GEN 1:1 Oosana kuradoo aukuanna Anutufa sia maru ainainannai mirisinnaarunna faqa maa maqana faqa oosana arasee auqinau.
GEN 1:2 Mi aukuanna maa maqafa fifau faafau inoo marufanoo, asukuna firaafa rafaaqafinoo marufanoo Anutuna maraquna fannoo nammari amuaqumau ufaira foora uqidanoo oonuree aniree imarinau.
GEN 1:3 Mi faasaanna Anutufa qinau, kaaqa qaranara mariannee qufanoo kaaqa qarafa kambiqanau.
GEN 1:4 Kambiqafufanoo qafamaseenoo amiqimambinoo qimaseenoo kaaqa qarana faqa asukuna faqa aadu aadu rakeemma quqanau.
GEN 1:5 Rakeemma quqaseenoo qafamaseenoo Anutufa kaaqa qaranara faasaanee qinau, asukunara eendaki fee qinau. Miqi qimasoofanoo mikari indaaru oosana araseenoo eendirafa naaree anireenoo aiqaroofanoo iaqarafa aniroofanoo mifa mi iaqarafa faqa mi eendirafa faqa indaaruqaa faasaana marinau.
GEN 1:6 Mina inaaqianaa faasaana Anutufa kaifaa qinau. Innaaruna kaqi saqanna rainafinanoo nammari mirinni faqa mianni faqa aadu aadu rainanoo marianifeera qufanoo miqimminau.
GEN 1:7 Miqi qimaseenoo Anutufa innaaruna kaqi saqanna auqu quqaseenoo nammari raina mianni faqa mirinni faqa quqanau. Quqasoofanoo doo miqinoo marinau.
GEN 1:8 Anutufa mi kaqi saqanna auqureenoo innaarunee qinau. Miqimmasoofanoo eendirafa aiqaroofanoo iaqarafa aniroofanoo mi iaqarafa faqa mi eendirafa faqa inaaqianaa faasaana marinau.
GEN 1:9 Qaaramoo faasaanaikufanoo Anutufa kaifaa qinau. Maqasaa nammari suqufinoo moodaanaki mandi finanoo maqa aadana koorooianifeera qimasoofanoo miqimminoo marinau.
GEN 1:10 Anutufa aadanaikunara maqa fee qinoo auquranau. Nammari moodaanaki suqunara ooruku nammari fee qinoo auquranau. Miqi qimaseenoo doo andeeqafiifoo qimaseenoo asasinau.
GEN 1:11 Asasammaseenoo fuka maqasaara Anutufa qinau. Andanda oosana oosana kambiqaani, oosana oosana andanda neemaru ainainna aqama faqa kambiqaanni, oosana oosana aqama ireemari saqarisa faqa kambiqaannee qufanoo miqimminau.
GEN 1:12 Maqa fannoo, oosana oosana andanda faqa saqari faqa maqanau. Maqasoofanoo Anutufa aiquqummaseenoo doo amiqimminoo fee qimasee asasinau.
GEN 1:13 Miqimmasoofanoo eendirafa aiqaroofanoo iaqarafa aniroofanoo mi iaqarafa faqa mi eendirafa faqa qaaramookinau.
GEN 1:14 Anutufa kaifaa qinau. Innaarunai qooma oosana oosana kambiqafinana, suani faqa quqoona faqa fasau faqa iaqarana faqa asukuna faqa rainaanifeera qinau, iaqarafa faqa aukuana faqa amaana suqirana oosana areemariana uqannifiqaani fee qinau.
GEN 1:15 Mi qoomausa innarunaindari maqasaa kaaqa qamannimaqaani qufanoo miqimminau.
GEN 1:16 Miqi qimaseenoo Anutufa firaa qoomatiaqara suani faqa quqoona faqa miqanda quqanau. Firaa qooma suaniara anee faasaana rakisinnimaqaannee qinau. Kaqikaa qoomara quqoonara anee eendaki rakisinnimaqaannee qinau. Fasau namu faqa auqu quqanau.
GEN 1:17 Anutufa mi qoomausa innaarunaindari maqasaa kaaqa qaanifeera quqanau.
GEN 1:18 Eendaki faqa faasaana faqa rakisidanoo asukuna faqa kaaqa qarana faqa rainaanifeera quqanau. Anutufa quqaseenoo aiquqummaseenoo doo amiqimmafinoo fee qimasee asasinau.
GEN 1:19 Miqimmasoofanoo eendirafa aiqaroofanoo iaqarafa aniroofanoo mi iaqarafa faqa mi eendirafa faqa qaara faqa qaara faqaikinau.
GEN 1:20 Anutufa kaifaa qinau. Aiqama nammariki maria ainainausa oosana oosana kambiqaani, maqa mirinni kaqi saqanna oosana oosana ufinuqa qumbiqaqa maridaqa qaqaqa nuaqa.
GEN 1:21 Miqi qimaseenoo Anutufa ooruku nammariki maria firaa aandausa faqa oosana oosana ainaina faqa auqu quqanau. Ufiniuqa oosana oosana faqa auqu quqanau. Auqu quqaseenoo aiquqummaseenoo amiqimmiifoo qimasee asasinau.
GEN 1:22 Miqi qimaseenoo Anutufa narí afaaqooqa qimannimaqeenoo qinau. Inni asumu moomoo kambiqafiqa ooruku nammarki qumbiqaqa mariaqa. Mifa ufiniuqara faqa moomoo kambiqafi mariaqee qinau.
GEN 1:23 Miqi qimasoofanoo eendirafa aiqaroofanoo iaqarafa aniroofanoo mi iaqarafa faqa mi eendirafa faqa moodaannai qisaukukinau.
GEN 1:24 Miqimma fufanoo Anutufa qinau. Maqa fannoo oosana oosana kasirana faqaa aandauqa maqaani. Maaqeena aadau faqa kaasau aandau faqa firaana faqa kaqikaana faqa maqa fannoo maqaani qufanoo miqimminau.
GEN 1:25 Miqimmaseenoo Anutufa mi aiqama ainainausa auqu quqaseenoo amiqimmafinoo qimaseenoo asasinau.
GEN 1:26 Miqimmaseenoo Anutufa kaifaa qinau. Maasa faiqí naanna faqaasa auquanaura, maasa qimana kai maasa qeeqa fooqaana auquanaura. Misa ooruku nammariki noodaanna ainaina faqa sandaaqai qaqamaree nimaria ufinisa faqa maaqeena aandauqa faqa kaasau aandauqa firaanauqa saa faqa kaqikaanauqa saa faqa rakisianifeera auquanaura.
GEN 1:27 Miqi qimaseenoo Anutufa faiqí narí fooqaa irana kai auqinau. Faiqí faqa anaasee faqa naumoo faqaa qanda auqinau.
GEN 1:28 Auquseenoo Anutufa nifaaqooqa qinoo qinau. Inniqara asumu moomoo kambiqeeqa maa maqa maaqanaki qumbiqafiqa rakisiaqa. Qinee inniqara mareeqee ooruku nammariki noodaanna faqa ufiniuqa faqa aiqama kaasau aandauqa rakisirausaika mannimaqaanaura.
GEN 1:29 Anutufa kaifaa qinoo qinau. Inni narana sakummara foora ireemarina oosana oosana faqa oosana oosana saqari aqama faqa naaqeera nimidaqa.
GEN 1:30 Doo qinee aiqama kaasau aandauqa faqa ufiniuqa faqa andanda faqa nariqa neemaria saqari amaneesa faqa naaqeera qinee nimidaqa. Miqi qimasoofanoo miqimminoo marinau.
GEN 1:31 Doo Anutufa narí auqu quqasoo aiqama ainainauqa qafamaseenoo firaaqoo asasinau. Miqimmaseenoo eendirafa aiqaroofanoo iaqarafa aniroofanoo mi iaqarafa faqa mi eendirafa faqa moodaannai qisauku taikasee dinni moodaa marasee 6 faasaanaikinau.
GEN 2:1 Miqimmaseenoo Anutufa aiqama innaaruna faqa maqa faqa auqu taikanau.
GEN 2:2 Dinni taikasee dinni oonu qaaraqanda marasee 7 faasaana Anutufa narí ainainirana taikanau.
GEN 2:3 Dinni taikasee dinni oonu qaaraqanda 7 faasaanara Anutufa afaaqooqa qimasee, aaduma naaquqara faasaanee qinau. Narí kadaapirirana mi faasaanna taikoonara mi faasaannara naaquqara faasaanee qimasee idooanau.
GEN 2:4 Miqimmaseenoo Anutufa innaaruna faqa maqa faqa auqinau.
GEN 2:5 Indaaru karaambaiqa Anutufa maa maqana faqa miri innaaruna faqa auqu aukuanna aaku sia maqasaa quqoonara oosana oosana andanda qaqama sia kambiqanau. Faiqí maqa apaurirafa faqa sia marinau.
GEN 2:6 Mikamuqoo nammari fannoo maqakiqari urureenoo aiqama maqa maaqa uqeena amaqanau.
GEN 2:7 Mikari karaambaiqa Anutufa maqa qumareenoo faiqí minannoo auqinau. Auquseenoo marirana nimi maru aidoona aikaamarai fuaqasoofanoo mi fasiqafa kasirana maranau.
GEN 2:8 Mi fasannai Anutufa suani afu oosanai Eedeenna maqa maaqaki kadiqa firaana auquseenoo narí auquqoo fasiqana minaki quqanau.
GEN 2:9 Anutufa oosana oosana amiqira saqariara qufanoo minaki kambiqafufaqa amiqira aqama iraqau. Kadiqa qambaanai saqari qaaraqanda marinau. Moo saqari fannoo marirana nimi maru saqarifa marinau. Kafaa moo saqari fannoo mandainainara faqa amiqira ainainara faqa irimaria iriranna nimimarufa marinau.
GEN 2:10 Nammari moo fannoo Eedeena maqa maaqakiqari qumureenoo kadiqa qambaana maqa uqeena uqeena ianifeera qumiqareenoo qaara faqa qaara faqaki raina fufanoo ooqufinau.
GEN 2:11 Moo amara auqu Pisoona nammari fee qiqau. Mifa Qafiraa maqa maaqa atindannai ooqu finau.
GEN 2:12 Miqoo koora amiqirafa maridanoo, amiqira afundi maru saqari anoonafa faqa miqoo marinau. Firaa feefauru aqimaria oonifa faqa miqoo marinau.
GEN 2:13 Kafa moo amara auqu Kiqoona nammari marinau. Mifa Kusa maqa maaqa atindanai qumifi marinau.
GEN 2:14 Kafa moo amara auqu Taikirisa nammari marinau. Mifa Asiria maqa maaqa suani oosana qaannai atindanai qumi marinau. Moo amara auqu Eeufarateesa nammari marinau.
GEN 2:15 Karaambaiqa Anutufa narí auquqoo fasiqana mareeqee Eedeena kadidakina quqanau. Kadidaki maqa apauridanoo aiqama ainainasaa mi kadidanaki rakisianifeera quqanau.
GEN 2:16 Anutufa quqaseenoo mi fasiqana maaqi qimaseenoo aakapanau. Anee kadidakina aiqama saqari qaqama diqisee naannee qinau.
GEN 2:17 Moodaa saqariara kai qinee qaoo qidaqa. Manda ainainara irirana faqa amiqira ainainara irirana faqa nimi mari saqarina kai sia naa. Anee namaseenana mikari kai kuqinnaranoo.
GEN 2:18 Mi fasannai karaambaiqa Anutufa mi fasiqanara qinau, maa fasiqafa naríaraa marifanoo siamma andeeqaidanoo. Qinee mina aqoonnana auqusaananoo mina dadaaqiannoo.
GEN 2:19 Anutufa maqa qumareenoo minannai aiqama aandau faqa ufiniuqa faqa auqinau. Auquseenoo aiqama naarammeeqeenoo faiqí maruqoo nuquraanifeera quqasoofanoo nana ainainee auquroofa doo mi nuquna faqaasa mariqau.
GEN 2:20 Miqimmaseenoo faiqí fannoo kooqikinaa aandauqa faqa kaasau aandauqa faqa ufiniuqa faqa nuqu rama quqanau. Miqiqa marufanoo Anutufa mi fasiqana aqoonnanaikiranara misaki randeenoo sia paqurinau.
GEN 2:21 Minara faiqarana faiqí aminau. Faifufanoo Anutufa mina aqaasana moodaa tatuseenoo mina amaqinnai minaki ititanau.
GEN 2:22 Ititaseenoo karaambaiqa Anutufa mina aqaasanannoo anaasee auqinau. Auquseenoo faiqí maruqoo afiqee finau.
GEN 2:23 Quqasoofanoo faiqí fannoo qafamaseenoo qinau. Doo maqee uqanna qini fooqaairafa uqanna maridanoo, amudaani qini qimudaani kinaafa, amaqi qini qimaqinnai auqirafa, qinee minara anaasee fee qimasee auquraanaura, mifa faiqí kinaafa marinara miqi qimasee auqu raanaura.
GEN 2:24 Minara kai faiqí narí anoona akoona minnisee narí anaaqa faqa moodaanaki mafi moodaara foora maridaqa.
GEN 2:25 Mi fasiqafa narí aanaaqandiri kaqisamu maruqanda mariqau, sia nariara nariara nisauri mariqau.
GEN 3:1 Karaambaiqa Anutufa aiqama aandauqakina auquqoona qambaanaindari sakani mifa nikaru qira ufa akoofasa marinau. Mifa anaasee iramirinoo qinau. Kuqaa fee Anutufa saqariuqaki aiqama qaoo qinoo fee sia naaqee qinoo fee.
GEN 3:2 Mi anaaseefa minara iriseenoo qimaminau. Eeoo aiqama maa afuqanakinaa saqari naaqee qifaqa naidaqa.
GEN 3:3 Kadiqa qambaanai moodaa saqariara sia naaqee sia auqaaqee qifaqa sia naidaqa. Maasa namaseeqa kuquanauranoo.
GEN 3:4 Sakani mina ufa iriseenoo anaasee akaru qinoo qinau. Namasee sia kuqinnara unnaqidanoo, anee sia kuqinnaranoo.
GEN 3:5 Anutufa minara iridanoo qaoo qinoo. Innee mi saqari aqamana namasee Anutufara foora maridaqa manda ainainara faqa amiqira ainainara faqa irifoora.
GEN 3:6 Anaasee sakani ufa iriseenoo mi saqarina afu qafamasoofanoo amiqirafa marufanoo aqama faqa qafoofanoo idaaqirafa marufanoo amiqira ainainara iriranara faqa manda ainainara iriranara faqa irufanoo amiqufanoo mi saqari aqamana diqiseenoo neenoo narí afaaqi faqa amufanoo nanau.
GEN 3:7 Miqanda namasoofanoo mikari miqanda nifusaa irirafa kambiqoofaqa nári nifaaqa qafamasee kaqisamu maridee qimaseeqa nisauruseeqa saqari amanee didiqi amanee fooqaana qumaree akunuseeqa nári nifaaqasaa ititaqau.
GEN 3:8 Mi faasaanna eenaanianna asooaa asooaa imarufanoo Karaambaiqa Anutufa kadidai nimarufaqa faiqí faqa anaasee faqa iriqaqara saqariuqaki nisaurusee kukeeqaqau.
GEN 3:9 Karambaiqa Anutufa faiqí aaramasee anee yaifee qufanoo mifa qinau.
GEN 3:10 Anee kadidai nuanaqa qinee iriseeqa kaqisamu mariunausa rufiaseeqa saqariuqaki kukeeqaidaqa.
GEN 3:11 Miqi qufanoo Anutufa qinau, yafee ani kaqisamu mariannanara qimaminoo fee. Anee saqari aqama qinee qaoo qunnana neenanee.
GEN 3:12 Faiqí iriseenoo narí qimaminoo qinau. Maa anaaseefa qini faqa marifa anee qimunafa mifa qimifaqa neeqa.
GEN 3:13 Miqi qufanoo karaambaiqa Anutufa mi anaaseena iramirinoo qinau. Anee nanaree maa oosanna mareenanee. Mi anaaseefa iriseenoo qinau. Sakani fannoo anireenoo qini qikaru qifaqa neeqa.
GEN 3:14 Karaambaiqa Anutufa mina iriseenoo quandafinoo mi sakanina manda afaaqooqa qimamaqeenoo qinau. Anee maa anaaseena akaru qiannanara mina akiiqara aiqama aandauqakiqari anee kai maa manda afaaqooqana mareennaranoo. Anee maqamau amuaqundari nidana kookoomma nananua.
GEN 3:15 Qinee qianaqa maa anaaseefa faqa anee faqa nariara nariara fidiaqaa ifaranoo. Inniqara faiqinamu naaruara namuqaa marifaranoo. Mi anaaseena asumu kiqari moodaa fannoo ani akiiqa radamuannoo. Anee mina asumu kinaana aiku ataa ukaqa aminnaranoo.
GEN 3:16 Anutufa maaqi qimasee anaasee afaaqooqa qinoo qinau. Anee amuaquqa faqa marinaqa umaara firaanaikamma amaqaanaura. Miqimmaseeqa faiqi maqaraqoo faqa aupurarana amianaura. Ani aundura fannoo aneenna afaaqiara rida marinnaranoo. Ani afaaqi fannoo ani uri aaqararafa marinana anee mina ureeqarafa marinnaranoo.
GEN 3:17 Miqi qimaseenoo Anutufa quandafinoo faiqi afaaqooqa qinoo qinau. Anee aneenna anaaqa ufa iriseena qinee qaoo qunna saqarina qaqama naananoo. Minara maa maqana aqurarasaanana anee kadaapi ridana arirana rakeeidana maa maqanaki ummaqusee naida maria.
GEN 3:18 Nimmuru faqa amuka faqaa ainaina faqa maqakiqari kambiqaannoo. Anee kaasau andanda neennaranoo.
GEN 3:19 Anee tooqaamu arimarinana kadaapirumasaidana maa maqanasaa narana kambiqasaidana nana fifiinana kuqinana maqaki ani auquafannanaki finnaranoo. Ani maqannai auquqaafanafa marianafa mariananoo. Anee maqa mariananoo kaifaa maqaikamma finnaranoo.
GEN 3:20 Faiqí fannoo narí aanaaqara maqasaa qaraa fasiqa anaasee ninoo fee qimaseenoo auqu Eewanee qinau. (Mi auquna oosana aiqama faiqí faiqi ninoo fee qidanoo.)
GEN 3:21 Karaambaiqa Anutufa aandau apata qumareenoo minannai qamunnara foora auqeeqeennoo Adamana faqa narí anaaqa Eewana faqa niminau.
GEN 3:22 Miqimmaseenoo Karaambaiqa Anutufa qinau. Maqee faiqí faiqi maafa maasara foora maridaqa aaqara oosanara faqa andeeqara oosanara faqa iridaqa. Maasa sia miqandara qianaqa naaru marirana nimimari saqari aqamana diqisee neefaranoo. Diqisee namaseeqa naaruara marifoora.
GEN 3:23 Karaambaiqa Anutufa minara iriseenoo Eedeena kadidakinaana doo miqanda nifaqaseenoo qinau. Inneeqara inni auquafanna maqanasaa maridaqa maqa auqamasaidaqa narana paquriaqa.
GEN 3:24 Anutufa Eedeenna kadidakiqari Adamasa Eewasa niqiqoofaqa fufanoo suani oosana qaannai kadida atinni naaru marira saqari fainnai fimaru aannanasaa angiroouqa quqasoofaqa ida auru arira paipana uaqeeidaqa faiqí minni fifoora ruki tataaka imariqau.
GEN 4:1 Adamafa narí anaaqa Eewana faqa aana numasoofanoo amuaqu qaikinoo faiqi maqaseenoo mina auqu Kainafee qinau. Maqaseenoo Eewafa qinau, Anutufa dadaaqifaqa qinee faiqi akoonaiqi maqeeqa.
GEN 4:2 Kafaa mariufanoo faiqi moo maqaseenoo mina auqu Abeeranee qinau. Abeerafa innooqafinoo kooqikinaa aandausaa rakisirafa marinau. Mina afasaafa Kainafa innooqafinoo afuqakina ainaini marufa marinau.
GEN 4:3 Mariufanoo moo kari Kainafa narí afuqakinaa ainaina maraseeoo Anutuna tatufirana suqa aminau.
GEN 4:4 Abeerafa mifa faqa Anutuna tatufu amiraree qimaseenoo narí firimaru aandausakinaana ooqasaa maqarana afaaqafaqaana aruseenoo amiqira afaaqa kai tatufirana suqa aminau. Abeerana tatufirana Anutufa qafeenoo amiqira fee qimasee asasinau.
GEN 4:5 Kafaa Kainaindi qafamasee minnisanau. Kainafa mina qafoofanoo firaqoo arana qoofanoo oori runinau.
GEN 4:6 Anutufa Kainana qafamaseenoo qimaminau, nanaree ani arana qaidanoo fee. Nanaree ani oori mianni qumidanoo fee.
GEN 4:7 Anee amiqira ainaina auqeenanau asasa mianaiqini. Anee mandainaina auqaannanara numoo fannoo ani kooqiki ani amaara usinoo maridanoo. Mifa ani rafaaqa firarinana anee mina uraaqaraa.
GEN 4:8 Miqi qimasoofanoo Kainafa narí akaqa Abeerana qimaminoo qinau. Aninaqa aana fua. Miqanda moosaa oonureeqa Kainafa narí akaqa Abeerana kuqa arinau.
GEN 4:9 Arusoofanoo Anutufa Kaina iramirinoo qinau, ani akaqa Abeerafa yaifee maridanoo fee. Qufanoo Kainafa qinau, Abee qinee sia iridaqa, anee qiniara narí akaqasaa rakisimarifee fee qidanee.
GEN 4:10 Anutufa mina iriseenoo qinau. Kaina anee nanee mareenee. Anee iria, aneenna akaqa fidika maqasaa teeqiananoo. Mi fidikafa mina akiiqara iannee qimasee maqakiqari qini daaraifaqa iriqa.
GEN 4:11 Anee aneenna akaqa fidika maa maqanasaa teeqiananoo maqa qoo raqafinaki ani akaqa fidika minaki keeqeenoo. Minara qinee ani aqurara ufa ameemaanai quqaidaqa. Anee sia kaifaa maqaki narana ummaqusaida neennaranoo.
GEN 4:12 Anee narana ummaqusainanoo maqa fannoo sia ani narana amiannoo. Minara anee maaqa siainafa maridana aiku quqirafa maaqa maaqa kaqi ninnaranoo.
GEN 4:13 Kainafa minara iriseenoo Anutuna qimaminoo qinau. Anee qummaara firaana qini qimiananoo sia qinee amana uqeeraanaura.
GEN 4:14 Qinee maa maqanasaa ani afusaa marunnana anee diqiqaanaqa qinee qiku quqirausa aiqamatinai nuanaura. Qinee maaqanna maaqanna dapikiqa nuananoo yafee qini qiqafainafa mifa kuqa daruannoo.
GEN 4:15 Karaambaiqa minara iriseenoo qimaminoo qinau. Sia miqifara, faiqí moo fannoo yafee ani arinnana qinee mina akiiqara dinni taikasee dinni ani qaaraqanda marasee naruanaura. Miqi qimaseenoo karaambaiqa Kaina afaaqasaa sia aruaqee akara quqanau.
GEN 4:16 Miqooqari Kainafa Anutuna oorisaaqari finoo Eedeena kadida aaqaqari suani oosana qaannai moo maqa maaqai mina auqu niku quqirausa nua maqusa fee qimarunnai finau.
GEN 4:17 Miqoo oonureenoo Kainafa narí anaaqa faqa faiqi moo akoonaiqi maqaseenoo mina auqu Eenookanee qinau. Kainafa narí anaaqa faiqi maqoo kari maqusa moo auquseenoo mi maqusana auqu narí amaaku amaranaikinoo Eenooka maqusa fee qinau.
GEN 4:18 Eenookafa faiqí kammafinoo akoonaiqi Iradana maqanau. Iradafa faiqí kammafinoo akoonaiqi Meequyaeerana maqanau. Meequyaeerafa faiqí kammafinoo akoonaiqi Metusaeerana maqanau. Metusaeerafa faiqí kammafinoo akoonaiqi Rameekana maqanau.
GEN 4:19 Rameekafa faiqí kammafinoo qaara anaasee maranau, moona auqu Adaa nammarifa moona auqu Siraa nammarifa mariqau. (Adaa nammarina auqu oosana amiqira fee qimaqoofa marinau. Siraa nammarina auqu oosana auqaana fee qimaqoofa marinau.)
GEN 4:20 Indaaruqaa anaasee auqu Adaa nammarifa faiqi moo Yabarana maqasoofanoo findifinoo aandau apatannai uiqaana maqa usakasaida nimarusa nikoofa marinau.
GEN 4:21 Yabarafa firimaru aandausasaa rakisi marusa nikoofa marinau. Yabarana akaqa Yubarafa marinau. Mifa findifinoo qufireena fuaqee marusa faqa piripunna arimarusa faqa nikoofa marinau.
GEN 4:22 Rameekana inaaqiana anaasee moo Siraa nammarifa marinau. Mifa akoonaiqi Tubarakaina maqasoofanoo findifinoo koopaannai faqa qainnannai faqa ainaina auqimarufa marinau. Tubarakainana auna auqu Naammaa nammarifa marinau.
GEN 4:23 Rameekafa narí aanaaqaqara maaqi qimasee qimanniminau. Adaa nammarisa Siraa nammarisa qini ufa iriaqa, Qinee Rameekausa qini qinaaqaqara ufa qianaqa amiqimmasee iriaqa. Faiqí moo fannoo kaakadi darifaqa qinee mina kuqamma ariqa. Asauku samu qini darina akiiqara mi kumaaraana kuqamma ariqa.
GEN 4:24 Moo fannoo Kainana arinnana akiiaqara Anutufa dinni taikasee dinni ani qaara marasee 7 fasiqa naruannoo. Moo fannoo qini Rameekausa darinnana akiiaqara Anutufa fiqaramasee 77 fasiqa naruannoo.
GEN 4:25 Adamafa kaifaa narí anaaqa faiqi mara amisoofanoo amuaqu qaikinoo akoonaiqi moo maqaseenoo mina auqu Seetanee qinau. Miqi qimaseenoo mina anoofa qinau. Anutufa qini qimaaku moo qiminoo narí afasaana Abeerana amaaqa maqaanifeera qiminoo mifa Kainafa aruna amaaqa maqaannoo.
GEN 4:26 Seetafa innooqafinoo akoonaiqi Eenoosana maqanau. Eenoosafa maru kamuqooqari oosana arasee misa Anutunara innaaru qidaqa minara naaqura Karaambaiqee Yaawee fee qidaqa innaaru qimariqau.
GEN 5:1 Adamana aiku asauku misa oosana maaqimmasee akaraki marinau. Anutufa indaaru narí amana kai faiqí anaasee auqinau.
GEN 5:2 Naumoo faqaa qanda auquseenoo nifaaqooqa qima nimaqaseenoo faiqí anaasee fee qimasee nuqu ranau.
GEN 5:3 Adamafa aukuana 130 marasoofanoo mina amaaku Seetafa kambiqanau. Narí akoona fooqaafa mina amana kai marinau.
GEN 5:4 Seetana maqookari oosana araseenoo Adamafa 800 aukuana maranau. Mi kamuqoo akoonaiqi maanaaqa faiqi namu moomoo Adamafa maqanau.
GEN 5:5 Adamana aukuana aiqama 930 maraseenoo kuqinau.
GEN 5:6 Seetafa 105 aukuana maraseenoo akoonaiqi Eennoosana maqanau.
GEN 5:7 Eennoosana maqoo kamuqooqari Seetafa 807 aukuana maraseenoo mi kamuqoo akoonaiqi maanaaqa faiqi namu moomoo maqanau.
GEN 5:8 Seetana aiqama aukuana 912 maraseenoo kuqinau.
GEN 5:9 Eennoosafa 90 aukuana maraseenoo akoonaiqi Keennana maqanau.
GEN 5:10 Keennana maqoo kamuqooqari Eennoosafa 815 aukuana maraseenoo mi kamuqoo akoonaiqi maanaaqa faiqi namu moomoo maqanau.
GEN 5:11 Eennoosana aukuana aiqama moodaanaki 905 maraseenoo kuqinau.
GEN 5:12 Mina amaaku Keennafa 70 aukuana maraseenoo akoonaiqi Maqarareerana maqanau.
GEN 5:13 Maqarareerana maqoo kamuqooqari Keennafa 840 aukuana maraseenoo mi kamuqoo akoonaiqi maanaaqa faiqi namu moomoo maqanau.
GEN 5:14 Keennana aukuana aiqama moodaanaki 910 maraseenoo kuqinau.
GEN 5:15 Mina amaaku Maqarareerafa 65 aukuana maraseenoo akoonaiqi Yareedana maqanau.
GEN 5:16 Yareedana maqooqooqari 830 aukuana maraseenoo mi kamuqoo akoonaiqi maanaaqa faiqi namu moomoo Yareedafa maqanau.
GEN 5:17 Maqarareerana aukuana aiqama moodaanaki 895 maraseenoo kuqinau.
GEN 5:18 Mina amaaku Yaareedafa 162 aukuana maraseenoo narí amaaku Eennookana maqanau.
GEN 5:19 Eennookana maqooqooqari Yareedafa 800 aukuana maraseenoo akoonaiqi maanaaqa faiqi namu moomoo maqanau.
GEN 5:20 Yareedana aukuana aiqama moodaanaki 962 maraseenoo kuqinau.
GEN 5:21 Mina amaaku Eennookafa 65 aukuana maraseenoo akoonaiqi Meetuseerana maqanau.
GEN 5:22 Eennookafa 300 aukuana Anutuna aqoondikiranaki maridanoo akoonaiqi maanaaqa faiqi namu moomoo maqanau.
GEN 5:23 Eennookana aukuana aiqama moodaanaki 365 aukuana maranau.
GEN 5:24 Eennookafa sia kuqinau. Kaaqa Anutunara rimarufa marufanoo Anutufa kaqimma afiqasoofanoo sia sia inau.
GEN 5:25 Eennookana amaaku Meetuseerafa 187 aukuana maraseenoo akoonaiqi Rammeekana amarana maqanau.
GEN 5:26 Rammeekana maqooqooqari mina akoofa Meetuseerafa 782 aukuana maraseenoo akoonaiqi maanaaqa faiqi namu moomoo maqanau.
GEN 5:27 Meetuseerana aukuana aiqama moodaanaki 969 aukuana maraseenoo kuqinau.
GEN 5:28 Meetuseerana amaaku Rammeekana amarafa 82 aukuana maraseenoo akoonaiqi maqaseenoo qinau.
GEN 5:29 Anutufa maa maqa maaqana aquraraqoofaqa maasa kadaapi ridaqa. Maa faiqifa kadaapiriranaki marunnana asooarana qimiannoo fee qimasee mina auqu Nooa nee qinau.
GEN 5:30 Nooana maqooqooqari mina akoofa Rammeekafa 595 aukuana maraseenoo akoonaiqi maanaaqa faiqi namu moomoo maqanau.
GEN 5:31 Rameekana aukuana aiqama moodaanaki 777 maraseenoo kuqinau.
GEN 5:32 Mina amaaku Nooafa 500 aukuana maraseenoo miqooqari akoonaiqi qaaramoo maqanau. Misa nuqu Seemmana faqa Qammana faqa Yafeetana faqa maqanau.
GEN 6:1 Mi fasannai faiqí anaasee moomoo kamambufaqa maqa maaqa itita fiqa maridaqa misa maanaaqauqa moomoo maqaqau.
GEN 6:2 Maqasaa fasiqauqa Anutuna faiqi namu mi manaaqausa nindafoofaqa nifu noori amiqirausauqa kai marufaqa nári nidimarusa maree mariqau.
GEN 6:3 Miqi marufanoo Anutufa qinau. Qini maraquna naaru naaru sia faiqiki mariannoo. Misa fifau faiqí faiqi marianara kisaaqa aukuana ateekasee qusa aukuana nimianaura, 120 aukuana kai nimianaura.
GEN 6:4 Mikari faqa kasooqaqee faqa maqasaa fasiqauqa Anutuna faiqi namu faiqí niraamuna maraqa ninii soofaqa faiqi maqee mariqau. Mi faiqisa nimudaani faqaasa murusaqa arirausa maa maqanasaa maridaqa nuqu faqaasa mariqau.
GEN 6:5 Anutufa aiqama maqasaaqaraasa nindafoofaqa misa marirafa faqa irirafa faqa mandaika uqanna inoo marinau.
GEN 6:6 Miqiqa marufanoo Anutufa firaqoo misa mi manda oosannara irinau. Mifa faiqí auqu maqasaa quqoonara irufanoo aundura mandaikufanoo akooqoofanoo qinau.
GEN 6:7 Maa oosanausa qinee auquafanausa maa maqanasaa qaraana qinee aiqama ruka aqusaanaura. Faiqí faqa ufini aandau faqa aiqama ruka aqusaanaura qinee misa auquafannanara qikooqaidanoo.
GEN 6:8 Anutufa Nooanara kai asasinau.
GEN 6:9 Nooana oosana maaqimminoo marinau. Nooafa kai sia aaqarana marufa marinau, narí faqa marusakiqari naríara andeeqarafa marinau. Mifa kai Anutuna aqoondikiranaki marinau. Mina amaaku qarammoo namu mariqau. Misa nuqu Seemmafa faqa Qammafa faqa Yafeetafa faqa mariqau.
GEN 6:11 Aiqamausa Anutuna afusaa mandainainaki mariqau. Faiqí narari nararirafa aiqama maqa maaqaki qumbiqanoo marinau.
GEN 6:12 Anutufa aiqama maqa maaqaki qafoofanoo mandaika uqannamminoo marinau. Faiqí anaasee aiqama mandainainaki kai mariqau.
GEN 6:13 Miqiqa marufanoo Anutufa Nooana qimaminoo qinau. Faiqí narari nararirafa qumbiqanoo marinara qinee aiqama fasiqa anaasee naru taikaanauree qidaqa.
GEN 6:14 Nooa, anee amiqira saqarinnai firaa sipa auqua. Mina aunduraki moomoo rumma auqua. Aunduraki faqa adisaa faqa koorootaqa qumaree akusainanoo ititaani.
GEN 6:15 Anee sipa maaqimasee auqua. Mina kisaaqa fannoo Aarinnoonna nammarikiqari Siara Doona nammariki amanasaa 130 metres mina kisaaqa mariani. Mina qusa fannoo 22 meters sia kisaaqa uqanna marinau. Mi sipana maqasaqari maaqa akiiqa amanasaa 13 metres mariani.
GEN 6:16 Asaana qumeeqarana ameemaanai apootaana kaqi mariani 0.5 metre mariani. Sipa qaqaasanai firaa kooqi auquseenana sipa aundurai maqasaa tida rua, mina murufi qambaanai moo tida rua, mina maariqoo moo tida rua.
GEN 6:17 Anutufa kaifaa Nooana qimaminoo qinau. Qinee nammari mareeqee quqasaananoo firaaqoo aufinoo aiqama kasimari ainainausa naru taikaannoo. Aiqama maqasaa maria ainainausa faqa kuqu taikeefaranoo.
GEN 6:18 Ani faqa kai moodaanaki kira ufa qianaura. Aneenna anaaqa faqa aneenna faiqi namu faqa misa ninaaqmaaka faqa sipaki keeqafi mariaqa.
GEN 6:19 Anee aandau oosana oosana mareeqee sipaki quqaa. Oosana oosana qaara kai qaara kai akoona faqa anaasee faqa apammasee sipaki quqasainaqa ani faqa asumu mariaqa.
GEN 6:20 Oosana oosana ufini faqa qaara kai qaara kai mara quqasainaqa ani faqa asumu mariaqa.
GEN 6:21 Anee oosana oosana narainaina misaindi faqa aneennaindi faqa mara sipaki quqaa.
GEN 6:22 Nooafa Anutuna ufa iriseenoo mifa qundee kai inau.
GEN 7:1 Karaambaiqa Nooana maaqi qimasee qimaminau. Anee aneenna aiku asauku faqa sipaki keeqaa. Maqa saaqaraasakiqari anee kai aneennaraa andeeqarafa mariana qafaidaqa.
GEN 7:2 Innee qini qifusaa anukara aandau fee qimariana qisauku dinni taikasee dinni oonu qaara marasee 7 akoona faqa anaasee faqa ani faqa sipaki mareeqee quqasainaqa asumu mariaqa. Innee qini qifusaa sia anukara aandau oosana oosana akoona faqa anaasee faqa moodaa kai mareeqee minaki asumu quqasaina mariaqa.
GEN 7:3 Aiqama ufini oosana oosana dinni taikasee dinni oonu qaara marasee 7 akoona faqa anaasee faqa mareeqee sipaki quqaa. Miqimmasainaqa aiqama aandau ufini kaifaa maa maqanasaa moomoo kiaqa.
GEN 7:4 Dinni taikasee dinni oonu qaaraqanda marasee 7 faasaana aiqarainaqa miqoo aaku maqasaa quqaanaura. Qaara fasiqa niku nisauku taikasee 40 faasaana faqa eendaki faqa aaku rida mariannoo. Miqi marinaqa qinee maqasaa aiqama naanna faqaasa qeeqa auqu nisaafanausa taika nisaanaura.
GEN 7:5 Nooafa aiqama ainaina Anutufa qimamundee kaimminau.
GEN 7:6 Nooafa 600 aukuana marasoofanoo mi aukuannasaa nammari aufirafa aninau.
GEN 7:7 Nooafa Anutuna mi ufausa iriseenoo rufiaseenoo narí faqa narí anaaqa faqa narí amaaku qaaramoo namu faqa minamusa ninaaqmaaka faqa sipaki keeqaqau.
GEN 7:8 Oosana oosana aandau ufini akoona faqa anaasee faqa Anutuna afusaa anukarausa faqa sia anukarausa faqa aiqama Nooana faqa sipaki keeqaqau. Anutufa ufa qumau kai keeqaqau.
GEN 7:10 Dinni taikasee dinni oonu qaara marasee 7 faasana marinoo nammari aufinau.
GEN 7:11 Mi aukuanna Nooafa 600 aukuana maranau. Qaara quqoonasaa qiku dinni taikasee dinni oonu qaaraqanda marasee 17 faasaanasaa mi faasaanna kai nammari radiqinau. Mi faasaanna kai maqa ameemaanaindari nammari radiqisee urureenoo innaaruna kooqiara foora atuqoofanoo aaku firaafa nammariara foora adianau.
GEN 7:12 Qaara fasiqa niku nisauku taikasee 40 eendaki faqa faasaana faqa aaku firaafa nammariara foora adianau.
GEN 7:13 Nammari radiqu faasaanna mi faasaanna kai Nooafa narí aanaaqandiri faqa narí amaaku namu Seemafa faqa Qammafa faqa Yafeetafa faqa minamusa nári ninaaqmaaka faqa sipaki keeqafiqa mariqau.
GEN 7:14 Kaasau aandau oosana oosana faqa maaqeena aandau oosana oosana faqa ufini oosana oosana faqa firaa aandauqa faqa kaqikaa aandauqa faqa Nooana aiku asauku faqa sipaki keeqaqau.
GEN 7:15 Aiqama oosana oosana kasimaru aandau ufinisa akoona faqa anaasee faqa Nooana faqa sipaki keeqaqau.
GEN 7:16 Anutufa Nooana qimamu mau kai keeqa fufanoo Anutufa narí kai kooqi itita nimaqanau.
GEN 7:17 Qaara fasiqa niku nisauku taikasee 40 faasana aaku nammariara foora adianau. Miqi ufanoo nammari qumbiqeenoo sipa uqeereeqeenoo murusaqa quqanau.
GEN 7:18 Nammari fannoo firaaqoo innooqoofanoo sipa fannoo mina amuaqumau nimarinau.
GEN 7:19 Nammari fannoo moo faqa innooqeenoo aiqama kisaaqa aaqana dukuninau.
GEN 7:20 Kaifaa innooqeenoo kisaaqa aaqana oori aaqaramaseenoo 7 meters amana ooru marinau.
GEN 7:21 Miqinoo marufanoo maqasaa maru ainainausa aiqama kuqiqau. Aiqama ufiniuqa faqa aiqama andauqa faqa aiqama fasiqa anaasee faqa kuqu taikaqau.
GEN 7:22 Aiqama aandau faqa doodaani faqa maa maqanasaa marusa kuqu taikaqau.
GEN 7:23 Karaambaiqa aiqama ainaina maqasaaqaraa ainaina taika uqanna sanau. Faiqí anaasee faqa aandau faqa ufini faqa taikannisanau. Nooafa kai narí aiku asauku faqa narí sipakinaa ainainauqa faqa misa kai asumu mariqau.
GEN 7:24 Dinni qisauku taikasee dinni oonu qaara fasiqa maraseenoo moodaa fasiqa asaukuqara 150 faasaana nammari kaqi aufinoo marinau.
GEN 8:1 Marufanoo Anutufa Nooanara faqa narí aiku asauku faqa aiqama aandau mina faqa marusara faqa iriseenoo qufanoo ufai uqufanoo nammari fannoo qumi marinau.
GEN 8:2 Maqa ameemaanaindari nammari ururee maruna rafaaqa finau. Rafaaqafuseenoo innaaruna kooqiara foora ititasoofanoo innaarunaindaraa nammari faqa sia quminau.
GEN 8:3 Itita fufanoo maqasaa nammari fannoo ireeda kai ireeda kai ooru maree ooru maree qumiqumii ufanoo maqa koorooinau. 150 suanisaa nammari qumimarinau.
GEN 8:4 Dinni taikaseenoo dinni oonu qaaraqanda marasee 7 quqoonasaa miqi mandee quqoonna qambaanai qisaukuqara faqa dinni qiku taikaseenoo dinni oonu qaara marasee 17 faasaana Nooana sipa fannoo Ararata aaqanasaa muqufi quqasoofanoo marinau.
GEN 8:5 Miqooqari nammari uru maree ooqinufanoo qisaukuqara taikasee 10 quqoonasaa indaaruqaa faasaanasaa aaqana atiuqa koorooinau.
GEN 8:6 Qaara fasiqa niku nisauku taikasee 40 faasaana aiqaroofanoo Nooafa winduaqa atuaseenoo ufini kaammeesa fooqaana mara aqinau.
GEN 8:7 Ufini fannoo sia kaifaa aninau. Kaqi kai qaqanoo nimarinau.
GEN 8:8 Nooafa mi ufininara rakisusia sia anufanoo nakipuruna mara aquseenoo nammari qafaanifeera aqiqanau.
GEN 8:9 Aqusoofanoo nakipuruna maqara randoosianoo nammari kaqi marufanoo mi eendanaki kai kaifaa Nooafunnai sipaki aninau. Nooafa narí asauku madaanai quqaseenoo qumara sipaki quqanau.
GEN 8:10 Qisauku dinni taikasee dinni oonu qaara marasee 7 faasaana afeesida mariufanoo Nooafa nakipuruna kaiqaa mareeqeenoo madaanai aqinau.
GEN 8:11 Eenee marufanoo nakipuruna fannoo oorifa saqari amanee ammunirana rakeemma aaku maree aninau. Nooafa mi saqari amaneena qafamaseenoo doo nammari ooqi maridanoo fee qinau.
GEN 8:12 Miqooqari kaifaa dinni taikasee dinni oonu qaara marasee (7) faasaana aiqaroo fanooo Nooafa nakipuruna kafaa mara quqasoofanoo doo funnai fifinoo doo sia kafaa aninau.
GEN 8:13 Nooafa 601 aukuana marasoofanoo indaaruqaa quqoona indaaruqaa faasaanasaa nammari tukaqnanau. Nooafa sipa ataufakaaqa akuamaqaqoona rafaammasee qafoofanoo maqa aadana usimarinau.
GEN 8:14 Namba 2 quqoonasaa 27 faasaanasaa aiqama nammari tukaqnamafufanoo maqa maaqa aadana uqanna marinau.
GEN 8:15 Miqimmafufanoo Anutufa Nooana qimaminoo qinau.
GEN 8:16 Doo sipakiqari anee faqa aneenna anaaqa faqa aneenna faiqi namu faqa misa ninaaqmaaka faqa raudaaqa.
GEN 8:17 Aiqama ufiniuqa faqa aandauqa faqa nifiqee raudaaqa. Raudamafiqa maqa maaqaki daraaniqa asumu moomoo kambiaaqa.
GEN 8:18 Miqi qimasoofanoo Nooafa faqa narí anaaqa faqa narí faiqi namu faqa misa ninaaqmaaka faqa sipakiqari raudaqau.
GEN 8:19 Aiqama aandauqa faqa ufiniuqa faqa narí oosana narí oosana kai moodaanaki suqufufaqa raudamaki daraaniqau.
GEN 8:20 Nooafa rafudamafufanoo karaambaiqa tatufirana suqarara ooni qumareenoo aaku aakummaseenoo Anutuna afusaa anukara aandau faqa ufini faqa maraseenoo muduka Anutuna tatufirana suqa aminau.
GEN 8:21 Suqoofanoo mina afunda karaambaiqa aikiambu ufanoo udirama qafeenoo asasinau. Asasammaseenoo maaqi qimasee qimmirinoo qinau. Sia qinee kaifaa faiqí inni mandainaina akiiqara aiqama maqa maaqa niquraraanauranoo. Inneeqa faiqi saaqari irirana faqa marirana faqa mandaika kai imarunara sia kaifaa unandee iqa maqa maaqa afaaqasasa maria fasiqa aanaaseesa faqa aandau doodaani faqa naru taikaanaura.
GEN 8:22 Anutufa minara maaqi qimasee qinau. Maa maqafa kaqi marinaqa qummaqira aukuana faqa narana nara aukuana faqa suara faqa aiqaiqa faqa aaku aukuana faqa suani aukuana faqa faasaana faqa eendaki faqa sia taika nimaqaanaura, kaqi marifaranoo.
GEN 9:1 Anutufa Nooana narí faiqi namu faqa nifaaqooqa qinoo qinau. Inni asumu moomoo kambiqafi aiqama maqa maaqa amana kai mariaqa.
GEN 9:2 Aiqama aandauqa faqa ufiniuqa faqa noodaanna faqa inniara rufiaranaki mariaqa. Misa inni afeeka ameemaanai mariaqa.
GEN 9:3 Innee maaqooqari sia andanda kai naaqa mi aandausa namu faqa naaqa. Innee naranara foora naaqeera nimidaqa.
GEN 9:4 Innee moodaa ainaina kai sia naaqa, fidika amaqiki marinnana kai sia naaqa. Mifa marirana nimimarifa marinara sia naaqa.
GEN 9:5 Faiqí moo fannoo faiqí faiqi fidika ruqiqainaqa qinee mina akiiqara ummaara amianauranoo. Aandau moo fannoo faiqí faiqi kuqa narinaqa qinee mi aandauna kuqa aruanaura.
GEN 9:6 Anutufa faiqí faiqi narí fooqaasa auquqoonara yafee moona auqu qimasee kuqa arinnana akaqausa mina akiiqara narí arifaranoo.
GEN 9:7 Innee moomoo faiqi maqasaifaqa aiqama maqa maaqaki amanaikammafi mariaqa.
GEN 9:8 Anutufa Nooana faqa narí faiqi namu faqa kaifaa qimanniminoo qinau.
GEN 9:9 Maqee qinee inni faqa innisaaqari kasooaqee kambiqainausa faqa moodaanaki kira ufa qidaqa.
GEN 9:10 Aiqama ainaina ufiniuqa faqa aiqama aandauqa faqa ani faqa sipakiqari anusa faqa moodaanaki kianaura.
GEN 9:11 Maa ufausannoo qinee moodaanaki kira ufa inni faqa qidaqa. Qinee kuqaa qima afeekaika qidaqa sia kaifaa nammari aufirafa faiqí faqa aiqama ainaina faqa naruannoo. Sia uqanna kafaa nammari aufirafa maa maqa maaqana mandaikiannoo.
GEN 9:12 Qinee naaru marira moodaanaki kira ufa ani faqa aiqama aandauqa faqa doodaaniuqa faqa qunafa maaqi qimasee uqannifiqaanaura.
GEN 9:13 Qinee qeeqa oondanda oonnamuki quqaanaura. Mifa qinee maa maqanasaaqaraasa faqa moodaanaki kirana uqannifiqaannoo.
GEN 9:14 Yairee fee qinee oonnamunnai innaaruna itita saananoo miqoo oondanda kambiqaannoo.
GEN 9:15 Oonnamuki oondanda rafeeqna finaqa qafeeqa qinee ani faqa aiqama aandau doodaani faqa qima afeekaikira ufara irisee sia kaifaa nammari aufirafa naruannoo.
GEN 9:16 Oondanda oonnamuki rafeeqnainaqa qafamaseeqa naaruara qinee inni maqasaaqaraasa faqa naaru marira moodaanaki kira ufa qiafannanara irianaura.
GEN 9:17 Minannai qinee aandauqa faqa doodaaniuqa faqa qima afeekaikiafanna ufana kooroo idaqa.
GEN 9:18 Nooana faiqi namu sipakiqari anusa nuqu maaqimminoo marinau. Seemmafa faqa Qammafa faqa Yafeetafa faqa mariqau. Qammafa Kannaana akoofa marinau.
GEN 9:19 Nooana mi faiqi qaaramoo namusa aiqama maa maqanasaaqaraasa nikeeku nikaaku mariqau.
GEN 9:20 Nooafa afuqaki ainaini marufa marinau. Mifa indaaru oosana arasee afuqa auqusee uainna sanda moomoo ummaqinau.
GEN 9:21 Mifa uainna aqama tatiseenoo moomoo neeneeseenoo furufara maseenoo narí qamunna raipaquseenoo narí uiqaana maqaki kaqi samu faiqanau.
GEN 9:22 (Yafeetafa indaaruqaafa Seemafa mina aanaaqianaafa marinau Qammafa inaaqianaafa marinau.) Qammafa Kannaana akoofa maridanoo anireenoo narí akoofa kaqi samu faiqaqee ufanoo oonu qafeenoo narí akaqaafasaaqara naaramaseenoo qimanniminau.
GEN 9:23 Seemafa faqa Yafeetafa faqa minara iriseeqa qaoo qimasee qamunna marasee moo fannoo dinni ati narí aururusaa quqasoofanoo moo fannoo dinni ati narí aururusaa quqaseeqara ninaaqianaindari uiqaana maaqaki keeqa fiqaqara nári nikoona afaaqa itita amaqaqau. Miqanda noori kaqinni quqasee nisauruanoo qimasee sia nári nikoona qafaqau.
GEN 9:24 Nooafa kasooqaqee irirafa kambiqafufanoo narí inaaqianaa faiqi mifa auqoo ainainnara irinau.
GEN 9:25 Iriseenooo maaqi qimasee aquraranau. Qinee ani amaaku Kannaanasaa aqurara ufa quqaanaura. Anee aneenna akaqaafasaauqa saika faiqi maria.
GEN 9:26 Miqi qimaseenoo Nooafa quandafinoo Qammana akaqaafasaa qarara maaqi qinau. Karaambaiqa Seemana Anutuna amooqirana amia. Kannaafa Seemana ainainira faiqi mariannoo.
GEN 9:27 Anutufa qinanoo Yafeetanakiqari moomoo kambiqafiqa mina faiqi namu Seemana faiqi namu faqa moodaanaki marifaranoo. Miqiqa marifanoo Kannaafa Yafeetana ainainira faiqi mariannoo.
GEN 9:28 Nammari aufirafa taikoofanoo miqooqari Nooafa 350 aukuana maraseenoo kuqinau.
GEN 9:29 Mina aukuana aiqama moodaanaki 950 aukuana maraseenoo kuqinau.
GEN 10:1 Nooana faiqi namu nuqu maaqimminoo marinau. Seemmafa faqa Qammafa faqa Yafeetafa faqa mariqau. Nammari aufirafa taikooqooqari misasaaqari kambiqarausa nuqu maaqimminoo mariqau.
GEN 10:2 Yafeetana faiqi namu nuqu maaqimminoo marinau. Koommafa faqa Makookafa faqa Madaifa faqa Yafanafa faqa Tubanafa faqa Meeseekafa faqa Tirasafa faqa mariqau. Mi fasiqausa ninaiqimara nisaifaqausa nariqa ninaakusa nuqu maree mariqau.
GEN 10:3 Koommanasaaqari kambiqoo maqannaasa nuqu Asakeenasa maqannaasa faqa Rifata maqannaasa faqa Tookaramma maqannaasa faqa mariqau.
GEN 10:4 Yafatanasaaqari kambiqoo maqannaasa nuqu Eerisa maqannaasa faqa Sipainna maqannaasa faqa Sipurusa maqannaasa faqa Roodeesa maqannaasa faqa mariqau.
GEN 10:5 Misa ooruku nammari afaiqara marusa faqa kaqikaa afumaki marusa faqa misa ninaakusa mariqau. Misauqa Yafeetanakiqari kambiqarausa maridaqa naadu naadu maqa maaqaki maridaqa naadu naadu ufa qimariqau.
GEN 10:6 Qammana faiqi namu nuqu maaqimminoo marinau. Kusafa faqa Isipafa faqa Ribiafa faqa Kannaafa faqa mariqau. Mi fasiqausa ninaiqimara nisaifaqausa nári ninaakusa nuqu maree mariqau.
GEN 10:7 Kusana faiqi namukiqari kambiqoosa Seebaa maqannaasa faqa Qafiraa maqannaasa faqa Sabataa maqannaasa faqa Rammaa maqannaasa faqa Sabateeka maqannaasa faqa mariqau. Rammanasaaqari kambiqoosa Seebaa maqannaasa faqa Deedana maqannaasa faqa mariqau.
GEN 10:8 Kusafa akoonaiqi Nimaroodana maqanau. Nimaroodafa findifinoo maa maqa maaqanaki indaaruqaa rakira karaambaiqa marinau.
GEN 10:9 Karaambaiqa dadaaqufanoo mifa amudaanai qimasee uaqee marufa marinau. Miqi marunara faiqí anaasee maaqi qimasee akaqausara qimariqau. Karaambaiqa fannoo ani Nimarooda fara foora kaaqa amudaanai qimasee uaqee mari fara foora maisaannoo.
GEN 10:10 Nimaroodafa Baabeera maqusa faqa Eereeka maqusa faqa Akada maqusa faqa mi maqusa namuna indaaru rakisimarinau. Mi maqusa namusa Babiroonia maqa maaqaki mariqau.
GEN 10:11 Miqoo mariufanoo Nimaroodafa Asiria maqa maaqai oonureenoo Ninifee maqusa faqa Reehoobootaira maqusa faqa Karaa maqusa faqa Reeseena maqusa faqa auqinau.
GEN 10:12 Reeseena maqusa fannoo Nineefee maqusa dinni marifanoo Karaa firaa taunna dinni marifanoo qambaana maridanoo.
GEN 10:13 Isipana saaqari aruakusa Ridiaa maqannaasa faqa Anamma maqannaasa faqa Reehaba maqannaasa faqa Nafatuqa maqannaasa faqa
GEN 10:14 Patarusa maqannaasa faqa Kasaru maqannaasa faa Kareetee maqannaasa faqa mariqau. Firistia maqannaasa Kareetee maqannaasakiqari kambiqarausa mariqau.
GEN 10:15 Kannaana faiqi namu nuqu maaqimminoo marinau. Indaaruqaafa Sidoonafa marinau. Mina aanaaqiannaafa Heetafa marinau. Miqanda nári ninaakusa nuqu marasee mariqau.
GEN 10:16 Kannaafa Yeebusa maqannaasa faqa Amoora maqannaasa faqa Kirakasa maqannasa faqa ninaakufa marinau.
GEN 10:17 Hifita maqannaasa faqa Akaa maqannaasa faqa Sinita maqannaasa faqa mariqau.
GEN 10:18 Arafada maqannaasa faqa Seemara maqannaasa faqa Qamata maqannaasa faqa mariqau. Kannaa maqannaasa moomoo oosana rainafufaqa aiqama maqa maaqaki daraanimambi mariqau.
GEN 10:19 Mariufaqa Kannaana saaqari kambiqarausa misa maru maqana dinni ati Sidoona maqusaki marufanoo suani dinni ataaqeenni Keeraa maqusa Kasaa maqusa aaqa maruna raquru aminoo marinau. Miqooqari suani oosana qaannai Soodoomma maqusa faqa Koomoora maqusa faa Adama maqusa faqa Seeboima maqusa Rasaa maqusa aaqa marunnai dinni ati marinau.
GEN 10:20 Doo Qammana saaqari kambiqarausa naadu naadu maqusakiaqa rainafufaqa naadu naadu ufa qimariqau.
GEN 10:21 Seemmafa Yafeetana afasaafa Heeburu maqannaasa ninaakufa marinau.
GEN 10:22 Seemana faiqi namu nuqu maaqimminoo marinau. Eerammafa faqa Asurafa faqa Arafakadafa faqa Rudafa faqa Arammafa faqa mariqau. Mi fasiqausa ninaiqimara nári ninaakusa nuqu maree mariqau.
GEN 10:23 Arammana faiqi namu Qusa maqannaasa faqa Huraa maqannaasa faqa Keeteera maqannaasa faqa Meeseekaa maqannaasa faqa mariqau.
GEN 10:24 Arafakadafa Seeraana akoofa marinau. Seeraafa Eebeereena akoofa marinau.
GEN 10:25 Eebeerafa akoonaiqi qaaraqanda maqanau. Indaaruqaana auqu Peereekafa marinau. Mina auqu oosana rainara fee qinoo marinau. Mifa maru aukuanna maqa maaqa rainanoo marufaqa minara Peereekanee qinau. Peereekana akaqa auqu Yookatanafa marinau.
GEN 10:26 Yookatana faiqi namukiqari maaqimmasee maqannaasa mariqau. Aramooda maqannaasa faqa Seereefaa maqannaasa faqa Asammafee maqannaasa faqa Yeeraa maqannaasa faqa Adooramma maqannaasa faqa Qusaraa maqannaasa faqa Dikaraa maqannaasa faqa Oobara maqannaasa faqa Abimaeera maqannaasa faqa Seebaa maqannaasa faqa Oofira maqannaasa faqa Qafiraa maqannaasa faqa Yoobabaa maqannaasa faqa mariqau. Aiqamusa Yookatana anaiqimara mariqau.
GEN 10:30 Misa maru maqa maaqafa dinni ati fannoo Meesaa maqa maaqaindari Seefaraa maqa maaqai suani oosana qaannai aaqana maqa maaqa dinni ati fannoo raquru aminoo marinau.
GEN 10:31 Seemana faiqi namu miqimmiqa mariqau. Naadu naadu maqa maaqaki maridaqa naadu naadu ufa qimariqau.
GEN 10:32 Aiqama misauqa Nooanasaaqari kambiqarausa mariqau. Moo maqannaa moo maqannaa nariqa oosana amana kai mariqau. Nammari aufirafa taikafufaqa aiqama maa maqanasaaqaraasa Nooana faiqi namukiqari kai kambiqafi mariqau.
GEN 11:1 Indaaru nammari taikoo kamuqoo aiqama maqasaa qaraasa moodaa ufa faqaasa maridaqa moodaa ufa kai qimariqau. Aiqama ainainara moodaa auqu kai ree mariqau.
GEN 11:2 Misa suani oosana qaannai oonuree aniree iqa niniufaqa Babiroonia afaasa paqurimmasee miqoo mariqau.
GEN 11:3 Misa miqoo maridaqa maaqi qimasee narí qimami narí qimami qidaqa qiqau. Anifaqa innisaimbaqa maqa qumareeqa atakuseeqa idara saananoo afeekaikamma finaqa minannai maaqa usakaa. Maasa miqimmaseeqa aaku aakummaseeqa koorootaqa mina apootaanaki akusaananoo atukaraani.
GEN 11:4 Miqi qimaseeqa maqee innisaimbaqa fuka maqusa indufusee kisaaqa maaqa auqiqa ooru fiinaqa innaaruna amana kai ooruraanaura. Miqimmasee maasa duqu faqaasa moodaanaki maridaqa sia aiqama maqa maaqaki daraanianaura. Miqi qimaseeqa doo miqimmiqau.
GEN 11:5 Mi maqusana auquseeqa kisaaqa maaqa faqa usakasoofanoo Karaambaiqa qumu nindafeenoo maaqi qinau.
GEN 11:6 Maqee maasauqa moodaa maqannaasa maridaqa moodaa ufa qidaqa. Misa nári auqararee qia ainainna oosana araidaqa. Qusasaa misa nári nidimari ainainna auqeefaranoo.
GEN 11:7 Doo anifaqa inni saimbaqa ooquree misa ufa furufaramma nimaqasaanaqa sia narí ufa narí ufa iriaqa.
GEN 11:8 Anutufa miqi qimasee misa ufa furufaramma nimaqasoofaqa misa mi maqusana auquanee quna minniseeqa maqa maaqaki daraaniqau.
GEN 11:9 Mi maqusana auqu Babiroonnia fee qimariqau. Miqoo karaambaiqa fannoo misa ufa furufaramma nimaqoonara miqi qimasee auqu raqau. Miqoo maruna Karaambaiqa furufaramma nimaqasoofaqa aiqama maqa maaqaki daraaniqau.
GEN 11:10 Seemmana saaqari kambiqoosa maaqimmiqa mariqau. Nammari aufirafa taika fufanoo miqooqari qaara aukuana aiqarama fufanoo Seemmafa 100 aukuana maraseenoo akoonaiqi Arafasadana maqanau.
GEN 11:11 Arafasadana maqooqooqari Seemafa 500 aukuana marinoo akoonaiqi maanaaqa moomoo maqanau.
GEN 11:12 Arafasadafa 35 aukuana maraseenoo narí faiqi Seeraana maqanau.
GEN 11:13 Seeraana maqooqooqari Arafasadafa 403 aukuana maraseenoo akoonaiqi maanaaqa moomoo maqanau.
GEN 11:14 Seeraafa 30 aukuana maraseenoo narí faiqi Eebeerana maqanau.
GEN 11:15 Eebeerana maqooqooqari Seeraafa 403 aukuana maraseenoo akoonaiqi maanaaqa moomoo maqanau.
GEN 11:16 Eebeerafa 34 aukuana maraseenoo narí faiqi Peereekana maqanau.
GEN 11:17 Peereekana maqooqooqari Eebeerafa 430 aukuana maraseenoo akoonaiqi maanaaqa moomoo maqanau.
GEN 11:18 Peereekafa 30 aukuana maraseenoo narí faiqi Reeuna maqanau.
GEN 11:19 Reeuna maqooqooqari Peereekafa 209 aukuana maraseenoo akoonaiqi maanaaqa moomoo maqanau.
GEN 11:20 Reeufa 32 aukuana maraseenoo narí faiqi Seerukana maqanau.
GEN 11:21 Seerukana maqooqooqari Reeufa 207 aukuana maraseenoo akoonaiqi maanaaqa moomoo maqanau.
GEN 11:22 Seerukafa 30 aukuana maraseenoo narí faiqi Naqoorana maqanau.
GEN 11:23 Naqoorana maqooqooqari Seerukafa 200 aukuana maraseenoo akoonaiqi maanaaqa moomoo maqanau.
GEN 11:24 Naqoorafa 29 aukuana maraseenoo narí faiqi Teeraana maqanau.
GEN 11:25 Teeraana maqooqooqari Naqoorafa 119 aukuana maraseenoo akoonaiqi maanaaqa moomoo maqanau.
GEN 11:26 Teeraafa 70 aukuana maraseenoo Abarammana faqa Naqoorana faqa Qarana faqa maqanau.
GEN 11:27 Teeraana faiqi namu mi oosanausa maaqimmiqa mariqau. Teeraafa Abarammana faqa Naqoorana faqa Qarana faqa nikoofa marinau. Qaranafa Rootana akoofa marinau. *
GEN 11:28 Qaranafa Babiroonia maqa maaqaki narí maqusa Uraa maqusaki mina akoofa faqa kaqi marufanoo kuqinau.
GEN 11:29 Abarammafa Sarai nammarina maranau. Naqoorafa Mirakaa nammarina maranau. Mirikaa nammarifa Qarana araamuna maranau. Qaranafa Isakana akoofa marinau.
GEN 11:30 Sarai nammarifa sia faiqi maqoofa aafa anaasee marinau.
GEN 11:31 Teeraafa narí amaaku Abarammana faqa Qarana amaaku narí anaiqi Rootana faqa Abarammana anaaqa narí aanaakuqu Sarai nammarina faqa Babiroonia maqa maaqaki Uraa maqusaindari nifiqeenoo Kannaana maqa maaqai fiqau. Teeraafa narí aiku asauku faqa Kannaana maqa maaqai fuanee qimasee Qarana auqu amarana maqusai oonu aana kasaaqai mariqau.
GEN 11:32 Miqoo mariiufanoo Teeraafa miqoo kuqinau. Teeraana aukuana aiqama moodaanaki 205 maraseenoo kuqinau.
GEN 12:1 Abarammana akoofa Teeraafa kuqufanoo Karaambaiqa Abarammana qimaminoo qinau. Aneenna maqa faqa aneenna aiku asauku faqa aneenna akoona maqa maaqakinaa ainaina faqa quqasee minniseenana maqa maaqa moo uqafiqaanana miqoo fua.
GEN 12:2 Miqoo oonu marinaqa ani faiqi moomoo amiananoo maqa maaqa qumbiqafi marifara. Qinee ani amiqi amiqimma amaqasaanana anee auqu faqaafa marinnaranoo. Miqimma finaqa anisaaqaraa amiqi amiqirana faiqí anaasee mareefaranoo.
GEN 12:3 Aniara amiqi amiqi mariasa qinee faqa quandafiqa misa faqa amiqi amiqi ianaura ani aqurarainausa qinee faqa quandafiqa misa faqa niquraraanaura. Aniaroo qimasee misa aiqama maqasaaqaraasa amiqi amiqimma nimaqaanaura.
GEN 12:4 Abarammafa 75 aukuana maraseenoo Qarana maqusa minniseenoo Kannaana maqa maaqai Karaambaiqa qimamundee inoo fufanoo Rootafa mina faqa finau.
GEN 12:5 Abarammafa narí anaaqa Sarai nammarina faqa narí akaqa faiqi Rootana faqa narí moomoo qumiasana ainainira faiqiuqa faqa nifiqeenoo Arana maqasaa mariuna nifiqeenoo Kannaana maqa maaqai finau.
GEN 12:6 Misa Kannaana maqasaa oonuroofanoo Abarammafa oonuree aniree inoo niniiufanoo Seekeemma maqa maaqaki naaquqara maqusasaa tatufirana suqee maruqoo Mooree maqa maaqaki naaquqara saqari atukaki aniranau. Mi aukuanna Kannaana maqannaasa mi maqa maaqanaki kaqi mariqau.
GEN 12:7 Abarammafa mi maqusanai oonu marufanoo Karaambaiqa akooqoo mina afusaa kooroomafinoo qimaminau. Qinee maa maqa maaqanara ani qimamunnana ani aiku asauku nimianaura. Miqi qimasoofanoo Abarammafa miqoo mina afusaa kooroou Karaambaiqana tatufirana suqa amira qainda auqusee tatufirana suqa aminau.
GEN 12:8 Suqa amiseenoo Abarammafa findifinoo aaqana maqa maaqai ooru finau. Beeteera maqusa fannoo suani keeqoo qaannai marufanoo suani oosana qaannai Ai maqusa marufanoo qambaanai narí uiqaana maqa usakanau. Usakaseenoo miqoo Karaambaiqa aadau tatufira ooni qainda faqa auquseenoo Anutuna aaramaseenoo innaaru qimarinau.
GEN 12:9 Miqinoo faiqanoo fifiiufanoo suani afu dinni ataaqeenni Kannaana maqa maaqa dinni atinni Isipa maqa maaqa oosira qaannai ooquranau. Neekeefa maqasaa ooqu finau.
GEN 12:10 Miqoo marufanoo aandaroo firaafa Kannaa maqannaasa narinau. Abarammafa mina qafoofanoo mandaikufanoo narí aiku asauku faqa narí ainaina namu faqa Isipa maqasaa ooqu finau.
GEN 12:11 Isipa maqa maaqa adeedi rama soofanoo Abarammafa narí anaaqa Sarai nammarina qimaminoo qinau. Ani afaaqa amiqirafa mariananoo.
GEN 12:12 Isipa maqannaa ani qafamasee, oo mina aanaaqammi maqi qimasee qini darusee ani maree foora.
GEN 12:13 Anee aneennara qiniara auna fee qinaqa sia darifaqa anindiri kaqi marianau.
GEN 12:14 Abarammafa Isipa maqa maaqai aniroofaqa Isipa maqannaasa Sarai nammarina qafamasee boo amiqira fee qiqau.
GEN 12:15 Isipa maqannaasa rakisirafa Faraoona mina faiqi namu Sarai nammarina qafamaseeqa Faraoona qimamiqa qiqau, qoo amiqira manaaqa fee qufanoo Faraoofa qimannimufaqa Sarai nammarina ani mareeqee Faraoona kinna maaqaki quqaqau.
GEN 12:16 Mina akiiqara Faraoofa Abarammana amiqi amiqimmaseenoo sipsipauqa faqa mimmiuqa faqa burimakauqa faqa doonkiuqa faqa kammeerauqa faqa ainainira faiqiuqa faqa maanaaqauqa faqa feefaru Abarammana aminau.
GEN 12:17 Faraoofa Sarai nammarina maroonara Karaambaiqa fannoo oosana oosana manda aurirana Faraoona faqa mina maaqaki marusaki faqa quqanau.
GEN 12:18 Faraoofa mina qafamaseenoo Abarammana aaramaseenoo aqinoo qinau. Anee qini naqaa fee maqimaqeenee. Anee nanaree sia qini qinaaqa fee qimasee qimaqiminanee.
GEN 12:19 Anee nanaree qini dauna fee qianaqee qinee qeeqara qinaaqara mareeqee qeeqa maaqaki quqee fee. Maa ani anaaqa marinoo, doo ani afiqee fifua.
GEN 12:20 Faraoofa miqi qimaseenoo narí sundiauqa niqiqoofaqa Abarammana faqa narí anaaqa faqa narí aiqama ainaina faqa nifiqa maree nári maqa atinni munusoofaqa fiqa.
GEN 13:1 Abarammafa Isipa maqa maaqakiqari suani afu dinni ataaqeendari dinni ataaqeenni Kannaana maqa maaqai qumurandee narí anaaqa faqa Rootana faqa narí aiqama qumiasana faqa maree finau.
GEN 13:2 Abarammafa ainaina faqaafa marinau. Sipsipa faqa mimmi faqa burimakau faqa siruaa faqa koora faqa faqaafa marinau.
GEN 13:3 Mifa miqooqari quqasee fifiiufanoo Beeteera maqusa amummaqa fimarinau. Mifa ooqai narí Beeteera maqusa faqa Ai maqusa faqa qambaana uiqaana maqa usakaqooqoo ooqu ranau.
GEN 13:4 Ooqai mifa miqoo tatufira qainda auquqoo ooqureenoo Karaambaiqa innaaru qimamaqanau.
GEN 13:5 Rootafa faqa sipsipauqa faqa mimmiuqa faqa burimakauqa faqa faiqi anaasee faqa narí ainainira faiqiuqa faqa maanaaqauqa faqa Abarammana faqa nimariqau.
GEN 13:6 Miqanda moomoo aandau ainaina faqaaqanda maridaqa aandauqa neemaru andandafa sia amanaikufaqa sia amana moodaanaki mariaqaa inoo marinau.
GEN 13:7 Miqiqa marufanoo Abarammana aandausaa rakisi marusa faqa Rootana aandausaa rakisi marusa faqa andanda narana saara tinooriqau. Mikari Kannaana maqannaasa faqa Peerisa maqannaasa faqa mi maqanasaa kaqi mariqau.
GEN 13:8 Abarammafa mina qafamaseenoo Rootana qimaminau. Maasa moodaa oosana maridaqa anee faqa qinee faqa sia tinooria, ani faiqi namu faqa qini faiqi namu faqa sia tinooriaqa.
GEN 13:9 Maqa maaqa firaatiamma maridanoo ania, anindiri rainaa, anee aninna aidimari maqana qafamasee utaaqamasee mi tinai finaqa qinee moo tinai fuanaura.
GEN 13:10 Miqi qimasee qimamufanoo Rootafa afu maqaidanoo Yooradanna noopundu dinni marufanoo Sooara maqusa dinni marufanoo mi qambaanna nammari moomoo marinau. Karaambaiqa kadidakiara foora moomoo nammari marinau. Amiqinoo maridanoo Isipa maqa maaqara foora marinau. Mi aukuannai Karaambaiqa Soodoomma maqusa faqa Koomoora maqusa faqa sia naru kammuqoo Rootafa mi maqa maaqana qafanau.
GEN 13:11 Rootafa qafamaseenoo aiqama Yooradanna afaasasaa ooqu mariraree qimaseenoo suani oosanai fimaru aatata finau. Miqi mandeeqara rainaqau.
GEN 13:12 Abarammafa Kannaana maqa maaqai kaqi marufanoo Rootafa Soodoomma maqusa aaqa maqusauqa dinni dinni marufanoo qambaana noopunduki narí uiqaana maqa usakanau.
GEN 13:13 Soodooma maqannaasa kaaqa mandainaina maree marusa maridaqa. Karaambaiqa afusaa oosana oosana mandainaina uqanna auqee mariqau.
GEN 13:14 Rootafa fifufanoo Karaambaiqa Abarammana qimaminoo qinau, anee mariannaqooqari amiqimmasee aiqama atinai aiuqia.
GEN 13:15 Anee qafaanna maqa maaqana ani faqa anisaaqari kambiqainausa faqa nimisaananoo naaruara naaruara innindi kamminoo mariannoo.
GEN 13:16 Qinee ani aiku asauku asumu moomoo kambiqa nimaqaanaura. Sia amana moo fannoo asaana rirana amanaikiannoo. Nukuda aiqama amana asaana rifaranoo, ani faiqi namu kai sia amana nisaana rifaranoo.
GEN 13:17 Doo maqee oonuree aiqama maqa maaqa qinee ani amiannana aiuqia.
GEN 13:18 Abarammafa minara iriseenoo narí uiqaana maaqa rapeemma mareenoo Heebaroona maqa maaqaki Mamareena saqariuqa atukaki ooqureenoo miqoo Karaambaiqa tatufira qainda ooninnai auquseenoo tatufirana suqa aminau.
GEN 14:1 Mi fasannai Amarafeerafa Babiroonia maqannaa karaambaiqa marinau. Mi aukuannai Eerasaa maqannaa karaambaiqa Ariookafa faqa Eeramma maqannaa karaambaiqa Keedooraoomafa faqa Kooimma maqannaasa karaambaiqa Tidarafa faqa minamusa aiqama nári sundiauqa moodaanaki nifiqeeqa Soodooma maqannaasa narirara fiqau.
GEN 14:2 Misa moodaannai qisauku karaambaiqauqa faqa rakiraree qimaseeqa fiqau. Soodooma maqannaa karaambaiqa Beerana faqa Koomoora maqannaa karaambaiqa Birasana faqa Adama maqannaasa karaambaiqa Sinabana faqa Seeboyima maqusanaasa karaambaiqa Seemeebeerana faqa Beeraa moo auqu Sooara maqanna karaambaiqa faqa mi moodaannai qisauku karaambaiqausa faqa rakiraree qimasee qumiqau.
GEN 14:3 Mi moodaannai qisauku karaambaiqausa rufiasee Sidimma noopunduki suqiqau. Maqee mi noopundunaki ooruku nammari rafaaqa finoo marifaqa mina auqu raidaqa Kuqira Nammari fee qidaqa.
GEN 14:4 Qisaukuqara taikasee qikunni ooqu qaara marasee 12 aukuanaki Keedooraoomana asauku ameemaanai mariqau. Qisaukuqara taikasee qikunni ooqu qaaramoo marasee 13 aukuanaki mina ufa rukiee mariqau.
GEN 14:5 14 aukuannasaa Keedooraoomafa findifinoo aqoonna karaambaiqauqa faqa nári rakira fasiqauqa faqa findifiqa ooqu fiqau. Ooqu fiu faqa moo maqannaasa ooqi naru maree fiqau. Reefaimma maqannaasa Aseetaroota Karanaimma maqusaki nariqau.
GEN 14:6 Naruseeqa Susima maqusanaasa Qamma maqa maaqaki faqa nariqau. Naruseeqa Eemimma maqannaa faqa Kiriataimma afaasa maqa maaqaki marusa nariqau. Miqooqari ooquree Qoora maqannaasa Eedoona aaqanasaa marusa nariqau. Misa naru mareeqa Eeraparanna aadana maqa maaqa atinni munu quqaqau.
GEN 14:7 Miqooqari oonu randeeqa Kadeeasa maqusai ooqeenaa auqu Eenamisapatee qimaru maqusaanaasa faqa nariqau. Amareekana aiku asauku misaqa maru maqusausa aiqama rafaaqa fiqau. Rafaaqafusee Amoorana aiku asauku Qasasoona Tamara maqusaki marusa faqa rafaaqafu nimaqaqau.
GEN 14:8 Miqimmasoofaqa Soodooma maqannaa karaambaiqa faqa Koomoora maqannaa karaambaiqa faqa Adamma maqannaa karaambaiqa faqa Seebooyima maqannaa karaambaiqa faqa Beera moo auqu Sooaa maqannaa karaambaiqa faqa mi maqusa namusa karaambaiqauqa faqa nári rakira fasiqauqa faqa moodaaqoo Sidima noopunduki suqiqau.
GEN 14:9 Suqufufaqa Eeramma maqannaa karaambaiqa faqa Kooimma maqannaa karaambaiqa faqa Babiroonia maqannaa karaambaiqa faqa Eerasara maqanna karaambaiqa faqa rakirara deedaqiqau. Moodaanai qisauku karaambaiqauqa qaara faqa qaara faqa karaambaiqauqa faqa rakirara deedaqiqau.
GEN 14:10 Sidima noopunduki koorootaqa madika moomoo marinau. Soodooma faqa Koomoora maqannaa karaambaiqauqa rakiranakiqari quqasee sandaani quna mi madikausaki aqufiqau. Qaaramoo karaambaiqauqa sanda maqaraasiqa aaqanai akaraqau.
GEN 14:11 Qaara faqa qaarafaqa karaambaiqauqa Soodoomma maqannaasa faqa Koomoora maqannaasa faqa aiqama ainaina uqanna maraqau. Afuqakinaa nara ainaina faqa maree fiqau.
GEN 14:12 Rootafa Abarammana akaqa amaaku fannoo Soodooma maqusai marufaqa mina faqa mina qumiasana faqa maraqau.
GEN 14:13 Faiqí moo fannoo rakiranakiqari sandeenoo Abarammafa Qeeburu maqannaa fasiqa fannoo Amoora maqannaa fasiqa Mamareena saqariuqa atukaki marufanoo ooru qimaminau. Mamareefa narí akaqaqara Eesakoorana faqa Aneerana faqa minamusa Abarammana aqoondi mariqau.
GEN 14:14 Abarammafa Rootana mara maree funara iriseenoo narí ainainira faiqiuqaki nimudaanai qimarusa narí uiqaana maqusakinaasa 318 fasiqa nifiqanau. Nifiqaseenoo qimannimufaqa qaara faqa qaara faqa karaambaiqauqa nifaqamaree Dannaa maqa maaqai nianai fiqau.
GEN 14:15 Ooruree namuqaa nindafamaseenoo narí faqa fusa rainaseenoo eendaki namuqaa maruqoo oonureeqa naru nindaqaaqa qiqau. Mifa misa nifaqa maree suani afu dinni ataaqeenni Damasakusa maqusa fiaaqaree Hoobaa maqusaki munusaqau.
GEN 14:16 Ooru randee qumureeqa Abarammafa Rootana faqa mina qumiasana faqa aiqama aanaaseeuqa faqa rumbee fusauqa faqa aiqama nifiqee aniqau.
GEN 14:17 Abarammafa Keedooraoommana faqa mina aqoonna karaambaiqauqa faqa naruseenoo aniroofanoo Soodooma maqanna karaambaiqa fannoo mina qafarara Saavee noopunduki moo auqu Kinna noopunduki fee qimaruqoo paqurinau.
GEN 14:18 Sareema maqannaasa karaambaiqa auqu Meerakiseedeekafa uriqarara Anutuna aanaiqikirafa marufa feemu faqa uainna nammari faqa Abarammana mini aminau.
GEN 14:19 Meerakiseedeekafa amiseenoo maaqi qimaseenoo amiqi amiqira ufa qimamaqanau. Uriqarara Anutufa innaaruna faqa maqa faqa auqufa mifa kai Abarammana amiqi amiqiannoo.
GEN 14:20 Kaaqa uriqarara Anutufa kai namuqaa mareeqee ani asaukuki quqeenoo miqinara Anutuna amoo qiaqa. Miqi qimasee amiqi amiqira ufa qimasoofanoo Abarammafa namuqaa ainaina maraqoona qisaukuqaraki rainaseenoo moodaaki Meereekiseedeekana aminau.
GEN 14:21 Amisoofanoo Soodooma maqannaa karaambaiqa Abarammana qimaminoo qinau. Anee rakiranaki maraanna ainainausa aneennara mareenana qini faiqí anaasee kai qimia.
GEN 14:22 Miqi qufanoo Abarammafa asauku uqeeraseenoo qinau. Qeeqa qisauku uqeereeqa, kaaqa uriqarara Anutuna innaaruna faqa maqa faqa auquna afusaa uqeerasee qimamidaqa.
GEN 14:23 Sia uqanna ani ainaina kaqikaa ainaina maraanaura tirita faqa niku aanaamu sanda faqa ririmma sia maraanaura. Anee qiniara maasa ainaina maraseenoo moomoo ainaina faqaasee qidanoo mifoo qinoora. Sia uqanna maraanaura.
GEN 14:24 Qinee sia uqanna moo ainaina qeeqara maraanaura. Qini faqa rakiranaki fuasa misa namasaa ainainnara kai doo maree fee qidaqa. Qini qiqoodi namu Aneerafa faqa Eesakoorafa faqa Mamareefa faqa misa kai nári nimanasaa maraaqa.
GEN 15:1 Rakirana taikaseenoo marufanoo Yaaweefa Abarammana afu pisipasa mandeenoo qimaminau. Abaramma anee sia rufiaa. Qinee ani saqariara foora anisaa ititafuananoo sia moo fannoo ani aruannoo. Qinee mina akiiqara firaa ainaina ani amianaura.
GEN 15:2 Abarammafa mi ufana iriseenoo narí qimaminoo qinau. Oo uriqarara karaambaiqa anee nana qumiasanee qini qiminnaree qinee faiqi siaisa maridaqa. Maa qini ainainira faiqi auqu Eerieseerafa Damaskusa maqusaindaraafa mifa kai maridanoo qinee kuquananoo qini ainaina maraannoo.
GEN 15:3 Anee faiqi asumu sia qini qimiananoo qini ainainira faiqi uqakiqari moo fannoo qini qumiasana maraannoo.
GEN 15:4 Miqi qimaseenoo Abarammafa irufanoo kafaa Karaambaiqa qimaminoo qinau. Maa ani ainainira faiqi Eerieseerafa sia ani qumiasana ainaina maraannoo. Aninna faiqi uqanna fannoo ani ainaina maraannoo.
GEN 15:5 Miqi qimaseenoo Karaambaiqa Abarammana afiqee madaanai muquseenoo qinau. Innaarunai qafamaseenana fasau amanee anee asaana rinnaree. Aniki ani aruakinausa miqimmasee kambiqeefara.
GEN 15:6 Abarammafa Yaaweena mi ufana iriseenoo narí saqarikirana mi ufanasaa rusisee marinau. Miqunara Karaambaiqa asasammaseenoo Abarammana mareeqee narí aqoondikiranaki quqanau.
GEN 15:7 Miqi qimasee Karaambaiqa Abarammana qimaminoo qinau, qinee Karaambaiqa ani Ura maqusakinaana Babiroonia maqa maaqaindaraana afiqee minisee maa maqa maaqana amiananoo anindikianifee qimasee afiqee aniqiafana.
GEN 15:8 Miqi qufanoo Abarammafa iramirinoo qinau. Oo uriqarara Karaambaiqa qinee naqi fee masee qinindi kammiannoo fee qimasee irianauree.
GEN 15:9 Miqi qufanoo Karaambaiqa narí qimaminoo qinau. Anee burimakau faqa mimmi faqa sipsipa faqa qaaramoo aukuana mararausa faqa nakipuruna faqa kukuma faqa maree mini qimia.
GEN 15:10 Miqi qimasoofanoo Abarammafa mi aandausa Anutufa maruqoo maree mini quqaseenoo minauqa qambaana kai afoommaseenoo dinni moo afooirana dinni moo afooirana qaaramau irasasaa quqanau. Ufiniqara kai sia afooinau.
GEN 15:11 Meemoonauqa mi aandausa narara aniroofanoo Abarammafa niiqaaqinau.
GEN 15:12 Suani keeqarana namu faqa eenoofanoo Abarammafa afuki qaunduarufanoo faiqaqeeidanoo qaini marufanoo firaa rufiarafa faqa maparaairafa faqa Abarammana afaaqai aqufinau.
GEN 15:13 Miqida rufiee marufanoo Karaambaiqa Abarammana qimaminoo qinau. Anisaaqari kambiqainausa aanaamuruara foora moo maqannaasa maqasaa oonu maridaqa ainainira faiqikiqa marifaqa 400 aukuanaki manda fitiqnarana nimifaranoo.
GEN 15:14 Miqi marifaqa qinee mi maqannaasa mi fitiqnarana nimimariana akiiqara aupurarana nimianaura. Misa mi maqa maaqana minnisee oonurandee aniqa moomoo qumiasana maree anifaranoo.
GEN 15:15 Aniara maaqi qiqa anee asooaqeenana asooaranaki kuqufinaqa akundaaqa.
GEN 15:16 Ani aiku asauku qaara faqa qaara faqa oosana mi rumbaranakiqari oonu randee anifaranoo. Qinee sia Amoora maqannaasa dauni naru taikaanaura. Misa kaaqa mandaika uqanna ifaqa miqoo misa naru nindaqaaqa masee ani aiku asauku miqoo quqaanaura.
GEN 15:17 Suani keeqoofanoo eendirara mammandufanoo Abarammafa qafoofanoo qafeeki idamuna namu faqa qooma namu faqa akooqoo narí kai kambiqafinoo aandau afoomma dinni dinni quqaqoona qambaana runna finau.
GEN 15:18 Doo aaqee mikari kai Yaaweefa Abarammana faqa moodaanaki kira ufa qinau. Qinee maa maqa maaqana ani aiku asauku nimianauranoo. Isipa maqannaa nammari dinni oosirafa ani rameeqeenoo firaa nammari dinni Eeufarateesa nammari mariannoo.
GEN 15:19 Keenaa maqusanaasa maqa faqa Keennisa maqusanaasa maqa faqa Koodamoona maqusanaasa maqa faqa Qeeta maqusanaasa maqa faqa Peerisa maqusanaasa maqa faqa Reefaimma maqusanaasa maqa faqa Amoora maqusanaasa maqa faqa Kannaana maqusanaasa maqa faqa Kirakasa maqusanaasa maqa faqa Yeebusa maqusanaasa maqa faqa miqimmasee maqannaasa maqa faqa ani aiku asauku nimianaura.
GEN 16:1 Abarammana anaaqa Sarai nammarifa mifa qaafa anaasee marinau, sia faiqi maqanau. Mina ainainira maanaaqa Isipa maqannaa maanaaqa marinau. Mina auqu Qakaara nammarifa marinau.
GEN 16:2 Sarai nammarifa nári oosana maraseenoo Abarammana qimaminoo qinau, anee iria, Anutufa sia faiqi qini qiminoo. Minara maa qini ainainira maanaaqa mara sainanoo mifa ani faqa finoo aqbee faiqi maqa sainaqa qinee qeeqara maraanaura. Miqi qufanoo Abarammafa eedoo qimaseenoo maranau.
GEN 16:3 Abarammafa qisaukuqara taikasee aukuana Kannaana maqa maaqai marufanoo Sarai nammarifa narí ainainira maanaaqa Qakaara nammarina Abarammana aminau.
GEN 16:4 Abarammafa Qakaara nammarina faqa aana fufanoo faiqi maranau. Qakaara nammarifa amuaquqaika mafufanoo nasuridanoo narí aqoonnana Sarai nammarina ramoo ramaa ira ufa qimamaqanau.
GEN 16:5 Miqufanoo Sarai nammarifa Abarammana qimaminoo qinau. Ani oosanasaa Qakaara nammarifa qini fidiaqaamma qimaqaidanoo. Qinee qeeqa kai mina ani amisaafananoo amuaquqaika mafinoo qini uridaaqa raidanoo. Karaambaiqa fannoo kai anindiri ufa rainaannoo. Anee fee, qinee fee andeeqee fee.
GEN 16:6 Abarammafa kafaa narí qimaminoo qinau. Doo amana ani ainainira maanaaqa ani ameemaanai maridanoo. Naqaamma amaqararee fee qimasee iridanee, doo miqia. Sarai nammarifa Akaara nammarina maqee maqee oofana qaidanoo ari aqimarunara quqasee sandanau.
GEN 16:7 Qakaara nammarifa amaaqa firaree qimasee Suraa maqa maaqaki fimaru aatata sandee fifiiufanoo aadana maqa maaqa qambaanai nammari kaqikaafa ururee maruqoo Karaambaiqa angiroo fannoo Qakaara nammarina paqurimmasee qimaminoo qinau.
GEN 16:8 Qakaara nammari, Sarai nammarina ainainira maanaaqa, anee yaindari fee anidanee maaqooqari yai fee fidanee. Miqi qufanoo Qakaara nammarifa qinau, qeeqa rakisirana Sarai nammarina aaqu rufiee sandaidaqa.
GEN 16:9 Angiroo fannoo minara iriseenoo maaqi qimasee qimaminau, doo findi finana aneenna rakisira anaasee marinnai kafaa anirandee oonureenana mina ainainira manaaqaikia.
GEN 16:10 Angiroo fannoo kafaa qimaminoo qinau. Qinee moomoo asumu ani amianaqa sia amana asaana rifaranoo.
GEN 16:11 Maqee ani aranandaki faiqi rinoo anee akoonaiqi maqeennaranoo anee mina auqu Isamaeera nee qia. Karaambaiqa fannoo anee aupuraranakiqari mina aaramasee faaqa ruannana irinara minara mi faiqina auqu Isamaeera nee qia.
GEN 16:12 Mi faiqifa kaasau fainiara foora mariannoo. Mifa aiqamausa namuqaakamma nimaqainaqa misa faqa narí namuqaakamma amaqeefaranoo. Mifa narí ainaina rakeemasee aaduma mariannoo.
GEN 16:13 Qakaara nammarifa narí kai qimirinoo qinau. Qinee kuqaa fee Anutuna qafamasee fee sia kuqirai kaqi maridee qimannimianauree. Miqi qimasee mina qimamu karaambaiqanara niqafee mari Anutu fee qinau.
GEN 16:14 Miqooqari misa mi nammari dikaandana auqu reeqa kaqi marira Anutufa qini qiqafai nammari dikaanda fee qiqau. Mi nammari dikaandafa Kadeesa maqusa dinni Beereeda maqusa dinni qambaana marinau.
GEN 16:15 Qakaara nammarifa kafaa anirandee oonureenoo faiqi maqasoofanoo Abarammafa mina auqu Isamaeera nee qinau.
GEN 16:16 Mi aukuanna Abarammafa 86 aukuana faqaafa marufanoo mina faiqi kambiqanau.
GEN 17:1 Abarammafa mariufanoo 99 aukuana marasoofanoo Karaambaiqa mina afusa kooroo mafi qimaminau. Qinee aiqama afeeka faqaa Anutusa maridaqa. Anee aiqama kari qini ufa qaindusidana andeeqara ainaina kai auqaa.
GEN 17:2 Qinee ani faqa qeeqa moodaanaki kira ufa qimasee anisaaqari asumu moomoo kambiqa nimaqaanaura.
GEN 17:3 Abarammafa mi ufana iriseenoo oorindari maqasaa mapamufufanoo Anutufa maaqi qimasee qimaminau.
GEN 17:4 Qinee maa moodaanaki kira ufana ani faqa qidaqa. Qinee kuqaa qima afeekaikidaqa. Anee moomoo maqannaasa ninaakufa marinnaranoo.
GEN 17:5 Doo maqee ani auqu Abarammafa marina maqee fuka auqu amiqa. Abaraqaammanee qianaura. Qinee ani moomoo maqannaa ninaakufaika maisaannanara ani auqu Abaraqaammanee qianaura.
GEN 17:6 Qinee ani faiqi asumu moomoo amianaqa misakiqari akaqausa karaambaiqa marifara. Ani asaifaqausa moomoo maridaqa moomoo maqannaa marifaranoo.
GEN 17:7 Qinee qeeqa qima afeekaikira ufa ani faqa ani asaifaqausa naaru kambiqainausa faqa qiafannana naaru marira moodaanaki kira ufara foora rakisianaura. Qinee ani faqa ani asaifaqausa Anutusa marianaura.
GEN 17:8 Anee asaqiraa faira foora maa maqanasaa mariannana qinee ani faqa ani asaifaqausa faqa nimianaura. Nimiananoo aiqama Kannaana maqa maaqa fannoo ani asaifaqausaindi kamminoo naaru naaru marinaqa qinee misa Anutusa marianaura.
GEN 17:9 Miqi qimaseenoo Anutufa kaifaa Abaraqaammana qimaminoo qinau. Anee faqa eedoo qimasee qini qima afeekai kira ufamau aneenna asaifaqausa naaru kambiqainausa faqa fuaqa.
GEN 17:10 Anee faqa ani asaifaqausamara faqa aiqama eedoo qimasee akoonaiqi faiqiuqa nifaaqa ati aukuaqa.
GEN 17:11 Maaqooqari aiqama akoonaiqi faiqiuqa maqasaifanoo 8 faasaana aiqaramafinaqa nifaaqa ati aukuaqa. Ainainira faiqiuqa inniki mariasa faiqi namu faqa nianaindaraasa feefaurumma quqaqaafaqa inniki mariasa faiqi namu faqa nifaaqa ati aukuaqa. Miqimmasaifanoo mifa qinee faqa innee faqa moodaanaki kirana uqannifiqaannoo.
GEN 17:13 Aiqama uqanna nifaaqa ati aukuaqa. Aukusaifanoo mifa inni nifaaqai qini moodaanaki kira ufa naaruara marianinnanara koorooiannoo.
GEN 17:14 Inniki qari akoonaiqi moo fannoo sia afaaqa ati aukinafa marinaqa sia qini faiqí aanaaseeki mariannoo fee qianaura. Mifa qini qima afeekaikira ufamau sia finara sia inniki mariani.
GEN 17:15 Kafaa Anutufa Abaraqaammana qimaminoo qinau, sia aneenna aanaaqara Sarai nammarinee qia. Maqee mina auqa Saraqa nammarifa mariannoo.
GEN 17:16 Qinee Saraqa nammarina amiqi amiqi maisaananoo faiqi akoonaiqi ani maqa amiannoo. Mifa moomoo maqannaasa ninoofa marinaqa mina faiqi namukiqari akaqausa karaambaiqauqa marifaranoo.
GEN 17:17 Abaraqaammafa mi ufana iriseenoo maqasaa mapamu finoo naanaidara qidanoo qinau. Amanee 100 aukuana marara fasiqa fannoo faiqi maqaannoo fee Saraqa nammarifa faqa 90 aukuana mararafa amanee faiqi maqaannoo fee.
GEN 17:18 Miqi qimaseenoo Abaraqammafa Anutuna qimaminoo qinau. Naqaa saina Isamaeerafa qini ainaina maraaqaana ifanee.
GEN 17:19 Miqi qufanoo Anutufa qimaminoo qinau. Ani anaaqa Saraqa nammarifa ani faiqi akoonaiqi maqasainana mina auqu Isakee nee qia. (Maasa ufakiqari Isakeena auqu naanaidara qiranee qimaqoofanoo.) Qinee ani faqa moodaanaki kira ufa quqaunafa Isakeenasaa faqa minasaaqari naaru naaru kambiqainausasaa faqa mariannoo.
GEN 17:20 Isamaeerana faqa anee qianandee, mina faqa amiqi amiqi ianaura. Mina faiqi namu moomoo uqanna kambiqeefara. Akoonaiqiuqa qisauku qara taikasee qikunni ooqu qaaraqanda 12 marasee uriqararausa marifara. Mina saaqari kambiqainausa firaa maqannaa marifaranoo.
GEN 17:21 Moo aukuana maa quqoonnanasaa kai Saraqa nammarifa ani faiqi Isakeena maqannoo. Qinee qeeqa moodaanaki kira ufa minasaa quqaqaana mariannoo.
GEN 17:22 Anutufa aiqama maa ufana Abaraqaammana qimamiseenoo doo quqasee finau.
GEN 17:23 Fifufanoo Abaraqaammafa Anutuna ufa mau finoo mi faasaanna kai narí faqa narí amaaku Isamaeerana faqa narí ainainira faiqiuqa faqa narí ainainiranaki marida maqaqoo faiqisa faqa aiqama nifaaqa ati aukinau.
GEN 17:24 Abaraqaammafa 99 aukuana marinoo narí afaaqa ati ateeka aqinau. Isamaeerafa 13 aukuana marasoofanoo mina afaaqa ati ateeka aqinau.
GEN 17:26 Moodaa faasaana kai Abaraqaammafa faqa narí amaaku Isamaeerafa faqa narí ainainira faiqiuqa aiqama nifaqa ati ateekaqau.
GEN 18:1 Abaraqaammafa Mamareena arookasa atukaki suani qambaanai aiqaiqa ufanoo narí uiqaana maqa kooqiki ooqu faaqee marufanoo karaambaiqa maaqimmasee mina afusaa kooroo inau.
GEN 18:2 Ooqufaaqee marufaqa faiqí qaaramoo namu anufanoo Abaraqaammafa niqafamaseenoo nári oosana mareenoo findimeeqeenoo misa anuqoo sandee oonureenoo oorindari maqasaa kummarama finoo qimanniminoo qinau.
GEN 18:3 Oo uriqararausa, qinee inni dadaaqirausa maridaqa sia qini aidaaqa raaqa.
GEN 18:4 Qinee qianaqa nammari minisaifaqa inneeqa niku nammari uqu seeqa maa saqarina atukaki adooaaqa.
GEN 18:5 Qinee akaqa narana nimiana namaseeqa afeeka mara mareeqa fuaqa. Qinee inni dadaaqianeera maaqoo aniafanoo. Innee mai anianannai qini duqu uqeeraafanoo. Minara eedoo qifaqa narana nimia. Miqi qufaqa misa qiqau. Dufi dufi doo nimina naanee qiqau.
GEN 18:6 Abaraqaammafa iriseenoo uiqaa maaqaki sandeenoo oonureenoo Saraqa nammarina qimaminau. Anee kai kaqi parauaqa amiqirana moodaa beeka marasee feemu suqa.
GEN 18:7 Miqi qimaseenoo raudamaki sandeenoo burimakau maruqoo oonureenoo burimakau aanaaqi amiqirana amaqi qumooqu kirana mara rumba mareenoo narí ainainira faiqi amisoofanoo kai kaqi ufanoo arusee suqanau.
GEN 18:8 Abaraqaammafa burimakau naamma anoona faqa naamma anoona fadameena faqa feemu faqa burimakau suqarana faqa mara maree mini nimufaqa naqau. Abaraqaammafa saqari atukaki misa faqa maridanoo narana nimufaqa naqau.
GEN 18:9 Misa namaseeqa Abaraqaammana maaqi qimasee iraqau. Ani anaaqa Saraqa nammarifa yai fee marinoo fee qufanoo mifa qinau. Maa uiqaana maqaki maridanoo fee qinau.
GEN 18:10 Miqi qufanoo misakiqari moo fannoo qinau. Moo aukuana maa quqoonnanasaa kai qinee kafaa aniraananoo ani anaaqa Saraqa nammarifa akoonaiqi faiqi maqaannoo. Miqi qimarufanoo Saraqa nammarifa uiqaana maqa kooqiki mi fasiqana aanaaqiannai ooqu faaqee idanoo irimarinau.
GEN 18:11 Miqi qufanoo Saraqa nammarisa Abaraqaamasa asooqa uqanna marufanoo Saraqa nammarifa faqa faiqi maqara aukuana ooqai taikanau.
GEN 18:12 Saraqa nammarifa minara iriseenoo narí kai naanaidara qidanoo qinau. Qinee faqa qeeqa nauraiqindiri asooqa marida. Naqimmasee fee qeeqa qifaaqi faqa aana fuanauree.
GEN 18:13 Miqufanoo karaambaiqa Abaraqaammana qimaminoo qinau. Naqaa fee ifanoo fee Saraqa nammarifa naanaidara qinoo fee. Maana qinee asooqa maridaqa naqimandee faiqi maqaanauree qinoo fee.
GEN 18:14 Nana ainainee moo ainaina Yaaweefa sia amana auqaannoo fee mifa amana aiqama ainaina auqaannoo. Qinee anoona ufa qidaqa, moo aukuana maa quqoonnasaa qinee kafaa aniraananoo Saraqa nammarifa akoonaiqi faiqi maqaannoo.
GEN 18:15 Saraqa nammarifa mina iriseenoo rufia mareennoo unna qimasee qaoo qinau, Qinee sia naanaidara qiqa. Miqi qufanoo misa uriqararafa Karaambaiqa qimaminoo qinau. Anee naanaidara qianaqa iriqa.
GEN 18:16 Mi fasiqa qaaramoo namusa Abaraqaammana faqa ooqu fiufaqa Soodooma maqusai qafee maruqoo muqunnisoofanoo Karaambaiqa narí kai qimasee irinau. Qinee auqararee qunna ainaina sia Abaraqaammana umeerama amaqaanaura.
GEN 18:18 Mina saaqari kambiqainausa firaa maqannaa marifaranoo. Aiqama maqannaasa Abaraqaammana saaqaraanannai amiqi amiqimma nimaqaanaura.
GEN 18:19 Abaraqaammafa narí faiqi namu faqa misasaaqari kambiqainausara faqa andeeqara oosanamau kai fuaqeera fuki faaki ianifeera rusandeesamummasee maraqiafana. Misa miqi faqa qinee qima afeekaikiafanna ainainausa aiqama miqimma nisaanaura.
GEN 18:20 Miqi qimiriseenoo Yaaweefa Abaraqaammana akooqoo kooroommasee qimaminau. Soodoomma maqusanaasa faqa Koomoora maqusanaasa faqa manda oosana fiqaranoo marifaqa akaqausa minara nikoo uqanna qaifaqa qimaqimiafaqa iriqa.
GEN 18:21 Qinee ooqureeqa mi fasiqa anaaseesa mi oosanna auqee mariana qafaanaura kuqaa fee unna fee maridanoo fee.
GEN 18:22 Mi qaaramoo fasiqa namusakiqari qaara qanda Soodoomma maqusai ooqu fimarufanoo Karaambaiqa Abaraqaammana faqa marinau.
GEN 18:23 Abaraqaammafa Karaambaiqa oorinni oonu reenoo iramirinoo qinau. Kuqaa fee anee andeeqarausa faqa aaqee mariasa faqa aiqamee naru taikeennaree.
GEN 18:24 Qaara fasiqa niku nisauku taikasee qini qisauku qara taikasee 50 andeeqarausa mi maqusanaki marifana anee aiqamee naru taikeennaree. Kafaa 50 andeeqarausa marifana mi maqusana asumu quqeennaree.
GEN 18:25 Sia amana andeeqarausa faqa mandaikirausa faqa moodaanaki narinnaranoo. Mifa sia andeeqanoo maridanoo. Andeeqarausa faqa aaqee mariasa faqa sia amana moodaa oosana kai niminnaranoo. Aiqama maa maqanasaa mariasa siaasa marianafa andeeqara oosana kai maraa.
GEN 18:26 Karaambaiqa Abaraqaammana ufa iriseenoo qimaminau. Qinee qaara fasiqa niku nisauku taikasee qini qisauku qara taikasee 50 andeeqarausa mi maqusanaki paquriqa sia mi maqusana kuridianaura.
GEN 18:27 Abaraqaammafa mina iriseenoo kafaa qimaminau. Oo karaambaiqa qinee qifaaqa quqasee ani qimamunna ufana mi numoona minni qisaa. Qinee faiqí faiqi maridaqa aaqamammasee ani faqa moomoo kari ufa qidaqa.
GEN 18:28 Amanee 50 sia marifana 45 kai andeeqarausa marifana moodaannai qisauku 5 minaki sia marinnanara irisee narinnaree. Karaambaiqa narí qimaminoo qinau. 45 andeeqarausa mi maqusanaki marifaqa sia kuridi taikaanaura.
GEN 18:29 Abaraqaammafa mina iriseenoo kafaa qimaminau. Oo karaambaiqa qaara fasiqa niku nisauku taikasee 40 andeeqarausa marifana aiqama narinnaree. Karaambaiqa mina iriseenoo qimaminau. Qinee qaara fasiqa niku nisauku taikasee 40 andeeqarausa paquriqa mi maqusana sia kuridianaura.
GEN 18:30 Abaraqaammafa iriseenoo kafaa Karaambaiqa qimaminau. Qinee kaifaa ani qimamianana anee sia qiniara aanoo qia. Moodaa fasiqa aiku asauku taikasee qini qisauku qara taikasee 30 andeeqarausa marifana naqaa fee innaree. Yaaweefa iriseenoo qinau. Qinee 30 andeeqarausa paquriqa sia miqianaura.
GEN 18:31 Abaraqaammafa kafaa qimaminau. Qinee qifaaqa quqasee ani faqa moomoo ufa qimarunnana mi numoona minni qisaa. Mi maqusanaki moodaa fasiqa 20 kai marifana naqaa fee innaree. Karaambaiqa iriseenoo qinau. Qinee 20 andeeqarausa paquriqa sia mi maqusana kuridianaura.
GEN 18:32 Abaraqaammafa kaifaa qinau. Oo karaambaiqa sia aanoo qia. Qinee moo ufa kafaa qianaura. 10 andeeqarausa paqurimasee naqi fee innaree. Miqi qufanoo Karaambaiqa qinau. Qinee qisauku qara 10 kai andeeqarausa paquri mandee sia kuridi nimaqaanaura.
GEN 18:33 Karaambaiqa Abaraqaammana faqa ufa qimaseenoo doo ooqu finau. Ooqu fufanoo Abraqaammafa quqasee anirandee amaaqa finau.
GEN 19:1 Abaraqaammafa muqunnisoo qangirooqanda Soodoomma maqusai ooquree maqusa kooqiki qafoofanoo Rootafa miqoo ooqu faaqee marinau. Maridanoo Rootafa miqanda nindafeenoo maqeenoo oonu miqanda noorinni oorindari maqasaa rupaitama fufanoo maaqi qimasee qimanniminau.
GEN 19:2 Oo qini uriqarara qanda qinee inniqara dadaaqirara maridaqa. Innee qara qini maaqaki aniree niku nammari uqusee qini maaqaki faiqaaqa. Faiqee duna kananaana findi finaqa inneeqa finnannai fuaqa. Miqi qimasoofaqa miqanda qaoo qida qiqau. Saina maa qanda maqusa qambaana faiqaanaura.
GEN 19:3 Rootafa sandanainai qimaseenoo ufaqa miqanda mina faqa maaqaki keeqaqau. Ooru roofanoo Rootafa narí ainainira faiqiuqara qufaqa misa ooruku anoona sia qai feemuna faqa amiqira narana faqa suqasee nimufaqa naqau.
GEN 19:4 Namaseeqa faiqarara imarufaqa mi maqusaanaasa faiqí kumaaraa nauraiqi aiqama aniree Rootana maaqa fuseemma dati mambufaqa Rootana maaqi qimasee aaraqau.
GEN 19:5 Mi faiqi qanda faasai ani maaqaki keeqaa qanda yai fee maridaqee. Anee miqanda maasa qiminaqa mi qanda manda oosana nimia.
GEN 19:6 Rootafa misa ufa iriseenoo rauda mafinoo narí aanaaqianaindari kooqi ititasee qimanniminau.
GEN 19:7 Qinee qaoo qira ufa inni qimannimidaqa. Sia uqanna maa manda oosanna maraaqa.
GEN 19:8 Iriaqa, qeeqa qiraamuna qaara qanda sia faiqí faqa nuaqanda inni nimisaanaqa inneeqa iriranannai kai maraaqa. Maa fasiqa qanda qini maaqaki ani raafaqa aqoondi kammaqauna mariafaqa qinee amiqimmasee miqandasaa rakisidaqa.
GEN 19:9 Miqi qimasee qimannimisoofaqa misa aiqama maaqi qiqau. Anee moo maqannaafa maasaki ani marianafa. Yafee qifanee anee maasara qaoo qidanee. Anee nimaaraa. Sia nimaarainaqa sia ani aqoondiqara kai mandaikamma nimaqaanaura, ani faqa firaaqoo mandaikamma amaqaanaura. Miqi qimaseeqa misa Rootana afeeqa aquseeqa mina kooqi rufadaairara iqau.
GEN 19:10 Maaqakiqari Rootana aqoondiqara Rootana qumu rarisameeqee maaqaki aqusee kooqi ititaqau.
GEN 19:11 Ititaseeqa mi fasiqausa madaanai marusa aiqama nifu qimbasoofaqa kooqiara randoosia minnisaqau.
GEN 19:12 Minni soofaqa Rootana aqoondi qara iramiriqa qiqau. Maa anee marianna maqusanaki ani ati akaqausa maridee. Kai kaqi aneenna araamuqmaaka faqa airaamaku oondamara faqa aneenna atiuqa faqa aiqama nifiqee moosaa fua.
GEN 19:13 Maasa maa maqusana damunamma aquanaura. Karaambaiqa maa maqusanakina oosana oosana mandainaina kambiqaifanoo mi ufana iriseenoo maaqanda diqiqaifaqa maa maqusana kuridirara qumidaqa.
GEN 19:14 Rootafa iriseenoo narí araamuna qara nifaaqi qarara qutaaqamaqoo fasiqa qanda faqa qimanniminau. Doo anifaqa innisaimbaqa mootinai fuaqa. Anutufa maa maqusana damunirara qinoo. Miqi qufaqa mina airaamaku qara sia iriqau. Quteeti qidanoo mifoo qimasee kaqi mariqau.
GEN 19:15 Iaqoo faqa kananaana angirooqara Rootana kafaa fuki faaki qiqau. Doo kai kaqinana aneenna anaaqa faqa aneenna araamuna qara faqa nifiqee fua. Innee faqa maa maqusana namu faqa kuridifaara.
GEN 19:16 Rootafa iriseenoo oonauqee anauqee imarufanoo mina aqoondiqara mina asauku faqa mina anaaqa asauku faqa mina araamunaqara faqa qumaree rarisameeqee aanai ubeekaqau. Yaaweefa Rootanara amuqusufanoo miqinau.
GEN 19:17 Nifiqa quqasoofanoo angiroo moo fannoo qimanniminoo qinau. Innee sandamafuaqa kuqifaara. Fidaqa sia quandafi qafaaqa. Afaasasaa faqa sia kasooiaqa. Innee kuqifaara, aaqanai sandee ooru fuaqa.
GEN 19:18 Rootafa iriseenoo maaqi qimasee qimaminau. Sia aneenna qiannannai diiqaa.
GEN 19:19 Anee firaqoo qiniara amuqusifana qini kuqiranakinaana maraananoo. Aaqana nianai marifaqa minni fimariananoo mi narirafa qini faqa darinaqa kuquanoora.
GEN 19:20 Anee kaqikaa maqusa muqunni qafaidanee. Mifa adeedi marifaqa amanee qinee minni sandaanauree. Kaqikaa maqusa uqanna maridanoo qinee minni oonureeqa asumu marianaura.
GEN 19:21 Miqi qimasoofanoo angiroo moo fannoo qimaminau. Doo amana qinee minara eedoo qidaqa. Sia qinee mi maqusana kuridianaura.
GEN 19:22 Doo kai kaqi sandaa. Anee oonu rainaqa miqoo qeeqa qunna ainaina auqaanaura. Rootafa mi maqusanara kaqikaa maqusee qunara misa mi maqusana auqu Sooara fee qidaqa.
GEN 19:23 Mi kananaanna suani afu maqee uri marufanoo Rootafa Sooara maqusai oonu ranau.
GEN 19:24 Oonuroofanoo Karaambaiqa ida namu faqa koorootaqasaaqari qeemari idanara foora irana namufaqa quqasoofanoo aakuara foora Soodoomma maqusasaa faqa Koomoora maqusasaa faqa aqufinau.
GEN 19:25 Aqufinoo mi arumunaki maru maqusausa faqa aiqama faiqí anaasee faqa andanda faqa naru taikanau.
GEN 19:26 Rootana anaaqa narí afaaqi faqa sandee fidanoo oonu quandafinoo afu maqeenoo doo miqoo ooruku kammafi kisaaqa saqariara foora rakiqanoo marinau.
GEN 19:27 Moo kananaana Abaraqaammafa findimeeqeenoo Karaambaiqa faqa ufa quqoo ooqu finau.
GEN 19:28 Miqooqari Abaraqaammafa mara muami qafoofanoo Soodoomma faqa Koomoora faqa mi afaasanasaa maru maqusausaki ida muna fannoo firaafa uqanna ooru fufanoo qafanau.
GEN 19:29 Anutufa mi afaasanasaa maru maqusausa faqa maqa maaqa faqa kurididanoo Abaraqaammanara iriseenoo Rootafa mariu maqusausa naridanoo Rootana kai mareeqee kaqinni quqanau.
GEN 19:30 Rootafa Sooara maqusara rufiaseenoo narí araamuna qara nifiqeenoo amuaqu namusaa ooni aamara marunaki ooru marinau.
GEN 19:31 Mariufanoo mina araamuna indaaruqaafa inaaqianaana maaqi qimasee qimaminau. Doo maasa qikoofa asooqa maridanoo. Sia maa saqanna anindiri marasee faiqi mara qimifaqa maqara fasiqauqa maridaqa. Aiqama faiqí auqeeu oosanafa sia anindiriki maridanoo.
GEN 19:32 Doo aninaqa anindiri uainna nammari auquseeqa nári nikoona amiananoo moomoo namaseenoo furu farinaqa anindiri mina faqa sakasee faiqaa. Miqi masaifanoo anindiri nikoofa anindiri faiqi mara qiminaqa anindiri faiqi namu findifiqa mariaqa.
GEN 19:33 Miqi qimaseeqa mi eendanaki miqanda uainna nammari moomoo nári nikoona amisoofanoo neeneeseenoo furufara masoofanoo anasaafa naaree narí akoona faqa sakasee faiqanau. Uainna nammari fannoo mina furu fara masoofanoo narí araamuna auqoo ainainara sia irinau.
GEN 19:34 Kananaana anasaafa narí auna qimaminoo qinau. Faasai eendaki qinee qeeqa qikoona faqa sakasee faiqeeqa. Doo fafaa eendaki anindiri uainna moomoo kaifaa amiananoo namaseenoo furu farinana anee faqa mina sakasee faiqaa. Miqimasee aninidiri qeeqa qikoona faiqi maqasaana faiqí asumu kaqi mariaqa.
GEN 19:35 Miqi qimasee doo mi eendanaki miqanda uainna nammari moomoo nári nikoona amisoofanoo furu faramma soofanoo auna fannoo narí akoona faqa sakaseenoo faiqanau. Rootafa uainna nammari namseenoo furu faridanoo narí araamuna auqoo ainainara sia irinau.
GEN 19:36 Miqimmasee Rootana araamuna qara nári nikoona faqa faiqoonannai nimuaqu qaikiqau.
GEN 19:37 Miqimasee marufanoo indaaruqaa araamana fannoo faiqi akoonaiqi maqaseenoo mina auqu Mooaba nee qinau. Mariu fanoo Mooabafa findifinoo Mooaba maqannaasa nikoofaikamminoo marinau.
GEN 19:38 Auna fannoo mifa faqa faiqi akoonaiqi maqaseenoo mina auqu Beenaami fee qinau. Mariu fanoo Beenaamifa findifinoo Amoona maqannaasa nikoofaikamminoo marinau.
GEN 20:1 Abaraqaammafa Mamareena maqusa minni seenoo Neekeefa maqa maaqakina ooqu finau. Mifa Kadeesa maqusa dinni Sura maqausa dinni qambaana ooqu marinau. Marikinoo kafaa Keeraara maqusaki ooqu marinau.
GEN 20:2 Keeraara maqusaki kaqi maridanoo Abaraqaammafa narí aanaaqara Saraqa nammarinara qini dauna fee qinau. Keeraara maqannaa karaambaiqa mina auqu Abimeereekafa marinau. Mifa Abaraqaammana ufa iriseenoo Saraqa nammarinara mina auna fee qimaseenoo narí ainainira faiqiuqa niqiqoofaqa Saraqa nammarina mareeqeeqa Abimeereekana amiqau.
GEN 20:3 Miqoo marufanoo Anutufa Abimeereekana qaina saa kooroo qimasee qimaminau. Anee kuqinnaranoo maa anaaseena anee maraannana moo fasiqa anaaqa maridanoo.
GEN 20:4 Abimeereekafa Saraqa nammarina sia sakasee faiqanau. Minara iriseenoo Anutuna qimaminoo qinau. Oo karaambaiqa qinee andeeqarausa maridaqa anee qini faqa qini faiqí anaasee faqee narinnaree.
GEN 20:5 Abaraqaammafa narí kai Saraqa nammarinara qini dauna fee qifaqa qinee iriqa. Kafaa maa anaaseefa faqa narí afaaqiara qinoo qini qifasaa fee qinoo. Miqi qifaqa qinee mina irunanoo qini daakirafa qimaqiminoo sia aaqarafa aniki mariannoo fee qifaqa maraunanoo sia aaqarafa qiniki maridanoo.
GEN 20:6 Anutufa iriseenoo kafaa qainasaa qimaminoo qinau. Eeoo qinee iridaqa kuqaa ani aakirafa qimamifana andeeqaananoo. Qinee kai ani qumee rafaaqafunana anee sia qini mandaikamma qimaqeenana mi anaaseena faqa sakasee faiqaananoo.
GEN 20:7 Doo findi finana mi fasiqana anaaqa kaifaa narí afaaqinnai aiqainanoo fuani. Abaraqaammafa qini tamummaqara fasiqa maridanoo. Mifa aniara innaaru qinaqa iriseeqa siamma ani aruanauranoo. Anee sia mi anaaseena aiqainaqa ani faqa ani maqannaasa faqa aiqama naruanauranoo.
GEN 20:8 Abimeereekafa mina iriseenoo Kananaana eendai findifinoo narí maqannaa uriqararausa naaramaseenoo Karaambaiqa qu ufana qimannimisoofaqa firaa qoo rufiaqau.
GEN 20:9 Abimeereekafa kafaa Abaraqaammana aaramaseenoo iramirinau. Anee nana oosanee maasa qiminanee. Nana manda ainainee maasa ani amunanee anee qini faqa qini qiku qisauku faqa firaa ummaara qiminanee. Sia auqaaqaa ira oosana maasa qimiananoo.
GEN 20:10 Nana irirafee marifanee maaq inanee.
GEN 20:11 Abaraqaammafa mina iriseenoo maaqi qimasee Abimeereekana qimaminoo qinau. Qinee maaqi qimasee qimiriqa maa maqannaasa sia Anutunara rufiqee mariafaqa qini daruseeqa qini qinaaqa maree maqi qimaseeqa miqi qiqa.
GEN 20:12 Qini qinaaqa kuqaa qini dauna maridanoo qini qikoona araamuna maridanoo moo anaasee faiqi marifaqa maraqaunafa maridanoo.
GEN 20:13 Anutufa qiniara aneenna akoona maqusa minnisee anaamurinni nuannee qufaqa qinee Saraqa nammarina qimamiqa maaqi qiqiafana. Anee qiniara qini uriqarara fee qinana qiniara qini qifasaa fee qia.
GEN 20:14 Miqi qufanoo iriseenoo Abimeereekafa Saraqa nammarina kafaa Abaraqaammana aminau. Mikari mifa sipsipauqa faqa burimakauqa faqa ainainira maanaaqa kumaaraauqa faqa Abaraqaammana aminau.
GEN 20:15 Amiseenoo maaqi qimasee qimaminau. Qini maqa maaqa maridanoo. Aneenna kai aidinnaqoo maria.
GEN 20:16 Miqi qimaseenoo quanda finoo Saraqa nammarina maaqi qimaseenoo qimaminau. Doo ani afasaana siruaa munnimma wan tauseenna (1,000) amiqa, maa ummaarafa taikainaqa ani faqa mariasa ani aaqarana sia mariifoo qiaqeera. Kafaa aiqamausa aniara sia mandoosana auqee maqi qiaqa.
GEN 20:17 Yaaweefa Saraqa nammarinaki kambiqoonara iriseenoo Abimeereekana, na aiku asaukukinaa aanaaseeuqa faiqi maqara aana ititasoofaqa faiqi maqarara sia amanaikiqau. Miqiqa marufanoo Abaraqaammafa Abimeereekanara Anutufinnai innaaru qufanoo Anutufa Abimeereekana faqa narí anaaqa faqa narí ainainira maanaaqauqa faqa misa aurirana taikannisoofaqa kafaa faiqi maqarana amanaikiqau.
GEN 21:1 Karaambaiqa narí qimaqoondee inoo Saraqa nammarina amiqi amiqimma amaqanau.
GEN 21:2 Miqimmasoofanoo Abaraqaammafa nauraiqi marufanoo Saraqa nammarifa amuaqu qaikinoo Abaraqaammana faiqi Anutufa qimaqooqoo maqanau.
GEN 21:3 Maqasoofanoo Abaraqaammafa mina auqu Isakeenee qinau.
GEN 21:4 Auqu ramaseenoo qisauku dinni taikasee dinni ani qaaramoo maraseenoo 8 faasaana aiqarama fufanoo Abaraqaammafa Anutufa qimamundee inoo Isakeena afaaqa ati ateeka aqinau.
GEN 21:5 Abaraqaammafa uan handeereeta 100 aukuana faqaafa marufanoo Isakeena maqanau.
GEN 21:6 Saraqa nammarifa Isakeena maqaseenoo maaqi qinau. Anutufa asasirana faqa naanaidara qirana faqa qiminoo. Aiqamausa minara irinausa qini faqa naanaidara qifaranoo.
GEN 21:7 Miqi qimaseenoo Saraqa nammarifa maaqi qinau. Yafee moo fannoo Abaraqaammana qimaminoo Saraqa nammarifa narí faiqi maqasee amana naamma amiannoo fee qiannoo fee, sia amana moo fannoo miqi qiannoo. Miqi qimariafaqa qinee asooqa namuki Abaraqaammana faiqi akoonaiqi maqeeqa.
GEN 21:8 Isakeefa aaqoo irinoo naamma minnisoo faasaana Abaraqaammafa qoomaqa firaaqoo suqananau.
GEN 21:9 Miqimmasee mariufanoo moo kari Isipa maqannaa anaasee Akaara nammarina amaaku fannoo Saraqa nammarina amaaku Isaakeena faqa sarari marinau.
GEN 21:10 Sararimarufanoo Saraqa nammarifa mina qafamaseenoo Abaraqaammana qimaminoo qinau. Maa ainainira manaaqana faqa narí faiqi faqa niiqainaqa fuaqa. Maa anaaseena faiqi fannoo sia ani qumiasana qini faiqi mararee qinnana maraannoo.
GEN 21:11 Isamaeerafa faqa Abaraqaammana faiqi marunara Abaraqaammafa mi ufana irufanoo aundura ummaara ranau.
GEN 21:12 Miqufanoo Anutufa Abaraqaammana qimaminoo qinau. Sia faiqi aanaaqi qisanoosara amuqusiani. Anee Saraqa nammarifa qimamindee ia. Isakeena saaqari kai qinee qima afeekaikiafannandee inoo moomoo asumu kambiqeefaranoo.
GEN 21:13 Ani ainainira anaasee faiqi faqa qinee dadaaqiananoo moomoo faiqi maqasainaqa moo maqannaasara foora marifaranoo. Mifa faqa ani faiqi kai maridanoo.
GEN 21:14 Abaraqaammafa mi ufana iriseenoo moo kananaana findifinoo feemu aafaqa faqa aandau apata taquki nammari sakaseenoo Akaara nammarina uqaruma amiseenoo faiqi aakuamaqaseenoo aiqanau. Akaara nammarifa narí amaaku afiqeenoo Beeraseeba maqa maaqaki aadana maqa maaqaki ooqu maridanoo oonuree aniree ida marinau.
GEN 21:15 Aandau apata taqukinaa nammari aiqama taikafufanoo Akaara nammarifa narí faiqi kaqikaa saqari atukaki aisanau.
GEN 21:16 Aisaseenoo kaqikaaqoo kisaaqasaa oonu ooqufaqee idanoo narí kai qimirinau. Qinee sia amana qeeqa faiqi kuqirana qafaanauranoo. Miqi qimaseenoo miqoo ooqufaaqee maridanoo iki raqee marinau.
GEN 21:17 Miqi marufanoo Anutufa mi faiqina iki raqarana irufanoo innaarunaindari Anutuna angiroo moo fannoo Akaara nammarina qimaminoo qinau. Akaara nammari anee nanaree ummaara maraidanee. Sia rufiaa. Ani amaaku iki raqarana Anutufa doo irinoo.
GEN 21:18 Doo findi finana oonu faiqi rafususee amiqi amiqia. Qinee mina saaqari kambiqainausa firaa maqannaasaika mannisaanaura.
GEN 21:19 Miqi qimaseenoo Anutufa Akaara nammarina afu maqa amufanoo nammari madika qafanau. Qafamaseenoo aandau apata taqu mara mareenoo ooqu saka narí faiqi amufanoo nanau.
GEN 21:20 Anutufa Isamaeerana rakisi amaqee marufanoo innooqanau. Innooqafufanoo mifa Paraana aadana maqa maaqaki maridanoo uaqarana akoofasa marinau.
GEN 21:21 Paraana aadana maqa maaqaki marufanoo mina anoofa Isipa maqusaindaraa maanaaqa mara aminau.
GEN 21:22 Mikari Abimeereekafa Pikoorana narí rakira fasiqauqa uriqararana afiqeenoo Abaraqaammafa maruqoo oonu reeqa maaqi qimasee qimamiqa qiqau. Anee aiqama ainaina auqaannanaki Anutufa dadaaqidanoo.
GEN 21:23 Doo maqee Anutuna afusaa qima afeekaikammasee qini faqa qini faiqi namu faqa qini saaqari naaru kambiqainausa faqa sia mandaikamma nimaqaa. Qinee ani amiqimma amaqaqiafana anee faqa miqi kai inana qima afeekaikammasee qini faqa maa maqa maaqana anee marianna maqa maaqana faqa amiqimma qimaqaa.
GEN 21:24 Abaraqaammafa minara iriseenoo qimaminau. Qinee miqimmianauree qimasee qima afeekaikinau.
GEN 21:25 Miqi qimaseenoo Abaraqaammafa Abimeereekana oori kandara ufakiqari qimaminau. Ani ainainira faiqiuqa qini nammari madika rakirara maseeqa mareea.
GEN 21:26 Abimeereekafa iriseenoo qimaminau, Qoo qinee sia mina iridaqa, yafee miqinoo fee. Anee minara sia qima qimunaqa sia iriqiafana. Maqee kai iridaqa.
GEN 21:27 Abaraqaammafa minara iriseenoo burimakauqa faqa sipsipauqa faqa mareeqee Abimeereekana aminau. Amisee miqanda moodaanaki kiqau.
GEN 21:28 Abaraqaammafa sipsipa aanaaqiuqa dinni taikasee dinni ani qaara marasee 7 naadumasaa raina quqanau.
GEN 21:29 Abimeereekafa mina qafamaseenoo Abaraqaammana iramirinau. Anee nanaree miqidanee.
GEN 21:30 Miqi qimasee iroofanoo Abaraqaammafa qinau. Anee maanauqa maraa. Anee marainnanannoo qiniara maa nammari dikaandana indu finaufoo qinnaranoo.
GEN 21:31 Misa miqoo qima afeekaika maseeqa mi maqusana auqureeqa Beeraseeba fee qiqau.
GEN 21:32 Miqanda Beeraseeba maqa maaqaki moodaanaki kira ufa qimasoofanoo Abimeereekafa narí rakira fasiqauqa uriqararana Pikoorasandiri nári maqusai Firistia maqa maaqai fiqau.
GEN 21:33 Miqanda fufanoo Abaraqaammafa tamarisika saqari Beeraseeba maqusai ummaquseenoo naaru naaru marira Karaambaiqa Anutunara innaaru qimarinau.
GEN 21:34 Mi kamuqoo Abaraqaammafa kisaaqasaa Firistia maqa maaqakina marinau.
GEN 22:1 Mariiufanoo Anutufa Abaraqaammana amanammasee qafaanee qimasee innaarunaindari aaramasee qinau. Oo Abaraqaama qufanoo Abaraqaammafa qinau qinee maaqoo maridaqa. Miqi qufanoo Anutufa qimaminau.
GEN 22:2 Aneenna amaaku Isakeena ani amaaku moodaa, kaaqa amuqusa imariannana afiqeenana Mooria maqa maaqai ooru rainaqa qinee aaqana moo uqafiqaanaura. Anee mi aaqannanasaa aneenna amaaku arusee qini tatufirana suqa qimia.
GEN 22:3 Miqi qimasoofanoo kananaana findifinoo narí dookisaa ida rufariseenoo minasaa quqaseenoo narí ainaini maru faiqi qanda faqa narí amaaku Isakeena faqa nifiqeenoo findimeeqee Anutufa qimamunnai finau.
GEN 22:4 Qaara afuru aanai fi faiqaqau. Qaaramoo kufanoo Anutufa qimaqoo aaqannafa nianasaa marufanoo qafanau.
GEN 22:5 Qafamaseenoo Abaraqammafa narí ainaini maru faiqi qanda qimanniminoo qinau. Inneeqara maaqoo marida doonkisaa rakisiaqa. Qeeqa qimaakundiri miqoo ooru Anutunara innaaru qimasee inneeqara iannai qumuanaura.
GEN 22:6 Miqi qimaseenoo Abaraqaammafa tatufirana suqaaninna idana mareeqeenoo Isakeenasaa soofanoo maroofanoo narí ida qeemaruna akuru mandeenoo mina qumareenoo musuka faqa qumareenoo doo narí faiqi afiqeenoo Anutufa qimaqoo aaqanna kaaqa ooru finau.
GEN 22:7 Aanai ooru fimarufanoo Isakeefa narí akoona aaramaseenoo qinau, Qipoo qufanoo Abaraqaammafa maqi qimasee qinau. Nanaree qidanee qufanoo Isakeefa qinau. Qinee qafaunana anee idati faqa ida rumbarana faqa maree fimarinanoo, yaafee tatufirana suqeefandinna sipsipafa maridanoo fee.
GEN 22:8 Abaraqaammafa maaqi qimasee narí amaaku qimaminau. Anutufa narí kai sipsipa aanaaqi moodaa qiminaqa tatufirana suqamianaura. Miqi qimaseeqa miqanda moodaanaki ooru fiqau.
GEN 22:9 Miqanda Anutufa qimaqoo aaqannasaa ooru reeqa Abaraqaammafa ooniuqa mareeqee aaku aakummaseenoo ida mina amuaaqa quqaseenoo narí faiqi Isakeena ruumbeeqeenoo rafusu idasaa rusinau.
GEN 22:10 Rusiseenoo musuka qumareenoo narí faiqi kuqa arusaaneera inau.
GEN 22:11 Karaambaiqa angiroo innaarunaindari aaramaseenoo qinau, Abaraqaamma, Abaraqaamma, miqi qufanoo Abaraqaammafa qinau. Qinee maa maridaqee qufanoo Karaambaiqa qinau.
GEN 22:12 Sia faiqi arua, sia mandaikamma amaqaa. Sia aneenna asaukukoo aneenna faiqi arua. Doo maqee qinee iridaqa anee Anutuna ufa qaindusidana mina ufa afaqee mariananoo. Anee aneenna amaakuara aneenna amuqusa uqannara sia qaoo qiananoo eedoo kai qiananoo.
GEN 22:13 Miqi qufanoo Abaraqaammafa uqeerafinoo qafoofanoo andandaki sipsipa akoona saqari aanaaqiki aanai rutaqusee marufanoo qafanau. Qafamaseenoo Abaraqaammafa narí amaaku amaaqa maqeenoo sipsipa akoona aruseenoo Anutuna tatufirana suqa aminau.
GEN 22:14 Miqooqari Abaraqaammafa mi aaqanna auqu reenoo, Karaambaiqa nimira aaqanee qinau. Minara maqee mindaraasa maaqi qidaqa, Yaaweefa narí aaqanasaa nimidanoo fee qidaqa.
GEN 22:15 Karaambaiqa angiroo innaarunaindari kaifaa Abaraqaammana aaramaseenoo qinau.
GEN 22:16 Karaambaiqa aniara maqi qidanoo. Qinee qeeqa duqusaa qima afeekaikammasee qidaqa. Qinee firaaqoo ani amiqimma amaqaanaura. Anee aneenna amaaku moodaa sia qaoo qiannanara qinee miqianaura.
GEN 22:17 Qinee kuqaa qima afeekaikammasee anisaa ani aruakinausa ani aiku asauku innaarunai fasaura foora moomoo marifaranoo nukudara foora ani amianauranoo. Ani aiku asauku namuqaa rafaaqa fusee misa ainaina maree marifaranoo.
GEN 22:18 Aiqama maqannaasa qiniara ani aiku asauku amiqi amiqimma nimaaqaafanandee masee maasa faqa amiqi amiqimma qimaqaannee qifaranoo. Anee qini aakapara ufa qaindusuannanara miqiqa.
GEN 22:19 Abaraqaammafa miqooqari narí faiqi Isakeesandiri narí ainainira faiqi qara qumi nifiqee narí maru maqusanai Beeraseeba maqusai ooqu marinau.
GEN 22:20 Mariiufanoo Abaraqaammafa irufanoo Mirikaa nammarifa Naqoorana Abaraqaammana akaqa faiqi qisauku dinni taikasee dinni oonu qaarammoo marasee 8 maqee foo qiqau.
GEN 22:21 Usafa indaaruqaafa Busafa mina aanaaqiannaafa marinau, mina aanaaqiannaafa Keemueerafa mifa Arammana akoofa marinau.
GEN 22:22 Mina aanaaqiannaafa Keeseedafa marinau, mina aanaaqiannaafa Qasoorafa marinau, mina aanaaqiannaafa Piradasafa marinau mina aanaaqiannaafa Didarafa marinau, misa ninaaqiannaafa Beetueerafa marinau. Mifa Reebeeka nammarina akoofa marinau. Mirikaa nammarifa mi faiqi namusa Naqoorana Abaraqaammana akaqasaa maqanau.
GEN 22:24 Reumma nammarifa Naqoorana inaaqiannaa anaasee fannoo Teebana faqa Kaqammana faqa Taqasana faqa Maakaana faqa maqanau.
GEN 23:1 Saraqa nammarifa 127 aukuana marasee kuqinau.
GEN 23:2 Kannaana maqa maaqaki Qeebooroona maqusaki kuqufufanoo Abaraaqaammafa mina kuqiranara soofaari marinau.
GEN 23:3 Abaraqaammafa narí anaaqa kuqirana mafi quqasee Qeetana aiku asauku maruqoo oonureenoo maaqi qimasee iramirinoo qinau.
GEN 23:4 Qinee moo maqannaasa inni qambaana ani maridaqa. Amanee qini maqa moo qimifaqa feefauru nimiseeqa qeeqa qinaaqa minaki akundaanauree.
GEN 23:5 Qeetana aiku asuku irisee Abaraqaammana qimamiqa qiqau.
GEN 23:6 Anee maasa ufa iria, maasa ani qafaunana anee afeeka rakisirafa marianafa mariananoo. Aneenna anaaqa maasa amiqira madikaki akundaa. Maasa aiqamausa mi madikanaki akundaranara asasidaqa.
GEN 23:7 Miqi qufanoo Abaraqaammafa misa noorinni kumma ramafinoo qimanniminoo qinau.
GEN 23:8 Innee eedoo qiafaqa amanee innee Eefaroona, Sooqarana amaaku iramirifanoo inni nifusaa Makapeera maqa maaqaki narí anaadoo atinni ooni aamara marina qiminaqa feefauru amana kai amiseeqee mi maqa maaqana qeeqaindi kammasee qeeqa qiku qisauku nikundee marianauree.
GEN 23:10 Eefaroofa narí Qeetana aiku asauku faqa faandaamura kooqiki ufa suqiranaki maridanoo iriseenoo aiqamausa iramirufanoo Abaraqaammana qimaminoo qinau.
GEN 23:11 Oo uriqararafa iria, qinee aiqama mi maqana faqa ooni aamara minaki marina faqa ani amianaura. Maaqoo qeeqa faiqi anaasee nifusaa ani amianana aneenna anaaqa minaki akundaa.
GEN 23:12 Miqi qufanoo Abaraqaammafa Qeetana aiku asauku noorinni kumma ramafinoo Eefaroona aiqamausa iriaqeera firaaqoo qimaminoo qinau.
GEN 23:13 Amanee qinee iramiriananee irinnaree. Qinee mi maqana atisaa aiqama feefaurianaura. Qinee feefauru amianana anee eedoo qimasee marainaqa qinee qeeqa qinaaqa miqoo akundaanaura.
GEN 23:14 Eefaroonafa minara iriseenoo maaqi qimasee Abaraqaammana qimaminau.
GEN 23:15 Oo uriqararafa, maqa feefauru 400 siruaa maridanoo, mi feefauruna maasa qeeqa qambaana naqa fee masee rainaanauree. Anee aneenna anaaqa kaqi minaki akundaa.
GEN 23:16 Abaraqaammafa iriseenoo eedoo qimaseenoo sikeera maraseenoo 400 qummaara ainaina dinni quqaseenoo siruaa dinni quqasoofanoo amana kai ufanoo aminau. Eefaroonafa aiqamausa narí maqannaasa Qeetana aiku asauku nifusaa qufanoo iriseenoo miqi kai minau. Nári sikeera qummaara amana kai Eefaroona aminau.
GEN 23:17 Miqimmasee Abaraqaammafa Eefaroona aiqama ainaina Makapeeraa maqa maaqaki suani oosana qaannai Mammareena maqusa adeedi maruna feefaurummasoofanoo Abaraqaammanaindi kinau. Mi feefaurirafa maqa faqa ooni aamara minaki maruna faqa aiqama saqariuqa mi maqana atisaa maru saqarisa faqa aiqama moodaanaki rafaaqafinau.
GEN 23:18 Aiqama Qeetana aiku asauku miqoo suqiranaki mariusa mi maqa maaqanara Abaraqaammanaindi fee qiqau.
GEN 23:19 Miqimmaseenoo Abaraqaammafa narí anaaqa Saraqa nammarina mi ooni aamaranaki Kannaana maqa maaqaki akundanau.
GEN 23:20 Miqimmasoofanoo mi maqafa faqa ooni aamara minaki marufa Qeetana aiku asaukundi mariufa Abaraqaammanaindi kufanoo mi maqana nikundara maqaikinau.
GEN 24:1 Doo Abaraqaammafa kaaqa nauraiqi marinau. Karaambaiqa Abaraqaammafa aiqama auqoo ainainna amiqi amiqimma amaqee marinau.
GEN 24:2 Abaraqaammafa nári oosana maraseenoo nári ainainiranasaa kisaaqasaa rakisi maruna aaramaseenoo qimaminoo qinau. Anee aneenna asauku qifundana ameemaanai aususee afeekaika masee qima afeekaikia.
GEN 24:3 Qinee aniara Karaambaiqa innaaruna faqa maqa faqa auqu Anutuna auqusaa qima afeekaikamasee sia qini qimaaku Kannaana maqannaa anaasee mara amiannee qidaqa.
GEN 24:4 Anee qinee kambiqaafanna maqusanai oonuree qini atikinaa maanaaqa mara maree Isakeena muqu amia.
GEN 24:5 Miqi qimasoofanoo mi rakisirafa maaqi qinau. Doo amana, ooru raanaqa mindaraa maanaaqa iraifanoo narí maqa maaqa minnisee mai qumirara ititinaqa amanee qinee ani amaaku aiqaananoo anee qumunna maqa maaqanai ooru fuannoo fee.
GEN 24:6 Miqi qufanoo Abaraqaammafa qinau. Oo sia uqanna anee qini qimaaku aiqainanoo minni oorufuani.
GEN 24:7 Yaaweefa innaarunaindaraa Anutufa qeeqa qikoona maqusaindaraana faqa qeeqa ainaina maqasaaqaraana faqa mara mareenoo maa maqa maaqanasaa quqaqoosa maridaqa. Mifa qima afeekaikammasee qini faqa qini qiku qisauku faqa maa maqa maaqana nimianauree qinau. Mifa narí angiroo aiqainanoo ani afunni finana ooru qini qimaaku anaaqa afiqee qumi naranoo.
GEN 24:8 Mindaraa maanaaqa fannoo sia mai qumiraree qinana miqoo kai qima afeekaika maqaanna ufanakiqari idukuananoo. Qini qimaaku sia minni afiqee ooru fua.
GEN 24:9 Miqi qimasoofanoo mi ainainira fasiqafa narí asauku Abaraqaammana narí uriqararana afundana ameemaanai quqaseenoo qinau, doo qinee anee qianandee ianaura.
GEN 24:10 Miqi qimaseenoo raudama kinoo Abaraqaammana kammeera, qoosa fooqaana, mina qisauku qara maraseenoo narí uriqararana ainaina amiqirana kai maraseenoo kammeerasaa quqaseenoo mareenoo finau. Abaraqaammana akaqa Naqoorafa Mesopotamia maqusai suani dinni ataaqeenni marunnai ooru finau.
GEN 24:11 Aanai faiqanoo fifiiu fanoo eenee marufanoo aanaaseeuqa nammari sakee maruqoo oonu ranau. Oonuree qafoofanoo maqusa adeedi nammari sakee maruqoo oonu reenoo miqoo narí kammeerauqa quqasoofaqa mariqau.
GEN 24:12 Narí kammeerauqa quqaseenoo mi fasiqafa Yaaweenara innaaru qinoo qinau. Oo Anutu qini uriqararana Abaraqaammana Anutufa anee qini faqa maridana maqee qini dadaaqia. Anee qini uriqararana Abaraqaammana faqa qima afeekaika maqoonafa maqee anoonaikiani.
GEN 24:13 Qinee nammari sakee mariana aaqa adeedi marunaqa, aanaaseeuqa nammari ani sakee mariafaqa maridaqa.
GEN 24:14 Moo maanaaqa anirainaqa qinee maaqi qimasee qimamianaura. Amanee aneenna taquki nammari saka qiminaqa naanauree. Mifa qiniara namasainaqa ani kammeerauqa faqa nimianauree qinnanara minara aneenna ainainira faiqi Isakeena utaaqama amaqaqaanafee qianaura. Mi ainainafa kambiqainaqa anee qini uriqararanasaa qima afeekaikunna ufanara irianaura.
GEN 24:15 Mifa miqi qimasee innaaru qimarufanoo moo maanaaqa Reebeeka nammarifa nammari taqu akumaaqa aku maree aniranau. Mifa Abaraqaammana akaqa Naqoorana faqa mina anaaqa Mirikaa nammarina faqa faiqi Betueerana araamuna marinau.
GEN 24:16 Mina oori afiri amiqi amiqi irafa sia auqu marufa aniroofanoo qafoofanoo ooqu nammari saka maree urinau.
GEN 24:17 Ururoofanoo Abaraqaammana ainainasaa rakisira fasiqa fannoo mi funnai sandee oonureenoo maaqi qimasee qimaminau. Amanee aneenna taqukinaa nammari kaqikaana qini qiminaqee naanauree.
GEN 24:18 Miqi qufanoo mi manaaqafa qinau, eeoo faiqí firaafa, doo naa qimaseenoo nammari taqu afiqu quqasoofanoo doo nanau.
GEN 24:19 Namasoofanoo mi manaaqafa narí kai qinau. Qinee nammari moo faqa sakasee ani kammeerauqa nimii saanaqa nama saifanoo nimuaqu iannoo.
GEN 24:20 Miqi qimaseenoo narí nammari taqu kai kaqi difaaniki adiaseenoo sandeenoo ooqu moo faqa saka mareenoo muru adia soofaqa kammeerauqa naqau.
GEN 24:21 Kammeerauqa nammari nimi marufanoo Abaraqaammana ainainira fasiqa fannoo ireeda kai kasooinoo maridanoo qafaidanoo maaqi qimirinau. Doo fee Yaaweefa qinee kisaaqasaa anunnanara anoonai kidanoo fee.
GEN 24:22 Kammeerauqa nammari neeneesee nimuaqummasee marufanoo Abaraqaammana ainainira fasiqa fannoo koorannai auqira qimmusa mi manaaqana aikiki qusamaqaseenoo kafa koorannai auqira isaaqama qaaraqanda asaukuki usamaqaseenoo iramirinoo qinau.
GEN 24:23 Anee yana araamunee maridanee amanee qini qimaqimia. Amanee maasa namu aneenna akoona maaqa kina nifiqee finaqee faiqaanauree.
GEN 24:24 Reebeeka nammarifa mina iriseenoo narí qimaminoo qinau. Qini qikoofa Beetueerafa Naqoorana faqa Mirikaa nammarina faqa faiqi maridanoo.
GEN 24:25 Maasa maaqa narana amana maridanoo ani faqa aniasa faqa ani kammeerauqa faqa narana maaqa faqa nimifaranoo.
GEN 24:26 Miqi qimasoofanoo Abaraqaammana ainainira fasiqa iriseenoo maqasaa oorindari mapamu finoo Karaambaiqa narí uriqararana Abaraqaammana Anutuna amooqidanoo maaqi qinau.
GEN 24:27 Oo Anutu Abaraqaammana Anutufa, anee amiqi amiqi uqanna miananoo. Anee Abaraqaammana amiqi amiqi imariannanara sia taikeenoo kaqi fidanoo. Karaambaiqa fannoo qini uriqararana atiuqa iannai andeeqasee qifiqee aninoo.
GEN 24:28 Miqi qimasee innaaru qimasoofanoo Reebeeka nammarifa sandeenoo narí anoona maaqai oonureenoo aiqama mi ufausa qimaminau.
GEN 24:29 Reebeeka nammarina afasaafa Rabanafa Reebeeka nammarina ufa iriseenoo koorannai auqira qimmusa qusamaqoona faqa koorannai auqira isaaqama qusamaqoona faqa qafamaseenoo raudamaku fanoo ooqureenoo nammari sakee maru madikana afainni qafoofanoo Abaraqaammana ainainira fasiqa miqoo nammari afainni narí kammeerauqa naaqa kikiqinoo marinau.
GEN 24:31 Marufanoo qafamaseenoo qimaminoo qinau. Qini faqa aninaqa maaqai fua. Karaambaiqa fannoo ani amiqi amiqimma amaqee marifa mariananoo. Nanaree anee maaqoo maridanee. Qinee ani faiqara maaqa doo deedaqammasee ani kammeerauqa marirana faqa deedaqiqa.
GEN 24:32 Abaraqaammana ainainira fasiqa fannoo mina iriseenoo narí faqa marusa faqa narí kammeerauqa faqa nifiqeenoo doo maaqai finau. Maaqai oonu roofanoo Rabanafa kammeera saaqaraa qumaara mara maqasaa quqaseenoo narana nammari nimiseenoo Abaraqaammana faiqi namu nammari nimufaqa niku nammari uqiqau.
GEN 24:33 Niku nammari uqu soofanoo Rabanafa narana niminau. Nimufanoo Abaraqaammana ainainira fasiqa fannoo qaoo qimasee qinau. Sia qinee kaqi naanaura. Qinee qiraree qunna ufana qima nimiseeqa miqoo naanaura. Rabanafa minara iriseenoo qinau. Doo qinaqa maasa iria.
GEN 24:34 Miqi qimasoofanoo Abaraqaammana ainainira fasiqa qima niminoo qinau. Qinee Abaraqaammana ainainira fasiqa maridaqa.
GEN 24:35 Karaambaiqa firaaqoo qini uriqararana amiqi amiqimma amaqaseenoo ainaina faqaafaikamma amaqeenoo. Karaambaiqa sipsipauqa faqa burimakauqa faqa siruaa faqa koora faqa ainainira fasiqauqa faqa maanaaqauqa faqa kammeerauqa faqa doonkiuqa faqa moomoo aminoo.
GEN 24:36 Qini uriqararana anaaqa Saraqa nammarifa asooqasaa faiqi akoonaiqi maqasoofanoo qini uriqararafa narí aiqama ainaina mina kai aminoo.
GEN 24:37 Qini uriqararafa qifaqa qinee afeeka ufannai qima afeekaikammaseeqa mina aamuaqira ufa qaindusuanauree qiafananoo qinau. Anee maqoo qaraasa Kannaana maqannaa kinaa anaasee sia uqanna mareeqee qini qimaaku amia.
GEN 24:38 Anee ooru qini qikoona maqannaasaki qini atikinaa maanaaqa mara maree muqusee qini faiqi amia.
GEN 24:39 Qinee mi ufana iriseeqa narí maaqi qimaseeqa qimamiqa. Mi manaaqafa sia qini faqa quminaqa naqaa fee ianauree.
GEN 24:40 Qunanoo mifa qinoo, qinee Karaambaiqa ufa aiqama kari afaqee marunausa maridaqa, mifa narí angiroo aiqainanoo ani faqa fidanoo dadaaqinanoo anoona kambiqaannoo. Anee qini faiqi anaaqa qini maqannaasakinaana qini qikoona atikinaana mareennaranoo.
GEN 24:41 Moodaa aana kai anee idukinna aanafa maridanoo. Ooru rainaqa misa maanaaqa moo sia qimifanoo ani qima afeekaikirafa taikainana idukira fasiqaikinnaranoo.
GEN 24:42 Qinee Abaraqaammana mi ufana iriseeqa nammari dikaanda mariqoo ururee maaqi qimasee innaaru qiqa. Oo Karaambaiqa qini uriqararana Abaraqaammana Anutufa mariananoo, qinee auqaunna ainainna anoona kambiqaani.
GEN 24:43 Qinee nammari dikaanda mariqoo marianaura. Mariananoo maanaaqa moo fannoo nammari sakarara anirainaqa qinee nammariara innaaru qianaura.
GEN 24:44 Mifa eedoo qimaseenoo qini faqa qini kammeerauqa faqa nammari niminanoo mifa anee qini uriqararana amaaku utaaqama amaqaqaanafa mariannoo.
GEN 24:45 Qinee qireeda kai innaaru qimarunanoo Reebeeka nammarifa maqusaindari nammari taqu akumaaqa akumareenoo aiqareenoo nammari sakararee qimasee fifaqa qinee maaqi qimasee qimamiqa. Amanee anee nammari qimina naanauree.
GEN 24:46 Miqi qunanoo mifa kai kaqi narí nammari taqu akumaaqa qaraana afaimma quqaseenoo qinoo. Namasainaqa ani kammeerauqa faqa nimianaura. Miqi qifaqa qinee namasaunanoo mifa kammeerauqa faqa nimifaqa neea.
GEN 24:47 Namaseeqa qinee maaqi qimasee iramiriqa ani akoofa yafee, qunanoo mifa qimaqiminoo qinoo. Qini qikoofa Beetueerafa Naqoorasa Mirikaa nammarisa faiqi maridanoo. Qinee mi ufana iriseeqa koorannai auqira qimmusa usuamaqaseeqa kafa koora isaaqama asaukuki usuamaqeeqa.
GEN 24:48 Usuamaqaseeqa doorindari maqasaa kummarama fifaqa qeeqa uriqarana Abaraqaammana karaambaiqa Anutuna amooqiqa. Mifa qini qifiqamareenoo andeeqasee qini uriqararana atiuqa iannai murusaifaqa qinee misa niraamuna qeeqa uriqararana amaaku anaaqa marianinnana paquriqa.
GEN 24:49 Doo maqee uqanna Rabanna anee qima qiminaqa iria. Anee qini uriqararana andeeqa amaqararee qinana qima qimia. Anee sia andeeqa amaqararee qinana minara faqa qima qiminaqa qinee qeeqa ianna ainainara oonu mafi irianaura.
GEN 24:50 Rabanafa faqa mina akoofa Beetueerafa faqa narí qimamiqa qiqau. Maa ufafa Karaambaiqinaindari ani marifaqa maasa naqifee masee minara ufa qinauree.
GEN 24:51 Maa Reebeeka nammarifa marinoo. Afiqamaree fua. Munusainanoo mifa ani uriqararana amaaku aanaaqaikinoo, Karaambaiqa narí qindee iani.
GEN 24:52 Abaraqaammana ainainira fasiqa mi ufana iriseenoo oorindari maqasaa aqufinoo Karaambaiqa amooqimamaqanau.
GEN 24:53 Amooqimaseenoo findifinoo qamunna faqa siruaa faqa koora faqa firaa feefauru aqimaru oonisa Reebeeka nammarina aminau. Mifa firaa munnimma aqimaru ainainausa mina afasaana faqa mina anoona faqa niminau.
GEN 24:54 Nimi seenoo narí faqa anusa saimbaqa narana faqa nammari faqa neenee seeqa faiqaqau. Faiqee iaqoofanoo kananaana Abaraqaammana ainainira fasiqa Reebeeka nammarina afasaana faqa anoona faqa qima niminau. Amanee qinee maqee qeeqa firaa finnai fuanauree.
GEN 24:55 Miqi qufaqa miqanda qiqau, saina Reebeeka nammarifa maasa faqa moodaa amaanaki fee, qisauku qara taikaseenoo afuru fee faiqeenoo fuani.
GEN 24:56 Miqi qufanoo Abaraqaammana ainainira fasiqa fannoo qinau. Doo sia maasa rafaaqa fua. Doo qinee maqee fidaqa. Karaambaiqa fannoo qinee kisaaqasaa anunna saikana anoona doo kambiqasaifaqa qafamaseeqa sainaqa qeeqa uriqarara finnai fua.
GEN 24:57 Miqanda minara iriseeqa qimamiqa qiqau. Saina Reebeeka nammarina aaramasee qifanoo naqaa fee qiannoofee.
GEN 24:58 Miqi qimaseeqa Reebeeka nammarina aaramaseeqa iramiriqa qiqau. Anee maa fasiqana faqa maqee fee finnaree. Miqi qufanoo doo maqee fuanauree qinau.
GEN 24:59 Misa mi ufana iriseeqa Reebeeka nammarifa faqa minasaa rakisi maru anaaseefa faqa Abaraqaammana ainainira fasiqa faqa mina faqa anusa faqa doo niqiqoofaqa fiqau.
GEN 24:60 Reebeeka nammarifa firarufaqa maa ufanannoo mina afaaqooqa qiqau. Oo maasa qisooki anikiqari aruakinausa moomoo uqanna firaaqoo uqanna kambiqeefara ani aiku asauku marinausa namuqaa nárí nifaqaaqa mandaida misa maqa maaqa namu faqa misa ainaina faqa maree marifaranoo.
GEN 24:61 Miqi qimasee afaaqooqa qimasoofanoo Reebeeka nammarifa faqa ainainira maanaaqauqa faqa kammeerasaa akaree fufaqa Abaraqaammana ainainira fasiqa namu faqa fiqau.
GEN 24:62 Isakeefa Neekeefa maqa maaqakiqari aadana maqa maaqai nammari dikaanda maruqoo ooqu marinau. Mi nammari dikaandana auqu kaqi marirafa qini qiqafaidanoo fee qimariqau. Mifa Kannaana maqa maaqa qaannai suani afu dinni ataaqeenni marinau.
GEN 24:63 Miqoo maridanoo Isakeefa moo eenoonnai aatata nidanoo uqeera fufanoo mirinni qafoofanoo kammeerauqa qumiqau.
GEN 24:64 Reebeeka nammarifa kammeera saaqari uqeera finoo Isakeena qafanau. Reebeeka nammarifa qafamaseenoo narí kammeera saaqari maqasaa aqufinau.
GEN 24:65 Aqufufanoo Abaraqaammana ainainira faiqi iramirinau. Ya fasiqa fee maasa unannai anidanoo fee. Miqi qufanoo Abaraqaammana ainainira fasiqa qinau. Qini uriqararafa anidanoommi qufanoo Reebeeka nammarifa nári oosana mareenoo qamunna mafi oorisaa ititanau.
GEN 24:66 Isakeefa uru paqurimmasoofanoo Abaraqaammana ainainira fasiqa fannoo aiqama ainaina auqoonara Isakeena qimaminau.
GEN 24:67 Qimamisoofanoo Isakeefa Reebeeka nammarina mareeqeenoo narí maaqaki Saraqa nammarifa mariunaki quqasoofanoo mina aanaaqai kinoo marufanoo Isakeefa Rebeeka nammarinara aidi marufanoo mi aidirafa Isakeefa narí anoofa kuqunara amuqusiufa doo asooanau.
GEN 25:1 Abaraqaammafa anaasee moo maranau. Mina auqu Keeturaa nammarifa marinau.
GEN 25:2 Minasaa faiqi moomoo maqanau. Faiqi moo indaaruqaana auqu Simaramafa marinau mina aanaaqianaafa Yookasanafa marinau mina aanaaqianaafa Meedanafa marinau mina aanaaqianaafa Midianaafa marinau. Mina aanaaqianaafa Isabakafa marinau ninaaqianaafa uqanna Suaafa marinau.
GEN 25:3 Indaaruqaana aanaaqianaafa Yookasanafa mifa Seebabana faqa Deedana faqa nikoofa marinau. Deedana aiku asuku Asuraa maqannaasa faqa Reetusimma maqannaasa faqa Reeummimma maqannaasa faqa mariqau.
GEN 25:4 Midiana amaaku indaaruqaa faiqi Eefaafa marinau, mina aanaaqianaafa Eefeerafa marinau, misa ninaaqianaafa Qannookafa marinau misa ninaaqianaafa Abidafa marinau, misa ninaaqianaafa uqanna Eeradaafa marinau. Minamusa Abaraqaammana anaaqa Keeturaa nammarina saaqari kambiqarausa mariqau.
GEN 25:5 Abaraqaammafa narí aiqama ainaina Isakeena kai aminau.
GEN 25:6 Amiseenoo narí kaqi maridanoo moo anaasee faiqi namu faqa amiqira ainaina oosana oosana Abaraqaammafa kaqi nimiseenoo Isakeefa maruqooqari suani oosana qaannai maqa maaqai nianai niiqoofaqa mitinai oonu mariqau.
GEN 25:7 Abaraqaammafa asooqaqeenoo kuqinau. 175 aukuana marasee kuqinau.
GEN 25:9 Kuqufufaqa mina amaaku qara Isakeesa Isamaeerasa miqanda nári nikoona iri mara maree Makapeeraa maqa maaqaki Mamaree maqusa suani oosana qaannai ooni aamaraki akundaqau. Mi maqana Eefaroona Sooqarana amaaku Heetana aiku asaukundi feefaurummaqoonaki Abaraqaammana akundaqau.
GEN 25:10 Abaraqaammafa kaqi maridanoo Qeetana aiku asauku feefauru maqoonakina Saraqa nammarina faqa Abaraqaammana faqa nikundaqau.
GEN 25:11 Abaraqaammafa kuqufufanoo mina amaaku Isakeena Anutufa amiqi amiqi imarinau. Isakeefa kaqi marira nammari dikaanda qini qiqafaidanoo fee qimaru nammari dikaandana aaqa marinau.
GEN 25:12 Qakaara nammarifa Saraqa nammarina ainainira maanaaqa Isipa maqannaa maanaaqa marufa mifa Abaraqaammana amaaku Isamaeerana maqoofa marinau.
GEN 25:13 Isamaeerana faiqi namu maaqimmiqa mariqau. Indaaruqaafa Neebaiootafa marinau, mina aanaaqianaafa Keedarafa marinau, misa ninaaqianaafa Adabeerafa marinau, misa ninaaqianaafa Mibasamafa marinau, misa ninaaqianaafa Misammafa marinau, misa ninaaqianaafa Dummaafa marinau, misa ninaaqianaafa Masafa marinau, misa ninaaqianaafa Qadadafa marinau, misa ninaaqianaafa Teemafa marinau, misa ninaaqianaafa Yeeturafa marinau, misa ninaaqianaafa Nafisafa marinau, misa ninaaqianaafa uqanna Keedeemaafa marinau.
GEN 25:16 Misa qisaukuqara taikasee qikunnooqu qaara marasee maqannaasa nikausaikiqa mariqau. Miqiqa maridaqa nariqa nuqu nariqa maqusa faqa nariqa uiqaana maqusa faqa qafaafauree mariqau.
GEN 25:17 Isamaeerafa 137 aukuana maraseenoo kuqinau.
GEN 25:18 Isamaeerana aiku asauku Isipa maqusaindari suani oosana qaannai Sura maqa maaqa faqa, Qafiraa maqa maaqa faqa qambaana Asiria maqa maaqai fimaruqoo mariqau. Misa Abaraqaamana aiku asauku akaqausa maruqooqari naaduma mariqau.
GEN 25:19 Moo ufa Abaraqaammana amaaku Isakeena ufa maridanoo.
GEN 25:20 Isakeefa qaara fasiqa niku nisauku taikasee 40 aukuana maraseenoo Beetueerana araamuna Reebeeka nammarina maranau. Rabannana asookina maranau. Beetueerafa Arameeannaindaraafa Meesoopootamia maqa maaqaki ani marinau.
GEN 25:21 Reebeeka nammarifa sia faiqi maqanau aafanaasee marinau. Isakeefa minara iriseenoo Yaaweenara innaaru qimarinau. Yaaweefa mina ufa iriseenoo dadaaqufanoo Reebeeka nammarifa amuaqu qaikinau.
GEN 25:22 Amuaqu qaikufanoo faiqi qaara qanda mina aranandaki maridaqa raki mariqau. Raki marufanoo Reebeeka nammarifa qinau, maa ainainafa nanaree qiniki kambiqaidanoo fee qimaseenoo karaambaiqunnai oonuree anoonufa qimamianifeera innaaru qinau.
GEN 25:23 Innaaru qufanoo Yaaweefa qimaminoo qinau. Qaara maqannaasa ani aranandaki maridaqa. Anee nariara nariara rairai qimariasa nikooqanda maqeennaranoo. Moo fannoo moo uriqarara afeeka faqaafa marianno. Akaqa fannoo afasaana rafaaqa fuaninafa mariannoo.
GEN 25:24 Reebeeka nammarina faiqi maqarafa aniroofanoo qaara qanda maqanau.
GEN 25:25 Indaaruqaana afaaqa kaaqa taatuqee arinoo marinau, mina afaaqasasa asausi aanaaqi marinau. Mina auqu Eesau nee qiqau. (Mina auqu oosana asausi fee qiqau).
GEN 25:26 Inaaqianaafa indaaruqaana aiku ataa rakisisimma uqirafa quminau. Minara mina auqu Yakooboo nee qiqau. (Mina auqu oosana aiku ataa fee qiqau.) Isakeefa qaaramoo fasiqa niku nisauku taikaseenoo 60 aukuana maraseenoo miqanda maqanau.
GEN 25:27 Miqanda innooqafufaqa Eesaufa uaqarana akoofasa maridanoo sia ooqu marufa kaqi niranara aidimarufa marinau. Miqi marufanoo Yakooboofa sia miqi marinau. Fifirafa maridanoo maqusasaa marufa marinau.
GEN 25:28 Isakeefa Eesaunara aidi marinau. Mifa aandau arusoofanoo nee marunara minara aidi marinau. Reebeeka nammarifa Yakooboonara rimarinau.
GEN 25:29 Moo kari Yakooboofa narana suqasee auqee marufanoo mina afasaafa nandaki niniiufa aararoofanoo anireenoo qinau.
GEN 25:30 Anee taatuqee narana auqee mariannana doo mina mara qiminaqa naa daarandee marifaqee qinau. Miqi qimasoofaqa misa minara iriseeqa Eesaunara Eedoomee qimariqau. Mi auquna oosana taatuqee fee qimariqau.
GEN 25:31 Yakooboofa iriseenoo qinau, aninidiri qikoofa anee indaaruqaa faiqi mariananoo ani afaaqooqa qima amaqee marina qiminaqa narana ani amianauranoo.
GEN 25:32 Eesaufa qinau. Saa qinee daararai faqa kuqua qaammidaqa qini mi ainainausa sia qini dadaaqifaranoo.
GEN 25:33 Yakooboofa iriseenoo qinau, aneenna ufa qima afeekaika mandee qiminaqa qinee narana ani amianaura. Qimasoofanoo Eesaufa Yakooboonara qima afeekaika mandee indaaru mina akoofa qutaaqama amaqoo ainainna amiraree qinau.
GEN 25:34 Miqi qima afeekaika masoofanoo Yakooboofa quanda fufanoo feemu faqa nara ainaina faqa nammari faqa Eesauna amufanoo namasee doo finau. Miqi maseenoo Eesaufa narí indaaruqaa faiqi marunara akooqoofanoo narí akaqa amisee quqasee finau.
GEN 26:1 Abaraqaammafa maru aukuanna aandaroo firaafa narufanoo Abaraqaammafa Isipa maqa maaqai ooqu finau. Kafaa mina amaaku Isakeefa maru aukuanna aandaroo narufanoo Isakeefa Keeraa maqusai Abimeereekana maqusai finau. Abimeereekafa Firistia maqannaasa uriqararafa Keeraa maqusai marunnai finau.
GEN 26:2 Isakeefa Keeraa maqusai oonu marufanoo Karaambaiqa maaqi qimasee qimaminoo qinau. Anee sia Isipa maqa maaqai ooqu fua. Maaqoo qinee aniara mariannee qunnaqoo kai maria.
GEN 26:3 Maaqoo kai marinaqa qinee ani faqa marida amiqi amiqida dadaaqianaura. Maa maqa maaqana faqa anisaa ani aruakinausa faqa nimianaura. Qinee minara Abaraqaammana ufa qima afeekaika masee amianauroo qiafannana doo ani faqa qima afeekaikiqa amianauranoo.
GEN 26:4 Qinee anisaa ani aruaki kambiqainausa fasaura foora moomoo amianaura. Qinee maa maqa maaqana misa nimianaura. Aiqama maqannaasa aniree maaqi qimasee innaaru qifaranoo. Oo Anutu anee Isakeena aiku asauku amiqi amiqimma nimaqoonandee inana maasa faqa amiqi amiqimma qimaqaa.
GEN 26:5 Abaraqaammafa ani akoofa qini sandufa faqa aamuaqira ufa faqa afaqee marunara qinee ani amiqi amiqimma amaqaanaura.
GEN 26:6 Isakeefa Anutuna mi ufana iriseenoo eedoo qimaseenoo Keeraa maqusai maridanoo Isipa maqa maaqai sia ooqu finau.
