MAT 1:1 Yesu Kristo naio miyotuba ea bajulukuti na tormoruo juo na tortoru na kulo Ju nalo korobilo, nina be Epraamo naio beamu, bija Teviti naio iorou kanio. Yesu korobinio nalo nonovio, sialo ajibe nei:
MAT 1:2 Epraamo naio kenerinio napano Aisak. Aisak naio kenerinio napano Yakovo. Yakovo naio kenerinio napano Yuta, naliko kuruano dolu nalo.
MAT 1:3 Yuta naio kenerinio juo Beresi naljuo kuruano Jera, naljuo abe savoro, napano kenielo Tem̃ar. Beresi naio kenerinio napano Esrono. Esrono naio kenerinio napano Remo.
MAT 1:4 Remo naio kenerinio napano Aminatapo. Aminatapo naio kenerinio napano Nesono. Nesono naio kenerinio napano Solomon.
MAT 1:5 Solomon naio kenerinio napano Boasa, ana Boasa nene napano kenieno napano Reavo. Boasa naio kenerinio napano Ovete, ana Ovete nene na kenieno Ruta. Ovete nene kenerinio na Jese.
MAT 1:6 Jese naio kenerinio napano Teviti, ana Teviti nene napano be parinio tubo na vio Israel. Teviti naio kenerinio napano Solomon, ana Solomon nene na kenieno tira na Uraia koano jukamu.
MAT 1:7 Solomon naio kenerinio napano Reopoam. Reopoam naio kenerinio napano Apia. Apia naio kenerinio napano Asa.
MAT 1:8 Asa naio kenerinio napano Jeosevata. Jeosevata naio kenerinio napano Joramo. Joramo naio kenerinio napano Usaia.
MAT 1:9 Usaia naio kenerinio napano Jotamo. Jotamo naio kenerinio napano Easa. Easa naio kenerinio napano Esekaia.
MAT 1:10 Esekaia naio kenerinio napano M̃anasa. M̃anasa naio kenerinio napano Amon. Amon naio kenerinio napano Josaia.
MAT 1:11 Josaia naio kenerinio napano Jekonaia naliko kuruano nalo. Naruei ea kialo bogo nei, kulo buruvenuo dolu napano Bapilon nalo abano aburu bulag kulo Israel nalo ka ava aim̃au kurano ga tibe na yako Bapilon.
MAT 1:12 Ka bogo napano amim̃au kurano ga yako Bapilon kia ga vo, Jekonaia naio kenerinio napano Sieltiel. Sieltiel naio kenerinio napano Serupapele.
MAT 1:13 Serupapele naio kenerinio napano Aviyuti. Aviyuti naio kenerinio napano Eliakim. Eliakim naio kenerinio napano Aso.
MAT 1:14 Aso naio kenerinio napano Setoko. Setoko naio kenerinio napano Akimi. Akimi naio kenerinio napano Eliuti.
MAT 1:15 Eliuti naio kenerinio napano Eliesa. Eliesa naio kenerinio napano Matano. Matano naio kenerinio napano Yakovo.
MAT 1:16 Yakovo naio kenerinio napano Yoseve, napano koano Mere. Mere nei, naio be Yesu kenieno, nam̃a aberii naio ka be Naverikariano.
MAT 1:17 Naruei jikar ea Epraamo binimei bokar Teviti, be taara duelimo ba veri [14]. A jikario ea Teviti binimei bokar bogo napano kulo Bapilon aburu bulag kulo Israel nalo ka ava aim̃au kurano ealo, be bunu taara duelimo ba veri [14]. A mia jikario ea bogo na nalo ajua vio Bapilon binimei bokar bogo napano Kristo kiano yotubaiano, be bereio taara duelimo ba veri [14].
MAT 1:18 Ninei be tukunu napano abar Yesu Kristo eaio, m̃arabo nene ninei: kenieno tira napano Mere, na beamu aberkakario ka mia naio soro ka toro tai, siano Yoseve. Ana bogo na maka asoro vo, mia Mere mijoglubar ka be m̃abono, napano m̃abono nei binimei ea Niununo Lu.
MAT 1:19 Ana Yoseve napano aberkar ka mia naio rivuru Mere nei ve koano, naio be toro novo tai, a naio maka tom̃a river Mere naio mila vite na bova tenia. Mia naio mial ka mia nalo ve juo monoka ala korov kialo verikariano nei, mia naio jidomii ka mia rim̃aukanio ea bajago novo tai napano melumu ga, bior naio maka sidom rila Mere rimou m̃ele rivior vite nei.
MAT 1:20 Mia bogo napano naio jidomii ka mia rila tibena, Atua kiano nailiano tai miyotuba kanio ea monovovuano tai bogiano, naruei nailiano nei berii kanio, berinavo “Yoseve, jau Teviti kiano bajulukuti, jau kojog re rivova ka mia kovuru tira na Mere ka ve koamo, bior tete na joa mabono, binimei ea Niununo Lu.
MAT 1:21 Mia Mere naio rivar tete sum̃ano tai, mia monoka jau kesisia siano ka Yesu Naioruriano, bior mia naio rilakon nonovio kiano tomu nalo kialo kariano nalo.”
MAT 1:22 Naruei vite nalo nei miyotuba jibe na ka rila iliano tai rimei rive riano tavukia na Atua naio berial nua ea niono Naverialiano Aisea,
MAT 1:23 napano naio berenio, berinavo “Mia merevono tai na maka rijikia sum̃ano vo, mia naio ve m̃abono, mia naio rivarlar kenerinio sum̃ano tai, mia nalo asisia siano aver ‘Emanuela.’ ” Sio nei “Emanuela,” berenio “Atua to kiteaku.”
MAT 1:24 Naruei Yoseve naio jevijo bereio, ana naio mila jibe ka napano Atua kiano nailiano berkanio, ana joro ka Mere, buru be koano.
MAT 1:25 Mia maka nalo atubiju vo bano-o bokar bogo napano Mere naio barlar kenerinio nene karina. Ana bogo napano Mere bar kiritete nene, ana mo Yoseve jisia tete nene ka Yesu.
MAT 2:1 Yesu kiano yotubaiano ea komeli tai na siano Betleem, ea tanobuku na vio Yutea, ka bogo na Erot naio be parinio tubo ka kulo Israel nalo. Mia maka vesiou ga ka bogo nene, ana tomu tai nam̃a amijikia batitig bajago na m̃arivitano nalo, abinimei ea vio Yerusalemo. Nalo nei ajumolu ea kialo buruvenuo ea vio nam̃a m̃erenio mijivi eaio abinimei.
MAT 2:2 Naruei nalo abika den tomu nalo, aberenio “?Tete na miyotuba voniganei, na aber mia naio ve kulo Israel kialo parinio tubo, naio jo be? Kumemi numial kiano m̃arivitano nene ruei, miyotuba ea vio napano m̃erenio mijivi eaio, ana kumemi nubinimei ka nuvilivu ka siano.”
MAT 2:3 Bogo na iliano nei binimei bokar Parinio tubo Erot naliko kulo Yerusalemo nalo tealo, amijogio, mia nalo maka asaaro kanio.
MAT 2:4 Naruei Parinio tubo Erot naio bio tomu na tortoru na kulo lu nalo naliko naverloglogiano na tuboiano nalo abinimei amial naio, ana naio bika denlo, berinavo “?Mia Naverikariano nam̃a aju aberiio vurua na, mia naio rimei riyotuba to be?”
MAT 2:5 Nalo nei aberdop̃e, aberinavo “Mia Naverikariano naio riyotuba ea tanobuku na vio Yutea, ea komeli na vio Betleem.
MAT 2:6 Nina bior beamu naverialiano tai naio bivitauiakar iliano nalo nei, berenio ‘Atua naio ber jibe nei, berinavo “Kamiu na vio Betleem, maka kuvijikia kuver kulo dolu na tortoru nalo na ga ea vio Yutea, nalo ga abe tomoruo loa kamiu, ana kamiu kumitutano, makanio, bior mia navurim̃araboiano na toru tai riyotuba ea kamiu rimemedu, naio rivitikar vatitig kiaku kulo Israel nalo.” ’ ”
MAT 2:7 Karina Parinio Tubo Erot naio bio bena ga tomu napano amijikia bajago na m̃arivitano nalo, abokar vioriano tai naliko naio ga, ka naio jidom rijogio vatitig denlo ka m̃arivitano nene naio miyotuba memedu ka bogo vaio.
MAT 2:8 Bisi na naio ber kalo, berinavo “Monoka kamiu kuva kuvisirag tete nene, ver kuvilealio, ana mo mia kumei kuverialio va kiniou bereio, ka mia kiniou bunu nava nolotu ka siano,” bisi na naio miilalo aba Betleem. Mia kanano iliano nei be sibiano ga, naio jidom rileal tete domudomu nei ka mia naio riva ruebinio ga.
MAT 2:9 Ana tomu nalo nei amiagago ka Parinio Tubo Erot kiano iliano nalo bisi, ana nalo aban ea kialo m̃arabo, ana amial bereio m̃arivitano nei nua amialio naio jo merera ea vio na m̃erenio mijivi eaio. Mia bogo na nalo amial bereio m̃arivitano nene, nalo amijog bo toru laka, ana m̃arivitano nei naio buru m̃arabo kalo abano-o aboru ea vio na kiritete nei naio mon eaio.
MAT 2:11 Naruei nalo aba joomo ea yimo, amial kiritete bija kenieno Mere. Naruei nalo aminie kamu kean naio, amilivu ka siano. Karina nalo abetavo ea kialo basaro nalo, ana abar kanano jidomiano nalo banio, niogo tai, bija bonotanunu na siano vrakenses, bija pomat, na puruveru nene bavin laka, siano mer.
MAT 2:12 Naruei bogiano, ana Atua mil banlo ea monovovuano tai, berburelo ka mia avan re bunu aial Erot. Naruei nalo ajumolu, ajel ea m̃arabo dolu aban bereio ea kialo vio.
MAT 2:13 Bogo na tomu nalo nei ajuvan vio nei ruei abano, ana Atua kiano nailiano tai miyotuba ka Yoseve ea monovovuano tai, naio berkanio, berinavo “Yoseve, jau kotumolu, kodu kiritete domudomu naljuo keniene, kuva kuvitu bilig ea vio Ijivi, bior Tubo Erot naio jom̃a jidomii kakar ka mia riila kiano tomu na mira nalo asirag kiritete domudomu na ka mia auebinio. Kamiu monoka kuva kuvitua vio na rivano-o ver kiniou never kamiu kumei, ana mo kumei bereio.”
MAT 2:14 Ana Yoseve jumolu, midu kiritete domudomu naljuo keniene, ka bogiano nene ga ajumolu amiel ka avan ea vio Ijivi.
MAT 2:15 Nalo ajua vio na jiou kija, bano-o bokar bogo na Parinio Tubo Erot naio m̃aro. Tena maluvo jel jibe nei ka mia rimemedu ka Atua kiano iliano tai na naio beriio ban Naverialiano Osea nanua ruei, berinavo “Keneriku joa vio Ijivi, mia kiniou nobio naio ka rimei bereio.”
MAT 2:16 Mo bogo na Parinio Tubo Erot naio mijikia ka tomu napano amijikia batitigio m̃arivitano amiyotel ea naio, maka bunu amei eaio, naio tinienmimi toru, ana naio ber ka kiano tomu na mira nalo, ka ava asirag kiritete sum̃ano nalo napano ajua vio Betleem bija komeli nalo napano aju jouro ea tanobuku nei, nalo nonovio na kialo yuka maka rivokar yuka ve juo vo, ka mia nalo auebinvinlo am̃arm̃aro. A naio buluku bogo nei memedu jibe nei, bior iliano napano naio mijogio den tomu nalo nei nua, aberial memedu ban naio ka bogo napano m̃arivitano nene naio miyotuba garuei be moti eaio.
MAT 2:17 Ea m̃arabo nei, vaio napano Naverialiano Jeremaia ber nua bini-mei miyotuba be riano, na naio berinavo
MAT 2:18 “Jooa na tegiano tai amijogio ea vio Rama, tegiano na tinie jaleleiano. Rejel naio jom̃a jegi kumabinio nalo, naio miilkue ka aiolip̃ilip̃i naio, bior kumabinio nalo am̃arm̃aro liki.”
MAT 2:19 Mia bogo na Parinio Tubo Erot naio m̃aro, Yoseve nalo aju kia ga Ijivi vo, naruei naio monovovu, mial bereio Atua kiano nailiano tai, napano naio binimei berkanio,
MAT 2:20 berinavo “Yoseve, jau kotumolu, kodu tete na vija keniene, kamiu kuvan bereio ea kenemiu venuo napano Israel, bior Parinio Tubo Erot nanua m̃a jidom ruei kiritete na, naio m̃aro ruei.”
MAT 2:21 Naruei Yoseve naio jumolu, midu tete bija keniene, ana nalo aban bereio ea kialo venuo napano Israel.
MAT 2:22 Mia bogo napano Yoseve mijogial ka Akaleasi jo jeleig karam̃ano Erot, ka naio be parinio tubo ea vio Yutea, Yoseve naio merou ka rivan bereio ea vio Yutea. Ana Atua mil bereio ban Yoseve ea monovovuano tai, berbure naio ka mia naio rivan re bunu ea vio Yutea bereio, naruei Yoseve naio ban ea vio dolu, vio nene siano Kalele.
MAT 2:23 Ana nalo aba ajua komeli tai napano ea tanobuku na, siano Nasarete. Vite na maluvo jibe na ka rila naverialiano nalo kanalo iliano nalo ave riano, napano m̃a aberii Verikariano nei nanua ruei, aberinavo “Mia averenio naio be toro re Nasarete tai.”
MAT 3:1 Yesu naio miluo binimei toru, nina ea vio Nasarete kia ga vo, mia ka bogo na, Jone Baruei miyotuba binimei ea vio yauo na Yutea, naio mioliolu berinavo
MAT 3:2 “Kamiu monoka kuvilig kamiu bior Atua kanano navenatuboiano jo binimei.”
MAT 3:3 Mia ninei be toro napano Naverialiano Aisea naio jom̃a berial nua ruei, berinavo “Toro tai bio jouo ea vio yauo, berinavo ‘Kamiu kuvila Atua kiano m̃arabo rimemedu, ka mia naio riyotuba ea kenemiu meuliano nalo.’”
MAT 3:4 Jone Baruei nene naio javukia Naverialiano Elaija re nua, jibe ka napano naio maka m̃ano kulum̃arauo novo nalo, mia m̃ano kulukoti amim̃aukanio ea vijinio kamele ga a naio mior m̃ano kulukoti ka niati kulubue marauo tai ga. Sano sinaniano na yeturu nene naio be surubu nalo ga bija vite sesei napano sukabak nalo amim̃aukanio.
MAT 3:5 Mia tomu na vio Yerusalemo bija komeli dolu nalo na vio Yutea, bija komeli nalo napano m̃a aju vaataro ka m̃arauei na vio Yortano, abinimei ka naio.
MAT 3:6 Ana aber bulag kialo kariano nalo banio, naruei naio baruei ealo ea m̃arauei na vio Yortano.
MAT 3:7 Be bogo tai, Jone mial ka napano be tiniobi na terati juo na nalotuano na kulo Ju nalo kialo, nina be Varisis bija Satusis nalo, abinimei ka naio rivaruei ealo, mia naio mil jikili banlo, naio berinavo “?Kamiu kumitavukia maro nalo ga napano amerou ka sebi tai naruei nalo aburo, mia kamiu kuberiam̃a mia kumijikia kuvuro ka sebi napano mia Atua riila rimei, napano kamiu maka kuvilig vatitigio kamiu rivu vo?
MAT 3:8 A ver kamiu kube riano ka kubilig tiniemiu bior kenemiu kariano nalo, mia kuvila titai medave ea kenemiu meuliano nalo ka mia ajikia ka kube riano.
MAT 3:9 Mia maka rivu kam̃a kuvarvar ka kamiu, tibe kanio nam̃a kumilaio, kuberinavo ‘Kito robo ruei, robe Epraamo kiano bajulukuti nalo.’ Mia kiniou neber ka kamiu, neber vite na maka ve titenia, bior Atua naio mijikia rivar puruveru nalo nei riviliglo amei ave Epraamo kiano bajulukuti nalo, ka adu jelemiu.
MAT 3:10 Neber ka kamiu, yekesi tai jua burupati iesi ruei, ju rorea ka mia ate bulag buruiesi nalo napano maka avar m̃arati nalo na bo, mia ate bulaglo avukulo avan ea sebi sisenlo.
MAT 3:11 Kiniou nojukamu nebinimei, nojom̃a nabaruei ea kamiu ka uei ga, ka rila rimeravo ka kamiu kuvilig kamiu ruei, mia be toro dolu tai napano jo binimei iorou ka kiniou. Naio jo loa kiniou, a kiniou maka navare ka neive kar kiano kulubue, p̃elina nala kiano im̃auano dolu tai. Mia naio naruei mia rivaruei ea kamiu ka Niununo Lu vija kiano sebi ka sisen kon bulag iorosoro nalo den kenemiu meuliano nalo.
MAT 3:12 Naio midukar titai jibe ka m̃artea joa jum̃ano, ka mia naio rilakon vatitig kanano uiti nalo. Mia naio rivar uiti napano be nioti uiti na bo, ava joomo ea kunuano, mia nalo na abe vinikiti ga, mia naio risebilo ka sebi tai napano maka rijikia rim̃aro bogo tai leleio.”
MAT 3:13 Mia Yesu naio juvan vio Kalele, binimei ea m̃arauei Yortano, ka Jone naio rivaruei eaio.
MAT 3:14 Mia Jone naio jidom riverbure be deio, ana naio ber “?Jum̃abe ana jau kobinimei ka navaruei easo? Kejiio, memedu ga ka jau kavaruei ea kiniou.”
MAT 3:15 Mia Yesu naio berdop̃e, berinavo “P̃eli ga koig, mia tibena re. Jau kala ninei beamu vo, bior bo laka ka mia kito ve juo monoka rotum̃a rataki vite nalo napano Atua jidom ka kito roim̃aukanio.” Naruei Jone mijamo ka Yesu binimei, ana naio baruei eaio.
MAT 3:16 Mia bogo napano Jone baruei eaio bisi, ana Yesu nene jaluvo den uei, ana vaarakurano naio mial vio mave betavo ka naio, ana naio mial Atua kiano Niununo Lu batove javukia vaama tai, binimei bujo jua Yesu.
MAT 3:17 Naruei Atua mil batove, naio ber “Nina be keneriku napano kiniou nejidom m̃elea naio. Kiaku jidomiano joa naio, kiniou najaaro toru m̃ele ka naio.”
MAT 4:1 Iorou ka bogo napano Jone Baruei naio baruei ea Yesu bisi, ana Niununo Lu buru Yesu ban ea vio yauo tai ka sim̃aro nalo kanalo parinio tubo rila von naio.
MAT 4:2 Naruei Yesu naio mondulu ka bogoti duelimo va veri [40] a bogiano duelimo va veri [40], ka bolkouo, mia iorou ka bogoti nalo nei ana jijer taneaio.
MAT 4:3 Ana mo Sim̃aro, toro nam̃a milavonvon tomu nalo, naio ber ka Yesu, berinavo “Verenio jau kobe Atua kenerinio riano, ana mo kover ka puruveru nalo na aju na, ka amei ave joko, ka kesen tai.”
MAT 4:4 Ana Yesu naio berdop̃eio, berinavo “Makanio, bior Niosi Lu naio berenio ruei, berinavo ‘Maka toro rijikia rimeul ea ga sinaniano, mia toro mijikia rimeul ea iliano nonovio napano Atua naio berenio.’”
MAT 4:5 Mia Sim̃aro naio milavon Yesu kiano jidomiano bereio, naio jiloglog Yerusalemo, naio buru kiano jidomiano bavin mave ea Atua Kunuano Lu.
MAT 4:6 Naruei Sim̃aro ber ka Yesu, berinavo “Verenio jau kobe Atua kenerinio, ana mo jau koviako kavatove ea borotano. Mia jau kovu ga na, bior Iliano Lu naio berii Atua, berinavo ‘Mia naio mijikia riila kiano nailiano nalo, ka amei atu avitikariso. Mia nalo adukarso ga ka jum̃alo mave, ka mia kavan re jaamo ea puruveru.’”
MAT 4:7 Ana Yesu berdop̃e Sim̃aro, berinavo “Makanio, bior Niosi Lu ber bunu ruei, berinavo ‘Maka rivu ka kalavon kanamo Tubo Atua, jau katadua re naio ka rila kiamo vite tai.’”
MAT 4:8 Naruei Sim̃aro naio milavon Yesu bereio, ka jidom rivuru Yesu kiano jidomiano rivavin ea burusuku na toru laka tai, ka mia naio rijikia siloglog buruvenuo nonovio na vio yetemeriba nei ka Yesu, rivija vite maraiu nene nalo.
MAT 4:9 Naruei Sim̃aro milavon Yesu bereio va rolu nene, berinavo “Saba nalo na komial na mia kiniou najamo kalo vanso, verenio jau keinietano, jau kolotu ka kiniou.”
MAT 4:10 Mia Yesu naio mil ban Sim̃aro, berdop̃e kiano iliano, berinavo “Jau kovuro den kiniou, Sim̃aro. Niosi Lu naio berenio ruei, berinavo ‘Mia jau kolotu ka ga Tubo kiamo Atua, naio ga takurano, mia naio ga kala kanano im̃auano.’”
MAT 4:11 Naruei Sim̃aro buro den Yesu, ana nailiano nalo abinimei, aju naliko amiyolup̃ilup̃i naio.
MAT 4:12 Mia ka bogo nei, parinio tubo Erot kiano tomu na mira nalo tai aba abokar Jone Baruei, ana aburu naio ban ea yimo na tetavokoiano. Mia ka legiano nene ga Yesu naio mijogial lilianiano nei, naruei naio jumolu den vio na, ana ban bereio ea tanobuku na vio Kalele.
MAT 4:13 Mia naio maka riva toa vio Nasarete, mia naio mijaka batove ea m̃arkomeli na vio Kapeneam, napano naio jo vaataro ka ueiyabo na toru na vio Kalele. Vio nalo nei napano jikar Kalele batove boru koyou ea tei, beamu borotano nei naio be Sebulano kiano bajulukuti nalo bija Naptali kiano bajulukuti nalo kialo nua.
MAT 4:14 Tenei miyotuba jel jibe nei ka mia rila iliano nalo napano Naverialiano Aisea berialio nanua ruei, rimei rive riano tibe ka napano naio berenio, berinavo
MAT 4:15 “Kamiu tomu nalo na Sebulano bija Naptali kialo vio nalo, napano kamiu kumitu iviso ka m̃arauei na vio Yortano bija tei na toru, kamiu na vio Kalele, vio na tomu na maka ajikia Atua, kamiu kuvijog iliano nei:
MAT 4:16 Tomu nalo napano m̃a aju nunu ga, mia nalo aial burum̃ara yulu tai. Nalo na aju nunu dam̃ariga, ka mia m̃a am̃arm̃aro ga, mia burum̃ara yulu tai naio rimereralilo.”
MAT 4:17 Mia jikar ea bogo nei, ana Yesu naio jom̃a mioliolu, naio berinavo “Kamiu monoka kuvilig kenemiu jidomiano nalo ka kenemiu kariano nalo, bior navenatuboiano na vio mave naio binimei vaataro ruei.”
MAT 4:18 Yesu naio jom̃a mieliel kiki jakii baramudou na ueiyabo napano toru na vio Kalele, ana naio mial tomu juo, Saimon Pitere naio kuruano Adru. Naljuo ajum̃a ajuvan sup̃ede, bior naljuo amijikia bajago nam̃a aburu niado.
MAT 4:19 Mia naio ber kalo, berinavo “Kamjuo kuvitakisor kiniou, mia kiniou nala kamiu kuve navagadeano na tomu nalo.”
MAT 4:20 Mia vaarakurano, naljuo ajuvan kialo sup̃ede nalo ajubo, ana nalo ajakisor Yesu.
MAT 4:21 Karina Yesu naio miel ban lie kija ga bereio, ana naio mial tomjuo dolu bereio, Yemesi naio kuruano Jone, nalo abe Sepeti kenerinio nalo. Nalo ajua kialo buluku uako naliko karam̃alo, nalo ajum̃a amila batitig kialo sup̃ede. Naruei Yesu biolo ka atakisorio,
MAT 4:22 mia vaarakurano ga, nalo ajumolu sop̃eli, ajuvan karam̃alo jobo ea kialo uako, ana nalo ajakisor Yesu abano.
MAT 4:23 Naruei Yesu naio jom̃a mieliel ea vio nalo napano Kalele, naio jom̃a berloglog kulo Ju nalo ea kialo yimo na lotuano nalo. Naio jom̃a berial ioluano novo nei na Atua kiano navenatuboiano, mia naio mieliel ka tomu napano nam̃a amie, naio milarur tomu nam̃a mieiano dedade nalo milalo, abo bereio.
MAT 4:24 Naruei ajukunu ka Yesu siano banbano barko reraio bunu burum̃ara tanobuku na vio Kalele tivelinio batove, napano ajisia ka Siria. Naruei tomu nalo na vio na bunu abarvar kialo namieiano nalo abinimei amial Yesu. Nalo nene tealo amie, tealo amijog niabele mijalele, tealo niadu jualo, tealo ajum̃a amiabulu m̃arm̃aro, mia nalo tealo napano niabele nalo am̃arm̃aro, mia Yesu naio milarurlo abo bereio.
MAT 4:25 Mia tiniobi toru na tomu nalo ajakisor Yesu ka bogo na. Nalo nei amolmoluo ea vio Kalele, ea vio napano ajisia ka Komeli Duelimo, mia ea vio Yerusalemo a ea vio dolu nalo na vio Yutea, a ea vio nalo napano jua m̃arauei na vio Yortano tivelinio bano. Nalo na vio nalo nei naruei nalo ajakisor Yesu ea bogo na.
MAT 5:1 Mia be bogoti tai, ana Yesu naio mial tiniobi toru abinimei aju naliko, naruei naio bavin ea suku tai. Jibe ka kialo naverloglogiano tai, naio jotano, ana na kiano tomu nalo abinimei ajutano jeliviv eaio,
MAT 5:2 ana na naio berlogloglo.
MAT 5:3 Mia Yesu kanano iliverloglogiano nalo na tortoru tai ajibe nei. Naio berinavo “Nalo napano abitilubar ka maka aleal Atua ea kialo meuliano nalo vo, mia ilivuiano rimei toalo, bior mia Atua naio rive Parinio Tubo ka tomu nalo na ajibe na.
MAT 5:4 Nalo napano amijog bova ka jaleleano nalo, ana ajum̃a ajegi, mia ilivuiano rimei toalo, bior mia nalo avokar lup̃ilup̃iano, ka mia nalo ajog rivu bereio.
MAT 5:5 Nalo napano tinielo melumu bo, mia ilivuiano rimei toalo, bior napano Atua berkario ruei ka mia rije tonovo na yetemeriba nei vanlo.
MAT 5:6 Nalo napano ajidom m̃elea bajago napano memedu javukia napano m̃a Atua naio jidomio, mia ilivuiano rimei toalo, ana na mia nalo aial bajago na memedu nalo nei amei avujo lou vatitig ea kialo meuliano nalo.
MAT 5:7 Nalo ga napano ajum̃a tinielmiia tomu dolu nalo, mia ilivuiano rimei toalo, ka mia Atua naio mijikia tinienriialo ve toru.
MAT 5:8 Nalo ga napano kialo iviso meravo bo, ilivuiano rimei toalo, ka mia aial Atua.
MAT 5:9 Nalo ga napano abe tomu nam̃a amila tum̃aro, mia ilivuiano rimei toalo, ka mia Atua naio riviolo ave kenerinio nalo.
MAT 5:10 Nalo ga napano amonea Atua, napano mia m̃a tomu dolu nalo amila baravo kalo bior kialo moneano nene, mia ilivuiano rimei toalo, bior mia Atua rivurlo ava jouro ea kiano navenatuboiano.
MAT 5:11 “Kamiu napano verenio tomu nalo amila lelan kamiu ajum̃a amijil kamiu, a ajum̃a amila sibi ea kamiu, napano ajum̃a aber niegeniege kamiu, nina bior kube kanaku tomu nalo, mia ilivuiano rimei toa kamiu bunu.
MAT 5:12 Kamiu kuvisidom bijovijon re, kuvisaaro ga, bior amila kiki kamiu ea bajago na ga amila ka naverialiano nalo re nua. Mia kamiu kuvar kenemiu burum̃ara ijaiano ea vio mave.”
MAT 5:13 Ana Yesu ber bunu, berinavo “Kamiu kube vaatei na tomu nalo na yetemeriba nei, napano kenemiu bajago novo naio bakar vio yetemeriba nei maka riva rivova laka. Ana verenio vaatei nei rijea re bunu rivu, maka bunu rijikia rila kanano im̃auano, a maka bunu titai rijikia rila rivu, mia naio bo ka ga avukuio rivano.
MAT 5:14 “Kamiu kumitavukia yulu na yetemeriba nei. Mia verenio m̃arkomeli tai toa suku levlevi mave, mia bogiano tomu nalo napano aju koalabo amijikia aial yulu na m̃arkomeli nene, tomu nalo napano ajuaio maka ajikia aduvan kanalo m̃arkomeli nei.
MAT 5:15 Mia bogo napano verenio rejelan yulu, kito maka rejikia reivekoio ka baja bereio, mia kito rejelan ka reive takilele mave ka vio reraio amerera.
MAT 5:16 Ana ea bajago nene ga, kamiu monoka kuvijamo ka kenemiu yulu nalo na kenemiu meuliano amerera rivokar tomu nalo, ka ajikia aial vatitig im̃auano novo nalo napano m̃a kamiu kumim̃aukanio. A bogo napano nalo aial kenemiu im̃auano novo nalo, mia avamenea Karamemiu napano joa vio mave riviorio.”
MAT 5:17 Ana Yesu berii bunu, berinavo “Mia maka rivu ka kamiu kuvitum̃a kuver kiniou nebinimei ka nala lelan Mosis kiano tuboiano nalo vija naverialiano nalo kialo iliano nalo, p̃eli ga, maka lele tibena. Kiniou nebinimei ka mia natakii masosoua nonovio, ka nevisi vatitig nioti nene nalo.
MAT 5:18 Kamiu kuvisidomiikar vatitig iliano nei, mia tuboiano nalo nei maka ajikia ava kovio bogo tai-o-a ka vio mave vija borotano ave juo avakovio. Tuboiano nei be ilisesa nene nalo telabo, mia maka lele kiri m̃ariliano na tai tertelisu nalo nei rijikia rivakovio, riva rivokar bogo na kiano im̃auano nalo amalmaluvo nonovio.
MAT 5:19 Tenene na, verenio toro tai rilakorov kiri tuboiano nalo nei tertelisu nei tai, mia naio tom̃a riverloglog toro dolu ka mia nalo atavukia naio, mia toro nene naio toa vio tai napano jotano maaro ea Atua kiano navenatuboiano. Mia verenio toro na naio bakar batitig tuboiano nalo nei, a naio jom̃a berloglog tomu dolu nalo ka mia ala tavukia naio, mia naio ve toro na toru tai ea Atua kiano navenatuboiano.
MAT 5:20 Kamiu kumitum̃a kumisidomii kuberenio naverloglogiano na tuboiano nalo a Varisis nalo abe tomu na memedu nalo laka ruei, a kamiu monoka kuvila bajago nalo na memedu lie vo tuvululo, ver p̃eli, mia kamiu kuvijikia re kuva jouro ea Atua kiano navenatuboiano.”
MAT 5:21 Ana Yesu berii bunu, berinavo “Kamiu kumijog ruei ka napano aberloglog kiado tormoruo nalo re nua beamu, aber ‘Kouebini re toro,’ mia bunu ‘Toro na riuebin toro rim̃aro, mia memedu ka avuru naio riva komeli ka mia ail vanio.’
MAT 5:22 Mia kiniou nei, neber ka kamiu: verenio toro na tinienjer kuruano, mia memedu ka avuru naio riva komeli labo, toro napano mil bova toru ka kuruano, naio berenio ‘!Jau kobo ka ga iakurano!,’ memedu ka avuru naio ea kiado tomu na tortoru nalo kialo vioriano. Mia verenio toro tai napano naio mil m̃ele ban kuruano, naio berenio ‘Pariparimo miavovu’ mia memedu ka mia avuku naio rivan ea sebi ea vio na jogvaiano.
MAT 5:23 Ka tena, verenio bogo tai jau komei ea Atua kiano vio na sida ka mia kodu kanamo ijaiano van naio, mia tiniem rimaio ka napano kanamo vite tai joa jau kamjuo kuruamo,
MAT 5:24 jau monoka kodu batitig kanamo ijaiano tobo ea vio na sida nei beamu vo, ana monoka kavan bereio kala merevuiano kam ve juo beamu vo, avona iorou kanio ana mo jau komijikia komei bereio ka kodu kanamo ijaiano rivan Atua.
MAT 5:25 “Verenio jau bogo tai kovilvil ea toro tai ka titai, karina naio jidom rivurso kava komeli kario, mia bo ka jau kavan sop̃eli keial naio ka keil vatitig vija naio tukamu, ka bogo napano maka avuruso kava komeli vo. Verenio makanio, p̃eli mia naio ruduso kotoa toro na toru jum̃ano ka naio tibureso, a mia naio naruei ruduso kotoa toro nam̃a bokakar toro jum̃ano, ka toro nene naio ruduso kotoa yimo na tetavokoiano.
MAT 5:26 Kiniou neber kaso, verenio tibena mia jau maka kejikia kataluvo den yimo na tetavokoiano rivan rivokar bogo na mia jau kovulu nonovio kanamo mauo beamu, avona bisi ana jau komijikia kataluvo.”
MAT 5:27 Ana Yesu berii bunu, berinavo “A kamiu kumijog bunu ruei ka napano aberloglogio ruei, aber ‘Mia kala re siakaiano.’
MAT 5:28 Mia kiniou neber ka kamiu, verenio toro na biti va ea tira tai ka naio jidom rivurio, mia naio mila siakaiano ban tira nene ruei ea kiano iviso.
MAT 5:29 Verenio miramo tivelinio rilaso kala kariano, bo ka jau ketelario, kovuku rivano. A verenio jum̃amo tinene rilaso kala kariano, bo ka jau ketelario, kovuku rivano. Bo kanio jau kalavenio niabemo togio tibena, ver p̃eli, mia mokotenamo reraio rivakovio ea vio na jogvaiano.”
MAT 5:31 Ana Yesu berii bunu, berinavo “Bereio, aber bunu nua, aberinavo ‘Toro napano jitiglar koano, mia naio monoka rudu m̃esi na silubariano tai vanio, napano naio beriio meravo ka naio jitiglar naio ruei, tira na maka bunu ve koano.’
MAT 5:32 Mia kiniou neber ka kamiu, ver toro na ver jitiglar koano, ka iakurano ga maka tira nei naio rive kodovo van koano neibano jukamu, mia ver tira neibano naio rila siakaiano, mia koano moruo naio be burupati nene. Mia toro na ver soro ka tira na jibe nei mia naio mila siakaiano.”
MAT 5:33 Ana Yesu berii bunu, berinavo “Kamiu kumijog bunu ruei ka nalo aberii ka kiado tormoruo nalo nua bogobe, aberver jau kover Atua siano ka mia rila kanamo verikariano to sikili, mia maka jau kalakorov bereio kanamo iliano nene. A vaio napano jau koberkar ban Atua, monoka jau kalaiio.
MAT 5:34 “Mia kiniou neber ka kamiu, neber jau maka kejikia kover titai siano leleio ka rila kanamo verikariano to sikili. Maka kejikia kover ‘Riano mave’ ver p̃elina jau kojom̃a kamila bulag tolu na vio mave napano be vio na Atua kiano.
MAT 5:35 A maka kejikia kover ‘Riano, vio yetemeriba novo na,’ ver p̃eli, mia jau kala bulag tolu na vio yetemeriba na jotano ka Atua kiano moroano. Maka kejikia koverenio ‘Riano, komeli lu yako Yerusalemo niako vo’ ver p̃eli, jau kojom̃a komila bulag tolu na vio na kanado Parinio Tubo Lu kanano.
MAT 5:36 A maka kejikia koverenio ‘Riano, paripariku nei’ kanio rila kanamo verikariano to sikili, ver p̃elina jau kojom̃a komila bulag Atua kiano tolu napano naio ga takurano mijikia rila viju parido tai ve takurano rimei riuvu p̃elina rimei ribobogio.
MAT 5:37 Ea kenemiu verikariano nalo, monoka kamiu kuver ga ‘Nao,’ p̃elina kamiu kuver ga ‘Makanio,’ nina ga barei na. Iliano dolu nalo napano m̃a kumitum̃a kuberenio, nalo abinimei den Sim̃aro.”
MAT 5:38 Ana Yesu berii bunu, berinavo “Mia kamiu kumijog naverloglogiano nalo aberii nua ruei, aberinavo ‘Verenio toro tai rila lelan toro dolu mirano tinene, monoka ala lelan mirano bunu. Mia verenio toro tai tukular toro dolu m̃arjuvono tai, monoka atukular m̃arjuvono bunu.’
MAT 5:39 Mia kiniou nei naruei neber ka kamiu, Mia koviolua re toro napano mila bova banso. Verenio toro rijuba yaba miramo tivelinio, monoka jau kovilig yaba miramo tivelinio rivan kean naio, ka naio rijuba bunu.
MAT 5:40 A verenio toro tai rivurso ea komeli ka tutuaso ka m̃amo kulusoto, mo mia jau kajamo ka vanio vija m̃amo kulukoti bunu.
MAT 5:41 A verenio toro na toru tai ritutuaso ka kavar kiano basaro keiel ka aura ve takurano, tibe ka napano naio mijikia berenio, monoka kasaaro ga ka kavario keiel ka aura ve takurano bereio vo.
MAT 5:42 Verenio toro tai rivika vite tai denso, mia monoka jau kodu vite nene vanio, a verenio toro tai sidom rudu kija vite na be kanamo, mia monoka kajamo ka vanio mia koverbureio re.”
MAT 5:43 Ana Yesu berii bunu, berinavo “Mia kamiu kumijog naverloglogiano nalo aberii nua ruei, aberinavo ‘Monoka jau kosidom nalo napano aju vaataro kaso, mia jau kovijuku die kanamo uolu nalo.’
MAT 5:44 Mia kiniou nei naruei, neber ka kamiu, neber monoka kamiu kuvisidom kenemiu uolu nalo, a kubolkouo ka nalo napano amila lelan kamiu,
MAT 5:45 ka mia kamiu kuvitakii vatitigio bajago na Karamemiu na ea vio mave, napano naio jidom nalo beverare ga. Tenene na naio mila kanano inio merera a kanano yuo bovo ea tomu nonovio, toro napano bo, a toro napano bova.
MAT 5:46 Verenio kamiu kuvitum̃a tiniemiu riia tomu nalo na ga tiniel miia kamiu, Atua maka rijikia rijev ijaiano van kamiu riviorio. Tomu nalo nam̃a abarbijii takis, napano kulo dolu nalo aberinavo nalo abe kulo va, mia nalo abare ka ala tibe na.
MAT 5:47 Verenio kamiu kuvitum̃a kuvan jumemiu kamliko ga kenemiu tomu nalo, nina maka tovulu bajago na kulo va nalo. Tomu nalo napano maka amonea Atua, ajum̃a ajidom bunu kanalo m̃aratavo nalo.
MAT 5:48 Mia kenemiu meuliano nalo monoka tibe ka na Karamemiu napano joa vio mave kiano bajago, napano memedu, a bo laka ban tomu nonovio.”
MAT 6:1 Ana Yesu naio mil banlo, berinavo “Vite nalo napano kiado nalotuano naio berenio bo ka alaio, kamiu kuvila re tavukia napano kamiu kumilaio ka mia tomu ve telabo ajikia avitilubario ka napano kamiu kumila tonovo. Verenio kamiu kuvitum̃a kuvila tibe na, mia Karamemiu napano joa vio mave, naio maka rijikia rije ijaiano van kamiu rivior vite na.
MAT 6:2 “Tibe na, ea bogo nalo napano jau kesian ijaiano van talim̃asa nalo, jau keil vevavin re kanio, tavukia nailikuleiano nalo. Nalo ajum̃a aber bulag kanalo im̃auano novo nalo joomo ea yimo na volkouano, a tavio bunu ea vio medave, ka rila ana tomu nalo avamenealo kanio. Mia kiniou neber ka kamiu, vameneano na kulo dolu na, nina ga be kialo ijaiano, mia maka bunu ajikia avokar vite dolu bereio.
MAT 6:3 Mia ver bogo na jau kodu ijaiano tai van talim̃asa nalo, monoka jau kala ea bajago na tai napano mia jau ga ve takurano kejikia kanamo im̃auano novo na, a napano kanamo jidomiano rivarvar re naio kanio.
MAT 6:4 Ver jau kalavan kiamo im̃auano vu tibe na, mia Karam̃amo napano mijikia mial vite nalo napano kulo dolu maka ajikia aialio, naio mia sian ijaiano vanso riviorio.”
MAT 6:5 Ana na Yesu berii bunu, berinavo “Verenio bogo napano kamiu kubolkouo, mia maka rivu ka jau kala takii bajago napano nailikuleiano nalo kialo. Nalo ajidom m̃elea ka atumolu ka abolkouo joomo ea yimo na volkouano, a tavio ea vio medave nalo, ka tomu nalo amijikia aialo. Vameneano na kulo dolu na, nina ga be mauo, mia maka bunu ajikia avokar vite dolu bereio.
MAT 6:6 Mia ver bogo napano jau kobolkouo, mia bo ka jau kala ka mia jau ga ve takurano kava joomo ea kunuamo yesobi, ea vio na tomu nalo ajikia re ka aialso, mia jau ketetavoko kiamo m̃aratavo, ana mo jau kobolkouo van Karam̃amo napano naio jo, mia maka toro tai rijikia rial naio. Ana mia Karam̃amo nene naio ga mijikia rial vite nonovio nalo napano tomu nalo maka ajikia aialio, mia naio rijev mauo nene vanso riviorio.
MAT 6:7 “Mia ver bogo napano kamiu kubolkouo, maka rivu ka kamiu kuver iliano ve telabo tibe ka tomu dolu nalo na maka amonea Karam̃ado riano vo. Nalo ajidomii aber mia avokar vaio napano ajum̃a abolkouo kanio, bior nalo aju aber iliano telabo telabo ea kanalo volkouano nalo, mia be deio ga.
MAT 6:8 Mia kamiu kuvila re takii kialo bajago, bior Karamemiu, naio mijikia ruei vite nalo na kumisidomio, bogo napano kamiu maka kuvika vite nalo nei denio vo.
MAT 6:9 “Bior vite na, memedu ka mia kamiu kubolkouo tibe ka volkouano nei, napano naio berenio, berinavo ‘Karamememi napano jau kojoa vio mave, memedu ga ka tomu nalo atu avatove ka siamo lu.
MAT 6:10 Kumemi nubolkouo ka kanamo navenatuboiano rimei tumolu tu sikili ea vio yetemeriba nei, ka mia tomu nalo alaio tavukia ga napano jau kojidomio, tibe ka napano nalo na vio mave ajum̃a amilaio.
MAT 6:11 Aiou, jau kesian van kumemi sememi sinaniano, banei a ea legiano nonovio.
MAT 6:12 A jau koviekokoa kumemi rivior kenememi kariano nalo, tibe ka kumemi numitum̃a nubiekokoa tomu dolu nalo napano amila vite jorokor ban kumemi.
MAT 6:13 A jau kajamo ka re vite va nalo na ajukujuku kumemi m̃ele, a kovuru bulag kumemi den sim̃aro napano jidom rila lelan kumemi.’
MAT 6:14 “Bior ver kamiu kuviekokoa tomu nalo na abijuku jorokor ban kamiu, mia Karamemiu na joa vio mave naio riviekokoa kenemiu vijukuano torokoriano nalo bunu.
MAT 6:15 Mia ver kamiu kuvisaaro re ka kuviekokoa nalo napano abijuku jorokor ban kamiu, mia Karamemiu naio maka rijikia riviekokoa kamiu ka kenemiu torokoriano nalo bunu.”
MAT 6:16 Ana Yesu berii bunu, berinavo “A bereio, ver bogo napano kamiu kumituvan semiu sinaniano, kuvel ga ka tiniemiu rimaio ka Atua a kuvolkouo vanio, maka kamiu kuvijikia kuvila tibe ka maka kuvisekon miremiu, p̃elina kamiu kuvila miremiu tibe ka jijer tanea kamiu, ka tomu nalo avitilubar tena kamiu kumitum̃a kumilaio. Nina be im̃auano na bova ga na nailikuleiano nalo kialo. Ana verenio nalo ala tibe na, a tomu tai tiniel riialo, nina be kialo vuluiano napano amijikia ajevio rivior kanalo monduluano, mia Atua maka rijikia sian titai vanlo bereio.
MAT 6:17 “Mia jau, bogo napano ver kotuvan samo sinaniano to tibe na, bo ka jau koyovovua vatitig miramo, tavukia nam̃a jau kojom̃a komilaio julaka ga,
MAT 6:18 ka mia tomu nalo ajikia re vaio napano jau komilaio. Karam̃amo ga napano jo, maka tomu nalo aialio, mia naio ga rivitilubario bior naio rial vite nalo napano tomu dolu nalo maka ajikia aialio, ana na mia naio rijev mauo nene vanso kanio.”
MAT 6:19 Ana Yesu berii bunu, berinavo “Maka rivu ka kamiu kuvitum̃a kuvila bijii kenemiu saba novo nalo ea vio yetemeriba nei ka mia kuve tomu na sanibaiano. Bior vio yetemeriba nei be vio na sivinia nalo, a tauo bunu napano mijikia rila bulag kenemiu saba novo nalo, a toro na vinauano bunu napano mijikia rimei rivar bulag saba nalo napano kamiu kumim̃auka bijon kanio.
MAT 6:20 Mia kamiu monoka kuvila bijii kenemiu saba novo nalo tu mave, ea vio napano sivinia a tauo a tomu na vinauano nalo ajikia re ka amei ala bulag kenemiu saba novo nalo napano kubar batitiglo aju.
MAT 6:21 “Bo ka kamiu ve kenemiu saba novo nalo vetelabo atua vio mave, bior mia kenemiu iviso rivujo tulaka ea jidomiano nalo na vio napano ga kenemiu saba novo nalo ajuaio.”
MAT 6:22 Ana Yesu berii bunu, berinavo “Toro mirano be vio tai napano yulu binimei joomo ea mokotenano. Verver miramo rimeravo rivu, mia komijikia kovitilubar vatitig toro dolu, ka koija naio. Verver kala tibe na, kiamo iviso bujolou ka yulu.
MAT 6:23 Mia verver miramo rimeravo re rivu, mia maka kojikia kovitilubar vatitig toro dolu, mia koto kovitii kiamo saba nalo ga, ana koto kove viti kalo. Verver kala tibe na, kiamo iviso bujolou ka melijokouo, a ver melijokouo ritoa vio napano memedu ka yulu toaio, nina jau kojoa melijokouo na bobogio mia kiri bobogio laka.”
MAT 6:24 Mo Yesu berii bunu, berinavo “Verenio toro ve takurano, naio maka rijikia rim̃au buron ea tubo ve juo ve vaarakurano. Verenio tibe na, mia naio tinien tii tinene, mia naio rilikue ka tinene, p̃elina mia naio rudu niono tinene, mia tuvan tinene. Kamiu maka kuvijikia kuvila ka kuve Atua kiano tomu nalo a kamiu kuve tomu na puruveru bunu ka bogo nene ga.”
MAT 6:25 Ana Yesu berii bunu, berinavo “Ka tenene, kiniou neber ka kamiu, maka rivu ka tiniemiu rivujo m̃ele ka kenemiu im̃auano na kuvitikar kamiu nalo, ka mia kuvivika, kuver ?Mia releal sado sinaniano vija m̃ado uei tum̃abe, a mia releal m̃ado kuluniabedo na mia reyaio toko mokotenado tum̃abe? Mia jidomiano nalo na biniu kiri torokor laka, bior kenemiu meuliano nalo, naio bo loa sinaniano, mia mokotenemiu nalo, abo loa kuluniabelo.
MAT 6:26 Kamiu kuvial von menu nalo napano m̃a aju amier janea vio. Mia nalo maka ala tiniavio, a nalo maka avarbijii sinaniano rimei vonuo, a nalo maka avar batitig sinaniano tu joomo ea yimo. Mia Karamemiu na vio mave naio baganlo, mia kamu ea mirano, naio mial kamiu kumitu mave loa menu nalo, mia naio monoka rivitikar kamiu rivu lie vo loalo.
MAT 6:27 ?Kamiu kuberiam̃a toro tai mijikia rila kiano meuliano na bulati rimei ve tebievi kija bereio, bior jom̃a jidom m̃elea kiano meuliano? P̃eli ga, maka tibe na, ana bo ka kamiu kuvisidom m̃elea re kenemiu meuliano.
MAT 6:28 “?A bior vaio ana kamiu kumitum̃a kumisidom bereverei ea kuluniabemiu? Kuvisidomii von burunieginiegi nalo napano aju amiluo janea vio ga. Nalo maka aim̃au a maka atul m̃alo kuluniabelo nalo.
MAT 6:29 Mia kiniou neber ka kamiu, Parinio Tubo Solomon re nua, napano naio be toro na sanibaiano tai, jum̃ano bujo ka saba nonovio, mia m̃ano kuluniabene maka tavukia burunieginiegi nalo nei m̃alo.
MAT 6:30 Burunieginieg nalo na abe tena bogoti takurano ga, mia beni ana mia aisebilo ea sebi, mia Atua naio jo miyovovua batitiglo bo laka. ?Ana na kamiu kuberiam̃a naio maka rijikia rivar kenemiu kuluniabemiu van kamiu? !Aa, maka lele garuei kuviekouo ea Atua sikili leleio!
MAT 6:31 “Bior vite nalo na, mia maka rivu ka kenemiu iviso nalo avujo ka jidomiano nalo na, ka kuvika kuver ‘?Jum̃abe, mia resen venia, romunu venia, a releal kiado kuluniabedo nalo tum̃abe?’
MAT 6:32 Nao, bogo nonovio ga tomu na maka amonea Atua nalo ajum̃a ajidomii m̃ele vite nalo na jibe na julaka, mia kamiu, Karamemiu napano jo mave, naio mijikia ruei ka monoka kamiu kumisidom ka kuvar vite nalo na.
MAT 6:33 Vite na be moti ka mia kuvisidomiio ve toru laka ea kenemiu meuliano, naio be Atua kiano navenatuboiano, vija kiano namemeduano nene nalo. Verenio tibe na, mia naio rivar bunu vite dolu nalo na rivan kamiu.”
MAT 6:34 “Tibe na maka rivu ka banei, kamiu kuvitum̃a kuvisidomii m̃elea rivior tena legiano na beni. Beni ga, ana mo kamiu kumijikia kuvisidomii tena vio beni, bior legiano na banei, naio be kiano jaleleano nalo telabo ruei.”
MAT 7:1 Naruei Yesu mil kia ga vo banlo, berinavo “Mia monoka kamiu kuvitibure niegeniege m̃elea re toro dolu. Tibe na, mia Atua naio tibure re kamiu sikili,
MAT 7:2 bior jidomiano napano joa kamiu ka bogo napano m̃a kamiu kumitibure toro dolu, mia jidomiano na ga jibe na joa Atua ea bogo napano mia naio tibure kamiu. Mia kamiu kuvar tibureiano rive verare ga ka tibureiano napano kamiu kumisianio.
MAT 7:3 Maka rivu ka jau kotom̃a koververii soro napano telisu ga joa kuruamo mirano, mia jau maka keial kar ka be burum̃ara bulapati iesi tai napano joa miramo.
MAT 7:4 ?Jum̃abe ana na jau kober komijikia keil van kuruamo na, koberinavo ‘P̃eli nelelar soro na telisu na monea miramo beamu?’
MAT 7:5 !Jibe na, jau maka kotom̃a kovitilubar kiamo kariano, ana na jau kojom̃a kojiibure kulo dolu nalo kialo kariano nalo! Mia jau kobe toro na ilikuleiano ga. Jau kodular bulapati iesi na den miramo beamu vo, karina mo jau kovitii batitig rivu ea niati soro na telisu na ea toro dolu mirano.
MAT 7:6 “Maka rivu ka kuvila von ka kuverial Atua kiano Iliano Lu van tomu nalo napano maka asaaro ka ajevio. Nina jibe ka napano kamiu kumitum̃a kubagan kuli deden ka sinaniano novo nalo, naruei bogo napano ajenio bisi, ana mia avilig pariparilo mia nalo aser kamiu bereio. Jibe ga na bunu verenio kamiu kuvisian ijaiano novo nalo van kiribue nalo, mia nalo avie dodomlo ea bulukinia.”
MAT 7:7 Mia Yesu berinavo “Toro na ver jom̃a bika vite, julaka mia naio mijikia rijevio, mia verenio toro na jom̃a jirag vite, julaka mia naio mijikia rilealio, mia ver toro na naio jom̃a minia m̃aratavo, julaka mia m̃aratavo nene mijikia rivetavo ka naio. Tibe na, mia kamiu kumijikia kuvar vite nalo nam̃a kumitu kubika den Atua, mia kamiu kumijikia kuvileal vaio nam̃a kamiu kumitum̃a kumisirag denio, mia m̃aratavo nam̃a kumitum̃a kuminia, mia Atua rivetavo ka van kamiu.
MAT 7:9 Verenio kenerimo tai siserio, rivika kiri joko napano jo, mia jau maka kejikia kesian puruveru van naio,
MAT 7:10 p̃elina ver naio rivika batitig ga niado na jo ruei, maka kejikia kodu maro tai van naio ka senio.
MAT 7:11 Riano ka kamiu kube kulo va ga nalo, mia maka kamiu tai rijikia rila tibe na, kamiu kumitum̃a kumisaaro dam̃ariga ka kuvisian vite novo nalo van kenerimiu nalo. Jibe na ga, ver bogo napano kamiu kubika vite tai den Karamemiu na vio mave, mia naio jaaro ga ka sian vite novo nene nalo rivan kamiu kenerinio vevinio nalo rivavin ve toru laka vo.
MAT 7:12 “Bo ka kamiu kuvila rivu van tomu dolu nalo dam̃ariga ea vite na bo nalo, tibe ka ga na kamiu kumisidom tomu dolu nalo monoka ala rivu van kamiu. Iliano nei naruei naio be burupati na iliano nalo na jua tuboiano napano Mosis jirio, bija bunu vaio napano naverialiano re nua nalo aberiio.”
MAT 7:13 Ana na Yesu berii bunu, berinavo “Be burum̃ara bulumorouo tai napano betavo laka jo, mia m̃arabo nene jagati toru laka be vodobi bo. Mia tomu telabo ajum̃a ajakii m̃arabo nene, mia m̃arabo nei naio ban ea vio na avokar vironiano. Mia kamiu monoka kuvisel ea bulumorouo dolu napano naio kiritavaso. M̃arabo nene naio jikili, mia maka tomu nalo ve telabo napano ajeliaio, mia m̃arabo nei naio be m̃arabo na meuliano.”
MAT 7:15 Ana na Yesu berii bunu, berinavo “Bo ka kamiu kuvitikar vatitig ka tomu nalo nam̃a aju aber nalo abe naverialiano, mia nalo ajum̃a aberloglog vite na be sibiano ga. Bogo napano ajidom averloglog kamiu, abinimei ajibe ka kenemiu bilbilu novo kamliko, napano ea kuluniabelo amom̃avo novo ga, jibe ka nunu nalo, mia ea kialo iviso nalo ajavukia kuli deden nalo ga, napano m̃a jijerlo ka vite nonovio.
MAT 7:16 Mia kamiu kuvitilubarbarlo ea m̃arati na kialo meuliano nalo. Soro napano be niononoti, bija teli nalo napano abe niononoti, maka atum̃a avar sinaniano novo p̃eli m̃arati napano jesei bo.
MAT 7:17 Buruiesi napano jo miluo bo, naio monoka rivar m̃arati na bo, mia buruiesi napano maka riluo rivu, naio monoka rivar m̃arati na bova ga.
MAT 7:18 Buruiesi napano jo miluo bo, maka rijikia rivar m̃arati na bova, a buruiesi napano maka riluo rivu, maka rijikia rivar m̃arati novo nalo.
MAT 7:19 Jibe na naruei, ana buruiesi va nalo nei napano maka avar m̃arati novo nalo, mia monoka ate bulaglo ga ana mo avukulo van ea sebi.
MAT 7:20 Jibe na naruei, m̃arati napano miyotuba ea toro kiano meuliano, mila meravo ka toro na naio be toro na jum̃abe, mia kamiu kumijikia kuvitilubar naverialiano va nalo na ea m̃arati va nalo napano amiyotuba ea kialo meuliano nalo.”
MAT 7:21 Ana Yesu mil berinavo “Tiniobi toru ajum̃a abio kiniou, aber ‘!Kiaku Tubo, kiaku Tubo o!’ mia nalo aviniu re napano mia amijikia ava jouro ea Atua kiano navenatuboiano ea vio mave. Toro napano mijikia riva jouro, naio be toro ga napano jom̃a mila vite nalo napano Karam̃aku naio jidomio.
MAT 7:22 Mia ka bogo napano mia Atua tibure tomu nalo, mia tomu ve miroano avio kiniou, tibe ka kiniou nebe kialo Tubo. Mia averinavo ‘?Tubo, jum̃abe ka kumemi? Kumemi numim̃auka vite telabo na bo ea siamo, a kumemi nuber bulavulag kiamo iliano, a kumemi numijil bulag sim̃aro nalo, a numila vremesiano nalo telabo bunu. ?Mia jau maka bunu kosidomial kenememi im̃auano novo nalo nene a?’
MAT 7:23 Mia kiniou neverial kalo rimemedu ga ea miralo, neverinavo ‘Kiniou maka leleio nejikia kamiu bogo tai, napano kamiu kube kiaku. Kamiu tomu na kariano ga. !Kamiu kuvitaluvo den kiniou vonganei!’”
MAT 7:24 Ana Yesu naio mil berinavo “Tibe na, nalo napano atakii vatitigio tibe ka napano kiniou neberloglog kamiu ruei, mia nalo atavukia toro tai na be masou, napano mim̃auka kunuano, napano mebija kiano m̃artea nene batove bokar tabap̃ilio na jikili.
MAT 7:25 Iorou kanio, ana yuo bovo toru binimei, mia ueimia buru vio toru, mia jegi miuvuvu biloulo, midon yimo nei, mia yimo nene maka rijoru, bior toro na yimo nei naio milakar kunuano jo mave ea tabap̃ilio.
MAT 7:26 Mia nalo napano maka atakii vatitigio rivu tibe ka nam̃a kiniou neberloglog kamiu ruei, nalo ajavukia toro tai napano kiano jidomiano kirivova, telikiti napano naio mim̃auka kunuano, naio bitiri bulag m̃artea nene nalo mave ea bayono ga.
MAT 7:27 Iorou kanio, mia yuo bovo batove, ueimia buru vio toru, mia jegi miuvuvu biloulo midon yimo nei, mia yimo nei mijoru. Mia bogo na naio mijoru, toro nei kiano im̃auano binimei bova kitkitio garuei.”
MAT 7:28 Iorou ka napano Yesu mila nonovio kiano iliano bisi, mia tomu nalo aju amiilo manenea kanio,
MAT 7:29 bior abitii kiano iliano maka tavukia kialo tomu na verloglogiano na tuboiano nalo kialo, mia kiano iliano tomi laka, a jo julu kialo jidomiano nalo, a naio ber bulavulag iliano nalo javukia na moroano joa naio.
MAT 8:1 Mia Yesu naio jumolu den suku, napano naio jom̃a berloglog tomu nalo eaio, naio batove, ana tomu telabo ajakisor naio.
MAT 8:2 Naruei toro tai napano naio bar burumieni binimei vaataro keanio, naio minie kamu kanio, ana balea, berinavo “!Tubo! Kiniou namoneaso ka jau komijikia kalarur kiniou bereio, ana ver jau kajaaro, nejidom nevika denso ka jau kala tibe na van kiniou.”
MAT 8:3 Ana Yesu maka rimerou ka tokol toro nei rivior kiano mieiano, mia naio jian jum̃ano, jokolio, ana naio berinavo “Kiniou nejidom jibe na. Neberinavo, mo, niabemo rivu.” Mia vaarakurano ga niabene meravo, mia burumieni nei naio bisi denio.
MAT 8:4 Ana na Yesu berkanio, berinavo “Jau komijog, jau kava koverii re tenei van tomu nalo vo, mia vonganei jau kava koverloglog niabemo ka toro lu, ka naio ria veve niabemo. Karina, jau kava kolotu van Atua, keisebi sida nam̃a Mosis naio berenio monoka toro rilaio bior vite na jibe na, mo iorou kanio nina, mia toro lu naio mijikia riverialio river burumieni nei naio bisi.”
MAT 8:5 Mia bogo na Yesu naio ba jouro ea bulukomeli na Kapeneam, boru na mira tai na vio Romo binimei mialio, naio jegi banio,
MAT 8:6 naio berinavo “Tubo, kiaku naim̃auano tai naio mijoru mon kea ea m̃ano jogu ea kunuaku. Niabene togio m̃aro, a naio mijog bova toru laka.”
MAT 8:7 Ana Yesu naio berkanio, berinavo “Mo, kito ve juo ravano. Mia kiniou nala naio rijog rivu bereio.”
MAT 8:8 Mia boru na toro na mira nei naio berdop̃eio, berinavo “Tubo, kiniou maka neve verare ka jau komei joomo ea kunuaku, jibe kanio kiniou maka neve toro Ju, mia ver jau kover iliano tai ga, mia kiniou nemijikia ka mia kiaku toro nene naio mijikia rijog rivu bereio.
MAT 8:9 Mia kiniou nemijikia ka monoka tibe na, bior kiniou nemijikia ka kiamo iliano amije moroano toru. Naio jibe kanio tomu na mira nalo napano aju yetano ka kiniou, napano mia monoka ajogkar kiaku iliano. Ver never ka tai ‘Kavano’ mia monoka rivano, p̃elina never ‘Komei’ monoka rimei, p̃elina never ‘Kala tibe na,’ mia monoka naio rilaio. Mia kiniou bunu monoka nala tena kiaku boru na toru naio berii ka kiniou. Jibe na naruei, ana kiniou nomoneaso ka ver kover ga titai, mia monoka tibe na.”
MAT 8:10 Mia bogo na Yesu mijogial iliano nei, mila naio miilo toru a naio jaaro toru laka kanio. Naruei naio ber ka tiniobi nalo napano aju naliko, berinavo “Riano ga kiniou neber ka kamiu memedu, kiniou maka leleio neleal toro tai na vio Israel naio riviekar kiniou sikili tibe ka toro nei.
MAT 8:11 Mia kiniou neber ka kamiu neber, maka kulo Ju nalo ga ajikia amei jouro ea jokoluolu na toru ea legiano na maaro. Makanio, mia tomu dolu nalo bunu ve telabo tibe ka toro nei, ea vio dolu nalo ea yetemeriba nei, napano mia amei ka atutano vio takurano ka asinan naliko Epraamo, Aisak, a Yakovo. Mia nalo na atu rivu bogo nonovio tibe na jouro ea Atua kiano navenatuboiano ea vio mave.
MAT 8:12 Mia kulo Ju nalo napano Atua biolo jukamu ka ava jouro, voniganei maka bunu amonmonea kiniou, ana mia Atua rivuku bulaglo ava atu tavio ea melijokouo, ea vio napano tomu ajum̃a ajegi ajer m̃arjuvolo eaio.”
MAT 8:13 Naruei Yesu ber ka boru na mira nei, naio berinavo “Mo, bo ga, jau komijikia kava vonuo. Mia rimaluvo kaso tibe ka na jau komoneaio.” Mia memedu ka bogo nene garuei, toro na im̃auano nei niabene binimei bo bereio.
MAT 8:14 Ana Yesu naio jo kia ga Kapeneam, ana naio ban ea Pitere kunuano, mia naio mial Pitere koano kenieno mieyulu, naio jo mon ea m̃ano jogu.
MAT 8:15 Naruei Yesu mijiou jokol tira nene jum̃ano, ana kiano mieyuluano nei jaluvo denio, ana naio mijog bo jumolu, naruei naio jian sinaniano ban Yesu.
MAT 8:16 Ea niogoravo na legiano nei, tomu nalo aburu tomu telabo abinimei ea Yesu, napano sim̃aro nalo ajualo. Naruei naio mijil bulag sim̃aro nalo nei ea ga kiano iliano, ana naio mila tomu na mieiano nalo bunu amijog bo bereio.
MAT 8:17 Vite nalo nei amaluvo jibe nei ka mia rila Naverialiano Aisea kiano iliano rimei rimaluvo, tibe ka napano naio berenio, berinavo “Naio bar bulag kiado mieiano nalo, a naio bar kiado niabe jaleleano nalo bunu.”
MAT 8:18 Ea bogoti dolu bereio, ana Yesu jo naliko tomu telabo napano aju jeliviv ea naio, ana naio jidom taluvo denlo, naruei naio ber ka kiano naiagagoano nalo, berinavo “Kito m̃a, ravan ea ueiyabo tivelinio.”
MAT 8:19 Mo nalo abarvio ka mia avano, ana naverloglogiano na tuboiano tai binimei ea naio, berkar ban Yesu, berinavo “Naverloglogiano, mia kiniou natakisorso navan ea vio vabe na jau kavan eaio.”
MAT 8:20 Ana na Yesu naio berdop̃e banio, berinavo “Kuli deden nalo abe m̃alo p̃ili na amon eaio, a menu nalo abe m̃alo niuku. Mia kiniou, Kulorinio Kenerinio, kiniou maka ve kiaku vio tai, ka nava nomonmel eaio. Mia verenio jau kajaaro ka meuliano na jibe nei mia jau komijikia komei.”
MAT 8:21 Ea bogo nene ga, Yesu kiano naiagagoano dolu bereio berkanio, berinavo “Tubo, jau kajamo ka kiniou nava nevitikar kiaku tormoruo beamu vo, mia verenio bogo tai naio rim̃aro ana mia kiniou nemei bereio natakisorso.”
MAT 8:22 Ana Yesu naio berkanio, berinavo “Komei katakisor kiniou ga. Kotuvan tomu napano niunulo am̃aro ruei ka ativin kialo tomu nalo napano am̃arm̃aro.”
MAT 8:23 Mia Yesu naliko kiano naiaga-goano nalo abinimei aboru ea ueiyabo nei bisi, ana nalo abavin ea uako tai ea vio na.
MAT 8:24 Nalo aju abano, mia burum̃ara jegi tai binimei miuvuvu mila ueiyabo nei bieveluo m̃ele, mila uako nei jikar ka jidom rimadudu. Mia Yesu naio joa uako, mia naio mon ea selailugu monmelio,
MAT 8:25 mia nalo aba amila bonio, nalo aberinavo “!Tubo, keialio! Vaataro ka ramadudu naruei, jau monoka kalarur kito.”
MAT 8:26 Naruei Yesu naio mil banlo, naio berinavo “!Mm! ?Kamiu kumerou ka venia? Kamiu maka kuvitu sikili ea kiaku moroano leleio.” Karina naio jumolu ju, ana naio mil berbure jegi ber riuvuvu re, naio mil berbure tei, ber rivatove. Ana vio binimei melumu bo.
MAT 8:27 Bogo napano naiagagoano nalo amial ka vio jubabinio bo jibe na, nalo amiilo toru, nalo aberenio “!Tomu nalo! Toro nei maka garuei, mil ga jibe nei, mia jegi naio tei naljuo amiduio. !Toro na naio maka tibe ka toro na!”
MAT 8:28 Mo bogo napano Yesu naio boru ea yaba ueiyabo tivelinio, ana naio ban ea kulo Katara nalo kialo vio. Ea vio na, tomu juo amiyotuba ea buluvae nalo na tomu na m̃ariano nalo, ana naljuo amileal Yesu. Tomu juo nei niadu ban ealo, mia nalo abe deden m̃ele, ana mila tomu nalo amerou m̃ele ka m̃a asel ea m̃arabo na.
MAT 8:29 Mia bogo napano nalo amial Yesu, naljuo amiaga jouo, aberinavo “?Jau Atua Kenerinio, kiamo vaio joa kumemi? ?Jau kobinimei ka koje vironiano van kumemi napano maka ve kenememi bogo nene vo, a?”
MAT 8:30 Ana ea vio na taara na kiribue nalo ajum̃a amiuoiuo ea borotano,
MAT 8:31 ana niadu nalo nei ajegi, abika jikili den Yesu, aberinavo “A verenio jau kejil bulag kumemi, nuberibo kaso jau keiila kumemi nuva joomo ea kiribue nalo na.”
MAT 8:32 Naruei Yesu naio ber kalo, berinavo “Kuvano.” Naruei nalo ajaluvo den tomu juo nei, ana aba joomo ea kiribue nalo neibano. Mia vaarakurano ga, kiribue nalo nei ajikiti, aban ea yabalili tai, ana na ajibirbil abavatove ea ueiyabo nei, abava kovio eaio.
MAT 8:33 Naruei tomu nalo nam̃a abitikar kiribue nalo nene aburo, aban ea kialo komeli, ana na nalo aberial vite nalo napano maluvo, a aberii bunu vaio napano bokar tomu juo nei napano beamu niadu jualo.
MAT 8:34 Naruei vaarakurano ga, tomu nalo na komeli nene abinimei ka aial Yesu, mia bogo na amialio, nalo amil jikili ban naio ka naio taluvo den kialo vio.
MAT 9:1 Ana Yesu naio ban bereio naliko kiano naiagagoano nalo, abavin ea uako nei bereio, nalo abarkor ueiyabo na toru nei bereio, naruei nalo abinimei ea kiano komeli nei Kapeneam.
MAT 9:2 Mia tomu tai ap̃ier toro na mieiano tai binimei ea naio napano niabene togio m̃aro, naio mon ea m̃ano jogu. Ana bogo napano Yesu mialio ka nalo amonea jikili ka mia Atua rilarur toro na mieiano nei, naio ber ka naio, berinavo “Keneriku, jau komerou re. Kiniou nebiekokoa kiamo vijuku vovaiano ruei.”
MAT 9:3 Ana ka bogo nene tomu tai na verloglogiano na tuboiano nalo bunu aju, mia amijog Yesu kiano iliano nalo nei. Sop̃eli ga nalo aberii naio banlo, aberinavo “Toro na mil mila bulag tolu na Atua siano. Naio jo mil jibe na jibe ka naio be Atua ruei.”
MAT 9:4 Mia Yesu bitilubar kialo jidomiano nalo, naruei naio berinavo “?Ka vaio ana kenemiu jidomiano bujo ka sidom vovaiano jibe na?
MAT 9:5 Ver kiniou never tibe na ka toro na, never ‘Kiniou nebiekokoa kiamo vijuku vovaiano nalo,’ p̃eli na never kanio, never ‘Jau kotumolu keiel,’ mia iliano juo nei, tinene jikili ka averenio, a tinene naio monmaio ka averenio. Nina iliano na napano naio berinavo ‘Jau kotumolu, jau keiel,’ naio jikili laka, bior tomu nalo amijikia avitilubar ka toro nene jumolu p̃elina maka tumolu.
MAT 9:6 Mia kiniou neim̃auka titai napano mia kamiu kuvisidomii kuver Atua naio ga takurano mijikia rilaio, bior kiniou nejidom nala rimeravo van kamiu ka Kulorinio Kenerinio naio bare ka riviekokoa kariano ea yetemeriba nei.” Naruei Yesu mil ber ka toro na mieiano nene, naio berinavo “Jau kotumolu, jau kojuku m̃amo jogu, jau keiel kava vonuo.”
MAT 9:7 Ana toro nei naio jumolu jibe na, ana naio ba vonuo.
MAT 9:8 Telikiti na tiniobi nalo nei amialio vite nei nalo amerou, a nalo abamenea Atua, bior naio mijamo ka moroano ban toro tai ka naio mijikia rila tibe na.
MAT 9:9 Mia Yesu naio juvan vio na, naio miel kija ga ba lie bano. Naio jo miel bano, ana naio mial kiniou nojom̃a nojotano ea kanaku vio na im̃auano. Mia kanaku im̃auano ea bogo na, nojom̃a nabarbijii puruveru na takis. Naruei Yesu bio kiniou, naio berinavo “Mataiu, jau komei katakisor kiniou.” Mia kiniou nojumolu sop̃eli, najakisor Yesu.
MAT 9:10 Karina Yesu binimei jinan ea kunuaku, ana ea bogo na noburu tomu telabo na abarbijii takis, bija kulo va dolu nalo telabo bunu abinimei, ka amijikia atutano asinan burukuti naliko Yesu naliko kiano naiagagoano nalo.
MAT 9:11 Ana na Varisis nalo tai amial ka napano Yesu jo vio takurano naliko tomu nalo nei, ana abika den kiano naiagagoano nalo, aberinavo “?Ka venia ana kenemiu naverloglogiano naio jom̃a jinan burukuti vio takurano jibe na naliko tom na bova na?”
MAT 9:12 Mia Yesu naio mijog kialo iliano nei, ana na naio berdop̃e banlo, berinavo “Tomu na niabelo jikili bo, nalo maka asidom toro na kulekuleiano, mia tomu na abar mieiano, nalo ajidom naio.
MAT 9:13 Bo ka kamiu kuvisidomii nioti na iliano tai napano joa Iliano Lu, napano Atua naio berenio, berinavo ‘Kiniou maka nesidom kenemiu sida nalo mia kiniou nejidom tinievuiano toa kenemiu meuliano nalo.’ Kiniou maka nemei ka novio nalo napano ajidomii aber nalo abe tomu na amemedu ruei, p̃eli ga, mia kiniou nebinimei ka novio tomu na bova nalo ka atakisor kiniou.”
MAT 9:14 Iorou ka vite na, naiagagoano nalo na Jone Baruei kiano abinimei ea Yesu, nalo abika denio, aberinavo “Kumemi numisidom jau koverial vite na ka kumemi. ?Kumemi numondulu dam̃ariga ka nubolkouo, mia Varisis nalo bunu amila jibe na, mia bior vaio ana kiamo naiagagoano nalo maka alaio?”
MAT 9:15 Ana Yesu naio berdop̃e banlo, berii naio naliko naiagagoano nalo, jibe kanio napano nalo ajaaro toru laka bogo napano naio jo naliko, mia monoka nalo ajog rivova iorou ka bogo napano mia naio taluvo denlo, ana naio berinavo “?Bogo napano toro napano naio joro jo kia ga vo ea jokoluolu naliko kiano bilbilu nalo, kamiu kuberiam̃a amijikia ateg rivior naio? P̃eli ga. Mia bogo tai, verenio toro nei kiano uolu tai amei avurular naio den kiano bilbilu nalo, ka bogo na naruei mia nalo amijikia amondulu ka sinaniano bior nalo amijog bova toru.”
MAT 9:16 Bajago na monduluano, naio be bajago moruo tai na nalotuano na kulo Ju nalo kialo, mia Yesu naio jidom rila rimeravo vanlo ka bajago moruo na jibe na, maka ajikia aviran rivija vite vou nalo napano naio jom̃a jiloglog kalo, ana naio jii jamerijiano tai tivelinio banlo, naio berinavo “Jau maka kejikia kodu niati kulum̃arauo napano be terivou, ka jau kotuluko ka kulum̃arauo moruo tai ka toko vio na burup̃e. Bior niati kulum̃arauo vou nei, naio mijikia rila korov kulum̃arauo moruo na togio, ana na mia bulujeleigio rimei ve toru lie vo.
MAT 9:17 Ana na jau maka kejikia koison m̃arjum̃elm̃elu vou napano naio jom̃a jarabujo kia ga vo ea kulukuti nani napano be terimoruo napano amison m̃arjum̃elm̃elu ea va telabo ruei. Verenio jau kala tibe na, mia m̃arjum̃elm̃elu nene riyukuio, rila kulukuti nani nene rivurup̃eio, naruei ana m̃arjum̃elm̃elu nene riou bulagio, ana kulunani nene rimei rivova bunu. Mia m̃arjum̃elm̃elu vou, jau monokanio koisonio rivan ea kulukuti nani napano be terivou, jikili bo, ana na jau komijikia kodu vatitig m̃amo m̃arjum̃elm̃elu toaio.”
MAT 9:18 Bogo napano Yesu naio jom̃a mil jibe na ban Jone kiano naiagagoano nalo, toro na toru tai na nalotuano na kulo Ju nalo kialo naio binimei vaataro keanio, naio minie tano ka Yesu, jegi banio, berinavo “Aue koig keneriku vevinio naio m̃aro vonganei ga, mia kiniou nebikaso ka nejidom komei, kodu jum̃amo toaio, ka mia naio rimeul bereio.”
MAT 9:19 Naruei Yesu jumolu jakisor toro nei, naio naliko kiano naiagagoano nalo abano.
MAT 9:20 Mo bogo napano Yesu naio jo miel ban jibe na, naruei tira tai naio jo napano mieiano na jada joa naio mila ka legiano nonovio ga, bokar yuka duelimo ba juo [12] ruei. Naruei naio mial Yesu jo binimei, naio jo ber ea kiano iviso, naio berinavo “Ver kiniou notokol ga kiano kulukoti, mia kiaku mieiano taluvo den kiniou.” Naruei tira nei binimei iorou ka Yesu taakano, ana naio jokol juluvati na kiano kulukoti.
MAT 9:22 Sop̃eli ga Yesu barip̃iligio, mial tira nei, ana naio berkanio, berinavo “Nena, jau komerou re. Kiamo viekouoiano ea kiniou burumeuliaso bereio.” Naruei memedu ka bogo na, mieiano nei naio jaluvo den tira nene.
MAT 9:23 Telikiti napano Yesu naio boru ea toro na toru nei kunuano, naio mial tomu nalo aju tiniel miia tira sesa nei, ajum̃a ajegio, amiou ka iou na m̃ariano nalo.
MAT 9:24 Naruei naio mil banlo, berinavo “Kamiu kuvatavio kuviel dedade bereio. Tira sesa na naio maka rim̃aro na, mia naio monmelio ga.” Mia nalo na amiyotel ea naio, abital ea ga.
MAT 9:25 Naruei nalo amiila bulag tomu nalo nei abatavio, ana Yesu naio ba joomo ea yimo. Naio ba bokar tira sesa nei jum̃ano, ana naio jumolu, meul vatitigio bereio.
MAT 9:26 Naruei lilianiano na tenei buro janea vio ninio, bokar vio reraio jeliviv ea vio nei.
MAT 9:27 Mia Yesu naio jaluvo den toro na toru neibano kunuano, mia bogo napano naio jo miel bano, mia merebono juo ajakisorio, nalo ajum̃a abio naio, aberinavo “!Jau tormoruo Teviti kiano bajulukuti, jau kobe Naverikariano, aui koig, tiniem riia kumemi juo liki!”
MAT 9:28 Ana Yesu ba joomo ea yimo tai, naruei merebono juo nei abinimei ea naio. Naruei Yesu naio bika denlo, berinavo “?Kamjuo kumonea ka mia nemijikia nalarur kamiu tibe na?” Ana tomjuo nei aberdop̃e, aberinavo “Nao Tubo, kumemi numoneaio.”
MAT 9:29 Ana Yesu mije jum̃ano monea tomjuo nei miralo, ana naio berinavo “Mia rimei tibe ka na kamjuo kumoneaio.”
MAT 9:30 Ana na tomjuo nei miralo binimei bo bereio ea aura nene. Naruei Yesu berburelo jikili, naio berinavo “Mia kamiu kuverial re tenei van tomu dolu nalo.”
MAT 9:31 Mia abe juo abatavio, ana aberial lilianiano nei ka vaio napano Yesu milaio banbano-o bokar nonovio vio reraio nei biniu.
MAT 9:32 Telikiti na naljuo nei abatavio, mia tomu dolu nalo aburu toro tai binimei ban Yesu. Toro nene niadu ban ea naio, mila na naio be buru maka rijikia ril.
MAT 9:33 Mia Yesu jan ka niadu nei jaluvo den naio, ana toro nei naio mijikia mil bo naruei, mia tiniobi nalo nei amiilo toru kanio, aberenio aberinavo “Uerei, maka leleio reial titai tibe nei kija ea kito kulo Israel-o, mia banei ga.”
MAT 9:34 Mia Varisis nalo aju aberenio, aberinavo “Tete na naio jom̃a jan ka niadu nalo jibe na ea ga moroano napano sim̃aro nalo kialo parinio tubo ga mijamo ka ban naio.”
MAT 9:35 Ana Yesu naio jo miel jeliviv ea komeli nalo a naio jom̃a berloglog tomu nalo ea kialo yimo na volkouano nalo. Naio jom̃a berial lilianiano vou na Atua kiano navenatuboiano, mia naio milarur tomu na mieiano nalo a tomu na niabele nalo bova bunu.
MAT 9:36 Mia bogo napano naio jom̃a miel jeliviv jibe na, naio jo mial tiniobi nalo, naio mialo jibe ka kialo jidomiano nalo bujo laka a nalo abokar jaleleano telabo laka ea kialo meuliano nalo, naruei naio tinien miialo toru laka, bior ajavukia nunu nalo na maka ve kialo toro na vitikariano tai, maka ajikia bunu ka mia atum̃abe naruei.
MAT 9:37 Naruei naio ber ka kiano naiagagoano nalo, berinavo “Riano ga, m̃arimeuano toru meruo jua tiniavio, mia maka tomu ve telabo na aju ka m̃a abarvario binimei vonuo.
MAT 9:38 Kamiu monoka kuvalea sikili ea tubo na tiniavio nei, ka mia riila bulag tomu tabunu avan ka avar kiano sinaniano nalo rimei.”
MAT 10:1 Naruei Yesu bio kiano naiagagoano duelimo ba juo [12] ka amei aialio. Nalo abinimei, ana naio mil batitig banlo, bisi na mije moroano banlo ka mia amijikia atitig bulag niununo va den tomu nalo, a ka amijikia aieliel ka tomu nalo napano m̃a amie ka mieiano dedade nalo bunu.
MAT 10:2 Atevi nalo sialo nalo nei: nana jukamu, Saimon, napano abio ka Pitere, napano naio be kialo toro na toru, a Adru, napano Pitere kuruano; Yemesi naio kuruano Jone, napano Sepeti kenerinio nalo;
MAT 10:3 Vilip; Bartolomio; Tomas; kiniou Mataiu, napano nebe toro na var bijii takis; Yemesi napano Alveas kenerinio; Tateas;
MAT 10:4 Saimon, napano naio mila poletik m̃ele laka ka jidom rijil bulagio kulo Romo nalo; a Jutas na vio Kariot, napano mia iorou kanio ana naio jiveluku ka Yesu ban kulo va nalo.
MAT 10:5 Mia Yesu naio mil batitig ban nalo duelimo ba juo [12] nei, karina naio miila bulaglo abano. Ilivatitigiano napano naio berii kalo, nainei, naio berinavo “Mia kamiu kuvan ea re nalo napano maka ave kulo Ju nalo, a kamiu kuvan ea re m̃arkomeli nalo na vio Sameria vo.
MAT 10:6 Kamiu kuvan rivior ga nunu nalo na vio Israel napano amilaluv m̃arabo.
MAT 10:7 Mia ver bogo napano kamiu kuvan ka nalo na, mia kamiu monokanio kuvioliolu, kuverinavo ‘!Vonganei be bogo na mia Atua kiano navenatuboiano naio jo binimei ea kito!’
MAT 10:8 Mia monokanio kamiu kuvieliel ka namieiano nalo, a kamiu kuvurumeulia tomu nalo napano am̃arm̃aro ameul bereio. Kamiu kuvilarur nalo napano burumieni milalo, niabelo ameravo bereio, a kamiu monokanio kuvititig bulag niadu nalo ea tomu nalo. Im̃auano nalo na, mia kamiu kuvim̃au kanio ea moroano tai napano kamiu kumijev kurano ka ga, ana mo mia kamiu monokanio kuvisian kurano ka ga bereio van tomu nalo.
MAT 10:9 Mia kamiu kuvar re kenemiu puruveru tai vija kamiu ea kenemiu siveu nalo,
MAT 10:10 kamiu kuvar re kenemiu basaro tai napano m̃a kumison kenemiu kuluniabemiu dolu nalo vija kulubue na jaamiu dolu bunu ban eaio, a kuvar re kenemiu iesi na abanio vija kamiu kuvano. Tomu nalo napano m̃a amila im̃auano novo jibe ka kamiu, mia tomu nalo napano nalo nei amim̃au kanalo, monokanio mia nalo avitikar vatitiglo.”
MAT 10:11 Ana Yesu berii bunu, berinavo “Bogo napano verenio kamiu kuva kuvoru ea m̃arkomeli tai, mia monokanio kamiu kuvisirag toro tai napano naio jaaro ka rivurukar kamiu ka kuvitua kunuano, ana mo kuvitu vija naio rivano-o rivokar bogo napano mia kamiu kuvituvan m̃arkomeli nene bereio.
MAT 10:12 Avena verenio bogo na kamiu kuvan kuvitu vija m̃aratavo na toro nei kiano, monokanio kamiu kuvan jumemiu kamliko, kuver kalo, kuver ‘Tum̃aro to vija kamiu.’
MAT 10:13 Avena verenio m̃aratavo nei avijuku rivu ka kamiu, mia kenemiu tum̃aro napano kamiu kuber kanio mia naio to vijalo, mia ver avijuku rivu re van kamiu, mia tum̃aro nei rimei bereio vija kamiu.
MAT 10:14 Mia ver tomu tai ailkue ka avurukar kamiu ea kunualo, mia ver ailkue ka aiagago ka kamiu, mia kamiu kuvituvan m̃aratavo nene p̃elina m̃arkomeli nene to. Mia bogo na kamiu kuvituvan vio nene, ana mo kuvijuba kon yevi ea jaamiu, tibe ka kenemiu iliano na jikili tai banlo ka mia avokar vironiano tai napano memedu ga ka kialo bajago va nalo.
MAT 10:15 Riano kiniou neber batitig ban kamiu, mia sikili lie vo van nalo na ea bogo na tibureiano, tovulu bogo napano Atua naio jiibure kulo Sotomo bija kulo Komora nalo nanua beamu.”
MAT 10:16 Mia Yesu naio berii kalo, berinavo “Kamiu kuvisidomii vatitig rivu. Kiniou nemiila bulag kamiu ka kuvano, mia kamiu kuvano jumemiu yauo ga tibe na, napano kuvitibe ka nunu nalo napano aju iviso ka kuli deden nalo. Tibe na, monokanio kamiu kuve masou rivu, a monokanio kamiu kumelumu vatitig rivu.
MAT 10:17 Bo ka mia kamiu kuvitikar vatitig kamiu rivu, bior mia tomu nalo avuru kamiu kuvan ea komeli a ea kialo yimo na volkouano ka ail van kamiu, ana na mia atibure kamiu a mia avitiv kamiu.
MAT 10:18 Mia avuru kamiu kuva kuvitumolu kuvitu kamu ea tomu na tortoru nalo na buruvenuo miralo, kar ga kamiu kube kiaku naiagagoano nalo, mia ka bogo nene mia kamiu kumijikia kuverial kenemiu moneano na ea kiniou kamu ea nalo na miralo, a kamu ka nalo na maka amonea Atua miralo.
MAT 10:19 Mia ka bogo na nalo amei avuru kamiu, bo ka mia niukniuku rivie re kamiu m̃ele, kuver ‘?Mia neil tum̃abe, a never venia vanlo?’ bior mia Niununo Lu naio sian iliano van kamiu ka mia kuverialio, rimemedu ka bogo na iliano.
MAT 10:20 Ana bogo napano kamiu kuvil, mia ve re kenemiu iliano, mia ve Karamemiu kiano Niununo na naio mil ea kamiu.
MAT 10:21 “Ea bogokouo na, mia toro mijikia rijamo ka kulo va dolu nalo amei avurular kuruano kar garuei, p̃elina kenerinio kar garuei, ka mia auebinvinlo am̃arm̃aro, nina bior ka napano nalo amonmonea kiniou. Mia kiritete nalo bunu amijikia atumolu, ka averial karam̃alo kenielo nalo napano amonmonea kiniou, ka mia am̃arm̃aro tibe na bunu.
MAT 10:22 Naruei mia tomu nalo tiniel tii re kamiu, mia atup̃e kenemiu iliano ka kamiu napano siaku jua kamiu, mia ver toro napano riviekouo dam̃ariga rivano-o rivokar bogokouo nei ribisi, mia Atua rilarur naio.
MAT 10:23 Bogo na ver tomu nalo ala baravo ka kamiu ea komeli tai, mia kamiu kuvuro kuvan ea nana lie kanio, mia verenio nalo ala baravo ka kamiu ea vio na, monokanio kamiu kuvuro bereio. Riano kiniou neber ka kamiu, mia kenemiu im̃auano riviniu re vo ea m̃arkomeli nalo nonovio na vio Israel nei vo, mia kiniou Kulorinio Kenerinio, nemei bereio.”
MAT 10:24 Mia Yesu berenio “Naiagagoano, naio maka rijikia to loa kiano naverloglogiano, mia toro na im̃auano, naio maka rijikia to loa kiano tubo. Tibe na, mia kamiu monokanio kuvisidomii re kuver mia sikili re van kito bogo tai,
MAT 10:25 bior bajago na jikili napano mia ala ka naverloglogiano, mia ala ka naiagagoano bunu, a vite kouo napano m̃a tubo rivokario, mia kiano toro monokanio rivokario bunu. Jibe ka tomu nalo abio niegeniege kiniou, napano kiniou nabe tobu ka kiaku m̃aratavo, aberinavo kiniou nebe Belsabel, napano nina be sio na tubo na sim̃aro nalo kialo, mia amijikia avio niegeniege kamiu rivova lie vo, kamiu napano kube kiaku m̃aratavo nalo.”
MAT 10:26 Ana Yesu berinavo “Bior mia ail rivova ka kamiu tibe ka ga na amil bova ka kiniou, mia kamiu kumerou re kalo. Vite va nonovio na tomu nalo ajum̃a amila luklukuaio, p̃elina aber vavanio, mia amalmaluvo amei medave navo, ka tomu nonovio amijikia ajikiaio.
MAT 10:27 A kamiu bunu, vite novo nalo napano nojom̃a neber ka kamiu ea burumelijo, kamiu monoka kuverialio bereio ea miamoiano, a vite nalo nam̃a kiniou nojom̃a nomijuvaluva kanio ea burutiliniemiu ga, monokanio kamiu kum̃adu ka bereio ea tomu nalo miralo, ka tomu nalo aviniu amijikia ajogio.
MAT 10:28 “Kamiu kumerou re ka nalo na amijikia auetam̃aria mokotenemiu, bior napano nalo maka ajikia auetam̃aria niunumiu, mia monokanio kamiu kumerou ka ga Atua, napano naio mijikia rila lelan mokotenemiu vija niunumiu ea vio na jogvaiano.
MAT 10:29 Kuvialio, menu nalo napano sialo kirijako, nalo miroano laka, aju janea vio, mia ap̃iliṽili kanio puruveru telisu ga ka juo, mia ver nalo tai rijoru ea borotano, Karamemiu naio rijikiaio.
MAT 10:30 A vijumiu nalo na pariparimiu nalo, nalo miroano laka bunu, mia Atua bulukuio nonovio abeve terakurano, naio mijikialo.
MAT 10:31 Naruei, kamiu maka kuvijikia kumerou m̃ele, bior naio mial kamiu kubo loa kirijako nalo nei, mia naio rivitikar vatitig kamiu ka vite nonovio nalo ea kenemiu meuliano nalo.”
MAT 10:32 Ana Yesu berinavo “Toro napano riverial ea tomu nalo miralo, riverinavo naio be kiaku toro tai, toro na, mia kiniou bunu neverial ea Teta na joa vio mave mirano never toro na naio be kiaku.
MAT 10:33 Mia toro napano naio riverial naio ea tomu nalo miralo riverinavo naio maka ve kanaku, mia kiniou bunu neverial naio kamu ea Teta na joa vio mave neverinavo naio maka ve kanaku.”
MAT 10:34 Ana Yesu berinavo “Kamiu kuvisidomii re kuver kiniou nebinimei ka nala burum̃ara tum̃aro ve toru toa vio yetemeriba nei. Makanio, mia kiniou maka nemei ka nodu tum̃aro toaio, mia kiniou nebinimei bija iobogu na mira tai, napano mia tomu nalo ala baravo a ala mira rivior kiniou.
MAT 10:35 Mia kiniou nebinimei ka nala m̃eaku nalo atup̃e karam̃alo nalo, a merevono nalo atup̃e kenielo nalo, a tira m̃eaku nalo napano ajoro vonga, mia atup̃e kenielo simemi nalo.
MAT 10:36 Mia nalo nam̃a tiniel mimi toru julaka ka kiaku naiagagoano nalo, nina maka ve kulo dolu nalo, mia nalo na abe kialo m̃aratavo ga nalo.”
MAT 10:37 Ana na Yesu naio berinavo “Verenio toro tai na naio jidom kenieno toru laka, p̃elina karam̃ano, p̃elina kenerinio, tuvulu napano naio jidom kiniou, toro na naio maka rijikia rimei rive kiaku naiagagoano.
MAT 10:38 Mo verenio toro tai rudu re kiano m̃akolkolo, ka takisor kiniou, tibe ka napano naio maka rijamo ka naio ka rijog rivova kar kiniou, toro na maka rijikia rimei rive kanaku naiagagoano.
MAT 10:39 Verenio toro tai tom̃a sidom m̃elea kiano meuliano, toro na mia rilaluvu kiano meuliano. Mia verenio kiaku naiagagoano tai rilaluvu kiano meuliano bior naio be kiaku, mia naio mijikia rivokar meuliano napano maka rijikia ribisi.”
MAT 10:40 Ana na Yesu berenio, berinavo “Verenio toro tai rivuru kamiu kuva joomo ea kunuano, nina jibe ka ga napano naio buru kiniou ga naba joomo ea kunuano. A verenio toro tai rivuru kiniou nava joomo ea kunuano, nina jibe ka ga napano buru naio napano miila kiniou nebinimei, naio ba joomo ea kunuano.
MAT 10:41 A verenio toro tai rivuru naverialiano tai p̃elina toro na memedu tai tibe na rivan ea kunuano, bior naio mijikia ka toro nei naio be toro lu tai na Atua kiano im̃auano, mia naio rivokar mauo na ga napano mia Atua rivar van kiano tomu na tortoru nalo nei.
MAT 10:42 Kiniou neber vatitig ban kamiu, ka verenio toro tai rije baja na uei menini ga van kanaku naiagagoano tai, napano naio maka sidomii river naiagagoano na naio be toro na toru tai, p̃elina naio be toro kurano ga, mia toro nene rijev kiano mauo tai rivior vite novo napano naio milaio ban kanaku toro neibano.”
MAT 11:1 Naruei bogo na Yesu mil batitig ban kiano naiagagoano nalo duelimo ba juo [12] nei bisi, ana naio jumolu den vio nei, naruei naio ban ka riverlogloglo a rioliolu vanlo ea komeli nalo na vio Kalele.
MAT 11:2 Kanio bogo nei, Jone Baruei joa yimo na tetavokoiano, a naio mijog lilianiano na im̃auano nalo napano Kristo jom̃a mim̃au kalo, naruei naio miila kiano naiagagoano tealo,
MAT 11:3 abano abika den Yesu, aberinavo “?Jum̃abe? ?Jau kobe toro na ajum̃a aberiio na nanua ruei aberinavo mia toro na toru tai naio rimei ka rivurim̃arabo ka kito, p̃elina jau maka kove toro nene kiana navo, ana monoka kumemi nuviturorea toro dolu bereio vo ka mia naio rimei?”
MAT 11:4 Naruei Yesu berdop̃e banlo, berinavo “Kamiu kuvan bereio, kuvial Jone, ana kamiu kuverial vanio vite nalo napano kamiu kumial napano kiniou nomim̃aukalo ea vio nei, a vite nalo na kumijog aberii ban kamiu ea kiniou, jibe ka vite nalo napano Naverialiano Aisea beriio na nanua ruei, napano naio berinavo:
MAT 11:5 ‘Merebono nalo, ajirarag bereio ruei, a nalo napano abe jaba milalo a abe javuluku milalo, vonganei amiel bereio ruei, a nalo napano burumieni milalo, vonganei niabele binimei meravo bo nonovio bereio ruei, a nalo napano abe bulubau nalo, vonganei amijog vite bereio ruei, a nalo napano am̃arm̃aro, vonganei nalo amemeul bereio ruei, a nalo napano abe talim̃asa, vonganei kiniou nojom̃a neberial Lilianiano Vou banlo ruei.’
MAT 11:6 “A kamiu kuva kuver ka Jone bunu, kuver ‘Toro napano maka leleio kiano jidomiano riveve juo ea kiniou bogo tai, mia ilivuiano rimei van naio.’”
MAT 11:7 Bogo napano Jone Baruei kanano naiagagoano nalo ajumolu ka avan bereio, Yesu berii Jone nene ban tomu nalo, berinavo “?Bogo napano kamiu kubatavio ea vio yauo na beamu, kamiu kuban ka kuvial venia? !Maka ve tinieku ka kamiu kuban ka kuvial javiniu nalo napano jegi jom̃a buku biliviliglo janea vio julaka ga!
MAT 11:8 A kiniou maka ve tinieku bunu ka kamiu kuban ka kuvial toro na toru tai napano naio miya kuluniabele maraiu, bior tomu na jibe na nalo maka ajikia atua vio na miagiago jibe ka vio yauo kurano ga na, mia nalo bogo nonovio ajua yimo novo na tubo na toru kunuano.
MAT 11:9 ?Makanio, mia kiniou neber p̃eli kamiu kuban ka kuvial naverialiano tai, a? Mo nina bo ga, mia kiniou neber ka kamiu, neberinavo toro napano kamiu kumitumolu ka kuva kuvial naio, naio toru lie, juvulu naverialiano re nua nalo,
MAT 11:10 bior Atua naio berii Jone nene ea kiano Iliano Lu ruei, naio berinavo ‘Kiniou nemiila kanaku naverialiano jukamu kaso, ka naio rila vatitig kanamo m̃arabo.’
MAT 11:11 “Riano, kiniou neber ka kamiu, neberinavo ea vio yetemeriba nei, Jone Baruei naio jo mave loa tomu dolu nalo abiniu. Mia nalo aviniu napano mia amei joomo ea navenatuboiano na Atua kiano, riva rivokar toro na maariano kalo nana jotano laka garuei, nalo na naruei aviniu atu mave loa Jone, ka mia nalo avar ilivuiano na Atua kiano tuvulu Jone.
MAT 11:12 Jikario ea bogo napano Jone Baruei jikar ka m̃a mioliolu, binimei bokar banei, tomu nalo ajum̃a amilidie navenatuboiano na Atua kiano, a uolu kouo na mira nalo bunu ajumolu m̃a amila vio ka atuvulio.
MAT 11:13 Be bogo binimei bokario bogo na Jone, naverialiano nalo a Mosis kiano tuboiano napano naio jirilo, aberial vite telabo napano mia amijikia ayotuba iorou.
MAT 11:14 A verenio kamiu kumisaaro ka kumonea vite nalo nei napano mia ayotuba iorou, mia kamiu kumijikia kuvitilubar ka kuver Jone Baruei naio be Elaija na nanua aberkario nua ruei ka mia naio rimei bereio.
MAT 11:15 A verenio be tiliniemiu, bo ka kuviagago vatitig ka kiaku iliano nei.”
MAT 11:16 Ana na Yesu mil lie vo, berinavo “?Mia kiniou nemijikia never iliano vaio ka mia rivokar bajago na tomu na vonganei? Ea m̃arabo nonovio napano Atua milaio ka rila von ka mia rivu ka kamiu, mia kamiu maka lele kuvisidomio, kamiu kumitu bereio m̃a kumil niegeniege naio biorio. Bior bogo napano Jone naio jo, naio jom̃a mondulu ka sinaniano ka tom̃a rivolkouo, a naio jo bel bunu ka m̃arjum̃elm̃elu, ana tomu nalo amialio jibe na, ana nalo amiila naio, aber ‘Tete na niadu jua naio.’ Mia bogo napano Kulorinio Kenerinio naio binimei jo, naio jinan batitigio a naio munu batitigio, ana nalo amil ea naio, aber ‘Kuvialio vo, toro na naio be toro na jinan m̃ele, a miokovo ka sinaniano julaka, a naio be toro na munu m̃elea m̃arjum̃elm̃elu, a naio be toro tai napano kiano bilbilu nalo abe tomu na abarbijii takis a tomu na bova ga nalo.’ “Ka tenene, kiniou nemial kamiu tomu na vio banei, napano kamiu kuvitibe ka kiritete nalo napano ver ajum̃a ajerjere ea vio medave na komeli, mia nalo atu aviovio van kialo bilbilu sesa nalo, aver ‘!Oi, kamiu kubova ga! Verenio kumemi numitu numue bulaiu, mia kamiu maka kuvisidom kuvolu vija kumemi, a verenio numiou ka iou na m̃ariano, mia kamiu maka kuvisidom kuviteg vija kumemi.’ “Mia vite nonovio napano amalmaluvo ea Atua kiano masouano, beamu tomu telabo amilikue keanio, mia iorou ana mia naio rila rimeravo ka masouano nei keano, naio memedu ga a be riano laka.”
MAT 11:20 Naruei Yesu mil berkakar ban tomu nalo na ea komeli nalo napano naio mim̃auka burutomoluo telabo kalo, bior nalo amial kiano vite nalo nei, mia nalo maka leleio aviliglo.
MAT 11:21 Naio berenio “!Kulo Koresin nalo, naliko kulo Betsaeta nalo, kamiu kumila lelan kamiu toru laka! Verenio kulo Taia naliko kulo Saiton nanua aial burutomoluo nalo nei napano kamiu kumialio nei ruei, mia nalo aviliglo nua ruei. Nalo maka ave kulo Ju, mia aya kuluniabelo na be m̃adati a mia nalo avisivisii bulum̃aroro ea pariparilo ruei, ka tomu nalo avitilubario ka nalo amijog bova riano bior kialo kariano nalo.
MAT 11:22 Kiniou neber ka kamiu memedu, ea bogo na tibureiano, mia kenemiu vironiano tovulu nana ve kialo.
MAT 11:23 “!A kamiu kulo Kapeneam, napano m̃a kumitum̃a kubarvar ka kamiu, a kumisidom kuvitu mave laka, mia kamiu kuvitikar kamiu! Mia Atua naio rivuku kamiu kuvatove laka ea bulukusebi. A verenio kulo Sotomo nalo aial burutomoluo nalo napano kamiu kumialio nei, mia p̃eli aviliglo ka mia burum̃ara sebi na vio mave maka rijikia sisen kialo vio rivakovio. Mia kamiu kumial burutomoluo nalo nei ruei, mia kamiu maka kuvilig kamiu leleio vo.
MAT 11:24 Tenene na kiniou neber ka kamiu, ka bogo na tibureiano, mia Atua tinien riialo tovulu kamiu.”
MAT 11:25 Mia ka bogo nei, Yesu bolkouo, ber “!Teta o, Tubo na vio mave, a Tubo na yetemeriba! Neber siva banso, bior jau koberloglog vite nalo napano ea kiniou, ban nalo napano kialo jidomiano jibe ka kiritete nalo ga, mia nalo napano ajidom ka abe masou laka, bija nalo napano ajidom aber amijikia vite, mia jau komilavan vite nalo nei kalo.
MAT 11:26 Riano, Teta, ninei javukia ga nana jau kojidomio.”
MAT 11:27 Karina Yesu ber bunu, berinavo “Karam̃aku juvan vite nonovio jua jum̃aku ruei. Mia Karam̃aku, naio ga takurano mijikia batitig kiniou, mia kiniou nei napano nebe kenerinio, kiniou ga takurano napano nemijikia batitig naio. Kiniou kumemliko nalo napano nebijauialo ka nesiloglog Karam̃aku kalo ka avarkar tinielo ea naio, kumemi nene naruei numijikia batitig naio napano be karamememi.”
MAT 11:28 Ana Yesu berii bunu, berinavo “Kamiu nonovio napano tiniemiu maro m̃ele bior kamiu kumitum̃a kubar de kenemiu bagaro nalo na teremi ea kenemiu meuliano, bo ka kamiu kumei, kamiu kumei ea kiniou, ka mia kiniou nemijikia nejev jilimebiano van kamiu.
MAT 11:29 Kamiu kuvudu kiaku iliano nalo tibe ka vuu tai na kenemiu meuliano, a kamiu kuvudu kanaku bajago nalo, bior kiniou nebe toro na momavo ga, kanaku jidomiano batove. Tibe na, mia kamiu kuvileal ka kenemiu jidomiano nalo ajilimebi,
MAT 11:30 bior kanaku verloglogiano nalo, nalo amonm̃ai ga a amelala ga, a vite nalo napano mia kiniou navar van kamiu ka mia kuvario, mia ve temi laka re ka kamiu.”
MAT 12:1 Naruei ka bogoti dolu bereio napano be Legiano Lu, Yesu naliko kiano naiagagoano nalo amiel abano, mia kialo m̃arabo jel iviso bure tiniavio na m̃arauiti. Nalo ajum̃a amiel jibe na, naruei kiano naiagagoano nalo jijerlo, ana amikiti kokorov m̃arati uiti nalo tealo ka asenio.
MAT 12:2 Nalo ajum̃a amila jibe na, naruei Varisis nalo tai ajua vio na, aju amial Yesu nalo, naruei nalo amil ban Yesu, aberinavo “!Ei, jau keialio! Kiamo naiagagoano nalo ajum̃a abar sinaniano ea tiniavio jibe na, ajum̃a amila im̃auano ea Legiano Lu, ana verenio amila jibe na, nalo ajum̃a amila korov kiado tuboiano.”
MAT 12:3 Ana Yesu berdop̃elo, naio berinavo “?Jibe na kovio, p̃elina maka kamiu kuvuluku kovio ea Iliano Lu bogo tai, ea vite nalo napano Parinio Tubo Teviti re nua milaio, a? Naio naliko kiano tomu nalo jijerlo toru,
MAT 12:4 naruei naio ba joomo ea Atua kiano Tobobo Lu, naio midu joko lu na tuboiano berenio kulo lu nalo ga amijikia asenio, mia Teviti nalo bunu ajenio.
MAT 12:5 ?Jibe na kovio, p̃elina kamiu maka kuvuluku bunu ea Tuboiano na Mosis kiano, napano ea Legiano Lu nalo, kulo lu nalo monokanio ava joomo ea yimo lu na Atua kiano, ka nalo ala kialo im̃auano eaio? Jibe na, nalo ajum̃a amila korov tuboiano na berbure ber toro maka rijikia rim̃au ka Legiano Lu, mia Atua naio maka sidomialio tena river nina be tena bova tai.
MAT 12:6 Kiniou neber ka kamiu, neberinavo be navenatuboiano vou tai jo vonganei, napano naio jo mave laka jovulu tuboiano na Atua Kunuano Lu,
MAT 12:7 mia naio jibe ka napano ea Iliano Lu, napano Atua naio berenio, berinavo ‘Kiniou maka nesidomii kenemiu sida nalo, mia kiniou nejidomii ga bajago na tinieiaiano.’ ?P̃elina kamiu maka kuvijikia nioti na iliano na navo? A verenio kamiu kumijikia ruei, mia kamiu kuvitu re kuvitibure searo ea kanaku naiagagoano nalo nei napano maka ala titai na bova.
MAT 12:8 Kulorinio Kenerinio, naio naruei naio be tubo na Legiano Lu.”
MAT 12:9 Naruei Yesu naio juvan vio na, naio miel bano, ana na naio ba joomo ea kialo yimo na volkouano tai.
MAT 12:10 Ea vio na, toro tai naio jo na, naio be jumekirikokouro, a tomu tai bunu aju ajidom aleal torokoriano tai ea Yesu verenio naio rila vite rimemedu re. Naruei tomu nalo nei abika Yesu, aberinavo “?Jum̃abe, kiado tuboiano berbure im̃auano ka ala batitig mokotenano toro ka Legiano Lu, p̃elina naio maka riverbureio? !Jau kover von vite na!”
MAT 12:11 Naruei Yesu berdop̃e, berinavo “?A verenio toro tai kiano nunu tai, mia nunu nene ga rijoru ea p̃ili tai ea Legiano Lu, kuberiam̃a mia toro nei maka rijikia riva rivuru lario bereio? !Nao, mia kito nonovio monokanio rala tibe na van kiado temeul nalo!
MAT 12:12 A verenio memedu jibe na ea kiado tuboiano ka kito rajai nunu ea Legiano Lu, jibe na kito romijikia rala im̃auano ka rajai toro ea Legiano Lu bunu, bior toro naio bo loa nunu.”
MAT 12:13 Naruei Yesu ber ka toro na be jumekirikokouro, berinavo “Kovitirii jum̃amo rimemedu.” Naruei naio mila jibe ka napano Yesu naio berenio, ana na naio jum̃ano binimei bo bereio, javukia jum̃ano tinene.
MAT 12:14 Ana na Varisis nalo napano aju ea bogo nei amijoku, naruei nalo abatavio, ka averii tum̃abe naruei ka mia amijikia auebin Yesu rim̃aro.
MAT 12:15 Mia Yesu naio mijikia ka Varisis nalo ajidom aue naio, naruei naio juvan vio nei, naio naliko tomu telabo napano ajakisorio. Naruei naio jo milarur tomu nalo na amie,
MAT 12:16 mia naio mil jikili banlo, naio berburelo ka ava averii re naio van kulo dolu nalo.
MAT 12:17 Naio mila jibe na ka mia Atua kiano iliano tai mijikia rimei rive riano, napano Naverialiano Aisea berialio nua, a iliano nei naio ber jibe nei, berinavo
MAT 12:18 “Nina be toro napano mim̃au kanaku, napano kiniou nebijauialar naio. Kiniou nejidom m̃elea naio bo laka, a kanaku jidomiano jaaro toru kanio. Mia kiniou nodu Niunuku toa naio, ka mia naio riverial bajago nalo napano memedu van tomu nonovio nalo na yetemeriba nei.
MAT 12:19 Mia naio maka rivukuju van toro, naio maka vijago m̃ele, mia naio maka rijikia rivuku iliano ve telabo ea vio medave.
MAT 12:20 Mia naio maka rijikia telar javiniu napano burukorovio jaklele ruei jo, a naio maka rijikia rijukon bin yulu na volvolkouo ka rim̃aro. Mia naio rim̃au tibe na rivanvano-o rivokar napano bajago na memedu naio tumolu sikili tu tovulu bajago na bova.
MAT 12:21 A mia tomu nalo nonovio na yetemeriba nei, mia nalo avarkar tinielo ea naio sikili ka mia naio rilarurlo.”
MAT 12:22 Naruei tomu nalo aburu toro tai napano niadu ban ea naio, naio binimei ea Yesu. Niadu nene mila naio mirano bono, a naio be buru bunu, mia Yesu naio mila batitig mirano a tiniajono abinimei abo bereio.
MAT 12:23 Naruei nalo napano amial vite nalo nei amiilo toru, amemebiju kanio, ana na aberinavo “!Uerei! ?Tete na naio be Teviti kenerinio nam̃a roju rorea naio kovio, p̃elina makanio?”
MAT 12:24 Mia bogo na Varisis nalo amijog tomu nalo kialo iliano nei, mia nalo amijoku toru, nalo aberenio “Toro na jitig bulag niadu nalo ea ga moroano napano sim̃aro nalo kialo tubo napano siano Belsabel, mijamo ka ban naio.”
MAT 12:25 Mia Yesu naio mijikia kialo jidomiano, ana naio ber kalo, berinavo “A verenio tubo tai, kiano tomu nalo avuruburelo, napano togio nene ail die togio nene, mia tubo nene kanano im̃auano nalo monoka mia atibirbili; a verenio komeli tai, p̃elina m̃aratavo tai, tomu nene nalo avuruburelo, ka togio ajidom ajil bulag togio nene, mia tomu nalo nei maka ajikia atu rivu bogo tai.
MAT 12:26 ?A jibe na bunu, verenio Setano kanano tava nalo tealo atu ajil bulag nalo togio dolu, nina berial ka nalo aburuburelo ruei, ana na mia navenatuboiano na Setano kanano naio sikili tu tum̃abe?
MAT 12:27 !Mia kamiu kumitum̃a kuberenio kuber jibe na naruei, kuberenio kiniou nojom̃a nemijil bulag niadu dolu nalo ea moroano na burum̃ara sim̃aro napano Belsabel, mia maka rijikia tibe na leleio garuei! ?Mia verenio tibe ka napano kamiu kuberenio, jum̃abe naruei ana kamiu tealo bunu ajum̃a amijil bulag niadu? ?Kei mijamo ka moroano na jibe na banlo, p̃eli Setano bunu koviobo? Bo ka verenio kenemiu naiagagoano napano ajum̃a amijil bulag niadu, ajog kenemiu iliano na.
MAT 12:28 Ana makanio, kamiu kuber maka rimemedu ga. Kiniou nojom̃a nejitig bulag niadu ea moroano na Atua kiano Niununo ga, mia tenei berial ber Navenatuboiano na Atua kiano ju iviso bure kamiu ruei.
MAT 12:29 “!Kuvijiio! Verenio toro tai sidom riva joomo ea toro kouo tai kunuano ka mia naio rivina ka kanano saba nalo, mia naio monokanio rivar teli riorkar toro nene sikili beamu vo, avona bisi, ana na mo naio mijikia riva joomo ka rivina ka nonovio saba nalo na kanano. Mia kiniou nojom̃a nomila jibe na naruei ka toro kouo napano Setano.
MAT 12:30 “Toro napano maka takisor kiniou, naio jo berbure kiniou, a toro napano maka rim̃au vija kiniou ka nuvuru kiaku tomu nalo amei vio takurano, naio jom̃a mijil dedade ealo abeve terakurano.
MAT 12:31 Jibe na naruei, kiniou neber ka kamiu, kariano nalo bija ilivovaiano nalo, a iliano napano mila bulag Kulorinio Kenerinio, mia Atua naio mijikia riviekokoa toro riviorio, mia toro napano naio ril rivova ka Niununo Lu, riverenio kiano im̃auano nalo be Setano ga mim̃aukanio, toro na jibe na, Atua naio maka rijikia riviekokoa naio bogo tai, ea bogo nei a ea bogo dolu napano mia rimei.”
MAT 12:33 A Yesu naio ber bunu, berinavo “Kito romijikia rovitilubar buruiesi nalo ea salo m̃arati napano abarlo. Buruiesi napano miluo bo, bar m̃arati na bo, mia buruiesi napano miluo bova, naio bar m̃arati napano bova.
MAT 12:34 Mia ea meuliano na toro kiano jibe na bunu, napano kiano iviso jibe kanio burupati tai, a iliano nalo napano amolmoluo ea kiano meuliano ajibe ka m̃arati nalo napano amolmoluo ea burupati nei. ?Mia kiniou nemial kenemiu burupati nalo amenunu ruei, mia tum̃abe ana m̃arati na bo tai mijikia rimoluo ea kenemiu iliano nalo? !Kamiu kube bajulukuti na maro nalo ga!
MAT 12:35 Toro napano bo, naio barbijii vite na bo nalo jua kiano iviso, naruei bogo nonovio kiano jidomiano na bo naio jo, napano naio mijikia sian bulagio, mia toro na bova, naio jo barbijii vite nalo na bova jua kiano iviso, naruei naio maka rijikia sian bulag jidomiano na bo bogo tai.
MAT 12:36 “Mia kiniou nejidom kamiu kuvijikia ka ea bogo na tibureiano, mia tomu nalo nonovio monokanio ala kialo veriiano ea kialo ilivovaiano nonovio veve terakurano napano ajum̃a aberenio ea kialo meuliano nalo,
MAT 12:37 bior mia Atua naio tibure kanamo meuliano rivior kanamo iliano nalo. Nina bior kanamo iliano nalo amijikia alaso komeul, p̃elina mia alaso kovokar vironiano.”
MAT 12:38 Ana tomu na verloglogiano na tuboiano, naliko Varisis nalo tai aber ka Yesu, aberinavo “Ei, jau napano abioso ka Naverloglogiano, kumemi numisidom ka jau kala vremesiano tai van kumemi ka mia nuvial kanamo moroano.”
MAT 12:39 Mia Yesu naio berdop̃e banlo, berinavo “Tomu nalo napano ajidom aial ga vremesiano nalo, abe kulo va nalo, nalo amila kodovo ban Atua jibe ka nalo napano m̃a amila siakaiano. Makanio, mia kamiu kuvial re vremesiano tai, mia vremesiano na Naverialiano Jona ga nanua, nina ga mia kamiu kuvialio.
MAT 12:40 Jona nene naio jo joomo ea burum̃ara keniene kelijumdumu na toru tai mabono ka legiano tolu a bogiano tolu, naruei mia tibe na bunu ea Kulorinio Kenerinio, napano mia naio toa bulum̃abono borotano ka legiano ve tolu a bogiano ve tolu.
MAT 12:41 Naruei nalo na vio Nineva re nua, amijog Jona kanano iliano, mia nalo abiliglo, a mia nalo na atumolu atu ea legiano na tibureiano, ka mia averilubarbar kenemiu torokoriano nalo, bior be toro tai napano naio loa ka Jona naio jo bija kamiu vonganei, mia kamiu maka kuvilig kamiu leleio vo.
MAT 12:42 “Nanua bunu be tira na toru tai napano naio be parinio tubo napano juvan kiano buruvenuo koalabo laka, naio batove binimei ka rijog tormoruo Parinio Tubo Solomon kiano ilimasosouano nalo. Naruei mia tira na toru nei bunu, mia naio tumolu tu ea legiano na tibureiano, naio riverlubarbar kenemiu torokoriano nalo, bior toro tai napano naio be masou loa ka Solomon naio jo bija kamiu vonganei, mia kamiu maka kuvisidom naio leleio.”
MAT 12:43 Karina Yesu ber bunu, berinavo “Bogo tai, napano ver ajitiglar niadu ea toro, niadu nene naio mijikia riva yeturu, sirago ka buluvio na mia naio rijilmebi eaio. Mia ver naio maka rijikia rilealio,
MAT 12:44 mia naio river ‘Ee, bo ka mia kiniou naiadu ka bereio kunuaku moruo na beamu vo.’ Naruei, bogo napano naio rimei bereio mia naio rial yimo nei beteauo, a mila kon a meravo bo, a amila batitig saba nene nalo memedu ruei ju.
MAT 12:45 Naruei naio mijikia riva rivuru bereio niadu dolu nalo ve aluo napano abova laka loa naio, amei vija naio, ka mia amijikia ava joomo bereio atua toro nei. Mia toro nei nua kiano meuliano bova, mia iorou kanio kiano meuliano rivova lie vo. A mia tibe na ga bunu ea meuliano na tomu na bova nalo ea bogo nei.”
MAT 12:46 Bogo na Yesu jom̃a mil kia ga vo bija tomu nalo nei, kenieno naliko kuruano nalo abinimei aboru ea vio nei, nalo ajikili aju tavio, ajidom ail vanio.
MAT 12:47 Mia nalo nei tai berial ka Yesu, berinavo “Oi, koniomo naliko kuruamo nalo ajikili aju tavio, amilavio ka ail vanso kija beamu vo.”
MAT 12:48 Mia Yesu naio miolu berdop̃elo, berinavo “?A konioku be kei, a kuruaku nalo abe kei?”
MAT 12:49 Ana naio jiloglog kiano naiagagoano nalo, naio berinavo “?Kumial nalo na aju na? Konioku a kuruaku nalo, nalo nei aju nei!
MAT 12:50 Bior ver toro napano rila tavukia napano Teta na vio mave naio jidomio, toro na jibe na naio be kuruaku, p̃eli kuvivinioku, p̃eli konioku.”
MAT 13:1 Ka legiano nene, Yesu jaluvo den vonuo, ba jotano koyou ea baramudou na ueiyabo na toru ka to riverloglog tomu nalo.
MAT 13:2 Mia tiniobi toru abinimei ka naio ka bogo na, mila ana naio bavin ea uako tai, jotano eaio, mia tiniobi toru nei nalo aju bin baramudou aju,
MAT 13:3 ana naio jo berloglog vite telabo kalo ea jamerijiano nalo. Ana naio berii kalo, berenio “Kuvijiio toro tai napano ban ka rivisivisii kurukuti ea kiano tiniavio.
MAT 13:4 Telikiti napano naio jom̃a bisivisii kurukuti nalo nei, tealo ajibiribil ea m̃arabo, ana iorou kanio, menu nalo abinimei amikiti bulagio nonovio.
MAT 13:5 A kurukuti tealo ajibiribil ea vio na be tabap̃ilio yetano kanio, mia maka sano tano nene rimerorolu. Mia abitovtov sop̃eli, bior salo tano menivinivi ga.
MAT 13:6 Ana bogo napano m̃erenio mijivi nieja jikili nieje salo toti nalo, vaarakurano ga amekekeu, bior maka ve salo bati ka avatove batitigio vo.
MAT 13:7 Mia kurukuti tealo ajibiribil ea vio napano beamu maka atekono vatitig teli va nalo eaio, mia iorou kanio, ana teli va nei naio miluo bereio toru, ana mueko miralo-o ana na nalo am̃arm̃aro.
MAT 13:8 Mia kurukuti dolu nalo bereio ajibiribil ea tano na bo tai, naruei nalo amiluo, ajakou abar m̃arati nalo, napano tealo abar duelimo toromomou [100], tealo abar duelimo va ari [60], a tealo abar duelimo va rolu [30].”
MAT 13:9 Ana na Yesu ber kalo, berinavo “Toro napano be tiliniene monokanio naio riiagago vatitig ka iliano nei.”
MAT 13:10 Mia iorou kanio, ana na Yesu kiano naiagagoano nalo abinimei abika den naio, aberinavo “?Bior vaio ana jau kojom̃a koberloglog tomu nalo jel ea jamerijiano jibe na?”
MAT 13:11 Naruei Yesu berdop̃e banlo, berinavo “Atua mila jibe na ka mia kamiu kuvijikia kuvileal m̃ajig na navenatuboiano na kiano, mia naio maka jian jikiaiano nei van kulo dolu nalo nei.
MAT 13:12 Kiniou neber jibe nei ka kamiu, ka toro napano verenio be kiano saba ruei, mia naio rijev tabunu bere vo ka mia ve miroano, mia toro napano maka ve kanano saba tai, mia naio rila deven vite vaio na telisu napano be kiano ruei.
MAT 13:13 Tenene na kiniou nojom̃a neberlogloglo ea jamerijiano, bior aju amial vite, mia maka lele avitilubario, a ajum̃a amiagago, mia maka lele ajoglubarbario.
MAT 13:14 Tomu nalo na jibe nei naruei, nalo nam̃a Atua beriilo nanua ruei, ea ilirianiano napano Naverialiano Aisea naio berialio, berinavo ‘Mia kamiu kuvijogio rivano-o, mia kamiu maka leleio kuvijikia kuvijoglubarbario bogo tai. Mia kamiu kuvialio rivano-o, mia maka leleio kuvijikia kuvitilubarbario bogo tai,
MAT 13:15 bior kamiu kumitibe ka tomu nalo napano kialo jidomiano nalo am̃arm̃aro, jibe ka napano ajinioko tilinielo nalo, a ajetavoko miralo nalo ruei. Verenio nalo ala re tibe na, p̃eli mia miralo rivitii dulu vite, p̃elina tilinielo rijoglubarbar vite, a p̃eli kialo jidomiano rijoglubarbar vite, ana tibe na ana amijikia aviliglo amei ka kiniou ka mia kiniou noim̃au ka vatitiglo.’
MAT 13:16 “Kiniou neber ka kamiu, kanaku naiagagoano nalo, ilivuiano joa kamiu, bior miremiu nalo aju amial vite nalo napano kamiu kumialio, a tiliniemiu nalo amijog vite nalo napano kiniou nojom̃a neberloglogio ka kamiu.
MAT 13:17 Naverialiano nalo telabo bija Atua kiano tomu nalo nanua, nalo ajidom toru ka aial vite nalo napano kamiu kumialio vonganei, mia maka lele aialio, mia nalo amila vio toru ka ajog venia na kamiu kumijogio vonganei, mia nalo maka ajog vite nalo nei tai leleio.”
MAT 13:18 Mia Yesu mil banlo, berinavo “Mo, kamiu kuviagago vatitig ka kuvijog nioti na jamerijiano na toro napano ban ka rivisivisii kurukuti ea kiano tiniavio.
MAT 13:19 “Vite na jukamu, be kurukuti na jibiribil ea m̃arabo, nina javukia napano tomu nalo na amijog Ioluano Vou na navenatuboiano nei, mia nalo maka ajoglubario. Kurukuti novo nalo na ajibiribil ea kialo jidomiano nalo, mia toro va nei Sim̃aro naio binimei ana naio bar bulag Ioluano Vou nei bereio den kialo iviso.
MAT 13:20 “Kurukuti dolu tealo nalo, ajibiribil ea vio na be tabap̃ilio yetano napano tano nene menivinivi ga, nina javukia napano tomu nalo na amijog Ioluano Vou nei, mia nalo ajaaro sop̃eli ga kanio,
MAT 13:21 mia jibe ka maka ve salo pati tai. Amijikia atu ka bogo ve bulati ga, mia verenio bogo na jikili rimei, p̃elina tomu nalo ajilo kar amonea Atua kiano iliano, mia vaarakurano ga nalo ajoru bereio.
MAT 13:22 “Dolu bunu, nina be kurukuti na jibiribil ea vio na teli va juaio, mia nina jibe ka napano tomu nalo amijog Ioluano Vou nei, mia nalo ajidom m̃elea kialo meuliano, a tinieljii saba nalo na yetemeriba nei toru laka. Bajago nalo na jibe nei jibe ka teli va, ana nalo abivibin Ioluano Vou nei ka mia naio rivar re m̃arati ea kialo meuliano nalo.
MAT 13:23 “Mia na maariano nene, naio be kurukuti na jibiribil ea borotano na bo, ninei javukia napano tomu nalo na amiagago ka Ioluano Vou nei, mia nalo amijoglubarbario, naruei ajakou abar m̃arati na Ioluano Vou nei ea kialo meuliano nalo, napano mia tai atakou avar m̃arati rivokar duelimo va rolu [30], mia tealo atakou avar m̃arati ve duelimo va ari [60], mia tealo atakou avar ve telabo, tibe ka m̃arati ve duelimo toromomou [100].”
MAT 13:24 Naruei Yesu berii jamerijiano dolu banlo, berinavo “Bajago napano Atua buru tomu nalo abinimei jouro ea kiano navenatuboiano nene jibe nei. Toro na toru tai napano naio ba bisivisii kurukuti uiti na bo ea kanano tiniavio,
MAT 13:25 mia bogo napano tomu nalo amonomel bogiano, ana kiano uolu tai binimei, bisivisii kurukuti soro na bova ea tiniavio nei bunu, karina naio buro ban bereio.
MAT 13:26 Naruei kurukuti vite juo nei amiluo biju vaarakurano, abe verare ga, mia bogo na ga uiti nalo ajikar ka ajakou, mia tomu nalo na toro na toru nei kiano nalo abitilubar ka soro na bova bunu miluo biju bija uiti nalo.
MAT 13:27 Ana na nalo abinimei amial naio, abika denio, aberinavo ‘?Boru, jum̃abe? Kurukuti nalo napano romebijalo ea kanamo tiniavio, nalo abe kurukuti na bo ga. ?Mia soro va nei naio binimei jum̃abe?’
MAT 13:28 “Ana na naio berii kalo, berinavo ‘Makanio, nina kiaku uolu tai napano naio mila vite na jibe nei.’ “Naruei kiano tomu nalo abalea naio bereio, aberinavo ‘?Mo, ana mia tum̃abe, jau kojidom nuva nuvuru bulag soro va nalo nene?’
MAT 13:29 “Mia naio berburelo, berinavo ‘Makanio, atubo beamu vo. ?Verenio kamiu kuva kuvuru bulag soro va na, p̃eli mia kamiu kumijikia kuvuru bulag belea uiti bunu, ve juo vaarakurano koviobo?
MAT 13:30 Mia nalo amijikia ave juo ailuo biju vio takurano riva rivokar bogo napano avarbijii uiti m̃arati rimei joomo. Ka bogo na, mia kiniou nemijikia never ka tomu nalo avan ka ate uiti nalo, mia ate bulag soro va nalo nene beamu, aiorkakarlo ve bagaro ka mia avukulo rivan ea sebi. Iorou kanio, ana mo amijikia ava ate uiti nalo ka avario rimei vonuo.’”
MAT 13:31 Naruei Yesu naio berial jamerijiano dolu tai bereio banlo, berinavo “Navenatuboiano na vio mave naio javukia kurukuti m̃arabako napano naio mijoru balea buruiesi.
MAT 13:32 Mia kurukuti nene naio kiritavaso leleio ga, mia bogo napano naio pitov mia naio binimei be buruiesi na burutomoruo tai, juvulu buruiesi dolu nalo, naruei menu nalo amue m̃alo niuku nalo ea sano jaati nene nalo.”
MAT 13:33 Mia Yesu berial jamerijiano dolu bereio kalo, berinavo “Navenatuboiano napano Atua kiano, naio javukia tira tai napano mim̃auka isi na telisu ga bija burum̃ara baju na yevi, mia isi na telisu neibano naio miyuku joko nalo nei biniu tortoru.”
MAT 13:34 Ea Yesu kanano iliano nalo nei, naio ber bulag vite nalo jibe na ban tomu nalo, mia va telabo napano naio mil ea jamerijiano banlo.
MAT 13:35 Jibe na, ana mila naverialiano nanua kanano iliano be riano, napano Atua ber “Mia kiniou neverial kanaku iliano nalo ea ga jamerijiano, mia kiniou neverial saba nalo napano ajuluku koalabo laka nua ruei aju nunu kia ga vo, jikar ka bogo na nejii yetemeriba, binimei bokar banei.”
MAT 13:36 Karina Yesu juvan tiniobi, ana naio ba joomo ea yimo, naruei kiano naiagagoano nalo abinimei kean naio, abika denio, aberinavo “?Aiou koig, kumemi numisidom kovisi nioti na jamerijiano na soro va na miluo ea tiniavio na uiti nei?”
MAT 13:37 Ana Yesu naio berdop̃elo, berinavo “Toro na toru napano bisivisii kurukuti na bo, naio be Kulorinio Kenerinio.
MAT 13:38 Mia kanano tiniavio nene, naio be yetemeriba nei. A kurukuti na bo nalo nei, nalo abe tomu nalo napano aju jouro ea navenatuboiano na Atua kanano. Mia soro va nalo nei nalo abe Sim̃aro kanano tomu nalo.
MAT 13:39 A uolu napano bisivisii kurukuti soro va nei, nina naio be Sim̃aro ga. A bogo na avarbijii m̃arati uiti, nina naio be bogo na tagap̃iano. A tomu nalo na im̃auano nei napano avan ka ate bijii m̃arati uiti nalo nei, nina naio be nailiano nalo.
MAT 13:40 A im̃auano na ayobijii soro va karina aisebilo, nina bajago napano mia rimei ea bogo na maaro,
MAT 13:41 napano mia Kulorinio Kenerinio, naio riila kiano nailiano nalo ka avan ka avar bulag vite nalo napano amila toro mijoru ea kariano, vija tomu nalo na amila bijuku vovaiano nalo, ka mia nalo ajikia atu re bunu naliko tomu nalo na kiano navenatuboiano.
MAT 13:42 Mia nailiano nalo avukulo avan ea sebi na toru, ea vio napano tomu nalo ajum̃a ajegi eaio, a ajum̃a ajer m̃arjuvolo nalo eaio.
MAT 13:43 Mia iorou kanio, ana tomu na memedu nalo atu jouro ea Karam̃alo kiano navenatuboiano, mia nalo nei amerera atavukia m̃erenio. A toro napano be tiliniene, bo ka naio riagago vatitig ka iliano nei.”
MAT 13:44 Mia Yesu naio berinavo “Bajago na ver toro napano jidom riva jouro ea navenatuboiano na Atua kiano, jibe ka jamerijiano nei: toro tai ba mial borotano tai, mia naio miilo ka burum̃ara puruveru novo tai napano jovorvoru ga eaio. Naruei naio jivin vanio lie ka puruveru nei bereio, mia naio ba p̃iliṽili bulag ka nonovio kanano saba nalo biniu, ka mia naio mijikia rivulular borotano nei, bior naio mijog bo toru laka ka tonovo napano naio milealio.”
MAT 13:45 Mia Yesu berii bunu, berinavo “Mia bereio, bajago na toro napano jidom riva jouro ea navenatuboiano na Atua kiano, javukia bunu: toro tai, napano naio jom̃a bulu basabebe novo nalo den tomu nalo.
MAT 13:46 Mia bogo tai ana naio mileal tai napano bo, ana naio berinavo ‘Riano ga na, kiniou tinieku jii vite nei toru laka. !Verenio kiniou nemijikia nodu ve kiaku garuei! Mia monoka kiniou nava noṽiliṽili bulag ka kanaku saba dolu nalo nonovio, ka mia kiniou nemijikia nemei novulu vite novo nei.’”
MAT 13:47 Ana Yesu naio ber bereio, berinavo “Mia bereio, bajago na Atua kiano ka rivuru tomu nalo ava jouro ea kiano navenatuboiano, naio javukia bunu, napano bogo na tomu nalo ajuvarvan levlevi ea ueiyabo, ana amijikia avuru ko niado kinkin nalo ve telabo eaio.
MAT 13:48 Ana bogo napano levlevi bujo vatitig bo, mia tomu nalo aburio bauro, naruei nalo ajaburuburu, abarburevure niado nene nalo. Ana niado nalo na bo, amisonlo aban ea kanalo basaro nalo, mia niado na bova nalo, nalo abuku lo abano.
MAT 13:49 Mia nina rimei tibe na ea bogo na maaro, mia nailiano nalo ava alaburevure tomu nalo, avuru bulag tomu na bova nalo,
MAT 13:50 avukulo avan ea sebi na toru, na tomu nalo ajum̃a ajegi eaio, ajum̃a ajer m̃arjuvolo nalo eaio.”
MAT 13:51 Naruei Yesu bika den kiano naiagagoano nalo, ber “?Kamiu kumijoglubarbar iliano nalo nei?” Ana nalo aberdop̃e, aberinavo “Nao, kumemi numijikia koviobo.”
MAT 13:52 Ana naio ber kalo, berinavo “Saba nalo nei jibe ka toro tai napano beamu, naio be naverloglogiano na tuboiano nalo na Atua kiano Iliano Lu, mia iorou kanio, ana naio binimei be kanaku naiagagoano tai ea navenatuboiano na Atua kanano. Naio javukia toro na toru tai napano kiano saba novo na im̃auano nalo telabo ea kunuano. Ana bogo nonovio, naio mijikia rivar bulag kiano vite na be terimoruo na bo kia ga vo, a naio mijikia rivar bulag bunu kiano tena be terivou, ka mia naio rila kiano im̃auano nalo ealo.”
MAT 13:53 Bogo napano Yesu berial jamerijiano nalo nei bisi, ana naio juvan vio nei,
MAT 13:54 binimei bereio ea kiano vio. Naruei naio jom̃a berloglog tomu nalo na vio nei, joomo ea kanalo yimo na volkouano, mia nalo amiilo toru ka kiano iliano nalo. Ana nalo ajum̃a aberverii kalo, aberinavo “!Tomnei! ?Tete na, naio bokar m̃asosouano nei jum̃abe, a naio jom̃a mila vremesiano nalo na jum̃abe?
MAT 13:55 Romijikia tete nei ruei. Naio karam̃ano napano be toro nam̃a mim̃auka yimo ga napano Yoseve, a napano kenieno, tira napano Mere. A kuruano nalo, nina Yemesi, a Yoseve, a Saimon, a Jutas, nalo na abe kurualo ea naio.
MAT 13:56 A kuvivinieno nalo, nalo nei ga aju kitoliko ga. ?Mia tete na naio jaluvo den kito, ba bar tenalo na be?”
MAT 13:57 Naruei nalo tiniel jer naio, maka asidom naio leleio. Mia Yesu naio ber kalo, berinavo “Toro napano be naverialiano, tomu dolu nalo amijikia ajovonio, mia tomu na kanano vio, naliko kanano m̃aratavo nalo, nalo na ga maka ajikia atovon naio.”
MAT 13:58 Naruei ea vio na, Yesu naio maka rila vremesiano ve telabo, bior nalo maka amonea naio.
MAT 14:1 Ka bogo nei, aber Yesu ba bokar Parinio Tubo Erot, na naio be parinio tubo na tanobuku na vio Kalele.
MAT 14:2 Ana Parinio Tubo Erot naio mijog iliano nalo nei, ana naio ber ka kiano tomu na tortoru nalo, berinavo “?Toro napano ajum̃a aberiio na, naio be Jone Baruei ga kovio, napano naio meul bereio den na m̃ariano bo? Tenene na naio mije moroano ka mim̃auka vremesiano nalo na.”
MAT 14:3 Parinio Tubo Erot naio mil jibe na, bior naio naruei muetam̃aria Jone Baruei m̃aro ruei, ana naio jo merou m̃ele kanio. A tukunu na m̃ariano na Jone Baruei kiano jibe nei: Parinio Tubo Erot nei kuruano Vilip, napano naljuo karam̃alo takurano mia keniele juo. Ana beamu, Vilip nene, naio joro ka tira tai siano Niarotias. Mia iorou kanio, ana Parinio Tubo Erot naio ba burular tira nene. Tenene na, Jone jom̃a mil ban Parinio Tubo Erot kanio, berinavo “Tena jau komila na maka rimemedu ka, napano jau koburular tira na, bior naio be kuruamo koano.” Mia Niarotias maka saaro leleio ka Jone kanano iliano, naruei naio mil ban Parinio Tubo Erot, ana Parinio Tubo Erot miila kanano tomu tai aba abokar Jone, amiorkario, ana amidu joa nalakoiano.
MAT 14:5 Mia Parinio Tubo Erot milavio ka ruebin Jone, mia naio merou kija kanio kulo Israel nalo, bior nalo amonea Jone aberinavo naio be kialo naverialiano tai.
MAT 14:6 Naruei Niarotias nei, naio be kenerinio vevinio tai, mia bogo napano nalo amila jokoluolu ka atekar bogo napano abar Parinio Tubo Erot eaio, ana niatira nene naio bolu kamu ka nalo na ajua jokoluolu nei miralo. Naruei Parinio Tubo Erot naio jaaro toru ka merevono nei kanano voluano,
MAT 14:7 naruei naio berkakario jikili banio, berenio vaio napano ver naio rivika denio, mia naio rudu vanio.
MAT 14:8 Naruei Niarotias naio mil bija kenerinio vevinio, bisi ana kenerinio vevinio nei naio ber ka Parinio Tubo Erot, berinavo “Vonganei, kiniou nejidom kodu van kiniou Jone Baruei pariparinio, toa baju tai, rimei ea vio nei.”
MAT 14:9 Mia iliano nei mila Parinio Tubo Erot mijog bova bior kiano verikariano na yokovoano nei, mia naio berenio ka ala bo ka tibe ka ga na merevono nei naio berenio, bior naio mila ilikakariano jikili jibe na ea kanano bilbilu nalo miralo ruei.
MAT 14:10 Ana nalo aban ea yimo na lakoiano, ajekorov Jone burujono,
MAT 14:11 ana amidu parinio joa baju tai, ana amidu binimei ban merevono nene, ana merevono nene na midu ba ban kenieno.
MAT 14:12 Iorou kanio ana Jone kiano naiagagoano nalo abinimei amidular mokotenano aba ajivinio, ana nalo aba aberial ka Yesu. Mo tukunu na Jone Baruei kiano m̃ariano biniu ea vio nei.
MAT 14:13 Naruei bogo napano Yesu mijogial ka Parinio Tubo Erot naio jo berii naio, berinavo naio be Jone Baruei naio meul bereio den na m̃ariano, ana Yesu jumolu den vio na, ana naio bavin ea uako tai, ka naio rivan ea vio yauo tai napano be tum̃aro napano maka tomu nalo atuaio. Mia bogo napano tiniobi nalo amijikia ka naio ban jibe na, amolmoluo ea kialo m̃arkomeli nalo, ajakisorio, ajel uro.
MAT 14:14 Mia bogo napano Yesu bauro, mia naio mial ka tiniobi na tomu nalo aju ruei, mia naio tinien miialo toru, ana naio mila kialo tomu na mieiano nalo abo bereio.
MAT 14:15 Mia bogo napano m̃erenio batove, ana Yesu kiano naiagagoano nalo abinimei kean naio, aberinavo “Tubo, vio nei maka rivu, a vaataro ka vio rimelijo bunu. Bo ka jau keiila tiniobi nalo na avanvan bereio ea komeli nalo, ka avulu salo sinaniano tai.”
MAT 14:16 Ana Yesu berdop̃e ber kalo, berinavo “Makanio, nalo amijikia atu tibe na rivu ga na. Bo ka kamiu kuvar sinaniano tai vanlo.”
MAT 14:17 Ana nalo aber kanio, aberinavo “!Uerei p̃eli ga, kumemi nubokar joko sesa jumo ga, bija momaio bana juo ga!”
MAT 14:18 Ana Yesu berinavo “Kuvar rimei van kiniou,”
MAT 14:19 ana naio ber ka tiniobi nei, berinavo “Kamiu kuvitutano ea soro beamu vo.” Naruei naio bar joko sesa jumo bija momaio bana juo nei, naio jirarago bavin ea vio tiniabene, ana naio ber siva ban Atua ka sinaniano nei, karina naio burekokorovio joko sesa nei, naio jian ban kiano naiagagoano nalo ka nalo avar van tiniobi nalo nei.
MAT 14:20 Mia nalo ajinan bano-o, mabolo jouo bo, mia niati na sinaniano nalo napano maka asenio, nalo abe verare ka aisonlo rivan ea basaro solokobaro nalo napano tortoru ve duelimo ba juo [12].
MAT 14:21 Mia tomu nalo napano ajinan, sum̃analo ga abokar kovio ea menu jumo [5,000], mia maka avuluku tire nalo vija kiritete nalo.
MAT 14:22 Karina Yesu ber ka kiano naiagagoano nalo, berenio “Kiniou nejidom ka kamiu kuvidu kiado uako, kamiu beamu kuva tivelinio ea ueiyabo na toru nei, mia kiniou noto nei beamu vo ka mia neiila tiniobi nalo nei avanvan bereio ea kialo m̃arkomeli dedade nalo.”
MAT 14:23 Ana bogo napano naio miila dedade ea tiniobi nalo nei abanvan bisi, ana naio bavin ea suku tai, naio takurano, ka rivolkouo. Bogo napano vio melijo ruei, mia Yesu jo naio ga takurano,
MAT 14:24 mia ka bogo nei, uako neibano naio jo koalabo ruei, iviso ea tinia ueiyabo. Naruei niatuva toru laka, a nalo aju ajup̃e jegi, mila ana nalo amidu tei mia amidu tei.
MAT 14:25 Mia vaataro ka vio rivuruburevure ka viorijeni, ana Yesu binimei ka rialo, naio jo miel manono mave ea tei.
MAT 14:26 Mia bogo na kiano naiagagoano nalo amial naio jo miel binimei jibe na, mia nalo amerou, ana aber “!Uerei! ?Titai yako, p̃eli sim̃aro tai koviobo, p̃eli venia jibe na?” Mia nalo amiaga jouo, bior nalo amerou m̃ele,
MAT 14:27 mia vaarakurano Yesu naio mil banlo, berinavo “!Ei, kamiu kumerou re bunu, mia be kiniou ga nei!”
MAT 14:28 Ana Pitere berdop̃e, berinavo “Tubo, a verenio be jau riano, mia kajamo ka kiniou bunu neiel mave ea tei neviedu keanso.”
MAT 14:29 Ana Yesu berinavo “Jau, bo ga, komei.” Ana Pitere batove den uako, naio jikar miel mave ea tei, naio ban vaataro ka Yesu,
MAT 14:30 mia bogo napano naio tinien maio bereio ka jegi napano jikili nei, naio merou. Mia bogo na naio merou jibe na, ana naio jikar ka madudu, naruei naio bio ban Yesu, berinavo “!Tubo, jau kajai kiniou!”
MAT 14:31 Vaarakurano ga Yesu mijiou bokar Pitere jum̃ano, ana naio berkanio, berinavo “?Jum̃abe ana niukniuku bieso? !Maka leleio koviekar kiniou sikili leleio kija vo!”
MAT 14:32 Mia bogo napano nalo abe juo abavin ea uako bereio, vaarakurano jegi juba bin,
MAT 14:33 mia nalo napano ajua uako amiaia Yesu, aberenio “Riano ga, jau kobe Atua kenerinio riano.”
MAT 14:34 Ana Yesu nalo aban ea kialo uako abarkorovio ueiyabo labo nei, aba tivelinio, naruei nalo abauro ea vio tai, siano Kenasarete.
MAT 14:35 Mia bogo napano tomu na vio nei amijikia naio, ana nalo amiila toru janea vio nonovio jeliviv ea vio nei. Ana nalo aburu tomu na mieiano nalo abinimei ea naio,
MAT 14:36 naruei nalo abalea naio ka rijamo ana nalo napano amie atokol ga kiano ikit kulum̃arauo. A nalo na atokolio tibe na, mia kialo mieiano nalo ribisi, ana mia nalo avu bereio.
MAT 15:1 Ana bogo nene, Varisis nalo tai naliko naverloglogiano na tuboiano nalo tai ajuvan vio Yerusalemo, abinimei ka aial Yesu.
MAT 15:2 Nalo abika denio, aberinavo “?Ka vaio ana kanamo naiagagoano nalo ajum̃a amiakurano ea bajago moruo na kiado nalotuano, na kiado navurim̃araboiano nalo na beamu ajum̃a aberloglog ka kito, aberinavo bogo nonovio ver toro sidom sinan, monokanio naio takii vatitig m̃arabo na memedu nene, ka sekon jum̃ano beamu vo, karina mo naio mijikia sinan?”
MAT 15:3 Ana Yesu berdop̃e banlo, berinavo “?Ana kamiu bunu, bior vaio ana kamiu kumisikili ka kumitakii kenemiu bajago moruo nalo nei, mia ea kenemiu bajago moruo kamiu kumitum̃a kumilakokorov Atua kanano tuboiano?
MAT 15:4 Mia Atua nene, naio ber ‘Jau komonmonea karam̃amo a koniomo,’ mia naio ber bunu, berinavo ‘Ver toro tai naio ril rivova ka karam̃ano a kenieno, kamiu kuvuebin naio rim̃aro.’
MAT 15:5 Mia vonganei, verenio toro tai berkar ber kiano saba nalo abe lu, mia naio rivar van Atua bogo tai, naio ber jibe na mia iorou kanio, ana naio maka rijikia rivitikar kiano tormoruo juo nei, p̃eli rijailo ka saba nalo nene,
MAT 15:6 ana kamiu kumitu kuber jibe na naio bo ga na, nina maka ve vite tenia. Mia ea bajago na, kamiu kumitum̃a kumila Atua kiano tuboiano binimei be iakurano, bior kamiu kumisidom kuvokar ga kenemiu bajago moruo nalo.
MAT 15:7 !Mia kamiu kumilasibi ga na, kamiu kumitum̃a kumil kurano ga! Naverialiano Aisea naio berii kamiu nua ruei, napano naio berial iliano na Atua naio berenio, napano ber
MAT 15:8 ‘Tomu nalo na amonmonea kiniou ka kialo iliano nalo ga, mia kialo jidomiano nalo aju koalabo den kiniou kia ga vo.
MAT 15:9 Mia nalo aju amilotu ban kiniou kurano ga, bior bogo napano aberloglog toro, nalo aber iliano na, naio be Atua nene kanano, mia iliano na be nalo kulorinio ga kialo.’”
MAT 15:10 Naruei Yesu naio bio tomu nalo ka amei vio takurano ea naio, ana naio mil banlo, berinavo “Bo ka kamiu kuviagago vatitigio, monoka kamiu kuvijoglubar kanaku iliano.
MAT 15:11 Maka sinaniano napano ba joomo ea toro niono, naio mijikia rila toro riagiago ea Atua mirano, mia iliano nalo napano m̃a moluo ea toro niono, naina naruei napano mila toro miagiago.”
MAT 15:12 Ana karina, kiano naiagagoano nalo abinimei, aber kanio, aberinavo “?Ai koig, jau komijikia ka Varisis nalo tiniel mimi toru ka iliano nalo napano jau kojom̃a koberenio?”
MAT 15:13 Ana Yesu berdop̃e ber kalo, berinavo “Kamiu kuvisidomial re nalo na. Venia napano nalo ajum̃a amilaio, naio maka ve Atua kiano im̃auano na, mia Teta napano joa vio mave mia naio rivuru bulag nonovio vite nalo napano naio maka rimebijalo. ?Tomu nalo na abe merebono ga, mia ajidom avurim̃arabo ka toro dolu napano be merebono, mia nalo ave juo aiel tum̃abe? !Mia nalo ave juo amijikia ajoru ea bulukup̃ili tai na!”
MAT 15:15 Naruei Pitere bika den Yesu, ber “Koig, jau kobijuku bo komijikia koverial nioti na jamerijiano neibano jau koberiio jukamu ban kumemi.”
MAT 15:16 Mia Yesu berenio “?Jum̃abe, p̃eli parimiu merorol bunu kia ga vo?
MAT 15:17 P̃elina kamiu kumijikia kija ruei, bior vaio napano ba joomo ea toro niono, jelea mabono ba tavio den mokotenano bereio,
MAT 15:18 mia vaio napano moluo ea toro niono, naio moluo ea kiano iviso jukamu, naruei naio mijikia mila toro miagiago.
MAT 15:19 Mia nina bior kiano jidomiano va nalo amoluo ea tiniene toro, jibe ka amila bin toro, amila siakaiano, a m̃eaku naljuo niatira amila siakiano, a vinauano, a ilisibiano, a ilivovaiano.
MAT 15:20 Mia nina be bajago nalo napano amijikia amila toro miagiago kamu ea Atua mirano. Mia bajago napano ajinan, maka asekon jum̃alo tukamu, naio maka rijikia rila toro riagiago tibe na.”
MAT 15:21 Naruei Yesu juvan vio nei, ana naio batove ea bulukomeli juo na vio Taia bija Saiton.
MAT 15:22 Ana tira valauo tai na vio Kenano, naio joa tanobuku na vio nei ruei, ana naio binimei mial Yesu, naio bio banio, berinavo “Tubo, jau kobe Naverikariano napano komiyotuba ea Teviti kiano bajulukuti. Kiniou neber bo kaso tiniem riia kiniou. Keneriku vivinio, niadu tai ban ea naio, a mila lelan naio jikili laka.”
MAT 15:23 Naruei Yesu mijog tira nei kiano iliano, mia maka riolu riverip̃e titai leleio van tira nei. Iorou kanio, ana kiano naiagagoano nalo abinimei, aber kanio aberinavo “Tubo, tira nei, naio jom̃a bio lili kito toru laka. Bo ka jau keiila naio rivabilig.”
MAT 15:24 Ana Yesu maka riverdop̃elo, mia naio mil ban tira nei, berinavo “Atua miila kiniou nebinimei ka navan ea kulo Israel nalo ga, nalo napano ajavukia nunu nalo napano amilaluvu m̃arabo.”
MAT 15:25 Mia tira neibano naio binimei, minie kamu kean Yesu jaano, ana naio berinavo “Tubo, neber bo kaso nejidom jau kajai kiniou.”
MAT 15:26 Mo Yesu naio berdop̃e, ber “Maka rivu ka navar bulag kiritete nalo salo sinaniano, novuku van kuli nalo.” Naio mil jibe na bior naio mijikia ka bogo na, kulo Ju dolu nalo aberiam̃a nalo ga abe Atua kenerinio nalo, bior ajum̃a aberii searo ea tomu nalo napano maka ave kulo Ju, abiolo aber abe kuli ga liki.
MAT 15:27 Mia tira neibano naio mil, berinavo “Jau kober riano, Tubo, mia kuli nalo amijikia asen ga iororoti sinaniano napano jibiribili jel tano ka boru na kuli nalo nei kiano barobaro na sinaniano.”
MAT 15:28 Ana Yesu berdop̃e vatitig ban naio naruei, berinavo “Tira, jau kobiekouo ea kiniou koju jikili laka. Mia vonganei jau keialio rimei vanso tibe ka napano jau komoneaio.” Mia memedu ka bogo nene, ana tira neibano kenerinio vivinio neibano binimei bo bereio.
MAT 15:29 Karina, Yesu jumolu den vio na bereio, naio ban bereio ea tanobuku na vio Kalele. Naio jom̃a miel barlaka, ban vaataro ka ueiyabo na tanobuku nei, naruei naio bavin ea suku tai, naio jotano.
MAT 15:30 Naio jotano jibe na, naruei tiniobi na tomu nalo abinimei ka naio, bija javuluku nalo, a nalo napano abe jam̃aba kirikokouro, a merebono nalo, a buru nalo, a tomu na mieiano dedade nalo bunu. Aburulo abinimei, ajuvanlo aju vaataro ka Yesu, naruei Yesu naio milarurlo abo bereio.
MAT 15:31 Ana tomu nalo amiilo toru ka bogo napano nalo amial buru nalo amil, jam̃aba kirikokouro nalo abo, javuluku nalo amiel, a merebono nalo ajirarago, naruei nalo amialio, ana amiaia kulo Israel nalo kialo Atua toru laka biorio.
MAT 15:32 Ana Yesu bio kiano naiagagoano nalo ka amei aialio, karina naio berinavo “Kiniou tinieku miia tiniobi na toru nei, bior nalo aju kitoliko bogoti tolu ruei, mia vonganei salo sinaniano nalo biniuviniu. Mia kiniou maka nejikia neiilalo avanvan vonuo ver maka sinaniano, bior ver kiniou nala tibe nei, p̃eli mia tomu tai miralo ribobogio ea m̃arabo rivior vitu.”
MAT 15:33 Naruei Yesu kiano naiagagoano nalo aber kanio, aberinavo “?Mia ravar salo sinaniano ea vio be? Bior vio nei be vio yauo kurano ga, a tiniobi toru laka.”
MAT 15:34 Ana Yesu bika denlo, berinavo “?Kamiu kubar joko vio?” Ana nalo aberinavo “Joko aluo [7] ga, bija momaio tealo.”
MAT 15:35 Naruei Yesu ber ka tiniobi na toru nei, berinavo “Kamiu kuvitutano beamu vo.”
MAT 15:36 Ana naio bar joko aluo [7] neibano, bija momaio nalo nei, ana naio ber siva kanio ban Atua, karina naio burekokorovlo, ana bario ban kiano naiagagoano nalo. Ana kiano naiagagoano nalo kija abario abiovio ka janea tiniobi nalo nei.
MAT 15:37 Naruei nalo ajenio bano-o mia mabolo jouo bo. Mia iorou kanio, ana nalo amison niati sinaniano nalo napano aju, ban ea basaro sarobobotu nalo aluo, abujovujo vatitigio bo.
MAT 15:38 Mia tomu nalo napano ajinan, sum̃ano nalo ga abokar menu veri [4,000], mia maka avuluku tire nalo vija kiritete nalo.
MAT 15:39 Karina Yesu miila dedade ea tiniobi nalo nei abanvan bereio vonuo, mia naio ban bereio ea kialo uako, ana naio juvan vio nei, naio binimei jo bogo bulati ga ea tanobuku na burum̃ara komeli na vio M̃akatano.
MAT 16:1 Bogo tai, ana Varisis nalo naliko Satusis nalo abinimei amial Yesu, ajidom ka alavon naio, ana nalo aberinavo “Kumemi numisidom jau kalavon vremesiano na toru tai van kumemi, napano mia jau koim̃aukanio ea moroano na vio mave.”
MAT 16:2 Ana Yesu naio berdop̃e banlo, berinavo “Bogo napano m̃erenio jo batove, mia verenio kamiu kumial vio bilvili ea vio na m̃erenio jo batove eaio, ana kamiu kumijikia kuverenio ‘Mia nieta beni,’
MAT 16:3 a bogo napano m̃erenio bavin, mia verenio kamiu kumial vio bilvili ana kumial melijo bobogio, ana kumijikia kuverenio ‘Mia yuo rivovo banei.’ ?Mia kamiu kumijikia kubitii vremesiano na ea tiniabene ruei, ka mia kuverenio mia bogo tum̃abe, mia jum̃abe ana kamiu maka kuvijikia kuvitilubar kiaku vremesiano nalo ea burum̃ara bogo toru nei nojo bija kamiu nei?”
MAT 16:4 Mia Yesu berii bunu banlo, berinavo “Tomu nalo na ajidom aial ga vremesiano nalo, abe kulo va nalo, nalo nam̃a amila kodovo ban Atua, abilig taakalo ban naio, jibe ka nalo napano amila siakaiano aburo den koualo nalo. Makanio, mia kamiu maka kuvijikia kuvial vremesiano tai, mia kamiu kuvial ga napano mia riyotuba ka kiniou tavukia vremesiano na Naverialiano Jona re nua, napano Atua mila naio meul bereio.” Ana naio jumolu denlo juvanlo ajubo.
MAT 16:5 Mia bogo na Yesu naliko kiano naiagagoano nalo ajumolu abano, ana abarkorov ueiyabo na toru nei aba tivelinio, ana kiano naiagagoano nalo tiniel bobogia ka avarkar salo joko tai. Mia bogo na aboru tivelinio,
MAT 16:6 ana Yesu jian iliano tai banlo, ana naio berinavo “Kamiu kuvitikar vatitig kamiu rivu ka isi na Varisis naliko Satusis nalo kialo.”
MAT 16:7 Ana nalo amijog iliano nei, mia nalo ajum̃a aberiio ka nalo bereio, aberinavo “?Naio mil jibe na bior maka ravarkar joko tai rimei ea vio nei koviobo?”
MAT 16:8 Mia Yesu mijikia kanalo jidom-iano nalo nene, ana naio ber “?Bior vaio ana kamiu kumitum̃a kumisidomii m̃elea mabomiu nalo, ka mia kito resen venia? ?Jum̃abe ana maka kuvijoglubar vite nei vo? !Kenemiu moneano kiritavaso! ?P̃eli kamiu tiniemiu bobogia bunu joko jumo nanua na, nabar ban tiniobi menu jumo [5,000], bija basaro solokobaro nalo na kumisonlo abujovujo?
MAT 16:10 ?P̃eli kamiu tiniemiu bobogia bunu joko aluo nanua na, nabar ban tiniobi menu veri [4,000] nalo, a basaro sarobobotu vio napano kamiu kumisonlo abujovujo iorou kanio?
MAT 16:11 ?Jum̃abe maka kuvijoglubar ka kiniou maka neil van kamiu ka joko? Mia neber ka kamiu bereio, kuvitikar vatitig isi na Varisis naliko Satusis nalo kanalo.”
MAT 16:12 Mia vonganei nalo amijikia ka naio maka riverii isi na joko miyuku, mia naio jo ber avitikar batitig Varisis naliko Satusis nalo kanalo ilisibiano nalo napano mia averlogloglo kanio, napano mijikia rila toro parinio turobi ve toru, mijikia riva rila searo ea nono togio na kiano meuliano, tavukia napano isi mila ka joko.
MAT 16:13 Naruei Yesu nalo abatove ea tanobuku na bulukomeli na toru nei Sisiria Vilipai, mia ka bogo na naio bika den kiano naiagagoano nalo, berinavo “?Kamiu kumijog ka tomu nalo ajum̃a aberverii aber Kulorinio Kenerinio naio be kei?”
MAT 16:14 Ana nalo aberinavo “Tomu tealo aber jau kobe Jone Baruei bereio, a tealo aber jau kobe Elaija, a tealo aber jau kobe Jeremaia, p̃elina naverialiano dolu tai re nua nua.”
MAT 16:15 Naruei naio bika denlo, berinavo “?Ana kamiu, kamiu na kuber kiniou nebe kei?”
MAT 16:16 Ana Saimon Pitere naio berdop̃e, berinavo “Jau kobe Naverikariano, jau kobe Atua na meul kenerinio.”
MAT 16:17 Ana Yesu berdop̃e banio, berinavo “Saimon, Jone kenerinio, mia ilivuiano rimei vanso. Vite na jau koberialio, maka kulorinio riverial kaso, mia Teta napano joa vio mave, naio berial banso.
MAT 16:18 Mo jau na siamo dolu nene napano Pitere naio ber jibe nei ber ‘Veru,’ a be riano laka, ka kiniou nemialso jibe ka veru tai napano jo, a mia kiniou nevitirilar kanaku taara na lotuano nalo ea tabap̃ilio tibe na naruei, mia moroano na m̃ariano maka rijikia tovulu taara na.
MAT 16:19 Mia kiniou nodu ki nalo na vetavoiano a na tetavokoiano na navenatuboiano na Atua kanano vanso, ka mia verenio vite napano jau koverbure ea yetemeriba nei, mia Atua na vio mave bunu riverbure kamiu ve juo, mia verenio vite napano jau kajamo kanio ea yetemeriba nei, mia Atua na vio mave naio bunu rijamo kanio kamiu ve juo.”
MAT 16:20 Ana na Yesu ber jikili ban kiano naiagagoano nalo, berinavo “Mia kamiu kuverial re van tomu nalo ka kiniou nebe Naverikariano.”
MAT 16:21 Mia jikar ea bogo na, Yesu milavon ka riverial rimeravo van kiano naiagagoano nalo, ka mia naio monoka rivavin ea vio Yerusalemo, ana ea vio na, mia tubo nalo na vio Israel, a nalo napano abe parinio kulo lu nalo, a naliko naverloglogiano na tuboiano nalo, nalo nei naruei nalo aviniu ala lelan searo ea naio. Mia Yesu berial banlo bunu ber mia nalo nei auetam̃aria naio rim̃aro, mia bogoti ve tolu [3] nene, ana mia Atua naio rivurular naio tumolu rimeul bereio.
MAT 16:22 Naruei Pitere biolar Yesu denlo, ana naio jikar mil jikili banio, berbureio, berinavo “Yesu, monoka mia Atua naio riverbure tena. Vite nalo na maka rijikia rimaluvo kaso tibe na.”
MAT 16:23 Mia Yesu barp̃ilig naio, ana mil jikili ban Pitere, berinavo “!Setano, kotu koalabo den kiniou! Jau kojom̃a komilavon kiniou ea kanamo jidomiano napano be toro ga kiano, mia maka ve Atua kanano jidomiano leleio.”
MAT 16:24 Naruei Yesu ber ka kiano naiagagoano nalo, naio berinavo “Toro napano ver jidom rimei tu iorou ka kiniou, monoka naio sidom ve iakurano ga ea kiano tinieiaiano nalo, mia monokanio naio rudu kanano m̃akolkolo, ana mo naio takisor kiniou.
MAT 16:25 Toro napano jidom rilarur kiano meuliano, mia naio rilaluvuio, mia toro napano rilaluvu kiano meuliano rivior kiniou, mia naio mijikia rivokar meuliano na be riano.
MAT 16:26 Naruei verenio toro tai napano na rivokar saba nalo nonovio na vio yetemeriba nei riviniu, mia naio milaluvu m̃arabo na meuliano, naio nei maka rijikia rivokar telerinio nabo tai leleio, mia iorou kanio, mia kiano saba novo nalo nei maka rijikia rivulu meran kanano meuliano bereio.
MAT 16:27 Mia vaataro ka Kulorinio Kenerinio rimei bereio naliko kanano nailiano nalo, mia naio rimei vija karam̃ano kanano miamoiano, naruei mia naio rivulu tomu nalo rive verare ka kialo im̃auano nalo.
MAT 16:28 Riano ga kiniou neber ka kamiu, be tomu tai nalo ajumolu ajua vio na, napano mia nalo maka ajikia am̃aro vo, rivano-o mia rivokar bogo napano mia aial Kulorinio Kenerinio naio rimaluvo rimei vija kiano navenatuboiano, ka mia rimei rive tubo ka tomu nonovio.”
MAT 17:1 Mia iorou ka bogoti ari [6] barlaka, ana Yesu buru Pitere, a Yemesi, a kuruano Jone, ana nalo veri abavin ea burusuku tai.
MAT 17:2 Bogo napano nalo aju jibe na, ana naiagagoano tolu nei amial Yesu niabene binimei be dolu, a mirano binimei merera toru jibe ka m̃erenio, a m̃ano kulum̃arauo nalo abinimei amiuvu novo mia amiuvu nonovio garuei.
MAT 17:3 Naruei nalo tolu nei amial Mosis naio Elaija amaluvo bunu, ana naljuo aju amil naliko Yesu.
MAT 17:4 Ana Pitere ber ka Yesu, berinavo “Tubo, bo ka kito rotua ga vio nei. Mia ver kajamo kanio, ana mo noim̃auka tobobo ve tolu ea vio nei, tai ve kanamo, tai ve Mosis kanano, a tai ve Elaija kanano.”
MAT 17:5 Bogo napano Pitere naio jo mil kia ga vo, ana melijo tai napano merera binimei jovukolo, naruei nalo amijog iliano tai maluvo ea melijo nene, na berinavo “Nina be keneriku napano kiniou nejidom m̃elea na. Kiaku jidomiano joaio na, mia kiniou najaaro m̃elea kanio na. Mia monoka kamiu kumonmonea vatitig naio.”
MAT 17:6 Ana kiano naiagagoano nalo amijog iliano nei, naruei nalo amerou mia amerou, ana nalo amijoru ea tano ana amiduvan miralo.
MAT 17:7 Mia Yesu naio binimei ealo, ana naio mijubaluba taakalo abe tolu, ana naio ber kalo, berinavo “Kamiu kuvitumolu, kamiu kumerou re.”
MAT 17:8 Naruei bogo napano nalo abar bulag pariparilo ajirarag bavin bereio, mia maka bunu aial tomu juo nei, mia Yesu ga takurano ju.
MAT 17:9 Tilikiti napano nalo ajuvan burusuku nei, aju abatove bereio, ana Yesu berii kalo berburelo, berinavo “Vite napano Atua mila kamiu kumialio, mia kamiu kuverial re ka tomu tai rivano-o rivokar bogo napano Kulorinio Kenerinio rimeul bereio ea m̃ariano, ana ea bogo na naruei, ana mia kamiu kumijikia kuverial ka tomu nalo.”
MAT 17:10 Karina naiagagoano tolu nei abika den Yesu, aberinavo “?Jum̃abe ana naverloglogiano na tuboiano nalo ajum̃a aber jibe nei, aberinavo ‘Monoka mia Elaija naio rimei bereio tukamu vo, avona bisi ana mia Naverikariano nei naio mia riyotuba’?”
MAT 17:11 Ana Yesu berdop̃e banlo, berinavo “Tena ajum̃a aberverii na jibe nei, tena be riano ga na, bior Naverialiano Malakaia naio berenio jibe na ea kanano niosi ruei. Elaija monoka mia naio rimei tukamu, ka mia naio rila batitig vite nalo nonovio atu batitig ka mia Naverikariano nene naio mijikia rimei,
MAT 17:12 mia kiniou neber ka kamiu, neberinavo Elaija nene naio binimei ruei, mia tomu nalo maka avitilubar naio, a nalo maka asidomial naio. Mia ea ga bajago nene, mia ala lelan Kulorinio Kenerinio bunu tibe na.”
MAT 17:13 Ka bogo nei, kiano naiagagoano tolu nei miralo madulu ana nalo amijikia ka Elaija napano Yesu naio jom̃a beriio, naio be Jone Baruei ga.
MAT 17:14 Mia Yesu naliko nalo tolu nei aban bereio, naruei nalo amiabure tiniobi nalo napano ajua bogo na, naruei toro tai binimei minie tano ea Yesu jaano, ana naio berinavo
MAT 17:15 “Koig, jau kobijuku bo, kiniou nejidom jau tiniem riia keneriku m̃eaku, nejidom kajai naio, bior mieiano tai joa naio. Mieiano nene mila naio jom̃a miabulum̃arm̃aro va telabo, a mila lelan m̃eleia naio-o mia, mila naio jom̃a mijorutate ban ea sebi a ban ea uei nalo bunu.
MAT 17:16 Mia kiniou noburu naio binimei ban kanamo naiagagoano nalo ruei, amim̃aukanio bano-o, mia maka ajikia aim̃auka naio rivu.”
MAT 17:17 Ana Yesu naio mil ban kiano naiagagoano nalo, berinavo “?Kamiu na, jum̃abe jibe na? Kamiu maka kuvitu sikili ea Atua leleio, bogo nonovio ga m̃a kumiavovu. ?Mia kiniou monoka noto vija kamiu rivano-o mia rivokar nagi? Mia kiniou tinieku maro ruei ka kamiu. Mo, bo ga, kamiu kuvuru m̃eaku nene rimei van kiniou.”
MAT 17:18 Ana nalo aburu m̃eaku nene binimei, ana Yesu janka niadu napano joa naio, berinavo “!Komoluo den naio vonganei ga!,” ana vaarakurano ga m̃eaku nei naio binimei bo bereio.
MAT 17:19 Ana iorou ka bogo nene, bogo napano Yesu jo naio takurano, ana kiano naiagagoano nalo abinimei kean naio, abika denio aberinavo “?Jum̃abe ana kumemi maka nuvijikia nuvititiglar niadu napano joa m̃eaku na?”
MAT 17:20 Ana Yesu ber kalo, berinavo “Nina bior kamiu maka kuviekouo ea kiniou sikili rivare vo. Riano, kiniou neber ka kamiu, verenio kamiu kuviekouo ea kiniou ve kiritavaso leleio ga tavukia kurukuti burubako, mia verenio kenemiu viekouoiano na rive riano rivu, ana mia kamiu kumijikia kuver ka burum̃ara burusuku na, kuver ‘Kataluvo den vio na,’ mia naio taluvo. Mia maka titai ka mia kamiu kuvijikia re ka kamiu kuvilaio.
MAT 17:21 Mia ka natitiglariano na niadu nalo tibe nei, m̃arabo nene jibe nei: toro naio monoka rivolkouo, a naio rimodulu ka sano sinaniano. Ea bajago na ga, mia naio mijikia titiglar niadu ninio nalo na.”
MAT 17:22 Bogo tai ana Yesu naliko kiano naiagagoano nalo abinimei vio takurano ea vio Kalele, ana naio ber kalo, berinavo “Vaataro ka mia adu Kulorinio Kenerinio toa tomu nalo jum̃alo,
MAT 17:23 ka mia auetam̃aria naio rim̃aro, ana mia iorou kanio, bogoti ve tolu nene, ana mia Atua rila naio rimeul bereio.” Ana kiano naiagagoano nalo amijog iliano nei, nalo amijog bova toru laka.
MAT 17:24 Tilikiti napano Yesu naliko kanano naiagagoano nalo abinimei aboru Kapeneam, tomu nalo nam̃a abarbijii takis na Atua Kunuano Lu, nalo abinimei kean Pitere, abika denio, aberinavo “?Jum̃abe, kanamo naverloglogiano na naio jom̃a bulu takis na bunu, p̃elina makanio?”
MAT 17:25 Naruei Pitere berdop̃e, berinavo “Nao, naio buluio.” Naruei Pitere ban bereio ea yimo napano Yesu joaio, mia Pitere maka river iliano tai vo, ana Yesu naio mil jukamu banio, bika berinavo “Saimon, jau kosidomii von parinio tubo na yetemeriba nalo. ?Kulo be nalo napano m̃a ajum̃a abulu takis banlo? ?Nalo napano abe m̃aratavo, p̃elina kulo dolu nalo?”
MAT 17:26 Naruei Pitere berinavo “Tomu dolu nalo ga monoka avuluio.” Ana Yesu berenio “Nao, jibe na naruei, a nina berenio m̃aratavo nalo na parinio tubo nalo, maka ajikia avuluio. A kiniou naruei, nebe m̃aratavo na Parinio Tubo na Yimo Lu napano memedu, mia kiniou maka nejikia novulu takis na ajum̃a abika denso na.
MAT 17:27 Mia bo ka kito juo rala bulag re tomu nalo na ajum̃a abarbijii takis, mia kito juo bunu rovuluio bo ka ga. Mo, jau kavatove ea ueiyabo, ana kosuvan tap̃ig, mia niado nana mia kovuruio tukamu, mia keial puruveru tai ea niono, na bare ka kiado takis kito juo, mia kodu kava kovulu kanio.”
MAT 18:1 Ana memedu ka bogo nene, naiagagoano dolu nalo abinimei memedu ka Yesu, abika denio, aberinavo “Kumemi numisidom nuvijikia: ?Toro kei na mia naio jo mave loa tomu dolu nalo jouro ea Atua kiano navenatuboiano?”
MAT 18:2 Ana na Yesu bio kiritete tai ka rimei kean naio, naruei naio mila naio jumolu ju iviso kalo, ana naio ber
MAT 18:3 “Riano, kiniou neber ka kamiu memedu, verenio kamiu kuvilig re kamiu, ka kenemiu bajago nalo amei atavukia bajago na kiritete nei kiano, mia kamiu maka lele kuvijikia kumei jouro ea navenatuboiano na Atua kanano bogo tai.
MAT 18:4 Mia verenio toro na rila kanano jidomiano totano tavukia kiritete na telisu nei, mia naio mijikia rimei to mave loa, tovulu tomu dolu nalo nam̃a aju jouro ea Atua kiano navenatuboiano.
MAT 18:5 Toro na kiano jidomiano rivatove ka kiniou, mia naio saaro ka rive merevu van kiritete nalo na tertelisu na tai jibe na, nina jibe ka ga napano naio jom̃a jaaro ka kiniou.”
MAT 18:6 Mia Yesu berii bunu, berinavo “Mia verenio toro tai rila kiritete nei tai ka mia naio tuvan kiniou, riviekouo ea re bunu kiniou, mia toro nene naio rivokar vironiano na jikili laka tai. Verenio aiorikar puruveru na toru tai ea burujono, ana avukuio rivatove rimadudu ea bulu niogovu, nina naio be vironiano tai na monmaio ga, mia toro na naio rivokar rivan lie vo tovulu ninei.
MAT 18:7 !Banalo! Yetemeriba nei naio bova nonovio ruei, naio bujo ka saba nalo na ajum̃a amila lili tomu nalo ka mia m̃a nalo alaluvu kialo viekouoiano ea kiniou. Mia tiboliboiano nalo na mia atu iviso ka kamiu bogo nonovio, mia rivova laka van tomu nalo na abar tibol boiano va nalo na jibe na amei van kulo dolu nalo.
MAT 18:8 “A verenio jum̃amo, p̃elina jaamo, p̃elina miramo, p̃elina vite dolu venia bunu ea kiamo meuliano, verenio vite nalo nene tai rilaso koviekouo ea re bunu kiniou, bo ka jau ketelar vite nene denso, ana kovukuio rivano. A verenio jau ketelar bajago na kariano den kiamo meuliano tibe na, mia jau komijikia kava jouro ea meuliano, a verenio jau kava jouro ea meuliano napano jum̃amo, p̃elina jaamo, p̃elina miramo, p̃elina vite dolu venia bunu ea kiamo meuliano, verenio vite nalo nene tai rivakovio denso ruei, nina bo ga na. Mia bova laka ka verenio taniabemo momou vija kiamo bajago va momou atu rivu ga easo, mia karina avukuso kavan ea sebi na maka rijikia rivatove bogo tai ea vio na jogvaiano.”
MAT 18:10 Ana Yesu berii bunu, berinavo “Kamiu monokanio kuvitikar batitig kamiu rivu ka mia kamiu kuviakurano re ea kanaku kiritete nalo nei tai bogo tai. A ver makanio, ana mia kamiu kuvitikar kamiu, bior tete nalo nei abe kanaku, ana nalo abe kanalo nailiano nalo napano ajua vio mave, napano ajum̃a abitikar batitiglo, a nailiano nalo nene, nalo aju bogo nonovio ea Teta na joa vio mave mirano.
MAT 18:11 Naruei Kulorinio Kenerinio, kiano im̃auano jibe na ga: naio binimei ka rilarur nalo na amilaluvu m̃arabo.
MAT 18:12 “Kamiu kuviagago batitig ka tukunuano nei: Be toro tai napano be kiano nunu toromomou [100], mia nalo tai mila pariparinio ba koalabo, ana naio milaluvu m̃arabo. ?Mia toro nei naio rila tum̃abe naruei? Monokanio naio tuvan kiano nunu duelimo va koveri ba koveri [99] nalo nei, atu asinan ea vio na soro bo eaio, ana mia naio monokanio riva rila von ka sirag napano milaluvu m̃arabo a ba kovio tai.
MAT 18:13 Riano ga kiniou neber ka kamiu, bogo napano naio mileal bereio nunu nene, mia naio mijikia saaro m̃ele kanio, tovulu napano naio jaaro ka kanano nunu dolu nalo napano telabo aju bo ga, maka avarlaka m̃ele ka mia ava kovio tai.
MAT 18:14 “Mia karamemiu na vio mave, naio bunu jibe na, naio maka sidom ka kiritete nalo nei tai rilaluvu m̃arabo riva kovio.”
MAT 18:15 Ana Yesu berii bunu, berinavo “Avena kuruamo rila vite rimemedu re vanso, monoka jau kava keial naio, kam ve juo ga kuvitu, ana jau koverial kiano vijuku vovaiano nene ka naio. Avena naio saaro ka rijog kanamo iliano nalo, nina jibe ka kanamo iliano nalo amila merevuiano ban kamjuo bereio ruei.
MAT 18:16 Mia ver naio maka sidom ka riagago ka kanamo iliano nalo, monokanio jau kava kovuru bereio tomu dolu tai amei vijaso, ka aijaso ka kanamo iliano, tavukia napano Niosi Lu berenio, berinavo ‘Iliano nonovio monoka ve ilitusoliano na tomu ve juo p̃elina ve tolu, ka mia iliano nei tu sikili tu.’
MAT 18:17 Mia ver kuruamo neibano naio to riilkue ka riagago vatitig rivu kaso, mia monokanio jau koverial kanano siniabu van taara na namoneano nalo, ka nalo tealo amijikia amei aial naio. Mia ver naio jikili kia ga vo, ka naio riagago vatitig re ka nalo bunu, mia kamiu kuvial naio tibe ka valauo ga tai, p̃elina naio tibe ka tomu nalo napano ajum̃a abarbijii takis, maka tomu nalo ala bilbilu nalikolo leleio.”
MAT 18:18 Ana Yesu berii bunu, berinavo “Riano, kiniou neberii ka kamiu, mia verenio vite napano kamiu kuverbure ea yetemeriba nei, mia Atua na mave naio riverbureio bunu vija kamiu, mia verenio vite na kamiu kuvijamo ka ea yetemeriba nei, mia Atua na mave naio rijamo kanio bunu kamliko.
MAT 18:19 A bereio, kiniou neber bunu ka kamiu, neber verenio tomu ve juo ea kamiu, naljuo ala ilivirakariano tai ea yetemeriba nei ka titai, ana verenio nalo abolkouo riviorio, mia Karam̃aku na mave mia naio rila tenene vanlo.
MAT 18:20 Bior ver tomu ve juo p̃elina ve tolu avior vio takurano ea siaku, mia kiniou bunu noto iviso kalo.”
MAT 18:21 Naruei Pitere binimei mial Yesu, ana bika denio, berinavo “?Tubo, verenio kuruaku rila rivova van kiniou bogo nonovio, mia kiniou neviekokoa naio ve va vio? ?Monokanio riva rivokar ve va aluo, p̃elina jum̃abe?”
MAT 18:22 Mia Yesu berdop̃e banio, berinavo “Makanio, mia jau koviekokoa re naio rivokar ve va aluo ga, mia monokanio jau koviekokoa naio rivokar duelimo va aluo va aluo bereio [70 va 7].
MAT 18:23 Bajago na viekokoano jouro ea Atua kiano navenatuboiano, naio monokanio tibe ga na. Kamiu kuviagago ka tukunuano tai napano berii bajago na viekokoano napano berenio, berinavo: Parinio tubo tai, na naio jidom rivitii veve jabue nalo napano kiano tomu na im̃auano nalo amila jua naio.
MAT 18:24 Mia naio mila jibe na bano-o, na aburu kiano toro na im̃auano tai binimei ea naio, napano toro nei mila jabue na veru taam̃aka [1,000,000] vio ea kiano toro na toru nei.
MAT 18:25 Bogo napano abika veru den toro nei, ana naio berenio maka rijikia rivulu meran bereio jabue nene. Ana na toro na toru nei, naio ber ka kiano tomu nalo, berinavo ‘Mo, bo kanio kamiu kuvilalar naio, a kuṽiliṽili lario, ka naio ve toro na toru dolu kanano, naio riva rim̃au kurano ga ea naio. A aṽiliṽililar ka koano bunu, naliko kenerinio nalo, vija kialo saba nonovio, mo kuvar puruveru nene rimei ka avulu bulag ka kiano jabue nene togio.’
MAT 18:26 “Naruei na toro nei naio mijoru kamu ea kiano parinio tubo nei jaano, ana naio jegi jouo banio, berinavo ‘Jau kobe parinio tubo, koig, mia kiniou nabaleaso ka nejidom kodu bogo ve telisu bereio van kiniou beamu vo, ka mia nala von ka navulu nonovio jabue nei denso.’
MAT 18:27 Naruei parinio tubo nei tinienmiia toro nei, ana naio biekokoa nonovio kanano jabue nei, ka mia naio rivulu kean re bunu, ana naio juvan toro nene bano.
MAT 18:28 “Mia bogo napano toro nene naio bano, ana naio mial kiano bilbilu tai, napano bilbilu nene naio kiano jabue tai telisu ga jua naio. Mia naio ba bokar toro dolu nei, ana naio mikiti burujono, naio berkanio, berinavo ‘Monokanio jau kovulu bulag kanamo jabue na jua kiniou vonganei.’
MAT 18:29 Naruei kiano bilbilu nei naio mijoru ea jaano, naio mila mirano melumu kanio, jegi banio, berinavo ‘Koig, mia kiniou nabaleaso ka nejidom kodu bogo ve telisu bereio van kiniou beamu vo, ka mia nemijikia ka novulu nonovio jabue nei denso.’
MAT 18:30 Mia toro nei naio maka sidom riviekokoa kiano bilbilu neibano, naruei naio ba mila aburu naio ban ea nalakoiano, ka naio to rivano-o mia naio rivulu bulag nonovio jabue nei, karina naio mijikia taluvo bereio.
MAT 18:31 “Mia bogo na parinio tubo nei kiano tomu tealo amial bajago nei, nalo amijog bova toru kanio, ana na nalo aban ea kialo parinio tubo nei, aberial saba nalo nonovio ban naio.
MAT 18:32 Ana parinio tubo nene, naio bio kiano toro neibano ka naio rimei bereio ea naio, ana naio mil jikili banio, berkanio, berinavo ‘!Aa, jau kobe toro va kitkiti tai! Kiniou nebiekokoa nonovio kanamo burum̃ara jabue nanua ruei, bior kejegi toru ban kiniou kanio, ana mila kiniou tinieku miiaso kanio.
MAT 18:33 ?Mia jum̃abe ana maka kejikia tiniem riia bunu kiamo bilbilu dolu, tibe ka napano kiniou tinieku miiaso jukamu ruei?’
MAT 18:34 Ana parinio tubo nene naio tinien mimi lie vo, ana naio berinavo monokanio avuku naio riva toa nalakoiano, a monokanio nalo atu avar vironiano vanio-o, rivokar bogo na naio rivulu bulag nonovio kanano jabue nene.”
MAT 18:35 Ana Yesu naio berinavo “A verenio kamiu kuviekokoa re kuruemiu nalo tulaka ve riano, ea iviso na tiniemiu momou nalo, mia karam̃aku na mave naio tinien ser kamiu tibe na, mia naio sian vironiano tibe ga na van kamiu.”
MAT 19:1 Bogo na Yesu berenio iliano nalo nei bisi, ana naio juvan vio Kalele naio bavin tivelinio ea tanobuku na vio Yutea, ea m̃arauei na Yortano tivelinio bano.
MAT 19:2 Ana tiniobi toru ajakisorio ka bogo na, mia ea vio na naio mila batitig tomu na mieiano nalo telabo abo bereio.
MAT 19:3 Mia Varisis nalo tai bunu ajua vio na, nalo abinimei amial Yesu ka ajidom ala von naio bereio, ana abika vikadeniano tai denio, aberinavo “?Kiado tuboiano berii vaio tivelinio ka bajago na toro mijikia titiglar koano? ?Memedu ga ka toro mijikia rila tibe na kar vite ninio ga, p̃elina mijikia rila kar ga vite na tortoru ga tai?”
MAT 19:4 Ana Yesu berdop̃elo, berinavo “P̃eli kamiu maka kuvijikia Atua kiano Iliano Lu na naio berenio, berinavo ‘Tikariano, Atua naio jii vite nonovio, a naio jii bunu kulorinio juo, napano tinene be sum̃ano a tinene be tira.’
MAT 19:5 Tena kamiu kumijikia ruei, bija bunu iliano dolu na napano berinavo ‘Tibe na, toro tai rivuro den karam̃ano naio kenieno, riva rivijurukar koano, mia naljuo ave takurano.’
MAT 19:6 Nina mila ana maka bunu ave juo, mia nalo abinimei abe takurano ga. Naruei vite napano Atua naio birokario, maka rivu ka kulorinio rilakorovio bereio.”
MAT 19:7 Ana Varisis nalo nei amijog iliano nei, ana nalo abika den Yesu bereio, aberinavo “?Bo ga, ana jum̃abe na Mosis naio berial tuboiano na jamoiano ka mia toro mijikia rudu m̃esi na silubariano tai rije van koano, ka mia naio mijikia titiglar naio rivano?”
MAT 19:8 Ana Yesu berdop̃elo, berinavo “Ee, ana mia beamu ka bogo na tiiano na yetemeriba naio maka tibe na, mia bior kamiu pariparimiu nalo binimei kirisikili laka, tenene na mila ana Mosis mijamo kanio jikar ea korobimiu nalo binimei, ka kamiu kumijikia kuvila titiglar kouemiu nalo tibe na.
MAT 19:9 Mia vonganei, kiniou neberii ka kamiu, ka verenio toro tai, koano naio rila siakaiano, mia toro nene mijikia rila titig koano nene. Mia verenio tira nene naio maka rila siakaiano, mia kiano sum̃ano nene naio titiglario, ana naio riva rivuru tira dolu, ver tibe na, Atua naio mial jibe ka toro nene naio mila siakaiano bija tira dolu nene ruei, naio milakiki tira nei napano be koano jukamu.”
MAT 19:10 Ana Yesu kiano naiagagoano nalo aber ka naio, aberinavo “Ver bajago na soriano jikili laka jibe na, bo laka ka kito rala re bunu soriano ka kito.”
MAT 19:11 Mia Yesu ber kalo, naio berinavo “Nao, be riano ka napano be tomu tealo napano mia asoro re bogo tai, jibe ka napano tealo amiyotuba mia niabele nalo abova, p̃elina tealo napano amila bulag niabele nalo, jibe ka napano ajivivi nalo, naruei nalo maka ajikia asoro. Mia tomu tealo maka asoro bior ka napano nalo ajuvan soriano ga ka amim̃au jikili ka Atua kiano navenatuboiano. Mia Iliano Lu naio berinavo bo kanio sum̃ano a tira, ave juo asoro, a bo ka nalo ve juo atu rivu vija naljuo rivokar jukuti na kialo meuliano nalo ve juo. Mia jau napano jau kajaaro ka iliano nei, a napano jau komial ka napano Atua naio mila jibe na banso ruei, mia bo ka kovokar sikili iliano na ea kiamo meuliano.”
MAT 19:13 Naruei nalo tai aburu kenerilo nalo abinimei ea Yesu, ka naio rudu jum̃ano toalo, a ka rivolkouo kalo. Mia kiano naiagagoano nalo amialio, ana nalo amil jikili ban tomu nalo nei, aberburelo,
MAT 19:14 ana Yesu berii kalo, berinavo “Kamiu kuverbure re kiritete nalo nei, kamiu kuvituvanlo amei ea kiniou, bior kiritete nalo na nalo ajavukia nalo napano aju jouro ea navenatuboiano na Atua kiano.”
MAT 19:15 Ana naio midu jum̃ano joa kiritete nalo nei, iorou kanio, ana naio miel bano.
MAT 19:16 Ka bogoti dolu tai, m̃eaku tai binimei mial Yesu, ana naio bika denio, berinavo “?Naverloglogiano, mia monokanio kiniou nala im̃auano novo na vabe, ka napano mia rila kiniou nemijikia nejev meuliano na jo jobo jo?”
MAT 19:17 Ana Yesu berkanio, berinavo “?Jum̃abe ana kobika den kiniou jibe na, ka never im̃auano na bo tai vanso? Atua ga takurano naio bo, a verenio jau komonmonea kiano tuboiano nalo, ana mia jau komijikia kejev meuliano na bo nene.”
MAT 19:18 Ana na m̃eaku nei naio bika denio bereio, berinavo “?Ana jau kojom̃a koberii tuboiano nalo na vabe na?” Naruei Yesu berii kanio, berinavo “Tuboiano nalo nene nei naruei, napano aberinavo: jau kouebin re toro, jau kesiaka re siakaiano, jau kovina re,
MAT 19:19 jau kala sibi re, jau kotovon karam̃amo naio koniomo, mia kosidom tomu nalo napano aju vaataro kaso, jau kovitikar vatitiglo, tibe kanio napano jau kobitikarso.”
MAT 19:20 Ana m̃eaku nei naio ber ka Yesu, berinavo “Tuboiano nalo napano jau kojom̃a koberenio na, kiniou nojom̃a nobokario nonovio ruei. ?Mia vite venia bereio napano naio jo kiano vo, napano kiniou maka nalaio vo?”
MAT 19:21 Ana na Yesu berdop̃e banio, berinavo “Verenio jau kosidom ka komei komemedu rivu batitigio, rivare ka meuliano na jo jobo jo, mia jau kala tibe nei: jau kavano, koṽiliṽili bulagio ka kanamo saba nalo nonovio riviniu, ana mo jau kavar puruveru nene, kava kovioa ka talim̃asa nalo. Verenio jau kala tibe na, mia ve kanamo togogo novo ve toru ea vio mave. Mo, jau, kava kalaiio, karina jau komei katakisor kiniou.”
MAT 19:22 Mia bogo napano m̃eaku nei naio mijog iliano nei, mia kiano iviso mijog bova toru, kiano jidomiano temi, bior naio kiano saba toru laka. Ana naio jaluvo den Yesu.
MAT 19:23 Naruei Yesu ber ka kiano naiaga-goano nalo, berinavo “Riano, kiniou neber ka kamiu, verenio toro tai na kiano saba toru, mia naio sidom riva jouro ea navenatuboiano na Atua kiano, mia vite nene naio kirisikili kija na.
MAT 19:24 Nao, kiniou neber ka kamiu, verenio kamele tai naio riovo dulu ea bulu mirano nitil, nina kirisikili kija, mia verenio toro tai napano kiano saba toru, naio jidom ka riva jouro ea navenatuboiano na Atua kiano, nina kirisikili laka lie vo.”
MAT 19:25 Mo bogo napano naiagagoano nalo amijog iliano nei, nalo amiilo toru kanio, ana nalo aberinavo “?Tomnei, verenio tibe na, ana mia kei naio mijikia rijev meuliano nei?”
MAT 19:26 Mia Yesu jirarag bitikarlo, ana naio berinavo “Nao, riano ka kulorinio maka rijikia rila kulorinio rijev meuliano nei, mia Atua ga naio mijikia rila vite nalo nonovio.”
MAT 19:27 Naruei Pitere berdop̃e, berinavo “?Mia jum̃abe ka kumemi? Kumemi numituvan kenememi saba nalo nonovio ruei, ana kumemi nubinimei ka nuvitakisorso. ?Mia kumemi nuvijev kija vite nalo na abo tai, p̃elina makanio?”
MAT 19:28 Ana Yesu ber kalo, berinavo “Riano ga kiniou neber ka kamiu, bogo napano verenio Kulorinio Kenerinio totano ea kiano burum̃ara jobaro lu ea yetemeriba vou nene napano mia rimei, kamiu napano kamiu kumitum̃a kumitakisor kiniou vonganei, mia kamiu kuvitutano ea burum̃ara jobaro duelimo vaarakurano ba juo [12] ka kuve boru ka bajulukuti duelimo vaarakurano ba juo [12] na Israel, tibe ka kialo parinio tubo nalo.
MAT 19:29 Mia toro na verenio tuvan kunuano, p̃eli kuruano p̃elina kuvivinieno, p̃elina karam̃ano p̃elina kenieno, p̃elina kenerinio, p̃elina kiano borotano, mia verenio naio tuvan vite nalo nei rivior kiniou ga, mia naio mijikia rivar meran bereio ea yetemeriba nei, vite nalo napano juvanlo ruei, riva rivokar ve va duelimo toromomou, mia mave ka mia naio rijev meuliano na jo jobo jo.
MAT 19:30 “Mia tomu nalo telabo na aju mave, mia nalo atu tano, a tomu nalo na ajutano, mia nalo atu mave.”
MAT 20:1 Ana Yesu naio jo mil dolu ka ga bano, ana naio berinavo “Vite na kiniou neber vonganei, naio jibe ka bajago na Atua jom̃a mila ban tomu nalo na aju jouro ea kiano navenatuboiano. Mia kiniou never vite nei van kamiu ea jamerijiano tai, napano jibe ka: Toro na toru tai, napano naio be boru ka jiotilikrevi na toru tai. Mia kavijo tai, viomijeni mermeravo vonga, ana naio ban ea m̃arkomeli tai ka naio rivuru tomu tai ka ava aim̃au ea kanano jiotilikrevi ka legiano nei.
MAT 20:2 Naio mial tai, ana naio berkar banlo ka puruveru tai na naio bare ka im̃auano na legiano vodolu tai, ana naio miila bulaglo ka ava aim̃au ea kiano jiotilikrevi nei.
MAT 20:3 Mia ka m̃erenio kover, ana naio ban bereio ea m̃arkomeli nei, ana naio mial tomu nalo dolu bereio, aju kurano ga, maka ve kialo im̃auano,
MAT 20:4 naruei naio ber kalo, berinavo ‘Bo ka kamiu bunu kumei kuvim̃au kija ea kanaku jiotilikrevi, mia kiniou novulu kamiu rimemedu ga.’
MAT 20:5 “Naruei nalo nei aba amim̃au, ana iorou ka bereio, napano leri, a ea m̃erenio tolu kijev bunu, toro na toru nei naio ba buru tom tai ka aim̃au kanano tibe na.
MAT 20:6 Mia bogo tai bereio, ka m̃erenio jumo kijev ruei, ana naio ban bereio ea m̃arkomeli nei, ana naio mial tomu tai aju kurano ga ea vio nei kia ga vo, naruei naio ber kalo, berinavo ‘?Ka venia ana kamiu kumitu kumilakule legiano momou nei ea vio na, maka kuvim̃au tai?’
MAT 20:7 “Naruei nalo nei aberdop̃e, aberinavo ‘Ana maka toro tai rimei rivio kumemi ka nuva nuvim̃au kanano tai.’ “Naruei toro na toru nei naio ber kalo, berinavo ‘Mo bo ga, ver tibe na kiniou novuru kamiu bunu. Kamiu, kumei kuvim̃au kanaku.’
MAT 20:8 “Mia kijev laka, ana toro na toru nei naio ber ka kiano boru na im̃auano, berinavo ‘Mo bo ga, jau kovio tomu na im̃auano nalo na amei, ana mo jau kovululo. Mia jau kala tibe nei: ketikar ea nalo na ajikar amim̃au iorou, rivano-o rivokar nalo na abinimei ajikar amim̃au jukamu kavijo.’
MAT 20:9 Mia bogo na nalo na ajikar amim̃auka m̃erenio jumo abinimei, ana toro na naio bululo bare ka legiano takurano momou na im̃auano.
MAT 20:10 Mia bogo na nalo napano amim̃au jukamu abinimei ka avar kialo puruveru, aberiam̃a mia nalo avar rivavin tovulu nalo napano amim̃au ka bogo bulati ga, mia boru nei bar kialo vuluano banlo beverare ga.
MAT 20:11 “Mia bogo na nalo amial kialo puruveru jibe ga na, mia nalo aju abar lele kuluniolo, aju amil mum̃i die toro na toru nei.
MAT 20:12 Ana nalo amiila nalo tai ba bika denio, berinavo ‘Nalo napano abinimei vonganei, amim̃au ka aura takurano ga, mia kumemi numim̃auka legiano momou ea burutinianio nei. Mia kumemi numialio kobululo be verare ga ka kobulu kumemi. ?Vite na jum̃abe na?’
MAT 20:13 “Mia toro na toru nei naio berdop̃e banio, naio ber ‘Koig, kiniou maka nala lelanso. Kito juo robirokar jukamu ruei, roberenio mia jau koim̃au legiano momou ve takurano nei, mia kiniou novuluso rimemedu kanio.
MAT 20:14 Mo verenio tibe na, ana bo ka kodu puruveru na be kanamo ana kava vonuo ga. Nina be kiaku jidomiano tai jibe na naruei, ka puruveru na nemijev banso, kiniou nejidom nejev van nalo na abinimei maaro bunu tibe na.
MAT 20:15 ?Jau koberiam̃a mia kiniou maka nejikia nala tibe ka napano kiniou nejidom ka kanaku puruveru? ?Jum̃abe ana jau komijoku ka tomu nalo na kiniou tinieku miialo?’ Ana jamerijiano nene maaro ea vio na.”
MAT 20:16 Ka Yesu rila nonovio kiano iliano nalo nei, naio berinavo “Ana tomu nalo napano nalo iorou, mia nalo atu kamu, a nalo napano aju kamu, mia nalo iorou.”
MAT 20:17 Ana Yesu naio jo bavin ea vio Yerusalemo naruei, ana bogo napano nalo aju amiel ea m̃arabo ka abano, ana naio bio kiano naiagagoano duelimo ba juo [12] nalo abinimei ea naio, naruei naio mil banlo, berinavo
MAT 20:18 “Kamiu kuviagago vatitigio. Vonganei, kito roju rabavin ea vio Yerusalemo, ka mia vesiou re ga, ana adu Kulorinio Kenerinio toa parinio kulo lu nalo jum̃alo, a tomu na verloglogiano na tuboiano, ka mia atibure naio ka mia aver naio monoka rim̃aro.
MAT 20:19 Karina mia adu naio toa kulo Romo nalo jum̃alo, ka mia ayotel va ea naio, avitiv naio, mia atukukakar naio ea m̃akolkolo ka mia naio rim̃aro. Mia bogo napano naio rim̃aro ribisi, bogoti ve tolu nene, ana mia Atua rila naio rimeul bereio.”
MAT 20:20 Naruei Sepeti koano, naio buru kenerilo abe juo Yemesi naio Jone, abinimei ea Yesu. Naio minie yetano kamu ka Yesu jaano, naio bika denio, berinavo “Kiniou nejidom kajamo ka titai van kiniou.”
MAT 20:21 Mia Yesu berdop̃e ban naio, bika denio “?Jau kojidom kovika vaio?” Mia tira nei naio berinavo “Kiniou nejidom verenio bogo na mia jau kovitirilar kanamo navenatuboiano, mia kenerimemi juo nei amijikia atutano vijaso ea kanamo vio lu na jo mave laka, ka mia tinene totano tivelinio vameruo, a tinene totano tivelinio mal.”
MAT 20:22 Mia Yesu berdop̃e banlo, berinavo “Kamiu maka kuvijikia tena mia kuvitum̃a kuvikanio na. ?Jum̃abe, kamjuo kuber kubare ga ka romunu bitiran ea baja na jaleleano na mia kiniou monokanio nomunu eaio?” Ana naljuo nei aberinavo “Ee, kumemi juo nubare.”
MAT 20:23 Mia Yesu naio berii ka tomu juo nei, berinavo “Mm, be riano ka kamjuo bunu kumunu ea kanaku baja na jaleleiano nene, mia tena kamjuo kubikanio na, ka mia kamiu kuvitutano rivija kiniou ea jum̃aku ve juo, nina maka ve kanaku ka mia nesian van kamjuo. Vio nalo na jibe na, abe nalo na ga karam̃aku mila batitig ruei ajurorealo, kanio napano naio berkar ruei banlo berii mia nalo atutano eaio.”
MAT 20:24 Bogo napano naiagagoano duelimo [10] dolu nene amijog vite na, mia nalo tiniel jer kurualo juo [2] nei.
MAT 20:25 Naruei Yesu biolo ka amei ea naio ka naio ril vanlo, naruei naio berinavo “Kito romijikia ruei bajago na tomu nalo napano maka amonea Atua. Kito romial tubo nalo bija tomu na tortoru na yetemeriba nei, nalo ajidom avututua kulo dolu nalo ka atutano kalo tulaka ga.
MAT 20:26 Mia kamiu kiaku naiagagoano nalo, kenemiu bajago tibe na re. Verenio kamiu tai sidom ka naio rimei ve toro na toru p̃elina naio rive kenemiu navurim̃araboiano, mia m̃arabo nene jibe nei: monokanio toro nene naio rimei tibe ka toro na rim̃au kenemiu tai.
MAT 20:28 Kulorinio Kenerinio naio mila jibe naruei, ka naio maka rimei ka mia tomu nalo ala im̃auano na ka mia aija naio, mia naio binimei ka rila im̃auano na ka mia naio rijailo, a kanio rijamo ka kiano meuliano ka rivulu bulag tomu nalo ve telabo.”
MAT 20:29 Ka bogo nene Yesu naliko kiano naiagagoano nalo aju Jeriko, mia bogo napano nalo ajaluvo den komeli na, mia tomu nalo telabo laka ajakigsorlo.
MAT 20:30 Naruei merebono juo, napano nalo ajutano ea ikim̃arabo. Mia bogo napano naljuo amijog ka tomu nalo aju amiolu juva aberinavo Yesu jo miel ea m̃arabo binimei, ana na naljuo abio jouo, aberinavo “!Tubo o, jau Teviti kiano bajulukuti, kumemi juo numisidomso tiniem riia kumemi!”
MAT 20:31 Naruei tomu nalo amil jikili banlo, aberinavo “Kuvuetuba re, tomjuo.” Mia tomjuo nei abio dolu ka ga, nalo abio jouo mave aberinavo “!Tubo, jau Teviti kiano bajulukuti, tiniemriia kumemi juo!”
MAT 20:32 Ana na Yesu naio jikil ju m̃arabo, ana naio bio tomjuo nei, naio ber kalo, berinavo “?Tomjuo, kamiu kumisidom ka kiniou nala tum̃abe ka kamjuo?”
MAT 20:33 Ana naljuo nei aber kanio, aberinavo “Tubo, jau kobijuku bo, kumemi juo numisidom ka mirememi rivu, ka mia nuvijikia ka nuvisirarago.”
MAT 20:34 Ana na Yesu tinien miialo, ana naio jokol tomu juo nei miralo, vaarakurano nalo amial vite nalo ea bogo nei, ana nalo ajumolu ajakisor Yesu abano.
MAT 21:1 Vonganei, Yesu nalo aju abinimei vaataro ka Yerusalemo naruei, mia beamu kanio nalo amaluvo ea m̃arkomeli tai, siano Petevas, napano naio joa suku na aberii Suku Na Buruolivi. Naruei Yesu miila kiano naiagagoano naljuo nei, berinavo
MAT 21:2 “Kamiu kuvan ea m̃arkomeli yako, mia verenio bogo na kamiu kuva jouro eaio, mia kamiu kuvial togki tai amiadikario ju, naio ju bija kirikiti. Ana kamiu kuvijubar lario, ana kuvurulo amei van kiniou ea vio nei.
MAT 21:3 Avena verenio toro tai ril van kamiu kanio, mia kamiu kumijikia kuverii kanio, kuverenio ‘Kiado tubo naio jidom temeul juo nei ka ala kiano im̃auano tai’ ana bogo napano kamiu kuver iliano nei, mia ve vaarakurano ga naio mijikia tuvan temeul juo nene van kamiu.”
MAT 21:4 Tena miyotuba jibe na ka rila iliano na naverialiano naio beriio nua ruei rimei rive riano, napano naio berenio, berinavo
MAT 21:5 “Kamiu kuvio ka kulo Saion nalo, kuverinavo ‘Kuvialio, vonganei kenemiu parinio tubo naio jo binimei ea kamiu. Naio be toro tai napano kiano jidomiano melumu batove ga, mila naio midu togki ga, togki tai napano telisu ga, napano naio be tete kia ga vo.’”
MAT 21:6 Naruei kiano naiagagoano juo nei abano, amila jibe ka napano Yesu berenio.
MAT 21:7 Ana bogo napano naljuo aburu togki nei bija kirikiti abinimei, naruei nalo abisi kanalo kulukoti ea togki juo nei taakalo, mia Yesu naio ba jotano mave ea na telisu nene.
MAT 21:8 Mia tomu nalo telabo abisi kanalo kulukoti nalo ea m̃arabo labo, a nalo tealo aje kokorov m̃am̃ali abar abinimei abue ka Yesu kiano togki mijikia riel ealo. Tibe na, jibe ka nalo amila ka nalo avatove ka Yesu, tibe kanio naio be parinio tubo na toru tai.
MAT 21:9 Ana nalo aju amiel ka ava jouro ea vio Yerusalemo, ana tiniobi toru aju kamu ka Yesu bija nalo na ajakisor naio, nalo aju abiovio jouo jibe nei, aberinavo Aiou bo mia bo laka “!Kito ravamenea naio napano be Teviti kiano bajulukuti nei! Atua Sop̃i, jau keilivu ka ninei napano naio binimei ea siamo. Kamiu napano ea mave laka, kamiu bunu kuvilivu ka naio.”
MAT 21:10 Mia bogo na Yesu naio ba jouro ea vio Yerusalemo, ana tomu nalo tinielo mudulo, amila iliano telabo, nalo aju abivika denlo aberinavo “?Toro na naio be kei?”
MAT 21:11 Mia nalo napano abinimei bija Yesu aberdop̃elo jibe nei, aberinavo “Nina naio be naverialiano napano naio maluvo ea m̃arkomeli na Nasarete ea vio Kalele, na naio siano Yesu.”
MAT 21:12 Ana na Yesu bavin ea Atua kunuano Lu, ana bogo nene naio mial ka be tomu telabo napano ajua m̃arsup̃iki na yimo nene. Nalo na ajum̃a amila im̃auano na avuru veru, nina ea tivelinio ea ijaiano a sida nalo na ea Yimo Lu nei, mia nalo ajum̃a amijukubin tomu nalo toru. Mia bogo na Yesu mial vite nei, naruei naio maka saaro ka leleio. Naruei naio ba mijil bulaglo, a naio javu bulag kialo barobaro nalo napano ajum̃a abar bereverei ka puruveru eaio, a naio buku bulag kanalo iesi nalo nam̃a ap̃iliṽili ka sibo.
MAT 21:13 Naruei naio berii kalo, berinavo “Atua naio berenio ea kiano Iliano Lu, naio berinavo ‘Mia averenio Kunuaku Lu naio ve yimo na volkouano,’ mia kamiu kubilig lario ruei binimei be buluvae na tomu na vinauano nalo.”
MAT 21:14 Naruei bogo na Yesu naio joa kia ga Atua Kunuano Lu nei vo, ana tomu na miralo bono a tomu na jaalo be kiri kokouro a javuluku milalo nalo abinimei ea Yesu, naruei naio milalo abo bereio.
MAT 21:15 Mia tomu na tortoru na kulo lu nalo kialo, naliko naverloglogiano na tuboiano nalo, amial Yesu kiano im̃auano novo nalo nei, a amijog bunu kiritete nalo ajum̃a abiovio kia ga vo, aberinavo “!Bo mia bo! !Kito ravamenea naio napano be Teviti kiano bajulukuti tanie!,” naruei tomu nalo na tortoru nei tiniel mimi toru.
MAT 21:16 Nalo tiniel mimi jibe na, ana aber ka Yesu, aberinavo “?Ei jum̃abe, jau komijog iliano nam̃a ajum̃a aberenio na?” Naruei Yesu naio berdop̃e banlo, berinavo “Ee, kiniou nomijogio kiana. Ana kiniou nemialio jibe ka maka leleio kamiu kuvuluku Iliano Lu na Atua kiano napano naio berenio, berinavo ‘Atua o, mia jau komijikia kala kiritete nalo, vija nalo na amidomudomu kia ga vo, avameneaso rivu.’”
MAT 21:17 Naruei Yesu juvan nalo na, ana naio ban ea m̃arkomeli na telisu na Betani, naio ba monmelio ea vio na.
MAT 21:18 Mia Yesu monmelio ea vio na, mia viomijeni kavijo, ana naio jidom ka rivan bereio Yerusalemo, mia naio jo miel ban jibe na, mia naio mijog jijerio.
MAT 21:19 Ana naio mial buruviki tai ju ikim̃arabo, m̃ati telabo, mia maka m̃arati tai tuaio. Bior maka ve m̃arati tai tibe na, ana Yesu mil ban buruiesi nei, naio berinavo “Jau katakou re bunu bereio.” Mia bogo napano naio mil jibe na, vaarakurano ga buruviki nei naio mekekeu menoko nonovio.
MAT 21:20 Ana kiano naiagagoano nalo amial buruviki nei naio menoko jibe nei, ana nalo amagmagodu toru, ana nalo abika den Yesu, aberinavo “?Vaio mila buruviki na menoko sop̃eli jibe na?”
MAT 21:21 Naruei Yesu berdop̃e berii kalo, berinavo “Riano ga kiniou neberii ka kamiu, verenio kamiu kuvitu sikili ea kiniou, ka mia kenemiu jidomiano riveve juo re, mia kamiu bunu kumijikia kuvila tibe na, mia kamiu kumijikia kuvila bunu nana mave lie vo ka ninei. Verenio kamiu kuver ka burum̃ara suku na, ka naio tumolu tabujo rivan ea tei, mia naio rila tibe na.
MAT 21:22 Mia verenio kamiu kuvitu sikili ea Atua, ka mia kamiu kumonea riano, mia kamiu kumijikia kuvijev vaio napano verenio kamiu kubolkouo, kuvikanio.”
MAT 21:23 Mia bogo na Yesu ban bereio jouro ea burusio na Atua Kunuano Lu, naio ba jo berloglog tomu nalo bereio. Mia parinio tomu na tortoru na kulo lu nalo bija navurim̃araboiano na Israel abinimei ea naio abika denio, aberinavo “?Jau kojom̃a komila saba nalo na ea kei siano? ?A kei naio mijamo ka banso ka jau kala tibe na?”
MAT 21:24 Ana Yesu berdop̃e berii kalo, berinavo “Mo kiniou bunu nejidom nevika vikadeniano tai bunu den kamiu. Ver kamiu kuverdop̃e kanaku vikadeniano, ana mo mia kiniou neverialio ka kamiu ka kei napano naio mijamo ka kiniou ka nala saba nalo nei.
MAT 21:25 Mo kanaku vikadeniano jibe nei: ?Varueiano na Jone naio mila ban tomu nalo nanua, naio be tena Atua jian ban Jone ka naio mijikia rila, p̃elina tomu nalo ga aber kanio?” Yesu kiano vikadeniano mila nalo abilvilii ealo kanio, mia aberenio “?Mia kito rover tum̃abe ka naio? !Rovitikario! Verenio kito rover varueiano na Atua naio berii ka Jone, monokanio mia toro nei naio rivika kito river jum̃abe ana maka romonea Jone.
MAT 21:26 Mia maka rejikia rover varueiano na tomu nalo ga aberii ka Jone, ver tibe na p̃eli mia tomu nalo na mia nalo ala titai ka kito kovio na, bior nalo amonea Jone ruei ka aberenio naio be Atua kiano Naverialiano riano tai.”
MAT 21:27 Kialo jidomiano nalo jibe nei mila na nalo amiolu aber ka Yesu jibe nei ga, aber “Kumemi maka nuvijikiaio.” Naruei Yesu berenio “Mo bo ga, mia kiniou bunu maka nejikia neverial ka kamiu ka kei naio mijamo ka ban kiniou ka nala saba nalo nei.”
MAT 21:28 Ana Yesu berii bunu kalo, berinavo “Kamiu kuvisidomii von tukunuano nei. Toro tai kenerinio sum̃ano juo, naio berii ka motoru nene berenio ‘Keneriku, banei mia jau kava koim̃au ea kiado jiotilikrevi.’
MAT 21:29 “Ana tete nene naio berdop̃e berenio ‘Eau. Kiniou maka nosidomio.’ Mia iorou kanio, kiano jidomiano biligio, ana naio ba mim̃au jibe ka napano karam̃ano berkanio.
MAT 21:30 “Mia karam̃alo nene naio jo jidomii berinavo mia kenerinio nei mia naio rivan re, naruei naio ba mial kenerinio maratoru nene, naio berenio iliano nei ban naio, naruei kiritete nei berdop̃e kirinovo ban naio berinavo ‘Bo ga, teta.’”
MAT 21:31 Ana Yesu bika denlo, berinavo “?Naljuo nei, na vabe nene naio mila jibe ka na karam̃alo jidomio?” Nalo aberdop̃e aberinavo “Motoru.” Ana Yesu berii kalo, berinavo “Tenene na. A riano kiniou neber ka kamiu, tomu na bova nalo jibe ka tomu na abarbiji takis, bija tire nalo na m̃arabo nalo, nalo naruei aju abinimei jouro ea Atua kiano navenatuboiano, aju abiliglo ruei, mia kamiu kumitu iorou maaro kalo ga ruei.
MAT 21:32 Bogo na Jone Baruei naio binimei nei, berloglog kamiu ka bajago na m̃arabo na memedu, mia tomu na bova nalo nei amonea naio. Mia kamiu bunu, kamiu kumial vite nalo nei, mia maka leleio kuvilig kamiu ve riano, ka kumonea naio leleio.”
MAT 21:33 Mia Yesu mil kia ga vo, naio berenio berinavo “Kamiu kuviagago rivu ka jamerijiano dolu tai, napano berii toro na toru tai, bija kanano jiotilikrevi tai. Toro nei mila batitig kiano vio nei, mila siokoa tai jeriko nonovio jeliviv, a naio mim̃auka kanano vio tai ka rivie bulag vati m̃arkrevi, a naio mim̃auka bunu kanano burutili yimoliu tai ka avieii avavin atu mave ka asirarag kuku ka jiotilikrevi nei. “Mia bogo tai, ana toro na toru nei naio jidom riel kiki kija rivan ea buruvenuo dolu, ana naio juvan kanano jiotilikrevi ban kulo dolu nalo tealo, ka mia amei aim̃au eaio, ka mia avulu van naio.
MAT 21:34 Naruei toro na toru nei naio ba jo laka o-o, karina naio mial ka vonganei bogo na m̃arati krevi meruo naruei. Ana naio miila kiano tomu tealo ka avan bereio ea nalo napano ajua jiotilikrevi na kanano nei, ka avar puruveru na krevi nalo nei togio napano tomu dolu nei monokanio avulu vanio kanio.
MAT 21:35 Mia bogo na kanano tomu nalo nei abinimei, tomu dolu nalo neibano amuelo, napano mia nalo tai abitivio, dolu nene ajukubin naio m̃aro, a dolu bereio ajubabinio ka puruveru m̃aro.
MAT 21:36 “Mia toro na toru nei naio miila kiano tomu dolu nalo bereio nalo telabo kija, mia nalo nei amila bere ga bajago nei kalo bereio.
MAT 21:37 Naruei toro na toru nei naio jo jidomii m̃elea kialo bajago nam̃a ajum̃a amilaio, ana naio berenio, berinavo ‘Monoka kiniou neiila keneriku garuei rimemedu ka naio rivano, monoka mia nalo avatove ka naio,’ ana naio miila kenerinio bano.
MAT 21:38 “Mia bogo napano nalo amial naio, nalo aju aberverii kalo aberinavo ‘Nina naio be toro na toru kenerinio na kito rava roue bin naio rim̃aro, ka mia romijikia rodu jiotilikrevi na, mia rudu tibe ka karam̃ano kiano jajum̃ano ve kanado.’
MAT 21:39 Naruei nalo abano aba kakario kirisikili ana aburio ba tavio ka jiotilikrevi nei ana nalo amuebinio m̃aro.”
MAT 21:40 Naruei Yesu bika berinavo “?Bogo napano toro na toru na jiotilikrevi nei naio rimei bereio, mia naio rila tum̃abe ka nalo na ajum̃a amim̃au ea kanano jiotilikrevi nei?”
MAT 21:41 Nalo aberdop̃e banio, aberinavo “Kulo va nalo na, mia toro na toru nei naio ruebinvinlo, am̃arm̃aro sel ea bajago na jogdedeiano tai. Iorou kanio, ana mia naio rudu kiano jiotilikrevi toa kulo dolu nalo jum̃alo, ka mia amijikia avulu van naio rimemedu ka bogo nene.”
MAT 21:42 Naruei ana Yesu berii kalo berinavo “Ea Iliano Lu tai napano Atua kiano, be iliano tai jibe nei napano naio berenio ‘Puruveru na, tomu na amila yimo aberenio naio bova abukuio ban ruei, mia vonganei puruveru nene naio binimei be puruveru na bo tai ka bokar sudu na yimo ka rudukar yimo sikili rivu. Tena Atua na jo mave laka naio milaio, mia kumemi numialio bo laka.’ “?Mia kamiu iliano nei kamiu kubuluku bogo tai ruei p̃elina makanio vo?”
MAT 21:43 “Mia kiniou neberii ka kamiu, mia Atua rudular kiano navenatuboiano den kamiu, ana mia naio rudu van kulo dolu nalo na kialo meuliano nalo amijikia avar m̃arati novo nalo rivare ka mia amijikia atu jouro eaio.
MAT 21:44 Mia verenio toro tai rijoru ea puruveru nei, mia puruveru nene tiviniegeniege niabene, rivurboṽeio, p̃elina verenio puruveru nei rijoru mave ea toro tai, mia puruveru nene tuba kitkiti toro nene mia rim̃akitkit vatitigio.”
MAT 21:45 Mia bogo napano kulo lu nalo nei naliko Varisis nalo amijog Yesu kiano jamerijiano nalo nei, mia nalo amijikia ka naio jo beriilo ga.
MAT 21:46 Mia bogo napano nalo ajidom ka avokar naio, mia nalo amerou ka tomu nalo, bior tomu nalo amonea naio ruei ka naio be Atua kiano Naverialiano tai.
MAT 22:1 Naruei, Yesu mil ka jamerijiano banlo bereio, naio berinavo
MAT 22:2 “Atua kiano bajago na jom̃a bio tomu nalo ka amei jouro ea kiano navenatuboiano, naio jibe nei: Parinio tubo tai napano naio mila batitig sinaniano na toru tai ka rila jokoluolu na soriano ka kenerinio.
MAT 22:3 Naio miila toru ka tomu nalo telabo ruei ka atu rorea ka mia nalo amei ea jokoluolu nene, mia bogo napano naio miila kiano atevi nalo ka avuru tomu nalo nene amei, mia tomu nalo nei maka bunu asidom ka amei.
MAT 22:4 Naruei parinio tubo nei ber ka kiano atevi dolu nalo, berinavo ‘Kamiu kija kuvan bereio, kamiu kuverii kanaku iliano nei vanlo, kuverenio romue buluku ruei bija temeul dolu nalo napano amijabojabo bo, mia saba nonovio na sinaniano nei biniu ju batitig bo ruei. Kuver kalo monokanio nalo amei aiasol kito ea jokoluolu nei.’
MAT 22:5 “Ana nalo abano aberii kalo jibe nei, mia nalo nei amiakurano ea ga parinio tubo nei kanano iliano, aju amila ga kialo jidomiano nalo. Tai bavenei ea kanano tiniavio, mia dolu jo bitikar kiano yimo na ṽilṽiliano,
MAT 22:6 a nalo tealo abakakar parinio tubo nei kiano atevi nalo, amila lelanlo, amuebinvinlo am̃arm̃aro.
MAT 22:7 Naruei parinio tubo nei naio tinien mimi toru, ana naio miila kiano tomu nalo na mira nalo abano, amuebinvin kulo va nalo napano amisebi kunualo a kialo komeli bunu.
MAT 22:8 “Naruei parinio tubo nei naio berii ka kiano atevi nalo, berinavo ‘Sinaniano nei ju batitig bo ruei, mia nalo na kiniou nobiolo ruei ka amei avijurukario, nalo maka bunu avu ka amei, mia kito rotuvanlo.
MAT 22:9 Kiniou nejidom kamiu kuvitakii m̃arabo sesa dolu nalo mia toro kei napano verenio kamiu kuvilealio, mia kamiu kuvikalo ka nalo amei ea jokoluolu nei.’
MAT 22:10 Naruei kiano atevi nalo nei abano, nalo amila jibe ka napano naio berii kalo, ana aburu tomu nalo abinimei, bekurano ka tomu nalo na abo p̃elina nalo na abova, nalo amei tibe ga na, ka nalo aison vatitig vio na jokoluolu nei rivujo.
MAT 22:11 “Mia bogo napano nalo aju jouro ea vio nei ruei, mia parinio tubo nei naio binimei ka rivanjum̃ano nalikolo, mia ka bogo na naio mial toro tai napano naio maka riya kulum̃arauo na bo tai napano beverare ka jokoluolu nei, mia naio miya kulum̃arauo p̃ilip̃ili ga.
MAT 22:12 Naruei parinio tubo nei naio bika den toro nei, naio berinavo ‘?Koig, jum̃abe ana jau kobinimei joomo nei, ana maka keya m̃amo kulum̃arauo na bo na jokoluolu nei tai?’ Mia naio niono buru maka bunu rijikia river titai.
MAT 22:13 Naruei parinio tubo nei naio ber ka kiano atevi nalo, berinavo ‘Kamiu kuviorkar jum̃ano ve juo a nalo ve juo, ana kuvuku naio riva tavio, ea vio na melijokouo, ea vio na mia naio to teg tulaka a naio ser m̃arjuvono eaio.’”
MAT 22:14 Ana na Yesu berenio, berinavo “Atua bio tomu nonovio, mia maka ve telabo napano naio bijauialo ka nalo ave kiano.”
MAT 22:15 Naruei Varisis nalo abano ka alavon ka aleal vikadeniano nalo na jikirkili tai ka alavon Yesu eaio, ka napano mia naio rijikia re ka riverdop̃elo eaio.
MAT 22:16 Bogo na aberio-o bisi, ana amiila kialo naiagagoano tai, naliko kulo dolu nalo na taara na Erot kiano, abinimei ea Yesu. Ana nalo nei amijubolbolili ka ilisibiano novo nalo, aberinavo “Yesu, kumemi numijikia ka jau kobe naverloglogiano, jau kobe toro na memedu tai. Kiamo iliano nalo abiniu abe riano, a jau kojo koberloglog tomu nalo ka bajago nalo na Atua naio jidomio. Mia jau maka kejikia kovitii ga tomu tai, mia jau kobitii tomu nalo abiniu abe verare ga.
MAT 22:17 ?Tenene na, kumemi numisidom jau kover von ka kumemi, ka ea kiado tuboiano, naio berii jum̃abe? ?Memedu ka kito kulo Ju nalo rovulu takis van Sisa, napano parinio tubo na vio Romo, p̃elina maka rimemedu ka tibe na?”
MAT 22:18 Mia Yesu naio mijikia ka nalo ajidom ala kiki naio ga, ana naio berenio “Kenemiu iliano nalo kirinovo mia kirinovo, mia kenemiu iviso nalo kirivova joono ruei. ?Kamiu kumitu kumila von kiniou jibe na ka venia?
MAT 22:19 Mo bo ga, kamiu kuvudu puruveru na takis tai rimei van kiniou.” Naruei nalo amidu tai binimei ban naio,
MAT 22:20 ana na Yesu bika denlo, berinavo “?Kei mirano nei joa puruveru nei? ?A sio nei be kei siano?” Ana nalo aberenio, aberinavo “Sisa mirano na a siano na bunu.”
MAT 22:21 Naruei naio berii kalo, berenio “Mo, vite napano be Sisa kanano, kuvar van Sisa. Mia vite napano be Atua kiano, kuvar van Atua.”
MAT 22:22 Bogo na nalo amijog iliano nei, nalo amiilo toru kanio, ana nalo ajuvan Yesu ajaluvo den naio abano.
MAT 22:23 Ea bogoti nene ga, kulo Satusis nalo tai abinimei ea Yesu, nalo ajidom avika naio ea tivelinio na vite napano nalo amonea jikili ea naio, napano nalo amonea aberinavo tomu nalo na am̃arm̃aro maka bunu ajikia ameul bereio ea bogo na tagap̃iano. Ka tenene, nalo abika Yesu jibe nei, aberinavo
MAT 22:24 “Yesu, jau kobe naverloglogiano, kumemi numisidom nuvika denso, ka jum̃abe ka iliano tai napano tormoruo Mosis naio berenio jukamu nua ruei. Naio berinavo ‘Verenio toro tai rim̃aro den koano, maka ve kenerilo tai vo, mo kuruano monokanio soro ka taanou nene. Ea bajago na, mia naljuo ve kenerilo ka mia rivokar toro na m̃aro ruei siano.’
MAT 22:25 Naruei ea kenememi m̃aratavo tai, tomu aluo napano abe kurualo. Motoru nene naio joro, karina naio m̃aro den koano napano maka ve kenerilo tai, ana kuruano maratoru naio buru tira nene.
MAT 22:26 Naruei, kuruano na toru naio bunu m̃aro den tira neibano, a nana lieie kaniao jibe na bunu, bano-o bokar kurualo aluo, nene abiniu amila bajago takurano ga.
MAT 22:27 Mia iorou kalo abiniu am̃arm̃aro tira nei bunu m̃aro.
MAT 22:28 Naruei kumemi numisidom jau koverial van kumemi vite nei: ea tagap̃iano, bogo napano aberii tomu nalo ameul bereio, mia tira nei ve kei koano, bior naio joro ruei ka kurualo aluo nei abiniu?”
MAT 22:29 Naruei Yesu berenio “P̃eli ga, kenemiu jidomiano jokoro, bior kamiu maka kuvijikia vaio napano Atua kiano Iliano Lu naio berenio, a kamiu maka kuvijikia vaio napano kiano moroano na toru naio mijikia rilaio.
MAT 22:30 Bogo napano tomu nalo ameul bereio, mia atibe ka nailiano nalo na mave ga, mia bajago na soriano naio maka bunu.
MAT 22:31 Ana ea tivelinio na meuliano bereio nei, be Atua kanano Iliano Lu tai naio jo napano naio mijikia rijai kito ea vio nei, p̃eli kamiu maka kuvulukuio vo? Iliano na naio berenio jibe nei berinavo ‘Kiniou nebe Epraamo a Aisak a Yakovo kialo Atua.’ ?Ana iliano na naio berenio venia? Nalo tolu nei am̃aro ea yetemeriba nei bogo be nua ruei, ana yuka telabo barlaka ana Atua berii vonga iliano nei, ka naio be kialo Atua. Jibe na, ana kanano iliano nei naio jiloglog ka nalo tolu nei am̃aro ea yetemeriba, mia nalo aju ameul ea naio kia ga vo. Atua maka sidom ka kanano tomu nalo ave tomu na am̃arm̃aro ga, mia naio jidom ka naio rive Atua na tomu nalo na ameul.”
MAT 22:33 Ana bogo napano tiniobi nalo amijog Yesu kiano iliano nei, nalo amiilo toru ka vite nalo nei napano naio jom̃a berlogloglo kanio.
MAT 22:34 Telikiti napano Varisis nalo amijog ka Yesu mila Satusis nalo maka bunu ajikia aver titai, ana nalo abior telisu beamu vo karina abinimei ea Yesu, nalo bunu ajidom ala vonio.
MAT 22:35 Naruei nalo tai napano naio be masou ka Tuboiano, naio bika vikadeniano tai den Yesu, berinavo
MAT 22:36 “?Naverloglogiano, kiniou nejidom ka jau koverial von, ka ea iliano nonovio napano ajua kiado Tuboiano, na vabe nene napano naio toru, jo mave jovulu dolu nalo?”
MAT 22:37 Ana Yesu ber ka toro nei berinavo “Iliano Lu berenio jibe nei, berinavo ‘Atua Sop̃i napano be kanamo Atua, jau monokanio kosidom naio ka tiniemo momou, ka kiamo meuliano momou, ka kiamo jidomiano momou.’
MAT 22:38 Nina naruei napano naio be tuboiano na be moti, a toru laka bunu.
MAT 22:39 A tinene kanio, napano naio toru bunu jibe ka napano jukamu nene, na naio berenio, berinavo ‘Mia jau monokanio kosidom tomu nalo napano aju vaataro kaso, kala rivu vanlo, rivare ka napano jau kojidomiiso.’
MAT 22:40 Tuboiano juo nei, nalo abe burupati na tuboiano dolu nalo nonovio napano Mosis kiano, bija Naverialiano nalo kialo iliano bunu, napano ajua kiado Niosi Lu nei.”
MAT 22:41 Naruei ka bogo nei mia Varisis nalo aju vio takurano naliko Yesu, ana naio bunu bika vikadeniano tai denlo, berinavo
MAT 22:42 “?Ea kenemiu jidomiano nalo aberenio mia Naverikariano rimaluvo ea kei kiano bajulukuti?” Mia nalo aberii kanio, aberinavo “Naio ve tormoruo parinio tubo Teviti kiano bajulukuti tai.”
MAT 22:43 Naruei Yesu bika bereio denlo, berinavo “?Ee, kamiu kuber riano ga na, ana jum̃abe ana Niununo Lu joa Teviti, naruei Teviti mil, berenio ‘Atua Sop̃i naio berkanio kiaku Tubo, naio berinavo “Jau koto tano tivelinio vameruo ka kiniou, rivano-o mia kiniou nala kiamo uolu nalo amei atibe kanio yebe sesa na kobijankon jaamo eaio.” ’ “Ea vio na naruei, kito romialio ka napano Teviti naio jo bio naveri-kariano nene berinavo naverikariano naio be kiano Tubo ruei.
MAT 22:45 ?Mia bior Teviti naio berii jibe na, jum̃abe ana kamiu kumitum̃a kuber Naverikariano nei naio miyotuba ea Teviti, ana naio be kiano bajulukuti tai ga?”
MAT 22:46 Naruei maka toro tai rijikia river iliano tai van Yesu. Mia jikario ea bogo na, mia maka bunu toro tai rijikia rila von Yesu ea navikadeniano nalo.
MAT 23:1 Mia ka bogo na, ana Yesu mil ban tiniobi, naliko bunu kiano naiagagoano nalo, naio berinavo
MAT 23:2 “Be riano ka vonganei, naverloglogiano na tuboiano a Varisis nalo, nalo amidu Mosis jeleigio kam̃a aberial nioti na tuboiano na Atua kanano.
MAT 23:3 Mo verenio tibe na, ana tenene na kamiu monokanio kamiu kumonmonealo, kamiu kuvila tibe ka napano nalo aberenio. Mia kamiu kuvitakii re kialo bajago, bior nalo maka atum̃a ala tenalo nam̃a aju aberiio ka tomu dolu nalo.
MAT 23:4 Nalo aju aburonkar bereio tuboiano sesa nalo telabo na nalo ga amilaio, amila jikili laka, mia nalo ajutua tomu nalo ka aiagago kalo. A nalo aju amila im̃auano na jibe na ka nalo ajum̃a amison vite nalo na kiri teremi nalo laka ban tomu nalo, mia maka leleio asaaro ka aija tomu nalo ka avar bitiran vite nalo nene.
MAT 23:5 “Nalo abarvar kalo m̃ele ka kialo im̃auano nalo, napano nalo amila jibe na ka mia avuru ga tomu dolu nalo miralo. Kamiu kuvial kialo bulusiveu nalo na amison Atua kiano Vivitauiano Lu juaio, ka mia m̃a amiorkario jua merinialo a mokojum̃alo nalo. Nalo ajidom ka kanalo monokanio ve tortoru loa tomu dolu nalo kanalo. Mia kamiu kuvial bunu ka abili iki m̃alo kulukoti na volkouano nalo terebievi laka. A abavavin m̃ele ka vite nalo nei, a ajidom ga ka tomu nalo avamenealo riviorio.
MAT 23:6 Ana ea bogo na jokoluolu a joomo ea yimo na volkouano bunu, nalo ajidom ka mia bogo nonovio nalo atutano ea tomu na tortoru nalo jelelo,
MAT 23:7 a verenio nalo aiel ea vioruru, mia nalo ajidom tomu nalo avatove kalo, a avio batitiglo averinavo ‘!Nao, kiaku naverloglogiano novo, kavijo bo o!’
MAT 23:8 “Mia kamiu, kenemiu naver loglogiano takurano ga naruei, a kamiu kumitibe ka m̃aratavo takurano ga, mia verenio tibe na, kamiu kuvijamo ka re tomu nalo ka mia m̃a avio kamiu tai ka ‘Naverloglogiano.’
MAT 23:9 Ana mia kamiu kuvio re toro na yetemeriba nei tai ka teta, bior kamiu be karamemiu takurano ga, napano naio jo mave.
MAT 23:10 A mia kamiu kuvijamo ka re tomu nalo avio kamiu tai aver kube navurim̃araboiano na kialo bior kamiu kenemiu navurim̃araboiano takurano ga, naio napano be Naverikariano.
MAT 23:11 Mia toro napano naio be kenemiu toro na toru laka, mia monokanio naio rimei ve kenemiu toro na im̃auano ga.
MAT 23:12 Mia toro na naio ga bitirilar naio ka naio to mave, mia Atua rila naio to yetano. Mia verenio toro napano naio ga rila naio to yetano, mia Atua rivitirilar naio to mave.”
MAT 23:13 Ana Yesu mil dolu ka ga banlo, berinavo “!Kamiu Varisis nalo kamliko naverloglogiano na tuboiano, o-o! Kamiu kumila lelan kamiu toru laka, mia ve kirivova laka van kamiu, kanio kenemiu iliano nalo kirinovo, mia tiniemiu nalo abova, ajoron ruei. Tomu nalo ajidom amei jouro ea Atua kiano navenatuboiano, mia kamiu kumitu kumitetavoko morouo kalo ea miralo, ka mia nalo ajikia re ka amei jouro, mia mave kanio, kamiu bunu maka kuvitu kumei jouro. Kamiu kubova ruei. Kamiu kumitum̃a kuburu kenemiu volkouano nalo terebievi laka, mia be sibiano ga, bior ka bogo nene ga mia kamiu kumitum̃a kumijubolibo lili taanou nalo nei, kam̃a kubina ka kialo saba nalo. Bior tena, mia kenemiu tibureiano sikili lie vo.
MAT 23:14 “!Kamiu Varisis nalo kamliko naverloglogiano na tuboiano, o-o! Kamiu kumim̃au bova ga. Kamiu kumisaaro ka kuviel ea uako, ka kuvan ea buruvenuo dolu nalo ka kuvuru tomu nalo atakisor kamiu, mia bogo napano kamiu kubokar tai binimei, mia maka vesiou, mia naio bokar nonovio kenemiu bajago va nalo ba bova laka, bova jovulu kamiu bereio.
MAT 23:16 “!Kamiu navurim̃araboiano nalo, kamiu miremiu bono ga. Mia kumila lelan kamiu laka, mia rivova laka van kamiu. Ea bogo napano tomu nalo aber titai ka rila kialo verikariano tu sikili, mia ver averenio ‘Kiniou neber riano, Atua kunuano Lu yako jo,’ a karina, ala korov verikariano nei bereio, ana kuberenio ‘Nina maka ve titenia.’ Mia verenio averinavo ‘Kiniou neber riano, niogo nalo na ajua Atua kunuano Lu joomo, nalo na aju,’ mia kamiu kuber iliano na naio jikili laka, maka ajikia ala korovio bereio.
MAT 23:17 Aire tomu nalo, kamiu miremiu bono, a pariparimiu nalo amiavovu. ?Venia napano naio be lu laka: niogo nalo, p̃elina Atua kunuano Lu napano naio mila niogo nalo abe lu?
MAT 23:18 Mia verenio toro tai riverenio ‘Neber riano, boda naio yako jo,’ kamiu kuber iliano nei be kurano ga. Mia verenio naio riverenio ‘Kiniou neberii riano, sida na naio joa boda,’ mia kamiu kuber iliano nei jikili laka, toro tai maka rijikia rilakorovio.
MAT 23:19 !Jibe kanio napano neberiio ruei, kamiu kube merebono riano! ?Venia naio be lu laka: sida napano joa boda p̃elina boda na mila sida nei be lu?
MAT 23:20 Monokanio kamiu na kuvitilubar vite nalo nei, bior verenio toro tai naio jo jiloglog boda ka rila kiano iliano nei tu sikili, mia naio jo jiloglog bunu bija sida napano joa boda nene.
MAT 23:21 A toro napano ver jom̃a jiloglog ban ea Atua kunuano Lu, naio jo jiloglog bunu bija nana naio be kanano yimo nene,
MAT 23:22 ana toro na jom̃a jiloglog mave, naio jom̃a jiloglog bunu bija jobaro lu na Parinio tubo lu na toru kanano, tenene naio jom̃a jiloglog Atua garuei memedu.
MAT 23:23 “!Kamiu naverloglogiano na tuboiano kamliko bunu Varisis nalo, o-o! Kamiu kumila lelan kamiu toru laka, mia rivova laka rivan kamiu. Kiniou nemijikia napano kamiu kumitum̃a kubitii bo julaka, ka verenio mia kuvar semiu sinaniano ve duelimo, mia ve takurano monokanio rivan ea Atua Kunuano, tibe ka napano tuboiano naio jom̃a berenio, a kamiu kumitum̃a kumila jibe na ka kenemiu saba nonovio nalo, rivano-o rivokar bunu m̃am̃esi na kiritavarvasu nalo a vite nalo bunu napano javukia m̃arsili nalo. Mia vite tomormoruo nalo napano tuboiano naio berenio, kamiu maka kuvisidomial leleio, tibe ka napano naio berenio berinavo kamiu kumemedu rivu, a kamiu monokanio tiniemiu riia kulo dolu nalo, monokanio kamiu kuvokar kenemiu verikariano. Verenio kamiu kuvisidom kuvokar sikili vite nalo na kiritavarvasu, naio bo ga, mia vite nalo na tomormoruo nei naruei bo ka kamiu kuvitum̃a kuvilaio garuei, ana makanio.
MAT 23:24 “!Aire tomu nalo, kamiu navurim̃araboiano nalo, kamiu miremiu bono ga! Kamiu kumitum̃a kumila jibe na kanio napano bogo na ana kamiu kumunu saba, mia kamiu tiniemiu maio jikili ka mia kuvilaluvu re ka kuviovolar nionono tai napano mijoru batove ea kenemiu baja nalo, mia kamiu maka kuvial kar ka kumdidiomo belia kamel napano joaio.
MAT 23:25 “!Kamiu naverloglogiano na tuboiano bija Varisis nalo bunu! Kamiu kumila lelan kamiu toru laka, mia rivova laka rivan kamiu. Kamiu kumitum̃a kumitakii vatitig tuboiano nalo napano kiritavarvasu nalo tivelinio ka sekoniano na kenemiu baju a baja nalo, naruei kamiu kuberiam̃a kenemiu vite nalo nonovio ameravo bo ruei. Mia kenemiu baju nalo nei abujo ka sinaniano na vinauano napano kamiu kubario ea bajago na yebekavoano.
MAT 23:26 Kamiu Varisis nalo, kamiu miremiu bono riano. Verenio kamiu kuvisidomii ka kenemiu baju a baja nalo ameravo rivu bogo nonovio, mia kamiu kuvisonlo re bunu ka sinaniano nalo napano kenemiu kariano juaio.
MAT 23:27 “!Kamiu naverloglogiano na tuboiano bija Varisis nalo, o! Kamiu kumila lelan kamiu toru laka, mia rivova lie vo van kamiu. Kamiu kumitavukia m̃artanbo napano amiovovua miuvu meravo kirinovo bo jel tavio, mia vajoomo nene naio bujo ka buriu na tomu nalo napano am̃arm̃aro, bija mokotenalo napano ajorono.
MAT 23:28 Jibe na, bogo na tomu nalo aial tavio na kamiu, mia nalo amijikia averenio kamiu kumemedu bo, mia makanio, vajoomo na kamiu bujo ka juboluboiano a kariano nalo.
MAT 23:29 “!Kamiu naverloglogiano na tuboiano nalo bija Varisis nalo! Kamiu na bogo nonovio kumil ka kuluniomiu ga. Mia rivova lie vo van kamiu kenemiu jidomiano nalo beve juo. Kamiu kumitum̃a kubitikar vatitig m̃artanbo na naverialiano nalo re nua, a kamiu, kumiovovua bo bunu puruveru na sidomkariano na tomu memedu nalo, ana jum̃abe: ?Kamiu kuberiam̃a kumemedu kamliko nalo na a?
MAT 23:30 Mia kamiu kumitu kuberinavo verenio kamiu kumeul nua ruei ea bogo na korobimiu nalo, mia kamiu maka kuvijikia kuvijurukar nalo na ka bogo napano nalo amuebinvin Atua kiano naverialiano nalo re nua.
MAT 23:31 Mia ea kenemiu ilisibiano nei, kamiu kumitum̃a kumil lelan kamiu bereio ga, bior iliano napano berial ka kamiu kube bajulukuti memedu na korobimiu nalo na amuebinvin naverialiano nalo.
MAT 23:32 Mo bo ga, kamiu kuvim̃au bo ka rivano-o, kamiu kuvila von ka kuvila nonovio im̃auano na korobimiu nalo nei ajikario nanua bogobe ruei.”
MAT 23:33 Naruei Yesu mil jikili kia ga banlo, naio berinavo “Kamiu kumitibe ka maro nalo garuei memedu. ?Kamiu kuberiam̃a mia kumijikia kuvuro ka kenemiu vironiano na ea vio na jogvaiano? !Maka leleio!
MAT 23:34 Verenio mia kiniou neiila naverialiano nalo aviedu, vija tomu napano abe masou bo ka Atua kiano iliano nalo, a vija bunu naverloglogiano na tuboiano nalo, verenio aviedu ea kamiu, mia kamiu kuvuebinvin tealo am̃aro ea m̃akolkolo, a tealo mia kamiu kuvitivlo ea kenemiu yimo na volkouano nalo, a mia kuvijili bulaglo ea kenemiu m̃arkomeli nalo.
MAT 23:35 Mia kamiu kuvila tibe na kalo dam̃ariga rivano-o, mia kamiu naruei kuvokar vironiano na m̃ariano na tomu na memedu nalo nei aviniu napano korobimiu nalo nanua amuebinvinlo. Tenei jikar ea Epel, na naio maka rila titai napano tokor leleio, binimei bokar Sakaraia, na Parakaia kenerinio, naio napano korobimiu nalo amuebin naio jo vaataro ka boda, joomo ea Atua Kunuano Lu.
MAT 23:36 Riano kiniou neberii ka kamiu, mia vironiano na m̃ariano na tomu nalo nei, mia rivokar kamiu, napano kumeul kia ga vo vonganei.”
MAT 23:37 Ana Yesu jegi bior Yerusalemo, ana naio berinavo “!Yerusalemo-o, Yerusalemo-o! ?Bior vaio ana kojom̃a komuebinvin naverialiano nalo, a kojuba binvin nalo napano Atua miilalo abiedu easo? Va telabo kiniou nejidom nodu jum̃aku selvivko kiamo tomu nalo, tibe ka tu sabarou buru kirikiti nalo abinimei ajuluku ea sibiano, mia kiamo tomu nalo maka asaaro ka kiniou.
MAT 23:38 Jau, komial na, Atua jo juvanso naruei, mia jau komei kove vio yauo kurano ga naruei.
MAT 23:39 Tenene na neber ka jau, mia kiamo tomu nalo aial re bunu kiniou bereio, rivano-o rivokar bogo napano mia nalo averenio bereio tenei, averinavo ‘Atua Sop̃i, jau keilivu ka ninei napano naio jo binimei ea siamo.’ ”
MAT 24:1 Ana Yesu batavio den Atua Kunuano Lu, mia bogo na naio miel bano, kiano naiagagoano nalo abinimei ana nalo ajiloglog yimo tomormoruo nalo napano aju jouro ea burusio na Atua Kunuano Lu, mia abo laka, ana aberii ka Yesu ka naio siraragdi rialo.
MAT 24:2 Mia Yesu naio berii kalo, berinavo “?Kamiu kumial yimo nalo na? Riano kiniou neber ka kamiu, yimo nalo na, mia ve re bunu puruveru nene tai totano vatitig ea jeleigio, bior mia tomu tai amei aue bulagio nonovlo.”
MAT 24:3 Telikiti na nalo amiel jibe ga na, nalo abinimei ea Suku Na Buruolivi, naruei Yesu naio jotano ea vio na. Mia bogo na maka bunu tomu dolu nalo tai atu naliko, ana kiano naiagagoano nalo abinimei ea naio, abika denio, aberinavo “?Mia aue bulag Yimo Lu nene nagi, a kijokijo na vabe na kanamo liliuano, napano mia jau komei bereio ea bogo na maaro?”
MAT 24:4 Naruei Yesu berdop̃e banlo, naio berinavo “Bo ka mia kamiu kuvitikar vatitig kamiu rivu, ka mia ve re toro tai rimei ka rijubolbolili kamiu,
MAT 24:5 bior mia tomu ve telabo napano mia adu siaku, naruei mia nalo amei averinavo ‘Kiniou nebe Naverikariano nene,’ naruei nalo avuru tomu ve telabo aiel vovu.
MAT 24:6 Ana ea bogo na bunu, mia kamiu kuvijog m̃aduano na mira napano ju vaataro, a lilianiano na mira nalo na aju koalabo, mia kamiu kumemebiju m̃ele re. Vite nalo na monokanio nalo amalmaluvo tukamu beamu vo, mia nina maka legiano na maaro nene navo.
MAT 24:7 Ana parinio tubo nalo ala mira ka parinio tubo dolu nalo, a venuo dolu nalo atumolu ka venuo dolu nalo. Mia ve bogo na vitu na toru, mia m̃ii rikulkulu ea vio yetemeriba reraio.
MAT 24:8 Mia vite nalo nei, maka ve bogo na maaro nene navo, mia tibe ka tira napano naio be m̃abono, naio jikar ka mijog be moti garuei ka taakano mijalele ka mia naio rivar kenerinio, mia burum̃ara jogvaiano naio maka navo.
MAT 24:9 “Mia ka bogo nene, kamiu na napano siaku joa kamiu, mia avokakar kamiu, a adu vironiano va nalo van kamiu, rivano-o mia auebinvin kamiu kum̃arm̃aro. Ana mia tomu na buruvenuo dolu nalo nonovio asidom lele re kamiu, mia ail die kamiu.
MAT 24:10 Vite nalo na, mia rila tomu nalo ve telabo atu sikili re bunu ea kiniou, a nalo na amonmonea kiniou jukamu, mia nalo asidom re bunu nalo na amonea kiniou jikili kia ga ea bogo nene, mia nalo ativeluku kalo van kialo uolu nalo nei jum̃alo.
MAT 24:11 Mia naverialiano nalo na tuboluboiano ve telabo atumolu, mia avuru tomu ve telabo aiel tokoro.
MAT 24:12 Mia vijuku vovaiano nonovio riluo ve toru lie vo rila ana tomu ve telabo kialo iviso rimei rimenini, asidom re bunu Atua.
MAT 24:13 Mia verenio toro na tu sikili dam̃ariga ea kiniou riva rivokar bogokouo nei ribisi, mia Atua rilarur naio.
MAT 24:14 Mia ioluano vou na navenatuboiano nei, mia aioliolu van taara kinkin nalo kanio ea vio yetemeriba reraio, jibe ka kijokijo tai napano berial ka legiano na iorou maaro jo binimei.”
MAT 24:15 Naruei Yesu berii bunu iliano dolu tai, napano bo ka verenio toro na rivulukuio, bo ka naio rila von ka rijikia vatitig nioti nene. Iliano nene berii jibe nei, berinavo “Mia kamiu kumijikia kuvial avitirilar tavoru tai napano kirivova mia kirivova laka, tumolu tu rila niegeniege vio Lu na Atua Kunuano Lu. Vite na Naverialiano Taniel naio berialio nanua ruei,
MAT 24:16 ana verenio bogo na kamiu kuvial vite nene, kamiu napano kumitua vio Yutea, monokanio kamiu kuvuro kuva kuvituluku ea suku nalo.
MAT 24:17 Ka bogo na, verenio toro tai to rijilmebi tavio ea kunuano, mia naio maka bunu rijikia riva joomo ka rivar kanano saba tai bereio,
MAT 24:18 p̃elina verenio toro tai toa kanano tiniavio, mia naio maka bunu rijikia riva vonuo bereio ka rivar kanano kuluniabeno.
MAT 24:19 Ana ka bogo nene kia ga vo, mia rivova laka van tire nalo na m̃abolo, a nalo na ajum̃a amije yu ban kenerilo tete mudomudomu nalo.
MAT 24:20 Verenio tibe na, monokanio kamiu kubolkouo ka kamiu, ka kenemiu bogo na jaleleano nei, ka mia rimei re rivokar kamiu ea bogo na niavo, p̃elina ea legiano tava tai,
MAT 24:21 bior bogo na jikili nei, naio sikili lie todovulu bunu bogo tealo na jikili, jikar ea bogo napano Atua jii vio yetemeriba binimei bokar banei, ka mia ve re bunu jaleleano na burutomoruo tai tibe nei bogo tai bereio.
MAT 24:22 Mia Atua naio jidomii ruei ka mia naio tekorov ve bulati ga bogo na jikili nei, kanio tomu nalo napano naio bijauialo ka ave kanano, napano ajua bogo na. Ana verenio naio tekorov re ve bulati tibe na, mia maka toro tai rijikia rimeul to.
MAT 24:23 “A ka bogo nene, verenio toro tai river ka kamiu, riverinavo ‘Kamiu kuvialio, nina naio be Naverikariano na,’ p̃elina naio riverinavo ‘Nina naio be Naverikariano naio yako,’ mia kamiu kumonmonea re kiano iliano nalo na,
MAT 24:24 bior naverikariano na tiboliboiano nalo ve telabo atumormolu, vija naverialiano na ti boliboiano ve telabo mia nalo nene ala kijokijo na tortoru, vija tokokouro nalo na iloiano. Mia nalo ala tibe na, ka avuru tomu nalo aiavovu, rivano-o rivokar napano mia alavon ka avuru bunu tomu nalo napano Atua bijauialo ka ave kanano, mia vite nei maka ajikia alaio.
MAT 24:25 Mia kamiu kuvitikar kamiu, bior kiniou neberial vite nalo nei ban kamiu jukamu ruei, ka bogo na tenene nalo maka amalmaluvo vo.
MAT 24:26 “Naruei ka tenene, verenio tomu nalo averii ka kamiu, averinavo ‘Kamiu kuvialio, Naverikariano naio joa vio yauo yako ruei,’ mia kamiu kuvan re ea vio nene, a verenio averii ka kamiu averinavo ‘Kamiu kumial na, naio jo joomo ea yimo yako ga,’ mia kamiu kumonealo re.
MAT 24:27 Ana ea bogo napano Kulorinio Kenerinio naio rimei bereio, mia naio rimei rimeravo ka tomu nalo nonovio, tavukia vio bijano, naio merera rudul batitig vio tiniabene reraio tikar is van ea ues.
MAT 24:28 Ea bogo nene, mia tavukia bunu napano verenio tena m̃aro tai toa vio tai, mia bebekumo rinio nalo napano ajum̃a ajen temeul nalo nam̃a am̃arm̃aro, mia nalo amei kanio, monokanio aje buronlo ve telabo.”
MAT 24:29 Naruei Yesu naio berinavo “Mia bogo na jaleleano nei naio ribisi, vaarakurano ga m̃erenio naio rimei ribobogio, mia siberio rimerera re bunu. M̃arivitano nalo na tiniabene mia nalo atibirbil, mia tenalo na jikirkili nalo na tiniabene, mia Atua rikulkulu kalo.”
MAT 24:30 “Mia ka bogo nene mia kijokijo na Kulorinio Kenerinio riyotuba ea tiniabene, a mia m̃atatoko nalo na yetemeriba nei mia nalo ateg ve toru aviovio mia aial Kulorinio Kenerinio riyotuba ea melijo nalo vija kiano burum̃ara moroano a vija kiano burum̃ara miamoiano.
MAT 24:31 Mia karina, simeduo na toru riolu, ana mia naio riila kiano nailiano nalo ava aseliviv ea vio yetemeriba reraio a vio mave bunu, ka avuru kiano tomu nalo napano naio bijauialo ruei, amei vio takurano ea naio.”
MAT 24:32 Ana Yesu naio berinavo “Kamiu kuvisidomii von buruiesi napano aber buruviki. Naio mijikia riverloglog kamiu ka vite tai napano kamiu monokanio kuvitii vatitigio. Bogo napano kamiu kuvial ka jaati nalo amei amemeiaio, amelumu, tikar ka mia rivarboṽeio, kamiu kumijikia ka kuverenio bogo binimei vaataro ka bogo na m̃erenio rivitunu ve toru.
MAT 24:33 Ka tenene, bogo na kamiu kuvial kijokijo nalo na ea vio yetemeriba, tavukia na kiniou neberenio ka kamiu ruei, mia kamiu kuvijikia ka Kulorinio Kenerinio naio jumolu jikili jua m̃aratavo ruei, vaataro ka naio rimaluvo naruei.
MAT 24:34 Riano kiniou neberii ka kamiu, mia vite nalo na mia ayotuba tukamu vo, mia iorou, ana taara na tomu nalo napano m̃a ameul ka bogo na, mia mijikia ava kovio den vio yetemeriba nei.
MAT 24:35 Mia tiniabene a yetemeriba ave juo bunu ava kovio, mia kanaku m̃ariliano nalo maka ajikia ava kovio bogo tai leleio.
MAT 24:36 Mia maka toro tai rijikia legiano nene p̃elina aura nene napano mia Kulorinio Kenerinio naio rimei eaio. Nailiano nalo na vio mave, naliko Atua Kenerinio, maka ajikiaio, mia Karam̃aku ga takurano naio mijikiaio.”
MAT 24:37 Ana Yesu naio berinavo “Rivano-o rivokar bogo na Kulorinio Kenerinio rimei bereio, mia tomu nalo atu batitig re, tibe ka bogo na tormoruo Noa kiano nanua.
MAT 24:38 Ea kiano bogo nene naruei, bogo na ueimia na toru nei naio maka rimei vo, ana tomu nalo ajum̃a ajinan, a ajum̃a amunu tenalo nam̃a amunmunio, ajum̃a amila soriano jibe na ga, binimei bokar bogo napano Noa naio ba joomo ea kiano uako na toru napano naio mim̃aukanio.
MAT 24:39 Mia tomu nalo na aju dam̃ariga jibe na, maka asidomial titai, naruei amial ga burum̃ara ueimia nei binimei buru bulaglo. Mia kiniou neber ka kamiu, mia bogo na Kulorinio Kenerinio naio riyotuba rimei bereio, mia tomu nalo ave virare ga ka nalo nei nua beamu ea Noa kiano bogo.
MAT 24:40 Mia verenio tomu ve juo atu aim̃au ea tiniavio, mia nailiano nalo amei avurular tinene, mia tinene atuvanio tobo,
MAT 24:41 mia verenio tira ve juo atum̃a ala sinaniano, mia avurular tinene, mia tinene atuvanio tobo.
MAT 24:42 “Tenene na mia kamiu monokanio kuvitikar vatitigio, bior kamiu maka kuvijikia ea legiano na vabe napano mia kenemiu Tubo naio rimei bere eaio.
MAT 24:43 Mia monokanio kamiu kuvitilubar vite nei, ka verenio toro na toru tai, verenio naio mijikia memedu ka bogo na mia toro na vinauano tai rimei ea kunuano, ka mia naio rivina ka kiano saba nalo, mia naio to derevijo rivu dam̃ariga, ka mia toro na vinauano naio rimei.
MAT 24:44 Tenene na, mia monokanio kamiu kuvitu derevijo rivu dam̃ariga, kanio mia Kulorinio Kenerinio naio riyotuba ea bogo tai napano mia kamiu kuvisidomial re ka mia naio rimei eaio.”
MAT 24:45 Naruei Yesu naio berinavo “?Verenio toro na im̃auano tai, napano naio be masou bo ka kiano im̃auano, a naio bokar vatitigio, mia naio rim̃au tum̃abe? Naio rim̃au tibe nei, napano verenio kiano toro na toru tuvan vio nei ka naio riel riva koalabo, ana toro na toru nei rudu naio to ka rivitikar vatitig rivu tomu na im̃auano dolu nalo, ana mia toro nei naio rivokar vatitig im̃auano nalo nei.
MAT 24:46 Mia bogo napano toro na toru nei naio rimei bereio, mia naio rijikia rileal kiano boru na im̃auano nei naio jo bokar vatitig im̃auano nalo nei bo. Ana mia boru na im̃auano nei naio rijikia rijog rivu ve toru,
MAT 24:47 bior mia toro na toru nei naio tuvan kiano saba nalo nonovio tua toro na im̃auano nei jum̃ano. Ierinio, mia Atua rila tibe ga na bunu.
MAT 24:48 “Mia verenio boru na im̃auano nei naio rivova, mia bogo na toro na toru nei naio tuvan vio, ana naio riva koalabo, mia boru na im̃auano nei naio rijikia river ‘?Ee, toro na toru nei naio jo kirisiou laka, p̃eli mia naio rimei re bunu koviobo, p̃elina jum̃abe?’
MAT 24:49 Ana mia naio tumolu rila lelan tomu dolu na im̃auano nalo, mia naio rijikia riva rimunu uei naliko tomu na pariparilo nalo m̃a amiavovu, mia nalo atu asen searo ea toro na toru neibano kanano puruveru nalo.
MAT 24:50 Mia toro na toru neibano naio rimei bereio ea legiano tai napano toro na im̃auano nei riilo kanio garuei, a ea bogo tai napano toro nei risidomial re ka mia naio rimei eaio.
MAT 24:51 Naruei toro na toru nei naio rudu vironiano ve toru van boru nei, mia naio riila naio riva to vija tomu na tibolboiano dolu nalo ea vio napano tomu nalo ajum̃a ajegi, ajerkakar m̃arijuvolo nalo eaio.”
MAT 25:1 Ana Yesu berenio, berinavo “Ka bogo napano mia Kulorinio Kenerinio naio rimei bereio, mia Atua kiano navenatuboiano naio tibe ka jamerijiano nei naio berenio. Jamerijiano nei berii jokoluolu na soriano tai, napano jakii kanalo bajago, nalo na tivelinio ka sum̃ano aburu naio ban ea niatira kunuano ka avuru naio rimei rivijaio. Naruei kuviviniene duelimo [10] nei nalo aju bo ga ea kunuano, ka aiomon vite nonovio tu rivu vatitigio. Ana vaataro ka melijo tarako m̃esi naruei kuviviniene nalo abar kanalo yulu nalo amielko m̃arabo kalo, ka aviniu amei bereio.
MAT 25:2 Kuviviniene nalo neibano, jumo nene abe masou bo, abe kialo jidomiano napano nalo abarkar kialo bauei na kanalo sunsunu ka mia aison bereio kanalo yulu nalo, mia nalo jumo nene nalo abe taboso ga, maka kialo jidomiano rivu tibe na ka avarkar kanalo bauei na sunsunu tai ka verenio sunsunu tabo, ana mia amijikia aison bereio.
MAT 25:5 Ana nalo aju rorea toro na soriano jiou jibe na bano-o, mia maka naio rila sop̃eli, ana merevono nalo nei miralo temi toru ana nalo amonmelio.
MAT 25:6 “Mia kanio bogiano viovare sebisaro, toro tai bio, berinavo ‘Toro na soriano, naio jo binimei naruei. Kamiu kumei kuviviuo naio.’
MAT 25:7 Ana na merevono duelimo nei nalo ajevijo, ana amim̃aukanio kialo yulu nalo ka avilvil rivu bereio. Amilakon julu na kanalo yulu nalo, a abitii batitig kialo sunsunu nalo.
MAT 25:8 Naruei nalo na abe taboso abitilubar ka kialo yulu nalo, vaataro ka mia am̃arm̃aro, naruei nalo abika den kuluelo jimo nene, aberinavo ‘Aiou banalo, kamiu kubo, kuviyon kija kenemiu sunsunu rivan kumemi, ver p̃eli mia kenememi yulu nalo am̃arm̃aro koviobo.’
MAT 25:9 “Mia nalo na abe masou, aberinavo ‘Vedeio ga, sunsunu maka rivare ka kumemi a kamiu bunu. Bo ka kamiu kuvan ea yimo na ṽilṽiliano ka kuvulu kenemiu tai.’
MAT 25:10 “Naruei nalo napano abe taboso aba ka avulu kanalo sunsunu, ana bogo napano nalo aju koalabo kia ga vo, mia toro na soriano naio boru. Naio ba jouro ea kiano vonuo, naliko merevono jimo na aju rorea naio, naliko abijurukar ea sinaniano na soriano. Naruei bogo napano tomu nalo aba aju jouro ruei, ana nalo ajetavoko m̃aratavo bo batitigio.
MAT 25:11 “Karina iorou kanio, ana merevono nalo na abe taboso abinimei bereio, abio aberinavo ‘!Kumanememi, kumanememi, jau kobijuku bo kajamo ka kumemi nuviedu joomo!’
MAT 25:12 “Mia toro na soriano naio riverinavo ‘!Ierinio, kiniou neberii ka kamiu, kiniou maka nejikia bunu kamiu kube kei!’”
MAT 25:13 Mia Yesu berii jamerijiano nei bisi, ana naio berinavo “Mo, kamiu monokanio kuvitikar batitig rivu, bior kamiu maka kuvijikia legiano na vite nei a aura nene.”
MAT 25:14 Ana na Yesu mil berinavo “Mo, mia bogo na Kulorinio Kenerinio rimei bereio, mia tibe ka bunu napano jamerijiano nei berenio, napano toro na toru tai na naio miomon ka mia naio riel riva koalabo ea buruveno dolu. Ana toro na toru nei naio bio kanano atevi na im̃auano nalo ka amei aialio, naruei naio mil banlo, naio bar kanano saba nalo jua jum̃alo ka avitikar vatitigio, ka aim̃au rivijaio.
MAT 25:15 Naio bitii vatitig kialo jikiaiano, naruei ea nalo tai jum̃ano naio midu siveu na puruveru jimo, ea dolu jum̃ano naio midu siveu na puruveru juo a ea dolu jum̃ano naio midu siveu na puruveru takurano ga, karina naio juvanlo, ana na naio ba jo koalabo kirisiou kija.
MAT 25:16 Naruei toro na bar siveu na puruveru jimo, vaarakurano ga naio ba mila im̃auano telabo ka puruveru nalo nei, bano-o naio bokar bereio siveu na puruveru jimo dolu bereio.
MAT 25:17 Mia ea bajago nene kia ga, toro napano mijev siveu na puruveru juo, naio bokar bereio siveu na puruveru juo dolu bereio.
MAT 25:18 Mia toro napano naio mijev siveu na puruveru takurano ga, naio ba mikil p̃ili ea borotano, ana naio jivin puruveru napano be kiano tubo kanano.
MAT 25:19 “Naruei bogo jiou barlaka ruei bano, karina toro na toru na tomu tolu nei kialo naio binimei bereio. Naruei naio jidom rial kanano puruveru nalo napano naio bario ban tomu tolu nei.
MAT 25:20 Naruei toro na bokar siveu na puruveru jimo jukamu, naio binimei jumolu jikili jukamu ea toro na toru nei mirano, naio bar bereio siveu na puruveru jimo dolu bereio. Naruei naio berenio ‘Tubo, Beamu jau kabar siveu na puruveru jimo ban kiniou, siveu jimo nene ninei. Mia nana kiniou nemim̃au nabokario tenene ninei, be siveu na puruveru jimo bereio, napano kiniou namiladu kanio be kanamo.’
MAT 25:21 “Naruei toro na toru nei naio berkanio, berinavo ‘A siva toru. Jau kobe kanaku atevi na im̃auano novo, jau kobokar vatitig bo laka kanaku im̃auano telisu na nemije monea jum̃amo, mo mia kiniou nevitiri larso ka mia jau kovitikar kanaku im̃auano dolu nalo na tortoru. M̃araiu novo, jau komei kovijurukar kiniou kiteaku ea kanaku jokoluolu na tiniesaariano nei.’
MAT 25:22 “Karina toro napano bar siveu na puruveru juo beamu, naio binimei jumolu jikili jukamu ea toro na toru nei mirano, ana naio berenio ‘Tubo, beamu jau kabar siveu na puruveru juo ban kiniou. Siveu juo nene ninei, mia nana kiniou nemim̃au nabokario bereio tenene ninei, be siveu na puruveru juo, napano kiniou namiladu kanio be kanamo.’
MAT 25:23 Ana toro na toru nei berkanio, berinavo ‘A siva toru. Jau kobe kanaku atevi na im̃auano novo, jau kobokar vatitig bo laka kanaku im̃auano na telisu napano nemije monea jum̃amo, mo mia kiniou nevitiri larso ka mia jau kovitikar kanaku im̃auano dolu nalo na tortoru. Jau komei, kovijurukar kiniou ea kanaku jokoluolu na tiniesaariano nei.’
MAT 25:24 “Karina, toro napano mijev siveu na puruveru takurano ga naio binimei, jumolu jikili jukamu ea toro na toru nei mirano na berkovio ga, berenio berinavo ‘Koig, kiniou nejidomii ka jau kobijuku m̃ete. Jau komijikia kokilkili ea tiniavio na maka jau komebijo eaio, a jau komijikia kabar m̃ariesi ea buruiesi napano maka jau komebijaio.
MAT 25:25 Bior tena, kiniou nemerou, ana nabano nomidu van kanamo puruveru, nejivin joa borotano. Keialio, ninei be kanamo puruveru na jo bo ga jo.’
MAT 25:26 “Mia toro na toru nei naio berenio ‘Aa jau, toro va tai, jau komiovo toru. Jau komil searo ea kiniou ruei, ka kober kiniou nebe toro p̃ilip̃ili tai jibe na jibe na, naruei verenio jau komial ka kiniou nebe toro kouo tai jibe na bior vaio ana jau komidu kanaku puruveru jo kurano ga jibe na.
MAT 25:27 Verenio jau kava kodu toa yimo na puruveru mia kiniou nemijikia navar bulagio vija kirikiti nene, ka bogo na kiniou nebinimei bereio jibe nei.’
MAT 25:28 Ana na toro na toru naio ber ka kiano navitikariano nalo, naio berinavo ‘Mo, kamiu kuva kuvidu denio puruveru na ea jum̃ano, kamiu kuvidu van toro napano naio bokar siveu na puruveru duelimo ruei.
MAT 25:29 Kiniou neber jibe nei ka kamiu, neber toro napano verenio be kiano saba ruei, mia naio mijikia rivokar tabunu bereio vo ka mia ve miroano, mia toro napano maka ve kanano saba tai, mia naio rila deven vite na telisu napano be kiano.
MAT 25:30 Mia taboso nei, kamiu kuvuku naio riva tavio ea vio na melijokouo, ea vio na tomu nalo ajum̃a ajegi a ajum̃a ajer m̃arijuvolo eaio.’”
MAT 25:31 Mia Yesu naio mil berinavo “Bogo napano mia Kulorinio Kenerinio naio rimei naliko kiano nailiano nalo, ea kiano mermerano ka rive Parinio Tubo, naruei mia naio rimei ka mia totano ea kiano jobaro lu.
MAT 25:32 Naruei mia nailiano nalo avan ka avuru m̃atatoko nalo nonovio na yetemeriba nei amei, ka mia atumolu atu kamu ea mirano, mo ka bogo na mia naio tiburevure tomu nalo, ana avan ea taara ve juo, tavukia toro tai napano naio jo bitikar kiano temeul nalo jiburevure kanano nunu nalo ka nani nalo.
MAT 25:33 Mia parinio tubo nei naio tiburevure nunu nalo ka ava atua jum̃ano meruo, mia nani nalo ava atua jum̃ano mal.
MAT 25:34 Ana mia naio river ka nalo na ea jum̃ano meruo, riverenio ‘Kamiu kumei naruei, kube tomu nalo napano karam̃aku milivu ka kamiu. Kamiu kumei kuvidu jelemiu jouro ea kiano navenatuboiano, napano naio mila batitigio jororea kamiu ruei, ka bogo napano naio jii yetemeriba nei eaio.
MAT 25:35 Kamiu kumei, bior ka bogo napano m̃a jijer kiniou, ana kamiu kumije sinaniano ban kiniou, a bogo napano m̃a midoujer kiniou, kumijev uei ban kiniou. A bogo napano nebe valauo, mia kamiu kuburu kiniou naba joomo ea kunuemiu,
MAT 25:36 a bogo napano kiniou niabeku yauo, kamiu kubar kulum̃arauo ban kiniou. Bogo na kiniou nemie, kamiu kubinimei kumiadu ka kiniou, a bogo napano kiniou nojoa yimo na tetavokoiano, kamiu kubinimei kumitukunu bija kiniou.’
MAT 25:37 “Mia tomu nalo na memedu nei napano ajua jum̃ano meruo, mia nalo avika denio, averenio ‘?Tubo, jum̃abe? Jau kojom̃a koberenio kumemi numitum̃a numiijaso ea kiamo bogokouo nalo na jibe na, mia kumemi maka bunu tiniememi rimaio ka kumemi numila jibe na banso leleio. ?Kumemi numila vite nalo na nagi?’
MAT 25:40 “Ana na Parinio tubo nei mia naio river kalo riverinavo ‘Riano kiniou neber ka kamiu, bogo nam̃a kamiu kumila jibe nei ban toro na kiaku m̃aratavo nalo nei tai, bekurano ka ver naio be toro na jum̃abe, mia jibe ka kamiu kumila ban kiniou ga na.’
MAT 25:41 “Mia iorou kanio, mia naio ril bunu van nalo na ea jum̃ano mal, mia naio river kalo, riverinavo ‘Kamiu kuvuro den kiniou, Atua miobap̃e ka kamiu ruei. Kamiu kuvan ea sebi na maka rijikia rim̃aro bogo tai, napano naio jororea kia Setano ruei naliko kanano nailiano nalo ka avan eaio.
MAT 25:42 Kanio bogo napano jijer kiniou, mia kamiu maka kuvar sinaniano van kiniou, a bogo napano midoujer kiniou, mia maka kuvijev uei van kiniou,
MAT 25:43 a bogo napano kiniou nebe valauo, mia kamiu maka kuvuru kiniou neviedu joomo ea kunuemiu a bogo napano niabeku yauo, mia kamiu maka kuvar kulum̃arauo van kiniou, a bogo napano kiniou nemie, p̃eli na nojoa yimo na tetavokoiano, mia kamiu maka kumei kuviadu ka kiniou.’
MAT 25:44 “Ana mia nalo averdop̃e Parinio Tubo nei, averinavo ‘?Tubo! Ana kumemi numialso nagi napano jau jijerso, p̃eli napano midoujerso, p̃eli napano kobe valauo, p̃eli na niabemo yauo, p̃eli napano komie, p̃eli napano kojoa yimo na tetavokoiano? ?Ana bogo jum̃abe napano jau kojibe na, ana maka kumemi nuviedu nuvijaiso?’
MAT 25:45 “Mia naio ril vanlo, riverinavo ‘Riano kiniou neberii ka kamiu, bogo napano maka kamiu kuvisidomial ka kamiu kuvila tibe na van kiaku toro tai napano naio be toro na jum̃abe, nina jibe ka kamiu maka kuvisidom ka kuvila van kiniou.’”
MAT 25:46 Naruei Yesu mila nonovio kiano iliano, ana naio berinavo “Nalo na mia avan ka ajev vironiano tai napano maka rijikia ribisi bogo tai. Mia tomu na memedu nene nalo ava ajev meuliano napano maka rijikia ribisi bogo tai.”
MAT 26:1 Ana telikiti napano Yesu berloglog kiano tomu nalo ka iliano nalo nei avona bisi, ana naio berii kalo, naio berinavo
MAT 26:2 “Kamiu kumijikia ruei ka veua ana Jokoluolu na Sidomkariano Na Ioruriano tikario. Mia ea bogo na jokoluolu nene, mia nalo adu Kulorinio Kenerinio toa tomu nalo jum̃alo ka mia atukukakario ea m̃akolkolo ka mia naio rim̃aro.”
MAT 26:3 Naruei kanio bogo nene, tomu na tortoru na kulo lu nalo, naliko navurim̃araboiano na kulo Israel nalo aju abior ea parinio toro lu kunuano, napano siano Kaivas.
MAT 26:4 Nalo amil kavulio ka mia avokar Yesu bena ga ka mia tomu nalo ajikia re, mia nalo adu vironiano na m̃ariano vanio.
MAT 26:5 Mia nalo aberenio, aberinavo “Kito maka rejikia rala ea bogo na jokoluolu, bior mia tomu nalo tiniel ser kito ve toru, mia uetubaiano ve toru, bior nalo telabo napano tiniel jii tete neibano ruei.”
MAT 26:6 Mia iorou kanio, Yesu naio joa m̃arkomeli na Betani, naio joa toro tai kunuano napano abio ka Saimon Burumieni, kunuano bior mieiano na burumieni jua naio nua.
MAT 26:7 Mia ka bogo tai napano Yesu jo jinano ea yimo nei kia ga vo, mia tira tai binimei ea naio, tira nene midu bauei tai napano amim̃aukanio ea puruveru novo tai, napano bujo ka bonotanunu napano puruveru nene burutomoruo laka. Ana tira nei miyon nonovio bonotanunu nei ea Yesu parinio.
MAT 26:8 Mia bogo napano Yesu kiano naiagagoano nalo amial vite nei, mia nalo tiniel mimi, ana nalo aberinavo “?Ka venia ana naio mila kule bonotanunu na jibe na?
MAT 26:9 Verenio naio riṽilṽili kanio ga, mia naio mijikia rivokar puruveru ve toru eaio, ka mia naio rivar van talim̃asa nalo.”
MAT 26:10 Mia Yesu mijikia ka ajum̃a amil jibe na, ana naio ber kalo, berinavo “?Jum̃abe ana kamiu kumila lelan tira nei jibe na? Naio mila tonovo tai ban kiniou.
MAT 26:11 Talim̃asa nalo na, mia nalo atu dam̃ariga iviso ka kamiu, ka mia kamiu kumijikia kuvijailo, mia kiniou, kiniou noto re kitoliko tulaka.
MAT 26:12 Vite napano tira nei naio milaio, napano naio miyon bonotanunu nei ea niabeku, nina jibe ka naio mila batitig kiniou rorea kanaku tiviniano.
MAT 26:13 Riano kiniou neber ka kamiu, ea vio yetemeriba nonovio na averial kanaku ioluano nei eaio, mia monokanio mia atukunu bunu ka vite napano tira nei naio milaio, ka mia asidomkario dam̃ariga bereio kiano burum̃ara tinietiiano, napano naio tinien miia kiniou toru riano.”
MAT 26:14 Karina kiano naiagagoano duelimo ba juo [12] nei tai, napano siano Jutas na vio Kariot, naio ban ea tomu na tortoru na kulo lu nalo,
MAT 26:15 ana naio berinavo “?Verenio kiniou netiveluku ka Yesu riviedu ea jumemiu, mia kamiu kuvar venia van kiniou?” Ana nalo abulu ka puruveru silva duelimo va rolu [30] banio,
MAT 26:16 ana mo jikario ea bogo na, Jutas jom̃a jirag m̃arabo ka mia naio tiveluku ka Yesu vanlo eaio.
MAT 26:17 Ana binimei bokar bogoti napano be moti ka jokoluolu nei, napano abio ka bunu Jokoluolu Na Asen Beskit Na Mioboba, ana kiano naiagagoano nalo abinimei kean Yesu, ana abika aberinavo “?Jau kojidom kumemi nuva nuvila vatitig vite nalo nene ea vio na vabe, ka mia kito rala Sinaniano na Sidomkariano Na Ioruriano eaio?”
MAT 26:18 Ana Yesu naio berdop̃e banlo, berinavo “Kamiu kuva Yerusalemo, kamiu kuvial toro na, kuverii kanio, kuverinavo ‘Kenememi naverloglogiano naio berii kiano bogo binimei vaataro na ruei. Mia naio jidom naio naliko kumemi kiano naiagagoano nalo, numei nuvila sinaniano nei ea kunuamo.’ ”
MAT 26:19 Ana Yesu kiano naiagagoano nalo aba amila javukia napano naio berii kalo, ana nalo amila batitig vite nalo na jokoluolu nene.
MAT 26:20 Naruei iorou kanio ana Yesu nalo abinimei ea vonuo nene, ana bogiano binimei, naruei Yesu binimei naliko kiano naiagagoano nalo ajutano, ana nalo aju amijev sinaniano nene,
MAT 26:21 ana Yesu berenio, berinavo “Riano kiniou neberii ka kamiu, be kamiu tai napano mia naio tiveluku ka kiniou.”
MAT 26:22 Telikiti na kiano naiagagoano nalo amijog naio mil berii jibe nei, mia nalo amijog bova toru, ana nalo abiniu abivika denio, aberinavo “?Tubo, be kiniou kovio, a?”
MAT 26:23 Mia Yesu berdop̃elo, berinavo “Toro napano kumemi ve juo nuvititi ka joko ea baju ve takurano naio naruei be toro nene.
MAT 26:24 Mia Kulorinio Kenerinio naio monokanio rim̃aro tibe ka na Vivitauiano Lu berenio, mia toro na naio ritiveluku ka naio, mia rivova laka van naio, bo laka ka ver naio rimoluo re.”
MAT 26:25 Mia Jutas, toro napano karina naio jiveluku ka Yesu, bika berinavo “?Naverloglogiano, be kei? ?Kiniou bo, a?” Ana Yesu berdop̃e naio, berenio berinavo “Tenene ga naruei na jau koberenio na.”
MAT 26:26 Telikiti napano nalo aju ajinan kia ga vo, ana na Yesu midu joko tai, ber siva ban Atua kanio, karina naio bure kokorovio ana naio bar jian ban kiano naiagagoano nalo, naio berenio berinavo “Kamiu kuvijevio, kamiu kuvisenio. Nina be mokotenaku.”
MAT 26:27 Karina naio mijev baja na m̃arjum̃elm̃elu, ana naio mil berenio siva ban Atua kanio, karina naio jian banlo, ana naio berinavo “Kamiu kuviniu kumunu bitiranio ga ea baja nei,
MAT 26:28 bior ninei be kanaku burukija, napano mia rila Atua kiano verikariano tu sikili, napano mia naio rioukar viekokoano na vijuku vovaiano na tomu ve telabo kialo.
MAT 26:29 Kiniou neberkar ban kamiu, mia kiniou nomunu re bunu m̃arjum̃elm̃elu na bereio, rivano-o mia nomunu m̃arjum̃elm̃elu vou na kitoliko, ea Teta kiano navenatuboiano.”
MAT 26:30 Karina nalo amijev iou tai maariano ea Iouano Nalo bisi, ana nalo abatavio, abano maariano ea Suku na Buruolivi.
MAT 26:31 Naruei Yesu berii kalo, berinavo “Ka bogiano nei, mia kenemiu moneano ea kiniou ajoru, kar vite nalo napano mia amei avokar kiniou. Mia tavukia ga na Atua berenio ea kiano Vivitauiano Lu, napano naio berenio, berinavo ‘Mia kiniou nouebin toro na bitikar nunu naio rim̃aro, ana mia kanano nunu nalo avuro dedade atan ea vio nonovio.’
MAT 26:32 “Mia bogo napano nemeul bereio den nam̃ariano, mia kiniou notukamu nava Kalele, ana mia kamiu bunu monokanio kumei iorou.”
MAT 26:33 Naruei Pitere berial kanio, berinavo “Yesu p̃eli mia nalo dolu na aviniu kialo moneano ajoru kaso, ana avuro, mia kiniou maka nejikia notuvanso bogo tai.”
MAT 26:34 Mia Yesu berdop̃e, berkanio berinavo “Riano kiniou neber kaso, mia ka bogiano nei ga, bogo na tormano tokokoreko re vo, mia jau kavarbonbonua kiniou ve varolu, koverenio maka kejikia kiniou.”
MAT 26:35 Ana Pitere naio berial meravo ban Yesu, ea miralo abiniu, berinavo “Verenio nalo asidom auebin kiniou bunu kito ve juo, nina bo ga na, mia kiniou maka nejikia navar bonbonuaso, ka never kiniou maka nove kanamo.” Mia kiano naiagagoano dolu nalo bunu aberii jibe na.
MAT 26:36 Karina Yesu naliko kiano naiagagoano nalo aban ea vio tai, siano Ketsemani. Naruei naio ber kalo, berinavo “Kamiu kuvitua vio nei beamu vo, mia kiniou nava lie kija bereio, ka nava novolkouo ve telisu yako.”
MAT 26:37 Naruei naio buru Pitere naliko Sepeti kenerinio juo, Yemesi naio Jone, nalo tolu naliko aban lie kija telisu bereio, mia ka bogo nei Yesu mijog kiano iviso binimei temi laka, naio mijog bova toru laka.
MAT 26:38 Ana naio mil ban nalo tolu nei, berinavo “Vonganei, nemijog niunuku burukokorov toru, mila vaataro ka nam̃aro kario. Aiou bo ka kamiu kuvitevijo vija kiniou ve telisu beamu ea vio nei vo.”
MAT 26:39 Ana Yesu miel ba lie kija telisu bereio, ana naio mijoru minie, dabuko mirano ka rivolkouo. Ana naio bio, berinavo “Teta o-o, verenio jau komijikia kala vite nei, aiou kiniou nejidom ka jau kejelar baja na jogvaiano nei den kiniou ka mia kiniou nomunu ea re. Mia kala re tibe ka na kanaku jidomiano, mia kala ea ga kanamo.”
MAT 26:40 Karina, naio binimei bereio kean naiagagoano tolu nei, naio mialo ajum̃a amonmelio ruei. Karina ajevijo, ana Yesu berii ka Pitere, ber “?Jum̃abe ana kamiu maka kuvijikia kuvitevijo rivija kiniou ka aura ve takurano ga nei?
MAT 26:41 Kamiu monokanio kuvitikar vatitig rivu, a kamiu monokanio kumolkouo bogo nonovio, ka mia natiboliboiano nalo ala re kamiu kuvijoru ea kariano. Riano ga, kenemiu jidomiano jikili bo, mia niabemiu melukluku toru laka.”
MAT 26:42 Karina valuo nene, naio ban bereio ea vio nabano, naio bolkouo bereio, berinavo “Teta o-o, verenio jau maka kejikia kodular baja na jogvaiano na kiaku nei, mia kiniou monokanio nomunu eaio, bior monokanio tibe kanio ga na jau kojidomio.”
MAT 26:43 Karina, naio binimei bereio, mial nalo tolu nei ajum̃a amonmelio bereio, bior nalo miralo jouo ajevijo dedeio.
MAT 26:44 Naruei naio juvan nalo tolu nei aju ga, ana naio ban bereio ea vio napano naio bolkouo ber bereio iliano takurano ga, mila varolu ka ninei.
MAT 26:45 Naruei naio binimei bereio kean nalo tolu nei, ana berenio “?Ei, kamiu kumijilimebi, kamiu kumonmel kia ga vo? !Kamiu kuvitikario! Vaataro ka bogo na Kulorinio Kenerinio naio rivan ea tomu na bova nalo jum̃alo naruei.
MAT 26:46 Kito, kuvitumolu, ravano. Kamiu kumial na, toro na jiveluku ka kiniou nana ju binimei vaataro ga naruei.”
MAT 26:47 Ana bogo na Yesu naio jom̃a ber iliano nene kia ga vo, Jutas neibano naio be naiagagoano duelimo ba juo [12] tai, naio binimei, naliko tomu telabo na mira nalo abar iobogu na mira bija kialo nia nalo. A tomu na tortoru nalo na kulo lu nalo naliko navurim̃araboiano nalo na kulo Israel, nalo naruei amiilalo abinimei.
MAT 26:48 Mia beamu ka nalo amaluvo, toro na tiveluku Jutas naio berial kijokijo tai banlo, naio berinavo “Toro na verenio kiniou neviviuo naio tukamu, naio naruei kamiu kuvokakar naio sikili,”
MAT 26:49 mia bogo napano nalo amiyotuba, Jutas miel memedu ka Yesu, biviuo naio ana naio berkanio, berinavo “!Bogiano bo-o, Naverloglogiano! Tum̃aro to vijaso.”
MAT 26:50 Ana Yesu berkanio, berinavo “Koig, im̃auano napano kobinimei kanio, mia jau kalaiio ga.” Naruei nalo abinimei, abokakar Yesu jikili.
MAT 26:51 Mia bogo napano abokar naio jibe na, ana Pitere burular kiano iobogu, p̃iligio je titire ea Parinio toro Lu kiano toro tai ana jelar tilinieno tivelinio.
MAT 26:52 Naruei Yesu mil banio, berinavo “Kodu vatitig kanamo iobogu rivan ea sivi nene bereio. Toro na jo midu iobogu na mira, mia naio rim̃aro ea iobogu na mira.
MAT 26:53 ?Kamiu kuberiam̃a maka nejikia nevio van Teta ka naio rijai kiniou? Verenio nevio van naio, mia ve vaarakurano ga, naio riila kiano taara na nailiano nalo ve telabo ka mia amei avitikar kiniou.
MAT 26:54 Mia verenio kiniou nala tibe na, mia iliano nalo nanua jua Vivitauiano Lu, mia maka ajikia amei ve riano, tibe kanio napano aberkario nua ruei.”
MAT 26:55 Mia Yesu mil ban tomu nalo nei, naio berinavo “?Ka vaio ana kamiu kubar kenemiu iobogu nalo bija kenemiu nia nalo? Kubokar bena kiniou jibe na? ?P̃eli kamiu kuberiam̃a kiniou nebe toro kouo na vinauano, p̃eli na napano m̃a mue toro? ?Mia legiano nonovio kiniou nojom̃a noberloglog tomu nalo ea Atua Kunuano Lu, mia jum̃abe ana maka kamiu kumei kuvokar kiniou ea bogo na?
MAT 26:56 Mia vite nalo nei bo ga na, bior vite nalo na kamiu kumitu kumilaio, jibe ka ga napano naverialiano nalo aberialio nanua ruei ea Vivitauiano Lu, ana kialo iliano nalo nene, aju abinimei abe riano naruei.” Ana ea ga aura nei, naiagagoano nalo ajuvan Yesu, nalo aburo ka naio.
MAT 26:57 Mia nalo napano abokar Yesu, aburu binimei ka ala naio tumolu tukamu kean Kaivas, Parinio toro lu, napano naverloglogiano na tuboiano nalo naliko navurim̃araboiano na kulo Ju nalo kialo abinimei vio takurano ea kiano komeli nene ruei.
MAT 26:58 Mia Pitere bunu jakisor Yesu ka bogo nene, mia naio maka rivan vaataro ka naio, mia bogo na abinimei jouro ea burusio na komeli labo nei, Pitere naio ba jotano naliko Kaivas kiano tomu na im̃auano nalo, ka mia rijog von ka mia ala tum̃abe ka Yesu.
MAT 26:59 Naruei tomu na tortoru na kulo lu nalo, bija tomu na tortoru dolu nalo na aju joomo ea vioriano nei, nalo ajirag tomu nalo tai ka mia ajubolbo ka Yesu, ka mia aver vite nalo tai ka napano aial ka amijikia auebin Yesu riviorio.
MAT 26:60 Naruei nalo amil, ana tomu telabo ajumolu, amijubolbo bano-o, mia vioriano nei maka rial vite tai ea kialo iliano nalo rivare ka mia ala tibe na ka Yesu. Kialo iliano nalo beve dolu ga jibe na bano-o bisi ana tomu juo ajumolu,
MAT 26:61 aber iliano takurano ga aberinavo “Toro na naio berenio mijikia rue bulag Atua kunuano Lu, karina naio rivon vavin bereio ka bogoti ve tolu ga.”
MAT 26:62 Naruei Parinio toro lu nei naio jumolu, mil ban Yesu, berinavo “?Jum̃abe, jau koverdop̃elo, p̃eli na makanio? ?Jum̃abe ka iliano nalo nam̃a aju aber bulagio na?”
MAT 26:63 Mia Yesu maka ril, naio ju buru ga. Naruei Parinio toro lu nei berkanio bereio berinavo “?Kiniou neber kaso, jau monokanio kover Atua Meul siano kover riano ka jau kobe Naverikariano, napano Atua kenerinio, p̃eli na jau maka kove naio? ?Jau monokanio koverialio vatitig van kumemi vonganei!”
MAT 26:64 Naruei Yesu mil banio, berinavo “Vite nene naruei, jau kojom̃a koberenio kiana. Mia kiniou neber ka kamiu, iorou kanio vesiou re, kamiu kuvial Kulorinio Kenerinio napano mia naio totano tivelinio vameruo ea Atua na moroano, a mia kuvial naio riyotuba ea melijo nalo ea yetemeriba.”
MAT 26:65 Mia Parinio toro lu nei, naio tinien mimi m̃ele, ana mijede m̃ano kulukoti, ana naio berinavo “!Barei naruei! Toro na naio ber niegeniege Atua siano lu ruei. ?Kamiu kumijogio? ?Jum̃abe ana roju rejirag bereio toro tai ka mia river bereio titai ka naio?
MAT 26:66 ?Vioriano jidomii jum̃abe? ?Mia roviron tum̃abe?” Nalo amil aberenio, aberinavo “Bo kanio auebin toro na naio rim̃aro.”
MAT 26:67 Naruei nalo abule mirano, a ajuku naio, mia tealo amijuba bilivilig naio,
MAT 26:68 ana nalo amiyotel ea naio, abika denio aberinavo “?Ei, Naverikariano, jau koverial vonio, kenia mijubaso vonga na?”
MAT 26:69 Ana ka bogo nene Pitere naio jotano jouro ea burusio nei, ana niatira tai napano jom̃a bitikar yimo naio binimei, berinavo “!Uerei, jau bunu kamliko Yesu na vio Kalele neibano!”
MAT 26:70 Mia kamu ea miralo abiniu, Pitere barbonbonua tenei, naio berinavo “Kiniou maka nejikia tena jau kojom̃a koberenio na.”
MAT 26:71 Naruei naio buro den niatira nene, batavio jua morouo na toru na burusio na komeli nei. Ana ea vio na, niatira dolu mialio, ana naio berii ka tomu nalo na aju vaataro, berinavo “Tete na, naio naruei naliko Yesu re Nasarete.”
MAT 26:72 Ana Pitere naio barbonbonua tena bereio, naio mila kiano iliano jikili, mia naio berinavo “P̃eli ga, kiniou maka leleio nejikia toro na.”
MAT 26:73 Ana maka vesiou, ana tomu nalo na aju vaataro ea morouo nene abinimei ea Pitere, aberii kanio aberinavo “Ninei be riano, jau kobe nalo tai, bior jooa na kojom̃a kabar ka kiamo iliano, jibe ka kulo Kalele nalo.”
MAT 26:74 Mia Pitere naio mila iliano jikili lie vo, ana naio berinavo “!Maka leleio! !Riano ka tiniabene! !Kiniou neberenio ruei, maka nejikia tete na!” Ana memedu ka bogo nene, tormano tai jokokoreko,
MAT 26:75 ana mila Pitere tinien maio ka Yesu kiano iliano, napano naio berkanio berinavo “Riano kiniou neber kaso, mia ka bogiano nei ga, bogo na tormano tokokoreko re vo mia jau kavarbonbonua kiniou ve varolu, koverenio maka kejikia kiniou.” Naruei Pitere batavio, naio jegi mia jegi ka tinie na jogvaiano toru.
MAT 27:1 Naruei kavijo, binimei bogo na m̃erenio bavin, tomu na tortoru na parinio kulo lu nalo naliko navurim̃araboiano na kulo Israel nalo, ajutano bereio ka alavon ka avirakar m̃arabo tai rivu, ka mia rila ana Yesu monokanio rim̃aro.
MAT 27:2 Mia bogo napano amil bisi, ana amiorkar Yesu jum̃ano, ana aburu naio ba ban Pailat, napano naio be Parinio tubo na vio Romo napano naio bitikar Israel ka bogo na, ana nalo amidu Yesu joa Pailat nene jum̃ano, ka mia naio tibureio.
MAT 27:3 Mia Jutas, napano naio jiveluku ka Yesu karina, naio bitilubar ka ajibure Yesu ruei ka monokanio mia naio rim̃aro, ana naio mijog bova toru ka vite na milaio. Ana naio bilig kiano jidomiano bereio ruei, ana naio bar bereio silva duelimo va rolu [30] nei, ba ban tomu na tortoru nalo nanua abar banio jukamu.
MAT 27:4 Naruei naio ber kalo, berinavo “Kiniou nabijuku bova bior nejiveluku ka toro na maka rila titai leleio tokoro, mia kanaku iliano ga mila ka mia ala bin naio rim̃aro.” Ana nalo nei aberii kanio ga, aberinavo “?Ai koig, jum̃abe ana jau kobinimei kejegi bereio ban kumemi? Kumemi nubisi denso ruei.”
MAT 27:5 Naruei Jutas p̃ilig m̃elea ga puruveru nalo nei joomo ea Atua kunuano Lu, ana naio batavio, ba jelan burujono ka teli, ka naio rim̃aro.
MAT 27:6 Mia tomu na tortoru na kulo lu nalo nei aba abar puruveru nalo nene, naruei nalo aberenio “Puruveru nei, burukija na toru miou kario ruei, ana ea kiado tuboiano, maka rejikia rodu puruveru na jibe na toa basaro na Atua kunuano Lu.”
MAT 27:7 Ana nalo aberiio, karina nalo abar puruveru nene, aba abulu ka niatano tai, napano beamu, siano “Borotano Na Tanop̃ili,” naruei nalo ajuvan niatano nei be pakeltavo na valauo nalo m̃alo.
MAT 27:8 Tenene na, binimei bokar banei, tomu nalo ajum̃a abio niatano nene, aberenio “Borotano na Burukija.”
MAT 27:9 Vite na jibe na, ana mila Naveri-aliano Jeremaia kiano iliano tai re nua naio binimei be riano, napano berenio “Abar puruveru silva veru duelimo va rolu [30], bare ka napano kulo Israel aberenio naio bare ka avulular ka toro,
MAT 27:10 ana nalo aba abulular borotano nei den toro nam̃a mim̃auka tanop̃ili, jibe ka na Atua berii ka kiniou ka noim̃au kanio.”
MAT 27:11 Ana nalo aburu Yesu binimei jumolu jukamu ea Parinio Tubo Pailat, ana na bika den Yesu berinavo “?Jau kobe Parinio tubo ka kulo Israel nalo p̃eli na makanio?” Ana Yesu mil berdop̃eio, berinavo “Tenene na, jau kojom̃a koberenio na.”
MAT 27:12 Mia bogo napano tomu na tortoru na kulo lu nalo naliko navurim̃araboiano nalo aberii lualua vite nalo telabo kar Yesu, mia Yesu maka bunu riverdop̃e titai.
MAT 27:13 Mia Yesu naio juburu ga jibe na, naruei mila Pailat bika bereio, berinavo “?Jum̃abe, jau maka kosidomial ka ajum̃a aberenio vite telabo na bova karso?”
MAT 27:14 Mia ea tivelinio na vite nalo na ajum̃a aberenio nei, mia Yesu maka leleio riverip̃e titai vanlo, naruei Parinio tubo nei miilo toru kanio.
MAT 27:15 Ka bogo nene, mia nalo aju kia ga vo ea Jokoluolu na Sidomkariano Na Ioruriano, mia ka yuka nonovio ea jokoluolu nei, Parinio tubo na Romo nei naio jom̃a mila vite tai ka kulo Israel nalo. Naio jibe ka napano verenio nalo tealo ajua tetavokoiano, ana nalo amijikia aver nalo tai kalo, ka mia parinio tubo nei naio rijamo ka naio riva tavio.
MAT 27:16 Mia ka bogo nei, toro na poletik tai joa tetavokoiano, napano mia tomu nalo amijikia batitig naio, siano Yesu Barabas.
MAT 27:17 Naruei bogo na tomu nalo abior vio takurano nalo telabo ea vio nei, Pailat bika denlo, berinavo “?Kamiu kumisidom kiniou najamo ka kei taluvo riviedu bereio ea kamiu? ?Yesu Barabas, p̃eli na Yesu na aju abio naio ka Naverikariano?”
MAT 27:18 Pailat bika jibe nei, bior naio mijikia ruei ka tomu nalo na tortoru na kulo Ju nalo, nalo ga aburu Yesu binimei banio bior im̃auano na jokuano ga, bior kialo tomu nalo ajaaro toru ka Yesu.
MAT 27:19 Ana ea bogo na bunu napano naio jotano ea vio na tibureiano ka rila iliano nei, mia kouano miila toru binimei banio berinavo “Jau kala re titai ka toro na. Naio maka rila titai, mia ka bogiano kiniou nomonbovuii naio, mia vonganei kiniou nomijog bova toru kario.”
MAT 27:20 Tenene na, Pailat jidom tuvan Yesu, mia tomu nalo na tortoru na kulo lu nalo naliko navurim̃araboiano na kulo Ju nalo, amila bulag tomu nalo kialo jidomiano nalo, ajikili laka kalo, aberinavo monoka averii ka Pailat naio tuvan Barabas, mia naio rila Yesu riva rim̃aro.
MAT 27:21 Naruei Parinio tubo nei naio bika denlo bereio, berenio berinavo “?Kamiu kumisidom kiniou najamo ka tomu juo nei, na vabe nene naio taluvo rivano?” Ana nalo abio jouo, aberenio aberinavo “Barabas.”
MAT 27:22 Naruei Pailat bika denlo, berinavo “?Mo, bo ga, ana mia kiniou nala tum̃abe ka Yesu napano ajum̃a abio naio ka Naverikariano?” Mia nalo abiniu amiaga jouo, aberenio “!Kotukukar naio toa m̃akolkolo!”
MAT 27:23 Ana naio berinavo “?Kar vaio? ?Venia bova napano naio milaio?” Mia nalo amiaga kilkil, aberinavo “Kotukukario, kotukukario toa m̃akol kolo.”
MAT 27:24 Telikiti na Pailat mial ka maka rijikia riverburelo, bior uetubaiano jumolu m̃ele ruei, ana naio midu baju na uei tai, naruei kamu ka tiniobi nei, naio jekon jum̃ano, ana naio berenio “Mia burukija na toro nei toa re kiniou. Kiano m̃ariano naio be kenemiu im̃auano ga.”
MAT 27:25 Naruei tomu nalo amil aberdop̃e, aberenio “Bo ga na, jibe na garuei ana kumemi numisidom, napano kiano m̃ariano be kenememi im̃auano, a napano kiano burukija naio toa kumemi vija kenerimemi nalo.”
MAT 27:26 Ana Pailat naio mijamo ka Barabas banlo, jibe ka na nalo ajidomio, ana naio midu Yesu joa kiano kulo na mira nalo jum̃alo ka avitivio, a ka avuruio rivan ka atukukario toa m̃akolkolo.
MAT 27:27 Naruei Pailat kiano kulo na mira nalo aburu Yesu abatavio ea vio medave na kanano komeli nene, mia nalo abio bunu kulo na mira taara dolu nalo ka amei aial Yesu.
MAT 27:28 Naruei nalo amiya bulag kanano kuluniabene, ana amiya kulukoti tai ea naio napano niabene be vabolo jibe kanio nam̃a parinio tubo nalo amiyaio,
MAT 27:29 naruei nalo abar tilikou abili vatitig bisi, ana amive joa parinio, jibe ka parinio tubo kanano batubatu tai, ana nalo amidu bunu iesi tai joa jum̃ano meruo ka naio rivokario. Naruei nalo aju aminie ka sudu jaalo kanio, ana nalo aju amiyotel eaio, aberinavo “!Kumemi nubameneaso, jau Parinio tubo novo na Kulo Israel kialo!”
MAT 27:30 Ana nalo aju abule titia naio, a amidu burusubavio nene, amue ka Yesu pariparinio.
MAT 27:31 Mia bogo napano amiyotel ea naio bisi, ana nalo amiyalar kulukoti vabolo nei denio, ana amiya m̃ano kuluniabene ea naio bereio, ana nalo aburu naio, abatavio ka atukukakario ea m̃akolkolo.
MAT 27:32 Ana bogo na kulo na mira nalo aburu m̃arabo ka Yesu aba tavio, ana nalo amileal toro na vio Saireni tai, siano Saimon, naruei nalo ajutua naio ka naio kija rudu Yesu kiano m̃akolkolo rivano.
MAT 27:33 Mia nalo aba abokar suku tai, napano siano Kolkota, napano nioti nene berenio vio na jibe kanio bordada.
MAT 27:34 Bogo napano nalo amijivi ea vodobi na suku nene, nalo ajidom adu m̃arjum̃elm̃elu tai van Yesu ka rimunuio, mia m̃arjum̃elm̃elu nei vati titai napano mijea juaio, ka mia rila Yesu niabene je ka mia rijog re rijalele m̃ele, mia bogo napano Yesu miomo vonio, mia maka sidom rimunuio.
MAT 27:35 Nalo aburu Yesu bano, ana ajukukakar naio ea m̃akolkolo. Karina, nalo amila jibe ka na amiere m̃abujo ka aleal ka mia kei rivar Yesu m̃ano kuluniabene tai a kei rivar dolu nene,
MAT 27:36 ana nalo ajutano ea vio nene ka aviti kuku ka naio.
MAT 27:37 Ana nalo ajiri verialiano tai, ajukukario jo mave ka parinio, naio berial vite na mila amuebin naio biorio, napano naio berenio “Nina be Yesu, Parinio tubo na kulo Ju nalo.”
MAT 27:38 Mia nalo amidu tomu juo na vinauano ajukukakarlo bunu ea m̃akolkolo jibe ka Yesu, amidu tinene jo tivelinio vameruo, a tinene jo tivelinio vam̃ali.
MAT 27:39 Naruei tomu nalo napano m̃a amiel abarlaka ea vio na, ap̃iligṽilig pariparilo, aberii niegeniege Yesu liki, nalo aberinavo
MAT 27:40 “!A! Jau m̃a na, nanua m̃a kober komijikia kala bulag Atua Kunuano Lu, ka mia bogoti ve tolu ana koivon kar vavin bereio, mia jum̃abe naruei? !Ee, mia bo ka jau kalarur kanamo meuliano vonio! !A verenio jau kobe Atua kenerinio riano, kataluvo den m̃akolkolo na, ana katabulu!”
MAT 27:41 Ea bajago nene ga bunu, tomu na tortoru na kulo lu nalo naliko naverloglogiano na tuboiano nalo naliko navurim̃araboiano nalo aju abital eaio,
MAT 27:42 nalo aju aberinavo “!P̃eli naio milarur tomu dolu nalo telabo ruei, mia vonganei, naio maka rivare ka rilarur naio! ?Naio be kito kulo Ju nalo kiado Parinio Tubo na, p̃eli na makanio? Bo ka naio tabulu den m̃akolkolo vonganei, ka mia kito romonea naio.
MAT 27:43 Toro na naio berenio naio biekouo ea Atua, naio berenio naio be Atua Kenerinio. !Mo, kito reial vonio, verenio Atua jaaro kanio, mia naio rilarur naio vonganei!”
MAT 27:44 Mia tomu juo na vinauano napano ajukukakarlo ea m̃akolkolo jibe ka Yesu, naljuo bunu amil bova ka Yesu, abironkar nalo nei ka kialo ilivovaiano nalo nalikolo.
MAT 27:45 Ana ea legiano viovare, ana melijokouo binimei miununuko vio reraio, mia jo jibe na bano-o bokar m̃erenio tolu niogoravo,
MAT 27:46 mia vaataro ka bogo na, Yesu miaga jouo ea kiano iliano memedu, naio berinavo “?Eli, Eli, lam̃a sabatani?” napano berenio “?Kiaku Atua, kiaku Atua, ka vaio ana kojuvan lelan kiniou nojo jibe nei?”
MAT 27:47 Mia tomu nalo nei tai ajua vio na, nalo aju abitii vite nalo na malmaluvo, nalo amijog belia Yesu miaga jibe nei, nalo aberenio “Toro na naio jo bio tormoruo Elaija, ka rimei rijai naio.”
MAT 27:48 Mia sop̃eli ga, nalo tai jikiti binimei, midu burujumu tai, miyon m̃arjum̃elm̃elu na mijea ban eaio, julu kario ka iesi tai, ana jianio ban Yesu ka rimunuio.
MAT 27:49 Mia kulo dolu nalo aberenio “!Ei, jau koto vo! Reial vonio, p̃eli mia tormoruo Elaija rimei rilarur naio bo, p̃eli na mia rimei re.”
MAT 27:50 Karina Yesu miaga jouo bereio, naio buru maaria kanano jegi, ana juvan niununo bano, ana mo naio m̃arodobi liki.
MAT 27:51 Monloglog ea bogo nene ga, jagidago na ea Atua Kunuano Lu, napano joko vio lu na be vio lu laka, naio burup̃e tivelinio juo, jikario mave batove boru yetano. Mia m̃ii mukulkulu ka borotano, ana puruveru nalo na tortoru aburuboṽelo,
MAT 27:52 mia ea pakeltavo, martanbo telabo na tomu nalo na memedu nua ajuvavo, mia tomu nene nalo amemeul bereio.
MAT 27:53 Ana amolmoluo den salo m̃artanbo, mia iorou ka bogo na Yesu bunu meul bereio ea nam̃ariano, nalo nei amiel aban ea bulukomeli lu na Yerusalemo, naruei tomu telabo amialo.
MAT 27:54 Naruei kulo na mira nalo, naliko kialo toro na toru, napano aju abitikar Yesu, bogo na amijog m̃ii mukulkulu, nalo amial vite nalo na amalmaluvo, nalo amerou toru, amemebiju, ana nalo aberenio “!Aue, tomu nalo, toro nei be Atua Kenerinio riano ga!”
MAT 27:55 A tire nalo telabo ea vio na, nalo ajikili aju koalabo, aju abitivitii Yesu. Nalo na, nanua ajaluvo Kalele ruei, ajum̃a ajakisor Yesu bano-o, a nalo ajum̃a amiija naio.
MAT 27:56 Ana iviso ka tire nalo nei, tolu nene tai be Mere tira re Maktala, a Mere napano Yemesi naio Yoseve kenielo, a tira napano Sepeti kouano.
MAT 27:57 Naruei toro tai na vio Arimatea naio jo, napano naio be Yesu kanano naiagagoano, a naio be toro na sanibaiano, siano Yoseve. Naruei bogo napano vaataro ka m̃erenio rivatove,
MAT 27:58 naio ba jikili jukamu ka Pailat mirano, ana naio bika Yesu mokotenano. Naruei Pailat berii ka kiano kulo na mira nalo ka adu Yesu mokotenano rivan naio.
MAT 27:59 Ana Yoseve naio midu Yesu mokotenano, mijuvulukoio ka kulum̃arauo tai na miuvu bo,
MAT 27:60 ana naio midu ba joa m̃ano buluvae vou, napano aje batitigio vonga. Ana amilivlivi ka puruveru na toru nene binimei, ajubonkokar buluvae nei m̃aratavo nene, ana Yoseve nalo aban bereio.
MAT 27:61 Ana Mere juo nei, tinene tena vio Maktala, naliko naljuo dolu nene, abinimei ajua vio nei, ajutano memedu ka m̃aratavo na buluvae nei napano Yesu mokotenano jo joomo eaio.
MAT 27:62 Vite nalo na amalmaluvo ea legiano na ka rila vite nonovio atu batitigio ea Legiano Lu. Mia bogoti dolu nene, napano naio be Legiano Lu nei naruei, tomu na tortoru na kulo lu nalo naliko Varisis nalo aba ajumolu aju kamu ea Pailat mirano,
MAT 27:63 nalo aberinavo “O Pailat, kumemi numisidom nuverial titai kaso beamu vo, napano kumemi numitum̃a numisidomii kia ga toro na sibiano nei, ka bogo napano naio meul kia ga vo, ana naio jom̃a berkar berenio ‘Iorou ka legiano ve tolu, mia kiniou nemeul bereio.’
MAT 27:64 Tenene na, kumemi numisidom nuvika denso, ka jau keiila kanamo kulo na mira nalo tai avan ka atukuku ka buluvae na riva ribisi ea legiano tolu nene. Tibe m̃a na mia kiano naiagagoano nalo amei avinalar ka mokotenano, ana mia nalo ala sibi, averial ka tomu nalo averenio ‘Naio meul bereio ea nam̃ariano.’ Verenio tibe na, mia kiano sibiano na iorou nene mia naio rivova laka, tovulu nana jukamu.”
MAT 27:65 Naruei Pailat berii kalo berinavo “Mo, bo ga, kamiu kuvuru kiaku na mira nalo tai avano, ka ala vite nonovio tibe ka na kamiu kumisidom, ka kuvitikar vio na.”
MAT 27:66 Ana nalo aba amila vatitigio puruveru nei a abijuru ka bijuru tai, ka verenio toro tai rikulkulu ka veru nei, mia bijuru nene rivurikorovio, ka mia amijikia avitilubario. Ana abar bunu kulo na mira nalo ajukuku ka vio nene.
MAT 28:1 Legiano Lu barlaka, ana legiano napano binimei iorou, napano be legiano moti na sude, bogo napano m̃erenio mijivi, ana Mere na vio Maktala, naljuo Mere dolu, abe juo aba ka aial buluvae nene.
MAT 28:2 Naljuo aba aboru ea vio nei, sop̃eli ga m̃ii mukulkulu toru, bior Atua kiano nailiano tai moluo den vio mave binimei ea yetemeriba, melivlivilar ka puruveru nei, ana naio ba jotano mave eaio.
MAT 28:3 Mirano merera o-o mia, kiano kuluniabene meravo a miuvu mia miuvu kirinovo,
MAT 28:4 mia bogo na kulo na mira nalo amialio, nalo amerou kilkil bano-o mia m̃a am̃arm̃aro yulu kanio garuei aju.
MAT 28:5 Naruei nailiano nei naio mil ban tira juo nei, naio berinavo “Kamjuo kumerou re. Kiniou nemijikia ka kamjuo kubinimei nei kar ga Yesu napano ajukar naio ea m̃akolkolo,
MAT 28:6 mia naio maka bunu toa vio nei, naio meul jumolu bereio ruei, jibe kanio napano naio berkario jukamu. Kamjuo kumei kuvial vio napano nanua mokotenano mon eaio.
MAT 28:7 Naruei kuve juo kuvan sop̃eli, kuverialio ka kiano naiagagoano nalo ka naio meul bereio den nam̃ariano. Mia vonganei, naio tukamu rivatove Kalele, mia kamiu kuviniu kuvatove bunu kuvial naio ea vio na. Ninei naruei be kanaku iliano ban kamjuo.”
MAT 28:8 Naruei naljuo ajuvan buluvae, amila sop̃eli aba. Naljuo abano jibe ka napano amerou kia ga vo, mia ajaaro toru bunu. Naruei abe juo ajikiti aban ka averial lilianiano nei ka kiano naiagagoano nalo,
MAT 28:9 mia naljuo aju aba kia ga jibe na, ana abitavo bija Yesu. Amiilo binvinlo garuei, ana naio mil banlo berinavo “Kavijo bo.” Naruei naljuo aba aminie yetano ka Yesu jaano, ana abe juo abokar jaano, ana amilotu kanio.
MAT 28:10 Naruei Yesu berii ka naljuo nei, berinavo “Kamjuo kumerou re. Kuve juo kuvan bereio kuverialio ka kuruaku nalo ka mia nalo ava Kalele, naruei ea vio na mia nalo amijikia aial kiniou.”
MAT 28:11 Bogo napano tira juo nei aban bereio ea naiagagoano nalo, naruei kulo na mira nalo tealo aban bereio Yerusalemo, aberial vite nalo na amalmaluvo ka tomu na tortoru na kulo lu nalo.
MAT 28:12 Naruei kulo lu nalo nei aba vio takurano naliko navurim̃araboiano nalo, aberii vite nei bano-o, bisi na abironikar ka abar veru toru ban kulo na mira nalo nei,
MAT 28:13 ana nalo amil jikili banlo, aberinavo “Kamiu monokanio kuva kuverialio ga ka tomu nalo, kuverinavo ‘Kiano naiagagoano nalo ga abinimei bogiano, bogo napano kumemi numitum̃a numonmelio, naruei nalo abinalar ka mokotenano, amidu abano.’”
MAT 28:14 Aber kalo bunu, aberinavo “Verenio iliano na tenei riva rivoru ea Pailat, mia kumemi nuva nuvila vatitigio vija naio, mia kamiu kuvijog re bunu iliano tai.”
MAT 28:15 Naruei kulo na mira nalo nei ajaaro ka veru nei, ana abario naruei, ana nalo aba amila ilisibiano janea vio jibe ka na aberii kalo, mila ana Kulo Israel nalo ajum̃a aberver iliano nei binimei bokar banei.
MAT 28:16 Naruei naiagagoano duelimo ba tai [11] abatove Kalele, ea burusuku na Yesu berii kalo,
MAT 28:17 mia bogo na nalo amial naio nalo amilotu ka naio, mia nalo tealo ajidom dede ga ka be Yesu p̃eli na maka ve naio.
MAT 28:18 Naruei Yesu binimei vaataro kalo, ana naio berii kalo, berinavo “Atua mijamo ka vite nonovio jua jum̃aku, napano mave a na vio yetemeriba nei bunu, ka mia kiniou neje tuboiano kalo.
MAT 28:19 Tenene na, kiniou nemiila bulag kamiu naruei, ka kamiu monoka kuvan ea m̃atatoko nalo ea vio yetemeriba reraio, monoka kamiu kuvurulo amei ave kiaku naiagagoano nalo, napano kuvaruei ealo ea Teta, Kenerinio a Niununo Lu sialo,
MAT 28:20 a napano kamiu kuverlogloglo ka mia ajogkar iliano nalo napano kiniou neber ka kamiu ruei. Mia monokanio kamiu tiniemiu rimaio ka tulaka ka na mia kiniou noto kitoliko dam̃ariga, rivano-o rivokar juluvati na yetemeriba. Mm.”
MAR 1:1 Niosi nei, naio be Ioluano Vou na Yesu Kristo kiano, Atua kenerinio.
MAR 1:2 Tukunuano na ioluano vou nei naio jikario bija Jone Baruei, jibe napano Atua kiano Iliano Lu beriio nuanua ruei, ea iliano tai napano naverialiano Aisea berialio, napano Atua naio berenio, berinavo “Naio be toro tai na ridu kiaku iliano, napano kiniou nemiila naio biedu jukamu kaso, ka rila vatitigio kiamo m̃arabo nalo ameravo rivu.
MAR 1:3 Mia naio jom̃a bio ea vio yauo, berinavo ‘Kamiu kuvila vatitigio m̃arabo nalo na Tubo Atua kiano, nalo amemedu rivu, ka naio mijikia rieliel ealo, naio rimaluvo ea kenemiu meuliano nalo!’ ”
MAR 1:4 Jibena naruei, Jone Baruei naio miyotuba ea vio yauo ea tanobuku na Yutea, ana naio jo mioliolu ka Atua kiano iliano ban tomu nalo. Naio berial banlo berinavo “Kamiu monokanio kuvilig kamiu rivior kenemiu kariano nalo, a kumei, ana mia navaruei ea kamiu ka uei, naruei mia Atua riviekokoa kamiu riviorio.”
MAR 1:5 Mia tomu telabo laka yako Yerusalemo a ea komeli dolu nalo na ea tanobuku na vio Yutea, nalo aban ka aiagago ka Jone, naruei nalo ajum̃a aber bulag kialo vovaiano nalo ban Jone ana naio baruei ealo ea marauei na Yortano.
MAR 1:6 Mia bogo napano Jone Baruei joa vio yauo jibe na, naio mila javukia tormoruo naverialiano re nua nei, Elaija, jibe napano naio maka to riya kulum̃arauo novo nalo leleio, m̃ano kulukoti abie bija vijinio temeul na toru tai ga kamel, mia miorikar m̃ano kulukoti nene bija niati kulubue marauo ga. Mia sano sinaniano ea vio yauo nene, be surubu nalo ga bija vite sese nalo nei napano jago deden mim̃aukanio.
MAR 1:7 Ana Jone berkar ban tomu nalo, berinavo “Mia toro tai, napano kiano moroano loa kiniou, naio mia takisor kiniou rimei. Toro nene loa ka kiniou, mia kiniou maka navare ka nomon korkor neialar kiano kulubue, p̃elina nala im̃auano dolu tai na jibena van naio.
MAR 1:8 Kiniou nabaruei ea kamiu ea uei ga, mia naio rivaruei ea kamiu ea Niununo Lu.”
MAR 1:9 Mia maka vesiou, Yesu juvan komeli nei Nasarete, ea tanobuku na Kalele, binimei ea vio na ea marauei nei Yortano, ana Jone baruei ea naio ka uei nene.
MAR 1:10 Bogo napano Jone baruei ea Yesu bisi, Yesu binimei mave, jaluvo den uei, mia vaarakurano ga tiniabene betavo, ana naio mial ka Niununo Lu jo batove jibe ka vaama tai napano binimei yetano, bujo joa naio.
MAR 1:11 Ana amijog Atua na tiniabene nei mil batove, berinavo “Jau kobe keneriku novokario ga takurano na, a tinieku jiiso toru. Kiaku jidomiano joaso, kiniou najaaro toru kaso.”
MAR 1:12 Ana ea bogo nene bunu, Niununo Lu buru Yesu naio takurano ban lie ea vio yauo,
MAR 1:13 ana Yesu joa vio na ba bokar bogoti duelimo va veri [40] napano bogo nonovio Sim̃aro jom̃a mila von naio laka. Yesu naio jo bija tededen nalo ea vio nene, mia Atua kiano nailiano nalo abitikar naio.
MAR 1:14 Mia iorou, abinimei abokar Jone Baruei, ana abuku naio ban ea yimo na lakoiano. Mia Yesu mijog lilianiano nei, karina jaluvo den vio nei, naio ba batove bereio ea tanobuku na vio Kalele, ana jikar ea bogo na, naio jo mioliolu ka Atua kiano Ioluano vou.
MAR 1:15 Bogo na naio mioliolu, jo berinavo “Vonganei, Atua mila ka kenemiu bogo memedu ka kuvilig kamiu naruei. Atua kiano navenatuboiano jo binimei ea kamiu naruei, mia vonganei monokanio kuvilig kamiu a kumonea Ioluano Vou nei.”
MAR 1:16 Iorou kanio, ana na Yesu jom̃a mieliel ea baramudou na burum̃ara ueiyabo na Kalele, mial tomjuo, nam̃a aburuvurua niado, be Saimon bija kuruano Andru, napano naljuo aju aburu kialo levlevi.
MAR 1:17 Ana naio ber kalo abe juo, berinavo “Kamiu kumei kuvitakisor kiniou. Mia kiniou nala kamiu kuve tomu nalo na avuru tomu nalo amei ave kanaku tomu nalo.”
MAR 1:18 Mia vaarakurano ga, naljuo ajuvan kialo levlevi, ajakisor Yesu.
MAR 1:19 Karina Yesu miel ba lie kija, ana mial Sepeti kenerinio abe juo, be Yemesi naio kuruano Jone. Nalo aju ajutano joomo ea kialo uako ana nalo abe juo amila batitig kialo levlevi.
MAR 1:20 Mia bogo napano Yesu mial naljuo nei, naio bio naljuo, ka atakisor naio bunu, mia ajuvan karam̃alo Sepeti joa uako bija kialo tomu nalo na im̃auano, ana naljuo ajakisor Yesu.
MAR 1:21 Ana Yesu nalo amiel aba abokar m̃arkomeli na Kapeneam, a ea Legiano Lu, nalo aba joomo ea yimo na volkouano, ana Yesu jo berloglog tomu nalo ka Atua kiano Iliano Lu.
MAR 1:22 Mia nalo napano amiagago nalo amiilo laka, bior nalo amijog Yesu kiano verloglogiano maka tibe ka kialo naverloglogiano dolu nalo, bior napano Yesu kiano temi vatitig bo, ana Atua kiano moroano joaio.
MAR 1:23 Ana ka bogo na, toro tai napano niununo va joaio, naio jo naliko,
MAR 1:24 ana mila toro neibano miaga va souo, naio mil ban Yesu berinavo “?Yesu re Nasarete, kiamo venia jua kumemi? P̃eli na jau kobinimei ka kala lelan kumemi, a! Kiniou namijikiaso ruei, ka jau kobe kirinovo, kobe Atua kiano Tolu tai.”
MAR 1:25 Mia Yesu mil kirisikili ban niununo va neibano, joko vio ka naio, berinavo “E! Jau keil re! Jau kataluvo den toro na vonganei ga!”
MAR 1:26 Mia niununo va neibano naio mila kema neibano naio miaburusalsal, ana naio miaga souo vaarakurano bereio, naruei naio moluo den naio ana buro bano.
MAR 1:27 Mia tomu nalo na vio na amiilo laka, nalo ajum̃a aberverii Yesu, aberinavo “?E jum̃abe nei? ?Verloglogiano vou tai bereio nei, p̃eli venia na? Toro na, kiano moroano kirisikili laka na, naio mil ga ban niununo va nalo, nalo amijogkar naio.”
MAR 1:28 Kar vite nalo na naruei nalo ajaaro, ana nalo ajum̃a aber vatitig Yesu siano novo ban ea vio nonovio ea tanobuku na vio Kalele.
MAR 1:29 Mia Yesu naliko tomu nalo nei, Yemesi bija Jone a Saimon bija Andru, nalo abatavio ea yimo na volkouano mia nalo aban ea Saimon naio Andru kunualo, ninei ea m̃arkomeli na Kapeneam kia ga vo.
MAR 1:30 Naruei ea m̃aratavo nene, Saimon kenieno simemi, naio mie m̃a niabene bituvitunu na naio jom̃a mon ea ga m̃ano jogu, mia nalo aberial ka Yesu.
MAR 1:31 Ana Yesu naio binimei bokar tiramoruo neibano jum̃ano, naio burular naio jumolu, jotano ea m̃ano jogu, ana niabene minini bereio, mia naio jumolu ju, ba borosebi salo.
MAR 1:32 Ea kijev na legiano nene, bogo napano Legiano Lu bisi, bogo na m̃erenio batove ruei, mia tomu nalo abarvar tomu nalo na amie bija nalo na sim̃aro nalo abujo ealo abinimei ea Yesu.
MAR 1:33 Mia tomu nalo miroano laka, jibe ka napano vaataro ka tomu nalo na m̃arkomeli neibano abinimei amivinkakarlo vatitig ea m̃aratavo na yimo neibano, vio telisu.
MAR 1:34 Mia Yesu naio milarur tomu nalo miroano na amie ka mieiano ninio nalo, naio mijil bulag sim̃aro miroano den tomu nalo, naio joko vio ka sim̃aro nalo neibano ka nalo aver re titai leleio, ka napano nalo amijikia ruei ka naio be Naverikariano riano.
MAR 1:35 Mia ea vio niogoravo, bogo na tu naio maka tokokoreko vo, ana Yesu naio jumolu jaluvo den yimo, mia naio ban ea vio tai napano vio melumu bo laka, mia naio rivolkouo rivan karam̃ano.
MAR 1:36 Ana iorou, tomu nalo abinimei ka naio ea yimo bereio, mia Saimon nalo maka bunu aial naio, mia nalo aban ka asiravo naio.
MAR 1:37 Nalo ajiravo naio bano-o, nalo amilealio ea vio nei, mia nalo aber ka naio, aberinavo “Tomu dolu nalo miroano abinimei kaso, mia nalo aju ajiragso.”
MAR 1:38 Ana Yesu berdop̃e banlo, berinavo “Riano, kiniou nemijikia na. Mia makanio, kito monokanio ravan lie ea m̃arkomeli dolu nalo napano aju kia vo, ka mia kiniou nemijikia noioliolu ka ioluano vou nei ea vio dolu nalo bunu. Ka tena naruei, kiniou najaluvo yako nebinimei ea vio nei biorio.”
MAR 1:39 Mia Yesu naio ba mieliel ea vio nonovio na Kalele, na naio jo mioliolu ea yimo na volkouano na kulo Ju nalo kialo, a jo mijil bulag sim̃aro telabo den tomu nalo.
MAR 1:40 Mia toro tai napano bokar menko burumieni naio binimei ea Yesu, naio minie tano keanio, naio bika kirisikili denio, berinavo “Neber bo, ver jau kojamo ka ga, kiniou nomonea ka jau komijikia kolarur kiniou, nomeravo bereio.”
MAR 1:41 Mia Yesu tinien miia naio laka, ana naio maka river mirou ka tokolio ka kiano mieiano, mia naio midu jum̃ano joa naio, ana berkanio “Kiniou nemijamo; voniganei niabemo monoka rimeravo.”
MAR 1:42 Mia vaarakurano ga menko burumieni neibano naio jaluvo den toro nei niabene, naruei naio meravo bereio.
MAR 1:43 Mia Yesu jutua naio, berinavo “Jau komijog, jau kava koververii re tenei van tomu nalo vo, a voniganei ga jau kova kosel ea toro lu ka naio mijikia rivitii veve niabemo. Karina jau komijikia kava kala lotuano van Atua vija koisebi bunu ga sida ka meravoiano nei napano m̃a Mosis naio berenio, napano toro monoka rilaio bior vite na jibena. Karina iorou ka nina, toro lu naio mijikia riverialio ka menko burumieni nei naio biniu ruei.” Ana Yesu miila toro neibano bano.
MAR 1:45 Ana bogo na toro neibano naio bano, mia naio ba jo berii tenalo neibano ka tomu nonovio, mila na iliano neibano ban ea vio nonovio, bano-o napano mila Yesu naio maka bunu rijikia ka riel ka riva joomo ea m̃arkomeli nalo, ka ver naio rivano, tomu ve miroano laka amei ka naio. Naio jojo tavio ga ka vonuo, mia tomu nalo amalmaluvo ea kialo vio nonovio kiavo, nalo abinimei eaio.
MAR 2:1 Ana bogoti nalo tealo abarlaka ruei, ana na Yesu naio ban bereio ea m̃arkomeli napano Kapeneam, a maka ve kirisiou, mia tomu nalo amijogial ka naio binimei bereio ruei.
MAR 2:2 Ana nalo miroano abinimei ea Yesu, mia joomo ea yimo neibano naio bujomagmago kalo, a tavio ea m̃aratavo bunu, vio telisu ga. Mia bogo napano aju vio takurano jibe na, ana na Yesu mioliolu ka Atua kiano iliano lu banlo.
MAR 2:3 Mia ea bogo nene, tomu nalo ap̃ier nalo tai napano naio mie binimei, napano niabene nonovio m̃aro. Mia nalo veri ap̃ier ea ga m̃ano jogu, napano naio jo monmoneaio.
MAR 2:4 Mia bogo napano abinimei abokar vio neibano, amial ka vio nene teliki laka, mia nalo maka ajikia adu kialo bilbilu nei rivan vaataro ka Yesu. Naruei nalo ap̃ier abavin ea yimo mave, ana nalo amuedulu vodobi loglog vio napano Yesu naio jo memedu kanio yetano, ana ajuvarvan toro nei batove bija m̃ano jogu batove ea buluvio, batove joomo ea yimo.
MAR 2:5 Mia bogo na Yesu mial vite nei, naio mijikia ka tomu nalo nei amonea naio kirisikili laka, ka mia naio rijai toro neibano mie nei, mia Yesu ber ka kema neibano mie nei berinavo “Keneriku, kiniou nebiekokoa kiamo kariano nalo.”
MAR 2:6 Ea bogo nene tomu nalo tai tena naverloglogiano na tuboiano, nalo bunu ga aju, mia nalo amijog Yesu kiano iliano. Ana kialo jidomiano jo mim̃au bova ka vite nei,
MAR 2:7 nalo aju amil niege naio, aberinavo “Jum̃abe ana toro nei naio mil mila bulag Atua siano lu jibe na? Atua naio takurano ga naio mijikia riviekokoa kariano, maka bunu toro dolu tai bereio, ana kema nei naio jo mil jibe ka naio jo jidomii ka beriam̃a naio be Atua naruei.”
MAR 2:8 Mia vaarakurano ga Yesu naio mijoglubar ea naio mijikia ka tomu nalo neibano aju ajidomii va jibe na ka naio, mia naio ber kalo berinavo “?Ka vaio ana kenemiu iviso bujo ka jidomiano va nalo na jibe na?
MAR 2:9 A ver kiniou never tibe nei ka namieiano nei neverinavo ‘Kiniou nebiekokoa kiamo kariano’ p̃elina kiniou never kanio, neverinavo ‘Jau kotumolu, kojuku m̃amo jogu ana keiel,’ ana ea iliano juo nei, tai naio jikili ka averenio, ana tai naio monmaio ga ka averenio. Ana naina berinavo ‘Kotumolu keiel,’ naio jikili bior ka kamiu kuvijikia kuvitilubar kiaku iliano nei naio be riano p̃elina naio maka rive riano, ka toro nei naio tumolu p̃elina makanio.
MAR 2:10 Mia vonganei, kiniou noim̃auka titai napano mia kamiu kuvisidomii kuver Atua ga takurano naio mijikia rim̃aukanio, ka mia kamiu kuvijikia kuvitilubar ka kiniou Kulorinio Kenerinio, kiaku moroano bare ka noviekokoa bunu kariano na yetemeriba nei. Kamiu kuviagago vatitigio.”
MAR 2:11 Ana na Yesu mil ban namieiano nei, berinavo “Kiniou neber kaso, jau kotumolu, kojuku m̃amo jogu, keiel kava vonuo.”
MAR 2:12 Mia kirisop̃eli ga ea tiniobi miralo napano aju amialio, toro neibano naio jumolu ana na naio mijuku m̃ano jogu, ana miel ba tavio ba vonuo. Bogo na tiniobi neibano amial tenei, mia nalo amiilo toru, abamenea Atua, aberinavo “Koig, kito maka lele reial titai tibena ea kiado meuliano, mia banei ga.”
MAR 2:13 Mia Yesu batove tivelinio bereio ea burum̃ara ueiyabo neibano, mia tiniobi nalo abinimei vio takurano aju jeliviv eaio, naio berlogloglo.
MAR 2:14 Karina, naio mieliel ba lie, mia naio mial toro tai jotano joa kiano vajoomo na im̃auano ea yimo na abarivar bijii veru na takis. Toro nene, be Livai, Alveas kenerinio. Ana Yesu bio naio berinavo “Komei kotakisor kiniou,” mia sop̃eli ga Livai naio jumolu ana jakisor Yesu.
MAR 2:15 Karina, Yesu ba jinano ea Livai neibano kunuano, mia ea bogo na, tilikiti na tomu dolu nalo na abarvar bijii takis, bija tilikiti na veribinio dolu nalo, nalo bunu abinimei ajutano burukuti bija Yesu naliko kiano naiagagoano nalo, bior napano bogo nei, tomu ninio ga aju ajakisor Yesu.
MAR 2:16 Mia tomu na verloglogiano na tuboiano tealo, napano nalo abe Varisis, nalo amial ka Yesu naio jom̃a jotano burukuti bija tomu nalo na jibena, ana nalo abika den naiagagoano nalo aberinavo “?Kar vaio ana kenemiu naverloglogiano naio ba jom̃a jinano burukuti jibena bija tomu veribinio nalo na?”
MAR 2:17 Mia Yesu naio mijog iliano nei, mia naio berdop̃e berenio banlo, berinavo “Nalo napano mokotenalo kirisikili bo, nalo maka asidom ka ava aial toro nam̃a mieliel ka namieiano nalo, mia namieiano nalo ajidom m̃elea naio. Kiniou maka nemei ka novio tomu nalo na aber nalo amemedu ruei ea Atua mirano ka nalo atakisor kiniou, mia kiniou nebinimei ka tomu nalo na abova ajibe ka tomu nalo nei naruei.”
MAR 2:18 Naruei ea bogo nei, Jone Baruei kiano naiagagoano nalo bija Varisis nalo ajum̃a abokar bajago na veliano na sinaneano ka nalo abolkouo ban Atua. Ana tomu nalo abinimei ea Yesu, mia abika veve denio, aberinavo “?A jum̃abe? Jone Baruei kiano naiagagoano nalo abel ka sinaneano kam̃a abolkouo, a Varisis nalo kialo naiagagoano bunu ga amila jibe na, ana jum̃abe na jau kiamo naiagagoano maka atum̃a alaio?”
MAR 2:19 Ana Yesu berdop̃e banlo, berii naio naliko kiano naiagagoano nalo jibe kanio napano nalo ajaaro toru laka bogo napano naio jo naliko, mia nalo ajog rivova iorou ka bogo napano mia naio taluvo denlo, ana berinavo “?Bogo napano toro na naio joro jo kia ga vo ea jokoluolu naliko kiano bilbilu nalo, kamiu kuberiam̃a amijikia atuvan sinaniano na jokoluolu? Maka leleio.
MAR 2:20 Mia bogo tai navo, ver bogo tai toro nei kiano uolu tai amei avurular naio den kiano bilbilu nalo, ea bogo na naruei mia kiano bilbilu nalo amijikia aveli ka sinaniano, bior napano nalo tiniel miia naio laka.”
MAR 2:21 Bajago na veliano na sinaneano, naio be bajago moruo tai na kulo Ju nalo kialo lotuano, mia Yesu naio jidom rila rimeravo vanlo ka bajago moruo na jibe na, nalo maka ajikia aveverare rivija vite vou nalo napano naio jom̃a berlogloglo kalo. Ana naio ber jamerijiano tai tivelinio kalo, naio berinavo “Kito maka rejikia rodu niati kulum̃arauo napano be terivou, ka rotuluko ka kulum̃arauo moruo tai ka toko bulukuti vio na burup̃e eaio. Bior napano niati kulum̃arauo vou nei naio mijikia rila korov kulum̃arauo moruo na togio, ana mia bulujeleigio mijikia rimei ve toru lievo.
MAR 2:22 “Ana m̃arjum̃elm̃elu vou napano naio jom̃a jarabujo kia ga vo, maka rojikia roisonio rivan ea kulukuti nani napano be terimoruo, napano amison m̃arjum̃elm̃elu ban ea vatelabo ruei. Verenio jau kala tibe na, mia m̃arjum̃elm̃elu nene riyukuio, rila kulukuti nani nei saburu, mia m̃amo m̃arjum̃elm̃elu riou bulagio ana bauei nene rimei rivova bunu. Mia m̃arjum̃elm̃elu vou, jau monokanio koisonio rivan ea kulukuti nani napano be terivou bunu, jikili bo, naruei na jau komijikia kodu batitigio to vesiou.”
MAR 2:23 Ana ka legiano tai bereio, napano naio be Legiano Lu, Yesu naliko kiano naiagagoano nalo amiel abano, mia kialo m̃arabo ba jel bure tiniavio na subavio. Nalo amiel jibe na, naruei naiagagoano nalo jijerlo ana amikiti kokorov subavio nei m̃arati tealo ana ajenio.
MAR 2:24 Nalo ajum̃a amila jibe na, naruei Varisis tealo ajua vio na, napano aju abitii Yesu nalo, naruei nalo aber ka Yesu, aberinavo “Ai, kal kija! Kiamo naiagagoano nalo aju amila jum̃abe na, mia nalo maka ajikia ala im̃auano na ea Legiano Lu, ver tibe na nalo ajum̃a amila korov kiado tuboiano na.”
MAR 2:25 Ana Yesu berdop̃e banlo, berinavo “?P̃eli kamiu maka kuvuluku Iliano Lu bogo tai bo, napano berii vite nalo napano Parinio Tubo Teviti na nanua naio jom̃a milaio? Naio naliko kiano tomu nalo, nalo jijerlo m̃ele,
MAR 2:26 ana naio ba joomo ea Atua kiano vio lu, ana naio midu joko lu napano tuboiano ber kulo lu ga amijikia asenio, mia Teviti nalo nei ajenio. Ana Abieta, napano naio be parinio toro lu ka bogo na, naio mijamo ka banlo ga.
MAR 2:27 Kiniou neber ka kamiu, neber kiado tuboiano nalo maka ka atutua niegeniege kito bereio. Jibe na, Legiano Lu naio maka ve tena rila bulag kiado meuliano bereio, mia naio be tena ka rijai kito.
MAR 2:28 Mia kiniou nebe Kulorinio Kenerinio, a naio be tubo ka vite nonovio, naio naruei be tubo ka Legiano Lu bunu. Mia naio ga mijikia river venia napano ramijikia rala ea Legiano Lu, p̃eli venia na maka rimemedu ka kito ralaio.”
MAR 3:1 Ana ea Bogoti Lu tai bereio, Yesu naio ban bereio ea yimo na volkouano, mo na ka bogo nene, jumevuluku tai naio jo joomo bunu napano naio jum̃ano buluku.
MAR 3:2 Mia Varisis tealo napano tiniel jer Yesu ruei, nalo aju vaataro ka ga Yesu ea bogo neibano, nalo ajum̃a miralo jua ga Yesu ka ajidom aleal bajago va nalo eaio Yesu. Naruei nalo ajidom ka aial von ka ver Yesu rilarur kema neibano ea Bogoti Lu nei p̃eli mia rila re.
MAR 3:3 Mia Yesu naio mil ban kema neibano, berinavo “Jau kotumolu, komei mave nei beamu vo.”
MAR 3:4 Ana Yesu bika den tomu nalo na aju, berinavo “?Kiado tuboiano naio berinavo kito romijikia rola venia ea Bogoti Lu? ?Naio bo ka kito reim̃auka tena bo, p̃eli na bo ka kito reim̃auka tena bova? ?P̃eli na naio berinavo bo ka kito ralarur tomu nalo, p̃eli na bo ka kito rouebinvinlo?” Mia tomu nalo neibano maka leleio aver iliano tai bereio.
MAR 3:5 Naruei Yesu jirarag jeliviv ealo, napano naio mial miralo nalo kirisikili ga, mia naio mijog bova toru biorio a naio tinien jerlo. Naruei naio mil ban kema neibano bereio, berinavo “Kala von ka kovitirii jum̃amo beamu vo,” mia ea bogo na ga toro na mila jibe na, jum̃ano binimei bo bereio.
MAR 3:6 Mia Varisis nalo nei abava tavio, aban memedu ga abiviuo vio takurano bija Parinio Tubo Erot kiano tomu nalo, ka nalo alavon ka aleal m̃arabo ka amijikia auebin Yesu rim̃aro tum̃abe.
MAR 3:7 Ana Yesu naliko kiano naiagagoano nalo ajaluvo denlo abatove bereio ea burum̃ara ueiyabo, mia tomu nalo miroano ajakisorlo abatove. Tomu nalo neibano, tealo abinimei ea vio dolu nalo tealo ea vio nei Kalele,
MAR 3:8 ana nalo tealo abinimei rove yako ea vio Yutea bija kiano m̃arkomeli nei Yerusalemo, mia tealo abinimei ea tanobuku na vio Itumea, a tealo abinimei ea vio nalo napano marauei na Yortano tivelinio bano, ana tealo abinimei ivin ea tei napano toru laka ea komeli nalo na ea komeli juo nei, Taia bija Saiton. Nalo nonovio nei abiniu nalo amijog ruei iliano na vite nalo napano m̃a Yesu naio jom̃a milaio, naruei nalo ajidom ka amei kanio.
MAR 3:9 Ana bogo napano nalo miroano aju tivelinio ea ueiyabo napano ana Yesu ber ka kiano naiagagoano ka nalo averiko tauako sesa tai to, ka tomu nalo miroano laka, mia naio merou ka mia tomu nalo amei m̃a aivinkakar naio laka.
MAR 3:10 Nina bior naio milarur tomu nalo miroano napano amie amijog bo bereio ruei, naruei tomu dolu nalo na amie kia ga vo nalo ajum̃a amila von ka aivinlo tibe na ka mia nalo bunu amijikia atokol Yesu.
MAR 3:11 Mia ka bogo nene aver niununo va nalo tai napano ajua tomu nalo tealo, bogo na amial Yesu, mia nalo monokanio avatove ka naio, nalo ajorua jaano, abio toru, aberinavo “Jau kobe Atua Kenerinio.”
MAR 3:12 Ana Yesu mil kirisikili ban niununo va nalo neibano berburelo, berinavo mia nalo atu re aververii ka tomu nalo aver naio be kei.
MAR 3:13 Naruei iorou kanio ana na Yesu naio bavin mave ea suku nalo, ana naio bio tomu nalo tai abinimei eaio.
MAR 3:14 Bogo na nalo abinimei, naio bitiri bulag nalo duelimo ba juo [12], naio ber nalo ave atevi nalo, napano kialo im̃auano naio jibe nei, mia nalo aiel vija naio tulaka ka mia naio rilalo avar ioluano vou avan ea vio nalo,
MAR 3:15 a mia moroano na ajil bulag sim̃aro nalo tualo.
MAR 3:16 Naruei Yesu kiano atevi duelimo ba juo [12] sialo ajibe nei: Saimon, napano Yesu midu sio vou joa berinavo Pitere.
MAR 3:17 A Yemesi, napano Sepeti kenerinio. A Jone napano Yemesi kuruano napano Yesu midu sio vou ban naljuo nei, berinavo Boanejes, napano ber nalo abe juo atibe ka tubaal memedu, bior naljuo na niolo jaburu julaka ga.
MAR 3:18 A Andru, a Vilip, a Bartolomio, a Mataiu, a Tomas, a Yemesi, napano Alveas kenerinio, a Tatesa, a Saimon, napano naio mila poletik die kulo Romo nalo.
MAR 3:19 A Jutas na Kariot, napano iorou kanio, ana naio jiveluku ka Yesu ban kiano uolu nalo.
MAR 3:20 Ana iorou, Yesu naio binimei bereio vonuo, mia tiniobi toru abinimei ka naio bereio, ana Yesu bija kiano naiagagoano nalo amim̃au kalo bano-o nalo maka bunu averio ajilimebi kija ka asinan.
MAR 3:21 Naruei Yesu kiano torogio nalo amijog ka napano Yesu naio jo mim̃au m̃ele jibena, a nalo amijog bunu ka tomu nalo ajum̃a amil dieio, aberinavo “P̃eli kema nei, naio milaluvu parinio ruei kovio!” Mia Yesu kenieno bija kuruano nalo aban ka ajidom ka alavon ka avurular naio den tomu nalo nei.
MAR 3:22 Naruei ea bogo nene, tomu nalo na naverloglogiano na tuboiano, nalo ajaluvo den vio Yerusalemo abatove ea vio neibano, mia nalo ajum̃a amilidie Yesu ban tomu nalo ajum̃a aberial, aberinavo “Sim̃aro nalo kialo Tubo Belsabel, naio ba joa toro na ruei,” a nalo aju bunu ga aber “Toro na naio jom̃a jitig bulag sim̃aro ea moroano na ga napano Belsabel juvan ban naio.”
MAR 3:23 Naruei Yesu biolo abinimei eaio, ana na naio mil banlo ea jamerijiano, berinavo “?Jum̃abe na kamiu kuberiam̃a Sim̃aro bereio naio mijikia titiglar sim̃aro. Maka rijikia tibe na!
MAR 3:24 A verenio tubo tai napano kiano tomu nalo avuruburelo, napano togio atum̃a aildie nalo togio, mia tubo neibano naio kiano im̃auano nalo maka rijikia atu sikili leleio.
MAR 3:25 Ana verenio ea m̃aratavo tai na nalo ajum̃a aburuburelo napano nalo togio ajum̃a ajitig nalo togio, mia nalo maka leleio ajikia atu rivu bogo tai.
MAR 3:26 A jibe na bunu ga, averenio niadu nalo na Sim̃aro kiano togio nalo atumolu alavon ka ajil bulag togio dolu nene, nina jibe ka moroano na Sim̃aro kiano maka bunu rijikia tumolu tu, kiano moroano bakovio ruei. Mia maka leleio, Sim̃aro p̃irinio kirisikili dolu ga kiana vo.
MAR 3:27 “!Kuvijiio! Verenio toro tai sidomii ka riva joomo ea toro kouo tai kunuano ka mia naio rivina ka kanano saba nalo, mia naio monoka rivar teli riorkar toro kouo nei sikili beamu vo, avona bisi ana mo naio mijikia riva joomo ka rivina ka nonovio saba nalo na be toro kouo nei kanano. Mia kiniou nojom̃a nomila jibe na naruei ka toro kouo neibano Sim̃aro.
MAR 3:28 “Mia kiniou neber riano ka kamiu, tomu nalo kialo kariano bija iliano va nalo nam̃a ajum̃a aberenio, Atua mijikia riviekokoalo riviorio,
MAR 3:29 mia toro na mil bova lelan Niununo Lu naio berenio kiano im̃auano tealo Sim̃aro ga naio mim̃aukanio, toro na jibe na naio mia maka lele rijikia rivokar viekokoano bogo tai, kiano kariano naio mia toa naio rivano-o, mia maka rijikia ribisi.”
MAR 3:30 Naruei Yesu naio berii vatitig iliano jikili nei banlo, bior nalo naruei ajum̃a aberii ruei ka niununo napano joa naio, be niununo va.
MAR 3:31 Mia Yesu kenieno bija kuruano nalo abinimei amiyotuba kean naio ea bogo nei, mia nalo abinimei ajikili aju tavio ga, na amiila toru ban ka naio rimoluo rimei rialo.
MAR 3:32 Ana ea bogo na, tiniobi toru ajutano vaataro ka Yesu, mia iliano binimei bokario, ana nalo aberinavo “Ai, koniomo bija kuruamo bija kuviviniemo nalo aju tavio, ajidom ka ail kijaso beamu vo.”
MAR 3:33 Ana na Yesu berdop̃e berinavo “?A kenioku nalo be kei? A nalo na abe kuruaku nalo abe kei?”
MAR 3:34 Naruei naio jiraravo bitikar tomu nalo napano ajum̃a ajutano vaataro ka naio, ana berinavo “!Kamiu kuvial, nalo nei abe konioku bija kuruaku nalo, nalo nei naruei.
MAR 3:35 Bior toro napano mila jibe ka napano Atua jidomio, toro na jibe na naio be kuruaku, a be kuvivinieku, p̃eli na abe konioku ruei.”
MAR 4:1 Ana ea bogo dolu bereio, Yesu naio jo berloglog tomu nalo ea tivelinio na ueiyabo na Kalele. Mia tomu telabo laka napano abinimei ea naio ka bogo na, mila na naio bavin ea uako sesa tai napano joa ueiyabo nei, ana naio ba jotano mave eaio, mia tomu nalo aju reraio ea baramudou uro.
MAR 4:2 Mia Yesu jo berlogloglo ka vite telabo ea jamerijiano nalo,
MAR 4:3 mia naio ber kalo berinavo “Kamiu kuvilavon ka kuviagago vatitigio. Toro tai, ban ka rivisivisii kurukuti subavio ea kiano tiniavio.
MAR 4:4 Naio jo bisivisiio jibe nei bano, mia kurukuti tealo ajibirbili vaataro laka ka ikim̃arabo tivelinio. Ana iorou, menu nalo abinimei amikiti bulaglo bereio.
MAR 4:5 “Mia kurukuti tealo ajibirbili ea vio na be tabaver yetano, mia ea vio na maka tano rimerorolu napano rivu mave, mila na nalo amiluo sop̃eli.
MAR 4:6 Mia bogo na m̃erenio mijivi ana naio junulo ana sop̃eli ga amekekeu ka bati nalo maka avatove vatitigio.
MAR 4:7 “Mia nalo tealo ajibirbili ea vio tai na beamu maka ate bulag vatitig teli va nalo na beve niononoti ealo, mia iorou teli neibano miluo toru bereio, ana naio misoveko kialo vitoviano nalo bano-o am̃arm̃aro, mia maka ave m̃arati nalo.
MAR 4:8 “Mia kurukuti dolu tealo bereio, ajibirbili ea borotano novo tai, mia nalo amiluo bo, bano-o ajarako abar m̃arati nalo. Tealo abar m̃arati abokar duelimo va rolu [30], nalo tealo abokar duelimo va ari [60], mia nalo tealo abokar toromomou takurano [100].”
MAR 4:9 Mia Yesu naio berkalo berinavo “Kamiu kubiniu kube burutiliniemiu, bo ka kamiu monokanio kuvijogkar kiaku iliano nalo.”
MAR 4:10 Ana iorou kanio tiniobi nalo abanvan bereio, ana na Yesu jo naio takurano ga, naruei tomu nalo napano aju bija naio bija kiano naiagagoano nalo, abinimei abika den naio aberinavo “Vaio naruei naio be nioti na jamerijiano na? Mia ka vaio ana jau kojom̃a komil jibe na, a koberloglog tomu nalo jamerijiano nalo?”
MAR 4:11 Ana Yesu berdop̃e banlo, berinavo “Kiniou nojom̃a neberlogloglo ka jamerijiano nalo na bior abe veribinio laka. Nalo ajibe ka, ajum̃a amila iliano tai na naverialiano Aisea nua binimei maluvo, napano naio berenio ‘Nalo ajum̃a abitii, abitiio bano, a aju amijogii, amijogiio bano, mia maka lele aver avitilubar a maka lele mia ajog lubar vite. !Ver makanio, p̃eli nalo avilig kialo jidomiano nalo ruei, a p̃eli Atua biekokoa kialo kariano ruei!’ “Jibe na naruei kiniou neber nalo pariparilo kirisikili laka, nalo aju koalabo laka keano vo. Mia kamiu naruei bo lie vo ban kamiu. Ililuklukuano nalo na Atua kiano navenatuboiano, mia kiniou neverial rimeravo ga rivan kamiu.
MAR 4:13 “?Ana jum̃abe, kamiu maka kuvijoglubar nioti na kurukuti subavio neibano? A ver kamiu maka kuvijikia kuvisidomii lubarbar nioti nene, mia tum̃abe naruei na mia kamiu kuvijoglubar jamerijiano dolu nalo na mia kiniou neverio ka tomu nalo?”
MAR 4:14 Ana Yesu berinavo “Mo, mia kiniou never bisivisii nioti na jamerijiano neibano van kamiu. Nioti nene naio jibe nei: Borotano ninio nalo na, nalo ajibe ka tomu nalo kialo iviso ninio nalo. Mia toro nei nana jo bisivisii kurukuti ea borotano nalo na, naio jibe ka toro napano jom̃a berial Atua kiano iliano ban tomu nalo.
MAR 4:15 “Borotano na kirisikili na jel ikim̃arabo tivelinio, naio jibe ka toro na napano naio mijog Atua kiano iliano, ana iliano nene maka lele riva joomo vatitig ea kiano iviso na jikili leleio. Mia menu nalo neibano, ajibe ka Sim̃aro, napano naio binimei vaarakurano ga, naio midular bereio iliano nei ea toro napano kiano iviso.
MAR 4:16 “A borotano na puruveru toru yetano tabap̃ilio, naio jibe ka toro na napano naio mijog Atua kiano iliano, mia kirisop̃eli ga naio tiniene jaaro kanio, miduio.
MAR 4:17 Ana iliano nene naio maka totano vatitig joomo ea kiano iviso. Mia naio miluo jibe ka titai napano maka ve sano bati novo, napano mijikia riluo bogo ve bulati ga. A verenio bogokouo rimei p̃elina tomu nalo asidom ka ajil lo rivior ka amonea Atua kiano iliano, a mia sop̃eli ga nalo atuvan bereio.
MAR 4:18 “Mia borotano na napano teli na bova juaio, naio jibe ka tomu nalo napano bogo na amijog Atua kiano iliano,
MAR 4:19 mia karina, nalo ajum̃a ajidomii m̃elea ga kialo meuliano nalo, a jidomii ka avar vite ve telabo rimei rive sibiano ga rivanlo, a nalo ajum̃a ajidomii m̃elea vite novnovo nalo na yetemeriba nei. Bajago nalo na abinimei jibe ka teli va, ana na amikitiko ioluano vou nei ka rivar re m̃arati ea tomu nalo tibe na ea kialo meuliano.
MAR 4:20 “Ana borotano na bo na, jibe ka tomu nalo napano bogo na nalo amijog Atua kiano iliano, amijoglubario ana tiniel jaaro kanio a amiduio ea kialo iviso ana iorou kanio abar m̃arati na ioluano vou neibano ea kialo meuliano nalo, napano na tealo abar m̃arati duelimo va rolu [30], a tealo abar m̃arati duelimo va ari [60], a nalo tealo abar bokar toromomou takurano [100]. “Ninei naruei jamerijiano na kurukuti uiti, naio bisi ea vio na.”
MAR 4:21 Mia Yesu ber bereio banlo, berinavo “Kito tomu nalo, ver kito rotilan yulu tai, mia kito rodu van re to yetano ka basaro tai. Maka leleio, kito monokanio rotilan to mave ga ka rimererali vio vatitigio.
MAR 4:22 A bo ga, Atua kiano navenatuboiano naio jibe ka yulu na, napano vonganei naio jo malmaluvo terteliki ea kito ka rimermerali vite nonovio nalo, a mia vite nonovio napano ajuluku ju, a bija ililuklukuano nonovio mia monoka amei medave.
MAR 4:23 Mia kamiu nonovio kube burutiliniemiu, bo ka kamiu kuvijoglubar kiaku iliano nei.”
MAR 4:24 Mia Yesu ber kalo bereio, beri-navo “Kamiu monoka kuviagago vatitig ka kiaku iliano nalo, a kuvila von ka kuvisidomii vatitiglo. Toro na jo mijog ga mia maka to takiio, mia naio maka bunu rijikia rijoglubar vatitigio bereio. A toro na mijogkar kiaku iliano nalo, mia naio mijikia rijoglubarbar vatitig kiaku verloglogiano ve telabo iorou.
MAR 4:25 Toro napano kiano saba nalo miroano ruei, mia naio rivar lie ve miroano laka, mia toro na maka kiano saba, mia naio rilaluvu vaio napano kiri teliki na be kiano.”
MAR 4:26 Yesu ber bereio, berinavo “Atua kiano navenatuboiano naio jibe kurukuti napano toro bisivisiio ea kiano borotano.
MAR 4:27 Bogo na naio bukuio bisi, mia naio maka bunu river rila titai ka kurukuti nene bereio. Toro neibano monmelio, jumolu, monmelio, jumolu, bogiano bija legiano, mia kurukuti nene naio ga takurano bitovi moluo, ana jo miluo. Jom̃a miluo jibe na banbano-o mia toro neibano maka lele rijikia ka kurukuti neibano jom̃a miluo jum̃abe.
MAR 4:28 Toro nei maka rijikia, naio maka rila titai, mia vite nei miyuku jum̃ano nalo aba laka, ana maka vesiou bar niati, bano-o bar nioti.
MAR 4:29 “Naruei bogo na nioti meruo bo, kema neibano jikario ka mim̃au bereio naruei, midu kiano iobogu ba je bulag m̃arati. “Mia Atua kiano navenatuboiano jom̃a miluo tertelisu jibe ka jeliviv ea vio yetano nei vonganei, a ea bogoti tai, mia reial m̃arati na toru naio rimei mave.”
MAR 4:30 Ana Yesu ber bereio, berinavo “Bajago na Atua kiano navenatuboiano, naio be dolu laka, naio kirisikili ka mia neleal jamerijiano tai bereio ka never naio jum̃abe.
MAR 4:31 P̃eli naio jibe ka kurukubako, napano naio teliki ka kurukuti dolu nalo tealo nam̃a remebijaio ea kiado tiniavio nalo, naio teliki mia teliki.
MAR 4:32 Mia bogo na naio miluo binimei toru, burupati toru loa ka sinaniano dolu nalo napano ea kiado tiniavio. Mia jaati nalo tortoru, napano menu nalo aba ajuaio ka vamelu nene bunu ga bo.”
MAR 4:33 A Yesu jo berloglog tomu nalo ka ioluano vou ea jamerijiano na miroano jibe na, jibe napano bare ka nalo ajoglubario.
MAR 4:34 A iliano nalo nonovio napano naio berloglog kalo, mia be jamerijiano ju joomo eaio, ana bogo na aju jibe naio ga bija kiano naiagagoano nalo, ea bogo na naruei naio jo ber bisivisii vatitig jamerijiano nalo na kalo.
MAR 4:35 Mia Yesu joa kea uako napano naio ba joa ka verloglog tomu nalo, mia bogo na m̃erenio jo batove, naio ber ka kiano naiagagoano nalo, berinavo “Ei, kito ravarkorov rava tivelinio ea ueiyabo neibano yako.”
MAR 4:36 Mia naiagagoano nalo ajuvan tomu nalo neibano aju, ana abavin ea uako na Yesu ju joomo eaio ruei, ana aburu naio abano. Mia uako dolu nalo bunu ga aban bijalo.
MAR 4:37 Uako nalo neibano aburo abano-o, mia burum̃ara jegi tai jumolu, mila na burum̃ara tei nalo ajum̃a abievelveluo a abava joomo ea uako bano-o bujo ka tei vare ga rimadudu.
MAR 4:38 Mia Yesu jo milugu ea selailugu tai ea uako iorou, naio jo monmelio ga. Naruei nalo aba abio bonio, ana nalo aber kanio aberinavo “!Naverloglogiano! ?Jum̃abe na jau maka kosidomial kito ka vaataro ka mia ramadudu naruei?”
MAR 4:39 Ana Yesu jumolu, mia mil kirisikili ban jegi, naio mil ban burum̃ara tei bija bievelveluo tortoru nalo nei, berinavo “Kamiu kumelumu.” Ana vaarakurano ga jegi m̃aro, vio melumu nonovio.
MAR 4:40 Ana Yesu ber kalo berinavo “?Ka vaio ana kamiu kumerou jibe na? P̃eli kamiu maka kuvarkar tiniemiu ea kiniou kovio?”
MAR 4:41 Naruei nalo amerou m̃elei, ana ajum̃a aberver kalo bereio aberinavo “?Toro kenia nei? Naio mil jibe na ga, mia jegi bija tei, abe juo amijogkar naio! Ou!”
MAR 5:1 Naruei Yesu nalo amaluvo aboru ea burum̃ara ueiyabo nei tivelinio, naina memedu ka vio na Kerasa, mia nalo tealo ajisia ka Katara p̃eli na Kerkasa.
MAR 5:2 Naruei nalo abauro ea vio nene, ana ea vio nene be buluvae nalo na tomu na am̃arm̃aro nalo ajuaio, mia be toro tai napano niununo va telabo ajuaio, napano naio jo joa m̃artanbo nei, jibe ka kiano vio. Naruei bogo na Yesu jabulu den uako nei, mia vaarakurano ga toro neibano moluo ea m̃artanbo nei, jikiti binimei ka rial Yesu.
MAR 5:3 Toro nene be deden laka, mia tomu nalo amila von ka aiorikario banbano-o mia amila de ga.
MAR 5:4 Va telabo ruei amiorkar jaano bija jum̃ano ka m̃arimieni, mia naio jo burukokorovio ga, mia va telabo amiorkar ea iesi, mia jo mila kokorovio ga, banbano-o napano maka bunu ve toro tai na be kiano moroano bare ka rila toro nei rimei melumu.
MAR 5:5 Ana ea legiano nonovio a bogiano nonovio naio jom̃a jeliviv ea m̃artanbo nalo a bunu mave ea suku dedade nalo, a naio jom̃a miaga m̃erere, a naio jo jukujuku niabeno ka puruveru nalo.
MAR 5:6 Ana toro nei naruei napano bogo na naio jo koalabo kia ga vo ka vio na Yesu nalo abauro eaio, mia naio mial Yesu, ana jikiti batove keanio, a batove ka naio, minie tano kamu kanio.
MAR 5:7 Ana Yesu berenio, berinavo “Niununo va, kotuvan kema na, kotaluvo den naio vonganei!” Mia niununo va nei miaga toru laka ban Yesu naruei, ana berinavo “Mia jau, Yesu, Atua kenerinio napano meul, jau kiamo vaio joa kiniou? Kiniou nebikaso ea Atua siano, ka mia kosian re vironiano rivan kiniou!”
MAR 5:9 Mia Yesu bika denio, berinavo “?Na siamo, kei?” Naruei niununo va nei berdop̃eio, berinavo “Kiniou siaku, burutiniobi na mira, bior kumemi miroano laka nei.”
MAR 5:10 Mia niununo va nei naio jo bivika kirisikili den Yesu bereio, ka Yesu rijil bulaglo re ea kialo tanobuku nei.
MAR 5:11 Mia ea burusuku neibano tivelinio, be burum̃ara taara na kiribue nalo miroano, nalo aju amiuo ea borotano, abokar kovio menu juo [2,000],
MAR 5:12 ana sim̃aro nalo neibano ajegi, nalo abika kirisikili den Yesu aberinavo “Nuber bo banso, jau koiila kumemi nuvan ea kiribue nalo na, jau kajamo ka kumemi nuva nuvitu joomo ealo.”
MAR 5:13 Mia Yesu naio mijamo kalo, berinavo “Bo ga, kamiu kuvano.” Naruei nalo ajaluvo den toro neibano, ana aba aju joomo ea kiribue nalo neibano. Ana sop̃eli ga kiribue nalo neibano ajikiti, abatove ea bavio tai burukorovio, ana nalo ajibirbili abavatove ea ueiyabo na toru ana nalo amunu tei banbano-o abiniu amadudu.
MAR 5:14 Naruei tomu nalo na abitikar kiribue aburo, aban bereio vonuo, aban aberial vite nei, a aberveriio ea vio dedade nonovio bunu, mila na tomu telabo abinimei ajidom aialio.
MAR 5:15 Mia bogo na aba amial ka Yesu naio jo, naio bija toro neibano nua niununo va nalo ajuaio, napano vonganei, naio miya vatitig kulum̃arauo ruei, naio jom̃a jotano marga, a maka bunu rive deden leleio. Nalo amialio ka naio binimei bo ruei jibe na, mia amerou.
MAR 5:16 Mia nalo napano m̃a aju beamu, napano amial vite nonovio nalo, ajukunu ka nalo na abinimei vonga, aber vaio na Yesu mila ka toro nei, a jum̃abe na kiribue nalo neibano aba amadudu ea tei.
MAR 5:17 Mia nalo amialio bova ga, mia nalo ajum̃a ajikili ka Yesu, ajidom ka mia naio tubilig den kialo vio.
MAR 5:18 Mia Yesu nalo abatove ea kialo uako bereio, mia bogo napano Yesu jo bavin mave ea uako, toro neibano na, naio binimei bika kirisikili den Yesu, berinavo “Aiou, Tubo, kiniou nojidom ka ver jau kajamo ka kiniou nemei vijaso.”
MAR 5:19 Mia Yesu naio maka rijamo kanio, mia naio ber ka ga berinavo “Makanio, bior bo laka ka jau kova vonuo bereio, a kava kotukunu rivan kiamo m̃aratavo vija kiamo bilbilu nalo, jau kover kalo ka jum̃abe na Atua tinien miiaso toru laka, ana naio mila bo mia bo laka banso jibe na.”
MAR 5:20 Naruei toro nei naio ban bereio, ana naio jo jeliviv ea vio nalo na kiano tanobuku nei, napano ajisia ka Komeli Duelimo, napano tomu nalo na maka ave Ju ajuaio, a naio berial im̃auano novo nalo napano Yesu jom̃a mila ka naio. Mia nalo na amijog kanano tukunuano nei, nalo amiilo toru ka naio.
MAR 5:21 Mia Yesu nalo ajel ea uako, abarkorov bereio ueiyabo nei aba tivelinio ruei, ana bogo na Yesu biako yetano jo bauro ga, tiniobi toru na tomu nalo abinimei ajelivivi eaio bereio.
MAR 5:22 Ana toro na toru tai na kialo yimo na volkouano ea vio na, siano Jairas, naio binimei mial Yesu, binimei vaataro kanio, minie keanio.
MAR 5:23 Ana naio jegi ban Yesu, bika berinavo “Keneriku tira sesa mie mia mie, vonganei p̃eli naio m̃aro ruei. Mia kiniou nebika denso ka jau komei, kodu jum̃amo toaio, ka naio mijikia rijog rivu bereio, ka naio rimeul kia to.”
MAR 5:24 Ana Yesu naio jumolu, ban naljuo kema neibano abano, ana tomu telabo na tiniobi neibano, nalo bunu ga aban bijalo, napano ajum̃a aba amivinvinkakarlo janea vio jeliviv ea ga Yesu.
MAR 5:25 A nalo tai napano aju aban bija Yesu jibena, naio be tira tai, napano mieiano na jada mila naio bogoti nonovio ga, bokar yuka duelimo ba juo [12] ruei.
MAR 5:26 A tira neibano, naio bulu nakulekuleano nalo banbano-o kiano veru biniu, mia nalo amim̃auka naio bano-o, mia mijog bova ga, kiano mieiano nei jo ba bova lie dam̃ariga.
MAR 5:27 Naio jom̃a mijog vatelabo ruei napano tomu nalo ajum̃a ajukunu ka Yesu ruei, mia be kiano jidomiano tai, berinavo “A ver kiniou notokol ga m̃ano kulum̃arauo, mia kiaku mieiano ribisi vatitigio.” Mia naio binimei juluku ga iviso ea tomu nalo neibano, ana jo binimei binimei iorou vaataro ka Yesu taakano ana naio jian jum̃ano jibe na, jokol Yesu m̃ano juluvati kulukoti ga.
MAR 5:29 Mia naio jokol Yesu m̃ano kulum̃arauo jibe na, ana monloglog ka bogo nene ga, jada nei mijelkorovio, mia naio mijoglubar ea niabeno ka kiano mieiano jaluvo denio ruei.
MAR 5:30 Mia Yesu bunu ga mijogii ea naio, naio mijogii ka kiano moroano jaluvo den naio, ana sop̃eli ga barp̃ilig naio iviso ka tomu nalo, ana naio bika berinavo “?Mia kei naio jokol vonga kiaku kulum̃arauo?”
MAR 5:31 Mia naiagagoano nalo aber ka naio aberinavo “?Jau kobika koberinavo kei naio jokolso vonga na, ana jum̃abe, jau maka keial ka tomu nalo na miroano nei na aju ga amivinkakarlo jeliviv easo?”
MAR 5:32 Ana Yesu naio jo jiraravo jeliviv kia ga vo mila von ka rial kei jokol naio.
MAR 5:33 Mia tira neibano, naio mijikia ruei ka naina, ana naio merou laka, ana jo memebiju, mia naio binimei ea Yesu, mijorua Yesu jaano, ana naio berial vite nonovio.
MAR 5:34 Mia Yesu berkanio, berinavo “Nena, kiamo viekouoiano ea kiniou milaso komijog bo bereio ruei, kiamo mieiano na maka bunu. Atua kiano tum̃aro to vijaso, jau kava vonuo bereio ga.”
MAR 5:35 Mia bogo na Yesu jo mil kiaga vo ban tira nei, mia iliano tai binimei den Jairas kunuano, aber ka toro na toru nei, aberenio “Kenerimo tira sesa m̃aro ruei. Bo ka jau kovuru re bunu naverloglogiano na toru na rimei, kala bulag re naio.”
MAR 5:36 Mia Yesu bunu ga mijogio, ana naio ber ka Jairas, berinavo “Kiamo iviso rivova re, jau komonea kar ga Atua sikili.”
MAR 5:37 Naruei Yesu berbure tom nonovio ka mia atakisor re bunu naio avan ea vio neibano, ana naio buru ga tom tolu nei, nina Pitere, bija Yemesi, bija kuruano Jone, abano.
MAR 5:38 Mia bogo na abinimei vaataro ka toro na toru nei kunuano, amial ka tomu nalo ajum̃a tiniel miia tira sesa neibano ruei, aju ajegi, a amila burum̃ara uetubaiano.
MAR 5:39 Mia Yesu ba joomo, ber ka tomu nalo nene berinavo “?Ka vaio ana kamiu kumitum̃a kumila uetubaiano toru, a kumitum̃a kumiteg jibe na? Tira sesa na naio maka rim̃aro, naio jo monmelio ga.”
MAR 5:40 Mia nalo abital niege naio ga. Mia Yesu miila bulag tomu nalo abava tavio, ana naio buru tira sesa nei karam̃ano bija kenieno ga, bija kiano naiagagoano nalo tolu neibano, nalo aba joomo ea vio na tira sesa nei mokotenano mon eaio.
MAR 5:41 Ana Yesu ba bokar jum̃ano, mia naio mil banio jelea kialo iliano, berinavo “Talita kum” napano naio berenio “Keneriku tira sesa, jau kotumolu von beamu vo.”
MAR 5:42 Mia ea bogo nene ga, tira sesa nei, napano kiano yuka duelimo ba juo [12], jumolu, ana jo mieliel. Mia nalo na amialio vite nei, amiilo bano-o, jidomiano bulati ga.
MAR 5:43 Mia Yesu ber kalo berenio mia adu sinaniano ve telisu vanio, a naio ber bunu banlo ber mia tomu dolu nalo monokanio ajog re tenei.
MAR 6:1 Mia Yesu jaluvo ea vio nei, ana binimei bereio ea kiano vio, naio naliko kiano naiagagoano nalo.
MAR 6:2 Mia ea Legiano Lu, naio bija tomu nalo na kiano vio aba joomo ea kialo yimo na volkouano, ana naio jo berlogloglo. Mia bogo napano amijogio, nalo amiilo laka ka kiano iliano nalo. Ana nalo aberenio “Tomnei! ?Kema na naio bar tenalo na be? ?Naio bokar masouano na jum̃abe? ?A naio jom̃a mila vremesiano nalo na jum̃abe?
MAR 6:3 Kito romijikia kema na naruei. Naio be toro na mim̃auka yimo nalo ga na, tira na Mere kenerinio na. Mia nalo nei Yemesi, a Joses, a Jutas, a Saimon, nalo na abe kuruano nalo. A kuviviniene nalo, nalo nei napano aju kitoliko ga.” Naruei nalo tiniel jer naio, maka asidom naio.
MAR 6:4 Mia Yesu ber kalo, berinavo “Toro napano be naverialiano, tomu dolu nalo amijikia atovon naio, mia tomu na kanano vio, naliko kanano m̃aratavo nalo, nalo na ga maka ajikia atovon naio.”
MAR 6:5 Naruei ea kiano vio memedu nei, Yesu maka rijikia rila vremesiano, mia midu jum̃ano jua tom juo p̃eli tolu ga na amie, milarurlo bereio.
MAR 6:6 Mia Yesu miilo laka ka tomu nalo na kiano vio na, bior napano maka asidom amonea naio leleio. Ana naio juvan kiano vio na, ana ba jeliviv ea m̃arkomeli dolu nalo napano naio jo berloglog tomu nalo.
MAR 6:7 Mia Yesu bio kiano duelimo ba juo [12] nei, ana mil batitig banlo, naio jian moroano banlo ka nalo amijikia atuvulu niununo va nalo, mia iorou naio miila bulaglo abeve juo abano.
MAR 6:8 Ilivatitigiano nalo na naio beriio beamu ruei nua ka avano, ajibe nei, napano naio berinavo “Ea tivelinio na kenemiu m̃arabo, mia kamiu kuvar re titai vija kamiu, mia kenemiu nasitoga ga na kubanio, kumijikia kuvario. Mia kamiu kuvar re semiu sinaniano tai kuvano, p̃elina kenemiu basaro, p̃elina kenemiu veru.
MAR 6:9 Kamiu kumijikia kuvar kenemiu kulubue kuviya ea jaamiu, a mia maka kuvijikia kuvar kenemiu kulum̃arauo dolu nalo bereio, mia kamiu kuvar ga kenemiu kulum̃arauo ve takurano ga napano kuviya bogo na kuviel kuvano.”
MAR 6:10 Ana Yesu ber bunu, berinavo “Bogo napano ver avuru kamiu kuva joomo ea kunualo nalo tai, mia kamiu monoka tiniemiu saaro ka kuvitu kamlikolo, m̃aratavo nalo na vonuo nene, rivano-o rivokar bogo napano mia kuvitaluvo den m̃arkomeli na bereio.
MAR 6:11 Ana ver ea m̃arkomeli tai, tomu tai maka asidom avuru kamiu kuvan ea kunualo nalo, p̃elina maka asidom aiagago ka kamiu, mia kuvituvan ga kialo vio na to, mia bogo na kamiu kuvitaluvo den vio na, kamiu monoka kuvijubakon yevi na vio na den jaamiu nalo, jibe ka kijokijo tai p̃elina kenemiu iliano tai na kirisikili banlo, ka mia nalo avokar vironiano tai na memedu ga ka kialo bajago na bova nene.”
MAR 6:12 Mia atevi nalo aban abeve juo jibe na naruei, mia aba amioliolu ban tomu nalo ka monoka aviliglo,
MAR 6:13 a amijil bulag sim̃aro telabo den tomu nalo, ana nalo amionion bonotanunu na m̃arolivi teliki ea tomu na amie telabo parilo, jibe kijokijo tai na Atua kiano ilivuiano, ana amijog bo bereio.
MAR 6:14 Naruei ea bogo nei, Parinio tubo Erot naio bunu mijog kija vaio na Yesu jom̃a milaio, bior ka Yesu siano, ajum̃a aberverii janea vio nonovio, mia tomu nonovio amijikia batitigio ruei. Ana tomu tealo ajum̃a aberii Yesu, aberinavo “Nina be Jone Baruei bere na, napano vonganei meul bereio ea m̃ariano. Tenei naruei napano mila naio be kiano moroano ka rila kijokijo nalo na.”
MAR 6:15 Ana nalo dolu nalo aberii Yesu, aberinavo “Nina tormoruo Elaija re nua na,” ana tealo aberenio “Nina be naverialiano tai na, jibe kiado naverialiano moruo nalo tai re nuanua laka.”
MAR 6:16 Mia bogo na Parinio tubo Erot mijog vaio na Yesu jom̃a milaio, berinavo “Toro na p̃eli Jone Baruei bere ga na! Kiniou nejelar pariparinio ruei, mia vonganei naio meul bereio ea m̃ariano bo?”
MAR 6:17 Parinio tubo Erot mil jibe na bior naio naruei muetam̃aria Jone Baruei m̃aro ruei, ana jo merou m̃elea kanio. Mia tukunuano na m̃ariano na Jone Baruei kiano naio jibe nei. Parinio tubo Erot kuruano nei, be Vilip, napano naljuo nei, karam̃alo takurano mia keniele naljuo. Vilip naio joro ka tira tai siano Erotias, mia iorou kanio ana Parinio tubo Erot naio ba burular tira nene. Tenena Jone jom̃a mil ban Parinio tubo Erot kanio, berinavo “Tena jau komila na maka rimemedu, ka na jau koburu tira na, bior naio be kuruamo koano.” Mia Erotias maka leleio saaro ka Jone kanano iliano, naio tinienjer Jone, mila na Parinio tubo Erot miila kiano tomu nalo tealo abano abokar Jone amiorkario aburu ban ea yimo na lakoiano.
MAR 6:19 Mia Erotias jo jidom ka auebin Jone rim̃aro, mia naio maka rijikia rilaio,
MAR 6:20 bior Erot merou ka ruebinio. Naio merou jibe na bior naio mijikia ka Jone be toro na memedu tai, a be toro lu bunu, ana naio bokar vatitigio ga jo. Bogo telabo naio bio Jone binimei ka ave juo atukunu, mia naio jidom Jone kanano iliano nalo, mia bogo nonovio iliano nalo nei aju ajulu naio bunu, a mila na naio kiano jidomiano beve juo naruei.
MAR 6:21 Mia maka vesiou, Erotias mial ka be kiano bogo. Nina, ea bogo napano nalo amim̃auka jokoluolu ka asidomkar bogo na Erot moluo eaio. Ana Erot naio mila jokoluolu tai ka kiano tomu nalo na tortoru bija kiano navurim̃araboiano na kiano im̃auano nalo bija tomu nalo na tortoru na tanobuku na vio Kalele.
MAR 6:22 Ea jokoluolu nei naruei, Erotias kenerinio tira naio binimei bolu ea ga miralo, ana Erot nalo tinielo jaaro laka ka kiano voluano, naruei Erot naio mila verikariano tai kirisikili ban naio berinavo “Vaio na jau kovika den kiniou, mijikia rivano-o rivokar togio na kiaku vite nalo nonovio, ana mia kiniou nemijikia notuvan ga rivanso.”
MAR 6:24 Mia tira neibano naio ba tavio, ana bika den kenieno, Erotias, berinavo “?Nena, mia kiniou nevika vaio denio?” Naruei kenieno ber banio, berinavo “Mia jau kover ka ga koverinavo naio monokanio rudu Jone Baruei parinio rivan kito juo.”
MAR 6:25 Naruei kenerinio tira nei naio mila sop̃eli bere ga ba joomo, ba bika sop̃eli ga den Erot, berinavo “Kiniou nojidom ka jau kodu Jone Baruei parinio ea baju tai ana kodu rimei ea vio nei vonganei.”
MAR 6:26 Naruei iliano nei mila tubo Erot mijog kirivova, mia naio maka bunu rijikia rila korov kiano verikariano na kirisikili nei napano naio mila ea kiano bilbilu nalo miralo ruei,
MAR 6:27 mia ea bogo nene ga naio miila kiano toro tai na mira, ba ber ka mia adu Jone parinio rime. Naruei nalo aban ea yimo na lakoiano ana aje korov Jone burujono,
MAR 6:28 ana amidu Jone parinio neibano ea baju tai, amidu abinimei ban tira neibano, ana tira neibano naio midu ba ban kenieno.
MAR 6:29 Mia iorou, bogo na amijog vite nei, Jone kiano naiagagoano nalo abinimei amidu mokotenano, aba amidu batove jua m̃artanbo. Naruei tukunu na berii Jone Baruei, naio maaro ea vio na, mia bogo na Erot mijog veriiano na Yesu, mila naio merou laka, ber p̃eli Jone Baruei nene napano naio muebinio, meul bereio.
MAR 6:30 Naruei atevi nalo napano Yesu miila bulaglo abano ka aioliolu, mia abinimei bereio naruei. Mia nalo aju aberialio ban Yesu vaio nalo napano amila ka tomu nalo, bija jum̃abe ajum̃a aberlogloglo.
MAR 6:31 Mia tomu miroano napano aju abinimei ealo, karina nalo abano, ana tealo bere abinimei, karina aban bereio, mia jibe na ga bano, mia Yesu nalo maka ajikia ajilimebi leleio, maka leleio bogo vare ka ajikia adu salo sinaniano ve teliki. Naruei Yesu ber kalo berinavo “Bo ga, mia kito ravano. Kito rala von ka rotu p̃ilig den vio nei ve telisu vo beamu, kito rava resiravo vio tai na be tum̃aro vatitigio, napano kamiu kumijikia kuvijilimebi vatitig eaio.”
MAR 6:32 Jibe na aba amidu uako tai, ana ajel eaio ka ava asirarag ka vio tai ea ueiyabo tivelinio, napano maka tomu nalo atua vio nene.
MAR 6:33 Mia tomu miroano na abitilubar ka Yesu nalo ajaluvo jibe na, ana nalo bunu ga ajaluvo den kialo m̃arkomeli nalo, ajikiti, ajel uro, ana aba abokar beamu vio napano amial ka uako nei naio jom̃a ban eaio, beamu ka Yesu nalo.
MAR 6:34 Mia Yesu bauro, a bogo na naio mial ka tomu telabo aju ruei, mia naio tinien miialo laka, bior naio mialo jibe ka nunu nalo napano amilaluvu m̃arabo, napano maka toro tai ka rivitikarlo, ana naio jom̃a berlogloglo ka iliano novo nalo telabo.
MAR 6:35 Mia bogo na m̃erenio batove, kiano atevi nalo abinimei eaio, aberinavo “Ai Tubo! Vio nei naio bova ga, a vaataro ka vio ribobogio naruei bunu.
MAR 6:36 Bo kanio jau keiila tiniobi nalo na avanvan bereio ea kialo vonuo nalo p̃elina avanvan ea m̃arkomeli nalo na aju dedade ea vio nalo nei, ka avulu salo sinaniano tai.”
MAR 6:37 Mia Yesu ber kalo, berinavo “E, makanio, bo kanio kamiu ga kuvar sinaniano tai rivanlo.” Mia aberiam̃a Yesu maka river vatitigio, naruei nalo aberinavo “E! Bo ga na p̃eli jau kojidom ka kumemi nuvar kiado puruveru na toru na, kumemi nuvario nuvulu ka joko rivare ka tomu menu telabo nei ka asenio?”
MAR 6:38 Naruei Yesu ber kalo berinavo “Mia kamiu kuva kuvial von ver joko vio na ju bija kamiu vonganei.” Mia nalo aba amialio, ana abinimei bereio, aberinavo “Kumemi nubar joko jimo na tereteliki ga ju, bija niado momaio juo.”
MAR 6:39 Mia Yesu ber ka tomu nalo, berinavo “Kamiu kuvitutano ea soro na beamu,”
MAR 6:40 ana ajutano ea taara nalo, napano tealo abokar duelimo va limo [50], a tealo abokar toromomou takurano [100].
MAR 6:41 Ana naio bar joko jimo nei bija momaio juo nei, jirarago bavin ea tiniabene, ber siva ban Atua biorio, ana burekokorov joko nalo nei, jian ban kiano atevi nalo, ka avario asian van tiniobi nalo nei, mia naio janka bunu ga niado tereteliki juo neibano jibe na.
MAR 6:42 Mia nalo ajinan bano-o, mia mabolo jouo vatitigio,
MAR 6:43 mia ioroti sinaniano bija niado nalo napano ajen ana nina beva aju, nalo amisonio ban ea basaro nalo bokario duelimo ba juo [12].
MAR 6:44 Mia tomu nalo napano ajinan, napano sum̃ano nalo ga, nalo abokar jibe kovio menu jimo [5,000].
MAR 6:45 Karina Yesu berii ka kiano atevi nalo, berenio “Kiniou nojidom ka kamiu kuvidu kiado uako, kuvan beamu tivelinio ea ueiyabo nei, ea m̃arkomeli na Betsaeta, mia kiniou noto nei beamu vo ka mia naiila tiniobi nalo nei avanvan bereio.”
MAR 6:46 Ana bogo na miila bulag tiniobi nalo nei abano beve terakurano bisi, naio bavin ea suku ka rivolkouo.
MAR 6:47 Ana bogo na vio binimei viobobogio ruei, uako jo koalabo tavio ea tinia tei ruei, mia Yesu jo naio takurano ga uro.
MAR 6:48 Ana Yesu mial ka nalo ajum̃a amila bijon ka m̃a abeluo ka uako neibano, bior aju abiniua jegi ga, mila nalo aburo melmelumu laka ga. Mia vaataro ka viorijeni mermeravo, naio binimei ealo, jom̃a miel mave ea niunuku tei. Nina naio jidom rivan vaataro ga kalo, ka riva rivoru tivelinio tukamu kalo,
MAR 6:49 mia bogo na nalo aju abitii naio jo miel mave ea niunuku tei binimei vaataro kalo jibena, abio souo, aberinavo “E! ?Vaio na binimei jibe na? ?P̃eli sim̃aro tai, p̃elina venia na jibe na?”
MAR 6:50 Nalo abiniu ajum̃a abitikar naio jibena, mia amerou laka. Mia kirisop̃eli Yesu mil banlo “E, kamiu kumerou re bunu, kiniou ga na.”
MAR 6:51 Mia Yesu bavin ea uako bijalo, ana ea bogo na memedu ga, jegi neibano m̃aro, ana nalo na ajua uako amiilo toru laka garuei.
MAR 6:52 Nalo amiilo jibe na bior kialo jidomiano nalo kirisikili laka kia ga vo, maka atu avitilubar vite nalo napano Yesu mijikia rila ea kiano moroano, jibeka vaio napano naio mim̃auka bija joko jimo tereteliki neibano.
MAR 6:53 Ana Yesu nalo abarkorov ueiyabo neibano aban ea kialo uako tivelinio, naruei aba aboru ea vio tai, siano Kenasarete. Mia bogo na abuku veru ba uro,
MAR 6:54 mia abavatove ea uako, ana sop̃eli ga tomu nalo na vio na abitilubar Yesu.
MAR 6:55 Naruei nalo ajikiti ajeliviv ea kialo m̃arkomeli nalo, aju abarvar kialo namieiano nalo ea m̃alo jogu nalo, abinimei ea vio nalo vabe napano amijog ka Yesu jom̃a ban eaio.
MAR 6:56 Ana ea vio nonovio na Yesu naio jom̃a ban eaio, ea m̃aratavo nalo, ea m̃arkomeli nalo, p̃elina ea m̃arabo nalo, nalo ajum̃a abar kialo namieiano nalo, aju abarlo ju vatitig ea vio medave, ana aju abika denio ka rijamo ka namieiano nalo nei atokol ga juluvati na kiano kulum̃arauo. Mia nalo na mia atokolio tibena, kialo mieiano nalo ribisi, a nalo amei rivu bereio.
MAR 7:1 Mia ea bogo nei, Varisis tealo abinimei vio takurano ea Yesu, bija bunu naverloglogiano na tuboiano, napano nalo ajaluvo ea vio Yerusalemo abinimei.
MAR 7:2 Mia nalo aju amial ka bogo napano Yesu kiano atevi nalo ajum̃a ajinan, amila napano ea Varisis nalo kialo vitiiano, jum̃alo nalo abova. Nina bior napano maka atakii vatitig kiri m̃arabo sesa nalo telabo ka asekon jum̃alo, napano Varisis nalo aber tomu nalo monoka alaio, karina amijikia asinan.
MAR 7:3 Nina bior ea bogo na, Varisis nalo bija kulo Ju dolu nalo ajikili laka ka ala tibena naruei, ka nalo monoka atakii vatitig rivu kialo bajago moruo na kialo lotuano re beamu.
MAR 7:4 Ajum̃a amila jibena ka ver nalo amiel aban ea komeli p̃eli na vio vabe, mia bogo na abinimei vonuo bereio, mia monoka nalo atakii tuboiano na ka asekonlo ameravo rivu p̃eli na ave lu vatitigio rivu bereio. Iorou ka nina, amijikia atikar ka asinan naruei, bior ver nalo ala re, maka ajikia atokol sinaniano leleio. Mia be tuboiano sesa telabo bereio jibe na napano monoka atakiio, napano tealo, aber monoka asekon baja tibe na tibe na, a tealo, aber monoka asekon p̃ili marauo tibe na tibe na, a tealo, aber monoka asekon baju na amim̃aukanio ea burujievi na be bras tibe na tibe na, rivan tibe na.
MAR 7:5 Vite na naruei mila Varisis nalo abika den Yesu, aberinavo “?Ka vaio ana kanamo atevi nalo maka atu atakii bajago moruo nalo na kiado lotuano nanua, napano kiado navurim̃araboiano nalo na ajum̃a aberloglogio ka kito. Kanamo nalo na, ajum̃a ajinan bija niamiamo nalo na jum̃alo, bior napano maka asekon batitig jum̃alo nalo.”
MAR 7:6 Ana Yesu berdop̃e banlo, berinavo “Riano ga na, naverialiano Aisea re nua naio berii memedu ga kamiu tomu nalo na sibiano na, napano naio berial iliano nei napano Atua naio berenio, napano ber ‘Tomu nalo na abamenea kiniou ka kialo iliano nalo ga, mia kialo jidomiano nalo aju koalabo den kiniou kia ga vo.
MAR 7:7 Mia nalo aju amilotu ka kiniou kurano ga, bior bogo napano aberloglog tomu nalo, nalo aju aber nina Atua kanano iliano na, mia makanio, iliano nei be tomu nalo kialo ga.’ ”
MAR 7:8 Ana Yesu ber kalo berinavo “Kamiu kumitum̃a kumituvan Atua kiano tuboiano, ana kumitum̃a kubokar bajago moruo na kulorinio ga kiano kirisikili laka.
MAR 7:9 Maka leleio rimemedu ka mia kamiu kuvitum̃a kuvila tibe na, bior napano kamiu kumitum̃a kumisikili ka kuvitakii bajago moruo nalo na toro ga kanano, mia vonganei kamiu kumila banbano-o mia bajago nei naio jo midu jeleig vio p̃elina naio jo bukular Atua kanano tuboiano.
MAR 7:10 Mosis kiano tuboiano naio berenio ruei, berinavo ‘Jau komonmonea karam̃amo naio koniomo,’ a naio ber bunu, berinavo ‘Toro na mil bova ka karam̃ano naio kenieno, mia kamiu kuvuebinio rim̃aro.’
MAR 7:11 “Tuboiano nei berenio ka kito monoka rovitikar vatitig kiado tormoruo juo nei, mia kamiu kumitu kumila dolu nei. Verenio toro tai verko kario kiano vite tealo ka river abe Atua kiano, ana ver tormoruo juo jum̃alo bulati, amei avikanio, mia kamiu kuver van naio ka monoka rila vaio van naljuo?
MAR 7:12 Mia kamiu kuvitutua naio, kuverinavo ‘Maka lele, maka kojikia kosian van naljuo nei, bior kanado bajago moruo ber vaio na kuberkoio ban Atua, monoka kosian ga van kiano tomu lu nalo, jau maka kojikia kotuvan van toro dolu.’
MAR 7:13 Kamiu kuberenio jibena, mia vaio na jibena? Kamiu kumitu jikili ea bajago moruo nalo, kamiu kumitu kumituvarvan batove, mia jo mila Atua kiano tuboiano binimei be vite kurano tai. Mia maka nina ga, mia kamiu kumitu kumila vite telabo na jibena.”
MAR 7:14 Naruei Yesu bio tomu nalo ka amei vio takurano bereio ea naio, ana naio mil banlo, berinavo “Kamiu nonovio kuviagago vatitig ka kiniou, kamiu monokanio kuvijoglubar kanaku iliano nei.
MAR 7:15 Maka leleio ve vite tai nam̃a jo tavio ea toro, mia river riva joomo ea naio mijikia rila naio riagiago ea Atua mirano. Mia vite nalo nam̃a aju joomo ea naio, napano m̃a amoluo ea naio, vite nalo na naruei amila naio miagiago ea Atua mirano.”
MAR 7:17 Ana Yesu jaluvo den tomu nalo nei, ana ba vonuo bereio, ana karina, kiano naiagagoano nalo abinimei, abika denio jamerijiano napano naio jom̃a berii kalo.
MAR 7:18 Ana Yesu berinavo “?Jum̃abe, p̃eli kamiu bunu parimiu bono kia ga vo javukia nalo na? Bior vaio napano kamiu maka kuvitilubar vite na? Vite vaio na jo tavio, jibe sinaniano nalo, verinavo riva joomo ea toro, nalo maka ajikia ala toro rivova ea Atua mirano.
MAR 7:19 Nina bior napano vite nalo nei maka ava avokar kiano jidomiano, mia abatove ea mabono ga, karina abarlaka amoluo den niabene bereio.” Mia Yesu ber jibe na naruei, ana karina, tomu nalo abitilubario von naruei ea kiano iliano nei, Yesu mila meravo ka maka ve sinaniano tai napano toro monoka rivel kanio ka rila naio rimeravo rivu ea Atua mirano, mia sinaniano nonovio ga nalo abo ga ka asenio.
MAR 7:20 A Yesu berenio bunu “Mia vite nalo napano ajua toro ruei, ana aju amalmaluvo ea kiano meuliano, vite nalo na naruei amijikia ala toro riagiago.
MAR 7:21 Nina bior joomo ea toro, be bajago va nalo napano aju amoluo ea naio, jibe jidomiano va, siakiano, vinauano, amue tam̃aro ea toro, siakaiano,
MAR 7:22 tinieiiano, bajago na bova, sibiano, lakoroviano na tuboiano, jokuano, tii ilisibiano nalo, ilivarvariano, bija vovuiano.
MAR 7:23 Bajago va nalo nei naruei, nalo amoluo den toro kiano iviso, mia nalo nei naruei vite nalo nam̃a amijikia ala toro riagiago kamu ea Atua mirano.”
MAR 7:24 Ana Yesu jaluvo den vio na, naio batove ea tanobuku na komeli nei Taea. Mia naio ban ea yimo tai, naio jidom rila ka mia tomu nalo ajikia re ka naio joa vio na, mia naio maka rijikia toluku tibena.
MAR 7:25 Naruei tira tai joa vio na napano maka ve Ju, bior napano kiano torogio nalo abe Kris ga, mia abinimei ajua tanobuku na Vonisia vaataro ka Siria. Tira nene, kenerinio kiri tira sesa, niununo va tai joaio, mia bogo na tira neibano mijog ka Yesu joa vio na, naio binimei minie tano ka Yesu jaano, jegi banio, ka naio rijil lar sim̃aro nene den kenerinio niatira sesa nei.
MAR 7:27 Mia Yesu berdop̃e naio, berinavo “Mia memedu ka kiritete nalo monoka asinan beamu! Maka rimemedu ka navar bulag kiritete nalo salo sinaniano nalo denlo, novuku rivan kuli nalo.” Naio berenio jibe na bior ka bogo na, kulo Ju nalo, napano aberiam̃a nalo ga abe Atua kenerinio nalo, nalo ajum̃a abio niegeniege tomu nalo napano maka ave kulo Ju, aberinavo “Kamiu kuli nalo ga.”
MAR 7:28 Mia tira neibano berdop̃e naio, berinavo “Jau kober be riano Tubo, mia kuli nalo aju aban vaataro ka vio na kiritete nalo salo sinaniano, ka mia amijikia asen yororoti sinaniano nalo nam̃a ajibirbil yetano ea borotano.”
MAR 7:29 Naruei Yesu berkanio, berinavo “Jau kojian verdop̃eiano novo tai ka kiaku iliano nei. Naruei bior kanamo iliano novo na, kiniou nebitilubar ka jau tiniemo barkar vatitig kiniou, ana bo, neber kaso ka jau komijikia kava vonuo ga, sim̃aro nene jaluvo den kenerimo niatira nene ruei.”
MAR 7:30 Naruei tira nei naio ban bere vonuo, ana binimei mial kiritete neibano kenerinio naio jo melumu ga, naio jo mon vatitig ea m̃ano jogu.
MAR 7:31 Mo, karina Yesu juvan tanobuku nei Taea, ana naio ba jel ea m̃arkomeli dolu na Saiton, ana binimei bereio ea ueiyabo na Kalele, nina tivelinio na tanobuku napano abio ka Komeli Duelimo.
MAR 7:32 Ana nalo na vio na aburu toro tai binimei banio, ka naio rudu jum̃ano toaio, bior toro nene naio tiliniene bono, naio mil dede laka ga.
MAR 7:33 Naruei Yesu buru toro nei jaluvo den tiniobi nalo nei napano aju, naruei naljuo aba laka kija. Naruei Yesu miyuku m̃arjukjum̃ano ban ea bulukuti buru tiliniene, karina naio midu titinio, mia ea kema neibano buruminano.
MAR 7:34 Karina Yesu jirarago mave ea tiniabene, naio burukar kiano jegi toru, ana ber ka kema neibano jel kialo, berinavo “Evata,” napano iliano na berenio “Jau kovetavo.”
MAR 7:35 Naruei vaarakurano ga, kema neibano, buru tiliniene betavo, bija buruminano mim̃au vatitigio, mila na kema neibano naio mijog vite bo a mil vatitig meravo ga.
MAR 7:36 Naruei Yesu jadu kalo, ka mia avan re atukunu ka tenei tanea vio van tomu dolu nalo, mia bogo na naio jo berii jibe na ka tomu nalo, mia nalo aba aberverii lie vo ea vio reraio ga.
MAR 7:37 Nalo aberii m̃elea jibe na, bior amiilo mia amiilo ka vite nalo nonovio napano m̃a nalo amialio ka Yesu mijikia mim̃aukanio. Nalo ajum̃a aberverii aberinavo “Yesu nei mila nalo nam̃a tilinielo bono nalo amijog vite, a naio mim̃auka tomu na maka ajikia ail, nalo amil. Kaleliki, kema na mim̃auka vite nalo nonovio bo mia bo laka, mm.”
MAR 8:1 Ana bogo tai, tiniobi toru tai na tomu telabo nalo abinimei ea Yesu bereio. Mia nalo aju bija naio bano-o, ana nalo jijerlo, ana nalo maka bunu salo sinaniano. Ana Yesu bio kiano naiagagoano nalo abinimei ea naio, ana naio ber kalo, berinavo
MAR 8:2 “Kiniou tinieku jii tiniobi nalo nei toru, bior aju bija kito bogoti tolu ruei, mia salo sinaniano biniu ruei.
MAR 8:3 A ver kiniou neiila bulaglo avan ea kunualo napano maka ve salo sinaniano jibenei, p̃eli tealo siserlo ve toru ea m̃arabo togio ana miralo ribobogio, bior nalo tealo, kialo komeli aju koalabo laka.”
MAR 8:4 Ana Yesu kiano atevi nalo aber ka naio, aberinavo “Ana mia kito ravagan tomu nalo nei ea vio iauo nei tum̃abe?”
MAR 8:5 Ana Yesu bika denlo, berinavo “Ana kamiu be semiu joko vio?” Ana nalo aber “Aluo ga.”
MAR 8:6 Naruei Yesu mil ban tiniobi toru nei, berinavo “Kamiu kuvitutano ea vio nei beamu vo.” Ana naio bar joko aluo nei, naio ber siva ban Atua kanio, karina naio burekokorovio, ana bario janea kiano naiagagoano nalo ka avar van tomu nalo, ana nalo aba ajankanio ealo.
MAR 8:7 A nalo abar niado momaio juo na tertelisu ea bogo nene, ana Yesu ber siva kalo bunu, ana berinavo “Kuva kuvitan kalo bunu van tomu nalo.”
MAR 8:8 Ana nalo ajenio banbano-o, napano mabolo jouo vatitig, ana amison basaro aluo bereio abujo magmago vatitig bija ioroti sinaniano nalo na ju.
MAR 8:9 Ana nalo na ajinan ea bogo nei, nalo abokar p̃eli menu veri [4,000]. Naruei Yesu miila bulag tiniobi nei aban bereio ea kialo komeli,
MAR 8:10 ana naio ban ea kialo uako na, bija kiano atevi nalo, a nalo ajuvan vio na, aba abokar tanobuku na vio Dalmanuta.
MAR 8:11 Ana ea bogo tai na, Varisis nalo tai abinimei ajidom avilvil ea Yesu, a ajidom ala vonvon naio, ana nalo aberinavo “Kumemi numisidom jau koverloglog kijokijo tai na toru ka nuvialio, napano jau kalaio vija sikiliano na tiniabene.”
MAR 8:12 Mia Yesu naio buru kiano jegi, jibe napano naio tinien maro kalo ruei, ana berdop̃e banlo, berinavo “Ka vaio kamiu na tena banei, kumitu kumisidom kuvial kijokijo tai tibena? Kiniou neber be riano ban kamiu, maka leleio, mia kenemiu bajulukuti na banei mia maka ajikia aial kijokijo tai.”
MAR 8:13 Ana Yesu jaluvo denlo juvanlo ajubo, ana naio ban ea uako bereio, naio barkorov bereio ueiyabo ba tivelinio.
MAR 8:14 Ana bogo na nalo ajaluvo aba abokar tivelinio na ueiyabo na toru nei, nalo ajidomii von bereio napano tinielo bobogia ka avar salo joko tai rimei, mia salo joko takurano ga jo bijalo ea uako.
MAR 8:15 Ana Yesu ber iliano tai banlo, berinavo “Kamiu monoka kuvitikar vatitig kamiu, ka Varisis nalo bija Erot kialo is.” Yesu berenio jibe na ber ka bajago va nalo na kialo navurim̃araboiano nalo, mia atevi nalo maka asidomiilubario.
MAR 8:16 Nalo amijog ga, ana aju aberii ealo, aberinavo “P̃eli naio mil jibe nei bior napano kito maka ravar joko tai rimei.”
MAR 8:17 Ana Yesu mijikia kialo jidomiano na, ana berinavo “Kamiu kumitu kuberii napano m̃aka ve sado joko ka vaio? Jum̃abe, kamiu maka kuvijoglubar p̃eli maka kuvitilubar vite nalo navo? P̃eli tiniemiu nalo jikili laka ga!
MAR 8:18 Kamiu, miremiu nalo ju, mia kamiu maka kuvitu kuvitilubar vite, a burutiliniemiu nalo ju, mia kamiu maka kuvijoglubar vite. P̃eli kamiu maka bunu kuvitu kuvisidomii bereio vite nalo napano kiniou nomilaio ban tomu nalo?
MAR 8:19 Bogo na kiniou nemila burevure joko jimo nua na ruei ea tomu nalo menu jimo [5,000] na, nalo ajenio banbano-o mia kamiu kumison iororoti sinaniano nalo aban ea basaro vio?” Nalo aberdop̃e ban naio, aberinavo “Kumemi numison duelimo ba juo.”
MAR 8:20 Ana naio bika bereio, berinavo “Ana bogo na nalo menu veri [4,000] na ajen ga joko aluo na, iorou kamiu kumison basaro vio bereio?” Ana nalo aberdop̃e, aberinavo “Kumemi numison aluo.”
MAR 8:21 Ana naio ber kalo, berinavo “Boga, ana jum̃abe vonganei? Kamiu kumijikia kija vite nalo nei naruei, p̃eli na makan vo?”
MAR 8:22 Naruei Yesu nalo abinimei abokar komeli nei, Betsaeta. Ana nalo na vio na, aburu merebono tai binimei ea Yesu, ajegi ban Yesu ka naio tokol vatitig toro nene.
MAR 8:23 Ana Yesu bokar merebono napano jum̃ano, ana naio burio bano, ana naljuo aban bilig ea komeli tivelinio abano. Naruei Yesu midu titinio jua toro napano mirano, a naio midu jum̃ano joa mirano be juo, ana bika den naio, berinavo “Jum̃abe, jau kojo komial vite, p̃elina makan vo?”
MAR 8:24 Ana toro napano naio jirarago, mial vio, mia naio ber berinavo “Nao-o, kiniou nemial tomu nalo, a nemial nalo jibe bulapati buruiesi ga nalo napano aju amiel.”
MAR 8:25 Ana Yesu midu jum̃ano joa naio bereio ea bogo valuo nene, ana toro nei, mirano binimei bo nonovio garuei, ana naio jirarago bereio, mial vite nalo meravo mia meravo bo.
MAR 8:26 Ana Yesu berkanio, berinavo “Mia kavan re bunu keial nalo na ajua komeli, kavan memedu ea kunuamo.”
MAR 8:27 Mia Yesu bija kiano atevi nalo ajidom avatove ea m̃arkomeli na tertelisu vaataro ka komeli na toru nei Sisiria Vilipai, a bogo napano nalo aju amiel ea m̃arabo ka avatove ea vio na, naio bika denlo berinavo “Kamiu kumitu kumijog tomu nalo aju aberverii kiniou ka kiniou kiniou kei?”
MAR 8:28 Nalo aberdop̃e banio, aberinavo “Tealo aberinavo jau Jone Baruei bereio, a tealo aber Elaija, a tealo aber jau naverialiano na nuanua laka.”
MAR 8:29 Ana naio bika bereio den nalo, berinavo “A jum̃abe ka kamiu, kamiu kumitu kuberii kiniou kiniou kei?” Naruei Pitere berdop̃eio, berinavo “Jau kobe kenememi Naverikariano memedu na.”
MAR 8:30 Ana Yesu ber memedu banlo, beri-navo “Bo, mia kamiu kuva kuverialio re vite nei van tomu nalo.”
MAR 8:31 Ana ea bogo na, Yesu jikar ka milavon ka riverloglog kiano atevi nalo ka Kulorinio Kenerinio, mia monoka nalo ala vite ve telabo napano mia naio rijog rivova kanio, a mia navurim̃araboiano nalo na kulo Israel bija kialo parinio kulo lu nalo, bija tomu na verloglogiano na tuboiano nalo, mia nalo avukular naio. A Yesu ber bunu mia auebin naio, mia bogoti ve tolu nene, mia naio tumolu bereio, naio tovulu m̃ariano.
MAR 8:32 Iliano nalo nei, Yesu berialio meravo vatitig kalo, a bogo na Pitere mijogio, bio Yesu, burular naio, mil jikili banio, jidom verbure naio, ber mia tibe na re.
MAR 8:33 A sop̃eli ga Yesu naio bilig taakano ka Pitere, naio bitii ban ea kiano atevi nalo dolu na aju, ana naio mil koko vio jikili ban Pitere, ber kaio, berinavo “Sim̃aro, kava bilig den kiniou! Kiamo jidomiano na be toro kiano ga, maka Atua kiano jidomiano leleio.”
MAR 8:34 Ana Yesu bio tiniobi nalo bija kiano naiagagoano nalo, ka amei ea naio, ana ber kalo, berinavo “Toro na jidom takisor kiniou, naio monoka sidomii iakurano ea kiano sidomiano nalo, monoka rudu kiano m̃akolkolo, ana takisor kiniou.
MAR 8:35 Toro na jidom rilarur kiano meuliano, mia rilaluvuio. Mia ver toro tas milaluvu kiano meuliano bior kiniou, p̃eli na bior kiaku Ioluano Vou, mia naio rije ioruriano.
MAR 8:36 “Verver toro tai rije vite nonovio na yetemeriba nei, mia iorou naio rilaluvu m̃arabo na meuliano, naio maka rije tena bo tai leleio.
MAR 8:37 Mia kiano vite novo nalo nei napano bario, maka ajikia avulu kean bere kiano meuliano bogo tai.
MAR 8:38 Tomu nalo miroano ea taara na vonganei nalo amila kariano, nalo maka leleio ave riano ea Atua, nalo abova laka, a nalo amimou ka tomu dolu nalo bior kiniou bija kiaku iliano. Ana iorou mia Kulorinio Kenerinio rimei bereio, naio vija kiano nailiano lu nalo, vija karam̃ano kiano mermerano, a bogo na amei, ver toro mimou ka naio vonganei, mia naio bunu rimou ka toro nene.”
MAR 9:1 A Yesu ber bunu banlo, berinavo “Riano ga neber ka kamiu, tomu nalo tai na aju ajikili ajua vio nei, napano mia nalo maka ajikia am̃arm̃aro, rivanvano-o rivokar bogo na nalo aleal Atua kiano Navena-tuboiano rimei riyotuba vija kiano burum̃ara sikiliano.”
MAR 9:2 Iorou ka bogo nei, bogoti ari barlaka ruei, ana Yesu buru Pitere, a Yemesi, a Jone, nalo abano mave ea burusuku tai na bavin laka, napano nalo veri ga. Ana bogo na nalo aju jibena, naiagagoano tolu nei amial Yesu niabene jo binimei be dolu,
MAR 9:3 a nalo amial kiano kulum̃arauo nalo amieg, a nalo amiuvu bo mia amiuvu nonovio garuei, jovulu vite dolu nalo tealo na yetemeriba neibano na amiuvu.
MAR 9:4 Ana nalo amial bunu naverialiano Elaija bija tormoruo Mosis, naljuo amiyotuba, naljuo aju ajukunu bija Yesu.
MAR 9:5 Ana Pitere ber ka Yesu, berinavo “Tubo, bo ka kito rotua vio nei. Bo ka kumemi nuvim̃auka yimo tobobo ve tolu ea vio nei, kiamo ve takurano, Mosis kiano ve takurano, a Elaija kiano ve takurano.”
MAR 9:6 Pitere mil vovu jibe na ka nalo amemebiju laka, a nalo amerou, nalo maka bunu ajikia mia aver venia.
MAR 9:7 Ana vaarakurano ga, melijo tai binimei jovukolo, ana nalo amijog iliano tai binimei eaio, berinavo Ninei be keneriku na, napano kiniou nojidom naio laka. Kamiu monoka kuvijogkar vatitig naio.
MAR 9:8 Naiagagoano nalo amijog iliano na, ana ajiraravo jeliviv ealo, ana maka bunu aial naljuo nabano, mia amial Yesu naio ga takurano jo bijalo.
MAR 9:9 Ana nalo ajaluvo den burusuku neibano, nalo aju abatove bereio, ana Yesu mil jikili banlo, berburelo berinavo “Tena Atua mila kumialio, mia kamiu kuvan kuver re ka tomu nalo vonganei, riva riva rivokar bogo na Kulorinio Kenerinio naio rimeul bereio ea nam̃ariano, naruei ea bogo na mia kuverialio ka tomu nalo.”
MAR 9:10 Ana nalo amijogkar Yesu kiano iliano nei, mia nalo abokar iliano nei be kialo ga, kar na nalo aju abivika denlo aber venia naruei be nioti na kiano iliano nei napano naio jo berii rimeul bereio ea nam̃ariano.
MAR 9:11 Ana naiagagoano tolu nei nalo abika den Yesu, aber “Jum̃abe ka tomu na verloglogiano na tuboiano nalo aju aber Elaija mia rimei bereio beamu, iorou Naverikariano nei mia riyotuba?”
MAR 9:12 Ana Yesu berdop̃e banlo, berinavo “Nina nalo aberiio be riano ga, Elaija monoka rimei beamu ka rila saba nalo rimemedu ka Naverikariano naio rijikia rimei. Mia iliano lu nalo aju aber todolu tai bunu na nalo maka atu asidomiio, nina jo berii Kulorinio Kenerinio, berinavo mia naio monoka riviviuo bogokouo ve telabo, a mia tomu nalo asidomii va lelan naio laka.
MAR 9:13 A kiniou neber ka kamiu, neber Elaija nei naio binimei vonga garuei, a tomu nalo maka asidom naio. Jibe Iliano Lu naio berenio, nalo amila bova ka naio ruei.”
MAR 9:14 Naruei Yesu bija nalo tolu nei aju aban ea naiagagoano dolu nalo, ana amial napano tiniobi miroalo aju jeliviv ealo, a nalo amial ka naverloglogiano nalo na tuboiano bunu aju jeliviv ealo.
MAR 9:15 Ana bogo na tiniobi nalo nei amial Yesu jo binimei bereio, nalo amiilo ka naio, a nalo ajaaro toru ka amialio, ana nalo ajikiti abinimei eaio, nalo aban jum̃alo bija naio.
MAR 9:16 Ana Yesu bika den naiagagoano nalo berinavo “Ee, kamiu kumitu kumitukunu ka vaio bija nalo na?”
MAR 9:17 Ana nalo tai ber ka Yesu, berinavo “Naverloglogiano, kiniou naruei noburu keneriku sum̃ano m̃eaku binimei easo ka jau keial naio, ka sim̃aro tai na buru joa naio.
MAR 9:18 Ana bogo na jo mim̃aukanio, buku naio batove ea borotano, titinio miou kirivova jibe tililevlevi, naio jer m̃arjuvono, a niabene nalo am̃arm̃ariulu. Ana kiniou noburu naio binimei, ana jau maka koto, ana nebika kiamo naiagagoano nalo ka abolkouo ka ajil lar sim̃aro nene, ana nalo amila vonvonio, amila banbano-o, nalo abijukudeio.”
MAR 9:19 Ana Yesu berdop̃e, mil banlo, naio berinavo “Kamiu na, jum̃abe jibe na? Kamiu maka kuvitu sikili ea Atua leleio. Kiniou monoka noto vija kamiu vano-o vokar nagi? Kiniou tinieku maro ka kamiu ruei. Mo, bo ga, kuvuru m̃eaku nene rimei ea kiniou.”
MAR 9:20 Ana nalo aburu binimei, ana bogo napano sim̃aro nene mial Yesu, mila m̃eaku neibano niabene m̃arm̃ariulu, mila mijoru ea borotano, naio jo bilivilig janea vio jibe na, a mila titinio miou bova jibe jo bep̃eili.
MAR 9:21 Ana Yesu bika sum̃ano m̃eaku nei karam̃ano, berinavo “A sim̃aro nei jikar mila naio jibe na nagi ruei?” Ana karam̃ano berdop̃eio, berinavo “O, tenei nua ruei, bogo na naio be tete kia ga vo.
MAR 9:22 Binimei bokar banei bogo telabo ruei, tena jom̃a mila naio jo mijoru batove ea sebi p̃eli ea bulukue. Tena jidom ruebulag naio laka, a ver jau komijikia kala titai ka naio, kumemi nubika denso, aua jau tiniem riia kumemi, jau koija kumemi rivior kenerimemi nei.”
MAR 9:23 Ana Yesu ber ka naio berinavo “Kiniou nomijog ka kober jibe na, ver kiniou nejikia neim̃aukaio. Ana kiniou neber kaso, verver jau komonmonea ga, jau komijikia koim̃auka vite nonovio.”
MAR 9:24 Naruei sum̃ano m̃eaku nei karam̃ano bio sop̃eli ban Yesu, jegi banio, berinavo “Nojo nomonea teliki, a maka nomonea vare vo. Aua jau koija kiniou ka kiaku moneano rimei ve toru lie.”
MAR 9:25 Ana bogo na Yesu mial ka tiniobi abinimei miroano aju ajelivivi ealo, ana naio mil ban niununo va nei napano joa sum̃ano m̃eaku nei, berinavo “Jau niununo va na tiliniene bono, a na be buru, neber memedu banso, neber jau kataluvo den naio vonganei, a mia kavan lele re bunu joomo eaio bereio bogo tai.”
MAR 9:26 Ana niununo va nene miaga va laka, a mila sum̃ano m̃eaku nei niabene am̃arm̃ariulu banbano ba bova laka, ana naio jaluvo denio, buro bano. Vonganei sum̃ano m̃eaku nei niabene melukluku laka jo, jibe ka naio m̃aro ga, a tomu nalo na aju abitii aber jibe nei naruei, aberinavo “O, sum̃ano m̃eaku nei naio m̃aro ruei na.”
MAR 9:27 Mia Yesu bokar jum̃ano, ana buru sum̃ano m̃eaku nene jumolu, ana jumolu ju vatitig jo.
MAR 9:28 Mia iorou, Yesu ban bere ea komeli bereio, ana ka bogo na, napano naio jo naio takurano ga, kiano naiagagoano nalo abinimei abika, aberinavo “Jum̃abe kumemi maka nuvijikia nuvijililar sim̃aro na joa sum̃ano m̃eaku na?”
MAR 9:29 Ana Yesu ber kalo, berinavo “Sim̃aro ninio nalo na jibe na, nalo ajikili laka, volkouano ga mijikia rijil bulaglo.”
MAR 9:30 Mia Yesu nalo ajuvan vio nei, ana nalo abanvano amalmaluvo ga ea tanobuku nalo na Kalele, mia ea bogo na, Yesu maka sidom ka tomu nalo ajikia venia na naio jo milaio, p̃eli ea vio vabe na nalo aju aban eaio.
MAR 9:31 Nina, bior ka naio jo berloglog kiano naiagagoano nalo ea bogo na, ana naio jo ber kalo, berinavo “Vaataro ka mia adu Kulorinio Kenerinio van ea tomu nalo jum̃alo napano mia auebin naio rim̃aro, mia iorou, ea bogoti ve tolu, mia Atua rila naio rimeul bereio.”
MAR 9:32 A kiano naiagagoano nalo maka ajoglubarbar vo venia napano Yesu naio jo berenio banlo, a nalo amerou ka avika vatitig denio bereio.
MAR 9:33 Ana iorou, bogo tai abinimei abokar bereio Kapeneam, abinimei joomo ea yimo tai, ana Yesu bika den kiano naiagagoano nalo, berinavo “Kamiu kumitu kubivivika iliano ea kamiu ea m̃arabo bior vaio?”
MAR 9:34 Mia maka averdop̃eio van naio, bior ka bogo na nalo aju amiel abinimei ea m̃arabo, nalo aju amil banlo, aber kei kalo na jo loa mave, p̃eli kei naio bo loa tealo.
MAR 9:35 Ana Yesu jotano, bio nalo duelimo ba juo [12] nei ka amei vaataro ka naio, ana naio ber kalo, berinavo “Verver kamiu tai na jidom naio to ve moti, a naio jidom ka siano to mave, bo ga, ana mia naio monoka rila naio rimei ve na maariano, to totano maariano laka garuei, naio monoka rimei tibe toro na im̃auano na nalo dolu beamu.”
MAR 9:36 Ana Yesu bio kiritete tai napano jo binimei ea naio, naio miduio jikili ju iviso kalo, ana naio bokar tete nei ana ber kalo, berinavo
MAR 9:37 “Toro na kiano jidomiano batove ka kiniou, ana naio tinien jaaro ka rila vatitig kiritete tai na jibe nei, nina, jibeka ga na naio jo jaaro ka kiniou. A toro na jaaro ka kiniou jibe na, maka saaro ka kiniou ga, mia naio jaaro ka nina naio miila kiniou nebinimei.”
MAR 9:38 Ana naiagagoano nei Jone ber ka Yesu, berinavo “Naverloglogiano, kumemi numial toro tai, napano naio jo mijil bulag sim̃aro nalo, naio jo mijil bulaglo ea siamo. A toro nene maka nuvijikiaio, naio maka ve kito tai, mia kito rotuko vio ka naio.”
MAR 9:39 Ana Yesu ber kalo, berinavo “Makanio, kamiu kuverbure re naio. Verver toro tai jibe naio be riano, ana naio mila im̃auano nalo na bo tortoru laka ea siaku, mia toro na maka rijikia ril vova ea siaku bereio bogo tai.
MAR 9:40 Toro na maka to toko vio ka kito, naio jo miija kito na.
MAR 9:41 Neber be riano ban kamiu, ka ver toro tai mijikia ka kamiu kumitu kubar Kristo siano ea kamiu, ana naio midu baja na uei tai ban kamiu ka kumunio, toro na mia maka rijikia rilaluvu kiano jidomiano tai na bo mia naio ruduio iorou.”
MAR 9:42 A Yesu ber bunu, berinavo “A verver toro tai rila ka tete tai naio maka bunu sikili ea kiniou, mia toro na ridu mauo tai na jikili lie vo, todovulu nina mia ver aiorikar puruveru tai na toru ea burujono ana avuku naio rivan ea niogovu.
MAR 9:43 “Verver jum̃amo tai p̃eli na jaamo tai milaso maka bunu koto sikili ea kiniou, bo ka ketelario rivan ga. Verver kete bajago na kariano ea kiamo meuliano tibe na, mia komijikia kava joomo ea meuliano, a ver kava joomo ea meuliano a jum̃amo tivelinio p̃eli jaamo aba kovio ruei, nina bo ga na. Mia bova laka ver jum̃amo ve juo vija jaamo ve juo nalo atu rivu ga, mia iorou avukuso ea sebi na maka rijikia rim̃aro bogo tai.
MAR 9:47 P̃eli ver miramo, p̃eli venia bereio ea kiamo meuliano milaso maka bunu koto kesikili ea kiniou, bo ka jau koija lario ga. Tibe na, mia jau kava joomo ea Atua kiano navenatuboiano napano vite teliki nei bakovio denso ruei, a nina bo ga na. A bova laka ver miramo ve juo p̃eli kiamo bajago bova nalo ju bo ga easo, mia iorou tenalo teliki nei ga buru kiamo meuliano ban ea sebi ea vio na jogvaiano,
MAR 9:48 napano sebi nene maka rijikia rim̃aro bogo tai, sorel nalo aju ajen mokotenamo bogo nonovio ga.
MAR 9:49 “Jibe na tei mijikia rila sinaniano maka jikia soono, mia Atua ridu sebi toa tomu nalo ka sisen bulag soro nalo na joa kialo meuliano.
MAR 9:50 Mia romial bunu tei mila sado sinaniano jesei bunu, a ver kiano sikiliano riva kovio, naio maka bunu rijikia rila kiano im̃auano. Vonganei kamiu monoka kuvijamo ka Atua kiano tei rim̃au ea kamiu bogo nonovio, ka kenemiu meuliano soono re, a ka kenemiu bajago naio sese, mia kamiu kuvitu vija tum̃aro bogo nonovio.”
MAR 10:1 Ana iorou, Yesu juvan vio Kalele, naruei naio bavin tivelinio ka tanobuku na Yutea, ea m̃arauei na vio Yortano tivelinio bano. Ana tiniobi nalo aju abinimei ea naio bereio ea vio na, a javukia napano naio jom̃a mila julaka, naio berlogloglo ka vite telabo.
MAR 10:2 Mia Varisis tai aju bunu ea bogo nei, mia nalo abinimei ea Yesu, a ajidom alavon naio bereio, naruei nalo abika vikadeniano tai denio. Nalo aberinavo “Tuboiano na kanado naio ber vaio ka tivelinio na bajago nei napano toro naio jitiglar koano? Jum̃abe, jau be tiniemo ka napano toro mijikia rila tibena, p̃eli na maka rimemedu?”
MAR 10:3 Ana Yesu bika ber banlo, berinavo “Mia tormoruo Mosis naio berial venia ea kiano tuboiano ruei?”
MAR 10:4 Mia Varisis nalo nei aberenio, aberinavo “Mosis naio berial ea tuboiano tai napano mijamo ka toro mijikia sian m̃esi tai van koano, naruei naio mijikia riilalar naio rivano.”
MAR 10:5 Mia Yesu naio berdop̃e banlo, berinavo “Nao, mia Mosis naio bivitauia iliano na bior napano ga pariparimiu nalo abinimei jikili laka, tenene na naruei mila naio mijamo jibe na kar kamiu kumijikia kuviilalar kouemiu nalo.
MAR 10:6 Mia jikario ea tiiano naio maka tibena, bior napano Atua kanano iliano lu naio berinavo ‘Ea burupati Atua jii tomu nalo, napano sum̃ano bija tira.’
MAR 10:7 “A iliano dolu bunu berinavo ‘Tibena, mia toro tuvan karam̃ano a kenieno, naruei riva to rivijurukar vija koano,
MAR 10:8 naruei naljuo abinimei abe takurano ga.’ “Nina naio mila ka naljuo maka bunu ave juo, mia naljuo abinimei abe takurano ga.
MAR 10:9 Mia venia na Atua miasolio binimei be takurano, maka rimemedu ka toro silubar bereio.”
MAR 10:10 Ana bogo napano nalo aba joomo ea yimo bereio, Yesu kanano naiagagoano nalo abika naio bereio tivelinio na iliano nalo nei.
MAR 10:11 Ana Yesu ber memedu banlo, berinavo “Verenio toro tai titiglar koano, karina naio riva rivuru tira dolu tai, Atua mial jibe toro nei naio jo mila siakaiano ruei, naio mila lelan bunu tira nei napano naio be koano jukamu.
MAR 10:12 Mia verenio tira tai rivuro den kanano sum̃ano, riva soro ka toro dolu tai bereio, naio bunu Atua mial ka naio mila siakaiano ruei.”
MAR 10:13 Naruei tealo aburu kenerilo nalo abinimei ea Yesu ka naio tokol lo, ana naiagagoano nalo amialio, naruei amil jikili ban tomu nalo nei aberburelo.
MAR 10:14 Mia bogo napano Yesu mialio, maka saaro leleio ka napano kanano naiagagoano nalo amila jibena, ana naio ber kalo, berinavo “Kamiu kuverbure re kiritete nalo na, kamiu kuvijamo kalo amei ea kiniou ga, bior napano kiritete nalo ajibe ka ga tomu nalo napano aju jouro ea Atua kiano navenatuboiano.
MAR 10:15 Kiniou neber riano ka kamiu, ka toro napano naio jidom riva jouro ea Atua kiano navenatuboiano, naio monoka rijikia ka naio javukia kiritete teliki tai ga, naio maka rijikia rila vite tai ka rila ka naio rudu Atua kiano navenatuboiano nei ea kiano meuliano.”
MAR 10:16 Ana Yesu bokar kiritete nalo nene, jikario naruei ka naio midu jum̃ano joa pariparilo ka naio rilivu kalo.
MAR 10:17 Naruei bogo napano Yesu jo batavio ka riel rivano, toro tai jikiti binimei minie tano ka Yesu, naio bika denio, berinavo “?Naverloglogiano novo, kiniou monoka nala im̃auano vaio ka rila ka mia kiniou novokar meuliano nei napano maka rijikia ribisi?”
MAR 10:18 Ana Yesu ber ka naio berinavo “?Bior vaio ana jau kobio kiniou jibe na kober kiniou nebe naverloglogiano novo? Maka ve toro tai napano be kirinovo to, mia Atua naio ga takurano naio be kirinovo.
MAR 10:19 A jau komijikia bunu kanano tuboiano nalo, napano kito monoka romonea nalo, napano aber jibene aberinavo: Jau kouebin re toro, jau kola re siakaiano, jau kovina re, jau kala sibi re, jau kojukujuku re toro, jau kavamenea karam̃amo naio koniomo.”
MAR 10:20 Ana m̃eaku nene berkanio, berinavo “Naverloglogiano, tuboiano nalo na napano jau koberenio, bogo napano kiniou nebe tete kia ga vo, kiniou nojom̃a nobokar nonovlo, binimei bokar banei.”
MAR 10:21 Ana Yesu bitikar naio bano-o, tinien jii naio toru bior kanano iliano nei, ana naio berkanio, berinavo “Vite takurano ga jo keano vo, napano jau maka kalaio vo. Jau kava koṽiliṽili bulag ka kanamo vite nonovio nalo, ana jau kavar veru na vite nalo nene, jau kava kotiburevure van talim̃asa nalo. Ver jau kala tibena, mia jau ve kanamo vite novonovo nalo ve miroano ea tiniabene. Mo, jau kava kalaio, karina komei katakisor kiniou.”
MAR 10:22 Mia bogo na m̃eaku nei mijog iliano nei, naio miilo va kanio, ana kanano iviso mijog bova toru, bior napano naio be kiano vite miroano. Ana naio jaluvo den Yesu.
MAR 10:23 Naruei Yesu jirarag jeliviv ea naiagagoano nalo, ber kalo, berinavo “?Kiniou neber batitig ban kamiu, neber ver toro tai napano be kiano vite miroano, mia naio jidom riva jouro ea Atua kanano navenatuboiano, nina naio jikili mia jikili na.”
MAR 10:24 Mia naiagagoano nalo amiilo toru laka ka Yesu kiano iliano nei, ana naio ber bereio kalo, berinavo “Riano keneriku nalo, ka ava jouro ea Atua kanano navenatuboiano, jikili mia jikili na.
MAR 10:25 Kiniou neber ka kamiu, ka kamele tai riovodulu ea bulumirano nitil tai, naio jikili laka, mia ka toro tai napano be kanano vite miroano ka naio rijikia riva jouro ea Atua kanano navenatuboiano, nina naio kirisikili lie vo.”
MAR 10:26 Ana bogo na naiagagoano nalo amijog iliano nalo nei, mia nalo amiilo toru laka kanio, ana aberinavo “Tomnei! Mia karina, aber mia kei naio mijikia rivokar meuliano?”
MAR 10:27 Mia Yesu jirarag bitikarlo, berinavo “Toro maka rijikia rilarur toro, mia Atua naio mijikia rila vite nonovio.”
MAR 10:28 Naruei Pitere naio jidom ril naruei, berinavo “?Mia jum̃abe ka kumemi? Kumemi numituvan kenememi vite nonovio ruei, ana kumemi nubinimei numitakisorso.”
MAR 10:29 Ana Yesu ber kalo, berinavo “Kiniou neber riano ban kamiu, ka toro kei napano naio tuvan kunuano, p̃eli kuruano bija kuviviniene, p̃eli kenieno bija karam̃ano, p̃eli kenerinio, p̃eli kiano borotano, rivior kiniou a rivior kanaku ioluano vou nei,
MAR 10:30 mia naio rijev bereio venia naio juvan riva rivokar toromomou ve takurano [100]. Ea yetemeriba nei, mia naio rivokar bereio yimo nalo, kuruano nalo, kuviviniene nalo, kenieno nalo, kenerinio nalo, borotano nalo, mia vija vite nalo nei mia naio rivokar bogokouo nalo ve telabo, napano tomu nalo ajerm̃i ka naio bunu. A mave ka vite dolu nalo nei, ea bogo napano jo binimei, mia naio rivokar bunu meuliano nei napano maka rijikia ribisi.
MAR 10:31 Mia tomu telabo napano m̃a aju mave vonganei, iorou nalo atu yetano, a nalo napano m̃a aju yetano vonganei, iorou mia nalo atu mave.”
MAR 10:32 Ana Yesu nalo aju amiel ea m̃arabo, aju abavin Yerusalemo naruei. Ana Yesu naio jo miel jukamu ka kanano naiagagoano nalo, mia aju amiilo laka napano naio jo burum̃arabo kalo aba Yerusalemo, bior nalo amijikia ka tomu nalo na vio na ajerm̃i laka ka Yesu. A nalo dolu nam̃a aju abinimei iorou kalo, nalo bunu aju amermerou kija naruei. Mia Yesu naio bio kanano duelimo ba juo [12] amei vaataro ka naio, ana naio berial bere kalo jum̃abe mia ala kiki naio yako Yerusalemo.
MAR 10:33 Naio ber bisivisii banlo, naio berinavo “Kamiu kuviniagago vatitig. Vonganei kito roju rabavin Yerusalemo naruei, napano rivesiou re, mia adu Kulorinio Kenerinio toa tomu na tortoru na kulo lu nalo jum̃alo nalo vija naverloglogiano na tuboiano, naruei mia nalo na atibure naio ka mia naio monoka rim̃aro. A mia adu naio toa kulo Romo nalo jum̃alo,
MAR 10:34 naruei nalo na mia ayotel va ea naio, avule mirano, mia avitiv naio, rivan mia auebinio rim̃aro. Mia ka bogoti ve tolu nene, mia naio rimeul bereio.”
MAR 10:35 Ana nalo aban lie telisu bereio, ana Sepeti kenerinio juo nei Yemesi naio Jone, naljuo abinimei vaataro ka Yesu, ana abika denio, aberinavo “Naverloglogiano, kumemi juo numisidom ver venia na mia kumemi ve juo nuvika denso vonganei, mia jau kotuvan van kumemi juo ga.”
MAR 10:36 Ana Yesu berdop̃e ban naljuo, berinavo “?A kamjuo kumisidom kuvika ka mia kiniou nela vaio ka kam ve juo?”
MAR 10:37 Ana nalo abe juo aberdop̃eio, aberinavo “Kumemi juo numisidom ka kajamo ana ver bogo napano jau komei tibe parinio tubo ea yetemeriba nei, mia kumemi juo numijikia nuvitutano ea kiamo vio lu vaataro kaso, tai toa jum̃amo meruo, a tai ea mali.”
MAR 10:38 Ana Yesu ber ka naljuo, berinavo “Kamjuo maka kuvijikia tena kamiu kumitu kubikanio? Jum̃abe, kamjuo na kumisidom ka kamjuo kubare ka romunu vio takurano ea baja na jogvaiano na mia kiniou monoka nomunu eaio? P̃eli kamjuo kuber kamjuo kumijikia kuvidu varueiano napano abaruei ea kiniou kanio?”
MAR 10:39 Ana naljuo aber ka naio, aber “Ee, kumemi juo nubare.” Ana Yesu ber ka naljuo, berinavo “Ee, be riano ka mia kamjuo kumunu ea kiaku baja na jogvaiano, a be riano bunu ka mia avaruei ea kamiu ka uei napano abaruei ea kiniou kanio,
MAR 10:40 a vite na kamiu kubika na, ka kam ve juo kuvitutano vija kiniou, ea tivelinio ve juo na kiniou, tena maka ve kiaku ka mia nejikia notuvan van kamjuo. Vio nalo na jibe na, nalo ga na Karam̃aku mila vatitigio kalo, a napano naio berkar ruei ka mia nalo atutano ealo.”
MAR 10:41 Mia naiagagoano duelimo dolu amijog tenei napano kurualo juo nei Yemesi naio Jone abikanio, ana nalo tiniel jerlo abe juo.
MAR 10:42 Ana Yesu bio nalo abinimei ka naio ril vanlo, ana naio ber kalo, berinavo “Kito romijikia ruei tomu nalo kialo bajago napano maka amonea Atua. Kito romial ka tubo nalo bija tomu nalo na tortoru ea vio yetemeriba nei, nalo aju ajututua tomu nalo dolu ka atu yetano ka nalo bogo nonovio.
MAR 10:43 A kiaku naiagagoano nalo kenemiu bajago monoka tibena re. Verver kamiu tai sidom ka rimei rive toro na toru tai p̃eli naio rimei rive kenemiu toro na vurim̃araboiano tai, kiano m̃arabo jibe nei. Toro na monoka rimei tibe toro tai ga na rim̃au kenemiu.
MAR 10:45 Kulorinio Kenerinio mila jibena ruei, na naio maka rimei ka tomu nalo aija naio, mia naio binimei ka rijai tomu nalo a ka rijamo ka kiano meuliano ka rivulu bulag tomu ve miroano.”
MAR 10:46 Ana Yesu bija kiano naiagagoano nalo abinimei aju Jeriko, ana iorou, bogo na nalo ajum̃a abanvan ea komeli nei, tomu miroano ajakisorlo. Nalo aju amiel abano, ana merebono tai naio jom̃a jotano ea ikim̃arabo tivelinio ea vio nei. Toro nene, karam̃ano siano Timeas, ana nalo abio kenerinio nene ka Batimeas. Batimeas nene, naio jom̃a jotano ea m̃arabo bogo nonovio ga, naio jo bio ban tomu nalo ka nalo aje veru ve teliki van naio ka rimeul eaio.
MAR 10:47 A bogo na mijog ka Yesu na vio Nasarete nei naio jo miel ea m̃arabo binimei, naio jo bio, berinavo “Oi Yesu, jau Teviti kiano bajulukuti! Kiniou nojidom tiniem riia kiniou beamu.”
MAR 10:48 Ana tomu nalo dolu amil tiniemimi ban naio, aberinavo “!Ei, jau koyotuba re!” A naio jo bio mave lie, berinavo “Oi Tubo, jau Teviti kiano bajulukuti! Neber bo kaso tiniem riia kiniou!”
MAR 10:49 Ana Yesu binimei jikili joa vio nei, ber ka tomu nalo ber avio toro napano na rimei vaataro ka naio, ana nalo aba aber ka merebono napano, aber “?Ei, komijikia vaio?” Ana toro neibano ber “Venia?” Nalo aber “Yesu nei naio berenio jau komei vaataro ka naio beamu vo. Bo ga, jau kotumolu kito ravano.”
MAR 10:50 Ana toro napano naio miyalar m̃ano kulukoti, naio jumolu sop̃eli ga, ana binimei ea Yesu.
MAR 10:51 Mia Yesu bika den naio berinavo “?Ana jau kojidom mia nala vaio kaso?” Mia toro nei berdop̃e, berinavo “Tubo, aua, kiniou nojidom ka kala miraku nalo rimei rivu, ka kiniou nejikia nesirarago.”
MAR 10:52 Mia Yesu ber kanio, berinavo “Bo, jau komijikia kavan bere ea kiamo vonuo, kiamo viekouoiano naio mila na jau kobinimei bo ruei.” Mia toro nei naio mial vatitig vite ea aura nene ga, mia naio jo mieliel ea m̃arabo, naio jo jakisor Yesu bano.
MAR 11:1 Vonganei, Yesu nalo abini mei vaataro ka Yerusalemo naruei, ana beamu kanio, nalo amiyotuba ea komeli juo nalo na terteliki nei, Betevas bija Betani, napano nalo aju tivelinio ea suku nei napano ajisia ka Suku na Buruolivi. Ana Yesu miila kiano naiagagoano juo, berinavo
MAR 11:2 “Kamjuo kuvan ea komeli yako na, mia memedu ka bogo na kam ve juo kuva jouro eaio, mia kuvial kirikiti togki tai, napano amiadikario ju, napano toro maka lele totania kija taakano vo. Mia kam ve juo kuvijubarlar sano teli, ana kuvuruio rimei bereio van kiniou ea vio nei.
MAR 11:3 A verver toro tai ril rivan kamiu kanio, rivika riverinavo ‘?Kamiu kumila jibe na ka venia,’ mia kamiu kuver ka naio, kuverinavo ‘Tubo naio jidom temeul nei, a mia naio riila rimei bereio ea vio nei vesiou re.’ ”
MAR 11:4 Ana naiagagoano juo nei abano, ana aba amial kirikiti togki nene, napano amiadikario, naio jumolu ju ju tavio ka m̃aratavo na yimo tai tivelinio ka m̃arabo. Ana naljuo ajidom ka ajubarlar sano teli,
MAR 11:5 mia nalo napano ajua vio na, abika aberinavo “?Oi, kamiu kumitu kumila venia na, na kumitu kumijubar bulag teli nene na?”
MAR 11:6 Mia naljuo aber kalo iliano nalo na Yesu ber kalo ruei, napano mia nalo amijikia averii ka tomu nalo, ana tomu nalo amijamo ka naljuo amijikia avuru togki riva rivu ga.
MAR 11:7 Ana naljuo aburu togki nene binimei, ana nalo abisi m̃alo kulukoti nalo ea taakano, ana Yesu bavin jotano mave eaio.
MAR 11:8 Ana tomu nalo miroano amiya bulag m̃alo kulukoti nalo abisi ea m̃arabo, a nalo tealo aba aje m̃am̃ali nalo, abar abulan ea m̃arabo ka togki naio rijikia riel eaio. Jibe na, nalo amila ka avatove ka Yesu jibe ka naio be tubo tai na toru laka.
MAR 11:9 Ana nalo amiel ka abano ka ava jouro Yerusalemo, a tiniobi nalo napano aban jukamu ka Yesu, bija nalo napano iorou ka naio, nalo aju amiaga laka jibe nei, nalo aberinavo !Bo mia bo laka! Roiovu ka naio! !Atua Sop̃i jau keilivu ka naio nei napano binimei ea siamo!
MAR 11:10 !Kito rajaaro toru ka Navenatuboiano na kiado tormoruo Teviti nei napano joa binimei! Kamiu nalo na tiniabene mave kuviovu bunu ka naio!
MAR 11:11 Ana Yesu ba jouro yako Yerusalemo, a naio ba bokar Atua Kunuano Lu. Ana naio ba joomo, ba bitii vio nalo nene, a vite nalo nonovio napano amila eaio. Ana m̃erenio jo batove ruei, mia naio buru kiano naiagagoano duelimo ba juo [12], ana nalo ajaluvo ea komeli na toru nei bereio, nalo aba amon Betani.
MAR 11:12 Ana kavijova, nalo ajaluvo Betani bereio, nalo amiel abinimei bereio Yerusalemo, ana Yesu naio mijog vitu.
MAR 11:13 Ana naio bitii buruviki tai jo, ana naio miel ba vaataro kanio ka rivar m̃arati tealo. Mia bogo na naio binimei mialio, naio mial ka buruviki nene, m̃ati telabo, a maka ve m̃arati, bior maka ve bogo nene vo.
MAR 11:14 Ana Yesu naio mil ban buruviki nene, berinavo “Jau, mia jau maka leleio kejikia kavar m̃arati bereio ka tomu nalo ajikia asenio.” A kiano naiagagoano nalo amijog bunu ka naio ber iliano nei.
MAR 11:15 Ana Yesu nalo aba abokar Yerusalemo bereio, ana nalo aban bereio joomo ea Atua Kunuano Lu. A Yesu bitii bereio ka tomu nalo miroano ka nalo aju tivelinio ka yimo, nalo aju amim̃auka im̃auano nalo na ka ajev veru eaio, a tomu miroano aju abulu saba nalo na aju ap̃ilṽili kanio. Ana naio maka leleio saaro kanio, naio ba mijil bulaglo, bilig dea ka barobaro nalo napano nalo ajum̃a amijebukua veru nalo na vio Romo binimei ea veru na kulo Ju nalo kialo, napano nalo ajum̃a ajuvanio ea Yimo Lu. A ba bunu buku bulag kialo iesi na totaniano na nalo aju ap̃ilṽili ka sibo na sida.
MAR 11:16 A naio berbure bunu nalo nam̃a aju ajidom avar kialo saba nalo na im̃auano ka aiel avarkorov yati na Yimo Lu nei.
MAR 11:17 Ana naio berlogloglo, berinavo “?Jum̃abe, kamiu maka kuvijikia ka Atua berial ea kiano Iliano Lu, ber ‘Mia nalo aver kiaku Yimo Lu naio be yimo na volkouano na taara nonovio na tomu nalo na yetemeriba reraio’? ‘A mia kamiu kumitu kubilig Yimo Lu nei ruei ka rimei tibe buluvae tai na vinauano.’ ”
MAR 11:18 Ana maka vesiou tomu nalo na tortoru na kulo lu bija naverloglogiano nalo na tuboiano, amijog venia na Yesu naio mila ruei ea Atua Kunuano Lu, mia nalo tiniel mimi laka, nalo ajidom ala titai kanio. Mia nalo amerou laka ka Yesu, nalo maka bunu ala, bior nalo abitilubar ka tomu nalo ajidom laka ka naio, nalo aju amiilo ka kiano verloglogiano novo nalo.
MAR 11:19 Mia ka bogo na m̃erenio jo batove ruei, Yesu nalo ajaluvo Yerusalemo bereio.
MAR 11:20 Mia kavijo, nalo aju amiel abano Yerusalemo bereio, ana amial bereio buruviki napano beamu na, ana nalo amial ka vonganei m̃ati nalo mekekeu biniu ruei.
MAR 11:21 Ana Pitere naio jidomii bereio Yesu kiano iliano, ana naio ber ka naio, berinavo “Tubo, jau keial vo! Buruviki nei napano jau komil banio niovo, vonganei naio binimei mekekeu nonovio ruei!”
MAR 11:22 Ana Yesu berdop̃eio, ber kalo, berinavo “Kamiu monoka kuvitu sikili vija Atua.
MAR 11:23 Kiniou neber be riano ban kamiu, ver toro kei na maka kiano jidomiano veve juo, a monea kirisikili, ana venia na naio berenio, mia monoka tibe na ga. Verver naio ril van burusuku na toru nei, river kanio riverinavo ‘Jau kavatove koviako ea tei,’ nina, mia monoka tibe na ga.
MAR 11:24 Nina naruei kiniou neber ka kamiu, ka venia na kamiu kumitu kubika ea kenemiu volkouano, verver jau komonea sikili ka tena be kiamo ruei, bo, mia monoka tibe na ga naruei.
MAR 11:25 A ea bogo nonovio na kamiu kuvisidomii ka kubolkouo, kamiu monoka tiniemiu maio ka bunu, ka ver titai joaso bija toro dolu, monoka koviekokoa beamu, karina jau komijikia kotumolu koverialio ea kiamo volkouano nene van Atua. Verver jau kala tibena, mia Karam̃ado na tiniabene, naio bunu mia sidomii ka riviekokoaso ka kiamo vovaiano nalo.”
MAR 11:27 Ana Yesu nalo amiel abinimei abokar bereio Yerusalemo, ana nalo aba jouro ea burusio na Atua Kunuano Lu bereio. Ana bogo napano nalo aju amiel jouro, tomu nalo na tortoru na kulo lu nalo, bija tomu na verloglogiano na tuboiano, bija tomu na vurim̃araboiano na kulo Ju kialo, nalo abinimei ea naio.
MAR 11:28 Nalo abika naio, aberinavo “?Jau kojo komila jibena ea vio nei ea kei siano? P̃eli kei bereio na berii kaso ka jau kala tibena?”
MAR 11:29 Ana Yesu naio ber kalo, berinavo “Bo ga, a kiniou bunu nojidom nevika vikadeniano tai van kamiu beamu. Verver kamiu kuverdop̃e kiaku vikadeniano nei rivu, mia kiniou neverial van kamiu jum̃abe ana kiniou nemijikia nemila jibe nei.
MAR 11:30 Bo ga, kiaku vikadeniano naio jibe nei naruei, berinavo ?Baruei nei na Jone naio mila von nua bogobe ka tomu nalo, naio be titai na Atua ber ka Jone ka naio rilaio, p̃eli tomu nalo ga nalo aber ka naio? Kamiu kuvilavon ka kuverdop̃e kiaku vikadeniano nei.”
MAR 11:31 Mia Yesu kiano vikadeniano nei naio mila nalo abilvili ealo bereio, nina nalo aju aberinavo “?Mia kito rover tum̃abe ka naio? !Rovitikar batitig kito nei! Verver kito rover varueiano nene Atua naio ber ka Jone, mia toro na monoka rivika den kito river ka venia na kito maka romonea Jone.
MAR 11:32 Ana kito maka rejikia rover bereio Jone kiano varueiano nene naio miyotuba ea tomu nalo kialo jidomiano ga, ka ver maka mia tomu nalo tiniel ser kito!” Tomu nalo na tortoru nei nalo amerou ka aver iliano nei, ka nalo amijikia ka tomu nalo aju amonea Jone jikil ruei ka naio be Atua kiano naverialiano tai na be riano.
MAR 11:33 Ana kialo jidomiano nalo jibe nei mila nalo aberdop̃e Yesu jibe nei ga, nalo aber ga “Kumemi maka nuvijikiaio.” Ana Yesu ber ka nalo neibano, berinavo “Jum̃abe, mia kiniou bunu, kiniou maka nejikia nover ka kamiu kei naruei naio ber ka kiniou ka nala im̃auano nalo nei.”
MAR 12:1 Mia bogo na Yesu naio jo berlogloglo, naio jo berii jamerijiano banlo bogo nonovio. Jamerijiano tai naio ber jibe nei, naio berii toro na toru tai, bija kiano jiotilikrevi tai. Toro nene naio mim̃auka vatitig ka kiano vio nene, naio mila burusio tai jikili jeriko tivelinio nalo biniu, ana naio mila vio tai ka rivie bulag vati m̃arkrevi, a naio mila bunu kanano burutili vio tai ka avoio avavin atu mave eaio ka asiraragkuku ka jiotilikrevi nei. Mia bogo tai, toro na toru nei naio jidom riel kiki kija rivan ea buruvenuo dolu nalo, ana naio juvan kanano jiotilikrevi nei ban kulo dolu nalo tealo, ka nalo amei aim̃au eaio, nalo avuluio van naio.
MAR 12:2 Naruei toro na toru nei naio ba jo laka-o, karina naio mial ka vonganei be bogo na m̃ariesi nalo ameruo naruei. Ana naio miila kiano toro tai ban bereio, ka rivar veru na m̃arati krevi nene togio ve kiano, nina monoka avario van naio.
MAR 12:3 Ana bogo napano naio ba miyotuba kean nalo nei, nalo amue niegeniege naio bova laka, ana nalo amijil deven naio ban bereio naruei naio maka rivar titai leleio.
MAR 12:4 Mia tubo nei naio miila kiano toro dolu bano, mia nalo nei amueio, bar ja ea parinio, nalo amila bova toru banio bano-o nalo amijil lar naio ban bereio.
MAR 12:5 Karina naio miila bereio tai, nalo amuebinio m̃aro, a iorou kanio naio miila kiano tomu nalo miroano nalo abano, a nalo aju ajukulo a amuelo bunu nalo am̃arm̃aro ga.
MAR 12:6 Naruei toro na toru nei naio mial ka toro ga takurano naio jo naruei, nina be kenerinio memedu na naio tinien jii m̃elea naio, ana naio jidomii banbano na berenio “Vonganei, monoka neiila keneriku ga naio rivano, mia nalo monoka avamenea naio.”
MAR 12:7 “Ana bogo na kulo va nalo nei amial toro na toru nei kenerinio binimei, nalo aju aberverii kalo, aberinavo ‘Nina be toro na toru kenerinio na. Toro na naruei, napano verver toro na toru rivakovio, mia naio naruei rudu tanobuku nei tibe kanano jajum̃ano. Bo ka rouebin bunu naio rim̃aro, ka mia kito ga rojikia rovokar tanobuku nene ve kiado.’
MAR 12:8 Tibe na naruei, nalo aba abokakar naio kirisikili, nalo amuebinio, ana nalo abukuio batavio ea jiotilikrevi nene.”
MAR 12:9 Naruei Yesu naio bika denlo, berinavo “?Bogo na toro na toru na jiotilikrevi nene mia naio rimei bereio, mia naio rila tum̃abe ka nalo na aju amim̃au ea kanano jiotilikrevi? Tomu nalo bova nei, mia naio rimei ruebinvin nalo am̃arm̃aro ea bajago tai na jikili, a mia naio rudu kiano jiotilikrevi rivan kulo dolu na bo.”
MAR 12:10 Naruei Yesu ber kalo, berinavo “Iliano tai ea Atua kiano Iliano Lu napano naio ber jibe nei, berinavo Veru na, tomu nalo na amim̃auka yimo aberinavo naio bova, ana nalo abuku ban ruei, mia vonganei veru nene binimei be veru tai napano bo ka toa sudu na yimo, ka naio rivokar yimo sikili.
MAR 12:11 Tena, Atua ga naio mila, a kumemi numial jibe ka bo mia bo.” “?Ana jum̃abe naruei, iliano na kamiu kumijikia ruei, a p̃eli kamiu maka kuvulukuio kija bogo tai?”
MAR 12:12 Mia bogo na Yesu berii jamerijiano nei bisi, mia nalo na tortoru abitilubar ka naio ber iliano na jibe na ka kialo bajago, ana nalo tiniel mimi, mila nalo aju ajidom alavon ka avokar naio sikili to, karina nalo amial tomu miroano laka, ana nalo amerou kalo, ana nalo ajuvan naio jo, nalo aju koalabo den naio ga.
MAR 12:13 Mia tomu nalo na tortoru aba abitii tenei, mia nalo amiila Varisis tealo bija Erot kiano burukuti tealo abinimei, ka alavon ka avika vikadeniano tealo na jikirkili ka alavon Yesu kanio, napano mia naio maka rijikia ka riverdop̃eio.
MAR 12:14 Mia nalo abinimei ea Yesu, amila sibilili naio ka iliano novo nalo, nalo aberii “Naverloglogiano, kumemi numijikia ka jau kobe riano garuei. A jau, jau maka koto komerou ka toro, ka toro na jo loa nalo dolu p̃eli toro na toru p̃eli na jum̃abe, a jau kojo koberial memedu Atua kiano m̃arabo ka tomu nalo abiniu. Mia kumemi numisidom nuvika denso tibenei, kiado tuboiano naio ber jum̃abe? ?Naio berii memedu ka kito kulo Ju rovulu takis van Parinio Tubo Sisa nei na Romo, p̃eli naio ber maka rimemedu?
MAR 12:15 Bo ka rovulu takis nalo p̃eli na makanio?” Ana Yesu naio mijikia ka aju abivika sibisibi ga, nalo ajidom ala bulag naio ga, ana naio berkalo, berinavo “?Ee, kamiu kumitu kumisidom kuvilavon kiniou tibe na ka vaio? Bo, kuvidu veru tai rimei ka nevitiio.”
MAR 12:16 Ana nalo amidu tai binimei banio, ana naio bika denlo, berinavo “?Mirano toro kei nei joa veru na teliki nei? ?A sio na abivitauia joaio, naio be toro kei siano?” Nalo aberenio “Parinio Tubo Sisa mirano na, a siano bunu.”
MAR 12:17 Ana naio ber kalo berinavo “Bo ga, vite na be Sisa kiano, kamiu monoka kuvar van Sisa, a vite na be Atua kiano, kamiu monoka kuvar van Atua.” Mia bogo na amijog verdop̃eiano nene, nalo amiilo va laka.
MAR 12:18 Mia iorou kanio, ana Satusis tealo abinimei ea Yesu, napano nalo ajidom avika den naio tivelinio na vite tai napano nalo amonea kirisikili eaio, napano tomu nalo na am̃arm̃aro, nalo maka bunu ajikia ameul bereio ea bogoti na maaro. Nina naruei nalo abika den Yesu, nalo aberinavo
MAR 12:19 “Naverloglogiano, kumemi numi-sidom nuvika denso, ka jum̃abe ka iliano tai na tormoruo Mosis naio bivitauia be kiado beamu nua. Naio berinavo ver toro tai, kuruano naio m̃aro den koano tira, na nalo maka ve kenerilo tai vo, mia toro na monoka rivuru taanou nene ve koano. Ana verver tira nei rivar tete, nalo amijikia asisia naio takii karam̃ano na m̃aro ruei, ka siano rimeul to.
MAR 12:20 Mia ea bogo tai, tomu aluo na abe kurualo. Nana beamu laka kalo naio buru koano tai, a mia naio m̃aro den koano napano naljuo maka avar kiritete tai vo.
MAR 12:21 Karina kurualo juo nene naio buru tira neibano, karina naio bunu m̃aro denio, na maka ve kenerinio, a iorou kurualo tolu nene naio bunu mila jibe na,
MAR 12:22 banbano-o bokar kurualo aluo nene, nalo nonovio amila jibe na ga, nalo am̃arm̃aro den tira nene. A iorou ka koano sum̃ano nalo nei napano abiniu am̃arm̃aro ruei jibe na, tira nene naio bunu m̃aro.
MAR 12:23 Mia jau kover von tenei? Ea legiano na maaro, bogo na mia atu aver ka mia tomu nalo amemeul bereio, mia tira neibano ve kei koano, ka napano naio joro ka tomu aluo napano abe kurualo ruei?”
MAR 12:24 Mia Yesu naio berinavo “Makanio, kenemiu jidomiano na naio ba kirivova laka. ?A p̃eli kamiu maka kuvijikia venia mila kenemiu jidomiano bova jibe na, a? Nina ka maka kuvijikia venia na Atua kiano iliano lu berenio, a kamiu maka kuvijikia venia bunu kiano moroano na toru rijikia rilaio.
MAR 12:25 Bogo na tomu nalo amemeul bereio, mia nalo atibe ka nailiano nalo na tiniabene ga, ana mia nalo maka bunu ala tenei soriano.
MAR 12:26 A ea tivelinio na ameul bereio nei, kiano iliano jo ruei ea niosi na Mosis bivitauia, napano naio berii iesi na teliki napano sebi jijenio, na Atua mil ban Mosis, berinavo ‘Epraamo, Aisak, a Yakovo, kiniou nebe kialo Atua.’ “?Vede kamiu maka kuvuluku iliano nei kija bogo tai,
MAR 12:27 ana mia kiniou never bisivisii van kamiu ka rivuririi kenemiu jidomiano nalo. Nalo tolu nei am̃arm̃aro ea yetemeriba nei bogo be nua ruei, mia yuka telabo barlaka ruei karina Atua naio ber vonga iliano nei, ber naio be kialo Atua. Tibena, kanano iliano nei berenio nalo tolu nei am̃arm̃aro ea yetemeriba nei, mia nalo aju ameul ea naio kiano vo. Atua naio maka sidom ka kiano tomu nalo ave tomu nalo na am̃arm̃aro ga, mia naio jidom ka rive Atua ka tomu nalo napano amemeul.”
MAR 12:28 Naruei naverloglogiano na tuboiano nalo tai binimei jikili ju bunu ka bogo nei, mia naio jom̃a mije tiliniene ka napano Satusis nalo ajum̃a ajidom ka alavon Yesu, mia Yesu naio jom̃a juvululo ea kiano verdop̃eiano novo nalo. Naruei naverloglogiano nei naio be tiniene ka naio kija, mia naio bika den Yesu, berinavo “?Ea kiado tuboiano nalo, nana vabe nene naio bo lie loa laka juvulu nalo dolu nalo?”
MAR 12:29 Naruei Yesu berkanio, berinavo “Iliano Lu naio ber jibenei, berinavo ‘Tomu nalo na Israel, kamiu kumije tiliniemiu. Atua Sop̃i, kiado Atua, naio takurano be Atua Sop̃i.
MAR 12:30 Atua Sop̃i napano be kiamo Atua, jau monoka tiniemo tii naio ka kiamo iviso momou, ka kiamo meuliano momou, ka kiamo jidomiano momou, a ka kiamo moroano momou.’
MAR 12:31 “Nina naruei naio be moti, a juo nene, naio ber jibe nei, berinavo ‘Jau tiniemo tii nalo napano aju vaataro kaso, jau kovijuku rivu kalo, tavukia napano kojom̃a tiniemo jiiso.’ “Mia maka bunu ve tuboiano dolu tai bereio napano naio loa laka ka juo nei.”
MAR 12:32 Naruei naverloglogiano na tuboiano nei naio berdop̃e, berinavo “Riano ga naverloglogiano, jau kober memedu ga. Jau kober be riano, ka Toro na Toru naio takurano ga, maka ve dolu tai.
MAR 12:33 “Mia jau kober be riano bunu, ka kiniou monoka tinieku tii naio vija tinieku momou, a vija kiaku jikiaiano momou, a vija kiaku moroano momou, a kiniou monoka tinieku tii nalo napano m̃a aju vaataro ka kiniou, tavukia napano tinieku jii kiniou kiniou takurano. Be riano na, ea Atua kiano vitiiano, ver kito rala tibe na, nina naio jo mave laka, naio bo laka ka sida nalo napano m̃a kito roju romilaio ea Kunuano Lu.”
MAR 12:34 Mia Yesu mijog kiano verdop̃eiano naio bo, naio be masou, naruei naio berkanio, berinavo “Kiniou neber kaso, neberinavo, jau kojo vaataro ruei, ka mia jau kava jouro ea Atua kiano navenatuboiano navo.” Ana mia iorou ka bogo na, maka bunu toro tai rila vonvon Yesu ea vikadeniano bereio.
MAR 12:35 Ana iorou, Yesu jom̃a berloglog tomu nalo joomo ea Atua Kunuano Lu, karina naio kija bika vikadeniano tai denlo. Naio bika, berenio “?Kiniou nomijikia ka naverloglogiano na tuboiano ajum̃a aberloglog kamiu, mia kiniou nojidom novika ka bior vaio ana ajum̃a aberenio Naverikariano naio monoka riyotuba ea tormoruo Teviti nei kiano yati, napano naio be Parinio Tubo beamu.
MAR 12:36 Kiniou nebika nina, bior napano beamu, Niununo Lu naio binimei ea Teviti, mila na naio mil berinavo ‘Atua Sop̃i naio ber ka kanaku Tubo, berinavo “Jau kototano tivelinio vameruo na kiniou, jau kotororea rivano-o mia kiniou novuru kanamo uolu nalo amei ave m̃adayebe tai tena kovijankon jaamo eaio.” ’
MAR 12:37 “Ea vio na kito romialio ka napano Teviti naio jom̃a bio Naverikariano nei naio be kiano Tubo ruei. Naruei bior Teviti naio ber jibena, jum̃abe ana ajum̃a aberinavo mia Naverikariano nene mia naio riyotuba ea Teviti, be kiano yati ga?” Mia burum̃ara tiniobi napano aju ka bogo na, ajidom m̃elea verloglogiano na jibe ka Yesu kanano, nalo amije tilinielo toru laka eaio.
MAR 12:38 Mia bogo napano Yesu jom̃a berlogloglo, naio jo jokol bunu bajago na m̃arouano na kialo navuri-m̃araboiano. Naio berinavo “Kamiu kuvitikar kamiu ka naverloglogiano na tuboiano nalo. Nalo abarvar kalo m̃elea ka kialo burutili kulum̃arauo nalo na, mia verenio amiel ea vio na vioruru, nalo ajidom ka tomu nalo monoka avatove kalo, a avio batitiglo aver ‘Naverloglogiano, kavijo bo!’
MAR 12:39 A ea bogo na jokoluolu a joomo ea yimo na volkouano bunu nalo ajidom dam̃ariga nalo atutano ea vio na tomu na tortoru jelelo ga. ?Kamiu kubitilubarlo ruei, a?
MAR 12:40 A ajum̃a aburii kialo volkouano terebievi laka, mia ajum̃a amila sibi ga, bior bogo nene kia ga, nalo ajum̃a amijukujuku taanou nalo ka amijikia avina ka kialo saba nalo. Naruei bior kialo bajago nalo na, mia kialo mauo nene mia naio sikili lie vo.”
MAR 12:41 Naruei iorou kanio, Yesu mijian naio ba jotano vaataro ka vio nam̃a abuku ijaiano na Yimo Lu nei, mia naio bilig pariparinio bitivitii tomu nalo nam̃a ajuvan kialo ijaiano. Naruei naio mial tomu telabo napano abe sanibaiano, nalo abar kialo burum̃ara ijaiano nalo abinimei, ajuvanio.
MAR 12:42 Mia karina naio mial bunu ka napano tiramoruo tai naio binimei, naio be taanou ga tai, a naio be talim̃asa laka. Naruei naio bar veru sesa subaier juo binimei naio jian ban Atua.
MAR 12:43 Naruei Yesu bio kiano naiaga-goano nalo ka amei ea naio, naruei naio mil banlo, naio berinavo “Kamiu kumial tiramoruo na, napano naio juvan veru sesa juo na? Kiniou neber be riano ka kamiu, ka naio jian loa, naio jovulu ijaiano dolu nalo nonovio napano na sanibaiano nalo ajuvanio.
MAR 12:44 Nalo na, be kialo burum̃ara puruveru nalo, mia amije bena ga torogio nene, mia taanou nei, kiriveru teliki na naio bokar jo ka mia rijai kiano meuliano, naio jian nonovio ban Atua.”
MAR 13:1 Mia Yesu naio jaluvo den Atua Kunuano Lu, mia bogo napano naio jom̃a miel bano, naiagagoano nalo tai naio jiloglog burum̃ara yimo nalo na Yimo Lu nei, ana berinavo “Naverloglogiano, jau keialio! Yimo nalo na bija salo puruveru nene nalo romial lo amieg kirinovo laka, a!”
MAR 13:2 Ana Yesu berkanio, berinavo “?Jau komial yimo nalo na tortoru na? Mia iorou kanio mia ve re salo puruveru nene nalo atu batitig ea jeleigio, bior mia tomu tai, mia amei auebulag lelan nonovio yimo nalo na aviniu.”
MAR 13:3 Ajum̃a amiel jibe na, abinimei ea Suku na Buruolivi Nalo, nina naio jo jirarago ban ea Yimo Lu, ana Yesu naio jotano ea vio na. Ka bogo napano maka ve kulo dolu nalo atu, a naiagagoano ver abinimei ea naio, nina be Pitere, Yemesi, Jone a Andru. Naruei nalo abika denio, aberinavo
MAR 13:4 “?Mia auebulag Yimo Lu na nagi, a venia naruei mia naio rila vite nalo nei monoka amalmaluvo?”
MAR 13:5 Ana Yesu mil banlo naruei, naio berdop̃e, berinavo “Bo ka kamiu kuvitikar vatitig kamiu rivu, ka mia ve re toro tai rimei rila sibilili kamiu,
MAR 13:6 bior mia tomu ve telabo napano mia adu siaku, ana mia amei averinavo ‘Kiniou nobe Naverikariano nene,’ naruei mia avuru tomu ve telabo aiel vovu.
MAR 13:7 Ana ver ea bogo na, mia kamiu kuvijog uetubaiano na mira naio jo binimei vaataro, p̃eli na kamiu kuvijog lilianiano na burum̃ara mira nalo napano m̃a aju koalabo, mia kamiu kumemebiju m̃elea re. Vite nalo nei monoka amalmaluvo beamu vo, mia nina maka ve legiano na maaro nene navo.
MAR 13:8 A mia parinio tubo nalo, mia ala mira ka parinio tubo dolu nalo, mia buruvenuo nalo mia atumolu ka buruvenuo dolu. Mia vio reraio ea yetemeriba nei, mia m̃ii rikulkulu ve toru, a mia ve burum̃ara bogo na vitu bunu, mia vite nalo na, maka ve Legiano na Maaro nene navo. Vite nalo na naio jibe ka ga napano tira napano m̃abono, naio mijog dovorovo ka taakano mijalele garuei be moti ka rudu kenerinio, mia burum̃ara jaleleano nei naio maka navo.
MAR 13:9 “A kamiu monoka kuvitikar vatitig kamiu rivu, bior ka napano tomu nalo mia avuru kamiu ea komeli nalo p̃eli ea kialo yimo na volkouano ka mia ail van kamiu, naruei mia atibure kamiu p̃eli mia avitiv kamiu. Mia monoka avuru kamiu kuva kuvitu kamu ea mirano tomu na tortoru na buruvenuo nalo rivior ga kamiu kube kiaku naiagagoano, ana ea bogo na kamiu kumijikia kuverial kenemiu moneano ea kiniou kamu ka miralo.
MAR 13:10 Ana Ioluano Vou, mia aioliolu kanio van taara nalo na tomu nalo na yetemeriba nei beamu vo, karina mia vite nalo nei amijikia amalmaluvo.
MAR 13:11 Ver nalo amei avokakar kamiu, ka avuru kamiu kuvan ka atibure kamiu, mia kamiu kuvisidomii bijovijon re laka, verenio ‘?Mia kiniou never vaio vanlo?’ Mia kamiu kuverial ga iliano vaio napano mia Niununo Lu naio sian rivan kamiu, rimonloglog bogo napano mia kamiu monoka kuvil, bior ka napano mia ve re kamiu napano kuvil, mia naio rive Niununo Lu napano mia naio ril moluo ea kamiu.
MAR 13:12 “Ea bogokouo na, mia toro mijikia rijamo ka tom na bova dolu nalo nei amei avuru bulag kuruano rimemedu p̃eli na kenerinio memedu, ka auebinvinlo am̃arm̃aro, nina kar ga napano amonea kiniou. A mia kiritete nalo amijikia atumolu bunu ka averial keniele nalo a karam̃alo nalo napano amonea kiniou, ka am̃arm̃aro bunu tibe na.
MAR 13:13 Mia tomu nalo aserm̃i m̃elea ka kamiu napano siaku joa kamiu, mia kamiu kei napano naio tumolu tu sikili riva rivokar juluvati na bogokouo nei, mia Atua rilarurio.”
MAR 13:14 Ana Yesu naio ber iliano dolu tai bunu, napano naio bo ka ver toro napano naio rivuluku, rilavon ka rijikia vatitig nioti nene. Iliano nei naio ber jibe nei, berinavo “Mia kamiu kuvial ka napano mia avitirilar tavoru tai napano kirivova mia kirivova laka, naio tumolu toa vio lu tai napano maka rimemedu ka toaio. A bogo na kamiu kuvial vite nei, kamiu napano kumitu Yutea, bo ka kamiu kuvuro bilig, kamiu kuva kuvitoluku ea burusuku nalo.
MAR 13:15 Ea bogo na, ver toro tai to rijilmebi tavio ea kunuano, naio monoka riva joomo re bereio ka rivar kanano saba tai,
MAR 13:16 p̃eli ver toro tai toa kanano tiniavio, mia naio monoka rivan re bunu ea kunuano ka rivar kanano kulum̃arauo, mia naio monoka rivuro sop̃eli tibe na ga rivano.
MAR 13:17 Ka bogo na, mia rivova laka bunu rivan nena nalo napano abe m̃abolo, vija nalo nam̃a amije yu ban kenerilo solbouo nalo.
MAR 13:18 Ver tibe na, bo ka kamiu kubolkouo rivior kamiu, ka bogo na kenemiu vuroiano nei ka mia naio rivokar re kamiu ea bogo na burum̃ara niavo.
MAR 13:19 Nina bior ka napano bogo na, mia sikili mia sikili, sikili lie tovulu bogokouo dolu nalo, napano jikar ea bogo na Atua naio jii yetemeriba nei binimei bokar banei, a mia ve re bunu burum̃ara bogokouo na toru tai tibe nei bereio bogo tai.
MAR 13:20 Mia Atua jidomii ruei ka mia naio tekor bogokouo nei ve bulati ga, bior kanano tomu nalo napano naio bijauia bulaglo ka ave kanano ajua bogo nei. Ver naio tekoro re ve bulati tibe na, mia ve re toro tai rijikia rimeul to.
MAR 13:21 “Mia ver tomu nalo averver ka kamiu ka bogo nei, averinavo ‘Kamiu kumial toro yako, nina be Naverikariano na,’ p̃eli na ver averii toro dolu, averinavo ‘Naio be Naverikariano na niako laka,’ mia kamiu kumonea re kialo iliano nalo na.
MAR 13:22 Naverikariano telabo napano maka ave riano amijikia atumormolu, vija bunu naverialiano na sibisibiano, mia nalo na amijikia ala jamerijiano nalo, vija vite nalo na memebijuiano. Mia nalo ala tibe na, ana mia avuru tomu nalo ave vovu, riva rivokar napano mia alavon ka avuru bunu Atua kiano tomu nalo napano bijauia bulaglo ka ave kiano, mia vite nei mia maka ajikia alaio ga.
MAR 13:23 Mia kamiu kumijikia kuvitikar vatitigio, bior napano kiniou neberial vite nalo nei ka kamiu vonganei ruei, napano maka amalmaluvo vo.”
MAR 13:24 Ana Yesu berinavo “Naruei ea bogo na, iorou ka napano jaleleano nalo nei ribisi, mia m̃erenio rimei ribobogio, a mia siberio rimermera re bunu.
MAR 13:25 M̃arvitano nalo ea bul niogovu mia atibirbili, a moroano na vio yauo, mia Atua rikulkulu kalo.
MAR 13:26 Naruei ea bogo na, mia aial Kulorinio Kenerinio rimaluvo ea melijo vija kiano burum̃ara moroano a vija kiano burum̃ara mermerano.
MAR 13:27 Avona bisi, mia naio riila kiano nailiano nalo aseliviv ea vio reraio yetemeriba a tiniabene, a mia avuru kiano tomu nalo napano naio bijauia bulaglo ruei, nalo amei vio takurano ea naio.”
MAR 13:28 Ana Yesu berenio, berinavo “Kamiu kuvisidomii von buruiesi nei, napano aber buruviki. Naio be kiano titai ka verloglog ka kamiu, napano kamiu monoka kuvitii vatitig eaio. Bogo na kamiu kumial ka sudoti vou nalo aju amiluo, aju abinimei amemeaio, ana kumijikia ka bogo na inio ve toru jo binimei vaataro.
MAR 13:29 Tibe na, bogo na kuvial jamerijiano nalo na ea yetemeriba, nalo aju amalmaluvo jibe ka napano kiniou neber ka kamiu ruei, mia kamiu kumijikia ka Kulorinio Kenerinio jikili jua m̃aratavo ruei, vaataro ka riyotuba naruei.
MAR 13:30 “Riano, kiniou neber ka kamiu, mia tenalo na mia amaluvo beamu, ana iorou, tarati na tomu nalo napano ameulial bogo na amijikia am̃arm̃aro ea yetemeriba nei.
MAR 13:31 Ana mia buluniogovu vija yetemeriba nei, naljuo avakovio bunu, mia kiaku iliano nalo maka ajikia avakovio bogo tai.
MAR 13:32 Mia maka toro tai napano mijikia bogoti na p̃eli aura nene napano mia Kulorinio Kenerinio rimei bere eaio. Nailiano nalo na tiniabene, bija Atua kenerinio, nalo maka ajikia, mia Karam̃aku, naio takurano ga mijikia.”
MAR 13:33 Naruei Yesu berenio, berinavo “Tibe na, kamiu monoka kuvitu kuvitikar vatitigio rivu, bior kamiu maka kumijikia ka legiano na vabe naruei mia kenemiu Tubo rimei bere eaio.
MAR 13:34 Vite na naio jibe ka napano toro na toru tai juvan kiano vonuo ka riva rudu kiano burum̃ara ieliano tai. Beamu ka naio taluvo ea kanano vio, mia naio juvan kiano saba nonovio jua kiano tomu na im̃auano nalo jum̃alo, ka avitikar kiano im̃auano nalo, a mia ril vatitig van nalo napano abe nakukuano ea kiano morouo, ka monoka avitikar rivu.
MAR 13:35 “Vonganei, jibe na bunu ban kamiu, naruei mia kamiu bunu monoka kuvitu kumisirarag kuku rivu, bior kito maka rejikia ka mia toro na toru na vonuo mia naio rimei nagi. Vede naio rimei ka niogoravo, vede ka bogiano, vede ka bogo na tu riolu, vede kavijo va,
MAR 13:36 mia maka rivu ka ver naio rimaluvo kean kamiu, ana rial napano kamiu kumitu kumonmelio ga.
MAR 13:37 Naruei iliano nei napano kiniou naber ka kamiu, naio memedu ga ka tomu nalo aviniu monoka ajogio, napano berio kamiu kuvitikar rivu, kamiu kuvitikar kamiu rivu.”
MAR 14:1 Naruei, bogo binimei vaataro ka yuka nonovio nalo ajum̃a amila kialo jokoluolu juo na tortoru. Bogoti juo ju kia vo, ka mia aim̃auka jokoluolu na sidomkariano na ioruriano tukamu, ana kario na aim̃auka ka jokoluolu na asen beskit na jikili. Mia ea bogo nene, tomu na tortoru nalo na kulo lu kialo bija naverloglogiano nalo na tuboiano, ajum̃a ajidom kea auebin Yesu. Aju kea amilavon ka asirag m̃arabo tai ka mia avokarvan ga naio.
MAR 14:2 Mia nalo ajum̃a aberii banlo bereio, aberinavo “Vite na, kito maka rojikia roim̃auka ea tomu nalo miralo napano abinimei ea jokoluolu nei, ver p̃eli mia nalo tiniel ser tanea kito kanio, mia ala burum̃ara uetubaiano na, bior napano nalo telabo ajum̃a ajidom kema nei laka ruei.”
MAR 14:3 Mia ka bogo nene, Yesu joa m̃arkomeli na Betani, naio ba jo miadu ka toro nei napano ajisia ka Saimon Burumieni, napano nanua beamu naio bokar burumieni ea niabene. Mia Yesu jo jinano ea vio na, tira tai binimei eaio napano naio midu bauei tai na amim̃auka ea puruveru na kirinovo tai, mia bauei neibano naio bujo ka m̃aatei na kirinovo tai napano amim̃aukanio ea uei na baiesi na buruiesi tai, napano puruveru nene toru laka garuei. Mia tira neibano naio mijukonlar tiniu na bauei neibano, ana miyon nonovio m̃aatei nene ea Yesu parinio.
MAR 14:4 Mia nalo tealo napano ajua vio neibano amial tenei, mia nalo tiniel jer tira neibano, aju amil mum̃ii kanio ban berelo, aberinavo “?Ka venia na tira na miyon bulag kule m̃aatei na bo nei jibe na?
MAR 14:5 A ver naio rivulvulu kanio ga, mia naio rivar burum̃ara puruveru tai, ana naio mijikia rivar puruveru nene ka rijai talim̃asa nalo. Mila bulagio ga na!” Ana ajum̃a amil niegeniege tira neibano jibe na.
MAR 14:6 Mia Yesu ber kalo berinavo “?E, kamiu kumila jibe na ban tira na ka vaio? Kamiu kuvil niegeniege re naio tibe na, naio mila tonovo tai ban kiniou, milivu ka kiniou laka.
MAR 14:7 Talim̃asa nalo nam̃a kumitu kuberiilo na, mia nalo bogo nonovio atu burukuti vija kamiu, ana kamiu kuvijikia kuvijailo bogo nonovio ea bogo ve telabo napano kamiu kumisidom. Ana kiniou, mia noto re bogo nonovio rivija kamiu na.
MAR 14:8 Tena, tira nei mim̃aukanio, napano naio miyon m̃aatei na ea kiniou, naio mila nonovio saba nalo na bo bo laka ga, napano naio mijikia rim̃aukanio, ka rijikia rila vatitig mokotenaku ka mia navan ea m̃ariano.
MAR 14:9 Kiniou neber be riano ban kamiu, ea vio nonovio ea vio yetemeriba reraio napano mia averial kiaku ioluano vou nabo eaio, mia nalo atukunu bunu ka vaio na tira nei naio mim̃aukanio, ka nalo asidomial bereio bogo nonovio tena tira nei kiano tinietiiano ban kiniou, napano naio tinien miia riano kiniou.”
MAR 14:10 Naruei Jutas na Kariot, napano naio bunu be Yesu kiano naiagagoano duelimo ba juo [12] tai, naio jo jidomii ruei ka mia tiveluku ka Yesu, ana naio ba mial tomu nalo na tortoru na tomu lu nalo.
MAR 14:11 Mia bogo na nalo amijog ka mia naio rim̃aukanio m̃arabo ka nalo ajikia avokar lukua Yesu, nalo ajaaro laka, aberkar ban naio aberinavo “Naio bo laka na, a ver jau kajai kumemi tibe na, mia kumemi nuvisian ijaiano tai ve telisu rivanso riviorio.” Naruei jikar ea bogo nene, Jutas naio jo jiravo buluvio tai na mia naio riven Yesu rivan ea kulo lu nalo nei jum̃alo.
MAR 14:12 Naruei ea legiano napano be moti na jokoluolu ka asen taba na, be Taste, a ea legiano nene ajum̃a amila sida ka nunu solbouo nalo ka sidomkariano na ioruriano. Naruei ea bogoti nei naiagagoano nalo abika den Yesu, aberinavo “?Jau kojidom ka mia kumemi nuva nuvila batitig sado sinaniano na jokoluolu nei ea vio vabe?”
MAR 14:13 Mia naio ber kalo abe juo, berinavo “Kuve juo kuva jouro Yerusalemo, mia kamiu kuvial toro tai napano midu burum̃ara bauei tai, naio rimei riviviuo vija kamiu. Mia kuve juo kuvitakisor naio kuvano,
MAR 14:14 ana mia naio rivuru kamiu kuvan ea yimo tai. Naruei bogo na kamiu kuve juo kuva joomo ea yimo nene, mo na kamiu kuvil van boru na yimo nene, kamiu kuverii tibe nei, kuverinavo ‘Kiado naverloglogiano naio bikanio, berenio vajoomo vabe na valauo nalo kialo, ka naio naliko kumemi kanano naiagagoano nalo, kumemi numijikia nuvisen sinaniano na sidomkariano na ioruriano eaio?’
MAR 14:15 “Kuve juo kuvil tibe na vanio, ana mia naio siloglog burum̃ara vajoomo na yimo tai napano ea kotkoti na jo mave ka kamiu, napano vite nonovio jua ruei, ana mia kamiu kuve juo kuviomon vite nonovio na sinaniano nei ea vio nene.”
MAR 14:16 Mia Yesu ber jibe nei ka naiagagoano juo neibano bisi, ana nalo abe juo abano, nalo amiel aba abokar vio Yerusalemo. Mia ea bogo nene amial ka saba nalo nonovio amalmaluvo jibe ka ga napano Yesu berii kalo abe juo jukamu. Jibe na naruei, ana na naljuo amila batitig sinaniano na maariano na jokoluolu na Yesu kiano, karina abe juo aban bereio.
MAR 14:17 Naruei ea bogiano, Yesu naliko kiano duelimo ba juo abinimei Yerusalemo, naruei nalo aban ea yimo neibano.
MAR 14:18 Naruei bogo napano nalo ajum̃a ajinan, Yesu mil banlo, berinavo “Kiniou neber be riano ban kamiu, ka mia kamiu tai ga mia naio riṽilṽili bena ga ka kiniou, kamiu ga tai napano mia kumemi ve juo nuvisinan burukuti vonganei.”
MAR 14:19 Naruei naiagagoano nalo amijog ka naio ber jibe na, mia nalo tinielo miia naio toru laka, ana na nalo ajum̃a abivika veve terakurano denio, aberinavo “?Koig, maka ve kiniou, a?”
MAR 14:20 Ana na Yesu berdop̃eio, berinavo “Nana mia naio rila tibe nei ka kiniou, naio be tai ga ea kiaku duelimo ba juo [12] nei ga, naio napano mia kumemi ve juo nuvititi ka sememi joko ea baju ve takurano ga.
MAR 14:21 Mia Kulorinio Kenerinio monokanio rim̃aro tibe ka na vivitauiano lu nalo aberii nua ruei, mia toro napano naio ṽilṽili bena ga ka naio, mia rivova laka van naio, bo laka verenio naio rimoluo re.”
MAR 14:22 Ana bogo napano nalo ajum̃a ajinan jibe na, Yesu midu joko tai, ber siva ban Atua kanio, ana burekokorovio bar banlo, ana ber kalo, berinavo “Kamiu kuvijevio kuvisenio, ninei naio be mokotenaku.”
MAR 14:23 Mia iorou kanio nina, Yesu midu baja na m̃arjum̃elm̃elu tai, ana naio ber siva ban Atua kanio, ana jian ban kiano naiagagoano nalo, mia nalo abeve terakurano abiniu amunu tertelisu eaio.
MAR 14:24 Ana naio ber kalo, berinavo “Ninei naio be kiaku burukija, ka rila Atua kiano virakariano tumolu tu sikili bogo nonovio, bior mia kiaku burukija nei naio riou ka sovoko tomu ve miroano kialo meuliano nalo.
MAR 14:25 Kiniou neberkar be riano ban kamiu, ka mia kiniou nomunu re m̃arjum̃elm̃elu na bereio rivano-o rivokar bogo na ga mia kiniou nomunu m̃arjum̃elm̃elu vou ea Atua kiano navenatuboiano.”
MAR 14:26 Mia bogo napano Yesu naio mila jibe na bisi, ana na nalo amiou ka iou tai napano joa niosi na Iouano nalo, avona bisi ana nalo abava tavio, aban ea Suku na Buruolivi Nalo.
MAR 14:27 Naruei bogo na ajua burusuku nene, Yesu ber kalo berinavo “Banei bogiano na, kenemiu moneano ea kiniou mia rijoru, bior iliano lu naio ber ruei, berinavo ‘Mia kiniou nouebin toro na bitikar nunu, ka mia kiano nunu nalo mia avuro ave dedade tanea vio.’
MAR 14:28 “Ea iliano nei, Iliano Lu jo berii venia napano mia rimaluvo ea kiniou, mia bogo na kiniou nemeul bereio ea m̃ariano, mia kiniou notu-kamu nava Kalele, ana mia kamiu monokanio kumei iorou, kumei ea vio nene bunu ga.”
MAR 14:29 Naruei bogo na Pitere naio mijog ka Yesu ber jibe na ana naio mil ban Yesu, berial, ber “P̃eli kumemi tealo nonovio mia kialo moneano easo rijoru, mia nalo avuro denso, mia kiniou maka nejikia notuvanso bogo tai.”
MAR 14:30 Mia Yesu berkanio, berinavo “Bo Pitere, ka na jau kober jibe na, mia kiniou neber be riano ga banso neber ka mia bogiano na ga, mia tu tokokoreko ve valuo ga, ana mia jau kavarbonbonua kiniou rive varolu ruei.”
MAR 14:31 Mia Pitere naio mil joko vio ka iliano na, naio berkar iliano na kirisikili lie, berinavo “A ver nalo ajidom ka auebin kiniou vijaso, bo laka lie vo, mia kiniou, maka nejikia nalabonuaso ka never kiniou maka nove kiamo.” Ana bogo nene, naiagagoano dolu nalo bunu aber iliano nene bunu ga.
MAR 14:32 Mia iorou, Yesu nalo abarp̃iliglo ajel tivelinio ea suku neibano, abatove abokar bolu na telisu tai, aban ea vio tai siano Ketsemani. Ana naio ber kalo, berinavo “Kamiu kuvitu nei vo, mia kiniou nava nobolkouo ve telisu kija tukamu.”
MAR 14:33 Mia naio buru Pitere naljuo Yemesi naio Jone, nalo aban bija naio, ana nalo aban lie kija telisu ga, ana ea bogo na Yesu kiano iviso binimei temi laka, ana naio mijog naio bova laka.
MAR 14:34 Naruei Yesu mil banlo abe tolu, berinavo “Vonganei namijog jibe ka niunuku burukorovio ruei, mila na kiniou vaataro ka nam̃aro kanio. Neber bo ban kamiu, kamiu kuvilavon ka kuvitevijo kuvitu vija kiniou ea vio nei kija ga vo.”
MAR 14:35 Ana Yesu naio miel ba lie kija ga, ana naio mijoru minie ana bolkouo ban karam̃ano, berinavo “Teta o, Teta o! Verver jau komijikia kajamo ga ka aura na jogvaiano nei naio rimei ea re bunu kiniou.
MAR 14:36 Jau komijikia komila vite nonovio, mia kiniou nobika denso ka jau kodular baja na jogvaiano den kiniou, ka mia kiniou nomunu eaio re. Mia jau kala re tibe ka na kiniou nejidom, mia be kiamo ga.”
MAR 14:37 Kario naio binimei bereio ea kiano naiagagoano tolu neibano ana naio mial amonmelio ruei, mia bogo na nalo ajevijo ana Yesu ber ka Pitere, berinavo “?Saimon jum̃abe na jau kojo komonmelio jibe na? ?Kamiu maka kuvijikia kuvitevijo kuvitu vija kiniou ka aura ve takurano ga?
MAR 14:38 Kamiu monokanio kuvitikar vatitigio, ka mia kamiu monokanio kubolkouo bogo nonovio, ka mia lavonvoniano nalo ala re kamiu kuvijoru ea kariano. Ee, kenemiu jidomiano nalo kirisikili vatitig, mia mokotenemiu nalo niabelo mave.”
MAR 14:39 Mia iorou kanio ana naio bano bereio ea vio napano, ana naio bolkouo bereio jaki kiano ilibolkouoiano napano jukamu.
MAR 14:40 Naruei naio binimei bereio mial ka nalo tolu nei ajum̃a amonmelio bereio, bior miralo jouo tomi laka, a bogo na naio mil banlo, maka bunu ajikia averdop̃e titai bereio rivanio.
MAR 14:41 Mia naio ba bolkouo bereio, nainei be varolu nene, karina naio binimei bereio, mia naio mil banlo berinavo “E, kamiu kumitum̃a kumijilimebi kia ga vo, kamiu kumonmelio kia ga vo. Bo ga, bare naruei! Na vonganei vaataro ka bogo na Kulorinio Kenerinio naio rivan ea tomu va nalo jum̃alo naruei.
MAR 14:42 Ei, kamiu kuvitumolu, kito ravano. Toro na ṽilṽili bena ka kiniou, naio yako jo binimei vaataro.”
MAR 14:43 Naruei monloglog bogo na Yesu naio jo ber kea iliano nalo nei kia navo, Jutas neibano be nalo duelimo ba juo [12] tai, naio binimei naliko tomu nalo miroano, napano nalo abar iobogu na mira nalo bija kialo nia nalo. Nalo na naruei, tomu nalo na tortoru na kulo lu nalo, bija naverloglogiano nalo na tuboiano, bija navurim̃araboiano nalo na kulo Ju nalo, nalo amiilalo abinimei.
MAR 14:44 Nua na maka amei vo tibe na, toro na jiveluku neibano Jutas, naio jii jamerijiano tai ruei kalo, napano naio berinavo “A ver toro na navan jum̃aku vija naio tukamu, toro nene naruei napano kito rojidomio, ana kenemiu tomu nalo na be p̃irilo monoka avokario avuru naio avano.”
MAR 14:45 Mia ka bogo na nalo abinimei naruei, Jutas naio miel ban memedu ka Yesu, naio berkanio, berinavo “Bogiano bo, Naverloglogiano.” Ana naio ban jum̃ano bijaio.
MAR 14:46 Ana kialo tomu nalo abinimei abokario kirisikili, nalo ajidom ka avuru naio rivano.
MAR 14:47 Nalo abakar naio jibe na naruei, ana naiagagoano nalo na ajua vio na nalo tai midular kiano iobogu na mira, jidom ka te toro tai na Parinio Kulo Lu kialo, naruei naio jeluvuio ana jelar ga burutiliniene tivelinio.
MAR 14:48 Na Yesu mil ban tomu nalo neibano, berinavo “?Jum̃abe ana kamiu kubar kenemiu iobogu a kenemiu nia nalo? Bior venia ana kamiu kumisidom ka kumei kuvokar kiniou tibe na? P̃eli na kamiu kumitum̃a kumisidomii kuber kiniou nebe toro tai na be p̃iriku ka nevina bija nouebin toro?
MAR 14:49 Julaka ea bogoti nonovio, kiniou nojom̃a neberloglog kamiu ea Atua kunuano lu ruei, ana ka venia ana kamiu maka kumei kuvokar kiniou ea bogo nalo nene? Mia bo ga na, bior vite nalo napano vivitauiano lu berenio nua bogobe ruei, monoka amei tibe na ga.”
MAR 14:50 Mia ea bogo nei, naiagagoano nalo ajuvan Yesu ana nalo aburo dedade denio.
MAR 14:51 Mia bogo nene, m̃eaku tai naio jom̃a jakisorilo, ana aburu Yesu bano ana m̃eaku neibano naio jukulou ga. Mia nalo tealo abitilubarbar naio, mia nalo ajidom ka avokar naio bunu ga,
MAR 14:52 naruei nalo abuluvu naio, nalo abokar ga kiano tukulou ana nalo aburu lario denio, naio buro jibe na ga napano be blamoma ga jo.
MAR 14:53 Naruei nalo aburu Yesu binimei jikili jukamu ka Parinio Toro Lu, nina be Kaivas, ana tomu na tortoru nalo na kulo lu nalo, bija naverloglogiano nalo na tuboiano, bija navurim̃araboiano nalo na kulo Ju nalo, nalo abinimei vio takurano ea vio neibano bunu.
MAR 14:54 Mia Pitere bunu jom̃a jakisosor Yesu ea bogo nene, mia naio maka riva vaataro kanio, mia bogo na nalo abinimei jouro ea burusio na komeli neibano, Pitere naio ba jotano bija tomu nalo na amim̃au Kaivas kiano, napano nalo ajum̃a ajutano vaataro ka sebi, bior vio menini.
MAR 14:55 Naruei tomu nalo na tortoru napano aju joomo ea vioriano neibano, nalo ajirag von tomu tealo ka aver vite nalo tai napano Yesu jom̃a mila p̃eli nam̃a naio jo berenio, ka nalo amijikia auebin naio riviorio, ana nalo maka aleal tai.
MAR 14:56 Nalo amileal tealo napano aburulo abinimei aberial iliano miroano, mia iliano nalo na abiniu ajum̃a amila sibi ga, mia nalo ajum̃a aber saba nalo na abeve dolu, naruei kialo ilisibiano nalo nei ajum̃a ajibirbili ga.
MAR 14:57 Mia karina tomu tealo na sibiano nalo neibano nalo amileal iliano tai, ana ajikili aberinavo
MAR 14:58 “Kumemi numijog ka kema na, naio jom̃a mil barvar m̃elea ka naio jibe na naruei, berii Yimo Lu neibano korobido nalo amim̃aukanio bija jum̃alo nalo, berinavo naio ga mia rue bulagio bereio, ka mia naio ga rim̃auka vatitig Yimo Lu vou tai bereio, ka bogoti ve tolu [3] ga, napano mia toro jum̃ano rim̃auka re.”
MAR 14:59 Nalo aber iliano nalo na bano-o, mia karina kialo iliano nalo amierier janea vio ga, maka bunu atu sikili.
MAR 14:60 Naruei parinio toro lu nei jumolu jikili jua miralo, mil ban Yesu, bika denio berinavo “?Mia jau koverdop̃eio vanlo, p̃eli makanio? Jum̃abe ka iliano nalo nei napano aju aber bulagio?”
MAR 14:61 Mia Yesu naio jo ga jibe na, maka riverdop̃e vanio bereio. Naruei Parinio Toro Lu nei ber bereio ban Yesu, berinavo “?Jum̃abe, jau kobe Naverikariano nei napano naio be Atua Lu kenerinio, p̃eli na makanio?”
MAR 14:62 Naruei Yesu berdop̃e banio, berinavo “Ee, Naverikariano na be kiniou na. Mia kiniou najidom never bunu vanso, never iorou, mia rivesiou re, mia kamiu kuvial kiniou Kulorinio Kenerinio napano nojo nojotano ea tivelinio vameruo ea Atua na moroano. Mia kamiu kuvial ka mia noyotuba ea melijo nemei bereio ea vio yetemeriba nei.”
MAR 14:63 Ana Parinio Toro Lu neibano tinien mimi laka, naio mijede kiano kulukoti, berinavo “Bisi ea vio na! ?Bior venia ana kito rojum̃a rejiravo toro dolu bereio ka river saba nalo tealo rivanio?
MAR 14:64 ?Kamiu kumijogio na? Toro na naio jo mila bulag tolu na Atua siano lu ruei! Mia vioriano naio jidom jum̃abe, mia kito rotibure naio tum̃abe?” Ana nalo ajibure Yesu, aberinavo memedu ga ka nalo monoka auebinio.
MAR 14:65 Mia nalo tealo ajum̃a abuvule eaio, napano abiviko mirano, ana ajukuio, naruei nalo amiyotel eaio, abika denio, aber “Ei, jau kover von, kei mijubaso vonganei?” Naruei Parinio Toro Lu kiano tomu nalo nei abinimei ka avuru Yesu ajaluvo den vio neibano, mia nalo neibano bunu napano ajum̃a ajuku naio bija amijuba naio napano mia nalo aju aburu naio abano.
MAR 14:66 Naruei ea bogo nei, Pitere naio jo jouro ea burusio nei kia ga vo, ana tira tai na jo bitikar Parinio Toro Lu kunuano naio binimei ea vio neibano.
MAR 14:67 Mia bogo na naio mileal ka Pitere jo juva sebi, ana naio mial mijikia Pitere, mia naio berkanio, berinavo “Ei, jau bunu kojo kajakisor toro na Nasarete na!”
MAR 14:68 Mia vonganei, Pitere naio mila bonua tenei, berinavo “Ei, kiniou maka leleio nojoglubarbar vaio na jau kojom̃a koberenio.” Naruei naio jaluvo den vio neibano, ba vaataro ka burum̃ara m̃aratavo na toru na yimo neibano.
MAR 14:69 Mia ea vio nei, tira neibano mialio bereio, a naio berealio ka tomu nalo napano aju na, berinavo “Toro na, naio be nalo tai na abe kiano.”
MAR 14:70 Ana Pitere naio mila bonua iliano nei bereio. Ana maka vesiou, ana tomu nalo na ajua vio na aber ka Pitere, aberinavo “Maka, jau kobe nalo tai na, bior jau kobe toro tai na vio Kalele memedu na!”
MAR 14:71 Mia Pitere mil kirisikili lie ea iliano nalo na kirisikili, berinavo “Riano mave, kiniou neber ruei, kiniou maka lele nejikia kema na kamiu kumitum̃a kuberenio na.”
MAR 14:72 Naruei memedu ka bogo na Pitere naio berenio jibe na, tu naio jokokoreko valuo nene, mila na Pitere naio tinien maio ka bereio iliano na Yesu berenio berinavo “Riano ga kiniou neber kaso, mia bogiano na ga, bogo na tu naio tokokoreko rive valuo nene vo, mia jau kalabonua kiniou rive varolu ruei.” Mia Pitere mijog tinieno bova mia bova, ana batavio, mia naio jegi mia jegi.
MAR 15:1 Naruei ka Vraire kavijova, tomu na tortoru na kulo Israel nalo ajutano bereio ea kialo burum̃ara komeli. Nalo nei, tomu na tortoru na kulo lu nalo kialo, bija navurim̃araboiano nalo a kialo naverloglogiano nalo na tuboiano. Nalo amil bano-o, nalo abokar jidomiano tai, ana iorou amiorkar Yesu jum̃ano, aburu naio aban ea Parinio Tubo Pailat, ana ajuvan Yesu jua jum̃ano ka tibureio.
MAR 15:2 Ana Parinio Tubo Pailat naio bika den Yesu berinavo “?Jau kobe Parinio tubo ka kulo Israel nalo p̃eli na makanio?” Ana Yesu berdop̃e, berinavo “Tenene na naruei, jibe na kojom̃a koberenio kia na.”
MAR 15:3 Mia tomu na tortoru na kulo lu nalo aberii bulavulag vite nalo telabo kar Yesu, aberinavo naio jo mila vite telabo na bova.
MAR 15:4 Naruei Pailat bika bereio, berinavo “Jum̃abe? Nalo nei aberenio vite telabo na bova biorso ruei, mia jau be kiamo verdop̃eiano kanio, p̃eli makanio?”
MAR 15:5 Mia ea tivelinio na venia nalo na ajum̃a aberenio, mia Yesu maka bunu sian verdop̃eiano tai bereio vanlo, naruei Pailat miilo toru kanio biorio.
MAR 15:6 Ea bogo na, mia nalo aju kia ga vo ea Jokoluolu na Sidomkariano na Ioruriano, a ka yuka nonovio ea jokoluolu nei, Parinio Tubo na Romo naio jom̃a mila vite tai ka kulo Israel nalo. Naio mila jibe ka napano verenio nalo tealo ajua lakoiano, tomu nalo amijikia avika nalo tai napano ajidom, ka mia Pailat rijamo ka naio riva tavio ga.
MAR 15:7 Ana ea bogo na, toro na poletik tai joa lakoiano, napano tomu nalo amijikia batitig naio, napano siano be Barabas. Naio be toro tai na kirisiou napano ajumolu ka ala mira keano kulo Romo, naio muebinvin tealo am̃arm̃aro, naruei ajetavokio ea lakoiano biorio.
MAR 15:8 Jibe na, ana tiniobi nalo abinimei telabo vio takurano ea Pailat mirano, nalo abika den naio ka rila rivanlo tavukia nam̃a naio jom̃a mila, ka naio monoka rijamo ka nalo tai kalo napano joa lakoiano naio riva tavio bereio.
MAR 15:9 Naruei Pailat berdop̃e, berinavo “Moo, p̃eli kamiu kumisidom ka kiniou najamo ka kema nei rivatavio bereio, nina be kamiu kulo Ju kenemiu Parinio Tubo?”
MAR 15:10 Pailat bika jibe nei, bior naio mijikia ruei ka tomu na tortoru nalo na kulo lu nalo na Ju nalo ga aburu Yesu binimei ban naio, jibe ka im̃auano na jokuano ga, bior amial ka tomu dolu nalo ajaaro laka kanio.
MAR 15:11 Jibe na, Pailat jidom tuvan Yesu rivano, mia tomu na tortoru na kulo lu nalo amila bulag tomu nalo kialo jidomiano binimei bitunu m̃elea, ana aber monoka asikil ka Pailat ka naio tuvan re Yesu rivano, mia naio tuvan ga Barabas rivano.
MAR 15:12 Mia Pailat naio mijog venia napano ajum̃a aber ka naio, naruei naio bika denlo bereio, berinavo “Mo bo ga, a ver tibe na, mia kiniou nala tum̃abe ka toro nei nam̃a kamiu kubio Parinio Tubo na kulo Ju nalo kialo?”
MAR 15:13 Mia nalo abiniu amiaga mave bereio, aberinavo “!Kuvitukukakar naio ea m̃akolkolo!”
MAR 15:14 Naruei Pailat bika denlo, berinavo “?Mia bior vaio, naio mila vaio na kirivova?” Mia nalo amiaga jouo lie vo, aberinavo “Kuvitukukakario, kuvituku-kakar naio mave ea m̃akolkolo!”
MAR 15:15 Mia Pailat maka bunu rijikia naruei mia naio rila tum̃abe, mia jidom ka naio monoka river titai ka mia tomu nalo nei amijikia ajog rivu riviorio, naruei naio berinavo Yesu naio tobo, mia naio tuvan Barabas bere rivanlo. Ana naio midu Yesu joa kiano na mira nalo jum̃alo ka nalo avitivio, ana ka avurio riva atukukakario ea m̃akolkolo.
MAR 15:16 Naruei Pailat kiano na mira nalo aburu Yesu aba joomo ea burusio na kanano komeli, mia nalo abio kialo taara dolu nalo telabo abinimei ka aialio.
MAR 15:17 Naruei nalo amiya bulag kanano kulum̃arauo, ana amiya kulukoti tai ea naio napano be vabolo, jibe ka nam̃a parinio tubo nalo amiyaio, a nalo abar nionoti tilikibi abili, amiveio ea parinio, jibe ka parinio tubo tai kanano batubatu.
MAR 15:18 Mia bogo napano abar tenalo na bisi, amiyotel eaio, aberinavo “Parinio Tubo na kulo Ju kialo, o! Kumemi nubatove kaso, kumemi numiaiaso!”
MAR 15:19 Ana nalo amidu jaati subavio, amue pariparinio, a abuvule niegeniege naio, aminie ka naio jibe ka abameneaio.
MAR 15:20 Mia bogo nam̃a amiyotel ea naio jibe na bisi, nalo amiyalar kulukoti vabolo nei denio, ana amiya m̃ano kulum̃arauo eaio bereio, ana nalo aburu naio, abatavio ka atukukakar naio ea m̃akolkolo.
MAR 15:21 Ana bogo na na mira nalo aburu Yesu aju abano, nalo amileal toro tai napano naio ba yeturu jo miel binimei. Toro nei, nina be Saimon nanua beamu naio be toro na Saireni, a napano naio be karam̃ano tomu juo nei Aleksada bija Rovus. Naruei nalo amial naio, ana ajutua ka naio kija rudu Yesu kiano m̃akolkolo rivano.
MAR 15:22 Mia nalo aburu m̃arabo ka Yesu aba abokar suku tai, siano Kolkota, napano nioti nene berenio vio na jibe kanio bordada na buriu na toro.
MAR 15:23 Naruei bogo napano nalo amijivi ea suku nene, nalo ajidom adu m̃arjum̃elm̃elu van Yesu ka rimunuio. Mia m̃arjum̃elm̃elu nei, nalo amiyon buron vite tai mijea ban bijaio ka rila Yesu niabene rije, ka naio rijog rijalele m̃elea re, mia bogo na nalo ajian banio mia naio maka sidom rimunuio.
MAR 15:24 Ana nalo amidu Yesu, ana ajuku kakario mave ea m̃akolkolo. Karina, nalo amiere m̃abujo, ka aleal ka kei kalo mia rivar kiano kulum̃arauo tai, a mia kei rivar dolu nene.
MAR 15:25 Mia bogo napano amidu Yesu joa m̃akolkolo nei, nina kavijova, ea aura kover jibe na.
MAR 15:26 Ana na mira nalo na Romo nei, nalo ajiri iliano tai, napano berial vite napano navurim̃araboiano nalo na ajidom auebin naio rim̃aro riviorio, napano berinavo “Toro nei, naio be Parinio Tubo na Ju nalo.”
MAR 15:27 Mia ka bogo na bunu, tomu va juo na vinauano, ajukukakarlo bunu ea m̃akolkolo jibe ka Yesu, tai abitirilario ea vameruo na naio, a tinene abitirilario ea vam̃ali.
MAR 15:28 Ea bajago nei naruei, nalo amila ka mia iliano moruo tai na Iliano Lu naio rimei rive riano, napano berenio berinavo “Nalo amidu naio mon naliko tomu nam̃a amila kokorov tuboiano.”
MAR 15:29 Naruei tomu nalo napano m̃a amiel abarlaka ea vio na, nalo aju ap̃iligṽilig pariparilo, nalo amil niegeniege Yesu liki, aberinavo “Aie, jau na, nanua m̃a kober komijikia kala bulag Atua Kunuano Lu, a mia jau kovitiri lario bereio ka bogoti ve tolu ga, mia jum̃abe vonganei?
MAR 15:30 !Bo ga, jau kalavon ka kalarurso, jau kataluvo den m̃akolkolo na, jau katabulu!”
MAR 15:31 Ea bajago na bunu, tomu na tortoru na kulo lu nalo naliko naverloglogiano na tuboiano nalo aju abital niegeniege naio, nalo aberinavo “!Naio milarur tomu dolu nalo telabo ruei, mia naio maka bunu rijikia rilarur naio bereio naruei!
MAR 15:32 ?Naio be Naverikariano, naio be Parinio Tubo ka kito kulo Ju, p̃eli? Bo ka naio tavulu den m̃akolkolo vonganei, ka mia kito reial ka naio be riano, ka mia kito romijikia romonea naio.” Mia naljuo napano ajukukakarlo ea m̃akolkolo bija Yesu, naljuo na bunu amiasol ilivaiano nalo ea naio jibe na.
MAR 15:33 Mia ka legiano viovare, ana melijokouo binimei miununuko vio reraio garuei, naio jo jibe na bano-o bokar m̃erenio tolu niogoravo.
MAR 15:34 Ana ea bogo na, Yesu miaga jouo ea kiano iliano memedu, naio berinavo “?Eli, Eli, lam̃a sabatani?” napano berenio “?Kiaku Atua, kiaku Atua, ka vaio ana kojuvan kiniou nojo jibe nei?”
MAR 15:35 Mia tomu tealo napano ajum̃a ajumolu ajua vio nei, napano nalo aju abitii vite nalo na, nalo amijog belea Yesu kiano iagaiano nei, naruei nalo aberinavo “Kamiu kumijog, toro na naio jo bio tormoruo Elaija na, ka rimei rijai naio.”
MAR 15:36 Mia sop̃eli ga, nalo tai jikiti binimei, midu burujumu, miyon m̃arjum̃elm̃elu na mijea banio, ana julukar ka iesi tai, ana miyuku ban ka Yesu rimunu eaio, berinavo “!Ei, kito rotu vo! Reial von, p̃eli mia tormoruo Elaija rimei rilarur naio kovio, p̃eli na rimei re.”
MAR 15:37 Naruei Yesu miaga jouo, naio buru maaria kanano jegi, naio m̃arodobi.
MAR 15:38 Ea bogo nene na ga, jagidago merorolu laka napano jaklele ea Atua Kunuano Lu, nam̃a joko vio lu na be vio lu laka, naio burup̃e tivelinio juo, jikar mave batove boru yetano.
MAR 15:39 Naruei toro na toru ka na mira nalo, napano ju bitikar Yesu, bogo na mial Yesu buru maaria kiano jegi jibe na, naio berinavo “!Banalo tom nalo, toro nei be Atua Kenerinio riano ga!”
MAR 15:40 A tire tealo napano ajum̃a ajakisor Yesu aju ka bogo nei, nalo ajikili aju koalabo kija, aju abitikar kialo naverloglogiano. Ea nalo nei, nalo tolu nei, be Mere tira re Maktala, a Mere dolu napano Yemesi naio Yoseve kenielo, a tira napano Salome.
MAR 15:41 Nalo nei naruei napano bogo na Yesu jo Kalele nua ruei, ajum̃a ajakisor naio, ajum̃a amijaio. A be tire telabo dolu nalo bunu ajumolu aju ea bogo na, napano nalo bunu ajaluvo Kalele, ajakisor Yesu abinimei mave Yerusalemo.
MAR 15:42 Mia bogoti nei be Vraire, naio be bogo na ala vite nonovio atu batitig rivu ea Legiano Lu nei beni, mia bogo napano vaataro ka m̃erenio rivatove,
MAR 15:43 toro tai na Arimatea, naio siano Yoseve, naio mila kiano jidomiano jikili, ana ba jikili jukamu ka Pailat mirano, naio bika Pailat ka rijikia ridu Yesu mokotenano. Mia kirisikili ka Yoseve naio rila tibe na, bior ka naio be tarati tai na burum̃ara vironiano na komeli na kulo Ju kialo, mila na tomu nalo amijikia batitig naio, a naio be toro tai bunu nam̃a jidom laka ka Atua kiano navenatuboiano rimei.
MAR 15:44 Ana ka bogo na, Pailat maka rijikia ka Yesu naio m̃aro ruei p̃eli na makan vo, naruei naio bio kiano toro na toru na kiano na mira nalo, ka vika denio.
MAR 15:45 Mia bogo napano naio mijogial ka Yesu naio m̃aro ruei, naio mijamo ka Yesu mokotenano ban Yoseve.
MAR 15:46 Mia Yoseve naio je m̃ano buluvae tai be terivou ga maka vesiou vo, karina naio ba bulu kulum̃arauo vou tai, naio ba amidular Yesu mokotenano batove ea m̃akolkolo, ana amijuvuliko ka kulum̃arauo neibano, ana nalo amidu abano mon ea m̃ano buluvae napano. Ana amelivlivi ka puruveru na toru nene binimei, ajubonkokar m̃aratavo nene, ana aban bereio.
MAR 15:47 Ana Mere juo nei, tinene tena vio Maktala, naliko dolu nene napano be Joses kenieno, naljuo bunu abinimei amial vio nei napano Yesu mokotenano joaio.
MAR 16:1 Mia bogo napano Legiano Lu naio barlaka ruei bisi, nina ka bogo napano m̃erenio jikar batove vonga kijev ka Sarere, mia Mere na vio Maktala, bija Mere napano Yemesi kenieno, bija Salome bunu, nalo tolu nei aba abulu bonotanunu nalo tealo ka amijikia aion ea Yesu niabene.
MAR 16:2 Naruei ka Sade kavijo, bogo na m̃erenio jikar ka mijivio kia ga vo, nalo tolu amiel ka avan ea buluvae nene.
MAR 16:3 Aju amiel abano, nalo ajum̃a abivika denlo, aberinavo “?Mia bogo na rovoru yako, mia kei mijikia rimelivlivilar ka burum̃ara puruveru napano ajubonkokar buluvae nei van kito, ka romijikia rava joomo?”
MAR 16:4 Mia bogo napano nalo abinimei vaataro ka vio nei, nalo amial ka burum̃ara puruveru nei, napano toro tai melivlivilario ruei.
MAR 16:5 Naruei nalo aba joomo ea buluvae nene, amiilo ka m̃eaku tai, naio jotano tivelinio vameruo, napano naio miya kulum̃arauo nalo na amiuvuruvu laka, mia bogo na nalo amial naio amiilo bova laka.
MAR 16:6 Naruei naio mil banlo, berinavo “!Ei, kamiu kumerou re! Kiniou nemijikia ruei ka napano kamiu kubinimei ea vio nei bior Yesu na vio Nasarete, napano ajukar naio ea m̃akolkolo. Mia naio jumolu meul bereio ruei, naio maka bunu toa vio nei. Kamiu kumei von kuvialio! Ninei naruei vio nanua amidu batitig mokotenano mon eaio!
MAR 16:7 Mia kamiu kuvan sop̃eli, kuva kuverial ka Pitere vija naiagagoano dolu nalo, ka mia Yesu rivatove tukamu kalo yako Kalele, mia nalo bunu monokanio atakisor naio, mia nalo amijikia aialio ea vio na, tavukia na nanua berkar kalo nua ruei.”
MAR 16:8 Naruei tire nalo nei amila sop̃eli, ajaluvo den buluvae, aburo abano, bior nalo amiilo toru laka ka vite nalo neibano bano-o m̃a amemebiju garuei. Ana amerou m̃elea bunu, mila ana maka ava averial ka tomu dolu nalo leleio, mia nalo aban memedu ka naiagagoano nalo ga.
MAR 16:9 Ana Yesu naio meul bereio jibe nei ea kavijo vio buru vurevure ka Sade nei ruei, napano naio be legiano moti na bogoti aluo. Naruei naio jo malmaluvo keanlo napano ajakisor naio, mia nana miyotuba kean beamu be Mere re Maktala, nina napano naio mijil bulag sim̃aro nalo aluo eaio nua ruei.
MAR 16:10 Ana iorou ka na Mere naio mial Yesu, naio ba miyotuba kean nalo nanua m̃a ajakisor naio, napano aju amijog bova a ajum̃a ajegi kia ga vo, ana naio berial kalo ka napano Yesu naio meul bereio ruei.
MAR 16:11 Naio ber batitig kalo ka naio mial Yesu ruei ka mirano, mia nalo maka amonea naio.
MAR 16:12 Ana iorou ka bereio, ea bogo tai napano naiagagoano juo aju ajaluvo den Yerusalemo, naljuo aju amiel abano, ana Yesu naio maluvo kean naljuo. Naruei naljuo amial jibe ka napano Yesu niabene be dolu, naio maka tibe ka nua.
MAR 16:13 Mia bogo napano amial naio bisi, abe juo abarp̃iliglo, aban bere, abano aberial vite nei ban nalo dolu, mia bogo tai bereio, nalo dolu nei maka amonea vite nei.
MAR 16:14 Ana iorou ka bereio, Yesu naio miyotuba kean naiagagoano duelimo ba tai, ea bogo tai napano nalo ajutano aju ajinan. Ana naio mil kija banlo, bior ka napano maka avar tinielo ea naio, a bior ka napano kanalo iviso nalo jikili laka, mila na maka atu amonmonea kialo iliano nalo ka amial naio meul bereio ruei.
MAR 16:15 Ana Yesu naio ber kalo, berinavo “Vonganei, kamiu monoka kuvano, kuvitan ka kamiu ea vio nonovio na yetemeriba nei, a kamiu monoka kuvioliolu ka kanaku Ioluano Vou van tom nonovio.
MAR 16:16 Ver toro tai rijogio, mia naio rimoneaio, mia karina avaruei ea naio, toro nene mia naio rijev ioruriano. Ana naio napano ver maka rimoneaio, mia Atua naio riverkar m̃ariano vanio.
MAR 16:17 “Mia nalo napano m̃a amoneaio, mia vremesiano nalo toalo, tibe ka napano mia ajil bulag sim̃aro nalo ea moroano na siaku, a mia ajev iliano dolu nalo,
MAR 16:18 mia ver bogo tai avokar maro tai, mia nalo avu ga, a ver bogo tai amunu vite tai napano monoka am̃aro kario, mia vite nene naio maka rijikia rila titai kalo, a mia adu jum̃alo toa namieiano nalo, naruei mia nalo amei avu bereio.”
MAR 16:19 Ana iorou ka napano kiado Tubo Yesu ber iliano nalo nei banlo bisi, Atua burular naio ban bereio mave tiniabene, midu naio jotano tivelinio vameruo na naio.
MAR 16:20 Naruei naiagagoano nalo abanvan tavio naruei, aba amioliolu ea vio nonovio, a nalo amial ka napano Tubo naio jo mim̃au bijalo, naio jo mila lo amila vremesiano telabo ka rila tomu nalo avitilubar ka kanalo iliano nalo nei abe riano. A tukunu nei naio bisi ea vio na.
LUK 1:1 Kiniou Luka nebivitauia tukunuano nei banso, toro na toru Tiovilas. Jibe ka napano jau komijikia ruei, tomu telabo abivitauia ruei tukunuano na vite nalo nei nanua amalmaluvo ka kito yuka tealo bar laka ruei.
LUK 1:2 Vite nene nalo, kito maka reialio rimemedu ka mirado, mia tomu nalo napano jikar ea burupati nene, nalo aju amialio, a ka napano nalo ajibe ka tomu na be moti na Lilianiano Vou nabo, nalo naruei aberial sosolio batitig binimei ban kito.
LUK 1:3 Naruei jikar nanua ruei, kiniou nojom̃a nebitii batitig m̃esi dolu nalo nam̃a abivitauiaio, a nojom̃a nabar iliano na vite nene nalo, naruei namial jibe bo ka ver nalavon ka navar torogio dolu nalo na tukunuano nei, novivitauia sosolio amei tibe ka niosi novo tai napano jakii memedu kiri m̃arabo sesa nalo na tukunuano novo nei.
LUK 1:4 Naio naruei nobivitauiaio ruei jo, mia kiniou najaaro ka notuvan riviedu ve kiamo, ka mia jau komijikia kovulukuio, komijikia kovitilubar ka vite nalo nam̃a kojom̃a komijogio ruei amemedu ga a abe riano, ajavukia nam̃a kanaku niosi nei berialio.
LUK 1:5 Tukunuano nene naio jikar jibe nei: Ea bogo nam̃a Parinio Tubo Erot naio jo mije tuboiano ea tanobuku na vio Yutea, toro lu tai, naio be m̃aratavo na Abija, a naio buru tira tai napano naio bunu miyotuba ea yati na kulo lu nalo, nina ea m̃aratavo na tormoruo Erono, Mosis kuruano re nua laka. Toro nene siano Sakaraia, a koano, siano Lesveti.
LUK 1:6 Mia naljuo nei, kialo meuliano kiri memedu laka ea Atua kiano vitiiano, ka nam̃a amonmonea kiano tuboiano, a nalo ajum̃a amila bajago nalo na memedu kam̃a amila bogo nonovio ga, maka atum̃a ala belea tai.
LUK 1:7 Mia vite takurano ga, naljuo maka ve kenerilo tai, bior tira nei Lesveti naio jumolumu ga, mia vonganei naljuo abinimei abe kulo moruo nalo laka ruei.
LUK 1:8 Mia ka bogo tai, naio be bogo na Sakaraia kiano taara nalo monoka ava ala sida ea Atua Kunuano Lu, tavukia nam̃a taara nalo amila terakurano ea sude nalo.
LUK 1:9 Mia dam̃ariga, bogo nam̃a amilala jibe na, nalo monoka ala tibe ka nam̃a amiere m̃abujo, ka mia aleal nalo na vabe kalo naruei napano mia naio mijikia rila burum̃ara im̃auano nei ka mia m̃a riva joomo ea Vio Lu na Yimo Lu nei, ka risebi sida ea boda na jo. Mia ka bogo na amilaiio jibe na, mia Sakaraia siano mijoru loglogio, ka mia naio naruei riva rilaii burum̃ara im̃auano nene.
LUK 1:10 Naruei monloglog bogo nam̃a amisebi sida nene, ana naio ba joomo ka rilaiio, a burutiniobi toru na tomu nalo aju tavio ajum̃a abolkouo.
LUK 1:11 Ana bogo na Sakaraia naio ba joomo, mia miilobin naio ka mial Atua kiano nailiano tai napano naio miyotuba kanio, jikili ju tivelinio vameruo na boda nene.
LUK 1:12 Mia bogo na Sakaraia mial nailiano nei, naio maka bunu rijikia ka mia tum̃abe naruei, a merou toru bunu.
LUK 1:13 Mia nailiano nei naio mil banio, berinavo “Sakaraia, jau komerou m̃ele re. Kiniou nebinimei ka neverial ga vanso ka Atua mijog kenemiu volkouano kube juo ruei, a mia koamo tira na Lesveti, mia naio rivar kenerimo solbouo sum̃ano tai, mia bogo na naio riyotuba, mia jau monoka kesisia naio ka Jone.
LUK 1:14 Mia bogo na naio riyotuba dovorovo, mia kuve juo tiniemiu saaro ve toru laka, tiniemiu sese, mia kamiu ve juo re ga, mia kulo dolu nalo bunu mia asaaro ve toru laka.
LUK 1:15 Kiritete nene, mia naio rimei rive Atua kanano toro na toru tai, a mia naio tibe ka toro lu tai, mia naio rivel ka m̃arjum̃elm̃elu vija uei na bitunu. Tikario ea bogo napano joa kia ga kenieno mabono, mia Niununo Lu to rivujolou ea naio ruei.
LUK 1:16 Mia naio rive toro tai napano mia naio rivilig kulo Israel nalo ve telabo amei bereio ea Atua Sop̃i, kialo Tubo.
LUK 1:17 Mia aial ka napano niununo a moroano nanua joa Naverialiano Elaija mia to rivare ka ga naio bereio, bior mia naio tukamu rimei, ka riverial ka mia Naverikariano naio rimei iorou ka naio vesiou re. Mia naio rivilig teta nalo kialo iviso nalo ka mia asidomial vatitig bereio kenerilo nalo, a mia rivilig tomu nalo nam̃a amila kokorov tuboiano ka mia atakii bereio bajago napano be masou a memedu. Ea m̃arabo nalo na naruei, mia naio rila vatitig rivu taara na tomu nalo tai ka mia ave Atua kiano, ka atu rorea naio ka mia riyotuba kalo.”
LUK 1:18 Mia Sakaraia naio mijog iliano nei, ana naio berkanio nailiano nei, berinavo “Ai, abe kover re tibe na. Maka rijikia tibe na, bior kumemi juo nei m̃erenio batove ruei nei.”
LUK 1:19 Ana na nailiano nei mil ban bereio, berinavo “Makanio, mia tibe ga na. Kiniou nebe nailiano Kapriel nei, nam̃a bogo nonovio najikili nojua Atua mirano ka m̃a nabar kanano iliano, naruei naio miila kiniou nebinimei easo ka neverial lilianiano novo nei vanso.
LUK 1:20 Mo bogo na kiniou neberialio kaso, mia jau maka komoneaio, naruei kiniou never kaso ka mia kove buru, a mia jau koto tibe na rivano-o rivokar bogo na keial vite nalo nene ayotuba kaso, nina ea bogo nene rimemedu.”
LUK 1:21 Mia bogo na nailiano jom̃a mil kia ga jibe na ban Sakaraia, mia tomu nalo ajikili aju tavio kia ga vo, aju rorea bano deio, ana nalo aju ajidomii aberinavo “?Ka venia ana naio ba joomo, bijuku kiki jibe na?”
LUK 1:22 Ana iorou kanio, ana naio batavio bereio, mia nalo amial ka naio maka bunu rijikia ril vanlo, naruei nalo abitilubar ka naio jo joomo naio mial titai napano mila naio jibe na. Naruei naio jom̃a mil ka ga jum̃ano banlo, maka bunu ril be buru ga jo.
LUK 1:23 Mia naio jidel dolu ka ga m̃a jo mila kiano im̃auano ea Yimo Lu na Atua Kunuano, bano-o kiano bogo nene bisi, ana naio ban bereio vonuo.
LUK 1:24 Naruei nalo aju jibe na bano-o, mia maka vesiou, ana koano p̃igi, mia bogo na naio mial ka naio be m̃abono jibe na, mia naio ba jo vonuo ga bano-o bokar siberio jumo.
LUK 1:25 Ana ea bogo na, naio jo ber jibe nei, berinavo “!Atua bijuku bo tanea ban kiniou nei! Beamu tomu nalo ajum̃a abiti sa ea kiniou bior maka navar tete, mia vonganei, Atua naio mial kiniou, tinien miia kiniou, naruei naio midular imouiano na kanaku jumolumu nene ruei.”
LUK 1:26 Naruei Lesveti naio be m̃abono siberio ari ruei, ana na Atua miila kiano nailiano nei, Kapriel, ka riva riverial kiano iliano tai rivan niatira tai, siano Mere, napano naio be niatira tai na komeli na vio Nasarete ea tanobuku na vio Kalele. Ea bogo na, aberkar Mere nene ruei ka mia riva soro ka toro tai, siano Yoseve, napano naio miyotuba ea yati na Parinio Tubo Teviti re nua, mia Mere naio maka riva to rivija naio vo.
LUK 1:28 Ana na nailiano nei Kapriel naio binimei, miyotuba ka Mere, naio berinavo “Mere-o, abe Atua naio jo jaaro toru laka ka jau, naio milivu kaso, a naio jo bijaso riano.”
LUK 1:29 Mia bogo na Mere mijog iliano nei, naio jidom bijovijonio toru laka, ana ber mia riviti von, ka nailiano nei mil kirinovo laka ban naio jibe nei, ber nioti nene venia.
LUK 1:30 Karina nailiano nei mil bereio banio, berinavo “Mere, jau komerou re. Atua tinieno jaaro kaso ga, mia rila burum̃ara ilivuiano tai rimei ea kiamo meuliano.
LUK 1:31 Vonganei, mia jau kove m̃abomo, vano-o mia kodu kenerimo sum̃ano tai, a ver naio riyotuba kario, ana monoka jau kesisia ka Yesu.
LUK 1:32 Iliano Lu re nua berii kenerimo nene ruei, na naio berinavo ‘Naio mia rive toro na toru, a mia siano rive “Atua Na Loa Laka Kenerinio,” a Atua Tubo rila naio rimei ve parinio tubo tai, napano ridu jeleig korobinio re nua nene, napano parinio tubo Teviti,
LUK 1:33 naruei mia naio rije tuboiano ka nalo napano na amiyotuba ea Yakovo kanano m̃aratavo, nina be kulo Ju nalo na aju vonganei, a ka mia nalo na amei iorou, a kanano navenatuboiano mia naio maka rijikia ribisi bogo tai.’ ”
LUK 1:34 Naruei Mere naio miilo toru laka ka iliano na ber mia naio rudu tete, ana bika den nailiano nei, berinavo “?Ana mia vite nene riyotuba sel tum̃abe liki nei, bior kiniou maka nuvitu biju kumemi juo kanaku sum̃ano vo?”
LUK 1:35 Ana na nailiano berdop̃e, berinavo “Mia Niununo Lu rivatove easo, a mia moroano na Atua Na Loa Laka kiano rimei sovokoso, ana na mia jau kop̃igi. Ana bior mia jau kotibe na, mia nalo averinavo kiritete lu napano mia jau koduio be ‘Atua kenerinio.’
LUK 1:36 “Ea kanamo vitiiano, jau komial tena kirisikili laka ka mia tibe na, ana bo ka jau kosidomii von koniomo tiramoruo Lesveti yako. Aju amial aber mia naio rivar kulu re tete ga, mia naber kaso, naio be tiramoruo ruei, mia vonganei, naio kiano siberio ari ruei.
LUK 1:37 Jau monoka tiniemo rimaio, ka jibe ka napano Atua ber ka tiramoruo Sera re nua laka, ea tivelinio ka naio, maka ve titai leleio napano mia naio rijikia re ka rilaio.”
LUK 1:38 Ana na Mere naio berdop̃e, berinavo “Ierinio ga. Kiniou nobe niatira na Atua kanano im̃auano ga, mo kiniou nomijamo ga ka mia naio rila vite nalo na ayotuba ka kiniou tibe ka ga napano naio jidomio, tibe kanio na jau koberial ban kiniou na.” Ana na nailiano nene juvan naio ban bereio.
LUK 1:39 Ana na Mere jom̃a jidomii nailiano nei kanano iliano nalo nei, karina naio jidom toru ka riva rial kenieno nene napano Lesveti, mia maka vesiou ga, ana naio jumolu den kiano vio, mila sop̃eli ban ea m̃arkomeli napano Lesveti naio koano Sakaraia ajuaio, nina ea tanobuku na suku nalo na vio Yutea.
LUK 1:40 Mia Mere neibano bokar naljuo nei kunualo nene, naio ba bio Lesveti.
LUK 1:41 Mia bogo napano Lesveti naio mijog lubar Mere joono ka mil banio, naio mijog ka kenerinio napano joa naio, bijobijo toru. Naruei Niununo Lu binimei ea Lesveti, naio binimei bujolou eaio,
LUK 1:42 naio miaga manenea, berinavo “Aiou Mere, Atua rilivu kaso ve toru laka, loa tira dolu nalo aviniu, a mia kanano burum̃ara ilivuiano toa bunu kanamo m̃arati napano mia kovario!
LUK 1:43 Kiniou maka nove tira na memedu leleio ka mia kanaku Tubo Kenieno rimei riadu ka kiniou tibe nei, mia namial kirinovo laka ban kiniou.
LUK 1:44 Mia kanaku solbouo naio bitilubarso, naio jaaro toru laka, bior monloglog bogo napano numijog joomo be moti garuei, naio bijobijo toru laka ea kiniou.
LUK 1:45 Kito juo rajaaro mia rajaaro, bior robiekar batitig Atua Sop̃i kanano iliano, a mia rimei rive riano van kito juo tavukia ga napano naio berkar ban kito ruei.”
LUK 1:46 Ana ka bogo na, Mere kanano iouano tai jibe nei, berinavo “Kanaku iviso miaia Atua toru,
LUK 1:47 niunuku jaaro toru laka ea Tubo kiaku ioruriano,
LUK 1:48 naio mial kiniou nojotano, tira na kiano im̃auano tai, naio be Atua na Moroano, jidomial kiniou, mila tonovo ban kiniou. Taara nalo napano amei iorou, averii kiniou, averinavo ‘Tira nei, Atua milivu toru.’ Nomidular siano lu,
LUK 1:50 tinien miia nalo nam̃a ajutano kanio, taara re nua, na iorou.
LUK 1:51 Moroano na jum̃ano mila vite miroano, naio jiburevure nalo nam̃a tinielo jikili, mila dedade ealo abeve terakurano.
LUK 1:52 Mila bulag parinio tubo den jelelo, bitiri bulag nalo nam̃a jidomiano batove ga.
LUK 1:53 Nalo nam̃a jijerlo, naio bagan batitiglo, nalo nam̃a abe sanibaiano, naio mijil bulaglo, jum̃alo yauo ga.
LUK 1:54 Naio mila nam̃a berkario nua ban korobido nalo, binimei miija kito, kanano kulo Israel nalo. Maka rivitoviton ea Epraamo, tinienriia kiano bajulukuti nam̃ariga-o tobo to.”
LUK 1:56 Naina naruei Mere kiano iouano maaro ea vio na, mia naio jo bija Lesveti bano-o bokar siberio tolu, karina ban ea kanano vonuo bereio.
LUK 1:57 Naruei binimei monloglog bogo na mia Lesveti rudu kenerinio, mia naio barlar be sum̃ano.
LUK 1:58 Mia bogo napano Lesveti kiano m̃aratavo bija tomu na vaataro nalo amijogial vite nei, nalo ajaaro toru laka bija naio ka Atua kanano burum̃ara tinieiiano nei banio, ka beamu naio be jumolumu ga, mia vonganei naio barlar kenerinio motoru.
LUK 1:59 Mia bogo na kiritete nei naio bokar bogoti aluo, ana abinimei ka ala pakuveu ka naio. Ka bogo na, ajidom ka adu siano bunu, avio ka Sakaraia, tibe ka karam̃ano siano,
LUK 1:60 mia kiritete kenieno berbure, berinavo “Makanio, naio siano Jone.”
LUK 1:61 Naruei nalo amil banio, aberinavo “?Venia na? !Maka lele garuei kanamo m̃aratavo tai napano adu sio na jibe na toa naio!”
LUK 1:62 Naruei amil ka ga jum̃alo ban kiritete nei karam̃ano, ka avika denio ka naio jidom ka adu sio na vabe toa kenerinio nene.
LUK 1:63 Ana na Sakaraia mil ka jum̃ano banlo, ber adu m̃esi tai rimei vanio, naruei naio bivitauia, berinavo “Siano, Jone.” Vite na naruei mila nalo na vio na amiilo toru laka kanio,
LUK 1:64 mia monloglog bogo na bunu, Sakaraia minano mijuo, naruei naio mijikia mil bereio, ana na miaia Atua.
LUK 1:65 Mia tomu nonovio nalo na tanobuku na, amijogial vite nei, amiilo va kanio, mia tukunuano nene mererako janea m̃arkomeli dolu nalo na tanobuku na suku nalo na vio Yutea.
LUK 1:66 Ana na nalo nam̃a amijogio, ajidom bijovijon toru laka kanio, bior abitilubar ka Atua jum̃ano jo bijaio, naruei nalo ajum̃a abivika denlo, aberinavo “?Kiritete lu nei mia naio tum̃abe?”
LUK 1:67 Naruei Niununo Lu binimei bujomagmago ea Sakaraia, kiritete telisu nei karam̃ano, ana naio berial jibe nei, ber
LUK 1:68 “Kito raiaia kanado Atua siano, Tubo re Israel, batove kean kito, bulular kito,
LUK 1:69 bitirilar kiano siyovo, miyotuba ea bajulukuti na kiano toro na im̃auano Teviti, ka mia rilarur kito.
LUK 1:70 Nina kiano verikariano nanua, naverialiano nalo aberialio, aber
LUK 1:71 Naio mia rivuru bulag kito den kiado uolu nalo jum̃alo,
LUK 1:72 tiniene ribobogia re kanano virakariano bija korobido nalo, tinien miialo kia ga vo.
LUK 1:73 Nina verikariano jikili nene bija korobido Epraamo,
LUK 1:74 nanua Atua berkar ber rilarur kito ka kiado uolu nalo jum̃alo, ka romerou re bunu, rove lu, romemedu kamu ea mirano, roim̃au kanano ka legiano nonovio ea kiado meuliano.
LUK 1:76 Keneriku, mia avioso ka Atua Loa Laka kiano Naverialiano, mia kotukamu ka kala vatitig Tubo kiano m̃arabo.
LUK 1:77 Mia koverial ka mia Atua tinien riia kiano tomu nalo, tinien tiilo, ana mia riviekokoa kialo kariano nalo, a rilarurlo. Mia Atua riila kiano kiriyulu telisu na kavijo ve moti rimererali kito,
LUK 1:79 rimei rimererali kito napano m̃a rojua melijokouo, napano niununu nam̃ariano miununuko kito ruei, a mia rimei rimererali m̃arabo na tum̃aro ka rotum̃a reiel eaio.”
LUK 1:80 Mia bogo na yuka nalo aju abarlaka bano, Jone nene naio miluo bavin ririo bo, a kiano jidomiano meruo batitigio, a naio biekouo ea Atua kiano im̃auano bo. A naio ba joa vio yauo, ka riva rivokar bogo na mia naio monoka riyotuba ea kulo Israel nalo miralo.
LUK 2:1 Ana ka bogo na, parinio tubo na kulo Romo kialo, naio siano Sisa Okastas. Naruei naio berial ka mia monoka avuluku tomu nalo na venuo nalo nam̃a ajutano ka kiano vitikariano.
LUK 2:2 Im̃auano na abuluku tomu nalo nei, naio be moti na amila jibe na, a ka bogo na amilaio, mia toro tai na Sisa kanano naio jom̃a bitikar burum̃ara tanobuku nei na vio Siria, a toro na toru nene, siano Kuarenias.
LUK 2:3 Ana ka ala im̃auano nei, aberenio tomu nonovio monoka avanvan bereio ea kialo vio nalo, ka mia amijikia avivitauia vatitig sialo, a avuluku vatitiglo.
LUK 2:4 Vite na naruei mila ana Yoseve naio jumolu den komeli na vio Nasarete, nam̃a naio jojoaio, nina ea tanobuku na vio Kalele, ana naio bavin ea komeli na vio Betleem, ea vio na tormoruo Parinio Tubo Teviti naio moluo eaio nua, nina ea tanobuku na vio Yutea, bior Yoseve naio miyotuba ea yati na tormoruo Teviti nene.
LUK 2:5 Mo Yoseve burukar koano Mere jakisorio, napano ka bogo na, vaataro ka rivarlar kenerinio.
LUK 2:6 Naruei abe juo abano, mia bogo na nalo aju kia ga Betleem vo, mia Mere mijog ea naio ka kiano bogo na mia naio to joomo binimei nonovio naruei.
LUK 2:7 Ana na Mere midu kenerinio motoru, naio be sum̃ano, a naio bivikakari batitigio ka niakulm̃arauo, mia maka kanano vio nabo tai, bior abe juo amilavon ka ava atua yimo na valauo, mia naio bujo ruei, naruei Mere mila kenerinio mon joomo ea vio na abagan temeul nalo eaio.
LUK 2:8 Naruei ka bogiano nene, be tomu tai nam̃a abitikar nunu aju bija kialo temeul nalo, ea soro tavio ka Betleem nene ga.
LUK 2:9 Naruei Atua kanano nailiano tai batove keanlo, a Atua kiano mermerano midulii rera vio nene jibe ka burum̃ara yulu tai, mila nalo nei amerou toru laka.
LUK 2:10 Naruei nailiano nei mil banlo, berenio berinavo “Kamiu kumerou re. Kiniou nomidu iliano nabo tai ka naver ka kamiu, ka mia naio mijikia rila tomu nonovio ajog rivu ve toru laka.
LUK 2:11 Ka bogiano nei ga, ea komeli na Parinio tubo Teviti re nua kanano, nina ea vio Betleem, kiritete solbouo tai naio moluo vonga, ka mia naio rive kenemiu ioruriano. Naina naruei be kenemiu Tubo, naio be Naverikariano nam̃a Atua berkario nua ruei ka mia riilaio rimei.
LUK 2:12 “A naina naruei be kijokijo na vite nene: Mia kamiu kuvileal kiritete telisu nene, napano amila kokouro ea naio. Mia kuvial ka napano abivikario ka niakulm̃arauo nalo ga, ka mia adu naio ka rimon ea vio na temeul nalo salo sinaniano.”
LUK 2:13 Naruei nalo amiilo ka sop̃eli ga, burum̃ara taara na nailiano dolu nalo na vio mave abinimei amiasolo bija nailiano neibano. Naruei nailiano nalo nei amiaia Atua, a amiou aber
LUK 2:14 “Mave niogovu, nalo ajum̃a amiaia Atua toru, a ea yetemeriba nei, tum̃aro joa tomu na Atua jaaro kalo.”
LUK 2:15 Nailiano nalo aberial iliano nei ruei, bisi na ajaluvo den tomu na abitikar nunu nalo nei bereio, karina abavin mave niogovu. Naruei nalo nei ajum̃a aberverii vite nei banlo bereio, aberinavo “Ai, abe ravano. Bo ka rava Betleem ka reial vite nei miyotuba vonganei, napano Atua berial ka kito.”
LUK 2:16 Ana nalo amila sop̃eli, aba amileal Mere naio Yoseve, a amijaka aba amiadu ka kiritete sesa napano monea m̃ano vio nam̃a abavagan temeul eaio.
LUK 2:17 Mia bogo na amial vite nalo nei, ana aber bulavulag nonovio iliano nalo napano nailiano berial kalo ruei, tivelinio na kiritete sesa nei.
LUK 2:18 Telikiti na kulo dolu nalo amijog tukunuano nei, tinielo bujo ka burum̃ara vameneano tai.
LUK 2:19 Mia Mere, mijekar vatitig nonovio vite nalo nei jua kiano iviso, maka tiniene ribobogia, naio jom̃a jo jidomiio julaka ga.
LUK 2:20 Mia tomu nalo nei aban bereio ea kialo nunu nalo, a ajum̃a abamenea Atua siano, a nalo ajum̃a amiaia naio toru laka ka vite kirinovo nalo napano amijogio a amialio, napano kirimemedu ga ka nailiano nei kiano iliano napano berial banlo.
LUK 2:21 Telikiti napano kiritete bokar kiano sude takurano, naio be bogo na mia ala pakuveu ea naio. Amila jibe na, kario ajisia ka Yesu, napano sio nei be sio nanua nailiano berial kalo jukamu ruei, avona bisi ana Mere naio be p̃igi kanio.
LUK 2:22 Telikiti na Yesu miyotuba sude ari barlaka ruei vo, bisi na be bogo na monoka avuru sida na lakoniano ea Atua Kunuano Lu, nina bior burukija na tira na bar tete. Naruei aba aburu sida nene, jakii tuboiano na Mosis kiano berenio, berinavo “Talim̃asa nalo amijikia aue ga vaama ve juo, p̃eli na kirisibo ve juo.” Ana ka bogo nene, amidu dovorovo Yesu ban ea Atua Kunuano Lu, amiokoio ban Atua. Vite na jakii Mosis kiano tuboiano, na naio berenio “Tete sum̃ano nalo nonovio na amoluo jukamu, nalo abe lu, abe Atua kanano.”
LUK 2:25 Mia be toro tai joa Atua Kunuano Lu ka bogo na, siano be Simion. Naio be tena vio Yerusalemo ga tai, naio be namemedu tai, a naio be toro tai nam̃a biekouo ea bajago na volkouano. Naio jororea jidom m̃elea ka rial Atua kanano Natinieiiano, nina Naverikariano, rimei ea kulo Israel nalo ea bogokouo nei ajuaio. Mia Simion nei naio be toro tai nam̃a Niununo Lu jojoa m̃a naio nam̃ariga,
LUK 2:26 mia Niununo Lu berial ka naio ruei ka mia naio rivakovio re vo rivano-o mia mirano rialio Atua kiano Naverikariano.
LUK 2:27 Ana Niununo Lu buru naio binimei ea Atua Kunuano Lu, monloglog bogo na amidu kiritete sesa Yesu binimei, ka ala bajago na tuboiano nene.
LUK 2:28 Ana Simion midu kiritete nene, ana naio miaia Atua a ber siva banio, berinavo
LUK 2:29 “Tubo toru o, vonganei nemial vite na jau koberkar ka kiniou, naio miyotuba ruei. Mila tum̃aro binimei ea tinieku, ana vonganei jau komijikia kajamo ka kiniou kanamo naim̃auano, nataluvo den yetemeriba nei neviedu.
LUK 2:30 Ea miraku ga namial kanamo Ioruriano,
LUK 2:31 napano komiila binimei ea tomu kinkin nalo na yetemeriba nei miralo,
LUK 2:32 javukia yulu tai napano jiloglogso ka kulo dolu nalo, a ka mia aiaia kumemi kanamo kulo Ju nalo, bior kenememi mermerano nei, Yesu.”
LUK 2:33 Ana Yoseve naio Mere, abe juo amiilo toru laka ka Simion kanano iliano nalo nam̃a berii Yesu,
LUK 2:34 ana Simion mil bereio, milivu kalo, naruei naio mil ban Yesu kenieno, berinavo “Atua mila kiritete nei binimei ban kito na vio Israel ka rila kito ve telabo rojoru, a kanio rila kito ve telabo rotumolu bereio. Atua mila naio binimei jibe ka kijokijo tai, mia tomu ve telabo ail rivova ka naio,
LUK 2:35 ana tibena mia naio rila kialo jidomiano nalo napano m̃a ajuluku nei amalmaluvo ea vio medave. Mia tivelinio ka jau, mia jogvaiano tulu tiniemo tavukia iobogu na mira, mia kanamo iviso rivurup̃eio kar tenalo na napano mia ayotuba ka kenerimo nei.”
LUK 2:36 Mia tiramoruo tai bunu jo ka bogo nene, siano Ana, napano naio be naverialiano tai. A Ana nene, karam̃ano siano Vanuele, napano naio miyotuba ea yati na tormoruo Aisere re nua. Naio joro nua ruei, ka bogo na naio be niatira kia ga vo, mia naio jo bija koano ka yuka aluo ga, ana koano m̃aro denio. Naruei naio be taanou jibe na ga, bano-o kiano yuka bokario duelimo va arolu ba veri [84]. Naio be tira tai napano monmon ka ga m̃a jojoa m̃a Atua Kunuano Lu, napano naio jom̃a bijurukar bogo na lotuano na kavijo bano-o bokario na kijevi, a dam̃ariga naio mondulu ka m̃a jo bolkouo.
LUK 2:38 Ka bogo na naruei, naio binimei vaataro kalo, ana naio bolkouo, ber siva toru ban Atua bior kiritete nei, a iorou ka nina, naio ba tavio ba jom̃a berii Yesu ban tomu nalo nam̃a aju ajirarag rorea ka Atua rimei rilarur Yerusalemo, mia Ana ber bisivisii banlo ka kanalo Naverikariano naio binimei ruei.
LUK 2:39 Telikiti napano Yoseve naio Mere amila nonovio vite nalo nei biniu javukia nam̃a Atua kanano tuboiano berenio, mo Yesu abatove bereio ea kanalo komeli na Nasarete, nina ea tanobuku na vio Kalele.
LUK 2:40 Mia kiritete nene miluo binimei toru, a kiano jidomiano binimei be masou laka, a amial ka napano Atua miija naio ka naio rila vite nonovio rivu ea kiano meuliano.
LUK 2:41 Ana ka yuka nonovio, kulo Ju nalo ajum̃a amila kanalo jokoluolu tai, napano naio be Sidomkariano na Ioruriano. A dam̃ariga, nalo nam̃a aju janea vio dolu, tiniel jii toru ka avavin Yerusalemo ka ala jokoluolu nene, a Yesu kanano tormoruo juo bunu amila jibe na.
LUK 2:42 Ana ka yuka tai, bogo napano Yesu kanano yuka bokar duelimo ba juo [12] kia ga vo, aban bereio aburu Yesu bijalo.
LUK 2:43 Mia amila vite nalo na jokoluolu nei bano-o biniu, ana tomu nalo amieliel bere abanvan ea kanalo vio nalo. Mia Yesu naio maka rivano, naio jobo kia Yerusalemo, mia kanano tormoruo juo, maka ajikiaio.
LUK 2:44 Naljuo ajidomii aberiam̃a naio jo kovio bija lo bure burum̃ara taara na m̃aratavo bija kanalo bilbilu nalo, mia nalo amiel ba bokar legiano momou takurano. Mia bogiano ana ajirag Yesu bano-o,
LUK 2:45 mia maka aialio to vijalo, naruei nalo amial ka monoka atakii bere jaalo ava Yerusalemo alavon ka alealio.
LUK 2:46 Amiel bogoti takurano momou, abinimei aboru bereio Yerusalemo, nalo ajiragio bano-o, ana ea bogoti dolu nene, be bogoti tolu na kialo ieliano, ana amileal vonga naio, amial naio jom̃a jotano ea Atua Kunuano Lu. Naio jotano bija naverloglogiano nalo na vio na, naio jom̃a mije tiliniene ka kialo iliano nalo, a jom̃a bivika vikadeniano denlo.
LUK 2:47 A nalo nam̃a aju vaataro ka Yesu ea bogo na, amiilo toru ka kiano burum̃ara masouano a jikiaiano na, a kanio verdop̃eiano nalo nam̃a naio jian ban nalo nam̃a ajum̃a abika vite denio.
LUK 2:48 Ana telikiti napano kanano tormoruo juo nalo amial ka napano naio jom̃a mila jibe na, amiilo toru kanio, ana kenieno mil banio, berinavo “!Ai, keneriku! ?Bior vaio ana kojidom ka kala lelan kumemi ve toru tibe na? Keialio, kumemi juo numisiragso-o mia, maka lele nuvilealso, komila kumemi numijog kirivova-o mia.”
LUK 2:49 Ana ka bogo na Yesu midu verdop̃eiano tai banlo, napano ber jibe nei, berinavo “?Bior vaio ana kubano kumitum̃a kumisirag kiniou janea vio dolu nalo jibe na? Jum̃abe, kamjuo maka kumisidomii ka kiniou monoka notom̃a nala Teta kanano im̃auano joomo ea kunuano?”
LUK 2:50 Mia verdop̃eiano na ber kalo, maka ajikia ajog lubar nioti nene.
LUK 2:51 Naruei Yesu jumolu den vio nei, ana naio ban bijalo, abatove bereio ea kanalo vio Nasarete. Ana Yesu jobo bijalo ea vio na, naio jo mijogkarlo bo dam̃ariga. A kenieno Mere naio jom̃a jidomikar vite nalo nei joomo ea kanano iviso bogo nonovio.
LUK 2:52 Mia yuka nalo aju abinimei abarlaka bano, mia Yesu jo miluo binimei toru nonovio, a kiano masouano bija kiano moroano jo binimei toru lie vo, mia Atua jo milivu kanio toru laka, mila ana tomu nalo amial naio bo laka, ajaaro toru kanio.
LUK 3:1 Yuka tealo bar laka ruei vo bisi, ana Jone Baruei, Sakaraia kenerinio, naio miyotuba ea vio yauo. Nina ea bogo na burum̃ara parinio tubo Taiperias Sisa na vio Romo naio be tubo bokar kiano yuka duelimo ba jimo ruei, ana ka telikiti na naio bitiri bulag kanano tomu na tortoru nalo tai ruei, jibe Pontas Pailat, naio mije tuboiano ea vio Yutea, a Erot, naio mije tuboiano ea vio Kalele, a kuruano Vilip, naio mije tuboiano ea tano na vio Ituraia bija Trakonaetis, a Lesanias, naio mije tuboiano ea tanobuku na vio Abilini. Ana ka bogo na bunu, parinio kulo lu juo napano m̃a aju Yerusalemo, be Anas naljuo Kaivas. Mia Jone joa vio yauo, ana Atua jian iliano ban naio,
LUK 3:3 naio ba jeliviv ea tanobuku nalo na Yortano, naio jom̃a mioliolu berinavo tomu nalo monoka aviliglo, a avaruei, tibe na ana mia Atua riviekokoa kanalo kariano nalo.
LUK 3:4 Naio mila javukia ga na nanua m̃a Naverialiano Aisea naio ber nua ruei ea kiano niosi, napano m̃a berenio “Niono tai naio jo bio ea vio yauo, berinavo: Kuvila vatitig Atua kanano m̃arabo nalo, ka naio mijikia rimei ea kenemiu meuliano nalo.
LUK 3:5 Mia monoka kuvitiviniko bop̃ap̃ili nalo, a monoka kuvikili bulag yasuku nalo avatove rivu, a vio nalo na jorokoro monoka nalo amemedu rivu, a vio nalo nam̃a jukujukuduo monoka nalo aierivin rivu;
LUK 3:6 tibe na, ana mia taara nonovio na tomu nalo aial kialo Ioruriano napano Atua riila riel ea m̃arabo nei riyotuba kalo.”
LUK 3:7 Im̃auano na be Jone kanano, naio jo ka m̃a rioliolu tibe na naruei, mia telikiti na tiniobi toru aba tavio ea vio yauo ka naio rivaruei ealo, naio mil jikili banlo, naio ber jibe nei berinavo “Kamiu na kumitibe ka maro nalo ga napano amerou ka sebi tai ana aburo, mia kuberiam̃a kumijikia kuvuro ka buruta kenieno sebi na mia Atua rionio rimei? Makanio, bior maka kuvilig kamiu vatitigio vo.
LUK 3:8 Mia ver kube riano ka napano kumerou ka vironiano nei, kenemiu meuliano monoka avar m̃arati nabo napano rivare ka kenemiu viligiano nene. Mia kuvitikar, kuve re m̃arou bereio, tibe ka nam̃a kumila ruei, nam̃a kumitum̃a kuberinavo ‘Ee, kito roju bo ruei, bior kito naruei robe Epraamo kiano yati nalo memedu kia nei.’ Mia nina maka titenia, bior ver Atua sidom, naio mijikia rivar puruveru nalo na ga rim̃aukalo ave Epraamo kanano yati ve telabo, ka mia adu jelemiu.
LUK 3:9 Kiniou neber ka kamiu, ka m̃aryekesi jo ruei ka te bulag buruiesi nalo na maka avar m̃arati nabo, ka avukulo avan ea burutinia sebi.”
LUK 3:10 Telikiti na tiniobi neibano amijogio amerou mia amerou, ana abika aberinavo “Mo aver tibe na, ana mia kumemi nuvila tum̃abe naruei?”
LUK 3:11 Ana Jone berdop̃elo, berinavo “Toro na m̃ano kulukoti juo, mia monoka naio rijamo ka tinene van toro na maka ve m̃ano tai; a toro na be sano sinaniano miroano, mia naio monoka riviovio ka tealo van toro na maka ve sano taio.”
LUK 3:12 A tomu na takis, nam̃a abe tomu na jukujukuano memedu, telabo bunu abinimei ka Jone rivaruei ealo, mia nalo bunu abitilubar kialo vovaiano nalo, naruei abika bunu aberinavo “?Naverloglogiano, tum̃abe ka kumemi, mia monoka nuvila tum̃abe?”
LUK 3:13 Ana naio ber kalo, berinavo “Mia kuvar den tomu nalo rive verare ka ga nana mia monoka avuluio, mia to loa re, tibe ka nam̃a kumilala mugaruei.”
LUK 3:14 Mia tomu na mira tealo bunu abika jibe na ka Jone, aberinavo “?Mia kumemi, nuvila tum̃abe?” Naruei naio ber kalo, berinavo “Kamiu kubar kenemiu tenalo na mira ana tomu nalo aju amerou laka ka kamiu, mila na bogo napano kamiu kumisidom vite tai, kuber ga, ana nalo monoka ajamo bior napano amerou. Mia bajago na, mia monoka kuvila re bereio. A kamiu kumitum̃a tiniemiu mimi dam̃ariga ka kuber tom na tortoru nalo ajum̃a abulu kamiu telisu ga, p̃eli bare ga kovio vo, mia kamiu monoka kuvisaaro ga kanio.”
LUK 3:15 Mia ea bogo na, kulo Ju ajidomii aber kialo Naverikariano vaataro ka maluvo, ana nalo amijog Jone kiano ilinovoiano nalo nei, ana nalo ajaaro kanio, naruei vikadeniano joa kialo jidomiano, ajum̃a abivika, aberinavo “?Aa, p̃eli toro na naruei, p̃eli naio be kiado Naverikariano koviobo?”
LUK 3:16 Mia Jone naio jom̃a ber lubarbario banlo, naio berinavo “Makanio, kiniou nebinimei jukamu, nojom̃a nabaruei ea kamiu ka uei ga, mia be toro dolu tai napano naio jo binimei iorou ka kiniou. Toro nene, naio loa lie vo ka kiniou, mia kiniou maka navare ka neialar kanano kulubue na jaano, p̃eli nala kanano im̃auano dolu tai. Mia naio naruei, mia rivaruei ea kamiu ka Niununo Lu, rivija kanano sebi, ka risebi kon niamiamo nono den kenemiu meuliano nalo.
LUK 3:17 Naio jibe ka napano naio midukar burup̃ia m̃artea tai, ka mia rikurkar ka uiti nalo, rip̃ilig kon m̃arati nalo. Tibe na, ka mia naio rivar m̃arati uiti nabo nene ava vonuo, mia naio rivuku vinikiti nene rivan ea sebi tai napano mia maka rijikia rim̃aro bogo tai.”
LUK 3:18 Nina naruei, Jone Baruei naio jom̃a mioliolu ka ioluano vou nabo ban tomu nalo jibe na naruei, a naio jom̃a ber iliano dolu nabo telabo ka tunukakarlo, a ka rilabonlo.
LUK 3:19 Mia be toro tai naio tiniene maka saaro ka Jone nene leleio, nina be Parinio tubo Erot, bior ka napano Jone naio jom̃a mil banio ka napano naio burular tira nei Erotias, napano kuruano koano, mia mil banio bunu ka vite dolu telabo napano jom̃a milaio.
LUK 3:20 Mia loa ka kanano vovaiano dolu nalo, Erot tinien jer Jone banbano-o deio, ana jumolu buku naio ban ea yimo na lakoiano.
LUK 3:21 Mia bogo na Jone maka rivan ea yimo na lakoiano vo, naio jom̃a baruei ea tomu nalo banbano-o, mia bogo tai ana Yesu bunu binimei ea vio nene, ana na Jone baruei ea naio bunu. Naruei telikiti na Yesu jaluvo den uei, naio jom̃a bolkouo, ana vio mave betavo,
LUK 3:22 naruei Atua kanano Niununo midu niabene, naio batove binimei jibe ka vaama tai, binimei bujo jua naio. Ana na Atua mil jel mave batove berkanio, berinavo “Jau kobe keneriku na, nam̃a nejidomso toru laka. Tinieku joaso, tinieku jaaro toru kaso.”
LUK 3:23 Mia iorou ka na Jone baruei ea Yesu, ana na naio jikar kiano im̃auano naruei, ana ka bogo na, naio kiano yuka bokar duelimo va rolu. Mia yati na Yesu miyotuba eaio, nina tivelinio ka sum̃ano, jikar ea Yoseve, napano amial jibe ka naio be Yesu karam̃ano, naio jo ban jibe na: Yoseve, naio be Eli kenerinio
LUK 3:24 Eli naio be M̃atata kenerinio M̃atata naio be Livai kenerinio Livai naio be Melki kenerinio Melki naio be Janae kenerinio Janae naio be Yoseve kenerinio
LUK 3:25 Yoseve naio be M̃atateas kenerinio M̃atateas, naio be Amos kenerinio Amos, naio be Neam kenerinio Neam, naio be Esli kenerinio Esli, naio be Nagae kenerinio
LUK 3:26 Nagae, naio be M̃at kenerinio M̃at, naio be M̃atateas kenerinio M̃atateas, naio be Semein kenerinio Semein, naio be Yosek kenerinio Yosek, naio be Jota kenerinio
LUK 3:27 Jota, naio be Joanan kenerinio Joanan, naio be Resa kenerinio Resa, naio be Serupapele kenerinio Serupapele, naio be Sieltiel kenerinio Sieltiel, naio be Neri kenerinio
LUK 3:28 Neri, naio be Melki kenerinio Melki, naio be Adi kenerinio Adi, naio be Kosam kenerinio Kosam, naio be Elm̃atam kenerinio Elm̃atam, naio be Ere kenerinio
LUK 3:29 Ere, naio be Yosua kenerinio Yosua, naio be Eliesa kenerinio Eliesa, naio be Jorim kenerinio Jorim, nao be M̃atat kenerinio M̃atat, naio be Livai kenerinio
LUK 3:30 Livai, naio be Simion kenerinio Simion, naio be Yuta kenerinio Yuta, naio be Yoseve kenerinio Yoseve, naio be Jonam kenerinio Jonam, naio be Eliakim kenerinio
LUK 3:31 Eliakim, naio be Melea kenerinio Melea, naio be Mena kenerinio Mena, naio be M̃atata kenerinio M̃atata, naio be Netan kenerinio Netan, naio be Teviti kenerinio
LUK 3:32 Teviti, naio be Jese kenerinio Jese, naio be Ovete kenerinio Ovete, naio be Boasa kenerinio Boasa, naio be Sala kenerinio Sala, naio be Nesono kenerinio
LUK 3:33 Nesono, naio be Aminatapo kenerinio Aminatapo, naio be Atmin kenerinio Atmin, naio be Ani kenerinio Ani, naio be Esrono kenerinio Esrono, naio be Peres kenerinio Peres, naio be Yuta kenerinio
LUK 3:34 Yuta, naio be Yakovo kenerinio Yakovo, naio be Aisak kenerinio Aisak, naio be Epraamo kenerinio Epraamo, naio be Tera kenerinio Tera, naio be Nao kenerinio
LUK 3:35 Nao, naio be Seruk kenerinio Seruk, naio be Reu kenerinio Reu, naio be Pelek kenerinio Pelek, naio be Epa kenerinio Epa, naio be Sela kenerinio
LUK 3:36 Sela, naio be Kaenan kenerinio Kaenan, naio be Avaksati, kenerinio Avaksati, naio be Sem kenerinio Sem, naio be Noa kenerinio Noa, naio be Lamek kenerinio
LUK 3:37 Lamek, naio be Metusela kenerinio Metusela, naio be Inok kenerinio Inok, naio be Jarete kenerinio Jarete, naio be M̃alalel kenerinio M̃alalel, naio be Kaenan kenerinio
LUK 3:38 Kaenan, naio be Enos kenerinio Enos, naio be Sete kenerinio Sete, naio be Atam kenerinio ana Atam, naio be Atua kenerinio.
LUK 4:1 Naruei telikiti na Yesu naio binimei bereio ea tanobuku na marauei na Yortano ea vio na Jone baruei ea naio, naio binimei bujo vatitig ka Niununo Lu. Ana na Niununo buru Yesu ban ea vio yauo bereio,
LUK 4:2 mo naio joa vio na bano-o bokar bogoti duelimo va veri [40], napano mia sim̃aro nalo kanalo parinio tubo nei jom̃a milalilio. A ka bogoti nalo na, naio maka m̃a to sinano, banbano-o na mijog ka jijer naio.
LUK 4:3 Ana Setano nene binimei, berinavo “Ver jau kobe Atua kenerinio riano, jau kover von ka puruveru na ka rimei rive joko, ka kosenio.”
LUK 4:4 Ana Yesu berdop̃e, berinavo “Maka leleio, bior Iliano Lu naio ber ruei, berinavo ‘Maka toro rijikia rila toro rimeul ea sinaniano ga.’ ”
LUK 4:5 Ana na Setano jidom rilavon Yesu bereio, naruei naio buru kanano jidomiano bavin ea burum̃ara burusuku tai. Ana vaarakurano ga naio jiloglog buruvenuo nalo na yetemeriba nei kanio,
LUK 4:6 ana naio berkanio, berinavo “Navitikariano na vio nalo na, bija kialo mermerano nonovio nalo na, ajua jum̃aku ruei. Kiniou nabar siano kario, ka namijikia najamo ka van kei napano tinieku ka naio.
LUK 4:7 Mo, ver jau kojorua jaaku ga, kobolkouo ka kiniou ga, mia kiniou najamo ka vite nalo na riviniu tua jum̃amo.”
LUK 4:8 Mia Yesu berdop̃e, naio berenio berinavo “Iliano Lu naio berenio ber ‘Jau kobolkouo ka Atua ga, jau monoka kala kanano im̃auano naio ve takurano ga, bior naio ga be kanamo Tubo.’ ”
LUK 4:9 Naruei Setano naio jidom rila-von Yesu bereio, naio buru kiano jidomiano ba Yerusalemo, midu naio jo levlevi ea vio tai, mave ea Atua kunuano, ana berkanio, berinavo “Ver jau kobe Atua Kenerinio, koviako yetano. Ver jau kalaio, mia rivu ga na,
LUK 4:10 bior Iliano Lu berii Atua, berinavo ‘Naio mia riila kiano nailiano nalo, ka mia amei atu avitiikarso, atukuku kaso.
LUK 4:11 Mia aisopkarso mave ga ka jum̃alo ka mia kavan re jaamo ea puruveru.’ ”
LUK 4:12 Mia Yesu berdop̃e naio bereio, berinavo “Maka leleio, bior Iliano Lu ber bunu ber ‘!Jau kolavon re Tubo kiamo Atua ka naio rila kanamo vite tai!’ ”
LUK 4:13 Mia telikiti na Setano mila juboluboiano nalo nei bisi, ana buro denio, ba jo rorea ka rileal bogo dolu tai napano naio jidom ber mia mijikia tovulu Yesu eaio.
LUK 4:14 Karina, Yesu miel ea moroano na Niununo Lu, binimei boru Kalele, mia tomu nalo ajum̃a aberii naio banbano-o ba bokar vio nonovio ea tanobuku nei.
LUK 4:15 Ana naio jom̃a ban ea kanalo yimo nalo na volkouano, naio jom̃a berlogloglo, naruei nalo ajaaro toru kanio, ajum̃a amidular siano bavin.
LUK 4:16 Bogo tai Yesu binimei boru ea kiano vio Nasarete, vio napano naio miluo binimei toru eaio, ana ka Legiano Lu, javukia nam̃a naio jom̃a mila bogo nonovio, naio ban bijalo ea kanalo yimo na volkouano. Ana aber naio rivuluku bulag Atua kanano Iliano Lu vanlo, ana na amidu niosi nam̃a Aisea naio bivitauia binimei banio. Ana naio jumolu betavo ea niosi nene, mileal vio na naio jidom rivuluku bulag vanlo, ana naio bulukuio, napano naio ber jibe nei, berinavo
LUK 4:18 “Niununo na Atua kanano naio joa kiniou ruei, bior Atua naio jiloglog kiniou ka kiniou naruei noioliolu ka Ioluano vou nabo rivan talim̃asa nalo. Naio miila kiniou nebinimei ka neverial van nalo na ajua lakoiano, ka vonganei, amijikia avanvan tavio bereio ga tibe na, a ka kiniou neverial ka merebono nalo, ka vonganei, miralo mijikia rimei rivu bereio. A naio miila kiniou, ka tomu nalo nam̃a ajutano, napano kulo dolu nalo ajum̃a amila kikilo julaka, mia kiniou novuru bulaglo, amei atua vio tai nabo bereio.
LUK 4:19 Tenene na, kiniou nemijikia nala rimeravo, ka vonganei, Atua mila kanano bogo vou nabo tai miyotuba ka tomu nalo nene naruei.”
LUK 4:20 Telikiti na Yesu buluku nina bisi, ana na mijukukarko niosi nene, jian ber ban tikon, ana naio ba jotano mave ea jeleigio vio nam̃a amioliolu eaio, ka naio ril van tomu nalo. Naruei nalo abiniu napano aju joomo aju abiti kilkil ea Yesu ka ajog ka venia napano mia naio river kalo.
LUK 4:21 Mia bogo napano naio jikar kiano iliano, naio ber jibe nei, berinavo “Kiniou neber ka kamiu, ka Atua kiano Iliano Lu na kumijogio vonganei, iliano nalo nei kanano abinimei be riano bo vonganei ga, ea miremiu.”
LUK 4:22 Mia telikiti na tomu nalo amijog Yesu kiano iliano nalo nei, amijog jibe ka naio mil bo mia bo, melokloko a m̃adigdig, mia nalo abameneaio toru, ajum̃a aberverenio jibe nei, aberinavo “!Ana kema na, naio be Yoseve kenerinio ga na! ?Mia naio jom̃a bar tanea iliano novo nalo na ea vio be?”
LUK 4:23 Ana na Yesu berdop̃elo, berinavo “P̃eli kumisidom kuver kanado iliano moruo tai ka kiniou, napano ber ‘Nakulekuleano, jau kala vatitigso beamu vo, karina jau komijikia kajai tomu dolu.’ Nina bior kamiu kumijog ruei ka bogo napano nojo yako Kapeneam, nojom̃a namieliel ka tomu telabo, tenene na kumitu kumisidomii kuber bior vaio ana maka nemei nala tena van kamiu ea kanado vio nei bunu.
LUK 4:24 Be riano never ka kamiu, ka ver naverialiano tai, mia tomu na kanano vio memedu, maka ajikia asaaro kanio, maka ajikia avatove kanio.
LUK 4:25 Nina be riano ga. Nejidom ka kamiu kuvisidomii von tormoruo Elaija re nua. Ka bogo na, yuo maka rivovo bano-o bokar yuka tolu togio, a burum̃ara vituiano tai jovuko rera vio Israel. ?Ana Atua miila Elaija ba miija kei ka bogo na? Kam kuvialio, naio maka riila naio rivan ka riija taanou re Israel tai nam̃a aju amijog bova, mia naio miila ba miija taanou na bulukomeli na vio Serevati, nina ea tanobuku dolu na vio Saiton.
LUK 4:27 A kuvisidomii von tormoruo Elisa kiano bogo bunu. ?Ka bogo na, tomu miroano na abar burumieni, mia Atua milarur kei? Naio maka rilarur nalo na Israel tai na bokar mieiano nei, mia naio milarur toro re Siria nei, Nomano. Be riano, kito tomu nalo nam̃a roju rober kito robe Atua kiano tomu nalo memedu, mia nalo nam̃a Atua miilalo abinimei ka ala im̃auano van kito, mia kito romielikue kalo ga.”
LUK 4:28 Ana na nalo napano aju joomo ea yimo na volkouano nei amijog iliano nei, kialo jidomiano bilig ba be dolu, vonganei nalo tiniel jer Yesu toru.
LUK 4:29 Naruei nalo ajerm̃i ka Yesu, ana aburio bano, aburu ba tavio ka kanalo komeli, ana aburu naio ba abavin ea burum̃ara yabalili tai napano kanalo komeli joaio ka ajidom avuku Yesu rivatove ea vio na naruei.
LUK 4:30 Mia Yesu jaluvo den jum̃alo bea ga, ana naio miel jel burelo ga bano, naio juvanlo ajubo.
LUK 4:31 Ana na Yesu miel batove bokar komeli dolu tai na vio Kalele, nina be Kapeneam, mia ka Legiano Lu berlogloglo ea kanalo yimo na volkouano.
LUK 4:32 Mia nalo nam̃a amije tilinielo amiilo toru laka, bior amijog Yesu kanano iliano temi bo, a Atua kanano moroano joaio.
LUK 4:33 Ana ka bogo na, toro tai jo joomo naliko, napano niununo na sim̃aro va tai joa mila bulag naio, mia toro nene miaga m̃erere kirivova tai vo, naio mil ban Yesu, berinavo
LUK 4:34 “?Ei, Yesu re Nasarete, kiamo vaio joa kumemi? !P̃eli jau kobinimei ka kalakiki kumemi, a! Bior nemijikiaso ruei, ka kobe Toru Lu nabo tai na Atua kanano.”
LUK 4:35 Ana Yesu mil jikili ban niadu va nene, berbureio, berinavo “!Ee, abe keil re bunu! Jau kataluvo den toro na vonganei ga.” Ana niununo va nei buku toro nei mijoru iviso burelo, ana na naio jaluvo denio, buro bano, mia toro nei mijog bo bereio jo.
LUK 4:36 Naruei tomu na vio nei amiilo toru laka, mia nalo ajum̃a aberverii Yesu, aber “Ei, iliano na jum̃abe tenia na? Nina be buruvayukouo tenia, kiano moroano buru tomoruo loa laka. Naio mil ga ban niununo va nalo, mia aburovuro jibe na ga.”
LUK 4:37 Ana bior tena mia nalo ajaaro, ajum̃a aberial vatitig Yesu siano ba janea vio bokar vio nonovio na tanobuku nei.
LUK 4:38 Ana Yesu jumolu den yimo na volkouano nei, mia naio ban ea Saimon kunuano, nina ea komeli na Kapeneam kia ga vo. Naruei ea vonuo nei, Saimon kenieno simemi naio jo mon ea m̃ano jogu, mie yulu, niabene bituvitunu, mia aberial ka Yesu, abika den naio aber jum̃abe ka tiramoruo nei.
LUK 4:39 Naruei Yesu binimei jikili ju tivelinio ka tira neibano, ana mo naio mil berbure mieiano nei, ana niabene binimei menini nonovio bereio, naio mijog bo bereio, ana jumolu, ba milaii salo sinaniano.
LUK 4:40 Mia bogo nam̃a m̃erenio batove, jibe ka na Legiano Lu na bisi, ana nalo nam̃a nalo tealo amie ajum̃a, abarvarlo abinimei ban Yesu, ana naio mije jum̃ano monealo, mieliel kalo.
LUK 4:41 A telabo kalo, sim̃aro nalo abava tavio denlo, napano ajum̃a amiaga, aberinavo “!Ei, jau naruei jau kobe Atua kenerinio a!” Mia Yesu berbure sim̃aro nalo nei ka mia aver re bunu titai leleio, bior amijikia ruei ka naio be Naverikariano riano.
LUK 4:42 Mia kavijova kia ga vo, ana Yesu jumolu ana naio takurano batavio den yimo, ban ea vio tai napano be tum̃aro bo. Kar iorou, ana tomu nalo abinimei kanio, ajirag naio bano-o mia amileal naio joa vio nei naruei, ana ajidom naio to naliko, amila vio ka averbure naio ka tuvanlo re,
LUK 4:43 mia naio ber kalo, berinavo “Makanio, monoka kiniou nava noioliolu ka Ioluano vou nabo na navenatuboiano na Atua kanano nei van komeli dolu nalo na aju keano vo, bior amiila kiniou nebinimei ka vite nei naruei.”
LUK 4:44 Ana naio jaluvo denlo, ba mioliolu janea yimo na volkouano nalo ea komeli nonovio na tanobuku nei Yutea.
LUK 5:1 Bogo tai, ana Yesu joa yaba ueiyabo na toru nei, nam̃a tomu tealo ajum̃a abio ka Ueiyabo na Kenasarete, a tealo abio ka Ueiyabo na Kalele. Ana ka bogo na, tomu nalo miroano laka ajumolu aju jelviviko Yesu, jibe ka vio telisu ga, bior ajidom ajog naio rioliolu ka Atua kiano iliano rivanlo.
LUK 5:2 Mia Yesu mial ka uako sesa juo aju ga vaataro kalo yako, napano aburulo abavauro ajua baramudou ea bayono, a naio mial ka napano tomu nene nalo ajudobi ea tei, ajum̃a ajekon kanalo sup̃ede.
LUK 5:3 Mia Yesu miel bano-o biako ea uako sesa nei tinene, napano be Saimon kanano, ana naio berkanio ber naio riyuku lario rivajou lie kija ga. Naruei Yesu jotano ea uako sesa nei, ana naio jom̃a berloglog nalo napano m̃a aju bijilo uro.
LUK 5:4 Mia bogo na naio mil banlo-o avona bisi, ana naio ber ka Saimon, berinavo “Kito, kiniou nejidom ravajou lie kija koyou von ka rovuku sup̃ede beamu vo.”
LUK 5:5 Ana Saimon berdop̃e, berinavo “E abe toro na toru, kumemi numisidel ka tena ruei o-o viomijeni nei, maka nuvokar niado tai leleio. Mia bior jau naruei kober ka kiniou jibe na, bo, kiniou najaaro ka rava lie kija bere vo.”
LUK 5:6 Ana nalo aba amila jakiio napano Yesu berenio, mia amiilo ka burum̃ara taara na niado napano bujo ea kialo sup̃ede, mila kanalo sup̃ede jikar ka buruboṽeio,
LUK 5:7 naruei abio nalo dolu nalo na ajua uako sesa dolu, ajuvanjum̃alo kalo ka amei aijalo. Ana nalo nei abinimei, ana aburu bitiran sup̃ede ka niado nalo nei binimei joomo ea buluku uako, bano-o uako juo nei abujovujo vatitigio, vaataro ka m̃a amadudu.
LUK 5:8 Mia Saimon Pitere mial tenei, naio bitilubar ka Yesu ga mila tenei ea kiano burum̃ara moroano lu nei, ana minie tano ea Yesu jaano, berinavo “Tubo, kiniou nobe toro na bova ga tai. Bo laka ka kovuro den kiniou, jau kotu re vaataro ka kiniou.”
LUK 5:9 Mia maka naio ga ve takurano, mia nalo dolu napano aju naliko ka aura nei, nalo abiniu abameneaio toru laka ka burum̃ara tiniobi na niado na abokarlo,
LUK 5:10 bija bunu Sepeti kenerinio juo nei, Yemesi naio Jone, napano naljuo amiasol Saimon amim̃au vio takurano, naljuo amiilo toru kanio. Ana na Yesu mil ba Saimon, naio berinavo “Ei, jau komerou re ka vite na tibe na. Bior tikar banei, mia jau kovuru bere re niado, mia jau kotom̃a kovuru tomu nalo amei atakisor kiniou.”
LUK 5:11 Ana nalo abinimei bereio, aburu kialo uako nalo nene abauro bereio, mia maka bunu ala titai, mia ajuvan kialo saba nalo biniu ju bo ga jibe na, ana ajakisor Yesu abano.
LUK 5:12 Ana iorou kanio, ea bogo tai, ana Yesu joa komeli na vio na tai, ana toro tai mialio, binimei ka naio, napano toro nene, mieiano na burumieni mila tanea niabene-e mia mila bulagio laka. Naruei naio binimei mijoru ea Yesu jaano, jegi banio, bika jikili denio berinavo “!Tubo! Kiniou nomoneaso jikili ka jau komijikia kalarur kiniou bereio, mia ver jau komijamo, kiniou nejidom nevikaso ka jau kalakon kiniou ga.”
LUK 5:13 Mia Yesu maka rienien ka tokol kiano menko nene, mia midu jum̃ano joaio, naio berinavo “Nao, kiniou nejidom komeravo.” Mia vaarakurano ga niabene meravo, burumieni nei m̃apm̃apvo denio.
LUK 5:14 Ana na Yesu berkanio, berinavo “Komijog, jau kava koverii re tenei ka toro tai vo, mia vonganei ga jau kejaka kava kesel ea toro lu ka naio riia veveso mia mijikia riverial niabemo meravo ruei. Karina monoka kava kolotu van Atua a keisebi sida na kanamo lakoniano, tavukia nam̃a Mosis naio ber monoka alaio.”
LUK 5:15 Yesu naio ber toro nei naio riva riverii re vite nei, ana deio ga, maka vesiou ana ajum̃a aberverii Yesu banbano-o, ba bokar vio reraio biniu, mila ana tiniobi na toru aju abinimei ka ajog kiano iliano nalo, a ajidom ka rilarur kialo mieiano nalo.
LUK 5:16 Mia ka bogo nalo nene, Yesu jom̃a miel batavio ea tomu nalo bunu, naio jom̃a janea vio yauo, bolkouo ban Atua.
LUK 5:17 Mia ka bogo tai, ana Yesu jom̃a berlogloglo, mia Varisis tai naliko naverloglogiano na tuboiano ajum̃a ajutano ea vio nei, napano nalo abe nalo na komeli dolu nalo na tanobuku na Kalele bija Yutea, a tealo ajuvan vio Yerusalemo abinimei. Ana ka bogo na, Atua kiano moroano jo binimei toru nonovio ea Yesu, mila ana naio mijikia milarur tomu na mieiano nalo.
LUK 5:18 Ana tom tai ap̃ier toro na mieiano tai binimei, napano niabene biniu m̃aro, mia nalo ap̃ier binimei, naio mon ea ga m̃ano jogu. Ajidom adu naio riva joomo rimon vaataro ka Yesu,
LUK 5:19 mia amial tiniobi toru jo joomo ruei, mia vio nene telisu laka, maka ajikia adu kialo bilbilu rivano. Naruei amidu naio abavin ea yimo, ana amijag bulag vodobi mave memedu ka vio na Yesu jotano loglogio, ana ajuvarvan toro nei bija m̃ano jogu batove ea buluvio nene ba jotano iviso ka tomu nalo, kamu kean Yesu mirano memedu.
LUK 5:20 Mia bogo na Yesu mial vite nei, mijikia ka nalo aju abiekouo kilkilii ea naio ka mia naio rijai toro na mieiano nei, ana naio berkanio berinavo “Koig, kiniou nebiekokoaso ka kiamo vovaiano nalo.”
LUK 5:21 Mia bogo napano Varisis nalo bija naverloglogiano na tuboiano nalo amijog iliano nei, aju ajidomii kirivova-o mia, naruei nalo ajum̃a abivika denlo, aberinavo “?Kei tenia m̃a jo mil niegeniege tolu na Atua siano jibe na? Atua ga takurano naio mijikia riviekokoa kariano, maka toro dolu bereio, mia tete na naio jom̃a mil jibe na ka jo jidom ber naio naruei, naio be Atua ruei kovio.”
LUK 5:22 Mia Yesu mijoglubar ea naio ka ajum̃a ajidomii kirivova jibe na ka naio, ana ber kalo, berinavo “?Kar venia ana tiniemiu nalo bujo ka jidomiano na kirivova jibe na?
LUK 5:23 Ver never ka toro na mieiano nei, neverinavo ‘Kiniou nebiekokoaso ka kanamo kariano,’ p̃eli kiniou never kanio neverinavo ‘Jau kotumolu, keiel,’ ana ea iliano juo nei, tinene jikili ka averenio, a tinene naio monmaio ga. Nana berenio ‘Jau kotumolu, keiel’ naio jikili lie, bior mia kamiu kumijikia kuvitilubar ka kanaku iliano nei naio be riano p̃eli na makanio, ka napano toro nei naio jumolu p̃eli maka tumolu.
LUK 5:24 Mia vonganei, kiniou noim̃au ka titai na mia kamiu kuveriam̃a Atua ga takurano mijikia rilaio, kanio mia kamiu kuvitilubar ka kiniou Kulorinio Kenerinio nemijev moroano. A kiniou neber ka kamiu, neberinavo moroano nene naruei naio bare ka kiniou nemijikia neviekokoa kariano bunu ea yetemeriba nei. Kamiu kuviagago vatitigio.” Ana Yesu ber ka namieiano nei, naio berinavo “Kiniou neber kaso, ka jau kotumolu, kojukular m̃amo jogu, jau keiel kava vonuo.”
LUK 5:25 Mo sop̃eli ga, ea mirano tomu nalo na aju amialio, toro nei naio jumolu jibe na, midu m̃ano jogu miel batavio, ana ba vonuo napano naio miaia Atua ga naio jo bano.
LUK 5:26 Mia bogo na tiniobi nei amial vite nei, abamenea naio toru riano, kuluniabelo p̃ili burevure biorio, a nalo ajum̃a amiaia Atua, ajum̃a aberinavo “!Uerei tom nei, riano ga, banei romial titai napano dolu laka!”
LUK 5:27 Iorou kanio, ana Yesu miel kiki kija ga bano, naruei naio mial toro tai jom̃a jotano ea kiano vio na totanian na imauiano, joomo ea vio na m̃a barbijii veru na takis eaio. Toro nene siano tai Livai. Ana Yesu bio naio, berinavo “Jau komei katakisor kiniou.”
LUK 5:28 Mia sop̃eli ga Livai jumolu, juvan kiano im̃auano, juvan kiano saba nonovio ju bo ga jibe na, naruei jakisor Yesu.
LUK 5:29 Karina, Livai nene mim̃auka Yesu sano burum̃ara sinaniano tai ea kunuano, mia ka bogo na, tomu telabo dolu nalo nam̃a abarbijii takis bija tomu dolu nalo na jibe na, nalo bunu abinimei ajutano vio takurano naliko Yesu a kiano naiagagoano nalo ea sinaniano nene.
LUK 5:30 Mia Varisis tealo, naliko kialo naverloglogiano na tuboiano tealo, amil niege naiagagoano nalo, aberinavo “?Bior vaio ana kumitum̃a kumisinan burukuti kamliko tomu na bova a tom na pariparilo kiri merorol na?”
LUK 5:31 Mia Yesu naruei naio berdop̃elo, berinavo “Tomu na niabele jikili bo, maka m̃a tiniel tii ka m̃a avan ea toro nam̃a mim̃auka mieiano, mia tomu nam̃a amijogjog mieiano, nalo naruei ajidom naio toru.
LUK 5:32 Kiniou maka nemei ka novio nalo na ajum̃a aber amemedu ruei kamu ea Atua mirano ka atakisor kiniou, mia kiniou nebinimei bior tomu na bova jibe ka nalo na naruei, ka aviliglo rivior kialo vovaiano nalo.”
LUK 5:33 Naruei nalo abika vikadeniano tai den Yesu, nalo aberinavo “Jone Baruei kanano naiagagoano nalo ajum̃a abokar jikili bajago nam̃a vatelabo, ajum̃a ajuvan sinaniano kam̃a abolkouo ban Atua, a Varisis nalo bunu ajum̃a amilala jibe na. ?Mia bior vaio ana kanamo naiagagoano nalo maka atum̃a alalaio?”
LUK 5:34 Ana Yesu berdop̃elo, berii naio bija kiano naiagagoano nalo, jibe ka napano amijog bo laka ka bogo na naio jo naliko, ana mia ajog rivova iorou ka bogo na ver naio taluvo denlo. Naio berinavo “?Bogo na toro na soriano naio jo kean ea jokoluolu naliko kiano bilbilu nalo, kuberiam̃a mia amijikia atuvan sinaniano na jokoluolu nei to, asenio re? P̃eli ga.
LUK 5:35 Mia ve bogo tai rimei napano mia avurular toro na soriano nei denlo, mia ka bogo na naruei mia nalo amijikia atuvan sinaniano bior amijog bova toru kanio.”
LUK 5:36 Bajago nam̃a ajuvan sinaniano na, naio be bajago moruo tai na kulo Ju nalo kanalo lotuano, mia Yesu jidom rila rimeravo vanlo ka bajago moruo nalo na jibe na, maka ajikia atusol vite vou nalo nam̃a naio jom̃a berloglog kalo. Ana naio beri jamerijiano tai kalo. Naio berinavo “Jau maka kejikia kavar niati kulum̃arauo tai na be terivou, kejedep̃e lario niati nene tai, ana jau kotuluko ka kulum̃arauo na be terimoruo ka toko vio na burup̃e be bulukuti eaio. Ver tibe na, jau komijedelar kule ga niakulm̃arauo vou nene kurano ga, a niati nene, mia keial ve kirivova-o mia.
LUK 5:37 A jau maka kejikia koison m̃arjum̃elm̃elu vou napano jom̃a jarabujo kia ga vo rivan ea kulukuti nani napano be terimoruo nam̃a amison m̃arjum̃elm̃elu vatelabo ban ea ruei. Ver jau kala tibe na, mia m̃arjum̃elm̃elu vou nei riyukuio, mia rila kulukuti nei saburu, ana mia m̃arjum̃elm̃elu nene riiou kule ga na, mia bati nene bunu rimei rivova.
LUK 5:38 Mia m̃arjum̃elm̃elu vou, monoka jau koison rivan ea kulukuti nani na be terivou bunu, na jikili bo, naruei komijikia kodu vatitigio m̃amo m̃arjum̃elm̃elu to rivu eaio.
LUK 5:39 A bunu, bogo nam̃a tomu nalo ajum̃a amunu m̃arjum̃elm̃elu na amim̃auka jiou kija ruei, mia asaaro re bunu ka amunu m̃arjum̃elm̃elu vou napano amim̃auka vonganei ga, mia monoka averenio m̃arjum̃elm̃elu moruo nei naio jesei kiano vo.”
LUK 6:1 Naruei ka legiano tai bereio, napano naio be Legiano Lu, Yesu naliko kiano naiagagoano nalo ajum̃a amiel abano, mia kanalo m̃arabo naio ba jel bure tiniavio na kon. Amiel jibe na naruei, mia naiagagoano nalo jijerlo naruei ana nalo ajavo bulag m̃arati tealo abal kon avona bisi ajenio.
LUK 6:2 Ajum̃a amila jibe na, mia Varisis nalo tai ajua vio na ka bogo nene, napano aju amial Yesu nalo, naruei nalo aberinavo “!Ai, bior vaio kumitu kumila im̃auano na ea Legiano Lu jibe na? Jibe na, kamiu kumitu kumilakorov kanado tuboiano ga na.”
LUK 6:3 Ana na Yesu berdop̃elo, naio berinavo “?Ii, p̃eli jibe na kovio, ana kamiu maka kuvuluku ea Iliano Lu bogo tai vo, ka vite nalo nam̃a Parinio tubo Teviti re nua jom̃a milaio? !Kamiu kumijikia ruei tena! Naio naliko kiano tomu nalo jijerlo toru laka,
LUK 6:4 naruei naio ba joomo ea Atua kiano Yimo Lu, mia midu joko lu nam̃a tuboiano berenio kulo lu ga nalo amijikia asenio, mia Teviti nalo ajenio.”
LUK 6:5 Ana Yesu ber kalo, naio berinavo “Kiniou Kulorinio Kenerinio, kiniou naruei nebe Tubo ka Legiano Lu, mia nemijikia neverenio venia na memedu ka mia alaio ea Legiano Lu, p̃eli na venia na maka rimemedu ka mia alaio re ea Legiano Lu.”
LUK 6:6 Ana ea Legiano Lu dolu bereio, Yesu ba ba joomo bereio ea yimo na volkouano, mia naio berlogloglo. Mia ka bogo na be toro tai bunu jo joomo napano jum̃ano tivelinio vameruo be jumevuluku.
LUK 6:7 Naruei naverloglogiano na tuboiano nalo bija Varisis nalo, napano tiniel jer Yesu ruei, aju vaataro ka naio ka bogo nei. Nalo ajum̃a abitikuku vatitig bo ka naio ka alavon ka aleal bajago na bova tai eaio, jibe na naruei ajidom aial ka mia rieliel ka jumevuluku ea kialo Legiano Lu nei p̃eli na mia rila re.
LUK 6:8 Mia Yesu mijikia batitig bo ruei venia napano jo joomo ea kialo jidomiano nalo, naruei naio mil ban kema neibano, naio berinavo “Jau kotumolu, komei, kotu mave ea vio nei beamu vo,” naruei toro neibano jumolu bano.
LUK 6:9 Ana na Yesu bika den nalo neibano aju nei, naio berinavo “?Kiado tuboiano ber kito romijikia rala venia ka Legiano Lu nalo? ?Naio berenio bo ka kito rala tena bo p̃eli na bo ka rala tena bova? ?Naio ber bo kanio kito ralarur kulorinio, p̃eli na bo kanio rouebin toro rim̃aro?”
LUK 6:10 Ana Yesu barp̃ilig, naio bitiilo abiniu jeliviv, avona bisi ana na naio ber ka toro neibano bereio, berinavo “Jau kovitirii jum̃amo vonio.” Mia monloglog bogo neibano ga toro nei naio mila jibe na, mia jum̃ano binimei bo vatitigio bereio.
LUK 6:11 Mia Varisis nalo tinielo kiri mimi, bano-o m̃a tinielo bitunu mia bitunu vatitigio laka, naruei nalo abava tavio aber vonvon ka mia ala tum̃abe ka Yesu.
LUK 6:12 Ana iorou ka bogo dolu bereio, Yesu jaluvo denlo ban ea burusuku na toru tai ka tom̃a rivolkouo van Atua, naruei naio jo mila jibe na ea vio nene bano mia viomijeni konio garuei.
LUK 6:13 Ana kavijo nene naio binimei bere, bio kiano naiagagoano nalo abinimei vio takurano ea naio, mia ea nalo nei naio berial nalo duelimo ba juo, napano bitiri bulaglo, berenio nalo nene naruei nalo abe atevi.
LUK 6:14 Mia duelimo ba juo neibano, sialo nalo ajibe nei: Saimon napano Yesu midu sio dolu ban ber Pitere, a Andru, na naio kuruano, a Yemesi, a kuruano Jone, a Vilip, a Bartolomio
LUK 6:15 a Mataiu, a Tomas, a Yemesi, napano Alveas kenerinio, a Saimon, nanua m̃a mila poletik, jidom ka rijil bulag kulo Romo, a Jutas, na Yemesi kenerinio,
LUK 6:16 a Jutas re Kariot, napano karina naio jiveluku ka Yesu.
LUK 6:17 Mia Yesu buru atevi nalo neibano abatove bereio, ana amileal vio vodobi tai, ana aba ajuaio. Ana ka bogo na, vio bujo ka Yesu kiano naiagagoano nalo miroano dolu nalo bunu, naliko burum̃ara tiniobi nalo na komeli dolu na vio Yutea, a kulo Yerusalemo bunu bija bunu tomu na vio Taia a tom na vio Saiton napano ajumormolu den kialo vio rove yako ea tei na toru abinimei.
LUK 6:18 Nalo nei abinimei ka ajidom ajog Yesu kiano iliano nalo, a bunu ajidom ka naio rieliel ka kialo namieiano nalo. Naruei Yesu milaiilo jibe na bano-o, ba bokar bunu tomu nam̃a niadu jualo m̃a mila lelanlo vururu.
LUK 6:19 Tomu nalo miroano laka, mia abiniu ga ajidom atokol Yesu, ka avokar kija burum̃ara moroano nam̃a amial jom̃a miyotuba ea naio, napano m̃a jo mila batitig tomu nalo miroano ruei.
LUK 6:20 Ana na Yesu jom̃a bitii kiano naiagagoano nalo nene, karina naio berlogloglo, naio berinavo: “Kamiu nam̃a kubitilubar ka m̃a kube talim̃asa, ilivuiano toa kamiu, bior kamiu naruei, Atua naio be Parinio Tubo ka kamiu, mia naio vitikar kamiu.”
LUK 6:21 “Kamiu nam̃a jijer kamiu vonganei, ilivuiano toa kamiu, mia kamiu kuvijog ka kamiu kubinimei kuvujo vatitig ka vite novo nalo. Kamiu nam̃a kamiu kumitum̃a kumiteg vonganei, ilivuiano toa kamiu, mia kamiu kumijikia kuvisaaro.”
LUK 6:22 “Kamiu nam̃a tomu nalo maka asaaro ka kamiu, a napano m̃a maka asidom kamiu, a napano m̃a amil niegeniege lelan kamiu, a napano m̃a abuku bulag siemiu nalo aberinavo kamiu tomu na kirivova ga, nina bior kamiu kube kiniou Kulorinio Kenerinio kanaku tomu nalo, ilivuiano toa kamiu bunu.”
LUK 6:23 “Ka bogo nalo na jibe na, kamiu kuvisidom bijovijon re, mia kuvitatabujo vija saariano, bior ajum̃a amila lelan kamiu ea ga bajago na nanua m̃a korobilo nalo amilaio ban naverialiano nalo re nua. Mia naio bo ga, mia kamiu kuvijev burum̃ara ijaiano nene ea vio mave.”
LUK 6:24 “Mia kamiu tomu na sanibaiano mia rivova ve toru laka van kamiu, bior kamiu kubar kenemiu jogvuiano a kenemiu saariano na kenemiu meuliano nabo na ruei ea yetemeriba nei.”
LUK 6:25 “Mia kamiu nam̃a mabomiu bujo batitig ruei jo, mia ve kirivova laka rivan kamiu, bior mia siser tanea kamiu ve toru laka. A kamiu napano kumitum̃a kubital banei kia ga vo, mia rivova laka rivan kamiu, bior mia kamiu kuvijog rivova ve toru laka mia kuviteg ve toru.”
LUK 6:26 “Mia kamiu monoka kuvitikar vatitig bogo napano tomu nalo aju amiaia siemiu. Verver tibe na, maka rivu ka kamiu bunu kuvisidomii kuver kubo, bior napano naverialiano sibisibiano re nua, kiado tormoruo nalo, ajum̃a amiaia sialo, mia Atua bitiilo abova ga, naruei naio mije vironiano banlo.”
LUK 6:27 Ana na Yesu berenio, berinavo “Kamiu nam̃a kumijoglubarbar kanaku iliano, kiniou neber ka kamiu, neber: Monoka kito rosidom kanado uolu nalo, a monoka rovijuku rivu ka nalo nam̃a maka asidomii kito,
LUK 6:28 a monoka reilivu ka nalo nam̃a amiolua kito, a monoka robolkouo kalo nam̃a ajum̃a amila kiki kito.
LUK 6:29 Verenio toro tai rujuba kulbibimo tivelinio, monoka jau kovilig kulbibimo tivelinio vanio ka rijikia rijuba bunu, mia verenio toro tai sikili ka rivar m̃amo koti, mia kasaaro ga ka kajamo ka m̃amo soto bunu van naio rivario.
LUK 6:30 Mia ver toro tai rivika kiamo titai, monoka jau kajamo ka rivanio, a ver toro tai rudular kanamo titai, mia jau kovika re bunu ka rudu merano bere rivanso.
LUK 6:31 Bajago na vabe nam̃a jau kojidom ka tomu nalo ala vanso, bajago nene naruei monoka jau kala rivanlo.
LUK 6:32 “Mia ver kito rotum̃a tiniedo riia ga nalo na ga m̃a ajidom kito, nina maka ve titenia, bior tomu na kariano nalo tiniel jii tomu nalo nam̃a aju ajidomlo mugaruei.
LUK 6:33 P̃eli na ver rotum̃a rovijuku rivu ka ga nalo nam̃a abijuku bo mugaruei ka kito, naio bunu maka rive titenia, bior tomu na kariano nalo, nalo bunu ajum̃a amila jibe na mugaruei.
LUK 6:34 P̃eli na ver rotum̃a rajamo ka veru van nalo na ga amijikia avar meran bereio, naio bunu maka ve titenia, bior tomu na kariano nalo, nalo bunu ajum̃a amilala jibe na mugaruei.
LUK 6:35 “Mia kiniou neber ka kamiu, neberinavo: Monoka tiniemotii kanamo uolu, a mia kovijuku rivu kanio, a mia kajamo ka kanamo veru tibe na ga, napano kosidom bijovijon re ka na naio bario, ka mia naio mijikia rivar kean bogo tai, p̃eli na mia naio rivar kean lele re bunu. Mia ver jau kotom̃a kalala tibe na, kojom̃a kabar bajago na karam̃ado, Toro na Loa laka, mia naio sian kanamo ijaiano tai na mia ve toru lie vo, bior naio be toro tai napano kiano iviso bo ga ka nalo na maka atu aver siva vanio, p̃eli na nalo na ajum̃a ajidomial nalo ga bereio.
LUK 6:36 Ver tibe na, jau monoka tiniem riia tomu nalo tavukia nam̃a karam̃ado tinien miialo.”
LUK 6:37 Mia Yesu mil kia ga banlo vo, naio berinavo “Mia kamiu monoka kuvitu re m̃a kuvitibure m̃elea toro dolu p̃eli na kuvijev vironiano vanio. Aver tibe na, mia Atua tibure laka re kamiu tibena, mia naio rije re vironiano van kamiu. Ver kuviekokoa toro dolu, mia Atua riviekokoa kamiu,
LUK 6:38 mia ver kuvisian titai van toro dolu, mia Atua sian vite rimei van kamiu. Mia Atua sian vite van kamiu ve toru loa nana kamiu kumisianio, mia naio sian ve miroano lie vo, tavukia nam̃a ajosonu ea bake, ajan kakario, amielio bano-o mia josonu batitigio bo, vite nene nalo bujo magmago ana na jibirbili. Riano, mia avar van kamiu rive verare ka ga nana m̃a kamiu kumitum̃a kumisian ban tomu dolu nalo.”
LUK 6:39 Mia Yesu jom̃a mil banlo kia ga vo, naio ber jamerijiano tai banlo, berinavo “?Jum̃abe, ver toro tai ve merebono to, naio mijikia rivuru m̃arabo ka merebono dolu ka nalo ve juo ava aiel nunu? P̃eli ga, mia ave juo atibirbil avatove ea bulukup̃ili tai na!
LUK 6:40 Naiagagoano, naio maka to loa nana berloglog naio, mia ver naio rila kakar vatitig vite nonovio na naverloglogiano berloglogio kanio, mia naio mijikia rimei rive verare ka kiano naverloglogiano.
LUK 6:41 Maka rivu ka kotom̃a koververii niamiamo na telisu na joa kuruamo mirano, mia jau maka keial kar burum̃ara burupati iesi na joko miramo jo.
LUK 6:42 ?Jum̃abe jau koberiam̃a komijikia keil van kuruamo na, kover ‘Koig, mia nelelar niamiamo na joa miramo na beamu vo’? Ver tibe na jau kojom̃a kobitoviton ia kia ga ka kiamo vovaiano, a jau kojom̃a kejibure toro dolu kiano vovaiano ga. Jau komijikia ruei ka jau kobova ga, ana jau kojidom kala van tomu nalo ka aver jau kobo ruei. Jau monoka kodular beamu burum̃ara bulapati iesi na den miramo beamu vo, karina mo jau komijikia kovitii vatitig niamiamo na monea toro dolu mirano.”
LUK 6:43 Ana Yesu ber bunu, berinavo “Buruiesi na bo maka rijikia rivar m̃arati na bova, a buruiesi na bova maka rijikia rivar m̃arati na bo.
LUK 6:44 Nao, jibe na naruei, napano kito rojum̃a robitilubar buruiesi nalo ka ajum̃abe ea salo m̃arati. M̃arati nalo na bo a nam̃a jesei bo, kito maka rotum̃a ravarlo ea soro na be niononoti, makanio.
LUK 6:45 Toro na tiniene bo, naio jom̃a miobijii vite nalo na bo jua kiano iviso, naruei bogo nonovio be kiano jidomiano na bo napano jo ka mijikia jian bulagio. Ana toro na bova naio jo miobijii vite nalo na bova jua kiano iviso, naruei naio jian bulag jidomiano na bova ga. Vite venia napano bujo toru ea toro kiano iviso p̃eli na kiano jidomiano, vite na naruei mia naio tom̃a rimalmaluvo bogo nonovio ea niono.”
LUK 6:46 Ana Yesu ber kalo, berinavo “?Bior vaio ana kumitum̃a kubio kiniou kuber ‘Tubo o, Tubo o,’ karina maka kuvitum̃a kumonmonea venia nam̃a kiniou nojom̃a neber ka kamiu ka m̃a kuvilaio?
LUK 6:47 Toro na ver binimei ka kiniou, mijog kiaku iliano, naio monoka rimonmoneaio a naio monoka rilaiio. Toro nam̃a rila tibe na, naio javukia tukunu tai napano berii, ber jibe nei:
LUK 6:48 Toro tai jo mim̃auka kunuano, mia toro nene be masou laka, jom̃a mikil p̃ili nene nalo bululuo batove yetano laka ka rivokar vio na borotano jikili eaio, karina mebija m̃artea nene nalo ea bulukup̃ili nalo neibano. Mia bogo na bogu va, burum̃ara ueimia mieraro, mia maka rijikia rila yimo rikulkulu leleio, bior toro nene mim̃aukanio, mim̃auka jikili bo.
LUK 6:49 Mia toro nam̃a mijog kanaku iliano nalo mia maka tom̃a rimonmoneaio, naio jibe ka toro dolu tai. Toro nene naio bunu mim̃auka kunuano tai, mia naio be vovu, mim̃auka jumolu ju vorvoru mave ea ga borotano, mia m̃artea nene maka rivatove rivare leleio. Mia bogo na bogu va, burum̃ara ueimia binimei, mila yimo nene mijoru, burukokorovio nonovio, bova laka.”
LUK 7:1 Naruei bogo na Yesu ber bulag nonovio kiano verloglogiano nalo nene ban tomu nalo bisi, ana naio ba jouro ea bulukomeli na vio Kapeneam.
LUK 7:2 Mo ea vio na, be natukamuano na mira na kulo Romo naio jo, mia naio be kiano toro novo na im̃auano tai mie toru laka, vaataro ga ka rim̃aro.
LUK 7:3 Ana bogo napano naio mijog ka napano tomu nalo ajum̃a aberii ka mia Yesu rimei ea kialo vio naruei, ana bio navurim̃araboiano na kulo Ju nalo, miilalo aban ka Yesu, ka avikanio rimei rieliel ka namieiano neibano.
LUK 7:4 Naruei nalo nei abinimei ea Yesu, aberii toro namieiano nei banio, a abika jikili banio jibe nei, aberinavo “Natukamuano na, memedu ka jau komei keijaio.
LUK 7:5 Be riano ka naio maka ve kito tai, naio be toro re Romo ga, mia naio be toro tai nam̃a jidomii m̃elea taara na kiado tomu nalo, a naio bunu miija kumemi toru ruei ea vio nei, napano naio mim̃auka kenememi yimo na volkouano. Naruei numial bo laka ka ver kajaaro ka komei keial kanano toro na mie toru neibano.”
LUK 7:6 Ana Yesu mijamo kanio, naruei ban bijalo. Aju amiel abano, ana bogo napano aju koalabo kija kia ga vo ka natukamuano na mira nei kunuano, mia nalo amial ka tomu tealo ajum̃a amiel abinimei. Nalo nei natukamuano nene kiano bilbilu nalo tealo bereio, napano naio miilalo abinimei ea Yesu, ka aver kiano iliano tai kanio. Naruei abinimei aber ka Yesu, aberinavo “Toro Romo nei miila kumemi nubinimei easo bereio, naio ber jibe nei, ber naio jo mila lelanso toru laka. Naio berenio berinavo naio mial naio jibe ka napano naio maka ve toro na bare ka mia jau komei joomo ea kunuano.
LUK 7:7 A jidomiano nei bunu mila naio mial ka maka rivu bunu ka riyotuba kaso, bior naio maka ve Ju tibe kaso, mia naio ber ga, ver jau kover ga iliano tai, mia kanano toro neibano rijog rivu bereio ga na.
LUK 7:8 Naio mijikia ka monoka tibe na, bior naio mijikia ka kanamo iliano mije moroano. Naio berenio berinavo vite na naio jibe ka tomu na mira nalo napano ajutano yetano ka naio, napano monoka ajogkar kanano iliano nalo. Ver naio river ka tai riverinavo ‘Jau kavano,’ naio monoka rivano, p̃eli na riverinavo ‘Jau komei,’ naio monoka rimei, p̃eli na riverinavo ‘Jau kala tibe na,’ mia naio monoka rilaio. A naio berinavo naio bunu monoka rim̃auka vaio napano kanano natukamuano na toru river kanio. Jibe na naruei, naio monea ka ver jau kover titai ga, mia monoka tibe na.”
LUK 7:9 Telikiti na Yesu mijog iliano nei, naio miilo toru ka natukamuano nei kiano jidomiano, a bunu naio jaaro toru kanio, naruei mil ban tiniobi nalo napano m̃a aju naliko ka bogo nei, berenio berinavo “Kiniou neber ka kamiu, ka kiniou maka neleal leleio toro Ju tai napano naio tumolu tu sikili ea kiniou tibe ka toro nei.”
LUK 7:10 Mo iorou kanio, nalo nene aban bereio ea natukamuano nei kunuano, mia amiilo ka napano amial toro na mie neibano naio binimei bo nonovio bereio ruei jo.
LUK 7:11 Ana iorou kanio, maka vesiou, ana Yesu miel ba bokar m̃arkomeli dolu tai, siano Naeni, a jibe ka titiliu, kiano naiagagoano nalo naliko kulo dolu nalo telabo ajum̃a ajakisorio.
LUK 7:12 Ana tilikiti napano Yesu nalo nei aju abinimei vaataro ka morouo labo na komeli nei, amial ka tomu nalo amidu buronlo amielvei abinimei, nalo aju ap̃ier tasim̃aro tai ka ava ativinio. Naio napano m̃aro ruei, naio be m̃eaku sum̃ano tai, napano kenieno be taanou. Taanou nene, naio maka rivar kenerinio dolu tai bereio, naio bar takurano ga neibano m̃aro ruei.
LUK 7:13 Mia Yesu nalo aju amial nalo napano m̃a aju amiel abinimei, mia bogo na kiado Tubo mial taanou nei, naio tinien miiaio toru laka-o mia. Naruei naio ban vaataro kanio, berkanio, berinavo “Ai, jau koteg re bunu.”
LUK 7:14 Ana Yesu binimei vaataro ka tasim̃aro nei, midu jum̃ano joaio, a nalo napano ajum̃a ap̃ier ba ajumomou ga aju jibe na, maka bunu aiel. Ana naio mil banio, berinavo “Koig, kiniou neber kaso, jau kotumolu bereio.”
LUK 7:15 Naruei m̃eaku nei naio jumolu jibe na, jo mil banlo, ana amidular naio bereio, ana Yesu jukamu kanio ba ban kenieno bereio.
LUK 7:16 Mia bogo na tomu nalo amial vite nei, burevure burelo toru laka, mia aju abamenea Atua, aberenio aberinavo “!Uerei, burum̃ara naverialiano na Atua kanano tai jumolu ju iviso ka kito vonganei naruei!” A tealo aber bunu, aberinavo “!Riano ga na! Atua miyotuba ka kiano tomu nalo naruei.”
LUK 7:17 Mia tukunuano na tenei, ajum̃a aber lilianio banbano-o bokar tanobuku na vio Yutea, bija vio dolu nalo napano m̃a aju ga vaataro kanio.
LUK 7:18 Ana ea bogo na, Jone Baruei naio joa yimo na tetavokoiano ruei, ana kiano naiagagoano nalo abinimei ajukunu banio ka vite nalo napano m̃a Yesu jom̃a milaio.
LUK 7:19 Naruei Jone mil ban kanano tom juo, naio miilalo aban ea kiado Tubo, ka ava avika vatitig denio, ka naio be Naverikariano na, nam̃a aju rorea ka mia rimei, p̃eli na maka ve naio.
LUK 7:20 Ana amiel ka amei aial Yesu, mia bogo napano amileal naio, abika jibe nei naruei denio, aberinavo “Kenememi toro na toru nei Jone, jidom rijikia jum̃abe? ?Jau kobe toro na nanua m̃a aberenio ruei aber ka mia toro na toru tai rimei ve kiado navurim̃araboiano, p̃eli na jau maka kove naio vo, mia monoka kumemi nuviturorea kiano vo ka mia toro nene naio rimei?”
LUK 7:21 Mia memedu ka bogo napano abinimei ka avika vikadeniano nei, Yesu jom̃a mieliel ka tomu na mieiano nalo, a jom̃a mijil bulag niadu nalo denlo, a jo mila merebono nalo miralo abinimei abo bereio, ana Jone kiano naiagagoano nalo amial vite nalo nei.
LUK 7:22 Naruei Yesu berdop̃e vikadeniano nei, naio berinavo “Kamiu kuvan bereio kuvoru ea Jone, ana mo kuverial vanio vite venia napano kumialio p̃eli kumijogio ea vio nei. Ajibe ka vite nalo nam̃a Naverialiano Aisea berial nua ruei, napano berinavo: ‘Merebono nalo, vonganei amial vatitig vite bo bereio ruei, a javuluku nalo, vonganei nalo amiel bo bereio ruei, a tomu nalo napano burumieni milalo, vonganei niabelo binimei meravo bo ruei, a nalo na abe bulubau, vonganei tilinielo bo bereio ruei, a tomu nalo na am̃arm̃aro, vonganei amemeul bereio ruei, a talim̃asa nalo, vonganei neberial Ioluano Vou banlo ruei.’
LUK 7:23 Mia kamiu kuva kuverial ka Jone bunu, kuverinavo ‘Toro napano ver maka leleio kiano jidomiano riveve juo ea kiniou bogo tai, ilivuiano toa naio.’ ”
LUK 7:24 Ana bogo napano Jone Baruei kiano naiagagoano nalo ajuvan ka avan bereio, Yesu berii Jone nei ban tomu nalo napano aju naliko, naio berinavo “?Bogo nam̃a kamiu kubatavio ea vio yauo na beamu, kamiu kuban ka kuvial venia? !Maka tinieku ka kamiu kuban ka kuvial buruburi nam̃a jegi jom̃a miuvuio p̃iligṽiligio!
LUK 7:25 A maka tinieku bunu ka kamiu kuban ka kuvial toro na toru tai napano m̃a miya kulum̃arauo na kirinovo a napano joa meuliano nabo, bior tomu nalo na jibe na maka ajikia atua vio na kiriniagiago jibe ka vio yauo na, mia nalo dam̃ariga ajujua yimo nabo na be tubo na tortoru nalo kunualo.
LUK 7:26 ?Makanio, mia kiniou tinieku ka kamiu kubatavio ka kuvial naverialiano tai, inau? Nina bo na, mia kiniou neber ka kamiu, Jone nam̃a kamiu kubatavio ka m̃a kumialio, naio loa laka, naio jovulu naverialiano nalo re nua,
LUK 7:27 bior Atua berii naio ea kiano Iliano Lu ruei, naio berinavo ‘Kiniou nemiila kiaku atevi na binimei jukamu kaso, ka rila vatitig kiamo m̃arabo.’
LUK 7:28 “Riano neber ka kamiu, ka ea yetemeriba nei, Jone Baruei naio loa laka ka kulo dolu nalo abiniu. Mia nalo nonovio napano mia amei jouro ea Atua kanano navenatuboiano, riva rivokar toro na maariano kalo nana jotano laka garuei, nalo na abiniu nalo loa laka ka Jone, napano mia avar Atua kiano ilivuiano nalo ve toru loa tovulu naio.”
LUK 7:29 Mia bogo na aban amijog Jone Baruei jo mioliolu, berial m̃arabo na Atua ka ajikia aviliglo, mia tomu na bova telabo, ba bokar tomu na takis bunu, amial ka m̃arabo nene be riano, ana abiliglo ana Jone baruei ealo.
LUK 7:30 Mia kulo dolu nalo, jibe ka Varisis bija naverloglogiano na tuboiano nalo, abilig taakalo ka m̃arabo na Atua naio mila ka ajikia aviliglo ka naio, ana Jone Baruei naio maka rivaruei ealo.
LUK 7:31 Mia Yesu berii kulo m̃arou nalo nei ka bogo na, naio berinavo “?Mia kiniou never iliano na vabe na mia mijikia rivokar tomu re banei kialo bajago, ka river nalo tomu na ajum̃abe?
LUK 7:32 Vite nonovio na Atua mila ka rilavonio rivu van kamiu, mia kamiu maka kuvisidomio ga, mia kumil niegeniege naio ga biorio. Bior bogo napano Jone naio binimei, naio jom̃a monodulu ka m̃a bolkouo, a naio bel ka m̃arjum̃elm̃elu, mia tomu nalo amial jibe na, nalo ajum̃a amilia naio aberinavo ‘Tete na sim̃aro juaio.’ “Mia bogo na kiniou Kulorinio Kenerinio nebinimei nojo, nejinan batitig bo a nomunu batitig bo, naruei amilia kiniou, aberinavo ‘!Keal, tete na naio be toro nam̃a jinano m̃ele, a naio be toro nam̃a munu m̃elea m̃arjum̃elm̃elu, a napano kanano bilbilu nalo, nalo abe tomu nam̃a abarbijii takis a tomu na abova!’ “Bior vite na naruei, kiniou nemial kamiu tomu na vio banei napano kamiu kumitibe ka kiritete nalo, napano ver ajum̃a amijejea ea vio yauo na komeli, mia nalo aviovio aiagiaga van kialo bilbilu sesa nalo, averinavo ‘!Oi, kamiu kubova na! Ver kumemi numitum̃a numue bulaiu, mia kamiu maka kuvisidom kuvolu rivija kumemi, p̃eli na ver kumemi numitum̃a numiou ka iou na m̃ariano, mia kamiu maka kuvisidom kuviteg vija kumemi!’
LUK 7:35 “Nina naruei, tomu nalo maka asidom Atua kanano m̃arabo nalo, mia kirim̃arati novo napano maluvo ea toro kiano meuliano na jo jakii Atua kiano m̃arabo, rila rimeravo ka m̃arabo na naruei naio be m̃arabo na masouano napano be riano.”
LUK 7:36 Mia Varisis nalo tai kalo, siano Saimon, naio berinavo naio jidom rim̃auka Yesu sano sinaniano tai, ana Yesu ban ea kiano vonuo, a naio ba jotano ka asinan.
LUK 7:37 Ana ea komeli na, be tira tai napano jo naio mila bajago miroano na kirivova laka, naruei naio mijog ka napano Yesu ba jo jinano ea Varisis nei Saimon kunuano. Naruei tira nene bitilubar kiano kariano, mijog kirivova toru laka, naruei naio mijog ka monokanio riva rial Yesu, ana naio midu kanano bauei na bonotanunu nabo tai, naio midu binimei ea yimo nei.
LUK 7:38 Mia Yesu mijoru mon ka merikono ka sinano, naruei tira nei binimei jumolu ju iorou ka naio ea jaano, napano jogumirano miou jibirbili bavatove ea Yesu jaano. Jogumirano nei jom̃a jekon Yesu jaano jibe na, naruei naio bar burutili vijinio m̃a na, naio jom̃a miolkono ka Yesu jaano, a naio mije kulbibinio tivelinio mon mave ea Yesu suvajaano, avona bisi ana na miyon bonotanunu nei eaio.
LUK 7:39 Naruei Varisis neibano miog Yesu binimei ea kunuano, naio jom̃a bitii vite nei, naruei naio jom̃a tiniene bova kanio kija. Naio jom̃a jidomii jibe nei, berinavo “Verenio Yesu na naio be naverialiano riano tai, p̃eli mia rijikia batitig ruei ka tira na naio be tira na kariano mugaruei jibe na, mia naio rijikia re rijamo ka naio tokol jaano lu na. Mia naio mijamo ka ga naio ka rila tibe na, kiniou maka bunu nejikia vatitig naio naruei.”
LUK 7:40 Mia Yesu mijikia kiano jidomiano, naruei berdop̃e banio, berinavo “Saimon, kiniou nejidom never kiri iliano tai ve telisu vanso beamu vo.” Ana Saimon berdop̃e berinavo “Bo ga, Naverloglogiano. Jau komijikia koverenio.”
LUK 7:41 Naruei Yesu berdop̃e jibe nei banio berinavo “Toro tomoruo tai, mia tomu juo amila jabue ea naio. Ea naljuo nei, tinene kiano jabue toru, mia tinene, naio kiano jabue burutomoruo laka.
LUK 7:42 Ana ea bogo na ka avulu meran bereio jabue nalo nei, mia abe juo maka ajikia avulu meran bereio, naruei toro tomoruo nei tiniene mialo abe juo, naio biekokoalo abe juo ka kialo jabue nonovio. ?Mo bior vite na, tom juo nei na vabe nene na naio monoka tinienriia m̃elea toro tomoruo nei?”
LUK 7:43 Ana Saimon berdop̃e ban Yesu, naio berinavo “Kiniou maka nejikia, p̃eli na kanano jabue burutomoruo laka kovio, naio monoka sidomii naio rivu lie.” Ana Yesu berenio berinavo “Nao koig, naio jibe na naruei.”
LUK 7:44 Mo Yesu barp̃ilig naio ka tira nei, jiloglog naio ka Saimon, berinavo “Saimon, bogo na kiniou nebinimei joomo ea kunuamo, maka neial toro tai rudu uei tai rimei ka mia nemijikia nesekon bulagio niamiamo na m̃arabo den jaaku, napano javukia kanado bajago, jau monoka kalaiio. Mia jau keial tira nei, naio naruei jekon jaaku ka jogumirano, a miolkon juva ka vijinio.
LUK 7:45 Kiniou nebinimei joomo ea kunuamo, mia jau maka kavan jum̃amo vatitig rivija kiniou tibe ka nebe kanamo bilbilu nabo tai, mia jikar ea bogo na kiniou nebinimei joomo, naio midu kulbibinio tivelinio mon mave ea suvajaaku nam̃ariga.
LUK 7:46 Jau maka kavar bonotanunu rimei ka koyon ea paripariku, mia naio mila ka jaaku ruei.
LUK 7:47 Mia kiniou neber batitig banso, ka tira nei, kanano kariano nalo miroano laka, mia kiniou nebiekokoa nonovlo biniu ruei, ana mila na tinien jii kiniou toru laka. Mia kiniou nemial ka toro na kanano kariano maka ve toru, kiniou nebiekokoa naio, mia naio tinien jii kiniou maka rive toru.”
LUK 7:48 Mia Yesu mil batitig ban tira nei bunu, naio berkanio berinavo “Kiamo kariano nonovio nam̃a kojom̃a kojidomii bova vururu biorio, kiniou nebiekokoa nonovlo ruei.”
LUK 7:49 Mia bogo na Yesu ber iliano na, kulo dolu nalo napano ajum̃a ajinan vio takurano naliko ka bogo nei, nalo maka asaaro laka, nalo ajum̃a amijuvaluva tertelisu banlo, ajum̃a aberinavo “?Mia tete na naio jidom naio rive kei, napano jom̃a berenio naio mila bulag kariano na tomu nalo kanalo jibe na?”
LUK 7:50 Mia Yesu mil ber ban tira nei vaarakurano bereio, naio berinavo “Kanamo viekouoiano milaso kobokar ioruriano ruei. Jau maka bunu kojog rivova, jau komijikia kavano ga, mia Atua kanano tum̃aro to vijaso.”
LUK 8:1 Ana maka vesiou bereio, Yesu naio jom̃a mieliel bano, naio jo ba jel burevure komeli nalo na tertelisu a nalo na tortoru, mia ea vio nonovio naio jom̃a mioliolu, a jom̃a midu lilianiano vou nabo na Atua kiano navenatuboiano binimei ban tomu nalo. Mia jibe ka titiliu, kiano duelimo ba juo [12] nalo aju bija ka bogo na,
LUK 8:2 mia tire nalo telabo kija bunu aju iorou ka nalo. Ea tire nalo nene, tealo kalo napano Yesu mieliel kalo bior niununo nalo na kirivova a kanio mieiano na jualo, jibe ka Mere na Maktala, napano nanua beamu niadu aluo ajua naio,
LUK 8:3 bija Joana, napano naio be toro nei Kusa koano, nanua naio be toro na toru tai na im̃auano na Parinio tubo Erot kiano, a bija Susano bunu. Mia nalo miroano lie vo bereio, napano nalo amiija Yesu nalo toru, mia nalo ajum̃a abitikarlo ka ijaiano nalo nam̃a tomu nalo aju ajian banlo.
LUK 8:4 Naruei ea kiri bogo tai, burum̃ara tiniobi na tomu nalo amoluo ea komeli telabo beve terakurano na kanalo, naruei nalo abinimei amiobijiilo jeliviv ea Yesu, naruei naio mil banlo, buku jamerijiano tai kalo.
LUK 8:5 Naio berenio jibe nei, berinavo “Be toro tai napano ban ka rivisivisii kurukuti ea kiano tiniavio. Bogo napano jom̃a bisivisii kurukuti nene abano, kurukuti tealo ajibirbili ea m̃arabo, mia iorou, tomu nalo abinimei amiel ea abie lelanlo, a menu nalo amikiti nonovlo.
LUK 8:6 A kurukuti tealo ajibirbili ea vio na be tabap̃ilio eaio, abitovtov sop̃eli, mia karina abinimei amekekeu ga, bior maka ve uei tai ea vio nene.
LUK 8:7 Mo kurukuti tealo ajibirbili ea vio nanua beamu maka atekon batitig rivu teli va nalo eaio, mia iorou kanio ana p̃eli nana bova nei naio barboṽeio miluo bereio, bisovoko toti nalo bano-o mia am̃arm̃aro.
LUK 8:8 Mia kurukuti dolu tealo bereio ajibirbili ea kiri borotano nabo tai, mia nalo amililiuo bano-o, ajakou abar m̃arati nalo, bokar toromomou takurano [100].” Mia bogo napano Yesu berenio iliano nei banlo bisi, ana naio miaga m̃erere banlo, naio berinavo “Toro na be tiliniene, monokanio riagago vatitig ka iliano nei.”
LUK 8:9 Ana iorou kanio, ana naiagagoano nalo abinimei ea Yesu mia nalo abika nioti na jamerijiano nei denio.
LUK 8:10 Naruei naio berdop̃e banlo, berinavo “Atua naio mila jibe na ka mia kamiu kumijikia kuvileal ililuklukuano nalo na kiano navenatuboiano. ‘Mia ea kulo dolu nalo, ililuklukuano nalo na ajuluku ea jamerijiano kia navo, mia ajum̃a abitio-o mia maka avitilubarlio, a ajum̃a amiagago-o mia maka ajog lubarlo.’ ”
LUK 8:11 Naruei Yesu ber bisivisii masosoua jamerijiano nei banlo. Naio berenio berinavo “Mo, nioti na jamerijiano nei naio jibe nei. Vite na be moti, naio be kurukuti, mia nina naio jibe kanio Atua kiano iliano.
LUK 8:12 Mia kurukuti nalo napano ajibirbili ea m̃arabo, nina naio jibe kanio napano tomu nalo amijog iliano nei, a kurukuti novo nei ajibirbili ban ea kialo jidomiano nalo. Mia Parinio Sim̃aro nei naio binimei bar bulag iliano nei bereio den kialo iviso nalo, ka rila amonea re bunu, a ajikia re avokar ioruriano.
LUK 8:13 “Dolu, nina kurukuti nalo napano ajua tabap̃ilio, mia nina jibe kanio tomu nalo nam̃a amijog Lilianiano Vou na bo nei, mia nalo amijevio, ajaaro kanio, mia jibe kanio napano maka ve salo bati na bo. Nalo amonea ka bogo bulati ga, mia verenio ve bogokouo, p̃eli na juboluboiano rimei, mia nalo ajoru bereio ga.
LUK 8:14 “Dolu bunu, nina kurukuti nalo napano m̃a ajua vio napano be teli na bova eaio, a nina jibe kanio napano tomu nalo na amijogio, mia bogo nam̃a aju amiel abano jibe na, mia ajidom yebekavo toru ea kialo meuliano, mia ajidom m̃elea puruveru, a nalo tiniel jii m̃elea serevuiano nalo na yetemeriba nei. Bajago nalo na abinimei jibe ka teli na bova tai nam̃a muekolo, ka mia rila ana na mia nalo ajikia re avar m̃arati napano meruo bo ea kialo meuliano nalo leleio.
LUK 8:15 “Mia nana maariano, nina kurukuti napano ajua borotano nabo, nina javukia napano tomu nalo nam̃a amiagago ka Lilianiano Vou nabo nei, naruei nalo amije batitigio monea kialo iviso nalo, abokario jikili vatitig bo be riano. Kulo novo nalo na jibe na, nalo ala kialo jidomiano nalo ve terebievi, naruei nalo aim̃au rimemedu rivanvano-o mia avar m̃arati na Ioluano Vou nei ea kialo meuliano nalo.”
LUK 8:16 Ana Yesu ber bunu, berinavo “Kito tomu nalo, verenio kito ravar yulu rimei, mia ve re tai napano roduvanio sel tano ka basaro p̃eli na vite na jibe na. P̃eli ga, kito reive takilele mave ga ka rila tomu nalo na ver amei joomo aial ka napano vio merera bo.
LUK 8:17 Mo, na Atua kanano navenatuboiano naio jibe ka yulu nei, napano vonganei jom̃a malmaluvo ea kito ka rudulii vite nonovio. Vite nonovio napano ajuluku aju, a ililuklukuano nalo, mia nalo monoka amalmaluvo ea vio medave ka tomu nalo avitilubario.
LUK 8:18 Kamiu monoka kuviagago vatitig ka kanaku iliano nalo, a kuvilavon ka kuvisidomii vatitigio. Toro napano be kiano saba miroano ruei, mia naio rivar rivan lie vo ve telabo laka, mia toro napano maka kiano saba, mia rila luvuio vite vaio na telisu nei napano naio tiniene ka ber kiano ruei.”
LUK 8:19 Ana na Yesu kenieno naliko kuruano nalo amiyotuba ka naio ka bogo nei, mia nalo maka ajikia avokar naio joomo, bior burutiniobi toru laka, mila vio telisu.
LUK 8:20 Mia tomu nalo aber lilian iliano binimei bokar Yesu, ana aberenio aberinavo “!Ai, koniomo naliko kuruamo nalo, nalo yako ajikili aju tavio, ajidom aialso beamu vo!”
LUK 8:21 Mia Yesu berdop̃e banlo, berinavo “Nana naio be kenieku, p̃eli na kuruaku, nina nalo ga nei napano amijog Atua kiano iliano lu, a nalo ajum̃a amila javukia ga napano iliano nei berenio.”
LUK 8:22 Mo ea legiano tai, Yesu buru naiagagoano nalo, abiako ea uako tai, naruei Yesu ber kalo, berinavo “Kito m̃a rava tivelinio ea ueiyabo nei.” Naruei ajuvan vio, ana abano,
LUK 8:23 mia bogo na uako jo juvan bano, mia Yesu mirano jouo toru ana monmelio. Ana iorou kanio, ana burum̃ara jegi tai jumolu binimei ea ueiyabo nei, mia burum̃ara kenieno niatuva nalo na amidon tanealo bano-o mia uako nei binimei bujo ka jumu, mia nalo amialo ka bova kitkiti ga naruei.
LUK 8:24 Ana nalo aba abio bon Yesu, aber kanio, aberinavo “!Tubo, Tubo, vaataro ka mia kito ramadudu naruei!” Ana na Yesu jevijo jumolu, ana naio berbure jegi bija burum̃ara kenieno niatuva nalo nei, naruei vite nalo nei ajuba binilo, vio be tum̃aro nonovio bo.
LUK 8:25 Ana Yesu ber kalo berinavo “?Kenemiu viekouoiano nibe?” Naruei nalo amerou mia amerou laka, amiilo toru, ana na nalo ajum̃a abivika denlo bereio, aberinavo “?Toro kenia na? Naio mil ga jibe na mia jegi naio tei amijogkar niono. !Tomnei!”
LUK 8:26 Naruei Yesu nalo abarkor abokar tivelinio nene, napano Kalele jirarago ban eaio, nina memedu ka vio nei Kerasa.
LUK 8:27 Mia bogo napano Yesu jabulu, bauro ea vio nei, toro na vio nei tai binimei ka rivitavo vijaio, napano toro nene sim̃aro nalo ajuaio. Bogobe nua ruei, toro nene naio jo jibe ga na, maka riya kulum̃arauo tai, a maka m̃a monmon ea yimo, mia tinien jii ka m̃a mon ea pakeltavo ga, ea buluvae nalo nam̃a abar kanalo tasim̃aro nalo aba amonmoneaio.
LUK 8:28 Sim̃aro nalo nei ajum̃a ajutua kiki toro nei va telabo ruei, mila na tomu nalo amilavon ka atukuku kanio dam̃ariga, a nalo ajum̃a amiorkakar ka m̃armieni, p̃eli amiorkakar jaano a jum̃ano ka teli, mia naio jom̃a mila kokorovlo ga, a sim̃aro nalo nei amijil deven naio binimei joa vio mom̃a nei. Mia Yesu mialio, mil ban niununo va nei, jitig naio berinavo tuvan toro nene. Mia toro nei mial Yesu, naio bio banio, a naio mijorua jaano, ana niununo neibano joa naio mil burutomoruo, naio berenio berinavo “?Mia jau, Yesu, Atua Sop̃i kenerinio, kanamo vaio joa kiniou? !Kiniou nobika jikili denso, ka mia jau kesian re vironiano van kiniou!”
LUK 8:30 Ana na Yesu bika denio berinavo “?Ana siamo, kei?” Ana na niununo va nei naio berdop̃e, berinavo “Siaku be ‘Tomu na mira miroano.’” Naio ber jibe na, bior sim̃aro nalo nam̃a aba joomo ea naio nalo miroano laka.
LUK 8:31 Mia niununo va nalo nene nalo ajum̃a abivika jikili den Yesu bereio ka mia naio rijil nalo re, naio rila lo re ava ajoru avatove yetano ea burum̃ara bulukuti sebi.
LUK 8:32 Mo ea suku tivelinio na vio nei, be burum̃ara taara na kiribue, nalo ajum̃a amiuoiuo ea borotano, ana sim̃aro nalo neibano amiaga ban Yesu, abika jikili denio aberinavo naio rila lo ava joomo ga ea kiribue nalo nei. Ana na Yesu mijamo ka jibe na banlo,
LUK 8:33 naruei nalo ajaluvo den toro nei, ana nalo aba joomo ea kiribue nalo neibano. Mia sop̃eli ga, kiribue nalo nene ajikiti, ajibirbili ea yabalili tai, abavatove yetano ea burum̃ara ueiyabo nei, amadudu nonovio ea bulu niogovu.
LUK 8:34 Ana bogo napano tomu na abitikar kiribue amial vite nei, mia nalo bunu aburo kilkil, aban bereio vonuo, aberial vite nei, mia nalo aberial janea vio reraio bunu,
LUK 8:35 mila ana vio bujo ka tomu nalo abinimei, ka ajidom aial kija. Mia bogo na abinimei, amial ka na Yesu naio jo, a toro nam̃a niununo va nalo neibano aburo denio ruei, naio jom̃a jotano ea Yesu jaano. Naruei naio miya batitig kulum̃arauo nabo ruei, mia naio jo melumu bo ruei jo, maka bunu rive deden leleio. Bogo napano amialio ka napano toro nei naio binimei bo ruei jibe nei, mia nalo amerou toru.
LUK 8:36 Mia nalo napano aju jukamu, napano amial vite nonovio, nalo ajukunu kanio ban nalo na abinimei vonga, nalo aberbisivisiio banlo jum̃abe ka toro nei nua niadu nalo aban ea naio, mia Yesu mila naio binimei bo bereio ruei.
LUK 8:37 Mia tomu nalo na tanobuku nalo na vio Kerasa, nalo amial ka bova ga, naruei nalo aju ajadu jikili ka Yesu ka ajidom ka mia naio taluvo denlo, bior vite na milalo amerou toru laka. Naruei Yesu nalo abajou bereio ka avan ea kialo uako, ka nalo avan bereio.
LUK 8:38 Ana bogo na ajum̃a abajou, toro neibano naio binimei balea Yesu jikili, ka jidom riva to naljuo bogo nonovio, mia Yesu maka rijamo kanio, mia naio berkanio, berinavo
LUK 8:39 “Makanio, bior bo laka ka kava vonuo bereio, a jau kava kover van tomu nalo, kover kalo jum̃abe napano Atua mila bo mia bo laka banso jibe na.” Ana toro nei ban bereio, a naio jom̃a miel jeliviv ea vio nalo na ea tanobuku na kanano burum̃ara bulukomeli, a naio jom̃a ber bulavulag im̃auano novo nei napano Yesu mila ban naio.
LUK 8:40 Naruei Yesu nalo abarkor bereio ueiyabo aba tivelinio, mia burum̃ara tiniobi na tomu nalo aju rorea naio, mia nalo ajaaro toru ka amial naio bereio.
LUK 8:41 Mia toro na toru tai na yimo na volkouano na kanalo na vio nei, siano Jairas, naio binimei vaataro ka Yesu. Naruei minie yetano kanio, jegi banio, baleaio ka rimei ea kunuano,
LUK 8:42 ka rial kenerinio vevinio, napano mie toru. Tira sesa nei, naio be toro na toru nei kenerinio takurano m̃anono ga, a kiano yuka be titai jibe ka duelimo ba juo ga [12], mia kiano mieiano binimei biloulo ruei, mila ana amial ka vaataro ka mia naio rim̃aro. Naruei Yesu jumolu, ban bija toro nei abano. Mia bogo na naio jo ban jibe na, vio bujo ka burum̃ara tiniobi na aju ajakisosorio, nalo ajum̃a amivinkakarlo ajeliviv ea Yesu.
LUK 8:43 Mia nalo nene tai kalo, naio be tira tai, napano kiano mieiano na monoleri mila naio ka legiano nonovio ga, bokar yuka duelimo ba juo [12] ruei, mia maka ve toro tai napano mijikia rila rivu kiano mieiano nei leleio.
LUK 8:44 Naruei tira nei, naio milavan naio bure tomu nalo nei, naruei mijian lilie ka naio binimei vaataro ka Yesu taakano, ana na naio jian jum̃ano jibe na ana jokol m̃ano ikiniono kulukoti. Naio jokol Yesu m̃ano kulum̃arauo jibe na, mia monloglog bogo nei ga, kiano mieiano nei bisi ruei.
LUK 8:45 Mia kolvare ga Yesu bika, berinavo “?Kenia na jokol kiniou vonganei ga?” Mia nalo aber “Maka toro tai tokolso,” mia Pitere bunu berkanio berinavo “?Ana Tubo, jum̃abe? Tom miroano miroano laka na amivinkakarlo jeliviv easo, a ajum̃a abalbaliaso.”
LUK 8:46 Ana Yesu berkanio, berinavo “Makanio, toro tai jokol batitig kiniou nei, bior nomijog lubar ka kanaku moroano togio jaluvo ea kiniou ban ea toro nene ruei.”
LUK 8:47 Naruei tira nene, naio bitilubar ka naio maka bunu rijikia rilavan naio, naruei naio binimei ea Yesu, napano naio merou toru bano m̃a jo memebiju ka garuei. Naio binimei mijoru ea Yesu jaano, kamu ka tomu nalo napano aju na miralo, naio ber bulag nonovio vite ea naio banio, jibe na kar vaio napano naio binimei jokol Yesu, a jum̃abe napano naio binimei bo ruei ea bogo nei.
LUK 8:48 Ana na Yesu berkanio, berinavo “Nena, kanamo viekouoiano ea kiniou milaso kobo bereio ruei. Atua kiano tum̃aro to vijaso, jau kava vonuo ga bereio.”
LUK 8:49 Naruei bogo napano Yesu jom̃a mil ban tira nei kia ga vo, iliano binimei ea toro na toru nei kunuano, berinavo “Kenerimo vevinio nam̃a na, naio bakovio ruei. Bo ka mia jau kovuru re bunu naverloglogiano na toru na rimei, ka kala lelan kule re naio.”
LUK 8:50 Mia Yesu bunu mijog iliano nei, ana na naio ber ka Jairas, berinavo “Jau niukniuku rivieso re, jau kavarkar tiniemo sikili ea Atua ga, bior mia kenerimo vevinio naio rimeul bereio na.”
LUK 8:51 Naruei Yesu ban bija toro nei ea kiano vonuo, mia bogo napano abinimei abokar vio nene, naio berbure nalo dolu berinavo mia nalo ava joomo re naliko naio, mia naio buru ga Pitere naljuo Jone, bija Yemesi, naliko niatira sesa nei karam̃ano a kenieno, mia nalo na ga aba joomo.
LUK 8:52 Mia bogo na nalo aba joomo jibe na, amial ka napano tomu nalo ajum̃a tiniel miia niatira sesa nene ruei, nalo ajum̃a ajigio, mia Yesu ber kalo, berinavo “Kamiu kuviteg re rivior niatira na tibe na. Naio maka rim̃aro na, mia naio jo monmelio ga na.”
LUK 8:53 Mia nalo abital m̃elea ga banio, bior nalo amijikia ruei ka napano niatira nei naio m̃arodobi ruei.
LUK 8:54 Naruei Yesu ba bokar niatira nei jum̃ano, a naio mil banio, berinavo “Kanaku niatira, jau kotumolu von.”
LUK 8:55 Naruei monloglog bogo nei ga, nalo amial ka napano niatira nei kiano meuliano binimei bere joaio bereio, naruei naio jumolu jikili ju, naio jom̃a miel, ana na Yesu ber kalo berinavo bo ka adu kiri sinaniano tai vanio.
LUK 8:56 Mia karam̃ano a kenieno, nalo amiilo toru napano mila kanalo jidomiano bakovio ruei, mia Yesu ber kalo berinavo mia averial re vite nei van kulo dolu nalo.
LUK 9:1 Naruei Yesu bio biroviron kiano duelimo ba juo [12], ana na naio mil batitig banlo, jian moroano banlo, mijamo kalo ka amijikia atuvulu sim̃aro, a ka amijikia aieliel ka mieiano nalo.
LUK 9:2 Naio mila jibe na ka mia naio riila bulaglo ka mia ava aioliolu ka Atua kiano navenatuboiano, a ka aieliel ka namieiano nalo.
LUK 9:3 A iliano nabo nalo tealo napano naio ber kalo beamu vo, avona bisi ana na nalo abanio aber jibenei, napano naio berinavo “Tivelinio ka kenemiu m̃arabo, mia kamiu kuvar re titai. Mia kamiu kuvar re kenemiu nasitogo nam̃a kubanio, p̃eli na kenemiu basaro, p̃eli na sinaniano, p̃eli na kenemiu puruveru, a mia kuvar re kenemiu kulum̃arauo ve juo, mia kamiu kuvar kenemiu kulum̃arauo ve takurano ga nam̃a kumiya kar vonganei ka kuvano.
LUK 9:4 “Mo vonuo na vabe na mia avurukar kamiu kuvitum̃a, kuva jouro eaio, mia monoka kamiu kuvisaaro ka mia kuvitu kamliko m̃aratavo na vonuo nene, mia kuvituvan vonuo nei bogo napano mia kuvitaluvo den m̃arkomeli nei bereio.
LUK 9:5 A ea m̃arkomeli na vabe na ver maka asidom avurukar kamiu ea kunualo nalo, mia kamiu kuvituvan ga kialo vio nene, a bogo na kamiu kuvitaluvo denio, kamiu monoka kuvijubakon bulukievi na m̃arabo na vio neibano den jaamiu nalo, tibe ka kijokijo tai, p̃eli na iliano na kirisikili tai na kenemiu banlo, ka mia avar vironiano tai napano memedu ga ka kialo bajago na bova nene.”
LUK 9:6 Ana na naiagagoano nalo abava tavio naruei, nalo aba ajel ea m̃arkomeli nalo, nalo ajum̃a amioliolu ka Lilianiano Vou nabo, a nalo ajum̃a amieliel ka tomu nalo.
LUK 9:7 Ana ea bogo na, Parinio Tubo Erot nene bunu naio mijog kija ka vaio napano m̃a Yesu nalo ajum̃a amilaio, naruei naio jo tiniene burukokorov biorio, bior tomu tealo ajum̃a aberii Yesu, ka naio be Jone Baruei, napano naio meul bereio den nam̃ariano,
LUK 9:8 mia nalo dolu ajum̃a aber vonvon aberinavo Yesu be tormoruo Elaija re nua, napano naio miyotuba bereio, a nalo tealo ajum̃a aberinavo Yesu be naverialiano nalo re nua nua tai, napano naio jumolu bereio den nam̃ariano.
LUK 9:9 Mia Parinio Tubo Erot naio berinavo “Maka ve Jone Baruei na, bior kiniou nomiovlar pariparinio ruei, mia toro nam̃a ajum̃a aberveriio na, naio be kenia bereio?” Mo jidomiano nei mila ana naio jidom toru ka rial kija Yesu.
LUK 9:10 Ana naiagagoano nalo napano Yesu miila bulaglo ka ava aioliolu, nalo aborvoru bereio, naruei nalo aberial ka Yesu vite nalo nonovio napano m̃a amim̃aukanio. Ana Yesu burulo ajaluvo den tomu nalo, ajubilig telisu ea m̃arkomeli tai, siano Betsaeta.
LUK 9:11 Mia karina, tomu nalo amijog ka aju aban ea vio nei, mia nalo bunu ajakisorilo, aban ea vio nene bunu. Mia Yesu naio jaaro ga, naio jukunu kija naliko, a kario naio berlogloglo ea tivelinio na navenatuboiano na Atua kiano, a naio mila batitig nalo nam̃a aju ajidom toro tai ka rieliel kalo.
LUK 9:12 Mia Yesu jo naliko banbano-o, karina nalo amial ka napano m̃erenio jo batove nonovio, naruei kanano duelimo ba juo [12] abinimei keanio, aberinavo “Ai, Tubo, bo kanio jau kajamo ka tiniobi nei avan bereio ea kanalo vonuo nalo, p̃eli na ea m̃arkomeli tealo na, ka amijikia avulu salo sinaniano tealo, a ka amijikia aleal vio tai ka mia amon eaio, bior vio nei kito rojua nei naio bova ga, maka rivu ka vio ribobogko kito eaio.”
LUK 9:13 Mia Yesu ber kalo, berinavo “Ee, makanio. Bo kanio kamiu ga kuvar sinaniano vanlo.” Mia nalo aberdop̃e aberinavo “!Ajerei! Abe kumemi nubarkar ga joko sesa jimo, bija niado na tertelisu juo. ?P̃eli na ver makanio, jau kojidom ka mia kumemi naruei, nuva nuvulu sinaniano rivare ka burutiniobi nalo na?”
LUK 9:14 Mia nalo aber jibe na bior tomu nalo napano aju na nalo miroano laka, napano kulovu nalo ga abokar titai kovio jibe ka menu jimo [5,000]. Ana na Yesu ber kalo berinavo “Kamiu kuva kuver ka tomu nalo na kuver atutano beamu vo, atutano ea taara nalo, napano mia tomu veve duelimo va jimo [50] atua taara tai.”
LUK 9:15 Naruei nalo abano amila javukia napano naio berenio, naruei tomu nalo ajutano ea taara nalo.
LUK 9:16 Naruei Yesu bar joko jimo bija niado na tertelisu juo nei, naio jirarago bavin tiniabene, naio milivu kanio, karina burekokorovio, ana bar jian ban naiagagoano nalo ka aviovio ka tanea taara nalo nei.
LUK 9:17 Naruei nalo ajinan banbano-o, mabolo jouo batitigio bo, a iororoti sinaniano napano ajen digio ju, nalo amisonsonlo aban ea basaro solokobaro nalo bokar duelimo ba juo [12].
LUK 9:18 Mia bogo tai, ana Yesu jo bolkouo naio takurano, a kanano naiagagoano nalo aju vaataro ka ga naio, naruei naio bika denlo, berinavo “?Kamiu kumitum̃a kumijog tomu nalo ajum̃a aberverii kiniou aber kiniou nebe kei?”
LUK 9:19 Ana na nalo aber kanio, aberinavo “Tealo aber jau kobe Jone Baruei, a tealo aber jau kobe Naverialiano Elaija, a tealo aber jau kobe naverialiano dolu nalo re nua nua tai napano meul bereio den nam̃ariano.”
LUK 9:20 Mo naio bika denlo, berinavo “?Mo ana jum̃abe ka kamiu, kamiu kumitum̃a kuber kiniou nebe kei?” Ana na Pitere naio berdop̃e, berinavo “Jau kobe Naverikariano na Atua kanano.”
LUK 9:21 Naruei Yesu mil jikili, ber kalo memedu, berinavo mia nalo avan re averial vite nei ka tomu nalo,
LUK 9:22 mia naio ber batitigio bo banlo ka mia tum̃abe ka naio. Naio berenio berinavo “Kiniou nebe Kulorinio Kenerinio, mia navurim̃araboiano nalo na kulo Israel nalo kialo, vija tomu na tortoru na kulo lu nalo, bija naverloglogiano na tuboiano nalo, mia avukular kiniou, monoka mia ala vite ve telabo ka ala lelan kiniou. Mia monoka auebin kiniou nam̃aro, mia ka bogoti ve tolu nene, mia Atua rivitirilar kiniou nemeul bereio.”
LUK 9:23 Naruei ea bogo na, Yesu mil banlo, naio berenio berinavo “Toro napano jidom rimei takisor kiniou, naio monoka sidom iakurano ga ea kanano sidomiano nalo, ana mia naio monoka rudu kanano m̃akolkolo ea legiano nonovio, jibe napano mia nodu kanaku, naruei naio takisor kiniou nam̃ariga.
LUK 9:24 Neber jibe na bior toro na ver sidom ridururu kiano meuliano, mia naio rilaluvu kiano meuliano. Mia toro na ver rijamo ka kiano meuliano rivior kiniou, mia naio rijev kiano meuliano bereio.
LUK 9:25 Avona ver toro tai bokar vite novo nalo na yetemeriba nei riviniu, mia rilaluvu m̃arabo a rilaluvu kiano meuliano, naio maka rijev vite novo tai leleio.
LUK 9:26 “Toro nam̃a mimou ka kulo dolu nalo miralo bior kiniou p̃eli bior kanaku iliano, mia kiniou Kulorinio Kenerinio, mia kiniou bunu noimou ea Atua mirano rivior toro nene, ea bogo napano mia nemei bereio eaio, napano mia nemei vija burum̃ara mermerano napano kanaku, a napano be karam̃aku kanano, a napano be nailiano lu nalo kanalo.
LUK 9:27 Riano kiniou neber ka kamiu, be tomu tai ajumolu aju ea vio nei, napano mia maka ajikia am̃aro, rivanvano-o rivokar bogo napano mia aial navenatuboiano na Atua kanano riyotuba.”
LUK 9:28 Iorou ka bogo na napano Yesu berenio iliano nalo na, titai jibe ka sude takurano barlaka bereio ruei, naruei naio buru Pitere, Jone, a Yemesi, nalo veri abavin ea burusuku tai, napano jidom rivolkouo.
LUK 9:29 Naruei nalo abinimei abokar vio nene, a bogo nam̃a Yesu jom̃a bolkouo, naiagagoano tolu nalo nei amialio napano mirano binimei be dolu, a amialio ka napano m̃ano kulum̃arauo merera laka, a amiuvu bo mia amiuvu nonovio garuei.
LUK 9:30 Ana iorou, tormoruo juo nei Elaija naio Mosis, naljuo amiyotuba bija burum̃ara miamoiano na mermerano na tiniabene, ana na abe juo ajum̃a ajukunu naliko Yesu, napano ajum̃a aberii ka mia tum̃abe ana na mia naio monoka riva Yerusalemo, a monoka m̃aro den yetemeriba nei, tavukia napano Atua berkario ruei.
LUK 9:32 Mia beamu, Pitere nalo nei amijog miralo jouo toru, amiyukudovo banbano-o mia amonmelio garuei, mia bogo napano ajevijo bereio, amiilo ka vite nalo nei, napano amial Yesu kiano burum̃ara miamoiano na mermerano, a amial tomu juo nei ajumolu aju bijaio.
LUK 9:33 Naruei nalo amial ka napano naljuo neibano aju ajuvan vio ka avan bereio, naruei Pitere naio jidom ril, mia maka rijikia vaio ka mia riverenio, ana naio ber ilikodovoiano tai ban Yesu, berenio berinavo “Tubo, bo ka napano kito rojua vio nei. Bo kanio kito roim̃auka tobobo ve tolu ea vio nei, tai ve kiamo, tai ve Mosis kiano, a tai ve Elaija kanano.”
LUK 9:34 Mia bogo napano naio jom̃a ber iliano nei, melijo tai binimei midukolo, mia bogo napano amialio ka nalo aju joomo ea melijo nene, nalo amerou binvinlo.
LUK 9:35 Naruei amijog iliano tai miyotuba ea melijo neibano, naio berenio berinavo “Nina be keneriku na, napano kiniou nebitirilar naio ruei. Naina naruei monoka kumonmonea naio rivu.”
LUK 9:36 Mia bogo na iliano nei bisi, melijo bakovio, amial ka napano Yesu naio ga takurano ju naliko bereio. Iorou ka nina, naiagagoano nalo aju ajurbanin kanio ga aju, maka ava averii vite neibano amialio ka tomu dolu nalo.
LUK 9:37 Mia ea legiano dolu nene, Yesu naliko nalo tolu nei ajuvan burusuku nei, abatove bereio, mia burum̃ara tiniobi na tomu nalo aju rorea ka ajidom aial naio.
LUK 9:38 Mia bogo napano amiyotuba kalo, toro tai kalo bio jouo ban Yesu, naio berenio berinavo “Naverloglogiano, neber aiou banso, kovitii von keneriku m̃eaku nei, bior naio be keneriku takurano m̃anono ga.
LUK 9:39 Niununo va tai jom̃a binimei ea naio jibe na, mila naio miaga burutomoruo laka, a miaburusalsal bano-o m̃a titilevlevi bavin eaio. Tenei jom̃a mila naio napano kirivova laka, mila lelan naio laka, a naio jom̃a monmon ga milaio, naio maka lele tuvan naio torm̃aro bogo tai.
LUK 9:40 Kiniou noburu naio ban ea kiamo naiagagoano nalo, neber aiou kalo ka ajilar niununo va nei, naruei nalo amila von, amim̃aukanio bano-o, mia abijukudeio ga.”
LUK 9:41 Naruei Yesu berdop̃e, mil banlo, berinavo “?Kamiu na, jum̃abe jibe na? Kamiu maka kuvarkar tiniemiu sikili ea Atua leleio. ?Mia kiniou monoka noto vija kamiu kelvovu nalo riva rivokar nagi? Kiniou tinieku m̃aro ea kamiu ruei. Mo, bo ga, kovuru kenerimo nene rimei vonio.”
LUK 9:42 Naruei nalo aba aburu kiritete nene binimei, mia bogo napano aju abinimei kia ga vo, niununo va nei mila m̃ele niadua kiritete nei bereio-o mia, mila niabene memebiju a ba burukar jikili. Mia Yesu mil jikili, berbure niununo va nene, ana naio mieliel ka m̃eaku nene, naruei naio buru bereio ba ban karam̃ano.
LUK 9:43 Mia nalo napano amial vite nalo nei, nalo amiilo toru laka ka Atua kanano moroano na loa laka na kirinovo nei, napano mila bo laka jibe nei ban tete m̃eaku nei. Ana memedu ka bogo na napano m̃a kulo dolu nalo ajum̃a aberverii vite novo napano Yesu milaio, mia Yesu ber iliano tai ka kanano naiagagoano nalo.
LUK 9:44 Naio ber kalo, berinavo “Kamiu kuvije tiliniemiu rivu ka kanaku iliano nei, kamiu kuvidu vatitigio toa kenemiu jidomiano nalo, ka mia tiniemiu ribobogia re bereio bogo tai. Nao, kiniou neber batitigio ban kamiu, Atua miila kiniou jibe Kulorinio Kenerinio, mia vaataro naruei ka mia adu kiniou navan ea tomu nalo jum̃alo napano mia ala bin kiniou nam̃aro.”
LUK 9:45 Mia naiagagoano nalo maka ajog lubar vo venia napano Yesu jom̃a berii kalo, jibe ka nioti nene joluku kia ga vo, mila maka ajikia ka avitilubario, a amerou bunu ka avika batitig den Yesu tivelinio ka iliano nene.
LUK 9:46 Mia iorou, ana baravo tai moluo iviso bure naiagagoano nalo, ka mia kei naio to mave ka nalo dolu.
LUK 9:47 Mia Yesu mijikia kialo jidomiano nalo, naruei naio bio kiritete tai napano jo miel binimei kanio, naruei naio midu kiritete nene ji ju tivelinio ka naio,
LUK 9:48 ana naio ber kalo, berinavo “Toro napano kiano jidomiano batove ka kiniou, mo naio saaro ka rijev kiritete nei, nina javukia ga napano naio jaaro ka rijev kiniou. A toro nam̃a jaaro ka kiniou, jibe ka napano naio jaaro ka nana miila kiniou nebinimei. Nina bior nana ka kamiu napano kiano jidomiano rivatove laka, naio naruei napano mia naio loa laka ka kam nonovio.”
LUK 9:49 Ana Jone ber ka Yesu, berinavo “Tubo, kumemi numial toro tai, napano naio jom̃a mijil bulag sim̃aro nalo, naio jo mijil bulaglo ea siamo. Mia toro nene, kumemi maka nuvijikiaio, naio maka ve kito tai, naruei kumemi nuberbureio.”
LUK 9:50 Mia Yesu berkanio, berinavo “Makanio, kamiu kuverbure re naio, bior toro napano maka m̃a riverbure kito, naio jom̃a miija kito kiana.”
LUK 9:51 Mia Yesu bitilubar ka vonganei, vaataro ka mia Atua rivuru naio rivavin bereio tiniabene, naruei naio midu vatitig kiano jidomiano ruei ka kiano m̃arabo monoka rivavin mave Yerusalemo.
LUK 9:52 Ana na nalo aju amiel abano, ana Yesu miila kiano atevi nalo ajukamu, aban ea m̃arkomeli tai na kulo Sameria kialo, ka ayomon vite nonovio rimemedu ka mia naio mijikia rimei iorou.
LUK 9:53 Mia nalo na vio na, maka asidom Yesu nalo amei jouro ea kialo vio, bior nalo maka atum̃a tiniel tii ka aija kulo Ju nalo, napano ajum̃a ajel ea kialo vio na abavin Yerusalemo.
LUK 9:54 Tilikiti napano naiagagoano juo nei Yemesi naio Jone naljuo amial ka napano nalo ajum̃a aberburelo jibe na, abika den Yesu, aberinavo “Tubo, kojidom nubolkouo, nuvio sebi tai taluvo ea vio mave rivatove sisen tanea nalo na?”
LUK 9:55 Mia Yesu naio bilig naio banlo, berbure kialo jidomiano na jikili nei.
LUK 9:56 Ana naio jukamu kalo, maka bunu ava jouro ea vio nei, mia amiel ga aban ea komeli dolu tai.
LUK 9:57 Tilikiti napano aju amiel ea m̃arabo abano, toro tai binimei vaataro ka Yesu, naio berkar banio, berinavo “Mia kiniou natakisorso, ea vio na vabe na jau kavan eaio.”
LUK 9:58 Ana Yesu berdop̃e banio, berinavo “Kuli deden nalo abe m̃alo bulukup̃ili na amon eaio, a menu nalo abe m̃alo niuku nalo. Mia kiniou Kulorinio Kenerinio napano nebinimei tiniabene, maka ve kiaku vio tai, ka mia nava nomon eaio. Ver jau kajaaro bunu ka meuliano na jibe na, jau komijikia komei.”
LUK 9:59 Ana ea bogo nei, toro dolu tai, Yesu berkanio bunu ber rimei takisorio, ana naio berdop̃e banio, berinavo “Tubo, bo ga, mia jau kajamo ka kiniou navan nevitikar kanaku tormoruo beamu vo, mia ver naio rim̃aro bogo tai, mia kiniou nemei bereio natakisorso.”
LUK 9:60 Ana Yesu ber ka naio, berinavo “Jau kotuvan tomu nalo napano maka ajev meuliano vo ka mia ava ativin kanalo tomu na am̃arm̃aro. Mia jau, komei ga, rava roioliolu ka Atua kanano navenatuboiano.”
LUK 9:61 A dolu tai bunu mila sop̃eiano jibe nei, naio bika den Yesu, berinavo “Tubo, mia kiniou tulaka ga natakisorso, mia vite tai ga, kiniou nojidom ka jau kajamo ka kiniou nava never bogiano bo van nalo na ea kanaku vonuo beamu vo.”
LUK 9:62 Ana Yesu ber iliano tai banio jibe nei, berinavo “Toro nam̃a jom̃a jidom m̃elea kanano vonuo a kiano saba nalo nonovio nei, naio jibe toro nam̃a jelanvu ka uako, a julaka jom̃a jiraragdi. Toro na jibe na maka rivare ka rimei ve toro na Atua kiano navenatuboiano.”
LUK 10:1 Ana ea bogo na, kiado Tubo bitiri bulag kiano naiolioluano tealo bereio. Nalo duelimo va aluo ba juo [72] abiniu, a naio jom̃a jidomii ka mia rila lo ava atukamu ka naio, ava aveve juo ea m̃arkomeli a ea vio nalo napano mia naio rivarlaka ealo iorou.
LUK 10:2 Naio berlogloglo jibe nei, naio berinavo “Be sinaniano miroano laka ju mermeruo ea tiniavio, mia tomu nalo maka ve telabo aju abarvar bijiilo binimei vonuo. Kamiu monoka kuvika sikili van boru na tiniavio nene, ka mia naio riila bulag tomu ta bunu avan ka avarvar sano sinaniano nene nalo rimei.
LUK 10:3 Ver tibe na, mo kamiu monoka kuvidu kenemiu m̃arabo kuvano. Mia bo kanio kamiu kuvitilubar ka nemiila kamiu kuba tavio, jibe ka napano kamiu kumitavukia nunu solbouo nalo, napano kumitum̃a kuba tavio ka mia kuviniua burum̃ara kuli deden nalo.
LUK 10:4 Bogo na ver kamiu kuvano, mia kuvar re siveu na kenemiu puruveru, mia kuvar re kenemiu basaro nalo, a kuvar re kulubue na jaamiu tai bereio. Mia kuviel yauo ga tibe na kuvano, kuvitukunu p̃ilip̃ili re ea m̃arabo van tomu nalo.
LUK 10:5 “A bogo napano kuvano-o kuviyotuba ea yimo na vabe, vite na be moti ka mia kuverenio, kuver tibe nei, kuverinavo ‘Tum̃aro toa vonuo nei.’
LUK 10:6 Ana verenio toro na toa vonuo nei naio tinien tii ka tum̃aro, mia tum̃aro neibano kuberenio mijikia to vija naio, mia verenio ve re toro tai tibe na, mia tum̃aro nei rimei ea kamiu bereio.
LUK 10:7 A kamiu kuvitatan ea re yimo nalo, mia kamiu kuvitua ga yimo ve takurano nei ga, mia kamiu kuvisaaro ga ka kumisen sinaniano vaio p̃eli na kumunu vaio na avar rimei asian van kamiu. Kamiu kuvimou re ka kuvijev vite novo vaio napano ajidom ala van kamiu, bior memedu ga ka toro na im̃auano monoka rivar kiano ijaiano ve telisu.
LUK 10:8 “Tibe na, m̃arkomeli na vabe na kuva kuviyotuba eaio, ver asaaro ka avitikar kamiu, mia monoka kamiu kuvisaaro ka sinaniano vaio napano mia asian van kamiu,
LUK 10:9 a mia kamiu monoka kuvieliel ka tomu na mieiano nalo na vio nene, a kamiu kuvijikia kuver kalo, kuver ‘Vonganei, Atua kanano navenatuboiano binimei vaataro ka kamiu, vonganei Atua jo binimei ka ve kenemiu Tubo naruei.’
LUK 10:10 “A bogo tealo mia kamiu kumalmaluvo ea m̃arkomeli tai, mia nalo asaaro re ka mia avuru kamiu kuva kuvitu kamliko. Verenio tibe na, mia kamiu kuvitakii ga m̃arabo labo kuvan na jel jouro medave ea komeli nene, a kuverial ka tomu nene nalo tibe na, kuverinavo
LUK 10:11 ‘Yevi na m̃arabo na kenemiu vio nei, kumemi numijuba kon bulagio den jaamemi, jibe ka kijokijo tai ka kamiu kuvisidomiio. Kamiu monoka tiniemiu ribobogia re, ka vaataro ga ka Atua kanano navenatuboiano riviedu kean kamiu ruei, mia kamiu kumilkue kanio, naruei kumilaluvuio ruei.’
LUK 10:12 “Kiniou neber riano ka kamiu, ka legiano na tibureiano, mia nalo na jibe na avar vironiano nana jikili loa tovulu nana mia nalo na bulukomeli na Sotomo re nua mia nalo avario.”
LUK 10:13 Naruei Yesu mil jikili ban tomu nalo ea vio tealo, berenio berinavo “!Kulo Korosin, bija kulo Betsaeta, kamiu kumila lelan kamiu toru liki-e mia! Ver kulo Taia vija kulo Saiton nalo aial kijokijo neibano kamiu kumialio ruei nei, mia nalo aviliglo nua ruei. Nalo maka ave kulo Ju, mia nalo aya m̃adabake ga a avuku bulukievi ea pariparilo ruei, nalo atutano atu tibe na ka tomu nalo avitilubar ka nalo amijog bova toru riano bior kialo kariano nalo.