GEN 26:7 Keeraa maqannaa fasiqauqa mina aanaaqara iramirufanoo Isakeefa qini qisooki fee qinau. Isakeefa narí anaaqa Reebeekaa nammarifa oori amiqirafa marufanoo qini darusee qini qinaaqa mareefoo qimaseenoo rufia mareenoo qini qisooki fee qinau.
GEN 26:8 Isakeefa kaqi kaaqoo marinoo moo kari narí anaaqa Reebeeka nammarina faqa madaanai ooqu faaqee narisaa narisaa mundiqa marufanoo mi maqannaasa uriqararafa narí maaqaki ooqufaaqee maridanoo qafanau.
GEN 26:9 Qafamaseenoo Abimeereekafa Isakeena aaramaseenoo qinau. Maa anaaseefa ani anaaqa uqanna maridanoo. Anee nanaree qini qisooki fee qinanee. Isakeefa qinau. Qini qinaaqa fee qianaqa darifoora miqi qiqa.
GEN 26:10 Abimeereekafa iriseenoo qinau. Anee maasa naqaa fee maqimaqeenee. Qini maqannaa moo fannoo ani anaaqa sakasee faiqaifana anee mi ummaarana maasa qimianaiqini.
GEN 26:11 Miqi qimaseenoo narí maqannaasa aiqama naarama quqaseenoo maaqi qimasee qima niminau. Yafee maa fasiqanee mina aanaaqee mandaikamma nimaqaifaqa qinee kuqa kai mina aruanauranoo.
GEN 26:12 Mi aukuannai Isakeefa narana ummaqusoofanoo kambiqafufanoo amiqimmasee anoona mafufanoo unakira aukuana moomoo uqanna unakinau. Karaambaiqa amiqi amiqimma amaqasee dadaaqunara miqinau.
GEN 26:13 Karaambaiqa dadaaqufanoo mina ainaina rairaaufanoo kaaqa ainaina faqaafa marinau.
GEN 26:14 Mifa moomoo sipsipa faqa burimakau faqa ainainira faiqiuqa faqa marunara Firistia maqannaasa niranaqee marinau.
GEN 26:15 Ooqai Abaraqammafa kaqi maridanoo indufuqoo nammari dikaandausa Firistia maqannaasa aiqama rafaaqa fiqau.
GEN 26:16 Moo kari Abimeereekafa Isakeena aiqama ainaina tia qafamaseenoo rufia seenoo qimaminau. Doo anee maasa uridaaqarana mariananoo. Anee maasa maqa maaqa quqasee moosaa fua.
GEN 26:17 Isakeefa mi ufana iriseenoo mi maqa maaqana minniseenoo narí uiqaana maaqa Keeraa noopunduki usakasee miqoo kisaaqasaa marinau.
GEN 26:18 Miqoo ooqu Isakeefa narí akoona nammari madikauqa Firistia maqannaa rafaaqa fuqoona paqurimmaseenoo kafaa indufuseenoo narí akoofa auquroo auquna kai kaifaa auquranau.
GEN 26:19 Isakeena ainaini maru fasiqausa mi arumunaki fuka madika indufiufaqa nammari paquriqau.
GEN 26:20 Paquri masoofaqa Keeraa maqannaa sipsipasaa rakisi marusa mi nammarina qafamasee Isakeena sipsipa rakisirausa faqa rakirarida qiqau. Maa nammarifa maasaindi maridanoo. Miqi qufanoo Isakeefa mi nammari madikana auqu Tinoorira nammari madikee qinau.
GEN 26:21 Miqi qimasoofaqa mina ainainira fasiqa namu kafaa moo indufiqau. Keeraa maqannaasa minara faqa miqi kai iqau. Isakeefa mina iriseenoo minara faqa niranaqara nammari fee kai qinau.
GEN 26:22 Miqi qimaseenoo kafaa quqasee moosaa oonureenoo miqi kai minoo moo nammari madika indufinau. Miqoo minara sia tinoo taanoo rirafa marufanoo mi nammari madikana auqureenoo nifaaqa quqasee mana manira nammari madikee qinau. Maqee Karaambaiqa fannoo mana manirana maasa qimifaqa maridaqa maaqoo aiqama ainaina masaananoo rairaaiannoo.
GEN 26:23 Doo miqoo mariufanoo miqoo minni seenoo Beeraseeba maqa maaqai finau.
GEN 26:24 Miqoo marufanoo moo eendaki akooqoo Karaambaiqa maaqi qimasee qimaminau. Qinee ani akoona Abaraqaammana Anutusa maridaqa. Sia anee rufia rufiaqia. Qinee ani faqa nidaqa. Qeeqa ainainira fasiqa Abaraqaammana faqa qima afeekaikiafannanara iriseeqa ani amiqi amiqi ianaura anisaa ani aruakinausa moomoo kambiqeefaranoo.
GEN 26:25 Isakeefa Karaambaiqa mi ufana iriseenoo ooninnai qainda auquseenoo Karaambaiqa aandau tatufirana minasaa suqa amiseenoo innaaru qinau. Miqoo Isakeeefa narí uiqaana maqa burimakau apatannoo usakaseenoo marinau. Minaki maridanoo narí ainainira fasiqauqa niiqoofaqa moo nammari madika indufiqau.
GEN 26:26 Abimeereekafa Keeraa maqa maaqaindari Ausafatana narí irirana amimaru fasiqana faqa narí sundiauqa uriqararana Pikoorana faqa Isakeena qafararee qimasee Beeraseeba maqusai aniqau.
GEN 26:27 Aniroofanoo Isakeefa iramirinoo qinau. Naqi fee qifaqee qiniara nikooqoofaqa diiqamasoosa marunnannai kafaa anidanee.
GEN 26:28 Miqi qufanoo Abimeereekafa faqa mina faqa anusa qiqau. Karaambaiqa ani faqa marinara maqee maasa iridaqa. Ani faqa maasa faqa qambaana kuqaa qima afeekaikirafa marianifeera iridaqa.
GEN 26:29 Maasa aniara qima afeekaikammasee sia maasa mandaikamma qimaqaannee qidaqa. Maasa sia ani mandaikamma amaqaafannandee inana maasa faqa sia mandaikamma qimaqaa. Maasa ani amiqi amiqimma aisaafanana anee asooaranaki finau. Maqee akooqoo uqanna Karaambaiqa fannoo ani amiqi amiqimma amaqaidanoo.
GEN 26:30 Miqi qimasoofanoo Isakeefa qoomaqa deedaqinau. Deedaqammasoofaqa misa narana namaseeqa faiqaqau.
GEN 26:31 Kananaana findi fufaqa narí qimami narí qimamimma afeekaikamasee firaa ufannai qima afeekaikamma rafaaqafiqau. Miqimmaseenoo Isakeefa nimandara ufa qimasoofaqa aqoondi kammasee quqasee fiqau.
GEN 26:32 Doo mi faasaanna Isakeena ainainira fasiqa namu nammari madika indufu qoonaki nammari paqurimmasee Isakeena qimamiqa qiqau. Doo maasa nammari paquriqa.
GEN 26:33 Miqi qimasee qimamufanoo Isakeefa mi nammari madikanara qima afeekaikira madikee qinau. Miqi qimaseenoo nári ufakiqari Beeraseeba maqusa fee qimasee auqu ranau.
GEN 26:34 Isakeena faiqi indaaruqaafa mina auqu Eesaufa marinau. Mifa qaara fasiqa aiku asauku taikasee 40 aukuana maraseenoo Qeetaa maqannaa aanaaseeqara maranau. Moo anaasee auqu Yuditi nammarina Beerina araamuna maranau. Moo anaasee auqu Baseemata nammarina Eeroona aramuna maranau.
GEN 26:35 Miqanda nári ninaakuquqara Isakeesa Reebeeka nammarisa sukaqara oosana nimufaqa nikooqanau.
GEN 27:1 Isakeefa mariiufanoo doo asooqaqoofanoo afu mandaikinau. Mariiufanoo moo kari narí indaaruqaa faiqi Eesauna aaroofanoo Eesaufa maqi qinau.
GEN 27:2 Foo qimasoofanoo Isakeefa Eesauna qimaminoo qinau. Doo qinee asooqa marida, qeeqa kuqira aukuana sia qafaida, minara ani qimamiqa.
GEN 27:3 Aneenna duru feefa mareenana nandaki aandau aru maree qini didi marina mini suqa qiminaqa namseeqa ani afaaqooqa qimamaqaseeqa kuqua.
GEN 27:5 Isakeefa Eesauna faqa ufa qiqiisoofanoo Reebeeka nammarifa iriseenoo qafoofanoo Eesaufa nandakinai uaqarara fufanoo quanda fufanoo Yakooboona qumee kai qimaminoo qinau.
GEN 27:7 Doo maqee ani akoofa Eesauna maaqi qimasee qimaminoo, anee aandau arumaree mini suqa qiminaqa qinee namasee Karaambaiqa afusaa ani afaaqooqa amisee kuqua.
GEN 27:8 Qini qimaaku doo anee qini ufa irisee qinee qianandee ia.
GEN 27:9 Anee doo fua oonu mimmi aanaaqiuqa marianakinaana afaaqa faqaana qaaraqanda mini sainaqa qinee ani akoona aidi marina suqa saanana munu amia.
GEN 27:10 Munu aminano namaseenoo narí afaaqooqa amiseenoo kuquani.
GEN 27:11 Yakooboofa iriseenoo narí anoona qimaminoo qinau. Qini qifasaafa asausi faqaafa maridanoo asausi aadaiki marifa maridanoo. Qini qifaaqa qisausi sia maridanoo umooqu kammidanoo.
GEN 27:12 Abee qini qikoofa qini qifaaqa duqama qafamaseenoo iriannoo. Qiniara qikaru qidanoo fee qiannoo. Miqiqa qinee rairaiqirana qeeqa qifaaqai qifaaqooqara foora mara quqaanaura.
GEN 27:13 Mina anoofa mi ufana iriseenoo qinau. Ani aqira ufa fannoo qinisaa kai mariannoo, sia anee minara iria, sandeenana oonu mimmi aanaaqi kaqi maree mini qimia.
GEN 27:14 Miqi qima soofanoo Yaakooboofa eedoo qimasee mara maree mini soofanoo mina anoofa maraseenoo narí afaaqi Isakeena aidira narana suqanau.
GEN 27:15 Reebeeka nammarifa aandau suqaseenoo Eesauna amiqira qamunna narí maaqaki quqaqoona maraseenoo Yakooboona afisu amaqanau.
GEN 27:16 Afisu amaqaseenoo mimmi aanaaqi apata qumareenoo Yakooboona afaarinni faqa asauku faqa asausi sia maruqoo afisu amaqanau.
GEN 27:17 Miqi mandeenoo mi adiafaaira naranna feemu namu faqa suqaqoona amufanoo narí akoo funnai maree finau.
GEN 27:18 Oonureenoo narí akoona maaqi qimasee qimaminau. Qipoo doo qinee anireeqa, qufanoo Isakeefa qinau. Qini faiqi namukiqari anee yafee maridanee qinau.
GEN 27:19 Yakooboofa qinau. Qinee ani indaaruqaa faiqi Eesausa maridaqa. Doo anee aandaura qiannana arusee suqamaree anireeqa doo anee findi finana namasee qifaaqooqa qimia.
GEN 27:20 Miqi qufanoo Isakeefa qinau. Oo qini qimaaku anee naqaa fee maseenanee kai kaqi paqurinanee qufanoo Yakoobofa qinau. Karaambaiqa ani Anutufa qini dadaaqi paqurimma qiminoo.
GEN 27:21 Isakeefa minara iriseenoo Yakoobona aaramaseenoo qinau. Anee qini daaqa adeedi ani rainaqa qinee ani auqama qafaa. Kuqaa anee Eesau fee maridanee.
GEN 27:22 Miqi qufanoo Yakooboofa narí akoona oorinni oonu kikiqamma fufanoo Isakeefa auqama qafamaseenoo qinau. Qinee irunanoo anee ufa qianafa ani Yakooboona aunda maridanoo ani asauku auqamasee qafaunanoo Eesauna asauku maridanoo.
GEN 27:23 Yakooboofa mimmi asausi afisuqoofanoo Eesauna asaukuara foora asausi aanaaqi marufanoo Isakeefa sia irinau. Isakeefa narí afaaqooqa mina amirarammaseenoo kaifaa iramirinoo qinau. Anee kuqaa Eesau fee maridanee. Miqi qufanoo Yakooboofa qinau. Eeoo qinee Eesausa maridaqa.
GEN 27:25 Miqi qufanoo Isakeefa qinau. Doo aneenna aandau mini qiminaqa namaseeqa afaaqooqa qimamaqaanaura. Yakooboofa irinoo aandau aina faqa uainna nammari faqa mini amufanoo nanau.
GEN 27:26 Namaseenoo Yakooboona maaqi qimasee qimaminoo qinau. Qini qimaaku maaqoo adeedi ani reenana qini qimooqaa.
GEN 27:27 Qufanoo Yakooboofa adeedi aaqa ani reenoo narí akoona amooqee marufanoo andanda unda afaaqaindari ufanoo udirama qafamaseenoo maaqi qimasee afaaqooqa qinau. Qini qimaaku afaaqai amiqira unda fannoo Karaambaiqa afaaqooqa qimamaqaqai maqana afundara foora idanoo.
GEN 27:28 Anutufa innaarunaindaraa qifi faramu quqasainanoo ani maqa ainoo ainoommaseenoo moomoo narana amiani.
GEN 27:29 Moo aanaamuru marinausa ani ainainira faiqi kammambi faranoo. Maaqanna maaqanna mariasa misa ani ani qafeeqa noorindari maqasaa kummaree faranoo. Anee aneenna akaqaafasaauqa firaafai kina marinnaranoo. Ani anoona faiqi namu ani ani qafeeqa noorindari maqasaa kummaree faranoo. Moo fannoo ani aqinafa mi ufafa nariki kai mariannoo. Moo fannoo ani amiqi amiqimma amaqainafa nariki faqa mariani.
GEN 27:30 Miqi qimasee Isakeefa Yakooboona afaaqooqa qimami soofanoo Yakooboofa narí akoona maaqakiqari raudamakufanoo dindanai fufanoo doo Eesaufa dindanai uaqanoo niniiufa aniranau.
GEN 27:31 Eesaufa anireenoo adiafaa ira aandau aina suqa mareenoo narí akoofuqoo oonu reenoo qinau. Qipoo doo findi finana namasee qifaaqooqa qimia.
GEN 27:32 Mina akoofa qinau. Anee yafee. Miqi qufanoo mifa qinau. Qinee Eesausa indaaruqaa faiqi maridaqa.
GEN 27:33 Isakeefa minara iriseenoo boo qimasee tautu maseenoo aindiri aindiri imarufanoo qinau. Yafee moo fannoo aandau arusee mini qimifaqa, namasaunana anee aniraananoo. Qinee namaseeqa doo qeeqa taikara afaaqooqa qimamaqasaunanoo naaru naaru minaindi mariannoo.
GEN 27:34 Eesaufa mina iriseenoo firaaqoo aundurai sukaqoofanoo qinau. Oo qipoo qini faqa qifaaqooqa qimia.
GEN 27:35 Qufanoo Isakeefa qinau. Ani akaqa fannoo qikaru qimaseenoo doo ani afaaqooqa maree fifinoo.
GEN 27:36 Eesaufa minara irufanoo Yaakooboonara arana qoofanoo qinau. Oo mina auqu Yakooboofa maridanoo narí auqu mau kaimbinoo qini ainaina qaara kari qini qikaru qimasee mareenoo. Indaaru mifa qinee indaaruqaa faiqi uriqararausa maraani qiafanna ainaina maroofa maqee miqi kai inoo qini qifaaqooqa qirana doo maree finoo. Miqi qimaseeno Eesaufa narí akoona qimaminoo qinau. Anee afaaqooqa sia fee qini faqa qiseenanee.
GEN 27:37 Miqi qufanoo Isakeefa qinau. Doo qinee ani uriqararafa marianifee afaaqooqa amiseeqa. Kaifa mina ainaina mina ainainira faiqi kiaqee afaaqooqa faqa amiqa. Qinee oosana oosana narana faqa nammari faqa amiqa. Qini qimaaku, maqee sia moo ainaina marinaqa ani amianauranoo.
GEN 27:38 Eesaufa narí akoona kafaa kafaa iki raqaidanoo iranau. Moodaa afaaqooqa marinee aminanee sia fee moo qini faqa qiminnaree.
GEN 27:39 Isakeefa minara irinoo maaqi qimasee Eesauna qimaminau. Sia innaarunaindaraa qifi faramu anindi mariannoo. Sia ainoo faqaa maqa anindi mariannoo.
GEN 27:40 Anee duru saamu uqeerasaidana aneenna amiqira marirana paqurinnaranoo. Miqidana anee aneenna akaqa ainainira faiqikina mariinana rakeemmaki aaduma finnaranoo.
GEN 27:41 Yakooboofa Eesauna afaaqooqa maree fifufanoo Eesaufa narí akaqara akoo qaidanoo fidiaqaammi marinau. Miqi marufanoo maaqi qimasee narí kai oonu mafi iriseenoo qinau. Kaqi kaaqoo maasa qikoofa kuqu finaqa soofaara taikaseeqa mikari qeeqa qikaqa kuqamma aruanaura.
GEN 27:42 Reebeeka nammarifa mi ufana iriseenoo Yakooboona aaramaseenoo aaqu qimamaqeenoo qinau. Iria ani afasaafa Eesaufa afaaqooqara qimammareenoo ani aruannoo.
GEN 27:43 Qini faiqi qinee qimamianandee ia. Anee quqasee sandeenana Qaraana maqusai qini qisookifa ani anaufa Rabannafa marinnai fua.
GEN 27:44 Anee ooru miqoo marinanoo ani afasaana arana qarafa asooainana qumua.
GEN 27:45 Anee mina mandaikamma amaqaannanara qaunusainaqa qinee akaqausa niiqaanaqa ani ooru afiqee qumuaqa. Qinee qikoo inneeqara moodaafa kuqiranara irunanoo qaifaqa doo quqasee fua.
GEN 27:46 Miqanda ninoofa Reebeeka nammarifa oonu reenoo narí afaaqi Isakeena qimaminoo qinau. Qinee maa Qeeta maqannaa anaasee qandara Eesauna anaaqa qarara qikoo uqanna fidiaqaammidaqa. Yakooboofa Qeeta maqannaa anaasee maaqirana moo marainaqa qinee kuquanauranoo.
GEN 28:1 Isakeefa minara iriseenoo Yakooboona aaramaseenoo amandaidanoo qinau. Oo Yakooboo sia uqanna Kannaana maqannaa anaasee maraa.
GEN 28:2 Doo findi finana ooru fua. Aneenna aanaakuna Beetueerana maqa maaqa Meesoopootamia maqa maaqaki ooruree aneenna anauna Rabannana araamuna maraa.
GEN 28:3 Aiqama afeeka faqaa Anutufa ani faqa ani anaaqa faqa amiqi amiqimma nimaqaseenoo moomoo faiqi nimisainana anee moomoo maqannaasa nikoofa marinnara.
GEN 28:4 Anutufa Abaraqaammana amiqi amiqimma amaqoondee inoo ani faqa amiqi amiqimma aisainana anee aneenna marianna maqa maaqana Anutufa Abaraqaamana amiqoonakinaa qumiasana maraa.
GEN 28:5 Miqi qimaseenoo Isakeefa Yakooboona aiqoofanoo findifinoo Meesoopootamia maqa maaqai Rabanafa Beetueerana amaaku Arameea maqannaafa Reebeekaa nammarina asookifa marunnai oorufinau. Rebeekaa nammarifa Yakooboosa Eesausa ninoofa marinau.
GEN 28:6 Isakeefa Yakooboona afaaqooqa amiseenoo Meesoopootamia maqa maaqai anaasee maraanifeera aqiqoonara Eesaufa irinau. Isakeefa afaaqooqa Yakooboona amiseenoo Kannaana maqanna anaasee sia maraannee qunara faqa irinau.
GEN 28:7 Yakooboofa narí anaukoo ufa irisee Meesoopootamia maqa maaqai funara faqa Eesaufa irinau.
GEN 28:8 Isakeefa Kannaana maqannaa aanaaseera akooqee marunara Eesaufa irinau.
GEN 28:9 Iriseenoo Isamaeerafa Abaraqaammana amaaku marunnai oonuree mina araamuna auqu Maqarata nammarina maranau. Maqarata nammarina asookifa Neebaiootafa marinau.
GEN 28:10 Kaifa Yakooboofa Beeraseeba maqusaindari Qaraana maqusai firaree qimasee faiqanoo ooru fimarinau.
GEN 28:11 Fimarufanoo eendufanoo moosaa uiqaana araseenoo faiqanau. Faiqararinoo ooni firaana marasee qunu rumasee miqoo faiqanau.
GEN 28:12 Faiqaqee idanoo qaina moo inau. Aana kisaaqa maqasaaqari innaarunai ooru marufanoo angiroouqa mimau ooruree qumuree imariqau.
GEN 28:13 Karaambaiqa Yakooboona aakaarinni kikiqinoo maridanoo maaqi qimasee qimaminau. Qinee Karaambaiqa maridaqa, ani aanaakuna Abaraqaamana Anutusa maridaqa, ani akoona Isakeena faqa Anutusa maridaqa. Qinee maa maqa maaqana anee faiqaannana ani faqa ani aiku asauku faqa nimianaura.
GEN 28:14 Ani aiku asauku anisaa ani aruakinausa faqa nukudara foora maa maqanasaa marifaranoo. Misa miqooqari kambiqamaree suani oosana qaannai finanoo aramareenoo keeqee mari qaannai finanoo dinni dinni ataaqeenni finanoo miqi mambi amana kai marifaranoo. Ani faqa ani aiku asaukuaroo qiqa aiqama maqannaasa amiqimma nimaqaanaura.
GEN 28:15 Karaambaiqa kafaa qimaminoo qinau. Iria, qinee ani faqa maridaqa aiqamai finnannai anisaa rakisianaura. Rakisidaqa kaifaa ani mareeqee maa maqanasaa quqaanaura. Qinee sia ani minnisaanaura, qinee qeeqa qima afeekaikiafanna ufafa anoona kambiqainaqa quqaanaura.
GEN 28:16 Miqi qimsoofanoo Yakooboofa tautinoo findifinoo qinau. Karaambaiqa maaqoo maridanoo. Mifa maaqoo marinara qinee sia iridaqa.
GEN 28:17 Yakooboofa Anutuna ufa iriseenoo rufia rufia idanoo qinau. Maa maqa maaqafa daaquqara maqa maqaa maridanoo. Abee Anutuna maaqa mariannoo innaarunai fimaria kooqifa uqanna mariannoo.
GEN 28:18 Kananaana Yakooboofa findifinoo narí ooni qunu qumareenoo daaqoo auqaanifee qimasee maqasaa rakiqaseenoo Anutunaindi fee qimasee oorifa fadameena akuamaqanau.
GEN 28:19 Akuamaqaseenoo mi maqanara Beeteera fee qinau. (Mi auquna oosana Anutuna maaqa fee qinau.) Ooqai miqoora misa Rusa maqusa fee qimariqau.
GEN 28:20 Yakooboofa mi maqana auqu ramaseenoo Karaambaiqara qima afeekaikinoo qinau. Qinee fimarianana anee qini faqa marida qinisaa rakisidana narana faqa qamunna faqa qiminaqa qinee amiqimmaseeqa qeeqa qikoona maaqai qumu raanana anee qini Anutufa marinnaranoo.
GEN 28:22 Maa daaqoo auqara oonina rakiqaunnana ani naaru amooqi fandinnaqoo mariannoo. Anee aiqama ainaina qiminaqa qinee qisaukuqarakinaana aninna amianaura.
GEN 29:1 Miqi qimaseenoo innaaru qimaseenoo Yakooboofa suani oosana qaannai mariasa, misa maqa maaqai oonu ranau.
GEN 29:2 Oonureenoo qafoofanoo nammari madika qusau saqanna marufanoo qaaramooki sipsipauqa mi nammari madikana afainni faiqaqeeufaqa misasaa rakisirausa miqoo rakisimariqau. Sipsipauqa mi madikanakinaa nammari neemariqau. Firaa ooninnoo mi madikana rafaaqafuqoofanoo marinau.
GEN 29:3 Sipsipauqa aiqama moodaa qoo aniroofaqa sipsipasaa rakisirausa mi oonina quanda quandamma aqusee nammari nimisee kaifaa mi oonina quanda qundamma mafi rafaaqafi mariqau.
GEN 29:4 Yakooboofa sipsipasaa rakisi marusa oonu nindafeenoo qinau. Qini qikaqaafasaa, innee yaindaraasee maridaqee. Misa qiqau, maasa Qaraana maqusaindaraasa maridaqa.
GEN 29:5 Yakooboofa iriseenoo qinau. Innee Naqoorana anaiqi Rabannanara iridee qufaqa misa qiqau. Eeoo maasa minara iridaqa.
GEN 29:6 Miqi qufanoo Yakooboofa qinau. Rabannafa amiqisaa fee maridanoo fee. Misa qiqau. Eeoo amiqisaa maridanoo. Mina qafaa, doo mina araamuna Raseera nammarifa mina sipsipauqa nifiqee anidanoo.
GEN 29:7 Yakooboofa misa sipsipa oosana qafeenoo qinau. Innee naqifee ifaqee sipsipa suani qambaana mara quqaqaafaqee maridee. Dauni nammari nimiseeqa mara quqasaifaqa misa fida qusau neeqa nifaaqa maraaqa.
GEN 29:8 Mi maqannaasa iriseeqa qiqau. Maasa sia miqianaura. Aiqama sipsipa maaqoo aniraifaqa ooni quanda quandamma aqusee nammari nimifaranoo.
GEN 29:9 Yakooboofa misa faqa ufa qimarufanoo Raseera nammarifa narí akoona Rabanna sipsipauqa nifiqee aniranau.
GEN 29:10 Yakooboofa narí anoona Reebeeka nammarina asookina araamuna qafamaseenoo Rabanna sipsipa faqa qafamaseenoo findifinoo nammari madikaki rafaaqafuqoo oonina quanda quandamma mafi quqaseenoo Raseera nammarina sipsipauqa nammari niminau.
GEN 29:11 Nammari nimiseenoo Raseera nammarina ooriki amooqaidanoo asasirafa firaafa minaki marufanoo iki raqanau.
GEN 29:12 Iki raqaseenoo Raseera nammarina qimaminoo qinau. Qinee ani akoona ati Reebeeka nammarina amaaku maridaqa. Raseera nammarifa mina ufa iriseenoo sandeenoo oonuree narí akoona qimaminau.
GEN 29:13 Rabannafa narí anauqi Yakooboona ufa iriseenoo sandeenoo oonu mafi kaqaramma qumareenoo amooqaseenoo sukudaakutamasee afiqeenoo narí maaqai aninau. Miqoo oonu maridanoo Yakooboofa Rabanna aiqama ainaina kambiqoonara qimaminau.
GEN 29:14 Rabannafa iriseenoo maaqi qimasee qimaminoo qinau. Anee qini moodaa fidika mariananoo. Miqi qimasoofanoo Yakooboofa moodaa uqoona mina faqa miqoo marinau.
GEN 29:15 Rabannafa maaqi qimaseenoo Yakooboona qimaminoo qinau. Kuqaa anee qini qinauqi mariananoo, sia fifau qini ainaina kai innaranoo. Maqee oosana araseeqa feefauru amiqambuanaura. Ani naqifee mandee feefauru amianauree.
GEN 29:16 Rabanna araamuna qara qaaraqanda mariqau, indaaruqaafa Reeaa nammarifa marinau inaaqianaafa Raseera nammarifa marinau.
GEN 29:17 Reeaa nammarifa indaaruqaafa amiqira oori afiri faqaafa marinau. Raseera nammarifa mina faqa arusee kaaqa amiqirafa uqanna marinau.
GEN 29:18 Yakooboona irirafa Raseera nammarinara kai iri marufa marinau. Minara iriseenoo Yakooboofa Rabannana narí ainaini maruna akiiqara qimaminoo qinau. Amanee qinee Raseera nammarina maraanauree. Anee eedoo qinaqa qinee mina akiiqara qisauku dinni taikasee dinni ani qaara marasee 7 aukuana ani ainaina ianaura.
GEN 29:19 Qufanoo Rabannafa qimaminau. Qinee amana ani amianaura, moo oosana nimiranara qikooqaidanoo. Doo anee qini faqa maridana ainainia.
GEN 29:20 Rabannafa miqi qimasoofanoo Yakooboofa Raseera nammarina marararee qimaseenoo qisauku dinni taikaseenoo dinni ani qaara maraseenoo 7 aukuana mina ainaina maisee marinau. Yakooboofa Raseera nammarinara aidi marufanoo mi aukuanna namufa qaaramoo faasaanara foora aiqaranau.
GEN 29:21 Dinni taikasee dinni ani qaara marasee 7 aukuana taikasoofanoo Yakooboofa Rabanna qimaminoo qinau. Doo qini maanaaqa qimiraree qunna aukuanafa aiqareenoo. Doo Raseera nammarina qiminaqa maraa.
GEN 29:22 Rabannafa eedoo qimaseenoo narí araamuna amundaida oomaqa sakasee aiqama naaroofaqa ani naqau.
GEN 29:23 Mi eendanaki Rabannafa narí araamuna indaaruqaana Reeaa nammarina qumee Yakooboona maaqaki quqasoofanoo Yakooboofa auna Raseera nammarifa mifoo qimaseenoo mina faqa sakasee faiqanau.
GEN 29:24 Rabannafa miqoo qaraasa oosana mareeno narí ainainira maanaaqa moo minauqu Siripaa nammarina mareeqee narí araamuna Reeaa nammarina ainaina maisaanifeera aminau.
GEN 29:25 Iaqoofanoo findifinoo Yakooboofa qafamaseenoo, boo Reeaa nammari fee qinau. Yakooboofa Rabanna funnai oonureenoo aqinoo qinau. Anee naqifee ifanee qini miqimma qimaqeenee. Qinee Raseera nammarina marararee qimasee ani ainaina maiseeqa. Anee nanaree qini qikaru q inanee.
GEN 29:26 Rabannafa qinau. Maasa maaqoo qaraasa oosana sia miqinoo maridanoo. Indaaruqaana naaree amundaseeqa inaaqiannaana kasooaqee inaaqianna amundaidaqa.
GEN 29:27 Anee Reeaa nammarina faqa kaqi marinanoo mina oomaqirafa 7 faasaana mariannoo. Taikainaqa miqoo kafaa Raseera nammarina faqa amianaura. Amianana miqooqari mina akiiqara anee oosana araseenana kaifaa dinni taikasee dinni ani qaara marasee 7 aukuana qini ainaina innaranoo.
GEN 29:28 Yakooboofa minara iriseenoo eedoo qimaseenoo Reeaa nammarina faqa mariufanoo qoomaqa narana taikoofanoo Rabannafa narí araamuna Raseera nammarina faqa aminau.
GEN 29:29 Kafaa Rabannafa narí ainainira maanaaqa mina auqu Biriqaa nammarina mareeqeenoo Raseera nammarina ainainianifeera aminau.
GEN 29:30 Amufanoo Yakooboofa Raseera nammarina faqa sakasee faiqanau. Yakooboofa Raseera nammarinara aidi marufanoo Reeaa nammarinara sia amiqimma aidi marinau. Miqidanoo Rabannana ainainiranaki kafaa qisauku dinni taikasee dinni ani qaara marasee 7 aukuanaki marinau.
GEN 29:31 Yakooboona irirafa Raseera nammarinasaa kai mundinoo marunara Reeaa nammarinara akoo akaa mimarinau. Miqi marunara Karaambaiqa qafeenoo dadaaqufanoo Reeaa nammarifa amuaqu qaikinau.
GEN 29:32 Reeaa nammarifa amuaqu qaikinoo mariiufanoo faiqi akoonaiqi maqanau. Maqaseenoo qinau. Karaambaiqa qiniara qimudaoo qinara qini qifaaqi fannoo maqee qinisaa atooqeenoo fee qianaura. Mi irirana iriseenoo mi faiqina auqu Reeubeena fee qinau.
GEN 29:33 Reeaa nammarifa marikinoo kaifaa amuaqu qaikinoo mariiufanoo faiqi akoonaiqi moo maqanau. Maqaseenoo qinau. Qini qifaaqi qini ameesuqi marinara Karaambaiqa irinoo qiniara qimudaoo qimaseenoo maa faiqina qiminoo. Minara mina auqu Simeeoona fee qinau.
GEN 29:34 Reeaa nammarifa marikinoo kafaa amuaqu qaikinoo mariiufanoo faiqi akoonaiqi moo maqaseenoo qinau. Doo maqee uqanna qini qifaaqi fannoo doo qinisaa atooqaannoo, qinee qaaramoo akoonaiqi maqaseeqa. Minara iriseeqa mi faiqina auqu Reefi nee qiqa.
GEN 29:35 Reeaa nammarifa marikinoo kaifaa amuaqu qaikinoo mariiufanoo faiqi akoonaiqi moo maqanau. Maqaseenoo qinau doo maqee qinee Karaambaiqa amooqidaqa, maa faiqina auqu Yuda fee qidaqa. Reeaa nammarifa Yudana kai maqaseenoo mi kamuqoo kisaaqasaa marinau.
GEN 30:1 Raseera nammarifa narí anasaana faiqi namu nindafeenoo Yakooboona aqinoo qinau. Anee faiqi sia qini mara qimianaqa qinee kaqi marianabaqa kuquanauranoo.
GEN 30:2 Yakooboofa minara irufanoo arana qoofanoo qinau. Qinee Anutusau maridau. Anutufa kai ani itita amaqaidanoo.
GEN 30:3 Miqi qimasoofanoo Raseera nammarifa qinau. Maa qini ainaini mari manaaqafa Biriqaa nammarifa marinoo qinee mina ani amiqa. Anee mina faqa faiqeenana faiqi mara amia. Aminanoo faiqi maqasainanoo qinindi kammiannoo. Miqimasee qinee faqa faiqi anausa marianaura. (Mi aukuannai mi maqannaasa oosana miqi marusa mariqau.)
GEN 30:4 Raseera nammarifa miqi qimasee narí ainaini maru manaaqana mina auqu Biriqaa nammarina Yakooboona amisoofanoo mina faqa sakasee faiqanau.
GEN 30:5 Miqimmasoofanoo Biriqaa nammarifa amuaqu qaikinoo mariiufanoo Yakoboona faiqi akoonaiqi maqanau.
GEN 30:6 Maqasoofanoo Raseera nammarifa qafamaseenoo qinau. Doo maqee Anutufa qini oosanara andeeqara oosana fee qimasee qini innaaru qirana iriseenoo doo akoonaiqi qiminoo. Miqi qimaseenoo Raseera nammarifa mi faiqina auqu Dannaa nee qinau.
GEN 30:7 Mi manaaqafa Biriqaa nammarifa marikinoo kaifaa amuaqu qaikinoo mariiufanoo akoonaiqi moo maqanau.
GEN 30:8 Raseera nammarifa mina qafamaseenoo qinau. Qinee qeeqa qinasaana faqa firaaqoo rairai qimasee qinee uriaaqareeqee qimaseenoo mi faiqina auqu Napatari fee qinau.
GEN 30:9 Reeaa nammarifa faiqi maqarana taikaseenoo narí ainaini maru manaaqana auqu Siripaa nammarina narí afaaqi Yakooboona mara aminau.
GEN 30:10 Amufanoo minasaa faiqi akoonaiqi moo maqanau.
GEN 30:11 Reeaa nammarifa qafamasee qinau. Oo qini amiqimma qisainara mi faiqina auqu Kadafa nee qinau.
GEN 30:12 Siripaa nammarifa marikinoo kafaa akoonaiqi moo Yakooboona faiqi maqanau.
GEN 30:13 Reeaa nammarifa mina faqa nariara maraseenoo qinau. Doo qinee firaaqoo asasidaqa. Maqee aanaaseeuqa qiniara asasirafee qimasee duqu reefaranoo. Minara iriseenoo mi faiqina auqu Aseera fee qinau.
GEN 30:14 Reeaa nammarina amaaku Reeubeenafa sakumma neemaru kamuqoo andanda kinai nidanoo faiqi maqee maru andandana qaqama paqurinau. Mi aqamana auqu mandareeka marinau. Mina paqurimaseenoo mara mareenoo mini narí anoona Reeaa nammarina aminau. Raseera nammarifa mina qafamaseenoo Reeaa nammarina qimaminoo qinau. Amanee mandareeka qaqama akaqana qini faqa qiminnaree.
GEN 30:15 Miqi qufanoo Reeaa nammarifa narí qimaminoo qinau. Anee qini qifaaqi marasaanafa kaifaa qini qimaaku mandareeka qaqama marararee fee qidanee. Miqi qufanoo Raseera nammarifa qinau. Ani amaaku marai mandareekana qaqama qini qiminaqa doo Yakooboona ani amiananoo ani faqa faiqaannoo.
GEN 30:16 Eenee marufanoo Yakooboofa ainainaindari aniroofanoo Reeaa nammarifa aanai oonu afiqeenoo anidanoo qimaminau. Doo qinee mandareeka qaqama Raseera nammarina amiqa. Mifa mina akiiqara maqee eendaki aniara qini faqa faiqaannee qinoo. Miqi qufanoo Yakooboofa eedoo qimasee Reeaa nammarina faqa sakasee faiqanau.
GEN 30:17 Anutufa Reeaana innaaruqirana iriseenoo dadaaqufanoo Reeaa nammarifa kafaa amuaqu qaikinoo faiqi akoonaiqi maqanau. Moodaannai qisauku namu Yakooboonasaa maqanau.
GEN 30:18 Reeaa nammarifa maqaseenoo qinau. Qinee qeeqa ainainira maanaaqa qeeqa qifaaqi amiafannanara maa faiqina Anutufa qini qiminoo. Mifa minara iriseenoo mi faiqina auqu Isakaranee qinau.
GEN 30:19 Reeaa nammarifa marikinoo kafaa amuaqu qaikinoo akoonaiqi moo maqanau. Dinni ani moodaa maraseenoo Yakooboonasaa maqanau.
GEN 30:20 Maqaseenoo qinau. Anutufa idaaqira ainaina kaqi qiminoo. Maqee dinni qisauku taikasee dinni ani moodaa 6 maraunnanara qini qifaaqi qiniara aidiannoo. Mifa minara iriseenoo mi faiqina auqu Seeburuna fee qinau.
GEN 30:21 Mina aanaaqianna Reeaa nammarifa maanaaqa maqaseenoo Dinnaa nammari fee qinau.
GEN 30:22 Miqooqari Anutufa Raseera nammarina innaaru qirana iriseenoo dadaaqufanoo faiqi maqarana amanaikinau.
GEN 30:23 Mifa amuaquqaika mafufanoo faiqi akoonaiqi maqaseenoo qinau. Anutufa qini qisaurirana taikeenoo qini faiqi akoonaiqi qiminoo.
GEN 30:24 Raseera nammarifa minara iriseenoo qinau. Karaambaiqa qini faiqi moo akoonaiqi qimiani. Miqi qimaseenoo mi faiqina auqu Yooseefaa nee qinau.
GEN 30:25 Raseera nammarifa Yooseefaana maqasoo kamuqoo Yakooboofa Rabanna maaqi qimasee qimaminoo qinau. Anee amanee qini quqasainaqa qeeqa maaqai fua.
GEN 30:26 Qinee ani ainainammasaunana qimianna anaaseesa nári faiqi namu faqa qiminaqa maree fua. Qinee amiqimmasee ani ainaina iunnanara anee minara iri mariananoo.
GEN 30:27 Rabannafa minara iriseenoo qinau. Qini afunee fannoo aniara qima qimifaqa iriseeqa anee qini faqa marunnaqoo Anutufa qini ainaina amiqi amiqifanoo firaa qoo kambiqafinoo maridanoo.
GEN 30:28 Qinee minara iridaqa anee aneenna feefauruara qinaqa qinee ani amianaura.
GEN 30:29 Yakooboofa mina iriseenoo kafaa qimaminau. Anee qini ainainirana oosana amiqimmasee irimariananoo. Qinee ani aandau ainasaa rakisi mariafananoo qini rakisirana ameemaanai marida moomoo kambiqee irairaa imariqau.
GEN 30:30 Qinee aniafanna kari ani ainaina oodaa kai marinau. Qinee maaqoo ani maridaqa ani ainaina aiqamai auqaunanoo Anutufa dadaaqifanoo firaanaikinoo maridanoo. Qinee maqee qeeqaree qianna ainainausa maraanaura.
GEN 30:31 Miqi qima soofanoo Rabannafa irinoo narí qimaminau. Doo anee qiananoo naqifee masee feefauru ani amianauree. Miqi qufanoo Yakooboofa qinau. Sia anee feefauru munnimma aina qini qimia. Qeeqa qiannana kai qimia. Qinee kaqi ani sipsipasaa rakisi marianana qini maa iriranara anee eedoo qinaqa ani sipsipasaa rakisianaura.
GEN 30:32 Qinee maqee ani sipsipauqa mariannai oonuree aiqama takoosa takoosira sipsipauqa faqa mimmi miqiranauqa faqa sipsipa aanaaqi ruduqariranauqa faqa maraanaura. Mi feerunara kai qini dididanoo.
GEN 30:33 Qinee andeeqasee maraanaura anee kasooaqee aneenna oonu reenana qafaa. Eekara arira sipsipa qinindiki marinana eekara fee dunduqarira mimmi fee qinindiki marinana qiniara qumuara miaanoo qia.
GEN 30:34 Rabannafa mina iriseenoo asasa mandee qinau. Eeoo maasa anee qianandeemmianaura.
GEN 30:35 Mi faasaanna qumee kai mimmi akoona takoosa takoosa iranauqa faqa mimmi anaasee miqiranauqa faqa eekarasai runduqasai irana faqa runduqarira sipsipauqa faqa moodaanaki quqaseenoo narí faiqi namuara qufaqa misasaa rakisiqau.
GEN 30:36 Rabannafa Yakooboonara maraandoo qimasee narí mimmi sipsipa mara mareenoo narí faiqi namusaa quqasoofaqa nianai qaaramoo afuru aanai faiqee oonuraaqaa irannai munu quqasee rakisi mariqau. Maree fifufanoo Yakooboofa akaqa sipsipauqa mafisoosasaa kai rakisi marinau.
GEN 30:37 Rabanna sipsipasaa maqusai rakisida maridanoo saqari amimiuqa ateekaseenoo moodaa mau apata ruata aquseenoo eekara ari marutinai quandaseenoo sipsipa nammari nee maruqoo rakiqanau.
GEN 30:38 Sipsipa mimmi nammari naidaqa miqoo ani raidaqa naafeeqaambaaqaa rimariqau. Yakooboofa mi saqarisa sipsipauqa difaaniki nammari neemaruqoo rakiqaqoofanoo marufaqa sipsipauqa nammari narara anireeqa mi saqarina qafaidaqa akoonauqa anaasee naafeeqaambaaqaa riaqeera rakianau.
GEN 30:39 Mimmiuqaindi miqoo mina qafaidaqa akoonauqa anaasee naafeeqasoofaqa akarakaurira aanaaqiuqa maqaqau.
GEN 30:40 Yakooboofa sipsipauqa nifiqeenoo akarakaurira mimmiuqa maruqoo munusaina sipsipa akoonauqa akarakaurirana qafaidaqa anaasee sipsipa naafeeqasaifaqa miqirana maqaaqeera nifiqee finau. Miqi marunannoo Yakooboofa akarakaurira aanaaqiuqa narindiki mareeqaida aaduma quqee marufanoo moomooki marinau.
GEN 30:41 Nifaaqauqa faqaa sipsipa faqa mimmi faqa naafee qaambaaqaa rirara ufanoo Yakooboofa mi saqari asaanausa mareeqee nammari neemaruqoo rakiqeesoofaqa minakiaqa nidaqa naafeeqee mariqau.
GEN 30:42 Nimudaani aanaaqi ummooqukiqa nusa naafeeqara rufanoo Yakooboofa sia mi saqarisa rakiqanau. Miqimmasee maru fanoo Rabananaindi amudaani aanaaqi ummooqukirafauqa kai marufanoo Yakooboonaindi nifaaqauqa faqaasa amiqirausa kai mariqau.
GEN 30:43 Mi oosannanannai Yakooboofa moomoo akinaina faqaafa marinau. Mina sipsipa mimmi moomoo uqanna mariqau. Mina ainainira fasiqauqa faqa aanaaseeuqa faqa kammeerauqa faqa doonkiuqa faqa moomoo qumbiqaqa mariqau.
GEN 31:1 Yakooboofa irufaqa Rabanna faiqi namu misa Yakooboona ainaina moomoo qafamaseeqa aqidaqa qiqau. Yakooboofa maasa qikoonaindi aiqama mareeqee narinni quqeenoo. Yaindaraanee maa firaa qumiasanna mareenoo fee. Maasa qikoonaindi kai mareenoo.
GEN 31:2 Yakooboofa mi ufana iriseenoo quanda fufanoo Rabanna oori qafoofanoo sia ooqai undee oori runinoo marufanoo qafanau.
GEN 31:3 Mi kamuqoo Karaambaiqa Yakooboona qimaminoo qinau. Doo findi finana aneenna akoona faqa aneenna ainaina maqai fua. Anee finaqa qinee ani faqa marianaura.
GEN 31:4 Yakooboofa mi ufana iriseenoo sipsipa rakisi marunnaindari Raseera nammarina faqa Reeaa nammarina faqa naaroofaqa oonu roofanoo qima niminau.
GEN 31:5 Ooqai inni nikoona oori sia runinoo mariufa maqee oori runifaqa qafaidaqa. Sia qiniara amiqi amiqidanoo. Miqimmi marifaqa qini qikoona Anutufa qini faqa mariufa maridanoo.
GEN 31:6 Inneeqara irimariafanoo, qinee qeeqa afeekannai inni nikoona ainaini mariqiafana.
GEN 31:7 Miqi mariafanano mifa qini qikaru qimaseenoo qisauku qara 10 kari qini feefauru quandaqaandinoo. Miqi marifanoo Anutufa qifanoo sia qini mandaikamma qimaqeenoo.
GEN 31:8 Inni nikoona ainaina iafannana feefauru mina sipsipa nifaaqa takoosa takoosa irana kai mi aukuanna maqee marufaqa qinee mareeqee qeeqaindiki quqee mariqiafana. Inni nikoofa qini feefauruara nifaaqa akara kau rirausa kai maraannee qufaqa mina sipsipauqa mi aukuannai miqi ranauqa kai maqee marufaqa mareeqee qeeqara qeeqaindiki quqee mariqiafana.
GEN 31:9 Miqimma saafananoo Anutufa inni nikoona aandau aina mareeqeenoo qinindiki kai quqaqiseenoo.
GEN 31:10 Mimmi sipsipa nariqa araraiki maru anaana qinee qaina qafaafananoo mimmi akoonauqa aanaaseeuqa naafeeqee marufaqa qafaqiafana. Mi akoonausa aiqama akarakau rirausa faqa nifaaqa takoosa takoosa irausa faqa anaasee naafeeqee mariqau.
GEN 31:11 Qinee qainasaa qafaafananoo Anutuna angiroo moo fannoo qini daaroofaqa qinee maqi qiqiafana.
GEN 31:12 Foo qiafananoo qinau. Qafaa maa nifaaqa takoosa takoosira akoonauqa naafeeqaidaqa. Qinee Rabanafa ani mandaikamma amaqee marina qafamasee qunanoo maa ainainafa kambiqaidanoo.
GEN 31:13 Qinee ooqai Beeteera maqa maaqai ani afusaa koorooiafanna Anutusa maridaqa. Miqoo anee aaqoo auqara ooni rakiqasee oorifa fadameena minasaa adiasee qiniara qima afeekaikinau. Doo maqee indaammamaree aneenna maqusai anirandee anee kambiqoonna maqanasaa fua.
GEN 31:14 Raseera nammarisa Reeaa nammarisa qimannimi soofaqa Yakooboona ufa iriseeqa qimamiqau. Sia maasa qikoona qumiasana aina kaqi marinaqa maasa maraanaura.
GEN 31:15 Mifa maaqandara aanaamuruara foora midanoo. Doo mifa maaqandasaa feefauru mara mareenoo doo nariki kai taikeenoo.
GEN 31:16 Anutufa maaqanda qikoona kinaana mareeqee maaqanda faqa maaqanda faiqi namu faqa nimifanoo maasaindi kamminoo maridanoo. Anutufa ani qimamindee ia.
GEN 31:17 Yakooboofa misa ufa iriseenoo narí akoona maqai Kannaana maqasaa firara deedaqinau. Mifa narí aanaaqmaaka faqa narí faiqi namu faqa kammeerauqa saa quqasee ooqu mari fufanoo finau.
GEN 31:18 Yakooboofa narí mimmi sipsipa doonki kammeera aiqama Meesoopootamia maqusai marida maroo ainainausa aiqama mareeqee oorinni quqaseenoo doo narí inaaqianna Kannaana maqa maaqai finau.
GEN 31:19 Rabannafa narí sipsipa asausi moosaa oonu aukirara fifufanoo Raseera nammarifa narí akoona maaqaki keeqa fufanoo narí akoona afunee ainaina maaqaki quqaqoona qumee kai mara mareenoo kukeeqa mareenoo Yakooboona faqa sia qimamirai doo mara mareenoo narí afaaqi faqa finau.
GEN 31:20 Yakooboofa Rabannana akaru qimasee sia qimamirai quqasee finau.
GEN 31:21 Yakooboofa narí ainaina namu faqa mareenoo kai kaqi ufanoo finau. Fifii ufanoo Eeufarateesa nammari taqa mareenoo dinni afainni oonu ranau. Doo miqooqari Kiriata aaqana qaannai oori ubeekamafi finau.
GEN 31:22 Qaarammoo faasaana aiqaroofanoo Yakooboofa sandoonara Rabanna qimamiqau.
GEN 31:23 Rabannafa minara iriseenoo narí aiku asauku aiqama nifiqee Yakooboona aanaaqiana afaqee finau. Dinni taikasee dinni oonu qaara marasee 7 afuru aanai fi faiqeenoo afaqee finoo oonu Yakooboona paqurinau. Kiriata aaqana moo amuaqu namusaa paqurinau.
GEN 31:24 Rabannafa aanai faiqaqee ufanoo mi eendanaki Anutufa qaina afunnareenoo qimaminau. Anee sia Yakooboona manda ufa amia.
GEN 31:25 Yakooboofa aaqanasaa narí uiqaana maqa usakaseenoo marufanoo Rabannafa narí ainaina faqa oonu reenoo mifa faqa narí uiqaana maqa Kiriata amuaqu namusaa usakanau.
GEN 31:26 Usakaseenoo Rabannafa oonu reenoo Yakooboona qimaminoo qinau. Naqi fee ifanee qini qikaru qimaseenee qini qiraamuqmaaka rakiranakiara foora rarisamammaree sandeenee.
GEN 31:27 Naqi fee ifanee sia qima qimirai qikaru qimasee qumee quqasee sandeenee. Anee qini qima qiminaqau qinee idi namu faqa asasirana namu faqa piripunna faqa dukaanaa faqa aridaqau aiqani.
GEN 31:28 Anee sia qini qima qimianaqa qeeqa qinaiqi mara faqa qeeqa qiraamuna qara faqa nimooqa saanana nifiqee aniaqaana. Anee furufarira ainaina auqaananoo.
GEN 31:29 Qinee ani mandaikamma amaqara afeeka marifaqa marunanoo eenda eendaki ani akoona Anutufa qini rafaaqafu seenoo qinoo. Anee sia uqanna Yakooboona mandaika mamaqaa qifaqa sia mandaikamma amaqaanauara.
GEN 31:30 Qinee iridaqa anee aneenna akoona maqa maaqara oonu mafi iriananoo aundura dapikifana qini qisee sandaananoo. Naqaa fee ifanee qini maaqaki rakisi maria anutusa ummuara mamaree aninanee.
GEN 31:31 Yakooboofa iriseenoo qimaminoo qinau. Qinee aniara narí araamuna qara rafiqaandoo qimasee rufiasee sandeeqa.
GEN 31:32 Ani maaqaki rakisi maria anutusa marainnana paqurimmaseenana kuqa arua. Doo qini qiku qisauku nifusaa qini ainaina moodaa moodaa mara quqaseenana aneenna ainaina paqurimmasee maraa. Yakooboofa Raseera nammarifa narí akoona Rabannana unnaqira anutusa ummuarunara sia irirai miqi qinau.
GEN 31:33 Rabannafa Yakooboona uiqaana maqaki keeqa fufanoo randoosia sia paqurinau. Miqooqari Rabannafa Reeaa nammarina uiqaana maqaki keeqafi randoosia. Kafaa miqooqari ainainira maanaaqaqara uiqaana maaqaki faqa keeqafi randasee sia paqurinau. Miqooqari Rabannafa Raseera nammarina uiqaana maaqaki keeqafinoo randanau.
GEN 31:34 Raseera nammarifa Rabannana maaqasaa rakisi maru anutusa mareeqeenoo kammeera saririqa maaqaki quqaqoona uqeeraseenoo minaki kukeeqaseenoo minasaa ooqu faaqee marinau. Rabannafa Raseera nammarina uiqaana maqaki aiqama ainainaki randasee qafoofanoo sia marinau.
GEN 31:35 Rabannafa randeemarufanoo Raseera nammarifa narí akoona qimaminoo qinau. Oo qipoo sia qinee findi fuanana sia qini diqia. Qinee qimaaqai qafaidaqa sia findi fidaqa. Miqi qufanoo Rabannafa aiqama ainainaki randoosia sia paqurinau.
GEN 31:36 Sia paqurufanoo Yakoobofa amambaina qimasee aanoo qidanoo qinau. Qinee nana aaqaranee maree fee. Nana sandufee rukiasaunana aranaqaifanee qiniara randamaree qumidanee.
GEN 31:37 Anee qini ainainaki randeesee doo fee aneenna ainaina paqurinanee. Doo mina mareeqeenana aneenna faiqi namu nifusaa faqa qini faiqi namu nifusaa faqa quqasee ufa qida qafaa, yafee andeeqeenoo fee.
GEN 31:38 Qinee moodaa fasiqa aiku asauku taikasee 20 aukuana ani ainaina imariqiafana. Mi kamuqoo ani sipsipa ani mimmi sia moo fannoo dapi maqee mariqau, amiqi kai mimariqau. Sia ani sipsipa akoona moo arusee naqiafana.
GEN 31:39 Kaasau faini ani sipsipa arusoofaqa qinee mina amudaani apata siamma ani uqafiqee mariqiafana qeeqaindi kai moo mareeqee mina amaaqa maqeeqa anindiki quqee mariqiafana. Ummuara fasiqa eendaki fee faasaana fee ummuara masoofana anee qiniara qunaqa qinee qeeqaindi mareeqee anindiki quqee mari qiafana.
GEN 31:40 Qinee moomoo kari ani ainaina imariafananoo suani darinoo eendaki suara darinoo miqi marufaqa sia faiqee mariqiafana. Miqidaqa ani ainainasaa rakisi mariqiafana.
GEN 31:41 Yakooboofa qimamidanoo qinau. Qinee moodaa fasiqa aiku asauku taikasee 20 aukuana ani ainaini mariafanausa marida. Qisauku qara taikasee qikunooqu qaara faqa qaara faqa marasee 14 aukuana ani araamuna qara mararara ani ainainiaafanausa maridaqa. Dinni taikasee dinni oonu moodaa marasee 6 aukuana ani sipsipa mimmi mararara kaifaa ainaini qiafana. Miqi mariafanana anee qisauku qara taikasee 10 kari anee qini feefauruara qikaru maakaru qimarinau.
GEN 31:42 Abaraqaammana Anutufa qini qikoona Isakeena Anutufa sia qini dadaaqinanau anee qiniara kaqi samu fua qinaqau qinee kaqi samu fini. Anutufa qini ummaara faqa qini kadaapirirana faqa qiqafamaseenoo eenda eendaki narí ufa irirana ani aminoo.
GEN 31:43 Rabannafa Yakooboona mi ufana iriseenoo qinau. Maa ani anaaqa qara qini qiraamuna qara maridaqa maa ani faiqi namu qini qinaiqi mara maridaqa maa ani sipsipa qinindi uqanna maridanoo, maa aiqama ainaina anee marana nuanafa aiqama ainaina maaqoo marifa qinindi kai maridanoo. Qinee sia amana qeeqa qiraamuna qara faqa qinaiqi mara faqa rafaaqa fuanaura.
GEN 31:44 Doo maqee ani faqa moodaanaki ufa qirara deedaqidaqa. Anindiri ooni aaku aakummasaananoo mifa maasa moodaanaki kira ufara daaqoo auqaannoo.
GEN 31:45 Yakooboofa minara iriseenoo eedoo qimaseenoo ooni firaatia qumaree kuradama seenoo daaqoo auqara ooni fee qinau.
GEN 31:46 Miqimmaseenoo Yakooboofa narí ainainira faiqiuqara qufaqa ooni moomoo suqusee aaku aaku iqau. Miqimmasee mi ooni aaku aaku irana aakaarinni ooqumarifi narana naqau.
GEN 31:47 Namaseeqa Rabannafa mi oonisa auqureenoo Yageer Sahadutaa fee qimasee narí ufakiqari auqu ramasoofanoo Yakooboofa narí ufakiqari Gareeda fee qinau. (Mi nuquna oosana daaqoo auqara ooni fee qimasee nári ufakiqari auquraqau.)
GEN 31:48 Rabannafa Yakooboona qimaminoo qinau. Maa ooni aaku aaku irafa anindiri daaqoo auqarafa mariannoo. Minara mi maqusana auqu Gareeda fee qianaura.
GEN 31:49 Rabannafa kafaa maaqi qinau. Karaambaiqa fannoo maaqanda daraaniananoo mina afu fannoo maasasaa mariani. Miqi qimaseenoo mi maqusana auqureenoo Misipaa fee qinau.
GEN 31:50 Rabannafa maaqi qinau. Anee qini qiraamuna qara mandaikamma nimaqeennaree moo anaasee fee mareennaree, qinee sia minara iriananoo Anutufa anindirisaa rakisidanoo.
GEN 31:51 Maaqoo qinee ooni aaku aaku maqaunanoo anindiri qara qambaana maridanoo. Maaqoo daaqoo auqara ooni rakiqarafa faqa maridanoo.
GEN 31:52 Maa ooni aaku aaku irafa faqa rakiqarafa faqa anindiri daaqoo auqarafa maridanoo. Qinee sia mina fiaaqaree ani aruanaura. Anee faqa sia mina aiaaqaree qini darua.
GEN 31:53 Abaraqaammana Anutufa faqa Naqoorana Anutufa faqa maasa qambaana andeeqa qisaannoo. Rabannafa miqi qufanoo Yakooboofa qinau. Qini qikoofa Isakeefa innaaru qimamaqee mari Anutuna auqusaa qimasee afaqaanauree qimasee qima afeekaikinau.
GEN 31:54 Miqi qimaseenoo Yakooboofa aandau aruseenoo mi aaqannasaa Anutuna aandau tatufusee suqaminau. Suqa amiseenoo Yakooboofa narí aiku asauku naaramasoofaqa moodaaqoo ooqu mari fufaqa mi aandauna ataraasa naqau. Namasee mi aaqannasaa faiqaqau.
GEN 31:55 Kananaana findifufanoo Rabannafa narí anaiqimara faqa araamuna qara faqa nimooqa namasee nimandamasee amaaqa finau.
GEN 32:1 Yakooboofa miqooqari findi fufanoo narí anaukoo unnai aanai fimaru fanoo Anutuna angiroouqa aanai ani paquriqau.
GEN 32:2 Yakooboofa nindafamaseenoo qinau. Maa maqa maaqafa Anutuna uiqaana maqusa maridanoo. Miqi qimasee mi maqusana auqureenoo Maqannaimmee qinau.
GEN 32:3 Yakooboofa narí faiqi namu qaaramoo ufa maree narí afasaafa Eesau funnai fuaqeera niiqoofaqa Eedoomma maqa maaqai fiqau.
GEN 32:4 Miqoo qini qifasaana paqurimmasee qini maa ufana qimamiaqa. Qinee Yakooboosa ani ainainira faiqi maaqi qimasee ani Eesauna qini uriqararana qimamidaqa. Qinee Rabannana faqa maridaqa anirara masaidaqa mariifaqa maqee anidaqa.
GEN 32:5 Qinee burimmakau faqa doonkiuqa faqa sipsipa faqa mimmiuqa faqa ainainira faiqiuqa faqa faqaasa maridaqa. Qinee aniara ufa quqaidaqa qini uriqararafa qini maa ufafa ani asooamamaqaanifeera qidaqa.
GEN 32:6 Ufa mareefu fasiqausa oonu randee aniree Yakooboona maaqi qimasee qimamiqa qiqau. Doo maasa ani afasaana qimamisaunanoo mifa narí ainainira fasiqauqa maqi handareeta 400 namu faqa maasa inaaqianna anidanoo.
GEN 32:7 Yakooboofa mi ufana irufanoo aaququqoofanoo moomoo irirana maranau. Miqufanoo narí sipsipauqa faqa mimmiuqa faqa burimakauqa faqa kammeerauqa faqa qaaraki raina quqanau.
GEN 32:8 Maaqi qimasee qimirinau. Eesaufa anireenoo moo usiranaki narinaqa moo usiranakiqari amana sandeefaranoo.
GEN 32:9 Miqimmasee Yakooboofa maaqi qimasee innaaru qinau. Oo Anutu, qini qinaakuna Abaraqaammana Anutufa qini qikoona Isakeena Anutufa qini innaaru iria. Karaambaiqa anee qini qima qimiananoo aneenna maqa maaqai aneenna ainainiannai finaqa qinee aiqama ainaina andeeqa aisaanauranoo fee qinau.
GEN 32:10 Oo Anutu anee qini amiqi amiqimma qisarana faqa ani mapukira dadaaqiranara faqa irunanoo uriqaraifaqa qinee oorudupiqa maridaqa. Qinee ooqai Yooradanna nammari qeeqa saunu kai uqirausa taqaqiafana doo maqee qinee qaaraki rainarausa faqa anidaqa.
GEN 32:11 Qinee qeeqa qifasaana Eesauna asaukukinaana asumu mara quqaqisaanneera innaaru qidaqa. Qinee minara rufiaidaqa. Mifa anireenoo maasa faiqi anaasee faqa aiqama daru taikaandoora rufiaidaqa.
GEN 32:12 Anee maaqi qimasee qiniara qima afeekaikinau. Ani aiqama ainaina andeeqamma aisaanauranoo fee qinau. Ani moomoo faiqi asumu amianaqa sia amana moo fannoo asaana ruannoo, nukudara foora sia kasoo uqanna marifaranoo fee qinau.
GEN 32:13 Yakooboofa miqi qimaseenoo innaaru qimaseenoo mi eendanaki miqoo faiqeenoo iaqoofanoo narí aandau Eesauna amiraree qimasee raina quqanau.
GEN 32:14 Mifa mimmi anaasee 200 faqa mimmi akoona 20 faqa sipsipa anaasee 200 faqa sipsipa akoona 20 faqa raina aaduma quqanau.
GEN 32:15 Miqimmaseenoo kaifaa kammeera anaasee 30 faqa nári aanaaqi naamma neemarusa faqa burimakau anaasee 40 faqa akoona 10 faqa doonki anaasee 20 faqa akoona 10 faqa raina quqanau.
GEN 32:16 Yakooboofa raineeqeenoo aandau oosana oosana naadu naadu kai quqaseenoo narí ainaini maru faiqisa moodaa moodaa mareeqeenoo minauqasaa rakisiaqeera quqanau. Quqaseenoo maaqi qimasee qimanniminoo qinau. Innee qini qifunni fidaqa adaaraika masaidaqa niana niana maridaqa fuaqa.
GEN 32:17 Miqi qimaseenoo Yakooboofa indaarufu faiqina qimaminoo qinau. Qini qifasaafa Eesaufa paquri maseenoo irainana yafee ani uriqararafa maridanoo fee yaifee anee fidanee yana aandauqee anee maree fidanee, qinana anee maaqi qimasee narí qimamia. Maa ainausa ani ainainira faiqi Yakooboooonaindi maridanoo. Mifa narí uriqararana Eesauna amiannee qimasee quqasaifaqa maree anidaqa. Yakooboofa narí inaaqianna anidanoo mifoo qia.
GEN 32:19 Yakooboofa indaaru fu faiqina qimamundee kai minoo mina aanaaqiana fusa faqa miqi kaimmasee qimanniminau. Innee Eesauna paqurimmasee miqi kaimmasee qimamiaqa.
GEN 32:20 Innee maaqi qiaqa. Eeoo ani ainainira faiqi Yakooboofa inaaqianna anidanoo mifoo qiaqa. Yakooboofa narí kai oonu mafi irinoo qinau. Qinee maa ainainausa amiannanannoo mina irirana quandasaananoo qiniara amiqi amiqiani. Qinee mina paqurimasaananoo aqbee mifa qini numooo minniqisaannoo.
GEN 32:21 Eesauna amaqoo ainainausa indaaru fifufanoo doo narí miqoo mi uiqaana maqusanaki faiqanau.
GEN 32:22 Mi eenda amuqusanai Yakooboofa findi fufanoo narí anaaqa qara faqa narí ainainira anaasee qanda faqa narí faiqi namu qisaukuqara taikasee qikunni ooqu moodaa marasee 11 nifiqamareenoo Yabooka nammari fitaqamareenoo muqu afainai munu nisanau.
GEN 32:23 Munusee niiqamasoofaqa fufanoo narí aiqama aandauqa faqa mara quqasoofaqa misa faqa taqaqau.
GEN 32:24 Taqa nimaqaseenoo naríara dinni afainni kaqi marinau. Marufanoo faiqí moo fannoo anireenoo aitata fufanoo Yakooboona qumaranau. Uaqeeidanoo narí rudammiqi narí rudammiqi idamarufanoo iaqarafa adeedi ranau.
GEN 32:25 Sia mi fasiqafa Yakoboona uraaqaranau. Miqi usianoo asauku samu Yakooboona upisuna aranaiqi arinau. Miqubaqa Yakooboona upisuna arufanoo amudaani ootuparafa aikatamafufanoo raaqee raaqee inoo ninau.
GEN 32:26 Iaqoofanoo mi fasiqafa Yakooboona qimaminau. Doo qini quqasainaqa fua, doo iaqarafa adeedi reenoo. Yakooboofa iriseenoo qinau. Sia ani quqaanaura. Anee qini qifaaqooqa qima qimaqasainaqa quqaanaura.
GEN 32:27 Mi fasiqafa Yakooboona qimaminoo qinau. Ani auqu yafee. Aneenna auqu rainaqa iria. Yakooboofa qinau. Qini duqu Yakooboosa maridaqa.
GEN 32:28 Miqi qufanoo mi fasiqafa qinau. Maqee maaqooqari Yakooboofa taikaannoo ani auqu Isaraeerafa marinnaranoo. Anee Anutuna faqa faiqí faqa aitatafi qumaraanannannoo uriqararafa marianaqa minara ani auqu Isaraeera fee qidaqa.
GEN 32:29 Miqi qimasoofanoo Yakooboofa mi fasiqana qimaminoo qinau. Aneenna auqu qimaqimia. Miqu qufanoo mi fasiqafa qinau. Nanaree anee qini duqu irirara iraidanee. Miqi qimaseenoo Yakooboona afaqooqa qimama qaseenoo doo quqaseenoo finau.
GEN 32:30 Mi fasiqafa fifufanoo Yakooboofa qinau. Qinee Anutuna oori qafamaseeqa sia kuqiqa kaqi maridee qimaseenoo miqoo auqureenoo Peenieera fee qinau.
GEN 32:31 Suani afu ururoofanoo Yakooboofa Peenieera maqa quqaseenoo upisuna aidafi marufanoo reetaa reetaa qinoo finau.
GEN 32:32 Miqooqari oosana arasee Isaraee maqannaasa sia aandau upisunakinaa amaqi neemariqau. Maqee faqa sia naidaqa. Anutuna angiroo fannoo Yakooboona upisunaki arunara iridaqa sia naidaqa.
GEN 33:1 Yakooboofa qafoofanoo Eesaufa 400 fasiqa faqa aninau. Yakooboofa mina qafamaseenoo narí faiqi namu rainasee Reeaa nammarina faqa Raseera nammarina faqa ainainira anaasee qaaraqanda faqa niminau.
GEN 33:2 Nimiseenoo indaaru narí ainainira anaasee qara faqa nári faiqi namu faqa niiqoofaqa fiqau. Misa ninaaqianna Reeaa nammarifa narí faiqi namu faqa finau. Inaaqianna uqanna Raseera nammarifa narí faiqi Yooseefaana faqa finau.
GEN 33:3 Yakooboofa misa noorinni indaaru finau. Oonu reenoo dinni taikasee dinni oonu qaara marasee kari maqasaa mapaminoo fifiufanoo narí afasaafa maruqoo oonuranau.
GEN 33:4 Eesaufa Yakooboona oori qafamaseenoo sandamammareenoo ani kaqaramma qumaraseenoo amooqananau. Miqanda aiqama qara qiki raqaqau.
GEN 33:5 Qiki raqaseenoo Eesaufa quanda fufanoo Yakooboona faiqi anaasee nindafamaseenoo qinau. Maa ani faqa aniasa yausee maridee. Qufanoo Yakooboofa qinau. Oo uriqararafa maa faiqi anaaseesannoo Anutufa qini amiqi amiqimma qimaqeenoo.
GEN 33:6 Miqi qimarufanoo Yakooboona ainainira aanaaseeqara nári faiqi namu faqa Eesauna oorisaa ani ninuka tuqu naumoo amisee reendeeniqau.
GEN 33:7 Miqanda ninaaqianna Reeaa nammarifa narí faiqi namu faqa anireenoo miqinau. Mina aanaaqianna uqanna Raseera nammarifa narí faiqi Yooseefaana faqa anireenoo miqikai inau.
GEN 33:8 Miqima soofanoo Eesaufa Yakooboona maaqi qimasee qimaminau. Faasai qafaunna aandausa oosana naqaa fee inoo maridano fee qufanoo Yakooboofa qinau. Ani aqoondikiraree qimasee kaqi ani amidaqa.
GEN 33:9 Miqi qufanoo Eesaufa narí qimaminoo qinau. Qinindi moomoo maridanoo aneenaindi aneenna kai maraa.
GEN 33:10 Miqi qufanoo Yakooboofa qinau. Qinee ani aqoondikiqa amunna ainainausa kaqi maraa. Anee qini kaaqa aqoondi kiannanara qinee ani oori Anutuna ooriara foora qafaidaqa.
GEN 33:11 Qinee ani amiraree qimasee maree anunna ainainausa maraa. Anutufa qini amiqi amiqimma qiseenoo qini didimari aiqama ainainausa qiminoo. Yakooboofa maraanifeera afeekaiki marufanoo Eesaufa maranau.
GEN 33:12 Eesaufa Yakooboona qimaminau. Doo uqeeraina anindiri fua qinee ani oorinni fuanana anee qini qinaaqianna ania.
GEN 33:13 Qufanoo Yakooboofa qinau. Oo qini uriqararafa anee iria, qini faiqi namu ummooqukiqa mariafaqa qinee sipsipa faqa misa aanaaqiuqara faqa iridaqa. Misa moodaa faasaana rarisaqa fimarianaqa aiqama aandauqa kuqifaranoo.
GEN 33:14 Anee indaaru finaqa qinee ani afaqee kasooaqee qeeqa aandauqa faqa faiqi namu faqa fifiinaqa Eedoomma maqa maaqaki ani paqurianauranoo.
GEN 33:15 Miqi qufanoo Eesaufa qinau. Doo amana qini faiqi namu akaqausa ani dadaaqi fifaranoo. Qufanoo Yakooboofa qaoo qinoo qinau. Qinee ani aqoondikunnanara minara kai firaa ainainee qidaqa. Doo amana qeeqa kai fuanauranoo.
GEN 33:16 Eesaufa mi ufana iriseenoo doo mi faasaanna kai anirandee narí maqa maaqai Eedoomma maqa maaqai finau.
GEN 33:17 Miqufanoo Yakooboofa Sukoota maqa maaqai oonureenoo narí maaqa faqa narí aandau auqaana faqa usakanau. Minara mi maqusana auqureenoo Sukoota fee qinau.
GEN 33:18 Yakooboofa Meesoopootamia maqa maaqaindari oonurandee amiqimmaseenoo Kannaana maqa maaqai Seekeemma maqusaki anireenoo narí uiqaana maqa mi maqusana adeedi usakanau.
GEN 33:19 Usakaseenoo Yakooboofa mi maqana Amoorana Seekeemana akoona aiku asauku unnai wan handareeta 100 siruaa munnimmannoo feefaurinau.
GEN 33:20 Feefauru maseenoo tatufirana suqara qainda auquseenoo mi kaqikaa maqusana auqureenoo Eeraa fee qinau. Mi auquna oosana Isaraee maqannaasa Anutu fee qinau.
GEN 34:1 Moo kari Dinnaa nammarifa Yakooboosa Reeaa nammarisa niraamuna fannoo Dinnaa nammarifa Kannaa maqannaa aanaaseeuqa nindafaanee qimaseenoo finau.
GEN 34:2 Seekeemmafa Amoorana amaaku Qifina aiku asaukukinaafa mi maqa maaqanakinaasa uriqararafa Dinnaa nammarina aanai paqurimaseenoo rarisanau.
GEN 34:3 Mifa qafoofanoo Dinnaa nammarifa kaaqa amiqirafa marufanoo amuqusa mandaikufanoo amiqira ufannoo mi manaaqana amuqusa reendeenianee qimasee amiqira ufauqa qinau.
GEN 34:4 Seekeemmafa narí akoona Qamoorana qimaminau. Anee maa manaaqana feefaurumma qiminaqa qinaaqara maraa.
GEN 34:5 Yakooboofa narí araamuna Dinnaa nammarina rarisoonara iriseenoo kasoo inoo marinau. Narí faiqi namu narí aandausaa rakisi marusa nianai marufanoo nifeesi marinau.
GEN 34:6 Seekeemmana akoofa Ammoorafa Yakooboona faqa ufa qirara finau.
GEN 34:7 Oonuroofaqa kai Yakooboona faiqi namu aandausaa rakisiusa aniraqau. Misa Dinnaa nammarina rarisoonara irufanoo sia faiqí auqaaqaa ira ainaina marufaqa kaaqa niranaqeenoo nifai sandurinau. Seekeemmafa Yakooboona araamuna rarisoonannoo Isaraee maqannaasa nuqu mara maree quminau.
GEN 34:8 Qamoorafa maaqi qimasee Yakooboona qimaminau. Qini qimaaku Seekeemmana irirafa ani araamunara firaaqoo aqufifaqa ani qimamidaqa. Amanee mina maraannoo fee.
GEN 34:9 Sainaqa maasa moodaanaki kira ufa qimasaanaqa kaqi ani maqannaa faqa qini maqannaa faqa kaqi narí maree narí maree iaqa.
GEN 34:10 Miqi mandaanaqa innee maa maqanasaa maridaqa kaqi dapi maa maqa maaqanaki oonuree aniree idaqa maqa akausa mariaqa.
GEN 34:11 Seekeemmafa Dinnaa nammarina akoona faqa asooqmaaka faqa qimanniminoo qinau. Innee qini didi marindee masaifaqa inni nidi mari ainaina nimianaura.
GEN 34:12 Inni nidi mari ainainnara qimaqimifaqa nimianaura. Firaa feefauruara qifaqa nimianaura. Innee qiniara mina maraannee qimasee innee iraifandinna ainainna kai nimianaura.
GEN 34:13 Miqi qimasoofaqa Yakooboona faiqi namu nári nisookina rarisoonara iriseeqa akaru qira ufa Seekeemmana faqa mina akoona Amoorana faqa qimannimiqau.
GEN 34:14 Maaqi qimasee qimamiqau. Maasa sia amana qeeqa dauna nifaaqa ati sia aukirausa nimianaura. Miqiqa maasa firaaqoo qisauruanoora.
GEN 34:15 Innee maasa daanna reeqa inneeqa faiqi namu nifaaqa ati aukusaifaqa minara kai maasa eedoo qianauranoo.
GEN 34:16 Miqimmasaifaqa maasa inniara eedoo qimasee inni faqa narí maree narí maree ifaranoo. Maasa inni qambaana maridaqa inni faqa moodaa maqannaa marianauranoo.
GEN 34:17 Innee sia mi ufanara eedoo qimasee nifaaqa ati ateekaifaqa maasa qeeqa dauna afiqamaree doo fuanaura.
GEN 34:18 Mi ufausara Qamoorafa faqa mina amaaku Seekeemmafa faqa iriseeqa amanee qiqau.
GEN 34:19 Seekeemmafa kai kaqi uqanna inoo misa qimamundee inau. Mifa Yakooboona araamunara aidi marunara miqinau. Seekeemmafa narí aiku asaukukiqari kaaqa uriqararafa marinau.
GEN 34:20 Amoorafa narí amaaku Seekeemmasandiri ufa suqimaru maqusanasaa faandaaura kooqiki oonuree nári maqusanaki marusa maaqi qimasee qimanniminau.
GEN 34:21 Maa fasiqausa aqoondiuqa maridaqa. Saifaqa maa maqanasaa maridaqa mana mana iqa nuaqa. Maa maqafa firaafa maridanoo. Misa faqa amana marifaranoo. Maasa misa niraamuqmaaka maraanaqa misa faqa maasaindi mareefaranoo.
GEN 34:22 Maa fasiqausa maasa qambaana marirara eedoo qidaqa moodaa mariranaki mariranara eedoo qidaqa. Maasa misa naanna reeqa qeeqa faiqi namu akoonaiqiuqa nifaaqa ati ateekaaqeera qidaqa.
GEN 34:23 Maasa miqianaqa misaki sipsipa burimakau aina marifa maasaindi kammiannoo. Anifaqa eedoo qianaqa maasa qambaana mariaqa.
GEN 34:24 Aiqama mi maqusanakinaasa Qamoorana faqa Seekeemmana faqa ufa iriseeqa eedoo qimasee aiqama akoonaiqi qisakoosa nifaaqa ati auku aqiqau.
GEN 34:25 Qaarammoo faasaana aiqaroofaqa nifaaqa ati aukuqoosa firaaqoo nammuana nidafi marufaqa Yakooboona amaaku qara Simeeoonafa faqa Reefifa faqa miqanda Dinnaa nammarina asooki qanda nári faaqaana qara mara maree umee kai Seekeemma maqusai ooru reeqara aiqama faiqí kumaaraa naru taikaqau.
GEN 34:26 Qamoorana faqa Seekeemmana faqa narusee Dinnaa nammarina Seekeemmana maaqakinaana afiqamaree doo quqasee fiqau.
GEN 34:27 Narusoofaqa Yakooboona faiqi namu akaqausa inaaqianna oonu reeqa nári nisookina rarisoona akiiqara mi maqusanakina aiqama ainaina maraqau.
GEN 34:28 Misa sipsipauqa faqa burimmakauqa faqa doonkiuqa faqa aiqama ainaina mi maqusanaki maruna faqa mi maqusana atiqara maru ainainausa aiqama maraqau.
GEN 34:29 Misa aiqama amiqira ainaina kai maraqau. Aiqama faiqi anaasee faqa maraqau. Aiqama maaqakinaa ainainauqa faqa maree fiqau.
GEN 34:30 Yakooboofa miqunara irinoo Simeeoonna faqa Reefina faqa maaqi qimasee qimanniminau. Inneeqara qini ummaaraki quqaqisaafanoo. Kannaa maqannaasa faqa Peerisaa maqannaasa faqa aiqama maa maqa maaqanaki mariasa qiniara fidiaqaammifaranoo. Qini faiqí sia moomoo mariafaqa, misa aiqama moodaanaki aniree qini dariqa aiqama maasa faiqi anaasee kuridi nimaqeefaranoo.
GEN 34:31 Yakooboofa miqi qufaqa miqanda narí qimamiqa qiqau. Maasa sia qeeqa qisookina quqaqaanaqa aanasaa aanaaseera foora kaqi maraqa nifaranoo.
GEN 35:1 Mi fasannai Anutufa Yakooboona qimaminoo qinau. Anee doo findi finana Beeteera maqa maaqaki oonu maria. Anee aneenna afasaana Eesaunara rufiasee sandoonaqa ani afusaa kooroo iafanna Anutusa tatufirana suqaqimira qainda miqoo oonuree auqua.
GEN 35:2 Yakooboofa iriseenoo narí aiku asauku faqa narí faqa marusa faqa qimanniminoo qinau. Moo maqannaasa unnaqira anutusa uaqeeianauqa mara aquaqa. Mara aquseeqa inneeqa nifaaqa anukamasee amiqira qamunna afisuaqa.
GEN 35:3 Maasa maaqooqari quqasee Beeteera maqa maaqai oonureeqa qini ummaara aukuana dadaaqi mari Anutuna qinee aiqama atinai nunanoo qini faqa mari Anutuna tatufirana suqara qainda auquanauranoo.
GEN 35:4 Miqi qimasoofaqa misa aiqamausa iriseeqa nariqa moosaaqaraa unnaqira anutusa maraqa nuna faqa naaqooki quqee maru fidinaanuna faqa Yakooboona amufanoo umareenoo Seekeemma maqusaki arookasa aaqa maqa indufusee minaki akundanau.
GEN 35:5 Akundamaseenoo Yakooboofa faqa narí faiqi namu faqa doo quqasee fufanoo firaa rufiarafa mi saqanna maru maqusausaki maru fasiqausa rafaaqafufaqa sia nifaqasee nariqau.
GEN 35:6 Yakooboofa aiqama narí faiqi namu faqa fifiufanoo Rusa maqusa ki Kannaana maqa maaqaki oonuranau. Maqee mi maqusana auqu Beeteera fee qidaqa.
GEN 35:7 Mifa miqoo oonureenoo tatufirana suqara ooni qainda auquseenoo mi maqusanaki Anutufa uainaina afaafau reenoo Beeteera fee qinau. Yakooboofa ooqai narí afasaanara rufiasee sandeenoo miqoo aniroofanoo Anutufa miqoo mina afusaa kooroouqoo marunara auqureenoo Beeteera fee qinau.
GEN 35:8 Miqi qimasee miqoo marufanoo Reebeeka nammarina ainainira maanaaqa Deebooraa nammarifa kuqufufaqa arookasa ameemaanai suani afu ataaqee qaannai Beeteera maqusa dinni atinai akundaqau. Akundamasee mi maqusana auqureenoo ikiraqara saqari fee qiqau.
GEN 35:9 Yakooboofa Meesoopootamia maqa maaqaindari oonu randee ani marufanoo Anutufa kaifaa mina afunni kooroommafufanoo amiqira afaaqooqa qimamaqanau.
GEN 35:10 Miqimmaseenoo Anutufa qimaminau. Ani auqu Yakooboofa maridanoo, maqee maaqooqari oosana arasee Isaraeerafa marinnaranoo. Miqi qimaseenoo Anutufa mina auqureenoo Isaraeeranee qinau.
GEN 35:11 Miqi qimaseenoo Anutufa kafaa Yakooboona maaqi qimasee qimaminau. Qinee aiqama afeeka faqaa Anutusa maridaqa qimamidaqa. Anee moomoo faiqi faqaafa maria. Akaqa maqannaasa ani aiku asaukukiqari marifaranoo. Anee karaambaiqauqa ninaakufa marinnaranoo.
GEN 35:12 Qinee Abaraqaammana faqa Isakeena faqa nimiafanna maqa maaqana ani faqa ani aiku asauku kasooqaqee kambiqainausa faqa nimianaura.
GEN 35:13 Anutufa miqi qimaseenoo Yakooboona qimamiseenoo doo quqaseenoo finau.
GEN 35:14 Yakooboofa mi maqusana Anutufa qimamuqoo miqoo ooni marasee daaqoo auqaanifee qimaseenoo rakiqaseenoo uainna nammari qumareenoo mi oonina adia amaqaseenoo oorifa fadameena faqa adianau.
GEN 35:15 Miqimasee mi maqusana auqu Beeteera fee qinau.
GEN 35:16 Yakooboofa narí faiqi namu faqa Beeteera maqusa quqasee Eefarataa maqusai fuanee qimasee aanai fimarufanoo Raseera nammarina faiqi maqarafa arinau. Arufanoo firaaqoo uqanna aupuranau.
GEN 35:17 Raseera nammarina aidafirafa kaaqa mandaika uqanna ufanoo mina dadaaqi maru aanaaseefa qinau. Raseera sia rufiaa, moo akoonaiqi maqaananoo.
GEN 35:18 Maqaseenoo Raseera nammarifa doo kuqiraridanoo aanna taikee marufanoo mi faiqina auqureenoo Beenooni fee qinau. Mina akoofa auqu reenoo Beensaminna fee qinau.
GEN 35:19 Raseera nammarifa kuqufufaqa Eefarataa maqusai fimaru aannana afainni akundaqau. Maqee miqoo Eefarataa maqusara Beeteereeqeemma maqusa fee qidaqa.
GEN 35:20 Yakooboofa aaqoo auqaanifeera ooni miqoo rakiqanau. Maqee kaqi mi oonifa Raseera nammarina madika mariuqoo maridanoo mi madikanara koorooidanoo.
GEN 35:21 Miqooqari Isaraeerafa findifinoo moo maqa maaqai Eedeera kisaaqa ooni maaqa usakaqoona dinni atinni narí uiqaana maaqa usakanau.
GEN 35:22 Isaraeerafa mi maqa maaqanaki marufanoo Reeubeennafa narí akoona anaaqa Biriqaa nammarina narí ainainira maanaaqa maraqoona sakasee faiqanau. Isaraeerafa mi ufana irufanoo arana qanau. Isaraeerana faiqi namu qisauku qara taikasee qikunni ooqu qaara marasee 12 mariqau.
GEN 35:23 Reeaa nammarina faiqi namu maaqimmiqa mariqau. Reeubeennafa indaaruqaafa Yakooboona ooqa faiqi marinau. Mina aanaaqianaafa Simeeoonafa faqa Reefifa faqa Yudafa faqa Isakaarafa faqa Seeburunafa faqa mariqau.
GEN 35:24 Raseera nammarina faiqi namu Yooseefaasa Beensaminnasa mariqau.
GEN 35:25 Raseera nammarina ainainira maanaaqa Biriqaa nammarina faiqi namu Dannaafa faqa Napatarifa faqa mariqau.
GEN 35:26 Reeaa nammarina ainainira maanaaqa Siripaa nammarina faiqí namu Kadafa faqa Aseerafa faqa mariqau. Mi faiqi namusa aiqama Meesoopotamia maqa maaqai kambiqaqau.
GEN 35:27 Yakooboofa narí akoofa Isakeefa unnai finau, Mamareena maqusaki Qeebooroona maqusa aaqa Abaraqaammafa faqa Isakeefa faqa mariuqoo finau.
GEN 35:28 Isakeefa 180 aukuana maranau.
GEN 35:29 Maraseenoo kuqufufaqa mina faiqi qara Eesausa Yakooboosa akundaqau.
GEN 36:1 Eesauna aiku asauku marusa maaqimmiqa mariqau. Mina moo auqa Eedoomma fee qimariqau.
GEN 36:2 Eesaufa Kannaana maqannaa aanaaseeuqa maranau. Indaaru maroo anaaseena auqu Adaa nammarifa marinau. Mifa Qeeta maqannaa fasiqa Eeroona araamuna maranau. Mina aanaaqiana maroo anaaseena auqu Ooqooribammaa nammarifa maranau. Mifa Qifita maqannaa fasiqa Sibeeoona amaaku Annaana namarina araamuna maranau.
GEN 36:3 Mina aanaaqianna maroo anaaseena auqu Baseemata nammarifa marinau. Mifa Isamaeerana araamuna Neebaiootana asookifa marinau.
GEN 36:4 Eesauna indaaruqaa anaasee Adaa nammarifa faiqi Eerifasana maqanau. Moo anaasee Baseemata nammarifa Reeueerana maqanau.
GEN 36:5 Moo anaasee auqu Ooqooribammaa nammarifa Yeeusana faqa Yaramana faqa Kooraana faqa maqanau. Eesauna mi faiqi namusa miqimmasee Kannaana maqasaa kambiaqau.
GEN 36:6 Eesaufa narí aanaaqmaaka faqa narí faiqi namu faqa narí araamuqmaaka faqa aiqama mina maaqaki mariusa faqa aiqama narí aandauqa faqa aiqama narí qumiasana Kannaana maqusai maridanoo maraqoona aiqama mara mareenoo Yakooboofa maruqoo qari nianasaa moo maqa maaqai finau.
GEN 36:7 Eesaufa faqa Yakooboofa faqa maru maqafa sia amana misa dadaaqiaqaa qufaqa Eesaufa quqasee moosaa finau. Misa kaaqa moomoo aandau ainaina marufaqa minara sia amana moodaanaki mariqau.
GEN 36:8 Eesaufa Eedoomma maqa maaqakina amuaqu namusaa marinau.
GEN 36:9 Eesauna aiku asauku maaqimmiqa mariqau. Misa Eedoomma maqannaasa ninaakusa marinau.
GEN 36:10 Eesauna anaaqa Adaa nammarina amaaku moodaa Eerifasafa marinau. Eerifasafa moodaannai qisauku faiqi maqanau. Teemmanafa faqa Oommarafa faqa Seefoofa faqa Katammafa faqa Keenasafa faqa mariqau. Moo anaasee Timinaa nammarinasaa moodaa akoonaiqi Amareekana maqanau. Eesauna moo anaasee Baseemata nammarifa akoonaiqi moodaa Reeueerana maqanau. Reeueerafa qaara faqa qaara faqa faiqi akoonaiqi maqanau. Naqatana faqa Seeraana faqa Sammaana faqa Misaana faqa maqanau.
GEN 36:14 Eesauna moo anaasee Ooqooribammaa nammarifa Anaana araamuna marinau. Anaafa Sibeeoona amaaku marinau. Mi anaaseefa faiqi qaaramoo maqanau. Yeeusana faqa Yarammana faqa Kooraana faqa maqanau.
GEN 36:15 Miqimmasee Eesaunakiqari aruaki kambiqarausa mariqau. Eesauna ooqa faiqi Eerifasafa maa maqannaasa ninaakufa marinau. Teemanaa maqannaasa faqa Oomaraa maqannaasa faqa Seefoo maqannaasa faqa Keenasaa maqannaasa faqa Kooraa maqannaasa faqa Katamaa maqannaasa faqa Amareeka maqannaasa faqa ninaakufa marinau. Misa aiqamausa Eesauna anaaqa Adaa nammarinakiqari kambiqarausa mariqau.
GEN 36:17 Eesauna amaaku Reeueerafa maaqimmasee maqannaasa ninaakufa marinau. Naqataa maqannaasa faqa Seeraa maqannaasa faqa Sammaa maqannaasa faqa Misaa maqannaasa faqa ninaakufa marinau. Aiqama misauqa Eesauna anaaqa Baseemata nammarinasaaqari kambiqarausa mariqau.
GEN 36:18 Kaifaa maa maqannaasa Eesauna anaaqa Ooqooribamma nammarina araamuna Annaa nammarinasaaqari kambiqaqau. Yeeusa maqannaasa faqa Yaramma maqannaasa faqa Kooraa maqannaasa faqa mariqau.
GEN 36:19 Aiqama mi maqannaasa Eesaunakiqari kambiaqa mariqau.
GEN 36:20 Eedoomma maqannaasa miqoo maridaqa rainasee qaara maqannaasaikammiqa mariqau. Misa ninaakufa Seirafa Qoora maqannaafa marufaqa minasaa aruaki maaqimmasee kambiaqau. Rootanafa faqa Soobarafa faqa Sibeeoonafa faqa Annaafa faqa Disoonafa faqa Eeseerafa faqa Disanafa faqa minamusa Eedoomma maqannaasa ninaakusa mariqau.
GEN 36:22 Rootanafa Qoorina oosana faqa Qeemmana oosana faqa ninaakufa marinau. (Rootanana auna Timinaa nammarifa marianau.)
GEN 36:23 Soobarafa Arafana oosana faqa Manaqatana oosana faqa Eebarana oosana faqa Seefoona oosana faqa Oonamana oosana faqa ninaakufa mariqau.
GEN 36:24 Sibeeoonnafa akoonaiqi qaaraqanda maqanau. Miqanda nuqu Aiaafa faqa Anaafa faqa mariqau. (Anaafa narí akoona Sibeeoonana doonkiuqa mareenoo andanda naaqeera kaasau maqa maaqaki munusoofaqa neemarufanoo rakisidanoo ida qeemaru nammarifa maqakiqari ururee maruna paqurinau.)
GEN 36:25 Anaafa Disoona faqa mina auna Ooqooriba nammarina faqa nikoofa marinau. Disoonafa Qeemadana oosana faqa Eesabana oosana faqa Itarana oosana faqa Keerana oosana faqa ninaakufa marinau.
GEN 36:27 Eeseerafa Biriqana oosana faqa Saafana oosana faqa Akana oosana faqa ninaakufa marinau.
GEN 36:28 Disanafa Usana oosana faqa Arana oosana faqa ninaakufa marinau.
GEN 36:29 Maaqimmasee Qooranasaaqari kambiqoo maqannaasa Eedoomma maqa maaqaki mariqau. Rootanana maqannaa faqa Soobara maqannaa faqa Sibeeoona maqannaa faqa Annaa maqannaa faqa Disoona maqannaa faqa Eeseera maqannaa faqa Disana maqannaa faqa mariqau.
GEN 36:31 Isaraee maqannaa karaambaiqa sia maru kamuqoo maa fasiqausa Eedoomma maqa maaqaki karaambaiqauqa mariqau.
GEN 36:32 Eedoomma maqannaasa indaaru rakisi nimaqoo karaambaiqana auqu Beerafa marinau. Beeoorana amaaku marinau. Mifa Dinabaa maqusanaasa karaambaiqa marinau.
GEN 36:33 Beerafa kuqufanoo Seeraana amaaku Yoobabafa karaambaiqa marinau. Mifa Boosaraa maqusanaafa marinau.
GEN 36:34 Yoobabafa kuqufanoo Qusamafa Teemana maqa maaqakinaafa karaambaiqaikinau.
GEN 36:35 Qusamafa kuqufufanoo Beedadana amaaku Adadafa karaambaiqaikinau. Mifa Midianna maqannaasa Mooaba maqa maaqaki naru nifaqaaqa maseenoo Adadafa Afitaa maqusaki karaambaiqa marinau.
GEN 36:36 Adadafa kuqufufanoo Samarafa karaambaiqaikinau. Mifa Masareekaa maqusakinaafa marinau.
GEN 36:37 Samarafa kuqufufanoo Saurafa Reeqooboota maqusakiqari Eeufarateesa nammari adeedi marufa karaambaiqaikinau.
GEN 36:38 Saurafa kuqufufanoo miqooqari Akaboonana amaaku Baaraqanafa karaambaiqa marinau.
GEN 36:39 Baaraqanafa kuqufufanoo Qadarafa karaambaiqaikinau. Mifa Pau maqusanaasa karaambaiqa marinau. Mina anaaqa auqu Meeqeetabeera nammarifa Maatareeda nammarina araamuna marinau. Maatareeda nammarifa Meesaqabana anaiqi marinau.
GEN 36:40 Eesaufa Eedoomma maqa maaqakina maru maqusausa kinaasa ninaakufa marinau. Timina maqannaasa faqa Arafaa maqannaasa faqa Yeeteeta maqannaasa faqa Ooqooribammaa maqannaasa faqa Eeraa maqannaasa faqa Pinoona maqannaasa faqa Keenasa maqannaasa faqa Teemana maqannaasa faqa Mibasara maqannaasa faqa Makadieera maqannaasa faqa Iramma maqannaasa faqa ninaakufa mariqau. Misa maru maqusausa nariqa ninaakusa nuqu nifaafau ramaqoofaqa marinau.
GEN 37:1 Yakooboofa narí akoofa Isakeefa mariu maqa maaqana Kannaana maqa maaqaki miqoo kai marinau.
GEN 37:2 Maa ufafa Yakooboona faiqi namu ufa maridanoo. Yooseefaafa kumaaraa maridanoo qisauku qara taikasee qiku dinni taikasee dinni oonu qaara marasee 17 aukuana faqaafa maridanoo narí afasausa faqa sipsipauqasaa faqa mimmiuqasaa faqa rakisimarinau. Narí akoona ainainira anaasee qara Biriqaa nammarisa Siripaa nammarisa faiqi namu faqa nidanoo rakisi marinau. Mina afasausamara manda oosana auqoonara narí akoona qimami marinau.
GEN 37:3 Yakooboofa aiqama narí faiqi namuara aidimaruna uraaqaramaseenoo Yooseefaanara aidi marinau. Mifa asooqa namuki maqoonara kaaqa minara aidi marinau. Mifa kisaaqa qamunna kisaaqa asauku faqaana auqu aminau.
GEN 37:4 Mina afasausamara qafoofanoo misa nikoofa Yooseefaanara aidi marufa uriqaranoo marufaqa misa firaaqoo uqanna naundura mandaiki marufaqa mina faqa ufa qimariqau.
GEN 37:5 Moo eendaki Yooseefaafa qainammaseenoo qafanau. Minara narí afasausa mara qimannimufaqa firaaqoo uqanna fidiaqaamma amaqaqau.
GEN 37:6 Yooseefaafa maaqi qimasee narí afasausamara qimanniminau. Qini maa qainnana iriaqa.
GEN 37:7 Maasa aiqamausa qafuqaki maridaqa raisa fooqaairana ateekasee rumbasee narisaa narisaa mundiiqaunanoo innindi fannoo maqasaa aqufifanoo qinindi fannoo andeeqasee kikiqinoo mariinoo. Innindi fannoo qinindi oosanaki aqufifanoo fiqu fiqumma datimmafinoo ammuqu namu rambaqaki oosanai quminoo.
GEN 37:8 Miqi qimasoofaqa mina afasausamara aqiqa qiqau. Kasooaqee anee karaambaiqaika mafi maasa rakisiqimaqeennaree. Miqi qimaseeqa mifa qainunara faqa misara qunara faqa iriseeqa firaaqoo fidiaqaamma amaqaqau.
GEN 37:9 Moo kari mifa kafaa qaina maseenoo narí afasausamara qima niminau. Innee iriaqa qinee qaina moommiqa. Qinee qafaunanoo suani faqa uqoona faqa qisaukuqara taikasee qikunni ooqu moodaa marasee 11 fasau namu faqa qini daumooki aniree ninuka tuqu naumoo amisee mariafaqa niqafeeqa.
GEN 37:10 Mifa narí akoona faqa mi qainufana qimamufanoo mina akoofa aqinoo qinau. Naqaa ira qaina fee inanee. Anee aneenna anoonara faqa aneenna afasausa marara faqa qiniara faqa ani aramandunnai ninuka tuqu naumoo amisee mariaqee fee qidanee.
GEN 37:11 Yooseefaana afasausa mara nári nikaqara nirana qeemarinau. Miqi marufanoo mina akoofa aiqama ufara kaqi kai irimarinau.
GEN 37:12 Moo kari Yooseefaana afasausa mara nári nikoona sipsipa mara maree Seekeemma maqusai karasa naaqeera nifiqee fiqau.
GEN 37:13 Oonu marufanoo Yakooboofa Yooseefaana qimaminoo qinau. Ani afasausa mara Seekeemma maqusai mariannai fua. Miqi qufanoo Yooseefaafa qinau. Qinee firara deedaqidaqa.
GEN 37:14 Mina akoofa maaqi qimasee qimaminau. Anee oonureenana qafaa. Ani afasausa mara kaqi fee maridafee. Aandauqa faqa amiqiqa fee maridee. Nindafamasee anireenana qimaqimia. Mina akoofa Heebooroona noopundukiqari aiqoofanoo finau. Yooseefaafa doo findifufanoo fifiiufanoo Seekeemma maqusai oonuranau.
GEN 37:15 Oonureenoo narí afasausa mararara randanoo nidanoo oonuree aniree inoo nufanoo faiqí moo fannoo qafamasee mina iramirinoo qinau. Anee nanaree randaidanee.
GEN 37:16 Miqi qufanoo Yooseefaafa qinau. Qinee qeeqa qifasausa mara sipsipasaa rakisi mariasara randaidaqa. Amanee anee misa mariannaira qini qima qiminnaree.
GEN 37:17 Miqi qufanoo mi fasiqafa qinau. Misa doo quqasee fiqau. Misa Dootana maqa maaqai firaree qufaqa iriqiafana. Yooseefaafa mi ufana iriseenoo narí afasausa ninaaqianna fifiufanoo Dootana maqa maaqai misa oonu paqurinau.
GEN 37:18 Mifa nianai ani marufaqa mina afasausamara qafamaseeqa mina arirara tipundaariqau.
GEN 37:19 Misa maaqi qimasee narí qimami narí qimami qimariqau. Doo qaininoo nifa anidanoo.
GEN 37:20 Anifaqa mina aruseeqa mina iri mareeqee maa soorausaki mooki aqua. Miqimmaseeqa maasa minara kaasau aandau ariifoo qianaura. Maasa miqimmasaananoo mina qaina fannoo naqaa fee iannoo.
GEN 37:21 Reeubeenafa misa ufa iriseenoo Yooseefaana saa ititaidanoo qinau.
GEN 37:22 Kaqi maa kaasau maqa maaqanaki maa nammari madikanaki aqua. Sia aidafirana amia. Mifa miqi qimasee narí kai qimiriseenoo qumee afiqamaree narí akoofunnai munu aisarara miqi qinau.
GEN 37:23 Yooseefaafa narí afasausamara maruqoo ururoofaqa qumarasee mina kisaaqa qamunna kisaaqa asauku faqaana raipaqiqau.
GEN 37:24 Miqimmaseeqa nammari aadana usufu madikanaki aqiqau.
GEN 37:25 Aquseeqa miqoo ooqu faqee narana naidaqa tautummasee qafoofaqa Isamaeerana aiku asauku aniqau. Misa Kireeata maqa maaqaindari Isipa maqa maaqai fimariqau. Misa adiafaa imarufaqa neemaru ainainna faqa afundimaru saqari anoonnana faqa mara kammeerasaa quqeesee Isipa maqannaasa feefauriaqeera maree fiqau.
GEN 37:26 Yudafa narí akaqaa fasaauqa qimanniminoo qinau. Inni saimbaqa qeeqa qikaqa arusee mina fidika rafaaqafusee nana dadaaqiranee maraanauree.
GEN 37:27 Anifaqa Isamaeerana aiku asauku maa aniraasa nimianaqa feefauru qimiaqa. Mifa maasa qikaqa maridanoo maasa moodaa fidika marinara sia mina aidafirana amia. Miqi qufaqa misa eedoo qiqau.
GEN 37:28 Eedoo qimarufaqa Midianna maqusanaasa ainaina feefauri marusa aniroofaqa misa nári nikaqa Yooseefaana madikakinaana qubaqeeqee misa nimisoofaqa siruaa munnimma moodaa fasiqa aiku asauku taikasee 20 nimisee doo Yooseefaana maree Isipa maqa maaqai fiqau.
GEN 37:29 Misa Yooseefaana nimuna Reeubeenafa sia qafanau. Mifa anireenoo madikaki ooqu qafoofanoo sia marufanoo narí qamunna anaqaana qinau.
GEN 37:30 Miqimmaseenoo Reeubeennafa narí akaqaafasaauqa unnai oonuree qimanniminau. Yooseefaafa sia maridanoo qinee naqi fee ianauree.
GEN 37:31 Miqi qufaqa misa mimmi arusee Yooseefaana kisaaqa qammunna mina fidikaki raaraa iqau.
GEN 37:32 Miqimmasee misa mi qammunnana mara maree nári nikoofunnai oonuree qimamiqau. Maasa maa qamunnana moosaa paquriqa, qafaa, ani amaakundi fee maridanoo fee.
GEN 37:33 Yakooboofa mi qamunnana qafamaseenoo qinau. Qini qimaaku qamunna maridanoo. Kaasau aandau fannoo qini faiqi Yooseefaana arusee rakeekaammaseenoo fee qinau.
GEN 37:34 Miqi qimaseenoo Yakooboofa narí qamunna anaqana qiiseenoo soofaara qamunna afisuseenoo kisaaqasaa narí faiqiara soofaarida marinau.
GEN 37:35 Marufaqa mina faiqi namu faqa araamuqmaaka faqa anireeqa nári nikoona aundura reendeenira ufa qufanoo misa nikoofa qaoo qidanoo qinau. Qinee qeeqa faiqiara iki raqaqa fuannaqbaqa kuqiqa kuqirausa mariannai fuanaura.
GEN 37:36 Yakooboofa miqi marufaqa Midianna maqannaasa Yooseefaana afiqamaree Isipa maqa maaqai Pootifaana ainainira faiqi kianifeera amiseeqa feefauru maraqau. Isipa maqannaa kinna maaqasaa rakisi marusakiqari Pootifaafa uriqarara oofisaa marufaqa amiqau.
GEN 38:1 Mi aukuanna Yudafa narí ainaina minniseenoo Qiraana faqa Aduramma maqusai ooqu marinau.
GEN 38:2 Miqoo Yudafa Kannaana maqannaa fasiqa Suana araamuna qafamasee maranau.
GEN 38:3 Mariufanoo mi anaaseefa amuaqu qaikinoo akoonaiqi maqasoofanoo Yudafa mina auqu Eera fee qinau.
GEN 38:4 Kafaa mariufanoo mi anaaseefa amuaqu qaikinoo faiqi moo maqaseenoo mina auqu reenoo Oonanee qinau.
GEN 38:5 Kaifaa amuaqu qaikinoo akoonaiqi moo maqaseeoo mina auqu Seeraa fee qinau. Yudafa Keesiba maqusai marufanoo mina anaaqa fannoo Seeraana maqanau.
GEN 38:6 Yudafa narí indaruqaa faiqi auqu Eerafa innooqa fufanoo anaasee Tammaara nammarina mara aminau.
GEN 38:7 Eerana marirafa Karaambaiqa afusaa mandaika uqanna ufanoo kuqa arinau.
GEN 38:8 Kuqufanoo Yudafa mina akaqa Oonana qimaminoo qinau. Anee maasa oosana mareenana aneenna afasaana anaaqa faqa aana finanoo faiqi maqasainanoo ani afasaana auqu sia taikaani.
GEN 38:9 Oonanafa mina iriseenoo maaqi qimirinau. Qinee faiqi maqasaananoo sia qinindi kiandoo qimaseenoo narí afasaana anaaqa faqa aana nidanoo kaqinni kai nammari adiee marinau. Narí afasaana faiqi asumu sia marianifeera miqi marinau.
GEN 38:10 Oonanafa mi oosanna maroofanoo Karaambaiqa qafoofanoo mandaika uqanna ufanoo mina kuqamma arinau.
GEN 38:11 Kuqufufanoo Yudafa narí aanaakuqu Tammaara nammarina qimaminoo qinau. Aneenna akoona maqa maaqai oonu adeedaana kai marinaqa Seeraafa innooqa finaqa mina faqa ani kai amianaura. Seeraafa faqa narí afasaaqanda undee inoo mi anaaseena marasee kuquandoora mina akoofa miqiqinau. Miqi qufanoo Tammaara nammarifa narí akoona maaqai finau.
GEN 38:12 Mariufanoo Yudana anaaqa Suana araamuna kuqinau. Kuqufufanoo soofaara taikaseeoo Yudafa narí aqoondi Aduramma maqusanaana mina auqu Qiraana faqa Timinaa maqusai narí sipsipa asausi aukimaruna niqafarara ooru finau.
GEN 38:13 Faiqí moo fannoo Tammaara nammarina qimaminau. Ani aanaakuqu Timinaa maqusai narí sipsipa asausi ateekarara ooru fidanoo fee qinau.
GEN 38:14 Tammaara nammarifa mi ufana iriseenoo adeedaana marida afisiu qamunnana raipaquseenoo moo qamunna afisumareenoo narí oori kaqikaa qamunnannai ititaseenoo Eenaimma maqusaki fimaru aannanasaa ooqufaaqee marinau. Tammaara nammarifa Seeraafa innooqanoo marifanoo sia qimiannoo fee qimasee miqinau.
GEN 38:15 Yudafa ani qafoofanoo qamunnannai oori rafaaqafusee marufanoo dapi maraqa nua aanaaseefa mifoo qinau.
GEN 38:16 Miqi qimaseenoo aana afainni mi anaaseefa marufanoo oonuree qimaminau. Ani rarisama saana mina akiiqara naqumma feefauru fee maridanoo fee. Yudafa mi anaaseenara sia narí aanaakuqu fee qimasee miqi qinau. Miqiqufanoo mi anaaseefa qinau. Mina akiiqara nanee qiminnaree.
GEN 38:17 Miqi qufanoo Yudafa qinau. Qinee mimmi moo timmusa ani amaqaanaura. Miqi qufanoo mi anaaseefa qinau. Anee moo ainaina qimiqaina uaqeeiana kasooaqee mimmi qiminna kari aninna amianaura.
GEN 38:18 Miqi qufanoo Yudafa qinau. Nana ainainee amianauree. Miqi qufanoo mi aneeseefa qinau. Aneenna asaukukinaa isaaqama faqa aneenna saunu faqa qimia. Miqi qufanoo Yudafa minauqa amiseenoo mi anaaseena faqa aana numasoofanoo amuaqu qaikinau.
GEN 38:19 Tamaara nammarifa findi fufanoo narí maqusai oonureenoo dapi anaasee maraqanu qamunnana raipaqusee adeedaana qamunna kaifaa afisinau.
GEN 38:20 Yudafa narí qaqoondi Qiraanasaa mimmi aanaaqi timmusa quqaseenoo munu mi anaaseena amisee narí ainaina uaqeeuna oonu mini qimiannee qufanoo oonu randoosiaa sia mi anaaseena paqurinau.
GEN 38:21 Mifa oonureenoo Eenaimma maqusanaa fasiqauqa iramirinoo qinau. Yaifee dapi maraqanua aanaaseefa maa aannana afainni ooqufaaqeeiufa maridanoo fee. Miqi qufaqa misa qiqau. Sia maa maqusanaki dapi maraqanua aanaaseefa maridanoo.
GEN 38:22 Miqi qufanoo mi fasiqafa kafaa anirandeenoo Yuda funnai oonureenoo qimaminau. Oo qinee sia mi manaaqana paquriqa. Mi maqusanakinaa fasiqauqa faqa qiqa, sia ooqaindari maasa maqusaki dapi maraqanua aanaaseesa marida miaafoo qia.
GEN 38:23 Miqi qufanoo Yudafa qinau. Saina mi anaaseefa mi ainainausa uaqee iani. Faiqí maasara naanaidara qifoora qikooqaidanoo. Minara qinee mi anaaseena feefauru amirara qunana anee oonuree sia paquriananoo.
GEN 38:24 Qaarammoo quqoona aiqaramafufanoo Yudana qimamiqa qiqau. Ani aanaakuqu fannoo dapi maraqanua aanaaseesara foora numaseenoo maqee mifa amuaqu qaikinoo maridanoo. Yudafa mi ufana iriseenoo qinau. Mi anaaseena maree munusee idarasaifanoo qaani.
GEN 38:25 Misa afiqee fimarufanoo narí aanaakuqu Yudanara ufa quqanau. Qinee maa ainainausa faqaa fasiqa faiqi uqa faqa maridaqa. Qafamasee iria, yana ainainauqee maridanoo fee. Maa qisaaqamafa faqa mina sanda faqa saunu faqa yanaindi fee maridanoo fee.
GEN 38:26 Yudafa qafamaseenoo qinau. Maa anaaseefa andeeqanoo maridanoo. Qinee kai aaqeeqa. Qinee qeeqa qimaaku Seeraana amiaqaana. Miqi qimaseenoo Yudafa sia kaifaa mi anaaseena faqa aana finau.
GEN 38:27 Mi anaaseena faiqi maqarafa aniroofaqa qafeeqa qiqau. Maa anaaseefa qaara faiqi maqaannoo fee qiqau.
GEN 38:28 Faiqi maqarara aupuree marufaqa moo fannoo naaree asauku quqasoo qumuroofanoo mina innaammuna afeesu aanaaseefa asauku qumaraseenoo taatuqee sanda rumbaseenoo qinau. Maafa indaaruqaafa maridanoo.
GEN 38:29 Miqi qimasoofanoo asauku raqandaamma maroofanoo moo kaiqeena naaree maqanau. Maqasoofanoo innaamunai afeesu aanaaseefa qinau. Anee naqaa fee ifanee kaqinnaindari anee naaree qumidanee. Minara mina auqureenoo Peereesanee qinau.
GEN 38:30 Mina inaaqianna mina akaqa taatuqee sanda asaukusaa rumbarana maqanau. Maqaseenoo mina auqu Seeraa fee qinau.
GEN 39:1 Isamaeerana aiku asauku Yooseefaana afiqamaree Isipa maqa maaqai muqusoofanoo Isipa maqannaa karaambaiqa Faraoona sundiauqa rakisirafa Pootifaafa Yooseefaana feefaurinau. Pootifaafa Faraoofa maruqoo rakisi maru sundiasa uriqararafa marinau.
GEN 39:2 Karaambaiqa Yooseefaana faqa maridanoo dadaaqi marufanoo aiqama ainaina auqoofanoo anoona kai kambiqee marinau. Mifa narí Isipa maqannaa uriqararana maaqaki marinau.
GEN 39:3 Pootifaafa qafoofanoo karaambaiqa Yooseefaana faqa maridanoo aiqama ainaina auqoofa anoona kambiqee marinau.
GEN 39:4 Pootifaafa Yooseefaanara asasammaseenoo uriqarara ainainira faiqikammaqoofanoo marinau. Miqimmaseenoo mifa Yooseefaana mareeqee narí maaqasaa faqa narí aiqama ainainasaa rakisirafaikamma qoofanoo marinau.
GEN 39:5 Miqooqari Yooseefaanaroo kai qidanoo karaambaiqa fannoo Isipa maqannaasa maaqakinaa aiqama ainaina faqa Pootifaana maaqakinaa ainaina faqa mina maqakinaa nara ainaina faqa amiqi amiqimma nimaqee marinau.
GEN 39:6 Pootifaafa mana mana kaimmi marinau. Sia narí ainainara irimarinau, naranara kai irimarinau. Yooseefaafa amudaani tiafa amiqirafa uqanna mariau.
GEN 39:7 Kaqi kaaqoo marinoo mina uriqararana anaaqa fannoo Yooseefaanara aidufanoo qimaminau, aniree qini faqa faiqaa.
GEN 39:8 Miqi qufanoo Yooseefaafa qaoo qimaseenoo qimaminoo qinau. Qini uriqararafa sia maaqaki quqaqai ainainausara iridanoo. Qinee marunanoo sia iridanoo. Mifa narí aiqama ainainasaa qini quqaqaifaqa rakisidaqa.
GEN 39:9 Qinee maa maaqanaki rakisira afeeka mifa uaqeeindee kai masee uaqee idaqa. Mifa sia moo ainaina qini kukeeqa qimaqa qaifanoo maridanoo aiqama ainaina qimiqaifanoo, ani kai sia qimiqaifanoo. Naqi fee mandee fee qinee maa manda oosanna auqamasee fee Anutuna mandaikamma amaqaanauree.
GEN 39:10 Pootifaana anaaqa fannoo aiqama faasaana Yooseefaanara qini faqa faiqaannee qimarufanoo Yooseefaafa sia mina faqa faiqanau.
GEN 39:11 Moo faasaana Yooseefaafa naríara maaqaki ainaina auqanoo nufanoo sia moo ainainira faiqi minaki marinau.
GEN 39:12 Nariaraa marufanoo mi anaaseefa mina siuta ani qumareenoo qinau. Doo ania. Aniree qini sakasee faiqaa. Miqi qimaseenoo Yooseefaana siutandauru qumaroofanoo mifa narí siuta kai raipaqueeqee mina asaukuki quqaseenoo rafudamakufanoo madaanai sandanau.
GEN 39:13 Madaanai sandoofanoo Pootifaana anaaqa fannoo qafamaseenoo narí maaqaki ainaini maru faiqisa naaramaseenoo qinau. Innee maana qafaaqa. Maa Qeeburu maqannaa fasiqana qini qifaaqi fannoo maaqaki miniqaifa maasa mandaikamma qima qaidanoo. Mifa qini rarisara rifaqa qinee firaaqoo faaqa runanoo mifa narí siuta qini daaqa quqasee sandeenoo.
GEN 39:16 Mifa miqi qimasee qimannimiseenoo mi siutana kaqi uaqeeufannoo Yooseefaana uriqararafa aniranau.
GEN 39:17 Aniroofanoo mi ufana kai qimaminau. Maa Qeeburu maqannaa anainira faiqina anee miniqaanafa qini maaqaki keeqafi qini faqa manda oosana auqarara inoo.
GEN 39:18 Miqifaqa qinee faaqa runanoo narí siuta qini daaqa raipaqu quqasee madaanai sandeenoo.
GEN 39:19 Yooseefaana uriqararafa mina irufanoo aranaqoofanoo Yooseefaana qumareeqee uriqararausa rumbara fasiqauqa marunaki quqanau. Quqasoofanoo minaki marinau.
GEN 39:21 Marufanoo karaambaiqa Yooseefaana faqa maridanoo dadaaqida amiqi amiqimma amaqee marufanoo karabusasaa rakisi marufa Yooseefaana qafamaseenoo asasinau.
GEN 39:22 Karabusasaa rakisi marufa Yooseefaana mareeqee karabusauqasaa rakisiranaika minau. Miqimmasoofanoo Yooseefaafa karabusa maaqaki aiqama ainaina auqee maruna rakisirafa marinau.
GEN 39:23 Karabusasaa rakisirafa Yoosefaafa rakisi maru ainainausara sia amiqimmasee iridanoo. Sia rakisi marinau. Karaambaiqa fannoo Yooseefaana faqa marunara aiqama ainaina mifa auqoofa anoona kai kambiqee marinau.
GEN 40:1 Kaqikaaqoo marinoo Isipa maqannaa karaambaiqa uainna anoona tatimaru fasiqafa faqa mina feemu suqee marufa faqa nariqa uriqararana mandaikamma amaqaqau.
GEN 40:2 Mandaikamma amaqasoofanoo mi qandara aranaqoofanoo narí sundiauqara qufaqa qumaraqau.
GEN 40:3 Qumaraseeqa sundiauqa uriqararana karabusa maqaki Yooseefaafa maru maqanaki quqanau.
GEN 40:4 Mi qanda kisaaqasaa karabusaki marufanoo karabusasaa rakisirafa qufanoo Yooseefaafa misasaa rakisi marinau.
GEN 40:5 Miqoo karabusaki maridaqa moo eendaki uainna tati marufa faqa feemu suqee marufa faqa qainiqau. Uainna tati marufa mina qaina oosana aaduma marinau. Feemu suqee marufa mina qaina oosana aaduma marinau.
GEN 40:6 Mi kananaanna miqanda noori runusee marufanoo Yooseefaafa ani nindafeenoo iramirinoo qinau.
GEN 40:7 Inneeqara nanaree kaaqa moomoo irira irida maridee.
GEN 40:8 Qufaqa miqannda qiqau. Maaqanda qaina maqaqee idaqa qaina oosana qimannimi marifa sia marifaqa maaqanda minara oonu mafi irida maridaqa. Yooseefaafa miqanda ufa iriseenoo qima niminau. Anutufa kai qaina oosana qimannimirana nimidanoo. Inneeqa qaina qima qimifaqa iria.
GEN 40:9 Miqi qimasoofanoo Faraoona uainna nammari tati maru fasiqafa narí qaina maaqi qimasee Yooseefaana qimaminau. Qinee qafaunanoo uainna sanda qini doorinni marifaqa qafeeqa.
GEN 40:10 Qaarammoo asaana minasaa marifaqa qafeeqa. Amanee ifaqa qafaunanoo afufeenaarifaqa qafaunanoo qaqama irafi akuqeenoo.
GEN 40:11 Qinee karaambaiqa Faraoona kaafa uaqeeidaqa akuqamafina minaki anoona tatiisee munu amiqa.
GEN 40:12 Yooseefaafa mina iriseenoo maaqi qimasee qimaminau. Sanda qaarammoo asaana qafaannana mina amana qaaramoo faasaana marinnara.
GEN 40:13 Qaaramoo faasaaana taikainanoo Faraoofa ani iduku aisainana kafaa aneenna saikaki finnaranoo. Anee ooqai mina uainna tatira faiqi maridana mina uainna kaafa amiunnandee inana kaifaa aminnaranoo.
GEN 40:14 Anee miqimma finana qiniara qimudaoo qimasee karaambaiqa Faraoona qimaminanoo qini dadaaqinoo iduku qisaani.
GEN 40:15 Misa ooqai qini Qeeburu maqusaindaraana ummuara mamaree aniqau. Qinee maaqoo Isipa maqa maaqaki marida sia moo manda oosana mareeqa. Misa fifau qini karabusaki quqaqaafaqa maridaqa.
GEN 40:16 Feemu suqee marufa narí aqoonnana qaina oosana qimamuna irufanoo amiqufanoo Yooseefaana qimaminoo qinau. Qinee faqa moo qainammiqa. Qinee qaarammoo feemu difaani qumbiqarana qikiiaaqa akuaqee idaqa qafeeqa.
GEN 40:17 Meeraqooqaraa difaaniki oosana oosana feemu ainaina uriqararanaindi marifanoo ufiniuqa nee mariafaqa qafeeqa.
GEN 40:18 Yooseefaafa mina qaina oosana iriseenoo maaqi qimasee narí qimaminau. Qaarammoo difaani qafaanafa qaarammoo faasaana maridanoo.
GEN 40:19 Qaaramoo faasaana amana mina qaaramoo feemu difaani marifana qafaananoo. Qaaramoo faasaana aiqarainanoo Faraoofa ani ani qumareenoo munusee anuka ateekasee ani iri saqarisaa dirisainaqa ufiniuqa ani amaqi neefaranoo.
GEN 40:20 Miqiqimasee qima nimisoofanoo miqooqari mi qaaramoo faasaanna aiqaroofanoo mikari Faraoona maqoo aukuanafa aniroofanoo narana firaaqoo suqaseenoo narí ainainasaa rakisi marusa niminau. Mifa narí uainna tati maruna faqa feemu suqee maru fasiqana faqa idukumaree mini narí ainainasaa rakisi marusa nifusaa quqanau.
GEN 40:21 Idukuseenoo uainna tati maru fasiqana mareeqee ooqai mareeu saikanaki kafaa quqasoofanoo uainna tatimarinau.
GEN 40:22 Feemu suqee maruna idukuseenoo anuka ateekasoofaqa sandannai mina qiri saqarisaa diriqau. Aiqama ainaina Yooseefaana ufamau andeeqaseenoo mimau kaimbinau.
GEN 40:23 Uainna tati marufa kafaa Faraoona ainainidanoo Yooseefaanara siamma irinau. Qaunusee marinau.
GEN 41:1 Qaara aukuana aiqaroofanoo moo eendaki Isipa maqannaa karaambaiqa Faraoofa moo qaina maaqimmasee qafee fee qinau.
GEN 41:2 Qinee Niru nammmari afainni kikiqiqa marida qafaunanoo qisauku dinni taikasee dinni ani qaara marasee 7 burimakau nifaaqa faqaasa urureeqa andanda nee mariafaqa qafeeqa.
GEN 41:3 Neemarufaqa dinni qisauku taikasee dinni oonu qaara marasee 7 nimudaani aanaaqi nammarikiqari urureeqa indaaru qaasa naaqa nammari afainni kikiqamma fuafaqa qafeeqa.
GEN 41:4 Nimudaani aanaaqiuqa nifaaqa faqaasa aiqama nambiqama saafaqa qafeeqa. Mi ainainausa qainasaa qafamaseenoo karaambaiqa Faraoofa tauti findifinau.
GEN 41:5 Mifa kaifaa afuki qaunduarufanoo faifufanoo moo qaininau. Sakumma moodaa oosana saa dinni qisauku taikasee dinni oonu qaara marasee 7 iranoo marufa aiqama anoona qumbi qumbiqirafa marufanoo qafanau.
GEN 41:6 Kafaa mina aanaaqianna moo qaina qafoofanoo dinni taikasee dinni ani qaaraqanda marasee 7 sakumma moodaa oosanasaa iranoo marinau. Anoona siaifa narana maaqina kinaafa mandaikirafa sia anoona marufa, ufai fannoo raudaqoo fara foora marufanoo fifau akee kai marinau.
GEN 41:7 Anoona siai sakummafa quandaku fanoo anoona faqaa sakumma aiqama namasanau. Mi qainna maseenoo Faraoofa tauti findi fufanoo Boo moo qainammidaqee qinau.
GEN 41:8 Mi kananaanna Faraoofa findi fufanoo moomoo irirana maroosia Isipa maqannaa irirana faqaasa faqa afunee fasiqauqa faqa naaranau. Naaramaseenoo narí qainuna qimannimufaqa sia moo fannoo amana mina oosana narí qimamiqau.
GEN 41:9 Minara tutu qidaqa randee marufanoo Faraoona uainna tati maru fasiqafa Yooseefaanara iriseenoo Faraoona qimaminoo qinau. Oo karaambaiqa maqee kai qeeqa furufariafanna oosanna oonu mafi iriseeqa kooroommasee qimamidaqa.
GEN 41:10 Ooqai anee aanoo qimaseenana qini faqa feemu suqee maruna faqa aneenna sundia rakisirana maaqaki quqaqisanau.
GEN 41:11 Moo eendaki maaqanda qaina qiqiafana. Mi qaina qanda naadu naadu oosana faqaa qaina qiqau.
GEN 41:12 Minakina Qeeburu maqannaa kumaaraa moo fannoo, sundia rakisirana Pootifaana ainainira faiqi marufa maasa faqa marinau. Maasa qeeqa qaina qimamiafananoo mifa mina oosana maasa qimaqiminau.
GEN 41:13 Mifa qundee kaimminau. Anee qini saikaki kaifaa mara quqaqiseenana feemu suqee maruna d irinau.
GEN 41:14 Faraoofa mi ufana iriseenoo niqiqoofaqa Yooseefaana karabusa kinaana aaqee uqanna afiqee aniqau. Mifa oosau suqaseenoo narí qamunna fuka afisumareenoo Faraoona afusaa aniranau.
GEN 41:15 Aniroofanoo Faraoofa qimaminau. Qinee qainammasaunaqa sia moo fannoo mina oosana qimaqimia faqa iriqa. Anee qaina oosana kooroo qimarianafa mariannanara qimaqimiafaqa aaraidaqa.
GEN 41:16 Miqi qufanoo Yooseefaafa qinau. Oo qini uriqararafa amiqirafa qinee qeeqa kai sia amanaikianauranoo. Anutufa kai qaina oosana qimannimirana qiminaqa qimamianaura.
GEN 41:17 Miqi qimasoofanoo Faraoofa narí qaina oosana Yooseefaana maaqi qimasee qimaminau. Qainunnana qinee Niru nammari afainni kikiqiqa maridaqa qafeeqa.
GEN 41:18 Qafaunanoo burimakau nifaaqa faqaasa dinni qisauku taikasee dinni oonu qaara marasee 7 nammarikiqari urureeqa andanda neemariafaqa niqafeeqa.
GEN 41:19 Misa ninaaqianna miqi kaimmaseeqa dinni qisauku taikasee dinni oonu qaara marasee 7 misa nimana kai nimudaani aanaaqi urureeqa kikiqamma fuafaqa nindafeeqa. Miqira mandaikira burimakauqa sia ooqai Isipa maqa maaqaki mootinai mariafaqa qafeeqa.
GEN 41:20 Nimudaani aanaaqi burimakauqa nifaaqa faqaasa namataikeea.
GEN 41:21 Nambiqamaseeqa sia moo fannoo nifaaqa mareea, ooqai mariundee kai miqa mariafaqa qafeeqa. Nindafamaseeqa tauti findi fiqa.
GEN 41:22 Qinee moo qaina faqa masee qafaunanoo dinni qisauku taikasee dinni oonu qaara maraseenoo 7 sakuma aiqama qumbi qumbiqirafa moodaa saqarisaa marifaqa qafeeqa.
GEN 41:23 Mina aanaaqianna qafaunanoo kafaa moo sakuma saqarisaa dinni qisauku taikasee dinni oonu qaara maraseenoo 7 iranoo marifaqa qafeeqa. Mifa anoona siaifa ufai uqinoo rauda quqaqai fara foora marifaqa qafeeqa.
GEN 41:24 Ira fifaqa qafaunanoo anoonna siaifa indaaru iraina anoona sakumma nambiqamasaafaqa qafeeqa. Qinee mi qainnana afunee fasiqauqa qima nimunaqa sia moo fannoo mina oosana qimaqimia.
GEN 41:25 Yooseefaafa mina qaina ufa iriseenoo Faraoona qimaminoo qinau. Anee qainiannana oosana moodaara qaaraqanda qaina iananoo. Anutufa auqaaninna ainainnara qainasaa ani qimaminoo.
GEN 41:26 Dinni qisauku taikasee dinni oonu qaara marasee 7 burimakau afaaqa faqaana qafaannana oosana dinni qisauku taikasee dinni oonu qaara marasee 7 aukuana qafaananoo. Sakumma dinni qisauku taikasee dinni oonu qaara marasee 7 sakuma anoona qumbi qumbiqirana faqa qafaanafa mifa faqa miqikai inoo dinni qisauku taikasee dinni oonu qaara marasee 7 aukuana maridanoo. Mi qaina qanda oosana moodaa maridanoo.
GEN 41:27 Dinni qisauku taikasee dinni oonu qaara marasee 7 burimakau nimudaani aanaaqi nammariki ururaasa faqa dinni qisauku taikasee dinni oonu qaara marasee 7 sakuma anoona siaina qafaannana oosana 7 aukuanaki aandaroo firaafa mariannoo.
GEN 41:28 Qinee qimamunandee kaimmiannoo. Anutufa narí auqaaninnanara ani uqafiqeenoo.
GEN 41:29 Dinni qisauku taikasee dinni oonu qaara marasee 7 aukuanaki Isipa maqa maaqaki narana firaaqoo rairaa iannoo.
GEN 41:30 Mina aanaaqianna kafaa miqi kai inoo dinni qisauku taikasee dinni oonu qaara marasee 7 aukuana aandaroo naruannoo. Mi aandaroonaki mi rairaaira narannara qaunifaranoo. Aandaroo fannoo maqa maaqa mandaika uqanna masaannoo.
GEN 41:31 Mi aandaroo aukuannai faiqí anaasee doo rairaaira aukuanara qaunu uqannaseefaranoo. Aandaroo firaafa mandaika uqanna irafa marianinnanara miqifaranoo.
GEN 41:32 Anee kaifaa kaifaa qainiannana oosana Anutufa mi ainainna kasooaqee kuqaa miqiannoo.
GEN 41:33 Minara anee aneenna maqannaasakina moo qafamaseenana irirana faqaa fasiqa mara quqasainanoo mifa Isipa maqa maaqasaa rakisiani.
GEN 41:34 Anee akaqa rakisirausa quqasainaqa moodaannai qisauku taikasee dinni oonu qaara marasee 7 rairaaira aukuanakina oosana oosana narana moodaannai qisauku namu kinaana moodaa moodaa mara afeediaqa.
GEN 41:35 Anee qimanniminaqa aiqama narana rairaaira aukuanakinaana suqu quqaaqa. Anee afeeka ufa nimisainaqa narana maqusa maqusaki suqu quqasee minasaa rakisiaqa.
GEN 41:36 Mi narannafa dinni qisauku taikasee dinni oonu qaara marasee 7 aukuana aandaroo firaafa anianinnanaki mi afeediranakinaana neefaranoo. Miqidaqa sia faiqí anaasee kuqifaranoo.
GEN 41:37 Faraoofa faqa narí uriqararausa faqa Yooseefaana iriranara eedoo qiqau.
GEN 41:38 Miqi qimaseenoo Faraoofa qimanniminoo qinau. Maasa sia amana moo fasiqa Yooseefaana uraaqararana paqurianaura, Anutuna maraquna minaki marifa marinara saifanoo mifa kai mariani.
GEN 41:39 Miqi qimaseenoo Faraoofa Yooseefaana qimaminoo qinau. Anutufa kai maa aiqama ainainna ani uqafiqeenoo. Anee aiqamausa urinnaaqara masee firaa irirana faqaafa akooqoo mariananoo.
GEN 41:40 Qinee ani quqasaanana qini maqa maaqasaa rakisinnaranoo. Aiqama qini faiqí anaasee ani ufa mau kai fifaranoo. Ani afeeka fannoo qini afeeka ameemaanai mariannoo.
GEN 41:41 Miqi qimaseenoo Faraoofa kafaa Yooseefaana qimaminau. Qinee maqee ani mareeqee Isipa maqannaasa uriqararafai kammiqa.
GEN 41:42 Miqi qimaseenoo Faraoofa narí asauku amukakinaa rinna firaa uriqararausa rinna maruna raduku Yooseefaana asaukuki quqanau. (Yooseefaafa mi rinnanannai peennakina raaraa maseenoo papiqasaa atooqasoofaqa maaqanna maaqanna mina qafeeqa Faraoona rinna akara fee qimaseeqa kaaqa rufieeqa mi papiqana saaqaraa ufara eedoo kai qimariqau.) Faraoofa amiqira qamunna afisu amaqaseenoo koorannai auqira kukukakana faqa rufu amaqanau.
GEN 41:43 Miqimmasoofanoo Faraoofa uriqararausa nifiqanoo nu qoosa karana Faraoofa Yooseefaana amisoofanoo minasaa rakisira sundiauqa mina afunni fidaqa maaqi qimasee faaqaridaqa qiqau. Amaaraaqa amaaraaqa. Mi oosannanannai Yooseefaana aiqama Isipa maqannaasa uriqararanaikinau.
GEN 41:44 Faraoofa kafaa Yooseefaana maaqi qimasee qimaminau. Qinee uriqararausa Faraoosa qimamidaqa. Sia amana Isipa maqannaa fasiqa moo fannoo narí aidiranannai moo ainaina auqaannoo. Mifa anisaa naaree iraannoo.
GEN 41:45 Miqi qimaseenoo Faraoofa Yooseefaana fuka auqu reenoo Safeenata Paneeanee qinau. Miqi qimasee mifa Yooseefaana anaasee aminau. Mi anaaseena auqu Aseenata nammarifa Pootifeerana araamuna marinau. Pootifeerafa Qeerioopoorisa maqusanaasa suani afuara innaaru qimarusa aanaiqikirafa marinau.
GEN 41:46 Yooseefaafa moodaa fasiqa faqa moo fasiqa asaukuqara taikasee 30 aukuana marasee Faraoona ainainirana oosana aranau. Oosana araseenoo Faraoona aiseenoo Isipi maqa maaqaki oonuree aniree idanoo aiqama atinai nimarinau.
GEN 41:47 Qisauku dinni taikasee dinni ani qaara marasee aukuanaki Isipa maqa maaqaki narana moomoo kambiqafi rairaa inau.
GEN 41:48 Mi aukuanna namunakinaa narana irairaa una Yooseefaafa mareeqeenoo maqusakiaqa afeedinau. Mi moodaa moodaa maqusanaki mi maqusana fiqu fiquinoo maru maqanakinaa naranna marasee mi maqusanaki afeedinau.
GEN 41:49 Mi naranausa unakiisoofanoo ooruku nammari afaiqaraa nukudara foora moomoo uqanna marufanoo Yooseefaafa asaana rusia minnisanau.
GEN 41:50 Aandaroo aukuana sia ani marufanoo Yooseefaana anaaqa Aseenata nammarifa akoonaiqi qaara qanda maqanau.
GEN 41:51 Maqasoofanoo Yooseefaafa qinau. Anutufa qini dadaaqifaqa qeeqa aupurarana faqa qeeqa qikoona atiara iriranara faqa auniqa. Miqi qimaseenoo mifa narí indaaruqaa faiqi auqureenoo Mannasee nee qinau.
GEN 41:52 Kafaa Yooseefaafa akoonaiqi moo maqaseenoo qinau. Anutufa maa maqa maaqanaki qinee aupurarana maree marunnanaki faiqi qiminoo. Miqi qimaseenoo mifa narí inaaqiannaa faiqi auqureenoo Eefaraimmanee qinau.
GEN 41:53 Qisauku dinni taikasee dinni oonu qaara marasee 7 aukuanaki narana irairaa imarufaqa Isipa maqannaasa asasiufa taikanau.
GEN 41:54 Yooseefaafa undee kai inoo qisauku dinni taikasee dinni oonu qaara marasee irairaa ira aukuana aiqaroofanoo aandaroo kambiqanau. Aiqama maqa maaqaki aandaroo narinau. Isipa maqa maaqaki kai narana kaqi marinau.
GEN 41:55 Mariufanoo Isipa maqa maaqaki faqa aandaroo narufaqa faiqí anaasee Faraoo funnai oonuree naranara faaqarida innaaru qufanoo mifa qinau. Innee Yooseefaa finnai oonu raifanoo mifa innandee innandee kai iaqa.
GEN 41:56 Aandaroo firaafa Isipa maqa maaqaki aiqama atinai firaaqoo narufanoo Yooseefaafa aiqama afeedira maqauqa atuqasoofaqa Isipa maqannaasa narana feefauri mariqau.
GEN 41:57 Aiqama maqa maaqaki maru fasiqa aanaaseesa aandaroo firaafa naru faqa aiqama atinaindari narana feefaurirara Yooseefaa funnai Isipa maqa maaqaki aniqau.
GEN 42:1 Yakooboofa Isipa maqa maaqai narana moomoo marunara narí faiqi namu qimanniminoo qinau. Innee naqaa fee ifaqee narana minni ooqu maraaqaana maridee.
GEN 42:2 Isipa maqa maaqai narana maridanoo mifoo qiafaqa iriqa. Miqoo ooqureeqa akaqa narana feefaurumma maree murusaifaqa namasee sia kuqua.
GEN 42:3 Miqi qufaqa Yooseefaana afasausa mara moo anaasee faiqi namu qisauku qara taikasee marusa narana feefaurirara Isipa maqa maaqai ooqu fiqau.
GEN 42:4 Yakooboofa Yooseefaana akaqa uqanna Beensaminna sia aiqanau. Moo ainaina mina afaaqai kambiqaandoo qimasee rufiasee sia aiqanau.
GEN 42:5 Aandaroo firaafa Kannaa maqa maaqaki nári marunara Yakooboona faiqi namu faqa moomoosa faqa narana feefaurirara ooqu fiqau.
GEN 42:6 Yooseefaafa Isipa maqa maaqakinaasa uriqararafa maridanoo aiqama maqa maaqakinaasa feefauriaqee qimasee quqaqoofaqa feefauri mariqau. Yooseefaana afasausa mara ooquree Yooseena oorinni noorindari maqasaa kummaraqau.
GEN 42:7 Yooseefaafa narí afasausa mara noori nindafoofanoo Yooseefaana irirafa kambiqanau. Kambi qoofanoo sia misara iridanoora foora aranaiqi iramirinoo qinau. Innee yaindarifee anidee. Qufaqa misa qiqau. Maasa Kannaana maqusaindari narana feefau rirara qumidaqa.
GEN 42:8 Miqi qufanoo Yooseefaafa misara iri marufaqa mina afasausa mara minara sia iri mariqau.
GEN 42:9 Yooseefaana irirafa kambiqa fufanoo mifa ooqai narí faiqi saa qainunara oonu mafi irinau. Innee nipuraraa fasiqauqa mariafaqa nindafaida. Innee mai qumuree maasa aandaroo darifaqa ummooqukida mandaiki marunausa qumu qiqafararee qimasee qumuafanoo.
GEN 42:10 Miqi qufaqa misa maaqi qimasee narí qimamiqau. Oo uriqararafa sia maasa miqianaura. Maasa ani ainainira faiqiara foora narana feefaurirara qumidaqa.
GEN 42:11 Maasa moodaa fasiqa faiqi namu kai maridaqa. Maasa kuqaa ufa kai qimarunausa maridaqa. Uriqararafa maasa sia nipuraraa fasiqau maridaqau.
GEN 42:12 Miqi qimasoofanoo Yooseefaafa nariqa qima niminoo qinau. Innee unna qimariafanoo. Maasa maqa maaqa mandaikinoo sia afeekaikinoo marina qafarara qumuafanoo.
GEN 42:13 Misa mi ufana iriseeqa kafaa narí qimamiqa qiqau. Uriqararafa, maasa aiqama qisaukuqara taikasee qikunni ooqu qaara marasee 12 maridaqa. Kannaa maqa maaqaki moodaa fasiqa faiqi namu mariafannanakiqari moodaafa kuqinau. Maasa ninaaqiannaafa maasa nikoona faqa maqusai kaqi maridanoo.
GEN 42:14 Yooseefaafa mina iriseenoo kafaa qima niminoo qinau. Doo qinee qidaqa, innee nipuraraa fasiqauqa mariafanoo.
GEN 42:15 Qinee maaqimmasee inni nimanammasee qafaanaura. Qinee Faraoona auqusaa inni qima nimidaqa sia innee ooru fifaranoo maaqoo marifanoo inni nikaqa qumurainaqa oorufifaranoo.
GEN 42:16 Innikiqari moo fannoo ooru inneeqa nikaqa afiqee qumuaqa. Innee akaqausa sundiauqa faqa marifaqa innisaa rakisi marifaqa maasa innee qia ufana qimasee qafamasaana oorufifaranoo. Innee unna qifaqa kuqaa Faraoona auqusa qimannimidaqa innee nipuraraa fasiqa marifaranoo.
GEN 42:17 Miqi qimasee Yooseefaafa qufaqa misauqa rumbeeqee karabusa maqaki quqasoofaqa qaaramoo faasaana mariqau.
GEN 42:18 Qaaramoo faasaanasaa marisoofanoo Yooseefaafa maaqi qimasee qima niminau. Qinee Anutunara rufiee marunna fasiqausa maridaqa. Innee qini ufa mau fiqa amiqimmasee marifaranoo.
GEN 42:19 Inniara kuqaa qira fasiqauqee qiaqeera innikiqari moodaafa innee maria karabusanaki marinaqa innee akaqausa narana feefauru maqaana muru inneeqa faiqi anaasee nimifaqa naaqa.
GEN 42:20 Innee ooruree inneeqa nikaqa inaaqianaana afiqeeqa qumuaqa. Qumu raifaqa qinee inniara kuqaa ufa kai qimariasee qimasee sia kuqa naruanaura. Miqi qufaqa misa aiqamausa mina ufara eedoo qiqau.
GEN 42:21 Eedoo qimasee narí qimami narí qimami qiqau. Innisaimbaqa kuqaa qeeqa qikaqa mandaikamma amaqa qiafana. Mifa firaa ummaaraki maridanoo dadaaqiaqee qimarufaqa innisaimbaqa sia iriqiafana. Minara maasa maqee maa ummaaranaki maridaqa.
GEN 42:22 Reeubeenafa misa ufa iriseenoo maaqi qinoo qinau. Qinee qaoo qiafana innee sia iriqau. Mifa kuquna akiiqara maasa maqee ummaara maraidaqa.
GEN 42:23 Yooseefaafa misa qimaru ufana umee kai irimarinau, miqi marunara misa sia iriqau. Misa Yooseefaana faqa ufa qianee qimasee qimarufanoo moo fasiqa fannoo misa ufa quandee marinau.
GEN 42:24 Yooseefaafa misa ufa iriseenoo quqasee umeenni oonureenoo ikiraqa seenoo oonu randee aninau. Iki raqarafa taikoofanoo ufaqirana amanaikufanoo oonu randee aninau. Anireenoo misakina Simeeoonnana qumarasee misa nifusaa rumbanau.
GEN 42:25 Yooseefaafa narí ainainira faiqiuqa qimannimufaqa narana mina afasausamara uqa umbiqaseeqa misa munnimma kaifaa nariqa uqa adianai uqarumasee nimiaqa, aanai fida neefandinna narana faqa nimiaqa qufaqa eedoo qimasee miqimma nimiqau.
GEN 42:26 Mina afasausa mara feefaurummasoo naranna nariqa doonkisaa quqasee maree ooru fiqau.
GEN 42:27 Yooseefaana afasausa mara narana nári doonkisaa quqasee maree fifii ufaqa eendufaqa aanai uiqaana arasee faiqarara imarufanoo mina afasaafa moofannoo narí doonki narana amirara narí uqa ooraqasee qafoofanoo mina munnimma uqa adianai marufanoo qafanau.
GEN 42:28 Qafamasee narí ainaina naaramaseenoo qinau. Innee aniree qafaaqa qini munnimma kaifaa qiqa qimiafanoo qini uqaki maridanoo. Miqi qufaqa misa nimuqusa mandaikufaqa rufiaidaqa qiqau. Anutufa maasa naqaa feemma qimaqeenoo fee maaqinoo fee.
GEN 42:29 Miqi qimasee faiqaqee mariufaqa iaqoo kananaana nári nikoofa Yakooboofa marunnai Kannaa maqusai ooruree aiqama mi ainainausa kambiqoonara qimamiqau.
GEN 42:30 Isipa maqannaa karaambaiqa fannoo aanoo qira ufa kai maasa qima qimaqeenoo. Mifa maasara innee qini maqa maaqaki nidaqa nipuree mariafanoo fee qimasee rairai qinoo.
GEN 42:31 Miqi qifaqa maasa maaqi qimasee narí qimamiqa. Oo maasa sia nipuraraa fasiqau maridaqau. Maasa kuqaa ufa qimarunausa maridaqa.
GEN 42:32 Maasa moodaa fasiqa faiqi namu qisauku qara taikasee qikunnooqu qaara marasee 12 maridaqa. Maasa qikaqa moo fannoo narí akoona faqa Kannaana maqusai maridanoo, moo fannoo kuqinau.
GEN 42:33 Maasa miqi qimasee qimamiafanoo mifa mina iriseenoo qinoo, qinee maaqi masee inni nimanida qafaanauree qinoo. Innikiqari moodaafa qini faqa marinaqa innee akaqausa sakumma aina maree muru faiqi anaasee nimiaqa.
GEN 42:34 Nimiseeqa narana taikainaqa kafaa qumiqa inneeqa nikaqa faqa afiqee qumuaqa. Muqusaifaqa qinee mina qafamaseeqa inniara kuqaa sia nipuraraa fasiqauqee kuqaa ufakai qimariasee qimaseeqa inni faiqí iduku nimianaqa innee maqee maqee narana aina feefaurida ooruree qumuree qiqa nuaqee qinoo. Misa miqi qimasee nári nikoona qimamiqau.
GEN 42:35 Qimamiseeqa nári uqauqa idukusee ooraqasee qafoofanoo aiqamausa munnimma kaqi marinau. Misa qafamasee nári nikoona Yakooboona faqa rufiaqau.
GEN 42:36 Yakooboofa rufiaidanoo maaqi qimasee narí faiqi namu niqinau. Innee qini faiqi namu mandaika maqimaqee mariafanoo. Yooseefaafa doo taika fufaqa, Simeeoonafa faqa taika fifaqa kafaa innee Beensaminnana faqa afiqee firaree qidee. Qinee ummaaraki kai maridaqa.
GEN 42:37 Reeubeenafa narí akoona ufa iriseenoo maaqi qimasee narí akoona qimaminau. Oo qipoo, qinee Beensaminnasaa rakisianaura. Qinee sia mina afiqee ururaanana mina akiiqara qini qimaaku qara narua. Anee qini qisaukuki quqasainaqa qinee amiqi masee afiqaqa niniinaqa afiqee uruanaura.
GEN 42:38 Miqi qimasoofanoo Yakooboofa qinau. Qini qimaaku sia uqanna inni faqa fuannoo. Mina afasaafa doo kuqu fufaqa mifa naríara maridanoo. Aanai mandainaina paqurinaqa qinee maaqirausa asooqa inni mi ummaarafa darinaqa kuquanoora.
GEN 43:1 Kannaana maqa maaqaki aandaroo firaafa narinoo mandaika uqanna inau.
GEN 43:2 Isipa maqa maaqai feefaurummamaree murusoo naranna Yakooboona aiku asauku nama taikasoofanoo Yakooboofa narí faiqi namu qimanniminau. Kaifaa ooquree kaqikaa narana feefaurumma murusaifaqa naa.
GEN 43:3 Miqi qimasoofanoo Yudafa qinau. Mindaraa uriqararafa maasa oori runusee qimaqimifaqa iriqa. Innee inneeqa nikaqa sia afiqee qumiqa sia qini qifusaa nifaranoo fee qinoo.
GEN 43:4 Anee qini qikaqara eedoo qinaqa maasa afiqee ooquree ani narana feefaurianaura.
GEN 43:5 Anee sia eedoo qinanoo maasa qikaqa sia ooqu finaqa sia amana fifau ooqu fuanaura. Mi maqannaasa uriqararafa qinoo inni nikaqa sia quminaqa sia qini qifusaa nifaranoo fee qinoo.
GEN 43:6 Yakooboofa mi ufana iriseenoo qinau. Innee nanaree moomoo ummaara qini qimidee mi uriqararana qimamiqa maasa qikaqa maridanoo fee qifee.
GEN 43:7 Misa iriseeqa kafaa qimamiqa qiqau. Mi uriqararafa maasara faqa maasa faiqi aanaaseera faqa iréenoo. Inni nikoofa kaqi fee maridanoo fee qinoo. Kafaa inni nikaqa moo maridanoo fee qinoo. Miqi qimasee maasa iraifaqa qimamiqa. Maasa naqaa fee masee maasa qikaqa afiqee qumuaqee qianinnanara irianauree. Sia maasa iriqa.
GEN 43:8 Miqi qimasee Yudafa narí akoona maaqi qimasee qimaminau. Qipoo anee maasa qikaqa qini qisaukuki quqasainaqa maasa doo findifi ooqu fuanauranoo. Miqinaqa maasa sia daara rainaqa kuqunauranoo.
GEN 43:9 Qinee qeeqa marirana mina amaaqa maqaanaura. Anee minara qini kikiaqa usua. Qinee sia afiqee andeeqasee anee iannannai uriqa qinee ani nifairirana maraanaura.
GEN 43:10 Maasa sia ani faqa kisaaqasaa ufa qifau, maasa amana qaara kari ooquree ururee unaiqini.
GEN 43:11 Miqi qufanoo misa nikoofa qimanniminau. Doo amana inneeqa miqiqa miqiaqa. Innee maa maqa maaqana kinaana amiqira ainaina inneeqa uqaki rumammareeqa kaqi nimi maria ainainnara foora muqu mi maqannaasa uriqararana amiaqa. Saqari anoona qoodaa faqa ookasaasa anoona qoodaa faqa adiafaa imari saqari qaqamana anoona faqa oofauna fooqaa ira ainaina anoona faqa kasa fooqaana anoona faqa maree ooqu fuaqa.
GEN 43:12 Innee moomoo munnimma qaara kari afaqamaree ooqu fuaqa. Innee ooqai munnimma inni uqa adianai marufaqa qafaqau. Abee, aaqamasee munnimma inni uqaki kafaa quqaqau.
GEN 43:13 Inneeqa nikaqa afiqee ooqurandee kai kaqi uruaqa.
GEN 43:14 Aiqama afeeka faqaa Anutufa dadaaqinanoo mi fasiqafa inniara qimudaoo qiani. Qimudaoo qimaseenoo Beensaminna faqa inni nikaqa moo faqa kafaa nimiani. Qinee qini faiqi namu kakasifanoo doo saina kakasiani.
GEN 43:15 Miqi qimasoofaqa Yakooboona faiqi namu mi saqari anoonausa faqa munnimma moomoo qaara kari mara maree Isipa maqa maaqai Beensaminna faqa afiqeeqa ooqu fiqau. Miqoo misa Yooseefaafa maruqoo ooqu kikiqa mambufanoo Yooseefaafa misa nindafanau.
GEN 43:16 Yooseefaafa Beensaminna qafamaseenoo narí maaqakinaa ainainasaa rakisi maru fasiqana qimaminoo qinau. Anee maa fasiqausa nifiqeenana qini maaqaki munu quqaa. Misa suani qambaana qini faqa narana neefaranoo. Anee aandau aruseenana deedaqia.
GEN 43:17 Ainainira faiqi fannoo mifa qimamundee inoo misauqa nifiqee Yooseefaana maaqaki munu quqanau.
GEN 43:18 Yooseefaana maaqai nifiqee munu quqarara fimarufaqa misa rufiaidaqa oonumafi irimariqau. Indaaru narana feefauriafanna munnimmana maasa mara mareeqa qimaaqai murusee mi munnimmana maasa uqaki paquriafannana akiiqara maasa mai qifiqee anidanoo. Misa kai kaqi maasa darusee maasa doonkiuqa marasaifaqa maasa misa ainainira faiqikianaura.
GEN 43:19 Misa miqi qimiriseeqa mina ainainasaa rakisi maru faiqina maaqa kooqiki oonuree qimamiqau.
GEN 43:20 Oo uriqarara amanee maasa ufa irinnaree. Ooqai maasa qeeqa maaqaindari mai qumuree narana feefauru iqiafana.
GEN 43:21 Maasa mai feefauru mamaree ooru fiiufaqa aanai ooru faiqarara uiqaana arasee maasa qeeqa sakuma uqa sanda idukusee qafaafananoo maasa aiqamausa aquafanna munnimmafa aiqama maasa uqauqa adianai marinau.
GEN 43:22 Maasa mi munnimmana fabaqa maasa qeeqaindi moo faqa fiqaramasee narana feefaurirara maree qumidaqa. Yafee moo fannoo maasa uqakiaqa maasa narana feefauriafanna munnimmana kafaa uqarinau fee.
GEN 43:23 Miqi qimasoofanoo Yooseefaana ainainasaa rakisi maru faiqifa iriseenoo qinau. Doo innee nifaaqa quqaaqa. Sia rufia rufia iaqa. Inni Anutufa inni nikoona Anutufa mifa kai inni munnimma inni uqaki rinau. Doo qinee inni munnimma mareeqa. Mifa miqi qimaseenoo Simeeoonna karabusaki maruna iduku eeqeenoo misaki quqanau.
GEN 43:24 Quqaseenoo misa nifiqa mareenoo Yooseefaana maaqaki munu quqaseenoo nammari nimufaqa niku nammari uqusee mariqau. Misa doonkiuqa faqa narana nimufaqa naqau.
GEN 43:25 Miqimmasee misa nári maree qumu ainainausa Yooseefaafa suani qambaana anirainaqa amiraree qimasee deedaqiqau. Yooseefaafa suani qambaana inni faqa narana naanauranoo fee qimasee qimannimunara irisee deedaqiqau.
GEN 43:26 Yooseefaafa maaqai aniroofaqa misa nári maaqaindari maree qumu ainainausa mara maree maaqaki mifa marunnai ooruree mina oorinni noorindari maqasaa aqufiqau.
GEN 43:27 Miqimmasoofanoo Yooseefaafa misara amiqi fee masee maridee qimasee iramirinau. Inneeqa nikoona nauraiqiara qima qimufaqa iriafanafa maqee kaqi fee maridanoo fee.
GEN 43:28 Qufaqa misa iriseeqa qiqau. Eeoo ani ureeqara ainainira faiqi maasa qikoofa kaqi maridanoo. Miqi qimaseeqa misa kafaa Yooseefaana oorinni noorindari maqasaa aqufiqau.
GEN 43:29 Miqimmasoofanoo Yooseefaafa narí akaqa Beensaminna qafamaseenoo qinau. Maana inneeqa nikaqara qima qimufaqa iriafanafee. Qimaseenoo Yooseefaafa qinau. Qini qimaaku Anutufa ani amiqi amiqimma amaqaani.
GEN 43:30 Miqi qimaseenoo kai kaqi findifufanoo quqasee finau. Mina amuqusa firaaqoo narí akaqara mandaikufanoo finau. Yooseefaafa misa nifusaa iki raqaaqaa ufanoo quqasee narí faiqee maru rummanai oonuree iki raqanau.
GEN 43:31 Iki raqeeseenoo nammarinnnai aukunu nammari uquseenoo narí aukunu afeekaika mandeenoo doo misunnai qumureenoo narí suqee maruna qimaminau. Doo narana rakiqaannee qinau.
GEN 43:32 Miqi qufanoo suqee marufa narana naadu naadu rakiqanau. Yooseefaana aaduma teeboorasaa rakiqa amaqanau. Kafaa mina afasausa mara naaduma teeboorasaa rakiqa nimaqanau. Isipa maqannaasa minaki nee marusa naaduma moo teeboorasaa rakiqa nimaqanau. Isipa maqannaasa Qeeburu maqannaasa faqa narana narara nikooqee marusa marunara naadu naadu naqau.
GEN 43:33 Yooseefaafa narí narana suqee maru faiqina qumee kai qimamufanoo mi faiqifa misa nifasaana indaaru mara ooqu mara amaqaseenoo mina aanaaqiannaana mina muqufi ooqu mara amaqasee miqimmamaree inaaqiana nikaqa fannoo atinni ooqu marinau. Misa nári ooqufaaqeeuna qafamasee tautumasee narí qafee narí qafee iqau.
GEN 43:34 Yooseefaafa narí qufanoo mina difaanikinaa narana mareeqaida misa piritakiaqa quqa mareenoo Beensaminnaindiki fiqaramasee moodaannai qisauku 5 kari narana quqanau. Quqasoofaqa narana faqa uainna nammari faqa neeneesoofanoo doo nifaaqa iduku fufaqa qufaina qiqa asasiqau.
GEN 44:1 Namasoofanoo Yooseefaafa narí maaqakinaa ainainasaa rakisi maru fasiqana qimaminoo qinau. Anee misa uqa maraseenana minakiaqa narana uqa ruma qumbiqasainaqa maree fuaqa. Moo uqa sia apeequniani. Amana kai marinaqa maree fuaqa. Misa munnimma faqa narana feefauriana nariqa uqa adianai rumasainaqa maree ooru fuaqa.
GEN 44:2 Miqidana inaaqiannaana uqakina narí munnimma narana feefaurina namufaqa qini siruaa kaafa faqa mina uqa adianai rua. Miqi qimasoofanoo mifa qimamundee inau.
GEN 44:3 Kananaana keekoo qufaqa doo misa nári doonkiuqa namufaqa niqiqoofaqa oorufiqau.
GEN 44:4 Doo mareeqa kaqi kaaqoo maqusa quqasee nianai fufanoo Yooseefaafa narí ainainasaa rakisi maru faiqina aiqeenoo qinau. Anee kai kaqi misa ninaaqianna fua fidana oonu misa rafaaqafusee maaqi qimasee qimannimia. Innee naqi fee ifaqee qinee amiqimma nimaqaunnana akiiqara mandaikamma qimaqee fee. Miqi qimasee qimannimia.
GEN 44:5 Nanaree innee qini uriqararana kaafa qummuari fee, mifa minaki kai nammari neemarina. Mifa minaki afunee qafeemari kaafana qummuariafanoo, innee manda ainaina uqanna auqaafanoo fee qia.
GEN 44:6 Miqi qimasoofanoo mina ainainira faiqi fannoo iriseenoo nifaqee finau. Misa oonu paquri mandeenoo Yooseefaana ufa kai misa qimanniminau.
GEN 44:7 Qimannimisoofaqa misa qiqau. Oo uriqararafa maasa ani ufa oosanara randaidaqa. Sia uqanna maasaki maaqira manda oosana maridanoo.
GEN 44:8 Maasa ooqai indaaru narana feefauriafanna munnimmafa maasa uqaki maruna mina maasa sia qumuariqa mina Kannaana maqusaindari mara maree kafaa muqu ani amiqa. Maasa miqi marunausa maridaqa naqi maseeqee ani uriqararana maaqakinaa siruaa faqa koora faqa maraanauree.
GEN 44:9 Anee maasa uqa kiaqa randasee qafa. Yana uqakifee mi ainainafa mariannoo fee doo mifa kai kuquannoo, maasa ani ainainira faiqi kamambi marianaura.
GEN 44:10 Yooseefaana ainainira fasiqa fannoo misa ufa iriseenoo qima niminau. Doo amana inni ufa mau kai fuanaura. Ya fasiqana uqaki fee marinafa mifa kai qini ainainira faiqi mariannoo. Innee aiqama nimaaqa fifaranoo.
GEN 44:11 Miqi qimasoofaqa misa kai kaqi nári uqauqa afiqu maqasaa quqasee idukiqau.
GEN 44:12 Yooseefaana ainainasaa rakisirafa indaaruqaanaindi naaree qafamaseenoo miqooqaraanaindiki miqoo qafamaseenoo kafa miqoo qaraanaindiki qafamaseenoo miqi kai mamaree aiqamausa uqakiaqa amiqimmasee qafanoo finau. Miqi mamareenoo misa ninaaqiannaana Beensammina uqaki qafoofanoo kaafa minaki marinau.
GEN 44:13 Beensaminnana uqaki paquri masoofaqa mina afasausa mara aiqamausa nimuqusufaqa nári qamunna aiqamausa rakeekaa iqau. Miqooqari nári ainaina doonkisaa quqasee oonu quandakufaqa maqusai aniqau.
GEN 44:14 Yudafa narí auna akaqa faqa Yooseefaana maaqai oonuree qafoofanoo Yooseefaafa kaqi maaqaki marinau. Marufaqa misa anireeqa noorindari maqasaa aqufiqau.
GEN 44:15 Aqufuma fufanoo Yooseefaafa qinau. Innee naqi fee ifee. Innee sia fee iridee, qinee maaqira uriqararausa qeeqa afuneennoo inni ummuarirana paquriranara, sia fee irifee.
GEN 44:16 Miqi qimasoofanoo Yudafa qinau. Oo uriqararafa maasa nana ufa fee ani qimamianauree. Maasa naqi mandee fee maasa qeeqa andeeqaranara qianauree. Anee maasa kikiqa qusimariannana naqimmasee fee qaoo qianauree. Anutufa maasa aaqarana koorooinoo. Sia kaafa maraifa kai ani ainainira faiqi mariannoo, maasa aiqamausa ani ainainira faiqi marianaura.
GEN 44:17 Miqi qimasoofanoo Yooseefaafa nariqa qimanniminoo qinau. Oo sia uqanna qinee miqianauranoo. Kaafa maraifa kai qini ainainira faiqi kiannoo. Innee akaqausa nimaaqa ooruree ineeqa nikoona qimamiaqa.
GEN 44:18 Yudafa Yooseefaafa maruqoo oorureenoo qimaminoo qinau. Oo uriqararafa, anee qiniara eedoo qinaqa ani faqa qifaaqa quqasee ufa qia. Anee sia qiniara aanoo qia. Anee Faraoona miqirafa mariananoo, uriqararafa mariananoo.
GEN 44:19 Oo uriqararafa, ooqai maasa umuraafanana anee maasa iramirinana inni nikoofa maridanoo fee inni nikaqa maridanoo fee qinau.
GEN 44:20 Miqi qunaqa maasa maaqi qimasee aninna qimamiqiafana. Maasa qikoofa asooqa maridanoo. Maasa qikaqa faqa maridanoo. Mifa asooqa namuki mi faiqina maqeenoo. Mi faiqina afasaafa kuqufufanoo naríara marifanoo maasa qikoofa kaaqa minara amuqusidanoo.
GEN 44:21 Maasa miqi qimasee indaaru ani qimamiqiafana. Uriqararafa anee maasara afiqee muqusaifaqa qafaanee qinau.
GEN 44:22 Miqi qunaqa maasa maaqi qimasee aninna qimamiqiafana. Oo mi faiqifa sia amana narí akoona quqaannoo. Mina faiqi fannoo miqinanoo mina akoofa kuquannoo fee qiqiafana.
GEN 44:23 Maasa miqi qimasee ani qimamiafana anee maaqi qinau. Innee inneeqa nikaqa sia afiqee qumiqa sia qini qifusaa anifaranoo fee qinau.
GEN 44:24 Maasa ani ufa iriseeqa qeeqa qikoo finnai oonuree anee qunna ufana qimamiqiafana.
GEN 44:25 Qimamiseeqa mariafananoo maasa qikoofa maasara kaifaa ooqu narana feefauriaqee qiqau.
GEN 44:26 Miqi qufaqa maasa maaqi qimasee narí qimamiqiafana. Maasa qikaqa ooqu finaqa maasa ooqu fuanaura. Sia maasa qeeqaraa uriqararana afusaa ooqu fuanaura.
GEN 44:27 Miqi qufanoo maasa qikoofa maaqi qimasee maasa qima qiminau. Innee irimmariafanoo qini qinaaqa Raseera nammarifa qini faiqi qaaraqanda kai maqanau.
GEN 44:28 Moo fannoo fifufaqa qinee minara kaasau aandau fannoo qini faiqi arusee rakeekaamma namaseefoo qiqiafana. Mi fasannai sia kafaa mina qafeeqa. Doo mifa taikafinau.
GEN 44:29 Innee maana qinee unnannaindaraana afiqee fifanoo moo ainaina mina afaaqai kambiqainaqa qini minara qimudaoo qirafa asooqa marunnaqoo qini daruannoo fee qinau.
GEN 44:30 Yudafa Yooseefaana kaifaa qimamidanoo qinau. Maasa qeeqa qikaqa quqaseeqa oonuraananoo maasa qikoofa maasa qiqafamaseenoo doo narí faiqiara amuqusinanoo kuquannoo.
GEN 44:31 Maasa qikoona amuqusirafa firaaqoo maa faiqinaki maridanoo. Mifa asooqa uqanna maridanoo maasa maaqaamma saananoo mi ummaarafa mina kuqa aruannoo.
GEN 44:32 Qinee qeeqa qikoona maaqi qimasee qimami qiafana. Qinee qeeqa qikaqa akiiqara ummaara maraanauree qiqiafana. Qinee sia mina afiqee uriqa ani nifairira ufa qinee maraanauranoo fee qiqiafana.
GEN 44:33 Miqi qimasee qinee qeeqa qikoona qimamiqiafana. Maqee qinee qeeqa qikaqa amaaqa maqeeqa ani ainainira faiqi kiananoo qini qikaqa fannoo narí afasausa faqa ooru fuannoo.
GEN 44:34 Qinee naqimmasee fee maa faiqifa sia qini faqa ooru finaqa qeeqaraa qeeqa qikoo finnai ooru fuanauree. Qini qikoofa manda ummaara marainaqa qafaananoo sia amiqiannoo, mandaikammiannoo.
GEN 45:1 Yooseefaana aundura dapikufanoo narí ainainira fasiqauqa nifusaa ikiraqararusia minnisee sia amanaikufanoo niqi qamasoofaqa madaanai fiqau. Fifufanoo Yooseefaafa narí ainaina faqa kai maridanoo qimanniminau. Qinee inni nikaqa Yooseefaasa maridaqa.
GEN 45:2 Yooseefaafa firaaqoo iki raqaida qufaqa Isipa maqannaasa madaanai maridaqa iriseeqa oonu Faraoona qimamiqau.
GEN 45:3 Yooseefaafa narí afasausa mara maaqi qimasee qimanniminau. Qinee maana Yooseefaasa maridaa. Kuqaa fee qini qikoofa kaqi fee maridanoo fee. Miqi qufaqa mina afasausa mara tautu maseeqa naaquqoofaqa sia ufa qiqau.