LUK 10:14 Kiniou neber ka kamiu, ea bogo na tibureiano, mia kenemiu vironiano tovulu napano ve nalo nei kanalo.
LUK 10:15 “!A kamiu kulo Kapeneam, napano kubarvar ka kamiu m̃ele, napano m̃a kumisidom kumijalar kamiu ka kumitu mave levlevi, kamiu kuvitikar kamiu! Mia Atua rivuku bulag kamiu kuvatove laka ea bulukuti sebi.”
LUK 10:16 A Yesu ber bunu ka nalo, berinavo “Toro napano verenio ka mia naio rudukar kamiu, naio jo midukar kiniou, a ver toro napano maka sidom kamiu, naio jo maka sidom kiniou, a ver toro na maka sidom kiniou jibe na, naio jo maka sidom toro na toru napano naio miila kiniou nebinimei.” Naruei bija iliano na, Yesu miila kiano naiolioluano nalo abatavio ka ala im̃auano.
LUK 10:17 Naruei naiolioluano nalo nei aba amila im̃auano novo nalo telabo, karina iorou kanio ana abinimei bereio ea Yesu, napano tinielo bujo laka ka saariano ka vite nalo napano m̃a amilaio. Abinimei bereio aber ka Yesu, aberinavo “!Tubo, kumemi numim̃auka vite nalo ea siamo bano-o bokar napano sim̃aro nalo bunu ajutano ka kumemi!”
LUK 10:18 Ana na Yesu berdop̃elo berinavo “Ee, kiado im̃auano jibe na naruei. A kiniou bunu, nemial Sim̃aro jumolu den tiniabene, amiila deven naio mijoru batove jibe ka viobijiio tai.
LUK 10:19 Vonganei, kiniou nomijamo ka ban kamiu ruei, ka kamiu kumijikia kuvivikar maro a buruolu, a moroano na kiado uolu kiano naio totano ka jaamiu bunu, ana mia ve re titai rijikia re rila bulag kamiu.
LUK 10:20 Mia kamiu kuvarvar ka kamiu re ka vaio napano kiniou nemijamo ka ban kamiu, napano niununo va nalo ajutano ka kamiu, mia be vite takurano ga napano kamiu kumijikia kuvujo ka saariano kanio, nina napano siemiu nalo, ajirikakarlo aju joomo ea niosi na meuliano ruei.”
LUK 10:21 Mia ka bogo nei, Yesu bolkouo, berinavo “!Teta o, Tubo na vio mave a Tubo na yetemeriba! Neber siva banso, bior vite nalo napano ea tivelinio na kiniou, jau kobisip̃eio banlo napano kialo jidomiano jibe ka kiritete nalo ga, mia nalo napano ajidomii ka abe m̃asou laka, bija nalo napano ajidomii aber amijikia vite, mia jau komilavan vite nalo nei kalo. Riano, Teta, ninei javukia ga nana jau kojidomiio.”
LUK 10:22 A Yesu ber bunu berinavo “Karam̃aku mijamo ka vite nonovio jua jum̃aku ruei. Teta naio ga takurano napano mijikia batitig kiniou ka nobe kei, a kiniou napano nobe kenerinio, kiniou ga takurano napano nomijikia batitig naio, ka naio be kei. Kiniou bija nalo napano nebijauia bulaglo abe kanaku, ka mia nesiloglog Teta kalo ka mia avarkar tinielo eaio, kumemi naruei numijikia batitig naio ka naio be karimememi.”
LUK 10:23 Naurei Yesu barp̃ilig ka kiano naiaga-goano memedu nalo, naio mijuvaluva banlo bare ka nalo ga ajogio, naio berinavo “Atua mila bo ban kamiu, napano kumijikia kuvial vite nalo na.
LUK 10:24 Naverialiano telabo a parinio tubo telabo re nua napano ajidom m̃elea ka aial vite nalo na, mia maka aial kija bogo tai, a abijuku kouo ka ajog vite nalo na bunu, mia maka ajog kija leleio.”
LUK 10:25 Mia bogo tai bereio, toro tai napano be m̃asou bo ka tuboiano, naio jidom rijukujuku Yesu ea vikadeniano tai na kirisikili, naruei naio jumolu ju, bika den Yesu, berinavo “?Naverloglogiano, verenio kiniou nesidom nalavon ka navokar meuliano napano maka ve jukuti nene, mia kiniou monoka nala tum̃abe?”
LUK 10:26 Naruei Yesu berdop̃e banio, berinavo “?Mia kiado Niosi Lu naio ber venia ka tivelinio na? ?Jau kobuluku komialio ber jum̃abe?”
LUK 10:27 Ana na toro neibano berdop̃eio berinavo “Niosi Lu ber jibe nei, berinavo: Atua Sop̃i napano naio be kiamo Atua, jau monoka tiniemo tii naio, kodu naio to tukamu ea kiamo iviso momou, a ea kiamo meuliano momou, a ea kiamo sikiliano momou, a ea kiamo jidomiano momou, a jau monoka tiniemo tii nalo napano aju vaataro kaso, jau kovijuku rivu kalo, tavukia napano m̃a tiniem jiiso.”
LUK 10:28 Ana Yesu berkanio, berinavo “Nao, jau kober kirimemedu tanea na. Mia ver jau kala tibe na, mia jau kovokar meuliano na kojom̃a kobikanio na.”
LUK 10:29 Mia tete nei nao mijikia ka naio maka tom̃a rila rimemedu tibe na, mia naio jidom rila sop̃eiano, naio bika den Yesu, berinavo “?Ana be kei nalo napano m̃a ajuju vaataro ka kiniou, napano kiniou monoka nala rivu kalo?”
LUK 10:30 Naruei Yesu berdop̃e kiano vikadeniano nei ea jamerijiano tai, napano naio ber jibe nei berinavo: Toro tai, bogo tai naio juvan vio Yerusalemo naio jo miel batove yako Jeriko. Naruei naio jom̃a miel ba bokar vio kouo tai, naruei naio miilo ka taara tai na tomu nalo na vinauano, napano abiako eaio, amue tanea, naio, abar bulag nonovio kiano saba nalo, ana aburo kilkil, napano ajuvan toro nei m̃ariulu mijoru joa kiano m̃arabo togio.
LUK 10:31 Ana kanado toro lu tai, naio bunu jo miel naio iorou kanio ea m̃arabo nene, ana bogo na naio binimei vaataro kean toro neibano, naio ju p̃ilig kanio jel ea ikim̃arabo tivelinio ka ga bano, naio miel barlaka denio ban ga.
LUK 10:32 Ana iorou kanio, ana toro dolu tai miel binimei. Naio be Livai nalo tai na, napano ajum̃a amila im̃auano nalo nonovio ea Atua Kunuano Lu, mia bogo na binimei bokar toro nei, naio bunu maka sidom rijai naio, naio miel ga barlaka ban ea ikim̃arabo tivelinio ban ga.
LUK 10:33 Mia iorou ka bereio, toro dolu tai, napano naio jo miel ea kiano burutili m̃arabo na, naio binimei. Naio be tete re Sameria tai, naruei jibe napano romijikia, nalo nene abe bilbilu va toru naliko kito kulo Ju nalo. Mia bogo na naio binimei bokar vio na, mial toro na m̃ariulu mijoru mon ea m̃arabo, mia tinien miia naio toru.
LUK 10:34 “Mia naio binimei vaataro keanio, ana jekon batitigio kiano niajebijo nalo, a mia titikivaka ealo, a bitakar batitiglo bo. Naruei naio burular toro nene jumolu, midu jotano mon mave ea kiano togki taakano, ana miel ka bija naio bano-o abinimei abokar vio tai napano be yimo na jilimebiano tai joaio. Ana naio buru toro neibano ba joomo ea vio nene, miija batitig naio bo mia bo laka.
LUK 10:35 “Mia kavijo, ana naio bar kanano puruveru tai, bar ban boru na yimo na jilimebiano nei, berenio berinavo ‘Kiniou monoka navan ea kanaku m̃arabo, mia toro nei toa jum̃amo beamu vo. Kovitikar batitig ka vite nonovio, a verenio puruveru na rivare re, mia kiniou nevitii bereio ka bogo na nemei nei bereio ea kanaku ieliano.’ ”
LUK 10:36 Naruei Yesu bika den toro neibano bika vikadeniano nei denio, berinavo “?Jau komial tukunu nei jum̃abe? ?Ka nalo tolu neibano amiel ea m̃arabo napano toro nei jo mon eaio, na vabe kalo mila banio jibe ka napano naio be toro tai napano jo vaataro ka naio?”
LUK 10:37 Ana na toro nei berinavo “P̃eli nana tinien miiaio.” Mia Yesu ber ka bereio, berinavo “Ee naio nao, a jau bunu, jau kava kataki kiano bajago novo na.”
LUK 10:38 Mia ka bogo na, Yesu naliko kiano naiagagoano nalo ajum̃a amiel abavin mave Yerusalemo, naruei nalo amalmaluvo ea m̃arkomeli na telisu na Betani, ana ea vio na tira na Marita naio buru Yesu ban ea kialo vonuo.
LUK 10:39 Mia bogo na Yesu ba jo bijalo, ana Marita nene kuluene tai, siano Mere, naio jotano kamu ka Yesu jaano, naio jom̃a miagago ka kiano verloglogiano nalo.
LUK 10:40 Mia ka bogo na, Marita maka tovon ka riagago, naio jom̃a bukudeli toru ka rila vite nonovio riviniu tu vatitig rorea Yesu, a naio jo jidomii bijovijon ka im̃auano nalo nei. Mia iorou kanio, ana naio binimei mial Mere naio jom̃a jotano, naio jom̃a miagago ka Yesu, naruei naio ber ka Yesu, berinavo “Tubo, kulueku na naio jotano kurano ga jum̃abe na, napano kiniou ga takurano nojom̃a nomila vite nonovio nalo. P̃eli jau maka koto kovitilubar koviobo, mia bo kanio jau kover ka rimei riija kiniou.”
LUK 10:41 Mia kiado Tubo berdop̃e naio berinavo “Marita, jau kobe tira tai nam̃a kojo kojidom bijovijon vite m̃ele, a jau kojom̃a komijog bova m̃ele ka vite telabo na jibe na.
LUK 10:42 Mia be vite takurano ga jo ka mia jau kosidomii ve temi kanio, a vite nene Mere nei naio jo mileal ruei ea kiano meuliano, mia maka nejikia nodu lario den naio bereio.”
LUK 11:1 Bogoti tai, Yesu ba bolkouo ea vio tai, avona bisi, ana naio binimei bereio, ana na kiano naiagagoano nalo tai bika denio, berinavo “Tubo, bo laka ka ver jau kalavon ka koverloglog kumemi ka kumemi bunu nuvijikia nubolkouo, tavukia na Jone berloglog kiano naiagagoano nalo beamu ka abolkouo tavukia naio.”
LUK 11:2 Ana Yesu mijamo kanio, naio berinavo “Mo, ver kamiu kuvisidom kubolkouo, kamiu kumijikia kuver tibe nei, kuverinavo: ‘Karamememi, memedu ga ka kumemi nuvitu nuvatove ka siamo lu. Kumemi nubolkouo ka kiamo navenatuboiano rimei.
LUK 11:3 Kumemi nubika denso ka kavar simemi sinaniano na banei a legiano nonovio.
LUK 11:4 A koviekokoa kumemi rivior kenememi kariano nalo, bior nam̃a kumemi numitum̃a nubiekokoa nalo nam̃a abijuku bova ban kumemi. A jau kotuvan re vite nalo alavon kumemi m̃ele.’ ”
LUK 11:5 Mia Yesu naio jidom ka nalo monoka amerou re ka avika vite den Atua, naruei naio ber jamerijiano tai banlo, berinavo “Verenio ka bogiano vio vare, keiilo ka kanamo bilbilu tai napano miel binimei boru ea kanamo vonuo. Mia samo sinaniano maka bunu tai rito, mia monoka jau ketikiti kavan ea tai na kunuano jo vaataro keanso, monoka kovika sikili denio, kover ‘Koig, bilbilu tai miyotuba ka kiniou vonganei ga, mia kiniou nebe deio riano. Maka bunu ve titai leleio ka mia nomijikia nodu rivan naio ka mia senio. ?Jau samo sinaniano tai beva ju kovio napano komijikia kajamo kanio van kiniou beamu vo?’
LUK 11:7 “Mia jum̃abe, rojidomii rober p̃eli mia toro na mijikia riverdop̃e, verinavo ‘Ee koig, jau kala m̃elea re kiniou tibe na. Jau keialio, kumemi numituboniko m̃aratavo ruei, mia kumemliko kiritete nalo, kumemi numitua mememi jogu nalo ruei, naruei maka bunu nejikia notumolu bereio.’ Mia toro na maka rijikia river tibe na.”
LUK 11:8 Mia Yesu naio jusol tukunuano, ana naio ber kalo, berinavo “P̃eli bogo tealo toro tai rijikia sidomii iakurano ka riijaso bior jau kojo vaataro ga ka naio. Mia ver jau koim̃au re ka kovivika sikili denio vano-o, mia monoka sian vite venia napano m̃a kojo kobivika banio.”
LUK 11:9 Mia tibe ka kiano jamerijiano Yesu ber bunu kalo berinavo “Toro na ver jom̃a bika vite, julaka mia naio mijikia rijevio, mia verenio toro na jom̃a jirag vite julaka, mia naio mijikia rilealio, mia ver toro na jom̃a miniania m̃aratavo julaka, mia m̃aratavo nene mijikia rivetavo kanio. Tibe na, mia kamiu kumijikia kuvar vite nalo nam̃a kumitum̃a kubika denio, a mia kamiu kuvileal venia na kamiu kumitum̃a kumisiragio denio, a m̃aratavo nam̃a kumitum̃a kuminianiaio mia naio rivetavo ka kamiu.
LUK 11:11 Ver kenerimo tai siserio, naio rivika niado sesa na jo, mia maka kejikia kodu maro tai vanio,
LUK 11:12 p̃eli na ver rivika boboti tu na jo, mia maka kejikia kodu buruolu rivan naio ka senio.
LUK 11:13 Be riano ka kamiu kube tomu na kirivova ga nalo, mia maka kamiu tai mijikia rila tibe na, kamiu kumitu kumisaaro julaka ga kam̃a kumisian tonovo nalo ban kenerimiu nalo. Jibe ga na, bogo napano kamiu kumitum̃a kubika den karamemiu na tiniabene, naio jaaro ga ka sian Niununo Lu van kamiu kenerinio nalo.”
LUK 11:14 Ana iorou kanio, ana aburu m̃arabo ka toro tai na sim̃aro ban ea naio binimei ban Yesu, sim̃aro nene mila toro nei maka ril, mia Yesu mijidiglar sim̃aro nene denio, naruei naio mil bo bereio, mila ana nalo napano amial vite nei amiilo toru laka.
LUK 11:15 Mia nalo tealo amijoku, naruei nalo aberii niegeniege Yesu, nalo aberinavo “Tete na naio jom̃a mijil bulag sim̃aro nalo ea ga moroano na sim̃aro nalo kanalo tubo, napano siano Belsabel, naio mijamo ka ban naio.”
LUK 11:16 A nalo tai bereio, ajidomii bova bunu ka Yesu, naruei nalo ajum̃a amilavon naio, nalo ajidom ala lup̃ilup̃i naio ka naio rila kijokijo tai ea moroano na vio mave ka amijikia aialio.
LUK 11:17 Mia Yesu mijoglubarbar kialo jidomiano nalo, ana na naio berinavo “Ver tubo tai, kanano tomu nalo avuruburelo, napano mia togio atup̃elo ka togio dolu, mia tubo nene kanano im̃auano nalo monoka atibirbil. A ver vonuo tai, atum̃a avuruburelo napano togio sidom rijil togio dolu, mia nalo na maka ajikia atu rivu bogo tai.
LUK 11:18 ?Jibe ga na bunu, ver sim̃aro nalo na Setano kanano atum̃a avuruburevurelo ruei, ana mia navenatuboiano na Setano kanano tumolu tu tum̃abe? !Ana kamiu kumitum̃a kuberinavo jibe na naruei, ka kuber kiniou nojom̃a nemijil bulag sim̃aro dolu nalo ea moroano na burum̃ara sim̃aro na Belsabel kanano, mia maka rijikia tibe na leleio!
LUK 11:19 ?Mia ver tibe ka nam̃a kamiu kuberenio, jum̃abe naruei ana kam tealo bunu ajum̃a amijil bulag sim̃aro? ?Kei naio mijamo ka moroano na banlo, p̃eli Setano bunu ga bo? Bo ka ver kenemiu naiagagoano nalo nam̃a ajum̃a amijil bulag sim̃aro nalo ajog kenemiu iliano nalo.
LUK 11:20 Mia makanio, kamiu kuber nina maka rimemedu na. Mia kiniou nojom̃a nemijil bulag sim̃aro nalo ea moroano na Atua jum̃ano ga, mia vite na berialio ka Atua kanano navenatuboiano naio ju iviso ka kamiu ruei.
LUK 11:21 “!Kamiu kuvialio! Jibe kanio napano ver torkouo tai, naio rivar kiano saba na mira nalo, a tukuku vatitig ka burum̃ara kunuano. Naruei, vite nalo na toru nei kiano aju bo ga jouro ea kanano burusio. Naina naruei Setano kiano im̃auano jibe na naruei.
LUK 11:22 Mia ver torkouo dolu tai rimei napano naio p̃irinio jikili loa naio, mia naio rila mira kanio-o tuvulu Setano, ana mia naio mijikia rivar bulag vite nalo na mira na be kanano, napano beamu barkar tinieno eaio, a naio mijikia rivar vite nonovio napano ju jouro ea burusio na torkouo kanano, tan kalo van kanano tomu nalo.
LUK 11:23 “Toro napano maka takisor kiniou, naio jo berbure kiniou, a toro na maka rim̃au vija kiniou ka kumemi nuvuru kanaku tomu nalo amei vio takurano, naio jom̃a mijil dedade ealo abeve terakurano.”
LUK 11:24 Ana Yesu ber bunu, berinavo “Bogo tai, bogo nam̃a amijil lar niadu den toro tai, niadu nene mijikia riva yeturu ka sirago kunuano dolu tai. Mia ver rileal re tai, mia naio riverinavo ‘Ee, mia nalavon ka navan bere ea kunuaku moruo na beamu vo.’
LUK 11:25 Mia bogo napano naio binimei, mia rileal ka yimo nene meravo bo jo, abar batitig vite nene nalo biniu ju memedu bo ruei.
LUK 11:26 Ana mia naio rivan rivuru niadu ve aluo dolu napano nalo abova loa naio lie vo, amei vija naio, ka na mia nalo ava joomo bereio ka atua toro nene. Ana toro nene, beamu kiano meuliano bova, mia iorou kiano meuliano bova bova laka.”
LUK 11:27 Ana ka bogo na, tira tai jo naliko nalo napano ajum̃a amial vite nalo nei, napano m̃a amijog Yesu kanano iliano, naruei tira nei jaaro m̃ele kanio. Mia naio miaga m̃erere laka naio berinavo “!Aiou liki! Koniomo napano bariso, midu yu banso, Atua kiano ilivuiano ve toru laka toa naio, napano bar tete tai jibe ka jau.”
LUK 11:28 Mia Yesu berdop̃e ban naio, berinavo “Nao, nina be riano na, mia kiniou neber ka jau ka mia Atua kiano ilivuiano rimei ve toru lie bereio vo van toro kei napano naio monmonea Atua kiano iliano nalo, naio mila venia napano naio jom̃a berenio.”
LUK 11:29 Ana ka bogo na, tiniobi nalo nam̃a amiagago ka Yesu nalo aju abinimei telabo lie vo, mia Yesu naio mijikia ka nalo miroano kalo nalo abinimei ka ajidom aial kiano kijokijo nalo ga, ana naio mil banlo, berinavo “Kiniou nemial jibe ka tomu nalo na taara na kenemiu banei abova laka. Nalo aju ajidom aial kijokijo toru laka, mia makanio, mia Atua maka rijikia sian kijokijo tai leleio vanlo. Mia naverialiano Jona, kiano kijokijo re nua ga, nina ga mia amijikia aialio.
LUK 11:30 Atua miila Jona, jibe ka kijokijo tai ban nalo na vio Nineva re nua ruei, ana naio miila bunu kiniou Kulorinio Kenerinio nebinimei jibe kijokijo tai ban kamiu na vonganei.
LUK 11:31 “Mia kulo Nineva re nua napano amijog Jona kiano iliano nalo, abiliglo ka bogo nene, a mia nalo na atumolu ea legiano na tibureiano, mia aver bulag rimemedu kenemiu torokoriano nalo, bior be toro tai napano naio loa laka ka Jona naio jo bija kamiu, mia maka kuvilig kamiu. “Nanua bogo tai bunu tira na toru tai na naio be parinio tubo tai napano naio jumolu ea kiano buruvenuo, napano jo koalabo laka, naio batove binimei ka rijog tormoruo parinio tubo Solomon kiano ilimasosouano. Naruei tira na toru nei bunu mia naio tumolu tu ea legiano na tibureiano, naio river bulag rimemedu kenemiu torokoriano nalo, bior be toro tai napano naio be masou loa Solomon naio jo bija kamiu, mia kamiu maka kuvisidom naio leleio.”
LUK 11:33 Mia Yesu ber bunu, berinavo “Bogo na ver rejelan yulu, kito maka retelan ka mia rava roduvanio toa bulutanbo tai ea borotano, p̃eli na mia kito reivekoio ka basaro tai bereio, mia kito rejelanio ka mia reiveio takilele mave, ka mia ver toro na rimei mia mijikia rial ka yulu mereralii vio nonovio biniu.”
LUK 11:34 A Yesu ber bunu, berinavo “Toro mirano naio jibe ka vio takurano napano yulu mijikia mereraliio binimei joomo ea mokotenano. Tibe na, ver miramo rimeravo rivu, rivitii batitig vite nalo, mia tibe ka napano tiniemo bujo magmago ka yulu. Mia verenio miramo rivova, tinie jii vite nonovio nam̃a jom̃a mialio, mia jibe kanio napano tiniemo bujo magmago ka melijokouo.
LUK 11:35 Tibe na, mia kamiu monoka kuvitikar rivu, ka yulu napano joa tiniemiu rimei re bunu tibe ka melijokouo bereio.
LUK 11:36 Mia ver tiniemiu rivujo ka yulu tulaka nam̃ariga, napano maka ve melijokouo tai ve telisu toaio, mia kenemiu meuliano rimerera vatitig rivu, rudulii vatitig vio nonovio rivu.”
LUK 11:37 Mia Yesu mil ban tiniobi nalo bano-o, naruei Varisis tai napano jom̃a miagago kanio ber ka Yesu berinavo mia rivuru naio rivan ea kunuano, ka rila sano sinaniano tai. Ana na Yesu ban bija naio, mia bogo na sinaniano amiomon ju, Yesu ba jotano ea vio na sinaniano.
LUK 11:38 Naruei ka bogo nene, Varisis nalo abokar jikili kialo tuboiano tai ka toro monoka takii m̃arabo tealo ka m̃a sekon jum̃ano karina mijikia sinano. Mia Varisis nei naio jidom ber Yesu naio be toro lu tai, naio monoka rila tibe ka napano kialo bajago na jikili nei berenio, mia bogo napano naio mial ka Yesu maka sidom bijon ka naio rilaio, naio miilo toru laka kanio.
LUK 11:39 Ana Tubo mil ban toro nei, naio berinavo “Kiniou nemijikia kenemiu bajago kamiu Varisis nalo ruei. Kamiu tiniemiu jii m̃elea ka m̃a kumisekon vatitig rivu dam̃ariga kenemiu baja nalo a kenemiu baju nalo, ana kumitum̃a kube m̃arou kanio, kumitum̃a kuberiam̃a kamiu kumeravo, a kube lu. Mia burum̃ara niamiamo na bijurukar kamiu kia navo, bior kenemiu iviso nalo abujo magmago ka m̃a kumijukubin toro, a kumila kiki toro, a bajago nalo na kirivova jibe na.
LUK 11:40 !Ai, abe mia m̃a kuviavovu m̃elea re tibe na! ?Kamiu maka kuvitilubar ka Atua nam̃a jii vatavio na vite nonovio, naio ji bunu vajoomo na vite nonovio, mia bo laka ka ver kamiu kuvilakon nono tivelinio na kamiu rimeravo rivu ve riano, vatavio a vajoomo bunu.
LUK 11:41 Tonovo nalo nam̃a kamiu kumitum̃a kumisonlo toru bogo nonovio ban ea kenemiu baju nalo a bija kenemiu baja nalo, ver kamiu kuvitum̃a kuvilavon ka m̃a kuvio ka kija ga rivan talim̃asa nalo ga, mia rivu. Ver tibe na, p̃eli mia kamiu kuvial ka kenemiu vite nonovio nalo amei rimeravo vatitig ruei, ana mia m̃a kumila bijon re bunu kenemiu bajago dolu nalo.”
LUK 11:42 Naruei Yesu berii bajago nalo na juboluboiano na navurim̃araboiano na nalotuano nalo ba lie vo, naio berinavo “!Kamiu kulo Varisis, aua! Kamiu kumila bulag kamiu toru laka, mia rivova laka van kamiu. Kiniou nemijikia ka kamiu kumitum̃a kubitikar batitig bo dam̃ariga, ka ver kubar semiu m̃arsinaniano duelimo, mia monoka ve takurano rivan ea Atua kunuano, tavukia na tuboiano naio jom̃a berenio, a kumitum̃a kumila jibe na ka saba nonovio na be kenemiu, ba bokar bunu m̃asebitu sesa nalo a vite nalo bunu na jibe ka m̃arsili nalo. Mia vite nalo na tomormoruo nam̃a tuboiano berenio, kamiu maka kuvisidomialio leleio, jibe ka nam̃a ber monoka kamiu kumemedu rivu, a kamiu monoka tiniemiu tii Atua a kulo dolu nalo bunu. Ver kamiu kuvisidom kuvokar sikili vite nalo na tertelisu nei, naio bo ga, mia vite nalo na tomormoruo nei naruei naio bo ka kamiu kuvitum̃a kuvila ruei, mia maka lele kuvilaio.
LUK 11:43 “!Kamiu kulo Varisis o! Kamiu kumila lelan kamiu toru laka, mia rivova laka van kamiu. Joomo ea yimo nalo na volkouano, kamiu kumisidom ka bogo nonovio kuvitutano ea vio na be tomu na tortoru nalo jelelo ga, a verenio kuviel ea tomu nalo miralo, kumisidom ka avatove ka kamiu, a avio vatitig kamiu, a averinavo ‘Aiou, naverloglogiano novo, kavijo bo!’
LUK 11:44 Mia ve kirivova laka rivan kamiu bior kamiu kube tekurano ga, kumitavukia m̃artanbo moruo nalo na tinielo bobogia ea ruei, amiel p̃ilinio mave ea ga, maka bunu ve tinielo ka vite jono tai napano menunu mon tano nei.”
LUK 11:45 Ana ea bogo na, toro tai napano naio be masou bo ka tuboiano, naio bunu jom̃a miagago, ana mijog jibe ka Yesu kiano iliano bokar naio bunu bija nalo napano amim̃au jibe ka naio, ana na naio berinavo “!Naverloglogiano, kiniou nomijog jibe ka kojidom keil niegeniege kumemi bunu!”
LUK 11:46 Ana Yesu berdop̃e, naio berinavo “!Nao-o, mia rivova van kamiu tomu nalo natuboiano bunu! Kamiu kumitum̃a kubitiri bulag bereio tuboiano sesa nalo tivelinio ka nalotuano bogo nonovio, nalo ajibe ka vite na teremi napano kumivon kakarlo ea tomu nalo taakalo ka monoka avarlo, mia kamiu kumitu jibe na ga, maka kuvikulkulu ka m̃arjukujumemiu tai leleio ka rilavon ka riijailo.
LUK 11:47 Mia rivova van kamiu, bior kamiu kumitum̃a kumiyovovua batitig m̃artanbo na naverialiano nalo na Atua kiano, mia kamiu kubevirare ga ka korobimiu tormoruo nalo re nua, napano nalo naruei amuebinvin naverialiano nene nalo am̃arm̃aro.
LUK 11:48 Kamiu bija nalo nei kubare ga, bior nanua, tormoruo nalo nei amue naverialiano nalo, mia banei kamiu kumisaaro ka kialo im̃auano nene, kumitusolio bereio napano m̃a kumitum̃a kumiyovovua martanbo nene nalo.
LUK 11:49 “Kamiu kumitibe ka ga napano ilimasosouano na Atua kiano ber nua, naio berinavo ‘Mia kiniou neiila kiaku naverialiano nalo a atevi nalo aviedu ealo, mia ala lelanlo, p̃eli mia auebinvinlo am̃arm̃aro.’
LUK 11:50 Iliano nei sano nioti nene ber mia kamiu naruei kuvokar vironiano nam̃a korobimiu nalo re nua amuebinvin naverialiano nonovio nalo, jikar ka bogo na tikariano na yetemeriba nei.
LUK 11:51 Nina jikar ea Epel, binimei bokar Sakaraia, napano korobimiu nalo amue tam̃aria naio iviso ka boda bija Vio Lu joomo ea Atua Kunuano Lu. Riano, kiniou neber ka kamiu nei, ka vironiano na burukija na Atua kiano naverialiano nalo jua kamiu na vonganei.
LUK 11:52 “Nao, mia ve kirivova lie vo van kamiu tomu nam̃a amijikia batitig tuboiano, bior kamiu naruei kumidu van navetavoiano na m̃aratavo na jikiaiano, ana kamiu maka bunu kuvitum̃a kuva joomo eaio, a kamiu kumitum̃a kumituko m̃arabo ka tomu dolu nalo nam̃a ajum̃a amila vio ka ava jouro.”
LUK 11:53 Ana Yesu ber iliano nalo nei bisi ana naio batavio den yimo neibano, naruei naverloglogiano na tuboiano naliko Varisis nalo tinielo bitunu tanea ka naio, napano tiniel mimi laka. Ana na nalo abie sosor Yesu dam̃ariga, nalo ajum̃a abika iliano nalo a vikadeniano nalo na jikirkili banio, ka alavon ka ayukuru naio a ka rila naio river iliano tai na maka rimemedu.
LUK 11:54 Amiliviko Yesu jibe naio be temeul deden tai, bior ajidom ka aleal kiano iliano nalo tai ka mia amijikia atibure naio riviorio.
LUK 12:1 Ana na tiniobi nalo ajum̃a abinimei ea Yesu keano vo, ajovulu menu na tomu nalo miroano. Mia bogo nam̃a abinimei vio takurano jibe na, vio telisu garuei, napano m̃a ajum̃a amivinkakarlo ga. Ana na bogo na Yesu maka ril vanlo vo, mia naio mil ban kiano naiagagoano nalo jukamu, berinavo “Kamiu monoka kuvitikar vatitigio ka Varisis nalo kialo bajago va nalo, bior nalo ajum̃a amil ka kuluniolo ga, ajum̃a amil moruo mia amila sibi ga. Kialo bajago va nalo nei amijikia amaluvo rivokar a rila bulag toro dolu nalo, jibe isi na joko telisu ga mia kirisop̃eli ba mim̃au bokar joko nonovio.
LUK 12:2 Vite nonovio na bova nam̃a tomu na jibe na ajum̃a amilavanio, p̃eli nam̃a aber luklukua ga, mia amalmaluvo ea vio medave navo, ka mia aviniu ajikiaio.
LUK 12:3 Iliano vaio nam̃a toro jom̃a berenio ea meljokouo, mia monoka ajogio bereio ea legiano, a vite nalo nam̃a toro jom̃a mijuvaluva kanio ea kunuano ga, mia aiaga m̃erere bereio ea tomu nalo miralo, ka mia aviniu amijikia ajogio.”
LUK 12:4 Ana na Yesu ber ka bunu kiano naiagagoano nalo, naio berinavo “Banalo, kiniou neber ka kamiu ka kamiu kumerou re ka nalo nam̃a amijikia aue tam̃aria mokotenemiu nalo ga, karina mia maka bunu ajikia ala titai bereio ka niunumiu nalo.
LUK 12:5 Mia nejidom neil vatitig rivan kamiu ka mia kumerou ka toro kei? Mia kamiu monoka kumerou riano ka Atua ga, napano mia naio mijikia rila niabemiu rim̃aro beamu, karina mia mijikia rivu niunumiu bunu rivan ea vio nam̃a ajog rivova eaio. Lerinio, toro na naruei kamiu monoka kumerou ka naio.
LUK 12:6 Mia ver kumerou kanio, mia kamiu maka bunu kuvijikia kumerou ka todolu bereio, bior Atua jom̃a bitikar kamiu, naio jo jidomial kamiu. Kuvisidomii von menu sesa napano kirijako. Nalo miroano laka janea vio ga, ajibe ka soro ga, ap̃iliṽili kalo veru telisu ga ka kirijako jimo, mia Atua jom̃a tinien maio kalo abeve terakurano dam̃ariga, naio maka tinien ribobogialo.
LUK 12:7 A vijumiu nalo na ea pariparimiu bunu, miroano laka, mia naio buluku nonovlo beve terakurano ga. Mia Atua naio jo mial kamiu kubo laka jovulu kirijako nalo nei, naruei mia naio rivitikar vatitig kamiu rivu ka vite nonovio na kenemiu meuliano.”
LUK 12:8 Ana na Yesu berenio, berinavo “Kei nam̃a berial kamu ka tomu nalo miralo ber naio be kanaku toro tai, mia kiniou Kulorinio Kenerinio, kiniou bunu neverial siano van nailiano nalo na mave ka toro nene be kanaku.
LUK 12:9 Mia toro kei nam̃a berial kamu ka tomu nalo miralo ber naio maka ve kiaku, mia kiniou Kulorinio Kenerinio kiniou bunu neverial van nailiano nalo na mave never toro na naio maka ve kanaku.
LUK 12:10 “Kariano nalo bija ilivovaiano nalo, bija iliano nalo nam̃a mila lelan kiniou Kulorinio Kenerinio, Atua mijikia riviekokoa toro riviorio, mia toro na ver mila lelan tolu na Niununo Lu, berii Niununo Lu kiano im̃auano, berinavo Sim̃aro ga mim̃aukanio, toro na jibe na, Atua maka rijikia riviekokoa bogo tai leleio.
LUK 12:11 “A verenio bogo tai, tomu nalo tiniel ser kamiu, mia avan ea ilivatitigiano ka kamiu. Mia amijikia avuru kamiu kuvan kuvitumolu kuvitu kamu ea tomu na tortoru na yimo na volkouano nalo miralo, a ea komeli bunu, mia kamiu kuvisidomial m̃ele re ka mia kuverdop̃elo tum̃abe, p̃eli na mia kuver iliano na vabe vanlo.
LUK 12:12 Rimonloglog aura nei ga, mia Niununo Lu ga rijai kamiu, ka riverloglog kamiu ka iliano na vabe na mia kamiu kumijikia kuverenio.”
LUK 12:13 Naruei tiniobi nei napano aju nei nalo tai, naio bio ban Yesu, berinavo “Naverloglogiano, kuruaku naio jom̃a mijukubin kiniou-o mia, naio maka tom̃a tan ka batitig karamememi jajum̃ano rivija kiniou. Bo kanio mia jau kover kanio ka naio rila rive verare ga vija kiniou.”
LUK 12:14 Ana na Yesu berdop̃e, berinavo “Ai, abe vite na maka ve kanaku ka nalaiio. Kiniou maka nove toro nana mia netibure kamiu.”
LUK 12:15 Jibe na naruei ana na Yesu maka rila tibe ka na kema nei naio berkanio, mia naio jian iliano tai tivelinio ka sidom m̃elea vite nalo. Naio berinavo “Kamiu monoka kuvitikar rivu, maka rivu ka kuvitum̃a kuvijoku m̃ele ka kulo dolu nalo, kumisidom m̃ele ka kuvar vite nalo na be kialo. Kiado meuliano maka toa vite ve telabo nalo napano na roju rabario, mia kiado meuliano jikili jua vite dolu.”
LUK 12:16 Mia Yesu jusol kiano iliano ea vio na lie vo, naio ber jamerijiano tai banlo, naio berinavo “Toro sanibaiano tai kiano borotano toru laka, a bo laka, naruei kiano tiniavio nalo abar marimeuano toru ealo.
LUK 12:17 Mia tete nei naio mial sinaniano nalo nei, naio maka bunu rijikia mia rila tum̃abe naruei, ka mia rivar vatitig sano sinaniano nalo nei tua vio na vabe, bior kiano yimo na varvatitigiano na sinaniano bija kiano vio dolu nalo abujovujo nonovio ruei.
LUK 12:18 Ana na kema neibano, berinavo ‘!Mia noue bulag kanaku yimo na varvatitigiano na sinaniano moruo nalo nei, ana mo nomijikia noim̃au kanio na be terivou dolu nalo bereio, na mia nalo ave tortoru lie vo, na mia rivare ka sinaniano a vite dolu nalo na miroano nei kanaku.
LUK 12:19 Mia bogo na ver noim̃au kanio riviniu, mia kiniou naial kiniou tibe ka kiniou riano, kiniou nobo kija naruei! Riano ga, mia kiniou nojog rivu! Mia kiaku saba na miroano nei, mia nesenilo rivano-o mia avitikar vatitig kiniou rivano-o rivokar yuka ve miroano. Ka bogo na, mia noim̃au lele re bunu mia nesen vaio na nojidom, a mia nomunu uei tibe na ga, mia notoa meuliano nabo nam̃ariga na.’
LUK 12:20 “Toro nei naio jom̃a jidom jibe na bano-o, mia naio maka rijikia ka Atua berii ruei ka mia ril vanio naruei, naio berinavo ‘E kodovo, komiavovu ga na, bogiano nei ga, kiniou nojidom nodular bereio kanamo meuliano denso. A vite nalo na miroano nam̃a komim̃au bijon kalo na, nam̃a jau komiobijilo be kanamo na, mia ave kei kiano bereio liki na?’ ”
LUK 12:21 Ana na Yesu ber kalo, berinavo “Mia tibe na naruei rivan tomu nalo nam̃a ajum̃a abarbijii kialo saba telabo, napano abe tomu na sanibaiano tivelinio na yetemeriba nei, mia maka leleio ave sanibaiano tivelinio na saba nalo na ea Atua.”
LUK 12:22 Ana na Yesu ber ka bunu kiano naiagagoano nalo, naio berinavo “Kar tena, kiniou naber ka kamiu, ka maka rivu ka kenemiu jidomiano rivujo m̃ele ka im̃auano na kuvitikar kamiu ga, ka na mia m̃a kuvivika, kuverinavo ‘?Mia vio na vabe na mia kito romijikia releal sinaniano?’ P̃eli na ‘?Mia rovokar kulum̃arauo na royaio tum̃abe?’
LUK 12:23 Jidomiano nalo na maka rimemedu, bior kenemiu meuliano naio bo loa ka sinaniano, a niabemiu naio bo loa ka kulum̃arauo.
LUK 12:24 Kuvisidomii von menu maina nalo nam̃a ajum̃a amierier janea vio nalo na. Nalo na maka m̃a aim̃auka kialo tiniavio, a maka avavenei ka avarbijii sinaniano rimei vonuo, a maka avar batitig salo sinaniano nalo tua vio nene tai. Mia Atua jom̃a baganlo, a ea kiano vitiiano, naio mial kamiu kubo lie loa ka menu nalo, ana mia naio rivitikar kamiu rivu laka tovulu nalo.
LUK 12:25 ?Kamiu kuberiam̃a toro napano jom̃a jidomii kiano meuliano toru laka naio mijikia rila kiano meuliano na bulati na rimei vetebievi kija bere ve telisu?
LUK 12:26 Makanio, maka tibe na, mia bior kamiu maka kuvijikia kuvila titai na telisu jibe na, bo kanio kamiu kuvisidom bijovijon re vite dolu nalo na ea kenemiu meuliano nalo.
LUK 12:27 “Kuvisidomii von buruniegniegi novo nalo nam̃a ajum̃a amililuo janea vio na. Nalo na maka m̃a atu aim̃au a maka m̃a atulu m̃alo kuluniabele nalo. Mia kiniou naber ka kamiu, Parinio tubo Solomon re nua, napano naio be nasanibaiano laka, a naio be kiano saba nonovio, kulum̃arauo nalo nam̃a miyaio maka rivar niogniogu na bo tibe ka m̃aniegniegi nalo nei.
LUK 12:28 M̃aniegniegi nalo nam̃a abe tena bogoti takurano ga, mia beni ana aisebilo ea sebi, mia Atua jo miyovovualo batitigio abo laka. Jum̃abe, kuberiam̃a Atua maka rijikia rivar kulum̃arauo van kamiu? Kaleliki, kamiu na maka kuviekar naio sikili leleio a!
LUK 12:29 “Bior vite nalo na, mia maka rivu ka kenemiu iviso rivujo ka jidomiano nalo na, kuverinavo ‘?Tum̃abe ana na mia rosinan, a romunu, a releal kulum̃arauo?’ Mia maka rivu ka kuvitum̃a kuvisidomii bijovijon m̃elea laka tibe na.
LUK 12:30 Ierinio, tomu nalo reraio na buruvenuo nonovio na yetemeriba neibano ajum̃a ajidomii m̃elea vite nalo jibe na bogo nonovio ga, mia kamiu, karamemiu naio mijikia ruei ka monoka kuvar vite nalo na jibe na.
LUK 12:31 Tena be moti ka mia kuvisidomii ve toru ea kenemiu iviso nalo, naio be Atua kiano navenatuboiano. Mia verenio kuvila tibe na, ana na mia naio rivar bunu vite dolu nalo nei rivan kamiu.
LUK 12:32 Ierinio kiaku nunu sesa nalo, karamemiu naio jidom toru ka rijamo ka kamiu kumei kuve tubo ka kiano tomu nalo, ana na mia kamiu kuvisidomial re titai leleio, mia vite nonovio rimei rivu ka kamiu.”
LUK 12:33 Ana na Yesu ber bunu ber “Bo kanio kamiu kuṽiliṽili bulag ka kenemiu saba nalo na, kuvar veru nene van talim̃asa nalo ka kuvijailo. Ver kuvitum̃a kuvila tibe na, jibe kanio kumitu kubar kenemiu burum̃ara basaro tai joa vio mave, napano mia maka rijikia rimei dagdago bogo tai, a kuvitum̃a kuvison bijii kenemiu saba nalo na miroano rivan eaio, ka mia kuvarkar tiniemiu eaio, ka mia toro na vinauano rijikia re ka rivar bulagio den kamiu bereio, p̃eli na mia sivinia ser dudulio re.
LUK 12:34 Mia bo kanio kamiu ve kenemiu saba novo nalo na atua vio mave tibe na, bior mia kenemiu jidomiano nalo atu tulaka ea vio na ga napano kenemiu saba na bo nalo ajuaio.”
LUK 12:35 Ana na Yesu ber bunu kalo, berinavo “Kamiu monoka kuvitu derevijo tulaka ka mia kenemiu Tubo riyotuba ka kamiu. Kamiu monoka kuvitibe ka tomu nam̃a amim̃au toro na toru tai kanano, napano naio juvanlo ka ban ea soriano tai. Naruei nalo amiyovovualo, ajelan bunu yulu nalo, ajumormolu aju, mia bogo vaio napano mia kialo toro na toru naio rivoru, naio rimei rinia m̃aratavo, mia nalo aju rorea ruei, amijikia avetavo kanio vaarakurano ga.
LUK 12:37 Mia burum̃ara ilivuiano van tomu nalo nam̃a amim̃au jibe na, ka bogo napano kialo toro na toru boru keanlo, mia nalo aju rorea ruei, nalo ajevijo aju. Mia kialo toro na toru naio saaro ve toru kalo, ana na mia naio riva riija naio, karina mia rimei mia amiilo ka naio riviolo ka amei atutano ea kiano vio na sinaniano, naio biovio ka sinaniano novo tai banlo.
LUK 12:38 Mia bekurano ka ver vio bobogio ruei, p̃eli na ba bokar bogiano vio vare, p̃eli na vaataro ka tu riolu, mia ver toro na toru naio rimei, rial ka kiano tomu nalo ajevijo aju rorea naio jibe na, mia naio rila vatitiglo rivu-o mia.
LUK 12:39 “Mia bereio be verare ga ka ver toro tai napano mijikia memedu ka bogo na toro na vinauano mia rimei ea kunuano, mia toro nei maka rijikia tuvan kunuano to ga tibe na ka naio riva vio dolu, naio monoka to derevijo rorea naio to.
LUK 12:40 Tibe na, kamiu bunu monoka kuvitu rorea vatitig rivu ka mia kiniou Kulorinio Kenerinio nomaluvo, bior mia nomaluvo ka kamiu bereio ea bogo tai napano maka toro tai rijikiaio, p̃eli na tom̃a sidomii ka mia river nemei bereio eaio.”
LUK 12:41 Ana mo Pitere bika den Yesu, berinavo “?Tubo, jamerijiano na jau kober vonganei na, jau kober ban kumemi kanamo naiagagoano ga, p̃eli na kober ban tomu nalo nei ga abiniu?”
LUK 12:42 Mia Yesu maka sian verdop̃eiano nene rimemedu vanio, mia naio berdop̃e ban ea jamerijiano tai. Jamerijiano nene naio jibe nei, ber “Ver toro na im̃auano tai, napano naio be masou bo laka, a naio biekouo ea kiano im̃auano, mia naio rim̃au tum̃abe naruei? Ver kiano toro na toru juvan vio ka riva koalabo, mia naio tuvan kiano naim̃auano nalo atua naio jum̃ano. Mia kema nei naio rivitikar kiano tomu na im̃auano dolu nalo, mia naio rivokar vatitig im̃auano nalo nene.
LUK 12:43 Mia bogo na toro na toru naio rimei bereio, mia naio rileal ka kiano toro na im̃auano nei, naio jo bokar batitig im̃auano nalo nene kiano vo. Mia ka bogo na, mia toro na im̃auano nei naio rijog rivu ve toru laka,
LUK 12:44 bior mia toro na toru nei naio tuvan vite nonovio na kanano tua jum̃ano. Ierinio, mia Atua rila tibe na ga bunu.
LUK 12:45 “Mia ver toro na im̃auano nei naio rim̃au rivova, mia bogo na ver kiano toro na toru nei tuvan vio ka riva to koalabo, mia naio jidom riverinavo ‘E, toro na toru nei naio ba jo yako kirisiou laka ruei, p̃eli mia rimei re bunu naruei.’ Ana na mia naio tumolu rila kiki tomu na im̃auano dolu nalo, a rivijuku rivova ka tire nalo na im̃auano, a mia naio tom̃a sen veru na toro na toru nei kiano, a riva rimunu uei ea legiano nonovio.
LUK 12:46 Ana mia toro na toru nei naio rimei bereio ea legiano tai na mia toro na im̃auano nei naio riilo kanio garuei, ea bogoti tai na mia naio risidom re ka mia boru nei rimei eaio. Ana na mia toro na toru nei sian burum̃ara vironiano van toro nei napano mia rila naio riva toa vio na tomu na pariparilo kirisikili ajuaio.
LUK 12:47 “Mia toro na im̃auano napano mijikia batitig venia napano kiano boru jidomio ka naio monoka rilaio, karina maka rilaio, mia monoka avitii vatitig naio.
LUK 12:48 Mia toro na im̃auano napano mila na bova memedu ga ka mia avitii vatitig naio riviorio, verver naio maka rijikiaio, mia avitiv naio ve toru re. “Toro na Atua mije ban naio ve toru, Atua jidom ka rial toro nene rim̃au ve toru rivijaio. Mia ver toro napano tomu nalo amije vite nalo miroano monea jum̃ano, mia amijikia avika vite ve miroano lie vo den naio bereio.”
LUK 12:49 Ana na Yesu berenio berinavo “Kiniou nebinimei ka noyon sebi rimemedu ea vio yetemeriba nei, mia bo ka ga ver sebi nene rivilvili ruei, ana makan vo.
LUK 12:50 Burum̃ara im̃auano kouo tai monokoro jo kamu ka miraku kia navo, ka mia monoka nevija dulu eaio, mia vonganei notom̃a nop̃idig kar kiniou ruei riviorio. Bo ka tenene rimei sop̃eli, ka nomijikia nala nonovio.
LUK 12:51 ?Kamiu kumisidom kuberiam̃a kiniou nebinimei ka nala burum̃ara tum̃aro toa yetemeriba nei? Makanio, maka nemei ka nodu tum̃aro toaio, mia nebinimei ka nala bajago na vuruvureiano rimei ve toru lie vo.
LUK 12:52 Mia tikar vonganei, p̃eli ea vonuo tai, tomu nalo jumo ajuaio, ana mia nalo tolu nene avuruburelo ka naljuo nene, p̃eli na juo nene avuruburelo ka nalo tolu nene.
LUK 12:53 Mia tomu nalo avuruburevurelo, ka na mia tete m̃eaku nalo atudie karam̃alo nalo, mia teta nalo atudie kialo tete m̃eaku nalo, mia nena nalo atudie kenerilo niatira vevinio nalo, a niatira vevinio nalo atudie kialo nena nalo, a mia niasimemi nalo atudie niatira na joro vonga ka kenerilo m̃eaku nalo, ana mia niatira nalo atudie kenielo niasimemi nalo.”
LUK 12:54 Ana mo Yesu mil ban tiniobi nalo bereio, naio berinavo “Bogo na kito rotum̃a roial burum̃ara melijo na bobogio joa vio nam̃a jegi moluo eaio, romijikia ka mia yuo rimei, mia maka vesiou ga ana na yuo bovo.
LUK 12:55 Mia bogo nam̃a romijog ka kanado jegi na saot jom̃a miuvuvu, nina naruei romijikia ka mia vio rivitunu m̃ele, ana na mia monoka tibe na ga na.
LUK 12:56 ?Nina naruei, kamiu kumitum̃a kubitilubar ruei kijokijo na vio yauo a yetemeriba, ka mia bogo tum̃abe p̃eli mia tum̃abe, ana mia jum̃abe kamiu maka kuvijikia kuvitilubar kijokijo nalo na ea kanaku burum̃ara bogo na vonganei nei napano m̃a nojo bija kamiu? P̃eli kamiu maka kuvisidom kuvitilubar ga kovio? Tomnei, kamiu kubarvar laka ka kamiu, kuber vite nalo mia maka kuvilaii.”
LUK 12:57 “Bo ka ver kamiu kuvilavon ka kuvijikia kuvitilubar kija ka m̃arabo na vabe naruei na naio memedu ka kamiu kuvitakiio.
LUK 12:58 Verver bogo tai jau kala baravo kam juo toro tai ka titai, mia naio sidom rivurso kavan kotumolu kotu kamu ea toro na tibureiano mirano riviorio, mia bo ka jau kala vio sikili ka keil vatitig rivija naio, beamu ka bogo na kamiu maka kuvoru komeli vo. Ver makanio, p̃eli mia naio ruduso kotoa toro na toru nam̃a jijibure toro jum̃ano, ana na toro na toru nei p̃eli mia naio ruduso kotoa tomu nam̃a abokakar tomu nalo jum̃alo, ana mia nalo aduso kotoa yimo na tetavokoiano.
LUK 12:59 Ierinio, kiniou neberii kaso, ka ver tibe na, mia jau maka kejikia kataluvo bereio den yimo na tetavokoiano nene, rivanvano-o mia jau kovulu bulag nono kiamo mauo riviniu beamu vo, ana mia jau komijikia kataluvo bereio.” “Mia iliano nei naio be riano ban kenemiu meuliano na yetemeriba nei, a be riano bunu ea tivelinio na kamiu bija Atua.”
LUK 13:1 Mia tomu nalo na aju ea bogo na, ajukunu ka kulo Kalele tealo ban Yesu, napano toro na toru na Romo nei Pailat mila bajago na kirivova tai kalo. Nalo aberenio “Nalo na ajua Atua Kunuano Lu, mia monloglog bogo na aju amilotu ka Atua, amila sida banio, mia Pailat nalo abinimei amiel binvinlo am̃arm̃aro, mia amila kitkiti kialo burukija bija burukija na kialo sida neibano ajum̃a amilaio.” Naruei bogo na aber vite nei ka Yesu, ajidomii ruei ka vite na bova nei na maluvo kalo, p̃eli be Atua kiano vironiano tai banlo, bior kialo vovaiano tai napano p̃eli nalo amilaio.
LUK 13:2 Ana na Yesu berdop̃e banlo, berinavo “Kamiu kuvial kulo Kalele nalo na am̃arm̃aro kirivova jibe na jum̃abe na? P̃eli kuberiam̃a nalo abe tomu na bova laka, jovulu kulo Kalele dolu nalo, naruei naio be kialo vironiano ga?
LUK 13:3 Kiniou nojidom nover ka kamiu never makanio, naio maka tibe na. Mia monoka kuvitikar vatitig rivu, bior ver kuvilig re kamiu, mia kumijikia kum̃aro bunu ea bajago na jibe na.
LUK 13:4 “Mia kamiu kuvisidomii von yimo na siraragkuiano napano joa komeli na Sailomo. Naio bavin loa laka, mia bogo nanua naio mijoru, na jibirbil ea tomu nalo mia nalo duelimo ba arolu [18] am̃arm̃aro. ?Mia jum̃abe ka nalo na? ?P̃eli kumitum̃a kuber nalo na bunu abova loa ka kulo dolu nalo na vio Yerusalemo, mia nina naio jibe ka kialo vironiano tai, a?
LUK 13:5 Mia makanio, naio bunu maka tibe na. Mia kiniou neber bereio ka kamiu, neber monoka kuvitikar kamiu rivu, bior ver kuvilig re kamiu, mia kumijikia kum̃arm̃aro bunu ea bajago na tai jibe na.”
LUK 13:6 Ana na Yesu ber jamerijiano tai bereio, napano naio ber jibe nei, berinavo “Toro tai, kiano burubilivo tai jua kiano tiniavio. Mia bogo tai ana toro nei naio binimei ea burubilivo nene, jidom ka rial von naio jakou p̃eli na maka takou. Naruei naio binimei mial ka buruiesi nene maka takou leleio.
LUK 13:7 Mia naio mil ban toro nam̃a bitikar kiano tiniavio, berinavo ‘Vonganei bokar yuka tolu ruei, napano nobinimei najirarago ka burubilivo nei m̃arati, mia maka lele tai. Niabeku mave ka ruei, naio jukoko vio na bo nei kurano ga, mia jau ketelario ga rivano.’
LUK 13:8 “Ana na toro na im̃auano neibano naio tinien miia burubilivo nei toru, ana ber ka kiano toro na toru nei, berinavo ‘Ver tum̃abe, mia kito ralavon ka rotuvan tu ka yuka ve takurano bereio von. Ka mia kiniou nalavon ka noim̃au ka vatitigio von beamu vo, mia nekil p̃ili selvivia burupati, ka mia novisivisi tera buluku ea ka mia rila riluo rivu.
LUK 13:9 Naruei ver riluo rivu, rivar kija m̃arati ka yuka yako, mia mijikia tu bo tibe na bo kanio, ver makanio, mia jau komijikia ketelario rivano.’ ” Jamerijiano nene ber be bogo telisu kiano jo ka tomu nalo amijikia aviliglo, verver makanio mia Atua rijev vironiano vanlo.
LUK 13:10 Ana ea Legiano Lu tai, mia Yesu naio jom̃a berloglog tomu nalo joomo ea kialo yimo na volkouano.
LUK 13:11 Ana ea vio na be tiramoruo tai naio jo, napano niununo na bova tai na mieiano joa naio. Ana niununo napano miadikar naio ka yuka duelimo ba arolu [18] ruei, napano mila na tiramoruo nei taakano jup̃e laka, naio maka rijikia rivitiri naio memedu leleio.
LUK 13:12 Mia bogo na Yesu jirarag loglogio, bio naio binimei, ana mil banio, ber jibe nei berinavo “Tiramoruo, kiniou neber jibe nei, neber jau, mieiano nam̃a bivikakarso na, mia ritaluvo denso vonganei ga.”
LUK 13:13 Ana bija iliano nei Yesu midu jum̃ano joaio, mia vaarakurano ga taakano binimei memedu bo bereio, naruei tiramoruo nei mijog bo toru laka, miaia Atua Sop̃i-o mia.
LUK 13:14 Mia navurim̃araboiano na yimo na volkouano nei, naio tinien jer Yesu ka napano naio mieliel ka tiramoruo nei ea Legiano Lu. Naruei naio mil ban tomu nalo, berinavo “Jibe ka na kito romijikia ruei, romijikia ka roim̃auka bogoti ve ari, mia bogoti takurano, maka roim̃au. Ver kamiu kuvisidom ka aieliel ka kamiu, mia bo kanio kumei ka bogoti ve ari ga, mia Legiano Lu na jibe nei naio maka rive bogo nene rimemedu.”
LUK 13:15 Ana na Tubo berdop̃eio berinavo “?Jum̃abe? P̃eli kamiu kumitum̃a kumijian kenemiu bue m̃arauo nalo ka Legiano Lu, p̃eli maka kumijianlo? P̃eli na kamiu kumitum̃a kubagan kenemiu temeul nalo a kumitum̃a kumiyon uei banlo ka Legiano Lu, p̃eli na maka kuvila tibe na? ?Mia bior vaio ana maka kuvisaaro ka namila batitig tonovo tai ea tiramoruo nei? !Kamiu kubarvar laka, kuber vite nalo mia maka kuvila!
LUK 13:16 Tiramoruo nei, naio be kuviviniedo tai napano kito robiniu romiyotuba ea yati na tormoruo Epraamo, mia Najuboliboiano miorikar naio ka mieiano nei mijil yuka duelimo ba arolu [18] ruei. Ana kiniou namial jibe ka Legiano Lu naio memedu ga ka kito rovurular naio den vio na bova nei napano joaio.”
LUK 13:17 Mia bogo na Yesu ber iliano nei, mila kiano uolu nalo nei amijog amimou toru laka ea tomu nalo miralo. Mia kulo dolu nalo, nalo ajaaro toru laka ka im̃auano na bo nalo na miroano napano Yesu milaio banlo.
LUK 13:18 Mia Yesu mil bereio, naio berinavo “?Kiniou never iliano venia rivan kamiu ka mia rila na kamiu kuvijikia ka Atua kanano navenatuboiano naio jum̃abe? ?Mia kiniou never navenatuboiano nene naio javukia vite venia?
LUK 13:19 Mia nalavon ka nala rimeravo rivan kamiu ka jamerijiano nei, napano naio ber jibe nei, berinavo, Navenatuboiano nene, naio jibe ka kurukubako napano mijoru ba birakar joa buruiesi tai. M̃arati nei kiritavaso leleio, mia bogo na miluo, binimei be buruiesi tai na burutomoruo laka, naruei menu nalo abinimei amila m̃alo niuku nalo jua jaati nene nalo.”
LUK 13:20 Ana Yesu ber jamerijiano dolu tai bereio banlo, naio berinavo “?P̃eli mia kiniou neverinavo Atua kiano navenatuboiano naio javukia vite venia bereio?
LUK 13:21 Navenatuboiano nei, naio javukia tira tai nam̃a jo milalaglag isi na teliki ga bija burum̃ara baju na yevi tai, naruei isi na teliki nei naio mila joko nonovio miyuku toru.”
LUK 13:22 Ana Yesu naio jo midu kiano m̃arabo bereio, naio jo jidom ka rivavin bere Yerusalemo. Mia bogo na jo ban jibe na, jo miel jel ea komeli nalo, jom̃a berloglog tomu nalo.
LUK 13:23 Naruei ea komeli tai, be toro tai bika denio, naio berinavo “?Tubo, nalo na mia avokar meuliano, nalo telabo, p̃eli na maka ve telabo laka?”
LUK 13:24 Naruei Yesu berdop̃elo, berinavo “Kamiu monoka kuvilavio sikili ka mia kuva joomo ea bulutavo dolu na, napano na teliki ga. Kiniou neber riano ka kamiu, ka mia tomu ve telabo asidom ava joomo, mia maka ajikia alaio.
LUK 13:25 Nina bior iorou, ana mia toro na toru na yimo mia naio rial ka bare ruei, mia naio tumolu, tetavoko vatitigio bereio. Ka bogo na, mia kamiu ve telabo kumei kuvidu buron kamiu ea m̃aratavo nei, mia kuviniu kuvio kuverinavo ‘Tubo, kumemi nuber bo ka jau kovetavo ka kumemi.’ Mia toro na toru nei naio riverdop̃e ga tibe nei, naio riverinavo ‘Ai, abe kiniou maka najikia kamiu leleio! Kamiu kube kulo be nalo?’
LUK 13:26 Ana na mia kamiu kuvilavon ka kuver kanio ka bogo na, kuverinavo ‘Ana jum̃abe, jau maka bunu kosidomial ka kito naruei rojum̃a rajinan vio takurano dam̃ariga beamu mugaruei m̃a na? !Kumemi nene nei naruei nam̃a jau kobinimei m̃a koberloglog kumemi janea vio medave nalo ea kenememi komeli nalo!’
LUK 13:27 Mia naio river kalo, riverinavo ‘Kiniou neber ka kamiu vaarakurano nua ruei, ka maka lele nejikia kamiu, kamiu kube kulo be. Mia namijikia ga ka napano kamiu kube tomu nam̃a amim̃auka bajago na kirivova ga. !Kamiu, kuvitaluvo den kiniou vonganei!’
LUK 13:28 “Ka bogo na, mia kuvijog rivova ve toru, mia ve burum̃ara tegiano, kuviser m̃arjuvomiu. Nina bior ka mia kamiu kuvial ka napano Atua kiano tomu novo nalo, jibe ka Epraamo, Aisak, Yakovo, a naverialiano dolu nalo bunu, nalo aju bo jouro ea kiano navenatuboiano ruei, mia kamiu, avuku kamiu kuvitu bo ga tavio tibe na.
LUK 13:29 Ea bogo na, mia kulo dolu vetelabo ayotuba ea sudu veri na yetemeriba nei, amei ka atutano ka asinan ea burum̃ara jokoluolu na jouro ea Atua kiano navenatuboiano, mia kamiu maka kuvijikia kuva jouro eaio.
LUK 13:30 Mia tibe na naruei, ka nalo nam̃a aju iorou, mia atu tukamu, a nalo nam̃a aju jukamu, mia atu iorou.”
LUK 13:31 Ka bogo na, ana Yesu jo bavin Yerusalemo kia vo, mia Varisis nalo tai abinimei eaio, aberial kanio, aberinavo “P̃eli jau maka kejikia, ana Parinio Tubo Erot na, naio berkar ruei ka mia ruebinso. Bo ka jau kataluvo den tanobuku na naio jom̃a be tubo eaio, jau kovuro kava Yutea beamu vo.”
LUK 13:32 Ana na Yesu berdop̃elo berinavo “Kiniou maka nosidomial souo kurkuru na ka naio be toro tai na mijikia rila titai ka kiniou. Kuva kuverial ea mirano kuver kiniou noto nala kiaku im̃auano beamu vo. Kuver kanio kuver kiniou nojom̃a nemijil bulag sim̃aro nalo, a nojom̃a nemieliel ka tomu nalo, a mia notom̃a noim̃au tibe na banei, beni, veua bereio, rivano-o mia neial ka namila nonovio ruei.
LUK 13:33 Mia kiniou namijikia na ver ka kamiu, ka mia kamiu kuvisidomii m̃elea re kiniou, bior ka legiano nalo nei, kiniou nojo najaluvo den tanobuku nei navan tibe na naruei. Monoka najaka nava novoru Yerusalemo vo, bior namial jibe ka vio na naruei nam̃a tomu nalo ajum̃a amuebinvin naverialiano nalo eaio, jikar nua ruei.”
LUK 13:34 Ana na ka bogo na, Yesu tinien miia Yerusalemo m̃a jegidu kanio, naio berinavo “!Yerusalemo, Yerusalemo-o! Bior vaio ana kojom̃a komuebinvin naverialiano nalo, a kojom̃a kojuba binvin tomu nalo nam̃a Atua jom̃a miilalo abinimei easo? Vatelabo kiniou nejidom nodu jum̃aku selvivko kiamo tomu nalo tibe ka sabarou bio kirikiti nalo abinimei amiyuku jel tano ka sibiano, mia kanamo tomu nalo maka asaaro kanio.
LUK 13:35 Mia komialio na, Atua naio jo bilig taakano kaso ruei nei, ana naio miila kiniou nebinimei be moti nei naruei, ana naber kaso, neber mia kanamo tomu nalo ajikia re aial kiniou bereio, rivano-o rivokar bogo na avitilubar kiniou, averii kiniou averinavo ‘!Atua sop̃i loa laka, jau keilivu ka naio napano naio jo binimei ea siamo!’ ”
LUK 14:1 Ana ka Legiano Lu tai, navurim̃araboiano na Varisis tia bio Yesu ba jinano ea kunuano. Mia tomu dolu nalo tealo nam̃a maka tiniel tii Yesu, nalo aju bunu ka bogo nei, ajum̃a abitivitii julaka ver naio rila vite tai na maka rimemedu, mia amijikia ala tibekovio ka naio.
LUK 14:2 Mia toro na mieiano tai jo naliko joomo ka bogo nei, napano toro nene niabene nalo jurojurobi tortoru laka. Mia Yesu mial toro nene,
LUK 14:3 naruei mil ban naverloglogiano na tuboiano nalo, bija Varisis nalo napano aju, naio bika denlo, berinavo “?Jum̃abe ka tivelinio na kiado tuboiano? ?Naio berenio kito romijikia reieliel ka toro ea Legiano Lu, p̃eli na ber maka rejikia reieliel kanio?”
LUK 14:4 Mo bogo na Yesu bika vikadeniano nei, amial jibe maka bunu ajikia asian verdop̃eiano rivanio, mia maka bunu ail. Ana na Yesu buru toro nei binimei vaataro keanio, ana mieliel vatitig ka naio bo bereio, berinavo mijikia rivan bereio vonuo.
LUK 14:5 Ana naio mil ban nalo na aju, naio berinavo “Kamiu kuvilavon ka kuvisidomii vonio. Ver kamiu tai, ka Legiano Lu, kenerinio tai, p̃eli na kanano temeul tai, naio riva rijoru rivatove ea bulukuei tai, ana mia jau kala tum̃abe? ?Mia jau monoka kala sop̃eli ga kava kovurular bereio, p̃eli na mia koverinavo ‘Uerei bova naruei, vonganei be Legiano Lu ruei, tuboiano berenio mia kiniou noim̃au re ea Legiano Lu, mia p̃eli keneriku p̃eli na kanaku temeul na tobo beamu vo ea p̃ili na, mia beni ga ana mia nava novuru lario?’ P̃eli mia maka bunu kejikia koto rorea titai bereio, mia jau kala sop̃eli ga na.”
LUK 14:6 Mia nalo maka bunu ajikia ka mia aver verdop̃eiano venia ka tivelinio na rivan naio bereio, aju buru ga jibe na.
LUK 14:7 Mia bogo na aju ka atutano ea sinaniano, Yesu bitilubar ka nalo tealo napano boru na jokoluolu biolo abinimei, tiniel jii toru ka ajidom aleal vio na bo, nalo aba ajutano mave ea tomu na tortoru jelelo. Ana Yesu mial kialo bajago na m̃arouano nei, ana ber kalo, berinavo
LUK 14:8 “Ver bogo tai avioso ka kavan ea sinaniano na soriano tai, p̃eli na jokoluolu tai na jibe na, maka rivu ka koyokovo sop̃eli ka kava kototano ea tomu na tortoru jelelo garuei. P̃eli jau maka kejikia ka vio na, amila batitigio bo jororea toro na toru tai,
LUK 14:9 ana mia boru na jokoluolu nei mia rimei river ka jau, riverinavo ‘Aiou kuruaku liki, mia p̃eli jau kavatove beamu vo, bior jau kojom̃a kojotano ea kanaku toro na toru jeleigio na.’ Naruei mia jau kavar burum̃ara imouiano tai na rila kojog ve kirivova laka, mia monoka jau kavatove ga bereio, kalavon ka keleal kiri vio sesa tai ka na mia komijikia ketivan miramo eaio.
LUK 14:10 Mia bajago na bo naio jibe nei: Ver avioso ka kavan ea sinaniano tai, bogo na kovoru eaio, jau kava kototano rivija tomu ninio ga. Mia ver boru na jokoluolu nene naio rimei, mia naio rialso, mia naio riverinavo ‘Oi, burum̃ara toro, kiniou nemije batitig jelemo na jo mave ruei, mia kito ve juo ravan ana neti vatitigso.’ Ana ka bogo na, mia komijikia kojog rivu ve toru laka, ka boru na jokoluolu rivitiri larso tibe na ea kulo dolu nalo miralo nam̃a kumisinan vio takurano.
LUK 14:11 Tibe na naruei, ka mia toro nam̃a miyuku lelar naio, mia adu naio totano, mia toro nam̃a midu naio jotano mia ayukular naio to mave.”
LUK 14:12 Ana ka bogo na, Yesu ber iliano tai bunu ban toro napano bio naio binimei jinano ea kiano vonuo, naio berkanio, berinavo “Vonganei, kito romial ka napano tomu nalo, bogo na amila sinaniano tai, tiniel jii ga ka avio kialo bilbilu na bo, p̃eli kurualo nalo, p̃eli na kialo m̃aratavo dolu nalo, vija bunu tomu na tortoru nalo na abe sanibaiano nam̃a aju vaataro ga kalo. Ajum̃a amilala jibe na naruei, bior amijikia ka iorou, ver nalo nei bunu ala sinaniano tai bogo tai, mia monoka ala meran rivanlo bereio.
LUK 14:13 “Mia bajago na bo ka rila bogo na jokoluolu naio maka tibe na. Bo laka ka kovio kulo dolu nalo, jibe ka nalo nam̃a abe talim̃asa, p̃eli na nalo na niabelo maka rivu, p̃eli na jaba nalo, p̃eli na merebono nalo, p̃eli na tomu nalo na ajiberbena, amei asinan rivijaso.
LUK 14:14 Tomu nalo na jibe na maka ajikia ala meran rivanso bogo tai, mia bogo na Atua mial ka jau tiniem jaaro ka koburulo abinimei ajinan kamliko ea kanamo vonuo, mia naio saaro laka kaniso. Karina naio rilivu kaso, a mia jau kavar vonga kiamo ijaiano na bo biorio, ea bogo na naio rila kanano tomu na memedu ameul bereio den nam̃ariano.”
LUK 14:15 Ana na toro tai napano joa sinaniano nei, naio mijog ka napano Yesu berii ka mia Atua rivitiri bulag kiano tomu na memedu ea legiano na maaro, naruei naio berinavo “!Ierinio, mia rivu lie rivan kito ka bogo na, ka napano mia kito raiasol burum̃ara jokoluolu na jouro ea Atua kanano navenatuboiano nene!”
LUK 14:16 Toro na, p̃eli naio jom̃a ber naio bo kovio ruei, mia tomu na jibe na maka asidom ava jouro, naruei Yesu ber jamerijiano tai ea tivelinio na, napano jibe nei “Toro na toru tai, naio jidom ka rila sinaniano tai, mia naio bio tomu nalo telabo ka amei.
LUK 14:17 Ana bogo na naio miomon vite nonovio bisi ju, ana miila kiano toro tai ka riva rivuru nalo nam̃a abiolo ruei ka amei.
LUK 14:18 Mia bogo na kiano toro nene bano-o miyotuba kalo, nalo abiniu abare ga, ajum̃a amila ilisop̃eiano ga. Tai ber jibe nei, berinavo ‘Ierinio, mia kiniou nobulu von ga kiaku niatano tai, naruei nojo napano ka neial von ka borotano nene jum̃abe. Mia kover ka toro na toru kover aua toru vanio, mia maka nejikia neviedu vonganei.’
LUK 14:19 Mia dolu, naio ber jibe nei, berinavo ‘Ierinio, mia kiniou nobulu von ga kanaku buluku nalo tai, ka avuru kanaku rukuruku nalo, naruei nojidom ka nava neial ka be p̃irilo jikili jum̃abe. Mia kover ka toro na toru kover aua toru laka, mia maka nejikia neviedu vonganei.’
LUK 14:20 Mia dolu bunu, naio berinavo ‘Ierinio, mia kiniou namila jokoluolu na kanaku soriano maka vesiou vo, naruei namial jibe ka p̃eli mia maka nejikia neviedu, bior saba telabo laka.’
LUK 14:21 “Ana na toro nei binimei berial iliano nalo nei ka kiano toro na toru, mia bogo na naio mijogio mila naio mila siniabu kalo. Naruei miila kiano toro nei bereio, naio berinavo ‘Mo, jau kala sop̃eli kavan ea m̃arabo nalo na tertelisu vaataro na, kava keleal talim̃asa nalo, vija nalo napano abe mervitovi, vija merebono nalo, ana kuvurulo amei ea kiado jokoluolu.’
LUK 14:22 Naruei naio ba milaio, mia iorou kanio ana naio binimei bereio ea kiano toro na toru nei, ana naio berinavo ‘Tubo, vite napano jau koberenio, kiniou nemilaiio ruei, mia tomu telabo abinimei ruei mia be vio toru jo kiano vo.’
LUK 14:23 Ana miila naio bereio, berinavo ‘Tibe na, jau kavan bereio, kava lie kija ea vio nalo na komeli, mia katadua sikili toro kei na ver jau keialio, ka monoka amei, ka aison kanaku burusio, ka rila jokoluolu nei rive kirinovo tanea.
LUK 14:24 Nalo dolu nam̃a amila ilisop̃eiano na kirivova na, kiniou nobiolo batitig ka amei ea jokoluolu nei ruei, mia vonganei, mia maka nalo tai kalo napano mia rijikia sen kiri sinaniano nei tai leleio ea jokoluolu nei. !Kiniou neber vatitigio kiana!’ ”
LUK 14:25 Naruei Yesu naio jo midu kiano m̃arabo ka rivavin Yerusalemo bereio vo, mia tiniobi niukniuku vio bujo kalo ajum̃a ajakisorio. Amiel bano-o, mia naio barp̃ilig kalo, ber kalo, berinavo
LUK 14:26 “Toro na jidom rimei rue jaaku, mia naio monoka rudu kiniou noto tukamu ea kiano meuliano, kiniou loa laka lie vo ka karam̃ano, kenieno, koano, kenerinio, kuruano, p̃eli na kuviviniene. Toro napano ver maka riilkue ka kiano meuliano, naio maka rivare ka rimei rive kanaku naiagagoano tai.
LUK 14:27 Mia toro nam̃a jidom ka rimei rive kiaku naiagagoano, naio monoka rila tibe nei. Naio monoka rudu kiano m̃akolkolo, rue jaaku nam̃ariga, tibe ka mijamo ka naio ka rijog jaleleano rivior kiniou.
LUK 14:28 Bo ka kuvisidomii vatitig rivu vite nei beamu vo, beamu ka na mia kuvil sop̃eli, kuver mia kuvitakisor kiniou. “Naio jibe ka na toro tai, ver naio sidom ka rim̃auka burum̃ara yimo tai, naio monoka totano, rivitii beamu vo, mia rivuluku vatitig beamu kiano veru na vuliano na im̃auano nei, mia monoka rivitii veve rivu ka naio bare ka mia rila nonovio burum̃ara im̃auano nei, p̃eli na maka rivare.
LUK 14:29 Ver p̃eli na, mia naio tikar rim̃auka batitig bulapati, rivavavin kija ga, ana mia naio riilo ka napano jum̃ano bulati garuei, ana na mia im̃auano nei tei riuedom tobo. Naruei bogo na kulo dolu nalo amei aial yimo neibano jo bija bayimo nene be togio ga jo, a maka ve vodobi nene, mia avital niegeniege m̃elea toro nene-o mia averinavo
LUK 14:30 ‘O, kema na, kiano jidomiano kirinovo laka. Naio jidom rim̃auka kunuano, mia maka rila batitig tiiano na im̃auano, mila na maka rijikia rila nonovio riviniu.’
LUK 14:31 “Jibe ga na, toro na jidom riverkar ka mia rimei rila im̃auano vija kiniou, naio monoka rila tavukia parinio tubo tai, napano toro na toru dolu jumolu ka naio, buru kiano burum̃ara taara na mira abinimei ka ala mira kanio. Tomu na mira na parinio tubo nei kanano nalo maka ve telabo tavukia toro na toru nei kanano, mia parinio tubo nei monoka rivitii vatitigio ga beamu vo, monoka sidomii vatitigio rivu ka naio mijikia tovulu burum̃ara taara neibano naio jo binimei ka naio kiana, p̃eli na maka rijikia tovulio.
LUK 14:32 Ver naio rial ka maka rijikia rilaio, naio monoka riila toro rieliko m̃arabo ka toro na toru nei, ka bogo napano naio jo koalabo kia ga vo. Naio monoka rivika denio, ka mia rivulu venia na ver toro na toru nei riverenio, ka mia ave juo atua tum̃aro bereio. Tibe na ana naio monoka rivatove ka toro na toru nei, rijamo ka naio nonovio rivanio.
LUK 14:33 Mo kamiu nam̃a kumisidom ka kumei kuvitakisor kiniou, kamiu monoka kuvitilubar ka kamiu bunu monoka kuvila tibe na ka kiniou. Toro na maka rijamo ka kiano meuliano kar kiniou, vija rera garuei kiano saba nalo, naio maka rijikia rimei rive kiaku naiagagoano tai.”
LUK 14:34 Ana Yesu ber jamerijiano dolu banlo, naio berinavo “Vaatei naio be tonovo tai, mia ver bogo tai ana vaatei nene naio rijea re bunu rivu, naio maka bunu rijikia rila kiano im̃auano, p̃eli na maka bunu ve titai rijikia rila rijea rivu bereio.
LUK 14:35 Mo vaatei naio jibe na, naio maka rijikia rila im̃auano na bo easo ea kanamo vonuo, p̃eli na ea kanamo tiniavio bunu. Vite na bo kanio, bo ka avuku rivan ea vio na soro ga. Nina naruei be tovorovo na kanaku naiagagoano napano milaluvu kanano moroano ka rila kanaku im̃auano. “Ana toro na be tiliniene bo, bo ka naio rijoglubar kanaku iliano nei.”
LUK 15:1 Ana ea bogo nalo na jibe na, amial ka napano tomu tealo napano tomu dolu nalo maka tiniel tiilo, jibe ka tomu na takis nalo, bija kulo dolu nalo napano Varisis aber abova, nalo bunu abinimei vaataro ka Yesu ka aiagago ka naio.
LUK 15:2 Naruei bogo na Varisis naliko naverloglogiano na tuboiano nalo aju amial ka Yesu jom̃a tinien jii ka tukunu vijalo, amial kirivova, ana aju aberinavo “Riano ga, tete na naio jidom ga tomu na kariano na jibe na, a bogo nonovio naio jidom ka riva sinano vio takurano naliko bunu. ?P̃eli naio mial ka kialo bajago ga naio bo, a kiado naio bova, a?”
LUK 15:3 Mia kialo jidomiano jibe na mila ana Yesu jukunu banlo ka jamerijiano nalo nam̃a aberii jum̃abe ka napano naio binimei ea yetemeriba nei kar toro napano milaluvu m̃arabo.
LUK 15:4 Yesu kiano jamerijiano na be moti ka tivelinio na naio jibe nei, napano naio ber kalo, berinavo “Toro tai, naio be toro nam̃a bagan nunu nalo, mia kiano nunu nalo abokar toromomou takurano [100]. Kiano nunu nalo telabo mugaruei jibe na, mia ver bogo tai, nalo tai riva kovio, mia naio sidomveia ga, p̃eli mia naio sidom bijovijon kanio? Mia monoka naio tuvan kiano nunu dolu nalo na atu bo beamu vo, mia naio rivakar napano ba kovio, mia naio sirag rilealio.
LUK 15:5 Mia bogo napano naio milealio, mia saaro ve toru laka, mia naio rudular nunu tavaliki nene rimon mave ea burusovonano, ana naio rudu rimei bereio.
LUK 15:6 Ana na iorou, ka bogo napano naio batove binimei ea kiano vonuo bereio, mia rivio nalo na ea kiano m̃aratavo, p̃eli na kiano bilbilu dolu nalo bunu, ka amei. Ana mia naio tukunu vanlo, riverinavo ‘Ei, vite tai napano kito ramijikia rasaaro ve toru m̃ele riviorio. Kanaku nunu tai napano ba kovio napano ba kovio laka garuei, mia karina naban kanio, najiragio-o, namilealio. !Bogo napano namilealio, najaaro mia maka garuei!’ ”
LUK 15:7 Ana Yesu mila meravo ban Varisis nalo, berinavo “Mia tibe na ga bunu ea vio mave. Tomu telabo napano ajua vio yetemeriba nalo ajavukia kamiu, be tinielo ka aber nalo amemedu ruei, ana p̃eli mia saariano na mave rivior kamiu tomu kinkin na jibe na kovio? Mia ver toro na kariano tai ga, naio rivilig kiano meuliano, mia ve burum̃ara saariano ea vio mave, riva lie vo ka mia ve burutomoruo laka. Vite na naruei mila ana tinieku jaaro ka notukunu vija tomu nalo nam̃a kamiu maka tiniemiu tiilo.”
LUK 15:8 Ana Yesu ber jamerijiano ta bunu ea tivelinio na, naio berinavo “Be tira tai, kiano kurukuveru duelimo, napano naio miduvan batitigio bo jo joomo ea kunuano. Ana ver bogo tai, rimei ber riadu kalo mia rial ve takurano naio mijoru ruei, ba kovio tai, mia naio rila tum̃abe naruei? Monoka naio rigoru yulu, rija bulag kiano saba nalo, a riakon vatitig vio ea kunuano, rivano-o mia rilealio.
LUK 15:9 Ana bogo napano rilealio, mia naio rivio nalo na ea kiano m̃aratavo, p̃eli na kiano bilbilu dolu nalo, ka amei. Ana naio tukunu kanio vanlo, riverinavo ‘Ai, abe vite tanie napano romijikia rojog rivu ve toru kanio. Kanaku burum̃ara kurukuveru tai nemilaluvuio mijoru banbo kovio tai, mia karina, nejiragio bano-o ana nemilealio bereio. !Bogo napano nemilealio, kiniou nomijog bo-o mia!’ ”
LUK 15:10 Ana na Yesu mila meravo ka Varisis nalo, naio berinavo “Naruei mia tibe na ga bunu ea vio mave. Ka bogo napano ver toro na kariano ga tai naio rivilig kiano meuliano, mia Atua kiano nailiano nalo aialio mia saariano ve toru laka ea vio mave.”
LUK 15:11 Mia Yesu kiano jamerijiano na maariano na tivelinio nei, naio jibe nei, napano berenio berinavo “Kulovu tai, be kenerinio sum̃ano juo, nam̃a aju amim̃au bijaio ea kialo borotano.
LUK 15:12 Ana ka bogo tai, maratoru na naljuo nei naio jumolu, berial ka karam̃alo abe juo, berinavo ‘Teta, kiniou nejidom navar saba togio na jajum̃amo ve kanaku ga.’ “Mia vite na maka rimemedu leleio ka naio rivika tibe na, bior karam̃alo naio meul jo kia vo. Mia karam̃ano maka ril, naio jan ka nonovio kiano saba nalo, mijamo ka togio ban m̃eaku nei, a togio be motoru kanano.
LUK 15:13 Avona bisi, ana na m̃eaku nei naio jom̃a p̃ilṽili ka saba nalo napano karam̃ano bar banio, mia iorou, maka vesiou, amialio ka naio mison nonovio kiano saba nalo, bar kiano puruveru beven ka bano. Mia ba joa buruvenuo dolu tai koalabo laka, ana ea vio na, naio ba mijamo ka momon naio ban bajago na bova, jinan ka puruveru nei bano-o mia mila lelan nonovio biniu.
LUK 15:14 “Vonganei naio bitilubar ka jum̃ano bulati naruei, ana ea bogo na, burum̃ara vituiano tai binimei bokar buruvenuo neibano naio joaio, naio midu m̃eaku nei naio joa vio tai na kirisikili laka kanio.
LUK 15:15 Ana na naio ba jirag im̃auano tai ka mia rim̃aukanio ka mia p̃eli mijikia rilarur kiano meuliano, naruei ba mim̃au ea toro na toru tai na vio nene, ba bagan kiano kiribue nalo. M̃eaku nei naio maka rimemedu ka rila im̃auano nei, bior naio bel ka kiribue jibe ka kito kulo Ju dolu nalo, mia nina be im̃auano takurano ga napano naio mijikia rilealio.
LUK 15:16 “Naruei naio mim̃au jibe na bano-o, mia maka avar sinaniano vanio, a maka m̃arabo tai ka rileal sano sinaniano eaio, mila jijer naio nam̃ariga. Naio jijer jibe na bano-o mila naio jidom sian jum̃ano rivan ea basaro na sinaniano torogio na menunu bija botuotu na kon nam̃a kiano toro na toru naio jom̃a bagan ka kiano kiribue nalo ajenio.
LUK 15:17 Mia bogo napano jidom ka rila tibe na, naio bitilubar naio bereio, naio mial ka kiano bijuku m̃eteano ga mila lelan naio bereio. Mo naio tinien maio bereio ka karam̃ano bija kiano vonuo, naio berinavo ‘Riano ga, kiniou nomiavovu toru laka. Kiaku bijuku m̃eteano ga mila kiniou nam̃aro ka vituiano ea vio nei, mia kosidomii von nalo nam̃a atibe ka tomu na im̃auano ga na teta kanano. Naio jom̃a jian sinaniano novo nalo telabo banlo ka legiano nonovio ga, maka ajikia asen nonovio.
LUK 15:18 Ver tibe na, bo laka ka kiniou nalavon ka navan bereio ga, noim̃au kija ga tavukialo. Mia kiniou nava naial teta, never kanio, neverinavo “Aiou teta, kiniou namila burum̃ara kariano va tai ban Atua, a banso bunu.
LUK 15:19 Vonganei, maka bunu rimemedu ka jau keial kiniou tibe ka nebe kenerimo tai, mia nobika denso ka tiniem riia kiniou ka noim̃au kija ga tavukia nalo nam̃a amim̃au kanamo.”’
LUK 15:20 Mia naio mila vatitig kiano jidomiano jibe na bisi, naruei naio jumolu, binimei ju lilie ju lilie, binimei boru ea karam̃ano. “Mia naio maka rijikia, mia karam̃ano naio jo tinien maio ka naio julaka ga, naio jom̃a jirarag lili m̃arabo ka p̃eli mia naio rimei. Mia bogo na naio ju koalabo ka kunuano kia ga vo, mia karam̃ano bitilubar naio, tinien miia naio-o mia, ana jikiti ka riva rivitavo vijaio. Mia bogo napano naio binimei bokar kenerinio nene, miabukario ka jum̃ano be juo, maka sidom tuvanio bereio.
LUK 15:21 Ana m̃eaku mil ban karam̃ano naruei, berinavo ‘Aiou teta, kiniou nomila burum̃ara kariano va tai ban Atua, a banso bunu. Vonganei, maka rimemedu ka jau keial kiniou notibe ka kenerimo.’
LUK 15:22 “Mia karam̃ano berbureio, bio kiano tomu na im̃auano nalo, berinavo ‘Ai, kamiu kuvila sop̃eli kuva, kuvar kulum̃arauo na bo laka, vija kiano kulubue na jaano, a kiano p̃ejelinio, vite nalo na jibe na, kuvar kumei kuviya eaio.
LUK 15:23 A kiribue m̃arauo nam̃a roju rabagan vurua m̃adigdig kirinovo na, kamiu kuva kuvueio, ka kito rala sado sinaniano tai ka ramijikia rasaaro kitoliko keneriku maratoru nei.
LUK 15:24 Bior keneriku nei, naio m̃aro ruei, mia meul bereio; naio ba kovio, mia kito romileal naio bereio.’ Ana ka bogo na, nalo abukudel ka jokoluolu na m̃eaku neibano.
LUK 15:25 “Ana ka bogo nene, kiritete motoru naio bavenei ea tiniavio, ba jo mim̃au ruei, avona kario ana naio binimei bere vonuo. Mia bogo na naio binimei vaataro ka vonuo, naio mijog ka ajum̃a amioiou, a mijog joa na voluano jo jaburu bunu.
LUK 15:26 Ana naio mial nalo na im̃auano nei tai, bika denio, berinavo ‘?Ei, venia na jibe na nam̃a aju amila vonuo jibe na?’
LUK 15:27 “Ana toro neibano berinavo ‘!Ai, abe kuruamo m̃a na! Naio binimei bere ruei, meul bo kia ga vo. Tenene na, karam̃amo naio jidom rila sano sinaniano tai. Amue kiribue m̃arauo nam̃a na ruei!’
LUK 15:28 Mia bogo napano motoru mijogio naio tinien mimi, maka riva joomo naliko. Naruei karam̃ano binimei mil banio, ka rivuru naio riva joomo, mia naio miilkue ga ka rivano.
LUK 15:29 Naio ber ka ga karam̃ano, berinavo ‘?Teta, yuka vio ruei nam̃a kiniou nojom̃a nomim̃au kanamo ea vio nei? Kiniou nomidu niomo batitig bo ea vite nonovio, mia jau maka lele kala titai tibe na van kiniou. Kiniou maka lele neial ka napano jau koue kirikiti nani tai van kiniou bogo tai ka nala sinaniano tai vija kanaku bilbilu nalo.
LUK 15:30 Mia bogo napano ga jau komial kenerimo novo na naio binimei vonuo bereio, ana kojumolu komue kiribue m̃arauo novo nam̃a rojum̃a rabaganio jo mijabo m̃adigdig bo na. ?Mia tete na naio mila venia bo ruei banso a? Naio bar bulag kanamo burum̃ara puruveru togio ruei, naio ba jen puruveru nene ka ga m̃a mior ka tire nalo ga, bano-o miakon batitig garuei. ?P̃eli bajago na naruei na jau tiniem jii, tenene na jau komila sano sinaniano kanio a?’
LUK 15:31 “Mia karam̃ano tinien miia motoru nei bunu, ana naio berkanio, berinavo ‘Ei, keneriku, kiniou maka m̃a noto nosidomii tibe na liki. Jau komila kiniou najaaro toru ruei, napano m̃a kojo bija kiniou dam̃ariga, a kanaku saba nonovio na ju, kiniou namijamo ka nonovio ruei banso.
LUK 15:32 Be riano ka keneriku maratoru na naio milaluvu m̃arabo na kiano meuliano, mia bogo na naio bilig naio binimei bereio, kiniou tiniek miia naio, ana namial jibe bo ga ka kito rasaaro ka naio, rala sinaniano tai kitoliko. Kuruamo na naio m̃aro ruei, mia meul bereio; naio ba kovio, mia kito romileal naio bereio.’ ” Naruei Yesu ber ka Varisis nalo, naio berinavo “Mo, jamerijiano nei naio bisi naruei ea vio na. Mia jibe ka napano naio berenio, bo ka toro napano milaluvu m̃arabo, naio monoka rivilig naio bereio, tavukia maratoru nei. Mia kamiu monoka kuvitikar vatitigio bunu ka mia kuvitavukia re motoru nei, napano kiano jidomiano kirisikili laka, naio mijoku ka kuruano napano bilig naio ka kiano bajag moruo ruei.”
LUK 16:1 Iorou kanio, ana Yesu mil ban kiano naiagagoano nalo, naio berii jamerijiano tai banlo, ana naio berii toro na im̃auano tai. Toro nene, naio mial ka mia kiano boru rivukular naio, naruei naio jumolu mim̃auka vite tai ka mia iorou ana kiano meuliano rivu ga. Jamerijiano nene naio jibe nei, berinavo “Toro na toru tai, naio bitirilar kiano toro tai ka rivitikar kiano puruveru nalo. Mia bogo tai, iliano binimei bokar naio ber kiano toro nene naio jom̃a jen kiano puruveru nalo, jom̃a mila lelan kiano saba nalo.
LUK 16:2 Naruei naio bio kiano toro nene binimei mial naio, mil ban berinavo ‘Ei, tomu nalo amidu kanamo veriiano ban kiniou ruei. Kiniou namial bo ka mia nodu larso den im̃auano na bereio, mia jau kobisi ga. Mia beamu ka na jau kavano, nojidom ka jau kavar vatitig saba nalo beamu vo, ka mia kiniou namijikia noviti jabue nam̃a tomu nalo amila jua kiniou.’
LUK 16:3 “Mia toro na im̃auano nei naio mijog bova, berinavo ‘Riano, vonganei bova nono naruei. Toro na toru midular im̃auano novo nei den kiniou, maka nejikia ka mia kiniou nesen venia naruei. Kiniou nojotano ea im̃auano nei kirisiou ruei, mia maka bunu ve kiaku moroano ka nava noim̃auka tiniavio bereio, a kiniou maka nosidom natan ea yimo nalo kam̃a noiniogiog sinaniano den tomu nalo bunu.
LUK 16:4 Mo bo ga, kiaku m̃arabo naio tibe nei. Mia note vatove kija bereio tomu nalo kialo jabue nalo, mia asaaro ka kiniou-o mia monoka avitikar vatitig kiniou ka bogo na ver toro na toru rivukular kiniou den im̃auano nei.’
LUK 16:5 “Naruei naio ba bio nalo napano kialo jabue jua toro na toru nei, nalo abinimei abeve terakurano eaio, ana naio berinavo ‘?Mo, jau komila jabue ea venia, a bokar vio?’
LUK 16:6 Ana naio berdop̃e, ber ‘Titikivaka basidobidobi duelimo toromomou takurano [100].’ Ana toro neibano berkanio, berinavo ‘Mo, mia kito juo rete rivatove ga. Ninei be kanamo jabue nene, jau kototano ana koyolkon bulag sop̃elia nana beamu, mia kovivitauia kar ve duelimo va limo [50] ga.’
LUK 16:7 “Mia naio bano, ana dolu binimei, ana naio bika denio, berinavo ‘?Koig a jau, kanamo jabue venia?’ Ana naio berdop̃e, ber ‘Bake na uiti tormomou takurano [100] ga.’ Ana naio berkanio, berinavo ‘Mo, mia kito ve juo rete rivatove ga. Ninei be kanamo jabue nene, jau kototano, ana koyolkon bulag sop̃elia nana beamu, ana kovivitauia kar ve duelimo va arolu [80] ga.’ Naruei naio mila jibe na-o mila nonovlo abiniu.
LUK 16:8 “Ana iorou kanio, ana toro na toru nei naio bitilubar vite nei, ana naio ber ka kanano toro nam̃a jenjen kanano puruveru nalo beamu, naio berinavo ‘Riano ga, jau kobina vatitigio ka kiniou, ana namial jibe kanamo masouano tenia, jau kobe pariparimo kija ga na.’ ” Naruei Yesu berinavo “Kamiu kumial kulorinio nalo na yetemeriba nei, bogo nam̃a amim̃au bija puruveru, mia abe masou ka bo, nalo amijikia bajago na ala bilbilu vija tomu nalo, ka mia tomu nalo nene ala rivu kalo iorou bereio. Mia kiniou nemial ka napano keneriku nalo na miamoiano, va telabo nalo maka ave masou batitig rivu ka aim̃au vija puruveru napano Atua jian banlo.
LUK 16:9 “Neberenio batitig ban kamiu, neberinavo, Puruveru naio be tena yetemeriba nei ga, mia verenio mijikia riijaiso ka kove bilbilu rivu vija Atua, bo ka koim̃au kanio. Ver jau koim̃au rivu vija puruveru ea m̃arabo na memedu nene, mia iorou kanio ana Atua naio risaaro ka mia rivurso kavan ea vio na maka puruveru toaio, naina naruei be kanamo vonuo na mave.
LUK 16:10 “Toro na bar ka naio batitig bo ea im̃auano na kiritavaso ga, mia kito ramijikia ravarkar tiniedo ea naio ka mia naio rivar naio ka im̃auano na toru bunu. Mia toro na mim̃au maka rimemedu ea vite na telisu, mia naio rim̃au rivova lie vo ea vite na toru.
LUK 16:11 Ver kamiu kuvar vatitig re kamiu ka im̃auano nalo na puruveru na yetemeriba nei, mia kei bereio rivar Atua kanano tonovo nalo tua jumemiu ka ve kenemiu?
LUK 16:12 A ver kamiu maka kuvijikia kuvim̃au rimemedu rivija vite nalo nam̃a Atua mijamo ka ban kamiu ka bogo bulati ga ea yetemeriba nei, mia kei bereio rijamo ka mauo novo nalo napano ajua vio mave ave kenemiu dam̃ariga?”
LUK 16:13 Mia Yesu ber bunu, berinavo “Bereio, ver toro na im̃auano tai, naio rim̃au dede ga ea tubo ve juo ve vaarakurano. Ver tibe na, mia naio tinien tii tinene, mia riilkue ka dolu nene, p̃eli na mia rudu tinene, mia tuvan dolu nene. Kamiu maka kuvijikia ka kuvila ka napano kamiu kube tomu nam̃a amim̃au Atua kanano, a kube tomu na puruveru ka bogo nene bunu.”
LUK 16:14 Ana na ea bogo na, Varisis nalo bunu aju kiano vo, ajum̃a amiagago ka iliano nalo nei. Mia nalo abe tomu nam̃a tiniel jii m̃elea puruveru toru bogo nonovio, naruei nalo abital lelan ga m̃arabo novo nalo na im̃auano bija puruveru napano Yesu berial ban kiano naiagagoano nalo.
LUK 16:15 Ana Yesu mil banlo berinavo “Kamiu tiniemiujii ka kuvila ka napano mia tomu nalo aial kamiu tibe ka tomu na memedu nalo, mia Atua biti dulu venia napano joa kenemiu iviso. Vite miroano napano m̃a tomu nalo amiaia, aberinavo naio bo, mia ea Atua kiano vitiiano tenalo na abova ga.”
LUK 16:16 Iliano dolu tai napano Yesu berenio, naio berinavo “Beamu, Niosi Moruo jo, napano niosi nalo na Mosis kanano bija niosi nalo na naverialiano nalo kanalo juaio, bano-o binimei bokar bogo na Jone Baruei. Jone mim̃au bano-o bisi ana vonganei Ioluano Vou na bo na Atua kanano navenatuboiano naio binimei, naruei ajum̃a amioliolu ka janea vio reraio, mia tomu nam̃a ajidom ka ava jouro eaio na aju amila vio jikili ka ajogkario.
LUK 16:17 Mia nina maka rila ka tuboiano na Atua kanano napano joa Niosi Moruo naio bova ruei. P̃eli vio mave a yetemeriba nei nalo ava kovio ga, mia kiri m̃ariliano na tuboiano nei maka rijikia riva kovio bogo tai ka tumolu tu re.”
LUK 16:18 Iliano dolu tai napano Yesu berenio, naio berinavo “Ver toro tai riilalar koano, ana naio riva rivuru tira dolu, mia Atua mialio ka toro nei naio jo mila siakaiano bija tira dolu nei. Be verare ga bunu ka ver toro tai soro ka tira tai napano koano na beamu miilalar naio ruei: toro nene bunu mila siakaiano.”
LUK 16:19 Yesu ber jamerijiano nei bunu, napano naio ber jibe nei, berinavo “Toro tai, jum̃ano bujo toru laka ka vite na bo nalo miroano, naio miyovovua naio bo laka bogo nonovio, a legiano nonovio amim̃auka sano burum̃ara sinaniano novo nalo.
LUK 16:20 Toro dolu tai naio bunu jo, napano m̃a bogo nonovio amidudu naio binimei amidu naio jo tavio ea burusio na burum̃ara yimo na toro nei kunuano napano be kiano saba telabo. Toro nei, naio be toro tai na maka ve kiano saba tai, naio be toro tai nam̃a jo miogiog sinaniano, niabene nalo vio bujo ka meniko, a siano be Lasaros.
LUK 16:21 Amidu naio joa vio na ka p̃eli mia naio mijikia riniog sinaniano nalo nei torogio nam̃a toro na toru nei jen digio ju, mia makanio. Naio jo miog kuleio ga jibe na, naliko kuli nalo napano abinimei amiom kanano meniko nalo.
LUK 16:22 “Milala jibe na bano-o na tete nei naio m̃aro, ana na nailiano nalo abinimei amidular naio, aba amidu jo tivelinio na Epraamo, ea vio mave. Ana maka vesiou ana na toro na toru bunu m̃aro, ana ajivinio.
LUK 16:23 Mia abuku deven naio ban ea sebi, napano mijog naio bova-o mia bova laka, mia iorou ana naio jirarag bavin, mial koalabo laka, naio mial Epraamo naio jo, a mial ka napano Lasaros jotano naljuo naio, abe juo ajum̃a ajinan.
LUK 16:24 Ana naio bio banlo, berinavo ‘Aue-e, karam̃aku Epraamo, kovijuku bo tiniem riia kiniou liki, jau keiila Lasaros rimei rudu juluvati m̃arjukjum̃ano titi ka kiri uei tai, ka titi ka minaku. Bior vonganei sebi jijen kiniou mia nomijogio bova toru nei.’
LUK 16:25 “Mia Epraamo berdop̃eio, berinavo ‘Keneriku, jau kosidomial bereio meuliano novo nanua beamu. Ka bogo na, jau kobokar kanamo vite nonovio napano jau kojidom m̃elea bo kaso, mia kiri tavaliki Lasaros nei, ea kiano meuliano re nua, vite nonovio maka tai rimelumu van naio. Vonganei, naio mije jogvuiano ea vio nei, ana jau komijog bova toru liki ea vio na.
LUK 16:26 Mia be vite tai ga, naio maka rijikia riviedu ka riijaso, bior Atua mila burum̃ara vio kiri bululuo tai napano jo iviso bure ka kito juo, ka rila ka toro rijikia re taluvo ea vio nei ka riviedu rialso, a maka rijikia taluvo ea vio na jau kojoaio ka rimei ea vio nei.’
LUK 16:27 “Mia toro nei bika bereio, berinavo ‘Teta, aver tibe na, kiniou nabika jikili banso ka keiila Lasaros rivatove bereio ea karam̃aku kunuano,
LUK 16:28 bior kuruaku nalo jimo aju keano vo. Bo kanio Lasaros riva ridu tiniemaiano vanlo, ver p̃eli mia nalo bunu amei ajoru ea jogvaiano nei na.’
LUK 16:29 “Mia Epraamo berdop̃e, berinavo ‘?Mia bior vaio ana monoka Lasaros naio rivano? Nalo ajum̃a abar Niosi Lu ruei, napano vivitauiano lu na Mosis kiano bija naverialiano nalo juaio ruei. Bo ka avuluku nina, ka mia aleal vite nonovio juaio.’
LUK 16:30 “Mia toro nei naio jo jikili kia navo, naio berinavo ‘Teta Epraamo, p̃eli mia maka ajikia ala nina na? Mia ver toro tai rimei bereio ea nam̃ariano, river vite nonovio kalo, mia monoka aviliglo kanio na.’
LUK 16:31 “Ana Epraamo berdop̃e, berinavo ‘A verenio nalo na maka asidom ajog vaio napano m̃a Niosi Lu berenio, maka bunu ve titai bereio ka napano rijikia rilalo amoneaio. P̃eli toro tai rimei bereio ea nam̃ariano, river vite nonovio nalo vanlo, p̃eli na venia, mia asidom re ka amoneaio ga na.’ ”
LUK 17:1 Ana Yesu ber ka kiano naiagagoano nalo, naio berinavo “Mia jukujukuano nalo amijikia amei bogo nonovio ga, mia toro napano mila vite tai napano m̃a buru jukujukuano jo binimei vaataro, mia rivova laka vanio.
LUK 17:2 Ver aiorikar puruveru tai toa burujono ana avuku naio riva ea buluniogovu, nina na be vironiano tai napano melala ga. Mia toro nam̃a mila kanaku tete nalo nei tai juvan kiniou, mijoru ea kariano ana maka bunu tu sikili ea kiniou, mia toro nene naio rivar vironiano tai napano kirisikili laka riva lie vo tovulu ninei.
LUK 17:3 Ver tibe na, monoka kuvitikar vatitig kenemiu meuliano nalo bogo nonovio, ka mia m̃a kala re jukujukuano rimaluvo ka kiamo bilbilu nalo.” Ana Yesu berenio, berinavo “Ver jau keial ka napano kuruamo naio jo mijoru ea kariano, monoka keil van naio ka kovururirio, mo ver naio rivilig naio, monoka jau koviekokoa naio.
LUK 17:4 A ver naio rila rivova vanso ve va aluo ka legiano ve takurano ga, a bogo nonovio, naio mila kirivova karina naio ber vonga berinavo ‘Aire koig, aua namila bulagso toru laka. Naber bo ka jau, koviekokoa kiniou,’ mia jau kala tum̃abe? Monoka jau koviekokoa naio ve va aluo nei nonovio riviniu.”
LUK 17:5 Ana atevi nalo abika den Yesu, aberinavo “Tubo, kumemi numisidom ka jau kala kenememi viekouoiano rimei sikili lie vo.”
LUK 17:6 Naruei naio berdop̃e, berinavo “Ver kamiu kuvika kiniou ve telisu ga, tavukia kurukuti m̃arabako, mia ver kenemiu viekouoiano nene naio sikili rivu, ana mia kumijikia kuver ka burupati burujou yako kuverinavo ‘Jau kataluvo den jelemo na vija kanamo pati nalo, jau kava kotu koiluo ea tinia tei iviso,’ ana mia naio rimonea kamiu.”
LUK 17:7 Ana Yesu berinavo “Ver kamiu tai naio ve toro na toru tai, a kanano toro tai tom̃a rila kiano im̃auano. P̃eli naio riva rim̃au ea tiniavio, p̃eli na rivitikar kiano temeul nalo, p̃eli na venia, ana verenio kijev bogo na naio rimei bereio ea im̃auano, mia toro na toru nei naio river venia kanio? Maka rijikia river kanio riverinavo ‘Mo, jau komei kototano vija kiniou, kito ve juo rosinan,’ bior naio be kiano toro na im̃auano ga.
LUK 17:8 Mia toro na toru monoka river kanio ga riverinavo ‘Mo, mia kava kovorosebi beamu vo. Verenio sinaniano rimenoko, ana kava koyovovua so rivu, ana kavar saku rimei ka nesenio, a nomunuio, bisi, ana mo jau komijikia koviovio samo.’
LUK 17:9 Mia bogo napano toro na im̃auano nei mila nonovio vite nalo nam̃a toro na toru ber ka naio, mia toro na toru maka rijikia river burum̃ara siva tai vanio, bior nina be kiano im̃auano ga.
LUK 17:10 Mia kam bunu monoka tibe na. Verenio kamiu kuvila vatitig nonovio im̃auano napano Atua ber ka kamiu, rivano-o riviniu, mia kuver ga tibe nei, kuverinavo ‘Aa, nina maka ve titenia na. Kito rala ga venia napano memedu ka kito ralaio, tavukia Atua kiano tomu na im̃auano nalo ga.’ ”
LUK 17:11 Ana ka bogo na, Yesu nalo aju amiel kia ga vo ka avavin Yerusalemo, ana kialo m̃arabo jel bure tanobuku juo nei Sameria bija Kalele.
LUK 17:12 Naruei nalo amiel bano-o, vaataro ka ayotuba ea m̃arkomeli tai, abitavo bija taara tai na tomu na burumieni, nalo duelimo, napano ajujum̃a ea ikim̃arabo.
LUK 17:13 Mia bogo napano amial Yesu, abio jouo banio, aberinavo “Yesu, Tubo, nuber bo kaso tiniem riia kumemi.”
LUK 17:14 Ana bogo napano Yesu mijogio, naio ber kalo berinavo “Kamiu kuva kuvar laka ea kulo lu nalo beamu vo, ka avitii veve niabemiu nalo ka aver niabemiu nalo ameravo ruei.” Naruei nalo abano, ana bogo napano aju amiel abano, amiilo ka mokotenalo nalo aju abinimei meravo.
LUK 17:15 Naruei nalo tai, bogo napano mial ka naio binimei bo ruei jibe na, naio barp̃ilig binimei, miaia Atua laka,
LUK 17:16 binimei mijorua tano ea Yesu jaano, ber siva kanio. Toro na, naio maka ve Ju tai memedu, mia naio be yati na Ju togio na Samaria. Mia nalo dolu na, nalo abe Ju memedu, mia nalo maka amei bereio.
LUK 17:17 Ana na Yesu berinavo “Nalo napano niabelo meravo ruei, nalo duelimo, mia nalo kover dolu nene nalo be?
LUK 17:18 Naina binimei bereio, naio be toro na vio dolu ga, mia ka venia ana naio ga takurano binimei bere ka rivamenea Atua, ana nalo dolu nalo maka amei bereio?”
LUK 17:19 Naruei Yesu ber kanio berinavo “Koig, jau kotumolu keiel kava vonuo. Kiamo viekouoiano milarurso ruei.”
LUK 17:20 Ana iorou, kulo Varisis nalo abinimei abika den Yesu, aberinavo “Navenatuboiano na Atua kiano nam̃a jau kojom̃a koberii vurua na mia kumemi nuvialio nagi?” Ana na Yesu berdop̃e, berinavo “Atua kiano navenatuboiano naio maka rijikia rimei tibe ka titai napano toro mijikia rialio ka mirano.
LUK 17:21 Naio maka ve titai napano mia averinavo ‘O naio naruei, jau komial naio jo binimei kia,’ p̃eli na averinavo ‘Naio nei jo binimei ruei.’ !Kamiu maka kuvitilubario, mia Atua kiano navenatuboiano naio ju iviso ka kamiu ruei!”
LUK 17:22 Naruei Yesu mil ban kiano naiagagoano nalo, naio jukunu banlo ber mia tum̃abe ka legiano na maaro nalo napano aju abinimei. Naio berenio “Iorou kanio ana mia kamiu kuvilavio sikili ve toru ka kuvial bogo na mia kiniou Kulorinio Kenerinio noyotuba ea yetemeriba nei, mia nina maka ve kenemiu ka kuvialio.
LUK 17:23 Mia tomu nalo atum̃a averver averinavo ‘Naio nei!’ p̃eli na ‘Naio yako!,’ mia kamiu kuvan re rivijalo, bior maka kiniou navo.
LUK 17:24 Mia bogo na kiniou Kulorinio Kenerinio nemei bere be riano rimonloglog legiano nene, mia aviniu avitilubario, mia kiniou nemei tavukia vio bijiio tai napano rila niogovu rimerera ea vio tivelinio riva rivokar tivelinio dolu nene.
LUK 17:25 Mia maka ve bogo na vite nene vo, bior beamu ka nina, mia kiniou Kulorinio Kenerinio, tom na vonganei mia monoka ala kiki kiniou ka saba vetelabo, mia monoka avukular kiniou.
LUK 17:26 “Rivano-o rivokar bogo na mia kiniou Kulorinio Kenerinio nemei bereio, mia tomu nalo atu vatitigio re rivu, rivare ga ka nanua amila ea bogo na tormoruo Noa kiano bogo.
LUK 17:27 Ka bogo nene, tomu nalo ajidel ka m̃a ajinan, a ajum̃a amunu vite nalo, ajum̃a amila soriano jibe na ga, binimei bokar bogo na Noa ba joomo ea kiano burum̃ara uako nanua naio mim̃aukanio. Naruei burum̃ara ueimia binimei burubulag nonovio kialo meuliano nalo.
LUK 17:28 A ea bogo na Lot kiano jibe na ga bunu. Tomu nalo ajum̃a ajinan, ajum̃a amunu vite nalo, ajum̃a aban ea yimo na ṽilṽiliano a amila bijii puruveru, ajum̃a amim̃auka tiniavio, ajum̃a amim̃auka yimo, amila jibe na banbano-o, mia maka bunu tinielrimaio ka titai leleio.
LUK 17:29 Mia monloglog legiano napano Lot jumolu den kialo vio, mia sebi bija vovosebi na sebi jinano ajibirbil abavatove ea vio yauo, jijen nonovlo abiniu abava kovio.
LUK 17:30 Mia kiniou neber ka kamiu ka mia bogo napano mia kiniou Kulorinio Kenerinio nemei, mia tomu asidomial re titai, mia asidomialo ga, mia nalo aiilo va ka burum̃ara vite nalo na jibe nei amalmaluvo ea kialo meuliano nalo.
LUK 17:31 “Ea bogo na, ver toro tai tom̃a rivonvon ea kunuano mave ea ino, mia naio rial tenei naio to rimei, mia ver naio rivatove, mia maka rivu ka rilavon ka rivar kiano saba joomo ea kunuano, mia naio monoka rivan ga tibe na. Mia toro nam̃a mim̃au ea tiniavio, naio bunu maka rivu ka rimei bere vonuo, mia naio monoka rivan ga tibe na.
LUK 17:32 Kam tiniemiu ribobogia re Lot koano, napano jiraragodi, mia naio binimei be puruveru ju.
LUK 17:33 Toro nam̃a jidom rilarur kiano meuliano ga, mia naio rila luvuio, mia nana m̃a mijamo ka kiano meuliano ba kovio, mia rilarur naio bereio.
LUK 17:34 Kiniou neber ka kamiu ka ea bogo na, p̃eli ka bogiano napano mia toro tai naio koano amon ea m̃alo jogu, mia amei avurular tinene ga, mia atuvan tinene tobo.
LUK 17:35 P̃eli na tira ve juo atu vio takurano avijii salo baba, mia ve takurano ga rivano, mia tinene naio tobo.
LUK 17:36 [P̃eli na tomu ve juo atu aim̃au biju ea tiniavio, tinene tuvan vio rivan mia tinene naio sikili tumomou tu.”]
LUK 17:37 Naruei kiano naiagagoano nalo abika denio aberinavo “?Ana Tubo, vite nalo nene mia ayotuba ea vio be?” Ana naio berdop̃elo, berinavo “Ea bogo nene, mia tavukia napano ver tena m̃aro tai jo kovio tai. Ea vio na naruei, menu nalo nam̃a ajenjen tena m̃aro, mia nalo amei kanio, monoka nalo ve miroano ea vio nene. Ea vio na vabe napano kariano joa, vio na naruei ve natibureano eaio.”
LUK 18:1 Ana Yesu jii jamerijiano dolu banlo, ka tunukakarlo ka m̃a tinielo veve juo re bereio ea kanalo volkouano, mia atu sikili dam̃ariga eaio, abolkouo rivano-o mia avokar verdop̃eiano eaio.
LUK 18:2 Kiano jamerijiano nei, naio ban jibe nei, berinavo “Be komeli tai, tubo nene naio be toro kouo tai, be toro tai nam̃a maka rialerinio ea Atua leleio, maka rimerou kanio, a maka tovon tomu nalo bunu.
LUK 18:3 Ana taanou tai bunu joa vio na, napano toro tai jom̃a mila bulag kiano saba nalo bogo nonovio ga, ana taanou nei naio jo ba jo jegi ban kanano tubo, jom̃a mila kiano veriiano ka toro neibano, berinavo ‘Aiou, jau monoka kala titai ka tete na, naio jom̃a mila kiki m̃elea kiniou mia.’
LUK 18:4 Mia tubo nei maka tinien riia tira nei, naio miovo ka ril van tete neibano. Mia naio mila jibe na banbano-o, mia tira nei naio jom̃a monmon ga ba jegi ban kanano yubo. “Ana iorou kanio ana tubo nene berenio ‘Kiniou nebe toro tai nam̃a maka nosidomial ka nala vaio nam̃a Atua p̃eli toro dolu ber ka kiniou ka bo ka nalaio.
LUK 18:5 Mia tira nei naio jom̃a binimei jegi vururu ban kiniou mia maka nosidom nala tena m̃a jom̃a berenio. Mia naio jom̃a binimei bika jibe na, mila kiki tanea kiniou toru laka, p̃eli mia nala ga venia nam̃a naio jom̃a bikanio. Ver p̃eli mia tinieku rim̃aro ka nojog kiano tegiano.’ ”
LUK 18:6 Ana Yesu mil ban nalo nam̃a ajum̃a amije tilinielo ka jamerijiano nei, ana naio berinavo “?Kamiu kuviagago vatitig ka toyovo nei kiano iliano nam̃a berenio? Bior tira nei jegi va telabo banio, mo mia naio monoka sidomii vite nam̃a tira na naio jom̃a bikanio.
LUK 18:7 ?Mia tum̃abe ka Atua na mave? ?Bogo na naio mijog ka kiano tomu nalo nam̃a bijauia bulaglo, ajum̃a ajegi ban legiano a bogiano, mia naio rijikia to vesiou tibe na rivano-o mia rila re titai vanlo?
LUK 18:8 Makanio, mia neber ka kamiu ka ver naio rijog ka m̃a kamiu kumitum̃a kubolkouo jikili dam̃ariga banio, mia naio tumolu sop̃eli ga tulaka ka rijai kamiu. ?Mia nejidom nevika kamiu bunu, ka ver bogo na mia kiniou Kulorinio Kenerinio nemei bereio ea yetemeriba nei, mia nemijikia neial ka tomu vetelabo atu sikili ea kiniou tibe na, p̃eli na mia ve re tai kovio ga?”
LUK 18:9 Bogo na Yesu jo bija tomu nalo, naio bitilubar ka napano nalo tealo ajum̃a abe m̃arou toru laka, aju aberiam̃a kialo meuliano memedu bo ruei, mia ajum̃a abitii saia tomu dolu nalo, amialo jibe ka maka avu tibe ka nalo. Naruei naio berii tomu nalo jibe nei, jii jamerijiano tai, berinavo
LUK 18:10 “Tom juo, aba joomo ea Atua kunuano monloglog bogo na volkouano. Nalo tinene, naio be Varisis, mia tinene, naio mila im̃auano tai napano tomu nalo maka tiniel tii naio riviorio, naio be toro na takis.
LUK 18:11 Mia bogo na Varisis naio jo jumolu ka rivolkouo, naio ber jibe nei, berinavo ‘Atua o, kiniou neber burum̃ara sivaiano toru laka nei banso, napano kanaku meuliano naio bo lie jovulu nalo dolu nei kanalo. Nemiaiaso napano kiniou maka natavukia tomu na vinauano nalo, p̃eli tomu na amijukubin toro, p̃eli tomu nam̃a amila siakaiano, p̃eli tomu na takis jibe ka ninei jumolu ju nei.
LUK 18:12 Makanio, mia kiniou nojom̃a nomila bo laka dam̃ariga, bior kiniou nomondulu ka nojom̃a nobolkouo banso ea legiano juo ka sude takurano, a ea vite nonovio nam̃a kiniou nabokar ka jum̃aku, verver novokar ve duelimo mia monoka nodu ve takurano vanso dam̃ariga. Vite nalo na naruei nam̃a kiniou nojom̃a namilaio ana mila kiniou nobo laka ea miramo.’
LUK 18:13 “Mia toro na takis naio jo mijog bova bior kiano kariano tealo nam̃a milaio, mia niabene buru vurebure jibe Atua bitii kiano meuliano maka rimemedu leleio. Naruei naio niabene p̃ili ka riva vaataro keanio, naio jumolu ju koalabo ga, mia maka sidom sirarago rivavin mave, naio jurubanini naio jom̃a mijubaluba bairene, naio jegi naio berinavo ‘!Aiou Atua, jau kala lup̃ilup̃i kiniou, a tiniem riia kiniou, kiniou toro na kariano.’
LUK 18:14 “Mo kamiu kumisidomii von: mia Atua naio saaro ka tomjuo nei na vabe kiano volkouano? Nao-o, toro napano bitilubar kiano kariano, naio mijog bova biorio, Atua mijelar kiano kariano. Mia dolu nene, naio ban bere vonuo napano kanano meuliano jo jibe ka ga bogo na naio binimei. Toro nam̃a jo bavavin ea naio, mia Atua rudu naio to yetano, mia toro nam̃a jo midu naio jo yetano, mia Atua rivitiri lario.”
LUK 18:15 Ana ka bogo na, nena nalo tai abar kenerilo solbouo nalo abinimei ea Yesu, ajidom naio tokol lo, rilivu kalo. Mia bogo na naiagagoano nalo amileal, aberburelo, aber avatavio bereio.
LUK 18:16 Mia Yesu bio ban tire nalo, ber amei bo ka ga aialio, a naio ber ka naiagagoano nalo, berinavo “Kamiu kuverbure re kiritete nalo na, kuvijamo kalo amei aial kiniou, bior kiritete nalo na, tomu nalo napano ajavukia nalo, nalo ga naruei aju aba jouro ruei ea navenatuboiano na Atua kanano.
LUK 18:17 Kiniou neber be riano ban kamiu, ka toro na ver sidom navenatuboiano na Atua kanano, naio monoka rila naio tibe ka kiritete nalo nei, ver p̃eli, naio maka rijikia riva jouro eaio.”
LUK 18:18 Avona bisi, ana tubo tai binimei bika Yesu, berinavo “Naverloglogiano novo, neber bo kaso, jau koverial van kiniou ka monoka nala venia ka mia nemijikia novokar meuliano na maka rijikia ribisi.”
LUK 18:19 Ana Yesu berdop̃e, ber “!Ei! ?Jau komijikia venia, ana kobio kiniou kober kiniou nobo? Maka ve toro dolu tai na rivu ve riano, mia Atua ga takurano.
LUK 18:20 Mia jau kobika kober jum̃abe ka toro tai na jibe ka jau mijikia rimei rivu ea Atua mirano. Mo, p̃eli jau komijikia batitig tuboiano nene nalo ruei nam̃a aber ka: Jau kala re siakaiano, jau koue tam̃aria re toro, jau kovina re, jau kala sibi re, jau kotovon karam̃amo naio koniomo ga.”
LUK 18:21 Ana tete nei naio berdop̃e ber “Nao, kiniou nomijikia nono tuboiano nalo nam̃a jau kober kiana, mia nomijikia na ver ka jau ka kiniou nojom̃a nabokar batitiglo jikar ea bogo na kiniou nobe m̃eaku kia ga vo. Binimei bokar vonganei, maka nalabelea tai.”
LUK 18:22 Mo bogo napano Yesu mijog ka napano naio ber jibe na, naio berenio “Kirinovo, mia tivelinio na jau, vite tai ju keano vo. Jau monoka kava koṽiliṽili nono ka kanamo saba nalo na miroano na, mia jau kavar puruveru nene, kavano katan ka van talim̃asa nalo. Ver jau kala tibe na, mia ve kanamo vite novo nalo ve miroano ea vio mave. Mo, jau kava kalaio, avona bisi ana komei katakisor kiniou.”
LUK 18:23 Mia bogo napano toro nei mijog iliano nei, naio mijog kiano iviso jegi toru laka, kiano jidomiano kiri temi m̃ele, bior naio be toro na jum̃ano bujo ka saba toru laka.
LUK 18:24 Naruei Yesu bitii toro na toru nei bano-o, kar na naio berinavo “Ver toro tai na kiano saba toru, ver naio sidom riva jouro ea Atua kiano navenatuboiano, vite na kirisikili kija na.
LUK 18:25 Nao-o, kiniou neber ka kamiu, ver kamele tai riovodulu ea bulumirano nitil tai, nina be kirisikili laka, mia ver toro tai na be kiano saba toru mia naio sidom ka riva jouro ea Atua kiano navenatuboiano, nina naio kirisikili lie vo ka nina.”
LUK 18:26 Mia nalo napano amijog iliano na, nalo abamenea naio kanio, aberinavo “!Tomnei! Ver tibe na, mia kei naio mijikia rijev meuliano?”
LUK 18:27 Mia Yesu naio berdop̃e, berinavo “Nao-o, toro maka rijikia rila naio rijev meuliano, mia venia nam̃a toro maka rijikia rilaio, mia Atua naio mijikia rilaio rivu ga.”
LUK 18:28 Ana Pitere naio bika, berinavo “?Ana mia tum̃abe ka kumemi? Kumemi numituvan kenememi vonuo nalo ruei, ana kumemi nubinimei numitakisorso.”
LUK 18:29 Mia Yesu naio ber ka kiano naiagagoano nalo, naio berinavo “Kamiu kuvisidomii m̃elea re tivelinio na. Ka toro kei napano ver tuvan kiano vonuo, p̃eli koano, p̃eli karam̃ano a kenieno, p̃eli na kenerinio nalo, mia ver naio tuvan vite nalo nonovio na rivior im̃auano na Atua kiano navenatuboiano,
LUK 18:30 mia naio rijev meran bere kiano saba nalo na jibe nei ve miroano lie vo. Nina ea bogo na naruei, a iorou ka bunu ea bogo na ju binimei, mia naio rivokar meuliano na maka rijikia ribisi.”
LUK 18:31 Mia bogo na ajum̃a amiel abano, ana Yesu bio kiano duelimo ba juo [12] abinimei kean naio, naruei naio ber kalo berinavo “Kamiu kuviagago vatitig rivu. Vonganei kito roju rabavin Yerusalemo kia nei, mia bogo na kito rovoru ea vio na, vite nonovio nanua nailiano nalo abivitauiaio nua ruei ea tivelinio na Kulorinio Kenerinio, mia kamiu kuvial amalmaluvo takiio.
LUK 18:32 “Mia kamiu kuvial ka napano adu naio toa kulo Romo nalo jum̃alo, ka mia aserei niadua rivanio, ala kiki naio, a avule titia naio,
LUK 18:33 a avitiv naio, rivano-o mia auebin naio rim̃aro. Mia ka bogoti ve tolu nene, ana mia naio tumolu rimeul bereio.”
LUK 18:34 Be kurano ka na Yesu berial vite nonovio meravo banlo jibe na, mia maka lele ajoglubarbar vatitigio rivu. Naio jibe ka napano amilavan iliano nei kalo, mila ana maka avokar batitig nioti na iliano nene.
LUK 18:35 Mia Yesu nalo aju amiel abano, abinimei vaataro ka komeli na vio Jeriko, mia merebono tai jom̃a jotano ea ikim̃arabo, naio jom̃a miogiog sinaniano den tomu nalo nam̃a ajeljel ea m̃arabo nei.
LUK 18:36 Naruei merebono nei naio mijog ka Yesu nalo aju abinimei, naliko tiniobi nalo napano ajum̃a amiel bijaio, ana naio bika berinavo “Nalo na vio be na, ajum̃a amiel ka ava be?”
LUK 18:37 Naruei nalo aberdop̃e aberinavo “!E, abe Yesu na vio Nasarete ga, naio miel binimei jel kean kito ga!”
LUK 18:38 Ana toro nei bio jouo, jegi ban Yesu berinavo “!Yesu, jau Teviti kiano yati, kiniou nojidom ka jau tiniem riia kiniou!”
LUK 18:39 Mia nalo nam̃a aju amiel jukamu ka Yesu, amijog ka m̃a naio bio jibe na, ana aberbureio, aber naio rimelumu ga. Mia tete nei naio maka sidom rijoglo, mia bio bereio, jouo lie, berenio “!Yesu, jau Teviti kiano yati, neber bo kaso, tiniem riia kiniou!”
LUK 18:40 Mia Yesu miel bano, mebi loglog vio nene, ana ber avuru toro nene rimei vaataro kanio. Ana aburio binimei, ana Yesu bika denio, berinavo
LUK 18:41 “?Jau kojidom ka mia kiniou nala vaio kaso?” Ana naio berdop̃e berinavo “Aiou, Tubo, kiniou nojidom ka miraku rivu, ka nejikia neial vite.”
LUK 18:42 Ana Yesu berinavo “Mo, vonganei kiniou nesian kiamo siraragiano vanso tibe ka na jau kobikanio. Kiamo viekouoiano milaso kovu bereio.”
LUK 18:43 Mia monloglog bogo na, toro nene mirano binimei bo, ana naio jom̃a miel naliko Yesu, naio jom̃a miaia Atua toru laka. Mia tomu nalo bunu napano amial vite nei, amial bo laka, ajum̃a abamenea Atua siano biorio.
LUK 19:1 Mia Yesu nalo abinimei jouro ea komeli na vio Jeriko, ajum̃a amiel aban ka aiovodulio ga.
LUK 19:2 Mia ea vio na, be toro tai jo, siano Sakias. Naio be toro na toru ka nalo na takis ea tanobuku na toru na vio nei, mia bior naio jom̃a mim̃au bova, jom̃a mijukubin tomu nalo ka kialo puruveru na takis nene, mila jum̃ano bujo kanio, kiano saba nalo miroano.
LUK 19:3 Mia naio bunu binimei ka bogo nei, jidom rial kija Yesu ka naio be toro na jum̃abe, mia tomu kinkin telabo aju vaataro ka Yesu, aju kovio amila vio telisu laka, mila naio maka rijikia rial vatitigio, bior naio be toro na bulati ga tai.
LUK 19:4 Mia mial bova ga, ana jikiti jukamu ka Yesu nalo, ba bokar buruviove tai, jakiio bavin mave joa jaati tai, jororea ka mia Yesu nalo aiel amei, ka mia naio mijikia rial vatitigio.
LUK 19:5 Mia bogo na Yesu binimei bokar buruviove nei, Sakias miilo ka napano Yesu jirarag bavin, mialio, mil banio berinavo “Sakias, jau katabulu sop̃eli. Kiniou nomijoglubar ea kiniou ka banei monoka noto kija ea kiamo vonuo beamu vo.”
LUK 19:6 Mia Sakias mijogio, jumolu jabulu sop̃eli batove, naruei buru Yesu ba vonuo ea kunuano, bija burum̃ara saariano tai.
LUK 19:7 Naruei bogo na tomu nalo amial tenei, nalo telabo maka asaaro, amil mum̃iio tertelisu, a berinavo “Toro na Sakias na, naio be toro tai nam̃a mim̃au kirivova, naio jom̃a mijukubin tomu nalo bogo nonovio ga, mia kar vaio ana Yesu jidom riva to naljuo ea kiano vonuo?”
LUK 19:8 Mia bogo na aju joomo kario, ana Sakias mijog lubar ka monoka naio rivilig naio, riyelar kiano meuliano, naruei naio jumolu berial ea Tubo mirano, naio ber “Tubo, vonganei kiniou nomijamo ka kiaku saba torogio ban tomu na abe talim̃asa, maka ve kanalo titai. A venia nam̃a namila sibilili toro kanio, nebina kalo, mia navar meran bereio vokar ve va veri tukario.”
LUK 19:9 Mia Yesu mijog bo toru laka ka venia napano Sakias mijue bulagio banio, ana berinavo “Kiniou nemial jibe ka banei ioruriano na Atua kiano naio binimei bokar m̃aratavo nei memedu. Tete na naio milaluvu m̃arabo na kiano meuliano, mia naio bunu naio be Epraamo kiano bajulukuti memedu, naio be toro Ju riano,
LUK 19:10 mia kiniou Kulorinio Kenerinio nebinimei ea yetemeriba nei ka nesirago nalo nam̃a amilaluvu m̃arabo jibe toro nei, a ka nalarurlo.”
LUK 19:11 Mo tomu nalo ajum̃a amije tilinielo ka Yesu kiano iliano nalo nei, naruei naio mil banlo ba ber jamerijiano tai kalo. Naio mial bo ka riverlogloglo ka jamerijiano nei, bior naio mijikia ka tomu nalo ajum̃a ajidom aber bogo na naio riva rivoru Yerusalemo, mia naio rila Atua kiano navenatuboiano riyotuba kalo ve vaarakurano ga ruei. Mia vonganei aju abinimei vaataro ka Yerusalemo ruei, ana Yesu jidom riverlogloglo ka mia naio monoka tuvanlo beamu vo, karina mia naio rimei bereio.
LUK 19:12 Naio ber kalo jibe nei berinavo “Be toro na toru tai, aber ka naio ka rieli riva koalabo ea vio na parinio tubo na toru joaio, ka avitirilar naio ka rimei rive parinio tubo ea tanobuku na kiano, karina, mia mijikia rimei bereio rive tubo ea kiano vio.
LUK 19:13 Mia beamu ka bogo na maka rivan vo, naio bio kiano tomu nalo, nalo duelimo, mia mije puruveru banlo abeve terakurano. Ana naio ber kalo berinavo monoka aim̃au rivija puruveru nei o-o mia bogo na naio rimei bereio.
LUK 19:14 Mia tomu nalo na tanobuku nei amiolu titig toro na toru nei, mia bogo na naio ban kario, ana aberiio aberinavo maka bunu asidom naio ka rimei rive parinio tubo kalo. Naruei amiila toru ba ban parinio tubo na toru, aber ‘Kumemi maka nuvisidom nuvial kema na rimei ka rive parinio tubo ka kumemi, kumemi maka lele garuei nuvisidom jau kodu burum̃ara sio na vanio.’
LUK 19:15 Mia parinio tubo na toru nei naio mila ga, ana toro na toru nei binimei bereio ka rive tubo ea kiano tanobuku. Naruei naio binimei bio kiano tomu nalo nei napano naio bar puruveru banlo beamu ruei, naio jidom ka rial ka amim̃au eaio abokar puruveru vio bereio.
LUK 19:16 Ana toro na jukamu binimei jikili jukamu ea toro nei mirano, berinavo ‘Tubo, kanamo puruveru takurano ga naio nei, kiniou nomim̃au bija bano naio milelar duelimo bereio judu kanio.’
LUK 19:17 “Ana na toro na toru nei naio mial kanano toro nei mim̃au bo, ana naio berkanio berinavo ‘!Bo mia bo, komim̃au bo laka. Mia bior jau kobitikar batitig im̃auano telisu na nomidu joa jum̃amo na, vonganei nodu burum̃ara im̃auano tai vanso, nebitiri larso ka kovitikar kanaku komeli duelimo na tortoru.’
LUK 19:18 “Bisi, ana naliano ka binimei, naio berinavo ‘Tubo, puruveru takurano nua komidu ban kiniou, nomim̃au eaio bano-o nemijev jumo bereio judu kanio.’
LUK 19:19 “Ana na toro na toru berkanio, ber ‘Kobo, jau bunu komim̃au bo, mo mia kiniou nevitiri larso ka mia kovitikar kanaku komeli jumo na tortoru.’
LUK 19:20 “Avona bisi ana na maariano nene naio binimei, berinavo ‘Tubo, kanamo puruveru na komidu ban kiniou, nomijuvulukoio batitig ka niakulm̃arauo tai, nomidu van batitigio jo, naio nei nomidu ber binimei ka nodu vanso.
LUK 19:21 Kiniou nojo nomialso jibe ka kobe toro tai na komijikia kavar bulag vite na toro dolu mije batitigio jo ve kanamo, a komijikia kejinan ea tiniavio na maka komebijaio. Kiamo bajago kirisikili kija jibe na, mila na kiniou nomerou kaso, tenene na maka nala titai ka kanamo puruveru nene, nomidukar batitigio jo bo ga.’
LUK 19:22 “Ana toro na toru nei tinien jerio, naio berinavo ‘Kaleliki, jau kober niegeniege kiniou kirivova tenia navo, napano kober nobe toro kouo tai jibe na. Mia bo ga, mo kanamo iliano na mia serso bereio.
LUK 19:23 ?Ver kiniou nobe toro na jibe na, bior vaio ana komidukar kurano ka kanaku puruveru jibe na? Bo laka ka ver jau kodu riva toa yimo na puruveru, ka ver nemei bereio, ana nemijikia navar bulagio rivija boboti napano naio miin bulagio.’
LUK 19:24 “Ana na toro na toru nei naio ber ka nalo dolu na ajikili aju vaataro, berinavo ‘Kuvidular puruveru na den jum̃ano, kuvidu van nana mileal duelimo.’
LUK 19:25 “Ana nalo aber ka toro na toru nei, aber ‘!Ana Tubo, naio bar miroano kiana, kiano duelimo ruei!’
LUK 19:26 “Mia toro na toru ber kalo, berinavo ‘Nao-o, jibe na naruei. Nana be kiano saba telabo ruei, mia naio rivar ta bunu bereio, mia nana maka kiano titai mia naio rilaluvu venia napano be kanano telisu mugaruei.
LUK 19:27 Mia tivelinio ka kiaku uolu nalo nei, napano maka asidom neve tubo kalo, nejidom ka kuva kuvurulo amei ea vio nei, kuvuebinvinlo am̃arm̃aro kamu ea miraku.’ ” Naruei Yesu kiano jamerijiano naio biniu ea vio na.
LUK 19:28 Iorou ka napano Yesu ber iliano nei bisi ana naio jumolu, miel jukamu bano, burum̃arabo kalo abavin Yerusalemo.
LUK 19:29 Mia nalo abinimei vaataro ka komeli juo na tertelisu nei Betevas bija Betani, ea tivelinio ka Burusuku na Buruolivi nalo. Ana Yesu mil ban kiano naiagagoano juo, berinavo
LUK 19:30 “Kuve juo kuviel kuvan ea komeli na telisu yako jo beamu vo. Mia bogo na ver kuva jouro eaio, mia kuvial togki tai amiorkar ju. Togki nene be m̃eaku ga, maka ala kor taakano vo, mia kuvijubarlar sano teli ana mo kuvuru kumei bere ea vio nei.
LUK 19:31 Mia ver avika den kam juo averinavo ‘?Ai, kumitu kumijubarlar sano teli ka venia?’ Ana mia kamiu kuverdop̃elo kuverinavo ‘Tubo jidom temeul nei ka rila kiano im̃auano tai.’ ”
LUK 19:32 Yesu ber jibe na kalo, naruei miilalo abano, mia nalo amial jibe ka ga napano naio ber kalo.
LUK 19:33 Ana na nalo aba ajum̃a amijubar bulag temeul nei sano teli, mia bogo nam̃a ajum̃a amilaiio, ana sano taanou nalo abika aberinavo “?Ai, kumijubarlar sano teli ka venia a?”
LUK 19:34 Naruei nalo aberdop̃elo, aberinavo “Makanio, Tubo naio jidom temeul nei ka rila kiano im̃auano tai beamu vo.”
LUK 19:35 Ana nalo amijamo kanio, ana na nalo aburu togki nene binimei ban Yesu, mia abisii bulag m̃alo kulukoti nalo mave ea taakano, ana na amidular Yesu bavin jotano mave eaio.
LUK 19:36 Ana Yesu midu togki nene, jom̃a miel bano, mia bogo na naio jo bano, mia tomu nalo abisii m̃alo kulukoti nalo ea m̃arabo, kanio mia Yesu kiano togki mijikia riel mave ealo.
LUK 19:37 Naruei nalo amiel ea Burusuku na Buruolivi nalo, bano-o abinimei aboru ea vio na m̃arabo mialolo batove ka rivatove Yerusalemo. Mia bogo na burum̃ara tiniobi na naiagagoano nalo miroano amial ka Yesu jo miel binimei vaataro ka vio Yerusalemo, mia ajidomial bereio burum̃ara im̃auano nalo bija kijokijo nalo nam̃a naio milaiio, mia amial jibe ka napano kialo burum̃ara parinio tubo vou tai naio jo binimei, mila na ajaaro toru kanio, aju abamenea Atua biorio.
LUK 19:38 Ajum̃a abiovio, aberinavo “!Atua loa laka, keilivu ka parinio tubo nei binimei ea siamo! Burum̃ara merivuiano ea vio mave, kamiu na ea vio na mave kuvitirilar Atua siano, kiano mermerano bo mia bo!”
LUK 19:39 Mia ka bogo na, Varisis tealo aju iviso ka tiniobi nalo nei, mia maka lele asaaro ka na abitirilar Yesu jibe na, ana na aberii kanio, aberinavo “!Naverloglogiano, koverbure kanamo naiagagoano nalo na ka auetuba kavuru kaso re tibe na!”
LUK 19:40 Mia Yesu berdop̃e banlo, berinavo “!Ee, vede ga. Ver nalo aviovio tibe na re, p̃eli mia puruveru rera ga nei monoka nalo aviovio.”
LUK 19:41 Mia Yesu binimei vaataro ka rivokar burum̃ara komeli nei Yerusalemo, mia naio jirarag ba jouro eaio, tinien miiaio, ana jikar ka jogumirano jibirbil biorio.
LUK 19:42 Mila jibe na ana naio mil ban memedu, berinavo “Kiniou nomijog bova toru kaso. Ver jau kovitilubar ga venia miyotuba ea kiamo vio banei nei! Atua jo mila kiamo m̃arabo novo tai ka kojev tum̃aro eaio, mia jau maka kovitilubario.
LUK 19:43 Mia monoka nover ka jau ka mia bogo tai rimei easo napano mia kanamo uolu nalo ve miroano laka amei kaso. Mia aseliviv easo atukoso, a mia ayuku bijii borotano rimei vio takurano, ve kialo m̃arabo ka mia amijikia avavin ea kanamo burum̃ara tagvoru nalo.
LUK 19:44 Mia amei jouro, aue vatitigso. Mia auebinvin kenerimo nalo, a mia ala bulag nonovio kunuamo nalo, avar bulag kiamo burukis nonovio avatove mia riviniu. Vironiano na jibe na mia rimei easo bior ka napano jau maka kosidom kovitilubar ka banei be kanamo bogo memedu ka napano Atua maluvo ka rilarurso.”
LUK 19:45 Naruei Yesu miel ba jouro ea komeli, mijaka ban ea Atua Sop̃i kunuano lu, ana mial nalo nam̃a aju amim̃au bior veru ea vio na. Naruei naio mijil dedade ealo, berinavo
LUK 19:46 “Atua ber ea kiano Iliano Lu, naio berinavo ‘Kunuaku Lu naio be yimo na volkouano,’ mia kamiu kubiliglar yimo nene ruei, binimei jibe ka buluvae tai na tom na vinauano nalo kunualo.”
LUK 19:47 Ana ka bogo na Yesu jom̃a bava joomo ea Yimo Lu legiano nonovio, naio jom̃a berloglog tomu nalo, mia tomu na tortoru ka kulo lu nalo naliko naverloglogiano na tuboiano nalo bija tomu nalo kialo tomu na tortoru maka lele asaro kanio. Ajum̃a ajiravo kavuru m̃arabo ka amijikia ala titai ka rila Yesu monoka rim̃aro.
LUK 19:48 Mia bede ga, abitilubar ka maka ajikia aleal m̃arabo tai, bior tomu nalo nam̃a ajum̃a amije tilinielo ka kiano verloglogiano, tiniel jii kiano iliano nalo toru laka, ajidom naio julaka ga.
LUK 20:1 Mia ka legiano dolu bereio, ana Yesu ban bere joomo ea Yimo Lu na Atua Kunuano yako Yerusalemo, naio jom̃a berloglog tomu nalo a jom̃a mioliolu ka Ioluano Vou na bo banlo. Ana tomu na tortoru na kulo lu nalo bija naverloglogiano na tuboiano nalo bija navurim̃araboiano dolu nalo abinimei eaio, abika denio aberinavo
LUK 20:2 “?Jau kover von ka kumemi, ka nam̃a jau kojom̃a komila jibe na ea vio nei ea kei siano? ?A kei ber kaso ka jau kala tibe na?”
LUK 20:3 Ana Yesu berdop̃elo, berinavo “Mo, mia kiniou bunu nevika vikadeniano tai den kamiu beamu vo. Kiaku vikadeniano jibe nei, ber
LUK 20:4 ?Varueiano nam̃a Jone jom̃a mila nua ban tomu nalo, naio be vite tai napano Atua berkanio ka m̃a naio rilaio, p̃eli na Jone ga naio jidom ka rilaio? Kamiu kuver von nina.”
LUK 20:5 Mia Yesu kiano vikadeniano nei mila amil toru banlo, ajum̃a aberinavo “?Mia kito rover tum̃abe ka naio? !Kito rovitikario vatitig rivu! Ver kito roverinavo varueiano na Atua ber ka Jone, mia tete na naio monoka rivika bere den kito riverinavo bior vaio ana maka romonea Jone.
LUK 20:6 Mia bunu, ver kito rover Jone ga jidomii ka rilaio, mia tomu nalo tinielser kito, mia atuba kito, bior nalo aju amonea Jone jikili ruei ka napano naio be Atua kiano nailiano riano tai.”
LUK 20:7 Ana jidomiano na mila ana aberdop̃e ban Yesu aberenio nalo maka ajikiaio ga.
LUK 20:8 Mia Yesu ber kalo, berinavo “Tibe na, mia kiniou bunu, maka nejikia never ka kamiu ka kei naruei naio ber ka kiniou ka nala im̃auano nalo nei.”
LUK 20:9 Ana Yesu ber jamerijiano tai ban tomu nalo na ka bogo na, berinavo “Toro na toru tai, bija kiano jiotilikrevi tai. Bogo tai naio jidom riel rivan ea buruvenuo dolu tai, napano jo vaatarobe laka, ana juvan kiano jiotilikrevi nei ban tomu dolu nalo ka mia amei aim̃au eaio, ka mia avulu vanio.
LUK 20:10 Ana toro na toru nei naio ba jo-o, avona bitilubar ka be bogo na m̃arkrevi meruo naruei. Jibena miila kiano toro tai ka ban bereio ea nalo napano ajua kiano jiotilikrevi nei, ka rivar puruveru na m̃arkrevi nei togio napano monoka avulu vanio. Ana toro nei bano, mia bogo na naio miyotuba kalo, nalo maka asidom avuluio, mia amue naio ga o-o bisi ana na amiila naio ban bereio jum̃ano ravavo ga jibe na.
LUK 20:11 Ana toro na toru nei miila kiano toro dolu tai bano, mia abitivi naio bunu, amila lelan toru laka, ana amijil deven naio ban bereio jum̃ano yauo ga jibe na.
LUK 20:12 Mo varolu nene, toro na toru nei miila kiano toro dolu bereio, mia naio bunu, amueio-o bar ja, ea naio toru laka, ana abukulario den jiosi.
LUK 20:13 “Mo toro na toru na jiosi nei naio mial bajago na kirivova nei, mia naio maka bunu rijikia naruei, berinavo ‘!Aiou! ?Bo ka mia nala tum̃abe naruei? P̃eli vonganei, monoka neiila ga keneriku rivano. Naio be keneriku takurano ga, tinieku jii m̃elea naio, mia ver naio rivan mia nalo monoka avitilubar avijuku rivu ka naio.’
LUK 20:14 Naruei miila naio bano, mia bogo na tomu nalo amialio, nalo ajidomii kirivova kanio. Aberiio ealo, aberinavo ‘Naina be toro na toru kenerinio na. Toro na naruei, napano ver toro na toru na riva kovio, mia naio naruei rivar kiano borotano nene tibe kiano jajum̃ano ve kiano. Bo ka kito rouebin naio rim̃aro, kanio mia kito ga romijikia ravakar borotano nei rive kiado.’
LUK 20:15 Naruei nalo ajumolu abokario, abukulario batove den jiosi nene, amuebinio.” Ana Yesu berinavo “Tukunu nei naio bisi ea vio na, mia bo ka kamiu kuvisidomii vonio. Bogo na toro na toru rijog tenei, mia naio rimei rila tum̃abe ka nalo nei?
LUK 20:16 Neber ka kamiu neber tomu kirivova nei, mia naio rimei ruelo, am̃arm̃aro ea bajago kouo tai, a mia naio rudu kiano jiosi nei toa tomu dolu na bo nalo jum̃alo.” Ana bogo na amijog Yesu naio ber jibe nei, amijog lubar ka iliano nei be ilivaniano tai, ber jibe ka kulo Ju maka asidom naio napano be Atua kenerinio, ana mia Atua rivuru tomu nalo na maka ave kulo Ju adu jelelo. Ana vite nei nalo maka asidom ajogio, naruei nalo amil jikili aberinavo “Vite na jau kojom̃a koberiio na, Atua maka lele rijamo ka mia riyotuba tibe na.”
LUK 20:17 Mia Yesu bitikarlo, bika ber “Kamiu maka kumisidom, ana bior vaio ana abivitauia iliano lu nei napano naio ber jibe nei, berinavo ‘Puruveru na, tomu nalo napano amim̃auka yimo aber naio bova, mia abuku ban ruei, mia vonganei, puruveru nene naio binimei be puruveru na kirinovo tai ea sudu na yimo, ka rudukar yimo sikili.’
LUK 20:18 “Tomu nonovio na mia ava aserbap̃e ea puruveru nei mia ajoru napano mia puruveru nene rila kokorov mokotenalo. Mia ver riva rivokar bogo na puruveru nei rijoru, toro kei napano puruveru mon kakario mia rila kitkitio rivova, naio riva kovio.”
LUK 20:19 Ana naverloglogiano na tuboiano nalo bija tomu na tortoru na kulo lu nalo, abitilubar ka Yesu kiano jamerijiano nei jilogloglo memedu, naruei nalo tiniel jerio lie vo, ajumolu ajidom avokar naio rimemedu ea bogo nei garuei. Ajidom toru ka ala titai kanio, mia amila dede ga, bior amial ka tomu nalo ajum̃a tiniel jii naio ga.
LUK 20:20 Jibe na naruei ana bogo nono ga ajum̃a abitivitiio, a nalo tealo ajum̃a ajivanlo ga aba vaataro kanio, abar kokoalo ga amilalo jibe amonea naio bo, mia tena ajum̃a amilaio, ajum̃a abarkakar kiano iliano nonovio ga. Kialo jidomiano, ka ajidom aleal iliano na naio riverenio, ana amijikia ala veriiano van toro na toru na vio Romo nene Pailat, ka naio mijikia sian vironiano tai vanio tibe ka na ajidomio.
LUK 20:21 Ana nalo nam̃a ajum̃a abar kokoalo ka napano abinimei vaataro ka Yesu, bogo tai ana abika vikadeniano tai denio, ajidom ajukubinio. Aberinavo “Naverloglogiano, kumemi nubitilubar ka kiamo iliano a kiamo verloglogiano be riano a memedu. A kumemi nubitilubar ka jau maka ketibure tomu nalo aveve dolu, mia komialo abe veverare ga kojom̃a koberial Atua kiano m̃arabo na memedu ka tomu nalo nonovio.
LUK 20:22 Ana numisidom nuvika denso tibe nei ka: ?Kiado tuboiano naio ber jum̃abe? ?Naio ber memedu ka kito kulo Ju nalo rovulu takis van parinio tubo na Romo na Sisa, p̃eli na ber maka rimemedu?”
LUK 20:23 Mia Yesu bitilubar ka ajidom ajukujuku naio, naruei naio ber kalo, berinavo
LUK 20:24 “Kuvidu puruveru sesa nene tai rimei van kiniou. ?Kuvial von kei mirano na joaio? ?A sio nei ajiri joaio, be kei siano?” Nalo aberinavo “Sisa mirano na, a siano na bunu.”
LUK 20:25 Ana naio ber kalo, ber “Mo, tena be Sisa kanano, kamiu kuvidu van Sisa. A tena be Atua kanano, kamiu kuvidu van Atua.”
LUK 20:26 Nalo nei ajidom toru ka avokar vatitig kija Yesu ea tomu nalo miralo ka kiano iliano tai, ana mia bogo nam̃a amijog kiano verdop̃eiano nei, amiilo toru kanio, amial ka naio bokar tanealo, ana nalo aju buru ga, maka bunu ajikia aver bereio titai.
LUK 20:27 Mia iorou ka naina, Satusis nalo tealo abinimei ea Yesu, ka ajidom avika denio ka tivelinio na vite tai nam̃a abiekar kouo eaio, aber tomu nalo na am̃arm̃aro, maka bunu ajikia ameul bereio ea bogo na maaro.
LUK 20:28 Naruei nalo abika denio, aberinavo “Naverloglogiano, kumemi numisidom nuvikaso, ka jum̃abe ka iliano tai nam̃a tormoruo Mosis re nua naio bivitauiaio be kiado. Naio berinavo, ver toro tai rim̃aro den koano, napano maka ve kenerilo tai vo, mia monoka nana lian ka naio rivuru taanou nene ve koano, ka mia rila ka tira nei mijikia rivar tete, ka mia rudu kuruano napano naio m̃aro siano, ka mia siano rimeul to.
LUK 20:29 Mo, ka bogo tai, be kurualo aluo. Motoru kalo buru tira tai be koano, mia m̃aro den koano napano naljuo maka avar kenerilo tai vo.
LUK 20:30 Ana maratoru naio kija buru tira nene, karina naio bunu m̃aro denio,
LUK 20:31 karina baratoru, naio bunu milaio, bano-o bokar kurualo aluo nene, nalo abiniu amila jibe na ga, napano maka ve kenerilo tai leleio.
LUK 20:32 Ana iorou ka koano nalo nao-o abiniu, tira nene bunu m̃aro.
LUK 20:33 Mo jau kover von vite na. Ea bogo na maaro, ka bogo nam̃a ajum̃a aberveriio vurua na aber mia tomu nalo atumormolu bereio, mia tira nei naio ve kei koano, bior naio joro ka kurualo aluo nei abiniu ruei?”
LUK 20:34 Naruei na Yesu berdop̃elo berenio berinavo “Ea yetemeriba nei ga tomu nalo ajum̃a ajorjoro,
LUK 20:35 mia nalo napano Atua ber ka amijikia ameul bereio ea nam̃ariano, ka ava jouro ea kiano vio, mia maka bunu ajikia alaio. Ka bogo na, maka bunu asorsoro kalo,
LUK 20:36 mia maka bunu ajikia am̃arm̃aro, bior mia amei atavukia nailiano nalo. Mia Atua rivuru meul ealo bereio den nam̃ariano, naruei amei ave kenerinio nalo riano.
LUK 20:37 “Mia ka tivelinio ka na meul bereio na, Mosis bunu beriio nua ruei, naina jakii tukunu na buruiesi tai napano sebi jom̃a bovago eaio. Ea vio na romial ka Mosis naio jom̃a bio Atua Sop̃i ber naio be Atua na Epraamo kanano, a Atua na Aisak kanano a Atua na Yakovo kanano.
LUK 20:38 Ana bogo na Mosis naio ber iliano na, tom tolu nei am̃aro ea yetemeriba nei nua bogo be ruei, jibe na am̃aro ea yetemeriba nei, mia aju ameul ea Atua kiano vo. Atua naio maka ve Atua na tomu na am̃aro ga, mia naio jidom ka tomu nalo na aju bija naio nalo abe tomu na ameul. Ea Atua kiano vitiiano, tomu nalo nam̃a am̃aro ruei ea yetemeriba nei, nalo ameul kia ga vo aju.”
LUK 20:39 Ana naverloglogiano na tuboiano nalo, nalo ajum̃a amiagago ka Yesu kiano verdop̃eiano ban Satusis nalo, ana amial ka naio be masou bo laka, ana aber “Naverloglogiano, kanamo verdop̃eiano naio bo mia bo.”
LUK 20:40 Aber jibe na bior Yesu kiano iliano nei mila Satusis nalo amerou ka avika vite tai den naio bereio.
LUK 20:41 Naruei Yesu mil ba lie banlo, bika vite denlo, berinavo “Bior vaio ana nalo ajum̃a aberloglog kamiu, aberinavo Naverikariano naio monoka riyotuba ea tormoruo Parinio Tubo Teviti nene kiano yati, napano nua naio be Parinio tubo beamu?
LUK 20:42 Kiniou nebika naina, bior beamu, Teviti naio bivitauia niosi na Iouano kanano, berinavo ‘Atua Sop̃i naio ber ka kiaku Tubo, naio berinavo “Jau kototano ea vameruo na kanaku,
LUK 20:43 jau koto rorea rivano-o, mia kiniou nala kanamo uolu nalo amei tibe ka yebe tai nam̃a kobijankon jaamo eaio.” ’
LUK 20:44 “Ea vio na romial ka napano Teviti naio jom̃a bio Naverikariano ka kiano Tubo mugaruei. ?Mo bior Teviti naio ber jibe na, mo jum̃abe ana ajum̃a aberenio mia Naverikariano naio riyotuba ea Teviti, rive kiano yati tai ga?” Mia ea bogo tai bereio, amiilo toru ka Yesu kiano iliano nalo.
LUK 20:45 Ana tiniobi nalo aju amiagago ka kia ga vo, ana Yesu berial iliano tai, napano be kanano naiagagoano ga nalo kialo.
LUK 20:46 Naio berinavo “Kamiu kuvitikar kamiu ka naverloglogiano na tuboiano nalo na nam̃a abarvar kalo m̃ele ka m̃alo burutili kulu-m̃arauo nalo na, a verenio nalo amieliel ea vioruru nalo, ajidom ka tomu nalo monoka avatove kalo, avio vatitiglo averinavo ‘!Aiou, naverloglogiano novo, kavijo bo!’ A ea bogo na jokoluolu p̃eli joomo ea yimo na volkouano nalo bunu, nalo ajidom ka dam̃ariga atutano ea vio na tomu na tortoru nalo kanalo ga. ?Kamiu kubitilubar ruei, a?
LUK 20:47 Mia ajum̃a aburu kialo volkouano nalo kiri p̃etep̃eteli laka, mia ajum̃a amila sibi ga, bior ka bogo nene ga, nalo ajum̃a amijukubin taanou nalo, amila bulaglo. Naruei bior kialo bajago nalo na, mia kialo vironiano sikili lie vo.”
LUK 21:1 Naruei bogo napano Yesu nalo ajua Yimo Lu na Atua Kunuano, ana amial ka napano tomu tealo abinimei ka mia avuku kialo ijaiano ea basaro na Yimo Lu. Naruei Yesu bitiio, ana naio mial ka nasanibaiano nalo abinimei abuku kialo ijaiano novo nalo,
LUK 21:2 ana na iorou kanio, naio mial bunu taanou tai, napano naio be talim̃asa ga, mia naio binimei buku kiri veru sesa juo ga.
LUK 21:3 Naruei naio berii tira nei banlo, naio berinavo “?Kamiu kumial taanou na, napano naio buku kiri veru sesa juo na? Kiniou neber riano ban kamiu, ka naio jian loa jovulu nonovio ijaiano dolu nalo na nasanibaiano nalo na kanalo.
LUK 21:4 Nalo be kialo burum̃ara veru nalo, mia amije bena ga togio, mia taanou na, veru telisu nei naio bokario ka rijekar kiano meouliano, naio jian nonovio ban Atua.”
LUK 21:5 Karina iorou ka naina, tomu tealo ajum̃a aberii Yimo Lu, aberinavo naio kirinovo tai mia, bija sano veru maraiu nene nalo, a tonovo nalo napano m̃a tomu nalo abario kam̃a miyovovua tanobuku nene. Ana Yesu mijog tukunu nalo na jibe nei, ana berinavo
LUK 21:6 “?Kamiu kumitum̃a kumial vite nalo na kuber bo? Neber ka kamiu mia iorou ka bogo tai na jo binimei, mia ve re bunu puruveru tai totano vatitig ea jeleigio, bior mia tomu nalo tai amei aue bulag searia yimo na riviniu.”
LUK 21:7 Mia bogo na nalo amijog ka Yesu ber jibe na, abika denio, aberinavo “?Ana Naverloglogiano, mia aue bulag Yimo Lu nene nagi, a mia kumemi nuvijikia nuvial kijokijo venia naruei naio verial ka vaataro ka vite nalo nene amalmaluvo?”
LUK 21:8 Ana na naio ber kalo, berinavo “Bo ka kamiu kuvitikar vatitig kamiu rivu, ka mia ve re toro tai rimei rila sibilili kamiu, bior mia tomu ve telabo napano mia adu siaku, mia nalo amei averinavo ‘!Kiniou nebe Naverikariano nei!,’ p̃eli averinavo ‘!Naina naruei, bogo nene naruei!’ mia maka rivu ka kuvitakisorlo.
LUK 21:9 Ana ver ka bogo na, mia kamiu kuvijog uetubaiano na mira, a jaleleano nalo aju vaataro, mia kumemebiju m̃ele re. Vite nalo na monoka amalmaluvo beamu, mia naina maka ve bogo na maaro nene navo.”
LUK 21:10 Ana naio ber bunu kalo, berinavo “A parinio tubo nalo, mia ala mira kanio parinio tubo dolu nalo, a venuo nalo atumolu ka venuo dolu nalo.
LUK 21:11 Mia m̃ii ve toru, mia reraio ea yetemeriba nei mia ve burum̃ara vituiano a mieiano kouo nalo, a rivija naina mia ve vite na memebijuiano ave burum̃ara kijokijo nalo ea bulu niogovu yauo mave.
LUK 21:12 Mia bogo na ve re vite nalo nei vo, mia tomu nalo ala kiki kamiu ve toru laka. Mia nalo amei avokakar kamiu sikili, avar niajebijo rivan kamiu, ana iorou kanio mia adu kamiu kuvitua jum̃ano navurim̃araboiano na yimo na volkouano nalo, p̃eli na avuku kamiu kuva kuvitua yimo na tetavokoiano, p̃eli ala kamiu kuvitumolu kuvitua mirano kialo parinio tubo nalo p̃eli na kialo navurim̃araboiano nalo. Vite va nalo na mia kuvarilo bior kubokar siaku jikili.
LUK 21:13 Ka bogo na mia sikili laka rivan kamiu, mia rive kenemiu bogo na kuvijikia kuverial Ioluano Vou na bo vanlo.
LUK 21:14 “Mia vonganei, bogo na vite nalo nei maka vo, kamiu kuvisidom m̃elea re ka mia kuver venia ka bogo na,
LUK 21:15 bior rimonloglog bogo nene ga, mia kiniou nesian iliano na masouano rivan kamiu. Mia bogo na kuver iliano nalo nei ka kenemiu uolu nalo, mia tovulo, mia ajikia re ka atup̃edop̃e bereio kenemiu iliano nene.
LUK 21:16 “Ka bogo na, mia nalo na ga napano m̃a kumitum̃a kubiolo ka teta p̃eli kuruemiu p̃eli tumano p̃eli bilbilu, nalo na jibe na naruei napano mia amijikia avuru bulag kamiu kuvano, adu kamiu kuvitua tomu na tortoru nalo jum̃alo, ka mia ala tanea kamiu rivano-o mia m̃a auebinvin kamiu tealo am̃arm̃aro.
LUK 21:17 Mia tomu nalo tiniel ser kamiu laka, mia nalo asian liliu iliano rivan kamiu napano siaku joa kamiu.
LUK 21:18 “Mia kiniou neber ka kamiu ka mia vijumiu tai riva kovio deio.
LUK 21:19 Mia kamiu kuvitu sikili rivano-o kuvitovulu juluvati na bogokouo nene, ana ea m̃arabo na naruei mia kamiu kuvokar meuliano riano na kenemiu.”
LUK 21:20 Mia ea tivelinio na burum̃ara bogokouo nei mia rimei, Yesu ber kalo bereio, ber “Telikiti na ver kuvial taara na tomu na mira atu selivivko burum̃ara bulukomeli na vio Yerusalemo, mia kuvijikia ka bogo na burum̃ara sano labulagiano nene naio jo binimei vaataro.
LUK 21:21 Mia bogo na kuvial vite nei, kamiu na kuvitua vio Yutea, bo ka kuvuro, kuva kuvitivan kamiu ea suku nalo, mia ver kamiu na kuvitu jouro Yerusalemo, bo ka kumolmoluo kuvuro kilkil, p̃eli na kamiu na kuvitu mave nei, maka rivu ka kuvilavio ka kuvatove vonuo bereio.
LUK 21:22 Nina bior ka bogo na, naio be burum̃ara legiano na lameraniano na Atua kiano siniabu, tavukia na vivitauiano re nua nalo aberkakario.
LUK 21:23 Ka bogo na bunu, mia ve kirivova laka rivan tire nalo na be m̃abolo, rivija bunu nalo nam̃a ajum̃a amije yu ban kenerilo solbouo nalo. Ka bogo na, mia ve burum̃ara najogvaiano ea kiado venuo nei, a burum̃ara siniabu rimei ea kiado tomu nalo nene.
LUK 21:24 Mia iobogu na mira rila vinvin ve telabo atibirbil, mia m̃arimieni riorkar ve miroano jum̃alo, avurulo ava aim̃au kurano ga ea taara dolu nalo. Mia kulo dolu nalo avie niegeniege kitkit lelan komeli lu na kito kulo Ju kiado Yerusalemo nei, mia ave tubo eaio rivano-o rivokar bogo na Atua jekar ka ve kialo bisi.”
LUK 21:25 Ana na Yesu berii legiano na maaro, naio berinavo “Ka bogo na, mia amijikia aial kijokijo ea m̃erenio a ea siberio a ea m̃arvitano nalo. Ea yetemeriba nei, mia taara na tomu nalo mia niukniuku rivielo ve toru laka, asidom bijobijon ve toru, mia bogo na aial tei tumolu ve toru to rivavauro, mia nalo ajikia re ka mia tum̃abe kalo.
LUK 21:26 Telikiti na nalo abitilubarbar ka venia napano m̃a jo binimei ea yetemeriba nei, a napano vite na tortoru nalo na bul niogovu yauo amikulkulu janea vio, mia nalo amemebiju ve toru, meribobogo am̃arm̃ariulu rivior meroano.
LUK 21:27 Mia ala tibe na rivano-o, ana iorou kanio ana mia aial kiniou Kulorinio Kenerinio noyotuba ea melijo vija kanaku burum̃ara moroano a vija kanaku burum̃ara miamoiano.
LUK 21:28 “Ana ea tivelinio na kamiu, ver bogo na kuvial vite nalo nei atikar kam̃a amalmaluvo tibe na, mia kamiu kumerou re. Mia niukniuku rivie re kamiu, mia kamiu kuvitumolu kuvar bulag pariparimiu kuvisirarag mave, bior vite nalo na nioti nene ber kenemiu toro na laruriano naio jo binimei, vaataro ka riyotuba.”
LUK 21:29 Ana na Yesu ber jamerijiano tai banlo ea tivelinio na bogokouo na jo binimei keano vo, naio berinavo “Kamiu kuvisidomii von burubilivo na, p̃eli na buruiesi dolu nalo na jibe na.
LUK 21:30 Telikiti na kumial jaati nalo abinimei amemeaio, a abinimei amelokloko, a sidiati nalo abarboṽelo, ana na kamiu kumijikia ka be bogo na vio bitunu jo binimei vaataro.
LUK 21:31 Jibe na bo ka na ver kamiu kuvial kijokijo nalo nei, ajum̃a amalmaluvo jibe na javukia nam̃a kiniou naber ka kamiu ruei, mia kamiu kuvijikia ka navenatuboiano na Atua kanano naio jo binimei vaataro kean kamiu.
LUK 21:32 Riano neber ka kamiu, mia vite nonovio na monoka ayotuba tibe na rivano-o, mia iorou kanio ana taara na tomu na ameul ea bogo na ava kovio ea yetemeriba nei.
LUK 21:33 Mia vio yauo rivija yetemeriba nei nalo ve juo bunu ava kovio, mia kanaku iliano nalo maka ajikia ava kovio bogo tai.”
LUK 21:34 Naruei Yesu midu iliano na banlo ka bogo na, iliderevijoiano banlo, naio berinavo “Mo ea tivelinio na kamiu, kamiu kuvitii vatitig kamiu. Maka rivu ka kenemiu meuliano tanea vio, p̃eli na kumunu m̃elea m̃arjum̃elm̃elu p̃eli na vite nalo na jibe na, a maka rivu ka kenemiu jidomiano to tulaka ea vite nalo na yetemeriba nei ga. Aver p̃eli, mia kuvitum̃a kuvila tibe na rivano-o mia kuviilo ka burum̃ara legiano na maaro riyotuba ka kamiu vaarakurano ga tavukia viobijiio.
LUK 21:35 Nao, mia tomu nalo tanea vio reraio ea yetemeriba nei, mia atu asidomialio re, atu avitilubario re, mia legiano nei rivokarlo tibe ka na menu miilo ka buruniavo julubinio m̃aro garuei.
LUK 21:36 Mia monoka kamiu kuvitu derevijo dam̃ariga, monoka kuvitu kubolkouo ka kuvijikia kuvitu sikili ka kuvilarur kamiu ea vite nalo na mia ayotuba, rila ka mia kamiu kuvijikia kuva kuvitumolu kuvitu ea kiniou Kulorinio Kenerinio miraku.”
LUK 21:37 Ana na Yesu jom̃a berlogloglo jibe na ea Yimo Lu ka legiano nalo, mia ka bogiano naio jo batavio den komeli, ba joa Suku na Buruolivi Nalo.
LUK 21:38 Mia kavijova nalo, ana tomu nalo ajumolu sop̃eli, aban bereio ea Yimo Lu ka ajog kiano iliano nalo.
LUK 22:1 Na karina, bogo binimei vaataro ka nam̃a yuka nonovio, amila kialo jokoluolu juo na tortoru, jibe ka jokoluolu na najenjeniano na beskit napano maka isi toaio, bija jokoluolu na nasidomialiano na ioruriano.
LUK 22:2 Ana ka bogo na, tomu na tortoru na kulo lu nalo bija naverloglogiano na tuboiano nalo, ajum̃a amila vio ka auebin Yesu keano vo, mia maka ajikia aleal m̃arabo tai, bior amerou ka ver alaio, p̃eli mia tomu nalo ajikia ala titai kalo.
LUK 22:3 Mia monloglog bogo na ga, sim̃aro binimei ba joomo ea Jutas na vio Kariot kiano iviso, napano naio be na duelimo ba juo tai.
LUK 22:4 Ana na maka vesiou, ana naio jumolu, bano ba miyotuba ka nalo napano tortoru ka kulo lu nalo bija tomu na tortoru na kialo menumia nalo, berial kiano jidomiano, ana na nalo aberii m̃arabo na vabe napano bo ka mia naio mijikia tiveluku ka Yesu selia rivanlo.
LUK 22:5 Ana na Jutas kiano jidomiano milalo amijog bova toru laka, mia nalo amial bo ka aje veru tai rivan naio riviorio.
LUK 22:6 Mia Jutas jaaro kanio, mia jikar ea bogo na, julaka ga naio jom̃a jiravo ka vulu kiano bogo ka ver bogo tai napano ver ve re bunu tomu nalo tai eaio, ana na mia mijikia tiveluku ka Yesu rivanlo.
LUK 22:7 Naruei abinimei monloglog legiano na beamu na jokoluolu na najenjeniano na beskit napano maka isi toaio, napano naio be bunu legiano napano monoka ala sida na nunu sesa nalo ka sidomialiano na ioruriano.
LUK 22:8 Naruei Yesu ber ka Pitere bija Jone, berinavo “Neiila kamjuo ka kuva kuvila vatitig vite nalo na sado sinaniano na jokoluolu nene.”
LUK 22:9 Ana na naljuo nei abika denio aberinavo “?Ana jau kojidom ka nuvila vatitigio to be?”
LUK 22:10 Ana na Yesu berinavo “Kuve juo kuva kuvokar m̃aratavo na toru na vio Yerusalemo, mia bogo na ver kuva joomo von kiaga eaio, mia kuvial toro tai napano midu burum̃ara bauei tai na rimei rivetavo ka kamiu. Mia kuvitakisorio kuva a mia naio rivuru kamiu kuvan ea yimo tai.
LUK 22:11 Mia bogo na ver kuva joomo ea yimo nene, mia kuvil rivan toro nene kuverinavo ‘Kiado naverloglogiano naio bika berinavo, Kumemi valauo nalo, kenememi vajoomo naio be, ka nuvijikia nuvisen sinaniano na sidomkariano na ioruriano eaio?’
LUK 22:12 Kuvil tibe na rivanio, naruei mia naio siloglog ka kamiu ka burum̃ara vajoomo tai mave, napano vite nonovio juaio ruei, ana na mo kuvila vatitig vite nonovio na sinaniano nei ea vio nene.”
LUK 22:13 Mia Yesu ber jibe na ka naiagagoano juo nei bisi, ana na abano, mia amial ka vite nonovio miyotuba jibe ka ga napano naio beriio kalo jukamu. Jibe na naruei, ana na amila vatitig sinaniano na maaro na Yesu sano.
LUK 22:14 Karina Yesu nalo abinimei mave ea vio nene, ana bogo na sinaniano, Yesu ba jotano ea vio na sinaniano, mia atevi nalo abinimei ajutano naliko.
LUK 22:15 Ana na Yesu mil banlo, naio berinavo “Bogo jiou ruei, kiniou najom̃a nojidomii sado sinaniano na sidomkariano na ioruriano nene. Ninei naruei saku sinaniano na maaro, napano kito ga rosinan vio takurano, ana iorou kanio ana mo nemijikia navan ea kanaku bogokouo.
LUK 22:16 Kiniou neber ka kamiu ka joko nei nioti nene berii ioruriano. Mia kiniou nesen re bunu bereio, rivanvano-o rivokar bogo na kiaku ioruriano rimei ea yetemeriba nei, ea bogo napano mia Atua kiano navenatuboiano rimei.”
LUK 22:17 Naruei naio midu baja tai, bolkouo ber siva ban Atua biorio, avona bisi ana ber kalo, berinavo “Kamiu kuviyon burevure tanea kamiu, kamiu ga kumunio.
LUK 22:18 Nina bior jikar vonganei, mia kiniou nomunu re bunu m̃arjum̃elm̃elu rivano-o rivokar bogo na mia Atua kiano navenatuboiano naio rimei.”
LUK 22:19 Naruei naio mije salo niajoko, naio bolkouo ber siva ban Atua kanio, avona bisi ana burekokorovio janealo, berenio “Ninei be mokotenaku, napano namijamo ka bior kamiu, mo mia monoka kamiu bunu kuvitu kuvila tibe na, tibe ka kenemiu buruka ka kiniou.”
LUK 22:20 Ana iorou kanio, bogo napano ajinan bisi, naio mila jibe na bereio javukia napano mila ka niajoko jukamu, naio midu baja namuniano tai, berenio “Baja nei naio be kijokijo na kiaku burukija napano mia riou ka kamiu, ka vitirilar Atua kiano virakariano vija kamiu.
LUK 22:21 Mia be titai bova, toro na mia tiveluku ka kiniou, naio be kito tai ga napano rojinan vio takurano nei ruei.
LUK 22:22 Mia kiniou Kulorinio Kenerinio monoka nam̃aro tibe ka nam̃a aberkario nua ruei, mia toro napano mia tiveluku ka kiniou, tiniek miia naio, mia rivova lie vo van naio!”
LUK 22:23 Mia bogo napano amijogio, ana na nalo ajum̃a abivika denlo amilavon ka alealio na vabe kalo napano jo jidomii ka mia rila tibe na, mia maka avokario.
LUK 22:24 Ana ka bogo na, siniabu jumolu bure naiagagoano nalo, ber mia kei kalo napano mia nalo asirarag kanio ka naio loalo lie, rive kialo navurim̃araboiano.
LUK 22:25 Mia Yesu mijogio ana na naio berenio berinavo “Kito romijikia ruei tomu na tortoru nalo na yetemeriba nei kialo bajago, Parinio tubo nalo abe tubo ka kialo tomu nalo, a navurim̃araboiano nalo, tomu nalo monoka atovonlo, adu sio na loa laka rivanlo, abiolo aberinavo toro na bitikarlo.
LUK 22:26 Mia kamiu kiaku naiagagoano nalo, monoka kuvila re kamiu tibe ka tomu na tortoru nalo nei. Naio be kenemiu napano p̃eli mia averinavo naio be toro na toru, mia monoka naio rimei tibe ka kenemiu toro na kiritelisu tai, tibe kanio napano naio moluo iorou. Kamiu tai napano ver sidom ka naio rimei rive kenemiu navurim̃araboiano, naio monoka rimei tibe ka toro na mia m̃a riijaja kamiu.
LUK 22:27 “Ka bogo na sinaniano, toro tai jotano ana toro dolu bar sano sinaniano binimei banio. Naruei naljuo nei, na vabe nene napano amial jibe ka naio toru lie loa tinene? Kamiu kumijikia, mia kiniou maka netibe ka naio, mia kiniou nebinimei ea yetemeriba nei jibe ka naio nam̃a mila im̃auano, miija kulo dolu nalo, bijuku bo kalo.”
LUK 22:28 Ana na Yesu ber kalo, berinavo “Kamiu na, nemial kumitibe ka kiaku ikurukariano na bo nalo ea bogokouo nalo nam̃a nabokario, binimei bokar banei.
LUK 22:29 Mia jibe kanio napano teta naio bitirilar kiniou ka neve tubo ea kiano vio, mia kiniou bunu neber ka kamiu neber nevitiri bulag kamiu kumei kuve m̃artubo nalo ea kiaku vio nalo nei.
LUK 22:30 Tibe na, ana na mia kamiu naruei kuvijikia kuvitutano rivija kiniou bereio, mia kito resinan vio takurano jouro ea kanaku navenatuboiano, ana mia kamiu kuvitutano ea vio na mave loa laka bunu ka mia kuve tubo ka bajulukuti duelimo ba juo na Israel nalo.”
LUK 22:31 Naruei Yesu mil ban Saimon Pitere, berinavo “O Saimon, jau monoka kovitikar vatitigso rivu. Sim̃aro tinien jer kamiu ruei, naio jidom toru ka rila bulag kamiu, mia Atua mijamo ka ruei ka mia naio mijikia tokol von kamiu ve telisu, a mijikia tiburelar nana naio bo a nana naio bova.
LUK 22:32 Mia kiniou nobolkouo kaso ruei, a noju jikili dam̃ariga ea kanaku volkouano ka ver jau kotum̃abe, ana na mia kanamo viekouoiano rijoru nonovio denso re. Ana verenio jau komei kovu bereio, komei bereio, mia jau monoka komei kove toro tai na mia kala kuruamo nalo atumolu atu sikili lie dam̃ariga.”
LUK 22:33 Mia Pitere naio berdop̃e Yesu berinavo “Tubo, verenio avukuso kavan ea yimo na lakoiano, mia kiniou neviedu rivijaso rivu ga. P̃eli mia ala kikiso mia kam̃aro kario, mia kiniou najaaro ga ka kito ve juo.”
LUK 22:34 Ana na Yesu berkanio, berinavo “Pitere, kiniou neber telerinio ka jau, ka bogiano nei ga, mia tormano tokoko-reko re vo, mia jau kavarbonbonua kiniou ve varolu, koverinavo jau maka kejikia kiniou leleio.”
LUK 22:35 Ana na Yesu bika denlo, naio berinavo “Kamiu kuvisidomii von nanua, ka bogo nam̃a nemiila kamiu kubano m̃a kubioliolu janea vio nalo. Kiniou neber ka kamiu ka mia kuvar re kenemiu saba nalo tealo vija kamiu, jibe ka siveu na veru, p̃eli na basaro, p̃eli na kulubue dolu na jaamiu, p̃eli na vite nalo na jibe na. ?Mia jum̃abe, kamiu kumial ka jumemiu bulati ka vite nalo tai?” Naruei nalo aberdop̃e aberinavo “Tubo, maka jumememi ve bulati ka titai.”
LUK 22:36 Ana na Yesu ber kalo berinavo “Nao, naina naruei. Mia vonganei, kito rojua bogo dolu tenia nei. Vonganei, verenio nana be kiano siveu na veru, p̃eli na kiano basaro, mia monoka naio rivar vija naio rivano. Toro na ver maka kiano iobogu na mira tai, bo ka naio riṽiliṽililar kanio m̃ano saluvoiano, mia naio rivar veru nene rivan rivulu ka kiano iobogu na mira tai.
LUK 22:37 Kiniou neber naio nei ka kamiu, bior vivitauiano lu nalo re nua nam̃a aberii kiniou, ajum̃a amalmaluvo abe riano naruei, ban bokar iliano nam̃a Aisea naio berenio, napano berinavo ‘Amila ka naio jibe ka naio bunu be toro va tai na lakokoroviano na tuboiano.’ ”
LUK 22:38 Mia naiagagoano nalo ajum̃a ajidomii ga iliano na iobogu na mira nei, naruei nalo aberinavo “Tubo, kejiio, ninei be kiado iobogu na mira juo nei.” Mia Yesu mial ka napano maka ajikia dulu kiano iliano nei, ana na naio berinavo “E abe, roberii vite na bare naruei.”
LUK 22:39 Mia Yesu nalo ajuvan vio nei mave, mia jibe ka napano naio jom̃a milaio, naio miel bavin bokar Suku na Buruolivi Nalo, naio naliko kiano naiagagoano nalo.
LUK 22:40 Mia bogo napano aba aboru ea vio napano Yesu jo ban eaio, amijilimebi eaio, naruei naio ber kalo berinavo “Kamiu monoka kubolkouo tulaka ka mia jukuano nalo ala re kamiu kuvijoru.”
LUK 22:41 Naio ber jibe na kalo, bisi ana na naio juvanlo, ba lie denlo telisu ga, naruei minie ka sudu jaano ana bolkouo ban Atua.
LUK 22:42 Naio bolkouo jibe nei, berenio “Aiou Teta o-o, ver jau komijikia kala mia rivu ga, jau kodular baja na jogvaiano nei kanaku, ka nomunu re. Mia jau kala re kanaku sidomiano, mia kala ga kiamo.”
LUK 22:43 Ana ka bogo nei Yesu mijog temiano toru ea naio, naruei amial nailiano tai jaluvo ea vio mave binimei yetano, binimei miija Yesu ka naio ve p̃irinio sikili bereio.
LUK 22:44 Mia Yesu jo mijog bova toru, jiniomo de sano titi, mia bolkouo jikili lie vo banbano-o mia sano minonoano nalo aju abadigdig jibe ka burukija bavatove ea borotano.
LUK 22:45 Mia bogo na naio bolkouo bisi, ana na jumolu bereio, ban bereio ea naiagagoano nalo, mia mial tinieiiano na monmeliano muelo ruei, aju amonmelio ga.
LUK 22:46 Naruei mila bovonlo, berinavo “Ai, jum̃abe ana na kamiu kumitu kumonmelio? Bo kanio kuvitumolu kuvila tibe ka na kiniou naber ka kamiu ruei. Monoka kubolkouo ka mia jukujukuano nalo amei re ka ala kuvijoru.”
LUK 22:47 Mia bogo na Yesu jom̃a mil banlo kia ga vo, amial burum̃ara taara na tomu nalo amiyoyotuba kalo, amial ka napano toro tai jukamu kalo abinimei vaataro, nina naio napano beamu, naio be nalo tai, be Jutas. Ana na Jutas binimei vaataro ka Yesu, bokario ana miomiom babibiniono.
LUK 22:48 Mia Yesu mil jukamu banio, berinavo “Jutas, ka vai na koniom kukulnioku jibe na mia naio bo ga, mia ka vaio ana jau kojidom kovulvulu ka kiniou Kulorinio Kenerinio ea m̃arabo na jibe na?”
LUK 22:49 Mia bogo na nalo na Yesu kiano napano ajikil aju vaataro ka naio abitilubar venia nei Jutas nalo ajidom alaio, abika den Yesu, aberinavo “?Tubo, jum̃abe, mia kito retelo ka kiado iobogu na mira?”
LUK 22:50 Mia Yesu naio maka riverdop̃elo vo mia naiagagoano nalo tai naio jumolu, burular kiano iobogu na mira, miven ea nalo tai, napano naio be toro tai na parinio toro lu kanano, mia naio jetitire ea ga meriniano ana jelar tiliniene vameruo.
LUK 22:51 Mia Yesu mil banio, berinavo “!Ee, to to to! Kito rola re bunu tibe na kalo.” Ana na naio mijiou jokol jeleig burutiliniene toro nei, mia mila vatitigio bereio bo.
LUK 22:52 Naruei naio bitikar tomu na tortoru na kulo lu nalo naliko tomu na tortoru na menumia nalo na Atua kiano yimo, bija navurim̃araboiano na kulo Ju nalo kialo, napano abinimei ka naio, naio mil banlo berinavo “?Jum̃abe ana na kubar iobogu bija kenemiu nia nalo jibe na? ?P̃eli kumitu kumisidom kuberiam̃a kiniou nebe toro na p̃irinio jikili ka m̃a bina p̃eli nam̃a muemue toro?
LUK 22:53 Nanua, legiano telabo ga, kiniou nojo bija kamiu ea Yimo Lu banbano-o, mia bior vaio ana maka kumei vaataro ka kiniou ka kuvokar kiniou ea bogo nalo na ruei? Mia nemial jibe ka kamiu kube tomu na melijokouo, napano kubinimei bija moroano dolu nalo na melijokouo, a vonganei be kenemiu aura memedu.” Mo abinimei abokar Yesu, aburio bano.
LUK 22:54 Bogo na abokar Yesu, aburio ban bereio naliko, abano aba jouro ea burusio na parinio toro lu kanano. Mia Pitere bunu jom̃a jakisosor vavanlo ga ka bogo nei, naio maka riva vaataro keanlo.
LUK 22:55 Mia bogo na abinimei jouro ea burusio nei, tealo aba ajovokar sebi bilvili ka atuṽalo eaio, mia Pitere bunu ba jotano naliko.
LUK 22:56 Naruei aju ana jegliiano na sebi mereralii Pitere mirano, ana na niatira tai nam̃a mim̃au napano jo bijalo, naio bitilubario, ana berenio “!Ai, kamiu kuvialio! Kema na, naio bunu be nalo tai nam̃a bogo nonovio ajakisosor tete na.”
LUK 22:57 Mia Pitere barbonbonua, berinavo “!Ee maka! Kuvivinieku!, kiniou neber vatitig kaso, maka nejikia kema na!”
LUK 22:58 Karina maka vesiou ga, nalo tai mial Pitere, bitilubario, ber “Ai, jau bunu, kobe nalo tai na.” Mia Pitere berdop̃e berinavo “Ai kema, abe makanio.”
LUK 22:59 Mo aju jibe na bano-o, na aura takurano barlaka bereio, dolu binimei berial bereio, ber m̃elea banlo, berinavo “Kiniou neber vatitig ka kamiu, kema na, naio naliko tete re Kalele na jukamu ruei. !Kuvial, naio bunu be toro Kalele memedu ga ruei!”
LUK 22:60 Mia Pitere berdop̃e mila sibi bereio berinavo “Kema, abe kiniou maka nejikia tena m̃a kojom̃a koberenio na koig.” Ana monloglog bogo nam̃a Pitere jom̃a ber iliano nei kia ga vo, tu jokokoreko.
LUK 22:61 Mia bogo na tu jokokoreko, ana Tubo p̃ilig parinio binimei, bitikar Pitere, naio bitii kilkil eaio. Naruei Pitere jidomial bereio Tubo kiano iliano nanua berial kanio nua ruei, napano berenio berinavo “Riano kiniou neber kaso, ka bogiano na legiano nene ga, bogo na tu tokokoreko re vo, mia jau kavarbonbonua kiniou ve varolu ruei, kover jau maka kejikia kiniou.”
LUK 22:62 Mia Pitere naio mijog kirivova toru laka, naio batavio, jegi-i o-o mia jegi.
LUK 22:63 Mo nalo napano ajum̃a abokakar Yesu ea bogo na, amila kikii naio, a amil vulevulei eaio, ajukukikio,
LUK 22:64 ban amiorko mirano ka mia naio rijikia re rial vite, mia bogo nam̃a ajum̃a amijuba biliviligio, amiyotel eaio abika denio aberinavo “Ei, aber jau kobe naverialiano tai, bo ga, jau kabagbag von ka kenia na jom̃a mijubaso vonga na.”
LUK 22:65 Mia amila jibe na ka banbano-o, amil niegeniege toru laka.
LUK 22:66 Aju jibe na banbano-o m̃erenio bavin garuei, ana na navurim̃ara-boiano na kulo Ju nalo, jibe ka kulo lu na tortoru nalo bija naverloglogiano na tuboiano nalo, abinimei vio takurano ea kialo komeli na toru neibano. Bogo na abinimei vio takurano bisi, ana na aburu Yesu ba jikili ju jukamu ea miralo.
LUK 22:67 Naruei amil banio abika denio aberinavo “Verenio jau kobe Naverikariano be riano, nam̃a kulo Ju nalo ajum̃a amial aber mia monoka rimei, mo, numisidom ka jau koverial ka kumemi vonganei.” Mia Yesu berdop̃e banlo, berinavo “Kiniou nemijikia neverial ka kamiu, mia ver neverenio, mia p̃eli kuvisaaro re ka kumonmoneaio.
LUK 22:68 Mia kiniou nejidom ka nevika vite tai den kamiu bunu, mia ver nevikanio, p̃eli mia kamiu kuverdop̃e kulu re ga na.
LUK 22:69 Mia be titai nana kiniou najaaro ka nejidom never ka kamiu naio ber jibe nei, ber ‘Jikar vonganei, mia tibe ka ga napano Iliano Lu berenio ruei, napano berinavo mia Kulorinio Kenerinio riva totano mave tivelinio vameruo ka Atua na moroano toru.’ ”
LUK 22:70 Mia bogo na amijog iliano nei, abika denio, aberinavo “!Tomnei, venia na jibe na! ?Jau kojo kober jau naruei kobe Atua kenerinio memedu?” Ana na Yesu berdop̃elo bere “Verver kuvisidom kuver tibe na, mia tibe na ga naruei.”
LUK 22:71 Mia bogo na amial Yesu jom̃a mijamo ka ber naio be Atua kenerinio, tiniel kirimimi, aber jibe nei aber “Kema na mil jibe na, kito robitilubar vatitig ka burum̃ara tokoriano joa naio ruei. Mia kito resiravo re bunu toro dolu ka rila veriiano na naio bereio, naio kiano iliano ga jibure naio bereio ruei.”
LUK 23:1 Ana na nalo na komeli na kulo Ju nalo amijog Yesu kiano iliano bisi, ana ajumormolu, amioburovuronlo ba vio takurano ea burum̃ara taara tai, naruei aburu Yesu ba jumolu jukamu ea Pailat mirano ea kiano vio na tibureiano.
LUK 23:2 Naruei amila veriiano ban Pailat, aber bulavulag vite telabo banio, tivelinio ka Yesu. Nalo aberenio aberinavo “Kema na, jom̃a mila bulag tomu na kenememi venuo kialo jidomiano, naio jom̃a berburelo ka avulu re bunu takis van kiamo boru parinio tubo Sisa na Romo, a naio jom̃a miaia naio toru ber naio bar sio na Naverikariano, jibe ka naio be kenememi parinio tubo na toru. Vite nalo na naruei, kumemi numialio ka mirememi memedu.”
LUK 23:3 Telikiti na Pailat mijog kialo veriiano nei, naruei naio bika den Yesu, berinavo “Mo, jau kija kover kanamo vonio. ?Be riano ka jau kobe parinio tubo ka kulo Ju nalo p̃eli na makanio?” Ana Yesu berdop̃e, berinavo “Naina naruei jau kojom̃a koberver kiana.”
LUK 23:4 Mia bogo na Pailat mijog venia napano Yesu berenio, naio maka rial ka naio mila tena bova tai, ana ber ka tomu nalo kialo tomu na tortoru nalo, berinavo “Kema na, ea kanaku vitiiano, naio memedu ga, naio maka rila kor leleio tuboiano tai.”
LUK 23:5 Mia nalo maka asidom ka ajog Pailat kiano iliano, mia amila jibe ka tena sop̃eli ga tai, ajikili lie vo kanio, aberinavo “P̃eli ga, tete na naio kirivova ga. Naio jom̃a julu vilivilig kenememi tomu nalo kialo jidomiano, a jom̃a mioliolu banlo ea vio nonovio, jikar jo Kalele, binimei midu nonovio Yutea, binimei bokar bulukomeli na toru nei ruei.”
LUK 23:6 Mia bogo nam̃a Pailat mijog aber Yesu jikar kiano im̃auano yako Kalele, ana bikanio berinavo naio be tete re Kalele memedu p̃eli na makanio.
LUK 23:7 Pailat bikanio jibe na bior naio maka m̃a to riadu ka tanobuku na Kalele, mia parinio tubo dolu nei Erot naio be toro na toru ka vio na, mila na ka bogo napano aberial ka Pailat ka Yesu naio be toro Kalele, naio berial ber mia monoka avuru naio riva van parinio tubo Erot ka naio rivitii veve vonio bior kiano tanobuku memedu. Ana ka bogo na, Erot bunu binimei miadu ka Yerusalemo ruei, tenene na aburu Yesu ba ban naio.
LUK 23:8 Mia bogo na parinio tubo Erot bitilubar ka Yesu nene, naio jaaro, bior naio mijog sano tukunu mugaruei, mila na kirisiou ruei naio jidom rialio kija, mila na naio jidom ka vonganei naruei na, p̃eli mia rial Yesu rila kiano kijokijo tai rivanio.
LUK 23:9 Naruei naio milavon ka tukunu vija Yesu, bivivika vite telabo denio, mia Yesu maka riverp̃e titai vanio, naio juburu ga jibe na ju, maka lele ril.
LUK 23:10 Naruei ka bogo na, kulo lu na tortoru nalo bija naverloglogiano na tuboiano, nalo bunu ajikil aju vaataro ajum̃a amil kilkil ajaam̃i ka m̃a aber bulavulag vite nalo na tivelinio ka Yesu.
LUK 23:11 Mia vite nalo nei naruei mila Erot naliko kiano tomu na mira nalo maka asaaro ka Yesu, ana amila kikio naio, amiyotel searia naio. Karina, amiya tubo nalo m̃alo kulum̃arauo nalo tai eaio, ka amijikia avital eaio, naruei amila banbano-o, karina Erot miila naio ban bere ea Pailat bitii bereio.
LUK 23:12 Beamu ka vite nalo na, tomu juo na Pailat naljuo Erot abe bilbilu va kalo, mia monloglog bogo na amim̃au biju jibe nei bereio ka tibureiano na Yesu, burulo abinimei abe bilbilu bo bereio.
LUK 23:13 Mia abinimei bere ea Pailat kiano vio, ana naio bio tomu na tortoru na kulo lu nalo bija tubo nalo bija tomu nalo ka amei aialio.
LUK 23:14 Telikiti na nalo abinimei joomo, naio mil banlo, berinavo “Nanua na, kamiu na kuburu toro na binimei jikili jua miraku, kuberial ka naio jom̃a bilivilig niegeniege m̃elea kenemiu tomu nalo kialo jidomiano nalo. Mia kiniou nebika vite nalo denio, jibe ka nam̃a kumijogio, mia maka neial ka naio mila vite nalo nam̃a kumitum̃a kuberenio na, nemial jibe ka naio memedu ga.
LUK 23:15 Naruei nemiila naio ba mial Erot ka rivitiio, mia Erot maka rileal titaio, naruei miila binimei ea kiniou bereio. Mo, kiaku tibureiano jibe nei, ber naio maka rila titai napano naio monoka rim̃aro riviorio.
LUK 23:16 Mia kiniou nala tibe na ga van naio: mia nala avitiv naio, karina mo atuvan naio rivano, rijikia rivan bereio ea kiano vio.”
LUK 23:17 Ana na bior bogo na be bogo na kulo Ju nalo kialo jokoluolu na toru, ajum̃a ajidom aber jibe ka nam̃a Pailat jom̃a milala vururu, mia monoka tuvanlar Ju nalo tai nam̃a amiadikakario jua kiano tetavokoiano.
LUK 23:18 Ana ka bogo na, nalo tai nam̃a Pailat miadikario, naio kema nei Barabas, napano nanua beamu naio buru tomu dolu nalo amila baravo tai yako Yerusalemo, napano amuebinvin kulo Romo kialo tomu na mira nalo am̃arm̃aro, mila na Pailat miadikario joa kiano tetavokoiano. Mia bogo na amial ka Pailat jidom ka tuvan Yesu rivan bereio tibe na ga, amiaga m̃erere banio, aberinavo “Ei, maka, makanio! Kumemi numisidom kesilar Barabas rimei bereio rivan kumemi. Mia toro na, kumemi nuber kaso ka numisidom jau kodular kiano meuliano ga.”
LUK 23:20 Mia Pailat maka sidom, naio jidom ka Yesu taluvo ga tibe na bereio, naruei naio milavon ka ril, ber banlo.
LUK 23:21 Mia abuku deven ga kiano iliano, abiovio kanio, aberinavo “!Kotukukar, kotukukar toa m̃akolkolo!”
LUK 23:22 Naruei Pailat mil banlo varolu nene, berinavo “?Ana kar venia, naio mila venia napano kirivova? Kiniou nemial vite nonovio ruei, maka neleal vovaiano tai toa nai na memedu ka mia naio rim̃aro riviorio. Mia kiniou nala avitivio ga, karina mia notuvan naio riva vonuo bereio.”
LUK 23:23 Mia nalo ajuve Pailat kiano iliano bereio, amiaga jouo lie jibe na bereio banio, ajaam̃i lie, aber monoka Yesu rivan ea m̃akolkolo, mia nalo amila jibe na banbano-o na ajovulu naio.
LUK 23:24 Karina Pailat mila kiano tibureiano, berial ber naio mijamo ka kialo vikaniano.
LUK 23:25 Naio napano m̃a joa nalakoiano bior bajago nam̃a mila mira a bajago nam̃a mue toro, Pailat mijamo ka naio batavio bereio ba banlo jibe ka nam̃a abikanio. Mia tivelinio ka Yesu, naio berial ka mia kiano tomu na mira nalo ala van naio tibe ka ga na kulo Ju nalo ajidomio.
LUK 23:26 Ana na aburu Yesu, amiel ban ea vio na atukukakar naio toa m̃akolkolo. Bogo na ajum̃a abano, amial toro na ba yeturu karina jo miel binimei vonuo bereio, nina be Saimon na nanua beamu be toro na vio Saireni, naruei ajutua naio ka rudu Yesu kiano m̃akolkolo, mia amidu joa burusovonano, miel jakisor Yesu bano.
LUK 23:27 Amiel jibe na bano, a ka bogo na vio bujo ka kulo dolu nalo bunu ajum̃a ajakisor Yesu, na nalo telabo be tire nalo, napano ajum̃a amiel bija burum̃ara tegiano bija burum̃ara tinieiiano.
LUK 23:28 Mia Yesu jom̃a miagago ka kialo iliano na jogvaiano nei, karina naio barp̃ilig parinio, jiraragidilo, mil banlo, berinavo “Tire re Yerusalemo nalo-o, kuvitig re bunu kiniou tibe na. Ver kuvisidom kuvitig, mia kuvitig kamiu ga, a kenerimiu nalo bunu.
LUK 23:29 Kiniou neber jibe na ka kamiu, bior bogo na jikili tai mia rimei, ana na mia nalo na mia atua naio mia aver tibe nei averinavo ‘!Ver tire nalo ve re kenerilo ga! Mia rivu lie vo ver avar re tete ka mia m̃a rimunu yu ealo, bior bogo nei mia sikili laka van kito rivija kanado solbouo nalo.’
LUK 23:30 “Ana mia bogo na rimei rivova laka vanlo, rivan rivan mia atumolu ateg van burusuku nalo vija suku nalo, aver ‘Aiou, kuvitibirbilko kumemi, kuvituba kitkit kumemi, kuvitivinko kumemi.’
LUK 23:31 Kamiu monoka kuvitikar rivu, bior vonganei buruiesi memeai kia ga vo ajum̃a amila kilkil ea kiniou ruei, mia iorou ka bogo na buruiesi rimei rijel bisi, mia amijikia ala rivova laka lie vo van kamiu.”
LUK 23:32 Ana na ka bogo nei, ajum̃a aburukakar tomu juo nam̃a amila kokorovio tuboiano, naruei aburulo naliko Yesu, ka auebinvinlo vijaio.
LUK 23:33 Naruei amiel banbano-o, abokar kanano vio, vio tai nam̃a abio ka Bordada na Kulorinio. Ana amidu Yesu ajuku kakario joa m̃akolkolo, abitiri lario jumolu ju iviso, mia ajuku kakario tomu na bova juo neibano, abitiri bulaglo tinene jua Yesu jum̃ano meruo, a tinene jua jum̃ano mali.
LUK 23:34 Jibe na naruei ana na Yesu jom̃a jaklele ea m̃akolkolo, naruei naio mil ban Atua, berinavo “Aiou Teta, jau koviekokoa nalo nei. Nalo maka avitilubar vatitig vite nei m̃a ajum̃a amilaio nei.” Ana na iorou kanio, ana tomu na mira nalo aju jibe na ajum̃a amila jibe ka nam̃a amiere m̃abujo, ka aleal ka kei kalo na mia rivar Yesu m̃ano kulum̃arauo tai, a kei rivar tai.
LUK 23:35 Mia kulo dolu nalo ajikil aju ga koalabo, aju ga m̃a abitivitiio, mia kialo natukamuano nalo ajum̃a amil bova ka Yesu, ajum̃a amiyotel va eaio, aberenio “Kumialio kema na! Tomu nalo ajum̃a aber naio milarur tomu dolu nalo miroano ruei, mia vonganei jum̃abe naruei? Aber naio be Atua kiano Naverikariano, p̃eli na naio be toro novo tai napano Atua miilaio binimei. Aver tibe na p̃eli bo ka rilarur kija naio bereio!”
LUK 23:36 Mia na mira nalo ajum̃a amil niegeniege naio bunu, abinimei amiyuku m̃arjum̃elm̃elu na mijea ban naio ka rimunuio,
LUK 23:37 aberinavo “!A verenio jau kobe parinio tubo ka kulo Ju riano, javukia nam̃a aju aberenio, bo ka jau kalarurso vonganei.”
LUK 23:38 Mia ka bogo na abivitauia tiniemaiano tai, ajuku jo mave ea m̃akolkolo mave ka Yesu parinio, na naio berinavo “Kulo Ju kialo Parinio Tubo.”
LUK 23:39 Ana na ka bogo nei, naljuo napano ajaklele ea m̃akolkolo bija Yesu amil banio na. Tinene mil kirivova banio, javukia nalo dolu nalo, naio berinavo “?Mia jau kobe Naverikariano, p̃eli na makanio? Bo jau kala sop̃eli, kalarur kito!”
LUK 23:40 Mia tinene mil banio berbureio, ber “Kaleliki, vonganei be kiado bogo na maariano naruei, mia jau maka kotovon Atua vo. Kito tolu nei tibureiano na amije ban kito be takurano ga,
LUK 23:41 mia tivelinio ka kito juo, memedu ga ka torokoriano nam̃a romilaio, mia tivelinio ka naio, naio maka rila titai leleio.”
LUK 23:42 Ana na mil ban Yesu, bika denio, berinavo “Yesu, bogo na ver komei kove barago, komei bereio, aiou kovijuku rivu, jau tiniemo ribobogia re kiniou.”
LUK 23:43 Ana na Yesu berdop̃e banio, berinavo “Kiniou neberkar banso, neber ea legiano na banei ga, mia jau koto vija kiniou ea kiado vio vuiano.”
LUK 23:44 Mia vonganei, rimei rivokar leri, ana tikar ea bogo na m̃erenio maka bunu merera, mila na melijokouo jovuko reraio vio nonovio garuei, naio jo jibe na bano-o bokar m̃erenio tolu niogoravo.
LUK 23:45 Ana iorou kanio, ana jagidago napano ajelanio jo joomo ea Atua Kunuano Lu, nam̃a joko vio lu na be lu laka, naio burup̃e mielibievi niati juo.
LUK 23:46 Mia ea bogo na, Yesu miaga maariano, ber “Teta, kiniou nomidu niunuku joa jum̃amo.” Mia naio miaga jibe na bisi, ana burum̃aria kanano jegi naruei, naio m̃aro.
LUK 23:47 Ana bogo na toro na toru na mira naio mial vite nei, miolua Atua siano, berinavo “!Riano ga na, kema na naio be toro tai na memedu ga!”
LUK 23:48 Mia tiniobi na toru napano abinimei vio takurano ea vio nei, nalo bunu amial vite nalo nei napano m̃a amila ka Yesu, tiniel miia naio toru laka na. Avona bisi, ana na abanvan bereio, amiel bija burum̃ara jogvaiano, abano bere ea kialo vonuo nalo.
LUK 23:49 Mia taara dolu na tomu nalo ajua vio nei ka bogo nene bunu, ajikili aju koalabo kija ga, ajum̃a abitivitii vite nalo. Nina be Yesu kiano bilbilu nalo, naliko tire nalo nanua abinimei ea vio Kalele, ajum̃a ajakilili Yesu banbano-o bokar vio nei, mia nalo bunu amial Yesu kiano m̃ariano.
LUK 23:50 Naruei toro tai na komeli na kulo Ju nalo kialo na Arimatea, mia siano be Yoseve. Naio be toro na toru tai na komeli na toru na vio Yerusalemo, be toro na memedu tai napano kiano bajago kirinovo laka.
LUK 23:51 Naio tai napano jidom toru ka Atua kiano Navenatuboiano rimei, mia beamu ka napano aber ka mia ala vaio ka Yesu, naio takurano kiano jidomiano maka tibe na, naio milavon ka riverburelo ka ala re rivova kanio.
LUK 23:52 Mia bogo na mijogial ka aber Yesu m̃aro ruei, naio ba jikil jukamu ea Pailat mirano, naio bika denio ka ver mijikia rudu Yesu mokotenano.
LUK 23:53 Ana na Pailat mijamo ka banio, naruei naio ba midular Yesu mokotenano ea m̃akolkolo, naio mijuvuluko ka kulum̃arauo, ana midu ba midu vatitig joa buluvae vou tai napano aje vonga, napano maka adu toro tai rimoneaio vo.
LUK 23:54 Naruei legiano na Yesu kiano m̃ariano, naio be Vraire, jibe ka bogo na amiomon vite rorea Legiano Lu. Mia vonganei m̃erenio jo mialolo batove, vaataro ka Legiano Lu tikario, nina monloglog bogo na m̃erenio javin.
LUK 23:55 Naruei tire nalo nanua m̃a ajakisor Yesu, jikar Kalele binimei boru ea kiano m̃akolkolo, mia vonganei bogo na amidu mokotenano binimei, ajakisorio bereio. Ajakisor binimei boru ea pakeltavo naruei, amial vio na amidu mokotenano jo mon joomo ea buluvae.
LUK 23:56 Nalo amialio avona bisi, ana aban bere vonuo ka ala vatitig sano bonotanunu vija pomat. Nalo aboru vonuo ruei, avona bisi ana Legiano Lu jikar naruei, mila na maka bunu ve bogo tai ka avan bereio ka ayovovua Yesu niabene. Mila na nalo aju ga vonuo jibe na, jibe ka nam̃a tuboiano berenio ber monoka nalo ala ea Legiano Lu.
LUK 24:1 Legiano Lu barlaka ban kario, ana na viomijeni kanio, naio be legiano na be moti na sude dolu. Mia viomijeni mermeravo kia ga vo, ana na tire nalo nei tealo abar bonotanunu bija pomat nalo na amim̃auka batitiglo ruei, amiel aban bereio ea buluvae ka ayovovua vatitig Yesu niabeno.
LUK 24:2 Naruei bogo na abinimei aboru ea vio nene, amial ka burum̃ara puruveru na ajubonko kar ka buluvae, ajubon lario ruei,
LUK 24:3 ana na nalo aba joomo, mia amiilo ka napano Yesu mokotenano bakovio tai ruei.
LUK 24:4 Mia ajikili aju ajidomii dede toru laka-o, mia amiilo ka vaarakurano ga tom juo ajikili aju bijalo. Tom juo nei, m̃alo kulum̃arauo miuvu mia miuvu batitigio bo.
LUK 24:5 Mila na tire nalo nei amerou ka avitikarlo, naruei aminie ka sudu jaalo, ajak banini tano kamu kalo. Ana naljuo amil banlo, aberinavo “Oi, tire nalo, kamiu maka kuvijikia kuvial toro na meul ea vio na m̃ariano.
LUK 24:6 Naio maka toa vio na, Atua bitirilar naio ruei. Kamiu kuvisidomii von bereio, venia naio berial ka kamiu ka bogo na naio jo kamliko nua yako Kalele, maka kumei nei vo.
LUK 24:7 Naio ber jibe nei berinavo, jibe ka naio be Kulorinio Kenerinio, mia monoka ajamo ka naio rivan ea tomu na bova jum̃alo, ka mia atukukakar naio toa m̃akolkolo, mia ka bogoti ve tolu nene, mia naio tumolu rimeul bereio. Naina naruei be iliano nanua m̃a naio berenio ka kamiu ruei.”
LUK 24:8 Mia tire nalo amijog ninei, mila na tiniel maio ka bereio Yesu kiano verikariano, nanua naio ber batitigio bo banlo berinavo mia naio mijikia rimeul bereio.
LUK 24:9 Tiniel maio ka bereio, ana na ajuvan vio nei, aban bere amial atevi duelimo ba tai bija nalo dolu nalo. Mia vite nalo nam̃a amial ea buluvae, aberiio meravo vatitig bo banlo,
LUK 24:10 mia nalo nei maka amoneaio, amial jibe ka tire nalo nei ajum̃a ajukunu vovu ga. Mia tire nalo na amial vite nalo nei, sialo ajibe nei, Mere re Maktala, Joana, Mere na Yemesi kenieno, bija tire nalo dolu bereio.
LUK 24:12 Mia Pitere, naio takurano jidom rileal ka tenei naio be riano p̃eli na makanio, naruei naio jumolu, jikiti bano-o jidom rial vonio vajoomo na buluvae nene. Naio binimei boru ea vio nei, monkorkor ba joomo, mia mial Yesu m̃ano kulum̃arauo nalo aju keano ga, mia mokotenano ba kovio tai ruei. Ana na naio batavio bereio miel ba vonuo, naio jo jidomii toru laka ber vite nei naio jum̃abe nei, p̃eli na nioti nene venia.
LUK 24:13 Ana iorou ka ninei bereio, ka legiano nene ga, tom juo kalo ajuvan vio Yerusalemo ka avan ea komeli na telisu tai, siano Emeas. M̃arabo na ban ea vio na maka ve tebievi laka, naio jibe ka sadu duelimo titai,
LUK 24:14 ana bogo nam̃a amiel abano, ajukunu toru ka vite nalo na abarlaka ruei.
LUK 24:15 Ajukunu abano-o, ana na Yesu miel binimei iorou kalo, jo miel nalikolo abano.
LUK 24:16 Amial naio jom̃a miel bijalo, amialio jibe ka valauo tai ga, bior miralo maka ajikia avitilubar naio.
LUK 24:17 Ana na Yesu bika denlo, berinavo “?Kube juo kumitum̃a kumiel jibe na, kumitukunu ka venia?” Mia bogo na bika jibe na, amebi ajikili aju ga jibe na, miralo bova kanio.
LUK 24:18 Naruei nalo tinene, siano Kleopas, berdop̃e ban Yesu, berinavo “Tomu nalo telabo na vio reraio ajum̃a amiadu ka Yerusalemo ka bogo na, mia p̃eli jau takurano maka kojog burum̃ara vite nalo na amalmaluvo vonganei yako, a?”
LUK 24:19 Ana Yesu bika ber “?Ana vite venia nalo nam̃a jau kojom̃a koberenio na?” Nalo aberdop̃e, aberinavo “Tenei be tivelinio na tete re Nasarete nei, Yesu. Naio binimei, be naverialiano tai, naio mim̃auka kijokijo telabo ea burum̃ara moroano na kiano, mioliolu berloglog tomu nalo bo laka, mila ajidom naio toru laka, ba bokar bunu ka nam̃a Atua Sop̃i berial ber naio jaaro toru laka ka naio.
LUK 24:20 Mia karina, nanua viomijeni niovo ga, kulo lu na tortoru bija kiado natukamuano nalo, tiniel jer naio, aburu naio jel ea burum̃ara komeli nalo banbano-o na ajibure naio aber monoka mia rim̃aro, ana aban ajukakar naio joa m̃akolkolo ana m̃aro.
LUK 24:21 Nanua beamu, kenememi jidomiano joa naio ka mia naio naruei mia rilarur kito kulo Israel, ka mia naio rivuru bulag kito den kulo Romo nalo kialo moroano, mia vonganei vite nonovio ba bova bereio ruei. Naio buro den kumemi banei be kiano bogoti tolu nei naruei.
LUK 24:22 “Mia be vite tai bereio mila kumemi numiilo m̃ele kanio, mila numitum̃a numisidom bijovijonio ka kia nei vo. Banei ga napano tu tokokoreko ve vaarakurano kia ga vo, kenememi tire nalo tealo ajevijo aban bereio ea buluvae ea vio na amidu Yesu mokotenano mon eaio, aban ka ayovovuaio vatitig rivu.
LUK 24:23 Mia bogo na aboru ea vio nene, amial ka mokotenano maka bunu toa vio na jo mon eaio, naruei ajikiti abinimei bere ea kumemi, mia maka nina ga, mia aberialio ka amial bunu nailiano naljuo, napano aberial aberinavo Yesu meul bereio ruei.
LUK 24:24 Ana kumemi tealo ajidom aialio vatitig, naruei aban ea buluvae, amialio javukia napano tire nalo nei aberenio, maka lele aial naio.”
LUK 24:25 Naina naruei be iliano napano tom juo neibano aberiio ka Yesu, bogo na ajikili ajua m̃arabo. Naruei naio bunu mil ber kalo, berinavo “Tomnei, kamiu kube bulubau nalo ga. Naverialiano nalo aberial batitig bo vite nalo na kirisiou ruei, mia jum̃abe maka kumonmoneaio vo?
LUK 24:26 P̃eli na kamiu kumijikia ruei, napano mia Atua rivitirilar kiano Naverikariano naio ve toro na toru ea yetemeriba nei. Mia kamiu maka kuvitilubar ka Iliano Lu nalo aju aber mia ala Naverikariano rojog rivova, ala bulag naio beamu, karina mia Atua mijikia vitirilar naio, rivokar kiano burum̃ara mermerano.”
LUK 24:27 Naruei Yesu jo jukunu banlo jibe na naruei, berlogloglo ba lie vo. Naio jikar ea Mosis kiano niosi nalo, binimei bokar Naverialiano nalo kialo niosi nalo, naio jom̃a ber bisivisii meravo banlo jum̃abe napano iliano moruo nei jom̃a jiloglog naio ga, p̃eli na ajum̃a aberii dam̃ariga naio.
LUK 24:28 Naruei abe tolu amiel aban bereio, mia maka vesiou ana abinimei vaataro ka komeli na tom juo nei aban kalo. Mia nalo amial jibe ka Yesu miel ka riel rijaka,
LUK 24:29 mia ajikili kanio ka naio to vijalo beamu vo. Amil banio, aberinavo “Koig vonganei, m̃erenio jo mialolo batove keano, vaataro ka vio rimelijo naruei. Jau komei koto kija vija kumemi beamu, romon ea vio nei ga vo.” Ana na Yesu ba jo naliko ea kialo vio.
LUK 24:30 Aju bano na monloglog bogo na sinaniano, mo nalo abinimei ajutano vio takurano ea vio na sinaniano. Naruei be bogo na abolkouo ka sinaniano, mia Yesu ga naio jumolu midu salo niajoko, naio bolkouo ban Atua ber siva kanio, naio burekokorovio bar janealo.
LUK 24:31 Mia bogo na naio mila jibe na, memedu ka bogo na naruei ana miralo jibe ka betavo, abitilubar ka naina jo naliko na, be Yesu nene na. Ana aju amial naio, mia bogo bulati ga, mia naio jaluvo ba kovio denlo bereio.
LUK 24:32 Naruei abe juo ajum̃a aberveriio, aberinavo “Ajerei, robe juo garuei maka rovitilubario, mia naio be kiado Tubo nam̃ariga neibano. Mia riano ga, bior bogo nam̃a roju rojukunu bija naio rojakii m̃arabo robinimei, napano naio jom̃a ber bisivisii Iliano Lu nalo ban kito, kiano iliano nalo ajese laka, ajibe ka sebi jo bovago joomo ea kiado iviso.”
LUK 24:33 Mia bogo na amijikia ka amial Yesu mirano ruei, maka bunu amonmelio, mia ajumolu sop̃eli, amiel ea burum̃ara miamo aban bereio Yerusalemo ka averialio ka nalo dolu nalo. Mia nalo aba amaluvo ka duelimo ba tai napano aju abior vio takurano kia ga vo naliko dolu nalo,
LUK 24:34 mia naljuo maka ail vanlo vo, mia nalo aberial kanalo jukamu aberinavo “!Ai, tom juo, abe bogo na ga kubano, titai miyotuba ea vio nei! Iliano napano tire nalo aber beamu, naio be riano ga. Kiado Tubo naio jumolu den nam̃ariano ruei, Pitere nei mialio ka mirano memedu.”
LUK 24:35 Ana na naljuo nei bunu ajusolio kialo iliano, nalo aberii jum̃abe ka Yesu miyotuba ka naljuo ea m̃arabo, a ka napano maka avitilubar naio, banbano-o bokar ga bogo napano jan ka joko janealo.
LUK 24:36 Mia bogo nam̃a naljuo nei ajum̃a ajukunu banlo ka vite nalo nei kia ga vo, amiilo va ka napano Yesu jikili ju iviso kalo garuei, naio ber kalo berinavo “Tum̃aro rito vija kamiu.”
LUK 24:37 Yesu binimei ealo jibe na, mila na ajidomii aberinavo naio be sim̃aro tai, mila na amerou toru laka.
LUK 24:38 Mia Yesu bitilubar ka amerou kanio, ana naio bika denlo berinavo “!Ai, ka venia kamiu kuvisidomii m̃elea jibe na? Kenemiu iviso veve juo re bunu!
LUK 24:39 Kuvial vonio jum̃aku vija jaaku, jeleig venia nalo nei jualo! Kam kuvialio, ninei be kiniou ga nei! Kumei kuvitokol veve niabeku torogio nalo nei, bior vite na jibe ka sim̃aro maka ve buruiu, a maka ve niamoiou tibe ka mokotenaku nei.”
LUK 24:40 Ana naio jom̃a mil banlo jibe na, naio jiloglog jum̃ano bija jaano kalo ka ajikia avitii vevelo.
LUK 24:41 Ana ka bogo na, naiagagoano nalo, kialo jidomiano jom̃a mim̃au toru jibe na, napano ajaaro toru ka amial aberii Yesu, mia ajidom deio kia ga bunu. Ana Yesu mil bereio, bika denlo berinavo “Ei kamiu kuburosebi ruei?”
LUK 24:42 Mia nalo amijege niado menoko ju ruei, ana na amidu niatai ban Yesu,
LUK 24:43 mia naio midu denlo, naruei kamu ka miralo naio jenio.
LUK 24:44 Karina na, Yesu mil banlo, berinavo “Bogo na nanua m̃a nojo kitoliko nua, kiniou nojom̃a neberii iliano miroano ea yati na nonovio na Navivitauiano Lu nalo ban kamiu ruei. Kiniou nobar iliano nalo na ea niosi na Mosis kiano, ea naverialiano nalo kialo niosi nalo, a ea niosi na Iouano lu nalo, naruei kiniou neberial ka iliano nalo na naruei, aberii kiniou ga, mia amei ave riano rivesiou re ga na. Tenene na kiniou neber jibe na ka kamiu, mia vonganei naruei kumial vite nonovio nalo na abinimei be riano ruei ea miremiu nalo.”
LUK 24:45 Naruei Yesu jom̃a berlogloglo ba lie vo, mila kialo jidomiano nalo ba toru laka bereio joomo ea Vivitauiano Lu nalo nei, naruei vite nalo nonovio binimei meravo bo kalo.
LUK 24:46 Naio ber kalo berinavo “Nina naruei, iliano nalo nei aberii jibe na naruei, ka Naverikariano, mia am̃ele naio rijalele rivano-o mia rim̃aro, mia sano bogoti tolu nene, mia naio tumolu den nam̃ariano rimeul bereio.
LUK 24:47 Ana iorou kanio, ea siano ga, mia kiano tomu nalo mia atikar to yako Yerusalemo, mia avan ea yetemeriba vodolu, avan aioliolu van taara nonovio na tomu nalo, averial vanlo ka monoka aviliglo ka mia amijikia ajev viekokoano ka kialo vovaiano nalo.
LUK 24:48 “Naruei kamiu napano m̃a kumial vite nonovio nalo na ka miremiu, kamiu nene naruei kuva kuverialio van tomu dolu nalo ka vite nalo nene be riano.
LUK 24:49 Im̃auano nei, naio be im̃auano tai na kirisikili laka, mia kiniou nodu moroano tai toa kamiu ka mia rijai kamiu kuvituvulio. Moroano nei, Teta kiano verikariano naio jo, ka mia naio riila lario sel mave tiniabene rimei rivujo loa ea kamiu, tenene na kiniou nejidom never ka kamiu, ka kamiu kuviel dedade re den komeli nei vo, mia monoka kuvitu rorea ea vio nei beamu vo-oa, ka kuvokario.”
LUK 24:50 Bogo na ka mia Yesu jidom ka tuvanlo, jukamu kalo abatove ea komeli sesa na Betani. Abinimei abokar vio nene, ajum̃a jibe na, banbano-o na Yesu jumolu jian jum̃ano loalo, milivu kalo.
LUK 24:51 Naio jom̃a mioa vatitiglo banbano-o, jo jikar juvanlo bavin mave tiniabene bereio.
LUK 24:52 Naruei naiagagoano nalo amial kialo Tubo naio buro denlo bereio, ana na nalo aminie ka sudu jaalo abatove amilotu ka naio, karina aban bere Yerusalemo, napano ajaaro mia ajaaro.
LUK 24:53 Mia ajua vio na banbano-o ana dam̃ariga ea bogo nalo na volkouano nalo ajum̃a aban ea Atua Kunuano Lu amiaiaio naio. Naina naruei be Lilianiano Vou na Yesu Kristo napano kiniou Luka nebivitauia, maaro ea vio na.
JOH 1:1 Beamu beamu, ea burupati, naio nam̃a abio ka Parinio Bajago na Atua kiano bajago naio jo, naio jo bija Atua, a naio, naio be Atua.
JOH 1:2 Ea bogo na tiiano na vite nonovio, naio bija Atua ruei,
JOH 1:3 naio mim̃auka im̃auano na rim̃auka vite nonovio, maka ve vite tai na naio maka rim̃aukanio.
JOH 1:4 Meuliano na be riano maluvo den naio ga, naruei meuliano nei binimei jibe ka yulu na taara nonovio na tomu nalo.
JOH 1:5 Naio binimei jibe ka yulu nam̃a mereralii nalo na ajua melijokouo, ana melijokouo neibano naio maka rijikia tovulio.
JOH 1:6 Karina, Atua naio miila kanano toro tai binimei ea yetemeriba nei, naina be Jone.
JOH 1:7 Naio binimei jibe nailiano tai, ka riverial riverinavo toro na yulu nene naio jo binimei, ka rijai tomu nalo nonovio ka ajikia amonea ka toro na naio be Atua kanano yulu.
JOH 1:8 Jibe na, Jone naio maka rive yulu nene navo, mia naio be toro na verialiano ga.
JOH 1:9 Mia iorou kanio, toro na yulu nene naio binimei miyotuba ea yetemeriba nei. Naio be yulu napano be riano, napano naio bo laka, naruei binimei ka rudu kanano yulu toa tomu nalo nonovio kanalo meuliano.
JOH 1:10 Toro na yulu, naio naruei napano jii yetemeriba nei, mia bogo na binimei eaio, ana tomu nalo na yetemeriba nei maka avitilubario.
JOH 1:11 Naio binimei be moti ea kanano tomu nalo kanalo vonuo, mia nalo na ea kanano torogio nei maka asidom naio ga.
JOH 1:12 Mia tealo ajaaro kanio, amoneaio, naruei ea nalo na abiniu, naio mijamo kalo ka amijikia amei ave Atua kenerinio nalo.
JOH 1:13 Naio milalo amiyotuba valuo bereio, napano maka tibe ka napano kiritete nalo amiyotuba jakii yati na burukija, p̃eli na jidomiano na tira bija sum̃ano kialo, p̃eli na toro kanano jidomiano, mia amiyotuba bereio jakii jidomiano na Atua kanano.
JOH 1:14 Tibe na, Parinio Bajago na Atua kiano naio binimei be toro riano, naio binimei jo iviso ka kito, naruei kito romial kanano meuliano na bo nene, naio bujo laka ea bajago na tiniememiano a bajago na ilirianiano. Naio be novo na bo laka be motoru na Karam̃ado kenerinio, naruei kumemi numial kanano burum̃ara mermerano nene, napano be kanano, naio ga takurano.
JOH 1:15 Mia bogo nam̃a Jone Baruei berii naio nua, naio berinavo “Naina nam̃a kiniou nojom̃a neberii ban kamiu, neber mia naio rimei iorou ka kiniou, naio loa laka, mia kiniou yetano ga, bior ka napano naio meul beamu laka garuei, mia kiniou nebe na vonganei ga.”
JOH 1:16 Naio bujo ka bajago novnovo nalo, mia bogo nonovio naio jo mila bo toru ban kito, kiano burum̃ara tiniememiano mila kito romijog bo toru bogo nonovio.
JOH 1:17 Beamu, Atua bitirilar tormoruo Mosis, ka naio du ga kanano tuboiano binimei ban kanano tomu nalo, mia Yesu Kristo, Atua bitirilar naio ka naio naruei bar bajago na tiniememiano a iliano na ilirianiano binimei ea yetemeriba nei.
JOH 1:18 Kito kulorinio, maka kito tai napano naio mijikia Atua, a rialio ka mirano, mia toro napano naio jo dam̃ariga ea Atua kanano jidomiano, naljuo aju vio takurano bogo nonovio, naio naruei binimei mila kito remijikia Atua bija kanano bajago novo nalo.
JOH 1:19 Ana bogo na Jone Baruei naio jom̃a mioliolu banbano-o na, navurim̃araboiano na kulo Ju nalo na vio Yerusalemo aju ajidomii toru aberinavo naio mim̃au jum̃abe na, p̃eli vede naio be Naverikariano, p̃eli naio be kei. Naruei nalo amiila kulo Lu tealo bija tomu na tortoru na yati lu na Livai, naruei nalo abinimei abika denio aberinavo “Jau kobe kei?”
JOH 1:20 Naruei telikiti na abikanio, naio ber bulag batitig vite nonovio banlo, naio berdop̃elo berinavo “Makanio, kiniou maka neve Naverikariano nene.”
JOH 1:21 Ana nalo aberinavo “?Ver tibe na, jau kobe tormoruo Elaija re nua, naruei jau komeul bereio, p̃eli? Nina bior Iliano Lu berenio mia naio monoka rimei bereio beamu ka Naverikariano.” Mia naio berdop̃e bereio, berinavo “Makanio, kiniou maka neve toro nene.” Naruei nalo aberinavo “?Mo, mia vede jau kobe naverialiano nanua m̃a Mosis naio berkario ruei?” Ana bereio naio berdop̃e, berinavo “Makanio.”
JOH 1:22 Naruei abika bereio denio aberinavo “?Ana jau kobe kei bere na? Jau monoka kover titai van kumemi ka numijikia nuvan bere nuverialio van nalo napano amiila kumemi nubinimei. Jau kover vatitig ga van kumemi, koverinavo, jau kobe kenia.”
JOH 1:23 Ana kanano verdop̃eiano na ea bogo nei, naio jibe nei berinavo “Kiniou nebe niono kurano ga ea vio yauo, nam̃a Naverialiano Aisea beriio nua ruei. Kiniou nebe niono napano binimei ka riverial riverinavo ‘Kuvila vatitig rivu m̃arabo nalo na Tubo kanano ea kenemiu meuliano nalo.’ ”
JOH 1:24 Nalo tai kalo napano ajua bogo na, nalo abe Varisis,
JOH 1:25 naruei nalo abika bere denio, aberinavo “Kumemi numijog jau kober ruei ka jau, maka kove Naverikariano, a maka kove Elaija, a maka kove naverialiano nam̃a Mosis berenio. ?Ver tibe na bior venia ana jau koberenio kobare ka kojom̃a kabaruei m̃ele ea tomu nalo janea vio jibe na?”
JOH 1:26 Ana Jone berdop̃e banlo, berinavo “Kiniou, varueiano na kiniou nojo namilaiio ban nalo na, naio ea uei ga. Mia toro dolu tai mia naio rimei rudu jeleku, napano naio jo iviso ka kito ruei, mia kamiu maka kuvijikia naio vo.
JOH 1:27 Naio loa lie laka ka kiniou, jibe ka napano kiniou maka navare ka nava vaataro ka naio, neiel vijaio, p̃eli neivelar kanano kulubuei.”
JOH 1:28 Naruei vio nei naruei napano nalo abano ka aial Jone ea, naina ea tanobuku na vaataro ka komeli na Betani, ea m̃arauei na Yortano tivelinio bano, nina ea vio nam̃a Jone naio jom̃a baruei ea tomu nalo.
JOH 1:29 Ana legiano dolu nene, Yesu naio miel ba miyotuba ka Jone Baruei bija kumemi naiagagoano nalo kiano ea vio nam̃a numituaio. Ana bogo na Jone mial Yesu, naio berial ka kumemi, naio berinavo “!Mm, kamiu kuvial toro yako naio jom̃a miel binimei kiana! Naio, jibe nunu solbouo na Atua kanano, napano mia naio rivar bulag vironiano na kariano nalo na tomu nalo na yetemeriba nei kialo.
JOH 1:30 Naio nam̃a kiniou nojom̃a neberiio ban kamiu nua ruei, neberinavo: Iorou ka kiniou, mia toro na toru tai rimei napano mia tukamu ka kiniou, naio loa laka lie vo bior naio jo jukamu ka kiniou.
JOH 1:31 Kiniou neber iliano nei beamu, maka nejikia ka mia ve kei, maka nejikia ka naio be kanaku tumano ga na, mia kiniou nemijikia ga ka monoka navaruei ea kito kulo Israel, ka rila ka mia romijikia rovitilubar kiado toro na toru nei.”
JOH 1:32 Ana Jone naio ber bisivisii vatitigio ban kumemi jum̃abe ka na naio mijikia ka Yesu naio be Naverikariano. Naio berinavo “Jibe ka nam̃a neber beamu ruei, maka nejikia naio be kei, mia maka vesiou ga, ana Atua mil ban kiniou, naio ber jibe nei, berinavo ver bogo na jau keial kanaku Niununo Lu naio rivatove totano ea toro tai, naina naruei mia naio rivaruei ea tomu nalo ea kanaku Niununo. “Naio ber jibe na ka kiniou, ana bogo na namial Yesu nene, namial napano Niununo juvan vio mave, batove ea naio javukia vaama tai, binimei bujo joa naio.
JOH 1:34 Bior vite na naruei napano namialio, nemijikia neverialio vatitigio van kamiu, ka be riano ga, toro na naio be Atua Kenerinio memedu.”
JOH 1:35 Ana ea legiano dolu nene bereio, ana Jone Baruei naio jo keano ea vio nei vo, naio jom̃a jukunu bija kumemi liko Adru, napano ea bogo nene kumemi nube kanano naiagagoano.
JOH 1:36 Ana numial Yesu jo miel binimei barlaka jel vaataro ka kumemi. Ana Jone berial ban kumemi, berinavo “!Tom juo, kuvial toro yako, naio jibe ka kirikiti nunu na telisu na sida na Atua kanano na!”
JOH 1:37 Kumemi juo numijog Jone naio ber jibe na, naruei vaarakurano ga nube juo numitumolu, nubano numitakisor Yesu.
JOH 1:38 Ana Yesu barp̃ilig naio ka kumemi, berinavo “Tomu juo, kiniou namial jibe ka kam juo kumisidom titai kovio.” Ana nuberdop̃e naio, nubio naio jibe ka kenememi naverloglogiano, ana nuberinavo “?Rapai, jau kobinimei ea vio nei, vio na vabe jau kojom̃a komon eaio?”
JOH 1:39 Ana naio berinavo “Mo, kamiu kumei, rava kuvialio.” Ana numiel nuba nubokar vio nam̃a Yesu joaio ka bogo na, a jikar ea titai jibe ka m̃erenio veri niogoravo, numitu bija naio, numitukunu banbano-o bokar vio melijo nonovio.
JOH 1:40 Ana Andru nene napano kumemi juo numijog Jone berii Yesu numitumolu numitakisor naio jibe na, naio be Andru napano naio be Saimon Pitere kuruano na telisu.
JOH 1:41 Ana Andru nene naio ka takisor Yesu garuei, mia naio ban sop̃eli ka kuruano nei beamu vo, ana bogo na naio mileal naio berii banio, berial Naverikariano, napano kulo Ju nalo abio ea iliano na Ipru aberinavo Misaea, a kulo Kris nalo abio ea iliano na Kris aberenio Kristo. Naio berial kanio, berinavo “Kuruaku, Naverikariano m̃a na, kumemi numileal naio ruei.”
JOH 1:42 Berial ka kuruano nei, ana buru binimei ea Yesu. Ana bogo na Yesu mialio, naio berinavo “?O, jau na naruei kobe tormoruo Jone kenerinio dolu nene, siamo Saimon? Mo vonganei kiniou nesisiaso bereio, never siamo Kevas.” Sio nei bunu naio be iliano na Ipru, napano naio ber puruveru, napano ea iliano na vio Kris aberenio Pitere.
JOH 1:43 Ana ea legiano dolu tai bereio, Yesu jidom rudu kanano m̃arabo bereio, naio jidom rivarkor vio, rivan bere ea kanano tanobuku na vio Kalele. Nubano jibe nei, ana Yesu mial toro tai bereio, berkanio berinavo “Jau komei katakisor kiniou.” Toro nene siano Vilip,
JOH 1:44 napano naio bunu ea komeli na Andru naio Pitere kanalo nei Betsaeta.
JOH 1:45 Ana maka ve sio, Vilip naio ba jirag kanano bilbilu tai, siano Nataniel, naio ba berkanio, berinavo “Toro na toru nam̃a tormoruo Mosis naliko naverialiano nalo abivitau kakario, aberialio nuanua ruei, naio miyotuba iviso bure kito ruei. Kumemi numileal naio ruei, be toro Nasarete tai, kenerinio tormoruo tai siano Yoseve, ana toro nene, naio siano Yesu.”
JOH 1:46 Mia bogo na Nataniel mijog ka Yesu naio be na komeli na telisu nei, naio bika berinavo “Ana jum̃abe? Tonovo na toru tai na jibe na naio maka rijikia riyotuba ea komeli na telisu na Nasarete nei!” Ana Vilip berdop̃e, berinavo “Ai, abe jau keil re tibe na, jau komei ga keial naio beamu vo.”
JOH 1:47 Ana naljuo aban bereio ea Yesu, mia bogo na amiel abinimei vaataro kanio, Yesu mial Nataniel, beriio, berinavo “Lerinio, kiniou namial toro na jibe toro novo na Israel tai memedu na, toro tai napano maka ve sibiano ea naio leleio.”
JOH 1:48 Mia Nataniel mijog Yesu berii naio jibe na, naio bika berinavo “?Ana jum̃abe jau komijikia ka kiniou nebe toro na jibe na?” Mia Yesu berdop̃e naio berinavo “Bogo na Vilip maka riviedu kaso vo, bogo na jau takurano kojo komijilimebi yetano ea vamelu na buruviki, kiniou namialso ruei kiana.”
JOH 1:49 Mia Nataniel miilo va ka Yesu kiano jikiaiano, berinavo “!Naverloglogiano, jau kobe Atua kenerinio riano! !Jau kobe parinio tubo na Israel memedu kia na!”
JOH 1:50 Ana Yesu ber banio, berinavo “!Kiniou neber iliano tai na telisu banso, ka kiniou namialso ea buruviki na, mia vaarakurano ga jau komonea kiniou jikili! Nina naio bo laka, mia neberkar banso ka mia jau kaial vite na iloiano ve telabo bereio, napano nalo tortoru lie todovulu ninei na jau komialio navo.
JOH 1:51 Nao, kiniou neber memedu, ka mia kamiu kuvial ka vio mave naio rivetavo to, vija nailiano nalo na vio mave na atu amei yetano ea kiniou atu avavin mave bereio, atu avatove bereio avavin tibe na. Vite kinkin nalo na tibe na ana mia kamiu kuvijikia kuvialio bior ka kiniou nebe Kulorinio Kenerinio, jibe napano kiniou tena vio mave, a nebinimei nebe kulorinio riano.”
JOH 2:1 Mia Yesu nalo abinimei aboru ea tanobuku na Kalele ruei, ana ea legiano tolu nene, jokoluolu na soriano tai ea komeli na Kana. Mia Yesu kenieno naio ba miyotuba ea jokoluolu nene ruei,
JOH 2:2 ana iorou kanio amiila toru binimei ka Yesu naliko kanano naiagagoano nalo, abiolo bunu ka amei eaio.
JOH 2:3 Mia Yesu nalo abano amiyotuba ea jokoluolu, aju naliko tomu nalo banbano-o, mia vite tai bova, uei na amunu ea jokoluolu nei naio biniu sop̃eli. Ana Yesu kenieno binimei berialio ban Yesu, naio berinavo “Munuiano na toro na toru na jokoluolu mila batitigio, amunu koko kanio, biniu ruei vio be teau, amila de batitigio garuei.”
JOH 2:4 Ana Yesu berdop̃e, mil banio berinavo “?Tiramoruo, venia na im̃auano na naio joa kiniou? Jau kodu re toa jum̃aku, bior kanaku bogo na nala vite nalo na jibe na, naio maka vo.”
JOH 2:5 Kenieno naio mijog venia napano Yesu berenio, mia naio ber ka tomu na im̃auano na jokoluolu nei, berinavo “Venia na mia naio river ka kamiu ka kuvilaio, mia kamiu kuvil re, kuvilaiio ga.”
JOH 2:6 Ana Yesu mial burum̃ara basi-dobidobi na uei tai aju vaataro, nam̃a kulo Ju nalo abar ka m̃a ajekon ka vite nalo jibe ka na kanalo nalotuano naio berenio. Burum̃ara basidobidobi nalo nei amim̃auka ea puruveru, abe verare ka sadu toromomou takurano janealo, basidobidobi nene nalo biniu be ari.
JOH 2:7 Ana naio ber kalo berinavo “Kamiu kuva kuviov uei, ana kuvar kumei kuvioionio rivan ea basidobidobi nalo nei rivano-o avuvujo magmago.” Naruei nalo amila banbano-o na amisono batitiglo abujovujo.
JOH 2:8 Ana Yesu naio berenio berinavo “Mo, vonganei kuviov ve telisu eaio, ana kuvar va van toro na toru na jokoluolu nei ka naio rijikia rimunu vonvonio.” Naruei nalo abiovio, abar ba ban naio.
JOH 2:9 Naruei toro na toru nei naio munu vonvonio, mijog jibe ka binimei be m̃arjum̃elm̃elu ruei, mia naio miilo toru kanio, naio maka rijikia ka amileal munuiano nei ea vio na vabe. Mia nalo ga napano abiovio, amijikia, mia maka aver kanio, mia naio bio toro na joro vonga binimei mial naio.
JOH 2:10 Toro nene naio binimei, ana toro na toru nei berkanio, berinavo “Ea jokoluolu dolu nalo, ajum̃a abiov m̃arjum̃elm̃elu nana bo naio binimei jukamu, mia bogo na tomu nalo amunu kija banbano-o, karina abiov vonga m̃arjum̃elm̃elu na maka rivu laka binimei iorou. Mia ea jokoluolu nei ajum̃a amunu uei banbano-o, karina jau kobiov vonga m̃aku m̃arjum̃elm̃elu napano naio bo laka, naio binimei maariano garuei. Ka venia komila jibe na?”
JOH 2:11 Vite nei nam̃a Yesu naio mila ea bulukomeli na Kenan ea vio Kalele, naio jibe ka burum̃ara vremesiano tai, be kiano vremesiano na be moti napano milaio. Naio mila jibe ka na naio jo jikar jo jiloglog kanano moroano na vio mave, mia bogo na naiagagoano nalo amialio, kanalo moneano na ea naio, ka naio be Naverikariano na be riano, binimei bavin lie vo.
JOH 2:12 Bisi naruei ana nalo abiniu aban bere ea Kapeneam bereio, nina be Yesu, kenieno, a kuruano nalo, bija kanano naiagagoano nalo, abinimei abokar vio nei ana aju kija jibe na ba bokar legiano nalo tai.
JOH 2:13 Mia bogo tai, vaataro ka bogo na kulo Ju nalo ala kanalo jokoluolu na toru, Jukoluolu na Sidomkariano na Ioruriano. Ana kanalo bajago tai, ber yuka nonovio nalo nonovio monoka ala vonio ka avavin Yerusalemo monloglog bogo ka ala jokoluolu nei, ka sidomkariano na korobilo nalo ajaluvo den Ijivi, ana ka bogo nei, Yesu bunu naio bavin.
JOH 2:14 Naio ba bokar vio nene, ana ba miyotuba ea Atua kanano Yimo Lu, mia naio mial ka napano nalo telabo aju napano ajum̃a ap̃ilṽili ka buluku, nunu, bija menu nalo, mia naio mial nalo nam̃a amijebukua veru dolu nalo binimei be veru na memedu na Atua kanano Yimo Lu. Im̃auano nalo nene abe im̃auano na bo tai, bior abe im̃auano na ap̃ilṽili ka vite na tomu nalo monoka avulu ka ala sida kanio, mia titai bova, nalo aju amijukubin tomu nalo toru, mia mave kanio, nalo aju amilaio jouro ea burusio na vio lu.
JOH 2:15 Ana Yesu naio mial ka nam̃a amila niegeniege dolu ga yimo lu nene jibe na, naruei naio tinien mimi, bar teli nalo, buru vuronlo jibe na, ana banku kalo. Naio ba jibe na, naio ba mijil dedade ealo bija kanalo nunu a buluku nalo abava tavio den Atua kanano Yimo Lu, mia ea tivelinio na nalo nam̃a aju amijebukua veru, naio ba miyon bulag kanalo basaro na puruveru nalo, naio bilig bulag kialo barobaro nalo bijaio.
JOH 2:16 Nalo nam̃a aju ap̃ilṽili ka menu nalo, naio mil banlo berinavo “!A, kuvar bulag kenemiu saba nalo na ea vio na! !Kamiu kuvila re karam̃aku kunuano nei rimei ve kenemiu yimo tai na kuvokar veru eaio tibe na!”
JOH 2:17 Ana bogo na kanano naiagagoano nalo amial Yesu naio mijil dedade ealo jibe na, mila na nalo tiniel maio ka vivitauiano lu tai bereio, jibe ka na naio berii Naverikariano beamu ruei, napano berenio berinavo “Kanaku jidomiano temi laka ea kanamo yimo lu, naio jibe ka sebi tai bovago ea kanaku iviso.”
JOH 2:18 Mia ka tenei, tomu na tortoru na kulo Ju nalo, nalo bunu amial venia napano Yesu milaio, naruei nalo abika denio, aberinavo “Venia napano jau komilaio vonga na, naio be burum̃ara vite tai. ?Mia jau na komijikia kala vremesiano na vabe ea mirememi, ka rila kumemi nuvijikia nuvial ka naio rimemedu ka jau kala tibe na?”
JOH 2:19 Ana Yesu berdop̃e banlo, naio berinavo “Mo, kanaku vremesiano naio jibe nei: kamiu kuvue bulag Yimo Lu na, avona iorou kanio, ea legiano ve tolu ga, mia kiniou nevitiri lario bereio.”
JOH 2:20 Ana nalo aberinavo “Nalo nam̃a amim̃auka yimo na, amim̃auka ba bokar yuka duelimo va veri ba ari [46], mia jum̃abe ana jau kober jibe na, kober komijikia kovitiri lario bereio ka legiano ve tolu ga? !Maka leleio rijikia tibe na!”
JOH 2:21 Nalo amil jibe na, a nina bior nalo maka ajikia vatitig rivu venia nam̃a Yesu naio berii ea bogo na. Nalo maka avitilubar ka bogo na naio jom̃a berii Atua kunuano na, nioti nene jibe ka mokotenano.
JOH 2:22 Ana iorou laka garuei, iorou ka na naio jumolu bere den m̃ariano, kanano naiagagoano nalo ajidomialio bereio ka naio ber iliano nei banlo, ana mila na amonea lie vivitauiano lu nalo bija Yesu kanano iliano nalo banlo.
JOH 2:23 Naruei Yesu nalo ajua jokoluolu na ea Yerusalemo banbano-o na, naio jom̃a mila vremesiano telabo, mia bogo na tomu nalo amialio, nalo telabo amoneaio ka naio be Naveri-kariano.
JOH 2:24 Mia Yesu maka to rijamo ka naio laka vanlo, naio maka to rivarkar tiniene m̃ele ealo, bior naio mijikia batitiglo.
JOH 2:25 Toro dolu tai rijikia re river titai van Yesu ea tivelinio na toro kanano bajago, bior naio mijikia vatitigio ruei, naio mijikia vite nonovio napano aju joomo ea toro kanano jidomiano.
JOH 3:1 Ana ka bogo tai bereio, ka bogiano tai, kulo Israel nalo kanalo navurim̃araboiano tai naio binimei ka jidom rial Yesu. Toro nene naio be Varisis nalo tai, siano Nikotimas. Mia naio binimei, naio mil bija Yesu naio berinavo “Naverloglogiano, kumemi numialso, nubitilubar ka jau kobe naverloglogiano tai napano jau kobinimei ea Atua, bior maka ve toro tai napano mijikia rila kijokijo nam̃a jau kojom̃a komilaio, ver Atua to re vija.”
JOH 3:3 Ana Yesu berdop̃e banio, berinavo “Ee, burutomoluo nalo na bo, a monokanio never ve riano bo vanso, toro na maka sidom rimoluo bereio ve terivou, mia Atua naio maka rijikia rive tubo ea kiano meuliano.”
JOH 3:4 Mia Nikotimas naio miilo ka iliano nei, ana berinavo “!Tomnei! ?Mia toro na be tormoruo ruei naio mijikia rimoluo bere tum̃abe? Kiniou maka ve tinieku ka mia naio mijikia riva joomo bereio ea kenieno mabono, ka mia naio rimoluo ve vaarakurano bereio.”
JOH 3:5 Ana Yesu berdop̃e berinavo “Kiniou neber riano banso, ka toro monoka riyotuba ea uei, a monoka riyotuba ea Niununo. Ver p̃eli, mia naio maka rijikia riva jouro ea Atua kanano navenatuboiano.
JOH 3:6 Toro naio mijikia rivar bereio toro ga, mia Atua kanano Niununo naio mijikia rivar bereio niununo vou ea toro kanano meuliano.
JOH 3:7 Naina naruei be yotubaiano valuo nam̃a kiniou nojo neber kaso. Tibe na, jau keiilo re bunu ka kiniou neber kaso ka jau monoka komoluo bereio.
JOH 3:8 “Kosidomii von jegi. Jeg naio jom̃a miuvuvu, naio jo janea vio jibe ka ga na naio jidom, p̃eli na kito roju romijogio, mia kito maka rejikia ka naio jo binimei jum̃abe, p̃eli na naio jo ba be. Mia m̃arabo na Niununo naio rim̃au ea toro kanano meuliano jibe na naruei, naio jibe ka jegi.”
JOH 3:9 Mia Nikotimas naio jidomii bijon iliano nei toru laka, ana bika berinavo “?Tomnei, mia vite na naio mia tum̃abe na?”
JOH 3:10 Ana Yesu berdop̃e banio, berinavo “Jau kobe naverloglogiano na toru tai na kulo Israel kialo ruei, mia kiniou nemial jibe ka vite nalo nam̃a kiniou nojom̃a neber bisivisiio banso na, jau maka lele kejikia vo, a!
JOH 3:11 Kaiagago rivu! Javukia nam̃a naverialiano nalo amilaiio beamu ruei, kiniou nojom̃a neberial ga venia na m̃a kiniou nemijikiaio, p̃eli na venia na m̃a kiniou namialio, mia tibe na dam̃ariga, kamiu tomu nalo na vio Israel kamiu maka kuvisidom kuvisov kenememi iliano nalo.
JOH 3:12 Kiniou nojo neberii saba nalo na yetemeriba nei ban kamiu, mia maka kuvisidom kumonmoneaio, mia ver neverii saba nalo na vio mave, mia kamiu kuvijikia kumonmoneaio tum̃abe? Kiniou namial ka mia ve deio ga.
JOH 3:13 Mia kiniou Kulorinio Kenerinio, kiniou ve takurano ga nemijikia neverloglog kamiu ka na vio mave, bior ka napano maka ve toro dolu tai riva rial vio nene, mia kiniou ga Kulorinio Kenerinio najaluvo den naio nebinimei yetano ruei, a iorou, mia navan bere eaio.
JOH 3:14 “Beamu beamu tormoruo Mosis nalo ajua vio yauo, maro nalo ajum̃a ajer binvinlo, mia naio bitirilar iesi tai, midu butoto maro jo mave, ana kei kalo napano maro jerlo, mia ver sirarago ga vitikar maro na jo mave, mia Atua rilarurlo. Ana ea m̃arabo nene kia ga, mia monoka adu kiniou Kulorinio Kenerinio bunu noto mave ea iesi tai.
JOH 3:15 Naruei toro kei na rimonea kiniou, mia naio rivokar meuliano vou nei napano naio maka ve jukuti nene.”
JOH 3:16 Yesu ber jibe na bior Atua tinien jii tomu nalo na yetemeriba nei toru laka, naruei naio mijamo ka kenerinio na kirinovo laka, napano naio ga takurano be kanano, binimei m̃aro kar kito, naruei toro kei napano rimonea naio, mia maka rijikia riva kovio, mia rivokar meuliano na bo nei napano maka rijikia ribisi bogo tai.
JOH 3:17 ?Ana bior vaio Atua miila kenerinio nei binimei yetano ea yetemeriba nei? Maka riilaio rimei ka tibure tomu nalo na yetemeriba nei, mia miilaio binimei ka rijamo ka kanano meuliano ka rilarur kito.
JOH 3:18 “Toro kei napano rimonea kenerinio nei ve riano, mia Atua tibure re naio, mia toro na maka rimoneaio, vironiano joa naio ruei, bior naio maka rimonea Atua kenerinio.
JOH 3:19 ?Ana vironiano nei napano mia Atua naio monoka rilaio, burupati nene be venia? Naina bior napano naio miila kanano yulu binimei ea yetemeriba nei, mia tomu nalo ajum̃a amila kikiio ga banbano-o na, maka asaaro kanio, mia ajidom ga bajago na bova tena melijokouo.
JOH 3:20 Mia nalo nonovio nam̃a aju amila bova jibe na, jibe ka napano maka asidom yulu nei leleio, a maka asidom amei vaataro kanio, bior amerou ka aberinavo vede mia naio rila kanalo vovaiano nalo ayoyotuba ea vio medave, naruei tomu nalo ajikia avitilubario.
JOH 3:21 Mia nalo nam̃a amim̃au ea bajago na bo a memedu, nalo maka amerou ka toro na yulu nei, a nalo abinimei vaataro kanio. Nalo ajaaro kanio, bior yulu nene naio rila meravo vatitig ka vite nalo nam̃a amilaio, nalo amim̃auka amonmonea ga jidomiano na Atua kanano.”
JOH 3:22 Ana iorou ka vite nalo nei, Yesu buru kanano naiagagoano nalo ajuvan vio Yerusalemo abatavio ea tanobuku na vio Yutea. Nalo aju jibe na, naruei ajum̃a abaruei ea tomu nalo.
JOH 3:23 Ana ka bogo nene nei ga Jone Baruei bunu naio joa vio dolu tai, siano Aenon, vaataro ka vio na Salim. Naio binimei ea vio na bior uei tai joaio, mia tomu nalo na aju abinimei ka naio, naio jom̃a baruei ealo ea marauei nene.
JOH 3:24 Nina ea bogo na nalo maka avokar naio, a maka avuku naio riva joomo ea yimo na lakoiano vo.
JOH 3:25 Naruei ka bogo na Jone kanano naiagagoano nalo amila iliano tai bija toro Ju dolu tai, ea tivelinio ka m̃arabo na sekon vite nalo jibe ka kanalo nalotuano berenio, ana ea tivelinio na bunu varueiano nalo napano Jone bija Yesu kialo.
JOH 3:26 Aberii banbano-o karina abinimei amial Jone, abika denio, aberinavo “Naverloglogiano, kumemi numisidom nuvika denso ea tivelinio na toro na Yesu napano beamu, bogo na kito rojua marauei na Yortano tivelinio bano, naio binimei mialso, naruei jau koberial saba telaboiio naio. Vonganei, naio bunu binimei jo baruei ea tomu nalo, mila abiniu aju ajuvarvan kito aban ea naio ga, vio bujo mia vio bujo.”
JOH 3:27 Ana bogo nam̃a aber jibe na ka Jone, naio maka rijoku, maka rijog rivova, mia naio jaaro ga, berinavo “Kito tomu nalo nonovio monoka roim̃auka ga venia napano Atua naio midu jua jum̃ado.
JOH 3:28 Javukia napano kamiu kumijikia batitigio ruei, nam̃a kiniou nojom̃a neberial julaka ga, ka kanaku im̃auano, kiniou maka neve Naverikariano, mia nebinimei beamu ka naio ga, ka neverial ka naio jo binimei ruei.
JOH 3:29 Ana vonganei jibe ka nam̃a kamiu kuberialio ban kiniou, naio binimei jo mila kanano im̃auano ruei, ana vite nei najaaro kanio, namialio bo laka. “Naio jibe ka bogo na soriano, napano naio jibe nei. Ver toro na naio soro, kanano bilbilu tai, naio riija naio ve toru ka aiomon saba nonovio na jokoluolu, mia karina, ea legiano nene, bogo na avuru tira rimei, tira nei naio maka riva totano vija naio mia naio ba jotano bija koano ga. Mia naio maka rijog vova, kanano saariano naio bare ka toro na soriano kanano. A vonganei kiniou bunu najaaro jibe na, napano kanaku naiagagoano nalo aju ajakisor Yesu.
JOH 3:30 Nina bior Tubo Naverikariano naio monoka to rimei ve toru lie tibe na tulaka, kiniou monoka nomei nove telisu lie vo.”
JOH 3:31 Ana Jone Baruei naio berii Naverikariano, berinavo “Naio be na vio mave, naruei naio mave loa vite nonovio. Kito romiyotuba ea vio yetano nei, kito robe na yetemeriba nei ga ana romijikia roverii vite nalo na vio nei ga. Mia naio, jibe ka nam̃a kiniou neberenio, naio jaluvo ea vio mave binimei yetano, naio loa lie ka tomu nonovio,
JOH 3:32 napano naio binimei jom̃a berial vite nalo nam̃a naio mialio beamu ea vio mave, a vite nalo nam̃a naio mijogio. Naio berial vite nalo na, mia tomu nalo maka asidom kanano iliano, maka amoneaio.
JOH 3:33 Telabo na maka amoneaio, mia kito nam̃a kito romoneaio, kanado moneano naio jekar batitigio ka Atua, kanano iliano nalo be riano, a amemedu batitigio bo ga.
JOH 3:34 Kanano iliano nene nalo, naio miila Naverikariano naio binimei berial ban kito ruei, ana romijikia ka iliano nalo nei abe riano. Nina bior bogo na Naverikariano binimei, kito romial ka napano naio mil ea moroano na Niununo na Atua kanano, bior Atua jian kanano Niununo banio, maka ve torogio ga, mia momonio garuei.
JOH 3:35 Karam̃ano Atua nene naio tinien jii kenerinio nene nei naio toru laka, naruei naio bar vite nonovio jua jum̃ano.
JOH 3:36 “Tibe na, kito napano romonea naio, robokar ruei meuliano nei napano naio to tobo to. Mia toro napano maka m̃a rimonmonea naio, mia naio rijikia re rial meuliano nei bogo tai, mia Atua kanano tiniemimiano ve toru toa naio.”
JOH 4:1 Ana ka bogo na, iliano jo jeliviv, ber Yesu jom̃a buru naiagagoano telabo abinimei ajakisor naio, a jom̃a baruei ealo. A maka ve Yesu nam̃a naio baruei ealo, mia kumemi kanano naiagagoano nalo ga numitum̃a numilaio, mia tomu nalo amialio ka nalo napano Yesu kanano aju abinimei miroano, jovulu Jone Baruei kanano. Naruei nalo ajum̃a aberver iliano nei ba janea vio jibe na, ba bokar Varisis nalo, mia bogo na Yesu mijogio ka nalo bunu amijikia vite nei a mila nalo amijog bova biorio,
JOH 4:3 naio mial bo ka tuvan vio Yutea, naio rivatove bereio Kalele. Naruei kumemi numituvan vio nei, nubano jibe na,
JOH 4:4 mia Atua jiloglog ka kenememi m̃arabo monoka va sel ea tanobuku na Sameria.
JOH 4:5 Naruei kumemi numitu numiel nubano, numalmaluvo ea komeli na vio na tai, siano Saika. Vaataro ka komeli nene, be bulukuei tai jo, napano jikar nuanua ruei, jo binimei jibe na, abio ka Yakovo m̃ano uei. Borotano nene, beamu be tormoruo Yakovo kanano, ana iorou kanio ana mijamo ka ban kenerinio Yoseve. Naruei kumemi liko Yesu numiel nubinimei nuboru ea uei nene, be bogo niogoravo memedu, naruei Yesu mijog tinien maro laka bior burutili ieliano ea burutinianio na jikili, ana naio ba jotano mave ea tagvoru na bulukuei nene.
JOH 4:7 Numitua uei nene bano-o, bisi ana na kumemi naiagagoano nalo numitumolu nubano ea komeli ka nuvulu simemi sinaniano, mia Yesu naio ga takurano jo mijilimebi. Mo iorou kanio tira re Sameria tai naio miel binimei ka jidom riviov uei. Naio binimei ana Yesu bika denio berenio “?Aiou, jau komijikia koviov m̃aku uei tai?”
JOH 4:9 Ana tira nene, naio maka rijikia Yesu, mia bitilubar ka naio be toro Ju tai, mia miilo toru laka ka napano naio mil batitigio bo ban naio jibe na, bior ka bogo na, kulo Ju nalo bija kulo Sameria nalo abe bilbilu va maka avior kalo. Ana tira nei naio bika den Yesu, naio berinavo “?Jum̃abe na jau, kobe toro Ju, komil ban kiniou tira na Sameria, na jau kobika uei den kiniou?”
JOH 4:10 Naruei ana Yesu naio berdop̃e berinavo “!Tira, verver jau komijikia ga ijaiano na bo napano Atua naio jidom sian vanso! !Verver jau komijikia ga ka kiniou nebe kei nei ga nam̃a nebika uei denso! Ver tibe na, vede maka ve kiniou na nebika uei denso, ana mia jau kovika uei den kiniou. Mia bogo na ver jau kovika uei den kiniou, nemijikia nesian uei na be uei na ridu meuliano vanso.”
JOH 4:11 Naruei tira nei naio mijog vite na, naio bika den Yesu, berinavo “Toro na toru, jau maka ve kanamo titai ka jau koviov ka uei nene, mia bulukuei nene naio bululuo batove laka. Tibe na, uei na meuliano nam̃a jau kojom̃a koberenio na, mia jau koviovio tum̃abe, p̃eli na mia jau koviovio ea vio be?
JOH 4:12 Mia jau kojom̃a kober uei na dolu na, mia ninei jo nei naio be uei na bo tai. Korobido tormoruo nanua na Yakovo, naio kanano uei nei. Naio munu bano-o, naliko kenerinio nalo, bija kanalo temeul nalo, naruei amila lilian binimei binimei bokar banei. ?Jau kober jau kobo loa tormoruo Yakovo ana komijikia kala uei tai na bo loa ninei?”
JOH 4:13 Ana na Yesu berdop̃e banio berinavo “Nao, uei nei naio bo, ana mia bogo na kito romunuio, mia maka vesiou ana midoujer kito bereio.
JOH 4:14 Mia toro na naio rimunu uei nei napano nemijikia nesianio vanio, karina mia naio maka rijikia midouser naio bereio. Mia uei napano naio rimunuio, mia rimei tibe ka burupati uei bereio joomo ea kiano iviso, ve uei na meuliano napano maka ve togio eaio, naio jom̃a mieraro den naio dam̃ariga, maka rijikia tabo bogo tai.”
JOH 4:15 Mia tira nei, naio maka rijikia vatitig vo Yesu kanano iliano, naruei naio berinavo “Toro na toru, ver tibe na, bo ka jau kodu uei na ve telisu van kiniou ka nomunuio, mia nomidou re bunu, ka mia nemei re bunu noviov uei tulaka ea vio nei.”
JOH 4:16 Ana Yesu jidom ka tira nei naio jikia ka naio be kei, a berkanio, berinavo “Kiniou never titai ka jau beamu vo. Jau kavan bereio, jau kovio koamo kovuru naio rimei bere ea vio nei.”
JOH 4:17 Ana tira nei berinavo “Ee, maka ve koaku tai!” Ana Yesu berkanio, berinavo “Rian ga na, jau kober memedu na, ka jau maka ve koamo tai.
JOH 4:18 Nina bior ka tomu nalo na kojoru kalo beamu ruei napano abiniu abokar jimo, mia vonganei kojo bija toro tai bereio napano maka kosoro kanio. Jibe na na kanamo iliano be riano na, jau maka ve koamo tai.”
JOH 4:19 Mia tira nei naio miilo toru laka ka napano Yesu mijikia batitig kiano meuliano jibe na, ana berinavo “Rian ga na, toro na toru. Vonganei kiniou nemijikia naruei, ka jau kobe naverialiano tai.
JOH 4:20 Naio bo laka kiana, mia p̃eli jau kobe kulo Ju nalo kanalo naverialiano ga na. Mia kumemi kulo Sameria, kenememi vio lu naio napano be burum̃ara burusuku yako Kerasim, napano korobimemi nalo amila lotuano na Atua eaio nua ruei, binimei bokar banei. Mia kamiu kulo Ju nalo, kumitu kumisikili ka kenemiu burum̃ara komeli lu na Yerusalemo, naio ga takurano be vio na memedu ka m̃a amila lotuano ban Atua. Tibe na, kei naio memedu, kamiu p̃eli na kumemi? Kover vonio!”
JOH 4:21 Mia Yesu jaaro ka rivuriri tira nei kanano jidomiano ea tivelinio na bajago na memedu na amila lotuano ban Atua, ana berkanio, berinavo “Nao kuvivinieku, jau kober be riano na, kiado lotuano kito juo naio maka rive verare. Mia nina maka rivior vio na amila lotuano ave juo, mia bior vite napano jibe na: Kamiu na ea vio na, kamiu kumitum̃a kumila lotuano, mia kamiu maka kuvijikia batitigio naio napano kamiu kumilotu banio, mia kumemi kulo Ju, Atua naio bijauialar kumemi ka toro na rilarur tomu nalo naio miyotuba ea kenememi torogio. Naruei kumemi numijikia batitig kenememi Atua nei napano m̃a kumemi numitum̃a numilotu kanio. “Mia kiniou nemijikia never kaso ka mia tibe na re tulaka. Mia jau monoka komonea kiniou, napano neber kaso vonganei ka bogo tai jo binimei napano mia lotuano vou tai tikario, napano ve kanado roviniu. Toro Ju p̃eli na toro Sameria, mia residomial re bunu ka vio na memedu ka rolotu ka Atua naio be suku na, p̃eli na komeli na Yerusalemo, p̃eli na vio be bereio.
JOH 4:23 Mia burum̃ara vite na mia residom, naio jibe nei, ber bogo na kolotu ka Atua, mia monoka kotuvan Niununo Lu rim̃au ea niunumo, a monoka kolotu ka naio ve riano, memedu ka kiano ilirianiano. “Nina napano Atua Teta naio jidomio, ana vonganei ruei a ea bogo na jo binimei, mia naio rivitikar kanano taara na lotuano riano, napano amijikia alotu ka naio ea bajago novo na jibe na.
JOH 4:24 Atua naio be niununo, naruei toro na jidom rilotu kanio monoka rilotu ka naio ea kanano iviso, a vite nei naio monoka rive riano ea kanano meuliano.”
JOH 4:25 Ana tira nei, naio jo monea ka mia Naverikariano naio rimei, naio napano iliano na vio Kris naio ber Kristo, naruei naio ber ka Yesu, berinavo “Vite nalo nei na jau kojom̃a koberenio, vede abe riano, mia kiniou nomonea ka Naverikariano napano mia naio rimei, mia naio naruei riverial vite nonovio ve riano vatitigio van kumemi.”
JOH 4:26 Naruei Yesu ber iliano telisu nei ga banio, berinavo “Naio nam̃a jau kojom̃a koberenio, kiniou nene nei ga nei, nam̃a nojo nojukunu bijaso vonganei.”
JOH 4:27 Naio berial naio ban tira nei jibe na bisi, ana naiagagoano nalo abinimei aboru ea vio nene bereio. Naruei amialio ka napano Yesu jom̃a jukunu bija tira nei, jibe ka naljuo nei ga, naruei nalo amiilo kanio. Nalo amiilo, mia nalo aju buru ga, maka ve nalo tai kalo napano naio rivika den tira nei ka naio jidom venia, p̃eli na rivika den Yesu river naljuo ajum̃a ajukunu ka venia.
JOH 4:28 Mo tira nei jumolu, mebi ka m̃ano bauei jo bo, naruei naio miel ban bere vonuo ea komeli. Ana bogo napano boru vonuo, naio ba berialio ka tomu nalo, berinavo
JOH 4:29 “Valauo Ju tai naio jo rove yako ea bulukuei, naio jukunu ban kiniou, naio mijikia vite nonovio ea kanaku meuliano. Kiniou namial naio jibe ka Naverikariano garuei memedu, p̃eli na? Kamiu kumei, ravatove reialio.”
JOH 4:30 Naruei nalo ajumolu ajaluvo abatove ka ajidom aial Yesu nene.
JOH 4:31 Mia bogo na aju amiel abinimei maka ayotuba vo, ana naiagagoano nalo abar bulag salo sinaniano napano aba abuluio, aberii ka Yesu aberinavo “Naverloglogiano, komei kesinan.”
JOH 4:32 Mia Yesu naio maka rimei, mia abio bereio bano-o, karina Yesu berinavo “Kamiu kuvisinan, kiniou be saku sinaniano dolu tai naio jo napano kamiu maka kuvijikiaio.”
JOH 4:33 Naiagagoano nalo amijogio nina, naruei nalo amil banlo, aberinavo “?Ana kenia naio bar sano sinaniano nene binimei? !Kito maka reial toro tai leleio!”
JOH 4:34 Ana na Yesu ber kalo, berinavo “Makanio, sinaniano na kiniou nojo neberenio na naio dolu kiana. Saku sinaniano, naio be im̃auano na jogkariano na tinieiiano na naio nam̃a miila kiniou nebinimei yetano nei, a kiniou monoka noim̃au ka nonovio riviniu rivanvano-o na ribisi.
JOH 4:35 Bogo nam̃a kito romebija tiniavio, rojum̃a rober bogo nonovio jibe nei, roberinavo: Siberio veri ju, ka sinaniano rimeruo. Mia vonganei ea Atua kanano tiniavio, tomu nalo aju ruei ka ajog Atua kiano iliano, jibe sinaniano nalo na amermeruo ruei. Kiniou nojidom ka kamiu kuvila vonio ka kuvetavo ea miremiu, ka kuvisirarago vatitig tanea vio, ana mia kuvijikia kuvial sinaniano nalo ameruo bo ruei, vonganei be bogo na ava avario rimei.
JOH 4:36 Mia nalo nam̃a ava avario, mia nalo asaaro ve toru laka bior kanalo vuliano telisu naio jo ruei, ana bogo na avar sinaniano nene rimei vonuo na meuliano na maka ve togio nene, toro na toru na mebija, mia naio bunu saaro ve toru. Naio jibe ka ga iliano napano ber jibe nei, berinavo ‘Toro tai naio ba mebijo, mia toro dolu naio ba bario, mia burum̃ara saariano be tena nalo nonovio.’
JOH 4:38 Jibe na, kiniou nojom̃a nemiila kamiu ka kuva kuvuru tomu nalo napano kulo dolu nalo amila burum̃ara im̃auano kalo ruei, mia vonganei kam nonovio kuvije buron kamiu ea jogvuiano na im̃auano nene.”
JOH 4:39 Mia bogo napano kulo Sameria napano ea komeli nei amijog tira nei naio berii jum̃abe ka na Yesu mijikia vite nonovio ea kanano meuliano, nalo amiilo toru, naruei mila nalo telabo amonea Yesu.
JOH 4:40 Ana bogo na abinimei ka aial naio, aju ajukunu bija naio banbano-o, karina abika naio ka nuva vonuo, nuvitu kija vijalo. Naruei nuba numitu bijalo ba bokar bogoti juo,
JOH 4:41 mia nalo telabo lie amonea naio bior kanano iliano novo nalo.
JOH 4:42 Aber ka bunu tira nei, aberinavo “Beamu, kumemi numijog venia ga napano jau kober ka kumemi, maka nuvijikia, mia vonganei, kumemi numijog kanano iliano memedu ga, kumemi numijikia ka be riano ga, kanado toro na toru nei, naio be Ioruriano na yetemeriba.”
JOH 4:43 Mia bogoti juo nei barlaka bisi ana kumemi liko Yesu numituvan vio nei nubano, numidu bere kenememi m̃arabo ka nuvatove ea tanobuku na Kalele.
JOH 4:44 Yesu jidom rivan bereio ea kiano vio Kalele, bior naio mial tomu dolu na vio dolu aberverii naio, ajirag naio laka janea vio. Nina jakii kiano iliano tai, napano berinavo “Tomu dolu nalo tiniel jii ka aiagago vatitig ka naverialiano, mia tomu na kanano vio nalo makanio, ajidom naio be iakurano.”
JOH 4:45 Mia bogo na nubinimei numiyotuba ea vio Kalele, tomu nalo na kiano vio ajaaro toru ka ala vorvoruano ka naio. Naina bior beamu, nalo telabo bunu aju ajua jokoluolu na Yerusalemo, ana amial ruei vijuku m̃eteiano na Yesu mila ea Atua Kunuano Lu ka bogo na, ana amialio ka naina bo laka.
JOH 4:46 Naruei naio jom̃a miel ea vio nalo na Kalele binimei bokar bereio komeli na Kenan, nanua naio bilig uei binimei be m̃arjum̃elm̃elu. Ana ka bogo na, tubo na toru tai na komeli dolu na Kapeneam naio joa vio na, mia naio jom̃a mijog bova bior kenerinio tete sum̃ano naio mie toru laka vaataro ka ga rim̃aro.
JOH 4:47 Mia bogo na naio mijog ajum̃a aberii ka Yesu naio juvan vio Yutea binimei Kalele bereio ruei, naio ba mileal naio. Naruei naio mial Yesu, jegi banio ka riva vonuo rieliel ka kenerinio nene.
JOH 4:48 Ana na Yesu ber kanio berinavo “Vede jau bunu jau kojibe ka tomu dolu nalo. Bogo nonovio ga ajidom vremesiano ninio nalo, mia ver noim̃au kanio, mia amonea kiniou kanio. Mia bogo napano maka bunu atu aialio, nalo maka asaaro ka amonmonea kiniou.”
JOH 4:49 Mia tubo na toru nei naio jikili kanio, berinavo “Toro na toru, neber bo kaso jau komei sop̃eli, ver p̃eli mia keneriku nene naio rivakovio.”
JOH 4:50 Mia Yesu naio jidom ka tubo nei monea kanano iliano ga, naio berinavo “Makanio, mia jau ga ve takurano kavano. Kiniou neber kaso neberinavo kenerimo nene mia naio rim̃aro re na, naio rimeul rivu ga.” Naruei toro nei monea iliano napano Yesu berkanio, ana na juvan vio ka riva vonuo bereio.
JOH 4:51 Ana na viobijeni kanio, bogo na naio jom̃a miel ban bere ka rivano, naio bitavo bija kanano tomu nalo, napano ajum̃a amiel bior naio. Mia nalo aberial banio, aberinavo “Kenerimo naio mijog bo ruei jo.”
JOH 4:52 Naruei naio bika denlo, berinavo “Kamiu kuvisidomii vatitigio: bogo na vabe naruei na kamiu kumialio jikar ka binimei bo bereio?” Nalo aberdop̃e aberinavo “Kumemi numialio jibe ka niabene binimei menini bo ea niogoravo naniovo, jibe ka m̃erenio takurano.”
JOH 4:53 Mia tete nei karam̃ano naio mijogio jibe na, naio mijikia ka nina naruei bogo memedu ga ka napano Yesu ber kanio berinavo “Kenerimo naio rim̃aro re, naio rimeul rivu ga to.” Naruei vite na mila karam̃ano, bija nalo nonovio ea kanano m̃aratavo, amonmonea Yesu.
JOH 4:54 Naruei ielieliano na tete nei, Yesu mila iorou ka napano naio jaluvo den vio Yutea binimei, a naio naruei be kiano vremesiano valuo nene ea tanobuku na vio Kalele.
JOH 5:1 Ana Yesu naio jo Kalele kirisiou kija banbano-o na bokar bogo na kulo Ju nalo kanalo jokoluolu dolu mave yako Yerusalemo. Naruei Yesu nalo aban bere mave ea jokoluolu nene.
JOH 5:2 Ajua vio Yerusalemo jibe na na ea legiano tai ana Yesu miel ba batove vaataro ka burum̃ara m̃aratavo na komeli nei napano abio ka M̃aratavo na Nunu, ana nalo aban ea vio tai napano be uei na m̃a amijeljelioa naio joaio, napano ea kialo iliano, abio ka Betsata. Naruei jeliviv ea bauei nei, be m̃arsup̃iki jimo nene ju, napano amim̃au kalo ea puruveru.
JOH 5:3 Mo bogo nonovio ga be tomu na mieiano nalo, be merebono nalo, be jaba nalo, a be nalo na niabele m̃arm̃aro, nalo na jibe na nalo miroano laka aju abinimei amonea m̃arsup̃iki nalo nei. Abinimei jibe na, bior uei nei, naio miyukulkulu be ve vaarakurano ga,
JOH 5:4 jibe ka Atua kanano nailiano naio binimei milaio, mo ver nalo amial jibe na, namieiano kei napano naio ba bokar uei nei jukamu, mia mieiano vaio nam̃a joa naio mia ribisi denio vaarakurano ga.
JOH 5:5 Jibe na, tomu na mieiano nalo aju abinimei ea vio nei, mia ka bogo nene nalo nene tai be toro tai napano niabene nalo biniu m̃arm̃aro bokar yuka duelimo va rolu ba arolu [38] ruei.
JOH 5:6 Ana bogo na Yesu binimei, naio mial toro nene, mia mijikia toro nei naio jo mon bior mieiano nei bogo jiou ruei jibe na, ana naio bika denio berinavo “?Koig liki, jau kojidom ka niabemo rimei rivu, ina?”
JOH 5:7 Ana na toro na mieiano naio berdop̃e berinavo “Toro na toru, kiniou nojidom toru kiana, mia bogo nonovio, ver uei naio miyukulkulu, mia maka toro tai ka rudu kiniou navatove tii kiniou notoa ea. Ana bogo na kiniou takurano nemiel vonvon nabatove mia toro dolu naio binimei batove bokar uei nene jukamu ka kiniou.”
JOH 5:8 Ana Yesu mil memedu ban toro nei naio berinavo “Mo, jau kotumolu, jau kavar m̃amo yebe, koiel kavano.”
JOH 5:9 Naruei ea Yesu kanano iliano nei, toro nei niabene nalo na abova abinimei abo nonovio, ana naio jumolu bar m̃ano yebe, jumolu miel ba vonuo. Ana ka legiano nei na vite nei miyotuba eaio, naio be Legiano Lu tai na kulo Ju nalo kanalo,
JOH 5:10 mila na ka bogo na tomu na tortoru na kulo Ju nalo amial ka kema nei naio jo miel bija m̃ano yebe, ana amil banio biorio, aberbureio, aberinavo “!Ai, abe banei be Legiano Lu kiana! Jau kojo komidu m̃amo yebe jibe na, jau komila korov kiado tuboiano kulo kito Ju nalo.”
JOH 5:11 Mia naio berdop̃e banlo, naio berinavo “Kiniou niabeku nalo burukokorovio, mia toro nene binimei mieliel ka kiniou, berii ka kiniou berinavo nodu m̃aku jogu navano.”
JOH 5:12 Mia nalo ajidom ajikia vatitig lie vo, nalo abika denio, aberinavo “?Ana kenia na? ?Naio be kenia napano naio ber kaso ka jau kala tibe na?”
JOH 5:13 Mia kema nei naio maka rijikia riverenio, bior napano naio maka rijikia ka be Yesu napano mieliel ka naio, mia maka bunu rijikia rial naio bior napano be burum̃ara tiniobi na jo, mia Yesu jo miel bure tomu nalo nene, naio jaluvo den vio nei ruei.
JOH 5:14 Ana iorou kanio maka vesiou, ana Yesu mial toro nene bereio joomo ea Yimo Lu, ana berkanio berinavo “Vonganei na jau kobinimei kobo ruei, bo ka jau kovitikar vatitigso. Jau kotuvan nonovio kanamo kariano nalo, ver maka vede titai naio riva rivova lie kaso tovulu napano beamu.”
JOH 5:15 Ana ka bogo na kema nei naio mijikia ka be Yesu nei napano mieliel ka naio, naruei naio ba berialio ka tomu na tortoru na kulo Ju nalo kialo.
JOH 5:16 Mia bogo na nalo amijogio ka be Yesu napano naio mieliel ka toro nei, tiniel jer naio, nalo maka asaaro ka na naio mila tenei ka Legiano Lu, naruei nalo ajikar ka amila baravo abilvili ea naio.
JOH 5:17 Ana na Yesu berdop̃elo, naio berinavo “Karam̃aku, naio jom̃a mim̃auka kanano im̃auano nalo na bo ea bogo ninio, ba bokar bunu Legiano Lu nalo, mia kiniou bunu monoka noto nala tibe na ga napano naio milaio.”
JOH 5:18 Jibe na ga ka bogo na, navurim̃ara-boiano na kulo Ju nalo ajum̃a abitii Yesu ruei aber naio be toro nam̃a mila bulag tolu na Legiano Lu. Mia vonganei mave ka naio, nalo amijog ka napano naio jom̃a bio Atua be karam̃ano memedu, nalo amialio jibe ka naio jom̃a mila naio be verare bija Atua. Naruei vite nalo nei mila ana abinimei abitunu lie vo, ajidom toru laka ka auebinio rim̃aro.
JOH 5:19 Ana Yesu ber kalo, naio berinavo “Kiniou neber be riano ka kamiu, ka kiniou Atua kenerinio, kiniou maka nejikia nela titai kiniou ga ve takurano, mia venia ga napano nemial Karam̃aku milaio, naina naruei kiniou bunu nemilaio jibe na.
JOH 5:20 Atua teta naio tinien jii m̃elea kiniou kenerinio, ana jom̃a jiloglog kiniou ka vite nonovio napano naio jidom ka mia nalaio. Abe im̃auano dolu nalo ju kiano vo napano nalo tortoru lie vo, napano mia karam̃aku sian van kiniou ka mia noim̃auka iorou, a bogo napano mia noim̃aukanio, mia kamiu kuviilo ve toru kanio.
JOH 5:21 A bunu, tibe ka napano Teta naio bitiri bulag bereio nalo napano m̃a am̃arm̃aro naio jian bere kialo meuliano banlo, mia kiniou Kenerinio bunu nemijikia nesian meuliano van toro kei nam̃a nojidom nesian vanio.
JOH 5:22 Mia Teta, maka ve naio ga nam̃a mila tibureiano, mia im̃auano na bunu naio midu joa jum̃aku,
JOH 5:23 ka rila na tomu nonovio monoka avatove ka kiniou, tibe ka nam̃a abatove ka Karam̃aku. Tibe na, toro nam̃a naio maka to rivatove rivu ka kiniou Kenerinio, jibe ka naio maka to rivatove rivu ka toro na toru napano miila kiniou nabatove.”
JOH 5:24 Ana Yesu mil lie vo, naio berinavo “Kamiu kuviagago vatitigio. Toro kei nam̃a monmonea kanaku iliano, a naio monea nana naio miila kiniou nabatove, ea bogo nei memedu mia naio rivokar meuliano. Naio maka totano yetano ka tibureiano tai leleio, bior naio jumolu den bajago na m̃ariano, ba bokar kiano meuliano vou ruei.
JOH 5:25 “A kiniou neber ilirianiano nei bunu ban kamiu, ka bogo na jo binimei vonganei napano nalo nam̃a Atua mial ka am̃arm̃aro den bajago va, mia nalo ajog jooku kiniou Atua kenerinio, mia nalo na ajogkario, mia avokar meuliano.
JOH 5:26 Kiaku Teta, meuliano na be riano joa naio ga, naruei naio mijamo ka meuliano nei na joa kiniou,
JOH 5:27 mia naio mijamo ka bunu ka kiniou Kulorinio Kenerinio, mia nala im̃auano nalo na tibureiano.
JOH 5:28 “Vite nalo nei, nalo maka ve tena kamiu kuviilo kalo, mia naio monoka tibe ga na ea bogo napano kiniou nojo noberenio ka naio jo binimei. Mia nalo nam̃a amonmelio ea borotano mia ajog jooku naio rivio,
JOH 5:29 naruei mia ana kialo tumoliano bereio ka aje meuliano, ana tomu nalo na aim̃au bova, kialo tumoliano ka avokar tibureano.”
JOH 5:30 Ana Yesu mil lie vo, naio mil memedu ban tomu na tortoru na kulo Ju nalo napano maka asidom amonea naio, naio berii vite nalo na m̃a ajiloglog naio ka naio be riano. Naio berenio berinavo “Ea tivelinio na tibureiano, napano mia kiniou nala, mia kiniou nala re tibe ka kanaku jidomiano kiniou ve takurano ga, mia nala ea ga venia napano nomijog Teta berenio. Tibe na, mia kanaku tibureano naio memedu ga, bior napano maka nala ka kanaku jidomiano, mia nemila ea Teta kiano na naio juvan kiniou nebinimei.
JOH 5:31 Naruei nemil jibe na ban kamiu, nemijikia ka nojo neberii kiniou bereio, ana vede nalo tai amial ka maka rimemedu ka neil tibe na, nalo maka ajikia amonea iliano na jibe na.
JOH 5:32 Mia naio bo ga na, naio maka ve titenia, bior napano be vite dolu nalo na m̃a amija kanaku iliano amijikia atumolu atu. “Na be moti nene, naio be toro tai napano naio berial vite ninio ban kiniou napano abe riano laka.
JOH 5:33 Ninei be Jone Baruei nei, napano beamu, kamiu kumituvan iliano ba banio, kamiu kubika jum̃abe ka kiniou eaio, naruei naio berial vite nonovio be riano bo ban kamiu.
JOH 5:34 Mia maka rivu ka kamiu ve tiniemiu ka iliano na toro tai jibe na Jone mila kanaku iliano tumolu tibe na. Mia kiniou nejidom kamiu kuvisidomii vatitig rivu bereio ea venia napano Jone berial ban kamiu ea tivelinio na kiniou, bior nojo namila vio ka najai kamiu ka kuvijikia kuvokar ioruriano.
JOH 5:35 Kiniou neber Jone nene ka kamiu, bior naio javukia yulu tai napano mereralii batitig kenemiu jidomiano, napano kumisaaro telisu ka naio.
JOH 5:36 “Mia vite dolu na m̃a miija kanaku iliano, be toru lie ea vite nalo na m̃a Jone beriio. Vite nei naio be kijokijo nalo napano Teta naio mijamo ka ban kiniou ka neim̃aukanio ea miremiu. Im̃auano nalo na tomormoruo nei na m̃a kiniou nojo namilaiio amiija kanaku iliano nei toru ka be riano ka napano Teta nei naruei naio miila kiniou nebinimei.
JOH 5:37 “Mia mave ka vite juo nei, dolu nene naio jo, naina be Karam̃aku napano miila kiniou nebinimei. Kamiu maka lele kuvijog joono a maka lele kuvial mirano, mia naio bunu, kanano iliano nalo amiija toru ka kanaku iliano, na aberial kiniou.
JOH 5:38 Mia kamiu kumila napano maka ve jeleigio ka iliano nei ea kenemiu meuliano, bior napano kamiu maka kuvisidom kumonea naio napano miila kiniou nebinimei.
JOH 5:39 Bogo telabo kamiu kumitum̃a kubitii vatitig Vivitauiano Lu nalo, bior kumitum̃a be tiniemiu ka mia kuvileal kenemiu meuliano napano maka ve jukuti nene, ana Vivitauiano Lu nalo nei naruei napano aberial kiniou.
JOH 5:40 Aber ka kiniou ga nebe burupati na meuliano nene, mia kamiu maka kuvisidom kumei kuvokar meuliano nene ea kiniou.”
JOH 5:41 Naruei Yesu mial kialo veribinio, mil jibe nei berinavo “Vite nalo na m̃a kiniou nojo nemila, maka noto nala rivior ka nejidom kamiu kuvitirilar siaku, makanio. Kiniou maka nesidomial naina,
JOH 5:42 mia be vite tai na bova, kiniou nemijikia batitig kamiu ruei, naruei nemijikia ka kamiu maka tiniemiu tii Atua leleio.
JOH 5:43 Bogo na m̃a kiniou nomiyotuba ka kamiu, nebinimei ea karam̃aku siano, mia kamiu maka kuvisaaro ka kiniou. Mia ver bogo tai toro dolu tai rimei, napano rimei ea naio ga ve takurano siano, a vede mia kamiu kuvisaaro kanio ga.
JOH 5:44 Kiniou tinieku miia kamiu toru laka, mia namial jibe kiride ka kuvijikia kuvokar moneano riano bogo tai. Naina bior napano dam̃ariga, kamiu kumitu tiniemiu jii ka kuvidular siemiu rivavin. Kamiu maka kuvitu kuvisidom ka kuvijebukua kenemiu bajago leleio, ka kuvila vite nalo napano iorou mia Atua naio mijikia rivitiri bulag kamiu riviorio.
JOH 5:45 “Kiniou neber iliano nalo nei ban kamiu, p̃eli kumitu kumisidom kuberinavo ‘Uerei, kema na tinien jer kito, p̃eli ea bogo na tibureiano mia naio naruei napano mia riverial kanado torokoriano nalo van Teta Atua ea vio mave.’ “Mia makanio, ve re kiniou na mia nala tibe na, mia ve dolu tai na mia naio rilaio. Dolu nene, nina be tormoruo Mosis, napano m̃a kumitu kubarkar tiniemiu ea naio ka mia naio river iliano na mia rijai kamiu, mia kiniou neber vatitig ban kamiu, naio naruei napano mia river bulag vovaiano nalo na kenemiu na.
JOH 5:46 Kamiu kumitum̃a kuberinavo kumitu kumonea jikili tormoruo Mosis kanano iliano nalo nei, mia ver tibe na bior vaio ana kamiu maka kumonea kiniou bunu, bior napano tormoruo na dam̃ariga naio bivitauii kiniou ga.
JOH 5:47 Mia vonganei kiniou nemial jibe ka napano kamiu maka kumonea vivitauiano na kanano, mia ka tenei, kamiu kuvijikia dulu re ka kumonea kanaku iliano nalo bunu.”
JOH 6:1 Iorou ka naina, kumemi liko Yesu numidu uako numituvan kanano tanobuku bereio, nubar kor burum̃ara ueiyabo nei Kalele, napano tealo abio ka ueiyabo na Taiperias.
JOH 6:2 Mia bogo na tomu nalo amial ka numitu nubano jibe na ea tivelinio, ajumolu ajakisor kumemi. Ajidom avan vija Yesu bior nalo aju amial burutomoluo na ielieliano na naio jom̃a mila ea nalo napano m̃a abokar mieiano nalo.
JOH 6:3 Ana nubano nubokar tivelinio nene, numiel nubavin ea suku tai napano joa vio na, numiel nubanbano-o na numebi.
JOH 6:4 Ana Yesu naio jotano jo jirarag ba laka, naio mial burum̃ara tiniobi napano nalo aju amiel abinimei ka naio. Naio bitilubar ka nalo telabo abe tomu na vio kinkin napano ajum̃a amiel vei ka ava Yerusalemo. Nalo aju abano bior burum̃ara jokoluolu na kulo Ju nalo kanalo, Jokoluolu na Nasidomkariano na Ioruriano, napano mia ala rivesiou re. Naruei bogo na Yesu naio mial nalo ka aju abinimei, naio bika vite tai den Vilip, naio berinavo “Vilip, nalo na aju jijerlo toru laka liki kiana. ?Mia kito rovulu salo joko tum̃abe?”
JOH 6:6 Vikadeniano nei Yesu kanano, naio be tena rilavon kija Vilip ga, bior Yesu naio mijikia ruei vite napano mia naio rilaio van tomu nalo nei.
JOH 6:7 Ana Vilip naio berdop̃e, berenio ga berinavo “Ver kiniou noim̃au yuka ve takurano, mia maka nejikia neleal puruveru rivare ka novulu ka sinaniano na nalo aviniu ajevio ve tertelisu!”
JOH 6:8 Naruei naiagagoano dolu nene, be Adru, napano be Saimon Pitere kuruano napano teliki, naio berial ban Yesu, berinavo
JOH 6:9 “Tubo, kiniou nemileal m̃eaku tai jo nei, naio bar joko sesa jimo [5] bija niado momaio juo [2]. Ninei naio telisu ga mia tomu nalo miroano laka.”
JOH 6:10 Mia Yesu naio berinavo “Makanio, naio bo ga na. Kuver ka tiniobi nalo ka atutano yetano beamu vo.” Naruei nuber kanilo, ka nalo atutano ea m̃ajumunei, ana naruei numial tomu nalo nene bokar menu jumo [5,000] titai jibe na.
JOH 6:11 Naruei Yesu naio bar joko jimo nene ana bolkouo, ber siva biorio. Avona bisi ana jikar ka m̃a burekokorovio a jijian bulag ban nalo napano ajum̃a ajutano, naio mila jibe na ga bunu bija niado, jijianio ban nalo nonovio jibe ka na nalo tiniel jii ka asenio.
JOH 6:12 Naruei nalo ajenio banbano-o na mabolo jouo, ana Yesu ber ka kumemi, naio berinavo “Sinaniano torogio na be va ju, kito ralaluvu re, ana bo ka kuvar bijiio riva vio takurano.”
JOH 6:13 Naruei kumemi nubano nubar niati joko jimo nei binimei, napano nalo ajen digio ju, naruei numisonlo ban ea basaro banbano bokar basaro duelimo ba juo [12] garuei.
JOH 6:14 Mo bogo na tomu nalo abitilubar burum̃ara burutomoluo napano Yesu milaio, ajum̃a aber jibe nei kalo aberinavo “Kiado burum̃ara naverialiano na m̃a korobido nalo aberkario ka mia naio rimei riyotuba ea yetemeriba nei, tete na naruei naio be naverialiano nene memedu kiana.”
JOH 6:15 Naruei nalo aju ajidomii ka ava avokar Yesu, ajidom atutuaio ka avitirilar naio rimei rive kanalo parinio Tubo, mia bogo napano naio mijog lubar ea naio venia napano ajidomii ka alaio, naio jaluvo denlo, miel naio takurano ga ba bavin lie vo ea burusuku nalo nei.
JOH 6:16 Naruei kumemi naiagagoano nalo numial ka napano m̃erenio jo batove, numial bo ka nuvan bereio, naruei nubatove ea tivelinio na ueiyabo.
JOH 6:17 Nubatove mia maka bunu nuvial Yesu riyotuba bereio ka kumemi, mia bior napano vio bobogio ruei, numidu kenememi uako, numituvan vio bereio nubeluo ka nuvavin ea ueiyabo ka nuvarkor bereio nuvan ea vio Kapeneam.
JOH 6:18 Naruei numitu nubano jibe na, kiri jegi tai binimei jo miuvuvu kija, naio mila na tei jikar ka bieveluo laka.
JOH 6:19 Mia bogo napano nubeluo koalabo kija ruei, jibe sudu jimo, numiilo ka napano Yesu naio jom̃a miel mave ea niunuku uei jo binimei vaataro. Naruei numerou kanio toru laka,
JOH 6:20 mia naio mil ban kumemi berinavo “!Oi, kamiu kumerou re! Kiniou ga nei.”
JOH 6:21 Ana numijog bo bereio, mia nuburu naio bavin ea uako, mia vaarakurano numial ka kenememi uako naio jologlog vio na numisidom ka nuvan ea ruei.
JOH 6:22 Naruei ea kavijo, nalo na laka yako ea ueiyabo nei tivelinio, napano Yesu baganlo vonga, nalo aju ajidom toru ka Yesu naio jo jum̃abe. Nalo aju ajidom jibe na bior bogo napano kumemi liko Yesu nubinimei ealo, numidu uako takurano ga, mia nalo amial ka napano kumemi numidu uako nene nubano bere ruei, mia Yesu naio maka rivan vija kumemi, naio takurano jobo. Mia vonganei nalo maka bunu ajikia aleal naio ealo,
JOH 6:23 mo nalo abano abar uako dolu nalo tai, nalo abarkor ea vio Kapeneam ka asirav kumemi. Uako dolu nalo nei, maka ave kanalo, mia be kulo Taiperias nalo kanalo napano nalo abinimei aborvoru ealo, abano vauro ea vio na ga m̃a Yesu bolkouo ka joko eaio, naio mila binimei bare ka nalo asenio.
JOH 6:25 Naruei tomu nalo nei abinimei aboru Kapeneam, ana abavauro, naruei nalo ajiravo Yesu. Mia bogo na amilealio, abika denio, aberinavo “?Naverloglogiano, jau kobinimei bere koboru ea vio nei ka bogo na vabe?”
JOH 6:26 Mia Yesu naio mijikia venia napano ajidom aial naio bereio riviorio, ana naio berdop̃e banlo, berinavo “Ver kamiu kubinimei kumisirav kavulu kiniou bereio bior kumial kanaku burutomoluo nalo ana kubitilubar ka kiniou kiniou kei, naina naio bo na. Mia kiniou nemial jibe ka kamiu kumitu kumisidomial ga ka naniovo kiniou nabagan vatitig kamiu, kumisinan banbano-o mabomiu nalo abujovujo vatitigio bo, tenene na kamiu kumisidom ka mia tibe na bereio banei, p̃eli makanio?
JOH 6:27 Mo, kanaku ilirianiano van kamiu naio jibe nei: kamiu kuvitum̃a kuvisidomii m̃ele re rivior sinaniano ga napano naio be tena bogo bulati ga naio joono bereio. Mia bo kanio kuvim̃au sikili rivior sinaniano nei na m̃a naio mijikia to dam̃ariga to, naio mijikia to to riva rivokar bogo na meuliano nei napano naio maka ve jukuti nene. Be riano, mia kiniou Kulorinio Kenerinio nemijikia nesian meuliano nene van kamiu, bior ka napano teta Atua naio jekarlar kiniou takurano ga ka nela tibe na.”
JOH 6:28 Naruei nalo abika denio, aberi-navo “Ana ver kumemi nuvisidom ka kumemi nuvila vite nalo nam̃a Atua naio jidomio, mia monoka nuvim̃auka tum̃abe?”
JOH 6:29 Ana Yesu berdop̃e banlo berinavo “Burum̃ara vite napano Atua jidom ka kuvim̃au kanio, naio jibe nei: kamiu kumonea rive riano ea kiniou napano Atua miila kiniou nebinimei ea yetemeriba nei.”
JOH 6:30 Ana nalo abika bereio, aberinavo “?Ana jau, venia naruei be kanamo burutomoluo napano ver kumemi nuvialio, mia kumemi nuvijikia nuvimoneaso? ?Mia jau kala im̃auano vabe na bo van kumemi?
JOH 6:31 Kumemi nubika jibe na bior ka napano numitu numisidomial kanado tormoruo nalo na beamu, nanua na ajua vio yauo. Aju jibe na, mia Mosis mila burutomoluo tai na bo banlo, napano dam̃ariga nalo aju abar joko na abio ka mana, mia nalo ajenio, maka lele siserlo. Vite na naio joa niosi lu, a naio berenio berinavo ‘Dam̃ariga naio baganlo ka joko na vio mave!’ ”
JOH 6:32 Ana Yesu berdop̃elo bereio, berinavo “Nao, vite na naio joa niosi lu, mia joko napano Mosis bario, naio maka ve joko na vio mave. Joko na vio mave napano be riano, karam̃aku ga naio mijikia sianio.
JOH 6:33 Atua kanano joko be kiniou napano najaluvo ea vio mave nebinimei yetano, ka nesian meuliano vou rivan tomu na yetemeriba nalo.”
JOH 6:34 Ana nalo aberdop̃e, aberinavo “Tubo, naina naruei be joko nam̃a kumemi numisidom tulaka.”
JOH 6:35 Ana Yesu berial banlo, naio berinavo “Kiniou, kiniou nebe joko na meuliano. Toro kei napano naio rimei ea kiniou, naio maka lele rijikia siser naio bereio, mia toro kei napano naio rimonea kiniou, naio maka lele rijikia midou ser naio bereio.
JOH 6:36 Be vite takurano ga naio bova, jibe ka napano neber ka kamiu ruei, napano kamiu kumial kiniou bija kanaku burutomoluo nalo ka miremiu ruei, mia kamiu maka kuvisidom kumonea kiniou.
JOH 6:37 Ana mia monoka tomu tai napano mia amonea kiniou, bior nalo nonovio napano teta mudulo ajua jum̃aku, mia monoka amei ea kiniou, mia nalo nonovio napano mia amei ka kiniou, ve re tai kalo napano mia novukulario bereio, mia novokar vatitiglo aviniu ave kanaku.
JOH 6:38 “Kiniou najaluvo ea vio mave nabatove yetano ea yetemeriba nei, maka ka mia nala kanaku jidomiano, mia ka nala jidomiano na kanano napano naio miila kiniou nabatove.
JOH 6:39 Mo kanano jidomiano naio jibe nei, ka nalo napano naio mudulo ajua jum̃aku, mia kiniou nalaluvu re nalo tai kalo, naio jidom ka ea legiano na maaro mia kiniou nevitiri bulag nonovlo bereio.
JOH 6:40 Karam̃aku naio jidom toru ka tibe nei naruei, ka nalo nonovio napano m̃a amial kiniou, ana amonea kiniou, mia nalo avokar meuliano nei napano naio maka ve jukuti nene, a naio jidom toru bunu ka ea legiano na maaro, ka mia kiniou naruei nevitiri bulaglo bereio.”
JOH 6:41 Naruei bogo na kulo Ju nalo kanalo tomu na tortoru aju amiagago ka Yesu kanano iliano nalo nei, nalo maka asaaro leleio, naruei ajum̃a amil mum̃i kanio. Be kanano iliano tai napano nalo maka asidom ajogio, naina be iliano napano naio berial ber naio be joko napano naio jaluvo ea vio mave batove ea yetemeriba nei.
JOH 6:42 Nalo aberii ealo aberinavo “?Jum̃abe ana toro na naio jom̃a berial ban kito ber naio jaluvo ea vio mave tiniabene naio binimei ea kito? Naio maka ve toro kokouro tenia na, kito romijikia batitig naio ruei, bija kenieno a karam̃ano bunu. Naio be tormoruo Yoseve ga kenerinio na, Yesu.”
JOH 6:43 Ana Yesu berdop̃e banlo naio berinavo “!Oi, ilimum̃iano ea kiniou naio bare, kamiu kuviagago vatitigio beamu vo!
JOH 6:44 Toro kei napano naio binimei monea kiniou vonganei, mia ea legiano na maaro kiniou nevitiri lar naio rimeul bereio. Mia Teta napano miila kiniou nebinimei, ver naio rivuru re toro na rimei ea kiniou, mia naio maka rijikia rimei.
JOH 6:45 Niosi na naverialiano Aisea kanano naio berial iliano tai, naio berinavo ‘Nalo nonovio, mia Atua ga naio riverlogloglo,’ ana mia never nalo nam̃a ajog batitigio iliano na Teta Atua kanano, nam̃a naio berloglog batitiglo kanio, nalo naruei mia amei ea kiniou.
JOH 6:46 Ana nalo na jibe na, mia ve re tai kalo napano aial Teta Atua, bior be toro takurano ga mial naio, nina be kiniou napano nejaluvo denio nebinimei.
JOH 6:47 “Nao, kiniou nojom̃a neber be riano laka ban kamiu, ka tomu nalo nonovio napano amonea kiniou, aju jouro ea meuliano ruei, na maka jikia bisi,
JOH 6:48 bior kiniou, kiniou nebe joko na meuliano.
JOH 6:49 Joko nei naio maka rive verare ka joko na mana napano kulo moruo nalo ajenio ea vio yauo. Nalo ajen banbano-o na, karina maka ve nalo tai kalo napano naio rimeul tobo to, nalo abiniu ajum̃a am̃arm̃aro jibe na ga.
JOH 6:50 Mia ver joko tai to, ana toro napano tom̃a senio mia naio rijikia re rim̃aro bogo tai, naina naruei kito rejisia ka joko na vio mave memedu.
JOH 6:51 Mo, kiniou naruei, kiniou nebe joko napano meul mugaruei, napano jaluvo ea vio mave binimei ea yetemeriba nei, ka toro na naio senio, naio meul tobo to. Joko nene naruei be mokotenaku, napano kiniou nemijamo ka bior yetemeriba vodolu nei, nejian bior meuliano na kanano tomu nalo.”
JOH 6:52 Naruei Yesu kanano iliano nalo nei kirisikili laka ka tomu na tortoru na kulo Ju nalo kialo nei ajikia batitigio rivu, naruei ajum̃a abivika aberenio “Venia na? Toro na naio ber ka mia naio sian niamoiano van kito ka kito resenio, p̃eli na naio jom̃a ber venia?”
JOH 6:53 Naruei Yesu naio ber bisivisii meravo banlo ea tivelinio na nioti na kanano m̃ariano, naio berinavo “Kiniou neber riano ban kamiu, neber kamiu monoka kuvisen niamoiano na kiniou Kulorinio Kenerinio, a kamiu monoka kumunu kanaku burukija. Ver p̃eli, mia kanaku meuliano naio maka rijikia toa kamiu.
JOH 6:54 Mia naio napano m̃a jen niamonioku, a naio munu kanaku burukija, naio bokar meuliano napano maka ve jukuti nene, mo mia kiniou nevitirilar naio bereio ea legiano na maaro, nala naio rimeul bereio.
JOH 6:55 Nina bior niamonioku, naio be sinaniano dolu tai, a kanaku burukija, naio be munuiano dolu tai laka.
JOH 6:56 Naio napano m̃a jen niamonioku, a naio munu kanaku burukija, kanano meuliano momou joa kiniou, a kanaku meuliano momou joa naio.
JOH 6:57 Karam̃aku na be burupati na meuliano, ana naio miila kiniou nebinimei, mia kiniou nojo nomeul ea kanano meuliano napano joa kiniou, naruei naio napano m̃a jen niamonioku, mia naio rimeul ea kanaku meuliano napano joaio.
JOH 6:58 Naina naruei kiniou nojom̃a neber ea kanaku iliano ea tivelinio na joko nei napano jaluvo ea vio mave naio batove. Joko nei naio maka tibe ka joko nei nanua m̃a korobido moruo nalo m̃a ajenio mia nalo ajum̃a am̃aro jibe na ga. Naio be joko napano toro kei napano ver naio senio, mia naio mijikia rimeul to tobo to.”
JOH 6:59 Iliano nalo nei naruei Yesu jo berloglog kalo joomo ea yimo na volkouano na vio Kapeneam.
JOH 6:60 Mia bogo na, Yesu naio ber iliano nalo nei, kumemi kanano naiagagoano nalo telabo ajidomii naio bereio, aberinavo “Kanano verloglogiano nalo nei kirisikili kiana. ?Kei bereio naio mijikia rijoglubarbar vatitigio?”
JOH 6:61 Mia Yesu naio mijog lubar ea naio ka kanano naiagagoano tealo ajum̃a amil mum̃i ka naio tertelisu jibe na, ana naio bika denlo, naio berinavo “?Jum̃abe, kamiu maka kuvisaaro ka kanaku iliano telisu nei, mila kamiu kumisidom kuvituvan kiniou bereio?
JOH 6:62 Ver tibe na, maka nejikia kamiu naruei. Ver bogo tai, kamiu kuvial kiniou Kulorinio Kenerinio notuvan kamiu, navan bere ea kanaku vio mave, mia tum̃abe naruei? P̃eli mia tiniemiu bobogia kiniou naruei!
JOH 6:63 Kanaku iliano nalo nei abe m̃arabo na Niununo, abe m̃arabo na meuliano. Kulorinio naio mijikia rivar bere kulorinio, mia kulorinio naio maka rijikia sian meuliano riano nei van kulorinio dolu. Vite na Niununo na Atua kanano ga naio mijikia sianio.
JOH 6:64 Mia nebitilubar ka kamiu tealo kumonea ruei, mia tealo makanio.” Yesu naio ber nina, bior ka napano beamu ruei, naio mijikia kulo be nalo nam̃a maka amonea naio, ba bokar napano naio mijikia kei kalo napano mia naio tiveluku kanio.
JOH 6:65 Ana Yesu ber kalo bunu, naio berinavo “Tealo mia amonea, a tealo mia amonea re, naina naruei kiniou neber batitigio ban kamiu iliano nei naruei, ka maka toro tai rijikia rimei ea kiniou, ver karam̃aku maka rijamo ka naio rimei.”
JOH 6:66 Naruei ea bogo nei, kumemi tealo kanano naiagagoano nalo amial jibe Yesu kanano verloglogiano nalo nei, abinimei jikili lie vo, naruei amialio ka be de ga, ana nalo aban bereio, maka bunu atu atakilili kumemi.
JOH 6:67 Ana bogo napano Yesu naio mial ka napano tomu tealo ajuvan naio bereio, naio mil ban kumemi kanano naiagagoano duelimo ba juo [12] nei, naio bika berinavo “?Ana jum̃abe ka kamiu? ?P̃eli kamiu bunu tiniemiu jii ka kuvan bere vija nalo na?”
JOH 6:68 Ana Saimon Pitere naio berdop̃e, berkar jikili ban Yesu, berinavo “Tubo, ver kumemi nuvituvanso, mia kumemi nuva nuvitakisor kei bereio? Jau takurano ga napano ioluano na meuliano na joaso,
JOH 6:69 jau ga takurano napano vonganei kumemi numonmoneaso, a kumemi numijikia ruei ka jau kobe Naverikariano Lu napano Atua juvanso kobinimei ka kolarur kumemi.”
JOH 6:70 Ana Yesu berdop̃e, naio berinavo “Nao, kiniou nebijauia bulag kamiu duelimo ba juo [12] na be kanaku, ka kamiu kumonea kiniou tibe na, mia iviso bure kamiu, kamiu tai naio be sim̃aro memedu.”
JOH 6:71 Mia Yesu naio maka riverial kumemi tai siano ka bogo na, mia iorou kanio ana nubitilubar ka ea kanano iliano nalo nei, naio jom̃a ber Jutas, tormoruo Saimon re Kariot kenerinio, napano naio be tai ka kumemi duelimo ba juo [12], mia naio maka ritovonio, naio jiveluku ka kanano Tubo novo nei.
JOH 7:1 Iorou ka naina Yesu naio jom̃a miel jeliviv, jom̃a ban ea ga vio na be kiano tanobuku ga nei Kalele. Naio maka bunu tom̃a rivavin ea vio nalo na tanobuku na vio Yutea, bior navurim̃araboiano na kulo Ju na vio na nalo ajum̃a ajirarag ka naio ruei, ka ajidom ka ala bin naio rim̃aro.
JOH 7:2 Mia bogo tai, be vaataro ka bogo na burum̃ara jokoluolu tai na kulo Ju nalo kialo bereio, napano be Jokoluolu na Yimo Tobobo. Mia jibe ka ga bogo nonovio, nalo miroano tiniel jii ka avavin Yerusalemo kanio.
JOH 7:3 Mia ka bogo na, Yesu kuruano nalo amil banio, aberinavo “Ei, jau kojo bogo jiou ea vio nei ruei, bo ka jau kalavon ka kavavin Yutea, ka kanamo naiagagoano nalo na yako nalo kija amijikia aial kijokijo nalo nam̃a jau kojom̃a komilaio.
JOH 7:4 Jau kojidom ka tomu nalo ajikia vatitigso, a kojom̃a komim̃au lukuluku ga. Ver be riano ka nam̃a jau komila burum̃ara burutomoluo nalo nei, bo kanio kava koyotuba ea yetemeriba mirano.”
JOH 7:5 Mia nalo nei kialo iliano nei jibe ka amiyotel ea ga Yesu, bior nalo abe kuruano memedu, mia nalo maka amonea naio.
JOH 7:6 Mia Yesu berdop̃elo, naio berinavo “Kamiu kumijikia kuvila kenemiu vite nalo ea bogo na vabe ga napano kamiu tiniemiu jii ka kuvilaio, mia kiaku burum̃ara bogo naio maka rimei vo.
JOH 7:7 Kamiu kumijikia kuvila kenemiu im̃auano nalo rivu ga, tomu nalo maka ajikia aserm̃i ka kamiu riviorio, mia bogo na kiniou nemila kiaku im̃auano, neberial ka kialo bajago va nalo na yetemeriba nei maka rimemedu, mia nalo ajerm̃i ka kiniou toru laka.
JOH 7:8 Tibe na mia kamiu ga kuvavin Yerusalemo, kiniou notobo nei ga beamu vo. Kiniou maka nejikia nava noyotuba ea mirano tomu nalo na jokoluolu nei, bior kiaku bogo jo binimei, mia maka rimei nonovio vo.”
JOH 7:9 Naio ber iliano nei banlo, avona iorou kanio ana nalo abano ana naio jobo.
JOH 7:10 Yesu jobo jibe na, mia maka vesiou ga, naio bunu bavin Yerusalemo, mia maka tibe ka na tomu nalo amijikia aial naio, mia naio milavan naio.
JOH 7:11 Naruei tomu na tortoru na kulo Ju nalo, ajum̃a ajidomiio ruei ka p̃eli mia naio rimei ea jokoluolu, naruei nalo ajum̃a ajiravo naio janea vio, abivika aber naio jo be.
JOH 7:12 A tomu nalo bunu, bogo nonovio ajum̃a aberverii naio, napano nalo tealo ajum̃a aber naio be toro na bo tai, a tealo aber naio kirivova, naio jom̃a mila niegeniege m̃elea tomu nalo kialo jidomiano.
JOH 7:13 Ajum̃a aberverii Yesu jibe na, mia maka atum̃a averial naio ea vio medave, bior amerou ka ver kialo tomu na tortoru ajogio, mia ala titai kalo.
JOH 7:14 Mo nalo ajua jokoluolu banbano-o na, legiano tealo barlaka ruei, mia Yesu naio mial bo ka riva rivavin ea Atua Kunuano Lu ka riverloglog tomu nalo bereio.
JOH 7:15 Mia bogo na tomu na tortoru na kulo Ju nalo kialo amijog kiano verloglogiano novo nei, amiilo toru laka, aberinavo “Jum̃abe ana tete nei naio mijikia vatitig Atua kiano iliano jibe na? Naio maka rivan ea yimo na verloglogiano leleio, mia kiano verloglogiano kirinovo-o mia!”
JOH 7:16 Ana jibe na Yesu naio berial banlo, berinavo “Venia nam̃a nojom̃a nejiloglog ban kamiu, maka ve kiaku, mia be Teta na naio miila kiniou nebinimei ea yetemeriba nei kiano.
JOH 7:17 Ver toro tai saaro ka rila ga Teta kiano jidomiano, mia naio rila toro nene mijikia rivitii vatitig kanaku verloglogiano nalo. Mia toro nene naio mijikia rivitilubar ka kiniou maka noto neverloglog tomu nalo selia ga siaku, mia mijikia rivitilubar ka verloglogiano nalo nei, be riano laka ka amaluvo ea Atua.
JOH 7:18 Ver kito reial toro tai tom̃a rila iliano ea siano bereio, kito romijikia ka naio jom̃a midular naio ga rivavin. Mia ver toro na m̃a mil, midular kiano toro na toru siano napano miila naio binimei, romijikia ka naio be riano ga, naio maka tom̃a rilasibi.
JOH 7:19 “Toro tai na mila jibe nei be Mosis. Atua jian kiano tuboiano banio, naruei naio binimei jian ban kamiu, ana kamiu kumitum̃a kumila kokorovio ruei. Mia jum̃abe na kamiu kumisidom kuvuebin kiniou nam̃aro, bior kuberinavo namila korov tuboiano? Naio memedu jibe na?”
JOH 7:20 Naruei tomu nalo aberdop̃e aberinavo “Jerei, vonganei kojom̃a komil vovu jibe ka sim̃aro tai joaso! Kei jidom rueso? Koverial vonio!”
JOH 7:21 Ana Yesu berdop̃e, berinavo “Nanua beamu nebinimei ea vio nei, nemila burum̃ara burutomoluo tai ea miremiu, nemieliel ka toro na be javuluku. Mia bogo na kumialio, maka kumisaaro kanio, kuberinavo kiniou nomim̃au bova ga ka napano nemila ea Legiano Lu.
JOH 7:22 Mo bo ka kamiu kuvilavon ka tiniemiu rimaio bunu ka bajago na pakuveu, javukia tormoruo Mosis naliko tormoruo dolu nalo na beamu ka naio, jibe ka Epraamo nalo, ajian ban kito. Naio bunu be im̃auano tai kiana, mia ver legiano na ala rijoru ea Legiano Lu, kamiu maka kuvisidomialio, na kumitum̃a kumila ga.
JOH 7:23 Kamiu kumitum̃a kuber maka kuvisidom kuvila korov Mosis kiano tuboiano, mia dam̃ariga kumijamo ka ala im̃auano na pakuveu ka Legiano Lu nei, naio bo ga na. Mo ver kamiu kumijamo ka nina, ana bior vaio ana kamiu tiniemiu mimi m̃ele jibe na ban kiniou bior kiri im̃auano sesa novo na kanaku na takurano ga nei, napano namila batitig kiri tavaliki nei niabeno bo bereio ea Legiano Lu?
JOH 7:24 Kiniou nemial jibe ka kamiu kumitum̃a kubitii vite nalo na jibe nei ea kulukuti ga, mia bo laka ka kuve masou kija, kuvilavonio ka kuvisidomii rivu vite nalo riva rivokar niamoiou.”
JOH 7:25 Ana ka bogo na tomu telabo na Yerusalemo amial ka napano Yesu jom̃a berloglog joomo ea Yimo Lu, mia nalo amiilo, aberinavo “Ierinio ga na! Toro nene kia ga nei navo, napano tomu na tortoru ajum̃a aber ajidom ka auebinio rim̃aro.
JOH 7:26 Be naina jom̃a berial kiano iliano jibe na ga, naruei nalo maka bunu alavon ka ala titai ka leleio. Kito maka rejikia, p̃eli maka asidom ail vanio bior napano abitilubar batitigio ruei ka be riano ka toro nei, naio be kiado Naverikariano memedu.
JOH 7:27 Mia makanio, maka rejikia ka reverenio aver naio nina ga, bior napano kiado moneano tai ruei, ka Naverikariano, bogo na ver naio riyotuba, mia maka ve toro tai rijikia river naio joa vio be na binimei na. Mia toro nei Yesu, kito nonovio romijikia kiano vonuo ruei.” Nalo aber jibe nei, aber p̃eli Yesu abario jo Nasarete, mia makanio, naio abario jo Betleem.
JOH 7:28 Mo bior nalo ajum̃a aber jibe na, Yesu jaam̃i ka berlogloglo joomo ea Yimo Lu, naio berial iliano nei banlo, berinavo “Kamiu kuberiam̃a kumijikia kiniou, a kuberiam̃a kumijikia vio napano nebinimei eaio, mia nemial jibe ka maka kuvijikia batitigio rivu. Nebinimei ea vio nei, maka ea kiaku jidomiano, mia toro dolu tai miila kiniou nebinimei, napano naio be burupati na ilirianiano. Mia jibe ka maka kuvijikia kiniou, mia maka kuvijikia naio bunu.
JOH 7:29 Mia naio, kiniou naruei napano nemijikia naio batitigio bo, bior ka napano naio naruei miila kiniou nebinimei ea yetemeriba nei.”
JOH 7:30 Mia Yesu kiano iliano nalo na jibe nei mila ajikili lie vo ka monoka avokakar naio, ana maka ve toro tai leleio ka napano mijikia tokolio, bior ka napano kiano bogo maka rimei vo.
JOH 7:31 Ajidom aue naio, mia tomu nalo miroano laka amonea naio ruei, bior burutomoluo nalo napano jom̃a milaio. Aber jibe nei aberinavo “Ana mia Naverikariano na vabe napano mijikia rimei rila burutomoluo venia bereio tovulu naio? Makanio, tete nei naio be kiado Naverikariano memedu kiana.”
JOH 7:32 Mia Varisis tealo ajum̃a amiagago ka tomu nalo nam̃a amijakar Yesu ka kialo iliano nalo, mia amila sop̃eli, aba amil bija kulo lu na tortoru nalo, naruei abiorkar ka monoka ala titai ka Yesu vonganei ga. Ana amiila kialo kukuano nalo, ka ava asirago buluvio ka avokar Yesu, ka avuru naio rimei bere vanlo.
JOH 7:33 Ana Yesu berial, berinavo “Mia kiniou nemijikia noto vija kamiu bogo ve telisu ga bereio, karina navan bereio ea naio napano miila kiniou nebinimei.
JOH 7:34 Bogo napano navan bisi, mia kuvila von ka kuvisirag kiniou rivanvano-o, mia maka kuvijikia kuvileal kiniou. Vio napano mia nava notoaio, mia maka kuvijikia kumei eaio.”
JOH 7:35 Mo bogo napano tomu na tortoru na kulo Ju nalo kialo amijog iliano nei, abitovitonu eaio, ajum̃a aber kalo, aberinavo “Kema na jo ber vio be na, ka mia naio rivan ea karina mia kito rejikia re releal naio bereio eaio? P̃eli naio jidom rivan ea vio dolu nalo na yetemeriba napano kuruado Ju aburo aban ea ka bogo na burum̃ara vurubureiano, tenene na naio jidom riva riverlogloglo kija koviobo?
JOH 7:36 Mia naio ber venia na, ber mia kito resirag naio rivano-o mia kito releal re naio. Mia tum̃abe ea kiano iliano napano berinavo naio to rivan ea vio tai napano kito rejikia re ratakisorio, maka rejikia ravan eaio?” Mia ka bogo na, kukuano nalo maka avokar Yesu vo.
JOH 7:37 Naruei amila jokoluolu nene bano-o, na binimei bokar legiano maariano nene, napano jibe ka legiano na toru nene. Mia bogo napano aju vio takurano, Yesu jumolu bio jikili jibe nei, naio berial berinavo “Kamiu kei na midou jer, bo naio rimei ea kiniou, rimunu uei na meuliano.
JOH 7:38 Toro nam̃a monea kiniou, mia rivu laka vanio, tibe ka nam̃a Vivitauiano Lu naio berenio, napano berinavo ‘Toro na jibe na, mia tiniene rivujo ka uei na meuliano, rivano-o rio magmago lou ea naio bereio tibe ka uei nam̃a mieraro.’ ”
JOH 7:39 Mia Yesu kiano iliano nei, naio jijamerji ka Niununo Lu, bior ka napano naio mijikia ka iorou, nalo na m̃a amonea naio, mia avokar Niununo Lu. Mia ka bogo na, Niununo Lu naio maka rimei vo, bior ka napano Yesu naio jo kia navo ea yetemeriba nei, naio maka riva totano ea kiano vio lu na mave vo.
JOH 7:40 Mia bogo napano tomu nalo amijog Yesu bio jibe na, kialo jidomiano nalo ba beve dolu. Nalo tealo aberinavo “Toro na, naio be naverialiano jibe Mosis nam̃a kito romoneaio ka mia naio rimei.”
JOH 7:41 Tealo abeinavo “Nina, jibe na kovio, p̃eli na ver maka naio be kiado Naverikariano garuei.” Mia nalo tealo aberdop̃e, aberinavo “Makanio, maka iliano tai napano river Naverikariano mia rive toro Kalele tibe ka tete na.
JOH 7:42 Kiado Vivitauiano Lu ajum̃a aber ga mia Naverikariano mia naio riyotuba ea Parinio Tubo Teviti kiano yati, mia naio rive toro re Betleem.”
JOH 7:43 Mia jidomiano telabo ka naio jibe na banbano-o, mila na tomu nalo aburuburevurelo bior Yesu.
JOH 7:44 Mo tealo nalo maka lele asaaro ka naio, amial bo ka avuku naio rivan ea nalakoiano, mia iorou kanio maka tai kalo napano ava vaataro kanio ka avokario.
JOH 7:45 Mia iorou ka vite nalo na, kukuano nalo na Yimo Lu aban bereio ea kulo lu na tortoru bija Varisis nalo, ka asian veriiano rivanlo. Ana bogo napano amiyotuba ea miralo, tomu na tomormoruo nei maka aial Yesu, ana amil banlo, aberinavo “?Ana toro nene naio be napano numiila kamiu kanio? ?Bior vaio ana kamiu maka kuvuru naio rimei?”
JOH 7:46 Naruei kukuano nalo nei aberdop̃e, aberinavo “Kumemi numiagago ka kiano iliano nalo abo mia abo, maka ve toro dolu tai napano mijikia riverloglog kito rivu tibe ka naio.”
JOH 7:47 Mia verdop̃eiano nei mila Varisis nalo amiilo kanio, aberinavo “!Tomnei, vonganei kamiu bunu, kema na buru kenemiu jidomiano ba be vovu!
JOH 7:48 Kamiu kumijamo ka naio milasibilili kamiu, mia jum̃abe, kamiu kumial ea kumemi tomu na tortoru p̃eli na ea kumemi Varisis, be tai napano amonea naio? Makanio.
JOH 7:49 Nalo ga nam̃a amoneaio, nina be taara kirivova dedade nalo na, mia nalo na maka ajikia vite. Maka ajikia batitig kiado tuboiano rivu, Atua berkar iliano va ka kialo vironiano ruei.”
JOH 7:50 Ajum̃a amil jikili jibe na, mia nalo tai milavio jikili ka rila kialo iliano rivatove bereio. Nina be Nikotimas, napano nua beamu ea bogiano tai, naio ba jukunu bija Yesu.
JOH 7:51 Naio ber kalo, berinavo “Kito rojum̃a romil ea toro na jibe na, javukia napano rojum̃a rejibure naio ruei. Mia kiado tuboiano berbure nina, naio ber ver kito rosidom reil van toro tai, kito monoka rotutano ea komeli kitoliko, monoka rodu bogo rivanio ka naio riverial kiano jidomiano van kito, ka kito monoka rovika vikadeniano nalo ka releal ka be riano naio mila jibe na p̃eli na jum̃abe. Nina naruei m̃arabo na ala im̃auano memedu.”
JOH 7:52 Mia maka asidom aiagago ka kiano iliano nei, bior amial ka napano naio mikurukar Yesu. Amil banio, aberinavo “!Tomnei, jau kojom̃a komil jibe na jau bunu kobe toro Kalele tai bereio! Kosidomii vatitig rivu ka venia napano Iliano Lu berenio. Maka leleio ve iliano tai napano riverial ka mia naverialiano vou tai naio tumolu rove yako Kalele rimei mave ea vio nei.”
JOH 7:53 Naruei kialo iliano nalo ba birankakario ea vio na ga, karina nalo abeve terakurano abanvan bereio ea kialo vonuo nalo.
JOH 8:1 Naruei Yesu juvan Yimo Lu, naio miel ban bereio ea Suku Na Buruolivi.
JOH 8:2 Naio mon ea vio na-o viomijeni kon naio, ana kavijo naio ban bereio ea Yimo Lu na Atua Kunuano. Bogo napano tomu nalo amial naio, nalo telabo abinimei eaio, naruei naio jotano jom̃a berlogloglo.
JOH 8:3 Mia maka vesiou, naverloglogiano na tuboiano bija Varisis nalo, aburu tira tai binimei eaio, amila naio jumolu jua mirano na tomu nalo. Tira nene, aju abokar naio jibe na bior aberenio naio mila siakaiano bija toro tai, mia nalo tai amial, aberialio.
JOH 8:4 Ana amila naio jumolu ju jibe na, amil ban Yesu, aberinavo “Naverloglogiano, tira nei amileal naio jom̃a mila siakaiano.
JOH 8:5 Mia jibe ka napano Mosis kiano tuboiano berenio ea tivelinio na kariano nei, vonganei naruei kumemi monoka nuvitubabinio ga rim̃aro. Mia tuboiano na Romo berenio be lu ka nuvitubabin toro. ?Mia jum̃abe ka jau, kiamo jidomiano jum̃abe?”
JOH 8:6 Naruei vikadeniano nei, maka avika masosoua den Yesu, mia ajum̃a aburu vonvonio, ka naio river belbeleia titai napano mia iorou kanio ana amijikia atibure naio riviorio. Mia Yesu naio maka riverdop̃e, naio maka river vite tai, mia jurubanini ga, bitiri m̃artukuji na jum̃ano naio bivitauia iliano tai ea borotano.
JOH 8:7 Ana ajum̃a abivika denio jum̃abe ka tira neibano, ana Yesu barlar naio bereio, mil banlo, berinavo “Mo, ver kamiu tai napano maka lele ve kariano tai toa kiano meuliano, mia naina rivuku puruveru na tukamu, tuba tira nei.”
JOH 8:8 Vaarakurano bereio, naio jurubanini batove, bivitauia iliano dolu tai ea borotano.
JOH 8:9 Mia bogo napano amijog venia napano Yesu ber kalo, ajikar ka abeve terakurano abanvan bereio. Na naio jukamu, be kialo tormoruo tai, mia iorou ka naio, nalo dolu bunu aburu dedade ealo beve terakurano, o-oa ka tira nei ga jumolu ju ea Yesu mirano.
JOH 8:10 Mia Yesu bitikar naio bavin, naio bika berinavo “?Tira, nalo napano aju be? ?Maka bunu nalo tai sidom tibureso?”
JOH 8:11 Ana tira neibano naio berdop̃e, berinavo “Tubo, maka bunu toro tai.” Mia Yesu berenio berinavo “Bo ga, mia kiniou bunu natiibureso re. Jau komijikia kava vonuo bereio ga, mia kola re bunu kariano bereio.”
JOH 8:12 Mo iorou kanio ana na Yesu mil banlo bereio, naio berinavo “Kiniou nebe yulu na yetemeriba, toro kei napano takisor kiniou, mia naio riel re bunu ea melijokouo, ana mia yulu na meuliano toa naio.”
JOH 8:13 Mia Varisis nalo tealo napano aju kia navo abukular kiano iliano bereio, aberinavo “Jau kober jibe na, jau ga bereio komiija kanamo iliano, jau kojom̃a komidular jau bereio bavin. Tibe na, kumemi maka nuvijikia numoneaso, kanamo iliano maka ve riano ga.”
JOH 8:14 Ana na Yesu berinavo “P̃eli namila jibe na kovio, mia kiaku iliano nonovio p̃eli kiaku verloglogiano abe riano laka. Kiniou nemijikia nonovio vite na tivelinio ea kiniou, ka kiniou nojo be na nebinimei ea vio nei, p̃eli na nojo nei ka mia nava be bereio, mia kamiu maka kumijikia lele tivelinio na kiniou.
JOH 8:15 Kumitum̃a kumitibure kiniou ea jidomiano na toro, mia kiniou maka netibure toro leleio.
JOH 8:16 Mia ver bogo tai netibure tomu nalo, mia kiaku tibureiano naio rimemedu ga, bior napano kiniou re ve takurano nalaio, mia kumemi juo naina napano miila kiniou nebinimei, kumemijuo nuvila buronio.
JOH 8:17 “Mo ea kenemiu tuboiano, abivitauia jibe nei berinavo ver ve tomu ve juo aikurukar iliano tai, mia kamiu kumoneaio,
JOH 8:18 naruei mia monoka tibe na bunu ea kumemi juo Teta. Kiniou neber kiniou nebe riano, a naio mikurukar kiniou, mila na vonganei kamiu monoka kumonea kiniou.”
JOH 8:19 Nalo amijog iliano nei, naruei abika denio, aberinavo “Jau kojom̃a kober karam̃amo na, mia naio jo be vonganei?” Ana na Yesu berdop̃e, naio berinavo “Kamiu maka kuvijikia naio, jibe ga napano maka kuvijikia kiniou. Ver kumijikia batitig kiniou rivu, mia rila kamiu kuvijikia vatitig naio bunu rivu, a maka kuvijikia kuvika vikadeniano tibe na, ana makanio.”
JOH 8:20 Iliano nalo nei, Yesu berlogloglo ea Yimo Lu, nina ea tivelinio na naio, vio be na mia avar vatitig kiano ijaiano na veru nalo napano ajuvan ban Atua. Ana ea bogo nei, maka ajikia avakar naio, bior maka kiano bogo vo.
JOH 8:21 Ana Yesu berial bunu jibe na banlo, naio berinavo “Kiniou nava kovio den kamiu naruei. Bogo na ver nava kovio varlaka, mia kamiu kuvisirago kiniou, rivano-o mia kuvial re kiniou, mia kum̃arm̃aro vija kenemiu kariano nalo. Kiniou navan ea vio tai napano mia maka kuvijikia kumei eaio.”
JOH 8:22 Telikiti napano tomu na tortoru na kulo Ju nalo amijog iliano nei, abika aberinavo “?Kema na naio jidom rila venia? Naio ber mia naio rivan ea vio tai na kito maka rejikia ka ravan eaio, p̃eli na naio ber mia rila kuku naio rim̃aro bereio bo?”
JOH 8:23 Ana na Yesu berenio berinavo “Kenemiu jidomiano a kiaku jidomiano abe dolu laka. Kamiu kube na vio yetano nei ga, mia kiniou nebe na vio mave, kamiu kube na yetemeriba, kiniou maka neve kiano.
JOH 8:24 Ana jibe ka napano kiniou neber ruei, mia kum̃arm̃aro ga rivija kenemiu kariano nalo. Ver kumonea re kiniou ka kiniou nebe naio napano jo jobo jo, mia monoka tibe na ga.”