GEN 45:4 Yooseefaafa kafaa qimanniminoo qinau. Doo innee qini daaqa aniaqee qufaqa misa mina aaqa aniroofanoo kafaa qimanniminoo qinau. Qinee inni nikaqa mariafanaqa innee feefauruara mamaree qini quqasoofaqa qini qifiqamaree Isipa maqa maaqaki ainainira faiqi kamma qisaqau.
GEN 45:5 Doo maqee innee sia qini qimu oosannara inneeqa kikiqusifanoo nimuqusiani. Anutufa kai qini diiqoofaqa innee kuqi foora indaarunni kamma nimaqasee inni dadaaqianeera qufaqa qumiqiafana.
GEN 45:6 Firaa aandaroo narirafa maa maqanasaa qaara aukuana marasee aiqaraifanoo moodaannai qisauku aukuana kaqi maridanoo. Mi kamuqoo fuka narana ummaqirafa faqa unakirafa faqa sia mariannoo.
GEN 45:7 Anutufa kai qini mareeqee inni indaarunni kamma saifaqa inni asumu marasainaqa sia kuquaqeera, mi mookira oosannananai kuqaa mifa inni faqa inni niku nisauku faqa marasainaqa asumu marifaranoo.
GEN 45:8 Minara sia innee fau qini diiqoofaqau maa maqa maaqanaki ani maridaqau. Anutufa diiqoofaqa ani maridaqa. Mifa kai qini mareeqee Faraoona oofisaauqa uriqarausaikamma qaifaqa maridaqa. Miqimmasaifaqa qinee mina aiqama maqa maaqasaa rakisirausa maridaqa. Aiqama Isipa maqa maaqasaa rakisirausa maridaqa.
GEN 45:9 Innee kai kaqi qini qikoo finnai ooruree ani amaaku Yooseefaafa maaqi qinoofee qimasee qimamiaqa. Anutufa qini mareeqeenoo aiqama Isipa maqa maaqasaa rakisira faika maqaifaqa maridaqa. Sia kisaaqasaa maria, kai kaqi qinee unnannai qumua.
GEN 45:10 Anee faqa aneenna faiqi namu faqa aneenna anaiqi mara faqa inneeqa sipsipa faqa inneeqa mimmiuqa faqa inneeqa burimakau faqa inneeqa aiqama ainaina faqa indaa mamaree qumuraifaqa Kooseena maqa nimianaqa qini daaqa mariaqa.
GEN 45:11 Innee Kooseena maqa maaqaki innisaa rakisianaura. Moodaannai qisauku aukuana kaqi maridanoo, mi aukuana namunaki aandaroo ida mariannoo. Innee faqa ineeqa faiqí anaasee faqa inneeqa aandauqa faqa naararaina kuqifoora qikooqaidanoo.
GEN 45:12 Yooseefaafa kaifaa narí afasausa mara qima nimidanoo qinau. Innee nifu maqasee qini qiqafaaqa sia moosau maridau qinee Yooseefaasa uqanna maridaqa. Doo qini qikaqa Beensaminnafa mifa faqa qini qiqafaani.
GEN 45:13 Qinee Isipa maqasaa firaaqoo uriqararausa marunnanara qini qikoona qimamiaqa. Aiqama ainaina qafaanara faqa qimamiaqa. Qimamiseeqa doo dauni dauni afiqee mai qumuaqa.
GEN 45:14 Miqi qimaseenoo narí akaqa Beensaminna oonu mafi anukaki difaa difaamma qumareenoo iki raqoofanoo Beensaminnafa faqa iki raqanau.
GEN 45:15 Yooseefafa quandaku fanoo narí afasausa mara aiqamausa nimooqaseenoo naiki raqanau. Naiki raqasoofaqa mina afasausa mara mina faqa ufa qiqau.
GEN 45:16 Isipa maqannaasa misa miqi unara oonu Faraoona qimamisoofanoo Faraoofa faqa mina uriqararausa faqa iriseeqa asasammiqau.
GEN 45:17 Faraoofa Yooseefaana maaqi qimasee qimaminoo qinau. Anee maaqi qimasee aneenna afasausa qimanniminaqa nári ummaara doonkisaa mara quqasaifaqa maree Kannaana maqusai ooru fuaqa.
GEN 45:18 Miqoo oorureeqa nári nikoona faqa nári faiqi anaasee faqa nifiqee mai qumuaqa. Qumuraifaqa Isipa maqa maaqaki qafamasee amiqira maqa nimianaqa miqoo narana fiqaranoo moomoo marinaqa marifaranoo.
GEN 45:19 Faraoofa kafaa Yooseefaana qimaminau. Anee qinee ufa qunnana qimanniminaqa Isipa maqusaindaraa qoosa rarisee mari karausa faqa daraiwaa faqa mara maree ooru fuaqa. Minakina nári ninaaqmaaka faqa nári faiqi aanaaqiuqa faqa nári nikoona faqa mara quqasai ooqu marifiqa qumuaqa.
GEN 45:20 Misa sia nári umiasana aina mafi quqasee quminnanara oonu mafi iriaqa. Isipa maqa maaqa amiqirafa aiqama misaindikammiannoo.
GEN 45:21 Yakooboona amaaku mara Faraoofa qimannimundee kai iqau. Yooseefaafa Faraoona ufa iriseenoo qoosa rarisee maru karausa mara quqasoofaqa daraiwaa namu faqa aatata neefandinna narana faqa nimufaqa maree ooru fiqau.
GEN 45:22 Yooseefaafa narí afasausa mara qamunna moodaa kai moodaa kai nimana nimana kai niminau. Beensaminna moodaanai qisauku qamunna faqa siruaa munnimma 300 faqa aminau.
GEN 45:23 Yooseefaafa Isipa maqannaa amiqira ainaina suquseenoo qisauku qara taikasee doonkisaa oorufusasaa amaqoofaqa mara maree muru mina akoona amiqau. Kafaa aatata qumidanoo naaninna narana sakumana faqa feemu faqa narana oosana oosana faqa anaasee doonki qisauku qara taikaseesaa oorufusasaa quqasoofaqa maree ooru fiqau.
GEN 45:24 Yooseefaafa narí afasausa mara Kannaana maqusai niiqamasoofaqa fufanoo qima niminoo qinau. Innee aatata fidaqa sia qiniara qimasaida narí aqi narí aqiqa fuaqa.
GEN 45:25 Misa Isipa maqa maaqa quqasee nimaaqa nári nikoofa Yakooboofa marunnai Kannaana maqa maaqai ooru fiqau.
GEN 45:26 Ooruree nári nikoona qimamiqau. Yooseefaafa sia kuqinoo kaqi maridanoo, misa miqi qimasee nári nikoona qimamiqau. Mifa Isipa maqannaa aiqamausa uriqarafa maridanoo fee qiqau. Yakooboofa mi ufana irufanoo amuqusa kaqinnaindari ufanoo misa ufara sia kuqaa fee qinau.
GEN 45:27 Yooseefaafa qimannimu ufausa nári nikoona qimami marufanoo Yakooboofa qafoofanoo qoosa rarisee maru karausa Yooseefaafa quqasoosa Yakooboona afiqee Isipa maqa maaqai ooqu firara ururaqau. Yakooboofa mi karausa qafoofanoo aundura idukinau.
GEN 45:28 Idukufanoo qinau. Qini qimaaku Yooseefaafa kaqi maridanoo. (Qinee kaqi maridaqa ooqu mina qafarafa mifa kai aiqama ainaina arusee uriqararafa maridanoo.) Qinee ooqu mina qafamasee kuquanauree qinau.
GEN 46:1 Yakooboofa narí ainaina indaaii mareenoo Beeraseeba maqusai ooqureenoo miqoo narí akoona Isakeena Anutuna aandau tatufirana suqaminau.
GEN 46:2 Miqoo eendaki faiqaqee ufanoo Anutufa qainasaa afu nareenoo qinau. Yakooboo Yakooboo qufanoo Yakooboofa maqi qimaseenoo qinau qinee maaqoo maridaqa.
GEN 46:3 Qufanoo Anutufa qimaminoo qinau. Qinee Anutusa ani akoona Anutusa maridaqa. Anee sia Isipa maqasaa ooqu firaranara rufiaa. Mi maqanasaa ooqu marinaqa ani aiku asauku firaa maqanaasaikamma nisaanaura.
GEN 46:4 Qinee ani faqa Isipa maqasaa ooqu fuanaura. Yooseefaafa ani faqa Isipa maqa maaqaki marinana mariinana kuqinnaranoo. Mariinaqa kasooaqee kafaa ani aiku asauku mareeqee kafaa Kannaana maqasaa quqaanaura.
GEN 46:5 Beeraseeba maqusa Yakooboofa quqasee Kannaana maqa maaqai ooqufinau. Mina faiqi namu Yakooboona faqa nári faiqi aanaaqiuqa faqa nári ninaaqmaaka faqa mareeqee qoosa rarisee maru karana Isipa maqannaa karaambaiqa Faraoofa nimaqoonasaa quqasee nifiqee ooqufiqau.
GEN 46:6 Misa nári aandau aina faqa nariqa umiasana faqa Kannaa maqasaa maridaqa maqeeiunauqa aiqama maree ooqu fiqau. Yakooboofa narí aiku asauku aiqama nifiqee ooqu finau.
GEN 46:7 Yakooboofa narí faiqi namu faqa narí anaiqi mara akoonaiqiuqa faqa narí araamuqmaaka faqa narí anaiqi mara maanaaqauqa faqa aiqama nifiqee ooqu finau.
GEN 46:8 Yakooboona faiqi namu Isipa maqasaa ooqu fusa maaqi miqa mariqau. Yakooboona ooqa faiqi Reeubeenafa marinau.
GEN 46:9 Reeubeena faiqi namu Qanookafa faqa Parufa faqa Qeeseeroonafa faqa Karamifa faqa mariqau.
GEN 46:10 Simeeona faiqi namu Yeemueerafa faqa Yaminafa faqa Ooqadafa faqa Yakifa faqa Sooqarafa faqa mariqau, misa aiqamausa moodaa anaasee faiqi namu mariqau. Moo anaasee faiqi Saurafa marinau. Mina anoofa Kannaana maqannaa anaasee marinau.
GEN 46:11 Reefina faiqi namu Keerasoonafa faqa Kooqafa faqa Meerarifa faqa mariqau.
GEN 46:12 Yudaana faiqi namu Seeraafa faqa Peereesafa faqa Siraafa faqa mariqau. Yudaana faiqi qaaraqanda Eerafa faqa Oonanafa faqa mariiufaqa Oonanafa Kannaana maqasaa kuqinau. Peereesana faiqi qara Qeesaroonafa faqa Qamurafa faqa mariqau.
GEN 46:13 Isakarana faiqi namu Toorafa faqa Puaafa faqa Yasubafa faqa Simaroonafa faqa mariqau.
GEN 46:14 Seeburuna faiqi namu Seereedafa faqa Eeroonafa faqa Yareerafa faqa mariqau.
GEN 46:15 Miqimmaseenoo Reeaa nammarifa Yakooboona faiqi namu Meesapotamia maqusai maridanoo maqanau. Maanaaqa moodaa auqu Dinnaa nammarifa mina faqa miqoo maqanau. Doo Reeaa nammarina faiqi namu maanaaqa akoonaiqi aiqamausa 33 mariqau.
GEN 46:16 Kadana faiqi namu Seefoonaa faqa Qakifa faqa Sunifa faqa Eesaboonafa faqa Eerifa faqa Aroodifa faqa Areerifa faqa mariqau.
GEN 46:17 Aseerana faiqi namu Iminaafa faqa Isauaafa faqa Isififa faqa Beeriaafa faqa misa nisookifa Seera nammarifa faqa mariqau. Beeriaana amaaku qara Qeebeerafa faqa Marakieerafa faqa mariqau.
GEN 46:18 Doo miqimmasee Yakooboona aiku asauku 16 nári ainainira maanaaqa Rabanafa Reeaa namarina amuna Siripaa nammarinasaa maqanau.
GEN 46:19 Yakooboona anaaqa Raseera nammarifa faiqi qaaraqanda maqanau. Yooseefaafa faqa Beensaminnafa faqa mariqau.
GEN 46:20 Yooseefaana faiqiqara qaaraqanda Isipa maqasaa kambiqaqau. Miqanda nuqu Mannaseefa faqa Eefaraimmafa faqa mariqau. Miqanda ninoofa Aseenata nammarifa marinau. Aseenata nammarina akoona auqu Pootifeerafa marinau. Mi fasiqafa Qeerioporisa maqannaa amaana maqasaa rakisi marufa marinau.
GEN 46:21 Beenasaminna faiqi namu maaqimmiqa mariqau. Beerafa faqa Beekeerafa faqa Asabeerafa faqa Keerafa faqa Naamanafa faqa Eeqifa faqa Roosafa faqa Mupimafa faqa Qupimafa faqa Aratafa faqa mariqau.
GEN 46:22 Doo miqimmasee 14 Yakooboona aiku asauku Raseera nammarinasaa qari kambiqaqau. (Rabanafa Biriqaa nammarina narí ainainira maanaaqa Raseera nammarina narí araamuna amufanoo mifa mareeqeenoo narí afaaqi Yakooboona amufanoo faiqi maaqi mandee maqanau.)
GEN 46:23 Biriqaa nammarina indaruqaa faiqi Dannafa marinau. Dannana faiqi moodaa marinau mina auqu Qusimafa marinau.
GEN 46:24 Biriqaa nammarina faiqi moo Nafatarifa marinau. Nafatarina faiqi namu maaqi miqa mariqau. Yaqaseerafa faqa Kunifa faqa Yeeseerafa faqa Sireemafa faqa mariqau.
GEN 46:25 Doo miqimmasee Yakoobooona aiku asauku 7 narí ainainira manaaqa Rabanafa Raseera nammarina amunasaa Biriqaa nammarinasaa maqanau.
GEN 46:26 Yakooboona aiku asauku uqanna Isipa maqasaa ooqufusaa aiqama moodaanaki 66 mariqau. Misa ninaakuqmaaka sia nisaanariqa.
GEN 46:27 Yooseefaana faiqi qara Isipa maqasaa kambiqaqau. Miqanda faqa Yooseefaana faqa Yakooboona faqa moodaanaki ootupamasee 70 fasiqa ooqu fiqau.
GEN 46:28 Yakooboofa Yudana aiqoofanoo indaaru ooqu Yooseefaana qimaminanoo Kooseena maqasaa misa paquriani feera aiqanau.
GEN 46:29 Yooseefaafa narí qoosa rarisee maru karanaki akarama fufanoo Kooseena maqa maaqai narí akoona paqurirara finau. Oonu paqurimmaseenoo Yooseefaafa narí akoona anukaki oonu mafi kaqaramma umareenoo kisaaqasaa iki raqee marinau.
GEN 46:30 Iki raqee marufanoo Yakooboofa Yooseefaana qimaminoo qinau. Doo qinee kuqiraridaqa qinee maqee ani qafeeqa anee sia kuqina mariana kaqi mariana.
GEN 46:31 Yooseefaafa iki raqaseenoo narí afasausa mara faqa narí akoona aiku asauku aiqama faqa qimanniminoo qinau. Qinee Faraoofa mariqoo ooruree inniara qimamianaura. Qini qikoofa faqa qini qifasausa faqa Kannaana maqusaindari qinee marunnannai qumureeaa maqi qianaura.
GEN 46:32 Qinee inniara sipsipasaa rakisi mariasa maridaqa nariqa sipsipa faqa burimakau faqa nariqa aiqama ainaina faqa maree qumiaa maqi qimasee qimamianaura.
GEN 46:33 Qinee miqi qimasee qimamisaananoo Faraoofa inni naaramasee innee ainaini marianara irainaqa maaqi qimasee qimamiaqa.
GEN 46:34 Oo maasa uriqararafa maasa qikeeku qikaaku ooqai sipsipa kai rakisi marusa marufaqa maasa faqa maqee minasaa kai rakisidaqa. Innee miqi qimasee Faraoona qimamifanoo mifa Kooseena maqa inni nimiannoo. Isipa maqannaasa sipsipa rakisiranara nikoo uqanna qaidanoo. Minara inni naaduma saa Kooseena maqa nimiannoo.
GEN 47:1 Yooseefaafa narí afasausa moodaannai qisauku namu nifiqeenoo Faraoo fuqoo ooru finau. Oorureenoo qimaminoo qinau. Oo Faraoo qini qikoofa faqa qini qifasausa faqa Kannaana maqusaindari nári sipsipa burimakau aiqama faqa nári ainaina faqa maree qumidaqa. Maqee misa Kooseena maqasaa qumu maridaqa.
GEN 47:2 Miqi qimasee narí afasausa mara Faraoona oorinni murusoofanoo niqafanau.
GEN 47:3 Faraoofa Yooseefaana ufa iriseenoo mina afasausa mara iramirinoo qinau. Innee nana ainaini mariasee. Miqi qufaqa misa iriseeqa qiqau. Uriqararafa, maasa sipsipasaa rakisira ainaina imarunausa maridaqa. Maasa qikeeku qikaaku auqeeu saikana kai maasa faqa maraidaqa.
GEN 47:4 Aandaroo firaafa uqanna Kannaana maqasaa darifanoo maasa sipsipauqa nara andanda sia marifaqa maasa maa maqa maaqanaki marirara umidaqa. Amanee eedoo qirana qiminaqa maasa Kooseena maqa maaqaki marianauree.
GEN 47:5 Faraoofa misa ufa iriseenoo Yooseefaana qimaminoo qinau. Doo ani akoofa faqa ani afasausa faqa ani faqa mariraree qidee.
GEN 47:6 Isipa maqa maaqa misaindi maridanoo. Sainaqa Kooseena maqa maaqaki mariaqa. Kooseena maqa maaqa amiqirafa maridanoo. Ani afasausa kinaana moo qafainanoo sipsipa burimakau amiqi mandee rakisi marinnana mina mareeqeenana quqasainanoo mifa qini sipsipa burimakausaa rakisiani.
GEN 47:7 Miqi qimasoofanoo Yooseefaafa narí akoona afiqeenoo Faraoo fuqoo minisoofanoo Yakooboofa miqoo anireenoo Faraoona afaaqooqa qimama qanau.
GEN 47:8 Miqi qimasoofanoo Faraoofa Yakooboona aukuanara iramirinau. Ani aukuana naqummee maridanoo fee qufanoo Yakooboofa qinau.
GEN 47:9 Qinee 130 aukuana kai maa maqanasaa maridaqa. Sia kisaaqasaa fau qinee moomoo ummaara paquriqa. Qini qikeeku qikaaku kisaaqasaa uqanna mariqau. Misa aukuana fannoo qini aukuana fiaaqaranoo maridanoo.
GEN 47:10 Yakooboofa miqi qimaseenoo kafaa Faraoona afaaqooqa qimama qaseenoo doo raudamaki finau.
GEN 47:11 Yooseefaafa narí afasausa mara faqa narí akoona faqa Faraoofa uqoo Isipa maqa maqaki Rameeseesa maqusa aaqa soofaqa mariqau.
GEN 47:12 Miqiqa miqoo marufanoo Yooseefaafa narí akoona faqa narí afasausa mara faqa narí akoona aiku asauku marusa faqa kaaqa aanaaqi faiqiuqa faqa narana nimi marinau.
GEN 47:13 Aandaroo firaafa uqanna imarufanoo sia uqanna aiqama tinai narana marinau. Isipa maqannaa fasiqa anaasee faqa Kannaana maqannaa fasiqa anaasee faqa naararoofaqa ummooquka iqa nimariqau.
GEN 47:14 Misa narana feefauri marufanoo Yooseefaafa mi munnimmana mara maree Faraoofa maruqoo munusee mina ami marinau.
GEN 47:15 Isipa maqannaasa faqa Kannaana maqanaasa faqa narana feefaurida aiqama nári munnimma taikaqau. Miqi maseeqa Isipa maqannaasa anireeqa Yooseefaana qimamiqa qiqau. Maasa munnimma doo taikaseeqa anee sia maasa afu kai qiqafaa kuquana faara narana niminaqa naa. Sia maasa narana qiminaqa maasa ani afusaa kuquanaura.
GEN 47:16 Misa miqi qufanoo Yooseefaafa maaqi qimasee nariqa qimanniminau. Inni munnimma taikainaqa inneeeqa aandau aina maree mini qimidaqa narana mina akiiqara maraaqa.
GEN 47:17 Miqi qufaqa misa nariqa aandau aina Yooseefaana mini amufanoo misa qoosauqa faqa sipsipauqa faqa mimmiuqa faqa burimakauqa faqa doonkiuqa faqa mina akiiqara narana nimimarinau. Doo mi aukuanna misa nári aandau aina akiiqara Yooseefaafa narana nimi marinau.
GEN 47:18 Mi aukuanna taikoofaqa kafaa moo aukuanaki Yooseefaa fuqoo anireeqa maaqi qimasee qimamiqau. Maasa naqi fee mandee moo ainaina ani afusaa kukeeqaanauree, sia. Doo maasa munnimma taika fifaqa maasa aandau aina faqa anindika kai mambifaqa kaqi maridaqa. Sia ani amira ainaina moo marifaqa. Maasa qiqa qifaaqa faqa maasa maqa faqa kai maasaki maridanoo.
GEN 47:19 Maasa ani afusaa kuquaqaa midaqa doo saina maasa qeeqa faiqi faqa maqa faqa mina kai amisaidaqa feefauru marasaidaqa narana naa. Miqimmaseeqa maasa qeeqa faqa Faraoona anainira faiqi kakai iqa maria. Maasa moodaa ainainara kai iridaqa. Narana faqa narana asumu faqa niminaqa maasa qummaqua. Narana qummaquseeqa maasa sia kuqua.
GEN 47:20 Yooseefaafa misa ufa iriseenoo aiqama Isipa maqa maaqa feefaurumma Faraoona aminau. Aiqama Isipa maqannaasa aandaroo firaafa uqanna narunara nariqa maqa amisee feefauru marasee minannoo narana feefaurumma neemarufanoo aiqama maqa maaqa Faraoonaindika minoo maarinau.
GEN 47:21 Miqi marufanoo Yooseefaafa Isipa maqa maaqa dinni atindari dinni atinni marusa mareeqee ainainira faiqika kai masanau.
GEN 47:22 Isipa maqannaa amaana maqasaa rakisirausa maqa kai Yooseefaafa sia feefaurinau. Faraoofa maqee maqee munnimma nimi marufaqa narana feefaurummasaida neemarufaqa sia misa maqa feefauriqau.
GEN 47:23 Yooseefaafa faiqí anaasee qimanniminoo qinau. Doo innee qafaidee qinee maqee inni faqa inniqa maqa faqa feefaurumma Faraoona amiqa. Maqee narana asumu nimianaqa inneeqa maqa Faraoona amu maqanaki kafaa qummaquaqa.
GEN 47:24 Narana anoona mambinaqa moodaaqoo unaku quqaseeqa aiqama moodaannai qisaukukinaana moodaa moodaa Faraoona amisee akaqana inneeqa faiqi aanaaseera faqa asumuara faqa quqaaqa.
GEN 47:25 Faiqí anaasee Yooseefaana maaqi qimasee qimamiqa qiqau. Oo Yooseefaafa anee aneenna kai maasa manda ainainasaa itita qisaananoo. Anee kai maasa amiqimma qisaananoo. Uriqararafa maasa amana Faraoona ainainira faiqi marianaura.
GEN 47:26 Miqoo qari Yooseefaafa afeeka sanda ufa quqanau. Mi sanda ufana oosana maaqi minoo maridanoo. Aiqama Isipa maqa maaqakinaa narana unakusee moodaannai qisauku kinaana moodaa Faraoona amiaqa. Mi ufafa maqee kaqi afeekaikinoo maridanoo. Amaana maqasaa rakisi marusa maqa kai sia Faraoonaindikinoo marinau.
GEN 47:27 Isaraee maqannaasa Isipa maqasaa Kooseena maqa maaqaki mariqau. Miqoo maridaqa moomoo ainaina faqaasa marufanoo misa faiqi namu faqa moomoo kambiqaqau.
GEN 47:28 Yakooboofa qisauku qara taikaseenoo qiku dinni taikaseenoo dinni oonu qaara maraseenoo 17 aukuana Isipa maqasaa marinau. Mina aukuana aiqama moodaanaki 147 aukuana marasee kuqinau.
GEN 47:29 Mina kuqirafa adeedi rama fufanoo Yakooboofa Yooseefaana aaramaseenoo qimaminau. Anee aneenna asauku qini qifundana ameemaanai quqaseenana sia Isipa maqasaa akundaanauranoofee qimasee qimafeekaikia.
GEN 47:30 Qini qiqa qikausa mara nikundoonaki qikundaa. Qini Isipa maqasaaqari mara maree misa nikundooqoo qikundaa. Miqi qufanoo Yooseefaafa narí qimaminoo qinau. Anee qianandee mianaura.
GEN 47:31 Yooseefaafa narí akoona ufa iriseenoo eedoo qufanoo mina akoofa qinau. Saa sia kaqi eedoo qia, kuqaa qima afeekai kinana eedoo qia. Miqi qimasoofanoo kuqaa Yooseefaafa eedoo qima afeekai kinau. Qima afeekai kammasoofanoo Yakooboofa narí qaarisaa ooqu marifi Anutunara dufi dufi qinau. Innaaru qimasoofanoo Yooseefaafa narí ainainai finau.
GEN 48:1 Kaqikaaqoo mari kufaqa misa Yooseefaana qimamiqau. Ani akoofa doo amiqimma auridanoo. Yooseefaafa mi ufana iriseenoo narí amaaku qara Mannaaseesa Eefaraimasa nindiqeenoo narí akoofunnai ooqu finau.
GEN 48:2 Misa Yakooboona qimamiqau ani amaaku Yooseefaafa ani qafarara qumidanoo fee qufanoo Yakooboofa afeekaikammasee findi fufanoo narí qaarisaa ooqu marinau.
GEN 48:3 Ooqu mari fufanoo Yakooboofa Yooseefaana qimaminoo qinau. Ooqai qinee Kannaana maqa maaqaki nuafannana kinai Rusa maqa maaqaki mariafananoo Anutufa aiqama afeeka faqaafa akooqoo kooroomma fufanoo qini qifaaqooqa qima qimaqanau.
GEN 48:4 Mifa maaqi qimasee qini qima qiminau. Qinee moomoo faiqi asumu amiana anisaaqari ani aruakinausa moomoo maqannaasaika mifaranoo. Qinee maa maqana ani aiku asauku nimiananoo naaru naaru misaindika minoo mariannoo.
GEN 48:5 Ani amaaku qara Isipa maqasaa kambiqara qanda qinee Kannaana maqasaa kaqi marunaqa kambiqaa qanda Mannaseesa Eefaraimasa qini faiqi qara Reeubeenasa Simeeoonasara foora marifaranoo.
GEN 48:6 Anee akaqa faiqi namu maqa sainausa misa anindika mambi marifara. Misa nári nifasaa qanda Mannaseesa Eefaraimasakinaa qumiasana ainaina maree faranoo.
GEN 48:7 Qinee ani anoona Raseera nammarinara iriqa miqi qidaqa. Mifa qini firaa qimudaoo qiranaki Kannaana maqa maaqaki kuqinau. Qinee Meesapootamia maqa maaqaindari ani mariafananoo aanai Eefarataa maqusa aaqa kuqinau. Qinee mina iri Eefarata maqusai fimaru aanna afainni akundaqiafana. (Maqee Eefarataa maqusara Beedeeree maqusee qidaqa)
GEN 48:8 Yakooboofa miqi qimaseenoo Yooseefaana amaaku qara nindafeenoo qinau. Maaqanda yana faiqi qaree.
GEN 48:9 Qufanoo Yooseefaafa qinau. Qini faiqi qara Anutufa Isipa maqasaa mariafananoo qimu qanda maridaqa. Yakooboofa mi ufana iriseenoo qinau. Doo miqanda nifiqee mai qinee unnaqoo adeedi minisainaqa nifaaqooqa qima nimaqaa.
GEN 48:10 Yakooboofa nauraiqi marunara sia amiqimmasee afu maqee marinau. Yooseefaafa narí amaakuqara minisoofanoo oonu mafi kaqaramma qumareenoo nimooqanau.
GEN 48:11 Nimooqa namasee Yakooboofa Yooseefaana qimaminoo qinau. Qinee sia kaifaa ani qafaanauree qunanoo Anutufa kai qifaqa ani faiqi namu niqafaidaqa.
GEN 48:12 Miqi qimasoofanoo Yooseefaafa narí akoona afundana saaqaraana narí faiqi qara qumareeqeenoo narí akoona afunni oorindari maqasaa aqufinau.
GEN 48:13 Yooseefaafa narí akoona afusaa kummarama fufanoo Eefaraimmana mara munu Yakooboona asaaqai quqaseenoo Mannaseena mina asaukuannai quqanau.
GEN 48:14 Quqasoofanoo Yakooboofa asauku qara fiqaree aiqaree mambufanoo akaqa Eefaraimana saa asauku uqannai quqeenoo afasaana Mannaseena saa asaaqai asauku quqanau.
GEN 48:15 Miqi mandeenoo Yooseefaana afaaqooqa qimamaqeenoo qinau. Qini qikausa mara Abaraqaammana faqa Isakeena faqa nikoofa Anutufa maa faiqisa amiqi amiqimma nimaqaani. Qini qifiqamaree maaqoo maqee miniqaifaqa marunna Anutufa misa amiqi amiqimma nimaqaani.
GEN 48:16 Qini oosana oosana madainaina kinaana itita qimaqoo qangiroofa misa amiqi amiqimma nimaqaani. Qini duqu faqa qini qikooqanda Abaraqaammasa Isakeesa nuqu faqa maa faiqi qandasaa mariani. Miqanda moomoo faiqi maqasaifanoo moomoo miqanda kiqari kambiqafi mariaqa.
GEN 48:17 Yooseefaafa narí akoona asauku qafoofanoo aundura mandai kufanoo narí akoona asauku qumareenoo afasaanasaa asaaqai asauku quqaqoona mareeqee akaqasaa quqasee akaqasaa asaukuannai asauku quqaqoona mareeqee afasaanasaa quqarara qinau.
GEN 48:18 Oo qipoo anee sia andeeqaananoo indaaruqaafa mai maridanoo aneenna asauku uqannai asauku mina akiiqasaa quqaaqaana.
GEN 48:19 Miqi qufanoo mina akoofa qaoo qida qinau. Qini qimaaku qinee iridaqa miqidaqa. Indaaruqaafa mifa faqa mina aiku asauku moomoo marifaranoo. Inaaqiannaana aiku asaukuqa firaa afeeka maqannaauqanna marifaranoo narí afasaana ooraaqaranoo mariannoo.
GEN 48:20 Miqi qimaseenoo mi faasaanna nifaaqooqa qima nimaqeenoo qinau. Isaraee maqannaasa nifaaqooqa qiqa anisaa qimasaida qifaranoo. Misa maaqi qifaranoo Anutufa Eefaraimmana faqa Mannaseena undeemma amaqaani. Miqunannai Yakooboofa Eefaraimmana uqeerasee Mannaseena rafaaqa finau.
GEN 48:21 Miqi qimaseenoo Yakooboofa Yooseefaana qimaminoo qinau. Qinee kuqirara midaqa Anutufa ani faqa maridanoo ani afiqee aninna akeeku akaaku maqasaa ooru fuannoo.
GEN 48:22 Seekeemma maqa maaqa amiqirafa maridanoo. Qinee ooqai qeeqa duru feefannoo Amoora maqannaasa faqa rakusee maraafanna maqana ani amianaura sia ani akaqaa fasaauqa nimianaura.
GEN 49:1 Yakooboofa narí faiqi namu naaramaseenoo qima niminau. Innee aiqama maaqoo aniraifaqa kasooaqee inni kina kambiqaaninna ainainara qima nimiana iriaqa.
GEN 49:2 Innee qini Yakooboosa faiqi namu innee qini fiqu fiqu mambifaqa inneeqa nikausa qini Isaraeerasa ufa iriaqa.
GEN 49:3 Reeubeenafa anee qini ooqa faiqi mariananoo. Anee qini afeeka indaaruqaafa mariananoo. Anee aiqama qini faiqi namu kiqari uriqararafa kaaqa afeekaiki marianafa mariananoo.
GEN 49:4 Anee nammari aufindee imarianafa kaaqa afeekaiki marianafa mariananoo. Anee sia uriqarana marinnaranoo. Anee qini qaarisaa qini ainainira anaasee sakasee faiqaannanara miqinnaranoo.
GEN 49:5 Simeeoonasa Reefisa innee qara moodaa fidika mariafanoo. Innee qara inneeqa rakira duru saamunnoo faiqí mandaikamma nimaqaqau.
GEN 49:6 Qini irirafa sia misa kukeeqara ufaki ootupanoo maridanoo. Qinee sia miqanda ufa suqiranaki marianaura. Misa nirana qoofaqa faiqí anaasee narusee miqooqari nasuridaqa burimakau akoonauqa naununu ateekaqau.
GEN 49:7 Inniqara aannoo qiranasaa niqirafa mariannoo. Innee kaqi fifau nárí marianara minara niqirafa mariannoo. Isaraee maqa maaqakina inniqara faiqi namu furufaramambuaqa.
GEN 49:8 Yakooboofa miqanda nifaaqooqa qimaseenoo quandafinoo Yudana afaaqooqa qinau. Yuda, ani akaqaafasaa ani amooqifara. Anee aneenna namuqaa ninukasaa reenana rafaaqa finafa mariananoo. Ani akoona faiqi namu ani oorinni niqoori saunu areefaranoo.
GEN 49:9 Yuda anee kaasau aandaura foora faiqí nárí marianafa mariananoo. Anee firaa kaasau ainaina mariana, anee aandau arusee namasee faiqaqee inanoo moo fannoo sia ani afauriannoo, rufiaannoo.
GEN 49:10 Yudafa karaambaiqa duru feefa uaqeeiannoo. Minasaa ani aruakinausa uriqaraqa maridaqa rakisi nimaqeefaranoo. Mifa uriqarara auqu marasee rakisi nimaqanoo fifiinoo Siroo maqusaki oonuraannoo. Miqoo maridanoo aiqama maqannaasa mina ameemaanai marifanoo rakisinnimaqaannoo mina aiku oosana maridaqa mina ufa mau kai fifaranoo.
GEN 49:11 Mifa narí doonki timmusa uainna sandasaa rumbeenoo. Uainnauqakiqari kaaqa amiqiranasaa rumbeenoo. Mifa narí qamunna fidika arira uainna anoonaki nammaruqinoo.
GEN 49:12 Mifa uainna neemarifanoo mina afu fidikandanda inoo marifanoo mimmi naamma anoona neemarifanoo afai eekara aridanoo.
GEN 49:13 Miqi qimasee Yudana qimamiseenoo Seeburunana quandafi afaaqooqa qinau. Seeburuna, anee ooruku nammari afainni marinaranoo. Sipauqaindi nammariara rufiasee ani mandaaqasee marifara. Ani maqa maaqa oosu Sidoona maqa maaqa ati raquru aminoo mariannoo.
GEN 49:14 Miqi qimasee Seeburuna qimamiseenoo Yakooboofa quanda finoo Isakaana afaaqooqa qinau. Isakaa anee afeeka doonkiara foora mafinana narana uqauqa amuaaqa faiqaqeeia.
GEN 49:15 Isakaafa idooara maqusa qafoofanoo amiqinoo marufanoo kummarama fufanoo ataufakaaqa firaa ummaara quqasee maranoo nimarinau. Mifa ainainira faiqiara foora ainainiannoo.
GEN 49:16 Yakooboofa Isakaana qimamiseenoo quandafinoo Dannaana afaaqooqa qinau. Dannaafa narí maqannaasa uriqararafa mariannoo. Misa Isaraee maqannaa foora marifaranoo.
GEN 49:17 Anee ukadiqara foora aana afainni marinanoo qoosa fannoo aatata finana aiku raquraminanoo maqasaa aqufinanoo faiqí minasaa marina afiqu aqusainanoo aanaaqiannaindari aqufuani.
GEN 49:18 Yakooboofa Dannaanara miqi qimaseenoo Anutunara innaaru qinoo qinau. Oo Yaawee qinee ani dadaaqiranara afeesidaa.
GEN 49:19 Miqi qimaseenoo Kadannana afaaqooqa qinau. Kada nipuraraa fasiqauqa ani arifaranoo. Miqifana anee quandaki nariqa nifaqee finnaranoo.
GEN 49:20 Miqi qimaseenoo Yakooboofa Aseeranara qinau. Ani maqa maaqaki narana moomoo amiqirafa kai mariannoo. Anee kinna ami mariandee ira narana kai neemarinnaranoo.
GEN 49:21 Napatari anee kaasau aandaura fooqaana maridana aneenna aidiranasaa sandana nua. Anee amiqira faiqi moomoo maqeennaranoo.
GEN 49:22 Yooseefaafa anee irumu miqirafa maridana nammari afainni kambiqafi aqama moomoo ireennaranoo.
GEN 49:23 Ani namuqaa nimudaanai qimasee nári duru feefannoo ani arirara afaqeefaranoo.
GEN 49:24 Miqifanoo Yooseefaana duru fannoo sia paruparuqiannoo tipu kai qinoo mariannoo. Yakooboona Anutufa aiqama afeeka faqaafa mina afeeka aminanoo mina asauku fannoo afeekaikiannoo. Mi Anutufa Isaraee maqannaasa rakisirafa misa afeeka kukeeqara maqusa maridanoo.
GEN 49:25 Ani akoona Anutufa ani dadaaqiannoo. Aiqama afeeka faqaa Anutufa ani amiqi amiqiani. Innaarunaindaraa aakunnoo ani amiqi amiqimma amaqaannoo. Maqakiqari ururainna nammarifa ani amiqi amiqirana amiani. Ani burimakau aandau faqa faiqi aanaaqiuqa faqa amiqi amiqimma nimaqaani.
GEN 49:26 Moomoo taatuqeenauqa faqa sakummauqannoo faqa ani amiqi amiqimma amaqaani. Ooqeenaa aaqanasaaqaraa amiqi amiqirafa ani amiqi amiqiannoo. Naaruara marira aaqanasaaqaraa amiqi amiqirafa ani amiqimma amaqaani. Oosana oosana ainaina qinee qunna amiqi amiqirafa ani Yooseefaanasaa mariannoo. Anee aneenna afasausa kiqari uriqararafa marinnanasa mi ainainausa anisaa mariannoo.
GEN 49:27 Miqi qimasee Yooseefaana qimamisee quandafinoo Beensaminna qimaminau. Beensaminna anee kaasau fainiara foora marinaranoo. Anee kananaana faqa eendimarinana faqa aandau arusee neennaranoo.
GEN 49:28 Doo miqimasee Yakooboofa narí faiqi namu indaaruqaana saa oosana araseenoo aiqama mafi nifaaqooqa qimasanau. Miqimasoofaqa misa qisauku qara taikasee qikunooqu qaara marasee oosana faiqi namu Isaraee maqannaa mariqau.
GEN 49:29 Yakooboofa nifaaqooqa qimannimaqaseenoo maaqi qimasee narí faiqi namu qimaniminau. Qinee kaqi kaaqoo kuqiqa qeeqa qikeeku qikaaku marianaki oonu ootupaanaura. Innee sia maaqoo qikundaaqa. Ooqai Abaraqaammafa nikundara maqa feefauru maqoofa maridanoo. Qeeta maqannaa Eefaroona maqaki qini qikausa nikundoonaki qini faqa qikundaaqa.
GEN 49:30 Kannaana maqa maaqaki Makapeera maqusa Mamareena maqusa suani afu oosana qaanai maridanoo. Abaraqaammafa Eefaroonafa unnai mi maqana feefaurummaseenoo nikundanau.
GEN 49:31 Miqoo misa Abaraqaammana faqa mina anaaqa Saraqa nammmarina faqa nikundaqau. Minakikai Isakeena faqa mina anaaqa Reebeeka nammarina faqa nikundaqau. Qinee minaki inni ninoona Reeaa nammarina akundeeqa.
GEN 49:32 Mi maqana faqa minakinaa ooni aamara faqa Qeeta maqannaasa unnai feefauriqia. Qini minaki qikundaaqa.
GEN 49:33 Yakooboofa narí faiqi namu qimannimi taikasee aiku raqandaammasee doo kuqinoo narí akeeku akaaku unnai finau.
GEN 50:1 Yakooboofa kuqu fufanoo Yooseefaafa aundura mandaikufanoo narí akoona qirisaa roofeebaaqa mambufanoo narí akoona oori amooqeenoo qiki raqanau.
GEN 50:2 Qiki raqaseenoo Yooseefaafa Isipa maqannaa oosana mareenoo tutaqausa qimannimufaqa anireeqa sia kai kaqi mandaikianifeera marasinna oosana oosana akuamaqee mariqau.
GEN 50:3 Misa Isipa maqannaasa oosana maraseeqa qaara fasiqa niku nisauku taikasee 40 faasaanasaa marasinna Yakooboona qiri akuamaqaqau. Isipa maqannaa qaaramoo fasiqa faqa qisaukuqara taikasee 70 faasaanasaa Yakooboonara iki raqaida soofaari mariqau.
GEN 50:4 Soofaarirana taikasoofanoo Yooseefaafa Faraoona aaqa marusa uriqararausa qimanniminoo qinau. Innee maa ufana mara maree munu karaambaiqa Faraoona qimamiaqa.
GEN 50:5 Qini qikoofa kuqirara idanoo qima afeekaikammasee qini qima qiminoo qinau. Qinee kuquanana qini qiri mara maree Kannaana maqa maaqaki ooni aamara deedaqamma qaafannanaki qikundaa. Minara amanee qinee oorureeqa qeeqa qikoona minaki akundamaseeqa qumuanauree.
GEN 50:6 Minara Faraoofa irisee qimaminau. Doo ooruree aneenna qima afeekaikianandee inana aneenna akoona akundamasee qumua.
GEN 50:7 Yooseefaafa narí akoona akundarara oorufufaqa Faraoona aaqa uriqararausa marusa faqa Faraoona koota irimarusa uriqararausa faqa Isipa maqannaasa indaarunniki imaru fasiqausa faqa Yooseefaana faqa ooru fiqau.
GEN 50:8 Mina aiku asauku faqa mina afasausa mara faqa mina akoona aiku asauku akaqausa faqa aiqamausa Yooseefaana faqa ooru fiqau. Misa aandau faqa faiqi aanaaqiuqa faqa kaqi kai Kooseena maqa maaqaki mariqau.
GEN 50:9 Akaqausa qoosasaa ooru fiqau. Akaqausa qoosa rariseemaru karanaki ooru fiqau. Yooseefaana faqa faiqí tatufufaqa ooru fiqau.
GEN 50:10 Misa aiqamausa suani oosana qaanai Yooradana nammari afainni sakuma faqa raisa adiuqa mara qaqimaru maqusanasaa ooruree misa firaaqoo kisaaqasaa soofaariqau. Yooseefaafa narí akoonara qisauku dinni taikasee dinni ani qaara marasee 7 faasaana soofaarinau.
GEN 50:11 Kannaana maqusanaasa miqoo marusa iki raqoona qafamasee qiqau. Nindafaaqa Isipa maqannaa firaaqoo faaqa rumasaida iki raqaida. Miqi qimaseeqa misa mi maqusana auqu Abeera Misaraima fee qimariqau. Mi auquna oosana Isipa maqannaa soofaarira maqusa fee qiqau.
GEN 50:12 Yakooboona faiqi namu nári nikoofa qimannimundee iqau.
GEN 50:13 Misa nári nikoona qiri mara maree Kannaana maqa maaqai ooruree Makapeeraa maqa maaqaki Mamaree maqusa suani oosana qaannai marufaqa miqoo ooni aamaraki akundaqau. Qeeta maqanaa fasiqa mina auqu Eefaroona Abaraqaammafa feefauru maqoonaki quqaqau.
GEN 50:14 Yooseefaafa narí akoona akundamaseenoo narí faqa fusa narí akaqaafasaauqa faqa moosa faqa kafaa anirandee Isipa maqusai fiqau.
GEN 50:15 Yooseefaana akaqaa fasaauqa misa nikoofa kuqufufaqa Yooseefaanara rufieeqa narí qimami narí qimami qiqau. Ooqai maasa Yooseefaana mandaika mamaqaafanausa marida. Mina akiiqara iannoofee.
GEN 50:16 Misa miqi qimaseeqa Yooseefaa funnai ufa quqaseeqa maaqi qimasee qimamiqau.
GEN 50:17 Oo Yooseefaa maasa qikoofa kuqiraridanoo aniara maaqi qimasee maasa qimaqiminau. Yooseefaa ani akaqaafasaa ani mandaika mamaqoonara qaunummasaa siamma iria. Misa ani mandaika mamaqoonara doo qinee mi ufana oosana iriqa. Maasa qikoofa miqi qunara minara maasa ani qimamidaqa. Ani akoona Anutuna ainainira faiqiuqa maasa ani mandaikamma amaqaafanna numoona minni qisaa. Miqi qufanoo Yooseefaafa minara iriseenoo iki raqanau.
GEN 50:18 Mina akaqaa fasaauqa minara iriseeqa anireeqa nariqa Yooseefaana oorinni maqasaa kummarama fufaqa qiqau. Maasa ani ainainira faiqi kakai mambi marianaura.
GEN 50:19 Yooseefaafa iriseenoo qinau. Innee sia qiniara rufiaaqa. Sia qinee qeeqa qifaaqa Anutuna amaaqa maqaanaura.
GEN 50:20 Kuqaa innee qini mandaikamma qimaqaaneera tipundaarufanoo Anutufa mina mara quandasoofanoo amiqinau. Moomoo maqee kaqi mariasa marirana dadaaqianifeera miqinau.
GEN 50:21 Sia rufiaaqa. Qinee inni faqa inni faiqi anaasee faqa narana nimida rakisi nimaqaanaura. Miqi qimasee Yooseefaafa narí ainaina nifaaqa quqaaqeera qima niminau.
GEN 50:22 Miqoo Yooseefaafa Isipa maqannai narí ainaina faqa kaqi marinau.
GEN 50:23 Mifa wan handereeta faqa qisauku qara faqa 110 maraseenoo kuqinau. Yooseefaafa miqoo maridanoo narí amaaku Eefaraimmana faiqi faqa qafanau narí anaiqi faqa narí afaqnausa faqa nindafanau. Yooseefaafa Mannaaseena faiqi Makirana faiqi namu narí afaqnausa marasee f irinau.
GEN 50:24 Kuqiraridanoo Yooseefaafa maaqi qimasee narí ainaina qimanniminau. Qinee kuqirarammidaqa. Qinee kuqu fuananoo Anutufa innisaa rakisidanoo inni indaarunnikinaqa ooqai Abaraqaammana faqa Isakeena faqa Yakooboona faqa qima afeekaika mandee nimiqoo maqanasaa inni nindiqamaree miqoo munu quqaannoo.
GEN 50:25 Yooseefaafa minara kai kafaa qimanniminau. Anutufa inni nifiqee finaqa qini qimudaani faqa mara mareeqa miqoo munu madikama qisaaqa. Innee minara qima afeekai kifaqa qinee iria. Misa irisee qima afeekaikammasoofanoo Yooseefaafa kuqinau.
GEN 50:26 Yooseefaafa Isipa maqa maaqaki maridanoo wan handeereeta faqa qisauku qara faqa 110 aukuana maraseenoo kuqinau. Kuqufufaqa misa sia kai kaqi putaa ianifeera mi marasinna aku amaqaseeqa bukisaki quqaqoofanoo marinau.
EXO 1:1 Yakooboona amaaku oondamara misa faqa Isipa maqusai ooqu fusa misa nuqu maaqimminoo maridanoo.
EXO 1:2 Reeubeenafa faqa Simeeoonafa faqa Reefifa faqa Yudafa faqa
EXO 1:3 Isakarafa faqa Seeburunafa faqa Beensaminafa faqa Dannaafa faqa Napatarifa faqa Kadaafa faqa Aseerafa faqa minamusa faqa misa faiqinamu faqa nári nikoona ninaakuna faqa Isipa maqa maaqaki ooqu fiqau.
EXO 1:5 Moodaanaki ruqauiqa ooqu fusa qaaramoo fasiqa niku nisauku taikasee moo fasiqa asaukuqara kai taikasee 70 Isipa maqa maaqaki ooqu mariqau. Yooseefaafa ooqai miqoo maruqoo marinau.
EXO 1:6 Miqoo mariiufaqa Yooseefaafa faqa narí afasausamara faqa aiqama mi akiiqausa kuqu taikafufaqa misa faiqi namu niku nisauku findifufaqa faiqi moomoo uqanna maqasoofaqa kambiqaqau. Kambiqafiqa Isipa maqa maaqa umbiqamma aqiqa mariqau.
EXO 1:8 Faraoofa Isipa maqannaa rakisirafa kuqufufanoo kisaaqasaa marinoo fuka moo Faraoofa kambiqanau. Mifa Yooseefaanara faqa aandaroo aukuana rakisiiunara faqa mina aiku asaukuara faqa sia irinau.
EXO 1:9 Faraoofa narí maqannaasa qimanniminoo qinau. Isaraee maqannaasa moomoo uqanna maqa maaqa umbiaqa mariafaqa maasa uridaaqaramaseeqa maasa rafaaqafu qimaqeefaara.
EXO 1:10 Rakirafa kambiqainaqa misa maasa namuqaa faqa moodaanaki kammafi maasa darusee quqasee sandee foora. Inni saimbaqa naqifee mandee oonumafi irisee misa rafaaqafusaanaqee misa sia moomoo kambiqeefaree.
EXO 1:11 Miqi qimasoofaqa Isipa maqannaasa Isaraee maqannaasa karafusa saika nimiqau. Afeeka rakisirausa misasaa rakisi mariqau. Isaraee maqannaasa karafusaki maridaqa qaara maqusa auqiqau. Moo maqusa auqu Pitoona maqusa auqusee moo maqusa auqu Raqamaseesa maqusa auqiqau. Mi maqusa qanda narana afeedimaru maqusa qanda mariqau. Qafee maqannai kai maaqa usakeemariqau.
EXO 1:12 Isipa maqannaasa Isaraee maqannaa kafaa kafaa ummaara nimufaqa moomoo kambiqafiqa maqa maaqa qumbiaqau. Isipa maqannaa misa nindafeeqa kaaqa rufiee mariqau.
EXO 1:13 Miqunara sia moomoo asumu kambiqaaqeera firaa kadaapi uqanna misa nimuaaqa quqasoofaqa misa manda marira mariqau.
EXO 1:14 Isipa maqannaasa qufaqa Isaraee maqannaa qafee maqa qumaree ausirira ooniara foora moomoo auquseeqa minannai maaqa usakeeqa kafaa afuqaki ainaina faqa imariqau. Miqi marufaqa sia Isipa maqannaasa misara qimudaoo qimariqau.
EXO 1:15 Faraoofa mi kadaapirirana Isaraee maqannaa nimiseenoo quandafinoo Isareee maqannaa anaasee qaaraqanda Sifaraa nammarisa Puaa nammarisa inaamunai fusasaa rakisimaru anaasee qanda qimanniminau.
EXO 1:16 Inneeqara innaamunai fidaqara dadaaqiqa faiqi maqaseeqa akoonaiqi aiqama aaqee uqanna rutukuaqa, maanaaqa kai kaqi mariaqa.
EXO 1:17 Mi anaaseeqanda Faraoona ufa iriseeqara Anutuna ufara rufiaseeqa sia akoonaiqiuqa nárí mariqau, kaqi mariqau.
EXO 1:18 Faraoofa akoonaiqi moomoo kambiqoofanoo nindafamaseenoo innaamunai nifiqaqanu aanaaseeqanda naaramaseenoo niqinoo qinau. Inneeqara naqaafee ifaqee sia akoonaiqi naridee qini ufa rukiaafanoo.
EXO 1:19 Miqanda mina ufa iriseeqa qiqau. Heeburu anaasee sia Isipa anaasee naannaraidaqa misa kaqi kaqi faiqi maqaidaqa. Maaqanda oonu raunaqa faasai faiqi maqaqaafaqa oonu nindafaidaqa.
EXO 1:20 Anutufa mi anaaseeqanda oosana nindafamaseenoo amiqi amiqimasoofaqa Isaraee maqannaasa moomoo kambiqafiqa afeeka maqannaa mariqau.
EXO 1:21 Miqanda Anutunara rufioofanoo mina akiiqara Anutufa miqanda faqa faiqi asumu niminau.
EXO 1:22 Faraoofa misa nindafeenoo narí maqannaa Isipa maqannaa aiqamausa naaramaseenoo ufa afeeka ufa qimanniminau. Heeburu anaasee akoonaiqi maqasaifaqa innee mina mareeqee nammari firaana Niru nammariki aqusaifaqa kuquaqa. Aiqama kuquaqeera maanaaqauqa kai kaqi mariaqeera qinau. Miqi qimasoofaqa miqimmi mariqau.
EXO 2:1 Mi kamuqoo mi aukuanna Reefina atikiqari kumaaraa moo fannoo findi finoo maanaaqa Reefina oosanaki maranau.
EXO 2:2 Maraseenoo faiqi moo akoonaiqi maqaseenoo mina anoofa qafoofanoo amiqira faiqi marufanoo Isipa maqannaasa arifoo qimaseenoo qaaramoo quqoonasaa kukeeqa amaqaqoofanoo marinau.
EXO 2:3 Qaaramoo quqoona aiqaroofanoo faiqi aanaaqi kaqikaaqoo aaqoo irufanoo mina anoofa akoofa rafaaqafirara oonumafi irusia mina anoofa furaa amanee uqa kisaaqa difaaniara foora auqinau. Mifa koorootaqa qumareenoo furaa uqamau sia nammari ruqiqaki keeqaanifeera akinau. Uqa auquseenoo mina anoofa faiqi aanaaqi uqaki rumaseenoo furaa moomoo nammari ammausai marunaki kukeeqaqoofanoo minaki marinau.
EXO 2:4 Nammariki marufanoo mi faiqina anasaafa nianaindari kukeeqanoo maridanoo rakisi marinau. Nanee kambiqaannoo qimasaidanoo rakisi marinau.
EXO 2:5 Faraoona araamuna nammari auqaaneera narí rakisimaru manaaqausa faqa mi nammarinai quminau. Mifa nammari auqaidanoo furaaki qafoofanoo uqa marinau. Marufanoo qafamaseenoo narí ainaini maru manaaqana qimamufanoo mi uqana nammarikinaana maranau.
EXO 2:6 Marasoofanoo Faraoona araamuna asaukukinaana maraseenoo uqa oo raqasee faiqi aanaaqi qafanau. Faiqi aanaaqi ikiraqoofanoo mina irufanoo amuqusufanoo qinau. Maafa Heeburu maqannaasa faiqi akoonaiqi maridanoo fee qinau.
EXO 2:7 Mifa miqi qimarufanoo mi faiqi anaaqina anasaafa anireenoo Faraoona araamuna maaqi qimasee qimaminau. Amanee Heeburu anaasee moo ooru afiqee muqusaananoo fee naamma amiannoo fee.
EXO 2:8 Faraoona araamuna eedoo qufanoo mi faiqi anaaqina anasaafa ooru nári ninoona uqanna afiqee quminau.
EXO 2:9 Qumuroofanoo Faraoona araamuna fannoo maaqi qimaseenoo mi anaaseena qimaminau. Anee maa faiqi anaaqina naamma amidana rakisi marinaqa qinee maqee maqee feefauru ani ami marianauranoo. Mi anaaseefa eedoo qimaseenoo narí faiqi aanaaqi uqanna narí maaqai munu qaqee idanoo rakisi marinau.
EXO 2:10 Mi faiqi anaaqifa kaqi kaaqoo innooqafufanoo narí anoofa afiqeenoo Faraoona araamuna maruqoo minisoofanoo narí faiqi kamambinau. Fuka anoofa auqu rarara maaqi qinau. Qinee nammarikinaana maraunnanara auqu Mooseenee qianaura.
EXO 2:11 Mariiufanoo Mooseefa innooqafufanoo moo kari narí maqanna Isaraee maqannaasa oonu nindafoofaqa firaa kadaapi rimariqau. Isipa maqannaa moo fannoo Heeburu maqannaa Mooseena aqoonnana arimarufanoo Mooseefa qafanau.
EXO 2:12 Aranaqoofanoo faiqiara dinni dinni munu afu maqee mini afu maqee ufanoo faiqí sia marufanoo Isipa maqannaa fasiqa Mooseefa kuqa aruseenoo mina iri nukuda afaqaseenoo minaki kukeeqasee akundanau.
EXO 2:13 Iqaqoofanoo kananaana rafudamakufanoo Mooseefa narí maqannaa nindafarara kafaa finau. Oonuree nindafoofaqa Heeburu fasiqa qaaraqanda rakiqau. Mooseefa aqoonnana arimaruna qimaminoo qinau. Anee naqaafee ifanee aneenna aqoonnana oosana siainaki fifau aridanee.
EXO 2:14 Miqi qufanoo aru fasiqafa qinau. Yafee aniara karaambaiqee qifanee anee maasa ufa irisee andeeqaidanee. Eenda anee Isipa maqannaa aruanafa kafaa maqee qini faqa darinnaree qufanoo Mooseefa tautinau. Tautumandee qinau. Doo eenda arunnanara aiqama kooroomminoo maridanoommifoo qimaseenoo rufianau.
EXO 2:15 Faraoofa minara iriseenoo Mooseena kuqa aruaneera ufanoo Mooseefa minara rufiamareenoo Isipa maqa maaqa quqasee Midianna maqa maaqai nianai sandanau.
EXO 2:16 Sandee oonureenoo nammari madika afaisaa ooqu marinau. Midianna maqannaa amaana maqaki aanaiqikirana mina auqu Yeetaroona araamuqmaaka dinni qisauku taikasee dinni oonu qaara marasee 7 mariqau. Mooseefa nammari madika afaisaa marufaqa mi manaaqausa nári nikoona sipsipauqa faqa mimmiuqa faqa nammari saka nimianee qimasee aniraqau.
EXO 2:17 Faiqí akaqausa nári sipsipasaa rakisimarusa mi manaaqausa niqiqoofaqa anirandee fufaqa misa nári sipsipa naaree nammari nimianeera qufanoo Mooseefa findifinoo misara qaoo qimaseenoo maanaaqauqa naaroofaqa aniroofanoo Mooseefa narí kai misa sipsipauqa faqa mimmiuqa faqa nammari saka niminau.
EXO 2:18 Mi manaaqausa sipsipauqa nammari neeneesoofaqa nifiqee maaqai fiqau. Oonu roofanoo misa nikoofa iramirinoo qinau. Innee naqifee ifaqee maqee faasaanasaa anidee.
EXO 2:19 Miqi qufaqa misa qiqau. Isipa maqannaa fasiqa moo fannoo faiqí sipsipasaa rakisi mariasa oonu raafanoo misara qaoo qimaseenoo maasa sipsipauqa narí kai nammari saka qumaree nimiisaifaqa dauni anidaqa.
EXO 2:20 Misa nikoofa mina irinoo qinau. Mi fasiqafa yaifee maridanoo fee. Nanaree innee minni aisee anidee. Doo sandee oonu afiqaifanoo narana ani naani. Miqi qimasoofaqa oonu Mooseena afiqee aniqau.
EXO 2:21 Yeetaroofa Mooseenara qini faqa mariannee qufanoo eedoo qimasee marinau. Marufanoo Yeetaroofa narí araamuna Sipooraa nammarina Mooseena amufanoo maranau.
EXO 2:22 Maraseenoo faiqi akoonaiqi maqanau. Maqaseenoo Mooseefa narí faiqi auqureenoo qinee aanaamuru maqusaki maridee qimaseenoo Keerasoomma nee qinau.
EXO 2:23 Mooseefa miqoo moomoo aukuanaki marufanoo Isipa maqanna karaambaiqa Faraoofa kuqinau. Kuqufufaqa Isaraee maqannaasa Isipa maqannaasa afeeka rumbarana ameemaanai kaqi kai annadannada qidaqa maridaqa Anutufinnai dadaaqianifeera innaaru qimariqau. Misa innaaru qirafa Anutufinnai ooru finau.
EXO 2:24 Anutufa misa qiki raqarana iriseenoo Abarahaamana faqa Isakeena faqa Yakooboona faqa moodaanaki kira ufa qimaqoofa misa faiqinamu faqa dadaaqianifeera oonu mafi irinau.
EXO 2:25 Anutufa misa mandainainaki marufanoo misara oonu mafi irufanoo amuqusinau.
EXO 3:1 Moo kari Mooseefa narí airaamaku Yeetaroona Midianna maqannaa amaana maqaki aanaiqi kirafa maruna sipsipasaa faqa mimmisaa faqa rakisi marinau. Moo kari Mooseefa narí airaamaku sipsipauqa faqa mimmiuqa faqa nifiqa mareenoo aadana maqa maaqa fiqareenoo Hooreeba naaquqara aaqanasaa muruqoofaqa andanda neemarufanoo rakisi marinau.
EXO 3:2 Miqi marufanoo Anutuna qangiroo Mooseena afusaa tautumma amaqaseenoo kooroomafinoo saqari amimikiqari idauru kambiqanau. Mooseefa mina qafoofanoo idauru firaafa qaidanoo sia mi saqari amimina qanau.
EXO 3:3 Mooseefa mina qafamaseenoo moo ainainammifoo saina aaqa oonuree qafaa, nanaree saqari amimi sia qaidanoo fee qimasee aaqa finau.
EXO 3:4 Mooseefa quandakinoo aaqa oonu roofanoo Anutufa minakiqari Mooseena aaraidanoo qinau. Moosee Moosee qufanoo Mooseefa iriseenoo maqi qimaseenoo qinau. Qinee maa maridaqa.
EXO 3:5 Miqi qimasoofanoo Anutufa kafaa qimaminau Moosee sia anee adeedi ania. Aneenna aiku aanaamu raipaqusee miqoo maria. Naaquqara maqa maaqa marinara aneenna aiku aanaamu mara aqua.
EXO 3:6 Miqi qimaseenoo Anutufa kafaa qimaminau. Qinee ani akoona Anutusa maridaqa. Abarahaamana faqa Isakeena faqa Yakooboona faqa Anutusa maridaqa. Mooseefa mi ufana iriseenoo Anutuna qafaanoo qimaseenoo rufiaseenoo oorisaa ititanau.
EXO 3:7 Anutufa kaifaa Mooseena qimaminoo qinau. Qini faiqí anaasee Isaraee maqannaasa Isipa maqasaa firaa aupurarana nimi mariafaqa nindafaidaqa. Misa qiniara maasa afeeka rakisira rakisi mariasa nisaukukinaana rafia quqaannee qimasee qini daaree mariafaqa iridaqa. Qinee misa aiqama aupurarana maree marianara iridaqa.
EXO 3:8 Qinee innaarunaindari qumuree Isipa maqannaasa nisaukukinaana mareeqee firaa maqa maaqa ainoo faqaa maqa aiqama ainaina rairaa imariqoo quqaanaura. Mi maqanasaa Kannaana maqannaasa faqa Heeta maqannaasa faqa Amoora maqannaasa faqa Peerisita maqannaasa faqa Hifita maqannaasa faqa Yeebusa maqannaasa faqa misauqa mariaqoo quqannisaanaura.
EXO 3:9 Isipa maqannaa Heeburu maqannaa radami mariafaqa misa qiki raqee mariafa doo qini daaqoosaa rifaqa niqafaidaqa.
EXO 3:10 Qinee ani Isipa maqannaa karaambaiqa Faraoo finnai aiqaanana oonureenana qini faiqí anaasee indaarunni kamma nimaqainaqa Faraoona maqa maaqakiqari quqasee aniaqa.
EXO 3:11 Mooseefa mi ufana iriseenoo Anutunara qaoo qidanoo qinau. Akasaa qinee maaqirausa naqimaseeqee Faraoo finnai oonuree fee Isaraee maqannaasa Isipa maqa maaqaki mariana nifiqaanauree.
EXO 3:12 Anutufa iriseenoo qinau. Qinee anifaqa marianana anee Isaraee maqannaasa Isipa maqasaa qaraana nifiqamaree maa aaqannasaa aniree qini qimoo qifaranoo. Miqinna oosanafa qinee ani aiqaafannanara kooroo iannoo.
EXO 3:13 Mooseefa iriseenoo kafaa Anutuna qimaminoo qinau. Anee qini diqiqaanaqa qinee Isaraee maqannaa innannai oonu reeqa maaqi qianaura. Inni nisaifaqausa ninaakusa Anutufa qini diqiqaifaqa inni qimannimirara anidaqa. Miqi qianaqa misa maaqi qimasee qini ireefaranoo. Mina auqu yafee maridanoo fee qifaqa qinee naqifee qimasee qimannimianauree.
EXO 3:14 Anutufa iriseenoo Mooseena qimaminoo qinau. Qinee qeeqa marunausa qidaqa. Anee maaqi qimasee qimannimia. Nariara qinee qeeqa marunausee qimarifa diqiqaifaqa innee iannai anidaqa.
EXO 3:15 Maaqi qimasee kafaa moo faqa qimannimia. Inni nikausa Abarahaammana faqa Isakeena faqa Yakooboona faqa Anutusa Yaaweesa maridaqa ani Isaraee maqannaa iannai ani aqiqaidaqa. Qini mi duqufa naaruara mariannoo. Kasooaqee kambiqainausa qini mi duquna reefaranoo.
EXO 3:16 Anutufa kaifaa Mooseena qimaminoo qinau. Anee ooquree Isaraee maqannaa uriqararausa suqusee maaqi qimasee qimannimia. Yaaweefa inni ninaakusa Abarahaammana faqa Isakeena faqa Yakooboona faqa Anutusa qini qifusaa kooroo mafinoo qimaqiminoo. Misa qimannimia, qinee misa iannai aniree qafaunaqa Isipa maqannaasa qumaara moomoo nimimariafaqa qafaidaqa.
EXO 3:17 Qinee Isipa maqa maaqakinaana maraanauree qimasee iridaqa. Misa firaa aupurarana kinaana nifieeqee ainoo faqaa maqasaa irairaa ida reemindeemiri mariqoo Kannaa maqasaa faqa Heeta maqasaa faqa Amoora maqasaa faqa Peerisita maqasaa faqa Hifita maqasaa faqa Yeebusa maqasaa faqa quqannisaanaura.
EXO 3:18 Moosee anee Isaraee maqannaasa mi ufana qimanniminaqa irifara. Anee Isaraee maqannaa uriqararausa faqa nifiqamareenana Isipa maqannaa karaambaiqa marinnai oonuree maaqi qimasee qimamia. Maasa Heeburu maqannaasa Yaaweefa maasa Anutufa maasa qifusaa kooroo mafinoo qimanniminoo. Maqee anee maasara eedoo qinaqa qaaramoo faasaana aadana maqa maaqaki oonuree maasa Yaaweena maasa Anutuna tatufirana suqa amianee qia.
EXO 3:19 Qinee iridaqa anee qimaminanoo Isipa maqannaa karaambaiqa fannoo sia inni niiqainaqa fifaranoo. Qinee mina aidafirana amiananoo miqoo inni niiqaannoo.
EXO 3:20 Qinee qeeqa afeekannai Isipa maqannaasa oosana oosana naaquqara ainainannai fitiqnarana nimianaura. Nimiananoo Faraoofa miqoo inni idukuannoo.
EXO 3:21 Qinee Isipa maqannaasa inniara naaquqarana nimianaqa innee Isipa maqasaaqari sia kaqi fifaranoo. Ainaina nimifaqa maree fifaranoo.
EXO 3:22 Innee firarifaqa inni ninaaqmaaka Isipa maqannaa aanaaseeuqa nári naaqa maria aanaaseesa faqa nariqa maaqaki mariasara faqa qifaqa qamunna faqa koora faqa siruaa faqa nifaaqa auqi maria ainainausa faqa nimifaqa inneeqa faiqi namu niraamuqmaaka Isipa maqannaa amiqira qamunna ainaina kai afisunnimaqaifaqa maree fuaqa. Miqinnanannai innee Isipa maqannaasa ainaina maree fiara foora ifaranoo.
EXO 4:1 Mooseefa Anutuna ufa iriseenoo kaifaa iramirinoo qinau. Misa Isaraee maqannaa sia qini ufa qaindusia, sia qini ufa iria qiniara unna fee qimasee Yaaweefa sia ani afusaa kooroo ifana unna qiaanoo qifaqa qinee naqifee ianauree. Naqifee ianaqee misa qini oosana qafee fee kuqaa fee qifaree.
EXO 4:2 Miqi qufanoo Anutufa qinau. Ani asaukuki anee nanee uqirafa nidanee, qufanoo Mooseefa qinau. Saunu uqirausa nidaqee qinau.
EXO 4:3 Anutufa iriseenoo qinau. Doo mina maqasaa aqua qufanoo maqasaa aqusoofanoo mi saunufa sakani kambiqa fufanoo Mooseefa mina qafamaseenoo rufiasee sandanau.
EXO 4:4 Anutufa kafaa qimaminoo qinau. Aneenna asaukunnai mara miami ameesa qumaraa qufanoo qumaroofanoo kafaa asaukuki saunu kammafinau.
EXO 4:5 Miqooqari Yaaweefa Mooseena qimaminau. Anee ooqu Isaraee maqannaa nifusaa miqinaqa misa qiniara Abarahaamana faqa Isakeena faqa Yakooboona faqa misa Yaaweefa misa Anutufa kuqaa ani afusaa kooroo iifoo qifaranoo.
EXO 4:6 Yaaweefa kafaa Mooseena qimaminau. Anee aneenna siutaki asauku upeekaa. Miqi qufanoo Mooseefa miqimminau. Asauku upeekaseenoo radukusee qafoofanoo asaukumau aiqama namuandaundau inoo marufanoo qafanau.
EXO 4:7 Anutufa kafaa qinau aneenna asauku kafaa upeekaa qufanoo upeekaseenoo radukuseenoo qafoofanoo asauku mau namuandaundau irafa sia marinau. Dinniara foora kai marinau.
EXO 4:8 Anutufa kafaa Mooseena qimaminoo qinau. Anee indaaru saunu uqannifiqaina sia irifana innaaqiana asauku uqannifiqainaqa iriaqa.
EXO 4:9 Misa ani mi ainaina qanda qafamasee sia ani ufa irifana anee Niru nammari saka qumareenana aadana maqasaa adiasainanoo fidika kai mandifinaqa qafaaqa.
EXO 4:10 Mooseefa Yaaweena ufa iriseenoo qimaminau. Oo Yaawee sia qini diiqaa. Qinee ooqaindari sia amiqimmasee faiqí nifusaa ufa qunausa maridaqa. Maqee anee qini qima qimiannaqooqari sia mifa qini mareeqee ufa qimarunausaikamma qiseenoo. Qinee sia ufa qunausa ufara mamma qimarunausa maridaqa.
EXO 4:11 Miqi qufanoo Anutufa Mooseena qimaminoo qinau. Yafee nifauru nimidanoo fee. Yafee sia ufa qiasaika faqa naaqoo qaunirausaika faqa mannisaidanoo fee. Yafee nifu maqarana faqa nifu dimbarana faqa nimidanoo fee. Qinee Yaaweesa kai miqidaqa.
EXO 4:12 Moosee anee doo fua. Qinee ani ufa dadaaqi aakapaanana qinnaranoo.
EXO 4:13 Mooseefa kaifaa Yaaweena qimaminoo qinau. Oo Yaawee anee moo aqiqainanoo fuani.
EXO 4:14 Yaaweefa mina iriseenoo aranaqoofanoo qinau. Doo amana ani afasaafa Aaroonafa Reefina atikinaafa andeeqasee ufa qimarifa marifaqa qinee iridaqa. Mifa maqee aniara randanoo anidanoo. Mifa ani paqurimandee asasiannoo.
EXO 4:15 Anee mina qimaminanoo mifa misa qimannimiani. Qinee inniqara dadaaqianaqa ufa qimannimifaranoo. Qinee inneeqara ifandinna ainaina qimannimianaqa auqeefaranoo.
EXO 4:16 Anutufa kafaa Mooseena qimaminau. Aaroonafa ani ufa mareeqee faiqí anaasee qimannimiannoo. Mifa ani oora foora marinana anee mina Anutufara foora maridana mifa auqaaninna ainaina anee aakapeennaranoo.
EXO 4:17 Anee aneenna saunu faqa uqirafa fua. Minannai oosana oosana ainaina faiqí sia amana auqaaqaa ira ainaina auqeennaranoo.
EXO 4:18 Mooseefa Yaaweena ufa iriseenoo narí airaamaku Yeetaroo funnai oonureenoo qimaminoo qinau. Amanee qinee Isipa maqusai kafaa anirandee oonuree qeeqa ainaina niqafaanauree. Misa kaqi fee maridee doo fee kuqia. Miqiqufanoo Yeetaroofa iriseenoo eedoo qimasee aiqanau.
EXO 4:19 Mooseefa Midianna maqa maaqai kaqi marufanoo Anutufa kafaa qimaminoo qinau. Doo findi finana kafaa Isipa maqusai fua. Ani arirari marusa doo kuqia.
EXO 4:20 Mooseefa irisee eedoo qimaseenoo narí anaaqa faqa faiqi namu faqa mareeqee doonkisaa quqaseenoo finau. Anutufa maree fuannee qu saununa faqa maree finau.
EXO 4:21 Anutufa Mooseena qimaminoo qinau. Anee Isipa maqa maaqai oonureenana misa karaambaiqa afusaa faiqí sia amana auqaaqaa ira ainaina qinee amiafanna afeekanannoo auqaa. Miqi marinaqa qinee Faraoona kaukaata qira irirana amiananoo sia eedoo qinaqa Isaraee maqannaasa fifaranoo.
EXO 4:22 Anee maaqi qimaseenana Faraoona qimamia. Yaaweefa maaqi qidanoo. Isaraee maqannaasa qini ooqa faiqiara foora maridammiaafoo qia.
EXO 4:23 Qinee ani qimamidaqa. Anee qini ooqa faiqiuqa Isaraee maqannaasa quqasainaqa misa oonuree qini qimooqiaqa, qunana anee qaoo qianaqa doo maqee ani ooqa faiqi aruanaura.
EXO 4:24 Mooseefa narí faiqi anaasee faqa fidanoo eendufanoo aanai faiqanau. Eendaki Anutufa anireenoo Mooseena kuqa arirara inau.
EXO 4:25 Miqufanoo Mooseena anaaqa Sipooraa nammarifa ooni raiqarana qumareenoo narí amaaku afaaqa ati aukuseenoo minannoo Mooseena aiku auqamaseenoo maqasaa quqanau. Quqaseenoo qinau. Anee qini qifaaqi fidika aanaaqi fasiqa mariananoo fee qinau.
EXO 4:26 Miqimmasoofanoo Yaaweefa Mooseena sia arinau.
EXO 4:27 Miqi qimarufanoo Yaaweefa Aaroona qimaminoo qinau. Anee aadana maqa maaqai fidana Mooseena paquria. Aaroonafa eedoo qimasee Anutuna naaquqara aaqanai ooru Mooseena paqurinau. Paqurimasee amooqa nanau.
EXO 4:28 Amooqasoofanoo Mooseefa Isipa maqa maaqai fuanifeera Yaaweefa qimamuna faqa oosana oosana ainainara faqa Aaroona qimaminau. Yaaweefa faiqí sia amana auqaaqaa ira ainaina auqannee quna faqa Aaroona qimaminau.
EXO 4:29 Mooseesa Aaroonasa Isipa maqa maaqai ooqureeqa Isaraee maqannaa faiqí firaasa naarama quqaqau.
EXO 4:30 Quqaseeqa Yaaweefa Mooseena qimamu ufausa aiqama Aaroonafa qimannimisoofanoo Mooseefa faiqí sia amana auqaaqaa ira ainainauqa misa nifusaa auqanau.
EXO 4:31 Isaraee maqannaasa Aaroona mi ufana iriseeqa kuqaa mifoo qiqau. Misa Yaaweefa misa unnai anunara nariqa firaa aupuraranara irisee kumma ramafufaqa innaaru qiqau.
EXO 5:1 Innaaru qimasoofaqa Mooseesa Aaroonasa Faraoo funnai oonuree qimamiqa qiqau. Oo Faraoo, Yaaweefa maasa Isaraee maqannaa Anutufa aniara maaqi qinoo. Anee qini faiqi namu idukusainaqa aadana maqa maaqaki oonureeqa oomaqa mandee qiniara innaaru qidaqa qimooqiaqee qinoo.
EXO 5:2 Faraoofa miqanda ufa iriseenoo qinau. Yaaweefa yafee. Nanaree mina ufara eedoo qimasee Isaraee maqannaasa niiqaana fifaree. Sia qinee Yaaweenara iridaqa. Minara qinee sia uqanna Isaraee maqannaasa niiqaanaura.
EXO 5:3 Mooseesa Aaroonasa kafaa Faraoona qimamiqa qiqau. Maasa Heeburu maqannaasa Anutufa maasa qifusaa koorooinoo. Anee maasara eedoo qinaqa qaaramoo faasaana aadana maqa maaqaki oonuree Yaaweena maasa Anutuna tatufirana suqa amianaura. Maasa sia miqiananoo mifa firaa manda auriranannai fee firaa dariranannai fee maasa aiqama daruannoo.
EXO 5:4 Faraoofa iriseenoo Mooseesa Aaroonasa qimanniminoo qinau, inneeqara nanaree faiqí anaasee qini ainaini mariasa nifiqee fuafaqee minnisee fidee. Saina kafaa anirandee ainainiranaki fuaqa.
EXO 5:5 Innee Isaraee maqannaasa maqee moomoo kammafi qini ainainirana minnisararee fee qidafee.
EXO 5:6 Mi faasaana kai Faraoofa Isipa maqannaa karabusasaa rakisi marusa faqa Isaraee maqannaa niqoonausasaa rakisi marusa faqa qimanninoo qinau.
EXO 5:7 Innee maqee sia kafaa uita asaki ateekasee Isaraee maqannaa nimifaqa minannoo maaqa usakee maria simmeerana auquaqa. Sai faqa nári kai maraaqa.
EXO 5:8 Maraseeqa sia oorudupi masee auquaqa. Aiqama kari auqi mariana amana kai auquaqa. Misa kudiki mariasa maridaqa qiniara maasa idukusainaqa maasa oonuree Yaaweena nári Anutuna tatufirana suqa amianee qidaqa.
EXO 5:9 Miqi qidaqifaqa innee firaa kadaapi nimifaqa misa oonauqee anauqee idaqa Mooseesa Aaroonasa qinna unnufausa sia iriaqa.
EXO 5:10 Miqi qufaqa karabusasaa rakisi marusa faqa Isaraee maqannaasa nári niqoonausasaa rakisi marusa oonuree maaqi qimasee Isaraee maqannaasa qimannimiqau. Faraoofa maasara sia uita asaki raraku mini nimiaqee qidanoo.
EXO 5:11 Mifa inniara inneeqa kai minakinai randasee maree miniseeqa ooqai auqiu simmeerana amana kai auquaqee qinoo.
EXO 5:12 Miqi qufaqa misa Isipa maqa maaqaki aiqamatinai nidaqa uita asaki randasee suqimariqau.
EXO 5:13 Isipa maqannaa karabusasaa rakisi marusa fuki faaki qidaqa qiqau. Innee ooqai maasa uita asaki nimiafana auqeeundee masee mina amana kai simmeera auquaqa.
EXO 5:14 Miqi qimaseeqa karabusasaa rakisi maru Isipa maqannaa fasiqausa Isaraee maqannaasa nári niqoonausasaa rakisiaqeera mara quqaqoosa naruseeqa qiqau. Innee nanaree simmeera ooqai auqiuna amana sia auqidee.
EXO 5:15 Qufaqa Isaaraee maqannaa rakisirausa Faraoo funnai oonuree qimamiqa qiqau. Oo uriqararafa. Anee naqaa fee ifanee maasa maaqimma qimaqaidanee.
EXO 5:16 Misa sia uita asaki nimiseeqa kaqi maasara simmeera auquaqee qidaqa. Mina saara maasa daria. Sia maasa oosanasaa fau. Inneeqa oosanasaa fifau miqiafanoo.
EXO 5:17 Faraoofa iriseenoo qimanniminau. Innee kudiki mariasa ainainiranara nikooqaifaqa qiniara maasa idukuqisainaqa Yaaweena tatufirana suqamianee qimariafanoo.
EXO 5:18 Doo kaqi kaqi anirandee inneeqa ainainai fuaqa. Misa sia inni uita asaki nimifaranoo. Inneeqa kai uita asaki maree miniseeqa ooqai iundee kai moomoo simmeera auquaqa. Doo fuaqa.
EXO 5:19 Isaraee maqannaasa nári niqoonausasaa rakisi marusa Faraoofa ooqai auqiundee kai masee auquaqee qunara irisee doo maasa ummaaraki maridee qiqau.
EXO 5:20 Faraoo funnaindari quqasee anidaqa Mooseesa Aaroonasa misa nifeesidaqa marufaqa ani paquriqau.
EXO 5:21 Ani paqurimmasee qimannimiqa qiqau. Yaaweefa inniqara oosana qafamaseenoo mina akiiqara nimiannoo. Inneeqara oosana arasaafanoo minasaara Faraoofa narí rakisirausa faqa maasa daruannoo. Inneeqara Faraoofa maasa daruanifeera andaana rumasaafanoo daruannoo.
EXO 5:22 Mooseefa misa ufa iriseenoo quandakufanoo oonureenoo Yaaweenara innaaru qinau. Oo Yaawee, anee naqaafee ifanee Isaraee maqannaa maa mandaikana mannimaqaidanee. Anee naqi fee ifanee qini mai diiqeenee.
EXO 5:23 Qinee Faraoo funnai oonureeqa ani ufa qimamiafanna qooqari Faraoofa Isaraee maqannaasa mandaika kai mannimaqaidanoo. Anee sia uqanna dadaaqira kari mariananoo.
EXO 6:1 Yaaweefa Mooseena ufa iriseenoo qimaminau. Amana doo anee maqee qini oosana qafeennaranoo. Qinee Faraoona afeekaikammasee qimamiananoo qini faiqí anaasee idukusainaqa fifaranoo. Sia kaqi idukuannoo qinee qiananoo idukuseenoo fuki faaki qinaqa mina maqasaaqari quqasee fifaranoo.
EXO 6:2 Anutufa kafaa Mooseena qimaminoo qinau. Qinee Yaaweesa maridaqa.
EXO 6:3 Qinee Abarahaamana faqa Isakeena faqa Yakooboona faqa misa nifusaa aiqama afeeka faqaa Anutusa qeeqa duqu kooroo iqiafana. Qinee sia qeeqa fuka naaquqara duqu Yaaweesee qirana qimannimi qiafana.
EXO 6:4 Qinee qeeqa moodaanaki kira ufa misa faqa qidaqa Kannaana maqa maqa misa nimiraree qima afeekaikiqiafana. Misa minaki asaqiraa faira foora mariunaki quqannisaanauranoo fee qiqiafana.
EXO 6:5 Qinee maqee Isaraee maqannaasa Isipa maqanaasa karafusaki maridaqa aupuraida annada annada imarianara iriseeqa qinee qeeqa moodaanaki kira ufara oonu mafi iriqa.
EXO 6:6 Moosee anee Isaraee maqannaasa maaqi qimasee qini ufa qimannimia, qinee Yaaweesa maridaqa. Innee Isipa maqannaa rumbaranaki mariana qinee inni idukeeqee asumu mariranaki quqannisaanaura. Qinee afeeka qisaukunnai manda aupurarana Isipa maqannaasasaa quqaanaura. Quqaseeqa inni Isaraee maqannaasa asumu maraanaura.
EXO 6:7 Qinee inni qeeqa faiqí aanaaseekammaseeqa qinee inni Anutusa marianaura. Qinee inni Isipa maqannaa karabusa kinaana iduku nisaanaqa miqoo innee qini Anutusara irifaranoo.
EXO 6:8 Qinee inni nifieeqee kuqaa qima afeekaikammasee Abarahaammana faqa Isakeena faqa Yakooboona faqa nimianauree qiafannaqoo quqannisaanaura. Qinee inni nimiananoo mi maqafa innindi kammiannoo. Qinee Yaaweesa qidaqa.
EXO 6:9 Mooseefa Isaraee maqannaasa qima nimufaqa misa sia mina ufa iriqau. Misa firaa ummaara maree marufa mifa misa naaqoo nifu furufara masoofaqa sia iriqau.
EXO 6:10 Anutufa kafaa Mooseena qimaminoo qinau.
EXO 6:11 Anee Isipa maqannaa karaambaiqa Faraoo finnai oonuree Isaraee maqannaasara qimamia. Misa karafusaki mariana idukusaina fuaqa.
EXO 6:12 Mooseefa mi ufana iriseenoo Yaaweena qimaminoo qinau. Isaraee maqannaasa ririmma sia qini ufa iria naqaa fee masee Faraoofa iriannoo fee. Qinee ufa qirara mamma qimarunausa maridaqa.
EXO 6:13 Yaaweefa Mooseena faqa Aaroona faqa qimanniminoo qinau. Inneeqara Isaraee maqannaasa faqa Faraoona faqa maaqi qimasee qimannimiaqa, qinee ani Mooseenara Isaraee maqannaasa Isipa maqa maaqaindaraana nifiqee fuannee qunnanara qimannimia.
EXO 6:14 Yakooboona indaaruqaa faiqi Reeubeenafa qaara faqa qaara faqa 4 faiqi maqanau. Misa nuqu Hanookafa faqa Paruafa faqa Heesaroona faqa Karamifa faqa minamusa mariqau. Misa nári nifaafaurara maqa maaqakina marusa ninaakusa mara mariqau.
EXO 6:15 Simeeoonafa qisauku dinni taikasee dinni ani moodaa marasee 6 faiqi maqanau. Misa nuqu Yeemueerafa faqa Yaminafa faqa Ooqadafa faqa Yakinafa faqa Sooqarafa faqa Sauroofa faqa mariqau. Sauroona anoofa Kannaa anaasee marinau. Misa nári nifaafau rara maqa maaqakina marusa ninaakusa mara mariqau.
EXO 6:16 Reefifa qaara moo faiqi maqanau. Misa nuqu Keerasoonafa faqa Kooqatafa faqa Meerarifa faqa mariqau. Misa nikoofa Reefifa 137 aukuana maraseenoo kuqinau. Misa nári nifaafaurara maqa maaqakina marusa ninaakusa mara mariqau.
EXO 6:17 Keerasoonafa qaara faiqi maqanau. Miqanda nuqu Ribinifa faqa Simeeifa faqa mariqau. Miqandasaaqari moomoo kambiaqau.
EXO 6:18 Kooqatafa qaara faqa qaara faqa 4 faiqi maqanau. Misa nuqu Amarammafa faqa Isaqaranafa faqa Heebaroonafa faqa Usieerafa faqa mariqau. Misa nikoofa Kooqatafa 133 aukuana marasee kuqinau.
EXO 6:19 Meerarifa qaara faiqí maqanau. Miqanda nuqu Maqarifa faqa Musaqifa faqa mariqau. Reefina faiqi namu anaiqi mara miqimmiqa mariqau.
EXO 6:20 Amarammafa narí akoona auna narí amaamuna Yookeebeeda nammarina maraseenoo Aaroona faqa Mooseena faqa maqanau. Amarammafa 137 aukuana maraseenoo kuqinau.
EXO 6:21 Isaqarafa qaaramoo faiqi maqanau. Misa nuqu Kooraafa faqa Neefeekafa faqa Sikirifa faqa mariqau.
EXO 6:22 Usieerafa faqa qaaramoo faiqi maqanau. Misa nuqu Misaeerafa faqa Eerasafanafa faqa Sitirifa faqa mariqau.
EXO 6:23 Aaroonafa Aminadafana araamuna Nasoona asookina Eeriseepa nammarina maraseenoo minasaa Nadabana faqa Abiquna faqa Eeriasarana faqa Itamarana faqa maqanau.
EXO 6:24 Kooraafa qaaramoo faiqi maqanau. Misa nuqu Asirafa faqa Eerakanafa faqa Abiasafa faqa mariqau. Misa Kooraanasaa ani aruaki kambiqainausa ninaakusa mara mariqau.
EXO 6:25 Aaroona amaaku Eeriasarafa Putieerana araamuna maraseenoo Fineeasana maqanau. Miqimmasee doo Reefinakiqari ani aruaki faiqí oosana oosana mariqau.
EXO 6:26 Yaaweefa Aaroonasa Mooseesara kai qufaqa Isaraee maqannaasa Isipa maqannaasa rumbarana kinaana nifiqa maree aniaqee qimaqoo qanda mariqau.
EXO 6:27 Miqanda kai Isipa maqannaa karaambaiqa Faraoona Isaraee maqanaasa idukuanifeera qimamiqau.
EXO 6:28 Yaaweefa Isipa maqa maaqaki maaqi qimasee Mooseena qimaminau.
EXO 6:29 Qinee Yaaweesa maridaqa. Anee Isipa maqanna kaaraambaiqa Faraoona aiqama qinee qunnufana qimamia.
EXO 6:30 Mooseefa iriseenoo Anutuna qimaminoo qinau. Qinee ufa qirara mamma qimarunausa maridaqa. Faraoofa naqifee masee qini ufa iriannoo fee.
EXO 7:1 Yaaweefa Mooseena qimaminoo qinau. Qinee ani aiqaanana anee Faraoona afusaa Anutufara foora marinnaranoo Aaroonafa ani afasaafa ani tamummaqara fasiqara foora mariannoo.
EXO 7:2 Qinee aiqama ufa qimamunnana anee Aaroona qimaminanoo mifa Faraoona qimaminanoo Isaraee maqannaasa Isipa maqa maaqaki rumbaqa mariana idukusainaqa mi maqa maaqana quqasee fuaqa.
EXO 7:3 Inneeqara Faraoona qimami marifaqa qinee kaukaata qimasee qaoo qira irirana amiananoo sia inniqara ufa iriannoo. Qinee moomoo naaquqara ainaina Isipa maqa maaqai auqaananoo sia inni ufa iriannoo.
EXO 7:4 Qinee firaa aupurarana uqanna Isipa maqannaasa nimisee qeeqa faiqí anaasee aiqama faiqí oosaa indaarunni kiqa nifiqee fuanaura.
EXO 7:5 Qinee Isipa maqannaasa naruseeqa Isaraee maqannaasa misa maqa maaqaki mariana nifiqee fuanaqa Isipa maqannaasa qinee kai Yaaweesa marunnanara misa irifaranoo.
EXO 7:6 Mooseesa Aaroonasa Yaaweena ufa iriseeqa doo miqimmiqau.
EXO 7:7 Mooseefa Faraoona faqa ufa quu kari Mooseefa 80 aukuana faqaafa marufanoo Aaroonafa 83 aukuana faqaafa marinau.
EXO 7:8 Yaaweefa Mooseesa Aaroonasa qimanniminoo qinau.
EXO 7:9 Faraoofa inni qarara moo naaquqara ainaina auqamasaifaqa kuqaa anoonee qianee qinaqa Moosee anee Aaroona qimaminanoo mifa narí asaukukinaa saunu maqasaa Faraoona afusaa aqusainanoo sakanikiani.
EXO 7:10 Mooseesa Aaroonasa Faraoo funnai oonuree Yaaweefa qimannimundee qiqau. Aaroonafa narí saunu Faraoona faqa mina uriqarara fasiqauqa faqa nifusaa aqusoofanoo sakani kinau.
EXO 7:11 Faraoofa mina qafamaseenoo narí irirana faqaa fasiqauqa faqa narí afunee fasiqauqa faqa naaroofaqa anireeqa nári afuneennoo Aaroonafa auqoo ainaina auqaqau.
EXO 7:12 Mi afunee fasiqausa faqa nariqa saunu maqasaa aqusoofanoo sakanikinau. Sakani kamafufanoo Aaroona saunu fannoo misaindi nambiqamasanau.
EXO 7:13 Faraoofa mina qafamaseenoo Yaaweefa qundee inoo kaukaata qira irirafa kaqi minaki marufanoo sia Mooseesa Aaroonasa ufa irinau.
EXO 7:14 Sia irufanoo Yaaweefa kafaa Mooseena qimaminoo qinau. Faraoofa kaaqa kaukaata qira irirafa minaki marifanoo idukirara akooqaidanoo.
EXO 7:15 Duna kananaana Faraoofa Niru nammari auqarara ooqufinaqa inneeqara mina minni ooqu paquriaqa. Sakaniki mari saununa faqa mara maree nammari afainni ooqu marida minara rakisiaqa.
EXO 7:16 Paquri maseeqa maaqi qimasee qimamiaqa. Yaaweefa Heeburu maqannaa Anutufa maaqanda diqiqaifaqa Isaraee maqannaasa anee idukusainaqa aadana maqa maaqai oonureeqa qiniara innaaru qiaqee qifaqa ani qimamidaqa. Anee sia iri mariananoo.
EXO 7:17 Maqee Yaaweefa aniara maaqi qidanoo. Anee qinee auqaanna ainaina qafamasee anee qiniara Yaawee fee qimasee irinnaranoo. Anee qafainaqa qinee nammari amuaqu maa saununannoo rukamu amiananoo nammari fannoo fidikaika miannoo.
EXO 7:18 Miqinanoo noodaanna minakinaafauqa aiqama kuqu taikainanoo nammari faqa manda unda inaqa Isipa maqannaasa sia amana mi nammarina neefaranoo.
EXO 7:19 Yaaweefa Mooseena kafaa qimaminoo qinau. Anee Aaroona maaqi qimasee qimaminanoo narí saunu qumaree aiqama nammariuqa faqa oorakinaa nammariuqa faqa akammandira nammariuqa faqa aiqama nammari amummaqa uqeeraani. Nammari fannoo aiqama fidikaika kai mafuannoo. Aiqama Isipa maqa maaqakinaa nammariuqaki fidika kai mariannoo. Difaaniki faqa afeeki faqa sakaqainafa faqa kai fidika aruannoo.
EXO 7:20 Mooseesa Aaroonasa Yaaweefa qima nimundee iqau. Faraoona faqa mina uriqarara rakisirausa faqa nifusaa Aaroonafa narí saunu uqeeraseenoo nammari amuaqu arufanoo aiqama mi nammarisa fidika kai arinau.
EXO 7:21 Noodaanna aiqama nammarikinaafa kuqu taikafufanoo nammari kaaqa manda undufaqa Isipa maqannaasa sia mi nammarisa nee mariqau. Aiqama Isipa maqa maaqakinaa nammariuqaki fidika kai arinoo marinau.
EXO 7:22 Faraoona afunee fasiqauqa nariqa afuneennoo Aaroonafa undee iqau. Miqufanoo Faraoofa Yaaweefa qundee inoo kaukaata qinoo Mooseesa Aaroonasa ufa sia irinau.
EXO 7:23 Faraoofa mina qafamaseenoo narí maaqai oonureenoo sia mi ainainausara irinau.
EXO 7:24 Isipa maqannaasa nammariara randoosia Niru nammari afaiqara nukuda indufusaida amiqira nammari sakasaidaqa neemariqau. Anoona nammari mandaikinoo marunara sia neemariqau.
EXO 7:25 Qisauku dinni taikasee dinni ani qaara marasee 7 faasaana nammari kaqi fidika arinoo marinau.
EXO 8:1 Yaaweefa kafaa Mooseesa Aaroonasa qimanniminoo qinau. Inneeqara Faraoo finnai oonuree maaqi qimasee qimamiaqa. Yaaweefa aniara maaqi qidanoo. Anee qini qiku qisauku idukusainaqa misa qiniara innaaru qidaqa qimooqiaqee qinoo.
EXO 8:2 Anee qaoo qinaqa qinee eeqamoosa moomoora qianaqa anireeqa ani maqa maaqa qumbiqeefaranoo.
EXO 8:3 Niru nammariki faqa eeqamoosa kai qumbiaqa marifaranoo miqooqari anee kooti marianna firaa maaqanaki faqa keeqeefaranoo. Anee faiqee mariannanaki faqa keeqeefara. Ani qaari qamunnasaa faqa qumbiqeefaranoo. Ani faiqí firaasa faqa ani maqannaasa faqa misa oonidaki faqa afeeki faqa qumbiqeefara.
EXO 8:4 Eeqamoosa fannoo urureenoo ani faqa ani ainainirausasaa rakisi mariasa faqa ani maqannaasa faqa nifaaqai akareefaranoo. Miqi qufanoo Faraoofa sia mi ufana irinau.
EXO 8:5 Yaaweefa kafaa Mooseena qimaminau. Anee Aaroona maaqi qimasee qimamia. Doo aneenna saunu uqeeraseenana aiqama nammari faqa oorakinaa nammari faqa aka mandira nammariuqa faqa uqeera uqafiqasainanoo eeqamoosa fannoo moomoo urureenoo Isipa maqa maaqa rafaaqa fuani.
EXO 8:6 Aaroonafa Mooseena ufa iriseenoo saunu uqeeraseenoo aiqama nammariuqa nimummaqa uqeeranau. Uqeerasoofanoo eeqamoosauqa moomoo nammarikiqari urureeqa maqa maaqa rafaaqa fiqau.
EXO 8:7 Isipa maqannaa afunee fasiqauqa misa faqa nári afunee auqusoofanoo eeqamoosa moomoo nammarikiqari Isipa maqa maaqaki qumbiqaqau.
EXO 8:8 Faraoofa eeqamoosara akooqoofanoo Mooseena faqa Aaroona faqa naaramasee qimanniminau. Inneeqara oonu Yaaweenara innaaru qimasaifanoo kafaa eeqamoosa niiqaani. Eeqamoosa aiqama niiqamasainaqa qinee Isaraee maqannaa karabusakinaana idukusaanaqa oonureeqa Yaaweena aandau tatufirana suqa amiaqa.
EXO 8:9 Mooseefa Faraoona ufa iriseenoo qimaminau. Qinee inniara innaaru qirara asasammidaqa. Aneenna kai yairee fee innaaru qiannee qinaqa qinee aniara faqa ani ainainirausasaa rakisirausara faqa ani maqannaara faqa innaaru qianaura. Mi faasaanna kai inni maaqakiaqa qari eeqamoosauqa quqasee Niru nammariki kai ooqu marifarannoo.
EXO 8:10 Faraoofa iriseenoo duna kai innaaru qiannee qufanoo Mooseefa iriseenoo qimaminau. Anee qianandee ianaura. Miqianana anee mina qafamaseenana sia moo maqasaa anutufa Yaaweena maasa Anutuna fooqaafa maridanoo fee qimasee irinnaranoo.
EXO 8:11 Aniki faqa ani ainainiranasaa rakisirausaki faqa ani maqannaasaki faqa maria eeqamoosausa taika fuannoo. Sia uqanna moodaa faqa kaqi mariannoo. Niru nammariki kai marifaranoo.
EXO 8:12 Mooseefa faqa Aaroonafa faqa Faraoona maaqakiqari raudeeqa oonuroofanoo Mooseefa Yaawee funnai eeqamoosa Faraoona faqa narí maqannaasaki faqa quqaqoona taika nisaanifeera innaaru qinau.
EXO 8:13 Yaaweefa Mooseefa iroondee inau. Aiqama maaqakinaa eeqamoosauqa faqa maaqa naambeeqa qara maru eeqamoosausa faqa maaqa saqama atiqara marusa faqa aiqama qufaqa kuqu taikaqau.
EXO 8:14 Isipa maqannaasa mi eeqamoosausa kuqiranauqa mareeqaida moodaanaki quqeesoofaqa putaa iqa aiqama maqa maaqaki putaa undi marinau.
EXO 8:15 Eeqamoosa kuqu taikafufanoo Faraoofa qafamaseenoo Yaaweefa qundee inoo kaukaata qimaseenoo sia Mooseena faqa Aaroona faqa ufa irinau.
EXO 8:16 Yaaweefa Mooseena qimaminoo qinau. Aaroona maaqi qimasee qimamia. Aaroona anee aneenna saunu qumaree maqa rupeemma aminanoo kookooma fannoo quandaki aakukaikamafi Isipa maqa maaqaki umbiqaani.
EXO 8:17 Aaroonafa narí saunu samu kookooma rupeema amufanoo aiqama Isipa maqa maaqakinaa kookoomma fannoo aakukaikinau. Mifa faiqí anaasee faqa aandauqa faqa nifaaqasasa qumbiaqa marida ukaqa nimi mariqau.
EXO 8:18 Isipa maqannaa afunee fasiqauqa Aaroona oosana qafamaseeqa misa faqa nári afuneennai aakuka amanammasee qafaanee qimasee amanufanoo sia ufaqa minnisaqau. Minnisoofaqa aakukauqa aiqama atinai amanaikiqa mariqau.
EXO 8:19 Afunee fasiqauqa Faraoona qimamiqa qiqau. Anutufa maa ainaina auqaidanoo. Faraoofa misa ufa iriseenoo Anutufa qundee inoo kaukaata qimasee Mooseesa Aaroonasa ufa sia irinau.
EXO 8:20 Yaaweefa Mooseena kafaa qimaminoo qinau. Duna kananaana uqanna Faraoofa nammari auqarara ooqu fuannoo. Anee kananaana findifinana ooqureenana paqurimasee maaqi qimasee qini ufa qimamia. Faraoo Yaaweefa aniara maa ufana qinoo. Anee qini qiku qisauku idukusainaqa qini qimoo qiaqee qinoo.
EXO 8:21 Qinee ani aaqu qimama qaidaqa anee sia idukinaqa qinee ani faqa ani ainainiranasaa rakisirausa faqa ani maqannaasa faqa faufaarinnoo aupurarana nimianaura. Isipa maqannaasa maaqauqaki faufaari kai qumbiqaannoo. Aiqama misa maqa maaqa faqa rafaaqa fuannoo.
EXO 8:22 Miqi mafinaqa qinee Kooseena maqa maaqaki qini faiqí anaasee mariasasaa ititasaana sia faufaari iannoo. Qinee miqianana anee qini Yaaweesara mi maqa maaqanaki maridanoo fee qinnaranoo.
EXO 8:23 Qinee ani faiqí anaasee faqa qeeqa faiqí anaasee faqa rainaanaura. Mi rainarafa naaquqara ainaina duna kambiqaannoo.
EXO 8:24 Kananaana Yaaweefa qufaqa faufaari moomoo uqanna nukudara foora anireeqa Faraoona ufa irira maaqaki faqa mina ainainiranasaa rakisi marusa maaqakiaqa faqa aiqama Isipa maqa maaqaki faufaari fannoo mandaika uqanna masanau.
EXO 8:25 Miqimmasoofanoo Faraoofa Mooseesa Aaroonasa naaramaseenoo qimanniminau. Innee maaqoo Isipa maqa maaqaki moo atinai inneeqa Anutuna tatufirana suqasee innaaru qiaqa.
EXO 8:26 Mooseefa narí qimaminoo qinau. Maasa sia amana miqianaura. Isipa maqannaasa Yaaweena maasa Anutuna tatufirana suqa amiranara nikooqaandoora. Maasa maa aandausannoo tatufirana suqarafa Isipa maqannaasa nikooqarana nimianaqa maasa qiqafamaseeqa oonisamu maasa kuqa darifoora.
EXO 8:27 Maasa qaaramoo faasaana aadana maqa maaqaki oonuree aandau tatufirana Yaaweena maasa Anutuna narí qimannimundee kai iqa suqa amianaura.
EXO 8:28 Faraoofa iriseenoo qinau. Doo amana innee aadana maqa maaqai oonu maridaqa aandau tatufirana suqasee Yaaweena inneeqa Anutuna amiaqa. Sia nianai fuaqa, adeedi maridaqa innaaru qidaqa qiniara faqa innaaru qiaqa.
EXO 8:29 Mooseefa Faraoona ufa iriseenoo qimaminau. Ani maaqakiqari raudeeqa qumureeqa innaaru qianaura. Duna kananaana faufaari taikaannoo. Ani maaqaki faqa ani ainainiranasaa rakisirausa maaqaki faqa ani maqannaasa maaqaki faqa duna kananaana taikaannoo. Faraoo sia kaifaa unna qimaseenana qaoo qia. Isaraee maqannaasa Yaaweena tatufirana suqamiranara sia kafaa qaoo qia.
EXO 8:30 Miqi qimaseenoo Mooseefa Faraoona maaqaki aiseenoo raudamafinoo Yaaweenara innaaru qinau.
EXO 8:31 Yaaweefa Mooseena irara ufa iriseenoo faufaari Faraoona maaqakinaana faqa mina ainainiranasaa rakisi marusa maaqakinaana faqa mina maqannaasa maaqakinaana faqa aiqama taikannisanau. Sia moodaa faufaari kaqi marinau.
EXO 8:32 Miqi marufanoo Faraoofa kafaa kaukaata qimaseenoo sia Isaraee maqannaasa idukusoofaqa fiqau.
EXO 9:1 Anutufa kaifaa Mooseena qimaminau. Anee Faraoo finnai oonureenana maaqi qimaseenana qimamia. Oo Faraoo, Yaaweefa Heeburu maqannaa Anutufa aniara maaqi qidanoo. Anee qini qiku qisauku idukusainaqa qiniara innaaru qimaseeqa qimooqiaqee qinoo.
EXO 9:2 Anee kaifaa qaoo qimasee Isaraee maqannaasa sia idukinaqa, qinee manda auriranara qiananoo ani aandau qoosauqa faqa doonkiuqa faqa kameerauqa faqa burimakauqa faqa sipsipauqa faqa mimmiuqa faqa mi aurirana nimianauranoo.
EXO 9:4 Qinee aandau rainaanauranoo Isipa maqannaa aadau aurirana nimianauranoo. Isaraee maqannaasaindi sia aurirana nimianaqa sia misaindi kuquannoo.
EXO 9:5 Qinee Yaaweesa duna faasaana miqianauranoo fee qidaqa.
EXO 9:6 Iaqoo kananaana Yaaweefa narí qundee inau. Isipa maqannaasa aandau aiqama kuqu taikaqau. Isaraee maqanaasa aandau sia moo kuqinau. Kaqi mariqau.
EXO 9:7 Faraoofa minara iriseenoo narí maqannaasa niqiqoofaqa oonu qafamasee aniree Faraoona qimamiqau. Isaraee maqannaasa aandau sia uqanna moodaafa kuqinoo. Miqi qufanoo Faraoofa kaukaata qimasee sia Isaraee maqannaasa idukusoofaqa fiqau.
EXO 9:8 Yaaweefa kafaa Mooseena faqa Aaroona faqa qimanniminoo qinau. Moosee anee danda qoodaa asaukunnoo afaqamaree Faraoona oorinni oonuree innaarunai aqua.
EXO 9:9 Miqimmasainanoo mi dandafa kookoomara foora aiqama Isipa maqa maaqakinai aqufinoo aandauqa faqa faiqí anaasee faqa nibeema naruani. Naru finoo radiqinoo namuana firaafa kambiqaani.
EXO 9:10 Mooseefa faqa Aaroonafa faqa Yaaweena ufa iriseeqa danda afaqamaree Faraoo funnai fiqau. Faraoona oorinni oonu kikiqa mafufaqa Mooseefa mi dandana innaarunai aqinau. Aqusoofanoo maqasaa aqufinoo mi dandafa aandauqa faqa faiqí anaasee faqa abeema niminau. Nimisoofanoo mifa radiqinoo namuana firaafa nárí marinau.
EXO 9:11 Isipa maqannaa afunee fasiqauqa sia amana Mooseena afusaa anirana amanaikiqau. Misa faqa aiqama Isipa maqannaa undee kai inoo abeema nárí marunara sia Mooseefa maruqoo aniqau.
EXO 9:12 Miqufanoo Yaaweefa qufanoo Faraoofa kaukaata qimasee Yaaweefa qundee inoo sia Mooseesa Aaroonasa ufa irinau.
EXO 9:13 Yaaweefa mina qafamaseenoo kafaa Mooseena qimaminoo qinau. Inneeqara duna kananaana findifiqa oonureeqa Faraoona maaqi qimasee qimamiaqa. Heeburu maqannaa maasa Anutufa Yaaweefa aniara maaqi qidanoo. Anee qini faiqí anaasee idukusainaqa misa qini qimooqiaqee qidanoo.
EXO 9:14 Anee sia miqinaqa mikari qinee sia ani ainainiranasaa rakisirausa faqa ani maqannaasa faqa kai naruanauranoo, ani faqa aupurarana amianauranoo. Miqianana anee irinnaranoo, sia moo fannoo qini daanna rarafa aiqama maqa maaqaki maridanoo.
EXO 9:15 Qinee ani faqa ani maqannaasa faqa manda auriranannai amana naru taikaunaiqini.
EXO 9:16 Qinee inni qeeqa afeeka uqannifiqarara inni minni nisaunaqa kaqi marianara qini afeeka duqu aiqama maqa maaqaki daraaniannoo.
EXO 9:17 Faraoo, anee kaqi kai ramoo ramaa idana sia qini faiqí anaasee idukusaanaqa fidammia.
EXO 9:18 Duna suani afu maa maqee marina amanasaa ururainaqa qinee qiananoo aaku firaafa pupu samu namufaqa aqufuannoo. Miqira pupu samu Isipa maqannaasa ooqai faqa maqee mariaqooqari faqa sia qafoo ainainafa maqee kai kambiqaannoo.
EXO 9:19 Doo aneenna maqannaasa qimanniminaqa nariqa aandauqa faqa aiqama ainaina madaanai mari ainainausa faqa mareeqee maaqaki quqaaqa. Madaanai marinna aandausasaa faqa faiqí aanaaseesaa faqa firaa pupusamu aqufinoo kuqa naruannoo.
EXO 9:20 Kinna Faraoona ainainasaa rakisi marusa uriqararausa akaqausa Karaambaiqa mi ufanara rufiasee nariqa ainainira faiqiuqa faqa aandauqa faqa mareeqee maaqaki uqaqau.
EXO 9:21 Akaqausa Yaaweena ufa irisee nikooqoosa misa nariqa ainainira fasiqauqa faqa nariqa aandauqa faqa kaqi madaanai quqaqoofaqa mariqau.
EXO 9:22 Iaqoofanoo Yaaweefa Mooseena qimaminoo qinau. Aneenna asauku innaarunai uqeeraa. Uqeerasainanoo pupu samu aiqama Isipa maqa maaqakinaa fasiqa aanaaseesaa faqa aandauqasaa faqa aiqama afuqakinaa naranauqasaa faqa aqufuani.
EXO 9:23 Miqi qufanoo Mooseefa narí saunu innaarunai uqeerasoofanoo Yaaweefa innaarunai qirana faqa aakuasaa faqa pupusamu faqa quqasoofanoo maqasaa quminau.
EXO 9:24 Yaaweefa aaku faqa pupu samu faqa quqaseenoo aakuasaara qufanoo aiqama atinai uqi marinau. Ooqai Isipa maqannaasa miqirana sia qafaqau. Mikari kai firaafa uqanna kambiqoofaqa qafaqau.
EXO 9:25 Pupu samu fannoo aiqama Isipa maqannaa maqusai quqaqoo ainainausa faqa aiqama faiqí anaasee faqa aandauqa faqa narinau. Mifa aiqama afuqakinaa narana faqa saqari qaqama nee marunauqa faqa itairi aqinau.
EXO 9:26 Kooseena maqa maaqaki Isaraee maqanaasa maruqoo kai pupu samu sia aqufinoo narinau.
EXO 9:27 Faraoofa mina qafamaseenoo Mooseena faqa Aaroona faqa naaramaseenoo qimanniminau. Maqee qinee aaqamamma seeqa. Yaaweefa andeeqarafa maridanoo. Qinee faqa qeeqa maqannaasa faqa aaqee marunausa maridaqa.
EXO 9:28 Inneeqara oonuree Yaaweenara innaaru qiaqa. Maasa innaarunai qiranara faqa pupu samuara faqa qikoo uqanna qeenoo. Qinee inni idukusaanaqa fifaranoo fee qimasee qima afeekaikidaqa. Innee sia maaqoo kisaaqasaa marifaranoo.
EXO 9:29 Miqi qufanoo Mooseefa qimaminau. Qinee ani maqusa naambeeqai oonureeqa qisauku Yaawee finnai uqeerasee innaaru qiananoo innaarunai qirafa faqa pupu samu faqa taikaannoo. Miqimmasaanana anee maa maqa maaqanara Yaaweenaindi fee qimasee irinnaranoo.
EXO 9:30 Qinee iridaqa anee faqa ani ainainiranasaa rakisirausa faqa sia Yaaweena maasa Anutunara rufiee mariafanoo.
EXO 9:31 Mikari Isipa maqannaasa reepaa faqa raisa fooqaa ira ainaina baari faqa mandaikinau. Baari fannoo akuqamafufanoo reepaa qaqama irarara deedaqa mafufanoo pupu samu fannoo aqufinoo mandaika masanau.
EXO 9:32 Sia moodaa uita fannoo mandaikinau. Mifa inaaqianna ummaqirafa maridanoo maqee uri marunara sia mifa mandaikinau.
EXO 9:33 Mooseefa Faraoona maaqakiqari raudeenoo naambeeqai qumureennoo asauku innaarunai uqeerasee Yaaweenara innaaru qinau. Innaaru qufanoo innaarunai qirafa faqa pupu samu faqa aaku faqa aiqama taikanau.
EXO 9:34 Taikafufanoo Faraoofa qafamaseenoo kafaa aaqanau. Mifa faqa narí ainainiranasaa rakisi marusa faqa kaqi kai kaukaataqiqa ani mariqau.
EXO 9:35 Ooqai Yaaweefa Mooseena qimamundee kai inoo Faraoofa kaukaata qimaseenoo sia Isaraee maqannaasa idukusoofaqa fiqau.
EXO 10:1 Yaaweefa kafaa Mooseena qimaminoo qinau. Anee kafaa Faraoo finnai fua. Qinee Faraoona faqa mina ainainiranasaa rakisirausa faqa kaukaataqira irirana nimiseeqa qeeqa faiqí sia auqaaqaa ira ainaina misa qambaana auqarara miqianaura.
EXO 10:2 Innee inneeqa faiqi namu faqa ninaiqimara faqa, qinee Isipa maqannaasa faiqí sia auqaaqaa ira ainainannai misa mara furufarirausaika mannimaqaafannanara qimannimia. Innee aiqamausa qini Yaaweesara irifaranoo.
EXO 10:3 Mooseefa faqa Aaroonafa faqa Faraoo funnai oonuree maaqi qimasee qimamiqa qiqau. Yaaweefa Qeeburu maqannaasa Anutufa aniara maaqi qidanoo. Kisaaqasaa fee anee qaoo qidanee sia fee aneenna auqu mara maree muqufisee qini qimeemaanai marinnaree. Anee qini faiqí anaasee idukusainaqa oonureeqa qiniara innaaru qiaqee qidanoo.
EXO 10:4 Anee kaqi kai qaoo qimarinaqa qinee duna pandaaqa moomoo mara quqasaanaqa ani maqa maaqaki qumbiqaannoo fee qinoo.
EXO 10:5 Pandaaqa moomoo uqanna kambiqafi maqa ititafinaqa sia maqa qafeefaranoo. Pupusamu fannoo naridanoo mafisai andandausa aiqama nama taikeefaranoo. Saqari mafisainauqa faqa neefaranoo.
EXO 10:6 Mi pandaaqausa ani ufa irira maaqaki faqa ani ainainiranasaa rakisi mariasa maaqakiaqa faqa ani maqannaasa maaqakiaqa faqa qumbiqeefaranoo. Ani akeeku akaaku maruqooqari faqa maqee anee mariannaqooqari faqa sia qafaa ainainafa mandainaina uqanna mariannoo. Miqi qimaseenoo Mooseefa raudamaki finau.
EXO 10:7 Faraoona ainainirana saa rakisi marusa Faraoona qimamiqa qiqau. Maa fasiqafa Mooseefa kisaaqasaa maasa ummaara qimidanoo. Isaraee maqannaa idukusainaqa oonuree nári Anutuna Yaaweenara innaaru qiaqa. Anee sia fee qafaidanee Isipa maqa maaqa doo mandaikidanoo.
EXO 10:8 Miqi qufaqa Mooseesa Aaroonasa nifiqee Faraoofa maruqoo minisoofanoo Faraoofa qimanniminoo qinau. Innee oonureeqa inni Anutuna Yaaweenara innaaru qiaqa. Inneeqa firanara faqa amiqi masee qimaqimifaqa iria. Yauyausee fifaranoo fee.
EXO 10:9 Miqi qufanoo Mooseefa narí qimaminoo qinau. Maasa aiqamausa fuanauranoo. Maasa qeeqa faiqi asooqa faqa fuanauranoo. Maasa qeeqa sipsipauqa faqa mimmiuqa faqa burimakauqa faqa aiqama oonuree Yaaweeena oomaqa suqamianauranoo.
EXO 10:10 Miqi qufanoo Faraoofa qinau. Qinee Yaaweena auqu ramasee qeeqa qimana aiqamasee maaqi qidaqa. Qinee sia eedoo qianaqa innee inneeqa faiqi anaasee nifiqee fifaranoo. Innee akooqoo maasa mandaikamma qimaqarara tipundaara maqaqee miqi mariafanoo.
EXO 10:11 Minara qinee inniara faiqí kai oonureeqa innee iri mariandee Yaaweenara innaaru qimaseeqa amooqiaqa. Miqi qimasee narí sundiauqara qufaqa Mooseesa Aaroonasa niiqoofaqa raudee fiqau.
EXO 10:12 Yaaweefa mina qafamaseenoo Mooseena qimaminoo qinau. Aneenna asauku Isipa maqa maaqa amummaqa uqeerasainaqa pandaaqauqa aniaqa. Anireeqa misa Isipa maqannaasa narana amanee aiqama naaqa. Pupu samu aridanoo mafisoona namataikaaqa.
EXO 10:13 Mooseefa iriseenoo narí saunu uqeerasoofanoo Yaaweefa ufaira qufanoo suani oosanaindari mi faasaanna faqa mi eendanaki faqa uqinau. Kananaana ufai fannoo pandaaqauqa moomoo maree urinau.
EXO 10:14 Pandaaqa moomoo nukudara foora urureeqa aiqama Isipa maqa maaqaki amanaikiqa mariqau. Moomoo indaaru ooqbiqasee urufaqa kafaa inaaqiana akaqausa ooqbiqasee urufaqa, miqi kai masaida moomoosa uru maqa maaqa qumbiaqau. Ooqai sia miqirana qafaqau, naaru faqa sia qafeefaranoo.
EXO 10:15 Mi pandaaqausa aiqama maqa rafaaqafusoofanoo sia maqa ati faqa kooroo inau. Maqa faqa kai kudima arinoo marinau. Pupu samu fannoo aridanoo mafisoo andandausa faqa aiqama saqari qaqama faqa namasaqau. Sia saqari amanee arira ainaina, saqarisaa faqa ummaqira ainainasaa faqa Isipa maqa maaqaki marinau.
EXO 10:16 Faraoofa Mooseesa Aaroonasara aniaqee qufaqa aniroofanoo qimanniminau. Qinee Yaaweena inni Anutuna faqa inni faqa mandaikamma nimaqeeqa.
EXO 10:17 Inneeqara qini aaqarana akiiqara kafaa maqee kai minni qisaaqa. Minni qiseeqa Yaaweena inneeqa Anutufinnai innaaru qifanoo maa kuquaqaa ira aupurarana mara aqu qisaani.
EXO 10:18 Mooseefa iriseenoo raudamaku fanoo oonureenoo Yaawee funnai innaaru qinau.
EXO 10:19 Yaaweefa qufanoo ufai fannoo suani afu oosana qaannaindari uriufa mara quandasee suani afu keeqee marunnaindari afeeka ufai uqanna uqinoo aiqama pandaaqauqa fuaqa Taatuqee ooruku nammarinni aqinau. Sia uqanna moodaa pandaaqa Isipa maqa maaqaki kaqi marinau.
EXO 10:20 Yaaweefa qufanoo Faraoofa kaukaata qimasee sia Isaraee maqannaasa idukusoofaqa fiqau.
EXO 10:21 Yaaweefa kafaa Mooseena qimaminoo qinau. Anee aneenna asauku innaarunai uqeerasainanoo asukuna fannoo aiqama Isipa maqa maaqa rafaaqafuani. Asukuna firaafa misa nifaaqai atooqanoo maridanoora foora inoo mariannoo.
EXO 10:22 Mooseefa narí asauku innaarunai uqeerasoofanoo Isipa maqa maaqa asukuna firaafa qaaramoo faasaana ititannimaqanau.
EXO 10:23 Isipa maqannaasa mikari sia narí qafee narí qafee imariqau. Sia aana nimariqau, maaqaki kai mariqau. Isaraee maqannaasa maruqoo kai kaaqa qee marufaqa marinau.
EXO 10:24 Faraoofa Mooseena aaramaseenoo qimaminau. Aneenna maqannaasa faqa doo oonureeqa Yaaweenara innaaru qimaseeqa amooqiaqa. Innee inneeqa faiqi anaasee faqa aiqama nifiqee fuaqa. Inneeqa aandauqa maaqoo quqasee inneeqa kai fuaqa.
EXO 10:25 Miqi qimasoofanoo Mooseefa qinau. Maasa nariqa aandauqa faqa maree oonureeqa Yaaweena maasa Anutuna tatufirana suqa amianaura.
EXO 10:26 Maasa qeeqa aandauqa maree fuanaura. Sia moodaa maaqoo kaqi mafi quqaanaura. Maasa qeeqa kai nana aandau fee aruseeqa Yaaweena maasa Anutuna tatufirana suqa amianauree. Maasa maqee sia iridaqa. Miqoo oonuree irianaura. Nana aandaunnoo fee tatufirana suqaanauree.
EXO 10:27 Yaaweefa qufanoo Faraoofa kaukaata qira irirana maraseenoo ititammaseenoo Isaraee maqannaa sia idukinau.
EXO 10:28 Miqi qimaseenoo Faraoofa Mooseena qimaminau. Doo qinee qafee mariana qini qifusaaqari fifua. Qinee sia kaifaa ani qafaanaura. Ani qafaanana kuqinnaranoo.
EXO 10:29 Mooseefa mina ufa iriseenoo Faraoona qimaminau. Anee kuqaa qiananoo. Anee sia kafaa qini qiqafeennaranoo.
EXO 11:1 Miqi qimasoofanoo Yaaweefa Mooseena qimaminoo qinau. Qinee moodaa ummaara kai Isipa maqannaasa karaambaiqa faqa mina maqannaasa faqa nimianaura. Miqimmasaananoo mifa inni idukusainaqa fifaranoo. Kuqaa uqanna mifa sia reendeenasaa inni niiqaannoo. Kaukaata qidanoo niiqaannoo.
EXO 11:2 Moosee anee aneenna maqannaasa maaqi qimasee qimannimia. Misa aiqama Isipa maqannaasa nári naaqa mariasa iramirifaqa nifaaqa auqi maria ainainna siruaannoo faqa koorannoo faqa auqirana nimiaqa.
EXO 11:3 Yaaweefa qufaqa Isipa maqannaasa Isaraee maqannaasara uriqararausee qiqau. Isipa maqannaa Faraoona ainainiranasaa rakisi marusa faqa aiqama faiqí anaasee faqa Mooseenara kaaqa uriqarara fee qimasee ainaina nimiraree qiqau.
EXO 11:4 Mooseefa Yaaweena mi ufana iriseenoo oonu Faraoona qimaminoo qinau. Yaaweefa aniara maaqi qinoo. Eendamuqusai uqanna qinee Isipa maqa maaqaki nuanaura.
EXO 11:5 Isipa maqannaa akoonaiqi ooqa faiqiuqa aiqama kuqifaranoo. Ani Faraoona faiqi ani amaaqa maqaaninnana saaqari oosana arasee miqooqaraasa ooqa faiqiuqa faqa kaaqa ureeqarausa ooqa faiqiuqa faqa aiqama naru taikaannoo. Aiqama burimmakauqa ooqa aanaaqiuqa faqa kuqifaranoo.
EXO 11:6 Aiqama Isipa maqa maaqaki ikifaafau qirafa firaafa mariannoo. Ooqai sia miqira iki raqarafa marinau. Kasooqaqee faqa sia miqira qikiraqarafa mariannoo.
EXO 11:7 Miqi marifanoo sia uqanna faini fannoo Isaraee maqannaasa faqa misa aandauqa faqa nindafeenoo kau kau qiannoo. Miqinana anee qinee Yaaweesa Isaraee maqannaasa faqa Isipa maqannaasa faqa rainee marunnanara irinnaranoo.
EXO 11:8 Mooseefa kafaa Faraoona qimamidanoo qinau. Ani ainainiranasaa rakisi mariasa aiqamausa qinee iannannai anireeqa qini doorinni niqoori saunu arafiqa qiniara doo aneenna maqannaasa nifiqee fuannee qifaranoo. Miqi qifaqa qinee doo fuanauranoo. Mooseefa miqi qimasee aranaqoofanoo aanoomaseenoo raudanau.
EXO 11:9 Raudamafufanoo Yaaweefa Mooseena qimaminoo qinau. Faraoofa ani ufa sia uqanna iriannoo. Miqi marinaqa qinee faiqí sia auqaaqaa ira ainaina moo faqa moo faqa auqaanaura.
EXO 11:10 Mooseefa faqa Aaroonafa faqa Faraoona oorisaa mi oosana oosanna ainainna auqoofanoo mifa sia irinau. Yaaweefa qufanoo kaukaata qira irirana maraseenoo sia niqiqoofaqa mina maqa maaqakiqari fiqau.
EXO 12:1 Mooseena faqa Aaroona faqa Isipa maqa maaqaki Yaaweefa kafaa qimanniminoo qinau.
EXO 12:2 Innee aiqama aukuanaki maa quqoonnara maasa indaaruqaa quqoona fee qifaranoo.
EXO 12:3 Anutufa Mooseena qimaminoo qinau. Aiqama Isaraee maqannaa maa ufana qimannimia. Maa quqoonnasaa qisaukuqara taikasee faasaanasaa moodaa moodaa fasiqa oonu sipsipa aanaaqi fee mimmi aanaaqi fee nári maaqaki mariasa naaqeera maraaqa.
EXO 12:4 Mi maqanakinaasa oodaa maridaqa sia mi aandauna nama taikaaqaa inaqa misa naaqa marinausa naaramasee misa faqa amana rainasee naaqa. Faiqí anaasee nimana nimana kai aukusee niminaqa naifanoo taikaani.
EXO 12:5 Innee sipsipa aanaaqi fee mimmi aanaaqi fee akoona kai moodaa aukuana marasainnana, sia moo nammuana faqa aurirana faqa marinnana maraaqa.
EXO 12:6 Mi quqoonnanasaa qisaukuqara taikasee qikunni qaara faqa qaara faqa marasee 14 faasaana eenee marinaqa kai aiqama Isaraee maqannaasa mi aandausa aruaqa.
EXO 12:7 Sipsipa arusaifaqa mina fidika sakaseeqa maaqa kooqiuqa dinni dinni afaimau faqa mirinni auni riranasaa faqa akuaqa. Innee mi aandausa neefandinna maaqana kooqi aku amaqaaqa.
EXO 12:8 Mi eendanaki kai mi aandauna amaqi idasaa kasooqammasee sukaqee mari adasana namufaqa naaqa. Sia innooqee mari pauraqana aqira bereeta suqasee sipsipa amaqi namufaqa naaqa.
EXO 12:9 Sia fuka naaqa. Nammariki faqa sia suqasee naaqa. Idaki kai akiiqa faqa aiku faqa arada faqa suqasee naaqa.
EXO 12:10 Eendaki mina aiqama taikaaqa. Mina ataraasa sia kananaana kaqi mariani, ida qarasainanoo taikaani.
EXO 12:11 Innee maaqimmasee mi aandauna naaqa. Amunnanda maraseeqa niku aanaamu afisuseeqa, saunu nisaukuki qumareeqa doo kaqi kaqi naaqa. Namaseeqa maaqooqari innee mi narannara Yaaweefa ainnaaqaroo narana fee qiaqa.
EXO 12:12 Mi eendanaki qinee Isipa maqa maaqa aiqamai oonuree aniree idaqa aiqama ooqa akoonaiqi faqa ooqasaa andau akoonauqa maqarana faqa kuqa naruanaura. Qinee Yaaweesa Isipa maqannaasa unna anutusa faqa aupurarana nimianaura.
EXO 12:13 Fidika kooqi afaisaa aku amaqarafa mifa kai innee maria maaqana koorooiannoo. Qinee Isipa maqannaa aiqama nariqa fidaqa inni maaqa kooqisaa fidika qafamasee ainaaqaraanaura sia inni naruanaura.
EXO 12:14 Innee mi faasaanna amaana qoomaqa faasaanara foora marinaqa qinee Yaaweesa auqaafanna ainainara naaqoo auqainaqa irisee asasifaranoo. Innee aiqama kari mi faasaannara asasifaranoo.
EXO 12:15 Yaaweefa kaifaa maaqi qinau. Qisauku dinni taikasee dinni ani qaara marasee 7 faasaana innooqee mari pauraqana aquqaa bereeta sia naaqa. Sia pauraqa aqira bereeta kai naaqa. Oomaqa indaaruqaa faasaana inneeqa maaqakiaqa aiqama innooqee mari pauraqana mara aqusaaqa. Oomaqaki faiqí moo fannoo innooqee mari pauraqana aqira bereeta nainna fasiqanara sia Isaraee maqannaa fee qiaqa.
EXO 12:16 Oomaqa indaaruqaa faasaana faqa qoomaqa taikara faasaanara faqa naaquqara faasaanee qimasee suqufi innaaru qiaqa. Sia moo ainainirafa mi faasaana qandasaa mariani. Narana deedaqirafa kai mariani.
EXO 12:17 Innee miqimmasee qoomaqa naida mariaqa. Mi faasaanna qinee inni faiqí oosana faiqí oosana Isipa maqa maaqaindaraana nifiqee aniqiafana. Innee aiqama kari mi faasaannasaa qoomaqa sakeera foora mi faasaannara asasiaqa.
EXO 12:18 Indaaruqaa quqoonasaa 14 faasaanasaa eenee marinaqa oosana arasee fifiinaqa mi quqoonnana 21 faasaanasaa innee sia innooqee mari pauraqana aqira bereeta naaqa.
EXO 12:19 Innee 7 faasaana qoomaqa nara faasaana innooqee mari pauraqafa sia inni maaqakiaqa mariani. Innikiqari faiqí moo fannoo fee moo aanaamuru ani marina fee innooqee mari pauraqana aqira bereeta nainaqa innee sia minara Isaraee maqannaa fee qiaqa.
EXO 12:20 Innee yai yai fee maridaqa sia innooqee mari pauraqana aqira bereeta kai naaqa.
EXO 12:21 Anutufa Mooseena mi ufana qimamisoofanoo Mooseefa Isaraee maqannaasa uriqararausa qimanniminoo qinau. Innee moodaa moodaa sipsipa akoona fee mimmi akoona timmusa fee inneeqa faiqi anaasee nimana kai mara minisee aruseeqa ainnaaqaroo qoomaqana suqasee naidaqa asasiaqa.
EXO 12:22 Aandau aruseeqa fidika difaaniki sakaaqa. Innee hisoopa saqari amanee raudasee minannoo fidika difaaniki raaraammasee kooqi afai dinni dinni faqa mirinni faqa akuaqa. Akuseeqa innee sia raudaaqa, maaqaki kai marifanoo iaqaani.
EXO 12:23 Fafaa eendaki Yaaweefa Isipa maqannaasa ooqa faiqi narinoo fidanoo inni kooqi mirinni faqa dinni dinni faqa fidika qafamaseenoo narinoo nimari qangiroonara qinanoo sia mi maqanaki keeqaannoo.
EXO 12:24 Innee faqa inneeqa faiqi namu faqa naaru naaru maaqi kai iqa fuaqa.
EXO 12:25 Innee Yaaweefa qima afeekaikamasee nimiraree qimaqoo maqannaasa oonureeqa maaqimmiqa fuaqa.
EXO 12:26 Kasooaqee inni faiqi namu mi qoomaqana qafamaseeqa mina oosanara iraifaqa innee maaqi qimasee qimannimiaqa.
EXO 12:27 Maa qoomaqafa Yaaweefa ainnaaqaroo qoomaqafa maridanoo fee qimasee qimannimiaqa. Ooqai mifa Isipa maqa maaqaki maasa ainnaaqareenoo Isipa maqannaasa ooqa faiqiuqa narinoo maasa sia darinau maqi qiaqa. Mooseefa miqi qimasoofaqa Isaraee maqannnaasa iriseeqa aiqama kumma ramafi Anutunara susuiqau.
EXO 12:28 Susummaseeqa misa daraanimafiqa Yaaweefa Mooseesa Aaroonasa nimu ufa mau fiqa aiqama ainaina andeeqasee deedaqiqau.
EXO 12:29 Mi eendanaki kai eenda amuqusai Yaaweefa Isipa maqannaa ooqa akoonaiqiuqa narinau. Faraoona amaaku narí akoona ainaina maraaninnana saaqari oosana arasee rumbaranaki mariasa faiqi namu faqa aiqama narinau. Aandau aanaaqiuqa akoona ooqasaa maqaranauqa faqa Yaaweefa narinau.
EXO 12:30 Narusoofaqa mi eendanaki Faraoofa faqa narí ainainasaa rakisi marusa faqa aiqama Isipa maqannaasa faqa aiqama tauti findifiqau. Iki faafau qirafa firaafa Isipa maqa maaqaki marinau. Sia moo maqaki kaqi mariqau, aiqama maaqaki kuqirafa marunara iki raqee mariqau.
EXO 12:31 Mi eendanaki kai Faraoofa Mooseena faqa Aaroona faqa naaramaseenoo qimanniminau. Inneeqara faqa inneeqa maqannaasa Isaraee maqannaasa faqa qini maqa maaqakiqari quqaseeqa inneeqa qiannai oonureeqa Yaaweena amooqiaqa.
EXO 12:32 Inneeqa sipsipauqa faqa mimmiuqa faqa burimakauqa faqa doo fuaqa nani. Oonuree qini faqa amiqi amiqimma qimaqaanifeera innaaru qiaqa.
EXO 12:33 Isipa maqannaa faiqí anaasee misa faqa Isaraee maqannaasa niqiqeeqa qiqau. Innee kai kaqi fuaqa. Innee kaqi marifaqa maasa aiqama kuqu taikaanoora. Innee doo fuaqa.
EXO 12:34 Miqi qimasoofaqa Isaraee maqanaasa innooqee maru pauraqana sia aqira bereeta sia suqarana difaaniki qamunnasaa kukuqamma quqasee nikumaaqa akumaree fiqau
EXO 12:35 Isaraee maqannaasa Mooseefa qundee kai iqa Isipa maqannaa nifaaqa auqimaru ainainara siruaara faqa koorara faqa qamunnaara faqa iraqau.
EXO 12:36 Yaaweefa qufaqa Isipa maqannaasa Isaraee maqannaasara uriqararausee qimasee misa iroo ainainna kaqi nimiqau. Miqunannai Isaraee maqannaasa Isipa maqannaa aiqama ainaina maree fiqau.
EXO 12:37 Isaraee maqannaasa sandeeqa Ramaseesa maqusa quqasee Sakoota maqusai fiqau. Misa nambaqa maaqimminoo marinau, 600,000 faiqí kai mariqau, sia faiqi anaasee nisaana riqau.
EXO 12:38 Moomoo maqusanaasa Isipa maqa maqaki ani marusa misa faqa nári burimakauqa faqa sipsipauqa faqa mimmiuqa faqa maree fiqau.
EXO 12:39 Misa aanai fidaqa fuka bereeta innooqee mari pauraqana sia aqirana maree funa suqa naqau. Isipa maqannaasa Isaraee maqannaasa nifaqasoonara aaqmuriqa bereeta innooqee maru pauraqana sia aqirana maree fiqau.
EXO 12:40 Isaraee maqannaasa 430 aukuana Isipa maqa maaqaki mariqau.
EXO 12:41 430 aukuana taikarana namu faqa faiqí aiqama oosana Yaaweena aiku asauku Isaraee maqannaasa Isipa maqa maaqa quqasee fiqau.
EXO 12:42 Eendaki Yaaweefa Isaraee maqannaasa qumee rakisidanoo nifiqee finau. Aiqama aukuanaki mi eendiranara kai Yaaweenaindi fee qimasee innaaru qidaqa rakisi mariqau.
EXO 12:43 Yaaweefa Mooseena faqa Aaroona faqa qima niminau. Ainnaaqaraafanna oomaqana suqara naakapara ufa maaqimminoo mariannoo. Moo maqanaindari ani marinafa sia amana mi oomaqana naannoo.
EXO 12:44 Inneeqa munnimmannai feefaurummaqoo ainainira fasiqausa fainanduqu saifaqa misa amana neefaranoo.
EXO 12:45 Ufaasu ani mariasa faqa feefauruara ainaini mariasa faqa sia neefaranoo.
EXO 12:46 Aiqama mi aandau naranna deedaqia maqanaki kai nama taikaaqa. Sia uqanna madaanai maree fuaqa. Sia aandau amudaani itairiaqa.
EXO 12:47 Aiqama Isaraee maqaannaasa mi oomaqanara asasiaqa.
EXO 12:48 Sia fainanduqira fasiqa fannoo sia amana naannoo. Anaamuru fasiqa inni qambaana marinafa ainnaaqaroo oomaqanara asasidanoo Yaaweena auqu uqeerararee qinaqa innee mina maaqaki mariasa akoonaiqiuqa fainanduqu saifaqa misa faqa mi oomaqanara asasiaqa. Miqi masaifanoo mifa Isaraee maqannaasaki kambiqara fara foora maridanoo mifa faqa oomaqa naranaki mariani.
EXO 12:49 Innee faqa moo maqannaa inniki ani marinafa faqa moodaa sanda mau kai fuaqa.
EXO 12:50 Yaaweefa Mooseesa Aaroonasa qima nimundee Isaraee maqannaasa iqau.
EXO 12:51 Mi faasaanna Yaaweefa Isaraeerana aiku asauku Isipa maqasaa qaraana nifiqee finau.
EXO 13:1 Yaaweefa Mooseena qimaminau.
EXO 13:2 Innee aiqama akoonaiqi ooqa faiqiuqa qini kai qimia. Aiqama Isaraee maqannaa ooqa faiqiuqa faqa aiqama aandau ooqasaa maqarana akoonauqa faqa qinindi marinara qini qimiaqa.
EXO 13:3 Mooseefa Isaraee maqannaasa qima niminoo qinau. Innee maa faasaannara iriaqa. Innee karabusakiqari maa faasaanna Yaaweefa narí afeekannoo nifiqee anunara innooqee mari pauraqana aqira bereeta sia naaqa.
EXO 13:4 Innee maqee Abiba quqoona indaaruqaa faasaana marifaqa Isipa maqa maaqa quqasee ani mariafanoo.
EXO 13:5 Yaaweefa inni nikeeku nikaaku faqa oori kandamasee qima afeekaika masee Kannaana maqa maaqa faqa Heeta maqa maaqa faqa Amoora maqa maaqa faqa Hifita maqa maaqa faqa Yeebusa maqa maaqa faqa misa maqa maaqa inni nimiraree qinau. Mifa inni nifiqeenoo ainoo faqaa maqa ainaina rairaa imariqoo munu sainaqa innee aiqama aukuana indaaruqaa quqoonasaa maa oomaqana sakasee naidaqa asasiaqa.
EXO 13:6 Dinni taikasee dinni ani qaara qanda marasee 7 faasaana innooqee mari pauraqana sia aqira bereeta naaqa. Innee miqimmaseeqa naidaqa mi 7 faasaanafa taikainaqa miqoo innee Yaaweenara uriqarara fee qimasee firaa oomaqa sakasee naaqa.
EXO 13:7 Dinni qisauku taikasee dinni ani qaara qanda marasee 7 faasaana innooqee mari pauraqana sia aqira bereeta kai naaqa. Mi kamuqoo inni maaqaki faqa inni maqa maaqaki faqa innooqee mari pauraqafa faqa innooqee mari pauraqana aqira bereeta faqa sia uqanna mariani.
EXO 13:8 Mi oomaqana nainna kari inneeqa faiqi namu maaqi qimasee qimannimiaqa. Maasa Isipa maqa maaqakinaana Yaaweefa nifiqee anunara maa oomaqana sakasee naidaqee qiaqa.
EXO 13:9 Mooseefa kafaa Isaraee maqannaa qimannimidanoo qinau. Maa oomaqana narafa inni naaqoo auqaannoo. Nisaukuki sanda rumbeera foora faqa niqinaaqa rumbeera foora inoo maridanoo, mifa inni naaqoo auqainaqa innee Yaaweena sandufa qirana faqa mina ufa asaana rumasee irirana faqa naaqoo auqaannoo. Yaaweefa narí afeekannoo inni Isipa maqa maaqaindaraana nifiqee anunara miqiaqa.
EXO 13:10 Aiqama aukuanaki maa faasaanna maa oomaqana sakasee naidaqa asasiaqa.
EXO 13:11 Yaaweefa ooqai inni faqa inni nikeeku nikaaku faqa nimirara qima afeekaikammasee Kannaana maqa maaqa nimianauree qimaqoonnai nifiqee fuannoo.
EXO 13:12 Mifa inni mi maqana niminaqa innee ooqa faiqi akoonaiqiuqa Yaaweena amiaqa. Aiqama aandau ooqasaa maqarana akoonauqa Yaaweenaindi mariani.
EXO 13:13 Doonki ooqasaa maqarana aanaaqi minisee sipsipa aanaaqi moodaa maraseeqa doonki aanaaqi amaaqa maqasaifanoo doonki aanaaqi kaqi mariannoo. Innee sia moo aandaunnai doonki aanaaqi amaaqa maqaani qimasee doonki aanaaqiuqa ninuka qumaree kuridiaqa. Innee inneeqa ooqa faiqiuqa faqa Yaaweenaindikinoo marina kafaa inneeqa feefauriaqa.
EXO 13:14 Kasooqaqee inni faiqi namu mi suqanara oosannara inni iraifaqa innee maaqi qimasee qimannimiaqa. Yaaweefa narí firaa afeekannoo maasa Isipa maqa maaqai rumbaranakinaana qifiqee aninau maqi qiaqa.
EXO 13:15 Faraoofa kaukaata qimasee sia maasa idukiraree qufanoo Yaaweefa ooqa faiqiuqa akoonaiqiuqa Isipa maqa maaqakinaana aiqama narinau. Aiqama aandau akoona ooqasaa maqaranauqa faqa narinau. Minara maasa aiqama ooqasaa maqara aandau Yaaweena tatufirana suqa amiseeqa nári faiqi namu kafaa maraidaqa.
EXO 13:16 Maa oomaqana narafa maasa daaqoo auqaannoo. Nisauku sanda rumbeera foora faqa niqinaaqa rumbeera foora inoo maridanoo, mifa maasa daaqoo auqainaqa Yaaweefa maasa Isipa maqa maaqaindaraana narí firaa afeekannoo nifiqee anunara irianaura.
EXO 13:17 Faraoofa Isaraee maqannaa idukusoofaqa fimarufanoo Anutufa Firistianni qusa aatata sia nifiqee finau. Isaraee maqannaasa Firistia maqannaasa faqa rakiqa anirandee kaifaa Isipa maqa maaqai fifoo qimaseenoo nifiqee moo aatata finau.
EXO 13:18 Minara iriseenoo Anutufa misa nifiqeenoo aadana maqa maaqai fiquinoo taatuqee nammari fimarunnai nifiqee fiquinau. Fidaqa Isaraee maqannaasa rakira ainaina deedaqa muqirausa fiqau.
EXO 13:19 Ooqai Yooseefaafa kaqi maridanoo maaqi qimaseenoo Isaraee maqannaasara qufaqa noori kandamasee mina amudaani maree firara qima afeekaikiqau. Yooseefaafa maaqi qimasee qimanniminau. Kasooqaqee Anutufa inni nifiqee finaqa innee qini qimudaani faqa maa maqusanakinaana maree fuaqa. Mooseefa minara iriseenoo Yooseefaana amudaani faqa mareenoo finau.
EXO 13:20 Isaraee maqannaasa Sakoota maqusakiqari fifiufaqa aadana maqa maaqa atinni Eetama maqusai oonuree miqoo uiqaana maqauqa usakasee faiqaqau.
EXO 13:21 Yaaweefa faasaana oonnamuki marufanoo oonamu fannoo nifiqee fimarinau. Eendaki mifa idauruki marufanoo idauru fannoo kaaqa qamannimaqee marufaqa eendaki faqa faasaana faqa kaqi kai fimariqau.
EXO 13:22 Aiqama faasaana oonnamu misa noorinni fimarinau. Aiqama eendaki idauru faqa miqikai imarinau.
EXO 14:1 Yaaweefa Mooseena qimaminoo qinau.
EXO 14:2 Anee Isaraee maqannaasa qimanniminaqa misa oonurandee quandaki Piqaqiroota maqusa oorinni Mikadoora maqusa dinni taatuqee ooruku nammari dinni mina qambaana Baa Seefoona maqusa aaqa uiqaana maqauqa usakaaqa.
EXO 14:3 Faraoofa maaqi qimasee iriannoo, Isaraee maqannaasa aadana maqa maaqaki firanara rufiqaidaqa maqa maaqaki oonuree aniree idammiaafoo qiannoo.
EXO 14:4 Qinee Yaaweesa kaukaata qira irirana Faraoona amiananoo mifa inni ninaaqiana nifaqee fuannoo. Qinee Faraoona faqa mina rakira fasiqauqa faqa urinnaaqararanannai firaa duqu maraanaura. Miqimmasaanaqa Isipa maqannaasa qini Yaaweesara irifaranoo. Miqi qimasoofaqa Isaraee maqannaasa Yaaweena ufa mau fiqa anirandee fiqau.
EXO 14:5 Isipa maqannaa karaambaiqa Faraoofa narí ainainiranasaa rakisirausa faqa Isaraee maqannaa quqasee funara kaifaa oonu mafi irufanoo sia andeeqoofanoo qinau. Maasa nana furufaree qimarunaqee Isaraee maqannaasa idukuaki quqasee fidaqee. Maasa Isaraee maqannaasa quqasaafaqa fuafanoo yafee maasa ainainira faiqi kiannoo fee.
EXO 14:6 Miqi qimasoofanoo Faraoofa narí qoosa rarisee maru rakira karana faqa narí rakira fasiqauqa faqa deedaqinau.
EXO 14:7 Faraoofa qoosa rarisee maru rakira karausa amiqiranauqa kai sikis handareeta 600 faqa Isipa maqa maaqaki maru qoosa karausa faqa minasaa rakisi marusa faqa mara quqasoofaqa Isaraee maqannaasa nifaqee fiqau.
EXO 14:8 Yaaweefa kaukaataqira irirana Faraoona Isipa maqannaa uriqararana amufanoo Isaraee maqannaasa idukuakiqa fidaqa nasuriqa fimarufanoo Faraoofa nifaqee finau.
EXO 14:9 Isipa maqannaa sudiauqa nariqa qoosauqa faqa nári qoosa rarisee maru karausa faqa daraiwaauqa faqa Isaraee maqannaasa nifaqeeqa Taatuqee ooruku nammari aaqa Piqaqiroota maqusa dinni Baaraseefoona maqusa dinni qambaana uiqaana maqa usakasee marufaqa oonu paquriqau.
EXO 14:10 Oonuroofaqa Isaraee maqannaasa Faraoona faqa mina rakira fasiqauqa faqa niqafamaseeqa tautumaseeqa rufiaidaqa Yaaweefa dadaaqianifeera faaqariqau.
EXO 14:11 Faaqaridaqa Mooseena qimamiqa qiqau. Isipa maqasaa madika sia amanaikifanee anee maasa qifiqeenanee maa aadana maqa maaqanaki kuquaneera aninanee. Anee maasa Isipa maqa maaqakinaana qifiqee anianafa quandafina qafaa.
EXO 14:12 Ooqai maasa ani ufa qimamiqiafana maasa Isipa maqa maaqaki kaqi maridaqa maa ainainafa kambiqaannoo fee qiqiafana. Maasa ani qimamiqiafana saina maasa kaqi Isipa maqannaasa ainainira faiqi kiqa marianee qiqiafana. Miqoo maridaqa misa ainainira faiqikirafa amiqirafa mariqini anee maa aadana maqa maaqanai fifau qifiqee minisaanaqa kuquanaura.
EXO 14:13 Mooseefa misa ufa iriseenoo qimanniminoo qinau. Innee sia rufiaaqa, kaqi nimatautasee maridaqa Yaaweefa innee asumu mariaqeera itita nimaqainaqa qafeefaranoo. Maqee innee Isipa maqannaa amiqimasee nindafaaqa. Innee maaqooqari sia kafaa nindafeefaranoo.
EXO 14:14 Yaaweefa inni rakirana nimaaqa maqa finoo misa saimbaqa rakuannoo. Miqinaqa innee sia moo ainaina auqaaqa, kaqi kai mariaqa.
EXO 14:15 Miqi qimasoofanoo Yaaweefa Mooseena qimaminau. Anee nanaree qiniara dadaaqiannee qimasee faaqaridanee. Anee Isaraee maqannaasa qimanniminaqa noori munduqaannai fuaqa.
EXO 14:16 Anee aneenna saunu nammari amummaqa uqeeraa. Miqimma sainaqa nammari raina finaqa Isaraee maqannaaa amana aadana maqasaa taqaaqa.
EXO 14:17 Qinee Yaaweesa Isipa maqannaasara qianaqa kaaqa firaaqoo kaukaataqira irirana marasee Isaraee maqanna ninaaqianna nifaqee fifaranoo. Qinee Faraoona faqa mina sundiauqa faqa mina qoosa rarisee mari karausa faqa daraiwaauqa faqa rakirana urinnaaqararanannai firaa duqu maraanaura.
EXO 14:18 Qinee misa urinnaaqarama saanaqa misa qiniara Yaawee fee qifaranoo.
EXO 14:19 Anutuna qangiroo fannoo Isaraee maqannaasa noorinni mariufa aiqareenoo ninaaqiannai finau. Oonnamu faqa miqi kai inoo aiqaree ninaaqiannai finau.
EXO 14:20 Mi oonnamufa Isipa maqannaasa dinni Isaraee maqannaasa dinni qambaana marinau. Mi oonamufa Isipa maqannaasa asukuna nimisee Isaraee maqannaa kaaqa qamannimaqanau. Miqinoo marufaqa mi eendanaki Isipa maqannaasa faqa Isaraee maqannaasa faqa sia narí aaqa narí aaqa fiqau.
EXO 14:21 Mooseefa asauku nammari amummaqa uqeerasoofanoo Yaaweefa suani afu urimarunnaindaraa afeeka ufainnoo ooruku nammari rainanau. Mi ufaifa mi eendanaki uqidanoo mariufanoo ooruku nammari rainasoofanoo aadana maqa koorooinau. Miqimmafufanoo nammari rainanau.
EXO 14:22 Miqimmafufaqa Isaraee maqannaasa ooruku nammari qambaana aadana maqasaa taqaqau. Dinni dinni nammari fannoo safasara foora inoo marufaqa fiqau.
EXO 14:23 Isipa maqannaasa misa niqafamaseeqa misa ninaaqianna nifaqeeqa nammari qambaanai ooquraqau. Isipa maqannaasa nariqa qoosauqa faqa nariqa qoosa rarisee maru karausa faqa nariqa daraiwaauqa faqa Isaraee maaqanaasa nifaqee nammariki ooqu raqau.
EXO 14:24 Iaqarooka Yaaweefa oonnamukiqari faqa idaurukiqari faqa Isipa maqannaasa nindafamaseenoo maparaa irana niminau.
EXO 14:25 Yaaweefa qufanoo qoosa rarisee maru karausa misa niku utusamafufaqa firara firaaqoo anuqi mariqau. Miqufaqa Isipa maqannaasa qiqau. Yaaweefa Isaraee maqannaasa saaroo qinoo maasa daridanoo. Maraifaqa quqasee fua.
EXO 14:26 Miqimasoofanoo Yaaweefa Mooseena qimaminau. Aneenna asauku nammari amummaqa uqeerasainanoo kafaa nammari fannoo quminoo Isipa maqannaa nári qoosa rarisee maru karausa faqa daraiwaauqa faqa rafaaqa fuani.
EXO 14:27 Mooseefa iriseenoo asauku nammari amummaqa uqeeranau. Miqimma soofanoo iaqarooka nammari fannoo kafaa oonurandeenoo ooqai mariundee kai mafinau. Isipa maqannaa sandeeqa fuaneera qufanoo Yaaweefa misa mareeqee nammariki aqinau.
EXO 14:28 Nammari fannoo kafaa quminoo Faraoona rakira fasiqauqa faqa qoosa kara faqa daraiwaauqa faqa aiqama Isaraee maqannaasa nifaqee nammariki ooquroosa aiqama rafaaqa finau. Sia uqanna moodaafa kaqi marinau.
EXO 14:29 Isaraee maqannaa ooruku nammari qambaana aadana maqasaa taqaqau. Nammari dinni dinni safasara foora inoo marufaqa fiqau.
EXO 14:30 Mi faasaanna Yaaweefa Isaraee maqannaasa Isipa maqannaasa nisaukukinaana maranau. Marasoofaqa Isaraee maqannaasa quandafi niqafoofaqa Isipa maqannaa nammari afaiqara kuqiqeeqee mariqau.
EXO 14:31 Isaraee maqannaasa Yaaweena moo ainaina afeeka eeraarirana rakiranaki Isipa maqannaasa urinnaaqaroonara irufanoo naaquqoofaqa nári saqarikirana Yaaweenasaa faqa mina ainainira faiqi Mooseenasaa faqa mundiqau.
EXO 15:1 Mikari Mooseefa faqa Isaraee maqannaa faqa maaqi qimasee Yaaweena amooqira idi raqau. Qinee Yaaweenara idi raanauranoo. Mifa rakiranaki uriqarainara miqianaura. Mifa qoosauqa faqa qoosasaa marusa faqa ooruku nammariki mara aqinara idi raanaura.
EXO 15:2 Yaaweefa qini afeeka ititarafa maridanoo. Mifa qini asumu maroofa maridanoo. Mifa qini Anutufa marifaqa qinee mina amooqianaura. Qini qikoona Anutunafa marifaqa qinee mina afeekara idi raanaura.
EXO 15:3 Yaaweefa afeeka rakira fasiqa maridanoo. Mina auqu Yaaweefa maridanoo.
EXO 15:4 Mifa Isipa maqanna sundiauqa faqa misa qoosa karauqa faqa rafusu ooruku nammariki aqinoo. Mina uriqarara sundiauqa Taatuqee Ooruku Nammariki ukuqneea.
EXO 15:5 Ooruku nammari faruma fannoo misa rafaaqa fusaifaqa misa ooniara foora meemaqoo maqasaa ooqu maridaqa.
EXO 15:6 Oo Yaawee ani asauku uqannai asauku fannoo naaquqara afeeka maridanoo. Mi asaukufa namuqaa naruseenoo utitiqeenoo.
EXO 15:7 Aneenna firaa uriqararanannai aneenna namuqaa rafusu aquananoo. Ani aanoo qirafa ida dudaaqasaaqari qeera foora mannimaqaananoo.
EXO 15:8 Anee ooruku nammari fuaqasaananoo nammari mandi mareenoo aaqanara foora ooru finoo. Nammari dinni dinni innooqa maree safasara foora ooru finoo. Nammari dinni dinni raina fufanoo maqa meemaqoo afeekaika minoo.
EXO 15:9 Namuqaauqa maaqi qiqau. Maasa misa nifaqasee qumaraanauranoo. Misa qumaraseeqa misa amiqira ainaina maasa didimarina aiqama maraanaura. Maasa qeeqa rakira paipanannai naruseeqa misa aiqama ainaina mararee qia.
EXO 15:10 Miqi qiafana anee Yaaweefa moodaannai aidoo fuaqasaananoo Isipa maqannaasa ukuqneea. Miqimma saifaqa misa ooniara foora firaa difukunaki ooqu fia.
EXO 15:11 Yaawee, yafee unna anutusakiqari ani fooqaafa maridanoo fee. Sia moo fannoo. Yafee ani amana maridanoo kaaqa naaquqara andeeqarafa maridanoo fee. Yafee faiqí sia amana auqaaqaa ira ainaina faqa afeeka ainaina anee imarianandee masee auqaannoo fee.
EXO 15:12 Aneenna asauku uqannannai uqeera saananoo maqa fannoo namuqaa nambiqeenoo.
EXO 15:13 Aneenna qima afeekaikiranasaa mapukusee maridana faiqí anaasee mandainainaki mariusa nifiqa maree fimariananoo. Aneenna afeekannoo misa indaarunni kamma nimaqa maree aneenna naaquqara andeeqara maqasaa quqanni seennaranoo.
EXO 15:14 Anaamuru minara irifanoo naaquqeenoo naindiri raannoo, Firistia maqannaasa iriafanoo maparaairafa misa qumareenoo.
EXO 15:15 Idooma maqannaa karaambaiqauqa faqa iriafanoo naaquqeenoo. Mooapa maqannaa afeeka fasiqauqa faqa naindiri raidanoo. Kannaana maqannaasa afeeka faqa nammari kidanoo.
EXO 15:16 Maparaa irafa faqa firaa rufiarafa faqa misaki maridanoo. Misa ani Yaaweena afeeka qafamasee naaquqaifaqa kaqi muquriqa mariafaqa ani faiqí anaasee karabusakinaana iduku saanausa misa nifusaa fiqaraidaqa.
EXO 15:17 Anee misa nifiqa maree aneenna aaqanasaa munuseenana asumu ainainara foora ummaqu saananoo. Anee Yaaweefa aneennara utaaqama qaanna maqusanaki munusaananoo. Amaana maqa aneenna usakaqaanna maqusanaki munusaananoo.
EXO 15:18 Anee Yaaweefa naaru naaru uriqarara karaambaiqa marinnaranoo.
EXO 15:19 Isaraee maqannaasa ooruku nammari qambaana aadana maqasaa taqaqau. Fitaqafufaqa Isipa maqannaasa qoosa kara faqa nári qoosauqa faqa nári daraiwaauqa faqa mi ooruku nammarinaki ooqu roofanoo Yaaweefa kaifaa nammariara qufanoo quminoo misa rafaaqa finau.
EXO 15:20 Aaroona anasaafa Miriama nammarifa Anutuna tamummaqara anaasee marufa marinau. Isipa maqannaasa nammariki kuqutaika fufanoo dukaanaa qumareenoo aridanoo idi ranau. Anaasee aiqama qafamaseeqa nári dukaanaa maree mina faqa oonuree aridaqa niqoori raqee mariqau.
EXO 15:21 Miriamma nammarifa maaqi qimasee idi ranau. Yaaweenara idi raaqa. Mifa rakirana firaaqoo uraaqareenoo, mifa qoosauqa faqa qoosasaa nimariasa faqa ooruku nammariki rafusu aqinoo.
EXO 15:22 Mooseefa Isaraee maqannaa taatuqee ooruku nammarindaraana nifiqeenoo Suraa aadana maqa maaqaki quqanau. Qaaramoo faasaanasaa aadana maqa maaqaki fidaqa sia nammari paquriqau.
EXO 15:23 Misa Maraa maqa maaqaki oonureeqa nammari moo paqurimasee noofanoo suka narufaqa sia naqau. Minara mi maqa maaqana auqu Maraa fee qiqau. Mi auquna oosana sukaqee mari fee qiqau.
EXO 15:24 Isaraee maqannaasa Mooseena aanoo qimamaqaidaqa qiqau. Maasa nana nammari fee naanauree.
EXO 15:25 Mooseefa iriseenoo afeekaika maseenoo Yaaweenara innaaru qinau. Innaaru qufanoo Yaaweefa Mooseena saqari moo uqafiqoofanoo Mooseefa mi saqarina nammariki aqusoofanoo nammari amiqinau. Miqoo Yaaweefa narí sanda ufa mi mau fuaqeera nimiseenoo miqoo misa nimana masee qafanau.
EXO 15:26 Yaaweefa qimanniminoo qinau. Innee qini ufa qaidusiqa qinee andeeqara ainainee qimarunnana auqeeqa kafaa qini sanda ufa mau fifaqa qinee sia manda aupurarana Isipa maqannaa nimiafannandee iqa inni nimianaura. Qinee Yaaweesa inni aurirana taikannisee marunausa maridaqa.
EXO 15:27 Miqooqari Isaraee maqannaasa fifiiufaqa Eerimma maqa maaqaki oonuraqau. Miqoo qisaukuqara taikasee qikunni ooqu qaara marasee 12 nammari maqakiqari ururee maruna faqa fasaafana fooqaa ira saqari moomoo 70 marinau. Miqoo nammari afainni misa uiqaana maqa usakasee mariqau.
EXO 16:1 Isaraee maqannaasa Isipa maqa maaqaindari quqasee anuqooqari inaaqiannaa quqoona 15 faasaanasaa Sinai aaqana dinni Eerimma maqa maaqa dinni qambaana Sinnaa aadana maqa maaqaki oonuraqau.
EXO 16:2 Misa aiqamausa aadana maqa maaqai funara Mooseesa Aaroonasa kaukaata qimannimaqasee qiqau.
EXO 16:3 Maasa Isipa maqa maaqaki mariafannaqoo Yaaweefa daruaqaana. Miqoo maasa maridaqa aandau faqa akaqa narana maasa didi maruna maasa qimana kai neemariqiafana. Inneeqara miqooqaraana maasa qifiqeeqeeqa maa aadana maqa maaqanaki quqasaafaqa aandaroo darinaqa kuqu taikaanaura.
EXO 16:4 Yaaweefa misa ufa iriseenoo Mooseena qimaminoo qinau. Qinee maqee inni aiqamausa naranara qiananoo innaarunaindari aakuara foora aqufina mara neefaranoo. Faasaambaasaana narana quqasaanaqa faiqí anaasee raudamafiqa moodaa faasaana amanakai maree marifaranoo. Qinee miqimmasee misa nimanamasee qafaanaura. Misa qini ufa irifaree sia fee irifaree.
EXO 16:5 Moodaannai qisauku taikasee dinni ani moodaa marasee 6 faasaana qaara eenda narana amanasaa mara deedaqamma quqaaqa.
EXO 16:6 Mooseesa Aaroonasa Isaraee maqannaa aiqama suqusee qimannimiqa qiqau. Maqee eenee marinaqa innee Yaaweenara Isipa maqa maaqaindari nifiqee anunara irifaranoo.
EXO 16:7 Kananaana innee Yaaweefa maasaki maridanoo daroo daraa ida kaaqa qeemarina qafeefaranoo. Innee minara aanoo qimariana doo mifa irinoo. Innee sia maaqanda rau qimariafanoo fau. Maaqanda faiqí faiqi kai maridaqa mina naakapurufa mau fidaqa mina kai qimannimidaqa.
EXO 16:8 Mooseefa kafaa qimanniminoo qinau. Eendinanoo Yaaweefa aandau niminaqa neefaranoo. Kananaana bereeta fooqaana inni nimana kai nimiannoo. Innee mina firaaqoo aanoo qimarianara miqiannoo. Innee maasara aanoo qimariana sia maasarau miqi mariafanoo, Yaaweenara aanoo qimariafanoo.
EXO 16:9 Mooseefa Aaroona qimaminoo qinau. Anee Isaraee maqannaa aiqama qima niminaqa Yaaweena oorinni ani kikiqiaqa. Mifa misa aanooqira ufa irinara miqiaqa.
EXO 16:10 Aaroofa faiqí anaasee ufa qimannimi marufaqa quandafi aadana maqa maaqai qafoofanoo oonamuki Yaaweena daroo daraa ira kaaqa qarafa koorooinau.
EXO 16:11 Yaaweefa Mooseena qimaminoo qinau.
EXO 16:12 Qinee Isaraee maqannaa aanoo qira ufa doo iriqa. Maaqi qimasee qimannimia fafaa eendinoo mammandi marinaqa misa aandau nimianaura duna kananaana uqanna bereeta fooqaana nári narana nimana kai nimianaura. Nimisaanaqa innee qini Yaaweesa inneeqa Anutusara irifaranoo.
EXO 16:13 Miqi qimasoofanoo eendi marufanoo afidauqa moomoo qaqamaraidaqa anirameeqee uiqaana maqusa amanaikiqau. Kananaana qififaramu uiqaana maqa aiqama fiqu fiqu inoo marinau.
EXO 16:14 Qififaramu taikafufanoo adamanna ainaina kaqikaafauqa aadana maqa mau marinau. Mi ainainafa pupusamuara foora kaqikaafauqa marinau.
EXO 16:15 Isaraee maqannaasa mina qafamaseeqa mina oosanara randeeqa narí qimami narí qimamiqa qiqau. Maana nana ainaina fee maridanoo fee qiqau. Miqi qufanoo Mooseefa maaqi qimasee qimanniminau. Yaaweefa narana naaqeera nimidannoo.
EXO 16:16 Yaaweefa maaqi qimasee qimanniminau. Innee inneeqa faiqi anaasee faqa inneeqa nimana kai maraaqa. Inneeqa maaqaki mariasa nimana nimana kai susufinna qumbiqa quqaaqa.
EXO 16:17 Isaraee maqannaa irisee miqimmiqau. Akaqausa moomoo maroofaqa akaqausa qoodaa maraqau.
EXO 16:18 Aiqamausa suqusee narí amani narí amani masee qafoofanoo akaqausa moomoo suqufanoo akaqausa oodaa suqiqau. Moomoo suqusa namasoofanoo nimuaqumminau. Oodaa suqusa misa faqa namasoofanoo nimuaqu kaimminau. Aiqamausa nári nimana kai suqiqau.
EXO 16:19 Mooseefa qimanniminoo qinau. Sia ataraasa duna nararee qimasee quqaaqa. Aiqama naaqa.
EXO 16:20 Miqi qufaqa akaqausa Mooseena ufa rukiasee duna kananaana nararee qimasee quqasoofanoo putaa undufanoo qimi kai qumbiqoofanoo Mooseefa aranaqoofanoo aanoomannimaqanau.
EXO 16:21 Aiqama kananaana nári nimana kai suqusaida neemariqau. Kaqi mafisoofauqa suani urureenoo ididiufanoo nammari nammarimma taikanau.
EXO 16:22 Dinni ani moodaa marasee 6 faasaanasaa qaara kari suqarana amana kai maraqau. Miqi masoofaqa Isaraee maqannaasa uriqararausa aniree mi ainainnara Mooseena qimamiqau.
EXO 16:23 Mooseefa iriseenoo moo ufa maaqi qimasee qimanniminau. Duna Yaaweena naaquqara idooara faasaana mariannoo. Mi faasaanna minaindi mariannoo. Innee nana ainainee suqararee qinnana maqee suqaaqa. Kaqi marinna narana aaduma quqaqaifanoo marinaqa duna suqa naaqa.
EXO 16:24 Misa Mooseefa qimannimundee iqa dunaindi kaqi maaqaki quqaqau. Iqaqoofaqa qafoofanoo sia putaa inoo qimi marinau amiqinoo marinau.
EXO 16:25 Mooseefa minara qimanniminoo qinau. Doo maqee mina naaqa. Maqee Sabata idooara faasaana Yaaweenaindi maridanoo. Minara innee fuka narana uiqaana maqusa naambeeaqara mararafa sia mariannoo.
EXO 16:26 Innee qisauku dinni taikasee dinni ani moodaa marasee 6 faasaana narana suqu quqaaqa. Qisauku dinni taikasee dinni ani qaara marasee 7 faasaana idooara faasaana marinaqa sia miqoo narana mariannoo.
EXO 16:27 Qisauku dinni taikasee dinni ani qaara marasee 7 faasaanasaa akaqausa narana suquanee qimasee oonu qafoofanoo sia marinau.
EXO 16:28 Anutufa mina qafamasee Mooseena qimaminau. Innee kisaaqasaa fee qini ufa rukiaidaqa sia qini sanda ufa afaqeefaree.
EXO 16:29 Innee iriaqa. Qinee Yaaweesa idooara faasaana nimiqa. Miqunnanara qinee dinni taikasee dinni ani moodaa marasee 6 faasaanasaa qinee qaara faasaana narana amana kai nimianaura. Aiqamausa mi faasaanna inneeqa mariaqoo kai mariaqa, sia kasiaqa.
EXO 16:30 Faiqí anaasee minara iriseeqa dinni ani qaara marasee 7 faasaanaikufaqa sia ainaini mariqau.
EXO 16:31 Isaraee maqannaasa mi narannara mannaa fee qimariqau. Mifa ooroorana qaqama fooqaafa eekara arirafa marinau. Mina namasoofanoo mina adiafaa irafa ookasaasa anoonannai auqira biskitara foora imarinau.
EXO 16:32 Mooseefa Yaaweena ufa iriseenoo maaqi qimasee qimanniminau. Yaaweefa inniara maaqi qidanoo, qinee mannaa nimmunnana akaqana afeeki mara quqaqai marinaqa inneeqa ninaiqimara nikeeku nikaaku uqannifiqaidaqa maaqi qimasee qimannimiaqa. Yaaweefa Isipa maqasaaqari maasa aadana maqasaa nifiqee anireenoo qimufaqa naafannanee qimasee uqannifiqaaqa.
EXO 16:33 Miqi qimasee qimannimiseenoo Mooseefa Aaroona qimaminau. Anee qafee moo mara maree mannaa suqeeqee Anutuna afusaa quqasainaqa kasooaqee kambiqainausa qafaaqa.
EXO 16:34 Yaaweefa Mooseena qimamundee inoo Aaroonafa mi naranna mara mareenoo moodaanaki kira bookisa aaqa quqasoofanoo marinau.
EXO 16:35 Isaraee maqannaasa 40 aukuanaki mannaa neemariqau. Mi naranna naqa fifiufaqa Kannaana maqasaa nariqa mariraree quqoo oonuraqau.
EXO 16:36 Mikari misa ummaara amana masee qafee marufa qaaraqanda marinau. Moo fannoo moodaa kaqikaa susufinna amana marinau. Moo fannoo qisaukuqara 10 kaqikaa susufinauqa amana marinau.
EXO 17:1 Yaaweena ufa mau fiqa Isaraee maqannaasa Sinnaa aadana maqa maaqakiqari quqasee fiqau. Fidaqa misa maqusa maqusa faiqaqa fimariqau. Misa Reefidimma maqa maaqaki nammari sia maruqoo oonu mariqau.
EXO 17:2 Sia marufaqa misa Mooseenara kaukaata qidaqa qiqau. Anee nammari nimina naanee qufanoo Mooseefa qimanniminoo qinau. Innee nanaree qini aanoo qima qimaqaidee. Nanaree innee Yaaweena amanammasee qafaidee.
EXO 17:3 Isaraee maqannaasa nammariara kaaqa nidufaqa Mooseena kaqi kai aanoo qimamaqee mariqau. Misa maaqi qiqau. Nanaree anee maasa Isipa maqa maaqaindaraana qifiqee mini saananoo fee nammariara didirafa maasa faqa maasa faiqi namu faqa maasa aandauqa namufaqa kuqa daruannoo fee.
EXO 17:4 Miqi qufanoo Mooseefa afeekai kammaseenoo Yaaweenara innaaru qidanoo qinau. Oo Yaawee qinee maa fasiqa anaaseesa naqifeemma nimaqaanauree. Misa qusasaa oonisamu qini darifaranoo.
EXO 17:5 Yaaweefa Mooseena qimaminoo qinau. Moosee anee Isaraee maqannaasa uriqararausa nifiqee indaaru fua. Ooqai anee Niru nammari arunna saununa faqa maree fua.
EXO 17:6 Qinee Sinai aaqanasaa inni noorinni oonisaa kikiqiqa marianaura. Aneenna saunu samu ooni arusainanoo nammari minakiqari quminaqa faiqí anaasee naaqa. Miqi qufanoo Mooseefa Isaraee maqanna uriqararausa nifusaa miqimandoofanoo nammari quminau.
EXO 17:7 Misa mi maqa maaqana auqu qaara auqu raqau. Masaa faqa Meeribaa faqee qiqau. Mi auqu qanda oosana amana masee qafarafa faqa aanoo qirafa faqee qiqau. Aanoo qidaqa qiqau. Yaaweefa maasa faqa maridanoo fee sia fee maridanoo fee. Misa mi ufanannai Yaaweena amana masee qafaqau.
EXO 17:8 Isaraee maqannaa Reefidimma maqa maaqai marufaqa Amareekana aiku asauku anireeqa misa nariqau.
EXO 17:9 Mooseefa misa nidafamasee Yoosuaana qimaminoo qinau. Anee akaqa fasiqauqa mara quqasainaqa duna kananaana Amareekana aiku asauku faqa oonu rakuaqa. Qinee aaqanasaa Anutufa marana nuannee qimasee qimaqimu saununa uqusee kikiqiqa marianaura.
EXO 17:10 Yoosuaafa eedoo qimasee kananaana iqaqoofanoo doo Amareekana aiku asauku faqa rakirara nifiqee finau. Fufaqa Mooseefa faqa Aaroonafa faqa Hurafa faqa aaqanai ooru fiqau.
EXO 17:11 Mooseefa aaqanasaa kikiqamambufanoo asaukuqara uqeerasoofaqa Isaraee maqannaasa rakiranaki afeekaikiqau. Kafaa narí asauku muqufisoofaqa Amareekana aiku asauku rakiranaki afeekaikiqau.
EXO 17:12 Mooseena asauku anuda qoofaqa Aaroonasa Hurasa ooni ufiqisoofanoo Mooseefa minasaa ooqu marifufanoo Aaroonasa Hurasa Mooseena asaukuqara uaqeeufanoo kisaaqasaa marufanoo suani keeqanau.
EXO 17:13 Miqimmasee uaqeeunara Yoosuaafa faqa narí rakira fasiqauqa faqa Amareekana aiku asauku amiqimmasee naruqaraasiqau.
EXO 17:14 Miqimmasoofanoo Yaaweefa Mooseena qimaminau. Anee papiqaki maa rakiranara akararumma quqaa. Miqinoo marinaqa kaqi iriqa nuaqa. Yoosuaana qimamia. Qinee Yaaweesa Amareekana aiku asauku kuridi taikasaanaura.
EXO 17:15 Rakirafa taikafufanoo Mooseefa ooniuqa qumareenoo mi maqa maaqanaki qainda auquseenoo mi qaindana auqureenoo Yaaweefa qini rakira saqari fee qimasee mi qaindana auqu ranau.
EXO 17:16 Mooseefa kafaa qinau. Innee Yaaweena rakira saqari uqeeraaqa. Yaaweefa kaqi kai Amareekana aiku asauku faqa naaruara rakida mariannoo.
EXO 18:1 Yeetaroofa Midianna maqannaasa aanaiqikirafa Mooseena airaamaku marinau. Aiqama ainaina Anutufa Mooseena faqa Isaraee maqannaasa faqa dadaaqi marunara faqa Isipa maqa maaqakinaana nifiqee anunara faqa Yeetaroofa irinau.
EXO 18:2 Iriseenoo mifa faqa Mooseena anaaqa Sipooraa nammarina maqusai quqasee anuna afiqee aninau.
EXO 18:3 Mina faiqiqara Keerasoommana faqa Eerieesarana faqa nifiqee aninau. Mooseefa maaqi qinau. Qinee aanaamuru maqa maaqaki asaqiraafai ani maridee qimasee narí amaaku auqureenoo Keerasoommanee qinau.
EXO 18:4 Mooseena inaaqianaa faiqi auqu Eerieeseerafa marinau. Mina anoofa maqasoofanoo Mooseefa qinau. Qini qikoona Anutufa qini dadaaqinoo Faraoona duru feefa ookinaana qini ititaqisainaree qinoo mina auqu Eerieesaranee qinau.
EXO 18:5 Yeetaroofa Mooseena anaaqa faqa mina faiqi qara faqa nifiqeenoo aadana maqa maaqaki naaquqara aaqana aaqa Mooseefa uiqaana maqa usakasee maruqoo aniranau.
EXO 18:6 Yeetaroofa Mooseenara ufa quqaidanoo qinau. Oonuree maaqi qimasee qimamiaqa. Ani airaamaku faqa ani faiqi anaasee faqa anidammiaafoo qia.
EXO 18:7 Mooseefa mi ufana iriseenoo narí airaamaku oonu aanai paqurimaseenoo mina oorinni aqoori saunu arafufanoo mina amooqa nanau. Miqi masoofaqa nári mariranara narí iree narí iree maseeqa doo Moosena uiqaana maqaki keeqaqau.
EXO 18:8 Minaki ooru maridanoo Mooseefa narí airaamaku oosana oosana aupurarana Yaaweefa Faraoona faqa Isipa maqannaasa faqa nimiseenoo Isaraee maqannaasa maroonara qimaminau. Mifa Isaraee maqannaasa aanai anidaqa moomoo ummaara maree marufanoo Yaaweefa dadaaqunara faqa qimaminau.
EXO 18:9 Yeetaroofa mi aiqama ufana iriseenoo asasinau.
EXO 18:10 Asasammaseenoo qinau. Yaaweefa Faraoona asaukukinaana faqa Isipa maqannaasa nisaukukinaana marainara mina amooqia. Yaaweefa narí faiqí anaasee rumbarana kinaana idukunara mina amooqiaqa.
EXO 18:11 Doo maqee qinee iridaqa, Yaaweefa aiqama unna anutusa urinnaaqararafa maridanoo. Isipa maqannaasa inni mandaikamma nimaqee marufanoo inni idaaqamma nisoonannai mifa aiqama unna anutusa urinnaaqararafa maridanoo.
EXO 18:12 Miqi qimaseenoo Yeetaroofa aandau marasee aruseenoo muduka ida aiqama qama taikara tatufirana Anutuna suqa aminau. Kafaa mifa akaqa tatufirana faqa Anutuna suqa aminau. Aaroonafa faqa Isaraee maqannaa uriqararausa faqa anireeqa Mooseena airaamaku faqa Anutuna amooqidaqa mi naaquqara qoomaqana naqau.
EXO 18:13 Iaqoo kananaana Mooseefa findifinoo narí maqannaa qambaanai oonureenoo misa kootauqa irinau. Kananaana oosana arasee kootinoo fifii ufanoo eenda kai masanau.
EXO 18:14 Yeetaroofa Mooseena kadaapirirana qafamaseenoo maaqi qimaseenoo Mooseena qimaminau. Anee nanaree aneennaraa maa saikausa auqaidanee. Faiqí anaasee kananaana kootirara ani marida rakisi mariafanoo eendidanoo.
EXO 18:15 Mooseefa iriseenoo qimaminoo qinau. Qinee miqianaqa faiqí anaasee qinee unnannai aniree Anutuna aidiranara irifaranoo.
EXO 18:16 Qaara fasiqa qara ufa rainaida narí afu mau narí afu mau maseeqa qinee unnannai aniraafaqa qinee andeeqai fasiqanara maafa andeeqee maqi qimaseeqa Anutuna sanda ufa naakapaidaqa.
EXO 18:17 Yeetaroofa Mooseena qimaminoo qinau. Anee sia andeeqee mariananoo.
EXO 18:18 Anee miqidana aneenna afeeka taikainaqa maa fasiqa anaaseesa faqa miqi kai ifaranoo. Aneennaraa sia amanaiki mariananoo.
EXO 18:19 Anee maqee qini ufa iria. Qinee amiqira aakapara ufa ani amianaura. Anee irinanoo Anutufa ani faqa marida dadaaqiannoo. Anee andeeqaseenana Anutuna afusaa aanaiqikina maridana faiqí anaasee ummaara Anutuna qimami mariananoo.
EXO 18:20 Anee Anutuna sanda ufa qimannimisee andeeqara marirana oosana naamua qimasee misa ifandinna ainainara faqa qimannimia.
EXO 18:21 Qima nimiseenana anee mina amuaaqa irirana faqaa fasiqauqa mara quqasainaqa Isaraee maqannaasa uriqararausaikiqa mariaqa. Akaqausa wan tauseenna (1,000) fasiqa aanaaseesaa rakisifaqa akaqausa wan handareetasaa 100 rakisifaqa akaqausa fiftisaa 50 rakisifaqa akaqausa teennasaa 10 rakisiaqa. Misa Anutunara rufiee mariasa maridaqa misa andeeqara oosana faqaasa maridaqa sia umee raaqee munnimma maree marinausa mariaqa.
EXO 18:22 Mi fasiqausa aiqama kari faiqí anaasee koota ufa irimarinausa mariaqa. Moo afeeka ainaina firaa ainaina kambiqafinaqa maree mini ani amifana anee mina andeeqaa. Kaqikaa ainaina nári kai andeeqaaqa. Misa miqimandee ani qummaara raina maraifanoo ani afaaqa aufadaani.
EXO 18:23 Anutufa eedoo qinana qini ufa mau finana sia kudoosaapeennaranoo. Miqinaqa maa fasiqa anaaseesa aanoo qirafa taikafinaqa quqasee nimaaqa fifaranoo.
EXO 18:24 Mooseefa Yeetaroona ufa iriseenoo mi mau kai finau.
EXO 18:25 Mooseefa irirana faqaasa Isaraee maqannaasa kinaana mara quqasoofaqa uriqararausaikiqau. 1,000 fasiqasaa rakisirausa faqa 100 fasiqasaa rakisirausa faqa 50 fasiqasaa rakisirausa faqa 10 fasiqasaa rakisirausa faqa mara quqasoofaqa rakisimariqau.
EXO 18:26 Misa aiqama kari siaasara foora naaruara mariqau. Maridaqa kaqikaa kootauqa misa andeeqee mariqau. Firaa koota Moosee funnai maree fimariqau.
EXO 18:27 Miqimmasee Mooseefa Yeetaroona amandama soofanoo amaaqa finau.
EXO 19:1 Isaraee maqannaasa Isipa maqa maaqakiqari Reefidimma maqa maaqaki ani mariufaqa miqooqari qaaramoo uqoona indaaruqaa faasaanasaa Reefidimma maqa maaqaindari Sinai aadana maqa maaqai oonu mariqau. Miqoo misa Sinai aaqana aikunni uiqaana maqa usakasee mariqau.
EXO 19:3 Mooseefa miqooqari Sinai aaqanasaa Anutuna faqa ufa qiraree qimasee ooru finau. Yaaweefa aaqana saaqari Mooseena aaramaseenoo qimaminau. Anee Yakooboona aiku asauku Isaraee maqannaasa maaqi qimasee qimannimia.
EXO 19:4 Innee qini oosana qafee mariafanoo. Qinee Isipa maqannaa narunnana innee qafaafanoo. Qinee inni quqaumu aanaaqiara foora itateeqeeqa qiqoosasaa quqaseeqa uqeereeqee qeeqa marunannai quqaqaunaqa mariafanoo.
EXO 19:5 Innee qini ufa iriseeqa qini moodaanaki kira ufa mau fiqa qini faiqí anaasee marifaranoo. Aiqama maa maqa maaqafa faqa faiqí anaasee faqa qinindi kai maridaqa innee qinee qeeqara utaaqama qaunausa mariafanoo.
EXO 19:6 Innee qinindi uqanna maridaqa qini aanaiqi kirausa mariafanoo.
EXO 19:7 Mooseefa irisee ooqureenoo Isaree maqanaa uriqararausa suquseenoo aiqama Yaaweefa qimamu ufana qimanniminau.
EXO 19:8 Faiqí anaasee Yaaweena ufa iriseeqa aiqamausa moodaa kari noo raqa maree qiqau. Yaaweefa aiqama ufa qinnana maasa irianauree qiqau. Miqi qufanoo Mooseefa misa ufa iriseenoo Yaaweena qimaminau.
EXO 19:9 Yaaweefa misa ufa iriseenoo Mooseena qimaminoo qinau. Qinee amatooki arira oonnamukiqari anee iannannai qumuree ani faqa ufa qianaqa faiqí anaasee iriseeqa miqooqari ani ufara kuqaa fee qifaranoo. Miqi qimasoofanoo Mooseefa faiqí anaasee quu ufana Yaaweena qimaminau.
EXO 19:10 Qimamisoofanoo Yaaweefa kafaa Mooseena qimaminoo qinau. Anee kafaa ooquree faiqí anaasee maaqi qimasee qimannimia. Misa aiqama maqee faqa duna faqa nári qamunna nammari uqusee nári nifaaqa anukamasee qini qimooqirara deedaqiaqa.
EXO 19:11 Deeda qimarifaqa duna kaqi mari moona qinee Sinai aaqanasaa qumuraanaqa aiqama faiqí anaasee qini qiqafeefaranoo.
EXO 19:12 Anee aaqana ameemaanai fiqu fiqumma oosumma sainaqa sia faiqí anaasee mina fiaaqaraaqa. Miqimmaseenana qimanniminaqa sia aaqanai ooru fuaqa, sia uqanna mina aaqa fuaqa. Minasaa aiku rainafa kuquannoo.
EXO 19:13 Innee miqinna fasiqana sia uqanna nisaukunnai aruaqa, ooni samu fee feefannai fee kuqa aruaqa. Maa ufana faiqí faqa aandaura faqa qidaqa. Miqinna fasiqa fee aandau fee kuquannoo. Ukeena fuaqaifaqa kai faiqí anaasee aaqana aikunni ooru fuaqa.
EXO 19:14 Mooseefa aaqanaindari qumureenoo faiqí anaasee Yaaweenara deedaqa masee amooqiaqeera qimanniminau. Miqi qufaqa faiqí anaasee nariqa qamunna nammari uqiqau.
EXO 19:15 Miqi marufanoo Mooseefa qimanninau. Duna kaqi mari moona deedaqiaqa. Maqee oosana arasee sia anaasee sakasee faiqaaqa.
EXO 19:16 Qaara afuru faisoofanoo qaaramookufanoo kananaana aaqanasaa ukeena firaana fuaqarana namu faqa qamatooki kira oonnamu namu faqa aakuasaa innaarunai namu faqa ufaqa faiqí anaasee uiqaana maqaki mariusa aiqama naindiri roofaqa rufiaqau.
EXO 19:17 Mooseefa faiqí anaasee aiqama uiqaana maqakinaana nifiqeenoo Yaaweena paqurirara aaqana aikunni oonu kikiqino marinau.
EXO 19:18 Yaaweefa idauruki qari Sinai aaqanasaa qumu marunara ida muna fannoo aaqana aiqama rafaaqafinoo marinau. Mi munafa firaa ida munara foora ooru fufaqa faiqí anaasee qafoofanoo firaaqoo naindiri ranau.
EXO 19:19 Ukeena feendundaanai qimarinau. Miqi qimarufanoo Mooseefa Yaaweena qimamufanoo Yaaweefa kafaa innaarunai darara qiranakiqari narí qimaminau.
EXO 19:20 Yaaweefa Sinai aaqanasaa qumureenoo Mooseena aaroofanoo oorufinau.
EXO 19:21 Ooru roofanoo Yaaweefa Mooseena qimaminoo qinau. Anee ooquree faiqí anaasee qimanniminaqa sia oosu aiaaqaree qini qiqafarara aniaqa. Misa miqiqa moomoosa kuqifaranoo.
EXO 19:22 Aanaiqikirausa faqa qini daaqa aniani qimasee anukamafiqa aniaqa. Sia miqifaqa misa aupurarana nimianaura.
EXO 19:23 Mooseefa Yaaweena ufa iriseenoo qimaminoo qinau. Faiqí anaasee sia amana Sinai aaqanasaa urifaranoo. Anee aneenna kai maasa daakapama seenana naaquqara aaqana fiqu fiqumma amusa arasaanaqa sia urifaranoo.
EXO 19:24 Yaaweefa iriseenoo Mooseena qimaminau. Ooqureenana Aaroona faqa afiqee urua. Qini aanaiqikirausa faqa faiqí anaasee faqa sia qini qiqafararee qimasee amusa rapeemmasee uruaqa. Miqifaqa qinee misa ummaara nimianaura.
EXO 19:25 Mooseefa iriseenoo ooqureenoo faiqí anaasee aiqama Yaaweefa quu ufana qimanniminau.
EXO 20:1 Anutufa maaqi qinoo.
EXO 20:2 Qinee Yaaweesa inni Anutusa maridaqa. Qinee Isipa maqasaa rumbaranaki maruna inni mareeqee mai quqaafanausa maridaqa.
EXO 20:3 Innee sia moo anutuna amooqiaqa, qini kai qimooqiaqa.
EXO 20:4 Innee sia innaarunai mari ainainausa faqa maqasaa mari ainainausa faqa nammariki mari ainainausa faqa nimana auqusee maasa anutufee qiaqa.
EXO 20:5 Minara sia moo ainaina amana auqirana oorinni mapamufida innaaru qidaqa amooqiaqa. Qinee Yaaweesa inni Anutusa marunnanara sia mi ainainausa nimooqiaqa. Qinee sia uqanna moo anutunara qiananoo qini qimaaqa maqaannoo. Faiqí qiniara fidiaqaa inausa aupurarana nimiananoo misasaa faqa misa faiqi namu saa faqa misa ninaiqimara saa faqa nisaifaqausa saa faqa mariannoo.
EXO 20:6 Moomoosa qiniara ridaqa qini sanda ufa mau finausa qinee misa faiqi namu kasooaqee nukudara foora kambiqainausa qeeqa didirana uqannifiqaanaura.
EXO 20:7 Innee sia qini duqunnai manda oosana auqaaqa. Qinee Yaaweesa inni Anutusa qini duqa fifau faafau inausa aupurarana nimianaura.
EXO 20:8 Innee Sabata faasaanara naaquqara faasaanee qimasee iriqa fuaqa.
EXO 20:9 Dinni taikasee dinni ani moodaa marasee 6 faasaana inni ainainira faasaana mariani.
EXO 20:10 Dinni ani qaara marasee 7 faasaanasaa qini Yaaweesa adooara faasaana maridanoo. Mi faasaannasaa sia uqanna moodaafa faqa ainainiani. Innee faqa inni faiqi namu faqa inni ainainira faiqiuqa faqa inni aandauqa faqa aanaamuru inniki ani mariasa faqa sia uqanna ainainiaqa.
EXO 20:11 Dinni taikasee dinni ani moodaa marasee 6 faasaana qinee Yaaweesa innaaruna faqa maqa faqa ooruku nammari faqa minauqaki mari ainainausa faqa auqi qiafana. Dinni ani qaara marasee 7 faasaanasaa qinee qidooa qiafana. Minara qinee Yaaweesa Sabata faasaana afaaqooqa qimasee naaquqara faasaanee qidaqa.
EXO 20:12 Inneeqa ninausa nikausara qeerairidaqa misa ufa qaindusuaqa. Innee miqiqa qinee nimianna maqanasaa kisaaqasaa marifaranoo.
EXO 20:13 Innee sia faiqí anaasee nuqu qimasee naruaqa.
EXO 20:14 Innee faiqí anaasee sia narí ummuari narí umuariaqa.
EXO 20:15 Innee sia moona ainaina umuariaqa.
EXO 20:16 Innee sia akaqausara unna qimasee misa kikiqa ususee ufa nimia.
EXO 20:17 Sia moona maaqa umiasanara amuqusiani. Sia moona aanaaqara amukaani mina ainainira fasiqa anaaseera faqa misa aandau ainainara faqa mina aiqama ainainara faqa sia amukaani.
EXO 20:18 Faiqí anaasee aiqama innaarunai qirana faqa aakuasaa faqa ukeena firaana faqa aaqanasaa idamuna namu faqa qafoofanoo naindiri reenoo naaquqoofaqa nianasaa marida qafee mariqau.
EXO 20:19 Miqi masee misa rufiasee Mooseena qimamiqa qiqau. Anutufa maasa qimaqiminaqa maasa irisee kuquanoora rufiaidaqa anee kai maasa qimaqiminaqa iria.
EXO 20:20 Mooseefa iriseenoo qimanniminau. Innee sia rufiaaqa Anutufa inni nimanamasee qafainaqa aiqama kari minara rufiasee mina ameemaanai maridaqa numoo ainaina sia auqaaqeera.
EXO 20:21 Miqi qimasoofaqa faiqí anaasee nianai marufanoo Mooseefa kai Anutufa asukuna arira oonamuki maruna aaqa finau.
EXO 20:22 Yaaweefa Isaraee maqannaasa qimannimianifeera maaqi qimaseenoo Mooseena qimaminau. Qinee innaarunaindari inni faqa ufa qimarunaqa innee inneeqa nifunnai mina qafaafanoo.
EXO 20:23 Innee sia siruaannai faqa koorannai faqa unna anutuna amana auqusee qini Yaaweesa faqbaqa masee amooqiaqa.
EXO 20:24 Innee maqannai qainda auqusee minasaa inneeqa sipsipa faqa burimakau faqa miniseeqa ida qama taikara tatufirana suqasaifaqa faiqí anaasee qini faqa moodaanaki kiaqa. Aiqama maqusa innee qini qimooqiaqeera utaaqama qaunna maqusanaki oonureeqa miqifaqa qinee innee iannai qumuree amiqi amiqimma nimaqaanaura.
EXO 20:25 Innee ooninnai qini aidara auqiraree qimasee sia faiqí rukamuqaa ooninannai auquaqa. Innee faiqí rukamuqaa ooninannai auquseeqa minasaa tatufirana suqa qimirafa sia amanaikiannoo.
EXO 20:26 Innee sia aidara auqusee minni akarara irirasu auquaqa. Innee miqiqa umee nifaaqa kooroo ifaqa qafeefoora.
EXO 21:1 Anutufa Mooseena qimaminoo qinau. Anee maa sandufana Isaraee maqannaasa qimannimi.
EXO 21:2 Innee Heeburu maqannaasa ainainira faiqi munnimmannai feefaurumasaifanoo mifa inni faqa moodaannai taikasee dinni ani moodaa 6 marasee aukuana ainaina masainaqa dinni ani qaaraikinaqa 7 doo quqasaifanoo kaqi fuani. Idukinnana akiiqara sia feefauriani.
EXO 21:3 Mifa adeedaana maridanoo ani ainainira faiqikinoo mariinafa amaaqa firarinoo sia anaasee maree fuannoo. Kafaa anaasee faqaafa inni ainainira faiqi kinoo mariinafa amaaqa finoo amana narí anaaqa afiqee fuannoo.
EXO 21:4 Mina feefauru mina rakisiifa anaasee aminanoo mifa faiqi maqaseenoo mariinanoo mina aukuana taikainanoo anaasee faqa faiqi faqa miqoo quqaseenoo kaqisamu amaaqa fuani. Mi anaaseena faqa mina faiqi faqa rakisiranaindi kai marifaranoo.
EXO 21:5 Ainainira fasiqa fannoo narí faiqi aanaaseera amuqusinanoo sia amana uqaanauree qimaseenoo
EXO 21:6 qinee qeeqa rakisiranara didimarifaqa qimaseenoo sia qinee taikasee fuanaura kaqi rumbaranaki marianauree qimasainanoo mina rakisirafa mina qumareenoo amaana maaqaki munuseenoo quka qumareenoo kooqi mammaaqai aaqoo ruqiaani. Ruqiasainanoo mi fasiqafa naaruara ainainira faiqi mariinanoo miqoo kuquannoo.
EXO 21:7 Faiqí moo fannoo narí araamuna ainainira maanaaqaikianifeera amisainanoo sia ainainira fasiqauqa iduku nisaandee masee idukusaina fuannoo.
EXO 21:8 Mi manaaqana ainaina faqaafa feefauru meeqeenoo narí ainainiranaki quqasee qinaaqara maraanauree qimasee mariinoo akooqaifanoo sia mareenoo. Miqinannai mi manaaqana mandaikama amaqaseenoo sia aanaamuru nimisee feefauru maraannoo. Narí akoofa kai kaifaa feefauriannoo.
EXO 21:9 Faiqí moo fannoo narí faiqi amiraree qimaseenoo ainainira maanaaqa feefauru maseenoo narí araamunara foora rakisiani.
EXO 21:10 Faiqí moo fannoo anaasee faqaafa moo maraseenoo indaaruqaana narana faqa qamunna faqa mina ainaina dadaaqirana faqa sia minnisaani, ooqai iundee kai iani.
EXO 21:11 Mi fasiqafa indaaruqaana sia mi ainainausa andeeeqa amaqeenoo mi fasiqafa mi anaaseena aiqainanoo finanoo sia feefauru maraannoo.
EXO 21:12 Faiqí moo fannoo moo fasiqa kuqarusainaqa narí faqa kai kuqaruaqa.
EXO 21:13 Faiqí moo fannoo sia moo fasiqa auqu qimasee arinafa mifa amana qinee inni utaaqama nimaqa qaunna maqusanaki keeqafinoo asumu mariannoo.
EXO 21:14 Yafee moo fannoo moonara aranaqainanoo auqu qimasee arinafa mifa faqa kuquani. Qini aidarai mifa oonu kukeeqafi asumu marianauree qinaqa innee mindaraana rarisamasee kuqa aruaqa.
EXO 21:15 Yafee moo fannoo narí anoona akoona narinaqa innee mina kuqa aruaqa.
EXO 21:16 Faiqí moo fannoo moo fasiqa mareeqeenoo narí ainainira faiqi kee iannoo fee moo atinai nimisee feefauru fee marainnana kuqa aruaqa.
EXO 21:17 Yafee moo fannoo narí anoona akoona manda ufa qimannimaqainnana mina kuqamma aruaqa.
EXO 21:18 Faiqí misa tinoorammamaree fidaqa faiqí moo fannoo moona ooni samu fee saamu samu fee arusainanoo sia kuqirai aurida mariinanoo findifinoo nimarinaqa innee mina akiiqara ari fasiqana sia aupurarana amiaqa. Arinna fasiqafa narí qaarisaa mariinanoo findifinoo madaanai saunusaa ooquree ururee irana amanaikinanoo ari fasiqafa mina feefauru auriranaki mariinna faasaana amana kai feefauru amisee minasaa rakisi marinanoo findi fuani.
EXO 21:20 Faiqí moo fannoo narí feefaurummaqai ainainira fasiqa nee maanaaqa nee saamu qumaree arusainanoo aaqee kuqinaqa innee mina akiiqara narí faqa moo aupurarana amiaqa.
EXO 21:21 Mi ainainira fasiqa nee manaaqa nee sia aaqee kuqirai moodaa eenda fee qaara eenda fee kaqi mariinanoo kuqinaqa innee sia mina uriqararafa mina arinnana akiiqara amiaqa. Narí ainainira faiqiara aupurama amaqaifa narí ariranasaa ititeenoo.
EXO 21:22 Faiqí rakinnanaki moo fasiqa fannoo amuaqu faqaa anaasee arusainanoo kuqira faiqi maqaseenoo mina anoofa kaqi marinanoo mi anaaseena afaaqi fannoo nana feefauruaree irainanoo mi fasiqafa feefauriannoo. Siaasauqa eedoo qinna feefauruna kai amiannoo.
EXO 21:23 Mi anaaseefa moo aupurarana marainaqa mina arinna fasiqana faqa mi aupuraranna kai amiaqa. Kuqa arinaqa narí faqa kuqa aruaqa.
EXO 21:24 Nifu dimbasainaqa narí afu faqa dimbaaqa. Nifai itairisainaqa narí afai faqa itairiaqa. Nisauku raudasainaqa narí asauku faqa raudaaqa. Niku itairisainaqa narí aiku faqa itairiaqa.
EXO 21:25 Idati raquru niminaqa narí faqa idati raquru amiaqa. Kaakadi narinaqa narí faqa kaakadi aruaqa. Saamu narinaqa narí faqa saamu aruaqa.
EXO 21:26 Faiqí moo fannoo narí ainainira maanaaqa fee fasiqa fee arumareenoo afu qimbaseenoo mina akiiqara idukusee aiqainanoo amaaqa fuani.
EXO 21:27 Kafaa mifa narí ainainira fasiqa fee maanaaqa fee arumaree afai itairiseenoo mina akiiqara idukusee aiqainanoo amaaqa fuani.
EXO 21:28 Burimakau akoona fannoo faiqí fee anaasee fee kuqa narusainaqa ooni samu mi burimakau akoonna kuqa aruseeqa mina amaqi sia naaqa. Mi burimakau akoona arusaifanoo mina akoona aupurarana amirafa sia mariannoo.
EXO 21:29 Mi burimakau akoonnafa ooqai faiqí nárí marifa maridanoo kafaa moo fasiqa kuqa arinaqa mina akoofa sia ququsaki mara quqainanoo kafaa narinaqa mina akiiqara ooni samu mi burimakauna kuqa aruseeqa mina akoona faqa kuqa aruaqa.
EXO 21:30 Kuqina akiiqara aqira feefauruara ooqai auqu ramaqaana amana kai aquseenoo narí kuqiranasaa ititaannoo.
EXO 21:31 Burimakau akoona moo fannoo maanaaqa fee akoonaiqi fee narusainaqa innee ooqai qimaqaa ufa mau kai fuaqa.
EXO 21:32 Burimakau akoona moo fannoo ainainira kumaaraa fee maanaaqee narusainaqa mi burimakauna akoofa ainainira faiqi uriqararana firaa feefauru amiannoo.
EXO 21:33 Faiqí moo fannoo madika indufuseenoo rafaaqafu qainanoo moo fannoo oonu mina rafaqaamma sainanoo burimakau fee doonki fee minaki aqufiqa kuqifanoo, madika afu rafaqaa ifa mi aandauna akiiqara feefauru maseenoo nariara mi aandauna maraanoo. Faiqí moo fannoo madika indufusee sia rafaaqa finanoo aandauqa minaki aqufiqa kuqifanoo mi fasiqafa aandau akoona feefauru amiseenoo nariara mi aandauna maraannoo.
EXO 21:35 Moo fasiqa burimakau akoona fannoo moona burimakau akoona arusainaqa burimakau akooqanda kaqi mari burimakauna mareeqee moosaa quqasee feefauru marasee miqanda mi munnimmana rainaqaraasa mandee kuqira burimakau qambaana aukuqaraasa masee moo fannoo dinni maraina moo fannoo dinni maraaqa.
EXO 21:36 Mi burimakau akoonafa ooqai nárí maru burimakaufa marifanoo mina akoofa sia ququsaki quqainanoo moona burimakau kuqa arusainanoo mina akiiqara moo kaqi mari burimakauna amiseenoo kuqirana nariara maraannoo.
EXO 22:1 Faiqí moo fannoo burimakau fee sipsipa fee qummuara mamaree munu moona amisee feefauru maraina fee arusaina fee mi fasiqafa moodaa burimakau akiiqara moodaannai qisauku burimakau mina amiannoo. Moodaa sipsipa qummuarinnana akiiqara qaara faqa qaara faqa sipsipa amiannoo.
EXO 22:2 Mi fasiqafa narí qummuarirana akiiqara feefauriannoo. Moo ainaina sia marinaqa mi fasiqana mareeqee moo maqannaa nimisee mina feefauru mareeqee mifa qumuarina akiiqara nimiaqa. Mi fasiqafa burimakau fee doonki fee sipsipa fee maraqainafa kaqi riri marinanoo qaaraqanda mina akiiqara nimiani. Eendakinai qummuarira fasiqa fannoo maaqa ruiqasee keeqainaqa mina qumarasee kuqa arusainafa sia mina akiiqara ufa maraannoo. Faasaana miqi marinaqa kuqa arinna fasiqafa mina akiiqara ufa maraannoo.
EXO 22:5 Faiqí moo fannoo narí burimakau fee sipsipa fee andanda nee marinana sia amiqimmasee rakisinanoo moona afuqaki keeqafi narana nainanoo mina akiiqara narana faqaana narí afuqakinaana amiqirana kai unaku maree munu amiannoo.
EXO 22:6 Faiqí moo fannoo narí afuaki ida arasainanoo qamammareenoo moona afuqa qeenoo narana unaku quqaqainnana qamasainanoo mina akiiqara idarai fasiqafa mina amiannoo.
EXO 22:7 Faiqí moo fannoo munnimma moo fasiqasaa quqasaina marinanoo moo fasiqa fannoo qummuari marinaqa paquri masaifanoo mina akiaqara qaara kari feefauru amiannoo.
EXO 22:8 Qummuari fasiqana innee sia paquriqa munnimmasaa rakisii fasiqana afiqamaree innaaru qimaria maqusanaki munusee iraifanoo mifa narí amana aiqamasee kuqaa sia qinee maree fee qiannoo.
EXO 22:9 Aiqama ainainara aanooqiranaki burimakaura faqa doonkiuqara faqa sipsipauqa faqa qamunnara faqa akaqa ainainara faqa qinindi kai fee qimasee aanoo qinna fasiqa qanda nifiqamaree innaaru qimariaqoo nifiqee aniaqa. Anutufa yanaree unnaqiifoo qinafa mifa mina akiiqara qaara kari feefauru amiannoo.
EXO 22:10 Faiqí moo fannoo moona doonki fee burimakau fee sipsipa fee moo aandau fee rakisi marinanoo moo aandau fannoo kuqinoo fee nana afaaqee mandaikinanoo fee namuqaa fee mara maraafanoo moo fasiqa fannoo sia minauqa qafeenoo.
EXO 22:11 Mi aandausa saa rakisirafa innaaru qimariaqoo oonureenoo amana aqiqamaseenoo qinee sia uqanna mi aandausa ummuari fee qiani. Mi aandausa sia ummuarifanoo aandau akoofa minara amanammifoo qimasee sia mina akiiqara rakisiinafinnai feefauru maraannoo.
EXO 22:12 Kuqaa mi fasiqafa ummuarinoo mifa aandau akoona mina akiiqara feefauru amiannoo.
EXO 22:13 Kaasau faini mi aandauna aruneennoo fee mina rakisi mari fasiqafa mina asausifee amudaani fee mara mina akoona uqafiqaseenoo sia mina akiiqara feefauriannoo.
EXO 22:14 Faiqí moo fannoo moona aandau akaqa ainainirana dadaaqianifeera marasainanoo kuquannoo fee amudaani itairinoo fee mi aandauna akoofa uqanna sia marinanoo ufaasu marai fasiqafa feefauriannoo.
EXO 22:15 Mi aandauna akoofa uqanna mina afusaa miqifanoo sia mina akiiqara feefauru aandau akoona amiannoo. Ufaasu feefauru masaafanoo ainainirana dadaaqi mari aandaufa kuquannoo fee amudaani itairiannoo fee feefauru maqaifa miqiannoo.
EXO 22:16 Faiqí moo fannoo maanaaqa moo faiqí moo sia utaaqama amaqarana sararamma amaqaseenoo mi fasiqafa mararara mina akoona feefauru amiseenoo marasainanoo mina aanaaqaikinoo mariannoo.
EXO 22:17 Mi manaaqana akoofa mi fasiqanara akooqainanoo sia narí araamuna maraannee qinanoo mi fasiqafa fuka maanaaqa feefauri mariana amana kai mina akoona amiannoo.
EXO 22:18 Aukainaina maraqanua aanaaseesa kuqa naruaqa.
EXO 22:19 Faiqí moo fannoo aandau amuaaqa akarainnana mina kuqa aruaqa.
EXO 22:20 Qini Yaaaweesa kai aandau tatufirana suqa qimiaqa. Moo unnaqira anutuna tatufirana suqa aminnana kuqa aruaqa.
EXO 22:21 Innee ooqai Isipa maqasaa aanaamuru marunaki mandainainaki marunnara irisee sia aanaamuru inniki marinausa mandaikamma nimaqaaqa.
EXO 22:22 Innee adeedaana anaasee fee fiaiqi faiqi fee sia mandaikamma nimaqaaqa.
EXO 22:23 Innee miqifaqa misa qini daaraifaqa qinee Yaaweesa irianaura.
EXO 22:24 Qini qirana qainaqa rakiranaki inni kuqa naruanaura. Narusaanaqa inni ninaaqmaaka adeedaana marifaqa inni faiqi namu fiaiqi marifaranoo.
EXO 22:25 Inniki qari qini Yaaweesa faiqí anaasee moo fannoo munnimmara sarau imarinnana ufaasu munnimma aminana sia ufaasu munnimma nimimariasa naanna raaqa. Misa nimiseeqa nárindi akiiqara maraseeqa aabaa faqa maraidaqa. Innee inneeqaindi akiiqara kai maraaqa.
EXO 22:26 Innikiqari faiqí moo fannoo ani ainaina ufaasu maraseenoo kafaa amianauree qimasee narí suara siuta amiseenoo minannoo narí amianinna ainainara kooroo idanoo kuqaa amianauree qidanoo. Miqi qinana anee suani afu sia keeqanoo marinana mina suara siuta kai kaqi narí amia.
EXO 22:27 Mi suara siutafa tootooqirana amianifeera quqaqaina marifanoo nanee moo ainaina akusee faiqaannoo. Anee sia aminanoo suara arinanoo qinee unnannai innaaru qinaqa qinee mina ufa irianaura. Qinee kaaqa faiqiara qimudaoo qimarunausa maridaqa miqianaura.
EXO 22:28 Innee sia qini Anutusara manda ufa qiaqa. Inniqa rakisirausara faqa sia miqi qiaqa.
EXO 22:29 Innee fuka narana afiana neeqa sakuma faqa uainna faqa oorifa fadameena faqa inneeqa ooqa faiqi faqa qini Anutusa naaree qimiaqa.
EXO 22:30 Inneeqa burimakau sipsipa ooqasaa maqarana akoonauqa dinni taikaseenoo dinni oonu qaara marasee 7 faasaana narí anoona faqa mariseenoo dinni oonu qaaramoo 8 faasaanaikinaqa mina arusee tatufirana suqa qimiaqa.
EXO 22:31 Innee qini faiqí anaasee marianara kaasau faini fannoo aru quqaqainna aandauna amaqi sia suqasee naaqa. Faini mara nimifaqa naaqa.
EXO 23:1 Innee aatata qaraa unna ufa iriseeqa sia moona munu qimamia. Innee sia aaqee mari fasiqana unna ufannai mina dadaaqiaqa.
EXO 23:2 Kootaki oonureeqa moomoosa unna ufa qifana anee sia misa dadaaqia. Misa ufaki kikiqa mafi andeeqara ufa mara furufarifana sia misa dadaaqia.
EXO 23:3 Kudi fasiqa moo fannoo kootaki kikiqa mafinana sia kudi marinnana roo qimasee dadaaqia. Andeeqara nara kai qiaqa.
EXO 23:4 Innee inneeqa namuqaa burimakau fee doonki fee furufariqa nifaqa innee qafamaseeqa maree narí akoona munu amiaqa.
EXO 23:5 Mi fasiqana doonki fannoo ummaara mara maree fidanoo aanai saamurinoo marinaqa innee oonu qafee sia fiaaqaraaqa dadaaqi uqeera aisaaqa.
EXO 23:6 Kudi fasiqa fannoo kootaki marinaqa innee sia minara manda fasiqee qimasee andeeqara oosana sia mina amiaqa.
EXO 23:7 Innee sia unna qimasee kootaki aqoonnana kikiqa usua. Sia andeeqarausa numoo siaisa fifau kuqiranaki mara quqannisaa. Qinee Anutusa mi manda ainainna auqainnana kuqa aruanauranoo.
EXO 23:8 Moo fannoo maqandanai kootaki minasaa roo qiannee munnimma aminana sia uqanna maraa. Miqira munnima fannoo faiqí nifu dimbarausaikamma saifaqa sia andeeqarana qafaidaqa. Andeeqara fasiqa faqa mara furufaramma aisaidanoo.
EXO 23:9 Innee ooqai Isipa maqasaa maridaqa aanaamuru aupurarana qafeeusa mariafanoo minara innee sia quandafi aanaamuru inni faqa marinausa mandaikamma nimaqaaqa.
EXO 23:10 Inneeqa maqa ummaqu nee maria maqanaki minaki dinni qisauku taikasee dinni ani moodaa marasee 6 aukuana ummaqusaidaqa unakusaidaqa naaqa.
EXO 23:11 Miqiqa fifi inaqa qisauku dinni taikasee dinni ani qaara marasee 7 aukuanasaa saifanoo maqa fanoo idooaani. Mi maqanasaa moo ainaina kambiqainnana sia unaku naaqa. Kudi fasiqauqa mina naaqa. Misa naidaqa andaanauqa mafi sainnana kaasau aandauqa naaqa. Inneeqa uainna afuqa faqa oorifa saqari faqa miqi kai iaqa.
EXO 23:12 Innee moodaannai qisauku taikasee dinni ani moodaa marasee 6 faasaana ainainiaqa. Ainainiqa fifi inaqa dinni taikasee dinni ani qaara marasee 7 faasaanasaa sia ainainiaqa. Inni ainainira faiqiuqa faqa aanaamuru inni ainaini marinausa faqa inni aandauqa faqa aiqama idooaaqa.
EXO 23:13 Qinee Yaaweesa aiqama ufa qimarunnana iriaqa. Innee maa amaana ufausa amiqimasee irimaree fuaqa. Sia unna anutusara innaaru qiaqa. Sia uqanna misa nuqu raaqa.
EXO 23:14 Aiqama aukuanaki qaarammoo kari oomaqa sakasee naidaqa qini Anutusara innaaruqiaqa.
EXO 23:15 Innee Isipa maqa maaqaindari anu quqoonnana Abiba quqoonasaa qinee qimannimiafannandee iqa innooqee mari pauraqana sia aqira bereeta naidaqa asasiaqa. Mi oomaqanaki 7 faasaanasaa sia innooqee mari pauraqana aqira bereeta naaqa. Innee qini qimooqiraree qimasee sia kaqi aniaqa. Qini tatufirana suqara ainaina faqa maree aniaqa.
EXO 23:16 Fukakinaana unakusee oomaqa sakasee asasidaqa namaseeqa inneeqa narana ummaquqaana oosanarasee unaku naaqa. Saqari aqama akuqainaqa innee mina tiqisee auqaanai maridaqa moo oomaqa sakasee naida asasiaqa.
EXO 23:17 Aiqama aukuana mi qaaramoo oomaqiranakina aiqama Isaraee maqannaa fasiqauqa anireeqa qini Yaaweesa inneeqa Anutusa qimooqiaqa.
EXO 23:18 Innee aandaunnoo qini tatufirana suqa qimiraree qimasee sia innooqee mari pauraqana aqira bereeta namu faqa moodaanaki suqaaqa. Tatufira aandau fadameena fannoo sia faiqee kananaana kaqi mariani aaqee kai aiqama idaki aqusaifanoo qama taikafuani.
EXO 23:19 Aiqama aukuana innee fukakinaa narana unaku maree qini Yaaweesa inneeqa Anutusa amaana maqaki maree aniaqa. Innee sipsipa aanaaqi fee mimmi aanaaqi fee arusee sia narí anoona naamma anoonannai suqaaqa.
EXO 23:20 Anutufa kafaa qinau. Qinee qeeqa kai qeeqa Qangiroo aqiqaananoo mifa qumuree inni indaaru nikidanoo innisaa rakisi marinaqa qinee inni deedaqamma nisaafanna maqa maaqanaki fifaranoo.
EXO 23:21 Innee mi qangiroofa qinnandee iaqa. Sia mina ufa rukiaaqa. Qinee mina aiqaunanoo qumu marinara sia mina ufa rukiaaqa. Mifa sia inni manda oosana akiiqara nifauaannoo.
EXO 23:22 Innee mina ufa irisee andeeqasee qinee qunnufa mau kai fifaqa qinee inni namuqaauqa faqa rakuanaura.
EXO 23:23 Qini qangiroo fannoo inni indaaru nikinoo nifiqee Amoora maqa maaqa faqa Heeta maqa maaqa faqa Perisita maqa maaqa faqa Kannaana maqa maaqa faqa Hifitana maqa maaqa faqa Yeebusa maqa maaqaki mariasa faqa naru taikaseenoo inni miqoo quqannisaannoo.
EXO 23:24 Innee miqoo oonu maridaqa sia misa unna qira anutusara niqoori saunu arafi innaaru qiaqa. Sia misa innaaru qimariandee iaqa. Innee misa unna anutusa turi taari maseeqa ooni rakiaaqee minara innaaru qimariana raudaandammeeqee aqusaaqa.
EXO 23:25 Innee qini Yaaweesa inneeqa Anutusa qimooqifaqa qinee narana faqa nammari faqa inni nimiseeqa inni auriranauqa mara aqunnisaanaura.
EXO 23:26 Innee Yaaweena kai amooqifaqa sia aanaaseeuqa eedada faiqi maqee faranoo. Sia moo aafa anaasee mariannoo. Innee sia dauni kuqifara, kisaaqasaa marifaranoo.
EXO 23:27 Qinee inni nifiqee fidaqa inni namuqaa qiniara rufiarana nimiseeqa inni faqa rakinausa furufarirana nimianaura. Nimiseeqa qianaqa inni namuqaauqa quqasee sandeefara.
EXO 23:28 Qinee ukaqa nimimari doodaanina inni namuqaaki quqasaana ukaqa niminaqa naaqoo nifu furufarinaqa sandee faranoo. Innee fimarifaqa qinee Hifita maqannaasa faqa Kannaana maqannaasa faqa Heeta maqannaasa faqa nifaqasaanaqa innee miqoo oonu marifaranoo.
EXO 23:29 Qinee sia moodaa aukuanaki inni namuqaa rapatutumma aquanaura. Qinee miqimma saananoo naakunduka mafinaqa kaasau aandauqa moomoo mi maqa maaqanaki maridaqa inni narifoora.
EXO 23:30 Qinee misara qianaqa misa moodaa kai qaara kai idaqa taikafifaqa innee moomoo kammafi amana mi maqa maaqana maree faranoo.
EXO 23:31 Qinee inni oosu maaqimasee oosumma nisaanaura. Dinni taatuqee nammari mariannoo. Dinni Firistia ooruku nammari mariannoo, dinni aadana maqa maaqa mariannoo, dinni Eeufarateesa nammari mariannoo. Qinee inni afeeka nimianaqa innee mi maqa maaqanaki fimarifaqa qinee inni namuqaa rapatutu iqa fimarianaqa innee misa maqa maaqa mareefaranoo.
EXO 23:32 Innee sia uqanna misa ufara eedoo qimasee moodaanaki kira ufa qiaqa. Misa unna anutusara faqa sia uqanna moodaanaki kiaqa.
EXO 23:33 Mi maqannaasa sia inni maqa maaqaki mariaqa. Innee miqifaqa misa inni mareeqee qini numookamma qimaqara tinai quqeefaranoo. Innee misa unna anutusa nimooqifanoo mifa inni ninuka ufanara foora fufinoo mariannoo.
EXO 24:1 Anutufa aiqama ufauqa Mooseena qimamiseenoo kafaa maaqi qinau. Moosee anee faqa Aaroona faqa Nadabana faqa Abiquna faqa Isaraee maqannaa rakisirausa 70 uriqararausa faqa nifiqa maree urureeqa nianasaa kummaramafinaqa qiniara innaaru qidaqa qimooqiaqa.
EXO 24:2 Moosee anee kai adeedi ania. Sia akaqa rakisirausa qini daaqa aniaqa. Faiqí anaasee faqa sia uqanna aaqanai uruaqa.
EXO 24:3 Mooseefa ooqureenoo faiqí anaasee Yaaweena sandufa aiqama qimannimisoofaqa misa maaqi qimasee moodaa kari noo raqamaree qiqau. Yaaweefa qindee iqa maasa aiqama ainaina auqaanaura.
EXO 24:4 Miqi qimasoofanoo Mooseefa Yaaweena sandaufa aiqama akara rinau. Akara rumaseenoo kananaana iaqoofanoo aaqana aikunni aandau tutufira qainda auqinau. Auquseenoo ooni qisaukuqara taikasee qikunni ooqu qaara marasee 12 ooni maraseenoo qainda fiqu fiqumma Isaraeena faiqi namu nimana kai rakiqanau.
EXO 24:5 Rakiqaseenoo kumaaraauqa qimannimufaqa burimakau arusee munu Anutuna tatufirana suqaqau. Mi tatufira aandauna Isaraee maqannaasa faqa Anutuna faqa moodaanaki suqira tatufiranee qiqau.
EXO 24:6 Misa arusoofanoo Mooseefa burimakau fidika akaqana difaanikiaqa sakaseenoo kaqi maruna qumarenoo aidarai rurufinau.
EXO 24:7 Rurufa maseenoo Akiiseenoo Mooseefa Anutufa moodaanaki kira ufa qimaqoo bukana akara rumaqoona maree findifinoo aiqama minakinaa ufa asaana rumasee firaaqoo faiqí anaasee qimanniminau. Misa iriseeqa qiqau. Maasa Yaaweena mi sandaufana aiqama irisee afaqaanaura.
EXO 24:8 Mooseefa misa ufa iriseenoo difaanikinaa fidika kaqi maruna indaku faiqí anaasee kiaqa aqidanoo qinau. Anutufa maa sanda ufausa nimuqooqari maa fidikafa Anutufa inni faqa moodaanaki kuna afeekaikamma nimaqaidanoo.
EXO 24:9 Miqi qimaseenoo Mooseefa Aaroona faqa Nadabana faqa Abiqufana faqa Isaraee maqanaa uriqararausa 70 faqa nifiqeenoo aaqanasaa oorufinau.
EXO 24:10 Oorureeqa miqoo misa Isaraee maqannaa Anutuna qafaqau. Mina aiku ameemaanai innaaruna kudimandara foora ira ooniuqa mina auqu safiree fee qimaru oonisa ausirirafauqa marinau.
EXO 24:11 Misa Anutuna qafoofanoo sia misa narinau. Misa miqoo moodaanaki suqufu faqa narana nammari naqau.
EXO 24:12 Misa namasoofanoo Anutufa Mooseena qimaminau. Anee aaqanai qinee marunnannai urua. Ururainaqa qinee qeeqa sandufa anee faiqí anaasee naakapaanneera qaara oonisaa akara ruma amianaura.
EXO 24:13 Mooseefa mina iriseenoo narí dadaaqimaruna Yoosuaana faqa deedaqamma seeqa Mooseefa aaqanai Yaaweefa marunnai ooru finau.
EXO 24:14 Ooru fidanoo Mooseefa Isaraee maqannaa uriqararausa maaqi qimasee qimanniminau. Innee maaqoo uiqaana maqusaki maridaqa maaqanda qifeesiaqa. Aaroonafa faqa Hurafa faqa inni faqa maaqoo marifaranoo. Akaqausaki ufa rainarafa kambiqainaqa miqanda andeeqa nimaqeefaranoo.
EXO 24:15 Miqi qimasee qimannimiseenoo Mooseefa aaqanai oorufufanoo qasuru fannoo aaqana rafaaqa finau.
EXO 24:16 Yaaweefa kaaqa qarafa aaqana aaqa qumuroonara Sinai aaqana saa qasuru quminau. Isaraee maqannaasa mi kaaqa qaranna qafoofanoo aaqanasaa firaa ida qeera foora qimarinau. Dinni ani moodaa marasee 6 faasaanna qasuru fannoo aaqana rafaaqa finoo marinau. Dinni ani qaara qanda marasee 7 faasaanna Yaaweefa qasurukiqari Mooseenara mai uruannee qinau.
EXO 24:17 Faiqí anaasee afaasasaa marusa aaqana qafeeqa naaquqara kudifaannammiifoo qiqau. Anutuna kaaqa qarafa aaqana saa firaaqoo idauruara foora imarinau.
EXO 24:18 Mooseefa aaqanai ooru fidanoo qasuruki keeqakufanoo aaqanasa ooru qaara fasiqa niku nisauku taikasee 40 eendaki faqa faasaana faqa marinau.
EXO 25:1 Mi aaqannanasaa Yaaweefa Mooseena qimaminoo qinau.
EXO 25:2 Anee Isaraee maqannaasa qimanniminaqa misa oosana oosana ainaina qini qimiani qinnana qimiaqa. Faiqí anaasee qini qimirara nidinaqa minisainna ainaina anee mara quqaa.
EXO 25:3 Maa ainainausa maree anifaranoo. Koora faqa siruaa faqa booroosa faqa amiqira qamunna faqa dirindaasi akira sipsipa asausi faqa pannoona akira sipsipa asausi faqa faeena akira sipsipa asausi faqa mimmi asausinnai auqira qamunna faqa sipsipa akoona apatasaa faeena akirana faqa ooruku nammariki mari firaa noodaana apata faqa akasia saqari amiqira saqari faqa maree minisaifana mara quqaa.
EXO 25:6 Qooma qumbi maria fadameenna faqa aanaiqikirausa aki maria oosana oosana fadameenna faqa moo pauraqa ida arasaafanoo muninoo amiqira afundi mari pauraqana faqa mini amiaqa.
EXO 25:7 Firaa feefauru aqi maria oonisa faqa aka amiqira ooniuqa faqa aanaiqikirausa eefooda qamunnasaa faqa nimuqusasaa rumbee marianasaa faqa atooqaaqa.
EXO 25:8 Isaraee maqannaasa qimanniminaqa qini naaquqara uiqaana maqa usakasaifaqa qinee misa qambaanai marianaura.
EXO 25:9 Innee uiqaana maqa faqa minakinaa aiqama ainaina faqa qinee naakapaunandee miqi kai masee auquaqa.
EXO 25:10 Innee akasia saqari marasee minannai moodaanaki kira bookisa auquaqa. Mina kisaaqa 110 centimetres amana auquaqa. Mina qusandanai faqa mina kuradarafa faqa amana amana kai 66 centimetres amana auquaqa.
EXO 25:11 Innee amiqira koora marasee turimmasai ausi rumafinaqa minannai kai bookisa adisaa faqa aundurai faqa ititaaqa. Mi bookisana afaimau koorannai amatookika masee rafaaqafuaqa.
EXO 25:12 Innee koorannai qaindusi fandinnana amaaqa qaara faqa qaara faqa 4 auqusee aiqama aikusaa quqaaqa. Dinni aikusaa qaara qanda dinni aikusaa qaara qanda quqaaqa.
EXO 25:13 Akasia saqari qaindusi fandinna qanda koora turimandee ausiruma qumaree minannai kukuqiaqa.
EXO 25:14 Kukuqa maseeqa dinni dinni amaaqa auquqainnanaki ausuaqa.
EXO 25:15 Miqimmaseeqa sia radukuaqa, saifanoo miqinoo mariani.
EXO 25:16 Miqimma saifaqa kasooaqee qaara oonisaa qeeqa sanda ufa akara ruma nimianaqa minaki quqaaqa.
EXO 25:17 Bukisa afu faqa Koorannai kai auquaqa. Mina kisaaqa 110 centimetres amana mariani. Mina qusa 66 centimetres amana mariani.
EXO 25:18 Innee kooraa turimmaseeqa bukisa afu auquseeqa minannai kai dinni dinni qangiroo qaara qanda nimana auquaqa.
EXO 25:19 Afu dinni atinni moo qangiroo amana auqusee dinni moo qangiroo amana auquaqa. Afu faqa mi qangiroo qanda nimana faqa moodaa koorannai kai auquaqa.
EXO 25:20 Mi qangiroo qanda bukisa afusaa quqasaifaqa noori narí qafee narí qafee iaqa. Miqanda niqoosa uqeerasaifanoo bookisa afusaa ititanoo mariani.
EXO 25:21 Qaara oonisaa sanda ufa marina mi bukisanaki quqasee afu rafaaqafuaqa.
EXO 25:22 Qinee inni faqa miqoo moodaanakika mafiqa bukisa afusaa qaara qangiroo qambaana maridaqa qeeqa sanda ufa inni Isaraee maqannaasa nimianaura.
EXO 25:23 Innee akasia saqarinnoo teeboora auqauqa. Mina kisaaqa 88 centimetres mariani. Mina qusandanai 44 centimetres mina kuradarafa 66 centimetres mariani.
EXO 25:24 Innee amiqira koora marasee turimmasaifanoo ausiruma finaqa minannai teeboora rafaaqa fusee kafaa moonnai teeboora atiqara fiqu fiqumma rafaaqa fuaqa.
EXO 25:25 Innee teeboora atiqara fiqu fiqumma 8 centimetres amana ititasee mina afaimau koorannai rafaaqa fuaqa.
EXO 25:26 Innee koorannai qaindusifandinnana amaaqa 4 auqusee teeboora aiqama aiku namusaa quqaaqa.
EXO 25:27 Teeboora afai ameemaanandanai qaindusirana amaaqa auquaqa.
EXO 25:28 Qaindusifandinna saqari qanda akasia saqari ateekasee koorannai mina kuku iaqa.
EXO 25:29 Amiqira koorannai kai teeboorasaa quqeefandinna pirita kaafausa faqa kisaaqa kaafauqa faqa uainna adiara pirita uqnaurirana faqa auquaqa.
EXO 25:30 Qini qimifandinna bereetana mi teebooranasaa quqaqaifanoo aiqama kari qini moodaanaki kira bukisa aaqa mariani.
EXO 25:31 Innee qooma qumbifandinna aikana amiqira koorannai auqua. Innee koora turiiseeqa minannai kai qooma aika oosana faqa adaka faqa asaanauqa faqa auquaqa. Mi asaanausa saa mi kooranannai kai taatuqee aqama afufeenaari marindee maseeqa auqusaifanoo kaafara foora afisu amaqanoo mariani.
EXO 25:32 Mi qooma aikausa qisauku dinni taikasee dinni ani moodaa marasee 6 mariani. Dinni qaaramoo dinni qaaramoo mariani.
EXO 25:33 Aiqama mi asaana namuna atimau koorannai taatuqee aqama afufeenaari marindee masee afaaqa auquaqa. Mi afufeenaarirafa teeqnoorina aqamara foora marufaqa mi asaana namuna saa auquaqa.
EXO 25:34 Mina adakasaa qaara faqa qaara faqa 4 saa taatuqee aqama teeqnoorina aqamara foora auquaqa.
EXO 25:35 Moodaa aqama indaaruqaa asaana qara ameemaanai mariani. Kafaa mina murufi asaana qara ameemaanai moo aqama mariani. Kafaa mina murufi asaana qara ameemaanai moo mariani.
EXO 25:36 Amiqira koora turiiseeqa minannai kai oosana faqa asaanauqa faqa afufeenaarirana faqa auquaqa.
EXO 25:37 Miqimmaseenana dinni taikasee dinni ani qaara qanda marasee 7 qooma auqusee mi asaanausa ati mau quqaa. Quqaseenana mara quandasainanoo mi qoomausa kaaqa qarafa sia kaqinni fuani. Maaqa aundurai kai kaaqa qaani.
EXO 25:38 Mina ufaqa faqa futufita faqa amiqira koorannai kai auquaqa.
EXO 25:39 Qooma quqara aika amiqira koorannai 35 kilogram ummaara amana kai marasee auquaqa.
EXO 25:40 Moosee qinee aaqanasaa ani qimamunandee aiqama ainaina miqikaimmasee andeeqasee auqua.
EXO 26:1 Innee qini naaquqara uiqaana maqasaa akifandinna qamunna kisaaqa maaqimasee auquaqa. Sipsipa asausi dirindaasi akirana faqa pannoona akirana faqa faeena akirana faqa sufusee amiqira qamunna auqusee aqoosa faqaa aandau amana auqusee minasaa atooqasee akuniaqa. Miqimmasee minauqannai innee qisaukuqara taikasee 10 firaa qamunna auqusee moodaanaki akuniaqa.
EXO 26:2 Mi aiqama qamunnausa amana amana kai 12 metre kisaaqa mina qusa 2 metre mariani.
EXO 26:3 Mi qamunnausa moodaannai qisauku 5 marasee moodaanaki ootupamasee akuniaqa. Dinni qisauku taikasee 5 faqa miqi kai iaqa.
EXO 26:4 Miqimmaseeqa mi qamunna qanda atiqara dirindaasi arira qamunnannai anaanu auqusee moodaanaki ootupaaqa.
EXO 26:5 Firaa qamunna atimau anaanu 50 auquaqa. Moo qamunna faqa miqi kai iqa moo qamunna saaqaraa aanaanu amummaqa kai auquaqa.
EXO 26:6 Koora qumaree turimandee qusa tafara foora saaeemma qumaree dinni dinni anaanuki upeekasaifanoo mi qamunna qanda moodaara maqi inoo mariani.
EXO 26:7 Uiqaana maqa saa akira qamunna firaana mimmi asausinnai 11 auquaqa.
EXO 26:8 Innee aiqama moodaa karirana kai auquaqa. Mina kisaaqa 13 metres amana mariani. Mina qusa fannoo 2 metres amana mariani.
EXO 26:9 Mi qamunnausa moodaannai qisauku taikasee 5 qamunna akunusainanoo moodaa qamunnaika mafuani. Kafaa moodaannai qisauku taikasee dinni ani moodaa marasee 6 narisaa narisaa akuniisaifanoo firaafaikiani. Miqimma finaqa uiqaana maqa kooqindaraana murufi tukaanda quqaaqa.
EXO 26:10 Qamunna atimau anaanu 50 akuniaqa. Moo atimau faqa mina amummaqa kai akuniaqa.
EXO 26:11 Booroosannai tafara foora ati saaeemmasee 50 auqusee minannoo dinni dinni anaanuki aususee ootupama saifanoo moodaa qamunnara foora mariani.
EXO 26:12 Mi firaa qamunnana uiqaana maaqa akuamaqa saifanoo mina ati fiqaramasee akunirafa uruanatinai naambeeqai qumiqaranoo mariani.
EXO 26:13 Aabaa akunira qamunna fannoo uiqaana maqa ati fiqaree aiqaree inoo mariani. Dinni dinni amana amana kai 50 centimetre kai mariani.
EXO 26:14 Mina taikasee mina amuaaqa qaara qanda faqa auquaqa. Moo sipsipa akoona apata faeena akiranannai auquaqa. Auquseeqa moo ooruku nammarikinaa aandau kuara fooqaa irana apatannai auquseeqa minannoo meeraqoo amuaaqa akuaqa.
EXO 26:15 Innee akasia saqarinnai kai naaquqara uiqaana maqa atuna auqusee kuradaaqa.
EXO 26:16 Maaqi mandee maaqa atuna auquaqa. Saqari dinni dinni kuradarafa 4 metres mariani. Mina ausana qusa 66 centimetres amana kai auni ruaqa.
EXO 26:17 Aiqama atuna maqaki rakiqaranara irisee ati ooqiqara masee ateekaaqa. Aiqama maaqa atuna miqi kai masee ateekaaqa.
EXO 26:18 Innee suani afu ataaqeenni south kisaaqandanai maaqa atuna 20 narisaa narisaa apamandee kuradaaqa.
EXO 26:19 Maaqa atuna oosana sia maqaki kaqi rakiaaqa. Siruaannai amaaqa auqusee minaki maaqa atuna kuradaaqa. Siruaannai 40 maaqa atuna oosana amaaqa auqusee minaki kuradaaqa.
EXO 26:20 Uiqaana maqa suani dinni ataaqeenni north kisaaqandanai maaqa atuna 20 narisaa narisaa apamandee kuradaaqa.
EXO 26:21 Maaqa atuna sia maqaki kaqi rakiaaqa. Siruaannai 40 amaaqa auqusee minaki maaqa atuna kuradaaqa.
EXO 26:22 Suani keeqee mari qaannai (west) uiqaana maaqa uruanatinai maaqa atuna dinni qisauku taikasee dinni ani moodaa marasee 6 narisaa narisaa apamandee auquaqa.
EXO 26:23 Maaqa dinni dinni munu raqaranaki kafaa qaaraqanda auqusee kuradaaqa.
EXO 26:24 Raudaranaki maaqa atuna oosanaki apammasee kuradama saifanoo amiqimasee narisaa narisaa apinoo mariani. Maaqa atuna rakiqarana oosanaki rumba atukarasee miqi kai mamaree mirinni murufisaaqa. Dinni dinni munu raqaranaki miqi kaimmiaqa.
EXO 26:25 Miqimmaseeqa maaqa atuna 8 oosanaki siruaannai qaaraqanda qaaraqanda amaaqa auqusaifanoo 16 mariani.
EXO 26:26 Innee qauniri fandinnana akasia saqari 15 maraaqa. Uiqaana maqa ataaqee dinni dinni faqa uruanai faqa faifa faifannoo auni rumasaifanoo maaqa atukarama qumaraani.
EXO 26:28 Mi maaqa atunna qambaana aunirira saqari fannoo maaqa amana kai dinni dinni ati mariani.
EXO 26:29 Maaqa atuna aiqama koorannai kai rafaaqa fuaqa. Maaqa atuna mau aiqama koorannai kai anaanu mamaree fuaqa. Aunirifandinna saqarisa faqa koorannoo rafaaqafusee mi anaanusaki ausuaqa.
EXO 26:30 Doo Moosee qini uiqaana maqa aaqanasaa qinee qimamiafanandee masee usakaa.
EXO 26:31 Innee sipsipa asausi dirindaasi akirana faqa pannoona akirana faqa faeena akirana faqa sufusee minannai amiqira qamunna auquaqa. Miqimmasee mi qamunnana saa qangiroo qaqoosa faqaana amana auquaqa.
EXO 26:32 Akasia saqari qaara faqa qaara faqa 4 marasee koorannai aiqama rafaaqa fusee mina atisaa mirinni qamunna dirifandinna amaaqa auquaqa. Miqimmasee mina kuradee fandinnana amaaqa 4 oosanaki siruaannai auqusee minaki kuradaaqa. Kaaqa naaquqara oosirana ititaanifeera kuradaaqa.
EXO 26:33 Miqimmaseeqa mi qamunnana amaaqa auquqaanasaa dirisaifanoo amaaqa auqirana ameemaanai qamunna ati ooreeqanoo mariani. Miqimmasaifanoo mi qamunnana ititarafa ataufaka ameemaanai ooreeqanoo mariani. Mi qamunnafa ititaranaki moodaanaki kira bukisaki qaara oonisaa sandufa marina quqaaqa. Mi qamunnafa naaquqara oosirana faqa kaaqa naaquqara oosirana faqa rainaannoo.
EXO 26:34 Moodaanaki kira bukisa kaaqa naaquqara oosiranaki quqasee koorannai mina afu auqusee rafaaqa fuaqa, nifauara afu minasaa rafaaqa fuaqa. Dirira qamunna fannoo raina nimaqaidanoo kooqi kinaa oosiranara naaquqara maqa fee qimasee kukeeqara oosiranara uriqaramasee naaquqara maqa fee qiaqa.
EXO 26:35 Teeboora mareeqee naaquqara oosirana maaqoo oonumafi kooqiki suani afu dinni ataaqee qaannai (north) mafi quqaaqa. Qooma saqari suani afu dinni ataaqee qaannai (south) mafi quqaaqa.
EXO 26:36 Uiqaana maqa kooqiki ititee fandinna qamunnana sipsipa asausi dirindaasi akirana faqa pannoona akirana faqa faeena akiranannai faqa marasee auquaqa. Oosana oosana sandannai mooka maakira ainainauqa mi qamunnanasaa auquaqa.
EXO 26:37 Mi qamunnana dirifandinnana moodaannai qisauku 5 akasia saqari marasee koorannai mina atimau rafaaqafusee qamunna dirifandinnana anaanu auqusee quqaaqa. Miqimmasee booroosannai moodaannai qisauku 5 atuna oosana amaaqa auqusee minaki kuradaaqa.
EXO 27:1 Innee akasia saqari marasee minannoo tatufirana suqara qainda auquaqa. Mina kisaaqandanai faqa qusandanai faqa amana amana kai mariani 2.2 metres. Maqasaaqari urirafa qaara faqa qaara faqa aiku 4 amana 1.3 metres mariani.
EXO 27:2 Mina qaara faqa qaara faqa atisaa aanaira foora auqinoo mariani. Tatufira qainda moodaa saqari fannoo kai atimau faqa qambaanai faqa aanai faqa moodaa saqarinnai kai auqusaifanoo mariani. Mi aiqama ainainausa booroosannai rafaaqa fuaqa.
EXO 27:3 Mi tatufirana suqeemaria qaindanasaa suqee maria ainainausa booroosannai kai auquaqa. Fadameena dandaki aqufinnana afaqee maria futufitausa faqa savoorauqa faqa uqnaurira piritauqa faqa tafa fooqaa irana ati saaee irana faqa ida auni afaqee maria futufitausa faqa aiqama booroosannai kai auquaqa.
EXO 27:4 Innee fukaa asaana booroosannai auqusee booroosannai kai aanaanu faqa auqusee qaara faqa qaara faqa atinni quqaaqa.
EXO 27:5 Mi fukaa asaanafa tatufira bukisa aundurai kasaaqai ooqeeqanoo qambaanai mariani.
EXO 27:6 Akasia saqari tatufira qainda qaindusi fandinnana qaaraqanda maraseeqa booroosannai miqanda rafaaqafuaqa.
EXO 27:7 Mi qaindana maree fuaqee qifaqa kai mi saqari qanda dinni dinni anaanuki aususaifaqa maree fuaqa.
EXO 27:8 Tatufira qainda indooira saqarinnai kai aundura faqaana auquaqa. Qinee aaqanasaa ani uqafiqaa fanandee masee auquaqa.
EXO 27:9 Innee amiqira sanda sufusee auquqaa qamunnanannoo uiqaana maqasaa ququsara foora auqu ititaaqa. Suani afu dinni ataaqeenni South mina kisaaqa 44 metres mariani.
EXO 27:10 Mi qamunnana dirifandinnana booroosannai dapu 20 auqusee mina kuradee fandinnana amaaqa miqi kai masee 20 auqusee siruaannai tafara foora mina amana kai auqusee auniri fandinna saqarina faqa minannai kai auquaqa.
EXO 27:11 Suani afu dinni ataaqeenni iandee kai iqa dinni ataaqeenni faqa miqi kai iaqa.
EXO 27:12 Suani keeqee mari qaannai dapu qusandanai 22 metres mariani. Mina dapu saqari 10 faqa mina amaaqa auqirafa faqa 10 kai mariani.
EXO 27:13 Kafaa suani oosana qaannai kooqi maru tinai faqa uruanai inoo marina amana kai 22 metres mariani.
EXO 27:14 Suani oosana qaannai East kooqi mariani. Mi kooqina dinni dinni diri fandinna qamunnafa 6.6 metres mariani. Mi kooqina dinni dinni qaarammoo dapu faqa mina amaaqa faqa dinni dinni qaarammoo kai mariani.
EXO 27:16 Kooqiki dirira qamunna 9 metres kisaaqa amiqira sipasipa asausi dirindaasianda faqa pannoonanda faqa faeenanda faqa marasee mi qamunnanasaa oosana oosana amiqira akara ruaqa. Mi qamunnana quqee fandinna saqarina qaara faqa qaara faqa 4 mariani. Mina rakiqee fandinnana qaara faqa qaara faqa ki mina amaaqa auquaqa.
EXO 27:17 Aiqama dapu fiqu fiqu qirafa siruaannai rafaaqa fuqaa saqarinasaa ootupanoo mariani. Minasaa qamunna diri fandinnana tafara maqi iranauqa siruaannai auquaqa. Mi saqarisa rakiqee fandinnana amaaqauqa booroosannai auquaqa.
EXO 27:18 Ququsa afuqai kisaaqa kamu 44 metres mariani. Mina qusa kamu 22 metres mariani. Ququsasaa dirira qamunna mina oorufirafa 2.2 metres maqasaaqari oorufuannoo. Mi qamunnana amiqira qamunna kaqikaa sandannai sufirafa afeeka mariani. Mina dapu oosanaki booroosannai amaaqa auqirafa maqaki mariani.
EXO 27:19 Uiqaana maqaki oosana oosana ainainira ainainauqa aiqama booroosannai auqirafauqa kai mariani. Uiqaana maqa ati mau apupuka arifandinna aikausa booroosannai kai auquaqa. Uiqaana maqa dapu rakiqarana qumaraanifee qimasee apupuka aqoosai faqa afuqai faqa arifandinafa aiqama booroosannai auqira apupuka kai mariani.
EXO 27:20 Moosee anee Isaraee maqannaasa qimanniminaqa oorifa saqari qaqamakinaa fadameena amiqirana kai minisaifana aiqama eendirana minannoo qooma qumbia.
EXO 27:21 Aaroonafa narí faiqi namu faqa qini Anutusa naaquqara uiqaana maqaki moodaanaki kira bukisa ititee maria qamunna naaquqara oosiranaki qoomauqa quqaaqa. Miqoo qini qifusaa eendi marinaqa qumbisaifanoo qamammareenoo iaqarana kai raquru amiani. Maa naamuaqira ufana Isaraee maqannaasa faqa misasaa ani arua kinausa faqa naaru naaru afaqaaqa.
EXO 28:1 Yaaweefa kaifaa Mooseena qimaminoo qinau. Anee aneenna afasaana faqa mina faiqi namu Nadabana faqa Abiuna faqa Eeriasana faqa naara masee Itammarana faqa Isaraee maqannaasa kinaana raina naaduma quqasainaqa qini aanaiqi kira saika maraaqa.
EXO 28:2 Aneenna afasaana Aaroona misakina uriqarara aanaiqikira qamunna auqu amia. Miqimmasainanoo mi qamunnafa amiqirana faqa uriqararausee qirana faqa amiani.
EXO 28:3 Moosee anee Aaroona qamunna akunifandinna fasiqausa irirana fiqararausa qinee irirana nimiqaunausa misa kai suqusee qimanniminaqa mina qamunna akuniaqa. Akunusaifanoo mina afisusee miqooqari qini aanaiqikira saika maraani.
EXO 28:4 Anee qimanniminaqa nimuqusasaa rufi maria ainainna faqa eefooda qamunna faqa kisaaqa qamunna aikusaa faqa ititeemari qamunnana faqa akara faqaa siuta faqa akiiqa rafaaqa fimari qamunna faqa aranandauqanna rumbarana faqa minamuna auquaqa. Misa miqimmaseeqa uriqarara aanaiqikira qamuna ani afasaana faqa mina faiqi namu faqa auqu nimisaifaqa misa qini aanaiqi kira saika maraaaqa.
EXO 28:5 Akunirana akoofasauqaindi sipsipa asausi dirindaasi akirana faqa pannoona akirana faqa faeena akirana faqa koora tiritanda faqa amiqira tiritanda faqa mi ainainausannai aanaiqikirausa qamunna auquaqa.
EXO 28:6 Misa sipsipa asausi dirindaasi akirana faqa pannoona akirana faqa faeena akirana faqa koora tiritanda faqa amiqira tiritanda faqa aiqama mi ainainausannai eefooda qamunna auquseeqa minasaa oosana oosana akara ruaqa.
EXO 28:7 Eefooda qamunna anaanu qaaraqanda aururusaa aakandianinnana auqusee eefooda qamunnasaa dinni dinni rumbaaqa.
EXO 28:8 Mina ooiqanda ianinnana amiqira qamunnannai eefooda qamunna auquandee kai masee auquaqa. Mifa eefooda qamunnasaa akunirafa mariani.
EXO 28:9 Eefooda anaanusaa akumaaqa ooni qaaraqanda pupuooni marasee dinni anaanusaa moo dinni anaanusaa moo quqasee Yakooboona faiqi namu qisauku qara taikasee qikunni ooqu qaara marasee nuqu mi ooni qandasaa akara ruaqa.
EXO 28:10 Dinni pupu oonisaa dinni taikasee dinni ani moodaa marasee 6 nuqu akara ruani, dinni pupu oonisaa miqikai mandee 6 akara ruani. Aiqama narí kambiqoona amana kai nuqu akara ruaqa.
EXO 28:11 Oonisaa akara rirana akoofasa marina afiqasaifanoo mifa qaara oonisaa Yakooboona faiqi namu nuqu akara ruani. Akara rumaseeenoo mi ooni qanda koora qambaana quqasainanoo atukaranoo mariani.
EXO 28:12 Miqimmasee aururusaa eefooda qamunna aakandammasainanoo Yakooboona faiqi namu qisauku qaara taikasee qikunni ooqu qaara marasee 12 Isaraee maqannaasa kikiqusinoo mariani. Miqimasaifanoo Aaroonafa misa nuqu narí aururusaa maranoo nimarinaqa qinee Yaaweesa qeeqa faiqí aanaaseera aiqama kari irianaura.
EXO 28:13 Aururusaa qaara ooni atukaramma qumaree mari kooranasaa qaara qanda amiqira koora sainanda sufirana moo ati moo oonisaa moo ati moo oonisaa ootupaaqa.
EXO 28:15 Innee nimuqusa saa rufi mariana aanaiqikirausa auqu nimisaifaqa minannoo misa Anutuna iriranara aidiranara irifaranoo. Eefooda qamunna auqu ainainausannoo kai auquseeqa moodaa karira akara kai ruaqa.
EXO 28:16 Qambaana tukaandasaifanoo aiqama ati amana amana kai 22 centimetres mariani.
EXO 28:17 Innee ooni amiqirana firaa feefauru aqi mariana kai marasee qaara faqa qaara faqaki mi qamunnanasaa padiaqa. Indaaruqaa padiranaki moo ooni auqu rubi faqa moo ooni toopasa faqa moo ooni ganeeta faqa minamuna padiaqa.
EXO 28:18 Mina aanaaqiannaa padiranaki moo ooni auqu eemeerara faqa moo ooni safairee faqa moo ooni daimanna faqa minamunannai padiaqa.
EXO 28:19 Mina aanaaqiannaa padiranaki moo ooni auqu teerakoosa faqa moo ooni agatee faqa moo ooni auqu ameetisa faqa minamunannai padiaqa.
EXO 28:20 Mina aanaaqianaa padiranaki moo ooni auqu beerira faqa moo ooni kanirianna faqa moo ooni yasapaa faqa minamunannai padiaqa. Mi oonisa koorandannai amuqusa saa ititanoo mari qamunnanasaa isooqa araaqa.
EXO 28:21 Mi oonisa moodaa moodaa ooni fannoo Yakooboona faiqi namu qisauku qara taikasee qikunni ooqu qaara marasee 12 Isaraee maqannaasa kikiqa usinoo mariani.
EXO 28:22 Innee nimuqusasaa rufirana anaanu amiqira koorannai auqira sanda seenandara foora auquseeqa afundasee dinni dinni atisaa qusuaqa.
EXO 28:23 Koorannai anaanu qaaraqanda auqusee amuqusa saa rufinna qamunnana mirinni atisaaqara qusuaqa.
EXO 28:24 Qaara qanda seennanda koorannoo afundaranannai mi anaanu qandaki qusuaqa.
EXO 28:25 Mi sandana ati qarannai aururusaa koorandannai ooni isooqa aruqaanaki ootupaaqa. Miqimmasaifanoo aururusaa eefooda qamunnasaa rumbaaqa.
EXO 28:26 Kafaa nimuqusa saa rufi mariana anaanu qaara qanda koorannai auqusee aunduraindari ati saa mi anaanuna rumbasaifanoo eefooda qamunna mammaaqai mariani.
EXO 28:27 Kafaa qaaraqanda aanaanu koorannai auquseee afunni qumu mari eefooda qamunnana saa aqaasanai amiqira qamunnannai sufirana ooi qandianinnana aaqa rumbaaqa.
EXO 28:28 Nimuqusa saa diri maria qamunnana saa anaanuki dirindaasiandannai sufira sanda qusuaki eefooda qamunna saaqaraa aanaanuki qususee rumbaaqa. Miqimasaifanoo amuqusa saa ititara qamunna sia kasi kasiani.
EXO 28:29 Aaroonafa naaquqara maaqaki keeqafinoo mi qamunnana Isaraee maqannaasa nuqu akara rirana afisusainaqa qinee Yaaweesa aiqama kari qeeqa faiqí aanaaseera irianauranoo.
EXO 28:30 Amuqusaa ititara qamunna raqandaamasee uqara foora akunusai mariani. Mi uqanaki ooni qaaraqanda miqanda nuqu Urimma faqa Tumimma faqa Aaroonafa mi uqanaki uqarumasee qini uiqaana maqaki aniani. Miqiraree qimaseenoo aiqama kari nimuqusa saa diri maria qamunnana rufu maree anireenoo mifa qini irirana iriseenoo Isaraee maqannaasa qimannimiannoo.
EXO 28:31 Innee eefooda qamunna meeaqoo qaraana auqirara dirindaasi akira sipsipa asausinnai kai auquaqa.
EXO 28:32 Anuka amaaqa auquaqa. Qamunna raqandaammasee akunusaifanoo anuka upeekaina sia anaqiani.
EXO 28:33 Mina atimau raqandaammasee akunuseeqa saqari aqama faqa kaqikaa biru koorannai auqirana faqa mina atimau qusuaqa. Dirindaasi akira sipsipa asausinnai faqa pannoona akiranannai faqa faeena akiranannai faqa mi saqri aqamana amana auquaqa. Auquseeqa mi saqari aqamana faqa koorannai auqira biru faqa qamunna atimau moo mafi quqee moo mafi quqee iaqa.
EXO 28:35 Aaroonafa aanaiqikira saika auqararee qimasee mi qamunnana afisuani. Mifa naaquqara maaqaki qinee umee marunnana qifusaa aninanoo fee quqasee finanoo fee mi birusa narisaa narisaa ariqa ufa qifanoo Aaroonafa sia kuquannoo.
EXO 28:36 Innee amiqira koora marasee aqiniandirana auqusee mina saa akara rumaasee Yaaweena ainainira faiqi fee qiaqa.
EXO 28:37 Akiiqa aanaamu qusirana aqini saa quqasee dirindaasiandannoo rumbaaqa.
EXO 28:38 Aaroonafa mina aqinaaqa rumbasainaqa qinee Yaaweesa aiqama Isaraee maqannaasa aaduma qini qimiraree qinna ainainausara eedoo qimasee maraanaura. Misa akaqa aaqarana auqamasee qimifaqa qinee Aaroona mi aqiniandiranara irisee sia minni saanaura. Kaqi maraanaura.
EXO 28:39 Innee amiqira sanda sufuseeqa Aaroona siuta auqusee mina akiiqa aanaamu faqa auqusee minannoo kai aranandauqa rumbarana faqa auquseeqa minasaa oosana oosana akarannoo afaaqa auquaqa.
EXO 28:40 Aaroona faiqi namu siutauqa faqa niranandauqanna rumbee mariana faqa nikiiqa aanaamu faqa kaaqa amiqiranauqa auqu nimiaqa.
EXO 28:41 Moosee anee maa qamunnausa mara maree aneenna afasaana Aaroona narí faiqi namu faqa afisu nimaqaa. Oorifa fadameena misa nikiiqa amoondunna adia nimaqasee naaduma mara quqasee mi saikana nimia. Miqimmasainaqa misa qini aanaiqikira saika maraaqa.
EXO 28:42 Innee qusa karausisa nooiqakiqari nifundana saa ooqeeqarana auqu nimiaqa. Miqimmasaifaqa misa sia nári nifaaqa kooroo iaqeera.
EXO 28:43 Aaroonafa narí faiqi namu faqa qinee umee marunnanaki qini uiqaana maqaki keeqafinoo qini qaindasaa naaquqara qoo aanaiqikira ainaina auqararee qimasee aiqama kari mi karausisana afisuaqa. Miqiqa sia nári nifaaqa kooroo iqa sia kuqifaranoo. Maa ufafa Aaroona faqa mina saa ani aruakinausa saa faqa naaruara mariannoo.
EXO 29:1 Maaqimmasee Aaroona faqa mina faiqi namu faqa naaduma mara quqasaifaqa qini saikaki aanaiqikirausa mariaqa. Innee burimakau akoona timmusa faqa sipsipa akoona qaaraqanda dinee teeroo siaina kai maree aniaqa.
EXO 29:2 Amiqira parauaqa qaindirirana innooqee mari pauraqana sia aqirana oorifa fadameenannai suqaaqa. Akaqana sia oorifa fadameennannai suqaaqa. Akaqana ausirira feemu auqusee oorifa fadameena akusee suqaaqa.
EXO 29:3 Mi ainainausa nafisaa amanee uqa fooqaa iranaki rumaseeqa innee burimakau akoonannoo faqa sipsipa akoona qaara qandannoo qini tatufirana suqa qimiraree qimasee mi ainainausa namufaqa qimiaqa.
EXO 29:4 Moosee anee Aaroona narí faiqi namu faqa nifiqamaree qinee umee marunna uiqaana maqa kooqiki minisee qimanniminaqa amiqimmasee nammari auqaaqa.
EXO 29:5 Miqimmasaifana anee uriqarara aanaiqikira qamunna Aaroona afisuamaqaa. Siuta faqa kisaaqa qamunna aiku ataa dukunirana faqa eefooda qamunna meeaqoo afisirana faqa mina amuaaqa eefooda faqa nimuqusa saa rufi maria qamunnana faqa nooiqandi mariana faqa aiqama mi ainainausannoo afisu amaqaaqa.
EXO 29:6 Nikiiqa aanaamu afisu amaqasee naaquqara kooroo ira fee qimasee rumbaa. Maaqi qimasee minasaa akara ruaqa. Yaaweena saikaki marifee qimasee akara ruaqa.
EXO 29:7 Rumba amaqasee Yaaweenaindi fee qimasee utaaqama amaqara fadameena akiiaaqa adiaaqa.
EXO 29:8 Anee Aaroona faiqi namu nifiqa quqasaina mi siutausa afisuaqa.
EXO 29:9 Niranandauqanna rumbee mariana rumbasee nikiiqa aanaamu faqa afisu nimaqaaqa. Miqimmaseeqa Aaroona faqa mina faiqi namu faqa mi saikana nimia. Misa faqa misa saa aniaruakinausa qini aanaiqikira saikaki naaru naaru marifaranoo.
EXO 29:10 Moosee anee Aaroona narí faiqi namu faqa qamunna afisu nimaqasainaqa burimakau akoona timmusa mara qinee umee marunna uiqaana maaqana kooqinni minisaifana Aaroona narí faiqi namu faqa qimanniminaqa mina akiiqasaa nisauku quqaaqa.
EXO 29:11 Miniseeqa mi burimakau akoonnana qinee umee marunna naaquqara uiqaana maqana kooqiki aruaqa.
EXO 29:12 Aruseeqa mina fidika marasee aneenna asauku amukasaa raaraammasee qaidara qaara faqa qaara faqa atisaa aanai fooqaa iranasaa akua. Miqimmasee akaqa fidika kaqi marinauqa mara maree qaidara qainda oosanaki adiaaqa.
EXO 29:13 Miqimmasee kafaa aradanda saaqaraa ainoo aiqama maraaqa. Mina annaama faqa mina atakisa qara faqa ainoo minasaa marina faqa amaandamoona saaqaraa karoo karoona faqa marasee tatufira qaindasaa quqasee suqa qimia.
EXO 29:14 Burimakau akoona amaqi faqa apata faqa arada faqa inneeqa naambeeqai aqoosai ida arasaifanoo qaani. Mifa aanaiqikirausa numoo maraqu niseenoo taika nimaqaannoo.
EXO 29:15 Sipsipa akoona moodaa marasee Aaroona faqa mina faiqi namu faqa qimanniminaqa nisauku mina akiiqa saa quqaaqa.
EXO 29:16 Miqimmasaifana mina arusee mina fidika marasee qaidara qaara faqa qaara faqa atinni mi fidikana adiaa.
EXO 29:17 Miqimmasee mi sipsipa akoonnana kaqikaana kaqikaana auku quqasee mina aunduraindaraa ainaina faqa aikuqara faqa nammari uqusee minauqa mareeqee mi sipsipana akiiaaqa akaqa aukiranauqa namufaqa quqaaqa.
EXO 29:18 Mi sipsipa akoonna aiqama afaaqa qaidarai quqasee qini tatufiranara foora ida araaqa. Mina afundara qinee asasianaura.
EXO 29:19 Mina ida arasee sipsipa akoona moo aanaiqikira saikaki quqee mariana mara minisainanoo Aaroonafa narí faiqi namu faqa mina akiiqasaa nisauku quqaaqa. Quqasaafana arua.
EXO 29:20 Aruseenana mina fidika afeeriqiseenana Aaroona narí faiqi namu faqa nisauku uqannai naaqoosaa akusee nisauku uqannai nisauku akoonnanasaa akusee, nisauku uqannai niku akoonnana saa faqa akua. Akusee fidika kaqi marina qumaree qaidara qaara faqa qaara faqa atinni adia aquaqa.
EXO 29:21 Qaindasaaqaraa fidika akaqana qumaree nikiiqaki aki maria fadameena namu faqa marasee Aaroona narí faiqi namu faqa nifaaqai faqa qamunnasaa faqa rurufida akunnimaqaaqa. Miqi masaifaqa Aaroonafa narí faiqi namu faqa misa fuka qamunna faqa qinindi kiani.
EXO 29:22 Mi sipsipana ainoo ameesa saa qaraana faqa audurakinaa afaaqa saa qaraa ainoo faqa annaama ati amiqirana faqa qaara atakisa mina saa ainoo marina faqa asauku uqannai afundana faqa ateeka aqua.
EXO 29:23 Qini qimia nafisa amanee uqana kinaana oosana oosana narana moodaa moodaa maraaqa. Oorifa fadameenannai suqarana moodaa faqa moo sia oorifa fadameenannoo suqarana moodaa faqa ausirira feemu moodaa faqa maraa.
EXO 29:24 Mi naranausa Aaroona faqa mina faiqi namu faqa nisaukuki quqasainaqa uriqarara kaqi nimirafa qini Anutusaindi fee qiaqa.
EXO 29:25 Miqi maseenana kafaa nisaukukinaana mareeqeenana qaindasaa sipsipa akoona auku quqaqaana amuaaqa quqasee ida arasaifanoo qaani. Qini qimira naranara foora ida araaqa. Mina afundara qinee asasianaura.
EXO 29:26 Moosee anee mi sipsipa akoonnana marasee qini Yaaweesa qifu saa uqeerasee qini Yaaweesa uriqarara qimira ainainee qimasee aneenna mi aandauna naa.
EXO 29:27 Innee faiqí aanaiqi kirausaikamma nimaqararee qimasee qini qimia narannakinaana sipsipa akoona ameemmeeqana marasee qini qifu saa uqeeraseeqa mina asaukuqannai afundana uqaqifiqaaqa. Miqimmaseeqa mi aandauna aanaiqikirausa naaqa.
EXO 29:28 Mi ufafa qini ufa marinaqa naaruara naaruara qini faiqí anaasee qini faqa moodaanaki suqira tatufirana suqaaqa. Mi aandauna ameemmeeqana faqa asaukuqannai afundana faqa aanaiqikirausaindi mariani. Faiqí anaasee qini Yaaweesa kaqi qimira ainaina miqimminoo mariannoo.
EXO 29:29 Aaroonafa kuqinaqa mina uriqarara aanaiqikira qamunna mina faiqi namu maraaqa. Mi saikana oosana arainna faasaana mi qamunnana afisusaifaqa fadameena nikiiqa amoondunna adiaaqa.
EXO 29:30 Aaroona amaaku narí akoona amaaqa maqainafa uiqaana maqaki qinee umee marunnnanaki keeqafinoo naaquqara oosiranaki ainainiraree qimaseenoo mi uriqarara qaanaiqikira qamunnana afisusee moodaannai qisauku taikasee dinni ani qaara marasee 7 faasaana saa mi naaquqara oosiranaki ainainiani.
EXO 29:31 Yaaweefa kafaa Mooseena qimaminoo qinau. Anee Aaroona faqa mina faiqi namu faqa nikiiqa amoodunna fadameena adia nimaqaidana suqeenna sipsipa akoonnana ameemmeeqana faqa asaukuqannai afundana faqa marasee qini naaquqara oosiranaki afeeki quqasee nammari namufaqa suqaaqa.
EXO 29:32 Qinee umee marunna uiqaana maqana kooqiki mina naaqa. Nafisa amanee uqaki kaqi mari feemusa namu faqa naaqa.
EXO 29:33 Misa namasaifana aanaiqikira saikaki keeqarana fadameena nikiiqa amoondunna adiasainanoo misa numoo akiiqara mininnisarafa mariannoo. Mi narannafa naaquqarafa marinara aanaiqikirausa kai naaqa.
EXO 29:34 Akaqa aandau faqa feemu faqa nimuaquinaqa sia naifandinnana kananaana kaqi marinaqa ida araseeqa minaki aqusaifanoo amiqimmasee qama taikaani. Mi naranafa naaquqarafa marinara sia naaqa.
EXO 29:35 Aaroonafa narí faiqi namu faqa aanaiqikira saika oosana arainna qooqari qinee ani aamua qunandee iqa moodaannai qisauku taikasee dinni ani qaara marasee 7 faasaana uqanna kai mi ainainausa auqaaqa.
EXO 29:36 Mi moodaa moodaa faasaannasaa anee burimakau akoona tatufirana suqa qiminanoo aiqama numoo taikaannoo. Miqinanoo qini qaidara fannoo anukarafa mariannoo. Miqimmafinana oorifa fadameena qaidarasaa adiasainanoo naaquqanoo mariani.
EXO 29:37 Aiqama kari moodaannai qisauku taikasee dinni ani qaara marasee faasaana saa miqia. Miqinanoo qini qaidara fannoo kaaqa uqanna naaquqarafa mariannoo. Moo fannoo fee moo ainaina fee mina auqainafa mina naaquqara afeeka fannoo aruannoo.
EXO 29:38 Yaaweefa kafaa Mooseena qimaminoo qinau. Innee sipsipa aanaaqi qaaraqanda moodaa aukuana marara qanda marasee qaidarai tatufirana suqaaqa. Naaru naaru aiqama faasaana miqi kaimmiaqa.
EXO 29:39 Moo sipsipa kananaana tatufuaqa moo eendimarina tatufuaqa.
EXO 29:40 Kananaana suqainna sipsipana namu faqa amiqira sakumannoo qaindirira parauaqa mina ummaara fannoo 1 kilogramme oodaa namu faqa amiqira oorifa fadameena namu faqa quandasee suqa qimia. Uainna nammari oodaa 1 litre amana kai qinee Anutusa naannana adiaaqa.
EXO 29:41 Eendi marinaqa suqainna tatufirana kananaana suqaandee kai iqa sakuma qaindiriranannoo faqa oorifa fadameenannoo faqa uainna nammarinnoo faqa suqaaqa. Mifa qini Yaaweesa qimira narana maridanoo. Mina afunda fannoo qini asasirana qimidanoo.
EXO 29:42 Naaru naaru kasooaqee maa tatufira suqarafa qinee umee marunna uiqaana maqa kooqiki qini qifu saa tatufu qimiaqa. Miqifaqa miqoo qinee inni qeeqa faiqí anaasee faqa moodaanaki maridaqa ufa qima nimianaura.
EXO 29:43 Miqoo qinee Isaraee maqannaasa faqa mariananoo qinee umee marunna maaqanakiqari daroo daraa ira kaaqa qarafa mi saqanna naaquqainaqa sia faiqí anaasee kaiqeesa miqoo fifaranoo.
EXO 29:44 Qinee qeeqa uiqaana maqa faqa qaidara faqa naaquqara faika masaanaura. Qinee Aaroona narí faiqi namu faqa qini ainainirausa mariafaqa naaduma misa aanaiqikira saikaki quqaanaura.
EXO 29:45 Qinee Isaraee maqannaasa qambaana maridaqa misa Anutusa marianaura.
EXO 29:46 Misa qini Yaaweesa nariqa Anutusa Isipa maqa maaqaindaraana nifiqee aniafannanara iri marifaqa qinee misa qambaana marianaura. Qinee Yaaweesa misa Anutusa marianaura.
EXO 30:1 Yaaweefa kaifaa Mooseena qimaminoo qinau. Moosee innee akasia saqari marasee amiqira afundi mari ida munana aree fandinna qaidarana auquaqa.
EXO 30:2 Mi qaidarafa dinni dinni amana kai mariani. Mina kisaaqandanai 45 centimetres mariani. Mina qusandanai miqi kai inoo 45 centimetres mariani. Maqa saaqari ooru firafa 90 centimetres mariani. Mina qaara faqa qaara faqa ati moodaa saqarinnoo kai burimakau aanaira foora auquaqa.
EXO 30:3 Mina afu faqa aanai fooqaana faqa ataaqeeqara faqa amiqira koorannai kai rafaaqafusee koorannai mina fiqu fiqumma auquaqa.
EXO 30:4 Koorannai qaara qanda aanaanu auqusee dinni moo dinni moo quqasaifanoo qaindusi fandinna saqarina atukaramma qumaraani.
EXO 30:5 Mi qaindusira saqari qanda akasia saqarinnai auqusee koorannai rafaaqa fuaqa.
EXO 30:6 Mi qaidarana mara maree naaquqara oosirana dinni qini moodaanaki kira bukisa marina oorinni quqaaqa. Miqoo qinee inni faqa moodaanaki kianaura.
EXO 30:7 Aiqama kananaana Aroonafa qoomauqa andeeqarara anireenoo mifa mina saa amiqira adiafaa ira afundi marina suqaani.
EXO 30:8 Mifa kaifaa eendi marinanoo qoomauqa qumbiseenoo amiqira adiafaa imari afundana imarina suqaani. Mi oosanafa naaru naaru sia uqanna taikaannoo kaqi kai mariannoo.
EXO 30:9 Innee sia moo mi qaidarana saa qinee qaoo qima qaunna afundirana suqaaqa. Aandau tatufiranee sakuma qaindirira tatufiranee uainna nammari adiasee suqara tatufiranee sia minasaa suqaaqa.
EXO 30:10 Aiqama aukuana moodaa faasaana kai Aaroonafa mi qaidaranasaa ainaininanoo qini qifusaa amiqiannoo.
EXO 30:11 Yaaweefa kafaa Mooseena qimaminau.
EXO 30:12 Moosee anee Isaraee maqannaasa nuqu marasainaqa moodaa moodaa fasiqa nariqa mariranara qini feefauru qimiaqa. Miqimmasee nuqu maree marinaqa moo ummaara sia misa saa aqufuannoo.
EXO 30:13 Aiqama nuqu akaraki marisa uriqararausa auqu ramaqaa munnimmana amana kai quqaaqa. Aiqamausa mi feefauruna aqiqa qini qimira ainaina qimifaranoo.
EXO 30:14 Faiqí moodaa fasiqa aiku asauku taikasee 20 aukuana faqaasa faqa mina fiqarara aukuana faqaasa miqimmasee qini feefauru qimiaqa.
EXO 30:15 Misa nariqa marirana maaqimmasee feefauriaqa. Ainaina faqaasa sia fiqaramasee aqifaranoo. Ainaina siaisa sia oorudupi masee aqifaranoo. Aiqama amana amana kai aqifaranoo.
EXO 30:16 Mi munnimmana Isaraee maqannaasiannai marasee qinee umee marunna uiqaana maaqafa mandaikinana minannoo itipia. Misa nariqa mariranara mi takisana aqusaifaqa qinee misa saa itita nimaqaranara irianaura.
EXO 30:17 Yaaweefa Mooseena maaqi qimasee kafaa qimaminau.
EXO 30:18 Moosee anee nammari auqeemaria difaanina firaana auqua. Booroosannai auqusee mina aiku faqa booroosannai kai auqua. Auqusee nammari minaki adiasee qini uiqaana maaqa dinni marinana qaidara dinni marinana qambaana quqaa.
EXO 30:19 Aaroona faqa narí faiqi namu faqa minaki niku nisauku nammari uqimarifaranoo.
EXO 30:20 Misa qini ufa suqira maaqaki keeqaanee qimasee niku nisauku minaki mafi nammari uqusee qini qimifandinna narana qaidarasaa suqa qimiaqa. Miqiqa sia kuqifaranoo.
EXO 30:21 Misa nári niku nisauku nammari uquseeqa sia kuqifaranoo. Maa sanda ufana Aaroonafa narí faiqi namu faqa kasooqaqee misa saa aniaruakinausa faqa maa sanda ufana afaqee faranoo.
EXO 30:22 Yaweefa kaifaa Mooseena qimaminoo qinau.
EXO 30:23 Moosee anee makaqa anoona moomoo 6 kilograms faqa isaaqa anoona moomoo 3 kilograms faqa amiqira undi mari innupina anoona moomoo 3 kilograms faqa maraa.
EXO 30:24 Saadapu moomoo 6 kilograms faqa maraa. Aiqama ainaina uiqaana maqa sikeera amana kai mariani. Oorifa fadameena 4 litres amana minaki adiaaqa.
EXO 30:25 Mi naaquqara fadameena Yaaweenaindi fee qimasee nikiiqa amoondunna adiee fandinnana auqusee amiqira afundi marina namufaqa quandaaqa.
EXO 30:26 Anee mi fadameenausa auqu maree qini uiqaana maqasaa akuseenana qini moodaanaki kira ufa mari bookisanasaa faqa akua.
EXO 30:27 Aiku faqaa teeboora faqa minasaa qaraa ainainauqa faqa qooma saqari faqa minasaa qaraa ainainauqa faqa amiqira afundi mari pauraqana ida qee mari qaidarana faqa akuamaqaa.
EXO 30:28 Tatufirana suqee mafia qaidarana faqa minasaaqaraa ainainauqa faqa akuamaqasee nammari difaani faqa mina aiku faqa akuamaqaa.
EXO 30:29 Miqimmasee mi ainainausa aaduma saa mara quqasainanoo kaaqa naaquqanoo mariani. Moo fannoo fee moo ainainee mi ainainausa auqainafa mi ainainausa naaquqara afeeka fannoo naruannoo.
EXO 30:30 Miqimmasee Aaroona narí faiqi namu faqa mi fadameenna aku nimaqa sainaqa qini aanaiqikira saikaki mariaqa.
EXO 30:31 Moosee anee Isaraee maqannaasa maaqi qimasee qimannimia. Maa naaquqara fadameenna nikiiqa amoondunna adiee fandinnana qini ainainiranaki naaru naaru quqaaqa.
EXO 30:32 Maa fadameennafa sia kaiqee fasiqa adiannimaqee mariafa maridanoo. Innee sia moo fadameena miqirana auquaqa. Mifa naaquqara ainaina marinara innee minara naaquqara fee qimasee eerairiaqa.
EXO 30:33 Yafee moo fannoo maa fadameennara foora auqusee moona akiiaaqa adiainafa qini faiqí aanaaseeki sia mariannoo.
EXO 30:34 Yaaweefa kaifaa Mooseena qiminoo qinau. Moosee anee oosana oosana amiqira undi mari pauraqana sitakatee pauraqa faqa oonikaa pauraqa faqa karabanumma pauraqa faqa amiqira makaqa anoona faqa aiqama amana amana kai maraa.
EXO 30:35 Maraseenana amiqira afundi marifaqa nifaaqai aki marianara foora auqamasee ida arasainanoo qeenoo amiqira muna afundiani. Ooruku faqa oodaa quqasainanoo amiqinoo naaquqara faikiani.
EXO 30:36 Anee mina atiuqa maraseenana kaada ririisainanoo kookoomaika mafinana mara maree qinee umee marunna maqanaki muruseenana moodaanaki kira bukisa oorinni quqaa. Mi amiqira undana imarinara kaaqa naaquara fee iaqa.
EXO 30:37 Innee sia moo miqira afudimarinnana auquaqa. Innee minara naaquqara andeeqara ainaina Yaaweenaindi fee qiaqa.
EXO 30:38 Yafee moo fannoo miqirana amiqira undi marina afaaqai akiraree qimasee auqinafa sia qini faiqí aanaaseeki mariannoo.
EXO 31:1 Yaaweefa kafaa Mooseena qimaminoo qinau.
EXO 31:2 Moosee qinee innikinaana Beesareerana utaaqeeqa. Mifa Urina amaaku Hurana anaiqi Yudana oosanakinaafa maridanoo.
EXO 31:3 Qinee qeeqa maraquna afeeka aaku amaqeeqa. Qinee irirana faqa aiqama ainainirana akoofasaikira saika amiqa. Aiqama amiqira ainaina auqirana akoofasaikirana faqa amiqa.
EXO 31:4 Mifa koorannoo faqa siruaannoo faqa booroosannai faqa oonu mafi irisaidanoo oosana oosana ainaina akoofasauqa akara rimaria irirana faqa auquani feera amiqa.
EXO 31:5 Qinee firaa feefauru aqi maria oonina ateekara oosana faqa saqarinnai ainaina amana auqirana akoofasaikirana faqa Basareerana amiqa.
EXO 31:6 Qinee moo fasiqa Ooqooriabana Aqisamakana amaaku Dannana oosanakinaana mara quqasaananoo Beesareerana faqa ainainiannoo. Qinee akaqausa faqa firaa irirana oosana oosana ainaina auqirana akoofasaikirana nimiqa. Miqimma saanaqa misa qinee qimannimianna aiqama ainainna auquaqeera.
EXO 31:7 Qinee umee marunna uiqaana maaqana faqa moodaanaki kira bukisa faqa mina afu numoo taikannisarana faqa aiqama uiqaana maqakinaa ainainauqa faqa auquaqa.
EXO 31:8 Teeboora faqa minasaa mari ainainausa faqa ramma dirirana amiqira koorannoo auqirana faqa minasaa mari aiqama ainainausa faqa amiqira afundi mari tatufirana suqara qainda faqa auquaqa.
EXO 31:9 Tatufirana suqee maria qaindana faqa mina suqee maria ainainausa faqa niku nisauku nammari uqimaria difaanina faqa mina oosana faqa auquaqa.
EXO 31:10 Misa amiqira qamunnauqa Aaroona faqa mina faiqi namundi faqa aanaiqi kira saikaki maridaqa afisifandinnana faqa auquaqa.
EXO 31:11 Qinindi fee qimasee akunnimaqee fandinna fadameenna faqa adiafaa ira amiqira afundimarina naaquqara oosiranakinaana faqa auqua. Misa auqidaqa qinee qunandee kaimaseeqa auquaqa.
EXO 31:12 Yaaweefa Mooseena qimaminoo qinau.
EXO 31:13 Moosee anee maaqi qimasee Isaraee maqannaa qimannimia. Sabata qini idooara faasaana amiqimandee ireedakai mariaqa. Mi faasaanafa qini faqa inni faqa qambaana naaru naaru maridanoo qinee Yaaweesa inni mara qeeqa faiqí anaasee kunnanara quqannifiqaannoo.
EXO 31:14 Innee qini idooara faasaana naaquqarafa marinara ireeda kai mariaqa. Faiqí moo fannoo sia ireeda marirai mi faasaanna ainaininnana kuqa aruaqa.
EXO 31:15 Qisauku dinni taikasee dinni moodaa marasee 6 faasaana innee inneeqa ainainiaqa. Qisauku dinni ani qaara marasee 7 faasaana firaa idooara faasaana qini naaquqara faasaana maridanoo. Yafee mi faasaanna ainaininnana innee mina kuqa aruaqa.
EXO 31:16 Isaraee maqannaasa innee faqa qinee faqa moodaanaki kunnanara mi faasaanafa uqannifiqaani.
EXO 31:17 Mi faasaanafa inni Isaraee maqannaa faqa qini faqa naaru naaru aqoondikirana koorooi mari faasaanafa mariannoo. Qinee Yaaweesa dinni taikasee dinni ani moodaa marasee 6 faasaanasaa maqa faqa innaaruna faqa auqusee dinni ani qaara marasee 7 faasaana ainainirana quqasee idooaafannanara mi faasaanafa idooara faasaana mariannoo.
EXO 31:18 Anutufa aiqama ufa Mooseena Sinai aaqanasaa qimami taikaseenoo qaara ooni ausiriranasaa Anutufa narí asaukunnai sanda ufa akara rumaqoona aminau.
EXO 32:1 Mooseefa aaqanai kisaaqasaa ooru marufaqa Isaraee maqanna faiqí anaasee Aaroonafa maruqoo suqumaree aniree Aaroona maaqi qimasee qimamiqau. Maa fasiqafa maasa Isipa maqa maaqaindari qifiqee anufa naqaafee imari faqee maasa sia iridaqa. Minara anee moo anutuna auqusainanoo maasa indaarunnikamma nimaqaani.
EXO 32:2 Aaroonafa misa ufa iriseenoo qinau. Inneeqa faiqi anaasee naaqookinaa koora faqa fidinaanu faqa tatuseeqa mini qimiaqa.
EXO 32:3 Miqi qufaqa aiqama faiqí anaasee nári naaqookinaana raduku maree mini Aroona amiqau.
EXO 32:4 Amisoofanoo Aaroonafa mina qumareenoo idannai tasirisiri mandeenoo maqasaa burimakau akoona aanaaqi amana auqu qoonaki adiasoofanoo burimakau amana auqinau. Auquseenoo paipanannai mina atiuqa andeeqanau. Miqimmasoofaqa faiqí anaasee qiqau. Isaraee maqannaasa maafa maasa Anutufa maridanoo. Maafa kai maasa Isipa maqannaindari nindiqee anufa maridanoo.
EXO 32:5 Aaroonafa misa ufa iriseenoo burimakau akoona amana auqirana aaqa tatufira qainda auquseenoo faiqí anaasee qimanniminoo qinau. Duna aiqama suqumaree aniraifaqa oomaqa sakasee naidaqa Yaaweena auqa uqeeraa.
EXO 32:6 Miqi qimasoofaqa iaqoo kananaana faiqí anaasee akaqa aandau mara maree minisee qaindasaa tatufirana faqa Yaaweena faqa moodaanaki kira tatufirana faqa suqaqau. Suqamiseeqa ooqu marifiqa afeeka nammari faqa narana faqa namaseeqa findifiqa aanaaseeuqa faqa manda oosana maraqau.
EXO 32:7 Yaaweefa misa nindafeenoo Mooseena qimaminau. Anee kai kaqi ooqufua. Faiqí anaasee anee Isipa maqanaindari nifiqee anianausa qini minnisee aaqara oosana maraidammia.
EXO 32:8 Misa doo qinee fuaqee qimasee naamuaqiafanna aana minniseea. Misa koorannai burimakau akoona aanaaqi amana auqusee mina tatufirana suqamiseeqa minara innaaru qidaqa. Misa maaqi qidaqa Isaraee maqanaasa maasa Anutufa maafa maasa Isipa maqannaindari nifiqee anufa maridanoofee qidaqa.
EXO 32:9 Minara qinee Yaaweesa Isaraee maqannaasa kaaqa ramoo ramaa imariafaqa iridaqa.
EXO 32:10 Doo firaaqoo qini qirana qaifaqa misa kuridi taikasaanaura. Anee sia qiniara qaoo qia. Miqimmaseeqa ani faqa anisaa ani aruakinausa faqa kai amiqi amiqimma nisaanaqa firaa maqannaa marifaranoo.
EXO 32:11 Mooseefa irinoo Yaaweena aanoo qiranara innaarukiqari qaoo qidanoo qinau. Oo Yaawee nanaree anee aneenna faiqí aanaaseera arana qaidanoo fee. Anee firaa afeekannai misa Isipa maqanaindari nifiqee anianafa naqaaifanee aanoo qima nimaqaidanee.
EXO 32:12 Anee miqinaqa Isipa maqannaasa aniara nári kai qimirisee Isaraee maqannaasa nifiqee aaqana aikunni munusee naru taikarara nifiqee fiifoo qifaara. Sia arana qaani aneenna arana qara irirana quandasee sia ummaara aneenna faiqi anaasee nimia.
EXO 32:13 Anee aneenna ainainira faiqiuqa Abarahammana faqa Isakeena faqa Yakooboona faqa kuqaa qima afeekaikira ufa qunnanara oonumafi iria. Anee misara fasaura foora mafifaqa qinee qima afeekaikiafanna maqa maaqana inni nimianauree qinau. Nimisaananoo mi maqa maaqafa innindikamminoo naaru naaru mariannoo fee qinau.
EXO 32:14 Mooseefa miqi qufanoo Yaaweefa narí aranaqara irirana quandasee sia ummaara narí faiqí anaasee niminau.
EXO 32:15 Yaaweefa Mooseena qaara oonisaa akara rumamufanoo mareenoo aaqanaindari afaasai narí maqannaa marunnai ooqu finau. Ausirira ooniqandasaa Anutufa sanda ufa dinni dinni akara rumaqoona uqirafa ooqu finau.
EXO 32:16 Anutufa narí kai mi oonina auquseenoo minasaa sanda ufa akara rinau.
EXO 32:17 Yoosuafa irufaqa faiqí anaasee nariqa uiqaana maqusakiqari faaqa fuisee qida qufanoo iriseenoo Mooseena qima minoo qinau. Qinee rakidaqia ufana iridaqa.
EXO 32:18 Miqi qufanoo Mooseefa qinau. Sia qufoona rira ufa fau maridanoo fau. Sia qiki faafau qirufa fau maridanoo. Idi rarana kai iridaqa.
EXO 32:19 Mooseefa uiqaana maqusa adeedi ooqureenoo nindafoofaqa burimakau aanaaqi amana auqirana faiqí anaasee fusakidaqa idi ree mariqau. Miqi marufanoo Mooseefa nindafoofanoo aranaqoofanoo akara rira ooniqara aaqana aikunni maqasaa aqusoofaqa miqanda rukamiqau.
EXO 32:20 Mooseefa aranaqoofanoo burimakau aanaaqi amana auqirana qumareeqeenoo idaki aqusoofanoo tasiris irinau. Tasirisiri maseenoo andaana rumeeqee nammariki aqusee naaqee qufaqa Isaraee maqannaasa mi nammarina naqau.
EXO 32:21 Miqimandeenoo Mooseefa quandakufanoo Aaroona qimaminau. Maa fasiqa anaaseesa ani naqi fee mamaqaafanee anee maa manda firaa aaqarana misa nifaaqai quqeenee.
EXO 32:22 Miqi qufanoo Aaroonafa Mooseena qimaminau. Oo qini uriqararafa anee sia qiniara aanoo qia. Anee maa fasiqa anaaseesa oosana irimariananoo. Misa kaaqa mandoosana auqarara sandanainai qimariasa maridaqa.
EXO 32:23 Misa qiniara maaqi qia. Maasa maa fasiqafa Mooseefa maasa Isipa maqa maaqaindaraana qifiqee anunaki kambiqai ainainnara sia iridaqa. Anee moo anutuna auqu sainanoo maasa indaarunnikamma qimaqaani.
EXO 32:24 Miqi qiafaqa qinee qimannimiqa koora faqaasa qimiaqee qunaqa uaqee iasa akaqana qimia. Qimiafaqa idaki aqusaunanoo burimakau aanaaqi kambiqeenoo.
EXO 32:25 Mooseefa qafoofaqa Aroonafa eedoo qufaqa faiqí anaasee nariqa namuqaa nifusaa oosana oosana manda oosana maroofaqa namuqaa misara uteetiqiqau.
EXO 32:26 Minara Mooseefa arana qoofanoo uiqaana maqusa kooqiki kikiqamma fufanoo maaqi qimasee nammeera qinau. Aiqamausa yafee Yaaweenaindi kiani qinafa maaqoo aniaqa. Miqi qufaqa aiqama Reefina aiku asauku kai suqumaree miqoo ani mina fiqu fiqumma fiqau.
EXO 32:27 Aniroofanoo Mooseefa maaqi qimasee qimanniminau. Isaraeerana Anutufa Yaaweefa maaqi qimasee aiqamausa inni naakapaidanoo mifa inneeqa rakira paipana mara maree innee uiqaana maqusa dinni kooqindari dinni kooqinni oonuree aniree idaqa unna anutuna amana auqi mariana akiiqara inneeqa nikaqaafasaauqa faqa inneeqa niqoondiuqa faqa inni naaqa mariasa faqa aiqama kuqa naru taikaaqa.
EXO 32:28 Miqi qufaqa Reefina aiku asauku eedoo qimasee mi faasaanna 3,000 fasiqa nariqau.
EXO 32:29 Narusoofanoo Mooseefa kafaa qimanniminau. Innee inneeqa faiqi namufaqa inneeqa nikaqaa fasaauqa faqa naruanara innee Yaaweena aanaiqikirausai kiqa mariafanoo. Miqi mariafanoo Yaaweefa narí amiqi amiqirana inni niminoo.
EXO 32:30 Iaqoofanoo kananaana Mooseefa faiqí anaasee qima niminau. Innee firaa manda aaqarana marasaafaqa aqbee qinee aaqanai kaifaa ooruree inniara Yaaweena iramiriananoo inni aaqarana akiiqara minninisaannoo fee.
EXO 32:31 Miqi qimaseenoo Mooseefa Yaawee funnai aaqanai ooruree qimaminoo qinau. Maa fasiqa anaaseesa firaa manda aaqarara marasee unna qira anutuna koorannai auqusee minara innaaru qiqiiaafanoo.
EXO 32:32 Amanee misa aaqarana akiiqara minninnisaa. Sia minninniseenana qini duqu ani faiqí anaasee faqa ani bukaki akararinoo marina kai rukaa.
EXO 32:33 Yaaweefa iriseenoo qinau. Sia kaiqeesa nuqu qeeqa bukakinaana rukaanaura. Qini ufa rukiee mariasa nuqukai rukaanaura.
EXO 32:34 Doo oonuree faiqí anaasee nifiqamaree qinee qimamiafanna maqa maaqanai fua. Anee iria, qini qangiroo fannoo inni indaarunni kamma nimaqaannoo. Mi fasiqa anaaseesa aaqarana akiiqara ummaara nimianna aukuanafa anidanoo.
EXO 32:35 Miqi qimaseenoo Yaaweefa manda aurirana mi fasiqa anaaseesa niminau. Misa Aaroonara qufanoo koorannai burimakau akoona aanaaqi auqunara miqinau.
EXO 33:1 Yaaweefa maaqi qimasee Mooseena qimaminoo qinau. Anee faqa Isipa maqa maaqaindari nifiqee anianna fasiqa aanaaseesa faqa maa maqana quqasee qinee qima afeekaikammasee Abarahaamana faqa Isakeena faqa Yakooboona faqa misasaa ani aruaki kambiqainausa faqa nimiraree qiafanna maqanasaa fua.
EXO 33:2 Qinee qeeqa angiroo aiqaananoo inni nifu uqi marinaqa fimarifaqa qinee Kannaa maqannaasa faqa Amoora maqannaasa faqa Heeta maqannaasa faqa Peerisa maqannaasa faqa Hifita maqannaasa faqa Yeebusa maqannaasa faqa naru nifaqaaqa ianaura.
EXO 33:3 Innee ainoo faqaa maqasaa ainaina ummaqusaa fanoo reemindeemiri mari maqanasaa fifaranoo. Qinee qeeqa sia inni faqa fuanaura. Innee ramooramaa imariasa mariafaqa qinee inni faqa fidaqa aanai inni naruanoora.
EXO 33:4 Isaraee maqannaa Yaaweena mi ufana iriseeqa nifaaqa auqira ainaina aiqama raipaqu quqasee soofaara maridara foora mafiqau.
EXO 33:5 Yaaweefa maa ainaina auqaaqeera qimannimufaqa miqiqau. Maaqi qimasee Yaaweefa Mooseena qimaminau. Innee kaaqa ramooramaa imariasa mariafanoo. Qinee inni faqa maqee fiqa inni kuridi nimaqaunaiqini. Doo maqee inneeqa nifaaqa auqirana raipaqu quqasee kaqi marifaqa qinee inni naqaafee mannimaqaannanara oonumafi irianaura.
EXO 33:6 Miqi qimasoofaqa Sinai aaqana quqasee fidaqa Isaraee maqannaasa sia nári nifaaqa auqirana afisiqau.
EXO 33:7 Isaraee maqannaasa nariqa uiqaana maaqauqa usakasoofanoo Mooseefa naaquqara uiqaana maaqa naambeeqai nianasaa usakanau. Usakasee mina auqureenoo Yaaweefa umee mari uiqaana maaqa fee qinau. Faiqí anaasee moo fannoo Yaaweena iriranara irianee qimasee mi maaqana kooqinni fimariqau.
EXO 33:8 Mooseefa narí uiqaana maaqai fufaqa faiqí anaasee nári uiqaana maqa kooqikiaqa kikiqamafi qafee maru fanoo keeqanau.
EXO 33:9 Mooseefa uiqaana maaqaki keeqafufanoo asuru qumureenoo mi kooqinaki marufanoo Yaaweefa minakiqari Mooseena faqa ufa qimarinau.
EXO 33:10 Asuru uiqaana maqa kooqiki qumu kasoo inoo marufaqa faiqí anaasee mina qafamasee ninuka tuqu naumoo amisee Yaaweena amooqi mariqau.
EXO 33:11 Yaaweefa Mooseena faqa narí oori narí oori qafaida ufa qimarinau, faíqi narí aqoondi faqa ufa qimarindee inau. Ufa taikaseenoo Mooseefa anirandee faiqí anaasee maru uiqaana maaqanai finau. Kumaaraa moo mina dadaaqi marufa Yoosuafa Nunnaana amaaku naaquqara uiqaana maaqaki kaqi marinau.
EXO 33:12 Mooseefa Yaaweena qimaminoo qinau. Oo Yaawee kuqaa anee qiniara maa fasiqa anaaseesa indaarunnikamma nimaqainaqa mi maqanasaa fuaqee qinau. Anee sia qini faqa fidanoo qini dadaaqianinna fasiqanara qimaqimiananoo. Anee qiniara amiqimmasee iridana qiniara asasidaqee qiananoo.
EXO 33:13 Anee kuqaa qiniara miqidana anee qimiriannana qimaqiminaqa qinee ani ainainiranaki maridqa maqee maqee ani asasamma amaqaanaura. Anee maanara faqa iria, maa maqannaasa ani faiqí anaasee anee utaaqama qaanausa maridaqa.
EXO 33:14 Yaaweefa mina iriseenoo Mooseena qimaminau. Qinee ani faqa fidaqa adooarana inni nimianaura.
EXO 33:15 Mooseefa iriseenoo Yaaweena qimaminoo qinau. Anee sia maasa faqa finana sia maasa maaqooqari diqiqaa.
EXO 33:16 Anee sia maasa faqa finaqa naqaafee masee akaqausa anee qiniara faqa aneenna faiqí aanaaseera faqa rimariannanara irifaranoo fee. Anee maasaki marinaqa maa maqa maaqana kinaasakiqari naaduma moo kirausa marianaura.
EXO 33:17 Yaaweefa Mooseena mi ufana iriseenoo qimaminau. Doo anee qianandee kaimmianaura. Qinee amiqimmasee aniara irimarunnanara faqa aniara asasi marunnanara faqa miqianaura.
EXO 33:18 Mooseefa mi ufana iriseenoo kaifaa Yaaweena iramirinoo qinau. Amanee aneenna oori daroo daraa irana uqaqifiqasainaqa qafaanauree qufanoo Yaaweefa qinau.
EXO 33:19 Amana qinee qeeqa amiqira areenarana quqasaananoo ani aiaaqaree afunni fuannoo. Qinee ani afusaa qeeqa naaquqara duquara koorooianaura. Qinee Yaaweesa qeeqa nifauarana faqa qeeqa qimudaoo qirana faqa qinee utaaqama qaunausa nimianaura.
EXO 33:20 Moosee anee qini doori sia qafeenaranoo moo fannoo qini qiqafainafa sia amana kaqi mariannoo kuquannoo.
EXO 33:21 Moosee anee qini daakaarinni oonisaa kikiqina maria.
EXO 33:22 Qini doori areenarafa finaqa qinee ani ooni afoo iranaki quqaseeqa qeeqa qisauku anisaa ititaseeqa fiqaramafiqa qisauku maraanaura.
EXO 33:23 Qinee qisauku mara maraanana anee qini itaufaka kai qiqafa. Sia doori qiqafeennaranoo.
EXO 34:1 Yaaweefa Mooseena qimaminoo qinau. Moosee anee maa aaqannasaaqari ooquree ooni ausiqara ateekasee maree urua. Anee indaaruqaa qanda amana kai ateekasee maree urua. Murusainaqa indaaru rukamunnanasaa akara ruafannufana kafaa akara ruanaura.
EXO 34:2 Anee maqee deedaqamaqai marinana duna kananaana eendai mara maree Sinai aaqanasaa ururee qini paquria.
EXO 34:3 Faiqí moo fannoo sia ani faqa uruannoo. Sia uqanna moo fannoo aaqanai fee aaqana aaqa fee mariani. Sia misa burimakau sipsipa faqa aaqana aikunni andanda naaqa.
EXO 34:4 Mooseefa iriseenoo ooni ausirirana qaara qanda ateekamaree kananaana Yaaweefa qimamundee inoo Sinai aaqanai oorufinau.
EXO 34:5 Yaaweefa asurukina qumureenoo Mooseena faqa kikiqa mafinoo narí auquara koorooinoo qinee Yaaweesee qinau.
EXO 34:6 Yaaweefa Mooseena oorinni fiqaree oonuree maaqi qimasee firaaqoo qinau. Qinee Yaaweesa maridaqa. Qinee qimuqusirana faqa qimudaoo qirana faqa umbiqarausa maridaqa. Qinee sia kai kaqi aanooqunausa maridaqa, qinee kaaqa faiqí anaaseera qimuqusi marunausa mardaqa, qinee ooqai marunnaqoo kai marunausa maridaqa.
EXO 34:7 Qinee qeeqa qima afeekaikira ufa kasooaqee nukudara foora kambiqainausara qima qaafanna ufana kaqi kai iridqa, numoo faqa manda oosana akiiqara faqa minninisaanaura. Qinee numoo auqainna fasiqa aanaaseesa faiqi namu faqa mina anaiqi mara faqa mina asaifaqausa faqa afaqnausa faqa sia sia naruanaura, naruanaura.
EXO 34:8 Mooseefa mi ufausa iriseenoo kai kaqi maqasaa oorindari mapamufufanoo Yaaweena amooqinau.
EXO 34:9 Amooqidanoo maaqi qimasee Yaaweena qimaminau. Yaawee anee kuqaa uqanna qiniara asasidana qinee aniara maasa faqa fuanneera iraidaqa. Maa fasiqa anaaseesa ramooramaa idaqa anee maasa numoo akiiqara minniqiseenana maasara aneenna faiqí anaasee fee qia.
EXO 34:10 Yaaweefa Mooseena qimaminoo qinau. Maqee qinee Isaraee maqannaasa faqa moodaanakikira ufa qidaqa. Qinee misa nifusaa firaa ainainauqa sia maa maqanasaa moo atinai faqa moo maqannaa qambaana faqa auqaafanna ainainausa auqaanaura. Aiqama faiqí anaasee qinee Yaaweesa firaa ainaina auqaanaqa qafaifanoo naaquqaannoo. Inni dadaaqianifeera miqianaura.
EXO 34:11 Qinee maqee qimannimianna sandufana amiqimasee irisee mimau fuaqa. Qinee Amoora maqannaa faqa Kannaana maqannaa faqa Heeta maqannaa faqa Peerisa maqannaa faqa Hifita maqannaa faqa Yeebusa maqannaa faqa inni noorinni fidaqa misa nifaqasaana fifaranoo.
EXO 34:12 Innee fuka maqasaa oonuree sia mi maqannaasa faqa kaqikaa ainaina ree firaa ainaina ree sia misa faqa moodaanaki kira ufa qiaqa. Misa ufaanara foora fufusaifaqa innee minaki arifoora, minara qeerairiaqa.
EXO 34:13 Misa tatufirana suqee maria qaidarana misa ooni ateekarana rakiaaqee maasa naaquqara anutunee qimariana innee mina rukamu aquaqa misa saqari ateeka rakiqasee maasa anaasee anutufa Aseeraafee qimariana minauqa faqa ateekaateekamma aqusaaqa.
EXO 34:14 Innee sia moo unna anutunara innaaru qiaqa. Qinee Yaaweesa unna anutufa qini qimaaqa maqaranara rairai qimarunausa maridaqa.
EXO 34:15 Innee fuka maqasaa oonuree sia uqanna misa faqa moo ainainara moodaanaki kira ufa qiaqa. Misa nariqa unna anutuna innaaru qidaqa tatufirana suqami mariana inniara naaqee qifaqa nee foora.
EXO 34:16 Inni faiqi namu mi anaamuru anaaseesa maraseeqa qini minnisee moo unna qira anutusara innaaru qifoora. Mi oosanafa qini qifusaa dapi nua aanaaseesara foora maridaqa.
EXO 34:17 Innee sia moo ainaina tasirisiri masee unna anutuna amana auqusee minara innaaru qiaqa.
EXO 34:18 Ooqai innee Abiba quqoonasaa Isipa maqasaaqari anusa mariafanoo. Minara Abiba quqoona anirainaqa maqee maqee innee sia yis mari feemuna oomaqa sakasee maqee maqee naaqa. Dinni qisauku taikasee dinni oonu qaara marasee 7 faasaana mi oomaqana sakasee naaqa. Isipa maqasaaqari anu quqoonafa marinara miqiaqa.
EXO 34:19 Aiqama ainaina ooqasaa aanaaqi qinindi maridanoo. Innikina ooqasaa akoonaiqi maqainafa faqa aiqama maaqeena aandauqa ooqasaa akoona maqainafa faqa qinindi kai mariannoo.
EXO 34:20 Innee inni doonki aanaaqi ooqasaa maqarafa kaqi marianifee qimasee sipsipa aanaaqi mina amaaqa maqasee tatufirana suqa qimiaqa. Innee sia miqiqa mina anuka kuridiaqa. Innee aiqama inneeqa ooqa faiqiuqa feefauru masaifaqa kafaa inniqaindi kiaqa. Sia moo fannoo tatufirana suqara ainaina sia uqirafa qini Yaaweesa qifusaa aniannoo.
EXO 34:21 Dinni taikasee dinni ani moodaa marasee 6 faasaanasaa inni ainainira faasaana maridanoo. Dinni ani qaara marasee 7 faasaanasaa sia ainainiaqa. Umaqira aukuanee aiqira aukuanee anirainaqa sia mi faasaanna ainainiaqa, idooaaqa.
EXO 34:22 Innee unakirana oosana arasee miqoo afiana nara oomaqa suqaaqa. Innee asumu aiqu quqara oomaqa faqa sakasee naidaqa mina auqu reeqa asumu aiqu quqara oomaqa fee qiaqa.
EXO 34:23 Moodaa aukuanaki qaarammoo kari aiqama Isaraee maqannaasa moodaaqoo suqufi qini Yaaweesa Isaraee maqannaasa Anutusa qimooqiaqa.
EXO 34:24 Qinee aanaamuru innee finnatinai nifaqaseeqa misa maqa maaqa inni nimisee inni mi maqa maaqana firaanaikamma nisaanaqa innee aiqama aukuana qaaramoo kari moodaaqoo suqufi inneeqa Anutusa qini Yaaweesa qifusaa marifanoo sia moo aanaamuru aniree inni maqa maaqa mareefaranoo.
EXO 34:25 Innee aandau arusee tatufirana suqa qimiraree qimasee sia innooqeemari pauraqana namufaqa feemu suqaaqa. Ainnaaqarara oomaqaki arusainna aandauna ataraasa fannoo sia akaqafa kaqi marinanoo faiqee iaqaani.
EXO 34:26 Aiqama aukuana indaaruqaa narana afiana nararee qinnana Yaaweena naree maree munu amiaqa. Innee sia mimmi fee sipsipafee arusee narí anoona naamma anoonannai suqaaqa.
EXO 34:27 Yaaweefa mi ufanara Mooseena qimaminoo qinau. Anee aiqama maa ufausa akara rua. Maa ufausa qinee ani faqa Isaraee maqannaasa faqa moodaanaki qima afeekai kamma qaunna ufana oosana maridanoo.
EXO 34:28 Miqi qimasoofanoo Mooseefa aaqanasaa Yaaweena faqa kisaaqasaa marinau. Qaara fasiqa niku nisauku taikasee 40 faasaana faqa eendaki faqa nammari faqa narana faqa sia neemarinau. Yaaweena moodaanaki kira sanda ufa ooni qarasaa akara rinau.
EXO 34:29 Mooseefa Sinai aaqanaindari Yaaweena sanda ufa akara rira ooniqara uqirafa quminau. Mifa Yaaweena faqa ufa qiqiunara mina oori afiri daroo daraa imarufanoo narí sia minara irinau.
EXO 34:30 Aaroonafa Isaraee maqannaasa faqa Mooseena oori afiri daroo daraa imaruna qafamaseeqa rufiaida nianasaa mariqau.
EXO 34:31 Mooseefa misa nindafamaseenoo Aaroona faqa faiqí firaasa faqa naarama quqasoofaqa aiqama aniroofanoo ufa qima niminau.
EXO 34:32 Adeedi aniroofanoo Yaaweefa Sinai aaqanasaa aiqama sandufa Mooseena qimamu ufana qimanniminau.
EXO 34:33 Mooseefa qimannimi taikaseenoo karoo karoonaikira qamunna qumaree oorisaa rafaaqafinau. Mina oori qafee rufieefoora miqinau.
EXO 34:34 Mooseefa aqoosai kaqikaa uiqaana maqaki keeqafinoo qamunna uturuquseenoo Yaaweena faqa ufa qimarinau. Qimaseenoo madaanai raudamafinoo faiqí anaasee Yaaweefa qimamu ufana qima niminau.
EXO 34:35 Qima nimi marufaqa misa mina oori qafoofanoo daroo daraa ufanoo Mooseefa narí oorisaa qamunannai ititaseenoo qima nimi taikaseenoo quandaki Yaaweena faqa ufa qiraree qimasee uiqaana maaqaki keeqafinoo kaifaa qamunna uturuqinau.
EXO 35:1 Mooseefa Isaraee maqannaa faiqí anaasee aiqama suquseenoo qima niminau. Yaaweefa inniara maa ufamau fuaqee qidanoo.
EXO 35:2 Qisauku dinni taikasee dinni ani moodaa marasee 6 faasaanasaa ainainiaqee qinoo. Dinni ani qaaraikinoo 7 qini firaa naaquqara idooara faasaana mariannoo. Faiqí moo fannoo mi faasaanna ainaininaqa innee mina kuqa aruaqa.
EXO 35:3 Innee sia Sabata faasaannasaa inneeqa maaqaki suqa naaqa.
EXO 35:4 Mooseefa Isaraee maqannaa aiqama kafaa maaqi qimasee qimanniminau. Yaaweefa maaqi qimasee naamua qidanoo.
EXO 35:5 Innee Anutuna amiraree qimasee nifaaqa asasinausa koora faqa siruaa faqa booroosa faqa maree aniaqa.
EXO 35:6 Amiqira qamunna faqa sipsipa asausi dirindaasi akirana faqa pannoona akirana faqa faeena akirana faqa mimmi asausinnai auqira qamunna faqa maree aniaqa.
EXO 35:7 Sipsipa akoona apata faeena akirana faqa ooruku nammarikinaa aandau apata faqa akasia saqari faqa maree aniaqa.
EXO 35:8 Qooma qumbi maria fadameena faqa amiqira afundi mari ainainna andaana rirana idaki adiasaafanoo adiafaa ira undi marina faqa mi ainainna kai nikiiqa amoondunna adiee maria fadameenaki quqarara faqa maree aniaqa.
EXO 35:9 Pupu ooniuqa faqa akaqa amiqira ooniuqa faqa aanaiqi kirausa uriqararausa afisi maria eefooda qamunnanasaa faqa amuqusasaa ititara qamunna saa faqa quqeefandinna oonisa maree aniaqa.
EXO 35:10 Inni kiqari oosana oosana ainaina auqarana akoofasauqa kai anireeqa Yaaweena uiqaana maaqaki ainaina mifa naamua qimaqaimau kai auqaaqa.
EXO 35:11 Misa uiqaana maqa faqa mina rafaaqafi maria qamunnana faqa mina anaanu faqa mi maqana usakara atunauqa faqa aunirira saqari faqa oosuki faqa kooqiki faqa rakiqee fandinna saqarisa faqa saqari maqaki rakiqarana amaaqa auqirana faqa auquaqa.
EXO 35:12 Moodaanaki kira bookisa faqa mina qaindusira saqari qara faqa mina afu faqa minasaa ititara qamunna faqa auquaqa.
EXO 35:13 Aiku faqaa qainda faqa mina aindusira saqari qara faqa minasaa quqee maria ainainna faqa auquaqa, Anutuna amifandinna feemuna faqa uquaqa.
EXO 35:14 Qooma saqari faqa mina qoomauqa faqa mina oosana oosana ainaina faqa mina qeemari fadameenna faqa auquaqa.
EXO 35:15 Afundi marina andaana rirana suqee maria qaidarana faqa mina qaindusi maria saqari qanda faqa faiqí nikiiqa amoondunna adieemaria fadameenna faqa afundimarina andaana rirana faqa uiqaana maaqa kooqi qamunna faqa auquaqa.
EXO 35:16 Aandau tatufirana suqee maria qaidarana faqa mina fukaa asaana booroosannai auqirana faqa mina qaindusira saqari qara faqa mina oosana oosana ainaina faqa nammari auqara difaani faqa mina oosana faqa auquaqa.
EXO 35:17 Dapusaa diri maria qamunnana faqa dapu saqari faqa saqari kuradee mariana oosana amaaqa auqiranauqa faqa dapu kooqiki keeqee maria qamunnana faqa auquaqa.
EXO 35:18 Kafaa dapu faqa uiqaana maaqa apupukauqa faqa mina rumbee maria sanda ainaina faqa auquaqa.
EXO 35:19 Aaroona idaaqira qamunna faqa mina faiqi namu qamunna faqa uiqaana maaqaki naaquqara oosiranaki aanaiqikira saika maraidaqa afisifandinna qamunnana faqa mi aiqama ainainna auquaqa.
EXO 35:20 Mooseefa mi ufana qima nimisoofaqa faiqí anaasee irisee daraaniqau.
EXO 35:21 Nifaaqa asasusa mi ainainausa Yaaweena mini amisoofaqa mi ainainausannai Yaaweena uiqaana maqa usakaqau. Yaaweena amooqifandinna ainainausa faqa aanaiqikirausa afisifandinna qamunnausa auqifandinna ainainausa faqa maree aniqau.
EXO 35:22 Faiqí anaasee Yaaweena amirara nidimarusa misa kai nifaaqa auqimaru ainainausa nikiiqa asausi rumbee maru pinnana faqa naaqoo kinaa fidinaanu faqa nisaukuki quqee maru isaaqamana faqa ninukaki rufi maru kukukakana faqa oosana oosana ainaina nifaaqa auqi maruna koorannai auqiranauqa mini Yaaweena amidee qiqa mini quqaqau.
EXO 35:23 Akaqausa amiqira qamunna maqeeusa faqa sipsipa asausi dirindaasi akiranee pannoona akiranee faeena akiranee maqeeusa faqa mimmi asausinnai auqira qamunna maqeeusa faqa sipsipa akoona apata faeena akirana maqeeusa faqa ooruku nammariki maru aandauna apata maqeeusa faqa maree aniqau.
EXO 35:24 Siruaa faqa booroosa faqa Yaaweena amirara amanaikusa maree aniqau. Akaqausa akasia saqari Yaaweena uiqaana maqa usakarana amana maqeeusa maree aniqau.
EXO 35:25 Akoofasa anaaseeuqa oosana oosana amiqira sanda sipsipa asausinnai dirindaasianda faqa faeenanda faqa pannoona ariranda faqa sufirana mini quqaqau.
EXO 35:26 Misa mimmi asausinnai faqa sufimariqau.
EXO 35:27 Faiqí firaasa aanaiqikirausa uriqarana qamunnasaa faqa amuqusasaa faqa quqaaqeera faraafana ooniuqa faqa firaa feefaura aqimaru amiqira oonisa faqa maree aniqau.
EXO 35:28 Kafaa misa adiafaa imaru ainainausa oosana oosana faqa qooma qumbi maru fadameennana faqa nikiiqa amoondunna adiee maru fadameennana faqa adiafaa ira afudimaru ainaina aindirirana idaki teeqimmasoofanoo adiafaa ira afundi maruna faqa maree aniqau.
EXO 35:29 Isaraee maqannaasa faiqí anaasee Yaaweena amirara nidimarusa Yaaweefa Mooseenara auqaanifeera aakapoo ainainausa maree aniqau.
EXO 35:30 Mooseefa kaifaa Isaraee maqannaa maaqi qimasee qima niminau. Yaaweefa faiqí moo mina auqu Beesareerana Urina amaaku Hurana anaiqi Yudana atikinaana mara quqeenoo.
EXO 35:31 Yaaweefa Beesareerana aiqama amiqira ainaina auqaanifeera narí maraquna afeeka umbiqa amaqeenoo. Aiqama ainaina auqirana akoofasaikirana faqa amanaikirana faqa oosana oosana ainaina amana auqira irirana faqa aminoo.
EXO 35:32 Yaaweefa Beesareerana oonu mafi irisee auqara irirana amisaifanoo mifa koorannai faqa siruaannai faqa boroosannai faqa oosana oosana ainaina auqirana akoofasa maridanoo auquannoo.
EXO 35:33 Kafaa mifa amiqira ooni ateekeemaria irirana faqa koorannai mi oonina quqarana amaaqa auqira irirana faqa saqarisaa oosana oosana ainaina amana auqira irirana faqa amiqaifanoo auqaannoo.
EXO 35:34 Ooqooriabana Aqisamakana amaaku Dannana oosanakinaana faqa Yaaweefa inniki quqaqaifanoo mifa faqa Beesareerana dadaaqianifeera maridanoo. Yaaweefa miqanda akaqausa uqannifiqaaqee irirana faqa niminoo.
EXO 35:35 Yaaweefa oosana oosana ainaina nisaukunnai auqarana akoofasaikirana nimiqaifaqa maridaqa. Oonisaa akararirana faqa oosana oosana amiqira akara rira irirana faqa amiqira qamunna afundara irirana faqa sipsipa asausi dirindaasi akiranannoo faqa pannoona akiranannoo faqa faeena akiranannoo faa akaqa qamunna auqira irirana faqa niminoo. Nimisaifaqa miqanda oosana oosana ainaina auqira irirana akoofasa qara maridaqa.
EXO 36:1 Mooseefa Isaraee maqannaasa qima nimidanoo qinau. Beesareerana faqa Ooqooriabana faqa miqanda dadaaqi marusa oosana oosana ainaina auqirana akoofasaikira irirana Yaaweefa nimiqoosa aiqama ainaina Yaaweefa naamua qundee kai masee naaquqara uiqaana maqa auqaaqa.
EXO 36:2 Miqi qimaseenoo Mooseefa Beesareerana faqa Ooqooriabana faqa Yaaweefa aiqama ainaina auqira irirana akoofasaikirana nimimaru fasiqausa faqa naarama quqaseenoo qimanniminau. Doo innee oosana arasee auqaaqa.
EXO 36:3 Isaraee maqannaasa Yaaweena amideequu ainainausa mini soo fanoo Mooseefa mi ainainira fasiqausa nimufaqa auqimariqau. Faiqí anaasee eedoo qimasaida aiqama kananaana Anutuna amidee quu ainainausa kaqikai maraidaqa Mooseefunnai munu quqee mariqau.
EXO 36:4 Naaquqara maqa usakee marusa moomoo ainaina qafamasee nariqa ainainirana minnisee Moosee finnai oonuree qimamiqa qiqau.
EXO 36:5 Faiqí anaasee moomoo ainaina aabaa faqa maree anidammia. Yaaweefa maasara auqaaqee qimaqaina amana minisee aabaa faqa minisaafannoo kaqi fifau mariannoo.
EXO 36:6 Mooseefa mina iriseenoo ufa quqasoofaqa aiqamausa qimannimiqa qiqau. Faiqí anaasee sia moo fannoo kafaa moo ainaina naaquqara uiqaana maqa usakaaqeera maree aniaqa. Miqi qimasee qimanimufaqa faiqí anaasee mina iriseeqa sia kafaa maree aniqau.
EXO 36:7 Indaaru mini qoo ainainausa aiqama ainaina taikarana amana faqa fiqaramasee aabaa faqa maree aniqau.
EXO 36:8 Irirana kaaqa fiqararausa kai indaaruqaa qamunna uiqaana maqasaa akirana auqiqau. Sipsipa asausi dirindaasi akirana faqa pannoona akirana faqa faeena akirana faqa sufusee amiqira qamunna auqusee aqoosa faqaa aandau amana auqusee minasaa atooqasee akuniqau. Miqimmaseeqa minauqannai qisaukuqara taikasee 10 firaa qamunna auqusee moodaanaki akuniqau.
EXO 36:9 Mi aiqama qamunnausa amana amana kai 12 metres kisaaqa mina qusa 2 metres mariani.
EXO 36:10 Mi qamunnausa moodaannai qisauku 5 marasee ootupamasee akuniqau. Dinni qisauku taikasee 5 faqa miqikai iqau.
EXO 36:11 Miqimmaseeqa mi qamunna qanda atiqara dirindaasi arira qamunnannai anaanu auqusee moodaanaki ootupaqau.
EXO 36:12 Firaa qamunna ati mau anaanu 50 auqiqau. Moo qamunna faqa miqi kai iqa moo qamunna saa qaraa anaanu amummaqa kai auqiqau.
EXO 36:13 Koora qumaree turimmandee qusa tafara foora saaeemma qumaree dinni dinni anaanuki upeekasoofanoo mi qamunna qanda moodaaraa maqi inoo marinau.
EXO 36:14 Uiqaana maqasaa akira qamunna firaana mimmi asausinnai 11 auqiqau.
EXO 36:15 Misa aiqama moodaa karirana kai auqiqau. Mina kisaaqa 13 metres amana marianoo mina qusa fannoo 2 metres amana marinau.
EXO 36:16 Mi qamunnausa moodaannai qisauku taikasee 5 qamunna akunusoofanoo moodaa qamunnaika mafinau. Kafaa moodaannai qisauku taikasee dinni ani moodaa marasee 6 narisaa narisaa akunusoofanoo firaanaikinau.
EXO 36:17 Qamunna atimau anaanu 50 akuniqau. Moo atimau faqa mina amummaqa kai akuniqau.
EXO 36:18 Booroosannai tafara foora ati saaeemmasee 50 auqusee minannoo dinni dinni anaanuki aususee ootupamasoofanoo moodaa qamunnara foora marinau.
EXO 36:19 Kafaa misa uiqaana maqa akuamaqara qamunna sipsipa akoona apata faeena akiranannai moo auqiqau. Inaaqianna amuaaqa akirana ooruku nammarikinaa aandau apatannai auqirafa marinau.
EXO 36:20 Misa akasia saqarinnai kai naaquqara uiqaana maqa atuna auqusee kuradaqau.
EXO 36:21 Maaqi mandee maaqa atuna auqiqau. Saqari dinni dinni kuradarafa 4 metres marinau. Mina ausana qusa 66 centimetres amana kai auniriqau.
EXO 36:22 Aiqama atuna maqaki rakiqaranara irisee ati ooqiqaramasee ateekaqau. Aiqama maaqa atuna miqi kaimasee ateekaqau.
EXO 36:23 Misa suani afu ataaqeenni south kisaaqandanai maaqa atuna 20 narisaa narisaa apamandee kuradaqau.
EXO 36:24 Maaqa atuna oosana sia maqaki kaqi rakiaqau. Siruaannai amaaqa auqusee minaki kuradaqau.
EXO 36:25 Misa uiqaana maqa suani dinni ataaqeenni north kisaaqandanai maaqa atuna 20 narisaa narisaa apamandee kuradaqau.
EXO 36:26 Maaqa atuna sia maqaki kaqi rakiaqau. Siruaannai 40 amaaqa auqusee minaki maaqa atuna kuradaqau.
EXO 36:27 Suani keeqeemari qaannai west uiqaana maqa uruanatinai maaqa atuna dinni qisauku taikasee dinni ani moodaa marasee 6 narisaa narisaa apamandee auqiqau.
EXO 36:28 Maaqa dinni dinni munu raqaranaki kafaa qaaraqanda auqusee kuradaaqa.
EXO 36:29 Raudaranaki maaqa atuna oosanaki apammasee kuradama soofanoo amiqimasee narisaa narisaa apinoo marinau. Maaqa atuna rakiqarana oosanaki rumba atukarasee miqi kai mamaree mirinni murufi saqau. Dinni dinni munu raqaranaki miqi kaimmiqau.
EXO 36:30 Miqimmaseeqa maaqa atuna 8 oosanaki siruaannai qaaraqanda qaaraqanda amaaqa auqusoofanoo 16 marinau.
EXO 36:31 Misa aunirifandinnana akasia saqari 15 maraqau. Uiqaana maqa dinni dinni ataaqee faqa uruanai faqa faifa faifannoo aunirumasoofanoo maaqa atukarama qumaranau.
EXO 36:33 Mi maaqa atunna aunirira saqari fannoo maaqa amana kai dinni dinni ati marinau.
EXO 36:34 Maaqa atuna aiqama koorannai kai rafaaqa fiqau. Maaqa atunamau aiqama koorannai kai anaanu mamaree fiqau. Aunirifandinna saqarisa faqa koorannoo mi anaanusaki rafaaqa fiqau.
EXO 36:35 Misa sipsipa asausi dirindaasi akirana faqa pannoona akirana faqa faeena akirana faqa sufusee minannai amiqira qamunna auqiqau. Miqimmasee mi qamunnanasaa angiroo niqoosa faqaasa nimana auqiqau.
EXO 36:36 Mi qamunnana dirianee qimasee qaara faqa qaara faqa 4 atuna akasia saqari ateekasee koorannai rafaaqafusee kuradaqau. Mina atimau koorannai qamunna dirifandinna anaanusa auqiqau. Mi saqarisa oosanaki siruannai amaaqa auqusee minakiaqa kuradaqau.
EXO 36:37 Uiqaana maqa kooqiki ititeefandinna qamunnana sipsipa asausi dirindaasi akirana faqa pannoona akirana faqa faeena akiranannai faqa marasee kooqiki dirifandinna amiqira qamunna auqiqau. Oosana oosana sandannai mooka maakira ainainauqa mi qamunnanasaa auqiqau.
EXO 36:38 Mi qamunnana dirifandinnana moodaannai qisauku 5 akasia saqari marasee koorannai mina atimau rafaaqafusee qamunna dirifandinnana anaanu auqusee quqaqau. Mi atunnana qumaraanifeera koorannai saqari kukuqamasee atimau auniriqau. Miqimmasee booroosannai moodaannai qisauku 5 atuna oosana amaaqa auqusee minaki kuradaqau.
EXO 37:1 Beesareerafa narí dadaaqi marusa faqa akasia saqari marasee minannai moodaanaki kira bookisa auqiqau. Mina kisaaqa 110 centimetres auqiqau. Mina qusandanai faqa mina kuradarafa faqa amana amana kai 66 centimetres amana auqiqau.
EXO 37:2 Misa amiqira koora marasee turimmasoofanoo ausirumafufaqa minannai kai bookisa adisaa faqa aundurai faqa ititaqau. Mi bookisana afaimau koorannai amatookika masee rafaaqafiqau.
EXO 37:3 Misa koorannai qaindusi fandinnana amaaqa qaara faqa qaara faqa 4 auqusee aiqama aikusaa quqaqau. Dinni aikusaa qaara qanda dinni aikusaa qaara qanda quqaqau.
EXO 37:4 Misa akasia saqari qaindusi fandinna qanda koora turimmandee ausiruma qumaree minannai kukuqiqau.
EXO 37:5 Kukuqammaseeqa dinni dinni amaaqa auquqoonaki ausiqau.
EXO 37:6 Bookisa afu faqa koorannai kai auqiqau. Mina kisaaqa 110 centimetres amana marinau, mina qusa 66 centimetres amana marinau.
EXO 37:7 Misa koora turimaseenoo bookisa afu auquseeqa minannai kai dinni dinni qangiroo qaaraqanda nimana auqiqau.
EXO 37:8 Afu dinni atinni moo qangiroo amana auqusee dinni moo qangiroo amana auqiqau. Afu faqa mi qangiroo qanda nimana faqa moodaa koorannai kai auqiqau.
EXO 37:9 Mi qangiroo qanda bookisa afusaa quqasoofaqa noori narí qafee narí qafee iqa mariqau. Miqanda niqoosa uqeerasoofanoo bookisa afusaa ititanoo marinau.
EXO 37:10 Beesareerafa akasia saqarinnoo teeboora auqinau. Mina kisaaqa 88 centimetres marinau. Mina qusa 44 centimetres marinau. Mina kuradarafa 66 centimetres marinau.
EXO 37:11 Mifa amiqira koora marasee turimmasoofanoo ausiruma fufanoo minannai teeboora rafaaqa fusee kafaa moonnai teeboora atiqara fiqu fiqumma rafaaqa finau.
EXO 37:12 Mifa teeboora atiqara fiqu fiqumma 8 centimetres amana ititasee mina afaimau koorannai rafaaqa fiqau.
EXO 37:13 Mifa koorannai qaindusifandinnana amaaqa 4 auqusee teeboora aiqama aiku namusaa quqanau.
EXO 37:14 Teeboora afai ameemaanandanai qaindusirana amaaqa auqinau. Mifa mi anaanusa afai ameemaanai ququseenoo atukaranau. Atukarasainaqa aindusira saqari minaki ausuaqeera atukuranau.
EXO 37:15 Mifa akasia saqari qaindusifandinna qanda koorannai kukuqinau.
EXO 37:16 Mifa amiqira koorannai kai teeboorasaa quqeefandinna pirita kaafausa faqa kisaaqa kaafauqa faqa Yaaweena amifandinna uainna adiara pirita uqnaurirana faqa auqiqau.
EXO 37:17 Misa qooma qumbira aika amiqira koorannai auqiqau. Misa koora turiiseeqa minannai kai qooma qumbira aika oosana faqa adaka faqa asaanauqa faqa auqiqau. Mi asaanausa saa mi kooranannai kai taatuqee aqama afufeenaari marindee maseeqa kaafara foora afisu amaqaqau.
EXO 37:18 Mi qooma aikausa qisauku dinni taikasee dinni ani moodaa marasee 6 marinau. Dinni qaaramoo dinni qaaramoo marinau.
EXO 37:19 Aiqama mi asaana namuna atimau koorannai taatuqee aqama afufeenaari marindee masee afaaqa auqiqau. Mi afufeenaarirafa teeqnoorina aqamara foora marufaqa mi asaana namuna saa auqiqau.
EXO 37:20 Mina adaka saa qaara faqa qaara faqa 4 saa taatuqee aqama teeqnoorina aqamara foora auqiqau.
EXO 37:21 Moodaa aqama indaaruqaa asaana qara ameemaanai marinau, kafaa mina murufi asaana qara ameemaanai moo aqama marinau. Kafaa mina murufi asaana qara ameemaanai moo marinau.
EXO 37:22 Amiqira koora turiiseeqa minannai kai qooma oosana faqa asaanauqa faqa afufeenaarirana faqa auqiqau.
EXO 37:23 Misa amiqira koorannai qoomauqa dinni taikasee dinni ani qaara marasee 7 qooma auquseeqa mi asaanausa atimau quqaqau. Mina ufaqaa faqa danda afaqee mariana faqa auqiqau.
EXO 37:24 Qooma quqara aika amiqira koorannai 34 kilogram umaara amana kai marasee auqiqau.
EXO 37:25 Misa akasia saqari marasee amiqira afundi mari ida munana areefandinna aidarana auqiqau. Mi aidarafa dinni dinni amana kai marinau. Mina kisaaqandanai 45 centimetres marinau. Mina qusandanai miqi kai inoo 45 centimetres marinau. Maqasaa qari ooru firafa 90 centimetres marinau. Mina qara qaara faqa qaara faqa ati moodaa saqarinnai kai burimakau aanaira foora auqiqau.
EXO 37:26 Mina afu faqa aanai fooqaana faqa ataaqee qara faqa amiqira koorannai kai rafaaqafusee koorannai mina fiqu fiqumma auqiqau.
EXO 37:27 Koorannai qaaraqanda anaanu auqusee dinni moo dinni moo quqasoofanoo qaindusifandina saqarina atukaramma qumaranau.
EXO 37:28 Mi qaindusira saqari qanda akasia saqarinnai auqusee koorannai rafaaqafiqau.
EXO 37:29 Misa naaquqara fadameenna Yaaweenaindi fee qimasee nikiiqa amoondunna adiee fandinnana auqiqau. Idaki quqasaafanoo adiafaa ira undimari pauraqara amiqira undimari fadameennara foora auqiqau.
EXO 38:1 Beesareerafa akasia saqari marasee minannai tatufirana suqara qainda auqinau. Mina kisaaqandanai faqa qusandanai faqa amana amanakai 2.2 metres marinau. Maqa saaqari kuradarafa qaara faqa qaara faqa 4 amana 1.3 metres marinau.
EXO 38:2 Mina qaara faqa qaara faqa 4 atisaa aanaira foora auquqoofanoo marinau. Tatufira qainda moodaa saqari fannoo kai atimau faqa qambaanai faqa aanai faqa moodaa saqarinnai kai auquqoofanoo marinau. Mi aiqama ainainausa booroosannai rafaaqa finau.
EXO 38:3 Mi tatufirana suqee maria qaindanasaa suqee maria ainainausa booroosannai kai auqinau. Danda afaqara futufitauqa faqa savoorauqa faqa uqnaurira piritauqa faqa tafa fooqaa irana ati saaee irana faqa ida qauni afaqee maria futufitausa faqa aiqama booroosannai kai auqinau.
EXO 38:4 Mifa fukaasaana booroosannai auquseenoo tatufira bookisa aundurai kasaaqai ooqeeqasee qambaanai quqanau.
EXO 38:5 Tatufira qainda atiqara anaanu qaara faqa qaara faqa 4 auquseeqa bookisa atiuqasaa rumbaqau. Misa aindusi fandinna saqari qanda upeekaaqeera rumbaqau.
EXO 38:6 Mifa akasia saqari tatufira qainda aindusifandinnana qaaraqanda maraseenoo booroosannai miqanda rafaaqafinau.
EXO 38:7 Mifa akasia saqari marasee anaanu auquqoonaki ausinau. Tatufira qainda indooira saqarinnai kai aundura faqaana auqinau.
EXO 38:8 Uiqaana maqa kooqiki dadaaqi maru aanaaseesa nariqa booroosannai auquqoo tanukana Beesareerana amufanoo minannai nammari auqara difaanina faqa mina oosana faqa auqinau.
EXO 38:9 Amiqira sanda sufusee auquqaa qamunnanannoo uiqaana maqasaa ququsara foora auqu ititanau. Suani afu dinni ataaqeenni (south) mina kisaaqa fannoo 44 metres marinau.
EXO 38:10 Mi qamunnana dirifandinnana booroosannai dapu 20 auqusee mina kuradeefandinnana amaaqa miqi kai masee 20 auquseeqa siruaannai tafara foora mina amana kai auqusee aunirifandinna saqarina faqa minannai kai auqiqau.
EXO 38:11 Suani afu dinni ataaqeenni undee kai iqa dinni ataaqeenni faqa miqi kai miqau.
EXO 38:12 Suani keeqee maru qaannai dapu qusandanai mina kisaaqa 22 metres marinau. Mina dapu saqari 10 faqa mina amaaqa auqirafa faqa 10 kai marinau. Qamunna dirifandinnana tafarafoo iranauqa faqa aunirifandinna saqarisa faqa siruaannnai kai auqiqau.
EXO 38:13 Suani oosana qaannai kooqi marutinai aqa uruanai inoo maruna amana kai 22 metres marinau.
EXO 38:14 Mi kooqina dinni dinni dirifandinna qamunnafa 6.6 metres marinau. Mi kooqina dinni dinni qaaramoo dapu faqa mina amaaqa faqa dinni dinni qaaramoo faqa mina amaaqa faqa marinau.
EXO 38:16 Aiqama qamunna dapusaa dirinoo marufa amiqira qamunna kai auqirafa marinau.
EXO 38:17 Aiqama dapu fiqu fiqu irafa siruaannai rafaaqa fuqaa saqarinasaa ootupanoo marinau. Minasaa qamunna dirifandinnana tafara maqi iranauqa siruaannai kai auqiqau. Mina dapu atimau faqa siruaannai kai rafaaqa fiqau. Mi saqarisa rakiqeefandinnana amaaqauqa booroosannai auqiqau.
EXO 38:18 Kooqisaa ititara qamunna amiqirafa marinau. Misa sipsipa asausi dirindaasi akirana faqa pannoona akirana faqa faeena akiranannai faqa sufusee mi qamunnana auqiqau. Auquseeqa amiqira sandannai oosana oosana ainaina amana auqiqau. Mi qamunnana kisaaqa fannoo 9 metres marinau. Mina qusa fannoo 2.2 metres marinau. Mi kooqina qamunna dapu rakiqarana amana kai marinau.
EXO 38:19 Misa mi qamunnana dapu saqari qaara faqa qaara faqa kooqiki rakiqaranasaa diriqau. Mi dapusa oosanaki booroosannai amaaqa auqusee minaki rakiaqau. Mi dapusa ati rafaaqafirana faqa auni rumaqaa saqarisaa faqa tafara foora iranauqa faqa siruaannai kai auqiqau.
EXO 38:20 Uiqaana maqa atimau apupuka arifandinna aikausa booroosannai kai auqiqau. Uiqaana maqa dapu rakiqarana qumaraanifee qimasee apupuka aqoosai faqa afuqai faqa aruqaafa aiqama booroosannai auqira apupuka kai marinau.
EXO 38:21 Yaaweena uiqaana maqaki qaara oonisaa qisaukuqara 10 sanda ufa akara rirafa marinau. Mi maqanaki ainaini maruna koora faqa siruaa faqa booroosa faqa marinau. Aanaiqikirana Aaroona amaaku Itamarafa Reefina aiku asauku qimannimi marufaqa misa mi koora ainainausa asaana rumasee akara rimariqau.
EXO 38:22 Beesareerafa Urina amaaku Hurana anaiqi Yudana ati marufa mifa aiqama ainaina Yaaweefa Mooseena qimamundee kai masee auqinau.
EXO 38:23 Mina dadaaqi marufa Ooqooriabafa marinau. Mifa Aasamakana amaaku Dannana ati marinau. Mifa oonisaa oosana oosana ainaina amana auqi marufa marinau. Mifa sipsipa asausi dirindaasi akiranannai faqa pannoona akiranannai faqa faeena akiranannai faqa amiqira sanda sufusee amiqira qamunna auqimarufa marinau. Kafaa mifa oosana oosana ainaina amana auqirana akoofasa marinau.
EXO 38:24 Aiqama koorauqa naaquqara uiqaana maqa usakarara Yaaweena amidee qufa mina ummaara uiqaana maqakinaa ainainauqa amana masee qafee maru sikeerana amana 998 kilogram maree aniqau.
EXO 38:25 Aiqama fasiqauqa 20 aukuana faqaasa nuqu marasoofaqa misa nambaqa 603, 550 fasiqauqa takisa munnimma aqi mariqau. Mi takisana aqusoofaqa mi siruaana qumaree uiqaana maqa sikeerasaa diriseeqa qafoofanoo 3,430 kilograms marinau.