JOH 8:25 Ana nalo abika, aberinavo “Abe jau kover vonio bereio, ka jau kobe kei.” Ana na Yesu buku bere iliano banlo, naio berinavo “Kiniou nebe naio ga napano nanua jikar beamu ruei binimei bokar vonganei, kiniou nojo neber kiniou nebe naio ga.
JOH 8:26 Naina ga kiniou nojom̃a neber tivelinio na kiniou. A tivelinio na ea kamiu, ve vite miroano napano nemijikia neverenio, mia p̃eli ver neverenio, a be iliano na tibureiano nonovio. Ana vite nalo napano nojom̃a neberial ea yetemeriba nei, naio be iliano nalo ga napano nomijog den naio napano miila kiniou, bior dam̃ariga, kiano iliano nalo amemedu laka.”
JOH 8:27 Yesu bisi meravo ga jibe nei, berii karam̃ano na mave banlo, mia maka ajikia leleio.
JOH 8:28 Naio mil bereio banlo, naio berinavo “Telikiti napano kuvitelan kiniou Kulorinio Kenerinio mave ea iesi m̃akolkolo bisi, mia kamiu kumijikia ka kiniou nebe kenemiu Naverikariano. Mia kamiu kuvitilubar ka napano vite nonovio nam̃a namilalo, maka nala kiniou ga ve takurano, mia dam̃ariga neber ga venia nam̃a Teta naio berloglog ka kiniou.
JOH 8:29 Naio naruei napano miila kiniou nebinimei, a naio jo bija kiniou vonganei. Naio maka leleio tuvan kiniou bogo tai, bior dam̃ariga nojom̃a namila vite nonovio jibe ka ga nam̃a naio jaaro kanio.”
JOH 8:30 Yesu naio jom̃a mil jibe na, kiano iliano nalo aburu kulo Ju telabo amonea naio.
JOH 8:31 Yesu mil ban nalo na amonea dovorovo ea naio, naio berinavo “Ver kamiu kuvokar sikili kiaku iliano, kuvitum̃a kuviduio, kamiu kuve kiaku naiagagoano riano nalo.
JOH 8:32 Mia kamiu kuvijikia ilirianiano, naruei mia ilirianiano rila m̃arimieni nalo atibirbili den kamiu.”
JOH 8:33 Nalo aberdop̃e banio, aberinavo “Ai, abe kumemi nube tormoruo Epraamo kiano yati nalo, maka numitum̃a numim̃au kurano ea toro na toru dolu tai. ?Mia jum̃abe ana jau koberinavo mia m̃arimieni nalo atibirbili den kumemi?”
JOH 8:34 Yesu berdop̃elo, naio berinavo “Kiniou neber riano ban kamiu, tomu nonovio napano m̃a amila kariano, nalo abe tomu nam̃a aju amim̃au kurano bior kariano, m̃arimieni na kariano miadikarlo jikili.
JOH 8:35 Kamiu kumitum̃a kumim̃au kurano ga bior toro na toru na kariano kanano, mia kamiu maka kuve kiano m̃aratavo. Mia kiniou, notobo rivija karam̃aku, bior kiniou nebe kiano m̃aratavo memedu.
JOH 8:36 Kiniou nebe tete na mave, mia ver novulu bulag kamiu, mia kamiu bunu kumijikia kuvitu dam̃ariga vija kiniou ea vonuo na mave.”
JOH 8:37 Ana Yesu ber bunu ka tomu nalo, naio berinavo “Kiniou nemijikia vatitig ka napano kamiu kube tormoruo Epraamo kanano yati nalo memedu, ana Epraamo kanano yati nalo nei naruei napano bo ka ver asaaro ka kiniou. Mia makanio, kamiu tealo kube yati nene nalo naruei napano kiaku iliano maka totano batitig rivu ea kenemiu iviso, naruei kumisidom toru ka kuvue bin kiniou nam̃aro.
JOH 8:38 Bo ka kamiu kumonea kiaku iliano nalo, bior kiniou nojom̃a neberial ga venia napano kiniou nemial bogo napano nojo bija Teta, mia kamiu kumitum̃a kumila ga venia nam̃a kumijog karamemiu naio berenio.”
JOH 8:39 Mia aberdop̃e, aberinavo “Riano ga, bior karamememi tormoruo buo Epraamo re nua nua laka.” Ana na Yesu berinavo “Maka leleio! Ver kamiu kube tormoruo Epraamo kenerinio riano, mia bo ka kamiu kija kuvitum̃a kuvila von ka kuvila vite nalo avu tibe ka nam̃a naio milaio.
JOH 8:40 Ana makanio, kamiu kumitum̃a kumila vite kirivova laka. Jibe kiniou, nebe toro tai nam̃a nojom̃a neberial ga ilirianiano nalo napano nomijog Atua naio ber ka kiniou, mia kamiu kumitum̃a kumisidom kuvuebin kiniou nam̃aro. ?P̃eli kamiu kuberiam̃a bajago na naruei napano kenemiu tormoruo Epraamo tinien jii ka kuvilaio?
JOH 8:41 Makanio, kiniou nemial jibe ka maka naina, mia be karamemiu dolu tai napano naio jo, kamiu kumim̃au kiano.” Mia nalo aberinavo “!Jerei, venia na! !Kojidom kala kumemi nuve tete na m̃arabo nalo, kumemi maka nuvijikia karamememi! Karamememi takurano riano ga naio jo, naina be Atua.”
JOH 8:42 Ana na Yesu berinavo “Ver iliano na be riano, ka Atua naio be karamemiu, mia kamiu monoka tiniemiu tii kiniou ve toru mia, bior ka kiniou najaluvo den naio nebinimei ea vio nei. Kiniou maka nemei tibe ka napano kiniou ga, mia naio naruei miila kiniou nebinimei.
JOH 8:43 Kiniou nojom̃a neberii vite nalo na ban kamiu banbano-o kiride ga, mia dam̃ariga kamiu maka kumijikia leleio. Kiniou maka nejikia den kamiu, bior vaio ana maka kuvisidom ka kuvokar vatitig rivu kiaku iliano na?
JOH 8:44 Kamiu, karamemiu Sim̃aro, a kamiu tiniemiu jii ka m̃a kuvila tena bova tibe ka ga napano naio jidomio. Jikar nua ea tikariano binimei, naio be toro nam̃a muebin toro m̃aro a naio maka tinien tii ilirianiano, naio maka tumolu tua tivelinio ka naio leleio. Bajago na memedu na kiano, naio mil dam̃ariga ea burum̃ara kenieno sibiano nei, bior naio be burupati na sibiano nalo nonovio, naio be teta na bajago na sibiano.
JOH 8:45 Naio jibe nei, mia bogo napano kiniou nebinimei, neberial ilirianiano novo nalo ban kamiu, mia karina kamiu maka kuvisidom kumonea kiniou bereio.
JOH 8:46 Mia kamiu kei na naio mijikia riverial kiaku beleano tai? ?Mia ver kumial ka nemil be riano, bior vaio ana maka kumonea kiniou?
JOH 8:47 “Toro na be Atua kanano, naio jo miagago vatitig ka Atua kiano iliano. Mia kamiu na ver kamiu maka kuvisidom ka kuvijog kiano iliano nalo, nemijikia ka nina bior kamiu maka kuve kiano leleio.”
JOH 8:48 Mia Yesu kiano ilisikiliano nalo nei mila tomu na tortoru na Ju nalo amijog bova, ana nalo abika denio, aberinavo “Kumemi numijog aber jau maka kove Ju rimemedu na, jau kobe niabe leri na Sameria ga tai. Ana kumemi numial napano sim̃aro tai joaso, naio jom̃a milaso kobe kodovo kija. ?Iliano nalo na abe riano, p̃eli na makanio?”
JOH 8:49 Ana na Yesu berdop̃elo, naio berinavo “Makanio, maka ve sim̃aro tai toa kiniou. Vite nalo nam̃a nojom̃a nemilaio, nemila ka karam̃aku siano rivavin. Vite nalo nam̃a kamiu kumilaio ka kiniou, kumila ka siaku vatove.
JOH 8:50 Nina maka ve titai ea kiniou, bior ka napano kiniou maka noto noim̃au ka nala siaku rivavin. Mia be toro na toru jo napano naio jidom ka tom nalo bo ka atovon kiniou, mia naio ga ve takurano tibure vite nonovio ea tivelinio na.
JOH 8:51 Mia be iliano tai napano be riano napano nemijikia never ka kamiu jibe nei, ka ver kamiu tai rivokar kiaku iliano sikili, naio rudukario, mia naio maka rijikia rial nam̃ariano bogo tai.”
JOH 8:52 Ana Ju nalo amijog iliano nei, aber ka naio, aberinavo “Vonganei numijikia batitig ka Sim̃aro joaso ruei. Jau kober toro napano tovonso mia naio maka rijikia rim̃aro, mia ve re toro tai napano mia maka rim̃aro bogo tai. Tormoruo Epraamo naio meul banbano-o karina naio m̃aro, a naverialiano nalo bunu amim̃au banbano-o karina am̃arm̃aro.
JOH 8:53 ?P̃eli na jau komialso jau loa laka ka kiado tormoruo lu nalo a? ?Jau koberiam̃a jau kobe kei bereio, m?”
JOH 8:54 Ana na Yesu berdop̃e, naio berinavo “Ver kiniou neverial ka kamiu, p̃eli kumial jibe na ka napano nomidular siaku bavin bereio, mia kamiu kuvial rivova. Toro dolu tai ga napano m̃a jo mila siaku bavin, nina naio napano m̃a kuber naio be kenemiu Atua, naina be karam̃aku.
JOH 8:55 Naio, kamiu maka kuvijikiaio, mia kiniou nemijikia batitig naio. Kiniou maka nala sibi tibe ka kamiu, neber vatitigio ga na, ka kiniou nemijikia batitig naio bo, a kiano iliano nonovio, nemije batitig bo monea kiaku meuliano.
JOH 8:56 Nemijikia never bunu ka korobimiu tormoruo Epraamo, naio tai napano jidom toru ka rial kiaku bogo nei. Naio jidom rial ka kiniou noyotuba ea kiano torogio, nemei nala kiaku im̃auano nei, a bogo na naio rialio bisi, mia naio saaro mia saaro.”
JOH 8:57 Ana Ju nalo abika naio aberinavo “Jau maka kove tormoruo tai tibe naio vo, kanamo yuka maka rivokar duelimo va limo [50] vo. ?Ana na jum̃abe ana jau kojom̃a kober jau komijikia tormoruo Epraamo re nua nene? ?Jau komial kovio tai?”
JOH 8:58 Ana Yesu naio berdop̃elo, naio berinavo “Kiniou neber riano ban kamiu, ka tormoruo Epraamo re nua nei, kiniou nojukamu laka ka naio. Bogo na naio maka vo, mia kiniou nebe naio napano jo beamu ruei.”
JOH 8:59 Ana telikiti napano kulo Ju nalo amijog ka napano Yesu jom̃a ber kiri iliano telisu neibano, napano naio jibe ka Atua siano lu tai, ana amijikia ka naio jo ber naio be Atua, mia nalo tiniel mimi toru. Naruei ajirag puruveru ka atuba Yesu rim̃aro, mia naio juvan naio bena ga denlo, juvan Yimo Lu ba tavio bereio bano.
JOH 9:1 Ana kumemi naiagagoano nalo kumemi liko Yesu numiel nubano, naruei bogo na numitum̃a numiel nuban jibe na, numial toro tai napano bogo na naio miyotuba, naio be merebono.
JOH 9:2 Mia nubika den Yesu, nuberinavo “?Naverloglogiano, venia mila kema na? ?P̃eli mauo na kiano kariano ga, p̃eli na mauo na kenieno naio karam̃ano kialo, mila naio be merebono jibe na?”
JOH 9:3 Ana Yesu berdop̃e naio berinavo “P̃eli ga, naio maka ve kiano kariano, a maka ve kariano na kiano tormoruo juo kialo, mia naio miyotuba jibena ka rila ga ka mia tomu nalo amijikia aial moroano na Atua kiano rim̃au ea kiano meuliano.
JOH 9:4 Jibe na, mia nalarur naio vonganei, bior bogo napano viomijeni kia ga vo, kito monoka roim̃au sikili, monoka roim̃auka naio napano miila kiniou nebinimei ka kiano im̃auano nalo. Melijokouo jo binimei, napano kito maka bunu rejikia roim̃au eaio.
JOH 9:5 Mia vonganei, kiniou nojo yetano ea vio nei, kiniou nebe yulu na yetemeriba nei.”
JOH 9:6 Yesu naio ber jibe na bisi, ana naio buvulei ea bulukievi na borotano, naio monkorkor batove mila kitkiti titinio melmeloko jibe bulukinia, karina naio bijan ea toro neibano mirano be juo.
JOH 9:7 Ana naio mil banio, naio berinavo “Mo, jau kavano, kavatove ea bulukuei na Sailomo, kesekon batitig bereio miramo.” Uei napano Yesu berkanio, siano naio berenio “uei na riila rivano.” Ana toro nene naio batove, mila jibe na, mia mirano abinimei abo. Ana naio binimei bereio kean kumemi bija Yesu, napano naio mijikia bitilubar vite nonovio bo.
JOH 9:8 Ana iorou, nalo na vaataro ka toro nei, bija nalo nanua beamu amial naio jom̃a miogiog, amial naio bereio, mia aberenio aberinavo “?Merebono m̃a na naina p̃eli, napano beamu jom̃a miogiog sano janea vio dam̃ariga na, p̃eli na maka ve naio?”
JOH 9:9 Mia nalo tealo aberinavo “Nao, naio ga na,” a tealo aber “Ee, toro dolu ga na napano midu mirano,” mia toro nene naio ga berial meravo banlo, berinavo “Kiniou nene nei.”
JOH 9:10 Mia bogo napano berial naio banlo jibe na, ana abika denio, aberinavo “Jum̃abe ana miramo bo bereio jibe na?”
JOH 9:11 Mia naio berdop̃elo, berinavo “Toro m̃a na Yesu, naio naruei mim̃aukanio. Naio mila kitkiti bulukinia telisu ea titinio, naio miaia jeleig miraku, ana naio berenio navatove ea uei na Sailomo, nesekonio bulag den miraku bereio. Mia nemila ga jibe na, nabatove, nejekon miraku, namial jibe ka tinia miraku bo naruei.”
JOH 9:12 Ana nalo abika Yesu denio, aberinavo “?Mia toro nene naio jo be vonganei?” Naio berdop̃elo berinavo “Maka nejikia, maka bunu naialio.”
JOH 9:13 Ana iorou, aburu toro neibano beamu mirano bono ba ban Varisis nalo ka amijikia aialio.
JOH 9:14 Aburu naio ba jibe na bior napano legiano napano Yesu milarur toro neibano mirano eaio, naio be Legiano Lu tai, mia nalo aberinavo p̃eli Yesu mila im̃auano tai napano tuboiano na legiano nei naio berbureio.
JOH 9:15 Telikiti napano abinimei aberial ka Varisis nalo, abika den toro nene, aberinavo “Mo, jau kija kala vonio ka kover jum̃abe ana miramo binimei bo.” Ana naio ber ga jibe nei, naio berinavo “Maka, toro nene bijan bulukinia melmeloko telisu ea miraku, avona bisi ana nabano nejekon bulagio bereio ga, ana kiniou nemijikia nemial vite nonovio bo.”
JOH 9:16 Telikiti na Varisis nalo amijogio, tealo aberinavo “Toro nam̃a mila tena, naio mila jibe na naio maka rialerinio ea tuboiano na Legiano Lu. Jibe na naio maka taluvo den Atua rimei.” Mia tealo dolu aberenio aberinavo “P̃eli ga, ver be riano ka naio be toro va tai napano mila korov tuboiano, jum̃abe ana naio mijikia mila burutomoluo novo nalo jibe na?” Ana nalo aberii jibe na bano-o, mila na ajua jidomiano juo biorio.
JOH 9:17 Ana nalo abika bereio den toro nei napano beamu naio mirano miunu, aberinavo “?Ana jau, jau na naruei napano naio mim̃auka miramo, mia jau kover venia tivelinio ea toro neibano?” Naruei naio berdop̃e memedu ga banlo, berinavo “Naio be naverialiano riano tai.”
JOH 9:18 Naio ber jibe na, mia tomu nalo na tortoru na Ju nalo maka amonmonea veriiano na, maka amonmonea ka beamu toro na mirano bono, vonganei naio mijikia jirarag. Karina abio karam̃ano a kenieno abe juo ka amei aialo.
JOH 9:19 Telikiti naljuo abinimei, abika denlo, aberinavo “Kuvitii vatitig toro na vonio. ?Nina be kenerimiu memedu, napano aberinavo naio miyotuba naio be merebono, p̃eli na maka ve naio? ?A ver be naio, jum̃abe ana mirano binimei bo bereio jibe na?”
JOH 9:20 Naruei aberdop̃e, aberinavo “Kumemi numijikia ka naio be kenerimemi, numijikia ka bogo napano nubario binimei bokar vonganei, naio be merebono batitigio.
JOH 9:21 Mia kumemi maka nuvijikia jum̃abe ana naio mijikia mial vite nalo vonganei, kumemi maka numijikia keinia napano mila mirano binimei bo bereio jibe na. Mia bo ka kamiu ga kuvika vonio, naio maka ve tete na, naio mijikia mil.”
JOH 9:22 Tom juo na amil jibe na, ajuvan kija ga kialo jidomiano, bior ka napano tomu na tortoru na kulo Ju nalo aberiio ruei aberial ka toro kei napano naio rimonea ka Yesu be Naverikariano, mia avukular naio tusolo re bunu ea Atua kunuano lu.
JOH 9:23 Aberial jibe na, na tomjuo nei amerou, mila aberinavo maka ajikia ga, aberinavo “Bo ka kamiu kuvika naio ga, naio maka ve tete na.”
JOH 9:24 Ana vaarakurano bereio, abio bere merebono nei nua naio binimei joomo keanlo. Naio ba joomo naruei amil jikili banio, aberinavo “Jau kover Atua na mave siano, jau koverial vite nonovio na be riano ga van kumemi, bior vonganei kumemi numileal ruei ka kema na naio be toro kirivova na lakoroviano na tuboiano.”
JOH 9:25 Ana toro nei naio berdop̃elo, naio berinavo “Naio be toro na bo p̃eli maka ve toro na bo, kiniou maka nejikia. Vite takurano ga na kiniou nemijikia, jibe ka. Nua beamu, miraku bono batitigio, mia vonganei kiniou nemijikia nemial vatitig vite nonovio.”
JOH 9:26 Mo nalo abika aberinavo “?Mia ver tibe na, naio mim̃au kaso jum̃abe? ?Naio mila batitig miramo jum̃abe?”
JOH 9:27 Ana toro nei berdop̃e, berinavo “Kiniou neber bisivisii vatitig bo vite nonovio ban kamiu vaarakurano ruei, mia kamiu maka kuvisidom kuvijogio, ana vonganei kumisidom kuvijogio bereio. ?Kar venia? ?P̃eli tiniemiu jii ka kamiu bunu kumei kuve kiano naiagagoano nalo na?”
JOH 9:28 Naio ber jibe na, jibe ka naio miyotel ealo kija telisu, mia nalo tiniel jer m̃elea naio, amil jikili banio, aberinavo “!A! Jau ga kove kiano naiagagoano, kumemi nube naiagagoano nalo na tormoruo lu Mosis kiano.
JOH 9:29 Mosis nei, kumemi numijikia batitigio bo ka be riano ka Atua berial kiano iliano nalo banio, mia tivelinio ka toro dolu na, kumemi maka nuvijikia naio, ka naio be toro na vio be p̃eli na naio binimei jum̃abe.”
JOH 9:30 Naruei toro nei naio berdop̃e, naio berinavo “!Tomnei, kiniou nemiilo va ka kamiu ka napano maka kuvijikia naio! Naio jom̃a mila burum̃ara im̃auano nalo jibe na, banbano-o na naio mila batitig miraku, mia kamiu maka kuvijikia ka naio be kei p̃eli na naio be toro re be.
JOH 9:31 Kito romijikia ka ver toro va naio rivio van Atua, mia Atua maka rijikia riagago kanio, mia ver toro na be toro nam̃a milotu ka naio a napano jom̃a mijogkario, ver naio rivio naio, mia naio riagago kanio.
JOH 9:32 Mia toro nene, Atua jom̃a miagago ka naio, bior jikar ea tikariano na yetemeriba nei binimei bokar vonganei, maka lele aial toro tai rilarur bereio toro napano naio miyotuba mirano bono.
JOH 9:33 Kema na naio monoka jaluvo ea Atua ga binimei ea vio nei, ver p̃eli naio rijikia re rila vite tai leleio tibe na.”
JOH 9:34 Mia maka lele asaaro ka napano toro nei mil banlo jibe nei, aberinavo “Tomnei, jau, jau toro kiriniagiago laka. Jau komiyotuba bija bajago na kariano ga, binimei bokar vonganei. ?Mia jau kobe kei koberiam̃a komijikia koverloglog kumemi bereio, ee kamali?” Amil niegeniege naio banbano-o na, amijil lar naio batavio bereio.
JOH 9:35 Mia maka vesiou Yesu naio mijog ka napano amijil lar tete nei jibe na, mia ba milealio, bika denio, berinavo “?Jum̃abe? ?Vonganei jau komonea Kulorinio Kenerinio ruei p̃eli makan vo?”
JOH 9:36 Mia toro nei naio bika den Yesu, naio berinavo “?Ana naina kober na, naio be kei? Ver jau komijikia koverialio ka kiniou, mia nemijikia nomonea naio ga.”
JOH 9:37 Ana Yesu berdop̃e, naio berinavo “Jau komial naio ruei, jau komial naio vonganei. Kiniou ga nene nei, nam̃a nojo nemil bijaso nei.”
JOH 9:38 Ana naio berdop̃e, berinavo “Aiou Tubo, ver tibe na, kiniou nomoneaso vodolu.” Ana toro nei jidel dolu ka miaia Yesu.
JOH 9:39 Ana na Yesu mil, berinavo “Kiniou nebinimei ea yetemeriba nei ka nevitii tomu nalo, ka rila meravo ka tomu nalo nam̃a abe merebono, amijikia aial vite, a ka tomu nalo nam̃a aberiam̃a amijikia amial vite, ajikia ka abe merebono ga.”
JOH 9:40 Mia Varisis tealo aju vaataro ga, amijog iliano nei, abika den naio aber “?Ana jau kober kumemi bunu nube merebono a?”
JOH 9:41 Ana Yesu berdop̃e, berinavo “Ver ve riano ka kamiu kuve merebono naio bo ga, kamiu kuvijikia re kuvar vironiano riviorio. Mia bogo napano kumitum̃a kuberinavo kamiu kumijikia kumial batitigio vite nonovio, burum̃ara beleano na joa kamiu ruei.”
JOH 10:1 Ana Yesu naio mil lie vo, naio berii jamerijiano tai banlo, ka tivelinio na burusio na nunu, napano ajum̃a amim̃au vei ka napano mia nunu na tomu ve telabo kialo amijikia atu amon jouro eaio. Naio berenio jibe nei, berinavo “Kiniou neber be riano ka kamiu, ka toro nam̃a maka selia morouo ka riva jouro ea burusio na nunu nalo, mia naio mijaloa burusio, toro na jibe na naio be toro va na vinauano ga.
JOH 10:2 Mia naio napano m̃a jeljel ea morouo nam̃ariga memedu, naio naruei be toro na be riano na bitikar nunu.
JOH 10:3 Ver adu toro tai to ka m̃a riviti kuku ka morouo, mia bogo na toro na bitikar nunu rimei, mia morouo mijikia rivetavo ga ka naio, mia bogo napano naio ba jouro, nunu nonovio abiniu amijog joono, mia naio bio nalo na ga abe kiano sialo, mia nalo nei ga ajumolu, naruei naio jukamu kalo abava tavio.
JOH 10:4 Telikiti napano naio jukamu kalo abatavio bisi, naio miel jukamu kalo, ana nalo amiel iorou ka naio abano, bior ka napano amijikia vatitig joa na joono.
JOH 10:5 Nalo maka ajikia ala tibe na ka valauo tai, mia nalo amerou ga kanio, bior napano amijog lubar dede joa na toro dolu joono.”
JOH 10:6 Jamerijiano nei Yesu ber kalo, mia maka ajikia yati nene.
JOH 10:7 Jibe na, mia Yesu mil lie vo banlo ea tivelinio na burusio na nunu, naio berinavo “Kiniou neber riano ka kamiu, ka morouo na burusio na nunu nalo, kiniou nene nei.
JOH 10:8 Kulo dolu nam̃a abinimei jukamu ka kiniou, nam̃a amila sibi aber mia avitikar vatitig nunu nalo, abe tomu kirivova na vinauano ga, a bogo nam̃a aba amiyotuba ka nunu nalo, nunu nalo maka ajogilo.
JOH 10:9 Kiniou ga nebe morouo na burusio, toro na rimei selia kiniou ga, mia kiniou nevitikar vatitig kiano meuliano. Mia naio mijikia rivatavio ka sirago sano sinaniano, karina mijikia rimei rimon jouro ka bogiano, naio mijikia rimei rivan tibe na rivu ga.
JOH 10:10 Toro na vinauano naio binimei ka rivuru bulag bena nunu, p̃eli na rue binvinlo am̃arm̃aro, p̃eli na ka rila lelanlo ve toru ga, mia kiniou nebinimei ka ajikia avokar meuliano, ka amijikia asaaro ka meuliano tai napano rivu laka rivanlo.”
JOH 10:11 A Yesu ber bunu, naio berinavo “Kiniou nebe toro na vitikariano na bo na nunu nalo. Toro na bitikar batitig nunu nalo, naio monoka saaro ka rijamo ka kiano meuliano ka rilarur nunu nalo kialo meuliano.
JOH 10:12 Ver toro na im̃auano ga tai, naio maka rijikia rivitikar rivu nunu nalo tibe na, naio maka tinien tiilo tibe na, bior maka ave kiano nunu nalo. Ver bogo tai naio rial burum̃ara kuli deden amei rivior nunu nalo nei, mia naio rimerou ga, naio tumolu rivuro, naio tuvan nunu nalo atubo ga, naruei mia kuli deden nalo nene abinimei ajer lo ana amlabulag lo, ana amjilo aburo aba dedade.
JOH 10:13 Toro nei buro den nunu nalo jibe na, bior naio be toro tai napano mim̃auka kiano veru ga, mia naio maka rialerinio ea nunu nalo leleio.
JOH 10:14 “Mia kiniou, nebe toro na nabitikar batitig bo kiaku nunu nalo. Kiniou nemijikia batitig bo nalo napano abe kiaku, a nalo bunu amijikia batitig kiniou bo.
JOH 10:15 Kumemi numijikia batitig kumemi javukia napano kumemi juo Teta numisidom batitig kumemi juo bo. A kiniou tinieku jii kiaku nunu nalo bare ka najamo ka kiaku meuliano riviorlo.
JOH 10:16 A kiaku nunu dolu nalo miroano napano aju bunu, napano maka amei atu jouro ea kiaku burusio nei vo, naruei kiniou monoka novio nalo bunu, mia bogo na ajog jooku, mia amei. Mia kiniou nala tibe na-o mia kiaku nunu aviniu amei ave burukuti ve takurano ga vija kiniou, kialo toro na vitikariano na toru nene.
JOH 10:17 “Rivano-o mia kiniou najamo ka kiaku meuliano riviorlo, naruei mia karam̃aku naio saaro ve toru ka kiniou kanio. Mia nemijikia never bunu ka kiaku meuliano nei napano ver nesian rivano, mia nodu bereio.
JOH 10:18 Vere toro dolu tai napano mia rudular kiaku meuliano nei den kiniou, mia kiniou ga takurano nemijamo kanio. Be kiaku ga nesian rivano, a be kiaku ga ka mia nodu bere rimei. Ka noim̃au tibe na, Teta ga mije monea kiniou.”
JOH 10:19 Ana bogo tai bereio, Yesu kiano iliano na jibe nei mila na kulo Ju nalo aburuburelo ea jidomiano juo bereio.
JOH 10:20 Telabo kalo aberinavo “Sim̃aroba ga joa naio, kema na miavovu tanea na! Kuviagago ka re naio!”
JOH 10:21 A tivelinio dolu aberinavo “Makanio, kiano iliano na bo nalo na maka ave iliano na toro napano sim̃aroba toa naio. ?A mia tum̃abe, mia sim̃aroba naio mijikia rilarur merebono binimei rivu bereio jibe ka napano naio mila ruei na?”
JOH 10:22 Ana ea bogo na be bogo na jokoluolu na toru bereio, mave yako Yerusalemo. Jokoluolu nei abio ka Jokoluolu na Aioko Vatitig Atua Kunuano Lu, a ajum̃a amilaio ea bogo na niavo.
JOH 10:23 Yesu bunu ba joa jokoluolu nene, ana bogo tai miel ban ea burum̃ara m̃arsup̃iki nei nam̃a abio ka Solomon kiano M̃arsup̃iki.
JOH 10:24 Naruei tomu na tortoru nalo na kulo Ju napano aju, abinimei amivonlo jeliviv ea naio, abika jikili denio, aberinavo “Bogo jiou ruei kumemi numisidom nuvijikia vatitigso ka jau kobe kei, mia jau komila lukuaso ka kumemi mia! Ver jau kobe kenememi Naverikariano riano, kumemi numisidom ka jau monoka koverial vatitig rimeravo rivu van kumemi vonganei.”
JOH 10:25 Ana Yesu berdop̃e, naio berinavo “?Ana kiniou neber batitig bo ban kamiu ruei, p̃eli na makanio? Kiniou neber ka kamiu ruei mia maka kumonea ga. A burum̃ara im̃auano nalo napano m̃a nemilaio ea karam̃aku siano, jibe ka napano kamiu kumitum̃a kumialio ruei, nalo bunu abisikon kiniou jo medave bo ka kamiu,
JOH 10:26 mia naina bunu kamiu maka kumoneaio. P̃eli nina bior kamiu maka kuve burukuti na kiaku nunu nalo.
JOH 10:27 Kiaku nunu nalo amijog lubar jooa na jooku, a kiniou nemijikia batitiglo abiniu, a nalo ajum̃a ajakisor kiniou.
JOH 10:28 Kiniou nojom̃a nejian meuliano nei napano maka ve jukuti nene banlo, ka mia ava kovio deio, a ve re toro tai napano mijikia rivuru bulaglo den jum̃aku.
JOH 10:29 Nina bior napano karam̃aku naruei napano naio jianilo ban kiniou, a naio jikili lie jovulu tomu dolu nalo nonovio, mia maka ve toro tai napano rijikia rivuru bulagio nunu nalo nei den jum̃ano.
JOH 10:30 Nao-o, kiniou bija Teta kumemi juo nube takurano.”
JOH 10:31 Mia bogo napano Yesu ber iliano nei bisi, ana tomu na tortoru na kulo Ju nalo tiniel jer naio bereio, abar puruveru ninio ga ajidom atuba ka naio rim̃aro.
JOH 10:32 Yesu mialio, ana mil banlo, bika ber “?Kiniou namila burum̃ara im̃auano telabo na bo na Teta naio jidomio ka nala ea miremiu ruei, ana kamiu kumisidom kuvituba kiniou tibe na bior na vabe kalo?”
JOH 10:33 Ana nalo aberdop̃e, aberinavo “Maka, kumemi nuvisidom nuvitubaso, maka rivior im̃auano na bo tai, mia bior napano jau kojom̃a komila niegeniege laka ka Atua siano lu, ka napano jau, kobe toro ga, mia dam̃ariga kojom̃a komila von ka kalaso kotibe ka Atua garuei.”
JOH 10:34 Ana Yesu berdop̃e, naio berinavo “Ea kiado Niosi Lu, Atua kiano iliano tai joa Niosi na Iouano, napano naio mil ban kulo Israel, naio berii jum̃abe abe kenerinio, ana naio mil jibe na banlo, naio berinavo ‘Kamiu kumitibe ka atua nalo ga.’
JOH 10:35 “Tibe na, ea vio nei kito romial napano nalo napano Atua kiano iliano nene ban ealo, abe kulorinio ga nalo, mia iliano nei berinavo nalo abe atua nalo, a iliano nene naio be kiado vivitauiano lu tai, naio monoka ve riano ga.
JOH 10:36 Atua naio berii kiano tomu nalo jibe nei ruei, ana mia jum̃abe ka kiniou, napano kiniou ga takurano naio mioa kiniou miila kiniou nebinimei ea yetemeriba nei? Memedu ga ka neverenio ka naio be Atua karam̃aku, a kiniou nebe kenerinio, a mia kamiu kuber maka rivu ka naber jibe nei. Mia kamiu kuber nojom̃a namila niege Atua siano lu, mia maka tibe na.
JOH 10:37 Ver be riano ka kiniou nojom̃a nomim̃au maka ve karam̃aku kiano, mo, kamiu kumonea re ana bo ga.
JOH 10:38 Mia ver kiniou notom̃a nala kiano im̃auano nalo, p̃eli mia kumonea kiniou p̃eli na kamiu kumonea re kiniou, mia kamiu monoka kumonea kiaku burutomoluo nalo, ka abe Atua kiano burutomoluo riano. Ver tibe na, mia kamiu kuvijikia kuvitilubar ka Teta naio joa kiniou be riano, a kiniou nojoa naio.”
JOH 10:39 Yesu naio ber jibe na kalo, mia kialo jidomiano nalo kirisikili bare dam̃ariga. Amila von ka avokar sikili naio bereio, mia amiilo ka napano naio jaluvo iviso denlo bano.
JOH 10:40 Naruei Yesu naio jaluvo Yerusalemo, barkor uei na Yortano nei ba tivelinio ea vio nanua Jone Baruei naio baruei ea tomu nalo. Naruei Yesu joa vio na kirisiou kija,
JOH 10:41 mia tomu nalo ajum̃a abinimei ka naio dam̃ariga. Abinimei, aberii Yesu aberinavo “Jone nanua na naio maka rila burutomoluo tavukia nam̃a kema nei naio jom̃a milaio, mia naio jom̃a berial vite telabo ea tivelinio na naio, naruei kito rojum̃a romial ka mirado ka napano vite nonovio napano naio berenio na ajum̃a abinimei be riano ga.”
JOH 10:42 Naruei kialo jidomiano jibe na mila napano nalo telabo ea vio nei amonea Yesu.
JOH 11:1 Mia bogo napano Yesu naio jo laka kia ga vo, mieiano na jikili tai binimei bokar kiano bilbilu tai, napano naio be Lasaros. Naina be Lasaros napano kuviviniene juo be Mere naio Marita, a nalo tolu nei tena komeli na telisu na Betani vaataro ka Yerusalemo.
JOH 11:2 A Mere nei bunu napano iorou, naio miyon bonotanunu ea Yesu, naio miolkon jaano nalo ka vijinio.
JOH 11:3 Mia bogo napano kuviviniene juo nei amial ka kum̃anelo na m̃aro naio mie toru jibe na, amiila toru ka Yesu, aberinavo “Tubo, kiamo bilbilu m̃a na jau tiniemo eaio, naio mie laka.”
JOH 11:4 Ana bogo na iliano nei binimei bokar Yesu, naio maka rivano, mia naio ber ga, berinavo “Kiano mieiano na maka ve tena m̃ariano, mia mieiano na naio jibe Atua kiano m̃arabo tai ga, ka naio riverial kiano mermerano, a ka riverial kiano burum̃ara moroano na jian ban kiniou Atua Kenerinio.” Yesu naio ber iliano na, jibe na ka naio mijikia vite na mia naio rilaio.
JOH 11:5 Yesu tinien jii Marita toru laka bija kulueno na telisu a kum̃anelo nei, a naio mijog bova toru kalo, mia maka rimonloglog bogo na tenei vo.
JOH 11:6 Jibe na, mia naio maka rivan vo, naio jo bere legiano juo ea vio nei ea marauei na Yortano tivelinio bano.
JOH 11:7 Naio jo bere bogoti juo jibe na, bisi ana naio ber ka kumemi kiano naiagagoano nalo, naio berinavo “Kito m̃a, ravarkor ravan bere ea tanobuku na Yortano.”
JOH 11:8 Mia kumemi numitu tiniememi maio ka kia ga vo nanua tom na tortoru na kulo Ju nalo na ea tanobuku nei tiniel jer m̃elea Yesu, mila na numerou ka nuvan bereio. Naruei nubika den Yesu, nuberinavo “?Naverloglogiano, jum̃abe? Vonganei ga napano kito roju yako, kulo Ju nalo amila vio toru laka ka ajidom atubabinso kam̃aro, mia vonganei ana jau koberinavo mia kito ravan bereio.”
JOH 11:9 Ana Yesu naio ber ka kumemi naio berinavo “Kiaku verdop̃eiano ban kamiu naio jibe nei: Ea legiano, ea aura duelimo ba juo nene, burum̃ara inio mereralii vio, mila na toro mijikia miel bo, maka tom̃a rijorjoru taatei.
JOH 11:10 Mia toro napano mila von ka riel ea melijokouo bogiano, mia naio to rijorjoru, bior napano inio nene maka bunu mereralii kiano m̃arabo.”
JOH 11:11 Yesu naio ber iliano nei ban kumemi, berial ka naio mijikia riel rivu ga, maka jikia vite tai na bova eaio, vano-o vokar bogo na Atua berkar ruei ka mia ajikia auebinio. Naruei naio jusol bereio, berinavo “Kiado bilbilu neibano naio monmelio ruei. Vonganei, kito ravan ka novio bonio.”
JOH 11:12 Mia kumemi naiagagoano nalo maka nuvijikia lubar nioti na iliano nei, naruei nuberinavo “Tubo, ver naio monmelio ga, nina bo ga na, mia naio rijog rivu bereio ga.”
JOH 11:13 Nuber jibe na bior ka napano numitu nuberiam̃a Yesu naio ber ka Lasaros naio mijilimebi ga, mia Yesu naio ber Lasaros kiano m̃ariano.
JOH 11:14 Naruei Yesu berial meravo ban kumemi, naio berinavo “Lasaros naio m̃aro ruei,
JOH 11:15 bior bogo na naio mie, maka noto vijalo. Mia jibe na kiniou nemial mia rivu ga, p̃eli rivu lie van kamiu, bior kiano m̃ariano na mia rimei tibe ka kenemiu buluvio tai, ka kuvijikia kumonea kiniou ve riano. Mo, kito ravan eaio.”
JOH 11:16 Mia kumemi naiagagoano nalo numitum̃a numerou ka nuvano, naruei Tomas m̃a na abio naio ka Tomas Savoro, naio ber ka kumemi, naio berinavo “Kamiu kuvitumolu, kito roviniu ravano, kiado Tubo naio jidom riva rim̃aro tibe na, bo ka kito roviniu ravano, ram̃aro vaarakurano kitoliko naio.”
JOH 11:17 Naruei kumemi nubiniu numiel nubano, nubano numiyotuba ea komeli telisu na Betani. Ana aberial ban Yesu ka amidu Lasaros taati monea buluvae bogoti ver barlaka ruei.
JOH 11:18 Mia komeli nei Betani naio jo vaataro ga ka komeli labo nei Yerusalemo, titai jibe ka kilometa tolu ga,
JOH 11:19 mila na kulo Ju nalo na Yerusalemo nalo telabo, bogo na amijog m̃ariano nei, tiniel miia Marita naljuo Mere toru, naruei abinimei ka ateg naio vijalo.
JOH 11:20 Mia Marita naio jo naliko, ana amiila toru binimei ban naio aber Yesu binimei joa m̃arabo ruei, naruei naio jumolu ban ka rivan jum̃ano naljuo naio. Mia kuluene neibano telisu Mere naio jo joomo ga ea yimo, a naio maka rivatavio.
JOH 11:21 Mo Marita, naio binimei mial Yesu, naio berkanio, berinavo “!Kanaku Tubo liki, ver jau komei ea vio nei ga, mia kum̃anememi riva kovio re na!
JOH 11:22 Mia kiniou nomonea ka be kurano ka napano naio m̃aro, mia venia na ver jau kovika den Atua, mia naio rijamo ka ga vanso.”
JOH 11:23 Ana Yesu berkanio, berinavo “Marita, mia kum̃anemo naio tumolu rimeul bereio na.”
JOH 11:24 Naruei Marita berdop̃eio berinavo “Ee, kiniou nemijikia nina, nemijikia ka mia rimeul bereio ea burum̃ara tumoluano bereio ea legiano na maaro.”
JOH 11:25 Ana Yesu berial iliano nei kanio, naio berinavo “Kiniou nebe m̃arabo na tumoluano bereio, kiniou nebe burupati na meuliano. Toro na rimonea kiniou, buriakurano naio monoka rim̃aro ea yetemeriba nei, mia naio rimeul bereio.
JOH 11:26 Toro napano rivokar meuliano nei, a viekouoiano ea kiniou toa naio, naio mia rivokar re m̃ariano bogo tai. ?Marita, jau komonea jibe na a?”
JOH 11:27 Ana naio berdop̃e, berinavo “Aiou, Tubo, nomonea. Kiniou nomoneaso, ka jau kobe Naverikariano, jau kobe Atua kenerinio, jau kobe naio nam̃a aber jikar beamu ruei ka mia rimei rilarur tomu nalo na yetemeriba nei.”
JOH 11:28 Telikiti na Marita ber jibe nei ka Yesu avona bisi, ana naio milivi joomo bereio, ban ka kuluene nei Mere, mijuvaluva banio, berinavo “Naverloglogiano nene, naio binimei ruei, naio joa m̃arabo yako, naio jidom rialso beamu vo.”
JOH 11:29 Mere mijogio, naruei jumolu vaarakurano, jidom ka rivatove ka rial Yesu,
JOH 11:30 nina rove ea m̃arabo napano Marita mial naio ruei eaio, bior ka napano naio maka rimei jouro ea komeli vo.
JOH 11:31 Mia kulo Ju nalo napano aju bija Mere joomo amial ka naio jumolu sop̃eli jibe na batavio, naruei be tinielo ka naio jidom riva teg bereio ea buluvae, naruei nalo bunu ajumolu ajakisorio.
JOH 11:32 Ana Mere naio miel binimei bokar vio na Yesu joaio. Ana bitikario, binimei vaataro kanio, buku naio mijoru ea jaano, jegi banio, berinavo “!Tubo, ver jau komei ea vio nei ga, mia kum̃aneku riva kovio re na!”
JOH 11:33 Mia naio jom̃a jegi jibe na, a kulo Ju dolu nalo napano m̃a ajakisorio, nalo bunu abinimei ajum̃a ajegi. Mia telikiti napano Yesu naio mial Mere nalo kialo burum̃ara jogvaiano nei, naio bunu mijog bova, mijog tenei jibe ka temi laka ea kiano iviso,
JOH 11:34 ana naio bika denlo, berinavo “?Kamiu kumidu naio mon be?” Ana nalo aberinavo “Tubo, jau komei rava raialio.”
JOH 11:35 Mia Yesu mijogio jibe na, mila jogumirano jibirbili.
JOH 11:36 Mia nalo amial ka naio jegi jibe na, tealo aberinavo “!Ierinio, naio tinien jii tanea kiano bilbilu nei, naruei naio tinien miiaio mia tinienmiiaio!”
JOH 11:37 Mia tealo dolu nalo, aju abivika denlo, aberinavo “Toro na naruei nanua beamu naio mila na merebono mirano binimei bo bereio. P̃eli verenio naio sidom, naio mijikia rila ka napano kiano bilbilu naio maka rijikia rivakovio ga p̃eli?”
JOH 11:38 Mia Yesu naio miel ban bija burum̃ara jogvaiano nei, naliko Mere nalo aba amiyotuba ea buluvae napano Lasaros taati mon eaio. Bulukuveru nei naio be buluvae tai, napano amidu burum̃ara puruveru tai joko buluku tavo nene.
JOH 11:39 Ana Yesu naio berinavo atubonlar puruveru na toru nei. Mia Marita naio mijog Yesu ber atubonlar puruveru, mia naio jidom riverbureio, ber kanio, berinavo “Tubo, maka rivu ka rala tibe na, bior naio m̃aro bogoti ver barlaka ruei, mia bonoti rivova laka na.”
JOH 11:40 Ana Yesu berdop̃e banio, berinavo “?Ee, jau maka koto tiniemo rimaio vo ka kiaku iliano nei napano neber ka jau ruei? Kiniou neber ka ver jau komonea ga, mia keial moroano na Atua kiano naio rim̃au.”
JOH 11:41 Ana ajidel ka ga, ajubonlar burum̃ara puruveru nei, bisi ana na Yesu naio jirarag bavin mave, naio bolkouo, berinavo “Teta, kiniou neber siva toru banso ka napano jau kajaaro ka m̃a komijog kanaku valeiano nei.
JOH 11:42 Kiniou nemijikia ka venia napano ver kiniou nesidom nevika denso, mia jau kojogio ga. A vite nei mia kiniou nevika denso vonganei, nebika ea tomu nalo nei ajumol aju miralo, ka nalo bunu ajikia ajogio. Naruei ver aial ka napano mia jau koverdop̃e rivan kiniou tibe ka na nobikanio, mia rijikia riijailo ka amonea ka be riano ka napano jau naruei komiila kiniou nebinimei ea yetemeriba nei.”
JOH 11:43 Mia telikiti napano Yesu bolkouo bisi jibe na, ana naio bio jikili jibe na ba ban naio berinavo “Lasaros, jau kotumolu komei tavio.”
JOH 11:44 Naruei amiilo ka napano toro na m̃aro nei naio jumolu miel binimei tavio, bija kulum̃arauo napano abiviko ka naio, napano m̃a ajum̃a ajarakii lele gorogoro ea jum̃ano a jaano a parinio kia ga vo. Naruei Yesu naio ber kalo berinavo “Mo, kamiu kuvijubar bulag kulum̃arauo nalo nei denio, ka mia mijikia riel rivu bereio.” Ana nalo amilaio, naruei Lasaros naio meul bo naio jo naliko bereio.
JOH 11:45 Mia kulo Ju nalo telabo napano ajakisor Mere abinimei ea bulukuti puruveru nei, telikiti napano amial ka napano Yesu naio mila Lasaros meul bereio jibe na, amonea batitig naio bo.
JOH 11:46 Mia nalo tealo maka amoneaio, aban bereio, aba amial Varisis nalo, aberial kalo ka venia napano Yesu milaio.
JOH 11:47 Ana telikiti na amijogio, maka lele asaaro kanio, naruei nalo bija tomu na tortoru na kulo lu nalo, abio nalo dolu na burum̃ara komeli na kulo Ju abinimei vio takurano. Naruei telikiti napano abinimei vio takurano bisi, aberial kalo aberinavo “?Mia kito rala venia ka toro nei naruei? Naio jom̃a mim̃auka burutomoluo na tortoru telabo janea vio ea kiado tomu nalo miralo.
JOH 11:48 Ver kito roverbure re naio, mia naio rila tibe na rivano-o mia ve re tai napano mia rimonea naio, mia naio rivuru nonovlo atakisor naio ga. A ver nalo na mira na vio Romo aial tete na naio jom̃a mila von ka rila naio rimei rive navurim̃araboiano na toru tai tibe na, mia ala siniabu ka kito kulo Ju roviniu. Mia amei ala mira ka kito-o mia auelar kiado taara kito roviniu vija kiado Atua kunuano lu.”
JOH 11:49 Ajum̃a aber jibe na, mia kialo navurim̃araboiano na toru nei Kaivas, napano ka yuka nei naio bokar sio na Parinio Toro Lu, naio ber kalo, berinavo “?Tomnei, bior venia ana kube vovu jibe na, ka napano maka bunu kuvijikia ka mia kito rala venia ka toro na?
JOH 11:50 ?Venia naio bo ka kamiu? Bo ka napano toro na ve takurano rila kito roviniu rava kovio, p̃eli na bo ka naio ga ve takurano rim̃aro ka rilarur meuliano na kiado taara roviniu?”
JOH 11:51 Mia ea bogo napano naio ber iliano nei, beriam̃a jom̃a berial kiano jidomiano ga. Atua mila naio bokar im̃auano na Parinio Toro Lu ka bogo na, mia Atua kiaga vo naio midu iliano nei joa kiano jidomiano ka naio riverial ilirianiano tai, ka ver Yesu naio monoka rim̃aro ka rilarur tomu nalo kialo meuliano aviniu.
JOH 11:52 Naio maka rijikia, mia naio jo berial ka iorou kanio, telikiti napano mia Yesu naio rim̃aro, mia naio maka rim̃aro rivior taara na kulo Ju nei ga, mia kiano m̃ariano nei naio kario Atua kenerinio dolu nalo napano aju janea buruvenuo dolu bunu, ka mia rivuru birovironlo aviniu amei ave m̃aratavo ve takurano.
JOH 11:53 Mia ea bogo na, Kaivas naio berial iliano nei, naio buru tomu na tortoru na kulo Ju nalo kialo jidomiano nonovio naruei, ka Yesu monoka rim̃aro ga. A jikar ea bogo na, ajum̃a aberii dam̃ariga, ka mia ajikia ala tum̃abe.
JOH 11:54 Mia kialo jidomiano nei mila na Yesu maka bunu rijikia rieliel iviso ka tomu nalo na tanobuku nalo nei na Yutea, ana naio buru bulag kumemi nubano numitua komeli na telisu tai, siano Ivraem, napano naio jo yako ea tanobuku napano vaataro ka vio teauo.
JOH 11:55 Naruei be vaataro ka bogo na jokoluolu na kulo Ju nalo kialo, napano be Jokoluolu na Sidomkariano na Ioruriano. Ana kulo Ju nalo napano ajua tanobuku dolu ninio, ajum̃a ajuvan kialo vio nalo abavin Yerusalemo, ajidom avan ea Atua kunuano Lu, amila sida na meravoiano nalo ka mia ajikia ameravo ea Atua mirano beamu vo, karina jokoluolu naio tikario.
JOH 11:56 Telikiti napano tomu nalo nei ajum̃a abavin ea Yimo Lu, ajum̃a amila von ka ajirag Yesu-o mia maka alealio. Ana ajum̃a abivika denlo, aberinavo “?Ee, kamiu kuber venia? ?Mia ver naio riyotuba ea jokoluolu nei, p̃eli na naio rimei re?”
JOH 11:57 Naruei parinio kulo lu nalo bija Varisis nalo, nalo bunu ajum̃a ajidom ka p̃eli mia Yesu rilavon ka riyotuba ea bogo nei. Naruei nalo aberial jikili ka ver aial Yesu to kovio na, monoka ala iliano rimei ealo ka amijikia amei avokakar naio sikili.
JOH 12:1 Mia telikiti napano Jokoluolu na Sidomkariano na Ioruriano nei naio maka vo, bogoti ari ju, ana kumemi liko Yesu nubano nubokar bereio komeli na telisu nei Betani. Naruei nubano numiyotuba bereio ea Lasaros kiano vonuo, naio napano Yesu nanua mila meul bereio den m̃ariano maka vesiou ga.
JOH 12:2 Kumemi numitu bijalo jibe na bano-o, ana nalo nei aber ajidom ala Yesu sano sinaniano tai. Ana telikiti na amila batitig vite nalo biniu, kumemi nubinimei numitutano, Lasaros bunu jotano bija kumemi, naruei kuviviniene nei Marita naio jom̃a barvar simemi sinaniano binimei.
JOH 12:3 Naruei Lasaros kuviviniene dolu nei Mere, naio bunu jo, naruei naio midu burum̃ara pati bonotanunu tai binimei, napano jibe m̃aatei, napano kidi nene bavin laka. Mo naio miduio, naio binimei vaataro ka Yesu, naio mionio jelele Yesu jaano nalo. Karina Mere nene bar burutiltili vijinio, naio miolkon bereio, mia maka vesiou, bonoti bonotanunu novo nei janunu misono batitig vio joomo ea kunualo nei.
JOH 12:4 Ana ka bogo na, Yesu kiano naiagagoano napano iorou kanio ana naio jiveluku ka naio, Jutas na Kariot, naio bunu jo mial vite nei.
JOH 12:5 Naio berinavo “?Bior vaio ana maka aṽiliṽililar ka burum̃ara bonotanunu nei ga? Ver tibe na, amijikia avokar burum̃ara veru tai tibe ka veru na im̃auano na yuka ve takurano ka rijai talim̃asa nalo. !Mila kule ga na!”
JOH 12:6 Naio ber jibe na, mia naio maka sidomial talim̃asa nalo. Naio ber jibe na bior naio naruei jom̃a bitikar kenememi basaro na veru, a jom̃a bina kanio, jom̃a jen kenememi veru, mila naio be viti bunu ka veru na bonotanunu nei.
JOH 12:7 Mia Yesu berdop̃e venia napano Jutas berenio, naio berinavo “Ee, maka rivu ka jau keil niegeniege kuviviniedo tibe na. Naio mila jibe na ban kiniou bior napano naio jo jidom m̃elea ka napano bogoti na mia navan ea buluvae jo binimei vaataro laka naruei.
JOH 12:8 Mia ve talim̃asa nalo atu vija kamiu bogo nonovio, ka mia kamiu kumijikia kuvijailo tibe na, mia ka kiniou maka nejikia noto vija kamiu bogo nonovio, mia venia napano naio milaio ban kiniou vonganei naio bo bo laka mia.”
JOH 12:9 Ana maka vesiou, lilianiano naio ba bokar tomu nalo napano aju amidu bijiilo yako Yerusalemo bior jokoluolu, ka vonganei Yesu naio binimei jo Betani ruei. Mo nalo abatavio ka aialio, a maka ve naio ga, mia ajidom aial Lasaros bunu, nanua Yesu mila naio meul bereio den m̃ariano maka vesiou.
JOH 12:10 Tomu nalo aju aba amial Lasaros jibe na bisi, a venia napano Yesu mila banio mila napano nalo telabo kalo, ba bokar kulo lu na kulo Ju tealo, aburo ajuvan kialo navurim̃araboiano dolu nalo abinimei amonea Yesu. Ana ka tena, tomu na tortoru na kulo lu aberiio, abirokar ka mia aleal m̃arabo tai ka ajikia auebin Lasaros rim̃aro bo.
JOH 12:12 Mo Lasaros nalo amila Yesu sano sinaniano nei bisi, ana ka legiano dolu nene, iliano ba bokar burum̃ara tiniobi nei napano aju Yerusalemo bior jokoluolu, ka vonganei Yesu naio jo binimei ruei.
JOH 12:13 Mo tomu nalo amijogio, ana nalo ajumolu aba aje m̃am̃ali nalo, abarkakar ka jum̃alo nalo amiel abadigdig aba tavio ka aviviuo naio ko m̃arabo. Ajidom ka ala rivan naio tibe na ka napano naio rimei ve kialo parinio tubo, naruei nalo aba tavio jibe na, ajum̃a abiovio, aberinavo “!Bo mia bo laka! !Kito ravamenea naio, be kiado parinio tubo vou na Israel! !Atua sop̃i, jau keilivu ka naio napano binimei ea siamo!”
JOH 12:14 Ana Yesu naio jo miel binimei, naruei milalo aburu kirikiti togki tai binimei banio, ana naio jotano eaio miel binimei. Vite na napano naio mila na naio jakii memedu iliano na Iliano Lu tai napano berinavo
JOH 12:15 “Kamiu kulo Yerusalemo nalo, kamiu kumerou re bunu. Kuvialio, vonganei kenemiu parinio tubo naio jo binimei ea kamiu naruei. Naio joa kirikiti togki ga tai naio jo binimei.”
JOH 12:16 Ana ea telikiti na, kumemi naiagagoano na Yesu kiano, kumemi maka nuvisidomial iliano na, mia iorou, telikiti napano naio bavin mave bisi, kumemi nubitilubar ka iliano moruo re nua nei naio berial naio memedu, ka napano naio mila vite nonovio memedu ga ka venia nam̃a Vivitauiano Lu aberialio beamu ka mia Naverikariano naio rilaio.
JOH 12:17 Naruei tiniobi toru nei aju aborvorua Yesu jibe na. Nalo miroano napano naniovo ga aju bija naio telikiti na naio bio Lasaros meul bereio den m̃ariano, ana aba aberial burum̃ara burutomoluo nei ban nalo dolu nalo.
JOH 12:18 Mia telikiti napano kulo dolu nei amijog burutomoluo nam̃a Yesu milaio, nalo ajidom aial naio, naruei abinimei bunu ka ava aviviuo naio.
JOH 12:19 Ana nalo nonovio nei, abe burum̃ara tiniobi ruei, mia bogo napano Varisis nalo amialio, amijog bova, ajubar parilo, aberinavo “Kito romila vio ka kema nao-o mia bova ga. Naio jovulu batitig kito ga, naio buru yetemeriba vodolu ga ajakisor naio ruei kiana.”
JOH 12:20 Tomu nalo miroano nam̃a abavin Yerusalemo ka alotu ka Atua ka jokoluolu nam̃a, a nalo tealo maka ave Ju, nalo abe kulo Krik nam̃a amonea Atua javukia kulo Ju nalo.
JOH 12:21 Mia telikiti napano nalo nei ajum̃a amijogjog mugaruei sio nei Yesu, naruei ajidom aial naio. Naruei aba ajiragio, amileal kiano naiagagoano nei Vilip napano be tena Betsaeta yako Kalele, ana abika Yesu denio.
JOH 12:22 Ana Vilip ba berial ka Andru, karina naljuo aba aberial ka Yesu.
JOH 12:23 Ana bogo napano Yesu naio mijog ka napano nalo nei bunu napano maka ave kulo Ju ajidom aial naio, naio berial berinavo “Vonganei, be aura nene memedu ka Atua rila kiniou Kulorinio Kenerinio siaku rivavin.
JOH 12:24 Kiniou neber be riano ban kamiu, ka ver kurukuti tai, ver amebija re, mia naio ve takurano to kurano ga tibe na. Mia ver amebijaio, mia naio rimei menunu, mia karina mia naio rivar m̃arati ve telabo bereio.
JOH 12:25 Jibe nei, naio napano jidom m̃elea kiano meuliano na yetemeriba nei loa ka napano naio jidom kiniou, mia rila luvuio, mia naio nam̃a maka sidomial lele naio, mia naio to rivu ga rivano-o rivokar meuliano vou napano maka ve jukuti nene.
JOH 12:26 Toro Ju p̃eli na toro Krik nam̃a ber jidom rim̃au kiaku, jidom riija kiniou, naio monoka takisor kiniou dam̃ariga. Mo ver naio to takisor kiniou tibe na, mia vio vabe nam̃a nava notoa, mia naio bunu mijikia rivija kiniou. Toro nam̃a be kiaku naim̃auano, mia Atua sian sio na bo van naio.”
JOH 12:27 Mo Yesu naio jikar ka jidomii ka napano vesiou re, mia naio monoka rim̃aro, naruei naio mijog deio ea kiano iviso. Naruei naio berinavo “Vonganei, kiniou namijog jidomiano niukniuku joomo ea kiniou. ?Mia kiniou never venia rivan karam̃aku? ?Bo ka kiniou novolkouo, nevika den naio, neverinavo: Teta, aiou jau kovurular kiniou den aura na bogokouo nei? Mia maka rivu ka neber tibe na, bior kiniou nebinimei ea yetemeriba nei kar im̃auano nene ga na.
JOH 12:28 Makanio, mia kiniou neber jibe ga na, neberinavo: Teta, aiou jau kala siamo rimei ve toru riano ea venia napano mia ala ka kiniou.” Naruei telikiti napano Yesu naio ber iliano nei bisi, niono tai na mave mil batove berinavo “Kiniou nojo namila siaku bavin easo ruei, a mia kiniou nala bere navo.”
JOH 12:29 Ana tiniobi nalo napano m̃a aju vaataro amijog jooa na niono nene, mia nalo tealo aber nina be tubaal tai ga, a nalo tealo aber “Makanio, nailiano tai na mil banio.”
JOH 12:30 Naruei Yesu berial kalo, naio berinavo “Niono nei napano kito romijogio vonganei, naio maka rimei ka kiniou nejogio, mia naio binimei ka kamiu, ka kamiu kuvijikia ka kiniou nebinimei be.
JOH 12:31 Monoka tibe na bior ka napano vonganei be bogo na tibureiano na yetemeriba, be bogo na avukular parinio tubo sim̃aro na yetemeriba naruei.
JOH 12:32 Ka kiniou nala im̃auano na, mia monoka kiniou natakilele mave ea m̃akolkolo, mia bogo napano noto mave tibe na, nomijikia novuru nono tomu nalo aviniu amei ea kiniou.”
JOH 12:33 Ana Yesu kiano iliano nei, naio berenio ka rila rimei rimeravo vanlo ka kiano m̃ariano naio ve m̃ariano na jum̃abe.
JOH 12:34 Mia bogo na tiniobi nalo amijogio, aberinavo “Kumemi numitum̃a numijog ka nam̃a abuluku Vivitauiano Lu, ber ka mia Naverikariano mia naio rimeul toboto, mia rijikia re rim̃aro bogo tai. ?Tibe na, jum̃abe jau kojo kober ka mia atelan Kulorinio Kenerinio mave ka naio rim̃aro? ?Vede jau kojom̃a kober toro dolu tai ga kovio? ?Kei Kulorinio Kenerinio na nam̃a jau kojom̃a koberenio, kober ka mia tibe na kanio?”
JOH 12:35 Naruei Yesu berdop̃e banlo, naio berinavo “Kiniou nebe yulu na Atua kiano, na nomijikia noto lie vo vija kamiu bogo ve telisu bere vo. Mia bogo napano noto vija kamiu, bo ka kamiu kuvitum̃a kuviel ea miamoiano nene, ver p̃eli, mia melijokouo sovoko kamiu, a toro napano jom̃a mila von ka riel naio rijikia re bunu rivitilubar kiano m̃arabo.
JOH 12:36 Telikiti napano kiniou burupati na yulu nojo kia ga bija kamiu, bo kamiu kumonea kiniou, ka kuvijikia kumei kuve tomu na miamoiano.” Mia bogo na Yesu ber iliano nalo nei bisi, naio juvanlo aju, naio ba jo luku ea vio tai napano ajikia re amei bunu rivior naio eaio.
JOH 12:37 Yesu mim̃auka burutomoluo na tortoru telabo ea miralo ruei, mia be iakurano maka asidom amoneaio ga.
JOH 12:38 Kialo bajago na, amila bereio javukia ga nanua m̃a kulo moruo Ju re nua amila ka bogo na naverialiano Aisea, napano naio beriio ea kiano iliano juo. Tai naio ber jibe nei, berinavo “?Atua Sop̃i, kumemi numitum̃a nuber bulavulagio banlo, mia nalo maka asaaro ka amoneaio, a jau kobisip̃e moroano na jum̃amo banlo, mia kei kalo naio rivitilubario? Maka tai!”
JOH 12:39 Mia dolu nene, naio bunu ber kalo ka maka ajikia amoneaio, naio berinavo
JOH 12:40 “Atua jidel kalo banbano-o mia deio ga, ana naio mila miralo nalo abe merebono, naio mila kialo iviso nalo abinimei jikili laka. Mia miralo nalo ajikia re bunu aial vite, ana kialo iviso maka ajikia ajoglubarbar vite. Ver p̃eli, mia aviliglo amei bere ea kiniou ruei, ka mia kiniou neielielilo.”
JOH 12:41 Mia Aisea kiano iliano nei binimei ea naio, iorou ka napano naio mial miamoiano na Naverikariano joomo ea Atua Kunuano Lu, mia vonganei kito romial ka naio berii Yesu memedu, bija nalo na ea kiano bogo.
JOH 12:42 Mia jibe ka nam̃a iliano nei berenio, telabo maka amonea Yesu, mia tai amoneaio, ba bokar kialo navurim̃araboiano tealo. Naina bo, ana vite tai naio bova, ajum̃a amila vavanlo ka amoneaio, bior amerou ka Varisis nalo, amerou ka tibe m̃a na mia avuku bulaglo den kialo yimo na volkouano.
JOH 12:43 Nalo amerou jibe na bior napano maka bunu asidomii ka ala vite napano mia Atua rijikia saaro kalo riviorio, mia ajidom ga toru ka mia kulo dolu nalo aialo tum̃abe.
JOH 12:44 Ana Yesu naio berial burum̃ara ilimaariano tai ea kanano tomu nalo miralo, naio berinavo “Naio napano monea kiniou, maka rimonea kiniou ve takurano ga, mia jibe na naio monea kumemi juo naio napano miila kiniou nebinimei,
JOH 12:45 a naio napano jom̃a mial kiniou, jibe na naio jom̃a mial naio.
JOH 12:46 Kiniou nebinimei ea yetemeriba nei, jibe ka kanano yulu, ka rila ka napano toro kei na rimonea kiniou, mia naio toa re melijokouo.
JOH 12:47 Mia ver tealo ajog kanaku iliano, naruei nalo ajogkar re, p̃eli ver tealo ailkue ka kiniou maka asidom ajog kanaku verloglogiano, nalo na mia avar kanalo tibureiano nalo ea Legiano na maaro. Ea bogo na, ve re kiniou napano mia notumolu netiburelo, bior kiniou maka nemei ka netibure tomu nalo na yetemeriba nei, mia kiniou nebinimei ka nalarurlo, mia vite napano mia tiburelo, nina be kanaku iliano napano neber kalo ka bogo napano nojo bijalo kia ga vo.
JOH 12:49 Kanaku iliano mijikia rila tibe na, bior ka bogo napano nojom̃a naberial iliano nalo na, maka neil ea siaku kiniou ga ve takurano, mia nemil ea Teta siano napano naio miila kiniou nebinimei yetano. Naio ga berial batitig ban kiniou vite nonovio na monoka neverialio,
JOH 12:50 naruei jibe na, dam̃ariga kiniou notom̃a never vite nonovio napano Teta naio jidom ka neveriio. A kanano tuboiano nalo na, namijikia ka be meuliano na bo nei napano maka ve jukuti nene joalo.”
JOH 13:1 Vonganei, vite nonovio ju batitig ruei, beni ga naruei ana ve burum̃ara legiano, napano Jokoluolu na Sidomkariano na Ioruriano naio tikar eaio. Naruei Yesu naio jo bitilubar ruei ka kiano bogo binimei, legiano na beni ga be kiano bogo na naio monoka tuvan yetemeriba nei ka rivavin mave ea karam̃ano. Binimei bokar bogo nei, ea m̃arabo telabo, naio bijuku bo laka ban nalo na abe kanano napano ajua yetemeriba nei ruei, naio tinien jiilo toru laka, mia vonganei be bogo na naio tinien riialo lie vo, rivano-o rivokar napano mia kiano meuliano rivakovio riviorlo.
JOH 13:2 Naruei naio jo kumemi liko kiano naiagagoano nalo ea vio mave, naio jo mila sano sinaniano na maaro kumemi liko. Mia Jutas na Kariot, tormoruo Saimon kenerinio, naio bunu jo kumemi liko kia ga vo ea bogo nei, naio jo bija kanano tiniekakariano ka mia tiveluku ka Yesu, ka na Sim̃aro midu joa tiniene ruei.
JOH 13:3 Kumitum̃a numisinan banbano-o mia Yesu jo tinien maio ka jum̃abe ka beamu, naio jaluvo den Atua naio binimei yetano, a jum̃abe ka napano vonganei Atua bar vite nonovio jua jum̃ano, a tum̃abe ka napano mia naio monoka tovulio, karina mia naio mijikia taluvo den yetemeriba nei ka rivavin bereio mave ea naio.
JOH 13:4 Naio mijog ka burum̃ara tinietiiano ea naio ka kumemi kanano naiagagoano nalo, a naio jidom ka rila burutomoluo tai ka tinietiiano nei van kumemi. Naruei naio jumolu, ba miyalar m̃ano kulukoti, jukulou ka iolkoniano tai,
JOH 13:5 midu baju na uei tai, midu binimei, ana naio jikar ka jekon jaamemi nalo, naio mila jibe ka naio be kenememi toro na im̃auano tai. Naio jom̃a jekon jaamemi jibe na bano-o, m̃a miolkonlo ka iolkoniano napano naio jom̃a jukulou kanio,
JOH 13:6 banbano-o na binimei bokar Saimon Pitere jaano. Mia Pitere jo mial ka napano binimei bokar naio, naruei naio ber kanio berinavo “?Tubo, venia na? Jau kobe kenememi toro na toru, maka rimemedu ka jau kesekon jaaku tibe na.”
JOH 13:7 Mia Yesu berdop̃e, berinavo “Pitere, venia napano kiniou nojom̃a nemila vonganei, jau maka kovitilubario vo. Mia iorou kanio ga mia jau kejikia vatitigio rivu.”
JOH 13:8 Mia Pitere naio jo jidom riverbure Yesu kiaga vo, naio berinavo “Makanio Tubo, najamo ka lele re so ka kasekon jaaku.” Ana Yesu naio berinavo “Ver kiniou nesekon vatitigso re, maka ve kanaku titai toaso.”
JOH 13:9 Naruei telikiti na Pitere naio mijog ninei, kiano jidomiano be dolu kija, naio ber ka Yesu berinavo “!Tubo, ver tibe na, najamo ka ga, nejidom ka jau kesekon kiniou maka ea jaaku ga, mia ea mokotenaku reraio, riva rivokar bunu jaaku a pariku!”
JOH 13:10 Ana Yesu berdop̃e ban Pitere ea jamerijiano sesa tai, na berial jum̃abe na toro naio meravo ka kiano kariano. Naio berinavo “Toro napano mijeliou vonga, niabene reraio meravo nonovio ruei. Ana ver jaano riagiago bereio, mia naio maka rijikia riva rijeliou nonovio bereio, mia naio sekon ga jaano. Mia kiniou nemial kamiu kumitibe na. Kamiu kumeravo nonovio bo ruei, mia kamiu tai ga maka tibe na, naio miagiago dolu ga jo.”
JOH 13:11 Mo Yesu naio ber jibe nei, ber maka nuviniu napano numeravo, bior ka napano naio mijikia ruei ka kumemi tai napano mia vesiou re mia naio tiveluku ka naio.
JOH 13:12 Naruei Yesu jekon Pitere jaano bija kumemi dolu nalo-o bisi na ba miya m̃ano kulukoti bereio, jotano ana bika den kumemi, naio berinavo “?Kamiu kubitilubar im̃auano na namila ban kamiu na, p̃eli na makanio?
JOH 13:13 Vite na naio jibe nei. Telikiti nam̃a kubio kiniou kuber Naverloglogiano p̃eli na Tubo, kamiu kumitum̃a kuber riano ga na.
JOH 13:14 Mia ver kamiu kumial ka napano kenemiu Naverloglogiano p̃eli na kenemiu Tubo naio jekon jaamiu, bo ka kamiu bunu kuvitum̃a kuvisesekon jaamiu nalo, kamiu kuvilala bajago novo nalo tibe na ea kamiu bogo nonovio.
JOH 13:15 Kiniou nemila jibe na ban kamiu ka mia kamiu kuvue jaaku ea legiano nalo na ju binimei kiana, ka mia kamiu kuvila bereio van kamiu tibe ka na kiniou nemila ban kamiu ruei.
JOH 13:16 Kiniou neber riano ka kamiu, ka toro na im̃auano naio maka to loa kiano tubo, p̃eli na toro na midu iliano naio maka to loa nana miila naio bano.
JOH 13:17 Mia verenio kamiu kumijikia ka kanaku iliano nalo nei abe riano, a ver kamiu kuvitum̃a kuvila venia napano m̃a neberenio, mia burum̃ara ilivuiano ve toru laka rimei rivan kamiu iorou.”
JOH 13:18 Ana Yesu berenio “Kiniou neber jibe na, mia maka never kito nonovio, bior kito tai naio jo, napano kiano jidomiano bilig be dolu ruei. Ierinio, kiniou nemijikia batitig kamiu kubiniu napano nebijauia bulag kamiu, mia kiniou nemijikia ka mia kamiu tai naio rila rimemedu ga takii napano Vivitauiano Lu berial nua ruei, napano ber jibe nei, berinavo Naina mia kumemi ve juo nuvisen bitiran saku joko, naio mudular burum̃eiano ka rivuta davalar ka kiniou ruei.
JOH 13:19 “Vite na kirivova tai vo mia kiniou nejidom neverial ka kamiu beamu, naruei bogo napano mia kamiu kuvialio iorou kanio, ana vesiou re mia kumijikia kumoneaio ka kiniou nebe riano, kiniou nobe naio napano jobo jo.
JOH 13:20 Kiniou neber riano ka kamiu, toro nam̃a mila ilivorvoruano ban toro nam̃a midu kiaku iliano napano m̃a nemiilaio, naio javukia napano naio mila ilivorvoruano ban kiniou, a naio nam̃a mila ilivorvoruano ban kiniou jibe na, naio jibe ka napano naio mila ilivorvoruano ban naio napano miila kiniou nebinimei.”
JOH 13:21 Yesu ber iliano nei ban kumemi bisi, ana naio jikar ka mijog ka napano kiano iviso bujo ka jidomiano na temi laka, banbano-o karina naio berial meravo ea mirememi, berinavo “Ierinio kiniou neber ka kamiu, mia kamiu tai tiveluku ka kiniou.”
JOH 13:22 Mia bogo napano naio ber jibe na, kumemi numiilo, numitum̃a nubiti kumemi jeliviv bereio, maka nuvijikia ka naio jo ber kumemi na vabe naruei.
JOH 13:23 Ana ea bogo na, kiniou Jone, jibe ka naiagagoano tai napano Yesu tinien jii kiniou m̃elea, nojom̃a nojotano vaataro lie ka naio,
JOH 13:24 naruei Saimon Pitere mil ka jum̃ano ban kiniou, berinavo “Ai koig, jau kovika vatitigio bere vo, kover naio jom̃a ber kenia.”
JOH 13:25 Naruei nemijian kiniou telisu, nemijian paripariku ba vaataro ka Yesu, nemijuvaluva banio, neberinavo “?Tubo, jau kojom̃a kober kumemi kei?”
JOH 13:26 Ana Yesu berdop̃e, berinavo “Kiniou nojom̃a neber ga naina napano niati joko sesa nei, kiniou nejiti ka vaatei, karina nejian banio.” Naruei naio mila jibe ka ga nanua naio berenio, naio midu niati joko sesa tai, naio jiti ka mememi vaatei, bisi na naio midular jian ban Jutas tormoruo Saimon na Kariot kenerinio.
JOH 13:27 Mo Jutas midu jenio, mia ea bogo nene ga, Sim̃aro bunu naio binimei ba joomo eaio. Ana Yesu berkan naio berinavo “Jau, venia napano kojidom kala, jau kavan sop̃eli kala beamu vo.”
JOH 13:28 Mia ka kumemi dolu nalo napano m̃a numitutano ea sinaniano nei kumemi liko Yesu nene, maka ve kumemi tai napano naio rijikia bior venia ana Yesu ber iliano nei ban Jutas.
JOH 13:29 Kumemi tealo be tinielo ka Jutas naio bitikar kenememi basaro na veru, tenene na Yesu miila naio ban ka rivulu simemi sinaniano, p̃eli na ba bar veru ban talim̃asa nalo, p̃eli na titai na jibe na.
JOH 13:30 Mia Jutas naio mijikia batitig venia napano Yesu berkanio, naruei ka bogo nei ga napano naio midu joko sesa nei bisi, kolvare ga naio jumolu ba tavio bereio, napano viobobogio laka ruei.
JOH 13:31 Mia bogo na Jutas bisi, ana Yesu jikar berloglog kumemi bereio ka vite telabo. Naio ber ka kumemi, naio berinavo “Vonganei be bogo na Kulorinio Kenerinio kiano miamoiano rimalmaluvo, vonganei be bogo na naio rila Atua kiano miamoiano rimei ve toru lie vo.
JOH 13:32 A verenio venia napano mia naio rilaio, mia naio rila Atua siano rivavin, ana iorou ka nina, bogo vesiou re leleio, mia Atua rivitirilar kiniou kenerinio bereio, naio rila siaku bunu rivavin.
JOH 13:33 “Keneriku nalo, be bogo telisu ga jo napano kiniou nemijikia noto kia vo kitoliko, vaataro ga ka monoka nataluvo den kamiu. Telikiti na kamiu kuvial ka napano nataluvo den kamiu bisi, mia kamiu kuvisidom kuvila von ka kuvisirag kiniou tanea vio rera ga. Mia venia nam̃a kiniou neber ka tomu na tortoru na kiado Ju nalo dolu, neber bere ban kamiu, ka vio vabe na mia kiniou navan eaio, kamiu maka kuvijikia kuvitakisor kiniou eaio vonganei.
JOH 13:34 Ana vonganei, kiniou nejian tuboiano vou tai ban kamiu, ka monoka kamiu tiniemiu titii kamiu ve toru, rivanvano-o mia tibe ka ga napano kiniou tinieku jii kamiu.
JOH 13:35 Mia ver kamiu tiniemiu titii kamiu m̃ele tibe na, naina be m̃arabo na rila tomu nalo na yetemeriba nei aial ka kamiu kube kanaku naiagagoano nalo riano.”
JOH 13:36 Yesu ber burum̃ara iliano nei bisi, ana Saimon Pitere jo tinien maio ka napano Yesu naio berenio mia naio taluvo den kumemi, naruei naio bika, berinavo “?Ana Tubo, mia kava be na?” Ana Yesu berdop̃e, berinavo “Kiniou noto navan ea vio tai napano kamiu maka kuvijikia kuvitakisor kiniou eaio vo, mia kamiu kuvijikia ga kumei navo.”
JOH 13:37 Mia Pitere mijogio, naio bika bereio, berinavo “?Tubo, bior vaio ana kiniou maka nejikia neviedu kito juo vonganei. Kiniou najaaro ga, namijamo ka kiaku meuliano riviorso vonganei.”
JOH 13:38 Ana Yesu berkanio, naio berinavo “?Jau kober ka mia jau kajamo ka kiamo meuliano rivior kiniou? Bo ga, mia kiniou neber riano banso, neber ka bogiano nei ga, bogo na tu tokokoreko re vo, mia jau kavarbonbonua kiniou ve varolu [3] ruei, kover jau maka kove kanaku.”
JOH 14:1 Mia Yesu mial ka napano kumemi naiagagoano nalo numijog bova ka na monoka mia naio taluvo den kumemi, naruei naio ber ka kumemi, berinavo “Kamiu kuvila tiniemiu rijog vova m̃ele re, kamiu kuvarkar tiniemiu ea Atua, ana kuvarkar tiniemiu ea kiniou bunu.
JOH 14:2 Tibe ka nam̃a kiniou neberenio ruei, kiniou navan ka nala vatitig kenemiu vio nalo mave ea Teta, a mave ea kunuano be vajoomo miroano napano bare ka kamiu nonovio. Ver p̃eli, kiniou maka nejikia never tibe na ka kamiu.
JOH 14:3 Kiniou navan ka nala vatitig rivu kenemiu vio nene, avona bisi, mia kiniou nemei bereio yetano nei ka kamiu, novuru bulag kamiu kumei ea kiniou, ka na mia kamiu kuvijikia kuvitu dam̃ariga vija kiniou ea vio napano mia notoaio.
JOH 14:4 Mia m̃arabo na ka riva rivokar vio napano mia kiniou noto navan eaio, kamiu kumijikia ruei.”
JOH 14:5 Ana Tomas bika denio, berinavo “Tubo, kumemi maka nuvijikia vio be na jau kojom̃a koberenio mia jau kavan eaio, mia tum̃abe ana kumemi nuvijikia m̃arabo na rivan eaio?”
JOH 14:6 Ana Yesu berinavo “Kiniou nebe burupati m̃arabo, kiniou nebe burupati ilirianiano, kiniou nebe burupati meuliano. Maka toro tai rijikia rivan ea karam̃aku, ver naio maka selea kiniou.
JOH 14:7 Ver kamiu kuvitilubar ka kiniou nebe kei, naio jibe ka kumijikia bunu karam̃aku ruei. Mia vonganei, kamiu kumitum̃a kumial naio ruei, mila na jikar vonganei, kamiu kumijikia naio be riano.”
JOH 14:8 Ana Vilip bika denio, naio berinavo “Tubo, vite na naruei kumemi numisidomio, ka nuvial kija karam̃ado vo. Aiou, ver jau kovisip̃e naio van kumemi, mia kumemi nuvijikia nuvisaaro-o mia.”
JOH 14:9 Ana Yesu berdop̃e, berinavo “?Vilip, kiniou nojo bija kamiu-o bokar yuka vio ruei, mia jau maka kovitilubar kiniou vo? Jibe ka nam̃a nojom̃a neberenio na, ka toro napano mial kiniou, naio jo mial Teta ruei. ?Mia jum̃abe ana jau kojom̃a kobika bereio ka kiniou nevisip̃e Teta na mave van kamiu?
JOH 14:10 ?Jau komonea ka kiniou ea Teta, a Teta naio ea kiniou, p̃eli na jau maka komoneaio? Iliano nalo nam̃a neber ka kamiu, maka kiniou ve takurano nam̃a nemil ea siaku ga, mia Teta napano joa kiniou naio jo mila kiano im̃auano nalo jel ea kiniou.
JOH 14:11 Bo ka kamiu kumonea venia nam̃a neberenio, ka kiniou ea Teta, a Teta ea kiniou. Ver kamiu maka kuvijikia kumonea kiniou rivior kanaku iliano ga, monoka kumonea rivior im̃auano nalo nam̃a kumialio napano m̃a namilaio ruei.
JOH 14:12 “Kiniou neber riano ka kamiu, ka toro kei napano naio rimonea kiniou, mia naio bunu rim̃auka im̃auano nalo napano nojom̃a namilaio. Mia notuvan vio navavin bereio ea Teta, karina iorou neiila Niununo rimei, mia naio mijikia rila burutomoluo nalo na tomormoruo bereio lie vo, tovulu nalo napano kumialio ruei.
JOH 14:13 “Kiniou neberkar ban kamiu, ka venia napano mia kuvika ea siaku, mia kiniou nala ga rivan kamiu. Mia kiniou nala ga tibe na van kamiu, ka rila ka Teta siano naio mijikia rivavin ve toru lie vo iviso ka kamiu, ea im̃auano nam̃a kiniou, nejibe ka kenerinio, namilaio.
JOH 14:14 Tibe na, venia na kuvika den kiniou, mia nala van kamiu.”
JOH 14:15 A Yesu ber bunu ka kumemi, naio berinavo “Ver kamiu tiniemiu jii kiniou be riano, mia monoka kuvokar vatitig rivu kanaku tuboiano nalo.
JOH 14:16 Mia kiniou noto re bunu vija kamiu, ana mia nevika den Teta ka mia naio riila toro dolu tai ka riija kamiu ka mia ridu jeleku ea kenemiu. Naio napano mia rimei, mia naio to vija kamiu dam̃ariga,
JOH 14:17 naio be Niununo na ilirianiano. Tomu nalo na melijokouo na yetemeriba maka ajikia avokar naio, bior ka napano nalo maka ajikia avitilubario, maka ajikia naio ga, mia kamiu kumijikia batitig naio bo bior naio naruei napano mia rivija kamiu bogo nonovio, to vija kamiu to toboto.
JOH 14:18 “Kanaku naiagagoano nalo, mia kiniou notuvan lelan re kamiu napano mia kuvitu tibe ka kirikiou ga. Maka leleio, mia kiniou nemei bere ka kamiu.
JOH 14:19 Bogo teliki ga jo kiano vo, vesiou lele re, karina mia tomu nalo na yetemeriba nei ajikia re bunu aial kiniou bereio. Mia kamiu ga kuvial ka napano mia nemeul bereio, a bior mia nemeul, mia kamiu bunu kumeul.
JOH 14:20 Ea legiano na naruei napano mia kamiu kuvial ka napano nemeul bereio, mia kuvijikia ka kiniou ea Karam̃aku, a kamiu ea kiniou, a kiniou ea kamiu.
JOH 14:21 Naina tinien jii kiniou be riano, naio be naina bokar batitig kanaku tuboiano a naio jo miduio. Naina tinien jii kiniou jibe na, mia karam̃aku tinien tii naio, vija kiniou bunu mia tinieku tii naio, notom̃a noyotuba ka naio ka rila naio mijikia rijikia kiniou lie vo.”
JOH 14:22 Ana kumemi naiagagoano nalo tai, napano naio be Jutas napano naio maka ve Jutas na Kariot, mia naio bika den Yesu, naio berinavo “Ana Tubo, jau koberinavo mia jau kotom̃a komalmaluvo ka kumemi, ana mia jau kala ea m̃arabo na vabe ka napano mia tomu dolu nalo na yetemeriba nei bunu ajikia re aialio?”
JOH 14:23 Ana Yesu berdop̃e, berinavo “Ver toro tinien tii kiniou, mia naio rivokar vatitig kanaku iliano, ana mia karam̃aku tinien tii naio. Ana mia kumemi ve juo nuviedu ea naio, nuvila kenememi vonuo ea kiano meuliano, mia maka rijikia tibe na ea tomu na maka amoneaio.
JOH 14:24 Mia toro na maka tinien tii kiniou, mia naio maka rimonea batitig kanaku iliano. Naina naruei be verdop̃eiano na kenemiu vikadeniano, ana iliano napano kumijogio ruei, naio maka ve kanaku, mia naio be Teta napano naio miila kiniou nebinimei ea vio nei kanano.”
JOH 14:25 Ana Yesu naio berinavo “Tilikiti nam̃a kiniou nojo kia ga vo bija kamiu, nojom̃a neber vite telabo jibe na ban kamiu ruei.
JOH 14:26 Mia bogo napano navano, mia Teta naio riila Niununo na ijaiano rimei, ana mia naio ridu jeleku, naio riverloglog kamiu ka vite nonovio, ana mia naio rudu sidomii kakarioano na kanaku iliano nalo nonovio ea kenemiu jidomiano.
JOH 14:27 Kiniou mia navano, mia notuvan tum̃aro to vija kamiu. Kanaku tum̃aro naio be tum̃aro na bo tai napano yetemeriba nei naio maka rijikia rije van kamiu. Tibe na, kamiu kuvila re ka mia tiniemiu rivujo m̃ele, a kamiu kumerou ka re vite nalo. Kamiu kuvisidomi m̃ele re,
JOH 14:28 bior ka napano mia tibe ka nam̃a naberenio ka kamiu ruei, ka kiniou nava koalabo beamu, karina mia nemei bereio ea kamiu. Vede kamiu kuvijog vova ka na mia navano, mia ver kamiu tiniemiu tii kiniou, bo ka kamiu kuvisaaro ve toru laka ka na mia nejikia nava neial bereio karam̃aku, napano naio loa laka lie vo ka kiniou.
JOH 14:29 “Vite nalo na nalo makan vo, mia vonganei kiniou neberial batitigio bo ban kamiu ruei, mia bogo na kuvial maluvo memedu ga ka venia neberenio, ana mia kamiu kuvijikia kumonea kiniou ka nebe riano.
JOH 14:30 Mia vonganei, kiniou maka nejikia never vite ve telabo rivan kamiu, bior parinio tubo nam̃a jo mila tuboiano ea yetemeriba nei, vonganei naio jo binimei ka kiniou ruei. Kanano moroano naio maka rivare ka tovulu kanaku moroano,
JOH 14:31 mia kiniou nemijamo ka ga kiniou ea jum̃ano, bior monokanio nala venia napano m̃a Teta berialio ka naio jidom ka kiniou nalaio. Mia nemila jibe na, ka tomu nalo na yetemeriba nei nalo ajikia avitilubar ka kiniou tinieku jiilo. “Kito m̃a, voniganei kiano bogo nene na ruei, rotumolu rava tavio.”
JOH 15:1 Naruei ka bogo na numiel nubano, Yesu naio ber iliano ta bunu ban kumemi. Naio berinavo “Kiniou nebe burupati na telikrevi na be riano, mia Teta naio jibe ka toro na bitikar jiotilikrevi nei.
JOH 15:2 Naio jom̃a bitii veve batitig tilikiti nene nalo, mia ver naio mial tilikiti nene tai napano mia maka rivar m̃arati, naio telario, a ver naio mial tai napano bar m̃arati, mia bivikon bulagio sidiati nalo denio bo, ka rijikia rivar m̃arati ta bunu bereio.
JOH 15:3 Vite na namila ban kamiu ruei, a vite napano bivikon batitig kamiu na, naio be kanaku iliano nalo nam̃a nojom̃a neber ka kamiu.
JOH 15:4 Kamiu kube saku tilikiti, kamiu monoka kuvijurukar vatitig kiniou rivu, a mia kiniou novijurukar vatitig kamiu rivu. Ver tilikiti rivijurukar vatitig re burupati, mia maka rijikia rivar m̃arati naio ga, mia bare ga ka kamiu bunu, ver kamiu kuvijurukar re kiniou rivu, mia kenemiu meuliano maka rijikia rivar m̃arati na bo leleio.
JOH 15:5 “Kiniou nebe burupati na teli, a kamiu kube saku tilikiti nene nalo. Naio napano bijurukar kiniou a napano kiniou nobijurukar naio, naio naruei kiano meuliano mijikia rivar m̃arati ve buro nalo, bior ver kiniou re ea kamiu, mia maka kuvijikia kuvila vite tai na bo leleio ea Atua mirano.
JOH 15:6 Ver toro tai vijurukar re kiniou, naio tibe ka tilikiti tai napano binimei menoko, ka mia atelario, adu avuku rivan ea sebi, ka mia sebi sisenio.
JOH 15:7 Ver kamiu kuvitu rivu dam̃ariga ea kiniou, a kanaku iliano to rivu dam̃ariga ea kamiu, venia nam̃a kamiu kumisidom ka kuvikanio, kamiu kumijikia kuvokario.
JOH 15:8 Bo kanio kamiu kuvar m̃arati ve telabo ea kenemiu meuliano, nina naruei naio memedu ga ka kiaku naiagagoano naio tom̃a rilaio, a ve m̃arabo bunu ka rila Teta siano rivavin lie vo.
JOH 15:9 Teta naio tinien jii kiniou toru laka, mia javukia ga napano naio tinien jii kiniou, kiniou bunu tinieku jii kamiu, naruei bo ka mia kamiu kuvijurukar vatitig ea kanaku tinietiiano nene.
JOH 15:10 Ver kamiu kumitum̃a kubokar vatitig kanaku tuboiano, kumijikia kuvijurukar ea kanaku tinietiiano, tavukia nam̃a kiniou nojom̃a nabokar batitig ruei karam̃aku kanano tuboiano, nobijurukar batitig joomo ea kanano tinietiiano nene.
JOH 15:11 “Naruei vite nalo nam̃a nojo nober ka kamiu, nemije ban kamiu ka kanaku saariano jikia toa kamiu, naio mila napano ve burum̃ara saariano tai napano bo mia bo naio mijikia toa kamiu dam̃ariga.
JOH 15:12 Ana kanaku tuboiano dolu tai na maariano na mia neje van kamiu naio jibe nei, ber kamiu tiniemiuti tii kamiu tulaka, tavukia nam̃a kiniou tinieku jii kamiu.
JOH 15:13 Maka bunu ve tinietiiano dolu tai ka mia rivu lie tovulu tinietiiano napano mia toro tai rijamo ka kiano meuliano, naio rim̃aro ka rilarur kanano bilbilu.
JOH 15:14 Verver kamiu kumidukar kanaku iliano nalo, kube kiaku bilbilu nalo ruei.
JOH 15:15 Kiniou novio re kamiu bunu ka kanaku tomu na im̃auano ga, bior toro na im̃auano naio mim̃au ga, naio maka rijikia batitig kanano tubo kanano jidomiano na kiano im̃auano. Mia kiniou nemial kamiu kumitibe ka kanaku bilbilu, bior vite nonovio nam̃a nomijog Teta ber ka kiniou, kiniou neberial meravo bo ban kamiu.
JOH 15:16 Kamiu maka kuvijauia kiniou ka neve kenemiu, mia kiniou naruei nebijauia kamiu ka kuve kanaku, kiniou nebitiri bulag kamiu ka kuva kuvar m̃arati ea kenemiu meuliano nalo, m̃arati napano mia to toboto. Ana ver bogo napano kamiu kuvitum̃a kuvan tibe na, venia na mia kuvika den Teta na mave ea siaku, mia naio sian van kamiu.
JOH 15:17 Mia kanaku tuboiano nene na jibe nei, ber kamiu monoka tiniemiu titii kamiu.”
JOH 15:18 Ana Yesu naio berinavo “Ver mia kuvial ka mia tomu nalo na yetemeriba nei napano maka amonmonea, nalo aserm̃i ka kamiu, kamiu kuviilo m̃ele re kanio. Kamiu monoka kuvisidomial ka napano nalo nei ajerm̃i ka kiniou beamu ruei, karina nalo aserm̃i bunu ka kamiu iorou.
JOH 15:19 Ver kamiu kuvitibe ka tomu nalo na yetemeriba nei ga, mia nalo asaaro ga ka kamiu, mia kiniou nebijauia bulag kamiu kumitaluvo den meuliano na yetemeriba nei. Kamiu maka bunu kuve verare ka kanano tomu nene nalo, ana rila na mia nalo aserm̃i ka kamiu nam̃ariga.
JOH 15:20 Mia bo ka kamiu kuvitum̃a tiniemiu rimaio nam̃ariga ka kanaku iliano nalo nam̃a naber ka kamiu ruei, napano naberinavo: Toro na im̃auano naio maka loa ka kiano tubo. Iliano na jaati nene ber javukia ga nam̃a amila kiki lelan kiniou, mia ala kiki lelan kamiu bunu. Mia tibe ka ga nam̃a maka ajogkar kanaku iliano nalo, mia ajogkar re bunu kenemiu iliano nalo.
JOH 15:21 Bajago va nalo na jibe na mia ala ka kamiu bior kamiu kube kanaku, mia ala bior maka ajikia naio napano miila kiniou nebinimei yetano nei.
JOH 15:22 “Ver nemei re neverial vite nonovio rimeravo ea miralo, mia Atua rialo re river nalo amila korov kanano iliano. Mia vonganei, maka ajikia aver sop̃eiano tai rivior kanalo kariano ka rila parilo sikili ka Atua, bior amijog kiaku iliano nalo ruei.
JOH 15:23 Nao, be riano ka parilo jikili ka Atua ruei, bior napano ajerm̃i ka kiniou, ana naio javukia ga napano ajerm̃i bunu ka Karam̃aku.
JOH 15:24 “Verver re kiaku burutomoluo nalo napano amial nemilaio, napano maka toro dolu rijikia rilaio, p̃eli mia Atua maka jikia river ka kariano jualo. Mia makanio, amialio ruei, mia maka ga amoneaio, ajidel dolu ka ga m̃a ajerm̃i ka kumemi juo karam̃aku.
JOH 15:25 Vite na naio memedu ga ka iliano tai napano Atua mudu jo joomo ea Vivitauiano Lu, napano berinavo ‘Ajerm̃i m̃ele ka kiniou kurano, maka rivior kanaku beleiano tai.’
JOH 15:26 “Mia kiniou neber ka kamiu, ka mia neiila Niununo na ijaiano taluvo ea Teta mave riyotuba ka kamiu, napano naio be Niununo na jaluvo ea Atua kanano meuliano, napano be Niununo na ilirianiano. Mia naio rimei riverial kiniou lie vo van kamiu,
JOH 15:27 ana iorou, mia kamiu bunu monoka kuverial kiniou ta bunu van kulo dolu nalo. Nina bior kamiu naruei kitoliko dam̃ariga jikar ea tikariano na kanaku im̃auano binimei bokar vonganei.”
JOH 16:1 Karina Yesu jo mil lie vo ban kumemi kiano naiaga-goano nalo kia navo, naio berinavo “Iliano nalo nei, neber ka kamiu na ka amijikia avokar vatitig kamiu, ka mia kenemiu moneano ajoru re bogo tai.
JOH 16:2 Nao, kamiu monoka kuvijikia ka kiado tomu na tortoru nalo, mia avuku bulag kamiu den yimo nalo na volkouano na kanado, mia rivova laka van kamiu rivano-o rivokar bogo na ver auebinvin kamiu kum̃arm̃aro, mia nalo averinavo nina naio be im̃auano na bo tai napano nalo amila ka Atua saaro riviorio.
JOH 16:3 Mia nalo amijikia ala tibe na rivan kamiu, bior binimei bokar vonganei maka ajikia vatitig Teta na mave, a maka ajikia batitig kiniou bunu.
JOH 16:4 Mia iorou kanio, bogo napano ver kuvial vite nene amalmaluvo ka kamiu tibe na, kuvijikia kuvisidomialio bereio, kuvijikia kuverinavo ‘Ierinio kiana, vonganei romial vite nalo na jibe ka ga napano Tubo naio ber bisivisii ban kito beamu ruei.’ ” Ana Yesu berinavo “Vite na, kiniou maka nojom̃a noberenio ka kamiu nua ruei, bior ea bogo na kiniou nojo kia ga bija kamiu vo.
JOH 16:5 Mia neber ka kamiu vonganei bior ka napano mia vesiou re, monoka notuvan kamiu, navan bereio ea naina nua beamu miila kiniou nebinimei. Kiniou nojom̃a neberver jibe na ban kamiu ruei, mia nemial ka kamiu maka kuvitum̃a kuvivikanio mia kiniou nava be, p̃eli na navan ea vio na jum̃abe,
JOH 16:6 bior ka bogo napano neber ka monoka notaluvo den kamiu tibe na, kenemiu iviso mijog bova toru laka biorio.
JOH 16:7 Mia makanio, naio monoka tibe na ga. Neber be riano ban kamiu, mia rivu laka van kamiu ka nataluvo den kamiu, bior ver navan re, mia Niununo na ijaiano naio maka rijikia rimei, avona ver navano, mia neiila naio rimei ea kamiu.
JOH 16:8 A Niununo na, bogo na naio rimei, mia naio rila im̃auano ea yetemeriba nei, rila kiano tomu nalo ka asidomlubar jidomiano na tortoru tealo, tai ea tivelinio na kialo kariano nalo, tai ea tivelinio na kanaku memeduano nalo, a tai ea tivelinio na Atua kiano tibureiano vanlo.
JOH 16:9 “Moti nene, be Niununo nene rila avitilubar ka burupati na kialo kariano naio be kialo bajago na maka asidom amonmonea kiniou.
JOH 16:10 “A tinene, mia Niununo nene rilalo avitilubar ka kiniou maka nala vova, nememedu laka. Kiniou nabare ka nemijikia navan bere mave ea karam̃aku, mia nalo aial re bunu kiniou.
JOH 16:11 “A tolu nene, mia Niununo nene rilalo avitilubar ka mia Atua naio rijikia tiburelo, tibe ka ga napano naio jibure tubo kirivova nei ruei napano naio jo be tubo ka yetemeriba vonganei.
JOH 16:12 “Vite telabo aju kiana vo ka mia neverialio, mia nemial ka napano kumijog bova jibe na, maka nejikia never ka kamiu vonganei.
JOH 16:13 Mia bo ga, bior mia iorou kanio, bogo na Niununo na ilirianiano naio rimei ea kamiu, mia mijikia rivuru m̃arabo ka kamiu, mia kuvokar ilirianiano dolu nalo nei. Ilirianiano nalo na mia naio riverloglog ka kamiu, mia river re ea kiano jidomiano ga, mia na naio mijogio ea vio mave, naio naruei mia naio riverialio ka kamiu, riva rivokar napano mia naio mijikia riverloglog vatitig kamiu ea tivelinio na vite nalo napano mia amalmaluvo ka kiniou rivesiou re.
JOH 16:14 Miamoiano nalo na be Teta kiano, abe kiaku bunu, naruei mia Niununo rudu kiaku iliano nalo na rimei rije vatitig rimonea kenemiu meuliano. Ea m̃arabo na naruei mia Niununo naio rila kiano im̃auano rimemedu, ka napano rudular siaku medave.”
JOH 16:16 Mia Yesu ber bunu ban kumemi, naio berinavo “Mia vesiou re, bogo ve teliki ga, ana mia kamiu kuvial re bunu kiniou, karina, bogo ve teliki ga bereio, ana mia kamiu kuvial kiniou bereio.”
JOH 16:17 Naruei kumemi naiagagoano nalo numijog iliano nei, nuberver ban kumemi nuberinavo “Kito maka rejikia vatitig rivu leleio vite nalo nei napano naio jom̃a berio. Beamu nua naio jom̃a berinavo mia naio rivan bereio riva to naljuo karam̃ano mave tiniabene, mia vonganei naio berinavo vesiou re, kito reial re naio, karina vesiou re bereio, mia kito reial naio.
JOH 16:18 A bogo ve teliki nam̃a naio jom̃a ber na, nioti nene ber venia? Kito maka ravokar kiano jidomiano leleio!”
JOH 16:19 Ana Yesu naio mijikia ka napano numisidom ka nuvika vatitig vite nalo nei denio, ana naio jikario, naio berinavo “P̃eli kamiu kumitum̃a kubivika ea kamiu p̃eli ea tivelinio na kiaku iliano nei?
JOH 16:20 Bo ga, mia kiniou neverial vatitigio van kamiu tibe nei, ka mia kuviteg, kuvijog rivova ka venia na ala ka kiniou, mia tomu dolu nalo na yetemeriba nei mia asaaro kanio, ajog rivu ve toru laka. Mia tiniemiu rivujo ka jogvaiano rivano-o, karina mia nemeul bereio ea nam̃ariano, mia kuvial kiniou bereio, mia kenemiu jogvaiano naio rivilig rimei ve jogvuiano bereio.
JOH 16:21 Mia nina tavukia ga tira na be m̃abono, napano ver rimonloglog kiano aura nene, mia taakano rijalele naio monoka rijog rivova-o mia ka naio rudu kenerinio. Mia bogo napano naio midu bisi, naio maka bunu sidomial kiano jogvaiano, mia naio tiniene bujo ka saariano bior kanano kiri solbouo neibano naio miyotuba ea yetemeriba nei.
JOH 16:22 “Naruei mia kamiu kuvitibe na ga. Vonganei mia tiniemiu nalo avujo lou ka burum̃ara jogvaiano, mia iorou kanio ana mia namalmaluvo ka kamiu bereio, ka na mia kamiu kumijikia kuvisaaro bereio ea burum̃ara saariano tai napano mia ve re toro tai naio rijikia rudular den kamiu bogo tai.
JOH 16:23 Mo bogo napano mia namalmaluvo ka kamiu, vede mia kuvisidom ka mia kuvika vite ve telabo den kiniou, mia makanio. Tenalo na kamiu kuvika re den kiniou, kamiu kumijikia kuvika rimemedu den Teta na mave. Kuvijikia kuvika ea siaku ga, naruei naio mia rijamo ka rivan kamiu.
JOH 16:24 Binimei bokar vonganei, kamiu maka kuvitum̃a kuvivika vite nalo ea siaku, a tikar banei, ver kuvivika ea siaku, na mia kumijikia kuvokario, a mia naio rila tiniemiu rivujo ka saariano.
JOH 16:25 Binimei bokar vonganei, nojom̃a nober vite nalo ban kamiu ea jamerijiano nalo, mia bogo nene jo binimei ka napano mia neilluku re bunu tibe nei rivan kamiu, ana mia neverii Teta na mave van kamiu, nemijikia neverial vite nonovio rimeravo rivu vatitigio van kamiu.
JOH 16:26 Ana ea bogo na, mia ve re kiniou ga napano kiniou monoka nevika vite nalo den Teta kar kamiu, ana mia kamiu ga kumijikia kuvika denio rimemedu ea siaku.
JOH 16:27 Kamiu kumijikia kuvika naio rimemedu, bior ka napano naio mial ka napano kumitum̃a tiniemiu jii kiniou, a naio mijikia ka napano kumonea kiniou ka nomoluo den naio nabatove ea yetemeriba nei.
JOH 16:28 Ana ea tivelinio ka vio na mia kiniou noto navan ea, nemijikia never jibe ka na neber vonga, ka napano najaluvo ea Teta na mave nebinimei ea yetemeriba nei, naruei mia nataluvo den yetemeriba nei bereio ka navan bere ea karam̃aku kanano vonuo.”
JOH 16:29 Naruei nuberdop̃e, nuberinavo “Tubo, vonganei jau maka bunu koilluku ea jamerijiano! Bogo nam̃a kober vite nalo meravo jibe na mia kumemi numialio bo laka.
JOH 16:30 Kumemi numijog kiamo iliano nalo, mila nubitilubar ka jau komijikia vite nonovio. Bogo na maka nuvika vikadeniano vo, jau komijikia ruei vite na nuvika denso. Jibe na, vonganei numonea jikili ka be riano, ka jau komoluo ea Atua ana kobinimei ea vio nei.”
JOH 16:31 Ana Yesu naio berdop̃e kumemi, naio berinavo “P̃eli vonganei ga ana kamiu kumoneaio, a?
JOH 16:32 Bo kamiu kumoneaio, bior aura nam̃a kiniou nojom̃a nober, naio jo binimei, ver p̃eli naio binimei ruei. Ea bogo nene, mia ajil kamiu kuve dedade tanea vio, p̃eli na kuvanvan veve terakurano bereio ea kenemiu vonuo nalo, mia ve re tai to vija kiniou, mia kiniou ga ve takurano noto. Mia naina naio bo ka ga kiniou, bior nemijikia ka mia ve re kiniou ga ve takurano mia Teta naio vija kiniou dam̃ariga.
JOH 16:33 Kiniou neber jibe na ka kamiu ka kamiu niukniuku rivie re kamiu, a ka kamiu kuvijog re rivova. Kenemiu meuliano na yetemeriba nei mia rivujo ga ka bogokouo, mia kiniou nojovulu vovaiano na yetemeriba nei, naruei kenemiu meuliano na ea kiniou, mia kamiu kuvileal tum̃aro na bo tulaka.”
JOH 17:1 Mia bogo na Yesu ber iliano nalo na bisi, ana naio river rivolkouo rivan karam̃ano. Naio jirarag bavin tiniabene, berinavo “Teta o, kiniou nemijikia ka vonganei be kiaku bogo na jogvaiano binimei naruei. Aire, jau kovitikar kiniou kenerimo siaku, naio rivatove re, mia naio rivavin, ka na mia nemijikia nodular lie siamo bunu bereio.
JOH 17:2 Nomonea ka mia jau kala tibe na, bior komidu burum̃ara moroano na ban kiniou ruei, ka mia neve tubo ka tomu nonovio. Mia jau komijamo ka ban kiniou ka nalo napano komije monea jum̃aku, mia nemijikia najamo ka meuliano napano naio maka rijikia ribisi bogo tai rivanlo.
JOH 17:3 Mo m̃arabo na meuliano nene napano naio maka rijikia ribisi naio jibe nei, kanio napano amijikia jau, Atua takurano ga napano naio be riano, bija bunu kiniou Yesu Kristo napano jau komiila kiniou nebinimei.
JOH 17:4 Kiniou nojuvanso nebinimei ka nala siamo rimei ve tomoruo ea yetemeriba nei, naruei nomim̃auka vite nene ruei, banbano-o vaataro ka nala nonovio im̃auano nalo napano kojidom nalaio.
JOH 17:5 A Teta, nojidom novika ver kiniou neviedu notumolu notua miramo bereio, mia jau kodu kiniou bere noto vijaso kito ve juo reje tuboiano bereio ea mermerano na vio mave, tibe ka napano kito juo romila beamu nam̃a rejii yetemeriba nei.”
JOH 17:6 Mia Yesu jo bolkouo lie bano, berinavo “Teta, ea tivelinio na nalo na yetemeriba nei napano kobijauia bulaglo abe kiamo, jau kojianlo ban kiniou, jau komijelo amonea jum̃aku, naruei nemijikia never ka jau ka neberialso kalo ruei. Vonganei naruei nalo ajum̃a abokar jikili kiamo Iliano Lu.
JOH 17:7 “Nalo abitilubar ruei ka vite novo nonovio napano ajua kiniou, nalo ajavukia kiamo ijaiano nalo ban kiniou,
JOH 17:8 bior kiamo iliano napano kojian ban kiniou, kiniou nejian solio ka banlo, naruei nalo amijevio nonovio ruei, mila na vonganei nalo amonea jikili ka kiniou najaluvo easo nebinimei, jau naruei komiila kiniou.
JOH 17:9 “Nobolkouo banso vonganei, maka nosidom nobolkouo ka tomu nonovio na yetemeriba reraio vaarakurano, naruei nojidom nobolkouo lie vo rivior nalo napano jau komijelo ban kiniou, bior napano nalo abinimei abe kanamo ruei.
JOH 17:10 Nalo nonovio na abe kiaku, abe kiamo, a nalo nonovio na abe kiamo, abe kiaku, a nalo napano jau komiilalo ka kiniou, abe burupati na kiaku mermerano.
JOH 17:11 “Mo vonganei binimei bokar bogo napano mia kiniou neviedu easo bereio, maka nejikia noto bunu ea yetemeriba nei, mia kanado tomu nei mia nalo atu ga. Tibe na, Karam̃aku lu, bo ka jau kovitikar nalo nei napano komiilalo ka kiniou, jau kovokar vatitiglo rivu joomo ea kanado m̃aratavo, ka mia amijikia amei ve takurano, tibe ka na kito juo robe takurano.
JOH 17:12 Tilikiti napano nojo bijalo, nebitikar batitiglo, nobokar batitiglo yetano ka siamo. Nobitikuku batitig kalo banbano-o nalo abiniu aju batitig bo ea kiniou, mia nalo ve takurano ga kalo monoka taluvo den kiniou, tibe ka ga napano Vivitauiano Lu berialio, nina be toro napano be kenerinio navakovioano.
JOH 17:13 “Vaataro ka ga kiniou nomei bere ea jau naruei, mia nejidom neverial iliano nalo na ka bogo napano nojo kia ga ea yetemeriba nei vo, ka rila burum̃ara saariano nei nam̃a joa kiniou vonganei, mia naio mijikia rimei ve toru bunu ea nalo dolu na.
JOH 17:14 Kiniou nejian kanamo iliano banlo ruei, mia bogo na kulo dolu na yetemeriba nei aial nalo, aserm̃i tanea kalo. Nina bior abinimei jibe ka maka bunu ave na yetemeriba nei, javukia napano kiniou maka nove na yetemeriba nei.
JOH 17:15 Mia kiniou nojom̃a nobolkouo bior nalo na kaso, maka noto novika ka mia kovuru bulaglo den yetemeriba, mia kiniou nobika ka bogo napano aju kia ga yetemeriba nei, mia jau kuvurukolo vatitigio rivu, ka mia toro kirivova nei rila lelanlo re.
JOH 17:16 Aiou, jau kovitikar vatitiglo, bior nalo ajibe ka kiniou ga, kumemi nube valauo ga ea yetemeriba nei.
JOH 17:17 A nobolkouo bunu ka mia koverloglog kanamo ilirianiano rivanlo, ka naio rioko nonovio kialo meuliano nalo amei ave lu, ave kiamo jau takurano ga.
JOH 17:18 Nobolkouo kalo jibe na, bior jibe ga nam̃a jau komiila kiniou nebinimei ea yetemeriba nei, naruei kiniou nojom̃a nemiila bulaglo bunu ka avanvan eaio.
JOH 17:19 Nomioko kiaku meuliano vanso riviorlo, ka mia nalo bunu aioko kialo meuliano rivanso rive riano.”
JOH 17:20 Ana Yesu jo bolkouo keano, berinavo “Teta, kiniou nojom̃a nobolkouo banso, maka nobolkouo rivior nalo nei ga, mia nobolkouo bunu bior nalo dolu napano mia amonea kiniou rivior kialo iliano nalo napano abe kiaku.
JOH 17:21 Kiniou neber bo kaso Teta, ka mia nalo nonovio nei amei ave takurano, rivare ga ka kito juo. Jau, jau ea kiniou, a kiniou, kiniou easo, mia nalo bunu monoka nalo ea kito, ka mia rila napano yetemeriba momou nei rijikia rimonea ka kiniou najaluvo denso, jau komiila kiniou nebinimei yetano.
JOH 17:22 Burum̃ara mermerano nam̃a kejian ban kiniou, ana kiniou nejianio banlo, ka na mia amijikia amei ave takurano tibe ka napano kito juo kito takurano.
JOH 17:23 Jau, jau ea kiniou, a kiniou, kiniou ealo, ka mia amijikia amei ve takurano ea vite nonovio, a bogo napano tomu nalo na yetemeriba nei aialio, mia amijikia avitilubar ka be riano, ka jau naruei komiila kiniou nebinimei, a avitilubar ka napano jau tiniemo jiilo toru laka jibe ka napano jau kojom̃a tiniemo jii kiniou.
JOH 17:24 “Vonganei Teta, nemil maaro jibe nei, nejidom toru laka ka nalo nam̃a jau kejian ban kiniou, mia iorou ajikia avija kiniou ea kanado vonuo. Kiniou nejidom avija kiniou ka ajikia aial kanaku burum̃ara mermerano nei, napano jau komije ban kiniou beamu ea tiiano na yetemeriba nei, bior jau tiniemo jii kiniou toru laka.
JOH 17:25 Teta, jau kobe lu a komemedu, mia tomu dolu nalo na yetemeriba nei maka ajikiaso, mia kiniou nemijikia batitigso bo dam̃ariga. Naruei kiniou namila ka napano vonganei kanaku naiagagoano nalo amijikia ka kiniou najaluvo denso, jau komiila kiniou nebinimei.
JOH 17:26 Kiniou nemila napano vonganei, telabo napano amijikia kanamo bajago novo ruei, a mia kiniou nala riva lie vo, ka mia burum̃ara tinietiiano na tiniemo jii kiniou kanio naio mijikia toalo, a ka mia kiniou bunu noto vijalo bogo nonovio.” Naruei volkouano na Yesu kanano ban karam̃ano biniu ea vio na.
JOH 18:1 Yesu berial iliano nalo nei, naio bolkouo bisi, ana na naio jumolu jukamu ka kumemi kiano naiagagoano nalo, numituvan Yerusalemo bereio, numiel ea buru-melijo nubatove ea bolu na Kitron tivelinio bano. Numiel nubano nubokar jioburuolivi tai na telisu nam̃a Yesu jom̃a banvan eaio va telabo ruei, naruei numitu kija ea vio na beamu vo.
JOH 18:2 Vio nei, Jutas jo jakisor kumemi liko Yesu nuban eaio va telabo ruei, ana naio mijikia batitigio bo ruei ka bogo na a p̃eli kumemi numitua vio na kovio. Jibe na, ka bogo nei naio ba berial Yesu ka tomu na tortoru nalo ruei, mila na amiila kialo tomu nalo ajakisorio, ana naio burum̃arabo kalo abinimei ea vio nei ka Yesu.
JOH 18:3 Nalo neibano tomu na tortoru na kulo lu bija Varisis nalo amiilalo, nina be taara tai na tomu na mira na vio Romo, bija taara tai nakukuano na Yimo Lu. Ana nalo aju amiel abinimei bija blayulu nalo, bija kialo tena mira nalo.
JOH 18:4 Abinimei ajidom avokar Yesu, mia naio jom̃a mijikia batitigio bo ruei vite nalo napano mia riyotuba ka naio, mia bogo napano naio mial lo, naio maka riilo, mia naio miel ku kalo ga ban ka rivitavo ka nalo, ana mil banlo, bika berinavo “?Ei, kamiu kumitum̃a kumisirag kei?”
JOH 18:5 Naruei nalo nei ajumolu aju napano Jutas, toro na jiveluku ka Yesu, naio jo jumolu lelan bijalo, mia nalo aberdop̃e banio, aberinavo “Kumemi numitum̃a numisirag kema na Yesu, napano naio tena Nasarete.” Ana Yesu berdop̃elo, naio berinavo “Naio nam̃a kamiu kumitum̃a kuber na, kiniou nene nei naruei.”
JOH 18:6 Naruei telikiti napano Yesu ber iliano nei kalo, amiilo mia mila amiel davarvatu vaarakurano, ajibirbili dedade ea borotano.
JOH 18:7 A vaarakurano bereio, Yesu bika bereio denlo, berinavo “?Kamiu kuvila von ka kuver bere vonio, kamiu kumitum̃a kumisirag kei?” Naruei aber bereio, aberinavo “Kumemi numisirag Yesu na vio Nasarete.”
JOH 18:8 Ana Yesu naio berinavo “Jibe ka nam̃a kiniou neberenio ruei, kiniou nene nei naruei. A ver kamiu kubinimei kar kiniou takurano ga, bo ka kamiu kumijamo ka dolu nalo nei kanaku amijikia avano ga tibe na, kuvitokol re lo.”
JOH 18:9 Naio ber jibe na kalo, mila na kiano iliano tai napano naio berial vonga ea kiano volkouano ban karam̃ano naio miyotuba, napano naio ber jibe nei, berinavo “Ea nalo napano komijelo ban kiniou, maka ve nalo tai kalo napano kiniou namilaluvu naio bano.”
JOH 18:10 Aju jibe na, mia amiilo ka napano vaarakurano ga, Saimon Pitere naio jumolu burular kiano iobogu na mira, naio babijan ban parinio toro na im̃auano tai na parinio toro lu, naruei naio jetitire ea ga, mioplar tiliniene tivelinio va meruo. Toro nene siano Malkusi.
JOH 18:11 Ana Yesu mil ban Pitere, naio berinavo “Pitere, jau kodu vatitig bereio kanamo iobogu na mira na riva joomo ea siveu nene bereio. ?Jum̃abe, jau maka kosidom ka kiniou navan ea bogokouo na jogvaiano napano Teta na mave naio mije ban kiniou? Makanio, monoka navan eaio ga.”
JOH 18:12 Yesu naio ber jibe na avona bisi ana tomu na mira, bija kukuano nalo na Yimo Lu, abinimei abokakar Yesu jikili, amiorkar vatitig jum̃ano be juo, aburu naio bano.
JOH 18:13 Naruei aburu Yesu bano, amaluvo ea Parinio Toro Lu kiano burusio, ana vite na jukamu napano amilaio, aburu Yesu ba miyotuba ea vio napano tormoruo nei Anas joaio. Anas nene, naio be Parinio Toro Lu nua beamu, mia naio joa vio na kia bija Parinio Toro Lu vou, bior napano Parinio Toro Lu vou nene, naio joro ka kenerinio vevinio niatira.
JOH 18:14 Toro nene siano Kaivas, mia naio naruei napano nua beamu, naio berial m̃arabo tai ban navurim̃araboiano nalo na kulo Ju kialo. Naio berinavo verver amial ka monoka auebin toro tai ve takurano ka rilarur tomu ve telabo kialo meuliano, naio mijikia rijamo ka rivu ga.
JOH 18:15 Jibe nei naruei, aburu Yesu ban ea vio napano Anas joaio, ana ea bogo na, kumemi juo Saimon Pitere numitu numitakisorlo. Beamu kumemi juo Parinio Toro Lu nei nuburon vio takurano, naruei amijamo ka kiniou natakisor Yesu nava jouro, mia aberbure Pitere jo bo.
JOH 18:16 Aber naio to tavio ga ea morouo, mia bogo napano nemial jibe na, nabano bereio, nemil ban toro na toru nei kiano niatira na im̃auano tai, napano jikili jua morouo. Ana niatira nei mijamo ka kiniou ka novuru Pitere bunu riva jouro.
JOH 18:17 Mia bogo napano Pitere jo binimei jouro, niatira nei mialio, bika denio, berinavo “?Ana jau bunu kobe naiagagoano tai na toro nei kanano, ina?” Mia Pitere naio mijogio, miilo kanio ana berdop̃e mila sibililio, berinavo “Ee, makanio.”
JOH 18:18 Ana Pitere naio mial ka napano tomu na im̃auano bija kukuano nalo ajovokar sebi tai ka vovojulu, ana ajumolu aju jeliviv eaio amijegilo, mia naio bunu ba vaataro kalo, jo mijegi naio eaio.
JOH 18:19 Naruei amila Yesu jumolu ju jukamu ea mirano Parinio Toro Lu moruo nei Anas, ana naio bika vite telabo denio. Naio bika jum̃abe ka naiagagoano nalo napano amonmonea naio, a bika denio ka tivelinio na verloglogiano nalo nam̃a naio jom̃a jian banlo.
JOH 18:20 Mia Yesu maka river vite ve telabo vanio, mia naio ber vatitigio ga banio, berinavo “Vite nonovio napano nojom̃a neberloglogio, kiniou maka lele neverloglog lukuvanio mia kiniou nojom̃a neberialio ea vio medave meravo banlo abiniu. Dam̃ariga nojom̃a neberloglog kiado kulo Ju joomo ea yimo na volkouano, p̃eli na joomo ea Yimo Lu, naruei dam̃ariga nalo miroano ajum̃a amiagago ka kiniou.
JOH 18:21 ?Tibe na, bior venia ana jau kobika den kiniou ka neberlogloglo jum̃abe? Ver jau kosidom kejikia, mia bo ka jau kovika von nalo nam̃a dam̃ariga ajum̃a amiagago ka kiniou. Nalo amijikia batitigio na.”
JOH 18:22 Mia bogo na Yesu ber iliano nei, nakukuano nalo tai kalo napano naio jikili ju vaataro kanio, naio mijogio jibe ka Yesu jom̃a miyotel ea toro na toru nei, naruei naio mijuba Yesu, mil banio berinavo “?Ei, jau be tiniemo ka koverdop̃e toro lu na kanado ka iliano na jibe na! Jau kovitikarso.”
JOH 18:23 Mia Yesu berdop̃eio berinavo “Kovitii vatitigio vonio kanaku iliano nei. Ver nomila sibi, bo ka jau koverial ea nalo na miralo, ka namila sibi jum̃abe. Mia ver maka never vite tai napano maka rimemedu, bior vaio ana komijuba kiniou?”
JOH 18:24 Ana kario, aburu Yesu, napano amiorkakar jum̃ano nalo kia ga vo, ajaluvo den tormoruo Anas, aburu naio ban ea komeli na Parinio Toro Lu Kaivas kanano, ana naio mila vijagiano kanio.
JOH 18:25 Mia Saimon Pitere jikili ju bijalo ea tivelinio na sebi, aju amijegilo, ana abitilubar kija naio, ana abika denio aberinavo “?Jum̃abe, p̃eli jau bunu kobe toro na kiano naiagagoano tai?” Ana naio berbure, naio berdop̃e berinavo “Makanio, kiniou maka neve kanano.”
JOH 18:26 Pitere berdop̃e jibe na, mia nalo tai napano m̃a ajumolu aju na naio be Parinio Toro Lu kanano toro na im̃auano tai, napano naio be torogio tai nanua Pitere jelar buru tiliniene meruo. Naio jikili lie vo ka bika bereio den Pitere, naio berinavo “?P̃eli jau maka kove kanano tai, mia kiniou be tinieku ka namialso bija naio yako ea buruolivi ruei?”
JOH 18:27 Mia Pitere milavanio jikili, naio barbonbonua varolu ka ninei, naio berinavo naio maka rijikia Yesu, mia monloglog ka aura nene ana amijog tormano jokokoreko.
JOH 18:28 Naruei viomijeni mermeravo kia ga vo, maka viorijeni vatitig vo, mia Kaivas naio mil ban Yesu ruei, naruei aburu naio ajaluvo den vio nei bereio, aban ea Pailat kanano komeli. Pailat naio be toro na toru napano kulo Romo abitirilar naio ka rije tuboiano ea buruvenuo na kulo Ju nalo kialo. Mia ka bogo na abinimei vaataro ka kanano komeli, kulo Ju nalo kialo navurim̃araboiano tinielo maio ka jibe ka napano abel ka ava joomo ea yimo nei, ajidomii ver ava joomo eaio mia rila amei ameravo re bunu ea Atua mirano, mia ajikia re ka avijurukarlo ka sinaniano na Jokoluolu na Sidomkariano na Ioruriano. Tenene na, aburu Yesu, abinimei aju tavio ga, mia maka ava joomo.
JOH 18:29 Ana aberial ka Pailat, ana naio binimei tavio mial lo, bika denlo, berinavo “Mo, kamiu kuver von kema nei mila venia na bova ana kuburu naio binimei jua miraku kavijova niogoravo nei jibe na.”
JOH 18:30 Ana nalo aberdop̃e, aberinavo “Maka, kumemi numijikia nuver kaso ka toro na, naio m̃a mila kirivova-o mia! Ver p̃eli, mia kumemi maka nuvijikia nuvuru rimei vanso.”
JOH 18:31 Ana Pailat berinavo “Ver tibe na, mia kamiu ga kumijikia kuva kuvisian vironiano na vabe van naio napano memedu ka kenemiu tuboiano.” Naruei navurim̃araboiano na kulo Ju nalo aber kanio aberinavo “Ea kenememi tuboiano, kumemi numijikia nuvitibure naio ka atuba bin rim̃aro, mia vonganei tuboiano na vio Romo naio berbure kumemi bereio ka mia kumemi maka nuvijikia bunu ka nuvila tibe na. Jau takurano ga, kobe toro na toru na parinio tubo na vio Romo kanano, jau ga komijikia kalaio, jau ga komijikia koverinavo asian vironiano na m̃ariano rivanio ea m̃akolkolo.”
JOH 18:32 Mia bogo napano amije iliano nei ban Pailat, maka ajikia, mia aju amila Yesu kiano iliano tai re nua naio binimei be riano. Nina bior naio berial kiano m̃ariano ruei, berenio memedu ga ea venia napano kulo Romo nalo ajum̃a amila, napano ajuk kakar toro ea m̃akolkolo.
JOH 18:33 Mia Pailat jidom ril kija naljuo Yesu ga, ana naio ba joomo ea kiano komeli, naio bio ber Yesu rimei rial naio vo. Naruei amiila Yesu ba joomo, ana Pailat bika denio, berinavo “Kiniou nojidom ka jau koverial vatitig rivu van kiniou. Jau kobe Parinio Tubo na kulo Ju be riano, p̃eli na makanio?”
JOH 18:34 Mia Yesu maka riverdop̃e rimemedu rivanio, mia naio berdop̃e liliu ea navikadeniano tai, naio berinavo “?Kanamo vikaniano na, jau kobika vatitigio, p̃eli na jau kobika den kiniou bior venia ga napano jau komijog nalo dolu ajum̃a aber niegeniege kiniou kanio?”
JOH 18:35 Ana Pailat berdop̃eio, berinavo “Ii, kiniou maka nejikia den kamiu kulo Ju nalo, kiniou maka neve kamiu tai. Kiniou nemijikia ga ka kanamo tomu nalo naliko tomu na tortoru na kulo lu nalo na kenemiu, nalo aburuso kobinimei ka netibureso. Jibe na, nojidom nejikia ga ka jau komila venia napano nalo amialio maka rimemedu?”
JOH 18:36 Ana Yesu berdop̃e, berinavo “Nalo ajidom ka jau monoka ketibure kiniou, bior ka napano nalo maka asidom kiniou neve tubo kalo. Mia kanaku tuboiano naio maka tibe ka tuboiano nalo na yetemeriba nei. Kanaku tomu nalo maka ala mira vija nalo na abinimei ka avokakar kiniou ruei na, ka mia kiniou navan ea re kenememi tomu na tortoru na kulo Ju nalo jum̃alo. Kumemi maka nuve tomu na mira tibe na, bior kanaku tuboiano naio maka ve tena yetemeriba nei.”
JOH 18:37 Ana Pailat berkanio, berinavo “?A na m̃a ka nomijog koberii kiamo tuboiano, jibe ka napano jau kobe parinio tubo tai ruei ina?” Ana Yesu berinavo “Naina naruei! Jau kobakario vatitigio kiana, javukia napano jau koberenio. Kiniou nebinimei yetemeriba nei, nomiyotuba eaio, kar vite na ga naruei, a ka kiniou nemei neverial ilirianiano nalo van kiano tomu nalo. Toro na m̃a naio jikili ju tivelinio na ilirianiano, mia naio riagago rivu ka kiaku iliano.”
JOH 18:38 Naruei Pailat bika den naio bereio, berinavo “Ana kei mijikiaio, ilirianiano naio be vaio na?” Telikiti napano Pailat ber iliano nei bisi, naio jumolu batavio bereio, ana naio berial ka kulo Ju napano ajikili aju tavio, naio berinavo “Tete na, kiniou nobitiio ruei mia maka naleal vite na bova tai toa naio leleio. Bo kanio naio mijikia riva tavio bereio ga tibe na.
JOH 18:39 Mia ver kamiu kuvitum̃a tiniemiu rimaio, ka yuka nonovio, ea jokoluolu nalo nei, nojom̃a noburular kamiu tai napano joa nalakoiano, nomijamo ka naio biedu bereio ea kamiu jibe na ga. Naruei kiniou nemial jibe ka ea yuka nei, naio bo ka ver kiniou notuvan toro nei, kenemiu Parinio Tubo kulo Ju nalo, naio riviedu ea kamiu tibe na ga.”
JOH 18:40 Naio berial jibe na, mia nalo maka asidomio, amiaga burelo aberinavo “Makan, maka leleio, kumemi maka nuvisidom toro na. Kotuvan dolu na Barabas rimei maluvo kean kumemi bereio.” Barabas na m̃a aberiio, naio be toro Ju tai napano nanua mila baravo die kulo Romo nalo.
JOH 19:1 Mia Pailat naio jidomii ka tuvan Yesu rivano, mia tomu na tortoru na kulo Ju nalo ajikili ka aberbureio. Ana Pailat jidom rila titai ka asaaro kanio, ana naio miila kiano tomu na mira ka alavon ka avitiv naio kija beamu vo.
JOH 19:2 Mia na mira nalo aburu naio bano, abar nionoti tilikibi abili vatitigio bo, ana amidu joa pariparinio jibe ka toro na toru tai kiano batubatu. Mia abar kulukoti na bo tai napano be si, jibe parinio tubo m̃ano, amiya ea naio.
JOH 19:3 Ana aju lilie abinimei vaataro kanio, abeve terakurano amiyotel eaio, aberinavo “!Parinio tubo na kulo Ju nalo kialo, aiou! !Kumemi nubatove kaso!” Aber iliano nei kanio, ajum̃a amijubajuba kulbibinio.
JOH 19:4 Bisi na iorou kanio, ana Pailat naio ba tavio bereio kean tomu na tortoru na kulo Ju nalo kialo napano aju tavio kiano, naio berial kalo, berinavo “Mo, vonganei kiniou nojidom kamiu monoka kuvitilubar ka kiniou maka bunu neleal ka kema nei, vovaiano joa naio leleio, naina naruei mia kiniou novuru rimei rivan kamiu bereio.”
JOH 19:5 Naio ber jibe na, ana Yesu naio miyotuba tavio, jikili ju kamu ea miralo, bija batubatu na tilikibi ea parinio bija kulukoti napano amiya eaio. Naruei Pailat berial ka kulo Ju nalo, berinavo “Nainei naruei be kenemiu toro na toru!”
JOH 19:6 Mia tomu na tortoru na kulo lu nalo, bija navitikariano nalo na Yimo Lu, bogo napano abitilubar venia napano Pailat naio jidom rilaio, nalo maka lele asaaro kanio naruei, nalo ajum̃a amiaganiaga, aberinavo “Kuvituku kakar naio ea m̃akolkolo! !Kuvituku kakar naio ea m̃akolkolo!” Mia Pailat maka bunu rijikia tovulu lo naruei, mijamo, berinavo “Mo, ea kanaku vitiiano, kema nei naio maka rila vite tai vova lele garuei, a verver kuvisidom, kamiu ga kuvuru naio kuvituku kakario ea m̃akolkolo.”
JOH 19:7 Mia bogo na amijogio, maka asaaro, aberinavo “E makanio! Komijikia ruei ka maka nuvijikia nuvila tibe na. A be riano, bo ka kema na naio rim̃aro, bior naio milakorov kenememi tuboiano. Naio jom̃a milavonio ka vavavinia naio tulaka, ka ver naio be Atua kenerinio. A jau ga naruei komijikia kala rim̃aro.”
JOH 19:8 Mia bogo na Pailat mijogial vite nei, burum̃ara moroano tai binimei ea naio bereio, naio jo jidomii toru ka Yesu naio be toro na vabe bereio,
JOH 19:9 ana naio ba joomo ea kanano komeli bereio, naio bio Yesu binimei, bika denio, berinavo “?Jau, vio na vabe naruei naio be kanamo vio memedu?” Naio bikanio, mia Yesu maka ril, maka river titai vanio.
JOH 19:10 Mila na Pailat naio berinavo “Ei, jau kojom̃a maka keil tibe na, jau ga komila bulagso bereio. Bo kanio jau kover titai van kiniou, bior kiniou naruei, joa kiniou ka nala venia napano nojidom nala vanso. Ver nosidom jau kava tavio bereio tibe na ga, kiniou nemijikia nalaio, p̃eli na ver kiniou nosidom kam̃aro ea m̃akolkolo, kiniou nemijikia nalaio. Vede jau komijikia vite na naruei?”
JOH 19:11 Vonganei Yesu mil naruei, naio berdop̃e banio, berinavo “?P̃eli jibe na kovio, mia be kei na naio mije moroano na banso ka kala tibe na? Verver Toro na toru na mave naio maka rijamo ka vanso, maka kejikia kala titai ka kiniou leleio. Ver koverinavo kiniou nam̃aro, nina be kiamo vovaiano tai ruei, mia naio napano midu kiniou nojoa jum̃amo, naio mila bova laka, naina be kiano burum̃ara kariano tai na.”
JOH 19:12 Telikiti napano Pailat mijog Yesu mil jibe na, naio milavon bereio naio jidom ka tuvan naio rivan ga tibe na, mia kulo Ju nalo kialo tomu na tortoru abio bereio, aberinavo “Kema na naio barvar ka naio-o mia, berinavo naio be parinio tubo tai, naio jidom rila naio to mave, ka kanamo toro na toru nei Parinio tubo Sisa naio totano. Tibe na, ver jau kotuvan naio rivano ga tibe na, jau komila im̃auano tai napano mia Sisa naio maka saaro ka leleio ga, mia rivuku larso den kiamo im̃auano na.”
JOH 19:13 Nalo aber jibe na, mila na Pailat kiano jidomiano beve juo bereio ana naio mila aburu Yesu ba tavio ea komeli bereio, ana ba jotano mave ea kiano vio tai na tibureiano, napano abio ka Puruveru Vodobi, p̃eli na napano kulo Ju abio ka Kapata.
JOH 19:14 Ana ka bogo na, binimei bokar niogoravo naruei, nina ea legiano na imoniano na vite nonovio na beni nene napano be burum̃ara legiano na Jokoluolu na Sidomkariano na Ioruriano. Mia Pailat naio jotano mave ruei, naio jiloglog Yesu ban tomu na tortoru na kulo Ju nalo napano ajikili aju yetano aju, naio berinavo “!Nina naruei, be kenemiu Parinio Tubo nei!”
JOH 19:15 Mia maka asidomio, amiaga koko vio laka, aberinavo “!Kuvurular naio rivano! Kuvituku kakario mave ea m̃akolkolo, kuvuebin rim̃aro!” Ana Pailat naio berdop̃e banlo, berinavo “!Tomnei! ?Jum̃abe, kamiu kumisidom ka kiniou nala ka napano mia auebin kenemiu Parinio Tubo nei?” Naruei tom na tortoru na kulo lu nalo aberdop̃e, aberinavo “?Kei naio ber naio be kenememi Parinio Tubo? Toro na toru Sisa naio ga takurano be kenememi Parinio Tubo.”
JOH 19:16 Mia Pailat mial ka ajikili laka, mo naio mijamo ka Yesu banlo, midu naio joa jum̃alo ka atukukakario ea m̃akolkolo, tavukia napano nalo ajidomio.
JOH 19:17 Pailat midu Yesu joa jum̃alo, naruei nalo aburular naio bano. Mia bogo napano aju abano, amila napano Yesu midu ga bereio kiano m̃akolkolo, naruei ajukamu kanio aba abokar suku sesa napano sano veru nene nalo ajavukia bordada na kulorinio tai, napano abio jelea iliano na Ipru aber Kolkota.
JOH 19:18 Ea vio nene naruei, ajukukakar Yesu ea m̃akolkolo, a bija tom juo dolu bunu, tinene jo tivelinio ka naio, a tinene jo tivelinio a naio jo iviso kalo.
JOH 19:19 A Pailat kiano iliano tai, naio berii kalo ka avivitauia bisi na atukukario to mave ka Yesu parinio, jibe napano naio ber “Yesu re Nasarete, kulo Ju nalo kialo Parinio Tubo.”
JOH 19:20 Iliano nene, abivitauia jel ea iliano tolu, Ipru na kulo Ju kialo, Latin na kulo Romo kialo, a Krik na kulo Kris kialo, naruei amidu jo mave ea Yesu kiano m̃akolkolo. Vio na m̃akolkolo nei naio vaataro ga ka bulukomeli, mia tomu nalo nam̃a ajum̃a amiel abinimei m̃a abarvar laka ea vio nei amial iliano nei ana ajum̃a abulukuio.
JOH 19:21 Mia tomu na tortoru na kulo lu nalo na kulo Ju nalo maka asaaro ka iliano nei. Nalo aberilubarbar ban Pailat, aberinavo “Toro na toru, jau koberenio avivitauia tibe nei aver ‘Parinio Tubo na kulo Ju kialo,’ jau kober maka rimemedu laka. Kumemi numisidom ka avilig bereio, avivitauia tibe nei, aver ‘Naina, naio ber be kulo Ju nalo kialo Parinio Tubo.’ ”
JOH 19:22 Mia Pailat maka sidom, naio jidom ka tobo ga tibe ka napano naio berenio, ana naio berial banlo memedu, berinavo “Vite napano nebivitauia, nebivitauia ruei.”
JOH 19:23 Tomu na mira nalo ajuku kakar Yesu naltolu ea kialo m̃akolkolo, mia amijilimebi. Tomu na mira nalo nei nalo veri, abokar Yesu m̃ano kulum̃arauo nalo, mia aberinavo atan kalo ea taara ve veri, tai kanano tai, tai kanano tai, jibe na. Nalo ajanka jibe na ba bokar Yesu m̃ano kulukoti na toru, mia maka asidom ajede kokorovio niati ve veri ealo bior kulukoti nene, maka aiasosolio, mia amim̃auka ea burum̃ara niati kulum̃arauo takurano ga.
JOH 19:24 Mila na aberver kalo, aberinavo “Maka rivu ka rejede lelan kulukoti na, mia bo ka kito reiere m̃abujo ga riviorio.” Mia maka ajikia, mia nalo ajum̃a amila memedu ga ka iliano tai ea iouano tai ea Niosi Lu na Iouano re nua ruei. Iliano nene naio ber jibe nei, naio berinavo Ajanka m̃aku kulum̃arauo jan ealo, mia amiere m̃abujo ka m̃aku kulukoti. Iliano nei naio ber jibe nei, memedu ga ka venia napano tomu na mira nalo amilaio.
JOH 19:25 Nalo ajelan Yesu mave ea kiano m̃akolkolo jibe na, a ea nalo napano m̃a ajikili aju vaataro ajum̃a abitio, be tira veri. Nalo nei be Yesu kenieno, a kenieno dolu na teliki, a Mere napano koano Klopas, a Mere na vio Maktala.
JOH 19:26 Ana Yesu jirarag batove, naio mial kenieno, a naio mial ka napano kiniou bunu, napano kumemi juo nube kuruememi, nejikili noju vaataro, ana naio berial kiniou ban kenieno, naio berinavo “Tiramoruo, ninei be kenerimo nei naruei.”
JOH 19:27 Mia naio mil ban kiniou bunu, naio berinavo “Naina, be koniomo nei naruei.” Mia jikar ka bogo na, kiniou noburu tiramoruo nene binimei mon ea kiaku vonuo, kiniou nobitikar batitig naio bo jibe ka kenieku.
JOH 19:28 Yesu naio mijog bova mave ea m̃akolkolo banbano-o naio bitilubar ka kiano im̃auano naio mila nonovio biniu ruei, naruei naio berial berinavo “Midou jer kiniou.” Nina be kiano iliano tai bereio napano naio ber ka iliano tai ea Niosi na Iouano Lu nalo rimei rive riano.
JOH 19:29 Mia nalo amijog ka napano naio ber midou jerio, naruei nalo amidu burujumu tai, abudom ea m̃alo m̃arjum̃elm̃elu tai napano jua baju tai, ana nalo amiyukuru kar ka jaiesi tai, ajian bavin jokol Yesu niono.
JOH 19:30 M̃arjum̃elm̃elu nei jokol niono bisi, ana naio berial iliano tai, naio berinavo “Biniu biniu naruei.” Mia bogo napano naio ber iliano nei, naio jurubanini ka parinio, naio mijamo ka niununo bano, naio burum̃aria kiano jegi ana m̃arodobi.
JOH 19:31 Bogo napano Yesu m̃aro, nina ea legiano viovare ea legiano na lavatitigiano na vite nonovio na Jokoluolu na Sidomkariano na Ioru-riano. Jibe na mia beni nene, naio be legiano lu na toru na jokoluolu nene, mia ea bogoti na, be lu laka ka atokol mokotenano kulorinio na m̃aro. Mila na tomu na tortoru na kulo Ju nalo ajidom ka monoka avar bulag mokotenalo tomu tolu nei beamu, karina m̃erenio rijoru. Mia amerou ka tibe m̃a nalo tolu nei tai maka rim̃aro vo, naruei amiila toru ba ban Pailat, abika ka ver amijikia asavokokorov jaalo ka am̃arm̃aro sop̃eli.
JOH 19:32 Ana Pailat mijamo kanio, mia kanano tomu na mira nalo abinimei ajavo korovio naio jaano napano ajukar naio ea m̃akolkolo tivelinio ka Yesu, karina amila ka nalo tinene.
JOH 19:33 Mo nalo abano ka ala ka Yesu bunu, mia amial ka napano m̃arodobi ruei, mila na maka bunu ala kanio.
JOH 19:34 Mia na mira tai midu kiano mira, julu dulu Yesu merikono tivelinio, naio miyuku ba joomo banbano-o amial ka napano burum̃ara burukija bija uei miararo batove.
JOH 19:35 Naruei vite nei naio be riano laka, bior ka napano kiniou namial ka miraku. Nomijikia ka be riano, ana neberial ka kamiu, naruei kamiu bunu kumijikia kumonea ka vite nei naio be riano ga.
JOH 19:36 Vite nalo nei ama-luvo jibe na ka rila iliano nalo na ea vivitauiano lu nalo re nua amei ave riano. Iliano tai naio ber jibe nei, berinavo “Maka bunu na niabene tai napano mia rivurikorovio,”
JOH 19:37 a dolu nene naio berinavo “Ajulu niegeniege lelan naio, bisi na mia atu avitii naio.” Naruei bajago na Yesu kiano m̃ariano naio jibe ga na napano iliano nalo na aberialio nuanua ruei.
JOH 19:38 Mia toro na toru tai na kulo Ju nalo kialo, siano Yoseve, na vio bulukomeli na Arimatea, naio be Yesu kiano naiagagoano tai kirisiou kija ruei, mia naio jom̃a milavan kiano moneano ka napano naio jom̃a mermerou ga ka tomu na tortoru dolu nalo. Mia bogo napano kiano Tubo naio m̃aro, karina merouano nei bakovio, naruei naio ban ea Pailat mirano, bika Yesu mokotenano. Ana Pailat mijamo kanio, ana naio ba midular Yesu mokotenano ea m̃akolkolo.
JOH 19:39 Mia toro dolu tai naljuo Yoseve ka bogo na, nina be Nikotimas m̃a napano beamu, naio ba lukuluku ga ka riva rial Yesu ea bogiano tai ka ritukunu vijaio. Naruei Nikotimas naio binimei ka bogo nei, naio bar bunu saba tai binimei ka rujuvuluko batitig ka Yesu mokotenano, bija burum̃ara bam̃aatei tai, napano natemiiano nene juvulu kilo duelimo va rolu [30].
JOH 19:40 Naruei nalo amidu Yesu mokotenano, amijuvulukoio ka kulum̃arauo nalo napano mivu, bija m̃aatei nalo neibano jibe ka nam̃a kulo Ju nalo ajum̃a amilaio julaka ea kialo m̃ariano nalo.
JOH 19:41 Amijuvuluko bisi, mia vaataro ga ka vio napano ajukukakar naio m̃aro ea, tiniavio tai jo, mia jouro ea tiniavio nene be bulukup̃ili vou na puruveru tai jo, napano aje vonga ka adu tasim̃aro romoneaio, mia maka ve tai rivan ea vo.
JOH 19:42 Naruei amial ka vaataro napano m̃erenio rivatove, bogo bulati ga ana Legiano Lu tikario, naruei amidu Yesu mokotenano mebi joomo ea vio nene.
JOH 20:1 Amidu Yesu mokotenano mon joomo ea buluvae nene, joa bano-o bokar legiano moti na sude dolu. A be tire nalo tealo kalo, jibe ka Mere na vio Maktala nalo, ajumolu kavijova niogoravo amiel ea vio bobogio abinimei ea buluvae. Mia bogo napano abinimei vaataro, amiilo va ka napano burum̃ara puruveru maka bunu toko buluniono buluvae, amelivilivilar kanio ruei jo mon tivelinio ka ga.
JOH 20:2 Mia bogo napano Mere naio mialio, naio barp̃ilig jikiti ban bereio, naio binimei mial Saimon Pitere bija kiniou nam̃a kumemi juo Yesu numitibe kuruememi, naio berialio ka kumemi juo, berinavo “!Ai, abe Yesu mokotenano ba kovio tai ruei! Amidu lario ba kovio, kumemi maka nuvijikia ka naio jo be naruei.”
JOH 20:3 Kumemi juo numijogio, naruei numitumolu nuban sop̃eli ea buluvae.
JOH 20:4 Numitikiti nubano, mia nojovulu Pitere, noboru ea vio nene jukamu, mia Mere bunu jakisor kumemi binimei bereio.
JOH 20:5 Nabano naboru ea buluvae, naban vaataro neminiadu ba joomo ea vio nei napano amidu Yesu mokotenano mon eaio. Mia maka bunu neialio, mia nemial ga kulum̃arauo napano amijuvuluko ka Yesu, jibirbil jibe na ga aju, mia maka nava joomo.
JOH 20:6 Mia maka vesiou ana Saimon Pitere naio iorou binimei mijaka ba joomo ea buluvae. Naio mial kulum̃arauo nene nalo, jibe ka ga napano amijuvuluko ka Yesu nua viomijeni niovo ruei.
JOH 20:7 Mia be ielikono tai, napano amiorkar ka Yesu parinio, naio maka to vija kulum̃arauo nalo, mia amijuku batitigio bereio jo naio takurano.
JOH 20:8 Pitere naio jom̃a bitii vite nalo nei jibe na, mia kiniou bunu naba joomo nebitiio. Nubitiio jibe na, numijikia naruei a numonea ka napano Yesu jumolu bereio meul den nam̃ariano ruei, be riano mia be riano.
JOH 20:9 Beamu, kumemi naiagagoano nalo maka nuvisidomiio ka mia tibe na, bior napano maka nuvijikia ka napano Vivitauiano Lu nalo ajum̃a aberialio ruei ka mia kiado Naverikariano monoka rim̃aro karina mia naio rimeul bereio.
JOH 20:10 Beamu, maka nuvijikiaio, mia vonganei kumemi juo numialio ka mirememi. Naruei nubitiio banbano-o, bisi ana kumemi nuban bereio vonuo.
JOH 20:11 Kumemi juo nuba vonuo bereio, mia Mere naio jikili ju tavio ea niono buluvae nei ga ju jogumirano jibirbili. Naio jom̃a jegi jibe na banbano, mia naio jirarag ba joomo ea buluvae,
JOH 20:12 naruei naio miilo bereio ka nailiano juo amiya kulum̃arauo napano miuvuruvu laka, aju ajutano mave. Tinene jotano ea vio napano beamu Yesu parinio mebi eaio, a tinene naio jotano ea vio na jaano ban eaio.
JOH 20:13 Ana naljuo amil ban Mere, aberinavo “?Koig, jau kojom̃a kejegi vaio?” Naio berdop̃e berinavo “Amidular kanaku Tubo bakovio tai, maka nejikia ka amidu naio mon be naruei.”
JOH 20:14 Naio ber iliano na, karina naio jiraragodi bereio, naio mial toro tai jumolu jikili ju. Naio maka rivitilubario, mia be Yesu nene.
JOH 20:15 Naruei Yesu bunu bika denio, berinavo “?Koig, jau kojom̃a kejegi vaio? Kojom̃a kejirag kei ea vio nei?” Mia Mere naio beriam̃a toro na im̃auano ea vio nei ga, naio berdop̃e banio, berinavo “Toro na toru, ver jau naruei komidular naio ea vio nei, aiou, jau koverial ka kiniou vio be naruei komidu mokotenano joaio. Kiniou nojidom ka nodu rimei to vatitig ea jeleigio bereio.”
JOH 20:16 Naruei Yesu bio Mere ka siano, berinavo “Mere!” Naio mijogio, ana barip̃iligio, bitilubar ka be Yesu, ba vaataro kanio, bioio mije kialo iliano, berinavo “Raponi!” napano nioti na iliano nei berinavo “Naverloglogiano.”
JOH 20:17 Ana Yesu ber kanio, berinavo “Mere, to, kotokol re kiniou tibe na. Kiniou maka najikia notoa vio nei, bior maka nava mave vo ea Teta. Mia bo jau kavan ea kuruaku nalo, koverial kalo ka kiniou neber jibe na, ka vonganei, kiniou nojo nabavin mave bereio ea naio napano be karam̃aku, a be karamemiu, napano be kiaku Atua, a be kenemiu Atua.”
JOH 20:18 Ana Mere na Maktala naio mila jibe na naruei, binimei bereio ea kumemi naiagagoano nalo, berialio berinavo “Kiniou namial Tubo ka miraku,” a naio berial ka kumemi vite nalo nam̃a Yesu berkanio.
JOH 20:19 Ana ea legiano moti na sude nei kia ga vo, kijev nene, na kumemi naiagagoano nalo numitu vio takurano joomo ea vio nam̃a numitua numituluku eaio. Nubukar batitigio m̃aratavo nalo, bior ka napano numerou ka tomu na tortoru na kulo Ju tiniel ser kumemi bunu, tavukia nam̃a tiniel jer Yesu beamu ruei. Numitu jibe na, mia kolvare ga, Yesu maluvo binimei jikili ju iviso ka kumemi, berinavo “!Tum̃aroano to vija kamiu!”
JOH 20:20 Naio ber jibe na, karina naio jiloglog ka kumemi ka jeleig butoto nalo ea jum̃ano bija burum̃ara niajebijo na ea merikono tivelinio. Numialio, mia bogo napano nubitilubario ka be Tubo, numisaaro mia numisaaro.
JOH 20:21 Naruei naio ber ka kumemi bereio, berinavo “Tum̃aroano to vija kamiu!” A naio jusolio, berenio “Javukia ga napano Karam̃aku naio miila kiniou ka nala kiano im̃auano, naruei kiniou neiila kija kamiu bunu ka kuvila tibe na.”
JOH 20:22 Iorou ka nina, naio miuvu jegi binimei ea kumemi, naio berinavo “Kamiu kuvokar Niununo Lu.
JOH 20:23 Toro kei napano ver kamiu kuviekokoa naio rivior kiano kariano, mia kariano nene taluvo den naio, mia toro kei napano ver kamiu kuviekokoa re naio rivior kiano kariano, mia kariano nene to dam̃ariga ea naio.”
JOH 20:24 Telikiti napano Yesu maluvo ea kumemi, kumemi tai maka to, nina be Tomas Savoro.
JOH 20:25 Iorou kanio, numial naio, nuberialio kanio, nuberinavo “!Tubo naio maluvo ea kumemi, numial naio ruei!” Mia naio maka sidom rimoneaio, berinavo “Makanio, kiniou monoka naial naio ka miraku. Ver kiniou naial re jeleig butoto ea jum̃ano, a notokol ka m̃arjukujum̃aku nei, a ver kiniou nasian re jum̃aku nei ea niajebijo ea merikono, mia kiniou nomonea re ka naio meul bereio.”
JOH 20:26 Tomas berial kanano jidomiano nei, mia sude takurano barlaka bano, na kumemi numitu vio takurano bereio ea vio nei nua. Ea bogo nene Tomas bunu jo kumemliko, a m̃aratavo nalo ajetavo batitigio bo aju, mia Yesu miyotuba ka kumemi vaarakurano bereio, berinavo “!Tum̃aroano to vija kamiu!”
JOH 20:27 Naio mil ban Tomas, berkanio, berinavo “Naine be jum̃aku, jau koyuku m̃arjukujum̃amo, kotokol veveio. Naine be merikoku, jau kodu jum̃amo toaio. Jau kovitovtonia re bunu, koviekar kiniou sikili.”
JOH 20:28 Tomas mijogio, bitii Yesu, naruei berdop̃e berinavo “Kanaku Tubo, jau kobe kanaku Atua!”
JOH 20:29 Ana Yesu berkanio, berinavo “?Jum̃abe, jau komial kiniou, ana komonea kiniou? Nina bo, mia burum̃ara ilivuiano toa nalo napano maka aial kiniou vo, mia amonmonea kiniou ruei.”
JOH 20:30 Saba miroano napano Yesu milaio, nebivitauia jua niosi nei ruei, mia naio mila burutomoluo dolu telabo bunu ea mirememi napano maka nevivitauia bulagio.
JOH 20:31 Mia iliano nonovio na jua niosi nei, be tena rijai kamiu kumijikia kumonea ka Yesu naio be Naverikariano, naio be Atua kenerinio riano. Naruei kenemiu moneano ea siano na, mia ve m̃arabo na mia kuvokar meuliano ea naio.
JOH 21:1 Iorou kanio, kumemi naiagagoano nalo tealo numitua burum̃ara ueiyabo nei na Taiperias, p̃eli na Kalele, ana Yesu miyotuba.
JOH 21:2 Kumemi napano numitu ea bogo na, be Saimon Pitere, Tomas Savoro, Nataniel na vio bulukomeli na Kenan yako Kalele, kiniou bija kuruaku na toru na Yemesi, bija kumemi juo bereio. Naruei Yesu kiano yotubaiano ea bogo na naio jibe nei.
JOH 21:3 Beamu, Saimon Pitere naio berial berinavo “Mo, kiniou nava novuku levlevi tavio beamu vo.” Naruei numitumolu nuberinavo “Bo ga, kitom̃a roviniu.” Naruei nubatove, numidu uako nuba nubuku levlevi. Naruei numitua tei bano-o bokar viomijeni, mia maka lele nuvokar niado tai.
JOH 21:4 Mia bogo napano viomijeni mermeravo, Yesu binimei jikili ju uro ea vio nei, numialio ka be toro tai ju, mia maka nuvitilubar ka be naina naruei.
JOH 21:5 Ana Yesu bio ban kumemi, bika ber “?Keneriku nalo, kubar kija niado p̃eli na makanio?” Naruei nuberinavo “Maka leleio.”
JOH 21:6 Ana naio berinavo “Mo, kuvila tibe nei. Kuva kuvuku bere kenemiu levlevi, mia kuvuku re bunu tavukia beamu, kuvila von ka kuvituvarvanio ea jumemiu meruo beamu vo, mia nomijikia ka mia kuvokar niado tealo.” Kumemi maka nuvitilubar ka be Yesu na jo mil, mia nubano numituvarivan levlevi javukia ga napano naio berenio. Mia vaarakurano ga bujo, niado mia niado, mia bogo na kumemi nuburu vonio ka rimei mave numila deio ga, naio temi laka ka niado.
JOH 21:7 Ana vonganei nubitilubar ka be Yesu, ana kiniou napano kumemi juo Yesu nube kuruememi, neber ka Saimon Pitere, neberinavo “Pitere, keialio. Tubo yako ju.” Bogo napano Pitere naio mijogio jibe na, ana naio jumolu vaarakurano, miya kiano kulukoti bereio, biako batove ea tei, mia ba uro.
JOH 21:8 Maka nuvitu laka ka vio uro, titai jibe ka meta toromomou takurano [100], mia Pitere naio jukamu ka kumemi, ana numidu uako kumemi iorou, napano nuburude lilian levlevi nei bujo ka niado.
JOH 21:9 Mia bogo napano nuboru uro, numial ka napano sebi tai jo, napano ajum̃a amijege niado ea vovosebi nene ruei, a numial ka napano joko nalo na terteliki bunu amenoko batitigio bo ju.
JOH 21:10 Ana Yesu berinavo “Niado napano kubokarlo naruei, kuvar tealo rimei rive sado.”
JOH 21:11 Ana Saimon Pitere naio batove ea tei, bavin ea uako, burular levlevi, buru binimei uro. Niado nalo miroano laka, numerou ka mia levlevi naio rivurkokorovio, mia makanio, nuburu binimei bo ga. Mia bogo napano nubar bulavulag niado nalo, nubulukulo bokar toromomou takurano duelimo va jimo ba tolu [153].
JOH 21:12 Naruei bogo napano niado nalo na aju amijegeio amenoko bo, ana na Yesu bio, berinavo “Mo, kamiu kumei kuvisinan.” Ea bogo nei, nubitilubar ka be Tubo, maka bunu nuvila von ka nuvikanio ka naio be kei.
JOH 21:13 Naruei nubinimei numitu vio takurano naruei, ana Yesu midu joko bureboṽe janea kumemi, bija niado nalo bunu, ana numisenio.
JOH 21:14 Nina naio jibe ka Yesu kiano varolu napano naio miyotuba ka kumemi kiano naiagagoano nalo, iorou ka napano Atua mila naio meul bereio ea nam̃ariano.
JOH 21:15 Telikiti napano numije simemi sinaniano na kavijo bisi, ana na Yesu jidom tukunu kija vija Saimon Pitere. Naio bika denio, berinavo “?Saimon, Jonas kenerinio, jum̃abe? Jau tiniemo jii kiniou loa laka, juvulu ka napano nalo dolu tinielo jii kiniou, p̃eli na makanio?” Ana Pitere berdop̃eio, berinavo “Tubo, vite na jau komijikia ruei, ka kiniou najaaro toru kaso.” Naruei Yesu berkanio, berinavo “M̃araiu, mo jau kavagan kiaku nunu solbouo nalo.”
JOH 21:16 Ana vaarakurano bereio, Yesu bika denio, berinavo “?Saimon, Jonas kenerinio, jau tiniemo jii kiniou toru laka, p̃eli na makanio?” Ana Pitere berdop̃e, berinavo “Tubo, vite na jau komijikia ruei. Javukia napano neberkario, kiniou najaaro toru laka kaso.” Naruei Yesu berkanio, berinavo “M̃araiu, mia jau kovitikar kiaku nunu nalo.”
JOH 21:17 Ana bereio, be varolu nene, Yesu bikanio, berinavo “?Saimon, Jonas kenerinio, jau kajaaro ka kiniou be riano, p̃eli na makanio?” Mia bogo napano Pitere naio mialio ka napano Yesu jom̃a bika den naio jibe na ba bokar varolu, naio mijog mimou, ana berkar ban Yesu, berinavo “Tubo, abe jau komijikia vite nonovio. Jau komijikia batitigio bo ruei ka napano kiniou najaaro toru laka kaso.” Ana Yesu berkanio, berinavo “M̃araiu, jau kavagan kiaku nunu nalo.
JOH 21:18 A neber riano ka jau jibe na, ka beamu, bogo na kobe m̃eaku kia ga vo, kojom̃a komila jibe ka ga nam̃a kojidom kala. Jau takurano komiel janea vio na vabe napano kojidom kavan eaio. Mia nomijikia never kaso ka bogo na mia komei kove tormoruo, mia tomu dolu aya kulum̃arauo easo, avokar jum̃amo, avuruso kavan ea vio napano maka kosidom ka kavan eaio.”
JOH 21:19 Iliano na Yesu kiano nei, naio jibe ka napano jo berialio jum̃abe ka mia auebin Pitere. Ea kiano m̃ariano, naio mila bajago tai napano naio midu naio ju tano, mia rivitirilar Atua siano to mave. Mia iorou ka Yesu ber ka Pitere jibe na, naio buru bere naio, ber naio takisorio bereio, berinavo “Jau komei, katakisor kiniou dam̃ariga.”
JOH 21:20 Mia bogo napano Yesu jukunu bija Pitere bisi, ana Pitere barp̃ilig naio, mial kiniou, Yesu kiano bilbilu na bo, nojo vaataro ka naljuo. Kiniou nei napano beamu, ea sinaniano na maaro, nojotano vaataro ka Yesu, nebika naio ka ea kumemi naiagagoano nalo, kei naio mia tiveluku ka naio.
JOH 21:21 Mia bogo napano Pitere mial kiniou, bika den Yesu, berinavo “Tubo, jum̃abe ka bilbilu nei?”
JOH 21:22 Naruei Yesu berkanio berinavo “Ver kanaku sidomiano ka mia naio rivakovio re, mia mijikia to tibe na-o vokar napano mia kiniou nemei bereio, vite na be kanaku, maka ve kanamo ka mia kover titai kanio. Mia venia napano be kanamo ka kala, nober kaso ruei, ka katakisor kiniou nam̃ariga.”
JOH 21:23 Mia iorou ka bogo na, bogo napano namoneano dolu nalo amijog ka napano Yesu mil jibe na, amijog belea, aberiam̃a Yesu berii kiniou, berkar ka mia maka nejikia nom̃aro bogo tai. Mia Yesu maka river tibe na, naio ber ga ka ver naio sidom, mia rijikia tibe na. Tibe na, nioti nene ber ka vite na Pitere bikanio, naio maka ve kanano, mia be Yesu kanano ga.
JOH 21:24 Mia kiniou naruei napano nojom̃a nober bulavulag vite nalo nei, nojom̃a nobivitauia bulagio batitig bo ka kuvijikia kuvulukuio. A kito roviniu romijikia romonmonea ka iliano nalo nei abe riano laka.
JOH 21:25 Bo ga naruei, niosi nei binimei maaro ea vio nei naruei. Mia vite telabo napano Yesu milaio ajuaio, mia vite telabo mia telabo bereio napano Yesu milaio maka atuaio. Ver kito rovivitauiaio nonovio, nomial jibe ka p̃eli mia kiano niosi nene nalo ve miroano laka, rivanvano-o mia vio ve teliki ea yetemeriba nei.
ACT 1:1 Nao, kanaku bilbilu Tiovilas, kiniou najaaro ka nevitavo vijaso ea niosi dolu nei. Ea kanaku niosi na jukamu napano nejiri banso, nojo nejiri tukunuano na vite nalo napano Yesu jom̃a milaio, a napano naio jom̃a berloglogio, nina jikar ea kiano im̃auano,
ACT 1:2 binimei bokar bogo napano ea moroano na Niununo Lu, naio jian kiano iliano na maaro ban kanano atevi nalo napano naio jo buru bulaglo ruei, ana iorou kanio ana Atua buru naio bavin bereio.
ACT 1:3 Bogo napano naio meul bereio ruei ea nam̃ariano, napano maka rivavin vo, ana bogoti telabo, naio jo malmaluvo kalo ba bokar legiano duelimo va veri [40], ka rila rimeravo vatitigio vanlo ka naio meul bereio ea nam̃ariano be riano. Ea bogo na, nalo ajum̃a abitilubarbar naio, mia naio jom̃a berii m̃arabo nalo na Atua kanano navenatuboiano banlo.
ACT 1:4 Bogo tai napano naio joa vio tai naliko, ana jian iliano nei banlo, berenio, berinavo “Mia kamiu monokanio kuvituvan re vio nei Yerusalemo vo, monokanio kuvitu rorea beamu vo ka mia kuvokar Niununo Lu na Teta naio berkario ruei ka mia sian van kamiu, jibe kanio nam̃a neberii ka kamiu bunu ruei.
ACT 1:5 Beamu, Jone Baruei naio baruei ea tomu nalo ka uei ga, mia vesiou re, legiano tai avar laka, mia Atua naio rivaruei ea kamiu ve riano, nina ea Niununo Lu.”
ACT 1:6 Ea bogoti tai bereio, napano atevi nalo abinimei vio takurano naliko Yesu, abika denio, aberenio aberinavo “?Tubo jum̃abe, be bogo nene memedu kanio mia jau kala kito kulo Israel nalo kito ve kiado parinio tubo bereio, p̃eli na maka ve bogo nene vo?”
ACT 1:7 Ana Yesu berdop̃elo, berinavo “Maka ve kenemiu ka mia kamiu kuvijikia bogoti nene nalo p̃eli na legiano nalo napano Karam̃eku naio ga takurano, naio bar batitigio ju ruei ka mia tibe na, tibe na.
ACT 1:8 Ana na iorou kanio, Niununo Lu naio rimei ea kamiu, ana bogoti nei naruei kuvijev moroano, ana mia kamiu monokanio kuva kuverial kiniou ea vio Yerusalemo nei, a ea vio dolu nalo nonovio napano yako Yutea vija Sameria, rivano-o rivokar vio dolu nalo na yetemeriba reraio.”
ACT 1:9 A bogo napano naio ber iliano nei bisi, mia nalo aju abitikar naio memedu kia ga vo, ana Atua burular naio bavin, ana melijo tai binimei midukoio, ana nalo nei maka bunu aial naio bereio.
ACT 1:10 Bogo napano nalo ajum̃a abitikar kia ga tiniabene, nalo amiilo kolvare ga ka tomu juo na kialo kulum̃arauo miuvuruvu, nalo abinimei abitirikarlo aju naliko, naljuo aberinavo
ACT 1:11 “!Ai, kulo Kalele nalo! Kamiu kuvijog re rivova, ana kuvitu kuvisirarag re vavin vesio tibe na. Yesu nene napano Atua burular den kamiu bavin tiniabene, monokanio mia naio rimei bereio, a mia rimei bereio tavukia ga na naio bavin tiniabene ruei, napano kumialio vonganei na.”
ACT 1:12 Ana atevi nalo ajuvan suku nene, napano naio be Suku Na Buruolivi Nalo, nalo aban bereio abatove ea vio Yerusalemo, maka ve tebievi laka, mia jibe ka kilometa menu takurano ga.
ACT 1:13 Nalo abinimei aboru Yerusalemo, ana aban bereio ea vajoomo na mave ea yimo na ajujuaio mugaruei. Mia sialo nalo nene ajibe nei: Pitere, Jone, Yemesi, a Andru; bija Vilip, Tomas, Bartolomio, a Mataiu; a bija Yemesi, napano Alveas kenerinio, bija Saimon napano naio be nalo tai napano jukamu m̃a amila baravo ka kulo Romo nalo, naliko Jutas, napano Yemesi kenerinio.
ACT 1:14 Ana ea bogoti nalo nei, nalo nei, naliko tire nalo, amidu buronlo bogo nonovio ka volkouano. A Mere, Yesu kenieno, bija Yesu kuruano nalo bunu, amidu buronlo nalikolo.
ACT 1:15 Be legiano tealo abarlaka ruei, ana namoneano nalo abinimei vio takurano, nalo abokar titai jibe kanio toromomou takurano duelimo valuo [120] abiniu. Ana ea bogo na, Pitere naio jidom riverii vanlo ka mia ala tum̃abe ka aleal toro na mia rudu jeleig Jutas.
ACT 1:16 Nina bior iorou kanio ana Jutas naio mila kanano im̃auano va nei nua ruei, naio bulu niatano tai bija puruveru na naio mijevio, ana naio ga mijoru ea vio nene, ana mabono burup̃eio, naruei tinieno nalo amolmoluo, ana naio m̃aro. Mia tomu nalo na vio Yerusalemo amijogial lilianiano nei, mila ana nalo abio niatano nei kanio kanalo iliano, aberinavo “Akeltema,” nina be iliano tai na berenio “Vio Na Burukija.” Tenene na Pitere naio jidom riverii vite nene van namoneano nalo, naio jumolu ju kamu ea miralo, mil banlo, berinavo “Bilbilu nalo, nanua Niununo Lu mil ea Teviti niono, naio berii Jutas nene kiano im̃auano, napano naio burum̃arabo ka tomu nalo abinimei abokar Yesu, mia iliano nalo nei abinimei abe riano ruei, kanio mia Iliano Lu monokanio rive riano bogo nonovio. Jutas nene naio be kumemi tai, napano Tubo bitirilar naio ka mia naio rivokar im̃auano rivija kumemi,
ACT 1:20 mia vonganei, naio jibe kanio na iliano juo napano joa Niosi na Iouano, napano tinene naio berinavo ‘Bo kanio mia kunuano to kurano ga, mia maka toro tai rijikia toaio,’ mia tinene bunu, napano naio berenio ‘Bo kanio toro dolu rudu jeleigio.’
ACT 1:21 “Bior vite na, monokanio toro tai rimei bereio tusol kumemi ka riverial ka verenio Yesu, kiado Tubo, naio meul bereio ea nam̃ariano. Toro nene naio monokanio ve nalo tai napano aju bija kumemi nanua, ea bogo nalo nam̃a Tubo naio jom̃a miel kumemliko. Naio monokanio ve toro tai napano naio joa bogo nalo nam̃a Jone miolioluii kanano varueiano, binimei bokar legiano na mia Atua burular Yesu den kito, ka naio bavin bereio.”
ACT 1:23 Naruei ana nalo aberial tomu juo nei sialo. Tinene, siano Yoseve, napano abio kanio Basabas, a be siano dolu tai bunu, aber Jastas. A toro tinene siano Matias.
ACT 1:24 Naruei ana nalo abolkouo, aberenio “Atua-o, jau ga kobe Atua Na M̃asosouano, komijikia venia napano joa tomu nalo kanalo iviso. Mo, kumemi numisidom ka jau kesiloglog van kumemi tomu juo nei na vabe nene napano jau koburu naio ruei,
ACT 1:25 kanio mia naio rivokar im̃auano na atevi, napano Jutas juvanio ruei ka rivan ea kanano vio na laveniano nene rimemedu.”
ACT 1:26 Nalo abolkouo bisi, naruei nalo amila jibe kanio nam̃a amiere m̃abujo, ana Matias siano maluvo. Naruei ana nalo abitirilar naio, ana nalo abuluku naio bija nalo dolu napano duelimo ba tai [11] nei, ana mila nalo duelimo ba juo [12] bereio.
ACT 2:1 Ea legiano na Jokoluolu Na Uiti Meruo, namoneano nalo abinimei aju vio takurano,
ACT 2:2 naruei vaarakurano ga, be malioano tai maluvo ea tiniabene, napano naio jibe ka burum̃ara jegi tai miuvuvu, ana malioano nei barko nonovio vio nalo na yimo nei napano ajutano joomo eaio.
ACT 2:3 Naruei ana nalo amial vite tai jibe kanio sebi naio bilvili, ana na sebi nene jerabo ba janea nalo abeve terakurano.
ACT 2:4 Naruei nalo nonovio, Niununo Lu binimei bujo magmago ealo, milalo amil ka iliano dolu nalo, jibe ka napano Niununo nei naio milaio ana nalo amijikia amil kanio.
ACT 2:5 Naruei ea vio Yerusalemo, be kulo Israel nalo aju, napano nalo abe tomu na volkouano nalo. Nalo na ajumolu ea vio telabo na yetemeriba nei, nalo abinimei.
ACT 2:6 Naruei nalo nei amijog malioano nei, ana nalo naliko kulo dolu nalo, nalo telabo abinimei ea vio nei. Mia nalo nei amiilo toru laka, bior tomu nalo neibano Niununo binimei ealo, nalo ajum̃a amil, mia tomu nonovio ga aju amijog kialo iliano nalo memedu ga.
ACT 2:7 Naruei nalo amiilo binvinlo, amemebiju, aberinavo “!Uerei tomu nalo! Tomu nalo napano ajum̃a amil jibe na, mia nalo abe kulo Kalele ga.
ACT 2:8 ?Jum̃abe ana kito roju romijog ka nalo ajum̃a amil kanio kanado iliano nalo jibe na?
ACT 2:9 Kito robe tomu na buruvenuo telabo napano roju nei, na vio Patia, na vio Mitia, na vio Elamo, na vio Mesopotomia, na vio Yutea, na vio Kapatosia, na vio Pontas, na vio Esia, na vio Vrijia, na vio Pamvilia, na vio Ijivi, na vio Krit, na vio Arapia, na vio Lipia ea tivelinio ban yako Saireni, a ea burum̃ara bulukomeli na vio Romo bunu. Kito tealo robe kulo Israel nalo memedu, mia tealo napano maka ave kulo Israel beamu, mia iorou kanio ana abinimei amidu kanado moneano. Mia kito robiniu, roju romijog ka nalo ajum̃a amil ka kanado iliano nalo beve terakurano, ajum̃a aberii burum̃ara im̃auano na tortoru napano Atua naio milaio.”
ACT 2:12 Naruei nalo amiilo toru, a kanalo jidomiano ba kovio, ana maka bunu ajikia ka mia atum̃abe naruei, ana nalo ajum̃a abivika denlo, aberinavo “!Uerei tomu nalo! ?Venia na jibe na?”
ACT 2:13 Mia nalo tealo aju bunu abital ealo napano Niununo binimei joalo ruei, aberinavo “A, tomu nalo na amunu m̃elea uei ga mila ana abe kodovo jibe na.”
ACT 2:14 Ana Pitere naliko atevi dolu nalo duelimo ba tai [11] nalo ajumormolu abinimei ajua vio nei, ana naio mil jouo banlo, napano berial jibe nei, berinavo “Bilbilu nalo, napano kamiu kube kulo Ju, bija kamiu kulo dolu nalo napano kamiu kumitua vio nei, ea Yerusalemo, kamiu kuviagago vatitigio ka kiniou ka never bisivisii vite nei van kamiu.
ACT 2:15 Tomu nalo nei makanio parilo selivivi tibe ka napano kumitum̃a kuberenio, makanio, bior vonganei naio be m̃erenio koveri [9] kavijo kia ga nei vo.
ACT 2:16 Mia vite napano kumialio, nina vite nam̃a Naverialiano Joel naio beriio nanua ruei, berinavo
ACT 2:17 ‘Atua berenio “Ea legiano nalo na bogo na maaro nei, mia kiniou nesian Niunuku van tomu nalo nonovio. Ana mia kenerimiu nalo aver bulavulag kanaku iliano, a mia kenemiu m̃eaku nalo amon derevijo aial vite nalo, a kenemiu tormoruo nalo, mia amonovovuii na monovovuano nalo.
ACT 2:18 Riano ga, ea bogo na, mia kiniou nesian Niunuku, rimei ve toru ea m̃eaku nalo a merevono nalo ka kanaku im̃auano, ana mia nalo aver bulavulag kanaku iliano.
ACT 2:19 Mia kiniou nala vite na iloiano nalo ea vio yauo, vija burutomoluo nalo ea yetemeriba nei, mia ve burukija a sebi a burum̃ara you banunu ve toru bunu atu.
ACT 2:20 Beamu, m̃erenio mia naio rimei ribobogio, a mia siberio naio rimei rivilvili tibe ka burukija. Ana iorou kanio, ana legiano na toru na Atua kanano, napano mia rivu laka, naio mijikia rimei.
ACT 2:21 Mia ea bogo nene, ana toro kei napano verenio rivio ka Atua siano, mia Atua rilarur naio.” ’
ACT 2:22 “Tomu nalo na Israel, kamiu kuviagago vatitigio ka kiaku iliano nei. Yesu na vio Nasarete, naio be toro napano Atua jiloglogio meravo ka kamiu ka naio be Naverikariano. Atua mila jibe na nina ea im̃auano nalo na moroano bija burutomoluo nalo napano naio mila Yesu mim̃aukanio ea miremiu nua ruei. Vite nalo na kamiu kumitu kumijikia ruei,
ACT 2:23 mia bogo na Atua midu naio joa jumemiu, kamiu kumitumolu kumuebin naio m̃aro, napano mia kumijamo ka taara va nalo ajukukakar naio ea m̃akolkolo. Bogoti napano kamiu maka kuvila vite nei vo, mia Atua naio mijikia ruei ka mia naio rimei tibe na, ana naio mijamo kanio, bior vite na jakii jibe na ka naio jidom kakar batitigio nua ruei ka rim̃aukanio.
ACT 2:24 A karina, moroano na nam̃aariano maka rivare ka rivokar Yesu sikili, mia Atua burular naio den nam̃ariano kiano taniabe jaleleano, ana na mila naio meul bereio.
ACT 2:25 Nina jibe ka Teviti kiano iliano tai re nua, napano naio berii Kristo, napano berinavo ‘Kiniou nemial ka napano Atua jo bija kiniou bogo nonovio, naio jo tivelinio vameruo na kiniou, ana mila kanaku iviso maka rimemebiju.
ACT 2:26 Jibe na naruei, ana tinieku jaaro, a buruminaku miou, kiniou nebe toro ga, mia nabarkar tinieku jikili ea Atua.
ACT 2:27 Ana jau Atua, mia jau kotuvan re niunuku toa vio na nam̃ariano, a mia jau kajamo ka re taniabene na kanamo Toro Lu na kanamo im̃auano rimenunu.
ACT 2:28 Jau kobisip̃e m̃arabo nalo na meuliano ka kiniou ruei, a mia tinieku rivujo ka saariano na toru, napano jau kojo bija kiniou.’
ACT 2:29 Banalo, kiniou nejidom neverial vite nei rimeravo van kamiu. Korobido nanua beamu, napano siano Teviti, naio m̃aro bogo be ruei, ajivinio nua ruei. Ninei be sano m̃artanbo nene nei joa kanado vio, jo binimei bokar vonganei.
ACT 2:30 Mia bogo napano naio jo meul kia ga vo, mijikia ruei ka Atua berkar jikili banio, berinavo mia bogo tai, kanano yati tai naio monokanio totano bereio ea kanano jobaro na toru, tavukia napano kanano yati naio rimei ve parinio tubo ka tomu nalo, tibe ka Teviti napano naio be parinio tubo jukamu. Ana Teviti nene naio be naverialiano tai,
ACT 2:31 mia bogo napano vite nei maka riyotuba vo, naio mial ruei ka mia Atua rila Naverikariano nei naio rimeul bereio ea nam̃ariano. Tenene na m̃a Teviti naio berenio ea kanano iliano napano berenio, berinavo Atua naio maka tuvan niununo tobo ea vio na nam̃ariano, a maka rijamo ka kanano tati tobo rimenunu.
ACT 2:32 Vite nei naruei kumemi numitum̃a nuber bulagvulagio, ka Atua bitirilar toro neibano Yesu nene den nam̃ariano bereio.
ACT 2:33 Atua bitirilario, ana buru lario bavin ruei, midu jo tivelinio vameruo ka naio. Ana jibe ka napano Atua Karam̃ado berkario, naio sian Niununo Lu van naio, ana Yesu rion Niununo Lu van kumemi, ana Niununo Lu nei naio jo mim̃auka vite nalo nei napano m̃a kamiu kumitum̃a kumialio a napano m̃a kumitum̃a kumijogio.
ACT 2:34 Ea Teviti kanano iliano nene, naio maka riverii naio, bior napano maka ve naio napano rivavin tiniabene tibe na, mia naio berii Naverikariano nei. A kanano iliano dolu jibe nei bunu, napano naio berinavo ‘Atua Sop̃i naio ber ka kiaku Tubo, berinavo “Jau kototano tivelinio vameruo ka kiniou, koto dam̃ariga,
ACT 2:35 mia kiniou nala kanamo uolu nalo amei atibe ka m̃adayebe na kovulan jaamo eaio.” ’
ACT 2:36 Bior vite nalo nei naruei, mia kiniou nejidom never bisivisii rimeravo van kamiu, m̃aratavo vodolu nonovio na Israel, ka Yesu nene napano Atua bitiri lario nua beamu be kiado Tubo a be Naverikariano, ana kamiu kumituku kakario ea m̃akolkolo ruei.”
ACT 2:37 Mia bogo napano tomu nalo amijog iliano nei, nalo amijog jibe ka julu kanalo m̃aravuo ba bokar kanalo buruiu memedu, naruei ana nalo abika den Pitere a atevi dolu nalo, aberinavo “?Banalo, mia kumemi nuvila tum̃abe naruei?”
ACT 2:38 Ana Pitere naio ber kalo berinavo “Kamiu nonovio, kuvilig kamiu, kuvan ea varueiano ea Yesu Kristo siano, ka mia Atua riviekokoa kenemiu kariano nalo. A mia Atua naio sian Niununo Lu rivan kamiu, tibe ka kanano ijaiano novo tai van kamiu,
ACT 2:39 bior verikariano napano Atua mila naio mila ban kamiu, a mila ban kenerimiu nalo, a mila bunu ban kulo dolu nalo napano aju koalabo kia ga vo. Verikariano nei naio joa nalo napano kanado Atua Sop̃i naio jom̃a biolo.”
ACT 2:40 Ana Pitere jom̃a ber iliano novo telabo ka mia rivurlo amei, ana naio berenio berinavo “Kamiu monokanio kuvituvan kariano na kulo va nalo na vonganei, kamiu kuvilarur kamiu den vironiano napano jo binimei ealo.”
ACT 2:41 Naruei nalo telabo kalo napano amijog Pitere kanano iliano nei, ana nalo amonea naio kanio, ana abaruei ealo. A ea tomu nalo nonovio napano ajua legiano nei, nalo telabo laka mia titai jibe ka menu tolu [3,000] napano abinimei ajusol lo ea kanalo taara nene.
ACT 2:42 Ana namoneano nalo nei nalo aju abokar jikili bajago nalo nene, napano nalo amiagago julaka ka atevi nalo aberlogloglo, a nalo amijeburonlo bogo nonovio ea tinieano takurano novo ea kanalo taara, a nalo ajum̃a ajinan vio takurano bogo nonovio, a nalo abarlo ka aura na volkouano nalo bogo nonovio.
ACT 2:43 Naruei atevi nalo amim̃auka vite na iloiano telabo, bija burutomoluo telabo, mia tomu nalo amial vite nalo nene, tinielo memebiju toru.
ACT 2:44 Mia namoneano nalo, abe tinielo takurano banbano-o, mia nalo ajum̃a amijamo ka kanalo saba nalo ka ve kialo bitiraviranio.
ACT 2:45 Jibe na, ana nalo aju ap̃iliṽili ka kialo borotano nalo a vite dolu nalo na be kialo, ka avio ka puruveru nene nalo napano abokario van nalo kei napano abe talim̃asa ka vite tealo.
ACT 2:46 Legiano nonovio, nalo nei aju amijeburonlo jibe ka taara takurano, joomo ea Atua Kunuano Lu, a nalo ajum̃a ajinan vio takurano ea kunualo nalo joomo. A bogo nonovio napano nalo ajum̃a amijeburonlo jibe na, mia nalo ajaaro toru laka, a bogo nonovio aju abatove ka Atua, a dam̃ariga nalo aber siva toru banio bior meuliano novo nei napano naio jian banlo,
ACT 2:47 ana nalo abamenea naio kanio. A ea bogo nei, kulo dolu nalo bunu ajaaro ka kialo bajago vou novo nei, a legiano nonovio, Atua Sop̃i naio jo milarur tomu ta bunu vo, naio jo buru bironlo ea taara na atevi nalo kialo.
ACT 3:1 Ana legiano tai, monloglog ea bogo na volkouano na niogoravo, m̃erenio tolu, Pitere naio Jone, naljuo aju abavin ea Atua Kunuano Lu.
ACT 3:2 Naruei be toro tai napano bogo na naio moluo be javuluku, mia legiano nonovio nalo ajum̃a amiduio binimei amebi kanio joa morouo napano aber “Morouo M̃araiu,” nina ea Atua Kunuano Lu. Ana javuluku nei naio jom̃a miog ijaiano den nalo nam̃a ajum̃a aba joomo ea Yimo Lu.
ACT 3:3 Naruei naio mial Pitere naio Jone napano naljuo aju aba joomo, mia naio miog ijaiano tai den naljuo.
ACT 3:4 Ana na Pitere naio Jone, naljuo abamere ea toro nei, ana Pitere naio berkanio, berinavo “Koig, jau kovitikar kumemi juo beamu vo.”
ACT 3:5 Naruei naio bitikarlo, jidomii beriam̃a mia naio rivokar vite novo tai denlo.
ACT 3:6 Mia Pitere naio berkanio, berinavo “Koig, kiniou maka neje puruveru tai leleio, mia vite novo tai takurano ga napano nemijevio ka mia neje vanso. Vite nene ninei: ea Yesu Kristo toro re Nasarete siano, kiniou neber kaso, jau kotumolu naruei, keiel.”
ACT 3:7 Naruei Pitere monokorkoro bokar toro nei jum̃ano meruo, ana miija toro javuluku nei ka naio tumolu, ana vaarakurano ga, jaano be juo abinimei abo ajikili.
ACT 3:8 Naruei naio jumolu vaarakurano ga, jumolu ju, miel vonvonio. Ana bogo napano naljuo aju abano, ana naio jo jakisorlo, ana nalo tolu abano aba joomo ea Atua Kunuano Lu, napano mia toro nei jo jaaro toru laka, jo miel, jajabujo, naio jo miaia Atua.
ACT 3:9 Naruei nalo napano aju joomo amialio ka toro nei napano jom̃a miel a jom̃a miaia Atua,
ACT 3:10 naruei bogo napano nalo abitilubario, nalo aberinavo “!Mm, kamiu kuvialio! Nina be toro javuluku nam̃a na-o! Bogo nonovio naio jom̃a miog puruveru tavio ea morouo na ea Yimo Lu, vonganei naio binimei bo jo mieliel ruei.” Naruei nalo amemebiju vatitigio bior vite nei napano maluvo ea toro nei.
ACT 3:11 Mia bior tomu nalo amiilo toru, nalo ajikiti abinimei ea nalo tolu nei ea m̃arsup̃iki na Atua Kunuano Lu, napano siano “Solomon Kanano M̃arsup̃iki.” Ea vio na, toro neibano jom̃a jakii Pitere naio Jone kia navo.
ACT 3:12 Bogo napano Pitere mial ka tomu nalo nei abinimei vaataro, ana naio mil banlo, berinavo “?Ai, kito kulo Israel nalo, jum̃abe? ?Ka venia ana kamiu kumiilo m̃ele ka vite nei, ana kubitii m̃elea kumemi juo jibe na? ?P̃eli kamiu kumisidom kuberiam̃a kumemi juo ga numila toro nei naio mijikia miel ea kenememi moroano ga, p̃eli na kuberiam̃a kumemi juo nube kulo lu, p̃eli na venia? !Makanio!
ACT 3:13 Mia Atua ga mila vite nei naruei, Atua napano Epraamo a Aisak a Yakovo kanalo, a napano be Atua na korobido dolu nalo kanalo bunu. Naio mila vite novo nei ka rivitirilar kiano toro na im̃auano nene Yesu siano ea miremiu nalo. Mia nina be Yesu nene kia ga navo, napano kamiu kuburu naio ban ea kiado komeli na toru nei, ana Pailat mialio berenio Yesu naio bo ga, ana berinavo naio mijikia rivatavio ga bereio, mia ka bogo na ana kamiu kumil jikili ban Pailat ea mirano, kuberinavo Yesu naio mila sibi ga, ana kamiu maka kuvisidom naio.
ACT 3:14 Bekurano ka naio bar sio na ka be Toro Lu a Toro Na Memedu, mia ea bogo napano kenemiu iliano jibe na naruei, kuber maka kuvisidom naio. Mia kuber ka ga Pailat kuberinavo kamiu kumisidom toro nam̃a muemue toro m̃aro ruei naio mijikia taluvo, mia Yesu naio tobo, ana Pailat naio mijamo kanio.
ACT 3:15 Tenene na mia kamiu kumuebin ruei Burubati Na Meuliano naio m̃aro, mia iorou kanio ana Atua mila naio meul bereio den nam̃ariano, mia vite nei naruei kumemi numial ka mirememi, ana na numitum̃a nuber lilianio.
ACT 3:16 Mia Yesu siano nene naruei naio mila javuluku neibano kumijikia vatitigio naio, binimei bo, jibe ka napano kumialio nei. Toro nei jaano be juo jikili bo bereio ga ea miremiu vonganei, bior ka ga napano kumemi numonea jikili ea moroano na Yesu siano.
ACT 3:17 “Mo bo, kuruaku nalo. Kiniou nemijikia ka vite nalo nanua kamliko kenemiu tomu na tortoru nalo kumila ka Yesu, kamiu nonovio ga kumilaio bior maka kuvijikiaio.
ACT 3:18 Mia nina naio be Atua kanano m̃arabo ka rila iliano nalo napano naio berial nanua ruei nalo amei ve riano. Ea iliano na kanano naverialiano nalo, naio berialio ruei ka mia Naverikariano na kanano naio monokanio rijog rivova ea mokotenano.
ACT 3:19 Mo, ana kamiu monokanio kuvilig kamiu, monokanio kumei bereio ea Atua, ka mia naio riolkon kokoa kenemiu kariano nalo.
ACT 3:20 Verenio kuvila tibe na, mia Atua naio mijikia sian moroano vou van kamiu ea kenemiu meuliano, a naio mijikia riila kenemiu Naverikariano na naio jii batitigio ruei, nina be Yesu, napano mia naio rimei bereio.
ACT 3:21 Mia Yesu naio monokanio to mave beamu vo, rivano-o rivokar bogo napano mia Atua sidom rila vite nalo nonovio amei ave terivou bereio, tibe ka napano naio ber bulagio ruei ea iliano nalo na kanano naverialiano lu nalo re nua beamu.
ACT 3:22 Ana nalo nene tai napano ber jibe na naio be Mosis, napano berinavo ‘Kenemiu Atua Sop̃i na mia naio rila kenemiu naverialiano tai naio tumolu iviso ka kamiu, tibe ka napano mila kiniou nojumolu noju iviso ka kamiu ruei. Naverialiano nene mia naio ve toro na kenemiu vio ga, a mia kamiu monokanio kuviagago vatitigio ka kiano iliano nalo.
ACT 3:23 Mia tomu nalo napano maka adu kiano iliano nalo, mia Atua rivuku bulaglo den kiano tomu nalo kar ga ruei, kanio mia nalo ava kovio.’
ACT 3:24 Tena Mosis naio berenio, a naverialiano dolu nalo bunu, jibe ka Samuel, naliko nalo napano abinimei iorou ka naio, ea kanalo iliano nalo, na nalo ajum̃a aberii vite nalo na kiado legiano nalo na vonganei.
ACT 3:25 Verikariano nalo napano Atua jian nua ea iliano nalo na naverialiano nalo na kanano, nalo abe kenemiu, a kamiu kumitu joomo bunu ea virakariano nei napano Atua milaio ruei naliko korobido nalo re nua, jibe ka napano Atua ber ka Epraamo, naio berinavo ‘Mia kiniou nala ka mia ilivuiano rimei van tomu nalo na yetemeriba nei, rimei riyotuba ea ga kanamo bajulukuti ga.’
ACT 3:26 Memedu ka verikariano na, Atua mila Yesu jumolu ruei jibe ka kanano toro na im̃auano, ana naio maka riila naio rimei ea kulo dolu nalo, naio miila binimei ka kamiu jukamu. Naio miila Yesu binimei ka rila rivu laka van kamiu, napano mia naio rivilig kamiu, ka kuvituvani kenemiu bajago va nalo.”
ACT 4:1 Ana Pitere naio Jone, naljuo aju amioliolu kia ga vo ban tomu nalo, ana kulo lu nalo, naliko natukamuano nakukuano nalo na Atua Kunuano Lu, naliko Satusis nalo, abinimei vaataro ka naljuo nei.
ACT 4:2 Nalo nei tiniel mimi kilkil, kanio naljuo nei ajum̃a aberloglog tomu nalo aber jibe ka napano Yesu meul bereio den nam̃ariano, tomu nalo bunu amijikia ameul bereio tibe na.
ACT 4:3 Naruei nalo abokakar naljuo, aburulo aban ea yimo na tetavokoiano ka atu rorea riva rivokar beni kanio, bior be bogo luvu ruei.
ACT 4:4 Mia tomu dolu telabo napano amijog kanalo iliano, nalo amoneaio, mia mirano na sum̃ano nalo ga na amoneaio, vaataro ka rivokar menu jumo [5,000].
ACT 4:5 Ea legiano dolu nene, tomu na tortoru na kulo Israel, naliko kialo navurim̃araboiano nalo, naliko naverloglogiano na tuboiano nalo, abinimei vio takurano nei Yerusalemo.
ACT 4:6 Naruei ana nalo aba ajutano ea komeli na toru naliko Anas, napano naio toru ka kulo lu nalo, a naliko bunu kulo kouo dolu tealo jibe ka Kaivas, a naliko Jone, a Aleksada, a kulo dolu nalo na m̃aratavo na toru na kulo lu nalo nei.
ACT 4:7 Naruei nalo amiila atevi juo nei ajumolu aju iviso kalo, ana nalo abika vikadeniano tai denlo nei. Nalo abika aber “?Kei naio berenio ka kamjuo ka kuvila tibe na van javuluku na? ?A kamiu kumijevio moroano na be?”
ACT 4:8 Naruei Niununo Lu binimei bujo ea Pitere, ana Pitere naio mil banlo, berinavo “Kiniou nojumolu nojukamu ea miremiu, kamiu tomu na tortoru nalo na vio Israel, a navurim̃araboiano nalo,
ACT 4:9 mia kiniou nemial jibe ka kamiu kumitum̃a kubika den kumemi juo, ka jum̃abe ka im̃auano novo na kumemi juo numim̃aukanio ea javuluku nei, mia jum̃abe ana kumemi numim̃aukanio bo bereio.
ACT 4:10 Mo, kiniou najaaro ga ka nesian verdop̃eiano na kenemiu vikadeniano nene, ka mia kamiu kuvijikiaio, a ka mia tomu na vio Israel bunu ajikiaio. Neber javuluku nene, naina jumolu jukamu ea miremiu ju na, bija jaano novo juo nene, naio binimei bo ruei ea moroano na Yesu Kristo na vio Nasarete siano. Yesu nene naio nanua kamiu kumuebinio m̃aro ea m̃akolkolo, mia Atua bitiri lario meul bereio den nam̃ariano.
ACT 4:11 Nina jibe kanio na Iliano Lu berii naio, napano berinavo ‘Kamiu tomu napano m̃a kumim̃aukanio yimo, kamiu kubukular belea iesi tai, napano vonganei naio binimei be m̃artea siovo na ju iviso kanio yimo ruei.’
ACT 4:12 Mia maka m̃arabo dolu tai bereio napano mia romijikia rovokar meuliano eaio, bior Atua naio maka sian sio dolu tai leleio van kito ea yetemeriba nei napano mijikia rilarur kito eaio.”
ACT 4:13 Naruei tomu na tortoru nalo nei amiilo toru, bior nalo abitilubar ka Pitere naio Jone naljuo maka ave tomu na tortoru leleio, a naljuo maka ajikia vite ve telabo, mia naljuo nei maka niukniuku rivielo leleio. Naruei nalo amileal bunu ka beamu, tomu juo nei amiel naliko Yesu bogo nonovio.
ACT 4:14 Ana nalo maka bunu ajikia aue dobi Pitere kanano iliano leleio, bior toro napano jaano be juo binimei bo ruei naio jumolu ju naliko naljuo nei.
ACT 4:15 Mia nalo aber kanio nalo tolu nei aberinavo nalo avatavio beamu vo, ka mia nalo amijikia averii vite nei.
ACT 4:16 Nalo tolu nei aba tavio, naruei tomu na tortoru nei aberii nalo aberenio “?Mia kito rala tum̃abe ka tomjuo nei? Tomu nalo na Yerusalemo abiniu amijog vite nei ruei ka tomjuo nei amila im̃auano na toru tai ban javuluku nei ruei, mia maka bunu rejikia roverbure iliano nei bereio.
ACT 4:17 Mia bo ka kito ralavon ka iliano nei riva lie re bunu van tomu nalo, mo ver tibe na mia roverbure naljuo nei ka mia ail re van tomu nalo averii sio nei Yesu vanlo.”
ACT 4:18 Ana nalo abio tomu tolu nei ka amei joomo bereio, naruei amil jikili ban atevi juo nei, aberenio, aberinavo “Kamjuo na mia kuverii re bunu Yesu siano van tomu nalo, a kuverlogloglo re ka naio.”
ACT 4:19 Mia Pitere naio Jone, naljuo aberdop̃elo, aberinavo “?Jum̃abe? ?P̃eli memedu ea Atua mirano ka kumemi nuvitovon re naio, mia kumemi nuvitovon ga kamiu? Nina bo na mo kamiu kuver vonio tena,
ACT 4:20 mia kumemi nei, kumemi maka nuvijikia nuviturmaro leleio ga. Saba nalo na numial ka mirememi, monoka nuverial vija nana numijog ka tiliniememi.”
ACT 4:21 Naruei tomu na tortoru nalo nei amil jikili lie bereio ban naljuo neibano, aberburelo javukia ga nanua beamu, karina na aberenio naljuo amijikia ava tavio, bior maka bunu ajikia aleal m̃arabo tai ka mia aje vironiano van naljuo, bior ga tomu nalo ajum̃a abamenea Atua bior venia napano maluvo kanio javuluku nei,
ACT 4:22 napano bogo na, naio be kiano yuka duelimo va veri [40] barlaka ruei.
ACT 4:23 Bogo napano Pitere naio Jone naljuo aba tavio, naljuo aban bereio memedu ea taara na namoneano nalo. Naruei naljuo aberial iliano nalo na tomu na tortoru na kulo lu nalo kanalo a navurim̃araboiano nalo aberenio,
ACT 4:24 mia bogo napano namoneano nalo amijog iliano nei bisi, ana nalo abolkouo ban Atua. Nalo aberenio “Atua Sop̃i, Atua Sop̃i, jau kojii tiniabene, a borotano, a tei, a vite nonovio na jua yetemeriba nei.
ACT 4:25 Kumemi numisidomial kanamo Iliano Lu tai, napano korobimemi tormoruo Teviti, napano naio be kanamo toro tai, naio berialio ea moroano na Niununo Lu, napano naio berenio jibe nei, berinavo ‘?Bior vaio ana tomu napano maka amonea aju tiniel mimi m̃ele jibe na? ?Tomu nalo aju ajidom ka ala im̃auano na bova, ana bior vaio ana maka ajikia alaio?
ACT 4:26 Parinio tubo nalo na yetemeriba nei, nalo ajumolu aju batitigio ka ala mira, ana tomu na tortoru nalo abinimei vio takurano biorio, mia maka ajikia ka nalo ajum̃a amila mira naliko Atua Sop̃i, a bija kanano Naverikariano.’
ACT 4:27 Atua Sop̃i, kumemi numial iliano nei be riano, naio memedu ga ka kenememi bogo na vonganei, bior memedu ea bulukomeli nei, Erot naio Pontas Pailat, naliko kulo Israel nalo, naliko kulo dolu nalo nei, tiniel mimi toru ka Toro Lu na kanamo im̃auano nei Yesu, napano naio be Naverikariano napano jau komioakoio, ana nalo ajidomii kakario ka mia ala lelan naio.
ACT 4:28 Nalo nei abinimei vio takurano ka ala tibe na, mia nalo amila memedu ga ka venia napano jau kojo kojidomii kakario ruei beamu, ana jau kobitirilar kober mia monokanio tibe na.
ACT 4:29 Mia Atua Sop̃i, kumemi nubika denso ka tiemo monmaio vatitigio rivu ka iliano nalo na jikirkili nei napano nalo ajum̃a aberiio ka kumemi, mia kumemi numisidom ka jau kajai kumemi, tomu na kanamo im̃auano, ka mia kumemi nuverial kanamo iliano, ka mia tiniememi rimemebiju re, a numerou re.
ACT 4:30 Mia kumemi nubika bunu denso ka jau kesianlar jum̃amo, kala tomu na mieiano nalo ajog rivu bereio, a ka mia kumemi numijikia nuvila burutomoluo nalo p̃eli na vite na vremesiano nalo, ea kanamo Toro Lu na kanamo im̃auano nei Yesu siano.”
ACT 4:31 Mo bogo napano nalo abolkouo bisi, ana vio napano aju abior eaio mikulkulu, naruei Niununo Lu binimei bujolou ealo, milalo abano aberial Atua kanano iliano, napano kanalo jidomiano jikili lie ea naio.
ACT 4:32 Naruei ea bogoti nei, taara na namoneano nalo, kialo meuliano nalo binimei bo laka, jibe kanio tinielo takurano ga, a be kialo jidomiano takurano ga, mila ana maka toro tai napano mia sikili ka sidom riverenio ka vite nalo napano be kanano mia nalo abe kanano ga, mia nalo aju amijamo ka kanalo saba nalo be kialo bitiraviranio.
ACT 4:33 Mia atevi nalo aju aber bulavulag ea tomu nalo miralo, ka kiado Tubo Yesu, naio meul bereio den nam̃ariano, mia kanalo iliano nene be moroano toru eaio, mia namoneano nalo amial ka bogo nei, Atua naio jo milivu toru kalo ea kiano tiniememiano banlo.
ACT 4:34 Maka nalo tai ea kanalo taara, napano jum̃ano ve bulati ka vite tai, bior tomu nalo napano be kanalo borotano p̃eli na kunualo, aju ap̃iliṽili bulagio ka vite nalo nei, ana nalo ajum̃a abar puruveru nene nalo abinimei,
ACT 4:35 ajuvanio joa atevi nalo jum̃alo. Mia iorou kanio, ana atevi nalo abarburevure puruveru nalo nene ban namoneano nalo tealo napano jum̃alo bulati ka vite nalo.
ACT 4:36 Nalo tai nene napano naio jakii bajago na, naio be Yoseve, napano miyotuba ea bajulukuti na Livai, abar naio ea uleule na Saipras, mia nina naruei napano atevi nalo ajisia ka sio dolu bereio be Barnabas, napano sio nei sano nioti nene berenio “Toro nam̃a miijalar toro dolu kiano jidomiano.”
ACT 4:37 Naio mila im̃auano novo tai jibe na naruei, napano naio p̃iliṽililar ka kanano niatano tai, ana bar puruveru nene abinimei, juvanio joa atevi nalo jum̃alo.
ACT 5:1 Mia be toro dolu tai, siano Ananaias, napano koano siano Savira, naio bunu p̃iliṽililar ka niatano tai napano be kanalo naljuo,
ACT 5:2 ana naio bar puruveru nene togio, naio bar binimei juvanio jua atevi nalo jum̃alo. Mia naio bar van puruveru na borotano nei togio, bokar bokanio be naljuo kanalo, a koano tira bunu naio mijikia vite nei, naio jaaro toru kanio.
ACT 5:3 Naruei Pitere berkanio, berinavo “?Ananaias, jum̃abe ana jau komijamo ka Sim̃aro binimei mila lelan kiamo iviso jibe na, ana jau komila sibilili Niununo Lu, ka napano jau kobokar bokanio puruveru na borotano nei togio nene?
ACT 5:4 !Komialio kiana! Bogo na jau maka koṽiliṽililar ka niatano nei vo, be kei kiano? Naio be kanamo ga. Mia bogo napano jau kop̃iliṽililar kanio, puruveru nene bunu jua kei jum̃ano? Naio ju kia ga vo ea jum̃amo. Mia bogo na jau koberkar ka kavar nonovio van Atua, jau monokanio kala tibe na naruei. ?Ana venia na mila kiamo jidomiano napano jau komila sibi ga bereio jibe na? !Mia jau maka kala sibilili ga tomu nalo, mia jau komila sibilili Atua memedu ga!”
ACT 5:5 Bogo na Ananaias naio mijog iliano nei, vaarakurano ga naio mijoru batove ea borotano, naio m̃arodobi. Mia nalo napano amijog lilianiano nene, amemebiju toru.
ACT 5:6 Naruei ana kialo m̃eaku nalo ajumolu, amijuvuluko tati na naio, ana amiduio aba tavio, aba ajivinio.
ACT 5:7 Vaataro ka m̃erenio ve tolu rivar-laka, ana koano tira Savira, napano naio maka rijikia vaio napano maluvo ka koano, naio kija binimei joomo.
ACT 5:8 Ana Pitere naio bika denio, ber “Savira, jau koverial ka kiniou. ?Nina be puruveru vodolu na kenemiu niatano nene na, p̃eli na makanio?” Tira nei naio bunu mila sibi, berdop̃e berinavo “Makanio, tenalo nei ga biniu be kiaku.”
ACT 5:9 Ana Pitere naio berkanio, berinavo “?Jum̃abe ana kamjuo kumila sibi jibe na? !Kamjuo kubironkar ka mia kuvila von Atua Sop̃i kanano Niununo! ?Kojog tomu nalo na aju amiel abinimei ea m̃aratavo? !Nalo ajivin koamo ruei abinimei, mia vonganei na, mia nalo aṽierso bunu kava tavio!”
ACT 5:10 Mia bogo napano tira nei naio mijog Pitere kanano iliano nei, ana mijoru memedu ea Pitere jaano, m̃arodobi. Mia m̃eaku nalo nei abinimei joomo bereio, ana bogo napano nalo amial ka tira bunu m̃aro ruei, ana ap̃ier bunu taniabene ba tavio, aba ajivinio jo tivelinio ka koano sum̃ano.
ACT 5:11 Naruei namoneano nalo napano ea lotuano, a kulo dolu nalo bunu napano amijogial lilianiano nei, nalo amemebiju toru laka.
ACT 5:12 Mia ka bogo nei atevi nalo aju amila burutomoluo telabo na Atua kanano moroano, bija vite na iloiano telabo bunu, ea tomu nalo miralo. Mia bogo nonovio, nalo nei bija namoneano dolu nalo ajum̃a ajusol nalo vio takurano ea Solomon kanano M̃arsup̃iki, ea Atua Kunuano Lu.
ACT 5:13 Ana tomu nalo telabo aju abatove kalo, mia nalo napano maka amoneaio, nalo telabo amerou ka avan aiaburelo.
ACT 5:14 Mia dam̃ariga, tomu tealo a tire ajum̃a amonea Yesu, nalo aju abinimei telabo telabo lie vo, mia nalo na, Atua Sop̃i naio jusol nalo ea taara na namoneano nalo kanalo taara.
ACT 5:15 Bior vite nalo nei bunu, tomu nalo aju aburu kialo tomu na mieiano nalo abinimei, ana amidu nalo aju amon ea m̃alo jog a m̃alo yebe nalo, ea ikim̃arabo. Nina nalo amila jibe na ka bogo na Pitere naio riel sel ea vio nei, mia verenio niununo nene ga tokol nalo tealo, mia nalo avu bereio.
ACT 5:16 Mia be tomu telabo bunu ea m̃arkomeli sesa nalo na aju jeliviv Yerusalemo, napano nalo abinimei bunu, a nalo aburu kanalo tomu na mieiano nalo abinimei, bija nalo tealo napano sim̃aro ban ealo, ana atevi nalo amilarurlo abo bereio.
ACT 5:17 Ana parinio toro lu, naliko kanano bilbilu nalo, ninei be Satusis nalo na vio na, nalo amijoku toru laka ka atevi nalo,
ACT 5:18 ana aba amiadikakarlo, abukulo aba joomo ea yimo na teta-vokoiano, naliko tomu na bova nalo napano nalo ajua ruei.
ACT 5:19 Aju ga banbano-o na ka bogiano, ana Atua kiano nailiano tai binimei, ana betavo ea m̃aratavo na yimo na tetavokoiano nei, ana naio jukamu ka atevi nalo aba tavio bereio.
ACT 5:20 Naio ber kalo, berinavo “Kamiu kuva kuvitumolu kuvitu joomo bereio ea Atua Kunuano Lu, kamiu kuverial iliano na meuliano vou nei van tomu nalo bereio.”
ACT 5:21 Ana atevi nalo amonmonea iliano nei, mia bogo na viomijeni mermeravo kia ga vo, ana nalo aba joomo ea Atua Kunuano Lu bereio, nalo aju amioliolu. Ana ea kavijo nene kia ga vo, ana parinio toro lu naliko kanano bilbilu nalo nei, abio navurim̃araboiano dolu na Israel nalo ka nalo amei atutano ea kanalo komeli na toru nei. Nalo nei abe tinielo ka aberiam̃a atevi nalo aju kia ea tavokoiano vo, mia bogo napano nalo abinimei vio takurano ruei jibe na, ana ajuvan iliano ban ea yimo na tetavokoiano ka mia kukuano nalo avurulo amei.
ACT 5:22 Mia bogo na nalo aba aboru ea yimo na tetavokoiano, mia nalo maka ajikia aleal lo. Ana nalo abinimei bereio ea komeli, amila iliveriioano, aberinavo
ACT 5:23 “Bogo na kumemi nuba nuboru ea yimo na tetavokoiano, mia kumemi numial ka napano m̃aratavo naio birako batitigio jo, napano abukario bo ga jo, mia kukuano nalo na m̃aratavo nene ajumolu ajikili aju. Mia bogo na kumemi nubetavo, nuba joomo, mia maka bunu nuvial toro tai to.”
ACT 5:24 Mia tomu na tortoru na kulo lu nalo, a natukamuano nakukuano na Atua Kunuano, bogo na amijog iliano nei, maka bunu ajikia jum̃abe ka atevi nalo nei naruei.
ACT 5:25 Mia ka bogo na, ana toro tai binimei berial lilianiano dolu tai banlo, ber “!Jerei tomu nalo! Tomu nalo napano kuburulo aban ea yimo na tetavokoiano, nalo ajumolu aju joomo ea Yimo Lu, ajum̃a aberloglog tomu nalo bereio ruei!”
ACT 5:26 Ana bogo napano natukamuano nei mijogio, naruei naio naliko kanano kukuano nalo aba aburu atevi nalo neibano abinimei bereio, mia nalo amila ea bajago na melumu ga, bior ka nalo amerou ka mia tomu nalo na vio nei atubalo ka puruveru riviorio.
ACT 5:27 Nalo nei aburu atevi nalo abinimei joomo, ana amila lo ajumolu aju kamu ea tomu na tortoru nalo nei miralo. Ana na parinio toru lu nei naio jom̃a bika denlo, berinavo
ACT 5:28 “?Jum̃abe? Kumemi nuberbure kamiu kirisikili ruei, ka mia kamiu kuverii re bunu sio nei van tomu nalo, p̃eli na kuverloglog tomu nalo ka naio. ?Mia vonganei jum̃abe? Kamiu kumila mia vio Yerusalemo naio bujolou ruei ka kenemiu iliano nalo, a kamiu kumitu kuberenio kumemi naruei nube burupati na toro nei kiano m̃ariano.”
ACT 5:29 Mia Pitere naliko atevi dolu nalo aberdop̃e, aberinavo “Mia monokanio kumemi numonmonea Atua loa ka napano numonmonea kulorinio.
ACT 5:30 Kamiu kumuebin Yesu ruei, kamiu kumitukukakar naio ea m̃akolkolo, mia Atua Sop̃i napano naio be korobido nalo kanalo, naio mila naio meul bereio den nam̃ariano.
ACT 5:31 Atua nene naio bitirilar naio ruei ka naio to tivelinio vameruo na naio, ka naio ve kiado Navurim̃araboiano a ve kiado Ioruriano. Atua naio mila jibe na ka kulo Israel nalo amijikia aviliglo, a ka mia naio mijikia riviekokoa kanalo kariano nalo.
ACT 5:32 Ana kumemi, kumemi tomu na numial vite nalo na ka mirememi ruei, a numitu ka m̃a nuverialio van tomu nalo, nina kumemi liko Niununo Lu napano Atua naio jian ruei ban tomu nalo napano amonmonea naio.”
ACT 5:33 Bogo napano nalo na komeli na toru nei amijog iliano nei, mia iliano nei jululo m̃ele, mila ana tiniel mimi m̃ele ka atevi nalo, ana nalo ajidom ka atiburelo ka mia am̃aro.
ACT 5:34 Mia nalo tai kalo, napano nalo ajum̃a abatove ka naio, naio be Varisis, naio be naverloglogiano na tuboiano, siano Kamaliel, naruei naio jumolu berinavo avuru atevi nalo ava tavio beamu vo.
ACT 5:35 Ana naio mil ban komeli na toru nei, berenio “Tomu na tortoru na Israel, miremiu ea kamiu, kamiu monoka kuvisidomii vatitigio rivu ka vite napano kumisidom ka kuvilaio ka nalo na.
ACT 5:36 Kamiu kuvisidomii toro nei Tutas. Nanua beamu kanio, maka vesiou laka, naio jumolu, ber naio be toro tai, a be titai jibe ka tomu nalo duelimo toromomou veri [400] napano aba abijurukario. Mia tomu nalo amuebin naio ruei, mia amijil dedade kanano tomu nalo abeve terakurano, mia kanano taara nei binimei be kurano ruei.
ACT 5:37 Iorou ka nina, nina ea bogo napano abuluku tomu nalo, Jutas nei na vio Kalele, naio bunu jumolu, buru tomu nalo ajakisor naio. Mia iorou kanio, ana nalo amuebin bunu, a nalo amijil dedade ea kanano tomu nalo bunu abeve terakurano.
ACT 5:38 “Mo ana, ea vite nei napano rojum̃a roberiio, kiniou neber jibe nei, neber mia kito rotuvan tomu nalo na atu ga tibe na, mia rala re titai kalo. Nina bior ka ver kialo jidomiano p̃eli na kialo im̃auano nei rimaluvo ea ga toro, mia vite nei bunu naio monoka rijoru,
ACT 5:39 mia verenio naio miyotuba ea Atua, kito maka rejikia roverbureio. Mia verenio kito ralavonio ka roverbureio, p̃eli mia releal ka kito rojuko vio ka Atua kiano im̃auano novo tai.”
ACT 5:40 Ana komeli na toru nei mijog iliano masosouano na Kamaliel nei kiano, napano naio berenio mia nalo ala re titai ka atevi nalo nene, mia nalo aberenio mia atakii ga tibe kanio napano naio berenio. Ana nalo abio atevi nalo ka amei joomo bereio, ana ajian vironiano telisu banlo, abitivlo, amil kilkil banlo bereio, aberenio averloglog tomu nalo re bunu kanio sio nei Yesu, avona bisi, ana amiila bulaglo abano.
ACT 5:41 Ana atevi nalo aba tavio den burum̃ara komeli nei, mia nalo maka ajog rivova, amijog bo laka ga bior ka Atua naio mialo abe verare ka avokar imouiano ea tomu nalo miralo, kario Yesu siano.
ACT 5:42 Ana nalo maka ajogkar kialo tomu na tortoru nei, ana legiano nonovio, joomo ea Atua Kunuano Lu, a joomo ea tomu nalo kunualo, maka nalo atuvan leleio ka napano nalo ajum̃a aberloglog tomu nalo, napano nalo ajum̃a amioliolu ka Ioluano Vou na Yesu, ka naio be Naverikariano.
ACT 6:1 Ana ea bogo na, Yesu kanano naiagagoano nalo aju abinimei telabo lie vo, mia baravo tai jumolu iviso kalo. Mia nalo tivelinio be kulo Ju nalo napano nalo amil jelea Kris, a tivelinio dolu naio be kulo Ju nalo napano amil jelea ga kanalo iliano napano Ipru. Ana nalo napano amil jelea Kris, nalo ajum̃a amila vukuleleano, nalo aberenio legiano nonovio, bogo napano nalo abio ka bulag kanalo ijaiano telisu ban taanou nalo, mia nalo maka ala rimemedu van kanalo taanou nalo.
ACT 6:2 Ana atevi duelimo ba juo [12] nalo amijog iliano nei, abio burum̃ara taara na naiagagoano nalo nonovio ka nalo amei vio takurano, ana amil banlo, aberinavo “Banalo, maka rivu ka kumemi nuvituvan im̃auano na verialiano na Atua kanano iliano, kanio kumemi nuvitu nuvitikar ga im̃auano dolu nalo na.
ACT 6:3 Verenio tibe na, kamiu monokanio kuvileal tomu ve aluo ea kamiu, napano sialo bo ea tomu nalo miralo, a napano abujo ka Niununo Lu, a napano abarlo ka im̃auano, kanio mia kumemi nuvitiri bulaglo ka nalo ave taara sesa ka avitikar vatitig im̃auano dolu nalo nei.
ACT 6:4 Ana tibe na, mia kumemi atevi nalo, kenememi iviso vodolu naio mijikia tumolu tu sikili bogo nonovio ea im̃auano nana volkouano a nana verialiano na Atua kanano Iliano Lu.”
ACT 6:5 Naruei nalo napano ea burum̃ara taara nei, nalo amijog jidomiano nei, mia ajaaro toru laka kanio, ana amileal tomu aluo jibe kanio napano nalo aberenio. Nalo aluo nei napano amilealo, nalo tai be Stevin, napano be toro tai napano jikili ka monmonea, a naio bujo ka Niununo Lu, bija Vilip bunu, a Pokaras, a Nikeno, a Timon, a Pamenas, a Nikolas toro na vio Antioko, napano naio maka ve toro Ju, mia naio monea kulo Ju nalo kanalo Atua ruei.
ACT 6:6 Naruei nalo aburu nalo aluo nei abinimei ajumolu aju kamu ea atevi nalo nei miralo, ka atokol parilo, a aioakolo.
ACT 6:7 Ana vite nei napano amila, mila ka bogo nonovio, Atua kanano iliano naio jo jeliviv ea tomu nalo, a taara na naiagagoano na Yerusalemo naio jo binimei telabo lie vo, bano-o bokar bunu kulo lu nalo telabo napano kulo Ju nalo kanalo, nalo bunu amijevio moneano.
ACT 6:8 Naruei nalo aluo nei tai, napano Stevin, naio be toro tai napano bujo ka Atua kiano tiniememiano, a bujo bunu ka burum̃ara moroano na Atua kiano, mila ana naio mim̃auka burutomoluo telabo a vite na iloiano bunu ban tomu nalo.
ACT 6:9 Mia kulo Ju nalo tealo napano ajua vio na, maka asaaro ka Stevin leleio, nalo naruei ajikar ka ajidom ala siniabu kanio. Nalo nei, abe kulo Saireni, a kulo Aleksadria, napano nalo aju Yerusalemo ea bogo na, a naliko kulo Selisia tealo bunu, a kulo Esia tealo, napano abinimei amiasol bijalo. Telabo ka nalo nei nalo ajibe ka bagaro takurano ga, napano ajuburon vio takurano julaka ea yimo na volkouano na kulo Ju nalo kialo tai.
ACT 6:10 Mia nalo nei amila vio ka averbure Stevin, bano-o mia kiri deio ga, bior Niununo Lu naio mila Stevin be masou batitigio ea kiano iliano nalo, mia kialo ilimimiano nalo nei maka ajikia atuvulu naio leleio.
ACT 6:11 Ana nalo aba amileal tomu tai bereio ka ava ala sibilili tomu na tortoru nalo, ana nalo nene aba aberial aberinavo “Kumemi numijog toro na naio mil niegeniege Mosis kiano tuboiano, a naio mila searia Atua kiano tolu bunu.”
ACT 6:12 Ana ea bajago na, amila jibe ka navurim̃araboiano nalo, a naver-loglogiano nalo na tuboiano nalo, bija tomu dolu nalo telabo, tinielo bilulu m̃ele ka Stevin. Ana nalo abinimei abokakar naio jikili, ana aburu ban ea komeli na toru na kulo Ju nalo kialo.
ACT 6:13 Ana ea bogo na naruei, ana ilisibiano nalo aju amalmaluvo telabo lie vo, napano amil aber niegeniege Stevin, aberinavo “Bogo nonovio ga, toro na naio jom̃a mili niegeniege kiado Atua kunuano Lu, bija Moses kiano tuboiano.
ACT 6:14 Mia kumemi numijog ka napano naio berii kiado Atua Kiano Yimo, napano naio berenio berinavo mia toro Nasarete na napano Yesu, mia naio rila bulag Yimo Lu nei, a mia naio rivilig bunu kiado bajago moruo nalo napano Mosis jianio nanua bogobe ruei, napano kito robokar batitiglo aju binimei bokar vonganei. !Toro nei Stevin naio jom̃a ber bulavulag vite nalo na, naio jo mila lelan kito toru laka nei!”
ACT 6:15 Nalo amijog iliano nei, naruei ap̃ilig pariparilo ka avitikar Stevin, ka naio rudu kiano verdop̃eiano kanio iliano nei, ana bogo napano abitikario, nalo amialio ka napano mirano binimei jibe ka mirano nailiano tai garuei.
ACT 7:1 Naruei ana parinio toro lu nei naio bika den Stevin, naio berenio berinavo “?Ana jau, jau kober jum̃abe? ?Riano ka napano jau kojom̃a kobuku bulavulag iliano nalo na jibe ka na nalo ajum̃a aberenio na, p̃eli na makanio?”
ACT 7:2 Ana na Stevin naio berdop̃e, berenio berinavo “Karam̃aku nalo a kuruaku nalo, kamiu kuviagago ka kiaku verdop̃eiano beamu vo. Mia kiniou neverii korobido moruo nalo re nua tukamu vo. Nanua nanua laka, tormoruo Epraamo naio joa kanano buruvenuo napano Koltia, ea burum̃ara vio napano Mesopotomia, ana Atua na mermerano na kiado naio maluvo ka naio, berial kanio, berenio berinavo
ACT 7:3 ‘Jau monoka kataluvo den kiamo m̃aratavo, a den kanamo vio, ka kavan ea buruvenuo tai napano mia kiniou nesiloglogio kaso.’
ACT 7:4 Naruei Epraamo jaluvo den Koltia, naio ba joa bulukomeli na Aran jukamu, banbano-o karam̃ano m̃aro, ana Atua buru naio binimei joa buruvenuo nei napano kito rojuaio vonganei.
ACT 7:5 “Mia bogo napano Epraamo naio binimei bokar vio nei, mia Atua maka rudu niatano tai ve telisu leleio vanio, a ea bogo na Epraamo naio maka rivar kenerinio bunu vo, mia naio bokar jikili ga verikariano napano Atua naio ber kanio nanua ruei, napano berkar berinavo mia buruvenuo vodolu na vio nei ve Epraamo kiano, vija kiano bajulukuti nalo napano mia nalo avavavin amei iorou ka naio.
ACT 7:6 Iliano napano Atua ber ka Epraamo ka bogo na jibe nei, napano Atua berenio, berinavo ‘Mia kanamo bajulukuti nalo na mia ava atua buruvenuo dolu, a mia nalo aim̃au kurano ga van sano tubo nene nalo, napano bisi ana mia nalo ala kikilo m̃ele rivano-o rivokar yuka ve duelimo toromomou ve veri [400].
ACT 7:7 Avona bisi, ana mia kiniou netibure buruvenuo nene, mia nesian vironiano van kiano tomu nene nalo, ana na mia novuru bulag kanamo bajulukuti nalo bereio, ka nalo amei bereio a alotu van kiniou ea kenemiu vio kar garuei nei napano nejian ban kamiu.’
ACT 7:8 “Mia ka bogo na naruei, Atua berenio bajago na pakuveuano ban Epraamo, javukia tovorovo tai ka virakariano nei napano Atua mila kario bija naio, mia bogo napano kenerinio Aisak nene naio moluo, bogoti aluo barlaka bano, ana Epraamo mila pakuveu kanio. A karina, Aisak bunu mila jibe na ka kenerinio Yakovo, mia iorou kanio, Yakovo bunu naio mila ban kenerinio duelimo ba juo [12], napano vonganei kito rojum̃a robiolo ka parinio karam̃ado nalo re beamu laka.”
ACT 7:9 Mia Stevin naio jom̃a mil kia ga vo, naio berenio berinavo “Tete nei Yoseve, naio be parinio karam̃ado nalo nei tai, ana kuruano dolu nalo amijoku m̃ele ka naio, ana ap̃iliṽililar ka naio ban ka riva rim̃au kurano ea buruvenuo na Ijivi. Mia Atua jo bija naio ea vio nene,
ACT 7:10 mia miija naio ka kiano bogokouo nalo na jikili nei, banbano-o mila napano parinio tubo na vio Ijivi nei, napano siano Vero, naio mial Yoseve kiano masouano bo laka, ana Vero nei naio midu im̃auano nalo na tortoru na vitikariano na kanano buruvenuo ban ea Yoseve jum̃ano naio takurano.
ACT 7:11 “Ana ea bogo na, ana be burum̃ara vitu tai ea vio Ijivi a ea vio napano korobido nalo kanalo Kenano, ana nalo amijog bova m̃ele biorio, nalo amial ka napano abe deio naruei, nalo maka lele salo sinaniano tai bunu.
ACT 7:12 Mia tormoruo Yakovo naio mijog ka napano be sinaniano na ṽiliṽiliano tealo ju keano Ijivi vo, naruei naio miila kenerinio nalo, napano abe parinio karam̃ado nalo, ka nalo avavin mave Ijivi ka avar tealo ve salo. Nina be kialo ieliano motiano garuei napano aba Ijivi.
ACT 7:13 Ea kialo ieliano valuo nene, Yoseve naio jiloglog naio ka kuruano nalo, a tukunuano na Yoseve kiano m̃aratavo nalo nei bano-o bokar Vero bunu.
ACT 7:14 Ana Yoseve naio juvan iliano ba ban karam̃ano Yakovo, berinavo naio naliko kanano m̃aratavo nalo monoka amei atu naliko naio, ana na Yakovo nalo abokar duelimo va aluo ba jumo [75], napano abavin aba aju Ijivi. Nalo aju banbano-o, ana iorou kanio Yakovo nei naliko kanado tormoruo dolu nalo nei nalo am̃arm̃aro ga ea vio nei.
ACT 7:16 Mia iorou laka kanio, ana na nalo abar buriu nene nalo aban bereio ea kanalo vio nei, ea vio tai siano Sekem, ana ajivinlo ea pakeltavo tai napano Epraamo naio bululario nanua ruei den kulo Amaro.”
ACT 7:17 Mia Stevin naio jom̃a mil kia ga vo, naio berinavo “Kanado tomu nalo ajua vio Ijivi ka yuka telabo bereio vo, naruei nalo amiluo abinimei napano nalo telabo lie vo, ana Atua naio mialio berinavo naio be bogo memedu naruei ka naio rila tibe ka napano naio berkario ban Epraamo nua ruei, berinavo mia naio rivurbulag kanano bajulukuti nalo den kanalo im̃auano kurano ga.
ACT 7:18 Ana ea bogo na, parinio tubo vou tai naio jumolu ea vio Ijivi ruei, napano naio maka rijikia tukunuano na Yoseve kanano re nua a bija kanano m̃aratavo nalo,
ACT 7:19 ana naio mila bova m̃ele ban kanado bajulukuti nalo re nua nei, napano bututualo ka atuvan lelan kenerilo nalo ka am̃arm̃aro ka mia amei re vetelabo.
ACT 7:20 “Mia memedu ka bogo na, Mosis naio moluo, napano naio be tete mudomudomu kirinovo tanea. Ana karam̃ano naio kenieno, abe juo ajivan naio joomo ea kunualo, banbano-o bokar siberio tolu,
ACT 7:21 mia karina, maka bunu ajikia ala titai, ana na monoka atuvanlario. Mia karina, parinio tubo kenerinio vevinio nei ga milealio, ana na midular Mosis ana bitikar lup̃ilup̃io ka ve kanano.
ACT 7:22 Naio jo miluo bavin jibe na banbano-o, ana nalo ajum̃a aberloglogio ka masouano na kulo Ijivi nalo kanalo, ana naio binimei be toro novo tai ea ilimasouano a ea kiano im̃auano bunu.”
ACT 7:23 Ana na Stevin naio berenio, berinavo “Naruei ka bogo napano Mosis kanano yuka binimei bokar duelimo va veri [40] titai jibe na, ana naio tinien maio ka kulo Israel dolu nalo napano aju keano, napano ajibe ka kuruano nalo, ana naio jom̃a jikar ka rivano m̃a miamiadu kalo kijakija.
ACT 7:24 Ana bogo tai naio bano, mial ka napano toro Ijivi tai jo mue toro Israel tai, ana naio ba miija toro re Israel nei, ana milameran ban toro re Ijivi nei, ana muebinio m̃aro.
ACT 7:25 Nina bior ka napano Mosis naio jidomii ruei berinavo mia Atua rivitirilar naio ka rilarur kiano tomu nalo nei, ana ka bogo na, kulo Israel nalo maka avitilubar Mosis vo ka mia naio rila tibe na vanlo.
ACT 7:26 “Ana ea legiano na beni nene, naio mial kulo Israel juo napano ajum̃a ajukulo, ana naio ban ka jidom rila naljuo nei avanjum̃alo bereio, ana ber kalo, berinavo ‘Ei, kamjuo kuviagago. ?Jibe ka kamjuo kube kuruemiu ga na, jum̃abe ana kamjuo kumue lelan kamiu jibe na?’
ACT 7:27 “Mia nana napano mila maka rimemedu ban dolu nene, naio jubonlar Mosis, naruei berkanio, berinavo ‘?Jum̃abe, kei bitiri larso ka mia kove kenememi toro na toru, a ka ketibure kumemi tibe na?
ACT 7:28 P̃eli jau kojidom kouebin kiniou tibe ka napano jau komuebin toro re Ijivi naniovo, a?’ ”
ACT 7:29 “Telikiti napano Mosis naio mijog iliano nei, mijog bova toru laka, ana jumolu buro den vio Ijivi, beven kanio ba joa buruvenuo dolu tai siano Mitiano, ana joa vio na kirisiou kija, ana kenerinio naljuo amoluo ea vio na.”
ACT 7:30 Ana Stevin naio berinavo “Naruei Mosis joa vio na banbano-o bokar yuka duelimo va veri [40] bereio, karina legiano tai ana naio joa vio yauo tai, vaataro ka burum̃ara burusuku na vio Sinai. Naruei naio mial nailiano tai maluvo kanio ea sebi tai napano jijen buruiesi tai.
ACT 7:31 Ana Mosis naio miilo toru ka vite nei napano mialio, ana ba vaataro ka buruiesi nei ka rivitii batitigio. Ana naio mijog Atua Sop̃i joono, napano berenio, berinavo
ACT 7:32 ‘Kiniou nebe Atua ka korobumo tormoruo nalo, jibe ka Epraamo, Aisak, a Yakovo.’ Ana Mosis naio memebiju toru, naio merou ka rivitikario.
ACT 7:33 Ana Atua Sop̃i nei berkanio bereio, berinavo ‘Jau keielar kanamo kulujabue, bior vio napano jau kojumolu kejikili kojuaio na, naio be vio lu tenia.
ACT 7:34 Mia kiniou neber kaso, neberinavo kiniou nebitii batitigio ruei jogvaiano nalo napano kanaku tomu nalo ea vio Ijivi kanalo, a nemijog ruei kanalo tegiano nalo. Naruei kiniou nojo nebinimei naruei ka novuru bulaglo, a jau keialio, kiniou nojo nemiilaso bunu ka kavan bereio ea vio Ijivi tukamu, ka jau kove kanaku toro na rila im̃auano nei.’ ”
ACT 7:35 Mia Stevin naio jom̃a milili kia ga vo banlo, berinavo “Mo Mosis na, naio naruei napano beamu nalo maka asidom naio, napano nalo aberenio iliano nei naruei, aberinavo ‘?Jum̃abe, kei bitirilarso ka kove kenememi toro na toru, a ka jau ketibure kumemi?’ Mia Atua naruei napano miila nailiano binimei joa buruiesi napano jo bovago na, ka rivitirilar Mosis bereio ka naio ve tubo a rive naioruriano na kulo Israel nalo.
ACT 7:36 Ana nina be Mosis nene kia ga navo napano naio burum̃arabo ka kulo Israel nalo ajaluvo den vio Ijivi, nalo abinimei. A bogo nonovio, ea vio Ijivi, a ea Tei Mia, a bereio ea yuka duelimo va veri [40] ea vio yauo, naio jom̃a mila vremesiano ea Atua kanano moroano, a mila saba nalo na burutomoluo nalo banlo.
ACT 7:37 Mia nina Mosis nene kia ga navo, napano naio berial ka kulo Israel nalo, naio berinavo ‘Mia Atua naio rivitirilar kamiu tai ga rimemedu, tibe ka kenemiu naverialiano dolu, jibe ka napano naio bitirilar kiniou jukamu ruei.’
ACT 7:38 A ninei be Mosis nene kia ga navo napano naio jo naliko korobido tormoruo nalo a naliko kulo Israel dolu nalo, ka bogo napano nalo amiel burukuti ea vio yauo, a napano naio jo naliko nailiano nei napano mil banio mave ea burusuku na, Sinai. Ka bogo na, ana Atua jian iliano na meuliano ban Mosis nene ga, ana Mosis nene naio bar binimei jian banlo.
ACT 7:39 “Mia korobido tormoruo nalo nei nalo maka asidom ajogkar Mosis leleio, a nalo abukular kanano iliano nalo ga, ana ea kialo jidomiano nalo, ajum̃a ajidom ka avan bereio Ijivi ga.
ACT 7:40 Mia bogo napano Mosis jaluvo denlo, ba jo kirisiou ea burusuku na Sinai, nalo ajidomii bereio kialo meuliano re nua ea vio Ijivi, naruei nalo aber ka Erono nei, aberenio ‘Kumemi numisidom ka jau monoka koim̃auka kanado tavoru tai, ka mia nalo amijikia avuru m̃arabo ka kito ravano, bior Mosis nei, naio buru bulag kito ea vio Ijivi naio burum̃arabo ka kito robinimei ea vio nei, mia kito maka bunu rejikia ka naio jo be naruei, p̃eli na mia tum̃abe ka naio.’
ACT 7:41 Naruei nalo abano amila jibe na, amim̃aukanio tavoru na kirikiti buluku napano be buruolu, ana amila sida banio, a nalo amim̃aukanio burum̃ara jokoluolu tai ka kialo tavoru nene napano nalo ga amim̃aukanio ka jum̃alo nalo.
ACT 7:42 “Naruei bogo napano Atua mial vite nei, ana naio bilig taakano kalo, a juvanlo ka ava alotu ka m̃arivitano nalo. Nina jibe ka Atua kanano iliano tai napano Naverialiano Amos naio berialio ea Iliano Lu, napano berenio berinavo, ‘!Kulo Israel! ?Julaka ea yuka duelimo va veri [40] ea vio yauo, kamiu kumue temeul nalo ka m̃a kumila sida, mia nina be kanaku sida nalo na p̃eli na kei kiano?
ACT 7:43 Makanio, maka kuvila rivan kiniou, mia kumilotu ka tavoru nalo ga napano m̃a kamiu ga kumim̃aukanio, jibe kanio Molek na, napano kumiel bija kanano tobobo, a javukia bunu Revano na, napano kamiu kubar tavoru na kiano m̃arivitano jukamu ka kamiu. Kanio vite na, mia kiniou nejili bulag kamiu kuva koalabo den kenemiu buruvenuo, kamiu kuva kuvitu laka yako Bapilono tivelinio bano.’ ”
ACT 7:44 Mia Stevin naio berenio, berinavo “Ka bogo napano korobido tormoruo nalo napano ajua vio yauo, ana Atua mil ban Mosis berinavo naio monoka rim̃auka kanano tobobo tai, tavukia kijokijo tai ka riverialio river Atua naio jo nalikolo dam̃ariga. Naruei nalo amim̃aukanio memedu ka tiiano napano Atua berial banio, ana naruei nalo ajum̃a amijiajian lilian tobobo nene ban taara nalo.
ACT 7:45 Nalo ajum̃a amila jibe na, binimei bokar bogo napano Yosua naio jukamu ka kiado tormoruo nalo abinimei amijil bulag kulo dolu nalo napano abinimei ajua kanado borotano nei ruei. Ana Atua naio buru kiado tormoruo nalo abinimei bereio jouro ea kiado buruvenuo nei, naruei ea bogo nei nalo amidu tobobo nei binimei jouro bijalo, jo bijalo binimei binimei bokar bogo napano tormoruo Teviti be parinio tubo.
ACT 7:46 “Ana Teviti naio mial ka napano Atua jaaro m̃ele ka naio ka saba telabo, naruei naio bika ka verenio Atua naio mijikia rijamo ka mia naio rim̃auka kunuano lu tai, ka Yakovo kiano bajulukuti nalo amijikia ava abolkouo vanio eaio.
ACT 7:47 Mia Atua maka rijamo ka Teviti ka naio rim̃auka yimo tai napano jibe na, mia karina kenerinio napano Solomon naio mim̃auka burum̃ara kunuano lu nene.
ACT 7:48 Mia kito monoka rosidomii bunu, ka Toro Na Toru Na Mave Laka maka rijikia toa yimo tai napano tomu nalo ga amim̃aukanio, jibe ka napano Naverialiano Aisea naio berenio, berinavo
ACT 7:49 ‘Atua Sop̃i naio berenio, berinavo “Tiniabene ga tibe ka kanaku vio na nototano eaio, a yetemeriba naio jibe ka jeleigio vio na novulan jaaku mave eaio. ?Kamiu kuberiam̃a kumijikia kuvim̃auka yimo venia, ka kiniou nava notoaio? ?P̃eli na kamiu kuberiam̃a kumijikia kuvim̃auka vio vaio, ka kiniou nava nejilimebi eaio?
ACT 7:50 Vite nalo nonovio nei napano aju, mia kiniou ga na nejii nonovio lo abiniu.” ’ ”
ACT 7:51 Mia Stevin naio jidom ka rila nonovio kiano iliano naruei, ana naio mil ban tomu na tortoru na kulo Ju nalo napano ajua komeli, ana ber kalo, berinavo “A kamiu, kamiu kumitibe ga ka korobido tormoruo nalo nanua beamu na. Tomnei, pariparimiu jikili laka, a tiliniemiu nalo abonbono, maka asidom ajog Atua kanano iliano, a tiniemiu nalo ajavukia tiniene tomu nalo napano maka ave pakuveu ga. Kamiu kube tomu nam̃a aberbure m̃elea Niununo Lu bogo nonovio.
ACT 7:52 Atua kanano naverialiano nalo re nua, korobido tormoruo nalo amila kiki nonovio lo abiniu, a amuebinvinlo telabo, be kurano ka abe tomu nalo napano Atua miilalo abinimei ka averial ka Toro Lu na Atua kiano im̃auano, mia naio jo binimei. Mia kamiu kubova kitkiti garuei, bior bogo napano toro nei naio maluvo ka kito ruei, mia kamiu kubielar naio a kumuebin naio m̃aro.
ACT 7:53 Kamiu naruei napano kubokar Atua kiano tuboiano nene ruei, napano beamu nailiano nalo amidu binimei, mia kamiu maka kuvijogkario, kumitum̃a kumila kokorovio dam̃ariga.”
ACT 7:54 Stevin kiano iliano bisi ea vio na, mia bogo napano tomu na tortoru na bulukomeli amiagago ka naio, iliano nalo nei ajuluborua tinielo, naruei nalo tiniel mimi m̃ele, ana na ajum̃a ajer m̃arjuvolo biorio.
ACT 7:55 Mia Niununo Lu naio binimei bujolou toru ea Stevin, ana na naio jirarago bavin vio mave, jo bitivitii banbano-o, ana mial burum̃ara miamoiano na mermerano napano joko vio ka Atua, a naio mial bunu ka Yesu jikili ju mave ea vio na bavin laka vaataro ka tivelinio na naio, nina ea jum̃ano meruo.
ACT 7:56 Naio mial vite nei ana ber kalo napano aju, berinavo “!Aioou! Kiniou nojo nemial vio mave naio betavo jo, ana nemial Kulorinio Kenerinio jumolu ju tivelinio ea Atua jum̃ano meruo.”
ACT 7:57 Mia tomu na tortoru nei ami-jogivaio napano Stevin berenio, a nalo amijog jibe ka iliano tai na mia rila kule Atua, naruei nalo amiaga toru, abuko burutilinielo nalo ka ajog re bunu Stevin, naruei nalo ajikiti abinimei ea naio,
ACT 7:58 mia vaarakurano ga, abokar naio jikili, ana abatete kanio batavio den bulukomeli. Aba tavio den bulukomeli nene, ka atubabinio, mia aberinavo tomu nalo nanua aber bulag iliano nalo na ka mia rila ana Stevin rivar vironiano, aberenio berinavo nalo nene naruei monoka avisove ka puruveru na jukamu. Naruei nalo amiya bulag m̃alo kulukoti nalo, ajuvanlo ajua m̃eaku tai jum̃ano napano naio jo naliko ea bogo na, napano siano Sol, ana na nalo na aju ajuba Stevin.
ACT 7:59 Ana bogo napano ajuba Stevin ba mia naio bolkouo, bio ban Atua, berinavo “!Aue, Tubo Yesu-o, koig kajamo ka niunuku riviedu to vijaso koig liki!”
ACT 7:60 Ana naio minie ka sudu jaano, ana mil medave, berenio, berinavo “Tubo-o, koig jau koje re vironiano van nalo nei rivior kialo kariano nalo neibano nalo aju amila ka kiniou nei.” A bogo napano naio berenio iliano nei bisi, ana mijoru mon napano m̃arodobi garuei.
ACT 8:1 Mia Sol neibano jo ea bogo nei, naio mial vite neibano, napano ajubabin Stevin m̃arodobi, naio mial jibe ka napano amila im̃auano na bo tai. Ana maka vesiou, mia tomu tealo na p̃irilo ajikili ka volkouano, nalo maka amerou, mia nalo amijog bova toru laka, naruei abinimei amidu Stevin tati abano, ajigi mia ajigi, ana aba ajivinio. Ana jikar ea bogo na, Sol nalo amila bova lie vo ban taara na namoneano nalo yako Yerusalemo. Mia ajum̃a amijil kikilo bova bano-o, mila napano miroano ka nalo aburo ka vio nei aban ea vio dolu nalo ea vio Yutea bija Sameria, mia atevi nalo maka avano, mia nalo aju dam̃ariga Yerusalemo. Mia Sol nalo ajerm̃i m̃ele vo ka namoneano nalo, ba lie vo, a nalo aju aban janea kunualo nalo, naruei aburu bulaglo, abukulo aban ea yimo na tetavokoiano, nina be sum̃ano nalo a tire nalo bunu.
ACT 8:4 Naruei namoneano nalo miroano aburovuro dedade den Sol nalo ea bogo nei, mia bogo napano ajum̃a ajanea vio jibe na, nalo ajum̃a amioliolu ka Yesu kiano iliano abano.
ACT 8:5 Ana nalo tai kalo, be toro nei Vilip, napano nalo abitirilar naio jibe ka tikon jukamu, naio binimei rove yako ea burum̃ara bulukomeli tai na vio Sameria, naio mioliolu be moti garuei ka Naverikariano Yesu ban tomu nalo na vio na.
ACT 8:6 Ana nalo na ajum̃a amiagago vatitigio ka kanano iliano, a nalo amial burutomoluo nalo napano naio mim̃aukanio,
ACT 8:7 jibe ka napano sim̃aro nalo ajaluvo den tomu nalo telabo, napano bogo na amoluo, nalo amiaga burutomoruo laka, naruei nalo aburo kilkil. A amial bunu ka napano nalo na niabele tivervelinio nalo am̃arm̃aro, bija javuluku nalo, abinimei abo bereio.
ACT 8:8 Naruei ea vio nei, tiniobi nalo ajaaro mia ajaaro toru laka ka vite nalo neibano amijogio a napano amialio.
ACT 8:9 Mia beamu, ka napano Vilip maka rimei ea vio Sameria nei vo, be jum̃aliano tai naio jo, napano siano Saimon. Jikar bogo be nua ruei, naio bar semei telabo a jom̃a mim̃auka vite telabo jibe na, mila ana naio jom̃a berial naio ber naio be toro dolu tai, naruei tomu nalo na tanobuku na nalo aju amiilo toru bogo nonovio kanio.
ACT 8:10 Kialo tomu na tomormoruo nalo, bija tomu dolu nalo, nalo ajum̃a amonea kanano iliano nalo, a nalo ajum̃a aber jibe nei, aberinavo “!Kaleliki! Toro na, Atua kiano moroano tai joa naio riano. Nina monokanio moroano na naruei napano rojum̃a romijog aberiio, abio ka ‘Burum̃ara Moroano.’ ”
ACT 8:11 Nalo aju amiilo toru ka naio jibe na naruei, napano jo mila vite nalo na bogo be nua ruei, nina naruei milaio ana amonea naio.
ACT 8:12 Mia vonganei, napano Vilip binimei mioliolu banlo, ana nalo amonea kiano iliano nei naruei, napano naio mioliolii navenatuboiano na Atua kanano, a sio nei Yesu Kristo banlo. Naruei nalo abiniu amonea iliano nene, a nalo amijev na varueiano, nina sum̃analo a tire nalo bunu,
ACT 8:13 binimei bokar bunu toro nei Saimon, naio bunu monea, naruei abaruei eaio. Ana iorou ka nina, dam̃ariga naio jo lili ga Vilip, naio jom̃a miilo toru dam̃ariga ea burutomoluo nalo a burum̃ara im̃auano nalo na moroano na Atua kanano napano Vilip jom̃a milaio.
ACT 8:14 Naruei maka vesiou ga, ana iliano na vite nalo nei napano amiyotuba ea vio nei naio ba bokar atevi nalo yako Yerusalemo, berinavo kulo Sameria bunu, vonganei nalo amonea Atua kiano iliano ruei. Naruei atevi nalo aberiio, amial bo kanio nalo aiila Pitere naio Jone ka naljuo ava ayotuba kalo, ka ave juo ala vonio ka avitii veve vite nalo nene.
ACT 8:15 Naruei naljuo nei abatove ea nalo na Sameria jibe na, ana abe juo ajokol pariparilo, a abolkouo biorlo ka Atua sian Niununo Lu vanlo.
ACT 8:16 Abe juo abolkouo kalo jibe na, bior ka napano Vilip naio baruei ea nalo nei ruei ea Tubo Yesu siano, mia Niununo Lu naio maka rivatove ealo vo.
ACT 8:17 Jibe na, ana Pitere naio Jone, naljuo amila jibe na banlo naruei, ana nalo abokar Niununo Lu ka bogo nene naruei.
ACT 8:18 Naruei na jum̃aliano nei Saimon, bogo napano naio jo mialio ka napano atevi nalo nei ajokol pariparilo napano ajikar vonga ka amonmonea jibe nei, mila ana nalo abokar Niununo Lu, naruei naio mijoku ka kialo moroano na. Naruei naio ba bar puruveru na toru tai binimei, mijian ban naljuo nei, jidom rivulular moroano neibano joa naljuo nei,
ACT 8:19 ber kalo, berinavo “Nina naruei kiniou nejidom ka kamiu kuvisian moroano na togio van kiniou, ka kiniou bunu nemijikia notokol tomu nalo pariparilo, ka mia amijikia ajev Niununo Lu.”
ACT 8:20 Mia Pitere naio maka lele saaro ka vaio napano Saimon bikanio, naio tinien jerio, naruei mil jikili banio, berinavo “!Tavaliki! Maka nejikia navar kanamo veru napano jau koberiam̃a komijikia kovulular moroano na Atua kiano kanio. Nina naio be ijaiano ga tai napano Atua mijikia sian kurano ka ga van toro. Kiniou neber kaso, mia kanamo puruveru mia rivano, sebi sisenio ea vio na jogvaiano, ana jau bunu katakisorio kavano.
ACT 8:21 Mia vonganei naruei kumemi numijikia vatitigso, ka maka rivu ka kala im̃auano rivija kumemi, bior ka napano kanamo iviso maka to batitigio rivija Atua leleio.
ACT 8:22 P̃eli ga, kiamo iviso naio bujo ka jokuano ga, a kiamo kariano va nalo amiorkakar m̃elea kanamo meuliano laka. Jau monoka koviligso ka kanamo jidomiano va nalo nene, jau monoka kobolkouo van Atua ka naio riviekokoaso riviorio.”
ACT 8:24 Ana na Saimon naio berdop̃e, berinavo “!Inau! Verenio tibe na, kiniou nejidom toru ka kamiu kubolkouo van Tubo kar kiniou, ka mia vite kouo nalo nam̃a kumitum̃a kuberenio na, mia nalo amei re ea kanaku meuliano.”
ACT 8:25 Naruei atevi juo nei, Pitere naio Jone, nalo aju kija bere vo naliko nalo nei, nalo ajum̃a aberbisivisii vite nalo napano m̃a Kristo milaio a Atua kanano iliano nalo, banbano-o bisi ana nalo ajaluvo ea vio nei, amidu m̃arabo na ka avan bereio mave Yerusalemo. Mia bogo napano naljuo ajum̃a amiel ea m̃arabo abano, ajum̃a amioliolu ka Ioluano Vou na Yesu ea m̃arkomeli telabo ea tanobuku na Sameria bisi, ana na nalo abinimei aboru bereio Yerusalemo.
ACT 8:26 Naruei bogo napano Vilip naio jo mim̃au yako Sameria kia ga vo, ana Atua kanano nailiano tai binimei eaio, mil banio, berinavo “Vilip, kiniou neber ka jau, neber jau kotumolu, kava katakii m̃arabo napano jikar Yerusalemo bavin ea komeli na Kasa.” Mia m̃arabo nene be m̃arabo napano bavin jelea vio yauo.
ACT 8:27 Jibe na, ana Vilip naio mijog iliano nei, ana jumolu, jikar ka ban naruei. Naio jo miel ban jibe na, mia miilo ka torbobogio tai napano joa kanano rukuruku napano parinio bue m̃arauo burio, binimei ea m̃arabo nene. Toro nene naio jom̃a buluku Niosi Lu napano Aisea bivitauia. Naio be toro na toru tai na tira na toru tai na vio Itiopia, napano abio tira nene ka Kedesi, napano nioti nene berenio naio be parinio tubo ea kanalo buruvenuo. Toro nei kanano im̃auano be tena rivitikar im̃auano nalo na tortoru ea tivelinio na veru na tira na toru neibano kanano, a toro nene, naio be toro tai bunu napano nanua ruei amila jibe ka tum̃aro. Naruei ea bogo na, naio batove Yerusalemo ruei ka rivolkouo van Atua, naruei naio jo jakii kanano m̃arabo ka rivan bereio ea kiano vio.
ACT 8:29 Jibe na, ana Vilip bunu jo miel ea m̃arabo nene bano, a toro na toru nei bunu joa kiano rukuruku buro bano, naruei Vilip mialio. Mia bogo napano Vilip mialio, Niununo Lu mil banio, berinavo “Jau katakisor toro na, kava vaataro ka kanano rukuruku.”
ACT 8:30 Naruei Vilip jikitisosorio bano, naruei naio ban vaataro, mijog ka napano toro nei naio jom̃a buluku niosi na Naverialiano Aisea. Naruei naio bika denio, berenio berinavo “?Jum̃abe, jau kobuluku lubar batitigio iliano na jau kojom̃a kobulukuio na, p̃eli na makanio, jau maka kovuluku lubario?”
ACT 8:31 Ana na toro nene berdop̃e berinavo “?Koig, ana mia kiniou nejikia tum̃abe, ka napano maka toro tai to, ka riveribisivisii iliano nei van kiniou?” Ana na naio ber ka Vilip, berinavo “Mo verenio tibe na, mia jau komei mave beamu, kito ve juo rotu tano ea vio nei.” Ana na Vilip bavin ea rukuruku.
ACT 8:32 Mia Iliano Lu napano Aisea naio bivitauia, napano toro na toru nei jom̃a milavonio ka rivulukuio ea bogo nei, nina be iliano napano ber jibe nei, berenio berinavo “Toro nene jibe ka nunu tai, bior ka bogo napano abokar naio ka mia aueio, mia naio melumu ga, p̃eli na naio jibe kanio kirikiti nunu tai, ka bogo napano aburon bulag vijinio napano be moti, mia maka rijikia riaga. Toro nene naio jibe na naruei, napano ea bogokouo na kiano meuliano, naio maka rijikia riverip̃e iliano tai leleio, mia naio mon melumu dam̃ariga.
ACT 8:33 Nalo amila burum̃ara im̃auano toru laka ban naio ruei, mia bogo na ajibureio, nalo amila maka rimemedu kanio. Mia nalo amial ka maka ve kenerinio tai ka rudu siano, bior aje korovio kiano meuliano ea yetemeriba nei kiri bulati ga.”
ACT 8:34 Mo toro na toru nei bikanio nioti na iliano nalo nei den Vilip, berinavo “Kiaku bilbilu, jau kover bisivisii vonio van kiniou ka naio be kei napano naverialiano nei naio jom̃a berii nei? ?Naio jom̃a berii ber ga naio, p̃eli na naio jom̃a berii toro dolu tai?”
ACT 8:35 Ana na Vilip jukunu ka banio, naio jikar memedu garuei ea Iliano Lu neibano jom̃a bulukuio nei, jakii ba lie ana berial Ioluano Vou na bo vodolu na Yesu kiano banio.
ACT 8:36 Mia ka bogo na, abe juo aju aburo ea rukuruku kia ga vo, ajakii m̃arabo abano, mia nalo abinimei abokar vio tai napano uei tai joaio. Naruei bogo napano toro na toru nei naio mial uei nei, naio mil ban Vilip, berinavo “Kiniou nejidom ka jau kavaruei ea kiniou, mo keialio, ninei be uei tanie jo. ?P̃eli maka bunu ve titai tokovio ka kito juo ka kavaruei ea re kiniou a?”
ACT 8:37 [Ana na Vilip berdop̃e, berinavo “Jibe nei, verenio jau komonea vija kiamo iviso momou reraio garuei.” Ana na toro nei berial ka Vilip, berinavo “Kiniou nomonmonea ka Yesu Kristo naio be Atua Kenerinio riano.”]
ACT 8:38 Naruei toro na toru nei mila kiano rukuruku mebi ea vio nei, ana abe juo amiel abatove, ajudobi joomo ea tinia uei, ana mo Vilip baruei ea toro Itiopia neibano.
ACT 8:39 Mia bogo na abavin den uei nei bereio, mia Niununo Lu binimei burular Vilip den vio nei kolvare ga, mila ana toro na toru nei maka bunu rial naio. Ana naio ba jotano bereio ea kanano rukuruku, jakii kiano m̃arabo, naruei naio jo bano, napano tinieno jesei mia jesei toru laka.
ACT 8:40 Mia Vilip jibe ka napano naio jaluvo ruei, mia miilo ka mial ka napano naio joa bulukomeli na vio Asotas ruei. Mia naio jo miel batove, ba jelea komeli na tanobuku na vio na, jo mioliolu ka Ioluano Vou na bo banbano-o bokar burum̃ara bulukomeli na vio Sisiria.
ACT 9:1 Naruei ea bogo nene, Sol napano beamu naio jom̃a mila baravo m̃ele ka namoneano nalo, naio jom̃a tinien jer Tubo kiano naiagagoano nalo kia ga vo, a naio jom̃a berkar kia ga vo berinavo mia naio ruebinvin nalo tibe na. Tenene na bogo tai, ana naio ba mial parinio kulo lu nalo,
ACT 9:2 naio bika ijaiano tealo denio. Sol jidom ka parinio kulo lu nei rivivitauia niosi nalo tealo van navurim̃araboiano na yimo na volkouano na kulo Ju nalo kanalo, nina ea vio Tamaskas, ka riverial vanlo ka monoka ajamo ka Sol rivatove ealo ka sirag tomu nalo napano aju joomo ea vaio napano m̃a abio ea bogo na kanio “M̃arabo Vou,” ninei be namoneano nalo. Sol mila jibe na bior naio jidomii ka riva rivokakarlo sikili, sum̃ano nalo a tire nalo, ana mo naio rivurlo avan bereio Yerusalemo, napano beamu nalo aburo kanio, ka rivukulo avan ea yimo na tetavokoiano. Ana toro na toru nei bivitauia jibe ka napano Sol bika denio, ana midu jian banio.
ACT 9:3 Mo Sol naio bar m̃a niosi nalo nei, karina ana naio juvan vio Yerusalemo naio jo batove Tamaskas. Mia Sol nalo aju amiel bano-o legiano tealo ruei, ana na nalo abinimei vaataro ka vio nei Tamaskas, mia naio miilo kolvare ga ka Atua kanano burum̃ara miamoiano tai maluvo ea tiniabene, mereralii vio napano Sol jom̃a miel eaio.
ACT 9:4 Miamoiano nene midulii Sol jibe na, mila mijoru ea borotano, ana naio mijog niono tai mil banio, berinavo “!Sol, Sol! ?Kar vaio ana jau kojom̃a komila lelan kiniou m̃ele, jibe ka na kojom̃a komila na?”
ACT 9:5 Bogo napano Sol mijog vikadeniano nei, ana bikanio, berinavo “?Tubo, jau keinia?” Ana Yesu berdop̃e jibe nei berinavo “Yesu napano jau kojom̃a komila kiki naio, kiniou nene nei naruei.”
ACT 9:6 Ana Yesu naio berkanio bunu, berinavo “Mo jau, kotumolu, keiel kava jouro ea komeli na Tamaskas, ana mia toro tai rimei riverial vanso ka mia jau kala tum̃abe.”
ACT 9:7 Naruei ana tomu nalo napano ajum̃a amiel naliko Sol ea bogo na, nalo amijog iliano nalo nei, mia maka aial toro tai na ber kalo, naruei nalo amiilo toru kanio, ajikili aju vovu ga aju jibe na, maka bunu kanalo iliano tai ka mia aver kalo.
ACT 9:8 Avona bisi, ana Sol naio mila jibe ka na Yesu berenio. Naio jumolu bereio, mia bogo napano bisip̃e mirano, mia maka rijikia rivitilubar titai leleio, jibe kanio napano mirano miununu ga. Vite nei naruei milaio ana nalo abokar jum̃ano, ana abalavo kanio ka ava Tamaskas.
ACT 9:9 Naruei nalo aba aboru vonuo ea vio nei, mia Sol naio mirano miununu jo jibe na ba bokar bogoti tolu, a ka bogo na, naio maka sen titai a naio maka rimunu titai, naio mondulu ga.
ACT 9:10 Naruei ea vio neibano Tamaskas, be naiagagoano tai jo, siano Ananaias, mia naio mial ka napano Tubo Yesu bio siano, jibe ka namonvovuano tai, naio berkanio, berinavo “Koig, Ananaias.” Ana Ananaias miolu, berinavo “Nao, kiniou nei Tubo.”
ACT 9:11 Ana na Tubo berkanio, berinavo “Jau kotumolu kavatove iviso ea bulukomeli na, jau katakii m̃arabo na telisu na abio kanio ‘M̃arabo Na Memedu,’ mia jau kava kovoru ea Jutas kunuano. Ana ea yimo nene, jau kovika toro na vio Tarsis tai napano naio siano Sol. Mia toro na, vonganei naio jo bolkouo, a naio mial visip̃eiano tai ruei,
ACT 9:12 ana ea visip̃eiano nei, naio mial jau naruei, napano kobinimei joomo ka naio, ana komidu jum̃amo jo mave ea naio, ka mia mirano sirarag bereio rivu.”
ACT 9:13 Mia bogo napano Ananaias mijog iliano nei naio miilo va kanio, ana berinavo “Tubo, kiniou nemijog tomu telabo aberii toro na kiano bajago ban kiniou ruei, a aberial jum̃abe napano m̃a mila ka kanamo namoneano lu nalo napano aju Yerusalemo,
ACT 9:14 a vonganei, nemijog naio binimei ea vio Tamaskas ruei, bior tomu na tortoru na kulo lu nalo amidu moroano banio ruei ka mia naio rimei rivokakar kumemi nalo napano numitum̃a nubolkouo ka siamo.”
ACT 9:15 Ana Tubo naio berkanio, berinavo “Jau komerou re, mia jau kavan ga, bior kiniou nebitirilar toro na ruei, ka mia naio rila kanaku im̃auano, ka mia naio rivar siaku riva tanea taara dolu nalo na maka ave kulo Israel, riva rivokar kialo parinio tubo nalo, a rivan kulo Israel nalo bunu kija.
ACT 9:16 Mia kiniou nala naio rivitilubar vite kouo dolu tai bunu, ka mia naio monoka rijog rivova ka vite ve telabo kario siaku, ea bogo napano mia naio tom̃a riverialio.”
ACT 9:17 Ana Ananaias midu iliano nei, ana ban ea yimo napano Tubo berkanio, ana ba joomo naruei naio mial Sol, ana midu jum̃ano jo mave ea parinio. Ana mil banio berinavo “Kuruaku Sol, Tubo naio miila kiniou nebinimei ka neialso, nina be Tubo Yesu napano miyotuba kaso ea bogo napano jau kojom̃a komiel ea m̃arabo kobinimei. Naio miila kiniou nebinimei ka mia nobolkouo ka miramo, ka mia rivu bereio, a ka mia Niununo Lu rimei rivujo lou easo.”
ACT 9:18 Naruei naio bolkouo kanio, mia vaarakurano ga vite nalo napano jibe ka tiririkiti niado ajibirbil den Sol mirano, mila ana mirano abo bereio. Naruei Sol naio jumolu ju, ana ea bogo nei, aburu aba abaruei eaio.
ACT 9:19 Mia naio jinano moti bere, a mijog p̃irinio jikili bo bereio. Naruei Sol naio jo legiano tealo bereio yako Tamaskas naliko naiagagoano nalo napano ajua vio na.
ACT 9:20 Mia maka vesiou, ana naio jom̃a ba joomo ea kulo Israel nalo kanalo yimo na volkouano nalo na vio nei, ana naio jo joomo jom̃a mioliolu ka Yesu, berinavo naio be Atua kenerinio riano.
ACT 9:21 Mia tomu nalo napano amijogio, nalo amiilo toru laka, a ajum̃a abivika denlo, aberinavo “!Tomnei! Toro nanua beamu naio jo Yerusalemo, jom̃a mue lelan tomu nalo nam̃a ajum̃a aberenio sio na napano vonganei naio bunu jom̃a mioliolu kanio bereio. Kamiu kuvialio, naio binimei ea vio nei kar ga vite nene kia ga navo, ka naio riadikar tomu nalo nene, ka rivurlo avan bereio, rivan parinio kulo lu nalo yako Yerusalemo, mia vonganei naio ba be dolu ruei. ?Venia mila naio jibe na?”
ACT 9:22 Mia Atua mija Sol ka kanano iliano binimei temi lie vo, mia naio jo bokar tomu nalo telabo lie, napano jo mila meravo laka banlo ka Yesu, naio naruei be Naverikariano na memedu riano. Ana kulo Israel dolu nalo napano ajua vio Tamaskas, maka aleal verdop̃eiano na bo tai leleio ka atukovio ka Sol kiano iliano nalo, mia kanano iliano nalo amila searo ea kanalo jidomiano nalo batitigio.
ACT 9:23 Naruei bogoti tealo barlaka bano, ana Sol jom̃a mioliolu jibe na, ana kulo Israel nalo ajumolu abinimei vio takurano, aberii ka aleal m̃arabo tai ka auebin naio rim̃aro.
ACT 9:24 Mia bogo nonovio, ka legiano a bogiano, nalo aju rorea naio ea burum̃ara morouo nalo napano ju bure tagvoru na komeli nei, ka mia amijikia auebin verenio rilavonio ka rivuro. Mia iliano nei binimei bokar Sol,
ACT 9:25 naruei kiri bogiano tai, ana nalo napano aju bija naio amidu naio bano, amisonio ban ea burum̃ara basaro tai, ana nalo ajuvarvan naio batove-e boru yetano tavio ka tagvoru na komeli nei.
ACT 9:26 Naruei Sol buro den vio nei Tamaskas, naio bavin Yerusalemo bereio. Ana na Sol ba Yerusalemo, mia naio jidom riva rivijurukar rivija naiagagoano nalo na vio na, mia maka amonea naio ka averenio naio be Yesu kiano naiagagoano riano tai, mia nalo niabele p̃ili kanio, mila na amerou m̃ele kanio.
ACT 9:27 Mia nalo tai kalo be Barnabas, naio mial ka Sol naio be riano, ana jidom ka riijaio, mila kiano m̃arabo ka mia mijikia rivan sikili tu tukamu ea naiagagoano nalo miralo. Ana abe juo abano, ana Barnabas berial kalo jum̃abe ana Sol mial kiado Tubo ea m̃arabo, a napano kiado Tubo mil banio jum̃abe, a naio berial bunu jum̃abe napano Sol jikili laka ka mioliolu yako Tamaskas ka Yesu siano.
ACT 9:28 Naruei nalo amijog iliano nei, nalo ajaaro kanio, ana na Sol naio jo naliko, jo ban ea vio nalo na Yerusalemo, a naio maka leleio rimerou, mia jom̃a mioliolu ka kanado Tubo Yesu siano.
ACT 9:29 Ana naio jom̃a mil bunu naliko kulo Israel nalo napano ajum̃a amijev tomu na vio Kris nalo kanalo iliano, naio jom̃a mila mira ka iliano naliko, banbano-o mia nalo ajidom auebin naio rim̃aro.
ACT 9:30 Mia bogo napano namoneano nalo amijog vite nei, mia nalo aburu Sol batove Sisiria bo ga, avona karina nalo aber bogiano bo kanio, ana nalo amiven naio ban ea kiano vio Tarsis bereio.
ACT 9:31 Ana ka bogo na, namoneano nalo napano aju rorea ea vio Yutea, a ea vio Kalele, a ea vio Sameria, nalo amial bogo melumu kija kalo. Ana na Niununo Lu naio jo miijalo, naio jo mila na tum̃aro binimei jikili lie vo, ana jo mila mirano na namoneano nalo aju abavin lie vo, ana namoneano nalo nene nalo aju ajovon kiado Tubo dam̃ariga.
ACT 9:32 Naruei ea bogo na, Pitere naio miel janea komeli nalo na tanobuku nei, naio jom̃a mioliolu, karina bogo tai bereio, batove ka riaduka namoneano lu nalo na yako ea komeli na Lida.
ACT 9:33 Ana bogoti napano boru ea vio na, mial toro tai napano niabene tivelinio m̃aro, mila naio mon ea m̃ano jogu ka yuka arolu [8] ruei. Toro nene, siano Aneas.
ACT 9:34 Mia bogo napano Pitere mialio, ana berkanio jibe nei, berinavo “Aneas, kiniou neber ka jau, Yesu Kristo rila vatitigio niabemo rivu bereio. Jau kotumolu kojukio m̃amo yebe.” Mia vaarakurano ga, Aneas jumolu, niabene bo ruei.
ACT 9:35 Ana na tomu nalo na vio Lida bija nalo na ea vio vodobi na Saron, amial toro nei binimei bo ruei, ana nalo abilig kanalo meuliano nalo abiniu amdu ban Atua.
ACT 9:36 Mia ea vodobi nei be bulukomeli tai, siano Jopa, mia namoneano tai kalo napano joaio, naio be tira na, napano siano Tapita. Nina be sio tai napano jelea iliano na Krik aber Toraka, sano nioti nene ber temeul maraiu tai napano siano tia. Tira nei, naio mila im̃auano novo nalo telabo julaka, a jom̃a miija talim̃asa nalo dam̃ariga.
ACT 9:37 Ana ka bogo na, mieiano tai bokario, bano-o mia m̃arodobi, naruei nalo ajekon niabene, ana amidu batitigio joa kunuano mave, ka atigio.
ACT 9:38 Mia bogo napano naiagagoano nalo na vio Jopa amijogial ka Pitere naio jo ga vaataro ea komeli dolu yako Lida, nalo amiila tomu juo ka avan sop̃eli kanio. Ana abano amiyotuba ka Pitere, abika m̃elea ga naio, aberinavo “Kumemi numisidomso toru ka komei sop̃eli kean kumemi.”
ACT 9:39 Jibe na naruei ana Pitere bar vio jumolu, ban bija naljuo ana nalo abano. Bogo na naio binimei boru, ana aburu naio bavin ea vodobi na jo mave napano amidu batitigio tira nei jo mon eaio. Mia taanou nalo abinimei aju jeliviv ea ajum̃a ajigio ruei, a bogo na Pitere binimei, ajian kulusoto nalo a kulutiresi nalo napano tira neibano naio jom̃a jululo bogo napano meul jo kia ga bijalo.
ACT 9:40 Ana iorou kanio, na Pitere ber jidom ava tavio beamu vo, a iorou ka napano aba tavio, ana na naio minie ka sudu jaano ana bolkouo. Ana barlar parinio bitikar tira nei mokotenano, mil banio, berinavo “Tapita, jau ketevijo.” Mia vaarakurano ga tira nene bisip̃e mirano, mia bogo napano naio mial Pitere, naio barlar naio jumolu jotano jo.
ACT 9:41 Ana Pitere mijiou bokar jum̃ano, ana burular naio jumolu, bio ba tavio ban namoneano nalo bija taanou nalo. Ana nalo abinimei joomo, ana naio ber kalo, berinavo “Nainei naruei, kenemiu tira nene, Atua mila naio meul bereio.”
ACT 9:42 Mia iliano na burum̃ara vite neibano sop̃eli ga jaburu janea komeli na vio Jopa, ana mila tomu telabo amonea kiado Tubo biorio.
ACT 9:43 Naruei Pitere naio jo jiou kija ea vio Jopa, nina ea toro tai, siano Saimon, napano naio be toro na m̃a mim̃auka vite ea kulukuti bue m̃arauo.
ACT 10:1 Mo be bulukomeli dolu tai jo koyou ea tanobuku nei, napano siano Sisiria, a be toro na toru tai na be na tukamuano na kulo na mira nalo na vio Romo, naio joa vio na, naio siano Kornelias. Ana naio jom̃a bitikar taara tai na mira nalo, napano abokar toromomou takurano [100] na tomu nalo, a nalo abio kanano taara nei kanio “Taara Na Vio Italia.”
ACT 10:2 Mo toro na toru nei, naio be toro novo tai, a naio naliko kiano m̃aratavo nalo dam̃ariga nalo ajum̃a abolkouo ka Atua, a amilotu kanio, a bogo nonovio nalo ajum̃a amiija tomu na vio Israel nalo napano abe talim̃asa ga, ajum̃a ajian ijaiano toru banlo.
ACT 10:3 Mo ea legiano tai, titai jibe kanio m̃erenio tolu [3], monloglog bogo na volkouano na niogoravo, ana naio mial vite tai jibe kanio visip̃eiano, napano Atua jiloglog kanio. Vite napano naio mialio, meravo batitigio bo, a mial ka napano Atua kiano nailiano tai batove binimei joomo ea kunuano, naruei bio berinavo “!Kornelias!”
ACT 10:4 Mia bogo napano Kornelias mial nailiano nei, naio merou bin naio, naruei naio jo bitikar nailiano nei jikili, ana berinavo “?Venia na?” Ana nailiano nei berdop̃e, berinavo “Atua naio mijog kanamo volkouano nalo ruei, a maka tiniene ribobogia bajago novo nalo napano m̃a komila ban talim̃asa nalo, naio jaaro kanio a naio jo tinien maio kaso kia ga vo.
ACT 10:5 Mo naio ber kaso berinavo jau monokanio keiila kanamo tomu tai avan ea bulukomeli na Jopa, ka avio toro tai napano siano vodolu be Saimon Pitere, ka naio rimei ea vio nei.
ACT 10:6 Toro nene naio joa toro dolu tai kanano vonuo, napano siano Saimon bunu, kunuano jo koyou vaataro ka tei, naio be toro napano mim̃auka vite ea kulukuti bue m̃arauo.”
ACT 10:7 Naruei nailiano nei berial iliano nei bisi, ana javin bereio. Ana Kornelias naio bio kanano tomu naim̃auano juo, a bija kanano toro na mira napano naio bunu jom̃a milotu ka Atua, napano naio jo bija naio julaka, bitikar naio, ana nalo tolu nei abinimei eaio.
ACT 10:8 Ana naio berial vite nei banlo abe tolu, avona karina miilalo aban ea vio Jopa ka avuru Pitere rimei.
ACT 10:9 Leri ka beni nene, bogo napano tomu nalo nei aju amiel abinimei Jopa kia ga vo, Pitere naio jo, naruei naio jidom rila volkouano na legiano viovare, mia jibe na bogo nonovio ana naio ban ea vio vodobi mave ea yimo napano naio joaio.
ACT 10:10 Naio joa vio na, naruei naio mijog ka jijerio, naruei naio berenio avurosebi. Mia bogo napano nalo ajum̃a amim̃auka sano sinaniano kia ga vo, naio mial visip̃eiano tai napano Atua jiloglog kanio jibe kanio monovovuano tai.
ACT 10:11 Ana mial vio mave betavo, ana naio mial titai jibe kanio panpano na toru tai, naio jo batove yetemeriba nei. Naio mial ka napano nalo aju abokar sudu nene nalo be ver, naruei nalo ajum̃a ajuvarvan batove.
ACT 10:12 Ana joomo ea panpano nei, Pitere mial ka be temeul kinkin dolu nalo ajuaio, bija bunu vite nalo napano Atua naio milalo abe lu ka kulo Israel nalo asenio re, jibe kanio m̃aro nalo, a niobi nalo, a menu nalo.
ACT 10:13 Ana naio mijog joono tai mil banio, berinavo “Pitere, jau kotumolu, koue vite nalo nei tai ana jau kesenio.”
ACT 10:14 Mia Pitere naio berinavo “P̃eli ga Tubo, maka lele rijikia tibe na. Kiniou maka lele nesen vite nalo na jibe na napano maka rimemedu ka asenio, a ka napano kumemi kulo Ju nalo kumemi nubel kanio.”
ACT 10:15 Ana naio mijog joono nei bereio naio berenio, berinavo “Vite napano kiniou Atua neber ruei neberinavo naio meravo, jau maka bunu kejikia kover naio miagiago.”
ACT 10:16 Ana vite nei naio maluvo jibe na valuo kanio, naruei iorou kanio ana varolu nene bereio, napano Pitere naio jo berbure kia ga vo, ana panpano na toru nei naio jo bavin bereio.
ACT 10:17 Ana Pitere naio mijog bova, naio jidom dede nioti na vite napano maluvo kanio, mia bogo napano jom̃a jidom dedeio kia ga vo, Kornelias kiano tomu tolu napano naio miilalo abano, nalo abinimei aboru Jopa. Naruei nalo abika Saimon kunuano den tomu tai, ana ajiloglog yimo nene kalo, ana nalo abinimei ajikili ajua Saimon kunuano m̃aratavo.
ACT 10:18 Naruei nalo abio jouo, aberenio “?O, be toro tai siano Saimon napano siano tinene abio ka Pitere, naio jo kamliko ea yimo na, p̃eli na makanio?”
ACT 10:19 Ana ea bogo nei Pitere naio jotano jom̃a jidomii kia ga vo vite neibano mialio, ana Niununo Lu mil banio ber ka, berinavo “?Jau komijogio? Tomu tolu nalo ajum̃a ajiragso, nalo nene na ajikili aju tavio, ajum̃a abioso kiana.
ACT 10:20 Mo jau kotumolu kavatove keialo, avona verenio nalo avaleaso ka mia kavan rivijalo, mia monoka jau kosidomii re ka mia kavan re kamliko, mia jau katakisorlo ga kavano, bior kiniou nemiilalo abiedu kaso.”
ACT 10:21 Ana Pitere jumolu jabulu batove tavio, ana mial nalo tolu nei, ana mil banlo, berinavo “Ninei be kiniou napano kamiu kumisiragio. ?Kamiu kumisidom kiniou ka titai kovio p̃eli na?”
ACT 10:22 Ana nalo nei aberdop̃e, aberinavo “Nao, kumemi nubinimei ea kenememi parinio navurim̃araboiano na mira, Kornelias, ana naio miila kumemi nubinimei kaso, kanio jau komei ea kunuano ka naio rijog kija kanamo iliano nalo tai. Atua kiano nailiano tai mil banio ka naio rivioso ka komei tibe na. Kenememi toro na toru nei, naio maka ve toro Ju, mia naio be toro na memedu tai napano dam̃ariga naio jom̃a bokar batitig bogo na volkouano nalo nonovio na kenemiu, a kulo Israel bunu ea kenememi vio nei nalo tiniel jii naio toru laka. Naio miila kumemi nubinimei kaso, tenene na kumemi numitu nei.”
ACT 10:23 Mo bior m̃erenio batove ruei, ana Pitere naio burulo aba amon ea yimo napano naio joaio, ka mia aviniu aiel kia ga kavijova avatove. Viomijeni kanio bereio, ana Pitere naio bano naliko, a naliko bunu namoneano dolu nalo na vio Jopa, nalo aban bunu naliko.
ACT 10:24 Nalo aba vio melijokolo m̃arabo togio, naruei nalo amon, mia viomijeni bereio, ana nalo abatove ea vio Sisiria. Ea vio na, Kornelias naio jo naliko kiano m̃aratavo nalo, a naio bio bunu kiano bilbilu nalo ka amei atu rorea Pitere nalo.
ACT 10:25 Telikiti napano Pitere binimei boru ea Kornelias kunuano, Kornelias binimei biviuo naio, mijoru ea jaano jibe ka naio milotu kanio.
ACT 10:26 Mia Pitere burular naio jumolu bereio, berkanio berinavo “Aiou, koig, jau kotumolu kotu memedu. Kejiio, kiniou nebe kulorinio ga.”
ACT 10:27 Mo, ana Kornelias jumolu, ana nalo ajikar ka ajukunu, naruei naljuo aba joomo ea yimo, napano ka bogo nei naruei Pitere mialio ka napano tomu nalo telabo aju rorea naio joomo.
ACT 10:28 Mo Pitere naio mil banlo naruei, berinavo “Kamiu kumitum̃a kumijikia batitigio ka napano tivelinio na nalotuano na kumemi kulo Ju nalo, maka nuvijikia nuva joomo ea kulo dolu nalo kunualo napano maka ave kulo Ju, p̃eli na nuve bilbilu vu rivijalo. Mia vonganei, Atua naio jiloglog meravo bo ban kiniou ka maka rimemedu ka neviti va ea tomu nalo tealo neverinavo nalo abova p̃eli na nalo amiagiago ga.
ACT 10:29 Bior vite na naruei napano Atua jiloglog ban kiniou, maka never bure nalo na ka bogo napano abinimei ka kiniou, ka mia neverenio re maka nejikia nemei, mia kiniou nebinimei ga. ?Ana nejidom ka kamiu kuverial van kiniou, kuverinavo kamiu kubio kiniou ka nemei ka venia?”
ACT 10:30 Mo ana Kornelias naio berdop̃e Pitere, naio berinavo “Nao, koig siva tanea. Vonganei, bogoti tolu barlaka ruei, monloglog bogo nene jibe nei naruei, ka m̃erenio tolu ka niogoravo, kiniou nojo joomo ea kunuaku ga, nojom̃a nemila volkouano na niogoravo. Nojom̃a nobolkouo, ana nemiilo ka nailiano tai binimei jumolu ju kamu ea miraku, napano m̃ano kulum̃arauo mieg bo laka.
ACT 10:31 Ana na naio mil ban kiniou, berinavo ‘Kornelias, Atua naio jom̃a mijog kanamo volkouano nalo, a naio jom̃a jidomial kanamo bajago novo nalo napano m̃a jau kojom̃a komila ban talim̃asa nalo.
ACT 10:32 Mo jau monokanio kala tibe nei: monoka keiila tomu nalo tai ava Jopa ka toro tai, ka mia toro nene rimei rivijalo bereio. Toro nene siano vodolu be Saimon Pitere, a naio joa toro dolu tai kunuano napano naio bunu siano Saimon, napano kanano im̃auano naio jom̃a mim̃auka vite nalo telabo ea kulukuti bue m̃arauo. Mia kanamo tomu nalo amijikia aleal kunuano nene jo koyou vaataro ka tei.’
ACT 10:33 Nailiano nene naio mil ban kiniou jibe na, naruei sop̃eli ga nemiila tomu nalo na abiedu kaso, a kiniou neber siva toru banso ka kanamo bijukuvuiano napano jau kobinimei ka kumemi ea vio nei. Mo, kito robiniu rojua vio nei, kamu ka Atua mirano, ka mia kumemi nuvijog iliano napano Atua ber kaso, ka mia jau koveriio van kumemi.”
ACT 10:34 Pitere mijog iliano nalo nei, ana mil banlo, berinavo “Bo ga, ana mo kiniou neberenio siva toru laka napano kamiu kumidu bogo nei ban kiniou, ka kiniou nemijikia neil van kamiu. Nejaaro toru laka, bior vonganei nebitilubar ka be riano toru laka ka napano Atua naio maka rivitisa ea kulo dolu nalo.
ACT 10:35 Toro Israel, p̃eli na toro napano maka rimoluo ea bajulukuti nei, p̃eli na toro be bereio, mia avona naio tovon Atua, rila ga vite nalo napano Atua naio jidomio, mia Atua naio saaro ka naio.
ACT 10:36 “Iliano napano Atua naio miila binimei ban kumemi kulo Israel nalo, kamiu kumijikia ruei, napano naio be ioluano novo tai napano berial berinavo toro mijikia rivokar tum̃aro napano naio be riano ea Yesu Kristo, napano naio be Tubo ka tomu nonovio na yetemeriba nei reraio.
ACT 10:37 Ana kamiu kumijikia sano natukunuano nene, napano beamu, ana Jone Baruei naio binimei mioliolu ka kanano varueiano nei, ana iorou ka nina, be burum̃ara vite na maluvo ka kito, jikar rove yako Kalele, bano-o bokar nonovio vio reraio napano Yutea.
ACT 10:38 Burum̃ara vite nene, nina Yesu na vio Nasarete na bija burum̃ara im̃auano nalo napano naio jom̃a milaio, napano Atua midu kanano Niununo Lu banio, bujolou batitigio toru eaio, a naio midu kanano burum̃ara moroano toru banio, ana Yesu jo miel jeliviv ea vio nonovio, mila im̃auano novo nalo a mila batitig bunu ga nalo napano Sim̃aro jom̃a mila lelanlo laka. Yesu mila vite nalo na, bior napano Atua jo bija naio.
ACT 10:39 “Mo vite nalo nei napano naio jom̃a mila yako Yerusalemo, a ea tanobuku dolu bunu ga nalo ea kenememi buruvenuo kumemi kulo Ju nalo, kumemi atevi nalo numitum̃a nuberial vite nalo nei ban tomu nalo. Numitum̃a nuberial ka napano kenememi tomu na tortoru nalo ajukakar Yesu ea m̃akolkolo, ana na naio m̃aro,
ACT 10:40 ana ea legiano tolu nene, Atua burumeulia naio bereio. Ana Atua mila kumemi tealo numialio, napano kumemi numitu tano, numisinan a numunu uei bijaio. Mia Atua maka rijamo ka naio rimaluvo tibe na ka tomu nalo nonovio, mia naio maluvo ka ga kumemi nalo, napano Atua bitiri bulag kumemi jibe nei, ka mia nuverial van tomu dolu nalo ka Yesu naio meul bereio ruei.
ACT 10:42 Ana bogo napano Yesu jo bija kumemi jibe na, naio mil ban kumemi, berinavo kumemi monoka nuvisivisii kiano Ioluano Novo van tomu nonovio, a monoka nuvila rimeravo vatitigio vanlo ka Atua naio bitirilar naio takurano ka naio tibure tomu nalo, nina nalo napano am̃aro ruei, a nalo napano mia nalo ameul kia ga vo ea bogo na tibureano.
ACT 10:43 Ninei be Yesu nene kia ga napano naverialiano nalo aberial naio nanua ruei, napano aberenio aberinavo mia Atua riviekokoa tomu nalo napano amonea siano kialo kariano nalo, nina nalo napano mia avie kouo ea naio.”
ACT 10:44 Bogo napano Pitere jo mil kia ga jibe navo, nalo amiilo ka napano Niununo Lu binimei batove ba bokar nalo napano ajum̃a amiagago kanio.
ACT 10:45 Ana namoneano dolu nalo napano ajuvan vio Jopa naliko Pitere abinimei, nalo abe kulo Ju nalo, naruei nalo amiilo toru manenea ka vite nalo nei, bior napano binimei bokar bogo nei, ana nalo aberiam̃a Niununo Lu naio be jidomiano tai napano Atua jian ga ban kulo Ju nalo ga.
ACT 10:46 Mia vonganei, nalo amial ka napano nalo napano maka ave kulo Ju, mia nalo amil ka iliano dolu nalo, ana ajum̃a amiaia Atua toru laka, ana na nalo amijikia ka naio jian Niununo Lu ban nalo napano maka ave kulo Ju nalo bunu.
ACT 10:47 Ana na Pitere ber ka nalo napano naliko naio, berinavo “!Kamiu kumialio na! Vonganei, nalo abokar Niununo Lu jibe ka ga napano kito rabakario jukamu. Jibe na, mia maka rejikia roverburelo bunu ka mia ravaruei re ealo.”
ACT 10:48 Bisi ana Pitere mil ban Kornelias nalo, berinavo ajev navaruieano ea Yesu siano, ana nalo abaruei. Naruei nalo abalea Pitere jikili bunu ka naio to rivijalo ka bogoti tai bere vo.
ACT 11:1 Ana maka vesiou, na lilianiano nei bano-o bokar atevi dolu nalo yako Yerusalemo, bija bunu namoneano dolu nalo ea tanobuku momou na vio Yutea, berinavo be tomu tealo napano maka ave kulo Ju napano nalo amonea Atua kiano Ioluano Vou ruei.
ACT 11:2 Ana namoneano tealo na vio Yerusalemo ajidomii kirisikili aberinavo namoneano dolu nalo napano maka ave kulo Ju, nalo bunu monoka ave pakuveuio ka mia atibe ka kulo Ju, mia bogo napano Pitere naio bavin ea vio Yerusalemo, nalo aber niegeniege naio bova laka.
ACT 11:3 Nalo amil banio, aberinavo “?Jum̃abe ana jau kaba kojo kamliko tomu kurano nalo napano maka ave pakuveulo, a kojom̃a kojinan kamlikolo bunu?”
ACT 11:4 Naruei Pitere naio mil banlo, jikar ea sano burupati nene naio ber bisivisii batitigio vite nonovio banlo, jukunu banlo jibe nei, berinavo
ACT 11:5 “Nanua beamu kiniou nojo Jopa, bogo tai nojom̃a nobolkouo. Nojo m̃a nobolkouo bano m̃a nojobobogu garuei, ana nomial titai jibe ka burum̃ara panpano tai, napano naio jumolu den vio mave binimei yetano, napano ajum̃a abokakar sudu ver nene nalo, nalo ajum̃a ajuvarvan binimei yetemeriba, binimei yetano vaataro kean kiniou.
ACT 11:6 Nobitii batitigio joomo ea panpano nei, naruei nomial temeul nalo na vonuo, naliko temeul nalo na yeturu, bija m̃aro nalo a niobi nalo, bija menu nalo, aju joomo eaio.
ACT 11:7 Kiniou nojom̃a nobitikario, ana nomijog joono tai mil ban kiniou, naio berinavo ‘Pitere, jau kotumolu, koue vite nalo na tai, ana mo kesenio.’
ACT 11:8 Ana kiniou neberinavo ‘!Ee, Tubo! !P̃eli ga, maka rijikia tibe na! Vite nalo na jibe kanio maka rimemedu ka asenio, a kumemi kulo Ju nalo nubel kalo, kiniou nojom̃a nebel batitigio kalo julaka ga.’
ACT 11:9 Ana na kiniou nomijog joono na vio mave mil bereio ban kiniou, berinavo ‘Vite napano kiniou Atua neberenio ruei ka naio meravo, mia jau maka bunu kejikia kover naio miagiago bereio.’
ACT 11:10 Nomijog iliano na miyotuba jibe na varolu avona bisi, ana panpano nene bija saba nene nalo napano ajuaio, aburio bavin mave bereio.
ACT 11:11 “Naruei monloglog ka bogo na, ana tomu tolu tai abinimei aboru ea yimo napano kumemi numituaio, napano toro na vio Sisiria tai naio miilalo abinimei ka avuru kiniou navan bereio kumemilikolo.
ACT 11:12 Naruei Niununo Lu naio mil ban kiniou, berinavo ‘Jau maka kejikia koverenio maka kasaaro ka kava kamliko nalo tolu na,’ mia kiniou naban ga, a kuruado dolu nalo ari nei na vio Jopa, nalo bunu abinimei kumemilikolo. Kumemi nubano-o nuboru Sisiria, ana na nalo aburu kumemi nuban ea toro neibano Kornelias kunuano.
ACT 11:13 “Naruei nuba joomo, ana naio jom̃a jukunu ban kumemi, jom̃a berii jum̃abe napano naio mial nailiano tai maluvo ka naio, jumolu ju kamu ea mirano joomo ea kunuano nei, ana na nailiano nene mil banio, berinavo ‘Jau keiila toru riva Jopa, ka toro napano Saimon Pitere, naio monoka rimei rialso.
ACT 11:14 Toro na mia naio rimei riverial lilianiano tai van kamiu napano mia iliano nene naio mijikia rilarurso rivija kanamo m̃aratavo nalo.’
ACT 11:15 “Mia bogo napano Kornelias naio mil bisi, ana na kiniou kija nemil banlo, mia monloglog bogo napano nojom̃a nejikar ka nemil kia ga, ana Niununo Lu batove ealo javukia ga napano jom̃a batove ea kito be moti nanua ruei.
ACT 11:16 Kiniou nemial vite nei, ana tinieku maio ka bereio kanado Tubo kanano iliano, napano beriio nanua, berinavo ‘Jone baruei ea kamiu ka uei, mia bogo vesiou re, ana mia kamiu kuvokar varueiano napano ea Niununo Lu.’
ACT 11:17 Mo kito kulo Ju nalo, napano kito romonea kiado Tubo Yesu Kristo ruei, Atua jian kiano Niununo ban kito, jibe ka ijaiano tai, mia bogo napano nemial napano Atua jian ijaiano nene kia ga banlo napano maka ave kulo Ju, ana vite na mila kirimeravo batitigio ea kiniou ka vonganei, maka lele rimemedu ka mia neverenio tomu nalo nei nalo maka ajikia amei jouro kitoliko. !Kiniou nebe kenia, ka neielkue kanio Atua tibe na, verenio naio sidom ka rila tibe na vanlo!”
ACT 11:18 Naruei ea bogo napano nalo nei na Yerusalemo neibano nalo amijog Pitere kanano iliano, nalo maka bunu ajikia averenio titai vanio, mia nalo ajaaro ga toru, a nalo abamenea Atua toru laka, aberinavo “!Riano ga na o-o! Vonganei ga kito robitilubar vatitigio ka Atua naio jaaro m̃ele ban nalo napano maka ave kulo Ju bunu, ana na naio midu buluvio banlo bunu ka mia nalo amijikia aviliglo, a ka nalo amijikia avokar meuliano riano ea naio.”
ACT 11:19 Ana nanua, bogo napano Sol nalo amuebin Stevin naio m̃aro ruei, Sol nalo nei amila lelan liki namoneano dolu nalo ea vio Yerusalemo bunu, naruei namoneano nei nalo telabo aburo dedade janea vio abeve terakurano. Nalo tealo aburo vio tebievi laka aba abokar tanobuku na vio Vonisia, tealo aburovuro lilian kalo aba abokar uleule na vio Saipras, a tealo aban lie vo aban ea burum̃ara bulukomeli labo tai, napano siano Antioko. A bogo napano nalo ajua vio nalo na, nalo ajum̃a aberial Ioluano Vou nei, mia nalo ajum̃a aberbisivisiio ban ga nalo napano abe kulo Ju javukialo.
ACT 11:20 Mia karina, ea vio Antioko nei be namoneano dolu nalo napano ajaluvo ea tanobuku na Saireni a uleule na Saipras, nalo abinimei bunu, amioliolu, mia nalo ajum̃a aber lualua Ioluano Vou na Tubo Yesu ban nalo na vio Antioko napano maka ave kulo Ju.
ACT 11:21 Naruei Atua kanano moroano jo binimei toru ea nalo na, a tiniobi toru amijog kanalo iliano nalo, ana na nalo amonea Yesu, nalo abiliglo abinimei ea naio.
ACT 11:22 Ana na lilianiano na vite nei binimei bokar taara na namoneano nalo tilinielo ea vio Yerusalemo, berinavo Atua kiano iliano bano-o bokar nalo na maka ave kulo Ju ruei, mila ana nalo amiila Barnabas ban ea vio Antioko ka naio rial vonio vite nei vo.
ACT 11:23 Bogo napano Barnabas naio boru ea vio na, naio mial vite nei be riano laka, napano Atua milivu toru ka tomu nalo nei kialo meuliano nalo, ana na mila naio jaaro toru laka kanio, naruei naio jusol iliano banlo ka avokar Tubo sikili, vija kialo iviso vodolu nalo, ea bogo na bo a ea bogo na bova.
ACT 11:24 Barnabas naio mila jibe na bior naio be toro novo laka, napano Niununo Lu bujolou eaio, a naio biekouo ea Atua, mo jibe na, ana tomu telabo abinimei ea Atua ka bogo na.
ACT 11:25 Mia Barnabas naio mial ka be im̃auano toru ea vio Antioko, naruei mial bo ka rila vonio ka rivan ea bulukomeli na vio Tarsis, ka rileal Sol, ka rivuru naio rimei ka rijai im̃auano.
ACT 11:26 Bogo napano naio milealio, ana burio abinimei bereio aba Antioko. Abe juo amijai namoneano nalo ea vio na, aberloglog tiniobi toru, amim̃au jibe na bano-o bokar yuka vodolu. Ea bulukomeli labo nei Antioko, kulo dolu nalo amilikotkotu kija ka naiagagoano nalo, abiolo ka “Kristo tomu nalo” p̃eli na “Kristin nalo” a nina naruei nalo aberenio sio nei be moti.
ACT 11:27 Naruei ka bogo na, namoneano tealo napano abe naverialiano, ajumolu ea vio Yerusalemo abinimei aboru Antioko, ana na nalo nene tai, siano Akabas, naio jumolu, mil ea moroano na Niununo Lu, berinavo “Mia bogo vesiou re, ana na mia vituiano tai ve toru rivokar tomu nalo nonovio ea venuo reraio na kanado tanobuku.” Naruei bogo napano naiagagoano nalo na vio Antioko nalo amijog iliano nei, nalo aberii bisi, ana aberinavo mia aviniu monoka asuvan puruveru na vabe napano toro ve takurano naio mijikia suvanio, ka atuvan riva van kurualo nalo napano ajua tanobuku na vio Yutea, ka rijailo ka nalo atu rorea batitigio ka bogokouo nene. Naruei nalo ajuvan puruveru nei, ana amijev ijaiano nei monea Barnabas naio Sol jum̃alo, ka mia naljuo nei avar riva van navurim̃araboiano na namoneano nalo na vio Yerusalemo. A naverialiano nei kiano iliano be riano, bior napano iorou kanio, be bogokouo tai bokar vio nalo nei javukia ga napano naio berialio, ana nina ea bogo napano Klotias naio jom̃a be parinio tubo ka vio Romo.
ACT 12:1 Ea bogo nei, napano naljuo abar ijaiano nene binimei yako Yerusalemo, Parinio Tubo Erot jo mue searo ea taara na namoneano nalo tealo.
ACT 12:2 Kanano tomu na mira nalo tealo aba abokar Jone kuruano nei, Yemesi, ana amuebinio ka kanalo iobogu na mira nalo.
ACT 12:3 Ana kulo kouo nalo na kulo Ju nalo kanalo, nalo ajaaro toru ka vite nei, ana mila Parinio Tubo Erot naio mila bajago nei ba lie vo jibe na, ana naio berkanio kanano tomu nalo nei ka ava avokar bunu ga Pitere. Naio mila nina monloglog bogo na jokoluolu na kulo Ju nalo kanalo, napano nalo amila Jokoluolu Na Sidomkariano na Ioruriano, a bija bunu ga Jokoluolu Na Sinaniano Na Taba.
ACT 12:4 Erot jo jidomii berinavo verenio bogo na jokoluolu nei rivarlaka bisi, ana mia naio rivuru Pitere riva tumolu tukamu ea tomu nalo miralo, ka nalo ail vanio, a ka nalo averenio naio monoka rim̃aro. Jibe na naruei, tomu nalo nei aba abokar Pitere, ana abuku naio ban ea yimo na tetavokoiano, a nalo amidu bagaro na mira nalo veri ka asirarag kuku vatitig kanio, napano bagaro nalo nei kanalo tomu nene nalo abeve veri ealo.
ACT 12:5 Ana bogo napano Pitere jua yimo na tetavokoiano jibe na, namoneano nalo aju abolkouo jikili ka naio julaka ga ban Atua.
ACT 12:6 Pitere joa yimo na tetavokoiano bano-o, bokar bogiano napano Erot jo jidomii berinavo ea kavijo nene, mia rivuru Pitere riva tumolu tukamu ea tomu nalo miralo ka atibure. Ea bogiano nene, Pitere naio jo monmelio, nina iviso ka tomu na mira naljuo, napano amiadikar Pitere ban ea naljuo nei bija marimieni juo. A be tomu dolu juo na mira bunu napano naljuo aju abitikar m̃aratavo nalo na yimo na tetavokoiano nene.
ACT 12:7 Mia kolvare ga, Atua kiano nailiano tai naio jumolu ju joomo ea vio nei, ana burum̃ara miamoiano na toru laka ea vio nene. Ana nailiano nei ba mikulkulu ka burusovonano Pitere, ka biobonio, ana berinavo “!Jau kalasop̃eli, kotumolu!” Ana marimieni juo nei ajaraluvo ga jibe na den Pitere jum̃ano kolvare ga, ajibirbil batove juai borotano.
ACT 12:8 Ana na nailiano nei berinavo “Kovitirakar vatitigio kanamo kulubue na serikar mabomo, keya kanamo kulubue na jaamo a m̃amo kulusoto, ana kito ve juo ravano.” Ana Pitere mila jibe na,
ACT 12:9 ana jakisor nailiano nei naljuo abano. Ea bogo nei, Pitere maka rijikia ka vite nei naio be riano kovio, p̃eli na jum̃abe, bior naio jidom berinavo p̃eli naio monvovu kia ga vo.
ACT 12:10 Ana naljuo aju abano, ajodovulu m̃aratavo na be moti napano toro na mira juaio, aba ajovulu bunu ga m̃aratavo juo napano toro na mira juaio, naruei naljuo abinimei abokar burum̃ara m̃aratavo na maariano napano be m̃arabo na aba tavio den yimo na lakoiano. Burum̃ara m̃aratavo nene amim̃aukanio be butoto, ana bogo na abe juo abinimei vaataro kanio, naio ga betavo kanio, ana abe juo aba tavio. Ana na abe juo amiel kija ga telisu ea m̃arabo aban jibe na, ana Pitere miilo ka nailiano nei jaluvo den naio kolvare ga, ana Pitere naio ga takurano ju.
ACT 12:11 Ana ea bogo nei ga, Pitere bitilubar ka vaio napano nailiano nei mila banio, ana berinavo “!Tomnei! !Riano laka nei! Nemijikia naruei ka napano Atua miila kanano nailiano nei binimei ka rivinalar kiniou den Erot jum̃ano, a ka rivurular kiniou den vite na bova nalo napano kulo Israel nalo aju ajidomio kia ga ka aber mia ala van kiniou.”
ACT 12:12 Pitere bitilubar vatitig vite nei naruei, ana naio ban memedu ga ea Jone Mak kenieno kunuano, siano Mere. Ea yimo nei naruei, nalo telabo napano ajua vio na ruei ka mia abolkouo rivior naio.
ACT 12:13 Ana Pitere boru ea yimo nei, minia m̃aratavo nene, ana niatira sesa na vio nei tai, siano Rota, naio binimei ka rivetavo.
ACT 12:14 Naio maka rivetavo vatitig ka m̃aratavo nene vo, mia mijog lubar Pitere joono ka mil banio, ana jaaro mia jaaro, juvan m̃aratavo nene jo, ana jikiti ba berial banlo, berinavo “!Pitere nene nei! !Pitere nene nei naio jumolu ju tavio ea kiado bulum̃aratavo ruei!”
ACT 12:15 Ana nalo aber kanio, aberinavo “!Jau keil vovu re tibe na!” Ana naio ber batitigio bereio banlo, berinavo “!Maka leleio, kiniou maka nalasibi nei, neber riano nei!” Ana nalo aber kanio bereio, aberinavo “!Makanio! Ver tibe na, p̃eli sano sim̃aro nene ga na koviobo?”
ACT 12:16 Nalo ajum̃a amil kia ga jibe, ana Pitere naio ju kia tavio, naio ju minia dolu ka ga m̃aratavo bano-o, ana nalo aba abetavo kanio. Bogo napano abetavo, ana nalo abitilubar ka be Pitere, mia nalo amiilo toru laka.
ACT 12:17 Ana Pitere jisiu benavena ga banlo, juvan jum̃ano berinavo aturm̃aro ga, ana naio jukunu banlo ka jum̃abe napano Atua burular naio den yimo na tetavokoiano. Ana naio ber kalo berinavo “Bo ka kamiu kuva kuverial vite nei van Yemesi vonganei, a vija bunu ga kuruado dolu nalo na.” Ana iorou kanio, ana Pitere jaluvo bereio, ba joluku ea vio dolu tai.
ACT 12:18 Mia kavijo, ana tomu na mira nalo amemebiju toru ka napano Pitere maka bunu toa marimieni nalo nei leleio, ana nalo amerou, maka bunu ajikia mia ala tum̃abe naruei, nalo ajum̃a abivika denlo, aberinavo “?Ana toro nei buro jum̃abe nei a naio ba jo be na?”
ACT 12:19 Ana iliano nei ba bokar Parinio Tubo Erot berinavo Pitere ba kovio ruei, ana Erot miila kanano tomu nalo aba ajiragio bano-o, mia nalo maka ajikia alealio. Ana Erot mil ban kiano tomu nalo napano nalo aju kuku ka Pitere, ana nalo nene maka ajikia averenio vite tai vanio, ana Erot berinavo avuku bulag nalo nene ana auebinvinlo am̃arm̃aro. Mia iorou kanio, ana Erot juvan vio nei Yutea bereio, batove ba jua burum̃ara bulukomeli na toru napano Sisiria.
ACT 12:20 Ana ea bogo nei napano Erot naio jom̃a mijil namoneano nalo kia ga vo, naio jom̃a mila baravo toru bunu bija tomu na burum̃ara bulukomeli juo nei Taia a bija Saiton, ban bano-o mia mila tomu na komeli juo nei amerou toru laka, aberenio aberinavo verenio baraviano nei rimei rivova mia rimei sikili kalo. Nalo na ajidom jibe na bior napano nalo aju ameul ga ea sinaniano nalo napano nalo abar ga ea Erot nene kiano borotano tai. Ana nalo amiila kanalo kulo kouo tealo ka amei ala merevu naliko Erot. Ana nalo nei abano abe bilbilu batitigio bo naliko toro kouo tai na Erot kiano, napano siano Plastas, ka naio mijikia rijailo a rila kialo m̃arabo ka amijikia ail rivija Erot ka atu rivu bereio ea tum̃aro rivija naio.
ACT 12:21 Ana Erot berial legiano tai berinavo nalo amijikia amei aial naio eaio, ana ea legiano nene nalo abinimei. Ea bogo nei, Erot miya m̃ano burum̃ara kulusoto novo nalo, jibe kanio napano naio be burum̃ara parinio tubo, a jotano ea kiano burum̃ara jobaro, ana jom̃a jian kiano iliano tai banlo.
ACT 12:22 Ana nalo nei amijog kiano iliano nene, ana ajidom ajubolbolili naio p̃eli na tum̃abe, ana nalo abio jouo, aberinavo “!Uerei, ninei maka ve toro na mil nei, p̃eli nina be Atua ga na, a!”
ACT 12:23 Ana Erot mijog iliano nei, mia jaaro kanio, a barvar ka naio bunu ga ka napano nalo aberinavo naio be Atua, ana memedu ka bogo nei, nailiano na Atua kiano tai binimei mue naio, bior napano naio maka riverburelo ka aiaia ga Atua, mia aiaia re toro. Mia maka lele vesiou, ana ilo va nalo abujolou eaio, ana ajer kokorovio tiniene ana naio m̃aro.
ACT 12:24 Ana ea bogo nei, bekurano ka napano tomu nalo na ajibe ka Erot nei nalo aju amila vonio ka m̃a auedom im̃auano na Atua kiano, mia Atua kiano iliano naio jo jaburu miadu ban ea vio nonovio, a jo bar m̃arati telabo.
ACT 12:25 Ana Barnabas naio Sol, abe juo amidu ijaiano napano namoneano nalo na vio yako Antioko nalo abuku ruei, abar ban navurim̃araboiano nalo na namoneano nalo na yako Yerusalemo, bisi ana abe juo abatove, aban bereio yako Antioko, ana ea bogo nene, aburu Jone Mak jakisorlo.
ACT 13:1 Ea taara na namoneano nalo yako Antioko neibano, ana tomu tai nalo aju napano abe naverialiano nalo, a tealo napano abe naverloglogiano nalo. Nalo nei tai kalo kanalo sio jibe: Barnabas, a Simion Kuluniabene Bobogio, a Lusias na vio Saireni, a Manaen nei nanua m̃aratavo na Parinio Tubo Erot nalo amidular naio bogoti napano naljuo Erot abe kiritete kia ga vo, a naliko nalo na, Sol bunu.
ACT 13:2 Ana bogoti tai, ana nalo nene naliko namoneano dolu nalo amondulu, ana aju amilotu ka Atua, ana Niununo Lu mil banlo, ber kalo berinavo “Kamiu kuvurular Barnabas naio Sol den kamiu vonganei, kuvitiri bulaglo ave juo ka ala im̃auano tai napano kiniou nejidom ka alaio.”
ACT 13:3 Ana iorou, amondulu bogo tai bereio ka abolkouo, ana nalo abokar Barnabas naio Sol pariparilo, ana amioakolo abe juo, bisi ana amiila bulaglo abano ka ala Atua kiano im̃auano.
ACT 13:4 Ana jibe ka napano Niununo Lu miila bulag Barnabas naljuo Sol jibe na, abe juo ajuvan vio Antioko, ana abatove ea m̃arkomeli nei Selusia napano jotano koyou, ana nalo ajel ea uauako tai, aba aboru ea uleule na Saipras.
ACT 13:5 Ea uleule nei, abe juo abauro ea burum̃ara bulukomeli na Salamis, ana naljuo aban ea yimo na volkouano nalo na kulo Ju nalo kialo, ana ajum̃a aberial Atua kiano iliano. Ana ea bogo na, Jone Mak bijurukarlo kia ga vo, ana naio jom̃a mijailo ka im̃auano.
ACT 13:6 Ana nalo tolu nei amiel ea uleule nei, abatove abokar togio dolu nene, ea bulukomeli dolu na toru nei Pavos. Ana ea vio na, amial toro tai napano mijikia mila m̃esi ka tomu nalo jo, napano naio be toro Ju tai, siano Baryesu, a abio bunu naio jel ea iliano na kulo Kris nalo kialo, aber Elimas. Toro nei naio jom̃a mila sibi janea vio, naio jom̃a berenio naio be Atua kiano naverialiano tai.
ACT 13:7 Ana toro napano m̃a mila m̃esi nei, naio be toro na toru tai bunu ea im̃auano na parinio tubo na uleule na, napano Sejes Poloso. Ana parinio tubo nei, naio be toro tai napano mijikia batitigio vite bo, ana bio Barnabas naljuo Sol ber amei aialio, bior napano naio jidom ka rijog Atua kiano iliano tai denlo.
ACT 13:8 Ana bogo napano naljuo abinimei, ana toro na mijikia mila m̃esi nei naio milidielo, milavio ka riverbure naljuo nei a jidom ka parinio tubo nei naio rudu re bunu moneano ea Yesu.
ACT 13:9 Naruei Sol, napano ajum̃a aber bunu siano aber Pol, naio binimei bujolou ka Niununo Lu, ana tiniamirano bitikar jikili ban ka toro nam̃a mila m̃esi nei,
ACT 13:10 ana berkanio, berinavo “!Jau kobe Sim̃aro kenerinio memedu! Vite nonovio napano bo, mia jau maka kosidom leleio, ana jau kobujo ka sibiano a bajago va nalo ga. Atua kiano iliano nalo, jau kojom̃a kobilivilig lelario julaka ka rimei rive sibiano bereio.
ACT 13:11 Vonganei ga mia keial Atua jum̃ano rivokarso rimemedu. Vonganei ga mia jau miramo ribono, mia jau kojikia re keial legiano vesiou kija.” Ana kolvare ga ana toro na mijikia mila m̃esi nei naio mial jibe ka napano iou tai na yeturu napano kiri bobogio laka binimei juko mirano, ana naio jo miel vovu ga jibe na ka jidom rileal toro tai ka rivokar jum̃ano ka rivurio rivano.
ACT 13:12 Ana bogoti napano parinio tubo naio mial vite nalo nei, ana naio monea Atua kiano iliano, ana bogo napano Barnabas naio Pol aberloglog naio ka iliano lu nalo nei, ana naio miilo kanio, mialio bo mia bo.
ACT 13:13 Ana Pol nalo ajuvan vio Pavos, ana ajel ea uako abatove naruei abauro ea tanobuku nei Pamvilia, ana nalo amiel abano-o abokar bulukomeli nei Peka. Ana ea vio na, ana Jone Mak juvanlo, maka bunu takisorlo, mia naio ban bereio Yerusalemo.
ACT 13:14 Ana Pol naljuo Barnabas, ajuvan vio Peka, ana amiel naruei aba aboru ea tanobuku na vio Pesitia, aba abokar bulukomeli tai napano siano Antioko bunu. Ajua vio na, ana ea Legiano Lu, ana aba joomo ea yimo na volkouano na kulo Ju nalo kialo, ana ajutano naliko tomu nalo.
ACT 13:15 Ana navurim̃araboiano nalo amila lotuano, ba bokar napano abuluku Iliano Lu, ana nalo abuluku vivitauiano tai ea Mosis kiano tuboiano, a tai ea niosi na naverialiano nalo. Ana bogo napano vulukuiano nalo nei bisi, ana kulo navurim̃araboiano nalo abika den Pol naljuo Barnabas, aberinavo “Banalo, verenio kamjuo kumije iliano tai napano mijikia rijai tomu nalo kialo meuliano, ana mo kumemi numisidom kamjuo kuverialio van kumemi.”
ACT 13:16 Ana na Pol jumolu, ana buku jum̃ano, ber amelumu ka aje tilinielo ka naio ana mil banlo, berinavo “Mia bo, ana kiniou nejidom ka kamiu kulo Ju nalo, naliko kulo dolu nalo napano kamiu bunu kumonea kenememi Atua, kamiu nonovio kuvije tiliniemiu rivu ka kiaku iliano nei.
ACT 13:17 Kiado Atua nei, naio naruei napano bitiri bulag kiado kulo moruo nalo na beamu, a naio naruei napano mila nalo abinimei miroano laka ea bogo napano amim̃au kurano yako Ijivi, a naio ga bereio napano buru bulaglo den bogokouo nei, ea kiano burum̃ara moroano nei.
ACT 13:18 Ana naio burum̃arabo kalo aba tavio aban ea vio yauo, ana amiel ea vio na bano-o bokar yuka duelimo va veri [400], ana va telabo ka bogo na nalo ajum̃a abilig taakalo ka Atua, mia naio maka lele tuvanlo.
ACT 13:19 Naruei ka bogo napano abinimei abokar buruvenuo nei Kenano, napano Atua berkar ka mia rudu vanlo, ana naio jitig bulag bajulukuti aluo na kulo dolu nalo napano abinimei ajua vio nei ruei, karina midu borotano nene ban korobido nalo, abe boru kanio, ana aba ajua bokanio.
ACT 13:20 Jikario ea bogo napano abano be moti garuei Ijivi, binimei bokar bogo napano abano bereio jouro ea kanalo buruvenuo bereio, bokar titai jibe ka yuka duelimo toromomou veri duelimo va limo [450]. “Ana ea bogo napano ajua kanalo borotano jibe na, ana Atua bitiri bulag kanalo tubo nalo, ka avurim̃arabo kalo ka m̃a atiburelo, ana tubo nalo nei amim̃au m̃a jibe na ba bokar nalo toro na maariano nei Naverialiano Samuel.
ACT 13:21 Ana nalo aberinavo maka bunu asidom tubo nalo na jibe na, mia aber ka Samuel aberinavo naio rileal toro tai napano mijikia ve kanalo parinio tubo na toru. Ana Atua jiloglog Sol, Kis kenerinio, banlo, napano naio be bajulukuti na Beniamen kiano, ana Sol binimei be kanalo parinio tubo na toru na be moti garuei, ana naio be tubo kalo bokar yuka duelimo va veri [40].
ACT 13:22 Karina, na Atua burular Sol bereio, ana bitirilar Teviti midu jeleigio, ana Atua jaaro toru ka Teviti, naio jo berii berinavo ‘Ea Teviti nei, Jese kenerinio, mia kiniou nemial ka nabokar toro tai napano kiano bajago jakii kiaku jidomiano memedu, ana nemijikia ka mia naio rim̃au tibe ka ga napano nejidomio.’
ACT 13:23 Ana Atua naio berkar ban korobido nalo re nua nua nalo ruei, berinavo mia naio rudu toro tai ea tormoruo Teviti nei kanano bajulukuti, rudu naio van kito kulo Ju nalo, tibe kiado Ioruriano, ana vite nei Atua milaio ea toro nei Yesu ruei.
ACT 13:24 “Beamu, bogo napano maka Yesu nei rimei vo, ana Jone Baruei jo mioliolu ban kito, berinavo ‘Kamiu monoka kuvilig kamiu, ana monoka kuvan ea varueiano.’
ACT 13:25 Ana bogo na Jone vaataro ga ka rila nonovio im̃auano nalo napano Atua midu banio, ana naio jom̃a bika den tomu nalo, berinavo ‘?Kamiu kumisidomii kuberiam̃a kiniou nebe Naverikariano? Kiniou neber ka kamiu, kiniou maka leleio neve toro napano kamiu kumitu rorea naio nei, makanio. Mia na iorou ka kiniou, naio jo binimei kia ga nei, naio bo mia bo, a naio be lu laka, ana nemial jibe maka neve verare ka neve kiano toro na im̃auano, maka navare ka nava vaataro ka mia neivelar kiano kulubue na jaano.’ ”
ACT 13:26 Ana Pol ber kalo, berinavo “Kuru-aku nalo, kamiu tealo napano abe kulo Ju nalo memedu, napano kumaluvo ea bajulukuti na Epraamo kanano, a kamiu tealo abe kulo dolu nalo, ana kumonea kenememi Atua kumemi kulo Ju nalo, kiniou nejidom ka kamiu nonovio monoka kuvitilubar ka kito nei naruei, napano Atua jian iliano na ioruriano ban kito ruei, mila ana kiniou nojom̃a neberial ban kamiu nei.
ACT 13:27 Nalo na vio Yerusalemo naliko kanalo tomu na tortoru nalo, nalo maka lele avitilubar Yesu ea bogo napano naio binimei, a maka avitilubar ka naio be Ioruriano napano naverialiano nalo aberiio ea Iliano Lu nalo napano abuluku julaka ea Legiano Lu nalo. Tibe na, nalo maka avitilubario, mia amila ka naverialiano nalo kialo iliano telaboamei ave riano, bior nalo naruei ajibure kanalo Naverikariano nene nei aber naio monokanio rim̃aro.
ACT 13:28 Maka ajikia aleal titai napano rimemedu ka mia naio rim̃aro riviorio, mia ajikili ka Pailat ka naio monoka rijamo ka riverenio nalo amijikia auebinio.
ACT 13:29 Ana amila kikio jakii ga vaio napano naverialiano nalo aberialio bogbe nua ruei, napano aberenio mia tomu nalo ala van naio, rivano-o mia auebinio ea m̃akolkolo, ana iorou kanio amidu tati nene, aba amidu joa buluvai.
ACT 13:30 Ana Atua mila naio meul bereio den nam̃ariano,
ACT 13:31 ana ea bogoti tealo telabo kija, ana na naio jom̃a mioyoyotuba ka kanano tomu nalo napano beamu naliko naio yako Kalele, a napano ajakisorio abinimei mave Yerusalemo. Ana nalo napano m̃a amial Yesu jibe na ruei, mia nalo nene naruei ajum̃a aberveriio ban tomu nalo aberenio naio meul bereio den nam̃ariano ruei.
ACT 13:32 “Mia vonganei, ea vio nei, kumemi juo nubinimei ea kamiu ka nuvar Lilianiano Novo nei rimei van kamiu. Kumemi juo nuberial ban kamiu, nuber vite novo nalo napano Atua berkario ban korobido nalo re beamu, berenio mia rila van kiano tomu nalo,
ACT 13:33 ana vonganei vite nalo nene abinimei abe riano ea kito ruei, kito kum̃abilo nalo, a ea kito kulo dolu napano kito romonea naio. Ana kito robokar vite novo nei ea kiado bogo ga, napano Atua miila Yesu binimei yetano ea yetemeriba nei, a mila naio meul bereio den nam̃ariano kar kito. “Ea Iliano Lu, Iouano mirano juo naio berii vite nei, napano ber ‘Kiaku tete, nemial jibe ka banei kobinimei kobe keneriku, ana kiniou nebinimei nebe karam̃amo riano.’
ACT 13:34 Ana ea tivelinio napano Atua mila Yesu meul bereio den nam̃ariano, napano naio maka rijikia rivan bereio ea m̃artanbo, ea tivelinio nei iliano juo na Iliano Lu aberenio ruei. Ea iliano na be moti ana Atua berii jibe nei, berinavo ‘Ilivuiano lu nalo nei napano kiniou neberkario nua ban Teviti beamu ruei, nalo aju ajikili kia ga vo, ana vonganei mia kiniou neje van kamiu naruei.’
ACT 13:35 Ana iliano tinene na tivelinio nei, naio joa Iouano tai bereio, napano toro napano jirio, naio mil ban Atua, berinavo ‘Mia jau kojikia re kajamo ka kiamo toro lu rial nam̃ariano, p̃eli na mokotenano rimenunu bogo tai.’
ACT 13:36 “Ana iliano nalo nei maka atum̃a averii tormoruo Teviti nanua beamu, bior karina napano naio mila Atua kiano im̃auano ban kiano tomu nalo, ban bano-o mia naio m̃aro garuei, ana ajivin jo bija korobinio nalo, ana mokotenano mon ea vio na bano-o mia menunu.
ACT 13:37 Ana iliano nalo nei aberii Yesu nei ga, aberii napano mokotenano maka riva rivova tibe na, mia Atua bitirilar naio meul bereio.”
ACT 13:38 Ana Pol naio berinavo “Kuruaku nalo, ver tibe na, kiniou nejidom ka kamiu monoka kuvijikia vatitigio vite nei, ka ea ga Yesu nene ga, ana Atua jo mila ban kitojuo berii naio biekokoa kiado vovaiano nalo bunu ruei.
ACT 13:39 Mosis kiano tuboiano maka lele rijikia rivurular kitojuo den kiado bajago na vovaiano, mia jau kei, napano verenio komonmonea Yesu sikili, ana mia naio rijelar kiamo bajago na kariano denso.
ACT 13:40 Tibe na, monoka kuvitikar vatitig kamiu rivu, bior ver makanio, mia kuvitibe ka napano naverialiano nalo kialo iliano tai berenio,
ACT 13:41 napano berinavo ‘!Kamiu kuvialio! Kamiu kumitum̃a kubital niegeniege vite lu nalo, mia vonganei mia kuvitilubario, karina mia kum̃arm̃aro. Bior napano kiniou nojo nemila im̃auano tai iviso bure kamiu ka bogo napano kumeul kia ga kia navo, ana nalo aju aberbisivisii meravo ban kamiu, mia maka kuvisidom kumonmoneaio.’ ”
ACT 13:42 Ana Pol mil banlo bisi, ana na nalo aba tavio, ana tomu nalo abinimei abika jikili den Pol, aberinavo “Kumemi numisidom nuber ea Legiano Lu nei napano jo binimei, mia kamjuo kumei nei bereio ana mo kuverloglog kumemi lie vo ka vite nalo nei.”
ACT 13:43 Naruei bogo napano Pol naljuo Barnabas aju abano, ana kulo Ju nalo telabo naliko bunu kulo dolu nalo napano abinimei ajibe kulo Ju nalo ruei, abinimei amiel ajakisor naljuo aban napano aber atukunu lie vo. Naruei atevi juo nene amil banlo, aberii kalo aberenio nalo monokanio avarkar tinielo lie vo ea Atua, a nalo monoka ala vonio ka ava joomo lie vo ea kiano tiniememiano.
ACT 13:44 Ana jibe ka napano nalo aberii ka Pol naio Barnabas ruei, ea Legiano Lu dolu napano binimei iorou, ana viobujo ka kulo Ju nalo, a viobujo bunu ka kulo dolu nalo ea bulukomeli nei abinimei vio takurano ga, ka aber aiagago ka Pol jom̃a mioliolu ka Iliano Lu na Atua kiano.
ACT 13:45 Mia bogo napano kulo Ju nalo kialo tomu na tortoru nalo amial tomu dolu nalo telabo nei, ana amijoku kanio, aju amil bova ka ga Pol, ajum̃a aberii ka tomu nalo aberenio naio jom̃a milasibi ga na.
ACT 13:46 Mia Pol naio Barnabas naljuo maka tinielo rimemebiju, naljuo aju amil toru ga, naljuo kanalo iliano ba jikili lie vo, ana aberii ka kulo Ju nalo nei, aberinavo “Kumemi numial memedu ka mia Iliano Lu na Atua kiano napano kumitum̃a nuber ka kamiu, rimei rivokar kamiu kulo Ju nalo ve moti, beamu ka kulo dolu nalo. Mia maka kuvisidom kumoneaio, ana kumitum̃a kubuku searia bulagio ga bano, javukia napano maka bunu kuvijikia kuvokar meuliano na maka rijikia ribisi. Mia bo ga, jua ga kamiu, mo ver tibe na mia kumemi nuva nuvioliolu ga van nalo napano maka ave kulo Ju nalo.
ACT 13:47 Bior napano Iliano Lu tai berenio ruei napano kumemi monoka nuvila tibe na, napano Atua naio berenio, berinavo ‘Kiniou nebitiri larso ka mia jau komerera, kotibe ka yulu tai rimererali nalo napano maka amonea kiniou vo. Mia jau kavar kiaku ioruriano riva rivokar vio reraio nalo ea yetemeriba.’ ”
ACT 13:48 Ana bogo napano nalo na maka ave kulo Ju amijog iliano nei, mia nalo amijog bo toru laka biorio, aberinavo “!Tomnei, Atua kiano iliano nei naio bo mia bo, koig kumemi tiniememi jiio-o mia!” ana nalo napano Atua berkarlo ka mia avokar meuliano napano maka rijikia ribisi, nalo nei naruei amonea Yesu ea bogo nei.
ACT 13:49 Ana jikario ea bogo nei, Tubo kiano iliano jom̃a mijiajian janea vio nonovio ea tanobuku nei.
ACT 13:50 Mia kulo Ju nalo napano amijoku aba amial tire nalo na tortoru nalo ea kialo yimo na volkouano, bija navurim̃araboiano na m̃arkomeli nei, ana amil banlo amila searo ea kanalo jidomiano, ban bano-o mia tomu na tortoru nalo nei amiila tomu nalo aba amijil lar Pol naljuo Barnabas den kanalo vio.
ACT 13:51 Ana bogo napano naljuo aju aba tavio, ana naljuo amila kijokijo tai ban nalo na m̃arkomeli nei, nalo amijuba kon yevi na m̃arabo napano jua jaalo. Ana nalo ajaluvo den vio Antioko, aba abokar m̃arkomeli nei Aekoniam,
ACT 13:52 mia naiagagoano vou nalo napano aju yako Antioko, tinielo jaaro toru, a Niununo Lu binimei bujolou vatitig ealo.
ACT 14:1 Naruei ea komeli na vio Aekoniam, vite nonovio amalmaluvo javukia napano ea vio Antioko garuei. Pol naljuo Barnabas aboru ea vio na, mia iorou kanio ana abe juo aba joomo ea yimo na volkouano na kulo Ju nalo kialo, naruei amioliolu. Abe juo amioliolu bija Atua kanano moroano, naruei tomu telabo napano ajua vio na amonmonea Ioluano Vou na bo nei, napano nalo togio abe kulo Ju, a nalo togio abe kulo Kris.
ACT 14:2 Mia kulo Ju dolu nalo napano aju na, maka asidom amonmonea, naruei iorou kanio ana aba amila vonio ka avilig lelan tomu dolu nalo napano maka ave kulo Ju kialo jidomiano, nalo amila tiniel jerlo nalo napano amonea vonga.
ACT 14:3 Vite na naruei naio mila ana na Pol naio Barnabas, naljuo aju lie vo ea vio na, aju bogo tebievi kija, ka alavon ka aija namoneano nalo. Mia bogo napano nalo aju naliko jibe na, mia maka amerou ka nalo napano tiniel jerlo, mia amioliolu dolu ga ka Tubo Yesu banlo, a ka aberii kiano burum̃ara tiniememiano ban tomu nalo. Ana Tubo naio mila tomu nalo abitilubar ka kanalo iliano nalo abe riano, bior naio mijamo ka ban naljuo ka amila burutomoluo nalo a vite na iloiano telabo bunu ea vio nei.
ACT 14:4 Mia tomu nalo na komeli nei nalo aburuburelo ea taara juo naruei, napano tealo amijakar kulo Ju nalo, mia nalo tealo amijakar atevi juo neibano.
ACT 14:5 Tivelinio juo nei ajum̃a amila baravo kalo jibe na, ban bano-o mia kulo Ju nalo naliko kulo dolu nalo napano maka lele tiniel tii namoneano nalo neibano, bija bunu kanalo tomu na tortoru tealo, nalo naruei aber kakar ka mia atuk atevi nalo nei a atuba binvinlo am̃arm̃aro.
ACT 14:6 Mia atevi juo neibano nalo amijog vite nei, ana amial aber bo kanio avuro den vio nei, ka ava aje jogvuiano ea vio tai. Jibe ga na, nalo ajumolu den vio nei, aban ea tanobuku dolu na vio Likonia, ana nalo aba aberial Ioluano Vou na bo ea tanobuku na vio na, bija sano komeli nene juo, napano sialo jibe nei, Listra bija Tebe.
ACT 14:8 Naruei ea m̃arkomeli na yako Listra, bogo tai ana Pol naio jom̃a mioliolu ban tomu nalo, mia toro tai be javuluku naio jom̃a jojo tano, jom̃a miagago ka Pol. Toro nei jikar ea bogo napano naio moluo, naio maka leleio riel bogo tai, bior jaano be juo abuluk. Naruei Pol mial ka toro nei jom̃a miagago batitigio ka naio, a mijog lubar ka toro javuluk nei naio jo monea Yesu ka mia naio mijikia rila vatitig jaano ve juo. Naruei Pol bitii kilkil eaio,
ACT 14:10 ana bio naio, berinavo “!Toro javuluk, jau kotumolu, kesikili kotu ka jaamo ve juo!” Naruei toro nei mijog Pol mil banio jibe na, naruei naio jumolu sop̃eli ga, ana na jo miel bija jaano be juo napano abinimei ajikirkili bo ruei.
ACT 14:11 Ana bogo napano tomu nalo amial vite nei napano Pol milaio ea toro javuluk nei, nalo aju abiovio kanio jel kialo iliano, aberinavo “!Aiou! !Kiado atua nalo amidu kulorinio mirano, abatove kean kito jibe ka toro garuei!”
ACT 14:12 Naruei nalo ajian sio na ban Barnabas, abio naio ka Susu, napano naio be sio na parinio tubo na kialo atua nalo, a ajian sio na ban Pol, abio ka Emis, ka naio be sio na toro napano jom̃a bar kanalo atua nalo kialo iliano nalo, bior amial ka Pol naio jom̃a mil lie jovulu Barnabas.
ACT 14:13 Ana tavio ea morouo na komeli nei, yimo lu tai tena kialo atua nei, Susu, naio jo, bija toro lu nene, naruei na toro lu nei naio jidom riomon ka tomu nalo monoka avuru sida rivan Pol naio Barnabas, napano nalo ajidomii aber tomjuo nei abe kanalo atua. Naruei toro lu nei milalo amila sop̃eli aba aburu bue m̃arauo nalo abinimei, ana amiovovualo ka maniegiegi nalo, ka auebinvinlo ea burusio na yimo lu neibano.
ACT 14:14 Naruei Barnabas naio Pol, naljuo maka atum̃a ajikia kialo iliano, napano ajum̃a aberii vite nalo nei, mia bogo napano naljuo amijog venia napano ajum̃a ajidomii ka alaio, naljuo amijog bova-o mia! Atevi juo neibano, naljuo maka asaaro leleio ka napano tomu nalo nei ajidom alotu kalo, mila na abe juo amijede m̃alo kulusoto nalo, ajikiti aba ajikili aju iviso ka tomu nalo nei, amiaga, aberinavo
ACT 14:15 “!Kuverburelo, kuverburelo! !Kamiu kuvila re tibe na van kumemi! !Kumemi juo nube toro ga javukia kamiu ga, maka nuve atua nei! Kumemi nubinimei ga bija Lilianiano Vou na bo, nubinimei ka nuverial van kamiu ka monoka kuvituvan kenemiu bajago moruo nalo na jibe na atu, kuvolkouo re bunu ka kenemiu atua nalo na telabo napano am̃arm̃aro ga. Mia nubinimei ka nuverial van kamiu ka Atua takurano ga jo napano naio meul, a numisidom nuvilig kamiu van naio, napano naio ga naio jii na vio yauo bija borotano, bija tei, a naio jii vite nalo nonovio napano ajua vio nonovio nalo ea yetemeriba nei.
ACT 14:16 Ea yuka nalo na telabo p̃eli na terati nalo napano abarlaka ruei, Atua mijamo ka tomu nalo na vio yetemeriba, jibe ka kamiu, nalo ajum̃a amiel ajakii bajago doldolu nalo, a maka ajikia naio, ana na nalo amila lotuano jibe ka ga napano ajidomii aber memedu ka alaio.