EXO 38:27 Maaqa atuna oosana amaaqa auqirafa 100 marinau. Mi siruaana moodaanaki asaana rumasoofanoo 3,400 kilograms marinau. Naaquqara uiqaana maaqaki qamunna diri maru saqarisa rakiqarana amaaqa faqa maaqa atuna rakiqarana amaaqa aiqama moodaa moodaa 34 kilograms kai marinau.
EXO 38:28 Miqimmaseeqa akaqa siruaa 30 kilograms amana kaqi marunannoo aunirira saqari faqa atuna rakiqarana ati mau faqa qamunna dirirana tafara maqi irana faqa auqiqau.
EXO 38:29 Yaaweena amu booroosana umaara fannoo 2,425 kilograms marinau.
EXO 38:30 Mi booroosanannai Yaaweena uiqaana maqa kooqiki saqari rakiqarana amaaqauqa auqiqau. Aandau tatufira qainda faqa mina fukaa asaana faqa minaki suqee maru ainainausa faqa minannai kai auqinau.
EXO 38:31 Dapu saqari rakiqarana amaaqauqa faqa kooqi saqari rakiqarana amaaqauqa faqa uiqaana maaqa apupukauqa faqa dapu fiqu fiqu irana apupukauqa faqa aiqama mi booroosanannai kai auqiqau.
EXO 39:1 Misa sipsipa asausi dirindaasi akirana faqa pannoona akirana faqa faeena akirana faqa marasee aanaiqikirausa naaquqara oosiranaki ainainiaqeera amiqira qamunna auqiqau. Aaroona aanaiqikira qamunna faqa Yaaweefa Mooseena qimamundee masee auqiqau.
EXO 39:2 Misa sipsipa asausi dirindaasi akirana faqa pannoona akirana faqa faeena akirana faqa koora sanda faqa sufuseeqa eefooda qamunna auqiqau.
EXO 39:3 Misa koora turiisoofanoo adamanaika mafufaqa tiritandara foora aukiiseeqa sipsipa asausi dirindaasi akirana faqa pannoona akirana faqa faeena akirana namu faqa sufuseeqa amiqira qamunna auqiqau.
EXO 39:4 Eefooda qamunna anaanu qaaraqanda fannoo aururusaa aakandianinnana auqusee eefooda qamunnasaa dinni dinni rumbaqau.
EXO 39:5 Mina ooiqanda ianinnana amiqira qamunnannai eefooda qamunna auqundee kai masee auqiqau. Mifa eefooda qamunnasaa akunirafa marinau. Yaaweefa Mooseena qimamundee kai iqau.
EXO 39:6 Eefooda anaanusaa akumaaqa ooni qaaraqanda pupu ooni marasee dinni aanaanusaa moo dinni aanaanusaa moo quqasee Yakooboona faiqi namu qisaukuqara taikasee qikunni ooqu qaara marasee nuqu mi ooni qandasaa akara riqau.
EXO 39:7 Miqimmasee aururusaa eefooda qammunna aakandammasoofanoo Yakooboona faiqi namu qisaukuqara taikasee qikunni ooqu qaara marasee 12 Isaraee maqannaasa kikiqa usinoo marinau.
EXO 39:8 Eefooda qamunna auqu ainainausannoo kai amuqusasaa rumbara qamunna auquseeqa moodaa karira akara kai riqau.
EXO 39:9 Mi qamunnana tukaandasoofanoo aiqama ati amana amana kai 22 centimetres marinau.
EXO 39:10 Misa ooni amiqirana firaa feefauru aqimariana kai marasee qaara faqa qaara faqaki mi qamunnanasaa padiqau. Indaaruqaa padiranaki moo ooni auqu rubi faqa moo ooni toopasa faqa moo ooni ganeeta faqa minamuna padiqau.
EXO 39:11 Mina aanaaqianna padiranaki moo ooni auqu eemeerara faqa moo ooni auqu safairee faqa moo ooni auqu daimanna faqa minamunannai padiqau.
EXO 39:12 Miqanda muqufi padiranaki moo ooni auqu teerakoisa faqa moo ooni auqu agatee faqa moo ooni auqu ameetisa faqa minamunannai padiqau.
EXO 39:13 Inaaqiana atimau padiranaki moo ooni auqu beerira faqa moo ooni auqu kanirianna faqa moo ooni auqu yasapaa faqa minamunannai padiqau. Mi oonisa koorandannai amuqusasaa maru qamunnanasaa isooqa araqau.
EXO 39:14 Mi oonisa moodaa moodaa ooni fannoo Yakooboona faiqi namu qisaukuqara taikasee qikunni ooqu qaara marasee 12 Isaraee maqannaasa kikiqa usinoo marinau.
EXO 39:15 Misa nimuqusasaa rumbarana aanaanu amiqira koorannai auqira sandannai seenandara foora auquseeqa moodaanaki quqasee afundasee dinni dinni ati saa qusiqau.
EXO 39:16 Koorannai anaanu qaara qanda auqusee amuqusasaa rufuaninna qamunnana mirinni atisaa qara qusiqau.
EXO 39:17 Qaaraqanda seenanda koorannoo afundaranannai mi anaanu qandaki qusiqau.
EXO 39:18 Mi sandana ati qarannai aururusaa koorandannai ooni isooqa aruqaanaki ootupaaqa. Miqimmasoofanoo aururusaa eefooda qamunnasaa rumbanau.
EXO 39:19 Kafaa nimuqusasaa rufimariana anaanu qaara qanda koorannai auqusee aunduraindari atisaa mi anaanuna rumbasoofanoo eefooda qamunna mammaaqai marinau.
EXO 39:20 Kafaa qaaraqanda aanaanu koorannai auqusee afunni qumu maru eefooda qamunnanasaa aqaasanai amiqira qamunnannai sufirana ooiqandi maruna aakaariqara rumbaqau.
EXO 39:21 Nimuqusasaa diri maria qamunnanasaa anaanuki dirindaasiandannai sufira sanda usuaki eefooda qamunnasaa qaraa anaanuki ususee rumbaqau. Miqimmasoofanoo amuqusasaa ititara qamunna sia kasi kasinau. Yaaweefa Mooseena qimamundee kai iqau.
EXO 39:22 Misa eefooda qamunna meeaqoo qaraana auqirara dirindaasi akira sipsipa asausinnai kai qamunna kisaaqa auqiqau.
EXO 39:23 Misa anuka amaaqa auqiqau. Qamunna raqandaammasee akunusoofanoo anuka upeekoofanoo sia anaqinau.
EXO 39:24 Mina ati mau raqandaammasee akunuseeqa saqari aqama faqa kaqikaa biru koorannai auqirana faqa mina atimau qusiqau. Dirindaasi akira sipsipa asausi faqa pannoona akiranannai faqa faeena akiranannai mi saqari aqamana amana auqiqau. Auquseeqa mi saqari aqamana aaqa koorannai auqira biru faqa qamunna atimau moo mafi quqee moo mafi quqee iqau.
EXO 39:27 Misa sipsipa asusi dirindaasi akirana faqa pannoona akirana faqa faeena akirana faqa tirita uqanna namu faqa sufusee Aaroona narí faiqinamu siutauqa faqa Aaroona uriqarara qata faqa mina faiqinamu kaqikaa qatauqa faqa auqiqau. Auqusee ooiqanda ianinnana minannai kai auquseeqa oosana oosana akarannoo afaaqa auqiqau. Miqimmaseeqa misa tarausisa tirita uqannannai auqiqau. Yaaweefa Mooseena qimamundee kai iqa aiqama ainaina auqiqau.
EXO 39:30 Misa amiqira koorannai niqinaaqa rumbeemaru doodapaaninara foora auqusee minasaa Anutunaindi fee qimasee akara riqau.
EXO 39:31 Misa doodapaani dirindaasiandannai auqirana marasee qatasaa quqasee akuniqau. Yaaweefa Mooseena qimamundee kai iqau.
EXO 39:32 Miqimasee Yaaweena uiqaana maqa taikaqau. Isaraeena aiku asauku Yaaweefa Mooseena qimamundee kai aiqama ainaina iqau.
EXO 39:33 Misa uiqaana maqa faqa mina rafaaqa fimaria qamunnana faqa mina anaanu faqa mi maqana usakara atunauqa faqa aunirira saqari faqa oosuki faqa kooqiki faqa rakiqee fandinna saqarisa faqa saqari maqaki rakiqarana amaaqa auqirana faqa maree Mooseefa marunnai munu quqaqau.
EXO 39:34 Sipsipa akoona apata faeena akirana minannai uiqaana maaqasaa akirana faqa ooruku nammarikinaa aandau apata uiqaana maqasaa akirana faqa kaaqa naaquqara oosiranaki ititara qamunna faqa maree munu quqaqau.
EXO 39:35 Misa moodaaniki kira bookisa qaara ooni minaki maruna faqa mina afu faqa mina qaindusira saqari qara faqa maree munu Mooseefa unnai quqaqau
EXO 39:36 Misa aiku faqaa qainda faqa minasaa mari ainainausa faqa Anutuna afusaa quqara feemu faqa maree munu quqaqau.
EXO 39:37 Misa amiqira koorannai auqira qooma saqari faqa mina qoomauqa faqa mina oosana oosana ainainauqa faqa mi qoomausa fadameena faqa maree munu quqaqau.
EXO 39:38 Koorannai auqira aidara faqa Yaaweenaindi fee qimasee utaaqama amaqasee adia nimaqee maria fadameenna faqa afundi mari pauraqana faqa uiqaana maqaki kooqi ititara qamunna faqa maree munu quqaqau.
EXO 39:39 Booroosannai auqira aidara faqa mina fukaa asaana booroosannai auqirana faqa mina qaindusira saqari qara faqa mina oosana oosana ainaina faqa nammari adiee maria difaanina faqa mina oosana faqa maree muna Mooseefa unnai quqaqau.
EXO 39:40 Dapu qamunna faqa dapu faqa dapu oosana amaaqa auqirana faqa dapu kooqi qamunna faqa dapu sanda faqa apupuka faqa aiqama ainaina naaquqara uiqaana maaqa aundurai auqee maria ainainausa faqa maree munu Mooseena uqafiqaqau.
EXO 39:41 Minauqa munu uqafiqaseeqa Aaroona naaquqara qamunna faqa narí faiqi namundi faqa naaquqara maqaki ainainidaqa afisifandinna qamunnana amiqirana munu Mooseena uqafiqaqau.
EXO 39:42 Isaree maqannaasa Yaaweefa Mooseena qimamundee kai masee aiqama ainaina auqaqau.
EXO 39:43 Mooseefa aiqama ainaina aiququ masee qafamaseenoo Yaaweena irirana mau kai auqeeaafoo qimaseenoo amiqi amiqimma nimaqanau.
EXO 40:1 Yaaweefa Mooseena qimaminoo qinau.
EXO 40:2 Indaaruqaa quqoonasaa indaaruqaa faasaana innee qini naaquqara uiqaana maqa oosana arasee usakaaqa.
EXO 40:3 Moodaanaki kira bookisaki qisaukuqara taikasee 10 sanda ufa marina kaaqa naaquqara oosiranaki quqasee ititee fandinnana firaa qamunna marasee minasaa ititaaqa.
EXO 40:4 Aikufaqaa qainda maree mini quqaseeqa minasaa ainainifandinna ainainausa minasaa mini quqaaqa. Qooma saqari faqa mini quqaseeqa mina qoomauqa mina ati mau quqaaqa.
EXO 40:5 Quqaseeqa koorannai auqira aidara amiqira afundi mari pauraqana suqee mariana mareeqee maamiqoo oosiranaki moodaanaki kira bookisa amummaqa quqaaqa. Quqaseeqa kooqiki ititee maria qamunnana maraseeqa kooqiki diriaqa.
EXO 40:6 Qaidara firaana aandau tatufirana suqee mariana uiqaana maaqa kooqi amummaqa ququsaki quqaaqa.
EXO 40:7 Kafaa nammari difaani mareeqee maaqa kooqi dinni firaa qaidara dinni qambaana quqasee nammari adia umbiqaaqa.
EXO 40:8 Ququsa dapu uiqaana maaqa aru fiqu fiqumma datimasee kooqiki qamunna diriaqa.
EXO 40:9 Yaaweefa Mooseena kafaa qimaminoo qinau. Qini naaquqara fadameena maraseenana uiqaana maaqa faqa minakinaa aiqama ainaina qini utaaqama qimaqaranasaa rurufa masainanoo naaquqanoo mariani.
EXO 40:10 Miqimmaseenana firaa aidara aandau tatufirana suqee mariana faqa minasaa qaraa ainainauqasaa faqa mi fadameenna rurufa masainanoo kaaqa naaquqanoo mariani.
EXO 40:11 Nammari difaanisaa faqa mina oosanasaa faqa miqi kai iaqa.
EXO 40:12 Miqi masee Aaroona narí faiqi namu faqa nifiqamaree uiqaana maqa kooqiki munusainaqa nammari auqaaqa.
EXO 40:13 Auqamasaifana aanaiqikirausa qamunna marasee Aaroona afisu amaqasee qini utaaqama qimaqara fadameena akiiqa amoondunna rurufammasainanoo naaquqanoo maridanoo qini aanaiqikira saikaki mariani.
EXO 40:14 Mina faiqi namu nifiqee miniseenana aanaiqikirausa qamunna afisu nimaqaa.
EXO 40:15 Miqi maseenana Aaroona ianandee inana mina faiqi namu faqa fadameena nikiiqa amoondunna rurufamma nimaqaa. Miqimmasainaqa qini aanaiqikira saikaki mariaqa. Mi fadameenafa misa naaruara qini aanaiqikira saikaki marirana nimiannoo.
EXO 40:16 Mooseefa aiqama ainaina Yaaweefa qimamundee kai masee auqanau.
EXO 40:17 Isipa maqa maaqa kiqari anukari moo aukuana aiqaroofaqa moo aukuana indaaruqaa uqoona mina indaaruqaa faasaanasaa Yaaweena naaquqara uiqaana maaqa usakaqau.
EXO 40:18 Mooseefa qufaqa uiqaana maaqa atuna amaaqauqa maqaki quqaseeqa maaqa atuna minakiaqa kuradamasee ausana auni rumasee kooqindanai atuna faqa rakiaqau.
EXO 40:19 Rakiqaseeqa indaaruqaa qamunna qairi akuseeqa mina amuaaqa qaaramoo mina rafaaqafuanifeera qairi akiqau. Yaaweena ufamau kaimbiqau.
EXO 40:20 Mooseefa sanda ufa akararira ooniqara bookisaki quqaseenoo mina aindusira aikaqara anaanuki upeekaseenoo mina nifauara afu rafaaqafinau.
EXO 40:21 Rafaaqafuseenoo mi bookisana mareeqeenoo uiqaana maqaki quqaseenoo qamunna qumareenoo dirisoofanoo minasaa itita amaqanau. Yaaweena ufamau kai miqinau.
EXO 40:22 Mooseefa aiku faqaa teeboora mareeqeenoo naaquqara oosiranaki suani afu dinni ataaqeenni North quqanau.
EXO 40:23 Quqaseenoo mi teebooranasaa Yaaweena amiraree qu feemuna quqaqoofanoo marinau. Yaaweena ufamau kai finau.
EXO 40:24 Miqi maseenoo Mooseefa qooma saqari uiqaana maqaki suani afu dinni ataaqeenni (South) maaqa atuna mammaaqai quqanau. Dinni taatatai aiku faqaa teeboora quqasee dinni taatatai qooma saqari quqanau.
EXO 40:25 Yaaweefa qumi maru uiqaana maqanaki qooma saqari quqasee qumbisoofanoo qanau. Yaaweefa qimamundee kai inau.
EXO 40:26 Miqi maseenoo Mooseefa koorannai auqira qaidara mareeqeenoo uiqaana maqa maamiqoo oosiranaki ititaqoo qamunnana aaqa quqanau.
EXO 40:27 Quqaseenoo mifa amiqira afundimaruna andaana rirana quqaseenoo idaranau. Yaaweena ufamau kai finau.
EXO 40:28 Mifa uiqaana maqa kooqiki qamunna d irinau.
EXO 40:29 Diriseenoo tatufirana suqee maru qaidarana uiqaana maqa kooqi amummaqa madaanai quqanau. Quqaseenoo Mooseefa aandau tatufirana faqa sakuma fooqaa irana qaindi rirana faqa tatufinau. Yaaweena ufamau kai miqinau.
EXO 40:30 Miqi maseenoo Mooseefa nammari difaani madaanai qaidara mianni marufanoo uiqaana maqa kooqi murunni marufanoo qambaana quqanau. Quqaseenoo nammari minaki adia qumbiqanau.
EXO 40:31 Mi nammarinaki Mooseefa faqa Aaroonafa narí faiqi namu faqa mi nammarinaki niku nisauku nammari uqi mariqau.
EXO 40:32 Misa uiqaana maqaki keeqararee qimasee fee tatufira qaidara aaqa firaree qimasee fee mi nammarinaki niku nisauku nammari uqusee fimariqau. Yaaweena ufamau kai miqi mariqau.
EXO 40:33 Miqimma taikaseeqa Mooseefa qufaqa uiqaana maqa faqa firaa qaidara faqa ququsa dapu fiqu fiqumma rakiqaqau. Rakiqaseeqa dapu kooqiki faqa qamunna ititaqau. Miqimmasee misa Mooseena faqa aiqama ainainirana taikaqau.
EXO 40:34 Miqi masoofanoo qasuru fannoo uiqaana maqa dukunimambufanoo Yaaweena kaaqa qara daroo daraa irafa uiqaana maqaki qumbiqa finau.
EXO 40:35 Miqimmafunara Mooseefa sia uiqaana maqa keeqanau.
EXO 40:36 Qasuru fannoo uqeeree fukari kai Isaraee maqannaasa nári uiqaana maqa faqa Yaaweena uiqaana maqa faqa aiqama ainaina faqa tatu maree fiqau.
EXO 40:37 Qasuru fannoo kaqi miqoo marufaqa misa faqa kaqi miqoo mariqau.
EXO 40:38 Isaraee maqannaasa fida marufanoo qasuru fannoo aiqama faasaana Yaaweena uiqaana maqa akiiaaqa marinau. Aiqama eendaki idauruara foora mina akiiaaqa marufaqa qafee mariqau. Miqinoo marufaqa fifiiufaqa Yaaweefa nimiraree qu maqa maaqanaki oonu raqau.
EST 1:1 Serkisisafa Peereesia maqa maaqaki kinna maru aukuana mifa Susa maqusaki narí kinna siaqa ufiqiseenoo ooqu marifinoo 127 maqa maaqa rakisi marinau. Suani afu uri maru qaannai India maqa maaqaki oosana araseenoo suanafu keeqee maru qaannai Itiopia maqa maaqaaki dinni ati oonu marinau.
EST 1:3 Mifa qaarammoo aukuanaki kinna maridanoo aiqama kiapausa faqa kaammanna uriqararausa faqa aiqama maqa maaqaki marusa faqa firaa oomaqa sakasaida nee marinau. Peereesia maqa maaqaki faqa Midia maqa maaqakinaa ammiuqa faqa mi firaa oomaqanaki ani mariqau. Rakisirausa faqa firaa fasiqauqa faqa aiqama maqa maaqaki marusa misa faqa mariqau.
EST 1:4 Mi naranafa qisauku dinni taikasee dinni oonu moodaa marasee 6 uqoonaki marinau. Marufanoo kinna fannoo narí aiqama munnimma faqa narí maaqa afaaqa auqirana faiqi anaasee quqannifiqanau. Quqannifiqasoofaqa misa mi ainainausa qafoofanoo kaaqa amiqirafa uriqaranoo uqanna marinau.
EST 1:5 Mina anaaqiana kinna fanoo moo firaa oomaqa narí uqusaki narí maaqa adeedi sakanau. Mi oomaqafa aiqama Susaa maqusaki maru fasiqausa ainaina faqaasa faqa ainaina siaisa faqa misaindi marinau. Marufaqa misa moodaa amaana aundurai naida mariqau.
EST 1:6 Mitinai misa narana nee marunnai amiqira tida marinau. Ooqai faiqi misa taatuqee ooninnai faqa eekara ooninnai faqa dirindaasi arira ooni faqa kinnaa ooniuqa misa rarai fee qimasee auqu ree maruna mookira ooni tanukaida qeemaruna faqa maqasaa padimmaseeqa minasaa tida auqiqau. Misa mi tidanasaa oomaqa naani qimasee eekara arira qamunnainnai faqa dirindaasi arira qamunnanai faqa afaaqa auqusee amiqira sandannai rumbaqoofanoo marinau. Misa mi sandanannai siruaannai auqira rinna amiqira ooni pausasaa rumbaqau. Misa miqoo koorannnai faqa siruaannai faqa auqira kisaaqa siaqauqa ufiqisaidaqa minasaa ooqu marifidaqa narana nee mariqau.
EST 1:7 Faiqi misa mooka maakira koora kaafaki nammari nee mariqau. Nee marufanoo kinna fannoo moomoo uainna mi fasiqausa nimi marinau.
EST 1:8 Sia misa neefandinnana asaana riqau. Kinna fannoo narí maaqaki ainaini maru faiqisa qimannimufaqa misa nári nidiranasaa moodaa moodaa fasiqa nammari nimi mariqau.
EST 1:9 Mikari Kuinna Wasti nammarifa aiqama anaaseeuqa faqa kinna maaqaki firaa oomaqa sakasee nee mariqau.
EST 1:10 Qisauku dinni taikasee dinni oonu qaaraqanda marasee 7 faasanasaa mi firaa oomaqanaki kinna fannoo kaqi kaaqoo uqanna uainnasaa furufarinau, furufarinoo mifa narí maaqaki ainaini maru faiqisa qisauku dinni taikase dinni oonu qaaraqanda marasee 7 naaroofaqa aniqau. Misa nuqu maaqimminoo marinau. Meehummafa faqa Bistaafa faqa Aboonnafa faqa Bitaafa faqa abaktaafa faqa Seetarafa faqa Karkasaafa faqa mariqau.
EST 1:11 Kinna fannoo misara kuinna Wasti nammarina afiqee aniaqee qimaseenoo qimanniminau. Kuinna Wasti nammarifa narí kuinna qafee afisu maree aniani. Kuinna Wasti nammarifa amiqira manaaqa uqanna marufanoo minara kinna fannoo kiapausa faqa aiqama mina firaa oomaqaki ani marusa uqannifiqarara aaranau.
EST 1:12 Mi ainainira faiqisa oonu kuinna Wasti nammarina kinna qu ufana qimamufanoo kuinna fannoo sia anufanoo minara kinna firaaqoo uqanna aranaqanau.
EST 1:13 Mifa irirana faqaa fasiqauqa naroofaqa anireeqa kuinna faqa auqaaninna ainainara qimamiqau. Kinna fannoo irirana faqaasa iramiriseenoo misa qimamundeemmasee narí sandufaki ainaini maruna faqa faiqi anaasee ooqu marirana faqa andeeqanau.
EST 1:14 Mi fasiqausa nuqu maaqimminoo marinau. Kareesanafa faqa Seetaraafa faqa Atmataafa faqa Tarasisaafa faqa Meereesafa faqa Maraseenafa faqa Meemukanafa faqa mariqau. Misauqa qisauku dinni taikasee dinni oonu qaaraqanda marasee 7 nikiiqa fasiqauqa Peereesia maqa maaqaki faqa Midia maqa maaqaki faqa aiqama kinna rakisi maru maqa maaqanaki misa uriqarara kaammanna mariqau.
EST 1:15 Mifa mi fasiqausa maaqi qimasee qimanniminau. Qinee kinna Seerkisisasa eeqá maaqaki ainainimaru faiqisa niiqaafanaqa oonu kuinna Wasti nammarina qimamifanoo qinee qimamianna ainainausa auqaanifee qiafananoo mifa qini ufa rukioofanoo qirana qanau. Sandufa fannoo minara naqaa fee qidanoo fee. Innisaimbaqa kuinna naqaa feemma amaqaanauree.
EST 1:16 Meemukanafa kinna narí oofisaa faqa maaqi qimasee qimanniminau. Rakisirafa anee iria, kuinna Wasti nammarifa sia anikai fau mandaikamma amaqeenoo fau. Mifa aiqama uriqarara fasiqauqa faqa aiqama ani maqa maaqaki maria fasiqausa faqa mandaikamma nimaqeenoo.
EST 1:17 Qusasaa uqanna aiqama anaaseeuqa anee rakisi marianna maqa maaqanaki mariasa misa kuinna mi oosanna auqainara irifaranoo. Iriseeqa misa maaqi qifaranoo, kinna Seerkisisafa kuinna Wasti nammarifa oonu mina qafaanifeera qufanoo kuinna fannoo kinna ufa rukiasee sia finau. Miqi kai iqa anaaseeuqa faqa nári nifaaqmaaka ufa rukieefaranoo.
EST 1:18 Mi faasanna kai uriqarara fasiqauqa Peereesia maqa maaqaki faqa Midia maqa maaqaki faqa marusa ninaaqmaaka kuinna mi oosanna auqoo ufana irisee misa mi ainannara nári nifaaqmaaka qimannimisee mi anaseesa moomoo mandoosana faqa mandufa faqa qifaranoo.
EST 1:19 Rakisirafa anee irinanoo amiqinana, anee moo ufa maaqi qimasee faiqi anaasee iannai uqaa. Wasti nammarifa sia kaifaa ani ani qafaani. Mi ufana Peereesia maqa maaqakinaasa faqa Midia maqa maaqakinaasa sandufa mari papiqanaki akara ruaqa. Akara rumasaifanoo mi sandufafa sia amana taikaannoo. Minara anee Wasti nammarina mara aqusee moo amiqira manaaqa mara uqasainanoo mifa kuinna mariani.
EST 1:20 Mikari ani mi ufafa aiqama anee rakisi marianna maqa maaqausaki daraani mafinaqa aiqama anaaseeuqa nári nifaaqmaaka nuqu faqaasa faqa nuqu siaisa faqa misa ufa amiqimmasee irifaranoo.
EST 1:21 Kinna narí uriqarara fasiqauqa faqa misa mi ufanara nidufanoo kinna fannoo Meemukanafa qundee inau.
EST 1:22 Kinna fannoo narí rakisi maru maqa maaqausakiaqa papiqa quqasoofanoo fifaininau, mifa aiqamausa nári ufakiqari papiqa akara ruma nimaqanau. Akara ruma nimaqaseenoo mifa maaqi qinau, faiqi fannoo kai narí faiqi anaasee rakisiannoo.
EST 2:1 Mikari kinna aranaqarafa kaqikaaqoo taikoofanoo mifa kaifaa Wasti nammarifa mandaikamma amaqoo oosannara oonu mafi irinau. Iriseenoo mifa Wasti nammarina aiqamasainanoo mifa sia kaifaa kuinna mariannoo fee qu ufanara oonumafi irinau.
EST 2:2 Akaqa fasiqauqa mina amiqira irirana amimarusa mina aaqa ooqufaaqeeidaqa maaqi qimasee mina qimamiqau, rakisirafa anee akaqa amiqira manaaqauqa sia faiqi faqa faiqama qaasara randaannee qiqau.
EST 2:3 Anee rakisi marianna maqa maaqanakinaa fasiqauqa mara uqasainaqa misa amiqira manaaqauqa sia faiqi faqa faiqama qaasa nifiqamaree kaammanna uriqarara taunna Susaa maqusaki minisee anee manaaqauqa suqu uqee marianna maaqanaki misauqa mini uqaaqa. Uqasaifanoo Eekaifa ani ainainira faiqi ani anaaqmaakasaa rakisi marifa mifa misasaa rakisiani. Rakisi marinaqa anaaseeuqa misa fadameena akunnimaqaseeqa misa nifaaqa auqusaifaqa misa kaaqa amiqirausa uqanna mariaqa.
EST 2:4 Marifana anee mi manaaqausa kinaana moodaa ani aidi marinnana mareeqee uqasainanoo mifa kuinnaika mafinanoo kuinna Wasti nammarina amaaqa maqaani. Miqi qufanoo kinna fannoo iriseenoo mi ufanara eedoo qimaseenoo afaqanau.
EST 2:5 Susaa maqusaki Yuda maqannaa fasiqa moo marinau, minauqu Moodeekaifa marinau mina akoona auqu Yairafa marinau. Yairafa Kisaana amaaku Simeena anaiqi Beensamina atikinaafa marinau.
EST 2:6 Ooqai Babiroonnia maqannaasa kinna Neebukatneesafa Yuda maqannaasa kinna Yeeoiakina faqa Yuda maqannaasa akaqausa faqa nifiqeenoo Babiroonnia maqusai mariaqeera finau. Mifa Moodeekaina aiku asauku faqa nifiqoo faqa misa faqa fiqau.
EST 2:7 Moodeekaifa moo manaaqa rakisi maruna minauqu Eestaa nammarifa marinau. Minauqu Heeburu ufakiqari Adasanee qimariqau. Eesta nammarifa Moodeekaina akoona akaqa araamuna marinau. Mina akoofa narí anaaqa faqa kuqufufanoo Moodeekaifa Eestaa nammarina maraseenoo narí faiqiara foora rakisi marinau. Rakisi marufanoo Eestaa nammarifa kaaqa amiqira manaaqa uqanna findifi marufaqa qafoofanoo amiqirafa uqanna marinau.
EST 2:8 Kinna Seerkisisafa narí oofisaauqara moomoo amiqira manaaqauqa nifiqamaree Susaa maqusai aniaqee qimasee ufa quqanau. Ufa uqasoofaqa misa manaaqauqa nifiqee anidaqa misa Eestaa nammarina faqa afiqee aniqau. Miniseeqa misa Eeataa nammarina kinna uqusaki manaaqauqa maru maaqanaki uqaqau. Uqasoofanoo Eekaifa mi manaaqausasaa rakisi marinau.
EST 2:9 Eekaifa Eesta nammarina qafoofanoo amiqira manaaqa marufanoo minara aidi marinau. Aidufanoo mifa kai kaqi ufanoo Eestaa nammarifa afaaqa auquaninna fadameena mainainausa faqa oosana oosana amiqira narana faqa aminau. Amiseenoo mifa kinna maaqaki marusara Eesta nammarinasaa amiqimmasee rakisiaqee qimaseenoo mara uqanau.
EST 2:10 Indaaru Moodeekaifa Eesta nammarina qimaminau, anee sia aneenara Yuda maqanaa manaaqa maridee qimasee koorooiannee qu ufana Eesta nammarifa narí rakisi maru akoona mi ufana afaqeenoo sia qimaminau.
EST 2:11 Aiqama faasaana Moodeekaifa anaaseeuqa maaqa maru uqusana kooqindanai oonuree aniree inoo nimarinau. Mifa Eesta nammarifa naqaa fee masee marinaqee irianauree misa Eesta nammarina naqi feemma amaqaifaqee irianauree qimasaidanoo oonuree aniree imarinau.
EST 2:12 Moodaa aukuana aundurai misa manaaqauqa rakisi marufaqa amiqirausa uqanna kambiqee mariqau. Kambiqee marufaqa misa qisauku dinni taikasee dinni oonu moodaa marasee 6 uqoonaki misa meea saqari anoonnai auquqoo fadameena amiqira afundi maruna mi manaaqausa nifaaqai akunnimaqee mariqau. Akunnimaqasee moo 6 uqoonaki misa fadameena faqa ainoo faqa amiqira afundi maruna akunnimaqee mariqau. Miqimmasee inaaqianna misa aiqama manaaqauqa moodaa moodaa nifiqa maraida kinna Seerkisisafa marunnai fimariqau.
EST 2:13 Manaaqa moo fannoo kinna maaqai fuani qimaseenoo narí aidiranasaa afaaqa auqu mareenoo fimarinau.
EST 2:14 Manaaqa fannoo eendi marufanoo kinna marunnai oonu mariinoo iaqee marinau. Iaqasoofaqa kananaana mina afiqamaree anaaseeuqa maaqa mooki munu Saskasana asaukuki uqaqau. Mi moodaa fasiqafa kai kinna inaaqianna anaaseeuqasaa rakisi marinau, rakisi marufaqa mi anaaseesa sia kaifaa kinna oonu qafee mariqau. Kinnna fannoo moonara aidinanoo mina auquramasee aarainanoo mifa amana fuannoo, sia moo aana maridanoo.
EST 2:15 Eesta nammarifa kinna qafaaninna faasaanafa aniranau. Eesta nammarifa Moodeekaina akoona akaqa Abiairana araamuna marufanoo Moodeekaifa Eesta nammarina maraseenoo narí araamunara foora rakisi marinau. Rakisi marufaqa aiqama fasiqauqa Eesta nammaria qafee marufanoo kaaqa uqanna minara nidi marinau. Mikari Eesta nammarifa kinna qafarara finoo sia narí aidiranasaa qamunna afisinau. Manaaqauqa rakisirafa Eekaifa qimamundeemmasee qamunna afisinau.
EST 2:16 Mikari Seerkisisafa qisauku dinni taikasee dinni oonu qaara marasee 7 aukuanaki kinna marinau. Mi aukuannanaki qisakuqara taikasee 10 uqoona misa auquree Teebeeta uqoonafee qimariqau. Mi uqoonnanaki misa Eesta nammarina afiqee kinna marunnai fiqau.
EST 2:17 Munusoofanoo kinna fannoo firaaqoo uqanna Eesta nammarinara aidinau. Mifa sia akaqa manaaqauqara aidi marundeemmaseenoo Eesta nammarinara aidinau. Mifa Eesta nammarina qafoofanoo akaqa manaaqauqa urinnaaqaramaseenoo kaaqa amiqirafa uqanna marinau. Sia moo manaaqa fannoo Eesta nammarifa kinna aqaararana amundee iannoo. Minara kinna fannoo mina akiiqaki kuinna qafee afisu amqanau. Afisu amaqasoofanoo Eesta nammarifa Wasti nammarina amaaqa maqaseenoo kuinnaikinau.
EST 2:18 Kinna fannoo Eesta nammarinara asasidanoo firaa oomaqa sakaseenoo nanau. Mifa aiqama uriqarara fasiqauqa faqa kiapausa faqa naaroofaqa mi firaa oomaqanaki aniqau. Aniroofanoo mifa qinau aiqama fasiqa anaasee qini maqa maaqaki mariasa misa maa faasaana idooaidaqa. Miqi qimaseenoo kinna fannoo moomoo amiqira ainaina faiqi anaasee niminau.
EST 2:19 Mikari kai kinna fannoo Moodeekaina mara uqasoofanoo mina maaqasaa rakisira fasiqaikinau.
EST 2:20 Ooqai Moodeekaifa Eesta nammarinaa qimaminau, anee sia aneennara Yuda maqannaa manaaqa maridee qimasee faiqi qimannimia. Miqi qimaqoona Eesta nammarifa mi ufana afaqanau. Mina oosana mifa aiqama kari Moodeekaina maaqaki maridanoo mina ufa afaqee marinau.
EST 2:21 Mikari Moodeekaifa kinna Seerkisisana saika maroofaqa qaara fasiqa qara kinnara aanoo qimasee miqanda mina kuqa arirara ufa tipundaari mariqau. Mi fasiqa qanda nuqu Biktanafa faqa Teereesaafa faqa marinau. Mi fasiqa qanda kinna faiqee maru maaqana kooqiki rakisimaru qanda mariqau.
EST 2:22 Moodeekaifa miqanda ufa iriseenoo mifa oonu kuinna Eesta nammarina qimaminau. Qimamufnoo Eesta nammarifa Moodeekaina faqa mi fasiqaqanda faqa ufa iruna kinna qimaminau.
EST 2:23 Misa mi ufana oosana randaseeqa iriseeqa mi ufanara kuqaa fee qiqau. Kuqaa fee qimaseeqa misa mi fasiqaqanda saqarisaa dirisoofaqa kuqiqau. Kuqufufanoo kinna fannoo narí oofisaauqa qimanniminoo qinau, mi ainainafa kambiqaina innisaimbaqa kaammanna papiqaki akara rua qufaqa misa miqimmiqau.
EST 3:1 Kaqikaaqoo marinoo kinna Seerkisisafa moo fasiqa mina auqu Amaannana mara uqasoofanoo mifa uriqarara kaammanna marinau. Amannafa Hammeedatana amaaaku Akakana anaiqi marinau.
EST 3:2 Kinna fannoo aiqama kiapausara Amaannanara niqoori saunu araseee mina firaa auqu amiaqee qufaqa misa aiqamausa kinna qundee ufanoo Moodeekaifa kai sia miqinau. Moodeekaifa Amannanara aqoori saunu arara akooqanau.
EST 3:3 Inaaqianna akaqa kiapausa mina qafamasee mina iramiriqa qiqau anee nanaree kinna ufamau sia finanee.
EST 3:4 Moomoo kari Moodeekaina mi oosannanara qimami mariqau. Miqi marufanoo Moodeekaifa misa ufa irirara akooqanau. Miqufanoo Moodeekaifa misa qimanniminoo qinau, qinee Yuda maqannaasa maridaqa minara qinee Amannanara sia qiqoori saunu araidaqa. Miqi qufaqa kiapausa Moodeekaifa qu ufana Amannana qimamiqau. Misa Moodeekainara kaqi mi ooasanna maree marinanoo Amannafa qafamasee arana qaannoo fee sia fee arana qaannoo fee qimasee qafee mariqau.
EST 3:5 Amannafa qaqfoofanoo Moodeekaifa sia minara aqoori saunu araseenoo mina amooqinau, miqufanoo mifa minara firaaqoo aranaqanau.
EST 3:6 Miqi marufanoo mifa mina paqurimmaseenoo qafoofanoo Moodeekaifa Yuda maqannaa fasiqa marunara mifa Moodeekaina mandaikamma amaqarara irinau. Sia Moodeekaina kai fau miqinau. Amannafa Yuda maqannaasa Peereesia maqa maaqaki marusa aiqama naru taikarara oonu mafi irinau.
EST 3:7 Qisaukqara taikasee qikunni ooqu qaara marasee 12 aukuanaki Seerkisisafa kinna marinau. Indaaruqaa uqoona auqu nisaanna fee qimarunasaa Amannafa purimma fee qimaru sararana masee qafaaqee qinau. Ya uqoonnanaki fee ya faasaanee Yuda maqannaa kuridi nimaqara amiqira faasaana mariannoo fee. Miqi qufaqa misa sarara masee maaqimmasee paquriqau. Adara 12 uqoona fee qimaru uqoonnanaki 13 faasaana Amannafa misa kuridi nimaqaannoo.
EST 3:8 Amnnafa oonureenoo rakisirana qimaminoo qinau. Aiqama anee rakisi marianna maqa maaqaki maria fasiqa anaaseesa akaqausa sia maaqoo mariasa naanna raidaqa, misa mooka uqanna midammia. Minara anee misa afu kai niqafee marinaqa marifanoo mifa sia ani faqa ani maqa maaqa faqa dadaaqiannoo.
EST 3:9 Minara rakisirafa ani aidinana anee aiqama faiqi anaaseera qinaqa mi fasiqa anaaseesa kuqa naruaqa. Anee miqinaqa qinee maqee aniara kuqaa idaqa qinee siruaa munnimma moomoo uqanna 50 mirioonna anee munnimma afeedi marianna maaqanaki uqaisaanaura. Miqimmaseenana anee minannai kaamaanna saika mareenaranoo.
EST 3:10 Kinna fannoo narí sandufauqa qimasainnana afeekaikiani feera mina rinnasaa mina akara maridanoo. Kinna fanoo mi ufana iriseenoo asaukukinaa rinna radukuseenoo Amannana Ammeedatana amaaku Akakana atikinaana Yuda maqannaasa namuqaa aminau.
EST 3:11 Amiseenoo kinna fannoo Amannana maaqi qimasee qimaminau sia munnimmara iria, anee nana ainainee maa fasiqa anaaseesaki auqararee iridanee kaqi auqaa.
EST 3:12 Indaaruqaa uqoona 13 faasaana Amannafa kinna kuskusauqa aiqama naaroofaqa aniqau. Aniroofanoo mifa narí ufauqa qimanniminaqa akara ruaqeera naaroofaqa aniqau. Misa anireeqa aiqama moodaa moodaa maqannaasa nári ufakiqari akara ruma nimaqaqau. Miqimmasoofanoo mifa mi papiqana aiqama rakisirausa faqa aiqama kaammnauqa faqa aiqama kiapausa faqa nimaqanau. Aiqama papiqa Seerkisisana rinna saaqaraa akara marinau. Kinna fannoo narí uqanna papiqa akarariifoo qirana koorooinau.
EST 3:13 Pasa maraqa nu fasiqausa mi pasausa mara maree kinna maqa maaqakinai aiqama maqannaa rakisirausa nimiqau. Aiqama pasauqa kiaqa maaqi qinoo marinau Adara uqoona 13 faasaana innee Yuda maqannaasa aiqama kuqa naruaqee qinoo marinau. Kumaara fasiqa anaasee faqa asooqauqa faqa faiqi anaaqiuqa faqa aiqama mi faasaana kai naru taikaaqa qiqau. Sia misara qimudaoo qiaqa aiqama naru taikaseeqa misa ainainauqa faqa maraaqa.
EST 3:14 Rakisirausa aiqama oosana oosana fasiqa anaasee aiqama maqa maaqaindari ani mariasa nifusaa mi pasana asaana ruaqa. Asaana rifaqa iriseeqa mi faasaanafa kambiqainaqa misa Yuda maqannaasa narirara deedaqiaqa.
EST 3:15 Pasa maraqa nu fasiaqusa misa kaunna qimasee pasa maree aiqamai fifainiqau. Misa maa ufana faqa Susaa maqusaki faiqi anaasee iriaqeera qimannimiqau. Kinna faqa Amannafa faqa miqanda kai nimuqusa amiqi marufaqa ooqu faaqee maridaqa uainna nee mariqau. Miqi marufaqa Susaa maqusakinaa fasiqa anaasee mi ufana irisee tautufanoo misa irirafa furufara uqanna minau.
EST 4:1 Moodeekaifa mi ufana iriseenoo firaaqoo qimudaoo qinau. Mina amuqusa ummaara uqanna roofanoo narí qamunna rakeekaammeeqee aqinau. Miqimmaseenoo mifa soofaara qamunnanda rumbaseenoo akiiqaki danda afaqa teeqinau. Mifa miqimmaseenoo maqusaki oorureenoo firaaqoo faaqa rumasee ikiraqanau.
EST 4:2 Mifa kinna maaqaki kooqiki oonureenoo mifa sia maaqaki keeqanau. Faiqi kinna maaqaqki keeqararee qinausa sia soofaara qamunna afisu mareeqa keeqeefaranoo.
EST 4:3 Mikari misa kinna ufa aiqama maqa maaqaki qimannimufaqa Yuda maqannaasa irufanoo naundura ummaara roofaqa firaaqoo faaqa riqau. Misa sia narana naqau qimudaoo qira idi ramasaidaqa iki faafau qimariqau. Yuda maqannaasa moomoo soofaara qamunna rakeekaa irana afisuseeqa dandaki noorindari aqufiqa mariqau.
EST 4:4 Eesta nammarina ainainira manaaqauqa faqa minasaa rakisi maru fasiqausa faqa Moodeekaifa auqoo oosanara qimamufanoo Eesta nammarina amuqusa firaaqoo uqanna ummaara ranau. Mifa Moodeekaifa qamunna anaqirana raipaqusee amiqirana afisuani feera amaqanau. Amaqasoofanoo Moodeekaifa akoo marara qanau.
EST 4:5 Miqufanoo Eesta nammarifa Atakana aaranau. Atakafa manaaqauqasaa rakisirafa marufanoo kinna fannoo Eesta nammarina ainainiani feera utaaqama amaqanau. Miqufanoo Eesta nammarifa Moodeekaina oosana paquriani feera nana oosanaree mifa mi ainaina auqeenoo fee qimaseenoo Akatana aiqanau.
EST 4:6 Akatafa suqira maqusaki keeqafufanoo kinna firaa maaqa kooqiki oonu Modekaina paqurinau.
EST 4:7 Oonu paqurimma soofanoo Moodeekaifa aiqama ainaina nariki kambiqoonara Akatana qimaminau. Amanafa faiqi Yuda maqannaa aiqama kuqa narusaifanoo mina akiiqara kinna fannoo munnimma uqeemaru maaqanaki mifa naqumma munnimmee uqaaninnanara faqa qinau.
EST 4:8 Moodeekaifa Amannana ufa maru pasausa kinaana moo maraseenoo Akatana aminau. Mi pasanaki faiqi anaasee Yuda maqannaasa aiqama kuqa naruaqee qinoo marinau. Moodeekaifa Akatanara mi pasana mara maree Eesta nammarifinnai munusee aiqama ainaina kambiqaaninnara qimamianne qinau. Akatafa Eesta nammarina qimaminanoo Eesta nammarifa kinninnai oonureenoo mifa Yuda maqannaara qimudaoo qimasee amuqusiani feera qimaminau.
EST 4:9 Miqi qufanoo Akatafa oonu Eesta nammarina qimaminau.
EST 4:10 Qimamufanoo Eesta nammarifa Moodeekaina qimamiani feera moo ufa Akatanasaa uqanau.
EST 4:11 Mifa maaqi qinau sia amana qinee oonu kinna qafaanauranoo. Kinna fannoo faiqi moo aarainanoo mifa amana mina maaqaki keeqaannoo. Sia riri aarainanoo narí iriranasaa keeqainnana misa kuqamma arifaranoo. Moodaa aana kai mi sandufana aiaaqararafa maridanoo. Faiqi moo fannoo kinna innannai kaqi fifau oonurainanoo kinna fannoo narí koora saununnai mina afaaqai mundusainafa mifa sia kuquannoo. Aiqama kinna ainainira faiqiuqa faqa kinna rakisi maru maqa maaqanaki maru fasiqausa aiqama mi sandufanara iridaqa. Minara moodaa uqoona taikarara imarufanoo kinna fannoo sia qini daaranau.
EST 4:12 Moodeekaifa Eesta nammarina ufa qimamufanoo iriseenoo mifa narí maaqi qimaseenoo qimaminau. Kuqaa anee kinna maaqaki mariananoo anee sia Yuda maqannaasakiqari aneennara kinna maaqaki marunnanara sia ummaaraki kuquanauree qimasee iria.
EST 4:14 Anee miqinna kari aneenna oo qumarainanoo akaqa ainaiana innisaimbaqa dadaaqirafa kambiqaannoo. Anee kuqinaqa ani ainaina aiqama kuqu taikeefaranoo. Minara innisaimbaqa sia iridaqa. Manda aukuana innisaimbaqa Yuda maqannaasa dadaaqirara anee kuinnaika mafuananoo.
EST 4:15 Eesta nammarifa Moodeekaifunnai kaifaa maaqi qimasee ufa uqanau.
EST 4:16 Anee oonu Susaa maqusaki aiqama Yuda maqannaasa suqu uqasee qimannimia innee qaarammoo faasaana faqa eendaki faqa narana faqa nammarifaqa auramasee sia naaqa. Kaifa qinee faqa eeqá ainainira manaaqauqa faqa miqi kai iqa narana faqa nammari faqa auramasee sia naanauranoo. Miqimmaseeqa inaaqianna qinee kinna innai fuanauranoo. Kaqi qinee sandufa rukiaanauranoo. Qinee miqimmasee kuquananoo sia ufa mariannoo kaqi qinee kuquanaranoo.
EST 4:17 Moodeekaifa Eesta nammarina ufa iriseenoo mifa kinna maaqa kooqi uqaseenoo oonureenoo Eesta nammarifa qimamundee maseenoo auqanau.
EST 5:1 Eesta nammarifa qaarammoo faasaana narana auranau. Mifa qaarammoo faasaanasaa kuinna qamunna afisu mareenoo kinna maaqa maru uqusanaki keeqanau. Kinna firaa oosiranaki maruna aaqa oorufinau. Kinna fanno narí siaqasaa ooqu faaqeeidanoo kooqinni afu maqanau.
EST 5:2 Kinna fannoo Eesta nammarifa maqusai kikiqinoo marufanoo qafoofanoo mina amuqusa fannoo Eesta nammarinara amiqufanoo mifa koora saunu uaqee mariiu asaukuna afaaqai mundinau. Miqufanoo Eesta nammarifa mina aaqa anireenoo mi saununa ati auqanau.
EST 5:3 Kinna fannoo qinau, kuinna Eesta nammari ani nanaree aididanoo fee. Qinee ani eeqá firaa maqa maaqa dinni ati ani amianeera aidi marinaqa qinee ani amianaura.
EST 5:4 Miqi qufanoo Eesta nammarifa maaqi qinau. Rakisirafa amanee anee faqa Amannafa faqa maqee eendaki firaa oomaqaki anifaree.
EST 5:5 Miqi qufanoo kinna fannoo mi ufanara eedoo qimaseenoo mifa Amannanara kai kaqi anirainaqa anindiri Eesta nammarifinnai fuanee qinau. Miqi qimaseeqa kinna faqa Amannafa faqa miqanda Eesta nammarina oomaqai fiqau.
EST 5:6 Misa oonu maridaqa uainna nee marufanoo kinna fannoo Eesta nammarina iramirinoo qinau. Anee nana ainainaree aidinnanara qinaqa amia. Aiqama ainainara anee irainnanara qinee eedoo qianaura. Anee qini maqa maaqa dinni ati mararee qinaqa qinee ani amianana anee rakisinnaranoo.
EST 5:7 Kinna fannoo miqi qufanoo Eesta nammarifa kinna narí qimaminoo qinau, qinee maaqi qimaseee ani iramiridaqa.
EST 5:8 Anee qiniara firaaqoo asasinana qini irara ufara faqa asasinaqa duna qinee moo oomaqa deedaqamma saanaqa anee faqa Amanafa faqa ani naaqa. Nee marifaqa miqoo qinee eeqá didirana ani qimamianauranoo.
EST 5:9 Amannafa narana neeneeuqooqari amuqusa amiqufanoo firaaqoo asasinau. Miqimmaseenoo oonuree qafoofanoo Moodeekaifa kinna maaqa kooqi aaqa ooqufaaqee marinau. Moodeekaifa maridanoo Amannana qafamaseenoo sia findifi amandanau. Miqufanoo Amannana firaaqoo arana qanau.
EST 5:10 Amannana aranaqarafa suka uqanna qoofanoo mifa narí amuqusa muqufiseenoo mifa sia moo ainaina auqanau. Mifa narí maaqai oonureenoo narí aqoondiuqa naaroofaqa aniroofanoo narí anaaqa Seereesa nammarina misa faqa mariani feera qimaminau.
EST 5:11 Misa maaqaki aniroofanoo Amannafa misa nifusaa narí auqu uqeeranau. Mifa narí munnimma moomoo marunara faqa umiasana faqa mina faiqi namu akoonaiqiuqa moomoo marunara faqa qimanniminau. Kinna fannoo mina firaa saika faqa firaaq auqu faqa amiqoonara qimanniminau. Qimannimufaqa kinna oofisaauqa akaqausa mina ameemaanai mariqau.
EST 5:12 Amannafa kaifaa maaqi qinau, kuinna Eesta nammarifa moo firaa oomaqa qinindi faqa kinnaindi faqa kai suqanau. Mifa sia moo fasiqa aaranau. Mifa maaqi qinau duna maaqandara kaifaa mina faqa oonu narana naaqee qinoo.
EST 5:13 Qinee Moodeekaina qafaunanoo mifa Yuda maqannaa fasiqa maridanoo. Mifa kinna kooqiki ooqufaaqee marifanoo qini qimuqusa ummaara raifaqa qinee mi amiqira ainainausara fifau ainainee qimasee iridaqa.
EST 5:14 Seereesa nammarifa Amannana anaaqa mifa narí aqoondiuqa faqa misa maaqi qimasee mina qimamiqau. Anee sia minara iria. Faiqi qimannimifaqa misa kisaaqa saqari 26 mita amana rakiqasee duna kananaana oonu kinna iramirisee Moodeekaina diriaqa. Anee miqimma sainanoo ani amuqusa amiqinana anee oonu narana naa. Amannafa mi ufanara asasammaseenoo faiqi qimannimufaqa misa Moodeekaina dirifandinn a saqarina rakiaqau.
EST 6:1 Miqu eendanaki kinna fannoo sia faiqanau. Minara mifa mina maqa maaqaki aiqama ainaina kambiqoonara akara rumaqoo papiqanara maree minisaifaqa misa minaki akara ufa qafaaqee qinau.
EST 6:2 Minisoofaqa misa Biktana faqa Teereesaana faqa ufa asaana rumasee qafoofaqa miqanda kinna maaqa oosiranauqaki rakisi mariqau. Mi fasiqa qanda kinna kuqa arira aanara randee mariqau. Randee marufanoo Moodeekaifa miqanda kukeeqara irirana qafamaseenoo miqanda koota niminau.
EST 6:3 Minara rakisirafa qinau, innisaimbaqa nanee moo amiqira ainainannai Moodeekaifa auqai oosana akiiqara amianauree. Miqi qufaqa faiqi maaqi qimasee mina qimamiqau, innisaimbaqa sia moo ainaina mina amiqa.
EST 6:4 Kinna fannoo misa iramirinoo qinau, qini oofisaauqa mi maqanaki mariiaafanoo fee sia fee. Maqee Amannafa kinna irara anidanoo, mifa Moodeekaina saqari rakiqasee deedaqamma qaanasaa diriaqeera qimamirara anidanoo. Minara Amannafa narí uqanna kinna maaqa mari uqusanaki keeqarara anidanoo.
EST 6:5 Ainainira faiqiuqa mina qafamaseeqa kinna qimamiqa qiqau, Amannafa ani maaqai maridanoo ani afeesidanoo. Mifa ani qafarara maridanoo ani afeesidanoo. Miqi qufanoo kinna fannoo qinau mina afiqee maaqaki uruaqee qinau.
EST 6:6 Amannafa maaqaki ooruroofanoo kinna fannoo qimaminoo qinau, qinee faiqi moo firaa auqu amirara iridaqa. Qinee sia iridaqa nanee moo amiqira ainainannai fee mina andeeqa amaqaanauree. Anee iria, qinee naqaa fee ianauree qufanoo Amannafa nariara maaqi qimasee oonu mafi irinau. Aqbee kinna fannoo yana miqimma amaqraree qidanoo fee sia moo fannoo maridanoo qinee kai maridaqa.
EST 6:7 Amannafa miqi qimiriseenoo kaifaa rakisirana narí maaqi qimasee qimaminau. Aneenna afisi marianna qamunnana minisee mi fasiqana afisu amaqaa. Anee qoosasaa uqeemaria sandiriqana faqa bakarainna faqa amiqimmasee afaaqa auqusee aneenna qoossaa uqaa. Miqimmaseenana kaifaa qoosa akiiqa faqa afaaqa auqusainanoo mifa kinna qoosa fee qirana koorooiani.
EST 6:9 Anee aneenna oofisaauqa kinaana moo misa uriqararana mara uqasainanoo mifa ani qamunnannai mina afaaqa auquani. Miqimma sainanoo mi fasiqafa qoosasaa ooqu marifinanoo oofisaa fannoo mina afiqeenoo firaa suqira maqusaki fuani. Afiqee fidanoo mi oofisaafa maaqi qimasee nammeera qiani, maa fasiqana qafaaqa kinna fannoo mina firaa auqu amiseenoo mina amiqimma amaqeenoo.
EST 6:10 Kinna fannoo mi ufana iriseenoo Amannana qimaminoo qinau anee kai kaqi oonu qamunna faqa qoosa faqa maraseenana qini saika faiqi Moodeekaina Yuda maqannaa fasiqa firaa auqu amia mi fasiqafa qini maaqa kooqiki ainaini marifa maridanoo. Aiqama ainaina maqee aneenna qiannandee masee auqaa.
EST 6:11 Miqi qufanoo Amannafa iriseenoo qamunna faqa qoosa faqa maraseennoo Moodeekaina afaaqa auqinau. Auqusoofanoo Moodeekaifa qoosasaa ooqu marifufanoo Amannafa qafamaseenoo suqi maru maqusanai afiqee finau. Afiqee fidanoo Amannafa nammeera qimasee maaqi qimasee faiqi anaasee qimanniminau. Maa fasiqana qafaaqa kinna fannoo firaa auqu amiseenoo amiqimma amaqeenoo.
EST 6:12 Miqi qimasoofanoo Moodeekaifa kaifaa anirandee kinna kooqinni finau. Fufanoo Amannafa asaurirana maraseenoo aundura ummaararoofanoo mifa oorisaa itita mareenoo kaifaa anirandee narí maaqai finau.
EST 6:13 Oonureenoo mifa moo anaasee faqa narí aqoondiuqa faqa aiqama ainaina minaki kambiqoonara qimanniminau. Mi anaaseefa faqa mi aqoondisa faqa irirana firaana faqaasa maridaqa misa mina maaqi qimasee qimamiqau. Maqee ani afeeka faqa ani auqu faqa quminanoo Moodeekaifa ani uriaaqaranoo. Mifa Yuda maqannaafa marinara anee sia mina aana titara aana maridanoo, anee ummaara kai mareennaranoo.
EST 6:14 Misa ufa qida marufanoo kinna ainainira faiqiuqa aniraqau. Misa Amannana kai kaqi afiqee Esta nammarina oomaqai firara aniqau.
EST 7:1 Minara kinna faqa Amannafa faqa kaifaa oonu Estaa nammarina faqa narana naqau. Nasmaseeqa misa uainna nammari naida marufanoo kinna fanno Estaa nammarina iramirinoo qinau, kuinna Esta nammari ani nana ainainaree aididanoo fee anee qinaqa qinee ani amianauranoo. Ani aidinaqa qinee eeqá maqa maaqa faqa ani amianauranoo.
EST 7:3 Qufanoo kuinna Estaa nammarifa qimaminoo qinau. Rakisirafa anee kuqaa anee qiniara aidinana qini amiqimma qimaqararee qimaseenana kaqi miqia. Qinee ikoo eeqá faiqi anaasee faqa kuqirara qaidanoo.
EST 7:4 Faiqi moo fannoo qini faqa qini faiqi anaqasee faqa kuqa nariraree qimasee doo ufa rumbaqaifanoo maridanoo. Misa maasa aiqama mandaikamma qimaqararee qidaqa. Misa maasa mandaikamma qimaqasee rumbara saika maasa qimisee fifau ainainira fasiqa anaaseekiaqee qifaqa qinee sia ufa qianauranoo. Qinee ikoo ani ummaara amirara qaifaqa misa maasa taikararee qianara minara qinee koorooidaqa.
EST 7:5 Kinna Serkisisafa mi ufana iriseenoo kuinna Estaa nammarina iramirinoo qinau. Ya manda fasiqafee sia miqirara rufieenoo fee, yaa fee mi fasiqafa maridanoo fee.
EST 7:6 Qufanoo Estaa nammarifa narí qimaminoo qinau. Qinee Amannanara qidaqa. Mifa manda fasiqa maasa namuqaa maridanoo maasa darirara deedaqidanoo. Qufanoo Amannana firaaqoo aindiri roofanoo rufianau.
EST 7:7 Kinna fannoo mi ufana irufanoo arana qoofanoo uainna neneuna minniseenoo aqoosai narí afuqai ooqufinau. Ooqufufanoo Amannafa kinna ooqufuna qafamasee mifa maaqi qimasee irinau kinna fannoo qini daruannoo, qimaseenoo Amannafa maaqaki maridanoo kuinna Estaa nammarifa minara qimudaoo qimasee kinna qimaminanoo sia mina mandaikamma amaqaanifeera iree marinau.
EST 7:8 Kinna fannoo qafuqaindari kaifaa oonurandee narana nee maruqoo anireenoo mifa Amannana qafoofanoo Estaa nammarifa ooqumarifida narana nee maru qaindanasaa faiaqee ufanoo qafamaseenoo tautinau. Faiaqee idanoo Amannafa minara qimudaoo qianifeera iree marinau. Iree marufanoo kinna mina qafamaseenoo faaqa rumasee qinau, aqbee maa fasiqafa kuinna qini maaqaki qini qifusaa mandaikamma amaqararee qidanoo fee, qimaseenoo kinna fannoo qufaqa misa kaunna qufaqa qamunnannai Amannana akiiqa kinna fannoo (faiqi kuqa narirara rumba nimaqee marundeemmasee rumba amaqanau).
EST 7:9 Ainainira faiqiuqa moo auqu Aboonafa maaqi qinau, iridafee Amannafa narí maaqa adeedi narí rakiaqoo pausafa mina kisaaqa fannoo 20 mita marinau. Mifa Moodeekaina minasaa diriraree qimasee rakiqanau. Kinna Moodeekaifa ooqai ani dadaqufaqa namuqaauqa sia ani kuqa ariqau. Qufanoo kinna fannoo qinau, innee Amannana narí mi pausanasaa dirisaifanoo kuquani.
EST 7:10 Qufaqa misa Amannafa Moodeekaina diriraree qimaseenoo rakiaqoo pausanasaa narí diriqau. Misa miqimmasoofanoo kinna aranaqarafa taikanau.
EST 8:1 Mi faasaanna kai kinna Serkisisafa Yuda maqannaasa namuqaa Amannana maaqa faqa aiqama mina ainaina faqa kuinna Estaa nammarina aminau. Amisoofanoo inaaqianna Moodeekaifa qini moodaa fidika maridanoo qufanoo kinna fannoo Moodeekainara qufanoo aiqama kari ani kinna qafee marinau.
EST 8:2 Kinna fannoo Amannafa unnai narí rinna maraseenoo kaifaa narí asauku amukaki uqaqoona Moodeekaina aminau. Mi rinnafa kinna nambaqa faqaafa marinau. Marufanoo Estaa nammarifa Moodeekaina mara uqasoofanoo Amannana aiqama ainainasaa rakisi marinau.
EST 8:3 Rakisi marufanoo inaaqianna Estaa nammarifa kinna marunnai oonureenoo mina aikuki aqufinoo maridanoo iki raqee marinau. Mifa kinna qimaminanoo mifa faiqi mi manda oosanna auqeefoora rafaaqafu sainaqa Amannafa Akakana atikinaafa Yuda maqannaasaki auqararee qimasee ufa rumboondee sia iaqa.
EST 8:4 Kinna fannoo narí koora saunu Estaa nammarinasaa mundusoofanoo findifinoo qinau.
EST 8:5 Rakisirafa anee qiniara aidinana qini ufa irinanoo amiqinana ufa uqasainanoo fifaininaqa misa sia Amannana Ammeedatana amaaku ufa afaqaaqa. Amannafa aiqama Yuda maqannaa fasiqa anaasee ani maqa maaqaki mariasa aiqama naru taikaaqee qimaseenoo qimanniminau.
EST 8:6 Qinee mi mandafa qini faiqi anaaseeki sia kambiqaanifee qimasee iridaqa. Misa qini moodaa fidikauqa kuqa narusaifaqa qinee naqi fee masee amiqiqa marianauree.
EST 8:7 Qufanoo kinna Serkisisafa Estaa nammarina faqa Moodeekaina faqa maaqi qimasee qimanniminau. Iridaqee qinee iriafananoo Amannafa Yuda maqannnaasa mandaikamma nimaqararee qufaqa minara qinee mina saqarisaa diriseeqa mina aiqama ainaina Esta nammarina kai amiqa.
EST 8:8 Papiqa qini duqusaa akara rumasee qini nambaqa minasaa uqaqaana mina kai sia mara aquanauranoo. Inneeqara nana ufa fee Yuda maqannaasara akara ruani qimasee kaqi akara ruaqa. Akara rumaseeqa inneeqara mi papiqanasaa qini duqu uqasee qini nambaqa faqa uqaaqa.
EST 8:9 Misa miqimmasee Siwa uqoona 23 faasaana Moodeekaifa aiqama kinna kuskusauqa naaroofaqa aniqau. Aniroofanoo misa ufa qimannimufaqa misa mi ufausa papiqaki akara riqau. Misa mi pasana Yuda maqannaasa uriqararausa faqa kiapausa faqa aiqama oofisaauqa faqa 127 maqa maaqaki marusa faqa India maqa maaqaki oosana arasee Itioopia maqa maaqai dinni ati oonuroofanoo misa akara ruma nimaqaqau. Misa mi pasana aiqama mi maqa maaqausaki marusa ufakiqari faqa Yuda maqannaasa ufakiqari faqa akara riqau.
EST 8:10 Moodeekaifa misa kinna Serkisisana auqusaa pasa akara rumasee mina nambaqa faqa mi pasanasaa uqaaqeera qimanniminau. Mi pasana maree firaree qu fasiqausa misa amiqira qoosa kinna ququsakinaana kaaqa sandee maruna maree minisee minasaa ooqu marifufaqa pasauqa maree aiqama maqusakiaqa fifainiqau.
EST 8:11 Pasaki maaqi qimasee akara riqau. Kinna fannoo qidanoo, Yuda maqannaasa misa aiqama maqusakiaqa mariasa misa nári faiqi anaasee namufaqa nariraree qu fasiqausa misa ruqaummafi nári faqa naruaqa. Moo maqusakinaa fasiqauqee moo maqannaa fasiqauqee misa mandaikamma nimaqararee qusa, Yuda maqannaasa aiqama ruqaummafi misa naru taikasee misa aiqama ainaina mareefaranoo.
EST 8:12 Mi faasaana Yuda maqannaasa aiqama Peereesia maqa maaqaki mi ainainausa auqeefaranoo. Misa 13 faasaana Adara uqoonaki auqeefaranoo.
EST 8:13 Misa kinna maa sandufa aiqama fasiqauqa aiqama maqa maaqaki mariasa qimannimiaqa. Qimannimi marifaqa Yuda maqanaasa mi faasaanafa anirainaqa nári namuqaa faqa rakirara deedaqifaranoo.
EST 8:14 Kinna fannoo qufaqa faiqi ufa maree fusa qoosasaa ooqumari kai kaqi sandee akaqa maqusakiaqa fiqau. Susa firaa maqusaki mi ufana oosana arasoofanoo aiqamai fifaininau.
EST 8:15 Misa kinna qamunna eekara faqa panoona arirana faqa Moodeekaina afisu amaqaqau. Afisu amaqsee dirindaasi arira qamunna moo marasee mina aku amaqaqau. Aku amaqasee inaaqianna misa kinna koora qafee firaana amiqira afaaqa auqirana akiaaqa afisu amaqasee afaaqa auqusoofanoo mifa kinna maaqakiqari raudee maqusai ooqufinau. Ooquroofaqa Susa firaa maqusakinaa fasiqa anasee mina qafamasee firaaqoo faaqaridaqa asasiqau.
EST 8:16 Yuda maqannaasa nimuqusa amiqi uqanna ufaqa misa nimuqusa asooarana faqa mariqau. Maridaqa misa firaaqoo asasidaqa nariara maaqi qimasee iriqau. Maas doo uriqaramafiqa sia amana kaifaa oorudupianauranoo.
EST 8:17 Aiqama maqa maaqaki faqa maqusaki faqa Yuda maqannaasa kinna ufa marasee moodaa faasaana utaaqamasee misa firaa narana naidaqa minara asasi mariqau. Asasi marufaqa moomoosa akaqa fasiqauqa Yuda maqannaasara rufiasee misaki ootupaqau.
EST 9:1 Mikari Adara uqoona 13 faasaana aniroofanoo indaaaruqaa kinna fannoo qinau, mi faasaanna kai namuqaauqa Yuda maqannaasa mandaikamma nimaqasee naru taikeefaranoo. Miqi qufaqa Yuda maqannaasa findifufaqa misa rafaaqafusee aiqama naru taikaqau.
EST 9:2 Yuda maqannaasa kinna fannoo rakisi maru maqusausakiaqa faqa maqa maaqanaki marusa misa namuqaauqa misa faqa rakirara anufaqa rakirara deedaqiqau. Aiqama fasiqa anaasee aiqama tinaindaraasa Yuda maqannaasara rufiasee misaki sia moo ainaina auqeefaranoo.
EST 9:3 Aiqama maqa maaqakinaa kiapausa faqa kaammannaauqa faqa aiqama kinna ainainasaa rakisi marusa faqa Yuda maqannaasa dadaaqiqau. Misa Moodeekainara rufiasee miqiqau.
EST 9:4 Aiqama fasiqauqa kinna rakisimaru maqa maaqanakinaasa irufanoo kinna fannoo firaa afeeka faqa uriqarara auqu faqa Moodeekaina aminau. Amisoofanoo mina afeeka aiqama kari uriqaranoo uqanna marinau.
EST 9:5 Marufaqa Yuda maqannaasa nári namuqaauqa nariqau. Misa kisaaqa paipanannai rakidaqa nariqa namuqaauqa naru taikaqau.
EST 9:6 Susa firaa maqusaki Yuda maqannaasa 500 fasiqa kuqa nariqau.
EST 9:7 Amannana faiqi namu qisaukuqara taikasee 10 mariqau. Yuda maqannaasa namuqaauqa nuqu maaqimminoo maridanoo. Parasadataafa faqa Darfoonafa faqa Asbatannafa faqa Pooratanafa faqa Adarianafa faqa Aridatanafa faqa Parmastanafa faqa Arisainafa faqa Aridainafa faqa Uaisataanafa faqa minamusa ainaina kai Yuda maqannaasa sia maraqau.
EST 9:11 Mi faasaana kai Yuda maqannaasa naqumma fasiqa Susa maqusaki narunara kinna qimamiqau.
EST 9:12 Marikinoo kinna fannoo kuinna Estaa nammarina qimaminau. Yuda maqannaasa 500 fasiqa Susa maqusakinaasa kuqa nariaafoo qinau. Misa Amannana faiqi namu qisaukuqara 10 faqa kuqa nariqau. Qinee iruna misa akaqa maqa maaqaki moomoo fasiqa faqa kuqa naria. Anee maqee nana ainainee akaqa ainaina mararee qinaqa, qinee amana ani amianauranoo. Esta anee nana ainainaree aidinna ainaina kaqi maraa.
EST 9:13 Estaa nammarifa kaifaa kinna qimaminoo qinau. Rakisirafa ani aidinana duna Susa maqusaindaraa Yuda maqannaasara qinaqa namuqaauqaki duna faqa maqee iandee kai iaqa. Misa Amannana faiqi namu qisaukuqara taikasee 10 mariasa mi faakannanasaa diriaqa.
EST 9:14 Doo kinna fannoo misara miqiaqee qimaseenoo mifa mi ufana Susaa maqusaindaraa fasiqauqa unnai afeeqoofanoo fufaqa misa Amannana faiqi namu qisaukuqara taikasee 10 marusa faakana rakiaqoonasa dirimarufaqa aiqama fasiqauqa qafaqau.
EST 9:15 Adara uqoona 14 faasaanasaa Susa maqusai maru Yuda maqannaasa kaifaa ruqaumma fufaqa 300 fasiqa mi maqusanaki kuqa nariqau, narusee sia misa ainainauqa maraqau.
EST 9:16 Yuda maqannaasa akaqa maqa maaqaki marusa misa faqa moodaanakika mafiqa afeekaika masee misa narusee misa amiqimmasee marifaranoo. Misara nikooqee maru namuqaasa 75,000 fasiqa anaasee kuqa nariqau. Narusee sia misa ainaina maraqau.
EST 9:17 Mi rakirafa maqa maaqaki 13 faasaana Adara uqoonaki kambiqanau. Kafa 14 faasaana misa sia nári namuqaa nariqau. Mi faasaana misa idooaidaqa firaa qoomaqa sakasee naidaqa firaaqoo asasi mariqau.
EST 9:18 Misa miqi marufaqa Yuda maqannaasa Susaa maqusaki marusa misa 15 faasaanara idooaidaqa asasira faasaanee qimasee utaaqaqau. Misa namuqaauqa 13 faasaana faqa 14 faasaana faqa narusee 15 faasaana misa sia rakiqau.
EST 9:19 Minara kai Yuda maqannaasa kaqikaa maqusauqa uqusa sia auqiranakiaqa mariusa misa Adara uqoona 14 faasaana firaa oomaqa naidaqa ainaina narami naramira faasaanee qimasee utaaqaqau.
EST 9:20 Moodeekaifa mi faasaanna aiqama ainaina auqoo ainaina akara rumaseenoo Yuda maqannaasa nianai marusa faqa adeedi marusa faqa kinna Serkisisafa rakisi nimaqee maru maqa maaqanakinai marusa nimaqanau.
EST 9:21 Misa Adara uqoonaki 14 faasaana faqa 15 faasaana faqa aiqama aukuanaki asasira faasaana utaaqaaqee qimaseenoo qimanniminau.
EST 9:22 Mi qaara faasaanna Yuda maqannaasa nári maqannaasa niiaqau. Mi uqoonnanaki kai misa naundura ummaara reereeufa faqa aiaaee qiqiufa faqa taikoofaqa Yuda maqannaasa nimuqusa amiqinau. Miqufanoo Moodeekaifa mi qaara faasaanara firaa oomaqa sakasee aqoondiuqa faqa kudi fasiqauqa nimiaqeera qimanniminau.
EST 9:23 Miqi qimasoofaqa Yuda maqannaasa Moodeekaina ufa afaqeeqa aiqama aukuanaki mi oosannana auqaidaqa asasi mariqau.
EST 9:24 Ooqai Amannafa Ameedatana amaaku Akaakana faiqi anaiqi maridanoo mifa Yuda maqannaasa namuqaakamma nimaqaseenoo mifa misa aiqama kuqa nariraree qimaseenoo satu sararidanoo misa narira faasaanara randee marinau. Misa Heeburu maqannaasa ufakiqari satura rarisaidanoo fee qimasee auqu ree mariqau. Amannafa aiqama Yuda maqannaasa naru taikaani qimasee ufa rumbee marinau.
EST 9:25 Ufa rumbee marufanoo Estaa nammarifa kinna unnai oonuroofanoo kinna fannoo maaqi qimasee papiqa akara rinau. Ooqai Amannafa Yuda maqannaasa kuqa nariraree qinau, maqee nári kuqa aruaqa qufaqa misa mina diriseeqa inaaqianna mina faiqi namu faqa misa mi poosanasaa kai diriqau.
EST 9:26 Mi oosannara kai misa mi idooqara faasaana qandara maaqi qimasee auqu raqau. Purimma faasaanee qiqau. Misa purimma fee qimaru auquna oosana satu maridanoo. Misa mi oosanna auqaidaqa mi ainainausa misaki kambiqoonara oonu mafi irimariqau. Irimarufanoo Moodeekaifa misa unnai papiqa afeeqaseenoo misa mi faasaana idooaaqeera qimanniminau.
EST 9:27 Yuda maqannasa mina mareeqee narí faqa misa ninaiqi mara inaaqianna kambiqainausa faqa aiqama fasiqa minaki ani keeqainausa faqa sandufaika maqoofanoo marinau. Aiqama aukuana misa mi qaara faasaanafa aniroofaqa misa Moodeekaifa qufanoo mi ainainafa kambiqoonara oonu mafi irimariqau.
EST 9:28 Misa maaqi qiqau aiqama Yuda maqannaasa moodaa moodaa oosana kasooaqee inaaqianna kambiqainausa faqa aiqama maqa maaqaki faqa aiqama maqusaki faqa maru fasiqa anaaseesa misa mi firaa masisa aqira faasaanara oonu mafi irisaidaqa aiqama aukuanaki miqoo kai idooaidaqa asasiaqa.
EST 9:29 Kuinna Estaa nammarifa Abiaina araamuna Moodeekaisandiri miqanda Yuda maqannaa qanda miqanda moo papiqa mi qaara faasaana masisa sararu ufana akara riqau mi oosannanannai kuinna fanno indaaruqaa papiqa Moodeekaifa nariara akara rumaqoona afeekaikinau.
EST 9:30 Miqanda mi papiqana uqasoofanoo Peereesiaa maqa maaqaki 127 (provinsaki) Yuda maqannaasa marunakinai papiqa maaqi qimasee akara rumasoofanoo fifaininau. Inni nimuqusa ireeda marinaqa innee amiqira ooqu marirana maraaqa sia rakirafa maridanoo.
EST 9:31 Innee faqa inni ninaiqi mara kasooaqee kambiqainausa faqa innee afeekaikammasee inneeqa mariaqoo mi firaa masisa sararira faasaannana umaraaqa. Innee narana aurarana faqa nimuqusa ummaarara oosana afaqararana faqa iki raqarana faqa mi sandufana uaqeeufaqa qinee Moodeekaisa kuinna Estaa nammarisandiri maaqanda maa sandufana inni nimiqa.
EST 9:32 Estaa nammarina mi sandufana masisa sararira sandufauqa afeekaika masoofaqa misa moo papiqasaa akara rumasee uqaqoofanoo marinau.
EST 10:1 Kinna Serkisisafa faiqi ooruku nammari afaiqara marusa faqa narí maqa maaqaki marusa faqa nifiqasoofaqa misa mifa rakisi maru maqanasa dadaaqira saika auqee mariqau.
EST 10:2 Aiqama amiqira ainaina faqa firaa ainaina faqa kinna fannoo auqaidanoo mifa Moodeekaina firaa auqu amimarufaqa aiqama mi oosannara ufa qimariqau. Aiqama mi ufana misa Peereesiaa maqannaasa faqa Midiannaa maqannaasa faqa kinna papiqaki akara riqau.
EST 10:3 Mi Yuda maqannaa fasiqafa Moodeekaifa kinna Serkisisana namba 2 marinau. Yuda maqannaasa minara firaaqoo uqanna nidimarufaqa misa mina firaa auqu amimariqau. Amimarufanoo mifa misa dadaaqinaqa amiqimmasee ooqu mariaqeera ainaini marinau. Mifa miqimma sainaqa misa niku nisauku kasooaqee kambiqainausa misa sia moo ainainara rufieefaranoo amiqimmasee marifaranoo.
PSA 1:1 Manda oosana maree mariasa iriranamau sia fimariasa faqa Anutuna ufa rukiee mariasa faqa sia moodaanaki kimariasa faqa andeeqara oosanara fidiaqaa imariasa faqa sia ooqu maria fasiqausa mi manda oosanausara rufiee mariasa misa asasiranaki maridaqa.
PSA 1:2 Miqi maria andeeqara fasiqa anaaseesa Anutuna sandufamau fuanara asasirana maraidaqa. Misa faasaana faqa eendanaki faqa mi sandufana asaana rumasee irimaree fidaqa.
PSA 1:3 Miqi maria fasiqa anaaseesa saqari nammari aaqa ummaqirafara foora iqa mariasa maridaqa narí qanaa mina aqama amiqimmasee iraidanoo mina amanee sia kakasidanoo. Miqira fasiqa anaasee nana ainainee auqaafanoo anoonaikidanoo.
PSA 1:4 Manda oosana maree marisa sia miqidaqa. Misa anaaqmaarara foora ufai uqinoo fuaqaqidanoo.
PSA 1:5 Yaaweena ufa rukiee marisa Anutufa narí ufannai rumbannimaqaseenoo narí faiqí anaasee mariaqooqari nianai naaduma mara quqannisaannoo.
PSA 1:6 Yaaweefa andeeqarausa nirana mariranasaa rakisidanoo itita nimaqaidanoo. Manda oosana maree mariasa kuridiranaki maaniki fifaranoo.
PSA 2:1 Nanaree aiqama maqannaasa fifau suqufiqa manda oosanara tipundaarammasee aanoo qidee. Nanaree faiqí anaasee anoona siai ainainara tipundaaridee.
PSA 2:2 Misa karaambaiqauqa faqa misa rakisi nimaqee mariasa faqa Yaaweefa rakisi nimaqee marinakiqari quqasee kaqinni firara tipundaaridaqa. Yaaweefa utaaqamaqai rakisirana rakisi nimaqaranakiqari faqa quqasee kaqinni firaree qimasee tipundaaridaqa.
PSA 2:3 Misa maaqi qidaqa anifaqa maasa misa rakisi nimaqaranakiqari qeeqa qifaaqa idukua. Anifaqa misa qimaqimira ufa aqusaanee qidaqa.
PSA 2:4 Yaaweefa innaarunai marifa naanaidara qimasee misa oosana siai tipundaariranara ataasa ataasa qimannimaqaidanoo.
PSA 2:5 Miqimmaseenoo narí aanooqiranakiqari aauqima nimaqasee narí idara fooira aanooqirana kiqari rufiarana nimidanoo.
PSA 2:6 Mifa maaqi qidanoo qinee Yaaweesa inni karaambaiqa marianinnana qeeqa naaquqara aaqana Sioona aaqanasaa quqeeqa.
PSA 2:7 Maqasaa karaambaiqa maaqi qinau, qinee Yaaweefa qima qimu ufana kooroo ianauree qinau. Mifa qiniara maaqi qinau. Anee qini qimaaku mariananoo maqee faasaana ani akausaikammiqa.
PSA 2:8 Anee qini iramirinaqa qinee aiqama maqannaasa ani amianaura. Aiqama maqa maaqa anindi kai mariannoo.
PSA 2:9 Anee qainna samu misa narusee nimudaani itairi nimaqeennaranoo. Anee qafeera foora misa rukamusee andaana rumaseennaranoo.
PSA 2:10 Innee maa maqanasaa karaambaiqauqa maa aauqira ufana iriaqa. Maa maqa maaqanakinaa rakisirausa maa irirana maaqimmasee iriaqa.
PSA 2:11 Innee naaquqee marinaqa Yaaweena ainaina mamaqaaqa.
PSA 2:12 Naindiri ree marinaqa mina oorinni niqoori saunu araaqa. Innee sia miqifanoo mifa aanoo qinaqa innee kuqifaranoo. Mifa itita qimaqaanifee qimasee mifinnai fimariasa asasi mariasa maridaqa.
PSA 3:1 Oo Yaawee qini namuqaa moomoo maridaqa, qini qiqoondikiqa mariusa quandaki qini namuqaakidaqa.
PSA 3:2 Misa qiniara maaqi qidaqa. Anutufa sia mina dadaaqiannoo fee qidaqa.
PSA 3:3 Miqi qimariafana oo Yaawee anee qini aiqama kari mandainainaki itita qimaqee marianafa mariananoo. Anee rakiranaki uriqararana qimiseenana qini paasoosirafa taikanoo marina kaifaa qimiananoo.
PSA 3:4 Qinee Yaaweena dadaaqianifeera aaree marunanoo narí naaquqara aaqanasaaqari iriseenoo dadaaqirana qiminoo.
PSA 3:5 Qinee maqasaa faiqaqee unaanoo aiqama eendirana Yaaweefa qini itita qimaqaidanoo.
PSA 3:6 Namuqaauqa nukudara foora qini fiqu fiqu iqa marianara sia qinee rufiaidaqa.
PSA 3:7 Qini Anutu, qini Yaawee anireenana qini mandainainaki marunnana dadaaqia. Anee qini namuqaa aiqama aupurarana nimiseenana misa afeeka siaisaikamma sainaqa maridaqa sia qini daruaqa.
PSA 3:8 Oosana oosana ummaaraki uriqararafa ani Yaawee finaindari anidanoo. Mifa narí faiqí anaasee amiqi amiqimma nimaqaani.
PSA 4:1 Oo qini itita qimaqee marianna Anutufa qinee innaaru ufakiqari ani aaraanana qini ufa iria. Qinee manda qumaaraki mariafannana anee dadaaqinau. Qiniara maqee qimudaoo qimisee qini innaaru qirana iria.
PSA 4:2 Kisaaqasaa fee innee aasaandaana ufa qima qimaqeefaree. Kisaaqasaa fee innee anoona siai ainainnara ridaqee unnaqira ainaina afaqaqa fifaree.
PSA 4:3 Innee iriaqa. Yaaweefa andeeqarausa nariara utaaqama qaifaqa maridaqa. Qinee mina aaraunanoo qini ufa iridanoo.
PSA 4:4 Innee naindiri ree marinaqa rufiaidaqa aaqee maria oosannana minnisaaqa. Anee aneenna qaarisaa ireeda faiqaqee idana firaaqoo minara oonu mafi iria.
PSA 4:5 Anee Yaaweefa aidimari andeeqara tatufirana kai suqa amia Anutuna suqa amiseenana mina kai saqarikia.
PSA 4:6 Moomoosa maaqi qimasee innaaru qidaqa. Oo Yaawee moomoo amiqi amiqirana maasa qimia. Maasa qiqafamasee qimudaoo qimasee qimia.
PSA 4:7 Misa miqi qimariafana anee qini asasirana qimi marianafa mifa misa mi ainainausa uriqararafa maridanoo.
PSA 4:8 Oo Yaawee anee kai amiqimmasee ititaqisaanaqa amiqimmasee faiqaidaqa. Qinee qeeqa qaarisaa qifaaqa quqasee asooaranaki faiqaidaqa.
PSA 5:1 Oo Yaaweefa qini ufa iria. Qini innaaru annada annada qiranakiqari qimarunnana iria.
PSA 5:2 Oo qini Anutufa, qini karaambaiqa qinee dadaaqiannee innaaru qimarunnana iria. Oo Yaawee qinee aniara innaaru qidaqa.
PSA 5:3 Oo Yaawee aiqama kananaana kananaana qini ufa iriananoo. Suani afu ururaifaqa qeeqa innaaru qirana amiseeqa ani dadaaqiranara afeesidaqa.
PSA 5:4 Anee aaqara oosanara sia asasimarianna Anutufa mariananoo. Aaqara oosana maree mariasa sia eedoo qinaqa ani afusaa marifaranoo.
PSA 5:5 Nári nimoo naamoo qimariasa misa noori niqafarara ani akooqaidanoo. Anee aiqama manda oosana maree mariasara fidiaqaa imariananoo.
PSA 5:6 Unnufa qimariasa kuridiranaki anee quqannisee mariananoo. Faiqí fidikanauqara faqa nikaru qimariasara faqa Yaaweefa fidiaqaamma nimaqaidanoo.
PSA 5:7 Ani firaa amuqusirafa marinara qinee kaqi ani naaquqara maaqaki keeqaanaura. Qinee kaqi ani naaquqara amaana maqaki keeqafi qeeqa mara maree muqusee qiqoori saunarafi innaaru qianaura.
PSA 5:8 Oo Yaawee qini namuqaa moomoo maridaqa. Aneenna aidi mari ainainnara kai qimaqiminaqa auqaa. Aneenna aana uqaqifiqainaqa mimau kai fua.
PSA 5:9 Qini namuqaauqa ufa sia anoona mari ufana qidaqa. Misa kuridiranara kai nididanoo. Misa nári ufannai unna qimasee fadameenara foora akusaafanoo faiqí narirafa qumbiqanoo maridanoo.
PSA 5:10 Oo Anutu anee misa ufa nimisee aupurarana faqa nimia. Misa nariqa manda tipundaarirafa nári kuridirana nimiannoo. Misa moomoo aaqarafa marinara faqa misa ani ufa afaqaranara ititammasee qaoo qimarianara misa aiqama aneenna afusaaqari futeeqeeqee nianai aqusaa.
PSA 5:11 Miqimmasainaqa aiqama ani saqariki mariasa asasifaranoo. Misa aiqama kari ani amooqira idi raaqa. Aniara rimariasa ititannimaqaa. Anee mariannanara misa kuqaa uqanna asasidaqa.
PSA 5:12 Oo Yaawee ani ufamau fimariasa amiqi amiqimmannimaqaa. Ani amuqusirafa rakira saqariara foora misa itita nimaqaidanoo.
PSA 6:1 Oo Yaawee aneenna aanooqiranaki qari sia qiniara qaoo qimasee minni qisaa. Aneenna aanooqiranannai sia qini aupurarana qimia.
PSA 6:2 Oo Yaawee qinee kudoosaapaidaqa anee qiniara qimudaoo qia. Qini afeeka taikee marifaqa kudoosaapaida marunnanara anee afeeka qimia.
PSA 6:3 Qini marirafa mudukatia firaaqoo ummaaraki maridanoo. Oo Yaawee kisaaqasaafee kaqi fifau maridanee sia qini dadaaqidanee.
PSA 6:4 Oo Yaawee anee aniree mandaki marunnana uqeereeqeena amiqiraqoo quqaqisaa. Aneenna nifauaranakiqari qinee kuqiranaki marunnana dadaaqia.
PSA 6:5 Kuqirausa sia aniara iridaqa. Sia moo fannoo amana miqoo ani amooqiannoo.
PSA 6:6 Qinee firaa ummaaraki maridaqa firaaqoo qimudaani rimarifaqa kudoosaapaidaqa. Aiqama eenda qini qaari faiqee marunnanasaa daukunu kai nammariara foora aufidanoo. Qiqa daukunu fannoo qini qunusaa aqufidanoo putaa idanoo.
PSA 6:7 Qini namuqaa darirari marianara qiki raqee marunanoo firaaqoo qifukaumuqa innooqaifaqa qifu maqarara anuqidaqa.
PSA 6:8 Innee manda oosana maree mariasa qinee marunnaqooqari nianasaa fifuaqa. Yaaweefa qini qiki raqarana iridanoo.
PSA 6:9 Mifa qinee dadaaqianifeera nammeera qunnana irisee qini innaaru qirana akiiqara dadaaqiannoo.
PSA 6:10 Qini namuqaauqa manda nisaurirafa tautummasee rafaaqafu nimaqainaqa furufariqa quqasee daraanifara.
PSA 7:1 Oo Yaawee qini Anutu qinee ititaqimaqaanneera anee iannannai anidaqa. Qini qifaqaqa nimarianakinaana qumareeqee amiqirannai kaqinni quqaqisaa.
PSA 7:2 Anee sia qini dadaaqinaqa misa kaasau fainiara foora qini daaku mareeqa fifaranoo. Qini dadaaqirausa sia maria maqa maaqanaki munusee miqoo misa qini qipata anaqifoora.
PSA 7:3 Oo Yaawee qini Anutufa qinee moona mandaikamma amaqasaananoo fee qeeqa qiqoondi oosana siainaki ueeqasaananoo fee.
PSA 7:4 Qeeqa namuqaa oosana siainaki aupurarana amiananoo fee qinee mi ainainausa akaqana auqamasaanaqau qini namuqaa qini qifaqasee qumarani.
PSA 7:5 Qini qumaraseefau kuqa darusee ateekaateeka masaifaqau kasirana siai ainainnara foora maqasaa qisaifaqau marini.
PSA 7:6 Oo Yaawee aneenna aanooqiranakiqari findifua. Qini namuqaa aanoo qirana firaanara irinana findifinana ititaqisaa. Anee andeeqaranara rimarianafa mariannanara findifinana qini dadaaqia.
PSA 7:7 Aiqama fasiqa anaasee aneenna aaqa moodaanaki suqu quqasee innaarunai mirindari rakisi nimaqaa.
PSA 7:8 Anee aiqama fasiqa anaasee ufa andeeqannisee marianafa mariananoo. Qinee aaqarana siaisa marunnanara anee irimmariananoo. Minara anee qini ufa irisee qiniara andeeqara fee qia.
PSA 7:9 Anutu anee andeeqarafa maridana maasa irirana faqa maasa qimuqusa faqa aiququmasee qafee marianafa mariananoo. Anee manda oosana maree mariasa aaqara oosana taikasainaqa mariaqa. Andeeqarausa amiqimasee dadaaqinaqa mapukusee mariaqa.
PSA 7:10 Anutufa qini ititaqimaqee marifa maridanoo. Mifa narí ufa mau fimariasa dadaaqidanoo.
PSA 7:11 Anutufa andeeqara ufasaa rakisirafa maridanoo. Aiqama faasaambaasaana narí aanoo qiranara manda oosana maree mariasa qimannimidanoo.
PSA 7:12 Misa sia naundura quandaifanoo Anutufa narí rakira faaqaana aaruqiannoo. Mifa narí duru fufuseenoo deedaqiannoo.
PSA 7:13 Mifa narí kuqa nári maria duru saamuna deedaqammasee maridanoo. Narí idaqeemari feefana faqa deedaqammasee maridanoo.
PSA 7:14 Manda oosana maree mariasa firaaqoo aaqara oosana auqarara qimiridaqa. Misa unna qimasee ummaara oosana uqeerarara tipundaaridaqa.
PSA 7:15 Misa akaqausa nimaara ufaana fufusee nári minaki aridaqa.
PSA 7:16 Nariqa aaqara oosaa fannoo nariqa aupurarana nimidanoo.
PSA 7:17 Qinee Anutuna andeeqaranara irisee dufi dufi qidaqa. Qinee firaaqoo uriqarara Anutuna amooqira idi raidaqa.
PSA 8:1 Oo Yaawee maasa Yaaweefa, ani uriqararana aiqama maa maqa maaqanaki mariasa qafaidaqa. Ani amooqirafa innaaruna amana kai ooru maridanoo.
PSA 8:2 Miqi qimasee faiqí aanaaqiuqaindi faqa naaqoo iriasa faqa ani amooqira idi raidaqa. Anee amiqiranaki marianaqa ani namuqaa sia ani arifaranoo. Nariara uriqararausee qimariasa anee misa aana ititannimaqee mariananoo.
PSA 8:3 Qinee anee auqu quqaqoonnana quqoona faqa fasauqa faqa innaarunai qafaidaqa.
PSA 8:4 Qinee mi ainainausa qafaidaqa maaqi qidaqa, Faiqí nanee mariafanee anee misara iridanee. Fifau kaqikaa ainaina maridanoo. Faiqí faiqí faqa nanainainee mariafanee anee misa rakisidanee.
PSA 8:5 Anee Yaaweefa faiqí faiqí mareeqee aiqama ainaina urinnaaqaramasee aneenna ameemaanai quqaseenana miqoo qareenarana faqa nuqu firaana faqa qatara foora afisu nimaqaananoo.
PSA 8:6 Anee faiqiara aiqama anee auquqoonna ainainausasaa rakisiaqee qimasee qinau. Anee aiqama ainaina auquqoonnana uriqararausa mariaqeera quqanau.
PSA 8:7 Sipsipauqasaa faqa burimmakauqasaa faqa kaasau aandausaa faqa rakisiaqeera quqanau.
PSA 8:8 Innaarunai qaqamaree nimaria ufinisa faqa ooruku nammariki maria noodaannausa faqa minaki maria aandausa oosana oosana saa rakisiaqeera faiqí quqanau.
PSA 8:9 Oo Yaawee maasa Yaaweefa ani uriqarara afeeka aiqama maqa maaqaki mariasa qafaidaqa.
PSA 9:1 Oo Yaawee qinee qeeqa qimuqusa aiqamannoo ani amooqianaura. Anee aiqama naaquqara ainaina auqoonnanara qimannimianaura.
PSA 9:2 Qinee aniki marunnanara asasidaqa idi raanaura. Aiqama afeeka faqaa Anutunara qinee amooqira idi raanaura.
PSA 9:3 Qini namuqaa ani qafamasee quandaki fuani qiana saamuriqa kuqidaqa.
PSA 9:4 Ani ufa iriranaki kuqaa qirana faqa amana amana kai ira oosanannoo rainee marianafa mariananoo. Anee qini ufa irisee qiniara andeeqara fee qimariananoo.
PSA 9:5 Anee ani ufa rukiee marusa ufa nimiseenana kafaa manda oosana maree marusa kuridi nimaqasoonaqa naaru naaru sia kaifaa misara irifaranoo.
PSA 9:6 Anee maasa namuqaa aiqama taikaseenana misa maqusauqa faqa kuridi nimaqanau. Miqimma soonaqa misara kaaqa qaunuqanna saqau. Misara irirana faqa kaaqa qaunuqanna seefaranoo.
PSA 9:7 Miqiqa mariafanoo Yaaweefa kai naaru naaru karaambaiqa maridanoo. Narí ufa irira qaari deedaqamma quqaseenoo ufa andeeqa nimaqaranara rakisidanoo.
PSA 9:8 Mifa narí andeeqaranannai maa maqa maaqanasaa mariasa rakisinimaqaidanoo. Mifa aiqama maqannaasa amana amana kai ufa irinnimaqaidanoo.
PSA 9:9 Oorudupirausee qimannimaqee mariasa Yaaweefa misa afeeka ititara maqusara foora maridanoo. Ummaara aukuana kukeeqee maria maqusafa Yaaweefa maridanoo.
PSA 9:10 Oo Yaawee ani oosanara irimariasa ani saqarikifaranoo. Anee sia anee iannannai ani mariasa moona minnisaanafa mariananoo.
PSA 9:11 Sioonna maqusai marida rakisinnimaqee mari Yaaweena amooqira idirama amaqaaqa. Mifa auqoo ainainnara aiqama maqannaasa kooroommasee qimannimiaqa.
PSA 9:12 Anutufa aupuraranaki mariasara sia qaunidanoo iridanoo. Mifa sia misa nammeera qiranara qaunidanoo. Mifa misa mandaikamma nimaqee mariasa aupurarana nimidanoo.
PSA 9:13 Oo Yaawee qini namuqaauqa ummaara qimimariana qafamasee qiniara qimudaoo qia. Oo Yaawee qini kuqiranakinaana ititaqisaa.
PSA 9:14 Miqimmasainaqa qinee Yeerusaree maqannaa fasiqa anaasee nifusaa kikiqammafi ani amooqimarunnanara qimannimianaura. Anee qini asumu mariranaki quqaqisaannanara asasianaura.
PSA 9:15 Anutunara sia iri mariasa maasa qimaara madika indufusee nári kai minaki aqufidaqa. Misa maasa qimaara ufaana fufusee nári kai minaki aridaqa.
PSA 9:16 Yaaweefa andeeqasee ufa raina nimaqaranannai nariara kooroo idanoo. Manda oosana maree mariasa nári auqee maria ainainafa quandakinoo ufaanara foora nariqa qumaraidanoo.
PSA 9:17 Aiqama manda oosana maraqanuasa faqa aiqama Anutuna ufa minnisee nári irirana mau nimariasa faqa kuqirafa misa maqusara foora maridanoo.
PSA 9:18 Kudi fasiqa aanaaseera Anutufa sia aiqama kari qaunuannoo. Ainaina siaisa sia kisaaqasaa rafaaqafu nimaqaqaifaqa marifaranoo.
PSA 9:19 Oo Yaawee anee findifua sia faiqí faiqi ani afusaa aanoo qimasee ani ufa rukiaannoo. Ani ufa sia irimariasa aneenna afusaa quqasee ufa nimia.
PSA 9:20 Oo Yaawee anee misa rufiarana nimia. Aiqama maqannaasa nariara faiqí faiqi kai maridee qimasee iriaqa.
PSA 10:1 Oo Yaawee anee nanaree nianai maridanee. Maasa qummaaraki marunana anee nanaree kukeeqana maridanee.
PSA 10:2 Aaqee mariasa misa nári nimoo namoo qidaqa ainaina siaisa narunnindaqaa idaqa. Misa kai indufuqaa dikaandanaki ainaia siaisa aqufidaqa.
PSA 10:3 Manda oosana maree mariasa nariqa manda oosana maree marianara nári nimoo naamoo qidaqa. Ainainara kaaqa rimarifa Yaaweena aquraraseenoo mina ameesa ubeekama amaqaidanoo.
PSA 10:4 Manda oosana maree mariasa sia Yaaweenara qeerairidaqa. Nári nasuriranakiqari Anutunara sia anoonee qidaqa.
PSA 10:5 Manda oosana auqee mariasa aiqama ainaina auqaafa anoona kambiqaidanoo. Misa sia Anutuna iriranara iridaqa. Misa nári namuqaa uqmairaaqmairamma nimaqaidaqa.
PSA 10:6 Misa náriara maaqi qidaqa. Maasa sia aqufuanauree qidaqa. Sia maasa moo ummaaraki marianauree qidaqa.
PSA 10:7 Misa ufa qirafa niqurara ufa faqa unna ufa faqa naaquqara ufa faqa kai umbiqanoo maridanoo. Misa kai kaqi fidiaqaa ira manda ufauqa qidaqa.
PSA 10:8 Misa aiqama maqusakiaqa kukeeaqa maridaqa andeeqara fasiqauqa kuqa narirara nimaarusidaqa. Misa afeeka siaisa nimaara kukeeqaidaqa.
PSA 10:9 Misa kaasau fainiara foora kukeeaqa maridaqa rakisidaqa. Misa miqimandee ainaina siaisara rakisidaqa. Misa ufaana fufuqaanaki arufuafaqa oonu rarisamammaree fidaqa.
PSA 10:10 Misasaaroo qirausa sia marisa narusaafaqa maqasaa aqufuafaqa nikunnai radamuqaafaqara foora maridaqa.
PSA 10:11 Manda oosana maree mariasa maaqi qimasee nariqakai qidaqa. Anutufa qini manda oosanara fifau ainainee qidanoo. Mifa afu tautasee sia qini qiqafaannoo fee qidaqa.
PSA 10:12 Oo Yaawee, miqira manda oosana maree mariasa aupurarana nimia. Kafaa aupuraranaki mariasara sia qaunua, misa faqa dadaaqia.
PSA 10:13 Manda oosana maree mariasa naqimmasee fee Anutunara unnaqimasee maaqi qidee. Mifa sia maasa aupurana qimiannoo fee qidee.
PSA 10:14 Oo Anutu anee niqafee mariananoo, anee ummaaraki mariasa faqa aupuraranaki mariasa faqa niqafaidana aiqama kari dadaaqirara deedaqi marianafa mariananoo. Misasaaroo qirausa siaisa aniki nári nifaaqa quqaidaqa. Anee ooqaindari sarau imariasa dadaaqi marianafa mariananoo.
PSA 10:15 Manda oosana maree mariasa faqa aaqee mariasa faqa misa afeeka qumaree raqurusaa. Anee misa manda oosana auqaana akiiqara aupurarana niminaqa sia kaifaa miqiaqa.
PSA 10:16 Yaaweefa naaru naaru uriqarara Karaambaiqa maridanoo. Aiqama unna anutusa nimooqi mariasa mina maqa maaqakiqari taikafifaranoo.
PSA 10:17 Oo Yaawee anee oorudupirausa innaaru irinnaranoo. Anee misa paasoosirana niminnaranoo.
PSA 10:18 Anee fiaiqi faiqi faqa rafaaqafu nimmaqee mariasa faqa iki raqarana irinnaranoo. Anee misa ufa irinnisainna kari misa dadaaqinnaranoo. Miqinaqa maqasaa fasiqa rufiarana firaana nimimariasa sia kafaa miqifaranoo.
PSA 11:1 Qinee Yaaweena saqarikiananoo mifa qini ititaqimaqaannoo. Anee nana furufaree inanee qiniara ufiniara foora qaqamaree aaqanai ooru fuannee qidanee.
PSA 11:2 Misa maaqi qimasee kaifaa unna qimasee qima qimidaqa. Manda oosana maree mariasa nári duru rambaqa fufusee, dindaramasee andeeqarausa qumee kukeeqaindari nariraree qidaqa.
PSA 11:3 Maa maqanasaa aiqama maasa dadaaqi maria ainainausa mandaikinaqa andeeqara fasiqauqa naqaa fee ifaree.
PSA 11:4 Yaaweefa narí naaquqara amaana maqaki maridanoo, mina ufirira qaari innaarunai ufiqinoo marifanoo minasaa maridanoo. Miqooqari mina afu fannoo aiqama fasiqa anaasee aiqamatinai nindafaidanoo. Misa auqee marianara iridanoo.
PSA 11:5 Yaaweefa andeeqee mariasa faqa aaqee mariasa faqa amana amana kai niuqidanoo. Sia mina sandufa afaqee mariasara Yaaweefa narí amuqusa aiqamannoo misara fidiaqaammidanoo.
PSA 11:6 Mandoosana maree mariasa Yaaweefa ida qauni namufaqa idauru fasafasi marina namufaqa nammariara foora teeqimma nimaqaidanoo. Mifa ididimari ufainannoo misa aupurarana nimidanoo.
PSA 11:7 Yaaweefa andeeqarafa maridanoo. Mifa andeeqaranara aididanoo. Miandeeqara oosanna maree mariasa misa Anutuna oorisaa marifaranoo.
PSA 12:1 Oo Yaawee maasa dadaaqia, sia uqanna moodaa andeeqara fasiqa maridanoo. Kuqaa kai qimari fasiqanara randeenana sia paqurinnaranoo.
PSA 12:2 Misa nári niqoonausara unnufa kai qiqanuasa maridaqa. Misa fadameena akusee nikaru qidaqa.
PSA 12:3 Oo Yaawee anee fadameena akira ufa qimaria nifauruna ititannisaa. Nári nimooqida nári nuqu uqeeree maria nifauruna faqa ititannisaa.
PSA 12:4 Misa maaqi qidaqa maasa qeeqa ufannai maasa didimari ainaina maraidaqee qidaqa. Maasa didimari ufana kaqi qianaura, sia moo fannoo maasa doo ititaannoo fee qidaqa.
PSA 12:5 Yaaweefa maaqi qidanoo. Kudi fasiqauqa rafaaqafi marianara faqa aupurarana nimiafaqa anaadannada qimarianara faqa qinee maqee aniree misa dadaaqianauree qidanoo. Qinee anireeqa nifaaqa quqasee mariranara rakisimariana nimianaura.
PSA 12:6 Yaaweena qima afeekaikira ufasaa nifaaqa quqee mariafa maridanoo. Mi ufafa amiqira siruaa qisauku dinni taikasee dinni ani qaara marasee 7 kari tisirisiri maqaafara foora kaaqa amiqirafa maridanoo.
PSA 12:7 Oo Yaawee anee maqee maqee maasa ititaqisaa. Mi manda fasiqausasaa ititasainaqa sia maasa mandaikamma qimaqaaqa.
PSA 12:8 Manda oosana maree mariasa aiqamatinai maridaqa. Aiqama fasiqa anaasee mandoosanara amiqira ainainee qimasaida asasidaqa.
PSA 13:1 Oo Yaawee kisaaqasaa fee anee qiniara qauninnaree. Naaruara naaruara miqi fee imarinnaree. Anee kisaaqasaa fee qini qifusaaqari kukeeqana marinnaree.
PSA 13:2 Kisaaqasaa fee qinee aupurarana uaqee maridaqee. Daunduraki rairai qimari umaaranara oonu mafi irianauree. Aiqama eendaki faasaana kisaaqasaa fee qini aiaaee qirafa mariannoo fee. Kisaaqasaa fee qinee namuqaa nimeemaanai marianuree.
PSA 13:3 Oo Yaawee qini Anutu anee amiqimasee qini qiqafamasee qini ufa anoona qimaqimia. Anee kafaa qini afeeka qiminaqa sia kuqua.
PSA 13:4 Oo Yaawee anee sia qini namuqaara qinaqa qiniara mina doo rafaaqafusee fee qiaqa. Anee sia qini namuqaara qinaqa qinee saamuruannanara nasuriaqa.
PSA 13:5 Anee maqee maqee qiniara aidimariannanasaa qinee mundidaqa. Anee qini asumu marainnanara qinee asasianaura.
PSA 13:6 Oo Yaawee anee qini amiqi amiqimma qimaqoonnanara ani amooqira idi raanaura.
PSA 14:1 Furufari mariasa nári nimuqusakiqari maaqi qidaqa sia Anutufa maridanoo fee qidaqa. Miqi qimariasa furufarira oosana maraidaqa. Misa kaaqa aaqara oosana uqanna auqee mariasa maridaqa. Sia moo fannoo andeeqara oosana maraidanoo.
PSA 14:2 Yaaweefa innaarunaindari maa maqanasaa faiqí faiqi mariasa niuqidanoo. Mifa irirana faqaasara randaifaqa sia maridaqa. Akaqausa qini Anutusara inaaru qidafee qimasee randaidaqa.
PSA 14:3 Aiqamausa quandaki kaqi runna fidaqa. Misoo maasoo amana amana kai mandaiki marunausa maridaqa. Sia moo fannoo andeeqarausa maridaqa. Sia uqanna.
PSA 14:4 Anutufa maaqi qimasee iraidanoo, misa sia fee iridafee. Aiqama maa aaqara oosanna maree mariasa irirana siaisee maridee. Misa qini faiqí anaasee feemuara foora nama taikaidaqa. Misa sia qiniara aiqama kari innaaru qimariasa maridaqa.
PSA 14:5 Miqi mariasa firaaqoo rufiee faranoo. Anutufa narí ufamau fimariasa faqa maridanoo dadaaqidanoo.
PSA 14:6 Narí mara maree qumimarifa moo ainaina auqarara oonu mafi irifaqa aaqeemariasa itita amaqaafanoo Yaaweefa mina dadaaqidanoo.
PSA 14:7 Qinee maaqi qimasee firaaqoo innaaru qidaqa, Isaraee maqannaasa dadaaqirafa Sioonna maqusakiqari anianifee qidaqa. Yaaweefa Isaraee maqannaasa nári maqa maaqa faqa qumiasana faqa kafa rairaamma saina misa firaaqoo asasifaranoo.
PSA 15:1 Oo Yaawee, yafee ani amaana maqaki keeqaannoo fee. Yafee Sioonna ani naaquqara aaqanasaa marida innaaru qiannoo fee.
PSA 15:2 Aiqama ainainaki ani ufa mau fimariasa faqa andeeqara oosana auqee mariasa faqa nári nimuqusa ookiqari anoona ufa kai qimariasa faqa ani naaquqara aaqanasaa marida innaaru qifaranoo.
PSA 15:3 Sia aqoonnana manda auqu amifa faqa sia narí aqoondi mandaikamma amaqaifa faqa sia nári niqoonausara munuqi miniqiasa faqa mi naaquqara aaqannasaa marida innaaru qifaranoo.
PSA 15:4 Anutufa ameesuqu nimaqaqaisara andeeqarausa faqa misara fidiaqaa idaqa. Yaweena ufa mau fimariasara uriqararausee qidaqa. Moo fannoo narí amana aiqamasee moo ainaina auqararee qimasaifanoo mi faasaanna moo ummaara kambiqaifanoo afai riqiseenoo oonu mi ainainna auqeenoo narí qima afeekaikira ufa taikaidanoo.
PSA 15:5 Faiqí moo fannoo narí ufaasu munnimma nimiseenoo aabaa munnimma siaina naríndi amana kai maree marifa faqa, aaqarana siai fasiqana mara ufaki quqaanifee qimasee munnimma amiafanoo qeerairi mari fasiqafa faqa ani naaquqara aaqanasaa marifaranoo. Mi aiqama ainainausa auqee maria fasiqausa misa naaruara mapukusee marifaranoo.
PSA 16:1 Qinee ani saqariki marunnanara ititaqimaqa. Oo Anutu, anee qini ititaqimaqaa.
PSA 16:2 Qinee Yaaweena maaqi qimasee qimamiqa. Anee qini Yaaweefa mariananoo. Aiqama ainaina anee iannannaindari kai qiniki anidanoo.
PSA 16:3 Faiqí anaasee Yaaweenaki mapukusee mariasa kaaqa andeeqarausa maridaqa. Qini firaa irirafa misa faqa marirara dididanoo.
PSA 16:4 Unna anutusa iannai sandee mariasa oosana oosana ummaara nári nifaaqai mara quqaidaqa. Qinee sia misa faqa aandau tatufirana suqaanaura. Qinee sia misa faqa misa unnaqira anutuna amooqianaura.
PSA 16:5 Oo Yaawee, anee kai qini aiqama ainainara foora mariananoo. Qini didimari aiqama ainainna anee qimimariananoo. Qini marirafa ani asaukuki maridanoo.
PSA 16:6 Anee qimimarianna ainainausa amiqirafa kai maridanoo. Mi ainainausa aiqama kaaqa amiqirafa kai maridanoo.
PSA 16:7 Yaweefa qini aana muquni marinara mina amooqidaqa. Eendaki qini daakirafa daakapaidanoo.
PSA 16:8 Qinee aiqama kari Yaaweena afusaa marunnanara iridaqa. Mifa qini faqa marinara sia moo ainaina fannoo qini kasi kasimma qimaqaannoo.
PSA 16:9 Minara qinee dufi dufi qidaqa asasidaqa. Qinee kaaqa amiqiranaki marunnanara miqidaqa.
PSA 16:10 Anee kuqira afeeka ameemaanaindaraana ititaqimaqaannanara miqidaqa. Anee aneenna aidimarina sia minnisainanoo mifa kuqufinoo putaaiannoo.
PSA 16:11 Anee kisaaqasaa maa maqanasaa marira aana qini uqafiqeennaranoo. Ani afusaa marunafa asasirana qumbiqa qimaqaidanoo. Mifa naaru naaru marira asasirana qimidanoo.
PSA 17:1 Oo Yaawee andeeqaranara innaaru qimarunnana iria. Qinee dadaaqianneera innaaru qimarunnana faqa iria. Qini kuqaa qira innaaru iria.
PSA 17:2 Anee andeeqaranara irimariannanara qini qifairi mariana dadaaqia.
PSA 17:3 Yaawee anee qini qimuqusara irimmariananoo. Anee eendaki qinee unnannai anireenana qini qimanammasee qafaananoo sia manda irirafa qiniki maridanoo.
PSA 17:4 Qinee sia akaqausa naannareeqa manda ufa qidaqa. Qinee ani naakapara ufa qaindusidaqa sia faiqi narimariasa fimaria aatata fidaqa.
PSA 17:5 Qini qiku fannoo ani aatata kai fida sia munuree miniree unausa maridaqa.
PSA 17:6 Oo Anutu anee qini inaaru irimariannanara qinee aniara innaaru qidaqa. Minara anee aneenna aaqoo rammatinimambi qini innaaru qirana iria.
PSA 17:7 Oo Anutu aneenna firaa amuqusirana maasa uqaqifiqaseenana anee maasa asumu maraqisaa. Maasa ani mandaaqaqa maridaqa sia namuqaa dariratinai marianaura.
PSA 17:8 Anee aneenna afu rakisianandee kai masee qini faqa rakisia. Anee aneenna aumooki quqaseenana rakisi qimaqainaqa qini namuqaa sia daruaqa.
PSA 17:9 Qini kuqa darirara imariasa qini fiqu fiqu iqa maridaqa.
PSA 17:10 Misa qimudaoo qirana siaisa, nári nimoo naamoo kai qimariasa maridaqa.
PSA 17:11 Misa qini itita qimaqaqaafaqa qinee firannai anirannaira idaqa. Misa qini qumara rudammiqi qaqeeidaqa rakisidaqa.
PSA 17:12 Misa kaasau fainiara foora qini qimaara usidaqa. Qini qumarasee rakeekaa irara miqiqa maridaqa.
PSA 17:13 Oo Yaawee anireenana qini namuqaa noorisaa oonureenana misa narusee urinnaaqaraa. Aneenna rakira paipanannai mandoosana maree mariasa narusee misa nisaukukinaana qini maraa.
PSA 17:14 Oo Yaawee maa maqanasaaqaraa aiqama ainaina náriara kai maree mariasa nisaukukinaana qini mara qisaa. Anee misa narirara nimaara usuqaanna samu misa narua. Naridana mina atisamu kaqi marinana misa faiqi namu faqa ninaiqimara faqa kasooqaqee kambiqaifana misa faqa narua.
PSA 17:15 Qinee sia aaqara ainaina auqaunnanara qinee ani qafaanaura. Qinee faiqaqee iinaqa findi fuananoo ani afusaa marira oosana fannoo qini asasirana qumbiqa qimiannoo.
PSA 18:1 Anee qini itita qimaqee marianafa mariannanara ani Yaaweenara firaaqoo dididanoo.
PSA 18:2 Yaaweefa qini itita qimaqee marifa maridanoo. Mifa qini afeeka faandaamurara foora maridanoo. Qini Anutufa qini itita qimaqee marifa maridanoo. Minaki marunnanara asumu maridaqa. Mifa qini rakira saqariara foora maridanoo. Mifa qinisaa ititaseenoo qini asumu mara quqaqisaidanoo.
PSA 18:3 Qinee Yaaweenara innaaru qunanoo qini namuqaauqa darirari mariana kinaana asumu mara quqaqiseenoo. Minara Yaaweena amooqiaqa.
PSA 18:4 Manda kuqirafa qini fiqu fiqu inoo marifanoo, darirafa ooruku nammari amakauriara foora inoo qini rafaaqafidanoo.
PSA 18:5 Manda kuqirafa qini fiqu fiqu inoo marifanoo, faiqí madika fannoo ufaanara foora qini qimaara fufinoo maridanoo.
PSA 18:6 Qeeqa ummaarakiqari Yaaweena aareeqa. Qinee qeeqa Anutuna dadaaqianifeera aareeqa. Narí amaana maqakiqari qini nammeera qirana irinoo. Qinee dadaaqianifeera nammeera qiqa.
PSA 18:7 Anutufa qini namuqaara aranaqainara maqa kasifanoo aaqanauqa doori doorifanoo firaa ooniuqa faqa kasi kasidanoo.
PSA 18:8 Ida muna fannoo Yaaweena aikaamaraindari anifanoo aiqama ainaina qama taikara ida faqa ida qauni namufaqa mina ookiqari anidanoo.
PSA 18:9 Yaaweefa innaaruna rakeemmafufanoo quminau. Mina aiku ameemaanai asukuna arira oonnamu marinau.
PSA 18:10 Yaaweefa aqoosa faqaa ainainasaara foora ooqu marifinoo qaqamaree ufaimau quminau.
PSA 18:11 Mifa asukunannoo narí kukeeqasoofanoo, amatooki oonnamu aaku suqirafa mina fiqu fiqu inoo marinau.
PSA 18:12 Pupusamu faqa idauru fasafasirafa faqa mina oorinni aakuasaa iranakiqari qumureenoo asukuna arira oonnamu rakeeinau.
PSA 18:13 Yaaweefa innaarunaindari innaarunai qiara foora qufaqa kaaqa uriqarara Anutuna ufa iriqau.
PSA 18:14 Yaaweefa miqi qidanoo narí feefauqa qumaree aquseenoo namuqaa narufaqa daraaniqau. Mina aakuasaa fannoo feefara foora aqusee narufaqa quqasee sandaqau.
PSA 18:15 Anee aneenna namuqaauqa niqiseenana aranaqoofana rairai qimannimaqee marinau. Miqunanoo ooruku nammari ameemaanaindaraa maqa koorooinau. Maqa ameemaanaindaraa ooniuqa faqa koorooinau.
PSA 18:16 Yaaweefa innaarunaindari qini nammari farumakinaanara foora qisauku qumaree uqeera quqanau.
PSA 18:17 Mifa qini afeeka namuqaauqa nisaukukinaana mara kaqinni quqaqiseenoo, qiniara fidiaqaa imariasa qini uridaaqarara afeeka faqaasa nisaukukinaana faqa mara kaqinni quqaqisanau.
PSA 18:18 Qinee ummaaraki mariafanaqa qini namuqaauqa qini darirariqau. Miqufanoo Yaaweefa qini ititaqimaqanau.
PSA 18:19 Mifa qiniara asasi marunara qini manda ummaarakinaana dadaaqamma qisanau.
PSA 18:20 Qinee andeeqee marunnana akiiqara amiqi amiqimma qimaqeenoo. Qiniki sia aaqarafa marinara miqimma qimaqaidanoo.
PSA 18:21 Qinee Yaaweena sandufamau fimarunausa maridaqa. Sia qeeqa Anutuna qimeesa uqusee mandoosana maraidaqa.
PSA 18:22 Qinee mina aiqama sandufamau fimarunausa maridaqa. Qinee sia mina naamuaqira ufa rukiqaunausa maridaqa.
PSA 18:23 Qinee aaqarana siaisa marunnanara mifa iridanoo. Qinee kaqi runna fuanoora qeeqa mariranasaa rakisidaqa.
PSA 18:24 Qinee miqunnana akiiqara faqa andeeqara oosana maraunnanara faqa mifa amiqimma qimaqaidanoo. Qinee aaqarana siaisa marunnanara miqimma qimaqaidanoo.
PSA 18:25 Oo Yaawee aniki mapukusee mariasa anee misa mapukunnimaqee mariananoo. Kaaqa andeeqee mariasa anee amiqi amiqimma nimaqee mariananoo.
PSA 18:26 Anee kaaqa anukarausa andeeqa nimaqee mariananoo. Mandoosana maree mariasa mandaikamma nimaqee mariananoo.
PSA 18:27 Nári mara maree qumi mariasa anee asumu maree mariananoo. Nári nuqu uqeeree mariasa anee mara maree qumimariananoo.
PSA 18:28 Oo Yaawee anee kaaqa qarana qimiananoo asukuna rakeemma qisaidanoo.
PSA 18:29 Anee qini afeeka qimianaqa qeeqa namuqaauqa naru nindaqaaqa idaqa. Miqimmaseeqa misa afeeka faandaamura aafeeqaramaki aqufiqa naru nindaqaaqa idaqa.
PSA 18:30 Mi Anutuna oosana fannoo andeeqanoo maridanoo. Mina ufasaa faiqí mundimaria ufafa maridanoo. Mifa narí mandaaqee mariasa rakira saqariara foora maridanoo, ititannimaqaidanoo.
PSA 18:31 Yaaweefa kai Anutufa maridanoo. Anutufa kai maasa faandaamura maridanoo.
PSA 18:32 Mi Anutufa kai qini afeeka qimiseenoo, rakisiqimaqee marifaqa qifaaqa quqasee aana nidaqa.
PSA 18:33 Mifa qini qiku afaidama saifaqa kaasau aandaura foora sandaidaqa. Qinee aaqanauqakiaqa nimarunanoo mifa qini rakisi qimaqaidanoo.
PSA 18:34 Mifa qini rakira oosana uqaqifiqasaifaqa qinee afeeka duru uqanna rakisidaqa.
PSA 18:35 Oo Yaawee anee qini itita qimaqaseenana asumu mara quqaqisaananoo. Ani rakisi qimaqarafa qini duqu uqeereenoo. Ani afeeka fannoo qini ititaqimaqaseenoo asumu marirana qiminoo.
PSA 18:36 Anee qini aana amiqimmasaanaqa sandaidaqa sia qiku qamaki saamurunaqa namuqaa qini qumareea.
PSA 18:37 Qinee qeeqa namuqaa sia minniseeqa nifaqaqa fifiifaqa oonu qumarasee naruseeqa kai seeqa.
PSA 18:38 Qinee oonu misa naru quqasaunaqa qini qikuki aqufiqa sia findifirana amanaikidaqa.
PSA 18:39 Oo Anutu anee rakira afeeka qini qimiseenana qeeqa namuqaa rakiranaki urinaaqarara afeeka qimianaqa misa urinnaaqareeqa.
PSA 18:40 Anee qini namuqaara qianaqa misa qini daaqu rufiasee sandeea. Sandaafaqa akaqausa qiniara fidiaqaa imariasa naru taikeeqa.
PSA 18:41 Misa akaqausara dadaaqiaqeera faaqaruafaqa sia dadaaqirausa maridaqa sia dadaaqia. Misa Yaaweenara faqa dadaaqianifeera aaraafanoo sia misa innaaru qirana irinoo.
PSA 18:42 Qinee misa radamusaunaqa misa kookoommaika mafuafanoo ufai fannoo misa fuaqa aqinoo. Misa aatataqaraa doonara foora mariafaqa qinee misasaa qiku reeqa.
PSA 18:43 Anee qini aanoo qimaqimaqee mariasa nisaukukinaana asumu mara quqaqiseenana moomoo maqannaasa rakisirausaikamma qisaananoo. Miqimma saanaqa qinee sia irunna fasiqa aanaaseesa qini qimeemaanai maridaqa.
PSA 18:44 Anaamuru qini qikuki niqoori saunu araidaqa Misa qini ufa irisee qini ufamau fidaqa.
PSA 18:45 Misa afeeka taikafifaqa nariqa afeeka faandaamura minniseeqa naindiri raifaqa qinee unannai anidaqa.
PSA 18:46 Yaaweefa kaqi marifa maridanoo. Qini ititaqimaqee marina amooqiaqa. Qini namuqaa nisaukukinaana asumu mara quqee mari Anutuna uriqararanara kooroo iaqa.
PSA 18:47 Mifa qini namuqaauqa urinnaaqarara afeeka qiminoo. Mifa moomoo maqannaasa qini qimeemaanai mara quqeenoo.
PSA 18:48 Miqimmaseenoo qini namuqaa nisaukukinaana asumu mara quqaqiseenoo. Oo Yaawee, anee qini namuqaa urinnaaqarara afeeka qimiseenana faiqí kuqa narimariasasaa ititaqisaananoo.
PSA 18:49 Miqiannanara qinee moomoo maqannaasa qambaanaindari ani amooqidaqa. Qinee ani amooqira idi raidaqa.
PSA 18:50 Anee qini Dafidisa utaaqama qaanausa aneenna sia taikaaninna amuqusirana qinisaa faqa naaru naaru qinisaa ani aruakinausasaa faqa quqaananoo. Minara Anutufa rakira afeeka qini Dafidisasaa quqeenoo.
PSA 19:1 Innaaruna fannoo Anutuna qareenaranara firaaqoo koorooidanoo. Innaaruna fannoo kaifaa Anutufa auqoo ainainausara kooroo idanoo.
PSA 19:2 Maqee faasaana fannoo Anutuna areenaranara duna faasaana qimamidanoo. Eendirafa miqikai qimasee moo eendirana qimamidanoo.
PSA 19:3 Iaqarafa faqa eendirafa faqa sia noo mari faqa sia ufa qidaqa. Minara maasa misa ufa qirana sia iridaqa.
PSA 19:4 Miqinoo marifaqa aiqama maqa maaqaindari misa Anutunara koorooimariana qafaidaqa. Maa maqana ati munu taikee mini taikee irannaindari misa ufa iridaqa. Innaaruna Yaaweefa uiqaana maaqara foora usakasaifanoo suani minaki maridanoo.
PSA 19:5 Suani fannoo minakiqari narí fuka anaasee amundara anaasee mararara foora asasidanoo suani qaidanoo. Mifa sandaranaki amani mariasara foora sandarara deedaqidanoo.
PSA 19:6 Suani fannoo innaaruna atisaaqari urureenoo fifiifanoo meeqai dinni keeqaidanoo. Sia moo ainaina fannoo mina ididiranara rufiasee kukeeqaanoo.
PSA 19:7 Yaaweena sanda ufa andeeqarafa uqanna maridanoo. Mifa fuka afeeka nimidanoo. Yaaweena naakaparufa minasaa mundi mariafa maridanoo. Mifa irirana siaisa irirana nimidanoo.
PSA 19:8 Yaaweena sandufa andeeqarafa marifaqa mi ufamau fimariasa asasidaqa. Yaaweena naamuaqira ufa fannoo amana amana kai andeeqa nimaqaseenoo maasa qitikuraki irirana moo faqa moo faqa qimidanoo.
PSA 19:9 Yaaweena oorinni nisaurusee madoodoonnara oosana fannoo kaaqa anukarafa maridanoo, naaru naaru kaqi kai mariannoo. Yaaweena ufa irirafa andeeqarafa marifanoo aiqama kari amana amana kai rainannimaqaidanoo.
PSA 19:10 Yaaweena ufa irirafa amiqira koora uqanna uriaaqararafa maridanoo. Mina adiafaairafa ookasaasa anoona adiafaairana faqa arusee uriaaqaranoo maridanoo.
PSA 19:11 Mi ufausa qini Dafidisa ani ainainira faiqi irirana qimidanoo. Qinee mi ufamau fimarunnana akiiqara anee Yaaweefa amiqi amiqimma qimaqaananoo.
PSA 19:12 Sia moo fannoo narí aaqara oosanara iridanoo. Oo Yaawee, qinee kukeeqara aaqaranaki marunnana mara kaqinni quqaqisaa.
PSA 19:13 Qinee iridaqa faqa aaqee marunnanasaa ititaqisaa. Sia mi aaqarafa qini rakisi qimaqaani. Miqimma qisainaqa andeeqafuananoo mandoosana fannoo sia rumba qimaqaani.
PSA 19:14 Oo Yaawee, anee qini afeeka kukeeqara maqusa faqa qini asumu maree marianafa faqa mariananoo. Amanee qini ufara faqa qini iriranara faqa amiqira fee qimasee eedoo qia.
PSA 20:1 Anee ummaaraki maridana Yaaweenara innaaru qinanoo ani dadaaqiani. Yakooboona Anutufa ani itita amaqaani.
PSA 20:2 Mifa Sioonna aaqanasaa narí naaquqara amaana maqakiqari ani dadaaqiani.
PSA 20:3 Mifa anee aminna ainainara eedoo qimasee ani aiqama aandau tatufiranara faqa asasiani.
PSA 20:4 Anutufa ani aidimari ainainna amiani. Anee oonu mafi irinna ainainafa anoona kambiqaani.
PSA 20:5 Anee rakiranaki urinnaaqaraannanara asasida faaqa ruanaura. Anee rakiranaki urinnaaqaraannanara maasa qeeqa Anutuna idi raidaqa amooqianaura. Anee aiqama ainainara irainnana Yaaweefa iriani.
PSA 20:6 Doo maqee qinee iridaqa Yaaweefa rakirana uriqarara afeeka narí utaaqamaqai karaambaiqana qini Dafidisa qiminoo. Mifa narí amiqira maqusa innaarunaindari qini innaaru qirana irinoo. Yaaweena afeeka fannoo firaa rakiranaki uriqarara afeeka qiminoo.
PSA 20:7 Rakiranaki akaqausa nári qoosa rarisee mari karana saqarikidaqa, akaqausa nári qoosa saqarikidaqa. Miqi mariafaqa maasa Yaaweena maasa Anutuna mina afeeka saqarikidaqa.
PSA 20:8 Maasa namuqaa mi rakira ainainausa saqariki mariasa niku amaki saamurifaqa maasa kaqi afeekaikammasee kikiqiqa marianaura.
PSA 20:9 Oo Yaawee anee rakiranaki uriqarara afeeka qini Dafidisa qimia. Maasa ani aaraanana maasa dadaaqia.
PSA 21:1 Oo Yaawee anee Dafidina afeeka amiannanara asasidanoo. Anee mina dadaaqiananoo rakirana uriaaqarainara firaaqoo nasuridanoo.
PSA 21:2 Anee mina amuqusaki aidimari ainainna amiananoo. Anee mifa irai ainainna faqa amiananoo.
PSA 21:3 Anee mifinnai anireenana firaaqoo amiqi amiqimma amaqaananoo. Miqimmasee anee uriqararausa qata koorannai auqirana afisu amaqaananoo.
PSA 21:4 Mifa mariranara iraifana anee amiseenana mina marirana kisaaqaikamma amaqaananoo.
PSA 21:5 Anee Yaaweefa dadaaqiannanara mifa uriqarara auqu mareenoo. Anee mina afeeka faqa uriqarara auqu faqa amiananoo.
PSA 21:6 Ani amiqi amiqirafa naaru naaru mina faqa mariannoo. Ani afusaa marirafa mina asasirana qumbiqa amidanoo.
PSA 21:7 Dafidifa Yaaweena aiqama afeeka faqaana saqarikidanoo. Yaaweena kaqi marira aidirafa marinara mifa aiqama ainainaki afeekaikammasee mariannoo.
PSA 21:8 Dafidifa narí aiqama namuqaa rumbannimaqaannoo. Mifa nariara fidiaqaa imariasa faqa rumbannimaqaannoo.
PSA 21:9 Mifa anireenoo idaurunnoo narí namuqaa aiqama kuridi nimaqaannoo. Yaaweena arana qarafa misa nambiqamasaannoo. Ida fannoo misa qama taikaannoo.
PSA 21:10 Sia uqanna misa atikiqari moo fannoo kaqi mariannoo. Dafidifa aiqama naru taikaannoo.
PSA 21:11 Misa mina ariraree qimasee tipundaaramma saifanoo sia misa tipundaarirafa anoona kambiqaannoo.
PSA 21:12 Mifa feefa niiqamasainaqa quqasee sandeefaranoo.
PSA 21:13 Yaawee maasa ani firaa afeekara amooqidaqa. Maasa idi raidaqa ani afeekara amooqianaura.
PSA 22:1 Oo qini Anutu, qini Anutu, naqifee ifanee anee qini minniqiseenanee. Anee naqaa fee ifanee aadumai nianasaa maridana sia qini dadaaqidanee. Anee naqaa fee ifanee sia qini ikiraqarana irinanee.
PSA 22:2 Faasaana ani qeeqa Anutuna aaraunana sia maqi qiananoo. Eendaki faqa aaraida maridaqa sia idooeeqa.
PSA 22:3 Anee naaquqarafa andeeqara oosana faqaafa mariananoo. Isaraee maqannaasa ani amooqi mariafa mariananoo.
PSA 22:4 Maasa qikeeku qikaaku ani saqariki mariqau. Misa ani saqari kammasoofana anee misa asumu mariaqeera maranau.
PSA 22:5 Misa manda ainainakiqari ani auqu roonannai asumu mariqau. Misa ani saqarikida sia nisaurirana mareea.
PSA 22:6 Qinee oorudupirausa fifau doodaaniara foora maridaqa. Qiniara nikooqaifaqa fidiaqaa midaqa.
PSA 22:7 Misa qini qiqafeeqa uteeti qimasee nimaakiri rummiqi qimaqaidaqa. Miqimmasee misa ninuka aqidaqa maaqi qidaqa.
PSA 22:8 Anee Yaaweenasaa mundi mariananoo nanaree mifa sia ani dadaaqidanoo fee. Yaweefa aniara aidi marifanoo nanaree mifa ani sia itita amaqaidanoo fee. Nanaree sia ani dadaaqidanoo fee.
PSA 22:9 Oo Yaawee anee kai qini qinoona aranandakinaana amiqimmasee qini mara akoonnai quqaqisaananoo. Qinee aanaaqi maridaqa qeeqa qinoona naamma neemariafanana anee qini amiqimmasee rakisi qimaqee marunaqa mariqiafana.
PSA 22:10 Qinee qeeqa qinoona aranandakiqari kambiqaafannaqoo qari anisaa mundiqa maridaqa. Miqiqa marunana anee qini Anutufa mariananoo.
PSA 22:11 Ummaara qiniki maridanoo, sia nianai maria. Sia qini dadaaqirausa maridammia.
PSA 22:12 Namuqaa moomoo kaasau aandaura foora qini fiqu fiqu iqa maridaqa. Misa Basaana maqa maaqakina afeeka kaasau aandaura foora qini fiqu fiqu iqa maridaqa.
PSA 22:13 Misa kaasau fainiara foora nooraqasee qini qipata anaqirara rairai qidaqa.
PSA 22:14 Nammari maqasaa adiasaafanoo dadasindee inoo qini afeeka taikeenoo. Qini qimudaani aiqama radukinoo maridanoo. Qini qimuqusaki daaquqarafa maridanoo.
PSA 22:15 Qini qimaaqaara aadana usidanoo. Qini qimaakiri qimaaqaarai atooqanoo maridanoo. Anee qini kookoommaki rumaqimaqa qaanaqa kuqirara midaqa.
PSA 22:16 Manda oosana maree mariasa aanoo qimaria fainisara foora qini fiqu fiqu iqa maridaqa. Misa qini qiku qisauku aakumaree rakee iraridaqa.
PSA 22:17 Qini qimudaani akooqoo marifaqa misa qini kaaqa tataqaidaqa.
PSA 22:18 Misa qini qammunna marasee rainaidaqa. Qini siuta raipaqusee kaatara foora sararammasee mareea.
PSA 22:19 Oo Yaawee sia anee nianai maria qini daaqa ani maria. Kai kaqi aniree qini rukia qisaa.
PSA 22:20 Oo Yaawee misa nookinaana qini mareeqee asumu quqaqisaa. Maa fainisa nookinaana qini mareeqee kaqinni asumu quqaqisaa.
PSA 22:21 Kaasau fainiuqa nookinaana mara kaqinni quqaqisaa. Qinee kaasau aandauqa nifusaa ititarausa sia mariafaqa maridaqa.
PSA 22:22 Miqimma sainaqa anee auqaanna ainainnara qinee qeeqa maqannaasa qimannimianaura. Qimannimisee qinee misa suqiranakiqari ani amooqianaura.
PSA 22:23 Innee Yaaweena ainainira faiqiuqa mina amooqiaqa. Innee Yakooboona aiku asauku mariasa mina auqu uqeeraaqa. Innee Isaraee maqannaasa mina kai amooqiaqa.
PSA 22:24 Yaaweefa sia kudi fasiqauqa sarau imarianara irisee ameesuqu nimaqaidanoo. Sia oori rafusu kaqinni aqidanoo, mifa misa innaaru qirana iriseenoo dadaaqidanoo.
PSA 22:25 Qinee firaa suqiranaki anee auqaanna ainainnara ani amooqianaura. Ani amooqirara suqiqa mariasa nifusaa ani amooqianaura. Qinee qima afeekaikammasee suqa amianauree qiafanna tatufirana suqa amianaura.
PSA 22:26 Sarau iranaki mariasa narana namasaifanoo nimuaqu imarina marifaranoo. Yaaweefinnai anirainausa mina amooqifaranoo. Miqi mariasa naaru naaru aiqama ainaina amanaikirausa mariaqa.
PSA 22:27 Aiqama maqannaasa Yaaweenara irifaranoo. Aiqama maqa maaqakinaasa mifinnai ubeekeefaranoo. Aiqama fasiqa anaasee mina amooqifaranoo.
PSA 22:28 Yaaweefa karaambaiqa maridanoo aiqama maqannaasa rakisinnimaqaidanoo.
PSA 22:29 Aiqama ramoo ramaa imariasa mina oorinni niqoori saunu areefaranoo. Aiqama faiqí faiqi mina oorinni niqoori saunu areefaranoo.
PSA 22:30 Naaru kambiqainausa mina ainainira faiqiuqa marifaranoo. Misa kasooaqee kambiqainausa Yaaweenara qimannimifaranoo.
PSA 22:31 Yaaweefa narí faiqí anaasee maroonara naaru kambiqainausa qimannimifaranoo.
PSA 23:2 Yaaweefa qini sipsipasaara foora rakisi qimaqee marifaqa qinee sia moo ainainara sarau ianaura. Mifa qini mareeqeenoo sipsipara foora quqeenara andandaki quqasaifaqa namasee faiqaidaqa. Mifa qini qifiqeeqee amiqira nammari reendeenammasee ooqu fimarina afaisaa quqaqisaifaqa namasee idooaidaqa.
PSA 23:3 Mifa qini fuka afeeka qimidanoo. Mifa narí qima afeekaika maqoomau finoo qini andeeqara aatata kai qifiqee fidanoo.
PSA 23:4 Yaawee anee qini faqa mariannanara qinee kuqira ummaaraki asukuna titunaanu qiranakiara foora fidaqa sia moo mandainainara rufiaanaura. Ani saunu faqa unnaana samu faqa qini itita qimaqeenoo.
PSA 23:5 Anee qini namuqaa nifusaa firaa oomaqa qini qimiananoo. Qinee uriqarara fasiqara foora marunana qini daarama quqaananoo. Anee amiqi amiqira ainaina namariara foora qini kaafaki adia afairaqaramma qimiananoo.
PSA 23:6 Ani amiqi amiqirafa faqa amuqusirafa faqa qini faqa mariinoo kuquananoo kai taikaannoo. Ani amaana maqa fannoo qini maaqara foora marinaqa qinee minaki keeqee raudee iiqa kuquananoo taikaannoo.
PSA 24:1 Maa maqa maaqafa faqa aiqama minakinaa ainaina faqa Yaaweenaindi kai maridanoo. Maqa faqa minasaa maria fasiqa aanaaseesa faqa minaindi kai maridaqa.
PSA 24:2 Mifa maa maqana ameemaanai maru nammarina amuaaqa auqu quqanau. Quqaseenoo mina faakanauqa maqa ameemaanaindaraa nammariki rakiqanau.
PSA 24:3 Yafee amana Yaaweena aaqanasaa oorufuannoo fee. Yafee amana mina naaquqara amaana maqaki keeqaannoo fee.
PSA 24:4 Andeeqara oosana auqee marifa faqa amiqira amuqusa faqaafa faqa sia unna anutusa nimooqi mariasa faqa sia unna qimasee nimana aiqee mariasa kai minaki keeqeefaranoo.
PSA 24:5 Yaaweefa misa asumu mara quqasee amiqi amiqimma nimaqaannoo. Miqimmaseenoo Anutufa misara aaqarana siaisee qiannoo.
PSA 24:6 Miqira fasiqauqa Anutufinnai anidaqa. Misa Yakooboona Anutuna oorinni fidaqa.
PSA 24:7 Innee faandaamura kooqiuqa firaaqoo atua aquaqa. Innee ooqeennaa amaana maqa kooqiuqa faqa atuasaifanoo uriqarara karaambaiqa keeqaani.
PSA 24:8 Yafee mi uriqarara karaambaiqafa maridanoo fee. Mifa Yaaweefa afeeka faqa eeraara faqa faqaafa maridanoo. Mifa Yaaweefa aiqama rakiranaki uriqaree marifa maridanoo.
PSA 24:9 Innee faandaamura kooqiuqa firaaqoo atua aquaqa. Innee ooqeennaa amaana maqa kooqiuqa faqa atuasaifanoo uriqarara karaambaiqa keeqaani.
PSA 24:10 Yafee mi afeeka karaambaiqafa maridanoo fee. Yaaweefa aiqama maqannaa uriqarara afeeka faqaafa, afeeka karaambaiqa maridanoo.
PSA 25:1 Oo Yaawee qeeqa innaaru qirana ani amidaqa.
PSA 25:2 Oo qini Anutu, qinee ani saqarikidaqa. Namuqaa darifaqa qisauruanoora anee mi dariranasaa ititaqisaa. Anee dadaaqinaqa qini namuqaa sia qiniara ataasa ataasa qiaqa.
PSA 25:3 Ani saqariki mariasa namuqaa rafaaqafu nimaqarafa sia maridanoo. Qusufa qimasee ani Yaaweenara kaukaata qimariasa namuqaa misa rafaaqafu nimaqaidaqa.
PSA 25:4 Oo Yaawee anee fimarianna aanna qini uqaqifiqaina fua. Anee fimarianna aannara qini daamuaqinaqa iria.
PSA 25:5 Anee qini Anutufa qini asumu maree marianafa mariannanara ani anoona ufa mau firana daakapa. Qinee aiqama kari ani saqarikidaqa.
PSA 25:6 Oo Yaawee aneenna qimudaoo qirana faqa aneenna naaru marira amuqusirana quqannifiqoonnanara oonu mafi iria.
PSA 25:7 Qinee kumaaraasaa auqaafanna aaqarana akiiqara minniqisaa. Oo Yaawee, aneenna naaru marira amuqusiranannoo faqa aneenna amiqi amiqirannoo faqa qiniara oonu mafi iriqisaa.
PSA 25:8 Yaaweefa andeeqara marirana faqaafa marinara aaqee mariasa andeeqara aanara naamua qidanoo.
PSA 25:9 Nári nifaaqa mara maree qumi mariasa Yaaweefa andeeqara aatata nifiqee fidanoo, narí aidiranara qimannimidanoo.
PSA 25:10 Mina moodaanaki kira ufa faqa mina sandufa faqa afaqee mariasa Yaaweefa narí mapukusee marira oosanannoo faqa narí amuqusiranannoo faqa nifiqee fidanoo.
PSA 25:11 Oo Yaawee, aneenna qima afeekai kiranara oonumafi irisee qini moomoo aaqarana akiiqara minniqisaa.
PSA 25:12 Yaaweenara naaquqee marisa mifa amiqira aanara qimannimiannoo. Qima niminaqa mi mau fifaranoo.
PSA 25:13 Misa aiqama ainaina amanaikiranaki amiqiranaki marifaranoo. Misa faiqi namu maqa maaqa mareefaranoo.
PSA 25:14 Yaaweefa mina ufa qaindusi mariasa niqoondi maridanoo. Mifa narí moodaanaki kira ufa qimaqoona kafaa qimannimidanoo.
PSA 25:15 Qinee aiqama kari dadaaqianifeera Yaaweefinnai qifu maqaidaqa. Miqi marunanoo mifa qini manda ainainakinaana itita qisee marifa maridanoo.
PSA 25:16 Qinee qeeqaraa marida ummooquki marunnanara Yaawee anee qinnee unnannai quandafi qiniara qimudaoo qia.
PSA 25:17 Qini qimuqusakina oosana oosana ummaarauqa maraqu qisasee qini oosana oosana ummaarakinaana mara kaqinni quqaqisaa.
PSA 25:18 Oo Yaawee, qini aiqama aaqarana akiiqara minni qiseenana aupurarana faqa fitinnarana faqa dadaaqia.
PSA 25:19 Oo Yaawee anee qafaa qini namuqaa moomoo uqanna maridaqa. Misa firaaqoo uqanna qiniara fidiaqaa idaqa.
PSA 25:20 Qini titaqisaidana qini marirana mara afeedamma qisaa. Anee itita qimaqaanneera qinee anee iannannai anidaqa. Namuqaa qini rafaaqafu qimaqee marianasaa itita qisaa.
PSA 25:21 Qinee ani mandaaqee marunnanara qini andeeqarafa faqa anoona qiramau firafa faqa qini rakisiqimaqaani.
PSA 25:22 Oo Anutu, Isaraee maqannaa aneenna faiqí anaasee nariqa oosana oosana ummaara kinaana mara kaqinni quqannisaa.
PSA 26:1 Oo Yaawee qinee andeeqara oosana maree marunnanara faqa firaaqoo ani saqariki marunnanara faqa iriseenana qiniara aaqarana siai fee qinaqa iriaqa.
PSA 26:2 Oo Yaawee, anee qini diuqummasee qimanammasee qafaa. Qini didirana faqa qini irirana faqa rainasee iria.
PSA 26:3 Ani aiqama kari mari amuqusirafa qini indaarunnikamma qimaqaidanoo. Aniki mapukusee marira oosana fannoo qini dadaaqidanoo.
PSA 26:4 Qinee sia fifau aatata nimariasa saimbaqa nidaqa. Qinee sia qaaraiki mariasa faqa moodaanaki kianaura.
PSA 26:5 Qinee aaqee mariasa faqa moodaanaki nirara fidiaqaammidanoo. Manda oosana auqee mariasa finnaaqa raidaqa.
PSA 26:6 Qinee qeeqa qisauku nammari uqusee qeeqara aaqarana siaisee qidaqa. Miqimmasee qinee ani aidara fiqu fiqu idaqa ani amooqidaqa.
PSA 26:7 Qinee aniara dufi dufi qira idi raidaqa anee firaa ainaina auqoonnanara qimannimidaqa.
PSA 26:8 Oo Yaawee qinee anee marianna maaqanara firaaqoo dididanoo. Ani qareenarafa mariqoora firaaqoo dididanoo.
PSA 26:9 Sia aaqee mariasa namufaqa qini kuridi qimaqaa. Faiqí nári mariasa darirana kinaana qini mara kaqinni quqaqisaa.
PSA 26:10 Miqi mariasa aiqama kari manda oosana faqa umeeramaisaanifee munnimma maqee maqee maree mariasa faqa nariranakinaana qini mara kaqinni quqaqisaa.
PSA 26:11 Qinee qeeqaraa andeeqara oosana auqaidaqa. Anee qiniara qimudaoo qimasee qini asumu mara quqaqisaa.
PSA 26:12 Qinee aiqama manda ainainakiqari kaqinni maridaqa. Qinee Yaaweena faiqí anaasee suqiranaki mina amooqidaqa.
PSA 27:1 Yaaweefa qini qoomara foora maridanoo qini asumu maree marifa marinara qinee yanaree moonara rufiaanauree. Qini marirana nirana afeeka Yaaweefa kai marinara qinee yanaree maparaa ianauree.
PSA 27:2 Manda oosana maree mariasa aanaamuru qini namuqaauqa qini makuruanee qimasee anireeqa niku amaki saamurifara.
PSA 27:3 Qini namuqaa moomoo aniree qini maqusa uqusaifaqa sia qinee misara rufiaanaura. Rakiranaki misa aniree darirarifaqa sia qinee maparaa ianaura qifaaqa quqasee marianaura.
PSA 27:4 Qinee moodaa ainaina kai Yaaweenasaa qaraana marararee qidaqa, qinee minara kai randaanaura. Qinee maa maqanasaa marunna kamuqoo Yaaweena uiqaana maqaki marianauree qidaqa. Minaki maridaqa Yaaweena qareenarana qafamasee asasianauree qidaqa. Mina uiqaana maqaki mina iriranara mariranara randaanauree qidaqa.
PSA 27:5 Manda aukuana kambiqainanoo narí mari maqanaki kukeeqa qimaqaannoo. Narí uiqaana maqaki qini kukeeqaqisaanoo. Mifa qini uqeereeqee aaqanasaa oonisaa amiqiraqoo quqaqisaannoo.
PSA 27:6 Doo miqoo qini namuqaa qini uqusaafanoo Yaaweefa qini mareeqee misa urinnaaqarama saifaqa marianaura. Miqimmasainaqa qinee narí Yaaweena naaquqara uiqaana maqaki faaqa quqasee asasammasee aandau tatufirana suqamianaura. Qinee idi namu faqa ufireena namu faqa Yaaweenara amooqira idi raanaura.
PSA 27:7 Oo Yaawee qinee qeeqa ufannai aniara nameera qimasee aaraanana iria. Anee qini qifauarana qimisee kafaa anoona ufa qimaqimia.
PSA 27:8 Anee qiniara aniree qini qimooqiannee qianaqa Yaawee, qinee eedoo qimasee anianaura.
PSA 27:9 Oo Yaawee aneenna oori afiri sia qini kukeeqa qimaqaa. Sia qiniara arana qaani. Sia aneenna ainainira faiqi qiniara anirandee fuannee qia. Anee qini dadaaqi marianafa mariananoo. Oo qini Manika Anutu anee qini asumu maree marianafa mariananoo, sia qini minniqisaa sia qini quqaqisaa.
PSA 27:10 Qini qinaukoo qini minniqisaifanoo Yaaweefa qinisaa rakisiannoo.
PSA 27:11 Oo Yaawee anee qiniara auqaannee qimarianna ainainnara daamuaqia. Qini namuqaa moomoo marianara irisee andeeqara aatata amiqiraqoo qifiqee fua.
PSA 27:12 Sia anee qini mareeqee qini namuqaa marianaki quqaqisaa. Misa naaquqara ufannai faqa unna ufannai faqa qini daridaqa.
PSA 27:13 Qinee maa ainainnara amiqimmasee iridaqa, qinee kasooaqee kaqi mariasa faqa maridaqa Yaaweena amiqi amiqirana qafaanaura.
PSA 27:14 Yaaweena saqarikia. Sia ani amuqusa ummaara raani, afeekaikammasee mina saqarikia.
PSA 28:1 Oo Yaawee anee qini dadaaqida ititaqimaqee marianaqa minakiqari qinee ani aaraanana qini nammeera qirana iria. Anee sia qini anoona ufa qima qiminaqa qinee kuqira maqa maaqaki kuqufida fimariasa qambaana marianaura.
PSA 28:2 Qinee qeeqa qisauku ani naaquqara amaana maqa maritinai uqeerasee dadaaqianneera innaaru qianana iria.
PSA 28:3 Oo Yaawee anee sia manda oosana maree mariasa faqa aaqee mariasa faqa amiqira adiafaa ira ufa qimaria fanoo misa nimuqusaki manda irirafa umbiqarausa namufaqa qini rafaaqafu qimaqaa.
PSA 28:4 Oo Yaawee misa auqee mariana akiiqara aupurarana nimia. Nisaukunnai manda oosana auqee mariana amana kai aupurarana nimia. Misa aiqama manda oosana maree mariana amana kai aupurarana nimia. Misa aaqarana akiiqara amanaikamma nimia.
PSA 28:5 Miqi mariasa Yaaweefa auqoo ainainnara sia iridaqa. Mifa narí asaukunnai auqu quqoo ainainara sia misa iridaqa mina akiiqara Yaaweefa misa aupurarana nimiseenoo kuridi nimaqaannoo.
PSA 28:6 Yaaweefa qinee dadaaqiani feera nammeera qunnana irinara mina amooqidaqa.
PSA 28:7 Yaaweefa qini itita qimaqaseenoo qini dadaaqi marifa maridanoo. Qinee mina saqarikidaqa. Mifa qini dadaaqirana faqa asasirana faqa qimisaifaqa asasidaqa. Minara qinee mina amooqidaqa asasira idi rama amaqaidaqa.
PSA 28:8 Yaaweefa narí faiqí anaasee itita nimaqaidanoo. Mifa narí utaaqamaqai karaambaiqana itita amaqaseenoo mina manda ainainakinaana mara kaqinni quqaisaidanoo.
PSA 28:9 Oo Yaawee aneenna faiqí anaasee manda ainainakinaana mara kaqinni quqasee anindikiqa mariasa amiqi amiqimma nimaqaa. Anee misasaa sipsipasaa rakisirafara foora maridana naaruara misasaa rakisia.
PSA 29:1 Innee innaarunai mariasa mina amooqiaqa. Mina afeekara faqa qareenaranara faqa amooqiaqa.
PSA 29:2 Yaaweena qareenara auqu uqeeraaqa. Yaaweefa naaquqarafa koorooinaqa mina oorinni niqoori saunu arafi naaquqamafi mina amooqiaqa.
PSA 29:3 Yaaweefa ufa qifaqa ooruku nammariki aiqamaindari mina ufa iridaqa. Uriqarara qareenarana faqaa Anutufa innaarunaira foora darara qifanoo ooruku nammari aiqamai daraanifaqa iridaqa.
PSA 29:4 Yaaweefa aiqama afeeka faqa eeraarirana faqaana ufa qirana irisee aiqamausa rufiaidaqa.
PSA 29:5 Yaaweena ufa fannoo firaa saqari raudee marifa maridanoo. Yaaweena ufa fannoo Reebanoona maqa maaqaki mari saqarisa sidaa saqariuqa raudee marifa maridanoo.
PSA 29:6 Yaaweefa qifaqa Reebanoona aaqanauqa kasidaqa aandau aanaaqiara foora rafusaki rafusaki idaqa. Qeeramoonna aaqana faqa miqi kai idanoo burimakau aanaaqi timmusara foora rafusaki rafusaki idanoo.
PSA 29:7 Yaaweena ufa fannoo aakuasaara foora pananana qidanoo.
PSA 29:8 Yaaweena ufa fannoo aadana maqa maaqa kasidanoo. Mifa qifanoo Kadeesa aadana maqa maaqa faqa kasidanoo.
PSA 29:9 Yaaweena ufa fannoo aakuasaara foora pananana qinoo saqari amanee rauqu aqidanoo. Yaaweena maaqaki mariasa firaaqoo faaqa rumasee Yaaweefa uriqarara qareenarana faqaafee qidaqa.
PSA 29:10 Yaaweefa naaruara uriqarara karaambaiqa maridanoo aiqama nammariuqasaa rakisidanoo.
PSA 29:11 Yaaweefa narí aiku asauku afeeka nimidanoo. Amiqi amiqimma nimaqasee asooaranaki quqannisaidanoo.
PSA 30:1 Oo Yaawee, ani auqu qinee uqeeraidaqa. Qini namuqaauqa qini darusee ataasa ataasa qidaqa nasuriraree qianakinaana kaqinni mara quqa qisaannanara ani auqu uqeeraidaqa.
PSA 30:2 Oo Yaawee qini Anutufa qinee ani dadaaqiranara aaraunana anee qini dadaaqiananoo.
PSA 30:3 Oo Yaawee anee qini madikakinaana qumbaqi qisaananoo, qinee kuqira madikaki ooqu raunana anee qumbaqisee kaqi marirana qimiananoo.
PSA 30:4 Oo innee Yaaweenaki mapukusee mariasa, innee mina amooqira idi raaqa. Innee mifa auqoo ainainara oonu mafi irisee mina dufi dufi qima amaqaaqa.
PSA 30:5 Yaaweena aanooqirafa qusakamu marinoo taikaannoo. Mina amiqirafa maa maqanasaa kisaaqasaa mariannoo. Eendaki qusasaa qikiraqarafa mariannoo, iaqainanoo kananaana asasirafa mariannoo.
PSA 30:6 Qinee afeekaikammasee mapukiqa maridaqa qinee aaqamasee qeeqara maaqi qiqiafana. Qinee naaruara naaruara sia kasianauree qiqiafana.
PSA 30:7 Oo Yaawee anee qini amiqimma qimaqaseenana aaqana saaqaraa maaqara foora mariafanana qinisaa itita qimaqanau. Anee aneenna oori kaqinni quandoonaqa qinee maparaa iranaki mariqiafana.
PSA 30:8 Oo Yaawee qinee ani aareeqa anee dadaaqirana qimianneera aareeqa
PSA 30:9 Qini kuqirafa sia kaqikaaqoo faqa ani amooqirafa mariannoo. Qinee madikaki ooquraananoo qini mi kuqirafa sia amana moo ainaina auqaannoo. Kuqirauasa amanee ani amooqifaree. Sia amana. Amanee misa anee kisaaqasaa amiqimma nimaqee mariannanara kooroo ifaree. Sia amana.
PSA 30:10 Oo Yaawee, anee qini innaaru irisee qimudaoo qimasee qini dadaaqia.
PSA 30:11 Qinee soofaaraki marunnana anee quandasee idi rarana qimiananoo. Anee qini ikiraqarana mara aquseenana asasirana qini fiqu fiqumma datimmma qimaqaananoo.
PSA 30:12 Miqimma qisaannanara qinee sia ufa siaina qireeda marianaura qinee ani amooqira idi raanaura. Oo Yaawee anee qini Anutufa qinee naaruara naaruara ani dufi dufi qima amaqaanaura.
PSA 31:1 Oo Yaawee qinee itita qimaqaanneera anee iannannai anidaqa. Naaruara sia qini qisauriranaki quqaqisaa. Anee andeeqara Anutufa mariananoo qini kuqiranakinaana mara kaqinni quqaqisaa.
PSA 31:2 Qini ufa irisee maqee uqanna qini kuqiranakinaana mara kaqinni quqaqisaa. Anee qini faandaamura ooniara foora maridana qini itita qisaa. Anee qinisaa ququsara foora auqu ititaseenana qini kuqiranakinaana mara kaqinni quqaqisaa.
PSA 31:3 Oo Yaawee anee qini faandaamura ooniara foora faqa ququsara foora faqa mariananoo. Aneenna qima afeekaikunadee inana qini qisauku qumaree aana muquninaqa fua.
PSA 31:4 Anee qini dadaaqinaqa qini qimaara fufuqaa ufaannanaki sia arua. Manda ainainasaa auqaanara foora qinisaa mandaaqa qimaqaa.
PSA 31:5 Ani asaukuki qeeqa qimana quqaidaqa. Oo Yaawee anee qini kuqiranakinaana mara kaqinni quqa qiseennaranoo. Anee mapukusee marirana faqaa Anutufa mariananoo.
PSA 31:6 Anee unnaqira anutusara innaaru qimariasara fidiaqaa imariananoo. Misa miqi mariafaqa qinee ani kai saqarikidaqa.
PSA 31:7 Ani maasara kisaaqasaa amuqusiranara qinee asasidaqa nasurianaura. Anee qini aupurarana faqa ummaara faqa qafaannanara miqianaura.
PSA 31:8 Anee sia qini mareeqee namuqaa nisaukuki quqasaanaqa qini qumareea. Qinee qifaaqa quqasee qeeqa didimarinnai firana anee qimiananoo.
PSA 31:9 Oo Yaawee qinee qummaaraki maridaqa qiniara qimudaoo qia. Qinee kaaqa moomoo kari iki raqee saunanoo qifukaumu innooqafinoo. Qini qimudaani firaaqoo ummooqukidanoo.
PSA 31:10 Qini ummaara fannoo qini afeeka taikaidanoo. Qini iki raqarafa qini marirana qusa raidanoo. Qini ummaara fannoo qini afeeka taikasaifanoo qini qimudaani ummooqukidanoo.
PSA 31:11 Qini namuqaa faqa qini qiqoonausa faqa qiniara uteeti amara auqidaqa. Minara kai qiniara irimariasa naaquqaifaqa qini daaqu rufiqaidaqa. Aanai qini paquri masee quqasee sandaidaqa.
PSA 31:12 Qinee kuqiara foora iqa marunaqa qiniara qaunidaqa. Qinee rukamufifaqa aqusaa qafeesara foora maridaqa.
PSA 31:13 Qini namuqaauqa maqandanai narí qimami narí qimami masaidaqa uteeti qimariafaqa iridaqa. Rufiarafa firaafa qini fiqu fiqu inoo maridanoo. Misa moodaanaki suqufiqa qini marirana taika qimaqaaneera tipundaaridaqa.
PSA 31:14 Miqi mariafaqa Oo Yaawee qini Anutu qinee ani kai saqarikidaqa.
PSA 31:15 Qinee aiqama kari ani rakisi qimaqaranaki maridaqa. Qini namuqaa qini darirara qifaqaqa nuanakinaana qini mareeqee amiqiraqoo quqa qisaa.
PSA 31:16 Qini aneenna ainainira faiqiara qimudaoo qidana qiqafaa. Aneenna sia takee mari amuqusiranaki qini mara quqa qisaa.
PSA 31:17 Oo Yaawee, qinee ani aaraunnanara anee qinaqa qini namuqaauqa sia qini qisauriranaki quqaqisaaqa. Manda oosana maree mariasa kai nisauriranaki mariaqa. Misa ufa taikafinaqa madikaki kuqirausa faqa mariaqa.
PSA 31:18 Unna ufa qimariasa noo qummuna mannisaa. Misa nári nifaaqa uqeerasee akaqausa mara maree qumimariasa misa andeeqarausara manda ufa qidaqa.
PSA 31:19 Ani ameemaanai maridaqa ani ufa mau fimariasa afeedamma nimaqaqaanna ainainausa kaaqa amiqirafa maridanoo. Anee firaaqoo amiqimma nimaqee mariannanara aiqamausa iridaqa. Ani saqariki mariasa anee firaaqoo rakisi nimaqaidana itita nimaqee mariananoo.
PSA 31:20 Ani saqariki mariasa narirara tipundaari mariafana anee mareeqee aneenna afusaa amiqiranaki quqannisee marianafa mariananoo. Misa namuqaa nifairiranakinaana mareeqee amiqira auqaanai quqannisee marianafa mariananoo.
PSA 31:21 Yaaweena amooqirana amiaqa. Qini namuqaa qini fiqu fiqumma datimmafi daruaneerufanoo qiniara firaaqoo aidufanoo itita qimaqoonara amooqiaqa.
PSA 31:22 Qinee rufiaidaqa maaqi qimasee iriqa, doo Yaaweefa qini narí afusaa marunnana mareeqeenoo kaqinni quqaqee maqi qimasee irunanoo, Yaaweefa qini innaaru qirana irisee dadaaqinoo.
PSA 31:23 Innee Yaaweena faiqí anaasee innee Yaaweenara firaaqoo nidiani. Yaaweefa narí ufaki mapukusee mariasa itita nimaqaseenoo, nári nuqu uqeeree mariasa nári manda oosana akiiqara nimimarifa maridanoo.
PSA 31:24 Innee Yaaweenaki mapukusee mariasa inni nimuqusa fannoo aiqama kari afeekaikinoo mariani.
PSA 32:1 Inni numoo minninisaisa faqa inni numoo rafaaqafu nimaqasaisa faqa asasiaqa.
PSA 32:2 Yaaweena nifairiranaki sia mari fasiqafa asasiranaki maridanoo. Sia unna qimasee nikaru qimari fasiqafa faqa asasiranaki maridanoo.
PSA 32:3 Qinee qeeqa numoo sia koorooiqa iki raqaida marunanoo suani afu keeqaidanoo. Miqunanoo qini qimudaani ummooqukidanoo.
PSA 32:4 Eendaki faqa faasaana faqa Yaawee aneenna asaukunnai fannoo qini aupurarana qimimariananoo qini afeeka taikeenoo. Aiqaiqa aukuana suani firaafa qeenoo maqa aadana ususaifanoo taadairindee idanoo.
PSA 32:5 Qinee miqiqa maridaqa qeeqa aaqarana ani Yaaweena afusaa akooqoo koorooiqa. Qeeqa manda oosana sia kukeeqeeqa kooroommasee ani qimamiqa. Qinee maaqi qiqa, qeeqa aaqarana Yaaweena afusaa kooroo qianauree qimasee kooroomma saunana anee Yaaweefa qini mandoosana faqa qini aaqarana akiiqara faqa minniqisaananoo.
PSA 32:6 Miqiannanara aiqama ani ufamau fimariasa aiqama ainainara randeeqa aniara innaaru qidaqa. Firaa ummaara nammari aufiara foora inoo sia misa rafaaqa fuannoo.
PSA 32:7 Anee qini kukeeqara maqusa mariananoo. Anee ummaara aukuana qinisaa rakisinnaranoo. Anee qini maree marianafa mariannanara firaaqoo idi raidaqa.
PSA 32:8 Yaaweefa maaqi qidanoo. Qinee anee finna aannanara qima amianaura. Qinee ani aakapamasee aamuaqianaura.
PSA 32:9 Anee sia qoosa doonkiara foora furufaria. Misa irirana siai ainainara foora maridaqa. Anee qainna misa nooki quqasee rarisee mariandee inaqa irifaranoo. Anee nookinaa qainna sia quqainaqa sia ani ufamau fifaranoo.
PSA 32:10 Manda oosana maree mariasa moomoo ummaara oosana oosana misaki maridanoo. Yaaweena saqariki mariasa mina naaru marira amuqusirafa misa kukuqinoo maridanoo.
PSA 32:11 Innee andeeqarausa Yaaweefa auqoo ainainausara asasida nasuriaqa. Innee mina ufa qaindusi mariasa faaqa ridaqa asasiaqa.
PSA 33:1 Innee andeeqarausa Yaaweefa auqoo ainainnara faaqa ridaqa asasiaqa. Mina ufa mau fimariasa mina amooqiaqa.
PSA 33:2 Innee piripuna aridaqa Yaaweena amooqiaqa. Qisaukuqara taikasee sandafaqaa piripuna aridaqa Yaaweena amooqira idi raaqa.
PSA 33:3 Innee Yaaweenara fuka idi raidaqa amooqiaqa. Innee amiqimmasee akoofasara foora piripuna aridaqa faaqa fuisee qidaqa amooqira idi raaqa.
PSA 33:4 Yaaweena ufa fannoo kuqaa anoona kai maridanoo. Aiqama ainaina auqee marina mi mau kai uqee marifa maridanoo.
PSA 33:5 Yaaweefa andeeqara marirana faqa andeeqasee amana amana kai rainee marianara faqa aididanoo. Maa maqa maaqanaki Yaaweena sia taikara amuqusirafa qumbiqanoo maridanoo.
PSA 33:6 Yaaweefa ufannai qufanoo innaaruna kambiqanau. Narí ookinaa aidoonnai qufanoo suani faqa quqoona faqa fasau faqa kambiqanau.
PSA 33:7 Yaaweefa ooruku nammari susufinnaki saka quqaandee inoo moodaannai suqu quqanau. Ooruku nammari faruma meemai uqanna quqasee afeedinau.
PSA 33:8 Minara maa maqa maaqanasaaqaraasa aiqama Yaaweenara innaaru qiaqa. Maa maqa maaqanasaa mariasa minara naaquqee marina mina ameemaanai mariaqa.
PSA 33:9 Yaaweefa qufanoo maa maqa maaqafa kambiqanau. Mifa afeeka ufa qufanoo aiqama ainaina kambiqanau.