ACT 14:17 Nemial ka napano kamiu kumila jibe na bior kamiu maka kuvijikia naio, mia tivelinio ka naio, naio maka ruduvan naio reraio ka kamiu, bior bogo nonovio naio jom̃a jiloglog naio tertelisu dam̃ariga ka kamiu, berinavo naio be riano, a napano kiano bajago ea kamiu kirinovo laka. Naio naruei naio jom̃a mila kiano yuo bovo jibirbili batove, a naio naruei napano jom̃a mila vite nonovio amiluo ea tiniavio nalo na kenemiu, nalo abar salo nioti nalo ka bogo nene memedu. Naio naruei jom̃a mila kamiu kumisaaro a kamiu kumijog bo toru laka ea sinaniano novo nalo napano kumitum̃a kubar ea kenemiu tiniavio nalo nene.”
ACT 14:18 Pol naio Barnabas naljuo aber iliano na jibe na naruei, mia kolvare ga ka mia ajikia re ka mia averbure re tomu nalo nei napano ajidom m̃elea ka ala lotuano vanlo a napano amiomon sida kalo. Mia iorou kanio napano nalo amijog tomjuo nei kialo iliano, ana na nalo maka bunu alaiio bereio.
ACT 14:19 Avona kario, ana kulo Ju nalo tealo napano m̃a amijil Pol naio Barnabas ea vio Antioko a ea vio Aekoniam ruei, vonganei ana nalo aba amiyotuba ea vio Listra nei bereio. Naruei nalo ajum̃a ajukunu ban kulo Listra nalo, ban bano-o mia aburu batitigio kialo jidomiano nalo abano be dolu bereio, avona kario, ana nalo aban ka Pol, ana ajubaio ban bano-o mia amialio aberiam̃a naio m̃aro ruei. Naruei nalo aburutitigia taniabene ba tavio ea komeli, abuku searia naio jo jibe ga na, naruei aban bereio.
ACT 14:20 Mia naiagagoano tai abinimei amidu batitig Pol, ana nalo aju naliko, avona bisi, ana naio jevijo bereio, ana ban bereio vonuo nalikolo. Mia ea kavijo, ana naljuo Barnabas, abe juo amiel, aban ea m̃arkomeli dolu na telisu nei Tebe.
ACT 14:21 Naruei ea vio Tebe, Pol naio Barnabas abe juo amioliolu, mia ea vio na nalo aburu tomu telabo abinimei amonea, abinimei abe Yesu kiano naiagagoano nalo. Ana iorou kanio, ana naljuo ajaluvo ea vio Tebe bereio, ajikar ka avan bereio, naruei nalo ajakii m̃arabo nene kia ga napano nanua ajel eaio abinimei. Jibe na ga nalo avan bereio ea vio Listra, karina, Aekoniam, karina, aba aboru Antioko na vio Pesitia.
ACT 14:22 Ana ea vio nalo nei, aberloglog namoneano nalo bereio, mia ajian iliano novo nalo ka rijailo, a nalo aberinavo “Be iakurano ka napano p̃eli mia kito romijikia roviniua bogokouo nalo, p̃eli na mia tomu nalo ail die kito, mia ka kito rava jouro ea Atua kiano navenatuboiano naio monokanio tibe ga na naruei. Verenio tibe na, kamiu kumelukluku re, kuvan re bunu, mia kuvitumolu kuvitu sikili ea Kristo dam̃ariga.” Nalo aber iliano nalo na jibe na, mila ana namoneano nalo abokar jikili moneano.
ACT 14:23 Ana ea komeli nalo abiniu, ajokol tomu nalo tai parilo ka ave navagadeano nalo ka taara na tomu na moneano nalo, ana nalo ajuvan sinaniano ka abolkouo kalo. Naruei amidulo ajua Tubo jum̃ano, napano nalo amonea ka mia naio rijailo tulaka.
ACT 14:24 Naruei nalo aju aban bereio jibe na, amiovodulu ea tanobuku na vio Pesitia, bisi na abinimei ea tanobuku na vio Pamvilia.
ACT 14:25 Ea tanobuku nei, amioliolu ea komeli na vio Peka, karina abatove ea vio Atalia, koyou ea tei,
ACT 14:26 ana nalo amidu uako, aba aboru bereio ea komeli na vio Antioko, nina ea vio Siria. Nina be burum̃ara komeli labo napano beamu, nalo abolkouo ka Pol naljuo Barnabas, ka mia Atua kiano tiniememiano vija kiano vitikariano vu novo to rivijalo, ana na amiila bulaglo ka adu Lilianiano Vou na bo rivano. Mia vonganei naruei, naljuo amila nonovio batitigio burum̃ara im̃auano nei, ana abinimei bereio ruei.
ACT 14:27 Naruei nalo abio ban namoneano nalo ka aviniu amei vio takurano, ana aberii iliveriioano banlo, a naljuo aberbisivisii batitigio banlo ka jum̃abe ana Atua naio betavo ka nalo napano maka ave kulo Ju, ka mia nalo bunu amijikia amonmonea, a amijikia aiasol ea navenatuboiano na kanano.
ACT 14:28 Ana na naljuo aju bunu siberio tolu titai jibe na naliko namoneano nalo ea vio Antioko.
ACT 15:1 Ana bogo napano Pol naljuo Barnabas aju kia ga vo yako Antioko, kulo namoneano tealo na tanobuku na vio Yutea, napano abe kulo Ju, abatove ea vio nene. Ana bogo napano nalo amioliolu ban kulo namoneano dolu nalo na vio Antioko, aberial kanalo verloglogiano tai, aberinavo “Verenio kamiu kulo namoneano nalo tealo, maka ave pakuveu takii vaio napano Mosis kiano tuboiano berenio, mia Atua maka rijikia rilarurlo.”
ACT 15:2 Mia Pol naio Barnabas, naljuo maka asaaro leleio ka iliano nei, bior amijikia ka Lilianiano Vou na bo na Tubo kiano naio maka river tibe na, naruei amil jikili banlo, amila baravo naliko jiou kija jibe nei, ka amila vonio ka averbure nalo nei averloglog re bunu tomu nalo ka vovuiano na jibe nei. Ana kulo namoneano na vio Antioko, nalo ajidomii m̃elea iliano nalo nei bano-o mia deio, ana amial jibe bo ka nalo aiila Pol naio Barnabas, a vija bunu ga nalo tealo, avavin Yerusalemo, avan aial atevi nalo a navurim̃araboiano nalo, ka ajog vonio ka kulo kouo nalo nei ajidomii jum̃abe ka tivelinio na vite neibano ajum̃a amila baravo biorio.
ACT 15:3 Naruei, kulo namoneano nalo amiilalo abano, abatove ea tanobuku na ea vio nalo na jibe kanio Vonisia, karina vio Sameria, a ea bulukomeli nonovio napano amiovodudulu eaio, ajum̃a abior bija kulo namoneano nalo, a ajum̃a ajukunu naliko ka jum̃abe ana nalo aba ajeliviv ea bunu nalo napano maka ave kulo Ju, a aberial Lilianiano Vou na bo banlo, a jum̃abe ana viobujo kalo abiliglo abinimei ea Atua ruei. A kialo veriiano nei naio mila namoneano nalo ajaaro toru laka, a nalo abamenea Atua biorio.
ACT 15:4 Nalo amila jibe na ban bano-o, abatove abokar vio Yerusalemo, ana aba amial taara na namoneano nalo, a bija atevi nalo a navurim̃araboiano nalo na nalotuano, mia nalo nei ajaaro ka amial Pol naliko Barnabas, amila ilivorvoruano banlo. Jibe na ana mo Pol naio Barnabas naljuo bunu amila veriiano bunu ban nalo na vio Yerusalemo, aberii jum̃abe napano Atua naio mila im̃auano telabo ruei banlo, napano naljuo aba abokar nalo napano maka ave kulo Ju, a amioliolu banlo, aberinavo verenio nalo amonea ga Kristo, mia Atua naio rilarurlo.
ACT 15:5 Ana bogo napano naljuo amila iliveriioano jibe na, kulo namoneano nalo tealo napano abe kulo Ju, napano abe Varisis, ajumolu aberial kanalo jidomiano nene bereio, aberinavo “Bo ka nalo napano maka ave kulo Ju, avona verenio nalo tinielo ka amonea Kristo, mia nalo monoka ave pakuveu bunu ga, a monoka atakii bunu ga iliano dolu nalo na Mosis kiano tuboiano, mo verenio atakii kiado bajago kito kulo Ju nalo tibe na, mia kito romijikia roverenio mia Atua naio saaro kalo.”
ACT 15:6 Ana nalo ajum̃a aberii vite nei toru laka, mila jibe na ana atevi nalo a navurim̃araboiano nalo aberinavo monoka ala vioriano tai ka averiio.
ACT 15:7 Ana ea vioriano nei, nalo amil banbano-o mia Pitere jumolu, mil banlo, berinavo “Kuruaku nalo, kamiu kumijikia ruei ka beamu, Atua naio bitirilar kiniou ka neve moti na kito ka nava noioliolu ka Lilianiano Vou na bo nei van nalo napano maka ave kulo Ju, mia vonganei kito roju romijog ka napano nalo telabo ajum̃a amonea Yesu ruei.
ACT 15:8 Atua naio mila jibe na bior naio maka tibure nalo nei den kito, mia naio mial tinielo beverare jibe ka napano naio mijikia vatitig vaio napano jua kiado iviso nalo. Naio berial ka naio jaaro ka nalo amijikia amonea kia ga m̃arabo napano kito rojum̃a romoneaio, napano naio mije Niununo Lu banlo, a napano naio jekon kialo iviso nalo meravo bunu, bior nalo abarkar tinielo ea naio, javukia kito.
ACT 15:10 Atua naio mila bo laka banlo ruei, mia vonganei, kito tealo ajidom ka ala sikili vanlo bereio. Verenio kito rosidom resikili ka nalo nei ka avar vite na teremi na kiado tuboiano ea taakalo, tibe napano ajum̃a aberenio, tibe na ana kito roju ramila von Atua bereio. Korobido nalo amial kiado tuboiano nei ana aber naio kirisikili laka, mia kito bunu romialio ka maka toro tai napano rijikia rudu nonovio iliano nene nalo riviniu.
ACT 15:11 Mia nalo amoneaio, a kito bunu ga romoneaio bijalo, ka kito nonovio rabarkar tiniedo ea Tubo Yesu, a robokar bunu meuliano ea naio, binimei ga ea kiano tiniememiano ga.”
ACT 15:12 Naruei nalo napano ea vioriano nalo maka bunu ail bereio, mia aju melumu ga, ana amidu bogo na iliano tai ban Pol naljuo Barnabas, nalo tinielo ka aber ajog kija bere lie vo burutomoluo nalo a vite na iloiano nalo napano naljuo amilaio ea moroano na Atua kiano ban nalo napano maka ave kulo Ju, ea bogo napano naljuo aba amiel jeliviv ealo.
ACT 15:13 Ana bogo napano naljuo ajukunu ka vite nalo nei bisi, ana Yemesi nei, napano naio be kanalo toro na toru tai yako Yerusalemo, naio jumolu jusol iliano ban tomu nalo, berinavo “Kuruaku nalo, nejidom kamiu kuviagago ka kiniou beamu vo.
ACT 15:14 Kito romijog m̃a ruei ka napano Saimon nei, napano Pitere, naio ber bisivisii batitigio ban kito ruei jum̃abe napano Atua malmaluvo moti ka nalo napano maka ave kulo Ju, a napano naio buru bulag nalo tealo abinimei ka ave kulo vou tai napano siano joaio.
ACT 15:15 Ana ea Iliano Lu, iliano napano kiado naverialiano nalo nanua beamu aberenio, naio ber ka mia tibe na naruei. Nalo tai napano naio ber jibe na, naio be Amos, napano naio berial Atua kiano iliano tai, berenio jibe nei, berinavo
ACT 15:16 ‘Karina, mia kiniou nemei bereio, neim̃au vatitigio ka Teviti nene kiano bajulukuti tai napano mijoru, naio rimei rimeul bereio. Bajulukuti nene javukia yimo tai napano burukokorovio bova ju nei, mia kiniou nevitirilario bereio.
ACT 15:17 Ana jibe na, tomu dolu nalo napano maka ave kiaku vo, nalo ajirav kiniou Atua Sop̃i, a tomu nalo na buruvenuo nonovio na yetemeriba nei, napano nomidu siaku jualo ruei, mia nalo amei ave kiaku tomu nalo.
ACT 15:18 Kiniou nebe Atua Sop̃i, napano nemila tomu nalo abitilubar vite nalo nei, jikar nanua beamu laka ruei, kiaku verikariano jibe na naruei.’ ”
ACT 15:19 Ana Yemesi mil lie vo, ber bisivisii kiano jidomiano, berinavo “Ea kiaku vitiiano, naio jibe nei naruei. Mia maka rivu ka kito rovijuku kouo p̃eli na rala m̃elea nalo napano abiliglo vonga abinimei ea Atua, napano maka ave kulo Ju. Maka rivu ka roverenio nalo monoka ave pakuveu, p̃eli na nalo monoka atakisor kiado tuboiano tibe na a tibe na.
ACT 15:20 A vaio ga napano bo ka kito rala vanlo, tibe nei, ka mia rovivitauia m̃esi tai, roverial vite ve tolu. Vite na be moti, rovere ka, mia nalo asen re bereio sunbue nalo napano kulo dolu nalo amila ka sida ban kanalo tavoru nalo, nalo monoka aveli kalo. A tinene, nalo ala re bereio bajago va, na jibe ka siakaiano p̃eli na siakiano. A tolu nene, asen re bunu ga burukija na vite na meul, jibe sunbue na vite na meul napano burukija nene maka tabo vatitigio vo eaio.
ACT 15:21 Tomu nalo ajum̃a amijikia vite nalo nana napano maka rimemedu ka ala, bior Moses kiano tuboiano naio jo berenio, a nalo ajum̃a abuluku bulag tuboiano nene a amioliolu kanio julaka ga ea Legiano Lu nalo ea kanalo yimo na volkouano na kanalo m̃arkomeli nalo, jikario nanua ruei binimei bokar banei.”
ACT 15:22 Ana iorou kanio, ana nalo amial jibe ka amil bare, ana atevi nalo a navurim̃araboiano nalo, a bija bunu ga kulo na namoneano nalo nonovio, nalo amial jibe bo ka mia aiila nalo tealo avan bereio naliko Pol naljuo Barnabas, avatove bereio yako Antioko. Naruei nalo ajekar kanalo kulo kouo juo na im̃auano nei, Jutas Barsabas naljuo Sailas, aberinavo mia naljuo nei avano.
ACT 15:23 Mia nalo abivivitauia bunu m̃esi tai ka naljuo amijikia adukario avatove, ana m̃esi nene berenio jibe nei, berinavo “Kumemi atevi nalo bija navurim̃araboiano nalo na vio Yerusalemo, napano kumemi nube kuruado bija kamiu ea Yesu, kumemi numisaaro toru laka ka nuviviuo kamiu bereio ea m̃esi nei. Kumemi nubivitau ea m̃esi nei biedu ban kamiu m̃arkomeli na vio Antioko, a sano tanobuku napano Siria, a ban kamiu bunu ga ea tanobuku na vio Silisia, ninei kamiu nalo napano maka kuve kulo Ju, napano beamu kamiu kumitua melijokouo ga.
ACT 15:24 Iliano binimei bokar kumemi ruei, berinavo beamu, kumemi tealo abiedu rove ea kamiu a nalo aberloglog kamiu aber kamiu na monoka atakisor kenememi tuboiano nalo kumemi kulo Ju, aver makanio, mia Atua naio maka rijikia rilarur kamiu. Kumemi numijikia ka iliano nei mila lelan kenemiu jidomiano nalo toru laka, a mila kamiu kumijog bova laka, ana iliano nei napano nalo aberenio, kumemi maka nuvijikiaio, kumemi maka nuver kalo ka monoka aviedu averloglogio tibe na van kamiu.
ACT 15:25 Ana kuruado novo juo nei, Pol naljuo Barnabas, napano nalo na maka asidomii ve temi ka kanalo meuliano, mia aju ajidom yebekavo toru ka ga averial Tubo Yesu Kristo siano, kamiu kuviila nalo na amei aial kumemi rivior vite nei. Ana kumemi nuvioro kanio, kumemi nuvitiio rivano-o, naruei nuvironkario ka mia nuviila kuruado juo na vio nei adu m̃esi nei, aviedu bereio naliko Pol naio Barnabas.
ACT 15:27 Naljuo neibano, Jutas naio Sailas, mia ave juo atukunu vatitigio lie vo van kamiu, riveverare ka ga vaio napano nubivitauia ban kamiu ea m̃esi nei.
ACT 15:28 Ana ea kenememi vitiiano, a ea vitiiano na Niununo Lu kiano bunu ga, kumemi numial jibe bova ka nuvututua ka monoka kuvijogkar kenememi tuboiano nalo kumemi kulo Ju. Mia kumemi numial jibe vite nalo nei tealo napano kumemi kulo Ju nalo maka nuvisidom leleio, a bo ka kamiu bunu kuvila re, ka mia rila ana kumijikia kuvitu rivu kamliko kuruado dolu nalo napano abe kulo Ju.
ACT 15:29 Vite nalo nei, tai berenio jibe nei, berinavo mia kamiu monoka kuvel ka sunbue napano kulo dolu nalo amila sida kanio ban kanalo tavoru nalo ruei. Ana na juo nene, mia kamiu kuvisen re burukija, p̃eli na sunbue na vite na meul napano sano burukija maka riou konio vo. A na tolu nene, mia kamiu kuvila re bajago na bova nalo, jibe kanio siakaiano a siakiano. “Verenio kamiu kuvituvan vatitigio vite nalo nei, kumemi numial ka tibe na mia ve novo laka van kamiu nonovio. Bo ga, mia kenememi iliano ribisi ea ga vio na.”
ACT 15:30 Ana nalo amiila Pol naio Barnabas naliko naljuo dolu nene, aban bereio abatove rove yako Antioko. Bogo napano nalo nei aboru ea vio nei, abio taara na kulo na namoneano nalo abinimei vio takurano, ana amidu m̃esi nei banlo.
ACT 15:31 Naruei nalo na vio Antioko abuluku m̃esi neibano, naruei nalo ajaaro toru laka ka iliano novo nalo napano nalo na vio Yerusalemo abivitauia binimei banlo.
ACT 15:32 A naljuo na vio Yerusalemo neibano, Jutas naio Sailas, naljuo nei abe naverialiano, mia ajum̃a amioliolu ban nalo napano Antioko, aberinavo monoka avarkar tinielo sikili ea Kristo tulaka ga, ana amila kialo iviso nalo jumolu ju jikili, ea kanalo iliano novo telabo napano aberenio.
ACT 15:33 Nalo aju amil banlo jibe na ea legiano telabo, ana iorou kanio, ana nalo na vio Antioko amivenlo aban bereio ea kialo m̃arabo, abolkouo ka naljuo, aber “Tum̃aroano na Atua kiano to vija kamjuo.” Ana naljuo abavin bereio ea vio Yerusalemo.
ACT 15:35 Ana Pol naljuo Barnabas, naljuo aju bokar siberio tai bere vo yako Antioko, ajum̃a amija kulo dolu nalo napano ajum̃a amioliolu a aberloglog tomu nalo ka Atua kiano Iliano Lu.
ACT 15:36 Mia iorou kanio, ana Pol ber ka Barnabas, berinavo “?Ei, jum̃abe, mia kito ve juo ravan bereio ka reiadu ka kuruado a kuviviniedo nalo ea vio nalo napano m̃a rabano rabisivisii Iliano Lu na Atua kanano banlo beamu vo? Naruei kito ve juo rava ralavonio ka reial lo aju jum̃abe.”
ACT 15:37 Ana Barnabas berinavo “!Bo laka koig, kiniou najaaro toru kanio! Ana kiniou nejidom toru ka rovurukar Jone Mak nei rimei vija kito.”
ACT 15:38 Mia Pol naio jo jidomii kia ga nanua ea kialo ieliano na jukamu, Jone Mak nene naio buro denio vaarakurano ruei, nina yako Pamvilia, napano bogo napano im̃auano maka riviniu vatitigio vo mia naio barp̃ilig naio ban bereio. Tenene na, Pol mialio maka rivu ka Jone Mak rimei vijalo ea kanalo ieliano dolu nei bereio.
ACT 15:39 Vite nei naruei mila ana Pol naio Barnabas abilvilii ealo memedu, naruei nalo aburuburelo. Barnabas naio ba buru Jone Mak ga, ana naljuo aba ajel ea uako tai, abe juo aba amim̃au yako Saipras,
ACT 15:40 mia Pol naio ba bijauia Sailas. Ana kulo namoneano nalo abolkouoko naljuo nei aberinavo mia Atua kiano tiniememiano a kiano vitikariano novo to rivijalo.
ACT 15:41 Ana naljuo amiel aba ajeliviv ea tanobuku juo na Siria bija Silisia, amim̃auka ala taara na namoneano nalo ka amei asikil lie vo. Nina jibe kanio Pol kanano buru-m̃ara ieliano valuo nene.
ACT 16:1 Naruei ea kiano burum̃ara ieliano valuo nene, Pol binimei bokar bereio komeli juo nei Tebe bija Listra. Naruei ea vio Listra nei, be naiagagoano tai jo na, nina be toro m̃eaku nei Timoti. Timoti nene kenieno be tira re Ju tai, napano naio monmonea Yesu ruei, mia karam̃ano naio maka ve toro Ju, naio be toro tai na vio Kris.
ACT 16:2 Naruei kuruado nalo na Timoti kiano vio, bija nalo na komeli dolu na vaataro nei Aekoniam, nalo amial ka Timoti naio mila Tubo kiano im̃auano banlo bo laka.
ACT 16:3 Naruei Pol naio jidom rivuru Timoti rivan vijaio ea kiano ieliano nei, mia be titai ga takurano naio bova, nina ga napano Timoti naio maka rive pakuveu, nina bior karam̃ano naio maka rive toro Ju. Mia Pol naio mijikia ka verenio Timoti takilili naio tibe na, mia kulo Ju nalo mia averbure naio ka riva joomo re ea kanalo yimo na volkouano nalo, a mia asaaro re ka ajog kiano iliano nalo. Mia bior vite na, ana na Pol miila Timoti ba amila pakuveu ka naio, karina iorou kanio ana nalo tolu nei Pol, Sailas, Timoti, abano.
ACT 16:4 Naruei ka bogo na nalo ajum̃a ajeliviv ea komeli nalo, ajum̃a ajian iliano ban namoneano nalo, aberial banlo tuboiano napano naiagagoano nalo a navurim̃araboiano nalo re Yerusalemo aberenio ea kialo vioriano jukamu ruei, ana na Pol nalo aber kalo ka monoka atakilili iliano nalo nei naruei.
ACT 16:5 Naruei bogo napano Pol nalo ajum̃a amiadu a aberloglog taara na namoneano nalo jibe na, mila ana taara nalo nei ajumolu aju jikili batitigio lie vo, a nalo amial ka napano namoneano nalo aju abinimei telabo lie julaka ga.
ACT 16:6 Naruei Pol nalo ajidomii ka ayotuba ea komeli nalo na telabo ea tanobuku na vio Esia, mia Niununo Lu berburelo ka avan re, averial Iliano Lu ea vio na, mila ana na amiyotuba ea ga tanobuku na vio Vrijia a vio Kalesia.
ACT 16:7 Ajum̃a aban jibe na, ana bogo napano abinimei vaataro ka tanobuku na Mesia, amila vonio ka ava tove ea tanobuku na toru Bitinia, mia bogo tai bereio, Yesu kiano Niununo maka rijamo kalo ka avan tibe na.
ACT 16:8 Naruei nalo amiovodulu vonga ea vio Mesia yako ga, abanbano-o abokar komeli nene tai koyou ea tei, siano Troas.
ACT 16:9 Naruei ea vio na, ka bogiano, Pol naio monmelio mial toro tai tena tanobuku na toru na tei tivelinio yako Masetonia, mia toro nene binimei ka Pol, jegi banio, bika denio, berinavo “Aiou koig liki, kumemi numisidom toru ka jau kavarkor komei keial kumemi, kanio mia kajai kumemi.”
ACT 16:10 Ana ea bogo na, kiniou Luka nojo kumemliko nalo bunu, mia bogo napano Pol berial ka naio mial toro nei mil ban naio, vaarakurano ga kumemi nubano numisirag m̃arabo ka nuvijikia nuvarkor nuva Masetonia, bior numijikia ka Atua naio bio kumemi ruei ka nuva nuvioliolu ka Lilianiano Vou na bo nei vanlo.
ACT 16:11 Tibena naruei, kumemi numidu uako, numituvan vio Troas, nuburo nubano-o nubokar uleule na vio Sametresi. Naruei numonmelio ea vio na, mo kavijo, ana na nubano-o nubokar tanobuku na vio Masetonia, naruei nubauro ea sano komeli na Niapolis.
ACT 16:12 Naruei ea tanobuku na Masetonia nei, burum̃ara bulukomeli dolu tai jo, napano naio jotan ka vitikariano na parinio tubo na vio Romo. Komeli nene siano Vilipai, naruei numiel nubano-o nuboru eaio. Numitu legiano juo tolu ea vio na, banbano-o bokar Legiano Lu.
ACT 16:13 Mia kumemi numijog ruei ka aberenio ea Legiano Lu, kulo Ju nalo na ea vio na ajum̃a amila lotuano ea vio na volkouano tai rove yako ea uei tai, ea komeli tivelinio bano. Naruei bunu numitaluvo ka nuvatove ka nuvial lo ea vio na, naruei kumemi numitutano numitukunu kumemliko tire nalo tai napano aju kamu abinimei ruei ajuaio.
ACT 16:14 Tire nalo nei tai, naio maka rive Ju, mia naio jo monmonea Atua. Naio be tena komeli na vio Tuatira, mia be kiano burum̃ara im̃auano, naio jom̃a p̃iliṽili ka kulum̃arauo na be vabolo na kirinovo nalo napano amim̃aukanio ea kiano vio. Tira nei, siano Litia. Ana ea bogo na, Tubo betavo ea kiano jidomiano, naruei naio midukar batitig iliano napano Pol jom̃a beriio banlo, mia naio bokario jikili bo ea kiano iviso.
ACT 16:15 Ana ea bogo na, Litia nei naliko nalo na ea kiano vonuo, abiniu abokar varueiano. Avona bisi, ana naio jadua jikili ban kumemi, naio berinavo “Verenio kamiu kumial kiniou noju jikili riano ea Tubo, kiniou nejidom ka kamiu kumei kuvitua kunuaku kija.” Jibe na naruei, ana na naio buru kumemi nuba numitua kanano vonuo.
ACT 16:16 Naruei ea legiano tai bereio, ana kumemliko Pol nubatove bereio ea kanalo vio na volkouano, naruei nubitavo bija niatira tai ea m̃arabo. Niatira nei, tomu tai abulular naio ka rim̃au kanalo, mia niununo va tai joaio napano abio ka niununo na m̃aro, napano be niununo na jom̃a mial vite nalo napano mia ayoyotuba iorou. Naruei tomu nalo telabo ajum̃a abinimei abika den niatira nei kiano tomu na tortoru nalo, ka naio riverial vanlo ka mia tum̃abe ka kanalo meuliano nalo. Ana bogo napano niatira nei berial banlo, ana nalo ajum̃a abar ijaiano ban kanano tomu na tortoru nalo, mila ana bogo nonovio nalo ajum̃a jum̃alo bujo ka puruveru telabo biorio.
ACT 16:17 Naruei kumemi numiel nuban jibe na, mia niatira nei jakisor kumemi naio iorou, naio jom̃a miagiaga toru ban tomu nalo nonovio ga, jo berinavo “!Ai! Abe tomu nalo na nalo abe tomu na amim̃au Atua kanano napano meul ea vio sop̃i mave. Nalo naruei amijikia averial m̃arabo na ioruriano van kamiu.”
ACT 16:18 Karina, naio jom̃a mila jibe na ban kumemi ka legiano telabo, mila Pol mijog bova-o deio, ana bokar bogo tai ana naio tinien jer niununo va nei, ana jiraragidi, berkanio, berinavo “!E, bare! Neber kaso memedu, ea Yesu Kristo siano, jau komoluo den niatira na vonganei.” Mo vaarakurano ga, naio buro den niatira nei naio bano.
ACT 16:19 Naruei bogo napano niatira nei kanano tomu na tortoru nalo nei amialio ka m̃arabo na na m̃a abar kanalo puruveru eaio binimei bova ruei, tiniel mimi toru ka Pol naio Sailas. Naruei nalo aburu tomjuo nei aba ajumolu ajukamu ea natibureano na vio Romo nalo miralo ea komeli.
ACT 16:20 Naruei nalo aberial banlo, aberinavo “Kulo Ju nalo na, abinimei ea kanado vio, nalo aju amila bulag kito toru o-o mia.
ACT 16:21 Nalo ajum̃a ajadua kito ka ratakii kanalo bajago tealo, mia ea tuboiano na vio Romo napano roju tan kanio ea vio nei, maka rimemedu leleio ka rala tibe ka napano nalo ajum̃a aberenio.”
ACT 16:22 Naruei tomu nalo amila burum̃ara uetubaiano na, a nalo amila searia Pol naio Sailas, ajidom atukulo, naruei natibureano nalo nei aberenio ajede bulag kanalo kulum̃arauo ealo ave juo, ana na avitivlo ka iesi.
ACT 16:23 Naruei nalo abitiv searialo jibe na-o bisi, ana na aburulo aba abukulo aban ea nalakoiano, mia amil jikili ban toro na bitikar nalakoiano, aberinavo monoka naio rivokar batitiglo ka avuro re bereio, ver p̃eli mia rivova ka naio.
ACT 16:24 Naruei bogo napano toro nei naio mijog iliano nei, naio buru tomjuo nei aba laka joomo, ea vio kouo tai napano m̃a aburu nalo na parilo jikili laka aban eaio, naio miorkakar jaalo aban ea burum̃ara iesi napano naio joa vio na.
ACT 16:25 Naruei Pol naio Sailas naljuo aju banbano-o bokar bogiano viovare, ajum̃a abolkouo ban Atua ea iouano lu nalo, a nalo dolu napano aju nalikolo ea nalakoiano nalo ajum̃a amiagago ka bunu.
ACT 16:26 Naruei nalo amiilo toru laka, napano kolvare ga, burum̃ara m̃ii tai binimei, mikulkulu ka yimo nalakoiano nei, mukulkulu ka tati nalo reraio. Ana amial m̃aratavo nonovio abevetavo, a marimieni nonovio napano amiorkakar ka jum̃alo a jaalo ajibirbili ga bunu.
ACT 16:27 Mia toro na bitikar yimo nalakoiano nei naio jevijo, naruei jikiti binimei mial m̃aratavo nonovio abiniu abevetavo aju, mia beriam̃a nalo napano aju joomo, nalo abiniu aburovuro abeve terakurano ajanea vio ruei. Naruei vite nei mila naio merou toru, naruei midular kiano iobogu na mira, ka jidom rielbin naio rim̃aro.
ACT 16:28 Mia Pol mialio, ana bio jouo banio, berinavo “!Ei, jau kotovo kala lelanso re vo! !Kumemi nonovio nubitu kiaga ea vio nei.”
ACT 16:29 Naruei toro nei naio bio ber avar yulu rimei, naruei jikiti ba joomo ea vio napano Pol naio Sailas ajuaio, mia memebiju mia memebiju.
ACT 16:30 Avona karina, naio burulo aba tavio bereio, ana bika denlo, berinavo “?Ai, tomjuo na tortoru, mia monoka nala vaio ana na mia neje ioruriano?”
ACT 16:31 Naruei tomjuo nei aber kanio aberinavo “Jau monoka komonea Tubo Yesu, ana jau kovokar ioruriano, jau kamliko nalo na ea kanamo m̃aratavo.”
ACT 16:32 Naruei nalo aberial Tubo kiano iliano banio, a ban nalo na ajua kiano vonuo,
ACT 16:33 mia memedu ka bogiano viovare ga, toro nei naio mila batitig Pol naio Sailas kanalo niajebijo na menko nalo, ana kanio bogo nei bunu, nalo abaruei ea naio naliko nalo na ea kanano m̃aratavo.
ACT 16:34 Naruei naio burulo aba joomo ea kunuano, naruei bar sinaniano banlo, ana naio naliko nalo na kiano vonuo nalo ajum̃a ajaaro-o mia ajaaro, bior vonganei nalo amileal Atua ea kialo meuliano nalo.
ACT 16:35 Ana ea kavijo nene ga, ana na natibureano nalo maka ajikia vite nei vo, mia nalo ajutano bereio bisi, ana amiila kialo tomu nalo abinimei aberial, aberinavo “Tomu juo na nalo amijikia ava tavio ga.”
ACT 16:36 Naruei toro na bitikar nalakoiano nei naio binimei berial ka Pol, berinavo “Natibureano nalo amiila toru binimei aberinavo kamiu kuve juo kumijikia kuva tavio ga. Tibe na mo kamiu kumei, kuvan ga tibe na. Mia kito rela re bunu iliano van kito rivior vite nei.”
ACT 16:37 Mia Pol naio ber ka nalo nei, berinavo “Ee, makanio, maka tibe na. Kumemi bunu numitutano ka parinio tubo re Romo nene, a ea kiano tuboiano, natibureano nalo na amila maka rimemedu ka kumemi ga na. Maka aleal ka kumemi numila tena bova tai, ana abitiv kumemi ea tomu nalo miralo, karina abuku kumemi nuba joomo ea nalakoiano, naruei vonganei ana ajidom ajil bulagio bena ea kumemi ga tibe na. !Makanio, kuvan bereio kuver kalo kuverinavo nalo naruei monoka amei ana mo avuru bulag kumemi ea vio nei, nalo monoka amei nei averenio iliano tai van kumemi beamu vo!”
ACT 16:38 Naruei tomu natibureano nalo abar Pol kanano iliano nalo nei aban bereio, ana bogo napano nalo amijogial ka Pol naljuo Sailas, nalo bunu ajutano ka natuboiano re Romo, naruei nalo amerou toru.
ACT 16:39 Naruei abinimei aberenio iliano tai banlo, karina aburulo aban ea m̃arabo, aberinavo ajidom ka monoka nalo ataluvo den vio nei.
ACT 16:40 Mia Pol naio Sailas, aban bereio amiyotuba ea Litia kunuano jukamu, karina iorou kanio, ana na nalo amial kuruado nalo bereio ana ajian iliano novo nalo na be tena ilivituniano banlo, a karina iorou kanio ana nalo ajaluvo den komeli nei.
ACT 17:1 Naruei Pol naio Sailas, naljuo amiel abano, ana ajel ea m̃arkomeli juo nei Amvipolis bija Apolonia, abinimei abokar m̃arkomeli nei, Tesalonaika. M̃arkomeli nei be yimo na volkouano tai na kulo Ju nalo kialo joaio,
ACT 17:2 ana jibe ka napano Pol jom̃a mila ea vio nonovio napano ban eaio, naio jusol nalo na vio nei, jo ban bijalo joomo ea kialo yimo na volkouano nei, ea bogoti nalo na volkouano. Ana ea Legiano Lu tolu, naio jom̃a mila jibe na, a mil vatelabo bijalo ea vaio napano Iliano Lu jom̃a jiloglogio.
ACT 17:3 Pol naio jom̃a jilogloglo kanio, a jom̃a berial binimei meravo bo, berinavo takii vaio napano Iliano Lu berenio, naio memedu ga ka napano kanalo Naverikariano, tomu nalo amila searo ga banio, banbano-o naio m̃aro, ana iorou kanio monoka naio rimeul bereio den nam̃ariano. Ana Pol berial banlo, berinavo “Yesu nei napano nojom̃a neberiio, naio naruei, be kiado Naverikariano nene.”
ACT 17:4 Ana nalo tealo napano ajum̃a amiagago, amialio aber iliano nene be riano, ana amonea Yesu, ana abinimei amiasol Pol naio Sailas. Ana ea vio na, be tomu nalo na maka ave kulo Ju, mia napano amonea Atua ruei, ana nalo telabo bunu amonea Yesu ruei, bija bunu natukamuano telabo na tire nalo kialo.
ACT 17:5 Mia tomu na tortoru na kulo Ju nalo maka asaaro, nalo amijoku, ana naruei aberii ka mia ala von vite tai. Ana aba amial terati na parilo jikili nalo na vio nei, ana aburu nalo tealo napano abova lie vo, ana aba aburu tomu nalo telabo bereio ana amila burum̃ara tiniobi na, ana nalo aba amila burum̃ara uetubaiano janea m̃arkomeli nei. Ana nalo aberiam̃a Pol naljuo Sailas nalo ajua yimo na toro tai kunuano, siano Jesono, ana nalo aban kalo ea yimo nene, ka avurulo ava komeli. Ana abinimei abokar yimo nei, ana amila searo mia, amila korovio m̃aratavo nene,
ACT 17:6 mia maka aleal naljuo joomo eaio. Ana abokar ga Jesono nene, bija kuruado dolu nalo, ana aburulo aba ajumolu aju ea mirano kulo navurim̃araboiano nalo na m̃arkomeli nei. Amil toru, aberinavo “Kulorinio nalo napano aju abiliglar kiado yetemeriba nei, aban ea vio dolu nalo telabo ruei, mia vonganei abinimei aju kija kitoliko naruei.
ACT 17:7 Ana toro nei, Jesono, naio burulo aban ea kunuano, ana nalo nei abova, ajum̃a amila kokorov tuboiano na parinio tubo na vio Romo nei, Sisa, kiano. Sisa nene ga naio berenio ruei ka mia rolotu ka naio ga, mia nalo nei ajum̃a aberenio aberinavo parinio tubo takurano ga ea yetemeriba nei, nina naio be toro tai napano siano Yesu.”
ACT 17:8 Ana tomu nalo bija kulo navurim̃araboiano nalo na m̃arkomeli nei, bogoti napano amijog iliano nei, mia nalo tinielo jikili, ana ajum̃a amiaganiaga a ajum̃a amil bova toru laka.
ACT 17:9 Ana na kulo navurim̃araboiano nalo nei aber Jesono nalo monoka adu burum̃ara puruveru tai toa jum̃alo, ka rila ana mia avokar re bunu Pol to vijalo bereio bogo tai, ver p̃eli mia maka ajikia avar merano bereio puruveru nene. Ana iorou ka napano amidu puruveru nene jo, ana amijamo ka nalo aba tavio bereio.
ACT 17:10 Ana bogiano kia ga, ana kuruado nalo na vio na aban amivenbena Pol naljuo Sailas ea kanalo m̃arabo, ana naljuo aban bere mave ea m̃arkomeli tai bereio, nina Beria. Mia bereio naljuo aju aba joomo ea yimo na volkouano na kulo Ju nalo na vio nei kialo.
ACT 17:11 Kulo Ju nalo na vio nei nalo abo, a nalo abe kialo vijauano, maka atibe ka nalo na vio Tesalonaika, nalo abar jidomiano novo ka napano amijikia amiagago vatitigio bo ka Pol naio Sailas kialo verloglogiano. Mia legiano nonovio, nalo tiniel jii m̃elea ka avitii Tubo kiano Iliano Lu ka aleal aver naljuo aberii be riano p̃eli na jum̃abe.
ACT 17:12 Amila jibe na bano-o, mia maka vesiou, ana na ajikar ka amonea naruei, ana navurim̃araboiano na tire nalo re Kris nalo bunu, naliko kulo Kris nalo telabo, nalo bunu amonea.
ACT 17:13 Mia karina, ana iliano ban bereio bokar kulo Ju nalo yako Tesalonaika nanua, ana aberenio vonganei Pol naio jom̃a mioliolu ka Atua kiano iliano yako Beria bunu, ana nalo tinielo jikili bereio. Ana abinimei mave yako Beria, ana amila searo ea kulo Beria dolu nalo kanalo jidomiano bereio ka rila nalo tiniel ser naljuo ka ajil lo avano.
ACT 17:14 Ana kuruado nalo amial vite nei, aber bo ana amila Pol ka rivatove sop̃eli koyou bereio, mia amial aberii Sailas naio Timoti, naljuo amijikia atu beamu vo, naljuo abo ga.
ACT 17:15 Ana nalo aburu Pol ea kiano m̃arabo, abatove koyou ea tei, ana amidu uako tai ana aba abokar burum̃ara bulukomeli nei, Atene. Ana bogo napano nalo ajuvan Pol ea vio nei ka avan bereio, ana Pol berii kalo berinavo mia Sailas naljuo Timoti, nalo bunu monoka ava tove sop̃eli ea naio vesiou re, ka mia nalo aim̃au vio takurano bereio vija naio.
ACT 17:16 Naruei Pol joa vio Atene, naio jororea Sailas naljuo Timoti ka naljuo amei, ana bogo napano naio jom̃a jirarag veve vio janea m̃arkomeli nei, mia naio mial ga ka napano vio bujo ga ka tavoru nalo, ana tenei mikuru kiano iviso.
ACT 17:17 Ana naio jo ban ea yimo na volkouano na kulo Ju nalo kialo, ana jom̃a mila iliano nalo telabo ka vite nalo nei bijalo a bija bunu kulo dolu nalo napano amonea Atua. Ana legiano nonovio ga, naio jom̃a ban bunu ea vio medave na m̃arkomeli, ka tukunu vija toro kei napano ver rialio ea vio nei.
ACT 17:18 Ana yako Atene, be burum̃ara yimo juo na verloglogiano na m̃asosouano, napano tomu na verloglogiano nalo na yimo juo nei, abiolo ka kulo Epikururu nalo, bija kulo Stoiki nalo, ana nalo aju abior bunu bija Pol. Mia nalo tealo ajum̃a amili tertelisu ban Pol, aberinavo “!Toro na mil m̃ele mia, mia naio maka rijikia vite na bo tai ka napano mijikia riverii ka kito.” Mia tealo bereio, amijog ka napano Pol jom̃a berii Yesu bija tumoluano, ana nalo ajidomiio aber nina tomu juo na, ana aberinavo “P̃eli, kumemi numial nuber toro nei naio jom̃a berii atua dolu nalo a niununo dolu nalo na buruvenuo na koalabo ga tai.”
ACT 17:19 Ana iorou kanio, ana kulo Atene nalo abio Pol aberenio naio riva totano vijalo ea kanalo burum̃ara komeli, mave ea burum̃ara burusuku na vio nei, napano siano, Areopakas. Ana abika den Pol, aberinavo “Kumemi numisidom ka jau kalavon ka koverii verloglogiano vou nei napano m̃a kojom̃a koberial ban tomu nalo.
ACT 17:20 ?Kumemi numijog jibe verloglogiano na naio be dolu ga, ana kumemi numisidom nuvijikia ka vite nalo na kojom̃a koberenio na, salo nioti nene be venia?”
ACT 17:21 Ana bogo napano amila jibe na, ana aju ajakii kanalo bajago kouo tai, bior napano kulo Atene naliko kulo dolu nalo napano ajua vio na, nalo ajidom m̃elea ga ka dam̃ariga, ana atu ga ajog p̃eli na atukunu ka verloglogiano p̃eli na iliano vou, p̃eli na jidomiano dolu nalo, p̃eli na tomu nalo kialo moneano nalo.
ACT 17:22 Naruei Pol jumolu jua miralo ea komeli nei napano jo mave yako Areopakas, ana mil banlo. Naio ber kalo, berinavo “Tomu na tortoru na vio Atene nalo, kiniou nemial jibe ka kamiu tiniemiu jii m̃elea nalotuano nalo toru laka, juvulu napano kulo dolu nalo tinielo jiio.
ACT 17:23 Bogo napano nojom̃a nemiel ea komeli nei, ana nemial vio lu nalo a boda nalo, a kenemiu tavoru nalo telabo laka, mia bogo tai ana nemial boda tai napano aje vivitauiano tai joaio, napano berinavo ‘Boda na atua napano maka rejikia naio.’ Ee, kamiu kumitum̃a kumilotu ka atua nene, mia kuber be riano ga, maka kuvijikia leleio naio, ka naio be kei. Mia be Atua riano takurano ga napano naio jo, a naio naruei kiniou nejidom neverial van kamiu ka kuvijikia naio.
ACT 17:24 Naio naruei naio be Atua Tomoruo napano jii yetemeriba nei, a vite nalo nonovio napano romial ajuaio. Naio naruei naio be Parinio Tubo na tiniabene a be Parinio Tubo na yetemeriba nei. Naio maka lele toa vio lu nalo p̃eli na vite lu nalo napano kulorinio nalo ga amilaio,
ACT 17:25 a naio maka to ga vain kito tomu nalo ka mia ravaganio p̃eli na rovitikario. P̃eli ga, bior naio naruei, naio jian meuliano, a jian jegi, a jian vite nonovio ban tomu nonovio nalo.
ACT 17:26 Atua nene naruei, naio mila tomu kinkin nalo nonovio amaluvo ea toro na jukamu napano naio jiio, ana jukamu beamu ruei, naio jekar bogoti nalo a vio nalo reraio ea mirano yetemeriba nei, napano mia kulo kinkin nalo nei amijikia ameul eaio.
ACT 17:27 Naio mila jibe na ka kito nonovio monoka rosidomii ka monoka releal Atua nene, ana mila kito roju rojian jum̃ado ban ea vio bobogio ka rabagbago ka kiano yulu. Mia bo ka rosidomiikar bunu, ka Atua nene, naio maka to koalabo laka, mia naio jo ga vaataro ka kito terakurano.
ACT 17:28 Tomu nalo ajiri kenemiu iouano nalo aberii vite nei ruei, napano tai berii jibe nei berinavo ‘Kito romeul ea naio, kito romiel ea naio, kito ea ga naio dam̃ariga,’ ana dolu berii jibe nei, berinavo ‘Kito nonovio naruei kito robe kiano kulo vou nalo.’
ACT 17:29 “Ana bior ka napano kito nonovio robe Atua nene kenerinio nalo jibe na, ana maka rimemedu leleio ka rotu rosidom rover naio jibe ka tavoru tai napano jum̃ano toro ga mim̃aukanio ea niogo, p̃eli na ea verumera, p̃eli na ea puruveru, napano amim̃auka jakii vaio napano jua ga kialo jidomiano.
ACT 17:30 Beamu laka ruei, ea melijokouo, tomu nalo maka ajikia vite tai, mia Atua bijuku bo kalo, naio maka tom̃a rivuluku kanalo vovaiano nalo ea bogoti nene. Mia vonganei naruei, ana na Atua berial memedu ga ban kulorinio reraio ea vio nonovio, berinavo monoka nalo aviliglo,
ACT 17:31 bior ka napano naio berkar legiano nene ruei, napano mia naio tibure yetemeriba nei, tibe ka napano rimemedu ka mia naio rila, a naio berkar bunu ruei kiano toro tai napano mia rila kiano im̃auano nene. Naio mila vite nei meravo batitigio ban tomu nalo ruei, napano kiano toro lu nei, nalo amuebini m̃aro ruei, avona bisi ana Atua bitirilario meul bereio.”
ACT 17:32 Ana binimei bokar vonganei, mia nalo ajum̃a amiagago vatitigio ka Pol, mia bogoti napano amijog ka naio jom̃a berii berinavo toro tai m̃aro, mia Atua mila naio meul bereio, mia nalo tealo abital searo ea naio biorio, mia nalo tealo aber kanio, aberinavo “Bo ga, tobo beamu vo. P̃eli mia kumemi nuvidu bogo vanso ka mia kotukunu bereio van kumemi bogo tai navo.”
ACT 17:33 Ana Pol mial ber nalo maka bunu tiniel tii ka aiagago kanio, ana jumolu denlo batove bereio,
ACT 17:34 ana tomu nalo na vio nei tealo amoneaio, ana aju abinimei abior vio takurano bija Pol, napano nalo tai kalo, naio be toro na toru tai na komeli na vio Areopakas nene memedu, siano Tionisia, ana tai bereio, naio be tira tai, naio siano Tamarisi, a nalo dolu bunu.
ACT 18:1 Ana iorou ka vite nalo neibano Pol mila yako Atene, naio jaluvo denio, ana ban yako ea burum̃ara bulukomeli dolu na Korin.
ACT 18:2 Ana ea vio na, naio mileal toro Ju tai napano toro nene be toro tai na tanobuku na vio dolu Pontas, mia naio ba joa venuo na vio Italia, ea sano burum̃ara bulukomeli na vio Romo, mia vonganei, naio naljuo koano, abinimei vonga aju Korin, bior Parinio Tubo Klotias na vio Romo naio bukubulag kulo Ju nalo ea kiano vio nei. Mia toro neibano siano Akuila, a koano siano Prisila. Jibe na ana Pol ba mial naljuo,
ACT 18:3 mia naljuo aberenio bo ka Pol naio to naliko, ka aim̃auka puruveru kija, bior naljuo naliko Pol, naltolu, kialo im̃auano takurano, napano im̃auano nam̃a ajul panpano na yimo.
ACT 18:4 Mia amim̃au jibe na banbano-o, mia ea Legiano Lu nalo, Pol naio jom̃a ban ea yimo na volkouano na kulo Ju nalo kialo, mia jom̃a mila iliano telabo laka naliko kulo Ju, a naliko bunu kulo Kris napano ajuaio, naruei naio mila jibe na banbano-o mia jo buru nalo telabo.
ACT 18:5 Mia iorou kanio, ana Sailas naljuo Timoti nalo abinimei aboru iorou ea vio nei, ana ea bogo na, Pol naio mijamo ka momonio kiano bogo ea Tubo kiano im̃auano, ka napano naio jom̃a mioliolu, jom̃a berialio ban kulo Ju nalo berinavo kialo Naverikariano riano napano m̃a aju rorea ka naio rimei, nina be Yesu nene napano binimei ruei.
ACT 18:6 Ana iliano nei mila ana kulo Ju tealo tiniel jer Pol, mia aberdop̃e niegeniegeio kirivova laka, naruei amila banbano-o mila ana bogoti tai ana Pol mila kijokijo tai banlo, napano mijagdago bulag ka bulukievi na vio nei den m̃ano kulum̃arauo, ber kalo berinavo “Ilirianiano na Atua kiano kiniou neberial batitigio ban kamiu kulo Ju ruei. Mia verenio kamiu maka kuvisidom kuvijogkario, kuvisidom kuvanvan kovio ga, kiniou neber ka kamiu ka kenemiu burukija toa jumemiu ga, maka bunu toa jum̃aku naruei. Tikar vonganei, kiniou notuvan kamiu, mia nava neverial Lilianiano Vou Na Bo nei van nalo napano maka ave kulo Ju.”
ACT 18:7 Ana na Pol jaluvo denlo ea kialo yimo na volkouano, naruei naio ba jua ga yimo tai napano jumolu ju ga tivelinio ka yimo na volkouano neibano. Yimo nene be toro tai napano maka rive toro Ju kunuano, mia vonganei naio monea Atua ruei, napano siano Titias Jastas.
ACT 18:8 Mia navurim̃araboiano na yimo na volkouano nei, napano siano be Krispas, naio tai nene napano monea Tubo Yesu, naio naliko nalo na ea kiano m̃aratavo, a be tomu dolu nalo telabo na vio Korin bunu napano bogo napano amijog Pol kiano iliano nalo, mia nalo amoneaio, mia karina amila varueiano ealo.
ACT 18:9 Ana iorou kanio ea bogiano tai, ana Pol monmelio ana na mial Tubo mil banio, berinavo “Pol, jau komerou re ka tomu nalo, mia jau kala bo ka ga, koto koverial kiaku iliano. Mia jau kala re ka napano tomu dolu nalo ala so koto melumu,
ACT 18:10 bior kiniou nojo bijaso. Mia ve re bunu toro tai ea komeli nei napano mia rijikia tukuso p̃eli na rijilso, bior kiniou be kiaku tomu nalo telabo ruei ea vio nei.”
ACT 18:11 Ana na Pol naio joa vio nei bogo tebievi kija ga, ba bokar yuka vodolu a togio bereio, a bogo nonovio naio jom̃a berloglog Atua kiano iliano ban tomu nalo.
ACT 18:12 Ana ea bogo na, parinio tubo na vio Romo naio bitirilar toro tai ka ve tubo na tanobuku reraio na kulo Kris nalo kialo, mia toro nene siano, Kalio. Naruei ea bogo na, kulo Ju nalo aberii abirakar ka monoka ala vite tai ka tokovio ka Pol ka naio rioliolu re bunu, naruei nalo aba abokar Pol, ana aburu naio ban ea komeli na Kalio nene kiano. Naruei kulo Ju nalo aberial ka Kalio bija kiano natibureano juo, nalo aberinavo
ACT 18:13 “Toro nei, naio jom̃a milavonio ka rivuru tomu nalo ka ava abolkouo van Atua ea m̃arabo nalo tai napano maka rimemedu leleio ea tivelinio na kenememi tuboiano.”
ACT 18:14 Ana na Pol naio jom̃a jidomii ka sian kiano verdop̃eiano ea kialo iliano nei naruei, mia naio maka ril vo, ana na Kalio nei monkoyo, mil kija ban kulo Ju nalo. Naio ber kalo, berinavo “Kulo Ju nalo, verenio kamiu kuverii ka kiniou ka toro na naio mila bajago nalo napano abova laka, p̃eli na naio mue toro tai, p̃eli na naio bina, p̃eli na titai tibe na, mo bo ka kiniou naiagago ka kamiu.
ACT 18:15 Mia venia napano kuberenio, mia nemijog jibe ka maka ve titenia leleio, be vite kurano ga ea tivelinio na kenemiu tuboiano na kamiu kulo Ju ga. Verenio tibe na, ana na mia kamiu ga kuvitiio, kiniou maka nasaaro ka neiagago ka vite nalo na p̃eli na nala tibureiano tai riviorio.”
ACT 18:16 Mo ea iliano nalo nei mia naio mijil bulaglo den kiano komeli bereio.
ACT 18:17 Naruei vite nei mila tinielmimi lie vo, mia bogo napano aba tavio, abokakar natukamuano vou na kialo yimo na volkouano, napano siano Sostinis, naruei ajuk niegeniege naio ea ga m̃aratavo na komeli nene. Naruei Kalio naio jo bitiio, mia naio maka rialerinio eaio, naio maka rila titai leleio ka nalo nei.
ACT 18:18 Mia iorou ka nina, ana na Pol jo bogo tebievi lie bereio vo naliko kuruado nalo na vio Korin, ana iorou kanio ana naio jaluvo denlo, jidom rivan bereio Siria, ana ea bogo na, Prisila naio Akuila, abe juo naliko naio. Naruei nalo abajou koyou ea tei, ea komeli na vio Kenkria, naruei ea vio na, ana Pol berenio avuron vijinio. Nina bior naio mila verikariano na tai jikili bija Atua beamu ruei, ana vonganei vite nonovio na ea verikariano nei abiniuviniu ruei, ana nalo aburon vonga vijinio ea bogo nene. Ana nalo abavin ea uako tai, napano naio jo ban ea vio Eveso.
ACT 18:19 Mia bogo napano abinimei aboru Eveso, ana na nalo abauro, naruei ana Pol naio berenio mia Prisila naljuo Akuila nalo atu aim̃au ea vio na beamu vo. Mia naio juvan naljuo, ba joomo ea yimo na volkouano na kulo Ju nalo kialo ea vio nei, a mila iliano telabo bijalo.
ACT 18:20 Nalo ajaaro ka ajukunu naliko Pol, naruei nalo ajidom ka naio to kija rivijalo ka amijikia ail lie vo vijaio,
ACT 18:21 mia Pol naio ber kalo, berinavo “Siva tanea, mia kiniou monoka navan bereio ea vio Siria beamu vo. Mia verenio Atua kiano tiiano, mia kiniou nemei ea kamiu bereio ea vio nei Eveso vesiou re.” Naruei naio takurano jumolu den nalo nei, ana midu uako ban bereio.
ACT 18:22 Mia bogo napano naio binimei bereio-o boru Siria, naruei bauro ea bulukomeli na vio Sisiria, ana na ba bavin Yerusalemo. Karina naio ba miyotuba ka taara na namoneano nalo, mia iorou kanio, ana na naio batove bereio yako Antioko. Nina naruei ana na Pol mila nonovio kiano burum̃ara ieliano valuo nei.
ACT 18:23 Ana na Pol naio jo yako Antioko banbano-o, bisi na naio juvan vio nene bereio, ban bereio ea komeli dedade nalo na tanobuku na vio Kalesia bija Vrijia. Naio jel ea komeli nalo nei vaarakurano ruei, mia naio ban ealo bereio ka rijai naiagagoano nalo ka atu sikili lie vo.
ACT 18:24 Mia bogo napano Pol naio maka rimei rivoru bereio Eveso vo, mia toro Ju tai binimei ea vio nei, naio be toro na burum̃ara komeli yako Aleksadria. Toro nei, siano Apolos, naio be toro tai napano pariparinio bo laka, napano mijikia iliano nonovio napano jua Vivitauiano Lu nalo, a naio be toro tai nam̃a mioliolu bo-o mia bo.
ACT 18:25 Nalo aberloglog naio batitig ka Tubo kiano m̃arabo ruei, naruei naio mijamo ka kiano meuliano vodolu ka mia m̃a rioliolu p̃eli na riverloglog vatitig tomu nalo ka vite nalo ea Yesu. Mia vite nonovio na m̃a naio jom̃a berenio naio kirimemedu laka, mia vite takurano ga, naio maka rijog vo ka napano tomu nalo monoka avaruei ea Yesu siano, naio mijikia ga varueiano napano Jone Baruei milaio jukamu nua beamu.
ACT 18:26 Mia bogo napano naio jom̃a ba mioliolu joomo ea kulo Ju nalo kialo yimo na volkouano, mia naio maka rimerou kalo, maka rialerinio. Mia bogoti tai, ana na Prisila naio Akuila, abe juo amijog ka napano naio jom̃a mioliolu jibe na, naruei amijog lubar ka toro nei maka rijikia batitig vite nalo nei tealo vo ea m̃arabo na Atua kiano, ana na nalo aburu naio aberloglog vatitig naio ka vite telabo bere vo.
ACT 18:27 Ana iorou kanio, Apolos naio jidom rivan ea kulo Kris nalo kialo vio yako Akaia, naruei banalo na yako Eveso nalo aberinavo bo laka verenio rivan tibe na, naruei nalo abivitauia m̃esi tai ban naiagagoano nalo yako ka mia Apolos naio mijikia ridukario rivano, ka rila nalo asaaro ka avurukar naio to rivijalo. Mia bogoti napano naio bano-o bokar vio na, naio miija vatitig nalo napano Atua kiano tiniememiano milalo amonea ruei.
ACT 18:28 Naio mijailo napano ea tomu nalo miralo, naio jilogloglo ka jum̃abe ana kulo Ju nalo amilaluv m̃arabo, bior naio ber meravo ka iliano telabo napano ajua Vivitauiano Lu napano aberenio meravo vatitigio ka Yesu naio be Naverikariano riano. Ana bogo napano kulo Ju nalo amijog kiano verloglogiano nei, nalo maka bunu ajikia aver titai bereio.
ACT 19:1 Naruei bogo napano Apolos naio ba jo kia ga Korin vo, mia Pol naio jo miel jel ea kiano m̃arabo napano jel ea tanobuku na mave ea suku nalo, naruei naio jakii m̃arabo nene banbano-o binimei boru Eveso. Naruei ea vio na, naio bano-o miyotuba ka taara na telisu na naiagagoano nalo kialo napano nalo aju,
ACT 19:2 ana bogoti tai, ana na naio bika denlo, berinavo “?Mia bogoti napano kamiu kumonea Yesu, mia kumijev Niununo Lu rimei ea kamiu ka bogoti na, p̃eli na maka kuvijevio?” Naruei nalo aberdop̃e, aberinavo “?Ana Niununo Lu na vabe na? Kumemi maka lele nuvijog kija vo ka be titai jibe na.”
ACT 19:3 Ana na Pol naio bika denlo bereio berinavo “?Mia bogoti napano abaruei ea kamiu, mia kamiu kumial ka sano nene be venia?” Naruei nalo aberdop̃eio, aberinavo “Abaruei ea kumemi, numial jibe ka ga varueiano nanua Jone naio jom̃a milaio.”
ACT 19:4 Ana na Pol naio berloglog vatitiglo, berinavo “Nao, nina bo ga na, ana varueiano napano Jone naio jom̃a milaio nua ban tomu nalo, naio jibe ka kijokijo ga tai ka ber ka tomu nalo nei abiliglo ruei, mia nina maka riverenio ka tomu nalo nei amonea Yesu ruei na. Mia Jone naio mijikia vite nei bunu, bior ka napano naio binimei jukamu, mia jom̃a ber ka tomu nalo berenio monoka amonea nana mia naio rimei iorou kanio, jibe ka Yesu.”
ACT 19:5 Mia nalo na vio Eveso amijog Pol kiano navervisivisiano nei, mia amial bo laka ka avokar varueiano ealo bereio, ana na nalo abaruei ealo ea Tubo Yesu siano.
ACT 19:6 A ka bogoti na, ana Pol naio jokol pariparilo, naruei Niununo Lu binimei ealo, mila ana nalo ajum̃a amijev ka iliano dolu nalo, a mila bunu ajum̃a aber bulavulag bunu iliano tealo napano m̃a Atua jian banlo.
ACT 19:7 Ea kialo taara na telisu nei, mirano nene titai jibe kanio duelimo ba juo [12] ga.
ACT 19:8 Naruei Pol naio jo Eveso siberio tolu [3] bereio, mia bogo nonovio naio jom̃a ba joomo ea kulo Ju nalo kialo yimo na volkouano, mia mila iliano telabo banlo. Mia bogo tai na maka rialerinio ealo, mil kirisikili banlo, bogo tai bilvili ealo, a bogo tai jegidu kalo ka mia nalo amei jouro ea Atua kiano navenatuboiano.
ACT 19:9 Mia naio mila jibe na banbano-o, mia mial ka napano bijuku deio, bior nalo pariparilo kirisikili ga, mia nalo maka asidomii ka amonea leleio. Ana nalo tealo ajum̃a aberii niegeniege lelan M̃arabo Vou nei ban kulo dolu nalo joomo ea yimo na volkouano nei, ana na Pol naio jumolu burubulag bereio naiagagoano nalo, ajaluvo den kulo Ju nalo nei, mia legiano nonovio nalo aba abior a amioliolu ban tomu nalo na ea yimo na teninio na toro nei Tirenas kiano.
ACT 19:10 Nina, Pol naio jom̃a milala jibe na banbano-o bokar yuka juo [2] bereio, naruei mila ana tomu nalo na burum̃ara tanobuku nei Esia, kulo Ju nalo naliko tomu dolu, nalo nonovio amijog Tubo kiano iliano.
ACT 19:11 Ana bogo napano Pol naio jom̃a mim̃au jibe na yako Eveso, mia Atua mim̃au ea naio, mila burutomoluo na tortoru nalo telabo ka rijai tomu nalo.
ACT 19:12 Mia verenio niati kulum̃arauo na telisu tai, p̃eli na soto tai, mia tomu nalo abario ba ban Pol bu veveio jukamu vo, bisi ana abar bano, aburu ea tomu namieiano nalo niabelo, mia kulum̃arauo nalo nei amijil bulag kialo mieiano nalo, p̃eli na niununo va nalo napano ajualo.
ACT 19:13 Ana ka bogo na, kulo Ju tealo bunu aju ajanea tomu nalo, aju amijidig bulag niununo va nalo denlo. Nalo nei maka amonmonea Tubo Yesu, mia bogo napano amijog ka napano Pol mim̃au jum̃abe, mia nalo bunu ajidomii ka mia ala vonio ka mia aim̃au ea moroano na sio nene. Mia bogo napano amijidig bulag niununo va, amil banio, aberinavo “Nuber kaso memedu ea Tubo Yesu napano m̃a Pol jom̃a mioliolu kanio, ka jau kataluvo den toro na.”
ACT 19:14 Ana be bogo tai, m̃eaku nalo tealo bunu ajidom ala vonio tibe na. Nalo na, nalo kiritete aluo na toro tai na be parinio toro lu ka kulo Ju nei, napano siano Skeva.
ACT 19:15 Naruei nalo nene abinimei abolkouo ka toro tai napano niununo va joaio, naruei amil ban niununo va nei ka taluvo denio, mia niununo va nei naio tinien jerlo, berinavo “Mo, kiniou nemijikia sio na Yesu, a nojo nemijog sio na Pol bunu, mia kamiu kenia? !Kiniou maka lele nejikia kamiu, kamiu kuvitikar kamiu vo!”
ACT 19:16 Mia kolvare ga, toro nei biako binimei ealo, midonilo bano-o jovulu nalo aluo neibano, mila niegeniege tanealo napano mijede bulag nonovio m̃alo kulum̃arauo nalo. Naruei nalo aburo den vio nei napano amijeljel lulua ka salo burukija naruei.
ACT 19:17 Naruei tomu nalo aberii vite nei bano-o bokar Ju nalo naliko kulo dolu nalo, mila na nalo na vio Eveso abiniu amijogio, mia vite nei mila ana nalo amemebiju kija, ana abamenea Tubo Yesu siano lie vo.
ACT 19:18 Ana iorou kanio, ana nalo telabo kalo napano vonganei abinimei abe namoneano nalo ruei, nalo abinimei aber bulavulag ka ajum̃a abar semei, a aber bulavulag vite nalo nam̃a ajum̃a amim̃aukanio ea burisolu nalo.
ACT 19:19 Mia nalo tealo napano abe tomu na burupati burisolu memedu, abarvar vite nalo nam̃a amim̃au bijaio, jibe kanio kialo niosi nene nalo binimei vio takurano, naruei kamu ea tomu nalo miralo napano aju amialio ka bogo na, abuku nonovio ban ea sebi. Niosi nalo nei miroano laka, mia bogo napano ajum̃a ajidomii sano puruveru nonovio nene nanua beamu abulu kanio niosi nene nalo, amialio jibe ka burutomoruo laka, jovulu taam̃aka [1,000,000] puruveru telabo laka.
ACT 19:20 Mia bogo napano vite nalo na jibe nei amalmaluvo, mia nalo aju amialio ka Atua kiano moroano mim̃au jikili laka, mia amialio ka napano Tubo kiano iliano jom̃a mikulkulu ba buru tomu ta bunu lie vo ea vio nonovio.
ACT 19:21 Mia Pol bitilubar ka Atua kiano im̃auano jo bavin, ana mijog ea naio ka monoka rim̃au rivan lie vo, ka mia selivivi rivitii veve bereio tanobuku nalo na vio Masetonia vija vio Akaia, yako Kris, a karina, mia naio riva Yerusalemo bereio. Ana naio berkario bunu ea bogo na, berinavo “Mia iorou ka napano kiniou navan bereio Yerusalemo, mia monoka neiel bereio navan lie vo, monoka najaka-o novoru Romo.”
ACT 19:22 Mia naio mial ka mia naio monoka to bogo ve telisu kija bereio beamu vo ea tanobuku na vio Esia vija burum̃ara komeli nene nei Eveso, naruei kiano tomu juo na ijaiano nei, Timoti naljuo Erastas, naio miilalo ajukamu aban ea vio Masetonia.
ACT 19:23 Ana ea bogo na, napano Pol naio jo kia ea vio nei Eveso vo, ana burum̃ara siniabu tai jumolu tivelinio ka M̃arabo Vou na Yesu kiano.
ACT 19:24 Vite nei, burupati nene napano kulo Eveso, aberenio kanalo atua, naio be tira tai, siano Atemes, a nalo ajum̃a abolkouo ka kanano burum̃ara tavoru na ea burum̃ara yimo lu na kanano. Mia toro tai na vio na, siano Timitrias, naio buru tomu telabo abinimei amim̃au kiano, napano ajum̃a amim̃auka kiri tavoru sesa nalo na yimo lu na atua na tira nei kanano, nalo amim̃aukanio ea verumera, ana tomu nalo ajum̃a abulu denio, napano mia naio naliko kiano tomu nalo abar tanea puruveru miroano biorio.
ACT 19:25 Ana iorou kanio, naio mial ka napano im̃auano na m̃a Pol jom̃a milaio naio jom̃a muedom kanano im̃auano nei ruei, ana bogoti tai ana naio bio ban kiano tomu nalo, naliko tomu dolu nalo napano ajum̃a amim̃auka vite nalo ea verumera, naruei bogo napano nalo abinimei vio takurano, mia mil banlo, berinavo “Mo, tomu nalo, kamiu kumijikia ruei ka kito roju romeul ea ga kanado im̃auano neibano m̃a kito rojum̃a romim̃auka vite nalo ea ga verumera. Im̃auano na ga mila ana kito rojum̃a rabar kija puruveru.
ACT 19:26 Mia neber p̃eli kamiu kumijog ruei, p̃eli na kito tai romial ka mirado, ka napano toro nei Pol naio jo bilig tomu nalo kanalo jidomiano nalo aju abano be dolu. Naio jom̃a mila ea vio na, a jom̃a mila bunu ka komeli nonovio na burum̃ara tanobuku na kanado nei Esia, napano jom̃a berloglog tomu nalo ka tavoru nalo napano m̃a jum̃ano toro ga mim̃aukanio, nalo maka ave atua riano leleio ga.
ACT 19:27 Ana kiniou nemialio ka toro na kanano iliano na mia rila kiado im̃auano nei rivatove laka, ka napano mia tomu nalo asidom re bunu ka mia avulu vite nalo napano m̃a kito romim̃aukanio. Mia mave ka nina, kitoliko kulo Esia, a vija bunu tomu dolu reraio ea yetemeriba nei, rojum̃a romilotu ka kiado atua na bo nei Atemes, mia p̃eli toro na naio jidom rivuku lelan naio kovio, p̃eli na naio jidom rila kunuano lu rimei rive vite kurano ga tai kovio.”
ACT 19:28 Naruei bogo na nalo amijog iliano nei, amila legleg tinielo ana mila tiniel mimi toru laka, mia ajum̃a amiaia ga aberinavo “Atemes na Eveso naio bo mia, naio ga takurano kito rojidomio-o!”
ACT 19:29 Ana na abitunu vatitigio, naruei aba amila burum̃ara uetubaiano ea komeli, ana aba abokar Kaias naljuo Arestakas, tomjuo na vio Masetonia napano naljuo ajum̃a amiel naliko Pol abinimei ajua vio nei, ana aburulo, ajikiti kalo aba joomo ea burum̃ara vio na vioriano na Eveso nei, mia kulo Eveso bunu aba naliko, abano amison vio nei bujo vatitigio.
ACT 19:30 Naruei Pol jidom ka riva joomo bunu ka mia rilavonio ka ril van tiniobi nei, mia naiagagoano nalo na vio Eveso amerou ka mia aue beleaio, ana na aberbure naio.
ACT 19:31 Mia tomu na tortoru tealo na m̃atatoko komeli na kulo Esia kialo, nalo amila bilbilu bo naliko Pol, naruei nalo bunu amiila toru binimei, abika jikili den Pol ka mia naio rivan re joomo, mila ana naio maka bunu rivano bereio.
ACT 19:32 Naruei joomo ea vio nei, tomu nalo aju amila burum̃ara m̃aduano, nalo telabo amil vaarakurano, tealo amil ban jibe nei, a tealo amil be dolu, a nalo telabo maka lele ajikia ka nalo aju bior kar venia.
ACT 19:33 Naruei kulo Ju nalo amerou ka mia tibe m̃a na averenio nalo naruei abe burupati na siniabu nei, ana na nalo amiyukular nalo tai, siano Aleksada, naio ba jumolu jukamu ea tomu nalo nei miralo ka rilavon ka ril vanlo ka tiniel ser re nalo kulo Ju nalo. Naio buku jum̃ano ka rila atu melumu ga, mia nalo be kialo jidomiano ruei ka aberiam̃a naio be toro na siniabu nei tai naruei.
ACT 19:34 Ana karina, bogo napano abitilubar ka naio be toro Ju ga tai, mia m̃aduano nei naio maka lele rivatove, mia aju amiaga burutomoruo ea tira na be kialo atua nei siano, amiaia ga amidu buron joolo kanio, aberinavo “!Kenememi Atemes kumemi kulo Eveso naio bo-o! !Kenememi Atemes naio takurano ga bo-o laka-o!” Mia nalo ajum̃a amiaga jibe na ba bokar aura juo titai jibe na.
ACT 19:35 Mo iorou kanio, ana tubo tai na vio Eveso nei naio jumolu jukamu ea miralo, naio milavon ka amelumu bereio bano-o bisi, ana naio ber kalo, berinavo “Tomu nalo na vio Eveso, kito nonovio romijikia batitigio ruei ka kiado komeli nei naio be burum̃ara komeli tai, a naio be komeli lu tai. Kito naruei, rojum̃a robitikar yimo lu na kiado burum̃ara atua nei, Atemes, a romijikia ka kiado moneano be riano, bior nanua beamu, m̃arivitano tai mijoru, ana sano burum̃ara puruveru lu nei mijoru jel tiniabene binimei, napano maka rijoru ea vio dolu, mijoru ea kito ga, naruei kito roju robitikario bo.
ACT 19:36 Vite nalo na romijikia ruei ka abe riano ga, tomu nalo na vio dolu nalo maka ajikia aili lelan leleio. Verenio tibe na, mia bo ka kito ralavon ka rotu rivu dam̃ariga.
ACT 19:37 Ana ea tivelinio na naljuo nei napano kamiu kuburulo abinimei ea vio nei, kiniou maka nojog ka napano kuverenio ka aba abina ka vite lu tai ea yimo lu na kanado atua, p̃eli na amiolua siano, ana tibe na mia maka rejikia rala titai ka naljuo ea vio nei.
ACT 19:38 “Mia verenio tomu nalo na amim̃auka verumera nei, jibe ka Timitrias nalo, verenio nalo be kanalo veriiano kia navo ka ala ka tomjuo nei, mo, be kiado komeli nalo aju, mia be kiado natibureano nalo aju, mia verenio nalo aial ka tum̃abe ana amijikia avurulo ava ail vanlo ea sano vio nene.
ACT 19:39 Mia verenio kamiu kuvisidomii ka be titai kia navo ka roviniu rovitiio bereio, mo bo, romijikia rovitiio ga ea kiado viorian tai bereio.
ACT 19:40 “Nina, bior ka napano bajago nam̃a rojum̃a romilaio banei, kito raba koalabo laka ruei na. Maka lele ve vite tai rimemedu ka napano mia kito romijikia rala burum̃ara m̃aduano nei riviorio, a verenio makan, p̃eli ana mia tomu na tortoru nalo na vio Romo mia nalo avuku kito ea nalakoiano navo kario kiado im̃auano nana banei nene.”
ACT 19:41 Mia bogo napano naio berenio iliano nei bisi, mia tomu nalo kanalo jidomiano nalo abavatove bo bereio ruei, naruei naio jetavoko iliano ana naio ber kalo ka nalo amijikia aieliel dedade bereio.
ACT 20:1 Mia be legiano tealo bereio, bogo napano burum̃ara m̃aduano napano kulo Eveso nei nalo amilaio batove bereio, mia Pol naio bio namoneano nalo abinimei vio takurano, naruei naio jian iliano novo banlo ka atu sikili lie vo, naruei naio mil maariano banlo, ana juvanlo, ba Masetonia bereio.
ACT 20:2 Ana ea vio na, naio ba miel jel ea kiano tanobuku nalo, mia ea vio nonovio naio jom̃a mijai tomu nalo ea kiano iliano novo nalo, ana iorou kanio, bavin bere Kris, napano bulukomeli labo nene naio be Korin.
ACT 20:3 Naruei Pol naio joa vio na bano-o bokar siberio tolu, naruei naio jo jidomii ka sel ea uako tai napano naio jo, ka mia rivan ea vio Siria bereio. Mia vaataro ka avuru veru, mia iliano boru ea naio berinavo kulo Ju nalo na vio na, ajum̃a amila jidomiano va tai ka ala van Pol ea bogo napano naio jo ban ea m̃arabo togio kia ga vo, mila ana naio maka bunu rivan ea uako nene, mia midu m̃arabo na tebievi, miel barlaka ba jeliviv ea vio Masetonia bereio.
ACT 20:4 Ana ea bogo na nalo tealo napano abano naliko naio, jibe kanio Sopata na vio Beria, napano Piras kenerinio, naliko Arestakas a Sekantas, naljuo na vio Tesalonaika, bija Kaias na vio Tepi, bija Timoti, a bija bunu Tikikas a Trovimas, naljuo na vio Esia.
ACT 20:5 Naruei nalo nei tealo kalo napano aju naliko Pol, nalo ajukamu aba aboru Troas.
ACT 20:6 Ana Pol naio iorou bano, mia kiniou Luka, nojusolo bereio ea vio Vilipai, a kumemi numila Jokoluolu Na Sinaniano Na Taba ea vio na. Bogo napano jokoluolu nei bisi, ana numisel ea uako, nuburo bano-o nubokar bogoti jumo, naruei nubinimei nuboru Troas, napano nalo napano ajukamu aju rorea kumemi eaio. Naruei kumemi nubiniu numitua vio Troas bokar bogoti aluo [7].
ACT 20:7 Ana ea Legiano Lu, bogo napano m̃erenio batove bisi, jibe ka napano legiano na be moti na bogoti aluo jikario naruei, kumemi nubior kumemi liko namoneano nalo na vio na, nubolkouo a nubure kokorovio joko lu. Naruei Pol naio jidomii ka ber mia nuvituvan kavijova kia ga vo, mia bior ninei be vioriano na maariano kumemi liko, be iliano telabo, mila Pol bunu mil vio tebievi, ba bokar bogiano viovare vaarakurano.
ACT 20:8 Naruei ea bogo nei, kumemi numitu nubior ea vajoomo tai mave ea vio vodobi tolu, mia tomu nalo abar yulu telabo binimei, ana mila vio bituvitunu toru laka joomo.
ACT 20:9 Naruei m̃eaku tai, siano Yutikas, naio jom̃a jotano ea bulukujegi, mia bogo napano Pol jom̃a mioliolu jiou bano-o, ana m̃eaku neibano mirano jouo mia mirano jouo. Naio mila jibe na banbano-o monmelio bobogu naruei, mia amiilo kanio naio mijoru ea bulukujegi nei, mijoru batove tavio ban manenea naio ea borotano. Vio nei naio jo laka mave, naruei bogo na ajikiti abatove, abokar naio, mia amialio ka napano m̃aro ruei.
ACT 20:10 Mia Pol bunu batove ka rial naio, naio mon korkoro ba tove, miabukario ka jum̃ano be juo, naruei naio ber kalo, berinavo “Kamiu kuvijog rivova re, kuvitigio re, vonga nei kiano meuliano binimei ea naio bereio ruei nei.”
ACT 20:11 Ana na Pol nalo abavin bereio, ana nalo amijev Sinaniano Lu nei, karina na nalo ajinan, ana iorou ka nina, ajukunu bereio bano-o viomijeni konlo, ana na Pol juvanlo bano.
ACT 20:12 Ana tivelinio ka m̃eaku nei, nalo aburu naio meul batitigio bereio jo naliko aba vonuo, a nalo amijog bo toru laka ka napano Pol mila batitigio m̃eaku nei banlo.
ACT 20:13 Mia Pol naio ber ka kumemi ruei berenio nuvitukamu nuvisel ea uako, nuva nuvitu rorea naio ea komeli na vio Asoso, mia naio rimei iorou, riel ga sel uro.
ACT 20:14 Naruei kumemi nubano nuboru Asoso, karina naio binimei iorou, binimei mave ea uako, naruei kumemi nubiniu nubano nuboru ea bulukomeli na vio Maetilin ea uleule sesa tai.
ACT 20:15 Karina, kumemi nuburo-o nubokar legiano takurano bereio, mia nubauro numijaka ea uleule sesa tai bereio, siano Kiosi, a iorou kanio nina, ea legiano dolu nene, kumemi nubinimei nuboru ea uleule sesa na Samoso, mia legiano dolu nene bereio, ana nuboru ea komeli na vio Maelitas ea tanolabo, naruei nubauro ea vio na.
ACT 20:16 Ea bogo na, kumemi nubarlaka ga ea vio Eveso jibe na, maka nuvauro eaio, bior Pol naio mial berinavo maka rivu ka kito rodu bogo ve telabo laka ea tanobuku nei na vio Esia, bior naio jo jidomii ka verenio nuvijikia nuvila, mia bo ka nuvoru Yerusalemo rimemedu ka bogo na Jokoluolu na Yuṽi.
ACT 20:17 Naruei ea vio Maelitas, Pol miila toru ban ea vio Eveso, berinavo navurim̃araboiano na nalotuano nalo amei aial naio.
ACT 20:18 Naruei iorou kanio ana nalo abinimei, ana Pol berial kiano iliano na maaro banlo. Naio ber jibe nei, berinavo “Kamiu, kamiu kumijikia batitig kiniou bo ruei, napano jikar ea bogo napano nebinimei be moti garuei ea kiado tanobuku nei, na vio Esia, binimei bokar vonganei, kiniou nojo bija kamiu bogo tebievi ruei. Mia kumijikia batitig kanaku bajago bunu a kanaku im̃auano nalo na Tubo kanano napano m̃a nemilaio ruei.
ACT 20:19 Kamiu kumijikia ka im̃auano nalo na, nojom̃a nemilaio napano kanaku jidomiano melumu ga, a nemilaio ea jogumiraku, a nemilaio bunu ea bogokouo naio napano kulo Ju nalo amila ban kiniou, napano miyotuba ea kialo tiniemimiano nalo kar kiniou.
ACT 20:20 A kamiu kumijikia batitigio bunu ruei, napano iliano nonovio napano memedu ka averenio, napano mijikia riija kamiu, iliano nalo na maka noimou ka naverialio van kamiu, p̃eli na maka nemerou ka neverloglog kamiu kanio, nina ea bogo nalo napano kito rojua vio medave bija tomu telabo, p̃eli na ea bogo nalo napano kiniou nojom̃a nemiel jeliviv ea kunuemiu nalo.
ACT 20:21 Mia kiniou nemil ban kulo Ju nalo p̃eli na nemil ban nalo napano maka ave kulo Ju, mia maka neialerinio, mia nojo nejikili kalo, neberial banlo, neberenio nalo nonovio monoka aviliglo amei ea Atua, monoka amonea kiado Tubo Yesu Kristo.
ACT 20:22 “Mia vonganei, kiniou nojo naban bereio yako Yerusalemo, mia maka nejikia venia mia kulo Ju nalo ala van kiniou ka bogo napano mia novoru ea vio na, mia nomijog lubar ea kiniou ka Niununo Lu naio jom̃a buru kiniou jibe na, naruei monoka navan ga.
ACT 20:23 Mia Niununo Lu naio jom̃a mila kirimeravo ban kiniou ruei ka napano ea bulukomeli nonovio nalo napano mia notom̃a navan ealo, mia monoka novokar bogokouo nalo, mia tomu nalo aju rorea ga ka mia avuku kiniou navan ea nalakoiano. ?Tenene na kiniou nemial ka ver kiniou navan yako Yerusalemo, p̃eli mia tibe na ga bunu bo?
ACT 20:24 Mia naio bo ga na, bior napano maka nevitii kanaku meuliano naio rive vite tai, p̃eli na mokotenaku, ka monoka nesidomiio m̃elea, p̃eli ga. Mia kiniou nejidom titai takurano ga, ka mia nemijikia novuro ga rivano-o mia novokar juluvati na im̃auano napano Tubo Yesu midu joaio jum̃aku, ka napano monoka neverial Ioluano Vou na Bo na Atua kiano na tiniememiano ea vio reraio ga.
ACT 20:25 “Ana vonganei, nemijikia bunu ruei ka kamiu napano nojom̃a najanea kamiu, napano nemioliolu ka Atua kiano navenatuboiano ban kamiu, nemijikia ka mia kamiu nonovio maka lele kuvijikia kuvial miraku bereio bogo tai.
ACT 20:26 Verenio tai ka kamiu maka rudu Atua kiano iliano nalo ea kiano meuliano vo, napano m̃a neber ka kamiu ruei mia naio riva kovio, mia verenio naio riva kovio, kiano burukija ritoa naio, mia ritoa re kiniou,
ACT 20:27 bior kiniou neberial m̃arabo ban kamiu ruei, mia kiniou maka noduvan Atua kiano jidomiano leleio ka kamiu.
ACT 20:28 “Naruei kamiu navurim̃araboiano nalo, bior Niununo Lu bitiri bulag kamiu javukia tomu nalo na m̃a abitikar nunu nalo na Atua kiano nalotuano nei, napano naio bulular ka burukija na kenerinio kanano, naruei kamiu monoka kuvitikar vatitig kamiu, a monoka kuvitikar vatitig nalo na.
ACT 20:29 Nao nejidom never ka kamiu, bogo napano ka mia kiniou nataluvo den kamiu bisi, mia nemijikia ka mia kuli deden nalo amei, aser niegeniege lelan kenemiu nunu nalo, mia nalo ala von ka ala dedade ealo, ava aveve terakurano.
ACT 20:30 Mia kiniou nemijikia never bunu, ka mia iorou kanio, mia kamiu tomu na tortoru tai ka kamiu ga, mia nalo atumolu, mia aver ilivovuiano na sibiano ve telabo, ka ala von ka avuru bulag naiagagoano nalo ava atakisorlo ga.
ACT 20:31 Tibe na, kamiu monoka kuvitu vatitig, a monoka kuvisirarago vatitig rivu, a monoka kuvisidomial ka kuvim̃au kouo tibe ka napano kiniou nemilaio ka bogo napano nojo bija kamiu bano-o bokar yuka tolu momou, napano bogo nonovio, ea legiano a ea bogiano, nojom̃a neberloglog tomu nalo, a neberial Atua kiano iliano memedu banlo, bano-o mia jogumiraku m̃a jibirbili biorlo.
ACT 20:32 “Mo vonganei, maka bunu toa jum̃aku ka mia nevitikar kamiu, mia nomidu kamiu kumitua Atua jum̃ano ga. A nobolkouo ka mia lilianiano Vou na Bo na tiniememiano na kanano, mia naio tom̃a rijai kamiu, rila kamiu kuvitu sikili, a rila ka mia kamiu bunu, kamiu kuvijikia kuvar ilivuiano maraiu nalo napano mia Atua rivar iorou van kiano tomu lu nalo.
ACT 20:33 “Mo nejidom kamiu monoka tiniemiu rimaio ka bogo napano kiniou nojom̃a na kitoliko, kiniou nojom̃a nemim̃au jibe na ga, a kiniou maka neyabar ka kenemiu saba novo nalo na jibe kanio kenemiu puruveru nalo, p̃eli na kenemiu kulum̃arauo nalo.
ACT 20:34 Mia maka neverenio ka mia kuvitikar kiniou ka saba nalo na, mia kiniou ga nebitikar kiniou ea im̃auano na jum̃aku be juo nei, mia nebitikar bunu nalo napano ajum̃a amim̃au bija kiniou ea bogo nei.
ACT 20:35 Naruei ea m̃arabo na, a ea bajago dolu nalo bunu, kiniou nejiloglog ka kamiu, neber bo ka kito roim̃au kouo ka rajai tomu nalo napano amelukluku a abijukude, bior kito monoka rosidomial Tubo Yesu kiano iliano tai, napano berinavo ‘Verenio jau kovokar kiamo ijaiano tai, mia kojog rivu, mia verenio jau kesian ijaiano tai rivano, mia kojog rivu ve toru lie, ilivuiano naio toaso.’ ”
ACT 20:36 Mia bogo napano Pol naio ber iliano nei bisi, ana nalo aminie, naruei naio bolkouo nalikolo.
ACT 20:37 Mo nalo ajikar ka ajegi naruei, mia abanjum̃alo naliko Pol, ajakia naio amijubaluba naio-o mia,
ACT 20:38 bior nalo ajum̃a ajidomial kiano iliano tai ga, napano ber mia aial mirano re bunu bogo tai. Kiano iliano nei naruei mila ana nalo amiel naliko, amiven binimei bereio ea uako napano kumemi numisel eaio.
ACT 21:1 Ana kumemi numituvan nalo ajua vio nei Maelitas, ana nuburu m̃aaja, nubano memedu ga nuboru ea uleule sesa na Kos, ana numon ea vio nene. Viomijeni kavijo, ana kumemi numituvan vio bereio, nubano-o nuboru bereio ea uleule dolu na Rotis, ana numon bereio, viomijeni kavijo, ana nubano bereio, napano nuboru ea bulukomeli na Patara ea tano labo.
ACT 21:2 Ana kenememi uako nei naio ba boru ga ea vio na ga, ana numitabulu nubauro. Ana bogo napano numileal bereio uako dolu tai napano ban yako Vonisia, ana nubavin eaio, ana aburu m̃aaja, ana numitua kenememi m̃arabo bereio.
ACT 21:3 Kumemi nubano ga jibe na ea burum̃ara tinia tei na toru, ana nubitikar ga burum̃ara uleule na Saipras, ana numituvan joa kenememi va mal ga, ana nubano-o ka mia nuvoru ea tanobuku na Siria napano numisidom ka nuvan eaio. Uako nei naio bar togogo nalo ka riva tuvanlo ea bulukomeli na Taia, ana bogo napano nubano nuboru ea vio nene, ana nubauro eaio.
ACT 21:4 Ana nubano numisirav naiagagoano nalo ea vio nei, ana iorou kanio ana numitu kumemi liko bano-o bokar legiano aluo [7]. Ana ea bogo na, nalo amial napano Niununo Lu jiloglog nalo napano mia tum̃abe ka Pol yako Yerusalemo, ana amil banio, tinielo ka averbure naio ka mia naio rivan lie re ka mia naio rivokar vio nei.
ACT 21:5 Mia Pol mijog ea naio, ber p̃eli ga, monoka naio rivan ga, ana iorou kanio, kumemi nuban bereio ea kenememi m̃arabo. Ana ea bogo na, sum̃ano nalo a tire nalo naliko kiritete nalo, amiel kumemi liko nuba tavio ea kanalo bulukomeli, ana amiven kumemi nubatove bereio ea kenememi uako. Ana kumemi nubiniu numinie ea bayono, ana nubolkouo ka kumemi, bisi ana nubanijumememi kalo.
ACT 21:6 Ana nubavin bereio ea kenememi uako, ana nalo aban bereio aba vonuo.
ACT 21:7 Ana kumemi numituvan vio Taia, ana nuburo nuba ea m̃arkomeli na vio Tolimeas, ana ea vio na nuba nubitavo bija kuruado nalo, numitu kumemilikolo ea ga legiano takurano nei.
ACT 21:8 Ana kavijo, naruei numituvan vio nei bereio, ana nubinimei nuboru ea bulukomeli na Sisiria, ana ea vio nei naruei, nubauro nuba numitua toro na Lilianiano Vou na Bo nei, Vilip, kunuano, napano naio naruei naio be nalo aluo nei tai napano abitiri bulaglo beamu ka aija im̃auano, nene yako Yerusalemo.
ACT 21:9 Ana Vilip nene, kenerinio vevinio nalo veri aju vonuo, nalo maka asoro vo, ana nalo nei, bogo telabo Atua jom̃a jian iliano banlo, ana nalo aberialio ban tomu nalo.
ACT 21:10 Ana kumemi numitua vio nei kumemilikolo ka legiano tealo ruei, ana naverialiano tai juvan vio Yutea binimei rove ea vio nei, toro nene siano Akapusi.
ACT 21:11 Ana naio binimei ea kumemi, jidom rila tovorovo tai van Pol, ana bar Pol kiano kulum̃arauo tai, m̃enkar jum̃ano bija jaano kanio, ana berial, berinavo “Niununo Lu berenio berinavo ‘Toro napano kiano kulum̃arauo nei, mia kulo Ju na vio Yerusalemo, mia aiorikario tavukia ga, naruei iorou kanio, ana ala naio rivan ea nalo napano maka ave kulo Ju nalo jum̃alo, napano mia ala searo vanio.’ ”
ACT 21:12 Naruei ea bogoti napano kumemi numijog iliano nei, kumemliko nalo napano aju ea bogo na, nubitig Pol, numisikili ka naio nuberbure ka naio ka maka rivu ka rivan bereio mave yako Yerusalemo.
ACT 21:13 Ana Pol berdop̃e ban kumemi, berinavo “Ee, tomu nalo, kamiu kumitum̃a kumiteg jibe na, mila nemijog jibe ka mia kiaku iviso rivurkokorovio ga. Mia vite nonovio naio bo ga, verenio nalo na vio Yerusalemo adu kiniou notoa yimo na nalakoiano rivior Tubo Yesu siano, nina naio bo ga na, ana verenio sikili ga tibe na rivano-o mia nam̃aro, nina kiniou najaaro ka ga.”
ACT 21:14 Ana kumemi numilavon ka nuver-bure naio tibe na-o mia nuberbure deio ga, ana nuberenio ga, nuberinavo “Bo ga, mia monoka tibe ka ga na Tubo naio jidomio.”
ACT 21:15 Ana kumemi numitu legiano tealo bunu ea vio na Sisiria, naruei iorou kanio, ana numila batitigio kenememi basaro nalo bereio, numituvan vio nei, ana numiel nubavin yako Yerusalemo.
ACT 21:16 Ana na naiagagoano nalo tealo na vio Sisiria ajakisor kumemi bunu ga, ana bogo napano nubinimei nuboru Yerusalemo, ana aburu kumemi nuban ea toro na vio Saipras tai kunuano, ka napano mia nuvitu kumemliko. Toro nene, naio bunu be naiagagoano tai napano be moti, napano nalo amonea Yesu garuei jukamu, a naio siano, Nasono.
ACT 21:17 Ana bogoti napano kuruado nalo amial kumemi nubinimei nuboru bereio ea vio Yerusalemo ruei, mia ajaaro toru laka.
ACT 21:18 Naruei numon, viomijeni kavijo ana kumemliko Pol, nubano numaluvo ka Yemesi, ana navurim̃araboiano dolu nalo na nalotuano na vio Yerusalemo bunu nalo aju ea bogo nei.
ACT 21:19 Ana nubanjumememi kalo, naruei Pol mil banlo, naio berial vite nonovio beve terakurano napano Atua milaio ruei, miyotuba ea im̃auano na kanano, nina ea nalo napano maka ave kulo Ju, napano naio jom̃a ba jeliviv ea kanalo vio nalo.
ACT 21:20 Ana bogo napano nalo amijog veriiano na Pol nei kanano, ana mila nalo amijog bo laka, ana amiaia Atua biorio. Mia ka bogo nei, be iliano nalo telabo bunu yako Yerusalemo, napano kar Pol, ana nalo amijikia vite nei, naruei aberii ka Pol, aberinavo “Tavaliki Pol, jau komijikia ruei ka ea vio nei nalo menu tealo napano amonea vonga, nalo abe kulo Ju ga nalo, a jibe kanio napano jau komijikia, tomu nalo na jibe na amijikia atumolu atu sikili laka ea kiado tuboiano moruo nalo.
ACT 21:21 Mia nalo amijogio ruei, ka napano tomu nalo ajum̃a aberveriiso kirivova, aberenio jau kojom̃a koberloglog kiado torogio nalo kirivova napano ajua buruvenuo dolu laka yako. Aber jau kojo koberloglog searialo, kober bo ka atuvan tuboiano na Mosis kiano vija kiado bajago moruo nalo, a bo laka ka ala re bunu pakuveu ea kenerilo nalo.
ACT 21:22 ?Ana mia kito rala vaio naruei, bior iliano nalo nei amila nalo tiniel jerso m̃ele ruei? Ana vonganei, mia vesiou re, ana mia monoka ajog bunu ka jau kobinimei kojoa vio nei ruei.
ACT 21:23 Mia bo ga, jau kala ga tibe ka napano kumemi nuverenio ka jau, bior numileal m̃arabo tai ruei napano mia jau komijikia kala ka mia koue bulag kialo tiniemimiano nei. Mia monoka kala tibe na: ea vio nei, be kenememi tomu nalo ver napano beamu, nalo amila verikariano na jikili tai ban Atua, aberenio mia aveli ka vite tealo nalo rivano-o rivokar bogo na jibe nei.
ACT 21:24 Ana beni, naio be kanalo bogo ka monoka avan ea Atua Kunuano Lu, ka ala vite nalo ea tivelinio na kanalo verikariano nei, jibe ka volkouano nalo, bija ijaiano na meravo, a vite nalo na jibe nei ka rila ana amijikia avuronbijiilo bereio. Ana numial nuber bo ka verenio jau bunu kavan rivijalo, jau kava koto vijalo ea bogo napano ala vite nalo nei, ana vite reraio ga nalo napano monoka avulu ea bogo nei, bo bunu ka verenio jau ga kovitiilo. Ana verenio kala tibe na, ana mia tomu nalo aial ka jau kobe toro tai napano kojo kajaaro ga ea tuboiano na Mosis kiano bija bajago nene nalo kia ga, ana mia ajikia iliano napano amijogio, napano beriiso, naio maka rive riano ga.
ACT 21:25 Ana ea tivelinio na nalo napano maka ave kulo Ju, napano nalo amonea ruei, kito roberii vite nei nua ruei, ana kiado iliano napano roberenio nanua ruei, ana kumemi nubivitauia ea mosi tai ba banilo rui. Kumemi nuberial banlo, nuber monoka nalo aveli ka sunbue nalo napano kulo dolu nalo amila sida kanio ban kanalo tavoru nalo ruei, a monoka asen re burukija, a asen re sunbue na temeul nalo napano sano ja maka riou kon vo, a mia monoka ala re bajago nalo napano bova, jibe kanio siakiano, p̃eli na siakaiano.”
ACT 21:26 Naruei Pol ba mila jibe ka napano nalo aberenio, napano ea legiano dolu, ana naio buru nalo veri neibano, ba mila ijaiano na meravo nalikolo, a ba joomo ea Atua Kunuano Lu bunu bijalo, ka rijogio verenio kanalo verikariano naio riva rivokar legiano ve vio, ana monoka asian kanalo ijaiano nalo veve terakurano ka verikariano nei ea legiano vaio. Ana aberenio legiano ve aluo [7] rivar laka, ana mia atikar ka ala vite nalo nene.
ACT 21:27 Ana ea bogo nei, kulo Ju tealo aju joomo ea Atua Kunuano Lu napano ajumolu ea tanobuku na vio Esia, ana abinimei, ninei ea vio nalo napano Pol jeliviv ea beamu ruei. Ana bogo napano bogoti aluo [7] na verikariano na Pol nalo kialo vaataro ga ka riviniu, ana kulo Ju nalo neibano amial napano ka Pol jo joomo ea Atua Kunuano Lu. Ana nalo amila burum̃ara m̃aduano, aba abokar Pol, ana ajukunu niegeniege naio ban tomu nalo,
ACT 21:28 amiaga ealo, aberinavo “!Ai, kamiu kulo Israel nalo, kuvijai kumemi ka toro nei! !Toro nei naruei naio ban ea vio nonovio, ana jom̃a berii niegeniege kito kulo Ju nalo, napano robe Atua kiano kulo lu nalo, a naio jom̃a berloglog niegeniege tomu nalo ber kiado tuboiano bija kiado Yimo Lu nei, maka ave titenia. A kumemi numijikia bunu ka naio buru bena tomu nalo tealo napano maka ave kulo Ju nalo, abinimei jouro ea tanobuku lu na Yimo Lu nei. !Naio binimei mila lelan tolu na Yimo Lu nei, bo ka kito rala titai ka naio!”
ACT 21:29 Nalo aber jibe nei, aberinavo Pol buru toro tai napano maka rive toro Ju binimei jouro ea tanobuku lu, bior napano amial Pol tavio ea m̃arabo ka napano naio miel naljuo Trovimas nei na vio Eveso, napano naio maka rive toro Ju, ana nalo aberiam̃a Pol buru naio ba joomo.
ACT 21:30 Ana nalo ajum̃a amila jibe na joomo ea Yimo Lu, ana m̃aduano nene naio ban ea vio nonovio nalo nei ea bulukomeli bunu, ana milaio ana tomu dolu nalo ajikiti abinimei. Abinimei naruei abokakar niegeniege ga Pol, ana aburu naio ba tavio ea Yimo Lu nei, ana bogo napano aba tavio kario, ana kulo lu nalo ajetavoko vatitig m̃aratavo na tortoru nene nalo.
ACT 21:31 Naruei bogo napano ajum̃a aburu Pol ban ka ajidom ka auebinio rim̃aro, ana iliano binimei bokar toro na toru na kulo na mira nalo na vio Romo napano aju yako Yerusalemo, berinavo burum̃ara mira judolu ga mijian yako.
ACT 21:32 Ana toro na toru nene jumolu vaarakurano, bio kiano tomu nalo, naliko kanalo tomu na mira nalo, ana nalo ajikiti abatove ea vio napano ajum̃a amila burum̃ara m̃aduano nei eaio. Ana bogo napano tomu nalo amial toro na toru na mira nei binimei bokar vio nei, ana ajuvan Pol, maka bunu atukuio.
ACT 21:33 Ana toro na toru nene binimei, mil ban kiano tomu nalo, berinavo ava avokar Pol, ana avivikar jum̃ano tivelinio rivan ea nalo tai a tivelinio ea dolu tai ka marimieni. Naruei naio bika denlo, berinavo “?Ana toro nei naio be kei? ?A naio mila venia ka kamiu?”
ACT 21:34 Ana tomu nalo telabo ajum̃a amiaga kokovio toru laka, tealo aber jibe nei, tealo aber jibe na, banbano-o mia toro na toru nei naio maka bunu rijikia rijoglubar iliano tai leleio ea tivelinio na vaio napano ajum̃a amilaio, naruei naio miila kiano tomu nalo berinavo avuru Pol rivan bereio ea kanalo burusio.
ACT 21:35 Ana bogo napano ajum̃a aban ea m̃arabo sesa tai, ana m̃arabo nene naio bujo ga ka tomu nalo napano ajum̃a tinielo ka ajidom atuku Pol kia ga vo. Naruei tomu na mira nalo aburu ga Pol bano,
ACT 21:36 ana taara na tomu nalo aju iorou kanio abinimei, ajum̃a abiovio kanio aberinavo “!Kuvuebin toro kirivova na a! !Kuvuebin ga naio rim̃aro!”
ACT 21:37 Ana nalo ajum̃a abano, mia vaataro ga ka amei avokar m̃aratavo na ka mia ava jouro ea burusio na tomu na mira nalo nei, ana Pol bika den kanalo toro na toru, berinavo “Novika denso, kajamo ka kiniou nevika titai denso vo.” Ana toro na toru nei naio miilo ka Pol mil jel Krik banio, naio berinavo “!A, jau komijikia ga komil jelea Krik!
ACT 21:38 ?Jibe na, kiniou nejidom neverii jau kobe toro Ijivi nanua maka vesiou ga ana milavon ka rila baravo, ana naio buru bulag tomu nalo menu veri [4,000] aban ea kanano taara na m̃a amuemue tomu nalo, mia nalo aburo abano ajuluku ea vio yauo? ?Jau naruei jau kobe toro nene, a?”
ACT 21:39 Naruei Pol berdop̃eio, berinavo “Ee, makanio, kiniou nebe toro Ju ga tai memedu nei, mia kiniou nemijikia nemil jel ea Krik, bior nebe toro na burum̃ara bulukomeli na vio Tarsis, ea tanobuku na vio Silisia. Tenene na kiniou nejidom nevika denso ka jau kajamo ka kiniou ka neil kija rivan tiniobi nalo na beamu vo.”
ACT 21:40 Naruei toro na toru nei naio mijamo, ana Pol jumolu ju mave, ana buk jum̃ano ber amelumu, ana abinimei amelumu batitig bo. Ana naio mil banlo, mil jel ea kulo Ju nalo kialo iliano ga memedu.
ACT 22:1 Naruei Pol naio mil banlo berinavo “Banalo, kamliko teta nalo, kiniou nejidom ka kamiu kuvijamo ka kiniou never bisivisii vatitig vite nonovio van kamiu. Kamiu kuviagago vatitig rivu ka kiniou beamu vo.”
ACT 22:2 Mia bogo napano amijog ka Pol naio jom̃a mil banlo ea kialo iliano, napano mil jel Ipru, naruei nalo amelumu bo, ana ajidom ajog kanano iliano. Ana naio berenio, ber
ACT 22:3 “Kiniou nebe toro Ju ga tai, jibe ka kamiu, a kiniou nemiyotuba ea komeli na vio Tarsis, ea tanobuku na vio Silisia. Mia bogo napano kiniou telisu kia ga vo, nebinimei ea vio nei, ea vio Yerusalemo, a nomila kakario ea naverloglogiano na Kamiliel, napano kamiu kumijikia batitigio naio ruei. Kiniou nojoa jaano, naio berloglog batitig kiniou ka tuboiano na kiado tormoruo nalo kanalo, bano mia kiniou bunu nomue jaano, nebinimei nebe naverloglogiano na tuboiano nene. A jibe ka napano kamiu banei, kamiu kumisidomii toru ka kuvila Atua siano rimei ve toru, kiniou bunu, ea bogo nanua, kiniou nemila Atua kiano im̃auano bija kiaku meuliano momou.
ACT 22:4 Ea bogo na, kiniou bunu nebe toro tai napano m̃a tinieku jerlo laka napano ajum̃a ajakii M̃arabo Vou nei, napano kiniou nojom̃a nejeliviv ka nesiravo nalo na m̃a aju ajakiio, ana kiniou nojom̃a nobokakarlo, a nojom̃a nobukulo aban ea yimo na tetavokoiano, sum̃ano nalo a tire nalo. Ka bogo na, kiniou nejidom ka nalo monoka am̃arm̃aro ga, a nejidom ka kialo m̃arabo nei naio ribisi sop̃eli ga.
ACT 22:5 Mia vite nei, kamiu kumijikia kuvika den parinio toro lu vija navurim̃araboiano na kanano komeli, bior ka napano nalo amijikia batitig bo ka kiniou napano nemila jibe na. Ana ka bogo na, abivivitauia m̃esi tealo ka rila ka mia nemijikia nava nejili tomu nalo kario M̃arabo Vou nei ea kanalo vio nalo. “Ana ka bogo tai, kiniou nomidu m̃esi tai jibe na, mia nejidom ka navatove yako Tamaskas ka novokakarlo ea vio na, ka noiorkakarlo ka marimieni a ka novurulo amei bereio ea vio nei ka mia kanado tomu na tortoru nalo aje vironiano vanlo.
ACT 22:6 “Ana ka bogo na, nojo nemiel nabano, mia legiano viovare, vaataro ka ga novoru Tamaskas, mia nemiilo ka napano kolvare ga burum̃ara miamoiano tai na vio mave mereralii vio napano nojom̃a nemiel eaio.
ACT 22:7 Naruei vite nei mila ana nomijoru nabatove ea borotano, ana nemijog iliano tai berinavo ‘!Sol, o, Sol, o! ?Bior venia ana jau kojo komila lelan kiniou jibe na ka napano jau komila na?’
ACT 22:8 “Ana na nebika denio neberinavo ‘?Ana Tubo, jau kobe keinia?’ “Ana kiniou nemijog mil ban kiniou bereio, berinavo ‘Yesu re Nasarete nene nei, napano jau komila bova banio, ninei be kiniou nene nei.’
ACT 22:9 Naruei nalo napano aju iorou ka kiniou ka bogo na, nalo abitikar burum̃ara miamoiano nene, mia nalo maka ajog joono nei napano jom̃a mil ban kiniou.
ACT 22:10 “Avona bisi ana nebika bereio, neberinavo ‘?Ana Tubo, mia kiniou nala tum̃abe naruei?’ “Ana Tubo mil ban kiniou, berinavo ‘Jau kotumolu, keiel kava jouro ea vio Tamaskas ga, ana mia toro tai rimei riverial vanso im̃auano nalo napano kiniou nemije vatitigio ju ruei ka mia jau koim̃aukanio.’
ACT 22:11 Ana nemijog iliano nei, mia maka bunu nejikia neial vite, bior burum̃ara miamoiano neibano naio mila miraku miununu garuei, naruei nalo abokar jum̃aku ga, aburu m̃arabo ka kiniou jibe na, nubano-o nuboru Tamaskas.
ACT 22:12 “Ana na maka vesiou ga, toro tai na vio na naio binimei mial kiniou. Naio be toro tai napano be Atua kiano riano, a naio monmonea kanado tuboiano, a kanado Ju nalo na vio nei nalo amial naio jibe ka toro novo tai laka, mia siano be Ananaias.
ACT 22:13 Naruei naio binimei jikili ju vaataro ka kiniou, ana mil ban kiniou, berinavo ‘Kuruaku Sol, vonganei, neber ka jau miramo avu bereio.’ Ana ea aura nene ga jibe na naruei, ana nemijikia nemial Ananaias nene mirano.
ACT 22:14 Mia naio mil ban kiniou bereio, berinavo ‘Atua Tomoruo na korobido nalo kanalo, naio berkarso nua ruei, ka mia jau naruei komijikia kejikia kanano sidomivaniano na toru tai, a ka mia jau naruei keial kiano Toro Memedu, a kojog kanano iliano.
ACT 22:15 Atua naio berkarso ruei, ka mia jau kava koverial ka tomu nalo ea vio nonovio, ka vite nalo na jau komialio a napano jau komijogio.
ACT 22:16 Mia vonganei ga, kito monoka rala vite tai beamu vo. Jau monoka kotumolu, kavaruei ea Yesu siano, naruei sio nei ga naio mia sekon bulag nono kiamo kariano nalo, ana mia jau komei komeravo ea Atua mirano.’
ACT 22:17 “Avona kario, ana kiniou nebinimei ea vio nei Yerusalemo bereio, ana naban ea Atua Kunuano Lu, ka nejidom nobolkouo. Ana bogo napano nojom̃a nobolkouo, nemijogio jibe ka kiaku jidomiano ba kovio,
ACT 22:18 ana nemial Tubo mil ban kiniou, berinavo ‘Jau kala sop̃eli, kataluvo den vio Yerusalemo vonganei, bior ver nalo na vio nei, ver kotukunu vanlo ka venia napano nemila banso, mia nalo maka ajikia amonmoneaso leleio.’
ACT 22:19 “Mia kiniou neberii ka naio, neberinavo ‘Ana Tubo, nalo amijikia batitigio kiniou ruei, bija venia napano m̃a nojom̃a nemilaio beamu. Nalo amijikia ga ka kiniou naruei nojo nejeliviv ea yimo na volkouano na kumemi kulo Ju nalo kenememi, a nojom̃a nobokar nalo napano amoneaso. A amial ruei napano nojom̃a nebitilo, a nojom̃a nobukulo aban ea nalakoiano, naruei nejidom neber monoka amonea kiniou ga ka nebe riano ga.
ACT 22:20 Mia nanua, bogo napano kanamo toro na Stevin, kiano burukija miou, nalo amijikia batitig ka kiniou naruei nojo bijalo ka bogo na. Bogo napano nalo ajubabinio m̃aro, kiniou nemiijalo, a kiniou nebitikar batitig m̃alo kulukoti nalo. !Monoka nalo aiagago ka kiniou ga na!’
ACT 22:21 “Mia Tubo naio ber ka kiniou ga, berinavo ‘Jau kataluvo den vio na ga, kiniou nejidom neiilaso kavan ea vio nalo na koalabo laka, jau kavan ka nalo napano maka ave kulo Ju nalo.’ ”
ACT 22:22 Ana binimei bokar aura nei, ana nalo nene napano ajum̃a amiagago ka Pol aju amije tilinielo batitigio ga kanio, mia vonganei, kanalo siniabu ka naio binimei bereio, naruei nalo aju amiagiaga ga bereio, aberenio “!Ei, bo ka auebin ga toro kiri bova na rim̃aro! !Kito maka rosidom toro na jibe na naio rimeul toa vio yetemeriba nei!”
ACT 22:23 Naruei nalo ajum̃a amiagiaga ga jibe na, a ajum̃a ap̃ilig m̃alo kulukoti nalo ea Pol, a aju ajuvu bulukievi na m̃arabo janea vio.
ACT 22:24 Ana toro na toru na mira naio ber ka avuru Pol taluvo den tiniobi nalo na, riva jouro ea kanalo burusio ga, a naio berenio nalo avitivio kija, ajikili kanio ka aleal vite venia naruei naio mila ana na tiniel jer m̃elea naio toru jibe na.
ACT 22:25 Mia bogo napano amiorkar naio bisi, ana ajidom avitiv naio naruei, mia Pol ber ka kanalo navurim̃araboiano nei tai, beri-navo “?Jum̃abe, memedu ka kamiu kuvitiv tavukia toro tai napano naio jotano ka navitikariano na vio Romo, a napano naio maka rivan ea komeli vo ka atibure vatitig naio, p̃eli na kamiu kumijikia kuvitivio ga tibe na a?”
ACT 22:26 Mia bogo napano navurim̃ara-boiano nei naio mijog Pol kanano vikadeniano nei, naio berenio mia avitiv re naio tukamu vo, ana sop̃eli ga naio ba mial kanalo toro na toru, berinavo “?Ei, mia jau kala tum̃abe ka toro nei naruei? Naio berialio ber naio jotano ka vitikariano na vio Romo.”
ACT 22:27 Naruei toro na toru nei binimei ka rial Pol bereio, naruei bika denio, berinavo “!Ei, jau kover vatitig rivu! ?Jau kojotano ka vitikariano na vio Romo, p̃eli na makanio?” Ana Pol berdop̃eio, berinavo “Ee, kiniou nejibe na naruei.”
ACT 22:28 Naruei toro na toru nei ber ka Pol berinavo “?Ana jau kojum̃abe na jibe na? Ka kiniou jibe na, kiniou nobulu burum̃ara puruveru nei.” Ana Pol berenio jibe nei, berinavo “Ii, mia kiniou, karam̃aku jibe na mugaruei, ana kiniou nemiyotuba, nejibe kanio bunu.”
ACT 22:29 Mia bogo napano nalo napano ka avitiv naio amijog iliano nei, amijikia naruei ka Pol naio be toro na toru tai jibe na. Ana ajaraluvo den naio vaarakurano, amijikia ka mia avitiv re naio naruei, a toro na toru nei bunu, vonganei naio bunu merou kija, bior ka napano naio be toro na mira na vio Romo tai, mia naio mila bova ruei ka Pol napano naio bunu jotano ka navitikariano na vio Romo.
ACT 22:30 Mia kavijo nene, ana toro na toru na mira nei naio jo jidomio ka rijikia kia na vo venia naruei be burupati na siniabu nei, ana naio bio tomu nalo na tortoru na kulo lu nalo bija navurim̃araboiano na kulo Ju nalo kialo, ber monoka atu rorea naio ea burum̃ara kanalo komeli. Naruei naio berenio ajubarbulag m̃arimieni den Pol, ana naio buru batove ea burum̃ara komeli neibano, naio bitirikar Pol ju iviso ka nalo.
ACT 23:1 Naruei Pol naio buku mirano memedu ea tomu na tortoru nei, ber kalo, berinavo “Kuruaku nalo, ea nono kiaku meuliano binimei bokar banei, ea im̃auano nonovio na Atua kiano napano nemilaio, maka nojog titai tuluborua kiaku iviso, ka river kiniou namila maka rimemedu. !Maka leleio ga ruei!”
ACT 23:2 Mia bogo napano parinio toro lu nei Ananaias mijog iliano nei, naio tinien mimi toru laka ban Pol, a ber ka nalo napano aju vaataro ka Pol ber nalo ajuba niono.
ACT 23:3 Naruei Pol mil kija ban naio naruei, berinavo “!Ei, jau kovitikarso, mia Atua ruebinso navo! Jau kojo tano ea vio na kiado natuboiano, ea vio na natibureano na toro, mia karina jau na naruei komila korov tuboiano nene bereio, napano koberenio ajuba kiniou tibe na. Jau kobe kulmedede ga tai na kojo na.”
ACT 23:4 Mia nalo napano aju vaataro aberinavo “?Ei, jau koberiam̃a bo ka keil rivova tibe na van Parinio Toro Lu na Atua kanano tibe na, p̃eli na tum̃abe?”
ACT 23:5 Naruei Pol naio berinavo “!Aa, riano-o! Kuruaku nalo, kiniou namijog kiano iliano mia maka nejikiaio, maka bunu nesidomiio never naio be Parinio Toro Lu na. Mia jibe ka napano kamiu kuberial batitigio ban kiniou ruei, naruei nemijikia ka nemil maka rimemedu ka naio, bior Atua kanano Iliano Lu berial batitigio ruei, ber maka rivu ka kito reil rivova van toro na toru na tomu nalo na kiado.”
ACT 23:6 Naruei Pol maka bunu rijikia venia mia naio riverenio naruei, ana mial ka nalo napano aju joomo ea vioriano ka bogo na, togio abe Varisis, a togio abe Satusis. Taara juo nei ajum̃a amila baravo toru, bior Satusis nalo aberenio mia tomu nalo maka ajikia ameul ea nam̃ariano, mia aberenio vite nalo na jibe kanio nailiano nalo, p̃eli na niununo nalo, aberenio vite nalo nei maka titai tibe na, mia Varisis nalo amonea vite nalo nei. Ana Pol mijikia naruei ka mia river tum̃abe, naruei naio bio ban tomu nalo na tortoru nei, berinavo “Kuruaku nalo, kiniou namaluvo ea yati na Varisis memedu. Karam̃aku nalo abe Varisis, a kiniou bunu nebe Varisis. Naruei bija Varisis nalo, kiniou nomonea ka bogo napano toro m̃aro, karina, mia naio mijikia rimeul bereio. Naruei nejidom jibe ka kiniou nojumolu nojukamu ea miremiu bior tomu tai ajidom ail van kiniou rivior kiaku moneano nei.” Naruei Pol kiano iliano nei mila ana Varisis nalo napano aju ana ajikar ka amila baravo bereio naliko Satusis nalo napano aju nei, mila ana nalo nonovio na ea vioriano nei aburuburelo bereio.
ACT 23:9 Amila jibe na bano-o, binimei toru laka, a karina, nalo naverloglogiano tealo ka tivelinio na Varisis nalo ajumolu, amil kirisikili laka, aberinavo “Kumemi numial ka toro na naio bo ga, maka vite tai ka napano mia kito romijikia reil vanio riviorio. ?A kei mijikia, p̃eli be riano ga ka niununo tai bo p̃eli na nailiano tai mil ban naio koviobo?”
ACT 23:10 Mia siniabu nei ba toru laka naruei, nalo ajum̃a ajidom ka atukulo riviorio, ana toro na toru na kulo na mira kialo mialio ka bova, naio merou ka tibe m̃a na mia nalo aser niegeniege laka ka Pol, naruei naio miila kiano tomu nalo abatove, aburular Pol denlo, ana aburio ban bereio ea kialo burusio.
ACT 23:11 Ana ka bogiano, Pol mial ka napano Tubo ju jumolu ju vaataro keanio, napano jom̃a mil banio, berinavo “Pol, mia komerou re. Jau koberial batitig kiniou ban tomu na abe p̃irilo ea vio nei ruei, ana kiniou nejidom ka mia jau monoka kala tibe na ga, ve vaarakurano bereio, nina ea vio Romo.”
ACT 23:12 Ana ea kavijo, kulo Ju nalo tealo abinimei vio takurano ka atuluku ga, ka averii ka mia tum̃abe ana mia amijikia auebin Pol. Mia bogo napano amileal m̃arabo tai bisi ana aberkar ea Atua siano ka mia atuvan sinaniano vija munuiano nalo, rivano-o mia auebin Pol tukamu vo.
ACT 23:13 Naruei nalo napano abijurukar iliano nei a napano amilakakar verikariano jibe na, nalo ajodovulu tomu nalo duelimo va veri [40].
ACT 23:14 Ana iorou kanio ana aba amial tomu na tortoru na kulo lu nalo, naliko navurim̃araboiano nalo, ana aberial vite nei banlo. Aberinavo “Kumemi nuberkar jikili ea Atua ruei, ka mia kumemi nuvel ka sinaniano nonovio rivano-o mia rivokar bogo napano mia numijikia nuvue bin toro na.
ACT 23:15 Mia kumemi numisidom ka kuvijai kumemi, napano kamiu kamliko nalo na ea kiado komeli, kamiu kuviila toru rivan ea toro na toru na tomu nalo na mira na, ka naio rivuru toro nene rivatove ea komeli bereio, kamiu kuvila sibilili naio ga kuver kumisidom kuvitii bereio iliano nalo na. Naruei mia kumemi nuvitu rorea ea m̃arabo ga, a bogo napano amei, mia nuvuebinio, napano naio jo koalabo ka komeli kia ga vo.”
ACT 23:16 Mia iorou kanio, ana na Pol, kuviviniene kenerinio tai naio mijogial ka napano ajum̃a aberii ka mia ala tibe na, naruei kiritete nei naio ba memedu ea burusio na tomu na mira nalo kialo, ana ba berial vite nei ban Pol.
ACT 23:17 Ana Pol bio tomu na mira nei tai kalo, berinavo “Ai, koig kobijuku bo, jau kovuru m̃eaku nei riva rial kenemiu toro na toru, naio mijikia titai napano bo ka mia toro na toru na naio monoka rijogio.”
ACT 23:18 Naruei naio buru Pol kumerano nei ba ban kialo toro na toru, a berkanio berinavo “Pol napano jo rove yako ea nalakoiano, naio berenio novuru kumerano nei rimei river titai vanso.”
ACT 23:19 Naruei toro na toru nei naio bokar m̃eaku nei jum̃ano, ana burio ba jibe ka naljuo ga, naruei bika denio, berinavo “?Mia jau kojidom kover venia van kiniou?”
ACT 23:20 Ana na Pol kumerano nei ber bulavulagio banio, ber “Jau keialio, tomu na tortoru nalo na kulo Ju abitirilar kanalo tiiano tai ruei, ka mia auebin kumeruaku nei, Pol. Nalo aberenio ruei ka mia aiila toru rimei vanso, ka nalo ajidom avitii vatitig bere vo ea tivelinio na iliano nalo nei, ka mia nalo avikaso ka beni, mia jau kovuru Pol rivatove bereio ea kialo komeli.
ACT 23:21 Mia maka rivu ka jau kala tibe na, bior nalo ajum̃a amila sibi ga na. Aberenio ruei ka bogo napano verenio kamiu kuvitua m̃arabo, kuvitum̃a kuvatove, mia nalo tovulu duelimo va veri [40] nei aviako ea kamiu, nalo auebin kumeruaku na. Nalo na aberkario ruei ea Atua ka mia atuvan sinaniano vija munuiano rivano-o mia verenio aial ka auebinio bisi, ana nalo nei naruei ajum̃a aju rorea kamiu ruei, ka verenio jau kajamo ka mia kuva tove bereio.”
ACT 23:22 Ana toro na toru nei naio ber ka Pol kumerano nene, berinavo “Bo ga, mia kiniou never kaso memedu, mia jau koverial re van toro tai bereio ka kobinimei koberial vite nei ban kiniou ruei. Mo siva toru, jau komijikia kava vonuo bereio naruei.”
ACT 23:23 Mo toro na toru na kulo na mira kialo nei naio bio kiano tomu juo, naio ber jibe nei, berinavo “Vite nalo na tivelinio ka toro nei Pol, abinimei jikili laka. Vonganei, mia kiniou neiila naio riva toa kiado parinio tubo Veliks jum̃ano, napano naio jo rove yako Sisiria. Kamjuo, kuvila batitig taara tai na tomu na mira na kiado, ka kuvisirag kuku vatitig rivu ka Pol, kuvuru naio rivatove. Kamiu kumijikia kuvuru tomu na mira toromomou ve juo [200], vija duelimo va aluo [70] napano avar parinio bue kulorinio, vija toromomou ve juo [200] bereio napano abar mira nalo na uteute. Kuvidu Pol kanano parinio bue kulorinio tai bunu ka naio mijikia totano eaio. Kiniou nejidom ka kamiu kuvituvan banei bogiano, ka m̃erenio koveri [9] bogo napano vio melijo ruei.”
ACT 23:25 Naruei toro na toru nei naio jiri m̃esi tai ka adukario rivan vijalo, naio jirio jibe nei, berenio:
ACT 23:26 “M̃esi nei, kiniou Klotias Lisias, napano nebivitauia biedu banso, Parinio Tubo Veliks, napano jau kobe toro na toru na vio Romo napano jau kobitikar kiado burum̃ara tanobuku nei.
ACT 23:27 Kiniou najaaro toru ka nevitavo vijaso bereio ea m̃esi nei. Toro napano aburio biedu banso na, kiano tukunu nene jibe nei: beamu, kulo Ju nalo na vio nei abokar naio, vaataro ka auebinio. Avona karina, nemijogial ka napano naio jo yetano ka kiado vitikariano na Romo, naruei kumemi nubatove, ana nuburular naio den kulo Ju nalo nei jum̃alo.
ACT 23:28 Naruei kiniou nejidom nejikia ka venia naruei naio be burupati na vite nei, naruei noburu naio batove ea kialo komeli na toru.
ACT 23:29 Ea bogo na, kiniou nemial ka napano naio maka rila titai napano rimemedu ka mia auebinio p̃eli na adu vironiano rivanio, mia nemial jibe kanio nalo ajum̃a amila baravo naliko ka tivelinio na tuboiano na nalotuano na kanalo ga.
ACT 23:30 Avona karina, iliano tai binimei bokar kiniou, ber aberiio ruei, amileal m̃arabo ruei ka ala vonio bereio ka auebin rim̃aro. Mia kiniou nemial bo ka neiila naio riviedu sop̃eli ga, mia neber bunu ka nalo napano tiniel jerio, neber monoka nalo aviedu averial ea miramo vite nalo napano ajidom atibure naio riviorio.”
ACT 23:31 Naruei tomu na mira nalo amila jibe ka napano kialo toro na toru nei berenio, naruei bogiano ana aburu Pol, mia burum̃ara taara nei ajuvan vio Yerusalemo, aba abokar vio Antipatris.
ACT 23:32 Naruei kavijo nene, tomu na mira nalo na amiel ka jaalo ga abavin bereio Yerusalemo, mia nalo napano abar parinio bue m̃arauo, naliko kia Pol vo, aban ea kialo m̃arabo abano lie abatove Sisiria.
ACT 23:33 Mia bogo napano abinimei aboru ea vio nene, amidu m̃esi nei ban parinio tubo nei naruei, iorou kanio ana aburu Pol ba ajuvan naio joa jum̃ano.
ACT 23:34 Naruei parinio tubo nei naio buluku m̃esi nei bisi, ana naio bika den Pol, ber naio be toro na tanobuku na vabe. Ana Pol naio berenio naio be toro na vio yako Silisia ga,
ACT 23:35 ana parinio tubo nei ber bereio, ber “Mo bo ga, kito monoka rotu rorea ga nalo napano mia amei ail vanso, naruei bogo napano ver amei, mia kiniou novurulo ea nailivatitigiano kitoliko.” Mia naio ber ka kiano tomu nalo na mira, ber “Toro nei naio mijikia to vija kito beamu vo ea yimo moruo nei, Parinio tubo Erot kiano, ninei kito rojua vonganei, mia kamiu kuvisirarago kuku vatitig rivu ka naio ea vio na.”
ACT 24:1 Mo Pol naio jo jibe na-o, bokar bogoti jumo barlaka, ana iorou kanio ana Parinio toro lu na vio Yerusalemo neibano Ananaias naio binimei rove nei Sisiria, naio naliko navurim̃araboiano dolu nalo tealo na kulo Ju nalo kialo, bija toro tai na kialo tuboiano, ka mia naio ril kanalo, siano Tetalas. Naruei nalo nei aba amial Parinio Tubo Veliks ka averial vite nalo napano ajidom ka ail rivan Pol riviorio.
ACT 24:2 Mo nalo abio Pol binimei joomo bunu, ana Veliks naio jian bogo ban Tetalas ka mijikia rivetavo ea kanalo iliano. Mia naio mil ban parinio tubo nei naio berinavo “Parinio Tubo Veliks, kumemi numisaaro toru laka ka nuvitumolu ea miramo banei, bior ka napano numialio ka napano jau kojom̃a kobitikar kumemi bo laka. Jikario ea bogo napano jau kobokar im̃auano nei, binimei bokar vonganei, kiamo masouano naio mila tum̃aro novo joa buruvenuo nei, a jau kojom̃a komila vite vou nalo telabo ka rijai im̃auano na vio nei.
ACT 24:3 Tibe na, kumemi nuberenio kenememi burum̃ara sivaiano banso ka napano dam̃ariga jau kojom̃a komila batitig kumemi bo laka ea vio nei jibe na.
ACT 24:4 Mia jau, kobe kanamo im̃auano telabo, maka rivu ka kumemi nuvila lelanso ka kenememi iliano nalo ve telabo laka, mia kiniou najidom ka novika denso kovijuku rivu ka kumemi, keiagago ka kenememi iliano telisu tai napano bulati ga.
ACT 24:5 “Mia ea tivelinio na toro nei, kumemi numialio jibe ka pariparinio kirisikili kija. Naio jom̃a miel janea kulo Ju nalo ea buruvenuo dolu nalo, a ea vio nonovio napano naio ban eaio, mia naio mila tomu nalo aburuburevurelo a amila baravo. A naio be navurim̃araboiano tai na taara na tomu nalo neibano, napano aberenio naio miyotuba ea vio Nasarete, napano p̃eli naio be nalotuano dolu tai koviobo, p̃eli na ver makanio, mia nalo ajum̃a amila baravo ga na.
ACT 24:6 Ana bogo napano toro nei naio binimei jo Yerusalemo, naio mila kirivova-o mia naio jidom rila bulag tolu na yimo lu na kenememi nei, tenene na kumemi nubano nubokario.
ACT 24:8 Mia ver jau kovika den naio ga, mia komijikia kojog ka vite nalo nam̃a nuberenio nalo abe riano ga.”
ACT 24:9 Ana bogo napano naio jom̃a milili jibe na, ana kulo Ju dolu nalo ajum̃a ap̃iliṽilig pariparilo, aju aberverenio aberinavo “Nina naruei, jibe na naruei, be riano ga na.”
ACT 24:10 Ana iorou kanio, parinio tubo nei naio bitikar Pol ana jian bogo banio ka naio mijikia river kiano verdop̃eiano. Naruei Pol naio berinavo “Parinio Tubo Veliks, jibe ka napano jau kejibure kumemi ea buruvenuo nei ka yuka telabo abarlaka ruei, mia najaaro ga ka notumolu notukamu ea miramo ka nodu kanaku verdop̃eiano.
ACT 24:11 Mia kiniou nejidom never kaso ga, ka nabavin yako Yerusalemo maka vesiou leleio. Ver jau kovika vatitigio ga den tomu nalo, mia jau keleal ka kiniou naban ea vio na ka ga nava novolkouo ea Atua Kunuano Lu, maka rivokar bogoti ve duelimo ba veri [14] vo.
ACT 24:12 Mia bogo napano nojoa vio na, mia maka aial ka napano kiniou nemila vite tai. Maka nala siniabu vija toro tai, a maka neilili van tomu tai neverenio nalo amila vite tai. Ea Atua Kunuano Lu, p̃eli na ea yimo nalo na volkouano nalo, p̃eli na ea vio be na ea komeli, mia maka nala titai leleio.
ACT 24:13 Mia vite nalo napano nalo aberii kaso vonganei na, ka kiniou nemila jibe na jibe na, nina be iliano na kanalo taara ga na, mia nalo maka aver vite tai ka rikurukar kialo iliano vanso, ka rila kanalo iliano nei rive riano.
ACT 24:14 “Mia vite takurano ga kiniou nemijikia najamo kanio, nemijikia never kaso neverenio, nao, kiniou nemila nina. Vite na, napano kiniou nojom̃a najakii M̃arabo Vou nei, napano m̃a aberenio nalotuano dolu. Mia maka tibe na, bior ea m̃arabo na, kumemi numitu nubolkouo ka Atua takurano ga, nina Atua na korobimemi tormoruo nalo kanalo, numitu numonea ga vite nalo napano kenememi tuboiano berenio p̃eli napano kenememi naverialiano nalo abivitauiaio.
ACT 24:15 Mia jakii vite nalo na, mia kiniou nojo ga ban Atua, be verare ga ka napano nalo bunu aju abitikuku kanio, ka mia naio rila tomu nalo nonovio ameul bereio ea nam̃ariano, nina nalo napano amemedu ea mirano, a nalo napano maka amemedu ea mirano.
ACT 24:16 Naruei bior kiniou nemijikia ka mia Atua rila tibe na, mia maka nosidomii ka mia nela re bajago na bova tai leleio. Mia bogo nonovio ga, nemila vonvon toru laka ka mia vite tai ve telisu tul re kiniou bogo tai, river ka nemila bova ea Atua mirano p̃eli na tomu nalo miralo.
ACT 24:17 “Mia yuka tealo barlaka ruei, mia nojom̃a naban ea buruvenuo dolu nalo, mia karina, vonganei ga, ana nebinimei bereio ea vio Yerusalemo. Mia tomu nalo na laka yako ajuvanini ijaiano tai ka rijai kenememi tomu nalo na vio Yerusalemo, ana na kiniou nabar ijaiano nei nebinimei, nabar banlo, a nejidom nava nala sida bunu ea Atua Kunuano Lu.
ACT 24:18 Ana bogo na m̃a kiniou nojoa Yimo Lu, nemila sida na meravoano bisi, ana na nalo na abinimei amial kiniou. Ka bogo na, maka bunu ve toro dolu tai atu rivija kiniou, mia maka ve iliano p̃eli na uetubaiano leleio, mia iorou kanio, ana kulo Ju nalo tealo na vio Esia abinimei, ana nalo naruei ajikar siniabu nei.
ACT 24:19 Mia nalo napano abe burupati na vite nei, ver asidomii ka kiniou namila vite tai bova, mia bo kanio ver nalo bunu atu rivija kito ea vio nei banei ka averialio kaso, mia maka neialo.
ACT 24:20 Ver p̃eli, mia bo ka jau kalavonio ka kovika den nalo dolu napano aju na, ka bogo napano aburu kiniou naba nabavin ea kanalo komeli, mia amileal kiniou nemila venia. ?Kiniou nemila vite venia na maka rimemedu, p̃eli na neber iliano venia na maka rivu? Nejidomiio-o, maka lele garuei.
ACT 24:21 Mia iliano takurano ga na kiniou neberenio banlo, neber jibe nei, neberinavo: Kiniou nemial jibe ka kamiu kumisidom kuvil rivan kiniou banei, rivior ga kanaku moneano nei, ka bogo napano toro m̃aro, karina mia naio mijikia rimeul bereio. Naruei kiniou neber iliano na, karina mila ana nalo ga ajum̃a amila siniabu kalo toru bereio.”
ACT 24:22 Ana Parinio Tubo Veliks nei, naio mijikia kija ruei vite telabo ea tivelinio na M̃arabo Vou nei, mia bogo napano naio mial ka siniabu neibano, kulo Ju naliko Pol amila bior vite nei, naruei naio jetavoko iliano ga, berinavo “Bo, mia kito rotua vio nei beamu vo. Mia kiniou notororea ga toro na toru na kulo na mira nalo kanalo Lisias tu mave Yerusalemo rimei, ana mia nemijikia nojog vatitig kiano veriiano tukamu vo, avona bisi, ana nejev kanaku natibureano van kamiu.”
ACT 24:23 Mo naio ber ka kiano tomu na mira nalo ka avokar Pol vo, nalo atukuku kanio, mia naio berenio nalo ala sikili laka re rivanio, monoka ajamo ka naio rieliel kija ga, a averbure re kiano bilbilu nalo ka amei aiadu kanio avitikario.
ACT 24:24 Mia Parinio Tubo Veliks nei, kouano be tira re Ju tai, siano Trusila, mia naljuo nei ajidom atukunu kija naliko Pol vo. Mia legiano tealo barlaka ruei, bisi na abe juo abinimei ea vio na Pol joaio, ana aburu Pol binimei, naruei Pol mil bijalo, naio berii kiano moneano na ea Kristo Yesu.
ACT 24:25 Mia Pol juvan iliano telabo lie vo ban naljuo, naio maka rialerinio ealo leleio, mia berii jum̃abe ka napano toro monoka rila bajago na memedu, a ka napano toro monoka telan vuu vatitig ka kiano meuliano, mia berii bunu tibureano napano Atua kanano ka mia rimei ea legiano na maaro. Naruei bogo napano Veliks mijog iliano nalo nei, naio mijog jibe ka julu m̃elea kiano jidomiano, mila naio merou kija, mo naio ber ka Pol, berinavo “Mo bo, bare ga vo. Jau kava joomo nei bereio vo, mia ver kiniou neleal kanaku bogo tai, mia neiila toru riviedu kaso bereio.”
ACT 24:26 Mia bogo napano Veliks naio mijog iliano nalo nei, mia naio be kiano jidomiano va tai bunu, napano naio jidomii berinavo mia Pol sian puruveru na toru tai rivan naina, ka rila ka naio river Pol naio mijikia taluvo bereio. Naruei kiano jidomiano nei mila naio jom̃a miila toru ka Pol julaka ga, a naio jo jukunu va telabo bijaio.
ACT 24:27 Mia naio jom̃a milala jibe na banbano-o bokar yuka juo, ana na naio bisi ea kanano im̃auano nei. Mia naio maka rijamo ka Pol ka taluvo bereio ea vio napano naio joaio, bior naio jom̃a jidomii ka rila kulo Ju nalo asaaro ka naio. Mo iorou kanio, ana na toro dolu tai binimei midu Veliks nene jeleigio, napano siano Posias Vestas.
ACT 25:1 Ana parinio tubo vou nei Vestas, naio binimei yako Sisiria, binimei ka rivitikar kanano tanobuku nei, mia iorou ka napano bogoti tolu ga barlaka, ana naio mial ka monoka riva rivitii vio mave yako Yerusalemo.
ACT 25:2 Ana bogo napano naio bokar vio nei, ana bior naliko tomu na tortoru nalo na kulo lu nalo, bija tomu dolu na tortoru na kulo Ju nalo, ana aberii niegeniege Pol banio. A nalo ajututua ka naio,
ACT 25:3 aberenio ver naio jidom rila tena novo tai vanlo, nalo ajidom naio riila Pol rimei bereio ealo, napano amijikia avuru riva komeli ail vanio. Aber jibe na, mia nalo aju ajidomii luklukua ruei ka ver Pol rimei, mia nalo ava atu rorea naio yako, ka mia auebin ga naio rim̃aro ea m̃arabo iviso viovare.
ACT 25:4 Ana Vestas naio berinavo “Bo ga, mia vesiou re ga ana kiniou bunu navan bereio yako Sisiria, ea vio napano ajum̃a abokar toro nene joaio.
ACT 25:5 Tibe na, mia kamiu tomu na tortoru tealo, kumijikia kuvitakisor kiniou ravatove, ka mia reial tum̃abe. Ver toro na mila vite nalo tai napano maka rimemedu, mia romijikia rala iliano ea bogo nene ga.”
ACT 25:6 Naruei Vestas jo naliko yako Yerusalemo maka rivokar bogoti ve duelimo ba veri [14], ana naio batove bereio yako Sisiria, naliko nalo nei tealo. Ana ea legiano dolu nene, ana naio ba jotano ea kanano vio na tibureano, ana berinavo ava avuru Pol rimei.
ACT 25:7 Mia bogo napano Pol binimei joomo, ana kulo Ju na vio Yerusalemo napano ajakisor Vestas abinimei, ajikili aju, ana ajum̃a aberial burum̃ara vite va nalo telabo napano aber Pol naio jom̃a milaio, mia kanalo iliano nalo nei maka atu sikili leleio.
ACT 25:8 Mia bogo napano Pol naio jidom ka sian kiano verdop̃eiano, naio jekorov bulati ga berinavo “Kiniou maka nala titai leleio, napano nemilakorov tuboiano na kulo Ju nalo kanalo, a maka nala niegeniege Yimo Lu na vio Yerusalemo, a maka nalakorov leleio bunu tuboiano na parinio tubo na vio Romo nei, Sisa kiano.”
ACT 25:9 Mia Vestas nei, naio jom̃a jidomii ka rila kulo Ju nalo ajog rivu ka naio, ana naio jidom ka rilavonio ka rila tibe ka napano nalo aber kanio, ana naio bika den Pol, berinavo “?Jum̃abe, p̃eli bo ka mia kiniou novuruso rava komeli yako ga Yerusalemo, ana mia jau kotumolu kotukamu ea miraku bereio ea vio na?”
ACT 25:10 Ana Pol berdop̃e, berinavo “Vonganei, ea vio nei, kiniou nojumolu nojukamu nojua miramo, jau toro natibureano na tuboiano na Sisa na vio Romo ruei. Verenio vite tai napano ka mia kala van kiniou, vio nei naruei naio memedu ga ka jau komijikia kalaiio. ?Mia kiniou navavin mave yako Yerusalemo bereio ka vaio? Jau kobitilubar ruei ka napano tivelinio na ea kulo Ju nalo, maka kialo iliano tai ea kiniou tu sikili leleio.
ACT 25:11 Mia ver jau komial kiniou nemila titai bova napano memedu ka mia monoka nam̃aro riviorio, nina naio bo ga na, maka notom̃a nalavonio ka novuro denio. Mia ver nalo na, maka kanalo iliano tai bereio ka mijikia tumolu tu sikili, mia maka rimemedu leleio ka jau keiila kiniou navan bereio ea jum̃alo ka ala vaio napano ajidom van kiniou. Vonganei, jibe ka napano kiniou nemijikia nalaio, jibe ka nojotano ka vitikariano na vio Romo, mia kiniou neber vatitig kaso, kiniou nejidom ka Parinio Tubo Sisa na vio Romo, naio ga monoka tibure kiniou.”
ACT 25:12 Mia iliano nei mila Vestas ba mil naliko kiano vuroniano nalo beamu vo, avona bisi, ana binimei bereio, berinavo “Jau koberenio ruei kober kojidom Sisa ga tibureso. Mia kiniou neberenio bo ga na, parinio tubo nene, naio nei naruei napano mia jau kotumolu kotukamu ea mirano.”
ACT 25:13 Ana iorou kanio, bogoti tealo barlaka bereio, ana tubo dolu tai binimei yako Sisiria. Naio siano nei, Akripa Juo, mia binimei naljuo kuviviniene nei Benisi. Naljuo amijog ka Vestas jikar vonga kiano im̃auano napano be parinio tubo na tanobuku nei, naruei nalo ajidom amei aiadu ka naio.
ACT 25:14 Mia naljuo ajua vio nei bano-o, mia bogo telabo ajum̃a ajukunu naliko Vestas nene, mia bogoti tai ana Vestas naio jukunu banlo ea tivelinio na Pol. Naio ber ka naljuo, berinavo “Kiniou be toro tai joa kiaku yimo nalakoiano, napano joa Veliks jum̃ano beamu ruei, beamu ka napano kiniou nebinimei ea vio nei.
ACT 25:15 Ana iorou ka napano nebinimei, ana nabavin mave yako Yerusalemo, ana tomu na tortoru na kulo lu nalo, bija navurim̃araboiano dolu na kulo Ju nalo, abinimei aberii toro nei ka kiniou, ajidom ka kiniou neverial kiano tibureano tai kanio.
ACT 25:16 Mia kiniou neber batitigio kalo, neberinavo kiniou maka leleio nejikia nala tibe na ga, mia monoka novuru tivelinio ve juo amei vio takurano beamu vo, ana nalo napano amila veriiano, monoka averialio ea mirano toro napano amila veriiano kanio, a monoka nodu bogo van toro nei ka naio bunu rudu kanano verdop̃eiano. Kiniou neberii kalo neberinavo bajago na tuboiano na vio Romo na kenememi jibe na naruei.
ACT 25:17 “Tibe na, nemei nei bereio ea vio nei, ana kulo Ju nalo atumolu den Yerusalemo amei ka kumemi nuvila iliano. Mia bogo napano nemijikia ka nalo abinimei abokar vio nei ka vio be kijev, maka netii lilian bogo mia kavijo ga, nabano nojotano ea vio na tibureano, ana nabio toro neibano Pol binimei joomo.
ACT 25:18 Mia bogo napano kulo Ju nalo ajumolu ka averial vite nalo na toro nei, nejidomii neberiam̃a mia nojog aver burum̃ara vite va tai napano aberenio naio milaio, mia nina maka leleio.
ACT 25:19 Nalo aber ga vite sesa nalo ea tivelinio na kanalo nalotuano ga, napano aju amila baravo kanio naliko toro nei. Nina ea tivelinio na kanalo bajago moruo ga nalo, a ea tivelinio ka toro tai, siano Yesu, napano naio m̃aro ruei, mia Pol naio jom̃a berenio naio meul bereio.
ACT 25:20 Mia nalo ajum̃a aberii vite nalo napano kiniou maka nejikiaio, tenene na maka nejikia ka mia nala venia naruei, ana nebika denio verenio naio sidom ka rivan bereio mave yako Yerusalemo, ka nalo ala kanalo iliano ea vio na ga.
ACT 25:21 Mia karina, toro nei naio ber p̃eli ga, mia rivan re tibe na, naruei naio jumolu ber naio jidomii ka Parinio Tubo Sisa ga naio tibureio. Kanano iliano nei mila ana nobokar naio joa vio nei kia navo, ka kiniou neleal m̃arabo tai ka mia neiila rivan yako Romo, ka mia Sisa rivitii vite nei.”
ACT 25:22 Ana Akripa ber ka Vestas, berinavo “Mo kiniou bunu tinieku jii laka ka ver nemijikia nojog kija toro na kanano iliano.” Ana Vestas berinavo “Bo ga, beni ga, na mia kamjuo kuvitukunu.”
ACT 25:23 Mia kavijo, amila vite nonovio ju vatitigio ea kanalo burum̃ara yimo na vioriano tai, amila jibe ka burum̃ara titai. Ana tubo na toru nei Akripa naljuo kuvivinieno nei Benisi, naljuo abinimei napano amiovovualo novo batitig ruei, mia abinimei joomo napano tomu na tortoru na kulo na mira nalo bija tomu na tortoru dolu nalo aju amiel iorou kalo. Ana amila vite nonovio ka naljuo nei jibe ka napano m̃a amila ea bogo na tortoru nalo na jibe nei. Amila bano-o bisi, ana Vestas berenio avuru Pol rimei joomo.
ACT 25:24 Ana aburio binimei, ana Vestas jian kiano iliano, berinavo “A Parinio Tubo Akripa, bija tomu dolu na tortoru nalo napano roju nei banei, nina be toro napano kulo Ju nalo abinimei amil ban kiniou biorio. Yako Yerusalemo, a ea vio nei, nalo abinimei abika jikili den kiniou aberinavo netiburio, aju amil telabo aberinavo toro nei, maka rimemedu ka naio rimeul riva lie vo, mia nalo ajidom ka naio monoka rim̃aro sop̃eli ga.
ACT 25:25 Naruei kiniou nebitii vite nei bano-o, mia maka neial titai ka mia rimemedu ka naio monoka rim̃aro riviorio. Avona bisi, ana toro nei naio bunu bika parinio tubo na toru na vio Romo, berinavo naio ga tibure naio, ana vonganei nojom̃a nebitiio ka mia monoka neiila naio rivan ga ea Sisa jum̃ano naruei.
ACT 25:26 Mia monoka nevivitauia m̃esi tai rivan vija toro nei ea kiado parinio tubo na, mia kiniou maka nejikia vatitigio bunu ka mia nevivitauia venia tua m̃esi nei. Tenene naruei, kiniou najaaro ka noburu naio biedu jikili jukamu ea miramo, tubo na toru Akripa, bija kamiu tomu dolu na tortoru nalo na, ka rovitii kanano iliano nalo nei bereio, ka p̃eli mia kamiu kumijikia kuvija kiniou ka mia nevivitauia venia tua m̃esi nei.
ACT 25:27 !Maka rivu ka kiniou neiila toro nei rivan ea natibureano na toru, napano maka neverial vatitigio ka iliano vaio napano milaio ana nemiila naio bano!”
ACT 26:1 Ana Akripa berii ka Pol, berinavo “Mo, kiniou nejian bogo banso naruei ka kotukunu kaso ea tivelinio na vite nalo na.” Ana Pol naio buku jum̃ano jibe na, ana jikar kiano iliano naruei, ka sian verdop̃eiano na vite nalo nene.
ACT 26:2 Naruei naio berii jibe nei, ber “Parinio Tubo Akripa, kiniou nemial bo laka ka napano nemijikia notumolu banei ea miramo, ka mia nalavonio ka neverdop̃e iliano nalo napano kulo Ju nalo amila ban kiniou.
ACT 26:3 Neber iliano na bior jau naruei, jau komijikia batitig ruei kanado bajago nalo kito kulo Ju, a jau komijikia batitig bunu ruei vite nalo napano bogo nonovio kiado tomu nalo ajum̃a amila baravo kalo biorio, a napano ajum̃a aburuburevurelo bunu biorio. Naruei kiniou nebika denso ka jau tiniem ser re kiniou, bior mia kanaku tukunuano naio tokol vite ve telabo tibe na naruei, a ve tebievi kija bunu.
ACT 26:4 “Kiaku tukunuano naio jikar jibe nei, kanio kiniou, jikar ea bogo napano nebe kiritete kia ga vo, nojo dam̃ariga kumemi liko kulo Ju nalo ga, nina ea kiaku vio, mia iorou kanio, ana yako Yerusalemo bunu. Naruei nalo amijikia batitig kiaku bajago nalo re nua ruei, a amijikia ka bogo napano nebe toro m̃eaku kia ga vo,
ACT 26:5 mia nebijurukar taara na Varisis nalo, napano nalo naruei abokar m̃elea kiado tuboiano jovulu taara dolu nalo. Naruei ver nalo asaaro ka nalo bunu atumolu atukamu ea miramo, mia nalo amijikia averialio vanso, ka vite nalo nei napano nojom̃a neberenio nalo abe riano ga nonovio.
ACT 26:6 “?Naruei bior vaio ana nalo tiniel jer kiniou bereio? Nina bior kiniou noju jikili dam̃ariga ea verikariano tai napano Atua mila bija korobido nalo nua ruei, napano naio berenio mia naio rila tomu nalo napano am̃arm̃aro mia nalo amemeul bereio.
ACT 26:7 Verikariano nene, kiado yati nalo duelimo ba juo [12] bunu nalo ajum̃a abolkouo legiano a bogiano ka amijikia avokario. !Parinio tubo, jau keialio vo! Vite nei Atua berkario ban kulo Ju nalo ruei, ana vonganei kulo Ju nalo nei ajidom ail van kiniou bereio bior kiniou nomoneaio.
ACT 26:8 ?Kiniou maka nejikia, mia bior vaio naruei ana tomu nalo ajum̃a aber Atua naio maka rijikia rila toro napano m̃aro ruei rimeul bereio?
ACT 26:9 “Be riano, beamu nua, kiniou bunu nejibe na, maka namonea vite nalo na. Kiniou tinieku jer toru nalo napano amonea Yesu re Nasarete, a nemial monoka nalavio sikili ka rila sio nei ribisi ga.
ACT 26:10 Naruei ea vio Yerusalemo, nojom̃a nemila vite telabo jibe na. Tomu na tortoru nalo na kulo lu nalo amijamo kanio ban kiniou, ana nabano nemila telabo ka namoneano lu nalo nei aban ea nalakoiano, ana bogo napano ajiburelo ka monoka am̃aro, kiniou nojo joomo eaio.
ACT 26:11 A kiniou nojom̃a najanea yimo nalo na volkouano, bogo nonovio ga nojom̃a nemila kikilo, a nojoma nomila vonvonlo, nojom̃a nomila vonvonlo ka aiolua Yesu siano. Mia nojom̃a nemila jibe na banbano-o napano nebitunu m̃ele, naruei nemijil dedade ealo abeve terakurano janea buruvenuo dolu nalo, karina, kiniou naban kalo bereio ea komeli nalo napano aba ajualo.”
ACT 26:12 Naruei Pol naio jom̃a jukunu ban kia, berinavo “Ana bogo tai, kiniou nabatove Tamaskas ka nala tibe na van nalo napano ajua vio na. Tomu na tortoru nalo na kulo lu nalo, nalo amiila kiniou nabatove, a amidu m̃esi tai ban kiniou ka mia nemijikia nala tibe na.
ACT 26:13 Naruei kumemi numitu numiel nubatove, ka m̃erenio jo memedu, nemial burum̃ara yulu tai merera ea vio mave, napano merera jovulu m̃erenio, naruei yulu nei mijegili memedu vio napano kumemi numituaio.
ACT 26:14 Naruei miamoiano nei naio toru jibe na naruei, mila ana kumemi numitibirbili ea borotano, ana iorou kanio nomijog joono tai, mil ban kiniou jel iliano re Ipru ga, berinavo ‘!Sol o, Sol o! ?Bior vaio ana jau kojom̃a komila kiki kiniou jibe ka napano kojom̃a komila na? Jau kojom̃a jaamo je bereio kiniou jibe na, mia milaio ana jaamo mijalele laka.’
ACT 26:15 “Naruei kiniou nebika denio, neberinavo ‘?Ana Tubo, jau kobe kei?’ “Naruei Tubo mil ban kiniou berenio, berinavo ‘Yesu napano jau kojom̃a komila bova kanio, ninei be kiniou nene naruei.
ACT 26:16 Mia jau kotumolu bereio bior ka napano mia jau koim̃au kanaku. Kiniou nemiyotuba kaso jibe na bior vite na naruei. Banei kovitilubar kiniou ka mia kover kiniou kei, a iorou, mia keial kiniou notom̃a noyotuba kaso ea vite ve telabo ea legiano nalo na ju binimei kia iorou. Vite nalo napano nejiloglog kaso banei nei, naio naruei mia jau kava koverialio van tomu nalo.
ACT 26:17 Mia jau kava koverialio ka kulo Ju, a ka nalo dolu napano maka ave kulo Ju, ana mia keial ka nalo na, mia ala rivova kaso, mia niukniuku rivieso re, kiniou noyotuba kaso ea bogo nalo na jibe na, nalarurso. “ ‘Nina naruei, kiniou nemiilaso ka kavan ealo,
ACT 26:18 ka kovetavo ea miralo nalo, ka koviliglo ataluvo den melijokouo napano ajuaio, amei ea miamoiano, a ka atuvan moroano na Sim̃aro kiano tobo, mia amei ka Atua ga. Naruei ka bogo napano aviekar kiniou tibe na, mia Atua rivie kokoalo ka kialo kariano nalo, a mia rivijurukarlo ea kiano taara na kulo lu nalo kialo.’ ”
ACT 26:19 Ana Pol naio mil kia navo, berinavo “Nina naruei, Tubo Akripa, bogo napano kiniou nemial burum̃ara vite napano jaluvo ea vio mave binimei ea kiniou, maka bunu nejikia nala titai bereio, mia nomonmonea ga Tubo kiano iliano ga.
ACT 26:20 Ana na-bano Tamaskas jukamu, naruei nemioliolu ban tomu nalo, neberenio monoka aviliglo rivan ea Atua, a kialo meuliano nalo monoka avu bereio aviniu, rimemedu ka viligiano nei. Ana iorou kanio, nabavin bereio ea vio Yerusalemo, nemioliolu jibe na bereio banlo, karina nabano nemila jibe na ea komeli dolu nalo ea tanobuku na vio Yutea, a karina, naban janea vio reraio nalo napano maka ave kulo Ju nalo kanalo, nomidu iliano nene ga banlo.
ACT 26:21 Naruei bior kiaku im̃auano nei ga, mila ana kulo Ju nalo abinimei abokar kiniou joomo ea Atua kiano Yimo Lu, ana ajidom auebin kiniou nam̃aro riviorio.
ACT 26:22 “Mia binimei bokar banei, ijaiano napano binimei ea Atua jo bija kiniou dam̃ariga, a vonganei nemijikia notumolu notua miremiu kamiu tomu na tortoru nalo, a kamiu kulo dolu nalo ga bunu, a be kiaku bogo ka nemijikia neil van kamiu. Venia napano Mosis naliko naverialiano nalo aberiio nuanua ruei, aberinavo mia tibe na mia tibe na, vite na ga kiniou nojom̃a neberialio ban kamiu vonganei.
ACT 26:23 Nina naio jibe na, napano Naverikariano, na bogo napano mia naio rimei riyotuba, mia tomu nalo monoka ala rivova ka naio, mia iorou, mia naio naruei ve toro na meul ve moti den m̃ariano bereio. A kiano tumoluano nene bereio den nam̃ariano, mia vite na naruei rive m̃arabo ka rivar yulu na ioruriano rimei rimiamo ea tomu nalo nonovio, kulo Ju nalo a nalo napano maka ave kulo Ju.”
ACT 26:24 Naruei bogo napano Pol jom̃a jian kiano verdop̃eiano jibe na, Vestas jumolu jekorov kanano iliano nalo, mil toru, berinavo “!Pol, jau komiavovu ga na! Jau kojidom ka jau kove masou ka jikiaiano doldolu nalo, naruei milaio pariparimo banbano-o m̃a miavovu garuei.”
ACT 26:25 Ana Pol berinavo “Kiniou nabameneaso, Parinio Tubo Vestas, mia monoka never kaso ka paripariku naio bo ga. Kiaku iliano nalo napano nojom̃a neberialio ea vio nei, abe burupati na ilirianiano napano abe riano laka garuei.
ACT 26:26 Vite nalo napano nojom̃a nojukunu kanio, nemijikia batitigio bo ka Tubo Akripa naio mijikia ruei, abinimei bokar kiano vitiiano, nina naruei mila ana maka nemerou ka neverialio ea mirano. Vite nalo nei, maka ayotuba ea vio na telisu ga tai napano toro maka rijikia vo, mia tomu nonovio amijikia ruei, ajum̃a aberiio va telabo bunu.
ACT 26:27 ?Mia Tubo Akripa, venia naruei naio be kiamo jidomiano riano ea vite nalo nei? ?Kiniou nemial ka jau bunu, komonea iliano nalo na naverialiano nalo re nua, a?”
ACT 26:28 Naruei Akripa ber ka Pol, berenio “!Ee, makanio! ?P̃eli jau komil ea bogo kiri bulati ga, jau koberiam̃a komijikia kovuru kiniou bunu neviedu neve Kristo kiano, na?”
ACT 26:29 Ana Pol berdop̃e, berinavo “Ee, kiniou maka nejikia, neil bogo ve bulati ga p̃eli na ve tebievi, mia vite takurano ga nobolkouo ka mia Atua rila banei, nejidom ka jau, kamliko nalo dolu na, napano kumitum̃a kumiagago ka kiaku iliano, nejidom ka mia kamiu kumei kuvitibe ka kiniou. Maka never ka mia kamiu kuvar marimieni nalo na tibe ka napano nabario, mia neberenio bo ka kamiu kumei kuvitibe ka kiniou, napano nemijev Yesu Kristo ea kiaku iviso, nebinimei nebe toro vou ea naio.”
ACT 26:30 Mo Tubo Akripa naio jetavoko iliano ea vio na, ana naio naljuo Vestas, bija Benisi, naliko tomu dolu nalo na tortoru napano ajum̃a ajutano mave naliko, nalo ajumormolu, abava tavio bereio.
ACT 26:31 Ana bogo napano abava tavio bisi na, ajum̃a aberverii kalo aberinavo “Toro na maka rila titai rivova leleio, napano rimemedu ka mia naio rim̃aro p̃eli na mia rivar vironiano riviorio.”
ACT 26:32 Ana Akripa ber ka Vestas, berinavo “!Ver toro na river re Sisa ga tibure naio, mia naio mijikia riva tavio ga tibe na ruei!”
ACT 27:1 Ana ea bogo na, kiniou Luka, kiniou bunu nojo bija Pol ea vio Sisiria, ana neberenio kiniou bunu navan vija naio Romo. Naruei bogo napano tomu na tortoru nalo amial ka bogo na ka mia nuvano, aburular Pol naliko nalo dolu napano aju joomo ea nalakoiano, amidulo jua toro na toru na mira tai jum̃ano. Toro na, naio siano Julias, a naio be navurim̃araboiano na taara na tomu nalo na mira nei napano abiolo ka “Taara na Okastas.”
ACT 27:2 Naruei naio buru kumemi nubano, nubajou koyou ea tei, naruei nalo amileal uako tai na vio Atramitiam ana nubavin eaio. Ana ea bogo na, Arestakas na vio Tesalonaika na tanobuku na Masetonia, naio bunu kumemliko. Ana kumemi numidu uako nene nubano, napano m̃arabo nene ka mia riva sel ea bulu yaniniobi nalo na tanobuku na vio Esia.
ACT 27:3 Ana ea kavijo, kumemi nubinimei nubokar vio nei Saiton, ana ea vio na, Julias mila bo ka Pol toru laka, napano naio mijamo ka bauro ka rial kiano bilbilu nalo, a naio mijamo ka nalo amijai Pol ka vite nalo tai ka kiano m̃arabo.
ACT 27:4 Naruei kumemi numituvan vio nei bereio, nuburo ea tei banbano-o, ana numitup̃e jegi ka bogo na, mila ana bogo napano nubokar uleule na vio Saipras, mia numisel ea taakano tivelinio, tivelinio bano.
ACT 27:5 Naruei nubar korovio burum̃ara tei neibano jo tavio ea tanobuku juo na vio Silisia bija vio Pamvilia, naruei nuburo nubinimei nubokar komeli na Maera, ea tano-buku na vio Laesia.
ACT 27:6 Ana uako nei naio miyon kumemi ea vio na, naruei toro na mira nei Julias naio ba jirag m̃arabo dolu. Ana naio mileal uako tai na vio Aleksadria napano naio jo ban ea buruvenuo napano kumemi numisidom ka nuvan ea na, Italia, ana naio mila kumemi nuban ea uako nene kija.
ACT 27:7 Ana kumemi nubatavio bereio ea tei, mia jegi bova ga, mila ana nuburo melmelumu ga nubano-o nubokar legiano nalo tai, naruei numila vio toru, numiaveve ka jegi jibe na ga ba bokar jelati na vio Nitas, mia jegi juko kumemi batitigio garuei. Naruei nubarip̃ilig, numiakar jelati dolu na vio Salmone ea uleule na vio Krit, ana numisel ea taakano tei melumu.
ACT 27:8 Kumemi numiaveve ga uleule nene, numitum̃a numitakii nubano-o napano jegi jom̃a mue kumemi bova kia ga vo, ana nubano-o nubokar bulu yaniniobi tai napano abio kanio “Bulu Yaniniobi na M̃araiu,” vaataro ka komeli na vio Lasea.
ACT 27:9 Ana kumemi numitua kija vio na telisu, mia nalo amial ka bova laka naruei, bior jegi jom̃a mila jibe na ka kumemi, mia numitua m̃arabo kirisiou ruei, mia m̃arabo tebievi jo keano vo, a vonganei, be bogo na jegi bija burum̃ara niavo ruei. Bogo nonovio ga ajum̃a aberenio bogo kirivova nei jom̃a jikario ea siberio na Jokoluolu Na Viekokoano, mia vonganei, jokoluolu nene barlaka ruei. Naruei Pol naio mijog bova ka vite na, naio ber vatitigio banlo, berinavo
ACT 27:10 “Tom na tomoruo nalo, kiniou nemijog lubar ka ver ravano, mia rivova laka, mia vite nalo nonovio avavakovio ga. Kiniou nemial jibe ka mia uako nei naio mijikia rimadudu ga vija sano vite nalo, a kito bunu, kiado meuliano nalo amijikia avavakovio ea tei.”
ACT 27:11 Mia toro na mira nei naio maka riagago ka Pol, mia naio miagago ka toro napano jilanivu ka uako, bija nana boru na uako nei. Mia naljuo aberinavo “P̃eli ga, mia rivu ga na, mia kito ravan ga,
ACT 27:12 bior kito maka rejikia rotua vio nei rivano-o rivokar napano rotua bogo na bo bereio.” Naruei nalo aberiio, ana nalo telabo amial bo ka kumemi nuvituvan vio nei, aber kumemi nuvuro ga ka nuva nuvokar bulu yaniniobi dolu tai, siano Viniks, ea uleule nei kia ga vo, napano amialio ka aber naio naruei bo ka nuvituaio, rivokar bogo na burum̃ara jegi na niavo nei tubabinio.
ACT 27:13 Naruei bogo napano amial ka napano jegi biligio, be jegi na saut naio jumolu kija naruei, amialio ana aberenio bo naruei, ana nalo ajidom aber jegi na naruei mia naio riuvu kumemi nuvan ea bulu yaniniobi napano numisidomio ka mia nuvan eaio. Naruei nalo aburu veru binimei mave, ana na nuburo nubano, numisel veve vio uro ga.
ACT 27:14 Mia maka vesiou, ana kumemi numiilo ka burum̃ara jegi uro tai naio jumolu binimei miuvu kumemi.
ACT 27:15 Jeg nei miuvuvu toru jibe na, naruei maka bunu nuvijikia nuvuro ka napano numidu jegi nei, mia nalo abilig ga uako ana ajuvanio, amijamo ka ga jegi nei jom̃a miuvu lilian kumemi nuba tavio ga, naruei jegi nei jom̃a miuvu titig kumemi nubano jibe na.
ACT 27:16 Ana na kumemi nuburo nubano, numitoluku vonio kija ga ea uleule sesa tai, siano Kaoda, mila naruei ea vio na ga kumemi numim̃au bijon ka uauako nene bano-o, ana aburu lario binimei mave.
ACT 27:17 Naruei nalo ajum̃a amerou aber tibe m̃a mia uako nei naio rivuruboṽe na, ana nalo aburu teli na tortoru nalo ajel yetano ka uako, ana na amiorkar kanio ka rivokar vatitigio. Ana amial ka napano jegi jom̃a miuvu titian kumemi nubano dolu ka ga, ana nalo amerou ka aju aban vaataro kanio baraam̃a nalo na vio Saitis, vaataro ka vio Lipia, naruei nalo aburu bereio m̃aaja. Naruei jegi miuvu titian kumemi nubano numitovulu vio nei, ana na vio melijo, mia kumemi nuburo nunu ga jibe na nubano.
ACT 27:18 Ana ea kavijo, ana jegi jom̃a miuvuvu biloulo kia ga vo, a tei jom̃a buku bilivilig kumemi, naruei nalo ajikar ka abuku bulavulag togogo nalo banvan ea tei.
ACT 27:19 Naruei ea legiano dolu nene bereio, vio bova kia ga vo, ana nalo abano amijubar bulag teli nalo a m̃aaja nalo a vite nalo na jibe na, abuku lo abanvan ea tei bunu.
ACT 27:20 Jibe na kanio legiano telabo bereio, napano mia vio yauo na mave naio kiri bobogio ga jo, maka nuvial m̃arivitano a maka nuvial mirano m̃erenio. Kumemi numial ka napano numitu kokouo ea jegi tai nei napano mia maka bunu ve toro tai sidomii ka river mia numeul.
ACT 27:21 Mia tomu nalo na uako nei maka bunu asinan legiano telabo ruei, nalo amijog bova toru laka, naruei Pol naio binimei mialo, ana ber kalo, berinavo “Tomu nalo, verenio kamiu kuviagago batitig ka kiniou nanua ruei ka bogo napano kito roju kia ga yako Krit, mia burum̃ara jogvaiano a burum̃ara laluviano nei maka rijikia rivokar kito.
ACT 27:22 Ana vonganei, mia kiniou never titai van kamiu bereio, mia kamiu kuvijikia kuvijog rivu eaio. Neberial ban kamiu, ka mia kiado uako nei mia naio rimadudu navo, mia maka kito tai leleio napano mia rivakovio.
ACT 27:23 Kiniou nemijikia vite nei bior ka napano bogiano ga, nemial kiaku Atua napano nojom̃a nobolkouo ka naio, nemial miila kiano nailiano tai binimei maluvo ka kiniou. Nailiano nei binimei jumolu ju vaataro ka kiniou,
ACT 27:24 ana naio berinavo ‘Pol, komerou re. Mia jau monoka kavano-o kovoru Romo, monoka kotumolu kotua mirano Sisa kia ga navo, ana nemijikia never kaso, ka nalo napano ajua uako na kamliko kialo meuliano, Atua jidom rijamo kanio vanso ga ka mia nalo ameul ga, nalo tai rivakovio re.’
ACT 27:25 Naina naruei, tomu nalo, kamiu kuvijog rivova re bereio, kiniou nebiekar m̃elea Atua ka mia tibe ka ga napano kiano nailiano berialio ban kiniou.
ACT 27:26 Mia vite takurano ga, mia kito monoka rovilig kiado uako riva sel uro ea uleule na telisu tai.”
ACT 27:27 Mia jegi nei jom̃a miuvu titig lelan kumemi nubano kia navo, bokar sude juo ruei napano numitum̃a nuburo janea burum̃ara tei na Metetireniano nei. Naruei ka bogiano tai, tomu nalo na uako nei abitilubar ka kumemi numitu nubinimei vaataro ka uleule tai kovio tai.
ACT 27:28 Naruei ajuvarvan teli batove, abuluku bululuoiano na tei bano-o bokario meta duelimo va veri [40], karina, aju kija ga telisu, karina amila bereio, abulukuio aber meta duelimo va rolu [30].
ACT 27:29 Naruei nalo amerou ka mia nuvuro nuva nuvijivi ea burum̃ara puruveru nalo tai p̃eli na venia, naruei nalo ajuvan veru na teremi veri iorou ea bareno uako, ana na nalo ajum̃a abolkouo ka veru teremi nalo nei monoka avokar kumemi, a ka viorijeni monoka rimei sop̃eli.
ACT 27:30 Ana tomu nalo na uako aberiio, aberenio mia ala sibilili kumemi dolu nalo, ka mia ala vonio ka adu uauako nei ga avuro avauro eaio. Naruei nalo amila sibilili kumemi, aberinavo “Oi, mia kumemi nuvidu von veru temi nei rivan yako beamu vo, ka nuvila vonio ka rivurukar kiado buruako.” Naruei nalo ajuvarvan uauako batove ea tei.
ACT 27:31 Ana Pol bitilubario, ana ber ka tomu na mira nalo, berinavo “Ver kamiu kuvisidom ka kamiu kumeul, nalo na monoka kuverburelo ka atu vija kito ea uako ga.”
ACT 27:32 Naruei na mira nalo nei amijogio, ajumolu vaarakurano ga abano aje kokorov teli nalo na uauako nei, ana naio mialalo den uako bano.
ACT 27:33 Naruei vaataro ka viorijeni mermeravo, ana Pol jidom asen titai, ana ber kalo berinavo “Ei, binimei bokar banei, be sude juo naruei napano kito rojua bogo na bova nei, maka rosinan batitigio rivu.
ACT 27:34 Ana bo ka banei, kito rosinan vatitigio kija rivu bereio, kanio niabedo nalo amijikia amei sikili bereio, tibe na ana mia kito romijikia romeul. Tibe ka napano neberenio ruei, mia maka lele kiri vijudo tai rijikia rivakovio, mia kito roviniu rovu ga.”
ACT 27:35 Naruei iorou ka napano naio berii vite nei bisi, naio ba midu joko tai, naruei bolkouo ea miralo, ber siva ban Atua biorio, karina burekokorovio jom̃a jenio.
ACT 27:36 Ana bogo napano nalo dolu amialio ka napano Pol jom̃a jinan jibe na, nalo bunu amonea ka be riano, mia nalo avu ga, naruei nalo bunu ajaaro ka asinan bereio, ana ajinan.
ACT 27:37 Mia kumemi nonovio napano numitua uako nei, kumemi nubokar toromomou juo duelimo va aluo ba ari [276].
ACT 27:38 Mia bogo napano abiniu ajinan bisi, amialio bo ka ala uako rimelala lie vo, naruei nalo abar bulag m̃arauiti nalo napano jibe ka sememi sinaniano, abukuvukulo banvano ea tei.
ACT 27:39 Naruei telikiti napano viomijeni kario, ana kumemi numial vio uro jo vaataro ga ruei, mia maka nuvijikia vio be nei. Ana amial bulu yaniniobi tai jo, a be bayono novo uro, ana na nalo aberiio, aberinavo mia ala vonio ka ala kenememi uako rivuro rivauro ea vio nene.
ACT 27:40 Naruei nalo aje bulag teli nalo na veru teremi nalo, ajuvanlo ajubo ea tei, a nalo amijubar bulag teli nalo napano amior kakario ka vuu na uako, ana aburu m̃aaja sesa na buruako, ka mia jegi riuvu kumemi nuva nuvia yono.
ACT 27:41 Kumemi numitu nuburo bano-o, naruei numiilo ka uako ba miakar belia ga burum̃ara yonovoro tai napano tei buru bijiilo ju vio takurano yetano. Buruako na uako miakar bayono nene, naruei naio birakar jo jikili batitigio jo, maka bunu rijikia rikulkulu leleio. Naruei burum̃ara niatuva nalo ajumormolu abinimei amidon boṽe baren uako garuei.
ACT 27:42 Mia na mira nalo ajum̃a aberii ruei, ka vere vite tai tibe nei mia auebinvinlo ga, nalakoiano nalo napano m̃a aju kuku kalo, ver makanio p̃eli mia nalo tai ala vonio ka aviako avatove ea tei, ajelio ava uro, mia avuro kilkil.
ACT 27:43 Mia kialo toro na toru naio berburelo ka nalo ala re, bior napano naio jidom ka Pol naio monoka rimeul ga. Mia naio ber ka kumemi nubiniu, berinavo “Mo, kito napano romijikia romijeliou, kito rotukamu, ratabulu ea tei ana reia vonio ka rovoru uro.
ACT 27:44 Ana kito napano maka rejikia reia, mia kito ravar m̃abulu, p̃eli na venia napano romijikia relealio ea uako nei ka romijikia romonmonea mave eaio, ana kito iorou rava uro.” Naruei ea m̃arabo nei ga, kumemi nonovio nubano-o nuboruvoru uro ea vio nei, napano kumemi nonovio numeul bo ga, maka kumemi tai rivakovio.
ACT 28:1 Mia bogo napano kumemi nubiniu nubinimei numitu batitig uro bo ruei, ana na tomu nalo na vio nei abinimei amial kumemi, ana aber ka kumemi aberenio vio nei naio be uleule tai, siano Molta.
ACT 28:2 Naruei nalo amila batitig kumemi bo laka, nalo abijuku bo ka kumemi mia. Ea bogo na, yuo jom̃a bovo, naruei nalo amial ka napano kumemi numijog niavo toru laka, ana nalo ajovokar sebi, mia abitikar vatitig kumemi jibe na.
ACT 28:3 Ana na Pol naio ba miabu bagaro na yeto tai, naio jidom rivukuio rivan ea sebi, ana bogo napano naio bar jakou ea sebi, mia kiri maro sesa tai mijukukar jo bure yeto nalo nene, mia naio mijog sebi mijegio bitunu, naruei naio mijuojuo den yeto nalo nei, mia m̃enkakar naio ea Pol jum̃ano, mia jerio.
ACT 28:4 Mia bogo napano tomu nalo na vio nei amial maro na m̃a jer binvin tomu jom̃a jakilele ea Pol jum̃ano jibe na, ana nalo amijuvaluva melumu ga ealo, aberinavo “!Keialio, toro na yimo nalakoiano nei, p̃eli naio be toro tai na m̃a muemue tomu dolu nalo telabo ruei! Tei jidom rila bin naio rim̃aro, mia naio buro kilkil ga, mia vonganei, mia maro na rila ka naio rimemedu na.”
ACT 28:5 Mia Pol p̃iliglar bere maro nei den jum̃ano ban ea sebi, mia naio maka rijog titai, jum̃ano maka rijalele leleio.
ACT 28:6 Mia nalo aju abitivitiio, aberiam̃a mia niabeno nonovio monoka aturobi ve tortoru, p̃eli na ver maka ana mia monoka naio rijoru rim̃aro ga, mia nalo aju rorea jibe na, banbano-o mia amial ka napano maro neibano maka ruebin naio leleio. Mia bogo napano amialio ka Pol naio bo ga, nalo ajidomii be dolu naruei, aberinavo p̃eli Pol naio be atua tai koviobo.
ACT 28:7 Ana vio neibano kumemi nubauro eaio, nina naio vaataro ka tubo na uleule nei kiano tiniavio, siano be Puplias. Ana naio buru kumemi nuban ea kiano vonuo, mia bitikar vatitig kumemi ka bogoti tolu, napano numitua jum̃ano.
ACT 28:8 Ana bogo napano numitu kumemliko nalo na, tubo nei karam̃ano tormoruo naio jomon ea m̃ano jogu, naio mieyulu, napano niabene bitunu, a barbulo bunu. Ana Pol naio ba mial tormoruo nei, ana midu jum̃ano joaio, bolkouo kanio, mila naio binimei bo bereio.
ACT 28:9 Mia bogo napano tomu dolu nalo amijogio ka napano Pol mila vite nei jibe na ka tormoruo nei, nalo bunu napano amie abinimei, naruei kanalo mieiano nalo ajaluvo.
ACT 28:10 Naruei nalo ajaaro toru ka vite nalo nei, naruei ajum̃a abar kurano ka vite telabo ban kumemi. Ana kumemi numitua uleule nei bano-o bokar siberio tolu, ana bogo napano mia kumemi numitaluvo bereio, mia nalo abar sinaniano telabo a ijaiano nalo abinimei, abar jua kenememi uako dolu ka rijai kumemi ea kenememi m̃arabo bereio.
ACT 28:11 Mo uako dolu na mia kumemi nuvisel ea naio be uako tai na Aleksadria kanano napano naio bunu jo kirisiou ea uleule nei, naio jo rorea ga ka bogo na jegi nei rivarlaka kario. Mia uako nene, ajisia kanio “Kasto a Polakis,” napano sio juo nei be tena atua juo na kanalo napano naljuo abe savoro, napano aje tavoru nene nalo jua buruako na uako nei.
ACT 28:12 Ana numituvan vio, nuban nuboru ea vio tai bereio, siano Sairakius, numitua vio na bogoti tolu.
ACT 28:13 Karina nuburu veru bereio, numisel tivelinio taakano nuburo jibe na bano-o nuboru Rejamo. Mia numitua vio na bogoti takurano bisi, karina jegi saut novo tai miuvuvu, naruei nuburo m̃asosou ka bogoti juo, mia kumemi nuboru ea bulu yaniniobi na vio Puteol.
ACT 28:14 Ana na kumemi numitabulu den uako ea vio na naruei, ana numileal namoneano nalo tealo, ana aburu kumemi nuban numitu kumemilikolo ka bogoti aluo [7]. Ana iorou ka nina, numial ka kenememi burum̃ara ieliano nei vaataro ka ribisi naruei, numitu nubinimei vaataro ruei ka burum̃ara komeli na yetemeriba nei, Romo.
ACT 28:15 Naruei namoneano nalo napano aju Romo, iliano bano-o bokarlo ka numitu numiel nubinimei rove ealo, naruei amielko m̃arabo ka kumemi. Nalo abinimei koalabo laka, nalo tealo abinimei aju rorea kumemi ea komeli nei napano burum̃ara yimo na ṽilṽiliano na Apias kanano naio joaio, a tealo abinimei lie vo bereio, abinimei nam̃ariga-o abokar komeli na yimo tolu na valauo nalo ajuaio. Ana bogo napano Pol mial ka napano nalo aju rorea jibe na, naio jaaro toru laka, a naio ber siva ban Atua ka napano vite nei mila ana naio mijog bo, mila ana mijog be p̃irinio bereio.
ACT 28:16 Ana bogo napano kumemi numiel nubinimei nuboru Romo, nalo maka adu Pol toa nalakoiano, mia amijamo ka naio ka mijikia rileal yimo tai ka naio toaio, mia nalo amidu toro na vitikariano tai jo bijaio.
ACT 28:17 Ana Pol naio jo Romo bogoti tolu bisi, ana miila toru ba ban kulo Ju nalo kialo navurim̃araboiano nalo napano ajua vio nei, ana bogo napano abinimei vio takurano, Pol jukunu banlo. Naio ber kalo, berinavo “Banalo, kiaku tukunuano jibe nei: kiniou nebinimei ea vio nei bior ka yuka nanua beamu, kiniou nojo Yerusalemo, ana kiado tomu na tortoru nalo na vio na abuku kiniou naban ea nalakoiano, karina amidu kiniou nojoa natibureano nalo na vio Romo jum̃alo napano abitikar kiado buruvenuo. Ea tivelinio na kiniou, maka nala vite tai ka kiado tomu nalo, a maka nala titai napano maka rimemedu ea kanado bajago p̃eli na ea korobido nalo kanalo iliano nalo, mia nalo amila jibe na ka kiniou dam̃ariga.
ACT 28:18 Ana bogo napano natibureano nalo na vio Romo abitii batitigio vite nei, bisi ana nalo ajidom ka kiniou nava tavio bereio ga, bior maka aial vite tai napano rimemedu ka mia asian vironiano van kiniou riviorio, ka river kiniou monoka nam̃aro.
ACT 28:19 Mia karina, nalo na navurim̃araboiano na kiado kulo Ju nalo amil vaarakurano bereio biorio, mia naio ba bova ga vo. Nalo amila jibe na, naruei ana kiniou nemial ka maka bunu ve kiaku vio tai naruei ka mia nemijikia nesel eaio, mia m̃arabo takurano ga nemijikia nesel eaio, naruei kiniou neberial ka nejidom ka Parinio Tubo Sisa na Romo ga, naio ga tibure kiniou. Maka notom̃a nesidomii ka novuru nalo na ea kiado buruvenuo avan ea burum̃ara komeli na vio nei, p̃eli ga, mia bior ka napano amila jikili laka ban kiniou jibe na, tenene na mila ana neberenio nalo monoka avuru kiniou nemei ea vio nei ea vio Romo.
ACT 28:20 Tenene na kiniou nojoa vio nei naruei, ana nejidom kamiu monoka kuvijikia vite nalo nei, ana nebio ka rotu vio takurano tibe na ka nemijikia notukunu van kamiu kanio. Kiniou nejidom ka monoka kuvijikia ka m̃arimieni nalo nei aju amior kiniou jibe nei, nina maka rivior kiaku vovaiano tai, nina bior ga Naverikariano na kanado, naio napano kito kulo Israel nalo nonovio roberenio ka roju ga ban naio.”
ACT 28:21 Naruei navurim̃araboiano nalo na kulo Ju nalo nei napano aju Romo nalo aber ka Pol aberinavo “Vite nalo na napano jau kojom̃a koberenio, mia kumemi nubitovitonia. Kumemi maka nuvial m̃esi tai napano tom̃a riverii jau napano kotaluvo Yerusalemo komei ea kumemi, a namoneano tealo napano ajumolu eaio abinimei, mia maka averii jau van kumemi ka jau komila jibe na jibe na.
ACT 28:22 Mia kumemi numijog kiamo iliano nalo, naruei numisidom ka nuvijog kija bere vo kanamo jidomiano nalo p̃eli na kanamo moneano, bior ka napano be riano, kumemi numitum̃a numijog kijakija ga ka tivelinio ka nalotuano vou nei, mia numijog ga ka tomu nalo ajum̃a aber niegeniege janea vio nonovio.”
ACT 28:23 Ana nalo aji bogo tai ka mia amei aial Pol bereio ea vio nei napano naio joaio. Ana iorou kanio, bogo napano nalo abinimei, abinimei nalo miroano mia miroano, naruei nalo ajum̃a amiagago ka Pol, ka napano jikar kavijo ga bano-o bokar m̃erenio batove mia naio jom̃a mil banlo. Naio berial banlo ka jum̃abe ana toro mijikia ba jouro ea navenatuboiano na Atua kanano, a naio jom̃a berlogloglo jum̃abe ka napano tuboiano nalo na Mosis kanano, bija naverialiano nalo re nua kanalo iliano nalo, nalo amila meravo bo ka Yesu naruei, naio be kiado Naverikariano, ka napano nalo bunu ajum̃a aju rorea naio ka mia rimei rilarurlo.
ACT 28:24 Naruei nalo tealo amijog Pol kiano iliano jibe ka be riano, mia nalo tealo maka amoneaio.
ACT 28:25 Vite nei naruei mila ana nalo ajua taara juo kanio, ajum̃a ajidom bijovijonio-o, deio ga, aberenio bo ka abisi ga, ava vonuo beamu vo. Ana Pol naio ber vite tai maariano banlo, berinavo “Ei, kiniou nemial ka napano Niununo Lu ber riano laka ga na, ka napano nanua, naio ber iliano tai ban korobido nalo, ka napano naverialiano Aisea naio berial banlo. Naio berinavo
ACT 28:26 ‘Jau kavan ea kanado tomu nalo nei, koverial vanlo tibe nei, kover “Mia kamiu kuvijogio-o mia kuvijog kulu re bogo tai, mia kamiu kuvialio-o mia kuvial kulu re bogo tai,
ACT 28:27 bior kamiu kumitibe ka tomu nalo napano kanalo jidomiano nalo am̃arm̃aro ruei, jibe ka ajiko burutilinielo, p̃eli napano miralo kiri bono ga ju. Mia verenio nalo ala re tibe na, p̃eli mia miralo nalo avitilubario, a burutilinielo nalo ajoglubario, a kialo jidomiano nalo amijikia avokar jikiaiano ruei, tibe na amijikia aviliglo amei ka kiniou ka mia nalarurlo.” ’
ACT 28:28 Mo vonganei, neberii ka kamiu, neberinavo kamiu monoka kuvijikia ka Atua kanano Ioruriano naio jo miadu ba tavio ba bokar ruei nalo napano maka ave kulo Ju, nalo naruei ajum̃a amijogio a mia nalo nene naruei ajogkario.” Naruei bogo napano Pol berial kiano iliano na maaro nei banlo bisi, ana na nalo ajumormolu abava tavio, napano mia nalo aju tiniel jer tanealo kar iliano nei.
ACT 28:30 Ana Pol naio joa vio na jibe na ka yuka juo, a naio ga jom̃a bulu kunuano, naio jo bitikar naio. A ver toro kei napano binimei mial naio, mia Pol jaaro ka rivurukar naio rivan ea kunuano,
ACT 28:31 ana jibe na, na naio jom̃a mioliolu ka Atua kanano navenatuboiano bogo nonovio ban tomu nalo nonovio napano naio milealo. A naio jom̃a berlogloglo ka Tubo Yesu Kristo, ka napano mia maka bunu ve toro tai ka ril van naio riviorio, p̃eli na riverbure naio ka mia rila re bunu.
ROM 1:1 Bilbilu nalo na Romo: Kiniou Pol neber kavijo bo p̃eli bogiano bo ban kamiu ea Yesu Kristo siano, na nebe kiano toro na im̃auano, nebe atevi nei na Atua bio kiniou, naio bijauia kiniou ka noim̃au ka neverial kiano Ioluano Vou.
ROM 1:2 Ioluano Vou nene, naio ju joomo ea iliano nalo na vivitauiano lu nalo na Atua kanano ruei, nina ea verialiano nalo na napano kanano naverialiano nalo aberialio nua nua binimei.
ROM 1:3 Burum̃ara vite napano Ioluano Vou nei naio berialio, naio be Yesu Kristo kiado Tubo, napano naio be Atua kenerinio napano naio miila naio miyotuba ka kito ea yetemeriba nei. Naina naruei napano ea tivelinio na yati na m̃aratavo na kanano, kito romijikia roverinavo naio moluo ea yati na tormoruo Parinio Tubo Teviti memedu.
ROM 1:4 Mia ea tivelinio na kanano niununo, naio be lu laka, naio miyotuba memedu ea Atua kanano yati ga. Amuebin naio m̃aro, ana ea kiano burum̃ara moroano, Atua mila naio jumolu meul bo bereio, naruei romijikia rovitilubario batitig ka be riano, kiado Tubo nene naio be Atua kenerinio memedu.
ROM 1:5 Naio naruei bitirilar kiniou ne-be atevi, a miila kiniou ka nava noioliolu van taara dolu na tomu nalo napano maka ave Ju, ka nalo bunu amijikia amonea Atua, ana amijikia amonmonea kanano iliano nalo. Im̃auano na jibe nei naio be ijaiano novo tai napano Tubo naio jian ban kiniou, naruei najaaro ka nala ka siano rivavin.
ROM 1:6 Mia vonganei, kiniou nojo nomila im̃auano nei ea kamiu, bior ka napano kamiu bunu siemiu joa vio na, kamiu bunu kamliko nalo dolu nei napano Atua biolo ka amei ave Yesu Kristo kiano tomu nalo.
ROM 1:7 Kamiu bunu tomu nalo napano naio tinien jii kamiu toru, napano naio bitiri bulag kamiu kube kanano namoneano lu nalo ea burum̃ara komeli nei Romo, naina naruei najaaro ka nebivitauia m̃esi nei biedu ban kamiu. Nebivitauia jibe nei, nobolkouo ka tiniesese a tum̃aro na karam̃ado Atua vija kiado tubo Yesu Kristo kanalo, naio to ve tomoruo ea kenemiu meuliano nalo veve terakurano.
ROM 1:8 Beamu ka neverial vite tealo rivan kamiu, kiniou nobolkouo ea Yesu Kristo siano, neber siva toru ban kanado Atua bior kamiu. Nojidom nela tibe na, bior napano vonganei, iliano nalo ea tivelinio na kenemiu bajago novo nalo, napano kuvitumolu kuvitu sikili ea moneano ea Kristo, naio jo ban ea vio miroano ruei.
ROM 1:9 Tenei naruei mila kiniou najaaro toru, bior napano kirisiou ruei nojo nomim̃au Atua kanano bija kanaku meuliano momou, nomim̃auka neverial Ioluano Vou napano beriio kenerinio. A naio mijikia ruei ka napano nojo tinieku maio ka kamiu ea kanaku volkouano dam̃ariga,
ROM 1:10 a nojo nobika den naio bunu ka river memedu ea kiano jidomiano ga, mia naio rila kiaku m̃arabo ka nomijikia namaluvo ka neadu ka kamiu.
ROM 1:11 Nojidom laka ka neviedu neial kamiu, ka verenio nemijikia nejev ijaiano tealo na moroano na Niununo Lu juvan ban kamiu ka rila kuvisikili lie vo, mia naio rivu laka.
ROM 1:12 Kiniou nomonea ka kiaku viekouoiano naio mijikia tunukakar kamiu, a nojidom nomei ka kenemiu viekouoiano mijikia tunukakar kiniou bunu, a tibe na kito roju romija bitiraviran bo ea kito bereio.
ROM 1:13 Banalo, nojidom kamiu kuvijikia ka va telabo ruei kiniou nemila vio jikili ka neviedu kean kamiu, mia dam̃ariga m̃arabo bisaro ea vite tealo, mila na maka neviedu vo. Mia nojidom toru ka neviedu, ka kanaku im̃auano mijikia rivar m̃arati tai bunu ea kamiu napano kumonea ruei, jibe na napano bar ruei ea nalo napano maka ave Ju ea vio dolu nalo.
ROM 1:14 Im̃auano napano joa jum̃aku naio jibe nei, berinavo monoka noioliolu ea kiado tomu nalo memedu kulo Ju, a tomu dolu bunu, a monoka noioliolu ea tomu nalo napano amijikia vite ruei a nalo napano maka ajikia vite vo,
ROM 1:15 naina naruei mila na nojidom neviedu neverial Ioluano Vou van kamiu ea burum̃ara komeli na kenemiu nei, Romo.
ROM 1:16 Ioluano Vou nei, naio be m̃arabo takurano ga napano Atua kanano moroano jo mim̃au eaio ka ridu ioruriano riyotuba ea tomu nalo, mila na maka noimou leleio ka neverialio bogo nonovio. Ioluano nei naio miyotuba ea kito kulo Ju beamu, karina naio ba tavio ea nalo napano maka ave kulo Ju, naruei toro kei napano rimoneaio, mia rileal meuliano eaio.
ROM 1:17 Ioluano novo nei, naio be kiado m̃arabo ka remijikia romei memedu ea Atua mirano bereio, ka maka bunu rovokar vironiano na kiado kariano nalo, mia bo romijikia ka monoka retikar vija viekouoiano, a mia rala nonovio rivija viekouoiano, bior napano naio jibe ka iliano moruo tai napano Naverialiano Abakuku berenio, berinavo “Toro napano ver ga naio rivarkar tiniene ea Atua, mia Atua rila naio rimei rimemedu rive riano, a nina ga naruei naio be m̃arabo na ajev meuliano.”
ROM 1:18 M̃arabo na aje meuliano naio jo, mia veribinio bija vovaiano abujo laka ea tomu nalo na maka ave Ju reraio ea yetemeriba nei, mila nalo aju aberbure m̃elea Atua kiano ilirianiano, ana jibe na kito romialio ka napano Atua naio joa vio mave, kiano siniabu monoka riyotuba rilalo ajikia.
ROM 1:19 Naio jo berloglog kiano bajago vu nalo amiyotuba medave ea mirano tomu nalo ruei, naruei bo ka abitilubario, mia maka asidom ajikia.
ROM 1:20 Be riano ka Atua naio maka ve kulorinio, a toro maka rijikia rial naio, mia jikar ea tiiano na yetemeriba binimei bokar vonganei, tomu nalo aju amial kiano bajago novo nalo, ana amijikia avitilubario ka naio be Atua riano. Ver aial kiano tiiano nalo ga, maka bunu ajikia avika aver ka naio be kenia.
ROM 1:21 Ver makanio, amijikia ka Atua naio jo, mia maka lele asidom ala kialo jidomiano rivatove ka naio, maka lele asidom aver siva van naio rivior kiano tovu ealo. Nalo maka asidomial titai, banbano kialo jidomiano nalo bujo ka melijokouo batitigio.
ROM 1:22 Nalo be tinielo ka aber abe masou, mia nalo abano aba vovu batitigio,
ROM 1:23 a nalo maka bunu alotu ka Atua napano naio maka rijikia rim̃aro bogo tai. Nalo maka asidom naio, mia amim̃auka tavoru napano midu mirano toro p̃eli mirano menu p̃eli mirano temeul nalo jibe niobi p̃eli venia, ana nalo be tinielo bo ka alotu ka tenalo nei naruei.
ROM 1:24 Bogo na amila jibe na, Atua naio binimei tinien maro laka ea kialo veribinio nalo nei, naruei naio juvanlo ka avan bo kanio vija sidomvaiano venia napano tinielo jiio. Ea bogo nei naruei kito releal ka napano tomu nalo aju amila bajago na imouiano ea mokotenalo nalo,
ROM 1:25 mia naina monoka tibe na, bior napano abar bulag Atua kanano ilirianiano, amidu sibiano ju keano, a maka bunu alotu ka Atua napano bo ka aiaia siano lu dam̃ariga, mia abatove ga ka vite nalo napano naio jiilo.
ROM 1:26 Nalo abilig dabu lelan vite nonovio na jibe na, mia Atua maka bunu riverburelo, mia juvanlo aba amila pariparilo ea kialo sidomiano va nalo. Jibe ka tire nalo maka bunu avan vija sum̃ano nalo, mia aban bija tire nalo bereio,
ROM 1:27 a sum̃ano nalo bunu, nalo maka bunu asidom aver bo ka asoro ka tira, tibe ka napano Atua naio berenio berinavo bo ka alaio, mia nalo ajidom sum̃ano ga, aju aban bija nalo bereio ea bajago napano romimouo ka roveriio. Im̃auano nalo na jibe nei maka amemedu leleio, mia nalo napano ajum̃a amilaio, ea kialo meuliano nalo ga, aial vironiano napano memedu ka toro napano mila jibe na monoka rivario.
ROM 1:28 Tomu kinkin na jibe na, maka aialerinio ea Atua ea kialo meuliano nalo, maka asidom titai kanio, ana Atua maka tokovio kalo, mia naio juvanlo ka kialo sidomsearoiano nalo aburulo aba amidu momou ea bajago va.
ROM 1:29 Amila jibe na banbano komial kialo meuliano binimei bujo ka bajago nonovio na lakorov tuboiano, bija vovaiano nalo, jokoluolu nalo, bija sidomvaiano ea kulo dolu nalo. Amijoku, amuebinvin tomu nalo am̃arm̃aro, abilvilialo, amila sibi, ajerm̃i ka kulo dolu nalo, aberveriilo,
ROM 1:30 ajian merano kanalo iliano nalo, a ea tivelinio na Atua, nalo maka asidomialio ga. A bija bajago nalo na bova nei, parilo kirisikili laka, abarvar kalo, amil vevavin, amila verikariano bior im̃auano vou na vovaiano napano nua makanio, mia bogo napano kialo tormoruo nalo amil banlo, amilkuei ga.
ROM 1:31 Tomu nalo na, romijikia roverinavo nalo maka aje masouano, maka adukar vatitig kialo verikariano nalo, maka ave tinievuiano rivu, maka tiniel riia toro leleio.
ROM 1:32 Nalo amijikia vatitig bo Atua kiano iliano ruei, amijikia ka Atua naio berkar m̃ariano ban tomu nalo na jibe na, mia maka atovonio. Nalo aju ajidel dolu ka amila jibe na, mia mave ka nina, aju ajaaro lie vo ver amial kialo bilbilu dolu nalo aju amila bova jibe nei bijalo.
ROM 2:1 Jibe na, ver jau toro Ju tai napano kojo komial vovaiano nalo na kulo dolu nei kialo, mia jau kosidomii tum̃abe kanio? P̃eli jau kosidomii ka jau kobo, nalo abova, mia maka leleio, vovaiano na joaso be verare ga, mia maka bunu kojikia kover titai. Jau kobe toro na tibure kulo dolu na, a kojo kojibureso bereio kar napano jau kojo komila tena javukia napano kojo kojibure dolu nalo kanio.
ROM 2:2 Mia jibe napano kito romijikia, Atua naio rije vironiano van tomu nonovio napano amila bova jibe na be verare ga.
ROM 2:3 P̃eli jau tai napano kojo kojidom ka jau kobo bior napano kojo komil ban toro napano mila korovio tuboiano, a jau bunu kojo komila korov, mia bova jau kojo kojidom ka vironiano na mia Atua sianio mia maka rijikia rivakarso.
ROM 2:4 P̃eli kojo kojidom ka Atua naio tiniene bo laka, tinien miia toro, a kiano jidomiano tebievi, ana kober p̃eli maka rijikia rila titai kaso? Ee, Atua naio bo laka jibe ka napano kojo koberenio, mia kiano tiniememiano maka rijamo kaso ka kala du ka kalakorov tuboiano, mia naio ga rivurso koviligso kataluvo ea kariano nalo napano kojoaio.
ROM 2:5 Ana jau, maka kosidom koviligso leleio, jau pariparimo jikili ga bano, ana jibe na kojo komila ka kojo komivon kakar kiamo vironiano nalo banbano bokar bogo napano mia Atua kiano tiniemimiano tibure memedu tomu nalo.
ROM 2:6 Ea bogo nei naruei mia naio rivar bulag van tomu nalo rivare ga tavukia venia napano nalo aju amilaio.
ROM 2:7 Jibe na, tomu tealo, nalo ajurmaro ga, nalo aju ajudu bogo nonovio ka amila bajago na bo napano mijikia rila sialo rivu ea Atua mirano, a mijikia rilalo avokar mermerano na vio mave. Venia na mia Atua sian vanlo, naio be meuliano napano maka rijikia ribisi.
ROM 2:8 Mia tealo, tomu na baravoiano, nalo maka amonea ilirianiano, a nalo aju yetano ka moroano na vovaiano. Venia napano Atua mia sian vanlo, nina vironiano napano riyotuba ea kiano burum̃ara tiniemimiano ga.
ROM 2:9 Mia bogokouo bija jogvaiano rimei rivokar tomu nalo nonovio napano amila bova, jikar ea nalo napano Atua bijauia bulaglo beamu, nina Ju nalo, ba bokar tomu nalo na vio dolu napano maka ave Ju.
ROM 2:10 Ana nalo napano kialo meuliano bo, mia avokar Atua kiano ilivuiano novnovo nalo, sialo nalo mia atu rivu vijaio, kiano tum̃aro to vijalo. A nina bunu tikar ea nalo napano abe Ju, ba bokar tomu nalo na maka ave Ju,
ROM 2:11 bior ka napano Atua naio maka rivitii tomu nalo ve dolu, a naio mila memedu bare abiniu.
ROM 2:12 Kulo Ju nalo aju yetano ka tuboiano napano Atua jian banlo ruei, ana verver amila korov tuboiano nene, mia Atua rije vironiano vanlo. A tomu nalo na maka ave Ju, nalo maka avokar tuboiano nene, mia p̃eli nalo maka ajikia venia napano tuboiano naio berenio, a ver nalo amila bova, mia am̃arm̃aro. Jibe na, kariano joa kito robiniu robe verare ga, a mia Atua monoka tibure kito roviniu.
ROM 2:13 Tomu nalo na amemedu ea Atua mirano, maka nalo napano amijikia ga venia napano tuboiano berenio, mia nalo napano Atua jaaro ka rivurlo, nina mia nalo napano kialo meuliano jakii vatitig bo venia napano tuboiano berenio.
ROM 2:14 Tomu tealo maka ave Ju, maka ajikia Atua kiano tuboiano, mia bekurano, kialo meuliano bo bano-o, kialo bajago jibe ka ga napano verver Atua kiano tuboiano jo bijalo ruei.
ROM 2:15 Nalo jibe ga napano venia na tuboiano jo beriio, naio joa kialo iviso ruei. Jibe na, bogo napano amijog iliano nalo reraio aberinavo jau kavan na, p̃eli jau kavan nei, kialo jidomiano novo jo ber vatitigio kalo venia na bo a venia na bova.
ROM 2:16 Jibe napano ioluano napano nojo nomioliolu kanio berenio, bogoti na toru nei naio jo binimei, a ea bogo na, mia Atua sian van Yesu Kristo ka rivitii veve tomu nalo kialo jidomiano nalo, riva rivokar venia na amilavanio joa kialo iviso, mia naio tibure tenalo napano amilaio, ba bokar naio napano aber p̃eli toro tai maka rijikiaio.
ROM 2:17 Nemialio bo ka noil lie bereio ea tivelinio na vite nalo napano kito kulo Ju roju reberenio. Kito roju reberii jum̃abe napano kito naruei rajakii Atua kiano tuboiano, reberiam̃a kito naruei Atua jidom lie kito, ana mila napano kiado jidomiano bavavin laka.
ROM 2:18 Kito roju rober ka kito romijikia vite bo ea Atua kiano tuboiano, mila roberiam̃a kito ga romijikia vatitig Atua bija kiano tinieiiano, kito ga romijikia vatitig vite nalo napano be riano a memedu bo.
ROM 2:19 Kito roju rober kito kulo Ju ga naruei bo ka kito rovuru m̃arabo ka nalo napano maka ave Ju, kar napano rober nalo abe merebono napano maka ajikia m̃arabo. Kito roberiam̃a kito ga kito robe yulu ka nalo napano ajua melijokouo,
ROM 2:20 kito ga bo ka rala toro rimemedu napano milaluv m̃arabo, kito ga romemedu ka roverloglog vatitig nalo napano ajibe kiritete nalo, maka ajikia vite. Mo nojidom never ea vio nei, bo ka napano robitilubar ka Atua kiano tuboiano bujolou ea jikiaiano novo a ilirianiano novo nonovio ruei, mia maka rivu ka rotu rosidomii ka rover kiado ga.
ROM 2:21 A titai bereio na bova lie vo mave kanio, kito rosikili ka roverloglog kulo dolu nalo, mia nemial jibe maka rotu roverloglog vatitig kito bereio. Verver koto koioliolu ka toro ka rivina re, a bo ka jau kojo kobina kia ga vo?
ROM 2:22 Jau na kojo koberloglog ka toro monoka rila re siakaiano, ka venia jau bunu komilaio? A jau na kober ka tavoru napano nalo dolu amim̃aukanio, nalo abova laka, jau kober be riano na, mia jau bunu, p̃eli jau kojo kobina ka niogo vite nalo na abar joa kialo vio lu nalo, ina?
ROM 2:23 Ea vio nei, monoka kito rover aua ve toru laka, bior kito tomu nalo napano rabarvar ka napano romidu Atua kiano tuboiano, mia roju romila niegeniege kiado Atua siano lu bereio, ka napano roju romila kokorov kiano tuboiano nalo na.
ROM 2:24 Iliano Lu naio berenio kiado bajago naruei, berenio jibe na, ber “Kamiu tomu nalo na Atua kiano, kenemiu sibiano mila na tomu dolu nalo aju amilkue bova ea siano.”
ROM 2:25 Jau kober ka apakuveuso ruei, ana kobe Ju tai riano, nina bo laka. A tena mijaso verver ga jau kojo komonea Atua kiano tuboiano. A ver jau kolakorov tuboiano na, jau kobe Ju ka iakurano ga, jau kobova ea Atua jibe ga nalo napano maka abakuveulo.
ROM 2:26 A p̃eli toro tai naio maka tibe ka kulo Ju nalo napano apakuveuio, naio maka apakuveuio ga, a ver toro na rimonea vatitig tuboiano nalo, ea Atua kiano vitiiano naio binimei bare ka toro Ju ruei.
ROM 2:27 Toro Ju naio apakuveu ruei a midu tuboiano, a ver naio maka rijogkario, naio monoka rivitikar vatitigio, ver makanio, Atua rivukular naio vatitig, mia rivuru toro dolu na maka avakuveuio ana napano mijogkar kiano tuboiano.
ROM 2:28 Nina ka ea Atua kiano vitiiano, nina be Ju riano, maka nana be Ju ea kuluniabene ga. A pakuveu napano Atua bitiio be riano, maka nana tavio ea toro niabene ga.
ROM 2:29 Toro na Atua kiano riano, maka nana bokar ga vivitauiano lu nalo ka jum̃ano, a naio be toro napano Niununo Lu jo mim̃au ea kiano iviso, napano kiano meuliano mijulu kon bo. Toro na jibe na, p̃eli tomu nalo maka asidomiio ka naio be toro tai, mia Atua naio jaaro laka kanio.
ROM 3:1 Kiniou nojom̃a nemil jibe nei, p̃eli vikadeniano tai miyotuba, bika jibe nei, ber “Verver toro Ju be verare ga ka tomu dolu nalo, jibe ka na kojo koberiio, ka venia na sio na Ju naio bo, roberiam̃a ka nina naio be titai? Roju romila pakuveu ea kito, ka romei rove kulo Ju riano, a p̃eli na ka iakurano ga?”
ROM 3:2 Vikadeniano na naio memedu, a neberdop̃eio jibe nei neber, Makanio, robarkar sio na Ju, naio be burum̃ara tolu tai napano mila bo laka ka kito. Bajulukuti vabe bereio na tomu nalo napano Atua midu kiano iliano lu joa jum̃alo nalo? Maka nalo dolu tanea vio, mia kito kulo Ju nalo ga.
ROM 3:3 Be riano ka kiado tomu tealo nalo maka amonmonea Atua kiano iliano nalo nei, naruei vikadeniano naio jo ber jibe nei, p̃eli mia Atua maka bunu riilivu ka kito tibe napano naio berkar ka rilaio? A makanio, maka tibe na. Be iakurano napano tealo nalo maka avokar vatitig Atua kiano iliano, mia Atua maka rijikia leleio tuvan bogo tai kiano verikariano na ban kito.
ROM 3:4 P̃eli kito tomu nalo romila sibi bogo nonovio, a Atua naio be riano bogo nonovio jo, jibe na napano Parinio Tubo Teviti naio ber ea Niosi na Iouano nalo, napano ber Mia nalo aialio napano jau kobe riano ga ka kanamo iliano nalo ka kotiburelo, a mia nalo ajidom atibureso bereio, mia jau komemedu ga kojo.
ROM 3:5 Kiado tokoriano nalo bova ga, a titai napano bo kija, tokoriano nalo na amila meravo ea tomu nalo miralo ka Atua kiano tuboiano nalo napano juko vio ka tokoriano nalo na, nalo amemedu mia amemedu. Kiniou neber jibe na, p̃eli mia kelvovu nalo tai atumolu averinavo “A verver kiado tokoriano nalo amila tenalo na bo nei, ka venia Atua tinien jer kito jidom sian vironiano van kito bereio riviorio?” Mia makanio, nina toro kiano jidomiano ga,
ROM 3:6 maka tibe na leleio! Verver Atua naio maka tibure kito kulo Ju, p̃eli maka rivu ka naio tibure kulo dolu napano maka ave Ju, mia makanio, naio memedu a naio takurano ga be natibureano.
ROM 3:7 Vikadeniano dolu jibe nei mijikia rimei bereio, napano naio ber jibe nei, berinavo “Beamu neber nomonea Atua, mia iorou maka neiagago ka naio, naruei jibe nojo nemila sibi ga. Mia kiaku sibiano na jo berialio ka Atua kiano iliano ga be riano, a jibe na jo rila siano ka rivavin. Ana ver tibe na, ka venia naio jidom to tibure kiniou kia na vo ka nobova?”
ROM 3:8 A mia tomu nalo dolu aviligvilig iliano kinkin nalo tibe na riva vova lie vo, nalo aver “Verver bajago va berialio ka Atua kiano iliano be riano, bo ka kito rotu raladu bogo nonovio ka rala kariano ve miroano, ka rila Atua kiano iliano ve riano lie vo.” Nalo tealo aber nojo nomioliolu ka jibe nei, a nina be sibiano ga, a nalo na napano aju aber, mia nalo avar vironiano rimemedu ka kialo iliano va nalo nene.
ROM 3:9 Kiniou nejidom navan bere ea tena roju roberiio, na rober toro na bar sio na Ju, mia tum̃abe ka naio? P̃eli tomu tealo be kialo vikadeniano ka mia bo lie ka naio jovulu toro napano maka rivar sio na jibe na, p̃eli makanio? Bo ga, kiaku verdop̃eiano, neber maka tibe na. Jibe ka napano neber ruei, kulo Ju nalo bija kulo Kiriki, abiniu aju yetano ka moroano na kariano bare ga.
ROM 3:10 A jibe ka iliano nalo na niosi lu aberenio, Maka lele toro tai na kiano meuliano memedu.
ROM 3:11 Makanio, maka toro tai na bitilubar m̃arabo, maka tai na jo milavio jikili ka rial Atua ea kiano meuliano.
ROM 3:12 Tomu nalo ajitetere den m̃arabo na memedu, nalo abano bova laka, maka lele tai na mim̃au memedu bo.
ROM 3:13 Kialo iliano nalo bova, jibe tanunu na jono, buruminalo aju amim̃auka sibiano nalo, ililelaniano nalo aju amiyotuba ea kuluniolo nalo, jibe ka maro va naio jerbin toro.
ROM 3:14 Riano ga, niolo ju bujo ka ilikakarioano va bija ilijaleleiano nalo ga.
ROM 3:15 Jaalo nalo aju abarlo ajikiti jan ea vio ka ala burukija riou,
ROM 3:16 kanalo ieliano nalo aba amila bulag vite nonovio, amila tomu nalo amijog bova.
ROM 3:17 Maka asidom asidomii ka m̃arabo tai na tum̃aro jo,
ROM 3:18 miralo maka leleio abitilubar ka Atua naio jo bitikarlo.
ROM 3:19 Ee, iliano nalo na amiyotuba ea Atua kiano tuboiano, a kito romijikia ka venia napano Atua kiano tuboiano berenio, naio jo jiloglog kito kulo Ju. Kito roju yetano ka tuboiano na, a toro na bitilubar venia na tuboiano na berenio, naio maka bunu iliano ka verenio, naio mijikia ka yetemeriba reraio amila kokorovio, monoka aviniu ka avar vironiano kanio.
ROM 3:20 Maka toro tai rijogkar ka tuboiano na Atua kanano rivare ka naio rimemedu ka Atua mirano, a tuboiano na mila na abiniu amijikia vatitig ka kariano joalo.
ROM 3:21 Jibe ka, m̃arabo na monmoneano ea tuboiano, maka toro tai rijikia takii rivanvano-o rimei rimemedu ea Atua mirano, a nina mila na Atua mial bo ka naio mila vatitig m̃arabo vou dolu tai napano romijikia ratakiio. M̃arabo vou dolu na naio bo laka, bior napano maka ve kiano tuboiano nalo napano mia toro monoka rijogkarlo. M̃arabo na, ilivivitauiano lu moruo nalo bija naverialiano nalo kialo iliano, nalo aberiio ruei tertelisu beamu nua, a vonganei Atua berialio ka kito ruei.
ROM 3:22 A m̃arabo nene jibe nei: naio be m̃arabo na moneano. Jibe na, toro kei napano biekouo ea Yesu Kristo, mia Atua rila naio rimemedu ea naio mirano kario. M̃arabo na maka ve tena tomu tealo ga, a tena tomu nonovio,
ROM 3:23 ka napano abiniu amila kariano, maka tai na kiano meuliano rimemedu rivokar jeleig meuliano novo napano Atua jidomio.
ROM 3:24 Mia bo ga, bior Kristo Yesu naio bulu bulag kito ruei, mila na Atua rila kito romemedu ea mirano, jibe ka jidomiano tai napano naio jian ban kito, binimei ea kiano tinieseseiano ga.
ROM 3:25 Naio bulu bulag kito ka napano Atua bitirilar naio jibe ka sida napano kiano burukija miou ka sekon bulag kiado kariano nalo kito napano romonea naio. A jum̃abe ka tomu nalo na jikar yuka nalo re nua binimei, bogo na Yesu maka rimei vo? Maka reialio napano Atua rije vironiano vanlo ka kialo kariano nalo, ana p̃eli be jidomiano ka p̃eli Atua mije vironiano na kariano na tomu tealo ga, a tomu tealo maka rije vironiano na kialo kariano? Mia makanio, nina maka river tibe na. Bogobe nua ruei, na Atua jo mila kiano jidomiano tebievi ga, a jo jokoko vio ka kiano tiniememiano, a naio mila jibe na ba bokar bogo na Yesu m̃aro ka kialo kariano na re nua bunu.
ROM 3:26 Jibe na, Atua berloglogial ka kito vonganei ka naio mim̃au memedu bogo nonovio ga, mila na toro kei napano balea ga Yesu, mia naio meravo rivu ea mirano.
ROM 3:27 Ver tibe na, mia kito romijikia ravarvar ka kito kar venia bereio? Maka titai, bior venia mila kito robo bija Atua bereio? Maka bajago na bo na jogkariano na kiano tuboiano napano rojidomii ka romila, mia maka leleio, bulapati nene, kiado moneano ea Yesu ga.
ROM 3:28 Kenememi iolioluano aber jibe nei vonganei, ka toro rimei rimemedu ea Atua mirano, joa ga naio kiano viekouoiano ea Kristo. Naio maka rijikia balea kiano im̃auano novo nalo, napano naio rijogkar rivu tuboiano nalo nonovio na kulo Ju nalo kialo bogo nonovio, kar napano maka toro tai rijikia rila tibe na.
ROM 3:29 Jibe na, romial napano Atua maka ve kiado Atua ga kulo Ju nalo, a be Atua na kulo dolu nalo bunu.
ROM 3:30 Ee, Atua naio takurano ga, a be tomu nonovio kanalo, a verver toro Ju, naio mijikia rimei rimemedu ea Atua mirano verenio ga riviekouo eaio, a p̃eli verver toro napano maka ve Ju, naio bunu mijikia rimei rimemedu ea Atua mirano verenio ga riviekouo ea naio.
ROM 3:31 Ana iliano nalo na maka river ka bajago na viekouoiano ea Yesu rivuku bulag Atua kiano tuboiano moruo napano ju, ka naio maka bunu kiano im̃auano ka rilaio. Naio maka river tibe na, naio ber ka bogo napano roju romomea Yesu, roju rabamenea vatitig tenalo napano tuboiano nei naio berenio, roju romilaio be riano.
ROM 4:1 Roju roberii jibe ka bajago na viekouoiano ea Kristo naio ga be m̃arabo na robokar ioruriano, a jum̃abe ka korobido nalo re nua, jibe korobido na toru nei ea kiado yati na tormoruo Epraamo?
ROM 4:2 Naio mila im̃auano novo telabo napano Atua jaaro kanio, a im̃auano nalo nene na maka ala naio rimemedu ea Atua mirano. Verver naio rimei rimemedu kar kiano im̃auano, p̃eli naio mijikia rivarvar ka naio bereio, mia maka tibe na. Maka toro tai napano mijikia rivarvar ea Atua mirano bior im̃auano napano naio milaio,
ROM 4:3 a viekouoiano ga mijikia rila toro rimemedu vija Atua, jibe ka napano Epraamo kiano tukunuano naio berenio ea Niosi na Tiiano, napano berenio Epraamo naio biekouo jikili ea Atua kiano verikariano nalo, ana Atua jaaro, midu Epraamo kiano viekouoiano na, mila naio binimei memedu bo ea mirano kario.
ROM 4:4 Kosidomii vonio, ver toro na mim̃auka veru, bogo na siberio burukorovio naio monoka rivar kiano veru. A kito rover re ka veru nei naio be jidomiano tai napano kiano toro na toru jian ban miyotuba ea tinieno vu, mia veru nei, toro na mim̃au nei naio mim̃au jikili kanio, nina naio memedu ka rivar ve kiano.
ROM 4:5 A tivelinio ka toro rimei rimemedu ea Atua mirano, naio maka ve titai tibe veru napano romijikia roim̃aukanio, napano romijikia rovar tibe titai napano kito ga romijevio be kiado. Kito, kiado im̃auano nalo abova ga, tenena monoka ravalea Atua, napano naio ga mijikia rivar bulag vovaiano ea kiado meuliano. Verver ga ravalea naio, mia naio rila kito romemedu ea mirano.
ROM 4:6 Tormoruo Burubati Parinio Tubo Teviti naio mijikia tena nua ruei, mia kiano iouano tai beriio jum̃abe mia rivu laka ka toro napano maka rivalea kiano im̃auano nalo bereio, mia balea ga Atua ka mia naio saaro ka rila naio rimemedu ea mirano. Iouano nene ber jibe nei, ber
ROM 4:7 Toro na Atua biekokoa kiano vovaiano nalo, napano miolkon bulag kiano kariano nalo, naio be ilivuiano tai napano mia bo laka kanio.
ROM 4:8 Toro napano Atua mial naio jibe ka napano maka bunu miamiamo tai toaio, napano monoka rivakar vironiano kanio, mia naio mijikia rijog rivu mia rijog rivu.
ROM 4:9 Ana nalo napano amijikia ajog rivu jibe napano iouano nei berenio, nalo kei na? Ilivuiano nei, mia maka rijikia rimei ea tomu na apakuveulo ga, jibe kito kulo Ju ga, a mia rimei bunu ea nalo na maka ave pakuveulo. Nina meravo bo, bior jibe ka napano roberiio, Epraamo binimei memedu ea Atua mirano, maka ka napano naio be pakuveu ga, a binimei memedu ea Atua mirano ka napano ga naio baleaio jikili.
ROM 4:10 A kito romijikia tena jum̃abe? A Atua naio ber Epraamo naio memedu ea mirano ea bogo vabe? Naio berenio ea bogo napano Epraamo naio be pakuveu ruei, p̃eli berenio ea bogo napano naio maka ve pakuveu vo? Verver ravan bereio ea kiano tukunuano, mia reial ka Atua ber mia Epraamo memedu ea mirano bogo na naio maka ve pakuveu vo.
ROM 4:11 Jibe na, Epraamo kiano viekouo-iano ea Atua, naina ga mila naio memedu ea mirano. Ea bogo neibano, naio maka ve pakuveu vo, a iorou, Atua jian pakuveu ban naio jibe kijokijo tai napano berial ka viekouoiano ea Atua ga be m̃arabo ka toro rimei memedu rivijaio. Epraamo naio be toro na beamu napano jibe nei, ana tomu telabo abinimei iorou napano maka ave pakuveulo ga, a nalo amonea Atua ana Atua mialo jibe amemedu ea mirano kanio. Nalo maka amoluo memedu ea Epraamo kiano torogio, mia vonganei nalo aju amial naio jibe naio be korobilo tai bunu,
ROM 4:12 be verare ka naina be korobilo napano aju amila pakuveu kalo. Beamu kito kulo Ju nalo roberiam̃a toro napano be pakuveu jibe tormoruo Epraamo, be riano ka miyotuba ea kiano torogio. Mia vonganei, jidomiano vou tai moluo napano jibe nei, berinavo toro napano mijikia river ka Epraamo be korobinio riano, nina toro napano naio biekouo ea Atua be verare ka Epraamo naio biekouo ea Atua, bogo napano maka rive pakuveu vo.
ROM 4:13 Nua nua beamu Atua berkar ban Epraamo ka mia kiano ilivuiano nalo amaluvo ea naio vija kiano torogio nalo, avan ea tomu nalo na yetemeriba reraio. Ana ka venia Atua jaaro ka rila verikariano nei van Epraamo? Maka ka napano Epraamo mijogkar vatitig kiano tuboiano, bior ka bogo napano Atua mila verikariano na, maka tuboiano to vo, bogo na Atua jian tuboiano ban Mosis naio jo koalabo kia ga. Jibe na, romijikia rover ka Epraamo kiano viekouoiano ga mila naio memedu ea Atua mirano, ana Atua jaaro ka sian verikariano novo nei rivanio.
ROM 4:14 Verver verikariano na ve tomu nalo na aju amijogkar tuboiano ga, mia rila ka toro napano moneaio, rimoneaio ka kurano, mia rila ana Atua kiano verikariano sikili re tu.
ROM 4:15 Mia bereio, titai dolu mila meravo ka kito berenio Atua kiano verikariano novo nalo maka ajikia amaluvo ea bajago na jogkariano ea tuboiano. Nina bior ka bogo napano tuboiano jo, bajago na lakokoroviano na tuboiano monoka riyotuba, a iorou kanio, monoka vironiano tai kanio, ka napano maka toro tai napano jilimebi ka rilakorovio tuboiano bogo tai.
ROM 4:16 Jibe na, tuboiano maka rijikia rijai kito ka kiado vovaiano nalo amei memedu ea Atua mirano, mia Atua kiano tinieseseiano laka ea kito ana naio ga milaio. Naio mial ka roju ban naio, ka rabalea naio ga, ana naio mila robokar kiano verikariano nalo na bo. Nina maka Ju nalo ga napano tuboiano binimei ealo beamu ruei, a tomu dolu nalo bunu napano amiasolo. Nalo abe tomu na vio ninio, a ver abar bajago na amonea Atua bare ka Epraamo monea naio, naina jibe napano nalo bunu amiyotuba ea kiano torogio. Mia bunu, kito robiniu ea taara na namoneano nalo ea yetemeriba reraio roju romial naio jibe korobido na toru.
ROM 4:17 A nina memedu ga ka venia napano Atua berkar ka Epraamo nua ruei, napano berkanio berinavo “Kiniou nebitiri larso, jau kobe burupati na torogio na tomu nalo na venuo miroano.” Bogo napano Atua berkar jibe nei ban Epraamo, Epraamo maka rimemebiju, a bokar vatitigio bo, kar napano naio mijikia ka Atua nei napano mil banio, naio be Atua napano mijikia rila venia napano m̃aro rimei rimeul, mijikia tii venia napano maka to, rimaluvo.
ROM 4:18 Be riano, Atua ber titai kanio napano jikili laka ka rimoneaio, bior berkar ka naio, berinavo “Kiamo torogio nalo mia ave miroano mia ave miroano laka ea yetemeriba nei.” A bogo na Epraamo mijogio, naio moneaio jikili ka mia monoka tibe na ga naruei.
ROM 4:19 Ea bogo nei, naio mijikia ka naio bija koano tira Sera, kialo m̃erenio vaataro ka rijoru naruei, napano kiano yuka bokar toromomou [100], a koano tira maka lele rivar tete kija vo, mia kiano viekouoiano maka leleio rijoru.
ROM 4:20 Naio maka sidomial titai mia kiano jidomiano jua ga venia napano Atua berkario. Kiano viekouoiano jo binimei jikili lie, a bogo nonovio jo miaia Atua a ber siva toru kanio ka venia napano mia rilaio.
ROM 4:21 Naio maka lele sidomii bogo tai river p̃eli Atua maka rivare ka rim̃auka takii kiano verikariano,
ROM 4:22 a kiano bajago na viekouoiano nei naruei mila na Iliano Lu berial naio bereio, berinavo Epraamo biekouo ea Atua, naruei Atua berial ka naio memedu bo ea mirano.
ROM 4:23 Ana iliano nei berial Epraamo naio takurano ga,
ROM 4:24 mia bo ka rodu tibe iliano tai napano berii kito nonovio, kar napano kito bunu romonea Atua ka mia naio rila kito romei romemedu ea mirano tibe napano naio mila ka Epraamo. Kito romonea ka naio naruei napano miila Yesu binimei ka rivokar m̃ariano kar kiado kariano nalo, a romonea ka Atua naruei midular Yesu den nam̃ariano ka rila rimeravo rivu ka kito romerevu bereio bija naio na ruei.
ROM 5:1 Bo ga, vonganei naio meravo bo ban kito ka tenalo napano mila kito romerevu bereio bija Atua, naio be kiado viekouoiano ea venia napano Yesu mila ka rijai kito. A bogo napano romijikia ka romerevu bija Atua jibe na, mila napano romial ka tum̃aro jo iviso ka kito bija naio,
ROM 5:2 a mila napano roju bo joomo ea kiano tinieseseiano bogo nonovio. Jibe na naruei, kiado jidomiano jikili ka iorou, mia monoka rove togio joomo ea Atua kiano mermerano, mia rasaaro laka.
ROM 5:3 Mia maka rasaaro ga ka meuliano novo nei napano mia rimei iorou, mia rasaaro bunu ka bogokouo napano roju robiviuo vonganei. P̃eli romijog bova, mia rasaaro ga ka napano romijikia ka jogvaiano mijikia rila jidomiano rive tebievi lie,
ROM 5:4 a jidomiano tebievi rila bajago rimei rivu laka lie ea Atua mirano, a bajago nei bo rila baleano ea Atua rimei lie vo,
ROM 5:5 a baleano ea Atua rila kiado jidomiano maka rijikia rijoru leleio kar titai bogo tai. Nina bior ka Niununo Lu napano naio jian ban kito, bogo nonovio jo mison vatitig Atua kiano burum̃ara tinietiiano ba joomo ea kito banbano-o kito robujo vatitig eaio.
ROM 5:6 Romijikia ka Atua naio tinien jii kito laka jibe na naruei bior napano nua, romijoru ea p̃ili tai napano maka rejikia rala titai bereio ka rijai kito, mia memedu ka kiano bogo napano naio bijauialario, naio miila Kristo binimei m̃aro kar kito tomu va nalo.
ROM 5:7 Ea kito, maka roial m̃elea napano toro tai mijikia rijamo ka kiano meuliano ka rilarur toro dolu kiano meuliano, p̃eli bogo terakurano ga toro tai mijikia rijamo ka kiano meuliano ka rilarur toro tai napano aberiam̃a naio bo laka, mia tena naruei Yesu mila ka kito nonovio napano kito tomu va nalo ga.
ROM 5:8 Atua kiano tinietiiano toru laka jibe na naruei, kar bogo napano kito tomu na kariano nalo roju parido jikili kia ga, Kristo binimei m̃aro kar kito.
ROM 5:9 Kiano burukija miou jekon kito romeravo ruei, ana robinimei romemedu ea Atua mirano a mila napano maka bunu titai toa kito napano naio mia ridu vironiano van kito kanio.
ROM 5:10 Nua, bogo napano kito robe Atua kiano uolu kia ga, kenerinio kiano m̃ariano mila kiado merevuiano bija naio, a vonganei, kar napano romila bilbilu bo bija Atua ruei, mia kenerinio kiano meuliano mila kito bunu romeul to to dam̃ariga.
ROM 5:11 Jibe na naruei, kito rajaaro laka napano Atua bitirilar kiado Tubo Yesu Kristo, kar napano naio rila kiado m̃arabo na merevuiano vija naio, rotu vio takurano vijaio bereio.
ROM 5:12 Mia tenalo juo nei m̃ariano bija meuliano, naljuo abinimei ea yetemeriba jum̃abe? Toro na beamu ea yetemeriba naina Atam, a naio be toro na beamu napano mila kariano, a mila vironiano na kariano, jibe m̃ariano, monoka rimaluvo ea yetemeriba. Mia tomu nalo napano abinimei iorou, nalo bunu abokar kariano, a m̃ariano bokar nalo abiniu bunu.
ROM 5:13 Beamu nua, ea Mosis kiano bogo, Atua maka sian tuboiano vo, mia be iakurano napano maka tuboiano, bajago na kariano jo ruei. Jibe na naruei, Atua maka tiburelo ka bogo na ka nalo amila kokorov kiano tuboiano, kar napano ea bogo na, tuboiano makan vo, mia kialo kariano nalo naruei mila na monoka avar vironiano na m̃ariano navo.
ROM 5:14 Romijikia ka jibe na, bior napano jikar ea bogo na Atam, binimei bokar Mosis kiano bogo, maka tuboiano, mia tomu nalo aju am̃arm̃aro ga, kar vironiano na kariano jo ruei ea yetemeriba. P̃eli tealo amila bova jibe Atam milaio, p̃eli amila todolu nalo, mia ea Atua kiano vitiiano, kialo vovaiano nalo nene abiniu abe kariano be verare ga. Jibe na ga, romial ka venia napano toro takurano na ga Atam milaio, bokar tomu nonovio kialo meuliano ea yetemeriba, jibe ka ga venia napano Kristo naio takurano mila iorou, naio bunu bokar kiado meuliano robiniu napano romoneaio.
ROM 5:15 Mia im̃auano novo na Atua milaio napano maluvo ea kiano tinieseseiano naio bo laka, mijikia tovulu im̃auano va napano Atam milaio napano maluvo ea kiano kariano. Atam kiano kariano naio takurano mila tomu nalo monoka am̃arm̃aro, mia Yesu Kristo kiano tinievuiano naio takurano mila kito romemedu ea Atua mirano. Tenei jibe jidomiano vu tai napano kito romidu ga jibe na ga.
ROM 5:16 Atam kiano kariano na maka rila titai rivu leleio, mia jidomiano nei naio bo laka ka kito. Atua jibure toro takurano nei kiano kariano, naio ber ka kiano vironiano rivan ea tomu nonovio, a iorou, Atua mial jidomiano napano Yesu jian ban kito, napano bulu bulag kiado kariano nalo, ana berenio ka kito romemedu bo ea mirano bereio.
ROM 5:17 Be riano napano toro takurano kiano kariano ga, nina Atam, mila nam̃ariano jo juvulu kito, napano mia mijikia rivar bulag tomu nonovio kialo meuliano. Mia iorou, toro dolu kiano tinievuiano, nina Yesu Kristo, jian jidomiano novo nei ban kito napano vonganei, romemedu ea mirano Atua, a rojuvulu m̃ariano ruei, a mia iorou robokar meuliano novo vija naio.
ROM 5:18 Ver tibe na, berial ka kariano takurano neibano Atam kiano midu tomu nonovio ajua vironiano, mia iorou, Yesu kiano im̃auano memeduano tai mijikia rivuru bulag nonovlo den vironiano nene a ridulo atua meuliano napano maka rijikia ribisi bogo tai.
ROM 5:19 Mia ber bereio ga, toro takurano parinio jikili, maka riagago ka Atua, ana mila tomu nonovio abe tomu na amila kariano, mia iorou, toro dolu miagago ka venia napano Atua berenio ka naio, ana m̃aro ea m̃akolkolo mila ka kito ve miroano romei romemedu rivu ea Atua mirano.
ROM 5:20 Nua, Atua jian tuboiano ban Mosis, mia tuboiano nene jo berial ka tomu nalo ka kialo kariano nalo ju bujo laka. Mia bogo napano kariano nalo aju abinimei miroano lie bogo nonovio, Atua bunu ban lie vo, mila napano kiano tinieseseiano binimei toru lie vo.
ROM 5:21 Beamu, kariano buru m̃ariano binimei, mia m̃ariano nene na naio jo mila kariano jo juvulu bogo nonovio. Mia iorou, Atua mila kiado m̃arabo ka romei memedu ea mirano, mia nina mila ka vonganei kiano tinieseseiano naio juvuluio, kar napano jo mila ka kito roviniu napano romonea Tubo Yesu Kristo, mia rovokar meuliano napano maka rijikia ribisi.
ROM 6:1 Jibe ka napano neber vonga, kito robe tomu nalo na romila kariano, mia Atua tinien jii kito biekokoa kito. Ana ka nina, bo ka kiado meuliano vonganei mia tum̃abe? P̃eli tomu tealo nalo aber mia bo ka rotudu ka rola kariano ve miroano, ka rila mia Atua kiano tinieseseiano bunu to rimei lie bereio ka naio todu ka riviekokoa kiado kariano nalo nei?
ROM 6:2 Mia makanio, maka rijikia tibe na leleio! Kito romijikia rover ka tivelinio na sidomiano va na laiano na kariano, kito rojibe tanunu, monoka robisi ka naio na ruei, bo ka rotu re rolaio.
ROM 6:3 Kosidomii vonio bogo napano abaruei ea kito ka rove takurano vija Kristo Yesu. Ea bogo na, venia napano maluvo ea kito bare ga ka venia napano maluvo ea naio nua ruei. Jibe beamu, naio m̃aro bior kiado kariano, a vonganei, bogo napano abaruei ea kito, kiado meuliano moruo na kariano bunu naio monoka rim̃aro.
ROM 6:4 Beamu, nalo atuvan mokotenano mon luku ea vio na m̃ariano, a vonganei, bogo napano abaruei ea kito, monoka rotuvan bajago na kiado kariano nalo, a bo ka robisi vatitigio eaio. Mia beamu bunu, Atua mila im̃auano na iloiano napano mila Kristo meul bereio, a vonganei, bogo napano abaruei ea kito, rojumolu bereio ka roiel ea meuliano vou tai.
ROM 6:5 Jibe na, kito robe takurano bija Kristo ruei kar napano naio juvan kiano meuliano ea yetemeriba nei naio m̃aro, a kito bunu monoka rotuvan kiado meuliano moruo nalo. A romijikia be riano ka mia rove takurano vija naio bereio navo, kar napano naio midu bereio meuliano vou tai, a mia kito bunu rodu kiado meuliano vou.
ROM 6:6 Mia kito monoka rosidomii bogo nonovio, ka bajago na laiano na kariano napano romoluo bijaio, jibe napano ajuku kakario joa m̃akolkolo bija Kristo. Tibe na, naio mila na maka bunu rala kariano nalo napano mokotenado ajidom ala, a kariano maka rijikia rive boru ea kiado meuliano jibe ka napano kito tomu nalo na kiano im̃auano ga.
ROM 6:7 Bo laka kito rom̃aro ka kariano ruei, mia moroano na sidomiano na laiano na kariano monoka ribisi ea kito, bior rojibe ka tanunu napano sidomiano va na kariano maka rijikia rila titai ka kito leleio.
ROM 6:8 Be riano ka beamu, jibe ka napano rom̃aro bija Kristo ruei, ana vonganei, kiado moneano jikili ka mia rotu romeul vija naio rivano.
ROM 6:9 Kito romijikia ka bogo napano Atua mila Kristo meul bereio den nam̃ariano, mila ka Kristo mia meul rivanvano-o mia maka rijikia leleio rim̃aro bogo tai bereio, m̃ariano kiano moroano maka rijikia rivokar naio bogo tai.
ROM 6:10 Kiano m̃ariano nua na, naio be m̃ariano tai na rivar bulag vironiano nonovio na kariano, a kiano meuliano vonganei, naio be meuliano tai napano ka ridular Atua siano,
ROM 6:11 a mia monoka tibe na ga ea kito. Monoka rosidomii ka kito bunu bo ka robisi vatitig ka bajago na kariano, a dam̃ariga monoka rodular Atua siano to mave ea meuliano vou nei napano rojuaio bija Kristo Yesu.
ROM 6:12 Jibe ka, kiaku iliano na temi tai ea vio nei jibe nei, ber kamiu kuvituvan re jidomiano na laiano na kariano rimei tibe ka moroano na jikili tai napano to rive boru ka kamiu. Ver makanio, mokotenemiu nalo, napano nalo be tena yetemeriba nei ga, mia nalo atu aiagago ga ka sidom vovaiano na bajago napano kito tomu nalo romoluo bijaio.
ROM 6:13 A mia ver tibe na, maka rimemedu, kar torogio nalo na mokotenado, maka rivu ka amei tibe tenalo na im̃auano napano vovaiano mim̃au bija ka rila kiano bajago va nalo. Beamu, kito jibe tanunu nalo, napano meuliano na Niununo maka toa kito leleio, mia vonganei Atua mila kito romeul bereio, ana monoka rodu kiado meuliano vou nei ea naio bereio ka naio rivuru ka rila kiano im̃auano. Jibe na, mia torogio na mokotenado nalo amei tibe vite nalo na im̃auano napano Atua mim̃au bija ka rila kiano bajago memeduano nalo.
ROM 6:14 Nua, roju yetano ka tuboiano napano Atua jian ban Mosis, bija kiano vironiano nalo, mia romilavio ka rojogkar bano-o mia maka leleio, maka rovare ka rovokar ioruriano eaio. Jibe na naruei, Atua tinien jii kito a vonganei jo mijai kito ka jidomiano na laiano na kariano maka bunu rijikia vurudidig kito leleio.
ROM 6:15 Neber vonga ruei ka kito maka rotu yetano ka tuboiano napano Atua jian ban Mosis kar rojev ioruriano eaio, mia nomerou ka p̃eli tomu nalo tealo adu kiaku iliano nei riva rivova. P̃eli ajidomiio aberiam̃a, O, Pol jo ber ka kito maka rotu yetano ka tuboiano, mia vonganei romijikia rala venia na bova napano rojidom rola, naina bo ga na, mia Atua tinien tii kito viekokoa kito. Mia makanio, maka never tibe na leleio.
ROM 6:16 Kamiu monoka tiniemiu maio ka bogo napano toro tai ju yetano ka tubo tai, naio monoka takii tubo nene kiano iliano a monoka rimei tibe kiano toro na im̃auano. A jibe na ga bunu ea kiado meuliano. Verver sidomiano va to rive boru ka kiamo meuliano, mia jau monoka kala kariano nalo napano naio jidom ka kalaio. A verver kiamo tubo naio be Atua, mia koto koim̃auka kiano im̃auano novo nalo. M̃arabo juo nei, tai mia rila jau vija Atua kuvitibure kamiu to tobo to, ana dolu nene mia rilaso komemedu rivu vija naio.
ROM 6:17 Beamu, kamiu bunu kube tomu nalo na im̃auano na yetano ea moroano na kenemiu sidomiano va ga, mia siva toru ban Atua napano neberloglog kamiu, ana kamiu kumidu dam̃ariga vatitigio ea kenemiu jidomiano, kumitakiio vatitig ea kenemiu meuliano.
ROM 6:18 Jibe na, kamiu kuvitaluvo den tubo va nei re nua, maka bunu kuve kiano tomu na im̃auano, mia vonganei kube tomu na Atua kiano im̃auano napano kumitum̃a kumila tenalo na memedu jibe napano naio jidomio.
ROM 6:19 Nemijikia ka verloglogiano nalo nei ajikili kija kar napano toro kiano jidomiano maka tibe Atua kiano jidomiano, nina naruei mila na nemijai kamiu nemil ea kijokijo napano berii tomu nalo na yetemeriba nei ga, jibe tubo nalo bija kialo tomu na im̃auano nalo. A kamiu monoka kuvitilubar vatitig nioti iliano nalo nei, ka beamu, jidomiano na laiano na vovaiano naio toru laka ea kamiu, napano ju miyuku kiki ea torogio na mokotenemiu nalo amila kariano nalo napano kirivova mia kirivova, mia vonganei maka bunu tibe na. Vonganei, jidomiano na laiano na bajago na memeduano monoka ve toru ea kamiu, napano mijikia rila ka kenemiu meuliano rimei ve lu mia ve lu.
ROM 6:20 Bogo napano kumitibe ka tomu na amim̃auka kariano ga, moroano na jidomiano na laiano na bajago memeduano maka rijikia rim̃au ea kamiu,
ROM 6:21 ana kamiu kumila im̃auano va nalo. A tenalo na, maka rijai kenemiu meuliano nalo leleio, a nalo amidu kamiu kumitua m̃arabo na m̃ariano memedu, mia vonganei, ver kuvitu kuvisidomiilo bereio, kuvimou laka ka venia napano kumilaio.
ROM 6:22 Mia vonganei, Atua naio midular kamiu den bajago na sidomiano na laiano na kariano neibano, kubinimei jibe naio kiano tomu na im̃auano nalo, mila napano bo laka ea kenemiu meuliano napano kubinimei kube lu bo ruei, a vonganei kuvitua m̃arabo na meuliano na maka rijikia ribisi.
ROM 6:23 Vuluiano napano kariano rila ka toro rijevio, naio be m̃ariano napano maka rijikia ribisi, mia kiado Tubo Yesu Kristo mila napano robokar meuliano na maka rijikia ribisi, napano maka rovulio, a naio be jidomiano tai napano Atua jianio ban kito jibe na ga.
ROM 7:1 Bilbilu nalo, nemijikia napano kamiu kumijikia vatitig tuboiano nalo ea kenemiu buruvenuo, a mia neberii tenalo tai ea tivelinio na tuboiano nalo nei napano mijikia rijai kiado jidomiano nalo ea tivelinio na Atua kiano tuboiano napano roju reberiio. Tenalo na jibe nei, ka ea tuboiano, bogo napano kito roju romeul kia ga vo, monoka romoneaio, a ver rom̃aro, maka bunu rotu reseltano kanio.
ROM 7:2 Kosidomii vonio bajago na toro buru tira, naljuo ajoro. Ver tira tai, bogo napano koano meul kia ga jo, tuboiano jikili ka tira nei monoka to vatitigio tulaka vija koano sum̃ano nene. A bogo napano ver toro m̃aro, tuboiano maka bunu riverii titai ka tivelinio na tira neibano, ka naio monoka to tibe na koano na toro nei kia ga vo.
ROM 7:3 Jibe na, ver tira nene, koano sum̃ano meul kia ga ana naio ba bina ka toro dolu, mia tuboiano ber ka naio mila siakaiano. A ver koano sum̃ano m̃aro den naio ruei, tuboiano maka bunu sikili tu ka river titai vanio. Naio mijikia riva soro ka toro dolu tai bereio bo ga na, mia maka siakaiano na.
ROM 7:4 Bo ga, bilbilu nalo, jidomiano na jibe ka kijokijo tai ga ka verial van kito ea tivelinio na tomu nalo vija tuboiano napano Atua jian ban Mosis. Nua, tomu nalo aju ajeltano ka tuboiano na, napano monoka amonea naio ka avokar ioruriano, mia vonganei, tuboiano nene naio m̃aro den kito namoneano nalo. Vonganei kito maka bunu rotu roseltano ka tuboiano, a romijikia rava rotu roseltano ka toro dolu, nina Kristo napano naio m̃aro kar kito. Atua burumeul ea naio bereio, mia rila ka kito tarati nene nalo mia rovar m̃arati nalo na bo bo laka napano naio jidomio.
ROM 7:5 Beamu, bogo napano roju rojeltano ka bajago va kiano moroano napano abar kito bijaio, kiado sidomiano va nalo amim̃au ea mokotenado, amila romila kariano telabo. A bogo napano romijikia ka Atua kiano tuboiano naio jo juko vio ka kariano nalo nei, ber ka kola re nina, kola re nina, tenena mila kiado sidomiano va nalo abavavin lie. Jibe na naruei, tuboiano na verbureiano na bajago va nei ju mila ka kito rovova lie, a midu kito rojua m̃arabo na m̃ariano memedu.
ROM 7:6 Tuboiano na bokar jikili kito jibe na, mila robinimei robe tomu nalo na im̃auano kurano na tuboiano moruo nalo napano abivitauialo nalo miroano aju. Mia vonganei, rom̃aro vatitigio ea m̃arabo nene, rojaluvo denio, ana robinimei robe tomu na im̃auano kurano ka m̃arabo vou novo nei Niununo Lu kiano.
ROM 7:7 Ana kamiu kumisidomii jum̃abe ka kiaku iliano nei, napano neber Mosis kiano tuboiano ju mila kiado sidomiano va nalo abinimei abavavin lie? P̃eli kamiu kuvitu kuvisidomii ka jibe nei kiniou nojo neber ka Atua kiano tuboiano bova? Mia makanio, maka never tibe na, kar napano tuboiano kiano im̃auano novo ka rilaio. Verver maka tuboiano, mia maka rejikjikia ka navurikoroviano na tuboiano naio jum̃abe. Jibe tuboiano ber jikili berinavo “Tiniem tii re tomu dolu kialo saba” a ver tuboiano maka riverenio, mia maka rejikia tinietitiano naio be venia, p̃eli tinietitiano naio be bajago na bova jum̃abe.
ROM 7:8 Riano ga, bogo napano tuboiano juko vio ka tinietitiano nei, vonganei ana jidomiano na lakoroviano na tuboiano jumolu mial vio tai ka sel eaio, mila tinietitiano nalo abinimei telabo joomo ea kito. Jibe na, tuboiano kiano im̃auano ju, ka ver maka tuboiano, mia maka rejikia rovitilubar bajago va na laiano na kariano napano abar kito bijaio.
ROM 7:9 Jibe beamu, maka nejikia tuboiano, ana maka nosidomialio, noju jibe na ga. Mia iorou kanio, nebitilubar ka tuboiano ber ka “Jau tiniemo tii re tomu dolu kialo saba,” ana vonganei nobitilubario naruei ka nojo nomila korovio tuboiano,
ROM 7:10 a nobitilubar ka monoka novar vironiano riviorio, nam̃aro. Jibe na, bajago na moneano ea tuboiano naio maka ve m̃arabo na vokariano na meuliano, mia tuboiano binimei jibe m̃arabo na m̃ariano na kanado ruei.
ROM 7:11 Beamu, roberiam̃a tuboiano naio be m̃arabo na meuliano, a nina kiado jidomiano va na laiano na kariano napano mila lelan kito ga, mila rosidomii tibe na. Mia maka tibe na, ka napano romila korovio tuboiano nene, ana midu kito rojoa m̃arabo na m̃ariano ruei.
ROM 7:12 Naina naruei im̃auano napano tuboiano jo milaio, a maka never ka bova, kar tuboiano nei be lu mia be lu, a kiano iliano nalo amemedu a abo.
ROM 7:13 Ana p̃eli mia tealo avika vikadeniano, averinavo ver be riano ka tuboiano be tonovo tai, a jum̃abe jo mila tomu nalo monoka avokar vironiano na m̃ariano? A makanio, maka never ka tuboiano na mila kito monoka ram̃aro, mia kiado jidomiano va na lakoroviano na tuboiano nei, naio ga milaio. Iliano na tuboiano nalo abo, mia bogo na kiniou nemila kariano, kiniou ga nojo nomidu kiniou nojua m̃arabo na m̃ariano. Verver maka tuboiano nei, mia maka rejikia ka kariano naio be venia, a mia maka rejikia venia na bo a venia na bova. A bogo napano tuboiano jikili ju, mila meravo bo ka kito ka bajago na laiano na kariano napano jua kito, bova mia bova.
ROM 7:14 Jibe napano neber, Mosis kiano tuboiano be lu laka, maluvo ea Atua kiano Niununo, a nemial napano kiaku bajago maka lele ve lu, nojo nomim̃au jakii kiaku sidomiano va nalo ga.
ROM 7:15 Tenalo na bova napano nojo nomilaio, maka nejikia vatitigio nojo nomila jum̃abe, p̃eli nemila kario venia, bior tenalo novo napano nojidom nala, maka noto nalaio, mia tenalo na bova napano maka nosidom nalaio, naina naruei nojo nemilaio.
ROM 7:16 Naina naruei neber ka Atua kiano tuboiano bo, kar napano monoka tuboiano tai to ka tokovio ka kiaku vovaiano nalo na, napano jibe ka neberiio ruei, maka nosidom nalaio, a nojo nomilaio ga.
ROM 7:17 Jibe na ga naruei, maka kiniou napano nosidomii ka nala vovaiano nalo nei, mia bajago na sidomiano na laiano na kariano napano jo mim̃au toru ea kiaku meuliano, naio naruei jo milaio.
ROM 7:18 Mia kiaku bajago na sidomiano na laiano na kariano na, maka neial ka naio rila tonovo tai vo na joa kiaku meuliano. Bogo telabo kiaku sidomiano naio ber monoka nala saba memedu, a iorou kanio, maka bunu nalaio.
ROM 7:19 Naina naruei jibe nam̃a nojo neberenio: maka noto nala tonovo nalo napano nojidom nalaio, a vovaiano nalo napano maka nosidom nalaio, tenalo na naruei nojo nomilaio.
ROM 7:20 A verver noto nala vovaiano nalo napano maka nosidom ka nalaio, naina berenio ka kiniou maka nala rivu na, todolu tai jo miyuku ea kiniou ka nalaio, naina bajago na laiano na kariano napano joa kiaku meuliano.
ROM 7:21 Bajago na laiano na kariano neibano, nemialio jibe tuboiano na jikili tai bereio napano jo mim̃au ea kiniou. P̃eli bogo tealo nojidom nala tonovo tai, mia jidomiano va jo vaataro ga, milavon ka rivuru kiniou navan vova bereio.
ROM 7:22 Bogo telabo, ea kiaku jidomiano kiniou takurano, nojo nojidomii vite nalo na Atua berenio, a nemial kiano iliano nalo abo laka,
ROM 7:23 a nomijog ea kiniou jibe iliano dolu tai bereio naio bunu jo mil. Nina bajago na kariano, napano jo miyukyuku kiniou ka noto neseltano ka moroano na kiaku sidomiano va nalo. Jibe napano kiaku sidomiano va nalo nei, ajua mokotenaku, aju amila burum̃ara mira bija kiaku sidomiano novo nalo napano nalo ajua kiaku jidomiano.
ROM 7:24 Tomnei, sidomiano novo bija bajago va, naljuo aju amila baravo ka naljuo ea kiniou jibe na, kiniou nomijog bova, nemial kiado meuliano ea yetemeriba na vokariano na m̃ariano nei jikili laka. A mia kei naruei mia mijikia rijai kito, kei mia mijikia rivar bulag kito den jogvaiano nei?
ROM 7:25 Kiado meuliano jikili kija, kar napano ea tivelinio tai, kiado jidomiano jidom rimonea Atua kiano tuboiano, a ea tivelinio dolu nene, bajago na laiano na kariano jo mim̃au ea mokotenado. A riano ga, siva toru ban Atua, kar napano naio miila Yesu Kristo kiado Tubo binimei, napano mia rijai kito, ridular kito den jogvaiano neibano, a rilarur kito.
ROM 8:1 Kristo Yesu binimei ka rilarur kito, naruei mila ka kito napano kiado meuliano jo bo bija naio ruei, mia Atua maka leleio rijikia ridu vironiano van kito bogo tai.
ROM 8:2 Nina kar napano beamu, kito rojua meuliano va tai napano bajago na kariano bavavin a napano berkar m̃ariano ban kito, a iorou, Yesu Kristo midu kito rajaluvo meuliano na, midu kito rojua m̃arabo vou dolu tai napano romijikia rovokar meuliano nabo napano Niununo Lu jianio.
ROM 8:3 Tomu nalo amila vio ka amonea vatitig Atua kiano tuboiano ka avokar ioruriano eaio, a maka ajikia ala kar toro parinio kirisikili laka. A venia napano maka ajikia alaio, Atua naruei milaio. Naio miila kenerinio Yesu binimei ea yetemeriba, mila mokotenano a kiano meuliano, be verare ka kito tomu na kariano. Mia Yesu binimei mijamo ka mokotenano a kiano meuliano nei jibe sida tai ka uelar vironiano na kiado kariano.
ROM 8:4 Vironiano na kiado lakoroviano na tuboiano, naio ga bario, mila kito romemedu ruei ea Atua kiano vitiiano, naruei maka bunu roiel ea bajago napano kariano jo buru didig lelan kito, a romijikia roiel ea bajago napano Niununo Lu jo buru vuru kito ga eaio.
ROM 8:5 Toro na jo miel jakii bajago na kariano napano abar naio bijaio, kiano jidomiano jo bujo ka sidomiano va nalo na yetemeriba nei, mia toro napano jo miel jakii Niununo Lu, kiano jidomiano jo bujo ka tonovnovo nalo napano Atua jidomio.
ROM 8:6 Sidomiano laka bajago va nalo na yetemeriba nei, naio be m̃arabo na m̃ariano, a sidomiano laka bajago novo nalo na Niununo, naio be m̃arabo na tum̃aro, be m̃arabo na meuliano.
ROM 8:7 Toro napano kiano jidomiano jidom bajago na sidomiano na laiano na kariano, naio be Atua kiano uolu memedu. P̃eli naio maka sidom rivatove ka Atua kiano tuboiano leleio, p̃eli ver makanio, p̃eli naio jidom rivatove kanio, mia bior naio bano-o bova laka ruei banbano-o ana maka bunu rijikia rivatove ka naio, a mia naio be toro na jibe na naruei.
ROM 8:8 Nalo napano amiel ajakii bajago na kariano napano abarlo bijaio jibe na, maka ajikia ala titai napano mia Atua rijikia risaaro ka nalo kanio.
ROM 8:9 Mia jau napano Atua kiano Niununo joaso, jau maka koiel ea bajago na kariano napano abariso bijaio, mia monoka koto koiel ea Niununo nei kiano moroano napano Kristo jian banso. Mia verver toro tai naio jo napano Niununo nei maka toaio, toro nene maka ve Atua kiano.
ROM 8:10 Bajago va na yetemeriba nei naio mila ka mia mokotenado riviniu monoka rim̃aro bogo tai, a kito napano Kristo joa kito, naio mila kito romemedu ea Atua mirano ruei, naruei mia niunudo ameul to toboto.
ROM 8:11 Atua Niununo napano mila Yesu meul bereio den nam̃ariano, nina naruei Niununo napano joa kito ruei, a mia rila vatitig tibe na ea kito bunu. Bekurano napano mokotenado rim̃aro, ana Atua kiano Niununo napano joa kito mia rila kito romeul bereio.
ROM 8:12 Bilbilu nalo, Atua mila bo laka ban kito jibe nei, mila jibe napano kiado burum̃ara jabue joa naio vonganei. Tibe na, bo rodumiran tonovo tai rivanio, mia bova ver rotu reiel ratakii bereio kiado bajago na sidomiano va na kariano.
ROM 8:13 Bajago na kariano naio be m̃arabo na rovokar m̃ariano, mia toro napano jidom riel takii m̃arabo na meuliano, naio monoka tuvan Niununo rim̃au ea naio, rijai ka te bulag sidomiano va na laiano na kariano den kiano meuliano.
ROM 8:14 Mia kito napano romonea Atua Niununo joono jibe na, kito naruei robe Atua kenerinio riano.
ROM 8:15 Nina bior napano Atua Niununo maka rila kito romei tibe ka tomu nalo na amim̃au Atua kanano kurano ga, a naio mila jibe na napano Atua bar bulag kito, robe kenerinio nalo. Jibe na, monoka romerou ka re Atua, a bogo napano roil vanio, romijikia rovio naio tibe karam̃ado, rover “Teta.”
ROM 8:16 Kito robio naio jibe na memedu ga na, kar napano Atua kiano Niununo jo berloglog kito ana niunudo bunu mijikia ka be riano, kito Atua kenerinio nalo.
ROM 8:17 Vonganei kar napano robe Atua kenerinio jibe na, ilivuiano novo nalo napano Atua bar ju rorea kenerinio memedu nei Kristo, mia kito kenerinio dolu nalo bunu, mia kito ravar rotiburevure vija naio. Be riano ka mia monoka ravar bunu jogvaiano tibe napano naio bario, a ver rasaaro ga, mia Atua rila rivu van kito ve verare ka naio mila bo ban Kristo.
ROM 8:18 Banei, ea yetemeriba nei, roju robiniua bogokouo telabo nalo nei, mia ver kiado jidomiano jo dam̃ariga ea mermerano napano mia rimaluvo iorou, nemijikia never ka ea kiaku vitiiano, jogvaiano nalo na vonganei, nalo ajibe tena iakurano ga.
ROM 8:19 Jogvaiano nalo nei aju abokar tenalo nonovio napano Atua jiio, vonganei tenalo nonovio aju rorea, ajidom m̃elea ka bogo maaro rimei, ka Atua riverial vonga ka kenerinio riano nalo abe kei.
ROM 8:20 Beamu, jogvaiano maka to, kar napano Atua jii tenalo nonovio bo, mia iorou, nalo aju abinimei aminunu, aburu kokorovio, abova jibe na banbano-o napano tenalo nonovio maka bunu aim̃au rivu tibe napano naio jidomio. Naio mijamo ka tibe nei ea yetemeriba nei, ka rila ka mia tomu nalo monoka kialo jidomiano ve takurano ka monoka avalea naio ga.
ROM 8:21 Jidomiano na mia monoka toa kenerinio nalo, napano nalo monoka amonea ka mia saba nalo maka ajikia atu rivova tibe na bogo nonovio. Nalo monoka tiniel maio ka bogo tai, mia naio rila saba nonovio napano naio jii amei rivu bereio, nalo abokar kiano mermerano, jibe ga napano mia kito kenerinio nalo nei bunu rotu rovokario.
ROM 8:22 Mia vonganei, kito roju romial yetemeriba nei kiana, napano jikar ka nua binimei, saba nalo napano ajuaio aju amijog bova jibe ga na tira tai jidom rivar kenerinio.
ROM 8:23 A be verare ga ka kito napano robokar Niununo Lu, napano naio jibe jidomiano tai na beamu napano Atua jian ban kito ka rila rosidomii ka mia jidomiano na toru mia rimei iorou navo. Kito bunu, tegiano jua kiado iviso kia ga vo, a romijikia ka mia kito rotu rojog rivova rivano-o vokar bogo napano Atua ridu bulag kito den yetemeriba. Rojidom nina laka, kar napano rojibe ka tete nalo napano naio bar bulagio ga, a ea bogo na, mia rojog rivu vatitig jum̃abe kenerinio riano nalo, napano rova rotu vija naio ea kiano vio memedu.
ROM 8:24 Tenene na naruei naio milarur kito kario, a jikar ka bogo na binimei roju romonea jikili ka kiano verikariano napano ber mia naio rila rivu van kito tibe na. Roju romonea jikili eaio bior napano maka reialio vo, a bogo na ver maluvo, mia maka rejikia rover romonea ka mia tum̃abe, kar napano jibe na ruei.
ROM 8:25 A maka reial tenalo na vo, naruei monoka romoneaio sikili ka mia tibe na, a monoka rala kiado jidomiano rivetebievi ka rotu rorea vanvano-o mirado rialio garuei.
ROM 8:26 Bogo napano roju rorea jibe na, bogo tai tiniedo m̃aro p̃eli roburu didig, mia bogo nonovio Niununo Lu jo miija kito. Bogo tai, rojidom robolkouo kar jogvaiano nalo, a romijog bova laka ana romil vonio, maka rejikia reial iliano memedu ka rever. A ea bogo na Niununo Lu mijikia rimei, ridu kiado vio ana naio ga bolkouo kanado ka tegiano nalo napano aberial kiado jidomiano nalo napano iliano nalo maka avare ka averenio.
ROM 8:27 Ea bogo jibe na, Atua mijikia tenalo nonovio napano ajua kiado iviso kito kiano namoneano lu nalo, a mijikia napano Niununo jo bolkouo kanio kito, napano jo ber tenalo memedu ga ea venia napano joa Atua kiano jidomiano ruei.
ROM 8:28 Ana ea bogokouo nalo napano robiniua, ea tenalo venia napano mia rimaluvo ea kito, romijikia ka mia Atua rila ka ea juluvati nene, mia rivu ga van kito napano tiniedo jii naio. Naio mila jibe na kar napano naio bijauia bulag kito beamu ruei ka naio mijikia rim̃auka kiano im̃auano novo nalo ea kiado meuliano.
ROM 8:29 Naio mijikia vatitig kito nua beamu binimei, jiloglog bulag vatitig kiado m̃arabo kirisiou ruei, mia rila ka kiado meuliano rivar kijokijo na kenerinio nei Yesu. Jibe na, kito kuruado a kuviviniedo nalo ea m̃aratavo takurano, napano Yesu naio be motoru ka kito.
ROM 8:30 Nina naruei im̃auano novo napano Atua mila ban tomu nalo napano naio jiloglog bulaglo ka ave kiano m̃aratavo. Naio biolo ka amei eaio, naio mila abe merevuiano bijaio, a mila ka mia avokar kiano mermerano ea bogoti napano mia rimei.
ROM 8:31 Tenalo na amila meravo ka Atua to vija kito, jo mila bo ban kito, a jibe na mia kito rover venia bereio? Verver Atua jidom ridular kito, mia kei mijikia rila kito rojoru bereio?
ROM 8:32 Kito romial ka Atua tinien jii laka ka kito banbano-o mijamo ka auebin kenerinio memedu kar kito, ana ver jaaro ka rila burum̃ara tonovo nei ban kito jibe nei, mia jaaro bunu ka sian tenalo dolu novnovo nalo rivan kito.
ROM 8:33 A nina Atua naio jo mila ka kito ruei. Naio bijauia bulag kito ka rove kiano ruei, mia kei bereio mia river ka kito maka ravare ka royotuba ea mirano? Atua naruei jo berial ka kito romemedu bija naio ruei,
ROM 8:34 ana kei bereio mia river ka kito monoka ravar vironiano kar kiado kariano nalo? Maka toro tai, kar napano Naverikariano Yesu mila vite nonovio nalo ruei. Naio m̃aro kar kito, iorou meul bereio den nam̃ariano, karina bano bereio jotano ea kiano vio lu mave bija Atua, a vonganei jo berial kito ban Atua ka Atua naio viekokoa kito.
ROM 8:35 Kristo tinien jii m̃elea laka kito jibe na, venia naruei mia mijikia vuru bulag kito den kiano tinietiiano nei bereio? Maka titai. Bogo tealo, im̃auano nalo temi ka kito, p̃eli tomu nalo amila bova ka kito. Bogo tealo, kito robokar bogokouo, p̃eli maka sado sinaniano, p̃eli maka ve kiado kulum̃arauo. Bogo tealo, kito romerou kar kiado meuliano, p̃eli rojen iobogu na mira, a makanio, bogo nonovio ga Kristo tinien jii kito a kiado meuliano jo bo ea jum̃ano.
ROM 8:36 Nina jibe na Parinio Tubo Teviti berenio beamu, ea bogo napano naio bunu bar bogokouo, napano ber “Siamo joa kumemi, ana nalo aju ajidom auebinvin kumemi num̃arm̃aro bogo nonovio ga, nalo amial kumemi jibe nunu nalo napano ajil bulaglo ka ativi bulag tilijolo.”
ROM 8:37 Tenalo kinkin na jibe nei nalo amijikia amaluvo ea kito, mia be iakurano ga. Ea tenalo nonovio na jibe na, Kristo kiano tinietiiano joa kito, ana kito roju loa, roju rojovulu dam̃ariga.
ROM 8:38 Nemijikia never memedu van kamiu bereio, ka maka titai leleio napano mijikia rila ka Atua maka bunu rijikia tinien tii kito. Verver romeul p̃eli rom̃arm̃aro, verver nailiano nalo atu vija kito p̃eli sim̃aro nalo atu amei ka kito, verver kito roviniua tenalo napano aju amidu vio vonganei p̃eli roviniua tenalo na napano mia adu vio ea bogoti nalo napano amei,
ROM 8:39 a verver moroano novo nalo ea vio mave nalo atu vija kito p̃eli moroano va na vio yetano nalo atukovio ka kito, a maka leleio titai napano Atua jii napano mijikia vurular kiano tinietiiano den kito. Kristo Yesu kiado Tubo midu Atua kiano tinietiiano joa kiado meuliano ruei, ana mia to toboto.
ROM 9:1 Bilbilu nalo, vonganei nojidom noverii ea tivelinio napano kito kulo Ju, rober ka kito robe Atua kiano tomu nalo, mia kito miroano maka asidom Yesu. Mia tum̃abe ka nalo na? Bo ga, kiniou maka nejikia nola sibi, monoka noverial ka kamiu jidomiano novo nalo tai napano Niununo Lu jian ban kiniou ea tivelinio nei ruei,
ROM 9:2 mia be riano, iliano nalo na, nalo amila ka kiaku aua a kiaku jogvaiano toru laka, naio maka rivatove leleio.
ROM 9:3 Nina kario napano vonganei, kiaku meuliano miasol bo bija Kristo ruei, a nemial jibe yati dolu nalo na Ju napano robe burukija takurano, kialo meuliano maka riasol rivu vija naio vo. Verver nemijikia nodular kiniou bereio ka nalo amijikia amei adu jeleku, mia nasaaro ga, mia maka rijikia tibe na.
ROM 9:4 Kosidomii von tenalo na bo napano Atua mila ruei ka kito kulo Ju, napano nalo jibe nei: kito naruei napano Atua bijauia korobido yati na Israel nalo ka ave kiano tomu nalo, kito naruei napano Atua berialio ka naio bijauia bulag kito jibe kenerinio nalo, kito naruei napano Atua midu yulu na kiano mermerano buruii kiado tomu nalo ea vio kurano nua, kito naruei napano Atua jo mila virakariano nalo bija kiado tormoruo nalo, kito naruei napano Atua midu kiano tuboiano joa kito, kito naruei napano burum̃ara Atua kunuano na lotuano jo bija kito, kito naruei napano Atua berkar ilivuiano telabo ban kito,
ROM 9:5 kito naruei napano kito rovio tormoruo lu re nua jibe Epraamo, Aisak, a Yakovo, ka nalo abe korobido, a mave ka tenalo na, kito naruei napano Yesu maluvo ea kiado yati, naio miyotuba ea yetemeriba nei jibe napano naio be toro, mia naio bunu be Naverikariano, napano naio be Atua napano be tubo ea vio reraio, napano bo ka roiaia naio bogo nonovio rivano-o maka ribisi. Nina naruei tenalo na bo napano Atua mila ban kito kiano tomu nalo, mia kito telabo amial jibe titai kurano ga.
ROM 9:6 Nina nalo napano maka aiasol rivu vija Kristo, a p̃eli tomu tealo nalo aber p̃eli vite nene mila ka verikariano napano Atua jian beamu maka bunu riyotuba tibe napano naio berenio, bior ka naio berkar ber mia kiano ilivuiano toa tomu nonovio na yati na Ju nalo. Mia maka tibe na, bior todolu tai, napano ban jibe na, ka nalo napano amiyotuba ea Yakovo kiano yati, napano robio ka kulo Israel, maka nalo aviniu napano Atua ber ka nalo ave kiano tomu nalo riano.
ROM 9:7 P̃eli romijikia rover iliano na ea m̃arabo dolu bereio, ka rover ka nalo napano aber ka Epraamo naio be korobilo, maka nalo aviniu napano rover ka amiyotuba ea kiano yati na bo naruei. Iliano tai napano joa Vivitauiano Lu nalo naio ber jibe nei ruei, napano Atua mil ban Epraamo ea tivelinio na kenerinio juo na Ismael bija Aisak, a naio ber Kiamo yati nalo memedu mia nalo amoluo ea kenerimo nei Aisak ga.
ROM 9:8 Ana iliano na jo ber kalo napano Atua mial ka aju joomo ea taara na Epraamo kenerinio nalo a memedu, nalo kenia? Maka tomu nalo aviniu napano amoluo ea yati nalo na kiritete nalo dolu napano naio bario, a naio be nalo napano amoluo ea kiritete nei Aisak kiano yati napano Atua bijauiaio, naio berkar ka mia kiano ilivuiano nalo atualo.
ROM 9:9 Kito romijikia ka naio jibe na, kario napano beamu, Epraamo be kenerinio bija kialo tira na im̃auano na Aka, mia tete na maka naio napano Atua ber ka mia Epraamo kiano yati nalo memedu ayotuba eaio. Mia Atua berkar vatitig ka Epraamo bereio, berinavo “Epraamo, mia kiniou nala kamjuo koamo na Sarai ka yuka yako, ea bogo tibe nei ga, mia naio rivar kenemiu kiritete sum̃ano tai.” Mia iorou, tibe ga napano Atua berkario, a Epraamo kenerinio nene Aisak, naio naruei yati memedu napano kito kulo Ju romoluo eaio.
ROM 9:10 A kito romial napano bogo napano Aisak nene naio toru, naio be kenerinio, a jibe na bereio. Koano Repeka bar savoro juo nei Yakovo bija Isau,
ROM 9:11 a bogo napano naljuo maka amoluo vo, Atua berialio venia napano naio berkario ka naljuo. Naio maka sidomii ka rila takii kialo im̃auano ka ala rivu p̃eli rivova, a naio mila jakii ga kiano jidomiano.
ROM 9:12 Naruei bogo napano naljuo amoluo, Isau moluo beamu, a Yakovo moluo iorou kanio, a Atua ber ka kenielo, berinavo “Naio napano moluo iorou mia naio maka riagago ka naio napano moluo beamu, a naio napano moluo beamu, naio monoka riagago ka naio napano moluo iorou.” Jibe na, maka takii kiado bajago moruo, mia mila meravo ka Atua bitirilar toro maka takii toro kiano jidomiano, a jakii venia napano Atua berkario ga.
ROM 9:13 A vite na meravo laka ea tivelinio na savoro juo na, kar napano iliano dolu tai joa Vivitauiano Lu ruei, napano Atua berialio ber “Kiniou nomidu Isau na napano moluo beamu, jo yetano, mia nomidu Yakovo na napano moluo iorou, jo mave.”
ROM 9:14 Bo ga, Atua berial kiano jidomiano meravo bo jibe na, naruei mia kito rover venia bereio? Mia romijikia rover ka Atua kiano bajago na bova, mila maka rimemedu ea tivelinio na tomjuo nei? Mia makanio, maka rejikia roil niegeniege Atua tibe na.
ROM 9:15 Nina jibe kiano iliano dolu tai bereio napano naio ber ka Mosis nua, napano berinavo “Kiniou nebe Atua, mia joa kiniou ka nemijikia tinieku riiaio toro kei napano nojidom ka tinieku riaio.”
ROM 9:16 Jibe na, Atua jo bijauia kiano tomu nalo maka rivior napano nalo ga naruei aber ka naio monoka rivijauialo, a maka kar napano nalo amila vio ka ala tenalo napano p̃eli naio jaaro kalo kario, a naio bijauia tomu nalo jakii ga kiano tinieriiaiano ea nalo napano aju amijog bova.
ROM 9:17 Atua kiano bajago na, napano mila ka toro takii ga kiano jidomiano, romial naio mila bunu ka Parinio Tubo Vero na Ijivi, ea Mosis kiano bogo nua. Vero na naio be toro tai napano naio tinien jer Atua kiano tomu nalo, mia Atua bijauialar naio bunu ka rila kiano im̃auano tai, jibe napano Vivitauiano Lu berenio, napano Atua mil ban Vero, ber “Kiniou nomidu larso ka kovar moroano ea kiamo buruvenuo. Mia nemijamo kaso ka kovarvar ka kiamo moroano beamu vo, mia nela ka mia jau koialio ga napano kiaku moroano lie laka ka kiamo moroano, a kiniou nojidom ka tomu nalo na vio nonovio mia ajikia ka moroano nonovio joa kiniou.”
ROM 9:18 Jibe na, kito romial napano toro napano Atua jidom tinien sesei ka naio, mia monoka tibe na, mia ver toro tai napano jibe Vero nei napano Atua jidom rila kiano jidomiano sikili, mia tibe na bunu.
ROM 9:19 Kiniou neber jibe nei, mia monoka jidomiano tai vavin napano mia toro mijikia vika tibe nei, river “Ver tomu tealo, Atua ve tiniesesei rivano, a tomu dolu tealo, naio jo milalo napano kialo jidomiano jikili, mia tum̃abe naruei? Verver Atua naio ga naruei jo mila ka kito romei rivu p̃eli rova rovova, ana maka rivu ka naio to tibure kito bereio. A ver Atua jidom rila ka kito takii kiano sidomiano, mia maka rejikia rotuko vio kanio ka rila re.”
ROM 9:20 A mia kiniou noverdop̃e ka iliano nalo na, kiniou neber: Koig, makanio, jau kobe toro ga, jau kobe titai napano Atua jiio, mia jau kola vonio re ka kodukian kiamo iliano mave ka naio bereio. Naio jibe ka napano toro tai jo mim̃auka baju na tano nalo. Bogo na naio mim̃auka baju na tano tai karina, ana baju nei maka rijikia tumolu ril vanio bereio riverinavo “E, kar venia jau komim̃au kirivova ka kiniou jibe na?”
ROM 9:21 Mia maka rijikia tibe na, bior naio napano mim̃auka baju na tano, joa naio ga ka rim̃auka takii kiano jidomiano. Ver naio ridu kulati tano tai, naio mijikia rim̃auka baju na tano ve juo kanio. Takurano, naio be baju novo na jokoluolu, a dolu, naio be baju na vonuo ga.
ROM 9:22 Ana Atua bunu mim̃au jibe nei, a naio bunu be kiano tenalo juo napano jidom rilaio. Naio jidom rila tomu nalo avitilubar napano naio tinien jer kialo kariano nalo, banbano-o mia mijikia rije vatitig vironiano vanlo vija kiano moroano na toru. Bogobe ruei, naio mila kiano jidomiano ealo tebievi, a vonganei joa naio ka rila rivanlo venia napano naio jidom rilaio.
ROM 9:23 A todolu napano naio jidom ka riverialio, naina kiano bajago novo nalo napano naio jidom rila ka kito napano naio be tiniesese ka kito. Nina jibe napano nua beamu ruei, naio mila vatitigio kiano ilivuiano novo nalo, a vonganei mim̃auka kito jibe basidobidobi na misonlo ban eaio.
ROM 9:24 Naio mila bo ka kito jibe na bior napano kito naruei napano naio bio kito, napano kito tealo romiyotuba ea yati na Ju nalo, a tealo romiyotuba ea yati na nalo napano maka ave Ju.
ROM 9:25 A bajago na jibe ka Atua kiano iliano tai napano Osea Naverialiano berialio ea kiano niosi, napano Atua ber jibe nei, berinavo “Taara na tomu nalo, napano beamu maka ave kiaku, a vonganei, kiniou nobiolo ka kiaku tomu nalo. Venuo napano beamu maka tinieku maio kanio, vonganei neber nojidomio laka.”
ROM 9:26 A bogo tai bereio, Osea berial Atua kiano iliano dolu napano ber “Beamu, neber ka tomu nalo ea vio nei ka nalo maka ave kanaku tomu, a vonganei, mia ajog napano aju abiolo ka nalo abe keneriku, kiniou Atua na moroano, kiniou Atua napano nemeul.”
ROM 9:27 A iliano dolu tai ber jibe nei bunu, napano joa niosi napano Naverialiano Aisea bivitauia. Ea vio na, naio mijog bova bior tomu na Israel, ber “Taara na tomu nalo na Israel kialo yati miroano, nalo miroano mia miroano, nalo a jibe kurukuti yono napano toro maka rijikia rivulukuio. Mia aua toru, nalo telisu ga napano mia Atua rilarurlo.
ROM 9:28 A ea bogo na tibureiano, mia naio rije vironiano van tomu nalo na yetemeriba, mia naio rila nalo na maka kialo moneano tai ka ajikia.”
ROM 9:29 A nina jibe ga iliano dolu tai napano Aisea bivitauia beamu ruei, napano berii bogo na tibureiano napano mia rimei, napano ver Atua maka tinien riia toro, mia tomu nonovio am̃arm̃aro. Iliano na ber jibe nei, ber “Atua binimei bija kiano tomu na mira nalo, vaataro ruebinvin kito nonovio. Ver maka tinien riia kenerido tealo, mia tuvanlo atu, mia kiado yati ribisi vatitigio. Vaataro naio rila ka kito ve verare ka venia napano mila ka tomu va nalo ea vio na tortoru juo nei nua, Sotomo bija Komora, karina iorou mila ka kiado tomu ve telisu amijikia atu ameul kia ga.”
ROM 9:30 Bo ga, iliano nalo na aber jibe nei, aber nalo napano maka ave Ju, nalo maka ala vonio ka atakii Atua kiano tuboiano ka amei amemedu ea mirano, a iorou, bogo napano nalo amonea Yesu, Atua mila vonga nalo ka amei memedu ea mirano.
ROM 9:31 A kulo Ju nalo, amila vonio jikili ka amonea tuboiano ka rila amemedu ea Atua mirano, a nalo abijukudeio ga, ana mia rivova vanlo.
ROM 9:32 Kiniou neber bova ka nalo na jibe na, nina kar napano amila vonio jikili ka amei amemedu ea Atua mirano, a nalo ajel ea m̃arabo dolu, aba ajibirbil vatitig eaio. Nalo ajel ea m̃arabo napano ajidomiio aber kialo im̃auano novo nalo amijikia alalo rivu vija Atua, mia maka tibe na. Kito monoka rosikili rotua ga venia napano Yesu milaio, nina naruei be kiado m̃arabo na romei rovu vija Atua bereio.
ROM 9:33 Iliano tai joa niosi na Aisea bereio, napano Atua berial jamerijiano tai, napano berii burupati puruveru tai, ana puruveru nene be Yesu, jibe Naverikariano napano Atua miila naio binimei. Iliano nene beriio jibe napano tomu tealo maka asidom puruveru nene, mia tealo amoneaio, ana naio ber jibe nei, berinavo “Kamiu kubitii batitigio! Nojo nebitirilar puruveru novo tai na yimo burupati, nina mave ea burusuku na Saion ea kiaku tomu nalo kialo burum̃ara komeli na Yerusalemo. Puruveru nene jikili bo, ana mia tomu ve telabo asidomio re, nalo jaalo je puruveru nene bano amijorjoru janea vio. Mia tomu nalo napano amonea puruveru nene, nalo aju jikili eaio, mia nala rivu laka kalo.”
ROM 10:1 Bilbilu nalo, kiniou nomijog bova napano kiaku yati nalo memedu, jibe kulo Ju nalo, maka amonea ga. A kiniou nojidom laka ka nalo monoka avokar ioruriano, nina naruei kiniou nojo nobolkouo jikili ban Atua kalo.
ROM 10:2 Nalo aju amila vonio laka ka asira-rag ka Atua ea kialo meuliano, a neber be riano, nalo maka ajikia m̃arabo, mia maka ajikia aleal naio.
ROM 10:3 Nina bior napano nalo aju ajakii kialo jidomiano ga, a nalo maka asidom atakii m̃arabo napano Atua mim̃aukanio ka toro rijikia rimei rimemedu ea mirano bereio.
ROM 10:4 Nalo aju ajikili ka aber ka ajogkar tuboiano, naio ga be m̃arabo, mia m̃arabo nene bova ruei, kar napano kito robiniu romila korovio tuboiano nalo. M̃arabo napano kito rober ka romemedu bija Atua bior napano romijogkar tuboiano, Kristo juko ruei, a naio mim̃auka kiado m̃arabo vou tai. A vonganei, ver romonea ka Kristo bar bulag kiado kariano nalo, naruei Atua mijikia rila kito romei romemedu ea mirano.
ROM 10:5 Ver kito rala korov re tuboiano, mia rivu ga, romijikia romemedu ea Atua mirano, bior napano ga romijogkar tuboiano, kar napano Mosis berenio iliano tai ea tivelinio nei ruei, berinavo “Toro napano jakii vatitig bo tenalo napano tuboiano nei berenio, mia mijikia rivokar meuliano.” Mia maka toro tai napano kiano meuliano bo jibe napano Mosis berenio, ana maka rejikia rovakar meuliano sel ea tonovo nalo napano romilaio.
ROM 10:6 Ka rila tibe na, naio jikili laka, a ver romonea ga Kristo romijikia romei romemedu ea Atua mirano, a nina maka titai napano jikili. Jibe iliano tai napano Mosis berenio, napano beriio Maka rivu ka kamiu kuvisidomii ka tenei naio jikili laka, ana kuvitu kuvivika kuver kei mia rila m̃arabo beamu ka kamiu riva mave ea tiniabene? Vikadeniano nei berenio ka kei mijikia riva rivokar tiniabene rivuru Kristo rimei yetano ea vio nei ka rilarur kito, a jidomiano jibe nei naio maka rimemedu.
ROM 10:7 P̃eli nalo avika vikadeniano dolu tai napano joa Iliano Lu, napano ber A kei mijikia rivatove riva rivokar vio na tomu na am̃arm̃aro a rimei bereio? Vikadeniano na ber ka nalo ajidom ka Kristo naio m̃aro ea m̃akolkolo, ana nalo aber p̃eli maka toro tai rijikia riva ridular naio ea vio na bereio ka rijikia rimei rilarur kito, a mia romijikia ka iliano nalo na maka rimemedu. Kito romijikia vatitig ka Kristo jaluvo ea tiniabene batove ea yetemeriba ruei, a iorou ka napano naio m̃aro, naio jumolu meul bereio a ban ea tiniabene ruei.
ROM 10:8 Jibe na, kito romijikia rosian verdop̃eiano na vikadeniano nalo na, rover iliano dolu tai napano Mosis ber nua, napano berinavo Atua kiano iliano ban kito kulorinio naio jo bija kito ruei. Jua jum̃ado ruei, ana romijikia rodu toa niodo, romijikia rodu vatitigio toa kiado jidomiano. A Atua kiano iliano napano iliano nene beriio, nina Ioluano Vou napano kumemi numitu numioliolu kanio, napano berialio ka tomu nalo monoka amonea Yesu Kristo.
ROM 10:9 A jau kei napano komonea Yesu Kristo ea kiamo iviso, kober ka Atua mila naio meul bereio ea m̃ariano, a kojaaro ka koverialio ea vio reraio ka jau komidu Yesu jibe kiamo Tubo, mia jau kovokar meuliano.
ROM 10:10 Nina bior napano toro na biekouo ea kiano iviso ka Yesu meul bereio ea m̃ariano, a berialio ea vio reraio ka Yesu be kiano Tubo, mia Atua sian re bunu vironiano van naio kar kiano kariano nalo, mia rilarur naio.
ROM 10:11 Nina jibe iliano tai ea Vivitauiano Lu re nua, napano jibe ka napano beriio napano romonea Kristo, napano berinavo Toro napano monea naio, naio maka rijikia rijog kiano jidomiano rijoru bogo tai.
ROM 10:12 Mia toro napano monea ka naio be Ju, p̃eli maka rive Ju, mia Tubo naio takurano be kialo tubo abiniu, mila bo kalo abiniu ga napano ajegi banio naio.
ROM 10:13 Nina jibe iliano tai napano Naverialiano Joel nua bivitauia, napano berinavo “Toro kei napano bio Tubo siano, mia rilarur naio.”
ROM 10:14 Be riano, kulo Ju miroano maka avio van Kristo ka rilarurlo, a jum̃abe jibe na? Nina bior napano maka ajikia avio naio verver maka amonea naio, a maka ajikia amonea naio verver maka leleio ajog siano vo, a maka ajikia ajog siano verver maka toro tai rioliolu ka vanlo.
ROM 10:15 A maka jikia toro riva rioliolu verver Atua maka riilaio ka rivano, a verver naio jaaro ka rivano, mia tibe na napano Vivitauiano Lu berenio ruei, napano ber “Siva toru ka Atua napano kiano naverialiano nalo, romijog jaalo aju amijubariva ea kialo m̃arabo ninio nalo ka avanvan tanea vio vija kiano Ioluano Vou.”
ROM 10:16 Nina naruei iliano napano tom tealo aberenio, a nemijikia never makanio, Atua jo miila kiano naverialiano nalo abanvan ruei, mia aua toru napano Ju nalo miroano maka asidom ajogio ga. Nina jakii iliano tai ea Vivitauiano Lu bereio, napano Naverialiano Aisea jegi ban Atua, ber “O Tubo, kumemi numitu numioliolu ka kiamo iliano banbano-o, mia jibe napano maka toro tai rive tinieno ka rijogio.”
ROM 10:17 A banei kumemi jibe nei naruei, numitu numioliolu ka Yesu Kristo banlo, a bogo napano kumemi numitu numioliolu, tealo amijog, a bogo napano amijog, tealo amonea.
ROM 10:18 Nina naruei kiniou nojo nomioliolu ban Ju nalo, a vikadeniano tai mijikia rimei mave ea vio nei, ber p̃eli kojo komioliolu banlo kar napano kojidomii ka nalo maka ajog venia napano Vivitauiano Lu nalo aberenio? Vonganei mia neverdop̃eio never, makanio, Atua kiano iliano bokarlo kirisiou ruei. Nalo abiniu amijikia bare ga napano nalo abiniu aju abiti m̃erenio a siberio bija m̃arvitano nalo, jibe napano iliano tai ea Niosi na Iouano berenio, berinavo “Tomu nonovio na yetemeriba amial tenalo na ea vio yauo mave, a nalo abitilubario ka Atua jo, ba bokar tomu nalo reraio napano aju koalabo, nalo bunu abitilubar ka kiano moroano toru laka.”
ROM 10:19 Jibe na, kulo Ju nalo abitilubar tenalo miroano ruei, a mia titai bova, nalo aber p̃eli Atua jidom rilarurlo nalo ga. Nalo maka avitilubar ka Ioluano Vou be tomu nonovio kialo, kar napano Atua jidom rilarur bunu tomu dolu nalo napano maka ave Ju. Mia bo ka avitilubar vite nei, bior kialo naverialiano moruo juo aberiio nua ruei ea Vivitauiano Lu, aber mia tibe nei. Mosis be motoru, napano berial iliano tai napano Atua ber ka kulo Israel, napano ber “Kamiu kubitii bova ka nalo napano maka ave Ju, jibe napano abe iakurano ga, a mia kamiu kuvijoku ka ilivuiano nalo napano mia kiniou nala kalo. Kamiu kuber nalo maka ajikia ala titai na bo leleio, a mia kamiu tiniemiu serlo bogo napano kuvial napano kiniou nelarurlo bunu.”
ROM 10:20 A juo nene kanio, naio be Naverialiano Aisea, naio bunu jumolu berial memedu Atua kiano iliano dolu tai ban korobido nalo kulo Ju miralo, napano Atua berii nalo napano maka ave Ju, berinavo “Beamu, nalo maka asirarag ka kiniou, a iorou, mia nalo amijev kiniou, nua maka avika kiniou, a mia iorou, ajidom ka nava noyotuba keanlo.”
ROM 10:21 A Aisea bivitauialar Atua kiano iliano dolu tai bereio, napano Atua berii nalo na abe Ju, berinavo “Tomu nalo na aju maka amonmonea kiniou, nalo aju abukular kiniou bogo nonovio. Kirisiou ruei kiniou nebetavo ka jum̃aku kalo, nojidom nalo amei bereio kean kiniou, mia maka garuei.”
ROM 11:1 Vikadeniano dolu tai jo, nina ea tivelinio na kulo Ju nalo, ka bogo na nalo maka amonmonea Atua, naio bunu jumolu, bilig taakano kalo, p̃eli makanio? Nemijikia never makanio, naio maka rila tibe na, bior napano kiniou nebe toro Israel nojo, kiniou bunu napano tormoruo Epraamo be korobiku, a kiniou nomiyotuba ea tormoruo Beniamen kiano yati, a nemijikia bo ka kiniou tai napano Atua maka rivukular kiniou.
ROM 11:2 Jibe na, nemijikia never makanio, Atua maka rivukular kito tomu nalo napano bijauia bulag kito robe kiano. Bo ka rosidomii iliano tai na Vivitauiano Lu nalo re nua ruei, ea bogo na Naverialiano Elaija. Ea bogo na, Elaija mijog bova laka ka veribinio na Atua kiano tomu nalo kialo, naruei naio mil m̃im̃i ban Atua, ber
ROM 11:3 Tubo, kiamo naverialiano nalo, kiamo tomu nalo aju amuebinvinlo, a kiamo vio lu nalo, aju aburu kokorovio, a ba bova laka, nemial jibe kiniou ga takurano nojo nabameneaso, a vonganei kiniou bunu, aju ajusosor kiniou ka adular kiaku meuliano.
ROM 11:4 Mia ea bogo nene, Atua berdop̃e naio, ber Makanio Elaija, maka jau ga ve takurano. Jau maka kojikia, a ea vio nei kiaku tomu nalo menu aluo [7,000] aju napano abo jibe so, napano maka alotu ka tavoru sibisibi na Baal.
ROM 11:5 A vonganei, ea kiado bogo, be verare ga jibe na ga. Tomu telabo maka amonea, a kito naruei roju, kito robe bagaro telisu tai na Ju nalo, napano Atua be tiniememi ka kito, bijauia bulag kito, ana kito romonea naio.
ROM 11:6 A bo romijikia vatitig ka Atua bijauia bulag kito kar venia, bior p̃eli tealo nalo aber p̃eli naio bijauia bulag kito bior napano romilala im̃auano novnovo nalo miroano napano naio jaaro kanio. A makanio, bior napano ver tibe na, ver p̃eli ka Atua kiano tiniememiano maka rila titai leleio. A Atua maka bijauia bulag kito kar napano romila tonovo nalo miroano, a naio bijauia bulag kito ea kiano tiniememiano ban kito ga.
ROM 11:7 Kito romijikia ka kito kulo Ju nalo, robiniu roju rojirag kiado m̃arabo ka romei rimemedu vija Atua, a kito telisu ga romialio. Ana ver tibe na, mia tum̃abe ka nalo dolu na? Nina berenio ka nalo miroano napano nalo pariparilo jikili laka, ana nalo maka aial m̃arabo nene vo.
ROM 11:8 Iliano tai ea Vivitauiano Lu berenio nalo jibe nei, ber “Atua juvanlo aju bija kialo vovuiano, ana binimei bokar banei, nalo jibe napano be miralo, a maka ajikia avitilubar vite, be tilinielo, a maka ajikia ajog lubar vite.”
ROM 11:9 A jibe ka bunu Parinio tubo Teviti kiano iliano tai re nua, bogo na naio jidom Atua ridular kiano uolu nalo kialo moroano napano aju ajusosor naio. Ea bogo nene, naio bika den Atua, ber “Tubo, kiaku uolu nalo nei nalo aju amijog bo bogo nonovio ea kialo burum̃ara jokoluolu nalo, a nebika denso ka kola kialo jogvuiano nei rimei tibe vite tai napano mila bulag vatitiglo, senlo bere, mila ka nalo maka ajikia avitilubar ka kialo uolu nalo aju vaataro kalo ga.
ROM 11:10 Bo ka jau kolalo tibe miralo rimei ribono, ka nalo maka ajikia avitilubar vite, a jau kola napano kialo uolu nalo ayukyukulo ka aim̃au kurano, nalo avar vite nalo na temi ea taakalo.”
ROM 11:11 Ana ea tivelinio na Ju nalo, Atua maka rivuku bulaglo, be riano, nalo abano bova kija. A kialo vovaiano na mila Atua milarur tomu nalo na maka ave Ju, a bogo napano Ju nalo amialio napano Atua tinien miia bunu nalo dolu na, amialio kirivova, amijoku kalo, ana mila amila vonio ka nalo bunu monoka amei rimemedu vija Atua bereio.
ROM 11:12 Ana nina berenio ka kulo Ju kialo bajago, napano maka amonea Yesu, naina mila m̃arabo na Atua kiano viekokoano a kiano ioruriano mijikia rimei rivokar tomu nalo na maka ave Ju. A ver Ju nalo bunu amonea, nalo amonea vanvan rivokar napano Atua berenio, mia mijikia rila napano kiano ilivuiano nalo amei ve toru lie.
ROM 11:13 Bo ga, vonganei nojidom nesian iliano ve telisu ea tivelinio na kamiu napano maka kuve Ju. Kiniou nebe atevi napano Atua bitirilar kiniou ka navan reraio ka neverial kiano Ioluano Vou van kamiu, a nina im̃auano tai napano nojo nomila von vatitig ka nalaio, bior napano namial bo laka.
ROM 11:14 Nina bior napano nemial ka bogo napano nomioliolu ka ban kamiu napano maka kuve Ju, kamiu kumitu kumonea, a mila napano kumemi kulo Ju nalo tealo ajidom ka nalo bunu monoka atu joomo, ana nalo bunu amoneaio.
ROM 11:15 Nua, Atua bilig dabu naio ka kulo Ju, a nina mila vonganei naio bitii nalo napano maka ave Ju, jidom ka rila kialo m̃arabo ka ajikia amei ave merevu vija naio bereio. A ver Ju nalo aviliglo a nalo bunu amei bereio ea Atua, mia rivu mia rivu, bior napano vonganei nalo ajibe tanunu, a ver amonea Yesu, mia atibe ka napano abinimei ameul bereio.
ROM 11:16 Mia kiniou never jamerijiano tai ea vio nei ea tivelinio na m̃ariesi moti nalo napano roju robario ban ea yimo na volkouano, rober siva ka Atua biorio, romioa rive lu. Mia bogo napano rojian m̃ariesi moti ban Atua, mila na m̃ariesi dolu nonovio napano maka rosianio, nalo bunu abe lu, abe Atua kiano. Ana kulo Ju kialo tormoruo nalo ajibe m̃ariesi moti nalo napano aban ea Atua kunuano beamu, a nina mila ka Ju dolu nalo napano abinimei iorou, nalo bunu ave Atua kiano. A bereio, tormoruo nalo nei ajibe burupati iesi tai napano ju miluo joomo ea Atua kiano tiniavio, a verenio burupati ve Atua kiano, mia jaati nalo napano amei iorou, nalo bunu ave Atua kiano.
ROM 11:17 Ver tibe na, burupati na bija jaati nalo aberenio ga Atua kiano tomu nalo, jibe Ju nalo. Mia iorou, Atua mial jaati tealo abova, naruei burekokorovlo, a ba je vatitig iesi dolu tai jerati nalo napano jo ga yeturu, ana midu binimei, je vatitiglo a miasol lo aba vio takurano ea burupati napano jo jouro ea tiniavio, nalo amidu jeleig jerati dolu nalo napano burekorovlo ruei. Jerati dolu nalo napano abinimei amijurukar burupati nei, naio berenio kamiu nalo napano kamiu maka kuve Ju. Kamiu maka kuviyotuba ea burupati na Atua kiano tomu nalo memedu, a naio jidom ka kamiu bunu monoka kuvijurukar vija nalo joomo ea kiano tiniavio, ka kamiu nonovio kuvokar kiano ioruriano nalo.
ROM 11:18 Jibe na, kamiu napano maka kuve Ju, monoka kuvarvar re napano Atua miasol kamiu bija kiano tomu nalo, bior napano maka kuve burupati, a kube jerati nalo ga napano Atua miasol kamiu ea burupati nei napano jo beamu ruei. Jerati nalo maka ala burupati meul, a burupati naruei jo mila jerati nalo ameul.
ROM 11:19 Bereio, maka rivu kamiu kuvisidomii ka kamiu kubo, naruei kuver O, Atua jidom m̃elea kumemi, ana bure kokorov jerati tealo na burupati neibano ka rila kumemi nuvijikia nuviasolio.
ROM 11:20 Be riano napano Atua burkokorov jerati tealo, a mila ga ban Ju nalo napano maka amonea Yesu, a be riano napano naio jidom kamiu kuviasol, a nina maka rivior napano kumila vite novo nalo tai, a bior napano kumitu jikili ea kenemiu viekouoiano ea naio. Jibe na, kamiu kuvarvar ka re napano kubinimei jibe Atua kiano tomu nalo, a monoka kuviturmaro ka kuvisidomii vatitig vite novo nei napano Atua mila ban kamiu. A kamiu monoka kuvitikar vatitigio bunu,
ROM 11:21 bior jibe napano Atua buku bulag jerati moruo nalo nene, napano kiano tomu nalo na maka amonea, mia naio mijikia rivuku bulag kamiu bunu jerati vou nalo be verare ga, ver maka kuvitu kuvar m̃ariesi novo nalo.
ROM 11:22 Jibe na, ea vio nene romial tivelinio be juo na Atua kiano bajago. Ea tivelinio takurano nene, kiano tiniemimiano jikili napano jikili ea nalo napano ajibiribil, napano maka atu sikili ea naio, tibe kulo Ju nalo. Mia tivelinio dolu nene, naio tinien vuii laka ea nalo napano maka ave Ju, nina nalo napano ajaaro kanio a aju ajakii vatitig naio. Mia nalo bunu, ver nalo atu re sikili, naio mijikia telarlo bereio den burupati novo nei napano aju amiasol eaio.
ROM 11:23 Nina naio mila ka kulo Ju nalo ruei. Nalo maka amonmonea, ana je bulaglo, a ver aviliglo, amijikia amei bereio ana Atua mijikia riasol vatitiglo ea burupati bereio tibe kiano tomu nalo riano.
ROM 11:24 Naio mila jibe na ka kamiu napano maka kuve Ju nalo, bior napano kamiu jibe jaati iesi na yeturu, a naio buru kamiu kubinimei, miasol kamiu ea burupati napano joa kiano tiniavio, ana kumijurukar bija ilivuiano nalo napano naio jidom sian van kiano tomu nalo. A ver mila ka kamiu ruei, mia mijikia rila bunu ka Ju nalo napano naio je bulaglo, bior ka naio jaaro ka riasol vatitiglo bereio ea burupati nene napano amiasol vatitigio eaio beamu ruei.
ROM 11:25 Bilbilu nalo, kiniou nojidom neverial van kamiu napano maka kuve Ju nalo, ka monoka kuvitilubar ka Atua maka rivukular kiano tomu nalo nei kulo Ju. Be riano ka nalo aju pariparilo jikili keano a maka asidom amonmonea, ana naio juvanlo kija ga beamu, a jo mila ka kamiu napano maka kuve Ju nalo kumijikia kumonmonea, kumijikia kumei ve miroano joomo riva vokar bagaro na toru napano Atua jidomio. Vite na jibe vite luku tai napano tomu nalo maka ajikiaio beamu, a vonganei Atua mila meravo. Mia kamiu monoka kuvijikia vite nei, bior bova ka kamiu kuvarvar ka kamiu kuveriam̃a Atua jidom kamiu ga, naio maka bunu saaro ka Ju nalo.
ROM 11:26 Maka tibe na, a mia naio rilarurlo kean navo, tibe iliano tai ea Vivitauiano Lu, napano beriio jibe nei, ber “Toro na rilarur kito Atua kiano tomu nalo, mia riyotuba ea kiado vio ga, ea kiado komeli na toru Yerusalemo mave ea burusuku nei Saion. Kito Yakovo kiano yati, kito kulo Ju napano kiado vovaiano nalo telabo laka, a naio naruei mia rimei rivar bulagio nonov kiado vironiano, rila kito rovu bereio.”
ROM 11:27 Iliano dolu tai ea Vivitauiano Lu berialio Atua kiano verikariano tai ea tivelinio na bunu, napano ber jibe nei, ber “Kiaku verikariano ealo ju ruei, ka mia navar bulag kialo kariano denlo, noviekokoalo aviniu.”
ROM 11:28 Bogo napano Ioluano Vou maluvo ea Ju nalo, nalo maka asidomio, ana ea tivelinio tai nina bo, bior napano rila ka kamiu napano maka kuve Ju, Atua midu bogo ka kamiu kija ka kumoneaio. A ea tivelinio dolu nene, nina bova bunu, bior ka mila na Ju nalo abinimei jibe na abe Atua kiano uolu nalo bereio. A Atua maka rijikia rivitiilo ka ave kiano uolu dam̃ariga, naio monoka tinien riialo bereio, bior naio maka rijikia tiniene ribobogia verikariano novo nalo napano naio mila ban korobilo moruo nalo na kiano tomu nalo nei, kulo Ju nalo.
ROM 11:29 Atua berkar ilivuiano nalo banlo ruei, a naio bio nalo na abe kiano ruei, a mia maka jikia tibukua bereio kiano jidomiano bogo tai.
ROM 11:30 Jibe na, naio mim̃au ea kito jibe nei. Beamu, kamiu napano maka kuve Ju, kamiu maka kumonmonea Atua, a bogo napano kumemi Ju kumemi maka numonmonea Ioluano Vou, nina mila kiano m̃arabo ka tinien riia kamiu.
ROM 11:31 A bogo napano naio tinien miia kamiu jibe na, mila napano kumemi numonmonea Ioluano Vou, ana mia naio mijikia tinien riia kumemi bereio.
ROM 11:32 Nina naruei Atua kiano jidomiano jibe na naruei. Beamu, naio mijamo ka kito robiniu roiel ea m̃arabo na maka rosidom rojog kiano iliano, mia rila ka naio rijikia tinien riia kito, rijikia rivuru kito nonovio ka romei rove kanano.
ROM 11:33 Bilbilu nalo, Atua kiano ilivuiano nalo ea kito tortoru laka! Kiano masouano nalo a kiano jikiaiano nalo abavavin mave! Kiano jidomiano nalo bululuo tanea, a kiano bajago nalo abo julaka!
ROM 11:34 Jibe napano iliano tai ea Vivitauiano Lu berenio “Maka lele toro tai napano vare ka rivakar venia napano joa Atua kiano jidomiano, maka lele toro tai napano mijikia sian iliano na ijaiano van Atua.
ROM 11:35 A maka lele toro tai napano mila bo ban Atua bare napano rijikia rila Atua saaro ka ridu kiano ilivuiano novo nalo vanio, tibe napano naio jo jian ban kito.”
ROM 11:36 Mia kiniou neiasol iliano na, neber: Kiado Atua, naio takurano be burupati na vite nonovio, naio takurano be moroano na vite nonovio, naio takurano be juluvati na vite nonovio, ana bo ka kito roviniu roiaia naio to toboto.
ROM 12:1 Bilbilu nalo, jibe ka Atua tinien miia vatitig kamiu, mila bo laka ka kamiu, nojidom novika sikili van kamiu ka monoka kuvijamo ka kenemiu meuliano momou van naio. Kamiu monoka kuve lu rivu, tibe napano kumioa mokotenemiu ban naio jibe sida tai napano kumidu banio. Naio maka sida tai na jibe temeul tai napano amuebin m̃aro, a naio be sida tai napano meul, a mia Atua mijikia saaro laka kanio. Nina naruei bajago novo na ala lotuano van Atua napano memedu ka kuvilaio.
ROM 12:2 A kamiu kuvijamo ka re vovaiano na yetemeriba nalo nei avuru kamiu kuvitakii kiano bajago nalo, a bogo nonovio, monoka kuvijamo ka Atua rila kenemiu jidomiano to rimei rive terivou bereio. Tibe na, mia kenemiu bajago mijikia riviligio, mijikia rimei rivu bogo nonovio, a mia kamiu kumijikia kuviel kuvitakii Atua kiano tinieiiano, napano bo, kirinovo, a memedu mia memedu julaka.
ROM 12:3 Kiniou neberial iliano nalo na ka kamiu bior napano Atua ve tiniesese ka kiniou, bijauialar kiniou midu im̃auano nei naruei joa jum̃aku. Mia nojidom never vite tai bereio ka kamiu, napano bova kuvitu kumila kenemiu jidomiano bavin laka. Kito rola kiano im̃auano nalo tum̃abe, a kiado jidomiano monoka rimemedu, monoka to yetano ga.
ROM 12:4 Kito maka rojikia rosidomii ka robo lie ka dolu nalo, bior napano rojibe mokotenano toro takurano ga, napano be yati nalo nene a yati nalo nene, be kialo im̃auano terakurano ka alaio.
ROM 12:5 Jibe kito miroano, mia Kristo midu kito robiniu robinimei robe takurano, ana jibe napano kiniou nojo banso, jau kojo ban kiniou.
ROM 12:6 Atua be kiano tinieseseiano ka kito, mijamo ka jikiaiano dolu nalo ban kito, napano jibe jidomiano nalo na naio jian bulagio ban kito ka kito roim̃au vijaio. A kito terakurano monoka rosikili ka roim̃au vija venia napano naio jian ban kito. Jibe nei ver Atua rijamo kaso ka rive kiamo ka koverial iliano napano naio jian banso, ana monoka kolaio vija moneano ve toru ka kiano iliano nei be riano laka,
ROM 12:7 p̃eli ver rive kiamo ka koim̃au ea yimo lu, monoka kolaio vija kiamo moroano momou, p̃eli ver rive kiamo ka koverloglog tomu nalo ka Atua kiano iliano, monoka kovarso vatitig ka kolaio,
ROM 12:8 p̃eli ver rive kiamo ka kotunukakar tomu nalo kialo jidomiano, monoka kosidomii ve temi ka kolaio, p̃eli ver rive kiamo ka kosian jidomiano nalo ka ijaiano, monoka kovario ve miroano, p̃eli ver rive kiamo ka kovuru m̃arabo ka Atua kiano im̃auano, monoka koyovo re, p̃eli ver rive kiamo ka keija nalo napano ajua bogokouo, monoka kosaaro ka kolaio.
ROM 12:9 Ana ninei naruei bajago novo dolu nalo na mia kuvilaio: kenemiu tinietiiano ea tomu dolu nalo monoka rive riano, monoka kuvitaluvo ea bajago va nalo, monoka kuvakar vatitig rivu bajago novo nalo,
ROM 12:10 monoka kuve tiniemiu titii ea kamiu tibe kube torogio takurano, monoka kuvila vio sikili ka kuvial ka kei naruei mijikia rila bajago na vameneano rivan lie,
ROM 12:11 monoka kuvijamo re ka kenemiu jidomiano sikili na laiano na tonovo nalo rivakovio bereio den kamiu, monoka kuvila ka sebi na Niununo Lu to meul rivu ea kamiu, monoka kuvim̃au Tubo kiano tulaka,
ROM 12:12 monoka kuvisaaro ka Atua kiano verikariano nalo napano kenemiu jidomiano balea naio ka mia naio rila rivu ka kamiu tibe ga napano naio berenio, bogo napano kubiniua jogvaiano, monoka kuvila kenemiu jidomiano rive tebievi, monoka kubolkouo tulaka,
ROM 12:13 bogo napano namoneano dolu nalo maka ve kialo tenalo tai, monoka kuvisaaro ka kuvisian saba vanlo, a monoka kuvisaaro ka kuvitikar tomu dolu nalo ea kunuemiu.
ROM 12:14 A nina naruei vite nalo tealo napano monoka kuvisidomiio ka kuvim̃aukanio van tomu dolu nalo: ver tealo aju amila niegeniege kamiu kar napano kumonea Yesu, monoka kuvila rivu kalo. Kuvil re rivova vanlo, a kuvika Atua ka rilivu kalo,
ROM 12:15 ver tealo amijog bo kar vite novo tai, kamiu bun u monoka kuvisaaro vijalo, ver tealo aju ajegi bior vite tai, kamiu bunu monoka kuviteg vijalo,
ROM 12:16 ver kamiu kuvija kulo dolu nalo, kamiu monoka kuvitu vatitig vijalo, napano ve kenemiu jidomiano ve takurano ga, ver kuvim̃au vija kulo dolu nalo, kuvidu re kamiu kuvitu mave kalo kuver kamiu kubo, a kamiu kuvisaaro ka im̃auano na tertelisu nalo a kuvisaaro ka kuviasol vija tomu nalo na tertelisu, ver kuvila titai nalo, a kuvisidomii re ka kube masou, a kuvila kenemiu jidomiano to yetano,
ROM 12:17 ver tomu tai ala rivova ka kamiu, a kuvila meran re rivova vanlo, a bogo nonovio monoka kuvisidomii ka kuvila vite nonovio napano mia tomu nalo amijikia avitilubario ka bo a memedu,
ROM 12:18 a ver kenemiu vite va tai jo iviso ka kamiu bija tomu dolu nalo, monoka kuvila vite nonovio napano ajua jumemiu ka ridu tum̃aro to bereio ea kamiu kuviniu.
ROM 12:19 Bilbilu nalo, tinieku jii kamiu laka, naruei nojo neber tenalo nei ban kamiu. Tealo lie ajibe nei, berinavo ver tomu tealo ala rivova ka kamiu, kuvila vonio re ka kuvije vironiano vanlo. Kumijikia kuvituvan rivan Atua ka naio tiburelo iorou, bior napano iliano tai joa Vivitauiano Lu ruei, napano Atua berenio ber “Kiniou naruei mia nesian vironiano van tomu nalo, kiniou naruei mia nodu kean van nalo napano amila bova.”
ROM 12:20 ver be kenemiu uolu nalo aju, kamiu monoka kuvila rivu kalo, jibe napano iliano dolu tai ea Vivitauiano Lu berenio, napano ber “Ver kiamo uolu jijerio, kodu sinan-iano rivanio, ver midou jerio, kodu uei rivanio. Verver kola tibe na, mia jau kola naio rimou laka ka kiano bajago va, rivano p̃eli naio jaaro ka rila bilbilu rivu vijaso bereio.”
ROM 12:21 Takiiano na tenalo nei, kiniou neber jibe nei ka kamiu, neber kamiu kuvijamo ka re bajago va tovulu kamiu, a monoka kuvitovulu bajago va vija ga kenemiu bajago novo nalo.
ROM 13:1 Vonganei kiniou nojidom naver iliano nalo tai ea tivelinio na navurim̃araboiano nalo. Kito romijikia ka Atua naio jo mave laka, naio be Tubo ka vite nonovio, a naio naruei bitiri bulag parinio tubo dolu nalo napano aju, a midu moroano banlo. Jibe na, kito namoneano nalo robiniu monoka ravatove ka parinio tubo nalo nene, monoka romonmonealo.
ROM 13:2 Tomu nalo napano ver aju amila vonio ka atukovio ka parinio tubo nalo, nalo aju ajukovio ka tena Atua bitirilario, a mia Atua mijamo ka parinio tubo nalo amijikia asian vironiano vanlo kario.
ROM 13:3 Parinio tubo nalo, Atua maka vitiri bulaglo ka ala tomu novo nalo ka amerou, a naio bitiri bulaglo kar nalo napano aju amila kokorov tuboiano. Nalo na naruei monoka amerou, bior napano ver parinio tubo nalo avokarlo mia asian vironiano vanlo. A ver jau kosidom ka komerou ka re parinio tubo nalo, mia monoka kola memedu ga ka venia napano tomu na tortoru aberenio, naruei mia nalo maka ala rivova kaso, mia ajaaro kaso.
ROM 13:4 Atua midu bulaglo ajibe kiano tomu na im̃auano nalo, ka ala im̃auano novo ka avitikar tomu nalo, a ver jau kojidom kola pariparimo, monoka kovitikar vatitigio, bior napano aju abar nia bunu, a maka atu avar kurano. Atua bitiri bulaglo, midu joa jum̃alo ka asian vironiano van nalo napano amila bova.
ROM 13:5 Jibe na, bo ka kito ravatove ka parinio tubo nalo, bior bova ka rola rivova ana nalo aje vironiano van kito. A nemijikia ka kiado jidomiano jo bitilubario ruei bunu ka bo laka ver roju romila vite nalo memedu ga julaka.
ROM 13:6 Jakii iliano nalo nei, memedu ka rosaaro ka rovulu takis napano monoka rosian van parinio tubo, bior ka bogo napano parinio tubo mila ka kiano im̃auano, jo mila im̃auano napano Atua jian banio ka rim̃aukanio.
ROM 13:7 Jibe na, monoka rola vite nonovio napano memedu ka rolaio. Ver takis tai ea tivelinio na veru napano roju robario, p̃eli veru kinkin nalo napano monoka rovukuio ka vite nalo, kito monoka rovuluio. A nalo napano abar im̃auano nalo na tortoru p̃eli abar sio na tortoru joomo ea parinio tubo nalo, memedu ka kito rovatove kalo, monoka rosaaro ka rovamenealo.
ROM 13:8 Todolu tai, naina ea tivelinio na jabue nalo na tomu nalo aju amilaio. Ver komila jabue ea toro tai, jau monoka kodukian ka vanio rimemedu ga ka venia napano kam juo kuberkario. A bo jau tiniemo maio ka bunu ka kiamo jabue tai joa Atua bunu, bior ka napano naio jian titai banso naio toru laka ruei. Tenena naio be tinietiiano, ana monoka koto kovar keano vatitigio van tomu dolu nalo. Jau monoka tiniemo tii nalo napano aju vaataro kaso, kar toro napano jo mila jibe na, naio jibe napano naio monmonea nonovio Atua kiano tuboiano nalo garuei.
ROM 13:9 Iliano dolu nalo miroano ju joomo ea tuboiano, jibe nalo na aber jibe nei, aber jau kola re siakaiano, a jau kouebin re toro rim̃aro, a jau kovina re, a jau tiniemo tii re tenalo na toro dolu kiano, a iliano dolu nalo na jibe nei. A iliano nalo na tuboiano nonovio, aju yetano ka burupati tuboiano na toru tai, napano naio ber jibe nei, berinavo: Jau monoka tiniemo tii toro dolu napano jo vaataro kaso, kala rivu ka naio jibe napano kojo komila kaso bereio.
ROM 13:10 Toro napano ver naio tinien jii toro dolu be riano, mia naio maka leleio rijikia rila titai napano bova kanio. Jibe na, bajago na tinietiiano na toro naio mijikia rila ka jibe napano komonmonea nonovio iliano na tuboiano berenio.
ROM 13:11 Kito monoka rola bajago novo nalo na, bior vonganei bogo jo bano. Monoka rovitilubar ka vaataro ka bogo na monoka rotumolu vatitigio, romonmelio re bereio. Bogo na kito romonmonea vonga beamu, rober p̃eli mia Atua rilarur bulag kito ea yetemeriba nei kirisiou kia ga vo, a vonganei, binimei vaataro ruei.
ROM 13:12 Kiniou nemijikia never tibe nei, never bogiano vaataro ka ribisi, legiano jo binimei, ana bo ka robisi ka bajago va nalo na melijokouo, a monoka ravar tenalo na bajago vu na miamoiano, ka romijikia ravan ka rola mira kean tenalo na bova.
ROM 13:13 Kiado meuliano monoka rimemedu vatitig, tibe napano kito tomu nalo napano roju romieliel ea legiano, a mia monoka rotuvan bajago va nalo. Kito rola re bunu jokoluolu kinkin nalo napano abujo ka saariano nalo na yetemeriba a tomu nalo amun uei banbano amilaluv pariparilo. Kito rotu re rola ka tomu nalo vija tire nalo atu avuruvurulo tanea vio a atu ala bajago na be soro nalo. Kito rotu re rola baravo, a rotu re roiasol ea jokuano nalo.
ROM 13:14 Kito monoka rotuvan bajago va napano romiyotuba bijaio, a rosidomii re bunu ka rotakii kiano sidomiano nalo, a jibe na roju romiya kiado kulum̃arauo meravo bo ea tomu nalo miralo, monoka roya bajago na memedu nalo na Tubo Yesu Kristo ea kiado meuliano, ka tomu nalo aialio ka kito kanano tomu nalo be riano.
ROM 14:1 Bilbilu nalo, nojidom ka kamiu kuvijikia ka kiniou nomijog ruei ka iliano na toru tai joa kamiu vonganei. Jibe tealo, kialo jidomiano telabo ea tenalo tealo, aber p̃eli bo ka ala p̃eli bova ka ala, mia nalo amerou ka verver alaio, p̃eli mia Atua maka bunu saaro kalo. Kiniou nojidom never ka nalo jibe nei, nomial nalo jibe maka atu sikili vo, mia bogo na nalo aju bija kito, kito monoka rala vonio re reilkuei laka kalo, mia rosaaro ka rovululo.
ROM 14:2 Jibe na, tomu tealo amijikia asen non sinaniano ninio vija bunu sunbue nalo, mia tomu tealo ajidomii aber Atua jidom ka monoka aveli ka sinaniano tealo, p̃eli aveli ka sunbue.
ROM 14:3 Vonganei nojidom never ka kamiu, verver jau tai napano kojen sunbue, jau kovitiio rivova re ka toro dolu napano naio bel kanio, a ver jau tai napano jau kobel ka sunbue, jau kotibure re naio napano jo jenio, kober mia Atua ridu vironiano van naio kario. Atua naio jaaro ka kamiu nonovio, mia kamiu bunu monoka kuvisasaaro ka kamiu.
ROM 14:4 Namoneano nalo abiniu aju abitii Atua ga ka naio be kialo tubo, ka naio ga mijikia river kalo ve terakurano ka nalo ala nina p̃eli nalo ala re ninei. Ana jibe na, maka rivu kito ga rotu rotibure kito bereio. Atua mial napano kiano tomu tealo nalo ajen sunbue, a tealo maka asen sunbue, mia naio jaaro ga ka nalo abiniu, kar napano naio mijikia ka mia Tubo Yesu mijikia to rijailo bogo nonovio ka asikil atu sikili ea naio.
ROM 14:5 Mia nina naio bare ka bunu ea tivelinio na bogoti nalo. Tomu tealo nalo amidu bogoti tai ka be kialo bogoti lu, a tomu tealo nalo amial bogoti nonovio aber abiniu abe verare ga. Nina bo ga, mia kito roviniu ve terakurano monoka rala kiado jidomiano, a resikili rotuaio, a mia royuku re toro dolu ka takisor kiado jidomiano.
ROM 14:6 Toro na jikili ka ridu bogoti tai tibe kiano bogoti lu, naio mila kar napano jidom ridular Atua siano eaio. Toro na jaaro ka sen tenalo ninio, naio jo ber siva ban Atua kario, ana jibe na, bogo na jinano, jo midular naio siano. Toro na mila naio bel ka sinaniano tealo, naio bunu jo mila ka ridular Atua siano, a naio bunu jo ber siva ka Atua ka sinaniano dolu nalo na jo jenio.
ROM 14:7 Kito monoka rosidomii ka maka kito tai napano rijikia toa yetemeriba nei tibe naio takurano ga, ka rila tenalo nonovio tibe ga napano naio takurano jidomio, a maka kito tai napano ver rim̃aro, mia nina kiano tena naio takurano.
ROM 14:8 Maka tibe na, bior ver romeul, kito romeul ka rodular Tubo siano, a ver rom̃aro, rom̃aro ka rodular siano. Jibe na, tenalo na kito romilaio, monoka rolaio vija jidomiano napano maka rala kiado sidomiano, mia robe Atua kanano, mia ratakii kiano sidomiano.
ROM 14:9 Nina kar napano nua na, iorou ka Kristo m̃aro, naio jumolu meul bereio, mia nina mila naio binimei be Tubo ka nalo na am̃arm̃aro a be Tubo ka nalo na ameul, mia bogo nonovio monoka rotutano ka kiano sidomiano.
ROM 14:10 Mia jibe na, bogo na namoneano tai jo mila tenalo jakii Ju nalo kialo bajago moruo, a naio jo jibure namoneano dolu napano maka to rilaio, nina bova laka. A bunu, bogo na namoneano tai maka rila tena jibe na, mia naio jo bitii va ea tai napano milaio, napano naio jibe kuruano tai joomo ea Atua kiano bajulukuti, nina be bajago na imouiano tai na. Kito rotu rotiburevure re kito, kar napano mia kito roviniu rosikili rotu kamu ka Atua mirano na vo, a naio naruei mia rivitii veve vatitig venia napano kito robiniu romilaio.
ROM 14:11 Tena joa Vivitauiano Lu nalo ruei, napano Atua mil, berenio Kiniou nemeul nei nojo, mia nemijikia never memedu ka bogo na rimei napano mia tomu nonovio anietano kamu ka miraku, a mia tomu nonovio averial ka kiniou takurano nebe Atua.
ROM 14:12 Tibe na, mia kito roviniu monoka remei kamu ka Atua mirano, a mia monoka reverii veve terakurano veriiano nalo na tenalo napano roju romilaio, a naio naruei mia rivitii veveio.
ROM 14:13 Jakii jidomiano nalo nei, kito monoka rotu re rovitii laka kito bereio ka roverii venia na toro dolu milaio, rober bo p̃eli bova. Mia venia na kito namoneano nalo monoka rosidomii ka rala ea kito bereio, mia jibe nei, monoka rala re titai napano p̃eli rila namoneano dolu tai rijikia rila luvu m̃arabo p̃eli rijikia rivuru naio riva rijoru ea kariano.
ROM 14:14 Jibe verver kiniou nosidomii ea kiniou, nemijikia never ka nojo noju jikili vatitig bija Tubo Yesu, ana nomonea jikili ka maka titai napano monoka reveli kanio, maka resenio. Mia ver namoneano tai rivar jidomiano ka sinaniano tai maka rimemedu ka naio senio, nina bo ga, mia nioti nene ber monoka rivel vatitigio kanio, a kito kulo dolu nalo monoka rojamo ka naio takii kiano jidomiano na.
ROM 14:15 Ana verver jau kojidomii ka sinaniano nalo abo ka asenio, komijikia koto kalala ga, mia ver kuruamo dolu naio bel kanio, jau kala vonio re ka naio bunu monoka senio. Ver maka, mia komijikia kola bulag vatitig kiano jidomiano, a nina maka bajago novo tai na kito tomu nalo napano tiniedo titii kito ka rolaio. Jau monoka tiniem maiio ka Kristo m̃aro ka rila kiado meuliano rivu, mia maka rivu rotuvan jidomiano tertelisu nalo tivelinio na sinaniano nalo amei ve tena tortoru nalo napano atu ala bulag kiado meuliano bereio.
ROM 14:16 A bereio, ver vite tai napano jau komialio ka bo ga ka kolaio, nina bo ga, mia maka rivu ka koto kolaio ana rila bulag namoneano dolu kiano jidomiano, rivanvano-o rila tomu dolu ail niegeniege kito namoneano nalo siado riviorio.
ROM 14:17 Ea vio na roberenio ka iliano nalo na tivelinio na ka mia romijikia romunu venia p̃eli rosen venia, p̃eli monoka roveli ka uei p̃eli sinaniano vabe, mia monoka tiniedo bobogia re ka nina maka ve tena toru tai joomo ea Atua kiano navenatuboiano na. Mia kiano tenalo na tortoru, naina rala bajago novo ea meuliano napano memedu, a rotua tum̃aro vija tomu dolu nalo, a rovakar jogvuiano napano Niununo Lu jo jianio.
ROM 14:18 A bogo napano rodu tenalo na rimei ve toru ea kiado jidomiano, romila im̃auano memedu napano Kristo jidomio, ana mia Atua risaaro laka ka kito riviorio, a mia tomu dolu nalo aialio ka bo laka.
ROM 14:19 Jibe na, bogo nonovio kito roviniu monoka rala vonio sikili ka roim̃auka bajago novo nalo napano amijikia adu tum̃aro toa kito namoneano nalo, a napano aijaja kito ka roviniu kiado jidomiano rimei rimeruo vatitigio.
ROM 14:20 Sinaniano naio jibe titai kurano, mia maka rivu ka rola naio rimei ve tena tai mia rila bulag bereio im̃auano novo napano Atua milaio ea namoneano dolu nalo kialo meuliano ruei. Kiniou neber jibe na, ka sinaniano nonovio ga bo a memedu ka asenio, mia bova ver jau kosen vite tai ana toro dolu rialio a rila naio rijoru, naio rila tena napano naio ber p̃eli maka rimemedu ka naio rilaio.
ROM 14:21 Mia bajago novo na rola tibe na, ka mia kosen re sunbue, p̃eli mia komunu re m̃arjum̃elm̃elu, p̃eli mia maka kala todolu tai bereio, ver bogo napano kuruamo rialio, mijikia rila bulag naio, mijikia rila naio rijoru.
ROM 14:22 Tibe na, ver jau kiamo jidomiano nalo tai ea tivelinio na vite nalo tertelisu napano kojidomii kober bo ka alaio p̃eli kojidomii kober bova ka alaio, naio bo, mia jau kovakar vatitigio rivu atu ve kamjuo Atua ga, jau kavan re koioliolu ka tanea vio. Toro napano mila ga vite napano naio mijikia ka memedu ka rilaio, mia Atua jaaro kanio, a naio maka rijog rivova ka naio rila vite va tai.
ROM 14:23 Verver toro na m̃a jidom veve juo ea tivelinio na venia napano mijikia senio, mia jenio kia ga ruei, mia Atua risaaro kanio re. Nina bior toro na be kiano jidomiano ruei ka p̃eli maka rimemedu ea Atua mirano ka alaio, be iakurano, naio milaio. Tibe na, naio mila kariano ruei na, bior naio maka rim̃au vija jikiaiano ea venia napano bo p̃eli bova ea Atua kiano vitiiano.
ROM 15:1 Kito miroano roju jikili ea Kristo ga, a maka rotua jidomiano ve juo ea tivelinio na vite tertelisu napano namoneano nalo dolu aju amila baravo kanio. Mia kito jibe nei monoka rotu re rala venia ga napano rojidom ka ralaio, mia monoka rola kiado jidomiano rive tebievi rivu ka namoneano nalo dolu napano ajidomii ka maka ajikia ala vite tai napano rojidomiio rober bo ka ralaio.
ROM 15:2 Kito robiniu, monoka rosidomii namoneano nalo dolu napano aju vaataro ka kito, a monoka rola venia napano nalo ajidomiio aber bo, ka nalo asaaro kanio, a ka rijai kialo meuliano vija Tubo.
ROM 15:3 Ver kito rosidomii Kristo, naio joa yetemeriba maka rila venia napano naio jidom ka rilaio, mia naio biniua bogokouo telabo, amila ka naio jibe napano iliano tai ea Niosi na Iouano nalo berenio, napano toro tai mil ban Atua, berinavo Iliano va nalo napano abuku banso, abuku bunu bare ea kiniou.
ROM 15:4 Iliano nalo jibe na napano ajua Vivitauiano Lu re nua, abivitauia ka averloglog vatitig kito napano robinimei iorou, mia rovulukuio amijikia ala kiado jidomiano sikili vatitigio ka kito bunu romijikia ka rovar dulu bogokouo nalo. Iliano nalo nei atunukakar kito, nalo ala kito rojikia vatitig ka mia monoka rotovulu vite nonovio napano Atua berkario.
ROM 15:5 Jibe na, kiniou nojo nobolkouo ban Atua ka kamiu, kar naio naruei be burupati na jidomiano tebievi, naio naruei mijikia tunukakar toro kiano meuliano. Nebika ka naio rila ka kamiu kuvitu kuvitakii Kristo Yesu kiano bajago, kuvitu rivu vio takurano vija bajago na vironiano,
ROM 15:6 napano kenemiu jidomiano ve takurano ga, a kenemiu iliano ve takurano ga, naruei kumijikia kuviaia vatitig Atua, napano kiado Tubo Yesu Kristo karam̃ano.
ROM 15:7 Jibe na, kamiu kulo Ju bija kamiu napano maka ave Ju, bogo napano kumitu kubinimei vio takurano, a kumisaaro ka kumil vorvoru kamiu nonovio kubinimei jouro, jibe napano Kristo jaaro ka rilivorvorua kito. Bogo napano kumila jibe na, naio be m̃arabo tai bereio ka adular Atua siano.
ROM 15:8 Mia bo ka rola tibe na, bior napano Kristo binimei ea yetemeriba, maka rila im̃auano rivan kulo Ju nalo ga, mia mila bunu ban nalo napano maka ave Ju. Jibe ea tivelinio na kulo Ju, naio mila nonovio vite napano Atua kiano Iliano Lu nalo aberenio, mila napano verikariano nalo napano Atua mila ban Ju nalo kialo bajulukuti, nalo amolmoluo abe riano.
ROM 15:9 Mia ea tivelinio na nalo napano maka ave Ju, naio berial Atua kiano tinieseseiano banlo, mila ka nalo aiaia naio, bare ga ka iliano na Vivitauiano Lu nalo aberenio. Nana beamu kalo jua Niosi na Iouano nalo, ber “Kiniou nojo iviso ka valauo nalo, nemiaia siamo, mia kiniou nolotuso ka iouano lu nalo.”
ROM 15:10 Mia dolu, ea Niosi na Tuboiano nalo, berinavo Kamiu valauo nalo, kamiu kuvijurukar vija Atua kiano tomu nalo memedu nei kulo Ju, ka mia kuviniu kuvisaaro!
ROM 15:11 A tai bereio ea Niosi na Iouano nalo bereio, berinavo Kamiu napano maka kuve Ju, kuvidular Atua siano mave, kamiu tomu nalo dedade, kuviaia naio.
ROM 15:12 A tai na maaro miyotuba ea Niosi na Aisea, naio berii Ju nalo kialo Naverikariano, ber mia naio tukamu bunu ka nalo napano maka ave Ju. Naruei iliano nene ber jibe nei, berinavo Mia tormoruo Jese kiano torogio tai rimoluo, napano mia Atua ridu naio to mave rive tubo ka nalo dolu nei napano maka ave Ju, naruei mia nalo avalea ea naio ka naio rije Atua kiano ilivuiano rimaluvo ealo.
ROM 15:13 Naruei nobolkouo bior kamiu bereio ban Atua, napano romijikia ravalea ea kanano verikariano nalo, nebika ka kamiu kuvitu kumonmonea naio rivanvano-o kanano saariano nalo a kanano tum̃aro rimei rivujo rivu ea kenemiu meuliano nalo, rila napano Niununo Lu kiano moroano mijikia rim̃au tanea kamiu ka rila ka kuvitu kuvalea kiano verikariano nalo, jo binimei toru lie riva rivan tibe na.
ROM 15:14 Bilbilu nalo, maka nosidomii veve ka kamiu, mia nemijikia vatitig kamiu, kenemiu iviso bo laka, kumijikia vatitig vite nalo miroano ruei, a kubare ka kuvijikia kuverloglog kamiu bereio ea Atua kanano iliano novo nalo.