PSA 33:10 Yaaweefa maa maqana saaqaraasa manda ufa tipundaariafanoo titannimaqaidanoo. Maa maqana saa mariasa auqararee qia ainainna itita nimaqaidanoo.
PSA 33:11 Yaaweena qimirirafa miqinoo maridanoo naaruara naaruara afeekaikamminoo maridanoo. Mina amuqusakinaa qimirirafa naaruara naaruara mariannoo.
PSA 33:12 Aiqama maqannaasa kiqari ya maqannaasee misa Anutufa Yaaweefa maridanoo fee asasiaqa. Yaaweefa nariaree qimasee utaaqama qaisa asasiaqa.
PSA 33:13 Yaaweefa innaarunaindari maqasaa mariasa aiqama niuqidanoo.
PSA 33:14 Narí maridanoo rakisi nimaqee mariqooqari aiqama maqasaa mariasa niqafaidanoo.
PSA 33:15 Yaaweefa aiqama maqannaasa nimuqusa auqunisaidanoo. Misa auqee maria aiqama ainainnara iridanoo.
PSA 33:16 Sia moo karaambiqa fannoo narí rakira fasiqa moomoonnaifau rakiranaki uriqaraidanoofau. Afeeka sundia sia narí amudaanai qiranannai fau rakiranaki namuqaa urinnaaqaraidanoo fau.
PSA 33:17 Rakiranaki maraqa nua qoosausa sia sundiauqa dadaaqifaqa rakirana urinnaaqareefaranoo. Mi qoosausa firaa nimudanai qiranannai sia amana moona kuqirana titaqamaqaannoo.
PSA 33:18 Yaaweena afu fannoo nariara rufiee mariasa dadaaqirara misasaa maridanoo. Yaaweena naaru marira amuqusiranasaa mundimariasa misasaa Yaaweena afu fannoo rusinoo maridanoo.
PSA 33:19 Mifa kuqiranasaa itita nimaqaidanoo. Mifa aandaroo aukuana faqa rakisi nimaqaidanoo.
PSA 33:20 Maasa qimana Yaaweenaki kai quqaidanoo. Mifa kai maasa dadaaqirafa maasa saqari maridanoo.
PSA 33:21 Maasa mina naaquqara andeeqara auqu saqarikunnanara firaaqoo asasidaqa.
PSA 33:22 Oo Yaawee ani naaru marira amuqusirafa maasa faqa mariani. Maasa anisaa mundiqa maridaqa.
PSA 34:1 Qinee aiqama kari Yaaweenara dufi dufi qianaura. Qinee sia mina amooqirana munu quqaanaura.
PSA 34:2 Qinee mifa auqoo ainaina irisee mina amooqianaura. Ummaaraki mariasa minara irisee asasiaqa.
PSA 34:3 Innee aniraifaqa maasa Yaaweena auqu qareenaranara koorooia. Doo aniraifaqa innisaimbaqa mina auqu uqeeraa.
PSA 34:4 Qinee Yaaweenara innaaru qunanoo mifa qini dadaaqinoo. Qini rufiaranakinaana iduku qiseenoo.
PSA 34:5 Ummaaraki mariasa Yaawee finnai ubeekamafuanara misa asasidaqa. Minara misa saqarikirafa sia kuridiannoo.
PSA 34:6 Kudi fasiqauqa Yaaweenara innaaru qiafanoo dadaaqidanoo. Mifa misa aiqama ummaarakinaana mareeqee kaqinni quqannisaidanoo.
PSA 34:7 Yaaweenara rufiee mariasa mina angiroouqa misa fiqufiquiqa maridaqa mandainainakinaana maraqunnisaidaqa.
PSA 34:8 Aneenna kai Yaaweena firaa amiqiranara oonu mafi iria. Yaaweena itita nimaqaranaki kukeeaqa mariasa asasiranaki maridaqa.
PSA 34:9 Innee Yaaweena faiqí anaasee innee Yaaweena ameemaanai mariaqa. Mina ameemaanai mariasa sia sarauirafa misaki mariannoo.
PSA 34:10 Kaasau faini narana sia amanaikianara naara raifaqa kudoosaapaidaqa. Yaaweena ufa mau fimariasa sia moo amiqira ainainara sarauifaranoo.
PSA 34:11 Innee qini faiqinamu mai aniree qini ufa irifaqa qinee Yaaweenara rufiara oosanara qimannimianaura.
PSA 34:12 Yafee moo fasiqa fannoo kaqi mariranara ridanoo fee. Anee kisaaqasaa maridana asasiranara aididanoo fee.
PSA 34:13 Aidinana anee sia manda ufa qia. Anee sia unna ufa qia.
PSA 34:14 Manda oosana ameesuqusee amiqira oosana maraa. Aneenna aiqama amuqusannoo asooaranara randasee faiqí anaasee faqa moodaanaki maria.
PSA 34:15 Yaaweena afu fannoo andeeqarausasaa mundinoo marifanoo rakisi nimaqaidanoo. Mina aaqoo fannoo misa nammeeraqiana iridanoo.
PSA 34:16 Yaaweefa manda oosana maree mariasara akooqaidanoo. Misa kuquafaqa miqoo kai misara qaunidaqa.
PSA 34:17 Andeeqara oosana maree mariasa Yaaweena aaraafanoo iridanoo. Mifa misa oosana oosana ummaarakinaana dadaaqidanoo.
PSA 34:18 Yaaweefa ummaaraki mariasa dadaaqirara naaqa maridanoo. Mifa kudoosaapee mariasa dadaaqinoo mara amiqiraqoo quqannisaidanoo.
PSA 34:19 Andeeqara fasiqa anaasee ummaara oosana oosana fannoo aupurarana nimifanoo, Yaaweefa minakinaana aiqama mareeqee amiqiraqoo quqannisaidanoo.
PSA 34:20 Yaaweefa misa aiqama nimudaanisaa rakisidanoo, sia moodaa nimudaani faqa raqanoo mariannoo.
PSA 34:21 Manda oosana fannoo manda oosana maree mariasa kuqa naruannoo. Andeeqara oosana maree mariasara fidiaqaa imariasa Yaaweena narira ufa ameemaanai marifaranoo.
PSA 34:22 Yaaweefa narí ainaini maria fasiqausa feefaurummasee kafaa maraidanoo. Mifa innai itita qimaqaanifee qimasee fimariasa sia kuridifaranoo.
PSA 35:1 Oo Yaawee qini rairai qimaqimaqee mariasa anee misa faqa rairai qimannimaqaa. Qini darimariasa nariqa faqa narua.
PSA 35:2 Aneenna rakira saqari faqa rakira ainainauqa namufaqa maree aniree qini dadaaqia.
PSA 35:3 Aneenna duru feefa faqa saasuna faqa mara maree aniree qini darirara qifaqaqanuasa narua. Anee qini dadaaqiraree qimasee qima qimia.
PSA 35:4 Qini darirari mariasa anee rafaaqafu nisainaqa nisauriranaki mariaqa. Qini mandaikamma qimaqarara tipundaari mariasa mara quanda sainaqa furufariranaki mariaqa.
PSA 35:5 Yaaweena angiroo fannoo misa nifaqaseenoo oofaafanaumuara foora utitiqameeqee aqusaina ufai fannoo aanaaqmaara fuaqa aqindee iannoo.
PSA 35:6 Misa nimaria aanafa asukuna faqa farindarafa faqa mariani, Yaaweena angiroo fannoo misa nifaqaani.
PSA 35:7 Qini namuqaauqa oosana siainaki qini qimaara qufaana fufuseeqa qini qimaarusidaqa. Misa fifau qini qimaara madika indufia.
PSA 35:8 Oo Yaawee anee dadaaqinaqa qini namuqaauqa sia iri marifanoo ummaara fannoo tautummaki misasaa aqufuani. Misa nariqa fufuqaa ufaanaki arufi nariqa ummaaraki aqufifaranoo.
PSA 35:9 Miqimma fifaqa qinee Yaaweenara asasianauranoo. Mifa qini asumu marainara nasurianauranoo.
PSA 35:10 Qinee qeeqa qimuqusa aiqamannoo Yaaweenara maaqi qianaura. Sia moo fannoo ani fooqaafaa maridanoo. Aniara afeeka siaisa afeekaikimariasa nisaukukinaana rafiaana fee qianaura. Kudi fasiqauqa mandaikamma nimaqee mariasa nisaukukinaana faqa maree marifee qianaura.
PSA 35:11 Manda fasiqauqa qinee sia qafaunna ainainara faqa sia irunna ainainnara faqa fifau qini rairai qima qimaqaidaqa.
PSA 35:12 Qinee amiqi amiqimmannisaunnana akiiqara mandaikamma qimaqeea. Miqiafanoo qini qimuqusa firaaqoo ummaarareenoo.
PSA 35:13 Qini oosana moomau fidanoo. Qini namuqaauqa auriranaki mariafaqa qinee misara soofaarira qamunna afisusee qeeqa mara maree qumureeqa daararee marufaqa misara findifuaqeera innaaru qimariqiafana. Qinee inuka tuqu daumoo amisee findifuaqeera innaaru qimariqiafana.
PSA 35:14 Qini namuqaauqa auriranaki marufaqa qini marirafa maaqimminoo marinau. Qinee misara qini qiqoondifaqa qini qikaqaafasaa faqa qini qinoofa faqa kuqiara foora iafaqa soofaarida kummaaraqa mariqiafana.
PSA 35:15 Qini namuqaauqa oosana misa sia qini daanna raidaqa. Qinee ummaaraki aqufunaqa misa qiqafamaseeqa asasammasee aiqama qini fiqu fiqummafi uteeti qidaqa. Qinee aanaamuru misara sia irimarunausa qini dariqa kai maridaqa, sia idooaidaqa.
PSA 35:16 Qinee qiku qisauku mandaikirausara foora marunaqa misa qiniara uteeti qidaqa. Misa qiniara fidiaqaa imarifaqa qini qiqafaidaqa.
PSA 35:17 Oo Yaawee, kisaaqasaa fee anee kaqi nindafaida marinnaree. Misa qini kuridi qimaqarara imarianasaa itita qimaqaa. Anee maa kaasau fainisa nookinaana qini mareeqee amiqiraqoo kaqinni quqaqisaa.
PSA 35:18 Miqimma sainaqa ani faiqí anaasee moomoosa suqirana qambaanaindari findifi ani Yaaweenara dufi dufi qianaura. Moomoo fasiqa anaasee firaa suqiranaki noorinni oonuree ani amooqianaura.
PSA 35:19 Fifau unna qimariasa qini namuqaa qini tataqaida asasifana Yaawee anee titaqisaa. Qini qumaara qafamasee fidiaqaaidaqa noorinnai nifunnai unnamaanna qimariasa anee misa faqa rafaaqafunnimaqasaa.
PSA 35:20 Misa nifauru fannoo sia asooara ufa aqoondikira ufa qimarisa, misa oosana oosana unna ufauqa faqa ida qai ufana faqa kai qimariasa maridaqa, misa unnamaanna qiranara randasee mareeqee asooaranaki mariasa nimuaaqa aqidaqa.
PSA 35:21 Qini namuqaauqa fifau firaaqoo noo raqasee qini kikiqususeeqa qiniara eeoo eeoo maasa qifu fannoo mina aaqarana qafee fee qidaqa unnaqidaqa.
PSA 35:22 Misa miqi qimariafana, oo Yaawee, anee misa unnaqirana qafaananoo. Anee sia ufa siaina maria, anee sia nianai maria, daaqa ani marida dadaqia.
PSA 35:23 Oo Yaawee, anee faiqara see findifi qini itita qisaa. Oo qini Anutu findifinana qini ufa afeekaikamma qimaqaa.
PSA 35:24 Oo Yaawee, qini Anutu, anee andeeqarafa, anee qiniara sia aaqarana siai fee qia. Anee qini dadaaqinaqa qini namuqaa qiniara ataasa ataasa qiaqa.
PSA 35:25 Anee qinaqa qini namuqaauqa sia nári nimuqusakiqari maaqi qimasee qiniara qiaqa. Eeoo maasa qunnandee kai qinoo mina mandainaina doo kambiqeenoo fee qiaqa.
PSA 35:26 Qini ummaara qafamasee nasuri mariasa anee misa aupuraranaki quqannisaa. Anee misa nisauriranaki quqasee furufaramma nimaqaa. Anee misa nisauriranannoo faqa noori runiranannoo faqa qamunnara foora dukunimma nimaqaa.
PSA 35:27 Qini andeeqaranara irisee qini iduku qimaqarara irimariasa kaifaa kaifaa maaqi qimasee faaqaridaqa asasiaqa. Yaaweefa kaaqa uriqararafa maridanoo. Yaaweefa qini narí ainainira faiqi qinee auqaunna ainainafa anoona kambiqainara iriseenoo asasidanoo.
PSA 35:28 Miqinaqa qinee ani andeeqaranara kananaana oosana arasee ani amooqianafa eedirana kai raquru amianaura.
PSA 36:1 Numoo fannoo manda oosana maree mariasa nimuqusaki maridanoo akaqa aaqara oosanara naakapaidanoo. Anutuna minnisee sia minara rufiee marianara manda oosanara irirafa nimuqasaki kambiqaidanoo.
PSA 36:2 Miqi mariasa nári kai náriara kaaqa uriqararausee qidaqa, Anutufa maasa aaqarana sia amana qafamasee maasa ufa qimiannoo fee qidaqa.
PSA 36:3 Misa nookinaa ufa fannoo manda ufa faqa unnufa faqa kai maridanoo. Misa sia iriqaraasammasee auqara oosanara faqa andeeqara oosana faqa auqaidaqa.
PSA 36:4 Misa nári qaarisaa faiaqee idaqa manda oosanara oonumafi irida maridaqa. Misa sia moo andeeqara oosana auqaidaqa, misa manda oosanara faqa sia qaoo qidaqa.
PSA 36:5 Oo Yaawee, ani sia takaaninna amuqusirafa innaaruna amana kai ooru maridanoo. Ani mapukusee marira oosana fannoo oonnamu amana kai ooru maridanoo.
PSA 36:6 Ani Yaaweena andeeqarafa firaa aaqananamuara foora uriqaranoo maridanoo. Anee maasa ufa irisee andeeqasee raina qimaqara oosana fannoo ooruku nammari farumara foora meemai uqanna maridanoo. Faiqí faqa aandau faqa ani rakisinnimaqarana ameemaanai maridaqa.
PSA 36:7 Oo Yaawee ani maasara amuqusirafa firaa feefauru aqimaria ainainnafara foora maridanoo. Maasa ani aqoosa ameemaanai keeqafi mandaaqaidaqa.
PSA 36:8 Oo Yaawee anee rairaamma nimianna naranna oomaqa sakasee naidaqa. Anee qinaqa maasa ani andeeqara oosana nammariara foora naa.
PSA 36:9 Anee aiqama marirana oosana mariananoo. Anee kaaqa qarafa mariannanara maasa kaaqa qarana qafaidaqa.
PSA 36:10 Oo Yaawee anee aneenna amuqusirana aniara irimariasa kaifaa kaifaa nimida kai maria. Anee aneenna andeeqarana andeeqara aatata fimariasa nimidana kai maria.
PSA 36:11 Anee qinaqa nári nimoo naamoo imariasa sia nikunnai qini rafaaqafu qimaqaaqa. Anee qinaqa manda oosana maree mariasa sia qini daru qifaqaaqa iaqa.
PSA 36:12 Niqafaa, manda oosana maree mariasa doo saamuriqa maridaqa. Misa maqasaa aqufiqa sia amana kafaa findififaaranoo. Miqoo kai marifaranoo.
PSA 37:1 Anee aaqara oosana maree mariasa nindafamasee sia minara aiaaqee qimasee sia qinee misa dadaaqunoo sia qia. Manda oosana maree mariasa nindafamasee sia minara qinee faqa sia maraunoo qimasee arana qaani.
PSA 37:2 Misa miqi marianara amukafaqaa sanda miqirausa qusasaa ateeka saifaqa qammundeefaranoo, misa andanda miqirausa maridaqa qusasaa aadanusifaranoo.
PSA 37:3 Yaaweena saqarikida andeeqara oosana kai maraida maria. Anee miqidana maa maqa maaqanaki kisaaqasaa kaqi marinanoo sia moo ainaina fannoo ani mandaikamma amaqaannoo. Anee aneenna maqa maaqaki kai marida asooaranaki maria.
PSA 37:4 Yaaweenaki asasamasee marinanoo ani amuqusaki aidimari ainainna ani amiannoo.
PSA 37:5 Anee aneenna marirana nirana Yaaweena amisee mina saqarikammasainanoo mifa maa ainainna ani amiannoo.
PSA 37:6 Mifa ani andeeqara oosana dadaaqinanoo suani qambaanara foora amiqimmasee kaaqa qaanoo.
PSA 37:7 Anee Yaaweena oorinni afaaqa quqasee ireeda maria. Manda oosana maree mariasa aaqara oosanara tipundaarifanoo anoona kambiqainana sia qeeqara faqa miqianee qia. Sia moomoo qumiasana faqaasa niqafamasee sia qinee faqa miqiunoo qia.
PSA 37:8 Anee mina qafamasee sia moomoo irira iria. Sia aanoo qia. Mi oosanafa ummaaraki nifiqee fidanoo.
PSA 37:9 Manda oosana faqaasa Yaaweefa misa aiqama taikannimaqaannoo. Irirana Yaaweenasaa mundimariasa maa maqanasaa amiqimmasee marifaranoo.
PSA 37:10 Kaqikaaqoo marikinanoo doo miqoo mandoosana maree mariasa taikeefaranoo. Anee misara randeenana sia paqurinnaranoo.
PSA 37:11 Nári mara maree qumi mariasa Yaaweefa aiqama maqa nimiannoo. Misa miqoo aiqama ainaina rairaa imarinaqa asooaranaki maridaqa asasifaranoo.
PSA 37:12 Manda oosana maraqanuasa andeeqarausa nariraree qimasee tipundaaridaqa. Miqidaqa misa andeeqarausara fidiaqaaira noori nifiri maraidaqa.
PSA 37:13 Yaaweefa qusasaa misa mandaikamma nimaqaaninnanara iriseenoo naanaidara qidanoo.
PSA 37:14 Manda oosana maree mariasa kudi fasiqa anaasee faqa sarauiranaki mariasa faqa andeeqara aatata fimariasa faqa nariraree qimasee nári faaqaana mai qumaree duru rakisisee nimaarusida maridaqa.
PSA 37:15 Misa nariqa rakira faaqaana fannoo nári nimuqusa raquru nimiannoo. Misa duru faqa raudaannoo.
PSA 37:16 Andeeqee mari fasiqana ainaina oodaa mariannoo, Anutuna afusaa uriqaranoo maridanoo. Manda oosana maree mari fasiqana ainaina moomoo maridanoo, Anutuna afusaa ureeqanoo maridanoo.
PSA 37:17 Minara manda oosana maree mariasa Anutufa misa afeeka mara maraannoo. Andeeqee mariasa Yaaweefa itita nimaqaannoo.
PSA 37:18 Yaaweena ufa mau fimariasa Yaaweefa misa marirana niranasaa rakisidanoo. Maa maqa maaqafa misaindikinoo naaruara mariannoo.
PSA 37:19 Miqi mariasa manda aukuana anirainaqa sia aupurarana mareefaranoo. Aandaroo aukuana misa narana moomoo mariannoo.
PSA 37:20 Mandoosana maree mariasa kuqifaranoo. Yaaweena namuqaauqa taatuqeena kakasindee ifaranoo. Misa ida muna qusasaa marinoo taikaindee ifaranoo.
PSA 37:21 Manda oosana maree mariasa moosa ainaina ufaasu maraseeqa sia kafaa nimidaqa. Andeeqarausa oosana moo maridanoo, misa afaarida kaqi nimimariasa maridaqa.
PSA 37:22 Yaaweefa amiqi amiqimmanimaqee marisa misa nári maqa maaqaki amiqimmasee marifaranoo. Yaaweefa niquraree marisa mina maqasaa mariana mara qaqusainaqa quqasee fifaranoo.
PSA 37:23 Andeeqara fasiqa niranara Yaaweefa asasidanoo dadaaqidanoo. Yaaweefa asasi maria fasiqa anaaseesa itita nimaqaidanoo.
PSA 37:24 Mi andeeqara fasiqafa saamurinoo maqasaa aqufinoo sia miqinoo mariannoo findifuannoo. Yaaweefa uqeerainara miqiannoo.
PSA 37:25 Qinee kumaaraa mariiafanausa doo maqee asooqa maridaqa, Yaaweefa andeeqarausa minninnisoona sia qinee mi kamu qafaqiafana. Mina faiqi namu naranara sarauida innaaru qirana faqa sia qafaqiafana.
PSA 37:26 Andeeqarausa aiqama kari afaari mariasa maridaqa. Sarau imariasa iraafaqa eedooo qimasee kaqi ufaasu nimidaqa, misa faiqi namu faqa amiqi amiqiranaki marifaranoo.
PSA 37:27 Anee manda oosanakiqari quandakinana andeeqara oosana maraa. Miqinaqa ani faiqi namu ani maqasaa naaruara marifaranoo.
PSA 37:28 Yaaweefa andeeqara oosana maree mariasara aididanoo narí ufamau mapukusee fimariasa faqa sia minninnisaannoo, misasaa naaruara titannimaqaannoo. Manda oosana maree mariasa faiqi namu mara aqusaannoo.
PSA 37:29 Andeeqarausa nári nikausa ninaakusa maqa maaqa umiasanara foora maraseeqa, minaki naaruara marifara.
PSA 37:30 Andeeqarausa nifauru fannoo irirana faqaasa ufa kai qidanoo. Mina afauru fannoo qambaana andeeqara ufa kai qidanoo.
PSA 37:31 Anutuna sanda ufa andeeqarausa nimuqusaki maridanoo. Minara misa sia quqasee moosaa fifaranoo.
PSA 37:32 Manda oosana maree mariasa andeeqarausa nipuraida narirara nimaarusidaqa.
PSA 37:33 Yaaweefa sia andeeqarausa manda oosana maree mariasa nisaukuki quqasaifaqa naridaqa. Manda oosana maree maria fasiqausa andeeqarausa ufaki quqasaifanoo Yaaweefa misa titannimaqainaqa sia narifaranoo.
PSA 37:34 Anee aneenna irirana Yaaweenaki quqasee mina ufa mau kai andeeqasee fua. Anee miqimarinanoo Yaaweefa ani firaa auqu amiseenoo ani aanaakusa akausa maqa maaqa amiannoo. Mifa minaki manda oosana maree mariasa mara aqusaina qafamasee kuqaa fee qinnaranoo.
PSA 37:35 Qinee Dafidisa, mandoosana maree mari fasiqana qafaafananoo firaa saqari miqirafa Reebanoona amiqira maqasaa kambiqafi ititanoo mariara foora inoo marinau.
PSA 37:36 Mifa qusasaa marinoo doo taikafifaqa qinee qafaunanoo sia marifaqa randeeqa sia uqanna paquriqa.
PSA 37:37 Anee ufa siai fasiqana faqa andeeqara aatata fimari fasiqana faqa niuqummasee qafaa. Asooara oosanaki reendeennammasee mariasa maa maqanasaa misa saaqari kambiqainausa faqa kisaaqasaa marifaranoo.
PSA 37:38 Aaqee mariasa Yaaweefa aiqama uqanna kuridi nimaqaannoo. Manda oosana maree mariasa niku nisauku marirana Anutufa ateekasaina sia marifaranoo.
PSA 37:39 Ummaara aukuana Yaaweefa andeeqarausa itita nimaqasee asumu maraidanoo.
PSA 37:40 Yaaweefa andeeqarausa dadaaqinoo manda mariranakinaana uqeerannisaidannoo. Aaqee mariasa nisaukukinaana asumu mareeqee kaqinni quqannisaidannoo. Misa Yaaweena mandaaqee marianara asumu maraidanoo.
PSA 38:1 Oo Yaawee, aneenna aanooqiranakiqari sia qiniara aanooqia. Aneenna aranaqaranakiqari sia qini ummaara qimia.
PSA 38:2 Anee feefara foora amiqimmasee qini tapooqaananoo. Ani asauku fannoo firaaqoo qini radamimarifaqa ummaara maraidaqa.
PSA 38:3 Anee qiniara aanooqiannanara qini qifaaqa firaaqoo didafidanoo. Qini numoo marinara qini qimudaani umooqukinoo marifaqa sia afeekaikidaqa.
PSA 38:4 Qini aaqara ummaara fannoo qini rafaaqafu qisaidanoo. Mifa firaa ummaara maridanoo, sia qinee amana akuanaura.
PSA 38:5 Qini furufarirafa marinara qifaaqa ateekeeqaafanoo adiara usufifanoo afundida putaaidanoo.
PSA 38:6 Qinee ummaaraki maridaqa maqasaa aqufiqa maridaqa, aiqama faasaana suani afu ururarana namu faqa soofaarida kummaraqa maridaqa iki raqaida marunanoo suani afu keeqaidanoo.
PSA 38:7 Qini qifaaqa idara foora qaidanoo. Qinee kuqirana adeedi raqa maridaqa.
PSA 38:8 Qini qimudaani raqanoo mariara foora qumooqukiqa nidaqa. Qini qimuqusa firaaqoo didafi marinara annadannada qida maridaqa.
PSA 38:9 Oo Yaawee qini didimari ainainausa ani afusaa akooqoo marifana iri mariananoo. Qini didafi marifaqa annadannadirafa ani afusaa sia kukeeqanoo maridanoo.
PSA 38:10 Qini qimuqusa rundurundi marifanoo qini afeeka taikeenoo. Qini afeeka doo quminoo, qini qifusaa mari kaaqa qarafa doo taikafifanoo asukuna kai titeenoo.
PSA 38:11 Qini qiqoondiuqa faqa qini faqa nimariasa faqa qini nammuana qafeeqa rufiasee niana tatutatuidaqa. Qini qiqoonausa faqa miqikaimmidaqa rufiqa rufiqa idaqa.
PSA 38:12 Qini darirara randee mariasa qufaana fufidaqa. Qini mandaikamma qimaqarara ufa qimariasa maridaqa. Suani afu ururarana namufaqa tipundaarida mariafanoo suani afu keeqaidanoo.
PSA 38:13 Qinee daaqoo qaunirausara foora sia misa ufa iriqa doo qummunirausara foora sia qimannimidaqa.
PSA 38:14 Qinee sia ufa irimaria fasiqausara foora maridaqa, qeeqa dookiqari qimannimirara sia amanaikidaqa.
PSA 38:15 Oo Yaawee qinee ani kai saqarikidaqa. Oo Yaawee qini Anutufa anee qini ufa qima qiminnaranoo.
PSA 38:16 Oo Yaawee qini namuqaa sia qini mandaikamma qimaqasee nasuriaqa. Qini qiku farindamaki aqufuanaqa sia nasurida asasiaqa.
PSA 38:17 Qinee saamuruaqaammidaqa. Qini didafirafa kisaaqasaa qini faqa maridanoo.
PSA 38:18 Qinee qeeqa aaqarana akooqoo kooroomasaunanoo, qini numoo fannoo qini qummaara qimidanoo.
PSA 38:19 Qini namuqaauqa moomoosa nimudaanai qimariasa maridaqa. Qiniara fifau fidiaqaa imariasa moomoosa maridaqa.
PSA 38:20 Qini amiqira oosana akiiqara mandaikammaqimaqee mariasa misa qinee andeeqaramau fimarunaqa misa qini namuqaakamma qimaqaidaqa.
PSA 38:21 Oo Yaawee qini Anutu, sia qini minniqisaa, sia nianai maria, daaqa ania.
PSA 38:22 Oo Yaawee qini asumu maree marianafa kai kaqi aniree qini dadaaqia.
PSA 39:1 Qinee Dafidisa qeeqara maaqi qiqa, qinee qeeqa nirana mariranasaa rakisianaura. Qini qifauru fannoo sia aaqara ufa qiannoo. Manda oosana maree mariasa qini daaqa marifaqa sia qinee moo manda ufa qianaura.
PSA 39:2 Qeeqa ufa rafaaqa fusee doo qummunimmasee marunanoo mifa sia dadaaqinoo. Doo qummunimmasee sia amiqira ufa faqa qimarunanoo qini daundurakinaa ummaara firaanaikinoo.
PSA 39:3 Doo qummunimmasee marunanoo qini daundurai qimuqusaki idara foora aurinoo. Qinee firaaqoo oonumafi irimarunanoo qini daundurai firaaqoo idaqeenoo. Idaqee marifaqa qinee sia doo qummunimmasee marianaura.
PSA 39:4 Oo Yaawee qinee taikaanna aukuannara qinaqa iria. Yairee fee qinee kuquanauree. Qini marirafa munu taikaaninnanara faqa qima qimia.
PSA 39:5 Anee qini marirana qusa uqanna ramasaananoo. Qini marirafa ani afusaa fifau ainainara foora sia maridanoora foora maridanoo. Aiqama fasiqa fifau naidoora foora kai maridaqa.
PSA 39:6 Aiqama fasiqauqa nimanandara foora marida nidaqa. Miqi mariasa aiqama ainaina fifau kai kadaapi ridaqa. Maaqoo maridaqa qumiasana suqu quqaseeqa kuqifanoo yafee maraannoo fee qimasaida sia iridaqa.
PSA 39:7 Oo Yaawee qinee nana moo ainainara afeesianauree. Qini irirafa aniki maridanoo.
PSA 39:8 Qini aiqama numoo kinaana mareeqee kaqinni quqa qisaa. Miqimma sainaqa furufarirausa sia qiniara naanaidara qiaqeera.
PSA 39:9 Anee kai maa aupurarana qimi marianafa mariannanara qinee doo qummunimmasee qireeda kai maridaqa sia ufa qianaura.
PSA 39:10 Sia kaifaa qini mandaikamma qimaqaa. Anee qini daruanaqa kuqirara miqidaqa.
PSA 39:11 Faiqí aaqara oosana maraasara anee Anutufa afeekaikaqmmasee aanoo qima amaqasee mina idi mari ainainna kuridi aisee mariananoo. Qumura mandaikindee idanoo. Aiqama fasiqauqa ani afusaa aidoora foora qusasaa fuaqaki taikaidaqa.
PSA 39:12 Oo Yaawee qini innaaru qirana iria. Qini dadaaqianneera aaraunnana aaqoo rammatinimmasee irisee qini dadaaqia. Qinee ani dadaaqiranara qiki raqaidaqa nammeera qianana dadaaqia. Qinee qusasaa maa maqanasaa ani faqa mariqa, qeeqa qikeeku qikaaku naanna reeqa qusasaa kai maridaqa.
PSA 39:13 Oo Yaawee ani oori afiriara kaaqa daaquqaidanoo anee kaqinni anneenna oori ubeekamasainaqa qinee qusasaa asasiranaki mariqa kuqua.
PSA 40:1 Qinee Yaaweenara deendeena mandee afeesida marunanoo, mifa quandafi qini nammeera qirana amiqimmasee irisee qimudaoo qimasee dadaaqinoo.
PSA 40:2 Qinee qeeqa aaqaranaki doona doona imarina kiara foora faqa faurima saara foora faqa farindamaki kuqira madikaki faqa afundimari doonna kiara foora faqa marunanoo minakinaana mifa qini uqeereeqeenoo oonisaa kikiqammaqiseenoo.
PSA 40:3 Miqoo mifa fuka idi qini qima qiminoo mi idifa maasa Anutuna amooqira idi maridanoo. Moomoosa mina qafamasee rufiasee Anutuna saqarikifaranoo.
PSA 40:4 Yaaweena saqariki mariasa asasiaqa. Tumunnai auqira anutufinnai sia ubeekee mariasa faqa unnaqira anutusa sia nimooqi mariasa faqa asasiaqa.
PSA 40:5 Oo Yaawee qini Anutufa anee moomoo afeeka naaquqara ainainannoo maasa dadaaqinau. Sia moo fannoo ani fooqaafa maridanoo. Anee moomoo amiqira irirausa maasara aneenna iriranaki qimirisaidana dadaaqi mariananoo. Qinee minauqara ufa qianee qimasee sia amana aiqamara ufa qianaura. Mifa moomoo maridanoo.
PSA 40:6 Andau tatufirana faqa oosana oosana ani amira ainainara faqa anee akooqananoo. Anee aneenna aidimarianna tatufiranara ani ufamau firana qini daaqooki quqasaana iriaa. Aandau ida tatufirana faiqí aaqarana akiiqara amiranara faqa anee sia qimiannee qiananoo.
PSA 40:7 Qinee minara iriseeqa maaqi qiqa. Doo qinee anireeqa. Anutuna akarakinaafa qinee aniannanara qifaqa anidaqa.
PSA 40:8 Oo qini Anutu, ani aidirana mau firara firaaqoo dididanoo. Ani sanda ufa qini qimuqusaki maridanoo.
PSA 40:9 Qinee ani faiqí anaasee moomoosa suqiqa mariana qambaanai anee maasa asumu maraannanara andeeqara ufa kai qimannimidaqa. Oo Yaawee qinee sia qeeqa doo qummunianaura, kaqi qimannimianaura. Anee minara irimmariananoo.
PSA 40:10 Qinee sia anee qini dadaaqinana qini asumu maraannanara qeeqa qimuqusaki rafaaqa fiqa, kooroomasee qimannimiqa. Ani mapukusee marira oosanara faqa ani asumu nimirana faqa kooroommasee qimannimiqa. Faiqí anaasee moomoosaki anee misara amuqusirana faqa ani kuqaa anoona ufa qirana faqa sia rafaaqa fiqa, kaqi qimannimiqa.
PSA 40:11 Oo Yaawee qinee iridaqa ani qiniara qimudaoo qirafa sia taikaannoo. Ani amuqusirafa faqa ani kuqaa anoona ufa qira oosana faqa qini itita qimaqeenoo.
PSA 40:12 Qini mandoosana moomoo sia asaanarirana amana qini Dafidisa fiqu fiqu inoo maridanoo. Qini aaqarafa doo qini rafaaqafusaifaqa sia qifu maqaidaqa. Qini qikiiqa qisausi moomoo maridanoo, qini aaqarafa mina faqa uriaaqaranoo sia asaanarirana amana maridanoo. Minara qini qimuqusa ummooquki fanoo qini afeeka taikaidanoo.
PSA 40:13 Oo Yaawee anee qini mandainainakinaana mara quqaqisaa. Oo Yaawee kai kaqi aniree qini dadaaqia.
PSA 40:14 Qini marirana taika qimaqarara randeemariasa rafaaqafu nimaqasee mareeqee furufariranaki quqannisaa. Qini aupuraranara asasimariasa mara quandasainaqa nisaurusee quqasee sandaaqa.
PSA 40:15 Qiniara uteeti qimariasa misa nariqa nisaurirana firaafa marina qafeeqa firaaqoo tautiaqa.
PSA 40:16 Oo Yaawee anee iannannai ani mariasa asasida nasuriaqa. Ani asumu mariranara dufi dufi qimariasa aiqama kari maaqi qiaqa Yaaweefa kaaqa uriqararafa maridanoo fee qiaqa.
PSA 40:17 Qinee Dafidisa qimudaani radukirausa saraui marunna fasiqausa marunnanara oo Yaawee anee sia qiniara qaunuananoo. Anee qini asumu maree marianafa faqa qini Anutufa faqa mariannanara kai kaqi aniree qini dadaaqia.
PSA 41:1 Kudi fasiqa aanaaseera irisee dadaaqi mariasa asasiaqa. Ummaara aukuanaki Yaaweefa miqimariasa uqeera kaqinni quqannisaannoo.
PSA 41:2 Kudi fasiqa anaasee dadaaqimariasa Yaaweefa ititannimaqaseenoo misa maa maqanasaa marirana afeekaika masainaqa kisaaqasaa marifaranoo. Maa maqa maaqanasaa marirana mifa amiqi amiqimannimaqaannoo. Sia mifa misa namuqaa nisaukuki quqaannoo.
PSA 41:3 Miqi maria fasiqa aanaaseesa auriranaki marifanoo Yaaweefa misa dadaaqiannoo. Misa aurida marifanoo Yaaweefa misa aurirana taikannimaqaannoo.
PSA 41:4 Qinee maaqi qidaqa, oo Yaawee qinee ani mandaikamma amaqeeqa. Anee qini qifauamasee qini auriranara foora taikaqisaa.
PSA 41:5 Qini namuqaa qiniara nimuqusa ummaara reemarifaqa maaqi qidaqa. Yaireefee mi fasiqafa kuqinaqa maasa minara qaunuanauranoo.
PSA 41:6 Qinee aurimarunaqa akaqausa ani qiqafeeqa qisee ufoo qidaqa unnaqidaqa miqidaqa. Misa unna ufa irisee raudamaki oonuree aiqama tinai qini qifasaasa qidaqa qimannimidaqa.
PSA 41:7 Aiqama qiniara fidiaqaa imariasa nupiqnupita kiqari nári qimami nári qimami qidaqa. Qini mandainaina daruani fee qidaqa miqi qidaqa.
PSA 41:8 Misa qiniara manda aurirafa aukainaina aurirafa mina arifanoo amiqimandee auridanoo mifoo qidaqa. Doo mifa rinoo maridanoo, sia findifuannoo, kuquannoo fee qidaqa qimatundaidaqa.
PSA 41:9 Qini qifaaqasaa qiqoondi, qinee minasaa mundimarunna fasiqafa, qini faqa neeneeu fasiqafa, mifa narí aiku qumbaqi uqeera qumaree aiku ataannai qini darinoo.
PSA 41:10 Oo Yaawee, anee qiniara amuqusinana qini uqeeraqisee afeeka qiminaqa mina akiiqara mannimaqaa.
PSA 41:11 Oo Yaawee qini namuqaa sia qini uridaaqaree mariafaqa qinee mina qafamasee oo Yaaweefa qiniara aidimarifanoo miqidanoo fee qidaqa qimiridaqa.
PSA 41:12 Anee qini andeeqara mariranara irisee qini uqeera qisainaqa naaru naaru ani oorisaa maria.
PSA 41:13 Yaaweena Isaraee maqannaasa Anutuna amooqia. Maqee faqa naaru naaru faqa amooqima amaqaa. Kuqaa uqanna kafaa kuqaa fee qidaqa.
PSA 42:1 Aandau nammariara aidifanoo maqee maqee aannanai aannanai qidanoo. Qini maraquna fannoo misa naanna raida maqee maqee oo Anutu ani aaqa mariranara didimarifaqa daannanai daannanai idara foora maridaqa.
PSA 42:2 Qini nammariara foora kaqi marira Anutunara dididanoo. Yairee fee qinee oonuree minara innaaru qianaura.
PSA 42:3 Qini namuqaauqa moomoo kari qiniara yaqoo fee ani Anutufa marifanee qiafaqa qinee mina iriseeqa qikiraqaidaqa. Faasaana faqa eendaki faqa qeeqa daiqunu daukunu naidaqa.
PSA 42:4 Qinee ooqai iafannanara irunanoo qimuqusa mandaikidanoo. Ooqai qinee moomoo fasiqa anaasee indaarunnikiafanaqa Anutuna amaana maqaki fimariqau. Oonuree faaqa fuisee qida asasida Anutunara dufi dufi qira idiuqa reemariqau.
PSA 42:5 Nanaree qini daundura kaaqa ummaara raidanoo fee, nanaree qinee kaaqa ummaaraki maridee. Qinee Yaaweenasaa kai irirana mundusee kaifaa mina amooqianaura. Mifa qini asumu maree marifa faqa qini Anutufa faqa maridanoo.
PSA 42:6 Oo qini Anutu, qinee ummaaraki maridaqa Yooradanna maqa maaqaki faqa Qeeramoona aaqanasaa faqa Misaraa aaqanasaa faqa maridaqa aniara irianaura.
PSA 42:7 Qini ummaara firaafa ooruku nammariara foora mandinoo maridanoo. Mi nammarina qamakaurirafa narisaa narisaa arinoo sandaaqai ooru fidanoo aiai qidaoo. Mifa innaarunaindari oondaindariara foora aaku quminoo maqasaa aqufifanoo firaaqoo aiai qidanoo. Ani mi nammari amakaurirafa qini uridaaqaramafi rafaaqafu qimaqaidanoo.
PSA 42:8 Faasaana Yaaweefa narí sia taikara amuqusirana aiqainanoo qinisaa qumuani. Miqinaqa eendaki qinee minara dufi dufi qira idi raanaura. Qinee Anutufa qini mariranasaa rakisi marina innaaru qima amaqaanaura.
PSA 42:9 Anutufa qini itita qimaqee marinara qinee minara maaqi qidaqa. Nanaree anee qini qaunuqiseenanee. Naqifee ifaqee qini namuqaa aupurarana qimi mariafaqee oonuree aniree iqa nidee.
PSA 42:10 Qini namuqaa qini ataasa ataasa ufa qima qimaqee mariafaqa kuqirafa qusaree marifaqara foora aupuraidaqa. Faasaambaasaana qiniara ani Anutufa yaifee maridanoo fee qidaqa.
PSA 42:11 Nanaree qini daundura kaaqa ummaara raidanoo fee. Nanaree qinee kaaqa ummaaraki maridee. Qinee Yaaweenasaa kai irirana mundusee kaifaa mina amooqianaura. Mifa qini asumu maree marifa faqa qini Anutufa faqa marinara mina amooqianaura.
PSA 43:1 Anutu ani ufa sia iri mariasa qini rafaaqa fidaqa, anee qini dadaaqinaqa qifairi mariasa ufa urinnaaqarama saanaqa qiniara andeeqara oosana faqaafee qiaqa. Ueeqee mariasa faqa mandoosana faqaasa faqa nisaukukinaana qini maraquqisaa.
PSA 43:2 Oo Anutu anee qini titaqimaqee marianafa mariananoo. Nanaree qini minniqiseenanee. Nanaree qini namuqaa aupurarana qimi mariafaqee oonuree aniree iqa nidee.
PSA 43:3 Oo Anutu anee aneenna kaaqa qarana faqa anoona ufa qirana faqa niqiqainaqa qini aana muquniaqa. Mi irira qanda qini mareeqee Sioona ani naaquqara aaqanasaa, mari amaana maqanaki anee mariannaqoo quqaqisaaqa.
PSA 43:4 Qinee miqoo maridaqa Anutuna qaidara mariqoo mina amooqirara fuanaura. Kaaqa asasirana faqa kaaqa nariara didirana faqa qimimari Yaaweefa miqoo maridanoo. Oo Anutu qini Anutufa qinee piripuna aridaqa ani amooqianaura.
PSA 43:5 Nanaree qinee kaaqa doori runusee maridee. Qinee Yaaweenasaa kai irirana mundusee kaifaa mina amooqianaura. Mifa qini asumu maree marifa faqa qini Anutufa faqa marinara mina amooqianaura.
PSA 44:1 Oo Anutu, maasa qikeeku qikaaku ooqai anee auquqoonna ainainnara qimaqimiafaqa iridaqa. Maasa qeeqa daaqoonnai misa marukamuqoo auqoonna firaa ainainnara qima qimiafaqa iriqa.
PSA 44:2 Anee aneenna kai aanaamuru niqiqamasoona amaaramafufana maasa qikeeku qikaaku maa maqa maaqanaki mara quqanau. Anee aanaamuru aupurarana nimisee Isaraee maqannaa maa maqanasaa mara quqasoonaqa faiqí moomoo kambiqafi maa maqa maaqana amanakai maridaqa.
PSA 44:3 Isaraee maqannaasa sia nári rakiranannaifau maa maqa maaqana maraqau. Sia nári afeekannaifau maraqau. Anee aneenna afeekannai faqa eeraariranannai faqa oori inaa inaa iranannai maa maqana mara niminau. Anutu, anee misara ani aidi marunara miqinau.
PSA 44:4 Anee qini karaambaiqa qini Anutufa mariananoo. Anee aneenna maqannaasara rakiranaki namuqaa urinnaaqaraaqee qiananoo.
PSA 44:5 Oo Anutu ani afeekannai maasa qeeqa namuqaa rafaaqafi marunausa maridaqa. Akaqausa findifi darirariafana anee maasa faqa marianaqa maasa rakirana uraaqa raidaqa.
PSA 44:6 Qinee sia qeeqa duru saqarikidaqa qini rakira paipana faqa sia qini dadaaqidanoo. Anee kai.
PSA 44:7 Anee kai maasara fidiaqaaimaria namuqaasa nisaukukinaana doo rafiamaree nisaurirana misa nimiananoo.
PSA 44:8 Maasa aiqama kari Anutuna kai amooqidaqa. Naaru naaru minara dufi dufi qianaura. Kuqaa.
PSA 44:9 Anee maasa rakira fasiqauqa faqa nidana dadaaqiunafa maqee sia nidana, sia dadaaqimariananoo. Oo Anutu, anee maasa minniqiseenana maasa ooru muqufi qisaananoo.
PSA 44:10 Anee miqiannanara namuqaa maasa nifaqasaafaqa sandaunaqa maasa aiqama ainaina mareea.
PSA 44:11 Anee maasa mareeqee namuqaa nimianaqa misa maasa sipsipara foora kuqa darirara idaqa. Anee maasa aanaamurukiaqa doo daru qifaqaa qianaqa moodaa moodaa iqa maridaqa.
PSA 44:12 Oo Anutu anee aneenna faiqí anaasee kaqikaa munnimma aqusee maree maria ainainnara foora mariafana namuqaa nimiananoo. Anee nimisee aabaa munnimma sia maree marianara foora nimiananoo.
PSA 44:13 Anutu anee miqi marianaqa maasa qiqoonausa maasara naanaidara qidaqa. Maasa daaqa mariasa ataasa ataasa maqimaqaidaqa.
PSA 44:14 Anee sia maasa dadaaqiannanara aiqama maqannaasa maasa qisaurirana qimidaqa. Akaqa maqannaa maasa Isaraee maqannaasa qiqafeeqa uteeti qimasaidaqa ninuka aqidaqa.
PSA 44:15 Qini namuqaa faqa qiniara fidiaqaa imariasa qini ataasa ataasa qima qimaqaafaqa qinee aiqama kari ummaaraki maruna qisaurirafa qini rafaaqa fidanoo.
PSA 44:17 Oo Anutu, anee fifau maasa dari mariananoo. Maasa aniara sia qauniqa sia ani qima afeekaikira ufa rukieeqa sandanainai qidaqa. Maa manda oosanafa fifau maasa rafaaqafu qimaqaidanoo.
PSA 44:18 Maasa nimuqusa sia qikooqaifaqa andeeqara oosanasaaqari moosaa quandeeqa, kaqi mariaqoo kai maridaqa. Maasa qiku faqa maasa firana faqa sia ani minnisee qiku munuree miniree idaqa.
PSA 44:19 Anee fifau maasa qimudaani tureeraummasee mareeqee kaasau faini ooki quqeenanara foora masaanaqa maridaqa. Anee firaa asukunannoo maasa rafaaqafu qimaqaananoo oosana sia marinaki fifau miqiananoo.
PSA 44:20 Maasa Isaraee maqannaasa Anutuna auqu qaunusaananoo fau mifa iriqini. Maasa unna anutunauqa uqeeraananoofau Anutufa minara faqa iriqini.
PSA 44:21 Anutufa maasa qimuqusaki kukeeqara ainainara irimarifa marinara mi aiqama ainaina qafaiqini.
PSA 44:22 Faasaambaasaana misa ani auqusaara maasa daruqifaqaaidaqa. Misa maasara kuqifandinna sipsipausee qimasaida maasa daruqifaqaaidaqa.
PSA 44:23 Oo Yaawee findifua nanaree faiqaidanee. Findifua sia kisaaqasaa maasa minniqisaa.
PSA 44:24 Anee nanaree aneenna oorisaa ititasee sia maasa qiqafaidanee. Yaawee anee nanaree maasa aupurarana faqa ummaara qimiranara faqa qaunidanee.
PSA 44:25 Maasa maqasaa aqufunaqa nikusamu radamu saafaqa maqasaa riqa maridaqa.
PSA 44:26 Oo Yaawee anee findifi maasa dadaaqia. Aneenna maasara naaruara aidiranara irisee maasa mareeqee amiqiranaki quqaqisaa.
PSA 45:1 Amiqira irirafa qini iriranaki umbiqanoo marifaqa karaambaiqa irianifeera maa idi ufana akara ruma amidaqa. Qini qifauru fannoo papiqa saiki marina amiqira kirifiara foora maa idina akara ridanoo.
PSA 45:2 Oo maasa maqasaa Karaambaiqa ani afaaqa aiqama faiqí faiqikiqari amiqirafa mariananoo. Ani afauru deepimaseera foora amiqira ufa adiafaa ira ufa kai ani ookiqari ururaidanoo. Minara naaruara naaruara Anutufa ani amiqi amiqimma amaqaidanoo.
PSA 45:3 Oo uriqararafa ani afeeka faqa ani qareenarafa faqa ani uriqararafa faqa marinara doo aneenna duru feefa deedaqinana rakiranaki fua.
PSA 45:4 Anee aneenna uriqararana namu faqa doo rakiranaki finana uriqaraa. Fimarinaqa ani anoona ufa qirana faqa andeeqarana faqa sia rafaaqa fuaqeera rakiranaki fua. Ani rakirafa afeekaikinaqa manda oosana maree mariasa aniara firaaqoo rufieefaranoo.
PSA 45:5 Ani duru feefa aaruqirafa namuqaauqa nimuqusaki kai naruannoo. Miqiannanannai moomoosa ani aikuki aqufifana radamu nimaqeennaranoo.
PSA 45:6 Anutufa anee naaru naaru uriqarana maridana aneenna faiqí anaasee andeeqara oosanannoo rakisi nimaqaa.
PSA 45:7 Ani andeeqaranara aidinoo mandainainara fidiaqaa inoo imarifa mariananoo. Minara kai ani Anutufa ani utaaqamaseenoo asasirana ani akiiqa amoondunna akaqa uriqararausa adia nimaqaina faqa uraaqa ramasee adia amaqeenoo.
PSA 45:8 Ani qamunna makaqa mandeefana undidanoo ani karaambaiqa amiqira maaqakina aiqama ainainauqa eereefanta aanainnai auqira ainainauqa kai maridanoo. Minaki piripunna oosana oosanannai auqaafana anee asasimariananoo.
PSA 45:9 Akaqa karaambaiqa niraamuqmaaka uriqarara aanaaseeuqa kai ani maaqaki maridaqa. Ani karaambaiqa asauku uqannai ani anaaqa uriqarara anaasee amiqira qamunna afisimarufa Oofiraa maqusaindaraa koorannoo afaaqa auqusee ani asauku uqannai kikiqinoo maridanoo.
PSA 45:10 Oo fuka amundara anaasee anee aneenna aaqoo ramatinimmafi qini ufa iria. Aneenna maqannaa faqa aneenna ainainara faqa qaunuseenana aneenna afaaqi maqa maaqaki kai maria.
PSA 45:11 Miqimarinanoo ani afaaqi karaambaiqa ani amiqira oori afiriara firaaqoo aidiannoo. Mifa ani karaambaiqa maridanoo anee minara kai qeerairidana mina ufa qaindusua.
PSA 45:12 Tiree maqusaindaraasa moo amira ainaina nisaukuki uqirausa aniree asasidaqa amifaranoo. Faiqí aanaaseekiqari ainaina faqaasa aniree ani aqoondikifaranoo.
PSA 45:13 Moo maqannaa karaambaiqa araamuna fannoo narí afaaqauqira maqaki maridanoo narí afaaqinnai firaridanoo. Mi manaaqana qamunna koorannai auqirafa idaaqirafa kai maridanoo.
PSA 45:14 Misa mina afiqamaree narí qamunna oosana oosana akararirana namufaqa karaambaiqa munu amiafaqa qafeeqa. Aqoonna maanaaqauqa mina dadaaqi marusa mina afiqee fia.
PSA 45:15 Misa asasirana namufaqa nasu nasurirana namufaqa aana muquniqa karaambaiqa amiqira maaqaki keeqaafaqa niqafeeqa.
PSA 45:16 Maa anaaseena afaaqi karaambaiqa, ani faiqi namu kambiqainausa ani amaaqa maqee findifi karaambaiqaikiqa fifaranoo. Aneenna faiqi namu anee kaqi maridana aiqama maqa maaqai uriqararausaika mannimaqasaina rakisi nimaqeefaranoo.
PSA 45:17 Qinee ani auqu uqeerasaanaqa naaru naaru aiqama kambiqeefandinausa minara irifaranoo. Miqiannanara faiqí anaasee naaru naaru ani amooqifaranoo.
PSA 46:1 Anutufa maasa kukeeqara maqusa faqa maasa afeeka faqa maridanoo. Maasa aiqama kari ummaaraki aqufunanoo dadaaqi marifa maridanoo.
PSA 46:2 Maasa minara irisee sia rufiaanaura. Maqa firaaqoo kasinaqa sia maasa minara rufiaanaura. Aaqana namu mareeqee ooruku nammari qambaanai uqasaina aqufinaqa maasa sia minara maparaa ianaura.
PSA 46:3 Aiqama nammari aufinoo firaaqoo narisaa narisaa arinoo qaqaara qaqaarinanoo firaaqoo ufaqinaqa sia rufiaanaura. Aaqana namu kasinaqa nammari fannoo aaqana ammitu ammitu inaqa sia rufiaanaura.
PSA 46:4 Anutuna maqusa aaqa mari nammarifa qumidanoo raina rainidanoo Anutuna maqusaki mariasa mi nammarifa asasirana nimidanoo. Mi maqusafa naaquqarafa marifanoo uriqarara Anutufa mi maqusanaki maridanoo.
PSA 46:5 Anutufa mi maqusanaki marinara sia kasinoo sia aqufuannoo. Namuqaa aniraifanoo mi kananaanna kai Anutufa dadaaqiannoo.
PSA 46:6 Aamina maqannaa tautummasee aanoo qimasee faaqa fuisee qiafaqa akaqa maqannaasa kurididaqa. Misa miqi mariafanoo Anutufa narí ufa firaaqoo uqeeraifanoo aiqama maqa tasirisirinoo nammarikidanoo.
PSA 46:7 Karaambaiqa aiqama afeeka faqaafa maasa faqa maridanoo. Yaakooboona Anutufa maasa afeeka kukeeqara maqusa maridanoo.
PSA 46:8 Oo aiqamausa aniree Yaaweefa auqamasai ainaina qafaa. Maa maqa maaqana aiqama naaquqara ainaina auqaina qafaaqa.
PSA 46:9 Mifa maa maqa maaqanasaa aiqama atiqara mari rakirana taikannimaqaidanoo. Mifa duru feefa itairaatairidanoo. Rakira saqari faqa idaki aqusaifanoo qama taikaidanoo.
PSA 46:10 Oo innee kasoomafinaqa qinee Anutusa marunnanara oonumafi iriaqa. Qinee moomoo maqannaasa qambaanai uriqaraqa marianaura. Qinee aiqama maa maqa maaqanaki uriqaramafuanaura.
PSA 46:11 Karaambaiqa aiqama afeeka faqaafa maasa faqa maridanoo. Yakooboona Anutufa maasa afeeka kukeeqara maqusa maridanoo.
PSA 47:1 Oo innee aiqama maqannaasa nisauku aridaqa asasiaqa. Innee Anutunara idi rama amaqaidaqa asasiaqa.
PSA 47:2 Kaaqa uriqarara Yaaweefa naaquqarafa maridanoo, minara rufiaaqa. Mifa aiqama maqa maaqasaa uriqarara karaambaiqa maridanoo rakisi nimaqaidanoo.
PSA 47:3 Mifa aiqama maqannaa mareeqeenoo maasa Isaraee maqannaa niramandunnai quqanau. Aiqama maqannaa oonu mafi maasa qiku ameemaanai quqasanau.
PSA 47:4 Maasa maqa maaqa qimiraree qimasee utaaqama qimaqoona narí kai qiminau. Anutufa mi amiqira maqa maaqana maasa Isaraee maqanaasa narí aidi marusa qimufaqa maasa mi maqa maaqanara asasidaqa.
PSA 47:5 Anutufa narí ufa irira qaari maruqoo ooru fimarufaqa mina fiqu fiquiqa marusa faaqa ridaqa asasi mariqau. Ukeena fuaqarana namufaqa Yaaweefa ooru finau.
PSA 47:6 Amooqira idi Anutuna ramamia. Doo ramamiaqa. Maasa karaambaiqa amooqira idi ramamiaqa. Doo kafaa idi ramamiaqa.
PSA 47:7 Anutufa aiqama maa maqanasaa mariasa karaambaiqa maridanoo. Doo innee mina amooqira idi ramamiaqa.
PSA 47:8 Mifa narí naaquqara qaarisaa ooqu marifi aiqama maqannaasasaa rakisi nimaqaidanoo.
PSA 47:9 Aiqama maqannaasa uriqararausa moodaaqoo Abarahaammana Anutuna ufa iri mariasa namufaqa suqidaqa. Misa aiqamausa Anutunaindi maridaqa. Mifa firaaqoo uriqarara afeeka faqaafa maridanoo.
PSA 48:1 Yaaweefa firaafa uqanna maridanoo. Maasa Anutuna maqusaki mina naaquqara aaqanasaa mari maqusanaki maasa Anutuna amooqidaqa. Mina firaaqoo uqanna amooqiaqa.
PSA 48:2 Sioona aaqana Anutunaindi kaaqa uriqararafa amiqirafa maridanoo. Mifa uriqarara karaambaiqa maqusa maridanoo. Mi aaqanafa maa maqa maaqanakinaa fasiqa anaasee asasirana nimidanoo.
PSA 48:3 Anutufa mi maqusanaki maridanoo faiqí anaasee dadaaqidanoo, mifa rakira aukuana faiqí anaasee mi afeeka faandaamura ququsanaki dadaaqidanoo ititannisaidanoo.
PSA 48:4 Moomoo namuqaa karaambaiqauqa suqufi mi maqusana ooru qafoofanoo naindiri ree naaquqoofaqa quqasee doo sandamafiqau.
PSA 48:6 Naindiri rarafa misa naakufufaqa anaasee innaamunara auruandee miqau.
PSA 48:7 Namuqaa nariqa rakira kannuqaki oobiqasee urufanoo suani oosanaindari ufai firaafa urinoo nammari amakaurufanoo misa kannuqa Tarasisaa maqusanaasaindi teeqindee mannisanau.
PSA 48:8 Maasa ooqai Yaaweefa rakisi marunara iriafannana maqee maasa qeeqa qifunnoo qafeeqa. Yaaweena aiqama afeeka faqaana maqusa marinara narí Anutufa mi maqusanaki amiqimmasee ititaqaifanoo naaru naaru afeekaikinoo maridanoo.
PSA 48:9 Oo Anutu, ani naaquqara amaana maqaki keeqafiqa ani maasara firaaqoo aidi marinara oonumafi iridaqa.
PSA 48:10 Oo Anutu, aiqama maqa maaqaki mariasa ani amooqidaqa. Ani firaa auquara aiqama maa maqa maaqanakinaa fasiqa anaasee asasidaqa. Anee andeeqara oosanannoo rakisi nimaqee mariananoo.
PSA 48:11 Oo Anutu, ani rainara ufa andeeqarafa marinara, Sioona aaqanasaa mariasa asasiaqa. Yuda maqa maaqakinaa maqusakiaqa mariasa faqa nasuriaqa.
PSA 48:12 Innee Anutuna faiqi namu Sioona aaqana fiqu fiqummasee qafaaqa, ooni faandaamura auquqoona amiqimasee qafeeqa asaanaruaqa.
PSA 48:13 Mina faandaamura ooru ree qumuree qiranakiaqa qafamaqaraasammasee kasooaqee inaaqianna kambiqainausa mi faandaamuranara qimannimiaqa.
PSA 48:14 Maa Anutufa naaru naaru innisaimbaqa Anutufa maridanoo. Mifa naaru naaru maasa qifiqee aana uqaqifiqanoo fuannoo.
PSA 49:1 Maa ufana aiqamausa iriaqa. Aiqama maa maqa maaqanaki mariasa amiqimmasee iriaqa.
PSA 49:2 Aiqamausa uriqararausa faqa ureeqarausa faqa ainaina faqaasa faqa kudi fasiqa faqa, aiqama iriaqa.
PSA 49:3 Eeqá dookiqari irirana faqaasa ufa kai qianaura. Qini daunduraindaraa irirafa andeeqara irirana maree maria irirana nimiannoo.
PSA 49:4 Eeqá naamuaqira ufa quandasee qianaura. Qini quandara ufa piripuna aridaqa idinnai qimannimianaura.
PSA 49:5 Manda aukuana aninaqa qinee sia fifau rufiaanaura. Mandoosana maree mariasa qini fiqu fiqu iqa maridaqa mandaikamma qisararifaqa sia qinee minara rufiaanaura.
PSA 49:6 Mi aaqara fasiqausa nári ainainasaa kai mundidaqa, nári moomoo munnimma ainaina faqaasa marianara nári nimoo namoo qidaqa.
PSA 49:7 Maasa sia amana qeeqa maa maqanasaa kisaaqasaa marirana feefaurianaura. Maasa sia amana Anutuna munnimma amisee qeeqa marirana feefaurianaura.
PSA 49:8 Faiqí marirana feefaurirafa firaafa fiqaranoo maridanoo. Firaa feefauru tia aqinanoo faqa sia kai amanaikiannoo.
PSA 49:9 Sia amana feefauru Anutuna amisaifanoo maa maqanasaa kisaaqasaa marida sia kuquanee qiannoo.
PSA 49:10 Aiqamausa maa ainainna qafaidaqa. Irirana faqaasa misa faqa kaqi kuqifaranoo. Irirana siaisa faqa furufarirausa faqa aiqama amana amana kai kuqiqa nári ainaina mafi quqasaafaqa akaqausa maraidaqa.
PSA 49:11 Ooqai maqa misaindi marinau. Maqee faiqí madika fannoo misa maqusa maridanoo. Naaruara naaruara misa mi madikanaki kai marifaranoo.
PSA 49:12 Maasa uriqarara duqu fannoo sia amana kuqirana itita qimaqaannoo. Maasa kaqi aandaura foora kuquanauranoo.
PSA 49:13 Faiqí náriara uriqararausee qimasee náriara kai irimariasa, miqira fasiqa irirafa sia andeeqanoo maridanoo. Misa fifau nariqa ainainara asasidaqa misa faqa aandaura foora kai kuqidaqa.
PSA 49:14 Misa sipsipauqara foora kuqifaranoo. Misa kuqu fifanoo kuqirafa misa sipsipasaa rakisirafara foora misa rakisi nimaqaannoo. Andeeqara oosana maree mariasa doo misa kanaanaanara foora findifiqa manda oosana maree mariasasaa rakisifaranoo. Manda oosana maree mariasa kaqi maridaqa amiqira maaqaki mariinaqa kuqiqa sia minaki marifaranoo nianai madikaki maridaqa kai kaqi putaa ifaranoo. Misa miqiqa mariafaqa qinee sia misa naanna raidaqa.
PSA 49:15 Anutufa qini kuqira afeeka ameemaanaindaraana feefauru masainaqa asumu marianaura.
PSA 49:16 Faiqí moo fannoo firaaqoo ainaina moomoo faqaafaikinnanara sia minara irinanoo amuqusiani. Mina maaqa amiqirana firaana usakainara sia anee qinee faqa miqiaqaanee qia.
PSA 49:17 Mi ainainna faqaa fasiqa kuqinoo sia moo ainaina maree fuannoo. Mina qumiasana sia mina faqa madikaki ooqu fuannoo.
PSA 49:18 Mi fasiqafa kaqi maru kamuqoo moomoo amiqira ainaina faqaafa maridanoo mifa fifau nariara amiqi amiqiranaki maridee qimarinau. Mifa moomoo amiqira ainaina faqaafa marufaqa aiqamausa mina amooqi mariqau.
PSA 49:19 Ainaina faqaafa kuqinoo mifa faqa narí akeeku akaaku kuqiqa oonu mariaqoo fuannoo. Mifa miqoo oonu maridanoo sia kaifaa kaaqa qarana qafaannoo.
PSA 49:20 Maasa uriqarara duqu fannoo sia maasa kuqiranasaa itita qisaannoo. Maasa aandaura foora kaqi kai kuquanaura.
PSA 50:1 Afeeka faqaa Anutufa Yaaweefa maa maqa maaqanakinaasara nammeera qifaqa suqufuafanoo qimannimi marifa maridanoo. Suani oosanaindari faqa suani keeqee marinnaindari faqa nammeera qifaqa suqidaqa.
PSA 50:2 Sioonna maqusa kaaqa amiqirafa qareenarafa marifanoo Anutufa mi maqusanaki maridanoo akooqoo kaaqa qaidanoo rupannoo imarifa maridanoo.
PSA 50:3 Maasa Anutufa anireenoo sia ufa siaina marifa maridanoo. Ida fannoo mina afunni fidanoo fasafasimarifanoo fidanoo. Misaqa mina fiqu fiqu inoo mari ainainausa ufai aakuasaa innaarunai qirafa mifauqa kai firaaqoo ufa qidanoo.
PSA 50:4 Anutufa aiqama maqannaa suqu quqaseenoo misa ufa andeeqaani qimasee innaaruna faqa maqa faqa naaramasainaqa anireeqa Anutufa narí faiqí anaasee raina nimaqaaninna ufana irifaranoo.
PSA 50:5 Anutufa qidanoo, qiniki mapukusee maria fasiqa anaaseesa suqumaree moodaaqoo aniaqa. Aandau tatufiranannai qini faqa qima afeekaikirana qimimariasa misa qinee marunnannai moodaaqoo suqumaree aniaqa.
PSA 50:6 Innaaruna fannoo Anutunara maaqi qimasee kooroo idanoo. Anutufa narí kai andeeqarafa ufa raina nimaqee marifa maridanoo.
PSA 50:7 Anutufa kafaa maaqi qidanoo. Oo Isaraee maqannaa qini maqannaasa irifaqa inni mandoosanara kooroommasee qimannimianaura. Qinee Anutusa inni Anutusa maridaqa qimannimianaura.
PSA 50:8 Innee qimi maria ainainna faqa aandau tatufi mariana faqa maqee maqee qimimariana sia minara aanoo qidaqa.
PSA 50:9 Qinee sia inni aandauqa kinaana burimmakau akoonara dididanoo. Sia inni mimmi ququsakinaana moora dididanoo.
PSA 50:10 Nandaki maria kaasau aandausa aiqama qinindi kai maridanoo, maaqeena aandau aiqama aaqanasaa faqa maqa maaqaki mariasa qinindi kai maridanoo.
PSA 50:11 Aiqama ufiniuqa faqa qinindi kai maridanoo. Aiqama maqa maaqaki maria aandausa aiqama qinindi kai maridaqa.
PSA 50:12 Qinee Anutusa aandaura didi marinaqau sia inni qimannimunaiqini. Maa maqa maaqana faqa aiqama minaki mari ainainausa qinindi kai maridanoo.
PSA 50:13 Innee qiniara burimmakau akoona amaqi neemarifee fee qidaqee. Innee qiniara mimmi fidika faqa neemari fee fee qidaqee. Sia mina naidaqa.
PSA 50:14 Innee dufi dufi qirana kai tatufiranara foora qini Anutusa qimiaqa. Innee qini uriqarara afeeka faqaasara qima afeekaikammaqaa mau kai fuaqa.
PSA 50:15 Ummaara inniki kambiqafinaqa qini daaraifaqa qinee inni dadaaqianaqa innee quandakina qini qimooqiaqa.
PSA 50:16 Aaqara oosana maree mariasa Anutufa maaqi qimasee qimannimidanoo. Innee nanaree qini naamuaqira ufa nikaru qimasee naakapaidee. Innee nanaree qini moodaanaki kira ufa unnaqimasee inni nifaurusaaqari uridanoo fee.
PSA 50:17 Qinee andeeqa nimaqararunaqa nikooqee mariasa. Aiqama kari qini naamuaqira ufa rukiee mariasa mariafanoo.
PSA 50:18 Innee qummuari mari fasiqana qafamasee mina aqoondiki mariafanoo. Innee faiqí anaasee qummuari mariasa niqafamasee innee faqa minaki ootupee mariasa mariafanoo.
PSA 50:19 Inni noo fannoo manda oosanara qiranara kai rakisidanoo. Inni nifauru fannoo unna ufa qirara sia marammara ridanoo kaqi qimariafanoo.
PSA 50:20 Innee inneeqa nikaqaafasaa unnufannai misa ufa nimi mariasa mariafanoo. Innee oosana siainaki misara manda ufa qimariasa mariafanoo.
PSA 50:21 Innee mi manda oosana oosanausa auqee mariafaqa qinee Anutusa kaqi kasooiqa marunaqa innee qiniara Anutufa maasa daanna raidanoo manda oosanara sia ufa qidanoo fee qimariafanoo. Innee miqi qidaqa aaqee mariafanoo. Inni nifusaa akooqoo inni aaqaranara kooroomma nimianaura.
PSA 50:22 Innee qini Anutusara nikooqee mariasa maana iriaqa. Qinee inni mandaikamma nimaqaanaura. Sia moo fannoo amana inni dadaaqiannoo.
PSA 50:23 Qini Anutusa dufi dufi qirana tatufiranara foora suqa qimimariasa faqa qini ufamau fimariasa faqa qinee Anutusa qeeqa asumu marirana nimianaura.
PSA 51:1 Oo Anutu aneenna sia taikaaninna amuqusirafa marinara irisee qini qifauama qisaa. Aneenna firaa nifauarafa marinara irisee qini aaqarana akiiqara rukaqisaa.
PSA 51:2 Qini manda oosana findaukamaqisaa. Qini aaqarana nammari uqu taika qisaa.
PSA 51:3 Qinee qeeqa aaqaranara iridaqa. Qini manda oosana fannoo naaruara doorinni marinaqa sia qaunuanaura.
PSA 51:4 Oo Anutu qini aaqarafa ani kai mandaikamma amaqeeqa. Ani afusaa kai maa manda oosanna auqeeqa. Oo Anutu akooqoo ani qimamidaqa. Anee qini ufa qimiannana anee kuqaa andeeqarafa mariananoo. Anee ufa qimiannanannai qini aaqarana akiiqara iananoo.
PSA 51:5 Qini qinoofa qini maqa qisooqooqari numoo aanaaqi mariafanausa maridaqa. Qeeqa qinoona amuaquki mariafananoo aaqarana asumu qiniki marinau.
PSA 51:6 Oo Anutu faiqí naundarai anoona ufa kai marianifee qimarianafa mariananoo. Qini daundurai kukeeqaranaki aneenna irirana daamuaqia.
PSA 51:7 Anee qini anukama qisainaqa qinee anukaqa maria. Qini nammari uqusainaqa qinee eekara arira qasuruara foora qiqa maria.
PSA 51:8 Oo Anutu anee qini aaqarana akiiqara qini qimudaani raqeera foora maqaanaqa maridaqa. Anee qini aaqarana minni qisainanoo qini qimudaani kafaa ootupeera foora inaqa qinee asasianaura.
PSA 51:9 Aneenna afu tautasee qini aaqarana sia qafaa. Qini manda oosana aiqama rukaqisaa.
PSA 51:10 Oo Anutu qini qimuqusa fuka amiqira qimuqusa auqu qisaa. Qini daunduraki naaruara ani ufamau fira maraquna quqaqisaa.
PSA 51:11 Sia qini mareeqee aneenna mariannaqooqari aquqisaa. Aneenna naaquqara andeeqara maraquna qiniki marina sia maraqua.
PSA 51:12 Qinee ani asasira asumu mariranaki mariufaqa kaqinni ubeekaqa marunnana kaifaa mina qiminaqa asasia. Miqianana anee kaifaa ani ufmau fira didira maraquna qiminanoo qini dadaaqinaqa ani aidirana mau fua.
PSA 51:13 Anee miqinaqa qinee aaqee mariasa ani andeeqara aana uqannifiqaanaura. Manda oosana maree mariasa faqa irisee anee innannai quandaki ubeekeefaranoo.
PSA 51:14 Oo Anutu qini asumu marirana qimianna Anutufa mariananoo. Anee sia qini kuqa darua, anee ititaqisainaqa qinee firaaqoo asasida ani andeeqaranara idi raanaura.
PSA 51:15 Oo Yaaweefa anee qini doo raqasainaqa qinee qeeqa dookiqari ani amooqiranara kai koorooianaura.
PSA 51:16 Qinee ani Anutuna aandau tatufirana amianee runana anee sia didiifoo qianaqa minniseeqa. Qinee tatufirana ani amianee runana anee minara sia asasiananoo.
PSA 51:17 Anutufa narí amira ainainara akooqaidanoo. Qini tatufirafa qeeqa mara maree qumirafa maridanoo. Anee nariqa mara maree qumira oosana faqa faiqí nári mandainainakiqari quandara oosanara faqa sia akooqaidanoo.
PSA 51:18 Oo Yaawee aneenna amiqira iriranannai Sioona maqusanaasa amiqi amiqimmannimaqaa. Anee Yeerusaree faandaamura kafaa auqu uqeerasaa.
PSA 51:19 Auqu uqeerasainaqa miqooqari ani aminna ainainafa ani aidimarifa mariannoo. Aandau muduka tatufirana suqarafa oosana oosana ani aidirafa kai mariannoo. Miqoo misa burimmakau akoonauqa arusee tatufirana suqasee ani amifaranoo.
PSA 52:1 Oo amudaanai qimarianna fasiqa, anee nanaree aneenna manda oosana amooqidanee. Anee nanaree faasaambaasaana anee Anutufa aidimari fasiqa aanaaseesa mandaikamma nisaidanee. Anutufa mapukusee marira oosana fannoo naaruara marifa maridanoo.
PSA 52:2 Manda fasiqa anee mandaikamma nimaqarara kai tipundaari marianafa mariananoo. Afai keedaira foora raiqarafa unna ainaina kai inanuanafa.
PSA 52:3 Ani manda oosanara rirafa amiqira oosanara rimariannana uriqaranoo maridanoo. Ani unna ufa qiranara aidirafa anoona ufa qira aidirana uriaaqaranoo maridanoo.
PSA 52:4 Anee unna ufa qirara kai aidi marifa mariananoo. Anee faiqí mandaikamma nimaqara ufara kai aidi marianafa mariananoo.
PSA 52:5 Anutufa kuqaa uqanna anee mariannaqoo qaraana ani rarisameeqee naaru naaru kuridiranaki quqasaannoo. Mifa ani maaqakinaana qumara rarisameeqee ummaaraki quqaisaannoo. Mifa maa maqa maaqakinaana ani umareeqeenoo kuqiranaki quqaisaannoo.
PSA 52:6 Anutufa manda fasiqauqa kuridinnimaqainaqa andeeqee mariasa qafamasee rufieefaranoo. Misa mi manda fasiqausara naanaidara qifaranoo.
PSA 52:7 Misa mi manda fasiqanara maaqi qimasee uteeti qifaranoo. Maa fasiqafa sia Anutunasaa mundidanoo. Sia mina dadaaqianifee qidaqa. Narí moomoo ainainasaa mundinoo maridanoo, mifa narí firaa qumiasanara qini dadaaqiannoo fee qidanoo. Mifa narí manda oosanara qini itita qimaqaannoo fee qianoo
PSA 52:8 Qinee Davidisa sia miqimarunausa maridaqa. Qinee Anutuna amaana maqaki fuka oorifa saqariara foora ammunidaqa. Qinee naaru naaru Anutuna sia taikaaninna amuqusirana saqarikidaqa.
PSA 52:9 Qinee anee auquqoonna ainaina oosana qafamasee naaru naaru ani faiqí anaasee nifusaa dufi dufi qianaura. Qinee ani andeeqaranara kooroommasee qimannimianaura.
PSA 53:1 Furufari mariasa nári nimuqusakiqari maaqi qidaqa sia Anutufa maridanoo fee qidaqa. Miqi qimariasa oosana mandaika minoo maridanoo. Misa manda ainaina kai auqee mariasa maridaqa. Sia moo fannoo andeeqara oosana maraidanoo.
PSA 53:2 Yaaweefa innaarunaindari maa maqanasaa faiqí faiqi mariasa nindafaidanoo maaqi qimasee qimannimidanoo. Akaqausa amiqira irirana faqaasa maridee sia fee maridee. Akaqausa qini Anutusara randaidee sia fee randaidee qidanoo.
PSA 53:3 Aiqamausa quandaki kaqi runna fidaqa. Misoo maasoo amana amana kai mandaikiqa maridaqa. Sia moo fannoo andeeqarafa maridanoo. Sia uqanna.
PSA 53:4 Anutufa maaqi qimasee iraidanoo. Manda oosana maree mariasa irirana siaisee maridee. Misa qini faiqí anaasee ainaina qumuaramasaida minasaa maridaqa.
PSA 53:5 Miqi mariasa firaaqoo rufiee faranoo. Ooqai rufioona arusee maqee firaaqoo rufiqeefaranoo. Anutufa narí faiqí anaasee namuqaauqa naruseenoo misa nimudaani aiqama tinai modaa moodaa aqusaannoo. Anutufa mi namuqaasa ameesuqinaqa Isaraee maqannaasa misa naru nifaqaaqifara.
PSA 53:6 Qinee maaqi qimasee innaaru qidaqa Isaraee maqanaasa asumu marirafa Sioona maqusakiqari aniani. Anutufa Isaraee maqannaasa nári maqa maaqa faqa qumiasana faqa kafaa rairaamma niminaqa misa asasidaqa idireefaranoo.
PSA 54:1 Oo Anutu aneenna afeekannai qini mara amiqiranaki quqaqisaa. Aneenna firaa afeekannai qini rumbaranakinaana iduku qisaa.
PSA 54:2 Oo Anutu, qini innaaru qirana iria, qini dookinaa ufa iria.
PSA 54:3 Ramoo ramaa imariasa aniree qini dariraridaqa. Faiqí kuqa narimariasa qini marirana taika qimaqarara midaqa. Anutu ani ufara sia irimariasa qini dariraridammia.
PSA 54:4 Kuqaa Anutufa qini dadaaqi marifa maridanoo. Qini mariranasaa rakisi marifa Yaaweefa maridanoo.
PSA 54:5 Anutufa qini namuqaa qini mandaikamma qimaqee maria oosannana quandasee nariqa faqa mandaikamma nimaqaani. Oo Yaawee aneenna mapukusee mariranara irisee misa kuridinnisaa.
PSA 54:6 Oo Yaawee qinee aandau tatufirana ani suqa amirara dididanoo. Oo Yaawee ani auqu amiqirafa marinara ani amooqianaura.
PSA 54:7 Anee qini dadaaqiananoo aiqama ummaara fannoo sia qini rafaaqafinoo. Miqimma saanaqa qeeqa qifunnai qeeqa namuqaa aqufuana niqafeeqa.
PSA 55:1 Oo Anutu qini innaaruqirana iria. Qinee ani iramirianana sia aaqoosaa ititasee kaqinni oori rafusu aqua.
PSA 55:2 Anee qini ufa irisee dadaaqinnanara qima qimia. Qini ummaara irirafa qini daruaqaa midanoo.
PSA 55:3 Qini namuqaa qini mandaikamma qimaqarara sandanainai qidaqa. Mi manda oosanna maree mariasa qini rafaaqafu qimaqaidaqa. Misa ummaara mareeqee qinisaa quqaidaqa. Misa qiniara aanoo qimasee fidiqaamaqisaidaqa.
PSA 55:4 Qinee firaaqoo rufiee marunanoo mi irirafa qini kuqirafa qimaqaa idanoo. Kuquanna daaquqarafa firaafa daakinoo maridanoo.
PSA 55:5 Firaaqoo rufiee marunanoo daindiri raidanoo. Kuqira daaquqarafa qini rafaaqfinoo maridanoo.
PSA 55:6 Qinee nakipuruna miqirausa qiqoosa faqaasa maridau qaqamaree moosaa oonuree idooaranaki marini.
PSA 55:7 Qinee qaqamaree nianai faiqí sia mariannai maaqa marunaiqini.
PSA 55:8 Ufainamu faqa aakuasaa namufaqara foora namuqaa darimariafaqa ufini maridau kai kaqi mooatinai auqaanaira foora asooarannai fini.
PSA 55:9 Oo Yaawee anee qini namuqaa ufa qirana furufaramma nimaqa. Narirafa faqa aanooqirafa faqa qini maqusaki marinara miqimmannisaaneera qinee ani iraidaqa.
PSA 55:10 Eendaki faqa faasaana faqa maqusa faandaamura afaimau oonuree aniree idaqa manda ainaina faqa ummaara faqa uqeeraidaqa.
PSA 55:11 Kuridinnimaqara oosana fannoo maasa maqusaki aiqama tinai maridanoo. Narira ufa faqa unna qira ufa faqa maasa maqusaki aiqama tinai qumbiqanoo maridanoo.
PSA 55:12 Qini namuqaa qifasaasa ufa qimi naqau kaqi maraunaiqini. Qini namuqaa darirari faqau qinee miqooqari kukeeqafini.
PSA 55:13 Sia qini namuqaa fau miqidau anee qini fooqaa ira fasiqa qini qifaaqasaa qiqoondi fannoo qini qiqoonafa qiniara ueeqee mariananoo.
PSA 55:14 Maaqanda moomoosa faqa moodaanaki Anutuna amaana maqaki keeqafiqa amiqira ufa narí qimami narí qimami qimari qiafana.
PSA 55:15 Kuqirafa qini namuqaauqa tautumasee naruani. Misa kaqi marifaqa misa mareeqee kuqirausa marianaki quqaaqa. Aaqarafa misa maaqaki faqa misa nimuqusaki faqa marinara miqiaqa.
PSA 55:16 Qinee Anutuna aaraananoo mifa qini asumu maraannoo.
PSA 55:17 Eeneemarinaqa faqa kananaana faqa faasaana qambaana faqa qinee qeeqa aupuraranakiqari aaraananoo mifa qini ufa iriannoo.
PSA 55:18 Rakiranaki moomoo namuqaa darirariafanoo Yaaweefa minakinaana amiqimmasee qifiqaifaqa oonurandee qimaaqa anianaura.
PSA 55:19 Misauqa nári manda nirana sia minnisee andeeqarannai quandaidaqa. Misa Anutunara rufiarafa sia maridanoo. Anutufa naaru mariranakiqari uriqararafa marifa qini innaaru iriseenoo misa aupurarana nimiannoo.
PSA 55:20 Qini ooqeenaa qiqoondi fannoo narí aqoondiuqa naridanoo. Narí aqoondikira qima afeekaikira ufa rukiasee naridanoo.
PSA 55:21 Mina afaurusaa ufa fannoo fadameenara foora amiqi amiqi qimarifanoo mina amuqusaki qari rakirafa kai kambiqee marifa maridanoo. Mina ufa fannoo fadameenara foora farindaidanoo mi ufana anoona aseema miqirafa maridanoo.
PSA 55:22 Aneenna ummaara Yaaweenasaa quqasainanoo mifa aufadama amaqaannoo. Yaaweefa andeeqarausa mandainainaki aqufifanoo irinoo siamma mininnisaannoo dadaaqammiannoo.
PSA 55:23 Oo Anutu anee faiqí kuqa nárí mariasa faqa unna ufa qiqanuasa faqa sia asooqa qeefaranoo, fukasaa kuqifaranoo. Misa miqifaqa qinee ani kai saqarikinaura.
PSA 56:1 Oo Anutu, anee qiniara qimudaoo qia. Faiqí moomoo nimudaanai qimasee qini daru qifaqaa qidammia. Qini namuqaa aiqama kari qini qifaqasee dariraridammia.
PSA 56:2 Qiniara ataasataasa qimariasa faasaambaasaana qini daru qifaqaa qidammia. Moomoosa qini dariraridaqa.
PSA 56:3 Qinee rufiaunna kari Oo Yaawee, qinee ani kai saqarikidaqa.
PSA 56:4 Qinee Anutuna saqarikdaqa sia moo ainainara rufiaidaqa. Mina qima afeekaikira ufara irisee mina auqu quqeeraidaqa. Faiqí faiqi nana mandaikee maqimaqaifaqa sia qinee rufiaanaura.
PSA 56:5 Aiqama faasaana qini namuqaa ummaara qimidaqa. Misa maqee maqee qini mandaikamma qimaqarara kai iridaqa maridaqa.
PSA 56:6 Misa qini marirana nirana qiqafamasee qini darirara kukeeaqa maridaqa.
PSA 56:7 Oo Anutu, anee misa manda oosana akiiqara aupurarana nimia. Anee aneenna aanooqiranannai mimaqannaasa muqufisee rafaaqafunnisaa.
PSA 56:8 Oo Anutu qini qiki raqarana aneenna papiqaki akararua. Qini daukunu quminara papiqaki padimmasee akara rua.
PSA 56:9 Qinee ani aaraanana anee irisee qinaqa namuqaa sandeefaranoo. Anee miqinaqa qini Anutufa qini saaroo qidanoo fee qianaura.
PSA 56:10 Qinee Anutuna saqarikidaqa mina qima afeekaikira ufara amooqidaqa.
PSA 56:11 Qinee mi Anutunasaa kai qeeqa irirana rusidaqa. Faiqí faiqi nana mandaikee maqimaqaifaqa sia qinee rufiaanaura.
PSA 56:12 Oo Anutu qinee qima afeekaikiafanna ufanara irisee dufi dufi qirana aandau tatufiranara foora suqamianaura.
PSA 56:13 Oo Yaawee, qinee madika afaisaa oonuraunnana uqeera qisaannanara dufi dufi qira tatufirana suqamianaura. Qinee farindamaki saamurirara unana qini mara findifuma qisaananoo. Qinee ani Anutuna afusaa kaqi marira kaaqa qaranasaa nuaneera mara findifuma qisaananoo.
PSA 57:1 Qiniara qimudaoo qimisee dadaaqiannee qidaqa. Oo Anutu qiniara qimudaoo qimasee dadaaqia. Qinee anee iannannai dadaaqianeera animarunnanara irisee qimudaoo qia. Qinee ani aqoosa ameemaanai itita qisaina kuqirafa aiqaramafinaqa akoonnai anianaura.
PSA 57:2 Qinee Anutuna aiqama afeeka faqaana aaraidaqa. Qini didimari aiqama ainainna qimimari Anutuna aaridaqa.
PSA 57:3 Mifa innaarunaindari qini innaaru qirana iriseenoo qini asumu maraannoo. Mifa qini mandaikamma qimaqee mariasa rafaaqafidanoo. Anutufa narí sia taikaaninna amuqusirana faqa narí mapukusee marira oosana faqa qini uqaqifiqaidanoo.
PSA 57:4 Qinee kaasau aandau raioonnara foora fiqu fiqu iqa mariana qambaanai maridaqa. Misa nifai fannoo feefara foora faqa faaqaanara foora faqa kaaqa aaruqirausa qambaanai maridaqa. Misa nifauru fannoo aseemara foora raiqarafa faiqí ateekee marisa qambaanai maridaqa.
PSA 57:5 Oo Anutu, aneenna uriqararana innaarunai uqannifiqaa. Aneenna qareenarana aiqama maqa maaqaki mariasa uqannifiqaa.
PSA 57:6 Qini namuqaa qini qiku ufana fufidammia. Qini daundurai rufiarafa marinara mapamidaqa. Misa qini qimaara madika indufuseeqa nariqa sia irirai nári indufuqaanaki nári kai doo aqufia.
PSA 57:7 Oo Anutu miqiqa maridaqa aniara irunanoo qini qimuqusa mapukinoo maridanoo. Minara qinee idi raidaqa ani amooqianaura.
PSA 57:8 Qinee findifiqa. Qinee piripuna faqa ufireena faqa arimariananoo iaqainanoo suani afu uruani.
PSA 57:9 Oo Yaawee qinee moomoo maqannaasa qambaanai kikiqamafi amooqianaura. Qinee moomoo fasiqa anaasee qambaanai idi raida ani amooqianaura.
PSA 57:10 Oo Yaawee ani maasara amuqusirafa firaatia innaaruna amana kai ooru maridanoo. Ani mapukusee marira oosana fannoo kudimanda mariqoo ooru maridanoo.
PSA 57:11 Oo Anutu, aneenna uriqararana innaarunai uqannifiqaa. Aneenna qareenarana aiqama maqa maaqaki mariasa uqannifiqaa.
PSA 58:1 Innee uriqararausa andeeqasee ufa nimidee. Innee anoona ufannai faiqí amana amana kai fee andeeqannimaqaidee.
PSA 58:2 Innee sia miqi mariafanoo. Inni nimuqusaki innee aaqaranara indeeindee imariafanoo. Innee maa maqa maaqanaki faiqí narira oosana kai nimi mariafanoo.
PSA 58:3 Aaqee mariasa maqannimaqoona kiqari kaqi runnai ubeekaqa maridaqa. Misa maqannimaqoona kiqari aaqaranaki kai fidaqa unnufa kai qidaqa.
PSA 58:4 Misa aaqara oosana fannoo ukadiqara foora faiqí anaasee ukaqa nimifaqa kuqidaqa. Misa moo sakani sia ufa irimari sakani fara foora ufa sia iridaqa.
PSA 58:5 (Akaqa maqannaasa sakani rakisi mariasa ufireena fuaqaafaqa misa ninuka aqidaqa. Davidifa faiqí sia ufa irimariasa mi sakanina kikiqa ususee niqinoo maaqi qinau.) Innee faiqí sakaniara foora ufireena fuaqaifaqa sia ufa irifaranoo. Ufireena akoofasa amiqimasee fuaqaifaqa mina faqa siamma irifaranoo.
PSA 58:6 Oo Anutu aaqee mariasa kaasau fainiara foora mariasa anee misa nifai rufidia.
PSA 58:7 Anee aaqara oosana maree mariasa nammari akooqoo qumida muqufi dadasindee mannisaa. Aanasaa mari ainainna nikunnai radamuandeemma nimaqaa.
PSA 58:8 Oo Anutu saina aaqee mariasa qoofi kuqufi putaa iandee iaqa. Kuqira faiqi maqasaasa sia kaaqa qarana qafaandee iaqa.
PSA 58:9 Faiqí kaqikaa saqari ateekaindee inoo kai kaqi Anutufa misa mandaikamma nimaqaannoo. Misa kaqi marifanoo Anutufa narí firaa arana qaranakiqari misa ufaira foora fuaqa aquannoo.
PSA 58:10 Misa manda oosana akiiqara Anutufa niminaqa, andeeqee mariasa mina qafamasee asasammifaranoo. Andeeqee mariasa misa fidikaki niku nammari uqifaranoo.
PSA 58:11 Faiqí mina qafamasee maaqi qifaranoo. Andeeqara marirana maree mariasa mi andeeqarana akiiqara nimirafa kuqaa maridanoo. Maa maqanasaa qaraasa andeeqasee rainee mari Anutufa kuqaa maridanoo, sia sia maridanoo.
PSA 59:1 Oo Anutu qini namuqaauqa nisaukukinaana maraquqisaa. Aiqama qini darirari mariasasaa ititaqisaa.
PSA 59:2 Manda fasiqa nisaukinaana maraquqisaa. Faiqí kuqa nári mariasa nisaukukinaana qini soodaaqammaqisaa.
PSA 59:3 Oo Anutu anee qafaa. Misa kukeeqafi qini darirara qipuraidaqa. Misa kaaqa aanoo qimariasa qini darirara suqidaqa. Oo Yaawee sia qini manda oosana akiaqarau dariraridau, kaqi fifau nariqa kai dariraridaqa.
PSA 59:4 Qinee sia aaqara oosanau maree fau. Misa sia minara irirai kaqi fifau qini darirara deedaqidaqa. Oo Yaawee, misa kai kaqi qini darirara deedaqidaqa rakisidaqa.
PSA 59:5 Oo Yaawee, aiqama afeeka faqaa Anutufa findifinana qini dadaaqia. Isaraee maqannaa Anutufa anee qumuree misa manda oosana aneenna afunnai qafaa. Findifinana Anutuna ufa sia iriasa ummaara nimia. Qini ueeqee mariasara sia qimudaoo qia, kaqi ummaara nimia.
PSA 59:6 Misa eendifaqa fainiara foora rairai qidaqa, manda ainaina uqeerarara qini maqusamau fiqu faiqu fiqa nidaqa.
PSA 59:7 Misa nookiqari nanee fididee. Misa nifauru nimaakiri qaseema miqirafa kai maridanoo. Misa nári manda ufara maaqi qidaqa. Yafee iriannoo fee qimasaidaqa kaqi fifau qidaqa.
PSA 59:8 Oo Yaawee, anee misa ufa irisee misara naanaidara qimariananoo. Anee aiqama mi manda maqannaasa ataasa ataasa qira ufa nimimariananoo.
PSA 59:9 Oo Yaawee, anee kai qini afeekaikamma qimaqasee rakisi qimaqee mariananoo. Anee Anutufa qini kukeeqara maqusara foora mariananoo.
PSA 59:10 Qini Anutufa qiniara amuqusi marifa qinee unnannai anireenoo dadaaqiananoo. Mifa qini namuqaa rafaaqafu nimaqainaqa qeeqa qifunnai niqafaanaura.
PSA 59:11 Oo Yaawee maasa ititaqisee marianafa qini maqannaasa mi manda maqannaasara qaunifoora minara sia aiqama naru taikaa. Aneenna afeekannai mi manda fasiqausa narunnifaqaaqa masainaqa auiqeera foora aiqama maqa maaqakinai oonuree aniree iqa nuaqa.
PSA 59:12 Misa nookinaa ufa faqa nifaurusaaqaraa ufa faqa aaqarafa kai maridanoo. Misa aaqara ufa faqa unna ufa faqa qimariana akiiqara mandaikiaqa. Misa nári noori uqeeree maria oosanafa ufaanara foora misa ninuka qumaraani.
PSA 59:13 Oo Anutu aneenna aanooqiranaki qari misa kuridi nimaqaa. Amiqimmasee kuridi taikasaa. Miqinaqa maa maqa maaqana atinni atinni mariasa minara iriseeqa oo Anutufa Isaraee maqannaasa rakisidanoo fee qifaranoo.
PSA 59:14 Eendifaqa namuqaa kafaa aniree fainiara foora rairai qidaqa mandainaina uqeerarara fiqu faiqu idaqa maqusamau nidaqa.
PSA 59:15 Misa nári naranara randaida oonuree aniree iqanida sia nimuaqu imarifaqa firaaqoo faaqa riqanidaqa.
PSA 59:16 Misa miqi mariafaqa qinee ani afeekara irisee idi raanaura. Oo Anutu, qinee firaa ummaaraki marunnana anee qini afeeka kukeeqara maqusa mariannanara qinee kananaana findifi ani maasara amuqusiranara idi raanaura.
PSA 59:17 Qinee qini Anutuna qini itita qimaqee mariannana amooqianaura. Anutufa firaaqoo qiniara aidi marifa qini afeeka kukeeqara maqusa maridanoo.
PSA 60:1 Oo Anutu, anee maasa minniqisaananoo. Anee maasa rafaaqafu qimaqaananoo. Anee maasa aanoo qima qimaqaananoo. Oo Yaawee, kafaa maasa iannai quandafi maasa dadaaqia.
PSA 60:2 Anee maqa kasiananoo maqa fannoo oo raqaidanoo. Anee maqa oo raqafina kafaa mafi titaa.
PSA 60:3 Anee maa aukuanna maasa afeeka ummaara doo uqaqifiqaananoo. Mi ummarana manda nammariara foora nimianaqa namasaafanoo narifanoo nifuai nifuai inoo.
PSA 60:4 Oo Anutu maasa aniara daaquqee marisa namuqaa maasa daru qifaqaa ifaqa anee firaka uqeerainnannai sandaifanoo namuqaa duru feefa nammari araannoo, miqifaqa maasa sia kuridianaura kaqi marianaura.
PSA 60:5 Oo Yaawee maasa innaaru qirana irisee aneenna afeekannai maasa asumu maraqisaa. Miqimmaseenana ani aidi maria fasiqa anaaseesa mandainaina kinaana asumu mariaqeera maraa.
PSA 60:6 Anutufa narí naaquqara uiqaana maqakiqari maaqi qinau. Qinee ufoona ridaqa Seekeemma maqa maaqa rainasee qeeqa maqannaasa nimianaura. Qinee Sukoota noopundu faqa miqi kai iqa qeeqa maqannaasa rainasee nimianauree qinau.
PSA 60:7 Kireeata maqa maaqa faqa Mannaseena maqa maaqa faqa qinindi maridanoo fee qinau. Eefaraimma maqa maaqa qeeqa qikiiqa afisi marunna afeeka qafeefara foora maridanoo. Yuda maqa maaqa fannoo qini uriqararausara uqannifiqee mari saunu fara foora maridanoo.
PSA 60:8 Qinee Anutusa Mooaba maqa maaqa mareeqee nammari difaanirara foora masee ooru dupimma nisaanaura. Qinee Eedooma maqa maaqa qiku aanaamu raipaqu quqee marunna maqa maaqafa ooreeqarafa mariannoo, miqiannanannoo qeeqaindika masaunnana kooroo ianaura. Qinee Firistia maqannaasa urinnaaqaramasee faaqa rumasee ufoona ruanaura.
PSA 60:9 Oo Anutu, yafee qini aana muquninaqee Eedooma maqannaasa afeeka faandaamuraki keeqafi naruanauree.
PSA 60:10 Oo Anutufa kuqaa fee anee maasa ameesa uquqiseenanee. Anee sia fee ooqai unnandee inana maasa rakira fasiqauqa faqa oonuree dadaqinnaree. Anee sia maasa rakira fasiqa namufaqa fidana dadaaqi mariananoo.
PSA 60:11 Anee maasa dadaaqinaqa maasa nári namuqaa narua. Faiqí faiqi dadaaqirafa sia amanaikiannoo.
PSA 60:12 Anutufa maasa dadaaqinaqa rakiranaki oonuree uriqaraanaura. Mifa maasa namuqaa rafaaqafu nimaqaannoo.
PSA 61:1 Oo Anutu, qini iki raqarana iria, qini innaaru qiranara aaqoo rammatinia.
PSA 61:2 Qinee moo maqa maaqai nianai oonu marunanoo qini qimuqusa mandaikimarifaqa ani aaraidaqa. Anee qini mareeqee afeeka kukeeqara maqusaki quqaqisaina asumu maria.
PSA 61:3 Nnaree anee qini faandaamurara foora qini ititaqimaqee marianafa mariananoo. Anee qini faandaamura marianaqa namuqaa sia amana qini rafaaqafifaranoo.
PSA 61:4 Qinee naaru naaru ani uriqarara naaquqara uiqaana maqaki marirara dididanoo. Ani aqoosa ameemaanaira foora mandaaqaanauree qidaqa.
PSA 61:5 Oo Anutu, qinee qima afeekaikira ufa ani qimamiafannanara anee irimmariananoo. Anee iriseenana ani auquara rufiee mariasa nimiraree qianna ainainna qini Dafidisa faqa qimiananoo.
PSA 61:6 Qinee Isaraee maqannaa karaambaiqa marunausa Anutu anee qini aukuana moomoo ootupamasainaqa qeeqa qinaiqimara qisaifaqausa nindafaanaura.
PSA 61:7 Oo Anutu anee qiniara naaruara qini qifusaa maridana Isaraee maqannaasa rakisi nimaqaannee qia. Anee aneenna amuqusirana faqa aneenna mapukusee marira oosanannoo faqa ititaqimaqaa.
PSA 61:8 Miqimarinaqa qinee naaru naaru ani auquara amooqira idi raanaura. Qinee ooqai aiqama faasaana ani amianauree qimasee qima afeekaika maqaafannamau fuanaura.
PSA 62:1 Qinee Anutufa qini asumu maraani feera kai afeesida maridaqa. Mifa kai qini asumu marirana qimidanoo.
PSA 62:2 Mifa kai qini itita qimaqaseenoo qini asumu marirana qimidanoo. Mifa qini afeeka kukeeqara maqusara foora marinara naaru naaru sia qini rakiranaki rafaaqa fifaranoo.
PSA 62:3 Oo qini namuqaauqa, naqumma kari fee qini darida marifaree. Innee qiniara nauraa ququsa rafaurinoo fifaiqanoo marindee irafee qimariafanoo.
PSA 62:4 Innee qinee uriqararaqoo marunnana qifeeqa maqasaa aqirara ufa qimariafanoo. Inni unnufara kai nididanoo. Inni nookiqari unna qimasee Anutuna amooqira ufa qimariafanoo, inni naunduraki manda niqurara ufa kai umbiqanoo maridanoo.
PSA 62:5 Qinee Anutuna kai mandaaqaidaqa. Qeeqa irirana minasaa kai munduqaqee maridaqa.
PSA 62:6 Mifa kai qini itita qimaqaseenoo qini asumu marirana qimidanoo. Mifa kai qini afeeka kukeeqara maqusara foora marinara sia qini rakiranaki rafaaqa fifaranoo.
PSA 62:7 Qini asumu marirafa faqa qini uriqarara duqu faqa Anutunakiqari kai qiniki anidanoo. Mifa kai qini itita qimaqee marifa maridanoo, mifa kai qini auqaana maridanoo.
PSA 62:8 Innee qini qiku qisauku aiqama kari Anutuna kai saqarikiaqa. Inneeqa aiqama ummaarara mina qimamiaqa. Maasa mifinnai oonuree kai asumu marianaura.
PSA 62:9 Aiqama faiqí faiqi fifau naidoora foora maridaqa. Nuqu faqaasa faqa ooreeqarausa faqa moodaakarirausa fifau ainainara foora maridaqa. Anee misa uqaki rumaseenana sikeerasaa dirisee qafa, siara foorammiqa maridaqa. Naidoo ummaara fannoo misa ummaara uraaqaranoo maridanoo.
PSA 62:10 Innee sia rakirana faqa moona ainaina ummuara mararana faqa saqarikiaqa. Inni ainaina moomoo kinaqa sia irirana minasaa rusiaqa.
PSA 62:11 Moomoo kari Anutufa maaqi qifaqa iriqa. Qinee Anutusa firaa afeeka faqaasa maridaqee qinoo.
PSA 62:12 Kafaa moo ainaina anee Yaaweefa maasara amuqusi marianafa mariananoo. Oo Yaawee anee kuqaa aiqamausa ainainirana akiiqara feefauru amana kai rainasee nimimarianafa mariananoo.
PSA 63:1 Oo Anutu, anee qini Anutufa mariananoo. Qinee doori kandamasee aniara randaida innaaru qidaqa. Qinee aadana maqa maaqai marunanoo nammariara didiara foora aniara dididanoo. Miqikaimmasee qini maa qifaaqafa faqa aniara nammariara foora aididanoo.
PSA 63:2 Ani naaquqara uiqaana maqaki ani qafaanaura, ani afeeka faqa ani qareenarana faqa qafaanaura.
PSA 63:3 Oo Anutu ani amuqusirafa maa maqee marunna marirana uriaaqaranoo marinara qinee ani auqu uqeeraanaura.
PSA 63:4 Qinee maaqoo kaqi marianna kamu aniara dufi dufi qianaura. Qinee qeeqa qisauku uqeeraseeqa ani innaaru qima amaqaanaura.
PSA 63:5 Qeeqa qimuqusannai amiqira naranara foora namasaananoo qini qimuaqu inaqa qinee asasira idinnai ani amooqianaura.
PSA 63:6 Anee ooqaindari qini dadaaqi marianafa mariannanara qinee qeeqa faiqara qaarisaa maridaqa aniara iridaqa. Eendamuqusai faiqarara andee qumooridaqa aniara kai iridaqa.
PSA 63:7 Qinee ani aqoosa ameemaanai maridaqa aniara asasira idi raanaura.
PSA 63:8 Qinee anisaa atooqaidaqa. Ani asauku uqannai asauku fannoo qini asumu maraidanoo.
PSA 63:9 Qini kuqa darirara imariasa aiqama kuqufi kuqirausa maria maqa maaqaki fifaranoo. Misa maqa ameemaanai kuqirausa faqa marifaranoo.
PSA 63:10 Misa duru feefa ooki keeqaifanoo kaasau aandau misa nipata neefaranoo.
PSA 63:11 Qinee Isaraee maqannaasa karaambaiqa rakiranaki uriqararana qimimarinara. Anutunara asasianaura. Aiqama Anutuna auqusaa kuqaa qima afeekaiki mariasa mina amooqifaranoo. Unna ufa qimariasa noo Anutufa ititannimaqasainaqa sia ufa qifaranoo.
PSA 64:1 Oo Anutu, qinee ummaaraki maridaqa, qini innaaru qirana iria. Qini namuqaa dariranara rufiaidaqa, anee qini marirana dadaaqia.
PSA 64:2 Manda oosana maree mariasa tipundaari mariasakinaana qini mareeqee kukeeqaqisaa. Aaqee mariasa faaqa fuisee qida qini darirari marianasaa faqa ititaqisaa.
PSA 64:3 Mi fasiqausa nári nifauru nimaakiri faaqaanara foora aaruqu maqaafanoo maridanoo. Misa ufa fannoo feefa dindasaa quqasee rakisiandee qini rakisi qimaqaidaqa.
PSA 64:4 Miqi maria manda fasiqausa qumee ooqa andeeqara fasiqa naridaqa. Misa rufiarana siaisa kaqi tautumaki naridaqa.
PSA 64:5 Misa nariqa suqufifaqa manda oosanara narí pooduqee narí pooduqee idaqa. Misa kukeeqara ufaana fufira oosanara amiqimmasee iriqaraasammasee maaqi qidaqa, sia moo fannoo maasa ufaana qafaannoo fee qidaqa.
PSA 64:6 Misa manda ainaina auqarara tipundaaridaqa. Misa nariqa tipundaariranara andeeqanoo maridanoo fee qidaqa. Faiqí faiqi kukeeqara irirafa farumara foora meemai uqnaurinoo maridanoo.
PSA 64:7 Anutufa mi manda faiqausa narí feefannai naruannoo. Dauni misa naru quqasaannoo.
PSA 64:8 Misa manda ufa akiiqara kuridi nimaqaannoo. Aiqamausa misa mi narirana niqafamasee boo firaa ainaina kambiqee maqi qifaranoo.
PSA 64:9 Misa aiqamausa misa narirana qafamaseeqa rufieeqa misa Anutuna ainainiranara iridaqa kooroommasee mina ainainiranara qimannimifaranoo.
PSA 64:10 Andeeqarausa Yaaweefa auqoo ainainara irisee asasifaranoo. Misa Yaaweenaki amiqimmasee marirana paqurifaranoo. Aiqama andeeqarausa mina amooqifaranoo.
PSA 65:1 Oo Anutu, anee maasa innaaru irimariannanara maasa Sioona maqusaki andeeqasee oonuree ani amooqidaqa ani amianauree qima afeekaika maqaafanna ainainauqa ani amianaura.
PSA 65:2 Faiqí anaasee aiqama maqa maaqaindari nári manda oosanara iriseeqa anee Anutufa iannannai ani faranoo.
PSA 65:3 Maasa mandainaina fannoo maasa dukunimma saifana anee Anutufa mina taikaqisaananoo.
PSA 65:4 Anutu anee rusandeesamummasee maraqaanausa ani asasiranaki maridaqa. Anee aneenna naaquqara maaqaki mariaqeera nifiqa quqasainausa asasiaqa. Maasa mi amaana maqanaki marunanoo ani amiqi amiqirafa maasaki qumbiqanoo marifaqa maridaqa. Ani naaquqara amaana maqaki marunanoo ani amiqi amiqirafa minaki marifa maasaki qumbiqanoo maridanoo.
PSA 65:5 Oo Anutu, anee maasa asumu qimi marianafa mariananoo. Anee maasa aneenna naaquqara andeeqara ainaina auqee mariannanannai maasa qimaqimi marianafa mariananoo. Aiqama maqannaasa nianai atinni atinni mariasa faqa ooruku nammari dinni afainni mariasa faqa ani kai saqarikidaqa.
PSA 65:6 Anee aaqanauqa aneenna afeekannai auqu eeqee nári maqee mariaqoo quqanau. Miqunnanannoo aneenna afeeka uqannifiqanau.
PSA 65:7 Ani afeeka fannoo ooruku nammari kasinoo amakaurirana faqa rafaaqafusaifanoo mina kasirana faqa ufaqirana faqa daimafinoo. Faiqí anaasee tutuqirana faqa taikannimaqaananoo.
PSA 65:8 Aiqama maqannaasa anee auqee marianna ainainna qafaafanoo naaquqaidanoo. Suani ururee marinnai mariasa faqa suani keeqee marinnai mariasa faqa aiqama ainaina auqee marianna ainainna qafamasee mi aiqama maqannaasa naaquqaifaqa faaqa rumasee aniara asasidaqa.
PSA 65:9 Oo Anutu anee maa maqa maaqana rakisidana uqeena uqeenianifeera aaku firaana teeqiananoo. Anee miqiannanannai maa maqana ainookamma saananoo. Anutu ani nammariuqa qumbiqanoo maridanoo. Mi nammarifa maqa maaqa amiqimma saifanoo amiqira narana faíqí anaasee nimidanoo. Anee miqimmasee auqinau.
PSA 65:10 Oo Anutu, anee qiananoo aaku firaafa rinoo maqa uqeena uqeena masaifanoo afuqaki narana kambiqaidanoo. Anee aaku dunoonnannai maqa uqeena saananoo narana kambiqaidanoo.
PSA 65:11 Ani amiqirafa narana rairaamma qimaqee marifa maridanoo. Anee finnatinai miqikai inoo narana rairaa iannoo.
PSA 65:12 Andandaki aiqamatinai burimakau faqa sipsipa faqa umbiaqa maridaqa. Aaqanauqa faqa kaqikaa amuaqu namuqa faqa aaku rifaqa firaaqoo asasidaqa.
PSA 65:13 Firaa afaasasaa burimakau sipsipa moomoo qumbiqaidanoo. Noopunduki faqa sakumma ainaina moomoo kambiqeenoo aiqama noopundu titaidanoo. Aaku rifanoo aiqama ainaina asasidaqa idi raidaqa.
PSA 66:1 Aiqama maqa maaqaki mariasa asasidaqa firaaqoo Anutunara faaqarumasee amooqiaqa.
PSA 66:2 Idi raidaqa mina auqu qareenaranara kooroo iaqa. Qareenara amooqirana mina amiaqa.
PSA 66:3 Innee Anutuna maaqi qimasee qimamiaqa. Anee auqu quqoonna ainainafa kaaqa naaquqarafa maridanoo. Ani namuqaauqa ani uriqarara afeeka qafamasee aniara firaaqoo rufieeqa ani oorinni niqoori saunu araidaqa.
PSA 66:4 Aiqama maa maqa maaqanasaa qaraasa ani amooqidaqa. Misa ani amooqira idi raidaqa ani auqu uqeeraidaqa.
PSA 66:5 Innee aiqamausa aniree Anutufa auqeeu ainaina qafaaqa. Mifa naaquqara ainaina faiqí anaasee qambaanai auqanau.
PSA 66:6 Mifa ooruku nammariara qufanoo aadanusufufaqa maasa qikeeku qikaaku maqamau aandanasaa funara Anutunara asasiqau.
PSA 66:7 Anutufa naaru naaru narí afeekannai aiqama maqannaasa rakisinnimaqaidanoo. Mina afu fannoo aiqama maqannaasa auqee maria ainainna niuqidanoo. Ufa rukiee mariasa sia Anutuna aana itita amaqaaqa.
PSA 66:8 Innee aiqama maqannaasa maasa Anutuna amooqiaqa. Innee mina amooqirana firaaqoo uqeeraifaqa nianaindari faiqí anaasee iriaqa.
PSA 66:9 Mifa maasa marirana afeedammaqisaifaqa kaqi maridaqa. Mifa maasa mandainainaki aqufuanoora itita qimaqaifaqa sia aqufidaqa.
PSA 66:10 Oo Anutu, anee maasa qimanammasee qafaananoo. Siruaa tasirisiri masee apaapu maraquandee iananoo.
PSA 66:11 Oo Anutu, anee maasa mareeqee ufaanaki aruqisasee firaa ummaara tia maasa qitaufakaaqa daaku qimaqaananoo.
PSA 66:12 Anee namuqaara qianaqa misa nikunnai maasa qikiiqa radamia. Maasa ida qambaanaira foora faqa nammari aufi marinakiara foora faqa oosana oosana ummaaraki fimariafanana anee maasa mareeqee amiqiraqoo quqaqisanau.
PSA 66:13 Qinee ummaaraki maridaqa ani Anutuna oosana oosana qima afeekaikira ufa qimamiqiafana. Doo maqee mi qima afeekaikira ufana qimamiafannandee ianaura. Doo maqee qinee qima afeekaikiafanna ufanara qianaura. Qinee aandau tatufirana mara maree ani amaana maqaki minisee suqa amianaura.
PSA 66:15 Qinee sipsipa tatufirana suqamianaura. Qinee burimmakau akoona faqa mimmi faqa tatufirana suqa amianaura. Miqiananoo muna fannoo innaarunai ani aikiambu iannoo.
PSA 66:16 Innee Anutunara qeerairi mariasa mai aniraifaqa qini dadaaqinara qimannimia.
PSA 66:17 Qeeqa dookiqari dadaaqianifeera aareeqa, idinnai mina amooqiqa.
PSA 66:18 Qinee mandainainara fifau ainainee qimasee kaqi auqaunanoo Anutufa sia qini innaaru qirana iriqini.
PSA 66:19 Kuqaa Anutufa qini ufa irinoo, qini innaaru qirana faqa irinoo.
PSA 66:20 Anutufa sia qini innaaru qirana minniseenoo. Sia narí aiqama kari amuqusiranara qao qinoo. Minara mina auqu uqeerasee mina amooqiaqa.
PSA 67:1 Anutu anee maasara qimudaoo qimasee amiqi amiqimmaqisaa. Aneenna oori afiri kaaqa qarana maasiannai ubeekamasee dadaaqia.
PSA 67:2 Miqinaqa ani oosana aiqama maqa maaqakinaasa iriaqa. Aiqama maqannaasa ani asumu mariranara faqa iriaqa.
PSA 67:3 Oo Anutu aiqama faiqí anaasee ani amooqiaqa. Aiqama faiqí anaasee ani amooqiaqa.
PSA 67:4 Oo Anutu, anee faiqí anaasee aiqama amana amana kai andeeqasee rakisi mariannana faqa amiqimmasee naamua qimasee nifiqee fimariannanara faqa aiqama maqannaasa asasammasee idi raidaqa.
PSA 67:5 Oo Anutu faiqí anaasee ani amooqiaqa. Aiqama faiqí anaasee ani auqu uqeeraaqa.
PSA 67:6 Miqifanoo maqakiqari aiqama narana kambiqanoo. Kambiqainanoo Anutufa maasa Anutufa amiqi amiqimma qimaqaannoo.
PSA 67:7 Anutufa maasa amiqi amiqimma qimaqanau. Aiqama maa maqanasaaqaraa fasiqa anaasee minara uriqarara fee qimasee qeerairiaqa.
PSA 68:1 Anutufa findifinoo narí namuqaauqa mara furufaramma saifaqa daraania. Anutunara fidiaqaa imariasa mina oorisaaqari nisaurusee quqasee sandaaqa.
PSA 68:2 Aneenna namuqaauqa ufai idamuna fuaqa aqindeemma saina fifuaqa. Mandainaina maree mariasa ainoo ainaina idaki quqasaafanoora foora iqa Anutu ani afusaaqari tasirisirimma taikafuaqa.
PSA 68:3 Andeeqee mariasa asasidaqa ani Anutuna afusaa nasuriaqa. Misa faaqa rumasee asasiaqa.
PSA 68:4 Innee Anutunara idi raida mina auqu amooqirana amiaqa. Oonnamusaa ooqumarifi nimari Anutuna aana andeeqaa. Mina auqu Yaaweefa maridanoo. Mina afusaa asasiaqa.
PSA 68:5 Anutufa narí naaquqara amaana maqaki marifa fiaiqi faiqi rakisi nimaqaidanoo, adeedaana aanaaseeuqa faqa ummaaraki itita nimaqaidanoo.
PSA 68:6 Anutufa náriaraa mariasa mareeqee moo fasiqa anaasee nári faiqi kiaqeera nimidanoo. Mifa rumbaranaki mariasa idukusee nifieeqee amiqiranaki quqannisaidanoo. Anutuna ufa rukiee mariasa sia miqidaqa, misa manda maqa maaqaki marifaranoo.
PSA 68:7 Oo Anutu, anee ooqai Isaraee maqannaa aadana maqa maaqaki nifiqee finau.
PSA 68:8 Sinai aaqanasaa marunna Anutufa, Isaraee maqannaa Anutufa, anee ooqai Isaraee maqannaasa nifiqee funanoo maqa kasinoo aaku nammariara foora adianau.
PSA 68:9 Oo Anutu anee qunanoo aaku firaafa rufanoo ani maqa Isaraee maqa maaqa mandaikinoo marufa amiqinau.
PSA 68:10 Ani maqannaasa mi maqa maaqanaki oonu marufaqa akaqausa kudi marufana Anutu anee afaaridana misa narana niminau.
PSA 68:11 Yaaweefa faiqí anaasee naamua qufaqa aanaaseeuqa mi ufana mara maree aiqama maaqi qimasee qimannimiqau.
PSA 68:12 Kannaa maqannaa karaambaiqauqa faqa sundiauqa faqa anirandee sandama qaraasidammiaafoo qiqau. Miqi qufaqa Isaraee maqannaa aanaaseeuqa oonu misa rakiranaki maraqoo ainainausa marasee rainaqau.
PSA 68:13 Mi anaaseesa siruaannnai faqa koorannai faqa nifaaqa auqusoofanoo amiqira ufiniara foora inoo marinau. Misa nifaaqa fannoo siruaara foora daroo daraa ufanoo misa niqoosara foora koora fannoo kaaqa qee marinau. Miqi marufaqa akaqausa nanaree kaqi nariqa sipsipasaa rakisi mariqau.
PSA 68:14 Mi rakiranaki aiqama afeeka faqaa Anutufa karaambaiqauqa Saramoona aaqanasaa naru nindaqaaqa ufaqa fifainufanoo firaa oonnamuara misaqa aiqamai itita aqufinau.
PSA 68:15 Basana aaqana kaaqa uriqarara aaqana maridanoo. Miqoo moomoo kaqikaa aaqanauqa mina aaqa maridanoo.
PSA 68:16 Innee Basana aaqanasaa maria aaqanausa nanaree innee Sioona Anutufa mari aaqannara fifau ainainee qidee. Yaaweefa narí kai mi aaqannana utaaqamaseenoo naaruara mi aaqannasaa mariannoo.
PSA 68:17 Anutufa narí sundiauqa moomoo tauseenna afeeka rakira karauqasaa ooqufaqee marusa faqa Sinai aaqanaindari qumuree Sioona aaqanasaa narí uiqaana maaqaki keeqanau.
PSA 68:18 Anutufa Sioona aaqanasaa ooru fidanoo rumbarausa aana muqunufaqa ooru fiqau. Mifa miqoo ooru marufaqa faiqí anaasee akaqa ainaina Yaaweena mini amiqau. Yaaweena ufa ooqai rukieeusa misa faqa akaqa ainaina amiqau. Mifa miqoo mariannoo.
PSA 68:19 Yaaweena amooqimamaqaa. Maasa Anutufa maasa asumu maree marifa marina amooqiaqa. Mifa aiqama kari maasa ummaara dadaaqi marifa marinara mina amooqiaqa.
PSA 68:20 Maasa Anutufa asumu marirana qimimari Anutufa maridanoo. Yaaweefa maasa kuqiranakinaana asumu maree mari Karaambaiqafa maridanoo.
PSA 68:21 Anutufa narí namuqaauqa nikiiqa kuqaa uqanna radandamumma saannoo. Nári aaqara oosanaki afeekaikammandee fimariasa faqa radandamumma saannoo.
PSA 68:22 Yaaweefa maaqi qinau, inni namuqaa Basana maqa maaqaki mariana nifiqee anianaura. Ooruku nammari farumakiara foora mariana oonu nifiqee anianaura.
PSA 68:23 Innee inneeqa namuqaa narusaifaqa inni maqannaasa misa fidikaki niku reefaranoo. Fainiuqa nári nidiranasaa misa fidika neefaranoo.
PSA 68:24 Oo Anutu qini karaambaiqa. Anee moomoo fasiqa anaasee aana muqunimma maree aneenna amaana maqaki keeqararee qimarianaqa doo aiqamausa misa nindafaidaqa.
PSA 68:25 Idi ree mariasa indaaru fimarifaqa piripunna ari mariasa inaaqianna fuafaqa qambaana temberinna ari maria manaaqausa fidaqa.
PSA 68:26 Innee Isaraee maqannaa fasiqa anaasee suqiqa marianakiqari Anutuna amooqiaqa. Innee Yakooboona saaqari kambiqarausa innee Anutuna amooqiaqa.
PSA 68:27 Isaraee maqannaasa Beensamina akeeku akaaku qoodaa marusa indaaru fimarufaqa Yudana akeeku akaaku marusakiqari uriqararausa moomoosa faqa Seeburuna akeeku akaaku kiqari faiqí uriqararausa faqa Napatarina akeeku akaaku kiqari faiqí uriqararausa faqa misa ninaaqianna amaana maqai suqirannai ooru fiqau.
PSA 68:28 Oo Anutu anee aneenna afeeka maasa uqaqifiqaa. Oo Anutu, anee ooqai aneenna afeeka uqannifiqoonnandee kai inana maqee faqa uqannindiqaa.
PSA 68:29 Anee aneenna uriqarara amaana maqaki Yeerusaree maqusai mariannanara, moomoo maqanaa karaambaiqauqa kaqi nimimaria ainainnaa maree mini ani amifaranoo.
PSA 68:30 Firaa doona aqmauraqmauri marinaki mari kaasau aandaufa Isipa maqannaa karaambaiqa Faraoofa maasa darirarinana Anutu anee minara aanoo qimasee qaoo qia. Faraoona dadaaqimaria uriqarara fasiqausa aanoo qimaria burimmakau akoonausara foora kaiqeesa qambaana oonuree narirara ifana anee misara faqa aanoo qimasee qaoo qia. Anee misa mara muqufisainaqa misa siruaa mara maree mini ani amiaqa. Aiqama rakiranara rimaria maqannaasa anee misa naru nindaqaaqa masainaqa daraaniaqa.
PSA 68:31 Isipa maqanaa uriqararausa Anutufinnai ubeekarara anifaranoo, Eetoopia maqannaasa nisauku uqeerasee Anutunara innaaru qifaranoo
PSA 68:32 Oo innee maa maqanasaa mariasa innee Anutuna idi ramamaqaaqa. Yaaweena amooqira idi raaqa.
PSA 68:33 Anutufa ooqaindari mari innaarunasaa nimari Anutunara amooqira idi ramamaqaaqa. Mi Anutuna ufa firaafa innaarunai qiara foora qimarifa maridanoo.
PSA 68:34 Innee Anutuna afeekara koorooiaqa. Mina amiqira uriqararafa Isaraee maqannaasa rafaaqafu nimaqaidanoo. Mina afeeka innaarunai maridanoo.
PSA 68:35 Isaraee maqannaasa Anutufa narí amaana maaqaki marifa kaaqa naaquqarafa marinara rufiaaqa. Mifa uriqarara afeeka faqa eeraarirana faqa narí faiqí anaasee nimidanoo. Anutuna amooqiaqa.
PSA 69:1 Oo Anutu anee uqeeraqisaa. Nammariara foora qini ummaara fannoo rafaaqafinoo qinukaki ururaifaqa kaqi kaaqoo kuquanaura.
PSA 69:2 Qinee firaa doona poopoo qimarinakiara foora qiku utusaqa maridaqa sia afeeka maqasaa qiku raidaqa. Qinee nammari difukunaki aniraunanoo nammari aufirafa qini dukuniaqaa idanoo.
PSA 69:3 Qinee Anutufa dadaaqianifeera aaraida afeesida marunanoo qini daunda aadana usufifanoo qini ufa akieenoo. Aniara rakisida marida qifuanda rakee iqa.
PSA 69:4 Qiniara fidiaqaa imariasa qini qikiiqa asausi faqa arusee fiqaramasee maridaqa. Qini kuqa darirari mariasa fifau qini oosana siainaki namuqaakamma qimaqaidaqa. Misa qiniara moo ainaina fifau unnaqimasee ummuariaanoo qimasee mina akiiqara nimiannee qimasee sandanainai qiafaqa rufiaseeqa fifau qeeqa ainaina nimiqa.
PSA 69:5 Oo Anutu qini furufarira oosanara anee irimmariananoo, qini aaqarafa sia ani afusaa kukeeqanoo maridanoo, akooqoo maridanoo.
PSA 69:6 Oo Yaawee, anee qini dadaaqinaqa sia moo aaqaranaki aqufuanaqa ani ufamau fimariasa nisauruaqa. Oo uriqarara Yaawee aiqama afeeka faqaafa anee qini dadaaqinaqa aniara innaaru qimariasara sia manda ufa qimannimaqaaqa. Oo Isaraee maqanaasa Anutufa miqimma qimaqaa.
PSA 69:7 Oo Anutu, ani auqu raunnanara aasaandaana ufa qimi mariafaqa qini qisaurirafa qini rafaaqafuqaifaqa maridaqa.
PSA 69:8 Qinee ani auqu raunnanara qeeqa qikaqaafasaa nifusaa aanaamuruara foora maridaqa. Qeeqa qinoona faiqi namu nifusaa moo aanaamuruara foora maridaqa.
PSA 69:9 Qinee ani Anutuna amaana maqara didirafa firaaqoo idara foora qaidanoo. Ani Anutuna aquraree maria aqurararafa qinisaa faqa aqufinoo marifaqa maridaqa.
PSA 69:10 Qinee qeeqa mara maree muqusee narana auramasee marunaqa faiqí anaasee qini qiqafamasee aasaandaana ufa qimaqimaqaidaqa.
PSA 69:11 Qinee manda qammunna soofaara qammunnara foora afisuqaunaqa faiqí anaasee qiqafamaseeqa qiniara ataasa ataasa qimasee naanaidara qima qimaqaidaqa.
PSA 69:12 Aatata oonuree aniree idaqa qini qiqafee mandufa qidaqa. Afeeka nammari namasee furufari mariasa faqa qiqafeeqa manda idi qiniara raidaqa.
PSA 69:13 Qinee sia misa ufa irianaura aniara kai innaaru qianaura. Oo Yaawee, aneenna qinna kari qini innaaru akiiqara kafaa qiqa qimaqimia. Anee qima afeekaikammasee qini asumu maraanauree qunnanara irisee miqia. Anee sia unna qimarianafa mariananoo.
PSA 69:14 Doona poopoo qimarinakiara foora utusaqa maridaqa Oo Anutufa anee qini qumaree tatu qisainaqa sia minaki ooqu keeqafi minaki kuqua. Qini namuqaa nisaukukinaana maraquqisaa. Faruma firaanaki uqnauriranakiara foora aqufiqa marunnana umbaqi afainni quqaqisaa.
PSA 69:15 Oo Anutu anee qinanooo sia nammari qini dukuniani. Faruma uqnauriranaki sia qinee aqufiqa ukuqnaanaura. Sia qinee madikakiara foora aqufuana maqa fannoo mafi titaqisaani.
PSA 69:16 Oo Yaawee, anee aneenna amiqiranakiqari qini innaaru iria. Anee aneena firaa nifauaranakiqari qinee unnannai oori ubeekaa.
PSA 69:17 Oo Anutu, qinee ani ainainira faiqi marunnanara sia anee oori rafusu kaqinni aqua. Qinee firaa ummaaraki marunnanara dauni dauni qini irara ufa anoona qima qimia.
PSA 69:18 Oo Anutu, anee qini daaqa aniree qini namuqaa nisaukukinaana mara asumu quqaqisaa. Qini namuqaauqa darirarifana qini mareeqee kaqinni qisaa.
PSA 69:19 Oo Anutu, qini namuqaauqa anee niqafee mariana qiniara aasaandaana qirana faqa mandaikamma qimaqarana faqa qisaurirana faqa qimi mariafana anee iri mariananoo.
PSA 69:20 Qini aasaandaana ufa qimiafa qini qimuqusa raquruqiminoo marifaqa qini qifaaqaki aiqama ummooqukinoo marifanoo qini qifaaqa dadaaqirafa sia maridanoo. Qinee nimuqusiranara randauna sia moo fannoo qiniara amuqusirafa maridanoo. Qinee qimudao qira ufa qima qimaqarausara randauna sia uqanna maridaqa.
PSA 69:21 Qini daararaifaqa misa qini naranaki qumee adudu fooqaana minaki quqasee qimiafaqa nauna suka darifaqa minniseeqa. Qini nammariara didifaqa misa sukaqee mari nammarina qimiafaqa namasee qafeeqa minniseeqa.
PSA 69:22 Mi manda oosanna qimimariasa nariqa narana difaani fannoo nári quandaki kuridi nimaqaani. Misa nariqa mi firaa naaquqara oomaqafa nikuqamasaina aqufuaqa.
PSA 69:23 Misa nifu asukunaarusaina mikiqmakiqa nuaqa. Misa nitaufaka faqa rambaqasaina naaruara miqiqa mariaqa.
PSA 69:24 Oo Anutu, aneenna aranaqarana nammariara foora misasaa adiasaa. Ani aanooqirafa idara foora misa qama taikaani.
PSA 69:25 Misa maqa maaqa naakundu kai saaeemasaa. Sia moodaafa faqa nariqa uiqaana maaqaki mariaqa, naakundu kai mariani.
PSA 69:26 Anee Yaaweefa ani ufa rukiee mariana akiiqara anee maasa kaakadi darusaanausa namuqaa anireeqa aaqaidaqa misa kaaqmukaidaqa. Kaaqmukamaseeqa misa nári maqusai oonureeqa anee Yaaweefa maasa daruannanara aupuraunaqa ataasataasa qidaqa.
PSA 69:27 Oo Yaawee anee misa aaqarana akiiqara sia qaunua amiqimmasee iria. Misa ani Anutuna asumu marirana sia uqanna kaqikaana faqa maraaqa.
PSA 69:28 Oo Yaawee ani naaru marira papiqaki misa nuqu marina rukaa. Aaqee mariasa nuqu sia andeeqee mariasa nuqu namu faqa moodaanaki akara rua.
PSA 69:29 Qinee Dafidisa firaa didafirana faqa ummaara faqa maraidaqa. Oo Anutu, anee qini uqeerasee asumu marirana qimia.
PSA 69:30 Qinee dufi dufi qira idinnai mina auqu qareenaranara koorooianaura.
PSA 69:31 Mina mi dufi dufi qirafa burimakau sipsipannoo tatufirana suqami mariana uriaaqaranoo maridanoo. Muduka burimakau faqa sipsipa faqa aiku namufaqa aanai namu faqa tatufirana suqarana faqa uriaaqaranoo maridanoo.
PSA 69:32 Kudi fasiqauqa mina qafamasee asasammifaranoo. Innee Anutunara randeemariasa inni irirana afeekaikamma nimaqaannoo.
PSA 69:33 Yaaweefa kudi fasiqauqa innaaru qiana iridanoo. Isaraee maqannaasa namuqaa rumbaranaki mariafanoo Yaaweefa misara sia qaunidanoo misara faqa iridanoo.
PSA 69:34 Innaarunai mariasa faqa maqasaa mariasa faqa ooruku nammariki nimaria ainainausa faqa Yaaweena amooqiaqa.
PSA 69:35 Anutufa Sioona maqusa moo auqu Yeerusaree maqusaki mariasa misa namuqaasaa ititannimaqaannoo. Yuda maqa maaqakinaa maqusauqa rapeepaa inoo marinauqa kaifaa itipiannoo. Itipammasainaqa faiqí anaasee miqoo kaifaa maridaqa aiqama maqa mareefaranoo.
PSA 69:36 Isaraee maqannaasa Anutuna ainainira faiqiuqa, misa faiqi namu kambiqafinaqa mi maqusausa marasaifanoo maasaindi kamminoo marinaqa minaki marifaranoo. Mina auquara rimariasa faqa minaki marifaranoo.
PSA 70:1 Oo Anutu, anee qini mandainainakinaana mara aquqisaa. Oo Yaawee, kai kaqi aniree qini dadaaqia.
PSA 70:2 Qini marirana taika qimaqarara randeemariasa rafaaqafu saina nisauriranaki faqa furufariranaki faqa mariaqa. Qini ummaarara irisee asasimariasa mara quandasainaqa nisauruaqa
PSA 70:3 Qiniara uteeti qimariasa nariqa nisaurirana firaafa marina qafaifanoo firaaqoo naaquqaani.
PSA 70:4 Oo Yaawee anee iannannai ani mariasa asasidaqa nasuriaqa. Ani asumu mariranara nidimarisa, maaqi qiaqa. Yaaweefa uriqararafa maridanoo fee qiaqa.
PSA 70:5 Qinee Dafidisa qimudaani radukirausa marunausa saraui marunna fasiqausa marunnanara oo Yaawee anee sia qiniara qaunuananoo. Anee qini asumu maree marianafa faqa qini Anutufa faqa mariannanara kai kaqi aniree qini dadaaqia.
PSA 71:1 Oo Yaawee, anee itita qimaqaanneera anee iannannai anidaqa.
PSA 71:2 Anee andeeqarafa mariannanara qini dadaaqinana mareeqee kaqinni quqaqisaa. Aneenna aaqoo qinee iannannai rammatinimmandee irisee qini asumu maraa.
PSA 71:3 Oo Anutu, anee qini ooni faandaamurara foora faqa auqaanara foora faqa auquqisaina qinee minaki keeqafi asumu maria. Anee qini ititee marianna oonifa faqa qini afeeka kukeeqara maqusa faqa mariananoo. Anee qinaqa qinee amiqimmasee marianaura.
PSA 71:4 Oo qini Anutu, manda oosana maree mariasa nisauku kinaana faqa eendaandi mariasa nisauku kinaana faqa fitiqnarana qimimariasa nisauku kinaana faqa maraquqisaa.
PSA 71:5 Oo uriqarara Yaaweefa, qinee aniara kai aambeembeesida marunausa maridaqa. Kumaaraasaa qari ani kai saqarikii aafanausa maridaqa.
PSA 71:6 Qini maqoonakiqari qinee anisaa mundiqa mariafanausa maridaqa. Qini qinoofa maqaqisooqoooqari anee kai qinisaa rakisina aniifana maqee aniraananoo, minara qinee maqee maqee ani amooqianaura.
PSA 71:7 Moomoosa qini faqa qiniki kambiqoo ainainna faqa qafamasee iriqau. Minara anee kai qini afeeka kukeeqara maqusara foora mariananoo.
PSA 71:8 Aiqama faasaambaasaana qinee ani amooqidaqa ani qareenaranara koorooidaqa.
PSA 71:9 Oo Anutu, qinee asooqa qaanana sia qini maraquqisaa. Qini afeeka taikainana sia qini minniqisaa.
PSA 71:10 Qini namuqaauqa qini darirarammidaqa. Qini dariraree qimasee ufa suqidaqa tipundaaridaqa.
PSA 71:11 Misa qiniara maaqi qidaqa. Anutufa mina minnisaifanoo sia moo fannoo mina dadaaqirafa maridanoo, anifaqa mina afaqaseeqa qumaraanee qidaqa.
PSA 71:12 Oo Anutu, sia nianasaa maria. Oo qini Anutu dauni aniree qini dadaaqia.
PSA 71:13 Qini darirari mariasa anee Yaaweefa misa rafaaqafu nimaqasee kuridi taikannisaa. Qini aupurarana qimirari mariasa nisauriranaki faqa aupuraranaki faqa mariaqa.
PSA 71:14 Qini irirafa naaru naaru aniara kai aambeembeesida mariannoo. Qinee kaifaa kaifaa ani amooqima amaqaanaura.
PSA 71:15 Qini doo fannoo ani Anutuna andeeqarana faqa asumu mariranara faqa faasaambaasaana kooroo ianaura. Qinee mi andeeqarafa faqa asumu marirafa faqa fiqaranoo marifaqa ati kai iridaqa mina oosanara faqa ammuquara faqa sia iridaqa.
PSA 71:16 Oo uriqarara Yaaweefa qinee anee amudaanai qimasee auqunna ainainausara kooroo ianaura. Qinee ani andeeqaranara kooroo ianaura. Anindiara kai kooroo ianaura
PSA 71:17 Oo Anutu, anee qini kumaaraasaaqari oosana arasee aneenna oosana uqaqifiqana ani mariananoo. Qinee miqooqari anee firaa ainaina auqoonnanara faiqí anaasee kaqi kai qimannimiqa fidaqa.
PSA 71:18 Oo Anutu maqee qinee nauraiqi aandau aanaaqi maridaqa sia qini minniqisaa. Anee qini faqa marinaqa qinee naaru kambiqainausa faqa qimanimia.
PSA 71:19 Oo Anutu, ani andeeqarafa maqasaaqari innaaruna auqanoo maridanoo. Anee firaa ainaina auqunafa mariananoo. Oo Anutu yafee ani fooqaafa maridanoo fee.
PSA 71:20 Oo Yaawee, anee oosana oosana ummaara faqa aupurarana faqa qimimariananoo. Kasooqaqee anee kaifaa qini marirana ooqai mariundeemma qiseennaranoo. Anee qini kuqa dariranasaa itita qimaqeennaranoo.
PSA 71:21 Anee qini firaaqoo uqeera murufi qiseennaranoo. Anae kaifaa qini amiqi amiqimma qima qeennaranoo.
PSA 71:22 Oo qini Anutu, ani mapukusee marira oosanara piripunna aridaqa ani amooqianaura. Oo Isaraee maqannaasa naaquqara Anutufa, qinee piripunna aridaqa ani amooqira idi raanaura.
PSA 71:23 Qinee piripunna arida ani amooqira idi raidaqa firaaqoo asasianaura. Anee qini mandainainakinaana kaqinni mara quqaqisaannanara asasidaqa.
PSA 71:24 Qinee faasaambaasana ani andeeqaranara qimannimianaura. Qini didafirana qimirari mariasa anee rafaaqafu nimaqasee mandaikamma nimaqaannanara irisee ani andeeqaranara qimannimianaura.
PSA 72:1 Oo Anutu anee Isaraee maqannaa karaambaiqa aneenna amiqimmasee ufa irira oosana amia, aneenna andeeqara oosana faqa mina amia.
PSA 72:2 Mifa andeeqaranannai ani Anutuna faiqí anaasee ufa andeeqannisaani. Narí maqannaa nuqu siai fasiqa anaaseesa faqa amana amana kai andeeqasee ufa raina nimaqaani.
PSA 72:3 Miqi marinaqa misa maqa maaqa ainoo kinoo aiqama ainaina rairaaiani. Mi maqanasaa mariasa andeeqara oosana mareefaranoo.
PSA 72:4 Mi karaambaiqafa kudi fasiqa anaasee amana amana kai raina nimaqaani. Ainaina siaisa faqa ummaaraki marianasaa ititannimaqaani. Mifa nariara uriqararausee qimasee akaqausa rafaaqafi mariasa radamusaani.
PSA 72:5 Ani faiqí anaasee suani afu kaqi qeemarinaqa ani amooqiaqa. Quqoona faqa kaqi qeemarinaqa ani amooqiaqa.
PSA 72:6 Mi karaambaiqafa aakuara foora fuka afuqaki rifanoo aiqama andanda afu amifanoo raambandaariara foora iani. Mifa aakuara foora rinoo maqa uqeenuqeeniani.
PSA 72:7 Mi karaambaiqafa marianinna aukuana faiqí anaasee andeeqara oosana kai maraaqa. Quqoona kaqi qeemarinanoo reemindeemirirafa kai mariannoo.
PSA 72:8 Mina rakisinnimaqarafa dinni ooruku nammarinni oosanarasee dinni ooruku nammarinni amanasaa rakisinnimaqaani. Dinni ati fannoo Eeufarateesa nammarindari maqa maaqa atinni amanasaa rakisinnimaqaani.
PSA 72:9 Aadana maqa maaqaki mariasa karaambaiqa aninaqa mina oorinni kummarama fifaranoo. Mina namuqaa faqa mina qafamasee maqasaa aqufifaranoo.
PSA 72:10 Sipeena maqannaa karaambaiqauqa faqa kaqikaa afuma kiaqa maria karaambaiqausa faqa amiqira ainaina mara maree Isaraee maqannaasa karaambaiqa mini amifaranoo. Seebaa faqa Sibaa maqannaa karaambaiqauqa faqa amifaranoo.
PSA 72:11 Aiqama maqannaa karaambaiqauqa maasa uriqarara fee qimasee mina oorinni niqoori saunu areefaranoo. Aiqama maqannaasa mina ainainira faiqikamma fifaranoo.
PSA 72:12 Mifa kudi fasiqauqa nammeera qiafanoo iriseenoo dadaaqidanoo. Kudiki mariasa faqa dadaaqirana siaisa faqa misauqa aiqama dadaaqiannoo.
PSA 72:13 Mifa kudiuqa faqa ainainirana sia amanaiki marifaqa ummooquki mariasara faqa qimudaoo qimasee dadaaqi marifa mariannoo, sarau imariasa nimana faqa kuqiranakinaana maree marifa mariannoo.
PSA 72:14 Mi karaambaiqafa mi kudi fasiqausa faqa ummooquki maria fasiqausa faqa kuqa narirari maria fasiqausa nisaukukinaana mara kaqinni quqannisaannoo. Mifa misara uriqarara ainainee qimasee miqidanoo.
PSA 72:15 Mi karaambaiqafa kisaaqasaa mariani. Seebaa maqannaasa nariqa koora mi karaambaiqana amiaqanani. Aiqamausa maqee maqee Anutufa mi karaambaiqana dadaaqiani feera innaaru qimamaqaaqanani. Aiqama faasaana Anutufa mina amiqimma amaqaani.
PSA 72:16 Mi karaambaiqafa marinna kamuqoo mi maqa maaqanaki sakuma faqa uita faqa moomoo rairaa inoo mariani, kaqikaa amuaqu namuqasaa faqa narana kai itita fuani. Mina qaqama fannoo Reebanoonna maqa maaqakinaa saqari aanna reenoo moomoo qaqama ireenoo rairaaiani. Mi maqusausa kiaqa faiqí qumbiaqa mariaqa. Mi sakummana qaqama faqa uita qaqama faqa andandara foora sia kasoo mariani.
PSA 72:17 Mi karaambaiqana auquara naaru naaru sia aunuaqa. Mina uriqararafa aiqama kari suani afuara foora uridaa kai mariani. Aiqama maqannaasa mi karambaiqana amiqa amiqimma amaqoonandee inana maasa faqa amiqi amiqimma qimaqaannee qimasaidaqa qifaranoo.
PSA 72:18 Isaraee maqannaasa Anutufa moo auqu Yaaweefa, mina amooqimamaqaaqa. Mifa naríara maa idaaqira ainainausa auqee marifa maridanoo.
PSA 72:19 Mina areenara auqu naaru naaru amooqiaqa. Maa maqa maaqanakina aiqamai mina qareenarafa qumbiqanoo mariani. Kuqaa uqanna.
PSA 72:20 Qini Dafidisa Yeeseena amaaku marunausa doo qini innaaru qirafa taikeenoo.
PSA 73:1 Oo kuqaa Anutufa Isaraee maqannaasa amiqi amiqi marifa maridanoo. Anukara nimuqusa faqaasa amiqi amiqimma nimaqaannoo.
PSA 73:2 Manda oosana maree mariasa aiqama ainaina amiqifaqa nári nimoo naamoo qiafaqa qinee qafaunanoo qirana qaifaqa Yaaweena minnisaaqaa unanoo Yaaweenaki mapukiqa marunafa taikaaqaammidanoo.
PSA 73:4 Miqi mariasa sia nidafirana maraidaqa. Misa nifaaqa afeeka marifaqa sia dinee teeroo maraidaqa. Amiqirausa maridaqa.
PSA 73:5 Misa sia akaqausa naanna raidaqa, sia ummaara oosana oosana faisa maridaqa.
PSA 73:6 Misa noori uqeerasee ramooramaairafa misa ninukakinaa kukukakanara foora maridanoo. Faiqí narirana misa qamunnara foora nári nifaaqai afisuaqee maridaqa.
PSA 73:7 Misa nimuqusa kiqari oosana oosana manda oosana kambiqaidanoo. Misa iriranaki oosana oosana manda ainainara oonu auqee ani auqee idanoo.
PSA 73:8 Misa akaqausara naanaidara qidaqa mandainainara ufa qidaqa. Misa nári nimoo naamoo qidaqa akaqausa uriqaramafi rakisi nimaqaanauree qimasee tipundaaridaqa.
PSA 73:9 Misa innaarunai mari Anutuna manda ufa qimamaqaidaqa. Misa nári ufamau fuaqeera aanoommasee maqasaa fasiqauqa qimannimidaqa.
PSA 73:10 Minara Anutuna faiqí anaasee misiannai quandafiqa aaqaidaqa misa ufara anoonee qidaqa.
PSA 73:11 Mi manda oosanna maree mariasa maaqi qimasee unnaqidaqa. Anutufa maasa oosana sia iriannoo. Uriqarara Anutufa sia manda oosana paquriannoo fee qidaqa.
PSA 73:12 Doo qafaa. Mi manda oosanna maree mariasa oosana miqimminoo maridanoo. Misa maaqimmiqa maridaqa misa moomoo ainaina faqaasa maridaqa aiqama kari moo faqa moo faqa mara usidaqa.
PSA 73:13 Qinee misa nindafamaseeqa maaqi qimasee manda irirana qiqa. Fifau qinee andeeqaidee qidaqa. Qinee fifau aaqara oosanara qeerairi marunausee qidaqa.
PSA 73:14 Oo Anutu anee faasaambaasaana qini aupurarana qimimariananoo. Aiqama kananaana kananaana ummaara kai daridanoo.
PSA 73:15 Qinee mi manda aaqara ufana qidaqau ani Anutuna faiqí anaasee naanna sia raunaiqini.
PSA 73:16 Qinee mi oosana oosana marirana oosanara irianeera oonu mafi irunanoo kadaapi daridanoo.
PSA 73:17 Miqiqa maridaqa ani Anutuna amaana maqaki keeqafifaqa mi manda oosanausa maree mariasa nifaaqai kambiqaaninna ainainara iriqa.
PSA 73:18 Oo Anutu, anee mi manda oosanna maree mariasa mareeqee farindara maqasaara foora quqeennaranoo. Anee qinaqa misa mareeqee kuridiranaki aqifaranoo.
PSA 73:19 Misa tautummaki mandainainaki kuridiranaki aqufidaqa. Miqi mariasa manda kuqiranaki ooqu fidaqa.
PSA 73:20 Aaqee mariasa qainammasee findifinana qaunuannandee inoo misa marirafa kai kaqi taikaanoo. Oo Yaawee aneenna mariannaqooqari findifuanaqa misa mina qafamasee miqooqari doo sia siammafia.
PSA 73:21 Qinee manda oosana maree mariasa moomoo qumiasanara irunanoo qini irirafa suka qaifanoo qini qimuqusa mandaikinoo.
PSA 73:22 Qinee kaasau aandaura foora ani afusaa irirana siaisa furufarirausa maridaqa.
PSA 73:23 Miqiqa maridaqa ani aaqa aiqama kari marunana, anee qini qisauku uqannai qisauku qumaree qisaadaku imarianafa mariananoo.
PSA 73:24 Anee aneenna aamuaqira ufannai qini daamua qimaseenana qini itita qisamammaree munusee kasooaqee innaarunai qifiqa quqaseenana uriqarara duqu qimisainaqa ani faqa marianaura.
PSA 73:25 Yafee moo fannoo innaarunai qini qiqoondi maridanoo fee, sia moo fannoo maridanoo, anee kai. Qinee ani Yaaweena maraafannaqooqari nannee moo maa maqa maaqanasaaqaraa ainainara didiannoo fee. Aniara didirafa aiqama minauqa uriaaqaranoo maridanoo.
PSA 73:26 Qini irirana faqa qini qifaaqa faqa ummooquki marifanoo Anutufa qini afeeka maridanoo. Mifa qini faqa marifaqa qinee aiqama kari amanaikidaqa.
PSA 73:27 Ani nimeesa uqusee kaqinni fimariasa anee mandaikamma nimaqeennaranoo. Ani ufaki sia mapukusee kisaaqasaa mariasa anee misa aiqama kuridi nimaqeennaranoo.
PSA 73:28 Qinee sia miqidaqa, Anutuna aaqa mariranara qinee kaaqa amiqira fee qidaqa. Qinee uriqarara Yaaweena mara qeeqa afeeka kukeeqara maqusaikammiqa. Anee auqoonna ainainara aiqama kooroommasee qimannimianura.
PSA 74:1 Oo Anutu, anee nanaree maasa maaqi uqanna masee minniqisaidanee. Anee kisaaqasaafee aneenna faiqí aanaaseera aanooqinnaree.
PSA 74:2 Oo Anutu, anee ooqai Isaraee maqannaasa rusandeesamummasee maroonausara, misara amiqi mandee oonumafi iria. Anee maasa feefaurummasee aneenna maqannaasaika maqoona marianara oonumafi iria. Sioona aaqanasaa anee marunafa mariananoo, minara faqa oonumafi iria.
PSA 74:3 Anee mai aniree Yeerusaree maqusa rapeepaa iranauqa qafaa. Maasa namuqaauqa ani amaana maqa faqa rapeepaammaseea.
PSA 74:4 Namuqaauqa aniree kaasau fainiara foora faaqa ridaqa aiqama ainaina auku usidaqa. Misa ani biraka raipaqu quqasee nariqa biraka uqeera quqasee náriara uriqararausee qirana kooroo ianifeera miqiqau.
PSA 74:5 Namuqaa ani Anutuna amaana maqaki anireeqa nandakinaa saqari ateekeera foora ani amaana maqa ateekaateekamma quqaseea.
PSA 74:6 Misa saasuna qamma firaana faqa mara mareeqa ani amaana maqaki keeqafifaqa aiqama amiqira akara mari saqarisa ateekaa teekamma aquseeqa.
PSA 74:7 Misa ani naaquqara amaana maqa ida arasaafanoo aiqama qama taikeenoo. Misa ani Anutuna innaaru qimamaqee mariana faqa, rapeemmasaafanoo mandaika mafinoo.
PSA 74:8 Mi manda fasiqausa nariqa maaqi qimasee qimiriqa qiqau. Doo maasa misa amiqiuqanna masee radamusaanaura. Aiqama maqusa maqusa Anutuna amooqi maria amaana maqausa misa idarasoofanoo qama taikanau.
PSA 74:9 Maasa Yaaweenara daaqoo auqee mari ainainausa aiqama mandaikamma aqusaqau. Tamummaqara fasiqauqa qima qimirausa faqa sia maridaqa aiqama taikafia. Minara maasakiqari sia moo fannoo maa manda aukuanafa taikaaninnanara iridanoo.
PSA 74:10 Oo Anutu, kisaaqasaa fee namuqaa aniara naanaidara qifaree. Naaru naaru namuqaa ani auquara manda ufa kai fee qimarifaree.
PSA 74:11 Oo Anutu, nanaree anee maasa dadaaqirara akooqaidanoo fee. Nanaree aneenna asauku raqandaammasee maridanee.
PSA 74:12 Oo Anutu anee maasa ooqeenna karaambaiqa mariananoo. Anee maa maqa maaqanaki maasa moomoo kari mandainainakinaana mareeqee amiqiraqoo quqaqisee marunafa mariananoo.
PSA 74:13 Oo Anutu, anee aneenna afeekannai ooruku nammari qambaana rakeeunafa mariananoo. Ooruku nammariki mari firaa aandauna akiiqauqa anee rukaminau.
PSA 74:14 Anee ooruka nammarikinaa firaa aandau mina auqu Reefiatanee qimaruna mina aiqama akiiqauqa rukamuseenana aadana maqa maaqaki maru aandausa mina amaqi nimunaqa naqau.
PSA 74:15 Anee qunanoo maqakinaa nammari faqa nammariuqa faqa quminau. Anee aneenna afeekannai firaa nammariuqa aadanusunafa mariananoo.
PSA 74:16 Asukuna faqa faasaana faqa auqunafa mariananoo. Suani faqa quqoona faqa anee kai quqoonafa mariananoo.
PSA 74:17 Oo Anutu anee maqa maaqaki aiqama oosiranauqa quqanau. Aiqaiqa dumudumu qira aukuna faqa suara aukuana faqa anee kai auqu quqasoonafa maridanoo.
PSA 74:18 Oo Yaawee namuqaa aniara uteeti naakada qimarianara iria. Kisaaqasaa furufari mariasa aniara fifau ainaina fee qimasee ani auqu aquraraidaqa.
PSA 74:19 Oo Anutu, aneenna faiqí anaasee sia minninnisainaqa fitiqnarana nimimaria namuqaasa maasa daruaqa. Aneenna faiqí anaasee namuqaa nimimaria ummaaranaki kisaaqasaa mariasara sia misara qaunua.
PSA 74:20 Aneenna ooqai qima afeekaikunnanara minara maqee irisee maasa dadaaqia. Maa maqa maaqanaki narari nararirafa aiqama amannaunai faqa asukuna arirannai faqa qumbiqanoo maridanoo.
PSA 74:21 Oo Anutu anee ummaara ameemaanai mariasa dadaaqinaqa sia nisauriqa oofikiaqa. Kudi fasiqa anaasee faqa sarau imariasa faqa ani auqu amooqiaqa.
PSA 74:22 Oo Anutu, findifinana aneenna auqusaa titaa. Furufari maria fasiqausa faasaambaasaana ani oosanara uteeti naakada qidaqa.
PSA 74:23 Sia anee aneenna namuqaa ani auquara fidiaqaammasee faaqa fuisee qimarianara irisee qaunua, amiqimmasee iria. Ani namuqaauqa aniara tutuqirafa kaqikai fida marinara sia qaunua, amiqimmasee iriaa.
PSA 75:1 Oo Anutu, maasa aniara dufi dufi qidaqa ani auqu uqeeraidaqa. Maasa anee uriqararafa mariannanara kooroommasee qimannimisee kaifaa anee naaquqara uriqarara ainaina auqoonnanara faqa aiqamausa qimannimidaqa.
PSA 75:2 Anutufa maaqi qidanoo. Qinee ufa irira faasaana utaaqamaqaunanoo maridanoo, qinee andeeqasee amana amana kai raina nimaqara oosanannoo raina nimaqaanaura.
PSA 75:3 Maa maqa maaqanakinaa aiqama ainaina rufieeqa naindiri raifanoo maqa faqa kasinaqa qinee Anutusa kai mina oosana atukaramma qumaraananoo sia kaaqa mandaikiannoo.
PSA 75:4 Qinee manda oosana maree mariasa sia ramoo ramaa iaqeera qimannimidaqa.
PSA 75:5 Qinee maaqi qimasee qimannimidaqa. Innee sia inneeqa nuqu uqeeraseeqa qiniara sia fee qiaqa.
PSA 75:6 Raina nimaqara oosana fannoo sia suani oosanaindari fau sia suani keeqee marinnaindari fau sia dinni dinni ataaqeendari fau anidanoo fau. Sia moo fannoo suani dinni dinni ataaqeendari amana faiqí raina nimaqaannoo.
PSA 75:7 Anutufa kai faiqí rainee marifa maridanoo. Mifa kai moo mara maqasaa muqufi quqaidanoo, moo uqeerasaifanoo uriqaraidanoo.
PSA 75:8 Yaaweefa narí asaukuki narí aanooqira nammari taqu uaqee idanoo. Mi taqufa afeeka wainna mina aanooqirafa qumbiqanoo marina uaqee idanoo. Mifa mi nammarina adiasaifaqa aiqama manda oosana maree mariasa namaseeqa mandainainaki maridaqa. Misa aiqama nama taikaidaqa, sia atiti taquki kaqi mariannoo.
PSA 75:9 Qinee Yakooboona Anutunara naaruara naaruara koorooiqa fuanaura. Qinee Yakooboona Anutunara idi raidaqa amooqianaura.
PSA 75:10 Mifa manda oosana maree mariasa afeeka aiqama rauda nimaqaannoo. Andeeqara oosana maree mariasa afeeka moo faqa moo faqa nimiannoo.
PSA 76:1 Yuda maqannaasa Anutuna auquara iridaqa, Isaraee maqa maaqakina mariasa mina auqu uqeeraidaqa.
PSA 76:2 Anutuna uiqaana maqa Yeerusaree maqusaki maridanoo. Mifa Sioona aaqanasaa maridanoo.
PSA 76:3 Miqoo Yeerusaree maqusaki Anutufa namuqaa duru feefa saqari raudaandamma aqinau. Mifa saqari faqa saamu faqa oosana oosana rakira ainaina faqa aiqama itairaatairamma aqinau.
PSA 76:4 Oo Anutu, anee firaaqoo qareenarafa mariananoo. Anee aaqanasaa aneenna namuqaa rafaaqafuseenana aneenna uriqarara rupannoo irana namu faqa oorurandee qumuananoo.
PSA 76:5 Oo Anutu, anee ufa qunaqa sundiauqa nimudaanai qimarusa doo kuqufufaqa akaqausa misa aiqama ainaina raipaqu maraqau. Misa aiqama doo saara faiqaidaqa sia kafaa findi fifara. Misa aiqamausa rakira afeeka faqa akoofasaikirafa faqa sia nariqa dadaaqufaqa kuqiqau.
PSA 76:6 Oo Yakooboona Anutu, anee aanoo qianaqa rakira qoosauqa faqa qoosasaa ooqu marifi nimariasa faqa rakira afeeka taikafifaqa maqasaa aqufi kuqiqa maridaqa.
PSA 76:7 Oo Anutu, aiqamausa aniara rufiee mariafa mariananoo. Anee aanooqinaqa sia amana moo fannoo ani afusaa kikiqiannoo.
PSA 76:8 Oo Yaawee, anee innaarunaindari andeeqa nimaqara ufa qunaqa maqasaa fasiqauqa rufiasee ufa sia qirai madoodoonnama fiqau.
PSA 76:9 Akaqausa uriqararanannai rafaaqafu nimaqaafaqa aiqama maa maqanasaa anee misa dadaaqiraree qimasee findifi andeeqara ufa qunaqa aiqama irisee daimmafiqau.
PSA 76:10 Faiqí faiqi aanoo qirafa quandaki ani Yaaweena amooqirana moo faqa moo faqa amidanoo. Akaqausa mi rakiranaki sia kuqinausa ani ufa suqiranaki ani amooqifaranoo.
PSA 76:11 Innee inneeqa Anutuna Yaaweena amiraree qimasee qima afeekaika maqaa ainaina sia minnisaa, kuqaa mina amia. Adeedi maria anaamurusa innee faqa aqoondikira ainaina mina amiaqa. Anutufa qifaqa aiqama faiqí anaasee minara rufiaidaqa.
PSA 76:12 Mifa nári nuqu uqeeree maria uriqararausa mara muqufi rafaaqafidanoo. Mifa maa maqanasaa maria uriqarara karaambaiqausa naindiri rarana nimidanoo.
PSA 77:1 Qinee Anutunara dadaaqiannee qimasee faaqa riqa. Qinee faaqa rimarunanoo mifa iridanoo.
PSA 77:2 Qinee ummaaraki maridaqa Yaaweenara innaaru qidaqa. Eendaki kisaaqasaa qisauku uqeerasee innaaru qidaqa, sia daundura asooarana mareeqa.
PSA 77:3 Qinee Anutunara iridaqa aiaaee qidaqa. Qinee minara oonu mafi irunanoo qini daundura ummaara reenoo.
PSA 77:4 Eendaki Anutufa sia qini faiqarana qimifaqa qinee oonu mafi irunanoo ummaararaifaqa sia qini ufa qirafa maridanoo.
PSA 77:5 Qinee ooqai mariaafannanara iridaqa, mi aukuanna amiqimmasee mariaafannanara oonu mafi iridaqa.
PSA 77:6 Eendaki qinee iriqaraasida maridaqa. Qinee maaqi qimasee oonu mafi iriranakiqari qeeqa iraidaqa.
PSA 77:7 Anutufa naaruaree maasa minniqisaannoo fee. Sia fee kafaa naaruara mifa maasara aidiannoo fee.
PSA 77:8 Kuqaa fee maasara aidirafa taikeenoo fee. Mina maasara qima afeekaikirafa doo fee taikeenoo fee.
PSA 77:9 Anutufa narí nifauaranara doo fee qaunuseenoo fee. Mina aanoo qirafee mina maasara amuqusirana amaaqa maqanoo maridanoo fee.
PSA 77:10 Qinee mina iriseeqa maaqi qimiriqa. Maa ainainafa qini daundura ummaara qimidanoo, Yaaweena afeeka doo taikanoo mariifoo qidaqa.
PSA 77:11 Anee firaa ainainauqa auqoonnanara qinee oonu mafi irianaura. Qinee mifa faiqí sia amana auqaaqaa ira ainaina auqoonara irianauree qidaqa.
PSA 77:12 Oo Anutu, qinee anee aiqama ainaina auqoonnanara indee indee ianauranoo. Anee amudaanai qimasee auqoonnanara qinee oonumafi irianaura.
PSA 77:13 Oo Anutu, ani oosana fannoo kaaqa naaquqarafa andeeqarafa maridanoo. Unna anutusa sia maasa uriqarara Anutufara foora uriqaraqa maridaqa.
PSA 77:14 Oo Anutu, anee faiqí sia amana auqaaqaa ira ainaina auqunafa mariananoo. Anee aneenna afeeka aiqama maqannaasaki uqeera akooqoo kooroommasaanaqa qafeea.
PSA 77:15 Aneenna afeekannai aneenna aiku asauku ummaarakinaana maraananoo. Anee Yakooboosa Yooseefaasa nikeeku nikaaku maraananoo.
PSA 77:16 Oo Anutu, nammari fannoo ani qafamaseenoo rufiaseenoo, rakeeinoo. Ooruku nammari faruma meemai ooqu marifa faqa ani qafamasee aindirireenoo.
PSA 77:17 Oonnamu fannoo ani Anutunara rufiasee maqasaa aaku nammariara foora adianau. Innaarunai qirafa firaaqoo darara qufanoo aakuasaa fannoo idauruanda kai qifuki munu raqee mini raqee inoo.
PSA 77:18 Ufai namufaqa aaku namu faqa ifanoo ani Anutuna innaarunai qirafa minaki kambiqaifaqa iriqa. Ani aakuasaa fannoo aiqama maqa maaqai kaaqa qamannimaqeenoo, maqa fannoo aindiri raifanoo kasinoo.
PSA 77:19 Anutu ani aana firaa nammari ameemaanai maridanoo. Ani aana firaa nammari ameemaanai marifana mi aatata fuanaqa sia ani aiku amaaqa qafeeqa.
PSA 77:20 Mooseesa Aaroonasa rakisiraqanda maridaqa ani Anutuna faiqí anaasee sipsipasaa rakisirausara foora iqa nifiqee fiqau.
PSA 78:1 Oo qini maqannaasa, innee amiqimmasee qini ufa iriaqa. Amiqimmasee naaqoo quqasee qini ufa iriaqa.
PSA 78:2 Qinee quandara ufannai inni qimannimianaura. Qinee ooqeennaasa ufa oonukeeqee anikeeqee qirana qimannimianaura.
PSA 78:3 Maasa ooqai iriafanna ufana maasa qikausa qimaqimu ufana qimannimianaura.
PSA 78:4 Yaaweefa amiqira ainaina auqoonara faqa mina afeeka faqa mina naaquqara ainaina auqoona faqa maasa faiqi namu naaru kambiqainausa faqa qimannimianaura sia kukeeqaanaura.
PSA 78:5 Yaaweefa narí sanda ufa narí faiqí anaasee Isaraee maqannaasa nimisee, Yakooboona aiku asauku narí aauqira ufa niminau. Miqimmaseenoo maasa qikeeku qikaaku afeekaikammaseenoo qimanniminoo qinau. Innee inneeqa faiqi namu sanda ufa qimannimiaqa.
PSA 78:6 Innee inneeqa faiqi namu qimannimifaqa misa inaaqiana kambiqainausa quandafi qimannimiaqa, kafaa misa miqi kai iqa nári ninaaqianna kambiqainausa quandafi qimannimifaqa, misa aiqamausa qini sanda ufa iriaqa.
PSA 78:7 Miqinnanannai nári irirana Anutunasaa kai mundifaranoo, misa Anutufa auquqoo ainainnara sia qaunuaqeera mina sanda ufa kai afaqaaqeera.
PSA 78:8 Miqidaqa sia nári nikausa naanna raaqeera. Misa nikausa ufa rukiasee ramoo ramaa imarusa mariqau. Sia misa nári irirana Anutunasaa mundiqau. Misa sia Anutuna ufaki mapukusee mariqau.
PSA 78:9 Miqimarunara Eefaraimmana akeeku akaaku duru feefa mareeqa rakiranaki oonureeqa, fifau rufiasee oonurandee sandaqau.
PSA 78:10 Misa Anutuna moodaanaki kira ufamau sia andeeqasee fiqau. Mina sanda ufara nikooqoofaqa minnisee kaqi runna fimariqau.
PSA 78:11 Anutufa auqoo ainaina qaunuseeqa, mifa naaquqara ainaina uqannifiqoonara faqa qaunusaqau.
PSA 78:12 Misa nikeeku nikaaku nikausa noorisaa faiqí sia amana auqaaqaa ira ainaina uqannifiqanau, Isipa maqa maaqaki moo maqusa auqu Sooana mi maqusanaki maru afaasanasaa uqannifiqoonara faqa qaunusaqau.
PSA 78:13 Anutufa taatuqee ooruku nammari rakeemasee misa nifiqee aadanasaa finau. Mifa nammari rakeemandoofanoo, dinni dinni aaqanara foora inau.
PSA 78:14 Faasaanasaa mifa asurukiqari misa nifiqee finau. Eendaki ida fannoo kaaqa qamannimaqee marufaqa fiqau.
PSA 78:15 Misa nammari siaisaqa fimarufanoo Anutufa ooni afoommandeenoo nammari farumakinaanara foora moomoo nimufaqa naqau.
PSA 78:16 Anutufa oonikiqari nammariara ooqufuannee qufanoo nammari quminau, firaa nammari anoonara foora quminau.
PSA 78:17 Misa sia minara irirai kaqi kai aaqara oosana Anutuna afusaa maree mariqau. Misa aadana maqa maaqaki fidaqa uriqarara Anutuna afusaa ititammasee nári iriranamau mandainainaki kaqi fimariqau.
PSA 78:18 Misa Anutuna amanamasee qafaanee qimasee nariqa nidimari naranara innaaru qimariqau.
PSA 78:19 Sia mina kai, misa Anutunara firaaqoo amanammasee qafaidee qimasee maaqi qiqau. Amanee maa aadana maqa maaqanaki Anutufa narana qimiannoo fee.
PSA 78:20 Kuqaa Anutufa ooni arufanoo nammari firaafa quminau. Mi nammarifa firaa nammariara foora quminau. Kafaa amanee mifa narana faqa aandau faqa maasa narí maqannaasa qimiannoofee.
PSA 78:21 Yaaweefa misa ufa iriseenoo firaaqoo aanoo qinau. Aanooqidanoo ida radiqisoofanoo Yakooboona faiqi namu narinau. Mina aanooqirafa firaanaikinau.
PSA 78:22 Misa Anutunasaa sia nári irirana rusiqau. Misa Anutunara sia amana mandainainakinaana maasa asumu maraannoo fee qiqau.