ROM 15:15 Jibe na, p̃eli kamiu kuviilo kija ka m̃esi nei, kumial ka nojumolu neberial vite telabo ban kamiu jikili kija, a neberenio bereio vite tealo napano p̃eli kamiu kumisidomii kuber kumijikia ruei. Mia nemialio monoka nala tibe na, kar napano Atua midu jikiaiano na laiano na im̃auano nei joa jum̃aku, jibe jidomiano kirinovo tai,
ROM 15:16 ka nomei tibe Yesu Kristo kiano toro na im̃auano ka noverial Atua kiano Ioluano Vou ka nalo napano maka ave Ju. Nomila im̃auano na, nojibe toro lu tai napano nomim̃au joomo ea Atua kunuano Lu, nomila nalo napano maka ave Ju abinimei abe lu vatitig, nomioalo ea Niununo Lu siano, ka amijikia amei tibe ijaiano novo tai napano ban ea Atua napano mia naio saaro ka vatitigio.
ROM 15:17 Tibe na, kumemi juo Kristo Yesu nuvitu nuvim̃au vio takurano, a nemijikia nasaaro laka ka kiniou bunu nemijikia nala Atua kiano im̃auano togio.
ROM 15:18 Maka neil varvarka vovu, mia nemijikia never ka nabarvarka laka ka venia napano Kristo mim̃auka miopdulu ea kiniou, bior vonganei, kumemi juo numidu nalo napano maka ave Ju nalo abinimei vaataro ka Atua, aju abatove kanio. Kiniou neberial iliano nalo, kiniou nemila im̃auano miroano,
ROM 15:19 Atua mila vremesiano kinkin nalo, a Niununo Lu kiano moroano mim̃au, ana mila na Kristo kiano Ioluano Vou ba reraio nonovio ea vio miroano, jikario Yerusalemo ban yako, mijaka ba boru ea tanobuku na toru Lirikam.
ROM 15:20 Mia nemialio ka maka rivare vo, kiaku jidomiano tai jikili joa kiniou ka monoka navan lie vo. Mia maka nosidomii ka navan ea vio napano Kristo siano bokario ruei, bior napano maka nosidom neiasol im̃auano napano nalo dolu ajikar ruei, mia nojidom navan ea vio napano tomu nalo maka ajikia naio vo.
ROM 15:21 Nina jibe iliano tai napano naverialiano Aisea ber beamu, napano berii Naverikariano, berinavo “Nalo napano tomu maka averial naio ka nalo vo, mia nalo avitilubario vonga, nalo napano maka lele ajog siano, mia nalo ajoglubario.”
ROM 15:22 Jibe napano nober ruei, bogo miroano nojidom neviedu ea kamiu na Romo, mia nojo nomila im̃auano ea vio dolu, a todolu nalo miroano banbano-o maka bunu neial bogo tai kanio vo.
ROM 15:23 Mia vonganei, nemial jibe kiaku im̃auano ea tanobuku nalo na Esia biniu ruei, a jidomiano napano joa kiniou yuka miroano ruei, ka nojidom neviedu noyotuba kean kamiu kija, nojidom ka p̃eli mia rimei rivu naruei.
ROM 15:24 Nojo nomila vatitig ka nataluvo den vio nei nava nejaka yako ea buruvenuo napano Speni, naruei nojidomii ka mia nesel ea kamiu, ka romijikia rotu vio takurano ka ravar bogo novo vija kito kija beamu. Mia maka nejikia noto vesiou tibe napano nojidomio, mia ver kamiu kuvijikia kuvila vite tealo ka rijai kiniou ka kiaku m̃arabo, mia netikar nodu kiaku m̃arabo bereio nataluvo navano.
ROM 15:25 Mia nina maka vonganei ga, bior napano beamu monoka nava nesel Yerusalemo, kar napano kiaku kiri im̃auano tai ka nala ka Atua kiano namoneano nalo napano ajua vio na beamu.
ROM 15:26 Nalo ajua bogokouo tai vonganei napano nalo miroano abe talim̃asa, maka ave kialo vite, naruei taara na namoneano nalo na vio nalo nei na Masetonia a Kris, nalo amijogio, ana nalo ga amidu jidomiano nei aberinavo bo ka avuku veru tai ka rijailo.
ROM 15:27 Nina vite novo tai napano amila jakii kialo jidomiano ga, mia nemial jibe naio be tena memedu tai ka nalo monoka ala bunu. Nalo na maka ave Ju, mia ea kialo meuliano bija Tubo, nalo abar Atua kiano ilivuiano miroano miopdulu ea kulo Ju nalo ban ealo, ana bogo napano Ju nalo na abiniua bogokouo bereio, bo ka nalo napano maka ave Ju adu kiano kija vanlo, aijalo ka tenalo tai napano maka ve kialo.
ROM 15:28 Mia veru nei napano nalo amila bijiio, nalo abar jua jum̃aku ka kiniou navario navano, ana bogo napano naba nabar ju vatitig ea nalo na Yerusalemo ruei, mia nataluvo bereio ka nemei nesel ea kamiu na Romo, karina mia nejaka nava Speni.
ROM 15:29 Mia nomijog ruei ka bogo napano neyotuba kean kamiu, mia rivu mia rivu ka kito nonovio, mia neviedu vija Kristo kiano ilivuiano novo ve miroano ka neveriio van kamiu.
ROM 15:30 Bilbilu nalo, nojidom nevika sikili van kamiu ea kiado Tubo Yesu Kristo siano, ka kamiu kumitu tiniemiu maio ka kiniou ea kenemiu volkouano. Nemijikia ka kamiu kubujo ea tinietiiano napano Niununo Lu jianio, ana bo ka kubolkouo sikili ka kiniou, kuviasol kenemiu volkouano vija kiaku volkouano napano nemila vonio jikili ka nobolkouo julaka kanio.
ROM 15:31 Bogo napano nava novokar tanobuku nei Yutea ka nava Yerusalemo, telabo napano maka asaaro ka amonea Ioluano Vou nei aju, ana maka nejikia ka mia nalo ajidom ka ala tum̃abe ka kiniou, mia neber bo ka kamiu ka kubolkouo van Atua ka tukovio ka kialo jidomiano va nalo ea kiniou. Mia monoka kubolkouo bunu ka namoneano lu nalo napano aju Yerusalemo, mia nalo asaaro ka avar veru ve telisu napano mia kiniou nesianio vanlo.
ROM 15:32 Ana verver vite nonovio memedu tibe Atua kiano tinieiiano, mia kiniou nemijikia neyotuba ka kamiu vija burum̃ara kiaku tiniesaareiano a mia nemijikia noto rivu vija kamiu, nojilimebi ve telisu beamu.
ROM 15:33 Mia kiniou bunu nojo nobolkouo ka kamiu, ka mia kiado Atua, burupati na tum̃aro, to vija kamiu rivanvano-o maka rijikia ribisi.
ROM 16:1 Bilbilu nalo, nojidom netetavoko kiaku m̃esi ea iliano nalo tai ea tivelinio ka kamiu nalo tealo. Ea tivelinio na kuviviniedo nei Vipi, napano naio naruei ridu m̃esi nene riviedu ea kamiu, nejidom kuvijikia ka naio be ijaiano novo tai ea taara na namoneano nalo na ea komeli na Kenkria,
ROM 16:2 naruei bo ka kamiu kuvisaaro ka kuver iliano vorvorua vanio, kuvuru naio tibe kuviviniemiu tai ea tivelinio na Tubo kiano torogio, jibe napano memedu ka kito namoneano nalo monoka ralaio van kito. Bo ka kamiu kuvijai naio ka venia napano mia jum̃ano bulati kanio, ka napano naio be tira tai napano be bilbilu novo ea kumemi miroano, miija vatitig kumemi.
ROM 16:3 Nejidom bunu ka kamiu kuver kiaku kavijo bo a bogiano bo rivan tira novo dolu nene Priska, rivija koano sum̃ano Akuila, napano kumemi nube tomu na im̃auveiano ea Kristo Yesu kiano im̃auano.
ROM 16:4 Riano ga na, bogo tai nua na, kiniou nojoa juluvati na m̃ariano, ana naljuo amila napano vaataro ala luvu kialo meuliano ka amei alarur kiniou, mia nojo nober sivaiano laka biorio. A maka kiniou ve takurano ga, mia taara na namoneano dolu nalo na tanobuku nei nalo bunu aber sivaiano kalo bior venia napano amila nei.
ROM 16:5 Mia kavijo bo a bogiano bo napano nober ka naljuo, nojidom nover bunu van ea nalo dolu napano aju joomo ea taara na namoneano na tertelisu napano aju abiviuo vio takurano ea naljuo kunualo. Mia neber jibe nei bunu ka nalo nene, jibe kiaku bilbilu novo nei Epanetas, napano naio be moti na ea burum̃ara tanobuku na Esia napano monea Kristo,
ROM 16:6 mia Mere, napano naio mila im̃auano novo nalo miroano iviso ea kamiu,
ROM 16:7 mia naljuo dolu na kiaku vio nene, Adronikas naio Junia, napano nua na kumemi nubiniu numitua tetavokoiano vaarakurano. Atevi juo nei, naljuo amonea Yesu nua ruei, beamu ka kiniou, a abar sio novo laka ea atevi dolu nalo miralo.
ROM 16:8 Tealo bereio, nina Ampliatas, napano Tubo mila ka kumemi ve juo nuve bilbilu novo,
ROM 16:9 a Upanas, napano numim̃au vio takurano bija naio ea Kristo kiano Ioluano Vou, a kuruaku novo nei Stakis,
ROM 16:10 a Apelesi, napano be iakurano ka juboluboiano toru binimei ea naio, mia naio jikili ju kirisikili ea Kristo. Mia bunu, neber kavijo bo a bogiano bo ban Aristobiulas kiano m̃aratavo nalo,
ROM 16:11 a toro dolu na kiaku vio nei Erodiano, a namoneano nalo na Narsisas kiano m̃aratavo,
ROM 16:12 a tira juo novo na amim̃au Tubo kiano na, Traevina bija kuluene Traevosa, a kuviviniedo dolu nei bunu Pesisi napano tiniedo jii naio toru, a naio mila Tubo kiano im̃auano toru laka ruei,
ROM 16:13 a Ruvus, navurim̃araboiano na Tubo kiano im̃auano, bija kenieno napano naio bijuku ban kiniou jibe napano nebe kenerinio.
ROM 16:14 Mia tealo bunu bereio, nina Asinkritas, Vlekono, Emesi, Patropas, a Emas, bija bunu kuruado dolu nalo napano aju bijalo,
ROM 16:15 a bereio maka tinieku bobogia Vilolokas, Juliano, Nereas bija kuviniene, a Olimpas, bija namoneano lu dolu nalo napano amila lotuano vio takurano bijalo.
ROM 16:16 Kiniou nejaaro ka nebiviuo kamiu nonovio ea kiaku m̃esi nei, a kamiu bunu monoka kuvorvorua vatitig van kamiu bogo nonovio, kuverial kenemiu tinietiiano van kamiu, tibe kamiu kumiom babibiniomiu ea tinievuiano. Mia bunu, taara nalo na Kristo kiano namoneano nalo ea tanobuku nalo nei aberial ka nalo aju ajidomii kamiu ea kialo volkouano nalo.
ROM 16:17 Bilbilu nalo, nebika jikili ban kamiu bereio ka monoka kuvitikar vatitig ka nalo napano aju ajikar baravoiano nalo, p̃eli aju amila namoneano nalo abeve terakurano, a aju amilkue ka verloglogiano nalo napano kumijevio. Mia bogo napano kuvitikar vatitiglo, kuvitu re kuva vaataro kalo.
ROM 16:18 Nina bior tomu nalo kinkin na jibe na, nalo maka atu ala kiado Tubo Kristo kiano im̃auano, mia nalo aju amila jakii ga kialo sidomiano va nalo. Nalo amijikia averial vite nalo na bo mia bo ve miroano, mia be seseiano ga na, a nalo aju ajubolbo vatitig tomu nalo kialo jidomiano napano nalo maka ve kialo jikiaiano rivu.
ROM 16:19 Tomu nonovio amijikia vatitig ruei ka kumitum̃a kumijogkar vatitig Atua kiano iliano, a naina mila kiniou nejaaro laka, mia monoka kuvitu kuvitikar vatitigio. Ea tivelinio na vite nalo napano abo, kamiu monoka kuvilala m̃asosouaio, mia ea tivelinio na vite nalo napano abova, ve re leleio soro nene tai toa kamiu.
ROM 16:20 Mia verver kuvila tibe na, mia kiado Atua na tum̃aro naio be kiano m̃arabo ka rila Sim̃aro to yetano ka jaamiu ka kuvila tanea vatitig naio. Mia kiaku volkouano ka mia kiado Tubo Yesu Kristo kiano tinieseseiano to vija kamiu.
ROM 16:21 Bilbilu nei Timoti, napano kumemi juo numitu numim̃au vio takurano, naio berenio kavijo bo p̃eli bogiano bo ban kamiu, a nalo tolu nei na kiaku vio, Lusias, Jasoni bija Sosipata, nalo bunu aberenio.
ROM 16:22 Kiniou napano nobokar vovojulu, nobivitauialar m̃esi nei Pol kiano na ban kamiu, siaku Tesias, a kiniou bunu nejidom neverenio ka nejaaro laka ka nebiviuo kamiu ea m̃esi nei, ea Tubo siano.
ROM 16:23 Bo ga, kiniou Pol nei naruei nebivitauia nei, mia vaataro nala nonovio kiaku m̃esi naruei, mia kavijo bo a bogiano bo jo biedu binimei ea nalo tolu nei, Kaias, napano nojoa kunuano, napano lotuano na vio na nalo aju abinimei vio takurano ea kunuano, bija Erastas, napano naio be navitikariano na veru na komeli nene, bija kuruado nei Kotas.
ROM 16:25 Vonganei ea kiaku iliano maariano, nejidom nedular bereio ilivuiano nonovio nalo van Atua. Nobolkouo ka mia naio ridu iliano nalo na Ioluano Vou, vija verloglogiano nalo novo napano aberii Yesu Kristo napano nejian ban kamiu ruei, ridu vatitig tua kenemiu meuliano nalo, ka kuvijikia kuvitu sikili ea bogoti napano ju binimei. Ilirianiano novo nalo na, tomu nalo maka ajikiaio ea yuka miroano napano barlaka ruei, mia vonganei ga Atua berialio ka kito.
ROM 16:26 Beamu, tomu nalo abuluku naverialiano nalo kialo iliano nalo, nalo maka ajikia ka ilirianiano nalo nene aju joomo ealo, mia vonganei, kumemi nuberialio meravo, kito robiniu romijikia rojoglubario. A Atua, jibe naio jo nua a mia to toboto, naio berialio Ioluano Vou nei monoka rivan ea tomu nalo na buruvenuo nonovio, ka nalo bunu ajikia ajogio, ajikia amonmoneaio.
ROM 16:27 Naio ga takurano be Atua, naio ga takurano be burupati na masouano, a naio ga takurano napano Yesu Kristo mila kiado m̃arabo ka rolotu naio, ravano-o maka rijikia ribisi bogo tai.
1CO 1:1 Bilbilu nalo na Korin, kiniou napano nebivitauia m̃esi nei biedu ban kamiu, kiniou Pol, napano Atua jidom ka nemei neve Kristo Yesu kenerinio kiano atevi tai, ana naio bio kiniou, bitirilar kiniou ka navakar im̃auano tibe na. Kiniou nojoa vio nei bija kiado bilbilu nei Sostinis, ana kumemi juo nuberenio kavijo bo p̃eli bogiano bo ban kamiu nonovio,
1CO 1:2 ea Atua kiano namoneano nalo ea burum̃ara komeli na Korin. Kamiu na naruei Atua bio kamiu ka kumei kuviasol vija kiano namoneano lu dolu nalo, napano vio reraio ea vio nonovio nalo aju amilotu naio napano mila kito robe lu vatitig bo ruei, nina Yesu Kristo napano naio be kito nonovio kiado Tubo.
1CO 1:3 Kumemi juo kenememi volkouano ka Tubo Yesu Kristo kiano tiniememiano a karam̃ado Atua kiano tum̃aroiano atu vija kamiu.
1CO 1:4 Nemial jibe ka bogo na kube Kristo Yesu kiano tomu nalo, Atua kiano tiniememiano jo mim̃au toru ea kenemiu meuliano, ana bogo nonovio nojo neber siva laka kanio.
1CO 1:5 Kamiu kumitu kubinimei bo laka ea tivelinio na verialiano na Ioluano Vou, ana kumitu kubinimei mave ea tivelinio na kenemiu jikiaiano, a ea tivelinio na bajago novo nonovio dolu.
1CO 1:6 Bogo napano nemial tena, nemialio jibe napano kiaku im̃auano nalo re nua na, napano neberloglog Kristo ka kamiu, vonganei naio jo bar m̃arati toru.
1CO 1:7 Jidomiano nalo a moroano nalo napano Niununo Lu no jo jianio, maka tai napano maka kuvokario vo, ana kumitu kumim̃au bijalo bo laka, bior napano kumitu kumisirarag ka kiado Tubo Yesu Kristo mijikia riyotuba bereio ea vio yetano nei.
1CO 1:8 Naio maka riyotuba vo, mia jo miija kito julaka ka rotu sikili rivano-o rivokar legiano maaro nene, mia bogo napano rotua Atua mirano naio mila napano maka tokoriano toa kito.
1CO 1:9 Atua berkar ruei ka riviekokoa kito, mia romijikia rovarkar tiniedo rivu ea kiano iliano nei, bior napano naio bio kito, midu kito miasol kito robe bilbilu novo nalo bija kenerinio, kiado Tubo Yesu Kristo.
1CO 1:10 Kiaku m̃aratavo, Yesu Kristo kiado Tubo kiano terati nalo, kiniou nojidom nevika sikili van kamiu ea siano, ka kamiu kuvila von ka kuvila kamiu ka kumei ve takurano bereio. Bova napano kumitu kuburuburevure kamiu, mia kenemiu jidomiano a kenemiu iliano monoka ve takurano ga.
1CO 1:11 Neber iliano nalo na, kar nalo napano aju kea ea toro nei Kloe kiano vio nalo abinimei aberial ban kiniou ka siniabu nalo aju iviso kean kamiu, kuruaku nalo a kuvivinioku nalo.
1CO 1:12 Nomijog napano kamiu terakurano kumitu kuber kenemiu bagaro nalo. P̃eli tai berinavo “O, kiniou natakisor Pol,” p̃eli dolu river “O, kiniou Apolos kiano,” p̃eli tai bereio, river “O kiniou neiasol Kevas kiano bagaro.” Ana tealo bereio nalo abitirilar kialo bagaro dolu na tertelisu nalo, abuku bulag dolu nalo, aberenio “O, kumemi ga nube tomu na Kristo kiano riano.”
1CO 1:13 ?Ei, venia na kamiu kumila jibe na? P̃eli bo ka rotivirivi Kristo ea niati, ratankanio ea kenemiu bagaro na tertelisu nalo tibe na? P̃eli tealo ajidomii aber nalo abe kiniou Pol kiaki, tibe napano aber kiniou naruei napano najakilele ea m̃akolkolo ka nalarurlo? P̃eli tealo tinielo bobogia napano abaruei ealo ea Yesu siano, mia nalo ajidomii aber abaruei ealo ea siaku?
1CO 1:14 Jibe na, nemial bo ga ka nanua na kiniou nala re varueiano ea kamiu tai leleio, p̃eli naljuo nei Krispas naio Kaias ga, a riano, tinieku bobogia, nabaruei bunu ea Stevanas bija nalo na ea kiano m̃aratavo, a maka bunu nosidomkar vonganei ka nalo na ga p̃eli ta bunu bereio. Kiniou neber jibe na bior napano ver nala varueiano ea kamiu ve va moroano, p̃eli nalo atumolu atu ail vevavin ka garuei, atu averinavo “!O, kumemi naruei, Pol baruei ea kumemi ea siano!”
1CO 1:17 Jibe na bova na, bior napano Kristo maka tuvan kiniou nemei navaruei ea tomu nalo, mia miila kiniou nebinimei ka noioliolu ka kiano Ioluano Vou vanlo. A bogo napano nojo nomioliolu jibe na, maka nala vija moroano na masouano na yetemeriba nei, mia nemila bija moroano na Kristo kiano m̃akolkolo.
1CO 1:18 Ana tomu nalo napano aju ajakii m̃arabo na vakovioiano, amijog iliano na, Kristo kiano m̃akolkolo, jibe titai na vovuiano ealo, mia kito napano roju rajakii m̃arabo na meuliano, romijog iliano na, Kristo kiano m̃akolkolo, jibe Atua kiano moroano ka rilarur kito.
1CO 1:19 Nina jibe iliano tai ea Vivitauiano Lu, napano Atua berenio jibe nei, berinavo Mia kiniou nouedom masouano den nalo napano ajidomii aber abe masou, mia notuko vio ka jikiaiano ea nalo napano ajidomii aber amijikia vite.
1CO 1:20 A iliano na be riano laka, bior napano robitii yetemeriba, romijikia rovika tibe nei, rever: ?Kiano tomu na masouano nalo, nalo be? Tomu nalo napano amilakakar vatitig jikiaiano nalo napano ajua niosi nalo, nalo be? ?Tomu nalo napano amijikia aberii jidomiano dolu nalo napano aju jeliviv vonganei, nalo be? Romial jibe maka atu na, a romial jibe Atua mila masouano na yetemeriba nei binimei jibe tena vovuiano tai bereio ruei.
1CO 1:21 Atua ga naio be masou, a ea kiano masouano, naio mila ka masouano na yetemeriba nei maka rijikia rila toro rijikia naio. Mia naio mial bo lie ka rila napano kenememi ioluano nalo napano tomu nalo aju ajidomiio aber be vovu ga, mijikia rilarur toro kiano meuliano napano moneaio.
1CO 1:22 Kulo Ju miroano maka asidom amonea, aju aberenio ver nuvila aial vremesiano nalo, mia atikar ka amoneaio, a kulo Krik miroano maka asidom amoneaio, aju aberenio ver nuvil rimemedu ea kialo jikiaiano moruo nalo, mia nalo atikar ka amoneaio,
1CO 1:23 mia maka nuvitu nuvila tibe na kalo. Kumemi numitu numioliolu ka Yesu ga banlo, nuber naio m̃aro ea m̃akolkolo kar kialo kariano nalo, mia iliano na, kulo Ju nalo aber maka ajikia amoneaio, a kulo Krik nalo, aber nina iliano vovu ga na.
1CO 1:24 Mia ea tivelinio na nalo napano Atua biolo ka ave kiano, jibe kito, napano kito tealo kulo Ju a kito tealo kulo Krik, maka tibe na. Kito rosidomii re ka reial kijokijo dolu, bior napano robitilubar Atua kiano moroano ea Kristo kiano im̃auano ruei, a rosidomii re ka rotakii jikiaiano dolu, bior napano robitilubar Atua kiano masouano ea Kristo kiano m̃arabo na milarur kito.
1CO 1:25 Tomu dolu nalo amial ka Atua mijamo ka Kristo m̃aro ea m̃akolkolo, ajidomii aber Atua melukluku ga, mia makanio, tenei berial kiano moroano napano jikili lie loa toro kiano moroano. Nalo amial tenei, ajidomii aber Atua miavovu ga, mia makanio, naio berial kiano masouano napano bo laka loa toro kiano masouano.
1CO 1:26 Kuruaku a kuvivinioku nalo, kuvila von ka kuvisidomii ver kamiu jibe venia na, napano Atua bio kamiu be kanano? Maka kito ve miroano napano ea tivelinio na vitiiano na yetemeriba robe masou, p̃eli kito tomu na be p̃irido, p̃eli kito tomu na tortoru.
1CO 1:27 Yetemeriba nei ber kito romiavovu, mia Atua buru kito, ana mim̃au jel ea kito, jo bar bulag masouano na yetemeriba. Yetemeriba nei ber kito romilukluku, mia Atua buru kito, ana mim̃au jel ea kito, jo miladom sikiliano na yetemeriba.
1CO 1:28 Yetemeriba nei ber kito robe tomu kurano napano roju yetano ga, mia Atua buru kito, ana ea mim̃au jel kito, jo muedom tenalo na burutomoluo napano aju, mila tenalo na abinimei be kurano.
1CO 1:29 Jibe na, maka toro tai leleio napano mijikia ridular naio toa Atua mirano, river naio be masou, p̃eli naio jikili, p̃eli naio be toro tai,
1CO 1:30 mia Atua ga be burupati na kiado meuliano vou bija Kristo Yesu. Naio naruei miila Yesu binimei jiloglog m̃arabo ban kito, ana Yesu bulu bulag kito mila romemedu ea mirano, robinimei robe kiano tomu lu.
1CO 1:31 Ana bior tenalo na, romial ka iliano tai ea Vivitauiano Lu be riano laka, napano berenio jibe nei, ber Toro napano jidom rive m̃arou, naio mijikia rive m̃arou ga ea venia Tubo milaka naio.
1CO 2:1 Bilbilu nalo, nua na kamiu maka kuvijikia Atua kiano iliano nalo, mia kiniou nebinimei neberialio ban kamiu. A jibe na napano kumialio, bogo napano nebinimei nomila, maka nola napano navarvar ka iliano terebievi nalo p̃eli toro kiano masouano nalo.
1CO 2:2 Nemila kiaku jidomiano jikili ka bogo napano nojo iviso kean kamiu, mia maka nosidomii tenalo dolu leleio, a mia noioliolu ga ka Yesu Kristo, vija kiano m̃ariano ea m̃akolkolo.
1CO 2:3 Nojo bija kamiu, nomijog ka nemelmeluku laka, nojo nomerou, nojo nomemebiju,
1CO 2:4 a kiaku iliano a kiaku tukunuano nalo maka avujo leleio ka masouano p̃eli toro kiano jikiaiano. Mia ea bogo na, kumijog napano kiaku iliano nalo abujolou ka moroano na Niununo Lu,
1CO 2:5 ana mila na kenemiu viekouoiano maka sikili tua toro kiano ilimasosouano, mia jikili jua Atua kiano moroano.
1CO 2:6 Be riano napano kiaku iliano maka rivujo ka ilimasosouano na yetemeriba nei, p̃eli jikiaiano ninio nalo napano tomu na tortoru na yetemeriba nei ajaaro kanio, mia naio bo ga, bior napano yetemeriba nei bija kiano tomu na tortoru mia ava am̃aro ga. Mia kamiu napano kenemiu jidomiano meruo bo, kubitilubar napano kiaku iliano bujo vatitig ka Atua kiano masouano nalo.
1CO 2:7 Kiano masouano na, naio midu vatitigio bo ju beamu karina jii yetemeriba nei, mia masouano na juluku ju vatitigio banbano-o, mia tomu nalo maka ajikia leleio, a vonganei ana maluvo ea kito medave jibe ilivuiano na toru tai napano Atua jianio ka rila rivu ka kito.
1CO 2:8 Ana kiano masouano na maluvo ea kito ea m̃arabo napano Yesu binimei milarur kito, mia tomu na tortoru na yetemeriba nei maka avitilubar tenei, ana amidu Yesu, napano naio be Tubo na toru na mermerano na tiniabene, ajilan naio jaklele ea m̃akolkolo m̃aro.
1CO 2:9 Tomu nalo maka avitilubar Atua kiano jidomiano tibe na, naio jibe Vivitauiano Lu tai, napano berenio jibe nei, berinavo Tenalo na bo napano toro mirano maka lele rialio, p̃eli maka lele toro tiliniene rijogio, p̃eli toro kiano iviso maka lele sidomiio, mia tenalo na naruei Atua mila vatitigio ju ka kiano tomu nalo napano tiniel jii naio.
1CO 2:10 A kito, romijikia ilivuiano nalo na, bior napano Atua Niununo napano bitilubar tenene nonovio, a mijikia Atua kiano jidomiano lukluku nonovio, naio berialio ban kito.
1CO 2:11 Jibe ka ga kito kulorinio, napano toro dolu maka rijikia venia joa kiado jidomiano, mia niunudo ga mijikia vatitigio bo, mia be verare bunu ka Atua. Kito maka rejikia venia na jua kiano jidomiano, mia Niununo mijikia, ana berialio ka kito.
1CO 2:12 Maka niununo tai na yetemeriba nei ga napano riverialio ka kito, mia Niununo Lu nei napano jaluvo den Atua binimei, naio naruei mila kito robitilubar vatitig jidomiano nonovio nalo napano Atua jo jian ban kito.
1CO 2:13 Tibe na, bo ka kuvitilubar bunu ka kenememi iliano nalo napano abinimei ea kamiu, maka ea toro kiano masouano, mia Atua kiano Niununo ga berloglog ka kito. Jibe na, numitu numidu Niununo Lu nei kiano ilirianiano nalo, ana numisian ban kamiu napano Niununo nene joa kenemiu meuliano ruei.
1CO 2:14 Toro napano Niununo maka toa kiano meuliano, naio maka rijikia rivitilubar tenalo na Niununo, naio jibe joa kia ga melijokouo, ana maka rivokar leleio moroano nalo napano Niununo jianio.
1CO 2:15 Toro napano Niununo joaio, mia mijikia rivitilubar vatitig vite nonovio, mia toro napano Niununo maka toaio, naio maka rijikia rivitilubar vatitig venia joa toro kiano meuliano napano Niununo joa naio.
1CO 2:16 Iliano Lu berenio jibe nei, ber Maka toro tai leleio napano naio mijikia venia joa Atua kiano jidomiano, maka toro tai leleio napano mijikia verloglog vite van Atua. Iliano nei be riano laka, mia ea kito napano Niununo joa kito, romijev Kristo kiano jidomiano ruei.
1CO 3:1 Ea bogo napano nojo bija kamiu nua na, nojidom neil vatitig vija kamiu, tibe napano kamiu tomu nalo napano Atua kanano Niununo joa kenemiu meuliano ruei, mia makanio. Namial ka maka kuvare vo, ana mila nemil ban kamiu jibe ka kamiu tomu nalo na yetemeriba kia ga vo, napano ea tivelinio na kenemiu meuliano bija Kristo, ajibe kiritete nalo kia ga vo.
1CO 3:2 Jibe na, nabagan kamiu ka yu ga, maka nejikia nesian sinaniano na jikili van kamiu, bior napano maka kuvare. Mia bokar banei, nemial jibe maka kuvare vo,
1CO 3:3 bior napano bajago miroano na yetemeriba aju iviso kean kamiu kia ga. P̃eli kamiu maka kuvitilubario, mia bogo napano jokuano a baravoiano ju kean kamiu, ber p̃eli kumitua melijokouo kea ga vo, kenemiu bajago ajibe toro ga kiano bajago.
1CO 3:4 Meravo laka ka kamiu jibe na, bior napano kumitu kuburu vurevure kamiu kea ga. Kamiu tealo kumitu kuberii kiniou, kuberinavo “O, kumemi numisidom Pol, kumemi nuvitakisor naio,” a kamiu tealo aju aber bilbilu navagadeano nei Apolos, aberenio “O, kumemi numisidom Apolos, kumemi nuvitakisor naio,” mia jidomiano kinkin jibe na naio be toro kiano jidomiano ga.
1CO 3:5 Verver kuvisidom kuververii kumemi juo Apolos siememi, bo ka kuvisidomiio vatitig ka kumemi juo nube toro na jum̃abe? Kumemi juo nube Tubo kiano toro ga, ka nuvila im̃auano napano naio midu joa jumememi, ka rila ka kamiu kuvijikia kumonea naio.
1CO 3:6 Ea tivelinio na im̃auano nei, kiniou naruei napano nemebija kurukuti, a Apolos naruei napano naio se toti nene, mia Atua ga napano mila burupati binimei toru bar m̃arati.
1CO 3:7 Naruei monoka rovitilubar ka toro napano mebija kurukuti a naio napano se toti nene, naljuo maka leleio ala titai na toru, mia naio napano mila burupati binimei toru bar m̃arati, naio naruei mila titai na toru.
1CO 3:8 Mia kumemi juo, napano tai mebija kurukuti, a tai se toti nene, kumemi juo numim̃au be verare ga, a mia kumemi juo nuvijev kenememi jidomiano rimemedu ka kenememi im̃auano.
1CO 3:9 Maka tibe napano kumemi tai naio bo, tai naio bova, mia kumemi juo nube tomu na im̃auano vei na Atua kiano, a kamiu jibe borotano napano kumemi juo numitu numim̃au eaio. P̃eli kijokijo dolu tai nene bereio, nemijikia never ka kamiu jibe yimo tai napano Atua naio jo mim̃aukanio.
1CO 3:10 Atua mije jikiaiano novo ban kiniou, ana nomim̃au jibe toro tai napano bari nai ka im̃auano, nomim̃auka burupati yimo novo tai nene napano jikili bo ju. Mia iorou, maka kiniou napano nevitirilar yimo toa burupati neibano, mia bilbilu dolu nei binimei jo miija ka rim̃auka yimo. A kamiu tealo dolu bereio kumijikia kuviija ka kuvim̃auka yimo toa burupati neibano, mia toro napano mila jibe na monoka vitikar vatitig kiano bajago na im̃auano.
1CO 3:11 Naio monoka rila von re ka ridu burupati dolu tai bereio, bior napano kiniou nomidu burupati na memedu ruei ju, napano naio be Yesu Kristo.
1CO 3:12 A bogo napano amim̃auka yimo mave ea burupati yimo nene, p̃eli tealo amim̃auka niogo p̃eli veriniogo p̃eli veru jikili, p̃eli tealo amim̃auka iesi p̃eli surukiaro p̃eli m̃aburi.
1CO 3:13 Mia iorou, sebi na legiano maaro rila von sisen veve kialo im̃auano nalo, rila im̃auano napano nalo amim̃aukaio, rimaluvo ea vio medave.
1CO 3:14 Ver sebi rivokar yimo napano toro tai bitirilar joa burupati neibano, ana ver maka rijikia sisen lele ga, yimo jikili ju bo ga ju, mia toro nene rijev jidomiano novo tai.
1CO 3:15 A ver toro dolu tai, sebi sisen nonovio kiano im̃auano, mia toro nene milaluvu nono vite. Vaataro mia sebi mijikia sisen bin naio toro na im̃auano nene bunu, ana p̃eli milarur naio buro den sebi nei, milarur kiano meuliano.
1CO 3:16 A kamiu monoka kuvitilubar ka yimo neibano napano abitirilar joa burupati nene, naio be kamiu namoneano nalo, a jibe yimo na volkouano lu tai na Atua kanano, napano kiano Niununo jo joa joomo eaio.
1CO 3:17 Atua kunuano na volkouano nene, naio be kamiu ga, a ver toro tai jidom rila bulag yimo nene, mia Atua rivelar naio garuei, bior napano kiano yimo na volkouano nene be lu laka.
1CO 3:18 Monoka kuvidu venia napano nojo neberenio nei, maka rivu ka kuvisidomii kuver be titai iakurano ga. Ver kamiu tai ber naio be masou bo ea jikiaiano nalo na yetemeriba nei, bo lie ka naio tuvan jidomiano sibisibiano nalo na atu. Ea tivelinio na jikiaiano nalo na yetemeriba nei, naio monoka rila naio tibe toro vovu tai ga, ana ver rila tibe na, mia naio mijikia ve masou vatitig ea Atua kiano jikiaiano.
1CO 3:19 Ea Iliano Lu, kito romial iliano tai napano jiloglog ber masouano na yetemeriba nei jibe vite vovu tai ea mirano Atua, napano berinavo jibe nei, ber Nalo napano ajidomii aber abe masou bo ea yetemeriba nei, ajidomii aber amijikia vite, mia ea Atua mirano, nalo abe vovu ga, naio bitilubar vatitiglo ruei.
1CO 3:20 A iliano dolu tai bereio jibe nei, napano berenio Tubo bitilubar vatitig kulo masouano na yetemeriba nei kialo jidomiano, ber nalo abe kurano ga.
1CO 3:21 Tibe na, monoka rove m̃arou re ka jidomiano nalo na yetemeriba. Nalo maka ajikia ala vite tai rivu ka kamiu leleio, bior napano Atua jian nonovio kiano ilivuiano novo ban kamiu ruei.
1CO 3:22 Kiniou Pol bija Apolos a Kevas, kumemi numila im̃auano novo ban kamiu ruei, a vonganei yetemeriba nei joa jumemiu. P̃eli kumeul p̃eli kum̃arm̃aro, p̃eli kumitu vonganei p̃eli kuvitu ea bogoti napano ju ka rimei, mia vite nonovio be kenemiu ruei,
1CO 3:23 a kamiu kube Kristo kiano, a Kristo naio be Atua kiano.
1CO 4:1 Tibe na, kamiu kuvidu re kumemi nuvitu mave, mia bo ka kuvitii kumemi tibe tomu nalo na Kristo kiano im̃auano ga, napano naio bar Atua kiano ililukuano nalo ban kumemi, ka nuverialio ka nalo napano maka ajikiaio.
1CO 4:2 A vite tortoru napano jua kene-memi jidomiano, kumemi numijikia ka monoka nuviekar vatitig ea im̃auano nei napano kenememi toro na toru midu jua jumememi.
1CO 4:3 Maka nosidomii m̃elea ka p̃eli kamiu kumisidomii jum̃abe ea kiniou, p̃eli tomu nalo atibure kiniou tum̃abe, a kiniou bunu maka noto nevitvitii kiniou bereio ka kiniou jibe na p̃eli jibe nei.
1CO 4:4 Ee, p̃eli nebitii ka nomim̃au bo ga, mia nina kiaku jidomiano na ga na. Kiaku jidomiano na maka rijikia rila kiniou ka nomemedu, mia Tubo ga naio be toro memedu ka tibure kiniou.
1CO 4:5 Tibe na, kito rala sop̃eli re ka rotibure toro dolu, mia monoka rotu rorea Tubo ka rimei bereio ea kiano legiano nene na tibureiano. Ea bogo na, mia naio rivar vite nalo napano ajuluku ea melijokouo, rila amalmaluvo ea mermerano, a mia naio rivar jidomiano nalo napano ajuluku ea toro kiano iviso, rila amalmaluvo ea mirano vio. Mia Atua rivitivitii vite nalo na, ana mia sian iliano van tomu nalo rimemedu ka venia napano naio mialio ea kialo meuliano.
1CO 4:6 Bilbilu nalo, iliano nalo napano nojo neber ruei na, nojo neberii laka kumemi juo Apolos ga, ana nemila jibe na bior napano nojidom neverloglog vatitig kamiu, ka kuvitii re ve dolu ea kenemiu naverloglogiano nalo. Kamiu tealo abe m̃arou bior naverloglogiano ea kialo burukuti, a nalo aju abitii bova ea naverloglogiano na nalo dolu kialo, mia maka rimemedu tibe na.
1CO 4:7 Kamiu kubiniu kube verare ga, maka kuvu lie tovulu nalo dolu, a ver vite tai na bo joa kamiu, maka kamiu napano kumim̃aukanio. Atua ga mijevio ban kamiu jibe jidomiano tai, ana tibe na bo ka kuvil re m̃arou riviorio bereio.
1CO 4:8 Ee, nemijikia ka kumitu kuber p̃eli kube sanibaiano ka vite novo nalo na Atua kiano ruei, a kumijog bo, kuber p̃eli kamiu kube kiano tomu na tortoru ea yetemeriba nei ruei, napano kubuku kumemi numitu iorou laka. Ver be riano ka kubinimei jibe ka Atua kiano parinio tubo nalo ea yetemeriba nei, bo lie vo, mia neber p̃eli maka tibe na. Ana ver bogo tai tibe na, p̃eli maka kamiu ga na, mia Atua rial ka kumemi juo bunu nubare ka nuvitutano mave vija kamiu ka rotilan vuu ka kiano tomu nalo.
1CO 4:9 Ana vonganei, kumemi atevi nalo maka nuvitua vio novo na jibe na. Jibe napano Atua midu kumemi numitutano maariano laka, napano tomu nalo na yetemeriba bija agelo nalo bunu abiti niege kumemi, jibe napano kumemi nube verare ga ka tomu na bova nalo napano amijev vironiano na m̃ariano banlo.
1CO 4:10 Numitu nubamenea Kristo, numila kiano im̃auano, ana kulo dolu nalo amial kumemi jibe vovu kija ga, ana aju aberii kamiu aber kube masou vatitig ea Kristo kiano meuliano. Nalo abitii ka kumemi niabememi mave, ana aberenio kamiu be p̃irimiu. Nalo amilkuei ka kumemi, ana amidu kamiu kumitu mave.
1CO 4:11 Kumemi maka tibe kamiu leleio, bior napano jikar nua binimei bokar vonganei jijer kumemi, midoujer kumemi, maka kenememi kulum̃arauo novo tai, numitu nubiniua bogokouo nalo, maka kunuememi novo nalo ka nuvituaio,
1CO 4:12 a numitu numeul ea im̃auano na jumememi ga. Tomu nalo amiolua kumemi, ana numilivu kalo ga. Nalo amila bulag kumemi, mia numituvan ga.
1CO 4:13 Nalo amil bova ea siememi, ana numila von ka nuvila bilbilu rivu vijalo ga. Numila bo jibe na, mia nalo amila kumemi jibe niamiamo tai ga na yetemeriba nei. Be riano, binimei bokar vonganei nalo amial kumemi jibe kurano ga.
1CO 4:14 Bo ga, maka never iliano nalo na ka rila kamiu kuvimou, bior kumitibe ka keneriku nalo, napano tinieku jii kamiu laka, ana nojidom neverloglog vatitig kamiu.
1CO 4:15 Nemijikia ka tomu na tortoru nalo miroano napano abitikar kamiu a amijai kenemiu moneano ea Kristo, ana bo tiniemiu maio ka kiniou takurano ga jibe karamemiu. Kiniou nebe moti na nomidu Kristo kiano Ioluano Vou binimei ea kamiu, ana kiniou nojibe karamemiu ea kenemiu meuliano bija naio.
1CO 4:16 Jibe na, nemialio memedu ka noil van kamiu, nejikili ka kamiu ka kuvila von kuvue jaaku kija beamu.
1CO 4:17 Jidomiano na naruei mila nojidom noiila Timoti riviedu ea kamiu. Nemial jibe Tubo juvan naio ban kiniou jibe keneriku tai ga, bior napano naio biekouo julaka ea im̃auano nalo a tinieku jii naio laka. Naruei bogo napano mia naio rimaluvo kean kamiu, nojidom ka naio rila kamiu kuvisidomii vatitig bereio kiaku bajago nalo na nemiel najakisor Kristo, jibe napano nojo neberloglog ka tomu nalo ea taara na nalotuano nalo napano nojo nejeliviv ealo.
1CO 4:18 Kiniou nemijikia ka bogo napano kumial ka maka bunu namaluvo kean kamiu, kamiu tealo amila von ka adulo atu mave ruei.
1CO 4:19 Mia bo ga, bior napano ver Tubo rijamo ka van kiniou, mia namaluvo kean kamiu vesiou re. Ea bogo na naruei, mia maka nosidom nojog nalo na kialo iliano, ana mia nojidom neial ka kialo moroano ka ala im̃auano jikili jum̃abe.
1CO 4:20 Nina bior napano toro kiano iliano maka ve titai ea Atua kiano navenatuboiano, mia Niununo kiano moroano naruei naio be vite na toru.
1CO 4:21 Bo ga, nojidom ka kamiu kuvisi-domii vatitig beamu, ver bogo napano namaluvo kean kamiu, mia tum̃abe? Ver kuvisidom, nemijikia neviedu vija iliano kouo nalo na baravoiano van kamiu, mia bo ka kuvidu kenemiu jidomiano totano beamu vo, naruei mia nemijikia neviedu vija iliano na melokloko nalo ga, ea bajago na tinietiiano.
1CO 5:1 Iliano binimei bokar tilinieku ber vite tai jo iviso ka kamiu napano kiriniagiago laka. Nalo aber kamiu tai, karam̃ano ba joro ka tira dolu tai, ana iorou, toro na bina ka karam̃ano koano tira neibano binimei jo bijaio. Be riano na, tomu na melijokouo maka ajikia ala bajago na, mia jum̃abe kamiu namoneano nalo tai jom̃a milaio?
1CO 5:2 Kamiu namoneano nalo kumitu kumidular kamiu, kuber kumitu kumim̃au bo, mia jum̃abe kumitu kumituvan bajago na jibe na jo ba iviso kean kamiu? Bo ka kuvijog rivova ka vite nei, a bo ka kuvukular toro na den kenemiu taara na nalotuano.
1CO 5:3 Ee, be riano napano vonganei kiniou nojo ea vio nei koalabo den kamiu, ana ea niunuku nomijog jibe nojo bija kamiu ga. Jibe na, ea Tubo Yesu siano, noberial toro na kiano tibureiano tai jibe napano nojo nejikili noju ea miremiu.
1CO 5:4 Jibe na, bogo napano kamiu kubinimei vio takurano bereio, monoka kuvitii ka jibe niunuku jo bija kamiu, a monoka kuvijikia ka Tubo Yesu bunu jo bija kiano moroano,
1CO 5:5 naruei monoka kuvukular toro na den taara na nalotuano. Naio monoka taluvo bereio, rivan bereio ea yetemeriba ea Sim̃aro jum̃ano, ana bo ka bajago na kariano nalo na yetemeriba ala naio rijog rivova rivano-o, p̃eli iorou mia naio rimei bereio, ka Tubo saaro ka rilarur niununo ea bogoti na maaro.
1CO 5:6 Bilbilu nalo, maka rivu napano kumitu kube m̃arou laka ka kamiu, kuber kumeravo, bior napano niamiamo nei jo keano vo ea kamiu. Kamiu kumijikia ruei ka isi telisu ga, mia mijikia rila joko nonovio nalo riyuku.
1CO 5:7 Tibe na, bo ka kuvar bulag isi na bova nei napano jua kamiu, ka kamiu nonovio kumijikia kumei kumeravo vatitig bereio. Kito monoka rosidomii jibe ka ga napano kulo moruo nalo aju amila sida ka nunu kenerinio ka avar bulag kialo kariano, vonganei Kristo binimei m̃aro ea m̃akolkolo ka kiado kariano, ana maka rivu ka niamiamo toa kito kia ga vo.
1CO 5:8 Ana bogo napano kulo moruo nalo amila sida kario, be jokoluolu nene, ana kito bunu namoneano nalo be kiado jokoluolu. Mia maka rivu rotua jokoluolu na, resen joko tai napano isi moruo tai joaio. Iliano nei berii bova ka kariano bija bajago va na meuliano moruo aju kea ea kito, bior joomo ea meuliano na taara na nalotuano, vite nonovio monoka rimeravo rivu, rive riano rivu, a ve lu rivu.
1CO 5:9 Kiaku iliano tai ban kamiu jibe nei ruei. Ea m̃esi dolu na napano nebivitauia biedu ban kamiu nua, neberial ban kamiu monoka kuvitu re vio takurano vija tomu nalo napano aju amila bajago va, p̃eli aju aburovuro janea vio ka tire nalo.
1CO 5:10 Ana p̃eli kamiu tealo kumijog belea kiaku iliano nei, bior maka never tivelinio na tomu nalo napano maka amonea. Ea nalo, miroano aju amila siakaiano, miroano abe buruviti, miroano abe navinauano, a miroano aju amilotu ka kialo tavoru nalo, mia ver rosidom ka rotu laka kalo, p̃eli monoka rotuvan yetemeriba nei ga, bior napano kito nonovio rojua yetemeriba, a roju robiviuo tomu p̃ilip̃ili nalo na jibe nei bogo nonovio.
1CO 5:11 Maka notuko vio ka nina, napano roju robiviuo tomu p̃ilip̃ili nalo jibe nei ea kiado ieliano nalo, mia venia napano nojidom neveriio, nojidom never ka ver toro tai to napano river ka naio be namoneano riano tai, mia kuvialio napano ea kiano meuliano naio jo mila siakaiano, p̃eli jo be buruviti julaka, p̃eli jo milotu ka tavoru nalo, p̃eli jo mioluolu, p̃eli jo munu uei, p̃eli jo bina. Toro na jibe na naruei mia kuvila vite tai re leleio vija naio, kuvan re vaataro kanio, kuvisinan re vijaio.
1CO 5:12 Tibe na, ea tivelinio na nalo napano aju tavio ea taara na nalotuano, maka ve kiado ka rotibure kialo meuliano nalo, mia ea tivelinio na nalo napano aju joomo ea taara na nalotuano, monoka rovitii vatitiglo. Ver tealo aju amila kariano na kirivova jibe napano neberiio, monoka rotiburelo, a monoka rala vite tai kalo.
1CO 5:13 Atua ga mia tibure nalo napano maka atu joomo ea taara na nalotuano lu, mia ea tivelinio na toro na napano jo mila bajago va iviso kean kamiu, kamiu ga naruei monoka kuvukular naio rivano.
1CO 6:1 Kiniou nomijog bunu aber bogo tai, kuruado tai ea taara na nalotuano naio mila baravo bija dolu tai, naruei naio jumolu buru dolu napano na ban ea komeli na toru ka ail vanio. Kiniou nemial ka vite na maka rimemedu leleio, bior napano maka rivu ka tomu nalo napano amonea Atua ava asikil atua mirano tomu na tortoru nalo napano maka amonea Atua, ka tomu na tortoru nene atiburelo.
1CO 6:2 Bogo napano namoneano nalo be kialo baravo, bo ka namoneano dolu nalo ga ala vatitigio, bior napano monoka rosidomii ka kito namoneano nalo naruei napano mia rotibure tomu nalo na yetemeriba ea legiano na maaro. Ana ver kito na naruei napano mia rala im̃auano ve toru tibe nei, p̃eli mia kamiu kubare ka kuvila vatitig kenemiu baravoiano na tertelisu nalo ea kamiu bereio.
1CO 6:3 Mia Atua jii kito roju ka rotibure agelo nalo na tiniabene, ana bogo napano namoneano nalo dolu amil bior vite nalo na yetemeriba nei, jum̃abe? Kamiu kumial ka jikili laka, maka kuvijikia kuvila vatitigio?
1CO 6:4 Makanio, monoka kuvilaio na. Ver makanio, p̃eli kamiu kuber p̃eli bo kamiu namoneano nalo kubar kenemiu iliano nalo jua tomu dolu jum̃alo napano maka atu amei ea taara na nalotuano?
1CO 6:5 Kiniou nemil jikili kija jibe na bior napano nojidom nala kamiu kuvimou kija! Ee, nomiilo laka ka nemialio ka jibe napano maka lele kamiu tai napano be masou, napano mijikia rila vatitig kenemiu baravoiano nalo na.
1CO 6:6 P̃eli nina naruei mila kuruado tai ea taara na nalotuano jumolu buru dolu nene ban ea komeli, naruei jo berial kiano vovaiano nalo ea mirano tomu na tortoru nalo na komeli na, napano maka amonea Atua?
1CO 6:7 Kiniou nojo nemil ban kamiu jibe nei ea tivelinio na m̃arabo napano monoka kuvitakiio ka kuvila vatitig baravoiano nalo napano aju iviso kean kamiu, mia bo lie bunu ver maka bunu baravoiano nalo na tu. Baravoiano nalo na ju jibe na, berenio ka Sim̃aro jo jovulu kamiu ruei. P̃eli maka kuvijikia vo, ka ver kuruado tai mila bova banso, p̃eli bina ka kiamo titai, kotovonio re, kotuvan ga, bior kiano kariano na ga.
1CO 6:8 Ana ver kotumolu kojidom kovuru toro na ea komeli labo ka adu vironiano vanio, jau naruei jau bunu kojo komila bova bereio ban kuruamo.
1CO 6:9 Monoka kuvisidomii ka nalo napano kialo meuliano maka rimemedu, mia maka ajikia aial Atua kiano navenatuboiano riyotuba keanlo. Maka rivu ka kuvila von tibe na napano maka kuvijikia vite na kiana vo, bior kumijikia ruei ka Atua maka saaro leleio ka nalo napano aju amiel vuru ninio vio, p̃eli nalo napano amilotu ka atua sibisibi nalo, p̃eli nalo napano amila siakaiano, p̃eli nalo napano aju ap̃ilṽili ka mokotenalo, p̃eli sum̃ano napano ju bano bija sum̃ano bereio, p̃eli tira napano ju bano bija tira bereio
1CO 6:10 p̃eli nalo napano abina ga, p̃eli nalo napano maka atu atan ka vite rivan toro dolu, p̃eli nalo napano aju amunu uei, p̃eli nalo napano aju amioluolu, p̃eli nalo napano aju amim̃au kotkoti.
1CO 6:11 Riano ga, beamu na kamiu tealo ajibe na ruei, mia siva toru napano Niununo Lu jekon kamiu kumeravo, mila kube lu, a kiado Tubo Yesu Kristo mila kito romemedu vatitig bereio ea Atua mirano.
1CO 6:12 Kiniou neberial bajago va nalo na, napano maka rivu ka ralaio, mia tomu tealo maka asidom ajikiaio. Nalo aber jibe nei, aberinavo “Ee, kiaku meuliano nei, kiniou nemijikia nala venia napano kiniou nojidom nalaio.” Mia neverdop̃elo, never “Ee, p̃eli kiamo meuliano, mia kovitikario, bior vite telabo napano kojidom kalaio, nalo amijikia ala kiamo meuliano rivova laka. Mia vite telabo napano kojidom ka atua kiamo meuliano, kober mia komijikia kotelan vuu liliglo, mia maka leleio, mia koial napano vite nalo na naruei mia atelan vuu lilig kiamo meuliano bereio.”
1CO 6:13 Tealo bereio napano ajidom ka ala venia napano ajidom ea mokotenalo, aju aber iliano dolu tai, aber “Sinaniano, naio be tena maboku, a maboku, naio be tena sinaniano.” Ee, be riano, mia kuvitikar vatitig bereio, bior napano mia Atua rila tenalo juo nei riva rivakovio navo. Jibe na, Tubo jian mokotenado ban kito, ana kito monoka resian mokotenado rivan bereio van naio. Mokotenado tena rim̃auka kiano im̃auano, mia maka ve tena rivan tanea ninio vio.
1CO 6:14 Ver kito rojamo ka mokotenado rila im̃auano novo nalo ga, mia ea bogoti na maaro Atua mijikia vitirilar mokotenado bereio, jibe napano naio bitirilar Tubo Yesu mokotenano garuei, ea kiano burum̃ara moroano.
1CO 6:15 Kito monoka tiniedo maio kanio ka mokotenado nalo ajibe niati nalo na Kristo mokotenano. Ana jum̃abe, bo ka niati na Kristo mokotenano tai riva riasol vija tira tai na m̃arabo bereio? Maka rijikia tibe na leleio!
1CO 6:16 Iliano Lu berenio jibe nei, ber “Mia sum̃ano a tira, abe juo abinimei takurano,” ana sum̃ano napano ban bija tira na m̃arabo, mila napano mokotenano binimei takurano bija tira nei mokotenano.
1CO 6:17 Maka rivu ka toro tai rila tibe na, mia monoka roiasol kito vija Tubo, napano niunudo binimei takurano bija niununo.
1CO 6:18 Monoka rovitikar vatitig ka kariano va nalo napano tomu nalo amijikia ala vija mokotenalo, ea tivelinio na sum̃ano bija tira. Kariano dolu nalo napano ajum̃a amilaio, aju amila bova ban toro dolu mokotenano, ana toro napano mila kariano bija tira, jo mila bova ban mokotenano naio takurano bereio.
1CO 6:19 Kito tiniedo bobogia re, moko-tenado jibe yimo lu tai na volkouano napano bujolou ka Niununo Lu napano Atua midu ju joomo ea kito. Mia mokotenado na, maka ve kiado,
1CO 6:20 mia be Atua kiano, bior napano naio bulular kiado meuliano ruei ea Yesu kiano m̃ariano. Jibe na, monoka roim̃au vija mokotenado ka rala ga vite nalo napano atum̃a adular siano.
1CO 7:1 Bo ga, vonganei mia neverial jidomiano tealo ea nina napano kamiu kubika den kiniou ea tivelinio na soriano, ber bo ka rosoro, p̃eli bo ka rotu ga tibe na? Bo ga, mia never tibe nei. Verver toro tai jo jidom ka soro re, nina bo ga na, maka ve titai.
1CO 7:2 Mia bior napano romial ka juku-jukuano jikili, a siakiano telabo, p̃eli bo lie ver tomu nonovio nalo ave koalo nalo.
1CO 7:3 Jibe na, bogo napano sum̃ano jidom riva vaataro ka koano tira, koano tira monoka saaro kanio, a bogo napano tira jidom riva vaataro ka koano sum̃ano, koano sum̃ano monoka saaro kanio.
1CO 7:4 Tira napano joro maka jikia river mokotenano be kanano naio takurano, mia koano sum̃ano mijikia river be kiano bunu. Mia sum̃ano napano joro maka rijikia rivere mokotenano be kanano naio takurano, mia koano tira mijikia river be kiano bunu.
1CO 7:5 Jibe na, tai monoka tukovio re ka dolu rimei re vaataro kanio. Ee, p̃eli bogo tai ave juo averiio, ajamo ka mia atuvanlo, abe juo maka amon vio takurano ea bogo ve telisu, ka rila amijikia abolkouo sikili rivior vite tai beamu, a nina naio bo ga. Mia iorou, ave juo monoka asaaro ka amei vio takurano bereio, bior napano ver makanio, p̃eli Sim̃aro bitilubar napano tai melukluku, maka bunu rijikia rivokar naio, ana mila mijoru ea jukujukuano ea vio tai.
1CO 7:6 Vite nalo na napano nojo neberenio, maka never tibe tuboiano tai na jikili, ka tomu nalo monoka asoro, p̃eli monoka asoro re, mia nejian von jidomiano tealo ka ijaiano ga.
1CO 7:7 Ver tomu nonovio amijikia atu tibe kiniou, napano maka nosoro, nojo jibe na ga, p̃eli mia bo mia bo, mia nemijikia ka tena joa ga jidomiano napano Atua jian ban kito terakurano.
1CO 7:8 Nojidom never iliano tai van nalo napano aju ga jibe na, jibe nalo napano maka asoro vo, bija taanou nalo. Kiniou nemial jibe ver kamiu kumijikia kuvitu tibe na ga, jibe napano kiniou bunu nojo nomilaio, mia rivu mia rivu.
1CO 7:9 Ana ver tealo aialio aver makanio, mia sikili laka ka nalo ka avokarlo tulaka tibe na bogo nonovio, mia bo ga na, bo lie ka aleal tai napano amijikia asoro kanio. Maka rivu ka jukujukuano to serlo rivano-o atu ajog rivova tulaka.
1CO 7:10 Iliano dolu tai napano nojidom neverenio, naio rivan ea nalo napano ajoro ruei, napano maka kiaku jidomiano tai ga, mia iliano tai napano Tubo jian jibe iliano tai na jikili ban kito. Naio ber jibe nei, ber tira monoka rivuro den re koano sum̃ano.
1CO 7:11 A ver bogo tai tira tai juvan koano sum̃ano, jaluvo denio bereio, naio monoka rivan re soro bereio, mia monoka to ga tibe na. A ver p̃eli, bo ka naio vija koano sum̃ano ave juo ala merevuiano vanlo, atu vio takurano bereio. Mia sum̃ano nalo bunu, monoka ajil bulag re koalo tira nalo.
1CO 7:12 Bo ga, mia neverial vite dolu nalo tai. Nalo maka atibe ka Tubo kiano tuboiano tai, mia nalo ajibe kiaku jidomiano tealo ka rijai kamiu. Vite na beamu, nina ea tivelinio na napano toro tai bija tira tai, naljuo ajoro, ana toro neibano naio monea Yesu mia koano tira naio maka rimoneaio. Mia ver tira nei jaaro ga ka nalo ve juo atu vio takurano, maka rivu ka toro neibano sidomii ka rivukular koano tira nei.
1CO 7:13 Mia bare ka bunu ver toro tai bija tira tai, naljuo ajoro, ana tira neibano monea Yesu mia koano sum̃ano maka rimoneaio. Verver sum̃ano neibano jaaro ga ka nalo ve juo atu vio takurano, maka rivu ka tira neibano sidomii ka rivukular koano sum̃ano neibano.
1CO 7:14 Nina bior napano naljuo tai napano monea naio mijikia rila vite novo tai ea napano maka rimoneaio, a bajago novo nei mijikia rila kialo soriano ave juo rimei rivu laka tibe tomu juo kialo soriano napano nalo abe juo amoneaio. A bunu, naljuo tai kialo napano monea naio mijikia rila vite novo tai ea kenerilo abe juo, bior napano naio mijikia ridu vatitig kenerilo ave juo atu ea m̃arabo na meuliano lu, nalo ailuo joomo ea taara novo tai tibe kiritete dolu nalo napano karam̃alo bija kenielo nalo abe juo amonea.
1CO 7:15 Mia ea tivelinio na naljuo nei napano tai monmonea mia tinene maka monmonea, ver naio napano maka monmonea jidom tuvan koano napano monmonea, kito namoneano dolu nalo monoka rojamo ka tibe na ga. Ver napano maka monmonea maka bunu sidom napano monmonea, maka rojikia rola von ka royuku napano monmonea ka to vija koano neibano napano juvan naio, bior napano Atua jidom ka rotua meuliano tai napano bujo bija bajago na tum̃aro.
1CO 7:16 Jau tira napano komonmonea, p̃eli jau sum̃ano napano komonmonea, p̃eli kojidomii kober jau komijikia kotuvulu koamo napano maka monmonea, mia makanio, jau maka kojikia vatitig ka mia tum̃abe, bior p̃eli jau maka kojikia kotuvulu naio leleio.
1CO 7:17 Mia venia ga napano monoka rolaio, kito nonovio monoka rotii vatitig kiado meuliano veve terakurano to rivu ea vio na napano Tubo jii kito rojua eaio ruei, p̃eli monoka rotu roieliel ga ea m̃arabo napano Atua bio kito ka roiel eaio. Nina naruei be iliano tai napano nojo nojii ea kiado yimo lu nalo.
1CO 7:18 Iliano nei nioti nene ber vio vabe kojua beamu komonea, monoka kosaaro ka kotoa kea ga bogo napano komonmonea. Tibe na, verver tealo abe Ju, a aju ajakii kialo bajago moruo nalo, jibe pakuveu p̃eli venia bereio, naio bo ga, kiniou maka never ka bogo napano amonmonea nalo monoka ajulu bajago moruo nalo napano aju ajakiio. Mia be verare bunu ka nalo napano maka ave Ju, napano maka ala pakuveu a nalo aju ajakii kialo bajago moruo dolu nalo. Ea tivelinio na nalo bunu maka never ka bogo napano nalo amonmonea nalo monoka ajulu kialo bajago moruo nalo nei.
1CO 7:19 Toro jakii bajago moruo venia, jibe abe pakuveu p̃eli maka ave pakuveu, naio maka ve tena toru tai ea Atua kiano vitiiano, mia Atua jidom ga ka rotakii kiano tuboiano nalo.
1CO 7:20 Nina naruei neber ka bogo na jau komonmonea, jau kotorm̃aro ga ea vio nei napano kojoaio bogo na maka komonmonea vo.
1CO 7:21 Jibe, ver beamu jau kojo komim̃au kurano toro tai kiano, karina komonmonea, nina bogo na, monoka kosaaro ka koto koim̃au kurano tibe na ga. Mia be riano, ver bogo tai koleal ka be kiamo bogo ka kotaluvo den im̃auano kurano nei, nina bunu bo ka kobisi kanio.
1CO 7:22 Verver jau komim̃au kurano ea toro tai, monoka kosidomkar ka bogo napano Tubo bioso, naio miija larso jiiso vatitig joomo ea kiano m̃aratavo memedu. Mia ea tivelinio dolu nene, ver maka koim̃au kurano toro tai kiano, jau kojo vatitig jibe na ga, jau bunu monoka tiniemo maio ka bogo napano Kristo bioso, monoka komei tibe kiano toro tai na mim̃au kurano, kala nonovio kiano im̃auano.
1CO 7:23 Nina bior napano Kristo bulu bulag kito ka vite toru tai, jibe kiano burukija, ka kito rove kiano, ana monoka rovitilubario ka memedu ka roim̃au kiano kurano ga, maka rivu ka roim̃au kurano toro dolu kiano p̃eli roju yetano ka toro dolu kiano jidomiano napano romim̃au kiano.
1CO 7:24 Naina naruei bilbilu nalo, vio napano jau kojoa bogo napano maka kojikia Atua vo, vio na naruei mia monoka kotoaio kia ga, mia vonganei napano jau komonmonea naruei, mia Atua jo bogo nonovio bijaso bunu ea vio na.
1CO 7:25 Bo ga, kiniou nojidom nesian iliano ve telisu van kamiu ea tivelinio na nalo napano maka asoro vo. Iliano nene, maka nejikia never ka naio be Tubo kiano tuboiano tai napano naio ber ka kiniou, mia iliano nene jibe kiaku jidomiano tai ga. Mia kamiu kumijikia ruei ka Tubo mijukubo ban kiniou, jian masouano nalo ban kiniou napano kumijikia kubalea vatitigio eaio, mia bo ka kuvisidomii ve temi ea kiaku iliano nalo nei.
1CO 7:26 Vonganei, kito rojua bogo va tai napano roju robiniua laka vite kouo eaio, mia bo ka never bereio iliano nei napano kiniou nober beamu mave, nober bo ka kito rotu rim̃aro ga ea meuliano vaio napano rojuaio ruei.
1CO 7:27 Tibe na, ver jau toro tai napano kojoro ruei bija tira tai, jau koto rim̃aro tibe na, kosidomii re ka kotuvanio. Verver jau toro tai napano maka ve koamo vo, jau bunu koto rim̃aro tibe na ga, kosidomii re ka kosoro ka tai.
1CO 7:28 Mia verver kosidomiio kober makanio, kojidom m̃elea ka kosoro vija tira tai, maka nover bova, a verver tira m̃eaku tai soro vija toro tai, nina bunu maka tibe kiano kariano tai, nina bo ga na. Mia nalo napano ajidom ka asoro, nalo monoka avitilubar ka mia kialo meuliano maka melumu, mia nalo aviniua bogokouo ve telabo ea yetemeriba nei, a verver kotakii kiaku iliano, ka kosoro re, mia nasaaro laka.
1CO 7:29 Bilbilu nalo, kiniou neber jibe nei bior napano bogo bulati ga ju ka Tubo rimei bereio, mia maka tomu ve telabo ka ala kiano im̃auano. Tibe na, bo lie verver tomu nalo napano abe koalo nalo ala tibe maka asoro, mia nalo amijikia ala Tubo kiano im̃auano ve telabo.
1CO 7:30 A bunu, nalo napano aju ajegi bior vite tai, bo ka nalo tinielo bobogia vite nene napano nalo aju ajegio, a nalo napano aju amijog bo ea jogvuiano na yetemeriba, bo ka asidomiio re bunu. Nalo bunu napano aju amim̃au bior veru, bo ka nalo ala napano jum̃alo beteauo ga.
1CO 7:31 Nalo napano amila im̃auano dolu na yetemeriba nei, bo ka nalo ala tibe napano maka ve kialo vite nalo toaio, bior napano yetemeriba nei bija kiano vite nonovio nalo jo ban ka rivakovio garuei.
1CO 7:32 Kiniou neber iliano nalo nei ka kamiu bior napano nojo nojidomii laka ka kamiu, maka nosidom ka vite ve telabo napano kenemiu jidomiano jo jidom laka kanio bogo nonovio. Toro napano maka ve koano, naio mijikia sidomii ve temi ea Tubo kiano im̃auano bogo nonovio ga, ber mia naio rim̃auka tum̃abe napano mia Tubo risaaro kanio.
1CO 7:33 Mia toro napano be koano, naio jo jidomii ka vite nalo na yetemeriba, ka monoka rila tibe venia napano mia koano saaro kanio,
1CO 7:34 a mijikia rila ka kiano jidomiano beveve juo. Mia tira m̃eaku p̃eli tira kulovu napano maka ve koano, naio bunu kiano jidomiano mijikia sikili vatitig ka rila Tubo kiano im̃auano nalo, a kiano ieliano bija kiano meuliano mijikia ve lu vatitigio laka. Mia tira napano be koano, kiano jidomiano monoka toa im̃auano nalo na yetemeriba nei, tibe napano monoka rim̃auka vite nalo na rila koano rijogio rivu.
1CO 7:35 Kiaku iliano nalo nei, maka nosidom notuko vio ka kamiu ka vite ninio napano kamiu kumisidom kuvilaio, mia neber ka rila von ka rijai kenemiu meuliano. Nojidom ga ka vite nonovio na lotuano riva rivu, a nojidom ka kito namoneano nalo ravan re tanea vio, mia rovitii ga Tubo naio ve takurano.
1CO 7:36 Kito tealo amila napano amila ko koalo tai, mia nalo aber p̃eli bo ka nalo atu vesiou tibe na ga beamu, nalo maka asidomii ka asoro bior napano ajidom ala Tubo kiano im̃auano. Mia ver tai rial ka jo jidomii laka ka tira nei napano aberkoio be kiano, a jidom laka kanio banbano-o maka rijikia rivakar naio, nina bo kanio ga ka ala naljuo asoro. Nina bo ga na, naio maka ve kariano tai leleio.
1CO 7:37 Mia ver tai rila kiano jidomiano rivu napano jikili ka naio jidom ka naio vija tira neibano aberkoio ka naio, ka nalo ve juo atu tibe na ga beamu, a ver naio bitilubar ka naio mijikia vokar vatitig naio, nina naio mila bo laka ver naio maka soro vija koano nei.
1CO 7:38 Jibe na, naio napano joro von ka koano nei napano aberkoio ka naio, naio mila vite novo tai, mia nina napano jo jibe na, maka rila soriano vija tira nei napano aberkoio ka naio, naio mila bo lie mia bo laka.
1CO 7:39 Ea tivelinio na nalo napano ajoro ruei, nalo monoka atuvanlo re. Tira napano joro ruei monoka to rivu vija koano sum̃ano napano koano nene meul jo kia ga. Mia verver toro neibano rim̃aro, tira neibano mijikia soro bereio, a naio mijikia soro ka toro kei napano jidomio, mia monoka tai napano monmonea bunu Tubo.
1CO 7:40 Jibe napano neber, naio mijikia soro, mia nemial jibe mia bo lie ka naio p̃eli mia kiano saariano ve toru lie ver naio soro re bereio ga. Nina be kiaku jidomiano ga, mia neber p̃eli Atua kiano Niununo naruei jian jidomiano masosouano nalo nene ban kiniou, ana bo ka kamiu kuvisidomii vatitig kanio.
1CO 8:1 Vonganei kiniou nojidom neverdop̃e kenemiu vikadeniano ea tivelinio na sunbue nalo napano tomu nalo na maka amonmonea amila sida kanio ban kialo tavoru nalo. Kamiu kumitu kubika kuber bo ka kito namoneano nalo rosen sunbue nalo na, p̃eli na makanio. Bo ga, mia kiaku verdop̃eiano beriio tenalo juo nei, bajago na jikiaiano, a bajago na tinietiiano. Ea tivelinio na jikiaiano, tomu telabo napano aberenio aber amijikia vatitig verdop̃eiano na kenemiu vikadeniano nei, a nalo amijikia avarvar kalo kija napano ajidomii aber nalo amijikia vite. Bajago na jikiaiano mijikia rila toro ridu kiano jidomiano to mave, mia bajago na tinietiiano maka tibe na, naio jo miija vatitig toro kiano meuliano ga.
1CO 8:2 Toro napano jidomii laka ber naio bokar bajago novo na jikiaiano, naio maka rijikia vatitig Atua vo jibe napano naio bo ka rijikiaio.
1CO 8:3 A toro napano bokar vatitig bajago na tinietiiano, nina naruei napano Atua bitilubar vatitig naio.
1CO 8:4 Bo ga, nina naruei kiaku iliano juo bereio ea tivelinio na sunbue nalo napano amila sida kanio ban tavoru nalo. Nana be moti ber jibe nei, ber kito romijikia vatitig ka tavoru nalo na abe toto ga, ana maka ave toto ka vite na be riano tai leleio. A juo nene jibe nei, ber kiado Atua naio takurano ga be riano ju.
1CO 8:5 Tomu nalo aju aberii kialo atua dolu nalo p̃eli kialo tubo dolu nalo, aberinavo ajua tiniabene p̃eli ea yetemeriba nei, a nalo aju aberiilo jibe nalo miroano aju,
1CO 8:6 mia ea kito, romijikia vatitig ka Atua takurano ga jo. Nina naruei Atua karam̃ado, napano naio be burupati ka vite nonovio, napano kito robe kiano. A Tubo takurano ga ju, nina naruei Yesu Kristo, napano naio jii vite nonovio, napano kito romeul eaio.
1CO 8:7 Nina naruei jikiaiano novo napano kito miroano namoneano nalo robokario ruei, mia titai bova, kito tealo maka ajikia vatitig vite nalo nei vo. Nalo nene, beamu laka nalo bunu aju amilotu ka tavoru nalo, ana binimei bokar banei, jikili kanilo ka avitilubar ka nina be vite na sibiano ga. Jibe na, bogo napano tomu nalo aborosebi bija sunbue nalo napano amila ruei sida kanio ka tavoru nalo, kito romijikia rosenio tibe napano maka ve titai ga, mia kito dolu nalo neibano, bogo na asenio, ajenio bija jidomiano ka sunbue nei be tena tavoru nalo, ana kar niabelo p̃ili kanio bereio, amijog jibe amila vite tai napano maka rimemedu ea Atua mirano.
1CO 8:8 Mia monoka rojikia ka sinaniano maka ve vite tai napano mijikia rila Atua rial ka robo p̃eli robova. Ver rosen re sunbue na, maka river ka robo ea kiano vitiiano, p̃eli ver rosenio, maka river ka robova.
1CO 8:9 Joa ga kito ka rojidom rosenio p̃elina maka rosidom rosenio, mia maka rivu rala vite tai napano namoneano dolu asidomii aver maka rimemedu ka alaio. P̃eli kito romijikia rala vite na rivu ga, mia maka rivu ka naio rialio napano romilaio, ana rila bulag kiano jidomiano.
1CO 8:10 Jibe tivelinio na sunbue nalo neibano, p̃eli ea kiamo jidomiano, komialio ka bo ga ka asenio, ana jau komijikia kala tibe maka ve titai. Mia ver bogo tai koto vija tomu nalo napano abolkouo ka tavoru nalo, a nalo asian sunbue vanso a jau kosenio vijalo, mia tum̃abe ver namoneano dolu tai rialso. P̃eli naio tai napano berkar ka naio bel ka sunbue nalo nene, mia bogo napano mialso ka kojo kejenio, mia naio riverenio “E, toro na be taara na nalotuano nalo tai napano mijikia vatitig vite, mia naio jo jen sunbue nalo na ga. Tibe na, bo ka kiniou bunu nosenio.” Mia ber jibe na, mila naio bunu jenio mia iorou mia mijikia rijog rivova laka bior napano ber p̃eli naio mila burum̃ara kariano tai.
1CO 8:11 Nina berenio ka jau kojo kojakii kiamo jikiaiano novo, kobitilubario ka komijikia kala vite na. Mia monoka tiniemo maio ka toro dolu na, napano naio be kuruamo tai napano Kristo m̃aro ka rilarur kiano meuliano, bior naio merou laka ka rilaio. Tibe na, ver naio rial napano bogo tai komilaio, mia mijikia rila ka napano komila bulag kiano viekouoiano novo.
1CO 8:12 Ver tibe na, mia Atua rialso tibe jau naruei komila kariano ea kuruamo nene, bior napano komila naio mila vite tai napano ea kiano jidomiano kirivova ka rilaio. Nina naio bova, jibe ka napano jau komila kariano ea ga Kristo.
1CO 8:13 Bior vite nei, nomila kiaku ji-domiano tai, ka ver kiaku bajago ka nosen sunbue nene naio be titai napano mila bulag kuruaku kiano viekouoiano, mia notuvanio ga. Mia notokolio re bunu, bior napano maka nosidom ka mia nola kuruaku rijoru.
1CO 9:1 Bilbilu nalo, nojidom never ka kamiu ka kiniou maka noto yetano ka toro dolu kiano jidomiano, mia nojo nomim̃au jakii venia napano nemijikia ka memedu ka nalaio. Kiniou atevi tai napano nomial Yesu Kristo kiado Tubo ka miraku, a kamiu naruei ajibe m̃arati na kiano im̃auano napano nomilaio.
1CO 9:2 Nemijikia ka tomu tealo maka asidom avitilubar kiniou ka nebe atevi tai, mia kamiu maka kuvitibe na. Vonganei, kenemiu meuliano ju vatitig bija Tubo ruei, mia vite na mila kamiu kubitilubar ka nomim̃au ea kamiu jibe kiano atevi riano tai.
1CO 9:3 Mia ea nalo napano ajidom atibure kiniou ka nemila bova jibe na jibe na, kiaku verdop̃eiano nalo aju.
1CO 9:4 Nemijikia ka nalo aberenio ka aju abitikar kumemi bano-o tinielo m̃aro, mia jum̃abe? Nalo abitikar nalo dolu ruei nua na, ana maka ail tibe na, ana bogo na napano nebinimei, ajikar ka amildie. P̃eli aber mia ver kumemi nuvidu re sinaniano p̃eli munuiano mia numijikia numeul tibe na ga ka nuvila im̃auano ea nalo?
1CO 9:5 Mia nalo amil ea kumemi tealo napano ajoro ruei, nalo abika aber bior vaio koalo nalo bunu abinimei aju ajakisor kumemi? Mia kei berenio ka nina naio kirivova? Atevi nalo dolu napano abinimei beamu, bija Tubo kuruano nalo, bija Kevas, bogo napano amieliel ka im̃auano jibe na, koalo tire nalo aju ajakigsorlo, mia ea bogo na, tomu nalo nei maka aildielo.
1CO 9:6 Mia bereio, nalo ajidom atuko vio ka kumemi ka monoka nuvim̃au re rivior veru ka nuvulu kenememi vite nalo. Ver kumemi juo Barnabas nuvim̃au re mia bo ga, mia bior vaio na aju aber jibe nei ban kumemi juo ga, mia maka aver ka nalo dolu?
1CO 9:7 Kuvila von kuvisidomii tomu na mira nalo na venuo tai. Bogo na aba amila mira, mia kei jo bulu kialo vite nalo? Nalo ga abuluio, p̃eli kialo parinio venuo naio bululo? Mia kuvila von kuvisidomii nalo napano amebija sinaniano ea tiniavio. Verver nalo asinan ea tiniavio nene, maka toro tai napano mia ril vanlo riviorio. A bunu, jum̃abe ka toro napano jo bagan temeul nalo? P̃eli naio maka leleio sen sunbue nene nalo?
1CO 9:8 Kiniou neber vite nalo na ka rila kamiu kuvitilubario ka toro tai rila im̃auano tai, bo kanio nalo napano mim̃au kialo nalo monoka avitikar vatitig naio. Mia kiniou neber jibe nei, maka riyotuba ea kiniou kulorinio kiaku jidomiano, mia kiado tuboiano lu naio jo berenio jibe na bunu.
1CO 9:9 Iliano tai ju joomo ea Mosis kiano tuboiano ruei, napano ber jibe nei, berinavo Bogo napano kiamo bue m̃arauo jo miel jeliviv mave ea kiamo boboseru nalo, ka vita bulag kurukuti nalo nene, jau monoka koiadikar re niono, mia monoka kotuvan naio sinano kija riel rivano. Ana bogo napano Atua ber iliano nei, naio maka to tinien maio ka temeul nalo,
1CO 9:10 mia naio jidomii kito napano romim̃au, ka nalo napano romim̃au kialo, nalo monoka avitikar vatitig kito. Toro napano mim̃au ea tano, memedu ka naio sidomii ka bogo tai mia naio sen venia napano jo mebijaio, a toro napano ban ea tiniavio ka rivar sinaniano rimei, memedu ka naio bunu sidomii ka mia ajev ve telisu rivanio.
1CO 9:11 Mia tivelinio na kenememi im̃auano ea kamiu, kumemi numebija kurukuti novo ruei ea kenemiu meuliano, mia bo ka kamiu kuvisaaro ka kuvitikar kumemi a kuvitanka vija kumemi ilivuiano nalo tealo napano Atua bario jua jumemiu.
1CO 9:12 Kamiu kumitu kumiija tomu dolu nalo ruei jibe na, mia bo ka kuvisaaro lie ka kuvila ea kumemi napano numila bo laka ka kamiu nua ruei. Ee, bo ka kuvila tibe na ka kumemi, mia bokario vonganei maka nuvitu nuver leleio van kamiu nuver monoka kuvilaio. Kumemi numerou ka ver nuverialio tibe na, mia kenemiu jidomiano rivova kean kumemi, mia ver p̃eli tukovio ka m̃arabo na Ioluano Vou rimei ea kamiu. Tibe na, kumemi nuvil re bunu, a ver numijog bova ka kamiu maka kuvitikar kumemi, nina bo ga na.
1CO 9:13 Mia bo ka kamiu kuvisidomii bunu ka ea Atua Kunuano Lu, nalo napano amim̃au joomo eaio, bija nasidaiano nalo, aju ajen tenalo nei, a aju ameul ea vite nalo napano tomu nalo aju ajianio jibe jidomiano nalo ban Atua.
1CO 9:14 Mia Tubo berial jibe na ga bunu ea tivelinio na kiano tomu nalo napano aju amioliolu ka Ioluano Vou. Nalo bunu, memedu ka amijikia ameul ea jidomiano nalo napano tomu nalo neibano amijog Ioluano Vou nene aju ajianio.
1CO 9:15 Bo ga, kiniou naruei kiniou tai kalo na jibe na, mia jikar nua binimei maka leleio never ka tomu nalo monoka asian venia rivan kiniou, p̃eli monoka ala tum̃abe ka kiniou. Mia nojo neberii vite nalo nei ea m̃esi nei, maka rivior ka nojidom novika vite tealo den kamiu. Maka nosidom ka kuvitikar von ka kuvisian vite nalo van kiniou, mia kamiu kube m̃arou kuber kamiu naruei kubagan kiniou, mia nojidom ka nomijikia noto nove m̃arou ka Atua ga jo bitikar kiniou bogo nonovio. Bogo napano nemijikia ka kiaku meuliano joa jum̃ano ga, nojo nomijog bo laka, a verenio naio re napano jo bitikar kiniou, p̃eli mia nojog ka bo ka ga nam̃aro.
1CO 9:16 Neber ka nebe m̃arou ka napano naio bitikar kiniou jibe na bogo napano nojo nomioliolu ka kiano Ioluano Vou, mia ea tivelinio na kiniou, be riano ga na ka maka vite tai leleio napano nemijikia neve m̃arou kanio. Maka nejikia nosidomii vevavin ea siaku bereio never kiniou naruei nebe naiolioluano na Ioluano Vou, bior napano Atua naruei bitirilar kiniou, mia nemial jibe monoka nala ga. Ver bogo tai novuro nala re bunu, mia rivova laka rivan kiniou na.
1CO 9:17 Maka noto nala im̃auano na rivior kiaku jidomiano tai ga, maka kiniou ga neber bo ka nala ka Atua saaro ka kinion, p̃eli naio rijikia sian jidomiano van kiniou riviorio. Maka tibe na, mia Atua ga naio berialio, midu joa jum̃aku, mia monoka nomonea, monoka nala tibe na ga.
1CO 9:18 A jibe na, neber p̃eli mia kiniou nodu re jidomiano tai riviorio, mia nina bo ga, bior ka Atua jo mila todolu tai napano jibe vuluiano novo tai ban kiniou ruei. Vite na, naio be burum̃ara jogvuiano na nabar bogo napano nojo nomioliolu ka Ioluano Vou ban ea tomu nalo, napano nomila kurano ga jibe na banlo. P̃eli nemijikia never bo ka ajian vite ban kiniou bior, p̃eli avitikar vatitig kiniou bogo napano nojo nomilaio, mia maka nosidom nina, nojidom napano amijikia avokario tibe na ga, maka ve titai leleio napano tukovio kalo.
1CO 9:19 Jidomiano jibe nei naruei joa kiniou, a mila nojo nomim̃au ea bajago tai napano mia nevisivisi vatitigio van kamiu vonganei. Jibe nei, maka noim̃au toro tai kiano, a maka toro tai napano ve kiaku boru, mia nojo namila kiniou nebinimei jibe nakuraniano ga na kulo dolu kialo, ka rila nemijikia novokar nalo ve telabo amei amonea.
1CO 9:20 Ea tivelinio na Ju nalo, nojo namila kiniou nebinimei jibe toro Ju novo tai, ka rila na nemijikia novuru nalo tealo amei. Ea tivelinio na nalo napano maka ave Ju, mia ajakii Mosis kiano tuboiano, nojo nomila kiniou nebinimei jibe tai napano jakii tuboiano nei bunu. Maka neial ka noto yetano ka tuboiano nene, mia najaaro ka nabamenea tuboiano nene jibe na, ka nomijikia novokar nalo na napano ajidom atu yetano kanio.
1CO 9:21 Ea tivelinio na nalo dolu napano maka ave Ju, napano maka atakii Mosis kiano tuboiano, nojo nomila kiniou nebe takurano bijalo. Maka never ka nomila kor Atua kiano tuboiano moruo, makanio, mia bogo napano nojo bijalo, nojo najakii Kristo kiano tuboiano vou ka rila ajikia aleal meuliano.
1CO 9:22 Ea tivelinio na nalo napano nemialo ka maka atu sikili rivu, maka neil sikili vanlo, mia nomila jibe kiniou bunu bijalo, nojo nemiijalo, ka p̃eli nemijikia novurulo. Jibe na, nojo najakii m̃arabo nonovio ka nala vite nonovio napano nemijikia nala van tomu nonovio, ka rila rivano-o mia nemijikia nalarur nalo tealo amei amonea Yesu.
1CO 9:23 Nemila jibe na, maka nala rivior kiniou ga, p̃eli rivior vite dolu ninio, mia nomila bior ga nojidom ka Ioluano Vou monoka rivar m̃arati ea tomu nalo kialo meuliano, a bogo napano neial ilivuiano nalo napano Ioluano Vou rila kalo, nojog rivu mia nojog rivu.
1CO 9:24 Kuvisidomii von bogo napano tomu na tikitiano aju ajikiti bijalo. Ea bogo na, nalo nonovio monoka ala von ka atuvanono ka atikiti avano, mia ve vio kalo amijikia amei atukamu beamu, atuvulu nalo dolu? Ve takurano ga mijikia rivuku nalo dolu, tikiti riva tuvululo rijev jidomiano riviorio. Mia tibe na, kamiu nonovio monoka kuvisikili ka Tubo kiano im̃auano, monoka kuvila von ka kuvitikiti kuvan ka kuva kuvijev kenemiu jidomiano.
1CO 9:25 Tomu na sereiano aju amila von kirisikili, aju amilakakar vatitigio bogo nonovio, a nalo aju abel ka vite nonovio napano p̃eli amijikia ala mokotenalo sikili re vatitig. Nalo aju amila jibe na bior kialo jidomiano jikili ka ajidom atuvulu ka ajev jidomiano. Mia bogo na ajilan maniegieg ea tomu na sereiano nalo nei, bogo bulati ga maniegieg neibano bova bereio, mia maniegieg napano bo ka rola vonio roim̃au sikili ka atilanio ea kito, naio naruei jo jobo jo.
1CO 9:26 Jibe na ga, nojo nomim̃au jibe na naruei ea Tubo kiano im̃auano napano nojo nomilaio. Maka noto netikiti kurano tanea vio, a maka noto nesere ga,
1CO 9:27 mia nojo nobokar kiniou, nojo nojilanvuu vatitig ka mokotenaku bogo nonovio, bior napano bova nojo nomioliolu vatitig ban tomu dolu nalo, neber nalo jibe nei jibe nei, mia iorou kiniou naruei nolaluvu m̃arabo p̃eli maka navare ka nala nonovio vatitig tikitiano napano nojo nejikitiio.
1CO 10:1 Bilbilu nalo, bo ka kito tiniedo maio ka venia napano korobido nalo amilaio. Nina ea bogo napano tormoruo Mosis burulo ajaluvo den Ijivi, ajakisor melijo na napano jo ban beamu kalo, banbano burulo abarkor burum̃ara tei nei napano betavo kalo.
1CO 10:2 Nalo abiniua bogokouo nalo nene, mia Mosis burulo abar duluio, a nalo abinimei jibe kiano tomu riano.
1CO 10:3 Yuka miroano aju amiel ea vio yauo, nalo nonovio ajen sinaniano na napano Atua jian banlo,
1CO 10:4 a bogo midoujerlo, Atua mila uei miyotuba ea bulukuveru ga, ka amunuio. Ea bogo na, jibe napano Kristo ga jo bijalo, jo bitikar vatitiglo ea vite nonovio.
1CO 10:5 Atua mila bo banlo jibe na banbano, mia maka asidom atu sikili ea naio. Nalo abilig taakalo kanio, naruei naio maka bunu rijamo kalo ava joomo ea vio napano naio berkario banlo, naruei mila am̃arm̃aro garuei janea vio ea vio yauo ga.
1CO 10:6 Mia kito banei, maka rivu ka parido sikili tibe korobido nalo nei, mia ver rosidomii vatitig rivu ka venia na maluvo ealo, romijikia rolakakar vatitig vite eaio.
1CO 10:7 Tibe na, monoka rodu re vite dolu to tukamu ka Atua ea kiado meuliano, jibe tavoru tai napano romilotu kanio, jibe napano korobido nalo nei amilaio. Iliano tai napano berii kialo bajago ea bogo na, berinavo Nalo maka asidomii vite dolu, ajidom ga ala jokoluolu, bija munuiano na torogiano, a asiraragii tira ea voluano, nina ga.
1CO 10:8 Nalo aber ka naina naruei meuliano novo, mia monoka tiniedo bobogia re bogoti nene napano Atua mila maro va nalo abinimei ajer tomu nalo a tire nalo napano amila siakaiano, mia ea bogoti tai ga menu duelimo valuo ba tolu [23,000] kalo am̃arm̃aro vaarakurano, jibe kialo vironiano na jikili tai. Jibe na kito monoka rovitikar vatitigio, maka rivu ka kito tealo atu avan tanea vio tibe na.
1CO 10:9 Toro na be m̃arou, mila kariano jibe na, a beriam̃a bo ga na, naio jo julu m̃elea Tubo. Mia Tubo rila vite tai kanio, mia toro na ritabujo, maro rimei kanio jibe nalo dolu neibano.
1CO 10:10 Mia maka rivu ka roserm̃ii ka Atua, jibe napano aju amilaio nua, ea korobido nalo kialo bogo. Ea bogo na, Atua miila nailiano tai na verikariano na m̃ariano binimei ealo, muebinivinlo.
1CO 10:11 Romial napano aju amila kariano jibe na, a romial ka vironiano nalo amalmaluvo ealo jibe na, naio be vite tai na rilabon kito. Abivitauia bulag tukunuano nene nua beamu, mia romijikia ralakakar vite eaio banei, ea bogo maaro nalo napano rojuaio.
1CO 10:12 Jibe na, ver toro tai jo jidom veve naio ve takurano kiano meuliano bereio, a beriam̃a naio jo jikili ju kirisikili vatitig ruei, bo ka naio vitikar vatitigio, bior maka rivu ka bogo tai naio rila vite va tai, ana rijoru.
1CO 10:13 Kumial jukujukuano nalo binimei, mia kumemebiju re laka. Maka kamiu ga napano kubiniua jukujukuano nalo nei, mia aju amaluvo ea tomu nonovio kialo meuliano. Mia kumijikia kuvalea Atua, bior napano mia naio maka rilaso ka koviniua jukujukuano napano maka kovare ka kotuvuluio, mia bogo napano jukujukuano rimei rila vonso, mia naio riverial kiano m̃arabo tai kaso ka kosikili koviniua jukujukuano nalo na, rivano-o kotaluvo den kiano moroano.
1CO 10:14 Kiaku bilbilu novo nalo, monoka kuvan re vaataro leleio ea bajago na napano tomu nalo aju amilotu ka tavoru sibisibi nalo.
1CO 10:15 Nemijikia ka kube tomu nalo napano kumijikia vite, mia bogo napano nomil kirimemedu ban kamiu jibe nei, nomonea ka kumijikia kuvitii vatitig venia napano nojo neberenio.
1CO 10:16 Neber iliano nei bior napano bogo na komiasolso bija tomu nalo napano aju amilotu ka tavoru tai, jibe ka napano jau bunu kojo komilotu kanio ruei. Nina be verare ga ka tivelinio na kito napano romonea Kristo. Ea bogo na sinaniano lu, robolkouo ka munuiano lu, romidu, a nina jibe ka roberialio ka romiasol bagaro na tomu nalo napano kiano burukija miou karlo. A iorou, rovurekokorov joko lu, romidu, a nina jibe ka napano robija nalo napano amila bulag mokotenano napano jaklele mave ea m̃akolkolo.
1CO 10:17 Nina be riano ka kito nonovio napano roju robinimei vio takurano ea sinaniano lu nei, bior ka robinimei jibe bajago takurano, a rojen ga joko takurano nei.
1CO 10:18 A jibe na bunu ea kulo Israel, bogo napano amue kialo sida nalo. Tealo maka ala sida, mia ajaaro ka asen sunbue na sida nalo nei napano nalo dolu amilaio, naruei mila jibe na napano abe bagaro takurano ga amila lotuano jibe na ban Atua.
1CO 10:19 Bo ga, iliano nalo na berenio venia? Nojo neberii tavoru nalo bija sida nalo nei, mia maka neverenio ea kiaku jidomiano ka vite nalo nei abe riano, p̃eli abo.
1CO 10:20 Maka tibe na leleio, mia bo ka nala meravo van kamiu ka nalo napano aju amila lotuano kinkin nalo jibe na, maka amonea Kristo, a sida nalo napano aju amilaio, maka atu ala van Atua napano be riano, mia aju amila ban ea sim̃aro nalo ga. Tibe na, maka rivu ka kuva vaataro kalo napano aju amilaio, bior napano maka nosidom ka kuviasol vija sim̃aro nalo.
1CO 10:21 Jau napano kojo kojotano ea Tubo kiano barobaro lu, kojo komunu ea kiano baja lu, a kojinan ea kiano sinaniano lu, maka kojikia kova kototano ea sim̃aro nalo kialo barobaro ka kodu kialo munuiano a sinaniano.
1CO 10:22 Toro napano naio mila jibe na jo julu Tubo, mijikia rila Tubo rijokua laka, tinien ser naio. P̃eli na toro nene beriam̃a ber ver Tubo tinien jer naio jibe na, maka ve vite tai na, bior ka naio kirisikili lie loa Tubo? Maka nesidom ver tibe na.
1CO 10:23 Iliano tai jo, napano tomu miroano aju aberenio, aber toro mijikia rila venia ga napano naio jidomio. P̃eli iliano na be riano, mia vite nalo tai ju ka nemijikia nalaio, mia maka nosidom ga nalaio, bior ka kiaku vitiiano, nalo maka atu aija kiniou ka kiaku meuliano, a maka atu aija tomu nalo kialo meuliano nalo napano aju vaataro kean kiniou.
1CO 10:24 Neber jibe nei bior napano maka rivu ka toro to sidomii naio ve taku-rano ga, mia naio monoka sidomii bunu tomu nalo napano naio jo vaataro keanlo.
1CO 10:25 Bo ga, vonganei mia neber tenalo tai ea tivelinio na sunbue na temeul nalo napano amila sida ruei kanio ka kialo tavoru sibisibi. Verver avar sunbue nene amei, avar tu vija sunbue dolu nalo ka aṽilṽili kanio, romijikia rovulu ka resenio nina bo ga. Nina bior napano maka rotu rovitilubar ka sunbue nalo nei ajum̃abe, nuber sunbue vabe na amila sida kanio, p̃eli sunbue vabe na maka ala sida kanio, mia rosidomio m̃elea re, rovika re vikadeniano, rovulu ga.
1CO 10:26 Rodu, rosenio, bior nina jibe ka iliano tai napano ber jibe nei, berinavo yetemeriba nei, bija vite nonovio napano ajuaio, abe kei kiano? Abe kiado Tubo kiano ga.
1CO 10:27 A ver toro tai napano maka rimonea rivioso ka kova kosinan ea kunuano, p̃eli komerou ka kovano, kojo kober p̃eli avar sinaniano tai vanso napano amila ruei lotuano kanio ban kialo tavoru nalo. Mia makanio, ver koto kosidomii ka kovano, kavano ga, a koto kovivika re vikadeniano tibe na, kodu ga venia napano ajianio banso.
1CO 10:28 Mia, vite tai ga, ver jau kova koto yako ruei, a namoneano dolu tai to, naruei p̃eli naio riverialio vanso tibe na, river, Kuruaku, sunbue na, kito juo monoka rovel kanio, bior napano nomijikia ka amila ruei sida kanio ban kialo tavoru nalo. Ver naio river tibe na vanso, naina naruei mia jau bunu kosenio re.
1CO 10:29 Ee, ea tivelinio na kiamo jido-miano, kojaaro ka kosen ga, mia ea tivelinio na kuruamo dolu nei napano ber vite na kaso, bova ka naio, naruei bo ka kotokol re bunu, bior verenio makanio, mia jau kola vite tai napano kiano jidomiano maka rimemedu kanio leleio. Mia ver jau ga takurano, a maka toro tai riverial vite tai vanso tibe na, jau komijikia ka kola venia napano komijikia ka memedu kaso ka kolaio. Naina naruei kiaku jidomiano jibe na ka vio na. Kiniou neber p̃eli maka rimemedu ka toro dolu kiano jidomiano ga jo miyuku kiniou ka monoka nala nina p̃eli nala re ninei.
1CO 10:30 Ver sinaniano kinkin vaio, mia nemialio ka ver beamu, nobolkouo kanio, mia nemijikia nosenio rivu ga. Maka rivu ka toro dolu tinien seri kiniou ka nojo nejen sunbue tai napano neber siva ban Atua bior ruei.
1CO 10:31 Bo ga, nina berenio jibe nei, ber verver kito rosen titai, p̃eli romunu titai, p̃eli vaio bereio napano romijikia ralaio, mia monoka ralaio nonovio ea bajago tai na ridular Atua siano.
1CO 10:32 Kirivova ver kamiu kuvila titai napano mia rila bulag kulo Ju nalo kialo jidomiano, p̃eli kulo Kris nalo, p̃eli kiado namoneano dolu nalo,
1CO 10:33 mia bo ka kuvila von ka kuvila tibe na kiniou nojo nemilaio kalo. Ea vite nonovio napano nojo nemilaio, maka nala von ka nala ka rivu van kiniou, mia namila von ka nala rivu vanlo, ka rila ka p̃eli nalo tealo amijikia avokar ioruriano.
1CO 11:1 Ee, bilbilu nalo, jibe ka napano kiniou nojo nomila von ka neiel noue Kristo jaano, bo ka kamiu kuvila von kija ka kuviel kuvue jaaku.
1CO 11:2 Bilbilu nalo, nomijog ka kumitu kumisidomii kia ga im̃auano nalo napano nomim̃auka ban kamiu, a kumitu kubakar batitig bajago nalo na im̃auano nei napano neberloglog ka kamiu.
1CO 11:3 Mia ea vite nalo nei, nalo tai jo keano napano nojidom ka kamiu monoka kuvijikia vatitigio, napano berii toro bija tira, napano naljuo kialo im̃auano maka rive verare. Jibe ka napano Atua karam̃ado naio be parinio ka Kristo, a Kristo naio be parinio ka toro, naruei sum̃ano be parinio ka koano tira.
1CO 11:4 Mia jakii kiado bajago, ver toro tai rivolkouo, p̃eli ril ea mirano namoneano nalo, naio monoka riya re batubatu joa parinio. Verver riyaio, romial naio jibe vovu tai napano maka rijikia rila bajago na vameneano.
1CO 11:5 Mia ea tire nalo naio be dolu. Verver tira tai bolkouo, p̃eli ril ea namoneano nalo miralo, romialio rober bo naio jovuko parinio ka batubatu p̃eli kulum̃arauo tai tibe na. Verver sovoko re vatitig parinio tibe na, naio bunu mila bova, romial naio be verare ga ver ve boromo ga, to sikili tu ea mirano tomu nalo.
1CO 11:6 Ver tira tai parinio sikili, maka sidom sovoko parinio tibe na, bo ka kamiu kuver kanio ka tap̃ig kon parinio ga tukamu, ana karina mijikia sikili tu ka rivolkouo joomo ea lotuano. Ana mia naio monoka rimou laka ka rila tibe na, bior maka rivu ka tira rivuron vijinio ve bulavulati laka, p̃eli tap̃ig vijinio ve boromo. A verenio ve vite na imouiano ka tira jibe na, bo ka tire nalo asaaro ka avokar kiado bajago na vameneano, nalo monoka asovoko parilo tibe na, bogo na abinimei ka avolkouo ea lotuano.
1CO 11:7 Mia ka venia tomu nalo maka asovoko parilo? Nina bior Atua jo mave, a naio be boru ruei, mia mila sum̃ano jibe nei, bitirilar sum̃ano mila naio loa ka tira. Jibe na naruei sum̃ano monoka re rilavan parinio, mia tira monoka sovoko parinio.
1CO 11:8 Romijikia ka sum̃ano monoka to mave tibe na, bior napano Atua jii sum̃ano beamu, karina jii tira den merikono tai na mokotenano sum̃ano, mia maka tii sum̃ano den tira,
1CO 11:9 a naio jii tira ka rijai sum̃ano, maka tii sum̃ano ka mia rijai tira.
1CO 11:10 Tibe na, tira monoka sovoko parinio, ka verialio ka naio bamenea koano. Mia bogo na naio mila jibe na, nailiano nalo na tiniabene amialio, a mila abitilubario ka jibe ka tira jaaro ka vatove ka koano, mia nalo bunu monoka asaaro ka avatove ka kialo toro na toru, napano Atua.
1CO 11:11 Ierinio napano tira monoka rivatove ka sum̃ano tibe na, mia nina maka riverenio ka naljuo maka ave verare. Kito napano roju joomo ea bagaro na Tubo, romijikia ruei ka tira maka rijikia to naio ve takurano, a sum̃ano maka rijikia to naio ve takurano, mia naljuo monoka atu aim̃au vei ka aijajalo ve verare ga.
1CO 11:12 Beamu laka, ea tiiano, tira moti moluo ea sum̃ano mokotenano, mia iorou ka naina, tomu nonovio aju amolmoluo ea tira mokotenano bokar banei, mia romijikia ka burupati riano nene, napano vite nonovio malmaluvo eaio, naio be Atua ga.
1CO 11:13 P̃eli tealo maka asaaro ka kiaku iliano, napano neber bo ka tira napano bolkouo monoka sovoko parinio, mia kamiu kuvila von ka kuvisidomii vatitig kanio. Ea kenemiu vitiiano, kubitii ka tira napano maka sovoko parinio, memedu ka naio tumolu rivolkouo van Atua? Maka leleio, ea kiado bajago maka lele rimemedu.
1CO 11:14 Ea kiado meuliano na yetemeriba nei, meravo vatitigio ka kito ruei, ber bogo napano sum̃ano juvan vijinio terebievi laka, maka rivu laka ka naio.
1CO 11:15 Mia bogo napano tira juvan vijinio terebievi kirinovo, bo laka ka naio, a vijinio na terebievi nei, Atua jian ban naio jibe ka vite tai ka riovovua vu mokotenano.
1CO 11:16 Mia jibe napano neberenio, na-moneano tealo aju amil laka, maka asaaro ka jidomiano nene napano ber ka tira napano jidom rivolkouo monoka sovoko parinio. Bo ga, kiaku iliano jibe na, ber kumemi naverloglogiano nalo, nuberloglog jibe nei ga, maka nuvisaaro ka bajago dolu, a Atua kiano bagaro na lotuano p̃ilip̃ili dolu nalo, nalo bunu aberenio jibe na.
1CO 11:17 Vite tai bereio jo kia napano nojidom never jidomiano tealo ka van kamiu. A maka rivu ga, bior napano maka ve vite tai napano nemijikia nodular kamiu riviorio, mia be vite tai napano monoka noil van kamiu riviorio. Nina ea tivelinio na bogo na lotuano, napano bo ka tibe na vite tai napano rijai kenemiu meuliano, mia kumila tibe na binimei be burupati jaleleano tai bereio.
1CO 11:18 Neber jibe na bior napano nomijog ruei aber bogo napano kamiu namoneano nalo kuburon vio takurano, maka kuve takurano, mia vuruburevureiano jo binimei judu iviso kean kamiu. Ver iliano nalo nei be sibiano, bo, mia makanio, nemialio jibe monoka be riano ga.
1CO 11:19 Mia maka nejikia ka vaio kumisidom kuvila tibe na? P̃eli tai jidom tovulu tai, tai jidom tovulu tai tibe na? P̃eli kojidom kotuvuluio, ka mia tomu nalo aver jau naruei kobe riano, p̃eli jau naruei Atua jo bijaso?
1CO 11:20 Mia ea tivelinio na sinaniano lu, nomijog aberenio nina bunu kumitu kumila bova. Bogo napano kuburon vio takurano ka kuvila sinaniano lu nei, maka bunu kuvila ka kuvisidomiikar kiado Tubo, mia kumila jibe semiu sinaniano dolu nalo.
1CO 11:21 Verenio tai rimei rijog vitu, mia tumolu riyuku jum̃ano rivar joko ve telabo naruei dolu nalo ve re salo, p̃eli dolu rimunu m̃arjum̃elm̃elu ve toru!
1CO 11:22 P̃eli maka ve kenemiu yimo na vorosebiano, ana kubinimei ea lotuano ka kuvisinan eaio? P̃eli kamiu kumila jibe na bior napano kumitu kumisidomii kurano ea Atua kiano yimo na lotuano, p̃eli kumitu kumisidomii kurano ea namoneano bilbilu dolu nalo? Maka nejikia mia never venia ka kamiu rivior vite nei, a mia neber ga maka nasaaro kanio leleio.
1CO 11:23 M̃arabo na memedu ka ala sinaniano lu, Tubo naruei ber ka kiniou, a iorou, kiniou naruei nojuvan biedu ban kamiu. Bano jibe nei, ber Tubo Yesu, ea kiano bogiano maaro na, napano Jutas jiveluku naio eaio, naio midu joko nei,
1CO 11:24 ana bolkouo ber siva biorio, burekokorovio, ana berenio “Ninei naruei be mokotenaku, napano nomijamo bior kamiu. A kamiu monoka kuvisen joko tibe na tulaka, tibe vite tai ka kuvisidomii kiniou.”
1CO 11:25 A iorou, bogo napano ajenio bano-o bisi, naio midu baja na m̃arjum̃elm̃elu, mila jibe nene bereio, ber kalo berinavo “Baja nei, naio be kiaku burukija, napano mila Atua kiano verikariano vou napano mila bija toro jikili ju. A bogo nonovio napano kamiu kuvidu baja nei tibe na, neber bo, kamiu monoka kuvisidomial kiniou.”
1CO 11:26 Bilbilu nalo, naina naruei Tubo kiano iliano ea tivelinio na, a mila ver bogo napano rosen joko vija rodu baja tibe nei, roju romila sidomkariano na kiano m̃ariano, a mia kito monoka rotu rala tibe na vokar bogo napano naio rimaluvo kean kito bereio.
1CO 11:27 Tibe na, ka rodu Tubo sano joko nei, vija m̃ano baja nene, naio be vite tai napano be lu laka. Ver toro tai ridu ea bajago tai napano maka rimemedu, toro na mila kirivova, mila bulag vijauano na mokotenano Tubo bija kiano burukija, jibe ka naio ga muebin naio.
1CO 11:28 Tibe na, bogo na ala sinaniano lu nei, monoka rovitii vatitig kiado meuliano veve terakurano, karina, rodu joko vija baja nene.
1CO 11:29 Mia bogo na rodu, monoka rovitilubario ka vite nei, nioti nene toru jo, napano berial ka kiado Tubo mijamo ka kiano meuliano bior kito. Naruei, ver toro tai senio, ana maka sidomii ve temi ka kito nonovio robe toro takurano ea Kristo, midu ka iakurano ga, a mia naio rialio napano rivova lie ka naio.
1CO 11:30 Vite na naruei jo mila kamiu ruei, napano miroano ka kamiu amelmeluku p̃eli amie, ba bokar napano tealo am̃arm̃aro.
1CO 11:31 Mia ver rotu rovitii vatitig kiado meuliano bogo nonovio, mia Atua sian re vironiano van kito tibe nei.
1CO 11:32 Mia kito napano Atua mila ka kito jibe nei, maka rodu tibe vironiano tai, rodu tibe jidomiano tai napano Atua mila ka rilabon kito, ka sian bogo van kito ka ea bogo maaro, mia avukular kito re rovan vija tomu dolu nalo na yetemeriba napano mia avan ea vio na jogvaiano.
1CO 11:33 Bilbilu novo nalo, naina naruei kiaku iliano ea tivelinio na ala sinaniano lu. Bogo kumei vio takurano tibe na, mia kuvila ea bajago novo. Ve re tai napano rila von ka ridu sop̃eli ka senio ve toru beamu, mia kuvitu rim̃aro ga, kar bogo napano aviniu atu, kamiu kuvilaio.
1CO 11:34 Toro napano jijerio ana jidom laka sinaniano, bo ka tobo ga vonuo, sinan vatitig ea kiano vio. A monoka kuvitakii kiaku iliano ea tivelinio nei, ver p̃eli, bogo na mia kumei vio takurano, mia maka lele vite tai rivu van kamiu. Vite nalo dolu ju ka neverialio van kamiu, mia rotukunu kalo bogo na namaluvo kean kamiu.
1CO 12:1 Bo ga kuruaku a kuvivinioku nalo, kiniou nojidom neverii moroano nalo napano Niununo Lu mijikia sianio van kito namoneano nalo jibe jidomiano tai. Ea tivelinio na, maka rivu kamiu kuve taboso, mia nojidom ka monoka kuvijikia vatitig kija kalo.
1CO 12:2 Beamu, bo ka kuvisidomii nua ea bogo na maka kumonmonea vo. Ea bogo na, moroano nalo na niununo dolu nalo aju amim̃au ea kamiu, aburu kenemiu jidomiano ba be vovu vatitig ka kuvilotu ka tavoru nalo ninio napano maka ajikia ail.
1CO 12:3 Nina naruei niununo kinkin nalo napano amijikia ala toro ril rivova ka Yesu, riolua siano, mia Atua kiano Niununo Lu maka rijikia sian iliano na jibe na. A niununo nalo na, maka ajikia ala toro river iliano novo, verial Yesu be Tubo riano, mia toro napano ber jibe na, romijikia ka Niununo Lu jo mim̃au ea naio, bar iliano nei banio.
1CO 12:4 Jibe na, bogo napano romial moro-ano novo nalo napano namoneano nalo amijikia aim̃au vijaio, romijikia ka jibe jidomiano nalo napano Niununo Lu jianio banlo. Moroano telabo ka ala im̃auano aju, mia Atua kiano Niununo naio takurano be burupati ka nonovio.
1CO 12:5 Jibe ka ga napano bajago telabo ka ala im̃auano aju, mia kiado Tubo naio takurano be parinio ka nonovio,
1CO 12:6 a jidomiano novo telabo ka ala im̃auano aju, mia Atua naio takurano jo mila abavavin ea kito nonovio.
1CO 12:7 Jibe ka, ea tivelinio na moroano nalo napano Niununo Lu jianio, namoneano nalo amijikia ajevio beve dolu, jakii venia ga napano Atua bitii ka mia riija lie taara na namoneano nalo.
1CO 12:8 Ea tai, Niununo jian iliano nalo napano abe masou laka. Ea tai, jian navitilubariano novo nalo.
1CO 12:9 Ea tai, jian viekouoiano toru. Ea tai, jian napano mijikia milarur namieiano nalo.
1CO 12:10 Ea tai, jian napano mijikia mim̃auka vremesiano nalo. Ea tai, jian verialiano na vite nalo na ju ka rimei. Ea tai, jian napano mijikia rijidig bulag sim̃aro nalo. Ea tai, jian napano mijikia rijev ka iliano dolu. Ea tai, jian napano mijikia bilig iliano nalo napano amijevio ka iliano dolu.
1CO 12:11 Nina naruei ijaiano nalo napano Niununo Lu naio takurano ga mijikia ridu toa toro kiano meuliano, jo jian bulagio ban kito terakurano jakii ga venia napano naio jidomio.
1CO 12:12 Namoneano nalo abar ijaiano nalo beve dolu jibe na, jibe ka napano mokotenado nalo be tarati dolu nalo miroano. Terati dolu nalo na, amiasolo aju amim̃au vei ea mokotenano takurano ga, a jibe ka bunu joomo ea taara na namoneano nalo, napano ajibe ka terati nalo ea Kristo mokotenano.
1CO 12:13 P̃eli kito kulo Ju p̃eli kito kulo Krik, p̃eli kito tortoru p̃eli roju romim̃au kurano toro na toru tai kiano, mia Atua kiano Niununo midu kito nonovio, mila kito rabaruei ka romei rove terati na Kristo mokotenano, a Niununo na naruei napano naio takurano ga joa kiado meuliano nalo beve terakurano.
1CO 12:14 Bo ka kito rosidomii lie ea kijo-kijo nei napano roju roberiio, rober kito namoneano nalo rojibe Kristo mokotenano. Naruei ea tivelinio na mokotenado, romijikia ka terati nalo miroano.
1CO 12:15 Tibe na, maka rimemedu ka terati tai, tibe jaano, rijog rivova, tumolu riverinavo “O, kiniou jaano ga, kiniou maka noim̃au rivu tibe napano jum̃ano mim̃au. P̃eli maka bunu rivu ka neve terati na mokotenano.” Mia makanio, jaado maka rijikia river tibe na, bior naio be terati na toru ea mokotenado ruei.
1CO 12:16 Mia maka rimemedu ka tiliniedo rijog rivova, tumolu riverinavo “O, kiniou tilinieno ga, kiniou maka nejikia nevitii vite tibe napano mirano milaio, p̃eli maka navare ka noto noiasol ea mokotenano.” Mia makanio, tiliniedo maka ver tibe na, bior napano naio, kiano im̃auano novo napano mila ka mokotenado jo ruei.
1CO 12:17 Nina bior napano verver mokotenado rive mirano ga, mia maka rejikia rojog lubar vite, a ver mokotenado rive tilinieno ga, mia maka rejikia rojugunu vite.
1CO 12:18 Mia ea mokotenado, Atua mila jakii kiano jidomiano, bar vatitigio nonovio terati nene ajua vio nalo nene memedu terakurano, ka ala kialo im̃auano memedu veve terakurano.
1CO 12:19 Ver terati mokotenado nalo aviniu averaverarei ga, mia kito maka rejikia rovitii tibe ka na mokotenano jibe ka takurano ga,
1CO 12:20 mia terati dolu nalo abiniu monoka aiasol vio takurano ka ve mokotenano toro.
1CO 12:21 Mirado maka rijikia ril rivova van jum̃ado, river “O, maka bunu nosidomso,” a pariparido maka rijikia rijil jaado, river “O, maka bunu tinieku tiso.”
1CO 12:22 Maka leleio tibe na, a! Terati mokotenado tealo amelmeloko laka, mia romijikia ka aju amila burum̃ara im̃auano.
1CO 12:23 Terati dolu na mokotenado nalo, rosidomii re rever abo jum̃abe, mia rotu rovitikar vatitiglo. Terati dolu tealo na mokotenado, maka rosidom toro dolu rialio, naruei rojidom temi ka roiako vatitiglo.
1CO 12:24 A terati dolu na mokotenado, abo ka tomu nalo amijikia aialio, naruei maka roiakolo. Jibe ka, romial ka Atua bar vatitig terati nonovio memedu ga, a midu jidomiano tai joa kito ka napano bekurano terati tealo amelmeloko, p̃eli maka ala im̃auano ve toru, mia rosidomii ve temi kalo a rovitikarlo rivu.
1CO 12:25 A nina mila napano terati nalo nonovio maka ail niegelo, mia aju bo ga, aju amijajalo bereio bogo nonovio.
1CO 12:26 Ver terati na mokotenado tai rijog rivova ka vite tai, terati nonovio dolu nalo monoka ajog rivova vija naio, a ver aijalar terati tai, amila bo banio, terati dolu nonovio amijikia ajog rivu vijaio.
1CO 12:27 Naruei iliano nalo nei aberenio jibe nei, aber kito naruei namoneano nalo, rojibe ka Kristo mokotenano, a kito terakurano robe kiano terati nalo nene.
1CO 12:28 A Atua bitiri bulag kito terati nalo na Kristo mokotenano, ka rola im̃auano nalo na lotuano. Na beamu, Atua bitiri bulag tealo abe navagadeano, na juo nene tealo abe atevi, na tolu nene, tealo abe naverloglogiano, a iorou kanio, nalo napano amim̃auka vremesiano, p̃eli amilarur mieiano nalo, p̃eli abitikar im̃auano ea lotuano, p̃eli amijev iliano dolu nalo, jibe na.
1CO 12:29 Naruei, ea taara na namoneano nalo, kito romialio napano abiniu abe atevi? P̃eli abiniu abe naverialiano? P̃eli abiniu abe naverloglogiano? P̃eli abiniu amim̃auka vremesiano? Maka leleio tibe na.
1CO 12:30 A abiniu amijikia ala rur mieiano nalo? P̃eli abiniu amijikia ail ka iliano dolu nalo, p̃eli avilig iliano dolu nalo?
1CO 12:31 Maka leleio tibe na, mia bo ka tomu nonovio asaaro ka avokar burum̃ara moroano vabe napano Niununo mijikia sianio vanlo. A ea moroano nalo na, tai jo napano monoka rimei ve moti ea kiado meuliano nonovio, napano bo lie laka ka nalo dolu, napano kiniou nojidom noveriio van kamiu, nina bajago na tinietiiano.
1CO 13:1 Tinietiiano, naio be vite tai napano monoka ve vite moti ea kiado meuliano. P̃eli nemijikia neil sel kulo dolu kialo iliano, p̃eli nemijikia neil ka agelo nalo kialo iliano, nina bo, mia ver kiniou tinieku tii re tomu nalo, mila napano kiaku iliano nonovio ajibe ka p̃i tai napano amue vovu, miolu kurano ga.
1CO 13:2 P̃eli burum̃ara moroano joa kiniou ka neverial Atua kiano iliano, p̃eli na nemijikia vatitig vite telabo napano tomu dolu nalo maka ajikiaio, p̃eli na kiaku viekouoiano toru laka bare ka nobolkouo ka tenalo na tortoru mia amaluvo, vite nalo na abo laka, a ver tinieku tii re tomu nalo, nebe iakurano ga.
1CO 13:3 P̃eli nejian kiaku saba nonovio ban talim̃asa nalo, ver p̃eli noju jikili banbano-o amisebi mokotenaku bior napano nebe Kristo kiano toro, nina bunu bo, mia ver maka tinieku titii tomu nalo, nemila ka iakurano ga.
1CO 13:4 Naruei burum̃ara vite nei, bajago na tinietiiano, naio jum̃abe? Jidomiano nene tebievi, a be tinievuiano. Naio maka rijokua, naio maka rivarvarka, a naio maka to ridular naio bereio.
1CO 13:5 Kiano bajago kirinovo, naio maka rive viti, maka tinien mimi sop̃eli, a maka rivokar jidomiano va vesiou.
1CO 13:6 Naio maka sidom vite va, mia jaaro ka vite novo.
1CO 13:7 Tinietiiano naio jikili ju julaka, tinietiiano naio be riano julaka, tinietiiano naio tinienekar julaka, a tinietiiano naio juvulu julaka.
1CO 13:8 Tinietiiano maka tinien maro leleio bogo tai. Be riano laka, moroano dolu nalo, jibe verialiano nalo, p̃eli iliano na ka iliano dolu nalo, p̃eli jikiaiano nalo, mia nalo maka ajikia atu tulaka, mia tinietiiano ga naio jo julaka ga, naio maka rijikia ribisi bogo tai.
1CO 13:9 Ea kiado bogo, aju aberial Atua kiano Iliano nalo, a aju aberloglog jikiaiano nalo jibe nei, mia venia napano aju amila banei, be torogtorogio nene ga, maka rivokar kiano vujoano leleio.
1CO 13:10 Vite nalo nei abe tena vonganei ga, a ea bogo napano mia Atua rila vite nalo rimei rivu nonovio, vite dolu nalo nei mia abisi, mia tinietiiano ga mia to.
1CO 13:11 Nina be verare ga ka kiado meul-iano. Bogo napano robe kiritete kia ga, kiado iliano bija kiado jidomiano bar kiritete kiano bajago. Mia bogo na robinimei tortoru, maka bunu rotibe ka kiritete, kiado bajago meruo vatitigio. Naruei kiado meuliano bija Niununo Lu monoka tibe na bunu.
1CO 13:12 A naio be verare bunu ka mermerobi nalo napano roju robitii mirado eaio. Bogo tealo, ver mermerobi nei miagiago p̃eli be m̃adati, mia maka rejikia rovitilubar vatitig mirado eaio. Mia bogo napano Atua rila vite nonovio rimei rivu, mia romijikia rovitilubar vatitig vite nonovio, a mia roial Atua mirano rimemedu ka mirado ga. Mia bunu ea tivelinio na kiado jikiaiano, vonganei romijikia telisu ga, mia ka bogo na ju ka rimei, mia Atua rila kito rojikia vatitig naio, vija vite dolu nonovio, ve verare ka ga naio mijikia vatitig kito nua ruei binimei bokar banei.
1CO 13:13 Tibe na, vite dolu nalo mia abisi, mia vite tolu ga amijikia atu tulaka, nina naviekouoiano, baleaiano, a tinietiiano. Mia ea vite tolu nei, nana napano toru laka kalo, naina neberenio maariano na, naio be tinietiiano.
1CO 14:1 Naruei bior napano tinietiiano naio burum̃ara vite laka jibe na, kamiu monoka kuviduio to ve vite moti ea kenemiu meuliano. Mia bija nina, monoka kuvidu kenemiu jidomiano toa moroano nalo napano Niununo Lu jom̃a jianio, kamiu kuvisaaro ka kuvakarlo. Mia ea moroano nalo nei, tai napano bo laka, nina napano toro berial Atua kiano iliano nalo.
1CO 14:2 Ver toro tai tumolu verial iliano jel iliano dolu tai napano Niununo Lu jianio banio, p̃eli bo ka naio, mia jibe ka napano jo mil ban Atua ga, maka to ril ka tomu dolu nalo ajikia ajog lubar naio. P̃eli jo berial burum̃ara iliano nalo napano Niununo Lu jian banio, mia iliano nalo na ajuluku ka kito, maka rejikia rovokarlo.
1CO 14:3 Mia ver toro tai riverial Atua kiano iliano nalo van kito, ril van kito sel ea kiado iliano, kiano iliano novo nalo nei amijikia ala kito rosikili, amijikia adular kiado jidomiano, amijikia adururu kiado iviso.
1CO 14:4 Jibe na, toro napano mil jel iliano dolu napano Niununo Lu jian banio, jo bagan naio takurano ga, mia toro napano berial Atua kiano iliano napano tomu nalo amijoglubario, naio jo bagan lotuano nonovio.
1CO 14:5 Ee, kiniou najaaro ver kamiu kuvil sel iliano dolu jibe na, mia nemialio ka bo lie ver kuvitu kuverial Atua kiano iliano van kulo dolu nalo. Naio napano jo berial Atua kiano iliano nalo, kiano im̃auano bo lie loa ka napano jo mijev jel iliano dolu. Nina bior naio napano jo mil jel iliano dolu, kiano im̃auano maka jikia rivar m̃arati ea kulo dolu kialo meuliano. Kiano im̃auano maka rijikia vagan lotuano ver maka tai napano jo bilig kiano iliano nalo ka kulo dolu nalo ajikia ajoglubario.
1CO 14:6 Bilbilu nalo, kuvisidomii vonio ver kiniou, bogo nojo nebinimei ea kamiu nojo nomioliolu ban kamiu jel iliano dolu tai napano Niununo Lu jiianio ban kiniou. Tibe na, mia kiaku iliano nalo maka ajikia aija kamiu leleio. Mia bogo na nemil ban kamiu jel iliano napano kumijoglubario, mila na venia napano nejianio ban kamiu, jibe vite vou tai napano Atua berloglog ka kiniou, p̃eli jikiaiano tai, p̃eli verialiano tai na Atua kiano iliano, p̃eli verloglogiano tai, mia mijikia rijai vatitig kenemiu meuliano.
1CO 14:7 Nina jibe ka p̃i m̃arauo tai, ver kiano terati jooa nalo avova, mia bogo na aserei kanio, maka rojikia rojog lubar vatitig iou venia napano ajerei kanio.
1CO 14:8 P̃eli ver tubo tai jidom rue p̃i, mia p̃i minunu, maka jikia riolu m̃elea, mia tomu nalo maka ajikia ajoglubario ka tubo mue p̃i bior vaio.
1CO 14:9 Mia jibe ka ga na lotuano na kenemiu yako bunu. Ver toro tai jo ber iliano nalo jel iliano dolu tai napano tomu nalo maka ajikiaio, mia maka ajikia avokar niati tai leleio ea venia napano naio jidom river kalo. Kiano iliano mia riva kovio ea vio yauo ga.
1CO 14:10 Jibe napano romijikia, iliano miroano ju janea yetemeriba, a kialo iliano nalo abe nioti aju.
1CO 14:11 Mia ver nava kovio tai, maka nejikia kialo iliano, nejibe ka valauo kalo ea vio nei, a nalo ajibe ka valauo ea kiniou bunu.
1CO 14:12 Ana iliano nei be nioti ban kamiu napano kumitu kumila vio jikili ka moroano nalo na Niununo Lu aim̃au iviso ea kamiu. A nioti nene jibe nei, ber kamiu kuvila re napano kubeve terakurano kuvitu kubavavini ea kamiu ga, mia monoka kuvilavio sikili ka kamiu nonovio kuvitu kuvidular lotuano rimei sikili vatitig nonio.
1CO 14:13 Tibe na, ver kamiu tai mijikia ril sel iliano dolu tai napano Niununo Lu jianio ban naio, bo ka rivolkouo van Atua ka sian moroano van naio ka vilig kiano iliano nalo nei avan ea kenemiu iliano.
1CO 14:14 Kiniou neber jibe na bior ver noto nobolkouo sel iliano dolu tai tibe na, nemial jibe ka nojo nobolkouo ea niunuku ga, mia joomo ea kiaku jidomiano, maka nejikia venia napano nojo neberenio.
1CO 14:15 Ver tibe na, mia bo ka rala tum̃abe? Ea kiaku vitiiano, bo ka rala ea tivelinio ve juo. Ver kiniou noto nobolkouo, p̃eli noto noiou, mia bo ka nala ea iliano napano miyotuba ea niunuku, a bo ka nala bunu ea iliano napano miyotuba ea kiaku jidomiano.
1CO 14:16 Ver makanio, p̃eli kojo kobolkouo jel iliano napano maluvo ea niunumo, kojo kober siva ka Atua bior vite tealo, mia toro dolu napano maka rijev moroano ka rijoglubar iliano nei, mia naio maka jikia rijikiaio, mia maka jikia riverenio “Jibe na ga naruei” ea kiamo volkouano.
1CO 14:17 P̃eli kojo kobolkouo jibe na, kojo kober vite novo miroano, mia kiamo volkouano na maka jikia rijai kiamo bilbilu kiano jidomiano leleio.
1CO 14:18 Kiniou najaaro laka ka Atua jian moroano ban kiniou ka noil ea iliano napano Niununo Lu jianio, neber siva laka kanio, a nemial jibe nemila toru jovulu laka kamiu nonovio.
1CO 14:19 Mia kiniou nojo nemila ea bogo napano nojo kiniou takurano ga, maka noto nala ea mirano tomu nalo ea bogo na lotuano. Ea kiaku vitiiano, verver never iliano na telisu tai ga sel iliano napano tomu nalo amijikiaio, napano mijikia verloglog kialo meuliano, nina kirinovo laka jovulu napano nejian iliano telabo jel iliano dolu napano maka ajikia ajoglubario.
1CO 14:20 Bilbilu nalo, neber bo ka kamiu kuvila von kuvisidomii vatitig ea vite nalo nei, kuvisidomii re bunu tibe kiritete. Be riano ka ea tivelinio na bajago va nalo, bo ka kuvitibe kiritete nalo, napano maka ajikia vite ve telabo kanio. Mia ea tivelinio na bajago novo nalo, kenemiu jidomiano monoka meruo vatitigio.
1CO 14:21 Iliano tai joa Vivitauiano Moruo, berial iliano tai napano Atua ber jibe nei, berinavo Mia novuru tomu nalo napano abinimei ea venuo dolu nalo, napano ail sel iliano dolu, neiilalo avan ka averial kiaku iliano van kiaku tomu nalo. Mia kiaku tomu nalo pariparilo kirisikili laka, mia maka ajikia aiagago ka kiaku iliano napano valauo nalo nei averialio kalo.
1CO 14:22 Ea iliano na, romial ka Atua berialio ka moroano na ail ka iliano dolu napano Niununo Lu jiianio, ka vaio? Moroano na, maka van kito na romonea ruei, mia ka rijai nalo napano maka amonea vo. Bogo napano ajogio, avitilubario ka be riano. Mia moroano nei ka riverial Atua kiano iliano, rijai laka ka kito napano romonea ruei, ka romijikia rojoglubario meravo bo. Mia moroano na maka jikia rijai laka nalo napano maka amonea vo, bior napano maka asidom aiagago ka Atua kiano ilirianiano.
1CO 14:23 Tibe na, bogo na kumei vio takurano ka kuvila lotuano, maka rivu ka kuvitu kuvil laka sel iliano dolu nalo napano Niununo Lu jianio ban kamiu. Ver bogo tai tibe na, ver tai napano maka jikia vatitig vite nei, p̃eli maka rimonea, ver rimei joomo ea kenemiu lotuano, mia naio rial tum̃abe? Mia monoka sidomii ver kamiu nonovio kumiavovu garuei.
1CO 14:24 A ver rimei joomo, rial ka kamiu kumitu kuberial Atua kiano iliano jel iliano tai napano kamiu nonovio kumijikiaio, mia riagago ka kenemiu iliano novo nalo, naruei mijikia rikuru tinieno, mijikia rila naio rivitilubar kiano kariano.
1CO 14:25 A bogo napano naio riagago rivano-o, mia rijog ka Atua kiano iliano bokar kiano meuliano, bar dulu ea vite nalo napano milavanio ajua kiano jidomiano, a mia rila naio rijog rivova, rinie tano rilotu van Atua, riverialio riverinavo be riano ga, Atua jo iviso ka kamiu.
1CO 14:26 Jakii iliano nalo nei ea tivelinio na moroano nalo napano Niununo Lu jiianio, mia kamiu kuvila tum̃abe ka bogo nalo na kenemiu lotuano? Bogo na kumei vio takurano, bo ka kuvitiburevure im̃auano nalo nene ea kamiu. Tibe ka, tai sian iouano, tai sian verloglogiano, tai sian jidomiano vou napano Atua berialio ban naio, tai sian iliano sel iliano dolu napano Niununo jianio ban naio, a dolu tai rijikia vilig iliano nei ka tomu nonovio ajikia nioti nene. A vite nonovio napano kumila jibe na, monoka vagan vatitig namoneano nalo kialo meuliano napano aju na.
1CO 14:27 Naruei jibe na napano neberenio, ver ea bogo na, tai jidom sian iliano tai sel iliano dolu tai napano Niununo Lu jianio banio, nina bo ga na. Ver juo p̃eli tolu tibe na, bo ga na bunu, mia monoka tuvulu re ve tolu. Mia ail re ve vaarakurano, mia adu bogo vanlo, tai tukamu, karina tai bereio, tibe na. Mia bunu, bogo napano tai ril bisi, toro dolu tai monoka vilig kiano iliano, ka tomu nonovio ajikiaio.
1CO 14:28 Mia ver asidom ka ail sel iliano dolu tibe na, mia maka tai to napano be kiano moroano ka verial nioti na iliano nei, mia ail re bunu sel iliano dolu nalo nei tibe na ea tomu nalo miralo. Mia toro na jibe na torm̃aro ga, a mijikia ril sel iliano kinkin nei joomo ea niununo ga, napano Atua ga mijikia rijoglubario ave juo.
1CO 14:29 Ea tivelinio na nalo napano aberial Atua kiano iliano, bo ka nalo ve juo p̃eli ve tolu ga ail. Mia bogo napano asian bulag kialo iliano nalo karina, bo ka namoneano dolu nalo aver kialo jidomiano kanio.
1CO 14:30 Ver tai to rioliolu jaka, ana Atua jilogloglar jidomiano vou tai ban namoneano dolu tai napano jotano jo, nina jo mil monoka ribisi beamu ka ridu bogo van dolu na.
1CO 14:31 Tibe na, kamiu nonovio kumijikia kuvar bogo ka kuverial Atua kiano iliano, napano tai berial tai, karina tai berial tai, jibe na. A mia iliano nalo na amijikia adular tomu nonovio kialo jidomiano, a tomu nonovio amijikia alakakar vite novo ealo.
1CO 14:32 Iliano novo tai jo, napano memedu ka nalo na abokar moroano nalo nei napano Niununo Lu jianio. Iliano na ber jibe nei, ber Niununo napano jian iliano ban toro, naio maka tutua toro na, mia monoka takii toro nei kiano masouano, napano mia verial iliano nei.
1CO 14:33 Iliano nei ber ka kito monoka roim̃au ea bajago novo na jibe napano Atua jidomio, bior napano naio maka rim̃au p̃ilip̃ili vija kiano moroano nalo, mia jo mim̃auka vite nonovio memedu ea bajago na tum̃aro. Mia bo ka kamiu kuvitu kuvila tibe ka napano taara dolu na namoneano lu nalo ajum̃a amilaio,
1CO 14:34 napano ea bogo na lotuano, amila ka tire nalo atu aturm̃aro ga. Maka ajamo ka tire nalo atumolu ka aver iliano ea sum̃ano nalo miralo, bior napano jibe ka tuboiano moruo berenio, tire nalo monoka atu mave re atuvulu sum̃ano nalo.
1CO 14:35 Ver tire nalo ajidom ajikia vite, maka rivu ka avika vikadeniano ve miroano p̃eli averial kialo jidomiano nalo ve miroano joomo ea lotuano, mia bogo napano ava vonuo karina, amijikia avika von den koalo nalo.
1CO 14:36 Naina naruei kiaku iliano tealo van kamiu, a maka rivu kamiu tealo aber p̃eli neber maka rimemedu. Maka kamiu napano Atua kiano iliano lu biedu ea kamiu jukamu, a maka kamiu ga napano kuvijevio.
1CO 14:37 Ver kamiu tai ber p̃eli naio be toro na verial Atua kiano iliano, p̃eli naio be toro napano jidomii jo jakii m̃arabo na Niununo Lu mila meravo banio, naio bo, mia ver jibe na be riano, mia naio monoka rivitilubar ka vite nalo napano nojo nojiri kakario ban kamiu, abe Tubo kiano ilirianiano.
1CO 14:38 Mia ver naio maka vitilubario ka kiaku tirikariano nalo abe Tubo kiano ilirianiano, mia kamiu kuvijamo ka re rim̃au vija kamiu.
1CO 14:39 Bo ga, kamiu monoka kuvisidomii vatitig kiaku iliano nalo, ka kuvisikili ka kuvijev moroano ka kuverial Tubo kiano iliano, mia ver tealo amijev moroano ka ail sel iliano dolu napano Niununo Lu jian banlo, monoka kuvituko vio re ka nalo kuver ala re.
1CO 14:40 Mia ver ala nina, p̃eli venia bereio, mia monoka ala vite nonovio takii m̃arabo napano bo a memedu.
1CO 15:1 Bilbilu nalo, kiniou nojidom noverii bereio Ioluano Vou nei napano nebinimei nomioliolu ka ban kamiu ruei, napano kumijevio, kumitu kumitua kirisikili eaio, ka rila tiniemiu bobogia re.
1CO 15:2 Ioluano Vou nei naruei napano ver kuvitu kuvokar sikili rivu kia ga, naio to rila kamiu kuvokar kenemiu ioruriano. Mia ver maka bunu kuvokar sikili ve verare ka venia napano nomioliolu ka ban kamiu, p̃eli ver kuvilig van ve dolu, nioti nene ber kumonmonea beamu na ka iakurano ga.
1CO 15:3 Ioluano Vou nei napano ajian ban kiniou nua beamu, naina naruei nemijevio, neberialio ban kamiu. Kiano iliano na tortoru nalo aberii Kristo, napano naio mila be verare ga ka Tirikariano Moruo berialio nua ruei ka mia naio rilaio, bogo napano naio maka rimei vo. Ban jibe nei, ber Kristo, naio m̃aro bior kito kar kiado kariano nalo,
1CO 15:4 karina amidu naio joa buluvae, mia iorou ka kiano bogoti tolu nene naio jumolu meul bereio,
1CO 15:5 a iorou ka naina naio miyotuba beamu kean Kevas mirano, karina, miyotuba bereio kean nalo duelimo ba juo [12] miralo.
1CO 15:6 Kar iorou ka naina, bogo tai naio miyotuba bereio kean taara tai na namoneano nalo miralo, jovulu toromomou jimo [500], napano miroano ka nalo ameul kia bokar banei, mia tealo am̃arm̃aro ruei.
1CO 15:7 Bisi na, naio miyotuba bereio kean Yemesi mirano, karina miyotuba kean atevi nalo miralo,
1CO 15:8 a iorou ka nina ban bereio ea vio mave. Kiniou maka noto ka bogo na, mia siva toru napano kario, Tubo miyotuba vaarakurano bereio, napano naina maariano laka, miyotuba kean miraku.
1CO 15:9 Maka nememedu ka naio rila tibe na van kiniou, bior napano ea atevi nalo nonovio, kiniou nojo yetano kanio, a maka navare ka sio na leleio, bior napano nua, kiniou naruei nojo nomijil nalo na taara na Atua kiano namoneano nalo.
1CO 15:10 Mia Atua be tiniememi toru ban kiniou, bitirilar kiniou ea vio nei napano nojoaio vonganei, a naio be tiniememi ka kiniou jibe na bior titai, bior napano nela kiano im̃auano telabo na tortoru. Ee, p̃eli nemijikia never ka nemila im̃auano nalo jovulu nalo dolu nonovio, mia maka kiniou napano nomim̃au, mia Atua kiano tiniememiano nei naruei napano joa kiniou, naio naruei mila im̃auano jel ea kiaku meuliano.
1CO 15:11 Mia maka noto nosidomii laka never nomim̃au jum̃abe, p̃eli atevi dolu nalo amim̃au jum̃abe, mia vite na toru na jibe na, ka kumemi numioliolu ka Ioluano Vou ban kamiu, a kamiu kumoneaio.
1CO 15:12 Naruei bogo napano numioliolu ka ban kamiu jibe na, nuberialio meravo vatitig nuber Kristo, naio m̃aro, mia karina meul bereio. A bior napano numila jibe na, nomiilo toru ka nomijog ka kamiu tealo aju aberver bogo napano ram̃arm̃aro, ativin kito, a mia ram̃aro bo garuei, maka rojikia romeul bereio bogo tai.
1CO 15:13 Jidomiano na maka rimemedu, bior napano ver atu aver ka maka toro tai rijikia tumolu bereio, nioti nene berinavo Kristo bunu maka tumolu bereio. Mia maka leleio, Atua bitirilar naio meul bereio ruei.
1CO 15:14 Ver naio vitirilar re Kristo, rila na numitu numioliolu ka Kristo ban kamiu ka kurano, a kamiu bunu, kumonea naio ka kurano ga.
1CO 15:15 A ver tibe na, rila na bogo napano numioliolu ban kamiu nuber Atua bitirilar Kristo meul bereio, p̃eli numila sibi toru ea Atua siano, p̃eli numitu nuberloglog kamiu ka vite tai napano maka ve riano.
1CO 15:16 Ver be riano ka toro napano m̃aro maka riijikia rimeul bereio, nioti nene ber ka Kristo bunu maka rijikia rimeul bereio.
1CO 15:17 A ver Kristo rim̃aro to kia ga tibe na vo, nioti nene ber kenemiu viekouoiano be kurano, a berenio ka kenemiu kariano nalo aju keano ea kamiu.
1CO 15:18 A bunu, ver Kristo rimeul re bereio den nam̃ariano tibe nei, nioti nene ka kiado bilbilu nalo napano amonea mia am̃arm̃aro ruei, aban ea vio kouo ruei, bior napano maka toro tai napano rijikia rilarurlo.
1CO 15:19 A verver kiado moneano ea Kristo mijikia rijai kito ea yetemeriba nei ga, mia maka rijikia rijai kito ka bogo napano rom̃arm̃aro eaio. Ver Kristo maka rijikia rilarur kito ea bogo napano rom̃arm̃aro ea yetemeriba nei, mia rivova lie van kito, mia tiniedo riia kar kito mia tiniedo riia kar kito.
1CO 15:20 Mia makanio, maka tibe na leleio. Nemijikia never rimemedu ka be riano, Atua mila Kristo meul bereio den nam̃ariano, a bitirilar naio jibe m̃ariesi moti na namoneano nalo nonovio, napano ver ava kovio bogo tai mia Atua mijikia rilalo bunu ameul bereio den nam̃ariano.
1CO 15:21 Nua ea tikariano, toro moti nei Atam buru nam̃ariano binimei ea yetemeriba, mia vonganei, toro dolu nei Kristo mila meuliano bereio den nam̃ariano binimei.
1CO 15:22 Jakii venia napano Atam milaio, tomu nonovio na yetemeriba monoka am̃arm̃aro, mia jakii venia napano Kristo milaio, tomu nonovio na yetemeriba amijikia aleal meuliano.
1CO 15:23 Mia vite nonovio be kialo bogo memedu, bior napano Kristo be moti ka jumolu den nam̃ariano, mia kito namoneano nalo, mia rotu vo rivano-o vokar bogo na naio rimei bereio, naruei mia kito bunu rotumolu den nam̃ariano.
1CO 15:24 A kario ka ninei, mia naio rivar bulag niununo va bija sim̃aro nalo na yetemeriba, a mia naio ve takurano rive parinio tubo ka vite nonovio rivano-o tovulu moroano va dolu nalo, atu yetano ka jaano. Kario mia naio sian nono navenatuboiano na vite nonovio rivan bere Atua karam̃ano.
1CO 15:26 A ea uolu nalo napano Kristo mia tuvululo ea bogo na, nina napano naio tuvulu maariano, nina vite nei na nam̃ariano, bija kiano moroano va nalo.
1CO 15:27 Kristo monoka tuvulu nam̃ariano nei, bior napano iliano na beamu mave ber jibe na ruei, ber mia Atua ridu vite nonovio atu yetano ka naio. Naruei iliano nei maka river ka Atua ridu naio bereio to yetano ka Kristo, mia berii vite dolu nalo, napano mia Kristo tuvulu nonovlo.
1CO 15:28 Mia bogo napano Atua ridu vite nonovio atutano ka Kristo tibe na, mia Kristo, tibe Atua kenerinio, ridu naio takurano bereio totano ka Atua, ana mia rila ka Atua naio ve takurano ve Atua ka vite nonovio.
1CO 15:29 Navan ea bere iliano nei napano beriio ber ver kito ram̃arm̃aro, mia iorou rotumolu bereio. Ana tealo napano amonea jibe nei, aju ajidomii laka kialo bilbilu nalo napano maka lele avaruei ealo ana am̃arm̃aro. Nalo aju aber p̃eli nalo nei maka ajikia ajev meuliano, mila na nalo abaruei bereio ea kialo bilbilu nalo na sialo, napano am̃arm̃aro ruei. Aju amila jibe na bior napano ga amonea jikili ka kito ram̃arm̃aro, mia rotumolu bereio.
1CO 15:30 Mia be verare bunu ka kumemi. Ver kuvisidomii vonio ka venia numitu nubiviuo bogokouo nalo bogo nonovio, numitu nubar jogvaiano jibe na bior ga romonea jikili ka toro na m̃aro, mia mijikia rimeul bereio den nam̃ariano.
1CO 15:31 Ee bilbilu nalo, kumemi numitu numim̃au jibe na, nemijikia never memedu never kiniou nomijog jibe ka nojo nojuvan kiaku meuliano bior kamiu bogoti nonovio ga. Mia naina bo ga na, bior napano najaaro mia najaaro ka meuliano na kubokario bija kiado Tubo Yesu Kristo.
1CO 15:32 Mia bogo napano nojoa komeli na Eveso, veribinio nalo na vio nei ajibe ka kuli deden nalo, aju amiaboluo ka kiniou banbano-o, ana bior vaio nojo nojoko vio kalo? Nojo nomila jibe na, maka nejev vite na bo tai leleio na meuliano na yetemeriba nei, mia nojo nomila bior napano nojo nojidomii meuliano nei napano rimei iorou. Ver meuliano nei re, bo lie kito rotibe ka kulo dolu nalo ninio napano maka amonmonea, ana aju aber jibe nei, aberinavo “Banei, kito rola jokoluolu, rosidomii re vite tai, bior napano beni, kei mijikia? Ver rom̃arm̃aro, nina bisi naruei, mia maka rejikia vite tai!”
1CO 15:33 Mia kamiu monoka kuvitakii re jidomiano vovu nalo tibe na, ver makanio, mia iliano dolu nei rimei rive riano ea kamiu, napano ber jibe nei, ber “Jau koiel vija bilbilu va nalo, mia kialo vovaiano rila niegeniege kiamo bajago novo.”
1CO 15:34 Kamiu monoka kuve masou, a monoka kuvituvan kenemiu kariano nalo. Neber jibe nei, p̃eli kuberiam̃a nemila niegeniege siemiu, mia monoka never ga, bior napano kamiu tealo maka ajikia vatitig Atua kiano m̃arabo na memedu nalo leleio.
1CO 15:35 Mia ea tivelinio na meuliano bereio den nam̃ariano nei, mia tealo abika jibe nei, aber “Mia ala tomu nam̃ariano nalo atumolu bereio tum̃abe?” P̃eli mia avika tibe nei aver “Nalo napano am̃arm̃aro kirisiou ruei, mia atumolu bereio vija mokotenalo nalo na jum̃abe bereio?”
1CO 15:36 Mia vikadeniano nalo na jibe nei, abe toro kiano vikadeniano napano maka jikia vite. Ver rosidomii kurukuti likiliki nalo napano roju romebijaio, mia rojev verdop̃eiano nene. Bogo napano jau komebija kurukuti na vite tai ban ea borotano, komijikia ruei ka mia kurukuti nene monoka riminunu, monoka rim̃aro, mia iorou, mia toti vou mijikia moluo eaio.
1CO 15:37 Vite napano komebijaio, naio be kurukuti tai ga napano mia toa borotano, mia vite napano mia rimoluo rive terivou bereio, naio be todolu tai.
1CO 15:38 Jibe napano kojo komebija kurukuti kinkin nalo, naruei Atua mila abe kialo toti vou kinkin nalo,
1CO 15:39 a beverare bunu ka tenalo napano ameul, napano mokotenalo nalo abe ve dolu kalo. Sunbue dolu tai joa toro mokotenano, a temeul nalo na tano, na tei, p̃eli na vio yauo, nalo abe kialo sunbue kinkin nalo.
1CO 15:40 Ana temeul nalo nei, mokotenalo kinkin nalo abe dolu laka ka mokotenano vite kinkin napano aju tiniabene,
1CO 15:41 jibe m̃erenio, a siberio, a m̃arvitano nalo. Ea nalo tolu nei, tai mirano dolu ka tai, a be verare bunu ka tivelinio na m̃arvitano nalo, napano tai, mirano dolu ka tai.
1CO 15:42 Mia vite nalo nei nonovio, romial ka Atua mila abeve dolu laka, a tena jibe kijokijo tai na mokotenado vou, napano kito napano ram̃arm̃aro, napano romijikia rodu bogo ka rotumolu romeul bereio. Mokotenado rivan ea bulukup̃ili na borotano, tibe kurukuti tai napano amebijaio, napano monoka riminunu, mia iorou, mokotenado vou napano riyotuba, mia maka rijikia rimei rivova bogo tai.
1CO 15:43 Mokotenado napano ban ea borotano, romialio bova, a buru kokorovio, ana mokotenado vou napano riyotuba iorou, mia roialio kirinovo, jikili vatitigio.
1CO 15:44 Vite napano van ea borotano, naio be terati na kito ea tivelinio na mokotenado ga, mia vite napano riyotuba iorou, naio be terati na kito ea tivelinio na niunudo.
1CO 15:45 A bunu, romijikia rosidomii toro moti nei napano Atua jiio, napano be Atam, bija Atam na maariano napano midu joa yetemeriba, napano be Kristo. Iliano tai berenio ber Atam, Atua jii naio binimei bija mokotenano tai napano meul, ana Kristo, Atua miila naio binimei bija niununo tai napano be burupati na meuliano.
1CO 15:46 Jakii nina, romial ka vite na tivelinio na mokotenano, binimei beamu, mia vite na tivelinio na niununo, binimei maariano.
1CO 15:47 Toro na beamu nei Atam, Atua mijilar naio ea borotano na yetemeriba nei, mia toro juo nene nei Kristo, Atua miilalar naio ea vio mave binimei.
1CO 15:48 Naruei kito tomu dolu nalo, kito napano robe na yetemeriba nei, romidu toro moti na yetemeriba nei kiano bajago, mia kito napano robe na vio mave, romidu nana binimei ea vio mave kiano bajago.
1CO 15:49 A kito napano romonea, beamu romidu toro na yetemeriba nei mirano, mia vonganei, romidu toro na vio mave mirano.
1CO 15:50 Bilbilu nalo, tenalo napano maluvo ea yetemeriba ga, jibe ka mokotenado, maka rijikia riva joomo ea Atua kiano navenatuboiano mave, a tenei napano mia rivakovio, maka jikia riva rivokar vio napano mia to tobo to.
1CO 15:51 Ana mia tum̃abe ka namoneano nalo napano ameul kia ea bogo napano Kristo rimei bereio? Vite na, tomu miroano maka ajikiaio, ana mia kiniou neberii memedu ban kamiu. Ee, be riano ka kito namoneano tealo mia ram̃arm̃aro re ea yetemeriba nei, mia ea bogo na, vaarakurano ga, tibe vio bijiio, niabedo viligio.
1CO 15:52 Jibe ka napano rojetavoko mirado bogo bulati kirisop̃eli ga, mia rotabujo ka vaarakurano ga simeduo rivio, a mia namoneano nalo napano am̃arm̃aro ruei mia atarabujo ameul bereio vija mokotenalo vou, a kito bunu napano romeul kia ea bogo na, mokotenado bunu rive terivou.
1CO 15:53 Mokotenado moruo monoka riviligio tibe na, bior napano tena borotano monoka rimei rive tena vio mave, a tena m̃ariano monoka rimei rive tena mia rimeul tulaka.
1CO 15:54 Mia bogo napano kito rojev mokotenado vou tibe na, mia rila iliano tai na Vivitauiano Moruo rimei rive riano laka, napano berinavo “Meuliano na Atua kiano moroano bar bulag moroano na m̃ariano nalo.”
1CO 15:55 Ea bogo na, mia kito reielkuei vite nei m̃ariano, rover tibe nei, rover “M̃ariano, jau kojidom koto mave, mia vonganei kiamo sebi m̃aro garuei. Kiamo m̃arbutoto ka tulu kumemi jo be vonganei?”
1CO 15:56 Mia kito roil tibe na bior ka tubo-iano napano jo, naio jian moroano ban bajago na kariano joomo ea kiado meuliano, napano mila na robinimei jibe tomu na lakokorov tuboiano, a bajago na kiado kariano nei jian moroano ban m̃ariano na jibe m̃arbutoto napano mijikia tulu kito ram̃arm̃aro.
1CO 15:57 Mia siva toru ka Atua, bior napano naio mila kiado Tubo Yesu Kristo napano mije loa moroano na tuboiano a moroano na kariano a moroano na m̃ariano, mila robokar meuliano nei napano maka rijikia ribisi bogo tai.
1CO 15:58 Bilbilu novo nalo, bior napano Atua mila kirinovo ban kito jibe nei, kamiu kuvitu sikili, kuvikulkulu re tanea vio, a kuvikar rivu ka kuvim̃au Tubo kiano vija kenemiu moroano momou. A bogo na kumitu kumila jibe na, bo ka kuvitu kuvisidomii ka kenemiu im̃auano nei maka tena iakurano, ana mia monoka rivar m̃arati tibe napano Tubo naio jidomio.
1CO 16:1 Kiniou nojidom nesian iliano tealo van kamiu ea tivelinio na kuvarbijio veru na ka rijai tomu na moneano nalo na Yerusalemo, napano abiviuo bogokouo, abe talim̃asa laka ea bogo nei. Nejian iliano jibe na ban lotuano nalo reraio ea tanobuku nei Kalesia ruei, mia vonganei nojidom neverial ka kamiu bunu.
1CO 16:2 Nojidom never tibe nei, ka kuvitu re ga tibe na kario kuvisuvan veru bogo napano noyotuba kean kamiu, mia nojidom ka tikar vonganei, ea bogoti moti na sude nonovio, kamiu veve terakurano monoka kuvar torogio ve telisu na venia napano kumijevio, a monoka kuvar vatitigio tu.
1CO 16:3 Mia bogo napano neviedu, mia rotikar ka rovarvar veru nalo nene rimei vio takurano, a mia kuvitan ea kamiu tealo ka avar jidomiano nei riva Yerusalemo. A mia kiniou novivitauia m̃esi nalo tai ka avario riva van namoneano nalo na yako, ka verial kamiu vanlo.
1CO 16:4 Maka nejikia vo mia bo ka kiniou vijalo p̃eli makanio, mia neial vonio tena iorou.
1CO 16:5 Bo ga, kiaku m̃arabo jibe nei, ber kiniou nojidom nesel ea tanobuku nei Masetonia beamu, a karina mia noyotuba kean kamiu.
1CO 16:6 Maka nejikia vatitig vo ka mia noto vija kamiu rivokar bogo vaio, ana nojo nojidomii ka noto vija kamiu ea bogo na niavo napano ju ka rimei, a kario ka nina, kumijikia kuvitii kiniou bereio ea kiaku m̃arabo, ka navan ea vio vabe bereio na navan eaio.
1CO 16:7 Maka nosidom nesel ea kamiu vonganei napano nojo naba Masetonia, bior tibe na mia noto bogo ve telisu laka, ana mia navan yako beamu, karina neviedu, bior ver Tubo rijamo, nojidom ka noto vija kamiu vesiou kija.
1CO 16:8 Vonganei nojo Eveso, a mia noto kea ea vio na navo, rivokar bogo na Jokoluolu na M̃arayuṽi Vou ribisi.
1CO 16:9 Be bogo dulu miroano laka kia ga ka nala im̃auano novo ea vio nei vo, a vite tai bunu, mia uolu nalo miroano ajua vio nei, mia maka nejikia mia netaluvo den vio nei nagi.
1CO 16:10 Ver kamiu kuvial napano Timoti riyotuba kean kamiu, neber bo, kamiu kuvijuku rivu ka naio, kuvila rijog rivu ka to vija kamiu, bior napano naio jo mila Tubo kiano im̃auano, beverarei ka na nojo nemilaio.
1CO 16:11 Kamiu kuvituvan re ka tomu tealo avitii rivova ka naio, ana mia kuvitikar vatitig naio ea bajago na tum̃aro, karina kuvidu naio toa kiano m̃arabo ka naio mijikia rimei ea kiniou rivu, bior napano nojo rorea naio bija kuruado dolu nalo ka asel ea vio nei.
1CO 16:12 Ea tivelinio na kuruado nei Apolos, nebika kirisikili ban naio ka takisor kuruado dolu nalo nei ayotuba kean kamiu, mia kiano jidomiano kirisikili ka nina maka kiano bogo rimemedu ka rimei. Ana verver ve kiano bogo, p̃eli mia naio riviedu vonga iorou.
1CO 16:13 Bilbilu nalo, vaataro ka kiaku iliano ribisi, mia nojidom nover ka kamiu ka kuvitikar vatitig kamiu, kuvitu sikili vatitigio ea kiado moneano, kumemebiju re ka vite ninio, a kuvisikili.
1CO 16:14 A vite nonovio napano kumilaio, monoka kuvilaio ea bajago na tinietiiano.
1CO 16:15 Bo ka kamiu kuvitilubar Stevanas nei vija kiano torogio nalo, vija im̃auano napano aju amilaio. Ea tomu nonovio nalo ea kenemiu tanobuku nei Akaia, nalo na naruei napano abe moti ka amonmonea. Mia karina, iorou ka amonea, aju amila im̃auano novo laka, aju amija namoneano nalo toru binimei bokar banei.
1CO 16:16 Tomu novnovo nalo jibe nei, bo ka kuvitiri bulaglo ka avuru m̃arabo ka kamiu, a bo ka kuvatove bunu ka tomu dolu nalo napano kumim̃au vei bijalo.
1CO 16:17 Stevanas nei jel ea vio nei ruei, naio binimei bija Vojunatas naljuo Akaikas, a nejaaro toru ka nalo tolu. Nalo aju amija vatitig kiniou ka vite telabo, beverare ga ka napano kamiu bunu kumijikia kuvila ver kamiu kuvitua vio nei.
1CO 16:18 Nalo tolu nei amila bo ban kamiu ruei, mia bogo na abinimei ea vio nei amila kiniou bunu nomijog bo laka, amidular kiaku jidomiano. Bo ka kamiu kuver siva ve toru vanlo bior kialo im̃auano jibe na.
1CO 16:19 Lotuano nalo reraio ea tanobuku na Esia, aberinavo aju ajidomii kamiu laka. A kiado bilbilu juo nei, Akuila naio koano Prisila, bija taara na lotuano na ea kunualo, nalo aber kavijo bo p̃eli bogiano bo ban kamiu ea Tubo siano.
1CO 16:20 Kiado bilbilu nalo ea vio nei ajaaro ka aviviuo kamiu ea m̃esi nei, a kamiu bunu, bogo nonovio napano kuviviuo kamiu, bo ka kuvitu kuvanjumemiu van kamiu a kuviniomo babibiniomiu, ka kuvisaaro ka kamiu vija jidomiano novo.
1CO 16:21 Mia jikar ea vio na telisu nei, kiniou Pol nojo nobokar vovojulu nojo nobivitau ka nesian kiaku iliano maariano van kamiu.
1CO 16:22 Kamiu monoka tiniemiu tii Tubo ve riano, ver makanio, toro napano maka tinien tiio, verikariano na m̃ariano joa naio. Nojo nobolkouo jibe nei, neber Tubo Yesu, neber bo jau komei sop̃eli,
1CO 16:23 a nojo nobolkouo bior kamiu bunu, ka Tubo Yesu kiano tiniememiano to vija kamiu.
1CO 16:24 A jibe bogo nonovio, nemijikia never ea Kristo Yesu siano ka kiaku tinietiiano ban kamiu toru laka ju. Kiaku m̃esi maaro ga ea vio nei, Kiniou, Pol.
2CO 1:1 Bilbilu nalo, kiniou Pol bija kuruado nei Timoti, kumemi juo numisaaro ka nubiviuo vija kamiu bereio ea m̃esi nei, nina kamiu ea Atua kiano yimo lu, ea komeli na toru na Korin, bija kamiu namoneano lu dolu nalo napano kumitu janea vio ea burum̃ara tanobuku nei na Kris. Ea kiano verikariano, Atua bitirilar kiniou Pol ka nemei tibe Yesu Kristo kiano atevi tai, mia vite telabo ka noverialio van kamiu ea m̃esi nei, mia beamu ka nina,
2CO 1:2 neber jibe nei ka kiaku volkouano ka mia karam̃ado Atua bija Tubo Yesu Kristo, naljuo atuvan kialo tiniememiano a tum̃aroano toa kamiu nonovio.
2CO 1:3 Kiniou nojidom noilivu laka van kiado Atua nei napano naio be kiado Tubo Yesu Kristo karam̃ano, a naio be teta novo tai napano be burupati na bajago na tinietiiano, a naio be Atua novo napano bujo ka bajago na ililup̃ilup̃iano.
2CO 1:4 Bogo ninio napano kito robiviuo bogokouo, Atua jo mililup̃ilup̃i vatitig kito, ana mila kito rojikili bereio. A kario, romijikia rodu bajago na ililup̃ilup̃iano napano naio mila ka kito, rolaio kija van kiado bilbilu dolu nalo napano aju abiviuo kialo bogokouo nalo, roijalo tibe na.
2CO 1:5 Be riano laka ka bogo telabo roju robar jogvaiano nalo beverare ka Kristo bario, mia naio mila na romijikia rovar bunu kiano ililup̃ilup̃iano novnovo nalo.
2CO 1:6 Mia bogo napano nubiviuo bogokouo nalo, numijamo ka ga, ka rila ka kamiu kumijikia kuvijog rivu a kuvijikia kuvijev meuliano. Mia bogo na numialio ka Atua mililup̃ilup̃i kumemi, naio bunu bo laka, bior napano mila ka numijikia nuvililup̃ilup̃i kamiu bereio, a numijikia nuviija kamiu ka kamiu kuvila kenemiu jidomiano ve tebievi ka kuvijikia kuvar dulu vovaiano nalo napano kamiu bunu kuvijikia kuviviuo.
2CO 1:7 Kumemi numisidomii venia napano kubar dulu ruei, mila na ea tivelinio na kamiu, kenememi jidomiano maka rimemebiju leleio, ka mia kamiu tum̃abe. Nina bior napano numijikia vatitig ruei ka bekurano napano monoka kuviviuo jogvaiano veverare ka napano kumemi nubiviuo, a mia kuvijikia kuvokar burum̃ara ililup̃ilup̃iano ea Atua bunu, veverare ka napano nubokario ruei.
2CO 1:8 P̃eli kamiu maka kuvijoglubar vatitig vo burum̃ara bogokouo nalo napano kumemi nubinua bogo napano numitu numim̃au janea tanobuku na toru nei Esia, mia nemijikia never ka bova mia bova laka. Vite nalo teremi laka ka kumemi, maka nuvare kalo, banbano numisidomii nuber nina naruei monoka nuvial juluvati na kiado meuliano vonganei.
2CO 1:9 Ee be riano, numijog jibe napano ver toro na toru na komeli tai berial ka mia auebinvin kumemi, mia numialio ka bo laka, bior napano numial ruei ka maka nuvijikia nuvituvan kumemi ga bereio ka mia nuvisikili tum̃abe. Ea bogo na, numitu numidu kenememi meuliano joa Atua jum̃ano ga, nubalea naio bior napano naio ga takurano be Atua napano mijikia rila toro napano m̃aro binimei meul bereio.
2CO 1:10 A numonea naio jibe na, numial ka be riano, naio milarur kumemi, a vonganei kenememi jidomiano jikili vatitig ka naio mijikia rilarur kumemi bereio, maka rive vaarakurano ga, a mia naio to rila bogo nonovio.
2CO 1:11 A kamiu monoka kuvija kumemi napano kuvisidomii kumemi bogo nonovio ea kenemiu volkouano nalo. Tibe na, bogo napano mia Atua rijog volkouano miroano nei, ana mia rilivu ka kumemi vatitig, rilarur kumemi den bogokouo nalo nei bereio, a mia kamiu ve miroano kuver siva laka vanio bior venia napano mia naio rila van kumemi.
2CO 1:12 Kumemi nubar jogvaiano nalo jibe nei, mia vite tai napano jo mila numijog bo laka ea kumemi. Nina jidomiano tai napano joa kumemi napano ber jibe nei, ber ea tivelinio na kenememi bajago kamu ea miremiu, a kamu ea tomu dolu nalo na yetemeriba nei miralo, kumemi numila vite nonovio be lu vatitig, a kenememi meuliano be riano vatitig, jibe napano Atua jidomio. Maka numim̃au vija jidomiano na yetemeriba nei, mia numim̃au bija Atua kiano tiniememiano.
2CO 1:13 Vite nonovio napano nubivitauio ban kamiu ea kenememi m̃esi nalo nei, nina vite nalo napano numijikia ka kamiu kuvijikia kuvulukuio, a numijikia ka kamiu kuvijikia kuvuluku lubario. Ana ver vite nalo tai napano kumitu kumijikia beve torogio ga, nejidom ea bogoti nalo napano ju binimei, mia kamiu monoka kuvila von kuvijog vatitig nonovio.
2CO 1:14 Verver tibe na, bogo napano kito nonovio rotu vio takurano ea bogoti na toru nei napano Tubo Yesu rimei bereio, mia kamiu kuvisaaro laka ka kumemi, a mia kumemi nuvisaaro laka ka kamiu.
2CO 1:15 Mia bior napano nomijikia vatitigio ka jidomiano novo na jibe na ju iviso ka kito ruei, nojidom laka ka bogo napano nojo ka navan ea tanobuku na Masetonia, mia nomei ka namaluvo kean kamiu.
2CO 1:16 Riano, nojo nojidomiio ka nesel ea kamiu ea bogo ve va juo ruei, beamu ea bogo napano nojo nabano Masetonia, a juo nene ea bogo napano nojo nebinimei bereio, napano neberiam̃a mia kamiu kuvitii kiniou noto vatitig ea kiaku m̃arabo ka navan yako Yutea, mia be deio. Nojidom nola rivu ka kamiu tibe na, mia tibe napano kumijikia ruei, maka bunu nejikia nalaio.
2CO 1:17 Mia nejidom ka kamiu monoka kuvijikia vatitig ka bogo napano nojo nojidomii ka neviedu kean kamiu, naio be vite tai napano nojidom laka ka nalaio, napano kiaku jidomiano jikili laka kanio. Naio maka ve vite tai napano nobitoviton eaio, napano nojo nojidomiio ka navan p̃eli mia navan re. Makanio, kiniou maka netibe tomu ninio napano maka kojikia komonmonea kialo iliano,
2CO 1:18 mia jibe napano kumijikia kumituvan ga Atua kiano iliano, kumijikia kumituvan ga bunu kenememi iliano. Kenememi “Ee” maka verenio “Makanio” p̃eli “tibe na kovio,”
2CO 1:19 mia bogo numitu nuberenio “Ee” be “Ee” ga. Kumemi monoka nuve riano tibe na, rila ka nuveverare ka Atua kenerinio Yesu Kristo, nina napano kumemi tolu Silvanus a Timoti, nubinimei numioliolu ka ban kamiu nua ruei. Ea bogo na nuberial ka kiano iliano nalo abe riano bogo nonovio, bior “Ee” kiano be “Ee” bo garuei,
2CO 1:20 a verikariano nonovio napano Atua berialio ruei ea tivelinio na Yesu, maka tai napano rimei tibe sibiano, mia abiniu abe riano. Vite na naruei mila na bogo napano roju robolkouo ban Atua, ea kiano tikariano banbano-o bokar napano rober “Mm,” kito rotu rola ea Yesu Kristo siano.
2CO 1:21 Kristo na naruei napano numioliolu ka ban kamiu, a Atua ga bitiri bulag kumemi ka nuvila kiano im̃auano. A bija naina, Atua mila kumemi bija kamiu, kito robiniu robinimei vio takurano ea naio.
2CO 1:22 Atua bijauia kito ka robe kiano, naruei naio jian Niununo ju joomo ea kito, jibe verikariano tai ka mia kitoliko naio ea bogo nonovio napano ju ka rimei.
2CO 1:23 Kiado Atua nei be riano bogo nonovio, a naio mijikia rijai iliano nei napano nojidom noverialio van kamiu. Jibe napano beamu neberio ruei ka mia noyotuba kean kamiu yako Korin, mia karina maka neviedu, a p̃eli kumisidomii niegeniege kiniou biorio. Mia nojidom noverial van kamiu ka naio maka rivior kiaku vite tai, mia bior kamiu ga, ka napano nemijikia ver neviedu, mia monoka neil sikili van kamiu rivior kenemiu bajago tealo. Mia maka nosidom ka mia nola kamiu kuvijog rivova, naina naruei mila na maka bunu neviedu.
2CO 1:24 Kiniou nemil ban kamiu jibe na, neber bo ka kuvisidomii re kuver nuvisidom nuvitu loa kamiu, ka nuvidu tuboiano loa kenemiu moneano. Maka tibe na, mia kumemi numisidom roim̃au vio takurano ga, ka rila kamiu kuvijikia kuvijog rivu bogo nonovio, kuvisikili kuvitu sikili rivu ea kenemiu viekouoiano.
2CO 2:1 Jibe na napano neberenio, nua na nebinimei beamu, tenalo tai napano monoka noil van kamiu riviorio, napano mila kamiu kumijog bova. Mia vonganei maka nosidom noviedu nala kamiu kuvijog rivova ve vaarakurano bereio, a jidomiano na naruei mila maka neviedu noyotuba kean kamiu na vo.
2CO 2:2 Ver neviedu neil van kamiu, nala kamiu kuvijog rivova, mia kiniou bunu monoka nojog rivova, ana bogo napano kito roviniu rojog rivova tibe na, mia maka bunu tai napano mijikia rijai tai ka rijog rivu bereio.
2CO 2:3 Jidomiano na naruei neberialio ea m̃esi tinene na napano nemijianio biedu beamu ruei. Kiniou nojidom ka kuvila von vovaiano nalo na rimemedu beamu ka rila ka verver bogo napano neviedu, mia maka bunu tenalo tai tu iviso kean kamiu napano mia monoka nojog rivova ka kamiu riviorio. Ana ver kamiu kuvila kenemiu im̃auano rimemedu, mia nemijikia neviedu neialio napano kubinimei bo bereio ruei, mia tibe na, nasaaro laka, a mia kiaku saariano nene rila kenemiu saariano bunu rive toru laka.
2CO 2:4 Neber jibe na bior napano bogo na nebivitau biedu ban kamiu nua na, nomijog bova laka garuei. Nomijog jibe kiaku iviso vaataro vuru kokorovio, a jogumiraku aju ajibiribil. Iliano na jikirkili nalo napano neber ka kamiu ea m̃esi nei, maka nala rivior napano nojidom ka nala kamiu bunu kuvijog rivova, mia nojidom nala ka kamiu kuvitilubar ka kiniou nojo tinieku jii laka kamiu bogo nonovio.
2CO 2:5 Naruei jibe napano kito nonovio romijikia, toro tai jo iviso ka kamiu napano naio mila burum̃ara jaleleano nei. Nojidom never ka jaleleano napano naio milaio, mila kiniou nomijogio bova, mia maka kiniou ga, mila kamiu miroano kumijog bova bunu. Mia maka nosidom never ka kamiu monoka kuvijev vironiano laka van naio bereio,
2CO 2:6 bior napano nemijikia ka kamiu nonovio kumil ban naio ruei.
2CO 2:7 Kamiu kumil ban naio bare bo naruei, mia vonganei be kenemiu bogo ka kamiu kuviekokoaio, tiniemiu riia naio bereio. Ver makanio, mia naio rijog rivova laka bereio, rivano-o rivova ka naio.
2CO 2:8 Ee, nejikili ka nebika den kamiu jibe na, ka kamiu kuvila meravo rivu van naio ka kamiu tiniemiu jii naio keano vo.
2CO 2:9 Kiniou nejirii m̃esi dolu nei nua na, nojidom nevitii veveio ka mia kamiu kumisaaro ka kumonea kiaku iliano nalo napano juaio, p̃eli makanio.
2CO 2:10 Bogo napano neber bo ka kuviekokoa toro tai, nomonea ka mia kuvilaio, a nana napano kubiekokoaio, kiniou bunu nebiekokoaio. A maka nejikia, p̃eli naio mila vite nalo tai bova kean kiniou bunu, mia kiniou najaaro ka noverial ea Kristo mirano ka nebiekokoa naio, a tibe na, rijai kamiu bunu ka kuvisaaro ka kuviekokoa toro dolu.
2CO 2:11 Kito monoka rovitikar vatitig bior napano romijikia ruei Sim̃aro kiano jidomiano va nalo ka rila bulag kito, ana ver rotu roviekokoa kito bogo nonovio, mia naio maka rijikia tuvulu kito leleio.
2CO 2:12 Ana bogo napano maka bunu neviedu kean kamiu yako Korin, naba nomioliolu ka Kristo kiano Ioluano Vou ea komeli na Troas, a ea vio na, nemial jibe m̃aratavo betavo bo ban kiniou ka nala Tubo kiano im̃auano.
2CO 2:13 Ana vite va tai ea bogo na, nojidomiio ka mia neial kuruaku nei Taitas ea vio nene, mia naio maka to. Ana kiaku jidomiano jidom dede laka ka naio, mila na maka vesiou nojuvan nalo nei, nojoa kiaku m̃arabo bereio nemijaka ea tanobuku na Masetonia.
2CO 2:14 Kiaku ieliano ban jibe nei naruei, mia siva toru ban Atua, bior napano bogo nonovio naio ji Kristo ju ka vurim̃arabo ka kito. Beamu, kito robe kiano uolu ga, mia naio buru bulag kito ruei, ana rotakisor naio ravan ea vio nonovio, ana bogo na tomu nalo aial kito, mia avitilubario ka Kristo naio be kiado Tubo. P̃eli nemijikia never tibe na, kito rojibe ka bonotanunu novo tai napano amisebi, napano jo miou janea vio reraio, ana bogo na tomu nalo amijugunio, mia amijugun lubario ka Kristo jo moluo ealo.
2CO 2:15 Atua mila bonoti nene ban ea tomu nonovio, ba bokar nalo napano aju aban ea m̃arabo na ioruriano, a ba bokar nalo napano aju aban ea m̃arabo na nakovioiano.
2CO 2:16 Ana ea nalo napano aju aba kovio, bonoti nene bova jibe vite tai na m̃aro joono, mia ea nalo napano aju amijev meuliano, naio jibe bonoti novo na tanunu na meuliano. Nina naruei romial ka im̃auano na numitu numilaio, naio be im̃auano na toru tai, bior numioliolu ka Atua kiano iliano napano rijikia rila ka toro rijev meuliano p̃eli rijev m̃ariano.
2CO 2:17 Verialiano tealo dolu maka asidomiio ve temi ka im̃auano nei, nalo aju amioliolu ka Atua kiano iliano amila von ka ajev veru eaio ga, mia kumemi maka tibe na. Atua bitiri bulag kumemi, a nimim̃au ea vio medave kamu ea mirano, nuberloglog Kristo kiano ilirianiano nalo, ban tomu dolu nalo maluvo ea moroano napano naio jian ban kumemi.
2CO 3:1 Kiniou neberii kenememi im̃auano na toru mave nei, maka rivu ka kuver p̃eli numitu numil m̃arou jibe naverloglogiano sibisibiano dolu nalo nei. Nalo na abinimei ea kamiu bija m̃esi nalo napano aberiilo ana aber ka monoka kuvivitau ea m̃esi nalo tealo bereio ka averii kialo im̃auano, napano amijikia avario avano. Mia ver kumemi nuvisidom nuvan ea vio dolu tai, maka nuvisidom m̃esi ninio tai na jibe na ka verial kumemi.
2CO 3:2 Ver toro tai jidom rijikia ka kumemi jum̃abe, bo ka rimei rial m̃arati na kenememi im̃auano ea kenemiu meuliano nalo ga. Kamiu na jibe m̃esi tai ruei, napano Kristo ga bivitauia berial kenememi im̃auano. Tomu dolu nalo amijikia amei avulukuio, ka ajikiaio venia napano naio jirio ea kenememi iviso nalo.
2CO 3:3 Mia aial kamiu jibe kamiu m̃esi tai napano Kristo jianio, a kumemi nubario binimei, a mia ajikia avitilubario ka be riano, numila im̃auano ea kamiu bo laka. Mia m̃esi nei maka m̃esi napano uei na vovojulu jirio ea m̃ati niosi, mia be m̃esi napano Atua kiano Niununo jirio ea toro kiano iviso.
2CO 3:4 Jibe na, kiaku iliano nalo nei maka ave ilimoruoiano, mia kumemi numijikia nuvil tibe na bior napano Kristo ga naio mila napano nubalea ga Atua toru laka.
2CO 3:5 Verver kumemi ga, mia maka nuvijikia nuver ka nubare ka nuvila vite tai, bior napano vite nonovio na numilaio, Atua ga mila na nubare ka nuvilaio.
2CO 3:6 Naio naruei jian moroano a jikiaiano ban kumemi, mila kumemi nubinimei nube tomu nalo na kiano im̃auano ea tivelinio na verikariano vou napano naio mila bija kito tomu nalo na yetemeriba. Verikariano na beamu, ajiri bulag kiano iliano nalo ea niosi lu nalo na Mosis kiano tuboiano, mia iliano nalo nene amiija kija kito telisu mia maka rivare. Nalo abo, mia venia napano amilaio, amilaio meravo ga ka kito tomu nalo na lakoroviano na tuboiano, napano mia monoka roviviuo m̃ariano riviorio. Mia verikariano vou, kiano iliano nalo amaluvo ea Niununo Lu, a Niununo nene naruei mila kito romijikia rojev ioruriano.
2CO 3:7 M̃arabo moruo re nua nene, napano aje kiano tuboiano nalo ea subaveru nalo, naio jo berkar m̃ariano ga ban kito, mia be vite lu tai laka. Bogo napano Mosis ba bar subaveru nalo nei, Atua kiano mermerano binimei eaio, ana bogo napano bar veru nalo nei ban tomu nalo na Israel, moroano na mermerano nei jo bavatove ruei, mia nalo maka ajikia avitii mirano bior napano merera mia merera kilkil laka.
2CO 3:8 Jibe na, ver Atua kiano mermerano mim̃au kirisikili ea bogo napano aberial m̃arabo na avokar m̃ariano, mia rim̃au tum̃abe ea bogo napano mia averial m̃arabo na avokar meuliano?
2CO 3:9 Mia Atua kiano mermerano monoka rim̃au ve toru laka garuei ea bogo na, a kito roju romial ruei napano miamoiano na m̃arabo vou jo merera janea vio, jo juvulu miamoiano na m̃arabo moruo nei napano jo batove ruei.
2CO 3:10 Ee, miamoiano na m̃arabo moruo nei merera vatitig nua, mia vonganei, romialio ka kiano miamoiano jibe ka maka bunu merera vatitig leleio, bior miamoiano na m̃arabo vou mijedulu, jo merera toru laka ea vio nalo.
2CO 3:11 Miamoiano napano jo batove nei, be riano ka naio binimei beamu, binimei bija kiano burum̃ara mermerano. Mia vonganei, miamoiano vou napano binimei vonga iorou, mia naio to tulaka, a kiano mermerano toru laka garuei.
2CO 3:12 Ver kito rosidomii nina, mia rila kiado jidomiano sikili vatitig, a romerou re ka rala Tubo kiano miamoiano rimerera ea vio reraio.
2CO 3:13 Mia rosidomii bunu tormoruo Mosis, napano bavin ea burusuku, ana Atua binimei vaataro kanio, mila mirano merera laka. Mia maka rivu ka rotibe ka naio, bior bogo napano naio batove binimei bereio ea tomu nalo na Israel, naio jovuko mirano bija kulum̃arauo ka aialio re, vano-o rivokar bogo na kiano miamoiano to rivatove rivano-o ribisi.
2CO 3:14 Ea bogo na, makalele aial miamoiano nene, bior napano pariparilo kirisikili laka, mia romial bokar banei, ajibe na kia bunu. Nalo aju abuluku iliano nalo na niosi moruo napano aju, mia jibe napano kulum̃arauo nene jo keano, jo joko kialo jidomiano. Mia ver amonea Kristo ga, mia naio mijikia ridular kulum̃arauo nene ka ajikia avitilubar kiano miamoiano vou.
2CO 3:15 Bogo napano abuluku Mosis kiano Tuboiano, jibe napano vite tai jo jetavoko pariparilo,
2CO 3:16 mia bogo napano toro tai binimei ea Kristo, amidular vite na napano joko kiano jidomiano, ana naio mijikia rivitilubar vite. Jibe ga iliano na Vivitauiano Lu nalo napano berii tormoruo Mosis nene, berinavo “Bogo napano Mosis bilig naio bitikar Tubo, kulum̃arauo nene jaluvo den naio bereio.”
2CO 3:17 Ana bogo napano iliano nei ber ka Mosis bilig naio bitikar Tubo, iliano nei Tubo jo ber ka nina napano Atua kiano Niununo Lu. A kito romijikia ka vio vabe Atua kiano Niununo joaio, tomu nalo amijikia ataluvo den moroano na vovaiano, ana amijikia ajev meuliano.
2CO 3:18 Jibe na, kito nonovio napano romonea ruei, maka bunu kulum̃arauo tai to toko mirado, mia roju robitii memedu burum̃ara Atua kiano mermerano. A bogo napano roju robitiio, Atua kiano mermerano nene jo binimei bujovujo ea kito bano napano robinimei jibe mermerobi ka merera bulag kiano miamoiano van tomu dolu nalo. Mia miamoiano nene maka taluvo den kiado meuliano, miyotuba den kiado Tubo, napano naio be Niununo na napano joa kito.
2CO 4:1 Kumemi numitu numerera bulag Atua kiano miamoiano jibe na, naio be kenememi im̃auano na toru tai ka nuviija tomu dolu nalo. Atua kiano iviso bujo ka tinievuiano, a naio naruei jian im̃auano nei ban kumemi, a bogo napano numisidomii nina, mila na maka lele tiniememi maro ka nuvilaio.
2CO 4:2 A bogo napano numim̃au, numitu numim̃au memedu bo bogo nonovio. Tomu tealo amijikia amim̃au lukluk bena ga na amila sibisibiano ga ka avuru tomu nalo kialo jidomiano, a amijikia bunu aviligvilig Atua kiano iliano riva rive dolu, mia kumemi maka nuvila bajago kinkin nalo na jibe na. Kumemi numijikia ver bogo na numitu numim̃au, numitu numila ea Atua mirano, ana monoka nuvila vatitigio. Tomu nalo dolu bunu aju abitivitii kenememi im̃auano, a aju amijog bo kanio, bior napano aju abitilubario ka numitu nuberial Atua kiano ilirianiano nonovio nalo me-medu ga.
2CO 4:3 Kumemi numioliolu jibe nei, maka toro tai napano mijikia river ka naio maka rijikia rijogkar Ioluano Vou napano numitu nuberialio. Mia ver tai river ka maka meravo ka naio, nina maka tai napano jo barlaka ka legiano, mia monoka tai napano jo barlaka ka melijokouo ga, napano monoka ve vite tai ka toko kiano jidomiano, jibe kulum̃arauo neibano roberiio ruei.
2CO 4:4 Ea tivelinio na nalo napano maka amonea vo, tubo va na yetemeriba nei naio jetavoko kialo jidomiano ruei, naio milalo jibe abe merebono, bior napano naio maka sidom ka avitii burum̃ara miamoiano na Kristo kiano Ioluano Vou. Kristo nene kiano mermerano merera laka, bior napano naio bar mirano Atua ga memedu.
2CO 4:5 Kumemi numitu numioliolu ka nina naruei, ninei Yesu Kristo, kiado Tubo. Maka nuvitu nuvidular kumemi ka kamiu bereio, mia kumemi tomu na im̃auano na kenemiu ga, ka nuvioliolu ka Yesu van kamiu ka kuvijikiaio.
2CO 4:6 A vite nonovio nei be Atua kiano im̃auano ga. Ea tiiano, Atua ber jibe nei, berinavo “Mia miamoiano rimei mereralii melijokouo napano jo,” a jo mila jibe na kea ban kito. Nina ga Atua nei napano jo mim̃au vonganei, mila kiano miamoiano merera ba joomo nonio ea kito, mila robakar miamoiano nei napano jo merera binimei den Kristo mirano, napano miyotuba nonovio ea Atua kiano mermerano napano joaio.
2CO 4:7 Jikiaiano nalo na miamoiano na Atua kiano mermerano joa kito jibe na, be vite novo tai napano be lu laka. Ea kumemi napano numila Tubo kiano im̃auano, numial jibe kumemi nube vite kurano tai ga, a maka nuvare ka kiano tolu novo nalo nei ajua kumemi, mia Atua naio bo, jo misonio ea kenememi meuliano julaka. A nina mila ka ver bogo tai nuvim̃auka vite tealo na bo, ana mia nuvitilubar ga ka moroano ve toru ka nuvim̃auka vite nalo nei maka moroano tai na yetemeriba nei napano maluvo den kumemi, mia be moroano tai na tiniabene napano maluvo den Atua ga.
2CO 4:8 Naruei numitu numim̃au bija moroano nene mijai kumemi toru, bior napano numitu nubiviuo bogokouo telabo, ana maka nuvitibirbil vo. Vite telabo amila kumemi numisidomii vonvon laka, mia kenememi jidomiano maka riva kovio.
2CO 4:9 Tomu telabo amila bulag vatitig kumemi, mia Atua bitikar kumemi julaka. Kumemi nubar jaleleano nalo, mia maka ajikia aue bulag kumemi, numeul kia vo.
2CO 4:10 Be riano, bogokouo ban kumemi jibe na naruei, rivano-o jogvaiano na m̃ariano nalo ajua mokotenememi nalo jibe napano Yesu bario ea kiano m̃ariano. Mia kumemi numituvanio ga, bior napano ver Yesu kiano m̃ariano joa kumemi, mia kiano meuliano toa kumemi bunu.
2CO 4:11 Kumemi numim̃au Yesu kiano jibe na, mila na bogo napano numitu numeul ea yetemeriba nei, mia bogo nonovio numitua ga juluvati m̃ariano, ana mia mila ka kamiu bunu kumijikia kuvitii ka Yesu kiano meuliano jo malmaluvo toru ea mokotenememi na m̃ariano nalo.
2CO 4:12 Be riano numitu nuban ka nuvokar kenememi m̃ariano, mia numila jibe na ka kamiu kuvijikia kuva kuvokar kenemiu meuliano.
2CO 4:13 Iliano tai joa Niosi na Iouano Lu nalo, napano toro tai mil, ber “Kiniou nomonea ruei, naruei mila na kiniou nemijikia neverial iliano,” a numialio jibe niununo na vie-kouoiano napano joa toro na, vonganei binimei toru ea kumemi bunu. Kumemi numitibe ka naio ga, napano kumemi bunu numonea, a vite venia napano numonmoneaio, nina naruei numijikia nuverialio.
2CO 4:14 Mia maka numerou ka nuverial leleio, bior napano numijikia vatitig ka kiado Atua napano mila Tubo Yesu meul bereio den nam̃ariano, mia naio mila kumemi bunu numeul bereio jibe Yesu, a mia kamiu bunu kumeul bereio tibe kumemi, ana mia naio rivuru kito nonovio ravan rotu vijaio.
2CO 4:15 Ee, kumemi nubardulu bogokouo telabo jibe na, mia bo ga, bior napano naio be kenememi m̃arabo tai ka nuvijikia nuviija kamiu. Kumemi numisidom ga ka Atua kiano tiniememiano monoka to rivanvano-o tulaka ea tomu nalo ea vio nonovio, ka rila aiaia Atua bogo nonovio, atu aver siva ka naio rivano-o rila kiano mermerano to rimei ve toru lie.
2CO 4:16 Jidomiano novnovo nalo nei mila buriakurano napano bova ban kumemi jum̃abe, mia numitu jikili bo ga numitu. Ea tivelinio na mokotenememi, jo binimei be kulu moruo, jo binimei burukokorovio, mia tivelinio na niunumemi, Atua jo mila binimei be terivou, jikili vatitigio ea bogoti nonovio ga.
2CO 4:17 Bogo kouo tertelisu nalo na yetemeriba nei nalo abe tena bogo bulati ga, mia aju amila kito roju vatitig ka ravar dulu ka rotua mermerano na tiniabene, napano toru laka, bo laka juvulu loa, napano mia rotu rojog rivu kanio to toboto.
2CO 4:18 Vonganei kiado jidomiano maka toa vite nalo napano mirado jo bitikario, mia kiado jidomiano toa vite nalo napano mirado maka rijikia aialio, kario napano vite na mirado mijikia rialio, nalo abe tena ga bogo bulati ea yetemeriba nei, mia vite na mirado maka rijikia rialio, nalo abe tena tu dam̃ariga ea vio mave.
2CO 5:1 Kito romijikia ruei ka mokotenado ea yetemeriba nei, maka rijikia to tulaka. Naio jibe tabobo tai na telisu napano roju rojuluku eaio, napano mia bogo tai monoka mom̃avu garuei, p̃eli tomu dolu nalo amijikia amei aue bulagio. Mia romijikia bunu ka kunuado dolu tai na jikili toru jo, napano maka aim̃aukanio ea vio yetemeriba nei, mia Atua ga mila vatitigio ju be kiado ea vio mave, ana iorou romijikia rava rotuaio.
2CO 5:2 Yetemeriba nei jibe vio na tegiano ga, a rajaaro ga ka rataluvo denio, rojidom rava rotoluku ea kunuado na mave.
2CO 5:3 A bogo napano mia rava rotuaio, mia maka bunu rojog ka maka ve kunuado tai, mia roialio navo ka kiado vio memedu jo.
2CO 5:4 Ee, mokotenado jibe tabobo tai napano rojuluku eaio ea yetemeriba nei, be riano ga, bogo napano roju jibe na roju rejerjerm̃i julaka bior jidomiano kokouro nalo na bogokouo nalo napano roju rabarduluio. P̃eli bova ka amei auebinvin bulag mokotenado, mia jidomiano tai monoka toa kito ka ver alaio, bo ga na, bior napano bo laka ka rotaluvo den tabobo nene, rava rotua yimo novo tai beamu. Monoka rovitilubar ka bo laka mokotenano na m̃ariano nei ribisi, ana mia mokotenano vou tai na meuliano mijikia rimei ridu jeleigio.
2CO 5:5 Bogobe ruei, Atua jo mim̃au ka rila vatitig kito ka ravan ea kiano vio tibe na naruei. Naio midu Niununo joa kito ka rila rosidomial tulaka ka kiano verikariano ka rila tibe na ka kito mia rimei ve riano ga.
2CO 5:6 Kito roju rojidomial nina, mila na bogo nonovio ga kito rojikili. Romijikia ka vonganei, roju romila kiado vonuo ea tabobo nene, napano be mokotenado, mia maka rotua kiado vonuo novo na vija Tubo vo.
2CO 5:7 Tibe na, bogo napano roju kia ea yetemeriba nei, monoka rola von re rotu rotua venia napano mirado ga mijikia rialio, mia monoka rotu sikili ea viekouoiano.
2CO 5:8 A ea tivelinio na kumemi, numitu kirisikili vatitig kea ka nuvitua yetemeriba nei ka nuvila kiano im̃auano, mia nubitii ka bo lie bunu ver nuvijikia nuvituvan mokotenememi na yetemeriba nei, nuva nuvitua kenememi vonuo memedu vija Tubo.
2CO 5:9 Jibe na, ver kito rotua yetemeriba nei, p̃eli rotu mave, mia tulaka monoka rola von ka rola venia napano mia naio saaro kanio.
2CO 5:10 Monoka rosidomii ka bogo napano Kristo riva totano mave ea kiano jobaro lu na tibureiano, mia kito ve terakurano monoka rava rosikili rotua mirano. Naruei ea bogo na, mia naio ga rila ka mia rivu van kito, p̃eli rivova van kito, takii ga venia napano roju romilaio bogo na rojua mokotenado na yetemeriba nei.
2CO 5:11 Bogo napano tiniememi maio ka Kristo tibure tomu nalo, numerou, a numial jibe bo ka nuvim̃au sikili ka nuvuru tomu nalo ka avakovio re. Atua bitilubar batitig bajago na kenememi im̃auano nalo nei, a neber p̃eli kamiu bunu kubitilubar ka numim̃au jibe na ga napano naio jaaro kanio.
2CO 5:12 Kiniou nojo neberii vite nalo nei, maka nala rivior napano nojidom ka kamiu kuvidular kumemi bereio, mia bo ka kuvijikia kuvisaaro ka venia napano numitu nuberenio. Ver kubakar vatitig kenememi iliano nalo, mia rila na iliano nalo nene amijikia atua kamiu, ana mia kumijikia kuverdop̃e nalo napano aju aber p̃eli abo ruei. Mia nalo aju amil vavavin ealo ka venia napano aju amilaio ea tomu nalo miralo, mia maka tiniel maio ka venia na ju joomo ea kialo meuliano.
2CO 5:13 Nemijikia ka bogo napano neber iliano nene, mia ve tealo napano atu vija kamiu napano monoka aver nomiavovu, mia nina bo ga na. Ver be riano ka numiavovu, numiavovu bior napano numila Atua kiano im̃auano nalo m̃elea, mia ver numitu parimememi bo ga, parimememi bo ga bior napano tiniememi maio ka kamiu, ana kamiu monoka kuviagago ka kumemi.
2CO 5:14 Vite takurano ga jo jilanvuu ka kenememi meuliano ka nuvila Kristo kiano im̃auano novo nalo, naina kiano tinietiiano. Kumemi numonea jikili ka kiano m̃ariano naio takurano mijikia rilarur kiado meuliano nonovio, ver p̃eli, mia kito nonovio monoka rom̃arm̃aro ga, mia maka kito tai na rijikia rimeul.
2CO 5:15 A naio m̃aro kar kito nonovio jibe na, naio jidom ka kito napano romonea naio a roju romeul kea ea yetemeriba nei, maka bunu roim̃au kiado ga, mia roim̃au kiano napano naio m̃aro ka rilarur kiado meuliano nalo, karina Atua bitirilar naio bereio.
2CO 5:16 Jibe na, bo ka rovitii re bunu tomu nalo takii jidomiano na yetemeriba nei. Beamu, bogo napano Kristo joa yetemeriba nei, tomu nalo aju abitii naio jakii jidomiano na yetemeriba nei, ana vonganei, rovitii re bunu naio tibe na, a maka rivu rotu rovitii tomu dolu nalo takii jidomiano na yetemeriba nei bunu.
2CO 5:17 Nina bior napano toro kei napano ver rimonea Kristo, naio rimei tibe toro terivou tai garuei. Kiano meuliano moruo na re nua ba kovio, a vonganei, kiano meuliano vou maluvo ruei.
2CO 5:18 Atua ga rila ka romijikia rovilig kiado meuliano tibe na, bior napano naio miila Kristo binimei ea yetemeriba ka rila kiado m̃arabo ka romei bereio ea naio, a jidom ka kito monoka rovuru tomu dolu nalo bunu amei eaio.
2CO 5:19 Jibe na, Atua mim̃au jel ea Kristo ka rivuru tomu nalo na yetemeriba amei ka ave takurano vija naio bereio, napano maka bunu sidomii ka sian vironiano vanlo bior kialo kariano. A bija nina, naio jidom ridu kiano iliano toa jum̃ado, ka rodu rivan ea kulo dolu nalo ka nalo bunu amei bere eaio.
2CO 5:20 Vite na naruei mila na kumemi nubinimei nube Kristo kiano tomu nalo ka nuvar Atua kiano iliano rivano. Tibe na, bogo napano nuberial iliano ban kamiu, jibe napano Atua ga jo mil, ana numisidom laka ka nuvika sikili van kamiu nonovio bereio nuber bo, ea Kristo siano, kamiu monoka kumei bereio eaio.
2CO 5:21 Naio naruei tinien miia laka kito, ana midu kenerinio nei Kristo, napano maka leleio rila kariano, miila naio binimei jibe toro na bar kiado kariano nonovio robiniu. Atua mila jibe na ban naio ka rila kito tomu na romila kariano, romijikia romei rove tomu memedu nalo ea Atua mirano.
2CO 6:1 Kumemi numim̃au jibe tomu nalo na amim̃au vei bija Atua, a numijikia jum̃abe ka naio be tinievu laka ban kito robiniu. Tibe na, numisidom nuvika sikili van kamiu, ka kiano tinievu novo napano binimei ea kamiu, maka rivu ka rimei kurano ga. Kamiu monoka kuviduio, a monoka kuvituvan rila kiano im̃auano ea kenemiu meuliano.
2CO 6:2 Iliano tai napano joa Niosi Moruo ber jibe na ruei, napano Atua ber jibe nei, berinavo. Memedu ea bogo napano bo ka kamiu, kiniou nomiagago ka kenemiu tegiano nalo, a memedu ka bogoti na ioruriano, kiniou nemei neiija kamiu. Naruei ea kenememi vitiiano, numijikia nuverial ka vonganei be kenemiu bogo memedu naruei, vonganei naruei be bogoti na kenemiu ioruriano.
2CO 6:3 Ea tivelinio na kenememi im̃au-ano, numitu numila von kirisikili ka nuvim̃au kanio rimemedu tulaka, ka nuvituko m̃arabo re ka tomu ninio napano ajidom amei. Maka nuvisidom ka kulo dolu aver ka numila vite tai kirivova, p̃eli numilaluvu im̃auano tai kovio.
2CO 6:4 Numitu numila vite nonovio ga ka riverial ka numitu numim̃au memedu jibe tomu novo nalo na Atua kiano im̃auano, naruei numitu numijamo ka nuviviuo vite ve miroano. Numitu nubakar kumemi ka nuvar dulu ka nuvila nono vatitig im̃auano nalo, kumemi nubinua jaleleano nalo, bogokouo nalo, a jogvaiano nalo.
2CO 6:5 Nalo ajumolu amilkuei kumemi, a abitiv kumemi, a abuku kumemi ea nalakoiano. Bogo miroano, numim̃au mia numim̃au, maka numonmelio rivu, a maka simemi sinaniano rivu.
2CO 6:6 Bova laka ka kumemi jibe na, mia numitu numim̃au memedu ga, a numitu numim̃au bija jikiaiano, bija jidomiano na tebievi, a bija tinievuiano. Tomu nalo amial ka kenememi meuliano bujo ka Niununo Lu, a kenememi bajago bujo ka tinietiiano na be riano,
2CO 6:7 napano nuberial iliano nalo napano maka ave sibiano, napano numim̃au ea Atua kiano moroano, a napano ea jumememi nalo, ea vameruo a vamali, nubokar vite nalo na mira ka rila memeduano tovulu nonio vovaiano.
2CO 6:8 Tomu tealo amidular kumemi, a tealo amidu kumemi numitu yetano garuei, tealo aberii vatitig kumemi, a tealo aberii kumemi bova laka, mia kumemi maka nuvisidomialio, nuban ga. Maka nuvila sibilili toro tai, mia aju amial kumemi jibe maka nuve riano leleio.
2CO 6:9 Nalo amijikia vatitig kumemi ruei mia aju amila jibe maka asidom ajikia kumemi lele. Kumemi numeul vatitig bo numitu keano, mia aju ajidom ver num̃arm̃aro garuei. Nina naruei jo ban jibe na ea kumemi vonganei, mia be iakurano napano nubar vironiano nalo, maka ajikia adular kea kenememi meuliano.
2CO 6:10 Be iakurano napano jogvaiano nalo abujo laka, mia kenememi iviso jaaro julaka ga. Be iakurano napano bogo nonovio jumememi beteauo, mia numitu numila tomu dolu nalo abar vite miroano. A be iakurano napano maka ve kenememi titai, mia nubitii ka vite nonovio be kenememi ga.
2CO 6:11 Bilbilu nalo na Korin, kumemi maka jidomiano va tai bere ea kamiu napano numila luku ju. Nuberial nonovio jidomiano ban kamiu ruei, a tiniememi maio ka kamiu laka.
2CO 6:12 Maka numila vite tai napano mia p̃eli tukovio ka kiado bilbilu novo, a ver tukovio ea vio tai, nina bior napano kamiu ga kubakakar jidomiano va tealo ea kumemi aju.
2CO 6:13 A ver tibe na, kiniou monoka noil van kamiu tibe keneriku nalo ga naruei. Nojidom novika den kamiu tibe nei, neber bo, kamiu kuvilavan re bunu kenemiu jidomiano luklukuano tai bereio, mia kuvila von ka kuvila kenemiu iviso rivetavo ka kumemi.
2CO 6:14 Kiniou nojidom never ka kamiu mia kuvitu re kuvila von ka kumei ve takurano vija nalo napano maka amonmonea. Bo ka kuvisidomii kario ka bajago na memedu bija bajago na kariano, naljuo maka ajikia amei avuron vio takurano, a legiano maka jikia rila bilbilu vija melijokouo.
2CO 6:15 Kristo maka rijikia rive kiano jidomiano tai vija Sim̃aro, a toro napano monmonea maka lele kiano vite tai vija toro napano maka monmonea.
2CO 6:16 Tavoru sibisibi nalo maka ajikia atu joomo ea Atua kunuano Lu bogo tai, a iliano nei be nioti nene bior napano Kunuano Lu naio maka ve yimo tai ga, mia naio be kito, Atua na meul kiano namoneano nalo. Nina jakii ga kiano iliano tealo, napano naio berenio jibe nei, berinavo “Kiniou mia notoalo, ka mia naiel iviso kalo. Kiniou mia neve kialo Atua, mia amei ave kiaku torogio nalo rimemedu.
2CO 6:17 Jibe na, jibe kialo Tubo, neber ka kiaku nalo nei ka monoka ataluvo den nalo dolu. Monoka atiburei nalo den tomu va nalo. Monoka amei aveli vatitig, a monoka atu re vaataro ka niamiamo nalo, tibe na mia nemijikia nojamo kalo ka amei atu vija kiniou.
2CO 6:18 Mia kiniou, jibe Atua Sop̃i, nemijikia never kalo never ‘Kamiu kumei ka neve karamemiu, a ka kamiu kuve keneriku nalo rimemedu.’ ”
2CO 7:1 Bilbilu nalo, naina naruei Atua kiano verikariano novo nalo napano ber ka mia rivuru kito tibe kiano m̃aratavo nalo. Naio mila jibe na ka kito bo laka, ana bo ka kito ravatove ka naio tulaka, a monoka rolakon niamiamo ea kiado meuliano. Kariano tealo romila ea mokotenado, a tealo romila joomo ea kiado iviso ga, ana monoka robisi kalo nonovio, a monoka romei roveli vatitig mia roveli vatitig, tibe napano naio jidomio.
2CO 7:2 Kiniou nojidom nevika bereio den kamiu ka tiniemiu ser re kumemi, mia kuvidu kenememi vio tai ea kenemiu iviso nalo, ka nemijikia never vite tealo van kamiu bereio. Bo ka kuvila tibe na, bior napano maka kamiu tai napano numila bova kanio, p̃eli numila bulagio, p̃eli nubilivilig lelar naio.
2CO 7:3 Ana bogo na neber iliano nalo na, p̃eli kamiu kuberiam̃a nojo nojidomii va ea kamiu, p̃eli nojidom neil niegeniege kamiu, mia maka tibe na leleio. Makanio, jibe ga napano neber ka kamiu ruei, nuber kumitua kenememi iviso ruei, a roju robinimei takurano riva rivokar napano jibe rojua meuliano takurano ga, ka verenio tai riviviuo m̃ariano, mia rojog jibe robiniu rom̃arm̃aro.
2CO 7:4 Ee, nemijikia never tibe nei never kiniou nojo ban kamiu toru laka mia toru laka, nobe m̃arou laka ka kamiu, a bogo napano nojidomii kenemiu im̃auano novo nalo, aju amijakar laka kiaku jidomiano. Be riano napano nobiviuo jaleleano laka, ana kumitu kumila ban kiniou napano jogvuiano a saariano bujo laka ea kiaku iviso.
2CO 7:5 A jibe na ga bunu nanua na, bogo napano nubano numoluo ea tanobuku na Masetonia. Ea vio na, nubiniua bereio baravoiano nalo na jikirikili, mila na numerou kija, a mokotenememi maka bogo ka jilimebi leleio.
2CO 7:6 A kiado Atua be Atua na dup̃ilip̃ili nalo napano amijog kirivova ea kialo iviso, ana naio tinien maio ka kumemi, mila bilbilu novo nei Taitas maluvo kean kumemi, a bogo napano numial naio bereio, numijog bo laka.
2CO 7:7 A bogo napano naio jukunu ban kumemi, naio berial tonovnovo nalo napano kumilaio, mikurukar kumemi toru laka. Naio berii jum̃abe napano naio bunu, bogo napano maluvo kean kamiu, mileal vite miroano ea kamiu napano mikurukar naio, a berealio ka kamiu kumila merevuiano bior kenemiu iliano nalo nanua na, napano vonganei, kubilig kenemiu jidomiano, kumitu kumisikili ea tivelinio na kiniou. Berialio ka kumisidom laka monoka noviedu neadu ka kamiu, mia banalo, bogo napano nomijog nina nomijog bo mia nomijog bo.
2CO 7:8 Bogo napano nobivitauia m̃esi dolu nei biedu kean kamiu, nejuvan bano ana maka vesiou nojidomiikar bereio, nojidom ver notuvanio re ga. Nina bior napano nemijikia ka kiaku iliano nalo ajikirkili, mia monoka ala kamiu kuvijog rivova kija. A bogo napano nomijog Taitas kiano veriiano, nomialio ka be riano, kiaku m̃esi mila bulag kenemiu jidomiano nalo. Ana nina tena bogo bulati ga, iorou kamiu kuvilig kamiu bereio, ana mila na tinieku jaaro bereio napano nejuvan m̃esi neibano biedu.
2CO 7:9 Jibe maka neverenio ka nejaaro napano m̃esi neibano mila kamiu kumijog bova, mia nejaaro ga napano jogvaiano nei mila kamiu kubilig kamiu. A kenemiu jogvaiano nei, maka kumemi napano nuvilaio rimaluvo kean kamiu, mia Atua naruei milaio maluvo.
2CO 7:10 Tibe na, jogvaiano nei naio be jogvaiano novo tai napano binimei mave, napano mila toro bilig naio ka rijikia rijev ioruriano. Mia jogvaiano dolu, napano jogvaiano na yetemeriba nei, naio be jogvaiano va tai napano mia rila toro rijog rivova ga riva rivokar m̃ariano.
2CO 7:11 Kamiu bunu kuvijikia kuvitilubar ka jogvaiano napano Atua jianio maluvo kean kamiu, naio mila im̃auano novo tai. Mila kamiu kumisidomii temi laka ea kenemiu meuliano, a kumila vonvon laka ka kuvila siemiu amei rivu bereio. Beamu, tiniemiu mimi napano aberii vovaiano napano jo iviso kean kamiu, a bogo napano nomil ban kamiu biorio, kumial von m̃arabo ana kumerou. Kamiu ga kuvitumormolu kuvil van kamiu bereio, a kuvisian vironiano van nalo napano amila bova, ka vovaiano tai re bunu toa kamiu.
2CO 7:12 Nojidom never ka m̃esi neibano, nejuvanio bior napano nojidom noil van naljuo napano amila bova, a tinieku miia bunu tormoruo nei napano naljuo amila bulag laka naio. Nejuvanio bunu bior napano nojidom ka monoka kuvitilubar ka be riano, kamiu tiniemiu jii kumemi, ana bogo napano nuvil van kamiu ea Atua siano, kamiu kuvisaaro ka kuvamenea venia napano nuberenio.
2CO 7:13 Bogo napano Taitas binimei berial ban kumemi ka kumila jibe na ruei, mijalar kenememi jidomiano toru laka. Kumemi numisaaro laka ka nina ruei, mia bogo napano Taitas jukunu lie ka ban kumemi, berii jum̃abe ka kumila bo laka kanio, numisaaro lie vo garuei. Naio berii napano jo bija kamiu, kumiija naio, a kumila naio jaaro laka bereio.
2CO 7:14 Kiniou neberii kamiu ban naio beamu ruei, neber ka nabarvar ka kiniou laka ka kenemiu bajago novo nalo, mia bogo napano naio maluvo kean kamiu, naio milealio ka maka nala sibi, mia neber be riano ga. Jibe nanua, nojo neber vite na be riano ga ban kamiu bogo nonovio, a vonganei kumila napano kiaku iliano ban Taitas ea tivelinio na kamiu binimei be riano vatitig bunu.
2CO 7:15 Naio maka rijikia tiniene bobogia ka bogo napano naio biedu, kamiu kumerou laka a kumemebiju, mia bogo napano naio mil ban kamiu, kumiagago kanio, kubatove vatitig ka kiano iliano. Kenemiu bajago novo jibe na mila ka bogoti na naio binimei bereio, jo jidomii laka ka kamiu bogo nonovio ga.
2CO 7:16 A ea tivelinio na kiniou, neber ga ka kiniou najaaro mia najaaro, a vonga nei nemial jibe ka mia nemijikia notuvan kamiu vatitig ea vite ninio ea bogo ninio ga.
2CO 8:1 Bilbilu nalo na Korin, kumemi numisidom kamiu kuvijog ioluano na vite novo tai napano jo malmaluvo ea yimo lu nalo na burum̃ara tanobuku na Masetonia, napano Atua jo mim̃au ea kiano tiniememiano.
2CO 8:2 Ea vio na, nalo abar dulu kija bogokouo nalo napano vite miroano amila von niegelo, a ba bokar napano maka bunu ve kialo vite tai, mia nalo na, maka lele abisi ka asaaro ga ka venia napano abiniuaio. Jum̃alo yauo ga, mia numiilo laka ka bogo napano amijog ka namoneano dolu nalo na Yerusalemo abiniua bogokouo bunu, ana tiniel miialo a jibe ka jum̃alo nalo na abinimei abujo vatitig bija vite nalo na ajianio jibe kialo jidomiano tai ban kulo dolu nalo nei.
2CO 8:3 Maka toro tai napano river ka monoka ala tibe na, mia nalo ga aberii ka alaio, a nomijikia vatitig ka ajian vite nonovio napano amijikia asianio, bano-o napano tealo ajian jovulu venia napano amijikia asianio.
2CO 8:4 A bogo napano abar bulag nonovio kario, abar jua jumememi, nalo ajikili ka nuvial m̃arabo tai ka nuvituvan jidomiano nei rivano, bior napano aber ka ver ve bogo tai ka ajikia aija namoneano lu dolu nalo tibe na bereio, mia rive vite novo tai laka kalo, na-pano mia asaaro laka kanio.
2CO 8:5 Nalo abo laka, bior napano beamu nalo amidu momou kialo meuliano jibe jidomiano tai ba ban Tubo, amidulo aju yetano ka kenememi iliano, ana iorou, amidu vite venia napano be kialo jibe jidomiano tai binimei ka namoneano dolu nalo. Nalo amila bo lie jovulu venia napano kumemi numisidomii ka mia alaio, a be riano, amilaio memedu ga ka Atua kiano tinieiiano.
2CO 8:6 Ana bogo napano numial ka tomu dolu nalo na Masetonia amila jibe na, nuber p̃eli bo ka nuviila Taitas rimei bereio ea kamiu, ka rikurkar kamiu ka kuvila tibe na bunu. Numijikia ka bogo napano naio binimei nua, naio jo mil ban kamiu, a kumitikar ka kuvila im̃auano novo na tinievuiano na naruei, mia bo ka naio rimei rila nonovio vatitig vija kamiu.
2CO 8:7 Numial napano im̃auano dolu nalo, kumitu kumilaio vatitig ruei, napano kenemiu viekouoiano toru laka, kumitu kuberial ilirianiano bo laka, kumijikia vite miroano ruei, kumitu kubarvar vatitig kamiu ka im̃auano, a kumitu tiniemiujii kumemi namoneano dolu nalo toru laka. Kamiu kumila im̃auano nalo na ba jovulu venia napano numisidomii nuber bare ka kuvilaio, ana bo kuvila tibe na bunu ea tivelinio na im̃auano na asian jidomiano nene.
2CO 8:8 Kiniou neber jibe na, mia iliano na naio maka tibe ka tuboiano tai napano mia monoka atakiio. Vite na joa ga kamiu, p̃eli bo ka noverii nalo dolu tealo van kamiu tibe na, neverial vite novo nalo napano amilaio ruei. A bogo napano mia kuvijogio, mia rila kamiu kuvitii kija kamiu bereio, kuver kenemiu tinietiiano toru bunu, beverare ka nana kanalo, p̃eli na makanio?
2CO 8:9 A bo ka rosidomii bogo nonovio Yesu Kristo kiado Tubo kanano burum̃ara tiniememiano, napano beamu, naio jibe ka be kiano vite nonovio, ana tinien maio ka kito ea yetemeriba, naio binimei jibe napano maka ve kiano titai, ka rila romijikia romei tibe napano be kiado vite nonovio.
2CO 8:10 Bo ga, nina naruei kiaku jidomiano tai ea tivelinio na. Kiniou neber ga ka nemial jibe ka vite na, kumisidom kuvilaio ka yuka na barlaka ruei, a kumitikar ka kuvilaio, mia bo lie ka kuvitumolu bereio ka kuvila nonio vatitigio.
2CO 8:11 Bogobe ruei, kenemiu jidomiano ka kuvila tibe na naio jikili batitig bo, mia vonganei bo ka kuvisikili vatitig ka kuvim̃aukanio, a ka kuvim̃aukanio rivoru ea juluvati napano kamiu kubare kanio.
2CO 8:12 Atua maka river ka monoka reje jidomiano todovul venia napano joa jum̃ado ka rosian, mia jidom ga ka rosaaro ka roija toro dolu, a reje jidomiano rimemedu ea venia napano rabare ka rosianio.
2CO 8:13 Ana bogo napano nobika kamiu ka kuvisaaro ka ijaiano tibe na, maka nosidomii ka nala ka mia im̃auano rimei ve temi ka kamiu mia rimei rimonmaio ga ka kulo dolu nalo.
2CO 8:14 Kiniou nojo nojidomii ga bo ka kito nonovio roveverare ga. Ea bogo na, kenemiu vite miroano, mia nalo maka kialo tai, mia tibe na, bo ka kenemiu vite torogio riva rila ka nalo ve kialo vite nalo ve telisu, a p̃eli bogo tai ver kamiu kuvokar jogvaiano ea yuka nalo napano ju ka rimei, kialo vite torogio mijikia rimei rila ka kamiu kenemiu ve telisu. Bogo napano roju romijaijai kito jibe na bo, mila na kito nonovio roju beverare,
2CO 8:15 a mia tibe iliano tai na Niosi Moruo napano ber jibe nei, berinavo “Toro napano bar sinaniano miroano binimei, naio jenio ba biniu koko, mia iorou kanio maka bunu sano sinaniano tai to, a nina napano ba bar sinaniano telisu ga, napano mialio ka bare ga, mia maka jum̃ano ve bulati ka vite tai.”
2CO 8:16 Beamu ruei binimei, nojo nojidomii laka kamiu, a vonganei, neber siva laka ban Atua ka naio mila ban Taitas ka vonganei, jidomiano na jikili novo tai joa naio ruei, ka naio monoka riviedu rijai kamiu.
2CO 8:17 Ana bogo napano kumemi nubika naio ka riviedu riyotuba kean kamiu, naio jaaro ga, bior napano jidomiano tai ka rila tibe na joa naio ruei.
2CO 8:18 A maka naio ga ve takurano, mia nuviila kumemi dolu tai rimei vija naio, napano be kuruado tai napano namoneano lu nalo ea vio miroano amijikia vatitig naio, bior napano naio be toro na bo tai na mioliolu ka Ioluano Vou.
2CO 8:19 Namoneano lu nalo ajaaro ka kiano im̃auano, ana nalo abijauialar naio ka to riel seliviv vija kumemi ea kiado tanobuku nalo, bogo napano numitu nubar biji veru na jidomiano nei napano ka rijai namoneano nalo ea vio Yerusalemo. Kumemi numila im̃auano nei bior napano tiniememi jiilo laka, a bogo napano mia avokar jidomiano nei mia aiilo vatitig ka bajago novo na ijaiano napano rolaio vanlo, mia adular Tubo siano rivavin.
2CO 8:20 A numisaaro laka ka kuruado dolu nei jakisor kumemi, bior napano naio mijikia rijai kumemi ka vitikar veru na toru nei napano aju ajuvanbijiio. Numisidom nuvitikar kanio takii kiano m̃arabo novo nalo ga, maka nuvisidom nuvijog iliano ninio rimei iorou.
2CO 8:21 Numisidom nuvila im̃auano nei tibe napano mia rimemedu vatitig ka Tubo kiano vitiiano, a mia rimemedu vatitig ka tomu dolu nalo kialo vitiiano bunu.
2CO 8:22 Ana ea tivelinio na Taitas naljuo nei, mia nuviila kuruado dolu tai bereio rimei ka rial kamiu. Naio bunu be toro tai napano nubar vite miroano ajua jum̃ano ruei, a numila von naio jibe na bano-o numialio ka naio biekouo vatitig ea vite nonovio. Naio be toro na bo tai ka rim̃au, a bogo napano kiniou nojo neberii kenemiu bajago novo nalo banio, naio monea kamiu laka ka ver rimei kija rim̃au vija kamiu mia rivu laka.
2CO 8:23 Tibe na, ea tivelinio na kiaku bilbilu novo nei Taitas, kamiu monoka kuvitii naio kuver kumemi juo naruei numim̃au vio takurano ka nuviija kamiu, a ea tivelinio na kuruado juo dolu napano mia amei vija naio, monoka kuvitiilo kuver nalo abinimei ka kamiu ea namoneano lu dolu nalo na tanobuku nei sialo, a abinimei ea Kristo siano napano kialo meuliano jo berial kiano bajago novo nalo.
2CO 8:24 Naruei nojidom nover ka kamiu ka bogo napano nalo nei amei ayotuba kean kamiu, kenemiu meuliano nalo monoka atu averial bunu kenemiu bajago novo nalo. Kiniou nojo nomioliolu kamiu ka nalo ruei, ana bo ka mia avitilubar vatitig ka miralo ka kiniou neber be riano ga, ka kenemiu tinietiiano toru laka, a mia ajikia asian veriiano novo tai napano riverii kamiu riva van namoneano lu dolu nalo.
2CO 9:1 Kiniou nebivitauia bulag iliano miroano ruei ea tivelinio na ijaiano na veru napano roju robarbijiio ka rijai Atua kiano namoneano dolu nalo nei, a neber p̃eli kamiu kumitu kumisidomii vite nalo na kia ga vo.
2CO 9:2 Nemijikia vatitig ruei ka kumisaaro ka kuviasol ea im̃auano na abarvar veru na ijaiano nei bior napano ka yuka na barlaka ruei, kumitu kumila bijii vite ka kuvijev kiano veru ve telisu. A bogo napano naban ea tanobuku nei Masetonia neberii kamiu banlo, neber kamiu kulo Akaia, kumitikario ruei, a bogo napano amijogio jibe na mikurlo kija, mila na kialo jidomiano ajevijo ka nalo monoka asikil lie ka ala kialo togio.
2CO 9:3 Nojo neberii kamiu ban tomu dolu nalo ruei, neber kamiu kumim̃au bo jibe nei jibe na, ana ver maka kuvilaio, mia kirivova ga! Naina naruei mila kiniou nojidom neiila kuruado tolu nei ka aviedu avitii vatitig kamiu, bior napano neber banlo neber monoka kuvarvar veru nalo nei ruei, naruei amijikia amei alealio ka jibe napano neberenio p̃eli na makan vo.
2CO 9:4 Ver makan vo, monoka kuvila sop̃eli ka kuvilaio, bior napano vaataro mia kiniou bunu noviedu, a mia noviedu vija tomu tealo na Masetonia, napano neberii kamiu banlo ruei. Naruei ver nuviedu a aialio ka napano maka kuvila vite rivu vo, mia ve burum̃ara imouiano van kiniou, a van kamiu bunu, mia nalo monoka averii kiniou nomila sop̃eli laka ka nomiaia kamiu banlo.
2CO 9:5 Nina naruei nemialio ka monoka nevika Taitas nalo ka aviedu beamu ka kiniou, ana amijikia aim̃au vija kamiu ka kuvarvar veru nalo napano kuberkario ka kuvario, kuvarbijii vatitigio tu, ana kario numei nuvar nuvano. Kiniou neber jibe nei, ana kamiu kuvisidomii re kuver nojo nomiyuku kamiu ka monoka kuvar jidomiano nene. Ijaiano na jidomiano jibe nei, naio be vite tai napano kube tinievuiano, mia kenemiu jidomiano ga asaaro ka alaio.
2CO 9:6 Mia iliano tai napano nemijikia never sikili van kamiu jibe nei, ber toro napano mebijo telisu, mia naio rivar ve telisu, mia toro napano mebijo toru, mia naio rivar ve toru.
2CO 9:7 Ea tivelinio na reje jidomiano van toro dolu, kito terakurano monoka rosian venia ga napano kiado jidomiano berkario ka ralaio, mia maka rivu ka kosian napano maka kosaaro ka kosianio, p̃eli kosian bior napano toro dolu miyukuso ka monoka kosianio. Atua maka sidom nina, mia naio jidom laka toro napano jian vite miyotuba ea tinievuiano a ea kiano jidomiano naio takurano.
2CO 9:8 Naruei ver jau tai napano kojo kojian jidomiano bano, jau kosidomial re kanio, bior napano Atua mijikia sian kean jidomiano novo nalo amei easo, ve miroano mia ve miroano. Naio mijikia rila napano bogo nonovio ga kovar vare ea vite nonovio napano kojidomio, a mave ka naina vare ka kosian bereio ka ijaiano na im̃auano novo dolu nalo.
2CO 9:9 Nina jibe iliano tai na Niosi na Iouano Lu nalo, napano berii Atua kanano tinievuiano, berinavo. Naio jo jijian bulag jidomiano novo nalo ban tomu nalo napano jum̃alo beteauo, kiano bajago novo aju julaka.
2CO 9:10 A Atua, naio naruei napano jian kurukuti ka romebija ea borotano, a naio naruei napano mila kurukuti bar m̃arati ka roim̃auka sinaniano eaio, a jibe nei, mia naio jian venia napano kumisidom ka kuvim̃au eaio, a mia rila kenemiu saba nalo amei ve miroano, a mia rila ka kenemiu im̃auano nalo rimemedu ka avar m̃arati ve miroano.
2CO 9:11 Mia naio rivitilubar vatitig kenemiu bajago novo nene, napano bogo nonovio kumisaaro ka kuvisian vite, naruei mia naio sian kean meran vite ve miroano rimei van kamiu, a bogo napano nuvar kenemiu ijaiano rivan ea nalo dolu nei, mia rila napano kito nonovio rosian sivaiano tai na toru van Atua bior ilivuiano novnovo nalo napano naio jo jianio binimei ban kito.
2CO 9:12 Jidomiano nene napano mia kuvituvanio rivano, mia rijai ve toru namoneano lu dolu nalo nei napano aju abiniua bogokouo, a mia rila aiaia Atua ve toru bunu, aver siva laka vanio.
2CO 9:13 Mia aiaia Atua tibe na bior napano mia aialio ka kamiu maka kuvitu kuvioliolu ka Kristo kanano Ioluano Vou ga, mia kumitu kumijogkar bunu ka venia napano naio beriio, a mia aial ka jidomiano napano kumijianio bano toru laka, napano mia mijikia rijai nalo ve toru a rijai nalo dolu bunu. Naruei bogo napano amialio vite juo nei, mia abitilubar von bunu ka kenemiu im̃auano jo berialio ka kenemiu viekouoiano kirisikili vatitig ga a be riano jo.
2CO 9:14 Mia nalo aial napano Atua kiano tiniememiano bujo lou laka ea kenemiu iviso jibe na, naruei mia tiniel maio ka kamiu bano-o, mia tiniel miia kamiu, mia aju abolkouo ka kamiu julaka.
2CO 9:15 Bo ka aver siva ka kamiu bior kenemiu jidomiano novo na jibe na, mia bo bunu ka kito nonovio rover siva laka van Atua tulaka bior jidomiano novnovo napano naio jianio ban kito, napano kenerinio nei, Yesu Kristo.
2CO 10:1 Bilbilu nalo, kamiu kumijikia ka kiniou nei Pol ga nojo nobivitau biedu, mia nojidom kamiu kuvijev kiaku iliano ea bajago na beverare ka Kristo kiano bajago, napano naio be tum̃aro bo a melokloko bo. Naina naruei bajago napano nojo nomila von ka nala van kamiu nua, mia nemijikia ka tomu tai napano aju amilkue kiniou biorio. Nalo aju aber bogo napano nojo bija kamiu, kiniou nomelmeloko laka, a nomerou ka noil, mia nalo aber bogo napano nobivitauia m̃esi biedu, nomila kiniou jibe toro tai napano nomijikia nomil jikili, bior napano ga nojo koalabo den kamiu.
2CO 10:2 Nina bo ga na, mia kamiu monoka kuvijikia ka bogo napano namaluvo kean kamiu, ver neial ka bo noil sikili, nomijikia nala ga. Mia vite na naruei nojidom never ka kamiu, a neber bo ban kamiu, nebika jikili den kamiu ka kuvila von vovaiano nalo nei amei rivu kija, bogo napano maka nomaluvo kean kamiu vo. Ver tibe na, bogo napano neviedu, mia ve re vite tai napano monoka noil sikili riviorio, ana ver makanio, maka nomerou ka novuku iliano tealo napano jikirkili mia jikirkili van nalo napano aju joomo ea vovaiano nalo nei, a napano aju amil niegeniege kumemi, aber ka kumemi numitu numim̃au jakii jidomiano na yetemeriba ga.
2CO 10:3 Ee, kito nonovio rojua yetemeriba nei, mia kumemi maka nuvitu nuvitakii kiano bajago. A be riano, numitu numila mira tai ea yetemeriba nei, mia mira nene maka na vio na.
2CO 10:4 Kumemi numitu numiasol ea mira tai napano moroano nalo na vio mave aju amila die moroano nalo na vio na jogvaiano, a tenalo na mira napano numitu nubokario, nalo maka tena yetemeriba nei, mia numitu numila mira ea moroano na Niununo Lu napano mijikia riolkon bulag vio na jikirkili nonovio napano vite va nalo aju ajuluku eaio.
2CO 10:5 Ver nalo aver ilivovaiano nalo die Tubo kiano im̃auano, mia kumemi numijikia nuvituvulu lo ga. Ver abe m̃arou, amila von ka atukovio ka kanano im̃auano, mia kumemi numijikia nuvar dulu ka nuvila tomu nalo ajikia naio ea kialo meuliano. Ver nalo atumolu vija kialo jidomiano va nalo, mia kumemi numijikia nuvilig tomu nalo nei amei napano kialo jidomiano rimei sikili ka atakisor Kristo ga.
2CO 10:6 Numijikia nuvila tibe na ka kamiu rivano-o kuvilig kamiu, kuvijamo ka kuvidu kamiu kuvitu yetano ka Tubo kiano iliano, a iorou mia nuvila rivan ea vio dolu nalo napano tomu nalo na jukujukuano ajuaio.
2CO 10:7 Naruei ea tivelinio na toro nei napano be burupati na jaleleano nei, p̃eli kamiu kumitu kuberiam̃a vite nonovio bo ga, bior napano toro nei naio ber be namoneano tai. Mia neber bo ka kamiu kuvitii re ea kuluniabene ga, kuvila von ka kuvitii vatitigio ea vite napano be riano napano joa miremiu ruei. Naio ber ka be namoneano, mia bo ga, mia naio jo mila bova, a bo ka naio rivitii vatitigio kiano meuliano bereio. Kumitu kumisidom kuviagago ka naio kia ga, mia jum̃abe, kiniou bunu nebe namoneano, ana bior vaio maka kuvisidom kuviagago ka kiniou?
2CO 10:8 Kiniou neber jibe na, p̃eli mia kamiu tealo ailkue ka kiniou bereio, averinavo kiniou nojidom notovulu lie ga, mia maka tibe na. P̃eli be riano ka bogo tealo nebe m̃arou laka, p̃eli nojo noberii laka ka kumemi naruei numitu nubitikar kamiu, mia maka nala titai rivova napano monoka noimou riviorio. Kiniou nojo neberii jibe na bior napano Tubo ga midu kamiu kumitua jumememi nua ruei ka nuvila kenemiu meuliano rivija naio rimei mave. Ver kamiu kuberka kumemi numitu numil ban kamiu ka nuvila bulag kenemiu meuliano bereio, maka tibe na leleio.
2CO 10:9 A ver kamiu kuberiam̃a kiniou nebe toro na tiniemimiano napano nojo nobivitauia ea m̃esi nalo biedu ka rila kamiu monoka kumerou ka kiniou, nina bunu maka rimemedu.
2CO 10:10 Kiniou nomijikia ka tealo aju aberii kiniou jibe na ruei, aberinavo “O Pol na, kiano m̃esi nalo abujo ka iliano na teremi nalo napano ajikili laka, mia ver koial naio, jibe toro ninio tai na melukluku ga, a ver kojog naio mil, melala ga.”
2CO 10:11 Mia nojidom never ka nalo na never bo ka avitilubario ka venia napano nojo nobivitauia bulag ea m̃esi, bogo napano maka nuvitu vija kamiu, naio bare ga ka venia napano mia nuvitu nuvila ea miremiu, bogo napano numitu bija kamiu.
2CO 10:12 Neber jibe nei, mia maka nosidom never m̃elea vite ka ridular siememi bereio. Maka nosidom ka nomei tibe tomu dolu nalo, napano aju abe m̃arou laka ka averial kialo vite novo nalo bereio. Tomu kinkin nalo nei aju abitii veve kialo bilbilu nalo, p̃eli aju abitii veve tomu dolu nalo, ana aber p̃eli nalo abo lie ajovulu lo, mia nina be im̃auano tai na vovuiano ga, bior napano p̃eli nalo nonovio na abova beverare ga.
2CO 10:13 Tibe na, mia neverii re laka ka kumemi riva lie laka, mia monoka noverii vite tealo van kamiu napano amemedu ka im̃auano nalo napano Atua midu joa jumememi, a joomo eaio, ba bokar vite tealo ea tivelinio na vitikariano na kamiu napano kumemi numitu numilaio.
2CO 10:14 Kumemi maka nuvisidom ka nuva laka ka nuvila von ka nuvitu mave ka kamiu, mia memedu ka numial ka numijikia nuvisian iliano tealo napano monoka kuvatove kanio, bior napano monoka tiniemiu ribobogia re ka kumemi naruei nube moti ka numidu Kristo kiano Ioluano Vou binimei lilian bokar kamiu.
2CO 10:15 Ver tealo dolu nalo abinimei ruei ea kamiu beamu, mia maka nuvisidomii ka nuvisirarago ka kamiu p̃eli ka nuvisian iliano van kamiu tibe nei. Mia kar napano numitikar im̃auano bija kamiu, monoka nuva lie vija kamiu. Numisidom ga ka kenemiu viekouoiano to riluo bogo nonovio, a numisidom laka ver tanobuku na vio na kenememi im̃auano mijikia rimei ve toru lie, maka ea kenemiu vio ga,
2CO 10:16 a mia kumemi nuvisaaro m̃elea ver kuvijikia kuvija kumemi ka rila ka kito rava lie roioliolu ka Ioluano Vou ea venuo dolu nalo tivelinio ka kenemiu ban lie, ka ravan rotep̃e viomoruo ea vio nalo napano tomu dolu nalo maka avan aioliolu eaio vo. Tibe na, ver bogo kito roverii im̃auano nalo napano mia rola ea vio nalo na, mia maka ajikia averii niegeniege kito ka roju rabarvar kito ka m̃arati napano miyotuba ea toro dolu kiano tiniavio! Ea bogo na, mia amijikia ka roju roberii m̃arati napano miyotuba ea kiado tiniavio napano kito ga roba romebijaio.
2CO 10:17 Jidomiano nalo nei abo laka, ana bova ver robe m̃arou ka vite tai napano romilaio, bior napano Niosi Lu berenio ruei, berinavo Toro napano jidom ve m̃arou ka vite tai, monoka ve m̃arou ka venia ga napano Atua milaio.
2CO 10:18 A bova kito roiaia kito bereio, bior toro na bo be riano, maka nina napano naio bereio ga ber ka naio bo, ana naio be naina napano Atua ga ber ka naio bo.
2CO 11:1 P̃eli kamiu kubuluku iliano tealo napano nobivitauia ruei, kuber p̃eli nomil vovu, mia nojidom kuvila kenemiu jidomiano rive terebievi kija van kiniou, ana mia nala von never tealo lie bereio.
2CO 11:2 Monoka never iliano nalo nei bior napano bogo nonovio nojo nojidomii laka ka kamiu. Mia never tibe nei, never nemial kamiu jibe kube kiaku niatira novo tai, napano neberkarikoio ka risoro ka koano napano Kristo. Nomijog jibe nomijukua vatitig ka kamiu, nojidom novitikar vatitig kamiu ka kuve riano ea verikariano nei, a nina jibe bunu Atua, napano naio mijukua vatitig ka kito, maka sidom ka rotuvan naio rava iorou bereio.
2CO 11:3 Mia kiniou bunu nomerou kija ver toro dolu rimei rivuru kenemiu jidomiano riva ve dolu bereio. Jibe nua na, maro nei binimei mila sibilili tira nei Iv, mila vonvon vatitig naio mila mijoru ea kariano, naruei maka nosidom leleio ka bogo tai kamiu kuve riano re bunu ea Kristo, tiniemiu tii vatitig re bunu naio ga ve takurano.
2CO 11:4 Neber jibe na bior napano nobitilubar pariparimiu kija ruei. Bogo napano verialiano tai binimei berii Yesu dolu tai napano maka Yesu na kito romioliolu kanio, a vonganei ga kamiu kumoneaio. A bogo napano niununo dolu tai maluvo ea kamiu napano maka Niununo na Atua jianio, kamiu kuviako kirisop̃eli ka kuviduio. P̃eli bogo na mia Ioluano Vou dolu tai rimalmaluvo ea kamiu, nemijikia ka mia kuvisaaro ka kuvijogkar naio tibe na ga.
2CO 11:5 Atevi dolu nalo aju amila sibi vatitig ban kamiu ka vite nalo nei, mia nemial ka kumitu kumisidomii mave laka kalo. Kamiu kumila jibe napano nalo ga abe atevi na kiado yetemeriba nei, a kumitu kumidu kiniou nojo yetano, naruei maka nosidomii ka nina naio memedu.
2CO 11:6 Ee, nemijikia ka tomu tealo aber ka kiniou maka nejikia noioliolu rivu laka, ana nemijikia ka maka tai napano mijikia vite laka lie ka kiniou, mia neberiam̃a kamiu kubitilubar vite na ruei, bior jo maluvo binimei meravo bo ea im̃auano nonovio napano nomim̃aukanio ea miremiu.
2CO 11:7 Kiniou nemijikia ka ea tivelinio na abarvar veru nei, tomu tealo maka asaaro kanio leleio, mia maka nejikia bior vaio jibe na. P̃eli nalo aberiam̃a nobika veru nei ka ve kiaku ga? Mia makanio, bior bogo napano nebinimei nomioliolu ka Atua kiano Ioluano Vou ban kamiu, maka lele never ka kamiu kuvisian vite tai van kiniou. Nomidu kiniou nojo yetano garuei, ka nemijikia nodu bulag kamiu rivavin, mia p̃eli kamiu tealo tiniemiu jer kiniou ka nomila jibe na? P̃eli kuber kiniou namila bova ka maka novika vite ninio den kamiu ea bogo na?
2CO 11:8 Nemijikia never rimemedu van kamiu ka bogo na, namoneano dolu nalo aju ajian jidomiano binimei ka aija kiniou, a nojo nojen veru nene ga bogo napano nomim̃au ea kamiu. Mia maka nala vite novo tai vanlo ea bogo na, naruei nomijog jibe ka nobena ka kialo veru ga.
2CO 11:9 A bogo napano nojo bija kamiu, jum̃aku bulati o-o, mia kuruaku nalo juo na abinimei Masetonia abitilubario napano nojo nemije jaleleano jibe na, ana abitikar vatitig kiniou. Maka lele nemei neteg van kam tai rivior vite tai, a neberkar ka mia maka lele nejikia nala niegeniege kamiu napano nomiyuku kamiu ka monoka kuvila tibe nei p̃eli tibe na van kiniou.
2CO 11:10 Neberkar jibe nei bior napano tinieku m̃aro ka tomu nalo aju amil niegeniege aber ka jijer kiniou bior kialo veru, a mia neverial kiaku verikariano nei ea vio nonovio nalo ea tanobuku na Akaia. Maka lele nomerou, bior neber kar ea Kristo siano napano kiano ilirianiano joa kiniou ka mia nala garuei.
2CO 11:11 Naruei bogo napano neber jibe na, p̃eli tomu tealo mia aver ka kiniou nojidom nala niegeniege siemiu ga, p̃eli aber ka maka tinieku tii kamiu, mia maka tibe na leleio. Atua mijikia vatitigio ka tinieku jii kamiu toru laka.
2CO 11:12 Mia monoka nosikili ga ka verikariano napano nojo neberio, mia monoka nala ga, bior napano nojidom nouebin nalo dolu nei kialo sebi napano aju abarvar kalo janea vio jibe na. Nalo aju amila von ka aber ban kamiu aber nalo amim̃au vio takurano bija kumemi, aju amila im̃auano napano bare ga ka nana numitu numilaio, mia maka tibe na.
2CO 11:13 Tomu nalo na jibe na, abe atevi sibisibiano nalo ga, amim̃au maka rimemedu leleio, mia aju amila vonvon kamiu namoneano nalo, jibe abar Kristo kiano atevi riano nalo miralo.
2CO 11:14 Mia monoka roiilo re napano amila jibe na, bior ka kialo toro na toru nei napano Sim̃aro, naio bunu jo mila jibe na ruei. Naio mijikia rila ka nailiano novo tai na yulu,
2CO 11:15 naruei romialio ka tomu nalo na kiano im̃auano abilivilig tomu nalo bunu, amila lo jibe tomu nalo na im̃auano na bajago memedu. Mia bogo na, romijikia ka mia avano ga abisi ea vio napano memedu ga ka kialo im̃auano va nalo.
2CO 11:16 Mia jibe na napano neberenio ruei, maka nosidom ka noil tibe na ana mila na tealo aber ka nomiavovu, mia ver asidom averenio, kuvituvanlo averenio. Mia ver tibe na, bo ka ala ka kiniou tibe napano amila ka vovu nalo, ka atukovio re ka kiniou beamu, mia atuvan kiniou ka never venia napano nojidom neverenio.
2CO 11:17 Bogo napano nojo noberii kenememi im̃auano, ver nojo nomil m̃arou laka kanio, rila ka be riano ka nojo nomil vovu ga na, a mia Tubo saaro re kanio.
2CO 11:18 Maka rivu roil m̃arou laka, mia kiniou maka netibe ka kulo dolu nalo napano aju amil m̃arou ea kialo vite nalo na yetemeriba nei, bior napano ver noil m̃arou, nojo neberii vite novo nalo ga.
2CO 11:19 A nomialio napano kamiu kumitu tiniemiu jii tomu dolu nalo napano kuber p̃eli abe vovu, bior napano kubitiilo abe dolu, nalo maka avokar masouano rivu nei napano kumisidomiio kuber kuvitoaio. Mia ver kuvisidomii kuver kiniou bunu nomiavovu, bior vaio kamiu maka kuvijikia kuvila kenemiu jidomiano ve tebievi kija ea kiniou bunu?
2CO 11:20 Kiniou nomial ka kamiu kumituvan ban atevi sibisibiano dolu nalo nei ka ala vite va ve miroano van kamiu. Amila jibe ka kamiu kialo tomu nalo na im̃auano, nalo amila niegeniege kamiu, abar kenemiu saba nalo, amidulo aju mave ka kamiu, a ver asidom amijikia ajuba miremiu. Kamiu kumitu kumituvanlo amila jibe na, mia jum̃abe? Bogo napano neber iliano tai ga, bior vaio maka kuvisidom kuvijog leleio?
2CO 11:21 P̃eli bo kanio ver kiniou bunu nojo ga nomila bajago ninio nalo jibe nei ban kamiu, p̃eli mia rila kamiu kuvisaaro ga ka kiniou? Mia aua, p̃eli nomelukluku laka, maka navare ka nala nina na. Bo ga, nober iliano na, nomijikia ka tomu tealo mia aver ka nojo nomil vovu bereio. Mia nejidom never ka verver atevi dolu nalo nei ajidomii aber amijikia ailivarvar bior napano aber vite tealo ea tivelinio na nalo abo, mia kiniou bunu nomijikia noilivarvar ka vite nalo na.
2CO 11:22 Ver atu adu bulaglo mave ka abe Ipru, mia kiniou bunu nobe Ipru. Ver avitiri bulaglo aver nalo abe tomu na tanobuku na Israel, mia kiniou bunu tena vio na. Ver adulo atu mave bior napano aber ka nalo memedu ka Epraamo kanano taara, mia kiniou bunu nobe taara nene.
2CO 11:23 A mia novika vikadeniano van kamiu vonganei, neber nalo na amim̃au Kristo kiano ba bokar im̃auano napano kiniou nomim̃aukanio? Makanio, neber p̃eli kiniou nomila bo lie loa ka nalo. Maka rivu noto noverii kiniou bereio tibe na, mia pariparimiu kirisikili laka mila na kiniou bunu vaataro paripariku rive vovu, ana nojumolu nomil jibe na. Mia vite na be riano laka, napano nomila im̃auano na tortoru nalo loa kalo, tomu na tortoru abuku kiniou ea nalakoiano va miroano jovulu lo, abitiv kiniou va vio maka nejikia novolukuio, a bogo miroano bunu napano ka mia nam̃aro ga.
2CO 11:24 Kiniou nemijikia ka va jimo ruei, tomu na tortoru na kulo Ju nalo abitiv kiniou napano ea va terakurano ea va jimo nei, teli jaburu ea niabeku va duelimo va rolu ba koveri [39]. Maka ajamo ka alaio riva rivokar va duelimo va veri [40], bior verver makanio, nina tena m̃ariano ga.
2CO 11:25 Mia va rolu amue kiniou ka iesi nalo, a bogo tai bereio ajuba kiniou banbano-o vaataro ka nam̃aro. Va rolu ruei nojoa tei uako madudu, a ea bogo nalo na tai, nojo nemialalo ea tei bogiano momou tai a legiano momou bereio.
2CO 11:26 Kiaku ieliano nalo terebievi miroano laka, a ea bogo nalo na nobinua bogokouo telabo na m̃ariano. Uei nalo na bolu nalo vaataro ka adular kiniou, tomu na amue van toro amijil kiniou, kiaku tomu nalo ga jibe Ju nalo amilkuei kiniou, a nalo napano maka ave Ju amila bulag kiniou bunu. Kiniou naban ea vio vabe, jibe ea komeli, p̃eli yeturu, p̃eli ea tei, mia nubinua bogokouo, a bogo nonovio, kuruado sibisibiano nalo nei aju amilkuei kiniou.
2CO 11:27 Bogo nonovio nabano bija im̃auano kouo a bogokouo, napano maka nejikia nomonmelio, napano midoujer laka kiniou a jijer kiniou napano sinaniano maka leleio, a naban napano maka noial vio na notoluku eaio ka burum̃ara vio menini.
2CO 11:28 A mave ka bogokouo nalo nei, bogo nonovio ga nojo nojidomii laka ka kiaku im̃auano bija namoneano lu nalo, napano jibe vite tai napano teremi mia teremi ka kiaku meuliano.
2CO 11:29 A nojo nojidomii kamiu laka bunu, napano ver neial ka kamiu namoneano tai rimei melmeluku, mia mila napano tinieku m̃aro laka garuei, a ver nojog ka tai mijoru ea kariano, mia rila napano tinieku mijalele laka.
2CO 11:30 Naina naruei vovaiano ninio nalo napano nojo nobinuaio, a nomialio ka nomelmeluku laka ka nola Tubo kiano im̃auano, a maka nola vite novo tai ka noilivarvar kanio, mila na noilivarvar ka bogokouo nalo nei napano nebinuaio.
2CO 11:31 A kiado Atua, napano naio be Yesu Tubo karam̃ano, napano mia roiaia siano to toboto naio, mijikia ka maka nala sibi, vite nalo na napano nojo neberenio abe riano nonovio ga.
2CO 11:32 A jogvaiano toru dolu tai bereio napano nobinuaio, napano maka noverio mave ea vio nei, nina ea bogo napano naban ea komeli na toru nei Damaskas. Ea bogo na, parinio tubo na tanobuku nei naio be toro nei Aretas, a kiano toro na toru napano bitirilar naio ka vitikar komeli nei, jidom rivakar kiniou, naruei miila kiano menumia nalo aba ajuko morouo nonovio na vio na ka maka nejikia novuro.
2CO 11:33 Vaataro ka avokar kiniou, mia bilbilu tealo amiija kiniou amiduvan kiniou joomo ea burum̃ara basaro tai, ana amiorkar teli eaio ajikili aju mave ea burum̃ara basio na vio na, ajuvarvanio melmelumu tavio ka basio, batove bokar yetano ana nomoluo den basaro nei noburo denlo nabano.
2CO 12:1 Bo ga, nemial ka ver nojo noberii kiniou jibe nei kia ga vo, mia maka nejikia nevilig kenemiu jidomiano rimei rivu ka kiniou bereio, mia bo ga na, nomijog jibe nojidom neiasol iliano bereio ka neverii vite nalo napano nemialio a vite nalo napano Tubo jiloglogio ka kiniou ea monovovuano nalo.
2CO 12:2 A mia nojukunu ka Kristo kiano toro tai beamu, napano nomijikia vatitig naio, napano yuka duelimo ba veri [14] barlaka ruei bokar vonganei, naio jo mia jabujo ka aburu naio ba miyotuba mave ea vio sop̃i tai mave. Maka nejikia ka naio ban bija mokotenano nonovio p̃eli ga mijikiaio.
2CO 12:3 Buriakurano napano ver naio rivan ea mokotenano p̃eli rivan ea niununo ga, nomijikia ka be riano, toro na ba mijaka bitii joomo ea kiado vonuo novo ea vio na.
2CO 12:4 Naio mijog vite miroano napano maka ka averialio bereio, napano maka bunu iliano nalo na yetemeriba nei tai napano vare ka averiio.
2CO 12:5 Naruei bogo napano neberii toro nei, p̃eli kumiilo, kuber ka toro nei, be riano ga na, nina toro tai na. Mia jum̃abe, ver never ka maka toro dolu, mia nojo noberii kiniou ga, p̃eli mia kamiu kuver von ka nina maka vite tai ga na? Tibe na, nomial ka ver nojidom noil m̃elea ka vite na tortoru tealo van kamiu, bo ka neverii ea toro dolu siano ga, ka kuvisaaro ka kumoneaio, mia ea siaku, noverii vonvon kiaku vite nalo na tertelisu ga.
2CO 12:6 A mia ver nojidom noil m̃arou ka vite na tortoru nalo napano nomilaio, mia toro tai re rijikia river ka kiniou nojo nomil vovu, bior vite nalo abiniu abe riano. Mia maka nosidom noil laka ka vite nalo na tibe na, bior napano bova nomila von ka nala kamiu kuvidu kiniou noto mave rivior vite tealo napano maka kuvialio kija a maka kuvijogio kija, mia kiniou ga nojo noberiio. Kiniou nojidom ka kuvitu kuvitii kiniou ea im̃auano venia napano kumial nomilaio ka kamiu, a ea iliano venia napano neberio ka kamiu.
2CO 12:7 A nemial jibe Atua bunu maka sidom ka kiaku jidomiano rimei to mave laka ea monovovuano nalo a vite nalo napano naio jo berialio ban kiniou, ana naio jian jaleleano tai joa mokotenaku napano nomijog jibe nionoti molu tai napano Sim̃aro jo julu kiniou bijaio julaka, napano jo mila mokotenaku mijalele, a jo mila kiaku jidomiano jo ga yetano.
2CO 12:8 Kiniou nebika den Tubo ka ridular vite nei den mokotenaku, ana maka rilaio, kario valuo nene nobolkouo ka naio biorio, kario varolu nene bereio, mia maka garuei,
2CO 12:9 naruei naio mil ban kiniou ga, ber jibe nei ber “Mia kiaku tinietiiano ga bare ka rivokar vatitigso, bior napano kiaku moroano mijikia rim̃au ve toru lie bogo napano rim̃au rivija kiamo meluklukuano.” Iliano nei naruei mila na kiniou nojaaro ka noverii kiniou lie bereio, mia noverii kiaku meluklukuano nalo ga, ka rila na Kristo kiano moroano mijikia rim̃au lie ve toru ea kiniou, jibe napano naio berenio.
2CO 12:10 Tibe na, ka rila na siano rimei ve toru lie, nomijamo ga ka neber nojaaro ka meluklukuano nalo ajua mokotenaku, p̃eli ka avitii kiniou rivova, p̃eli nobinua bogokouo nalo, p̃eli amila bulag kiniou, p̃eli nubardulu jaleleano nalo, bior napano nomijikia ka bogo na nomelmeluku, Kristo naruei mia rila kiniou nesikili.
2CO 12:11 Banalo! Nojidomii iliano nalo napano neber bulagio ban kamiu ea vio nei, nomialio ka be riano, nojo nomil jibe nomiavovu laka. Kamiu kuviekokoa kiniou, mia bo ka kuviti-lubar bunu ka kamiu naruei kumila kiniou jibe na. Neber p̃eli mia kamiu naruei kuvitu kuverii vatitig kiniou, napano kumisaaro ka vite novnovo nalo napano nomila ban kamiu ruei, mia makanio, kumitu kuberii niegeniege kiniou ga. Nemijikia ka kiniou nebe iakurano ga, mia neber p̃eli maka nobova loa atevi sibisibiano dolu nalo, naruei bior vaio kamiu kumitu kumiaia laka nalo?
2CO 12:12 Bo ka kuvisidomii bereio vite nalo napano nomilaio iviso kean kamiu, napano aberialio ka kiniou naruei nobe atevi riano. Bogo nonovio ga, kiaku jidomiano tebievi bo ka noim̃au melmelumu vija kamiu, a nomila kamiu amial vremesiano nalo, bija vite nalo na iloiano, bija kijokijo nalo na Atua kiano moroano.
2CO 12:13 Nemila vite nonovio ban kamiu bo laka, beverare ga ka venia napano nomila ban namoneano lu dolu nalo, naruei maka ail mum̃iio, mia kamiu kumil mum̃iio. Vite tai ga napano nomilaio banlo, a maka nala van kamiu, maka nevika ka kuvitu kuvitikar kiniou p̃eli kuvijai kiniou, jibe napano nalo amila ruei, mia p̃eli ea vio na naruei nomila bova? Ver tibe na, kamiu kuviekokoa kiniou, bior napano p̃eli ver kiniou novika vite ve miroano ruei den kamiu mia kamiu, kuvisaaro ga ka kiniou naruei?
2CO 12:14 Bo ga, vonganei naruei nojo ka noviedu noial kamiu bereio, napano varolu nene naruei. Kiniou neberkar ka mia nola re burim̃auano van kamiu, bior napano maka noviedu ka kenemiu vite nalo na aija kiniou, mia neviedu ka kiniou naruei neiija kamiu. Nina jibe teta nalo a nena nalo bija kialo kiritete nalo, napano maka kiritete likiliki nalo kialo im̃auano ka avitikar kialo tormoruo nalo, mia tomoruo nalo naruei monoka avitikar vatitig kialo kiritete nalo.
2CO 12:15 Naruei jibe na, kiniou najaaro ga ka nesian kiaku vite nonovio, vija kiaku meuliano bunu, ka rijai kamiu. Nemijikia nala tibe na bior napano tinieku jii kamiu laka, mia nomijog kirivova bior napano nomial ka bogo napano kiaku tinietiiano ea kamiu jo bavin lie, mia kenemiu tinietiiano ea kiniou jo batove ga.
2CO 12:16 Kiniou neber jibe na bior napano nomijog kenemiu iliano dolu tai ruei. Kamiu kubitilubar ka bogo napano nojo bija kamiu, maka nala burim̃auano ka kamiu ka kuvitikar kiniou, a maka nesen kenemiu veru leleio, mia jidomiano tai joa kamiu kia ga. Kuber kiniou nebe masou vatitig ka bajago nalo na ala sibilili toro, naruei kumitu kuber nojo nomila lukua m̃arabo tai ka nola sibilili kamiu bior kenemiu togogo nalo.
2CO 12:17 Mia maka tibe na leleio. Kamiu kuvila von kuvisidomii vatitigio ka nalo napano nojo nomiilalo ka aviedu kean kamiu. Kumial napano amila niegeniege kamiu ka vite tai, p̃eli abar kenemiu vite nalo tealo be kiaku? Neber p̃eli makanio.
2CO 12:18 A jum̃abe bunu bogo napano nojikili ka Taitas ka naio naliko kuruado dolu nei, naljuo monoka ayotuba kean kamiu? Kumialio ka amila sibisibi ka kamiu ka kenemiu veru tealo? Maka leleio, bior napano kumemi jibe taara takurano ga, napano Niununo takurano ga joa kumemi, a kumemi numitu numitakii m̃arabo tai na im̃auano ga, napano maka leleio nuvisodomii ka nuvila Tubo kiano im̃auano ka nuvar saba ve kenememi.
2CO 12:19 Kiniou nojo noberii kiaku im̃auano jibe na, p̃eli kamiu kuber p̃eli nojo nomila von ka nodular siaku mave ea miremiu ka rila kamiu kuvisidomii re rivova ka kiniou. Mia makanio, maka noto tinieku maio ka kiniou, mia nojo tinieku maio ga ka kamiu, a iliano nalo napano neberio, neberenio jibe Kristo kiano toro tai, ea Atua mirano, ka rijai kenemiu meuliano nalo.
2CO 12:20 Neber iliano nalo nei bior napano nomerou laka ka maka rivu kiniou namaluvo kean kamiu, ana noial ka kamiu kumitu ea vio tai napano maka rivu leleio ea kiaku jidomiano, a nomerou bunu ka maka rivova ka kamiu maka kuvisidom kiniou. Ver tibe na mijikia rila ka kito rala baravo ka kito, p̃eli rosidomii rivova kean kito, p̃eli tiniedo seri kito, p̃eli rosidomii re toro dolu mia rosidomii kito ga veve terakurano bereio. Ea bogo na jibe na toro mijikia rioliolu, mijikia ril ea toro dolu, mijikia ril varvar, a mijikia rila yotubaiano laka. Ver rivan tibe na, bova ga ruei.
2CO 12:21 A nomerou laka bunu ka bogo napano noviedu bereio ea kamiu na mia nomial napano kiaku im̃auano nalo ea kamiu ajibirbil vatitig garuei. Ver tibe na, mia rila noimou laka ea Atua, rila kiniou nojog ka naio burudobi kiniou toru ea miremiu. Mia nomial ka mia monoka tibe na ga, bior napano burum̃ara kariano napano kamiu tealo aju amilaio, naio be bajago va tai na siakaiano napano amila korov tuboiano na Atua midu jo ka toro a tira monoka atakiio, a nalo maka aviliglo kanio leleio, a kuvitu kuvituvanlo ga ka nalo atu alaio rivano.
2CO 13:1 Bilbilu nalo, jibe napano neberenio, nina naruei ieliano varolu napano mia nala ka neviedu ea kamiu, a p̃eli mia bogo varolu na monoka noil van kamiu ka jaleleano nei. Nina mila kiniou nojidomii iliano tai ea Vivitauiano Lu nalo napano berenio jibe nei, ber “Bogo napano amil ban toro tai ea komeli ka kariano tai, monoka ve juo p̃eli ve tolu napano amijikia averial kiano kariano, ka rila avitii ve riano.”
2CO 13:2 Kiniou nojidomiikar nina bior ka bogo na nomaluvo kean kamiu ea bogo valuo nene nua na, nomil ban kenemiu tom juo napano amila kariano nei, naina naruei bogo moti napano nomil banlo jibe na. A vonganei nojo nomil valuo nene bereio ea m̃esi nei, a ver nomei noil bereio, nina mila varolu nene. A kiniou nojidom never ka nalo nei, vija nalo dolu napano aju tivelinio na nalo, ver nomei noil bereio, nina mia tinieku tii re lo, mia notiburelo ka vironiano na jikili tai.
2CO 13:3 Kamiu kumitu kuber bo ka kiniou noverial kija kiniou ka be riano ka Kristo jo mil riano ea kiaku iliano nalo, ana ver kamiu kuvisidom tibe na, bo ka kamiu kumei kuviagago ka kiniou ea bogo na, naruei mia kamiu kuvialio. Mia kuvitii ka bogo napano Kristo jidom rila kiano im̃auano ea kamiu, naio maka lele melmeluku, a mia mijikia rim̃au vija kiano moroano nonovio.
2CO 13:4 Bogo napano ajukar naio m̃aro ea m̃akolkolo, romial ka mokotenano binimei melukluku garuei, mia bogo napano naio jumolu meul bereio, naio bujo vatitig ka Atua kiano moroano nonovio. A kumemi numelmeluku bunu javukia naio, mia bogo na numila kiano im̃auano ka rijai kamiu, numitu numim̃au bija moroano napano Atua mijamo ka ban kumemi.
2CO 13:5 Kiniou nojidom nover bunu ka nomial napano kumitu kumitibure kiniou laka, ana jum̃abe, kamiu maka kuvijikia kuvitibure kija kamiu bereio, ka kenemiu viekouoiano jo jikili vatitig kiano p̃eli jum̃abe? Kuvitii vatitig kamiu, kumitu ku-bitilubar ka Yesu Kristo jo mim̃au ea kenemiu meuliano kiano, p̃eli makanio? Verenio makanio, p̃eli tealo ajua meuliano napano Tubo maka leleio toaio, a nalo maka ave namoneano napano abe riano.
2CO 13:6 A ver bogo tai kuvisidom kuvitii veve kenememi meuliano bunu, mia bo ga, a nojidom laka ka mia kuvitilubar ka Tubo jo mim̃au ea kenememi meuliano, naruei maka nuvila luvu niati nene tai.
2CO 13:7 A kumemi numitu nubolkouo ban Atua ka rim̃au ea kenemiu meuliano ka kamiu bunu maka kuvilaluvu vite tai. Ver kamiu tibe na, mia mijikia rila siememi rivu bunu, bior napano kumemi naruei nuberloglog kamiu, mia kumemi maka nubolkouo ka kamiu bior siememi ga. Ver tomu nalo aial ka kumemi numim̃au bova jum̃abe, nina naio bo ga, mia kenememi jidomiano na toru, numisidom ka kamiu monoka kuvitu kuvila rimemedu bogo nonovio.
2CO 13:8 A kumemi bunu, numisidom ka kenememi im̃auano nonovio bunu monoka memedu ga ea Tubo kiano ilirianiano, maka nuvisidom nuvila vite tai napano riuedom kiano ilirianiano nei bereio.
2CO 13:9 Kumemi numitu numim̃au kiano ga, naruei ver bogo tai rila numei numelmeluku, numisaaro ga, bior napano numijikia ka bogo napano numelmeluku, a kamiu kumitu kubinimei jikili. Numitu nubolkouo bior nina ga, ka mia kuvitu kumei rivu lie bogo nonovio.
2CO 13:10 Jidomiano nei naruei mila nobivitauia m̃esi nei biedu ban kamiu vonganei ea bogo na nojo koalabo den kamiu kia ga. Kiniou nojidom kamiu kuvijogkario, a ver kuvilaio, mia bogo na noviedu, noil sikili re bunu van kamiu. Tubo midu kamiu kumitua jum̃aku ka novitikar kamiu, maka ka rila bulag kamiu, mia ka rila kamiu kuvavin mave. A ver noviedu a noial jum̃abe, mia monoka nala sikili van kamiu ka venia ga memedu ka nalaio.
2CO 13:11 Bilbilu nalo, nebinimei ea kiaku iliano maaro naruei, nober bogiano bo ga ban kamiu. Neber bo, kamiu kuvila von ka kuvila kenemiu m̃arabo rivu vatitigio. Kumonea vatitigio ea vite nalo napano nobika den kamiu. Kamiu nonovio kuberkakar jidomiano novo tai ga. Kuvitu bo ga ea bajago na tum̃aro, naruei mia Atua na tiniememiano a tum̃aroiano to vija kamiu.
2CO 13:12 Bogo napano kumitu kubiviuo kamiu, kuvan jumemiu vatitig van kamiu, kuviniom babibiniomiu ea saariano lu.
2CO 13:13 Namoneano lu nalo na vio nei aber kialo bogiano bo binimei ban kamiu bunu.
2CO 13:14 Naruei kiaku volkouano ka mia kiado Tubo Yesu Kristo kiano tiniememiano, bija Atua kiano tinietiiano, bija voroniano na Niununo Lu, atu vija kamiu nonovio. Kiniou, Pol.
GAL 1:1 Kiniou Pol nebivitauia m̃esi nei biedu ban bagaro na moneano nalo ea tanobuku na vio Kalesia, mia kumemiliko kuruado nalo na vio nei, kumemi nubika den kamiu ka kamiu kumitu bo ga, p̃eli na kumitu jum̃abe? Kiniou nei naruei napano Yesu Kristo naljuo Atua karam̃ado, napano naio bitirilar Yesu bereio ea nam̃ariano, naljuo nei abitirilar kiniou nebe atevi, jibe na ana mia maka ve toro napano bio kiniou, p̃eli na bitirilar kiniou jibe nei. Nao, mia monokanio kamiu kuviagago ka iliano nalo napano mia kiniou never ka kamiu.
GAL 1:3 Nejidom m̃elea ka mia Atua karam̃ado naljuo Tubo Yesu Kristo, nalo ve juo amidu tiniememiano bija tum̃aroiano ban kamiu.
GAL 1:4 Nao, Yesu Kristo naio mila memedu ga jibe ka napano Atua karam̃ado jidomio, ka napano naio rijamo ka mia naio rim̃aro ka rila bulag kiado kariano nalo, ka mia naio mijikia rivuru bulag kito den bajago na bova na bogo nei napano kito rojuaio vonganei.
GAL 1:5 Mia tibe na, bo ka kito rodular Atua siano rivavin medave tulaka, rivano-o mia ribisi deio, ee mia tibe na.
GAL 1:6 Kiniou nomiilo toru ka kamiu, napano Atua bio kamiu, a Kristo mila bo laka ban kamiu ruei, ana mia maka vesiou ga ana kuburo den Atua bereio ana kubokar iliano tai napano jibe ka Ioluano Vou dolu tai bereio.
GAL 1:7 Mia maka rijikia ve Ioluano Vou dolu bereio, mia be ga ioluano takurano ga na jo. Kiniou neberii jibe na, bior nomijog ka tomu tai ajum̃a amila bilivilig kenemiu iviso nalo ka mia, nalo ajidom avilig Ioluano Vou na Kristo kiano rimei ve dolu.
GAL 1:8 Ana verenio kito tai, p̃eli na nailiano na vio mave, p̃eli na toro kei bereio, naio river lua lilianiano tai napano maka riveverare vija nana kumemi nuber lua ban kamiu nanua ruei, memedu ga ka toro nene avukuio rivan ea jeleig vio na jogvaiano.
GAL 1:9 Nao, neber iliano nei vaarakurano bereio ban kamiu, ka verenio toro tai kei napano rioliolu ka iliano tai napano be dolu ka ioluano napano kamiu kumiduio jukamu ruei, mia toro na aviron naio rivova laka ea sebi.
GAL 1:10 ?Nemijikia ka tomu tai aber niegeniege kiniou, aber nejidom ga tomu nalo ajog rivu ka kanaku iliano, mia kamiu kumijog kanaku iliano napano jikili nei jum̃abe? P̃eli mia, tomu tai tiniel ser kiniou koviobo! Mia bo ga, bior venia napano nojidomio, kiniou nejidom ga ka Atua naio saaro ka kanaku iliano, ka napano ver kiniou noto never lua ga ka mia tomu nalo aiaia kiniou kanio, jibe na maka bunu neve Kristo kiano toro na im̃auano ve riano.
GAL 1:11 Kuruaku nalo a kuvivinioku nalo, monoka neverii rimeravo van kamiu, ka Ioluano Vou na nojom̃a neberii luaio, naio maka ve iliano tai napano toro ga to tikario.
GAL 1:12 Kiniou maka nejevio den toro tai, a maka toro tai riverloglog kiniou kanio, mia Yesu Kristo ga, naio jiloglog Ioluano Vou nei meravo ban kiniou.
GAL 1:13 Nina jibe ka napano kamiu kumi-jog ruei, ka beamu kanaku meuliano jum̃abe, ka bogo napano nojo joomo ea kenememi nalotuano kumemi kulo Ju. Ka bogo na kiniou tinieku jer bagaro na namoneano nalo na Yesu kiano toru laka bogo nonovio, ana nemijil lo nemila lelanlo napano mia maka leleio bunu tinieku riialo, bior nejidom ka mia namoneano nalo ta re bunu to.
GAL 1:14 Ka bogo na, najakii vatitig bajago na nalotuano napano kenememi kulo Ju, juvulu tomu dolu nalo na kumemiliko kenememi terati takurano ga, mia kiniou nabokar jikili iliano moruo nalo napano korobimemi nalo kanalo, napano tomu nalo aju ajakiio binimei batove bokar banei.
GAL 1:15 Kiniou nojom̃a nemila jibe na bano-o mia maka nejikia ka Atua naio berkar kiniou ruei, bogo na maka nomoluo vo. Naruei ea ga kiano tiniememiano, naio bio kiniou ka neve kanano, a ea kiano jidomiano novo
GAL 1:16 naio miila kenerinio Yesu, maluvo ka kiniou ka nemijikia novitilubario, ka nava noioliolu kanio van nalo napano maka ave kulo Ju. Ka bogo na, maka nava neial kulo dolu nalo ka mia novokar jikiaiano tai denlo tivelinio ka Ioluano Vou nei.
GAL 1:17 A maka navavin Yerusalemo bunu ka neial atevi nalo napano nalo abe atevi jukamu ka kiniou, ka nevika denlo, ka mia kiniou neioliolu ka venia, p̃elina kiniou neverial iliano tum̃abe? Makanio, maka nava nevika tibe na, bior Kristo naio mila vite nonovio meravo ban kiniou ruei. Ka bogo na, najaluvo sop̃eli ga, naban yako laka ea buruvenuo na vio Arapia, mia iorou kanio ana nebinimei bereio, nemijaka garuei naban ea komeli na vio Tamaskas.
GAL 1:18 Karina iorou kanio napano yuka tolu barlaka bano, naruei ka bogo na ga, ana nabavin bereio Yerusalemo naba nemiadu ka Pitere, mia maka noto vija naio vesiou, nojo bogoti duelimo ba jimo [15] ga.
GAL 1:19 Mia ka bogo na maka neial atevi dolu nalo bunu, mia takurano ga na nemialio, nina kialo navurim̃araboiano napano Yemesi ga, napano naio be kiado Tubo kuruano.
GAL 1:20 Nina naruei mia venia napano nojo neberiio ka kamiu naio be riano. Kiniou maka nala sibi, Atua naio mijikiaio.
GAL 1:21 Tenene na naruei, nojo Yerusalemo jibe na maka bogo vesiou leleio. Ana karina nejeliviv ea vio nalo napano ea tanobuku juo napano Siria bija Silisia,
GAL 1:22 mila na ka bogo na, namoneano nalo na tanobuku dolu na mave ea vio Yutea, bija kiano komeli labo napano Yerusalemo, nalo na maka ajikia vatitig kiniou vo.
GAL 1:23 Nalo amijog ga vaio napano tomu nalo aju aberenio, aber “Toro nanua jom̃a mijil lelan kito vururua na, vonganei naio jom̃a mioliolu jikili ka kiado moneano nanua naio jom̃a milavio jikili ka ruedomio.”
GAL 1:24 Ana bior vite na, nalo aju amidular Atua toru kario napano naio jo bilig kiaku meuliano jibe nei.
GAL 2:1 Bogo na yuka duelimo ba veri [14] barlaka bano, ana Atua jiloglog ka kiniou ber monoka navavin ea vio Yerusalemo bereio. Nomijog Atua mil jibe na ana kiniou Barnabas nubano, mia noburukar Taitas bunu binimei bija kumemi. Kumemi nuboru Yerusalemo, ana numitutano ea vioriano tai napano kumemi liko ga tomu na tukamuano na tum̃aro ga abinimei joomo eaio. Ea vioriano nei, neber bisivisii iliano nalo napano m̃a nojo nomioliolu kanio ban tomu nalo na maka ave kulo Ju. Neber bisivisii vatitig vite nalo nonovio nei napano nojom̃a nemilaio banlo, bior maka nesidom ka aver kiniou nemim̃au maka rimemedu, ka mia nalo aitava re ea kanaku im̃auano binimei bokar bogo nei, mila ana kanaku im̃auano rimei ve iakurano bereio.
GAL 2:3 ?Beamu neberiam̃a mia nalo ail sikili ka kiniou, ka mia never tomu nalo na maka ave kulo Ju, monoka nalo bunu ava joomo, mia vioriano nei naio ber venia? Tivelinio ka kiaku bilbilu nei Taitas, naio maka ve toro Ju tai, naio be toro na vio Kris tai, napano naio maka riva joomo, mia maka nalo atutua naio ka aver naio monoka riva joomo.
GAL 2:4 Ea vioriano nei naio beve terakurano napano nalo ajidom ka Taitas riva joomo, ana mia namial nalo nei jibe ka napano aberenio nalo abe kuruado, mia nalo amila sibi ga. Nalo na abinimei joomo ea vioriano kar ga ajidom atuluku ga avitiv kumemi ga. Ajidom avitivitii kumemi tibe na bior nalo maka asaaro ka napano numitu nuberloglog ka kumemi numijurukar bija Yesu Kristo ruei, ana na bajago moruo re nua maka bunu avokario m̃elea kumemi, mia kumemi nubisi kalo. Mia nalo nei maka asaaro ka kenememi iliano nalo, mia ajidom ala ka napano ka tuboiano na nalotuano na kulo Ju nalo kanalo monokanio rivokar kito nonovio sikili dam̃ariga.
GAL 2:5 Mia kumemi numisidom nuvakar vatitig ilirianiano na Ioluano Vou, ka mia kamiu kumijikia kuvakario rimemedu ga, naruei nuberburelo, ana maka nuvijamo kalo leleio, napano aju ajidom ayuku kinimemi iliano rivatove.
GAL 2:6 Ea vioriano nene, tomu nalo tai napano aberenio nalo abe navurim̃araboiano nalo, mia kiniou maka neial lerinio ealo ver abe tomu na tortoru nalo p̃eli na maka ave tomu na tortoru. Nina buriakurano ga na, bior Atua naio maka lele tovon sio nalo na jibe na. Mia navurim̃araboiano nalo na, maka lele averloglog kiniou ka vite vou tai leleio ka noioliolu kanio.
GAL 2:7 Makanio, maka tibe na. Nalo abitilubar ka Atua, ea ga kiano sikiliano, naio bitirilar kiniou ka mia neve atevi tai, ka mia neverial ioluano vou nei van nalo na maka ave kulo Ju nalo, jibe kanio napano ea kiano moroano bunu napano naio bitirilar Pitere ruei, ka naio bunu rive atevi tai ka naio riverial Lilianiano Vou van nalo napano abe kulo Ju nalo.
GAL 2:9 Naruei Yemesi naio Pitere a Jone, napano tomu nalo aberenio ka nalo ve tolu nei abe kialo navurim̃araboiano, nalo abitilubar ka Atua midu im̃auano maraiu nei joa jum̃aku ea kiano tiniememiano. Ana nalo tolu nei abinimei abanjum̃alo kumemliko Barnabas, jibe ka napano kumemi nube taara takurano kumemliko nalo, mia nubiniu numijamo ka nuvitibure im̃auano nalo, jibe ka napano mia kumemi ve juo nuva nuvioliolu ea vio nalo na tomu nalo napano maka ave kulo Ju, a mia nalo avan aioliolu ea kulo Ju nalo kialo vio.
GAL 2:10 Mia nalo na amijev iliano takurano ga ban kumemi juo, aber monoka kumemi juo tiniememi rimaio ka kanalo talim̃asa nalo yako Yerusalemo, ka mia nuvijailo, mia nina be titai napano nejidomii bogbe ruei ka mia neim̃aukanio tibena.
GAL 2:11 Iorou ka nina, kiniou nabatove bereio, naba nojoa komeli napano Antioko, naruei ka bogo na Pitere naio malivo ka kumemi ea vio na, ana kiniou nejikil noju kamu ea namoneano nalo miralo, neberbure naio, bior meravo batitig ka vaio napano naio mila maka memedu.
GAL 2:12 Beamu, Pitere naio mila memedu ga, kanio napano naio jo jinan ga naliko kuruado nalo napano nalo maka ave kulo Ju, mia iorou kanio, Yemesi miila kiano tomu tai abinimei Yerusalemo, ana nalo amil ban Pitere, nalo ajum̃a aber jibe nei aberinavo “Nalo napano maka ave kulo Ju, nalo bunu monoka avakuveulo, ver p̃eli, mia Atua maka rijikia rilarurlo.” Iliano nei maka takii vaio napano vioriano na toru nei berenio beamu, mia mila lelan Pitere kiano jidomiano, mila naio merou, ana kario naio maka bunu saaro ka sinan vio takurano naliko namoneano nalo na napano maka avakuveulo.
GAL 2:13 Mia maka Pitere naio ve takurano, mia kuruado dolu nalo na vio na, napano nalo abe kulo Ju, binimei bokar Barnabas bunu, nalo na ajakisor Pitere ea jidomiano na merouano nei.
GAL 2:14 Mia bogo napano nemial napano nalo aju amiel jibe na ea m̃arabo tai napano maka rimemedu tibe ka napano Lilianiano Vou naio berenio, nemil jikili ban Pitere ea nalo na miralo, neber jibe nei, neberenio “Pitere, be riano ka napano jau kobe toro re Ju, mia bo laka napano beamu ruei, jau kojo kojaaro ka nalo napano maka ave kulo Ju kialo bajago ruei, napano jau kojinan vio takurano kamliko ruei. ?Mia jum̃abe naruei, ana jau kojidomii kotutua bereio nalo ka monoka atakii kiado bajago kulo Ju, napano jau kober nalo monoka avakuveulo?”
GAL 2:15 A ka bogo na, kiniou neber vatitig ka nalo jibe na neberinavo “Kito romiyotuba ea bajulukuti na kulo Ju, kito maka ve kulo dolu nalo, tibe ka nalo napano kulo Ju nalo aju ajidomii aber nalo amiagiago ga.”
GAL 2:16 Makanio, kito robe kulo Ju memedu nei, mia vonganei, kito romijikia ruei, ka toro maka rijikia rimemedu vija Atua, napano naio jo mijogkar vatitig ga Mosis kanano tuboiano. Toro napano monea Yesu Kristo, naio ga mijikia rimemedu rivija Atua. Jidomiano nei naruei mila kito kulo Ju kito monoka romonea Yesu ga bunu, ka kito romemedu vija Atua. Kamiu monoka kuvijikia vatitig iliano napano Atua kiano iliano lu berenio, napano berinavo maka toro tai leleio napano rimemedu vija Atua bior naio jakii batitig tuboiano na.
GAL 2:17 Mia kito kulo Ju nalo, kito roju rojidomii roberiam̃a tuboiano nei mila kito romemedu kitoliko Atua ruei na, mia maka tibe na. Mia verenio be riano ka kito kulo Ju bunu, monoka romonea ga Yesu Kristo bunu ka romemedu kitoliko Atua, neber p̃eli tomu tealo amijog bova ka iliano nei. P̃eli nalo alavon ka aver iliano na mila ana kito kulo Ju robinimei robe tomu na kariano beverare ga tomu nalo napano maka ave kulo Ju. ?Ana p̃eli nalo amila von ka aver bunu ka tibe na, nina sano nene berenio Kristo nei naruei mila kito kulo Ju robinimei robe tomu na kariano ga? Mia makanio, nina maka tibe na leleio garuei.
GAL 2:18 Nina bior nanua, kiniou nojom̃a nomue dodom bajago moruo na tuboiano na ruei, mia verenio vonganei nevitirilar bereio bajago na takiiano na tuboiano moruo na, napano neberenio monoka ravakuveu a monoka rala tibe na tibe na ka romemedu vija Atua, nina mila ka beamu na, kiniou bunu nebe toro na nemilakorov tuboiano ruei.
GAL 2:19 Ee, tuboiano na naio jidom rila ka kiniou nam̃aro, mia vonganei tuboiano na naio javukia tasim̃aro tai ga ea kiniou, kiniou nebisi eaio ruei. Kiniou nojuvan tuboiano na ruei, kanio kanaku meuliano toa ga Atua.
GAL 2:20 A vonganei, maka bunu ve kiniou napano nojo nemeul, mia Kristo naio jo meul ea kiniou, mia kanaku meuliano na vonganei, naio moluo bior napano nomonea Atua Kenerinio, napano naio tinien miia kiniou toru laka, naio mijamo ka kiano meuliano, naio m̃aro kar kiniou.
GAL 2:21 Ea bajago na, romial Atua kiano tiniememiano toru laka, naruei maka nejikia nala kiano tiniememiano nei rimei rive vite kurano ga tai, bior ver toro mijikia rimei memedu vija Atua bior ga naio mijogkar tuboiano, nana jibe na jibe Kristo naio m̃aro kar iakurano ga.
GAL 3:1 Kiniou nemial kamiu kulo Kalesia jibe ka pariparimiu amiavovu ga. ?P̃eli tomu nalo tai amila mali ea kamiu bo, tenene kamiu kubano kumilaluvu m̃arabo? Neberial meravo ea miremiu ruei, ka jum̃abe ana Yesu Kristo naio m̃aro ea m̃akolkolo, mia voniganei kamiu kuba kube dolu bereio.
GAL 3:2 Kiniou nejidom nevika vikadeniano tai van kamiu beamu vo. Vikadeniano nene jibe nei “?Kamiu nanua kumijev Niununo Lu ruei, kumijevio kar vaio? ?Kumijevio bior kumonea Mosis kiano tuboiano nalo na?” Makanio, kamiu kumijevio kar ga kumijog Ioluano Vou ana kumitu kumoneaio.
GAL 3:3 ?Kamiu kubitikar kenemiu meuli-ano vou bija Kristo ea moroano na Atua kiano Niununo Lu, mia vonganei ana kumisidom ka kuvila nonovio ea kenemiu moroano ga? Maka leleio, kamiu kumiavovu tanea ga ruei.
GAL 3:4 Ea kenemiu meuliano vou nene, vite novo telabo amaluvo ka kamiu ruei, jibe ka napano Atua mijev kanano Niununo Lu ban kamiu, mia naio jo mila jamerijiano nalo ea miremiu, mia jum̃abe, p̃eli kamiu maka kuvitilubar vo ka vite nalo na abinimei ea kamiu kar venia? Monoka kuvijikia vatitig ka Atua mila jibe na, maka rivior kumitakii tuboiano, mia kar ga beamu kamiu kumijog Ioluano Vou, mia bogo napano kumijogio ana kumoneaio.
GAL 3:6 Kamiu kuvisidomii von tormoruo Epraamo napano Atua kiano Iliano Lu berii naio, ber “Bior ka napano naio barkar tinieno ea Atua, ana na naio binimei memedu bija Atua.”
GAL 3:7 Mia tomu nalo na abinimei iorou napano abarkar tinielo ea Atua jibe na, nalo abe tormoruo Epraamo kiano bajulukuti nalo memedu.
GAL 3:8 Bior Atua kiano Iliano Lu berial Ioluano Vou nei nuanua laka ruei, napano naio berii Epraamo berenio “Ea jau mia Atua rilivu ka yati na tomu nalo nonovio na vio yetemeriba nei.” Takii iliano nei, Iliano Lu berkario bunu ruei berinavo mia Atua to rila nalo na maka ave Ju mia amemedu naliko, verenio avarkar tinielo ea naio.
GAL 3:9 Ana na nalo napano abarkar tinielo ea Atua jibe na, mia naio jo milivu kalo vonganei, jibe kanio napano naio milivu ka tormoruo Epraamo re nua, ka naio barkar tinieno eaio.
GAL 3:10 Mia nalo napano aju ajidom kavulio ka amijikia avokar meuliano bior amila von ka amonea tuboiano nalo, nalo na ajutan ka vironiano tai ruei, bior maka toro tai napano naio ridukar vatitig tuboiano nalo nei riviniu, ana Atua kiano iliano lu berenio, “Tomu nalo napano maka amonea vite nalo nonovio napano ajua niosi na tuboiano, mia nalo monokanio avokar vironiano.”
GAL 3:11 Tenene na meravo vatitig ban kito ka napano maka toro rijikia rimei rimemedu vija Atua kar ga naio monea tuboiano na, mia jibe ka Atua kiano Iliano Lu berenio, napano berinavo “Toro napano memedu bija Atua kar ga barkar tiniene ea Atua, naio ga mijikia rimeul.”
GAL 3:12 Iliano nei naruei naio berii bajago na viekouoiano, mia romijikia reial bajago na viekouoiano nei vija bajago na moneano na tuboiano, naljuo maka aveverare leleio. Nina bior bajago na moneano na tuboiano, naio jumolu jua tivelinio vite nalo napano toro ga mijikia mim̃aukanio, jibe ka napano Iliano Lu berenio berinavo “Toro napano mila saba nalo nonovio napano tuboiano berenio, mia naio mijikia rivokar meuliano eaio.”
GAL 3:13 Mia maka ve kito tai napano rila nonovio vite nalo napano tuboiano berenio, ana tuboiano berkar vironiano bija m̃ariano ban kito robiniu. Mia Kristo naruei naio binimei buru bulag kito ruei den tibureiano nene, mijamo ka naio midu jeledo, ana naio ba jotan yetano kanio. Nina jibe ka napano Iliano Lu berenio, napano berinavo “Toro napano amiorkario jaklele ea iesi mave ka rim̃aro, amiorkar naio bior napano naio jotano yetano ka Atua kiano tibureiano.”
GAL 3:14 Kristo naio mijamo ka naio jibe na, ka tomu nalo napano maka ave kulo Ju, nalo amijikia avokar bunu ka ilivuiano nalo napano Atua berkario ban Epraamo, ana vite nei mila ana vonganei, kito napano robiekouo ea Kristo, romijikia rejev Niununo Lu napano Atua berkario ka mia rije van tomu nalo.
GAL 3:15 Kuruaku nalo a kuvivinioku nalo, mia kiniou neverii tukunu tai ea kiado meuliano ga napano sano nene vaataro ka ga ea Atua kiano verikariano ban Epraamo. Verenio toro tai riverial kiano ilimaariano river bogo napano naio mia rim̃aro, mia kanano saba nalo monoka atibe nei atibe nei, naruei naio rila m̃esi tai ka river verikariano nei ka mia ver naio maro, mia toro dolu maka rijikia rudular kanano iliano, a maka rijikia tusolio.
GAL 3:16 Ana Atua mila kiano verikariano ea Epraamo, bija kiano bajulukuti. Iliano nei maka river ga ea tomu nalo napano ea kiano bajulukuti nalo, napano naio ber toro takurano ga, mia toro nene naruei naio be Kristo.
GAL 3:17 Kanaku iliano ea vio nei sano nene jibe nei. Beamu Atua birakar kialo virakariano nei jikili, naruei iorou kanio yuka duelimo toromomou veri duelimo va rolu [430] barlaka na tuboiano na Mosis kanano naio maluvo. Mia tuboiano nei naio maka rijikia rila korov verikariano nei, a maka rijikia riolkon bulag Atua kiano iliano.
GAL 3:18 Verenio ramijikia ravokar Atua kiano ilivuiano kar ga roju rajakii tuboiano napano naio binimei iorou, nina jibe ka ber Atua kiano verikariano na jo jukamu naio bekurano ga. Mia romial Epraamo bokar Atua kiano ilivuiano nalo bior ga naio bokar Atua kiano verikariano bo, maka rivior tuboiano.
GAL 3:19 Bo ga, ana p̃eli vikadeniano tai jo, napano berinavo “?Jibe na, Atua jian Mosis kiano tuboiano na kar vaio p̃eli bior vaio?” Boga, kiniou neverenio ka kamiu voniganei, ber Atua naio mijeduka bereio tuboiano nei mave ea kiano virakariano, ka rijai kito tomu nalo ka rovitilubar kiado kariano. Atua naio midu tuboiano nei ka tumolu tu rivano-o rivokar bogo napano toro napano naio be yati na Epraamo kiano bajulukuti, napano Atua berkario, rimoluo ea kito. Mia romial napano tuboiano be kiano im̃auano novo tai jo, mia kito monoka rosidomiikar tuboiano nei, ver bogo naio rimaluvo, naio rimei ea nailiano nalo tukamu, karina ajianio ban toro tai, naina be Mosis, ana naio bario binimei ban tomu nalo. Mia bogo napano Atua mila virokariano na bija Epraamo, nina maka tibe na.
GAL 3:20 Bogo na naliuo nei aju vio takurano, maka nailiano tai p̃eli toro dolu tai napano jo iviso ka naljuo ka rivar iliano, mia Atua naio takurano ga berial kiano verikariano memedu ea Epraamo mirano.
GAL 3:21 A nina maka river ka tuboiano rilavio ka riverbure Atua kiano verikariano, makanio. Ver Atua naio mijikia sian tuboiano dolu tai bereio napano ver kito rojogkar nonovio, ana mijikia rila kito romeul, p̃eli naio jian tuboiano nene ban kito ruei ka romijikia romemedu vija naio naruei.
GAL 3:22 Mia maka titai tibe na, bior Iliano Lu naio berenio ruei ber kito nonovio rojutano ka moroano na kariano, kito roju romila korov tuboiano ga. Mia Atua kiano ilivuiano nalo napano berkar ka mia sianio, nalo amijikia amaluvo ea kito bior napano ga kito rabarkar tiniedo ea Yesu Kristo.
GAL 3:23 Nanua ruei, binimei bokar vonganei napano romijikia rabarkar tiniedo ea Kristo, Mosis kiano tuboiano na naio jom̃a miadikar m̃elea kito, jibe ka napano rojua yimo na lakoiano ruei.
GAL 3:24 Tuboiano na naio jibe kanio jo bitikar kito, jibe kanio kiado naverloglogiano tai, binimei bokar bogo napano Kristo naio binimei, ka ea bogo na, romijikia ravarkar tiniedo ea naio ana romijikia romei romemedu vija Atua.
GAL 3:25 Mia vonganei, tuboiano na maka bunu rivitikar kito, bior bogo na napano ravarkar tiniedo ea Kristo miyotuba ruei.
GAL 3:26 Ana bior napano kamiu kubarkar tiniemiu ea Kristo Yesu, kamiu nonovio kamliko naio kube Atua kenerinio nalo.
GAL 3:27 Abaruei ea kamiu ruei, ana kubinimei kube takurano bija naio, jibe kanio napano kumijev ko bajago novo nalo napano Kristo kiano ea kamiu jibe kanio kumiya kuluniabemiu ko mokotenemiu.
GAL 3:28 Mia kamiu nonovio kubinimei kube takurano ga ea Kristo Yesu, mia jibe na naruei, kamiu nonovio kube veverare. Bokanio kito monoka rotiburevure re tomu nalo, rover ninei be toro Ju, mia nina be toro dolu ga, p̃eli na rover ninei naio be toro na toru, mia nina be toro na im̃auano ga, p̃eli na rover ninei be tubo, mia nina be toro na im̃auano ga, p̃eli na rover nina be sum̃ano, ana ninei be tira ga. Mia bajago na monoka toa re bunu kamiu.
GAL 3:29 Mia bior kamiu kube Kristo kanano jibe na, kamiu naruei kube Epraamo kiano bajulukuti memedu, mia tibe na, ilivuiano nalo napano Atua naio berkario ka Epraamo kanano bajulukuti nalo, mia kamiu naruei kuvarilo.
GAL 4:1 Naruei mia neil ta bunu vo ea bajago na kito ka nevisivisii lie vo ea tivelinio ka tuboiano na. Verenio toro tai, ana naio rim̃aro, mia kenerinio mijikia rivar kiano saba nalo. Mia ver kiritete nene naio telisu kia ga vo, mia naio maka rijikia rivitikar saba nalo nei. Mia jibe ka naio be karam̃ano kanano toro na im̃auano ga,
GAL 4:2 ka mia naio monoka totano ka kulo dolu nalo ga jum̃alo, jibe ka karam̃ano dolu nalo, rivano-o rivokar bogo memedu napano karam̃ano berialio nua ruei ka mijikia rivitikar saba nalo na.
GAL 4:3 Ea kito naio jibe na bunu, napano beamu, rojibe ka kiritete nalo, napano kiado jidomiano jutano ka sim̃aro nalo na jukamu ea vio yetemeriba nei.
GAL 4:4 Mia binimei bokar bogo nene memedu, Atua miila kenerinio binimei, napano tira tai bario, naio moluo ea vio yetemeriba nei, a napano naio moluo yetano ka kulo Ju nalo kialo tuboiano.
GAL 4:5 Naio moluo yetano ka tuboiano na, naio miluo eaio, ka naio mijikia rivuru bulag kito napano rojutano ka tuboiano nei naruei, ka mia Atua rivuru bulag kito romei rove kenerinio nalo.
GAL 4:6 Mia vonganei, jibe napano robe kenerinio nalo, naio juvan kenerinio kiano Niununo binimei ea kiado iviso, napano naio mila na kito romijikia rovio Atua, rover “Teta, Teta.”
GAL 4:7 Bior vite na, kamiu maka bunu kuve tomu na im̃auano nalo ga, mia kamiu kube Atua kenerinio nalo riano, napano mia naio sian van kamiu vite novo nalo, napano naio berkar berinavo mia kenerinio nalo avario.
GAL 4:8 Nua na, ka bogo napano kamiu maka kuvijikia Atua vo, kumitutano ka moroano na sim̃aro nalo napano maka ave atua leleio,
GAL 4:9 mia vonganei, kumijikia Atua ruei, p̃elina bo ka never tibe na, never voniganei, Atua mijikia kamiu. Mia kiniou nejidom nevika den kamiu, nenerinavo “?Kar vaio ana kumisidom kuva iorou bereio ea sim̃aro nalo nanua na, napano maka ve kanalo moroano tai, a napano maka ajikia avijuku rivu ka kamiu bogo tai? ?Kar vaio ana kumisidom kuvitutano ka kialo moroano bereio?
GAL 4:10 ?Jum̃abe ana kamiu kumitu kumisidomikar kanalo legiano lu nalo, a kanalo siberio lu nalo, a kanalo bogo lu nalo, a kanalo yuka lu nalo jibe na? Kamiu kuberiam̃a mia Atua saaro ka kamiu kario?”
GAL 4:11 Tomnei, kiniou nemerou ka kamiu toru bior kamiu? !Nemialio jibe ka nomim̃au toru laka ka kurano!
GAL 4:12 Kuruaku nalo a kuvivinioku nalo, nanua beamu kamiu maka kuvitutan ka tuboiano, ana na ka bogo napano nobinimei nojo bija kamiu, nomila kiniou bunu najavukia ga kamiu. Mia vonganei, nomijogio ka napano kumisidom ka kuvan bere ea bajago na tuboiano bereio, tenena nebika jikili den kamiu ka kumei tibe ka kiniou bereio ga, napano kiniou maka bunu nototan yetano ka tuboiano. Kamiu kuvisidomii vonio bogo napano nomioliolu beamu ban kamiu, napano kiaku mieiano ga mila napano be kiaku bogo ka noto vija kamiu, mia bekurano ka nemie ka bogo na, kamiu maka kuvila kiniou nojog rivova.
GAL 4:14 Makanio, mia kanaku mieiano nei mila lelan kamiu toru laka, mia maka kuvijog rivova ka kiniou, maka kuvisidom va ea kiniou, makanio, kuburu kiniou naban ea kunuemiu, jibe ka napano ver kiniou nebe nailiano tai na Atua kanano, p̃elina nejibe napano nebe Yesu Kristo ga.
GAL 4:15 Nanua kumisaaro m̃elea ka kiniou, nomial jibe kanio napano ver kumijikia kuvila, p̃eli kumisaaro ka kuvurular miremiu ka riverei ka miraku ka rijai kiniou, mia jum̃abe vonganei?
GAL 4:16 P̃eli vongane, kanaku ilirianiano nalo nei, nalo amila kiniou nebinimei jibe ka kenemiu bilbilu va tai bereio. ?Mia venia na?
GAL 4:17 Kulo dolu nalo na napano nomijog aber aju kamliko vonganei, nalo na aju abilvilig Kristo kiano Ioluano Vou, nalo na aju abijurukar kamiu ka ave bilbilu rivu kamliko, mia kamiu kuvisidom sop̃i ealo, mia nina be tena aju kubijukubin kamiu ga, bior ajidom ga ka avuru bulag kamiu den kiniou.
GAL 4:18 Mia maka never tibe na ka mia kiniou ga ve takurano nomijikia noto vija kamiu, p̃eli na kiniou ve takurano ga ka kito rove bilbilu vatitig rivu, bior bajago na bilbilu vu rivija toro dolu naio bo bogo nonovio, mia bo ga verenio ka ga rila vite na bo.
GAL 4:19 Keneriku nalo, kiniou nejavukia tira tai napano mabono mijalele ka naio rivar tete, napano nojo nomijog bova toru ka kamiu, ka kamiu kuvijev Kristo vija kiano bajago na bo nalo ea kenemiu meuliano nalo.
GAL 4:20 Riano, ver nomijikia noto kitoliko vonganei, mia nojog rivu laka. Verenio tibe na, mia nevilig kanaku iliano rivatove kija ve telisu, mia vonganei napano nojo laka ka kamiu jibe nei, maka bunu nejikia ka kamiu jum̃abe naruei.
GAL 4:21 Nalo na kamiu napano ajidom ka kito monoka rodukar kiado tuboiano rimemedu vija Atua, nejidom ka nalo averdop̃e kanaku vikadeniano tai, ka “?Tuboiano nei napano ajum̃a aberiio, nalo aju amijoglubar venia na tuboiano nei jom̃a berenio, p̃elina maka ajoglubario?”
GAL 4:22 Iliano Lu nei berii tormoruo Epraamo, napano naio be kenerinio tete sum̃ano juo, napano tinene, tira na Ekara, napano mim̃au ea koano, naio bario jukamu, mia tinene, koano memedu, napano Sera, naio bario iorou.
GAL 4:23 Nana napano moluo iorou, naio be Aisak, naio moluo bior Atua berkario, mia dolu napano moluo beamu, napano Ismael, naio moluo jibe na ga.
GAL 4:24 Naruei mia romijikia reial viginiano nei jibe kanio jamerijiano tai, napano tira juo nei, a jibe ka verikariano napano Atua milaio. Tira nei Ekara naio jibe ka virakariano napano Atua milaio ea burusuku na toru na Sinai, nina ea buruvenuo na Arapia, vio na naruei napano Atua jian tuboiano ban Mosis eaio. Ekara nene, naio be tira na im̃auano ga, mia kenerinio nalo, nalo bunu abe tomu na im̃auano ga. Tenene na Ekara naio bunu jibe kanio komeli labo na Yerusalemo, napano tomu nalo nene abokar tuboiano nene nalo jikili, mia nalo abe tomu na im̃auano ga bunu, bior nalo ajutan ka tuboiano nene naruei.
GAL 4:26 Mia tira dolu nene naio be Sera, napano naio maka toro rivokar naio kanano im̃auano naio ga jo, mia nina javukia Yerusalemo dolu napano naio be Yerusalemo na mave. Sera kenerinio nalo, nalo bunu maka toro na toru tai rivokarlo ka im̃auano mia nalo bunu aju ga jibe na, tenene na milaio ana na Sera nene jibe ka be keniedo napano rabarkar tiniedo ea Kristo.
GAL 4:27 Iliano Lu naio ber vite nalo nei kija ruei, berenio “Tira nei napano beamu jau maka kejikia kavar tete bogo tai, jau kajog rivu, kasaaro, koiou. Jau na koamo naio juvanso, vonganei kenerimo nalo amei ve telabo, tovulu nalo na tira nana koano jo bija ga naio julaka bario.”
GAL 4:28 Iliano nei javukia napano Atua berkar berinavo mia kenerinio nalo ve miroano, a kamiu kuruaku nalo a kuvivinioku nalo, kito naruei kito robe tete nalo na Atua kiano verikariano nei, jibe kanio kiano verikariano re nua mila Sera nene bar kenerinio nei napano Aisak.
GAL 4:29 Ana bogo na Aisak nene moluo, tete dolu nei Ismael napano naio moluo ga jibe na, mia naio jo mila titig kiritete napano Aisak, napano naio moluo ea Atua kiano Niununo Lu. Mia binimei bokar banei, kito romial tomu nalo ajum̃a amila bajago na jibe na kia ga vo.
GAL 4:30 ?Mia Iliano Lu naio berenio venia? Naio berenio Atua mil ban Epraamo, berenio “Jau monoka kovukular nana napano be tira na im̃auano ga, naljuo kenerinio, bior kenerinio nei maka rimemedu ka mia rijikia rivar kanamo saba tai. Saba nalo na mia riviniu rivan ea kiritete na tira napano naio jo ga jibe na, napano be koamo memedu.”
GAL 4:31 Nao, banalo, Atua naio ber jibe nei, ana kiniou neber ka kamiu naruei neber kito maka rove kenerinio tira na im̃auano na, napano rojutan ka Mosis kanano tuboiano mia p̃eli ga, mia kito robe kenerinio tira napano jo ga jibe nei, jibe ka napano romonea Yesu, a vite nalo napano Atua berkar ban kenerinio nalo memedu, mia nei naruei mia kito rovokario.
GAL 5:1 Bogo napano Kristo buru bulag kito, naio mila jibe na ka mia rataluvo na mia rataluvo batitig garuei, maka ka mia ravan bereio ka rovan rotutan ka tuboiano napano Mosis kiano bereio. Tibena, kamiu monoka kuvitu sikili, ka nalo atutua re kamiu ka kumei tibe tomu nalo na im̃auano bereio, napano tuboiano nei riadikar vatitig kamiu sikili bereio.
GAL 5:2 Kamiu kuviagago vatitig ka iliano napano kiniou Pol nojo nober ka kamiu. Verenio kamiu kuvijamo ka nalo avututua kamiu napano monoka kuvakuveu, mia im̃auano napano Kristo mim̃aukanio ruei naio maka rijikia rijai kamiu leleio.
GAL 5:3 Ee, tenene napano neber bereio iliano na jikili nei ka kamiu, ka toro napano verenio naio rijamo ka naio rivakuveu, naio jo midu naio jo yetan ka tuboiano nei bereio, a mia toro napano naio jotan ka tuboiano nei jibe ka naio monoka rivitikar vatitig ka rijogkar vite nonovio napano tuboiano nei berenio, ver p̃elina mia rije vironiano.
GAL 5:4 Kamiu tealo napano kumitum̃a kumila vio ka kumonmonea tuboiano na ga ruei, ka kamiu kumemedu vija Atua kanio, kamiu na kumitu kumite bulag kamiu ruei den Kristo, kamiu kubilig takaamiu ka Atua kanano tinievuiano ruei.
GAL 5:5 Mia kito roju rojidom m̃elea laka ka mia Atua naio rila kito romemedu rivu vija naio, bior ga napano kito rabarkar ga tiniedo ea naio, ana Niununo Lu jo mijai kito romonea jikili ka bogo napano roju rorea kia ga vo, mia Atua monoka rila tibe na van kito.
GAL 5:6 Bogo napano robinimei takurano kitoliko Kristo Yesu jibe na, bekurano ka toro be pakuveu, p̃eli maka rive pakuveu mia tena burutomoruo loa laka nina be kiado viekouoiano ea Kristo, napano viekouoiano nei naruei naio mila kito rojidom Atua a bija tomu dolu nalo bunu.
GAL 5:7 Beamu kiniou nemial kamiu kumitikiti bo laka, ana vonganei, maka bunu tibe na. Atua naio bio kamiu beamu ruei, ana nejidom nevika ka keinia toro napano naio berbure m̃arabo ka kamiu bereio, mila ana maka bunu kumonea ilirianiano? !Kiniou nemijikia maka ve Atua na!
GAL 5:9 Verloglogiano na bova napano naio jom̃a mila lelan kenemiu jidomiano, naio jibe ka iliano tai napano berinavo “Soromi tai napano naio kiritelisu ga ana naio mijikia mila lelan niamoiou reraio amijea.”
GAL 5:10 Ana jibe kanio kamiu kamliko kiniou kito robe takurano ea Atua, kiniou nojo nomonea kamiu jikili kiano vo ka mia kiado jidomiano ve takurano ga, ka kito monoka rovutua re namoneano nalo napano maka ave kulo Ju, ka monoka nalo ave pakuveu. Mia nojo nabarkar tinieku jikili ea kamiu bunu ka toro napano naio jom̃a mila lelan kamiu jibe na, bekurano ka naio be toro kei mia Atua rudu vironiano vanio.
GAL 5:11 Kuruaku nalo a kuvivinioku nalo, be iliano nalo tai napano ber ka kiniou bunu, najo m̃a nomiolu kia ga vo neber namoneano nalo monoka ave pakuveu bunu ka mia Atua naio mijikia rilarurlo, mia iliano na naio maka rive riano. Verenio kiniou noto noioliolu tibe na, mia tomu nalo napano aju kamiliko nalo asaaro ka kiniou ga na. Ana kamiu kuvial, nalo aju tiniel jer kiniou kia navo, bior kanaku ilivisivisiano na m̃akolkolo napano Kristo kanano, naio jo miolkon bulag kanalo verloglogiano nalo.
GAL 5:12 Kiniou nojo nojidom ka tomu nalo napano ajum̃a amila bilvilig kamiu, a mila tiniemiu memebiju kanio ajidomii toru ka monoka kuve pakuveu, bo ka nalo adu iobogu ana nalo ga ativi kalo bereio ka mia ala niegeniegelo.
GAL 5:13 Mia kamiu kanaku bilbilu nalo, Atua naio buru bulag kamiu ruei, riano ga ka maka bunu kuvitan ka Mosis kiano tuboiano na. Mia kamiu kuvisirarago vatitig rivu, mia kuvisidomii re bunu ka kuver “Bo na, kiniou najaluvo ruei den tuboiano nei ruei, kiniou ga naruei. Ana kiniou nemijikia nala vite nonovio nalo napano kanaku jidomiano naio jidomiio.” Kamiu kuver re bunu tibe na, ana mia monoka bajago na kenemiu tinievuiano naio monoka rila kamiu kuvisaaro ka kuvijaija toro dolu bunu.
GAL 5:14 Bajago na jibe na jakii iliano tai na tuboiano, napano naio barko vatitig iliano dolu nalo na tuboiano, napano naio berenio “Mia kosidomii tomu nalo napano aju vaataro kaso, jau kovijuku rivu kalo rive verare kanio napano jau kojidomiiso.”
GAL 5:15 Mia vere kamiu kuvitum̃a kuvilivil ea kamiu, a kuvitum̃a kuviser niegeniege kamiu tibe ka tededen nalo, mia monoka kuvitikar vatitig kamiu rivu, kenemiu bajago na jibe na naio mijikia rila lelan kamiu nonovio bereio.
GAL 5:16 Kiniou nejidom never iliano nei van kamiu. Kamiu na monoka Niununo Lu tukamu ka kamiu, a kamiu kuvitu re kuvitakii bajago moruo na kenemiu ga napano kumoluo bijaio.
GAL 5:17 Bior bajago napano romoluo bijaio, naio miilkue ka bajago na Niununo Lu kiano, a nana napano na Niununo Lu nene, naio maka saaro leleio ka nana napano kito romoluo bijaio. Vite nei naruei jibe ka napano bajago juo nei, abe juo ajum̃a amila baravo ka naljuo. Tenene na jibe na ver Niununo Lu jo jukamu ka kamiu, maka bunu kuvijikia kuvila ga vaio napano kenemiu jidomiano milavio kanio.
GAL 5:18 Mia monoka tiniemiu ribobogia re bunu ka ver Niununo Lu to tukamu ka kamiu, mia kamiu maka bunu kuvitutan ka tuboiano nei.
GAL 5:19 Im̃auano nalo na bajago na tomu nalo amoluo bijaio naio meravo ga. Im̃auano nalo nene, ajibe ka tomu nalo amila nasiakiano, nalo amila vite nalo na imouiano, a bajago na kiriniagiago nalo,
GAL 5:20 bija volkouano na tavoru, a bija navarsemeiano. Bereio, be navilviliano, tukurukuano, jokuano, tiniemimiano, buruvitiano, vuru vurevureiano, ilidieiano kean tomu nalo,
GAL 5:21 na tinietukuniano, a bija nalo nei be namunu m̃elea uei, bija namaduano, bija vite dolu nalo na jibe nei. Naruei nomidu tiniemaiano bereio ban kamiu, javukia napano neberii ka kamiu nua ruei, ka kamiu kuvitikar kamiu, bior toro napano m̃a jo mila bajago nalo na, mia naio maka lele rijikia toa Atua kanano navenatuboiano bogo tai.
GAL 5:22 Naruei kurukuti napano Niununo Lu mila miluo ea toro kanano meuliano jibe nei: tinietiiano, nasaaroiano, tum̃aroano, jidomiano tebieviano, natinievuiano, nanovoiano, niabetitiano, navatoveiano, a natelan vuuiano.
GAL 5:23 Bajago nalo na abo laka, mia maka iliano tai p̃eli na tuboiano tai napano riverbure kamiu ka kuvila re vite nalo nei.
GAL 5:24 Ana bajago napano romoluo bijaio, bija kiano nasidom vovaiano nalo, rojukukakarlo ea m̃akolkolo ruei. Nina kito nalo napano robe Kristo kanano, kito rojuvan saba nalo na ruei.
GAL 5:25 Bior kito romeul ea Niununo Lu mia bo ka kito reiel ea kiano bajago na bo bunu.
GAL 5:26 Maka rivu ka kito rotum̃a ravarvar ka kito, p̃eli na kito ga rotum̃a rotulutulu kito, p̃eli na rojoku ka kito.
GAL 6:1 Kiaku bilbilu nalo, averenio kamiu tai rijoru ea kariano mia bo ka kamiu napano Atua kiano Niununo Lu joa kamiu, kamiu monoka kuvijai naio ka kuvuriri naio bereio. Mia monoka kuvil m̃asosou ga vanio tibe ka tiniemiu miiaio, mia monoka kuvitikar vatitig kamiu bunu ka mia vite napano kumila vatitig toro dolu kanio naio rimei re bunu ka rilavon kamiu bereio.
GAL 6:2 Monoka kamiu kuvijaija kamiu tibe na naruei, ka kuvar bitiraviran toro dolu kiano bagaro nalo napano teremi. Tibe na, ana kamiu kumitu kumonea venia napano Kristo kiano tuboiano naio berenio.
GAL 6:3 Ana mia kamiu kuvarvar ka re kamiu tibe ka toro tai napano naio jo jidom naio ga ber “Kiniou riano, kiniou nebe toro tai.” Ver tibe na, toro nene naio jo mijubolibolili naio bereio, bior naio maka rivitilubar ka naio be toro kurano ga.
GAL 6:4 Mia kamiu monoka kuveve terakurano kuvitii veve kenemiu im̃auano nalo napano kumim̃aukanio. Ver tibe na, toro tai maka rijikia rilavon ka rivitii veve von kanano im̃auano nalo abo loa tomu dolu nalo kialo ana monoka naio rivitii veve ga naio ga kanano im̃auano. Ver kiano im̃auano bo mia naio mijikia saaro ga kar kiano im̃auano novo nei. Bior tomu nonovio maka ave verare, bior nalo kialo vite dedade nalo napano teremi napano abario ea kialo meuliano.
GAL 6:6 Kamiu napano ajum̃a aberiloglog kamiu ka iliano na moneano, mia ver bogo tai kamiu kuvileal vite na kiritavaso tai, bo ka mia kuvio kanio kamliko kenemiu naverloglogiano nalo.
GAL 6:7 Mo ana kamiu kuvitikario, ka kuvila sibilili re kamiu bereio. Jau maka kejikia kala dovorovon Atua. M̃ariesi vaio napano komebija ea kanamo tiniavio, m̃arati nene ga napano mia jau kesenio.
GAL 6:8 Mia toro napano mebija kanano bajago napano naio moluo bijaio jibe ka kurukuti tai ea kanano meuliano, mia naio rivar kurukuti tai napano menunu bova ga ea kanano bajago nene, be na maariano, ana ver naio rimebija bajago na Niununo Lu ea kiano meuliano, Niununo Lu naio mijikia rivar sinaniano novo nalo napano meruo bo ea naio, be meuliano napano maka rijikia ribisi deio.
GAL 6:9 Ana mia kito romijikia ravar sinaniano novo nalo rimemedu ka bogo na marimeuano nene, ver rotuvan re im̃auano. Tibe na ana mia kito tiniedo rim̃aro re ka rala bajago novo nalo na bo,
GAL 6:10 ana mia monoka rovijuku rivu ka tomu nalo bogo nonovio, ana monoka tiniedo vu rivu lie vo van nalo napano robe m̃aratavo takurano kitoliko ea Kristo.
GAL 6:11 Mo, mia kiniou nevivitauia kanaku ilim̃aariano nalo ka jum̃aku ga, tenene nei mia kumijikia kuvial kanaku m̃arati iliano nalo ave tomormoruo tibe nei.
GAL 6:12 Nejidom never ka nalo napano ajidom avututua kamiu ka kuve pakuveu, nina jibe ka nalo ajidom avarvar kalo ga rivior vite na kuluniabene toro ga. Ana nalo ajidom ala tibe na kar vite takurano ga, napano amila von ka atuvan ioluioluiio napano Kristo kanano m̃akolkolo ga mijikia rilarur kito. Iliano na nalo maka asidomio, bior nalo amerou ka napano ver aioliolu ka Lilianiano nabo ka Yesu kiano m̃ariano rimemedu tibe na, mia kulo dolu nalo ajil lo.
GAL 6:13 Nalo napano ajidom ka kamiu monoka kuve pakuveu, nalo ajidom tibe na bunu ka mia amijikia ail vevan ka aver nalo ajudovulu kamiu ruei, ka nalo aburu kamiu kubano iorou bereio jeltan ka kulo Ju nalo kialo tuboiano. Mia kamiu kuvitii vatitig, bior napano nalo na bunu maka atu adukar vite nalo nonovio napano tuboiano naio jo berenio.
GAL 6:14 Naruei ea kiniou, maka bunu ve titai ka nesidom navarvar ka kiniou kanio, mia kiado Tubo Yesu Kristo kiano m̃akolkolo ga napano nabarvar kiniou kanio, bior kiano m̃ariano mila bajago nalo na vio yetemeriba nei nalo abinimei jibe ka vite nalo napano am̃arm̃aro ga ea kiniou ruei, ana mila kiniou bunu nebinimei nejibe ka toro na m̃aro tai ea bajago na tibolboiano nalo na vio yetemeriba nei ruei.
GAL 6:15 Ka toro tai rimei rimemedu vija Atua, bekurano ka toro nene be pakuveu p̃eli na maka rive pakuveu, ana ver Atua naio tii toro nene rimei rive toro vou bereio tukamu vo, karina toro nene naio mijikia rimei rimemedu vija naio.
GAL 6:16 Naruei kiniou nobolkouo ka nalo napano mia adukar iliano nei, napano mia amei ave Atua kiano kulo Israel nalo garuei rimemedu, neberenio mia Atua kiano tum̃aroano a natinieiiano to vijalo.
GAL 6:17 Ninei naruei be kanaku iliano. Mia kiniou maka nesidom ka napano toro tai rila yebekavo ka kiniou tibe na bereio, bior kiniou nabar niajebijo kar Kristo ea mokotenaku ruei, jibe ka napano ajuba kiniou a abitiv kiniou.
GAL 6:18 Nao kuruaku nalo a kuvivinioku nalo, kiniou nobolkouo ka mia kiado Tubo Yesu Kristo kiano tiniememiano naio to rivija niunumiu nalo nonovio, Mm tenene na.
EPH 1:1 Kiniou Pol, napano Atua naio bitirilar kiniou ka neve kiano toro tai napano nojom̃a ber bulag Ioluano Vou nei, napano nebe Kristo Yesu kiano atevi, kiniou nejirii m̃esi nei viedu ban kamiu namoneano nalo na komeli labo na vio Eveso, napano kamiu na kubiekouo ea Kristo Yesu.
EPH 1:2 Kiniou nobolkouo ka kamiu ka mia tiniememiano a tum̃aro na Atua karam̃ado kiano a na kiado Tubo Yesu Kristo, to vija kamiu bunu.
EPH 1:3 Bo kanio kito reiaia Atua, napano naio be Atua ka kiado Tubo Yesu Kristo, a napano naio be karam̃ano bunu, bior kito napano robe takurano bija Kristo, Atua naio mila vatitig kito bo laka ka ilivuiano novo nalo ea vio mave.
EPH 1:4 Nina jibe bogo na vio yetano nei naio makanio vo, ana Atua naio berko kito ruei kan romei rove takurano kiteaku Kristo, ka rove kanano, a kan kiado meuliano naio rimeravo rivu ea mirano, napano mia maka niamiamo tai toaio.
EPH 1:5 Beamu laka, bior kiano burum̃ara tinietiiano, ana Atua naio midu kito roju kanio mia naio riviobulag kito rove kenerinio nalo ea Yesu Kristo. Vite na, Atua naio mila memedu ka nana naio mialio ber bo ka mia naio rilaio, a naio jaaro toru bunu ka rilaio.
EPH 1:6 !Reiaia Atua rivior kiano burum̃ara tiniememiano nei, a ka kiano ijaiano novo nei na naio jian kurano ga kanio ban kito, miyotuba ea kenerinio na naio jidom m̃elea naio!
EPH 1:7 Ja na kenerinio naio miou, mia kario vite na kito napano robe takurano kitoliko Kristo nene, ana Atua naio buru bulag kito, napano naio biekokoa kiado kariano nalo. !Riano ga, Atua kanano tiniememiano ka kito naio toru laka, ba lie vo!
EPH 1:8 Atua naio be masou laka, mia naio bitilubar vite nonovio,
EPH 1:9 ana naio jaaro ka rijamo ka kito rejikia kiano jidomiano tai napano beamu naio be navigivaniano tai ka kito. Naio mila jidomiano nene binimei meravo batitig bo ka kito, a kiano jidomiano ka rim̃auka vite novo nalo ve telabo ea Kristo ga.
EPH 1:10 Ea jidomiano nei naruei, mia Atua naio riasol vatitig vite nalo napano naio jiilo atu vio ve takurano, nina ea vio mave a ea vio yetano, nalo amei yetano ka Kristo, a mia Atua naio rim̃auka batitig vite nonovio rimemedu ka kiano jidomiano, rivano-o rila nono batitig rivu ea bogo nene rimemedu.
EPH 1:11 Vite nalo nonovio monoka amalmaluvo rimemedu ga ka na Atua naio jidomkakar ka rilaio. Mia jakii kiano jidomiano nei nanua beamu, naio berkar berinavo kumemi kulo Israel ka kumemi nuve kiano, ka kumemi nuve takurano kumemi liko Kristo.
EPH 1:12 Kumemi nei naruei, Atua bitiri bulag kumemi ka mia nuvitu tukamu ka mia nuvidu kenememi jidomiano to sikili ea Kristo, tenene na, bo ka kumemi monoka nuviaia Atua bogo nonovio, bior naio bo laka.
EPH 1:13 Mia kamiu kulo dolu nalo bunu, napano kamiu maka kuve kulo Ju nalo, kamiu kumijog iliano riano nei ruei, napano be Ioluano Vou napano kubokar kenemiu ioruriano eaio. Kamiu kumonea Kristo ruei, ana kubinimei kube Atua kiano tomu nalo ruei. Ana bior kamiu kube kiano, Atua naio midu tovo na vite na monea kamiu, napano naio jian Niununo Lu ban kamiu, jibe ka napano naio berkario.
EPH 1:14 Ana Niununo Lu nene, naio jibe ka Atua kiano verikariano togio na jukamu nene ban kito, ka mia kito rejikia vatitigio ka mave ka Niununo napano, kito rovokar nono jajum̃ano na be kiado, nina ea bogo na mia Atua naio rivuru bulag tomu nalo avan eaio, nina nalo ga napano naio bul bulaglo ruei abe kiano. !Kito reiaia Atua, bior naio bo laka!
EPH 1:15 Bior ka vite nalo na, bogo nonovio, ea kanaku volkouano, kiniou nojo nojidomial kamiu, a nojo nober siva toru ban Atua bior kamiu. Bajago na, nejikar ea bogo napano nomijog ka kamiu kumonea jikili Yesu, kiado Tubo, a kumisidomii toru namoneano lu dolu nalo, naruei binimei bokar banei, kiniou nojo nobolkouo jibe na.
EPH 1:17 Bogo nonovio na nojom̃a nobolkouo ban Atua, napano naio be Atua ka Yesu Kristo kiado Tubo, a napano naio be karam̃ado na mermerano na toru, nojo nobika denio ka naio rudu Niununo na masouano a Niununo na verialiano van kamiu, ka kuvijikia Atua ve toru lie vo.
EPH 1:18 Ana na nojom̃a nobika denio ka naio rivetavo ea kenemiu jidomiano, ka mia kuvitilubar kiano yulu, a ka kuvijikia vite nalo napano Atua naio bio kamiu kanio, a ka kenemiu jidomiano naio monoka sikili lie vo ka mia kuvokar vite nalo na. Vite nalo napano, naio be kenemiu jajum̃ano, jibe ka vite na bo telabo napano Atua mila batitigio ju, ka ve namoneano lu nalo kanalo.
EPH 1:19 A vija naio bunu, kamiu monoka kuvitilubar a monoka kuvijikia batitig kanano burum̃ara moroano na toru, napano naio jo mim̃au ea kiado meuliano napano romonea naio.
EPH 1:20 Nina burum̃ara moroano nene kia ga navo napano Atua naio mim̃au eaio, bogo napano naio bitirilar Kristo naio meul bereio den nam̃ariano, karina, naio buru naio ba midu naio jotano ea vameruo na naio ea vio mave.
EPH 1:21 Moroano nene, naio mave loa ka moroano dolu nalo, a vite dolu nalo na jikirkili, a tomu na tortoru dolu nalo, a navurim̃araboiano dolu nalo na mave. Mia Kristo siano naio jo mave laka laka loa sio dolu nalo, maka ea vio yetano nei ga, mia ea yetemeriba dolu bunu na mia rimei.
EPH 1:22 Atua naio midu vite nalo nonovio aju yetano ka Kristo jaano, a naio bitirilar Kristo ea tum̃aro lu na kiano, ka mia naio ve parinio ka saba nonovio.
EPH 1:23 Mia kiano tum̃aro lu nei, naio jibe ka tati na Kristo, napano bujo batitig ka Kristo, napano naio bujo batitig ea saba nalo ea vio nonovio.
EPH 2:1 Nanua beamu, jibe ka kamiu kum̃arm̃aro ga bior kenemiu vovaiano nalo a kenemiu kariano nalo,
EPH 2:2 naruei ea bogo na, kamiu kumiel ea bajago va nalo na yetano nei. Beamu, kamiu kumitakisor tubo na moroano nalo na vio yauo, kumonmonea naio ga, napano naio be niununo napano jo mila kiano im̃auano ea nalo napano m̃a maka amonmonea Atua.
EPH 2:3 A nanua beamu, kumemi kulo Israel nalo bunu, kumemi nubare ga ka kulo dolu nalo, napano numitum̃a numiel jakii ga kenememi tinietiiano nalo na bajago va na toro ga. Kumemi bunu, numitum̃a numila ga vite nalo napano kenememi jidomiano jidomio, vite nalo napano m̃a numijog bo kanio. Bior saba nalo na, numitavukia tomu dolu nalo na, napano Atua tinien ser kumemi bunu, rivan rivano bisi ana mia naio maka rijikia rila vite tai ea kumemi nei, ana monoka sian vironiano van kumemi bunu.
EPH 2:4 Mia Atua, kiano tiniememiano a kiano jidomiano naio toru laka ban kito,
EPH 2:5 ana bogo na naruei jibe ka napano ram̃arm̃aro ruei kar kiado vovaiano nalo, mia naio mila kito romeul bereio kitoliko Kristo. Be riano ga, Atua naio milarur kito ea ga kiano tiniememiano.
EPH 2:6 Ana jibe ka kito romeul kitoliko Kristo, mia Atua naio bitirilar kito bija naio bunu, a naio midu kito rojutano bija naio ea vio mave.
EPH 2:7 Atua naio mila jibe na bior bogoti nalo napano ju ka rimei, mia tomu nalo amijikia avitilubar kiano tiniememiano nei naio toru laka, naio jidom kito jibe na miyotuba ea Kristo Yesu.
EPH 2:8 Atua naio milarur kamiu ea ga kiano tiniememiano, bior kamiu kubarkar tiniemiu ea naio. Vite na maka rimaluvo ea kenemiu im̃auano novo tai, makanio, mia Atua ga naio jian kurano ka ga ban kamiu.
EPH 2:9 A vite na maka ve vite tai napano mia toro mijikia rim̃au riviorio, bior ver tibe na mia ravarvar kito kanio, reil vevavin rover “O kiniou, kiniou ga nemilarur kiniou ea kiaku im̃auano.”
EPH 2:10 Mia kito rajavukia tonovo tai napano Atua mim̃aukanio bo laka, ka napano naio ji kito robinimei robe kulo vou nalo ea Kristo Yesu, a Atua naio mila jibe na ka mia kito bunu rala kiano im̃auano novo nalo, napano naio bijauialo kar beamu ruei, ka kito roim̃aukanilo ea kiado meuliano nalo.
EPH 2:11 Mia kamiu monoka tiniemiu rimaio ka bogo na kumoluo, kamiu maka kuve Atua kiano tomu nalo tavukia kulo Ju nalo, kamiu kube kulo dolu nalo ga. Kanio tena, kulo Ju, nalo napano aber nalo abe kulo lu, bior nalo abokar pakuveu jikili, amiyotel ea kamiu, aberenio “Kulu momou” ea kamiu. Mia pakuveu na, naio be vite kurano ga tai ea kuluniabene toro ga.
EPH 2:12 Mo, ana nanua beamu, kamiu kumitibe na ruei. Kamiu tiniemiu ribobogia re nanua, kumitu koalabo ka Kristo, kumitu tavio ka taara na kulo Israel nalo, a kube valauo ga, mia maka kuvijikia kuvokar vite nalo napano Atua naio berkario ban kiano tomu nalo. Kamiu kumitua vio yetano nei, kube iakurano ga liki, a maka kuvijikia Atua leleio.
EPH 2:13 Mia kamiu, napano beamu kumitu koalabo, mia vonganei kubinimei vaataro ruei ea Kristo kiano burukija, vonganei ana kube takurano kamliko naio.
EPH 2:14 Kristo naio be kiado tum̃aroano, naruei naio mila kiado taara juo nei abinimei abe takurano. Beamu kumemi kulo Ju bija kamiu tomu dolu nalo, rojum̃a tiniedo jer kito bogo nonovio, jibe ka burum̃ara tagvoru tai jibure kito, mia Kristo naio mila bulag vite nei ea kiano nam̃ariano.
EPH 2:15 Naio berbure kulo Ju nalo kialo tuboiano bija yati nene nalo, naio mila jibe na ka mia rila kiado taara juo nei amei ve toro takurano ea naio, tibe kanio naljuo amei ave vite vou tai. Jibe na naruei, Kristo naio mila tum̃aro bija kito.
EPH 2:16 Ea kiano m̃ariano napano ea m̃akolkolo, naio muekorov kiado tiniemimiano, ana naio burubiron kiado taara juo nei abinimei abe tomu takurano, ana naio mila robokar jum̃ado bereio kitoliko Atua, mila kito robe merevu bereio bija naio.
EPH 2:17 Mo, ea bajago na naruei, Kristo naio binimei, berial Ioluano Vou na tum̃aro nei ban tomu nalo, nina kamiu napano maka kuve kulo Ju, napano kumitu koalabo ka Atua, bija kumemi bunu kulo Ju nalo napano numitu vaataro ruei.
EPH 2:18 Ana bior vite nalo nei napano Kristo naio mila ruei, vonganei kito nonovio robe kiado m̃arabo tai ea Niununo tai ga, ka romei ea karam̃ado mirano.
EPH 2:19 Jibe na, ana kamiu maka bunu kuve valauo, a maka bunu kuve toro na maka ve kiano vio tai, makanio. Mia vonganei kamiu kube m̃atatoko bija namoneano lu dolu nalo ea Atua kiano vio, ana kumitua kiano m̃aratavo.
EPH 2:20 Kamiu kumitavukia m̃artea na yimo tai, napano atevi nalo a kulo naverialiano nalo, nalo ajibe ka m̃artea na sudu na yimo nene. A ea yimo nei, Yesu Kristo naio jibe ka m̃artea siyovo napano kirisikili bo napano ju iviso,
EPH 2:21 napano naio jo bokar jikili batitig m̃artea dolu nalo nei. Naio bokarlo naruei, ana nalo ajumolu aju jikili, ana na yimo nei naio jo binimei jibe ka Atua kiano yimo lu tai.
EPH 2:22 Atua naio jo mim̃auka kamiu jibe na naruei, ka ea Kristo kamiu tomu namoneano riano nalo, kamiu kuvitu kumei kuvitibe ka yimo tai, napano naio mijikia riva to joomo bogo nonovio eaio ea kiano Niununo.
EPH 3:1 Mia ka vite nalo napano neberenio ruei, kiniou Pol, nojo nobolkouo ban Atua bior kamiu. Mia vonganei nojoa yimo na tetavokoiano, bior nojom̃a nemila im̃auano napano Kristo Yesu kiano ban nalo napano maka ave kulo Ju, jibe ka kamiu, mia nojom̃a nobolkouo kia ga vo ka kamiu ban Atua.
EPH 3:2 ?P̃eli kamiu kubitilubar ruei ka nojom̃a nomim̃au jibe na kar kamiu, p̃eli na makanio? Im̃auano na kiaku ka rijai kamiu, Atua naio jianio ban kiniou ea kiano tiniamemiano,
EPH 3:3 ana naio jibe ka kiano jidomiano tai napano beamu naio bigivanio, avona kario ana naio jiloglogio ka kiniou. A vite na kiniou nejiriio ruei,
EPH 3:4 a ver kamiu kuvulukuio, mia kumijikia kuvokar kiaku jikiaiano tivelinio nene ea jidomiano na Atua kiano, napano vonganei naio jo binimei malmaluvo meravo ea Kristo.
EPH 3:5 Ea terati nalo na beamu, tomu nalo maka ajikia vite nalo na jibe ka vonganei, napano Atua naio jiloglog vonganei ban atevi lu nalo bija kiano naverialiano nalo maluvo ea Niununo Lu.
EPH 3:6 Mia iliano napano binimei meravo nei jibe na naruei, napano naio ber jibe na berinavo, kulo dolu nalo bunu naliko kulo Ju nalo, abe juo abokar Atua kiano ilivuiano nalo, napano ajibe ka torogio na tati takurano ga, a ka Atua kiano naverikariano nalo abe kialo bitiraviranio abe juo. Saba novo nalo na amaluvo bior Kristo Yesu kiano Ioluano Vou.
EPH 3:7 Mia Atua naio mila kiniou nobe atevi na im̃auano na Ioluano Vou nei, a im̃auano nei naio be ijaiano novo tai napano Atua jianio ban kiniou, napano kiano moroano nene naio jo mim̃au maluvo ea kiniou.
EPH 3:8 Kiniou kiritavaso loa namoneano lu dolu nalo, mia najaaro toru laka napano ea tiniamemiano napano Atua kiano, naio mije monea jum̃aku ka kiniou noioliolu ka Ioluano Vou nei van nalo napano maka ave kulo Ju. Jibe na naruei, na kiniou neber lualua banlo vite novo nalo napano be Kristo kiano, napano mia maka ajikia avulukuio,
EPH 3:9 mia nojo nejiloglog bunu banlo jum̃abe napano Atua naio mila kiano jidomiano nei maluvo. Jikario ea bogo napano Atua naio ji saba nonovio, binimei bokar bogo nalo napano abarlaka ban ruei, Atua naio bigivanio kiano jidomiano nei jo.
EPH 3:10 Ana ea kiado bogo nei naruei, Atua mila nailiano nalo bija moroano nalo napano vio mave, amijikia avitilubar kiano masouano dolu nalo ea vite nalo napano naio mim̃aukanio ea Yesu kiano nalotuano.
EPH 3:11 Saba nalo na, amemedu ga ka Atua kiano jidomiano, napano naio jom̃a jidomii kakarlo beamu, ka bogo na vio yetano nei naio makanio vo, a naio mila saba nalo nei amalmaluvo ruei binimei ea Kristo Yesu, kiado Tubo.
EPH 3:12 Mia bior kito rabarkar tiniedo ea Kristo, a robe takurano kitoliko naio, naruei romijikia romei rotumolu rotukamu ea Atua mirano, a maka rejikia romemebiju, a kiado iviso sikili ea naio ka mia naio saaro ka kito.
EPH 3:13 Tenene na, kiniou nojo nobika jikili den kamiu, nober bo ka kamiu tiniemiu rijoru re rivatove bogo tai, napano kumijog bova toru ea kiniou ea jaleleano nalo napano nojom̃a nabokario bior kamiu ea yimo na tetavokoiano nei, napano ajum̃a amilavon kiniou toru. Saba nalo nei, nalo abe tena rijai kamiu ka mia kuvokar mermerano na Atua kiano.
EPH 3:14 Jibe na, bior vite nalo napano nojom̃a neberenio, na kiniou neminie, nobolkouo ka kamiu ban Karam̃ado,
EPH 3:15 napano naio be Karam̃ado riano garuei memedu, a napano karam̃alo dolu nalo na m̃aratavo nalo na ea vio mave a ea vio yetano, nalo ajum̃a abar kialo bajago novo a sialo novo nalo ea naio ga.
EPH 3:16 Kiniou nojom̃a nobika den Atua, napano kiano mermerano naio toru laka, ka mia naio rudu kiano moroano toa kenemiu iviso nalo riyotuba ea ga kiano Niununo, ka kenemiu iviso nalo atumolu atu sikili vatitig dam̃ariga.