PSA 78:23 Mifa sia minara irinau kaqi qasuru qimamufanoo innaruna kooqi atuanau.
PSA 78:24 Atuaseenoo mannaa feemu innaarunaindaraa narana sakuma fooqaana aakuara foora teeqimasoofaqa naqau.
PSA 78:25 Mikari Anutufa angiroouqa neemaru naranna nimufaqa naqau. Anutufa misa sia amana nama taikaaqaaira narana niminau.
PSA 78:26 Anutufa narí afeekannai qufanoo suani afu oosanaindari faqa dinni ataaqeendari faqa ufai uqinau.
PSA 78:27 Mifa ufiniuqa kookoommara foora misa teeqimma niminau. Ooruku nammari afaiqaraa nukudara foora ufini misa niminau.
PSA 78:28 Anutufa qufanoo ufiniuqa misa uiqaana maqusa qambaana faqa naambeeqaqara faqa teeqi teequfaqa naqau.
PSA 78:29 Teeqi teeqimmasoofaqa marasee noofanoo moomoo uqanna kaqi marinau. Misa faaqa rimarufanoo Anutufa moomoo uqanna nimufaqa misa namasoofanoo nimuaqu inau.
PSA 78:30 Mi ufini naranausa neemarufanoo sia nimuaqu inau, kaqi naida marufanoo Anutuna arana qoofanoo misa afeeka fasiqauqa kuqa narinau. Mifa Isaraee maqannaa amiqira kumaaraauqa narinau.
PSA 78:32 Misa mi aiqama ainaina tianaki Anutuna afeeka qafamasee sia mina saqari kiqau, kaqi aaqaranaki fimariqau. Misa Anutufa sia faiqí auqaaqaa ira naaquqara ainaina auqoonara irisee sia misa irirana Anutunasaa rusimariqau.
PSA 78:33 Mina akiiqara misa maa maqanasaa marirana naidoora foora fuaqasoofaqa kai kaqi taikaqau. Misa mandaikamma nimaqasoofaqa kuqirafa tautummasee misa qumaroofaqa kuqiqau.
PSA 78:34 Anutufa misa kuqa narufaqa kaqi marusa misa quandaki Anutufinnai ubeekaqau. Mifa misa kuqa narufaqa kaqi marusa noori runusee mifunnai ubeekamafi innaaru qimariqau.
PSA 78:35 Anutufa misa kuqa narufaqa nári oonu mafi iriseeqa, kuqaa Anutufa maasa ititaqimaqee mari fee qiqau. Uriqarara Anutufa maasa mandainainakinaana feefaurummasee dadaaqi marifammifoo qimariqau.
PSA 78:36 Misa sia nimuqusa ookiqarifau miqi qiqau. Misa fifau nookiqari kai Anutuna amiqi amiqidaqa miqi qimariqau. Misa nári nifaurunnai unnufa kai qimariqau.
PSA 78:37 Misa sia kuqaa uqanna Anutuna ufa afaqee marinau. Misa sia Anutuna faqa moodaanaki kammaqoo ufanasaa mapukusee mariqau.
PSA 78:38 Anutufa misa manda oosana qafamaseenoo, mina amuqusirafa qumbiqanoo marunara misa manda oosana akiiqara minnisanau, sia narinau. Moomoo kari narí aanooqirana rafaaqafuseenoo sia narí aanooqirana aiqama uqeeranau.
PSA 78:39 Mifa misara faiqí faiqi kai fee qimaseenoo irinau, misara kaqikaa ufai fuaqaifaqa kai kaqi taikee mariasee qinau.
PSA 78:40 Misa aadana maqa maaqaki naqumma kari fee naakapara ufara nikooqoofaqa aanooqimariqau, moomoo kari miqimariqau. Naqumma kari Anutuna amuqusa mandaikirana amimariqau fee. Moomoo kari miqimariqau.
PSA 78:41 Misa moomoo kari Anutuna amanammasee qafaqau. Misa Isaraee maqannaa naaquqara andeeqara Anutuna amuqusa mandaikirana kaifaa kaifaa amimariqau.
PSA 78:42 Misa Anutuna afeekara qauniqau. Mifa misa firaa ummaara ameemaanai mariuna kinaana maroonara faqa qauniqau.
PSA 78:43 Anutufa Isipa maqa maaqaki narí oosana uqannifiqoofaqa qafaqau. Moo maqusa auqu Sooana mi maqusanaki maru afaasanasaa faqa narí oosana uqannifiqoofaqa qafaqau.
PSA 78:44 Anutufa qufanoo nammari uqanna fannoo quandaki fidikaikinau. Miqimmafufaqa Isipa maqannaasa nammari naranara randoosia minnisaqau.
PSA 78:45 Mifa qufanoo faufaari oosana oosana kambiqafufaqa Isipa maqannaasa ukaqa nimidaqa aupurarana nimimariqau. Mifa eeqamoosara qufaqa anireeqa misa maqa maaqa mandaikamma nimaqaqau.
PSA 78:46 Anutufa qufanoo pandaaqa moomoo aniree misa ainaina aiqama nama taikaqau. Mifa qufanoo misa kadaapi rirafa aammaadi oo aamarai kaimbinau.
PSA 78:47 Anutufa qufanoo pupusamu aqufinoo misa waina sanda afuqakinaana ariisoofanoo aiqama aadana usu taikanau. Firaa suara namu faqa pupusamu namu faqa aninoo misa saqari qaqama neemaruna faafisa fooqaa irana aiqama mandaikammasanau.
PSA 78:48 Mifa qufanoo misa burimakau aina pupusamu aqufinoo aiqama narinau. Kafaa aakuasaa fannoo aiqama firimaru aandausa oosana oosana narinau.
PSA 78:49 Anutufa narí aanoo qirana faqa narí kaukaata qirana faqa narí aranaqaranara faqa faiqí nárí maru qangiroosa faqa idara foora niqiqoofaqa qumuree Isipa maqannaasa nariqau.
PSA 78:50 Mifa narí aanoo qirana sia rafaaqa finau. Misa nimana kuqiranaki firarufanoo sia rafaaqa finau. Mifa Isipa maqannaasa manda auriranaki quqasoofaqa kuqi mariqau.
PSA 78:51 Mi angiroofa Isipa maqannaa ooqa faiqiuqa aiqama naru raurukanau.
PSA 78:52 Anutufa narí maqannaa Isaraee maqanaasa sipsipara foora nifiqee finau. Mifa sipsipara foora aadana maqa maaqaki misa andeeqasee indaarunnikamma nimaqanau.
PSA 78:53 Anutufa amiqimmasee rakisi nimaqee marufaqa sia narira ainainara rufiaqau. Taatuqee nammari fannoo misa namuqaa aiqama dukuninau.
PSA 78:54 Anutufa misa nifiqamaree Kannaa maqa maaqai narí naaquqara maqa maaqai nifiqee oonuranau. Narí afeekannai maroo aaqannasaa quqannisanau.
PSA 78:55 Mi maqa maaqanakinaa aanaamuru damunamma aquseeqa maqa maaqa oosuseeqa Isaraee maqannaa faiqí oosana faiqí oosana rainannimufaqa maqa maaqa marasee nariqa maqasaa ooqu mariqau.
PSA 78:56 Misa mi aiqama ainainna qafamaseeqa quandakiqa uriqarara Anutunara amanammasee qafaqau. Misa sia mina naamuaqira ufa afaqaqau.
PSA 78:57 Misa quandaki nári ninaakusa naanna raida ufa rukiee mariqau. Misa eendaandira feefaraa foora aqusoofanoo fuadakamaki kaqinni fimariqau.
PSA 78:58 Isaraee maqannaasa unnaqira anutusa tatufirana suqa nimidaqa minannai Anutuna uqanna arana fundakiqau. Náriqa tumunnai auqira unna anutunannai mina arana qarana amiqau.
PSA 78:59 Anutufa misa oosana qafamasee misa aanoomma nimaqasee misa miniseenoo ameesa uqunnisanau.
PSA 78:60 Rakeemmeeqee aquseenoo Anutufa narí naaquqara uiqaana maaqa Siroo maqusaki maruna faqa minnisanau. Narí maasa qambaana mariu maqana minnisanau.
PSA 78:61 Mifa narí qima afeekaikira bookisa narí afeeka maruna namuqaa nisaukuki quqasoofaqa maree fiqau. Mifa narí bookisa narí afeeka areenarafa maruna mareeqeenoo namuqaa nisaukuki quqasoofaqa maree fiqau.
PSA 78:62 Mifa narí maqannasa Isaraee maqannaasa aanoomannimaqaseenoo misa namuqaara qufaqa akaqausa kuqa nariqau.
PSA 78:63 Misa kumaaraauqa rakiranaki kuqufufaqa maanaaqauqa marara fasiqa sia mariqau.
PSA 78:64 Misa amaana maqasaa aanaikirausa duru saamu ookina keeqafufaqa misa ninaaqmaaka rakirafa kaqi kai marufaqa náriara faqa rufiasee sia iki raqee mariqau.
PSA 78:65 Miqooqari Yaaweefa faiqaranakiara foora tautuma findifinau. Mifa afeeka fasiqa wainna nammari namasee afeeka marasee findi fuandee inau.
PSA 78:66 Findifinoo narí namuqaauqa narunifaqaaqa masoofaqa fiqau. Anutufa naru nifaqasoofaqa naaru marira nisaurirana marasee sia kafaa rakiqau.
PSA 78:67 Yaaweefa Yooseefaana narí amaaku Eefaraimmana faqa misa nikeeku nikaaku sia rusandeesamummasee maranau.
PSA 78:68 Yudana akeeku akaaku rusandeesamummasee maranau. Anutufa misa maqa maaqaki maru aaqanna misa auqu faqaa aaqanna Sioona aaqana narí aidi maru aaqanna faqa maranau.
PSA 78:69 Miqoo Sioona aaqanasaa Yaaweefa narí innaarunai maru naaquqara amaana maqana fooqaairana usakanau. Maa maqanara foora naaruara mapukusee marira maaqa usakanau.
PSA 78:70 Anutufa narí ainainira faiqi Dafidina rusandeesamummasee maranau. Mifa sipsipasaa rakisi marunakinaana maranau.
PSA 78:71 Anutufa Dafidina sipsipasaa rakisi marunakinaana mareeqeenoo Isaraee maqannaasa karaambaiqaika masanau. Anutu faiqí aanaaseesa sipsipara foora faqa rakisianifeera mara quqanau.
PSA 78:72 Miqooqari Dafidifa narí andeeqara iriranannai faqa narí akoofasaikiranannai Isaraee maqannaasa sipsipara foora indaarunnikamma nimaqanau.
PSA 79:1 Oo Anutu, aamina maqannaa aniara sia iri mariasa maasa maqa maaqaki doo aniree maasa ani faiqí anaasee faqa rakidaqa. Misa ani naaquqara amaana maqa putaammamaqeea. Yeerusaree maqusa rapeepaammaseea.
PSA 79:2 Misa ani aiku asauku aiqama narusee quqasoofaqa ufiniuqa aniree misa iri naqau. Kaasau aandau faqa ani maqannaasa naru quqasoosa nipata naqau.
PSA 79:3 Misa fidika Yeerusaree maqusamau nammariara foora umbiqanau. Misa nikundara fasiqa sia mariqau.
PSA 79:4 Maasa daaqa mariasa faqa maasa fiqu fiqumma mariasa faqa mina qafamasee maasara ataasataasa qimaseeqa naanaidara qidaqa.
PSA 79:5 Oo Yaawee, ani aanoo qirafa naaruaree mariannoo fee. Ani rairai qirafa naaru naaru idara fooree qaannoo fee.
PSA 79:6 Oo Yaawee, aneenna aanoo qirana aamina maqannaasa, sia ani auqu amooqi mariasasaa teeqia. Akaqa maqannaasa sia aniara innaaru qimariasa misasaa teeqiaqaana.
PSA 79:7 Misauqa maasa ani faiqí anaasee kuqa daridaqa. Misa ani maqa maaqa furufaridaqa.
PSA 79:8 Oo Yaawee, sia maasa qikeeku qikaaku aaqarana akiiqara maasa aupurarana qimia. Aneenna nifauara reendeeniranannoo kai kaqi maasa dadaaqia. Maasa oonumafi irirafa oorudupinoo marinara maasa dadaaqia.
PSA 79:9 Oo Anutu maasa asumu maree marianafa anee aneenna auqu qareenaranara irisee maasa aaqarana akiiqara minniqisainaqa maasa ani amooqianaura.
PSA 79:10 Nanaree akaqa maqanaasa maasara yaifee inni Anutufa maridanoo fee qifoora. Aneenna aiku asauku fidika akiiqara qimasee maasa qifusaa aupurarana niminaqa maasa qafaa. Misa ani ainainira faiqiuqa naruana akiiqara miqia.
PSA 79:11 Oo Yaawee, maasa qiku qisauku namuqaa rumbaranaki mariasa faaqari mariana iria. Namuqaa naruaneera ifana anee aneenna afeeka asaukunnai misa ititannimaqasee mara asumu mariranaki quqannisaa.
PSA 79:12 Oo Yaawee maasa daaqa mariasa ani manda ufa ami mariasa anee mina akiiqara dinni taikasee dinni ani qaaraqanda marasee kari misa nimia.
PSA 79:13 Anee miqimmasainaqa maasa ani faiqi namu, ani sipsipara foora aniara naaru naaru dufi dufi qianaura. Naaru kambiqainausa faqa ani amooqirana amifaranoo.
PSA 80:1 Oo Yaawee, anee Isaraee maqannaa sipsipasaa rakisirafara foora mariannanara maasa ufa iria. Anee maasa sipsipara foora rakisi marianafa mariannanara maasa ufa iria. Anee angiroouqa niqoosa faqaasa mariaqoo seerubimma mariaqoo miqoo anee Yaaweefa ooqu marifi marianafa mariannanara anee maasa ufa iria.
PSA 80:2 Eefaraimmana akeeku akaaku faqa Beensaminnana akeeku akaaku faqa Mannaseena akeeku akaaku faqa nifusaa koorooia. Aneenna afeekannai findi finana mai aniree maasa ummaaraki marunnana uqeeraqisaa.
PSA 80:3 Oo Anutu, anee kafaa maasa uqeera quqaqisaa. Anee maasara qimudaoo qinaqa maasa kaqi asumu marianaura.
PSA 80:4 Oo Yaawee, aiqama afeeka faqaa Anutufa, anee kisaaqasaa fee aneenna faiqí anaasee innaaru qiranara aanoo qinnaree.
PSA 80:5 Anee maasa naukunu kai naranara foora nimianaqa neeqa. Anee naukunu qumbiqanoo mari difaanina qimianaqa nammariara maqi neeqa.
PSA 80:6 Anee qianaqa maasa daaqa mariasa faqa maasa maqasaara tinoo taanoo ridaqa. Maasa namuqaa maasa qiqafeeqa ataasataasa qima qimaqaidanoo.
PSA 80:7 Oo Anutu anee kafaa maasa uqeera quqaqisaa. Anee maasara qimudaoo qinaqa maasa kaqi asumu marianaura.
PSA 80:8 Oo Anutu, anee maasa Isaraee maqannaasa wainna sandara foora Isipa maqa maaqakinaana maasa asumuanara mamaree anireenana maaqoo aiqama maqannaasa futeeqa aqusee misa maqasaa ummaquqoonausa maridaqa.
PSA 80:9 Anee saikammasee miqoo ummaqusoona mariifanoo kambiqafinoo maa maqa maaqana amanaikinoo. Mina atuka fannoo maqaki meemai uqanna keeqeenoo.
PSA 80:10 Mi sandafa firaanaikufanoo amuaqu namuqa faqa mina auqaanai mariqau. Firaa sidaa saqariuqa faqa mi sandana auqaanai kai mariqau.
PSA 80:11 Mi sandana dinni asaana fannoo firaa ooruku nammari mediteereenia afainni ooqu finau. Dinni asaana fannoo firaa nammari Eufarateesa nammari afainni amana kai finau.
PSA 80:12 Oo Anutu, anee nanaree mina ququsa rakeemmasaanaqee aatata fiqaree aiqaree inausa mina qaqama tiqinfaree.
PSA 80:13 Kaasau kuara fannoo nandakiqari aniree mi sandana nikunnai radamuseea. Kaasau aandau faqa aniree mina naidaqa.
PSA 80:14 Oo aiqama afeeka faqaa Anutufa, anee maasa iannannai quandaa. Innaarunaindari maasa qiqafaa. Ani wainna sanda marunausa qiqafamasee dadaaqia.
PSA 80:15 Anee qummaquqoonna afuqana qumuree qafaa. Ani wainna sanda anooka aneennara ummaquqoonafa afeekaikinoo maridanoo, qumu qafamasee dadaaqia.
PSA 80:16 Maasa namuqaa maasa Isaraee maqannaasa ani wainna sanda asaanara foora mariafaqa ateekasee idara saafanoo doo qamafinoo. Anutu anee aanoo qimasee misa kuridi nimaqaa.
PSA 80:17 Anee rusandeesamummasee maraqoonausa aneenna asaukunnai misa ititannimaqaa.
PSA 80:18 Miqimmandaina sia maasa anikiqari quandaki kaqinni sandaanauranoo. Anee marirana qiminaqa maasa kafaa findifi ani auqu ramasee ani amooqianaura.
PSA 80:19 Oo Yaawee aiqama afeeka faqaa Anutufa, anee kafaa maasa qifiqee aneenna iannannai ania. Anee maasara qimudaoo qinaqa maasa sia kuqua kaqi asumu maria.
PSA 81:1 Anutufa maasa dadaaqi marifa marinara faaqa rumasee asasida idi rama amaqaaqa. Yakooboona Anutuna amooqira idi raaqa.
PSA 81:2 Idi oosana arasee, temberinna namu faqa piripuna namu faqa ufireena namu faqa marasee aridaqa asasira idi raaqa.
PSA 81:3 Fuka quqoona anirainaqa sipsipa aanainnoo ufireena fuaqaaqa. Kafaa mi quqoonafa rufatee fatinaqa oomaqa sakasee naida ukeena fuaqaaqa.
PSA 81:4 Mi qoomaqa sakarafa Isaraee maqannaasa sanda ufara foora marinaqa aukuana aukuana naaru naaru miqifaranoo. Yakooboona Anutufa maasa qimu sanda ufafa maridanoo.
PSA 81:5 Anutufa Isipa maqannaasa naruseenoo mi sandufana Isaraee maqannaasa niminau. Qinee sia qafeemarunna fasiqana aunda irida.
PSA 81:6 Mifa maaqi qimasee qimanniminau. Qinee inni Isaraee maqannaasa nikumaaqa firaa ummaara akunnimaqaqoona afaimeeqee quqeeqa. Qinee inniara qunaqa inneeqa ummaara maqasaa afaimma quqaafanoo.
PSA 81:7 Innee manda aupuraranaki maridaqa qini Anutusa daaroofaqa qinee minakinaana inni mareeqee kaqinni quqannisa qiafana. Qinee qeeqa kukeeqara maqusa oonnamukiqari inni dadaaiqiafana. Innee Meeribaa nammari maruqoo marufaqa qinee inni nimanammasee qafaqiafana. (Meeribaa mi nammarina auqu oosana tinoo taanoo rira nammari fee qinau.)
PSA 81:8 Oo qini maqannaasa qinee inni aauqira ufa qimannimianaqa iriaqa. Oo Isaraee maqannaasa innee qini aauqira ufa iriaqa.
PSA 81:9 Innee sia moo unna anutuna amooqiaqa. Qini kai qimooqiaqa.
PSA 81:10 Qinee Yaaweesa inni Anutusa maridaqa. Qinee inni Isipa maqa maaqaindaraana nifiqee aniafanausa maridaqa. Innee minara iriseeqa qinee unnannai kai noo raqasaifaqa qinee kai inni narana nimianaura.
PSA 81:11 Qinee mi ufana amiqimasee qeeqa maqannaasa qimannimiafanaqa sia mi ufana iriqau. Isaraee maqannaasa sia qini Anutusa ufamau fiqau.
PSA 81:12 Qinee misa mumuqira oosana qafamaseeqa misa rafuseeqee nári nidimaru mandoosanaki aqiqiafana. Doo miqooqari misa nári nidimaru manda iriranamau fiqau.
PSA 81:13 Oo qini maqannaasa naqaa qini ufa iriaqaana. Isaraee maqannaasa qini aatata fuaqaana.
PSA 81:14 Misa miqifaqau qinee kai kaqi misa namuqaa rafaaqafusani. Misa qini ufa irifaqau misa namuqaauqa narini.
PSA 81:15 Isaraee maqannaasa qini ufa irifaqau qini Yaaweesara fidiaqaa imariasa qini doorinni firaaqoo rufiaidaqa niqoori saunu araaqini. Miqoo misa narirafa naaruara mariqini.
PSA 81:16 Innee Isaraee maqannaasa qini Anutusa ufa amiqimmasee irifaqau qinee amiqira narana sakumma ainaina nimunaiqini. Innee qini ufamau fifaqau qinee oonikinaana ookasaasa anoona adiafaa imarina nimunaiqini.
PSA 82:1 Anutufa innaarunai suqiranaki uriqaranoo maridanoo misa ufa andeeqannimaqaidanoo. Oosana oosana rakisirausa suqiranaki Anutufa narí irirana misa qimannimidanoo.
PSA 82:2 Innee Isaraee maqannaasa manda rakisirausa innee manda koota masaida sia amiqimmasee ufa rainee maria oosanna miqoo taikaaqa. Innee sia manda oosana maree mariasa manda oosana auqaaqeera fadameena akuaqa, miqi mariana taikaaqa.
PSA 82:3 Innee sarau imariasa faqa fiaiqi faiqiuqa faqa ititannimaqaaqa. Sarau imariasa faqa aupuraranaki mariasa faqa misa amiqimmasee mariaqeera dadaaqiaqa.
PSA 82:4 Manda oosana maree mariasa nisaukukina mariana mara kaqinni quqannisaaqa.
PSA 82:5 Maa maqanasaa maria siaasausa innee irirana siaisa eendaandirana oosana uqanna maraidaqa asukunakiara foora kai nimariafanoo. Inni mi manda oosannara andeeqara oosana fannoo maa maqa maaqanaki taikanoo maridanoo.
PSA 82:6 Qinee Anutusa misara maaqi qidaqa. Innee faiqí aanaaseesaa rakisira saika auqee mariasa Anutusara foora maqasaa uriaraqa maridaqa faiqí anaaseesaa rakisi mariafanoo. Innee aiqamausa qini uriqarara Anutusa faiqi namu mariafanoo.
PSA 82:7 Innee faiqí faiqi naannaree kaqi kuqifaranoo. Inni marirafa maqasaa karaambaiqauqa faiqi namu kuquafanoo misa marirafa taikaindee inoo inni marirafa taikaannoo.
PSA 82:8 Oo Anutu, aiqama maqannaasa ani faiqí anaasee marianara anee aniree misasaa rakisi nimaqaa.
PSA 83:1 Oo Anutu, sia ufa siaina kasoo ina maria. Sia anee kaqi muqurina maria.
PSA 83:2 Qafaa ani namuqaa rakirana uqeeraidaqa. Aniara fidiaqaa imariasa ninuka uqeerasee ani ramoo ramaamma amaqaidaqa.
PSA 83:3 Misa umee tipundaarammasee ani faiqí anaasee nariraridaqa. Anee itita nimaqee marianausa narirara tipundaaridammia.
PSA 83:4 Misa maaqi qidaqa. Anifaqa Isaraee maqannaasa naru raurukamasaanaqa sia mariaqa. Sia moo fannoo misara kaqikaaqoo iriaqeera doo naaruara misara qaunu saaqa.
PSA 83:5 Misa tipundaarammasee moodaa iriranasaa maridaqa. Misa ani Anutuna futeeqa aqiraree qimasee moodaanaki kidaqa.
PSA 83:6 Maaqimmasee maqannaasa suqu fifaqa namuqaakidaqa. Eedooma maqannaasa faqa Isamaeera maqannaasa faqa Mooaba maqannaasa faqa Hakari maqannaasa faqa Keebara maqannaasa faqa Amoonna maqannaasa faqa Amareeka maqannaasa faqa Firistia maqannaasa faqa Tiree maqa maaqaki mariasa faqa moodaanaki kammafifaqa misa Isaraee maqannaasa futeeqararee qidaqa.
PSA 83:8 Asiria maqannaasa Amoonna maqannaa faqa Moaba maqannaasa ooqeenaa niqoolndi mariusa aniree misaki ookaammafiqa Rootana aiku asauku dadaaqiqa Isaraee maqannaa namuqaa kamma nimaqaqau.
PSA 83:9 Oo Anutu, anee Midianna maqannaasa faqa Siseera maqannaasa faqa Yabina maqannaasa faqa Kisoona nammari afainni narunnandee maseenana misa aiqama naru taikaa.
PSA 83:10 Misa Eendoora maqa maaqaki fufana anee Isaraee maqannaasara qunaqa nifaqasee narusee sia nikundaqau. Doo kaqi miqoo quqasoofaqa putaa iqa madaapee kammafiqau. Oo Anutu, maqee maasa darirari mariasa miqi kai mandee narua.
PSA 83:11 Midianna maqannaasa Isaraee maqannaa narirarufanoo Gideeoonafa misa naru nifaqasee misa karaambaiqaqara Ooreebana faqa Seepana faqa miqanda narundee kai inana maqee maasa darirari mariasa Anutu anee narua. Mi maqannaasa uriqarara karaambaiqaqara Seepana faqa Saramuna faqa narundee kai masee maasa darirari mariasa narua.
PSA 83:12 Misa maaqi qimasee manda ufa qiqau. Maasa Anutuna aiku asauku Isaraee maqannaasa maqa maaqa qeeqara maraanauree qimasee oonuroofana anee misa uriqararausa narutaikanau.
PSA 83:13 Oo maasa Anutu, maasa darirara imariasa kookoommara foora fuaqa aqusainaqa nianai fuaqa. Ufai fannoo andanda fuaqa aqindee masaa.
PSA 83:14 Ida fannoo nanda qaindee inana maasa darirari mariasa nifaqasaina sandaaqa. Usau aaqana qumbiaramasaafanoo akara qaindee inana maasa namuqaa nifaqasainaqa sandaaqa.
PSA 83:15 Oo Anutu, anee aakuasaa faqa innaarunai darara qirana namu faqa nifaqasaina sandaaqa. Firaa ufai uqiranannai rufiarana niminaqa rufiasee sandamafuaqa.
PSA 83:16 Oo Yaawee, anee nisaurirana firaana naaku nimaqainaqa mina qafamasee quandaki ani afeekara anoonee qiaqa.
PSA 83:17 Maqee maasa darirari mariasa naaru naaru rafaaqafu nimaqasee rufiarana misa nimia. Misa firaa nisauriranaki maridaqa kuquaqa.
PSA 83:18 Oo Yaawee anee miqinaqa maasa darirari mariasa anee kai Yaaweefa mariannanara iriaqa. Aniara maa maqa maaqana firaa uriqarara rakisirafa maridanoomifoo qiaqa.
PSA 84:1 Oo aiqama afeeka faqaa Yaaweefa, ani amaana maqara kaaqa dididanoo.
PSA 84:2 Qinee ani Yaaweena amaana maqaki marirara dididanoo. Qinee Yaaweena amaana maqaki marirara indee indee idaqa. Qini qimuqusa faqa qifaaqa faqa ani kaqi marira Anutunara asasira idi raidaqa.
PSA 84:3 Oo aiqama afeeka faqaa Yaaweefa qini karaambaiqa qini Anutufa ufini moo fannoo saanoona fooqaafa ani Anutuna amaana maqaki keeqafinoo ani aandau tatufira qainda aaqa aanaamu usakaseenoo anaaqi maqaidanoo.
PSA 84:4 Oo Yaawee ani amaana maqaki mariasa firaaqoo asasidaqa aiqama kari ani amooqima amaqaidaqa.
PSA 84:5 Oo Anutu, anikinaa afeeka maree maria fasiqa anaseesa asasiranaki maridaqa. Ani amooqirara Sioonna aaqanai ooru firara nidi marisa misa asasiranaki maridaqa.
PSA 84:6 Yeerusaree maqusai ooru firaree qimasee afeeka aatata aadana aatata Bakaa noopundu runna ooru fufanoo mi maqa maaqafa moomoo nammari maqakiqari ururee marufaika mafinau. Aaku dunoonna ufanoo madikaki nammari mandi marinau.
PSA 84:7 Miqimmasee fimariasa afeekaika mafiqa Sioonna maqusa moo auqu Yeerusaree maqusai Anutufa aiqama unnaqira anutusa uriqararafa marina qafeefaranoo.
PSA 84:8 Oo Yaawee Anutufa, aiqama afeeka faqaa Anutufa, qini innaaru qirana iria. Oo Yakooboona Anutu anee aaqoo quqasee iria.
PSA 84:9 Oo Anutu, anee maasa Isaraee maqannaasa karaambaiqa maasa rakiranaki saqariara foora ititaqimaqee mari fasiqana amiqi amiqimma amaqaa. Anee mina rusandeesamummasee maraqoonafa maridanoo.
PSA 84:10 Moodaa faasaana ani amaana maqaki marirafa uriqararafa maridanoo. Wan tauseena faasaana kaqinni marirafa oorudupirafa maridanoo. Qinee qeeqa Anutuna amaana maqa kooqiki keeqarara dididanoo. Manda oosana maree mariasa maaqaki mariranara qikooqaidanoo.
PSA 84:11 Yaaweefa qareenara karaambaiqa maasa itita qimaqee marifa maridanoo. Mifa narí amiqira dadaaqirana faqa maasa duqu uqeerarana faqa mi qandannai amiqimma qimaqaidanoo. Andeeqara aatata fimariasa moo ainainara iraifanoo sia amiqira ainaina nimiranara qaoo qiannoo.
PSA 84:12 Oo aiqama afeeka faqaa Yaaweefa ani saqariki mariasa firaa asasiranaki maridaqa.
PSA 85:1 Oo Yaawee, ani maqa maaqara ani amuda qanau. Anee Isaraee maqannaasa kafaa reemindeemirimma nisanau.
PSA 85:2 Anee aneenna maqannaasa mandoosana akiiqara minninnisanau. Misa aaqarana akiiqara aiqama rukannisanau.
PSA 85:3 Anee ooqai aanoo qiqiunnana faqa aneenna qarana qarana idara foora qeeqeeuna faqa maqee minnisaananoo.
PSA 85:4 Oo maasa asumu marirana qimi marianna Anutufa, anee kaifaa maasa sooqbaandumeeqee quqaqiseenana aneenna oori runirana maasasaa marina taikaa.
PSA 85:5 Anee naaru naaru maasara aanoo qinnaree. Ani aanoo qirafa sia fee dauni taikaannoo fee.
PSA 85:6 Anee maasa kafaa afeekaikamma qimaqasainaqa maasa ani maqannaasa ani amooqianaura.
PSA 85:7 Oo Yaawee, aneenna maasara naaru naaru aidirana uqaqifiqaseenana aneenna dadaaqirana qiminaqa asumu marirana maraa.
PSA 85:8 Qinee Yaaweena Anutuna ufa iridaqa. Mifa maasa narí aiku asaukuara sia inneeqa ooqeennaa furufarira aatata kafaa fifaqa qinee qeeqa asooarana inni nimianauree qidanoo.
PSA 85:9 Yaaweefa nariara naaquqaifaqa qeerairi mariasa kuqaa asumu mararara deedaqinoo maridanoo. Miqinoo marifanoo mina dadaaqira marirafa maasa maqa maaqaki aiqama atinai mariannoo.
PSA 85:10 Miqimmafinanoo Anutufa maasara aidirafa faqa maqasaa qaraa fasiiqa mapukusee marira oosana faqa moodaanaki kifaranoo. Yaaweena andeeqara oosana faqa maqasaaqaraasa asooarafa faqa narí difaa difaa narí difaa difaa ifaranoo.
PSA 85:11 Maqasaaqaraasa Anutuna ufasaa nifu mundusee firafa innaarunai ubeekaifanoo innaarunaindari Anutuna andeeqarafa qumuree misa dadaaqiannoo.
PSA 85:12 Miqimmafinanoo Yaaweefa maasa amiqi amiqimmanimaqaannoo. Maasa maqa maaqaki nara ainaina rairaa inoo reemindeemiriannoo.
PSA 85:13 Andeeqara oosana fannoo faiqí moora foora Yaaweena afunni fidanoo mifa fuaninna aana afisidanoo.
PSA 86:1 Oo Yaawee, qinee afeeka siaisa, dadaaqirana siaisa marunnanara anee qini innaaru qirana irisee dadaaqinnanara anoona ufa qimaqimia.
PSA 86:2 Qinee qifu mundusee ani ufamau kai fimarunausa marunnanara kuqiranakinaana mara kaqinni quqaqisaa. Qinee ani ainainira faiqi ani saqariki marunnanara qini asumu mara quqaqisaa.
PSA 86:3 Anee qini Anutufa mariananoo, anee qini qifauama qimaqaa. Qinee faasaambaasaana aniara innaaru qimamaqaidaqa.
PSA 86:4 Qini innaaru qirafa anee iannannai kai oorufi marinara oo Yaawee, aneenna ainainira faiqi qini asasirana qimia.
PSA 86:5 Oo Yaawee, anee maasa amiqimma qisaseenana maasa numoo minni qisee mariananoo. Aniara innaaru qimariasara ani misara amuqusirafa firaafa maridanoo.
PSA 86:6 Oo Yaawee, qini innaaru qirana iria. Dadaaqianeera nammeera qimarunnana irisee dadaaqia.
PSA 86:7 Anee qini innaaru iri mariannanara qinee ummaaraki maridaqa ani aaraidaqa.
PSA 86:8 Anaamuruki unna anutusa moomoosa maridaqa sia moo fannoo misa qambaanai ani fooqaafa uriqararafa maridanoo. Sia moo unnaqira anutufa anee auqoonna ainainausa auqaannoo.
PSA 86:9 Oo Yaawee, aiqama maqannaasa anee auqu quqoonna maqannaasa, aiqamausa aniree ani afusaa niqoori saunu arafi ani amooqifaranoo. Misa ani auqu qareenarana amooqifaranoo.
PSA 86:10 Anee kai firaa afeeka faqaafa mariananoo naaquqara ainaina auqee marianafa mariananoo. Aneennaraa kai Anutufa mariananoo.
PSA 86:11 Oo Yawee, anee qiniara auqaannee qimarianna ainainna qima qimia. Miqimma sainaqa qinee ani ufamau mapukusee fua. Qini daamua qinaqa kaaqa andeeqasee ani ainainiranaki maria.
PSA 86:12 Oo Yaawee, qini Anutufa, qinee qeeqa qimuqusa aiqamannai ani amooqianaura. Qinee naaru naaru ani auqu qareenarana amianaura.
PSA 86:13 Anee qiniara amuqusirafa firaafa maridanoo. Anee qini maqa ameemaanai faiqí madikakinaanara foora marunnana mareeqee kaqi mariranaki quqaqisaananoo.
PSA 86:14 Oo Anutu, ramooramaa imariasa qini dariraridaqa. Kaaqa fidika ruqiee mariasa suqufifaqa qini kuqa darirara randaidaqa. Miqi mariasa sia ani Anutunara iridaqa.
PSA 86:15 Oo Yaawee, anee kaaqa amuqusi marianna Anutufa faqa kaaqa afaari marianafa faqa mariananoo. Anee sia dauni aanoo qimarianafa mariananoo. Ani maasara amuqusirafa faqa aniki mapukusee marirafa faqa fiqaranoo maridanoo.
PSA 86:16 Oo Anutu, qinee unannai quandafi qifauarana qimia. Qini qinoofa iundee kai iqa qinee faqa ani ainainira faiqi marunnanara aneenna afeeka faqa asumu marirana faqa qimia.
PSA 86:17 Oo Yaawee, anee qini amiqi amiqimma qimaqee mariannanara moo ainaina auqainnanannai uqaqifiqainaqa qafaa. Anee qini amiqi amiqirana faqa dadaaqirana faqa qiminaqa qiniara fidiaqaa imariasa nisaurifaranoo.
PSA 87:1 Sioona aaqanasaa naaquqarana saa Yaaweefa narí maqusa auqusee maridanoo.
PSA 87:2 Yaaweena Yeerusaree maqusara aidirafa aiqama Isaraee maqa maaqakinaa maqusauqara aidirna uriaaqaranoo maridanoo.
PSA 87:3 Oo Anutuna maqusa iria, mifa aniara amiqira ufa kai qidanoo.
PSA 87:4 Qinni ufa irimariasa nisaanariqa Firistia maqannaasa faqa Tiree maqannaasa faqa Eetioopia maqannaasa faqa mara Yeerusaree maqannaasa namufaqa moodaanaki quqasee nisaana ruanaura.
PSA 87:5 Sioona maqusara maaqi qifaranoo. Aiqama maqannaasara mi maqusaanaasee qifaranoo. Miqi qifanoo uriqarara afeeka faqaafa mi maqusana afeekaikamma saannoo.
PSA 87:6 Anutufa aiqama fasiqa anaasee nuqu narí papiqaki akara ruannoo. Misakiqari akaqausara narí ufa irimariasa Sioona maqusanaasa namufaqa nisaana ruannoo.
PSA 87:7 Sioona maqusaki maria fasiqa anaaseesa maaqi qimasee idi reefaranoo. Maasa aiqama amiqi amiqirana oosana Sioona maqusa maridanoo.
PSA 88:1 Oo Yaawee, anee qini asumu maree marianna Anutufa mariananoo. Faasaana anee dadaaqianneera innaaru qidaqa iki raqaidaqa. Eendaki faqa aniara innaaru qidaqa.
PSA 88:2 Qini innaaru qirana iria. Dadaaqianneera innaaru qimarunnana iria.
PSA 88:3 Qini oosana oosana ummaara darimarifaqa qusasaa kuquanaura.
PSA 88:4 Qinee kuqirari mariasa naanna raidaqa. Qini afeeka aiqama taika finoo.
PSA 88:5 Qini kuqirausa namu faqa rarisameeqee quqaqaafaqa maridaqa. Qinee faiqí kuqa naruqaasara foora madikaki maridaqa. Anee faiqí kuqufuasara sia iridana sia dadaaqi mariananoo. Qinee misara foora maridaqa. Ani rakisi qimaqaranakiqari nianai maridaqa.
PSA 88:6 Oo Anutu, anee qini mareeqeenana meemaqoo maqa ameemaanai madikakiara foora aqu qisaananoo. Asukunaki meemai uqanna aqu qisaananoo.
PSA 88:7 Ani aanooqirafa firaaqoo qini radandamu masaananoo, ooruku nammari amakau rinoora foora qini rafaaqafinoo.
PSA 88:8 Anutu anee qini daaqa qiqoondiuqara qianaqa qini minniqiseea. Anee qini mandaika uqanna maqisa saanaqa qini qiqoondiuqa qiniara rufieea. Qinee rumbaranakiara foora maridaqa sia amana idukuaki sandaanaura.
PSA 88:9 Aupuraidaqa qiki raqee marunanoo qifu mandaikidanoo. Oo Yaawee, aiqama kari qinee qisauku anee iannannai uqeerasee dadaaqianeera innaaru qidaqa.
PSA 88:10 Oo Anutu, aneenna naaquqara ainaina naqimmasee kuqirausa uqannifiqeennaree. Kuqirausa amanee findifi ani amooqifaree. Sia miqifaranoo.
PSA 88:11 Madikaki mariasa ani naaru marira amuqusiranara ufa qida fee. Sia ufa qidaqa. Maaniki mariasa ani mapukusee marira oosanara ufa qidee. Sia ufa qidaqa.
PSA 88:12 Ani naaquqara ainaina asukunaki mariasa qafaidee. Sia qafaidaqa. Kuqiranaki finausa ani andeeqarana qafeefaree. Sia qafeefaranoo. Minara anee qini titaqisainaqa sia kuqua.
PSA 88:13 Oo Yaawee, anee qini dadaaqianneera aaraidaqa. Aiqama kananaana qinee aniara innaaru qidaqa.
PSA 88:14 Oo Yaawee nanaree anee qini minni qisaidanee. Nanaree aneenna oori afiri qini qiqafaanoo qimasee kukeeqaidanee.
PSA 88:15 Qinee kumaaraasaaqari manda ummaara darinoo aniifanoo maqee doo kuqirana afaisaa minisaifaqa maridaqa. Anee moomoo aupurarana qimiananoo mifa qini qimudaani ummooquka maseenoo.
PSA 88:16 Ani firaa aanooqirafa doo qini rafaaqafinoo. Ani manda darirafa qini mandaikamma qimaqeenoo.
PSA 88:17 Anee miqi mariana aiqama faasambaasaana manda fasiqauqa qini fiqu fiqu tookusiqa maridaqa nammari mandinoo maridanoora foora iqa maridaqa. Mi ummaarausa firaa nammari amakauriara foora inoo firaaqoo qini rafaaqafu qimaqeenoo.
PSA 88:18 Qini qifaaqasaa qiqoondiuqara anee qianaqa qini minniqisaafanoo asukuna fannoo kai qini daaqa qaraa qikaqaafasaara foora maridanoo.
PSA 89:1 Yaaweena naaru naaru maasara firaa amuqusiranara qinee faqa naaru naaru idi raanaura. Qinee ani mapukusee marira oosanara naaru naaru kooroommasee qimannimianaura.
PSA 89:2 Qinee aniara maaqi qimasee iridaqa. Ani maasara amuqusirafa naaru naaru afeekaikinoo mariannoo. Ani mapukusee marira oosana fannoo innaarunara foora atukaranoo marinara qimannimianauranoo.
PSA 89:3 Anee Anutufa maaqi qinau qinee qeeqa moodaanaki kira ufa qinee rusandeesamu masee maraafanna fasiqanasaa Dafidinasaa quqeefee qinau. Qinee qeeqa ainainira faiqi Dafidinara qima afeekaikiqa.
PSA 89:4 Mifa maaqi qinau. Qinee anisaaqari rakisira saika oosana arasaanaqa naaru naaru ani aiku asauku kambiqainausa miqikai iqa fifaranoo. Naaru naaru ani aiku asauku kai rakisirausaikamma nimaqaanaura.
PSA 89:5 Oo Yaawee, innaarunai maria angiroosa ani amiqira ainainiranara idi raidaqa amooqidaqa. Innaarunai naaquqarausa mariasa faqa ani mapukusee marira oosanara idi raidaqa amooqidaqa.
PSA 89:6 Sia moo fannoo innaarunai marifa ani Yaaweena fooqaafa maridanoo. Sia innaarunai mari ainainausakiqari moo ainaina fannoo ani fooqaafa maridanoo.
PSA 89:7 Innaarunai suqiranaki mariasa aniara firaaqoo rufiaidaqa. Mina fiqu fiqumma mariasa firaaqoo minara naaquqaifaqa rufiaidaqa.
PSA 89:8 Oo Yaawee, aiqama afeeka faqaa Anutufa mariananoo. Sia moo fannoo ani afeeka fooqaafa maridanoo. Oo Yaawee anee aiqama ainainaki afu munduqaannaqoo kai fimarianafa mariananoo.
PSA 89:9 Oo Anutu, anee ooruku nammari aanooqira amakaurirana rakisi marianafa mariananoo. Ooruku nammari firaaqoo aanoo qinoo amakaurifana anee Yaaweefa rafaaqafi marianafa mariananoo.
PSA 89:10 Anee ooruku nammariki mari firaa naaquqara aandauna radamunafa mariananoo. Anee aneenna afeeka asaukunnai aneenna namuqaa furufara mandaana rakee mafiqa moodaa moodaa mafia.
PSA 89:11 Innaaruna anindi maridanoo. Maa maqa maaqafa faqa anindi kai maridanoo. Maa maqa maaqafa faqa minaki mari ainainausa faqa anee kai quqaqoonafa maridanoo.
PSA 89:12 Anee Yaaweefa suani afu dinni dinni ataaqeenni auqu quqaqoonafa maridanoo. Qeeramoonna aaqana faqa Taboora aaqana faqa faiqiara foora ani Yaaweena auqu irisee asasira idi raidaqa.
PSA 89:13 Oo Anutu, anee firaa afeeka faqaafa marianafa mariananoo. Anee uriqarara afeeka faqaafa mariananoo.
PSA 89:14 Ani rakisinnimaqarafa andeeqaranasaa faqa amana amana kai raina nimaqaranasaa faqa mundinoo maridanoo. Faiqí aanaaseera nimuqusirafa faqa mapukusee marira oosana faqa anee Anutufa auqaanna aiqama ainainnaki maridanoo.
PSA 89:15 Faiqí anaasee ani Yaaweenara idi raranannai ani amooqimariasa misa firaaqoo asasiranaki maridaqa. Oo Yaawee misa ani afusaa ani eedoo qiramau fimariasa misa asasiranaki maridaqa.
PSA 89:16 Misa faasaambaasaana ani auquara asasidaqa. Misa ani andeeqaranara irisee firaaqoo nasuridaqa.
PSA 89:17 Anee kai maasa afeeka qimianaqa maasa firaaqoo aniara asasidaqa. Anee aneenna aidiranannai maasa firaa afeeka nimianaqa maasa qeeqa namuqaa urinnaaqareeqa.
PSA 89:18 Oo Yaawee, anee maasa ititaqimaqaaninna fasiqana rusandeesamummasee mara qiminau. Anee Isaraee maqannaasa naaquqara andeeqara Anutufa maasa maqasaa karaambaiqa qimunafa mariananoo.
PSA 89:19 Oo Yaawee ooqai anee qainasaa aniki mapukusee maru ainainira faiqisa maaqi qimasee qimanniminau. Qinee moo amudaanai qimari rakira fasiqana dadaaqirana amiqa. Qinee mi kumaaraana faiqí anaasee qambaanaindaraana rusandeesamummasee marasee Isaraee maqannaasa rakisira afeeka amiqa.
PSA 89:20 Qinee qeeqa ainainira faiqi Dafidina naaquqara fadameenannai akiiqa amoondunnai adiaunnanannai uriqararanaikamma amaqeeqa.
PSA 89:21 Qini Yaaweesa afeeka fannoo aiqama kari mina faqa mariannoo. Qini afeeka fannoo mina afeekaikamma amaqaannoo.
PSA 89:22 Mina namuqaauqa sia uqanna rakiranaki mina rafaaqafu amaqeefaranoo. Manda oosana maree mariasa faqa sia amana mina ooru muqufi seefaranoo.
PSA 89:23 Qinee Yaaweesa mina namuqaa radamusaanaura. Minara fidiaqaa imariasa qinee kuqa kai narusaanaura.
PSA 89:24 Qinee minara didimarinaqa mina faqa naaruara marianaura. Rakiranaki qinee mina dadaaqiananoo uriqaraanoo.
PSA 89:25 Mina maqa maaqa dinni oosu Mediteranea ooruku nammari mariannoo, dinni oosu Eufarateesa firaa nammari mariannoo.
PSA 89:26 Mifa maaqi qimasee qini Yaaweesa qimaqimiannoo. Anee qini qikoofa mariananoo. Qini Anutufa mariananoo, anee qini asumu qimi marianafa, qini ititee marianna ooni faandaamura fara foora mariananoo.
PSA 89:27 Qinee mi fasiqana Dafidina utaaqama saananoo qini ooqa faiqiara foora mariannoo. Aiqama maa maqa maaqanakinaa karaambaiqauqa uriqarara karaambaiqa mariannoo.
PSA 89:28 Qinee qeeqa qima afeekaikira ufa mi fasiqana Dafidinasaa quqasaananoo naaru naaru mariannoo. Qini moodaanaki kira ufa mina faqa naaruara mariannoo.
PSA 89:29 Innee Dafidinasaa aruaki oonu marinausa naaruara karaambaiqaiki faranoo. Misa innaarunara foora naaruara maridaqa Isaraee maqannaasa rakisi nimaqeefaranoo.
PSA 89:30 Dafidina faiqi namu qini sanda ufa minnisee qini irirana mau sia fiqa misa qini naakapara ufa rukiasee, sia qumaraifaqa aupurarana nimianaura.
PSA 89:32 Qinee misa aaqarana akiiqara aupurarana nimianaura. Qinee qianaqa misa nári aaqarana akiiqara nidafirana mareefaranoo.
PSA 89:33 Qinee misa aaqarana akiiqara ummaara nimiqa sia qini Dafidinara qimuqusirana taikaanaura, kaqi mariannoo. Qinee qeeqa qima afeekaikirana sia minnisaanaura kaqi kai mariannoo.
PSA 89:34 Qinee moodaanaki kira ufa mina faqa qiafannana sia aikatamasee kaqinni fuanaura. Qeeqa dookiqari qiafanna ufana sia moo mafi quqaanaura, miqoo kai marianaura.
PSA 89:35 Qinee moodaa kari qeeqa naaquqara andeeqara oosanara iriseeqa qinee minara kuqaa fee qimasee maaqi qiqa, sia unnufa Dafidina qimamianauree qiqa.
PSA 89:36 Miqianaqa Dafidinasaa aru akinausa naaruara marifara. Qinee misasaa naaruara suaniara foora qaida rakisi nimaqaanaura.
PSA 89:37 Quqoona fannoo miqoo naaru naaru maridanoo, qinee auquafanna ainainara kooroo imarindee inoo qinee Dafidinara qima afeekaikiafanna ufafa miqinoo mariannoo.
PSA 89:38 Oo Yaawee, anee miqi qimasee qima afeekaikammaseenana kafaa aneenna rusandeesamummasee maraqoonna fasiqausa qini Dafidisara arana qaifana minni qisaananoo. Anee qini firaaqoo ameesuqu qimaqaananoo.
PSA 89:39 Anee aneenna ainainira faiqi qini faqa moodaanaki kira ufa qimaqoonnana rukiaananoo. Anee qini uriqarara qafee qimunnana qumareeqee kookoomaki aqusaananoo ikairi reenoo.
PSA 89:40 Anee qini faandaamura aiqama rakeekaa iananoo. Anee qini afeeka maaqauqa rapeemma saananoo naakundu kammafinoo.
PSA 89:41 Akaqausa qinee marunnaqoo aiqaree fidaqa qini ainaina ummuaramamaree fidaqa. Qini qiqoonausa minara uteeti qidaqa.
PSA 89:42 Yaawee, anee qini namuqaa dadaaqianaqa misa rakiranaki uriqareea. Anee namuqaa dadaaqianaqa misa asasidaqa.
PSA 89:43 Anee qini duru saamu nammari arasaananoo. Anee qianaqa rakiranaki misa qini rafaaqa fia.
PSA 89:44 Anee qini karaambaiqa duqu marina mara maraananoo. Miqimmaseenana anee qini ufa irimarunna qaarina maqasaa aquseenana utitiqaananoo.
PSA 89:45 Anee qini kumaaraa marirana ateeka qusaramasaanaqa dauni asooqaikunana qisaurirana qamunnara foora dukunimma qimaqaananoo.
PSA 89:46 Oo Yaawee, kisaaqasaa fee kukeeqana marinnaree. Ani aanooqirafa kisaaqasaa fee idarafoora qaida mariannoo fee.
PSA 89:47 Qini marirafa qusaranoo maridanoo anee minara iria. Anee maasa aiqama kuquanausa auquqisaannanara iria.
PSA 89:48 Yafasiqa fee sia kuquannoo fee. Yafasiqa fee kaqi maridanoo narí afeekannai narí madikaki firanara qeerairiannoo fee. Sia moo fannoo miqirafa mariannoo.
PSA 89:49 Oo Yaawee, yaafee anee ooqai qiniara aidimariannana kooroo imari ainainafa maridanoo fee. Anee Dafidinara qima afeekaikammaqoonafa yaifee maridanoo fee.
PSA 89:50 Oo Yaawee, ani ainainira faiqi ataasa ataasa qimamaqee marianara anee sia qaunua. Aiqama maqannaasa manda aasaandaana ufa qimimariafaqa marunnanara, anee minara faqa sia qaunua.
PSA 89:51 Oo Yaawee anee rusandeesamummasee maraqoonna karaambaiqanara aasaandaana ufa qidaqa. Mifa aiqama tinai nifaqa qafamasee ataasa ataasa qidaqa.
PSA 89:52 Naaru naaru amooqirafa Yaaweenaindi mariani. Kuqaa kafaa kuqaa.
PSA 90:1 Oo Yaawee, ooqai uqanna maasa qikeeku qikaaku qifaqnausa faqa maasa faqa maaqara foora ina marunafa mariananoo.
PSA 90:2 Ooqai aaqana faqa maa maqa maaqafa faqa sia marufana anee marinau. Anee ooqai mariunna Anutufa kafaa naaru faqa marinna Anutufa mariananoo.
PSA 90:3 Anee Yaaweefa faiqí mareeqee kafaa maqaiki marianafa mariananoo. Anee qinana faiqí faiqi kafaa quandaki maqaikammiaqee qimarianafa mariananoo.
PSA 90:4 Anee wan tauseenna aukuanara moodaa faasaanee qimariananoo. Anee minara eenda faasaana aiqaree maqi qimariananoo.
PSA 90:5 Anee Yaaweefa nammari aufinoo faiqí maree findee imariananoo, misa qainasaara foora qusasaa mariqa kai kaqi taikaidaqa. Faiqí nimmuru kananaana amiqi amiqindee iifanoo eendifanoo ammundaidanoo.
PSA 90:6 Kananaana kambiqafinoo amiqi amiqidanoo. Eendimarifanoo doo aadanusinoo rooraiqidanoo.
PSA 90:7 Ani Anutuna aanooqirafa maasa faiqí faiqi turaurinoo. Ani tikoora maasa firaaqoo rufiqaidaqa.
PSA 90:8 Maasa aaqarana aneenna afusaa aiqama quqasee qafee marianafa mariananoo. Maasa kukeeqafi maraunna mandoosanafa ani afusaa kaaqa qaranaki akoosaqa maridanoo.
PSA 90:9 Ani aanooqirafa maasa marirana qusarama qimaqaidanoo. Maasa qeeqa maa maqanasaa marunna aukuannana moodaannai daannamma neera foora iqa taikaidaqa.
PSA 90:10 Maasa marianna aukuanafa qaaramoo fasiqa niku nisauku taikasee qisaukuqara taikasee 70 aukuana kai marianaura. Afeekaikiasa ootupamasee qaara faqa qaara faqa fasiqa niku nisauku taikasee 80 aukuana maraidaqa. Maasa miqimmasee aukuanaki maridaqa ummaaraki faqa kadaapiki faqa maridaqa. Maasa miqimmasee aukuanaki marunanoo mi aukuanafa kai kaqi taikaifanoo maasa marirafa faqa kai kaqi taikaidanoo.
PSA 90:11 Oo Anutu, yafee ani firaa aanoo qira afeekana oosana iriannoo fee. Sia moo fannoo iriannoo. Yafee faiqí anaasee anee aanoo qimariana rufiee marianara irianno fee. Sia moo fannoo iriannoo.
PSA 90:12 Oo Yaawee, maasa qeeqa maa marirafa qusaranoo marinara qima qiminaqa iria. Miqimmasainaqa maasa irirafa irirana faqaasa iriranara foora mariani.
PSA 90:13 Oo Yaawee, anee maasara aanooqirafa kisaaqasaa fee mariannoo fee. Maasa aneenna ainainira faiqiuqara amuqusiani.
PSA 90:14 Oo Yaawee, aneenna naaru naaru marira amuqusirana aiqama kananaana maasa umbiqa nimia. Miqimma niminaqa maasa kaqi marianna aukuana asasira idi raidaqa nasurianaura.
PSA 90:15 Oo Yaawee, anee moomoo aukuana dariunnana amana kai asasirana maqee qimia. Mandaikamaqimaqee unna aukuana amana kai asasirana qimia.
PSA 90:16 Oo Yaawee anee kaaqa idaaqira ainaina auqu quqoonnana maasa aneenna ainainira fasiqauqa nifusaa kooroommasee uqannifiqaa. Aneenna areenara afeeka faqa maasa faiqinamu qinaiqi mara uqannifiqa.
PSA 90:17 Yaaweefa anee maasa Anutufa, ani amiqi amiqirafa maasasaa mariani. Maasa aiqama ainaina auqee marunnana anee anoonaika maqisaa. Eeoo, maasa ainainirana mapukunnisaa.
PSA 91:1 Yafee Yaaweefa itita qimaqaani fee qimasee fimarifa faqa yafee aiqama afeeka faqaa Anutuna itita nimaqaranaki maridafee.
PSA 91:2 Misa Yaaweenara maaqi qifaranoo, mifa maasa afeeka kukeeqara maqusa maridanoo fee qidaqa. Mifa maasa Anutufa marifaqa minakai saqarikidaqa.
PSA 91:3 Mifa namuqaa umee mandainainakinaana ani asumu maraannoo. Manda kuqira auriranakinaana mareeqee kaqinni quqaannoo.
PSA 91:4 Mifa kookooraanara foora narí aqoosannai ani itita amaqaannoo. Anee mina aqoosaki keeqafinana itita amaqarana paqurinnaranoo. Mina mapukusee marira oosana fannoo ani saqari kamma amaqeenoo ani faandaamurara foora mariannoo.
PSA 91:5 Anee miqina maridana eendaki rufiee maria ainainausara sia rufieennaranoo. Faasaana tautummasee ani mandaikamma amaqara ainainnara faqa sia rufieennaranoo.
PSA 91:6 Eendaki faiqí narimari auriranara faqa sia rufieennaranoo. Faasaana narimari manda ainainnara faqa sia rufieennaranoo.
PSA 91:7 Ani aaqa wan tauseenna fasiqa kuqaki aqufifaranoo kafaa ani asauku uqannai maria fasiqausa ten tauseenna kuqiranaki fifaranoo. Mi narirafa faqa sia uqanna ani aaqa aniannoo.
PSA 91:8 Aneenna afunnoo manda oosana maree mariana akiiqara narirana qafeennaranoo.
PSA 91:9 Anee uriqarara Anutunara itita qimaqee mari fee qiannanara faqa Yaaweenara qini afeeka kukeeqara maqusa fee qimasee keeqafuannanara sia moo manda ainaina anisaa aqufuannoo, sia moo ummaara ani maaqa aaqa aniannoo.
PSA 91:11 Anee miqinanoo Anutufa narí qangeeroouqara qinaqa misa ani marirana niranasaa rakisi amaqeefaranoo.
PSA 91:12 Mi qangiroosa nári nisaukunnai ani qumaraifana sia oonisaa aiku rupaurinnaranoo.
PSA 91:13 Anee raioona faqa manda sakani faqa nimuaaqa aiku reennaranoo. Raioona firaana faqa ukadiqa faqa aikunnai radamusainaqa sia ani arifaranoo.
PSA 91:14 Anutufa maaqi qidanoo, qinee qiniara nidimarisa manda ainainakinaana qumareeqee kaqinni quqaanaura. Qiniara karaambaiqee qimasee irimarisa qinee itita nimaanaura.
PSA 91:15 Misa qini daaraifaqa maqi qimasee kaifaa qimamianaura. Misa ummaaraki marifaqa misa faqa maridaqa dadaaqammianaura. Qinee misa mandainainakinaana uqeerasee uriqarara nuqu nimianaura.
PSA 91:16 Qinee misa marirana kisaaqaikamma nimaqasee manda ainainakinaana mareeqee kaqinni quqaanaura.
PSA 92:1 Oo Yaawee ani amooqirafa firaaqoo uriqararafa amiqira oosana maridanoo. Ani uriqarara auquara irisee idinnai ani amooqirafa amiqira oosana maridanoo.
PSA 92:2 Aiqama kananaana ani amuqusirana kooroo irafa amiqira oosana maridanoo. Ani mapukusee marira oosana faqa aiqama eendaki kooroo irafa amiqira oosana mariannoo.
PSA 92:3 Piripunnannai ani amooqira idi rarafa amiqirafa maridanoo. Ufireena fuaqaida amiqira naundasaa idi raidaqa ani maasara amuqusirana kooroo idaqa.
PSA 92:4 Oo Yaawee, anee auqoonna afeeka ainainausa qini asasirana qimidanoo. Qinee anee asaukunnai auqoonna ainaina qafamasee ani amooqira idi raidaqa.
PSA 92:5 Oo Yaawee, anee auqoonna ainainafa firaafa uqanna maridanoo. Ani irirafa firaafa farumara foora meemai maridanoo.
PSA 92:6 Irirana siaifa maa ainainnara sia iridanoo. Furufari marifa mifa faqa sia iridanoo.
PSA 92:7 Maa ainainnara faqa sia iridaqa. Aaqara oosana maree mariasa amiqira andandara foora dauni kambiqaidaqa. Manda oosana maree mariasa reemindeemiriranaki maridaqa. Misa miqiqa mariinaqa naaru amiqi uqanna masee kuridifaranoo. Irirana siaisa minara sia iridaqa.
PSA 92:8 Oo Yaawee anee naaru naaru kaaqa uriqararafa mariannanara kuridi nimaqeennaranoo.
PSA 92:9 Oo Yaawee maasa iridaqa ani namuqaauqa kuqaa uqanna kuqifaranoo. Aiqama manda oosana maree mariasa anee rafaaqafu nimaqeennaranoo.
PSA 92:10 Kaasau burimakau akoona afeeka amana kai qini faqa qimimariananoo. Anee asasiranannai qini amiqi amiqimma qimaqaananoo.
PSA 92:11 Qini qifu fannoo qini namuqaa rafaaqafu nimaqarana qafeenoo. Manda oosana maree maria namuqaasa qeeqa daaqoonnai misa faaqa rirana iriqa.
PSA 92:12 Andeeqee mariasa asumu saqari kambiqeenoo amanee muna munindee idaqa. Misa innooqa fiqa. Rebanonna maqa maaqakina mari sidaa saqariara foora kisaaqa marifaranoo.
PSA 92:13 Mi andeeqara fasiqausa Yaaweena amaana maqa naambeeqaqaraa saqariara foora amiqimmasee kambiqaidaqa. Misa Anutuna amaana maqa naambeeqaira foora kambiqafi moomoo kidaqa.
PSA 92:14 Mi andeeqara fasiqa anaaseesa asooaqeeqa saqariara foora kaqi qaqama ireefaranoo. Misa fuka saqariara foora afeekaikiqa maridaqa amanee muna muna ifaranoo.
PSA 92:15 Miqianannoo Yaaweefa andeeqarafa marinara kooroo idanoo. Yaaweefa qini afeeka itita qimaqee mari ooni fara foora maridanoo. Sia moo aaqarafa minaki maridanoo.
PSA 93:1 Yaaweefa karaambaiqa maridanoo. Mina afeeka faqa kaaqa uriqarara andeeqara oosana faqa mina qamunnara foora afisinoo maridanoo. Maa maqa maaqafa mapukinoo maridanoo sia amana furufariannoo.
PSA 93:2 Oo Yaawee, ani ufa irira qaari ooqai oosana arooqooqari afeekaikinoo maridanoo. Maa maqa maaqafa sia marunaki anee ooqai naaru naaru mariranaki marunafa mariananoo.
PSA 93:3 Oo Yaaweefa, ooruku nammari fannoo amakauridanoo firaaqoo ufa qidanoo. Mi amakaurirafa firaaqoo narisaa narisaa arinoo darara qidanoo.
PSA 93:4 Uriqarara Yaaweefa firaa afeekannoo innaarunaindaraa ainaina rakisidanoo, ooruku nammari amakaurirana faqa arusee uriqararafa uqanna maridanoo. Ooruku nammari firaaqoo amakauri mari afeekana Yaaweefa uraaqararafa maridanoo.
PSA 93:5 Oo Yaawee, ani sanda ufa naaruara marifa maridanoo. Ani amaana maqa naaquqarafa naaru naaru marianinafa maridanoo.
PSA 94:1 Oo Yaawee, anee manda oosana akiiqara imarianna Anutufa mariananoo. Anee miqi mariannanara aneenna arana qarana kooroommasainaqa qafaaqa.
PSA 94:2 Oo Yaawee, maasa maa maqa maaqanasaaqaraasa ufa rainee marianafa, anee findi fua. Doo findi finana nári noori uqeeree mariasa miqi mariana akiiqara nimia.
PSA 94:3 Oo Yaawee, kisaaqasaa fee manda oosana maree mariasa asasida marifaree. Kisaaqasaa fee misa nasu nasurifaree.
PSA 94:4 Ummuari mariasa kisaaqasaa fee ramoo ramaa ida nári manda oosana maree mariana amoo aamoo qifaree.
PSA 94:5 Oo Yaawee, miqi mariasa ani faiqí anaasee radamidaqa. Ani aiku asauku mariasa nári uriqararanannai misa rafaaqa fidaqa.
PSA 94:6 Mi manda oosanna faqaasa adeedaana faqa asaqiraafai faqa narimariasa maridaqa, fiaiqi faiqi maasa maqa maaqaki ani mariasa faqaa kuqa nárí mariasa maridaqa.
PSA 94:7 Miqi mariasa Yaaweenara quandaki maaqi qidaqa. Yaaweefa sia maasa qiqafaidanoo. Isaraee maqannaasa Anutufa sia minara iridanoo, mana mana kai midanoo.
PSA 94:8 Qini faiqí anaasee naqaa fee ifaqee maa furufarira oosana auqee fee. Innee furufarira irirana faqaasa mariasa mariafanoo. Yairee fee innee irirana maree faree.
PSA 94:9 Naaqoo auqu quqoo fasiqanara Anutunara innee minara sia ufa irimarifee fee qidafee. Inni nifu auqu quqoo fasiqanara Anutunara innee minara sia qafee marifee fee qidafee.
PSA 94:10 Aiqama maqannaasa Anutufa rakisi nimaqaidanoo innee minara sia misa andeeqaannoo fee fee qidafee. Mifa irirana uqannifiqee mari fasiqafa maridanoo Anutunara innee minara sia irirana faqaafee fee qidafee.
PSA 94:11 Yaaweefa aiqamausa umee irirana iridanoo. Misa irirafa dapikira irirafa kai marinara faqa mifa iridanoo.
PSA 94:12 Oo Yaawee anee irirana maraanifeera qima ami marianna fasiqafa asasiani. Anee aneenna sanda ufa uqafiqee marianna fasiqafa mifa faqa asasiani.
PSA 94:13 Anee misa ummaara maraafana asooarana nimimariananoo. Miqidana anee manda oosana maree mariasara madika deedaqi mariananoo.
PSA 94:14 Yaaweefa narí faiqí anaasee sia ameesuqu nimaqaannoo. Mifa sia uqanna narindikiqa mariasa ameesuqu nimaqaannoo.
PSA 94:15 Mikari ufa andeeqa nimaqee mariasa kaifaa andeeqa nimaqeefaranoo. Aiqama andeeqara marirana faqaasa misa mi andeeqa nimaqara ufana qafamasee amiqirafee qimasee pooduqeefaranoo.
PSA 94:16 Qinee findifiqa manda oosana mareeusa qini darirarufaqa itita nimaqaaneera iafanaqa yafee moo fannoo qini dadaaqinau. Sia moo fannoo qini dadaaqinau. Qinee findifiqa aaqee mariasa qaoo qianee riafanaqa yafee moo fannoo qini dadaaqinau. Sia moo fannoo qini dadaaqinau.
PSA 94:17 Yaaweefa sia qini dadaaqinaqau qini darusaifaqau qinee kai kaqi kuqirausa ufa siaisaki marunaiqini.
PSA 94:18 Qinee aqufuanauree qunana Yaawee aneenna naaru marira amuqusiranannai qini qumaraananoo.
PSA 94:19 Qini daunduraki ummaara darimarifaqa moomoo irirana irimarunana anee Yaaweefa qini daundura uqbiqasee asasirana qimi mariananoo.
PSA 94:20 Oo Yaawee anee eendaandira siaasauqa faqa sia amana misa faqa moodaanaki ainaini mariananoo. Misa aaqee maria sandufausa marasee unna qimasee maasa andeeqara sanda ufee qianara aaqaidaqa.
PSA 94:21 Miqi maria manda siaasausa moodaanaki suqufiqa andeeqarausa mandaikamma nimaqarara tipundaaridaqa. Mi manda siaasausa aaqarana siaisa mara kuqiranaki quqaidaqa.
PSA 94:22 Misa miqi marifanoo Yaaweefa qini afeeka kukeeqara maqusa maridanoo. Qini Anutufa qini itita qimaqara ooniara foora marifaqa qinee minaki kukeeqaidaqa.
PSA 94:23 Yaaweefa mi manda siaasausa nariqa aaqarana akiiqara nimiannoo. Misa aaqarana akiiqara Yaaweefa kuridi nimaqaannoo. Yaaweefa maasa Anutufa misa kuridi nimaqaannoo.
PSA 95:1 Doo aniaqa, aniraifaqa Yaaweena amooqira idi ramamaqaa. Mifa maasasaa ititee marifa marinara firaaqoo asasira idi raaqa.
PSA 95:2 Doo aniaqa, aniraifaqa dufi dufi qirana namu faqa mina afusaa oonu raa. Asasammasee amooqira idi namu faqa mina afusaa oonu raa.
PSA 95:3 Yaaweefa afeeka faqaa Anutufa maridanoo. Mifa aiqama unna anutusa rafaaqafu nimaqaseenoo afeeka karaambaiqa maridanoo.
PSA 95:4 Mifa aiqama maa maqa maaqana rakisirafa maridanoo. Mifa maqa ameemaanai ooni aamarauqa faqa kisaaqa aaqanauqa faqa rakisi marifa maridanoo.
PSA 95:5 Mifa ooruku nammari faqa maqa faqa narí auquqoona minaindi marifanoo minasaa rakisidanoo.
PSA 95:6 Doo aniaqa, aniraifaqa mina oorinni kummara mafi amooqia. Yaaweefa maasa auqunara maasa mina oorinni qiqoori saunu arafi mina amooqia.
PSA 95:7 Mifa maasa Anutufa maridanoo. Maasa mina sipsipara foora maridaqa. Maasa mina sipsipara foora mina rakisi nimaqaranaki maridaqa. Oo maqee uqanna mina ufa iriaqa.
PSA 95:8 Inni nikeeku nikaaku Meeribaa maqasaa undee sia iaqa. Innee sia misa naanna ramasee inneeqa nimuqusaki qini ufara ititiaqa. Inni nikeeku nikaaku Masaa aadana maqasaa qini Anutusa kafaa kafaa qimanammasee qafoondee sia iaqa.
PSA 95:9 Misa miqoo aadana maqa maaqaki marida qinee firaa ainaina auqaafannana qafamasee sia iriqau, kaqi qimanammasee qafaqau.
PSA 95:10 Qaara fasiqa niku nisauku taikasee 40 aukuanaki qinee Isaraee maqannaasara qikoo uqanna qoofaqa qinee Anutusa misara maaqi qiqiafana. Maa maqannaasa kaaqa qaara irirana mau fimarisa maridaqa. Misa qini sanda ufa minnisee moosaa fimariasa maridaqa.
PSA 95:11 Minara qinee Anutusa qeeqa aanoo qiranakiqari maaqi qimasee qima afeekaikiqa. Misa qini idooara maqusaki sia uqanna keeqeefaranoo.
PSA 96:1 Innee fuka idi Yaaweena rama amaqaaqa. Aiqama maa maqanasaaqaraasa Yaaweena idi rama amaqaaqa.
PSA 96:2 Innee Yaaweenara idi raaqa. Mina auqu amooqiaqa. Mifa maasa kuqiranakinaana asumu marainara aiqama faasaana mi amiqira fasaasa ufana koorooiaqa.
PSA 96:3 Mina areenaranara maa maqanasaa mariasa qimannimiaqa. Mifa firaa afeeka naaquqara ainaina auqoonara aiqama faiqi anaasee qimannimiaqa.
PSA 96:4 Yaaweefa firaafa uriqararafa marinara mina amooqirafa faqa miqikai masee uriqararafa mariannoo. Aiqama fasiqa anaasee unnaqira anutusara naaquqee marina minisee Anutuna uqannara firaaqoo naaquqaani.
PSA 96:5 Anaamuru mariasa unnaqira anutusa fifau nariqa auqusee amooqidaqa. Miqi mariafanoo maasa Yaaweefa innaaruna faqa minakinaa ainaina faqa auqu quqoofa uriqaranoo maridanoo.
PSA 96:6 Kaaqa qara areenarafa faqa uriqararafa faqa mina fiqu fiqu iqa maridaqa. Amudaanaiqirafa faqa kaaqa idaaqirafa faqa mina amaana maqaki qumbiqanoo maridanoo.
PSA 96:7 Innee aiqama maqannaasa Yaaweena afeeka faqa areenarana faqa amooqima amaaqa.
PSA 96:8 Yaaweena areenara auqu amooqiaqa. Innee amaana maqaki keeqaani qimasee dufi dufi qima amaqee fandinna ainaina uqirafa keeqaa.
PSA 96:9 Naaquqara karaambaiqa kooroo inaqa aiqama maa maqanasaaqaraasa mina oorinni naindiri reemarinaqaniqoori saunu araaqa. Aiqama maqannaasa mina afusaa rufiaida naindiri raani.
PSA 96:10 Innee Yaaweefa uriqararafa marinara aiqama maqannaasa qimannimiaqa. Maa maqa maaqafa afeekaikamma mapukinoo marinara sia amana rundoorundiannoo. Mifa aiqama maqannaasa andeeqasee amana amana kai andeeqa nimaqaannoo.
PSA 96:11 Innaarunai maria ainainausa Yaaweenara asasiaqa. Maqa faqa minakinaa ainainauqa faqa asasiaqa. Ooruku nammari anee faqa minakinaa noodaanna ainaina faqa Yaaweenara faaqa ridaqa amooqiaqa.
PSA 96:12 Usau maqa maaqa faqa minaki maria ainainausa faqa aiqama asasiaqa. Nandaki saqariuqa faqa nasuridaqa asasifaranoo.
PSA 96:13 Yaaweefa maqasaaqaraasa rakisi nimaqarara anireenoo andeeqaranannai faqa amana amana kai ira oosanannai faqa rakisi nimaqaannoo.
PSA 97:1 Yaaweefa karaambaiqa marinara maa maqa maaqafa asasiani. Ooruku nammariki mari afumausa faqa asasiaqa.
PSA 97:2 Eekara oonnamu faqa asukuna faqa Yaaweena fiqu fiqu inoo maridanoo mina kukeeqa amaqaidanoo. Mifa andeeqaranannai faqa amana amana kai raina nimaqararannai faqa faiqí anaasee rakisi nimaqaidanoo.
PSA 97:3 Ida fannoo mina oorinni fidanoo mina namuqaa mina fiqu fiqu imariasa qamataika nimaqaidanoo.
PSA 97:4 Mina aakuasaa fannoo aiqama maqa maaqaki kaaqa qamannimaqaifanoo, maa maqafa qafeenoo rufiaifanoo aindiri raidanoo.
PSA 97:5 Aiyama maqa maaqa quqoo Karaambaiqana Yaaweena afusaa aaqanauqa tasirisirimma taikaidaqa.
PSA 97:6 Innaaruna fannoo Yaaweena andeeqaranara kooroo ifaqa aiqama maqannaa mina areenarana qafaidaqa.
PSA 97:7 Nisaukunnai auqimaria unna anutusa nimoo qimariasa Anutufa uqanna misa mareeqee nisauriranaki quqaidanoo. Unna anutusauqa aiqama quandaki Yaaweena oorinni kummarama fuaqa.
PSA 97:8 Yaaweena andeeqa nimaqara ufa marinara Sioona maqusanaasa faqa Yuda maqannaasa faqa asasidaqa.
PSA 97:9 Oo Yaawee, anee aiqama afeeka faqaafa aiqama maqa maaqaki mariasa rakisi nimaqee marianafa mariananoo. Aiqama unnaqira anutusa faqa firaaqoo urinnaaqararafa uqanna mariananoo.
PSA 97:10 Yaaweefa mandoosanaa fidiaqaa imariasara aididanoo. Mifa narí ufamau fimariasa misa mariranasaa rakisida ititannisaidanoo. Mifa manda oosana maree mariasa nisaukukinaana mara kaqinni quqannisaidanoo.
PSA 97:11 Kaaqa qarafa andeeqarausasaa kaaqa qaidanoo. Andeeqara marirana faqaasaki asasirafa maridanoo.
PSA 97:12 Innee andeeqaramau fimariasa, Yaaweefa auqoo ainainara irisee asasiaqa. Naaquqara Anutufa auqoo ainainara oonumafi irisee dufi dufi qima amaqaaqa.
PSA 98:1 Yaaweefa moo kamaakira amiqira ainaina auqoonara innee fuka idi rama amaqaaqa. Mifa narí afeekannai faqa kaaqa naaquqara afeekannai faqa narí namuqaauqa naruseenoo urinnaaqarama finau.
PSA 98:2 Miqimmaseenoo Yaaweefa rakiranaki narí uriqararana koorooinau. Aiqama maqannaasa nifusaa Yaaweefa mandainainakinaana mara kaqinni quqeemari afeekana kooroo inau.
PSA 98:3 Yaaweefa Isaraee maqannaasara sia taikaaninna amuqusirana faqa mapukusee marira oosanara faqa nimianauree qimasee qimaqoona sia qauninau kaqi afu mundusee fimarinau. Aiqama maqa maaqa ati ati marusa rakiranaki maasa Anutuna afeeka doo qafaqau.
PSA 98:4 Maa maqa maaqanaki mariasa innee aiqama Yaaweena asasira idi ramamaqaaqa. Innee firaaqoo asasira idi faqa amooqira idi faqa ramamaqaaqa.
PSA 98:5 Innee amooqira idi Yaaweena ramamaqaaqa. Piripunna aridaqa mina amooqiaqa.
PSA 98:6 Ufireena faqa sipsipa aanainnai auqira ukeenannoo faqa fuaqaidaqa, Yaaweenara maasa karaambaiqa fee qidaqa mina oorinni mi namunannai asasamma amaqaaqa.
PSA 98:7 Ooruku nammari faqa minakinaa aiqama ainaina faqa Yaaweenara irisee faaqaruaqa. Maqa maaqa faqa minakina maria fasiqa aanaaseesa faqa aiqama ainainauqa faqa faaqa fuisee iqa asasiaqa.
PSA 98:8 Nammari uqanna faqa Yaaweena oorisaa nisauku aridaqa asasiaqa. Amuaqu namuqa faqa moodaanaki kammafi Yaaweena oorisaa susummamaqaaqa.
PSA 98:9 Yaaweefa maa maqa maaqanaki mariasa ufa andeeqa nimaqarara quminara asasamma amaqaaqa. Narí andeeqaranannai faqa amana amana kai andeeqaranannai faqa maqasaa qaraasa andeeqannisaannoo.
PSA 99:1 Yaaweefa karaambaiqa marifaqa aiqama fasiqa anaasee rufiaafanoo naindiri raidanoo. Mifa angiroouqa oorinnaaqaree meeraqoo narí ufa irira qaarisaa ooqufaaqee marifanoo maqa kasidanoo.
PSA 99:2 Yaweefa Sioona maqusaki afeeka faqaafa maridanoo. Aiqama maqannaa fasiqa anaasee urinnaaqaramafi maridanoo.
PSA 99:3 Minara aiqamausa mina firaa uriqarara auquara amoo qifaranoo. Mifa kaaqa naaquqarafa maridanoo.
PSA 99:4 Afeeka faqaa karaambaiqa anee andeeqaranara kai aidimarifa mariananoo. Anee andeeqarana kai Isaraee maqa maaqaki quqaananoo. Anee andeeqarana faqa amana amana kai rainannimaqarana faqa maree mini quqaananoo.
PSA 99:5 Yaaweena maasa Anutuna amooqiaqa. Mina ufa irira qaari aaqa oonuree minara innaaru qiaqa. Mina andeeqarafa naaquqarafa maridanoo.
PSA 99:6 Mooseesa Aaroonasa mina aanaiqikira fasiqaqara mariqau. Samueerafa faqa Anutunara innaaru qimarufa marinau. Minamusa Yaaweena innaaru kiqari aaroofanoo iriseenoo nári qimanniminau.
PSA 99:7 Yaaweefa oonnamukiqari misa ufa qimanniminau. Misa mina naamuaqira ufa faqa sanda ufa faqa iriseeqa mimau kai fimariqau.
PSA 99:8 Oo Yaawee maasa Anutu ani faiqí anaasee aniara innaaru qiafana anee qimannimiananoo. Anee aaqarana akiiqara minninnisee marianafa mariannana misa uqannifiqaa. Anee misa aaqarana akiiqara aupurarana nimi mariannana faqa uqannifiqaa.
PSA 99:9 Minara innee Yaaweena maasa Anutuna amooqiaqa. Mina naaquqara aaqanasaa mina amooqiaqa. Yaaweefa maasa Anutufa andeeqarafa naaquqarafa maridanoo.
PSA 100:1 Aiqama maa maqanasaa mariasa Yaaweenara asasira idi ramamaqaaqa.
PSA 100:2 Asasirana namufaqa Yaaweena amooqiaqa. Innee asasira idi ramammaree mina oorinni aniaqa.
PSA 100:3 Innee sia Yaaweenara aunuaqa, mifa kai Anutufa maridanoo. Mifa kai maasa auqinau, maasa minaindi maridaqa. Maasa mina faiqí anaasee mina sipsipara foora maridaqa.
PSA 100:4 Innee mina amaana maqa faandaamura kooqiki oonuree dufi dufi qimammareeqa keeqaaqa. Oorureeqa amaana maqa kooqiki faqa dufi dufi qidaqa amooqiaqa.
PSA 100:5 Yaaweefa andeeqarafa maridanoo, mina faiqí aanaaseera amuqusirafa naaru naaru marifa maridanoo. Mina mapukusee marira oosana naaru naaru marifa maridanoo.
PSA 101:1 Ani sia taikara amuqusira oosanara faqa amana amana kai nimira oosanara faqa idi raidaqa. Oo Yaawee, ani idi rama amaqaidaqa.
PSA 101:2 Qini marirafa andeeqasee ufa siaisa marianaura. Miqiqa marianana oo Yaawee anee yairee fee qinee marunnannai qumuree dadaaqinnaree. Qinee anukara marira qeeqa maaqaki marianaura.
PSA 101:3 Sia qinee naaruara moo manda aaqara oosanara eedoo qianaura. Anutuna ufara nimeesa uqimariasa oosanara qinee fidiaqaammidaqa. Sia misa manda oosanaki kaqikaaqoo faqa keeqaanaura.
PSA 101:4 Qinee unna oosana faqaasa futeeqa nianai auquanaura. Qinee sia manda oosana maree mariana kaqikaaqoo faqa dadaaqianaura.
PSA 101:5 Nári niqoonausara unnufa qimasaida nupiqnupita qimaria fasiqa anaaseesa qinee misa taika nimaqaanaura. Nári noori uqeeree mariasa faqa aanoo masee nári iriranamau fimariasa faqa sia qini daaqa marifara nianasaa futeeqa aquanaura.
PSA 101:6 Anutuna ufasaa nifu mundusee fimariasa qinee misara didiannoo. Misa qini faqa qini maaqaki marifaranoo. Aaqarana siaisa andeeqara mau kai fimariasa misa qini ainainira fasiqa anaasee marifaranoo.
PSA 101:7 Unna ufa qimariasa sia uqanna qinee marunnanaki marifaranoo. Qaara iriramau fimariasa faqa sia qini qifusaa marifaranoo.
PSA 101:8 Qini maqa maaqaki aaqara oosana maree mariasa qinee aiqama kari randasee misa taika nimaqaanaura. Anutuna maqusaki manda oosana maree mariasa qinee niqiqaanaura.
PSA 102:1 Oo Yaawee qini innaaru qirana iria. Qini qikiraqarafa anee dadaaqianneera anee marianannai fimarina iria.
PSA 102:2 Qinee mandainainaki marianana sia aneenna oori kaqinni rafusu aqua. Aneenna aaqoo rammatini mambi iria. Qinee ani aaraanana dauni maqi qimasee qimaqimia.
PSA 102:3 Qinee auriranaki faqa namuqaa dariranaki faqa marunanoo qini marirafa munara foora dauni taikararidanoo. Qini qifaaqa idara foora muqurinoo maridanoo.
PSA 102:4 Qinee aadana andanda maqamau faiqeera foora maqasaa aqufiqa, qinee naranara qikooqaifaqa daarara fidaqa.
PSA 102:5 Daarara marunanoo qini qifaaqa asaqufifaqa qimudaani aanaaqi maridaqa, firaaqoo annadannada qidaqa maridaqa.
PSA 102:6 Kaasau ufini faiqí sia maria maqa maaqanaki marindee qinee iqa maridaqa. Qinee karoondara foora ooqeennaa naakunduki kukeeaqa maridaqa.
PSA 102:7 Qinee qeeqaraa ufini maaqa ataufakaaqa mariara foora iqa ummaaraki maridaqa. Sia faiqeeqa kaqi andeequmoorida maridaqa.
PSA 102:8 Qini namuqaauqa faasaambaasaana manda ufa kai qimidaqa. Qini ataasa ataasa qima qimaqee mariasa qini duqunnai akaqausa niquraraidaqa.
PSA 102:9 Anee qini aanoo qima qimaqee mariananoo qini narana fannoo dandara foora marifaqa naidaqa. Qeeqa daiquni daukunu namu faqa nammari naidaqa. Anee qini mareeqee nianai aqu qisaanaqa maridaqa.
PSA 102:11 Qini maqee marirafa nimanandara foora mariifanoo eendifanoo taikeera foora qinee iqa maridaqa. Qinee nimmuruara foora aadanusiqa rooraiqidaqa.
PSA 102:12 Kafaa anee Yaaweefa, naaruara uriqarara karaambaiqa marianaqa naaru kambiqainausa kaqi aniara iriqa fifaranoo.
PSA 102:13 Anee findifinana Sioonna maqusanaasara qimudaoo qinnaranoo. Mi maqusanara qimudaoo qira aukuana doo anireenoo. Maa maqee uqanna narí aukuana maridanoo.
PSA 102:14 Ani ainainira fasiqauqa Isaraee maqannaasa Sioonna maqusara ridaqa. Mandaikinoo naakundukinoo marifaqa kaqi minara qimudaoo qidaqa.
PSA 102:15 Aiqama maqannaasa Sioonna maqusa dadaaqirana qafamasee Yaaweena auquara rufieefaranoo. Aiqama maa maqanasaaqaraa karaambiqauqa misa Yaaweena mi areenara afeekanara naaquqaannoo.
PSA 102:16 Yaaweefa Sioonna maqusa kafaa usakasee miqoo narí uriqarara afeeka kooroo iannoo.
PSA 102:17 Mifa qumureenoo Isaraee maqannaa fasiqa anaasee sarauirausara irinoo misa innaaru qirana faqa iriseenoo dadaaqiannoo.
PSA 102:18 Yaaweefa auqoo ainainara papiqasaa akara rumasainaqa naaru anisaa ani aruaki kambiqainausa qafamasee mina amooqiaqa.
PSA 102:19 Yaaweefa narí sandaaqai naaquqarannai marunnaindari maqasaa mara miami qafanau. Mifa innaarunaindari maqasaaqaraasa mara miami niuqinau.
PSA 102:20 Kuqiranaki fuaqeera karabusaki quqaqoosa annadannada qimarufanoo mifa iriseenoo iduku nisanau.
PSA 102:21 Miqinaqa Sioonna maqusaki misa Yaaweena auqu kooroommasee qimannimifaranoo. Sioonna moo auqu Yeerusaree maqusaki misa mina amooqifaranoo.
PSA 102:22 Moomoo maqannaasa moodaanaki Yeerusaree maqusaki suqufiqa Yaaweena amooqifaranoo.
PSA 102:23 Qinee kumaaraa fasiqa marunanoo Yaaweefa qini afeeka taika qiseenoo qini marirana mara qusa reenoo.
PSA 102:24 Miqimmasaifaqa qinee maaqi qiqa. Oo qini Anutu qinee kumaaraa fasiqa maridaqa, sia qini mara aquqisaa. Oo Yaawee, anee naaru naaru marianafa mariannoo.
PSA 102:25 Ooqai kuradoo aukuana anee maa maqa maaqana poosauqa faakanara foora atukaranau. Aneenna asaukunnai innaaruna auqu quqoonafa mariananoo.
PSA 102:26 Anee aiqama ainaina auquqoonafa taikafuannoo. Aneenna kai kaqi marinnaranoo. Mi aiqama ainainausa nauraa qammunnara foora anaqi anaqiannoo. Anee mi nauraa ainainausa ooqeennaa qamunnara foora aqusainaqa taikafifaranoo.
PSA 102:27 Anee Yaaweefa naaru naaru miqi kai ina marinanoo ani marirafa sia taikarafa mariannoo.
PSA 102:28 Maasa ani ainainira fasiqauqa marunaqa maasa faiqi namu ani asumu mariranaki marifaranoo. Misasaa ani aruakinausa ani ititannimaqarafa misa fiqu fiqu inoo mariannoo.
PSA 103:1 Oo qini qimana, Yaaweena amooqia. Qini daunduraki marianna aiqama ainainafa Yaaweena amooqia.
PSA 103:2 Oo qini maraquna, Yaaweena amooqia. Mifa paapaa qida qimimarinara sia qaunua.
PSA 103:3 Mifa aiqama qini aaqarana akiiqara minni qisee marifa maridanoo. Mifa qini aurirana aiqama taikaqisee marifa maridanoo.
PSA 103:4 Yaaweefa qini madikakinaana uqeera qiseemarifa maridanoo. Mifa amuqusiranannai faqa narí qimudaoo qiranannai faqa qini amiqi amiqimma qimaqaidanoo.
PSA 103:5 Yaaweefa qini mariranaki amiqira ainainannai qumbiqa qimaqaidanoo. Miqimmasaina qini marirafa aneesara foora fuka qisausi kambiqafinaqa kumaaraara foora kafaa marianaura. (Dafidifa quqaumuara qifaqa maasa ufa sia miqinoo marifaqa aneesara kai qiqa.)
PSA 103:6 Uriqararausa nimeemaanai ummaaraki mariasa Yaaweefa misa ufa irisee dadaaqiannoo. Mifa misa nári ainaina andeeqasee nariqa kai nimidanoo.
PSA 103:7 Yaaweefa narí qimiruna Mooseena kooroommasee uqa fiqanau. Narí firaa afeeka ainainna auqoona Isaraee maqannaasa uqannifiqasoofaqa qafaqau.
PSA 103:8 Yaaweefa qimudaoo qirana faqa amuqusirana faqa faqaafa maridanoo. Mifa sia kai kaqi aanooqidanoo. Mina naaru marira amuqusirafa firaafa qumbiqanoo maridanoo.
PSA 103:9 Yaaweefa sia kisaaqasaa inni manda oosanara nifairiannoo. Kafaa mina aanooqirafa sia naaruara mariannoo.
PSA 103:10 Mifa sia maasa aaqarana amana kai daridanoo, oorudupimasee daridanoo. Sia maasa aaqarana akiiqara mina amana kai daridanoo, ureeqasee darinoo.
PSA 103:11 Maqasaaqari innaarunai kisaaqasaa marina amana kai Yaaweefa narí amuqsirana nariara rufiee mariasa nimidanoo.
PSA 103:12 Suani ururee marina faqa keeqee marina faqa nianasaa marifanoo mina amanasaa Yaaweefa maasa mandainaina mara aqu qisaidanoo.
PSA 103:13 Faiqi nikausa faiqiara firaaqoo nimuqusidaqa. Miqikai inoo Yaaweefa nariara rufiee mariasara firaaqoo amuqusidanoo.
PSA 103:14 Yaaweefa maasa auqunara iridanoo, maasa maqannai taikaaninna ainairannai auqunara iridanoo.
PSA 103:15 Maasa faiqí faiqi marirafa maaqimminoo maridanoo. Maasa fifau adandara foora maridanoo. Maasa marirafa andandara foora urureenoo afufeenaara mafifanoo amiqi amiqinoo
PSA 103:16 marifanoo ufai fuaqasaifanoo kai kaqi taikaidanoo. Taikafinana sia kaifaa qafeennaranoo.
PSA 103:17 Yaaweenara eerairida mina ufa qaindusi mariasasaa mina amuqusirafa naaru naaru mariannoo. Mina andeeqarafa misaki faqa misa faiqi namuki faqa misa ninaiqimaraki faqa misa nifaqnausaki faqa mariannoo.
PSA 103:18 Yaaweena moodaanaki kira ufamau fimariasa faqa sia mina sandaufa minnisee kaqi mi sanda ufamau fimariasa faqa, misasaa faqa mina andeeqa nimaqarafa mariannoo.
PSA 103:19 Yaaweefa narí rakisi nimaqara qaari innaarunai quqaqaifanoo afeekaikinoo maridanoo. Mifa aiqama maqannaasa uriqararafa maridanoo.
PSA 103:20 Yaaweena afeeka qangeeroouqa mina ufara eedoo qimariasa innee Yaaweena qimannimira ufa irimariasa innee Yaaweena amooqiaqa.
PSA 103:21 Innee innaarunai angeeroouqa moomoo maridaqa mina ainaini mariasa mina aidiramau fimariasa innee aiqamausa Yaaweena amooqiaqa.
PSA 103:22 Yaaweefa auqu quqoo ainainausa, mifa aiqama atinai rakisi nimaqee marisa innee faqa mina amooqiaqa. Qini maraquna anee faqa Yaaweena amooqia.
PSA 104:1 Oo qini qimana anee Yaaweena amooqia. Oo Yaawee, qini Anutu, anee firaafa uqanna mariananoo. Anee qammunnara foora kaaqa qareenarana faqa uriqararana faqa afisirafa mariananoo.
PSA 104:2 Yaaweefa anee kaaqa qarana qumaree qamunnara foora afisi marianafa mariananoo. Kafaa anee innaaruna qumareeseera maaqara foora usakaananoo.
PSA 104:3 Yaawee anee aneenna maaqa innaaruna maarinni mari nammarinasaa usakaananoo. Asuru fannoo ani rakira karara foora marifana anee minaki nimariananoo. Anee ufai qaqoosasaa ooqu marifi nimarianafa mariananoo.
PSA 104:4 Anutu anee ufai faiqiara foora niqiqaanaqa ani ufa mara maree fidanoo. Aakuasaa faqa ani ainainira faiqiara foora maridanoo.
PSA 104:5 Yaawee anee maa maqa maaqana maaqa poosara foora rusisoonanoo afeekaikinoo maridanoo naaruara sia kasiannoo.
PSA 104:6 Oo Yaawee, ooqai anee ooruku nammari quqasoonanoo aiqama maqa maaqa qamunnara foora dukuninau. Aiqama aaqanauqa faqa rafaaqa finau.
PSA 104:7 Anee aanoo qimasee qaoo qunaqa nammariuqa rufiasee sandaqau. Ani innaarunai qirana iriseeqa doo sandamaqaraasa mafiqau.
PSA 104:8 Mi nammarisa anusaa qari qumuree anee mariaqee qimaqoonna noopundunaki kai maridaqa.
PSA 104:9 Oo Anutu, anee oosuqoonnamau nammari fannoo marida naaru naaru sia fiaaqararana amana mariannoo. Mi oosirafa nammari ititasainanoo sia kafaa maqa maaqa rafaaqa fuannoo.
PSA 104:10 Yaawee anee qunaqa maqakiqari nammari uqa urureeqa noopundu runna qumidaqa. Mi nammarisa aaqana aikundanai fiqu aiquidaqa ooqufidaqa.
PSA 104:11 Oosana oosana aandauqa faqa mi nammarisa naaqeera qumidaqa. Kaasau doonkiuqa faqa mi nammarisa nimaaqaara aadanusi marina quqeenaaqeera qumidaqa.
PSA 104:12 Ufiniuqaindi mi nammarina afaiqara saqariki aanaamu usakasee minaki maridaqa ufa qidaqa.
PSA 104:13 Anutu anee aneenna oonnamukiqari aaku adiaananoo aaqanauqa saa aqufifanoo ani amiqi amiqirafa maqa maaqaki qumbiqaidanoo.
PSA 104:14 Anutu anee aaku adiasaananoo aandauqa neefandinna andandausa kambiqaidanoo. Mi aakufa faiqí neemaria narannana afu amifanoo kambiqaidanoo. Miqimasaifanoo faiqí narí nara ainaina ummaqidanoo.
PSA 104:15 Faiqí fannoo wainna qaqama ummaqusee tiqisee tatisee wainna anoona naifanoo mina amuqusa fannoo asasidanoo. Mifa oorifa fadameena ooriki aku usaifanoo oori amiqi amiqidanoo. Mifa feemu uquseenoo naifanoo amuaquinoo afeekaikidanoo.
PSA 104:16 Yaaweefa Sidaa saqariuqa Reebanoona maqa maaqaki ummaqusoofanoo marufaqa Yaaweena saqari fee qimariqau. Aaku moomoo mi saqarisasaa aqufifaqa amiqi amiqidaqa.
PSA 104:17 Mi saqarisaki ufiniuqa aniraida aanaamu usakaidaqa. Noonaafeesoona fooqaa ira ufi faqa miqoo moo saqari tookuseena fooqaa ira saqariki aanaamu usakaidaqa.
PSA 104:18 Kaasau mimmiuqa uriqarara aaqanasaa misa quqaqoo qoo maridaqa. Mi aaqannasaa mataqooma fooqaa ira aandauqa ooni afooiranauqa aundurai maridaqa.
PSA 104:19 Anee Yaaweefa quqoona auqu quqaqoonanoo aukuana rainaidanoo. Suani faqa auqu quqaqoonanoo aiqama kari narí keeqaaninnanara iridanoo mimau kai fidanoo.
PSA 104:20 Oo Yaawee, anee eendirafa mariannee qunanoo eendirafa anifanoo nandakinaa kaasau aandau aina aana nidaqa.
PSA 104:21 Kaasau aandau auqu raioona Anutufa amu narannara faaqariqanidaqa randaidaqa.
PSA 104:22 Suani ururaifaqa mi aandausa oonu maree ani maree nári faiqee mariana kiaqa faiqaidaqa.
PSA 104:23 Faiqaafaqa faiqí anaasee kafaa findififaqa nári ainainirannai oonuree ainainiqa fima riafanoo eendidanoo.
PSA 104:24 Oo Yaawee, anee moomoo ainainatia auqu quqoonafa mariananoo. Aneenna amiqira iriranannai kai aiqama ainaina auqu quqoonafa mariananoo. Anee moomoo kasi mari ainainna auqu quqaqoonafa maa maqa maaqana qumbiqanoo maridanoo.
PSA 104:25 Ooruku nammari dinni dinni fiqu fiqu firaana quqaqoonafa maridanoo. Minakinaa aandau ainaina kasimarina firaana faqa kaqikaana faqa moomoo uqanna usidaqa sia amana nisaana rirana amana maridanoo.
PSA 104:26 Miqiqa mariafaqa sipauqa mi nammarina amuaqumau oonuree aniree idaqa. Moo firaa aandau anee auqusee ooruku nammariki sararianee qimasee auquqoonafa maridanoo. Mina auqu Reeviatanna maridanoo.
PSA 104:27 Mi aiqama ainainausa ani Yaaweenara narana nári nee marianara qiafana nimimariananoo.
PSA 104:28 Anee Yaaweefa misa narana nimianaqa mara naidaqa. Anee nimianaqa naafanoo nimuaqu idanoo.
PSA 104:29 Oo Yaawee anee misa ameesa uqunnimaqasaanaqa misa rufiaidaqa. Anee misa naidoo taikannimaqaanaqa misa kuqiqa kafaa maqaikidaqa.
PSA 104:30 Anee aidoo aiqama ainaina nimianaqa misa kasirana maraidaqa. Maa maqa maaqanasaa aiqama atinai mari ainainausa fukaikamanimaqee mariananoo.
PSA 104:31 Yaaweena areenarafa naaru naaru marida kai mariani. Narí auqu quqoo ainainausara asasiani.
PSA 104:32 Mifa maqasaa mara miami qafainara maqa fannoo rufiasee kasidanoo. Asaukunnai aaqana ati auqainara idamuna ururaidanoo.
PSA 104:33 Qinee Dafidisa kaqi marunna kamuqoo Yaaweenara idi raanaura. Qini daanna kaqi mari kamuqoo qeeqa Anutuna amooqira idi raanaura.
PSA 104:34 Qini asasirafa Yaaweefa marinnaindari qumi marinara qinee idi raannanara mifa asasiani.
PSA 104:35 Aaqee marinausa maa maqa maaqanakiqari taikaaqanani. Manda oosana faqaasa sia mariaqanani. Oo qini maraquna Yaaweena amooqia. Yaaweena amooqia.
PSA 105:1 Oo innee, Yaaweena dufi dufi qimamaqaa. Mina uriqararanara kooroo iaqa. Innee mifa auqoo ainainnara aiqama maqannaasa kooroomma nimiaqa.
PSA 105:2 Innee Yaaweena idi ramamaqaida mina amooqiqa. Mifa idaaqira ainaina auqoonara qima nimiaqa.
PSA 105:3 Maasa Yaaweenaindi marunnanara asasiaqa. Innee minara amooqi mariasa asasiaqa.
PSA 105:4 Innee dadaaqiranara Yaaweena qafaifanoo nimiani. Innee maqee maqee mina amooqiaqa.
PSA 105:5 Innee Yaaweena ainainira fasiqa Abarahaamana akeeku akaaku mariasa mariafanoo. Anutufa rusandeesamummaqaisa Yakooboona faiqi namu mariasa, innee mifa amiqira ainaina auqoonara faqa sia faiqí auqaaqaa ira ainaina auqoonara faqa mina naamuaqira ufara faqa iriaqa.
PSA 105:7 Yaaweefa maasa Anutufa maridanoo. Mina naamuaqira ufa aiqama maqa maaqaki mariasa iriaqeera maridanoo.
PSA 105:8 Yaaweefa narí moodaanaki qima afeekaikira ufa sia aunuannoo, kaqi mina naaru naaru irinoo fuanoo. Wan tauseenna oosana kambiqainausara Yaaweefa narí qima afeekaikira ufa sia aunuannoo naaru naaru misasaa mariannoo.
PSA 105:9 Yaaweefa narí moodaanaki kira ufa Abarahaamana faqa qimasee amuna sia minnisaannoo mimau kai fuannoo. Isakeena faqa qima afeekaikira ufa amuna faqa sia minnisaannoo kai mimau fuannoo.
PSA 105:10 Yaaweefa Yakooboona moo auqu Isaraeerana moodaanaki kira ufa amufa naaru naaru mariannoo.
PSA 105:11 Yaaweefa misa faqa moodaanaki kira ufa maaqi qinau, qinee Kannaana maqa maaqa ani amiananoo mifa ani faiqi namu anaiqimaraindi kammiannoo.
PSA 105:12 Ooqai Yaaweena aiku asauku Isaraee maqannaasa oodaa maridaqa Kannaa maqa maaqaki anaamuruara foora misa qambaana mariqau.
PSA 105:13 Isaraeerana akeeku akaaku maaqa maaqa aiqama maqusa maqusa oonuree aniree iqa nimariqau.
PSA 105:14 Miqi marufaqa qinee Yaaweesa qumee misa rakisi nimaqee mariafana sia moo fannoo misa ummaara niminau. Qinee misa saara karaambaiqauqa aanoommasee qaoo qimannimaqaqiafana.
PSA 105:15 Qinee Yaweesa maaqi qimasee mi karaambaiqausa qimannimiqa. Innee sia qini qisauku munduqaunausa nuqaaqa. Sia qini tamummaqara fasiqauqa faqa mandaikamma nimaqaa.
PSA 105:16 Yaaweefa qufanoo aandaroo firaafa inoo misa narana aiqama taikanau.
PSA 105:17 Yaaweefa Isaraeena aiku asaukukinaana mina auqu Yooseefaana misa noorinni aqiqoofanoo Isipa maqa maaqai finau. Misa Yooseefaana Midianna maqannaasa nimisee feefauru mara maroofaqa mina afiqamaree Isipa maqa maaqai quqaqoofanoo moo fasiqa ainainira faiqikinau.
PSA 105:18 Isipa maqannaasa karabusa maaqaki quqasee sainnandannai aikuqara rumbaqau. Misa qainnannai faqa mina anukaki rumbaqau.
PSA 105:19 Yooseefaafa karabusaki kaqi maridanoo qaina oosana qimannimufa anoona kambiqoofaqa qafamasee Yooseefaana idukiqau. Yaaweena ufa fannoo Yooseefaafa miqunara kuqaa fee qinau.
PSA 105:20 Isipa maqannaasa uriqararafa qufaqa Yooseefaana idukiqau. Moomoo maqannaasa uriqararafa maridanoo idukinau.
PSA 105:21 Faraoofa Yooseefaana qumareenoo narí uriqararausa nikiiqa fasiqaikinoo maridanoo mina maqa maaqa faqa rakisianifee qimasee karaambaiqaikinau.
PSA 105:22 Miqimmaseenoo Faraoofa Yooseefaanara anee qini uriqararausa nikiiqa fasiqaikina maridana qini irirana qimi mariasa anee naakapaa.
PSA 105:23 Miqimmasoofanoo Yakooboofa Isipa maqa maaqai oonuree miqoo marinau.
PSA 105:24 Miqoo marufanoo Anutufa moomoo faiqi asumu narí faiqí anaasee Isaraee maqannaasa nimiseenoo misa nári namuqaa urinaaqarara afeeka faqaasaikamannisanau.
PSA 105:25 Miqiqa marida mikamuqoo Anutufa qumee misa iriranaki naakapoofaqa Isipa maqannaasa Anutuna ainainira faiqiuqa Isaraee maqannaasara fidiaqaaidaqa nikaru qi mariqau.
PSA 105:26 Miqiqa marufanoo Anutufa narí ainainira fasiqa Mooseena misunnai aiqanau. Anutufa rusandeesamumaqoo fasiqana Aaroona mareeqee seenoo Mooseena faqa niqiqoofaqa isipa maqusai fiqau.
PSA 105:27 Oonuree miqanda Isipa maqa maaqaki maridaqa Anutuna naaquqara uqannifiqara ainaina Isipa maqannaasa Anutuna moo kira ainaaina uqannifiqaqau.
PSA 105:28 Mikari Anutufa Isipa maqa maaqaki asukuna quqasoofanoo asukuna misa rafaaqafinau. Sia fifau miqinau. Misa mina ufara aanoommasee rukiqoonara miqinau.
PSA 105:29 Mifa Isipa maqannaasa nammari fidikaikamandoofaqa misa noodaanna aiqama kuqu taikaqau.
PSA 105:30 Misa maqa maaqaki eeqamoosa moomoo misa uriqarausa maaqakiaqa faqa qumbiqaqiqau.
PSA 105:31 Anutufa qufanoo faufaari sia kasoo anireenoo maaqa maqusa ititanau. Nunuka faqa miqikaimminoo misa maqa maaqa aiqama atinai qumbiqanau.
PSA 105:32 Anutufa kafaa qufanoo aaku rirara foora mandee pupusamu qumuroofanoo aakuasaa quqasoofanoo aiqama atinai daraaninau.
PSA 105:33 Mi ainainna qandannai Anutufa Isipa maqannaasa wainna sanda faqa saqari qaqama faqa nee maruna faqa misa fifau saqariuqa faqa aiqama raudaandammasanau.
PSA 105:34 Yaaweefa kafaa qufanoo aammaadi moomoo nukudara foora teeqimafufaqa sia amana nisaanarirana amana, maqa maaqa umbiqaqa mariqau.
PSA 105:35 Aammaadi misa andanda faqa qafuqakinaa narana faqa aiqama nama taikaqau.
PSA 105:36 Doo mi ainainausa taikaseenoo Anutufa quandakufanoo Isipa maqannaasa ooqa faiqi akoonaiqiuqa aiqama narinau.
PSA 105:37 Yaaweefa Isipa maqannaasa ooqa faiqi akoonaiqiuqa naruseenoo Isaraee maqannaasa nifiqamareenoo misa Isipa maqannaasa koora siruaannai auqira ainainauqa mara maroofanoo Isipa maqa maaqakiqari nifiqee finau. Sia moo fannoo teeroo quqoofa mariqau aiqamausa amiqirausa kai fiqau.
PSA 105:38 Isipa maqannaasa Isaraee maqannaara rufiarafa firaaqoo marunara misa fufaqa Isipa maqanaasa minara asasiqau.
PSA 105:39 Anutufa Isaraee maqannaasa nifiqee fidanoo asurunnai faasaana auqaana aru nimaqeenoo eendaki idauru miqirafa kaaqa qamannimaqee marinau.
PSA 105:40 Nifiqee fimarufaqa Isaraee maqannaasa Anutunara naranara iroofanoo afida faqa innaarunaindaraa narana manna feemu faqa naaqeera niminau.
PSA 105:41 Mifa ooni afoomandoofanoo nammari radiqisee firaafa quminau. Mi nammarifa aadana maqa maaqaki firaa nammariara foora ooqu finau.
PSA 105:42 Yaaweefa misa nifiqee fidanoo narí ooqai qima afeekaikira ufa narí ainainira faiqi Abarahaammana amu ufanara irinau.
PSA 105:43 Isaraee maqannaasa narí rusandeesamu mandoosa nifiqee fidanoo asasirana nimufaqa mina namufaqa fidaqa faaqa rumasee asasiqa fimariqau. Anutuna rusadeesamu iranaki maridee qimasee idi ramasee fiqau.
PSA 105:44 Yaaweefa moomoo maqannaasa maqa maaqa Isaraee maqannaasa mara nimisoofaqa misa miqooqaraasa naru nifaqasee misa narana andanda aiqama ainaina neemariqau.
PSA 105:45 Yaaweefa sia fifau miqinau. Isaraee maqannaasa mina aamuaqira ufa faqa sanda ufa faqa maraaqee qimasee miqinau. Innee aiqamausa Yaaweena amooqiaqa.
PSA 106:1 Yaaweenara amooqiaqa. Innee Yaaweefa amiqirafa marifanoo mina amuqusirafa naaru naaru marinara mina dufi dufi qimamaqaaqa.
PSA 106:2 Yafee moo fannoo mifa firaa ainaina auqoonara amana kooroommasee qiannoo fee. Sia moo fannoo amanaikiannoo. Yafee moo fannoo mina amana kai amooqirana amiannoo fee. Sia moo fannoo amanaikiannoo.
PSA 106:3 Mina naamuaqira ufa qaindusi mariasa faqa aiqama kari andeeqara oosana maree mariasa faqa misa asasidaqa.
PSA 106:4 Oo Yaawee, anee aneenna maqannaasa dadaaqidana qiniara faqa iria. Anee misa mara niseenana qini faqa mara qisaa.
PSA 106:5 Miqimasainaqa ani faiqí anaasee ainaina rairaa inaqa qinee kaqi maridaqa qafamaseeqa misa saimbaqa asasidaqa ani aiku asauku mariasa faqa nasu nasuriqa nua.
PSA 106:6 Maasa qeeqa qikeeku qikaaku naannaa reeqa aaqara oosana maree marunausa maridaqa. Maasa aaqara oosana faqa firaa manda aaqara oosana faqa maree marunausa maridaqa.
PSA 106:7 Ooqai anee Anutufa Isipa maqa maaqaki naaquqara ainaina auqamasoonaqa maasa qikeeku qikaaku qafamasee sia ani oosana iriqau. Anee misa moomoo kari amuqusamma nimaqoonnanara sia misa minara iriqau, qaunuseeqa misa Taatuqee nammari afaisaa oonuree ani aiqama afeeka faqaanara nimeesa uqusee nári nidiramau fimariqau.
PSA 106:8 Yaaweefa narí amudaanai qimaru afeekanara kooroo ianifeera narí qima afeekaikira ufa mau finoo misa ummaarakinaana uqeera nisanau.
PSA 106:9 Yaaweefa Taatuqee nammariara qufanoo aadanusinau. Aadanusufufanoo mifa misa aana muqunufaqa aadana maqasaa taqaqau.
PSA 106:10 Yaaweefa Isaraee maqannaasara fidiaqaa imarusa nisaukukinaana rafiqanau. Mifa namuqaa nisaukukinaana maranau.
PSA 106:11 Miqimmasoofaqa Taatuqee nammari fannoo misa namuqaa rafaaqafinau. Sia moodaa kaqi mariqau, aiqama taikaqau.
PSA 106:12 Miqimmasoofaqa Isaraee maqannaasa mina qafamaseeqa Yaaweena qima afeekaikiranara kuqaa fee qimasee mina amooqira idi raqau.
PSA 106:13 Miqidaqa misa Yaaweefa auqoo ainainnara kai kaqi auniqau. Misa sia mina naakapara ufara afeesiqau. Nári iriranamau kai fiqau.
PSA 106:14 Oonureeqa misa aadana maqa maaqaki nidaqa nári Isipa maqa maaqai maru narana ainainausara firaaqoo nári nidi maru narannara aiaaee qimariqau. Miqidaqa misa firaaqoo Yaaweena akooqara oosanannai amanammasee qafaqau.
PSA 106:15 Miqiufanoo Yaaweefa misa amanira osana iriseenoo akooqoofanoo misa qu ainaina eedoo qimasee nimiseenoo manda aurirana namu faqa nimufaqa auri mariqau.
PSA 106:16 Misa Isaraee maqannaasa miqoo aadana maqa maaqaki maridaqa Mooseenara rairai qimariqau. Misa Aaroonara Yaaweena naaquqara ainainira fasiqara faqa rairai qimariqau.
PSA 106:17 Misa miqi qimarufanoo Yaaweefa qufanoo maqa fannoo oo raqafufanoo faiqí moo auqu Datannana nambiqanau. Abirammana faqa mina aiku asauku namu faqa nambiqama rafaaqa finau.
PSA 106:18 Rafaaqafusoofanoo Yaaweefa qufanoo manda oosana auqee mrusa akaqausa kaqi marusa idauru fannoo misakiaqa fasafasufanoo mi manda fasiqa qanda ufa iri marusa idauru fannoo aiqama qama taikasanau.
PSA 106:19 Isaraee maqannaasa Sinai maqa maaqaki oonureeqa koorannai tasirisirimmasee burimakau akoona aanaaqi amana auqiqau. Misa mina auqu quqaqaqee Yaaweenara foora amooqimamaqee mariqau.
PSA 106:20 Misa Yaaweena amiqira areenarana faqaana mafi nimeesa uquseeqa fifau andanda neemaru ainaina burimakau akoona aanaaqi amana auqirafa marunnai ubeekamafiqa amooqi mariqau.
PSA 106:21 Isaraee maqannaasa Isipa maqa maaqaki marufanoo Yaaweefa naaquqara ainaina firaa ainaina auqamaseenoo Isaraee maqannaasa rafioo Anutunara misa qauniqau.
PSA 106:22 Misa miqimmasee Isipa maqa maaqaki marufanoo Yaaweefa mookira ainaina firaatia auqamasoofaqa qafaqau. Taatuqee nammari aaqa marufanoo Yaaweefa kaifaa naaquqara ainaina auqamasoofaqa misa minara faqa qauniqau.
PSA 106:23 Yaaweefa misa manda oosana nindafamaseenoo qinau. Qinee misa aiqama kuridi taikasaanauree qinau. Mooseefa Anutufa qutaaqamaqoofa maridanoo Yaaweefa arana qoofanoo nariraree qunasaa ititasoofanoo sia narinau.
PSA 106:24 Misa aadana maqa maaqaki kaqi maridaqa Isaraee maqanaasa fuka idaaqira maqa maaqara Kannaa maqa maaqaki fifandinnanara fidiaqaammasee Yaaweena qima afeekaikira ufara faqa unna fee qiqau.
PSA 106:25 Nári uqiqaana maqakiaqa maridaqa ninunu ridaqa Yaaweena ufa rukiee mariqau.
PSA 106:26 Miqufanoo Yaaweefa narí asauku uqeeraseenoo maaqi qimasee qimannimaqanau. Qinee qianaqa innee aiqama maa aadana maqa maaqanaki kuqu taikeefaranoo.
PSA 106:27 Misa niku nisauku marinausa naru nindaqaaqa ianaqa aanaamurukinai furufariqa moodaa moodaa ifaranoo. Qinee aiqama niana maqa maaqakiaqa quqannisaanaqa miqoo kuqifaranoo.
PSA 106:28 Isaraee maqannaasa aaqamasee Peeoora maqannaasa unna qira anutuna Baarana amooqi marunaki ootupaqau. Peeroora maqannaasa andau tatufirana nári unnaqira anutusa suqasee nimisee naríara faqa akaqana neemarufaqa Isaraee maqannaasa aaqamasee misaki ootupaqau.
PSA 106:29 Misa nári manda aaqara oosanannai Yaaweena arana fundakiqau. Misa miqi marufanoo Yaaweefa qufanoo misaki manda aurirafa kambiqafufaqa moomoosa kuqi mariqau.
PSA 106:30 Miqiqa nufanoo misakiqari faiqí moo andeeqara fasiqa mina auqu Fineeqasafa findifinoo Isaraee maqanaasa manda oosana akiiqara narufanoo mi manda aurirafa taikanau.
PSA 106:31 Doo miqooqari Fineeqasanara andeeqara fasiqa fee qiqau, maqee faqa naaru naaru faqa minara andeeqara fasiqee qifaranoo.
PSA 106:32 Isaraee maqannaasa Meeriba maqa maaqaki maru nammarinaki maridaqa Yaaweena amanammasee qafaidaqa arana qarana ami mariqau. Miqiufanoo Mooseefa misa aaqaranasaa qaraana maraseenoo narí faqa moo aaqarana maranau.
PSA 106:33 Isaraee maqannaasa Mooseena qarana fundakufanoo Mooseena ookiqari aaqara ufa kambiqanau.
PSA 106:34 Yaaweefa Isaraee maqannaasa qimanniminau. Innee Kannaa maqannaasa manda oosana maree mariasa naru taikaaqee qufaqa sia misa miqiqau.
PSA 106:35 Misa Yaweena ufa rukiaseeqa sia narirai misa faqa maanaaqa narí ami narí ami idaqa misa saimbaqa moodaanaki kammafi maridaqa misa manda aaqarana faqa mara nári nifaaqai quqee mariqau.
PSA 106:36 Anutuna faiqí anaasee unnaqira anutuna amana auquqoonauqa nimooqimannimaqee mariqau. Misa miqiqa nidaqa nári ufaanaki ninuka nári nárí mariqau.
PSA 106:37 Misa moo manda oosana maraqau. Misa nári faiqi namu akoonaiqi faqa manaaqa faqa marasaidaqa Kannaa maqannaasa unnaqira anutusa noorinni munusaida tatufirana suqa nimimariqau.
PSA 106:38 Isaraee maqannaasa nári faiqi aanaaqiuqa qikairi nisakadiki sia marusa nariqau. Narusoofanoo mi fidikafa fifau teeqinoo mi fuka maqa maaqana putaa inoo maridanoo manda afundi marinau.
PSA 106:39 Misa mi oosanna maroo mandoosanafa nári putaa mannimaqee marinau. Misa Anutuna uqanna minniseeqa moo unnaqira anutusasaa mundidaqa sia Anutuna uqanna saa mapukusee mariqau.
PSA 106:40 Miqunara Yaaweefa narí faiqí aanaaseera arana qoofanoo fidiaqaa uqannamminau.
PSA 106:41 Yaaweefa misauqa mareeqee moo maqannaa aaqee marusa nisaukuki quqanau. Quqasoofaqa misa namuqaa misasaa manda rakisi rakisinnimaqee mariqau.
PSA 106:42 Mi namuqaasa nisaukuki marufaqa misa nariqa uriqararanannai rafaaqafuqoofaqa misa niramundunai ummaaraki mariqau.
PSA 106:43 Miqi marufanoo Yaaweefa moomoo kari narí faiqí anaasee ummaarakinaana mareeqee kaqinni quqanau. Miqidaqa nariqa kai qimasee Yaaweena naakaparanara aanoo qimasee ititiqau. Miqidaqa misa mandainainaki keeqa qaraasaa mafiqau.
PSA 106:44 Misa mi mandainainaki maridaqa quandaki Yaaweenara iki raqoofanoo Yaaweefa misa iki irinau. Iriseenoo Yaaweefa misa aupuraranaki maruna amiqimmasee irisee niqafeenoo dadaaqinau.
PSA 106:45 Niqafamaseenoo misara qimudaoo qimaseenoo narí moodaanaki kira ufara iriseenoo narí firaa amuqusirafa marunara faqa iriseenoo narí aanooqirana minnisanau.
PSA 106:46 Yaaweefa misa rumbannimaqee marusa naundura quandasoofaqa qimudaoo qimasee reendeenammasee rakisinnimaqee mariqau.
PSA 106:47 Oo Yaawee maasa Anutufa anee maasa ummaara mariranakinaana mara kaqinni quqannisaa. Maasa aiqama maqannasa qambaana moodaa moodaa iqa marunnana sooqbaandummeeqee kaifaa qeeqa maqasaa quqaqisaa. Miqi mannisainaqa maasa kaifaa ani naaquqara andeeqara auquara maasa dufi dufi qimamaqaaqeera miqimma qimaqaa. Maasa ani amooqimamaqaidaqa maasa daundura areenee marinaqa asasianaura.
PSA 106:48 Isaraee maqannaasa Anutuna Yaaweena amooqiaqa. Maqee faqa naaru naaru faqa mina amooqiaqa. Faíqi anaasee aiqama minara kuqaa fee qiaqa. Yaaweena amooqiaqa.
PSA 107:1 Yaaweefa andeeqarafa marinara mina dufi dufi qima amaqaaqa. Mifa maasara amuqusirafa naaru naaru marifa maridanoo.
PSA 107:2 Yaaweefa inni namuqaa nisaukuki umaaraki maruna maroosa innee kafaa kafaa dufi dufi qimasee amooqiaqa.
PSA 107:3 Mifa inni aanaamuru maqa maaqakinaana nifiqee aninau. Suani afu dinni dinni ataaqeendari faqa suani ururee marinnaindari faqa keeqee marinnaindari faqa nifiqee aninau.
PSA 107:4 Akaqausa aadana maqa maaqanaki aana sia marunakinai auiaqa nimariqau. Misa nariqa marifandinna maqusanara randasee sia paquriqau.
PSA 107:5 Misa miqiqa nimarufanoo naarareenoo nammariara nidufaqa misa nári mariranara sia kaqi marianauree qiqau.
PSA 107:6 Misa nariqa ummaaraki maridaqa Yaaweena aaraqau. Aaroofanoo mifa iriseenoo misa ummaarakinaana mareeqeenoo amiqira qoo uqannisanau.
PSA 107:7 Yaaweefa misa andeeqara aatata nifu uqu mareenoo misa mari fandinna maqusanaki quqannisanau.
PSA 107:8 Miqi marisa Yaaweena sia taikaaninna amuqusiranara dufi dufi qimamaqaaqa. Mifa faiqí sia auqaqaaira ainaina dadaaqinoo auqoonara faqa dufi dufi qimamaqaaqa.
PSA 107:9 Mifa nammariara nidimarisa amanaikamma nimaqaseenoo naararee marisa amiqira nara ainainannai nimuaqumma nimaqainara dufi dufi qimamaqaaqa.
PSA 107:10 Akaqausa rumbaranaki marufaqa niku nisauku sainnandannai rumbaqoofaqa aupuraidaqa asukunaki firaa ninunuriranaki mariqau.
PSA 107:11 Misa aiqama afeeka faqaa Anutuna ufara aanoommasee ititunara faqa mina naamuaqira ufa minnisoonara faqa mi mandainainaki mariqau.
PSA 107:12 Misa minaki marufanoo Anutufa firaa kadaapi rirana nimufanoo misa afeeka taikanau. Minaki maridaqa misa niku amaki saamu rufanoo sia moo fannoo misa uqeerarafa miqoo marinau.
PSA 107:13 Misa mi aupuraranaki maridaqa misa quandafiqa Yaaweena aaroofanoo misa aupurarana kinaana uqeerannisanau.
PSA 107:14 Yaaweefa misa niku nisauku rumbara sainnanda rakeemma aanaaqi aanaaqimmaqusee asukunaki faqa firaa ninunuriranaki faqa maruna mareeqee kaaqa qaraqoo quqannisanau.
PSA 107:15 Miqi marisa Yaaweena sia taikaaninna amuqusiranara dufi dufi qimamaqaaqa. Mifa faiqí sia auqaaqaaira ainaina auqoonara faqa dufi dufi qimamaqaaqa.
PSA 107:16 Yaaweefa namuqaauqa karabusa kooqiuqa koopaannai auqira kooqiuqa rakeemmasee qainnannai auqira kairi kooqi ititee maruna qumaree itairi andaanandaana rumuqusanau.
PSA 107:17 Akaqausa nári ufa rukiqaranannai aupuraidaqa furufarirausaikiqa mariqau. Nariqa aaqarana akiiqara mi aupuraranaki mariqau.
PSA 107:18 Misa mi aupuraranaki maridaqa nikoo nikaaidaqa narana faqa sia neemariqau. Misa miqidaqa kuqirana afaisaa mariqau.
PSA 107:19 Misa miqiqa maridaqa nári aupuraranakiqari Yaaweena aaramasaidaqa innaaru qimariqau. Miqi qimarufanoo Yaaweefa nariqa aupuraranakinaana uqeereeqee amiqiraqoo quqannisanau.
PSA 107:20 Mifa narí ufannai misa aurirana taikannimaqanau. Mifa madika afaisaaqaraana uqeereeqee kaqini quqannisanau.
PSA 107:21 Miqi marisa Yaweena sia taikaaninna amuqusiranara dufi dufi qimamaqaaqa. Mifa faiqí sia auqaaqaa ira ainaina dadaaqinoo auqoonara faqa dufi dufi qimamaqaaqa.
PSA 107:22 Miqidaqa misa Yaaweenara dufi dufi qira aandau tatufirana suqa amiaqa. Amiseeqa misa asasira idinnai Yaaweefa amiqira ainaina auqoonara aiqamausa qimannimiaqa.
PSA 107:23 Doo akaqausa sipaki ooruku nammari amuaqumau nidaqa aanaiqiara foora nidaqa ainaina munu nimi mini nimi idaqa feefauru maree mariqau.
PSA 107:24 Misa ooruku nammari farumaki fidaqa Yaaweefa faiqí sia auqaaqaa ira ainaina auqamaqoona qafaqau.
PSA 107:25 Yaaweefa qufanoo ufai firaafa aniree uqufanoo nammari amakau rinoo aaqanara foora inau.
PSA 107:26 Amakaura firaaqoo idanoo misa sipa uqeera innaarunai seenoo muqufi maqai rumaseenoo imarinau. Miqi marufaqa minaki marusa misa paasoosirafa taikafufaqa naaquqeenoo naindiriranau.
PSA 107:27 Misa sipa teeqi taaqufaqa minakinaasa firara munari minari idaqa nammari namaqaaqee furufari mariasa naannaree mariqau. Misa miqiqa nufanoo misa sipa akoofasaikirafa sia nimanaikufaqa furufariqau.
PSA 107:28 Misa miqiqa maridaqa nári aupuraranakiqari Yaaweena aaramasaidaqa innaaru qimariqau. Miqi qimarufanoo Yaaweefa nariqa aupuraranakinaana uqeereeqeenoo amiqiraqoo quqannisanau.
PSA 107:29 Yaaweefa amakauriranara qaoo qufanoo daimafinau. Firaa amakaura rirafa taikafufanoo reendeeninau.
PSA 107:30 Ooruku nammari fannoo kasoo inoo dai qimafufaqa sipaki mariusa nimuqusa uqbiqafufaqa asasiqau. Miqi marufanoo Yaaweefa misa mareeqeenoo nári fuanee qunnai ubeekamasoofaqa fiqau.
PSA 107:31 Miqi marisa Yaaweena sia taikaaninna amuqusiranara dufi fufi qimamaqaaqa. Mifa faiqí sia auqaaqaa ira ainaina dadaaqinoo auqoonara faqa dufi dufi qimamaqaaqa.
PSA 107:32 Misa faiqí suqiranaki maridaqa Yaaweena uriqararanara kooroo iaqa. Faiqí rakisirausa suqinnanaki mina faqa amooqiaqa.
PSA 107:33 Yaaweefa qufanoo nammari amiqimmasee aadanusinau. Kaqikaa nammariuqa faqa maqakiqari ururee marifauqa faqa tukaqnanau.
PSA 107:34 Mi maqa maaqanaki mariusa mandoosana akiiqara Yaaweefa misa maqa ainoo faqaana kafaa mara indiri maqaika masanau.
PSA 107:35 Kafaa Yaaweefa aadana maqa maaqa mareeqeenoo nammari namu faqa uqeena uqeenira maqaikinau. Mifa aadana maqa maaqa mareeqeenoo nammari aanaaqi aanaaqi moomoo qumi maru maqanaikinau.
PSA 107:36 Miqiufanoo Yaaweefa naranara sarauimarusa nifieeqeenoo miqoo uqannisanau. Misa miqoo maridaqa maqusa indufusee miqoo mariqau.
PSA 107:37 Misa miqoo maridaqa oosana oosana narainaina faqa wainna sanda faqa ummaqimariqau. Ummaqusoofanoo aiqama narainaina fannoo kambiqeenoo, rairaa rairaa inoo didisamu rimarinau.
PSA 107:38 Yaaweefa mi fasiqa anaaseesa narí aiku asauku amiqi amiqimma nimaqoofaqa misa miqoo moomoo kambiqeeqa aramaree fimariqau. Misa firinee maru aandausa mifa dadaaqufanoo sia oodaa mariqau. Misa faqa moomoo kambiqeeqa aramaree fimariqau.
PSA 107:39 Misa miqi marufaqa namuqaa manda fitiqnarana nimufaqa firaaqoo aupuraqau. Miqimmasee Yaaweena faiqí anaasee rafaaqafusee nisaurirana nimiqau.
PSA 107:40 Yaaweefa misa rafaaqafu nimaqee marusara fidiaqaammaseenoo misa aadana maqa maaqakinai aana sia marunnai aqusoofaqa nimariqau.
PSA 107:41 Mifa narí aiku asauku ainainara sarau imarusa nári noori runiranakinaana uqeereeqee amiqira qoo quqannisanau. Kaifaa misa faiqi namu kambiqeeqa sipsipara foora moomoo kambiqafi aramaree fiqau.
PSA 107:42 Andeeqara oosana maree marusa mina qafamasee asasufaqa manda oosana maree marusa mina qafamaseeqa noo qumunamasee mariqau.
PSA 107:43 Naaqoo fainausa Yaaweena mi oosanna qafamasee amiqimasee iriaqa. Yaaweena naaru marira amuqusiranara oonumafi iriaqa.
PSA 108:1 Oo Anutu qini qimuqusa aiqama anisaa mapukusee mundinoo maridanoo. Minara qinee idi raidaqa ani amooqianaura. Qini qimana anee findifua.
PSA 108:2 Qini piripunna faqa ufireena faqa findi fifaqa inniqarannai suani afu ooqu findifumaisaanaura.
PSA 108:3 Oo Yaawee qinee aanaamurukiaqa ani dufi dufi qimamaqaanauranoo. Qinee faiqí anaasee qambaanai ani amooqianaura.
PSA 108:4 Ani aiqama kari amuqusirafa inaaruna ooraaqaranoo maridanoo. Ani mapukusee marira oosana fannoo qasuru ooru auqanoo maridanoo.
PSA 108:5 Oo Anutu, aneenna uriqararana innaarunaki uqannifiqainaqa maasa qafa. Aneenna areenarana aiqama maqa maaqaki quqasainaqa qafaaqa.
PSA 108:6 Oo Yaawee qini innaaru qirana irisee aneenna afeekannai maasa asumu maraqisaa. Miqimmaseenana ani aidi maria fasiqa aanaaseesa mandainaina kinaana asumu mariaqeera maraa.
PSA 108:7 Anutufa narí naaquqara uiqaana maqakiqari maaqi qinau. Qinee ufoona ridaqa Seekeemma maqa maaqa rainasee qeeqa maqannaasa nimianaura. Qinee Sukoota noopundu faqa miqi kai iqa qeeqa maqannaasa rainasee nimianaura.
PSA 108:8 Gireeadana maqa maaqa faqa Mannaseena maqa maaqa faqa qiqaindi maridanoo. Eefaraimmana maqa maaqa faqa qeeqa qikiiqa itita qimaqee mari ainaina fara foora maridanoo. Yuda maqa maaqa fannoo qini uriqararausara uqannifiqee mari saunu fara foora maridanoo.
PSA 108:9 Qinee Anutusa Mooaba maqa maaqa mareeqee qeeqa qiku nammari uqi marunna difaaniara foora masee ooru dupimma nisaanaura. Qinee Eedooma maqa maaqa qiku aanaamu raipaqu quqee marunna maqa maaqafa ooreeqarafa mariannoo. Qinee Firistia maqannaasa urinnaaqaramasee faaqa rumasee ufoona ruanaura.
PSA 108:10 Oo Anutu, yafee qini aana muquninaqee Eedooma maqannaasa afeeka faandaamuraki keeqafi naruanauree.
PSA 108:11 Oo Anutu kuqaa fee anee maasa ameesa uquqiseenanee. Anee sia fee ooqai unnandee inana maasa rakira fasiqauqa faqa oonuree dadaaqinnaree.
PSA 108:12 Anee maasa dadaaqinaqa maasa nári namuqaa narua. Faiqí faiqi dadaaqirafa sia amanaikiannoo.
PSA 108:13 Oo Anutu anee maasa dadaaqinaqa rakiranaki fuanana aneenna kai maasa namuqaa rafaaqafu nimaqaa.
PSA 109:1 Oo Yaawee, qinee ani amooqi marunafa mariananoo anee sia kaqi muqurina maria.
PSA 109:2 Manda oosana maree maria fasiqausa faqa nikaru qimaria fasiqausa faqa qini namuqakamma qiaidaqa. Misa qiniara unna ufa qimariasa maridaqa.
PSA 109:3 Misa qini fidiaqaamma qimaqee maria ufanannai qiniara qidaqa. Misa sia oosana marifaqa kaqi fifau qini namuqaakamma qimaqaidaqa.
PSA 109:4 Qinee misara rimarunnana akiiqara misa fifau qini qifairidaqa. Qinee misara innaaru qimarunaqa misa sia minara iridaqa kaqi qifairidaqa.
PSA 109:5 Qinee misa amiqi amiqimma nimaqee marunnana akiiqara misa manda oosana qini qimidammia. Qinee misara didi marina akiiqara qini fidiaqaamma qimaqaidaqa.
PSA 109:6 Oo Yaawee aaqee mari siaasana utaaqamasainanoo qini namuqaa koota amiani. Anee qinanoo mina moo namuqaa fannoo mina kikiqa usuani.
PSA 109:7 Mi kootanaki mi fasiqanara aaqee mari fasiqafee qiaqanani. Mi manda fasiqana innaaru qiranara faqa aaqara oosana fee qiaqanani.
PSA 109:8 Mi manda fasiqana marirafa qusasaa taikainanoo moo fannoo mina amaaqa maqafinoo mina saika maraani.
PSA 109:9 Mi fasiqana faiqi namu fiaiqi marifanoo mina anaaqa faqa adeedaana mariani.
PSA 109:10 Mina faiqi namu maaqa siaisa naranara aiqama maaqakiaqa innaarumma naqanuasa mariaqanani. Misa miqiqa nidaqa ooqeennaa naakunduki rambairira maaqaki mariana, nifaqasaifaqa fifuaqanani.
PSA 109:11 Mi manda fasiqafa ufaase munnimma marasee mariufa kuqufinanoo ufaasu munnimma amu fasiqafa anireenoo mina ainaina aiqama nariara maraani. Moo maqannaasa anireeqa mifa kadaapi ririqoo ainainna náriara maraaqanani.
PSA 109:12 Sia moo fannoo mi manda fasiqanara amuqusiani. Sia moo fannoo mina fiaiqi faiqiara amuqusiani.
PSA 109:13 Saifaqa mina faiqi namu anaiqiqmara aiqama kuquaqanani. Akaqausa faqa sia mina auquara iriaqanani.
PSA 109:14 Mi manda fasiqana akeeku akaaku manda oosanara Yaaweefa oonumafi iriani. Mi manda fasiqana maqoo aanaaseena aaqarana akiiqara naaru naaru sia minnaisaani.
PSA 109:15 Mi manda fasiqana akeeku akaaku aaqarana akiiqara Yaaweefa aiqama kari iriani. Aiqamausa misara qaunuqanna saaqanani.
PSA 109:16 Mi manda fasiqafa faiqí anaaseera qimudaoo ira irirafa sia mina iriranaki maridanoo. Mifa ainaina siaisa faqa sarau imariasa faqa naundura ummaara reemarisa faqa oosana oosana ummaara niminoo kuqa narinau.
PSA 109:17 Mi manda fasiqafa niqurara ufa qiranara kai aidimarifa marinara anee mina akiiqara aqurara ufa kai amia. Mi manda fasiqafa amiqi amiqimma nimaqaranara fidiaqaa imarinara sia moo fannoo mina amiqi amiqimma amaqaaqanani.
PSA 109:18 Mi manda fasiqafa niqurara ufa afaaqa quqasee qamunnara foora afisirafa nidanoo. Mina narí niqurara ufa fannoo narí nammari naindee inoo nariki kai keeqaani. Mina niqurara ufa fadameenara foora nifaaqasaa akusaafanoo keeqaindee narí mi manda fasiqanaki keeqaani.
PSA 109:19 Mi manda fasiqana niqurara ufa fannoo oonurandeenoo qamunnara foora narikai kukuqinoo mariani. Pikapara foora mina niqurara ufa fannoo aiqama kari narí kai rumbamaqanoo mariani.
PSA 109:20 Oo Yaaweefa qini namuqaa miqimmasee aupurarana nimia. Mi namuqaasa qiniara manda ufa qimariasa aupurarana nimia.
PSA 109:21 Oo uriqarara Yaaweefa aneenna qima afeekaikiranara iriseenana qini dadaaqia. Aneenna sia taikaaninna amiqira amuqusiranannai qini namuqaa nisaukukinaana mara aquqisaa.
PSA 109:22 Qinee Dafidisa ainaina siaisa sarau irausa maridaqa. Qini qimuqusaki dariara foora aupuraidaqa.
PSA 109:23 Suani afu keeqaifanoo qini qimananda taikaindee inoo qini marirafa taikararamidanoo. Qini marirana aammaadiara foora ufai fuaqa aqindee qusasaa taikararidaqa.
PSA 109:24 Narana sia naunnanara qini qikuqara indindidanoo doori ummooqukidanoo. Qinee qifaaqa asaqinoo marifaqa qimudaani aanaaqi maridaqa.
PSA 109:25 Faiqí anaasee qini qiqafamasee uteeti naakada qidaqa. Misa qini qiqafaidaqa ninuka aqidaqa ataasataasa qidaqa.
PSA 109:26 Oo Yaawee qini Anutufa anee qini dadaaqammaqisa. An i sia taikaaninna amuqusirafa marinara qini mareeqee asumu mariranaki quqaqisaa.
PSA 109:27 Oo Yaawee anee miqinaqa qini namuqaa iriqa ani Yaaweenara qini dadaaqidanoommifoo qimasee iriaqa.
PSA 109:28 Qini namuqaauqa qini diqurara ufa qimifana anee amiqi amiqimma qimaqeennaranoo. Qini aupurarana qimimariasa anee misa rafaaqafu nimaqaa. Miqimmasainaqa qinee ani ainainira faiqi asasianauranoo.
PSA 109:29 Qini namuqaa nisaurirana dukunimma nimaqaa. Misa nisaurirana qamunnara foora kukuqiaqanani.
PSA 109:30 Qinee Dafidisa qeeqa dookiqari Yaweenara firaaqoo dufi dufi qianaura. Faiqí moomoosa suqi marinnanaki mina amooqimamaqaanaura.
PSA 109:31 Yaaweefa mifa ainaina siaina itita amaqaseenoo mina kuqa arirari mariasa nisaukukinaana marainara dufi dufi qianaura.
PSA 110:1 Yaaweefa maaqi qimasee qini karaambaiqa qimaminau. Anee qini daaqa qisauku uqannai ooqu mari finaqa qinee ani namuqaauqa mareeqeeqa ani aramandunnai quqasaanaura.
PSA 110:2 Yaaweefa ani urinnaqarara rakisirana Sioona maqusasaaqari firaanaikamasainana aiqamatinai rakisi nimaqeennaranoo. Mifa qinoo anee aneenna namuqaauqa faqa rakisi nimaqeennaranoo.
PSA 110:3 Anee nammeera qimasee namuqaa faqa rakuanauree qinaqa ani rakira fasiqauqa ani ufara eedoo qimasee afeekaikammasee rakifaranoo. Kananaana suani oosana qaannaindari ani kumaaraauqa sia kasoo, qifi faramu andandasaa mandinoo marindee moomoo aaqana uqasaa suqifaranoo.
PSA 110:4 Yaaweefa qini karaambaiqara (Yisunara) qima afeekaikuna sia amana kaifaa moosaa fuannoo. Mifa maaqi qimaseenoo qima afeekaikinau. Anee naaruara naaruara aanaiqikirafa marinnaranoo. Anee Meerakiseedeekafara foora maridana naaru naaru aanaiqikina marinnaranoo fee qinau.
PSA 110:5 Qini karaambaiqa Yaaweena asauku uqannai maridanoo, mifa aanoo qinanoo maqasaa karaambaiqauqa urinnaaqa raannoo.
PSA 110:6 Mifa maa maqanasaaqaraasa urinnaaqaramasee moomoo narueeqaida quqaannoo. Mifa aiqama maa maqanasaa uriqararausa rafaaqafuannoo.
PSA 110:7 Mifa rakiranaki maridanoo kaqikaa nammari aana afainni qumi marina namasee rakiranaki afeekaikamasee urinaaqaraannoo.
PSA 111:1 Yaaweena amooqiaqa. Qinee qeeqa qimuqusannai mina faiqí anaasee suqiranaki Yaaweenara dufi dufi qianaura.
PSA 111:2 Yaaweefa auqoo ainainausa naaquqarafa maridanoo. Mifa auquqoo ainainausa qafamasee asasi mariasa mi ainainausa oosanara iriraree qidaqa.
PSA 111:3 Aiqama ainaina Yaaweefa auqoo ainainafa areenarafa faqa uriqarara amiqi amiqirafa faqa kai maridanoo. Mina andeeqarafa naaru naaru marifa maridanoo.
PSA 111:4 Yaaweefa narí naaquqara ainaina auqamasee maasara sia qaunuaqee qidanoo. Mifa paapaa idanoo nifauee marifa maridanoo.
PSA 111:5 Yaaweenara qeerairida mina ufa qaindusi mariasa mifa narana nimidanoo. Mifa narí moodaanaki kira ufa sia qauni marifa naaruara irimarifa maridanoo.
PSA 111:6 Mifa anaamuru maqa maaqa narí faiqí anaasee nimiranannai narí afeeka uqannifiqanau.
PSA 111:7 Mina aiqama ainaina auqaranaki mifa narí mapukira oosana faqa Yaaweefa narí asaukunnai auqai ainainafa mapukirafa faqa aindeeqarafa amana amana kai rainara oosana faqaafa maridanoo. Mina aiqama naamuaqira ufa fannoo anoona ufa faiqí minasaa mundufi mariaqee ufa maridanoo.
PSA 111:8 Mi naamuaqira ufausa anoona ufa qiranasaa faqa andeeqara mariranasaa faqa mundinoo maridanoo, naaru naaru afeekaikinoo mariannoo.
PSA 111:9 Yaaweefa narí faiqí anaasee rumbararakinaana idukuseenoo naaru marira moodaanaki kira ufa misa faqa qinau. Kaaqa naaquqara andeeqarafa faqa uriqarara afeeka faqaafa faqa marifa maridanoo.
PSA 111:10 Irirana faqaafa mariraree qimaseenana Yaaweenara eerairida mina ufa qaindusua. Mina naamuaqira ufara eedoo qimasee mi mau fimariasa mifa andeeqasee rainara oosana nimidanoo. Naaru naaru amooqirafa minaindi mariani.
PSA 112:1 Yaaweena amooqiaqa. Yaaweenara eerairammasee mina ufamau fimarifa faqa mina sandufara asasammasee afaqee marifa faqa asasiranaki maridanoo.
PSA 112:2 Andeeqara fasiqa faiqi namu nariqa maqa maaqaki nimudaanai qimarinausa marifaranoo. Minasaa aruakinausa amiqi amiqiranaki marifaranoo.
PSA 112:3 Mi andeeqara fasiqana faiqi namu ainaina faqaasa arifaranoo. Mina ainaina faqa naaruara rairaammida mariannoo.
PSA 112:4 Andeeqarausa faqa nifauee mariasa faqa qimudaoo qimariasa faqa asukunaki kaaqa qaranakiara foora miqi mariasa maridaqa.
PSA 112:5 Eedoo qimasee ufaasu munnimma nimimarifa faqa narí bisinisa kuqaa qira irirana mau kai auqee mari fasiqafa faqa asasiranaki maridanoo.
PSA 112:6 Andeeqee marifa sia kuridiannoo. Faiqí anaasee minara naaruara irifaranoo.
PSA 112:7 Mi andeeqara fasiqafa manda ufauqaindi irinoo sia rufiannoo. Mifa Yaaweena saqarikirafa afeekaikinoo marinara sia rufiaannoo.
PSA 112:8 Miqi marifa sia kaaqa amuqusifanoo rufiaidanoo. Mifa mariinoo narí namuqaa rafaaqafu nimaqainnana qafaannoo.
PSA 112:9 Mi andeeqara fasiqafa afaaridanoo sarauimariasa nimidanoo. Mina qimudaoo qirafa sia taikaannoo mi fasiqafa afeeka faqaafa marinaqa mina ufa ameemaanai keeqee faranoo.
PSA 112:10 Miqi marifaqa manda oosana maree mariasa mina qafaafanoo niranaqaidanoo. Misa noori kandamasee fidiaqaamma amaqasee quqasee fidaqa. Manda oosana maree mariasa misa mi andeeqara fasiqana andaikamma amaqarara tipundarimariafa naaruara taikafuannoo.
PSA 113:1 Yaaweena amooqiaqa. Innee Yaaweena ainainira faiqiuqa mina amooqiaqa. Yaaweena auqu amooqiaqa.
PSA 113:2 Maqee faqa naaru naaru faqa Yaaweena auqu amooqirafa kai mariani.
PSA 113:3 Suani ururee marinnai mariasa faqa suani keeqee marinnai mariasa faqa aiqamausa Yaaweena auqu amooqimamaqaaqa.
PSA 113:4 Mifa Yaaweefa aiqama maa maqa maaqanaki mariasa urinnaaqaranoo maridanoo rakisi nimaqaidanoo, mina qareenarafa innaaruna uriaaqaranoo maridanoo.
PSA 113:5 Sia moo fannoo Yaaweena maasa Anutuna fooqaafa maridanoo. Mifa meerai innaaruna uraaqaranoo maridanoo.
PSA 113:6 Miqooqari mifa mara miami innaaruna faqa maqa faqa qafaidanoo.
PSA 113:7 Yaaweefa ainaina siaisa nikuqara madaanai marisa uqeereeqeenoo amiqiraqoo quqannisaidanoo. Mifa sarau imariasa nári aupuraranakinaana uqeerannisaidanoo.
PSA 113:8 Uqeeraseenoo misa mareeqee uriqararausa faiqi namu aqoondikamma nimaqaidanoo. Uqeerasaifaqa Yaaweena faiqi anaasee (Isaraee maqannaasa) uriqararausa misa aqoondi kidaqa.
PSA 113:9 Aafaikinoo marinna anaaseena Yaaweefa amiqimma amaqaseenoo. Faiqi aanaaqi aranandaki rumasaifanoo minara asasidanoo. Yaaweena amooqiaqa.
PSA 114:1 Isaraee maqannaasa Yakooboona akeeku akaaku aanaamuru maqa maaqa Isipa maqa maaqakiqari quqasee aniqau.
PSA 114:2 Miqiqa ani marufanoo Yudana akeeku akaaku Yaaweena naaquqara fasiqa anaasee kammiqa mariqau. Isaraee maqannaasa Yaaweenaindi kammiqa mariqau.
PSA 114:3 Yaaweenaindi kiqa marufanoo Taatuqee Nammari misa nindafamasee quqasee sandanau. Yooradanna nammari faqa misa nindafeenoo kasooinau.
PSA 114:4 Maqa kasufanoo aaqanauqa faqa mimmi aanaaqiara foora kooripoo kooripoo imariqau. Kaqikaa amuaqu namuqaindi faqa sipsipa aanaaqiuqara maqi rafusaki rafusaki imariqau.
PSA 114:5 Oo maa Taatuqee nammari naqaa fee ifanee quqasee sandeenanee. Oo Yooradanna nammari anee faqa naqaa fee ifanee kasoo inanee.
PSA 114:6 Oo aaqana namuqa naqaa fee ifaqee mimmi anaaqiara foora kooripoo kooripoo ifee. Oo amuaqunamuqaindi innee faqa naqaa fee ifaqee sipsipa aanaaqiara foora rafusaki rafusaki ifee.
PSA 114:7 Maa maqa maaqafa mina quqoofa qumiranara aindiri raani. Yakooboona Anutufa qumu marinara aindiri aindiri raani.
PSA 114:8 Mi Anutufa ooniara qufanoo quandaki nammari farumaikinau. Mifa qufanoo afeeka ooniuqa aanaaqi nammariuqa kammafi qumi mariqau.
PSA 115:1 Oo Yaawee sia maasa duqusaa qareenarafa mariani. Ani auqusaa kai qareenarafa marani. Ani sia taikaanina amuqusirafa faqa ani mapukusee marira oosana faqa marinara qareenarafa ani auqusaa mariani.
PSA 115:2 Aiqama maqannaasa nanaree maasara inni Anutufa yaifee maridanoo fee qimasee iraidee.
PSA 115:3 Maasa Anutufa innaarunai maridanoo. Mifa narí aidiramau fidanoo narí aidi ainanna auqaidanoo.
PSA 115:4 Misa aiqama anaamuru mariasa unnaqira anutusa faiqí faiqi nisaukunnai koora faqa siruaannoo faqa auquqaafa maridanoo.
PSA 115:5 Misa noo aamara marifaqa sia ufa qidaqa. Misa nifu faqa marifaqa sia qafaidaqa.
PSA 115:6 Misa naaqoo faqa marifaqa sia ufa iridaqa. Misa naikaamara faqa marifaqa sia udi ramasee qafaidaqa.
PSA 115:7 Misa nisauku faqa marifaqa sia auqama qafaidaqa. Misa niku faqa marifaqa sia nidaqa, sia kasi kasidaqa. Misa nisananda faqa marifaqa minakiqari sia ufa qidammia.
PSA 115:8 Mi ainainausa auqusee mina saqariki mariasa nariqa sia kasi mari anutuna aannaraqa mariaqanani.
PSA 115:9 Oo Isaraee maqannaasa innee Yaaweena mandaaqaaqa. Mifa inni dadaaqinoo itita nimaqaidanoo.
PSA 115:10 Oo Isaree maqannaa aanaiqikirausa nikeeku nikaaku mariasa innee Yaaweena mandaaqaaqa. Mifa dadaaqinoo itita nimaqaidanoo.
PSA 115:11 Aiqama innee Yaweena amooqi mariasa mina saqarikiaqa. Mifa inni dadaaqinoo itita nimaqaidanoo.
PSA 115:12 Yaaweefa maasara iridanoo amiqi amiqimma qimaqaannoo. Mifa Isaraee maqannaasa amiqi amiqimma niseennoo. Kafaa mifa aiqama narí aanaiqikirausa faqa amiqi amiqimma nimaqaannoo.
PSA 115:13 Yaaweenara naaquqaifaqa mina ufa ameemaanai keeqee mariasa mifa amiqi amiqimma nimaqaannoo. Mifa uriqararausa faqa oorudupirausa faqa amana amana kai amiqi amiqimma nimaqaannoo.
PSA 115:14 Yaaweefa ani faqa ani akeeku akaaku faqa faiqi asumu nimiani.
PSA 115:15 Yaaweefa maa maqa maaqana faqa innaarunna faqa auqu quqaqoofa mifa inni amiqi amiqimma nimaqaani.
PSA 115:16 Innaaruna Yaaweenaindi kai maridanoo. Maa maaqana Yaaweefa faiqí faiqnimufa maridanoo.
PSA 115:17 Kuqufuasa sia Yaaweena amooqidammia. Ufa taikafifaqa madikaki kuqiqa mariasa sia Yaaweena amooqidaqa.
PSA 115:18 Maasa kaqi marunausa Yaaweena dufi dufi qimamaqaanaura. Maqee faqa naaru naaru faqa miqianaura. Yaaweena amooqiaqa.
PSA 116:1 Yaaweefa qini innaaru qirana iri marinara qinee minara ridaqa.
PSA 116:2 Mifa qini ufa aaqoo rammatinimmasee irimarinara qinee kaqi marunna kamu minara innaaru qianaura.
PSA 116:3 Kuqirafa qini fiqu fiqumma datinoo marinau. Kuqiranara rufiarafa qini qumara kuqiranaki quqararinau. Qini rufiarafa faqa qinunurirafa faqa qumbiqanoo marinau.
PSA 116:4 Qinee miqiqa maridaqa Yaaweena qeeqa qimuqusiranakiqari maaqi qimasee innaarukiqari qimamiqiafana. Oo Yaawee anee qini asumu mara quqaannee qidaqa.
PSA 116:5 Yaaweefa mifa nifauara oosana faqaafa faqa andeeqara oosana faqaafa faqa maridanoo. Maasa Anutufa faiqí faiqiara amuqusirafa qumbiqanoo marifa maridanoo.
PSA 116:6 Soodaa qirausa siaisa Yaaweefa ititannimaqaidanoo. Qinee kuquaqaa ira ummaaraki marunanoo Yaaweefa qini mareeqee amiqiraqoo quqaqiseenoo.
PSA 116:7 Yaaweefa qini amiqimma qimaqainara qini qimuqusa anee kafaa paasoosida afaaqa quqasee maria.
PSA 116:8 Yaaweefa qini kuqiranakinaana kaqinni mara quqaqiseenoo qini daukunu aadanusu qimaqaseenoo qini rafaaqafu qimaqarariana ititaqimaqeenoo.
PSA 116:9 Miqimmasainara qini aiqama marirafa maa maqanasaaqaraasaki mariasa faqa maridaqa Yaaweena afusaa kai maridaqa.
PSA 116:10 Qinee qeeqara namuqaa kaaqa qini radamuseeaafoo qimasee kaqi kai Yaaweena saqarikidaqa.
PSA 116:11 Qinee qeeqa rufiaranakiqari maridaqa maaqi qiqa. Sia faiqí faiqi moo saqariki mariafa maridanoo.
PSA 116:12 Yaaweefa qini amiqimma qimaqaina akiiqara nana ainainee amianauree.
PSA 116:13 Yaaweefa qini asumu marainara dufi dufi qimamaqara wainna nammari tatufiranara foora amianaura.
PSA 116:14 Mina faiqí anaasee suqirana qambaana qinee amiraree qimasee qima afeekai kammaqaafannana amianaura.
PSA 116:15 Yaaweena ufamau fimariasa kuquafanoo Yaaweefa firaaqoo aiaaeeqidanoo.
PSA 116:16 Oo Yaawee qinee ani ainainira faiqi maridaqa. Qinee qini qinoofa undee kai iqa ani ainainira faiqi maridaqa. Anee qini kuqiranaki quqaqoona mara qisoonafa mariananoo.
PSA 116:17 Qinee dufi dufi qirana faqa qeeqa innaaru qirana faqa aandau tatufiranara foora amianaura.
PSA 116:18 Ani faiqí anaasee nifusaa ani naaquqara maaqa maqusasaa Yeerusaree maqusa qambaanai Yaaweena amirara qima afeekaikiafanna ainaina amianaura. Yaaweena amooqiaqa.
PSA 117:1 Innee aiqama maqannaasa Yaaweena amooqiaqa. Innee aiqama fasiqa anaasee mina amooqiaqa.
PSA 117:2 Mina maasara aidirafa afeekaikinoo maridanoo. Mina mapukusee marira oosana naaru naaru marifa maridanoo. Yaaweena amooqiaqa.
PSA 118:1 Yaaweefa andeeqarafa marinara mina dufi dufi qimamaqaaqa. Mina faiqí aanaaseera aidirafa naaru naaru marifa maridanoo.
PSA 118:2 Isaraee maqannaasa maaqi qiaqa. Yaaweena faiqí aanaaseera aidirafa naaru naaru marifa maridanoo.
PSA 118:3 Anutuna aanaiqikirausa mariasa maaqi qiaqa. Yaaweena faiqí aanaaseera aidirafa naaru naaru marifa maridanoo.
PSA 118:4 Aiqama mina amooqimariasa maaqi qiaqa. Yaaweena faiqí aanaaseera aidirafa naaru naaru marifa maridanoo.
PSA 118:5 Qeeqa teerookiqari Yaaweena aaraafananoo mifa iriseenoo qini oosana oosana teerookinaana idukuqisanau.
PSA 118:6 Yaaweefa qini faqa marinara sia qinee rufiaanaura. Moo fannoo sia amana mandaikamma qimaqaannoo.
PSA 118:7 Yaaweefa dadaaqi marifa marinara qinee Yaaweefa qini namuqaauqa rafaaqafu nimaqee marina qafaanaura.
PSA 118:8 Yaaweena saqarikirafa amiqirafa uriqarafa maridanoo. Faiqí faiqisaa mundirafa ureeqanoo maridanoo.
PSA 118:9 Yaaweena saqarikirafa amiqirafa uriqararafa maridanoo. Faiqí faiqi uriqararausasaa mundirafa ureeqanoo maridanoo.
PSA 118:10 Moomoo namuqaauqa qini darirara fiqu fiqumma fufaqa qinee Yaaweena afeekannai misa naru taikaqiafana.
PSA 118:11 Misa qini fiqu fiqumma aiqamai datimma fufaqa qinee Yaaweena afeekannai misa naru taikaqiafana.
PSA 118:12 Qini namuqaauqa nunukara foora qini fiqu faiqu idaqa qausana qoomara foora fasa fasi marufaqa qinee Yaaweena afeekannai misa naru taikaqiafana.
PSA 118:13 Qini namuqaauqa qini darusee rafaaqa firarufanoo Yaaweefa qini dadaaqi uqeeranau.
PSA 118:14 Yaaweefa qini afeekaikirana faqa nimudaanai qirana faqa qimidanoo. Mifa qini mandainaina kinaana uqeera qiseenoo.
PSA 118:15 Yaaweena rakira fasiqauqa uiqaana maaqaki asasida qufoona rida qiana iriaqa. Yaaweena uriqarara afeeka fannoo miqidaqinoo iriaqa.
PSA 118:16 Yaaweena afeeka fannoo rakiranaki uriqararana maasa qiminau. Mina uriqarara afeeka maasa dadaaqifaqa rakirana uriqareeqa.
PSA 118:17 Qinee sia kuquanaura. Qinee kaqi maridaqa Yaaweefa dadaaqu oosanara koorooianaura.
PSA 118:18 Yaaweefa qini firaa ummaara qimiseenoo qini kuqiranasaa ititaqiseenoo.
PSA 118:19 Naaquqara amaana maqa kooqiuqa atuaqisaaqa. Qinee minaki keeqafi Yaaweenara dufi dufi qianaura.
PSA 118:20 Mi kooqifa Yaaweefinnai fimaria kooqifa maridanoo. Andeeqarausa kai minaki keeqeefaranoo.
PSA 118:21 Anee qini innaaru qirana irisee dadaaqi mariannanara ani Yaaweena amooqidaqa. Anee rakirana uriqararana qimiannanara ani amooqidaqa.
PSA 118:22 Maaqa usakee mariasa afeeka sabeena minnisoofa innaaqianna aiqama sabeenauqa uriqararafa marinau.
PSA 118:23 Yaaweefa kai mi ainainna auquqoofaqa qafaidaqa idaaqira ainainee qidaqa.
PSA 118:24 Yaaweefa maa faasaanna rakiranaki uriqaree mari faasaanafa maridanoo. Miqunara maasa asasidaqa idi raaqanani.
PSA 118:25 Oo Yaawee maasa mareeqee amiqira qoo quqaqisaa. Anee qiqama ainaina anoonaikamma qimia.
PSA 118:26 Yaaweena auqusaa animari fasiqana Yaaweefa amiqi amiqimmamaqaani. Maasa Yaaweena naaquqara amaana maqakiqari inni amiqi amiqimma nimaqaidaqa.
PSA 118:27 Yaaweefa mifa Anutufa maridanoo. Mifa maasa amiqimma qisee marinau. Innee aiqamausa suqufiqa saqari amanee raudasee uqirausa asasammamaree amaana maqaki keeqafi aidara fiqu fiqu iaqa.
PSA 118:28 Oo Yaawee anee qini Anutufa marianaqa minara qinee ani dufi dufi qimamaqaidaqa. Qinee ani uriqararanara kooroo ianaura.
PSA 118:29 Yaaweefa andeeqarafa marinara mina dufi dufi qimamaqaaqa. Mina faiqí anaaseera aidirafa naaru naaru marifa maridanoo.
PSA 119:1 Aaqara oosana sia mari marirana faqaasa asasidaqa. Yaaweena sanda ufamau fimariasa faqa asasidaqa.
PSA 119:2 Yaaweefa naamuaqira ufamau fimariasa asasidaqa. Nariqa nimuqusannai mina ufa afaqee mariasa asasidaqa.
PSA 119:3 Miqi marinausa sia moo aaqara oosana maraidammia. Misa Yaaweena aatata fimariasa maridammia.
PSA 119:4 Oo Yaawee anee aneenna sanda ufa maasa qimiseenana mapukusee andeeqasee aiqama afaqaaqee qimasee qimanniminau.
PSA 119:5 Qinee ani naamuaqira ufa afaqaidaqa mapukusee marianauree qidaqa iridaqa.
PSA 119:6 Qinee ani sanda ufa aiqama kasoommafi iriaraasidaqa.
PSA 119:7 Qinee ani andeeqara rainannimaqaranara iriseeqa qeeqa anukara qimuqusannai ani amooqianauranoo.
PSA 119:8 Qinee ani naamuaqira ufa mau fuanaura. Anee Yaaweefa sia qini minniqisaa.
PSA 119:9 Naqi masee fee kumaaraa fannoo narí marirana maqee maqee anukaida mariannoo fee. Ani Yaaweena ufamau fimarianannai miqiannoo.
PSA 119:10 Qinee qeeqa qimuqusannai ani ufa qaindusiraree qidaqa amanidaqa. Ani sanda ufa rukiaranasaa anee qini ititaqisaa.
PSA 119:11 Qinee ani naamuaqira ufa qumareeqa qeeqa qimuqusaki quqaseeqa sia ani mandaikamma amaqaanaura.
PSA 119:12 Oo Yaawee qinee ani amooqidaqa. Aneenna oosanara qimaqimia.
PSA 119:13 Anee qimunna sanda ufausa kafaa kafaa firaaqoo nameera qidaqa qimannimianaura.
PSA 119:14 Qinee ani sanda ufamau firanara didimarifaqa asasi marunafa moomoo umiasana ainainara asasimarunnana faqa uraaqaranoo maridanoo.
PSA 119:15 Ani naakapara ufa qinee aiuqimarunausa maridaqa. Ani qimannimira ufauqa amiqimmasee asooki rimarunausa maridaqa.
PSA 119:16 Qinee ani sanda ufara asasidaqa. Qinee ani naamuaqira ufara sia qaunusee mana mana ianaura.
PSA 119:17 Qinee kaqi maridaqa ani qimannimira ufamau fuaneera aneenna ainainira faiqi qini amiqimma qisaa.
PSA 119:18 Oo Yaawee ani naaquara anoona ufa qirana ani sanda ufaki marina irianeera qini irirana atuqasainaqa irianaura.
PSA 119:19 Qinee maa maqanasaa qusasaa marianauranoo. Sia aneenna sanda ufa qini kukeeqa qimaqaa.
PSA 119:20 Qinee qinunu rimarunanoo didafidanoo. Ani rainannimaqara ufara aiqama kari iriraree qimasee aupuraidaqa.
PSA 119:21 Oo Yawee nári nimoo naamoo qimariasa anee aanoommasee qaoo qimarianafa mariananoo. Ani naamuaqira ufa rukiasee kaqi runna fimariasa ani niqurara ufa ameemaanai maridaqa.
PSA 119:22 Qinee ani sanda ufauqa afaqee marunausa marunnanara misa ataasa ataasa qima qimaqaranakinaana faqa aasaandaana ufa qima qimaqaranakinaana faqa iduku qisaa.
PSA 119:23 Uriqararausa moodaanaki suqufiqa qini mandaikamma qimaqarara tipundaari mariafaqa qinee sia minara irianaura kaqi ani naakapara ufa asaana rumasee irianaura.
PSA 119:24 Ani naakapara ufauqa qini didirana qimidammia. Mi ufausa qini daakapee mariasa maridaqa.
PSA 119:25 Qinee kookoommaki rafaaqa fusaafaqa kuqiraridaqa. Anee aneenna qima afeekaika maqoonandee inana qini uqeera qisaa.
PSA 119:26 Oo Yawee qinee qeeqa mariranara kooroommasee qimamunana anee iriseenana qima qimiananoo. Aneenna oosana qima qimia.
PSA 119:27 Qini dadaaqinaqa ani sanda ufa oosanara amiqimasee iria. Anee miqinaqa qinee ani naaquqara naakapara ufara indee indee ida marianaura.
PSA 119:28 Oo Yaawee qiqa qimudaoo qirafa qiqa rafaaqafidanoo. Aneenna qima afeekaikamma qoonandee inana afeeka qimia.
PSA 119:29 Anee unnaqira aatata fira oosana ititaqisaa. Aneenna amiqi amiqira nakiqari aneenna sanda ufa daamuaqia.
PSA 119:30 Qinee andeeqara aatata kai fuanauree qimasee utaaqeeqa. Qinee ani rainannimaqara ufa amiqimmasee iriqa.
PSA 119:31 Qinee ani Yaaweena naakapara ufa afaqee marunausa marunnanara anee sia qisauriranaki quqaqisaa.
PSA 119:32 Anee irirana moo faqa moo faqa qimiannanara ani naamuaqira ufa mau asasamasee fidaqa.
PSA 119:33 Oo Yaawee aneenna sanda ufa oosana daamuaqinaqa qinee naaru naaru mi mau kai fuanaura.
PSA 119:34 Anee irirana qiminaqa ani sanda ufa oosana irisee mi mau fuanaura. Qeeqa aiqama qimuqusannoo afaqaanaura.
PSA 119:35 Anee dadaaqinaqa ani sanda ufa kooroo imari aatata fua. Qinee minaki asasirana paquri marunnanara minaki fuanaura.
PSA 119:36 Anee qini didirana mareeqeenana aneenna sanda ufamau firatinai ubeekama qisaa. Moomoo qumiasana faqaasaikiqa marira oosanai sia ubeekama qisaa.
PSA 119:37 Oo Yaawee anee qini dadaaqinaqa anoona siai ainainaki sia fua. Anee qima afeekaikunandee inana amiqi amiqimma qisaa.