EPH 3:17 Nojo nobolkouo bunu ka mia Kristo naio to kamliko dam̃ariga bogo nonovio ea kenemiu iviso nalo rimei ea kenemiu viekouoiano nalo, a nobolkouo ka kamiu bunu bajago na jidomiano, naio rimei tibe ka burupati na kenemiu meuliano nalo.
EPH 3:18 Jibe na, ana kamiu kamliko namoneano lu dolu nalo, mia kamiu kuvare ka mia kuvijikia kuvitilubar burum̃ara jidomiano na toru napano Yesu kiano, p̃eli jagati, p̃eli tebievi, p̃eli vaviniano, p̃eli na bululuoiano nene tum̃abe.
EPH 3:19 Riano ga na, kiano tinietiiano nene naio toru, mia maka garuei, kito maka rejikia rover romijikia batitig naio ruei. Mia bekurano, kiniou nobolkouo ga ka mia kamiu kumijikia kuvial kiano jidomiano nene ea kenemiu meuliano nalo, rivano-o mia Atua kiano bajago novo nalo, a kiano meuliano novo, avujolou batitig ea kamiu.
EPH 3:20 Mia vonganei, kito reiaia Atua, bior ea kiano burum̃ara moroano napano jo mim̃au ea kiado iviso nalo, naio mijikia rim̃au tovulu venia napano romijikia rovika denio, p̃eli venia na mia romijikia rosidomiio.
EPH 3:21 Mia vonganei, Atua kiano lotuano reraio aiaia naio rivior Kristo Yesu, vonganei, a bunu ea terati nalo nonovio napano ea bogo nalo na aju abinimei, rivano-o mia ribisi deio. Mm.
EPH 4:1 Jibe ka kiniou nojoa yimo na tetavokoiano, bior kiado Tubo kiano im̃auano, nejikili ka kamiu, ka kenemiu meuliano nalo monoka rimemedu ka bajago nalo napano Atua naio bio kamiu kanio, mia kamiu kuviel eaio.
EPH 4:2 Tibe na ana mia kamiu kuvatove ga ka kamiu, a kumelumu ga bogo nonovio. A kenemiu jidomiano monoka rimelokloko ka kamiu, napano mia tiniemiu rimimi sop̃eli re van kamiu. Nina naruei naio be bajago na tinietiiano.
EPH 4:3 Kamiu kuvilavio sikili ka kuvokar batitig tum̃aro nei napano riasol kamiu, tibe na ana kumijikia kuvitikar batitig burukutiano napano Niununo Lu naio jo jianio ban kamiu.
EPH 4:4 Kamiu kumitibe ka tati takurano ga, a be Niununo takurano ga bunu joa kamiu, mo ea bajago nene, be verikariano takurano ga napano kenemiu jidomiano naio mijikia tu sikili eaio, napano Atua bio kamiu biorio.
EPH 4:5 Ana Tubo Yesu takurano ga, a kiado moneano ea naio be takurano ga, a varueiano bunu be takurano ga,
EPH 4:6 a Atua takurano ga napano jo, napano naio be kulorinio nonovio karam̃alo, a naio mije tuboiano ka vite nonovio, a naio mila kiano im̃auano miyotuba ea vio nonovio, a naio joa kulorinio nonovio kialo meuliano.
EPH 4:7 Mia ea kito nonovio robeve terakurano, Kristo jian ijaiano dedade nalo ban kito ea kiado meuliano, napano nalo kirinovo laka, memedu ka kiano tiniamemiano napano toru nei.
EPH 4:8 Nina javukia napano Iliano Lu berenio nanua ruei, berinavo “Bogo napano naio jo bavini ea vio mave na bavini laka, naio burukar kiano uolu nalo napano naio jovululo ruei, nalo iorou ka naio, a naio jian ijaiano ban tomu nalo napano abe kiano.”
EPH 4:9 ?Mia iliano napano berenio berinavo “naio bavini,” naio berii venia? Iliano na naio berenio beamu, naio batove laka ruei, napano naio binimei ea vio yetano nei, naio batove ea kiano vio bululuo nene nalo.
EPH 4:10 Mia toro napano beamu naio binimei yetano, toro nene kia ga na vo napano mia iorou kanio ana naio bavin laka mave, a bereio, naio bavini lie bereio vo, ka naio mijikia rison batitigio rivujo vio nalo na Atua naio mila vatitigio aju.
EPH 4:11 Mia naio naruei toro nene kia ga na vo napano naio jom̃a jian ijaiano ban kiano tomu nalo, napano tealo, naio bitiri lualua nalo abe atevi, a tealo, naio bitiri lualua nalo abe naverialiano, a tealo, naio bitiri lualua nalo abe naieliano ea Ioluano Vou, a dolu nalo, naio bitiri lualua nalo abe tomu navitikariano na namoneano nalo, a tealo, ka averlogloglo.
EPH 4:12 Kristo naio mila jibe na ka mia namoneano lu nalo amijikia ala kiano im̃auano, ka taara na namoneano nalo na vio yetano nei, napano ajavukia tati na naio, mijikia riluo lie vo a rimei sikili lie vo.
EPH 4:13 Tibe na, ana mia kito nonovio romijikia romei ve takurano ga ea kiado viekouoiano ea Atua kenerinio, a romei rove takurano ga bunu ka robitilubar batitig naio ea kiado meuliano nalo. Tena naruei, ana romijikia rotu romei rotibe ka toro na naio meruo, riva rivokar napano mia romeruo tibe ka Kristo, napano mia romei rove toro na toru riano tibe ka naio.
EPH 4:14 Tibe na, mia kito rotibe ka re bunu kiritete, napano naverloglogiano dolu nalo na tomu na sibiano nalo aburu kiado jidomiano aba be dolu, kialo jukujukuano nalo abilvilig kito, jibe ka napano jegi naio jom̃a miuvuvu kito, p̃eli na tei jom̃a buku bilvilig kito janea vio reraio, makanio.
EPH 4:15 A kito monoka rovokar ilirianiano ea bajago na tinietiiano, a ea kiado m̃arabo nonovio nalo, monoka reiluo ka mia romei rove Kristo kiano tomu nalo, napano naio be parinio ka bagaro na namoneano nalo na kiano.
EPH 4:16 Mia kito rojibe ka torogio nalo na tati na naio, napano naio jo mila torogio nalo nei abinimei abe takurano ga ea naio, ka kiano meribuku nalo atu aiasosol vatitig torogio nalo nei van ea pariparinio. Mia bogo na torogio na tati nei nalo atakii vatitig kialo im̃auano nalo rimemedu, mia nalo atum̃a tinielo tiilo bereio, mia tati nene naio mijikia riluo, mijikia rimei sikili lie vo.
EPH 4:17 Ea kiado Tubo siano, nejikili ka kamiu bereio, ka kamiu kuvitikar kamiu, mia kuvitakii re bunu bajago napano nalo na maka amonea Atua. Nalo na, kialo jidomiano kirivova ruei, a be m̃adati ruei,
EPH 4:18 a joa melijokouo ga. Tenene na, nalo aju koalabo laka den meuliano napano Atua naio jianio, bior pariparilo kirisikili laka, jibe kanio puruveru, maka ajikia ajoglubar vite.
EPH 4:19 Tinielo maka bunu rijikia rimou ka kialo vovaiano nalo, naruei nalo ajidel dolu ga ea siakaiano, a bajago nalo na kiriniagiago, napano maka asidomialio leleio.
EPH 4:20 Mia ea Kristo, maka averloglog kamiu ka bajago na jibe na tai leleio, makanio.
EPH 4:21 Mia aberii kiano saba novo nalo telabo ban kamiu ruei, napano kamiu kumitakisorio, mia aberloglog vatitig kamiu ka ilirianiano nei napano jua Yesu.
EPH 4:22 Tenene na, kamiu monoka kuvilar bajago moruo na kumoluo bijaio. Bajago na naio jom̃a mila kenemiu meuliano re beamu abova, mia nanua, kenemiu sidomvovaiano nalo na bajago nene, nalo ajum̃a amiju bolbo lili kamiu, a nalo aju amila lelan kenemiu meuliano nalo toru toru laka.
EPH 4:23 Mia vonganei, kenemiu iviso nalo a kenemiu jidomiano nalo monoka amei ave terivou nonovio,
EPH 4:24 ana mia kamiu monoka kuviya bajago vou nalo na kenemiu meuliano vou ea Yesu napano Atua naio jiio ea kamiu, javukia kiano, ka mia tomu nalo amijikia aialio ka naio memedu riano, a be lu.
EPH 4:25 Tibe na, ana sibiano re bunu, bior kito robe torogio na tati na Kristo, monoka rove riano ga van kiado na vaataro nalo bogo nonovio.
EPH 4:26 Mia ver bogo tai tiniemiu rimimi, mia kuvila re ka tiniemimiano na rivuru kamiu kuvan ea kariano, mia kenemiu tiniesereiano monoka rivatove beamu vo, karina m̃erenio rijoru.
EPH 4:27 Mia kamiu monoka kuvijamo ka re buluvio van Sim̃aro ka rimei rilaso kovova laka.
EPH 4:28 Toro napano beamu naio be toro na vinauano, naio monoka tuvan vinauano. Naio monoka rim̃au m̃ele ka jum̃ano ea bajago na memedu, ana mia naio mijikia rivitikar naio, a rijai talim̃asa nalo bunu.
EPH 4:29 Ea kenemiu iliano nalo, kamiu kuve re ilimenunuano, mia kuverenio iliano nalo napano mia rijikia riijalar kialo jidomiano nalo, ka nalo amijog kenemiu iliano nalo, napano josonu bare, a memedu bo, a ka rijailo.
EPH 4:30 Kamiu kuvila re Niununo Lu riumou, a rijog rivova, ea kenemiu ilivovaiano nalo, bior Niununo Lu napano, Atua midu joa kamiu jibe ka kiano tovo, napano naio berial berinavo kamiu kube kiano, a ka riverial bunu, ka mia naio rivuru bulag kamiu ea bogo na tagap̃iano.
EPH 4:31 Mo tibe na na, bo ka tiniemiu rimimi re bunu, ala re bunu siniabu, a tiniemiu ajea re bunu. Kamiu kuvituvan bajago na p̃ep̃eiano, a bajago na ilivovaiano, a bajago na bilbilu vaiano.
EPH 4:32 Mia kamiu kuvijuku rivu ka kamiu, tiniemiu rimelokloko van kamiu, a kamiu kuviekokoa kamiu tavukia napano Atua naio biekokoa kamiu maluvo ea Kristo.
EPH 5:1 Bior kamiu kube Atua kenerinio novo nalo, kamiu kuvilavon ka kuvar nonovio kiano bajago.
EPH 5:2 Monoka kuviel ea jidomiano, tibe ka napano Kristo naio jidom kamiu, ana naio mijamo ka kiano meuliano kar kamiu, jibe ka bonotanunu novo tai ban Atua, a sida tai napano Atua naio jaaro kanio.
EPH 5:3 Bior kamiu kube Atua kiano namoneano lu nalo, maka rimemedu leleio ka bogo tai saba nalo tai amalmaluvo ea kamiu tibe ka siakaiano, p̃eli vite na imouiano, p̃eli na bajago na sidomii vite ta bunu, mia vite nalo na maka ve tena kuva kuvitum̃a kuvil sosol kanio.
EPH 5:4 Maka rimemedu ka kamiu kuver ilivovuiano nalo p̃eli iliniagiagoano nalo, p̃eli iliserevaiano nalo. Memedu ka kamiu kuvitum̃a kuver siva ga van Atua.
EPH 5:5 Kiniou nejidom never rimeravo van kamiu, ka nalo napano ajum̃a amila siakaiano, a nalo napano ajum̃a amila vite nalo na imouiano, a nalo napano ajum̃a ajidom aiobua saba ta bunu ta bunu bogo nonovio, nalo na mia ava kovio. Toro napano naio jidom m̃elea saba bogo nonovio, naio jibe ka toro napano milotu ka atua dolu nalo. Kamiu kumijikia kumonea iliano nei ruei, napano berinavo nalo napano ajum̃a abokar bajago va, mia maka leleio ajikia ava jouro ea navenatuboiano napano Kristo naio Atua kanalo.
EPH 5:6 Kamiu kuvijamo re ka tomu nalo avuru kamiu kuvan ea m̃arabo dolu nalo, napano nalo amijubolbolili kamiu ea kanalo iliseseiano nalo. Vite nalo nei naruei, mila ana Atua tinien jerlo ruei, jibe ka napano nalo maka amonmonea naio ruei, ana na mia naio rudu vironiano vanlo.
EPH 5:7 Mia kamiu kuva kuve re taara ve takurano leleio vija tomu nalo na jibe na.
EPH 5:8 Nanua beamu, ana kamiu kube tomu nalo na melijokouo ga, mia vonganei, napano kumitua kiado Tubo, kamiu kumitua kiano miamoiano bunu. Tibe na, monoka kuviel tulaka ga tibe ka kamiu kube tomu na miamoiano nene nei ruei,
EPH 5:9 bior ea miamoiano nei, mia naio mijikia rila kenemiu meuliano rivu, rimemedu, a naio rive riano, ana mia naio rijikia rivar m̃arati novo nalo ve telabo.
EPH 5:10 Kamiu monoka kuvilavio sikili ka kuvileal bajago vaio napano kiado Tubo naio jaaro kanio.
EPH 5:11 Mia kamiu liko re tomu nalo na amila vite nalo na bova, napano abe im̃auano kurano na melijokouo ga. Mia bo verenio kamiu kuvar saba nalo nene amei ea miamoiano.
EPH 5:12 Kito romimou kija ga ka rover vite nalo napano m̃a aba amila luklukuaio,
EPH 5:13 mia bogo napano Atua naio rivetavo ka vite nalo nonovio amei ea miamoiano, mia miamoiano nei naio rila bajago nalo nei amalmaluvo.
EPH 5:14 Mia bogo na miamoiano mila vite nalo amalmaluvo medave jibe na, vite nene nalo bunu amijikia amei tibe ka miamoiano. Vite nei javukia iou napano berii jibe nei, berenio “Jau napano komonmelio ruei, ketevijo, kotumolu ea nam̃ariano, komeul bereio, ana mia Kristo naio rimereraliso.”
EPH 5:15 Bior tena ana kamiu monoka kuvitikar vatitig kamiu rivu, ka mia kamiu kuviel tum̃abe. Mia kuvitibe ka re nalo na maka ve pariparilo, mia kuvila bajago nalo na tomu nalo na abe masou bo.
EPH 5:16 Kamiu monoka kuvisel ea buluvio nonovio napano kuvilealio, ka kuvila im̃auano na bo ea, bior kito rojua bogo na vovaiano nei.
EPH 5:17 Mia kamiu kuviavovu re, ana monoka kuvilavon ka kuvijikia vite nalo napano kiado Tubo naio jidom kamiu ka kuvilaio.
EPH 5:18 Mia kamiu kumunu re bunu m̃arjum̃elm̃elu rivano-o mia m̃a kuvilaluv pariparimiu, ka bajago na naio mijikia rila bulag kenemiu meuliano vodolu bereio. Mia kamiu monoka kuvujo ga ka Niununo Lu.
EPH 5:19 Bo ka kamiu kuvitukunu van kamiu ea iliano nalo napano ea Niosi na Iouano Nalo, vija iouano lu nalo, a iou navameneano van kiado Atua, mia kamiu monokanio kuviou ka iouano lu nalo nene, ka kuvamenea kiado Tubo, ea kenemiu iviso vodolu.
EPH 5:20 Mia bior vite nonovio, tulaka ga kamiu kuvitum̃a kuver siva van Atua karam̃ado, ea kiado Tubo Yesu Kristo siano.
EPH 5:21 Kamiu nalo napano abe namone-ano, sum̃ano nalo a tire nalo, kamiu monoka kuvatove ka kamiu, tibe ka ga napano kamiu kubatove ka Kristo.
EPH 5:22 Kamiu tire nalo napano kumisoro, monoka kuvatove ka kouemiu nalo, tibe kanio napano kamiu kubatove ka kiado Tubo,
EPH 5:23 bior ka sum̃ano naio be parinio ka koano, jibe ka Kristo naio be parinio ka kiano nalotuano napano kiano, napano be tati na naio napano naio milarurio.
EPH 5:24 Bior vite na, tire nalo monoka avatove ka koalo nalo ea vite nonovio, tibe ka Yesu kiano nalotuano jo batove ka naio.
EPH 5:25 Mia kamiu sum̃ano nalo napano kumisoro, monoka kamiu kuvisidom m̃elea kouemiu nalo, tibe ka napano Kristo naio jidom m̃elea kiano nalotuano, ana naio mijamo ka kiano meuliano biorio.
EPH 5:26 Naio mila kiano nalotuano meravo, a naio je ka uei a ka kiano iliano, naruei naio miokoio ban Atua.
EPH 5:27 Kristo naio mila jibe na, ka naio mijikia rivuru kiano nalotuano nei rimei ea naio, napano naio rive lu mia rive lu batitigio to, tibe ka niatira sesa napano naio ju rorea ka mia soro, naio meravo bo, maka vite tai rila niegeniege naio, a amiovovua batitig naio bo mia bo.
EPH 5:28 Ea bajago nene ga, toro monoka to sidom m̃elea koano, naio rivitikar batitigio tibe ka napano naio jo bitikar vatitig niabene. Sum̃ano napano jidom m̃elea koano, naio jo jidom m̃ele naio bereio.
EPH 5:29 Maka toro tai to rivitii va kanio taniabene, p̃eli na rila lelanio bereio, mia tomu nalo aju abagan batitiglo, a aju abitikar vatitig taniabele nalo. Nina jibe kanio napano Kristo mila ban kiano nalotuano,
EPH 5:30 mia kito romijikia batitig vite nei, bior kito robe torogio na kanano taniabene nalo.
EPH 5:31 Iliano Lu naio beriio bunu ruei napano sum̃ano bija koano, naljuo abe taniabele takurano ga, napano naio berenio, berinavo “Bior vite na, mia sum̃ano naio tuvan karam̃ano naio kenieno, riva rivijuru kar koano. Naruei mia nalo ve juo amei tibe ka taniabene takurano ga.”
EPH 5:32 Iliano Lu nei, be iliano na temi tai joaio, napano beamu naio be navigivaniano ga tai, mia vonganei, nemijikia ka iliano nei naio jo berial Kristo bija kiano nalotuano.
EPH 5:33 Mia kamiu kuvisidomii re iliano nei kuver naio maka to riverii kamiu bunu, makanio, naio jo berenio na. Riano ga, kamiu sum̃ano nalo nonovio, monoka kuvisidom m̃elea kouemiu nalo, tibe ka na kamiu kumisidom kamiu ga, a kamiu tire nalo nonovio, monoka kuvatove ka kouemiu nalo.
EPH 6:1 Kiritete nalo, kamiu kube nataki na Tubo kanano, kamiu kumonea karamemiu bija koniomiu nalo, vite nei naruei naio memedu ka kamiu kuvilaio.
EPH 6:2 Tuboiano tai ea Iliano Lu napano Atua kiano naio berenio jibe nei, napano naio berinavo, “Kamiu kuvatove ka karamemiu a koniomiu nalo,” mia nina naio be natuboiano jukamu napano be verikariano mave ea naio, napano naio berinavo,
EPH 6:3 “Verenio kamiu kuvila tibe na, mia vite nalo na kenemiu meuliano nalo amijikia avuro rivu, a mia kenemiu meuliano nalo ea borotano nei ve tebievi.”
EPH 6:4 Kamiu karam̃alo nalo a kenielo nalo, tiniemiu riviluludie re kenerimiu nalo tulaka, rivano-o mia ajikia tiniel ser kamiu bereio. Mia kamiu monoka kuvisavoriri batitiglo rimemedu rivu, kuverlogloglo, a kuvisiloglog vanlo m̃arabo nalo na kiado moneano ea Kristo.
EPH 6:5 Kamiu tomu na im̃auano, kamiu kuvitovon ka kenemiu tubo nalo na vio yetano nei, tibe ka napano kumerou kalo, a kuvatove kalo, mia monoka kuvila tibe na ea kenemiu iviso momou nalo, tibe kanio kamiu kumitu kumim̃au Kristo kiano.
EPH 6:6 Maka rivu ka kamiu kuvitu kuvila tibe na ea bogo napano ga nalo aju kamliko, ka mia kuvilavon ka kuvilalo asaaro ka kamiu, mia monoka bogo nonovio kuvila vite nalo napano Atua naio jidomio, vija kenemiu iviso rianiano nalo, tibe ka napano kube Kristo kiano tomu na im̃auano nalo.
EPH 6:7 Monoka kuvisaaro ka kenemiu im̃auano, mia bo ka kuvila re bunu im̃auano na tavukia napano kumim̃au toro kanano ga, mia kuvila tibe ka kumim̃au kiado Tubo kanano.
EPH 6:8 Kamiu kuvisidomii von, toro tai naio be tubo, p̃eli na naio be toro na im̃auano ga tai, be kurano, mia Atua sian meran bereio van rimemedu ka kiano im̃auano novo nalo.
EPH 6:9 Mia kamiu tubo nalo na tomu na im̃auano nalo kanalo, kamiu bunu kuvila rimemedu van kenemiu tomu na kenemiu im̃auano nalo, mia kuvil re ka tiniesereiano tulaka vanlo. Monoka kuvitu tiniemiu rimaio ka kamliko nalo, kubiniu kenemiu Tubo takurano ga, napano joa vio mave, a napano naio jom̃a mila be verare ga ban tomu nalo.
EPH 6:10 Vaataro kanio nala nonovio kiaku iliano naruei, mia nejidom never ka kamiu, ka kamiu kuvilavio sikili ka mia kuvisikili ea kiado Tubo, vija kiano burum̃ara moroano na toru nene.
EPH 6:11 Kamiu kuviya kuluniabemiu kouo nalo na mira napano Atua jianio ban kamiu, ka mia kuvijikia kuvitu sikili, a ka kuvituko vio ka buruniavo nalo napano Sim̃aro kiano, vija kiano juboluboiano va nalo napano naio jom̃a mijukujuku kamiu kanio.
EPH 6:12 Nalo napano m̃a kito roju romila mira kalo, ea kiado meuliano, nalo maka ave kulorinio. Mia roju romila mira ka moroano dolu nalo, a sim̃aro nalo kialo tomu na tortoru nalo, a kialo tubo nalo napano abe burupati na melijokouo na vio yetano nei vonganei, ana rojum̃a romila mira die semei va nalo na telabo napano aju janea vio.
EPH 6:13 Mo bo kanio kamiu kuviya vatitig saba nonovio nalo na tena mira na Atua nei kiano naruei, mia bogo nonovio ga a ea legiano nonovio ga napano Sim̃aro naio rimei ka rila mira ka kito, mia romijikia rala mira ka uolu nalo na, rivano-o mia rotovululo, rivano-o riviniu, mia kito rotumolu rotu sikili kia na vo rotu.
EPH 6:14 Bogo napano kamiu kumitumolu ka kuvila mira tibe na, kenemiu vite na mira nalo ajibe nei naruei. Kulubue napano kuburukario ea m̃arip̃imiu nalo, nina jibe kanio napano kubokar bajago na ilirianiano. Kuluniabemiu kouo napano juko vio ka mokotenemiu nalo ka buruniavo, nina jibe kanio kubokar bajago na memeduano ea kenemiu meuliano vodolu nalo.
EPH 6:15 Kulubue na toru tena ieliano na jaamiu, nina jibe ka kumitu vatitig ka kuva kuverial Ioluano Vou na tum̃aroano.
EPH 6:16 Burum̃ara selap napano kumidukario ka kuvituko vio ka buruniavo nalo na Sim̃aro kiano, napano sebi bilvili ealo, nina jibe ka kenemiu viekouoiano na jikili ea Atua.
EPH 6:17 Basaro na mira na pariparimiu, nina javukia ioruriano napano Atua jianio ban kamiu, a iobogu na mira na Niununo Lu napano kubokario, nina naio javukia Atua kiano Iliano Lu.
EPH 6:18 A vija vite nalo na, kamiu monoka kubolkouo bunu, monoka kuvika den Atua ka rijai kamiu. Bogo nonovio ga, monoka kuvitum̃a kubolkouo ea moroano na Niununo Lu, mia kuvitu tiniemiu rimaio ka namoneano lu dolu nalo tulaka ea kenemiu volkouano nalo, napano mia miremiu nalo ve temi re bogo tai.
EPH 6:19 A bereio, monoka kubolkouo rivior kiniou bunu, ka mia Atua naio sian bogo na iliano van kiniou, ka nesidomdeio re ka mia neverial Ioluano Vou na Kristo kiano, napano beamu, naio joluku ka tomu nalo, mia vonganei, mia nesikili ka neverialio vanlo.
EPH 6:20 Kiniou nobe toro na berial iliano na Ioluano Vou nei, mia nojoa yimo natetavokoiano, mia monoka kubolkouo ka mia kiniou nesidomdeio re kanio mia neverial Ioluano Vou nei ea vio nei, tibe napano memedu ga ka nalaio.
EPH 6:21 Kiniou nejidom ka kamiu kuvi-jikia kanaku lilianiano nalo, naruei ka tena nemiila kiado bilbilu novo nei, Tikikas, biedu ea kamiu. Naio jom̃a be niabene ea im̃auano nalo na kiado Tubo kiano ea vio na,
EPH 6:22 ana mia naio riverial van kamiu ka kumemi numitu jum̃abe, ka mia kumijikia kuvijog rivu ea kumemi bereio.
EPH 6:23 Ana tum̃aroano, a jidomiano, a viekouoiano binimei den Atua Karam̃ado a Yesu Kristo kiado Tubo, aju bija kito a namoneano nalo nonovio.
EPH 6:24 A tiniamemiano napano Atua kiano naio toa kamiu, a ea kito bunu, napano kito nonovio rosidom m̃elea kiado Tubo Yesu Kristo, napano mia kito rosidom naio rivano-o ribisi deio. Kiniou, Pol.
PHI 1:1 M̃esi nei, tomu juo nam̃a amim̃au kurano ga Yesu Kristo kanano, naina be kumemi juo kiniou Pol bija Timoti, kumemi juo nubivitauia biedu ban kamiu, napano kamiu kumitua komeli na vio Vilipae, nina kamiu nam̃a kenemiu meuliano naio jo bo bija Kristo, jibe ka kamiu kube namoneano lu nalo, bija kenemiu navagadeano nalo a kenemiu ijaiano nalo.
PHI 1:2 Kumemi juo numisaaro ka nuviviuo kamiu bereio ea m̃esi nei, ea Atua karam̃ado siano, a ea kanado Tubo Yesu Kristo siano, a kumemi juo nubika nalo abe juo ka mia adu tiniememiano vija tum̃aroano toa kamiu vonganei.
PHI 1:3 Kiniou nojom̃a tinieku maio ka kamiu julaka ga ea kanaku volkouano nalo, a najaaro toru ka notom̃a nobolkouo ka kamiu van kiado Atua, a ka naver siva ve toru vanio ka kamiu.
PHI 1:5 Nojo tinieku maio ka kenemiu vitikariano nalo ea kiniou, bija bunu kiado im̃auano vei nalo na Ioluano Vou na bo, jikario ea bogo na kiniou nejikar kanaku im̃auano ea kamiu, binimei bokar vonganei, mia nober siva toru biorio.
PHI 1:6 Kiniou nomonea ka Toro na Toru, na naio jikar kanano im̃auano na bo tai ea kamiu ruei, mia naio mijikia rim̃au rivanvano-o rila nonovio batitigio riviniu ea bogo na maaro, nina ea Yesu Kristo kanano burum̃ara legiano nene.
PHI 1:7 Tibe na naruei ana kamiu kuvialio ka kiniou nojo nojidomii kamiu toru, mia nomialio ka nina naio memedu ga, bior kito raba jouro vio takurano ea Atua kanano tiniememiano ruei, naruei kamiu kitoliko ruei ea vite miroano, ea bogo na bo a bogo na bova. Vonganei, kiniou nobokar batitig kamiu kumitu jouro ea kiniou, naruei mila na vonganei na nojoa nalakoiano, naio javukia na kam liko kiniou. Mia ver avuru kiniou nava komeli ka ail van kiniou rivior Ioluano Vou na bo na nojom̃a neberialio, mia kam bunu kuvitu vija kiniou keano vo.
PHI 1:8 Naina be riano na, mia Atua naio mijikia bunu ka nejidom toru ka neial miremiu nalo bereio. Aue, kiniou tinieku jii kamiu na toru ea tinietiiano nonovio na Yesu Kristo kanano.
PHI 1:9 Kiaku volkouano na ka kamiu naio jibe nei, neberinavo kenemiu tinietiiano mia naio monoka to riluo dam̃ariga, mia ver jikiaiano na bo a m̃asosouano a vitii veveiano bunu nalo atua kamiu, nalo mijikia rijai kenemiu tinietiiano nei rimei ve toru lie vo.
PHI 1:10 Mia ver kamiu kuvitibe na, mia kumijikia kuvitu kuvidu ga bajago nonovio na naio bo laka, a kuvituvan nana naio bova, ana mia kenemiu meuliano mijikia to rimeravo rivu, mia ve re titai na naio toa kamiu ea Legiano na Kristo kanano na jo binimei.
PHI 1:11 Ana mia kenemiu meuliano nalo amijikia avar na memeduano m̃arati nene napano Yesu Kristo naio jian biedu, na naio jibe ka m̃arabo tai nam̃a kito romijikia rovamenea Atua kanio, a napano Atua bunu naio rimerera kanio.
PHI 1:12 Kuruaku nalo a kuvivinieku nalo, kiniou nojidom neverial vite nei van kamiu, ka bogo va nalo na amiyotuba ka kiniou, nalo maka atokovio ka kanaku im̃auano, makanio. Mia aju amijai toru ka rila Ioluano Vou na bo nei rivan lie ea vio telabo dolu nalo.
PHI 1:13 Ea tivelinio na vio nei na kiniou nojoaio, neialio ka tomu na mira nalo amijog Ioluano Vou na bo nei ruei, a naio ba bokar nalo na mira na ea yimo na parinio tubo Sisa kunuano, bija tomu dolu nalo bunu. Vonganei, nalo nei abitilubario ruei ka nojom̃a nabar m̃arimieni nei bior Kristo ga.
PHI 1:14 Mia kiniou najaaro toru bunu ka nemial ka bogo na abokar kiniou ea nalakoiano jibe na, mia vite nei naio maka rila namoneano dolu nalo na vio nei amerou, mia mila nalo aju ajumolu ajikili lie vo ea Tubo, mia nalo aju ajidel dolu ka ga aberial Atua kanano iliano.
PHI 1:15 Nalo amioliolu ka Atua kanano iliano, naio be vite novo tai, mia vite tai ga, kiniou nemijikia ka nalo tealo amioliolu ka Naverikariano Kristo ea jidomiano na bo, mia tealo amioliolu kanio ea jidomiano na jokuano a ea jidomiano na varvariano.
PHI 1:16 Nalo nam̃a amim̃au bo, nalo abitilubar ka kiniou nojoa nalakoiano nei bior ka na nemim̃au ea Ioluano Vou na bo, naruei tinielo miia kiniou a tinielo miia nalo na maka ajogio vo, naruei amioliolu bija jidomiano na bo.
PHI 1:17 Mia nalo dolu na, amioliolu ka Kristo mia maka ave riano ga, abe m̃arou m̃ele, naruei ajidom ka ala ka nalo na kija avavin. Jidomiano na bova na jibe na naio joalo, naruei bogo na amial ka amior batitig kiniou ka m̃arimieni nene na nojoa vio nei, mia amial ka vonganei kanalo bogo na ala bulag niegeniege vatitig siaku ea mirano tomu nalo, ka ala sialo rimei rivavin.
PHI 1:18 Mia kei naio mijikia, vede naina maka ve vite tai. Vede kanalo jidomiano na bo ga p̃eli nana bova, p̃eli na abe riano, p̃eli na amila sibi, mia vite na toru, Kristo siano naio monoka riva rivatavio lie vo dam̃ariga.
PHI 1:19 Naina naruei, bogo na kiniou nomijog ka siano jo batavio ruei, najaaro toru, a ver bogo tai nojog ka kanano im̃auano naio jo jidel dolu bo kiano vo, mia nojog rivu lie vo eaio. Vonganei nojoa vio tai na namial jibe ka amidu kiniou nojoa juluvati na nam̃ariano, mia maka ve kanaku m̃arabo na nemijikia nataluvo den bereio, mia bogo na nomijog ka kanano im̃auano jo bavin jibe na, miijalar kanaku jidomiano bereio, mila na nabarkar tinieku lie ea kenemiu ilivolkouano nalo, bija ijaiano nalo na Niununo na Tubo Yesu Kristo kanano, ka mia rivu van kiniou keano na vo.
PHI 1:20 Tibe na, vonganei kiniou nojom̃a nomonea jikili ka ala venia ka kiniou, mia maka ajikia ala kiniou nala titai na maka rimemedu, p̃eli never iliano tai napano karina mia noimou kanio ea Atua mirano bereio. Ver kiniou nemeul p̃eli na namaro, mia maka notovon, ana tibe ka bogo nonovio, nejidom ga ka nesikili ka Kristo siano naio mijikia rivavin lie vo, ea venia na mia riyotuba ka kiniou p̃eli na ea mokotenaku.
PHI 1:21 Venia na joa kiniou naio jibe nei, berinavo ver kiniou nemeul, mia Kristo kiano meuliano na bo naio to vija kiniou, mia ver kiniou nam̃aro, nava noto vija naio, naio bo lie vo bereio.
PHI 1:22 Ver kanaku ka nemeul ea yetemeriba nei keano vo, naina nioti nene ber be kanaku im̃auano novo keano vo ka mia naio rijikia rivar sano m̃arati na bo nene. Tibe na, namial jibe ka ver kiniou noto, mia rivu ga, mia nemial bunu ka ver navano, naio bunu bo. Naruei maka bunu nejikia ka mia rivu lie ka navan ea na vabe.
PHI 1:23 Kirisikili laka ka neviti veve kanaku m̃arabo juo ka nevijauia tinene, bior ea tivelinio nene, tinieku jii toru ka kiniou nemijikia notuvan yetemeriba nei, ka nava noto vija Kristo, naio rivu laka keano vo,
PHI 1:24 mia nemial bunu jibe ka monoka noto kija bereio ea vio nei keano vo, ka neiija kamiu lie vo.
PHI 1:25 Jidomiano na jibe na naio jo jikili vatitigio ea kiniou ruei, mila na vonganei nemial jibe nemijikia neverikar van kamiu ka mia noto vija kamiu bereio kija vo, ka rila na kuvijikia kuvijog rivu ve toru ea kenemiu viekouoiano ea Kristo Yesu, ka mia kumijikia kuvan lie vija naio.
PHI 1:26 Tibe na, ver bogo tai nemijikia noyotuba ka kamiu, nomonea ka mia naio rila ka kamiu kuvisaaro lie ea Kristo, a mia naio rivu laka van kamiu, rila ka mia kenemiu saba ta bunu lie vo bereio ka kuver siva van naio, a ka kuvamenea naio riviorio.
PHI 1:27 Mia kito maka rejikia rimemedu vo ka mia tum̃abe ka kiniou, naruei nojidom ka mia kuvisidomial re kiniou, mia kuvisidomial ga kamiu. Kuviel ea m̃arabo na bo naio memedu ka kamiu tomu na Ioluano Vou na bo na Kristo. Vede nemijikia noyotuba ka kamiu, p̃eli na maka nejikia neviedu, mia bo ka lilianiano naio bokar burutilinieku ber kumitum̃a kumitu jikili bo, ka niunumiu nalo be takurano, kenemiu jidomiano takurano ga ka kuvitumolu kuvitu vio takurano ga, kuvila vio sikili ka namoneano na Ioluano Vou na bo naio monoka tovulu.
PHI 1:28 Mia kamiu kumerou re, tiniemiu ribobogia venia na vede mia uolu nalo ala van kamiu. Ver nojog ka na kamiu kumitu kumila jibe na, mia rivu mia rivu, bior ka mia naio be kijokijo na Atua rivan uolu nalo ka riuedomlo, a ve kijokijo na Atua rivan kamiu ka mia naio rilarur kamiu.
PHI 1:29 Nao-o, mia kamiu monoka kuvila mira ka uolu nalo na jibe na, bior ka bogo na Kristo buru kamiu abe kanano, naio maka ka kumonea ga, mia ka kuvijikia kuvar jogvaiano rivior naio bunu.
PHI 1:30 Naio monoka tibe na, bior vonganei kito rojum̃a rabarbitiran burum̃ara mira na nanua kumial ka na kiniou nabario, a napano p̃eli kumitu kumijog ka nojo nabar keano vo.
PHI 2:1 Kiniou nojidom ka kamiu kuvisidomii von kanado meuli-ano na bo kitoliko Kristo. Kanano bajago naio jo miijalar kanado jidomiano, a! Kanano tinieruru naio mila kito romijog bo laka, a! Niununo naio mila kito roju bo bija kito, a! Ana naio mila melmeloko a tinieiiano naio bujo ea kito, a!
PHI 2:2 Naruei bior naio mila bo laka ban kito jibe na ruei, nejidom notusol iliano, nebika den kamiu ka kuvan lie vo. Neber bo ka kamiu, kuvijamo ka kenemiu bajago na rivan kamiu, mia naio rive verare ka Kristo kanano bajago na rivan kamiu. A mia kamiu tiniemiu titii kamiu naio rive verare ka na naio tinien jii kamiu, a mia kenemiu iliano vija kenemiu jidomiano ve takurano. Ver neial ka kuvila tibe na, mia nojog rivu, nasaaro mia nasaaro.
PHI 2:3 Tibe na, mia kito roim̃au re bunu ea bajago na ve vitiano, mia rala re bunu vite vija jidomiano vevavin nalo, mia romomavo, rala kito rotutano, reial kulo dolu nalo avu loa ka kito.
PHI 2:4 Kito rosidomial re ga kito, vija venia na be kanado, mia rosidomial kulo dolu nalo bunu, vija venia na be kanalo.
PHI 2:5 Bo ka jidomiano na bo a bajago na bo naio toa kito tulaka, rivior naina nam̃a kito romial ea Kristo Yesu ruei, napano bo mia bo.
PHI 2:6 Naio jibe ka na iouano nei na naio ber, napano berinavo, Naio be tovorovo na Atua, jibe ka nono Atua, mia naio maka sikili ka rivare ka naio tulaka.
PHI 2:7 Naio juvan kanano mermerano joa vio mave, naio binimei jibe ka vite batoravavo tai ga, naio miyotuba ea yetemeriba nei be kulorinio, binimei jibe ka toro na im̃auano tai na maka ve siano.
PHI 2:8 Toro na vio mave naio binimei be toro na yetemeriba, naio mila naio batove, naio jotano yetano ka sidomiano na Atua kanano, banbano-o na naio bokar m̃ariano ea m̃akolkolo.
PHI 2:9 Naio monmonea Atua, naruei Atua bitirilar naio bereio, mila kanano sio naio bavin loa laka lie ka sio dolu nalo nonovio.
PHI 2:10 Nalo na vio mave, nalo na yetemeriba, a nalo na vio yetano, mia aviniu avatove ka sio nei, mia anie ka naio
PHI 2:11 mia niolo nalo nonovio avamenea Atua Teta, averial ea miralo, aver ka Yesu Kristo naio takurano be Tubo.
PHI 2:12 Banalo, ea vio nei romialio jibe ka nam̃a Yesu naio monmonea karam̃ano, a kamiu bunu, nanua kiniou namial jibe ka kumitu kumonea naio bo bunu ruei, bo mia bo. Mia maka kumila ga ka bogo na kiniou nojo bija kamiu, mia vonganei, maka bunu noto vija kamiu, maka bunu neial ka kamiu jum̃abe naruei, mia nojidom ka kuvitu kuvisikili dolu ga ka rila rivano-o rivu lie tibe na. Kamiu kubokar ioruriano ruei, tibe na naio maka rivu ka kuvitutano kule vijaio, mia monoka kuvisidomii rivu laka ea naio. Monoka kuvitilubar vatitig burum̃ara im̃auano novo nam̃a Atua naio mila, naruei monoka kuvim̃auka kija ka im̃auano novnovo nalo na meuliano vou nam̃a naio jian ban kamiu.
PHI 2:13 Mia kiniou nomonea ka romijikia ralaio, bior ka Atua ga na naio jo mim̃au ea kiado meuliano terakurano, naio jo miija batitig kito ka rila kanado sidomiano nalo ajaaro ka rila kanano sidomiano, mia naio rila kito ravare ka rala tenene.
PHI 2:14 Tibe na, venia nam̃a naio joa jum̃amo ka mia kala, jau kala ka mia keil mum̃ii re, p̃eli kover re bunu iliano tai riviorio.
PHI 2:15 Mia kito roju iviso ka tomu nalo nam̃a amilaluvu m̃arabo, kanalo jidomiano nalo abe dolu, mia monoka roim̃auka kanado im̃auano nalo avu a rimemedu. Kito robe Atua kenerinio nalo nam̃a bo ka ve re niamiamo toa kito, mia monoka rotibe ka yulu na mereralii m̃arabo ka tomu nalo na yetemeriba nei.
PHI 2:16 Kamiu kuvar batitig iliano na meuliano rivanlo, rivan rivano-o rivokar burum̃ara legiano na mia Kristo rimei bereio. Tibe na, mia nemijikia neial ka netikiti kule re, mia nemijikia neve m̃arou ka kamiu, na nasaaro ka kamiu tibe ka abe burum̃ara m̃arati na kanaku im̃auano.
PHI 2:17 Vede mia naio rivano-o rivokar na mia kanaku burukija monoka riiou rivior kamiu, mia ver tibe na, nemialio bo-o ga. Neber jibe na bior ka nemial jibe ka na m̃a kamiu kubarkar tiniemiu ea Yesu, kumila kamiu jibe ka jokoluolu tai ban naio ruei, mia bo ka mia kiniou bunu nasaaro ka najamo ka kiaku meuliano rivior Tubo kanano im̃auano.
PHI 2:18 Naina naruei neber ka mia nasaaro ka tibe na, mia naio bo ka kamiu bunu kuvisaaro kanio, bior ver Atua naio saaro ka nemijikia nalaluvu kiaku meuliano rivior toro dolu, naio be tena bo laka tai neibano naio mila ka kiniou.
PHI 2:19 Kiniou nojidom neverial van kamiu bunu ka ea tivelinio na kuruado nei Timoti, kanaku jidomiano naio jikili ea Tubo Yesu ka mia vesiou re, mia nemijikia neiila naio riviedu ea kamiu. Tinieku jii toru ka naio mijikia riviedu rial kamiu, karina mia naio rivar kenemiu iliano rimei bereio van kiniou ea vio nei, nina ka mia rila nejog rivu ve toru laka.
PHI 2:20 Nemialio ka maka bunu ve toro dolu tai toa vio nei napano naio bo jibe ka naio ka mia nemijikia neiila riviedu kean kamiu. Be kiano jidomiano takurano bija kiniou, naruei nemijikia ka ver naio to vija kamiu, nabarkar tinieku ea naio ka mia naio to sidomii ve toru ka rila rivu lie van kamiu tulaka.
PHI 2:21 Nalo dolu aju keano, mia nalo maka atavukia naio. Kiniou nobitilubar nalo ruei, ka venia napano naio toru ea kanalo jidomiano, nina vite nalo nam̃a be kanalo ga, mia vite nalo na be Kristo kanano, ajidom be iakurano ga, maka atu asidomii naio ve temi.
PHI 2:22 Mia Timoti kito romijikia vatitig ka naio bo laka. Kumijikia ruei jum̃abe ka napano kumemi juo numim̃au burukuti vio takurano ea Ioluano Vou na bo banbano-o na m̃a kiniou namial naio jibe keneriku, naio bio kiniou tata.
PHI 2:23 Jibe na, namial naio be toro na memedu ka neiila naio riviedu kean kamiu, mia maka rijikia riviedu vo. Nojidom ka neial von ka mia tum̃abe ka kiniou ea vio nei beamu vo, ana naio mijikia riviedu riverial van kamiu.
PHI 2:24 Verenio mia rimei rivu ka kiniou ea vio nei, nemijikia never ka mia naio re ga ve takurano napano mia riviedu riyotuba ka kamiu, mia nodu joa kanaku volkouano, nomonmonea Atua ka mia vesiou re ana mia kumijikia kuvial miraku bunu neyotuba ka kamiu.
PHI 2:25 Vite dolu tai bereio ka neverial van kamiu, ka kuruado nei Epavrotaitas naio mie toru laka banbano-o na namial jibe bo ka neiila riviedu bereio rial kamiu beamu vo. Kumiila binimei tibe ka kenemiu ijaiano tai ban kiniou, naruei numim̃au burukuti bo, numisikili numitu vio takurano na bo mia bo ea mira.
PHI 2:26 Mia vite takurano ga mieiano nei bokar naio milalelan naio batitigio, mila jidom toru ka riviedu vonuo ea kamiu bereio. Mia bogo na naio mijog ka lilian na kiano mieiano nei bokar burutiliniemiu ruei, mila na mijog bova kija, tiniene ka jidom rial kamiu.
PHI 2:27 Riano ga, mieiano nei mila naio bova banbano-o kumemi numial ka mia tovulio, mia Atua tinien miia naio, naruei naio maka rim̃aro. Mia nojo nojidomiio ka maka Atua tinien riia naio ga, mia naio tinien miia kiniou bunu, bior ver naio rim̃aro mia sikili laka van kiniou, mia naio rijedu ka burum̃ara jogvaiano mave ka jogvaiano na m̃a kiniou nojo nabar ruei.
PHI 2:28 Mia bogo na m̃a naio jo mie jo bija kiniou ea vio nei kia ga vo, nojom̃a nojidom biroviron toru ka naio. Tenena nojidom nober bo ka neiila naio riviedu rial kamiu bereio vo, mia nomonea ka mia kamiu bunu kuvisaaro ve toru ka kuvial mira bereio.
PHI 2:29 Kiniou nojidom ka kamiu kuvila kanano ilivorvoruano ea Tubo siano, kuvitikar vatitig naio tibe ka na kubitilubar naio bija im̃auano nalo na m̃a naio mim̃aukanio ea vio nei. Tomu nalo na jibe na, bo ka rovitii veve batitiglo rivu, p̃eli kito rotovonlo,
PHI 2:30 bior ka m̃a nalo amila Kristo kanano im̃auano naio bo laka. Epavrotaitas naio jibe na naruei, napano jidomii m̃elea im̃auano nei, mila na maka bunu sidomial kanano meuliano, vaataro ka rim̃aro. Naio mila jibe na bior ka naio jidom ka monoka tiniene ka rila venia na m̃a kamiu kumidu joa jum̃ano. Kamiu maka kuvijikia kumei kuvija kiniou, mia kumiila naio ju jeleig kamiu, binimei mim̃au bija kiniou. Naina naruei kuvuru naio kuvila rur naio.
PHI 3:1 Mo kuruaku nalo a kuvivinieku nalo, nejidom netikar ka netetavoko kanaku iliano naruei. Iliano na maaro tai na naio bo ka never ka kamiu naio jibe nei, berinavo kamiu kuvisaaro tulaka ea meuliano na bo napano Tubo naio jian ban kamiu ruei. Vede iliano nene neber ka kamiu bogo telabo ruei, mia tiniemiu ser re kiniou, maka nasidom rivova ka never vite na bo van kamiu ve vatelabo. Naio bo ga ka kiniou, mia nejidom jibe ka naio mijikia rijai kamiu ve burutomoruo bunu.
PHI 3:2 Mia be iliano vou tai na tinieku maio kanio ka never ka kamiu naio jibe nei, berinavo monoka kuvitikar batitig nalo na m̃a aju amioliolu m̃ele ka pakuveuano. Nina kario aju ajikili aberinavo pakuveuano nei naruei, naio ga be m̃arabo ka toro mijikia riasol Atua kanano m̃aratavo, mia nina maka ve riano. Kiniou maka lele nasaaro kalo, namial lo jibe ka aju abior janea vio jibe ka kuli deden nalo ga.
PHI 3:3 Venia napano kito rojuaio, naio maka tibe na leleio. Kito maka rotu rovitii venia nam̃a joa kuluniabedo riverinavo naina naruei naio mila kito robo ea Atua mirano, kar kito roju romilotu ka naio ea niunudo, mia rajaaro julaka ka tiniedo rimaio ka Kristo Yesu ga naio mila batitig kanado m̃arabo. !Ver nalo atum̃a asidom aver ka pakuveuano naio mila Atua jaaro ka kulorinio, mia monoka rover roverinavo naina be kanalo tena mokotenalo ga, mia nana be riano nene, naio nei naruei kito rojuaio, napano rojum̃a reje bulag bajago a jidomiano na bova nalo den kanado meuliano!
PHI 3:4 Mia ver nalo atu sikili averinavo mia Atua naio saaro ka kito ea venia ga na m̃a joa kito, vede kiniou nemijikia neverial kanaku mia naio rivu tovulu kanalo bereio.
PHI 3:5 Ver never bulag kanaku tukunu, mia kuvialio ka abiniu nono naio jakii ga venia napano bajago na memedu a tuboiano aju aber aberinavo naio bo laka. Vite na jukamu, ea kanaku yati nalo, nomiyotuba memedu ea burum̃ara yati na kulo Israel, nebe jameul na memedu ea yati na tormoruo buo na Beniamen. Teta naio nena naljuo abe kulo Ju, mila na kiniou bunu nebe Ju riano. Ta bunu, kiniou nomiyotuba bokar sude takurano nene amila pakuveu ea kiniou. A dolu, ea tivelinio na kulo Ju kanalo tuboiano, kiniou nebinimei toru, nebe Varisis nene, nojom̃a neberloglog ka kulo dolu.
PHI 3:6 Mia beamu, ea tivelinio na ikurukar nalotuano na kulo Ju sikili, kiniou naruei kiniou loa ka nalo nonovio, nojo namila namoneano nalo amijikia. A na maariano nene na nemijikia neverenio, ea tivelinio na bajago kirimemedu, maka ve iliano na tuboiano tai na kulo Ju kanalo leleio napano namila korovio p̃eli na namilaluvio.
PHI 3:7 Mo vite nalo nene, amila na amial kiniou bo laka, amidu kiniou nojo mave laka. Mia bogo na Kristo bio kiniou, maka bunu neial vite nalo na never ave tena bo tai ea kiniou, namial abe tena vakovio ga, naruei nojuvan nonovlo aju, najakisor naio.
PHI 3:8 Nao-o, nemijikia never tibe nei naruei, neverinavo nojo namial vite dolu nalo nonovio abe tena vakovio ga, mia nojidom ga ka nejikia vatitig Kristo Yesu tibe ka tubo na kanaku meuliano, riva lie tibe na. Vite takurano na ga na namial naio bo, napano bo lie vo jovulu vite dolu nalo nonovio, naruei naina ga nojidomio. Kiniou nojidom toru ka novokar naio ea kanaku meuliano, mia namilaluv kanaku saba dolu nalo nonovio bior ruei, mia naio bo ga, kiniou namial vite nalo na jibe soro ga ea kiniou.
PHI 3:9 !Ver kanaku meuliano naio mijikia riasol vatitig ea kanano meuliano mia rivu mia rivu! Nina, kiniou takurano maka nejikia noim̃au kanio, bior ka ver nomonmonea tuboiano, mia tuboiano naio maka jikia rila ka navare ka nememedu ea Atua mirano. Mia kanado m̃arabo dolu ka rovokar memeduano nei naio jo. Nene be viekouoiano ea Kristo, a naio be m̃arabo na memeduano takurano napano Atua ga naio betavo ea ban kito napano romonea kenerinio.
PHI 3:10 !Ver namijikia nejikia vatitig naio ga rivu, vija Atua kanano burum̃ara moroano napano mila naio meul bereio den m̃ariano, mia naio rivu mia! Kiniou najaaro ka navar burovuron jogvaiano na m̃a naio bario, mia ver kiniou nejikia rivare ka mia nam̃aro ea m̃ariano tai na jibe ka kanano m̃ariano, mia naial rivu laka van kiniou.
PHI 3:11 Vite kouo venia na jibe na na mia monoka noiopdulu eaio, rivu ga, mia monoka nala venia nam̃a nemijikia ka rila ka novokar meuliano vou ka notumolu bereio den m̃ariano.
PHI 3:12 Kiniou nojom̃a neberii kiniou bereio jibe na, mia maka nosidom ka kuverinavo be tinieku ka nojo neber ka kiniou nebinimei nobo nonovio, p̃eli na nobokar buruka ruei. Kiniou bunu kiniou maka vo, mia bior nemijikia ka Kristo Yesu naio buru kiniou ruei nebe kanano, mia nojo nojidom nalaii dam̃ariga bogo nonovio ka mia novokar vio tai napano mia naio mijikia saaro kanio.
PHI 3:13 Mo kuruaku nalo a kuvivinieku nalo, monoka never vatitig van kamiu ka namial kiniou jibe ka maka novokar vio nene vo, mia be im̃auano tai ga na naio joa kanaku jidomiano julaka, ka mia monoka tinieku ribobogia venia napano naio ju iorou ka kiniou, a monoka nesikili dam̃ariga dolu ka notovulu venia napano jo kamu ka miraku.
PHI 3:14 Vite nei na m̃a nojom̃a nejikili kanio, naio jibe nei, berinavo kanaku meuliano naio jo bo bija Kristo Yesu dam̃ariga, rivanvano-o na mia kiniou bunu tai na mia nojog vioano novo na bo na Atua kanano nei na mia naio river ka kiniou, riverinavo “!Mo, jau komei mave koto vija kiniou naruei!” Vite na naio jibe ka jidomiano na sereano tai na m̃a amidu batitig naio jo ana na kito rojum̃a rojikiti biorio, ka rotovulu ve kanado.
PHI 3:15 Ver kito tealo, kanado jidomiano naio meruo ruei, bo ka rotum̃a roim̃au tibe na naruei, p̃eli na ver ea vite tealo, mia kito tealo kialo jidomiano maka rimeruo tibe na vo, kiniou nomonea ka mia Atua naio rila vite nalo na ameravo rivu vanlo. Vede ea vite telabo na maka romei rivu ea vo, mia naio rijai kito kanio na vo.
PHI 3:16 Mia kito monoka rovokar batitig naina napano robinimei robo eaio ruei, kanio maka rivu ka rojoru retitiravolar denio bereio.
PHI 3:17 Kuruaku nalo a kuvivinieku nalo, neber bo ka kamiu ka kuviasosol vatitig kamiu, ka kuvilavon kuviel takii jaaku ea m̃arabo na kanaku meuliano. Ver kuvitilubar ka kamiu tealo ajum̃a amila bo jibe na ruei, mo kamiu dolu nalo kija, kuviel takii jaalo.
PHI 3:18 Kiniou neberial iliano na ban kamiu va telabo ruei, mia vonganei neverial ve varakura bereio napano nomijog kirivova laka, jogumiraku na jo jibirbili. Nina kario nojo nemial kam tealo napano abar sio ka abe namoneano nalo, mia kanalo meuliano nalo naio jiloglog berinavo nalo abe Kristo kiano uolu nalo ga vija sano m̃akolkolo nene.
PHI 3:19 Kanado uolu nalo nei, vite na amilotu kanio, naio be mabolo ga. Kanalo vovaiano nalo bo ka aimou kanio, mia abarvar kalo laka. Vite na m̃a bujovujo ea kanalo jidomiano nalo, abe tena yetemeriba nei, mia kanalo jukuti, naio avakovio rivova.
PHI 3:20 Mia kito maka rove tomu na vio yetemeriba nei, kiado buruvenuo memedu, naina tiniabene mave. Toro na toru na vio na, nina be Tubo Yesu Kristo, kanado Ioruriano, mia rojua yetemeriba nei, roju rorea keano, a roju rojirarago kuku ka mia naio rimei bere vesiou re rivior kito.
PHI 3:21 Mia bogo na ver naio rimei, mia rim̃au vija kanano burum̃ara moroano napano bare ka rila vite nonovio atu yetano ka kanano tuboiano, naruei naio mia rivilig kito. Vonganei, roju bija kuluniabedo moruo nalo na yetemeriba nei, napano amenunu, aburu kokorovio, abe tena m̃ariano ga, mia naio sian kuluniabedo vou tai, na naio bo jibe ka niabene, napano naio meravo, naio merera, naio jikili, naio jobo to tobo to.
PHI 4:1 Ver tibe na, kuruaku nalo a kuvivinieku nalo, bo ka kamiu kuvitumolu kuvitu sikili tibe na ea kanado Tubo. Neber jibe na bior ka tinieku jii kamiu, nojidom kamiu toru, kamiu kumila kiniou najaaro laka, nabarvar toru ka kamiu, tenene na nojidom ka mia rivu van kamiu tulaka.
PHI 4:2 Kiniou nomijog bova ka namialio ka monoka neil ve telisu van kanado tira juo nei, Yuotia naio Sintike. Naljuo ajum̃a abilvilii ealo toru laka, tenene na neber ka kamiu ka nojidom ka naljuo monoka ala kanalo jidomiano rivatove, rimei ve takurano ea kanado Tubo.
PHI 4:3 Tira juo nei, nanua numim̃au vio takurano kumemi liko bo laka, bija bunu tom nei Kleman a tomu na im̃auano dolu nalo, na numim̃au jikili bior Ioluano Vou na bo banbano-o na nubiniu nube jidomiano takurano ga. Kiniou nemijikia ka tomu na im̃auano nalo nene sialo abiniu abivitauia bulagio jua niosi na meuliano ruei, mia bogo na be vuruvureiano jo iviso kalo bereio, nomijog bova toru. Jibe na, kanaku vikadeniano tai biedu banso, kanaku bilbilu na robe juo robe tomu na romim̃au vio takurano nua ruei binimei. Nebika denso ka jau naruei kajai tira juo nei ka amei ave bilbilu na bo bereio.
PHI 4:4 Naruei kanaku iliano tai van kam nonovio bereio, neberinavo kamiu kuvisaaro ea Tubo, kuvisaaro ea naio tulaka.
PHI 4:5 Bogo na m̃a kamiu kubiniua bogokouo, kumelumu, kuvila ka tomu nalo ajikia ka avitilubario ka kenemiu jidomiano naio tebievi bo. Kuvisidomii von tulaka ka vesiou re ga mia Tubo rimei bereio.
PHI 4:6 Kamiu kuvila re kenemiu jidomiano rivova tulaka ea vite nalo, mia ea vite venia na mia naio riyotuba ea kenemiu meuliano, kuver siva van Atua riviorio. Kamiu kuverial ka naio vite venia na jumemiu bulati kanio, kubolkouo kanio, kuviteg vanio riviorio, a nina monoka kuvila vija jidomiano na sivaiano tulaka.
PHI 4:7 Naruei ver kamiu kuvidu vite nonovio toa jum̃ano tibe na, mia kuvial ka na mia Atua rudu kanano tum̃aro loa kamiu, naio rijai kamiu. Kanano tum̃aro nene naio burutomoruo laka, mijikia rila rivu laka van kito tovulu venia nam̃a romijikia rosidomio, rivanvano-o rila napano mia rivokar vatitig kanado iviso p̃eli kiado jidomiano naio to sikili ea Tubo Yesu.
PHI 4:8 Kuruaku nalo a kuvivinieku nalo, vede vaataro ka nala nonovio kanaku iliano van kamiu naruei, mia nojidom notunukakar kamiu ka kuvila kenemiu jidomiano naio rivujo ga ea vite nalo nam̃a Atua naio jidomiio. Vite venia na be riano, p̃eli vite venia na naio loa, p̃eli vite venia na naio memedu, p̃eli vite venia na naio meravo bo, p̃eli vite venia na naio kirinovo, p̃eli vite venia na naio be navijukuvuiano, p̃eli vite venia na naio ka aiaia, p̃eli vite dolu venia na naio bo, naina naruei be vite kinkin nalo naruei napano bo ka atua kanado jidomiano tulaka.
PHI 4:9 Naina naruei be bajago nalo na nojom̃a namila vio jikili ka naverloglog ka kamiu, p̃eli kuvokar den kiniou, p̃eli mave ka nina, kamiu kuvial ea kanaku meuliano. Naruei ver kamiu kuvial ka be riano ka bajago na bo nalo nene tealo na ajua kanaku meuliano, neber bo ka kamiu neberinavo kamiu bunu kuvije batitiglo amonea kenemiu meuliano nalo. Mia ver kuvila tibe na nomonea ka mia kanado Atua na tum̃aro mia naio to vija kamiu, rijai kamiu.
PHI 4:10 Kiniou nojidom never ka kamiu never burum̃ara saariano na ea kiniou, ka kirisiou kija maka naial vite tai, mia nobokar ijaiano telisu nei ga kamiu kumituvan binimei. Nomonea ka kamiu kumitu tiniemiu maio ka kiniou, mia nemijikia ka maka ve kenemiu m̃arabo ka kuvila vite rimei rivokar kiniou ea vio nei. Mia bogo na nemial ijaiano nei binimei vonga, namial jibe ka na kenemiu jidomiano na ijaiano na ea kanaku im̃auano naio meul vatitig bereio, nabamenea Atua biorio.
PHI 4:11 Kiniou neber jibe na, mia maka ve tena noto nala vukuleleano ka maka ve kanaku titai, bior vite na namila kakario mugaruei, ka vite venia na mia riyotuba ka kiniou, p̃eli na kiniou noto tum̃abe, mia nasaaro ga.
PHI 4:12 Kiniou noto tano p̃eli noto mave, siseri kiniou p̃eli na saku sinaniano ve telabo, jum̃aku ve teau p̃eli jum̃aku rivujo, kiniou nomiovo dulu ea vite nalo nonovio ruei. Bogo na bova vede bogo nabo mia Atua kanano m̃arabo ka noiopdulu ea naio bo jo, mia naio berloglog kiniou kanio, mila na namila kakar vite nalo na ea naio ruei.
PHI 4:13 Tibe na, vonganei namial jibe nemijikia notovulu vite nonovio napano mijikia rimei ea kiniou, naina ea burum̃ara moroano na Kristo naio jo mila nejikili eaio.
PHI 4:14 Kiniou nojidom neverinavo kamiu kulo Vilipae, kumisidomii ka kuvijai kiniou ea kanaku bogokouo tibe na, kamiu kumijuku bo toru laka.
PHI 4:15 Jibe ka napano kamiu kubitilubario ruei, ka bogo na nejikar nemiel bior Ioluano Vou nei, bogo na najaluvo ea vio M̃asitonia nabano, maka ve lotuano tai napano naio rijai kiniou leleio, mia kamiu ga. Nejian vite nalo na telabo banlo, mia maka nalo tai napano naio ve tiniene ka sian vite rimei ka rijai kiniou ea kanaku m̃arabo p̃eli na kanaku im̃auano.
PHI 4:16 Mia kamiu kubo laka, kumitu kumijai kiniou ea bogo na jum̃aku bulati, kumitum̃a kumituvan ijaiano binimei ban kiniou va telabo kija, bano-o bokar bogo na naba nojo nomim̃au laka yako Tesalonaika.
PHI 4:17 Nojom̃a nemil jibe na, maka ka noto nosidom navar ijaiano tulaka, mia bior ka nojidom neial ka lotuano nalo atu aija Tubo kanano im̃auano. Naina bior napano ver kuvila rivu van toro dolu tibe na, ana kenemiu bajago novo nene mia naio rivar marati nene rila vite nonovio rivu lie van kamiu bunu.
PHI 4:18 Tibe na, neber siva toru laka ka ijaiano nalo nam̃a kamiu kumiila Epavrotaitas naio bar binimei, nobokar nonovio ruei. Ijaiano nalo na binimei, naio ba loa ka napano nojidom, ana nemial ka vonganei naio bo laka ban kiniou. Kenemiu ijaiano nalo nei, ajibe ka bonotanunu tai napano naio be sano bonoti nene bo laka, ajibe ka jokoluolu tai na m̃a kumisian ban Atua napano naio mial bo laka, naio jaaro toru kanio.
PHI 4:19 Mia nemijikia ka ver jumemiu rive bulati bogo tai, mia kanaku Atua naio rivitii ea kamiu tulaka, bior ka Kristo Yesu naio mila ruei Atua kanano mermerano na mave nalo burutomoruo laka.
PHI 4:20 Tibe na, mia rotu rodular karam̃ado Atua siano tulaka, mia ravamenea naio rivan rivano-o mia maka rijikia ribisi bogo tai, Mm.
PHI 4:21 Kuver lilian kanaku iliano nei van namoneano lu nalo nam̃a aju na, a kuverial vanlo ka nojo tinieku maio ka nalo bogo nonovio. A kuruaku a kuvivinieku dolu nalo nam̃a aju bija kiniou ea vio nei, nalo bunu ajidom aver kavijo bo vede na bogiano bo van kamiu.
PHI 4:22 Nalo ta bunu ka atuvan iliano tibe na van kamiu, naina be namoneano lu nalo abiniu ea vio nei, bija bunu nalo nam̃a amim̃au parinio tubo nei Sisa kanano ea kunuano na toru.
PHI 4:23 Kanaku volkouano, ka Tubo Yesu Kristo kanano tiniememiano naio toa niunumiu nalo, naio to iviso ka kamiu bogo nonovio. Kiniou, Pol.
COL 1:1 Kiniou Pol, kiniou nebe atevi napano Kristo Yesu kiano, napano Atua naio bitiri lar kiniou, najaaro ka neviviuo kamiu ea m̃esi nei, napano nejiriio biedu ban kamiu namoneano lu nalo na Kolosia, napano kamiu kuruaku nalo a kuvivinioku nalo ea Kristo, napano kumitu jikili eaio. Kumemi juo Timoti, napano naio jo bija kiniou, nubolkouo ka mia Atua karam̃ado kanano tinievuiano a tum̃aroano to vija kamiu.
COL 1:3 Bogo nonovio ea kenememi volkouano, kumemi juo nuber siva bior kamiu ea Atua, Yesu Kristo kanado Tubo karam̃ano.
COL 1:4 Nina bior kumemi juo numisaaro toru ka kamiu, bior lilianiano bokar kumemi ber kamiu kumitu kubiekouo jikili ea Yesu Kristo, a kumitu tiniemiu jii namoneano dolu nalo.
COL 1:5 Bajago novo na jo maluvo ea kenemiu meuliano bior kumitu kumisidomii m̃elea ka kumijikia kuvokar saba novo nalo napano Atua bar batitiglo aju tiniabene ka ve kenemiu. Saba nalo na jibe na, kumijog Ioluano Vou berenio ruei.
COL 1:6 Mia Ioluano Vou nei biedu ban kamiu ruei, a vonganei, jo ba tavio keano vo ea vio dolu na yetemeriba. Naio jo ba tavio jibe na, naruei jo miluo a bar m̃arati novo nalo, jibe ka napano mila ea kamiu, jikario ea bogo napano kumijog beamu, napano kubitilubar ka Atua kiano tiniememiano ea kito burutomoruo a be riano laka.
COL 1:7 Vite nalo na, Epavras naio berloglogio ka kamiu ruei, ea bogo napano naio midu jelememi biedu berial ioluano vou nei ka kamiu na be moti. Naio be toro tai napano numim̃au biju vio takurano, a naio biekouo vatitig ea Kristo kiano im̃auano novo nalo. Kumemi numisidom naio toru,
COL 1:8 mia vonganei, naio binimei bereio ea kumemi ruei, jian veriiano novo tai ban kumemi, napano berii burum̃ara tinietiiano napano Niununo Lu midu joa kenemiu meuliano nalo.
COL 1:9 Kanio tena, bogo napano kumemi juo numijog Epavras kiano iliano, kumemi juo numitu nubolkouo ka kamiu julaka ga binimei bokar vonganei, a numitum̃a nubika den Atua ka Niununo naio sian m̃asosouano a jikiaiano vu van kamiu, ka mia kumijikia kuvijikia nonovio Atua kanano tinieiiano nalo.
COL 1:10 Tibe na ana mia kumijikia kuviel rimemedu ea m̃arabo napano bo ka tomu nalo na Tubo kanano amiel eaio, a mia kumijikia kuvilaio ka mia naio rijikia saaro m̃ele ea kenemiu bajago nonovio nalo. A mia bo ka kurukuti na bo mijikia rimaluvo ea kenemiu meuliano nalo a ea kenemiu im̃auano nalo bunu, a mia kenemiu jikiaiano ea Atua mijikia riva ve toru lie vo.
COL 1:11 Kumemi juo nubolkouo ka mia Atua kanano moroano na toru rila kamiu kuvokar moroano bunu, ka mia kumijikia kuvitumolu kuvitu sikili ea bogokouo, a mia kenemiu iviso nalo amijikia ave tebievi, a asaaro ga ka bogo nalo na tibe na.
COL 1:12 Monoka rover siva van Karam̃ado, napano naio mila kito bunu, kitoliko namoneano lu dolu nalo, romijikia ravar kiano jajum̃ano, jouro ea kiano navenatuboiano na miamoiano,
COL 1:13 bior naio buru bulag kito ruei den moroano na melijokouo, naio mijian bulag batitig kito raban ea navenatuboiano na kenerinio kiano, napano tinien jii naio bo laka.
COL 1:14 Nao-o, Atua naio buru bulag kito ruei, napano naio biekokoa kito bior kanado kariano nalo.
COL 1:15 Nina be kenerinio na, naio be Kristo nene, napano naio be tovorovo tai napano romijikia reialio, ka Atua napano maka rojikia roialio, napano naio be motoru ka vite nonovio nalo na Atua jiilo.
COL 1:16 Ea Kristo nene, Atua naio jii vite nonovio, na vio mave a na vio yetano, napano romijikia reialio p̃eli na nana maka rejikia reialio, bija vite nalo napano abe natuboiano ea vio yauo, jibe ka parinio tubo nalo, moroano nalo, a tomu na tortoru nalo, a nailiano nalo. Atua jii vite nonovio ea Kristo, a Atua jii vite nonovio be Kristo kanano.
COL 1:17 Kristo naio jo ruei jukamu ea vite dolu nalo nonovio, mia naio bar batitig saba nalo nene ajum̃a amim̃auo bo ea jelelo memedu.
COL 1:18 Kristo naio be burupati na meuliano na torogio nalo na kiano nalotuano, a naio be parinio ka lotuano nene jibe ka lotuano nene tibe mokotenano. Naio be toro na jukamu ka nalo na ameul bereio ea m̃ariano, ana jibe na mila ka vonganei naio jo mave lie vo loa vite dolu nalo nonovio.
COL 1:19 Kristo naio jo mave laka jibe na, bior Atua naio mijamo ka kiano mermerano joaio, javukia meuliano a moroano na kanano joaio.
COL 1:20 Ea Kristo nene kia ga vo, Atua bar bereio vite nalo na vio mave bija na vio yetano abinimei eaio. Ana na naio mila nonovio yauo amijikia ave merevuiano rivija naio bereio, nina ea Kristo kiano burukija napano miou ea m̃akolkolo.
COL 1:21 Nanua beamu, kamiu kube valauo ga, a kumitu koalabo ka Atua, a kube kiano uolu, bior jidomiano va nalo a bajago va nalo na kenemiu.
COL 1:22 Mia vonganei, napano Kristo binimei jibe ka kito, kiano m̃ariano mila kito robe merevuiano kitoliko Atua bereio. Atua naio mila jibe na, ka mia naio mijikia rivuru kamiu kumei keano naio napano kuve lu batitig rivu, kumeravo vatitig rivu, a napano maka niamiamo va tai toa kamiu leleio.
COL 1:23 Mia nina naio mijikia tibe na, verenio ga kamiu kuvitumolu kuvitu sikili kia ga vo ea Kristo, a ver kumonea naio kia ga. Bo verenio kamiu kumelukluku re ka kuvokar sikili moneano na Atua kiano verikariano nalo, monoka kumonea ka mia naio monoka sian vite nalo van kamiu napano kumijogio ruei ea Ioluano Vou nei, napano tomu nalo na vio yetano nalo ajum̃a amijogio ruei, a napano kiniou Pol nebe toro na mioliolu kanio.
COL 1:24 Vonganei kiniou nojo nomijog jaleleano ea mokotenaku bior kamiu, mia najaaro ga kanio. Nina jibe ka napano nojo nomim̃au nonovio kanio ea jogvaiano na mokotenaku nalo, napano Kristo ber lua ka mia navario, jibe ka ga napano naio bario ruei, ka najai taara na namoneano nalo ka atu sikili.
COL 1:25 Atua bitiri lar kiniou ka mia nemei neve toro na im̃auano tai na bagaro na moneano nalo, mia vonganei nemijikia najai kamiu ea im̃auano napano Atua naio miduio joa jum̃aku, nina ka neverial iliano na kiano van tomu nalo ka mia ajikia nonovio eaio.
COL 1:26 Kiano iliano nene nei, jibe ka iliano tai re bogo be nua, joluku ga ea tormoruo nalo, napano nalo maka ajikia leleio, mia vonganei Atua mila meravo ban kiano namoneano lu nalo.
COL 1:27 Kiano jidomiano ka rila tibe na naruei, berinavo iliano na napano kiano tomu nalo, kulo Ju, maka ajoglubario, mia naio riverial kiano vite novo nalo, napano abo laka, ea nalo napano maka ave kulo Ju. ?Mo ana ililuklukuano nei naio ber venia? Naio ber jibe na naruei, berinavo Kristo naio mijikia toa kenemiu iviso nalo, ana kamiu kumijikia kumonea kuver mia Kristo mijikia rila kamiu kuvitusol ea meuliano novo na Atua kiano ea vio mave.
COL 1:28 Kumemi juo numitu numioliolu ka Kristo nene ban tomu nalo, a numitu numil banlo nuber nalo monoka avitikarlo rivu, ana numitu nuberlogloglo ka masouano nalo. A ver tomu tai napano kialo jidomiano a kialo moneano rimei rimeruo vatitigio, amijikia amei atumolu atu kumemi liko ea Atua mirano.
COL 1:29 Kiniou nojo nobukudeli bijonio bior vite na, mia bogo nonovio nojom̃a nemim̃au ea moroano na toru napano Kristo naio jo misonio ban ea kiniou.
COL 2:1 Nao-o, javukia na kiniou neberenio, ka napano nobu-kudeli toru bior kamiu, a bior nalo na vio Leotesia bija tomu dolu nalo bunu napano maka aial miraku kija bogo tai vo.
COL 2:2 Nejidom ka nala kialo jidomiano nalo atu sikili, a ka kialo tinietiiano mijikia rila aiasol kialo iviso nalo amei ve takurano ga. Nejidom m̃elea ka mia avokar burum̃ara ilirianiano na vite luku nei napano beamu nalo maka ajikiaio, napano naio be Kristo memedu, naruei mia kialo jidomiano nalo maka rijikia to veve juo.
COL 2:3 Nina bior ea Kristo, tomu nalo amijikia aleal vite novo nalo na Atua kiano masouano a jikiaiano, napano naio bar vanio jua Kristo.
COL 2:4 Kiniou nojo neber iliano na ban kamiu, ka mia tomu nalo tai re ave niosesei van kamiu rivano-o avuru kenemiu jidomiano riva rive dolu, ea kialo masouano lubolubo nalo.
COL 2:5 Nemil jibe nei bior kanaku jidomiano joa kamiu jikili dam̃ariga. Bekurano ka mokotenaku jo koalabo ka kamiu, mia kanaku iviso naio jo miasol kamiu dam̃ariga ruei. Mia najaaro toru ka kamiu bunu, napano nomijog ka maka kuve dedade ga, mia kubiekouo jikili buronio dam̃ariga ea Kristo.
COL 2:6 Jibe na, bior kito romidu Kristo Yesu be kanado Tubo ruei, bogo nonovio mia reiel dam̃ariga ea naio ga,
COL 2:7 mia naio monoka tibe ka p̃elilikiti na kanado meuliano, p̃eli na yimo na kanado meuliano, monoka sikili tu mave ea naio. Tibe na ana na kiado viekouoiano ea Kristo naio mijikia rimei sikili lie bogo nonovio, tavukia napano aberloglog kito kanio ruei. Mia bogo nonovio, kito monoka rotu rover siva vanio.
COL 2:8 Kamiu monoka mia kuvitikar rivu, ka mia tomu tai re amei ka mia aiadikar kamiu ka iliano nalo na jelea masouano na toro ga kanano, p̃eli ka verloglogiano nalo napano abujo ka masouano na yetemeriba nei ga. Ilikuraniano nalo na be tena sibiano ga, a nalo aju amaluvo ea tomu nalo kialo jidomiano moruo, a maluvo ea tivelinio na sim̃aro nalo a semei nalo, nalo mia maka amaluvo ea Kristo.
COL 2:9 Atua naio midu kiano meuliano a moroano nonovio nalo ajua mokotenano toro nei Kristo,
COL 2:10 napano naio be parinio ka vite nonovio, a naio loa ka moroano dolu nalo. Ana ea bajago nene, Atua midu kiano tonovo nalo napano kiano ajua kenemiu meuliano nalo, kamiu napano kumitua Kristo.
COL 2:11 Mia bior kamiu kumitua Kristo, naio je bulag bajago va nalo a jidomiano va nalo den kamiu, jibe ka naio mila pakuveu ea kamiu, mia maka never pakuveu na tomu nalo ajum̃a amilaio, nojo neber pakuveu dolu tai napano Kristo naio milaio, jibe ka napano naio jo bar bulag vovaiano den kenemiu meuliano nalo.
COL 2:12 Naruei ka bogo napano abar uei ea kamiu, jibe ka ga napano Atua jivinko kamiu kamliko Kristo, a ka naio mila kamiu bunu kumeul bereio kamliko Kristo, nina bior kamiu kubarkar tiniemiu ea Atua kanano burum̃ara moroano napano naio mila Kristo meul bereio ea nam̃ariano.
COL 2:13 Ana kamiu na, beamu Atua naio mial kamiu jibe ka kenemiu kariano nalo amila kamiu kum̃aro ruei. Maka kamiu kuve pakuveu tavukia kulo Ju nalo, mia Atua mial kamiu jibe ka kenemiu meuliano maka rive pakuveu bunu, jibe ka napano kenemiu meuliano maka rijulukon vatitigio vo, a bajago va nalo aju kiano ea kamiu vo. Mia vonganei, napano kamiu kumijuru kamiu bija Kristo, Atua jian meuliano vou ban kamiu ruei. Kito robokar meuliano vou nei bior Atua biekokoa nono kito bior kiado kariano nalo,
COL 2:14 a naio miolkon bulag ruei kanado jabue nalo. Beamu, jabue nalo nei ajua niosi napano Atua kanano tuboiano nalo napano kirisikili ajuaio, napano amiadikakar kito m̃ele, mia Atua naio bar bulag vite nalo na bija niosi nene ruei, jibe ka napano naio jukkakar nonovio ea m̃akolkolo naliko Kristo, ana na maka bunu ve jabue nalo nene.
COL 2:15 Ea m̃akolkolo nei, Kristo jovulu vite jikili dolu nalo, naio mila kokorov sim̃aro nalo kialo buriu kouo nalo, jibe ka napano naio jovulu nalo ea burum̃ara mira tai, naruei naio mila kiano uolu nalo nene abinimei abe iakurano ea mirado kito tomu nalo, ka mia rosidomii yebekavo re bunu mave ealo.
COL 2:16 Tibe na, ana mia kamiu kuvijamo re ka toro tai riverbure kamiu river kuvisen re tena p̃eli na kumunu re tena. Mia kamiu kuvijamo re ka toro tai riyuku kamiu ka kuvitakii kialo bajago moruo nalo ea tivelinio na vite nalo tibe legiano lu nalo na yuka, p̃eli na ea tivelinio na jokoluolu na siberio vou, p̃eli na ea tivelinio na bogoti aluo.
COL 2:17 Tuboiano nalo na jibe na, tomu nalo aber ka ala vonio ka aleal m̃arabo na memedu, mia nalo ajavukia ga vamelu na vite na maka rimaluvo vo, mia burupati riano na vite nonovio nene, naio be Kristo ga.
COL 2:18 Be tomu tealo ajidomii aber nalo abo loa kamiu, bior nalo ajum̃a amial vite telabo ea kanalo monvovuano nalo, ana nalo ajidomii aber ka amijikia lie vo tivelinio na nailiano nalo. Mia nalo ajidom aber nalo abo, ajum̃a amilakialo jidomiano nalo, jotano dobi, jovulu kulo dolu nalo, mia maka leleio, nalo na ajibe ka sieso. Nalo ajum̃a abarvar ga ka kanalo iliano nalo, napano nalo ga ajum̃a aberii nalo m̃ele bereio, mia kialo jidomiano nalo bujo ka varvariano ga bija jidomiano kurano dolu nalo, banbano-o bokar napano nalo ajum̃a amiaialo bereio. Jibe na mia kamiu kuvijamo ka re nalo na atibure kamiu aver kamiu maka kuvokar vite nalo napano ajua ruei,
COL 2:19 bior nalo na ajuvan Kristo ruei, nalo maka bunu avokar vatitig naio sikili rivu napano naio be parinio kalo. Mia Kristo naio jo bitikar batitig ga nalo napano ajibe ka niabene torogio nalo, a naio jo baganlo, jo jelanvuu batitigio ka burubuku nalo a kiano vaiu nalo, naruei tati nei naio mijikia rim̃au rivu a mijikia riluo rivu tibe ka napano Atua naio jidomio.
COL 2:20 Kiniou nemijikia Kiniou nemijikia never ka jibe ka Kristo naio m̃aro nanua ruei, kamiu bunu kum̃aro bija naio, mila napano ea tivelinio na bajago va, kum̃aro eaio ruei, mia maka rimemedu ka bajago va ritokol kenemiu meuliano bereio. Mia Kristo naio buru bulag kamiu ruei bunu den moroano nalo na jukamu na vio yetano nei, bija sim̃aro nene nalo. Jibe na naruei ana na nejidom nevika den kamiu, ka: ?Jum̃abe kamiu kumitu kumiel kia ga jibe kamiu kube na vio yetano nei kia ga vo? ?A ka venia ana kamiu kumitum̃a kumonmonea tuboiano moruo napano aberloglogio ka kamiu nua, napano aberenio
COL 2:21 “Kamiu kuvokar re vite na,” p̃eli na “Kamiu kuviniomo von re tena,” p̃eli na “Kamiu kovitokol re vite na?”
COL 2:22 Naruei be riano ka napano tomu nalo amijog iliano nalo nei, ana na nalo ajidom aber tuboiano nalo na jibe na abe masou bo, mia tuboiano nalo na amiyotuba ea toro ga, maka ave Kristo kiano verloglogiano. Aberiio vite nalo na vio yetano nei ga, jibe kanio sinaniano, p̃eli vite na munuiano, mia vite nalo na maka ajikia ajai kamiu, a maka ajikia ala bulag kenemiu meuliano bunu, bior bogo napano komiduio p̃eli na komilaiio, karina abiniuviniu bereio ruei. P̃eli tomu nalo abitiri bulag tuboiano nalo nei ka ala von ka ala im̃auano novo nalo tai, napano aberenio toro monoka rivolkouo tibe na p̃eli tibe nei, a napano aberenio ka toro monoka rilavon ka rila kiano jidomiano vatove tibe na p̃eli tibe nei, a napano aberenio toro monoka rilavon ka telanivuu batitig ka tiniabene tibe na p̃eli tibe nei ka vite nalo napano jikili ka naio. Mia kiniou neberii ka kamiu, ka tuboiano nalo na jibe na, maka leleio ve kanalo moroano ka tokovio ka jidomiano na bova nalo a bajago na bova nalo napano m̃a ajua toro kanano iviso.
COL 3:1 Kamiu na Atua naio bitiri bulag kamiu kumeul bereio ea nam̃ariano bija Kristo, ana tibe na monoka kuvilavio sikili ka kuvan ka vite nalo na vio mave ga, ea vio napano Kristo naio jotano tivelinio vameruo ea Atua.
COL 3:2 Monokanio mia kuvisidomkar vite nalo na vio na ga, mia kuvisidomi re bunu vite nalo na vio yetano nei,
COL 3:3 bior jibe ka napano kamiu kum̃aro ruei ea naio. Vonganei kenemiu meuliano vou joluku bija Kristo ea Atua,
COL 3:4 bior ka Kristo naio naruei be burupati na kiado meuliano vonganei, mia iorou kanio, bogo napano mia naio riyotuba ea tomu nalo miralo, mia kito bunu royotuba vija naio ea kanano burum̃ara mermerano.
COL 3:5 Monoka kamiu kuvuekon bulag bajago nalo na vio yetano den kenemiu meuliano nalo, jibe kanio nasiakaiano, vite nalo na imouiano, nasidomvaiano, natitii kariano nalo, a natitiiano. Bajago nalo na bova, a natitiiano jibe na, naio jibe ka napano toro mila saba nalo na naio jidom m̃elealo abinimei jibe ka kanano atua dolu nalo.
COL 3:6 Bior bajago nalo nei naruei Atua tiniene mimi m̃ele, ana kanano natibureano jo binimei ea nalo napano maka amonmonea naio.
COL 3:7 Beamu kenemiu meuliano jibe na naruei, napano kamiu kumitum̃a kumiel ea bajago nalo na,
COL 3:8 mia vonganei, be bogo na kuvituvan bajago nalo na, be bogo na abisi ea kenemiu meuliano nalo. Tibe na, ana mia tiniemiu rimimi re, a kuvilvilea re toro dolu, a kuvitu re m̃a kuve nabilbiluvaiano van kamiu. Mia kamiu kuvil die re a kuvitu re m̃a kuvila nailimum̃iano va ka toro dolu, a kuvila re iliniamiamoiano nalo.
COL 3:9 Mia kuvitum̃a kuvila sibilili re kamiu bunu, nina bior kubielar ruei kenemiu bajago moruo napano kumoluo bijaio,
COL 3:10 mia kuvidu bajago vou tai ea kamiu tibe ka meuliano vou tai napano Atua naio jiio ea kamiu. Mia bogo nonovio, Atua jo mila meuliano na binimei be terivou bereio, ka rila kamiu kuvijikia naio ve riano, a ka rila kumei lie vo tibe ka kube kanano natovorovoiano na naio.
COL 3:11 Bior vite nalo na, kito maka bunu rejikia retiburevure tomu nalo, ka mia rover tealo abe kulo Ju, mia tealo abe tomu na vio dolu nalo ga, p̃eli na tealo abe navakuveuiano, mia tealo maka atibe na, p̃eli tomu tealo abe tubo, a tealo abe tomu na im̃auano na tubo kiano ga. A maka rejikia rover tom tealo roverinavo aberloglog batitiglo tenene na amijikia vite, a nalo tealo abe kulo yeturu ga napano maka ajikia vite. Mia be burum̃ara vite tai ga napano mia romijikia rovitii toro kanio, rober naio rimonea Kristo p̃eli maka rimoneaio, bior Kristo naio joa vite nonovio a ea tomu nalo nonovio.
COL 3:12 Mm, jibe ka napano Atua naio jidom m̃elea kamiu, ana naio bijauia bulag kamiu ka kuve kanano kulo lu nalo, monoka kuviya bajago vou nei ea kamiu tibe ka napano naio jidomio. Bajago vou nei jibe ka vite nalo nei ajua kenemiu meuliano, javukia tinieiiano ban toro, tinievuiano, navatoveiano, namom̃avoiano a namelumulumuano.
COL 3:13 Kamiu monoka kuvitu re tiniemiu rivavavin sop̃eli ka kamiu, mia bogo napano verenio kamiu ve juo nene ala titai iviso bure naljuo nei, mia naljuo nei monokanio avieviekokoalo ave juo. Kamiu monoka kuvieviekokoa kamiu, ea bajago na ga m̃a kiado Tubo naio jom̃a biekokoa kito.
COL 3:14 Mia vija bajago dolu novo nalo na napano monoka kuviyaio ea kamiu, mia monoka kuviya bunu tinietiiano ea kamiu, bior tinietiiano naio mijikia rivitirasol batitig bajago novo nalo na mia aim̃au bijuviju rivu, ka mia amei ave takurano.
COL 3:15 Mia tum̃aro napano Kristo jianio naio mijikia rivitikar kenemiu iviso nalo, bior Atua naio bio burovuron kamiu kanio mia kumei ve takurano, napano mia kuviniu kuvijurukar rivu vija naio ea tati ve takurano napano naio be parinio kanio, ka mia tum̃aro neibano naio mijikia to vija kamiu. Ana bogo nonovio kamiu kuver siva ka vite nonovio nalo.
COL 3:16 Mia bogo nonovio Kristo kanano iliano novo nalo monoka ameul ea kenemiu iviso nalo, bior kiano iliano nalo abo tanea. Kamiu monoka kuvitu kuverloglog kamiu ka naio, mia kamiu ga kuvitu kuvuriri kamiu bereio ea kenemiu m̃asosouano novo nalo. Bo ka kuvitu kuviou van Atua ea Iouano nalo, a iouano lu nalo, a iou nalo na vameneano ban Atua, ka napano ea bogo na kumitum̃a kumiou jibe na, mia kenemiu iviso nalo avujo lou ka sivaiano vanio.
COL 3:17 Mia vite nonovio napano kumilaio, mia iliano nonovio napano kuberenio, mia monokanio kuvilaio ea Yesu kanado Tubo siano, mia bogo nonovio monoka kuver siva sel ea naio van Atua karam̃ado.
COL 3:18 Kamiu tire nalo na m̃a kumisoro, monoka kuvatove ga ka kouemiu nalo, tibe na kanio mia rimemedu ka tira napano naio be namoneano naio milaio.
COL 3:19 Mia kamiu sum̃ano nalo na m̃a kumisoro, monoka tiniemiu riia tanea kouemiu nalo, mia kuvila re kenemiu bajago nalo ajea m̃ele vanlo bogo nonovio.
COL 3:20 Kamiu kalse nalo, monokanio mia kuvijogkar karamemiu a koniomiu nalo, bior kanado Tubo naio jaaro ka bajago na.
COL 3:21 Mia kamiu teta nalo a nena nalo mia tiniemiu nalo avilulu re van kenerimiu nalo tulaka, bior ver kuvila tibe na, ala lelanlo, ala kialo jidomiano nalo atibirbili.
COL 3:22 Kamiu tomu nalo na m̃a kumim̃au tubo nalo kanalo, ea bogo nonovio monoka kuvidu kenemiu tomu na tortoru nalo nei niolo. Mia kuvila re tibe na ga ea bogo napano nalo aju bija kamiu, ka mia kuvilavon ka mia nalo asaaro ka kamiu, mia bogo nonovio monoka kuvim̃auka mia kenemiu jidomiano nalo ave riano batitigio, tavukia napano ea im̃auano na kumitu kumitovon kanado Tubo julaka.
COL 3:23 Ea im̃auano vaio napano kumitum̃a kumim̃aukanio, monoka kuvilaio napano mia kuvisaaro kanio, tavukia napano kumitum̃a kumim̃au Tubo kanano, mia ka re tomu nalo ga.
COL 3:24 Bo ka mia tiniemiu rimaio ka Tubo nei naruei mia naio sian kiano jajum̃ano van kamiu, tibe kanio kenemiu vuliano, bior toro na toru riano napano kumim̃au eaio, naio be Tubo Kristo.
COL 3:25 Mia toro napano naio jom̃a mila maka rimemedu, mia naio rivar meran bereio rimemedu takii kanano vijuku vovaiano nalo, bior Atua naio bitii tomu nalo nonovio kanalo im̃auano ga memedu.
COL 4:1 Mia kamiu tomu nalo na tortoru, kamiu bunu monoka kuvila rimemedu rivu van tomu nalo napano m̃a aju amim̃au kenemiu, bior kamiu bunu kenemiu Tubo na toru tai joa vio mave napano mia naio tibure kenemiu bajago nalo.
COL 4:2 Kamiu kuvisikili ka volkouano bogo nonovio, mia monoka kubolkouo napano mia kuvisidomii vatitig vite nalo ka kuverenio ea volkouano, a ka mia kenemiu iviso river sivaiano van Atua.
COL 4:3 Kiniou nejidom bunu ka monoka kubolkouo ka kumemi, ka mia Atua naio rivetavo ea m̃arabo ka numijikia nuvioliolu ka vite novo nei napano beamu naio joluku, napano Kristo kiano iliano, napano vonganei nojoa nalakoiano biorio.
COL 4:4 Neber bo, nejidom bunu ka kubolkouo ka mia nemijikia neil rivu, ka mia rila iliano nalo nei rimeravo, rimemedu tibe ka ga na mia monokanio nalaio.
COL 4:5 Ea bajago nalo na m̃a kumitum̃a kumilaio ea tomu nalo miralo napano maka amonea Kristo, monoka kuve masou rivu ka kuvitakii kenemiu buluvio nalo, ka mia kuvurulo amei ea Kristo.
COL 4:6 Monoka kuvil rivu vijalo, ea iliano nalo napano ga be nailitinievuiano a ajese bo, ana mia ajog rivu ka iliano nalo nene, a monoka kuvijikia m̃arabo ka kuvisian verdop̃eiano vanlo napano avika vikadeniano ninio ea tivelinio na kenemiu viekouoiano.
COL 4:7 Kuruado novo nei Tikikas napano naio jo bija kiniou, mia neiila naio rudu m̃esi nei riviedu kean kamiu ka naio riverial ka kumemi numitu jum̃abe, ka kumijikia kuvijog rivu. Kiniou najaaro toru ka kuruado nei, ka napano bogo nonovio naio jikili ka mijai kiniou ea Tubo kanano im̃auano.
COL 4:9 Mia kuruado dolu nei napano kiado bilbilu novo nei Onesimas, mia naio bunu takisor Tikikas riviedu kean kamiu. Onesimas, naio be kamiu tai na kenemiu vio, a naio bunu jom̃a monea Kristo. Mia naljuo averial van kamiu vite nalo napano amalmaluvo ea vio nei.
COL 4:10 Arestakas napano naio joa yimo na nalakoiano bija kiniou, a toro napano Mak napano naio be Barnabas kuruano, a Jisas napano abio naio ka Jastas, nalo tolu aberinavo aju ajidomial kamiu toru. Mak nei, kubokar iliano ea tivelinio ka naio ruei, ka ver naio riviedu sel ea kenemiu vio mia monoka kuvisaaro ka kuvuru naio tusol kamiu. Ea kulo Israel nalo napano amonea Kristo ruei, nalo tolu nei ga naliko kiniou kumemi numim̃auka im̃auano nalo na Atua kanano navenatuboiano, mia nalo tolu nei nalo ajidel ka amijai kiniou toru laka ea bogo na jikirkili nalo.
COL 4:12 Epavras nei napano naio bunu be kamiu tai, naio be toro vu tai na mim̃au Kristo Yesu kanano, a naio bunu berenio kavijo bo a bogiano bo ban kamiu, berenio bogo nonovio naio jom̃a bolkouo jikili dam̃ariga bior kamiu, ka kumijikia kuvitu sikili, ka kumeruo rivu tibe ka siyovo ea Kristo, a ka kuvitu sikili ka kuvila ga vite nalo napano Atua naio jidomio.
COL 4:13 Kiniou nejidom never rimemedu ka kamiu ka toro neibano Epavras jo mim̃au jikili laka bior kamiu, a kulo Leotesia a kulo Ierapolisi bunu.
COL 4:14 Kiado bilbilu novo nei, nakulekuleano nei Luka, bija kuruado dolu nei Timas, naljuo bunu aju aberenio naljuo aju ajidomii bijon kamiu toru laka.
COL 4:15 Kiniou nejidom kamiu kuvisian lilian kanaku iliano riva van kuruado a kuviviniedo nalo napano ajua Leotesia, vija tira napano Nemeva naliko bagaro na namoneano nalo napano aju abior ea kunuano, ka kiniou nojo nejidomiilo toru laka.
COL 4:16 A mia bogoti napano kamiu kuvuluku kanaku m̃esi nei ribisi, ana neber bo, kamiu kuvituvan rivan ea kulo Leotesia, ka mia avulukuio van bagaro na namoneano nalo ea vio na, a kamiu monoka kuvuluku kanaku m̃esi dolu bunu napano nalo na vio Leotesia atuvan rimei rivan kamiu.
COL 4:17 Mia kanaku iliano tai ba ban Akipas, neberenio “Jau kovitikar vatitig rivu im̃auano napano Tubo miduio joa jum̃amo, koim̃auka nonovio batitig garuei.”
COL 4:18 Mia vonganei, kiniou nodular vovojulu den toro nam̃a jo bivitauia m̃esi, naruei kiniou Pol nejirii kanaku iliano na maaro biedu ban kamiu ka jum̃aku ga, neber kavijo bo p̃eli na bogiano bo ban kamiu. Kamiu tiniemiu ribobogia re marimieni nalo na amiadikar kiniou kanio, mia Atua kanano tiniamemiano naio to vija kamiu nonovio. Kiniou, Pol.
1TH 1:1 Kiniou Pol bija Sailas a Timoti, kumemi tolu numisaaro laka ka nuvivitauia niosi nei riviedu ea kamiu taara na namoneano na ea komeli na Tesalonaika. Kumemi numonea ka kenemiu meuliano nalo aju vatitig ea karam̃ado Atua bija kiado Tubo Yesu Kristo, naruei kumemi nubolkouo ka tiniememiano a tum̃aroano to vija kamiu nonovio.
1TH 1:2 Nao, bogo nonovio kumemi numitu nubolkouo ban Teta Atua, monoka nuver siva van naio rivior kamiu.
1TH 1:3 Kumemi numitu tiniememi maio ka kamiu ea kenememi volkouano jibe nei, maka nuvijikia tiniememi ribobogia kenemiu moneano, napano kumim̃au jikili jakiio, a napano kenemiu tinietiiano, jo miyoyotuba ea kenemiu bajago novo nalo, a napano kenemiu jidomiano tebievi, naio mila kamiu kumitu jikili batitig ea kiado Tubo Yesu Kristo.
1TH 1:4 Banalo, kumemi numijikia ruei ka Atua naio maka tinientii ga kamiu, a naio bijauia bulag kamiu bunu ka kamiu kuve kanano riano,
1TH 1:5 bior bogo napano kumemi numioliolu nuber lilianiano vou na bo ka kamiu, naio maka tibe toro kiano iliano kurano, a naio binimei ea kamiu jibe iliano na temi tai na jikili. Sikiliano na Niununo Lu kiano joaio, a naio julio kenemiu iviso rivanvano-o kamiu kumoneaio. Kumijikia kenememi bajago nalo bogo na numitu bija kamiu, numijog bin laka ka nuvim̃auka saba nalo riviniu nina numijikia nuvim̃aukanio ka rijikia rijai kamiu ka kumonea,
1TH 1:6 a iorou, kamiu kuvijevio, kumei tibe ka kenememi natakisoriano nalo, a maka ve tena ga kenememi, mia kumei kuve Tubo kiano natakisoriano nalo. Bekurano ka ver nalo dolu amila burum̃ara jaleleano ban kamiu a ajian bogokouo laka ban kamiu ka bogo nei, a mia kumila borvorua ka ioluano, naruei Niununo Lu midu kiano burum̃ara saariano joa kamiu.
1TH 1:7 Ea kenemiu bajago novo nalo na, maka kumisidomii vovaiano nalo, kuvitu kamu ka kuburu m̃arabo ka namoneano dolu nalo ea tanobuku na Masetonia a Kris.
1TH 1:8 Tubo kiano lilianiano vou nabo naio jo jaluvo ea kamiu bano, maka ea vio juo nei ga, a ea vio dolu nalo na laka bunu, mila tomu nalo amijog kenemiu viekouoiano ea Atua ruei. Nina naio bo laka, a vonganei jibe ka ea vio be na nuvan ea bereio, a maka bunu kenememi titai ka nuvijikia nuver kalo, bior ka napano iliano nonovio biedu ea kamiu ruei ba bokar nalo ruei.
1TH 1:9 Kumemi maka bunu nuvitukunu rivan kulo dolu nalo na, mia nalo ajukunu binimei ban kumemi bereio, ajukunu jum̃abe ka napano kamiu na vio Tesalonaika kuburu kumemi numitu bija kamiu, a jum̃abe na kubilig kamiu, kubuku bulag kenemiu tavoru nalo na m̃arm̃aro, kumei tibe tomu nalo na Atua na meul riano kiano.
1TH 1:10 A bija nina, nalo aju ajukunu bunu napano kumitu jikili, kuvitu rorea Atua kenerinio nei, Yesu. Naio riyotuba ka kito bereio, bior napano Atua bitiri lario meul bereio ea nam̃ariano ruei, a mia naio riila riyotuba bogo ve valuo nene, ka naio toko kito ka bogo na tibureiano.
1TH 2:1 Banalo, kumemi numijog iliano tai aber numim̃au kirivova, mia be tinieku ka kubitilubar ka kenememi yaduiano ea kamiu bar m̃arati moroano na bo.
1TH 2:2 Beamu laka, bogo na numitu numim̃au Vilipai, nalo aju amil bova jibe na ka kumemi ruei, aju amila bulag laka kumemi, a jibe na kumijikia ruei, bogo na numiyotuba ea kamiu, nalo amil ea kumemi laka bereio bunu. A numial ka Atua naio jo mija kumemi, naruei maka bunu numerou ka vovaiano, numim̃au dolu ka ga ka nuverial kiano lilianiano vou nei van kamiu.
1TH 2:3 Kumemi numioliolu ban kamiu, a nemijikia never ka kiano iliano nalo maka tibe tomu nalo tai na aju aber. Nalo maka ayotuba ea kenememi labeleiano tai ga, p̃eli ea kenememi jidomiano va tai, a naio maka ve titai na kumemi nuvilavon nuvatete ka kamiu, maka leleio.
1TH 2:4 Maka lele tibe na, a ea bogo nei, kumemi numitibe ka tomu nalo na Atua bitiri bulag kumemi, naio midu kiano lilianiano vou na joa jumememi, ana nubinimei nuberial kiano iliano riano ban kamiu. Kumemi maka nuvim̃au ka tomu nalo aial kumemi tum̃abe, a numisidom ga ka Atua rijikia saaro ka venia na numila, bior naio ga mijikia rivitii venia na joa kiado iviso terakurano.
1TH 2:5 Kamiu kumijikia batitigio ka maka numei ka nuvuku iliseseiano p̃eli na ilivevaviniano ka kamiu, a Atua mijikia batitigio bunu ka maka tiniememi ka kenemiu saba nalo, p̃eli nuvila sibilili kamiu kanio.
1TH 2:6 A ea bogo na bunu, maka lele kenememi jidomiano tai ka rila kamiu p̃eli tomu dolu nalo kuvidular siememi mave.
1TH 2:7 Be riano ka kumemi numaluvo ea kamiu jibe naiagagoano na Kristo kiano, na p̃eli memedu ga ka kuvila saba ve miroano ka kuvitikar kumemi, a maka numisidomial saba nalo na. Nubinimei numidomdom ga, numila ka kamiu jibe nena tai bagan kenerinio domdomu.
1TH 2:8 Kumemi numisaaro m̃ele ka kamiu jibe na, numisidom m̃ele ka nuververial Atua kiano lilianiano vou na ka kamiu, a numijog numisidom m̃elea kamiu, banbano numitum̃a numijamo ka kenememi meuliano ka nuvijai kenemiu meuliano nalo.
1TH 2:9 Banalo, neber jibe na maka nalasibi, bior kumijikia jum̃abe numinonou ka im̃auano nalo na jikili ka jumememi ka bogo na. Kumemi numim̃au legiano a bogiano, ka rila bogo na kumemi nuvitu vija kamiu ka nuvioliolu ka lilianiano vou na Atua kiano, maka numila ve temi van kamiu. Kumemi ga numitum̃a nubitikar kumemi, maka bunu kam tai bereio vitikar kumemi leleio.
1TH 2:10 Kumemi numisidomii ka ea miremiu, a ea Atua mirano, numijikia nuverial ka ea bogo na numitu iviso ka kamiu na moneano nalo, maka lele titai rivova ka kumemi kenememi meuliano memedu ga, a be lu vatitigio.
1TH 2:11 P̃eli kamiu kumitu kumisidomii kia ga, napano numila ka kamiu jibe teta tai napano jo mila batitig laka ka rijai vatitig kenerinio nalo kialo meuliano.
1TH 2:12 Kumemi numila kenemiu iviso nalo melumu bo, nubar iliano nalo na ilivituniano ban kamiu, a numidular kenemiu jidomiano bavin ka monoka kuvila kenemiu meuliano rimei rimemedu rivu ea kiado Atua kiano bajago, na naio naruei bio kamiu ka kumei jouro ea miamoiano na bo ea kiano navenatuboiano.
1TH 2:13 Titai dolu bunu nuber siva ban Atua bogo nonovio biorio, naina kenemiu bajago na bogo na lilianiano miyotuba ea kamiu. Kumijog, a maka lele kuvukulario ka kuver toro ga kiano iliano, a kumitu kubitii kuber be riano, be Atua kiano iliano memedu. Mia kamiu na kumonea, kubetavo ea kenemiu iviso ka mia naio to rim̃au ea kenemiu meuliano rivokar banei.
1TH 2:14 Kuruaku a kuvivinieku nalo, nemi-jikia ka iorou ka kumonea, maka vesiou tomu nalo na kenemiu vio bereio ga ajumolu amila bova ban kamiu, kubiviuo bogokouo laka. Jibe na bova, a ea vio nei kuvitu kuviel ea m̃arabo na ga moneano na Yesu Kristo kiano nalo na ea Atua kiano yimo lu nalo na ea tanobuku na Yutea nalo amiel ea nua ruei. Nalo bunu, bogo na amoneaio, ana kulo Ju nalo aju amila bulaglo toru laka!
1TH 2:15 A bajago na, Ju nalo aju amila nua ruei binimei. Beamu, maka asidom naverialiano nalo, a iorou, nalo naruei amila amuebin kiado Tubo Yesu m̃aro, a nalo bunu ga na aju amijil kumemi bogo miroano ruei. Saba nalo na aju amila na, Atua maka tiniene saaro kalo leleio, ka nalo aju amilkuei bogo nonovio ga.
1TH 2:16 Kumemi numitu numioliolu ka lilianiano vou na ban tomu nalo dolu na maka ave Ju, be iakurano ka be bogo ka ajikia ala vatitigio kialo meuliano, a Ju nalo nene aju amila vonvon ka atukovio ga ka kumemi, maka asidom ka nuverial kalo. Kialo bajago va nei misonson bavin laka bija kialo kariano na amila nua ruei binimei, mila vonganei kialo vovaiano bavin jovulu laka. Amila jibe na banbano-o maka asidomial titai, a remijikia ka Atua kiano tiniemimiano bujo jo binimei kalo ruei.
1TH 2:17 Banalo, kumemi numisidom nuverial ka kamiu, numituvan kamiu bogo nua ga na, nubano teliki ga, nuber aua toru ka kamiu, numisidom nuvial miremiu bereio. Be riano ka robeve terakurano ka mokotenado, a ea kiado iviso, kito roju robe takurano ga.
1TH 2:18 Kumemi numitu jibe nei, numisidom ka nuvial m̃arabo ka nuviedu nuvial kamiu bereio, a kiniou Pol nojo nomilavon vatelabo laka, mia toro va nei Sim̃aro, naio jo jokoko vio julaka ga.
1TH 2:19 Ana ka venia numisidom laka ka nuvial bereio kamiu? Nina ka kei bereio numijikia nuvar tiniememi ealo? Kei bereio na mijikia rila kumemi nuvisaaro? Kei bereio nalo abe m̃arati na bo na kenememi im̃auano, napano nuvijog rivu kanio ea bogo na kiado Tubo Yesu riyotuba bereio? Maka toro dolu tai, mia kamiu na ga!
1TH 2:20 Be riano, kamiu jibe ka kenememi jidomiano na sereano novo tai napano numitovulio, kubinimei jibe burum̃ara burupati na jogvuiano na meuliano na kenememi.
1TH 3:1 Kumemi numitu tiniememi maio ka kamiu jibe nei banbano, numial jibe maka, kumemi tai monoka riviedu riyotuba ka kamiu bereio. Ana nuber mia monoka kumemi juo Sailas numitu Atenisi beamu vo,
1TH 3:2 mia Timoti mijikia riviedu bereio ea kamiu. Kuruado nene, kumemi numim̃au Atua kiano vio takurano bija naio, ka rila lilianiano vou na Kristo kiano rivanvano-o tavio, ana namial jibe naio be toro na bo tai ka riyotuba ea kamiu. Namijikia ka mia naio mijikia riilikakar kamiu, a mia mijikia rijai kamiu ka kenemiu moneano to sikili bogo nonovio,
1TH 3:3 ka mia maka kuvijikia kumermerou laka ka bogokouo nalo na kumitu kubiviuo. Bogo kouo nalo jibe na, remijikia batitig ka abe togio tai na kiado meuliano kito namoneano nalo na maka rejikia rataluvo denio.
1TH 3:4 A verver kumitu tiniemiu maio ka kia ga vo, kumijikia bogo na kumemi numitu bija kamiu, numitu nuberial bogo nonovio ka kamiu nuber numial ruei ka mia vesiou re, ana mia monoka ala vova ka kito. A vonganei, tenalo nei miyotuba jibe na ga ruei, na kamiu naruei kumitu kubokar toru laka.
1TH 3:5 Nina naruei mila nomijog ka maka nejikia noto tibe na ga, a monoka nala titai ka nojog iliano tai river kumitu jum̃abe. Kiniou nemerou kija ka toro va na rila vonvon toro nei, p̃eli naio mial kiano m̃arabo tai ka rila kamiu kuvijoru ruei, mia nojidom nojog kamiu kumitu jikili kia ga vo p̃eli na jum̃abe, bior maka rivu ka kenememi im̃auano novo nalo napano ea kamiu rimei rive iakurano bereio. Jibe na naruei, nomiila Timoti biedu.
1TH 3:6 Timoti biedu mial kamiu, a vonganei ga naio binimei bokar kumemi. Bogo na binimei, bar iliano nalo na bo laka, berial jum̃abe kenemiu moneano bija bajago na tinietiiano na kenemiu jo kia ga toru, ju bo ga ju, ana mila tinieku jaaro toru laka. Naio midu kenemiu iliano binimei ban kumemi, ka kumitu tiniemiu maio ka kumemi julaka, a kumisidom m̃ele ka kuvial mirememi bereio, jibe ka ga kumemi numisidom nuvial miremiu.
1TH 3:7 Mia be iakurano ka numitu numijog jaleleano laka ea vio nei ka tenalo na bova amila ka kumemi, mia bogo na numijog lilianiano na kenemiu moneano kuruememi nalo, numijog jibe midular kenememi jidomiano bereio.
1TH 3:8 Kumemi numijog ka kumitu jikili bija Tubo, ana mila jibe na numijog jibe numeul vatitigio bereio.
1TH 3:9 Bogo na numitu nubolkouo ka kamiu, numial jibe maka kumemi nuvila titai na bo laka ka kamiu, a kamiu naruei kumitu kumila tena bo tai ka kumemi, bior kumila kumemi nubar jogvuiano ea kenememi iviso, banbano kumemi maka bunu iliano vare ka nuver siva van Atua kanio.
1TH 3:10 Naruei mila numitu numisidom laka ka nubolkouo legiano a bogiano, ka verver nuvijikia nuvial kamiu bereio ga, ver vio tai na kenemiu moneano mijoru eaio kija ga, nina mia numisaaro laka ka nuviija ka rimei to sikili vatitigio bogo nonovio.
1TH 3:11 Nina naruei be tena nojo nobolkouo jikili kanio vonganei, ka mia karam̃ado Teta Atua bija kiado Tubo Yesu, nalo avetavo ea m̃arabo ka kumemi ka numei bereio nuvial kamiu.
1TH 3:12 Bano bokar bogo na, nojo nobolkouo ban Tubo, nebika ka mia naio rila kenemiu tinietiiano to riluo rivan tibe nei, rison vatitig kenemiu meuliano rivanvano-o rivokar bunu tomu nalo dolu, rimei ve toru laka rive verare ka kenememi tinietiiano ea kamiu.
1TH 3:13 A bija nina, nobolkouo ka mia naio ridu jidomiano tai na bo a jikili vatitig ea kamiu, ka kuvijikia kuvokar vatitig kenemiu meuliano nalo vanvano vokar bogo na kiado Tubo Yesu riyotuba vija kiano kulo lu nalo, ana bogo na mia kuvijikia kuvisikili kuvitu ea Atua Karam̃ado mirano na kamiu kumeravo rivu, kube lu vatitigio ga kumitu.
1TH 4:1 Banalo, bogo na numitu bija kamiu, kumemi nuberloglog vatitig kamiu jum̃abe ka kuviluo lie ea bajago na meuliano na Atua naio jidomio, a numitu numijog kumila kija ruei, naio bo laka. A ea Tubo Yesu siano, nubika numisikili den kamiu ka kuvitu van re, kuvitu kuvijedu ka rila rivan lie bogo nonovio.
1TH 4:2 Tubo Yesu midu kiano verloglogiano nalo joa jumememi ka nuverial ka kamiu, mia kumijikia batitiglo ruei. Tibe na, bo ka kuvitakiio.
1TH 4:3 Bo ga, ninei naruei saba tealo napano Atua jidom kiano tomu nalo monoka alaio. Kiado meuliano monoka ve lu rivu, jibe monoka rala re bajago na bova ea tivelinio na sum̃ano bija tira.
1TH 4:4 Kito nonovio monoka retakisor vatitig m̃arabo na memedu na soriano, ka toro rijikia to vija koano tira memedu ea bajago na meravo bo, na maka rijikia rila bulag nalo ve juo sialo bereio.
1TH 4:5 Jibe na, bova ka toro soro sop̃eli, jakiio kiano tinietiiano jikili ea tira ga, bior nina naio be bajago tai na tomu nalo na melijokouo ga, napano maka ajikia Atua leleio.
1TH 4:6 Verenio tomu nalo na aju amila bajago na bo laka bogo nonovio ea vio nei, mia bo laka, ka mia nalo maka avina ala bulag re saba novo na kurualo kialo. Kamiu monoka kuvitilubar vio na, ka Atua jo midu vironiano bogo nonovio ban tomu nalo na amijoru ea kariano kinkin nalo jibe nei, jibe na nuberial ban kamiu bija iliano tiniemaiano na jikili ruei.
1TH 4:7 Kuvilavon ka kuvisidomii ninei vonio. Bogo na Atua rivio kito ka rove kiano tomu nalo, naio maka la ka kiado meuliano rimei rivujo ka bajago nalo na maka rimeravo, a naio mila ka kiado meuliano rimei rivujo ka bajago nalo na be lu vatitigio.
1TH 4:8 Tibe na, toro napano maka tinien saaro ka verloglogiano nalo nei, naio monoka rivitilubario ka maka toro kiano iliano ga na naio jo bukular, a naio jo bukular Atua kiano iliano ga na, nina napano midu kiano Niununo joa kito, napano naio be Niununo napano be Lu.
1TH 4:9 Titai bereio napano nojidom neveriio ka kamiu, kito namoneano nalo kiado bajago, napano monoka rosidom kito tibe na robe m̃aratavo takurano ga. Tena kumijikia vatitigio ruei, maka tena ka nevivitauia bulagio bereio van kamiu, bior Atua naio berloglog kito robiniu ruei ber nina naio be tena bo tai na bo kirinovo laka.
1TH 4:10 Nemijikia ka kumitu kumila jibe na ruei ka namoneano nalo na Masetonia bo laka, a nojidom never bereio, ka kuvokar vatitig bajago na bo nei, kuvila rimei ve toru lie iviso ka kamiu.
1TH 4:11 Vonganei nojidom nevivitauia saba nalo tealo bereio na bo ka kuvisikili ka kuvilaio. Na beamu, jau katanea re vio, jau koto melumu ga dam̃ariga. Juo nene, koyuku re sunumo rivan ea re toro dolu kiano burusio, a kovitii ga kiamo meuliano. A tai bereio, koyovo re, a koim̃auka kiamo im̃auano na joa jum̃amo sikili rivu, tibe ka na nuberial ka kamiu nanua ruei.
1TH 4:12 Verver kala tibe na ea kiamo meuliano bogo nonovio, mia nalo dolu napano maka amonea, nalo amijikia avitii vatitigso, avitilubario napano maka nalo dolu ka abitikarso, mia jau ga kojom̃a kobitikar vatitigso.
1TH 4:13 Mia banalo, nemial bo ka kuvijikia kija saba nalo tealo ea tivelinio na nalo na kito na amonmelio ruei, jibe abano kovio ea yetemeriba. Tomu nalo telabo na maka ave namoneano, amerou laka ka m̃ariano, aber p̃eli tomu nalo abano kovio mia rivova laka ka nalo, ana mila ka bogo na nalo tai bakovio, nalo ajegi toru kanio.
1TH 4:14 A kito maka tibe na, bior romonea ka iorou ka Yesu naio m̃aro ea m̃akolkolo, naio jumolu meul bereio, a ea bajago na naruei, kito na romonea bunu ka nalo na abinimei takurano bija naio am̃arm̃aro, mia Atua naio rilalo amei ave takurano vija naio ameul bereio, a mia amei bereio vijaio.
1TH 4:15 Nemijikia never riano ka kamiu, ka iliano tai na Tubo ga naio berenio nua, kito na roju remeul kia ga rivokar bogo na naio mia rimei bereio, kito maka rejikia ravavin beamu ka nalo na abano kovio ruei.
1TH 4:16 Makanio, a venia mia rimoluo ea bogo na jibe na. Mia parinio nailiano na tiniabene rivio souo vija verialiano tai na toru, a mia Atua kiano simeduo riolu, a mia kiado Tubo taluvo ea tiniabene mave rivatove nei. Naio rivatove, mia namoneano nalo na am̃arm̃aro aju, mia atumormolu bereio beamu.
1TH 4:17 Iorou ana mia kito na remeul roju kia ea vio yetano, mia naio rivuru kito bunu ravavin mave vija nalo roviniu, ravan bure melijo nalo na mave ea tiniabene, ravan roviviuo kiado Tubo mave ea vio yauo. Rovan tibe nei, a mia rotu vija naio maka rijikia ribisi bogo tai.
1TH 4:18 Verikariano na bo laka, mia bo ka kito rotu reijaja kito bogo nonovio ea jidomiano novo nalo nei.
1TH 5:1 Banalo, nemijikia ka tomu miroano nalo ajidom ajikia ka saba nalo nei mia riyotuba ea bogoti vabe, p̃eli ea bogo venia. A nina maka kiaku ka novivitau kanio van kamiu na,
1TH 5:2 bior kumijikia ruei ka tena maka toro kiano ka rijikiaio. Mia tibe ka ga toro na vinauano mila kiano im̃auano bogiano. Naio maka rijikia verial beamu bogo venia ana mia naio riyotuba!
1TH 5:3 Vede naio rimei ea bogo tai na tomu nalo aju aberver kalo, aberinavo “O, vonganei be bogo na tum̃aro ruei” p̃eli aber “O, vonganei rojua bogo tai na bo!” Nalo maka ajikia, ana tenei jibe tira tai na vaarakurano ga mijog ka mia kenerinio rimoluo naruei. Mia bogo na naio rimei bereio mia tibe ka ga, napano tomu nalo amiilo kanio, maka asidomiio, mia burum̃ara bogo na jaleleano riyotuba kalo, nina maka ajikia avuro den leleio.
1TH 5:4 A kamiu bilbilu nalo, maka bunu kuvitua melijokouo, a ver bogo na toru nei riyotuba, neber p̃eli mia kuvijikia kuviilo kanio re, jibe ka naio be toro na vinauano tai binimei ka kenemiu saba nalo.
1TH 5:5 Kito maka bunu rove tomu na melijokouo na bogiano, a rove tomu na miamoiano na legiano ruei.
1TH 5:6 Tibe na naruei, mia kiado jidomiano ritevijo vatitigio rivu bogo nonovio, rovokar vatitig rivu kiado meuliano, ka rotibe ka re tomu nalo dolu na melijokouo.
1TH 5:7 Im̃auano nalo na aju amim̃aukanio, aju amun uei amun banbano-o muelo, karina aju ga amonmonmelio ga,
1TH 5:8 a kito na miamoiano, monoka rala kiano im̃auano rimemedu. Mia kito rala kiado meuliano rimemedu rivu, mia reiako niabedo ea bajago na viekouoiano a bajago na tinietiiano, a rosovko parido ea moneano na jikili, ber ka mia Atua monoka rilarur kito.
1TH 5:9 Nina maka rivu ka kiado jidomiano veve juo ka mia Atua rilarur kito, p̃eli mia rilarur re kito, bior ka maka kiano jidomiano ka kiano moneano nalo mia avokar vironiano, a naio bijauia kito ruei ka rovokar ioruriano napano Tubo Yesu Kristo naio jovulu be kiado.
1TH 5:10 Naio m̃aro kar kito, mila ka ver bogo na naio rimei bereio, be iakurano napano romonmelio, jibe na rabakovio ruei, p̃eli rotu rotevijo, tibe na romeul keano roju, a kiado meuliano mia to vatitigio vija naio bogo nonovio.
1TH 5:11 Iliano nalo na naruei bo ka kuvitu kuverver ka ridular kenemiu jidomiano mave, kuvitu kuvijaija kamiu ka kuvim̃auka kenemiu moneano rimei sikili rivu, tibe napano nemijikia ka kumitum̃a kumila ruei.
1TH 5:12 Banalo, nojidom nevika kamiu bunu ka kuvisikili kuvitilubar vatitig nalo na amim̃au m̃ele ka im̃auano na Tubo kiano iviso ka kamiu. Nina bior napano naio midulo aju ka aje tuboiano van kamiu, averloglog kamiu. Kamiu monoka kuvamenealo rivu,
1TH 5:13 a kuvidulo atu mave ea kenemiu jidomiano, tiniemiu tiilo, ka im̃auano na nalo aju amim̃aukanio. A bunu, kuvitu re kuvila baravo, a monoka tiniemiu memi ka kamiu bogo nonovio.
1TH 5:14 Nebika jikili ban kamiu kuruaku nalo a kuvivinieku nalo, verver kamiu tai amiyovo, bo ka kuvil vanlo ka avarlo kija. Ver kamiu tai amerou, kuvil vanlo ka rila nalo atu asikil. Ver kamiu tai niabelo mave, kuvil vanlo ka riijailo. A ea nalo abiniu, kuvila ka kenemiu jidomiano rive tebievi vatitigio rivu.
1TH 5:15 Kamiu kuvisikili ka kuvila ka ver toro tai rila vova ka kamiu, mia kuvila kean re bunu vanio. Kito monoka resikili ka rala ka rove tiniememi vatitig ka kito, a rove tiniememi vatitig ka tomu nalo dolu bunu.
1TH 5:16 Bekurano ka venia na mijikia riyotuba ka kito, a monoka rasaaro bogo nonovio,
1TH 5:17 robolkouo bogo nonovio,
1TH 5:18 rover siva ka Atua bogo nonovio. Nina naruei kiano sidomiano ka kito roim̃aukanio, ea tivelinio na kito robe Yesu Kristo kiano.
1TH 5:19 Bereio, verver sebi na Niununo na Atua kiano jo bilvili bo ea vio tai, mia kuvuebin re rim̃aro,
1TH 5:20 a verver toro tai jo berial verialiano nalo, mia kuviyotel ea re naio,
1TH 5:21 a kuvitivitii veve saba nalo riviniu vatitigio rivu. Vite na bo, kuvokar sikili,
1TH 5:22 a vite na bova, kuvituvanio.
1TH 5:23 Ana nobolkouo ka Atua ga, napano be Atua na tum̃aro, rila kenemiu iviso vija jidomiano a meuliano bunu rive lu mia rive lu vatitigio. Nojidom laka ka bogo na kiado Tubo Yesu Kristo rimei bereio, mia niunomiu, tiniemiu, vija mokotenemiu nonovio maka lele kiri soro tai toalo.
1TH 5:24 Naio napano bio bulag kamiu, naio be viekouoiano riano, a mia naio rim̃auka tibe na ga rivano.
1TH 5:25 Tena maariano na neverial ka kamiu bilbilu nalo, nebika ka kamiu tiniemiu ribobogia re kumemi ea kenemiu volkouano nalo.
1TH 5:26 Kuver kavijo bo a bogiano bo ka namoneano lu nalo dolu na aju,
1TH 5:27 a ea Tubo siano, never niosi nei, kamiu kuvuluku bulagio ea miralo.
1TH 5:28 Kiado Tubo Yesu Kristo kiano tiniememiano jo bija kamiu. Kiniou, Pol.
2TH 1:1 Taara na namoneano nalo na karam̃ado Atua kiano a kiado Tubo Yesu Kristo, napano kumitua komeli na Tesalonaika, kumemi tolu Pol, Sailas a Timoti, kumemi numisaaro toru laka ka nuviviuo kamiu ea niosi nei.
2TH 1:2 Tiniememiano a tum̃aroano na karam̃ado Atua kiano bija kiado Tubo Yesu Kristo to vija kamiu.
2TH 1:3 Titai napano bo ka nuvila bogo nonovio, monoka nuver siva ka Atua ka kamiu nalo na kenememi bilbilu nalo. A vonganei, kumemi numisaaro toru ka nuvila tibe nei, bior kumemi numijog lilianiano nalo na kenemiu, aber kenemiu moneano binimei bavin laka bogo nonovio, a kamiu tomu nalo biniu aju tinielo jiilo bavin toru lie.
2TH 1:4 Nina bo laka, ana bogo na numitu numiselviv ea taara nalo dolu na Atua kiano namoneano, numitu numiaia kamiu toru banlo. Kumemi numitu nubisivisii banlo ka kumitu kubar bajago nalo na jikili na uolu nalo kialo, a kumitu kumidu ruru bogokouo tai na mila bulag kamiu laka, a kamiu kuvikulkul re, kenemiu moneano rijoru leleio re.
2TH 1:5 Bogo na kumitu jikili jibe na, ana numial ka bogo na Atua bijauia ga kamiu naio mim̃auka memedu batitigio, bior mijikia ka kamiu kube tomu nalo napano maka kuvijikia kuvijoru. Vonganei, naio mijikia ruei ka kamiu kumitu kubar jogvaiano nalo bior kiano navenatuboiano, a iorou, mia naio vititii kamiu ka kubare ka kuva joomo eaio.
2TH 1:6 Naio, bogo nonovio naio mim̃auka memedu ga, a mia naio rila meran vovaiano van nalo na aju amila bova ban kamiu.
2TH 1:7 Nalo amila kamiu kumitu kubar bogokouo laka, a mia naio rila ribisi, mia naio rijai kamiu yako, a rijai bunu kumemi ea vio nei napano kumemi bunu numitu nubinua saba tealo. Bogo na reial ka burum̃ara sebi vilivili ea vio yauo, remijikia ka mila m̃arabo na Atua kiano ka riila Tubo Yesu taluvo ea tiniabene rimei ea yetemeriba, vija kiano nailiano nalo na jikili, ka mia naio rivuru bulag kito den jaleleano nalo na yetemeriba.
2TH 1:8 Naio riyotuba, mia naio tibure nalo na maka asidom ajikia Atua, maka asidom ajogkar Ioluano Vou na kiado Tubo Yesu kiano.
2TH 1:9 Kialo vironiano na mia nalo avario, mia nalo ava koviobo garuei, mia nalo atukovio kalo maka ajikia atu vija Tubo bogo tai ea vio novo napano kiano moroano mim̃aukanio bo jo ruei.
2TH 1:10 Ea bogoti napano mia naio rimaluvo, mia kiano tomu lu nalo aiaia naio ve toru laka, mia nalo na amonea naio aial naio tibe naio bo bo laka, a mia kamiu bunu vijalo, kuvitakisor naio. Kumijikia kuvila tibe na bior kumonea kenememi Ioluano nalo, mia nalo dolu napano na, mia maka ajikia atakisor naio leleio.
2TH 1:11 Kumemi numitu numisidomii saba nalo na banbano-o, ana mila numisikili vatitigio bo ka nubolkouo bogo nonovio bior kamiu. Numitu nubika den kiado Atua ka riijaja kamiu, kubare ka meuliano lu nei napano naio bio kamiu kanio. Nubolkouo ka kenemiu verkariano novo nalo napano kumitu kumisidomii ka kuvitakiio, bija im̃auano nalo na bo napano kenemiu viekouoiano mijikia rila, mia Atua rim̃au ea kiano sikiliano ka mia monoka avar m̃arati.
2TH 1:12 Numitu nubolkouo jibe na ka kamiu kuviaia kiado Tubo Yesu siano rimei ve toru bure kamiu, a ka kuviluo lie vija kiano bajago nalo na bo. Ver kumijikia kuvila tibe na rivan rivano-o rive verare ka tiniememiano novo napano Atua kiado Tubo kiano, nina be Yesu Kristo, mia rivu mia rivu.
2TH 2:1 Kiniou nojidom neverii bereio Tubo kiano liliuiano bereio, bijaio jum̃abe ka mia rivuru kito rotu vija naio. Banalo, ea vio nei, nojidom never tibe nei,
2TH 2:2 mia niukniuku rivie re kamiu laka, kumerou re. Nemijikia ka iliano tai jo jeliviv ber tomu tai aju aberial ruei p̃eli aju amioliolu ka legiano na Tubo kiano liliuiano maluvo ruei, a nalo dolu aberverial aber kumemi naverloglogiano nalo naruei nuberial tena ea kenememi niosi tai ruei. A kamiu kumonmonea re iliano nalo na,
2TH 2:3 kuvijamo kalo re ala sibilili kamiu tibe na. Venia na nalo aju aber, maka jikia tibe na leleio, bior burum̃ara naili-dieiano van Atua monoka rimei mave beamu vo. Mia iorou kanio toro va na rivakovio nei, napano abio ka Uolu na Tuboiano, naio bunu monoka riyotuba medave.
2TH 2:4 Toro na naio bova laka, naio jo mil die tenalo na bo, a naio jo midu naio jo mave ka tenalo abiniu na Atua siano joalo bija tenalo lu dolu na tomu nalo ajovon vatitigio. Mia naio rila tibe na rivan rivano-o, naio ga takurano ridular naio bereio toa vio lu joomo ea Atua kunuano, naio riverial naio river naio be Atua ruei. Mia bogo na naio rila tibe na, nina bogo na naruei mia romijikia royotuba ea legiano na maaro.
2TH 2:5 Ver kumitu tiniemiumaio kia ga vo ka bogo na nojo bija kamiu, nojo neberial vite nei va miroano ban kamiu ruei.
2TH 2:6 A jakii venia na nebisivisii vonganei, kumijikia kuvitilubar ka toro na, kiano bogo memedu ka riyotuba jo, a nalo aju koko vio ka naio bior kiano bogo nene na makam vo.
2TH 2:7 Mia be iakurano ka Uolu na tuboiano na naio maka riyotuba vo, a kiano sikiliano jojom̃a mim̃au lukuluku kiano bajago va nalo ea vio yetemeriba nei ruei. Naio maka rijikia riyotuba medave ea kiano sikiliano nonovio vo, ka Niununo Lu joko vio ka naio, a bogo na Niununo Lu taluvo bereio rivano,
2TH 2:8 mia naio tumolu vija kiano sikiliano nonovio. Mia naio rila mira rivan riva vaataro ka tovulio, a iorou Tubo Yesu mia rimaluvo, mia jegi na kiano iliano naio riyuvu lar toro va nei ve vaarakurano, mia mia-moiano na toru na binimei bija, rijilar toro nene riva kovio ea melijokouo.
2TH 2:9 Bogo napano Uolu na Tuboiano nene maluvo, mia naio rim̃au vija Sim̃aro kiano sikiliano, a mia naio rila vremesiano nalo vija tovo nalo vija vite nalo na iloiano, a abe sibiano nalo ga.
2TH 2:10 Mia naio rila tibe na bior jidom rijukujuku tomu nalo nei kialo jidomiano, ka nalo avakovio. A mia naio rila bunu bajago va na ajikia avurudom kialo jidomiano ve dolu, bior nalo abe tomu na maka asidom Atua kiano ilirianiano, nalo maka asidomii leleio ka mia naio rijikia rivuru meul ealo.
2TH 2:11 Ana bogo na Atua mial kialo jidomiano jikili jibe na, mia naio tuvanlo ga, mia naio mijamo ka ga burum̃ara sibiano nalo ka tovulu kialo jidomiano tibe nei ga, mia amonea vatitig sibiano nalo na.
2TH 2:12 Ana iorou, mia naio tiburelo memedu garuei, ber abe tomu na maka amonea kiano ilirianiano, mia venia na ajaaro kanio, naio be bajago va nalo nam̃a aju amila ruei.
2TH 2:13 Vite tai napano monoka nuvila bogo nonovio, kumemi monoka nuver siva ka Tubo Atua rivior kamiu kuviniu kuruememi a kuviviniememi nalo, napano naio jidom kamiu toru laka. Jikar nua ruei, naio bijauia bulag kamiu ka mia kuve m̃arati moti ka kumonea kiano ilirianiano, a Niununo mim̃au ea kenemiu meuliano, kumei kumeravo ea mirano, ana mia naio rijikia rilarur kamiu.
2TH 2:14 Naio bio kamiu ea lilianiano vou na napano kumemi numidu binimei, bior ka naio jidom ka kamiu bunu kuviasol miamoiano na toru ka ridular kiado Tubo Yesu Kristo siano mave.
2TH 2:15 Jibe na banalo, maka rivu ka kam tai rila luvuio. Monoka kuvitu sikili vatitig bogo nonovio, a monoka kuvokar vatitigio verloglogiano na nuberial ban kamiu ruei ea kenememi iliano nalo p̃eli ea niosi nalo nei.
2TH 2:16 Karam̃ado Atua tiniene jii kito, kiano tiniememiano ka kito midular kiado jidomiano ea kiano verikariano tai na bo, ka kito rotu rivu vija naio bogo nonovio maka rijikia ribisi bogo tai. Ana nobolkouo ka naio, ka mia kenerinio, kiado Tubo Yesu Kristo,
2TH 2:17 naio tunukakar kenemiu iviso, rila kamiu kuvisikili vatitigio rivu ea iliano nonovio nalo na bo a im̃auano nonovio nalo na bo laka.
2TH 3:1 Kulou nalo, beamu ka navokar juluvati na kiaku iliano nojidom nevika den kamiu nonovio ka kamiu tiniemiu bobogia re kumemi ea kenemiu volkouano nalo, ka nuvijikia nuvim̃au sikili lie, ka Tubo kiano iliano rijikia rivanvano-o tavio sop̃eli ea vio nalo. Verver tibe na, mia tomu nalo bunu amijikia ajog kiano ilirianiano, amijikia adular siano, jibe na ga kamiu kumila bogo na naio miyotuba ea kamiu beamu nua.
2TH 3:2 A bogo na kubolkouo, bo ka tiniemiumaio ka bunu ka maka tomu nonovio na amonea, a tomu va nalo tai na kialo jidomiano dolu, ana kubolkouo ka Atua tokovio vatitig ka kumemi ka nalo ajikia re atokol kumemi.
2TH 3:3 Remijikia ka remijikia ravarkar tiniedo ea Tubo bogo nonovio, ana be iakurano p̃eli Parinio Toro Va na naio jidom rila venia ka kito, a nomonea ka Tubo mia rila kito resikili vatitigio rivu, mia vitikar kito rivu laka.
2TH 3:4 Be tinieku ka mia naio saaro ve toru ka rijai kamiu tibe na, bior tenalo na kumemi nuberial ka kamiu, nomonea ka kamiu kumitu kumila ruei, a nomonea ka mia kuvitu kuvila tulaka ea bogoti nalo na ju ka rimei.
2TH 3:5 Kamiu kumila jibe na bo laka, mia kiaku volkouano ka mia Kristo kiado Tubo tukamu ka kamiu riva rivokar na kenemiu jidomiano rimei rive tebievi riano tibe ka kiano, a na kenemiu iviso rivujo ea Atua kiano tinietiiano.
2TH 3:6 Banalo, ea Tubo Yesu Kristo siano nojidom neverial ka kamiu ka ver kuruado tai maka rim̃au vatitig p̃eli naio maka takii verloglogiano nalo na kumemi numisian, bo ka kuvitu koalabo kija ka naio. Tomu na yoviano na jibe na, kamiu kuvan re vaataro kalo,
2TH 3:7 bior bogo na kumemi numitu iviso ka kamiu, maka numitu kurano tibe na. Kumemi nuberial m̃arabo na bo ka kamiu, a kumijikia vatitig ka bo ka kuvitakiio.
2TH 3:8 Bogo na verver numidu sinaniano tai, a kumemi nubul ga, bior napano numim̃au legiano a bogiano ka nubar veru ve teliki ka nubul venia na numisidom. Kumemi numinonou jibe nei ka rila nuvila re buru im̃auano van kamiu ka kuvitikar kumemi.
2TH 3:9 P̃eli memedu ga ka monoka kuvitikar kumemi ve teliki, a numisikili ka nuvitikar kumemi ga, ka nuverloglog kamiu ka bajago tai na bo nina kuvijikia kuvitakiio.
2TH 3:10 Bogo na numitu bija kamiu, kumijog numitu nuberial tenei ruei, jibe ka kenememi tuboiano tai, napano numisian bunu ban kamiu, ver toro na maka sidom rim̃au, mia naio maka rijikia sinano.
2TH 3:11 Nemil jibe nei bior iliano telisu tai binimei bokar tilinieku ber kam tealo maka ala titai leleio, aju kurano ga jibe na, mia aju amilkue laka ka tenalo na tomu dolu nalo aju amim̃aukanio.
2TH 3:12 Kenememi iliano ban nalo na jibe na ban jibe na, ber kamiu maka bunu tena kuvitan ea vio tibe na, kuvilavon ka kuviturmaro ga ve telisu beamu, a kuvisikili ka kuvila im̃auano kija vare ka kuvokar semiu sinaniano na kumisen ka bogoti bogo nonovio.
2TH 3:13 Ana iliano ban kamiu kuruememi nalo a kuviviniememi nalo abiniu, ver maka kito tai na river ka naio rijog tinieno m̃aro ka im̃auano novo nalo na ju ka roim̃aukanio.
2TH 3:14 Kumemi nuber saba nalo miroano ea niosi nei, ana ver toro tai maka tiniene saaro kanio, bo ka kuvitilubario toro na. Mia kuvitu re kuvila vonvon ka kuvim̃au vija toro na beamu, ka rila naio rimou ve telisu, naio rivitilubar kiano beleiano.
2TH 3:15 A mia kuvila re titai vanio tibe kenemiu uolu tai, a kuvila bon naio tibe na ka naio rimei rive kuruemiu novo tai.
2TH 3:16 Kiaku iliano na maaro, nobolkouo ka mia Tubo na tum̃aro rudu kiano tum̃aro to vija kamiu ea kenemiu m̃arabo nalo riviniu, nobolkouo ka naio rivija kamiu kuviniu bogo nonovio.
2TH 3:17 Vio nei telisu yetano nei mia keial ka kiniou ga nobivitauia iliano nalo ka jum̃aku. Nojidom ka nala tibe nei ea kiaku niosi nalo ka kuvitu kuvitilubar jum̃aku ka kiniou naruei nojuvan niosi nei biedu. Naio naruei kiaku vivitauiano jo, beriio:
2TH 3:18 Kiado Tubo Yesu Kristo kiano tiniememiano jo bija kamiu nonovio. Kiniou, Pol.
1TI 1:1 Nao Timoti, kiniou atevi Pol nei nebivitauia ea m̃esi nei biedu banso, napano Atua na Ioruriano na kiado bija Kristo Yesu kiado siraragkuiano abitirilar kiniou ka noim̃au ka Ioluano Vou na bo.
1TI 1:2 Kiniou najaaro toru ka nevitavo easo bereio ea vio na, bior nabano nemialso jibe ka napano jau kobe keneriku riano tai joomo ea m̃aratavo na viekouoiano na kiado. Nojo nobolkouo biorso, ka Atua karam̃ado, bija Kristo Yesu Tubo na kiado, mia nalo aje tiniememiano, a tinieiiano, a tum̃aro na kanalo to rivijaso.
1TI 1:3 Kiniou nojidom neverial bereio vanso vite nei napano kito roberiio beamu, bogo napano nojo bijaso yako Eveso, beamu ka napano nojo najaluvo ka navan ea Masetonia. Ka bogo na, roju remial ka napano veribinio tealo aju, romijikia batitiglo, tenene na neberinavo bo ka jau koto ga ea vio na beamu vo, ka kalavon ka koverburelo. Vite na naruei nojidom neverial vanso bereio, ka kotoa vio na beamu vo, bior napano nalo na, ajum̃a aberloglog vite nalo napano maka amemedu ga.
1TI 1:4 Bogo nonovio kialo jidomiano nalo ju bujo ka kialo tukunu moruo nalo, a aju tinielo jii ka averii ga torogio na kialo buo nalo re nuanua laka, mia bo ka atuvan vite nalo na tu. Iliano kinkin nalo na jibe na ju mila tomu nalo kialo jidomiano beve juo bereio, a maka ajikia aijalo leleio ka avokar meuliano na bo napano Atua naio jidom, napano romijikia rovokar ea moneano ea naio ga.
1TI 1:5 Tibe na bo ka kito roverburelo, ka rila na mia kiado tomu nalo, kialo iviso mijikia rimeravo rivu, kialo jidomiano mijikia memedu rivu, a kialo viekouoiano ve riano to, bior napano ver tibe na, mia bajago novo na tinietii kito naio mijikia rimei rive toru laka bure kito bereio.
1TI 1:6 Mia vonganei naio bova, bior napano nalo na vio na tai, ajitiravo ajaluvo den m̃arabo na bo nei, amiel ban ea m̃arabo na ilivovuiano nalo.
1TI 1:7 Nalo abarvar kalo, a ajidom ka amei ave naverloglogiano na tuboiano lu, mia aju aber bulavulag sano iliano nalo na jikili nene, a maka ajikia vatitig rivu venia napano nalo ga bereio ajum̃a aberenio, maka ajikia aver bisivisii vatitigio leleio.
1TI 1:8 Nalo na aju amila baravo ka Atua kiano tuboiano, mia kito romijikia ka tuboiano, ver kito ralaio rimemedu, naio be kiano burum̃ara im̃auano nene.
1TI 1:9 Kito monoka rejikia ka tuboiano, maka avitirilar ka rijai tomu nalo napano amemedu ruei, mia ka rila kulo dolu nalo amemedu, tibe ka nalo nam̃a amila korovio, bija nalo napano maka asidom aiagago kanio. Nalo na be nalo napano maka tiniel tii Atua, napano amila vite nalo napano naio maka sidomio, napano ajidom be iakurano ea vite lu nalo, napano pariparilo kirisikili ga, a napano amuebinvin karam̃alo bija kenielo, p̃eli na amuebinvin tomu dolu nalo.
1TI 1:10 Bija nalo nei, abe nalo nam̃a amila siakiano, bija nam̃a sum̃ano buru sum̃ano bereio p̃eli tira buru tira bereio, bija nalo tai napano abina ka kiritete ka aṽilṽil kanio rivano, a nalo na tena sibiano, bija bunu nalo napano aju amilavan kanalo beleano va nalo. Tuboiano nei naruei be kanalo, bija nalo napano ajum̃a amila bajago dolu nalo na bova na jibe na, bior napano nalo abijukudie toru laka ka kiado verloglogiano na bo.
1TI 1:11 Nalo maka atakii leleio lilianiano novo napano kiado Atua lu novo kiano, napano naio mije monea kiniou ka neverial van kamiu.
1TI 1:12 Im̃auano nei naio joa jum̃aku ka nala, mia nojidom never burum̃ara siva van Kristo Yesu kiado Tubo. Naio naruei bitii kiaku meuliano, mialio ka nemijikia nebiekouo ea im̃auano nei, naruei naio bitirilar kiniou ka nalaiio, mia monoka neverial ka naio ga jo mije moroano ban kiniou dam̃ariga ka neim̃auka tavukia napano naio jidomio.
1TI 1:13 Beamu, kiniou nebe toro tai napano m̃a nojo nomioluolu niegeniegeio ea sio lu nei Yesu, a nojo nomila lelan naio toru, napano nojo nomila bova laka ea namoneano nalo na kanano, napano memedu ga ka naio rije mauo van kiniou riviorio. Mia makanio, naio bitilubario ka nojom̃a nemiel ea melijokouo ga, maka nomonea naio, maka nejikia vite venia napano m̃a nojo nemila, naruei naio mila bo laka, be tiniememiano ka kiniou.
1TI 1:14 Jibe na, nemial ka napano kiado Atua naio mije kanano tiniememiano novo ban kiniou burutomoruo laka, mison kanaku meuliano ka viekouoiano a tinietiiano napano be kiado robiniu napano robe takurano bija Yesu Kristo.
1TI 1:15 A iliano tai jo, napano romijikia ravarkar tiniedo eaio, napano bo ka aviniu ajev ea kialo meuliano, napano ber jibe nei, berinavo Kristo Yesu naio batove yetano ea yetemeriba nei ka rilarur nakariano na vabe kiano meuliano. Mia ea tomu nalo na m̃a amila kariano jibe na, nemial jibe ka kiniou nebe natukamuano kalo, kiniou nobova loa ka nalo abiniu,
1TI 1:16 mia siva ban Atua napano tinien miia kiniou. Nemial jibe ka maka nememedu ka naio viekokoa kiniou tibe na, napano nebe natukamuano na tomu na kariano nalo. Mia naio mila jibe na ka kiniou, ka mia tomu nalo amijikia avitilubario ka Yesu Kristo, kiano jidomiano tebievi laka ka naio rijikia tinien riia tomu nalo na bova. Naruei bogo napano nalo na aju ka amei iorou aialio ka napano Atua naio jaaro ka rivuru kiniou tibe na, mia rila nalo avitilubario ka nalo bunu amijikia amonea naio ka avokar meuliano napano maka ve jukuti nene.
1TI 1:17 Nojidomial kanano bajago novo nei mila nemiaia naio, neberinavo naio be parinio Tubo ka bogo nalo re nua, a naio meul jobo jo. Naio joa vio nonovio mia toro maka rijikia rialio, naio takurano ga be Atua a maka dolu tai bereio. Tibe na, bo ka ravatove ka naio, rodular siano rivano-o rijikia re ribisi bogo tai, mm.
1TI 1:18 Timoti, nojo nemialso jibe kobe keneriku, a nojo nojidomial verialiano napano aberiiso beamu kiana, napano aberialso ban kiniou. Amila nebitilubarso ka jau kobe toro tai napano nemijikia navar tinieku easo. Tibe na, iliano tealo na teremi p̃eli verloglogiano tealo na tortoru ju, napano nojidom nesian moneaso. Iliano nalo na mia amijikia ala jau kesikili m̃ele ea mira lu na Atua napano rojum̃a romila,
1TI 1:19 bior napano mia aijaso ka kavakar vatitig bajago na viekouoiano, a amijikia ala napano kanamo jidomiano mijikia meravo tulaka. Tomu tealo, jibe ka aju ajelan vuu ka uako, naruei kialo jidomiano na bo berial kalo ber m̃arabo ninei, mia nalo maka asidom aiagago ka naio, ana amilaluvio, kanalo viekouoiano riva rivavin ea baraam̃a tai.
1TI 1:20 P̃eli komijikia tomu juo nei Aemeneas bija Aleksada, naruei kiniou neber aua ka neverial ka tomu juo nei ajibe na ruei. Amila bova banbano, maka asidom aiagago, ana nobuku bulaglo aban bereio ea Sim̃aro jum̃ano, ana vede naljuo abitilubario kiana vo ka atu re bunu ala bulag lu na Kristo siano tavukia napano ajum̃a amila.
1TI 2:1 Mo, kiniou neverial naverloglog-iano nalo nei naruei. Na be moti, nojunu kakar kamiu ka ea bogo na volkouano nalo, monoka aver siva van Atua riviorlo dolu nalo, a monoka kuvolkouo sikili rivior nalo, a monoka kuvika sikili den Atua ka riijailo.
1TI 2:2 Nina monoka kuvila bunu ea tivelinio na tomu nalo na tortoru, jibe ka parinio tubo nalo bija navurim̃araboiano nalo napano aju mave ka kito, bior napano ver nalo aim̃au rivu, mia rivu lie van kito. Mia romijikia rotua meuliano nabo, napano momavo a tum̃aro joaio, a romijikia rala im̃auano lu nonovio na Atua kanano, ea bajago novo jibe ka napano naio jidomio.
1TI 2:3 Bajago nalo na jibe na abo laka, naio be bajago napano Atua na ioruriano na kiado naio jaaro ka vitiio ka mirano,
1TI 2:4 bior napano naio jidom ka tomu nonovio avokar kiano ioruriano, naio jidom ka tomu nonovio ajikia kiano ilirianiano.
1TI 2:5 Maka ve m̃arabo dolu, bior napano naio takurano ga be Atua naio jo, a toro takurano ga naio mijikia rila kiado merevuiano rivija naio, nina be Kristo Yesu,
1TI 2:6 napano naio binimei be toro, karna naio mijamo ka kiano meuliano bereio, midu jeleig kito, bul bulag tomu nonovio na yetemeriba den toro na bova jum̃ano. Im̃auano nei napano Yesu naio mim̃aukanio, naio mila Atua kanano verikariano nalo na beamu abinimei abe riano, amaluvo ea bogo nene memedu,
1TI 2:7 naruei naio mijoru ea kiniou naruei ka neverial van tomu nalo. Vede tealo be tinielo ka nojo nemila sibi, mia makanio, neber be riano ga. Abitirilar kiniou jibe toro tai na bar iliano p̃eli na atevi tai, ka neverloglog taara na tomu nalo ea bajago na viekouoiano a ea m̃arabo na ilirianiano.
1TI 2:8 Bior jidomiano nalo na, nojidom ka tomu nalo monoka atu abolkouo tulaka ea vio nonovio, a bogo napano atumolu ka avolkouo monoka ave lu rivu, napano tiniemimiano maka toalo, siniabu maka to iviso ka nalo rivija tomu dolu.
1TI 2:9 Ea tivelinio na tire nalo, kiniou nojidom ka bogo napano amei joomo ea yimo na lotuano, bo ka nalo ayovovu vatitigio ve kirinovo, mia maka rivu ka ava loa, monoka rivare ga ea vio lu napano aju aba joomo eaio. Maka nosidom ka ala m̃elea vijulo veve dolu nalo, p̃eli na atelan m̃elea niogo nalo tanea niabelo nalo, a maka rivu ka avarvarlo m̃ele ea kulum̃arauo napano abululo ka burum̃ara puruveru.
1TI 2:10 Vite takurano ga naio mijikia riovovualo rivu laka, nina be kanalo im̃auano novo nalo, napano amemedu ga ea tira kiano meuliano napano milotu ka Atua.
1TI 2:11 Tire nalo monoka avatove rivu, atu melumu ka aiagago ka verloglogiano nalo napano aju aberialio ban tomu nalo.
1TI 2:12 Maka noto najamo ka tire nalo averloglog sum̃ano nalo, p̃eli na aje tuboiano mave loa nalo, mia monoka atu melumu ga.
1TI 2:13 Nina naio memedu ga, bior napano Atua jii toro na jukamu be Atam, karina tira nei Iv,
1TI 2:14 a maka ve Atam napano Sim̃aro mijukubin naio, mia be Iv, naio be moti napano milakorov tuboiano.
1TI 2:15 Sim̃aro mijukubin Iv, mia Atua tinien miia tira nalo keiano vo, jian im̃auano novo tai banlo, ka avar kiritete vou nalo amoluo ea yetemeriba nei. Ana ver tira tai, naio ve kiano viekouoiano, kiano bajago rivujo ka tinietiiano, kiano meuliano rive lu vatitigio, a kiano jidomiano to tano, mia Atua naio risaaro ka rilarurio.
1TI 3:1 Ver toro tai, jidomiano tai toaio ka tinieno ka rudu sio na navurim̃araboiano, naio bo na, bior be riano, naio be im̃auano novo tai laka nei napano naio jo jidomiio ka rila. Naruei kanado navurim̃araboiano nalo, mia kiniou neverial ka nalo monoka ave toro na jum̃abe.
1TI 3:2 Vite na jukamu, navurim̃ara-boiano naio monoka ve toro tai napano maka ve vite tai na bova toa kiano meuliano. Mia naio monoka rivuru tira ve takurano ga, a rive riano tu laka vijaio. Mia naio monoka telan vuu vatitig ka kiano bajago nalo, mia naio monoka ve masou, mia tomu nalo monoka aialerinio eaio, mia naio saaro ka rivitikar toro dolu ea kunuano, a mia monoka naio rijikia vatitig bajago na verloglogiano.
1TI 3:3 Bija vite nalo na, monoka ve toro napano maka tom̃a munu uei m̃elea mijorjoru tatei, mia naio maka tom̃a tukuruku, mia kiano jidomiano tebievi, mia kiano iviso melokloko. Naio monoka rila siniabu re, mia monoka tinientii m̃elea re puruveru.
1TI 3:4 Mia tai bunu jibe nei, monoka rive tubo vatitig ka kiano vonuo, napano kenerinio nalo aialerinio eaio, avatove kaio ea vite nonovio,
1TI 3:5 bior napano ver toro tai tibe na rijikia re rivitikar vatitig kiano vonuo, tum̃abe mia rijikia rivitikar vatitig Atua kiano tum̃aro?
1TI 3:6 Mia toro nene monoka rimeruo ve teliki, tibe ka naio rudu Kristo ea kiano meuliano jiou kija teliki ruei, ver makanio mia parinio rimei rivujo ka m̃arouano, rila naio rilaluvu m̃arabo, rijoru ea bulukup̃ili napano Sim̃aro naio mijoru ban ea beamu.
1TI 3:7 Mia navurim̃araboiano na tum̃aro nalo monoka ave tomu napano tomu nonovio, riva rivokar nalo napano maka ave namoneano, nalo aberinavo nalo abe tomu na amemedu, bior napano Sim̃aro naio jo mila vio jikili ka rijukubinlo, naio jidom rila napano tomu nalo na be tinielo ka vovaiano tai joalo.
1TI 3:8 Ninei be navurim̃araboiano nalo, mia vonganei navan tivelinio ka ijaiano nalo. Toro napano naio bokar im̃auano na ijaiano, mia kiano jidomiano monoka rivamenea rivu, mia naio be toro na ber iliano na memedu ga, mia maka to ve minano ve juo. Mia naio monoka to re rimunu m̃arjum̃elm̃elu bogo nonovio, mia monoka naio sidom m̃elea re vite nalo,
1TI 3:9 a mia naio monoka rivokar sikili ga bajago na viekouoiano ea kanano iviso, jovulio napano tomu dolu nalo abokario.
1TI 3:10 Mia toro napano ka mia naio rivokar im̃auano na ijaiano, monoka avitilubar naio rivu, alavon naio beamu vo, mia ver naio rim̃au rivu, kiano bajago bare ka im̃auano nei, mo amijikia adu siano ka rim̃au.
1TI 3:11 Mia ijaiano koano bunu, kiano jidomiano nalo monoka rimelumu rivu, a monoka to re m̃a ilisosol m̃ele rivan kulo dolu nalo, mia monoka ve tira na mijikia telan vuu vatitigio ka kiano bajago nalo, a monoka viekouo ea im̃auano nonovio.
1TI 3:12 Mia ijaiano nalo monoka avuru tira ve takurano ga, a ave riano tu laka vijaio, mia monoka ave tomu nam̃a amijikia avuru m̃arabo rivu ka kenerilo nalo, a amijikia avitikar vatitig kialo vonuo.
1TI 3:13 Mia ijaiano nalo nam̃a abarlo vatitig bo ka kialo im̃auano mia aialio ka napano tomu nalo asaaro ve toru kalo, a mia ajog tibe ka Kristo Yesu naio jo mijailo ka mia amerou re ka atumolu atu sikili ea kialo im̃auano nei.
1TI 3:14 Timoti, nojidom noviedu nealso vesiou re ka noverial vite nalo na rivanso, mia nomial jibe ka bede ga, monoka novivitauia ga rivanso beamu vo.
1TI 3:15 Vede vite tealo abokar kiniou ea vio nei kiana vo, mia nejidom ka jau monoka kovokar sop̃eli verloglogiano nalo nei, ka kojikia vatitig rivu bajago nalo napano amemedu ka alaio joomo ea m̃aratavo lu na Tubo kanano. M̃aratavo lu nei, be Atua napano meul kiano namoneano nalo, napano avokar sikili kiano ilirianiano tulaka, tibe ka burupati ivoniano na yimo tai naio bokar jikili m̃artea nalo nene.
1TI 3:16 Nao, kiado lotuano naio jikili juaio ea moneano tai napano naio jibe ka vite na lukuano tai napano bululuo bo, naio temi batitigio laka. Kito rojo roberial kiado moneano na jibe na, roberinavo Yesu, naio be Atua napano miyotuba ea yetemeriba nei ea mokotenano toro, Niununo kiano moroano mim̃au toru ea naio, a nailiano nalo aju bijaio, aberial naio ba bokar taara dolu na tomu nalo, mila na amonmonea naio janea vio reraio ea yetemeriba, karina Atua buru naio bavin bereio ea kiano burum̃ara mermerano ea vio mave.
1TI 4:1 Niununo Lu naio berial iliano tai naio meravo laka, napano naio berinavo ea bogo nalo na maaro, mia nalo tealo kalo nam̃a amonea beamu ruei, mia nalo aiagago ka niununo nalo na juboluboiano, mia atakisor sim̃aro nalo kialo verloglogiano, ana rila avuro avan ea meuliano na maka memedu.
1TI 4:2 Verloglogiano nalo na kiri niagiago tibe na, mia amalmaluvo ea tomu na jubolubo na m̃a be tinielo ka aber amijikia vite, mia kialo jidomiano nalo kiri bobogio jibe ka vovojulu.
1TI 4:3 Vite tealo napano mia averenio naio jibe nei, ka toro maka bunu rijikia soro, a mia ala veliano lu ve telabo ea sinaniano novo nalo napano Atua naio jiilo be sado ka romijikia rasaaro ka rejevio. Bior kito napano romonea a romijikia vite napano be riano, kito roju rejen julaka, roju reber siva ban naio biorio.
1TI 4:4 Naina bior napano vite nonovio nam̃a Atua jiio, maka rejikia rover naio bova, mia romial ka naio bo mia bo. Maka ve vite tai napano robitisaia naio, mia rajaaro ka rejev vite nonovio, rover siva van Atua rivior.
1TI 4:5 Ana bogo napano romila jibe na, mila na napano vite nalo nei abinimei abe lu. Atua kiano iliano bija kiado volkouano mila ameravo ruei.
1TI 4:6 Verloglogiano nalo na, ver jau koverial naio rimeravo rivu van namoneano nalo, naio jibe ka napano jau koberialso ka jau toro novo tai a toro na viekouoiano na im̃auano Naverikariano Yesu. Tilikiti napano amial ka napano jau komim̃au jibe na, mia ajikia ka kobinimei mave ruei jibe ka toro tai napano naio meruo bo ea ilirianiano nalo na kiado viekouoiano. Mia avitilubarso ka napano jau bunu kojo kajakii vatitig verloglogiano novo nalo nei napano kojo koberial banlo, naruei mia nalo asaaro ve toru.
1TI 4:7 Ea tivelinio na tukunu moruo vovuiano nalo na beamu, napano aberii vite dedade nalo, maka ve kanamo vite tai toalo. Jau kotuvanlo atu bo, mia monoka kalakakarso kosikili rivu ea meuliano lu.
1TI 4:8 Tomu nalo tinielo jii ka alakakar niabelo asikil, mia nina naio bo ka tivelinio tealo, mia bogo napano jau kojo komilakakarso kosikili rivu ea meuliano lu, naio mia rila rivu lie vo ea tivelinio nonovio. Ea tivelinio na meuliano na banei, meuliano lu naio mijikia rijaiso, a ea tivelinio na meuliano vou napano naio jo binimei iorou, mia meuliano lu naio rila kiamo m̃arabo ka kojikia kava jouro eaio.
1TI 4:9 Vite na kito roju robukudeli toru, romila bijon toru biorio, bior napano romije kiado jidomiano monea Atua na meul naio takurano ga, napano naio be ioruriano na tomu nalo abiniu, jibe nalo napano amoneaio. Iliano nei naio be riano toru ga, komijikia komonea naio ka tiniemo momou.
1TI 4:11 Kanaku iliano nalo nei napano nojo neber ka jau nei, naina naruei vite nalo napano jau monoka koverloglog ka kulo dolu nalo, kesikili kalo ka monoka ajogkario.
1TI 4:12 Ver tomu tealo atu avitso rivova bior napano jau kobe m̃eaku ga, mia komerou re, koim̃au p̃ilinio ga. Lerinio jau kobe m̃eaku ga, mia jibe ka napano kojo komila, monoka kesiloglog m̃arabo ka namoneano dolu nalo. Mia bo ka aue jaamo, napano koberloglog vatitiglo bo ea meuliano kirinovo, ea tivelinio na iliano, ea tivelinio na bajago novo, a ea tivelinio na tinietiiano, viekouoiano, a meravoiano.
1TI 4:13 Rivan rivakar napano ver kiniou nemijikia namaluvo ka jau, kovakar sikili bogo na lotuano nalo. Kovuluku bulag iliano lu ea tomu nalo miralo, koioliolu, koverloglogio vanlo.
1TI 4:14 Jau tiniemo bobogia re moroano lu nam̃a Atua jian banso ea bogo napano taara na vurim̃araboiano nalo amioa parimo. Naverialiano tai ka bogo na, kiano iliano naio berial moroano nei be kanamo, naruei monoka kesikili ka koim̃au vija.
1TI 4:15 Jau monoka koto kalakakarso ea im̃auano napano mijoru joa jum̃amo, monoka kalavio sikili tulaka ka kalaiio, naruei mia tomu nalo aviniu amijikia avitilubario ka kojo kabano lie bija Atua ea kiamo meuliano.
1TI 4:16 Monoka kovitikar vatitigso rivu, a jau bunu monoka katakii batitig verloglogiano nalo nam̃a kojo kejian ban tomu dolu nalo. Ver jau kovokar rivu, mia kala napano jau kamliko nalo napano ajum̃a amiagago ka jau, kam nonovio kuvijikia kuvokar ioruriano.
1TI 5:1 Timoti, ver jau keial tormoruo tai rila vite tai na maka rimemedu, jau keil siniabu re rivanio. Jau komelokloko ga van naio, kala vanio tibe ka napano naio be karam̃amo. Bo ka kala tibe na van nalo dolu bunu. Keial m̃eaku nalo atibe ka napano abe kuruamo,
1TI 5:2 keial tiramoruo nalo atibe ka napano abe koniomo, a keial niatira nalo atibe ka napano abe kuviviniomo. Ver jau kala tibe na, mia kanamo jidomiano rimeravo rivu dam̃ariga.
1TI 5:3 Ea tivelinio na taanou nalo, kito na tum̃aro monoka rovioa vatitigio vanlo, monoka rovitikar rivu nalo napano aju abe terakurano ga, maka ve koalo tai ka rijailo.
1TI 5:4 Mia ver taanou tai kenerinio nalo atu, p̃eli na kum̃abinio nalo, mia nalo na naruei monoka avitikar naio. Ea m̃arabo na, amijikia ala meran van naio vitikariano novo nalo a ijaiano napano naio mila banlo ea yuka nalo napano barlaka ruei. Nalo monoka avitilubario ka nina be im̃auano na memedu tai, p̃eli vite lu tai, ka ala van tai kalo napano memedu ka kialo m̃aratavo ga, a naio be bajago na bo tai napano Atua tiniene jii toru.
1TI 5:5 Taanou napano maka toro dolu tai rivitikar naio, napano nalo am̃arm̃aro nonio den naio banbano naio takurano ga jo, monoka naio jo bar tiniene ea Atua naio ga takurano. Naio mijikia to tiniene rimaio ka Atua legiano a bogiano ka rivolkouo rivanio naio ka rivitii naio rivior vite venia napano naio jidom.
1TI 5:6 Mia ver taanou tai ver naio to sidomii ga ka seseiano na meuliano na yetemeriba nei, naio tibe ka napano naio m̃aro den Tubo ruei, javukia ga koano m̃aro den naio beamu ruei.
1TI 5:7 Nomijog ka kamiu namoneano nalo kumitu kumisidomii ka kuvila m̃arabo tai ka rijai taanou nalo. Nina bo laka, mia nomerou ka vede tealo avilvil ealo riviorio, mia nojidom nesian iliano nalo tai van kamiu ea tivelinio nei beamu vo.
1TI 5:8 Iliano na beamu, naio ber jibe na, berinavo ver namoneano nalo tai naio maka to vitikar batitig nalo na ea kiano yati, na toru nene, naio maka vitikar vatitig nalo na ea kanano m̃aratavo memedu, toro na naio jibe ka napano naio maka ve toro tai na ve Kristo kiano. Naio kirivova laka, a kiniou nemial naio jibe ka naio bova laka jovulu nalo napano maka amonmonea vo.
1TI 5:9 Mo juo nene, ea tivelinio na taanou nalo, naio jibe nei. Taara na taanou nalo napano mia tum̃aro naio rivitikarlo, taanou napano jidom ka siano riva joomo, monoka be tiramoruo ga, jibe ka napano kiano yuka jikar ka bakar duelimo va ari [60] jo bavin. Dolu nene, be tire napano mijoro vaarakurano ga, buru sum̃ano takurano ga, a be riano tu laka bijaio.
1TI 5:10 Bereio, naio monoka ve tira napano tomu nalo abitilubario ka naio mila im̃auano nalo bo laka, napano naio mia berloglog batitig kenerinio nalo, naio be tai napano naio jaaro ka rivitikar rivu toro dolu ea kunuano. Tilikiti napano namoneano lu dolu nalo abinimei amiadu ka naio, naio jekon jaalo, a naio jo bitiri bulag nalo napano amijoru ea jogvaiano tedade nalo. Tiramoruo taanou napano naio mim̃au jikili ea im̃auano novo nalo na jibe na, naio naruei siano mijikia riva jouro.
1TI 5:11 Mia ver taanou tealo atu napano maka ave tiramoruo vo, bo ka jau kodu re sialo vo. Naina bior napano amijikia averikar van Kristo ka mia atu tibe na ga vija naio rivokar jukuti na kialo meuliano, mia karina, maka vesiou, vede sidomiano na soriano binimei jikili laka bereio, naruei mia aiilo ka taanou nei naio jumolu buru sum̃ano tai bereio.
1TI 5:12 Ver naio rila tibe na mia aial rivova kanio, bior napano naio milaluv kiano verikariano, naio mila korovio bereio.
1TI 5:13 Mo bija naina, mia taanou m̃eaku nalo na amijikia aiovo, p̃eli maka atu ala im̃auano na bo, mia aju amidu nono vio jeliviv, ajum̃a amalmaluvo ea tomu nalo kunualo, a mave ka nina ajum̃a amil ea kulo dolu nalo, ajum̃a amiyuku sunulo ban ea vite napano maka ve kanalo iliano naio to joomo eaio.
1TI 5:14 Naruei ea kiaku vitiiano, kiniou neber ka taanou napano nalo abe niatira kia ga vo, naio bo laka ka rajamo ka nalo asoro bereio ga, bo ka nalo avar kiritete, avitikar kialo vonuo nalo, naruei mia ve re titai napano tomu nalo amijikia atu ail rivova kalo riviorio.
1TI 5:15 Kiniou neber nina bior napano nalo tealo amilaluv m̃arabo ruei, aju ajakii m̃arabo na m̃ariano napano aban kean Sim̃aro.
1TI 5:16 Tibe na, ver kito tai naio ve namoneano tai, mia taanou tai joa kanano m̃aratavo, naio ga monoka rijai batigio. Ver naio rila, mia tum̃aro naio rila bijon re naio bunu, mia naio mijikia rivitii ga taanou dolu nalo napano maka ve toro tai ka rijailo.
1TI 5:17 Ea tivelinio na ijaiano teliki napano rojum̃a rejian ban kiado navurim̃araboiano nalo, kiniou neberii ban ea iliano juo na Iliano Lu. Tai berii bue m̃arauo nalo napano roburulo amiel jeliviv mave ea bagaro na boboseru ka rivieboṽe bulag kurukuti nene. Iliano na naio ber jibe nei berinavo Jau koyorko re kanamo bue m̃arauo niono napano naio jo bieboṽe bulag kanamo boboseru, jau kajamo ka naio sen ve tertelisu rivano. A iliano juo nene ber jibe nei Toro napano naio mim̃au, memedu ka naio rial titai rimei ea jum̃ano rivior. Tibe na, bo ka kito rala bunu van navurim̃araboiano na tum̃aro. A nalo napano m̃a amim̃au bo, a amim̃au jikili ka amioliolu ka Ioluano Vou na bo a ka aberloglog tomu nalo, bo ka nalo avar ve toru likiliki, rivan ve valuo.
1TI 5:19 Ver toro tai rimei riverial navuri-m̃araboiano tai, ver naio mila vite tai na bova napano monoka ail van naio ea komeli riviorio, iliano na toro takurano ga kanano naio maka rivare ka ver ala tibe na. Iliano na jibe na, monoka tomu ve juo p̃eli ve tolu ka aikurukario, naruei amijikia adu rivan komeli.
1TI 5:20 Mia ver navurim̃araboiano tai naio to rimonmon rila kariano, mia jau monoka koverbure naio sikili ea taara na namoneano nalo miralo, naruei bogo napano navurim̃araboiano dolu nalo aialio, merouano rivokar vatitiglo ka maka rivu ka nalo bunu ajoru tibe na.
1TI 5:21 Kito juo remijikia ka Atua bija Kristo Yesu bija nailiano lu nalo na kanalo ajum̃a amial kito, naruei ea miralo kiniou neber ka jau ka kovokar vatitig kanaku iliano nalo na. A neber bunu ka bogo napano jau kojo komila vite nalo nei, jau kovitii re tomu nalo aveve dolu, mia monoka kala rive verare ga ka nalo aviniu.
1TI 5:22 M̃ajigidulu tealo jibe nei, berinavo jau kala sop̃eli re ka koyoa toro ka rimei ve navurim̃araboiano, mia kovitii kiano meuliano rivu beamu vo. Maka rivu ka mia kavan re vaataro ka kariano napano toro dolu naio jom̃a mila, mia koto kuku ka kanamo iviso naio rimeravo, ve lu dam̃ariga.
1TI 5:23 Javukia napano nojo nomijog, nemijikia ka jau kojom̃a komiemie tertelisu, naruei never ka jau komijikia kovelikar re na munuiano na m̃arjum̃elm̃elu. Jau koto komunu uei re ga, mia kalavon ka komunu m̃arjum̃elm̃elu ve tertelisu bogo tai, naruei vede naio mijikia rijai mabomo.
1TI 5:24 Tai bunu jibe nei, berinavo tomu tealo, amila napano kialo kariano naio joa mirado medavo ga, naruei robitilubar ka mia avar vironiano riviorio. Mia tomu dolu nalo, amila napano kialo kariano naio joluku vatitigio jo, mia karina, naio bunu mia rimaluvo ea vio meravo iorou.
1TI 5:25 A im̃auano novo nalo bunu ajibe na. Tealo ajua mirado kirimeravo bo, a tealo, ajoluku vatitigio bo, maka rejikia. Mia naio napano joluku jo, naio maka rijikia toluku bo kanio, mia naio bunu monoka rimaluvo ea mirano tomu nalo miralo.
1TI 6:1 Nobivitau naruei ea tivelinio na kanado tomu nalo napano aju napano maka ve kanalo titai, dam̃ariga ajua toro na toru tai ka aim̃au kanano kurano ga. Meuliano na jibe na naio jikili, naio jibe ka napano vite na temi tai naio jorimaro ga ea taakalo, mia monoka aserm̃i re ka kialo toro na toru, monoka aial naio tibe ka memedu ka avatove kanio. Ver ala tibe na, mia kialo toro na toru maka rijikia rivitii vova ea Atua siano napano joalo.
1TI 6:2 Kiniou nemijikia ka tomu tealo napano amim̃au kurano ga jibe na, kialo tomu na tortoru bunu amonmonea. Jibe na, toro na im̃auano bija toro na toru naljuo abe kurualo ea Kristo, mia nina naio maka riverenio toro na im̃auano naio mijikia sereserei ka toro na toru kiano im̃auano. P̃eli monoka aim̃au rivu lie vo tibe na, monoka asaaro ka aija toro nam̃a aju amim̃au kanano, bior napano naio be tai ea kialo taara na namoneano javukialo, a naio bunu be tai napano monoka tinielo tiio. Naina naruei be verloglogiano tai ka mia kotuvan rivan nalo dolu, napano mia monoka kotunukakarlo ka mia atakii vatitigio rivu.
1TI 6:3 Toro napano naio berloglog jakii jidomiano dolu, naio juvan iliano novo nalo na kiado Tubo Yesu Kristo, kiano iliano maka vare bija verloglogiano napano mijikia ridu toro kiano bajago binimei jibe ka Atua kiano bajago.
1TI 6:4 Toro napano naio jakii kiano jidomiano ba be dolu jibe na, kito romial naio, naio barka naio, naio parinio toru laka, mia naio maka rijikia titai leleio. Mia naio mila jibe ka toro tai na jidom m̃elea baravoiano nalo, bija bajago kilkil, mia maka tonovo tai rimaluvo ea vio nene. Mia bajago na bova nalo amalmaluvo ea naio, jibe ka jokuano, jup̃e iliano, ilidieiano, bija jidomiano sorosoro na bova ka tomu dolu nalo.
1TI 6:5 Tomu nalo napano amila nina aju abilvil ealo janea vio, napano jidomiano napano bo a iliano napano be riano naio maka bunu toalo leleio. A abano bova kitkiti lie vo, bior napano aju ajidom verver aiasol tum̃aro naio be m̃arabo na bo ka avuru veru.
1TI 6:6 Mia maka tibe na, bior napano toro na kanano bajago naio bo jibe ka Atua kanano, a naio jaaro ga ka venia napano Atua jian banio ea kiano meuliano, toro na naruei naio buru vite novo tai napano naio bo laka ruei.
1TI 6:7 Bogo na kito romiyotuba ea yetemeriba nei, niabedo yauo ga robinimei, jum̃ado be teau ga, mia rotuvan bereio vare ga, maka ve titai napano romijikia ravarkario ravano.
1TI 6:8 Mia bogo napano roju romeul ea yetemeriba nei, ver releal sinaniano ve teliki vija kulum̃arauo ve teliki rotukuloko kito, nina naio bare ruei, romijikia rasaaro ga, rojidom venia bereio?
1TI 6:9 Mia nalo napano ajidom m̃elea vite nalo, ajidom ka ave sanibaiano, vede nalo maka avitilubario, mia ajua vio na juboluboiano ruei, Sim̃aro naio jo bokarlo ea kiano jukujukuano nalo ruei. Mia sidomsearoiani nalo napano amila lelan toro kiano meuliano amei ve telabo ealo, rivanvano adulo avan rivova laka, mia alaluv vite nonovio, a ava amadudu ea vio na vakovioiano.
1TI 6:10 Nao, bajago na sidom m̃elea puruveru naio be burupati tai napano bajago va kinkin dolu nonovio mijikia maluvo eaio. Sidom m̃elea ka rivar veru ve telabo naio jen kito tealo kialo iviso, a naio burulo amiel tertelisu abano, naruei amiilo napano amolmoluo nonovio den m̃arabo na viekouoiano ruei. Karina, abar jaleleano miroano biorio, a mila jogvaiano nalo bokarlo, naruei abitilubario vonga, ajidomial bereio mia bova ga.
1TI 6:11 Mia Timoti, jau kojibe ka Atua kiano toro tai riano, mia monoka kovilig taakamo ka juboluboiano nonovio na jibe na. Venia napano naio bo ka jau kodu toa meriniamo tulaka, naio be bajago na memeduano, bajago napano toro naio rimei rivu tibe Atua, bajago na viekouoiano, bajago na tinietiiano, bajago na vokar vatitig im̃auano, a bajago na melumuiano.
1TI 6:12 Jau monoka kotumolu kotu sikili ea mira lu na kanado moneano. Tiniemo bobogia re bogo napano kojumolu ea namoneano nalo telabo miralo, napano koberial kanamo verikariano novo na beamu nei. Atua naio bioso ka kodu meuliano nei napano maka rijikia ribisi, ana naio jian banso ea bogo nene, naruei monoka kovokar sikili rivu rivan rivano-o mia rijoru den re bereio jum̃amo.
1TI 6:13 Atua naio be burupati na meuliano na vite nonovio, a Kristo Yesu, tilikiti napano abur naio ba ban toro na toru nei Pontas Pailat, mia naio maka rimerou, naio jikili ka ga berial kiano verbulagiano novo, naruei jibe ka napano kito juo rojua naljuo miralo, nojidom nesian burum̃ara iliano dolu tai vanso.
1TI 6:14 Kiniou neber jibe na, nejikili kaso ka jau monoka kovokar sikili vatitig Atua kiano iliano nalo, napano maka ve kanamo niamiamo tai p̃eli na kanamo beleano tai, riva vokar napano kiado Tubo Yesu Kristo naio riyotuba bereio.
1TI 6:15 Kiano yotubaiano na, mia naio riyotuba ka kito ea kiano bogo nene rimemedu, tibe ka napano Parinio Tubo Lu na mave naio jidom, bior napano Parinio Tubo Lu nene, naio takurano ga be tubo ka tubo kinkin nalo, naio be yoro na toru ka tomu na tortoru nonovio.
1TI 6:16 Naio takurano ga meul jo jobo jo nam̃ariga, napano naio jo joomo ea kiano burum̃ara mermerano napano joko naio ka toro rijikia re riva vaataro kanio, napano maka lele toro rial naio vo, a maka lele toro rijikia rial naio bogo tai. Kiado Atua nene, kito ravatove ka naio, a bo ka navenatuboiano ka vite nonovio na be kanano naio takurano ga, rivan rivano-o rijikia re ribisi bogo tai.
1TI 6:17 Be riano napano kito tealo, kialo veru nalo miroano, jum̃alo nalo bujovujo vatitig ka saba nalo. Nina naio bo ga, mia jau monoka koverlogloglo sikili ka avarvarlo m̃ele re, ave m̃arou re kalo bereio riviorio. A maka rivu ka avarkar tinielo ea ga kialo veru nene, napano vede bogo tai aiilo, aial riva kovio nonovio, mia monoka avarkar tinielo ea ga Atua. Naio ga be burupati na tonovo nalo nene, naio jo bar ijaiano toru ga amalmaluvo ka kito, miroano laka, ka ajai kito rasaaro m̃ele ea kiado meuliano.
1TI 6:18 Nalo napano jum̃alo bujo ka veru, kialo meuliano naio monoka rivujo vatitigio ka im̃auano novo na aju amila bijaio. Maka asidomii ve toru ka monoka avokar vatitig veru nei na be kialo ga, mia bo ka asaaro ka avio ka van toro dolu napano kiano maka vare.
1TI 6:19 Verenio ajian ba jibe na, mia Atua mila napano aju amiyobijii kialo ilivuiano mave, jibe ka napano aju abitiri kunualo novo tai ju ka bogo na rimei. Ea m̃arabo na, aju aba amiyotuba ka avokar meuliano na be riano.
1TI 6:20 Nao Timoti, kovokar vatitig rivu iliano novo nonovio napano neber biedu banso, napano nomidu joa jum̃amo ka kesian rivan lie vo. Jau kava joomo re ea iliano nalo napano maka ajikia aija kanamo meuliano vija Atua. Tomu telabo aberloglog ka jikiaiano na yetemeriba ga, karina aberinavo kiado moneano, bija Atua kiano iliano lu, vite nalo napano maka ave riano ajuaio. Mia kialo jikiaiano na naio naruei maka rive riano ga, naio jubon lili kialo jidomiano bereio.
1TI 6:21 Tealo abokar vatitig masouano na yetemeriba nei, aju amioliolu vatitig janea vio, mia be vite tai ga, amilaluv m̃arabo na moneano napano amilaluv batitigio. Kanaku iliano bisi ea vio na, naruei jibe ka bogo nonovio, kiniou nobolkouo ka Atua kiano tiniememiano naio to vijaso. Kiniou, Pol.
2TI 1:1 Koig keneriku Timoti, kiniou Pol nojo nebivitauia m̃esi nei biedu banso, napano jibe ka Atua kiano sidomiano, naio bitirilar ruei kiniou nebinimei nebe atevi na Kristo Yesu kiano. Kristo Yesu nene naio be bulapati na meuliano nene napano Atua berkar ka nalo napano amonea naio.
2TI 1:2 Timoti, kiaku volkouano ka mia karam̃ado Atua a Yesu Kristo kiado Tubo, naljuo adu burum̃ara tiniememiano, tinieiiano a tum̃aroano to vijaso dam̃ariga.
2TI 1:3 Jibe na napano korobiku nalo amila nua ruei binimei, kiniou nojom̃a nomila Atua kiano im̃auano dam̃ariga, nojom̃a nomilotu ka naio ea kiaku iviso momou. Ana ea legiano a bogiano, ea aura na volkouano nalo, nojo tinieku maio kaso, nojo neber siva toru laka banio kaso.
2TI 1:4 Nojo nojidomii jogumiramo nalo na jogvaiano, ana mila na nojidom m̃elea ka monoka neviedu namaluvo kaso bereio. Ver nejikia neial bereio miramo ga, mia kiaku iviso saaro mia saaro!
2TI 1:5 Nojo nejidomii bunu kiamo viekouoiano riano, napano joa korobimora napano tiramoruo Loes, karina joa koniomo na Yunis, a jibe napano nebitilubario ruei, vonganei mia joaso.
2TI 1:6 Naina naruei nojo nojidomii bunu ijaiano napano Atua mije banso bogo napano nomidu jum̃aku joa pariparimo ka nomioakoso. Nojidom never kaso mia kola re sebi na ijaiano nei rivatove, a mia jau monoka kala vilivili vatitigio rivu dam̃ariga.
2TI 1:7 Monoka tiniemo rimaio ka Niununo napano Atua jian ban kito, naio maka ve Niununo na morouano na kulorinio, a naio be Niununo na meroano, be Niununo na tiniememiano, a be Niununo na mila kulorinio naio rila vatitig kiano meuliano rimei memedu.
2TI 1:8 Verver be riano ka Niununo nei naio joa kiamo meuliano, jau koimou leleio re ka koverial Tubo kiano Ioluano van tomu nalo, a koimou re ka koverial kalo ka be riano, ka jau kobe kiaku bilbilu novo tai. Nalo abuku kiniou ea yimo na tetavokoiano bior kiano im̃auano, mia koimou re ka kiniou kanio. Vite na mia kala, mia jau monoka tiniemo saaro vija kiniou rivior jogvaiano na Ioluano Vou, rivanvano-o rivokar venia na Atua kiano moroano milaso kobe verare ka koim̃aukanio.
2TI 1:9 Atua, naio milarur kitojuo ruei, a bio kitojuo ka reiel ea kiano m̃arabo na meuliano lu, mia bogo nonovio naio mijikia rijai kito. Nina maka bior ka kitojuo romim̃au kiano bo p̃eli kitojuo romila venia, mia naio mila miyotuba ea kiano jidomiano bija kiano tiniememiano novo ban kito. Kiano tiniememiano na, naio mila vatitigio jo bija Kristo Yesu beamu ruei, nua ea bogo na tikariano na kito tomu nalo na yetemeriba.
2TI 1:10 Mia tiniememiano nene jo jibe na banbano bokar vonganei kia navo, napano naio binimei miyotuba ea yetemeriba, maluvo ea mirado jelea kiado naioruriano Kristo Yesu. Naio binimei ea yetemeriba, naio mila nonovio moroano na m̃ariano binimei be tekurano tai, a kiano Ioluano Vou mila napano bogo na rojua yetemeriba kia navo, remijikia rejev meuliano na bo. A mila ka iorou, ana mia romijikia rava jouro bunu ea meuliano na mia maka rijikia ribisi bogo tai.
2TI 1:11 Ioluano nene, naio nei naruei napano Atua bitirilar kiniou nebe kiano naverialiano, nebe kiano atevi, nebe kiano naverloglogiano.
2TI 1:12 Kiaku im̃auano nei naruei mila na kiniou nojo nabar bogo nalo napano jikirkili joomo ea yimo na tetavokoiano nei kanio, mia naio bo ga, naio maka ve titai ea kiniou. Maka noimou, bior nemijikia ka naina nomoneaio, naio be riano, a kiaku moneano ea naio jikili vatitigio ka venia na nomidu joa jum̃ano, mia naio bokar vatitigio vokar bogoti na maaro.
2TI 1:13 Tibe nei Timoti, kiniou nojidom never kaso ka jau monoka katakii vatitig m̃arabo na iliano na memedu nalo na nejian banso, monoka kesikili kotu sikili ea Yesu Kristo bogo nonovio, a monoka kodu vatitig kiano tinietiiano to rivujo ea kiamo meuliano.
2TI 1:14 Niununo Lu naio jo bujolou vatitig ea kiado iviso, mia kotuvan re ilivuiano nalo na naio midu jo vatitig ea kiamo meuliano ruei, a koto kovitikar vatitigio.
2TI 1:15 Kiniou nemijikia ka jau komijog ruei lilianiano tai na bova, napano namoneano nalo na tanobuku na toru ea vio Esia, nalo abilig taakalo ka kiniou ruei, a bija nalo na abe kiado bilbilu nalo, Paekelus bija Emojenis.
2TI 1:16 Mia kuruado novo nei Onesiporas, naio mila bo laka. Be iakurano ka nalo amiorkar kiniou ka m̃arimieni nalo na lakoiano nei, mia naio maka rimou ka rimei riyotuba ka kiniou, naio bitikar kiniou ea saba nalo miroano, ana nobolkouo ban Tubo ka naio rilivu ka naio rive toru rivija kiano bajulukuti nalo.
2TI 1:17 Naio binimei miyotuba Romo nei, maka vesiou lele vo mia naio milavio ka rial kiniou, banbano na naio binimei bokar kiniou ea vio nene.
2TI 1:18 Ana naio jo mila tenalo na bo ban kiniou bereio ea vio Romo nei, jibe ka ga napano naio mijai vatitig kiniou beamu ruei ka bogo napano nojo Eveso nua kia ga vo, jibe ka napano kumijikia vatitigio ruei. Naio bo ka kiniou jibe na, namonea ka mia Atua naio tinien tii naio ka bogoti maaro.
2TI 2:1 Keneriku Timoti, nojidom never kaso, bo ka kodu tiniememiano na Kristo Yesu kiano ve toru ea kiamo meuliano, a mia komijikia kosikili vatitig ka kotu bogo nonovio.
2TI 2:2 Bogo telabo ruei jau komiagago ka kiaku iliano nalo na nojom̃a nober ea mirano tomu nalo, ana vonganei monoka keial tomu nalo tai na nalo abe viekariano ka im̃auano, kavar iliano nalo nei rivanlo, a iorou, ana nalo bunu amijikia averloglog lilian riva rivan tomu dolu nalo.
2TI 2:3 Kito tomu nalo na mira na Kristo Yesu kanano, mia kito rove terakurano, kanado bogo napano monoka roviviuo vija bogokouo to. Mia ver vonganei kiamo bogo, jau kajamo ka ga tibe ka togio na kiamo im̃auano tai.
2TI 2:4 Kalavon ka kosidomii vatitig tomu na mira. Kialo im̃auano ka aue kialo toro na toru kiano uolu kanano moroano rivatove ga, mia maka atu aiasol lo ea im̃auano ninio nalo tibe napano tomu dolu nalo aju amila.
2TI 2:5 A kalavon ka kosidomii bunu m̃eaku nalo napano amila tikitiano. Nalo amilavon jikili ka atovulu, ka avokar kialo ijaiano tai, mia ver nalo amilakorov tuboiano, mia avuku bulaglo, maka ajikia avokar titai leleio.
2TI 2:6 Mia kosidomii bunu tomu nalo na amim̃auka tiniavio. Toro na mim̃au jikili mebijo toru, nina naruei toro napano bo ka naio rivar sinaniano eaio.
2TI 2:7 Saba nalo na kiniou nojom̃a neberenio, verver jau kosidomii vatitigio rivu kalo, mia Tubo riijaso ka kovokar kiano masouano nalo na bo a kiano jikiaiano nalo eaio.
2TI 2:8 Ana nana monoka jau kosidomii loa kanio bogo nonovio, naio be Yesu Kristo. Naio miyotuba ea vio yetemeriba, miyotuba ea Tormoruo Parinio Tubo Teviti kiano yati, a iorou, amuebinio, karina naio meul bereio, jibe napano Ioluano Vou berenio. Nina Ioluano Vou napano nojo nomioliolu kanio,
2TI 2:9 a nina Ioluano Vou na nobokar jogvaiano toru kario ea vio na, nina mila na vonganei amiorkar niabeku nalo ka m̃arimieni nalo, jibe ka kiniou nebe toro tai na bova na lakoroviano na tuboiano nalo. Mia be titai napano tomu nalo maka ajikia aiorkario, naio be Atua kiano iliano lu, ka naio jo kia jaluvo ba maka ajikia atukovio kanio.
2TI 2:10 Kiniou nojo tinieku miia toru tomu nalo napano Atua bijauia bulaglo, ka nalalo amei avokar meuliano selia Kristo Yesu. A jidomiano nei naruei mila na bogokouo ninio na nojo naban ea, nina nojo nobokar kiniou jikili ga ka noto nala vite nonovio, ka nalo bunu ajikia avokar mermerano na vio mave na maka rijikia ribisi bogo tai.
2TI 2:11 Iouano tai berii tenei, kiano iliano nalo be riano laka, napano ber jibe nei, berinavo “Verver ravan ea m̃ariano vija naio, mia romeul vija naio.
2TI 2:12 Verver rotu sikili ea bogokouo, mia roje tuboiano vija naio. Verver rovilig taakado ka naio, mia naio tuvan kito,
2TI 2:13 a verver ralaluv kito rojoru, mia naio to rivokar kito sikili to, bior naio midular kito be kiano, ana naio maka rijikia rila sibi, naiomaka rijikia rivuklar kito bereio.”
2TI 2:14 Namoneano nalo napano aju, monoka koto koverlogloglo ka nalo tinielo ribobogia re tenalo nei. A jau monoka keil sikili vanlo ea Atua siano, ka mia nalo avilvil ea re bunu lo. Nalo aju tinielo jerlo ka nioti na iliano nalo jibe ka na nalo aju amila, maka atu ala titai na bo, a maka atu aija lele nalo dolu na aju amiagago.
2TI 2:15 Venia nalo na m̃a jau komijikia kala tibe ka toro na bo tai na im̃au-ano na Atua kiano, monoka kala nonovio aviniu ka rivu laka ea kiano siraragiano. Verver koim̃au rivu tibe na naruei, ana mia maka kejikia koimou ka m̃arati na kiamo im̃auano bario, a komijikia komei kove toro tai na naverloglogiano na ilirianiano na Atua kanano van tomu nalo, rimemedu a rivu.
2TI 2:16 Kovitikar vatitig rivu ka ilikurani-ano na tomu nalo ajum̃a aberverenio janea vio. Iliano nalo na jibe na maka ve tena toa namoneano nalo kialo jidomiano, bior amijikia avurulo avan lie vo ea bajago nalo napano Atua naio maka sidomiio. Bo ka kavan re vaataro ka tomu nalo na ajum̃a amila jibe na,
2TI 2:17 bior kialo iliano nalo na jibe na, naio jibe ka menko va tai, napano jo jer toro mokotenano maka rijikia rimei rivu bogo tai. Nemial jibe monoka never ka tomjuo nei Aemeneas bija Vaelitas, naljuo jibe na kija ruei,
2TI 2:18 bior nalo ajaluvo den m̃arabo na ilirianiano ruei, aju amioliolu ka kialo namoneano tai napano maka rive riano leleio. Nalo aju aber ka bogo maaro na yetemeriba, mia meuliano bereio den maariano to re bunu, bior ea kialo jidomiano, aber p̃eli Atua naio jo mila ruei, nina ea bogo na naio mim̃au ea kiado meuliano. Mia bogo na aju amioliolu ka kialo sibiano nei, nalo aju amila niegeniege tomu nalo miroano kialo moneano, mila na kialo jidomiano beve juo bereio.
2TI 2:19 A jau bunu monoka komemebiju re, bior yimo napano Atua naio jo mim̃aukanio, kiano bulapati burupati nalo ajikili aju jikili bo aju. Iliano nalo na ea Atua kiano Vivitauiano Lu aju, mia naljuo na memedu ka tivelinio napano nalo na ajuvan kito nei. Tai naio ber jibe nei, berinavo Atua naio mijikia vatitigio kei nalo napano abe kiano, mo juo nene, ber jibe nei, ber Toro na midu Tubo ea kiano meuliano, naio monoka tuvan bajago va nalo na m̃arabo na laiano na kariano kanano.
2TI 2:20 Kalavon ka kosidomii tomu na saba toru kialo yimo nalo na tortoru. Joomo ea yimo nalo nene, remijikia reial baju na sinaniano nalo, napano tealo, amim̃au kalo ea niogo p̃eli puruveru na miuvu, a tealo, amim̃au kalo ea borotano p̃eli ea iesi ga. Nalo na amial lo bo, aju abio ka sinaniano ban ea kialo burum̃ara jokoluolu nalo, a nalo dolu, aju ajinan janea vio ga.
2TI 2:21 Mia kito tomu nalo jibe na ga. Toro na mila kiano meuliano meravo bo, a be lu, a maka rim̃auka im̃auano na bova, mia kiano toro na toru rudu naio ka rim̃auka kiano im̃auano ve telabo napano bo ea mirano tomu nalo.
2TI 2:22 Verver kosidom ka jau kotibe na, monoka kotokovio ka tiniekariano nalo na jikili a tinieiiano nalo na bova napano m̃eaku nalo kialo jidomiano mijikia rivujo kanio. Jau monoka kalavio sikili ka kiamo meuliano rivujo ka memeduano, a viekouoiano, a tinietiiano, a tum̃aro, mia tibe na mia rivu laka vanso vija nalo dolu napano kenemiu jidomiano takurano, napano kumitu kubolkouo ka Tubo ka kiano ijaiano.
2TI 2:23 Bogo telabo, tomu nalo amijikia ala baravo ka nalo ka kialo vite vovuiano p̃eli kialo jidomiano kinkin nalo, jibe ka maka ajikia vite. Bogo tai baravoiano nalo nei amijikia ava avokar napano nalo atuktuklo, ava dedade bereio, ana mia bo laka ka jau kava joomo re ea iliano nalo na jibe na.
2TI 2:24 Toro na mim̃au kiado Tubo kiano im̃auano, naio monoka ve re toro na rila baravo ka toro dolu, mia monoka rivijuku rivu kalo, monoka rijikia m̃arabo nalo na verlogloglo riva melmelumu. Naio monoka re tinieno mimi sop̃eli, a kiano jidomiano ve tebievi rivu kalo.
2TI 2:25 P̃eli bogo tai mia nalo tealo tinielo ail die naio, ana ver naio rilavio ka rila kialo jidomiano to rimemedu, mia naio rimelumu rivanlo ga. Ea m̃arabo na naruei p̃eli mia Atua mijikia rudu bogo ve telisu kalo ka avilig kialo jidomiano bereio, amijikia avokar kiano ilirianiano.
2TI 2:26 Nalo napano jibe nei, Sim̃aro jo bokarlo jikili ruei, naio jo mikurlo ka ala venia na naio jidom, ana ver amijikia avokar bereio kialo jikiaiano na bo, mia amijikia avuro den kiano saba a kiano sibiano nalo.
2TI 3:1 Timoti, monoka tiniedo bobogia re ka ea bogo maaro nalo na, mia monoka bogokouo ve miroano ayotuba.
2TI 3:2 Mia monoka tibe na ga, bior ka bogo na mia tomu nalo kialo bajago riva rivova lie vo. Ea bogo na, mia nalo tibe nei: mia ave tomu na asidomii nalo ga bereio mia asidomii ve toru ka veru mia avarvar kalo a ave m̃arou mia ave tomu na baravo mia maka ajikia ajogkar iliano na korobido nalo kialo mia maka ajikia aver siva ka vite tai mia ajidomii be iakurano ga ka vite nalo na be lu
2TI 3:3 mia maka tiniel tii tomu nalo dolu mia parilo jikili laka mia amioluolu a amil bova ka vite nalo na bo mia tiniel jer tomu nalo, atukulo mia maka asidom tenalo na bo
2TI 3:4 mia ala sibilili kialo bilbilu nalo mia maka asidomial ka titai mia ajidomii ka aber nalo ga abo mia maka tiniel tii Atua, a tiniel jii meuliano novo venia na ajidomio,
2TI 3:5 a verver alavon ka avokar kija im̃auano nalo na tertelisu na Yimo Lu, nina ea kuluniabelo ga, bior ka napano kialo meuliano berial ruei ka moneano ea Atua, kiano moroano riano na maka toalo leleio. Nina naruei bajago nalo na tomu na bogoti na maaro kialo, a monoka koto rava vaataro re kalo.
2TI 3:6 Kiniou neber aua laka bunu ka tire nalo napano naverloglogiano nalo na sibiano nei aju ajeliviv ea kunualo. Tire nalo nene, tealo aju abar temiano na kialo kariano ruei, a tealo, jidomiano dolu nalo na jualo, mila mia bogo na tomu nalo abinimei bina ga jibe na, tire nalo nene tiniel m̃aro laka, maka kialo moroano ka tokovio kalo.
2TI 3:7 Venia na tomu nalo nei aberiio, mia nalo amonea ga vonganei, a aju amila jibe na banbano mia maka lele avokar jikiaiano na bo na Atua kiano ilirianiano.
2TI 3:8 Tomu nalo na aju abinimei nei, kiniou nemial lo ajibe ka uolu na ilirianiano memedu, jibe tormoruo Mosis kiano bogo re nua, napano naljuo nei Sanesi bija Sampres, abinimei aberloglog niegeniege tomu nalo miroano kialo jidomiano. Im̃auano na naruei tomu nalo na aju amila kia navo, napano kialo jidomiano bilig ba bova, maka bunu avokar kiado viekouoiano, a ajaluvo aban ea dolu.
2TI 3:9 Venia napano nalo amila, naio bova laka, mia bogo na avar vironiano nene mia riyotuba bogo tai navo, tibe ka na miyotuba ka naljuo na neber vonganei. Bogo tai, nalo aiilo ka kialo sibiano nalo riyotuba ea vio medave, mia tomu nalo avitilubario.
2TI 3:10 Timoti, roju vio takurano bogo be ruei, mia nemijikia ka jau kobitikua vatitig kiniou. Jau komijikia kiniou jibe na, napano: komijikia vatitig venia na nojom̃a neberloglog ka tomu nalo komijikia vatitig kiaku bajago komijikia vatitig venia na nojidom ka noim̃auka ea kiaku meuliano komial ka kiaku viekouoiano ea Kristo naio toru jum̃abe komijikia ka kiaku jidomiano tebievi komial ka tinieku jii toru tomu dolu nalo komijikia ka bogokouo na vabe na binimei ea kiniou, mia nejikili noju ga
2TI 3:11 komijikia vatitig vovaiano nalo na kiaku uolu nalo amila ban kiniou, jibe ka ea komeli tolu na tortoru nei Antioko, Aekoniam, bija Listra ana komijikia niabe jalele na nabar ea jum̃alo ea bogo nene. Jogvaiano nalo nei ajikili laka, mia nobokar kiniou ga banbano nemial ka Tubo naio binimei burular kiniou den bogo na jogvaiano nalo nei nonovio.
2TI 3:12 Nao, kito nonovio nalo napano rojidom Kristo Yesu ka toa kito, p̃eli roje meuliano na bo vija naio, monoka rejikia ka mia ravar jogvaiano ea kulo dolu nalo.
2TI 3:13 Nina naio bo ga, mia jogvaiano dolu na jo na bova, nina napano tomu nalo na kirivova bija tomu nalo na sibiano mia avario. Vonganei aju amila bova laka ruei, a mia ala rivova tibe na rivan riva rivova lie vo, rivan riva rivova nonovio.
2TI 3:14 Mia jau Timoti, koim̃au ga vija jikiaiano nalo na bo napano kobokar ruei, a koim̃au rivan tibe na vija moneano nalo nabo napano kejikili koju jikili vatitigio eaio ruei. Tiniemo bobogu ea re ka kumemi kei napano nuberloglogso,
2TI 3:15 jikar ea bogo napano jau telisu kia ga vo ea kanamo vonuo, binimei bokar banei, mia mila na komijikia vatitig Niosi Lu, na naio berloglog m̃arabo na ioruriano na tomu nalo napano amonea Kristo Yesu.
2TI 3:16 Vivitauiano Lu nalo nei, Atua Niununo joalo, mia amijikia aija kito ve toru laka. Nalo averloglog vatitig kito rivu, alabon kiado jidomiano, ala vatitig kiado bajago, a ala kiado meuliano rimei rimemedu rivu,
2TI 3:17 rivanvano-o mia kito Atua kiano tomu nalo romei rovu a reve verare ka rala kiano im̃auano novo nalo.
2TI 4:1 Timoti, jibe ka kitojuo rojua Atua mirano, a ea Kristo Yesu siano, nebika denso ka jau kovar vatitig tenalo tai na nojidom nover kaso. Kitojuo remijikia ka be kiado Tubo, mia naio tibure nalo na am̃arm̃aro ruei vija nalo na ameul, a kitojuo roju rojidom temi laka ka kiano liliuano bereio, vija kiano navenatuboiano napano mia naio rivitiri lario, naruei mia monoka kojog vatitig iliano nei rivu.
2TI 4:2 Venia na ka jau kala naio jibe nei: bogo nonovio monoka jau koioliolu ka Iliano Lu. Verver bogo rivu p̃eli bogo rivova, mia monoka kesikili kotu ka koverialio. Monoka kalavon ka kovuru tomu nalo, monoka kovururiri nalo napano aban ea m̃arabo dolu, a monoka kotunukakar nalo napano amonea. Mia bogo na kala im̃auano nalo na, bogo nonovio kiamo jidomiano monoka rive tebievi rivu, mia maka lele kejikia tiniemo rim̃aro ka koverlogloglo.
2TI 4:3 Bogo nalo aju abinimei ka mia tomu nalo maka asidom ka ajog verloglogiano nalo nabo, a mia tilinielo rivilulu bior jidomiano doldolu nalo, a mia atu avuru naverloglogiano ve miroano ka p̃eli mia amijikia aver tenalo na bo kalo ka ajog rivu kanio.
2TI 4:4 Mia nalo atuvan jog kariano na ilirianiano, a mia alaluvuio m̃arabo, ava atakisor tukunuano nalo na tomu nalo ga amim̃aukanio.
2TI 4:5 Mia jau monoka tibe na re, a kala kiamo jidomiano to melumu ga, kovokarso ea bogokouo, kala kiamo im̃auano ka koioliolu ka Ioluano Vou, a koim̃au takii venia na Atua bioso ka koim̃aukanio.
2TI 4:6 Ea tivelinio na kiniou, nomijog jibe vonganei nebinimei vaataro ea juluvati, nebinimei ea vio tai na mia monoka nala sida ka kiaku meuliano rivior Ioluano Vou, nemial jibe kiaku bogo ka notuvan vio na naio jo binimei kiana ruei.
2TI 4:7 Mia naio bo ga, ka nemijikia ka kiniou nojo nemila mira, nejikili vatitig bo; kiniou nejikiti, nejovulu nono bo; a kiniou nobokar moneano, maka notuvan bogo tai.
2TI 4:8 Tomu na memedu nalo na Tubo kiano mia nalo avokar batubatu lu, a be tinieku ka kiaku naio midu vatitigio jo mave ruei, ka mia rudu van kiniou ea legiano na maaro. Ea bogo na, naio tibure tomu nalo rive memedu, a mia naio sian jidomiano van kito roviniu napano kiado jidomiano naio jikili ka rasirarago kuku ka kiano rimeiduluiano.
2TI 4:9 Timoti, kiniou nojidom laka ka kalavio sikili ka kalasop̃eli komei kean kiniou ea vio nei.
2TI 4:10 Kiniou nojidomso laka, kuruado nei Dimas, vite nalo na vio yetemeriba abur kiano jidomiano banbano buro ba Tesalonaika. Ea kiado dolu nalo, Kresens bunu jaluvo ba Kalesia, a Taitas maka bunu to vija kiniou, naio ba Telmasia.
2TI 4:11 Bilbilu tai ga naio jo bija kiniou vonganei, nina be Luka. Ana verver jau komijikia keleal Mak, mia kovuruio rimei vijaso, bior nemial ka naio jo miija kiniou toru ea im̃auano na Tubo kiano napano nojidom nala.
2TI 4:12 Tikikas, kiniou nemiila naio ba Eveso ruei.
2TI 4:13 Mia never kiaku tenalo tai, ver bogo na komei ea vio nei, mia jau kovarlo amei. Kiaku kulukoti na niavo, nabar ju bija Karpas bogo na nojo Troas, a kiaku niosi nalo bunu a kiaku m̃esi nalo, saba nalo na nojidom verver jau kavarlo amei.
2TI 4:14 Jau komijikia toro na mim̃auka tano p̃ili marau nei Aleksada, naio mila iliano bova telabo laka ban kiniou. Mia Tubo ga naio rivitii ka rila venia ka naio,
2TI 4:15 a monoka neverial ka kojikia ka naio jo mil die toru kiado Ioluano Vou, vonganei monoka kovitikar vatitigso ka naio.
2TI 4:16 Tomu nalo na tortoru na vio Romo nalo amila vioriano ka kiniou ea komeli vaarakurano ruei. Ea bogo na, bilbilu dolu nalo abiniu aburovuro, maka lele tai rimei to ka tivelinio na kiniou. Mia nina bo ga, bo verver Atua naio rila siniabu re kalo rivior.
2TI 4:17 Ea bogo na, Tubo naio takurano bija kiniou, mia nomijog jibe naio midu moroano toru ban kiniou, ana nejikili ka neberial vite nonovio na Ioluano Vou ea tomu nalo miralo, mila taara na nalo napano maka amonea Atua amijog. Ea bogo na, be riano, kiniou nojo joomo ea niono laeon ruei, mia naio midular kiniou denio bereio.
2TI 4:18 Maka nejikia mia noviniua venia na bova bereio, mia nomidu kiniou nojoa Tubo jum̃ano, ka naio mia rilarur kiniou ka noto vija naio ea kiano vio na bo mave ea tiniabene, a bogo nonovio mia kiniou neje bereio kanano mermerano vanio, rivano-o mia maka rijikia ribisi bogo tai. Mm.
2TI 4:19 Vite tealo bereio ka never, aua kover kavijo bo p̃eli bogiano bo ka tira nei Prisila bija koano Akuila, a bunu van nalo na Onesiporas kiano torogio nalo.
2TI 4:20 Erastas naio maka bunu rimei ea vio nei, naio jo Korin ga, a bogo na kumemi numitu nubinimei, nuboru Maelitas, ana Trovimas naio mie, nojuvan naio jobo ea vio na.
2TI 4:21 Timoti, nojidom laka vonganei ka jau komei sop̃eli ea vio nei, bior bogo na niavo jo binimei vaataro. Nalo na vio nei aberinavo neverial kaso ka nalo aju tinielo maio kaso laka, nina Yubulus, Putensa, Linas, Klotia, bija bilbilu nalo dolu.
2TI 4:22 Namaaro ea vio na, neber Tubo to vija niunumo, kiano tiniememiano to vija kamiu kuviniu. Kiniou, Pol.
TIT 1:1 Keneriku Taitas, kiniou Pol, najaaro laka ka nebiviuoso bereio ea m̃esi nei, ea Atua siano, napano nebe toro na kiano im̃auano, a ea Yesu Kristo siano, napano nebe kiano atevi. Nojoa vio nei, nojo nomim̃au kia ga vo bija tomu nalo napano Atua bijauia bulaglo ruei abe kiano, kar napano nojidom ka kialo viekouoiano rimei sikili lie, a kialo jikiaiano ea ilirianiano rimei ve toru lie vo. Verver tibe na, mia kialo bajago mijikia rimei memedu tibe ka bajago na Atua kiano tomu lu dolu nalo,
TIT 1:2 a mia amijikia avokar meuliano napano maka rijikia ribisi bogo tai. Kiado jidomiano ju jikili ruei ka mia kito rovakar meuliano na, kar napano Atua berkar nua beamu ka mia naio rila tibe na, a romijikia ka naio maka leleio rila sibi bogo tai.
TIT 1:3 Naio be kiado Atua na Ioruriano, ana bogo napano naio mial ka kiano bogo memedu, naio midu kiano iliano maluvo ka rila kiado m̃arabo na meuliano, a vonganei midu joa kiniou ka nava noioliolu tanea vio.
TIT 1:4 Ana Taitas, nina naruei kiaku m̃esi banso. Nemialso jibe jau kobe keneriku memedu napano kitojuo kiado viekouoiano ve takurano ga, mia kiaku volkouano karso naio ban jibe nei, ka Atua karam̃ado bija kiado Kristo Yesu na Ioruriano kialo tiniememiano a tum̃aroano to vijaso.
TIT 1:5 Nebivitau biedu, nojidom nala iliano vitunu vanso ea im̃auano napano kojo komila ea Krit kia ga vo. Beamu laka, kitojuo naruei robe moti ka romidu ioluano binimei ea vio nei, a bogo napano najaluvo, im̃auano na togio toru jo kiano vo, ana nomiduso kojo ka kala im̃auano nalo rimei rivu lie beamu. Jibe napano neber kaso ea bogo na, nojidom koselviv ea komeli nalo, koioua tomu tealo ka nalo amei ave navurim̃araboiano lu.
TIT 1:6 Nalo na, monoka ave tomu napano maka tokoriano tai toa kialo meuliano, monoka asoro ka koalo tira ve takurano ga, napano abe riano tulaka bijaio, a kenerilo nalo, nalo bunu monoka amonea Yesu, maka lele rimemedu kito reial parilo nalo sikili, p̃eli atu atup̃e kialo tormoruo juo kialo iliano.
TIT 1:7 Monoka tibe na bior napano tomu na tortoru na tum̃aro, abe tomu na vitikariano na Atua kiano im̃auano lu, ana nalo monoka ave tomu na memedu. Nalo asidomii re ka aver nalo abe toro tai, nalo monoka tinielo mimi sop̃eli re, nalo monoka amun m̃elea re uei na jikili, nalo ave re toro na tukurukuano, a nalo monoka asidom m̃elea re saba, maka leleio.
TIT 1:8 A ver tibe na, mia navurim̃ara-boiano kiano meuliano naio monoka mia tum̃abe? Bo ka naio vitikar valauo nalo ea kunuano, bija bajago novo nalo dolu na jibe nei. Bo ka naio rivuru vatitig im̃auano nalo, naio be masou laka, kiano jidomiano meravo bo, a naio jilanvuu bo ka kiano meuliano.
TIT 1:9 Ilirianiano nalo napano aberloglog ka naio, naio monoka rivakario sikili rivu, ka rila ka naio kija mijikia riverloglog lilie kanio rivano. Tomu tealo aber p̃eli kiado moneano be sibi, mia kiado verloglogiano novo nalo mijikia rila kialo iliano nalo maka rijikia sikili tu rivu leleio.
TIT 1:10 Tomu telabo nalo aju napano maka asidom ajog kito, ana aju amil miroano laka, ana aju amila dede ga ka avuru tomu dolu kialo jidomiano rive dolu. Ea Krit na, kitojuo rajaaro toru ka tomu miroano na Ju napano roburulo abinimei abe Yesu kiano tomu nalo, mia vonganei nalo dolu nei ajidom ka avurulo avan rivova bereio.
TIT 1:11 Jibe na, bo ka titai tokovio ka niolo, napano nalo aju amila bulag nono m̃aratavo tealo ruei. Nalo aju aberloglog tenalo napano maka amemedu ka averiio, a nalo aju amila dede ga laka ka alaio, maka rivior jidomiano novo, a kar jidomiano va nei ga ka p̃eli nalo ajikia avar veru ve telisu kario.
TIT 1:12 Ver p̃eli tomu nalo na Krit, kialo bajago jibe nei ga, bior toro tai ka rivivitau ea tukunuano re nua, napano naio be toro tai na kialo vio memedu, bogo tai naio beriilo, berinavo Tomu na Krit nalo abe tomu na sibiano, nalo abova jovulu kiribue, nalo abe tomu na yoviano, nalo abe tomu na ajidomii mabolo ga.
TIT 1:13 Toro nene, kiano iliano na jikili kija, a nemial jibe p̃eli be riano ga na, ana bo ver koil sikili vanlo, ver p̃eli, mia kialo moneano maka leleio rijikia rimei rimemedu rivu bogo tai.
TIT 1:14 Vonganei, nalo aju abokar jikili kulo Ju re beamu kialo tukunuano moruo nalo, a nalo aju ajaaro ka tomu tortoru dolu nalo kialo iliano napano nalo aju abukular ilirianiano, a kar venia nalo maka asidom amonmonea Atua kiano iliano lu novo nalo napano roju rejian banlo?
TIT 1:15 Toro napano kiano jidomiano meravo bo laka, tenalo napano miagiago maka rijikia rila kiano jidomiano rimei riagiago, mia saba nonovio meravo bo ka naio. Ana toro napano maka rimonmonea, napano kiano jidomiano miagiago, p̃eli titai meravo, mia maka rila kiano jidomiano rimei meravo, mia maka bunu titai napano meravo bo ka naio. Nina bior napano kiano jidomiano a kiano iviso nalo aba abova ruei.
TIT 1:16 Tomu nalo napano nojo nebivitauia nei, nalo aju aberial ka nalo amijikia Atua, a kialo im̃auano nalo na amila meravo ban kito ka nalo maka ajikia leleio. Kialo iviso minunu a mijalele, parilo kirisikili laka, nalo maka avare ka ala im̃auano novo tai leleio.
TIT 2:1 A Taitas, nemijikia ka mia kotibe na re, a mia monoka koto koverial kalo iliano nalo napano amemedu ka verloglogiano na memedu nalo.
TIT 2:2 Iliano tealo na resian van tormoruo nalo jibe nei, ber nalo monoka aikulkul re atu sikili m̃ariga, a bo ka asidomii ve temi ka kialo meuliano, bija kialo jidomiano ve masou vatitigio. Ea tivelinio na amonea Yesu, ea tivelinio na tinietii toro dolu, a ea tivelinio na sikili tu ea im̃auano, monoka avujo ka bajago na memedu bogo nonovio.
TIT 2:3 Tiramoruo nalo bunu kialo iliano tealo jibe nei ju, ber monoka avujo ka bajago na abatove ka Atua, nalo maka atu ail vova tanea vio van nalo dolu, a jidomiano ka amun uei na jikili maka rivakar m̃elealo. Im̃auano napano bo ka ala naio tibe na, monoka averloglog ka nalo dolu tenalo venia na bo ka aim̃aukanio.
TIT 2:4 Toru ea telikiti na tira m̃eaku nalo napano ajojoro vonga, nalo monoka averlogloglo ka m̃arabo vu nalo ka asidom vatitig koalo nalo vija kenerilo nalo.
TIT 2:5 Tiramoruo nalo nei, kialo jidomiano nalo monoka ave masou, kialo meuliano nalo monoka rimeravo, monoka avitikar vatitig kunualo nalo, kialo iviso abe tiniememi, a nalo aju abatove ka koalo nalo. Verver nalo ala tenalo nei, mia tomu nalo avitilubar ka Atua kiano iliano napano berial m̃arabo novo nalo nei, naio be vivitauiano lu tai napano bo laka.
TIT 2:6 Ea bajago nei kia ga vo, nojidom ka kosikili ka tete m̃eaku nalo, ka monoka atilanvuu vatitig ka kialo meuliano.
TIT 2:7 Bo ver bogo nalo aialso, nalo aial napano kojo komieliel beamu ka nalo ea m̃arabo na meuliano napano bo, napano bujo ka im̃auano novo nalo, ana nalo amijikia aue jaamo ea jaalo. Venia napano koverloglog ka nalo, monoka toa kiamo meuliano ruei, a monoka amijikia avitilubar ka jau bunu kojo kojidomii temi bereio eaio.
TIT 2:8 Venia napano amijog ka kojo koberial, monoka iliano nalo napano mia nalo maka ajikia ail vanso bereio kario. Ver tibe na, tomu nalo napano aserm̃i ka kito, mia nalo alavon ka atukovio ka kito, ana mia nalo ava ave vovu ga, mia maka bunu kialo iliano nalo napano mijikia sikili tu.
TIT 2:9 Ea tivelinio na nalo napano amim̃au kurano toro na toru kiano, monoka kala ajikia vatitigio ka nalo monoka avatove ka naio, a nalo monoka asikil ka ala napano naio mijikia saaro ka im̃auano napano amila be kiano. Nalo maka ajikia ailkuei van naio bereio,
TIT 2:10 a maka rivu nalo asidomii ka amijikia avina van kiano tenalo tertelisu tai rive kialo. Nalo monoka ave riano vu laka, ka ala napano kialo toro na toru mijikia rimonmonealo ka kiano tenalo nonovio. Bogo napano namoneano nalo aim̃au memedu rivu tibe na, amijikia ala kiado verloglogiano ea telikiti na kiado Atua na Ioruriano binimei mave toru laka ea kulo dolu nalo kialo vitiiano.
TIT 2:11 Bo ka tomu nalo avitilubar kiado moneano, bior napano Atua naio be tiniememi ea yetemeriba nei, jian ioruriano maluvo ea taara nalo na tomu nonovio nalo.
TIT 2:12 Naruei kito napano robakario, robitilubario napano Atua jo berloglog kito ka kiado meuliano, ka monoka rotuvan bajago va na tomu napano maka ajikia naio, a monoka rovilig taakado ka sidom vovaiano nalo na yetemeriba nei. Yetemeriba nei naruei naio be vio napano romeul rojuaio, a kiado meuliano monoka melumu rivu, monoka memedu, monoka rivare ka Atua kiano tomu nalo.
TIT 2:13 Monoka rotu tibe na ga, monoka rotu rorea ga bogo na bo napano kiado jidomiano joaio, napano kiado burum̃ara Atua, kiado Naioruriano Yesu Kristo mia maluvo eaio, bija kiano burum̃ara miamoiano.
TIT 2:14 Naio naruei napano mijamo ka kiano burukija miou kar kito, buru bulag kito den moroano na vovaiano, jekon kito romeravo robinimei robe taara lu tai ka rovar ka kito ka im̃auano novo nalo jibe napano naio jidomio.
TIT 2:15 Iliano nalo na naruei mia koto koverialio. Toro napano bo ka atunukakar naio, jau kotunukakario, a toro napano bo ka ail van naio, jau koil vanio. Bogo nonovio jau koim̃au vija moroano a sikiliano, a jau kotuvan re ka ailkueso p̃eli asidomii iakurano easo.
TIT 3:1 Bo jau koverloglog namoneano nalo ka asidomii bogo nonovio bajagvuiano ka alaio. Ea tilikiti na tubo nalo kialo, bija kialo tomu na tortoru nalo, napano aju, nalo monoka avamenealo, amonealo, a asaaro ka ala kialo im̃auano novo nonovio.
TIT 3:2 Mia jau monoka koverlogloglo bunu, ka nalo na, nalo maka ka atu averii niegeniegelo bereio, a maka rivu ka ava jouro ea baravoiano nalo. A bajago napano nalo monoka ala ka toro dolu naio jibe nei, ka nalo monoka amelumu, nalo ala re bajago napano ajikili, a monoka ala burum̃ara vameneano bogo nonovio.
TIT 3:3 Iliano nalo jibe na abe kiado robiniu, kar napano maka nalo dolu ga, ana beamu nua, kito bunu rojua meuliano va. Kito romila vovu ban Atua, a kito romila parido jikili ka naio. Bajago va buru bova kito banbano-o robinimei robe toro na jo yetano ka moroano na sidomivaiano nalo a saariano va na yetemeriba. Ea bogo na, sado sinaniano na bogoti bogo nonovio naio be tiniemimiano bija tiniekakariano nalo. Kiado iviso jerm̃ii tomu dolu nalo, a mave kanio, roju rejerm̃i kito bereio.
TIT 3:4 Kito rojua meuliano va jibe nei banbano-o, a iorou, Atua kiado Naioruriano, kiano tinievuiano a tinietiiano novo maluvo ea kito,
TIT 3:5 naio milarur riano ga kito. Naio milarur kito jibe nei, maka kar kiado im̃auano tealo na memedu napano p̃eli kito romilaio, mia bior ga kiano tiniememiano lu ea kito. Naio tinien miia kito, ana naio jekon kito, mia Niununo Lu mila kito romoluo bereio ea meuliano vou.
TIT 3:6 Yesu Kristo kiado Ioruriano kiano burukija miou jovuko kito.
TIT 3:7 Naina naruei m̃arabo na kiano tiniememiano, kito robinimei romemedu bo ruei ea mirano. Mia maka naina ga, mia mave kanio, naio mila kito robinimei robe kenerinio nalo, napano mia romijikia rovar buron kiano jajum̃ano napano mia jian ban kito, naina meuliano napano maka rijikia ribisi.
TIT 3:8 Siva toru kanio, iliano nalo na be riano laka. Nojidom ka jau kosikili ka Atua kiano namoneano nalo ka nalo avokar vatitig iliano nalo nei, a monoka nalo alavon sikili bogo nonovio ka avokar im̃auano novo nalo, napano amemedu, a napano amijikia aija kulo dolu nalo.
TIT 3:9 Bogo tai aju aberver iliano kurano nalo napano maka ajikia aija toro kiano meuliano, jibe napano aju amila baravo vovu ea jidomiano nalo napano maka ve sinaniano tai toaio, p̃eli aju amila baravo kar korobilo kialo saba nalo napano abokar vatitig sialo ju. Bogo tai aju amiolualo, banbano-o bokar napano kialo jidomiano mijikia tiburevure bunu ea iliano nalo napano Atua kiano tuboiano berenio. Mia bo ka kover ka namoneano nalo ka avuron re lo vija iliano nalo na jibe nei.
TIT 3:10 Ver toro tai to riasosolio, jo jup̃e iliano bogo nonovio, amijikia ail vanio ea bogo tai, ver makanio bogo ve valuo, a ver naio maka sidomial, jo mila duio ka mila, bo ka nalo avior re bunu vija naio ea tenalo tai.
TIT 3:11 Kito romijikia tomu nalo jibe na ruei, ka kialo meuliano nalo bilig bova, a kialo jidomiano nalo bujo ka kariano. Maka kito napano rober ka naio bova, mia kiano im̃auano nalo ga berial kiano vovaiano ea mirado robiniu.
TIT 3:12 Taitas, nojidom noverenio kaso ka ver jau keial napano neiila tomjuo nei Atemas a Tijikas nalo tinene rimaluvo easo, ea bogo na naruei jau komijikia kataluvo ea vio na, komila vio jikili ka komei keial kiniou ea Nikopolis. Nina bior napano maka ve sio, mia nataluvo den vio nei, nojidom nava notoa vio na riva rivokar bogo na niavo rivar laka ruei.
TIT 3:13 Naljuo dolu nei napano aju bijaso vonganei, naina toro na tuboiano neibano Sinas, bija Apolos, mia kolavon ka naljuo amijikia adu kialo m̃arabo ave juo bereio ve sio re, ka avan lie ea vio dolu nalo. Aua, jau kojai naljuo ka vaio napano jum̃alo bulati kanio.
TIT 3:14 Joaso bunu ka kotunukakar kiado tomu nalo tibe napano neber vonga, nalo monoka alavon sikili ka avar im̃auano novo nalo. Verver tibe na, bogo napano titai na iloiano, a nalo be kialo vite nalo ruei napano mijikia riijailo, a mila bunu napano kialo meuliano mijikia rivar m̃arati lie vo tibe napano Atua jidomio.
TIT 3:15 Nalo napano aju bija kiniou vonganei aberenio kavijo bo p̃eli bogiano bo banso. A bilbilu nalo napano aju bijaso napano aju ajidomii kumemi ka kito roviniu ea taara na kiado moneano ve takurano, aua kover kalo ka kumemi bunu numitu numisidomiilo. Kiaku volkouano ka mia Atua kiano tiniememiano to vija kamiu kuviniu tulaka. Kiniou, Pol.
PHM 1:1 Kiniou Pol, nojom̃a nejirii m̃esi nei biedu banso, Vailimon. Vonganei kiniou nojoa komeli labo na vio Romo, mia bior nojom̃a nemila im̃auano napano Yesu Kristo kiano, tenene na nalo amila kiniou nojoa yimo na tetavokoiano ea vio nei. Kuruado nei Timoti naio jo bija kiniou ea vio nei, naruei kumemi juo nuber kavijo bo p̃eli na bogiano bo banso, napano kito tolu romim̃au ea ga Tubo takurano ga,
PHM 1:2 a kumemi juo kenememi iliano nei jibe nei naio rivan bunu kuviviniedo na, Niavia, a van bunu toro na kiado bagaro na, Akipas, napano naio be toro kouo na mira na Tubo kiano im̃auano, bija bagaro na namoneano dolu nalo napano ajum̃a abior ea kunuamo.
PHM 1:3 Naruei kumemi juo nubolkouo ka mia Atua Karam̃ado, a kiado Tubo Yesu Kristo, nalo ve juo adu kialo tiniememiano a tum̃aroano to vija kamiu ea vio napano kumituaio.
PHM 1:4 Kuruaku Vailimon, bogo napano nojom̃a nejidomialso ea kanaku ilivol-kouano nalo, bogo nonovio nojom̃a nober siva dam̃ariga ban Atua biorso.
PHM 1:5 Nina bior nomijog ruei ka napano ajum̃a aberii kanamo bajago novo, napano kanamo viekouoiano ea Tubo Yesu naio jikili vatitigio bo, a kanamo tinietiiano ban namoneano nalo bunu, naio toru laka.
PHM 1:6 Ana nojom̃a nobolkouo kaso ka bogo napano kojom̃a kobiovio bulag kiamo viekouoiano ban kulo dolu nalo, mia rila nalo ajikia ve telabo lie vo ilivuiano novo nalo napano romijevio, napano romidu Kristo ea kiado meuliano.
PHM 1:7 Nao, Vailimon, kanamo tinietiiano novo na naio jom̃a mila namoneano lu nalo, kialo iviso amijog bo-o mia, mia bogo napano nomijog vite nei mila kiniou nomijog bo bereio, a mila najaaro toru kanio.
PHM 1:8 Nao Vailimon, kiniou nejidom novika titai denso. Ea burum̃ara im̃auano na Kristo kiano napano nojom̃a nemilaio, p̃eli memedu ga ka mia kiniou never batitig ga ka jau ka mia jau kala tibe na tibe na,
PHM 1:9 mia takii bajago na tinietiiano, maka nesidom neil sikili tibe na vanso. Vonganei nebinimei nebe tormoruo ruei, nojoa yimo na tetavokoiano bior Yesu Kristo, naruei nejidom nevika denso ga, verenio jau kajaaro ka kajamo ka vite napano ver nevika denso.
PHM 1:10 Mia toro tai joa vio na, ka bogo napano nojoa yimo na tetavokoiano jibe na naruei ana nobur toro nene binimei ea Kristo, mia vonganei nojo nemial naio jibe ka keneriku tai. Toro nene, Onesimas ga, napano beamu naio be toro napano jom̃a mim̃au kanamo, karina naio buro binimei ea vio nei.
PHM 1:11 Nao, toro nene, siano nioti nene be “Rila im̃auano na bo,” mia nemial jibe ka nanua beamu, naio maka tom̃a rim̃au batitig kanamo rivu laka. Mia vonganei, napano kiano meuliano mijulio ruei, mia kiniou nomonmonea naio ka mia naio mijikia rila im̃auano novo nalo ka mia riijaso, a naio mijikia rila im̃auano ka mia rijai kiniou bunu.
PHM 1:12 Mo, vonganei nejidom neiila bereio Onesimas riviedu rialso bereio naruei, jibe ka nomidular kiaku meuliano togio ga nemiila biedu banso.
PHM 1:13 Najaaro ver naio toa vio nei vija kiniou ga, ka rijai kiniou ea bogokouo nei, napano kiniou nojoa yimo na tetavokoiano bior Ioluano Vou, mia ver naio rila tibe na, javukia napano naio midu jelemo, naio mila im̃auano tai napano memedu ka mia jau kala van kiniou.
PHM 1:14 Mia maka rivu ka mia nesikili kanio ka mia naio to vija kiniou tibe na, bior jau maka kejikia. Nejidom ka vere jau kala im̃auano novo tai tibe na van kiniou, mia nina maka bior notutuaso kanio, mia bior kanamo jidomiano novo a kanamo tinievuiano ga. Venia napano mia Onesimas naio rilaio, ve kanamo ga ka mia jau koverialio.
PHM 1:15 Riano ga ka napano Onesimas naio buro denso, ana mia kei rijikia, p̃eli Atua ga mila naio jaluvo denso ka bogo na bulati tai jibe na, ka vere naio riviedu easo bereio, mia naio ve kiamo bo kanio naruei, rivano-o mia to toboto.
PHM 1:16 Nina bior vonganei, mia naio riviedu easo bereio maka bunu tibe ka toro na kiamo im̃auano ga, mia naio riviedu bereio tibe kanio kuruamo tai ea Yesu, napano jibe na naruei naio bo laka. Tinieku jii naio toru ruei, jibe ka kuruaku tai, ana nomonmonea ka mia jau tiniemo tii naio riva lie riva lie vo laka, bior naio be kanamo toro ruei, ana mave kanio, vonganei naio binimei be kuruamo bunu.
PHM 1:17 Vite na naruei nojom̃a nobika denso. Ver jau komial nejibe ka kuruamo, a ka robe juo robe tomu na romila im̃auano takurano ga, nejidom ka mia kovuru bereio Onesimas riviedu easo, rive verare ga ka napano ver neviedu easo, mia jau kasaaro ve toru laka ka mia kovuru kiniou neviedu ea kunuamo.
PHM 1:18 Mia vero Onesimas bina ka kiamo titai, p̃eli na naio mila bulag kiamo vite tai, p̃eli na vaio, mia kiniou ga nevitii vite nalo nene.
PHM 1:19 Iliano nei kiniou Pol nei nojom̃a nejiriio ka jum̃aku ga, javukia kana-ku verikariano tai banso, ka ver kosidomiio, mia kiniou novulu bulag nonovio kiano jabue denso. Mia p̃eli jau kotom̃a kosidomii ve dolu kia ga ka jau bunu be kiamo jabue tai napano toru joa kiniou, napano be kanamo meuliano vodolu, bior kiniou nemilaso kobokar meuliano nei ea bogo napano nomioliolu ka Ioluano Vou banso.
PHM 1:20 Tibe na, ana mia nejidom ka jau kala im̃auano novo na rivan kiniou napano nojom̃a nebika denso ea Tubo siano. Kuruaku liki, ver kala tibe na, mia nojog rivu ve toru laka bereio ea kiaku iviso, napano Kristo kiano meuliano novo naio jom̃a mim̃au ea kiado meuliano nalo jibe na.
PHM 1:21 Maka nemerou ka netiri iliano nalo nei vanso tibe na, bior nemijikia batitig ruei ka napano mia kala takii napano nebika denso. Nao, nemijikia bunu ka p̃eli mia kala rivu lie bunu, rivano-o mia tovulu kanaku vitiiano.
PHM 1:22 A nejidom nevika vite dolu tai denso bunu, ka neber bo kaso ka kala batitig kiaku vajoomo tai ea kunuamo, bior kiniou nebe kiaku jidomiano kouo tai ka vesiou re, mia Atua naio rijamo ka neviedu ea kamiu bereio, javukia napano kumitum̃a kubika denio ea kenemiu volkouano nalo.
PHM 1:23 Epavras nei, napano naio bunu kumemi juo numitua yimo na tetavokoiano ea vio nei bior Yesu Kristo, naio berenio Atua riilivu ka jau.
PHM 1:24 Ana nalo dolu na, Mak a Arestakas a Timas a Luka, napano nalo ajum̃a amijai kiniou toru ea im̃auano, nalo bunu aber ajum̃a tinielo maio kaso ea kanalo volkouano nalo.
PHM 1:25 Mia vonganei, kanaku volkouano jibe nei, ber tiniememiano napano Tubo Yesu Kristo kanano, naio toa kenemiu iviso nalo nonovio. Kiniou, Pol.
HEB 1:1 Bilbilu Ju nalo, beamu beamu laka binimei, ea m̃arabo telabo a ea bajago kinkin nene nalo, Atua na naio jom̃a berial kiano iliano vatelabo ban kiado tormoruo nalo, binimei ea kiano naverialiano nalo.
HEB 1:2 Mia voniganei, ea legiano na maaro nalo na kito rojua nei, naio mil ban kito jel ea kenerinio memedu Yesu. Kenerinio nene naruei napano beamu, ea tiiano na yetemeriba nei, Atua mim̃au eaio, ana na nalojuo ajii bogo nalo a vio nonovio, avona iorou kanio ana na Atua naio bitirilar kenerinio nei, naio mije vite nonovio monea jum̃ano be parinio kalo.
HEB 1:3 Kenerinio nene nei, Atua kiano mermerano mereralii kiano meuliano, jibe ka napano naio bar nonovio Atua mirano-o mia memedu garuei, naio be tovorovo na Atua kiano bajago. A moroano na kiano iliano naio jikili laka, naio ga bokar masosoua vite nonovio nalo na yetemeriba nei bija vio dolu nalo bunu aju bo. A bereio, naio naruei mijamo ka naio binimei milakon nono kiado kariano nalo biniu, mia bogo na mila nonovio kiano im̃auano na yetemeriba nei, ana naio bavin bereio tiniabene, ba jotano tivelinio vameruo na karam̃ano jum̃ano, napano be Barago na tiniabene.
HEB 1:4 Yesu jotano jibe na, naio toru mave loa ka nailiano nalo napano m̃a aju, bior siano na midu bior kiano im̃auano naio bo laka loa sialo.
HEB 1:5 Verver kito reial ea vivitauiano lu nalo, iliano miroano napano ju na m̃a aberenio Atua mila kenerinio naio loa lie vo ka nailiano nalo. Ea iliano nalo nei tai kalo, Atua mil ban kiano Naverikariano, naio berinavo “Jau na, kiniou namial jibe ka banei jau kobinimei kobe keneriku riano, a kiniou nebe karam̃amo riano.” A tai bereio jibe na bunu, naio berinavo “Mia kiniou nemei neve karam̃ano, a mia naio rive keneriku.” Iliano juo nei, Atua maka lele river ka kiano nailiano nalo nei tai, river naio be kenerinio lu, mia ber ka Yesu ga.
HEB 1:6 Ana be iliano tai bereio, na naio berii bogo na Atua jidom riila kenerinio motoru nene rimei ea yetemeriba nei, ana na naio berenio “Mo bo ka nailiano nonovio alotu ka naio.”
HEB 1:7 Mo tivelinio ka nailiano nalo, nalo amila im̃auano na bo telabo, naruei Iliano Lu beriilo berenio “Atua kiano nailiano nalo, abar kiano iliano, ajibe ka jegi, amim̃au Atua kanano, ajibe ka sebi.”
HEB 1:8 Mia bogo na Iliano Lu ber Atua kenerinio, ber naio loa laka ka nailiano nalo, beriio jibena ka naio bevirare ka Atua, bio naio ka Atua. Berii naio berinavo “Atua o, kanamo vio lu na m̃a kojojo tanea mia naio ritobo to. Nasitogo na kiamo navenatuboiano, na bajago memedu.
HEB 1:9 Jau kajaaro m̃ele ka bajago na bo, mia maka kosidom keial bajago na kirivova, naruei na kanamo Atua Sop̃i midu larso kojo mave kojo loa ka kanamo bilbilu nalo, naio mila burum̃ara saariano banso jibe ka amiovovuaso batitig ka bonotanunu maraiu tai.”
HEB 1:10 Ana ea iliano tai bereio, romial ka napano Atua Sop̃i bio kenerinio berenio Tubo, a naio berii vite nalo na m̃a naio milalo, berinavo “Tubo, jau na naruei jau kobitirilar burupati na yetemeriba, jum̃amo ga mim̃auka vio iauo mave.
HEB 1:11 Vite nalo nei, mia amdagdago, rivanvano-o mia avavakovio, mia jau kotobo koto.
HEB 1:12 Tavukia m̃adayebe moruo tai, mia jau kojukilo a keyabulaglo, a tavukia kanamo m̃ada kulum̃arauo tai, mia jau kovarvar bulaglo, ana mia jau koto kove terivou dam̃ariga, mia kanamo yuka nalo mia ribisi re bogo tai.”
HEB 1:13 Mia bereio, Atua kiano iliano dolu tai naio jo, napano maka leleio river ka kiano nailiano tai, mia naio berka kenerinio naio takurano ga, naio berinavo “Jau koto tano ea jum̃aku tivelinio vameruo, jau koto tibena, rivanvano-o mia nala kiamo uolu nalo amei atavukia m̃adayebe tai na m̃a kovijankon jaamo eaio.”
HEB 1:14 Naina naruei be iliano na maaro ea tivelinio nei, na m̃a berii jum̃abe ka Atua kiano nailiano nalo na aim̃au kanano ga, nalo abe niununo nalo na m̃a abar kanano iliano, a nalo na ka m̃a ajai kito na m̃a rojev ioruriano, mia be toro tai jo napano naio loa lievo kalo, nina naio be Kenerinio Lu na Yesu, napano Atua mil maariano ban kito eaio.
HEB 2:1 Ver tibena, iliano riano novo nalo na Ioluano Vou na bo na m̃a kito rojum̃a romijogio ruei, mia monoka rosidomii vetemii lievo kalo, monoka rovokarlo sikili rivu, ver p̃eli na, mia vier rivuru kito reielalo denlo bereio.
HEB 2:2 Tivelinio na tuboiano moruo re nua, nailiano nalo ga amidu binimei, mia iliano nene nalo amemedu ga bo, a ajikili. Nalakokoroviano na iliano nene nonovio, a jog volvoliano nonovio nene, sano mauo nene memedu jo ruei.
HEB 2:3 Mia voniganei, Ioluano Vou na bo na terivou naio binimei bokar kito ruei, mia naio toru lie loa ka Tuboiano moruo na beamu. Jibena, ver kito rosidomii kurano ea m̃arabo na kiado ioruriano napano joaio, mia maka rejikia rovuro den kanano vironiano leleio. Kanado Tubo nene naruei naio mila Ioluano Vou na bo naio miyotuba jukamu, mia nalo na m̃a amijog naio ka m̃a berialio ea tilinielo nalo, nalo kija aberial sosolio binimei boru ea kito, amila meravo ka be riano.
HEB 2:4 Mia Atua bunu miija iliano nei, napano m̃a mila vremesiano ninio nalo, a vite na vameneano nalo, a im̃auano nalo na kiano moroano, mia mave ka nina, naio biovio ka bulagio Niununo Lu kiano ijaiano nalo ban kito kei napano naio jidom rudu vanio. Ana na kito romial vite nalo nei ana romijikia ka Ioluano Vou na bo na Yesu Kristo kiano naio be iliano tai napano bo-o laka loa ka tuboiano moruo na kito kulo Ju kiado.
HEB 2:5 Kito romijikia ka Yesu naio loa lie ka nailiano nalo bior ea tivelinio na yetemeriba na to rimei keano, mia Atua rudu re kiano nailiano nalo ka ave tubo eaio, mia naio rudu totano yetano ka kenerinio.
HEB 2:6 Vite na niosi moruo berenio bunu, ea Barago Teviti kiano iliano tai napano berka Atua, naio berinavo “?Vite novo venia na joa toro, mila na jau kojidomii m̃elea naio jibe na? ?P̃elina venia mila na jau kojom̃a komiyotuba ka kulorinio kenerinio?
HEB 2:7 Beamu, jau komidu naio jotano ka nailiano nalo, mia nina naio be tena bogo bulati ga, mia voniganei, jau kobitirilar naio bereio ruei, jau komidu naio joa vio na loa laka tai mave bija kiano burum̃ara mermerano a kiano m̃arouano,
HEB 2:8 jau kabar vite nonovio ajutano ka kiano moroano.” Mia bogo na Atua mila kiano toro be parinio ka vite nonovio, mila na maka ve titai leleio napano naio maka rive tubo kalo. Naio mila ka mia tibena, mia binimei bokar vonganei, mia maka reial ka mirado vo ka vite nonovio nalo na yetemeriba nei naio rivokar jeleigio na Atua naio jidomii kanio.
HEB 2:9 Mia vite nalo naio makanio vo, mia dam̃ariga kito rotu resirarago ka Yesu, napano Atua bitirilar naio loa loa laka. Beamu, Atua naio tinien miia kito toru laka, ana na naio miila Yesu naio batove telisu ka bogo tai ga, mila naio batove yetano ka nailiano nalo, ana mila naio jen tanea jogvaiano napano m̃aro ka kito nonovio, mia iorou kanio, ana naio bitirilar naio bereio, miyovovua batitig naio bo bija mermerano na vio mave.
HEB 2:10 Atua kiano bajago na im̃auano na ka naio rilarur kito naio memedu, bior naio jii vite nonovio, a vite nonovio be kiano, naruei naio jidom ka mia naio tovulu meran bereio burum̃ara taara na kenerinio nalo ataluvo den yetemeriba nei, amei ave kiano bereio. Naio jidom ka rila tibena, mia ka rim̃auka tibena naio kirisikili laka, naruei naio mial m̃arabo tai ga ka rilaio, naio jibenei: be Yesu kiano m̃arabo na jogvaiano, napano mia Atua mila naio binimei be toro, naio be toro na m̃a je dulu m̃arabo ka tovulu kiado ioruriano.
HEB 2:11 Yesu naio mijikia tukamu ka kito tibena bior naio na m̃a milakon kito romeravo, mila na naio jaaro ka rial kito tibe ka robe m̃aratavo takurano ga kitoliko naio.
HEB 2:12 Kiano iliano tolu ban Atua ber jibenei. Tai joa niosi na Iouano, naio ber jibenei, naio berinavo “Mia kiniou naverial siamo na bo van kuruaku nalo, mia kiniou navameneaso tukamu ka kulorinio nalo.”
HEB 2:13 Mia dolu nene naio berial ka Yesu naio monea Atua jibeka na kito romonea naio, be iliano na joa naverialiano Aisea, naio berinavo “Kiniou nei, kanaku monmoneano nomidu joa naio.” Mia nana maariano, iliano tai bereio ea Aisea, naio ber Yesu bija kuruano nalo, naio berinavo “Ninei be kiniou nene nei nojo nei kumemliko Atua kenerinio dolu nalo napano naio barlo ajua jum̃aku.”
HEB 2:14 Mia kito robiniu robe Atua kenerinio nalo kia nei, kito robiniu robe kulorinio, bija niabedo a kiado burukija, mia ka Yesu rimei rive kuruado be riano, naio binimei ea yetemeriba nei, midu niabene a kiano burukija jibe ka kito ga. Tibena, mia bogo na naio mijamo ka bereio, naio m̃aro bior kito, naruei kiano m̃ariano nei naio muelar moroano na parinio tubo na kirisikili na m̃ariano kiano, nina be Sim̃aro.
HEB 2:15 Naio muelar Sim̃aro kiano moroano, ana naio mijubar bulag teli nalo na merouano na m̃ariano na amiorkakar tanea niegeniege kito, napano mila kito romijog bova biorio ea kiado meuliano momou.
HEB 2:16 Riano ga na, Yesu kiano im̃auano novo na ijaiano nene, naio maka rila rivan nailiano nalo na vio mave, mia naio mila ban kito tomu na yetemeriba nei. Iliano telabo na m̃a aber vite na jibena, aberinavo “Naio jom̃a miija batitig tormoruo Epraamo kiano bajulukuti nalo.”
HEB 2:17 Naina naruei be Atua kiano jidom-iano naio jibenei. Naio mial bo ka mia Yesu naio rimei tibeka ga kito kuruano nalo ea vite nonovio, rivanvano-o mia mijikia rijikia vatitig kito rivu, naio mijikia tinien riia kito. Ana mia kito ravarkar tiniedo ea naio, ka mia naio riviekouo ea im̃auano na mia naio rila van Atua rivior kanado kariano nalo, napano naio mila kiado merevuiano bija Atua, jibeka naio be kiado parinio toro lu.
HEB 2:18 Naio mial burum̃ara lavoniano na miyotuba ka kiano meuliano, naio mijog bova bano-o na naio jovulio, mila naruei naio mijikia rijai vatitig kito bereio rivu ka bogo na lavoniano naio binimei jikili bunu ka kito.
HEB 3:1 Kuruaku a kuvivinioku lu nalo, na m̃a kamiu kumonea vioano na mave ruei, kiniou neber ruei ka kamiu ka Yesu naio mijikia rijai vatitig kito rivu, mia naruei nejikili ka kamiu, nejidom na ver bo ka kuvilavon ka kuvisidomial naio lie vo, tibeka na naio be atevi a naio be parinio toro lu na kanado moneano.
HEB 3:2 Ralavon ka revitii vatitig Yesu naljuo tormoruo Mosis re nua nei. Tormoruo Mosis re nua, naio biekouo laka ea kiano im̃auano ea Atua kiano m̃aratavo, a Yesu bunu naio biekouo laka ea kiano im̃auano, na m̃a Atua bitirilar naio ka rilaio.
HEB 3:3 Nalo abe juo abiekouo ea im̃auano, mia Atua bitirilar Yesu naio loa lie laka ka Mosis, bior naio jibeka na Mosis naio jo joomo ea Atua kunuano naio jom̃a mila kiano im̃auano sesa nalo eaio, mia im̃auano na toru ka avitirilar yimo nei, Yesu naio takurano mim̃aukanio.
HEB 3:4 Yimo nonovio, monoka ve toro tai na ka m̃a riim̃aukanio, ana Yesu nene naruei naio mim̃auka Atua kunuano, mia Atua naio be parinio ka im̃auano na ga.
HEB 3:5 Jibena, Mosis naio be toro na im̃auano, na kirimemedu bo ea kiano im̃auano nonovio na jouro ea Atua kiano m̃aratavo, rivanvano-o rivokar ka na m̃a naio be toro na m̃a berverial Atua kiano iliano nalo na burutomormoruo na m̃a ajum̃a aberial lilianlo binimei bokar voniganei,
HEB 3:6 mia Kristo naio mila lievo, bior ka naio biekouo ka rivitikar im̃auano na burutomoluo nonovio ea yimo nei, jibeka na naio be kenerinio motoru kar garuei ka naio be napano boru na yimo nene. ?Ana yimo nei naio jom̃a ber venia, p̃elina ber kei? Naio jo ber kito ga, bior ka na ver romerou re, a ver rajaa-ro ka kiano verikariano nalo, rovokar vatitig rivu kiado verikario ealo, mia kito rove kiano m̃aratavo lu memedu.
HEB 3:7 Be iliano tai joa vivitauiano lu, napano naio be iliano na Niununo Lu ka labon kito, napano naio ber jibenei, naio berinavo “Banei, ver kamiu kuvijog joono,
HEB 3:8 maka rivu ka kenemiu jidomiano rimei sikili bereio, tavukia na kenemiu tormoruo nalo amilaio. Beamu ea vio iauo, ajua bogo tai na lavoniano toru laka, aju banbano-o karina ajumolu amila pariparilo bereio.
HEB 3:9 Naruei Atua mial lo, ana naio ber jibenei, berinavo. Ea kialo ieliano ka yuka duelimo va ver [40] nei, dam̃ariga kiniou nojo bijalo, amial kanaku ijaiano novo na banlo, mia kialo bajago nalo na aju amilavon kiniou laka.
HEB 3:10 Kialo veribinio nei naio mila tinieku bilulu m̃ele, ana namial jibe makanio, nalo na julaka ga ajum̃a aburvuru dedade ealo ajanea vio ajum̃a ajaluvo den kiaku m̃arabo na memedu nalo.
HEB 3:11 Tinieku m̃aro ka nalo na jibe na ruei, tinieku kiri seri tanealo, naruei nojumolu namila verikariano tai, neberinavo buruvenuo na jilimebiano novo na kiniou namila batitigio bo jo kalo, mia maka ajikia ava jouro ea bereio.”
HEB 3:12 Kuruaku nalo bija kuvivinieku nalo, bior vite nalo na mia bo ka mia kamiu kuvitikar kamiu rivu. Maka rivu ka mia kamiu tai, jidomiano na bova toa naio, p̃eli kiano iviso rimonea re bunu, ka mia rila naio rivan bereio taluvo den meuliano nabo na Atua na meul kiano.
HEB 3:13 Maka rosidom ka mia kito tai rijoru tibena, naruei monoka rotunukakar kito dam̃ariga ka legiano nonovio, ka mia ve re tai ka kito napano bajago na kariano atum̃a atubolbolili lelan naio rivano-o mia rimenini nonovio. Iliano na mave na ber “Banei, ver kamiu kuvijog joono Atua,” mia naio be iliano na beamu tai, mia naio ju jikili kia ga vo, joono naio jom̃a bio kiaga vo, kito rojua legiano nalo na jogvaiano kiaga vo.
HEB 3:14 Bokanio kito rovokar vatitig sikili kiado moneano ea naio tavukia ga na m̃a rojum̃a romonmonea jukamu, bo ka kito rotu sikili rivanvano-o rivokar jukuti. Ana vere rotum̃a ralala ga tibena, mia kitoliko Kristo, kito tomu nalo na m̃a ravar bitiran Atua kiano mermerano novo nalo rivija naio.
HEB 3:15 Rian ga na, iliano lu na mave naio ber jibenei ber maka rivu ka kenemiu jidomiano rimei sikili bereio, tavukia nanua m̃a kenemiu tormoruo nalo amilaio ea kialo bogo na lavoniano beamu ea vio iauo, napano ajumolu bereio amildie Mosis.
HEB 3:16 ?Mo nalo na m̃a amila parilo jikili jibena, nalo abe kenia? Nalo na m̃a amila jibena, nalo na m̃a beamu ajaaro ka m̃a amidu Atua joono ruei, abatove ka kialo tor na toru Mosis, naio jukamu kalo ajaluvo den Ijivi. Naio jukamu kalo abatavio, mia maka vesiou, ana amildie naio bereio.
HEB 3:17 ?Mia nalo na m̃a amilavon Atua, ajuljulu tiniene ka yuka duelimo va veri [40] nei ea kialo burutili m̃arabo nei, banbano-o na naio tinien jerlo toru, nalo nene kiaga nei vo, a? Ee nalo na m̃a amila jibe nei, nina nalo kiaga nene kiana vo na, napano naio milarurlo, mia iorou kanio ana ajum̃a amila kariano dam̃ariga ea mirano, mia iorou kanio ana naio milalo napano am̃arm̃aro ga, salo buriu nalo abe dedade ea vio iauo.
HEB 3:18 ?A nalo na m̃a naio berkar ber mia nalo ajikia lele re ka mia ava jouro ea kiano buruvenuo novo na jilimebiano napano naio mila batitigio be kanalo, nalo abe tomu na ajum̃abe? Nalo na maka ajikia avano, nina nalo na m̃a amila pariparilo, a nalo na m̃a maka adu niono.
HEB 3:19 ?Mia venia na mila napano maka ajikia ava jouro ea vio novo na jilimebiano nene? Maka ajikia avano, bior maka amonea kar Atua, maka avarkar tinielo ea naio.
HEB 4:1 Naruei beamu, Atua naio mila batitig kiado tormoruo nalo kanalo vio novo na jilimebiano tai, mia voniganei naio mila batitig ber ga bunu kiado jilimebiano lu tai ruei jibe na. Verikariano na jilimebiano na naio meul batitig bo jo kiana vo, naruei maka rivu ka kito rotibe ka kiado tormoruo nalo nei, napano amilaluvu kialo jilimebiano nene, nalo miroano maka ava jouro eaio. P̃eli bo ka kito rotu rovitii vatitig kito rivu, maka rivu ka rotu ga o-o mia kito tealo nalo bunu alaluvu kialo bogu, avitiilo ka maka ajikia avokar kialo jilimebiano.
HEB 4:2 Nina bior kito rabare ga ka kiado tormoruo nalo nei, ka lilianiano na bo na Atua kiano binimei bokar kito, javukia napano bokarlo, mia nalo amila jibe ka amijogio, mia maka ajedu moneano mave kanio. Nalo maka aje batitigio rimon ea kialo meuliano, naruei iliano nei maka rivar m̃arati ealo.
HEB 4:3 Naruei ea tivelinio na nalo na maka amonea naio jibe na ana na Atua mil jikili ruei, naio berenio iliano na kiniou nebivitauia mave vaarakurano garuei. Iliano nene naio berinavo “Nalo na amila m̃a tinieku jerlo toru laka, naruei neberkar ka mia ajikia re avokar kanaku jilimebiano nei.” Mia kito na ga kito romonea naio riano, jilimebiano nei naruei naio be kiado, ka rava jouro eaio. Atua kiano jilimebiano nene, naio mila batitigio bogobe ruei jo be kiado, bior ka bogo na tiiano, naio mim̃auo ea legiano ari nei o-o biniu,
HEB 4:4 ana jibe ka Iliano Lu naio ber kovio tai navo, ka legiano aluo, mia naio mijilimebi ka kiano im̃auano nalo, maka bunu rim̃aukalo bereio.
HEB 4:5 Ana vite takurano bereio, be iliano na mave naio berii Atua ka naio berinavo mia tomu tealo ajikia re avokar kanano jilimebiano,
HEB 4:6 ana na iliano nei mila kirimeravo ka monoka ve tomu nalo na vio dolu tai bereio na mia Atua naio rijamo kalo ava jouro eaio. Nalo na beamu, amijog Atua kiano lilianiano vou na bo, bija buruvenuo na berkario ka ve kialo, mia maka atu sikili, maka amonmonea, mia nalo amilaluvu tanea garuei, maka ava jouro eaio.
HEB 4:7 Mia kiado jilimebiano jo kiano vo, a Atua jekar legiano nene memedu ka mia rovokario, bior yuka miroano barlaka ruei, avona bisi, ana na parinio tubo Teviti naio berial iliano nalo na aju mave ruei, napano naio ber jibe nei, berinavo “Banei, ver kamiu kovijog joono, maka rivu ka kenemiu jidomiano nalo amei sikili bereio.” Bo ka rovitilubar ka “banei” napano naio berenio ea vio nene nainei naruei kito rojua nei ruei, napano Atua jekar ka ber bogo nene memedu ka rovokar ioruriano eaio.
HEB 4:8 Kuvisidomii von tormoruo Yosua nei nua. Naio jukamu ka kiado tormoruo nalo nei togio abano jouro ea buruvenuo novo napano Atua berkario, a ver naina naruei naio be Atua kiano jilimebiano na amijevio ruei, mia Atua maka bunu rijikia riverii bogo dolu tai bereio ka Teviti, ka river be legiano na va jouroiano ea kiano jilimebiano.
HEB 4:9 Ana makanio, naio jom̃a ber be jilimebiano lu tai naio jo keano be kiano tomu nalo kanalo,
HEB 4:10 mia ver kei na riva jouro eaio, mia rivu mia rivu ka naio, naio mijikia rijil mebi ka kiano im̃auano nonovio, tavukia na Atua naio mijilimebi ka kanano.
HEB 4:11 Ver tibena, bo ka kito resikili ka ravokar jilimebiano lu novo na, maka rivu ka mia kito tai bunu rimonmonea re Atua, ka mia rilaluvuio.
HEB 4:12 Kito rojutano ka Atua kiano iliano, bior kiano iliano naio meul, naio jom̃a mim̃auo jikili laka, naio mijikia julu dulu toro kiano meuliano, naio mali laka jovulu iobogu na mira napano mali ea ikiti be juo. Atua kiano iliano naio mijikia riovodulu riva joomo ea kito, riva tibure venia napano joa kiado jidomiano, p̃eli vitii venia napano joa niunudo.
HEB 4:13 Nao, naina mia rivitii kiado meuliano, mirano joa vite nonovio, maka kito tai napano mijikia toluku ka naio.
HEB 4:14 Atua mijikia vite nonovio ea tivelinio na kito, mia siva ga kanio ka napano kenerinio, kiado parinio toro lu na toru na Yesu, naio juvan vio nei naio mijaka ban ea kiano vio mave niogovu, naio ba mila merevuiano ban Atua kar kito bereio. Mo bior naio jom̃a mila batitig kito bo bija Atua jibe na, mia bo ka rovokar sikili kiano moneano, bo ka rotuvan re naio bogo tai leleio.
HEB 4:15 Kiado parinio toro lu nei, naio maka ve tai na m̃a maka rijikialubar kiado mijikikiano, mia naio mijikia vatitig ka kito maka m̃a rotumolu rotu sikili laka. Naio tinien miia kito, mia naio rijai kito, bior beamu naio bunu, juboluboiano nalo abinimei kirisikili laka ban naio ka tivelinio nonovio, jibe ka ga napano m̃a ajum̃a abinimei ea kito. Naio javukia ga kito, mia vite takurano ga, juboluboiano maka rivuru naio rijoru ea kariano leleio kija garuei.
HEB 4:16 Jibena, ana kito romial ka napano robe kiado m̃arabo naruei napano romijikia ralavon ka rojian kija kito romei vaataro ka Atua kanano jobaro lu, napano be burupati na tiniememiano. Kito romerou re bunu, rasaaro ga ka romei ea Atua, ana na mia rovokar kiano tinieiiano ea kiado meuliano, rovitiio ka kiano tinievuiano naio mijai kito ea bogokouo vaio na rojoaio.
HEB 5:1 Nalo nam̃a abokar im̃auano na parinio toro lu, abitiri bulaglo den kulo lu dolu nalo ka aim̃au tibena naruei. Parinio toro lu naio be toro tai na mia tumolu to iviso ka tomu nalo a Atua, ka mia sian ijaiano nalo p̃elina sida nalo na kialo riva naio, ka naio mijikia riviekokoa kialo kariano nalo.
HEB 5:2 Parinio kulo lu nei naio bitilubar batitig bo ka na m̃a tomu nalo amim̃au bova, ajum̃a amiel belbele amilaluvu m̃arabo, bior naio bunu be sunbue, mijikia jikia, naruei naio mijikia tinien miia tomu dolu nalo riano, mijikia melokloko vanlo.
HEB 5:3 Naio a javukia ga tomu dolu nalo, naruei bogo na m̃a mila jokoluolu nalo, monoka rila, maka ka tomu nalo ga kialo kariano, mia bior kiano kariano bunu.
HEB 5:4 Bior vite na, maka rivu ka tor tai ga rivijauia naio bereio ka naio river bo ka naio rimei rive parinio toro lu, makanio, mia Atua ga mijikia rivijauialar toro na mia mijikia rudu sio na toru na jibena, jibeka naio bijauialar tormoruo Erono re nua naio be kiado parinio toro lu na be moti garuei.
HEB 5:5 Ana tivelinio na Kristo kanano naio jibena bunu. Naio be kiado parinio toro lu na toru, mia maka rivevavinia naio ka river naio jibena, mia Atua ga bitirilar naio. Atua kiano iliano na m̃a ber jibena naio jikili jua vivitauiano lu moruo nalo re nua, napano tai ber jibe nei, naio berinavo “Jau na, kiniou nemial jibeka banei jau kobinimei kobe keneriku riano, a kiniou nebe karam̃amo riano.”
HEB 5:6 Mia dolu naio ber jibe nei ber “Kiniou nomiduso kojo javukia tormoruo Melkeseteki, jau kobe parinio toro lu na maariano na ea kiano bajulukuti, ka na mia jau kovokar im̃auano nei rivan mia ribisi deio.”
HEB 5:7 Atua midu im̃auano nei ban Yesu, naruei romial ka bogo na kiano meuliano na ea yetemeriba nei, naio milaiio ruei. Dam̃ariga naio jom̃a jidom yetemeriba nei toru laka, naruei naio jegi ban Atua, sano jogumirano miou biorio. Naio jom̃a biekouo jikili ea Atua ka ver kiano meuliano rivakovio, mia Atua rila naio rimeul bereio, naruei naio jikili lie ka m̃a bolkouo bior kito ban naio. Ana na Atua naio tinien miia, bitii kiano bajago novo na namelumuano a navatoveiano na Yesu kiano, ana na mijog kiano viiano.
HEB 5:8 Be riano ka Yesu be Atua kenerinio ruei, mia Atua naio mijamo ka jogvaiano na jikili nalo amiyotuba kanio, jidom ka riverloglog Yesu ka rivokar vatitig rivu bajago na monmoneano ea kiano meuliano.
HEB 5:9 Naio batove ka karam̃ano kanano sidomiano nalo abiniu, bano-o na mila nonovio im̃auano na Atua midu banio, mila na Atua bitirilar naio javukia tormoruo Melkeseteki. Jibena, Yesu binimei be Atua kiano parinio toro lu, binimei be burupati na meuliano na maka rijikia ribisi, na kiado robiniu napano romijogkar naio.
HEB 5:11 Naruei sio nei Melkeseteki, naio be kiano tukunu moruo na bo nalo aju, napano amijikia ala rimeravo rivu van kamiu jum̃abe ka tete na bija kanano im̃auano. Kirisikili ka avisivisii rivan kamiu, bior be bogo tai napano m̃a burutiliniemiu nalo abonvono kija. Mia ver kamiu kuvilavon ka kuvijoglubarbario,
HEB 5:12 mia rivu, bior kamiu kumonea bogbe ruei, mia memedu ka kumei kuve naverloglogiano na iliano lu na Atua kanano ruei. Ana makanio, kumitu jibena ga, ka mia averloglog ka kamiu bereio, tikar bereio ea burupati na iliano nalo na kiano. !Riano ga na, kamiu na ka mia kuvisen sinaniano na jikili ruei, mia jibeka napano kumitum̃a kumisidom kumunu yu kia ga vo!
HEB 5:13 Kulo be na m̃a ajum̃a ajidom amunu yu jibena kia ga vo, nalo abe kiritete kia ga vo, tenene na maka ajikia ave masou rivu ka iliano na m̃arabo na memedu,
HEB 5:14 mia nalo na m̃a ajum̃a ajen sinaniano nalo na kirisikili, na ameruo bo ruei. Nalo na ajibe nei, kialo jidomiano nalo amim̃au bo bano-o abitii lubarbar vite nalo nonovio, naruei amiluo abinimei abo bokar nana abitilubar vatitig vite venia nalo na bo a vite venia nalo na bova.
HEB 6:1 Bior jidomiano nalo na, mia bo ka kito rotuvan bajago na kiritete naio to, rava lie rivija Kristo kiano verloglogiano na jikirkili jibe na, napano amemedu ka jidomiano nana mermeruo bo. Kito robilig kito den im̃auano va nalo na m̃ariano ruei, kito robokar viekouoiano ea Atua ruei, ana maka rivu ka rotum̃a rajajaloa bereio. Naio jibe ka na romilakon jeleig yimo ruei, mia be bogo na rotu rovitirilar tu sikili naruei.
HEB 6:2 Ajiloglog kito ruei ka varueiano, a ajokol pariparido ruei, romonea ruei ka mia rotumolu bereio den m̃ariano, a romijikia ruei ka tibureiano tai jo bija kiano vironiano napano mia tomu na bova mia avokar rivano-o mia rijikia re ribisi bogo tai. Mia vite nalo na kito romiovo dulu ealo ruei, mia maka rivu ka rotum̃a rataki jaado ka m̃a reseliviv ea vite nene dam̃ariga, mia bo ka rotu rava lie vo vija kiado Tubo.
HEB 6:3 Vite na kirisikili, mia ver Atua naio rijamo ka ga rivan kito, mia romijikia ga ka roim̃aukanio.
HEB 6:4 Nao, mia kito monoka ralavon ka rotu rava lie vo rivija naio dam̃ariga, mia tum̃abe ka nalo na amijoru, aban bereio ruei? Nalo na beamu amiel bo ea miamoiano, a ajum̃a ajinan ea tiniavio na vio mave ruei, a Niununo Lu binimei ealo bunu, mia bogo na m̃a aban bova bereio jibe na, mia maka bunu ajikia aviliglo amei bereio ea meuliano na bo.
HEB 6:5 Atua kiano Iliano Lu naio miija batitiglo bo ea kialo meuliano, ana abokar kija moroano na navenatuboiano napano jo binimei,
HEB 6:6 mia bogo na m̃a abilig bereio taakalo, amila pariparilo jibe na, mia tum̃abe ana ajikia amei bereio rivu? Makanio, mia rivova laka vanlo, bior ajum̃a amila jibe ka napano ajukukakar Atua kenerinio mave ea m̃akolkolo bereio, ka jum̃alo nalo, tibe ka napano ajum̃a amidular naio ea tomu nalo miralo ka aiolua searia siano bereio.
HEB 6:7 Kuvisidomii von ninei. Borotano na m̃a jo munu yuo nam̃a jibirbili julaka eaio, mia naio bar m̃arati miroano ka nalo napano aim̃au eaio, ana mia Atua jaaro toru kanio, kiano ilivuiano joaio.
HEB 6:8 Mia borotano na na maka rivar tena bo, bar ga soro na bova, naio jibe ka napano aberkar m̃ariano ga banio, mia maka ajikia ala tena bo tai eaio, mia aisebio ga.
HEB 6:9 Be riano laka banalo, iliano nalo na jibe na ajikili laka, mia tivelinio ka kamiu, maka rosidomii ka kumitibena. P̃eli ga, kiniou nabarkar tinieku ea kamiu, ka m̃arati na bo nalo na meuliano vou ajum̃a amiluo bo ea kenemiu meuliano kia navo.
HEB 6:10 Kiniou nomonea Atua ka mia naio tiniene ribobogia re kenemiu im̃auano na bo nalo ka mia naio sidomii ve iakurano re ea kenemiu bajago na bo na tinietiiano a auaiano ka na kumila banio, ka bogo na m̃a kumijai kiano namoneano lu dolu nalo. Kamiu kumim̃au bo jibe na mila na Atua jaaro toru laka kanio, mia naio bunu rila rimemedu a rivu ka kamiu.
HEB 6:11 Tibe na, ana mia nojidom notunukakar kamiu bereio, ka kamiu kuvan re bunu, kuvisikili ka kuva lie vo rivano-o rivokar jukuti nene, ka mia monoka kuvokar vatitig vite nonovio na m̃a kenemiu jidomiano joaio.
HEB 6:12 Kamiu kuviovo re, niabemiu rimelukluku re, mia kuvim̃au sikili rivare ka kiado tormoruo novo nalo nanua m̃a abokar masosoua im̃auano nalo, napano kialo jidomiano nalo terebievi bano-o na abokar vite nonovio na Atua berkario beamu ruei banlo.
HEB 6:13 Verikariano tai na jibe na, Atua mila ban Epraamo, napano naio berkar jikili banio ea tivelinio na yati nalo na mia ayotuba eaio. Maka ve sio dolu napano Atua naio mijikia river ka rila kiano verikariano nei naio sikili, bior siano naio loa laka ka sio dolu nalo, naruei Atua berkar ea siano bereio, naio berinavo
HEB 6:14 “Kiniou Atua, kiniou neilivu kaso ve toru, ka mia nala kiamo bajulukuti amei ve miroano laka ea yetemeriba nei.”
HEB 6:15 Mia vaataro ka Epraamo rimonea re iliano nei, mia naio mial ka napano Atua mila kiano verikariano nei jikili bo laka, mia be kurano Epraamo bokar bogokouo miroano, mia naio maka tuvan verikariano nei, naio bokario bo bano-o na naio jikar ka bokar venia na m̃a Atua berkar banio.
HEB 6:16 Ka tivelinio na bajago na ala verikariano jikili, tomu nalo ajum̃a aberii tor lu tai siano p̃elina vite lu tai. Mia bogo na tomu dolu amijogio, monoka amonea ga, maka bunu ajikia ail mum̃ii ka bereio, bior sio na aber naio mila iliano nene tu sikili.
HEB 6:17 ?Mia jum̃abe ka Atua? Naio bunu tinien jii ka rila kiano iliano ea kito sikili rivu, ka mia romonmonea, maka rejikia rovitovitonia naio kanio. Kito rojibe ka kiritete nalo na mia ravar kiano jajum̃ano, naruei naio jidom ka rejikia rive riano ka kiano jidomiano na bo ka kito naio maka rijikia ribisi bogo tai, naruei naio milakar verikariano nei ban kito naio jikili bo laka.
HEB 6:18 Atua kiano verikariano ka kito jibe na naio bo, naio jikili ruei, bior naio maka rila sibi bogo tai, kiano iliano maka rijikia rive dolu bogo tai, mia mave ka kiano verikariano, berkar bija siano lu bereio. Ana vite juo nei, kiano verikariano bija siano, naljuo amim̃au biju ka rila kito rotumolu rotu sikili ea kiano iliano. Kito roburo den vio na bova nanua m̃a rojujua mugaruei, rojum̃a rojiravo vio na tolukuano, naruei Atua kiano verikariano na bo nalo amila kiado jidomiano rimei rive tebievi rivu. Tibena mia kito romijikia rava rovokar vatitig rivu vio novo nei napano Atua naio mila batitigio bo midu jo kamu ea mirado.
HEB 6:19 Mia kiado moneano kouo nene, napano rober ka mia Yesu rilarur kito, naio be jidomiano tai napano jibe ka veru na m̃a bokar batitig uako jo. Mia naio rivokar vatitig kiado meuliano rivu, ka mia ve re titai napano mia rijikia rivurular kito bereio, rivano-o rivokar bogo na kito rava resel iorou ka burum̃ara jagidago joomo ea vio Lu napano be Lu laka. Ea Vio na, mia rotumolu rotua Atua mirano rimemedu, mia kiado jidomiano mijikia sikili rivu kianavo ka mia rivu ga van kito.
HEB 6:20 Nina bior Yesu naio jukamu ka kito ban ea vio lu nene ruei, naio ba mila kiano im̃auano jibe ka parinio toro lu na kiado, ka rila kiado merevuiano rivija Atua. Jibe ka na m̃a kito roberiio beamu ruei, naio javukia parinio tor lu na maariano na yati na tormoruo toro lu na Melkeseteki, naruei naio bulu bulag nono kiado kariano nalo ruei, ana mia rimonmon bo ka kiano im̃auano na kar kito rivano-o mia maka rijikia ribisi bogo tai.
HEB 7:1 ?Ana tormoruo Melkeseteki nene, naio be kei, a sano tukunuano nene jum̃abe? Niosi na Tikariano berii naio, berenio naio jo ka bogo na tormoruo Epraamo re nua, na naio be parinio tubo ka komeli lu moruo na Salemo, mia naio be toro lu na toru na Atua kiano. Ana ka bogo tai, ana tormoruo Epraamo ba mila mira ka kiano uolu nalo, ka parinio tubo dolu nalo, karina naio jo binimei bereio, ana naio biviuo naljuo Melkeseteki mia naio batove kanio, ana Melkeseteki mialio, ana milivu kanio.
HEB 7:2 Ana Epraamo mije ijaiano banio, duelimo jaluvo den tormomou ea vite nonovio nalo na naio mijevilo ea mira, napano naio jom̃a bar ban bere ea kiano vio. Mia burum̃ara toro lu nei naio be toro tai, na jibe ka siano juo nei aberenio. Siano na na jukamu nene, be Melkeseteki, nioti nene ber “Parinio tubo na memedu,” ana, siano juo nene naio ber jibe nei ber “Parinio tubo na tum̃aro,” bior naio be parinio tubo na komeli na Salemo, napano nioti nene ber tum̃aro.
HEB 7:3 Kema na, kiano tukunuano naio be dolu, bior ka maka romijog ka napano m̃a aberenio ka kiano tormoruo juo nei ajum̃abe, p̃elina korobinio nalo yati re be. Maka averenio ka kiano meuliano naio jikar jel jum̃abe, a tukunuano na kiano m̃ariano maka tai. !Jibe napano naio maka rim̃aro kulio, mia naio jom̃a bokar dolu ka ga kiano im̃auano vo! Jibe na naio jibe ka Atua kenerinio, napano naio be kiado toro lu riva vano-o mia ribisi re bogo tai.
HEB 7:4 Bior vite nalo na, romial ea Atua kiano iliano moruo, ka napano sio nei Melkeseteki naio be sio tai na loa laka, banbano-o na korobido tormoruo Epraamo, na m̃a ajidom sop̃eia naio ruei, naio bunu batove kanio, naio jian ijaiano banio ea togio na vite nalo na barlo ea bogo na jovulu mira.
HEB 7:5 Mia bajago na asian ijaiano na jibe na, naio be bajago tai na m̃a tuboiano berenio berinavo kulo Israel monoka ala tulaka. Nalo na abe tomu lu na kanalo yati na Livai, monoka ava avitikar vatitiglo, monoka asian duelimo taluvo den tormomou na kanalo saba nalo nonovio vanlo, bior nalo ajibe ka m̃aratavo takurano ga, abe bajulukuti na Epraamo.
HEB 7:6 Mia Melkeseteki nene, naio maka ve m̃aratavo na Epraamo, mia tormoruo Epraamo naio bitilubar ka naio be toro lu tai, ana naio bio ka togio na ijaiano banio. Tormoruo Epraamo nei naruei nanm̃a Atua berkar tonovo nalo banio, mia naio batove ka Melkeseteki. Mia bogo na Melkeseteki bokar ijaiano nei, naio jaaro milivu ka Epraamo, a nina naio mila kirimeravo ban kito ka naio loa lie kanio,
HEB 7:7 bior toro na bare ka rilivu ka toro dolu, naio monoka loa lie ka toro nene.
HEB 7:8 Mo na Melkeseteki naliko kulo lu dolu nalo nei, nalo nonovio abokar ijaiano na bevirare ga, mia abe dolu ka titai. Vite na jibe na, aber kulo lu nalo abokar kanalo, iorou kanio ana am̃arm̃aro, mia Melkeseteki naio bokar kiano, aberinavo naio jo bano-o na maka rim̃aro kulio.
HEB 7:9 Mo na jibe ka napano Melkeseteki naio loa lie ka tormoruo Epraamo, naio loa lie bunu ka sio dolu na tortoru napano Livai. Be riano ka na Livai naio be korobido moti garuei na yati na kulo lu memedu, mia naio bunu miyotuba ea yati na Epraamo, ana bogo na Epraamo naio batove ka Melkeseteki, naio jian ijaiano banio, jibeka ga na m̃a Livai bunu batove ka Melkeseteki jian ijaiano banio.
HEB 7:10 Vite na jibe na javukia bogo na Epraamo biviuo Melkeseteki, mila banio, Livai naio maka riyotuba ea korobinio nei navo, mia jibe ka napano naio bunu milaio.
HEB 7:11 Ana iliano nalo na mave nei aberial burum̃ara vite tai. Amila kirimeravo ka na Atua midular bajulukuti na kulo lu na Livai nalo, naio bitirilar bajulukuti dolu tai na kulo lu nalo, midu jo jeleig naio. Tormoruo Erono bunu naio bitirilar im̃auano na bajulukuti na kulo lu nalo, a Mosis naio bar kiano tuboiano miyotuba, mia ver Atua rial ka vite juo nei bevirare ka rila kito romemedu rivu vija naio, mia naio tuvan tobo. Mia makanio, naio mijebukua, naio miila parinio toro lu vou tai miyotuba ka kito, napano naio be bajulukuti na tormoruo dolu nei Melkeseteki.
HEB 7:12 Ana bior Atua bitirilar parinio toro lu vou nei, memedu bunu ka ver rivitirilar kiano tuboiano nene.
HEB 7:13 Naio monoka tibe na, bior vio nei naio berii kiado Tubo, napano naio miyotuba ea yati tai napano maka lele tai ka nalo sikili tu ea boda ka rila toro lu kiano im̃auano.
HEB 7:14 Yati napano Yesu naio miyotuba eaio, romijikia ka naio be yati na Yuta, ana bogo na Mosis berial sio na bajulukuti na tomu lu nalo, naio maka riverial leleio sio na Yuta.
HEB 7:15 Mia Yesu, be yati dolu na toro lu jo napano naio miyotuba eaio, naina naruei be Melkeseteki kiano bajulukuti nene napano rojum̃a roberenio. Vite na naruei mila na romial ka Yesu maka tavukia kulo lu dolu nalo, mia naio jibe ka Melkeseteki garuei.
HEB 7:16 Nalo dolu nei, abinimei abe kulo lu bior ka ga ajakii jameul na kiano bajulukuti, jibe ka na tuboiano moruo naio berenio, mia Yesu naio binimei be kiado parinio toro lu ea burum̃ara moroano na kiano meuliano nei na maka ajikia ala lelanio, napano mia naio to tobo to.
HEB 7:17 Kito romijikia ka mia naio toboto tibe na, bior Atua kiano iliano naio berenio ruei, napano naio berinavo “Kiniou nomiduso kojo jibe ka tormoruo Melkeseteki, jau kobe toro lu na maariano ea kiano bajulukuti, ka na mia kovokar im̃auano rivano-o mia maka rijikia ribisi.”
HEB 7:18 Ea vio na, binimei meravo bo ban kito ka Atua biebukua m̃arabo na kiano im̃auano. M̃arabo moruo, na be Mosis kiano tuboiano re beamu, napano jumolu ju bogo be ruei, mia javukia napano maka rijev moroano tai ka mia rila vite novo tai van kito.
HEB 7:19 Naio bijuku deio ka rila kito romei romemedu, tenene na Atua juvan m̃arabo moruo nene jobo garuei, ana mila jidomiano vou tai binimei medave, midu jeleigio. M̃arabo vou nei naruei romijikia romonea sikili ka naio be m̃arabo na be riano, napano mia naio mijikia rivuru m̃arabo ka kito ka mia romei vaataro ka Atua.
HEB 7:20 Ana m̃arabo vou nei, Atua kanano verikariano tai naio mila jumolu ju jikili ju. Kulo lu dolu nalo re beamu, bogo na ajokol parilo, amioakolo ka kialo im̃auano nalo, maka ve verikariano tai tibe na.
HEB 7:21 Mia bogo na Atua bitirilar Yesu be kiado parinio toro lu, naio milakar bija kiano verikariano na jikili tai. Javukia napano iliano tai ea niosi lu na iouano naio berenio, napano naio berinavo “Atua sop̃i naio berkar ruei, mia naio maka rijikia river bukua kanano iliano bereio, naio berinavo ‘Jau mia kovokar im̃auano na parinio toro lu na kanaku tomu nalo, rivano-o mia jau kobisi ka re bogo tai.’ ”
HEB 7:22 Mia Yesu naio bokar batitig kiano im̃auano jibe na, be kijokijo na verikariano vou na Atua kanano bija kito, napano naio bo lie vo loa ka nana beamu, a naio be tikariano na vite dolu nalo na Atua berkario ban kito, mia na rila nonovio ea kito iorou.
HEB 7:23 Kulo lu nalo na beamu nalo miroano, bior nalo tai mim̃au bano-o bakovio, ana na dolu midu jum̃ano, mim̃au banbano-o, naio bunu bakovio, nalo amila jibe na naruei. Nalo maka ajikia avokar tobo to,
HEB 7:24 mia Yesu, naio be na toboto nam̃ariga, mia naio ga ve takurano na mia rivokar kiano im̃auano tibe ka kiado parinio toro lu rivanvano-o mia rimebi re bogo tai.
HEB 7:25 Jibe na naio jo dam̃ariga ea Atua mirano, naio jo bolkouo dam̃ariga banio ka kito, mila na kito na voniganei, p̃elina kito tomu na romei iorou, mia naio naruei mijikia rilarur nono kito na m̃a rejelea naio robinimei vaataro ka Atua.
HEB 7:26 Kito rajaaro toru ka na Atua mial bo ka tuvan parinio toro lu tai na naio bo laka jibe na rimei rivior kito. Naio be toro tai na be lu laka, napano maka vijukubeleano tai rimonea naio leleio, naio meravo nonovio, kiano bajago naio maka tibe ka tomu na m̃a amila kariano leleio, siano jo mave loa laka ka vite nonovio nalo na tiniabenei.
HEB 7:27 Mia kulo lu dolu nalo nei, nalo monoka atum̃a ala sida na meravoiano tulaka ea legiano nonovio. Beamu, monoka ala rivior kialo kariano nalo bereio, ana iorou, amijikia ala rivior kariano na tomu dolu nalo kanalo, mia Yesu naio maka tibe na. Naio mila sida na meravoiano na kariano na yetemeriba nei reraio ve vaarakurano ga, nina, ka bogo na naio mila jokoluolu ka mokotenano bereio kar kito.
HEB 7:28 Be riano ka tuboiano moruo binimei beamu, mia kiano parinio kulo lu be kulorinio ga, melokloko ga, mia verikariano vou na binimei iorou, kiano parinio toro lu naio memedu dam̃ariga, be Yesu Atua kenerinio.
HEB 8:1 Naruei verloglogiano nalo nei aber vite telabo ea tivelinio na parinio toro lu nalo. Mia burum̃ara burupati iliano tai na naio jo, napano temi bo ka rosidomii ve temi eaio, napano berenio kiado parinio toro lu novo tai jo ruei. Naio be Yesu na naio ban bere mave tiniabenei, naruei toro na toru na vio mave naio midu naio jotano tivelinio na jum̃ano meruo.
HEB 8:2 Naio joa vio na, naio mila kiano im̃auano lu, javukia napano parinio toro lu nalo re beamu amila lotuano joomo ea yimo lu panpano nei ea vio yauo. Mia vio na lotuano nei, tomu nalo ga amim̃aukanio, mia kiado parinio toro lu Yesu, naio jom̃a mim̃au joomo ea vio na lotuano na bo laka, nana be riano, napano Atua ga mim̃aukanio.
HEB 8:3 Mia parinio kulo lu dolu nalo nei, kialo im̃auano nalo, napano dam̃ariga abitiribulaglo ana m̃a ajum̃a ajian ijaiano ban Atua, a napano m̃a amila sida banio, mia bo ka rovika rover kiado toro lu nei, p̃eli naio bunu midu ijaiano ban Atua, mila sida kanio?
HEB 8:4 Verver yetemeriba nei ga, mia naio maka aial naio tibe toro lu tai, bior naio maka riyotuba ea yati na Livai, na m̃a tuboiano mije moroano banlo ga ka amijikia asian ijaiano rivan Atua. Jibe na, kiado parinio toro lu nene naio jom̃a mim̃au ea vio lu na mave ga.
HEB 8:5 Vio lu na yetemeriba nei, bija im̃auano na na m̃a amim̃au kalo eaio, naio javukia melukuti nene ga, p̃elina kijokijo ga, mia na na ea vio mave, naio be telerinio nene. Atua bunu ber jibe na ga, tilikiti na naio berlubarbario ban Mosis, naio berkanio ber mia tum̃abe ka mia naio rim̃auka yimo panpano lu nei, naio berinavo mia naio monoka rim̃auka takii tiiano nene rimemedu ka na m̃a naio mialio bogo napano naio bavin ea burusuku.
HEB 8:6 Mo jibe na na kito romial ka Yesu kiado parinio toro lu naio be riano, a kanano im̃auano nonovio nalo abo lie vo. Naio jotano iviso ka kito bija Atua, naio mim̃auka virakariano vou tai ea kito bija naio napano bo lie vo, napano jikili jua Atua kanano verikariano napano abo lie vo, o-oa na nalo romial naio jo mave mila im̃auano tai ea vio lu napano naio bo lie laka.
HEB 8:7 Verver virakariano na beamu naio rivu kia ga vo, mia ve re bunu tinene bereio, mia makanio, milaio ana na Atua bitirilar virakariano vou bija kito napano naio bo bo laka garuei.
HEB 8:8 Virakariano na jukamu, Atua naio jo mial ka maka rim̃au rivu, ana naio maka rivare vo ea kiano jidomiano, mila na naio berkar na na terivou dolu bereio. Naio berial jibe nei ea iliano tai nanua jian ban naverialiano Jeremaia ka naio riverialio. Ea iliano nene, Atua berkar jibe nei, berinavo “Kamiu kuvije tiliniemiu vatitig rivu. Kiniou nojidom never ka kamiu ka bogo tai jo binimei kiana, ka mia kiniou nala virakariano vou tai vija kamiu kanaku tomu nalo, kamiu na kube bajulukuti na Yuta bija bajulukuti na Israel.
HEB 8:9 Mia virakariano nei naio rivevirare re ka nanua namila kar bija korobimiu nalo re nua. Virakariano moruo nene, nina ea bogo na kiniou tinieku miialo, kiniou noburu bulaglo den bogokouo ea vio Ijivi, mia iorou kanio, ana maka bunu asidomial virakariano nene, a maka bunu amonmoneaio, mila na kiniou bunu nobilig taakaku kalo.
HEB 8:10 Mia vonganei, kiniou nevitirilar virakariano vou tai vija kenemiu bajulukuti nalo bereio. Ea virakariano nene, mia kiniou nala tibe nei: mia nevitiri bulag vatitig kiaku tuboiano nalo tua kialo jidomiano nalo, mia nevivitauia kanaku iliano nalo tua kialo iviso nalo, mia nemei neve kialo Atua riano, mia nalo na amei ave taara na kanaku tomu nalo.
HEB 8:11 Ka tilikiti na, mia alavon re bunu ka m̃a aververlogloglo bereio, ka na mia tai river ka kiano bilbilu riverinavo ‘E, m̃arabo naio nei,’ p̃elina tai river ka kuruano, riverinavo ‘Atua, naio jibene jibene.’ Makanio, mia ala re bunu tibe na, bior mia aviniu ajikia vatitig kiniou ea kialo meuliano nalo aviniu koko, tikar ea nalo na tertelisu laka, riva rivokar kialo tomu na tortoru nalo.
HEB 8:12 Kiniou neberkar ka kialo vovaiano nalo, mia nevie kokoalo ga, a kialo kariano nalo, mia nosidomialo re bunu. Naina naruei be kanaku virakariano vou bija kanaku tomu nalo.”
HEB 8:13 Ana ea kanano iliano nene nei, Atua berii virakariano vou nei, mila kito robitilubar ka naio jo mial virakariano na beamu nei naio be termoruo ruei. Mia jidomiano tai na jo ber vite na m̃a Atua ber be termoruo ruei, vonganei jo batove lilie ka mia riviniuviniu nonovio.
HEB 9:1 Mia kito romijikia ruei bo ka virakariano moruo, naio be kiano m̃arabo nalo ka rila kanano lotuano eaio, a be bunu vio tai na rila kanano lotuano nei eaio, napano joa ga yetemeriba nei.
HEB 9:2 Vio na lotuano nene, be kiano yimo panpano lu nene, napano aburuko ka burum̃ara jagidago eaio, a amuebure togio juo. Ea togio, na abio ka Vio Lu, be burupati na yulu tai jum̃ano aluo, bija barobaro na joko duelimo ba juo napano abio ka “Joko na asiloglog ka Atua.”
HEB 9:3 Ana iorou ka jagidago nei, togio na bano ba yesobi nene, naina abio ka vio Lu na be Lu Laka.
HEB 9:4 Joomo ea Vio nei, naio be boda na bonotanunu na m̃a amim̃auka niogo, bija basidobidobi na tuboiano nei. Basidobidobi nei, abijan niogo ea kulukuti, vajoomo a tavio bunu, mia vajoomo nene, be vite tolu napano abar batitiglo ajuio. Nana jukamu, naio be baju na niogo tai napano niati sinaniano na vio iauo na abio ka mana naio joaio, a vite juo nene, naio be tormoruo Erono kiano nasitogo napano toti barboṽeio nua, a vite na maariano naio be puruveru na mierivin juo napano Atua bivitauia kiano tuboiano ealo.
HEB 9:5 Ana mave ea basidobidobi na tuboiano nei, naio be sikmirano, napano abio ka vio na totaniano na Atua kanano tinieiiano. A be tovorovo na nailiano juo ajumolu aju mave eaio, napano sibialo amiaveveko tivelvelinio vio na m̃a Atua kiano mermerano jom̃a batove eaio. Naruei vio lu na lotuano na virakariano termoruo nene naio be vite novo nalo nei naruei, mia maka rejikia rover vite ve miroano bere vo ea tivelinio na nalo. Mia vite takurano ga na roverenio, ka vio na lotuano nene, vija kiano saba nalo, nina amim̃auka ga ea tenalo na yetemeriba, naio maka rijikia tobo to kanio ga, naio maka rivu tibe ka vio na lotuano na virakariano vou.
HEB 9:6 Vite nalo na mave nei, naina naruei vite nalo na m̃a abar batitiglo aju joomo ea yimo panpano lu na beamu nei, mia bogo na kulo lu nalo aba joomo, amim̃au bijalo. Mia dam̃ariga, ajum̃a aba joomo ea ga vio lu na jukamu nene,
HEB 9:7 ana ea vio lu juo nene, na be vio na mia be lu laka, kulo lu nalo maka leleio ava joomo eaio. Vio nei, toro takurano ga mijikia ba joomo eaio, nina be kialo parinio toro lu, a naio maka m̃a to riva joomo tulaka, mijikia ban vaarakurano ga ka yuka takurano. Ana bogo na m̃a ver naio bano, maka rijikia riva jum̃ano yauo ga tibe na, mia monoka takii m̃arabo nene. Beamu ka naio rivano, monoka ala jokoluolu ka temeul tai, ka mia naio monoka rivar basidobidobi tai na burukija nene riva joomo tibe ka ijaiano tai, naina ea tivelinio na kiano kariano, a bija tomu nalo kanalo.
HEB 9:8 Mia bogo na ajum̃a amila jibe na, javukia kijokijo na Niununo Lu napano mila meravo ban kito ka bogo na ver yimo panpano lu naio tumolu tu kia ga vo, mia kito tomu ninio kito ve re kiado m̃arabo tai leleio ka ravan rovokar vio na m̃a Atua naio joaio.
HEB 9:9 Panpano na yimo lu nei, bija sano jagidago nene napano jakilele jo joomo, a sano vite nalo, abe tena vio beamu ruei, mia aber burum̃ara titai ban kito banei. Amila kito robitilubar ka ijaiano nalo na m̃a kulo lu nalo ajiajian ban Atua a jokoluolu nalo na m̃a ajum̃a amilaio, nalo abo ga, mia vite nalo nei maka ajikia ala tomu nalo ajog ka kialo iviso meravo reraio ea vitiiano na Atua kiano.
HEB 9:10 Amila vite nalo na, bija venia napano tuboiano sesa nalo aberenio ea tivelinio na m̃arabo na amim̃auka sinaniano bija munuiano, a ea tivelinio na bajago na sekoniano na saba. Mia vite nalo na naio be tena vio tavio ea toro niabene ga, mia maka atokol toro kiano iviso p̃eli kiano jidomiano. Mia kiado tormoruo nalo ajum̃a abokar bajago nalo jibene bano-o, abe navokariano nalo ga rivano-o rivokar bogo na Atua mila kiado m̃arabo vou, napano naio be kiano virakariano vou napano maluvo ruei.
HEB 9:11 Mo bogo na Kristo miyotuba, naio binimei jibe ka kiado parinio toro lu, napano naio maka ve tena bajago moruo, mia naio be tena m̃arabo vou, ka rila napano romijikia rovokar ilivuiano na kirinovo nalo na Atua bar batitiglo bo aju. Naio maka riva rim̃au joomo ea yimo panpano lu na beamu, mia naio mim̃au ea tai napano bo lie vo, a loa lie vo. Vio lu napano naio jom̃a mila im̃auano eaio, maka ve toro jum̃ano napano milaio, mia maka toa yetemeriba nei, mia naio joa vio medave kamu ea Atua mirano mave.
HEB 9:12 Ana bogo na Kristo ba joomo ea vio lu nei, naio banbano bokar vio nana be lu mia be lu laka kanio, mia naio ba vaarakurano ga, maka ka mia naio riva ve vaarakurano bereio. Ana bogo na naio ba joomo, burukija na bario naio maka ve burukija na nani, p̃elina burukija na kirikiti bue m̃arauo, mia be kiano burukija ga napano miou ea m̃akolkolo. Naruei kiano burukija nei naio joa Atua mirano jibe na, naio bokar vulbulagiano na kiado kariano ka ritoboto.
HEB 9:13 Monoka tibe na, bior ea bajago moruo, ka ver toro tai mila titai na bova, ana amidu burukija na nani p̃elina bue m̃arauo, bija bulum̃aroro na kirikiti bue m̃arauo napano amisebio, amidu ban ea vio lu. Ana ea bogo na, ajidom aber ka ijaiano na jibe na mijikia rila toro neibano naio rimeravo bereio ea Atua mirano.
HEB 9:14 Mo na ver burukija na temeul ga mijikia rila tibe na, mia Kristo kiano burukija naio mijikia rila riva lie vo ve toru laka. Kristo naio be toro lu tai, naio meravo nonovio, maka ve niajebijo tai toaio, naruei naio mijamo ka kiano meuliano ka Niununo Lu mijikia rudu van Atua tibe ka ijaiano tai, ana naio binimei be kiado naioruriano. Tibena na mia burukija na Kristo mijikia rila tiniedo rimeravo, rivurular kito den kiado im̃auano na m̃ariano nalo rivitiri bulag kito, ka romila Atua na meul kiano im̃auano.
HEB 9:15 Ana bior Yesu mila im̃auano na bo nalo jibe na, romijikia reial naio, naio be toro na m̃a bar tenalo novo na virakariano vou nalo amaluvo ka kito. Nina naio milaiio ea kiano m̃ariano, napano be m̃ariano tai napano bular meuliano nonovio na tomu nalo na lakokoroviano na tuboiano na virakariano na beamu. Ana bior naio bulbulag kito jibe na, mila na kito kei napano Atua bio ka kito, romijikia rovokar kiado jajum̃ado neibano mia maka rijikia ribisi bogo tai.
HEB 9:16 Ver Yesu rim̃aro re, mia kito maka rejikia rovokar kiado jajum̃ado nene, mia bogo napano be riano ka naio m̃aro, verikariano nonovio na virakariano nei binimei jibe ka Yesu kiano iliano na maaro, naruei vite nonovio binimei ea jum̃ado.
HEB 9:17 Bior ver toro tai riverkar vite tai tibe na naio kiano iliano na maaro, ka bogo na naio meul kia ga vo, ajum̃a abokar batitigio bo kanano verikariano nei jo, mia maka alaiio tibekovio kanio bano-o bokar bogo na ver naio rim̃aro, ana mia alaiio.
HEB 9:18 Naio jibe ka ga ea virakariano na beamu na Atua mila bunu, napano burukija na jokoluolu miou, ana na iliano nalo na virakariano na atumolu atu.
HEB 9:19 Tena Mosis bunu mila, napano Atua jian tuboiano banio mave ea burusuku, ana naio batove berial iliano nonovio na kanano ban tomu nalo, ana ka bogo na naio berialio bisi, naio muebinivin sida nalo, ka rila ka iliano nalo na tuboiano nei ameul, atumolu atu. Amuebinvin kirikiti bue marauo bija nani nalo, naruei naio midu kija kialo burukija telisu, mion kija uei telisu ban ea, ana midu jaiesi tai na telisu, abio ka isop, bija vijinio sipsip na bilvil, ana budomio ban ea burukija nene, bukio tertelisu mave ea niosi na tuboiano nene, a bukio bunu ea tomu nalo, karina naio berial banlo, naio berinavo
HEB 9:20 “Naina naruei be burukija na temeul napano naio m̃aro ka rila Atua kiano tuboiano rimeul. Naruei kito rotovonio, kito romonmoneaio.”
HEB 9:21 Ana jibe ka napano p̃iligṽilig burukija nei ealo, naio p̃iligṽilig bunu tertelisu ea yimo panpano nei, bija vite nalo na aju joomo eaio napano m̃a abar amila kialo lotuano bijaio.
HEB 9:22 M̃arabo na im̃auano na tuboiano moruo nei naio jibe na naruei, napano mia vaataro ka vite nonovio na m̃a amim̃au bijaio, monoka ap̃iligṽilig burukija eaio dam̃ariga ka rilalo ave lu. Nina jiloglog burum̃ara titai na rivan kito, ka ver burukija riou re, viekokoano na kariano maka tai.
HEB 9:23 Tibe na, vite nalo na m̃a kulo lu nalo amim̃au bijaio, bogo nonovio monoka ala bunu rimeravo ea m̃arabo sesa nalo nene. Mia yimo panpano lu nene, bija sano tenene nalo, nalo abe tena yetemeriba nei ga, ana jum̃abe ka vio lu nana be riano, napano Atua joaio ea vio mave? ?Naio bunu monoka ve jokoluolu tai na viekokoano na naio? Nao, naio bunu monoka burukija riiou ka rila kiano saba nalo riviniu rive lu, vija bunu nalo na m̃a aju aban eaio. Mia jokoluolu na vio lu na tiniabene naio maka tibe ka temeul nalo na m̃a amila jokoluolu kalo ea vio lu na yetemeriba nei, naio be jokoluolu tai na toru lie vo, a bo lie vo laka.
HEB 9:24 Ana burukija na jokoluolu nei naio joa Atua mirano ruei, bior kiado parinio toro lu Kristo naio ban ea vio lu nei ruei, napano maka ve vio lu na tomu nalo ga amim̃aukanio, mia be vio lu na be riano, nina ea vio mave tiniabene.
HEB 9:25 Mia bogo na mila kiano jokoluolu jibe na, naio maka tavukia nalo na m̃a parinio kulo lu dolu nalo amilaio. Nalo amila jokoluolu ka burukija na temeul nalo, mia naio mila jokoluolu ka kiano burukija bereio. Mia nalo, aba amila ea vio lu vaarakurano ga ka yuka nonovio, monoka mia ala tibena rivan dam̃ariga, ana naio mim̃au ka nonovio varakurano ka bogo tai na ga, bisi, ana maka ka mia aim̃au ka bereio.
HEB 9:26 Ver Yesu monoka tom̃a rila kiano jokoluolu tulaka rivior kariano nalo na m̃a tomu nalo ajumon ka m̃a amilaio, nina jibe ka ber jikar ea tikariano na yetemeriba binimei bokar vonganei, naio jo jaklele ea m̃akolkolo ga, naio mijog bova ka napano kiano burukija jom̃a miou bogo nonovio ga. Mia ea tiiano na Atua bitirilar naio maka tibe na. Naio mial jukuti na bogo nei rojua voniganei naio binimei lilie vaataro, ana na mila napano Yesu binimei miyotuba ka kito maka vesiou. Naio maluvo ka kito naruei naio mila jokoluolu ka nono kiano meuliano, mijil lar bajago na kariano.
HEB 9:27 Ea tivelinio na kito tomu nalo, Atua mila ka kito romeul ea yetemeriba, karina rava kovio denio karina romeul bereio ka ravan ea tibureiano,
HEB 9:28 mia ea tivelinio na Kristo, naio jibe na bunu. Naio binimei miyotuba ea yetemeriba nei, karina mila jokoluolu ka naio ka rivar vironiano na kiado kariano nalo, karina mia riyotuba bereio ve valuo nene, maka ka mia rivulu bulag kariano bereio, mia ka rivuru bulag kito den vironiano na kariano na kiado, na m̃a rabarkar tiniedo eaio, rojidom ka mia naio rimei rilarur kito.
HEB 10:1 Kito rosidomii von bereio tuboiano moruo na Mosis kanano. Naio ber saba novo nalo tealo tai, ana mia naio maka riverial nonovio ilivuiano novo nalo na m̃a Atua naio jidom ka Kristo rila riyotuba ka kito, mila na tuboiano nei naio jibe ka vaiunu ga, maka ve niosunbue riano nene. Tuboiano moruo nei naio jom̃a beve torogio mugaruei jibe na, naio jiloglog ka kanano jokoluolu nalo, napano m̃a ajum̃a amilaio ka yuka nonovio, maka avare, maka ajikia ala rimeravo vatitigio rivu nonovio nalo na m̃a amila lotuano bijaio.
HEB 10:2 Aver tibe na, mia nalo nam̃a amila lotuano jibena, p̃eli mia nalo amei ameravo nonovio ruei na, ajog re bunu ka kariano joalo, ka na mia asidomii re bunu ka mia ala jokoluolu, mia makanio, amonmon ga amila jibe na.
HEB 10:3 Jokoluolu nalo na monoka ala ka ajog ka nalo maka ve kariano tai, mia makanio, yuka nonovio amialio ka napano jokoluolu nalo nei amila nalo ajidomial bereio vovaiano nalo na kanalo, ana amijog ealo ka niamiamo na kariano jo kia ealo vo napano ba bova lie vo.
HEB 10:4 Ajum̃a amijog jibe na bior kialo jidomiano tai jo, aber burukija na buruolu bue marauo p̃elina burukija na nani naio mijikia sekon bulag kialo kariano tum̃abe? Vite na, ajidom bitovitonia toru laka kanio, ban bano-o na abitiidieio, kialo kariano jo keano vo.
HEB 10:5 Ana bior tenalo na, bogo na Kristo riyotuba ka kito ea yetemeriba nei, naio berial kiano m̃arabo vou naruei. Naio midu iliano tai napano joa niosi na Iouano Lu, naio ber ka karam̃ano Atua, naio berinavo “Jau maka bunu kosidom jokoluolu nalo a ijaiano nalo, mia jau komim̃auka batitig mokotenaku ka najamo ka vanso.
HEB 10:6 Vite nalo na m̃a aju amisebio jijenio ba biniuviniu, jau komial bova ga, a ijaiano nalo na meravoiano na kariano, maka lele tiniem tiio.
HEB 10:7 Karina, kiniou nojumolu neberial batitig banso, neber ‘Atua, kiniou najaaro ka nala kanamo sidomiano, nina ga kiniou nebinimei biorio, nina tibe ka ga napano Niosi Moruo naio berenio ber mia kiniou nalaio.’ ”
HEB 10:8 Mo bo ka kito rovitii vatitig rivu iliano na Kristo berenio nei. Vite na jukamu napano naio berenio, ber napano jokoluolu nalo bija ijaiano doldolu nalo na m̃a ajum̃a amilaio, be kurano ka na m̃a tuboiano naio berenio ber monoka alaio, mia Atua naio maka tom̃a rijog rivu kalo, mia naio maka bunu sidom ka mia alaio.
HEB 10:9 Karina, vite juo na m̃a Kristo berenio, berinavo naio mijamo ka naio naruei, ka naio rimei rila Atua kiano sidomiano. Ea vio na, romial napano m̃arabo na jukamu na m̃a amila jokoluolu bior kariano, Atua midu lario ruei, kanano m̃arabo juo nene, naio jakiio.
HEB 10:10 Ea m̃arabo vou nei naruei, Kristo naio mila jibe ka na Atua kiano sidomiano naio berenio, naio jian nonovio mokotenano, ana mila napano kito robinimei romeravo a robe lu ea Atua mirano, naio jo jibe na dam̃ariga.
HEB 10:11 Kulo lu nalo na m̃a ajum̃a amim̃au ea bajago moruo, monoka ve tealo na m̃a legiano nonovio ga atumolu atua Vio Lu. Nalo ajum̃a amila jokoluolu sesa nalo dam̃ariga, napano abe vevirare ga bogo nonovio. Jokoluolu nalo nei ajum̃a amila bior kariano na tomu nalo ajum̃a amilaio, mia maka lele ajikia avare ka avar bulag bajago na kariano den tomu nalo kialo meuliano.
HEB 10:12 Mia kiado parinio toro lu nei Kristo, kiano jokoluolu naio maka tibe na. Naio mila jokoluolu ka kiri vite takurano ga bior kariano nalo nonovio, mia naio mila vaarakurano ga, ana bogo napano mila bisi, ana naio ba jotano mave ea tivelinio vameruo na Atua.
HEB 10:13 Atua naio mial Yesu ka mila jibena, berenio ber mia rivar Yesu kiano uolu nalo, rudulo atutano ka naio tibe ka yebe tai napano bijankon jaano eaio.
HEB 10:14 Maka ver im̃auano dolu tibe na ka Yesu monoka rila, bior ka napano naio jian ijaiano ruei, kiano burukija mila kito romeravo, vonganei robo ea Atua mirano ruei, rivanvano-o mia ribisi deio.
HEB 10:15 Niununo Lu bunu naio miasol iliano ban kito ea vio na, ea iliano tai nanua binimei ea naverialiano Jeremaia. Ea iliano nene Atua naio ber jibe nei berinavo
HEB 10:16 “Ana vonganei mia kiniou nevitirilar virakariano vou tai vija kanaku tomu nalo bereio. Ea virakariano nei, mia nala tibe nei. Mia nodu vatitigio kanaku tuboiano nalo atoa kanalo jidomiano nalo, mia nevivitauia kanaku iliano nalo toa kanalo iviso nalo.”
HEB 10:17 Atua naio ber jibe nei, ana ba lie telisu ga naio miasol bereio, naio ber jibe nei berinavo “Mia kialo kariano nalo, vija kialo vovaiano nalo, mia nosidomialo re bunu.”
HEB 10:18 Iliano nei naio berial burum̃ara viekokoano napano Atua naio mila ban kito ruei, ana ver tibe na, ve re ijaiano dolu bereio napano romijikia resian ka rivokar viekokoano rivior kiado kariano p̃elina kiado vovaiano nalo, bior ka napano Atua naio mila batitigio bo ruei.
HEB 10:19 Kuruaku nalo a kuvivinieku nalo, jibe ka na m̃a iliano nalo nei aberenio, Yesu kiano burukija betavo ea kiado m̃arabo ruei, naruei bo ka romerou re ga, mia resel ea naio rava joomo ea Vio Lu napano Atua joaio.
HEB 10:20 Beamu, burum̃ara jagidago na jaklele ko kanado m̃arabo, mia Yesu mokotenano naio burup̃e, jagidago nei bunu burup̃e niati juo, naruei naio betavo ka kito rava joomo. Vonganei kito rojua m̃arabo novo nei naruei, napano be m̃arabo vou tai, a be m̃arabo na ban kar meuliano.
HEB 10:21 Naruei Yesu naio mila kiado m̃arabo ba joomo ea vio lu jibe nei, naio binimei be kiado burum̃ara toro lu, napano bitikar kito nonovio ea m̃aratavo na Atua kanano.
HEB 10:22 Kiano burukija naio milakon niamiamo na bova napano ju joomo ea kito, kiano uei na meravo novo naio jekon niabedo binimei meravo nonovio, ana maka bunu roimou, mia romijikia rava joomo. Romijikia rava vaataro kean Atua napano kiado iviso be riano, rotu sikili laka ea naio rober mia naio rivuku bulag kito re, ka na mia naio rila vorvoruano van kito ga.
HEB 10:23 Kito romijikia romonmonea rivu vatitig ka mia Atua rila rivu tibe na van kito, bior dam̃ariga, naio jom̃a mila memedu ga ea venia napano m̃a naio berkario. Kito maka bunu rosidom dede kanio, mia robokar batitig im̃auano na ka roverial van kulo dolu nalo vite novo nei na m̃a naio milaio ban kito.
HEB 10:24 Ana ea tivelinio ka kito bereio, bo ka rotu rosidomii vatitig rivu, roseravo m̃arabo na tutuliano na kiado jidomiano nalo ka tiniedo tii kito rivu lie, a ka ralala im̃auano novnovo nalo van kito rivan lie tibe na.
HEB 10:25 Maka rivu ka kito rotuvan bajago na reiasosol vatitig kito rivu, tavukia na tealo ajum̃a amila ruei, mia bo ka na kito rotum̃a rotunukakar kito tulaka dam̃ariga. Bajago novo nalo nei monoka rotum̃a rala van kito dam̃ariga, ana ver bogo tai kito reial ka bogokouo na legiano na maaro atu vaataro, bo ka rovu ka kito tibe na dam̃ariga lie vo.
HEB 10:26 Bo ka kito rovika vikadeniano ea tivelinio na kito napano robokar jikiaiano nalo na ilirianiano ruei. Rovika tibe na, rover ver kito rotovon re, rotumolu rotum̃a rala tanea kariano lie, mia tum̃abe ka kito? Sano verdop̃eiano nene, naio jibe nei, ka kariano nalo na jibe na, maka bunu ve jokoluolu tai napano mijikia rivar bulagio bereio.
HEB 10:27 Venia napano ga jo, nina Atua kiano verikariano ka mia sian vironiano na jikili riviorio, vija burum̃ara jeleig sebi napano mia sisen nonovio kiano uolu nalo. Naina be vite na merouano toru laka na.
HEB 10:28 Ea tuboiano moruo na Mosis kanano beamu, ver toro tai rila korov iliano nei tai, mia tomu ve juo p̃elina ve tolu bereio avirokarlo ka be riano, ka toro na mila jibe na jibe na, mia ve re bunu m̃arabo na tinieiiano bereio, mia toro nene mia atelar kiano meuliano ve vaarakurano ga.
HEB 10:29 Ver ala tibe na ka toro na mila korov Mosis kiano tuboiano, mia tum̃abe ka toro na bilig taakano ka Atua kenerinio? Mia kanano vironiano naio ve burutomoluo laka na, bior naio mila lelan burukija na virakariano vou napano beamu mila naio meravo ruei ea Atua mirano. Mia Niununo na tiniememiano naio rijog rivova ka bajago na mia naio tinien ser m̃elea toro na m̃a mila.
HEB 10:30 Mia monoka naio rudu vironiano nene bior Atua naio berkario jibe na ruei. Kiano iliano lu tai naio joa niosi na tuboiano moruo, napano naio ber jibe nei, naio berinavo “Ka tibureiano na kariano, be kanaku kiniou ga takurano. Nesian meran sikili mia sikili rivior kialo vovaiano nalo.” Ana ea vio nene kia ga vo iliano dolu naio ber jibe nei bereio, naio berinavo “Mia Atua sop̃i naio tibure kanano tomu nalo.”
HEB 10:31 Kito monoka rovitikar vatitig rivu, bior toro na m̃a milala kariano, ka bogo na adu naio toa Atua jum̃ano ka rivitii naio, naina maka ve tena telisu tai, mia naio be tena merouano memedu.
HEB 10:32 Kito maka rejikia ka mia tum̃abe ea legiano nalo na aju abinimei, mia bo ka rotu rosidomial m̃arabo novnovo nalo nam̃a Atua mijaja kito kanio ea legiano nalo napano abarlaka ban ruei. Bogo na kito romiyotuba ea miamoiano nanua beamu na, maka vesiou ana romidu bogo na jikili laka, napano aju amila kirivova ban kito napano romonea Yesu.
HEB 10:33 Bogoti tealo, kamu ea tomu nalo miralo, abuku iliano na bova ban kito, bogo tealo am̃ele tanea kito ea bajago va nalo napano kirivova-o mia kirivova. Ana bogo tealo, maka rivan kito mia amila ban kanado bilbilu nalo, ana robano rejikili roju bijalo, romijailo.
HEB 10:34 Kito tealo, abukulo aban ea yimo na lakoiano, ana tiniedo miialo toru laka, roju raba romilavon ka rejailo ka ravar bulag kanalo burum̃ara jogvaiano napano aju abiniua ea vio nene. Ana bogo tealo bereio, nalo na m̃a ajerm̃i ka kito abinimei kar kiado saba nalo, ka avar bulavulag lelan kito, be burum̃ara laluvuiano ea kito laka. Ana ka bogo na, mia tiniedo serlo re, rajamo ka ga, bior be saariano tai napano joa kito, ka vite nalo na abar bulagio abe tena yetemeriba nei ga, mia kanado tonovnovo nalo napano abo laka aju, napano maka ajikia avakovio bogo tai, mia ave kiado bo kanio.
HEB 10:35 Naina naruei burum̃ara kanado vulaviano napano mia Atua naio sian van kito, ana bior ka ijaiano novo nei naio jokamu ea mirado, maka rivu ka ralaluv bereio burum̃ara jikiaiano riano napano joa kito ruei,
HEB 10:36 mia monoka rotu sikili dam̃ariga ea Atua. Kiado jidomiano monoka ve tebievi rivu ka rotu rala naio kiano sidomiano nalo, ka mia romijikia rovokar vite nalo na m̃a naio berkario ban kito.
HEB 10:37 Ana bogo na ka rovokario, p̃eli mia ve sio re ga na mia naio riyotuba ka kito, tavukia na Atua kanano iliano tai napano naverialiano Abakuku naio berialio, napano naio berinavo “Bogo ve telisu kija bereio, ve sio re ga na, mia toro na toru nei napano ka mia rimei naio maka rijikia tuliliei va lie vo, ana mia naio riyotuba.
HEB 10:38 Ka bogo na, kanaku tomu na memedu nalo mia amijikia ameul rivu ga, bior ka na m̃a amonmonea kiniou, mia ver neial nalo tai kalo na maka asidom kiniou, vurudidig naio, mia kanaku iviso risaaro re ka naio leleio.”
HEB 10:39 Ana naina maka ve kito nei. Kiniou Maka ve tinieku ka kito ka kito tomu kinkin na m̃a romerou ka Atua. Nalo na m̃a aburu didiglo jibe na, mia monoka ava kovio mia kito, tomu na m̃a roju jikili ea naio, mia monoka ravokar meuliano.
HEB 11:1 ?Kiado viekouoiano nei, mia roverenio naio be vite venia? Romijikia roverenio naio be bajago na romonmonea vatitig Atua rivu sikili, ka naio mijikia rila kiado jidomiano riluo rivu ea naio ga, mia mijikia rila kiado moneano tu sikili ka rover vite nalo na m̃a maka rejikia reialio, abe riano aju.
HEB 11:2 Viekouoiano naio be burum̃ara vite laka ea Atua kiano vitiiano. Jikario ea kanado tormoruo nalo na beamu binimei, nina be m̃arabo takurano ga napano Atua mila ka naio rijikia saaro ka tomu nalo.
HEB 11:3 Bajago na viekouoiano nene naio naruei mila kito robitilubar ka be riano, Atua kanano iliano ga naio jii vite nonovio, a naio mila kanado yetemeriba miyotuba. Kiano moroano naruei midu vite napano toro maka rijikia rialio, mim̃auka vite nonovio na m̃a roju robitii joaio.
HEB 11:4 Bo ka kito rosidomial korobido nalo tealo, ka jum̃abe nalo bunu abalea Atua bogo na beamu. Nalo tai be tormoruo Epel. Ea kiano viekouoiano ea Atua, naio milotu ban naio ka ijaiano tai napano memedu, ana Atua jaaro ka rijevio, naio mial bo loa ka ijaiano na kuruano Ken naio jianio. Mia Ken tinieno mimi, ana naio muetam̃aria kuruano nene, mia Epel kiano bajago bo na viekouoiano ea Atua, mila Atua mial naio be toro na memedu tai, mia vite nei mijikia rija kito rimei rivokar banei keana vo.
HEB 11:5 Tormoruo dolu, naio be Inok. Ea kanano viekouoiano ea Atua, naio maka rivokar m̃ariano. Naio be tormoruo laka ana Atua ga naio binimei burulario jaluvo den yetemeriba nei, naio bavin mave, ana ajiravo naio mia maka alealio. Atua mila jibe na ka naio bior jibe ka na m̃a aju aber, ka bogo na naio joa yetemeriba nei, naio be toro novo tai na m̃a Atua naio jaaro toru laka kanio.
HEB 11:6 Be riano, ver viekouoiano ea Atua naio toa re kito, maka rejikia rala ka na mia Atua naio saaro ka kito. Toro kei napano naio jidom rijikia Atua ea kiano meuliano, jidom rimei vaataro ka naio, monoka riviekouo sikili ea naio tibe na. Naio monoka rimonmonea ka be riano laka, Atua naio jo, a monoka rivarkar tinieno eaio ka mia naio rila rivu laka van nalo na m̃a ajum̃a abitikar naio.
HEB 11:7 Tormoruo tai bereio naio be Noa. Ea kiano viekouoiano ea Atua, naio mila venia na m̃a naio berkanio. Atua berial burum̃ara ueimiya nei banio, ana bogo na Noa naio maka rial kijokijo na tenei tai leleio vo, mia naio mila ga venia napano Atua naio ber kanio, mim̃auka burum̃ara kanalo uako ka sano m̃aratavo nene amijikia ameul eaio. Noa kiano viekouoiano na ea Atua milarur nalo nene, mia mila bunu burum̃ara vironiano maluvo ka nalo dolu nonovio ea yetemeriba nei, bior nalo maka amonea. Mia Noa be nalo tai ea taara nei na m̃a amonea Atua, ana Atua milalo amemedu ea mirano.
HEB 11:8 Dolu, naio be tormoruo Epraamo. Ea kanano viekouoiano ea Atua, naio monea naio batitig bo, naio jumolu den vio nanua naio joaio, naio ban ea vio dolu tai, napano Atua berkario ka mia rudu vanio. Naio jo miel ban ea vio nene, maka rijikia ka naio jo ba be na, mia bior Atua bio naio, naio ban ga.
HEB 11:9 Naio miel banbano-o mia bogo na naio miyotuba keanio, mia naio javukia ga valauo tai, mia buruvenuo nei naruei napano Atua berkario ban naio. Ana naio jom̃a buru kunuano panpano ea vio nene, naio joaio naliko kanano m̃aratavo nalo, jibe ka kenerinio nalo napano Aisak nalo bija kumabinio sesa nalo, napano Yakovo nalo, napano nalo bunu aborkar borotano nei nanua m̃a Atua naio jian banlo ka ve kanalo tobo to.
HEB 11:10 Ana Epraamo naio boru ea vio nene, naio joaio, mia naio maka rim̃auka m̃ano yimo na toru tai, naio jom̃a mon ea ga yimo panpano nei ga. Naio ga bior ka napano naio monmonea ka maka ve kiano vonuo riano vo, mia naio jo ga jibe na, ka mia riva jouro ea burum̃ara komeli na Atua kanano, napano Atua naio bitirilario a mim̃aukanio bija kanano burupati na jikili napano mia maka ajikia avurukorov bereio bogo tai.
HEB 11:11 Tai bereio, naio be tiramoruo Sera. Ea kiano viekouoiano ea Atua, naio be m̃abono ka kenerinio motoru neibano Aisak. Beamu, naio maka rijikia rivar kiritete banbano-o binimei be tiramoruo, mia naio biekouo ju jikili ea Atua ka mia Atua rive riano ea kanano verikariano van naio vija kanano tormoruo Epraamo, ka mia naljuo avar kenerilo tai.
HEB 11:12 Mia tormoruo Epraamo nene bunu, jibe ka m̃erenio batove ruei, mia kiritete neibano naio bario mila na kanano m̃aratavo nalo binimei telabo. Karina abar sosolilo batove binimei jibe na banbano-o na kanano yati nalo abinimei miroano javukia m̃arvitano nalo na vio iauo, maka bunu ajikia avulukulo ajavukia kurukuti yono na koyou ea tei.
HEB 11:13 Mia tormoruo nalo nonovio nei na m̃a amonmonea Atua jibe na, mia Atua naio berkar tonovnovo nalo banlo, mia nalo amijev togio telisu ga, mia am̃arm̃aro ajaluvo den yetemeriba nei. Mia nalo amijikia ka mia Atua rijev togio ga vanlo, mia sian nonovio togio na toru nene vanlo iorou, naruei naio mila abitilubar ka nalo abe valauo ga ea vio nene.
HEB 11:14 Vio yetemeriba nei naio maka ve kialo vio rimemedu, mia kialo jidomiano jua kialo vonuo riano tai.
HEB 11:15 Ana ver vio neibano ajum̃a ajidomii m̃elea, naio be buruvenuo nei napano beamu ajuvanio abinimei, ver nalo asidom, amijikia avarp̃iliglo avan ea naio bereio ga.
HEB 11:16 Ana makanio, mia nalo maka atu tinielo rimaio ka naio bereio, nalo ajum̃a ajidomii ka mia avokar vio dolu tai napano naio bo laka, ajidom vonuo na vio mave ga. Atua naio mila batitig kanalo komeli novo nene ruei, ana naio tinien jiilo toru ka rijog ka na mia atum̃a averenio ka naio be kialo Atua riano, a napano ajum̃a aber kiano vonuo, naio be kialo vonuo dam̃ariga.
HEB 11:17 Ana ea tivelinio na tormoruo nalo nei keana vo, kito rover tormoruo Epraamo bereio, naina ea lavoniano kouo napano naio biniuaio. Ea kanano viekouoiano ea Atua, naio mijamo ka kenerinio takuranolar ga nei Aisak, naio mijamo ka mia rila jokoluolu ka naio bereio. Naina be Aisak nene nanua beamu, Atua naio berkar jikili ban karam̃ano, naio berinavo
HEB 11:18 “Riyotuba ea kenerimo na mia kanamo bajulukuti nalo amei ve miroano.”
HEB 11:19 Ana ka bogo napano Aisak vaataro ka naio rim̃aro, Epraamo naio maka vitovtonia ea Atua kanano verikariano nei, mia naio jo monmonea ga ka ver naio monoka ruebin kenerinio nene rim̃aro, mia Atua mijikia rila naio rimeul bereio. Ana Atua mial kiano viekouoiano ea naio be riano jibe na, ana Aisak naio maka bunu m̃aro, mia karam̃ano naio mial ka napano Atua mila kenerinio kiano meuliano ban ea jum̃ano bereio.
HEB 11:20 Mo be tormoruo nene tai bereio, naio be Epraamo kenerinio Aisak. Ea kiano viekouoiano ea Atua, naio jian kiano iliano na maaro ban kenerinio juo nei Yakovo naio Isau, naio monmonea ka mia iorou ana mia ilivuiano rimei ea naljuo tibe ka ga napano naio berkario banlo.
HEB 11:21 Ana Yakovo nei bunu naio jibe na. Ea kiano viekouoiano ea Atua, mia naio barkar tiniene ea naio ka mia naio rila rivu van kiano bajulukuti nalo na mia amei iorou. Naio bar kenerinio nei Yoseve, ana Yoseve nene naio bar kenerinio nalo juo. Ana ka bogo titai, bogo napano vaataro ka korobilo tormoruo Yakovo nene rivakovio, mia naio jumolu ka kiano nasitogo naio jurubanini ka parinio naio milotu ka Atua, ana naio berial kanano verikariano na ilivuiano ban kum̃abinio sesa nalo abiniu.
HEB 11:22 Karam̃alo tormoruo nei Yoseve, naio bunu bo ka rosidomial naio. Ea kiano viekouoiano ea Atua, naio monmonea jikili ka mia Atua tuvan re kulo Israel atubo ea vio Ijivi, mia naio rivuru bulaglo avan bereio ea kialo buruvenuo rimemedu. Naio berial jibe na, ana bogo napano kiano meuliano vaataro ka ribisi, naio ber bunu ber, ver naio rim̃aro mia ativin re naio to Ijivi, mia monoka adu riva ativin toa kanalo vio.
HEB 11:23 Tai bereio be tormoruo Mosis, kanano tormoruo juo nene. Ea kanalo viekouoiano ea Atua, naljuo maka amerou ka parinio tubo Vero kanano tuboiano na kirisikili nei, mia bogo na naljuo nene kenerilo Mosis naio moluo, amial naio kirinovo tai vo, ana maka ajamo ka naio ka auebinio, mia amidu van batitig naio jo banbano-o bokar siberio tolu.
HEB 11:24 Ana Mosis nene, naio bunu, bogo napano naio miluo bavin naio toru ruei, naio bunu be toro na moneano. Ea kiano viekouoiano ea Atua, naio maka sidomii m̃elea ka sio novo na amidu banio jibe ka parinio tubo Vero kenerinio vevinio kenerinio,
HEB 11:25 mia naio jidomii temi laka ka kiano bajulukuti dolu nalo, tomu nalo na abe Atua kanano m̃aratavo. Naio juva vonuo na tor na toru kanano, bija yetemeriba nei kiano bajago nene nalo, napano kanano saariano nene naio be tena banei ga, ana naio ba miasol kanano tomu nalo, ea meuliano na bogokouo napano m̃a kulo Ijivi nalo ajum̃a amila banlo.
HEB 11:26 Ea bogo na, naio jom̃a bitikuku ilivuiano nalo napano rijikia rimaluvo kanio, ea bogo na jo binimei iorou. Naio bitii ka ver naio jo bar jogvaiano bijalo bior Naverikariano kiano im̃auano, naio bo loa ka naio rivar kanano tonovnovo nalo ea kiano meuliano na monmaio ea tor na toru na Ijivi kunuano.
HEB 11:27 Ea kiano viekouoiano ea Atua, naio maka rimerou ka venia napano parinio tubo Vero mijikia rila vanio, mia juvan vio Ijivi, jibe ka napano Atua ber kanio. Naio maka bitikar Atua mirano, mia naio jom̃a monmonea ka ga jibe ka napano naio jom̃a bitikar naio ka mirano memedu ga.
HEB 11:28 Bereio bunu, ea kiano viekouoiano ea Atua naio bokar batitig m̃arabo na ioruriano napano Atua ber kanio, ana naio mila kiano tomu nalo ap̃iligṽilig burukija na nunu ea kialo m̃aratavo, ana bogo napano Atua naio miila kiano nailiano na m̃ariano binimei ka rudu vironiano van Vero, naio bar laka jel mave ka kialo vonuo nalo, mia naio ba muebinvin nonovio kiritete motoru ea vonuo nonovio na ea vio Ijivi.
HEB 11:29 Ana iorou ka naina kulo Israel nalo aburo den Vero, amiel aba abokar tei napano be Teimia. Ea kialo viekouoiano ea Atua, abarkor aba tivelinio ea burum̃ara tei nei, amiel aba jibe ka ga na m̃a amiel ea borotano ga. Mia nalo na Ijivi aju abinimei iorou kalo, naruei nalo amilavon ka aiel avarkor tibe na bunu, mia burum̃ara tei nei naio binimei miasol bereio, miladomdomlo am̃arm̃aro nonovio.
HEB 11:30 Ana bogo napano kulo Israel nalo amiel aba lie vo, aba aboru ea burum̃ara komeli na vio Jeriko, bija kiano kulo na mira nalo napano aju jouro ea kanano burum̃ara tagvoru napano burutomormoruo napano amivon be puruveru jeliviv. Ana ea kialo viekouoiano ea Atua, kulo Israel nalo amiel abulan jaalo jeliviv ea komeli nei ba bokar bogoti ari, banbano-o bogoti aluo nene, amialio ka napano Atua mila tagvoru nalo nei ajibirbili vaarakurano.
HEB 11:31 Ana na jouro ea komeli nene, be tira tai napano jo, napano beamu naio be tira na m̃arabo, siano be Reavo. Beamu tomu juo na Israel amiilalo ka ava aviti venalulua kulo Jeriko kialo vio, nalo abano ajoluku jouro Jeriko, ana bogo napano ajuaio, tira nei milavanlo ajua kunuano, naio miija tomu juo nei toru. Mia nalo, aba amila ea vio lu vaarakurano ga ka yuka nonovio, monoka mia ala tibena rivan dam̃ariga, ana naio mim̃au ka nonovio varakurano ka bogo tai na ga, bisi, ana maka ka mia aim̃au ka bereio.
HEB 11:32 Naina naruei be kiado tormoruo tealo napano abe burupati toro na viekouoiano re nua. Mia romijikia rava lie vo, bior ka sio miroano ju keano vo, javukia tormoruo nalo nei Kition, Barak, Samson, Javta, bija parinio tubo Teviti bunu a Samuel bija naverialiano dolu nalo, mia namial jibe ka bare beamu vo, maka bunu ve bogo na rovivitauia bulag kialo tukunuano nalo riviniu riveve terakurano.
HEB 11:33 Be riano keana, ver romijikia rojog tukunuano nalo nei ga, nalo bo mia bo. Ea kialo viekouoiano na ea Atua kiado tormoruo nalo amila burum̃ara vite nalo telabo. Reialio ka napano amila mira, ajovulu buruvenuo dolu na jikili, amila napano tomu na vio ga nalo monoka aim̃au takii tuboiano memedu, mia ajikili ka avokar venia napano amijikia ka Atua naio berkario banlo. Kulo dolu nalo abukulo aban ea bulukup̃ili na laion ka aserlo, mia maka ajikia aserlo.
HEB 11:34 Mia abukulo aban ea burum̃ara kenieno sebi na, ana mia maka rijikia sisenlo leleio. Bogo tai ana abiniua iobogu na mira, mia aburo denio bo ga, mia bogo tealo uolu nalo amila kikilo banbano-o na kialo moroano batove, vaataro ka ribisi. Ana iorou kanio, ana amial ka napano abavin bereio, abinimei jikili laka, naruei amila mira ka kialo uolu na ea buruvenuo dolu nalo, banbano-o na ajovulu lo, amijil bulaglo aban bereio.
HEB 11:35 Nalo tealo kalo am̃arm̃aro ea bogokouo nei, naruei koalo nalo ajum̃a ajiglo toru, mia amiilo ka napano Atua jian bereio niunulo banlo, bar bulaglo ameul bereio. Nalo tealo bereio, uolu nalo amila jaleleano telabo ea mokotenalo, a amilavonlo ka ver aber maka bunu amonea ga Atua, mia nalo atuvanlo avan bereio. Mia verver nalo aber ka aju amonmonea, mia ala kilkil ealo liei vo. Mia ea bogo na, Atua kiano tomu nalo aberver ver nalo ala sikili liei kalo, mia bo ga, mia nalo maka ajikia atuvan kialo Tubo. Nalo tinielo maio ga ka bogo na mia naio rilalo asikil atu bereio, nalo ajidom asikil atua mirano napano asaaro, a nalo aimou re bunu kanio.
HEB 11:36 Nalo tealo amiorkakarlo ana abitivlo ea vio medave kamu ea tomu nalo na m̃a aju amilkuei kalo m̃elei. Mia nalo tealo, bogo na amiorkarlo, nina ea m̃armieni na teremi, naruei abukulo bijaio ban ea nalakoiano.
HEB 11:37 Tai bereio, ajubabinvinlo ka puruveru, a tealo abijikokorov mokotenalo beve juo ka so, a tealo ajebinvinlo ka iobogu na mira. Nalo napano ver maka am̃aro, nalo bunu vite nonovio kirisikili banlo. Nalo maka ve kialo titai, jum̃alo bulati laka, naruei amijulu bulag kulukuti nani p̃elina nunu bunu ka mia mila niabele bitunu, mia vite nonovio bova ga banlo julaka ga, mia tomu dolu nalo maka aialerinio ealo, amila lelanlo toru laka.
HEB 11:38 Nalo na maka ve kialo vonuo, maka ve kialo vio na mia avan eaio, naruei amiel janea vio nalo na be teauo p̃elina ea burusuku, aju janea buluvai nalo. Nina be tomu na viekouoiano nalo, nalo ajibe na naruei. Yetemeriba nei naio bijuku bova toru kalo, jibe ka napano romijikia roverenio roverinavo yetemeriba nei naio maka bunu rivare ka kulo novo nalo na jibe nei atuaio, tomu nalo nei bo ka atua ga kanalo vonuo na jo mave.
HEB 11:39 Romial ka nalo nonovio napano roberiilo ruei, abiniua bogokouo telabo laka mia maka ajoru, aju jikili dam̃ariga, mila kito robitii kialo viekouoiano ea Atua naio burutomoruo, a be riano. Nalo abe tomu na virakariano moruo na beamu ga, ana ajum̃a amijog Atua kanano verikariano novo nalo, ka mia naio rila m̃arabo na ka mia ajikia avokar meuliano napano maka ve jukuti nene tai, mia maka aial m̃arati na verikariano nene maluvo keanlo.
HEB 11:40 Mia Atua naio jo bitii boka rila m̃arabo vou tai van kito. Mia naio miila Yesu binimei mila kiano im̃auano bisi, mila na nalo na beamu nei, bija kito, kito nonovio robar m̃arati na Atua kanano verikariano nei ea m̃arabo takurano ga a ea bogo takurano ga.
HEB 12:1 Mia nalo nonovio napano roberiilo ruei, nalo ajibe ka burupati tormoruo nalo na burum̃ara viekouoiano, napano be kialo burum̃ara taara na ajumolu ajum̃a amial kito, naruei ajum̃a abitii kanado viekouoiano ka kito rejikiti jum̃abe. Vite venia na m̃a monko kiado m̃arabo, monoka rovukulario, a kariano nalo na m̃a abivikakar tanea kito, monoka ravar bulagio, ka mia ve p̃irido ka retikiti ea burutili m̃arabo na tebievi na jokamu ea mirado, ka na jidomiano na tuvaniano maka toa kito leleio, mia kiado jidomiano ve tebievi ga rivu.
HEB 12:2 Kito rovuku mirado ea Yesu sikili, napano m̃a jikili ju ea juluvati m̃arabo iako. Naio be burupati m̃arabo na viekouoiano, a naio be jukuti nene, mia bogo na tiniedo maio ka naio, mia naio rije moroano van kito. Romijikia rosidomii jum̃abe ka bogo na m̃a naio jom̃a bar niabejalele nalo a mijog kirivova mave ea m̃akolkolo, naio jidom bea ga ka bogokouo na naio jo biniuaio. Naio midu kiano jidomiano jo jikili ea burum̃ara saariano napano jokamu ea mameriniano, rivano-o mia naio tovulio, napano vonganei naio jom̃a jotano ea Atua jum̃ano vameruo, ea kanano vio lu napano loa laka tiniabene.
HEB 12:3 Mia bo ka rotu tiniedo rimaio ka Yesu, ea bogo na tomu na bova nalo nei ajum̃a ajuba naio ka iliano na bova nalo, a tinielo jer m̃elea naio jibe na, mia naio mijamo ka naio ga ba bokar jukuti nene. Jibe na, kito bunu bo ka tiniedo rim̃aro re sop̃eli ka im̃auano, maka rejikia romerou, maka rosidomii ka mia rovuro ka venia napano monoka ralaiio.
HEB 12:4 P̃eli roberiam̃a romijog bova ka m̃a romila mira ka bajago na bova bare, tiniedo m̃aro, mia kito maka rovokar vo venia nam̃a Yesu milaiio, maka rotuko vio ka kariano-o mia sado burukija riiou lele niabedo kario.
HEB 12:5 Mia bo bunu ka maka tiniedo ribobogia iliano na tunukakariano na karam̃ado Atua naio ber ka kito, na naio bio kito jibe ka robe kenerinio, napano naio berinavo “Keneriku, ver kiniou neial rivu ka jogvaiano tai rimei rivokarso, mia jau keiakurano ea re, p̃eli na ver bogo tai neial ka monoka nodu vironiano vanso, mia kanamo jidomiano rijoru re, bior kanaku bajago na mia m̃a noverloglogso kanio naio jibe na naruei.
HEB 12:6 Ver nalo na m̃a kiniou tinieku jiilo, bogo tealo monoka nalalo ajog rivova, a nalo na m̃a nebe karam̃alo, mia bogo tealo monoka nevitivilo.”
HEB 12:7 Tibe na, ver bogo tai jau keial ka jibe nei banso, mia monoka kodu ga tibe ka m̃arabo tai napano Atua naio jidom ka mia riverloglogso kanio, naio jidom rivuririi kanamo meuliano. Kito nonovio na m̃a robe teta, roju m̃a romila jibe na ka kenerido nalo, naruei ver Atua rial kito tibe ka kenerinio, naio monoka rila tibe na ka kito bunu.
HEB 12:8 Tena be kiado ka mia kito roviniu rovokar, mia ver rila re ka kito tai, tibe na mia naio rial toro na tibe ka maka bunu memedu ka ve kenerinio, mia be tete nalo na karam̃alo toro dolu na kovio tai bereio.
HEB 12:9 Mia beamu, kito robiniu, bogo na karam̃ano ajum̃a amila vironiano ban kito, maka rosidomio, be riano, voniganei robitilubario ka nalo amemedu ga, mia mila na rabamenealo loa laka. Tibe na ana bo ka ravatove ka niunudo na naio be karam̃alo, rasaaro ka venia na naio mila miyotuba ka kito, bior naina naruei be m̃arabo na meuliano.
HEB 12:10 Karam̃ado nalo ajum̃a amije vironiano ban kito ka yuka nalo na m̃a robe kiritete kia ga vo, amila jibe na ka ajidom aber mia rivu kalo bereio, mia bogo na Atua midu vironiano ban kito, naio mila ka mia rivu lie van kito vo, ka mia kito bunu rojikia rovokar kiano meuliano lu.
HEB 12:11 Vironiano naio be titai na ka bogo na ravario, mia naio maka sese leleio, naio mijea laka. Mia iorou kanio, ver kito rajamo ka naio riverloglog vatitig rivu kiado meuliano, mia naio rivar sano m̃arati na bo, napano bajago na melumuiano vija tum̃aroano, vija bajago na be lu a memeduano.
HEB 12:12 Tibe na, be kurano ka venia na m̃a kubiniualo, mia kamiu kuvila von ka kuvila tavukia na m̃a naverialiano Aisea naio ber beamu ruei, na m̃a naio berinavo “Kuvitiri bulag jumemiu na m̃a melukluku jaklele, kuvilalo aikulkulu bereio, a sudu jaamiu na m̃a aju amemebiju na, kuvilalo asikil bereio.”
HEB 12:13 Jibe na, kamiu bunu kuvila kenemiu m̃arabo nalo amemedu rivu, ana kenemiu jaba nalo napano amiel jakio, mia jaalo riva rivova lie re, mia amijikia amei asikil bereio.
HEB 12:14 Vite juo na m̃a ratam̃i ka rovokar tulaka atibe na. Tai, naio bajago na bilbilu na bo vija kulo dolu nalo, a tinene, naio be bajago na meuliano lu na m̃a toro monoka toaio ver naio jidom rial Atua na loa laka mirano.
HEB 12:15 Ana monoka kuvim̃auka im̃auano m̃ele ka mia ve re kamiu tai tikiti mia rijoru rimebi ea m̃arabo togio, napano maka rivokar Atua kanano tiniememiano vo. Kuvitikar vatitig bunu rivu ka kiri pati na mijea tai na telisu ga rimei re ka rivijurukar kiamo iviso. Verver makanio, bisi mia riluo rivar m̃arati na bova nalo ve telabo ea kiamo meuliano, a napano niamiamo nene rila niegeniege namoneano lu dolu nalo kanalo meuliano na bo nalo.
HEB 12:16 Monoka ve re bajago va na sum̃ano vija tira rimonea kamiu, a monoka ve re bajago na tiniel ribobogia batitig Atua, tibe ka Isau re nua naio milaio. Isau nene, Atua bijauialario be motoru na karam̃ano ka mia mijikia rivar nonovio kiano jajum̃ano, mia ka bogo tai ana naio jijerio, mijugun bonoti vaatei na bo, napano kuruano maratoru Yakovo naio jonio, ana naio p̃iliṽililar ka Atua kanano tiiano na kiano meuliano, berika kuruano ber “Ei kodu vaatei nei van kiniou voniganei ga, a teta jajum̃ano napano kanaku, mia nesian vanso.”
HEB 12:17 Ana jibe ka kito romijikia ruei, ka iorou kanio ana Isau naio berenio mia rivar bereio kiano jajum̃ano nene, mia aberbureio ga, bior ka naio p̃iliṽililario ka ruei. Mia naio mijog bova o-o jidom riviligio, jegi mia kiride ga. Naio jidomii bereio, ber ver naio rila re ga, ana bo, mia voniganei bano bisi.
HEB 12:18 Bo ka kito rosidomii ve telisu kija bereio ka tivelinio na tuboiano moruo na beamu vo, rivija Ioluano Vou na bo na Yesu kanano napano binimei voniganei. Vite juo nei abe dolu laka garuei, mia vite nei kito romijikia rovitilubar ea salo burusuku nene ve juo. Burusuku na tuboiano moruo, nina naio be burusuku Sinai, napano ea yetemeriba nei ga. Kiado tormoruo Ju nalo amijikia amialio ka miralo, naruei amial ka naio be burum̃ara jeleigio vio na miroano, napano sebi joaio, a be bolu nene napano vio nene kiri bobogio ga, bija kiano suku nalo napano melijokouo jovukoio jo, mia jegi tai napano jom̃a miuvuvu jan eaio.
HEB 12:19 Mia kiano burum̃ara pasimeduo miaga m̃eleia, mia amijog joono tai mil napano kiri temi kar ga jo, mila amerou mia amerou m̃a ajegi aber mia naio river re bunu titai vanlo.
HEB 12:20 Nalo amial ka vio nene be lu laka, ajerako jikili mia kirisikili, ka temeul venia nam̃a ban vaataro ka burusuku nei, tokol luvluvu ga, mia monoka atubabinio ka rim̃aro.
HEB 12:21 Mia tormoruo Mosis naio mial vite nalo nene, mia naio bunu merou, naio berinavo “Lerinio, kiniou nememebiju ka nam̃aro.”
HEB 12:22 Naina naruei be burusuku lu na tuboiano moruo re beamu, mia vonganei kito maka bunu m̃a ravan eaio, robinimei ea burusuku lu na Ioluano Vou na bo burusuku Saion nei. Naina jo tiniabene, napano be burum̃ara bulukomeli na Atua na meul kanano naio joaio, naio be Yerusalemo vou na vio mave. Naio bujo magmago ka nailiano nalo, miroano mia miroano napano maka ajikia avulukulo, napano abitiri bijiilo aju janea vio ka ala iouano na saariano.
HEB 12:23 Mia iviso kalo, kito taara na namoneano lu nalo rotu vio takurano, napano rojibe Atua kenerinio motoru nalo, napano romidu jajum̃ano ruei. A bija kito bunu, niununo na kanado m̃ariano nalo aju, nina nalo napano amemedu bo ruei ea yetemeriba nei, ana bogo na m̃a am̃aro, abur bulaglo aba aboru ea jukuti na m̃arabo na ioruriano, napano aju bo ea vio nei. Mia toro na tibureiano tai bunu naio jom̃a jotano mave ea vio nene, nina be Atua na vite nonovio.
HEB 12:24 A bija vite dolu na bo nene nalo napano ajua kiado burusuku lu na Ioluano Vou na bo nei, mia romijikia reial Yesu, vija kiano burukija na miou, napano m̃a ap̃iligṽilig ea kiado iviso nalo ka rila romeravo. Kiano burukija nei, naio maka tibe ka burukija na tormoruo Epel re beamu, na m̃a ajum̃a aber naio be burukija na m̃a wem̃aren toro, aber bunu be burukija na riuemeran na bova, mia Yesu kiano naio be burukija na milarur toro a naio be burukija na viekokoano. Yesu mila tanea keana, ka naio jikili ju iviso ka Atua bija toro, naio mila virakariano vou ka tom juo nei ju jikili bo, naio milalo aju burukuti bo bereio.
HEB 12:25 Tuboiano moruo re beamu, naio jibe ka ililaboniano tai napano miyotuba ea yetemeriba nei, a ioluano vou na bo, naio jibe ka ililaboniano tai na miyotuba ea vio tiniabene. Nalo na m̃a abilig taakalo ka tuboiano moruo, maka ajikia avuro ka kialo vironiano leleio, naruei ver tibe na, mia tum̃abe ka nalo na m̃a abilig taakalo ka ioluano na bo? Mia nalo avuro kulu kija re na. Tibe na, mia bo ka raiagago vatitig ka Atua joono, bo kito roduio.
HEB 12:26 Ka bogo na m̃a Atua mil ban nalo nanua na, kiano iliano kiritemi tanea naio mila borotano mikulkulu, avona bisi, ana kiano verikariano tai naio berenio bavin lie ka naio bereio, naio berinavo “Bogo tai bereio mia kiniou noikulkulu vatitig ka vio nalo, maka yetemeriba nei ga, mia vija rera garuei mave vaarakurano.”
HEB 12:27 Mia iliano na ea vio nei na ber “Vaarakurano bereio,” naio ber titenia. Naio berenio Atua mikulkulu ka vio vaarakurano ruei, ana kiano jidomiano jikili ka mia rikulkulu vitii bereio saba nalo. Ka legiano na maaro mia naio rijagdag boṽeio ka yetemeriba nei, vija vite nalo nonovio na m̃a jiilo ajuaio, naruei mia vite na m̃a maka rijikia rijagdag boṽeio kanio mia naio tumolu tu sikili tubo tu.
HEB 12:28 Titai ga naio mijikia tu sikili tubo tu jibe nei, naina be kiado Atua kiano navenatuboiano nene, a siva toru laka ka na m̃a naio midu kiado meuliano jo bo joomo eaio. Bo ka bogo nonovio rodu lotuano na bo tai vanio ka mia naio mijikia saaro kanio, mia robitilubar ka naio be lu laka, a rotovon naio.
HEB 12:29 Bior kanado Atua naio be sebi napano jum̃ano nalo amijikia asisen nonovio vite nalo rivano-o riviniu kokoio.
HEB 13:1 Iliano tealo bereio ka rijai kamiu ajibe nei. Bo ka kamiu kuvitum̃a tiniemiu riia kamiu dam̃ariga, tibe ka na m̃a kamiu kube m̃aratavo takurano ga bija Kristo.
HEB 13:2 Mia kamiu tiniemiu riia re kamiu ga, mia tiniemiu riia bunu valauo nalo, kuvisaaro ka kuvitikarlo ea kenemiu vonuo nalo. Bo ka kuvila tibe na, bior ka na m̃a bogo tealo, maka ajikia, mia valauo nalo na m̃a kumitu kubitikarlo, nalo abe Atua kanano nailiano nalo.
HEB 13:3 Kuvisidomial nalo na m̃a ajua nalakoiano, kuvar bitiran kanalo jogvaiano nalo, na tavukia ga napano abuku kamiu bunu kumitu bijalo. Mia kamiu tiniemiu ribobogialo re bunu nalo na m̃a kulo dolu nalo amila lelanlo, bior ka kito robiniu rojua vio yetemeriba nei ga, monoka rajai kito ka ravar bitiran bogokouo nalo nam̃a robiniuaio.
HEB 13:4 Bo ka roviniu rovitii vatitig bajago na soriano naio be kirinovo tai a be vite lu, ana bior vite na, maka rivu ka niamiamo tai rimei rila niegeniege jogu novo napano aboeio ban naljuo neibano ajoro, bior napano aberkar ka mia nalo avuru re bunu dolu. Mia Atua rije tibureiano van nalo na m̃a amiel janea vio, jibe nalo napano ajoro amila siakaiano p̃elina m̃eiaku bija niatira amila siakiano.
HEB 13:5 Kuvitikar vatitig ka kodu re veru naio to tukamu ka kanamo meuliano. Bo ka mia kala jau kasaaro ga ka venia na telisu napano naio joa jum̃amo ruei, bior verikariano na Atua kanano napano naio jom̃a ber jibe na, berinavo “Mia kiniou notuvanso re bogo tai, maka nejikia novilig taakaku kaso.”
HEB 13:6 Ana bogo na m̃a tiniedo maio ka nina, naio mije moroano ban kito bereio, ka romijikia roverial iliano na niosi na Iouano, na binimei be kiado iliano, roberinavo “Toro na miija batitig kiniou naio be Atua sop̃i ga naruei, mia kiniou nomerou re bunu, toro dolu naio mijikia rila venia na vova van kiniou bereio?”
HEB 13:7 Vite dolu, bo ka kamiu kuvitu tiniemiu rimaio ka kenemiu navu-rim̃araboiano nalo, napano ajukamu ka aberial Atua kanano iliano beamu ban kamiu. Kuvilavon ka kuvitii vatitig m̃arati napano naio miyotuba ea kialo bajago novo na kialo meuliano, a kuvilaii kialo moneano na jikili ea kenemiu meuliano nalo.
HEB 13:8 Nalo amonmonea bo, ana kito bunu romijikia romonea, bior Tubo Yesu Kristo naio rive dolu re bogo tai, naio bare ga ka naniovo, a banei, a beni bunu rivano-o mia maka rijikia ribisi.
HEB 13:9 Bo ka rover bunu ka kamiu, ka kuvitikar vatitig kamiu rivu, ka iliano dedade nalo a verloglogiano vovu nalo amei re avuru bulag kamiu den burusio na bo neibano kumituaio ruei. Tomu tealo ajidomii m̃elei ka jokoluolu lu nalo, bija salo bajago lu likiliki nalo, mia m̃arabo nalo na amim̃auka sinaniano nalo nei maka ajikia ajai kialo meuliano nalo. Vite takurano ga na naio mijikia rila kiado iviso nalo sikili rivu vatitig, nina be Atua kiano tiniememiano na bo ban kito.
HEB 13:10 Sinaniano nalo tai na jibe na, nina be sunbue na jokoluolu napano kulo lu nalo ajum̃a abuku jua boda. Abolkouo kanio, amila im̃auano bisi ana iorou kanio ana ajen jibe ka salo sinaniano nalo. Kulo lu nalo nei nalo ameul ea sinaniano na boda nei, mia kito na m̃a romonea Yesu, maka rotum̃a rosinan ea boda nene, mia be kiado boda dolu tai na naio jo, napano romeul ea jokoluolu napano abuku joaio, napano kulo lu nalo maka avitilubario, mia maka ajikia asinan eaio.
HEB 13:11 Nalo ajum̃a amila kialo jokoluolu nalo nene, naruei tai naio be dolu kija, jibe ka napano jidom rila tovorovo na Yesu kiano m̃ariano. Jokoluolu nene naio na m̃a aberenio be ijaiano na viekokoano rivior kariano, naruei bogo napano parinio toro lu mila nina, naio maka rudu momon temeul niabene riva joomo ea vio na be lu laka, mia naio bar ga burukija nene ba jua boda nene. Mia niabene temeul nei, abar ba tavio ea komeli bereio, ana amisebio.
HEB 13:12 Nina jibe ka ga na m̃a Yesu milaio, napano naio bunu amidu naio ba tavio ea burusio na komeli, amila naio mijog bova banbano-o na kanano burukija miou dabo nonovio, napano maka riou kurano, mia miou ka rila kito kiano tomu nalo romei rove lu rivu kamu ea Atua mirano.
HEB 13:13 Ana bior Yesu naio jaaro ka rila tibe na rivior kito, kito bunu monoka rasaaro ka ravavin vija naio ea vonuo tavio, napano tomu nalo ajum̃a abitiidie kito jibe ka na m̃a ajum̃a abitidie naio, mia kito ravar jogvaiano jibe ka na m̃a naio bario bunu.
HEB 13:14 Verver rivova van kito ea yetemeriba nei tibe na, mo bo ga, bior maka rotum̃a rosidomii ka mia rotua komeli tai ea vio nei napano jo julaka ga, mia rojum̃a romidu kiado jidomiano joa kiado vonuo memedu ea komeli vou napano roju raban ka keana.
HEB 13:15 Jibe na, bo ka rosidomial ka Yesu, naio bijuku bo laka ban kito, naio betavo ea kiado m̃arabo, mia rodular Atua siano tulaka kanio. Rala re sida ka temeul nalo vanio, tibe nalo re nua, ana iliano nalo na amiyotuba ea niodo ka rudular naio ajibe ka m̃arati tai napano jesei bo laka banio.
HEB 13:16 Ana kito tiniedo ribobogia re ka rala im̃auano na bo nalo, bior nalo ajibe ka sida napano romijikia ravar van Atua. Mia tai napano naio jo jaaro toru kanio naio jibe ka ver kito rala rivu dam̃ariga van kulo dolu nalo, rasaaro ratan ka kiado saba nalo vijalo.
HEB 13:17 Vite ta bunu bereio, na naio bo ka kito monoka romonmonea kiado navurim̃araboiano nalo, a monoka rasaaro ka rotutano ka kanalo iliano nalo. Nalo aju amila vio jikili ka abitikar batitig kito bo, bior kanalo tomu na tortoru nalo na mave kalo ajum̃a abitii kialo im̃auano nalo a kialo bajago nalo bunu. Verver kiado navurim̃araboiano nalo, kialo jidomiano nalo am̃arm̃aro, ana mia im̃auano nonovio rivova, mia ver romonmonea nalo rivu, ana mia rila im̃auano ve temi laka re vanlo. Mia asaaro kanio ana mia rivu lie bunu rivan kito tomu na im̃auano nonovio.
HEB 13:18 Bo ga, ana vaataro ka iliano nonovio riviniuviniu naruei, mia kumemi numisidom nuvika bunu den kamiu ka kuvisidomial kumemi ka kenemiu volkouano nalo, rivior vio na kirisikili nei na m̃a kumemi numituaio voniganei. Kumemi maka nuvial kar ka torokoriano naio joa kumemi, mia kenememi jidomiano naio meravo bo ga, ana numitum̃a numisikili ga numitua bajago na bo napano memedu ea tomu nalo miralo.
HEB 13:19 Mia kiniou nojidom laka ka kuvolkouo ka ala iliano nalo nei amemedu vatitig sop̃eli, ka mia nejikia notumolu den vio nei neviedu kean kamiu rivesiou re.
HEB 13:20 Kiniou nojom̃a nobolkouo ka kamiu bunu, ka mia Atua rijai kamiu. Naio be Atua na tum̃aro, a be Atua na tinien miia kito kiano nunu nalo, naruei naio miila kiado Tubo Yesu naio binimei ea yetemeriba nei, naio binimei be kiado toro na toru na bitikar nunu nalo, kiano burukija naio miou ka rivitirilar virakariano vou nei napano mia naio to toboto. Naio be Atua nene kiaga vo bunu napano Yesu mijamo ka kiano meuliano banio, naruei naio burulario den m̃ariano, bitirilario meul bereio.
HEB 13:21 Ana kiniou nabarkar tinieku ea naio ka mia naio sian vite novnovo nalo riviniu napano kamiu kuvisidom ka kuvila kanano im̃auano ea yetemeriba nei tibe ka na naio jidomio. Naio jo mim̃au ea kanado meuliano nalo beve terakurano ea ga Yesu Kristo, ana naio jo mim̃auka batitig kanado bajago binimei jibe ka na naio jaaro kanio, ana mia kito reiaia naio ve toru laka riviorio, rivanvano-o na mia rijikia re ribisi, Mm.
HEB 13:22 Kanaku m̃aratavo nalo na ea Kristo, nebivitauia m̃esi nei biedu ban kamiu, be kurano ka maka ve tebievi laka, mia ver kuvial tum̃abe ana mia tiniemiu ser m̃elea re kiniou, mia kuvidu tibe ka kanaku iliano na ijaiano ka rijai kamiu ga.
HEB 13:23 Kiniou nojidom neverial van kamiu ka kuvijog ka kuruado nei Timoti, amijamo ka naio batavio bereio ruei den nalakoiano, p̃eli mia naio rimei sel ea vio nei vesiou re ga, mia kumemi ve juo nuviedu ka nuviadu ka kamiu.
HEB 13:24 Kumemi numisidom ka kuverial van kenemiu navurim̃araboiano nalo, vija Atua kanano tomu dolu nalo, ka kumemi numitum̃a nubika ka nalo ajum̃abe na, aju bo p̃elina jum̃abe, a nalo na vio Italia napano m̃a ajua vio nei nalo ajidom aver bogiano bo van kamiu bunu.
HEB 13:25 Kanaku iliano na maaro ea vio nei naruei, neberinavo mia Atua kanano tiniememiano novo a kanano tinievuiano naio to vija kamiu nonovio.
JAM 1:1 Kiniou Yemesi, kiniou nobe toro na m̃a nemila Atua kiano im̃auano, a kiado Tubo Yesu Kristo kanano, napano nejirii m̃esi nei biedu ban kamiu, napano m̃a kube bajulukuti duelimo ba juo [12] na Israel, napano m̃a kumitua taara dedade nalo ea vio yetemeriba nei. ?Kiniou nebika neber jum̃abe, kamiu kumitu bo ga p̃eli na kumitu jum̃abe?
JAM 1:2 Kuruaku nalo a kuvivinioku nalo, mia bogo na vite na lavonvoniano nalo amei ea kamiu ka alavon kamiu, mia kumijikia kuvial lo tibe ka vite na jogvuiano ga.
JAM 1:3 Nina jibe ka kamiu kumijikia, ver bogo nam̃a vite milavon kenemiu viekouoiano, mia kumitu jikili dam̃ariga, nina rila kenemiu viekouoiano sikili lie vo ka mia kuvitumolu kuvitu bogo nonovio.
JAM 1:4 Mia bogo na m̃a kamiu kumitumolu kumitu jikili jibe na, nina mijikia rila kenemiu meuliano rimemedu rivu vatitigio, a rimeruo vatitigio, mia rivujo ka vite maraiu nonovio na abo, mia maka bajago novo tai na mia naio toa re.
JAM 1:5 Mia ver kamiu tai napano naio river kiano m̃asouano telisu ga mia monoka naio rivika den Atua ea kanano volkouano, ana mia Atua mijikia sian vanio. Bior ea Atua, kanano bajago maka rivitisa ea toro napano jom̃a bika vite nalo denio, naio jo jian ijaiano novo julaka ban tomu nalo ea kiano tinievuiano.
JAM 1:6 Mia ver bogo na m̃a toro naio jom̃a bika vite na jibe na ea kanano volkouano, monoka naio rimonea sikili, ka mia naio sidomii dede re bereio, bior toro na kiano jidomiano jibe na naio jibe ka tei napano m̃a bieveluo, napano m̃a jegi jom̃a jubon titigio janea vio reraio ga.
JAM 1:7 Toro na jibe na, kanano jidomiano beve juo, a kanano bajago nalo maka ajikia avu ga. Toro na jibe na maka rijikia sidom river mia naio rivokar tonovo tai ea Tubo.
JAM 1:9 Kuruado nalo tealo, abe talim̃asa, maka ve kialo saba, mia nalo amijikia avarvarlo m̃ele bior Atua naio midular kialo jidomiano abavin mave.
JAM 1:10 A kuruado tealo bunu, nalo kialo saba toru, mia bo ka nalo avarvarlo m̃ele bunu, nina bior Atua mila kialo jidomiano ajutano ga. Amijikia asaaro tibe na bior abitilubar ka toro na be kanano saba toru, naio javukia niaiesi napano be tena bogo bulati ga.
JAM 1:11 Bogo napano m̃erenio bavin, naio bitunu m̃ele, mia naio tunu niaiesi nalo nei mia amekekeu, atibirbil, naruei niabene na bo avakovio. Mia ea bajago nene kia ga vo, ea bogo napano tomu na saba nalo ajum̃a amim̃auka abarbijii kanalo veru nalo kia ga vo, mia nalo ajoru avakovio.
JAM 1:12 Toro napano jumolu ju jikili ea nalavonvoniano nalo napano abinimei eaio, ilivuiano joaio, bior ka bogo napano naio jovulu vite nalo nei ruei, mia Atua riyovovua vatitig naio ka ijaiano na bo laka, nina be meuliano napano Atua naio berkar ban kito ruei, ka kito napano tiniedojii naio toru.
JAM 1:13 Ver nalavonvoniano nalo nei amei ea kamiu, ana nalo ajukujuku kamiu, mia kamiu kuver re “Uerei, najukujukuano nei amaluvo ea Atua.” Mia maka kuvijikia kuver tibe na, bior maka vite tai naio mijikia rijukujuku Atua, a bajago na milavonvon toro, nina maka ve kiano bajago.
JAM 1:14 Najukujukuano nalo nei abinimei jikili ea toro ea ga bogo na ga kanano sidomvovaiano ga mijubolbolili naio ana buru naio bano.
JAM 1:15 Karina sidomvovaiano nei naio riluo rimei ve toru ana naio rivar kenerinio vijuku vovaiano, karina bogo napano vijuku vovaiano naio bunu riluo rimei ve toru, mia naio bunu rivar kenerinio be m̃ariano.
JAM 1:16 Kuruaku novo nalo, bo ka kamiu kuvitikar kamiu rivu ka kuvijamo ka re tomu nalo amei ka ajubolbolili kamiu.
JAM 1:17 Monoka kuvijikia ka vite novo nalo nonovio a ijaiano maraiu nonovio nalo, ajumolu den vio mave abinimei ea kito. Ajumolu den Atua napano m̃a jo jii yulu nalo nam̃a aju mave tiniabene, a yulu nalo nei, amijikia ajum̃a amijiajianilo julaka. Atua kiano bajago maka lele rivilig ve dolu bogo tai, bior naio maka lele rijikia riverenio rivilig taakano ka kito bogo tai leleio, ka mia tuvan kito ea melijokouo.
JAM 1:18 Ninei be Atua nene ga napano ea kiano jidomiano ga, naio mila kito robinimei robe kenerinio, bior kito romonea kiano ilirianiano, ka kito rojibe ka m̃ariesi na be moti garuei jukamu ka tomu telabo napano mia nalo amonea Kristo iorou.
JAM 1:19 Kuruaku a kuvivinioku novo nalo, mia kamiu tiniemiu ribobogia re iliano nei, ka tomu nonovio monoka ala sop̃eli ka aiagago ka tomu nonovio monoka ala sop̃eli ka aiagago kanio, ana monoka aviju kiki ka aili. Ana ala sopeli re ka tinielo rimimi,
JAM 1:20 bior toro kiano tiniemimiano maka rijikia rila bajago na Atua kanano rimaluvo leleio.
JAM 1:21 Ver tibe na, kamiu monoka kuvuku bulag bajago va nalo a im̃auano va nalo den kenemiu meuliano, a monoka kuvidu kenemiu jidomiano ritotano yetano ka Iliano Lu napano naio mijikia rivurumeul ea kamiu, napano Atua mebija kar ea kenemiu iviso nalo ruei.
JAM 1:22 Kamiu monoka kuvila vaio napano Iliano Lu na naio berenio, maka rivu ka kuvitu kuvijubolbolili bereio kamiu ga a kamiu napano kumitu kumiagago kurano ga ka Iliano Lu nei, karina maka kuvila vite nalo napano naio berenio.
JAM 1:23 Nina javukia toro tai napano naio jom̃a bitii mirano ea mermerobi,
JAM 1:24 mia bogo napano naio barlaka bano, ka bogo bulati ga, mia naio tinieno bobogia bereio mirano jum̃abe.
JAM 1:25 Mia toro napano naio jom̃a bitii veve vatitig va joomo ea tuboiano novo nei napano mijikia rivuru bulag kito den kariano nalo, a naio riagago vatitig ka mia naio riagago re ga ka mia tinieno ribobogia, mia naio rimonmonea a naio riim̃aukanio, toro na naruei mia Atua riilivu ka naio ea kanano im̃auano nonovio.
JAM 1:26 Verver toro tai river naio be toro na moneano napano memedu, mia naio telanivuu vatitig re ka buruminano, naio jom̃a mijubolbolili naio ga bereio, mo kanano moneano be iakurano ga.
JAM 1:27 Ana bajago na moneano na memedu bo, a napano be riano bo ea Atua mirano, jibe nei: mia jau keiel selivivi ka keija kirikiou nalo a taanou nalo ka keijalo ea kialo meuliano kouo nalo, a kovokar kouo rivu kiamo meuliano, ka napano niamiamo nalo a bajago na kiri niagiago nalo na vio yetemeriba atokol lelanso re.
JAM 2:1 Kuruaku nalo a kuvivinioku nalo, jibe ka napano kamiu kumonmonea kiado Tubo Yesu Kristo, napano naio be Tubo na mermerano, mia kamiu kuvitisaia re tomu tealo ka ave dolu, napano kuvila rivu ga ka tealo, a kuvila rivova ka nalo tealo.
JAM 2:2 Jibe ka ver tomu ve juo amei joomo ea kenemiu yimo na volkouano, tinene naio be kiano saba telabo napano kiano kuluniabene minieg bo a naio miya p̃ejelinio na m̃arjukujum̃alo napano amim̃aukanio ea niogo joa m̃arjukjum̃ano, a tinene naio be talim̃asa, napano m̃ano kuluniabene buruboṽeio, mia kamiu kuvila re ve dolu ka naljuo nei.
JAM 2:3 Maka rivu ver kamiu kuviaia nana naio miya kuluniabene maraiu mia kuvudu naio toa vio napano bo laka be sudoyu ana kuver kanio kuver “Barago, ninei be jelemo na bo nei, kumemi numisidom nuver bo kaso kototano ea vio nei,” mia kanio dolu nene ana mia kuver kanio ga kuver “Mia jau kotumolu kotu iorou yako, aver maka ana jau koto tano yetano ga.”
JAM 2:4 Bogo napano kumitum̃a kumila bajago na jibe na, kumitu kubitii tomu tealo abova a tomu tealo abo, nina bior ga vite napano nalo amiyaio, mia vitiiano na kenemiu na maka lele riyotuba ea jidomiano na bo.
JAM 2:5 Kuruaku nalo, kuviagago ka kiniou. Tomu nalo na yetemeriba nei napano abe talim̃asa, mia Atua naio buru bulagio abe kanano, ka rila nalo ave kialo saba novo nalo ea tivelinio na kialo moneano. Ana Atua mila jibe na bunu ka nalo amijikia ava jouro ea kialo jajum̃alo napano Atua kiano tuboiano berkar ruei ban nalo napano tiniel jii naio.
JAM 2:6 Mia kamiu kumitum̃a kubitii tomu na jum̃alo yauo napano abe talim̃asa ajibe ka tena miagiago ga tai. Mia kamiu kuvisidomii vonio. ?Kulo be nalo na m̃a aju amijil kamiu vururu napano m̃a aju abur kamiu kuba komeli? ?A bunu kei nalo napano ajum̃a amiolua kamiu ea sio novo na tortoru napano m̃a Atua midu joa kamiu? Nina maka ve tomu nalo napano jum̃alo beteauo abe talim̃asa, mia nina tomu nalo napano be kialo saba telabo.
JAM 2:8 Kenemiu m̃arabo napano memedu ka kuvitakii ea vio nei naio jibe ka burupati tuboiano na Atua kanano navenatuboiano naio berenio, napano berinavo “Mia kovijuku rivu van tomu nalo napano m̃a aju vaataro kaso, rive verare ka napano jau kojom̃a kojidomiiso.”
JAM 2:9 Mia ver kamiu kuvitisaia ga tomu nalo ave dolu tibe na, nina kumila kariano ga na, mia Atua kanano tuboiano naio tibure kamiu river kamiu kube tomu na m̃a amila kokorov tuboiano.
JAM 2:10 Bior toro napano mila korov iliano takurano ga ea tuboiano nei, naio mila kariano ea Atua kiano vitiiano, jibe ka napano naio mila korov nonovio iliano nalo ea tuboiano biniu kokoio.
JAM 2:11 Bior Atua naio berenio berinavo “Mia kamiu kuvila re siakaiano,” nina Atua nene kia ga navo napano naio berenio berinavo “Mia kamiu kuvuebin re toro.” Ver maka kuvila siakaiano mia kumue toro, mia kube tomu napano m̃a amila kokorov tuboiano ruei.
JAM 2:12 Ea bogo na tibureiano, mia Atua naio ridu re vironiano van kamiu, tibe ka napano mia naio rudu van tomu na bova nalo, mia naio rivuru bulag kamiu den vironiano nei ga. Ka vite nei naruei, kenemiu iliano nalo, a kenemiu im̃auano nalo, monoka tibe ka napano maka kuvila vite tai napano memedu ka kuvar vironiano riviorio.
JAM 2:13 Nina bior Atua tinien miia kamiu, a kanano tinieiiano nene, mia riolkon bulag tibureano napano memedu ka mia kuvokario. Mia bogo napano mia Atua tibure tomu nalo napano maka tiniel riia toro dolu, mia naio bunu maka rijikia tinien riia nalo.
JAM 2:14 ?Kuruaku nalo jum̃abe, ver toro tai tom̃a river naio biekouo ea Kristo, karina naio maka rila bajago nalo napano abo? ?Mia kanano viekouoiano nene naio mijikia rilarur naio? !P̃eli ga! Nina maka lele titai napano bo rijikia riyotuba ea toro na kiano viekouoiano libolibo na jibe na.
JAM 2:15 ?Mia jum̃abe bunu ver ve kuruado tai a kuviviniedo tai napano nalo abe talim̃asa ka kuluniabelo a amijubavio ka sinaniano?
JAM 2:16 ?Ve re kamiu tai ril siniabu vanlo riverinavo “Atua riilivu ka kamiu, ka mia niavo sen re kamiu, a siser re kamiu,” mia naio maka sian vite tai lele vanlo ka riijailo, nina jibe na na bo p̃eli maka rivu? P̃eli ga, kiano iliano napano jibe naio mil kurano ga.
JAM 2:17 Kanado viekouoiano naio jibe nei naruei, ver naio ga ve takurano to, a ve re im̃auano nalo na bo tai to vija naio, viekouoiano nei naio rim̃aro ga.
JAM 2:18 P̃eli mia tomu tai ajog iliano nei, ana mia alavon ka averdop̃eio averenio “Bo ga, mia naio maka tibe na. Naio jibe ka ga napano tomu tealo, abe tomu na viekouoiano, a tomu tealo, abe tomu na amila im̃auano novo nalo.” Mia kiniou neverdop̃elo neverinavo “Ver kiniou neialso napano koberenio kober jau kobe toro na viekouoiano ga, tibe na mia maka nejikia neial kijokijo tai ka river kanamo viekouoiano naio be riano. Mia ver komial napano kiniou nojom̃a nemila bajago vu nalo, nina mijikia rila rimeravo vanso ka kiaku viekouoiano be riano.”
JAM 2:19 Nao, nemijikia ka jau komonea ka napano be Atua takurano ga naio jo, nina bo laka. Ana neber kaso, neberinavo sim̃aro nalo bunu amonea jibe na, a nalo ajum̃a amemebiju toru kanio.
JAM 2:20 Javukia napano rojum̃a roberenio, toro napano naio jom̃a ber be kiano viekouoiano, mia naio maka rila bajago nalo na memedu, kiano viekouoiano naio be tena iakurano ga, toro na jibe na naio miavovu ga na. ?Mia kamiu kumisidom ka nalavon never vite nei rimei rimeravo vatitig?
JAM 2:21 Boga kamiu kuvisidomii von korobido na nanua Epraamo. ?Atua naio mila Epraamo memedu bija naio jum̃abe? Nina bior Epraamo midu kenerinio Aisak, naio miorikario ea boda, naruei naio mijamo ka risebi kenerinio Aisak ve sida van Atua.
JAM 2:22 Kamiu kuvialio, ea vio nei romial ka Epraamo kanano viekouoi-ano, a kanano im̃auano nalo na m̃a mim̃aukanio, vite juo nei amim̃au biju vio takurano ga. Kanano im̃auano, mila ana kiano viekouoiano be riano mia be riano batitigio.
JAM 2:23 Naruei vite nei naio mila ana Iliano Lu nei naio be riano bunu, napano naio berinavo “Epraamo naio biekouo ea Atua, a kar vite na ana Atua mila Epraamo naio binimei memedu bija naio.” Mo vonganei, rojum̃a robio Epraamo kia ga vo roberenio naio be Atua kiano bilbilu.
JAM 2:24 Bior vite nalo na, romijikia ka releal ka Atua naio mila toro memedu bija naio bior kiano bajago novo na kanano meuliano bunu, a maka ka ga kiano viekouoiano ga.
JAM 2:25 Mo kamiu kuvisidomii von Reavo nei, na nanua beamu naio be tira na jom̃a jaano jeregii ga ea m̃arabo. ?Mia Atua mila naio memedu bija naio jum̃abe? Nina bior naio bitikar batitig tomu juo na vio Israel nei, napano naljuo abinimei benalukluku ga ka avitilubarbar vio Jeriko. Naio buru van tomu juo nei ea kunuano, avona bisi ana iorou ana naio jiloglog m̃arabo dolu ka naljuo ka amijikia avuro avan bereio.
JAM 2:26 Mo bo ga, jibe ka napano tati na toro napano maka niununo toaio, naio m̃aro, viekouoiano bunu, napano maka ve bajago novo nalo aim̃au biju vio takurano vijaio, naio bunu m̃aro.
JAM 3:1 Nao kuruaku nalo a kuvivinioku nalo, maka rivu ka kamiu ve telabo kuvilavon ka kuvokar im̃auano tavukia naverloglogiano ea yimo nalotuano, bior jibe ka napano kumijikia, ea bogo na tibu-reiano, mia Atua naio tibure kumemi naverloglogiano nalo sikili laka.
JAM 3:2 Ver toro tai maka lele rilaluvu kanano iliano bogo tai, toro na naio bo mia bo, naio mijikia telanvuu vatitig ka kiano meuliano momou. Mia p̃eli ga, kito nonovio roju romila kokorov kanado iliano julaka ga.
JAM 3:3 Bo ka rosidomii m̃aributoto napano romidu joa bue kulorinio niono. Bogo napano romidu joaio, romijikia romila bue kulorinio nei monmonea kito, mia romijikia robilig kiano burum̃ara tati nei ban ea vio napano rojidom naio rivan eaio.
JAM 3:4 Mia kito tiniedo rimaio ka uako bunu, bekurano ka naio kiritemi laka, a p̃eli na jegi na toru jo jidom riuvio a jubon titigio bano, mia sano vuu nene kiritavasu ga, ana mijikia rila burum̃ara uako nei rivan ea vio na vabe na toro napano bokar vuu naio jidom ka rivan eaio.
JAM 3:5 Buruminado nalo ajibe na naruei, napano nalo abe vite na kiritavasu nalo ga, mia amijikia amil vevavin m̃ele laka. Kamiu kuvisidomii von, ka napano morogo na sebi kiri tavasu ga, mia naio mijikia sisen iesi nalo napano tomormoruo ea burum̃ara vio yeturu.
JAM 3:6 Nao, be riano, buruminado javukia sebi tai. Buruminado nei naio be torogio na mokotenado napano vite va nalo nonovio na yetemeriba nalo abujo magmago vatitig eaio, mia kanano vovaiano nalo ajum̃a amila lelan kanado meuliano momou garuei. Mene nei naio jo mijev sebi ea vio na jogvaiano, ana naio jo mila sebi nei naio bilvili janea nonovio kanado m̃arabo na meuliano nalo.
JAM 3:7 Mia romial napano toro naio mijikia milalup̃ilup̃i tededen nalo amom̃avo, jibe ka temeul nalo napano yeturu, menu nalo, maro nalo, a niado nalo,
JAM 3:8 mia maka toro tai rijikia rila buruminano to dam̃ariga. Buruminado nalo abova laka, mia maka rejikia roverbureo, a kanalo iliano nalo ajavukia maro semei napano mijikia muebin toro.
JAM 3:9 Kito rojum̃a romil ka buruminado romilivu ka Atua Lu napano naio be karam̃ado, mia iorou kanio ana romil kanio bereio ka romiolua kulo dolu nalo, napano maka rosidomial ka Atua naio jiilo jibe ka tovorovo na naio.
JAM 3:10 Naruei ea niodo takurano ga, rojum̃a romil bo a rojum̃a romil bova bunu. Kuruaku nalo, vite nei naio be vovu laka.
JAM 3:11 Maka bulukuei tai ga to napano ea bulukuei ve takurano ga mia uei vija tei nalo ve juo amoluo eaio.
JAM 3:12 Mia jibe na bunu napano buruviki maka rijikia rivar m̃arolivi, a telikrevi maka rijikia rivar m̃arati buruviki. Jau maka kejikia kava kovioviou uei ea buluniogovu.
JAM 3:13 Ver kamiu tealo napano nalo abe masou, a nalo amijikia batitig vite, bo ka mia nalo ala vite nei rimaluvo rimeravo rivu, tavukia kanalo meuliano, monoka naio rimemedu, kialo jidomiano, monoka naio totano, a kialo bajago monoka rimeruo rivu.
JAM 3:14 Mia ver kuvitum̃a kuvisidomii kuver kube masou, mia kenemiu iviso nalo abujovujo ka jokuano, bija varvariano bunu, jibe na kumitum̃a kumila sibi ga. Kamiu kuvil vevavin re bunu ka masouano libolibo na kenemiu, bior nina maka lele ve bajago na masouano na leleio.
JAM 3:15 Nina naio maka ve masouano na mave, mia naio be masouano na yetemeriba nei ga, a naio be tomu va ga kialo, a naio be masouano na miyotuba ea Setano memedu.
JAM 3:16 Bior bogo napano tomu nalo ajum̃a amijoku, a abarvar kalo, mia ka vite nonovio maka bunu ajikia aiasol rivu, naruei bajago va nalo ajum̃a amaluvo.
JAM 3:17 Mia toro napano mije masouano na mave, kanano bajago naio be dolu. Loa ka vite dolu nalo, kanano meuliano meravo batitig, mia naio be bunu toro tum̃aroano, a naio be toro namelumulumuano naio bijuku bo ka kulo dolu nalo. A bunu be toro naio na tinien miia toro dolu. Naio be bunu toro na bar m̃arati na bo ea kiano meuliano, a maka naio rivitisa ea tomu dolu nalo, mia kanano jidomiano maka veve juo.
JAM 3:18 Toro na jibe na, vite nonovio ea kiano meuliano naio memedu bo laka, mia javukia bunu rivan tomu nalo nonovio napano abe tomu na tum̃aroano, napano amim̃au ea bajago na tum̃aro.
JAM 4:1 ?Mo ver tum̃aro nei naio toa re kamiu, mia kuvitum̃a kuvila mira ka kamiu ga, a kuvitum̃a kuvilivili ea kamiu, mia venia naruei naio be burupati nene? Nina naio miyotuba ea kenemiu sidomiano nalo, napano ajum̃a amila ana kumitum̃a kumim̃au m̃ele ka kuvilavon ka mia kuvijog rivu ka vite nonovio na yetemeriba nei.
JAM 4:2 Mia kumisidom m̃elea vite nalo napano m̃a aju yetemeriba nei, mia maka kuvijikia kuvokarlo. Tenene na, milaio ana kumisidom kuvue toro riviorio. A kamiu kumitum̃a tiniemiu jii m̃elea toro dolu kanano saba nalo, mia maka kuvijikia kuvarilo bunu, tenene na milaio ana kubilivili ea kamiu a kumila mira biorio. Kamiu maka kuvokar vite nalo nei tealo napano kumisidomiio, bior maka kuvika den Atua.
JAM 4:3 Mia bogo tealo napano kubika den Atua, mia ka bogo na maka kuvar bunu, a nina bior kubika belea ga. Kamiu kumitu kubikanio ga ka rila ka kenemiu sidomiano nalo amijikia avar venia napano ajidomio ka mia ajog rivu kanio.
JAM 4:4 Kamiu kumitavukia tomu nalo napano maka avijuku rivu ka koalo nalo, javukia napano maka bunu kuvijuku rivu ka kenemiu Atua, napano maka bunu kuver riano vanio. Toro napano naio jidom ka rila bilbilu rivija yetemeriba nei a rivija kanano bajago nalo, naio jom̃a mila bilbilu va naljuo Atua, jibe ka naio be Atua kanano uolu ruei.
JAM 4:5 Iliano riano tai napano joa Iliano Lu naio berenio “Niunudo napano Atua midu joa kito naio jo jidom ka riel bele bogo nonovio ea kiano sidomiano va nalo.” Mia nina maka ve iliano kurano na,
JAM 4:6 mia Atua naio jom̃a mijai kito toru ea kiano tiniememiano ka mia rotibe na re bunu. Nina jibe ka napano Iliano Lu naio berenio berinavo “Atua naio juko vio ka navarvariano mia naio tinien jii toro napano kanano jidomiano batove.”
JAM 4:7 Bior vite na, monoka kamiu kuvidu kamiu totano yetano ka Atua jum̃ano. Monoka kuverbure Setano ana mia naio rivuro den kamiu.
JAM 4:8 Monoka kuvitu lie rimei vaataro ka Atua ka naio to lie riviedu vaataro ka kamiu, a kamiu kulo va nalo, mia kuvisekon jumemiu nalo, a kamiu napano kenemiu jidomiano beve juo, monoka kuvila kenemiu iviso nalo ameravo rivu.
JAM 4:9 Vonganei be kenemiu bogo na tiniemiu riia kamiu rivior kenemiu kariano nalo, napano kumijog bova kanio, napano kumitum̃a kumiaga ka tegiano. Bo ka kuvila kenemiu vitaliano rimei ea kenemiu tegiano, a kenemiu saariano rimei ea kenemiu tinieiiano.
JAM 4:10 Ana monoka kuvila kenemiu jidomiano rivatove ea Atua mirano napano mave laka, naruei mia naio rivitirilar kamiu.
JAM 4:11 Kuruaku nalo a kuvivinioku nalo, maka rivu ka kuvitum̃a kuver niegeniege kamiu a kuvitiburevure re kamiu bereio. Bajago na, Atua kanano tuboiano naio berbure ruei, naruei toro napano naio jo mila jibe na ka kuruano naio jo mila niegeniege tuboiano nei bunu, a naio jo jiburevure tuboiano nei ber naio bova. Mia bogo napano kumitu kubitii tuboiano nei kuber naio bova jibe na, kumitu kumidular kamiu jo mave loa naio, maka bunu kuvitu yetano ka naio.
JAM 4:12 Atua nene naio ga mijikia rivurumeul ea toro a mijikia rila toro rivakovio, naio ga takurano memedu ka naio sian tuboiano to a tibure toro. ?Mia kamiu kuberiam̃a kamiu kube Atua ka mia kuvitiburevure kuruemiu nalo tibe na?
JAM 4:13 Mia kamiu tealo amijikia aver “Banei p̃eli na beni mia kumemi nuvan ea m̃arkomeli dolu tai. Naruei ea vio na mia nuvitu yuka vodolu, mia nuvim̃auka im̃auano napano mia nuvokar puruveru ve telabo.” Mia kamiu kuviagago ka kiniou.
JAM 4:14 Kamiu maka lele kuvijikia venia napano mijikia riyotuba ka kenemiu meuliano beni. Kenemiu meuliano javukia mavo na burusuku napano naio miyotuba ka bogo bulati ga mia iorou kanio ana naio ba kovio bereio.
JAM 4:15 Iliano na memedu ka mia kamiu kuver, kuver tibe nei “Ver Atua napano jo mave laka naio sidom tibe na, mia numijikia numeul nuvitu kija bere vo, ana mia numijikia nuvila tibe na nuvila tibe na.”
JAM 4:16 Mia maka kamiu kumitum̃a kumil vevavin ga a kubarvar ka kamiu kurano laka, mia nina bova ga na.
JAM 4:17 Toro napano naio mijikia batitig vite novo nalo napano memedu ka mia naio rila, mia naio maka rilaio, naio jom̃a mila kiano kariano ga na.
JAM 5:1 Tomu na saba toru, bo ka kamiu bunu kuviagago ka kiniou. Bo ka kamiu kuviaga ka nategiano ka bogo na jikili nalo napano ajum̃a abinimei ka mia avokar kamiu.
JAM 5:2 Ea Atua mirano, naio jom̃a mial kenemiu saba novo nalo jibe ka amenunu ruei, a kenemiu kulum̃arauo novo nalo bunu jibe ka sivinia nalo ajer dudulilo ruei.
JAM 5:3 Ana kenemiu veru nalo bunu, ajibe ka abijauialo ruei, bija mokotenemiu bunu abijauialar lo ruei, jibe ka sebi jijenio, mia nina mila meravo ber kamiu kumim̃au bova bija kenemiu puruveru nalo. Kito rojua legiano na maaro nalo, mia kamiu kumitu kubiobijii kenemiu puruveru nalo bavin lie vo.
JAM 5:4 Tomu na im̃auano amim̃au ruei ea kenemiu tiniavio nalo, mia kamiu maka kuvulu lo. Mia kanalo vuliano napano kubokario ju, jibe ka napano miaga jikili ka berial ka kamiu kumitum̃a kumila saba nalo na bova. Tomu na im̃auano nei bunu ajum̃a ajegi, mia kanalo tegiano bano-o bokar Atua na sikiliano tilinieno.
JAM 5:5 Ea vio yetemeriba nei kenemiu meuliano monmaio ga, kumijikia kuvul ga vite nonovio napano kumisidomiilo ka kuvijog rivu kanio. Kamiu kumisen sinaniano novo nalo bogo nonovio, mia kiniou neber ka kamiu, kamiu kumitibe ka temeul nalo napano tomu nalo abaganilo bano m̃a amijabojabo kirinovo, ana temeul nalo nei amijog bo, mia maka ajikia ka bogo na mia auelo jo binimei vaataro.
JAM 5:6 Kamiu kumitum̃a kubitisa ea nalo napano abe talim̃asa, jum̃alo yauo, kumisian tibureiano nalo napano kiri sikilikili banlo, bekurano ga ka ver nalo amemedu ga. Kamiu kumila kikilo mia kumuebinvinlo am̃arm̃aro garuei. Vite nalo na, kamiu kumila ban nalo napano maka ajikia averbure kamiu leleio.
JAM 5:7 Kuruaku nalo, kamiu monoka kuvitu melumu ga ka mia kuvitu rorea kiado Tubo-o mia naio rimei bereio. Nina javukia toro na tiniavio napano naio jo melumu rorea bogo napano memedu ka mia naio rila im̃auano ea kiano tiniavio, a ka yuo rimei rivovo eaio, a ka naio rivar sinaniano na meruo eaio.
JAM 5:8 Ana kamiu monoka kumelumu ga tibe na bunu naruei ka kuvitu rorea kiado Tubo naio rimei bereio. Mia kenemiu jidomiano naio monoka tu sikili, bior mia naio rimei bere vesiou re ga na.
JAM 5:9 Kuruaku nalo, mia kamiu kuvil mum̃ii re van kamiu tulaka, ka mia Atua naio tibure re kamiu riviorio. Bior naio be toro na tibureiano nene, a jibe ka naio jumolu ju ea m̃aratavo ka mia naio rimei joomo.
JAM 5:10 Kuruaku nalo, bo ka kito tiniedo rimaio ka Atua kiano naverialiano nalo re nua. Nalo aberloglog m̃arabo napano bo tai ka kito, ka bogo napano tomu nalo amila kikilo nalo amelumu ga, a kanalo jidomiano nalo maka rijoru.
JAM 5:11 Nalo aju jikili bano-o ana nalo ajovulu vite nalo nei, ana tenene na kito romial ka Atua naio milivu kalo toru laka. Toro nei Jov naio bunu ga be nalo tai napano naio ju jikili ea bogo na jikili jibe na, mia romijikia ruei vite novo nalo napano Atua naio mila banio iorou kanio. Nina riano, Atua naio be tiniememi toru ka tomu nalo a tinien miialo toru laka.
JAM 5:12 Kuruaku nalo a kuvivinioku nalo, mave ka vite dolu nalo, bogo napano kuberkar ea vite tai, p̃eli na kuber iliano na toru tai, mia kamiu kuvijekakar re rivija mave siano, yetemeriba nei siano, p̃eli na vite dolu siano kanio rila ana kenemiu iliano sikili. Verenio kamiu kuver “Mo” mia monoka kamiu kuver “Mo” ga. Mia ver kuver “Makanio” mia monoka kuver “Makanio” ga. Ver kenemiu iliano be riano bo jibe na, mia Atua naio maka rijikia tibure kamiu riviorio.
JAM 5:13 Ver kamiu tai napano naio mijog bova ka vite tai, bo ka naio rivolkouo, a ver kamiu tai naio saaro, bo ka naio riilivu ka Atua ea iouano.
JAM 5:14 A ver kamiu tai rimie, nina memedu ka naio rivio navagadeano na lotuano ka amei aialio, naruei mia nalo amijikia abolkouo kanio, a amijikia aion titikivaka ve telisu ea parinio ea kiado Tubo siano.
JAM 5:15 Ana bior m̃a aju jikili ea kialo Atua, ana abolkouo koio bija viekouoiano, mia Atua rilarur toro na mieiano nei, rila naio rivu bereio. Ana ver mieiano na m̃a bokario toro na bior kiano kariano tai, ana ver toro nene naio river bulag kariano nene, mia Atua naio riviekokoa naio ka kariano na bunu.
JAM 5:16 Bior vite na, bo ka kuvitu kuver bulavulag kenemiu kariano nalo van kamiu, mia bo ka kuvitu kubolkouo ka kamiu, ka mia Atua naio rila kamiu kuvu bereio. Bogo na toro na memedu naio bolkouo jikili, kanano volkouano naio mijikia rivar m̃arati ve telabo.
JAM 5:17 Elaija naio be toro tai jibe ka kito ga, mia naio bolkouo jikili ka mia yuo rivovo re, naruei ka yuka tolu a togio bereio [3½] maka yuo tai leleio ea kiano vio.
JAM 5:18 Ana iorou kanio ana naio bolkouo bereio, ana yuo bovo bereio, ana tiniavio nalo abar sinaniano bereio.
JAM 5:19 Kuruaku a kuvivinioku nalo, ver kamiu tai jaluvo den nailirianiano, karina kamiu tai ba burio binimei bereio, nina naio be im̃auano novo tanea.
JAM 5:20 Monoka kuvisidomii kario, ver toro tai bilig toro va tai jaluvo den m̃arabo na bova binimei bereio ea m̃arabo na memedu, naio milarur toro na bova neibano kiano meuliano, ana na mia toro na bova nei maka rijikia rivakovio. Ana ea bajago na, toro dolu nei naio mila jibe na ka mia Atua mijikia rivuku bulag nonovio kariano na toro na bova nei kiano. Kiniou, Yemesi.
1PE 1:1 Banalo, kiniou Pitere neber kavijo bo a bogiano bo ban kamiu ea Yesu Kristo siano, napano nebe kanano atevi. M̃esi nei biedu ban kamiu Atua kanano tomu nalo, napano nanua kumitua kenemiu vio na Yerusalemo, a karina amijil dedade ea kamiu banbano vonganei kube valauo ga kumitu janea vio ea tanobuku nalo na tortoru nei Pontas, Kalesia, Kapatosia, Esia, bija Pitinia.
1PE 1:2 Kamiu kumijog bova biorio, mia nojidom neverial van kamiu, ka karam̃ado Atua naio mijikia m̃arabo nonovio na kenemiu meuliano na beamu beamu ruei. Naio bijauia bulag kamiu beamu ruei, naruei Niununo naio mim̃au ea kamiu, mia kuvijogkar Yesu Kristo kuvidu naio ea kenemiu iviso, kiano burukija jekon kamiu kumeravo, a naruei kubinimei kube kanano kulo lu nalo tai. Kanaku volkouano ka mia naio rudu tiniememiano a tum̃aroano na kanano atu ajai kamiu ve toru lie dam̃ariga.
1PE 1:3 Bo ka kito rosidomii jum̃abe ka napano Atua na Yesu Kristo kiado Tubo karam̃ano, naio mila bo laka ban kito. Kito romiaia naio toru laka, bior napano naio tinien miia kito, mila kito romoluo rebe terivou bereio jouro ea kiano m̃aratavo. Naruei jibe ka napano naio mila kenerinio Yesu Kristo naio meul bereio den nam̃ariano, romijikia rejikia vatitig ka vite napano naio jukamu kean kito, maka bunu rive nam̃ariano, mia naio be nameuliano napano maka ribisi bogo tai.
1PE 1:4 Nina naio javukia Atua kanano jajum̃ano novo napano mia ravario iorou. Naio mila batitig ju ruei, naio bar batitigio ju mave tiniabene, napano mia maka rijikia rimenunu, a maka rijikia rimei rivova, maka rijikia riva kovio bereio bogo tai.
1PE 1:5 Vite nei kito maka rovokar vo, mia romonea Atua ka mia kanano moroano toko batitig kito, rivokar vatitig kito rivan riva rivokar legiano na maaro. Ana ka bogo na, mia naio rivetavo ea mirano kulo dolu nalo ka rilarur kito.
1PE 1:6 Nemijikia ka vonganei, kamiu kumitu kubar vite teremi na jogvaiano nalo ea juboluboiano napano m̃a kubokario, a p̃eli jo jibe ga na bunu ea bogo tealo napano naio rimei kia navo. Mia jidomiano nalo napano neberenio ruei na, naio bo ka rila kamiu kuvisaaro, kenemiu iviso nalo ajog rivu bereio.
1PE 1:7 Juboluboiano nalo na, abinimei ga ka ala kenemiu viekouoiano atevijo kija, amei asikil lie. Nina naio jibe ka vite nalo tai javukia niogo, ka napano ver asidom rimei rimeravo rivu, monoka ajie ea sebi ka sisen bulag niamiamo napano joaio, p̃eli na rojie tilibuemia ka meravo a memedu, mia kito bunu rabare kanio. Juboluboiano nalo nei napano robokario, ajavukia sebi tai ka sisen kon kiado viekouoiano rimeravo rivu, a sikili rivu. Ver bogo napano Yesu Kristo riyotuba bereio, naio rial kiado viekouoiano rimeravo rivu tibe na, naruei mia kito nonovio romijikia rasasaaro-o mia, romijikia rovitii vatitig kito, rojog rivu laka.
1PE 1:8 Nojo neberii Yesu na, tinieku maio bereio ka nanua, nojo bija naio, nemijikia batitig naio, mia kamiu makanio. Be riano ka napano kamiu maka kuvija naio nua, bekurano, vonganei tiniemiu jii naio toru laka, a maka lele kuvial naio ka miremiu leleio, mia kuvitu kumonea naio jikili bo, a kenemiu iviso nalo ajaaro kanio ka burum̃ara saariano tai napano toru laka, iliano maka rive verare ka riverii vatitigio.
1PE 1:9 Kenemiu saariano nei, naio be m̃arati novo tai ea kenemiu moneano napano kuvijikia kuvisenio vonganei, mia maka ve nina ga, bior bija naio, ea bogo napano jo binimei, mia kuvijikia kuvisen tai napano jesei lie vo, nina ioruriano na kenemiu meuliano.
1PE 1:10 Vite na napano roberiio, ioruriano na tom nalo kanalo meuliano, naio be vite tai napano m̃a naverialiano nalo re nua amila vio jikili ka ajikia. Amijikia vatitig Atua kanano verikariano, ka mia naio tinien riia kanano tomu nalo, ka mia rilarurlo, a atu averial tibe na.
1PE 1:11 Ajum̃a aberenio, mia maka ajikia batitig ka mia naio rim̃auka tum̃abe, p̃eli mia naio rim̃auka ea bogo na vabe. Amijog ga ka napano Niununo na Naverikariano na kanano naio jo betavo ea banlo ka beamu, mia nalo ala kiki naio ve toru, mia iorou, ilivuiano novo nalo amijikia amalmaluvo, mia ajikia re ka mia Naverikariano naio ve toro na jum̃abe, p̃eli naio be kenia.
1PE 1:12 Beamu be tinielo ka naio be toro na toru tai ea kialo bogo ga, avona iorou, abitilubar ka vite nalo nei napano aju aberialio, maka ve kialo bogo, mia ka ve kiado na iorou. Naruei kamiu bunu kubitilubar ka vite nalo nanua m̃a naverialiano nalo ajum̃a aberialio beamu binimei, nina naruei abinimei abe riano ea iliano nalo na Ioluano Vou nabo napano kumemi numioliolu ka ban kamiu ea Niununo Lu na mave kanano moroano ruei. Mia maka ve naverialiano nalo ga, mia nailiano nalo bunu ajidom ajikia vite nalo nei, mia makanio, maka ve kialo ka ajikia. Tenalo nei amalmaluvo vonga meravo ea kiado bogo ga.
1PE 1:13 Naruei bior napano Yesu Kristo miyotuba ea yetemeriba monloglog kiado bogo, kito naruei monoka rala vatitig kiado jidomiano ka resikili vatitig ka rala kanano im̃auano. Monoka rotilan vuu vatitig ka kiado meuliano, a rosidomial re yetemeriba nei, mia rosidomkar ga ilivatitigiano na bo napano rejikia rovokar ka bogo na mia Yesu rimei riyotuba ea yetemeriba nei ve vaarakurano bereio.
1PE 1:14 Mia monoka romei rotibe ka kiritete novo nalo na m̃a aju amonea batitig karam̃alo nalo, a mia sidomiano va na kulo vovu kialo, maka rivu ka rajamo kalo ka ave tubo ka kiado meuliano tibe ka na beamu, ea bogo na maka rojikia vite tai leleio.
1PE 1:15 Karam̃ado, naio naruei bio kito, mia monoka rovitilubar ka naio napano jidom romei vaataro kean naio, naio be lu laka, naruei kito bunu monoka rove lu vatitig ea m̃arabo nonovio nalo na kiado meuliano.
1PE 1:16 Atua kanano iliano tai ea kanano Tuboiano moruo naio ber jibe nei ruei, naio berinavo Kiniou nebe lu, kamiu monoka kuve lu bunu.
1PE 1:17 Ana bereio, Karam̃ado, vatelabo rojum̃a robio ban naio ka rijai kito, mia monoka rovitilubar ka naio jo bitii veve tom nalo memedu ga ka kialo im̃auano beve terakurano, naruei monoka reiel ea yetemeriba nei napano kiado jidomiano rivatove ka naio, romerou kanio. Naio midu kito rojua vio nei ka bogo telisu ga, rojibe ka valauo nalo ga eaio, mia monoka tiniedo rimaio ka karina, mia rava rotumolu rotu ea mirano rimemedu.
1PE 1:18 Nanua beamu, kiado kulo moruo nalo maka ajikia Atua, tenena ajian lilian kanalo meuliano na melijokouo batove ba bokar bogo na Yesu Kristo naio binimei buru bulag kito denio. A jibe ka napano kumijikia, naio mila jibe nei, maka rivulu bulag kito ka tena yetemeriba tibe ka puruveru p̃eli niogo p̃eli vite venia bereio tibe na napano mia mijikia rivakovio.
1PE 1:19 Maka leleio, naio bul bulag kito ka kanano burukija lu memedu, bior ka napano naio jian kiano meuliano jo jeleig kito, mijamo ka naio javukia kirikiti nunu solbouo tai napano maka ve niajebijo eaio ka ala jokoluolu kanio.
1PE 1:20 Atua naio bijauia Yesu ka rijai kito tibena nanua beamu ruei. Beamu ka bogo na naio jii yetemeriba, mia naio bokar kenerinio nei bija naio jibe na ba tinien miia kito laka, naruei naio miila naio miyotuba vonganei ga ea legiano nalo na maariano nei.
1PE 1:21 Naio miyotuba, naruei ea kanano m̃ariano naio betavo ea kiado m̃arabo ka rovan bereio ea Atua naio bo laka. Mia bogo napano romial ka Atua mila naio meul bereio, midu naio jo mave bijaio ea kiano mermerano, kito be tiniedo ka Atua nei naruei, bo ka romonea naio, resikili rotuaio, a ravarkar tiniedo eaio.
1PE 1:22 Jikario ea vio nei naruei kamiu kumonea ilirianiano na Atua kanano, a kenemiu meuliano jo binimei memedu bo, a kumitu tiniemiumaio lie vo ka kuruemiu dolu nalo. Mia kamiu kuveve re torogio ea naio, monoka kuvila vio sikili ka tiniemiuriia kamiu kuviniu ea kenemiu iviso nalo ka rimei ve toru lie laka.
1PE 1:23 Kamiu kumoluo kube terivou bereio, kumidu meuliano vou tai ruei, mia nina maka tibe nena nalo abar tete. Kiado meuliano vou nei, naio miyotuba ea Atua ka iliano ga, iliano napano meul, iliano napano mia rijikia re rivakovio bogo tai.
1PE 1:24 Kulorinio kiano meuliano maka rijikia to vesiou, bior ka napano miluo bo javukia m̃aiesi, mijikia rimei ve novo laka tibe niaiesi, mia iorou kanio m̃aiesi nei mijikia rijeli, a niati mijikia tibiribili.
1PE 1:25 Mia vite tai ga naio mijikia tobo to, nina be Tubo kiano iliano. A iliano nei naruei, naio ga napano numioliolu ka ban kamiu jikar nua ruei binimei bokar banei.
1PE 2:1 Naruei bior ka napano iliano vou na bo bokar kamiu ruei, monoka kuvituvan bajago na bova nalo. Iviso va nalo, sibiano nalo, kariano luklukuano nalo, jokuano nalo, ililelaniano nalo, bajago nalo na jibe na monoka kuvila bulaglo den kenemiu meuliano nalo.
1PE 2:2 Jibe ka napano tete domdomu ajidom m̃elea m̃alo yu ka amijikia ameul eaio, kamiu bunu monoka kuvisikili ka kuvakar sinaniano a munuiano novo napano mijikia rila niunumiu riluo rimei rimeruo rivu, rimemedu ka bajago na tomu nalo napano Atua milarurlo.
1PE 2:3 Kamiu kuvisen vonvon Tubo sano sinaniano telisu ruei, a ver kumisen kumijog bo, bo ka kuvisen bogo nonovio, mia mabomiu rivujo vatitig dam̃ariga eaio.
1PE 2:4 Atua naio jidom rivitirilar yimo lu tai, naruei naio bijauialar puruveru tai napano naio meul tena tagvoru na yimo nei, napano naio mial bo laka, nina be Yesu. A kulo dolu nalo maka asidom naio, abukulario, mia kito tiniedo jii naio toru, rotakiio.
1PE 2:5 Naruei Atua naio buru kito, naio bitiri bulag kito mave ea puruveru nene, naio miasosol kito jibe ka puruveru nalo napano ameul ea kanano yimo lu nene. Naio mial kito jibe ka taara na kulo lu nalo ka roim̃au kanano, napano romijikia ravar novo nalo van naio napano mia naio saaro kalo, napano romijikia resian vanio rivior im̃auano ga napano Yesu Kristo naio mila ruei.
1PE 2:6 A javukia ga iliano tai joa niosi na tormoruo naverialiano Aisea kanano nua ruei, napano Atua naio ber berinavo Kamiu kubitilubar ruei p̃eli makanio? Kiniou nemijauialar puruveru na bo tai tena tagvoru na kunuaku ruei, napano tiniekujii naio toru. Mia nevitiri naio memedu ea kanaku komeli lu na, Saion. Toro kei napano rivitirilar kanano meuliano ea naio, mia naio rijikia re rijoru rimei rivova bogo tai.
1PE 2:7 Mia kito na m̃a romonea puruveru nene, rober naio bo laka ea kanado vitiiano, mia tealo maka asidom, abukular naio ga bano. Mia iliano dolu tai na Atua kanano ea tivelinio nei joa Niosi na Iouano nalo, napano naio berinavo Bekurano ka napano tomu nalo na amim̃auka yimo aberenio puruveru nei naio bova, abukulario, mia kiniou nomidu puruveru nene, nemila naio be burupati puruveru na tagvoru na kunuaku yimo lu.
1PE 2:8 A ea Niosi na Aisea bereio, be Atua kanano iliano tai naio berii puruveru nei keano vo, naio ber jibe nei, berinavo Puruveru nei, mia tom ve telabo jaalo nalo ser bap̃eia naio, rila aiel vovu. Naio be puruveru tai napano mia rila tom nalo na yetemeriba nei atibirbil. Ver revika venia milalo na ajibirbil jibe na, nina bior ga maka amonea ilirianiano nei napano amijogio, a mia atibirbil avatove laka ea vio na vakovioiano napano naio jo mon kalo.
1PE 2:9 Mia tibena re van kito, bior napano robe taara takurano napano Atua naio bitirilario, robe taara takurano na parinio kulo lu tai na rovitikar kiano vio, roju jouro ea kanano buruvenuo lu, robe tom nalo na kanano m̃aratavo memedu. Kito naruei napano robe tomu na memedu nalo ka ravamenea naio, ka roverial kanano tinienovoiano na mila ban kito, napano naio buru bulag kito den melijokouo, ana jii kito rojua kiano miamoiano na bo laka.
1PE 2:10 Beamu nua robe tomu p̃ilip̃ili, mia vonganei robinimei robe taara takurano na Atua kanano. Beamu nua kito maka rovokar kanano lup̃ilup̃iano, mia vonganei kiano lup̃ilup̃iano naio bujolou ea kanado meuliano.
1PE 2:11 Banalo, ver tibe na, bo ka kamiu kuvitilubar ka yetemeriba nei naio maka ve kiado vonuo rimemedu. Kito rojibe ka tomu na vio dolu nalo, rojibe ka valauo nalo ga, naruei monoka rotuvan bajago natiniekakariano nalo na yetemeriba nei kanano, bior ka napano kanano vovaiano nalo abe uolu memedu ka niunudo.
1PE 2:12 Dam̃ariga roju iviso ka nalo napano m̃a maka asidom amonmonea, ka napano m̃a aju abijukudie kito, mia bogo napano rojua miralo, kanado meuliano monoka rivu mia rivu. Ver tibe na, mia amijikia avitilubario ka venia na m̃a rojum̃a romila naio memedu, mia nalo bunu ver amonmonea, mia amijikia avija ka kito, roviniu ravamenea Atua ea bogo na mia naio riyotuba ka kito bereio.
1PE 2:13 Jibe ka kito robe namoneano nalo ea Tubo ruei, kiado bajago, bogo napano rojua yetemeriba nei naio monoka rimemedu ea naio siano na m̃a roju romioliolu kanio. Namoneano nalo monoka atovon tomu na tortoru nalo napano abitiri bulaglo ka avitikar vatitig tomu nalo. Vede tubo nalo, p̃eli navurim̃araboiano na tortoru nalo,
1PE 2:14 p̃eli na parinio tubo nalo, mia kito monoka rovitilubarlo ka Atua naruei naio mije monea jum̃alo ka atibure tomu nalo, ka asian vironiano van na m̃a mila maka rimemedu, a ka aiaia na m̃a mim̃au bo.
1PE 2:15 Atua naio jidom ka kanano tomu nalo monoka ala rivu, bior ka napano ver rotu rala tibe na tulaka, mia tomu nalo na m̃a maka ajikia vite, napano ajum̃a abuku iliano vovu die kito, mia ajikia re bunu ka aver titai leleio.
1PE 2:16 Ka tivelinio, be riano ka kito romijikia romila venia ga na m̃a kito rojidom, mia ka tivelinio nene, toro na m̃a be namoneano naio maka rijikia sidom m̃elea tibe na. Vede naio jidom ka river tibe na, ver O, vite na naio joa kiniou ga na, kiniou nemijikia nala vite va venia napano kanaku jidomiano ga naio jidom. Mia maka tibe na leleio, bior ka napano monoka rovitilubar ka kito namoneano nalo robe tomu na amim̃au Atua kanano, mia monoka rala venia ga na m̃a naio jidomio.
1PE 2:17 Namoneano nalo monoka atovon kulo dolu nalo, monoka tiniel tii kurualo dolu nalo a kuvivinielo nalo na ea Atua kanano m̃aratavo. Monoka amerou ka Atua, avameneaio, a monoka avatove bunu ka kialo tubo nalo.
1PE 2:18 Ea taara na namoneano nalo, tealo abe tom na tortoru kanalo, ka aim̃au kanalo kurano ga. A kanalo tomu na tortoru tealo amijuku bo, mia tealo ajikili laka, naruei bekurano ka napano toro na toru bijuku bo p̃eli bijuku bova jibe na, mia toro na mim̃au kanano monoka tovon naio rivu.
1PE 2:19 Bogo tealo, vede toro na im̃auano naio mim̃au bo ga, mia kanano marauo naio mijikia rila siniabu vova kanio, naio mijikia rila vova kanio dolu ga. Toro nei mia naio rijog rivova rivior kanano marauo kanano bajago napano maka rimemedu, mia bo laka ka naio river bare ka rijamo ka ga, napano kanano iviso jo bar tiniene ea Atua ga, ana mia naio rijikia rijoglubar ka napano Atua jo bija naio ka riijaio.
1PE 2:20 Mia ver toro na im̃auano mila vite na bova telabo, p̃eli mia kanano toro na toru monoka river asian vironiano vanio. Mia ver bogo napano aje vironiano van toro nei, ana naio jo buru ga, mia kito rover re ka naio jo buru bior ka napano naio be toro novo tai, mia romijikia ka naio maka ril bior ka napano naio bitilubar kiano vovaiano. Mia ver jau kotom̃a kala ga vite nalo na bo tibe ka napano Atua naio jidom, naruei nalo ajumolu amila siniabu kaso, ajian vironiano na kirisikili tai banso biorio, ana jau koto buru ga, nina naruei bajago na bo nanm̃a Atua naio tinien jii m̃elea laka.
1PE 2:21 Vite na napano toro na bo naio mijog bova bior ka napano amila bova kanio, naio monoka ve yati tai na kiado meuliano na m̃a Kristo bio kito robinimei eaio, bior ka napano beamu naio jibe na ruei ban naio. Naio maka rila titai, ana amila naio bar jogvaiano laka, mia naio mijamo ka ga, bior kito. Naruei jibe ka m̃arabo na m̃a kiado Tubo naio miel ban ea beamu ruei, mia kito roue jaano iorou kanio.
1PE 2:22 Iliano Lu moruo berii naio beamu ruei, napano ber jibe nei, berinavo Naio maka lele rila kariano bogo tai, iliano na sibiano maka lele riyotuba ea niono.
1PE 2:23 A jibe ka bunu napano kito romijikia, bogo na m̃a abuku iliano na bova nalo banio, naio maka bimerano, a bogo na amue niegeniege niabeno, mia maka naio river titai leleio vanlo. Naio jo buru ga, naio midu vite nonovio joa Teta Atua jum̃ano napano dam̃ariga kanano tibureiano nalo memedu batitig bo ga.
1PE 2:24 Bogo napano Yesu naio jaklele ea m̃akolkolo, vironiano na kanado kariano nonovio mijoru ea niabene, a kiano m̃ariano mila na bajago na lakariano naio m̃aro den kito, mila napano bajago na mila memedu naio meul bo naio joa kiado meuliano. Ierinio, kiano niabejalele nalo amila kiado niabejalele nalo amije ioruriano na bo.
1PE 2:25 Beamu, kito roju romiel vovu jibe ka nunu nalo napano m̃a amilaluvu kanalo m̃arabo, mia vonganei toro na m̃a bitikar nunu naio mileal kito bereio ruei, vonganei robinimei ber roju batitig bija naio napano jukuku ka kiado meuliano.
1PE 3:1 Jibe ka napano kito namoneano nalo monoka rotovon parinio tubo na buruvenuo, kito na m̃a rojoro monoka rotovon bunu koado nalo. Nemil beamu ban kamiu tire nalo, ka kamiu monoka kuvitovon vatitig kouemiu nalo. Vede tira tai koano naio maka rimonmonea iliano lu, naio maka sidom rijog kanano tira nei verii kanio, mia ver kanano tira rila rivu ka naio dam̃ariga, p̃eli mia mijikia rivuru naio bunu rimei rive namoneano tai.
1PE 3:2 Iliano telabo maka rijikia tovulu toro nei, mia bogo napano naio bitii vatitig koano kiano bajago lu na tovoniano na meuliano nei, mia naio saaro ka rimonea.
1PE 3:3 Tire nalo, bo ka kuvitilubar ka burupati na yovovuano na kenemiu, maka rivior na m̃a kuvijukon vijumiu tibe na tibe na, p̃eli na m̃a kumive yomu niogo nalo, p̃eli na m̃a kuviya kulum̃arauo nalo na bo.
1PE 3:4 Vite na, naio maka rivior napano m̃a kumiyovovua batitig niabemiu nalo jibe na, mia venia na m̃a mila kamiu kumadigdig bo riano, naio be bajago na bo na joomo ea kamiu. Nao, kenemiu tiniememiano a kenemiu iviso na melumu, nina naruei naio be kenemiu novonovoiano riano, a mia nina naio maka rijikia rimei ve terimoruo bogo tai, naina naruei be bajago napano Atua naio mial bo laka.
1PE 3:5 Korobido tire nalo re nua, nalo bunu kanalo bajago jibe na ga. Nalo abarkar tinielo ea Atua, naruei amonea ka naio ga mijikia riijailo ka amei ave novo laka ea mirano a ea mirano na kulo dolu nalo. Bogo napano koalo nalo bunu amial ka napano kanalo tire nalo nei abatove batitig jibe na, nalo amial bo laka.
1PE 3:6 Tira tai napano naio jom̃a mila jibe na, naio be tiramoruo Sera, napano naio jaaro ka tovon batitig koano tormoruo Epraamo, banbano naio jo bio ka naio be kiano tubo. Tiramoruo Sera nene, roju romial naio jibe ka kiado nena novo tai, naruei kamiu tire nalo re banei, ver kamiu kuvitu kuvila memedu van kouemiu nalo, tibe ka napano naio milaio, kamiu kumei kuvitibe ka kenerinio niatira nalo memedu. Vede tealo amerou ka ver ala tibe na van koalo nalo aver mia tum̃abe ka nalo, mia makanio, kamiu monoka kuvatove kalo tibe ka na m̃a Atua naio jidomio.
1PE 3:7 Mia iliano rimei ka kamiu sum̃ano nalo, ber ka kamiu monoka kuvisidom bukua kouemiu tire nalo ve toru. Vere toro tai toa kanano vonuo vija koano, naio monoka rivitilubar ka naio be sum̃ano, naio jikili bo, mia koano naio be tira, maka sikili laka tibe ka naio. Naio monoka tinieno maio tulaka ka Atua naio jian meuliano novo maka van sum̃ano ve takurano ga, mia naio jian banlo abe juo, sum̃ano bija tira abe veverare ga. Mia ver toro tai rila re sikili m̃ele van koano tira, mia kanano jidomiano rivatove kanio, melmeloko rivu vanio, mia naljuo kialo volkouano nalo maka ajikia ava avoru ea m̃arabo togio ga, mia amijikia ajaka ava avoru ea vio na m̃a Atua naio jojoaio.
1PE 3:8 Iliano na maaro tai ea tivelinio na, kiniou neber bo ka kamiu kuvidu jidomiano nalo napano neberenio mave ruei. Kamiu kuviniu, monoka kuvila vio sikili bogo nonovio ka kuvitu batitig vija kamiu napano kenemiu jidomiano ve takurano ga. Kamiu tiniemiu riiaia kamiu, kamiu tiniemiu titii kamiu tibe ka kube m̃aratavo takurano ga, kuvijuku rivu, kuvidu kamiu kuvitutano ka kamiu bereio.
1PE 3:9 Nana m̃a mila lelanso, mia jau kovimerano re vanio, a nana m̃a mioluaso, mia jau koyolua merano re naio. Venia napano vede rimei easo, mia koto kesian merano ilivuiano na bo ga rivanio. Bajago na bo jibe na naruei napano Atua naio bio kito biorio, ka rala tibe na dam̃ariga, a ver resian ilivuiano rivan toro dolu, mia Atua naio rudu kanano ilivuiano toa kiado meuliano.
1PE 3:10 Verikariano na Atua kanano na jibe na naio joa Niosi na Iouano nalo ruei, napano naio ber jibe nei, berinavo Toro na m̃a tinien jii ka toa yetemeriba nei rivu, p̃eli naio jidom ka kiano meuliano mia rivuro rivu, ve tebievi, naio monoka riverbure ilivovaiano nalo amei re amolmoluo ea niono, monoka rivitikar vatitig ka naio tom̃a rilasibi re.
1PE 3:11 Naio monoka rituvan na bova, rila na bo ga. Naio monoka ritakisor tum̃aro, monoka rilavio sikili tulaka ka rivuru rimei vaataro ka iviso na tomu nalo.
1PE 3:12 Tubo mirano naio jo bamere jikili vatitig ea toro na m̃a jo mila vite memedu, naio jo mije tiliniene ka volkouano na tomu nalo na bo jibe na. Mia tomu nalo napano m̃a aju amim̃auka vovaiano, mirano jikili ealo, bilig taakano kalo.
1PE 3:13 Ver kito rotu rala vio sikili m̃ele ka rala vite nonovio naio rivu mia rivu, mia rover re ka mia tomu tai amijikia ala siniabu ka kito riviorio.
1PE 3:14 Mia vede bogo tai aial kito roju romila bo jibe ka napano Atua naio jidomio, naruei romiilo ka napano ajumolu amila bova ban kito biorio. Ana ver tibe na, monoka reial jogvaiano nei naio maka ve vite tai, naio be ilivuiano tai ga napano Atua naio mije ban kito. Romijikia rosidomial iliano tai na niosi na tormoruo naverialiano Aisea, napano naio ber jibe nei, naio berinavo Atua kanano toro, jau komemebiju re, jau monoka komerou ka re venia na m̃a tomu nalo na yetemeriba amijikia amerou kario.
1PE 3:15 Iliano na ber ka mia kito romerou re, mia venia napano mia monoka rala, ea kiado iviso, monoka rodu Kristo naio loa vite nonovio, naio takurano be kiado tubo. A bogo nonovio monoka rotu batitig rivu, jibe ka napano ver vikadeniano tai rimei rivika ka bior vaio romonea, a bior vaio ana rabar tiniedo ea Yesu, naruei monoka rejikia vatitig tum̃abe mia romijikia resian verdop̃eiano na bo rivano.
1PE 3:16 Mo bogo napano verdop̃eiano bano, naio monoka rivan vija bajago na melumuiano, a nana tovoniano na toro. Nalo na m̃a tinielo jii ka m̃a ala lelan Kristo kiano namoneano nalo, amijikia avuku iliano na bova ve miroano rimei ea kamiu, mia kuvitikar, maka rivu ka kuvuku bereio iliano na bova nalo rivan ealo bereio. Ver kuvila tibe na, mia iorou kumijikia kuvimou ve toru laka ea ilisikiliano nalo na kenemiu bereio, mia ver kumelokloko ga kalo, mia nalo naruei monoka aimou rivior kanalo iliano nalo na jikirkili m̃a na.
1PE 3:17 Ver Atua kanano sidomiano naio rijamo ka bogo tai jogvaiano naio mijikia riyotuba ka kito, mia maka rivu ka jogvaiano nei naio rimaluvo rivior vite tealo na bova na m̃a kito ga romilaio. Mia bo lie ver jogvaiano nei naio riyotuba ka kito rivior ga im̃auano novo nalo na m̃a kito roju romilaio.
1PE 3:18 Kamiu tiniemiu maio ka Kristo, napano naio jibe na. Naio be toro na memedu laka tai, mia naio mijog jaleleano burutomoruo laka bior tomu nalo napano maka amemedu. Kariano na kito tomu nalo na yetemeriba kiado telabo laka, mia ea kanano m̃ariano takurano nei, naio mila vite nonovio bo ruei ka rila ka ve kiado m̃arabo ka mijikia rivuru kito rava vaataro ka Teta Atua. Amila lelan Yesu niabene jibe na bano naio m̃aro garuei, mia bo laka ka napano iorou, naio binimei meul bereio ea moroano na Atua Niununo.
1PE 3:19 Beamu ka naio meul bereio jibe na, napano naio joa vio na m̃ariano kia ga vo, moroano na Niununo na Atua kanano nei binimei bujo magmago eaio, mila na naio ba mioliolu memedu ban niununo dolu nalo napano ajua vio nei, ka vonganei naruei Atua naio jovululo ruei, ana Sim̃aro naio bijukude garuei.
1PE 3:20 Niununo nalo nei, naio be tomu nalo na m̃a maka asidom amonmonea Atua, ajavukia nalo na ea bogo na tormoruo Noa re nua. Ea bogo na, Atua naio jororealo ka aviliglo, naio midu bogo tebievi banlo. Aju jibe na, bano na Noa naio jo mim̃auka burum̃ara kanano uako nei banbano, mia maka asidomio ga, naruei bogo napano ueimiya jovukolo nalo amadudu. Nalo miroano aba kovio ka bogo na, mia tomu telisu ga amije ioruriano joomo ea uako, nina be Noa nalo arolu ga.
1PE 3:21 Naruei burum̃ara uei nei napano burulo ameul ea kialo uako nei, naio be nioti venia ban kito banei? Naio mila kito rojidomii uei dolu, uei na kanado ioruriano, naina be uei na m̃a amila varueiano ea kito eaio. Uei na varueiano nei, naio maka ka rila ka niabedo rimeravo, mia naio jekar vatitig kito ka Atua biekokoa kariano nalo na kiado, naruei kito maka bunu roimou ea naio riviorio. Varueiano naio midu kiado meuliano jo bo bija Atua jibe na, mia bo ka kito rosidomii bunu ka kei naio mila kiano m̃arabo jibe na? Yesu Kristo ga na naio milaio, binimei ea kanano tumoluano bereio den nam̃ariano.
1PE 3:22 Mia iorou ka nina, naio bavin bereio ea vio mave, naio ba jo jotano mave bija Atua ea jum̃ano tivelinio vameruo nene, napano nailiano nalo, kulo kouo nalo na tortoru, bija moroano nalo, abiniu ajutano ka kanano navenatuboiano.
1PE 4:1 Jibe ka na neberenio ruei, Kristo naio mijamo ka naio bar jogvaiano miroano ea mokotenano, mia kito bunu monoka rala kiado jidomiano riveverare ga. Toro na m̃a naio rijog vova ea mokotenano, monoka naio river re river bova, bior ka bogo napano naio miyotuba ea jogvaiano jibe na, mijikia rila naio sikili lie vo ka naio ribisi vija bajago na kariano nalo.
1PE 4:2 Toro na jibe na, naio maka bunu todu ka kanano meuliano na yetemeriba nei, napano tinieiiano va nalo na bajago na tomu, nalo ve toru laka ea kiano jidomiano, mia naio jidom ga vite na memedu nalo na m̃a Atua naio jidomio.
1PE 4:3 Burum̃ara togio na kanado meuliano, kito romila kule laka bogo be ruei napano roju rejeliviv bija bilbilu nalo nei na m̃a maka amonmonea. Kitoliko nalo ea meuliano va napano bujo ka veribinio nalo, najiliano na tire nalo, namunuiano na uei ba parilo jeliviv, tinielo mimi a ajukuruku, amila uetubaiano janea vio bokar viomijeni, amila korov tuboiano, bija amila lotuano ea tavoru sibisibiano nalo.
1PE 4:4 Nina kiado meuliano na beamu na, mia vonganei bilbilu nalo na maka bunu ajikia ka kito roju jum̃abe. Amial ka napano maka bunu ga rosidom ka ratakisorlo ka ravan rovudomdom kiado meuliano ea kialo bulumirano bulukinia, mia maka asaaro leleio, mila na tinielo jer kito toru laka.
1PE 4:5 Mia kito rosidom dede re, tomu kinkin nalo na jibe na mia atumolu kia navo kamu ka Atua mirano, napano mia naio tibure tomu nalo na ameul vija bunu nalo napano am̃arm̃aro beamu ruei. Mia monoka nalo averial kialo veriiano vanio, naruei ea bogo nei, mia avitilubar kanalo torokoriano nalo.
1PE 4:6 Mia tibe na re van namoneano nalo. Vede tomu nalo na yetemeriba atiburelo asian vironiano na yetemeriba van mokotenalo, mijikia riva rivokar napano mia alaluvu kialo meuliano, mia bogo na napano atumolu ea mirano Atua, mia naio sian ijaiano na meuliano rivan niunulo. Mia meuliano nei naruei naio be burum̃ara vite na m̃a mila kito roju romioliolu ka Ioluano Vou na bo ban tomu nalo.
1PE 4:7 Kiniou nojidom never tibe nei, ka vonganei vaataro ka kito rovokar jukuti na vite nonovio. Ea bogo na jibe na, namoneano nalo monoka atumolu batitig rivu ka napano kialo jidomiano nalo ameravo rivu, ka amelukluku re ka volkouano.
1PE 4:8 A mave ea vite nonovio dolu nalo, monoka tinielo titiilo bereio ve toru laka, bior ka napano bogo na tiniedo jii toro tai, mila na romijikia robiekokoa kiano kariano monmaio ga. Iliano tai naio ber jibe na ruei, berinavo kariano toru laka, mia tinietiiano naio mijikia rivariko nonovlo.
1PE 4:9 Vite dolu, namoneano nalo monoka asaaro ga ka avitiikarlo bereio ea kunualo nalo.
1PE 4:10 A bunu, nalo veve terakurano monoka ajikia vatitig veve moroano a jikiaiano nalo napano Niununo jian banlo, a monoka aim̃au rivu vija ka rijai batitig kanalo bilbilu dolu nalo. Ver aviekouo rivu, amijikia ala ka napano mia tiniememiano novo na Atua kanano riyotuba kalo.
1PE 4:11 Toro napano jikiaiano na iliano joa naio, naio monoka ril rivu tibe ka napano Atua kanano iliano na memedu ga naio jo moluo ea niono. Toro napano jikiaiano na ijaiano na im̃auano joa naio, naio monoka rila rivu vija sikiliano nonovio napano Atua jian banio. Ver bogo nonovio rala vite nonovio rivu laka tibe na, mia tomu nalo amijikia avamenea Atua ve toru riviorio, avamenea naio ka Yesu Kristo siano, napano mermerano nalo a moroano nalo abe kanano ga rivan riva ribisi re bogo tai.
1PE 4:12 Banalo, nemijikia ka vonganei kamiu kumitu kubiniua bogo tai na jaleleano napano naio mila kamiu kumijog bova toru. Mia nejidom never ka kamiu, ka kuviilo m̃ele re kanio, maka kuvial vite na tibe vite tai napano be tiniemiu ka kuver maka rijikia riyotuba ka kamiu bogo tai.
1PE 4:13 Mia venia ka ala, kuvisaaro ga ka napano kuvijikia kuvitu burukuti vija Kristo ea jogvaiano nalo na kanano. Ver tibe na, mia iorou kanio ve burum̃ara kenemiu saariano, napano kuvijikia kuvitu burukuti vija naio bereio ea bogo napano naio rimaluvo vija kanano mermerano.
1PE 4:14 Ver dolu nalo amijikia ka Kristo siano joaso, mia amijikia avuku ioluoliano va amei easo, mia kosidomii m̃elea re kanio. Mia burum̃ara ilivuiano na Atua kanano naio toaso ga, bior Niununo na mermerano na Atua na mave naio jo joa kanamo meuliano.
1PE 4:15 Ver ala vironiano tai p̃eli jogvaiano tai rimei easo, maka rivu ver ala rivior napano jau kobe toro tai na mue toro, p̃eli kobe toro na vinauano tai, p̃eli kobe toro na mila korov tuboiano, p̃eli kobe toro tai na mila jaleleano.
1PE 4:16 Mia ver ala rivior napano ga amijikia ka komonmonea Kristo, mia kala re tibe ka na jau komimou, mia monoka kovamenea Atua napano naio mialso kabare ka Yesu Kristo siano naio toaso.
1PE 4:17 Vonganei bogo na tibureiano naio jikar ruei, a mia riva rivokar na moti Atua kanano m̃aratavo. A romial ka napano naio mijikia rijamo ka bogokouo tealo amaluvo ea meuliano na kenerinio nalo kanalo, mia ver naio rila tibe na van nalo napano amonea, maka rejikia ka mia tum̃abe ka nalo napano maka asidom amonmonea kiano Ioluano Vou?
1PE 4:18 Nina naio javukia iliano tai na niosi moruo na Ilimasouano nalo na m̃a naio berenio jibe nei, naio berinavo Toro na ajidomii aber naio memedu ruei, be vite jikili tai ka Atua mijikia rilarur naio. Mia ver tibe na, kuvilavon kuvisidomii nalo na m̃a maka asidom Atua, abe tomu na kariano ga. Mia tum̃abe kalo?
1PE 4:19 Mo, ea vio nei never iliano telisu tai van kamiu napano Atua mijamo ka jogvaiano maluvo ka kamiu. Neber kamiu kuvitu bogo nonovio ka kuvila rivu van tomu nalo nonovio, a kamiu kuvidu kenemiu meuliano toa Atua jum̃ano. Naio naruei be Atua na jii vite nonovio, naio be Atua na biekouo laka, naio be Atua napano romijikia rovarkar tiniedo rivu ea naio dam̃ariga.
1PE 5:1 Mo vonganei nojidom neverial jidomiano tealo rivan kamiu navagadeano nalo na lotuano. Kiniou be tinieku ka nabare ka neil van kamiu tibe nei, bior kiniou bunu nebe navagadeano tai, a mave ka naina, nobe nalo tai na m̃a numial Kristo ka mirememi bogo na naio bar jogvaiano nalo mave ea m̃akolkolo. A nemijikia batig bo ka kiniou bunu nove tai napano mia noto jouro ea mermerano nalo napano mia amolmoluo iorou, tenene na nemial bo ka nesian iliano nalo nei ka rijai kamiu.
1PE 5:2 Nebika jikili ban kamiu jibe na, ka kuvitikar rivu taara na nunu nalo napano Atua barlo aju yetano ea vitikariano na kenemiu. Nina be burum̃ara im̃auano tai na, mia riano, maka rivu ka ver kuvitu kuvila napano kenemiu iviso maka sidom rilaio. Mia bo ka kuvilaiio vija jidomiano na saariano, jibe ka na Atua naio jidomio. Mia im̃auano venia na m̃a kuvila, maka kuvila rivior ga ijaiano telisu tai napano vede kuvijikia kuvario, mia monoka kuvila rivior ga jidomiano tai joa kamiu ber bo laka ka ala im̃auano nalo na rijai tomu dolu nalo.
1PE 5:3 A nalo napano m̃a ajua jumemiu ka kuvitikarlo, kuvila re ka kuvitu kuvilavon kuve boru na jikili vanlo, mia monoka kuvitukamu rivu kalo, kuvisiloglog m̃arabo vanlo, ka mia amijikia aue jaamiu.
1PE 5:4 Ver kamiu kuvim̃au rivu tibe na rivano, mia parinio toro na bitikar Atua kanano nunu nalo mia naio saaro rivior kamiu. Bogo na mia naio riyotuba bereio, mia naio rivitiri bulag kamiu tibe ka kiano parinio tubo nalo, mia naio riyovovua vatitig kamiu napano mia kiano burum̃ara miamoiano na kiano mermerano mermeralii kamiu napano maka rijikia rivatove bogo tai.
1PE 5:5 Vonganei iliano biedu ban kamiu m̃eaku nalo. Nebika jikili den kamiu ka monoka kumisaaro ka kuvatove ka tormoruo nalo vija kenemiu navurim̃araboiano nalo. Iliano na jibe na kamiu kuviniu monoka kuviduio, bior ka napano naio bo ka bogo nonovio monoka rola bajago na vatoveano van kito. Naina jibe ka iliano tai napano Niosi na Ilimasouano naio ber nua ruei, napano berinavo Atua naio berbure bajago na m̃arouano, mia naio miija bajago na vatoveano.
1PE 5:6 Tibe na, bo ka kito rala kiado jidomiano totano ka Atua bogo nonovio. Rodu kito rotua jum̃ano, naruei ea kanano moroano mia naio mijikia vitiri bulag kito bereio bogo tai.
1PE 5:7 Kito ravar kiado bagaro nalo tua taakano, bior napano naio jidom kito toru laka, naio jaaro ka rijai kito.
1PE 5:8 Kiniou nojidom nover bunu iliano tai ka rilabon kamiu, ka monoka kuvitikar vatitig kamiu, monoka kuvitilubar m̃arabo kija. Kiado uolu nei Sim̃aro, naio jom̃a jeliviv ea kito dam̃ariga, naio javukia burum̃ara temeul deden tai napano jijer naio toru kar namoneano nalo ka tumolu ser niadualo.
1PE 5:9 Mia kamiu kuvijamo ka re naio ka rila tibe na, monoka kuviekouo sikili ea kenemiu viekouoiano ka kuvitoko vio vatitig ka naio. A maka ve kamiu ga napano naio jom̃a milavon kamiu, mia kumijikia ruei ka kiado bilbilu dolu nalo miroano na aju jeliviv ea yetemeriba, a jogvaiano nalo aju amiyotuba ealo bunu, naruei bo ka kito roviniu rotumolu rotu sikili ka Sim̃aro naio tovulu re kito tai.
1PE 5:10 Ierinio ka napano kamiu kumitu kumijog jaleleano kija ea bogo na, mia kanado Atua na tiniememiano nonovio mia rijai kamiu. Naio naruei napano bijauia bulag kamiu ruei ka mia kamliko Kristo joomo ea kiano mermerano, mia naio naruei napano mia ridururu kamiu vonganei. Mia kumemebiju re bunu, mia kuvikulkul re, ana ea kiano moroano, mia kuvijikia kuvitumolu vatitig bereio.
1PE 5:11 Tibe na, kito rovamenea kiado Atua, bior ka napano kanano moro-ano naio jo jovulu nono vite nalo, a mia naio to tovulu vanvan rijikia re bisi bogo tai, tibe na naruei.
1PE 5:12 Kiniou nojoa vio nei bija kuruado novo nei Sailas, nojo nabalea naio ka vite miroano, a naio naruei miija kiniou bivitauia kar bulag kenemiu m̃esi nei. Nemijikia ka m̃esi nei naio bulati laka, neber vite telisu ga, mia venia napano naio joa vio nei, nemijikia ka naio berial bajago novo nalo na tiniememiano na Atua kiano be riano, napano naio memedu ka kamiu ea vio napano kumituaio vonganei. Tibe na, kuvulukuio, kuvidu ka rijai kenemiu jidomiano, kuvitu sikili eaio dam̃ariga.
1PE 5:13 Nalo namoneano nalo na vio nei Romo, bija bunu Mak, napano nobur naio jibe ka keneriku ruei, aber kavijo bo p̃eli bogiano bo ban kamiu. Numitua vio na, numial bova kija, numijog jibe napano numitua burum̃ara komeli va na beamu nei napano abio ka Bapilon. Mia naio bo ga, bior napano numijikia ka Atua bijauia bulag kumemi ruei, nubija kamiu, kito rove kanano.
1PE 5:14 Kanaku iliano maaro ga ea vio nei, neber bogo na kamiu kubinimei vio takurano, kuvila vorvoruano bo van kamiu, kuviniomniom kamiu tibe napano tiniemiu jijii kamiu. A kanaku volkouano, ber tum̃aroano novo na Yesu Kristo kanano naio jo bija kamiu kubiniu napano kube kanano. Kiniou, Pitere.
2PE 1:1 M̃esi nei, kiniou Saimon Pitere nebivitauia, jibe ka nebe Yesu Kristo kiano naim̃auano, a nebe kiano atevi. Nojo nebivitauia biedu ban kamiu napano kubokar viekouoiano ea naio bo laka, be verare ga ka kumemi nanua, nubakar beamu ruei. Naio naruei be Atua a be ioruriano na kiado robiniu, naio jo mila memedu bo ban kito dam̃ariga.
2PE 1:2 Jibe na, nojidomial kamiu, kanaku volkouano ka mia kuvijikia vatitig Atua kiado Tubo napano Yesu na riva lie tibe na, vanvan rila napano kiano tiniememiano a tum̃aroano to rivujo ve toru ea kenemiu meuliano nalo.
2PE 1:3 Yesu naio bijuku bo laka ban kito, napano ea moroano na mermerano a tinievuiano na kanano, naio bio kito ka rejikia vatitig naio tibe na. A bogo napano romijikia vatitig naio, naio ga rila vite nonovio ea kanano moroano lu nene ka rila Atua kanano meuliano a kanano bajago lu avujo lou ea kito.
2PE 1:4 Yesu naio mila ka napano roju robokar ijaiano novo nalo nei napano kirinovo laka, romial ka jakii memedu ga kiano verikariano nalo. A ea m̃arabo nene, romial ka napano naio mila kiado meuliano jo miasol meuliano lu na Atua kiano, a naio jo jian ban kito ka rovuro den niamiamo na sidomvovaiano nalo na yetemeriba nei.
2PE 1:5 Bior vite na, kamiu monoka kuvukdeli ka rila kenemiu meuliano rimei rivu lie tibe na. Ea viekouoiano napano naio joa kamiu ruei, bo ka kuvijedu ka tinievuiano bereio. Ea tinievuiano nei, bo ka kuvijedu ka jikiaiano a masosouano.
2PE 1:6 Ea jikiaiano a masosouano nei, bo ka kuvijedu ka telanvuiano, a ea telanvuiano nei, bo ka kuvijedu ka jidomiano na tebievi, a ea jidomiano na tebievi nei, bo ka kuvijedu ka bajago lu.
2PE 1:7 Ea bajago lu nei, bo ka kuvijedu ka sidomiano, a ea sidomiano nei, bo ka kuvijedu ka tinietiiano.
2PE 1:8 Bajago novo nalo nei, ver atua kamiu, a ver atu ailuo lie dam̃ariga, mia kenemiu meuliano mijikia rivar m̃arati ve miroano napano ajesei laka. P̃eli kamiu kumijikia kiado Tubo Yesu Kristo ruei, mia ver bajago nalo nei atua re kamiu, mia kamiu maka kuvijikia kuvila kanano im̃auano na bo tai leleio.
2PE 1:9 Toro na jibe na, mirano miunu, maka rijikia rivitilubar vite, a kanano jidomiano bulati ga. Naio tiniene bobogia vatitig ka ajekon bulag kiano kariano moruo nalo, a maka bunu tinien rimaio ka naio joa meuliano vou tai ruei.
2PE 1:10 Kiaku bilbilu nalo, maka rivu ka toro tibe na, mia nejikili ka kamiu kuveve terakurano monoka kuvukdeli dam̃ariga ka kuvila im̃auano nalo na bo ka riverial ka Yesu naio bio kamiu ka kuve kanano, naio maka ve tena sibiano tai, a maka ve tena seresereiano ga tai, mia naio be tena riano tai.
2PE 1:11 Ver kamiu kuvitu kuvila tibe na, mia kuvijikia re kuvijoru bogo tai, a m̃aratavo na riva joomo ea Yesu Kristo kiano navenatuboiano napano naio be Tubo a Ioruriano na kiado, mia naio rivetavo ea batig van kamiu. Mia ala vorvoruano na bo van kamiu ka kuva kuvitu vija naio to toboto.
2PE 1:12 Kiniou nemijikia ka iliano nalo nei, maka rive terivou van kamiu, bior kumitu kubokar batig bogo tebievi kija ruei. Mia maka nejikia notuvan ka napano monoka noto neververial ilirianiano nalo nei rivan kamiu ve vatelabo bogo nonovio.
2PE 1:13 Nina naio be im̃auano na kanaku meuliano, ka neiila kamiu ka tiniemiu ribobogia re, a nemijikia ka napano mia monoka nala tibe na riva rivokar jukuti na kanaku meuliano.
2PE 1:14 Tubo Yesu Kristo naio berial ban kiniou ruei ber rivesiou re, mia notuvan niabeku nei navano,
2PE 1:15 mia beamu ka nina, nojidom nevivitauia bulag vite nonovio batitig ruei tu. Tibe na, ver navano, mia m̃arabo naio jo ka kuvijikia kuvisidomiikar iliano nalo nei dam̃ariga.
2PE 1:16 Kumemi atevi nalo nuberloglog kamiu ka kiado tubo Yesu Kristo mia naio rimei bereio vija kanano burum̃ara moroano. Tealo aberii verloglogiano nalo nene, aberinavo nina be iliano nalo na jidomiano na tomu nalo ga, p̃eli na aberinavo nina javukia tukunuano moruo re nua nalo, mia kumemi numijikia nuver memedu nuver maka tibe na, bior napano Yesu kanano moroano naio be vite na be riano napano kumemi numial ka mirememi ruei.
2PE 1:17 Nanua na, kumemi numitu bija naio memedu ka bogo na napano Atua Teta jian mermerano nalo na vio mave ajuaio, abamenea naio, napano kanano iliano tai jaluvo mave batove, berii naio berinavo “Nina naio be keneriku memedu napano tinieku jii naio toru laka, napano najaaro toru ka naio.”
2PE 1:18 Kumemi naruei numijog joono na vio mave naio berial iliano nei, nina ea bogo na m̃a kumemi numitu bija Tubo mave ea burusuku lu napano na.
2PE 1:19 Ana bior vite nalo nei napano numial p̃eli numijog, numijikia vatitig bo napano meravo bo ea kenememi jidomiano, ka nina be vite memedu nalo napano naverialiano moruo nalo na beamu aberialio. Kanalo iliano nalo ajibe ka yulu na bo tai ka merera ea vio na bobogio napano rojuaio, naruei bo ka rotu rovulukuio a roduio. Tibe na mia vetavo ea m̃arabo van kito riva rivokar bogo na legiano vou naio riyotuba ka kito, a M̃ejegi na kavijo rivavin rijivi ea kiado vio yauo ka rimererali kiado jidomiano.
2PE 1:20 Mia kiniou nojidom never vite tai bereio ea tivelinio na verialiano nalo na naverialiano moruo nalo kialo, napano abivitauia joa niosi lu. Naio jibe nei, berinavo verialiano nalo nei, toro maka rijikia tumolu riverial river naio ga takurano mijikia vatitig nioti nene nalo.
2PE 1:21 Nina bior napano verialiano nalo nei, maka lele amaluvo den toro kiano jidomiano, mia Atua kiano Niununo naio mim̃au ea tomu nalo, naio jukamu kalo ka averial Atua kanano verialiano.
2PE 2:1 Mia jibe ka na m̃a kito romijikia, ea bogo na naverialiano na bo nalo na beamu nei, bogo tealo naverialiano sibisibi nalo bunu ajum̃a amalmaluvo ea mirano Atua kanano tomu nalo. A mia mijikia tibe na ga van kito banei bunu, napano bogo tai, p̃eli mia naverloglogiano sibisibi nalo amijikia ayotuba. A naverloglogiano na jibe na, mia avar parinio verloglogiano napano maka rive riano amei, mia amijikia averinavo amonea Tubo na vio mave, ka aver naio milarurlo, mia kialo verloglogiano nalo ajum̃a amildie naio bereio. Verloglogiano nalo nei amijikia ala lelan namoneano nalo kialo viekouoiano, mia verloglogiano sibisibi nalo nei maka ajikia avitilubar ka kanalo vironiano naio jo binimei sop̃eli biorlo ruei.
2PE 2:2 Nalo abova laka, a romimouo ka roverii venia na m̃a nalo ajum̃a amilaio. Nalo aju aberenio aberinavo abe namoneano, mia amila ka bogo napano tomu dolu nalo abitilubar kialo bajago, ajum̃a amiyotel toru ea kiado m̃arabo na ilirianiano.
2PE 2:3 Tomu nalo na sibiano nei, ajidom vite nalo toru, naruei amijikia avuku iliseseiano ve miroano van kamiu. Mia alavon ajukubin kamiu ea tukunuano nalo napano abujo ka vite nalo napano maka rive riano. Mia naio bo ga, Atua naio maka to rimonmelio. Naio jiburelo, naio mila batitig kanalo vironiano jororealo bogbe ruei ju.
2PE 2:4 Bo ka kito rovitilubar Atua kiano bajago na tibure tomu a na milarur toro ea meuliano na nanua beamu. Moti, kuvilavon ka kuvisidomial Atua kiano nailiano nalo na beamu, napano tealo ajumolu amilavon ka atu loa naio. Naio maka riverenio maka ve titai, mia naio jumolu buk bulaglo vaarakurano abatove ea bulu joomo nalo na melijokouo ea sebi na lakoiano, ka atua vio na riva rivokar burum̃ara legiano na tibureiano na maariano.
2PE 2:5 A kuvisidomii bunu tomu nalo na beamu nua laka nei, nina ea tormoruo Noa kiano bogo. Bogo napano naio jom̃a mioliolu ka Atua kanano bajago na memedu banlo, mia parilo jikili laka, maka asidom leleio ga. Naruei Atua mila burum̃ara ueimiya binimei buru bulaglo, mia Noa ga bija kanano m̃aratavo aluo, naio milarurlo.
2PE 2:6 A bereio, kuvisidomial burum̃ara komeli juo na Sotomo bija Komora. Atua mial kialo vovaiano nalo naruei naio misebikolo abe burumaroro ga naruei, a nina naio betavo ea venia na mia naio rila ka nalo nonovio napano ajua meuliano na bova.
2PE 2:7 A na maariano ka rosidomial nalo nanua beamu, nina toro nei Lot. Naio be toro na memedu tai, a naio jo mijog bova dam̃ariga ea bajago na kiriniagiago nalo na tomu na m̃a amila korov tuboiano, napano naio jo iviso kalo.
2PE 2:8 Legiano nonovio ga naio jo mial kanalo meuliano va nalo, a naio jo mijog kanalo ioluoliano nalo, mia Atua naio mila jum̃abe? Naio mije mauo ban kulo va nalo nei, mia naio milarur meuliano na kanano toro na bo nei, Lot.
2PE 2:9 Naruei ver kito rosidomii vatitig ka nalo na, mia releal Atua kiano bajago tai, napano jibe nei. Naio mijikia batitig jum̃abe ka rivuku bulag kiano tomu nalo na bo ataluvo den lavoniano nalo, a naio mijikia rivokar sikili tomu na bova ka avar kanalo vironiano nalo. Mia naio rila avar ve tertelisu vonganei beamu vo, mia ea legiano na tibureiano mia avokar nonovio nana ju nene.
2PE 2:10 Iliano nei ba ban tomu nonovio, mia jokol batitig nalo napano aju ajakii sidomvovaiano nalo na bajago na kariano napano amoluo bijaio, a jokol bunu nalo napano maka asidom aiagago, parilo jikili laka. Tomu kinkin na jibe na abe m̃arou ka kialo veribinio nei, a parilo toru laka ea kanalo vovaiano nalo, banbano maka bunu amerou ka vite tai, mia aju amil niegeniege Atua kanano kulo sop̃i nalo.
2PE 2:11 Nailiano nalo na vio mave ajikili lie loa tomu nalo na, mia amijikia ka aju jukamu ea Atua mirano ea vio mave, mia amerou m̃ele ka ail niegeniege tomu nalo na, mia nalo na maka atibe nei, maka aial lerinio.
2PE 2:12 Vite miroano napano kito romial ka abe lu p̃eli abe sop̃i m̃ele, mia tomu nalo na maka avitilubar leleio, aju amila lelan tolu nalo na. Kialo bajago nalo ajibe na, mila na ajibe ka temeul deden nalo ga, napano amila pariparilo ga, mia maka ala tonovo tai. Aju amiel janea vio jibe na banbano tomu nalo amilivi kalo amuebinvinlo, a mia tibe ga na bunu ban tomu nalo nei ga, aiilo ga ka aial kanalo m̃ariano.
2PE 2:13 Tomu nalo na jibe na, ajidom ka ala kialo jokoluolu nalo na parilo selivivi ea vio nonovio legiano ga, a ea bogo na kuvila sinaniano lu nalo na kenemiu, nalo amei atu jouro napano kialo jidomiano nalo rivujo ka jogvuiano na kialo vovaiano nalo ga. Nalo ajibe ka tukei nalo p̃eli menko nalo napano amila lelan mokotenemiu novo nalo, mia maka asidomial leleio ka kialo vovaiano nalo mia ala nalo bereio ajog rivova m̃elea iorou.
2PE 2:14 Miralo nalo bujo ka tira ka ala siakaiano, a ajum̃a ajidom asen kariano nalo rivan rivano maka niabelo mave bogo tai kanio. Ba loa, ajum̃a abur kamiu dolu nalo napano amijikiki aban bijalo, a abe tomu na aberlogloglo bunu bereio ka m̃arabo nalo na tinietii m̃elea vite nalo. Ierinio, nalo na abe taara tai napano Atua kanano siniabu na jikili mia naio riakonlo vatitig n avo!
2PE 2:15 Ajuvan m̃arabo na memedu ruei aba ajum̃a ajajakisor m̃arabo na tertelisu nalo na m̃a romijikia rover ka be m̃arabo nalo na toro nei Palam Peor kanano, napano Iliano Lu berii naio jibe toro tai nanua beamu be naverialiano tai, mia ba tinien jii m̃elea ka sen m̃ariesi nalo na vovaiano.
2PE 2:16 Mia kolvare ga, naio miilo manenea ka napano Atua miila togki na telisu tai mil ban naio bior kanano vovaiano nalo. Togki nalo maka ajikia ail, mia ninei naio mil jel ea toro joono, buriri kija kiano bajago vovu nalo nei.
2PE 2:17 Tomu na bova nalo na m̃a nojo neberiilo na, nemijikia never bunu ka nalo ajibe ka bulumirano uei napano naio jabo ruei, napano toro na m̃a midoujer naio maka rijikia rileal uei eaio. P̃eli nalo ajibe ka mavo p̃eli vio melijokolo napano rojaaro kanio, reberiam̃a yuo rivovo, mia makanio, jegi miuvu bulagio bano. Mia tomu nalo na, kanalo vio na memedu tai napano be burumelijo laka jo kia na vo, nina ea vio na jogvaiano.
2PE 2:18 Mia monoka avar vironiano tibe na, bior ka napano niolo bujo ka sibiano nalo a ilivevaviniano nalo, napano jo buru m̃elea tomu dolu nalo kialo jidomiano. Tomu dolu nalo nei, aburo den yetemeriba vonga abinimei jouro maka vesiou, mia vonganei tomu na bova nalo nei ajum̃a aber iliano nalo na vaganiano na tinieiiano va na bajago na kariano napano joalo, mila binimei burutomoruo lie vo, naruei ea m̃arabo na aju aburvuru bulaglo bereio.
2PE 2:19 Kanalo meuliano jo yetano ka moroano na toro na toru nalaiano na kariano kanano ruei, ana jum̃abe ajum̃a amila sibilili tomu nalo ka aver atakisorlo, mia aleal meuliano na bo? Maka rijikia tibe na, bior napano moroano na jum̃abe naio jo be tubo ka kanamo meuliano, mia jau kobe kanano toro na im̃auano kiana, javukia nalo na, napano vonganei abinimei ajibe ka tomu na im̃auano na moroano na kariano kanano ruei.
2PE 2:20 Ver be riano ka amileal Tubo Yesu Kristo kiado Ioruriano ea kialo meuliano nalo, abitilubar ka napano bajago na yetemeriba nalo ajum̃a amila lelanlo, mila aburo den naio abinimei, nina naio bo laka. Mia ver bogo telisu ga na naruei aban bereio ea kialo meuliano napano ajaluvo denio ga abinimei, nina naruei bova lie laka.
2PE 2:21 Ver maka lele ajikia bajago na m̃arabo na memedu p̃eli bo kija ve telisu banlo, mia bogo napano amijikia batitigio bo ruei, amiel ea kija bogo bulati, kar na iorou kanio abar p̃iliglo aban bereio, naina bova laka. Atua kanano iliano lu nalo na m̃a ajian banlo, beamu ruei ajaaro ka adu ea kialo meuliano, mia vonganei aju abilig taakalo ka naio bereio.
2PE 2:22 Tomu nalo na jibe na, iliano juo naio jo beriilo napano tai, naio ber jibe nei, berinavo “Kuli ga naio mijikia ba jen bereio sano juluoiano,” a juo nene naio ber jibe nei, berinavo “Ver jau kesekon batig kanamo bue, mia naio monoka rijaka riva rijokolke ea bulukinia bereio.”
2PE 3:1 Banalo, jibe ka napano kamiu kubitilubar ruei, nina naio be kanaku m̃esi juo nene nei na biedu ban kamiu. Venia napano joa kanaku jidomiano ka nevivitauia buron m̃esi juo nalo nei, nojidom neverial iliano novo tealo napano mia amijikia avavavin ea kenemiu jidomiano tulaka ka rijai kenemiu meuliano nalo.
2PE 3:2 Nojidom never bo ka kamiu kuvitu tiniemiu maio dam̃ariga ka iliano nalo na naverialiano lu nalo re nua, bija bunu tuboiano vou napano kiado Tubo Naioruriano naio jian ban kumemi kenemiu atevi nalo, ka kumemi nuver lilian van kamiu.
2PE 3:3 Titai na be moti ka napano nojidom nover naio jibe nei, ber kamiu monoka kuvijikia ka ea bogo na maaro nalo, mia tomu na amiyotel ea Atua kiano im̃auano amijikia amaluvo. Tomu nene kanalo bajago nalo, ajum̃a ajidom venia ga napano nalo tinielo jiio, mia aju amiakurano ea toro dolu kanano jidomiano.
2PE 3:4 Vite tai napano mia amijikia atu avital ea kito rivior, naio be tivelinio na tubo kanano iliano napano naio berenio mia naio rimei bereio rivior kito. Mia atum̃a avivika aver “Ana liliuano bereio nei napano kenemiu toro na toru berkario ban kamiu, nibe? Jikar ea bogo na korobido nalo binimei, vite nonovio ea yetemeriba aju aba bavarare dam̃ariga. Kumemi maka numial vite tai leleio kija vo, p̃eli kamiu ga kumialio?”
2PE 3:5 Telikiti na m̃a aber iliano na, maka asidom tiniel rimaio ka napano Atua kiano verikariano nalo abe riano dam̃ariga, a kanano iliano be kiano burum̃ara moroano eaio. Javukia bogo na tiiano na yetemeriba, kanano iliano ga mila vio tiniabene jo, a mila yetemeriba bija borotano nene nalo a tei nene nalo.
2PE 3:6 Mia iorou ka nina, kanano iliano bereio naio mila burum̃ara ueimiya jovuko yetemeriba nei bereio, napano burukon vatitig vite nonovio napano ajuaio ka bogo na.
2PE 3:7 A kanano iliano nene naio jo mim̃au vonganei kiana, naio jo bokar vatitig vio tiniabene a borotano na yetemeriba, ka atu rivan riva vokar bogo na sebi na toru ea legiano na tibureiano mia naio rimei ka sisen bulag meuliano na tomu nalo na m̃a maka asidom Atua ea kanalo meuliano. Nina naruei be moroano na Atua kanano iliano, mia tomu nalo nei maka asidom ajikia.
2PE 3:8 Mo bilbilu nalo, ea tivelinio na verikariano na Tubo kiano bogo na rimei ea bereio, bo ka kito tiniedo ribobogia re ka Atua naio maka vuluku yuka nalo p̃eli legiano nalo tibe ka kito. Ea Atua kanano vitiiano, yuka menu takurano bija legiano tai abe veverare ga.
2PE 3:9 P̃eli tomu tealo be tinielo ka aber Atua jo jii liliano laka ka rila venia na naio berkario, mia naio maka tibe na. Naio maka rivijuku kiki, mia jo mila kiano jidomiano ba tebievi laka, bior napano maka sidom toro tai rivakovio. Naio jidom rudu bogo rivan tomu nalo nonovio ka amijikia aviliglo.
2PE 3:10 Be riano, bogo tai mia burum̃ara legiano na Tubo kiano riyotuba ea yetemeriba. Mia rimei tavukia toro na bina, napano yetemeriba maka rijikia ka naio jo binimei, mia riilo ka ga napano binimei bokar vio ruei. Ea bogo na, ea vio yauo nalo na tiniabene asaraburuburu tavukia tubaalo, ana avakovio nonovio, a mia sebi sisen vite nonovio rivan riva vokar napano yetemeriba vija vite nonovio napano ajua naio, abisi.
2PE 3:11 Naruei bior napano yetemeriba nei mia naio rimei kurano tibe na, kiniou nojidom nevika den kamiu, ka bogo napano kuvitu kea eaio, bo ka kuve tomu nalo na jum̃abe, a bo ka kamiu kuve lu p̃eli kuvim̃au Atua kanano tum̃abe?
2PE 3:12 Kamiu monoka kuvisaaro ka legiano na rimei, a ver kamiu kuvu, a kuvitu kuvim̃au sikili, mia kuvijikia kuvila riyotuba sop̃eli. Bogo napano naio rimei, mia sebi rivilvili ea vio mave, sisen kokoa nonovio, mia naio sisen vite nonovio na yetemeriba riiou bulagio.
2PE 3:13 Mia kito rotumolu rotu sikili ea kiano verikariano, napano naio berenio berinavo ve kiado vonuo vou tai, nina vio mave vou a yetemeriba vou, napano naio be burupati vio na bajago na memedu nonovio.
2PE 3:14 Bilbilu nalo, nina naruei roju rorea naio ka rimei rivuru kito ravan ea vio nene, mia bogo napano maka rovokar vo, monoka ralavon ka rove lu, rotu romeravo, a rotua tum̃aro.
2PE 3:15 Be riano ka Tubo naio maka rimei vo, mia kito ve tiniedo re ka naio bova, monoka rasaaro ka napano naio midu bogo ban kito ka rovilig kito, a jian buluvio ban bilbilu dolu nalo bunu ka amijikia avokar ioruriano. Jidomiano na, kuruado novo nei Pol naio bunu ber ka kamiu ea m̃esi tai beamu ruei, napano bivitauia bija masouano na bo nalo napano Atua jo jian banio.
2PE 3:16 Mia nina iliano nene kia ga napano naio jo jian ea kanano m̃esi dolu nalo, bogo napano ver naio berii liliuano bereio na Tubo kanano. Kiano m̃esi nene nalo kirinovo laka, mia bogo tai kiano verloglogiano nalo teremi kija, mila na iliano tealo napano naio bivitauiaio, tomu tai maka ajikia avuluku vatitigio. A bogo tai, tomu nalo napano maka ve parilo rivu, p̃eli napano maka ajikia vite nalo, abuluku abilivilig kiano verloglogiano ba be dolu bereio, javukia na m̃a aju amila ea iliano dolu nalo telabo ea Vivitauiano Lu nalo na. Mia bogo napano amila jibe na, mia ve re toro dolu napano mia naio rijog eaio, naio mila nalo ga aju aban ea m̃arabo na laluvuiano.
2PE 3:17 Kanaku bilbilu nalo, bior vite nalo na kiniou nojo tinieku maio ka kamiu julaka. Nemijikia ka kumijikia batitig vite nalo nei ruei, tenene na nojidom nesian iliano na jikili van kamiu bereio, ka monoka kuvitikar batitigio. Kuvijamo ka re jidomiano na sibiano na tomu nalo napano maka atakii Atua kanano tuboiano ka mia amei avuru bulag kamiu bereio. Maka rivu ka kuvijoru bereio den vio na bo napano kumitua jikili eaio ruei.
2PE 3:18 Kanaku iliano na maaro, ber kamiu kumiluo kumei kumeruo bo ea bajago na bo nalo na tinie-memiano a masouano na Tubo Yesu Kristo kanado Ioruriano kanano. Ana kito rejian meran mermerano van naio, vonganei, a ea bogo nalo napano aju abinimei, rivan riva ribisi deio, Mm. Kiniou, Pitere.
1JO 1:1 Vite tai, re nua ea bogo na tiiano, mia vonganei ga na kiniou nomijog, a nemial ka miraku, nobitii batitig bo banbano-o na nojokol ka jum̃aku, vite nene siano jibe nei berinavo Burupati Meuliano na Maka Rijikia ribisi bogo tai, mo tenene na kiniou nejidom novivitauiaio van kamiu.
1JO 1:2 Tenei, na nanua kito maka rejikia naio, naio jo ga naljuo Atua Teta o-o, mia vonganei ana miyotuba medave ea mirado ea yetemeriba nei ruei, naruei kumemi miroano numialio, ana numitum̃a nuberialio ka tomu nalo.
1JO 1:3 Numijog memedu ka burutiliniememi, a numialio memedu ka mirememi, naruei numisidom nuverial ka kamiu ka mia kamiu bunu kuvijikia kumoneaio. Ver kamiu kumonea, mia kuvijikia kumei ve takurano rivija kumemi, tibe ka kumemi nube takurano bija Atua teta a bija kenerinio Yesu Kristo ruei.
1JO 1:4 Tena mila burum̃ara saariano joa kumemi dam̃ariga nei, a ver kamiu kuvidukar batitig iliano nei na m̃a nojidom nover ka kamiu ea m̃esi nei, mia burum̃ara saariano nei toa kamiu bunu, ana mia rila kito roviniu rojog rivu ve toru laka.
1JO 1:5 Iliano na Atua kenerinio midu ban kumemi, ber monoka kumemi nuverial ka tomu dolu nalo, naio jibe nei berinavo. Atua naio be burupati na miamoiano, maka lele kiri melijokouo tai ritoaio.
1JO 1:6 Tibe na, ana ver kito rotum̃a roverial ka kito robe takurano bija Atua, mia rojum̃a romila bajago na melijokouo keano vo, nina rojum̃a romila sibi ga na, kito maka rotum̃a rala tena be riano.
1JO 1:7 Mia ver rotum̃a reiel dam̃ariga ea miamoiano na m̃a Atua naio joaio, mia naio rila ka rotua natinie takuraniano na bo tulaka vija kito, ana mia reial ka kenerinio Yesu, kiano burukija naio mijikia to sekon kito romeravo ka kiado kariano nalo.
1JO 1:8 Toro na m̃a jo mila bonua, ka ber maka ve na bova tai toa kiano meuliano, kiano iliano nei naio maka rive riano leleio, naio jom̃a mila sibilili naio bereio.
1JO 1:9 Mia ver kito roverial ga kiado kariano nalo, mia Atua naio riviekokoa kito, mia naio rivar bulag kiado vovaiano nalo den kito, rila kito romeravo. Naio ga mila batitig m̃arabo ka mia naio rila tibe na ruei, a romijikia ravarkar tiniedo ea naio ka mia naio rila van kito rivare ga napano naio berkario.
1JO 1:10 Mia ver kito rotum̃a rala bonua, roverinavo kito maka m̃a rala kariano tai, nina jibe ka rober Atua naio be sibiano ga, a romila jibe ka napano kanano ilirianiano novo, maka bunu rodu to vatitig ea kiado meuliano leleio.
1JO 2:1 Keneriku nalo, nojidom novivitauia iliano nalo nei van kamiu ka riija kamiu ka kuvitilubar ka bo ka mia kamiu monoka kuvila re bunu kariano bereio. Mia ver bogo tai, toro tai rila tena bova tai, kito monoka tiniedo rimaio ka Yesu Kristo naio ju rorea ju, jibe ka toro lu tai ka rivar kiado iliano. Naio kiri memedu, a naio meravo, ka mia naio mijikia riva sikili tua Atua Teta mirano rimemedu, ka mijikia rivika denio ka naio tinien riia kito, a riviekokoa kito.
1JO 2:2 A m̃arabo na ka mia Atua riviekokoa kito naio jibe nei, nina be Yesu ga na, bior naina be jokoluolu ka mia rivar bulag kiado kariano nalo, kito tomu nalo nonovio na yetemeriba nei.
1JO 2:3 A ver toro tai rivika tibe nei, riverinavo: ?Kiniou maka najikia, kiniou nojo nomijikia batitig Atua, p̃eli na maka noto nojikia batitig naio rivu? ?Kiniou nobe kanano, p̃eli na maka nove kanano? Ver tibe na, bo ka rovika den naio bereio, roverinavo: ?Jum̃abe, jau kojom̃a komonmonea kanano iliano nalo, p̃eli na maka kotom̃a komonmoneaio?
1JO 2:4 Nina bior ver toro tai naio riverenio river naio mijikia batitig Atua, a naio be kanano, mia naio maka tom̃a rila vite nalo na m̃a Atua kanano tuboiano nalo aberenio, toro na naio maka to river riano na, naio mila sibi ga na.
1JO 2:5 Mia toro na m̃a jo monmonea batitig Atua kanano iliano nalo bo, naio jo berial ka naio jom̃a tinien jii naio riano, tinien jii naio jo binimei lie vo bogo nonovio. Naruei ea m̃arabo nalo na jibe na naruei, kito romijikia rejikia batitig ka kito robe Atua kanano riano.
1JO 2:6 Toro na ber naio be Yesu kanano, mia kito monoka rejikia reial ka naio miaia Yesu ea kiano meuliano.
1JO 2:7 Banalo, ea tivelinio tai, tuboiano na m̃a nojo nobivitauia ban kamiu naio maka ve iliano na terivou na vonganei ga na, mia naio be iliano tai na beamu mugaruei, naio be Atua kanano iliano na m̃a kumijogio mugaruei.
1JO 2:8 Mia ea tivelinio dolu nene, be riano bunu, ka tuboiano nei, naio jibe ka naio be terivou laka ban kito, bior rojum̃a romial kanano miamoiano naio jo mila melijokouo naio jom̃a buru didig naio bano, ana naio jo buru yulu riano binimei ruei. Naio jibe ka ga ea Yesu kiano meuliano ruei, a vonganei naio jo binimei jibe na bunu ea kiado meuliano nalo, ana naio jo mila kito robitilubar ka iliano vou nei naio riano mugaruei.
1JO 2:9 A verver toro tai naio tom̃a river naio jom̃a miel ea miamoiano ruei, mia romial ka naio jom̃a jerm̃i ka kuruano, jom̃a mila bova kanio, toro na naio jo keano vo ea melijokouo.
1JO 2:10 Mia toro na tinien jii kuruano, mila bo kanio julaka, toro na naio jo miel ea miamoiano ruei, naio maka bunu riel vovu ea melijokouo mia naio to rijoru re bereio bogo tai.
1JO 2:11 Mia naio na m̃a jo jerm̃i ka kuruano, naio maka tibe na. Naio jo keano vo ea melijokouo, melijokouo mila jibe ka mirano miunu, naruei naio jom̃a miel vovu ea vio bobogio dam̃ariga, naio maka rijikia rivitilubar batitig kiano m̃arabo, naio maka rijikia vio na mia riagago sel eaio.
1JO 2:12 Kamiu keneriku nalo, kamiu kanaku solbouo nalo ea kiado moneano, kiniou nojom̃a nobivitauia iliano nalo nei biedu ban kamiu bior kamiu naruei napano Atua karam̃ado naio biekokoa kenemiu kariano nalo kar Yesu Kristo siano, mila kumijikia naio.
1JO 2:13 Kenemiu kulovu nalo, kiniou nojo nobivitauia iliano nei ban kamiu bior kamiu naruei kumijikia batitig naio lie ruei, napano naio meul jo beamu mugaruei, beamu ka tiiano na yetemeriba nei.
1JO 2:14 Kenemiu m̃eaku nalo, kiniou nojom̃a nobivitauia iliano nalo nei ban kamiu bior kamiu naruei na m̃a kumisikili bo, kamiu kumidu batitig Atua kanano iliano joa kenemiu meuliano ruei, a kumitovulu toro na kirivova na ruei.
1JO 2:15 Kiniou nojidom never tibe nei ka kamiu nonovio, ka mia tiniemiu tii m̃elea re yetemeriba nei, bija kanano saba nalo. Toro na m̃a tibena, naio maka rijikia tinientii vatitig karam̃ado.
1JO 2:16 Naina bior saba nalo na yetemeriba nei, p̃eli na kiano bajago nene nalo, abe kiri dolu, maka atibe ka saba nalo na karam̃ado Atua kanano vija kiano bajago nene nalo. Vite nalo na yetemeriba nei nalo ajibe nei, abe burupati na nasidom m̃elea vite nalo, abe burupati na m̃a abur mirado, a abe burupati na varvariano na kiado meuliano nalo.
1JO 2:17 Yetemeriba nei, vija kanano saba nene nalo na m̃a tomu nalo ajum̃a ajidom m̃elea julaka, naio jo barlaka ban ka mia rivakovio ga mia toro na m̃a jo mila memedu ka Atua kanano sidomiano, naio to tobo to.
1JO 2:18 Keneriku nalo, vonganei kito rojua bogo maariano nei ruei, mia jibe ka na m̃a kumijog ruei, toro napano siano Jerm̃ii ka Kristo, naio mijikia riyotuba ea bogo nene. Maka reial naio vo, ana kito rojikar ka romial serm̃iano sesa ea Yesu nalo telabo ruei, naruei mila na robitilubario ka mia vesiou re, mia legiano na maaro rimei.
1JO 2:19 Uolu nalo na m̃a nojom̃a noberiilo na, kamiu kumijikia kiana. Beamu, nalo aju bija kito iviso ka kito, mia iorou ana ajumolu, ajuvan kito aburo den kito bereio. Vonganei, robitilubar batitiglo, ka nalo maka amei ve takurano rivu vija kito, bior ver maka, mia atu rivu vija kito kia navo.
1JO 2:20 Mia kamiu na m̃a kumitu bo kia navo, Toro Lu Kristo naio mioako kamiu ruei, naruei kamiu kubitilubar kanano ilirianiano, mia maka kuvijikia kuvitaluvo den naio bereio.
1JO 2:21 Kamiu kuver re ka kiniou nojidom neil van kamiu rivior jidomiano tai na berinavo kamiu maka kuvijikia vite, bior naio maka tibe na. Kiniou nomial ka kamiu kumijikia kuvitii veve masosoua ilirianiano a iliano na be sibiano mugaruei, kumijikia batitig ruei ka ilisibiano maka rijikia riyotuba ea ilirianiano, naruei kiniou nojidom neil van kamiu ka notunukakar kamiu ga.
1JO 2:22 ?Ana venia naruei be ilisibiano na m̃a dolu nalo na m̃a ajum̃a aberialio? Naina be iliano nam̃a berenio jibe nei, ber Yesu naio maka ve Naverikariano na Atua miila naio binimei ka rilarur yetemeriba nei. Iliano nei naio be iliano na toro na siano Jerm̃ii ka Kristo ga, a toro na m̃a ber iliano nei jibe na, naio jom̃a miitava ea Atua Teta, a jom̃a miitava ea kenerinio.
1JO 2:23 Toro na m̃a bilig taakano ka Atua kenerinio, Atua maka rijikia toa naio, mia toro na m̃a berial batitig bo ka ber naio midu Atua kenerinio ea kiano meuliano, mia Atua bunu rimonmon ga to vija naio dam̃ariga.
1JO 2:24 Ioluano Vou na bo nanua kamiu kumijog be moti ruei beamu, naina naruei be iliano na bo a be riano, naruei bo ka kuvidu batitigio to rivu ea kenemiu meuliano. A ver tibe na, mia kenemiu meuliano mijikia to rivu vija Atua a kenerinio bogo nonovio,
1JO 2:25 naina naruei kumijikia kuvokar meuliano na m̃a naio berkario ka mia sian van kito, na mia maka rijikia ribisi bogo tai.
1JO 2:26 Naina ga nojidom nover ka kamiu ea tivelinio ka nalo na m̃a aju amila sibilili kamiu, napano ajidom avuru kamiu kuvan ve dolu bereio.
1JO 2:27 Kristo naio mioako kamiu ruei, a Niununo Lu na kumijevio ruei ka bogo na naio jo kia ga kamliko vo. Naio mijikia riverloglog kamiu ka saba nonovio na be riano a memedu, mo kamiu kuvilavon re ka kuvisirago toro dolu ka riverloglog kamiu ka saba tai bereio. Mia kamiu kuvilavon ga tibe ka na Niununo Lu naio berloglog ka kamiu ruei, na m̃a naio ber bo ka na kamiu kuvidu batitig kenemiu meuliano to rivu ea Kristo tulaka.
1JO 2:28 Naina naruei, keneriku nalo. Verenio kiado meuliano naio to rivu ea Kristo nam̃ariga, mia maka rejikia rojog rivova ka bogo na ver mia naio riyotuba ka kito bereio. Mia ver maka, mia ve burum̃ara kenieno imouiano, mia rosidom rodu van mirado ka bogo na raial naio to rimei.
1JO 2:29 Kito romijikia ka Kristo, kiano bajago nonovio naio bo a kirimemedu tanea, naruei toro na naio bunu jibe na, romijikia rover ka kema na bunu naio be Atua kenerinio javukia Kristo.
1JO 3:1 Kamiu kuvisidomii von tinietiiano na Atua Teta kanano na ban kito tomu na bova. Naio tinien jii kito toru laka-o mia, banbano-o na mila ban kito jibe ka na kito romial kito robe kenerinio nalo ga. Mia maka ve kito ga na ramial kito jibe na, bior naio bunu, naio buru kito robinimei jouro ea kiano m̃aratavo ruei, jibe ka kenerinio nalo memedu ga. Nalo dolu nalo na yetemeriba nei nalo maka ajikia batitig karam̃ado vo, jibe ka na m̃a kito romijikia naio, naruei vite na mila na nalo maka ajikia kito bunu, ka kito robe kenerinio nalo.
1JO 3:2 Kanaku bilbilu nalo, romijikia rover vonganei kito robe Atua kenerinio nalo, mia maka rejikia vo, ka iorou kanio, mia naio rila kito romei rove vaio ga bereio. Mia be titai ga romjikia batitigio. Bogo na Tubo Yesu Kristo rimei bereio, mia rovitikar naio ka mirado rimemedu, mia rovitilubar naio garui memedu, mo bogo na reial naio tibena, mia romei rotibe ka naio ga.
1JO 3:3 Naruei toro na sidom ka mia naio tai na mia rimei tibe ka Tubo Yesu tibe na, naio monoka to rivokar vatitig rivu kiano meuliano rimeravo a rive lu, tavukia Yesu ga.
1JO 3:4 Toro na m̃a mila kariano, naio jom̃a mila korov Atua kanano tuboiano, bior burupati na bajago va, naio be bajago na maka sidom rimonmonea tuboiano.
1JO 3:5 Mia bogo na Yesu naio binimei ea yetemeriba nei, naio binimei napano maka kariano toa naio leleio, naruei naio binimei ka rivar bulag kiado kariano nalo.
1JO 3:6 Tibe na, toro na m̃a kiano meuliano jo bo ea Yesu, mia ve re bunu kariano tai toaio, mia naio rivijuku rivova re bunu. Mia toro na m̃a kariano joa naio julaka, naio maka rivitii Yesu vo, naio maka rijikiaio vo.
1JO 3:7 Kanaku kiritete sesa nalo, maka rivu ka mia nalo ala sibilili kamiu. Toro na ver kiano meuliano bo, naio be tor memedu javukia Kristo.
1JO 3:8 Toro na kanano meuliano bova, naio be Sim̃aro kiano toro, na naio be burupati na kariano ea yetemeriba nei jikar ea kiano tiiano binimei bokar vonganei. Bajago va na Sim̃aro nei kiano naio mila na Atua kenerinio miyotuba ea yetemeriba nei, ka ruekon bulag kanano im̃auano na bova nalo a ka rila kanano burum̃ara moroano naio ribisi.
1JO 3:9 Toro na jo jouro ea Atua kanano m̃aratavo, mia naio rila re bunu kariano, bior Atua kiano meuliano joaio ruei. Naio be Atua kenerinio, naruei monoka naio rivar karam̃ano kiano bajago na bo nei, ana naio maka bunu rijikia rila na bova.
1JO 3:10 Ea m̃arabo nei naruei kito romijikia ka rovitilubar batitig ga kei na be Atua kenerinio, a kei naio be Sim̃aro kenerinio. Toro na maka rila rimemedu p̃eli na toro na maka tinien tii kiano m̃aratavo, toro na jibe na naio maka ve Atua kenerinio leleio.
1JO 3:11 Ioluano navm̃a kamiu kumitum̃a kumijog mugaruei jikar ea burupati binimei, naio jibe nei, na m̃a naio berenio ber kito monoka tiniedo titii kito rivu bogo nonovio ga.
1JO 3:12 Kuvisidomii Sim̃aro kanano toro na nanua beamu na, Ken, na naio maka tinien tii batitig kuruano kar garuei Epel, naio muebinio m̃aro. Maka rivu ka kito rala tibe na, mia bo ka rosidomii ka venia na naio mila jibe na? Nina bior kanano im̃auano nalo, Atua mialio abova ga, mia kuruano kanano, nalo amemedu bo, mia Atua naio jaaro kanio, tenene na mila na Ken mijoku m̃ele ka kuruano nei Epel, naio tinien jerio, ana naio muebinio m̃aro.
1JO 3:13 Kiaku bilbilu nalo, bajago bova na jibe na, tomu nalo ajum̃a amilala mugaruei binimei bokar banei, naruei maka rejikia reiilo ver reial ka nalo amijoku ka kito bunu, a ajerm̃i ka kito bior Atua kiano im̃auano novo nalo na ver romim̃aukanio.
1JO 3:14 Mia kito na m̃a kito maka m̃a reserm̃i ka toro, mia tiniedo tii kiado m̃aratavo nalo rivu, nina be m̃arabo na mila meravo ka rojuvan m̃ariano, robinimei ea meuliano ruei. Mia toro na tinietiiano maka toa naio, naio jo keano ea m̃ariano vo.
1JO 3:15 Toro na m̃a jerm̃i ka kiano m̃aratavo tai, naio jibe ka toro na muebin toro m̃aro ruei, a jibe ka na romijikia ruei, ka toro na m̃a muemue toro, meuliano na maka ve jukuti nene naio maka toa naio leleio.
1JO 3:16 P̃eli kito tai naio jom̃a bika ber, ana tena m̃a ajum̃a aber, tinietiiano, na naio be tena jum̃abe? Mo kito romijikia tinietiiano na be riano jibe na: Yesu Kristo mijamo ka momou kiano meuliano bior kito, a ver tinietiiano na toa kito, mia kito bunu rajamo ka kiado meuliano rivior kuruado nalo.
1JO 3:17 Toro tai, naio jum̃ano bujo ka saba novnovo nalo, mia kuruano tai naio maka ve kiano saba tai, naio jum̃ano bulati liki. Mia naio bitilubar kia ka kuruano nei jibe na, mia naio mila kiano iviso jikili lie vo kanio, naio maka sidom riijaio, Toro na jibe na, Atua kanano tinietiiano maka toa naio leleio.
1JO 3:18 Kanaku tete nalo, kiado tinie-tiiano naio monoka ve re iliano ga. Tinietiiano na be riano, naio maka ve tena ververenio ga, mia be tena roim̃aukanio a ve tena ralaiio.
1JO 3:19 Ana ver kiado tinietiiano rivokar batitig jeleigio nene tibe na, naio mila m̃arabo na rejikia ka Atua kanano iliano naio bar m̃arati ea kiado meuliano. Ana tibe na, romijikia rojog rivu ga ka rava vaataro ka Atua, romerou ka naio re bunu.
1JO 3:20 Mia bogo tai ana mia romerou ka naio, bior kiado jidomiano ga tibure kito bereio, rila na rotum̃a rosidomial bere kanado vovaiano, mia Atua naio mijikia nonovlo biniu ruei, a kiano viekokoano naio buru tomoruo laka, naio bar bulaglo den kito ruei.
1JO 3:21 Banalo, a ver tiniedo nalo ameravo rivu, mia nalo maka ajikia atibure kito bereio, rila na maka lele romerou ka romei rotumolu rotua Atua ka rovika vite den naio.
1JO 3:22 Ver romonmonea naio, a rotum̃a rala tena naio ga jidomio, mia romijikia rovokar vite venia na m̃a robika denio.
1JO 3:23 Atua kanano tuboiano ea kito naio jibe nei, ka ber: kito monoka romonea kenerinio Yesu Kristo siano, amonoka tiniedo titii kito bogo nonovio, tibe ka na naio ber ka kito.
1JO 3:24 Toro na m̃a naio monmonea Atua kiano tuboiano, naio joa Atua, mia Atua naio joa kanano iviso. ?Mia romijikia rejikia ka naio joa kiado iviso jum̃abe? Tena, Niununo na naio jian ban kito, naio mila romijoglubar ka vite nei be riano laka.
1JO 4:1 Banalo, ver toro tai ver Niununo Lu joa naio, mila na naio jom̃a berial kanano iliano, bo ka kamiu kuvitii veve vatitig niununo neibano joaio, be riano ka be Atua kanano, p̃eli na maka ve Atua kanano. Kito monoka rovitii vatitig rivu, bior be naverialiano sibisibi miroano aju aban janea yetemeriba nei ruei.
1JO 4:2 ?Ana mia kito romijikia rovitii niununo na tum̃abe? Romijikia rovitilubar Atua Niununo bior naio jom̃a berial ber Yesu Kristo naio binimei be toro, naio binimei miyotuba ea yetemeriba nei.
1JO 4:3 Mia ver niununo tai tom̃a river re tibe na, niununo na naio maka ve Atua kanano. Niununo na jibe na naio miyotuba ea uolu na Kristo kanano, na m̃a kamiu kumijog mugaruei ka naio jo binimei, p̃eli naio joa yetemeriba vonganei ruei.
1JO 4:4 Mia keneriku nalo, mia kamiu kumerou ka re naverialiano sibisibi nalo na, bior kumitu tivelinio ka Atua, kumijikia kuvituvul ga. Be riano ka mugaruei, naina joa kamiu naio jikili lie loa ka na naio jo yetemeriba nei.
1JO 4:5 Tomu na sibiano na, nalo abe tomu na yetemeriba nei, a iliano nalo nam̃a aju aberenio amolmoluo ea jidomiano na yetemeriba nei, a kulo dolu nalo na yetemeriba nalo ajom̃a amiagago kalo.
1JO 4:6 Mia kito namoneano nalo, kito maka rove tomu na yetemeriba nei, robe Atua kanano. Toro na naio mijikia batitig Atua, naio jaaro ka riagago ka kito, ana na nana naio maka ve Atua kanano, naio maka sidom riagago ka kito. Ea m̃arabo nalo na naruei romijikia rovitii lubar ka niununo na iliano na be riano, a niununo na ilisibiano.
1JO 4:7 Banalo, bo ka kito tiniedo riia ea kito tulaka ga, bior ka tinietiiano naio be Atua kanano bajago. Toro na tinien jii toro, naio be Atua kenerinio, naio bar bajago na Atua kanano memedu, a naio mijikia batitig Atua bo ea kiano meuliano.
1JO 4:8 Toro na m̃a maka tinien tii toro, naio maka rijikia Atua vo, bior ka Atua naio be burupati na tinietiiano.
1JO 4:9 ?Ana kito romial Atua kanano burum̃ara tinietiiano nene ea bogo na vabe? Kito romial kiano tinietiiano nene ka bogo na naio miila kenerinio takurano m̃anono garuei naio binimei ea yetemeriba nei, ka mia rila ka mia kito romeul.
1JO 4:10 Naina naruei be tinietiiano na naio be riano laka. Naio maka na m̃a kito tiniedo jii Atua, mia nina na naio tinien jii kito, banbano-o na mijamo ka kenerinio binimei mila sida ka rila merevuiano ka kanado kariano nalo.
1JO 4:11 Banalo, jibe ka nam̃a Atua naio tinien jii kito, naio bijuku bo ka kito julaka, bo ka kito bunu monoka tiniedo titii kito tulaka, rovijuku rivu ka kito.
1JO 4:12 Toro maka lele rial Atua, mia ver rotum̃a tiniedo titii m̃elea kito, mia reial ka na Atua naio joa kiado iviso, a bajago na kanano tinietiiano mia naio to rimei ve toru lie vo tulaka ea kanado iviso momou nalo.
1JO 4:13 Kito romijikia ka Atua naio joa kiado iviso, a kito roju bo ea kanano iviso, bior naio jian Niununo memedu ban kito, ka rila ka rojoglubar ka tenei be riano.
1JO 4:14 Ana robitilubar bunu ka be riano ga ka Atua Teta naio miila kenerinio nene naio binimei ka rive ioruriano na yetemeriba nei, jibe ka na romial ruei ka mirado a bunu ka na m̃a rojum̃a roberial janea vio nonovio.
1JO 4:15 Toro na m̃a jo berial ber Yesu naio be Atua kenerinio memedu, Atua joa kanano iviso, a naio joa Atua kanano iviso bunu.
1JO 4:16 Kito ramijikia rejikia vatitig ka Atua naio tinien jii kito, bior ka romijikia rojog batitig ea kiado meuliano nalo, mia kito romijikia romonea kanano iliano na m̃a naio berial ban kito. Atua naio be burupati na tinietiiano, mia toro na bajago na tinietiiano binimei mison batitig kiano iviso, naio joa Atua kanano iviso, ana Atua bunu joa kiano iviso.
1JO 4:17 Atua naio jidom rila bajago na tinietiiano to rimei ve toru lie tulaka ea kanado meuliano, ka rila ka kiado bajago na yetemeriba nei na tavukia Kristo kanano na nanua na. Naruei ver kanado bajago naio rimei rivu tibe na, mia naio rivu laka rivan kito, bior ka mia kito romerou re a roimou re ka legiano na tibureiano na naio jo binimei.
1JO 4:18 A ver toro tai rimerou, naina bior naio mial kanano vironiano tai jo binimei, mia naio maka rijoglubar ka na m̃a Atua kiano tinietiiano naio mila batitig kanano meuliano ruei. Mia bajago na tinietiiano na bo naio mijikia rijil deven merouano na burutomoruo nei, rivanvano-o ribisi.
1JO 4:19 Verenio kito rotum̃a tiniedo tii toro dolu, naina bior Atua naio tinien jii kito beamu ruei.
1JO 4:20 Toro na m̃a jo ber naio tinien jii Atua, mia naio jo kia ga m̃a jerm̃ii ka kanano m̃aratavo tai, naio jom̃a milasibi ga. A ver naio maka tom̃a tinien tii kiano m̃aratavo neibano naio mial ka legiano nonovio ga, naio maka rijikia tinien tii Atua na naio maka lele rial kija naio.
1JO 4:21 Kristo kiano tuboiano napano ban kito naio jibe nei, ber toro na m̃a jidom ka naio be toro na m̃a tinien tii Atua, naio monoka tinien tii vatitig bunu kanano m̃aratavo.
1JO 5:1 Mia toro napano naio monea ka Yesu naio be Naverikariano, toro na naio be Atua kenerinio riano. Ana verenio Atua kenerinio nei naio riverenio riverinavo naio tinien jii Atua kiano Teta, ana na naio monoka tinien tii Atua kenerinio dolu nalo bunu.
1JO 5:2 ?Mia naio rijikia ka naio tinien jii batitig nalo tum̃abe? Verenio naio tinien tii Atua, a naio rimonmonea kanano tuboiano nalo, mia naio rial ka na m̃a naio jom̃a tinien jii Atua kenerinio nalo memedu ga.
1JO 5:3 Bajago na tiniedo tii Atua naio jibe nei: kito robokar batig kiano iliano. Kanano tuboiano nalo maka ave temi laka van kito ka ralaio,
1JO 5:4 bior kito rabe kiritete nalo nam̃a romiyotuba ea Atua, mia ver kito rotumolu rotu sikili ea kiado viekouoiano, kito robe tomu na ratovulu yetemeriba nei ruei.
1JO 5:5 Kiniou nebika den kamiu bereio: ?Toro na mia tovulu yetemeriba nei, naio be kei? ?Naina ga napano naio jumolu jo jikili ber ka Yesu naina be Atua kenerinio memedu.
1JO 5:6 ?Mia jum̃abe ka kito romijikia ka Yesu naio be Atua kenerinio? Tomu tolu aberial iliano nei ban kito: tai naio be Niununo Lu, tai naio be uei, a tai naio be burukija, a nalo tolu nene, aberial jibe ka iliano takurano ga. Uei naio berenio bajago na Yesu Kristo kiano, ka napano naio miyotuba yetemeriba nei jibe ka venia, a naio bokar varueiano jum̃abe, mia romijikia rovitilubario ka naio be Atua kenerinio. Mia maka naina ga, mia burukija bunu naio ber bajago na Yesu kanano bereio, napano naio m̃aro jum̃abe, mia romijikia rovitilubario ka naio be riano. Ana mave ka naio bereio, Niununo Lu, napano kanano iliano naio be riano julaka, naio berialio kiri meravo ban tomu nalo re nua ea miralo bunu ruei.
1JO 5:9 Mia iliano nalo nam̃a Niununo Lu berialio nalo temi laka, tibe na monoka romoneaio, bior naina naio maka ve kulorinio kanano iliano, mia naio be Atua kiano ilivervisivisiano, ka naio mial kenerinio jibe venia.
1JO 5:10 Toro na m̃a monea Atua kenerinio riano, mia iliano nalo nei aju jikili bo-o ea kiano jidomiano napano naio maka sidom dedeio ka bereio, mia toro na maka rimonea Atua kenerinio, naio maka rimonea vite napano Atua ber bisivisii ban kenerinio, naio jibe ka napano naio mial Atua, ber naio mila sibi ga.
1JO 5:11 Ana iliano napano mia kito monoka rotumolu rotu sikili ea bogo nonovio, naio jibe nei, ber: Atua naio jian meuliano napano maka ve jukuti nene ban kito, ana burupati na meuliano nene miyotuba ea kenerinio ga.
1JO 5:12 Toro na m̃a Atua kenerinio joa kanano meuliano, naio bokar meuliano ruei, mia naina Atua kenerinio maka toa kanano meuliano, naio maka rivokar meuliano nene vo.
1JO 5:13 Kiniou nojo nebivitauia m̃esi nei biedu ban kamiu na na m̃a kamiu kumonea Atua kenerinio siano ruei, ka rijai kamiu ka kenemiu jidomiano veve juo re, mia ka kuvijikia rivu ka kubokar meuliano napano maka ve jukuti nene.
1JO 5:14 Bogo na maka tiniedo veve juo, romijikia rotumolu rotu sikili ea naio, naruei vite venia na rovika den naio rimemedu ka kiano sidomiano, mia naio rijog kito.
1JO 5:15 Naruei ver kito romijikia batitig ka naio mijog kito ruei, romijikia rejikia vatitig bunu ka vite napano kito robika denio, robokar ruei.
1JO 5:16 Ver kito reial kuruado tai napano naio jom̃a mila kariano, napano kar-iano nene maka ve toru laka, maka ka toro rim̃aro riviorio, p̃eli ka rivuru bulag tomu den Kristo bereio, romijikia robolkouo van naio, ana mia Atua mijikia jaamo ka naio to joomo ea meuliano ga. Mia maka kiniou never bo ka kito robolkouo ka toro na m̃a mila burum̃ara kariano bova, bior ka napano kariano tealo abe tena m̃ariano ga, ana ver toro tai rila, mia maka rejikia rever titai bereio.
1JO 5:17 Vite nonovio na amila bova naio be kariano, mia kariano tealo ga abe tena m̃ariano, mia tealo maka ave tena m̃ariano.
1JO 5:18 Mia kito romijikia ruei ka toro napano naio binimei be Atua kenerinio ruei, p̃eli kariano na maka ve tena m̃ariano p̃eli be tena m̃ariano, maka ka mia naio rila bereio. Mia toro na jibe na monoka naio rivitikar batitig naio, naio rivel ea vatitig kiano meuliano, naruei Toro na Bova nei naio maka rijikia rila bulag naio bereio.
1JO 5:19 Yetemeriba momou nei naio jotano ka moroano na Toro na Bova nei kanano, mia kito namoneano nalo, romijikia ka robe Atua kanano ga.
1JO 5:20 Kito romijikia ka Atua kenerinio naio binimei, naio jian vitilubariano ban kito ka mia rejikia Atua napano naio be riano, ana kito rojua ga naio naruei, vija kenerinio nene nei, Yesu Kristo. Kanado Atua nei naio be riano, mia meuliano na naio jian ban kito naio maka ve jukuti nene.
1JO 5:21 Keneriku nalo: Kamiu kuvitikar vatitig kamiu rivu, mia kuvilotu ka Atua nei naio takurano ga tulaka, kuvijamo ka re tavoru dolu nalo amei ka adu jeleig naio ea kenemiu jidomiano nalo. Kiniou, Jone.
2JO 1:1 Kiniou tormoruo navagadeano, nebivitauia m̃esi nei biedu banso, javukia tira tai napano Atua bitirilarso, a ea kenerimo lu nalo. Kiniou najaaro toru laka ka neviviuo kamiu ea m̃esi nei, bior ka kiniou tinieku jii kamiu toru laka, mia maka kiniou ga ve takurano, mia namoneano dolu nalo bunu nalo aju tinielo maio ka kamiu dam̃ariga.
2JO 1:2 Kito roju tiniedo titii kito jibe na bior Atua kiano ilirianiano naio joa kanado meuliano ruei, a mia naio toa kito rivano-o na maka rijikia ribisi bogo tai.
2JO 1:3 Kiniou nobolkouo ka kamiu, ka tiniememiano, tinieiiano, a tum̃aroano binimei den Atua karam̃ado, vija Yesu Kristo na naio kenerinio, a joa kito, mila na bajago na ilirianiano a tinietiiano naio jo binimei burutomoruo lie ban kito dam̃ariga.
2JO 1:4 Kiniou nejidom neverial vanso, ka namial kenerimo tealo ea vio nei ruei, mia najaaro toru laka ka nemial ka nalo aju amiel ea bajago na ilirianiano bo laka, javukia na Teta naio ber ka kito.
2JO 1:5 Nena, kiniou nemial tenei, naruei nojidom notunukakar kamiu bereio, ka kumonmonea kanano tuboiano nei napano robokario nua ea burupati nene ruei. Tibe na, maka never vite vou tai van kamiu, neberial iliano tealo ga, ka kito monoka tiniedo titii kito dam̃ariga.
2JO 1:6 Ver kito rosidom rala tibe na, m̃arabo nene naio jibe nei: monoka romonmonea Atua kanano iliano. Ana kanano burum̃ara tuboiano napano naio jo beamu ruei binimei bokar vonganei, romijog naio ber jibe nei ber: kito monoka reiel dam̃ariga ea bajago na tinietiiano.
2JO 1:7 Tomu na juboluboiano miroano, aju aban ea vio yetemeriba nei ruei ka avilig tomu nalo kanalo jidomiano. Nalo ajum̃a aberinavo Yesu naio be toro tai ga jibe ka kito, maka ajidom ka tomu nalo amonmonea ka Yesu naio be Naverikariano na naio binimei ea Atua ka rilarur kito. Tomu nalo na jibe na, abe tomu na m̃a amilavon tomu, a nalo abe tomu nalo na Kristo kiano uolu kanano.
2JO 1:8 Tibe na, ana mia kamiu monoka kuvitikar vatitig kamiu rivu ka iliano kinkin nalo na jibe na, ka mia kuvilaluvu re bereio meuliano na bo napano numila vio jikili ka ban kamiu. Monoka kuvitumolu kuvitu sikili dam̃ariga, ka na mia kumijikia kuvokar momou ijaiano novo nonovio na kenemiu iorou.
2JO 1:9 Toro na tumolu, riviako loa rivatavio den burusio, rimonea re bunu verloglogiano nalo na Kristo, naio maka bunu ve Atua kanano. Mia toro na jo bo dam̃ariga jouro ea ilirianiano na kiado, Atua Teta bija kenerinio ajoa naio.
2JO 1:10 A vere kamiu kuvial ka nalo tai rimei riyotuba kean kamiu, mia naio maka tom̃a riverenio iliano nalo na memedu takii kanado, kamiu kuviilalar naio rivan bereio. Kamiu kuvuru re naio riva joomo ea kunuemiu, a kuviluku re naio to vija kamiu,
2JO 1:11 ver p̃eli, na kuvitu kuvijakar naio ka rila kanano im̃auano na bova nei rivavin na.
2JO 1:12 Iliano miroano na jo ka neverenio, mia maka nosidom nodu toa m̃esi. Mia nalavon ka neviedu ga neial kamiu ka mia rejikia reil vatitig van kito ea mirado ga. Ver naio tibe na mia naio rivu laka, mia rila kito nonovio romijikia rojog rivu ve toru laka.
2JO 1:13 A kuluemo dolu na, napano Atua bitirilar naio jibe ka jau, a kenerinio nalo bunu ajua vio na, ajum̃a aberenio aberinavo Atua milivu ka kamiu. P̃eli naina ga na kiniou nejidom neverenio, iliano bisi ga ea vio na.
3JO 1:1 Kiniou tormoruo navagadeano, nebivitauia m̃esi nei ka riviedu vanso, kuruaku Kaias. P̃eli kito tealo ajum̃a amiliaso kija, mia kiniou nojidom nover kaso never kiniou najaaro toru ka neviviuoso ea m̃esi nei, bior kiniou tinieku jiiso toru, jakii bajago novo na ilirianiano na Tubo kanano.
3JO 1:2 Kanaku bibilu novo, nemijikia ka jau kojom̃a komijog bo dam̃ariga napano kanamo meuliano naio jo bo ea Atua jum̃ano ruei, mia nojom̃a nobolkouo kaso julaka, ka kanamo im̃auano nalo atu aiel rivu, a ka ve re mieiano tai ka rila bulag mokotenamo.
3JO 1:3 Vonganei maka vesiou laka vo, ana kuruado nalo tealo abinimei aboru ea vio nei, ana nalo ajukunu ban kiniou jum̃abe ka jau kojom̃a kajakii Tubo kanano ilirianiano, a jau kojom̃a komila kanano im̃auano novo nalo banbano-o na tomu nalo abitilubar ka kanamo meuliano naio memedu riano ga. Kanalo veriiano nei naio mila tinieku jaaro-o mia jaaro toru laka.
3JO 1:4 Maka ve todolu tai napano mia mijikia rila kiniou nojog rivu tibe nei, mia bogo na ga nomijog ka keneriku nalo aju ajumolu aju jikili ea Tubo kanano ilirianiano, naina naruei namial bo laka.
3JO 1:5 Kiaku bilbilu na bo, siva toru banso ka im̃auano nalo na m̃a jau komila ka mijai nalo na m̃a aju amial bija Ioluano Vou na bo, na abiedu aboru ea kamiu. Nalo abiedu jibe ka na nalo abe valauo ga, naruei tealo maka asidom avitikarlo, mia jau komijuku bo toru laka banlo.
3JO 1:6 Nalo abinimei aberialio ea mirano namonea nalo na lotuano na vio na ruei, aju ajukunu ka kanamo im̃auano na bo na kanamo tinietiiano. Naruei tomu ta bunu abiedu bereio aju kamliko vonganei, naruei nebika denso ka jau kajailo bunu. Ana vere ala nonovio im̃auano ribisi, mia bo ka ver kamiu kuvitii kiri titai ve telisu ka riijailo ea kanalo m̃arabo, tibe ka na memedu ka ala van toro na mila Atua kanano im̃auano.
3JO 1:7 Nalo na, amiel bior vite na ga, ana bogo na m̃a aju aba amioliolu ban nalo na m̃a maka amonea vo, nalo maka atu asidom ka nalo na monoka avitikarlo ka vite tai, bior nalo maka ave namoneano vo.
3JO 1:8 Mia kito namoneano nalo, tenei joa kito ka rajailo. Bo ka kito rotunukakarlo, a roikurkarlo, ka rila ka mia kito bunu reiasol vijalo, kito nonovio robe tomu na romim̃au vei ka Tubo kanano ilirianiano.
3JO 1:9 P̃eli jau komijikia ka kiniou nebivitauia m̃esi tai bior vite na ban namoneano nalo ea lotuano ruei, mia Tiotrivis nei, napano naio jidom ka naio rive tubo kalo, naio maka rivitilubar kiniou, naio maka sidom riiagago ka kanaku iliano, naio jokovio ka Tubo kanano im̃auano napano m̃a kumemi numitu numila.
3JO 1:10 Naio jom̃a mil m̃ele, a jom̃a ber iliano telabo na bova ii kumemi, naio mila sibi niegeniege kumemi toru laka. A maka ve iliano na bova ga, mia be im̃auano na bova bunu, bior bogo na m̃a Atua kanano tomu nalo amiyoyotuba ka kamiu, naio maka sidomlo, naio ber avan bereio ga. Mia mave ka naina, bogo na kam tealo ka kamiu, kubitikar nalo, kumijailo ka ala im̃auano na abinimei kario, mia kema nei naio jumolu buk bulag kamiu den lotuano bunu. Vite nalo nei na m̃a naio jo mila nei naio maka rimemedu na, mia bogo na kiniou neviedu nomiyotuba kean kamiu, mia roviniu rava vio takurano ka roverii ka mia rala venia van naio.
3JO 1:11 Kanaku bilbilu, nojidom never kaso ka kema nei mila kirivova kaso mia maka rivu ka rila jau bunu, jau kala rivova van naio bereio. Monoka kito rovijauia re bajago na bova ga, mia bo ka rovijauia bajago na bo. Toro na m̃a mila bo ban toro dolu, naio be Atua kiano toro riano, mia toro na m̃a mila bova ban toro dolu, naio maka rial Atua vo, naio jo koalabo kia ga vo.
3JO 1:12 Mia Dimitrias nei, naio mia riijaso. Tomu nalo tinielo ea naio, nalo aberenio aberinavo naio mim̃au bo laka, mia Atua kanano iliano naio jom̃a berii bajago na joa kanano meuliano, berinavo abo laka. Mia kiniou bunu nemial naio be toro na bo tai, ana nemijikia ka jau komonmonea kanaku iliano, ka monoka never ve riano ga vanso.
3JO 1:13 Vite miroano na ka never kaso aju kiano vo, mia maka nosidom nevivitauia toa m̃esi vonganei.
3JO 1:14 Mia nojidom ka mia neviedu neial kamiu rivesiou re, naruei mia romijikia rovitii mirado, reil van kito.
3JO 1:15 Tum̃aro to vija jau Kanado bilbilu nalo na ea vio nalo nei aberen aberinavo Atua milivu kaso. Aiou koig, jau kover ka kanado bilbilu nalo aviniu na m̃a kumitu na, ka mia Atua riilivu bunu ka kamiu. P̃eli naina ga na kiniou nojidom noverenio, iliano bisi ea ga vio na.
JUD 1:1 Kiniou Jut, nebe toro na m̃a nemim̃au Yesu Kristo kanano, a nebe Yemesi kuruano, kiniou nebivitauia m̃esi nei biedu. Nojuvan binimei ban kamiu, tomu nalo na m̃a Atua karam̃ado naio bio kamiu ruei kube kanano, napano naio tinien jii kamiu toru, ka napano kumitutano ka Yesu Kristo kanano vitikariano novo.
JUD 1:2 Kanaku volkouano ber tinieiiano, tum̃aroano a tinietiiano amei avujo lou ea kamiu, atu amei ve toru lie dam̃ariga.
JUD 1:3 Banalo, beamu kiniou nejidom nevivitauia m̃esi tai van kamiu ka neverial jidomiano tealo ea tivelinio na ioruriano novo na m̃a kito nonovio robokario, mia vonganei ga iliano tai binimei bokar kiniou jelea kamiu, naruei namial ka monoka nevivitauii vite dolu naruei. Kiniou nomijog jibe vite tealo abova kija, tenena nejidom never ka kamiu ka kuvitumolu kuvitu sikili, kuvisikili ka p̃irimiu rivalo ka kuvokar vatitig kiado moneano. Kiado moneano nene, Atua naio jian binimei ban namoneano lu re nua vaarakurano ruei, naruei maka ve tena aje bukua p̃eli aiasol dolu tai mave kanio bereio.
JUD 1:4 Ana vite na m̃a nomijog, namial jibe ka tomu nalo na m̃a abinimei ajusol ka kamiu, nalo amijejebukua kiado moneano ruei. Nalo na, maka amemedu ka atusol kamiu, abinimei bena ga, maka asel ea morouo, mia vonganei aju bija kamiu ruei. Nalo na abe uolu na kanado lotuano, nalo maka asidom Yesu Kristo napano naio takurano be toro na toru, a naio be kanado Tubo. Atua berenio berinavo, ea kanano tiniememiano, naio jaaro ka riviekokoa kito ka kanado kariano nalo, mia nalo nei abilig kiano iliano bereio, aju aberinavo ver tibe na, amijikia ala kariano venia napano ajidom, naio maka ve titai na, mia Atua riviekokoa nalo ga na. Iliano na kiriniagiago laka, mia nalo na m̃a ajum̃a aberenio, Iliano Lu berkar kanalo vironiano beamu ruei.
JUD 1:5 Bo ka kamiu kuvisidomii von nalo tealo na m̃a amila kirivova jibe na, naruei Atua mije batitig kanalo vironiano banlo. Tukunuano nalo na aberloglog batitig kamiu kanio ruei, mia p̃eli tiniemiu bobogia ruei, ana mia never bereio van kamiu. Nana be moti nene, naio be kulo Israel nalo napano m̃a amim̃au kurano ga Ijivi beamu. Atua naio milarur burum̃ara taara nei, naio buru bulaglo ea vio Ijivi, mia karina nalo miroano abilig taakalo kanio, mia naio mue bulaglo ga am̃arm̃aro.
JUD 1:6 Ana juo nene, naio be nailiano nalo na m̃a ajua vio mave beamu. Atua midulo ajua vio novo tai na naio loa laka ruei, mia nalo maka asidom, ajidom ka atua jeleigio bereio, ana mila na naio miorkakarlo ka m̃arimieni nalo napano maka ajikia ataluvo denlo bogo tai. Naio mila batitig jelelo dolu tai ea burumelijo, naio buk bulaglo aba ajuaio banbano bokar bogo na burum̃ara vironiano na legiano na maaro.
JUD 1:7 Mia tolu nene, naio be kulo Sotomo, bija kulo Komora, bija tomu nalo na komeli dolu nalo na vaataro kalo. Nalo bunu ajavukia nailiano nalo na, kanalo jidomiano nalo bavavin laka. Nalo maka atakii bajago na memedu na m̃a Atua naio midu joa kito, mia ajum̃a amila napano sum̃ano nalo ga aju abur sum̃ano bereio, ana sidomiano kiriniagiago nalo na jibe nei naio bavavin toru ealo bogo nonovio. Mia monoka rosidomii vatitig rivu ka venia napano naio miyotuba ka nalo. Burum̃ara sebi na jijenlo, naruei aju abokar vironiano vo ea sebi dolu napano maka rijikia rivatove bogo tai.
JUD 1:8 Ana tomu na bova nalo na abinimei aju kamliko na, nalo na bunu aju amila kariano na jibe na. Nalo m̃a aju amial vite na bova nalo ea kanalo monovovuano, mia venia na m̃a amialio, ajidom aim̃aukanio. Nalo amila vite na bova nalo ka niabelo, nalo abukular ga iliano na toro na m̃a jidom ril vanlo, ajum̃a abital bova ea moroano novo dolu nalo na m̃a maka rejikia reialio.
JUD 1:9 Mia moroano dolu nei naio maka ve tena royotel rivijaio. Mia remijikia reial ka napano parinio nailiano Maikel, bogo na m̃a jo mila baravo bija Sim̃aro ka ber kei ka naljuo nei mia rudu Mosis mokotenano, mia naio maka ril vova vanio. Vede tiniedo ka mia memedu ka river iliano na jikirkili p̃eli na iliano siniabu nalo, mia maka riverenio, berenio ga ber “Atua na loa laka mia naio ril vanso navo.”
JUD 1:10 Mia tomu nalo nei, amil kirivova a amil siniabu ea vite nonovio ga. Vite na m̃a amijikia p̃eli na m̃a maka ajikia, mia aberiio kirivova ga. Jikiaiano na m̃a nalo amijev, naio be verare ga ka jikiaiano na temeul, ka napano vite venia nam̃a naio mijog ka rila, bo p̃eli na bova, mia naio mila ga. Bajago bova nalo nam̃a ajum̃a amila, naio mila kanalo verloglogiano nalo abe tena sibiano ga, maka amemedu, maka ajikia atumolu leleio.
JUD 1:11 Nalo ajum̃a amiel ea m̃arabo na m̃ariano nei napano Ken re nua naio miel eaio, bior napano naio jerm̃i ka kuruano. Ana tomu na bova nei, amidulo ajua vio va nei napano Naverialiano Pelama na beamu naio midu naio joaio, bior ka napano naio ber iliano napano maka rimemedu ka rijev puruveru eaio, naruei kanano iliano nei mila Atua kanano tomu nalo aba amilotu ka atua dolu. Mo tai bereio, amijoru abatove abakovio ea p̃ili na borotano nei napano Kora re beamu ba bakovio eaio. Nina ea bogo na borotano napano naio jo jikili jua naio burup̃e, bior naio mil die navurim̃araboiano napano Atua naio bitirilario.
JUD 1:12 Bogo na kamiu kubinimei vio takurano ka kuvila sinaniano na tinietakuraniano nalo, mia tomu nalo na, nalo aju jibe ka baraam̃a tai napano naio joluku yetano ea tei, napano ver uako tai va vaataro laka kanio mia riva rivavin eaio. Nalo amila bulag ga semiu sinaniano nalo, napano ajen m̃elea janea vio reraio, amun ba amilaluvu pariparilo, amila uetubaiano toru laka, a maka asidomial toro dolu, maka aialerinio ea titai. Tomu na jibe na nalo ajibe ka melijo na m̃a jegi midulo miuvio barlaka ga bano, naio maka sian yuo ea kiado tiniavio nalo. Nalo ajavukia buruiesi tai napano ajelar menunu naio jo, bior napano naio maka rivar m̃arati.
JUD 1:13 Nalo ajibe ka tei napano naio jo mikulkulu toru, karina naio jo buk niamniag bija soro nalo abavin ea vio medave. Ajavukia m̃arvitano nalo na m̃a aburo ea buluniogovu yauo mave, napano aju bogo bulati ga karina aba kovio bereio, aban bo kovio ea burum̃ara melijokouo ea vio na bobogio.
JUD 1:14 Kuvisidomii von naverialiano tai bunu na tormoruo Inok re nua nua laka, napano naio be togio na terati aluo napano amoluo ea Atam. Naio berii tomu nalo na jibe na naruei, napano ber jibe na, ber “!Kamiu kuvitikarlo! Mia Atua na loa laka naio rimei rivija taam̃aka na nailiano lu nalo na kanano,
JUD 1:15 ka atibure kulo va nalo na amila kariano napano maka amonmonea naio. Mia sian vironiano vanlo rivior im̃auano va nalo na kanalo veribinio, a bior kanalo ilisiniabu va napano abuku ea mirano.”
JUD 1:16 Nalo na na m̃a abinimei aju bija kamiu, iliano na naio memedu ga ka nalo, bior ka napano abe tomu na vukuleleano, abe tomu na amilidie vite nonovio, abe tomu na m̃a ajidom nalo ga, a abe tomu na m̃a amil vevavin ka iliano nalo na tortoru. Mia ver nalo asidom ka avokar vite tai ea kamiu, monoka kuvitikar vatitiglo, bior abe tomu na niosesei, a abe tomu na ilinovoiano bunu.
JUD 1:17 Mia kamiu, kanaku bilbilu nalo, bo ka kamiu kuvitum̃a kuvisidom bunu venia napano m̃a naiagagoano nalo na Tubo Yesu Kristo kanano ajum̃a aberenio ka mia riyotuba iorou.
JUD 1:18 Nalo ajum̃a aber ka kito aberinavo “Ea bogo na maaro, mia tomu nalo ayotel rivova ea im̃auano na Tubo kanano rivija kanano tomu nalo. Mia ala pariparilo, mia ala ga venia napano kanalo sidomiano va nalo ajidom.”
JUD 1:19 Tomu nalo na jibe na ajum̃a aber aberinavo kanalo taara ga naio bo, aberinavo nalo ga amim̃au ea Niununo, mia kiniou nejidom neverial van kamiu ka nalo amim̃au ea ga jidomiano na yetemeriba nei ga, Niununo Lu naio maka toalo leleio.
JUD 1:20 Mia kamiu, kanaku bilbilu nalo, bo ka kenemiu im̃auano nalo ea kanado moneano lu naio jo bavin lie dam̃ariga. Monoka kubolkouo dam̃ariga ka moroano na Niununo Lu.
JUD 1:21 Kuvidu vatitig kamiu to dam̃ariga yetano ka Atua kanano tinietiiano, kuvitu melumu ka kuvisirarago ka Tubo Yesu Kristo ga, rivan napano naio, ea kanano tinieiiano, rivuru bulag kamiu kuvan ea meuliano napano maka ve jukuti nene.
JUD 1:22 Toro na m̃a jo tiniene beve juo, kuvija naio ka kanano jidomiano rimei sikili rivu bereio.
JUD 1:23 Telabo na jibe na ajum̃a ajua tivelinio ka bulukusebi, vaataro ka atibirbil ea ruei, mia kuvila sop̃eli ka kuvuru bulaglo, kuvilrurlo. Bo ka tiniemiu riia tomu nalo, mia tealo napano abova laka mia kumerou kija kalo. Kariano nalo a niamiamo va nalo na kanalo naio jokol kialo meuliano momou a mila bulag kanalo bajago nonovio, a jua niabelo reraio, mia monoka kuvja kalo, kuve bilbilu re vijalo.
JUD 1:24 Kito ravamenea Atua, ka napano naio mijikia rivokar batitig kito ka mia rojoru re, rivan rivano-o naio rivuru kito rava rotumolu rotu ea kanano mermerano lu, napano kanado meuliano naio meravo bo ea mirano, mia rovokar burum̃ara jogvuiano.
JUD 1:25 Kumemi nubameneaso Atua, napano jau ga takurano kobe naioruriano. Numidular siamo, bior moroano, sikiliano, a tuboiano abe kanamo ga. Numiaiaso maluvo jelea Yesu Kristo Tubo na kenememi, jikar ea bogo nalo na beamu ruei binimei bokar vonganei, rivan rivano-o to tobo to, mm. Kiniou, Jut.
REV 1:1 Niosi na be visip̃eiano ka venia napano mia naio riyotuba ea legiano nalo napano mia amei navo. Atua naio jidom ka kanano tomu na im̃auano nalo na yetemeriba monoka ameravo rivu ka vite nalo nene, naruei, jian jikiaiano nene ban Yesu Kristo, karina Yesu naio miila kiano nailiano tai miyotuba ka kanano toro na im̃auano nei Jone, naio mila vite nalo nene amiyotuba ka naio ea kanano visip̃eiano tai.
REV 1:2 Jone naio mial nailiano nene bisi, naruei naio bitilubar ka naina be Atua kanano iliano riano, be iliano na be riano tai memedu ka aver visivisii venia napano mia Yesu Kristo naio rim̃auka iorou, mila na naio bivitauia bulagio vatitig bo jua niosi nei vite nonovio napano naio mialio, ka kito na iorou romijikia rovulukuio.
REV 1:3 Naruei toro kei napano mia naio rivuluku iliano nalo na verialiano nei, p̃eli mije tilieno kanio, mije vatitigio joa kanano iviso, mia Atua kanano ilivuiano ve burutomoruo toa kiano meuliano, bior ka napano burum̃ara legiano nene naio jo binimei vaataro laka naruei.
REV 1:4 Kiniou Jone, nebivitauia bulag iliano nalo nei ka riviedu rivan kamiu taara aluo na namoneano nalo napano kumitua komeli nalo na ea tanobuku na toru na vio nei Esia. Kiniou najaaro ka neviviuo kamiu ea siano napano naio jo beamu beamu laka, a naio jo vonganei, a mia naio to toboto. Nojom̃a nobolkouo vonganei ka kamiu ka burum̃ara tiniememiano vija tum̃aroano toa kenemiu meuliano tulaka, napano mia rijikia rimaluvo ka kamiu den kiado Atua nei vija kanano niununo aluo napano ajumolu ajukamu ka kiano jobaro,
REV 1:5 a mijikia rimaluvo ka kamiu den Yesu Kristo bunu, naina napano naio biekouo banbano mia kiano burukija miou, karina naina be moti napano naio jumolu meul bereio, napano vonganei naio be burum̃ara parinio tubo ka parinio tubo nalo na yetemeriba. Riano, Yesu Kristo nene napano naio tinien miia kito toru, banbano mijamo ka kanano burukija miou ka rivulu bulag kito den vironiano na kiado kariano nalo,
REV 1:6 naruei naio bitiri bulag kito ka romei rove m̃aratavo ve takurano ea yati na kanano tubo sesa nalo, a ka naio bijauia bulag kito ka rajai naio rotibe ka tomu lu na karam̃ano kanano im̃auano nalo, naio ga be Atua Sop̃i. Yesu mila bo ban kito toru jibe na ana bo ka reilivu ka siano, rodular naio to medave laka, rivan rivan mia maka rijikia ribisi bogo tai, tibe na.
REV 1:7 Kamiu kuvitii vatitig rivu! Naio naruei jom̃a mijian burevure melijo nalo na mave, naio riyotuba rimei. Mia kito nonovio reial naio ka mirado memedu, a vija bunu nalo nanua m̃a ajukukakar naio ea m̃akolkolo, nalo bunu avitilubar naio bereio. A mia ve burum̃ara jogvaiano a tegiano riyotuba ea tomu nalo na yetemeriba, tinielo rimaio ka venia napano amila ban naio ea bogo nanua beamu. Mia monoka tibe ga na, neber “Ee” ban naio kanio.
REV 1:8 Bo ka kito rovatove ka Tubo Atua, Atua Sop̃i na moroano, naio napano jo beamu, naio jo banei, a mia naio tobo to, napano kiano ilitemiano tai naio ber jibe nei, berinavo “Kiniou nei nebe burupati, kiniou nei nebe juluvati!”
REV 1:9 Kiaku bilbilu nalo, kiniou Jone nebe kuruemiu tormoruo, napano neberial vite nalo nei ban kamiu. Nojidom neverial van kamiu bior kito naruei napano robe Yesu kiano, ktio naruei rojutano ka kiano tuboiano, kito naruei rojum̃a rabar bitiran jogvaiano na bogokouo nei, ana kito naruei rojum̃a rojam̃ikar kito bija jidomiano na tebievi. Mo kanaku tukunuano naio ban jibe nei, berenio nua beamu kiniou nojom̃a neberial Atua kanano iliano, nojo nomioliolu ka Yesu Kristo banbano na kulo Romo amije vironiano ban kiniou, amila kiniou nebinimei nomim̃au kurano ea uleule na telisu nei, siano Patimos.
REV 1:10 Naruei ea Legiano Lu tai nojo jibe na ana nomijog jibe Niununo binimei ea kiniou, nomijog jooa tai ju iorou ka kiniou, mil burutomoluo jibe ka pasimeduo miolu, mil ber jibe nei, berinavo:
REV 1:11 “Venia napano mia jau kealio, keial kovivitauia bulagio rivan ea niosi tai, karina jau kotuvan rivan tanea lotuano nalo na tanobuku na vio Esia, ka ajikia avulukuio. Lotuano nalo na, nalo aluo, be Eveso, Simena, Pekamam, Taitera, Satisi, Vilatelvia bija Leotesia.”
REV 1:12 Jooa na mil ban kiniou jibe na ana nejidom neial kenia, nabarp̃ilig kiniou nemial burupati na yulu nalo ga aju, napano amim̃auka niogo ea nalo aluo.
REV 1:13 Burubati yulu nalo nene ajumolu aju jibe na, karina iviso kanio nemial toro tai jumolu jikili ju, napano naio jibe ka naio napano aber Kulorinio Kenerinio. Naio miya burutili soto tai, bija miya kulum̃arauo napano amiyako ka niogo, ajelan barkor iarene.
REV 1:14 Vijinio miuvu mia miuvu, jibe ka vijinio nunu bija mavo, mia tiamirano merera jibe ka minano sebi.
REV 1:15 Jaano kirisikili bo, javukia m̃arbutoto napano amijie ea sebi ka rila sikili rivu, mia bogo napano naio mil, joono miolu jibe ka tei napano jaburu ea baraam̃a.
REV 1:16 Naio jumolu jikili ju jibe ka napano ea jum̃ano meruo naio bokar m̃arvitano aluo, mia iobogu na mira tai napano naio mali ea ikit tivelinio juo naio jo moluo ea niono. Mirano bunu, riano, naio merera, mia merera naio javukia m̃erenio napano naio jikili mia jikili.
REV 1:17 Nemial toro nene jibe na, tomnei, mila kiniou jibe ka nam̃aro garuei, nomijoru yetano ea jaano. Mia naio jian jum̃ano meruo binimei jokol kiniou, naio berinavo “Jau komerou re ka kiniou, kiniou nei nebe natikariano mia nebe najuluvatiano.
REV 1:18 Naio napano be burupati na meuliano be kiniou nei, bior napano kiniou nemeul, karina nam̃aro, karina nemeul bereio, nemeul to toboto. Kiniou nei naruei napano vulariano na m̃ariano a vulariano na bulukusebi kirivova nei na tomu na m̃ariano, nalo ajua jum̃aku.
REV 1:19 Mia jau komerou re, jau kotovon re, kovivitauia bulagio vatitig ga venia na jau kojom̃a komialio, napano tealo abe tena vonganei, bija tealo abe tena bogo nalo na amei na vo.
REV 1:20 Mia kiniou never titai vanso beamu vo, ka tivelinio na m̃arvitano aluo nanua jau komialio joa jum̃aku, bija burupati yulu aluo na m̃a amim̃aukalo ea niogo na. Vite nalo nei ajavukia jikiaiano tai napano naio joluku, mia nioti nene jibe nei, ber m̃arvitano aluo nalo nei napano, abe nailiano aluo na mia avitikar lotuano aluo nalo nei, a burupati yulu aluo, naina be lotuano aluo nene neibano.”
REV 2:1 Naruei Yesu mil dolu kia ga ban kiniou, naio berinavo “Vonganei mia kiniou neverial venia napano mia jau komijikia kovivitauia riva rivan lotuano aluo aveve terakurano.” “Beamu, jau kovivitauia m̃esi tai riva rivan nailiano na lotuano na komeli na vio Eveso, jau kovivitauia tibe nei, koverinavo ‘Iliano napano biedu ban kamiu binimei den naio napano bokar m̃arvitano aluo ka jum̃ano meruo, napano jo miel jeliviv iviso ka burupati yulu aluo nei.
REV 2:2 “ ‘Naio berial ka kamiu jibe nei, berinavo “Kiniou nemijikia kamiu ruei, bior nemial kenemiu im̃auano novo nalo, nemial ka napano kumila vio toru, nemial ka napano kumitutua kamiu bija jidomiano na tebievi naio bo bo laka. Kiniou nemial bunu bo laka jibe napano kamiu maka kuvijamo ka tomu na bova amei ala niegeniege kamiu, bior tealo, bogo napano amiyotuba ka kamiu, ana aberinavo nalo abe atevi nalo, mia kamiu kuvial vonlo, kuvijikia vatitiglo rivu, ana mia kamiu kuvileal lo ka nalo amijubolbolili kamiu ga.
REV 2:3 “ ‘ “Bior siaku ga napano kamiu kumiduio, naruei kubiniua bogokouo, a amila bova ban kamiu, mia nemijikia ka maka kuvituvan kiniou vo, kumitum̃a kubokar jikili bo kia ga vo, mia jidomiano napano ber tiniemiu m̃aro laka, p̃eli na kamiu kumijog kuber bare, nina naio maka toa kamiu leleio.
REV 2:4 “ ‘ “Kenemiu bajago nalo nei kiri-novo laka, a be riano, vite tai jo napano kumitum̃a kumila napano maka nasaaro lele kanio, mia bo ka neverialio van kamiu memedu. Naio jibe nei, ber burum̃ara tinietiiano napano naio joa kamiu be moti, vonganei naio binimei melukluku laka, maka bunu tavukia beamu.
REV 2:5 Kuvisidomii bereio von ea burum̃ara bajago na tinietiiano novo na beamu, napano tiniemiu jii kiniou toru, a tiniemiu jii kamiu ga toru bija kulo dolu nalo. Ea bogo na naio bo mia bo, mia vonganei, naio batove mia batove laka. Mia bo ga, mia monoka kuvilig kamiu ga, a monoka kuvan bereio ea vio novo nei nanua kumitua beamu. Mia ver kuvilig re kamiu, nemijikia never mia neyotuba ka kamiu, navar bulag burupati yulu na ju merera iviso ka kamiu vonganei.
REV 2:6 “ ‘ “Riano, nina be burum̃ara tena bova tai na kenemiu napano neber vonga, mia nojidom neverial van kamiu bunu ka kumitum̃a kumila burum̃ara vite novo tai bunu, napano nejaaro toru kanio. Vite nene napano kumitum̃a kumijuku die nalo nei napano ajum̃a amila vite dolu vovu nalo, napano toro nei Nikolas naio mioliolu kanio be moti. Abova ga, a kiniou bunu maka nosidom leleio.
REV 2:7 “ ‘ “Toro napano be tiliniene, bo ka naio rijoglubar venia napano Atua kanano Niununo Lu naio jo berialio ban taara na namoneano nalo. Toro napano naio tu sikili rivanvano tuvulu na bova, mia nemijikia najamo ka naio ka mijikia riva to jouro rimemedu ea tiniavio novo na Atua kanano, naio riva to sen m̃arati iesi na buruiesi na meuliano.” ’ ”
REV 2:8 “Jau monoka kovivitauia m̃esi tai riva rivan nailiano na lotuano na komeli na vio Simena, kover tibe nei, koverinavo ‘Iliano na napano biedu ban kamiu binimei den naio napano be moti a ve na maariano, napano amuebin m̃aro, kar na meul bereio.
REV 2:9 “ ‘Naio berial ban kamiu jibe nei, berinavo “Kiniou nemijikia vatitig bogokouo nalo napano m̃a kumitum̃a kubiniua, a nemijikia ka jumemiu nalo abeteau. Mia nojidom ka monoka kuvijikia ka maka kuve talim̃asa, mia kube na sanibaiano laka! Riano ga, nemijikia ka nalo nei napano ajum̃a aber abe kulo Ju, nalo ajum̃a abuku iliano nalo na bova miroano laka ban kamiu, mia maka kuvisidomialio, nemial nalo maka atibe ka Ju nalo leleio, makanio, nalo ajakisor Sim̃aro memedu.
REV 2:10 “ ‘ “Mia be riano, p̃eli mia vesiou re kamiu tealo monoka avar burum̃ara jogvaiano nalo rivior napano kumonea kiniou, mia kumerou re. P̃eli Sim̃aro naio mijikia rila ka mia avuku kam tealo avan ea nalakoiano, ka naio to rila vonvon kamiu, mia nemijikia never ka mia naio rijikia rila lelan kamiu ea jogvaiano nalo riva rivokar legiano ve duelimo ga. Ver tibe na, monoka kuvitu sikili riva rivokar bogo na mia adular kenemiu jegi, mia ver kuvijoru re ea bogo na, mia bogo na koviyotuba kean kiniou, mia nesian burum̃ara ijaiano van kamiu, nina be batubatu niogo na meuliano.
REV 2:11 “ ‘ “Toro napano be tiliniene, bo ka naio rijoglubar venia napano Niununo na Atua kanano naio jom̃a berialio ban taara na namoneano nalo. Toro napano jovulu bajago va ea meuliano nei, mia naio riyotuba ea re m̃ariano juo napano mia naio rimei iorou.” ’ ”
REV 2:12 “Tai bunu bereio, jau monoka kovivitauia m̃esi tai riva rivan nailiano na lotuano na komeli na vio Pekamam, kover tibe nei, koverinavo ‘Iliano napano biedu ban kamiu naio binimei den naio napano jo mudu iobogu na mira napano mali ea ikiti be juo.
REV 2:13 “ ‘Naio berial ban kamiu jibe nei, naio berinavo “Nemijikia vatitig bo ka vio napano kamiu kumituaio, naio be tanobuku tai iviso memedu ea vio napano Sim̃aro naio jo be tubo eaio! Kanano vio nalo aju janea kamiu, mia kamiu kubokar siaku jikili bo dam̃ariga. Beamu, jouro ea kenemiu komeli na, p̃eli romijikia rover komeli na Sim̃aro kanano, amuebin kuruemiu nanua Antipas, naruei ajikili ka kamiu monoka kuvituvan kenemiu moneano ea kiniou. Mia makanio, jibe ka napano naio biekouo ea kiniou bokar m̃ariano, kamiu bunu, maka kam tai aburo den kiniou.
REV 2:14 “ ‘ “Nina naio be tivelinio na bo nene, mia be saba tai nojidom neverial van kamiu bunu. Vite na be moti, jouro ea kenemiu taara, be tomu tealo aju napano ajum̃a ajakii jidomiano tai napano be verare ka Naverialiano Pelama re nua. Ver kamiu tiniemiu maio kanio, naio naruei napano berii m̃arabo tai ban Parak, naruei maka vesiou ana Parak kija buru naio bano beriio ban kulo Israel nalo, mila na maka vesiou, ana ajikar ka ajen sinaniano lu napano kulo dolu nalo amila jokoluolu kanio ban kanalo tavoru nalo, ana nalo ajum̃a ajidel ka amila siakiano. Aju amila kariano jibe na naruei, mia jakii iliano napano amijog ruei, nalo aber naina bo ga.
REV 2:15 “ ‘ “Mia juo nene, be ta bunu na-pano kumijamo kalo aju jouro ea kenemiu taara na namoneano nalo. Nina nalo napano ajum̃a ajakii verloglogiano vovu dolu nalo nei, napano toro nei Nikolas naio jom̃a mioliolu kanio beamu.
REV 2:16 “ ‘ “Tibe na, monoka kuvilig kenemiu jidomiano taluvo den vovaiano nene! Ver makan, mia noyotuba ka kamiu vesiou re, ana mia iliano napano mia riyotuba ea nioku never kalo ea bogo na, mia naio tavukia iobogu na mira tai napano naio tekitkiti rilalo ajikia.
REV 2:17 “ ‘ “Toro napano be tiliene, bo naio rijoglubar venia napano Niununo na Atua kanano naio jom̃a berial ban taara na namoneano nalo. Naio napano bare ka tovulu na bova, mia naio ve kiano ijaiano novo, mia nesian sinaniano tai vanio, tavukia sinaniano napano kulo Ju nalo ajenio ea vio yauo, mia nina be sinaniano tai napano maka toro tai rialio vo. A mia nodu puruveru na mivu tai vanio, napano aje sio vou tai joaio, napano naio riduio, naio ga mia rijikia nioti riano nene.” ’ ”
REV 2:18 “Tai bunu bereio, jau monoka kovivitauia m̃esi tai riva rivan nailiano na lotuano na komeli na vio Taitera, kover tibe nei, koverinavo ‘Iliano nei napano biedu ban kamiu naio binimei den Kulorinio Kenerinio, napano mirano merera bilvili javukia menano sebi, a jaano kirisikili jibe ka butoto.
REV 2:19 “ ‘ Naio berial ban kamiu jibe nei, berinavo “Kiniou nemijikia vatitig bo kenemiu im̃auano nalo, kenemiu tinietiiano bija viekouoiano, a kenemiu im̃auano kouo nalo a jidomiano na tebievi na kenemiu, a mave lie kanio nomijikia vatitig bo ka kumitum̃a kumila ba lie vonganei, jovulu nanua m̃a kumitum̃a kumilala beamu.
REV 2:20 “ ‘ “Nina be tivelinio na bo nene, mia be vite tai na monoka kiniou never rimeravo van kamiu. Nina be tivelinio na tira va nei Jesebel, napano kubitilubar kanano vovaiano nalo, mia kumijamo ka naio jidel dolu ka ga kiano im̃auano vovu nalo napano naio jom̃a milala. Naio berenio naio be tira na verialiano tai, a p̃eli, kamiu kumonea naio, mia naio mila sibilili ga kamiu. Ea kanano verloglogiano, naio jo buru tomu na kanaku im̃auano aba be dolu laka, napano vonganei amijoru ea siakiano, ajum̃a ajen sinaniano na tavoru nalo kanalo, a ajidom aber bajago nalo na naio bo ga.
REV 2:21 Kiniou nodu bogo ban tira nei ka naio tinieno maio ka bereio, rivilig naio taluvo den niamiamo na m̃a milaio, mia naio maka sidomio.
REV 2:22 Mo, kiaku jidomiano naio jo ruei, ka mia nala naio rimon ea jog tai na mieiano na jikirkili nalo, a mia nala nalo napano m̃a amila siakaiano bijaio, ver aviliglo re ka kanano bajago na bova, mia nalo bunu ajog rivova ve toru laka.
REV 2:23 “ ‘ “Tira nei mia ve re kenerinio tai meul, mia kanaku siniabu tokol nonovlo aviniu. Naruei bogo napano nalo na taara na namoneano nalo aial vite nei, mia avitilubar ka kiniou naruei, kanaku vitiiano jo jeliviv bakar venia napano jo joa toro kanano iviso, a jikia leal venia na joa kiano jidomiano. A mia avitilubar bunu ka kiniou naruei, nojo nejian meran ban tomu nalo, memedu ga ka bajago na vite nalo napano ajum̃a amila ea kialo meuliano nalo.
REV 2:24 “ ‘ “Naruei ea tivelinio na kamiu nalo dolu na ea vio Taitera, nemijikia ka maka kuvitakii verloglogiano nalo na tira nei kanano. Naio milavon ka buku iliseseiano nalo ban kamiu, ka ber mia naio rivetavo ea jidomiano lukuluku nalo napano abe teremi bo van kamiu, mia kamiu kubitilubar ka Sim̃aro ga naio ga be burupati na iliano nalo nene. Mia kiniou never re bunu kiri titai ve dolu van kamiu,
REV 2:25 mia neber ga ka kamiu kuvokar sikili ilirianiano nei napano kubakar ruei, kuvituvan re rivan rivano, mia kiniou nemei bereio.
REV 2:26 “ ‘ “Naio napano juvulu na vovaiano, naio rila ga takii kiaku tinieiiano riva rivokar juluvati na bogo nei, mia kiniou nesian burum̃ara ijaiano vanio. Mia najamo ka vanio ka rije tuboiano ea venuo nalo,
REV 2:27 tibe ka napano niosi na iouano naio beriio, napano naio ber Naio mia rije tuboiano ka tomu nalo, napano kanano iesi napano na bokar ka jum̃ano, naio be m̃arbutoto na kirisikili tai, a nalo napano parilo jikili, mia naio rivukulo avan ea borotano, avurukokorov aveve niati tavukia tanop̃ili na amim̃aukanio ea borotano. “ ‘ “Moroano na rila tibe nei, Teta naio mijamo ka ban kiniou ruei, naruei mia najamo ka rivan toro na be kanaku.
REV 2:28 A maka naina ga, mia toro nene, mia nodu m̃arivitano napano M̃ejegi toa jum̃ano.
REV 2:29 “ ‘ “Toro napano be tiliniene, bo ka naio rijoglubar venia napano Niununo na Atua kanano naio jo berial ban taara na namoneano nalo.” ’ ”
REV 3:1 “Mo jau monoka kovivitauia m̃esi tai riva van nailiano na lotuano na komeli na vio Satisi, kover tibe nei, koverinavo ‘Iliano nei biedu ban kamiu naio binimei den naio napano bitikar niununo aluo na Atua kanano bija m̃arvitano aluo napano kiano. “ ‘Naio berial ban kamiu jibe nei, naio berinavo “Kiniou nemijikia batitig kenemiu im̃auano nalo. Tomu nalo ajum̃a amiaia kamiu m̃ele janea vio, aberinavo kamiu kube lotuano tai napano meul bo, mia makanio, kiniou nemijikia batitig ka napano kamiu kum̃arm̃aro ga kumitu.
REV 3:2 Vonganei be kenemiu bogo na kuvitevijo kija. Kenemiu im̃auano nalo, nemilealio ka Atua kiano vitiiano, kamiu maka kumila nonovio riviniu rivu, mia maka kuvila rimemedu leleio. Kenemiu sebi maka riva kovio vo, mia naio jo ban vaataro ka rim̃aro dobi nonovio, mia bior vite na, neber vatitig bo ban kamiu neberinavo monoka kuvila vatitig rivu ka mia naio rimei sikili lie bereio.
REV 3:3 “ ‘ “Tibe na, monoka kuvisidomial bereio iliano novo nalo napano m̃a kumijogio a napano kumijevio ruei. Kumonmonealo bo dam̃ariga, a kuvilig kenemiu meuliano rimei bereio, bior ver kuvitevijo re, mia nemijikia never vatitig rivu van kamiu ka mia nemijikia namaluvo ka kamiu tavukia toro na vinauano tai, napano mia kuvijikia lele re.
REV 3:4 Beriano, nemijikia ka kamiu maka m̃arati ve telabo na vio Satisi aju bo ga, napano maka aia niegeniege m̃alo kulum̃arauo tavukia nalo dolu. Nalo ameravo bare bo ruei, ka na mia aia kulum̃arauo na miuvu, aiel rivija kiniou nuvan ea kiaku vonuo.
REV 3:5 Toro kei napano jovulu vovaiano, naio bunu mia ayovovua vatitig naio rivu ka kulum̃arauo na miuvu jibe na. Mia naio siano, maka nejikia noiolkon bulag den niosi na meuliano bogo tai, mia kiniou nesiloglog naio ka karam̃aku rivija kanano nailiano nalo, never, kema na naio be kanaku toro tai riano.
REV 3:6 “ ‘ “Toro na be tiliniene, bo ka naio rijoglubar venia napano Atua kanano Niununo jom̃a ber bulavulag ban taara ninio na namoneano nalo.” ’ ”
REV 3:7 “Bereio, jau monoka kovivitauia m̃esi tai riva van nailiano na lotuano na komeli na vio Vilatelvia, jau kover tibe nei, koverinavo ‘Iliano na napano biedu ban kamiu, naio binimei den naio napano be lu, a naio be riano, napano naio naruei naio midu vukariano na vetavoiano na m̃aratavo napano Parinio Tubo Teviti re nua kiano. Venia napano naio betavo eaio, maka toro tai rijikia tetavoko bereio, a venia napano naio jetavokoio, maka toro tai rijikia rivetavo ea bereio.
REV 3:8 “ ‘Naio berial ban kamiu jibe nei, naio berinavo “Kiniou nemijikia batitig kenemiu im̃auano nalo ruei. Naruei monoka kuvitii vatitig, nebetavo ea m̃aratavo tai ban kamiu napano maka toro tai rijikia tetavoko bereio. Kiniou nemijikia ka kenemiu moroano naio telisu ga, mia najaaro toru ka napano kumitum̃a kubokar vatitig kanaku iliano, a maka kuvila lelan siaku napano joa kamiu.
REV 3:9 Nalo napano ajakisor Sim̃aro, aju aba vio takurano ka avitirilar kialo taara, ana nalo ajum̃a aber nalo abe kulo Ju memedu, mia maka tibe na, nalo amila sibi ga na. Mia iorou kanio mia nala nalo nei amei anie yetano ka jaamiu ka avitilubar ka kiaku jidomiano maka toalo, joa kamiu ga.
REV 3:10 “ ‘ “Kiniou neber ka kamiu nua ruei neberinavo monoka kuvitu sikili vija jidomiano na tebievi tulaka, naruei nemial jibe kubokar vatitig kanaku iliano nei. Bior vite na naruei, nemijikia neverikar van kamiu never burum̃ara jogvaiano na mia rimei ea yetemeriba nei, ka rilavon nalo napano ajuaio, ana mia kiniou notokovio batitig ka kamiu kanio, mia vite na naio maka rijikia tokol kamiu.”
REV 3:11 “ ‘ “Vesiou re, kiniou nemei ka kamiu bereio. Venia napano kumitum̃a kumitutua mugaruei, monoka kuvokar sikili rivu-oa ka kiniou nomaluvo, ana mia kamiu kumijikia kuvijev kenemiu ijaiano, mia maka toro dolu rijikia rivarlar kenemiu batubatu niogo den parimiu.
REV 3:12 Toro napano jovulu jukujukuano nonovio riva rivokar bogo na nemei, mia novuru naio rimei tibe m̃artea na toru tai joomo ea yimo lu na Atua kiano, mia toro nene to joomo ea toboto. Mia netekar sio nalo napano mia netiri eaio, tibe sio na kiado Atua kiano, bija bija sio na kiano komeli na toru, naina Yerusalemo novo, napano naio jo batove ea vio mave binimei napano kiado Atua kanano, a bija nalo napano, mia nevivitauia siaku vou toa naio bunu.
REV 3:13 “ ‘ “Toro napano be tiliniene, bo ka naio rijoglubar venia napano Atua kiano Niununo naio jom̃a berialio ban taara ninio na namoneano nalo.” ’ ”
REV 3:14 “Na maaro, jau monoka kovivitauia m̃esi tai riva van nailiano na lotuano na komeli na vio Leotesia, kover tibe nei, koverinavo ‘Iliano napano biedu ban kamiu naio binimei den naio napano naio be parinio ka vite nonovio, napano naio ga mijikia river “Tibe na.” Naio biekouo be riano ea Atua va vokar napano kiano burukija riou, a naio rive tubo ka yetemeriba nonovio napano Atua naio jiio.
REV 3:15 “ ‘ Naio berial ka kamiu jibe nei, naio berinavo “Kiniou nemijikia batitig bo kenemiu im̃auano nalo, mia nebitilubar ka kenemiu jidomiano nalo ea kiniou maka rimenini laka, a maka rivitunu rivare. Bo laka ka ver jau kosidom komenini, mo jau komenini bo kanio, p̃eli na ver jau kosidom kovitunu, jau monoka kovitunu vatitig rivu, mia naina napano kenemiu iviso beve torogio ga jibe na, bajago na kiniou maka nosidom leleio.
REV 3:16 Mia bior kamiu naruei kumisidom kumenini, a kumisidom kuvitunu tibe na, kiniou nojo ruei ka novule bulag kamiu den nioku.
REV 3:17 Kamiu kumitum̃a kuberinavo kubiobijii saba novo nalo miroano na be kenemiu, tenene na kamiu be tiniemiu ka kuber maka toro tai napano rijikia sian vite tai van kamiu, bior be kenemiu telabo ruei. Mia makanio, ea kanaku vitiiano naio maka tibe na. Kamiu maka kuvijikia kuvitilubar kamiu, mia kamiu maka ve kenemiu vite novo nalo leleio, kube kulo kurano ga, kube merebono, a niabemiu yauo ga kumitu.
REV 3:18 “ ‘ “Mo kiniou neber ka kamiu, ka bo ka kumei bereio ea kiniou, kumei kuvar niogo nei napano sebi jijenkon niamiamo nene ruei, ka kumijikia kuvakar vite novo tai ea jumemiu. Bo ka kumei kuvar kulum̃arauo na miuvu bo, ka kuvisalvoko kamiu, ka mia kuvimou re bunu, a bo kumei kuvar vam̃esi na kuvia ea miremiu, a na mia kumijikia kuvial vite bereio.
REV 3:19 “ ‘ “Toro kei napano tinieku jii naio, monoka neil vanio ka nala kanano meuliano rimemedu, tibe na, kuvidu kiaku iliano nei rivu, ka mia kuvilig kamiu.
REV 3:20 Kamiu kuviniagago vatitig rivu! Kiniou nejikili noju neminia tavo na kanamo meuliano. Jau napano kojog jooku bio, kovetavo ka kiniou, mia nemei joomo ka kito ve juo rotukunu, kito ve juo rosinan vio takurano.
REV 3:21 “ ‘ “Naio napano ju jikili ba jovulu na bova, mia najamo ka naio rijikia totano biju vija kiniou ea jobaro lu na kanaku, javukia ga napano kiniou bunu nojuvulu kanaku uolu, a na iorou kanio karam̃aku buru kiniou nojotano biju bija naio ea jobaro lu na kanano.
REV 3:22 “ ‘ “Toro napano be tiliniene, bo ka naio rijoglubar venia napano Niununo na Atua kanano naio jo berial ban taara na namoneano nalo.” ’ ”
REV 4:1 Iorou ka napano kiniou nemial vite nalo nei, nemial bereio m̃aratavo tai ka ava joomo ea vio mave naio juvavo jo ea miraku. Ana nomijog bereio jooa na mil ban kiniou beamu, naio mil burutomoruo javukia pasimeduo, ana naio ber ka kiniou, berinavo “Jau komei mave nei beamu vo, mia kiniou nelaso keial vite nalo napano mia amaluvo iorou.”
REV 4:2 Naio ber jibe nei, ana vaarakurano ga, nomijog jibe ka Atua niununo midular niunuku, naio midu kiniou nojo mave tiniabene, naruei nejerarago ban ea burum̃ara jobaro lu tai napano jokamu ka miraku, napano toro na toru tai naio jotano eaio.
REV 4:3 Nemial naio jibe ka napano naio merera, naio bar yovovuano na veru maraiu nalo, a kanano yulu nene jeliviv eaio javukia subovivi tai.
REV 4:4 Burum̃ara jobaro lu nei naio jo iviso, a jobaro dolu nalo bunu ajelivivi eaio, nobulukulo bokar duelimo valuo ba veri [24]. Ea nalo abeve terakurano, toro tai jotano ealo, mila nalo bunu abe duelimo valuo ba veri [24], napano nalo na abe navagadeano nalo na tiniabene. Nalo na amiya kulum̃arauo na miuvu laka, abar batubatu niogo jua pariparilo.
REV 4:5 Nojo nejiraravo jibe na, nomiilo bunu ka napano vijaniano naio miyotuba iviso ea vio lu nei, bija bunu burum̃ara uetubaiano na tubaalo naio jom̃a jara. Kamu ea mirano, yulu aluo amiuvu, napano nalo abe Atua kanano niununo aluo nene,
REV 4:6 a nalo ajumolu aju ea vodobi tai, banbano laka jibe tei, naio mieg meravo bo javukia mermerobi. Ana iviso ka vio nene bereio, tom meul veri aju, napano ea kamu kalo a iorou kalo, abe miralo nalo vio bujo laka, a nalo aju vaataro, aju jeliviv ea burum̃ara jobaro lu.
REV 4:7 Toro meul na jukamu nene naio javukia laeon, tinene naio javukia bue m̃arauo buruolu, tolu nene naio bar kulorinio mirano ga, mo nana maariano naio javukia bebekumo.
REV 4:8 Nalo abiniu, be sibialo ari, napano miralo jovukoio vatitig bo sibialo bunu, ba bokar yetano kalo. Nalo nei kanalo im̃auano, legiano bogiano, maka ajilimebi bogo tai, ajum̃a aberial dam̃ariga jibe nei aber, “Atua na moroano na mave, naio jo beamu, naio jo vonganei, naio mia to toboto. Naio be lu mia be lu, naio be lu laka.”
REV 4:9 Ea iliano nalo na jibe na, nalo aju amidular naio siano napano naio jotano iviso kalo ea vio lu, aju abatove kanio, ajum̃a aber siva banio ka napano naio meul toboto. Bogo napano ajum̃a aberenio,
REV 4:10 navagadeano nalo bunu abatove kanio, amilotu ka naio napano mia naio maka rijikia rim̃aro bogo tai. Ana kario, abar bulag kanalo batubatu niogo nalo den pariparilo, abar jutano ea jaano, aberinavo
REV 4:11 “Tubo kenememi Atua, memedu ka mermerano, vatoveano vija moroano nonovio aje vanso, ve kanamo jau ve takurano ga. Jau naruei kojii vite nonovio, ea kanamo jidomiano ga abokar kanalo meuliano.”
REV 5:1 Karina kiniou nemial bereio toro na toru nanua jotano mave ea vio lu, ka napano midukar vite tai ka jum̃ano meruo, naio be niosi tai, napano abivitauia tivelinio be juo karina amijukuio, karina abukario bija sano vukariano aluo nene.
REV 5:2 Naruei nomijog nailiano na toru tai miaga jouo, naio bika ber “Toro kei naio bare ka rilakorov vukariano nalo nei? Be toro tai napano naio jo mijikia vetavo ea niosi nei p̃eli na makanio?”
REV 5:3 Naio to tibena vano, vedeio, maka ve toro tai na tiniabene p̃eli na yetemeriba, p̃eli na yetano ka yete-meriba, napano naio mijikia rivetavo ea niosi nei, maka tai napano rivare ka sirarago joomo eaio.
REV 5:4 Nemial jibena naruei nomijog bova, nejegi mia nejegi, napano maka toro tai rijikia rila.
REV 5:5 Naruei navagadeano nalo tai mil ban kiniou, naio berinavo “Ei, jau keteg re bunu! Koialio, laeon yako napano miyotuba ka tomu nalo na Yuta, naina napano abio ka yati na Teviti, naio jovul vite nonovio ruei. Naio naruei mia rilakorov vukariano aluo nei, naio naruei mia rivetavo ea niosi neibano.”
REV 5:6 Naruei nejirarago bano, mia maka rive laeon, mia nemial kiritete solbouo na nunu tai jumolu jikili ju iviso ka toro meul veri bija navagadeano nalo, kamu ea vio lu nei. Naio be nunu na telisu ga, mia kiano pasimeduo aluo na jikili, bija mirano aluo ajua parinio. Naio jikili ju jibe na, naio jibe ka amila sida ka naio ruei, mia naio meul bo ga jo.
REV 5:7 Ana naio miel binimei, midular niosi nei den toro na toru nei jum̃ano meruo, napano naio jotano mave ea burum̃ara jobaro lu.
REV 5:8 Naio midu ruei, ana toro meul veri nei bija navagadeano duelimo valuo ba veri [24] amijoru ea jaano. Nalo be kialo nioragrago nalo janealo a be kialo baju niogo nalo, napano abujo magmago ka m̃aatei napano ajonio, mia bonoti tanunu nene napano jo bavin, naio be volkouano nalo na namoneano lu nalo kanalo.
REV 5:9 Mo nalo amijev iouano vou tai napano ban jibe nei, berinavo “Amila sida kaso, naruei ea kanamo burukija jau kobulu bulag tomu nalo abe Atua kanano, napano amoluo ea taara nonovio na tomu nalo, ea iliano doldolu nalo nonovio, ea uleule nonovio nalo na tortoru, a ea uleule na tertelisu nalo bunu. Jau komiasosol lo abinimei abe taara takurano ajutano ka parinio tubo takurano ga, nalo abinimei abe kulo lu na Atua kanano im̃auano, ka napano mia ave tubo ka yetemeriba nei. Mo bior ka napano jau komila jibe na, memedu ka jau ga ve takurano naruei kodu niosi nei, ka kelelar vukariano nalo nene, ana kovetavo eaio.”
REV 5:11 Nojo nejirarago jibe na ana nomijog nailiano nalo amiou, nalo miroano mia miroano mia miroano, nalo jovulu taam̃aka [1,000,000] bano na jibe na. Aju ajeliviviko jobaro lu bija tomu na ameul bija navagadeano nalo nei,
REV 5:12 ana aju amiou jouo, aber jibe nei, aberinavo “Nunu domudomu, napano amila sida ka naio, naio ga takurano bo mia bo. Moroano nonovio, tovuiano nonovio, masouano nonovio, sikiliano nonovio, vameneano nonovio, mermerano nonovio, miaiano nonovio, memedu ga ka ala rivan naio ga ve takurano.”
REV 5:13 Iorou ka nina, nomijog bereio ka napano temeul nalo nonovio bunu amiou, nina be temeul nalo napano aju mave ea tiniabene, bija nalo napano ajua yetemeriba, p̃eli ea borotano, p̃eli ea tei, kanalo iouano naio ber jibe nei, berinavo “Miaiano, vameneano, mermerano bija moroano riva van Toro na Toru napano jotano mave ea jobaro lu, bija bunu nunu solbouo, rivan rivano-o to tobo to.”
REV 5:14 Ana tom meul veri nei aberial “Jibe na, mm” kar iliano nalo nei, ana navagadeano nalo amijoru, aminie, amilotu kalo abe juo.
REV 6:1 Kiniou nojo najirarago bano, ana nemial ka napano kirikiti nunu naio milakorov vukariano na be moti na niosi nei. Naio mila kario ana temeul veri nei nalo tai naio miaga ka joono jibe ka tubaalo, naio berinavo “Komei!”
REV 6:2 Vaarakurano ga bue kulorinio tai napano miuvu jikili jua miraku. Ana nemial toro tai jotano mave eaio, naio midu viu, ana nalo amidu parinio tubo kanano batubatu joa parinio, ana naio midu kanano bue kulorinio nene, jikiti batavio javukia toro na mira tai ban ka tovulu kanano uolu nalo.
REV 6:3 Karina, nunu solbouo milakorov vukariano juo nene. Naio mila kario naruei nomijog temeul juo nene naio bio, naio bunu berenio berinavo “Komei!”
REV 6:4 Vaarakurano ga bue kulorinio dolu tai binimei, napano naio bilvili. Toro napano joaio, amijamo ka ban naio ka riva ridular tum̃aro napano jo yetemeriba nei, ka mia tomu nalo atum̃a auebinvinlo am̃arm̃aro. A amidu burum̃ara iobogu na mira joa jum̃ano, naruei naio bunu batavio bano.
REV 6:5 Karina, nunu solbouo naio mila korov vukariano tolu nene. Naio mila kario ana nomijog temeul tolu nene naio bio, naio bunu berenio berinavo “Komei!” Vaarakurano ga bue kulorinio dolu tai jumolu jua miraku, naio bobogio. Toro napano naio miduio, midukar skel tai ka jum̃ano, ka naio rivitii tomu nalo na yetemeriba nei salo sinaniano nalo.
REV 6:6 Ana nomijog iliano tai maluvo iviso kean temeul veri [4] nei, naio berinavo “Jau kavano, amijamo ka banso ka jau komijikia kala ka mia vitu toa vio nonovio, ka napano mia monoka avulu ve burum̃ara veru ve toru mia sinaniano ve telisu ga. Mia maka kejikia kalalelan burupati buruolivi napano m̃a amim̃auka titikivaka ea m̃arati nene, a maka kejikia kalalelan burupati telikrevi napano amim̃auka m̃arjum̃elm̃elu eaio.” Nalo aber jibe na, ana naio bunu jikiti bano.
REV 6:7 Bisi na, nunu solbouo naio mila korov vukariano veri nene. Naio mila kario ana nomijog temeul veri nene naio bio, naio bunu berenio berinavo “Komei!”
REV 6:8 Vaarakurano ga nomial bue kulorinio tai napano niabene be yevi, jikili joa miraku. Toro na miduio, ajisia ka sio na M̃ariano, mia naio, kanano bilbilu tai naio jo miel bija naio, napano siano, abio ka Bulukuti Sebi. Ana naljuo nei, amijamo ka amijikia ala rivova van tomu ve miroano ea yetemeriba nei, ea iobogu na mira, p̃eli ea vitu, p̃eli ea mieiano, p̃eli ea temeul nalo. Jibe ka, ver tomu veri ajua yetemeriba nei, tolu nene amijikia atu rivu ga, mia veri nene kalo, nalo amijikia ala naio rijikia tibe na.
REV 6:9 Karina, nunu solbouo naio mila korov vukariano jimo nene. Naio mila kario naruei nemial boda, bija niununo miroano na tomu nalo amivon ea burupati nene. Naina be nalo napano m̃a amuebinvinlo bior napano aju jikili ka ajogkar Atua kanano iliano, a aju jikili ka m̃a aberial ka nalo amonea Yesu.
REV 6:10 Nalo nene, nemial aju ajegi ban Atua ka burum̃ara jooa, aberinavo “Aue Tubo na vite nonovio, jau kobe lu a jau kobe riano, aioo jau kovitilubar kenememi burukija nei. Nagi ana mia jau kala mirano van tomu na bova nei nanua m̃a amila bova jibe nei?”
REV 6:11 Nalo aber jibe nei, ana ajian kulukoti na miuvu banlo ka ayaio, ana mia aber kalo ka vite nei napano abikanio naio maka vo. Nalo aberinavo atu kija ve telisu beamu vo, bior kanalo bilbilu tealo napano nalo aju kia vo, bija bunu kurualo a kuvivinielo dolu nalo, napano mia nalo bunu monoka auebinvinlo am̃arm̃aro bior napano amonea, ana ver bogo na amei ve miroano avare ka Atua kiano jidomiano, mia naio rila venia napano abikanio.
REV 6:12 Naruei, kiniou nemial ka nunu solbouo naio milakorov vukariano ari nene. Naio mila kario, ana vaarakurano ga m̃ii mikulkulu, a maka vesiou m̃erenio binimei bobogio napano bobogio nonovio, a siberio naio binimei bilvili jibe burukija,
REV 6:13 a m̃arvitano nalo napano aju mave buluniogovu ajibir-bili abatove ea borotano, javukia ga m̃ariesi nalo na buruiesi tai na meruo, bogo na burum̃ara jegi mikulkulu ka jaati nene.
REV 6:14 Karina, amila bulunio-govu javukia yebe napano amijukuio amidu bano, a burusuku nonovio a uleule nonovio ajaraluvo den jelelo.
REV 6:15 Ana bogo na tomu nalo amial vite nalo nei, amerou toru mia amerou toru. Parinio tubo na yetemeriba, tomu na tortoru, tomu na ajukamu ka tomu na mira nalo, sanibaiano nalo, tomu na p̃irilo jikili, naliko bunu kialo tomu na im̃auano nalo, naliko kulo dolu nalo reraio, nalo abiniu abijauia buluvae nalo, aban ka vio nalo na mave ea suku napano mia ala vio sikili ka atuluku eaio.
REV 6:16 Bogo na abokar vio nalo nene, mia miroano jo binimei toru lie, ana nalo abio ban puruveru bija suku nalo, aberinavo “Aio-o, kamiu kuvijoru kuvisovko vatitig kumemi, ka siraragiano na naio napano jotano mave ea vio lu naio rijikia re rivokar kumemi, a ka nunu solbouo kiano siniabu naio rijikia re rila lelan kumemi.
REV 6:17 Legiano toru nei na naljuo kanalo siniabuiano binimei ruei, a kei naio mijikia tumolu rimeul ka bogo na? Makanio, vonganei mia naio rivova laka van kito roviniu.”
REV 7:1 Iorou ka vite nalo nei, nemial ka napano nailiano veri ajumolu ajua sudu veri na yetemeriba, aju ajukovio ka jegi veri napano m̃a ajum̃a amiuvuvu ea yetemeriba, ka rila na jegi nalo nei ajikia re bunu aiuvuvu ea tei, p̃eli ea borotano, p̃eli na mave ea buruiesi.
REV 7:2 Karina, nemial nailiano dolu bereio, naio binimei bija tena aue tovo napano Atua na meul kanano ea kiano tomu nalo, mia naio jaluvo ea tivelinio na jegi uro binimei. Naio mijikia ka nailiano nalo veri nei, nalo abar moroano ka amijikia ala lelan borotano a amijikia ala lelan tei bunu, ana naio bio m̃ele banlo, berburelo ka ala re bunu titai.
REV 7:3 Naio ber jibe nei, naio berinavo “Ee to, kamiu kuvila bulag re tei p̃eli borotano p̃eli buruiesi nalo, rivan riva rivokar bogo napano rodu tovo tai toa ea meriniano tomu na memedu nalo napano abe kiado Atua kanano.”
REV 7:4 Ka bogo nei naruei nejikar nomijog ka napano aberial memedu kanalo mirano napano ajekarlo. Nalo na amoluo ea yati duelimo ba juo [12] na Israel, nalo abe yati nalo napano m̃a abar korobilo nalo sialo, naina be Yuta, Rupen, Gat, Asa, Naptali, Manase, Simion, Livai, Isaka, Sepiulan, Yoseve, a Beniamen. Naruei ea yati nalo nei abiniu, tai bokar tomu nalo menu duelimo ba juo [12,000] amoluo ea naio, mila na nalo abiniu abokar menu toromomou duelimo va veri ba veri [144,000].
REV 7:9 Ana iorou kanio, nejiraravo ba naruei kamu ka miraku be burum̃ara tiniobi na tomu nalo, napano nalo miroano mia miroano, maka ajikia avulukulo, napano nalo na amiyotuba ea yati dolu nalo. Nalo naruei abe tomu na buruvenuo dolu nalo, bija kialo iliano kinkin nalo, naruei abinimei ajumolu ajukamu ea burum̃ara jobaro lu, napano nunu solbouo naio joaio. Nalo amiya kulum̃arauo novo na miuvu abiniu, a abar m̃ati burum̃al,
REV 7:10 ana aju abio toru, aberinavo “Kiado Atua jotano ea kiano jobaro lu, naio ga, bija nunu solbouo, naljuo abe burupati na ioruriano na kanado.”
REV 7:11 Ana bija nalo na, nailiano nalo bunu ajumolu aju jeliviv ea jobaro lu, ana amijil bunu navagadeano nalo bija temeul veri, ana nalo bunu aminie abamenea kamu ka jobaro lu, amilotu ka Atua,
REV 7:12 aberinavo “Nao, be riano! Ilivuiano nonovio, a miamoiano, a masouano, a sivaiano, a vameneano, a sikiliano, a moroano, nalo nonovio abe kanado Atua kanano naio takurano ga, mia tibe na toboto. Ilivuiano ban Atua!”
REV 7:13 Ana ka bogo na, navagadeano tai naio bika den kiniou, berinavo “Burum̃ara tiniobi nei napano amiya tena miuvu na, a jau komijikia abe kei nalo na, a jau komijikia ka nalo aju be abinimei na?”
REV 7:14 Ana kiniou neberinavo “Ii, maka nejikia, mia jau kobe toro na toru tai na vio nei, p̃eli jau komijikia kovio?” Ana naio berdop̃e berinavo “Ierinio, nalo na naruei napano amieldulu ea bogo na burum̃ara jogvaiano nene. Mia kulum̃arauo nalo na m̃a amiya na, ajekon ka burukija na nunu solbouo nei, naruei abinimei amiuvu bo jibe ka na komialio na.
REV 7:15 Nalo naruei, kialo im̃auano jibe nei, ber ‘Nalo ajukamu ea jobaro lu na Atua kanano, legiano a bogiano ana amim̃au kanano joomo ea kunuano lu, a naio napano jotano mave nei, naio mia rivitikarlo.
REV 7:16 Mia maka bunu ajikia siserlo bereio, a mia ajog re midou bereio, m̃erenio maka rijikia rila bulaglo, burum̃ara sebi mia tunu re bunu lo,
REV 7:17 bior nunu solbouo napano naio jo iviso ea vio lu nene mave, mia naio rivaganlo, rivuru m̃arabo kalo avan ea burupati uei na meuliano, ana mia Atua naio riolkon nono jogumiralo den miralo.’ ”
REV 8:1 Iorou ka naina, nemial ka napano nunu solbouo mila korov vukariano aluo nene. Naio mila kario, ana vaarakurano ga vite nonovio na tiniabene maka bunu rila malioano tai, vio nonovio melumu bo jibe na banbano bokar aura togio.
REV 8:2 Maka vesiou ga, nemial nailiano aluo napano nalo ajum̃a ajumolu kamu ea Atua mirano ka ala kanano im̃auano, a ajian simeduo aluo banlo, abar janealo.
REV 8:3 Ana iorou kanio, ana nailiano dolu tai naio binimei. Naio midu basidobidobi na m̃aatei, napano amim̃aukanio ea niogo, a bar binimei ju kean boda, napano naio bunu amim̃aukanio ea niogo, a napano naio jokamu ea jobaro lu. Naruei abar m̃aatei miroano banio ka risebilo ea boda ka rila bonotanunu rivu, a nalo ajian bunu volkouano na namoneano lu nalo kialo banio, ka rivar tumave ea boda tibe ka ijaiano tai.
REV 8:4 Mia bogo napano sebi jo jijen m̃aatei nene, bonoti nene bija volkouano nalo na kulo lu kanalo, ajaraluvo den nailiano jum̃ano, aba abokar vio mave ea Atua mirano.
REV 8:5 Karina, nailiano nene bar vovosebi tealo napano jua boda, mison ba joomo ea basidobidobi na m̃aatei nei, ana naio buku ba tove yetemeriba. Ana bogo na vite nei jokol yetemeriba, naio mila napano tubaalo jaara janea vio nonovio nalo, bija uetubaiano javukia bulukusebi bija vio bijaano, a m̃ii mikulkulu bunu.
REV 8:6 Ana nailiano aluo napano abar simeduo aluo nei, amila batitiglo ka aiuvlo.
REV 8:7 Nailiano na beamu naio miuvu kanano simeduo, naruei mila na yuo napano jikili jibe kurukuveru, bija burukija napano miaja jibe ka sebi, abinimei amue vio reraio ea yetemeriba. Amila vio jibe na ban bano-o sebi jijen yetemeriba tivelinio, bija sano buruiesi nene nalo, bija bunu vite nonovio napano m̃a aju amiluo eaio.
REV 8:8 Ana iorou kanio nailiano juo naio miuvu kiano simeduo. Nina mila napano burum̃ara kenieno burusuku tai, napano sebi jo moluo eaio, abuku batove ea tei. Naio mijuba tei jibe na, ana tei togio binimei jibe ka burukija,
REV 8:9 ana sano temeul nalo am̃arm̃aro, a uako nalo na m̃a ajum̃a aburo ea burum̃ara vio reraio nei, nalo amadudu.
REV 8:10 Karina, nailiano tolu nene miuvu kiano simeduo. Naio ga mila napano burum̃ara m̃arvitano tai, napano sebi jom̃a bovago eaio merera javukia yulu, naio moluo den vio yauo, naio buro binimei bokar yetemeriba. Ana kanano sebi ba jokol uei nalo napano amieraro a burupati na uei nalo.
REV 8:11 M̃arvitano nene, siano abio ka Uei Mijea, naruei naio mila ana uei na vio nonovio abinimei amijea, ana tomu nalo maka ajikia amunio, mia midou jerlo banbano ba am̃arm̃aro.
REV 8:12 Bisi na, nailiano veri nene naio miuvu kiano simeduo. Naina mila ana m̃erenio tivelinio binimei bobogio, a siberio tivelinio maka bunu rimiamo, a m̃arvitano nalo miroano maka bunu aialo. Naina mila ana legiano binimei bulati laka, a maka vio rimiamo bunu, mila ana be melijokouo reraio ea yetemeriba.
REV 8:13 Nojom̃a nejiraravo bano, ana nemial bebekumo tai jom̃a mier mave, naio jo miaga janea vio, berinavo “Vio bova ruei, mia kuluniabene kia ga navo. Nailiano tolu aju kia, ana kanalo simeduo nalo ajikili laka. Kamiu na yetemeriba, kamiu kuvitikar, burum̃ara jogvaiano naio jo maluvo!”
REV 9:1 Bisi na, nailiano jimo naio miuvu kiano simeduo. Naina mila ana m̃arvitano dolu tai moluo ea vio yauo naio bijulu batove ea yetemeriba. M̃arvitano nene amidu vulariano tai banio, naina be vulariano na rivetavo ea bulukup̃ili napano ba bokar sebi yetano.
REV 9:2 Bogo napano naio mijaglar sikmirano bulukup̃ili nei, iou juru bavin jo molmoluo eaio, javukia iou na burum̃ara sebi, naruei naio bavin miduko vio reraio ea vio yauo, miduko m̃erenio mirano, mila vio bobogio bereio.
REV 9:3 Mia bogo na iou jo miduko vio jibe na, surubu nalo amolmoluo den iou aba tove ea borotano, mia maka bunu ave surubu, mia abinimei ajibe buruolu nalo na tortoru.
REV 9:4 Aberburelo ka atokol re buruiesi nalo p̃eli na sinaniano p̃eli na vite nalo napano ajum̃a amiluo ea yetemeriba, mia amijamo kalo ka amijikia ala lelan tomu nalo na yetemeriba napano maka avar tovo ea mamerinialo napano Atua midu joa kanano tomu na memedu nalo.
REV 9:5 Mo buruolu nalo nei, maka ajamo kalo ka ajikia auebinvin tomu am̃arm̃aro, mia amijamo kalo ga ka amijikia aikitkitilo rivanvano-o rivokar siberio ve jimo. Ana bogo napano mia atum̃a ala tibe na rivanvano, tomu nalo ajog niabele nalo ajalele reraio.
REV 9:6 Ka bogo na, ve telabo averinavo bo ka am̃arm̃aro ga, mia amijikia asiravo m̃arabo na am̃arm̃aro eaio, mia m̃ariano naio maka sidomlo, mia tuvanlo atu tibe na ga.
REV 9:7 Ana surubu nalo nei, bogo na nebiti batitiglo, nalo ajavukia bue kulorinio napano tomu na mira nalo m̃a abarlo. Amiyako pariparilo bija batubatu na abieko ka niogo, ana bogo napano nebiti vatitig miralo, nemiilo ka napano ajibe ka toro ga.
REV 9:8 Mia vijulo aburon javukia tira vijinio, mia m̃arjuvolo javukia kuli kialo parinio tubo m̃arjuvono memedu.
REV 9:9 Amilako baerelo ka butoto, a bogo na m̃a amier janea vio, sibialo nalo amalmalio, ajavukia bue kulorinio nalo napano aburu rukuruku aburo aban ka ala mira.
REV 9:10 Mia surubu nalo nei be bulajielo joalo, bija vite na be niononoti ka m̃a julu tomu nalo joaio, napano mia amijikia atulu kulorinio kanio riva rivokar siberio ve jimo.
REV 9:11 Nalo abe kanalo parinio tubo tai, naina be nailiano tai, mia maka ve Atua kanano nailiano, mia be nailiano napano naio bitikar m̃aratavo na bulukusebi. Toro nene siano jel ea Ipru, abio ka Abatono, a ea Krik, abio ka Apolion, napano sio juo nei nioti nene be toro na mila bulag saba.
REV 9:12 Naina naruei surubu nene nalo, napano naio be moti ea jogvaiano tolu na jikili nei. Mia nemial ka napano naio ba bar laka ruei, juo nene ju kiano vo.
REV 9:13 Bisi na, nailiano ari naio miuvu kiano simeduo, ana nomijog iliano tai maluvo ea sudu veri na boda lu napano amim̃aukanio ea niogo napano naio joa vio lu ea Atua mirano.
REV 9:14 Iliano nene mil ban nailiano nei, ber jibe nei berinavo “Nailiano veri nalo napano aju amior vatitig nalo ajua vio na uei napano mieraro napano abio ka Yuvretis, vonganei naruei be bogo na jau kova kotuvanlo avava tavio bereio.”
REV 9:15 Nailiano nalo nei, nalo abokar vatitig nalo jibe na ba bokar aura nene memedu ea legiano nene memedu ea siberio nene memedu napano amijikia ataluvo bereio ka ava ala kanalo im̃auano nalo. Ana nailiano dolu naio ba juvanlo, mila na ajaluvo, aban janea buruvenuo nalo ka amue tomu nalo vaataro ka rivokar tomu na yetemeriba togio.
REV 9:16 Nalo aban bija kanalo tomu na mira nalo napano abar kanalo bue kulorinio na mira, ana nomijog napano aberial kanalo mirano bokario taam̃aka toromomou juo [200,000,000].
REV 9:17 Ana bogo napano nebitii bue kulorinio nalo nei bija tomu napano m̃a ajutano mave ealo, nemial napano butoto vite na amidu joko baerelo, amiyovovua bo abilvili javukia sebi, abe si javukia buluniogovu, a amijelea javukia m̃erenio. Kanalo bue kulorinio nalo abe dolu, napano pariparilo bar kuli kialo parinio tubo, mia bogo napano aburu jegi nemial be sebi a iou a vijinio bulusebi amiyotuba ea niolo.
REV 9:18 Vite tolu nei naruei, sebi a iou a vijinio bulusebi, amila na vaataro ka tomu nalo na yetemeriba togio rivakovio ka bogo na.
REV 9:19 Moroano na bue kulorinio nalo nei ajoa venia napano miyotuba ea niolo, a ajoa bulajielo bunu, bior bulajielo mijukonkon jibe ka m̃aro, a javukia parinio m̃aro joa juluvati jielo napano naio jian burum̃ara jaleleano ban tomu nalo.
REV 9:20 Jogvaiano nalo nei ajikili laka jibe na, mia tomu nalo togio toru, nina nalo napano m̃a ameul kiano vo, maka asidomialio. Maka lele aviliglo ka kialo im̃auano va nalo napano jum̃alo ga jo mim̃aukanio, mia aju ajidel dolu ga ka amilotu ka sim̃aro nalo, a ajum̃a abolkouo ka tavoru nalo na kanalo atua nalo, napano maka ajikia asirarago, napano maka ajikia ajoglubar vite, napano maka ajikia aiel, napano toro ga mim̃au kalo ea niogo p̃eli ea veru na miuvu p̃eli ea butoto p̃eli ea puruveru p̃eli ea iesi.
REV 9:21 A bija nina, maka aviliglo leleio ka kialo bajago na m̃a amuebinvin toro, p̃eli semei nalo, p̃eli amijuku bova ka tira, p̃eli kialo vinauano nalo, na m̃a aju amila.
REV 10:1 Karina nemial ka napano nailiano dolu tai na be p̃irinio juvan vio mave batove. Naio miya melijo jibe ka napano kanano kulum̃arauo, a sibovivi tai jeliviv ea parinio, bija mirano na naio jibe ka m̃erenio, a jaano be juo ajavukia burum̃ara m̃artea mia abe sebi.
REV 10:2 Mo nemial ka napano naio midukar niosi na telisu tai, napano naio bisi dea kamu kanio ea jum̃ano nalo. Ana naio midu jaano meruo biekar ka tei, mo jaano mali naio biekar ka borotano.
REV 10:3 Naio jumolu jibe na ju, naruei naio juvan burum̃ara iagaiano tai napano naio jibe ka laeon, mia bogo na naio mila, tubaalo nalo amiolu meran binimei, amil ban naio ea kanalo saburuburiano nalo.
REV 10:4 Bogo napano tubaalo nalo ajaraburuburu jibe na, ana nojidom nevivitauia bulag kanalo iliano nalo, naruei vaataro ka kiniou netikar nala, ana iliano dolu tai juvan vio mave binimei ea kiniou, naio berinavo “Jau kotovo, jau kovivitauia bulag re kanalo iliano nalo na. Vite nalo napano m̃a aju aberenio, nalo maka ave tena tomu nalo amijikia ajikia.”
REV 10:5 Iliano nalo na jibe nei, mia nailiano nei nua nemial naio biekar tei a borotano, naio jian jum̃ano meruo bavin mave.
REV 10:6 Ana naio ber kanano iliano na jikili tai, naio berkar ea naio napano meul jo jobo jo siano, napano m̃a naio jii vio mave bija venia na m̃a ajuaio, bija yetemeriba nei bija venia na m̃a ajuaio, bija tei, bija venia na m̃a ajuaio. Iliano na kanano naio ban jibe nei, naio berinavo “Vonganei naruei maka bunu ve bogo na kotororea!
REV 10:7 Vaataro ka bogo na nailiano aluo nene rimei riuvu kiano simeduo, mia ver naio rila bisi, mia Atua kanano jidomiano vinivaiano nalo aviniu ayotuba medave, vite nonovio amalmaluvo tavukia ga napano naio berial beamu ban naverialiano nalo nanua m̃a ajum̃a amim̃au kanano.”
REV 10:8 Naio ber jibe na ana kiniou bunu nomijog iliano dolu tai jel mave binimei ban kiniou, naio berinavo “Niosi telisu nei napano betavo joa nailiano nei jum̃ano napano naio jumolu jua tei a borotano, kova kodu beamu.”
REV 10:9 Mia naban vaataro ka nailiano nei, nebika niosi telisu nei denio. Mia naio mijamo ka ga ban kiniou, berinavo “Bo ga, komijikia koduio. Ver koduio, monoka kosenio. Mia nemijikia never kaso ver bogo napano mia kosenio, mia kojog ka seseiano nene rivu ea niomo, avona bisi, mia jau kojog rijea ea mabomo.”
REV 10:10 Ana kiniou nomidu nejenio, mia naio jesei bo ea nioku. Mia nojiomo dodomu ruei, mia jibe ka ga napano naio berenio, napano vite nene mila maboku bova laka.
REV 10:11 Karina, iliano binimei ban kiniou vaarakurano bereio, berinavo “Tibe ga na naruei, bior ka napano verialiano dolu jo napano mia monoka kava koverialio bereio, napano aberii taara p̃ilip̃ili nalo, buruvenuo nalo, tomu na iliano kinkin nalo, a parinio tubo nalo napano m̃a ajua yetemeriba nei.”
REV 11:1 Ana ea bogo na amidu javiniu tai joa jum̃aku, aber ka mia nava nejeteli ea vio nalo vijaio. Aberinavo “Jau kavan ea Atua kunuano Yimo Lu, kejeteli ea vatitigio burutomoruo nene jum̃abe, a kejeteli ea boda napano m̃a jo joomo eaio, a kovuluku tomu nalo na m̃a aju amilotu ea vio na, abokar vio.
REV 11:2 Mia burum̃ara tanobuku napano jotavio kanio, nina mia kejeteli ea re, bior naio be vio togio na Yimo Lu napano tomu nalo napano maka ave Ju mia nalo aduio. Valauo nalo nei mia amei atovulu burum̃ara komeli lu nene Yerusalemo, mia nalo amei jouro aiel tanea vio nene tibe ka kialo vio, mia nina aim̃aukanio riva vokar siberio ve duelimo va veri ba juo ga [42].
REV 11:3 Mia bogo na atua vio na, mia tomu juo napano aju jikili ea ilirianiano na kanaku ayotuba. Mia naljuo aya m̃adabake ga tibe ka kialo kulum̃arauo, mia nalo averial kanaku iliano ea tikariano na siberio nalo na riva rivokar juluvati nene, napano legiano nalo nene abokar menu takurano toromomou juo duelimo va ari [1,260].”
REV 11:4 Tom juo nene, iliano lu na Atua kanano beriilo nua ruei, naina napano berii berinavo be burupati buruolivi juo naio ju, p̃eli napano berii be m̃artea na kadel juo, napano abe juo ajumolu aju kamu ka kiado Atua mirano nei napano naio be tubo ka yetemeriba reraio.
REV 11:5 A verenio bogo tai toro tai rilavon ka rila vite na bova tai ka naljuo nei, mia sebi mijikia riyotuba ea niolo, mia rijikia rila niadua kanalo uolu nalo. Naina naruei be m̃arabo na ver toro jidom ruebin naljuo, mia naio ga naruei sen kanano m̃ariano bereio.
REV 11:6 Naljuo nei be kialo burum̃ara moroano, ka napano amijikia averbure vio yauo mave ka mia yuo rivovo re rimonloglog bogo napano ajum̃a aberial Atua kanano iliano, a mia amijikia ala uei nalo amei ve burukija, a amijikia ala ka napano jaleleano kinkin p̃eli bogokouo rimei rila lelan yetemeriba ea bogo na vabe ga napano naljuo ajum̃a ajidom ka alaio.
REV 11:7 Naruei naljuo nei, mia averial Atua kiano iliano riva vokar bogo napano naljuo aim̃au tibe na ribisi. Ana ea bogo na naruei, mia burum̃ara temeul na bova napano naio jotano joomo ea bulukusebi naio riyotuba rimei ka naljuo, a mia kanano moroano tovulu naljuo, ruebinvinlo ave juo.
REV 11:8 Mia avuku salo tasim̃aro nalo amon ea m̃arabo iviso ea burum̃ara komeli nei napano be komeli nene kia ga vo napano kialo Tubo, naio bunu ajukukakar naio m̃aro ea m̃akolkolo eaio, ea bajago na ililuklukuano, bogo tai aber komeli nei siano abio ka komeli moruo na bova na Sotomo p̃eli vio Ijivi.
REV 11:9 Mokotenalo be juo aju amon tavio jibe na, mia taara na tomu nalo ve miroano, p̃eli na yati nalo, p̃eli ea iliano nalo, p̃eli ea uleule nalo, amei ka aial naljuo, a mia averbure ka mia ativin re naljuo-oa bogoti ve tolu togio.
REV 11:10 Mia bogo na m̃a aju abitii mokotenalo be juo banbano na, mia amiyotel ealo toru a abital niegeniegelo. Mia nalo atu asidomii jogvaiano nalo napano naverialiano juo na m̃a aju amila binimei ka tomu nalo na yetemeriba, ana mia nalo asaaro mia asaaro ka napano tomu juo nei am̃arm̃aro ruei, mia ala burum̃ara jokoluolu a mia aje jidomiano vanlo bereio riviorio.
REV 11:11 Ana iorou ka bogoti tolu togio nei barlaka kario, mia maka ativinlo ave juo vo ana amiilo ka napano jegi na meuliano tai jaluvo den Atua binimei jokol tasim̃aro juo nei, mila naljuo ajumolu bereio ajikili aju. Bogo na tomu nalo amialio, amerou mia amerou,
REV 11:12 a maka vesiou, amijog burum̃ara iliano tai jaluvo ea vio mave binimei mil banlo abe juo, naio berinavo “Mo, kam ve juo kumijikia kumei mave naruei.” Naruei vaarakurano ga abe juo abavin amiduburevure melijo ba aboru mave, napano kanalo uolu nalo nei ajikili aju vovu garuei abitivitiilo bano mia maka bunu ajikia aver titai.
REV 11:13 A monloglog bogo na, borotano mikulkulu toru, mila napano komeli tivelinio, yimo nonovio ajibirbili aburu kokorovio naruei, a tomu nalo napano am̃arm̃aro ea m̃ii mikulkulu nei abokar menu aluo [7,000]. Nalo na ameul aju bo ga amial vite nei amerou tanea, ana amial aber bo ka ailivu ka Atua na mave rivior kanano burum̃ara moroano nei napano abitilubario.
REV 11:14 M̃ii mikulkulu nei mila be burum̃ara jogvaiano juo nene naio bar laka ruei, mia tolu nene naio maka vo, naio mia rimei vesiou re.
REV 11:15 Bisi na, nailiano aluo naio miuvu kanano simeduo. Nina mila napano joono miroano aber bulavulag burum̃ara iliano nalo na mave, amilivu ka Atua, aber jibe nei “Vonganei naruei vio nonovio napano beamu aju yetano ka tubo va na yetemeriba nei, aju yetano ka Tubo Atua na kanado, naio bija Naverikariano na kanano. A mia naio rive Parinio tubo riva rijikia ribisi deio.”
REV 11:16 A bija nalo, nalo navagadeano duelimo valuo ba veri [24] nene bunu, napano ajum̃a ajutano ea kanalo jobaro nalo, aminie tano kamu ka Atua mirano, amilotu kanio,
REV 11:17 aberinavo “O Atua Sop̃i na moroano na mave, jau nanua kojo beamu, jau na mia koto vonganei, jau napano mia koto bogo na mia jo rimei. Kumemi nuber siva toru banso bior komidu bereio kanamo moroano na toru ruei, vonganei naruei koju jikili ea kanamo tuboiano.
REV 11:18 Beamu, buruvenuo nalo na yetemeriba ajerm̃i kaso, mia vonganei be kanamo bogo na koverial kanamo siniabu vanlo. Vonganei be bogo napano mia jau kotibure tomu na m̃ariano, a mia jau kala lelan tomu nalo nanua m̃a amila lelan kanamo yetemeriba nei. Ana kanamo tomu na im̃auano nalo, naverialiano nalo, bija kanamo namoneano lu nalo, a nalo napano m̃a aju abatove ka siamo, mia avar kanalo ijaiano novo nalo ea bogo na, bekurano ka napano abe tomu na tortoru p̃eli abe tomu na tertelisu ga ea kanamo im̃auano.”
REV 11:19 Ana ea bogo na abetavo ka Atua kunuano Yimo Lu na mave ea siraragiano na tomu nalo kialo, mia amial basidobidobi lu na tuboiano lu naio ju. Mo vaarakurano ga, vio binimei mkekeano bior Atua kanano moroano naio jo, napano vio bijiio bija tubaalo jom̃a jaara, vio malmalio, m̃ii mikulkulu, a burum̃ara kenieno kurukuti yuo aes tai mijoru.
REV 12:1 Kiniou nojom̃a nebitii vite nalo na mave kia ga vo, ana nemial burum̃ara kijokijo tai napano naio be tena iloiano. Nina be tira tai, napano naio midu m̃erenio, miako ka naio jibe kanano kulum̃arauo, a naio jumolu ju mave ea siberio, a kanano batubatu na parinio, m̃arvitano duelimo ba juo [12] juaio.
REV 12:2 Tira nene naio jo be m̃abono, ana naio mijog bova jo miaga souo, bior be kiano bogo ruei, vaataro ka rivar kenerinio.
REV 12:3 Nojo nebiti naio kia ga ana burum̃ara temeul dolu tai miyotuba mave, napano be tena merouano laka. Nina be burum̃ara kenieno niobi tai, naio bilvili, be parinio aluo napano abar batubatu na parinio tubo nalo kanalo, tai bar tai, tai bar tai, be bunu salo pasimeduo jua pariparilo nalo nene, biniu be duelimo [10].
REV 12:4 Mia vaarakurano ga tenei p̃ilig jieno mikulkulu jibe na, muebulag m̃arvitano miroano ea vio yauo, buku lo aban ea vio nonovio na yetemeriba. Ana tena bova neibano naio binimei ju kamu ka tira nei mirano, kiano jidomiano jororea ruei ka ver tira neibano naio rivar kenerinio, mia vaarakurano ga naio serbin senio.
REV 12:5 Naio jo jibe na bano na tira neibano naio bar kenerinio, bar be sum̃ano. Ana Atua naio jidom ka kiritete nei rimei ve parinio tubo na rivokar butoto ka jum̃ano ka rive tubo ka tomu nalo na yetemeriba, ana bogo napano temeul na kirivova nei naio maka rivokar kiritete nei vo, mia amidular den vaarakurano garuei, amidu bavin ban Atua mave ea burum̃ara kanano jobaro.
REV 12:6 Mia tira nei naio merou, naio buro ba joluku ea vio yauo, ea vio tai napano Atua mila batitig be kanano, mia ba juluku ea vio nene, ajirag naio ka bogoti telabo, bokar menu takurano toromomou juo duelimo va ari [1,260].
REV 12:7 Mia ka bogo na, be burum̃ara mira tai maluvo ea vio mave. Parinio nailiano napano Maekel bija kiano nailiano nalo, amila mira kean burum̃ara kenieno niobi napano, mia naio bunu naliko kiano nailiano nalo amila mira jikili bunu keanlo.
REV 12:8 Nalo amila mira jibe na bano-o, bokar bogo na niobi nei kanano moroano batove, naruei naio naliko kiano nailiano nalo ajibirbili abatove. Naruei amila bulaglo laka, amije vironiano banlo, abar bulag jelelo na ea vio mave denlo.
REV 12:9 Mo burum̃ara kenieno niobi nei, abukulario den vio mave vaarakurano, naio batove ea yetemeriba, naio bija kanano nailiano nalo nei. Naruei ea bogo na mia kiniou nebitilubar ka burum̃ara kenieno niobi nene naina ga napano beamu nuanua laka naio midu maro mirano, naio be toro na m̃a napano abio ka Sim̃aro, p̃eli Setano, napano vonganei ea kiado bogo, naio kia ga navo, naio jom̃a buru yetemeriba reraio ba milaluvu m̃arabo julaka.
REV 12:10 Mia iorou, nomijog burum̃ara jooa tai bio toru janea vio mave, naio berinavo “Vonganei naruei Atua kiano ioruriano naio jumolu, Atua kiano sikiliano naio jodovulio, Atua kiano navenatuboiano naio miyotuba, moroano na kanano Naveri-kariano naio jo loa laka ka vite nonovio. Vonganei naruei toro na bova nei napano m̃a jom̃a mil die m̃aratavo nalo na be Yesu kiano, naio bisi ruei. Legiano a bogiano naio jumolu jukamu ka Atua mirano naio milavon ka verbulag ga tomu nalo kialo kariano nalo, ana vonganei naruei, abukular naio ruei.
REV 12:11 Namoneano nalo miroano maka bunu asidomial kanalo meuliano, nalo maka amerou ka m̃ariano, mia aju jikili dam̃ariga ba bokar bogo na ajovulu toro na bova neibano, ana venia napano abokar ka jum̃alo ka ala mira vijaio, naio be burukija na Nunu Solbouo ga, bija iliano nalo na averial kanalo moneano ea Yesu.
REV 12:12 Ajodovulu toro na bova neibano, mila na vonganei mave bija nalo nonovio napano ajuaio, amijikia asaaro mia asaaro, mia nalo napano m̃a aju yetemeriba p̃eli ea tei, mia ajog rivova, a monoka amerou, bior Sim̃aro naio batove jo iviso kalo bija tiniene bujo ka siniabu, bior ka naio mijikia ka kiano bogo telisu ga, vaataro ka riviniu, naruei mila naio be deden lie vo.”
REV 12:13 Ninei be iliano napano toro tai berialio ea vio mave, karina kiniou nemial ka burum̃ara kenieno niobi neibano naio bitilubar ka napano abukular naio batove ea yetemeriba, mila na kiano siniabu bavin lie vo, naio berkar jikili ka mia naio monoka rivokar tira nei navo, napano naio bar kenerinio sum̃ano ruei.
REV 12:14 Naio ba milavio ka tira nei, mia naio miilo ka ajian sibiano juo ban tira nei, javukia sibiano burum̃ara bebekumo, ka naio rijikia rier rivuro riva toluku ea vio tai ea vio yauo napano amila batitig ka abitikar naio eaio. Naio ba jibe na, naruei burum̃ara kenieno niobi neibano naio maka rijikia rivokar naio ea vio nene, mia aberinavo mia naio monoka toa vio nene bogo vetebievi kija, napano ve yuka takurano, karina yuka ve juo, karina ve togio bereio.
REV 12:15 Vonganei niobi naio mial tira nei jo mier bano, mijikia ka naio maka rijikia rila titai, naruei mila siniabu lie vo, jumolu mijuluo ka burum̃ara ueimiya ka rivurular tira nei van vudodom naio.
REV 12:16 Burum̃ara uei nei naio jo mieraro bano, vaataro ka rivokar tira nene, mia amiilo ka napano vaarakurano ga, yetemeriba tinien miia tira nei, naio miija naio ka napano borotano burup̃e, naio betavo jibe burum̃ara niono tai, ana naio jiniomo uei napano niobi mijuluo bulagio jaluvo ea niono.
REV 12:17 Niobi mialio, vonganei kiano siniabu binimei bova laka, mia naio juvan tira jo, naio berinavo mia naio rivan ka kenerinio nalo ga, nina tomu nalo na m̃a aju ajakii tuboiano na Atua kanano, jibe ka nalo na m̃a aju abokar jikili Yesu kanano iliano nalo.
REV 12:18 Naio ber jibe na, ana batavio bija kanano burum̃ara siniabu, ban ka rila mira die nalo dolu nei.
REV 13:1 Burum̃ara niobi nei miel ba jumolu jua tei tivelinio ju. Ana maka vesiou, nemial temeul tai jaluvo den tei binimei ka naio. Vite meul nei be parinio aluo, pasimeduo nene nalo bokar duelimo, a ea simeduo beve terakurano be batubatu lu na parinio tubo kanano naio jo jaklele ealo. Ana ea merinialo beve terakurano, abivitauia sio tai jualo, napano ioluoliano ka lalelan tolu na Atua kanano.
REV 13:2 Vite meul nene nemial be dolu laka, napano naio jibe ka jidom tibe laeon kija, bior niono jibe kuli kialo parinio tubo memedu, mia jaano veri jibe ka temeul deden dolu javukia bea. Naruei naio binimei jikili jukamu ka niobi, ana niobi mije sikiliano banio, mila naio be parinio tubo ea kiano tanobuku nalo, juvan moroano nonovio banio.
REV 13:3 Mia nebiti vatitig vite meul nei bija kanano pariparinio nalo, nemial napano kanano parinio tai bar niajebijo tai napano toru laka. Bogo napano naio bar menko nene, ka naio rim̃aro ga riviorio, mia tomu nalo na yetemeriba amiilo ka amieliel ka binimei bo, ana mila nalo abilig kialo jidomiano amonea toro meul nei naruei, aju ajakisorio.
REV 13:4 Jibe na, tinielo vite meul nei, ana bogo napano amial ka napano niobi mije moroano banio ka rimei sikili batitigio, ajaaro toru, amilotu ka niobi, a amilotu ka toro meul nei napano naio jo jukamu kalo. Aju aber jibe nei, aberinavo “Kei naio mijikia tovulu kanado toro meul ea mira bogo tai? Vonganei maka toro dolu sikili batig tibe naio.”
REV 13:5 Mia bogo napano vite meul naio binimei jikili batig bo jibe na, naio jikar ka mila kiano vovaiano nalo. Naio jo juvan kanano ilivevaviniano, jo mioluolu janea vio, a jo mim̃au bija kanano moroano va, a mila ba bokar siberio duelimo va veri ba juo [42], nina yuka tolu togio [3½].
REV 13:6 Ka bogo na, naio jo mil niegeniege Atua, naio jo miolua siano, a naio jo buku iliano nalo na bova ka mave a ea kulo lu napano ajuaio.
REV 13:7 Sikiliano na amije ban naio bare ka naio rila sebi rivan ea namoneano lu nalo, riva rijikia tovulu lo, a moroano na m̃a naio jo miduio, bare ka naio rije tuboiano ea taara ninio nalo, tomu nalo, iliano nalo, vija uleule nalo.
REV 13:8 Naio mijikia rive tubo tibe na rivano-o rivan nalo nonovio na yetemeriba mia avatove ka naio, mia nalo tealo maka avatove kanio, a nina be nalo ga napano jikar ea tikariano na yetemeriba, sialo abivitauia ju joomo ea niosi na meuliano na nunu solbouo nanua amuebin m̃aro.
REV 13:9 Jau napano m̃a komijog iliano nalo nei, ver be tiliniemo bo jo, bo jau koiagago vatitig rivu.
REV 13:10 Namoneano napano mia avina ka naio ea kanano buruvenuo riva rim̃au kanalo, naio monoka rivan ga na. Mia nana mia atekorov burujono ka iobogu na mira, riano, mia iobogu na mira monoka tekorov burujono ga. Ver ve bogokouo tai tibe na, mia namoneano lu nalo monoka atumolu atu sikili rivija jidomiano na tebievi, monoka aviekouo rivanvano-o avar duluio avokar juluvati nene.
REV 13:11 Ana iorou nemial temeul dolu na bova tai, mia naio mijivi mave ea borotano binimei. Naio pasimeduo nene juo ga, jo ga jibe ka nunu solbouo tai, mia bogo napano naio mil, joono javukia niobi nanua beamu.
REV 13:12 Ana temeul na be moti naio mijamo ka juo nene mim̃au bija kanano sikiliano a kanano moroano nonovio, ana naio mim̃au banbano-o mila napano yetemeriba bija kanano tomu nonovio aju amilotu ka temeul na be moti, naio napano bar menko na m̃ariano napano amieliel kanio.
REV 13:13 Ana juo nene naio jo mim̃auka jameri-jiano na tortoru bija vite na iloiano nalo, banbano-o naio mim̃auka tai napano mila sebi jaluvo ea vio mave binimei yetano ea yetemeriba ea tomu nalo miralo napano aju abitiio.
REV 13:14 Naruei ea kijokijo nalo nei napano naio jo mila ea siano temeul na be moti, naio jom̃a mila sibilili tomu nalo na yetemeriba, naio burulo aba amiavovu laka. Naio berial kalo berinavo ate tavo-ru na temeul na be moti, napano iobogu na mira jeio mia naio meul bereio jo.
REV 13:15 Ana amim̃aukanio bisi, ana amidu moroano ban temeul juo nene ka naio rila tavoru nei mijikia rivuru jegi, a mijikia ril, a amije moroano ban naio ka rijikia ruetam̃aria toro kei napano naio maka saaro ka rivatove ka rilotu ka tavoru nei.
REV 13:16 Mo bija nina, naio jikili ka aviniu monoka aue toto tai tualo, ea jum̃alo meruo ver makanio ana ea mamerinialo. Tomu na tertelisu bija tomu na tortoru, tomu nalo na m̃a abe talim̃asa a tomu nalo na abe sanibaiano, tomu nalo na im̃auano, bija kialo boru nalo, aviniu avar toto nei.
REV 13:17 Ver makanio, maka ajikia avulu vite ea yimo na ṽiliṽiliano, a maka ajikia aṽiliṽili ka titai rivan toro dolu. Toto napano amue jualo, naio miyotuba ea siano temeul nei, naio jibe ka mirano na kanano sio.
REV 13:18 Jau napano mia kovuluku niosi nei, monoka kove masou rivu ka vio na. Ver komijikia kovitilubar vatitig rivu vite nalo nei, mia komijikia koleal merano na tomu nalo sialo, mia amijedu merano na temeul nei siano, amileal bokar toromomou ari duelimo va ari ba ari, p̃eli jibe napano tomu tealo aberenio, ari ari ari [666].
REV 14:1 Bogo tai bereio nejirarago bano, nemial burusuku na Saion naio jo kamu ka kiniou, a mave ea jumoti levlevi ana nemial nunu solbouo naio jumolu ju, naio naliko burum̃ara tiniobi na tomu nalo na kanano tai. Nalo abivitauia siano bija karam̃ano Atua siano joa merinialo, nalo miroano laka, merano ba bokar menu toromomou takurano duelimo va veri ba veri [144,000].
REV 14:2 Ana burum̃ara malmalioano tai miyotuba ea vio mave, jovulu malmalioano na tei mom̃avu ea baraam̃a p̃eli malmalioano na tubaalo. Ana nemiagago napano be malmalioano na p̃i m̃arauo nalo napano ajum̃a amueio,
REV 14:3 a nalo ajumolu aju kamu ka vio lu, kamu ka temeul veri nei bija navagadeano nalo, ajum̃a amiou ka iouano vou tai. Kulo dolu nalo miroano tinielo jii iouano nene toru, nalo ajidom aiou ka bunu, mia nalo maka ajikia ala kakario. Nalo ga napano amijikia amiou kanio, nina be tiniobi na menu toromomou takurano duelimo va veri ba veri [144,000], napano abulu bulaglo den yetemeriba.
REV 14:4 Nalo nei naruei napano maka lele avijuku vova ka tira bogo tai. Nalo abokar vatitig kanalo meuliano meravo bo julaka, a ajum̃a ajakisor Nunu Solbouo ban ea vio na vabe napano naio ban eaio. Tomu telabo aju, mia nalo nei naruei abulu bulaglo ajaluvo den dolu nalo, mia amila lo abinimei jibe jidomiano tai ea m̃ariesi na be moti ba ban Atua bija Nunu Solbouo.
REV 14:5 Nalo nei maka lele sibiano riyotuba ea niolo, maka ve vite na bova tai toa kialo meuliano.
REV 14:6 Ana ka bogo na, nemial nailiano dolu tai jom̃a mier janea vio mave. Ajian iliano vou na bo nei napano maka rijikia rivakovio bogo tai banio, ka naio rijikia riva rioliolu tanea tomu nalo napano m̃a ajua yetemeriba, ka riva rivokar venuo nonovio, taara na tomu nalo nonovio a iliano ninio nalo.
REV 14:7 Naio jo berial janea vio bija burum̃ara joono, naio berinavo “Kamiu kuvatove ka Atua, kuvidular vavin siano, bior napano aura na naio tibure yetemeriba nei naio maluvo ruei. Kamiu kuvilotu ka naio napano naio jii tiniabene, yetemeriba, a tei, bija burupati uei nalo.”
REV 14:8 Ana iorou ka nina, nailiano juo nene tai naio jakisor binimei napano jom̃a bio jibe nei, berinavo “Komeli kirivova na toru nei Bapilon naio mijoru ruei! Naio ba midu atua na maka rive riano, ana buru tomu dolu miroano amiavovu bija naio, nalo ajavukia tomu nalo na m̃a parilo jeliviv ga. Mia vonganei, burum̃ara komeli nei naio binimei bova ruei bija kanano tavoru nalo.”
REV 14:9 Ana bogo tai bereio, nailiano tolu nene naio jakisor naljuo binimei, berial medave berinavo “Tomu ve telabo anie tano ka alotu van temeul va rivija kanano tavoru, mia nalo ve telabo ajamo ka atirikar kanano toto toa mamerinialo p̃eli ea jum̃alo.
REV 14:10 Toro na jibe na, buruveru na bitunu ea bulukupil na mia sisen mokotenano ea nailiano lu nalo miralo, bija ea Nunu Solbouo mirano.
REV 14:11 Bonoti va na kanalo jogvaiano mia naio to rimaluvo dam̃ariga ea sebi nei napano maka rijikia rim̃aro bogo tai. Nalo napano amilotu ka temeul va nene, aturbanini ka kiano tavoru, vija nalo napano abar toto na siano ea niabelo, nalo maka ajikia avokar vio na jilimebiano na bo, mia atomon ga aial jogvaiano legiano bogiano dam̃ariga rivano.”
REV 14:12 Vironiano nene napano nailiano naio jo berenio naio kirisikili laka, ana mila na kito namoneano lu nalo monoka rotumolu rotu sikili vija kiado jidomiano na tebievi, a monoka romonea tuboiano nalo na Atua kanano, a monoka rotu rove riano van Yesu bogo nonovio.
REV 14:13 Ana kiniou nomijog iliano tai juvan vio mave, berinavo “Ninei be iliano tai ka jau kovivitauia bulagio. Naio ber, tikar vonganei rivano, nalo na mia am̃arm̃aro, napano kialo meuliano naio jo bo ea Tubo jum̃ano ruei, mia nalo avar ilivuiano ve toru.” Iliano nei bisi, ana nomijog Niununo mijamo kanio, berinavo “Nao, nalo na mia kialo im̃auano novo nalo amei mave vijalo, a vonganei, mia aim̃au re bunu, mia nalo aje kialo jilimebiano na bo.”
REV 14:14 Ana nemial bereio, ana melijo na miuvu tai naio jukamu ka kiniou, ana nemileal toro tai, jibe ka Kulorinio Kenerinio, naio jom̃a jotano mave ea melijo nene. Naio jotano jo bija parinio tubo kanano batubatu tai ea parinio, napano amim̃auka ea niogo, a ea jum̃ano naio midukar tap̃ig iobogu tai napano mali laka ka te bulag jirati m̃arati sinaniano.
REV 14:15 Ana nailiano dolu tai naio miyotuba ea yimo lu, naio bio ban naio napano jotano mave ea melijo nei, berinavo “Mo, jau kotumolu, kodu kanamo iobogu, kava ketikar im̃auano. Sinaniano nalo napano aju yetemeriba nei ameruo ruei, vonganei naruei be bogo na kova kete bijiilo.”
REV 14:16 Mia naio napano jotano mave ea melijo naio jumolu, buku kiano iobogu janea vio yetemeriba, naio je sinaniano nalo napano amermeruo aju.
REV 14:17 Ana nailiano tai bereio miyotuba ea yimo lu na mave ea tiniabene, napano naio bunu midu tap̃ig iobogu tai, napano mali bo bunu.
REV 14:18 Ana nailiano tai bunu binimei bereio, nina be naio na m̃a bitikar bulukuti sebi, naruei naio jel ea boda binimei bio ban dolu neibano naio midukar iobogu neibano, naio berinavo “Mo, jau bunu, be bogo na kava kala kanamo naruei. Jau kodu kanamo iobogu kava keselivivi ea tilikrevi selivivi ea yetemeriba, ketebijii m̃arati nalo napano ameruo ruei ajaklele aju.”
REV 14:19 Naruei nailiano nei mijogio, juvan kiano iobogu ban yetemeriba, ba miobijii m̃arati krevi na yetemeriba, naio bukulo ea vio na abup̃i bulag vati nalo napano aju tavio ka komeli.
REV 14:20 Mia Atua kiano siniabu mila niegeniegelo, budig vatitiglo banbano m̃a burukija miyotuba, miou miou binimei toru jibe ueimia, naio mison buruvenuo nonovio, bululuo bokar kulorinio burujono, banbano-o jibe na mia miralo bulati.
REV 15:1 Kiniou nojo nebitivitii vite nalo na mave ea tiniabene kia ga vo, mia maka vesiou nemial burum̃ara kijokijo dolu tai napano naio be vite na iloiano laka. Nina be nailiano aluo, napano abar bogo va aluo nalo nei napano na maariano. Nalo abe na maariano jibe na bior ver napano avar laka ruei, naina naruei mia rila Atua kiano burum̃ara siniabu ribisi ea vio nonovio.
REV 15:2 Ana nemial burum̃ara vodobi tai, banbano jibe ka tei, mia nina naio sebi joaio, a naio merera javukia mermerobi. Ana ea tivelinio na vio nene, nemial tomu nalo miroano ajumolu aju, a nalo nei, nina tomu nalo aviniu napano ajodovulu toro deden, ajovulu kanano moroano, ajovulu sikiliano na mirano na toto napano joaio, napano toro nene midu jibe ka kiano sio maraiu tai. Tomu nalo na ajovulio, ajumolu aju bija kialo p̃ii m̃arauo nalo napano Atua bar banlo,
REV 15:3 mia nalo ajum̃a ajerei kanio, amijev kialo iouano tai, nina be iouano na toro na mim̃au Atua kanano Naverialiano Mosis, mia vonganei naio binimei napano abio aber iouano na Nunu Solbouo. Iouano nei naio jel jibe nei berinavo “Aire Teta Atua na moroano, kanamo im̃auano nalo abe tomormoruo laka, a bo laka. Jau kobe parinio tubo ka bogo nonovio, kanamo bajago nalo amemedu a abe riano.
REV 15:4 Jau kobe tubo, maka ve toro tai napano rijikia rimerou re kaso, maka toro tai napano rijikia rivatove re ka siamo. Jau takurano ga kobe lu riano, mia taara na tomu nalo monoka amei anie tano alotu vanso, bior vonganei, vite na memedu nalo napano komilalo, nalo amoluo abinimei meravo bo ea tomu nalo na yetemeriba miralo.”
REV 15:5 Karina, nejirarago ba joomo bereio ea vio mave, ana nemial ka abetavea m̃aratavo nalo na yimo lu. Nemial jibe ka tabobo panpano napano beamu amidu lilian ea vio yauo, napano abar batitig Atua kiano tuboiano juaio.
REV 15:6 Abetavea kario, ana nailiano aluo nalo amiyotuba denio. Nalo amiya kulum̃arauo na teremi nei napano ameravo bo, amerera, ajelan kialo kulubue napano amim̃au kalo ea niogo kario ea baerelo. Ana amiel abinimei, bija bogo va aluo nei napano ajum̃a abario.
REV 15:7 Abinimei ajumolu aju ana temeul veri nei tai naio jian basidobidobi niogo aluo banlo, tai midu takurano, tai midu takurano, abujovujo ka siniabu na Atua kanano nei napano naio jo jobo jo.
REV 15:8 Nalo abario bisi, ana bior napano burum̃ara miamoiano na Atua kanano moroano joa yimo lu nei, vio na sebi binimei bujo laka, mila napano maka toro rijikia riva joomo eaio. Naruei jo jibe na ga banbano bokar napano bogo va aluo na nailiano aluo nalo nei kanalo abiniuviniu kokoio.
REV 16:1 Ana nomijog iliano na jikili tai miyotuba ea vio mave ba ban nailiano aluo nalo nei, berinavo “Vonganei, be bogo na kamiu kuvim̃auka kenemiu naruei. Kamiu kuviyon bulag veve terakurano basidobidobi nalo na kenemiu Atua kanano siniabu rivan ea yetemeriba.”
REV 16:2 Naio berenio bisi, ana nailiano na be moti naio ba miyon bulag kiano basidobidobi ban ea borotano, mia sano uei nene mieraro ba mila menko va nalo amiyoyotuba ea tomu nalo napano toto na temeul va joa niabelo, napano m̃a amilotu ka kanano tavoru, mila na amijog napano niabelo mijalele m̃elea.
REV 16:3 Bisi na nailiano juo nene naio miyon bulag kanano basidobidobi ban ea tei, ana sano uei nene miou ba mila tei binimei be burukija jibe ka toro na m̃aro kanano, ana temeul nalo napano ajuaio am̃arm̃aro nonovio.
REV 16:4 Karina nailiano tolu nene naio miyon bulag kanano basidobidobi ban ea uei napano mieraro bija burupati uei nalo, ana sano uei nene naio miou ba mila nalo bunu abinimei abe burukija garuei.
REV 16:5 Naruei nomijog iliano tai binimei den nailiano napano naio jo be boru ka uei nalo na yetemeriba, berinavo “Jau napano beamu kojo, mia jau koto banei, jau kobe nana be lu, kanamo vironiano nalo nei ajikili m̃ele, mia kanamo tibureiano naio memedu ga.
REV 16:6 Be riano ka tomu nalo na yetemeriba, amuebinvin kanamo kulo lu nalo, amila burukija na kanamo naverialiano nalo amiou, ana jau kojom̃a komila meran banlo memedu ga, napano m̃alo uei nalo abe burukija ga.”
REV 16:7 Ana iliano dolu tai bunu miyotuba ea boda, berinavo “Atua Sop̃i Na Mave, be riano laka, kanamo tibureiano nalo amemedu, abe riano laka.”
REV 16:8 Bisi na, nailiano veri nene naio miyon bulag kiano basidobidobi ban ea m̃erenio, ana sano uei nene mila m̃erenio binimei jikili lie vo, naio mijikia tunu tomu nalo na yetemeriba niabelo tibe ka sebi.
REV 16:9 Ana mia ajog vio rivitunu mia rivitunu, ana mia m̃erenio tunulo rivan rivano-o mia atu aiolua niegeniege Atua siano. Amijikia ka naio jom̃a juvan vironiano nalo nei binimei, amijikia ka naio mijikia verbure ver naio sidom, mia maka lele asidom aviliglo kanio, aber nalo maka ajikia avatove ka naio p̃eli ailivu ka siano bogo tai.
REV 16:10 Bisi na, nailiano jumo nene naio miyon bulag kanano basidobidobi ban ea jobaro sop̃i na temeul va nei, ana sano uei nene naio mieraro ban ea tanobuku reraio ea kanano navenatuboiano, mila vio bobogio laka. Tomu nalo amijog bova ka vironiano nalo nei, nalo ajer minalo banbano,
REV 16:11 mia amiolua niegeniege Atua na mave bior niabele bivitunu bija kialo menko lu nalo, na ajum̃a amilakokoa ga, bior maka asidom ka aviliglo ea kanalo bajago moruo nalo.
REV 16:12 Bisi na, nailiano ari nene naio miyon bulag kanano basidobidobi ban ea burum̃ara uei napano m̃a mieraro na, siano Yuvretis, ana sano uei nene mila uei nei binimei jabo nonovio. Nina mila napano parinio tubo nalo na buruvenuo nalo ea tivelinio na m̃erenio mijivi eaio, be kialo m̃arabo ka avarkor vio amei vija kanalo tomu na mira nalo.
REV 16:13 Ana nemial niununo va tolu napano ajavukia niobi na uei, napano nalo tai miyotuba ea burum̃ara niobi niono, a nalo tai miyotuba ea niono temeul na kirivova nei, a nalo tai miyotuba ea niono naverialiano lubolubo.
REV 16:14 Nalo tolu nei, abe niununo na sim̃aro tolu napano ajum̃a amim̃auka kijokijo nalo, ajum̃a aba ajeliviv ea parinio tubo na buruvenuo nalo na yetemeriba, aburulo abinimei vio takurano ka ala batitig vite nalo rivior burum̃ara mira napano mia naio tumolu ea burum̃ara legiano na maaro napano Atua Sop̃i naio berkario ruei. Atua naio beriio legiano nei ruei ea kanano iliano tai, napano naio berinavo
REV 16:15 “Kamiu kuvitikar, mia kiniou nemei vina ga ea kamiu, mia kuviilo ka kiniou tibe ka napano ver toro na vinauano tai rimei. Toro na ver mison vatitig kiano saba nalo, ju rorea ruei ju jevijo kia vo jororea kiniou ka kumemi ve juo nuvano, mia rivu laka van naio. Ana mia nalo dolu aiilo ga, atikiti mom̃a tanea vio, avar burum̃ara imouiano ka bogo nene.”
REV 16:16 Naruei nemial ka napano bogo na mira na legiano na maaro naio miyotuba, ana niununo nalo aburu burovuron parinio tubo nalo na yetemeriba nei aba vio takurano, nina ea vio na napano iliano na Ipru berii jibe nei ber Am̃aketen.
REV 16:17 Bisi na, nailiano aluo nene naio kija miyon bulag kiano basidobidobi, mia naio miyon bulagio ba janea vio vio yauo mave. Ana iliano tai miyotuba ea jobaro lu joomo ea yimo lu na mave ka bogo na, naio miaga mave berinavo “Vonganei naruei be bogo na juluvati vite nonovio ribisi.”
REV 16:18 Ana vaarakurano ga vio jikar viobijan janea vio, bija tubaalo ajum̃a ajaara, abe vioano nalo a malioano nalo. A bija nina, m̃ii mikulkulu toru, memebiju ba bova laka jibe ka napano toro maka rial kija ea tikariano na yetemeriba binimei bokar banei.
REV 16:19 Ana m̃ii mikulkulu bakup̃e borotano, mila komeli nalo na buruvenuo nalo na jeliviv ea yetemeriba ajibirbili abavatove, ana na mila napano burum̃ara komeli nei Bapilon bakuboṽe ea niati tolu. Atua jidomkar vio nene, bija kanano vovaiano nalo, ana naio mila naio mijikia memedu ka kiano bajago nalo napano naio jom̃a milaio, mila naio munu ea baja napano bujo ka m̃arjum̃elm̃elu na moroano na kanano siniabu.
REV 16:20 Ana bija m̃ii nei, uleule sesa nalo aburo janea vio aba kovio, a burusuku nalo nanua beamu ajumolu aju, maka bunu aial lo.
REV 16:21 Kurukuti yuo aes nalo na mave ea vio yauo ajibirbil ajavukia puruveru na tortoru, ajuba vinvin tomu nalo napano m̃a ajua yetemeriba nei. Amijog bova toru biorio, amial ka napano jaleleano nei naio jikili laka, banbano ajum̃a abuku iliniegeniegeiano ban Atua.
REV 17:1 Ana ka bogo na nailiano tai binimei, nina be nailiano aluo tai napano aju abar basidobidobi aluo. Binimei kuku ka kiniou, berial berinavo “Jau katakisor kiniou. Mia nesiloglogso ka burum̃ara komeli va nei Bapilon, napano naio joa vio nei napano burum̃ara uei nalo napano m̃a amieraro ajuaio. Komeli nei naio jom̃a mim̃au bova, naio javukia tira na m̃arabo ga. Naio javukia napano parinio tubo nalo na buruvenuo dolu nalo ajum̃a aba amila siakaiano bija naio, a jibe ka napano m̃ano m̃arjum̃elm̃elu bilig tomu nalo na yetemeriba aba amiavovu tanea garuei. Mia jau komei, ka mia nalaso keial venia napano mia rimaluvo kanio ea bogo napano mia rivar kiano vironiano rimemedu.”
REV 17:3 Mo nailiano nene naio binimei midular niunuku, midu kiniou nojoa vio yauo tai. Ana nemial tira tai naio jotano mave ea buruolu deden tai. Temeul nei naio bilvili mia bilvili reraio, naio be parinio aluo a pasimeduo nene nalo bokar duelimo, a niabeno reraio abivitauia sio va nalo ka ail niegeniege Atua.
REV 17:4 Ana tira nene, naio miovovu bo laka, ea kulum̃arauo nalo na be si a abilvili, mia naio jelan ea niabene nonovio ka yomu, a p̃ejelinio na tiliniene, a niogo nalo, a vermiromu nalo na be burum̃ara veru nene, a basabebe nalo. Naio midukar baja niogo tai ka jum̃ano, mia baja nei naio bujo ga ka kanano niamiamo nalo bija kanano siakaiano nalo.
REV 17:5 Karina abivitauia iliano tai joa mameriniano, naio be ililuklukuano tai. Iliano nei naio javukia sio tai, napano ber jibe nei, berinavo “Bapilon napano burutomoruo, be kenieno tira nalo na m̃arabo, be burupati bajago na niamiamo na yetemeriba.”
REV 17:6 Nojom̃a nebitii tira nene, nebitilubar ka napano parinio jeliviv, a maka rivior ka napano naio munu m̃arjum̃elm̃elu, mia bior naio jom̃a munu burukija na moneano lu nalo, nina nalo napano m̃a amuebinvinlo bior ka na m̃a ajakisor Yesu. Nemial tira nei jibe na, nomijog niabeku p̃ili mia!
REV 17:7 Ana nailiano naio mil ban kiniou, berinavo “Ei, venia na milaso komiilo m̃ele jibe na? Jau koto vo, mia kiniou never bisivisii batitigio navo. Tira na, bija buruolu na naio jotano eaio, napano parinio aluo nalo a sano pasimeduo duelimo, vite nalo nei nioti nene nalo aju, a mia nalaso kovitilubarlo.
REV 17:8 “Buruolu na komialio, naio jo beamu, mia maka bunu to vonganei. Ana ka bogo tai napano jo binimei, mia naio riyotuba rimei mave bereio den bulukup̃ili napano joaio vonganei, mia rivan ka rim̃aro ea kanano vironiano. Ana ea bogo na, tomu nalo na yetemeriba napano aju keano vo, mia aial buruolu nene. Nina be nalo napano jikar ea tikariano na yetemeriba, sialo maka to joomo ea niosi na meuliano. Mia bogo na aial naio, mia aiilo ve toru, bior amijikia ka naio jo beamu nua, karina maka bunu to bogo kirisiou laka, karina, naio miyotuba bereio.
REV 17:9 Ana toro napano be masou bo, mia naio mijikia rivitilubar rivu nioti na vite nalo napano mia neverenio. “Moti nene, naio be sano parinio aluo. Nioti nene, naio ber komeli tai napano tira nei naio jo be tubo eaio, napano be sano suku aluo ajuaio. A suku nalo nei, naio be sano nioti nene nalo bunu, berinavo be parinio tubo aluo na tortoru aju.
REV 17:10 Bokar banei, parinio tubo jimo nene nalo abisi ruei, a be tai na naio jumolu ju vonganei. Tai bereio napano maka riyotuba vo naio jo keano, a bogo na rimei, mia monoka naio to vesiou kija vo.
REV 17:11 “Buruolu nei bunu napano beamu naio jo mia vonganei naio maka bunu to, beamu naio bunu be parinio tubo aluo nei tai. Naio be nalo tai ruei, mia naio rimei bereio tibe parinio tubo arolu nene. Naio be toro na toru jibe na, mia bekurano, bior mia iorou naio bunu mia ribisi, naio riva rivar kanano vironiano na jikili.
REV 17:12 “Vite dolu ka aver bisivisiio, nina be pasimeduo duelimo nene. Sano nioti nene nalo, naio be parinio tubo duelimo bereio. Nalo na maka atumolu vo ka ave tubo ea kanalo tanobuku veve terakurano, mia nalo ala kanalo im̃auano ea bogo napano mia buruolu neibano tumolu. Mia ave tubo ea yetemeriba vija naio, mia nina naio be bogo na kiri bulati tai, tibe aura ve takurano ga.
REV 17:13 “Nalo duelimo nei, nalo maka ajikia ala kanalo im̃auano nalo, mia nalo abe tena aim̃au buruolu nei ga kanano, ka kanalo moroano rijai naio, ka rila naio rimei ve toru lie vo.
REV 17:14 Mia nalo nonovio na amei vio takurano ka alavon ka ala mira ka Nunu Solbouo, ana mia maka ajikia atovuluio. Makanio, mia naio tovulu nalo bior napano naio ga be tubo loa ka tubo nalo, naio ga be parinio tubo loa ka parinio tubo nalo, a kanano tomu novo nalo, nina nalo napano naio biolo, naio bijauia bulaglo, a nalo abiekouo ea naio.
REV 17:15 “Vite dolu ka aver bisivisiio, naio be uei nalo a tei nalo napano komial tira va nei naio jom̃a jotano mave ealo. Salo nioti nene nalo, naio be tomu nalo na m̃a ajua yetemeriba, bija taara nalo, a buruvenuo nalo, a iliano nalo.
REV 17:16 “Ana iorou kanio, buruolu nei bija sano pasimeduo duelimo, mia asidom re bunu tira va nei. Mia atumolu ala naio rimei vova laka, napano mia aya bulag m̃ano kulum̃arauo nalo denio mia naio rivar mom̃a ea mirano tomu nalo, mia nalo asen sano sunbue na niabene rivan mia avuku sano buriu nalo rivan ea sebi sisenio.
REV 17:17 “Ea m̃arabo nei naruei na mia ala van tira nei, kito romial memedu ga ka vironiano napano Atua berialio ea kanano iliano nua, ber naio jidom ka tira nei monoka rivario. Naio ga midu joa kanalo jidomiano bija buruolu, ka ala ka naio tibe na.”
REV 17:18 Naruei nailiano nei mila nonovio kanano iliano ea bogo nei, berinavo “Nina naruei vervisivisiano na tira nei, napano naio be burum̃ara bulukomeli napano be tubo ka parinio tubo dolu nalo na yetemeriba.”
REV 18:1 Bisi na, nemial nailiano dolu tai jaluvo ea vio mave naio binimei yetano. Naio be nailiano na Atua kanano na jikili tai, binimei bija burum̃ara moroano, a kiano mereraiano midulii yetemeriba.
REV 18:2 Naio miaga m̃erera ka burum̃ara joono, berial “Burum̃ara bulukomeli Bapilon nei mijoru ruei. Vonganei, vio nene binimei be vonuo tai na sim̃aro nalo kanalo, a vio na niununo va nalo ajuluku eaio. Menu kinkin nalo na m̃a amim̃auka bajago na miagiago va, nalo bunu ajum̃a amim̃auka m̃alo niuku nalo eaio.
REV 18:3 Naio ba midu atua nalo napano maka ave riano, a naio buru tomu dolu nalo abe vovu bija naio, ajibe ka tomu nalo na m̃a pariparilo jeliviv ka uei. Jibe ka napano naio buru parinio tubo na buruvenuo dolu nalo, aba amila siakaiano bija naio, a tomu nalo napano m̃a amim̃au bior veru jeliviv ea yetemeriba, amijev veru va miroano ea m̃asautogo va na bulukomeli nei, banbano na abinimei abe sanibaiano laka.”
REV 18:4 Nailiano nei naio mil jibe na bisi, ana nomijog iliano dolu tai jaluvo ea vio mave naio binimei ber jibe nei, berinavo “Aire kiaku tomu nalo, bo ka kamiu kuvuro sop̃eli kuvitaluvo den vio nei, ver p̃eli mia kuvila bitiran kiano kariano vija naio, ver p̃eli mia kuvidu bitiran bunu kiano vironiano nalo.
REV 18:5 Kiano kariano nalo amivonlo ba bokar mave, mia Atua maka rijikia tinien ribobogia bogo va vio napano naio mila korov kiano tuboiano nalo.
REV 18:6 Bo ka asian meran jogvaiano van naio tibe ka napano m̃a naio jian ban dolu nalo, bo ka avulu meran naio rive valuo ka venia napano naio mila ruei. Uei na mijea napano naio mila tomu dolu nalo amunuio, bo ka aion rivan ea kiano baja rivujo batitig.
REV 18:7 Beamu, kanano jogvuiano ea kiano meuliano monmaio naio toru laka, mia naio sibuku rimei ve jogvaiano ea niabelejalele nalo bija tegiano nalo. Mia nina naio maka na vo, bior napano naio jom̃a mila kiano jidomiano be m̃arou laka keano, naio jo berii naio, berinavo ‘O, kiniou nebe tira parinio tubo jibe nei, nojotano batitig nojo nei. Vite nonovio binimei bo laka ban kiniou, ana mia netibe re leleio taanou tai napano maka ve kiano vite, mia maka nejikia neteg rivior jogvaiano.’
REV 18:8 Mia naio, ea legiano tai napano jo binimei, mia jaleleano nonovio ala tanea naio vaarakurano. Mia ve m̃ariano, vija tegiano, vija vituiano, a mia sebi sisen vatitig naio. Naio maka to sidomial, mia Tubo Atua napano mia naio tibure naio, kiano moroano toru laka.”
REV 18:9 Ana nailiano nei ber jibe nei, berinavo “Parinio tubo nalo na buruvenuo dolu jeliviv ea yetemeriba napano ajum̃a aba amilotu ka atua nalo na burum̃ara bulukomeli nei, mia avitilubario ka napano mijoru ruei. Nalo naruei ajibe ka napano aba amila siakaiano bijaio, aba abijurukario ea kanano meuliano na bo banbano, maka asidomial titai. “Mia bogo napano naio mijoru, sebi jo jijenio sano iou nalo bavavin, naina naruei mia ajog rivova kanio ve toru, mia ateg riviorio.
REV 18:10 Mia aial vironiano napano mia naio to rivario, mia rilalo bunu atikar ka amemebiju. Mia nalo atumolu atu koalabo denio, avitivitiio, averinavo ‘Uerei Bapilon, burum̃ara bulukomeli na moroano, kumemi tiniememi miiaso toru. Riano ga jau kojo bo bano-o, mia ka aura takurano ga nei ana jau komial kanamo jukuti, komijoru, jau kobisi mia kobisi.’ ”
REV 18:11 Mo bija nalo na, tomu nalo na yimo na ṽilṽiliano nalo jeliviv ea yetemeriba mia ateg ajog rivova, bior ka napano mia ve re bunu tomu tai ka avulu kialo saba.
REV 18:12 Beamu, amison kanalo uako nalo bija togogo na bo, jibe ka vite nalo na m̃a amim̃aukalo ea niogo p̃eli na ea verumera, bija vermiromu napano burum̃ara veru kanio, bija basabebe nalo, a kulum̃arauo mkekeano napano salo niabele nalo bo, a iesi bonotanunu, a vite nalo napano amim̃au kalo ea m̃arjuvono bue m̃arauo na eleven, p̃eli ea iesi nalo, butoto nalo, a puruveru nalo, mia vonganei, kanalo im̃auano nalo ka veru mia amei ajuba vio nonovio.
REV 18:13 Mo ea bogo na, mia tomu nalo avulu re bunu vite nalo na amim̃auka salo sinaniano, jibe ka m̃aiesi nalo, p̃eli na m̃arsili nalo, p̃eli na niago na bilulu, yevi bija kon, bija bunu vite na munuiano jibe m̃arjum̃elm̃elu. Mia tomu nalo ajikia re bunu avulu vite nalo na jibe ka m̃aatei a titikivaka na m̃arolivi, p̃eli na vite nalo na m̃a ajum̃a aburu veru ealo beamu, javukia bue m̃arauo, p̃eli na nunu, p̃eli na bue kulorinio bija kanano rukuruku nam̃a jo burio. Tealo nanua beamu ajum̃a abulvulu ka tomu nalo na m̃a amim̃au kurano ga ea boru nalo, mia maka bunu ajikia alaio, bior ka bogo napano burum̃ara bulukomeli nei naio mijoru, mia ve re bunu im̃auano tai, mia toro maka bunu rijikia rileal veru ka rivitikar kanano meuliano.
REV 18:14 Ka bogo na naruei, mia averii vio na, averinavo “Jau kojidom ka jau kovar m̃ariesi na tortoru ve telabo, mia maka rimeruo vatitig vo naio jibirbili ruei. Beamu, jau kobe sanibaiano laka, kiamo saba nonovio kirinovo laka, mia vonganei biniu bakovio nonovio, mia toro maka bunu rijikia rial tena bo tai easo bereio leleio.”
REV 18:15 A tomu na m̃a ap̃ilṽili ka vite nalo, napano m̃a aburu veru nalo telabo bior ruei, mia atu laka ga asirarago vano mia amerou ka vironiano na mia burum̃ara bulukomeli nei naio to riduio. Mia ajog rivova riviorio,
REV 18:16 mia nalo ateg ve toru, averinavo “Aiou kenememi burum̃ara bulukomeli nei, aua toru banso. Nanua jau kojom̃a komiovovu bo ka kulum̃arauo novo nalo, jau kobar yomu niogo a p̃ejelenio niogo janea niabemo, mia vonganei jau kobe deio ruei, kiamo sebi m̃aro.
REV 18:17 Jum̃abe kanamo burum̃ara sanibaiano mijikia biniu kokoa ea aura takurano ga jibe na?” A be natelanvuuiano nalo na uako nalo nanua beamu ajum̃a abarvar togogo nalo, bija kialo naim̃auano nalo, bija nalo napano aju amieliel ea uako p̃eli abar veru ea tei, nalo bunu aju koalabo ajirarago ban ea vio nene.
REV 18:18 Bogo na iou na sebi napano jom̃a miduko vio, jo bavin ea vio yauo, mia atum̃a aververii vio nene, averinavo “Riano ga, bulukomeli na be vio tai na, tai re bunu tibe naio ea yetemeriba nei.”
REV 18:19 Tinielo maio ka jibe na, mila amijog bova, abisivisii burumaroro ea pariparilo, ajegi, aberinavo “Aiou, kenememi burum̃ara bulukomeli nei, aua toru banso. Jau kobujo ka veru, mia kumemi numim̃au ea uako nalo na kenememi, nubarvar kanamo togogo nalo, banbano kumemi bunu numileal veru, mia vonganei bova ga. Ea bogo tai na bulati ga nei, mia jau komei kove vio na vakovioiano ga.”
REV 18:20 Ana bior napano burum̃ara vio va nei naio mijoru jibe na, iliano tai miyotuba mave, berinavo “Ea vio mave, burum̃ara saariano a jogvuiano. Kamiu namoneano lu nalo, a atevi nalo, a Atua kiano naverialiano nalo, kamiu kumijikia kuvilivu ka naio ve toru, bior ka napano naio jibure tira va nei ruei, jian meran ban naio bior vovaiano nalo nanua m̃a mila ban kamiu beamu.”
REV 18:21 Ana ea bogo na, nailiano tai binimei bitirilar burum̃ara puruveru tai, naio midular loa ka parinio, ana naio bukuio mijoru mue tei, madudu bakovio. Karina, nailiano nei naio ber jibe nei, berinavo “Naina naruei burum̃ara bulukomeli va nei Bapilon, mia avukular naio rivan laka tibe na, mia ala naio rijoru ka mia rijikia re tumolu bereio bogo tai.
REV 18:22 A jau Bapilon, iliano biedu banso jibe nei, ber iouano nalo na vameleviu bija p̃i m̃arauo nalo, mia toro rijog re to easo bereio, tomu nalo na aim̃auka im̃auano nalo, mia ve re tai to easo bogo tai, a malioano nalo na abiji ka sinaniano ve re bunu.
REV 18:23 Miamoiano na yulu nalo ajegli re kanamo vio nalo bereio, mia jau kojog re ilimerevuiano na m̃eaku bija tira napano naljuo ajoro vonga. Tomu na amim̃auka kanamo veru, maka dolu tai ea yetemeriba nei tavukialo, a moroano na kanamo semei nalo a kanamo sibiano nalo amilaso koburu buruvenuo dolu kialo jidomiano ba be vovu laka.”
REV 18:24 Naina naruei kito romial ka napano Bapilon nei naio be vio tai napano be burupati vovaiano toru mugaruei. A naverialiano kei, vede namoneano lu p̃eli toro dolu napano amuebinvinlo bior nalo abe Atua kanano, mia salo burukija miou ea borotano na bulukomeli nei naruei, naina naruei mila napano Atua kiano tibureiano a kiano vironiano mijoru ea naio jikili laka tanea.
REV 19:1 Iorou ka nina, nomijog ka napano tiniobi toru ea vio mave abio toru, aberinavo “Siva ban kanado Atua! Ioruriano, mermerano a moroano abe kanano naio takurano ga.
REV 19:2 Kiano tibureiano biniu abe riano a amemedu laka. Burum̃ara kenieno tira va na tire nalo na m̃arabo nei, kiano siakiano nalo amila yetemeriba binimei miagiago laka, ana vonganei Atua jibure naio biorio ruei. Naio jian burum̃ara vironiano tai banio bior burukija na kanano tomu na im̃auano nalo napano mieraro.”
REV 19:3 Ajum̃a abio jibe nei, ana ajusol lo bereio, aberinavo “Siva ban Atua! Sebi jom̃a jijen soro nalo nene ruei, mia iou nene naio rivavin rijikia bisi re.”
REV 19:4 Mia navagadeano duelimo valuo ba veri [24] bija temeul veri nalo anie yetano kamu ka Atua mirano, napano naio jom̃a jotano mave ea kanano jobaro lu, naruei amilotu kanio. Amiaga, aberinavo “Bo laka! A siva toru banio!”
REV 19:5 A iliano tai miyotuba ea jobaro lu bunu, napano naio ber jibe nei, berinavo “Kamiu tomu na Atua kanano im̃auano, kamiu tomu na tortoru nalo a tomu nalo reraio, kamiu nonovio napano kubatove ka naio, vonganei bogo memedu ka kuvilivu ka siano.”
REV 19:6 Naruei nomijog bereio tiniobi toru neibano, kanalo niagaiano mila malioano jibe tei mom̃avu, jibe tubaalo. Nalo aber “Siva ban naio! Kiado Tubo Atua Sop̃i naio jovulu vite nonovio ruei!
REV 19:7 Kito reiaia ea naio, reijalar siano, rasaaro kanio. Vonganei be bogo novo na rala jokoluolu na soriano na nunu solbouo naruei. Koano naio miyovovua naio batitigio jo ruei,
REV 19:8 amija vatitig naio ka kulum̃arauo vou nalo na bo, amiuvu akirinovo nalo.” Ana kulum̃arauo novo na mivu nei napano nunu solbouo koano naio miyaio, naio be sano nioti nene jo, naio berenio im̃auano novo nalo napano namoneano lu nalo na Atua kanano amila ruei.
REV 19:9 Ana nailiano napano ju bija kiniou ea bogo na mil ban kiniou, berinavo “Mia kiniou never iliano tai vanso kovivitauia kar toa kanamo niosi na. Iliano nene jibe nei, ber toro napano mia avio ka naio tusol lo ka sinaniano na jokoluolu na soriano na nunu solbouo, mia naio rijog rivu mia rivu laka.” Ana naio jusol iliano nei bereio, berinavo “Naina naruei be Atua kanano ilirianiano napano be riano laka.”
REV 19:10 Mia nomijog naio mil jibe na ban kiniou, neminie tano kanio, nojidom nolotu vanio, mia naio berbureio. Naio berinavo “To, jau kala re tibe na van kiniou! Jau monoka kolotu van Atua naio ve takurano ga. Kiniou nebe toro na kanano im̃auano ga, nejibeso ga, nejibe bunu kuruamo dolu nalo napano m̃a aju jikili ea Yesu kanano ilirianiano. A bo laka ka napano kamiu kumitum̃a kumila jibe na, bior ka napano burupati nioti na visip̃eiano nonovio na be riano napano aberial beamu binimei, naio be Yesu ga na, bija kanano ilirianiano napano kamiu kumitum̃a kubokar jikili.”
REV 19:11 Mia ka bogo na vio mave betavo ban kiniou, nejiraravo ba joomo, nemial bue kulorinio na mivu naio jumolu ju, a toro kouo tai jotano mave eaio. Naio naruei napano mila mira die vovaiano, ana bogo napano mila kiano tibureiano, naio mim̃au memedu ga. Toro nene, abio siano ka Parinio Tubo Viekouoiano na Riano,
REV 19:12 ana naio siano be dolu tai bunu abivitauia joaio napano maka ve toro tai rijikia sano nioti, naio ga takurano mijikia. Mirano naio merera jibe ka sebi napano m̃a bilvili, a ea parinio naio miya batubatu na parinio tubo.
REV 19:13 Naio miya bunu kanano kulukoti tebievi napano ajekon ka burukija ka rila ve kalkal eaio, a siano dolu tai bereio, abio ka naio jibe nei, aber Atua kanano Iliano Lu.
REV 19:14 Ana ea bogo na, taara nalo na tomu na mira na mave, a miyovovua ka kulum̃arauo na miuvuruvu nalo bo, a abar kialo bue kulorinio nalo na amiuvuruvu, aba tavio ajakisor kialo navurim̃araboiano nei abano.
REV 19:15 Naio burulo abano, kiano iliano jo moluo ea niono javukia iobogu na mira tai na mal ea ikiti be juo, ka napano mia tekitkiti venuo nalo na yetemeriba ajoru. Iorou ka napano naio jovululo, mia naio tumolu ve tubo kalo, a kiano nia napano naio midukar ka jum̃ano, naio be butoto na temi tai. Vironiano na jikili be venia napano Atua Sop̃i kiano siniabu naio midu jo ka mia tomu nalo avario, mia toro na toru nei naruei naio mia rivar riyotuba.
REV 19:16 A naio be siano dolu tai kia ga vo, napano abivitauia joa kiano kulukoti a jaano, be “Parinio tubo na parinio tubo nalo, Toro na toru na tomu na tortoru nalo.”
REV 19:17 Bisi na, nemial nailiano tai naio jumolu ju napano m̃erenio mijegliio, naio bio ka menu nalo napano m̃a aju amier reraio mave. Naio biolo, berinavo “Oi, kamiu kuviniu kumei vio takurano ea Atua kanano burum̃ara jokoluolu nei.
REV 19:18 Kamiu menu nalo na m̃a kumisen sunbue, mia aim̃auka semiu sinaniano tai rive verare ka kamiu vesiou re, napano naio be tasim̃aro nalo na Atua kanano uolu nalo. Parinio tubo nalo, tomu na tortoru na mira, tomu na p̃irilo jikili, bue kulorinio na mira nalo bija nalo napano ajum̃a abarlo, bija tomu nalo dedade napano abe tomu na tortoru p̃eli abe tomu na tertelisu na im̃auano ga, nalo na abiniu ajumolu ka ala mira ka Atua, ana naio jovululo milalo am̃arm̃aro janea vio.”
REV 19:19 Ana nemial temeul va nei, bija parinio tubo nalo na yetemeriba, bija kanalo taara na mira, nalo abinimei amidu buronlo vio takurano. Amila batitiglo ka ala mira ka naio napano midu bue kulorinio na miuvu nei bija kanano tomu na mira nalo.
REV 19:20 Ana aberinavo ala mira naruei, ana tomu na bova nalo nei amiilo ka napano nalo na Atua kanano ajumolu vaarakurano aba abokar kilkil ea navurim̃araboiano juo na kanalo, naina be temeul va na bija naverialiano lubolubo napano naio be toro na miija naio ka semei a vite na iloiano nalo. Beamu, naio jom̃a mim̃auka vite nalo nei, mila sibilili tanea tomu nalo napano naio buru kialo jidomiano ba amijamo ana amue toto na temeul va nei joa mamerinialo, aba amilotu vovu ka kiano tavoru. Mia nalo abokar vatitig navuri-m̃araboiano juo na taara va nei, ana abukulo abe juo aban ea bulukuti sebi napano naio jom̃a jumu.
REV 19:21 A dolu nalo na kanalo, maka ala mira vo amiilo ka napano iobogu na mira tai miyotuba ea naio napano midu bue kulorinio niono, mia iobogu nene ban jibe nei ban jibe na je kitkitilo am̃arm̃aro janea vio. Mo jakii venia napano nemialio, menu nalo na m̃a ajen sunbue abinimei amijede boṽe salo tasim̃aro nalo nei, ajenlo banbano mabolo jouo.
REV 20:1 Ana kiniou nemial nailiano tai jaluvo den vio mave binimei yetano, naio midukar vulariano tai ka jum̃ano, napano vulariano nene be tena m̃aratavo na bulukup̃ili na m̃ariano napano naio batove maka ve togio nene, a bija vulariano nei, bar bunu m̃arimieni na jikili tai.
REV 20:2 Ana naio ban memedu ka burum̃ara kenieno niobi nei, napano be maro moruo nei Sim̃aro Setano, naio ba bokar batitigio jikili bo, miorikar vatitigio bo ka m̃arimieni, berkar ber mia to tibe na rivokar yuka menu ve takurano [1,000].
REV 20:3 Ana midu naio bija sano m̃arimieni bukuio ban ea burum̃ara bulukup̃ili nei napano batove bululuo laka, ana jetavoko, bukar naio jobo, ka toro kirivova nei naio rijikia re bunu rijukujuku tomu nalo na buruvenuo nalo, riva rivokar napano mia yuka menu takurano nei naio ribisi. Ana kanano moroano maka rijikia riviniu nonovio vo, bior mia iorou, ea bogo tai na ve kiri bulati ga, mia mijikia riyotuba ka rila parinio ve vaarakurano bereio.
REV 20:4 Ana nemial vio lu nalo, bija nalo napano m̃a ajutano mave ealo, nalo na napano abijauia bulaglo ruei ka amijikia atibure tomu nalo. A bija nalo nene, nemial niununo nalo na tomu nalo vio bujo aju, nina nalo nanua beamu ajum̃a amioliolu ka Yesu bija iliano lu na Atua kanano, mia aje kokorov burujolo biorio. Nalo na maka alotu ka temeul va nei, maka anie tano ka kiano boda, a maka avar kanano toto ea mamerinialo p̃eli na ea jum̃alo, mia Atua naio jaaro kalo, milalo ameul bereio ka amijikia atumolu atu vija Kristo ka aje tuboiano ea vio nonovio riva vokar jukuti na yuka menu takurano nei.
REV 20:5 Nina napano ameul bereio jibe na, naio be bogo moti na tomu nalo ameul bereio den nam̃ariano, mia nalo nei ga abokario. Nalo dolu napano am̃aro aju kia vo ea bogo nene, nalo amijev kanalo meuliano bereio ea valuo nene, nina bogo napano yuka menu takurano biniu.
REV 20:6 Atua kiano ilivuiano na bo toalo napano ameul moti bereio den nam̃ariano, napano kanalo meuliano be lu vatitig bo. M̃ariano juo nene maka rijikia tokol lo leleio, mia nalo aim̃au tibe ka Atua kanano kulo lu nalo, ave tomu lu na Kristo kanano, mia naio rivitiri bulaglo ka aje tuboiano ea vio nalo vija naio ea yuka menu takurano nei.
REV 20:7 Ana bogo napano yuka menu takurano nei bisi, mia Sim̃aro naio mijikia moluo bereio ea nalakoiano nanua naio juaio.
REV 20:8 Ka bogo nene, mia naio rivan tanea vio nonovio ea buruvenuo nalo na yetemeriba ka rila sibilili tomu nalo bereio, a mia rivuru buron taara juo na tortoru nei amei vio takurano, nina be tomu na Koko bija tomu na M̃akoko, ka amei vio takurano bereio ka ala mira ka tomu nalo na Atua kanano. Mia bogo na taara juo nei abinimei vio takurano, nalo vio bujo mia vio bujo, jibe ka kurukuti yono na bayono.
REV 20:9 Nalo ajibijilo jibe ka tomu na mira nalo, abulan jaalo abarkor yetemeriba abinimei aboru Yerusalemo, vio nei napano Atua jaaro toru kanio, napano naio be vio na m̃a kanano tomu nalo ajujuaio mugaruei. Mia nalo ajeliviviko batitig bo burum̃ara komeli nei, aberinavo ajidom atikar mira naruei. Mia vaarakurano ga, amiilo ka napano be burum̃ara kenieno sebi tai jaluvo den tiniabene binimei karlo, naio jijenlo banbano abiniuviniu.
REV 20:10 Mo Sim̃aro, naio napano m̃a mila sibilililo beamu ruei, abuku naio ban ea burum̃ara bulukuti sebi napano jom̃a jaraburuburu, ninei sebi napano abuku temeul va nei bija naverialiano sibisibiano abe juo ajuaio ruei. Mia nalo tolu nei mia ajog jogvaiano ea vio nei legiano bogiano, rivan riva to tobo to.
REV 20:11 Naruei nemial burum̃ara vio tai natibureano na tomu nalo, napano miuvu mia miuvu, naliko burum̃ara tubo na tibure tomu nalo naio jom̃a jotano eaio. Kanano mermerano mison vatitig vio reraio, mila na yetemeriba a vio yauo ave juo aburo aba kovio.
REV 20:12 Mia nemial burum̃ara taara na tomu nalo tai, nina be nalo nanua beamu am̃arm̃aro ruei ea yetemeriba, tomu na tortoru naliko kulo dolu nalo reraio. Naruei nalo amiyotuba ea vio nei ka atumolu atu kamu ka mirano na tubo na toru na tibure tomu nalo. Nemial niosi tealo abisidea kalo aju, ana aba amidu tai bereio binimei, naina abio ka Niosi na Meuliano, mia abisidea ka naio bunu. Mia abitio amileal venia napano abivitauia joa niosi nalo nei tivelinio na maariano nalo nei, mia abeve terakurano aburu kialo vironiano jakii niosi nalo nei.
REV 20:13 Mia bija tomu na m̃ariano nalo nei, nalo napano am̃arm̃aro ajua tei, a nalo napano m̃a am̃arm̃aro aba ajua vio na jogvaiano ruei, nalo abiniu abinimei bereio ka atiburelo memedu ka kialo im̃auano.
REV 20:14 Naruei ajibure tomu na m̃ariano nei abanbano biniu, karina ajumolu abar vite juo nei m̃ariano, bija bunu vio na jogvaiano nei, naruei abuku lo abe juo aba joomo ea burum̃ara bulukuti sebi nei. Ana m̃ariano na tomu nalo amijev ea vio na, nina abio ka m̃ariano juo nene.
REV 20:15 Mia toro kei napano maka alealio siano toa Niosi na Meuliano nei, naio naruei avuku naio bunu rivatove ea burum̃ara bulukuti sebi nei.
REV 21:1 Ana iorou ka naina, nemial vio mave vou bija yetemeriba vou amiyotuba, bior vio mave moruo bija yetemeriba moruo bija sano borotano a tei nene nalo, aba kovio nonovio ruei.
REV 21:2 A nemial komeli lu novo nei, Yerusalemo vou, jaluvo ea Atua ea vio mave binimei yetano ea yetemeriba. Nemial ka napano amiyovovuo bo, jibe ka tira tai napano miyovovuo kirinovo laka binimei ka aiven riva rivan koano sum̃ano ka soro kanio.
REV 21:3 Mo ka bogo na kiniou nomijog iliano na bo tai juvan vio mave, berial jibe nei, berinavo “Vonganei, Atua jidom to vija tomu nalo na yetemeriba, jidom rila kanano vonuo toalo. Mia nalo amei ave tomu nalo na kanano, bior ka napano mia naio to vijalo toboto, naio rimei ve kialo Atua riano.
REV 21:4 Jogumiralo nonovio, mia naio riolkon bulagio, mia m̃ariano p̃eli tegiano, p̃eli jaleleano, p̃eli jogvaiano atu re bunu, bior bogo moruo na beamu naio bar laka ruei bano.”
REV 21:5 Iliano nei bisi, ana toro lu na m̃a jo jotano mave naio berial, berinavo “Nao be riano laka kiana! Mia kiniou nala vite nonovio rimei ve terivou bereio!” A jusol bereio berial memedu ban kiniou, berinavo “Naina naruei mia kiniou never iliano tai vanso napano naio be riano bo, napano jau komijikia komonmoneaio rivu, mia bo jau kovivitauia kario.”
REV 21:6 Ana naio mil du kia ga, berinavo “Kiaku im̃auano nonovio, nemila nonovio biniu ruei! Kiniou nebe motoru a nebe natumaariano, kiniou natikariano a najuluvatiano. Toro na m̃a midou jerio, mia noviov m̃ano uei tai ea burupati uei na meuliano, nesian van naio rimunuio tibe na ga.
REV 21:7 Toro na m̃a biniua bogokouo ea kiano meuliano, naio tu sikili riva tovulu na vovaiano, mia naio rivokar ilivuiano nalo tibe ka kiano jajum̃ano. Mia kiniou noto neve kiano Atua riano, mia nodu naio rimei ve keneriku.
REV 21:8 Mia tomu na vovaiano nalo, nalo bunu mia avokar kialo jajum̃ano tai. Nina be tomu nalo na m̃a maka atu sikili ea kiniou, napano maka amonea, napano kialo bajago naio kirivova laka, amuebinvin tomu, abijuku bova ka tira p̃eli sum̃ano, abar semei, amilotu ka tavoru, a abe tomu na sibiano. Nalo nei naruei mia ava avokar m̃ariano juo nene, nina ea kialo vio nene rimemedu ea bulukusebi napano bonoti kirivova, a naio maka rijikia ribisi.”
REV 21:9 Iliano nei bisi, ana nailiano nalo nei nua tai kalo, nanua m̃a abar basidobidobi aluo na jogvaiano aluo na maariano na yetemeriba, naio binimei bio kiniou. Naio berinavo “Jau komei beamu vo, mia nalaso jau keial tira na soriano, nina be Nunu Solbouo koano.”
REV 21:10 Naio burular kiniou naban ea niunuku ga ana kumemi juo nuba nuboru mave ea burum̃ara burusuku tai. Numisikili numitua vio nene ana naio jiloglog burum̃ara komeli lu nei Yerusalemo ban kiniou, nemialio bereio ka napano naio jo jaluvo ea Atua mave tiniabene naio jo binimei yetano.
REV 21:11 Naio jo batove jibe na, naio jo bujo ka Atua kanano mermerano, mila naio merera laka, javukia mermerobi napano mkekeano meravo bo laka.
REV 21:12 Mia kanano tagvoru jumolu jeliviv eaio, bavin laka, a m̃aratavo na tortoru duelimo ba juo [12] juaio, napano abe terakurano be kialo nailiano aju abitikar vatitiglo. A m̃aratavo nalo nene be terakurano be sio jualo, napano be siano yati duelimo ba juo na Israel,
REV 21:13 napano m̃aratavo tolu ju ba tivelinio not, tolu ba tivelinio saut, tolu ba tivelinio wes, tolu ba tivelinio is.
REV 21:14 A burum̃ara tagvoru nei jumolu ju ea burum̃ara m̃artea duelimo ba juo na kanano, be sialo abivitauialo beve terakurano, napano sio nalo nei abe atevi duelimo ba juo [12] na Nunu Solbouo.
REV 21:15 Naruei nailiano napano naio jom̃a jukunu bija kiniou nei, midu burutili toto tai tena niogo ea jum̃ano, ka riva rijeteli ea komeli nene naio toru jum̃abe, vija tagvoru nene, a sano m̃aratavo nene nalo.
REV 21:16 Burusio na komeli nei, tivelinio veri nene terebievi abe verare ga, ana nailiano naio ba mijeteli ealo, jovulu sadu taam̃aka juo, p̃eli kilometa menu juo [2,000]. A mijeteli ea jikar yetano bavin bokar jumoti levlevi, naio be verare ga bereio ka tivelinio ver nene.
REV 21:17 Naruei naio ba mial tagvoru, naio mijeteli ea meroroliano nene, naio buluku batitig meta nene nalo, jovulu tiijaano duelimo va ari [60] garuei.
REV 21:18 A tagvoru nene nalo, maka alailo ka puruveru p̃ilip̃ili ga nalo, mia amim̃au kalo ka puruveru tai napano naio mkekeano na bo laka, a komeli, torogio nonovio nene nalo amim̃au kalo ka niogo ga, meravo nono bo laka, naio mieg bo mia bo laka.
REV 21:19 A m̃artea tortoru nalo na tagvoru, nalo bunu amiyovovua vatitiglo bija puruveru novo nalo, napano tai amiyovovua nonovio ka puruveru tai napano mkekeano nene jibe nei, tai amiyovovua nonovio ka puruveru tai napano mkekeano nene jibe nei, banbano mila nonovio m̃artea duelimo ba juo nene. A puruveru duelimo ba juo nei sialo, ajibe nei. Na jukamu, siano saspa, juo nene naio sapaia, tolu nene naio kalseton, veri nene naio be emrol,
REV 21:20 jimo nene naio be satonik, ari nene naio be kaneleon, aluo nene naio be krisolaet, arolu nene naio be berol, koveri nene naio be topas, duelimo nene naio be krisopres, duelimo ba tai nene naio be sasin, a na maariano be duelimo ba juo naio be ametis.
REV 21:21 A m̃aratavo nalo, mia abeve terakurano abe burutomoruo basabebe takurano ga. A nemial burum̃ara m̃arabo na komeli nene bunu, napano naio abijuru ka niogo nonovio, naio kirinovo mia kirinovo tanea.
REV 21:22 Mia vite tai napano nomiilo kanio, be tinieku ka mia neial burum̃ara yimo lu tai to iviso ea bulukomeli lu nei, mia nebitiio mia maka neleal tai. Vio nei maka ve yimo na jibe na, bior Atua Sop̃i na moroano, bija Nunu Solbouo, tomu nalo amilotu kalo ea vio nonovio dam̃ariga.
REV 21:23 A nemileal ka napano komeli nei maka ve m̃erenio a siberio amerera eaio, bior napano Nunu Solbouo naio jibe sano yulu nene, Atua kiano miamoiano mila vio nonovio be burum̃ara mereraiano jo dam̃ariga.
REV 21:24 Buruvenuo dolu nalo mia aiel ea burum̃ara mereraiano nei napano miyotuba denio, a vite nonovio venia napano tubo nalo na tortoru na buruvenuo dolu nalo amijevio, mia avarlo rimei asian riva Yerusalemo vou nei, tibe ka kialo jidomiano tai.
REV 21:25 Vio nei mia ve re melijokouo rimei eaio bogo tai, mila na sano m̃aratavo na tortoru nalo amijikia atum̃a avetavo dam̃ariga,
REV 21:26 a miamoiano a vite novo nalo na buruvenuo dolu mia atu amei joomo eaio dam̃ariga.
REV 21:27 Mia tivelinio ka vite nalo napano maka ameravo rivu laka, mia ve re tai rijikia riva jouro ea vio nei bogo tai, mia toro kei napano naio mila im̃auano tai napano be tena imouiano p̃eli be tena sibiano, mia naio bunu rijikia re riva jouro eaio. Nalo na ka ava jouro, nalo na ga napano sialo, Nunu Solbouo bivitauia ruei ju joomo ea kanano niosi na meuliano ruei.
REV 22:1 Karina, nailiano jiloglog parinio uei na meuliano ka kiniou. Nemial napano be uei novo nene, naio meravo mia meravo, naio jo mieraro miyotuba jikar ea vio lu na Atua napano Nunu Solbouo juaio.
REV 22:2 Uei nene naio mieraro bano, yano nene mieraro memedu jel iviso bure burum̃ara m̃arabo na komeli na Yerusalemo vou. Uei na meuliano nei naio mieraro jibe nei bano, a be burupati iesi na meuliano nalo na ajumolu aju tivelinio be juo na uei neibano. Buruiesi nalo nene abo laka, bior napano aju ajako ea siberio nonovio ga, duelimo ba juo [12] ka yuka takurano. A m̃ati nalo bunu, abo laka, bior amijikia aieliel batig ka mieiano nalo na tomu nalo na buruvenuo na yetemeriba nei.
REV 22:3 Tibe na, mia Sim̃aro kanano bajago va nalo, napano jidom rila bulag vurua vite nonovio, mia nalo atua re komeli nei leleio. Nunu Solbouo joa Atua kiano vio lu ea vio nene, a vio bujo ka kanano tomu nalo na m̃a kanalo im̃auano, aju amilotu ka naio dam̃ariga.
REV 22:4 Nalo aju vaataro kanio, a ajirikakar siano jua mamerinialo.
REV 22:5 Ea vio na, melijokouo re, viorijen rivu bogo nonovio, mia maka ve yulu na yulu tai p̃eli yulu na m̃erenio. Makanio, mia Tubo Atua ga naio be burupati na yulu, napano midulii vio na, mia naio buru kiano tomu nalo nene, naio bitiri bulaglo abe tubo na tortoru ka aje tuboiano ka vite nonovio nalo.
REV 22:6 Ana nailiano nei naio mil ban kiniou, berinavo “Vite nalo na m̃a komial lo p̃eli komijoglo, amemedu laka, mia iorou amei ave riano nonovio. Burum̃ara kiado Tubo, naina be Atua nanua m̃a naverialiano na beamu amim̃au ea moroano na Niununo, naio miila kumemi kanano nailiano nalo numiyotuba kaso ka nuvisi vite nalo nei vanso. Naio mila jibe na bior napano naio jidom ka kanano tomu nalo monoka ajikia vite nalo napano mia ayotuba vesiou re.”
REV 22:7 Mia Yesu kiano iliano ea vio nei ban kiano tomu nalo, naio jel jibe nei, berinavo “Kamiu kuvitikar! Mia vesiou re, mia kiniou nemei noyotuba ka kamiu bereio. Toro napano bokar vatitig iliano na visip̃eiano nalo na kanaku niosi nei, mia rivu laka van naio, mia naio mijikia rijog rivu ve toru.”
REV 22:8 Kiniou na m̃a nemial vite nalo nei, nomijog iliano nalo nei, kiniou tormoruo Jone. A bogo napano nemial nonovio bisi, nomijorua tano neminie kamu ka nailiano nei jaano napano naio bisip̃e vite nalo nei ban kiniou ruei, nomijog jibe nojidom nolotu kanio.
REV 22:9 Mia naio berbureio, berinavo “To, jau kala re tibe na. Kiniou bunu nebe Atua kanano toro na im̃auano tai ga, jibe ka jau kamliko kuruamo nalo naverialiano nalo re nua, bija bunu kulo dolu nalo napano abokar jikili bo iliano nalo na niosi lu nei. Bo ka kito rolotu ka kiado Atua naio ve takurano ga.”
REV 22:10 A naio ber iliano dolu tai bunu ban kiniou, berinavo “Jau kodu van re visip̃eiano nalo na niosi nei. Be bogo binimei vaataro, naruei bo ka tomu nalo ajikia venia na m̃a ajum̃a aberenio.
REV 22:11 Toro napano maka sidom riagago, mia naio rila kiano bajago va riva rivavin lie vo, mia kanano kariano na miagiago ava ve burutomoruo laka. Mia toro na m̃a mije tilinieno, mia kanano im̃auano na memedu nalo amei avu laka, mia kanano bajago novo nalo amei ave lu laka.”
REV 22:12 Ana Yesu kanano iliano ea vio na, naio jibe nei, ber “Kamiu kuvitikar! Kiniou nojo ka namaluvo kean kamiu vesiou lele re. Kiniou nemei vija kanaku jidomiano novo nalo, napano mia nesian van tomu nalo takii im̃auano nalo napano amila be kiaku.
REV 22:13 Kiniou nebe motoru a nebe bajulkuti, kiniou nojukamu a nojo iorou, kiniou nebe natikariano bija namaroano.
REV 22:14 “Vesiou re ga, mia burum̃ara ilivuiano riyotuba ka kanaku tomu nalo rimemedu. Nalo ajekon vatitig kanalo kulum̃arauo nalo, amiya vatitiglo ruei, naruei amijikia ava joomo ea m̃aratavo ka ava jouro ea komeli lu na Atua kanano, amijikia ava avokar buruiesi na meuliano.
REV 22:15 Mia kulo dolu nalo miroano maka ajikia amei jouro. Nina nalo napano ajum̃a amiel janea ga vio jibe ka kuli nalo, bija nalo napano m̃a abar semei, nalo napano m̃a amila siakiano a siakaiano, nalo napano m̃a amuebinvin kulorinio, nalo napano m̃a amilotu ka tavoru nalo, a nalo napano m̃a tinielo jii ka ala bajago na sibiano.
REV 22:16 “Kiniou Yesu, nemiila kiaku nailiano na biedu ka riverial iliano nalo na vanso, ka jau komijikia kava kesian van kanaku lotuano nalo. Naverikariano napano aberkar ka mia rimaluvo ea tormoruo parinio tubo Teviti re nua, kiniou nei. Kiniou nei nebe M̃ejegi, m̃arivitano napano berial ka vaataro ka viorijen mermeravo.”
REV 22:17 Mo Atua niununo naio mijog iliano nalo nei, naio ber ka Yesu, berinavo “Bo ga, jau komijikia komei!” Tira na ju ka soro kanio, naio berinavo “Nao, bo ka jau komei naruei!” A toro kei napano naio mijog iliano nalo nei, bo ka naio bunu riverialio, riverinavo “O Yesu, ver jau komei ga!” Mia kei napano midou jer, kuvetavo ka m̃aratavo kanio ka naio mijikia riviedu joomo. Toro napano naio jidom rimei, mia naio mijikia rivokar m̃ano uei na meuliano, jibe ka kanano jidomiano kurano tai ga.
REV 22:18 Mia kiniou neber iliano na jikili tai van kamiu napano mia kuvijog iliano nalo na visip̃eiano nalo na niosi lu nei. Verenio toro tai rijeva ka iliano dolu tai bere mave ka napano jo ruei, mia Atua rila naio rivar jogvaiano nalo riviniu napano niosi nei jo berialio nua ruei.
REV 22:19 P̃eli ver toro tai rila kokoa bereio iliano nalo nei tealo napano ju ruei, mia Atua rijelar den bereio kiano jajum̃ano napano joa buruiesi na meuliano, mia naio rijev re tonovo nalo jibe ka napano niosi lu nei naio berenio ka na aju jouro ea komeli lu.
REV 22:20 Naio napano jom̃a berial iliano nalo nei, naio berinavo “Naio jibe ga na naruei. Vesiou re, mia kiniou noyotuba kean kamiu.” Mia tomu nalo na Atua kanano kialo jidomiano, aberinavo “Ver tibe na, rivu mia rivu laka. Aiou Yesu, jau komei sop̃eli!”
REV 22:21 Mia ilimaariano na tivelinio na tukunuano na kanaku monovovuano, kiniou tormoruo Jone nobolkouo ka mia kiado Tubo Yesu kanano tiniememiano novo to vija kamiu, Atua kiano tomu nalo. Mm.