PSA 119:38 Oo Yaawee ani ufa mau fimariasara qima afeekaikunandee kai inana qini aneenna ainainira faiqi mi qima afeekaikirana qinisaa faqa quqasainanoo anoonaikiani.
PSA 119:39 Qini aasaandaana ufa qimi mariafaqa rufiaqa nimarunnanakinaana anee uqeereeqee kaqinni quqaqisaa. Ani andeeqara rainannimaqara ufa naaquqarafa maridanoo.
PSA 119:40 Oo Yaawee ani naamuaqira ufa mau firara dididanoo. Anee andeeqarafa mariannanara fuka marirana qimia.
PSA 119:41 Oo Yaawee ani qiniara firaaqoo aidi marina uqaqifiqainaqa qafaa. Aneenna qima afeekammaqoonandee inana qini mandainainakinaana uqeera amiqiraqoo quqaqisaa.
PSA 119:42 Miqimma sainaqa qini aasaandaana ufa qimimariasa qimannimianaura. Qinee ani ufa saqariki marunnanara qimanniminaura.
PSA 119:43 Anee afeeka qiminaqa anoona ufa kai aiqama kari qia. Qini irirafa ani rainannimaqara ufasaa mundinoo marinara miqianaura.
PSA 119:44 Aiqama kari qinee ani sanda ufamau naaruara naaruara fuanaura.
PSA 119:45 Qinee ani naakapara ufamau firara amanamasee qafee marunnanara qinee adaarasaqanna idukiranaki marianaura.
PSA 119:46 Qinee ani naamuaqira ufa uriqararausa kooroommasee qimannimianaura. Qinee miqi qimasee qimannimidaqa sia qisauruanauranoo.
PSA 119:47 Qinee ani naamuaqira ufara didimarinara mimau fidaqa asasirana paquridaqa.
PSA 119:48 Qinee ani naamuaqira ufara didi marifaqa qeerairidaqa. Qinee miqidaqa ani naakapara ufara maqee maqee indee indee idaqa.
PSA 119:49 Anee qini aneenna ainainira faiqiara qima afeekaika maqoonnanara oonumafi iria. Mi ufafa qini pooduqama qimaqeemarifa maridanoo.
PSA 119:50 Ani qima afeekaikira ufa fannoo qini kaqimarirana qimi marinara qeeqa aupuraranaki maridaqa qifaaqa asooarana mareeqa.
PSA 119:51 Nári nimoo naamoo qimariasa aiqama kari ataasa ataasa ufa qima qimaqaidammia. Miqi mariafaqa qinee ani sandufa sia minnisee moo saa fiqa.
PSA 119:52 Oo Yaawee ooqai aneenna rainannimaqara ufara qunaqa kaqi iridaqa. Mi ufafa qini qifaaqa asooarana qimidanoo.
PSA 119:53 Mandoosana maree mariasa ani sanda ufa rukiaafaqa qinee niqafaunanoo qirana qarafa qiniki qumbiqaidanoo.
PSA 119:54 Qeeqa qusasaa maa maqanasaa mariranaki ani naamuaqira ufasaa quandasee idiraidaqa.
PSA 119:55 Oo Yaawee eendaki aniara iridaqa. Ani sanda ufara faqa iridaqa.
PSA 119:56 Ani naamuaqira ufamau funnanannoo asasirana paquridaqa.
PSA 119:57 Oo Yaawee qini aiqama didirafa anee kai mariananoo. Qinee ani sanda ufa afaqaanauree qimasee qima afeekaikiqa.
PSA 119:58 Qinee qeeqa aiqama qimuqusannoo anee qima afeekaikunandee inana qifauama qimaqaanneera iraidaqa.
PSA 119:59 Qinee qeeqa marira oosanara oonumafi iriseeqa quandaki anee qimannimira ufa mau firaree qimasee qima afeekaikidaqa.
PSA 119:60 Qinee ani naamuaqira ufamau firaree qimasee sia manoo maanaa idaqa kai kaqi idaqa.
PSA 119:61 Manda oosana maree mariasa qini qiku ufana fufusee qiniara minaki aruanifee qiafaqa qinee ani sanda ufa sia qauniqa mimau kai fidaqa.
PSA 119:62 Enda amuqusai qinee findifiqa ani andeeqara rainannimaqara ufara amooqidaqa.
PSA 119:63 Qinee ani ainaini mariasa faqa ani sanda ufamau fimariasa niqoondi maridaqa.
PSA 119:64 Oo Yaawee ani sia taikaaninna amuqusirafa maa maqa maaqana qumbiqanoo maridanoo. Miqinoo marinara anee aneenna naamuaqira ufa daamuaqia.
PSA 119:65 Oo Yaawee anee aneenna qima afeekaikira ufa mau finana qini amiqi amiqimma qimaqaananoo.
PSA 119:66 Qinee ani sandufa saqariki marunnanara anee oosana oosana irirana rainara iriqaraasirana faqa oonumafi irirana faqa qimia.
PSA 119:67 Qinee indaaru kaqirunna fimariafanana anee Yaaweefa anee firaa ummaara qimunaqa maqee qinee quandaki ani ufamau fidaqa.
PSA 119:68 Anee kaaqa andeeqarafa mariannanara aiqama ainaina imarianna ainainafa faqa kaaqa andeeqarafa mariananoo. Aneenna naamuaqira ufa daamua qia.
PSA 119:69 Nári nimoo naamoo qimaria fasiqausa qiniara unna ufa qimariafaqa qinee qeeqa aiqama qimuqusannoo ani qimannimira ufa mau fidaqa.
PSA 119:70 Mi fasiqausa irirana siaisa mariafaqa qinee ani sanda ufaki asasirana paquridaqa.
PSA 119:71 Oo Yaawee dufi dufi qiqa manda oosana akiiqara darimarianafa mifa qini dadaaqinara ani naamuaqira ufa oosanara iridaqa.
PSA 119:72 Anee qimianna sanda ufanara didirafa oosana firaafa fiqarara fee qidaqa. Maa maqanasaa aiqama munnima marina uraaqaranoo maridanoo.
PSA 119:73 Anee qini auquseenana qini afeedamma qisaananoo. Anee irirana oosana qiminaqa ani sandufa irianaura.
PSA 119:74 Qinee ani qima afeekaikira ufa saqariki marunnanara aniara qeerairida ani ufa qaindusi mariasa qini qiqafamasee asasifaranoo.
PSA 119:75 Oo Yaawee ani rainannimaqara ufa andeeqarafa marifaqa qinee iridaqa. Anee mapukusee marira oosana faqaafa mariannanara anee aupurarana qini manda oosana akiiqara qimiananoo.
PSA 119:76 Aneenna ainainira faiqi qinisaa qima afeekaikamma qoonnamau finanoo ani sia taikaaninna amuqusirafa qini qifaaqa asooama qimaqaani.
PSA 119:77 Qinee ani sanda ufara asasimarunnanara qifauama qimaqaa.
PSA 119:78 Nári nimoo naamoo imariasa unna qimasaida qini kiki qusi marianara nisauriranaki mariaqanani. Qinee qeeqaraa ani qimannimira ufara indee indee ianaura.
PSA 119:79 Ani Yaaweenara qeerairida ani ufa qaindusi mariasa faqa ani naamuaqira ufa irimariasa faqa qinee unnannai aniaqanani.
PSA 119:80 Qinee andeeqasee ani naamuaqira ufamau fuaqaana, miqi mariaanoo aaqara qisaurirafa sia qini rafaaqafu qisaani.
PSA 119:81 Oo Yaawee qinee ani dadaaqiranara kisaaqasaa rakisunaisia kudoosaapaidaqa. Qinee qeeqa saqarikirana ani ufasaa rusidaqa.
PSA 119:82 Ani qima afeekaikiranara qinee rakisida marunanoo qifu anauru idaqeenoo. Qinee iraanana anee yairee fee qini dadaaqinnaree.
PSA 119:83 Qinee mimi apatannoo nammari sakee mariana auquqaafa anaqinoo mandaikinoo marindee irausa maridaqa. Qinee miqiqa maridaqa sia ani naamuaqira ufa aunidaqa kaqi maraqa fidaqa.
PSA 119:84 Qinee kisaaqasaa fee rakisianauree. Yairee fee anee qini dari mariana akiiqara ummaara niminnaree.
PSA 119:85 Nári nimoo naamoo imaria fasiqausa sia ani sanda ufamau fimariasa qini qumararara dikaanda indufidaqa.
PSA 119:86 Ani aiqama naamuaqira ufa nifaaqa quqee maria afeeka ufafa maridanoo. Faiqí misa unna qimasee darirari marianara anee qini dadaqia.
PSA 119:87 Misa qini darirara qimeekaidaqa. Misa miqi mariafaqa qinee ani naamuaqira ufa sia minnisaidaqa.
PSA 119:88 Ani sia taikaaninna amuqusirafa marinara anee amiqi amiqimma qimaqaa. Qinee ani sandufamau fuaneera miqimma qimaqa.
PSA 119:89 Oo Yaawee ani ufa naaru naaru marifa maridanoo. Innaarunai faqa naaru naaru marifa maridanoo.
PSA 119:90 Ani mapukusee marira oosana fannoo miqikai inoo naaru naaru mariannoo. Anee maa maqa maaqana quqaqoonnaqoo kai maridanoo.
PSA 119:91 Ani naamuaqira ufa marinara aiqama ainaina maqee kaqi maridanoo. Mi aiqama ainainausa ani ainainira faiqiara foora marianara maqee kaqi maridaqa.
PSA 119:92 Ani sanda ufa sia qini asasirana oosana marinaqau qinee qeeqa umaara ameemaanai kuqunaiqini.
PSA 119:93 Qinee sia ani naakapara ufa qaunuanaura. Mi ufafa marinara minannai qini kaqi marirana maa maqanasaa qimiananoo.
PSA 119:94 Oo Yaawee qinee anindi maridaqa, qini dadaqia. Qinee ani naamuaqira ufamau firaree qidaqa amanidaqa.
PSA 119:95 Mandoosana maree maria fasiqausa qini darirara qimaarusidaqa. Misa miqi mariafaqa qinee ani sanda ufara kai indee indee idaqa.
PSA 119:96 Oosana oosana aiqama ainaina taikaaninafauqa kai marifaqa iridaqa. Miqinoo marifanoo ani naamuaqira ufa andeeqarafa sia taikaaninafa marifa maridanoo.
PSA 119:97 Oo Yaawee ani sandufara qinee firaqoo ridaqa. Qinee faasaambaasaana minara kai iridaqa.
PSA 119:98 Ani naamuaqira ufa fannoo qini faqa aiqama kari maridanoo. Qini amiqira irirana qimiseenoo qini namuqaa irirana uriqararausaikamma qimaqaidanoo.
PSA 119:99 Qinee ani qimannimira ufa indee indee imarunnanara qeeqa daakapee mariasa faqa urinnaaqaramasee iridaqa.
PSA 119:100 Qinee ani Yaaweena naamuaqira ufa mau fimarunnanara qini irirafa faiqí firaasa irirana urinnaaqaraidanoo.
PSA 119:101 Qinee ani ufamau firaree qimaseeqa aiqama mandainainara qeerairammasee amaaraidaqa.
PSA 119:102 Oo Yaawee anee aneenna kai qini daakapee marianafa mariannanara qinee sia ani naakapara ufa qimeesa uqidaqa.
PSA 119:103 Ani naakapara ufa kaaqa adiafaaimarifa maridanoo. Mi adiafaairafa ookasaasa anoona kaaqa adiafaa imarina faqa arusee uriqaranoo maridanoo.
PSA 119:104 Qinee ani sanda ufa irisee minannai amiqira irirana maraidaqa. Miqinoo marinara aiqama kaqi runna fimaria aanausara qini fidiaqaamma qimaqaidanoo.
PSA 119:105 Ani ufa fannoo qini qikuki qoomara foora kaaqa qee marifaqa fidaqa. Ani mi ufafa kai qini aana kaaqa qama qimaqee marifaqa fidaqa.
PSA 119:106 Qinee ani andeeqara sandufara doori runusee qima afeekaikammasee naaru naaru mimau fuanauree qiafannana, maqee kuqaa mi mau kaimbuanaura.
PSA 119:107 Oo Yaawee qinee firaa aupuraranaki maridaqa anee aneenna qima afeekaikunnandee inana maa maqanasaa kaqi marirana qimia.
PSA 119:108 Oo Yaawee, qini dufi dufi qira innaaru qiranara eedoo qimasee aneenna naamuaqira ufa qima qimia.
PSA 119:109 Qinee aiqama kari kuqirana afaisaa maridaqa taikaranara deedaqidaqa. Miqiqa maridaqa qinee sia ani sanda ufara qaunidaqa.
PSA 119:110 Mandoosana maree mariasa misa qini qimaara ufaanara foora fufusaafaqa qinee sia rufiamaree ani naamuaqira ufasaaqari kaqini fiqa.
PSA 119:111 Ani naamuaqira ufa qini naaru marira qumiasanara foora maridanoo. Mi ufausa qini qimuqusa asasirana qimi maria ufausa maridaqa.
PSA 119:112 Qinee ani sanda ufa mau fuanauree qimasee iridaqa. Ani sandufa mau fifi inaqa qeeqa kuqiranaki munu taikaanaura.
PSA 119:113 Ani sandufamau sia aiqama kari fimariasara qinee fidiaqaammidaqa. Miqidaqa ani sandufara kai qinee ridaqa.
PSA 119:114 Oo Yaawee anee qini itita qimaqee marianafa mariananoo. Minara qinee qeeqa irirana ani qima afeekaikiranasaa rusisee maridaa.
PSA 119:115 Innee mandoosana maree mariasa qini daaqaqari nianasaa fifuaqa. Qinee qeeqa Anutuna naamuaqira ufamau fuanaura.
PSA 119:116 Oo Yaawee anee qima afeekaikunandee qinana afeeka qiminaqa kaqi maa maqanasaa marianaura. Anee dadaaqinanoo qini daundura anisaa mundirafa sia taikaannoo.
PSA 119:117 Anee qini qumaree uqeera qisainaqa qinee amiqiraqoo marianaura. Anee miqimma qisainaqa qinee aiqama kari ani naamuaqira ufasaa irirana rusianaura.
PSA 119:118 Ani sanda ufa rukiee mariasa anee mininnisee mariananoo. Misa ueeqarara tipundaarirafa fifau sia anoona marifa maridanoo.
PSA 119:119 Anee maa maqanasaa mandoosana maree mariasa madaapeera foora damunamma aqi marianafa mariananoo. Qinee minara ani naakapara ufara dididanoo.
PSA 119:120 Qinee aniara rufiaidaqa. Qinee ani andeeqasee rainannimaqaranara irunanoo rufiarafa qini qumbiqa qimaqaidanoo.
PSA 119:121 Qinee andeeqara oosana faqa amiqira oosana faqa maree marunausa maridaqa. Anee minara iriseenana sia qini minni qisainaqa namuqaa qini mandaikamma qimaqaaqa.
PSA 119:122 Anee kuqaa qima afeekaikammasee aneenna ainainira faiqi qini dadaaqia. Ramoo ramaa imariasa sia qini nári uriqararanannai rafaaqafu qimaqaaqa.
PSA 119:123 Oo Yaawee qinee ani asumu mara qimaqaranara kisaaqasaa rakisidaqa marunanoo qifuki qaunduaridanoo. Anee qini namuqaa nisaukukinaana rafiaranara qima afeekaikamma qoonnanara afeesi marunanoo qifuki qaunduaridanoo.
PSA 119:124 Oo Yaawee aneenna sia taikaaninna amuqusirana amana kai qini amiqimma qimaqasee aneenna naamuaqira ufa daamua qia.
PSA 119:125 Oo Yaawee qinee ani ainainira fasiqa maridaqa anee irirana oosana qiminaqa qinee ani naamuaqira ufa oosana irianaura.
PSA 119:126 Oo Yaawee faiqí anaasee ani sandufa rukieemarianara anee oosana uqannifiqara aukuana doo kambiqaidanoo.
PSA 119:127 Ani naamuaqira ufara qini didirafa koora uraaqaranoo maridanoo. Kaaqa amiqira koora uqanna faqa uraaqaranoo maridanoo.
PSA 119:128 Minara qinee ani aiqama naakapara ufa afaqaidaqa aiqama aaqara oosanara fidiaqaa idaqa.
PSA 119:129 Ani naakapara ufa kaaqa amiqirafa marifaqa qinee qeeqa qimuqusa aiqamannoo afaqaidaqa.
PSA 119:130 Ani naakapara ufa oosana qimannimirafa kaaqa qarana nimidanoo. Mi ufafa sia iri mariasa irirana nimidanoo.
PSA 119:131 Ani naamuaqira ufa aniranara kisaaqasaa rakisidaqa doo raqasee daannanai daannanai qida maridaqa.
PSA 119:132 Anee aniara rimamasara misa nifauee marianafa mariananoo. Anee qinee unnannai quandafi qini faqa qifauama qisaa.
PSA 119:133 Aneenna qima afeekaikunandee qinana qini saamuriranasaa itita qisaa. Anee qinanoo aaqara oosana fannoo sia qini rafaaqa fu qimaqaani.
PSA 119:134 Faiqí misa nári uriqararanannai qini rafaaqafidammia, anee minakinaana qini mara qisaa. Miqimma sainaqa qinee ani naamuaqira ufa mau fuanaura.
PSA 119:135 Anee aneenna oori afu amiqi amiqiranannai qini amiqimma qimaqasee aneenna sanda ufa daamuaqia.
PSA 119:136 Faiqí anaasee ani sandufa mau sia fuanara qini daukunu fannoo nammariara foora adiaidanoo.
PSA 119:137 Oo Yaawee anee kaaqa andeeqarafa mariananoo. Ani sandufa faqa aiqamausa amana amana kai andeeqa nimaqee marifa maridanoo.
PSA 119:138 Ani aataata fuaqee ufa fannoo kaaqa amana amana kai andeeqa nimaqee marifa maridanoo.
PSA 119:139 Qini namuqaa ani naamuaqira ufa minnisee mana mana imarianara qini aanoo qirafa idara foora qini qitaku qidanoo.
PSA 119:140 Ani qima afeekaikira ufa kaaqa mapukirafa maridanoo. Minara qini kaaqa dididanoo.
PSA 119:141 Qinee oorudupirausa marunaqa misa qiniara fidiaqaaidaqa. Miqi mariafaqa qinee sia ani naamuaqira ufara mana manamasee qaunidaqa.
PSA 119:142 Oo Yaawee ani andeeqarafa naaru naaru mariannoo. Ani sandufa faqa aiqama kari kuqaa anoona maridanoo.
PSA 119:143 Ummaara faqa inunurirafa faqa qiniki qumbiqaidanoo. Miqi marifanoo ani naamuaqira ufa fannoo asasirana qimidanoo.
PSA 119:144 Ani naakapara ufa aiqama kari amana amana kai andeeqannimaqee marifa maridanoo. Minara iriseenana anee irirana oosana qiminaqa maa maqanasaa kaqi marianaura.
PSA 119:145 Oo Yaawee qinee qeeqa qimuqusannai ani aaraidaqa. Qini nammeera qiranara qima qiminaqa qinee ani naamuaqira ufa mau fuanaura.
PSA 119:146 Qinee ani aaraidaqa qini mandainainakinaana uqeera qisainaqa qinee ani sanda ufa afaqaanaura.
PSA 119:147 Suani afu maqee urimarinana, anee qini dadaaqianneera aaraidaqa. Qinee qeeqa irirana ani qima afeekaikira ufasaa quqasee maridaqa.
PSA 119:148 Maqee eendirana namu faqa kaqi marunanoo qifu faqbaqa iaqaqaifaqa ani naakapara ufauqara oonu mafi iridaqa.
PSA 119:149 Oo Yaawee ani sia taikaaninna amuqusirafa marinara qini innaaruqirana iria. Aneenna nifauarana uqaqifiqasee qini marirana afeedamma qisaa.
PSA 119:150 Nidafirana faqa narirana faqa qimi mariasa adeedi anidaqa. Misa ani sanda ufa sia afaqee mariasa maridaqa.
PSA 119:151 Miqi mariafana anee Yaaweefa qini daaqa mariananoo. Ani aiqama naamuaqira ufauqa naaruara marifa maridanoo.
PSA 119:152 Qinee ooqai ani naakapara ufa iriqiafana. Mi ufausa anee qunaqa naaru marira ufauqaika mafiqau.
PSA 119:153 Qini aupurarana qafamasee minakinaana qini maraqisaa. Qinee sia ani sandufa qaununnanara miqimma qisaa.
PSA 119:154 Qinee ufaki marunnana ititaqimaqasee qini idukuqisaa. Anee aneenna qima afeekaikunandee inana qini amiqiraqoo mara quqaqisaa.
PSA 119:155 Manda oosana maree mariasa misa ani sanda ufa mau sia fimariasa anee sia mareeqee amiqira qoo quqanniseennaranoo.
PSA 119:156 Miqi mariafana oo Yaawee anee qiniara amudaaoo qirafa firaaqoo marinara aneenna nifauarana uqaqifiqasee mareeqee amiqiraqoo quqaqisaa.
PSA 119:157 Qini namuqaauqa ummaara qimi mariasa moomoo maridaqa. Misa miqiqa mariafaqa qinee sia ani sandufasaaqari quandaki moosaa fiqa kaqi mi mau kai fidaqa.
PSA 119:158 Ani sanda ufa minnisee ueeqee mariasa qinee niqafamasee fidiaqaamma nimaqaidaqa. Sia ani naamuaqira ufa mau fimarianara miqidaqa.
PSA 119:159 Oo Yaawee doo qafaa, ani naakapara ufara firaaqoo dididanoo. Ani aidirafa sia moosaa fimarinara mariqoo kai marinara qini marirana afeedamma qisaa.
PSA 119:160 Ani sanda ufa oosana anoona maridanoo. Marifanoo ani aiqama andeeqara rainannimaqara ufafa naaru naaru marirafa maridanoo.
PSA 119:161 Misa faiqí uriqararausa misa fifau qini mandaikamma qimaqaidaqa. Misa miqi mariafaqa qinee ani sanda ufara kai qeerairammasee qaindusidaqa.
PSA 119:162 Qinee ani qima afeekaikira ufara firaaqoo asasidaqa. Mee faiqí moo fannoo koorara paqurimmasee asasindee qinee faqa miqi kai masee ani ufara asasidaqa.
PSA 119:163 Qinee aiqama unna ufara qikooqeenoo fidiaqaa uqanna qidaqa. Miqi marunanoo ani sanda ufara kai dididanoo.
PSA 119:164 Qinee aiqama faasaana moodaanai qisauku taikasee dinni oonu qaaraqanda marasee kari ani andeeqara rainannimaqaranara dufi dufi qimamaqaidaqa.
PSA 119:165 Ani sandufara nidi marisa asooaranaki maridaqa. Sia moo ainaina fannoo nikuama niminaqa saamurifaranoo.
PSA 119:166 Oo Yaawee anee qini asumu mara qisaanneera afeesidaqa anee daamuaqianna mau kai fidaqa.
PSA 119:167 Qinee ani naakapara ufa mau fidaqa. Qinee qeeqa aiqama qimuqusannoo minara dididanoo.
PSA 119:168 Qinee ani naamuaqira ufa faqa ani naakapara ufa mau fidaqa. Qinee aiqama ainaina auqee marunnana anee qafee mariananoo.
PSA 119:169 Oo Yaawee qini nammeera qirafa anee iannannai oorufuani. Aneenna qima afeekaikunandee inana irirana oosana qimia.
PSA 119:170 Qini innaaruqirana irisee aneenna qima afeekaikammaqoonnana amana kai mara amiqira qoo quqaqisaa.
PSA 119:171 Anee aneenna sanda ufa qima qimiannanara qinee aiqama kari ani amooqianaura.
PSA 119:172 Ani naamuaqira ufa aiqamausa andeeqasee raina nimaqee marifa marinara ani sanda ufara idi raanaura.
PSA 119:173 Qinee ani naamuaqira ufa afaqee marunnanara aiqama kari qini dadaaqirara deedaqina maria.
PSA 119:174 Oo Yaawee qinee ummaaraki marunnanara firaaqoo ani afeedamma qimaqaranara rakisidaqa. Qinee asasirana ani sandufaki paquridaqa.
PSA 119:175 Anee maqee marirana qiminaqa amana qinee ani amooqianaura. Ani naakapara ufa fannoo qini dadaaqamma qimaqaani
PSA 119:176 Qinee auiara sipsipara foora auiaqa nidaqa. Qinee sia ani sandufa qimeesu uqimarunnanara anee aniree qini aneenna ainainira faiqi randasee paquria.
PSA 120:1 Qinee manda ummaaraki maridaqa Yaaweena aaraunanoo mifa eedoo qimasee dadaaqinoo.
PSA 120:2 Oo Yaawee unnaqimariasa faqa ueeqee mariasa faqa nisaukukinaana mareeqee kaqinni quqaqisaa.
PSA 120:3 Innee unna qimariasa Anutufa inni naqaa fee mannimaqaannoo. Mifa naqimmaseenoo fee inni aupurarana nimiannoo fee.
PSA 120:4 Sundia rakira feefannoo faqa fidika arira idaurunnai faqa naruannoo.
PSA 120:5 Inni qambaanai marirafa kaasau maqannaa aamina maqannaasa qambaanara foora mandaikiqa maridaqa.
PSA 120:6 Qinee asooaranara fidiaqaa imariasaki kisaaqasaa uqanna mariaafanausa maridaqa.
PSA 120:7 Qinee asooaranara qimarunaqa misa rakiranara kai qidaqa.
PSA 121:1 Qinee aaqanai qifu maqasee, qini dadaaqirafa yaindari fee aniannoo fee qidaqa.
PSA 121:2 Qini dadaaqirafa Yaawee finaindari kai aniannoo. Maa maqana faqa innaaruna faqa auqu quqoo finnaindari kai aniannoo.
PSA 121:3 Mifa sia aniara qinana aqufinnaranoo. Ani rakisi amaqee marifa aiqama kari afu maqaida maridanoo.
PSA 121:4 Isaraee maqannaasasaa rakisinnimaqee marifa sia moo kari qaunduarinoo sia faiqaidannoo.
PSA 121:5 Yaaweefa ani rakisi amaqaannoo. Mifa ani itita amaqarara ani aaqa maridanoo.
PSA 121:6 Suani fannoo faasaana sia naruannoo. Kafaa eendaki quqoona fannoo sia naruannoo.
PSA 121:7 Yaaweefa aiqama mandainainaki innisaa ititamma nimaqaannoo. Mifa inni nariranasaa itita nimaqasee innisaa rakisiannoo.
PSA 121:8 Mifa kai inni firannai anirannaira rakisi nimaqaannoo. Maqee faqa naaru naaru faqa rakisi nimaqaannoo.
PSA 122:1 Yaaweena amaana maaqai firaree qimasee qimaqimiafaqa qinee asasiqa.
PSA 122:2 Maqee maasa maaqoo Yeerusaree faandaamura kooqiki keeqafi afuqaki maridaqa.
PSA 122:3 Yeerusaree maqusa usakasoofanoo kaaqa amiqirafa atiuqa amana amana kai inoo maridanoo.
PSA 122:4 Isaraeena akeeku akaaku miqimmasee aniree Yaaweena naamuaqira ufa amana kai dufi dufi qirana amidaqa.
PSA 122:5 Maaqoo Yeerusaree maqannaa karaambaiqauqa nariqa faiqí anaasee ufa andeeqa nimaqararee qimasee ooqu mariqau.
PSA 122:6 Yeerusaree maqusa asooaranaki marianifeera innaaruqiaqa. Yeerusaree maqusara rimariasa aiqama ainaina rairaa iani
PSA 122:7 Oo Yeerusaree maqusa ani faandaamura afuqaki asooarafa kai mariani. Ani karaambaiqauqa nári maaqaki amiqimmasee mariaqa.
PSA 122:8 Qeeqa ainainara faqa qeeqa qiqoondiuqara faqa irisee Yeerusaree maqusara maaqi qidaqa. Asooarafa aniki mariani.
PSA 122:9 Yaaweena maasa Anutuna amaana maaqara irisee inni Yeerusaree maqannaasee irairaamma nimaqaranara innaaru qidaqa. Anutufa qimudaoo qirana amiani fee innaaru.
PSA 123:1 Oo Yaawee qinee anee iannannai qifu maqaidaqa. Innaarunai anee rakisi nimaqee mariannannai qifu maqasee dadaaqianneera innaaru qidaqa.
PSA 123:2 Ainainira faiqi nariqa rakisiranasaa nifu mundi mariandee iqa kafaa faqa ainainira maanaaqa miqikai inoo narí rakisira aanaaseesaa mundidanoo. Oo Yaawee maasa Anutufa maasa miqi kai iqa ani qafaqa maridaqa anee maasara qimudaoo qirana qimianneera afeesidaqa.
PSA 123:3 Oo Yaawee maasara qimudaoo qimasee qifauama qimaqaa. Maasa moomoo aasaandaana ufa qima qimaqaidaqa.
PSA 123:4 Ainaina faqaasa kisaaqasaa maasara uteeti qidaqa. Kafaa nári nimoo qimariasa nári mara maree uriranannai maasa rafaaqafusee ataasa ataasa qima qimaqaidaqa.
PSA 124:1 Yaaweefa maasa sia dadaaqinaqau naqaa fee unaiqini. Oo Isaraee maqannaasa minara qima qimifaqa iria.
PSA 124:2 Yaaweefa maasa sia dadaaqinaqau namuqaa nári aanoo qiranannai maasa qumarasee kaqi kasi marunaqa nambiqaa qini.
PSA 124:4 Miqinanoofau nammari aufirafa maasa maree fiqini. Kaifaa nammari maasa rafaaqafu qisaiqini.
PSA 124:5 Nammari aufinoo firaaqoo aiai qimarifa maasa ukuqnama qimaqaiqini.
PSA 124:6 Yaaweefa maasa namuqaara qifaqa sia maasa mandaikamma qimaqaanara maasa mina dufi dufi qimamaqaa.
PSA 124:7 Maasa ufiniara foora faiqí ufini ufanaki arurudukaki fiara foommiqa. Mi fasiqana ufaana raudafifaqa maasa qifaaqa quqasee mana mana idaqa.
PSA 124:8 Maasa dadaaqirafa Yaawee finnaindari anidanoo. Maqa faqa innaaruna faqa auqu finnaindari anidanoo.
PSA 125:1 Yaaweena saqariki mariasa Sioona aaqanara foora maridaqa. Sia amana kasi annoo sia moo fannoo mina mareeqee moosaa quqaannoo.
PSA 125:2 Aaqanauqa Yeerusaree maqusa fiqu fiqumma datinoo marindee inoo Yaaweefa narí faiqí anaasee fiqu fiqumma ititannimaqasee maqee faqa naaru faqa rakisi nimaqaidanoo.
PSA 125:3 Mandoosana maree mariasa sia amana andeeqarausa maqasaa aiqama kari rakisifaranoo. Misa miqifaqa andeeqarausa misasaaqaraa aaqara oosana maree foora.
PSA 125:4 Oo Yaawee andeeqara oosana maree mariasa amiqi amiqimmannimaqaa. Ani naamuaqira ufamau fimariasa amiqi amiqimma nimaqaa.
PSA 125:5 Miqidana anee manda oosana maree mariasa aupurarana nimidana ani ufa minnisee kaqi runna fimariasa faqa aupurarana nimia. Asooarafa Isaraee maqannaaki mariani. Manda ainainakinaana mara kaqinni uqannisaani fee innaaru.
PSA 126:1 Yaaweefa maasa Yeerusareenni qifiqee anufa qainasaara foora marinau.
PSA 126:2 Maasa firaaqoo naanaidara qida asasida idiree mariqau. Miqi mariafanaqa akaqa maqannaasa maasara maaqi qiqau. Yaaweefa firaa ainaina dadaaqinoo fee qiqau.
PSA 126:3 Kuqaa mifa firaa ainaina maasa dadaaqufaqa maasa minara firaaqoo asasiqiafana.
PSA 126:4 Aadaturunna aaku rifanoo nammari qumi marindee inana kaifaa maasa amiqi amiqimma qimaqaa.
PSA 126:5 Naukuna namu faqa ummaqi mariasa asasira idi namu faqa unakuaqanani.
PSA 126:6 Asumu ainaina ummaqiraree qimasee naukunu namufaqa maree munu ummaqusee mariifaqa nara aukuana unaku maree asasira idi namu faqa maree anifaranoo.
PSA 127:1 Yaaweefa sia maaqa usakaifanoo, usakara saika fannoo anoona siaifa mariqini. Yaaweefa sia maqusasaa ititee marifanoo aufari mari fasiqafa kikiqinoo marida rakisi mari oosanafa sia amanaikiqini.
PSA 127:2 Fifau kananaana eendai uqanna findifi ainaina kadaapirina fifiina eendi mariananoo. Yaaweefa narí aidi marisa faiqaqee iafanoo narana nimidanoo.
PSA 127:3 Faiqi asumu Yaaweefa kaqi nimi mari ainainafa maridanoo. Mifa kaaqa afaaramasee amiqi amiqimma qimaqaidanoo.
PSA 127:4 Kumaaraasaa maqainna faiqisa nári nikoona asaukuki rakira fasiqauqa duru feefara foora maridaqa.
PSA 127:5 Miqira fasiqa moomoo faiqi duru feefara foora mina asaukuki karariqa mariafanoo asasidanoo. Mifa ufa iriranaki mina namuqaauqa sia mina rafaaqa fifaranoo.
PSA 128:1 Yaaweena ufamau fimariasa asasidaqa. Mina naamuaqira ufasaa mariasa faqa asasidaqa.
PSA 128:2 Anee miqi marianafa aiqama kari ani kadaapirirafa narana ainaina amiannoo. Ani ainaina reemindeemirinoo marinana asasinnarannoo.
PSA 128:3 Ani anaaqa fannoo wainna sandara foora maaqaki mariranaki moomoo qaqama iraannoo. Ani akoonaiqi faiqiuqa oorifa amiqira saqariara foora ani narana nee marianna difaanina fiqu fiquiqa marifaranoo.
PSA 128:4 Faiqí Yaaweena ufamau fimarifa miqimmaseenoo kaaqa amiqi amiqiannoo.
PSA 128:5 Yaaweefa Sioonna maqusakiqari inni amiqi amiqimma nimaqaani. Inneeqa kaqi marinna kamu Yeerusaree maqusaki aiqama ainaina reemindee mirirana qafaaqanani.
PSA 128:6 Innee kisaaqasaa marida inneeqa ninaiqimara niqafaaqanani. Asooarafa Isaraee maqannaasaki mariani.
PSA 129:1 Innee Isaraee maqannaasa innee kumaaraasaa maruqooqari inni namuqaa ummaara nimi maree ani marianara qima qimiaqa.
PSA 129:2 Qinee kumaaraa mariafannaqooqari qini namuqaauqa niranaqee marufaqa qini mandaikamma qimaqee mariqau. Miqidaqa sia qini uridaaqaree mariqau.
PSA 129:3 Maqarumasee afuqaki oora ateekee mariandee iqa namuqaauqa qini kaakadi qitaufaka runna oorara foora meemai uqanna ateekee mariqau.
PSA 129:4 Miqi marufanoo Yaaweefa andeeqarafa maridanoo rumbaranakinaana iduku qisanau.
PSA 129:5 Aiqama Sioonna maqusara fidiaqaa imariasa rafaaqa fusaifaqa anirandeeqa sandeefarannoo.
PSA 129:6 Misa maaqasaa ururee mari andanda fara foora urureenoo aadana usidanoo.
PSA 129:7 Sia moo fannoo mina suqu moodaanaki quqaidaqa sia rumbamaree fidaqa.
PSA 129:8 Aiqaree fimariasakiqari sia moo fannoo Yaaweefa amiqi amiqimma amaqaanifee qifaranoo. Maasa Yaaweena auqusaa amiqi amiqimma amaqaidee qidaqa.
PSA 130:1 Qini qimuqusa mandaikirafa faruma uqnauriara foora inoo marifaqa oo Yaawee qinee ani innaaru kiqari aaraidaqa.
PSA 130:2 Oo Yaawee anee qini nameera qirana iria. Anee aaqoo rammatinimmaseenana qini qiki raqarana iriseenana dadaaqia.
PSA 130:3 Oo Yaawee anee maasa aaqarana papiqaki kaqi akara rumasaina marinanoo yafee ani ufa nimiranaki fiqaraannoo.
PSA 130:4 Maasara aneenna afusaa naaquqamasee mariaqeera maasa manda oosana akiiqara minninnisee marianafa mariananoo.
PSA 130:5 Qinee Yaaweena dadaaqiranara asasida afeesidaqa. Mina ufa saqarikidaqa.
PSA 130:6 Qinee Yaaweena dadaaqiranara asasida afeesi marunafa aufari maria fasiqausa suani afu uriranara rakisi mariana uraaqaranoo maridanoo.
PSA 130:7 Yaaweena sia taikaaninna amuqusirafa marinara faqa mifa maasa mandainainakinaana dadaaqirara aidi marinara faqa irisee, Isaraee maqannaasa Yaaweena saqarikiaqa.
PSA 130:8 Mifa narí faiqí anaasee Isaraee maqannaasa nári aiqama aaqaranakinaana dadaaqiannoo.
PSA 131:1 Oo Yaawee qinee qeeqa qimooqirana minniseeqa. Qeeqa ramoo ramaa irana faqa minnisee qimeesa uquseeqa. Qinee sia firaa ainainauqara oonu mafi iridaqa, qinee sia amanaiki marunna ainainara faqa sia iridaqa.
PSA 131:2 Qinee sia miqidaqa, qinee asooaranaki qifaaqa quqasee maridaqa. Faiqi aanaaqi nári ninausa nifundanasaa ireeda faiqaqee iandee iqa marunanoo qini qimuqusa fannoo ireeda qiniki maridanoo.
PSA 131:3 Oo Isaraee maqannaasa maqee faqa naaru faqa Yaaweena kai saqari kiaqa.
PSA 132:1 Oo Yaawee anee sia Dafidinara qaunua. Mifa oosana oosana aupurarana maroonara faqa sia qaunua.
PSA 132:2 Oo Yaawee Dafidifa qima afeekaikunara iria. Mifa ani afeeka faqaa Anutuna Yakooboona Anutuna faqa qima afeekaikunara iria.
PSA 132:3 Qinee sia qeeqa faiqara maaqai fuanaura.
PSA 132:4 Qinee sia idooeeqa faiqeeqa ianauranoo.
PSA 132:5 Qinee afeeka faqaa Anutuna Yakooboona Anutuna maqusa deedaqammaseeqa inaaqianna faiqaanaura.
PSA 132:6 Maasa Beeteereeqeemma maqusaki maridaqa moodaanaki kira bookisara irisee Yeearimma afaasasaa paqurimmasee qafaqiafana.
PSA 132:7 Maasa maaqi qiafana. Anifaqa maasa Yaaweena amaana maqai oonuree mina ufa irira qaari oorinni oonuree amooqiaqa.
PSA 132:8 Oo Yaawee moodaanaki kira bookisa namu faqa mara maree aneenna naauqara uiqaana maaqaki ania. Mi moodaanaki kira bookisafa ani afeekara kooroo imarina faqa maree aniree maaqoo naaruara maria.
PSA 132:9 Ani aanaiqikirausa aiqama kari andeeqara ainaina kai auqaaqanani. Ani faiqí anaasee faaqa fuisee qidaqa asasiaqanani.
PSA 132:10 Oo Yaawee aneenna ainainira faiqi Dafidinara qima afeekaikinau. Sia aneenna utaaqamaqaanna karaambaiqana minni aisaa.
PSA 132:11 Anee oori kandamasee Dafidinara qima afeekaikinau. Sia kaifaa mi qima afeekaikirana rukaanauranoo fee qimasee qima afeekaikamasee maaqi qinau. Qinee ani faiqi namukinaana moo karaambaiqaika masaananoo anee kuqu finanoo mifa Isaraee maqannaasasaa rakisiannoo.
PSA 132:12 Ani faiqi namu qini moodaanaki kira ufamau andeeqasee fiqa qini naamuaqira ufa nimunnana mau andeeqasee fifanoo misa faiqi namu faqa anee kuqinaqa ani amaaqa maqasee karaambaiqa marifaranoo.
PSA 132:13 Yaaweefa narí faiqara maaqaikianifeera Sioona maqusa utaaqanau.
PSA 132:14 Maaqoo qinee naaruara maridaqa rakisinnimaqaanaura.
PSA 132:15 Qinee Sioona maqusanaasa nidi mari ainainausa aiqama nimianaura. Mi maqusanakinaasa kudi mariasa naranannoo amiqimma nimaqaanaura.
PSA 132:16 Qinee mi maqusanakina aanaiqikirausa mariasa auqainna aiqama ainainna amiqi amiqimma nisaanaqa minakinaa fasiqa anaasee asasira idi raidaqa faaqa fuisee qifaranoo.
PSA 132:17 Mi maqusanaki qinee Dafidina akeeku akaakukinaana afeeka karaambaiqaika masaanaura. Mi maqusanaki qinee qeeqa utaaqamaqaunna karaambaiqana rakisinnimaqarana afeedamma aisaanaura.
PSA 132:18 Qinee mi karaambaiqana namuqaauqa nisauriranannoo rafaaqafu nisaanauranoo. Mina rakisinnimaqaranaki mariasa amiqiranaki marifanoo aiqama ainaina irairaa iannoo.
PSA 133:1 Anutuna faiqí anaasee moodaanaki marida narí amiqi narí amiqirafa kaaqa amiqirafa maridanoo.
PSA 133:2 Mi amiqi amiqirafa Aaroona akiiaaqa oorifa fadameena amiqirana adiasoofanoo qumu rameeqee oosaumau qumundee ira amiqi amiqirafa maridanoo.
PSA 133:3 Mi amiqi amiqirafa Qeeramoona aaqanasaaqaraa qifi faramu Sioona aaqanasaa aqufinoo aiqama ainaina asooama nimaqaindee idanoo. Yaaweefa miqi qimasee narí amiqi amiqirana nimiraree qimasee qima afeekaikinau. Mi amiqi amiqirafa kisaaqa marirafa maridanoo.
PSA 134:1 Innee Yaaweena naaquqara amaana maqaki eendaki ainaini mariasa innee aiqama aniree Yaaweena amooqiaqa.
PSA 134:2 Amaana maqaki inneeqa nisauku uqeerasee innaaru qidaqa Yaaweena amooqimma amaqaaqa.
PSA 134:3 Yaaweefa maa maqana faqa miri innaarunna faqa auqu quqoofa Sioona maqusakiqari inni amiqi amiqimma nimaqaani.
PSA 135:1 Yaaweena amooqiaqa. Yaaweena auqu mina ainainira faiqiuqa amooqiaqa.
PSA 135:2 Innee Yaaweena naaquqara amaana maqaki ainaini mariasa innee Yaaweena amooqiaqa.
PSA 135:3 Yaaweefa andeeqarafa marinara mina amooqima amaqaaqa. Mifa maasara qimudaoo qimarinara mina auquara amooqira idi ramamaqaaqa.
PSA 135:4 Mifa nariara Yakooboona utaaqanau. Mifa mina akeeku akaaku Isaraee maqannaa fasiqa anaasee naríndi kiaqeera utaaqanau.
PSA 135:5 Maasa Yaaweefa aiqama unna qira anutusa firaaqoo uriqararafa marinara iridaqa.
PSA 135:6 Innaaruna ameemaanai faqa maqasaa faqa ooruku nammariki faqa mina aundurai faqa Yaaweefa narí aidiranannai kai imarifa maridanoo.
PSA 135:7 Mifa narí kai qifanoo asuru nannamu ira oonamu maqa dinni atindari uridanoo. Asukuna arira oonamuki Yaaweefa aakuasaa quqasaifanoo aaku namu faqa qumidanoo. Mifa narí afeedira maaqaki qariara foora ufaira qifanoo uqidanoo.
PSA 135:8 Yaaweefa Isipa maqannaasa ooqa faiqiuqa faqa misa aandau ooqa anaaqiuqa faqa moodaa karammasee narinau.
PSA 135:9 Miqoo mifa misa karaambaiqa faqa misa faiqí firaasa faqa aaqarana akiiqara aupurarana nimiraree qimasee misaki faiqí sia auqaaqaa ira ainaina faqa naaquqara ainaina faqa auqanau.
PSA 135:10 Mifa moomoo maqannaasa mandaikamma nimaqasee misa afeeka karaambaiqauqa kuqa narinau.
PSA 135:11 Amoora maqannaasa karaambaiqa mina auqu Sioonana faqa Basanna maqannaasa karaambaiqa mina auqu Ookana faqa Kannaa maqannaasa karaambaiqauqa aiqama faqa kuqa narinau.
PSA 135:12 Naruseenoo misa maqa maaqa rafieeqeenoo narí faiqí anaasee Isaraee maqannaasa niminau.
PSA 135:13 Oo Yaawee faiqí anaasee aiqama kari aniara Anutu fee qimasee koorooifaranoo. Aiqama naaru kambiqainausa aniara irifaranoo.
PSA 135:14 Yaaweefa narí faiqí anaasee ititannimaqasee narí ainainira faiqiuqara qimudaoo qiannoo.
PSA 135:15 Anaamuru mariasa misa unna qira anutusauqa koorannai faqa siruaannai faqa faiqí nisaukunnoo auquqoofauqa maridanoo.
PSA 135:16 Misa noo aamara marifaqa sia ufa qidaqa, nifu marifaqa sia qafaidaqa.
PSA 135:17 Misa naaqoo marifaqa sia ufa iridaqa. Misa naikaamaraindari sia uqanna kaqi kaaqoo naannamma naidaqa.
PSA 135:18 Mi unnaqira anutusa auqu quqoosa faqa mina saqariki mariasa faqa mi sia kasi mari ainainnara foora mariaqanani.
PSA 135:19 Oo Isaraee maqannaasa innee Yaaweena amooqiaqa. Innee aanaiqikirausa Aaroona faiqi namu innee faqa Anutuna amooqiaqa.
PSA 135:20 Innee Reefina aiku asauku mariasa Yaaweena amooqiaqa. Aiqama innee minara innaru qimariasa Yaaweena amooqiaqa.
PSA 135:21 Sioona maqusakiqari Yaaweena amooqiaqa. Yaaweena amooqiaqa.
PSA 136:1 Yaaweefa andeeqarafa marinara dufi dufi qimamaqaaqa. Mina amuqusirafa naaru naaru marifa maridanoo.
PSA 136:2 Aiqama unnaqira anutusa uriqararana dufi dufi qimamaqaaqa. Mina amuqusirafa naaru naaru marifa maridanoo.
PSA 136:3 Aiqama karaambaiqauqa afeeka urinnaaqararana dufi dufi qimamaqaaqa. Mina amuqusirafa naaru naaru marifa maridanoo.
PSA 136:4 Mifa kai firaa naaquqara ainaina auqi marifa maridanoo. Mina amuqusirafa naaru naaru marifa maridanoo.
PSA 136:5 Mifa narí amiqira iriranannai innaaruna auqufa maridanoo. Mina amuqusirafa naaru naaru marifa maridanoo.
PSA 136:6 Mifa maa maqana auqeeqee nammari faruma amuaaqa quqanau. Mina amuqusirafa naaru naaru marifa maridanoo.
PSA 136:7 Mifa suani faqa quqoona faqa auqinau. Mina amuqusirafa naaru naaru marifa maridanoo.
PSA 136:8 Mifa suaniara anee iaqaranasaa rakisiannee qimasee auqinau. Mina amuqusirafa naaru naaru marifa maridanoo.
PSA 136:9 Mifa quqoona faqa fasauqara faqa eendirana saa rakisiaqee qinau. Mina amuqusirafa naaru naaru marifa maridanoo.
PSA 136:10 Mifa Isipa maqannaasa ooqa faiqiuqa narinau. Mina amuqusirafa naaru naaru marifa maridanoo.
PSA 136:11 Mifa Isaraee maqannaasa Isipa maqusaindaraana aana muqunufaqa fiqau. Mina amuqusirafa naaru naaru marifa maridanoo.
PSA 136:12 Mifa misa narí afeeka asaukunnai nifiqee finau. Mina amuqusirafa naaru naaru marifa maridanoo.
PSA 136:13 Mifa Taatuqee nammari qambaana rakeeinau. Mina amuqusirafa naaru naaru marifa maridanoo.
PSA 136:14 Mifa narí faiqí anaasee minaki aana muqunufaqa fiqau. Mina amuqusirafa naaru naaru marifa maridanoo.
PSA 136:15 Fitaqa fufanoo Isipa maqannaasa karaambaiqa narí rakira fasiqauqa faqa oonuroofanoo ukuqnama nimaqanau. Mina amuqusirafa naaru naaru marifa maridanoo.
PSA 136:16 Mifa narí faiqí anaasee nifu uqufaqa aadana maqa maaqaki fiqau. Mina amuqusirafa naaru naaru marifa maridanoo.
PSA 136:17 Mifa maqasaa afeeka faqaa karaambaiqauqa narinau. Mina amuqusirafa naaru naaru marifa maridanoo.
PSA 136:18 Mifa firaa nuqu faqaa karaambaiqauqa narinau. Mina amuqusirafa naaru naaru marifa maridanoo.
PSA 136:19 Amoora maqannaasa karaambaiqa mina auqu Siqoonnana arinau. Mina amuqusirafa naaru naaru marifa maridanoo.
PSA 136:20 Basanna maqannaasa karaambaiqa mina auqu Ookana faqa arinau. Mina amuqusirafa naaru naaru marifa maridanoo.
PSA 136:21 Yaaweefa mi maqannaaqanda maqa maaqa rafieeqeenoo narí faiqí anaasee Isaraee maqannaasa niminau. Mina amuqusirafa naaru naaru marifa maridanoo.
PSA 136:22 Narí ainainira faiqiuqa Isaraee maqannaasa niminau. Mina amuqusirafa naaru naaru marifa maridanoo.
PSA 136:23 Maasa namuqaa rafaaqafu qimaqoofanoo mifa maasara sia qauninau. Mina amuqusirafa naaru naaru marifa maridanoo.
PSA 136:24 Mifa maasa namuqaa rumbaranakinaana idukuqisanau. Mina amuqusirafa naaru naaru marifa maridanoo.
PSA 136:25 Mifa kai faiqí faqa aiqama aandau auqu rarana faqa doodaani auqu rarana faqa narana nimidanoo. Mina amuqusirafa naaru naaru marifa maridanoo.
PSA 136:26 Anutufa innaarunai marina dufi dufi qimamaqaaqa. Mina amuqusirafa naaru naaru marifa maridanoo.
PSA 137:1 Maasa Yuda maqannaasa Babiroonia maqannaasa rumbaranaki maridaqa Babiroonnia nammariuqa afainni ooqufaaqee idaqa Sioonna maqusara irisaidaqa iki raqee mariqiafana.
PSA 137:2 Maasa miqoo maridaqa doori runusee nariqa piripunna saqari asaanasaa diri qiafana.
PSA 137:3 Maasa rumbaqimaqee marusa maasara qidaqa idi raaqee qiqau. Idi raidaqa maasa asasirana qimiaqee qiqau. Sioonna maqusara rara idi rama nimiaqee qiqau.
PSA 137:4 Misa miqi qufaqa maasa maaqi qiqiafana. Maasa naqimasee fee aanaamuru maqa maaqakiaqa Yaaweena amooqira idi raanauree. Sia amana.
PSA 137:5 Qinee Yeerusaree maqusara qaunuseefau qinee sia kaifaa naaruara piripunna amana aruanaura.
PSA 137:6 Qinee ani Yeerusaree maqusara sia aiqama kari irifau sia amana kaifaa naaruara idi raanaura. Anee qini uriqarara asasirafa mariannanara qaunusee sia amana kaifaa idi raanaura.
PSA 137:7 Babiroonnia maqannaasa Yeerusaree maqusa faandaamura rakeemmasee keeqoo faqa Eedoomma maqannaasa namuqaa fuki faaki qidaqa Yeerusree maqusa rapeepaa iaqeera qunara Yaawee anee iriseenana mina akiiqara ia. Oo Yaawee anee misufara iriqaraasammasee sia qaunua.
PSA 137:8 Oo Babiroonnia maqannaasa innee kuridi fifaranoo. Maasa Isaraee maqannaasa saaroo qinana Babiroonnia maqannaasa narinafa asasiannoo.
PSA 137:9 Inni Babiroonia maqannaasa faiqi aanaaqiuqa qumaree maasa Isaraee maqannaasa saarooqi oonisaa rutukinafa asasiannoo.
PSA 138:1 Oo Yaawee qinee qeeqa qimuqusa ookiqari dufi dufi qimamaqaidaqa. Unna anutusa nifusaa ani Yaaweena amooqira idi raanaura.
PSA 138:2 Qinee ani naaquqara amaana maqa maritinai ubeekamafi qiqoori saunu arafi ani auqu amooqianaura. Ani sia taikaaninna amuqusiranara faqa ani mapukusee marira oosana faqa marinara ani amooqianaura. Anee aneenna auqu faqa aneenna naamuaqira ufa faqa aiqama ainaina urinnaaqararana uqannifiqoonnanara ani auqu amooqianaura.
PSA 138:3 Oo Yaawee qinee aaraunana iriseenana anee qimaqimiananoo. Aneenna afeekannai qini afeekaikamma qimaqaananoo.
PSA 138:4 Aiqama maa maqa maaqanaki maria uriqararausa ani Yaaweena ufa irianara ani amooqifaranoo.
PSA 138:5 Misa anee auqoonna ainainara faqa ani firaa afeekara faqa irisee idi reefaranoo.
PSA 138:6 Anee kaaqa mirinni uriqarana maridana ureeqarausasaa rakisinimaqee mariananoo. Faiqí nári nimoo naamoo qimariasa sia amana ani afusaaqari kukeeqeefaranoo.
PSA 138:7 Manda ummaara qini fiqu fiqumma datinoo marifana anee minakinaana qini amiqimma qimaqaananoo. Qini namuqaauqa aanoo qiafana aneenna afeekannai misa nindaqaa qimarianafa mariananoo.
PSA 138:8 Anee aiqama ainaina qima afeekaikamma qoonnandee innaranoo. Oo Yaawee ani amuqusirafa naaru naaru marifa maridanoo. Anee maasa Isaraee maqanaasara dadaaqiraree qunnana sia qaunusee minnisaa.
PSA 139:1 Oo Yaawee anee qini qimuqusaki diuqummaseenana qiniara irimariananoo.
PSA 139:2 Qini ooqu marirana faqa findifirana faqa aiqama ainaina auqee marunnanara faqa anee irimariananoo. Anee nianaindari qini Anee nianaindari qini qitikurakin Anee nianaindari qini qitikurakinaa Anee nianaindari qini qitikurakinaa iriranara irimariananoo.
PSA 139:3 Anee qinee ainaini marunnana faqa idooee marunnana faqa diuqimariananoo. Anee qinee aiqama ainaina auqee marunnanara irimariananoo.
PSA 139:4 Oo Yaawee qinee moo ufa qianeerunana anee faasai mi ufana aiqama irimarianafa mariananoo.
PSA 139:5 Anee qini fiqu fiqu ina datina aiqamatinai mariananoo. Anee aneenna afeekannai qini itita qimaqee mariananoo.
PSA 139:6 Ani qiniara irirafa kaaqa firaafa uriqaranoo maridanoo. Ani mi irirafa qini irirana faqa fiaaqaranoo maridanoo.
PSA 139:7 Qinee ani Yaaweena maraquna minnisee yaifee moosaa fuanauree. Qinee ani afu saaqari yaifee moosaa fuanauree.
PSA 139:8 Qinee innaarunai ooru firaree qianana anee minni faqa marinnaranoo. Qinee kuqirausa mariannai firaree qianana anee minni faqa marinnaranoo.
PSA 139:9 Qinee qaqamaree suani afu ururee marina ooqiaaqarama fuanana anee minni faqa marinnaranoo. Suani keeqee marina fiaaqaraanana anee miqoo faqa marinnaranoo.
PSA 139:10 Qinee mitinai marianana anee miqoo maridana qini aana muqunimma qisarara faqa miqoo marinnaranoo.
PSA 139:11 Qinee asukunara kukeeqa qimaqaannee qimasee kaaqa qarafa qini fiqu fiqu inoo marifa quandaki asukunaikiannee qiananoo asukuna fannoo sia ani afusaa asukunara foora maridanoo. Asukuna fannoo faasaanara foora kaaqa qaannoo. Asukuna faqa kaaqa qarafa faqa ani afusaa amana amana kai maridanoo.
PSA 139:13 Anee Yaaweefa kai qini daundurakinaa ainaina aiqama auqunafa mariananoo. Anee qini qinoona aranandaki qini qifaaqa moodaanaki ootupama qisaananoo.
PSA 139:14 Aniara rufiee mariafa mariannanara ani amooqidaqa. Anee aiqama ainaina auqee marianafa mookira ainaina naaquqara ainaina auqee marianafa mariananoo. Qinee minara qeeqa aiqama qimuqusannoo iridaqa.
PSA 139:15 Qini qimudaani moodaanaki ootupee marufana anee ireeda qini qinoona aranandaki moodaanaki quqaqisanau. Qinee miqoo kukeeqaranaki innooqee mariafanana anee qinee mariafannanara iri marinau.
PSA 139:16 Anee sia kambiqaqa mariafana qiqafanau. Qinee naaru moodaa moodaa faasaana auqaanna ainainara ani papiqaki akara rinoo maridanoo. Mi moodaa moodaa faasaanafa sia kambiqanoo marufanoo miqoo ani papiqaki akararinoo maridanoo.
PSA 139:17 Oo Anutu ani iriranara irunanoo firaaqoo ummaara darinoo. Moomoo uqanna maridanoo.
PSA 139:18 Qinee asaana ruananoo nukuda faqa arusee fiqaranoo mariannoo. Qinee faiqaqee marii findi fiqa ani mi iriranara kaqi kai irimaree fidaqa.
PSA 139:19 Oo Anutu anee mandoosana maree mariasa narinnaranoo fee qidaqa. Faiqí fidika ruqiqee mariasa qini quqasee fififaqa qeeqaraa marianauree qidaqa.
PSA 139:20 Misa manda ufa ani qimamaqaidaqa. Misa oosana oosana manda ufa ani auquara qidaqa.
PSA 139:21 Oo Yaawee aniara fidiaqaa imariasa qinee misa fidiqaqmma nimaqaidaqa. Ani ufamau firanara ititammasee aanoo qimariasara qinee firaaqoo qikooqaidanoo.
PSA 139:22 Qinee miqimariasara kaifaa firaaqoo uqanna fidiaqaamma nimaqaidaqa. Qinee misara qini namuqaauqee qidaqa miqidaqa.
PSA 139:23 Oo Anutu qini diuqummasee qini iriranara iria. Anee qini qimanammasee qini irirana oosanara iria.
PSA 139:24 Qini daunduraki manda ainaina qafamaseenana naaru marira aanaindari qinisaa rakisiqisaa.
PSA 140:1 Oo Yaawee mandoosana maree mariasa nisaukukinaana qini maraquqisaa. Faiqí nariqanuasasaa faqa ititaqisaa.
PSA 140:2 Misa aiqama kari mandainainara tupundaaridaqa. Misa aiqama kari aanoo qirana kai uqeeraidaqa.
PSA 140:3 Misa nifauru nimaakiri kuqimaria sakanifara foora maridanoo. Misa nookinaa ufa fannoo ukadiqa manda marasinnara foora maridanoo.
PSA 140:4 Oo Yaawee manda oosana maree mariasa afeeka ameemaanaindaraana qini ititaqisaa. Faiqí nariqanuasa qini qiku qama qimifaqa aqufuaneera misa tipundaridaqa. Minara anee misa saa ititaqisaa.
PSA 140:5 Nári nimoo naamoo imariasa qini qimaara ufaanara foora fufidaqa. Misa nári ufaana aatataa qini qimaara fufidaqa.
PSA 140:6 Oo Yaawee qinee maaqi qimasee aniara qidaqa. Anee qini Anutufa mariananoo. Oo Yaawee anee qini dadaaqianneera aaree marunnana iria.
PSA 140:7 Oo qini uriqarara Yaaweefa, anee qini amudaanai qimasee itita qimaqee marianafa mariananoo. Rakiranaki anee qini ititaqimaqaananoo.
PSA 140:8 Oo Yaawee sia anee mandoosana maree mariasa nidi mari ainaina nimia. Anee misa tipundaarirana ititannisainanoo sia anoonaikiani.
PSA 140:9 Anee qinaqa qini namuqaauqa sia rakiranaki uriqaraaqa. Anee qinanoo misa darirari maria ufafa quandaki nariqa naruani.
PSA 140:10 Miqi mariasasaa fidika arira ida auru adia nimaqaa. Misa dikaandaki aqusaina sia kaifaa minakiqari uruaqa.
PSA 140:11 Niqoonausara unna qimasee misa kikiqusi mariasa aiqama ainainirafa sia anoonaikiani. Mandainaina fannoo faiqí kuqa nariqanuasa rafaaqafuseenoo mandaikamma nimaqaani.
PSA 140:12 Oo Yaawee anee kudi fasiqa anaasee kootaki itita nimaqaannanara qinee iridaqa. Anee sarau imariasa amana amana kai itita nimaqaannanara faqa iridaqa.
PSA 140:13 Andeeqarausa kuqaa uqanna ani amooqifaranoo. Misa ani afusaa marifaranoo.
PSA 141:1 Oo Yaawee qinee ani aaraidaqa qini maqee dadaaqia. Qinee ani aaraanana iria.
PSA 141:2 Qini innaaru qirana amiqira afundimari ida munanara foora maraa. Qinee qisauku uqeerasee innaaru qirana eeneemari suqee maria tatufiranara foora maraa.
PSA 141:3 Oo Yaawee anee qini doosaa rakisianinna quqasainanoo rakisi marinanoo qini dookiqari sia manda ufa ururaani.
PSA 141:4 Qini mandainaina auqarara didi marina ititaqisaa. Manda fasiqauqaki ootupamafi misa manda oosana mararanasaa ititaqisaa. Qinee sia misa qoomaqa dadaaqi naanaura.
PSA 141:5 Andeeqara fasiqa fannoo qini aaqarana akiiqara qini dadaaqianifee aupurarana qiminaqa qinee minara qini amiqi amiqimmidanoo fee qianaura. Aaqee mariasa qiniara uriqarara fee qifaqa qimooqirana sia maraanaura. Qinee maqee maqee misa manda oosannara taikaannee qimasee innaaru qimarunnanara misa qimooqirana sia maraanaura.
PSA 141:6 Andeeqara uriqararausa manda oosana maree mariasa misa uriqararausa rafuseeqee maaninni aqusaifaqa faiqí anaasee qini ufara kuqaa anoonee qifaranoo.
PSA 141:7 Mi manda uriqararausa nimudaani saqari araira foora moomoo madika afaiqara irairaa inoo mariannoo.
PSA 141:8 Oo Uriqarara Yaawee qinee kaqi ani saqarikidaqa. Qinee ani itita imaqaranara randaidaqa. Anee qiniara qaoo qinaqa sia kuquanaura.
PSA 141:9 Qini qimaara qinukufana fufuqaanasaa ititaqisaa. Manda oosana maree mariasa qiku ufana fufuqaanasaa ititaqisaa.
PSA 141:10 Manda oosana maree mariasa nariqa ufaanaki aru fifaqa qinee amiqimmasee fuanaura sia minaki aruanaura.
PSA 142:1 Qinee dadaaqianifeera Yaaweena aaraidaqa. Qinee qiki raqaidaqa minara innaaru qidaqa.
PSA 142:2 Qinee qeeqa aiqama inunu rira ufauqa mina amidaqa. Qinee qeeqa aiqama ummaara mina qimamidaqa.
PSA 142:3 Qinee minnisara runanoo qinee andeeqasee qianna ainnainnara mifa iridanoo. Qinee fimarunna aannanasaa qini namuqaa qini qimaara kukeeqasee ufaana fufidaqa.
PSA 142:4 Qinee qeeqa inaaqiannai dadaaqiranara qafaunanoo sia maridanoo. Sia moo fannoo qini ititaqimaqaaninafa maridanoo. Sia moo fannoo qiniara qimudaoo qidanoo.
PSA 142:5 Oo Yaawee anee dadaaqianneera aaraidaqa. Anee Yaaweefa qini itita qimaqee marianafa mariananoo. Maa maqanasaa mariranaki maridaqa aniara kai ridaqa.
PSA 142:6 Oo Yaawee qinee dadaaqianneera qiki raqee marunnana iria. Manda ummaara fannoo qini nammariara foora ukuqnama saifaqa kuqiraridaqa. Qini namuqaa kaaqa afeeka faqaasa marianara qini misa nisaukukinaana mara kaqinni quqaqisaa.
PSA 142:7 Qini teerookinaana iduku qisainaqa ani faiqí anaasee suqiranaki ani amooqianaura. Anee qini amiqimma qimaqaannanara ani amooqianaura.
PSA 143:1 Oo Yaawee qini innaaruqirana iria. Aneenna andeeqaranakiqari qini afeeka innaaruqirana iria. Aneenna mapukira oosanakiqari qini ufa anoona qima qimia.
PSA 143:2 Sia moo fannoo maa maqanasaa qaraafa ani afusaa andeeqarafa maridaqa. Minara anee sia qini aneenna ainainira fasiqa mareeqee aneenna kootaki quqasee qimanammasee qafaa.
PSA 143:3 Qini namuqaa qini qifaqasee firaaqoo uqanna qini rafaaqa fidaqa. Mifa qini asukuna rumbaranaki quqasaifaqa qinee ooqai kuqusara foora maridaqa.
PSA 143:4 Miqimmasaifaqa qinee minnisarara deedaqidaqa. Qini qimuqusa fannoo munara minari marifaqa kaaqa kuquaqaa idaqa.
PSA 143:5 Qinee indaaru mariaafanna mariranara oonu mafi iridaqa. Qinee anee aiqama ainaina iannanara iridaqa. Anee aiqama ainaina auqaannanara qeeqa iriranaki minisee iridaqa.
PSA 143:6 Qinee innaarukiqari qeeqa qisauku anee iannannai uqeeraidaqa. Aadana maqara foora qini qimana fannoo aniara nammariara foora aididanoo.
PSA 143:7 Oo Yaawee qini marirafa taikaaqaammidanoo. Qini ufa irisee mina anoona qimaqimia. Sia qini qiqafamasee kukeeqaa. Anee miqinaqa qinee kuqirausa fimariannai fuanaura.
PSA 143:8 Aiqama kananaana anee daaqoo auqainaqa ani sia taikaaninna amuqusiranara irisee qeeqa saqarikirana aniki quqaanaura. Qini innaaru qirafa anee iannannai ooru fidanoo. Anee qiniara fuannee qinnaqoo uqaqifiqainaqa fua.
PSA 143:9 Oo Yaawee ititaqimaqaanneera anee iannannai fidaqa. Qini namuqaa nisaukukinaana mara kaqinni quqaqisaa.
PSA 143:10 Anee qini Anutufa mariannanara aneenna aidira ainaina qima qiminaqa auqaa. Qini amiqimma qisaseenana amiqira aanasaa ititaqimaqainaqa fua.
PSA 143:11 Oo Yaawee aneenna qima afeekaikunandee inana qini namuqaa nisaukukinaana maraqu qisaa. Aneenna andeeqaranakiqari qini ummaarakinaana mara quqaqisaa.
PSA 143:12 Anee qiniara aidi mariannanara qini namuqaa kuqa narua. Qinee ani ainainira fasiqa marunnanara nári uriqararanannai qini rafaaqafi mariasa aiqama kuridi nimaqaa.
PSA 144:1 Qini itita qimaqee marina Yaaweena amooqia. Mifa rakira oosana uqaqifiqaseenoo qini rakiranaki firana deedaqamma qisaidanoo.
PSA 144:2 Mifa qini aiqama kari itita qimaqee marifa maridanoo. Mifa qini auqaanara foora qini asumu maree marifa maridanoo. Qini amiqimma qisaanifeera mina saqarikidaqa. Mifa faiqí anaasee mareeqeenoo qini qiramandunnai quqaidanoo.
PSA 144:3 Oo Yaawee faiqí anaasee nana ainainee mariafanee anee misara iridanee. Faiqí anaasee nana ainainee fifau ainaina mariafanee anee misa rakisi nimaqaidanee.
PSA 144:4 Faiqí misa naidoora foora fuaqasaafanoo dauni taikeera foora irausa maridaqa. Mina marirafa nimanandara foora kaqi kaqi mandaaqee marifa maridanoo.
PSA 144:5 Oo Yaawee anee innaaruna rakee maseenana qumureenana aaqanauqa auqamasainanoo ida muna minakiqari ururaani.
PSA 144:6 Miqimmaseenana aneenna aakuasaa panana qirana quqasainanoo qumureenoo ani namuqaauqa furu faramma nimaqaannoo. Aakuasaa aneenna feefara foora dindai qinaqa quqasee sandaaqa.
PSA 144:7 Oo Yaawee anee innaarunaindari qini mara miami anaamuru nisaukuki nammari faruma kiara foora marunnana uqeereeqee kaqinni quqaqisaa. Anaamuru afeeka ameemaanai marunnana mareeqee kaqinni quqaqisaa.
PSA 144:8 Mi anaamurusa nifaurusaa unnufa kai qumbiqanoo marifaqa misa kuqaa ufa qiraree qimasee nimana aiqamasee unna ufa kai qidaqa.
PSA 144:9 Oo Anutu qinee aniara fuka idi ramamaqaanaura. Qinee piripunna aridaqa ani idi ramama qaanaura.
PSA 144:10 Anee kai karaambaiqauqa rakirana uriqarara afeeka nimimarianafa mariananoo. Anee aneenna ainainira fasiqa qini Davidisa namuqaa nisaukukinaana maree marianafa mariananoo.
PSA 144:11 Anee fitiqnarana qimi maria namuqaasa nisaukuki marunnana anee mara kaqinni quqaqisaa. Anaamuru afeeka ameemaanai marunnana mara kaqinni quqaqisaa. Mi anaamurusa nifaurusaa unna ufa kai qumbiqanoo maridanoo. Misa kuqaa ufa qiraree qimasee nimana aiqamasee unnufa kai qidaqa.
PSA 144:12 Maasa faiqi namu aanaaqisaaqari findifiqa ummaqira saqariara foora afeekaikammasee ururaaqa. Maasa qiraamuqmaaka faqa maqasaa karaambaiqa maaqakina amiqira afaaqa auqira sapatariara foora maridaqa maasa asasirana qimiaqa.
PSA 144:13 Maasa afeedira maaqaki oosana oosana nara ainaina qumbiqanoo mariani. Maasa maaqeena aandau sia kasoo anaaqiuqa uqanna maqaaqa.
PSA 144:14 Maasa maaqeena aandauqa kaifaa moomoo kiqa faiqi maqasaifanoo sia eedadaikinaqa kuquaqa. Maasa maqusaki sia teeroo faqa qiki raqarafa faqa mariani.
PSA 144:15 Miqi maria fasiqa anaaseesa amiqiranaki asasiranaki marifaranoo. Yaaweefa maasa Anutufa marifaqee qimaria fasiqa aanaaseesa asasiranaki maridaqa.
PSA 145:1 Qini Anutu qini Karaambaiqa, qinee anee uriqararafa mariannanara kooroo ianaura. Qinee ani naaruara naaruara dufi dufi amooqianaura.
PSA 145:2 Aiqama kari ani dufi dufi qimamaqaanaura. Qinee naaruara naaruara ani amooqianaura.
PSA 145:3 Yaaweefa uriqararafa marifaqa mina uriqaramasee amooqi mariafa maridanoo. Mina uriqararafa firaafa irirafa munu taikarana fiqaranoo maridanoo.
PSA 145:4 Anee auqoonna ainainnara maqee mariasa faqa naaru kambiqainausa faqa ani amooqifaranoo. Misa anee auqoonna afeeka ainainnara kooroo ifaranoo.
PSA 145:5 Misa ani qareenaranara faqa ani afeekara faqa ufa qifaranoo. Qinee ani naaquqara ainaina auquqoonnanara maqee maqee indee indee iqa fuanaura.
PSA 145:6 Faiqí anaasee afeeka ainaina anee auqee mariannanara ufa qimariafaqa qinee ani uriqararanara kooroo ianaura.
PSA 145:7 Misa ani andeeqaranara qima nimisee ani amiqi amiqiranara idi reefaranoo.
PSA 145:8 Yaaweefa aidi marifanoo nifauaidanoo. Mina aranaqarafa kasooaqee kasooaqee qimarifanoo mina sia taikaaninna amuqusirafa qumbiqaidanoo.
PSA 145:9 Mifa aiqamausa amiqi amiqimma nimaqaseenoo narí aiqama auqu quqaqoo ainainausara amuqusi marifa maridanoo.
PSA 145:10 Oo Yaawee anee aiqama aandau doodaani auquqoonausa ani amooqifaqa aiqama ani faiqí anaasee dufi dufi qirana ani amifaranoo.
PSA 145:11 Misa ani karaambaiqa afeeka areenaranara ufa qidaqa ani amudaanai qiranara qifaranoo.
PSA 145:12 Miqimmasaifaqa aiqamausa anee afeeka ainaina auqoonnanara irifaranoo. Misa ani afeeka areenara ququsara faqa irifarannoo.
PSA 145:13 Ani rakisi nimaqarafa naaru naaru marifa marifana anee naaruara karaambaiqa mariananoo. Yaaweefa narí qima afeekaika maqoo ufanasaa mapukinoo marifa maridanoo. Narí aiqama ainaina imarina nifauarana namu faqa idanoo.
PSA 145:14 Mifa ummaaraki mariasa dadaaqidanoo. Mifa rafaaqafu nimaqee mariasa uqeera nisaidanoo.
PSA 145:15 Aiqama kasi maria ainainausa narana nimianneera nifu mundusee ani kai qafaafana narana nimi mariananoo.
PSA 145:16 Anee misa nimana kai niminana aiqamausa nidirana amanaikiananoo.
PSA 145:17 Yaaweena aiqama ainaina auqaranaki andeeqarafa maridanoo. Narí aiqama ainaina imarina nifauarana namu faqa idanoo.
PSA 145:18 Mifa narí aaree mariasa naaqa maridanoo. Mifa nariqa nimuqusa ookiqari aaree mariasa naaqa faqa maridanoo.
PSA 145:19 Mifa nariara naaquqee marifaqa mina ufa qaindusi mariasa dadaaqira ainainauqa nimidanoo. Mifa misa qiki raqarana iriseenoo misa ummaarakinaana mara kaqinni quqannisaidanoo.
PSA 145:20 Mifa nariara rimariasa itita nimaqasee mandoosana maree mariasa kuridi nimaqaannoo.
PSA 145:21 Qinee aiqama kari Yaaweena amooqianaura. Mifa auqu aiqama ainainausa mina naaquqara andeeqara auqu naaru naaru amooqima amaqaaqa.
PSA 146:1 Yaaweena amooqia. Oo qini qimana Yaaweena amooqia.
PSA 146:2 Qinee kaqi marunna kamuqoo Yaaweena amooqianaura. Qeeqa aiqama kari maa maqa maaqanasaa mariranaki qeeqa Anutuna idi ramamaqaanaura.
PSA 146:3 Sia aneenna saqarikirana maqasaa qaraa uriqararausasaa quqaa. Sia faiqí faiqi amana ani dadaaqiannoo.
PSA 146:4 Maqasaa uriqararausa kuqufiqa kookoommaika mafidaqa. Mi faasaannasaa misa oosana oosana ainainara tipundaarammaqaafa taikaidanoo.
PSA 146:5 Yakooboona Anutunara dadaaqirana qimiannee qimari fasiqafa faqa Yaaweena nariqa Anutunasaa mundi mariasa faqa asasidaqa.
PSA 146:6 Innaaruna faqa maqa faqa ooruku nammari faqa minaki maria ainainausa faqa auqunasaa mundi mariasa asasidaqa. Mifa aiqama kari narí qima afeekaikiranasaa afu rusisee maridanoo.
PSA 146:7 Mifa uriqararanannai rafaaqa fuqaasa narí ufa iriranaki dadaaqidanoo. Naararee mariasa faa narana nimidanoo. Yaaweefa fifau rumbaranaki mariasa iduku nisaidanoo.
PSA 146:8 Iduku nisaseenoo nifu imbarausa nifu maqa nisaidanoo. Mifa aqufiqa mariasa uqeera nisaidanoo. Mifa narí andeeqara fasiqa aanaaseera aididanoo.
PSA 146:9 Yaaweefa asaqiraafai maasa maqa maaqaki mariasasaa itita nimaqaidanoo. Mifa adeedaana anaaseeuqa faqa fiaiqi faiqiuqa faqa dadaaqidanoo. Kafaa mifa manda oosana maree mariasa nariqa kuridiranaki quqa nisaidanoo.
PSA 146:10 Yaaweefa naaruara uriqararafa maridanoo. Oo Sioona maqusa ani Anutufa aiqama kari rakisi amaqaannoo. Yaaweena amooqia.
PSA 147:1 Yaaweena amooqia. Maasa Anutuna amooqira idi rarafa amiqira oosana maridanoo. Mina amooqirafa andeeqarafa adiafaairafa maridanoo.
PSA 147:2 Yaaweefa Yeerusaree maqusa kaifaa usakaidanoo. Isaraee maqannaasa narufaqa anaamurukiaqa moodaa moodaa iqa mariusa Yaaweefa kafaa suqeeqee quqaidanoo.
PSA 147:3 Mifa nimuqusa mandaiki marusa amiqimma nisaidanoo. Misa kaakadi narirana rumbannisaidanoo.
PSA 147:4 Mifa aiqama fasauqara iriseenoo asaana rirana amana kai quqaseenoo naadu naadu nuqu ranau.
PSA 147:5 Maasa Yaaweefa firaafa marida amudaanai qimarifa maridanoo. Mina amiqira irirafa sia oosana faqa ammuqu faqa marifa maridanoo.
PSA 147:6 Mifa nári mara maree qumi mariasa uqeerannisaidanoo. Kafaa mandoosana maree mariasa maqa mammaaqai radamidanoo.
PSA 147:7 Amooqira idi Yaaweenara rama amaqaaqa. Piripunannai aridaqa maasa Anutuna idi rama amaqaaqa.
PSA 147:8 Mifa oonnamu innaarunai rainaidanoo. Mifa aaku quqasaifanoo rifanoo amuaqu namusaaqaraa andandauqa ururaidanoo.
PSA 147:9 Mifa aandauqa narana nimisee ufini aanaaqiuqa naranara qiafanoo misa faqa nimidanoo.
PSA 147:10 Mifa qoosauqa afeekara sia ridanoo. Mifa afeeka sundiauqa rakiranaki paasoosi mariasa afeekara faqa sia ridanoo.
PSA 147:11 Mifa nariara naaquqaifaqa rufiee mariasara aididanoo. Misa nári irirana Yaaweena sia taikaaninna amuqusiranasaa rusimariasa misara aididanoo.
PSA 147:12 Oo Yeerusaree maqusaki mariasa innee Yaaweena amooqiaqa. Oo Sioona maqusaki mariasa inneeqa Anutuna kai amooqiaqa.
PSA 147:13 Mifa inni maqusa faandaamura kooqi afeekaikammasee ititaidanoo. Mifa minaki maria fasiqa anaaseesa amiqi amiqimma nimaqaidanoo.
PSA 147:14 Mifa inni Isaraee maqannaa oosusaa rakisidanoo amiqira narana inni nimana kai nimidanoo.
PSA 147:15 Mifa narí naamuaqira ufa maa maqana qimamisaifanoo mifa qii ainainafa kai kaqi kambiqaidanoo.
PSA 147:16 Mifa qaisara qifanoo aqufinoo qamunnara foora maqasaa rafaaqa fidanoo.
PSA 147:17 Mifa innaarunaindari pupusamu oonisamuara foora aqidanoo. Sia moo fannoo mifa nimi mari suaranaki amana kikiqiannoo.
PSA 147:18 Mifa pupusamuara qifanoo tasirisirinoo nammarikidanoo. Kafaa mifa ufaira qufanoo ufai uqufanoo qaisa fannoo firaa nammari kammafi ooqu finau.
PSA 147:19 Mifa narí ufa narí faiqí anaasee nimidanoo. Mifa narí sandufa faqa narí naakaparufa faqa Isaraee maqannaasa nimidanoo.
PSA 147:20 Mifa mi ainainna auqoona sia moo maqannaasa mina sanda ufa sia iri mariasarau auqinoo fau. Yaaweena amooqia.
PSA 148:1 Yaaweena amooqia. Innaarunai mirinni mariasa Yaaweena amooqiaqa.
PSA 148:2 Mina aiqama qangeeroouqa mina innaarunaindaraa rakira fasiqauqa mina amooqiaqa.
PSA 148:3 Innee suani faqa quqoona faqa aiqama fasau firaaqoo kaaqa qeemariasa faqa aiqama mina amooqiaqa.
PSA 148:4 Innaaruna meerai uqanna marianafa anee faqa Yaaweena amooqia. Innee mirinni innaarunai maria nammarisa innee faqa mina kai amooqiaqa.
PSA 148:5 Misa aiqamausa Yaaweena amooqiaqanani. Mifa qufaqa misa kambiqaqau.
PSA 148:6 Mina ufannoo misa kambiqafi nariqa mariaqoo naaru naaru maridaqa sia amana Yaaweena ufa rukieefaranoo.
PSA 148:7 Maqasaaqaraa ainainauqa faqa ooruku nammariki maria firaa aandausa faqa nammari ameemaanai mariasa faqa aakuasaa faqa pupusamu faqa qaisa faqa oonnamu faqa afeeka ufai Yaaweena naakapara ufa mau fimari ufaifa faqa innee aiqamausa Yaaweena amooqiaqa.
PSA 148:9 Innee aaqanauqa faqa amuaqu namuqa faqa qaqama iree maria saqarisa faqa aiqama nandauqa faqa aiqama aandau maaqeena faqa kaasau faqa nimuaqundari nimariasa faqa qaqamaree nimaria ufinisa faqa innee aiqama mina amooqima amaqaaqa.
PSA 148:11 Aiqama maqasaaqaraa karaambaiqauqa faqa aiqama maqannaasa faqa uriqararausa faiqi namu faqa aiqama maqannaa rakisirausa faqa kumaaraauqa faqa maanaaqauqa faqa asooqa fasiqa anaasee faqa faiqi uqaindi faqa innee aiqamausa Yaaweena amooqiaqa.
PSA 148:13 Misa aiqama misoo maasoo Yaaweena auqu amooqiaqa. Mina auqu fannoo aiqamausa nuqu uriqararafa maridanoo. Mina areenarafa maa maqa maaqana faqa innaaruna faqa urinaaqaranoo maridanoo.
PSA 148:14 Mifa Yaaweefa narí maqannaasa afeekaikamma nisaifaqa mina faiqi anaasee mina amooqiaqeera. Isaraee maqannaasa mina afaaqasaa aqoondiuqa maridaqa mina amooqidaqa. Yaaweena amooqia.
PSA 149:1 Yaaweena amooqia. Yaaweena fuka idi ramamaqaaqa. Mina ufa mau fimariasa ufa suqiranaki mina amooqimamaqaaqa.
PSA 149:2 Isaraee maqannaasa inni auqu nisoonara irisee asasiaqa. Sioona maqusaki mariasa inneeqa karaambaiqara susumma amaqaaqa.
PSA 149:3 Innee idi raida niqoori raqaranannai faqa dukaanaannai faqa piripunnannai faqa mina auqu amooqiaqa.
PSA 149:4 Yaaweefa narí faiqí aanaaseera asasidanoo. Nári mara maree qumimariasa rakirana uriqararanannai amiqimma nimaqaidanoo.
PSA 149:5 Yaaweena faiqí anaasee nariqa rakiranara qufoonaridaqa asasira idi eendaki raqa fifi iaqaaqa.
PSA 149:6 Misa firaaqoo faaq rumasee Anutuna amooqiaqa. Misa nisaukuki dinni dinni raiqarana rakira paipana kaqi marinaqa mina namu faqa amooqiaqa.
PSA 149:7 Kaqi marifaqa misa minannai aanaamuru rafaaqa firara uaqee idaqa. Anaamuru fasiqa anaasee narirara uaqee idaqa.
PSA 149:8 Misa karaambaiqauqa sainandannai rumbarana uaqee idaqa. Misa karaambaiqauqa qainna sainandannai rumbarara uaqee idaqa.
PSA 149:9 Anutufa naamuaqundee iqa moo maqannaasa narirara uaqee idaqa. Anutuna faiqí anaasee rakirana uriqararafa miqimminoo maridanoo. Yaaweena amooqia.
PSA 150:1 aaweena amooqia. Anutuna naaquqara amaana maqaki mina amooqiaqa. Mina uriqarara afeeka innaaru nai marina amooqiaqa.
PSA 150:2 Mifa afeeka ainaina auqoo nara amooqima amaqaaqa. Mina amiqira uriqararanara amooqiaqa.
PSA 150:3 Ukeena fuaqaidaqa minannai mina amooqiaqa. Kaqikaa piripunnannai faqa firaa piripunnannai faqa mina amooqiaqa.
PSA 150:4 Dukaanaannai faqa idi raida niqoori raqaranannai faqa mina amooqiaqa. Piripunnannai faqa ufireenannai faqa mina amooqiaqa.
PSA 150:5 Innee qumiandau qaqama kaqikaa qanda faqa firaa qanda faqa qumaree narisaa narisaa ramoo ramoo idaqa Yaaweena amooqiaqa.
PSA 150:6 Aiqama naanna faqaa ainaina Yaaweena amooqiaqa. Yaaweena amooqia.
PRO 1:1 Maa aaquqira ufafa Soroomoonna ufa maridanoo. Dafidina amaaku Isaraee maqannaa karaambaiqa ufa maridanoo.
PRO 1:2 Maa aaquqira ufafa ani dadaaqinana amiqira irirana faqa andeeqara naamuaqira ufa faqa irisee mina oosana farumara foora meemai uqanna marina faqa irinnaranoo.
PRO 1:3 Irirana faqaa nira marirana uqannifiqara ufa maridanoo. Anoona ufa kai qira oosana faqa andeeqara oosana amana amana kai raina nimaqara oosana faqa nimianifeera maa ufafa maridanoo.
PRO 1:4 Maa ufafa irirana siaisa irirana nimidanoo kumaaraa maanaaqa irirana naakapama saina amiqira nira marirana faqaasa mariaqeera maa ufafa maridanoo.
PRO 1:5 Maa aaquqira ufafa irirana faqaasa irirana moo faqa moo faqa nimimarifa maridanoo. Amiqira irira aanara randee mariasa nimimarifa maridanoo.
PRO 1:6 Uqannifiqaafaqa aaquqira ufa oosana kukeeqarana faqa irirana faqaasa kukeeqara mariranauqa faqa irifara.
PRO 1:7 Anee irirana faqaafa mariraree qimasee Yaaweena ameemaanai maria. Furufari mariasa sia iriranara naaquqaidanoo irirana mararanara faqa nikooqaidanoo.
PRO 1:8 Qinee qimaaku anoofakoona ufa iria.
PRO 1:9 Ani anoona akoona aamuaqira ufa fannoo ani amiqira fasiqaikamma amaqaannoo, amiqira sarandaraqara foora aqinaaqa rumbasee kukukakana anukaki rufu amaqeera foora masainana amiqirafa marinnaranoo.
PRO 1:10 Qini qimaaku manda oosana maree mariasa ani amanifana sia misa ufa iria.
PRO 1:11 Misa aniara maaqi qifaranoo. Anee maasa faqa anirainaqa maasa faiqí kuqa narua. Aninaqa kukeeqafi qeeqa didirana taikeeqa oosana siaisa kuqa narua.
PRO 1:12 Misa kaqi marida amiqiqa marifaranoo maasa misa paqurimmasaanaqa kuqifaranoo. Amiqira fasiqa faqa manda fasiqa faqa dapi naruanauranoo.
PRO 1:13 Misa naruseeqa misa qumiasana oosana oosana mareeqee maasa nári maaqaki quqasaananoo maasa maaqa qumbiqaani.
PRO 1:14 Anee maasa faqa aninaqa maasa ummuara masainna aiqama ainaina ani faqa naida amianaura.
PRO 1:15 Qini qimaaku sia miqira fasiqa faqa fua. Misa mariaqooqari nianai maria.
PRO 1:16 Misa mandainaina auqarara sia anuqidaqa. Misa aiqama kari fidika ruiqaranara deedaqiqa maridaqa.
PRO 1:17 Anee ufini ufana fufinana sia aruani qinna ufinina afusaa fufua. Mifa qafamasee rufiaannoo.
PRO 1:18 Miqi maria fasiqausa nári nimaara ufaana fufidaqa. Nariqa ninuka arusee kuqifandinna ufanna fufidaqa.
PRO 1:19 Faiqí nári marusa mi oosanafa nariiundee inoo ummuari mariasa mi ummuarira oosanafa nári naruannoo.
PRO 1:20 Iriaqa, amiqira irirafa irirana faqaa anaas eera foora aana kindooraki faqa faiqí suqi mariaqoo maridanoo nammeera qidanoo.
PRO 1:21 Faandaamura ququsa kooqiki faiqí suqi mariaqoo maridanoo firaaqoo nammeera qidanoo.
PRO 1:22 Innee furufarirausa innee kisaaqasaa fee furufarida marifaree, innee kisaaqasaa fee irirana faqaasa iriranara uteeti qifaree. Sia fee innee minara irifaree.
PRO 1:23 Innee qini aaquqira ufa amiqimmasee iriaqa. Qinee qeeqa amiqira naakapara ufa faqa qeeqa irirana faqa inni nimianaura.
PRO 1:24 Inni naarauna sia irimariafanoo. Aniaqee qunaqa innee qini ufa irisee mana mana imariafanoo.
PRO 1:25 Innee qini naamuaqira ufa nimeesuqusee qini andeeqa nimaqaranara sia nididanoo.
PRO 1:26 Qinee irirausa innee umaaraki aqufi saamurifaqa qinee inniara naanaidara qianaura. Innee mandainainaki aqufifaqa qinee ataasa ataasa qima nimaqaanaura.
PRO 1:27 Mandainaina fannoo firaa aaku ufaira foora anireenoo inni nifu mara ookeendaandaa meeqeenoo aqusaannoo. Nidafirafa faqa ummaara faqa inni rafaaqafu sainaqa qinee naanaidara qianaura.
PRO 1:28 Innee mi mandainainna kiqari iriranara qini irirana faqaasa daaraifaa qinee sia irianaura. Innee firaaqoo qiniara aiqamai randeeqa sia paqurifaranoo.
PRO 1:29 Innee iriranara mandainainee qimasee sia Yaaweena ufa qaindusi mariafanoo.
PRO 1:30 Innee qini naamuaqira ufara sia nididanoo. Qini andeeqa nimaqaranara sia nididanoo.
PRO 1:31 Innee inneeqa mandoosana akiiqara feefauru marasaifanoo inni auriranara foora nimiannoo.
PRO 1:32 Irirana siaisa amiqira irirana nimeesa uqaanara kuqidaqa. Furufari mariasa amiqira irirafa sia marinara mandaikidaqa.
PRO 1:33 Yafasiqa fee qini irirausa ufa irinanoo mi ufafa minasaa rakisi amaqaanoo. Mifa asumu marinanoo sia mandainainara rufiara oosana mariannoo.
PRO 2:1 Qini qimaaku iria qinee auqaannee qimasee qimamianna ufana sia qaunua.
PRO 2:2 Amiqra ufa amiqimmasee iriseenana minara oonumafi iria.
PRO 2:3 Eeoo amiqira irirafa anee iannannai anianinnanara iramirisee iria.
PRO 2:4 Amiqira iriranara siruaa maqaki marifaqa randee mariandeemmasee randaa. Kukeeqara amiqira iriranara akaqa ainaina maqaki kukeeqaqaafaqa randee mariandeemmasee randaa.
PRO 2:5 Miqinana anee Yaaweenara rufiara oosanara iriseenana Anutunara irinnaranoo.
PRO 2:6 Yaaweefa kai amiqira irirana nimidanoo. Mifinnaindari kai irirafa faqa oonumafi irirafa faqa anidanoo.
PRO 2:7 Kuqaa anoona ufa kai qimariasa faqa andeeqara oosana maree mariasa faqa Anufufa dadaaqida itita nimaqaidanoo.
PRO 2:8 Anutufa faiqí amana amana kai amiqimma nimaqee mariasa faqa mina ufa mau maqee maqee fimariasa faqa Anutufa itita nimaqaidanoo.
PRO 2:9 Qini qimaaku anee qini ufa irinana amiqira ainainara faqa andeeqara oosanara amana amana kai rainara oosanara faqa irinnaranoo. Anee aneenna auqainna amiqira oosanara faqa irinnaranoo.
PRO 2:10 Anee moomoo amiqira irirana marasainanoo mi irirafa ani asasirana amiannoo.
PRO 2:11 Ani amiqimmasee marirafa faqa amiqira irirafa faqa anisaa itita amaqaannoo.
PRO 2:12 Mifa kai anee manda ainaina auqaranasaa itita amaqaannoo. Ummaara kambiqaanifeera qimariasa ufasaa itita amaqaannoo.
PRO 2:13 Miqi maria fasiqausa andeeqara marirana minnisee numoo asukunaki maridaqa.
PRO 2:14 Oosana oosana manda oosanara nidi marisa faqa amiqira irirana sia mari manda oosanara asasimariasa faqa furufara foomboo rimaria fasiqausa ufara faqa eerairiaqa.
PRO 2:15 Miqi maria fasiqausa oosana sia andeeqanoo maridanoo. Misa eerairi mariasa maridaqa.
PRO 2:16 Anee qini andeeqara ufa irinanoo moo fasiqa anaaqa fannoo narí fadameena akira ufannai aniara anirainaqa manda oosana auqaanee qinanoo mi amiqira irirafa ani itita amaqaannoo.
PRO 2:17 Miqira anaasee fannoo narí afaaqiara sia irirai Anutuna afusaa naaquqara qima afeekaikirufa qimaqoonara qaunuseenoo narí afaaqi minnisaidanoo.
PRO 2:18 Anee miqi mari anaaseena maaqai finana anee kuqirannai fimaria aatata finnaranoo. Minni finana kuqirausa maria maqa maaqanakiara foora finnaranoo.
PRO 2:19 Mi anaaseefinnai finafa sia kafaa oonurandee aninnaranoo. Anee sia kafaa oorurandee kaqi marira aanasaa aninnaranoo.
PRO 2:20 Anee amiqira irirana marirana mareenana andeeqara fasiqauqa naanna reenana amiqira marira marinnaranoo.
PRO 2:21 Andeeqara fasiqa anaasee faqa oosana siai fasiqa anaaseesa maqa maaqanara maasaindi fee qimasee minaki marifaranoo.
PRO 2:22 Miqiqa marifanoo Anutufa mi maqa maaqanaki manda oosana maree mariasa ummaqira ainainara foora raraku aquannoo.
PRO 3:1 Qini qimaaku qinee qimamianna ufana sia qaunua. Qinee qimamianna ufana aiqama kari iridana qinee qimamunnandee ia.
PRO 3:2 Qinee qimami marunna ufafa ani kuqirana kisaaqasaa sainana maridana amiqiranaki reemindeemi riranaki marinnaranoo.
PRO 3:3 Mapukusee marirana faqa fisoo fisoo irana faqa mi ainainna qanda mareeqee saufauruara foora rumbasaina anukaki mariani, aneena amuqusaki akara rumaqaina mariani.
PRO 3:4 Anee miqinnanannai faiqí faqa Anutufa faqa aniara nidifaranoo.
PRO 3:5 Aneenna amuqusa aiqamannai karaambaiqa saqarikia. Sia anee aneenna iriranara amanammifoo qimasee minasaa mundua.
PRO 3:6 Anee aiqama ainaina auqeenanana Yaaeenara ani aaqooki marinana kai auqaa. Miqimmasee finanoo mifa andeeqara aana ani uqafiqaannoo.
PRO 3:7 Sia anee aneennara irirana faqaasee qimasee mana mania. Karaambaiqa ufa mau fidana manda oosana auqarara qeerairia.
PRO 3:8 Anee miqinnanannai amiqira marasinnara foora ani afaaqai nammuana qunuseenoo aidafirana taika sainana amiqirafa mariannandee ina marinnaranoo.
PRO 3:9 Anee aneenna nara ainaina amiqirana kai aneenna maqakinaana unakuseenana Anutuna tatufirana suqa amia.
PRO 3:10 Anee miqinanoo Yaaweefa ani ainaina moomoo afuqaki rairaamma amiannoo. Anee miqinanoo Yaaweefa quandaki ani narana nammari moomoo rairaamma aminana afeedira maqaki quqararee qimasee sia amanai kinnaranoo.
PRO 3:11 Oo qini qimaaku Yaaweefa ani andeeqainana sia anee minara akooqaani, Yaaweefa aaquqira ufa qimidanoo fee qimasee amiqimmasee iria.
PRO 3:12 Yaaweefa narí aidi marisa aaqee foora andeeqa nimaqaidanoo. Faiqi anoofa akoofa narí faiqi andeeqaindee inoo miqidanoo.
PRO 3:13 Amiqira irirana faqaasa faqa andeeqara irirana faqaasa faqa asasidaqa.
PRO 3:14 Irirafa siruaa faqa koora faqa uriaaqararafa maridanoo.
PRO 3:15 Mi irirafa firaa feefauru qusee maree maria oonina faqa ani kaaqa aidi mari amiqira ainaina faqa uraaqararafa maridanoo.
PRO 3:16 Irirafa kisaaqasaa marirana ani amidanoo. Mi irirafa ainaina faqaasaikirana faqa uriqarara auqu aniamiannoo.
PRO 3:17 Amiqira irirafa ani marirana amiqimma amaqaseenoo ani amiqimmasee afiqee fuannoo.
PRO 3:18 Amiqira irirana faqaasa asasidaqa, amiqira irirafa misa marirana nimiannoo.
PRO 3:19 Yaaweefa narí amiqira iriranannai innaruna faqa maqa faqa auqinau. Oonumafi iriranannai innaaruna murufi atukaranau.
PRO 3:20 Yaaweena amiqira irirafa qufanoo nammari quminau, kafa oonamuara qufanoo aaku suqufufanoo maqasaa aqufinau.
PRO 3:21 Oo qini qimaaku anoona ufa faqa amiqira irirana faqa sandee foora atukaramma qumarasee sia uqaa.
PRO 3:22 Anee miqinanoo mi ainaina qanda ani marirana amisee ani amiqira doodapaaniara foora marifaranoo.
PRO 3:23 Anee miqinana aneenna aatata amiqimmasee finnaranoo sia aiku rupauraki saamurinnaranoo.
PRO 3:24 Anee faiqeenana sia rufieennaranoo amiqimmasee afu rirainana faiqeennaranoo.
PRO 3:25 Manda oosana maree mariasasaa tautummasee kambiqara ummaara firaafa firaa aaku oonnamuara foora kambiqoondee iranara sia rufieennaranoo.
PRO 3:26 Yaaweefa ani ummaarasaa itita amaqaannoo. Mifa anisaa rakisinana sia ufaanaki arinnaranoo.
PRO 3:27 Oo qini qimaaku faiqí moo fannoo moo ainainara dadaaqiannee qinana sia qaoo qia. Mi ainaina marinana kaqi dadaaqia.
PRO 3:28 Sia aneenna aqoonnanara finana duna ani maraannee qia. Aniki marinana aaqee kai amia.
PRO 3:29 Aneenna aqoonnanara sia oonumafi manda irirana iria mifa ani aaqa marifa narí afaaqa aniki quqee marifa marinara sia manda irirana minara iria.
PRO 3:30 Ani sia mandaikamma amaqainnana sia fifau aanoo qima amaqaa.
PRO 3:31 Anee sia faiqí narimarasa naanna raa. Misa oosana qafammasee sia qinee faqa miqiunoo qia.
PRO 3:32 Manda oosana maree mariasara Yaaweefa fidiaqaa midanoo. Andeeqara oosna faqaasa Yaweena afaaqasaa aqondi mariafanoo misara aididanoo.
PRO 3:33 Yaaweefa narí manda niqurara ufa manda oosana maree maria fasiqausa maaqasa uqaidanoo. Andeeqara oosana maree maria fasiqausa maaqasaa narí amiqi amiqirana uqaidanoo.
PRO 3:34 Faiqí nári nifaaqa nári nuqu uqeeqee fasiqausa Yaaweefa misara akooqaidanoo. Fisoofisoo idaqa nári mara maree qumi mariasara Yaaweefa aididanoo.
PRO 3:35 Irirana faqaasa nuqu uqeerarana mareefaranoo. Furufari mariasa nári mi furufarirafa nári nisaurirana nimiannoo.
PRO 4:1 Oo qini faiqi namu inneeqa nikausa qini naamuaqira ufasaa irirana rusisee oonumafi irira oosana mareefaranoo.
PRO 4:2 Qinee qimannimianna ufafa amiqira ufa maridanoo. Minara aiqama aiqamara iria.
PRO 4:3 Qinee faqa ooqai kaqikaa faiqi mariaafanausa maridaqa. Qinee qeeqa qinaukoo moodaa faiqi mariaafanausa maridaqa.
PRO 4:4 Qini qikoofa maaqi qimasee qini qimaqiminau. Qinee qimamianna ufana sia qaunua aiqama kari iria. Qinee auqaannee qianna ainaina auqeenana sia kuqinnaranoo.
PRO 4:5 Anee amiqira iriranara faqa oonumafi iriranara faqa randasee maraa. Qinee qimamianna ufana sia irisee qaunua.
PRO 4:6 Sia amiqira irirana minnisaa minara rinanoo ani faqa maridanoo mifa anisaa rakisiannoo. Anee minara rinanoo mifa anisaa itita amaqaannoo.
PRO 4:7 Irirafa kuqaa firaa ainaina maridanoo mina kai randasee maraa. Anee nana oosana oosana ainainee maraseenana oonumafi irirana sia aunua mina faqa maraa.
PRO 4:8 Anee amiqira iriranara aidinana rakisi qumarainanoo mifa ani firaa auqu amiannoo. Anee irirana oonumafi rakisi qumarainanoo ani auquara naaquqarana faqa qeerairirana faqa nimiannoo.
PRO 4:9 Anee irirana marasainanoo ani aqinaaqa amiqira faini afaira foora mariannoo. Mifa uriqararausa qafeera foora ani akiiqa afisu amaqanoo mariannoo.
PRO 4:10 Oo qini qimaaku anee oori kandamasee qini ufa irisainanoo ani marirafa kisaaqasaa mariannoo.
PRO 4:11 Qinee amiqira iriramau fimaria aanna aamuaqi marunausa maridaqa.
PRO 4:12 Anee mimau finanoo sia moo ainaina fannoo ani aana ititaannoo. Anee mimau finana sia aiku rupaurinnaranoo.
PRO 4:13 Anee aamuaqira ufa rakisi qumaraa. Sia uqaa. Aneenna ufa minasaa atukarama qaina mariani ani marirafa maridanoo.
PRO 4:14 Aaqee mariasa fimaria aatata sia fua. Sia manda oosana maree mariasa naanna raa.
PRO 4:15 Anee misa aatata faqa sia fua. Minniseenana aneenna aatata kai fua.
PRO 4:16 Mandoosana maree mariasa akaqausa mareeqee sia nári mandoosanaki uqaseeqa sia maqasaa faiqeefaranoo. Misa akaqausa rarisameeqee minaki uqaseeqa maqasaa faiqeefaranoo.
PRO 4:17 Misa manda oosana faqa faiqí kuqa narirafa faqa misa narana nammariara foora maridanoo.
PRO 4:18 Andeeqarausa nimari aanafa kaaqa qara aana uqanna maridanoo.
PRO 4:19 Manda oosana maree mariasa aana asukuna miqirafa maridanoo. Misa nanasee fee niku amaki saamrida fee, sia qafaidaqa.
PRO 4:20 Oo qini qimaaku amiqimmasee qinee qunna ufana iria. Qini ufa amiqimmasee iria.
PRO 4:21 Sia amiqira irirana minnisaina fuani. Aneenna amuqusaki quqasaina mariani.
PRO 4:22 Amiqira irirafa faqa oonumafi irirana faqa sia kuqirana faqa nifaaqa amiqi amiqirana faqa nimidanoo.
PRO 4:23 Maa firaa ainainnara qimamianaura. Aneenna amuqusasaa rakisia. Aiqama marirana oosana amuqusaki qari ururaidanoo minara aneenna amuqusa amiqimmaseenana rakisia.
PRO 4:24 Sia unna ufa qia. Unna ufa faqa eendaandira oosanrafa faqa sia qia.
PRO 4:25 Aneenna firaree qinnaqoo amiqimmasee aiuqummasee kuqaa qimaseenana fua. Sia aneenna akiiqa asauriranaki quqaa.
PRO 4:26 Aneenna nimarianna aannana andeeqasainanoo amiqinoo marinana nua.
PRO 4:27 Anee aneenna aatata fidana sia dinni quandee dinni quandee ia. Andeeqasee manda oosanara qeerairammasee ani aiku fannoo ani aatata kai fuani.
PRO 5:1 Oo qini qimaaku qini aakapara ufa amiqimmandee aaqoo uqasee iria. Qinee amiqira irirana faqa aakapara ufa faqa ani qimamidaqa.
PRO 5:2 Anee andeeqara oosana mau finanoo ani aiqama ufaqirafa irirana faqaasa ufara foora mariannoo.
PRO 5:3 Moo fasiqa anaaqa ufa fannoo kaaqa adiafaa iannoo. Ookasaasa anoona adiafaa imarina faqa uriaaqaranoo mariannoo. Mina ookinaa ufa fannoo fadameena miqirafa maridanoo.
PRO 5:4 Mifa taikainanoo mifa ani quqasee finanoo qisaaqa suka miqirafa faqa aidafirafa faqa mariannoo. Aseema miqirafa afai raiqarafa ani afaaqa ateekaanoo.
PRO 5:5 Mi anaaseefa ani afiqeenoo kuqira maqa maaqaki fidanoo. Mina nira aana kuqirafa maridanoo.
PRO 5:6 Mifa sia kaqi marira aatatau fidanoo fau. Mifa fimari aanafa eendaandirafa maridanoo sia minara irimarifa kaqi mi aatata fimarifa maridanoo.
PRO 5:7 Qini faiqi namu qini ufa iria sia qinee qimannimianna ufana qaunuaqa.
PRO 5:8 Anee mi anaaseefa mariqooqari nianai maria. Sia mina kooqi aaqa faqa fua.
PRO 5:9 Anee mina kooqi aaqa finana aneenna andeeqaree auqu aiqamausa nifusaa maqasaa uqaminanoo aqufuannoo. Anee nimudaoo qirana siaisa nisaukuki oonu rainaqa kuqa arifaranoo.
PRO 5:10 Anaamuru anireeqa ani ainaina kaqi mareefaranoo. Ani kadaapi rirafa moosaindika miannoo.
PRO 5:11 Anee aneenna faiqara qaarisaa annadannadidana kuqina marinaqa ani amaqi faqa aununu faqa fifau ainainauqa namaseefaranoo.
PRO 5:12 Miqidana annadannadidana maaqi qinnaranoo. Oo qinee nanaree aaquqira ufasa fidiaqaa iqiafanee. Qini qimuqusa fannoo aamuaqira ufara fidiaqaa imariafanausa maridaqa.
PRO 5:13 Qinee sia ufa qima qimusa ufa iriafanausa maridaqa. Qinee aaqafana andeeqa qimaqoosa ufa sia iriafanausa maridaqa.
PRO 5:14 Qinee maqee aiqamausa nifusaa tautummasee qisauriranaki firaridaqa.
PRO 5:15 Anneenna nammari kai naa. Aneenna taquki kai sakasee naa.
PRO 5:16 Moomoo aanaaseesaa faiqi maqasainausa sia ani andeeqa amaqeefaranoo.
PRO 5:17 Anee moo aanaaseesa maqasainna faiqifa mi anaaseena oosanaki mariannoo. Sia ani faqa mariannoo.
PRO 5:18 Aneenna anaaqa kumaaraasaa maroonnana mina faqa amiqidana asasammasee maria.
PRO 5:19 Mina afaaqa amiqirafa eeqaku miqirafa ummooqukirafa maridanoo. Mina faqa maqee maqee maria. Anee maqee maqee mina naammara kai aidiani. Mina aidirafa maqee maqee ani qumaraani.
PRO 5:20 Oo qini qimaaku nanaree anee moo aanaaseera ridanee. Anee nanaree moo fasiqa anaaqa naammara ridanee.
PRO 5:21 Anee aiqama ainaina auqaannana Yaaweefa qafaidanoo. Anee yaifee fuananoo Yaaaweefa anisaa rakisidanoo.
PRO 5:22 Manda oosana maree mariasa nári mandainaina fannoo ufaanara foora nári ninuka qumaraidanoo.
PRO 5:23 Mi fasiqausa sia nariqa nirana mariranasaa rakisira irirafa marinara kuqidaqa.
PRO 6:1 Oo qini qimaaku akaqausa dinnaa munnimma maraifana misa faqa qima afeekaika maseenana qinee mina akiiqra ianauree qimasee sia miqinana aneenna qima afeekaikianna ufanaki ufaana kiara foora aruananoo.
PRO 6:3 Oo qini qimaaku anee maaqi qimasee mi fasiqana ufaanakinaana aneenna faaqa mara kaqinni quaa. Doo anee aneenna afaaqa aneenna aqoonnana asaukuki quqaananoo kai kaqi moodaaqoo oonureenana mi ufana taikasaa.
PRO 6:4 Anee sia faiqaa sia kisaaqasaa adooaida maria.
PRO 6:5 Anee kaasau kuara miqirafa maria ufaanaki arufinoo munari minarindee dauni ratoofusee mina faqa ufa qima taikaa. Ufini ufaanaki aiku arindee ia, dauni aruratoofua.
PRO 6:6 Oo kudi fasiqauqa tarika mariqoo oonuree mina oosana qafaaqa. Innee mina oosana qafamaseeqa oonumafi iriseeqa irirana faqaasaikifaranoo.
PRO 6:7 Sia tarika rakisirafa moo maridanoo sia misa fukifaaki qimarifa moo maridanoo, sia moo fannoo misa aranaiqi qimannimifaqa ainainai fidaqa.
PRO 6:8 Suani aukuana misa nári kai nári narana moomoo afeedidaqa. Aaku aukuana narana taikainaqa nararee qimasee miqidaqa.
PRO 6:9 Oo kudi fasiqa kisaaqasaa fee innee miqoo faiqaqee ifaree. Yairee fee innee findi fifaree.
PRO 6:10 Innee maaqi qimariafanoo maasa qusasaa faiqaanauree qimariafanoo. Maasa qeeqa qisauku raqandaammasee kaqikaaqoo idooaanauree qimariafanoo.
PRO 6:11 Innee faiqaafanoo inni faiqarafa ummuara fasiqara foora inni aiqama ainaina ummuara maraanoo.
PRO 6:12 Mana oosana maree mariasa unnufa qiqa nidaqa.
PRO 6:13 Nikaru qiraree qimasee nifu quandaqaandi mariasa misa niku munuree miniree imariasa maridaqa.
PRO 6:14 Misa nimuqusaki nikaruqirafa qumbiqarausa maridaqa. Maqee maqee mandainainara kai ufa qimariasa maridaqa. Misa aiqamatinai nidaqa ummaara kambiqaanifeera kai andaana riqa nidaqa.
PRO 6:15 Miqi marianara firaa ummaara sia aaquqima nimaqarai tautummasee misa naruannoo.
PRO 6:16 Yaaweefa qisauku dinni taikasee dinni oonu qaara marasee ainaina auqaanara kaaqa fidiaaidanoo.
PRO 6:17 Maa ainainnara fidiaqaa idanoo. Oori uqeeraranara faqa unna qimari afaurunara faqa fifau fidika ruiqee marinara faqa manda oosanara nári iriranaki tipundaari mariana faqa mandainainaki dauni niku ree mariana faqa kootaki unnufa qimariana faqa nári nikaaqaafasaa ummaara nimimaria oosannara faqa Yaaweefa fidiaqaa idanoo.
PRO 6:20 Oo qini qimaaku ani akausa qimamunnandee inana aneenna anoona ufa sia qaunua.
PRO 6:21 Aiqama kari aneenna anaukoo ufa sia quqaa, aneenna amuqusaki quqasee atukaraa.
PRO 6:22 Misa qimaminna ufafa ani indaarunnikamma amaqaanoo. Eendaki anisaa itita amaqaseenoo faasaana niranaki ani aakapaannoo.
PRO 6:23 Ani anaukoo aakapara ufa qoomara foora kaaqaqaidanoo. Misa andeeqara ufa fannoo ani maa maqanasaa marirana andeeqa amaqaidanoo.
PRO 6:24 Mi ufafa dapi maraqa nua anaasee finnai firanasaa itita amaqaannoo. Akaqa fasiqauqa ninaaqmaaka fadameena akira ufasaa itito amaqaannoo.
PRO 6:25 Sia anee misa amiqira nifaaqara rua. Afunnai ani mareeqeenoo ufaanaki aruaneera quqainana sia minara iria.
PRO 6:26 Dapi maraqa nua aanaaseefinnai finana kaqikaa feefauru narana maree mariana amana kai aqinnaranoo. Faiqí moo anaaqa faqa finana firaa feefauru faqa aneenna aiqama ainaina faqa aqinnaranoo.
PRO 6:27 Amanee anee ida auri marina qumaree amuqusasaa uqasainanoo qamunna sia qaannoo fee. Ani qamunna faqa afaaqa faqa aiqama ida qaannoo.
PRO 6:28 Amanee anee ida auruki aiku reennaree sia amana reennaranoo. Aiku turuquannoo.
PRO 6:29 Doo miqi kai inoo faiqí moo fannoo narí aqoonnana anaaqa faqa sia faiqaannoo. Miqinafa aupurarana maraannoo.
PRO 6:30 Faiqí moo fannoo aararainanoo ummuara masainanoo sia minara firaaqoo ufa qifaranoo.
PRO 6:31 Akaqausa mifasiqana paqurimmasaifanoo moodaa ainaina ummuarinnana akiiqara dinni taikasee dinni ani qaara marasee 7 ainaina amiannoo. Mifa narí uaqeei ainaina aiqama amiannoo.
PRO 6:32 Narana ummuari fasiqanara miqimminoo marifanoo anaasee ummuari marinara maaqimminoo maridanoo. Moo fasia anaaqa faqa manda oosana auqee marifa narí kai narí kurididanoo.
PRO 6:33 Mi fasiqafa arirana faqa aqirana faqa maraidanoo. Mi fasiqafa naaruara asauriranaki mariannoo.
PRO 6:34 Mi anaaseena afaaqi paqurinanoo rairai qirafa idara foora atakuquannoo. Minara ufa qifanoo sia kaqi irinoo minnisaannoo, arana qarafa kisaaqasaa mariannoo. Sia kai kaqi taikaannoo.
PRO 6:35 Sia mifa feefauruara iriannoo munnimma ainaina oosana oosana aminanoo siamma iriannoo sia doo fee qiannoo.
PRO 7:1 Oo qini qimaaku qinee qimamianna ufana iria. Qinee auqaannee qianna ainainnara sia qaunua.
PRO 7:2 Anee qinee qunnandee inana amiqimmasee marinaranoo. Qini aamuaqiira ufa aneenna afu rakisinnandee amiqimmasee rakisia.
PRO 7:3 Qini aakapara ufa aiqama kari uaqeeina ani faqa mariani. Aneenna amuqusasaa akara rumasaina mariani.
PRO 7:4 Oo qini qimaaku anee amiqira iriranara qini qisookifee qia. Oonumafi iriranara qifaaqa saa qiqoondi fee qia.
PRO 7:5 Anee miqinanoo mi irirafa moona anaaqa faqa firanasaa aitita amaqaanoo. Mi anaaseesa fadameena akira ufasaa itita amaqaannoo.
PRO 7:6 Qinee qeeqa maaqaki ooqufaqee qeeqa kooqirunna qafaunanoo dapi kumaarauqa marianakiqari moo furufarira kumaara fannoo ummuarimari anaaseena maaqa marindanai ubeekaidanoo mina kooqindanai fidanoo doo mina naambeeqandanai finoo suani keeqaifanoo sisisasa qeenoo fee eendaki fee asukunai fee doo mifinnai fidanoo.
PRO 7:10 Mi anaaseefa doo oonu afiqararee qimasee anidanoo. Aatata nua aanaaseesa qamunna afisusee anidanoo.
PRO 7:11 Mi anaaseefa kambaaramasee ufa qimarifa asaurirana siaifa maridanoo. Mifa aiqama kari fifau aatata oonuree aniree inoo nifa maridanoo.
PRO 7:12 Anee aanai finana miqoo qafeennaranoo. Anee maqusa qambaanai finana mina miqoo qafeennaranoo. Mifa aiqama aana kindooraki oonureenoo afu munu maqee mini maqee iannoo.
PRO 7:13 Mi kummaaraana paqurimandee asauku qaqusee qumaseenoo amooqa namaseenoo afuki kai qafanoo maridanoo qiannoo.
PRO 7:14 Doo qinee maqee amaana maqaki keeqafiqa tatufirana suqeeqee qiannoo. Doo qinee tatufirana suqaidaqa aandau ati maree mini quqasee anidaqee qiannoo.
PRO 7:15 Qinee qeeqa maaqakiqari raudamaki aniara randamaree doo ani paquriqa.
PRO 7:16 Doo qinee qeeqa qaari amiqirana ufiqiseeqa. Isipa maqanna qamunna amiqirananoo minasaa ufiqiseeqa.
PRO 7:17 Qinee minasaa fadameena afundi marina adieesee makaqa anoona faqa saadapu anoona faqa adieeseeqa doo anee aniraina maaqooqari oosana arasee nariara nariara nidira nammari neenee iaqasaa.
PRO 7:19 Qini qifaaqi sia maridanoo nianai fifinoo mifa munnimma moomoo maree finoo mifa qaara amaana minni maraannoo sia kai kaqi aniannoo.
PRO 7:21 Mi aanaaseefa narí naammannai mina qumaraseenoo ummooqifira ufannai mina rarisaidanoo.
PRO 7:22 Mi anaaseena ufa fannoo mi kumaaraana afu dapikammasaifanoo aandau miqirafa sia irirai kuqiranaki kaqi fidanoo.
PRO 7:23 Kaasau kuara ufaanaki arinoo marifanoo faiqí oonu qafeenoo doo amuqusa arifanoo kuqidanoo. Mifa ufiniara foora sia irirai ufini ufanaki keeqafinoo kuquannoo. Mifa narí marirafa manda marinara sia iridanoo.
PRO 7:24 Oo qini faiqi namu innee amiqimmasee qinee qianna ufana iriaqa.
PRO 7:25 Inni nimuqusa fannoo sia mi anaaseena faqa firara findifuani. Sia kambaaramasee mi anaaseefa marinnai fuaqa.
PRO 7:26 Mifa moomoo fasiqa mandaikamma nimaqaseenoo kuqirana niminoo. Sia amana nisaana rirana amana kuqa narimarifa maridanoo.
PRO 7:27 Anee mi aanaaseena maaqai finana anee kuqira aatata fimariananoo. Mi aanafa kuqirannai fimaria aanafa qusa aana maridanoo.
PRO 8:1 Iriaqa, amiqira irirafa irirana faqaa aanaaseera foora nammeera qidanoo. Oonumafi irirafa dadaaqinoo firaaqoo naaraidanoo.
PRO 8:2 Amiqira irirafa aaqana namusaa fee aanasaa fee aana kindooraki fee kikiqinoo maridanoo nammeera qidanoo.
PRO 8:3 Maaqusa kooqiki fee maqusa atinni fee kikiqinoo maridanoo maaqi qimasee nammeera qidanoo.
PRO 8:4 Inni aiqamausa qimannimidaqa, inni aiqama maa maqa maaqana saaqaraasa naaraidaqa.
PRO 8:5 Innee irirana siaisa irirana maraaqa. Furufarirausa inneeqa furufarirana kiqari nifu maqasaa qafamasee iriaqa.
PRO 8:6 Qini amiqira ufa iriaqa, aiqama qinee qimannimi marunna ufafa kuqaa kai maridanoo.
PRO 8:7 Qinee qimarunna ufafa kuqaa anoona maridanoo. Qinee unna ufara fidiaqaa midaqa.
PRO 8:8 Qini aiqama ufa kuqaa kai maridanoo. Sia unna qirafa faqa eendaandirafa faqa minaki maridanoo.
PRO 8:9 Irirana faqaafa qini ufara aiqama iriannoo kaaqa qara ufa fee qiannoo. Irirana faqaasa qini ufara kuqaa anoonee qifaranoo.
PRO 8:10 Innee siruaa minnisee qini naakaparanara amiqira ainainee qimasee maraaqa. Innee koora munnimmara rimariana minnisaaqa, irirafa mifa naaru naaru marirafa maridanoo mina maraaqa.
PRO 8:11 Qinee amiqira irirausa maridaqa qinee nifaaqa auqi maria amiqira ainainausa faqa uriaqararausa maridaqa. Sia moo ainaina innee rimariafa qini qimana maridanoo.
PRO 8:12 Qinee irirausa ufa raina nimaqarana akausa maridaqa. Qinee irirausa akooqoo irirana auqi marunausa maridaqa.
PRO 8:13 Yaaweenara qeerairida mina ufa qaindusiraree qimasee manda oosanara fidiaqaa ia. Qinee ramoo ramaa iranara faqa nári nuqu uqeerara oosanara faqa manda oosanara faqa unnufa qiranara faqa fidiaqaamidaqa.
PRO 8:14 Qinee ainaina auqararee qimasee qeeqa iriranaki qima irisee auqaanaura. Qinee oonu mafi irirana faqaasa maridaqa qinee afeeka maridaqa.
PRO 8:15 Qinee uriqararausa faqa rakisirausa faqa dadaaqunaqa amiqira irirana qimasee maqa maaqaki rakisi nimaqaidaqa.
PRO 8:16 Aiqama maa maqanasaa qaraa rakisirausa qini dadaaqirananoo rakisi nimaqaidaqa. Uriqararausa miqi kai idaqa.
PRO 8:17 Qiniara rimariasara qinee faqa misara ridaqa. Nimudaanai qimasee qiniara randee mariasa misa qini paqurifaranoo.
PRO 8:18 Qinee moomoo munnimma faqa uriqarara auqu faqa uaqeeidaqa nimianaura. Aiqama ainaina auqainafa anoona kambiqarana faqa reemindeemirirana faqa nimianaura.
PRO 8:19 Qini ainaina maraafa koora uraaqararafa maridanoo. Mina amiqirafa kaaqa amiqira siruaa faqa uriaqararafa maridanoo.
PRO 8:20 Qinee andeeqara aatata kai fidaqa. Qinee ufa amana amana kai raina nimaqara aatata fidaqa.
PRO 8:21 Qiniara rimariasa moomoo qumiasana nimidaqa misa maaqaki qumiasana qumbiqannisaidaqa.
PRO 8:22 Ooqai Yaaweefa aiqama ainaina auquanee qimaseenoo qini irirana naaree auqinau.
PRO 8:23 Ooqai uqanna aiqama ainaina sia auquqoo qini irirausa naaree auqinau. Maa maqa maaqana sia auquaqee idanoo qini naaree auqinau.
PRO 8:24 Ooqai ooruku nammari sia maruqoo qinee naaree kambiqaafanausa maridaqa. Maqakiqari nammariuqa sia ururee marufaqa qinee naaree kambiqaqiafana.
PRO 8:25 Aaqanauqa faqa amuaqu namuqa faqa sia maruqoo qinee naaree kambiqaafanausa maridaqa.
PRO 8:26 Yaaweefa maqa maaqa faqa kookoomma faqa sia auqu aukuana qinee irirausa naaree mariafanausa maridaqa.
PRO 8:27 Qinee faqa mariafananoo Yaaweefa innaaruna auqu quqanau. Qinee faqa mariafananoo Yaaweefa ooruku nammari fiqufiqumma auqu quqanau.
PRO 8:28 Qinee faqa mariafananoo Yaaweefa oonnamu auqu quqanau. Qinee faqa mariafananoo Yaaweefa ooruku nammari maqakiqari ururee maruna auqu quqanau.
PRO 8:29 Qinee irirausa Yaaweena faqa mariafananoo Yaaweefa ooruku nammari mandiranara maa oosirana amana kai mandiannee qufanoo miqinninau. Qinee faqa mariafananoo Yaaweefa maa maqana maaqa atunara foora rakiasoofanoo maridanoo.
PRO 8:30 Yaaweefa mi ainainausa auqi marufaqa qinee amiqira irirausa mina aaqa faiqi aanaaqiara foora mariaafanausa maridaqa. Qinee mina afusaa maridaqa aiqama kari asasirana amimariqiafana.
PRO 8:31 Aiqama maqa maaqai asasiqa niniaafanausa maridaqa. Qinee faiqí faiqi faqa asasiqa niniaafanausa maridaqa.
PRO 8:32 Doo maqee kumaaraa fasiqa anaasee qini ufa iriaqa. Qinee qiannandee iqa innee asasifaranoo.
PRO 8:33 Innee qini naakapara ufa iriaqa, sia minnisaaqa. Iriseeqa irirana faqaasa mariaqa.
PRO 8:34 Qini ufa irimariasa asasifaranoo. Qini kooqiki aiqama kari mariasa faqa eeqá maaqai fimarunna aanna afainni maridaqa qiniara rakisi mariasa asasifaranoo.
PRO 8:35 Faiqí moo fannoo qini irirausa paqurinafa kaqi marirana faqa paquriannoo.
PRO 8:36 Faiqí qini irirausara sia randee mariasa nariqa kai nariqa mandaikamma nimaqaidaqa. Qini irirausara fidiaqaa imariasa kuqiranara nididanoo.
PRO 9:1 Irirafa narí maaqa atuna qisauku dinni taikasee dinni ani qaara marasee 7 pausasaa usakaseenoo.
PRO 9:2 Irirafa narí aandau arusee suqeenoo. Narana faqa uainna nammari faqa deedaqamma narana neemaria qaindanasaa oomaqa saka quqanau.
PRO 9:3 Mifa narí ainainira maanaaqauqa niqiqoofaqa maqusasaa aaqanaikiraqoo ooruree nammeera qiaqeera niqiqoofaqa fiqau.
PRO 9:4 Innee ooruree maaqi qimasee nammeera qiaqa. Innee irirana siaisa mai aniree qoomaqa naaqee qiaqa. Furufarirausara maaqi qimasee nammeera qiaqa.
PRO 9:5 Mai aniree qini narana nammari naaqee qiaqa.
PRO 9:6 Inneeqa furufarirana minnisee kisaaqusaa mari faranoo. Amiqira iriranamau fuaqa.
PRO 9:7 Anee náriara maasa amiqirausee qimaria fasiqausa qaoo qinaqa misa ani namuqaaka mifaranoo. Nariara andeeqarausee qimariasa aaqaranara qaoo qinaqa misa ani arifaranoo.
PRO 9:8 Anee ufa rukiee maria fasiqausara qaoo qinaqa misa aniara fidiaqaa mifaranoo. Anee irirana faqaa fasiqa andeeqa amaqainanoo ani ufara eedoo qimasee ani ameemaanai keeqaannoo.
PRO 9:9 Nana ainainaree irirana faqaana qimaminanoo mifa misa kaaqa firaaqoo irirana faqaasaikamma nimaqaannoo. Andeeqara fasiqauqa qimanniminaqa misa moo faqa moo faqa irirana mareefaranoo.
PRO 9:10 Yaaweenara rufieenana irirana faqaafa mariannaranoo. Anutuna naaquqara ainainara irinanoo mifa ufa irirana oosana amiannoo.
PRO 9:11 Amiqira irirafa faiqí marirana maa maqanasaa kisaaqa kamu rarisama nimaqaidanoo.
PRO 9:12 Anee irirana faqaafa marinanoo mi irirafa ani moomoo amiqirana amiannoo. Anee mi irirana minnisainanoo aupurarafa aniki mariannoo.
PRO 9:13 Furufarirafa asaurirana siai anaaseefara foora maridanoo. Firaaqoo faaqa quqasee ufa qimari anaaseefara foora maridanoo.
PRO 9:14 Miqira anaasee fannoo narí maaqa kooqi afaisaa ooqumarifinoo aiqama maqusa mirinni urinnaaqaramafa maridanoo.
PRO 9:15 Akaqausa nári qimaqaannai nári ainainai aiqaree fimariasa misa naarama narí maaqaki quqaidanoo.
PRO 9:16 Mi aanaaseefa maaqi qimasee furufarirausa qimannimidanoo. Irirana siaisa doo mai aniaqee qidanoo. Furufarirausara maaqi qidanoo.
PRO 9:17 Ummuarira nammari adiafaa irafa maridanoo. Ummuarira feemu narafa adiafaa midanoo.
PRO 9:18 Mi anaaseefinnai fimariasa kuqimarianara furufarira fasiqa fannoo sia iridanoo. Mi anaaseena maaqaki keeqoosa maqee kuqira maqa maaqaki maridaqa.
PRO 10:1 Maana Sooroomoonnana aaquqira ufa maridanoo. Irirana faqaasa nári rukausa mara asasirana nimidaqa. Furufarirausa nári ninausa nisaurirana nimidaqa.
PRO 10:2 Unna qira aatata marainna ainainafa sia ani dadaaqiannoo. Anoona qira aatata marainna ainainafa ani marirana dadaaqiannoo.
PRO 10:3 Anutufa sia andeeqara fasiqauqa naarararana nimiannoo. Manda oosana maree mariasa nári nidimari ainainna mararanasaa Anutufa itita nisaidanoo.
PRO 10:4 Kudoosaaparafa kudikirana amiannoo. Kadaapi rirafa ani ainaina faqaa faikamma aisaidanoo.
PRO 10:5 Irirana faqaafa narana qaanaakifaqa afeedidaqa. Moo fannoo narana unnakara aukuana faiaqee idanoo sia narana deedaqafi asauriranaki mariannoo.
PRO 10:6 Andeeqara fasiqa anaasee amiqi amiqirana mareefaranoo. Manda oosana maree marina ufa fannoo mina manda irirana kukeeqasaifanoo akaqausa mandaikamma nisaidanoo.
PRO 10:7 Amiqira fasiqa kuqufinaqa amiqira ainainara foora iriranaki kaqi minara oonu mafi irifaranoo. Manda oosana maree mari fasiqafa kuqufinaqa misa mi fasiqanara kai kaqi qaunuseefaranoo.
PRO 10:8 Irirana faqaasa amiqira naamuaqira ufa iriseeqa nári nimuqusaki mara quqaidaqa. Fifau faafau iqa nuasa kuridifanoo.
PRO 10:9 Kuqaa qira oosana fannoo faiqí mareeqeenoo andeeqaranaki quqaannoo. Unna qira oosana fannoo faiqí mareeqeenoo maaniki aquannoo.
PRO 10:10 Noorinnai nifunnai imariasa ummaara kambiqaanifeera miqidaqa. Aiqama nifufsaa paasoosammandee manda oosanara qaoo qinafa mifa asooarana nimidanoo miqidanoo.
PRO 10:11 Amiqira fasiqa ufa fannoo nammariara foora, maqakiqari urureenoo kaqi marirana nimidanoo. Mandoosana maree mari fasiqana ufa fannoo narí irirana kukeeqa saifanoo narí aqoonausa mandaikamma nimaqaidanoo.
PRO 10:12 Faiqí aanaaseera fidiaqaa ira oosana fannoo ummaara kambiqaidanoo. Faiqí aanaaseera nidira oosana fannoo aiqama misa aaqarana minninnisaidanoo.
PRO 10:13 Irirana faqaa fasiqa afaurusaa amiqira ufa kai ururaidanoo. Furufarira fasiqa arirafa kai maridanoo.
PRO 10:14 Irirana faqaasa irirana oosana oosana moodaasaqa maridanoo. Furufarira fasiqa ufa qinanoo ummaara sia nianai mariannoo aaqa uqanna mariannoo.
PRO 10:15 Ainaina faqaana narí ainaina fannoo itita amaqaidanoo. Kudi fasiqa fannoo ainaina sia marinara kuridiannoo.
PRO 10:16 Amiqira oosana auqaana akiiqara kaqi marirafa maridanoo. Numoo fannoo nifiqeenoo firaa numooki kai fidanoo.
PRO 10:17 Naakapara ufa iri mariasa sia kuqifaranoo. Naakaparanara nikooqee mariasa manda aatata fifaranoo.
PRO 10:18 Faiqí moo fannoo faiqí aanaaseera ookiqari amiqi amiqidanoo umee fidiaqaa imarifa unnaqi marifa maridanoo. Munuqi miniqinoo nifa furufari marifa maridanoo.
PRO 10:19 Ufa moomoo qinana moomoo aaqarana mareennaranoo. Anee irirana faqaafa maridana qireeda marinnaranoo.
PRO 10:20 Amkiqira fasiqa ufa fannoo amiqira siruaara foora maridanoo. Mandoosana maree mari fasiqana irirafa maannukuara foora maridanoo.
PRO 10:21 Amiqira fasiqa ufa fannoo moomoosa dadaaqidanoo. Furufari marifa narí furufariranannai narí kai aridanoo.
PRO 10:22 Anutuna amiqi amiqiranannai kai ainaina faqaafaikinnaranoo. Ani kadaapirirafa sia amana minaki ookaa iannoo Anutufa kai amiannoo.
PRO 10:23 Furufarirafa manda oosana auqarara kai asasidanoo. Amiqira irirana faqaafa amiqira oosana auqee marinara kai asasidanoo.
PRO 10:24 Andeeqarausa nári nidimari ainainna mareefaranoo. Mandoosana maree mariasa kaaqa rufiee maria ainainna mareefaranoo.
PRO 10:25 Deedeefaa ufai firaafa uqinanoo mandoosana maree mariasa fuaqamma aqusaannoo. Andeeqarausa sia fuaqa aquannoo. Misaki kaqi marifaranoo.
PRO 10:26 Anee kudoosaapara fasiqa sia aneenna ainainiani feera afiqaa. Afiqasainanoo kudoosapee marinana afai sandurinafaara. Ida muna aninna afuki keeqeenoora foora iandoora sia afiqaa.
PRO 10:27 Yaaweena ufa qaindusinana sia dauni kuqinnaranoo kisaaqasaa marinnaranoo. Manda oosana maree mariasa kuqirafa kisaaqasaa marifaqa kasaaqai kuqidaqa.
PRO 10:28 Andeeqara fasiqa anaasee nidimari ainainafa kuqaa kambiqainaqa asasifaranoo. Manda oosana maree mariasa sia moo ainaina mareefaranoo.
PRO 10:29 Kuqaa qira oosana faqaasasaa Anutufa faandaamurara foora misa itita nimaqaidanoo. Miqimmaseenoo quandaki mandoosana maree mariasa kuridi nimaqaidanoo.
PRO 10:30 Andeeqara oosana maree mariasa sia amana atoosaa ususee kumbaimmaqifaranoo, misa doo miqoo mapukiqa maridaqa. Manda oosana maree mariasa sia mi maqa maaqanaki marifaranoo.
PRO 10:31 Andeeqara oosana maree mariasa amiqira ufa kai qidaqa. Manda ufa qimari fasiqana afaurusaa ititeefaranoo.
PRO 10:32 Andeeqarausa ufa qimannimidaqa narí oonu mafi iriseenoo mina ookiqari amiqira ufa kai qidanoo. Manda oosana maree mariasa aiqama kari narira ufa kai qidaqa.
PRO 11:1 Sia andeeqara sikeerara foora imariasara Yaawefa fidiaqa midanoo. Mifa andeeqara sikeerara aidifanoo asasidanoo.
PRO 11:2 Faiqí moo fannoo narí afaaqa amooqi marifa qusasaa asauriranaki aqufuannoo. Moo fannoo narí afaaqara reendeeni marifa irirana faqaafa mariannoo.
PRO 11:3 Ainainara kuqaa qimariasa misa nári kuqaa qira oosana fannoo manda ainainasaa itita nisaidanoo. Sia Yaaweena saqarikinausa nariqa unnaqira oosana fannoo nariqa kuridi nimaqaidanoo.
PRO 11:4 Ani moomoo ainaina fannoo sia ani kuqiranasaa itita amaqaanoo. Aneeqara oosana fannoo ani itita amaqaannoo.
PRO 11:5 Kuqaa qira oosana fannoo andeeqara fasiqa marirana amanaikamma amaqaidanoo. Sia saqariki mariasa nariqa mi oosanafa nári nikuqama nimifaqa aqufidaqa.
PRO 11:6 Andeeqarausa nári andeeqarafa idukunnisaidanoo. Sia saqariki mariasa nári mi manda oosanafa nári ufaanara foora ninuka aridanoo.
PRO 11:7 Manda oosana maree mariasa nári kuqira faasaana nári nidi marifaqa mararee qimaria ainainafa mi faasaanna taikaannoo. Manda oosanannai ainaina marararee qimariasa mi faasaanna nári ainaina mararafa taikaannoo.
PRO 11:8 Amiqira oosana maree marina mandainaina anifanoo Anutufa itita amaqaifanoo mi mandainainafa aiqareenoo mandainaina maree mariasa nifaaqai aqufidanoo.
PRO 11:9 Anutunara nikooqee mariasa ufa fannoo ani mareeqee mandaki quqaisaannoo. Andeeqara oosana maree mariasa irirafa ani mareeqee amiqiraqoo quqaannoo.
PRO 11:10 Andeeqee maria misa aiqama ainaina andeeqaifaqa faiqí anaasee mina qafamasee asasidaqa. Manda oosana maree mariasa kuridifaqa asasifaranoo.
PRO 11:11 Andeeqee mariasa maqusa amiqi amiqinoo maridanoo. Manda oosana maree mariasa ufa fannoo nári maqusa naakunduka midanoo.
PRO 11:12 Irirana siaifa narí aqoonausa raiqara ufa qimannimaqaidanoo. Irirana faqaafa sia miqira ufa qidanoo oo qummunimmasee maridanoo.
PRO 11:13 Munuqi miniqimarifa aaqaidanoo kukeeqarana kooroo imarifa maridanoo. Amiqi mari fasiqafa mifa kukeeqarana rafaaqafidanoo.
PRO 11:14 Moomoo irirana faqaasa marinna maqusafa sia aqufuannoo. Irirana sia marinna maqusafa aqufuannoo.
PRO 11:15 Anee moo maqannaa dinnaakira munnimmara dadaaqianee qinana dadaaqinanoo doo ani munnimma kuridiranaki finanoo ani afaaqa mandaika uqanna iannoo. Anee aanaamuru feefauru dadaaqiranara akooqee marinanoo ani munnimma kaqi mariannoo anee amiqiraqoo kaqi marinnaranoo.
PRO 11:16 Afaaridanoo fifamari anaaseefa amiqirafa aiqamausa mi anaaseena amooqi mariafa maridanoo. Manda oosana maree mari anaaseenara fidiaqaa midanoo. Kudoosaapee maria fasiqa anaaseesa sia ainaina moomoo mareefaranoo. Nimudaanai qimaria fasiqa anaaseesa ainaina qumiasana moomoo marisa maridaqa.
PRO 11:17 Afaarimari fasiqafa narí afaarimarifa nariki kai maridanoo narí dadaaqidanoo. Kaqi narimari fasiqafa mi narirafa quandaki narí aridanoo.
PRO 11:18 Manda oosana maree mariasa maree maria qumiasana ainainafa sia misa dadaaqidanoo. Andeeqara oosana maree mariasa maree maria ainainafa akooqoo afeeka ainaina mariannoo.
PRO 11:19 Yafee andeeqara oosana aiqama kari auqaee marifa sia kuquannoo kaqi mariannoo. Manda oosanara sandanainai qimarifa dauni kuqirana paquriannoo.
PRO 11:20 Yaaweefa manda irirana faqaasara fidiaqaa midanoo. Andeeqee mariasara Anutufa ridanoo.
PRO 11:21 Anee irimmariananoo manda oosana maree maria fasiqa anaaseesa aupuraranaki fifaranoo. Andeeqara oosana maree mariasa sia mi aupuraranaki marifaranoo.
PRO 11:22 Amiqira afaaqa faqaa anaasee maridanoo irirana furufari marifa kuara aanna raidanoo. Amiqira afaaqa faqaafa fifau maridanoo.
PRO 11:23 Andeeqara oosana maree mariasa moo ainainara nidifaqa marasaafanoo amiqirafa maridanoo. Manda oosana maree mariasa nári nidi mari ainainna marasaafaqa aiqamausa aanoo qidaqa.
PRO 11:24 Faiqí moo fannoo afaarinoo nimi marifanoo mina ainaina marirara kai idanoo. Faiqí moo fannoo manda fasiqa kaaqa ainainara tatamaqidanoo rakisi qumaraifa sia mina ainaina moomoo kidanoo.
PRO 11:25 Afaarinanoo ani ainaina moomoo mariannoo. Anee aneenna ainaina akaqausa dadaaqinana niminaqa ani faqa dadaaqiqa amifaranoo.
PRO 11:26 Faiqí moo fannoo aandaroo narimarifanoo narí narana moomoo marifanoo saina munnimma nambaqa meeraqoo auqu ramasaanaqa qimiaqee qimarinara faiqí anaasee mi fasiqa anaaseena aquramma araidaqa. Kaqi feefauriaqee qimari fasiqana amooqidaqa.
PRO 11:27 Fainqi moo fannoo amiqira oosanara afeekaikammasee randainafa mi fasiqafa narí amooqirana faqa paquriannoo. Faiqí moo fannoo manda oosanara randanoo fimarifa mi manda ainaina paquriannoo.
PRO 11:28 Nári qumiasanasaa mundi mariasa ufai firaafa uqnoo saqari amanee rauqu aqusaifafanoo maqasaa aqufindee mifaranoo. Andeeqara oosana maree mariasa misa sia fuka saqari amanee rafoora amiqi amiqi faranoo.
PRO 11:29 Faiqí moo fannoo faiqí aanaaseera manda ufa qimarinaqa faiqí anaasee findimeeqee daraani mambifanoo nariara quanda quandidanoo. Furufarira fasiqauqa irirana faqaasa ainainira faiqi marifaranoo.
PRO 11:30 Andeeqee maria oosanafa kaqi marirana nimidanoo. Mandoosana maree mariasa kasaaqanda midaqa.
PRO 11:31 Amiqi maria fasiqausa maa maqanasaa nári andeeqasee marinnana akiiqara mareefaranoo. Manda oosana maree mariasa misa faqa maqee kamuqoo nári manda oosana akiiqara firaaqoo aupurarana mareefaranoo.
PRO 12:1 Faiqí moo fannoo aaqamasainanoo moo fannoo qimaminanoo eedoo qimasee irinafa irirana faqaafa mariannoo. Aakapara ufara akooqee marifa furufarira fasiqa maridanoo.
PRO 12:2 Yaaweefa andeeqara fasiqa aanaaseera asasidanoo. Manda iriranara tipundaari mariasara akooqaidanoo.
PRO 12:3 Mandoosana fannoo sia amana itita nimaqaannoo. Andeeqarausa sia amana kasi kasifaranoo atuka araqa marifaranoo.
PRO 12:4 Irirana faqaa aanaase afaaqi fannoo mina amooqida asasidanoo. Manda oosana maree mari anaaseefa narí afaaqi asaurirana amisaifanoo amudaani rumafifanoo aurinoora foora inoo maridanoo.
PRO 12:5 Kuqaa anoona ufa qimariasa aiqama ainaina andeeqa nimaqeefaranoo. Manda oosana maree mariasa inni nikaru qiranara kai iridaqa.
PRO 12:6 Manda oosana maree mariasa misa ufaana fufidaqa ufannai faiqí naridaqa. Faiqí andeeqee mariasa misa ufaana kinaana andeeqara ufannai idukidaqa.
PRO 12:7 Manda oosana maree mariasa kuqifanoo misasaa ani aruakinausa sia marifaranoo. Andeeqara fasiqa aiku asauku sia dauni kuqifaranoo kaqi marifaranoo.
PRO 12:8 Anee irirana faqaafa marinaqa faiqí anaasee ani amooqifaranoo. Anee irirana siaifa marinaqa faiqí anaasee noori runifaranoo.
PRO 12:9 Kaqi fifau fasiqa narí ainainiranannai narana naidanoo amiqiranaki maridanoo. Moo fannoo nariara unnaqimasee karaambaiqee qimasee oonuree aniree inoo nidanoo naranara sia, marifanoo aarara nidanoo.
PRO 12:10 Andeeqara fasiqauqa nári aandau kuara faini nimuqusi marifaqa rakisidaqa. Manda oosana maree marifa kuara faini kaukaata qimannimaqaidanoo.
PRO 12:11 Kaaqa ainaini mari fasiqana narana moomoo marifanoo naidanoo. Fifau unnaqira ainaina auquanoo nifa narana sia marifa maridanoo.
PRO 12:12 Manda oosana maree mariasa manda ainainara kai randaidaqa. Andeeqee mariasa misa atukaraqa maridaqa.
PRO 12:13 Mana oosana maree mariasa nári ufaki ufaanakiara foora aridaqa. Anoona qira oosana maree mariasa misa rakeemmaki kaqinni maridaqa.
PRO 12:14 Aneenna ufa qimariannana akiiqara faqa aneenna asaukunnoo auqee mariannana akiiqara faqa mareennaranoo. Aneenna auqaannana amana kai aiqama ainaina mareennaranoo.
PRO 12:15 Furufarira fasiqauqa aiqama kari náriara amiqimmidee qidaqa. Irirana faqaasa naamuaqia ufana amiqimmasee iridaqa.
PRO 12:16 Irirana siaifa kaqikaa ufa iriseenoo tautummeeqeenoo aanoo qidanoo. Irirana faqaafa iriseenoo mafi rafaaqafusee mana mana fidanoo.
PRO 12:17 Faiqí moo fannoo andeeqarafa anoona ufa kai qidanoo andeeqara ainaina uqeeraidanoo. Unnaqi mari fasiqafa unna qira ainaina kai uqeeraidanoo.
PRO 12:18 Sia irirana irisee qimaria ufafa aseemara foora faiqí ateekaidanoo. Irirana faqaasa nifauru fannoo ufaanakuru ununnisaidanoo.
PRO 12:19 Kuqaa anoona ufa qimari afai afaurufa kisaaqasaa maa maqanasaa mariannoo. Unna qimari afai afaurufa qusasaa taikaannoo.
PRO 12:20 Manda ainainara tipundaari mariasa naundurai suka sanda itaranda maridanoo. Faiqí anaasee amiqiranaki mariaqeeree qimasee ainaini mariasa asasifaranoo.
PRO 12:21 Andeeqara fasiqa afaaqai sia mandainaina auqufuannoo. Mandainaina maree mariasa sia moo ainaina uaqeeidaqa misaki ummaara kai qumbiqanoo maridanoo.
PRO 12:22 Yaaweefa unnaqi maria afauru afainara fidiaqaa midanoo. Andeeqara ufa mau fimariasara Yaaweefa asasidanoo.
PRO 12:23 Irirana faqaasa nári iria ufana rafaaqafusee maridaqa. Furufarirausa nári furufarirana faaqa quqasaida nimidaqa.
PRO 12:24 Kadaapi rumasee ainainirafa ani afeeka amiannoo. Kudoosaaparafa ani moona ainainira faiqika maisaannoo.
PRO 12:25 Moo ainainara amukee marifa ani asasirana aruannoo. Reedeenira ufa fannoo ani asooama amaqaannoo.
PRO 12:26 Andeeqee mari fasiqafa narí aqoondiuqa amiqira aana uqannifiqaidanoo. Manda oosana maree mariasa nári mandoosana fannoo nári mareeqee kaqirunna ubeekaidanoo.
PRO 12:27 Anee ainainirara kudoosaapeenana sia aneenna masaree qimarianna ainainna mareennaranoo. Anee amudaanai qimasee ainaininana aneenna aiki mari ainainna mareennaranoo.
PRO 12:28 Kaqi marirannai fimaria aanafa andeeqara oosana maridanoo. Kuqirannai fimaria aanafa mandoosana maridanoo. Aaquqira Ufa.
PRO 13:1 Irirana faqaa faiqiuqa nári ninausa nikausa ufa amiqimmasee iridaqa. Ufa rukiee mariasa sia moo fannoo qaoo qinnana iriannoo.
PRO 13:2 Amiqira fasiqa fannoo amiqira ufa qinnana akiiqara maraannoo. Kaqi runna fimariasa nariranara kai naararaidanoo.
PRO 13:3 Aneenna ufasaa rakisinana aneenna mariranasaa faqa rakisinna anoo. Fifau faafau ufa qimarifa narí kai narí aridanoo.
PRO 13:4 Kudiki maria fasiqausa ainainara firaaqoo amuqusi marifanoo sia maraannoo. Amudaanai qimasee ainaini marifa aiqama ainaina narí aidi ari ainainausa maraannoo.
PRO 13:5 Andeeqara fasiqauqa unna ufara fidiaqaa midaqa. Mandoosana maree mariasa marirafa nisaurirana faqa manduqarana faqa nimidanoo.
PRO 13:6 Andeeqara oosana fannoo aaqarana siasa itita nimaqaidanoo. Manda oosana fannoo mandoosana maree mariasa mandaikamma nimaqaidanoo.
PRO 13:7 Akaqausa ainaina siaisa ainaina faqaasa naanna raidaqa sia ainaina marifaqa fifau miqidaqa. Akaqausa ainaina siaisa naanna raidaqa noori kandamasee nidaqa misa moomoo ainaina faqaasa maridaqa.
PRO 13:8 Ainaina faqaafa arirariafanoo narí ainaina moomoo nimifaqa sai aridaqa. Ainaina siaisa sia minara rufiaidaqa manoo manaa idaqa.
PRO 13:9 Amiqira oosana maree mariasa qoomara foora kaaqa qaidaqa. Manda oosana maree mariasa qimbarari mari qoomafara foora maridaqa.
PRO 13:10 Narí amoo kai qidanoo mandufa kai uqeeree marifa sia moo ainaina auqaidanoo ummaara kai uqeeraidanoo. Reedeeni mariasa misa irirana nimiaqeera kai iraidaqa.
PRO 13:11 Unna iriranannai maree maria ainainafa kai kaqi taikaannoo. Kadaapi rumasee marainafa moomooka miannoo.
PRO 13:12 Faiqí mo fannoo moo ainainara kisaaqasaa afeesida marifanoo sia anifanoo amuqusa mandaikifanoo akooqaidanoo. Aidi mari ainainnara afeesida mariifanoo aniraifanoo asasidanoo.
PRO 13:13 Faiqí moo fannoo naamuaqira ufara fidiaqaa imarifa mandainaina ummaara aaraidanoo. Naamuaqira ufa reendeena mandee irimari fasiqa anaaseefa asasirana maraidanoo.
PRO 13:14 Irirana faqassa naamuaqira ufa fannoo kaqi marirana nimira nammariara foora maridanoo. Ani kuqiranakinaana dadaaqifana kaqinni ubeekeennaranoo.
PRO 13:15 Irirana faqaana aqoonausa mina ufa qaindusidaqa minara ridaqa. Unna ufa qida mandaiki mariasa kuridira aatata fidaqa.
PRO 13:16 Amiqira irirana faqaa fasiqa anaasee andeeqara irirana iriseeqa mimau kai fidaqa. Furufarira fasiqa anaasee faiqí nifusaa nári furufarirana uqeera uqannifiqaidaqa.
PRO 13:17 Aanaiqi fannoo unna ufa aatata qinoo nifa faiqí anaasee manda ummaaraki mara quqaidanoo. Kuqaa ufa qimarina ufa fannoo asooama nimaqaidanoo.
PRO 13:18 Aakapara ufa sia irimarifa kudikinoo asauruannoo. Aakapara ufa irimari fasiqafa uriqaraidanoo.
PRO 13:19 Moo ainainara kisaaqasaa rakisiinanoo anirainanoo amuqusa amiqiannoo. Irirana siai fasiqa anaaseesa manda ainaina minnisee amiqira ainaina auqarara nikooqaidanoo.
PRO 13:20 Anee irirana faqaasa faqa finana irirana mareennaranoo. Anee furufarirausa aqoondikinana kuridinnaranoo.
PRO 13:21 Manda oosana maree mariasa fimariafanoo ummaara fannoo misa nifaqanoo nidanoo. Andeeqara oosana maree mariasa mi andeeqarana akiiqara amiqira ainaina mareefaranoo.
PRO 13:22 Andeeqara fasiqauqa kuqifaqa misa faiqi namu ninaiqi mara misa qumiasana mareefaranoo. Mandoosana maree mariasa qumiasana andeeqarausa iannai kai fuannoo.
PRO 13:23 Fuka maqaki kudi fasiqauqa narana ummaqusaafanoo moomoo marifa sia andeeqee mari siaasafa mi kudi fasiqausa ufa sia irinoo sia mina narana andeeqaisaifaqa fifau dapi mara taikaidaqa.
PRO 13:24 Anee sai aneenna faiqi aaqarana akiiqara arinana sia aneenna faiqiara aidinnaranoo. Anee aneenna faiqiara aidinana saamu qumasee arusee andeeqaa.
PRO 13:25 Andeeqarausa narana moomoo marifaqa naidaqa. Manda oosana maree mariasa aiqama kari naararaidanoo.
PRO 14:1 Amiqira irirana faqaa aanaaseeuqa maaqa usakaseenoo amiqimmasee rakisidanoo. Furufari maria anaaseesa mi maaqana rapeepamma aqidaqa.
PRO 14:2 Andeeqara aatata fimariasa Yaaweenara qeerairidaqa miqidaqa. Manda aatata fimariasa Yaaweenara nikooqeemari faqa miqidaqa.
PRO 14:3 Narí amoo aanoo qida kaaqa ufa qimarina ufa fannoo saamu kamambi narí aridanoo. Irirana faqaana afauru fannoo narí itita amaqaidanoo.
PRO 14:4 Tarakasaa siai fasiqana narana oodaa mariannoo. Taraka faqaasa narana moomoo maridanoo.
PRO 14:5 Ainaina qafamasai fasiqafa kuqaa anoona ufa qimari fasiqafa kootaki sia nikaru qiannoo. Ainainara unna qimari fasiqafa unna ufa kai mina ookiqari ururaidanoo.
PRO 14:6 Kaukaata qimaria fasiqausa iriranara randaasia sia paquridaqa. Irirana faqaasa sia kadaapiridaqa dauni paquriqa irifaranoo.
PRO 14:7 Anee sia furufarira fasiqauqa naaqa maria qeerairamandee nianai maria. Misa sia amiqira irirana ani qimamifaranoo.
PRO 14:8 Nanaree aiqama ainaina akoofasa fannoo irirana faqaafaikidanoo fee. Mifa ainaina auqarana iri marinara miqidanoo. Nanaree irirana siai fasiqafa furufarira fasiqaikinoo fee. Mifa iridamunoo qinara miqidanoo.
PRO 14:9 Furufarirausa sia aaqaranara qeerairidaqa. Andeeqarausa aaqamaseeqa mi aaqarafa kai kaqi taikaanifeera oonu mafi iridanoo.
PRO 14:10 Ani asasirafa anindi kai maridanoo. Ani sukaqarafa anindi kai maridanoo. Sia moo fannoo mina maraannoo.
PRO 14:11 Manda oosana maree mariasa maaqa rapeemma fuannoo. Andeeqarausa maaqa sia rapeeiannoio kaqi mariannoo.
PRO 14:12 Faiqí moo aana qafamaseeqa amiqira aanee qimariana aaqaidaqa sia qafaranaki kuqira aana marifaqa miqi qidaqa.
PRO 14:13 Akaqausa naanaidara qimariafanoo misa naunduraki kaqi rumbanoo maridanoo. Asasirafa taikaifanoo noori runirafa kambiqaidanoo.
PRO 14:14 Manda aatata fimariasa miqi mariana akiiqara mareefaranoo. Andeeqara oosana maree mariasa miqianannai nári feefauru mareefaranoo.
PRO 14:15 Furufari mari fasiqafa unnufara faqa anoona ufara faqa kuqaa fee kai qidanoo. Irirana faqaafa sia miqidanoo mifa narí aiku amaarususee reemarifa maridanoo.
PRO 14:16 Irirana faqaafa mandainaina ummaaraki marirara qeerairidanoo. Irirana siaifa mifa furufarinoo aanoommasee kaqi pasoosammasee fidanoo.
PRO 14:17 Qusa ufa qimaseea kai kaqi aanoo qimarifa furufarira ainaina kai auqaidanoo. Irirana faqaasa qireeda kai maridaqa.
PRO 14:18 Irirana siaisa misa aiqama ainainirafa furufarirafa kai maridanoo. Irirana akoofasauqa mariana akiiqara feefauru amiqira irirafa maridanoo.
PRO 14:19 Mandoosana maree mariasa andeeqarausa noorinni kumma ramafi nári mara maree qumuree qimudaoo qima nimaqaaqeera iraidaqa.
PRO 14:20 Kudi fasiqa sia aqoondi faifa maridanoo, mina aqoonausa faqa miqi mariasara nikooqaidanoo. Ainaina faqaafa moomoo aqoondi faqaafa maridanoo.
PRO 14:21 Faiqí moo fannoo moonara akooqainafa aaqaidanoo. Anee asasiraree qimaseenana kudi fasiqa idaaqamma amaqaa.
PRO 14:22 Manda oosanara randee marifa aaqaidanoo. Anee amiqiranara randeenana ufa qaindusiranara faqa saqarikirana faqa paqurinnaranoo.
PRO 14:23 Kadaapi rinana amiqira marirana mareennaranoo. Ufa kai qina nidana fifau ooqumarindundina nidana kudi marinnaranoo.
PRO 14:24 Irirana faqaasa mariana akiiqara moomoo qumiasa maraidaqa. Irirana siaisa furufarira oosanara aiqamausa iridaqa.
PRO 14:25 Kootaki narí afu qafai ainainara andeeqasee quqaa kai qimarifa faiqí mariranasaa itita nimaqaidanoo. Unna ufa qimarifa faiqí ueeqaidanoo.
PRO 14:26 Yaaweena ufara rufiarafa ququsa kiara foora maridaqa. Miqira fasiqa fannoo narí faiqi anaasee faqa ququsaki maridanoo.
PRO 14:27 Anee kuqirana aiaaqarareefee fee qidanee. Yaaweenara rufiarafa kaqi marirana nimi marifa maridanoo.
PRO 14:28 Karaambaiqa uriqararafa mina aiku asauku moomoo mariafanoo raikisi nimaqee marinara miqidanoo. Mina aiku asauku sia marifanoo mina karaambaiqa auqu fifau mariannoo.
PRO 14:29 Anee sia dauni aanoo qinana reedeeni marinafa firaa irirana faqaafa marinnaranoo. Qusa ufa qimari fasiqafa narí furufarirana kai uqeera uqannifiqee marifa maridanoo.
PRO 14:30 Asooara irirafa mina afaaqa amiqirana amidanoo. Rairai qira oosana fannoo manda auriranara foora maridanoo.
PRO 14:31 Kudi fasiqara kaukaata qinana mina auqu fasiqana Anutunara faqa kaukaata qimariananoo. Kudi fasiqara amuqusinana dadaaqinna anee Anutuna amooqidana mina auqu uqeeree mariananoo.
PRO 14:32 Manda ainaina kambiqaifaqa mandoosana maree mariasa kuridiranaki fidaqa. Andeeqara fasiqauqa nariqa andeeqarafa misa itita nimaqaidanoo.
PRO 14:33 Irirana fannoo irirana faqaasa iriranaki maridanoo. Furufarirausa irirafa sia kaifaafa faqa maridanoo.
PRO 14:34 Andeeqara oosana fannoo mi maqannaasa nuqu uqeera firaanaikidanoo. Nári eendaandira mandoosana fannoo mi maqannaasa mareeqee nári nisauriranaki aqidanoo.
PRO 14:35 Kaiqee fasiqa irirana faqaa fasiqa maridanoo. Karaambaiqa minara aidiannoo. Mi kaiqee fasiqafa asaurirana karaambaiqa amimari fasiqafa aanoo qirana kai maraanoo.
PRO 15:1 Reedeenira ufa aminanoo aanooqirafa taikaani. Raiqara ufa fannoo aanooqirana uqeeree marifa maridanoo.
PRO 15:2 Irirana faqaasa ufa qiafaqa akaqausa mina iriseeqa irirafa amiqira ainainee qidaqa. Irirana siaisa nookiqari furufarira ufa kai fididaqa.
PRO 15:3 Yaaweefa aiqamai kambiqee mari ainainna qafaidanoo. Maasa andeeqara ainainee mandainainee auqaunanoo mifa maasasaa afu rusisee maridanoo.
PRO 15:4 Nifaaqa amiqianifee ufafa marirana nimidanoo. Aanoo qimaria nifaurufa faiqí naunduraindaraana narimarifa maridanoo.
PRO 15:5 Narí anoona akoona ufara fidiaqaa imaifa furufarirafa maridanoo. Naakaparufa irimarifa irirana faqaafa maridanoo.
PRO 15:6 Andeeqara fasiqa anaasee maaqaki qumiasana oosana oosana maridanoo. Manda oosana maree mariasa munnimma marasaafanoo mifa misa mareeqee mandainainaki quqaidanoo.
PRO 15:7 Irirana faqaasa irirana aqamara foora doo aiqamai aaqaidaqa. Sia furufari mariasa miqidaqa.
PRO 15:8 Mandainaina maree mariasa aandau arusee tatufu amiafanoo Yaaweefa qafamaseenoo misa tatufiranara fidiaqaa midanoo. Aneeqee maria fasiqa anaaseesa innaaru qiranara Yaaweefa aididanoo.
PRO 15:9 Yaaweefa manda oosana maree mariasa niqafamasee misa oosanara fidiaqaa midanoo. Andeeqara oosanara rimariasara Yaaweefa aididanoo.
PRO 15:10 Anee aaqara ainaina auqeenana afeeka nariranaki finnaranoo. Anee aakapara ufara qidoo fee qinana kuqinnaranoo.
PRO 15:11 Kuqirausa mariannai ririmma Yaaweena afusaa akooqoo maridanoo. Kaqi mariasa naqi fee masee fee Anutuna afusaa nári irirana kukeeqeefaree akooqoo qafaidanoo.
PRO 15:12 Kaukaata qimari fasiqafa aakapara ufara akooqaanoo. Mifa sia irirana faqaasiannai oonuree iriranara iraannoo.
PRO 15:13 Faiqí anaasee asasiafanoo noori inaa inaa idanoo. Nimuqusa ummaara raifanoo nifaaqa faqa rumbaidanoo.
PRO 15:14 Irirana faqaasa irira ainainara kai randaidaqa. Furufarirausa sia miqidaqa. Nári furufariranara maasa qimana maridanoo fee qidaqa.
PRO 15:15 Kudi fasiqa marirafa naaruara ummaaraki kai maridanoo. Asasi mariasa aiqama kari misa marirafa nasunnasura kai midaqa.
PRO 15:16 Kudi fasiqa maridana Yaaweenara aaquqee marinana marinafa moomoo qumiasana narí ummaara namu faqa uraaqarana marinnaranoo.
PRO 15:17 Ani aidi mariasa saimbaqa aadana adasa naidana anee amiqira aandaura nikooqee marisa saimbaqa neemarina uraaqararafa mariananoo.
PRO 15:18 Qusufa qimasee aanoo qimari fasiqafa aanoo qirana uqeeraidanoo. Reendeenimari fasiqafa asooarana nimidanoo.
PRO 15:19 Ainainirara nikoo nikaa imariasa misa aiqama niranaki ummaara paquridaqa. Anee kuqaa qira oosana auqeenana sia ummaara mareennaranoo.
PRO 15:20 Irirana faqaa faiqiuqa nári nikausa nifaaqa asasirana kai nimidaqa. Furufarirausa nári ninausamarana fidiaqaammidaqa.
PRO 15:21 Irirana siaisa nári furufariranara asasa midaqa. Irirana irimari fasiqafa andeeqara ainaina auqaidanoo.
PRO 15:22 Anee moo ainaina auqararee qimasee aakapara ufa marasee auqainanoo anoona kambiqeenoo andeeqaannoo. Aakapara ufa mau sia finana sia mina anoona paqurinnaranoo.
PRO 15:23 Moo fannoo ufa qinnanaki anoona ufa irisee qimarifa narí ufara asasidanoo.
PRO 15:24 Irirana faqaasa ameemaira foora ooru fidaqa naaru marirannai ooru fidaqa. Misa kuqirannai ooqufirara nikooqaifaqa miqidaqa.
PRO 15:25 Nári nifaaqa amooqi mariasa Yaaweefa misa maaqa rapeeiannoo. Adeedaana anaasee aiqama ainainasaa Yaaweefa rakisi nimaqaidanoo.
PRO 15:26 Manda oosana maree mariasa oonu mafi iriranara Yaaweefa fidiaqaa midanoo. Anukara irirana faqaasara mifa asasidanoo.
PRO 15:27 Aiqama ainaina nariara kai fatusi marifa narí faiqi anaasee ummaaraki quqaidanoo. Manda oosana maraaqee qimasee feefauru nimiafaqa qaoo qimariasa kisaaqasaa maa maqanasaa marifaranoo.
PRO 15:28 Andeeqara oosana maree mariasa moona ufa iriseeqa andeeqara ufara oonu mafi iriseeqa narí qimamidaqa. Manda oosana maree mariasa moona ufa iriseeqa kai kaqi narí qimamidaqa ummaara uqeeridaqa.
PRO 15:29 Andeeqee mariasa innaaru qirana Yaaweefa iridanoo. Manda oosana maree mariasara Yaaweefa akooqaifanoo nianasaa maridanoo misa innaaru qirana sia iridanoo.
PRO 15:30 Moo fannoo ani qafamasee naanaidara qimasee amandaifanoo ani amuqusa amiqidanoo. Moosaaqari amiqira ufa aninana irinanoo ani amuqusa amiqi miannoo.
PRO 15:31 Qaoo qira ufa irisee eedoo qimari fasiqafa irirana faqaafa maridanoo.
PRO 15:32 Anee aakaparufa irirara akooqainafa aneenna kai aupurarana aneennaki mara quqee mariananoo. Anee faiqí aakapara ufa aminnanara eedoo qimasee qaindusinanoo ani irirafa uriqaraannoo.
PRO 15:33 Yaaweenara qeerairirafa amiqira irirana ani amiannoo. Reendeenira oosana naaree maraseenana inaaqianna uriqarafaikinnaranoo.
PRO 16:1 Faiqí ainaina auqarara tipundaaria fanoo Yaaweefa minara irisaifaqa kai auqaidaqa.
PRO 16:2 Faiqí nári mariranara andeeqaidee qifanoo Yaaweefa aiqamausa naundurai irirana oosana rainasee qafaidanoo.
PRO 16:3 Aneenna tipundaarianna ufana Yaaweenara amiqi amiqimma qimaqaannee qinanoo anoona kambiqaannoo.
PRO 16:4 Yaaweefa aiqama ainaina auqufa taikeefandinnanara iridanoo. Manda oosana maree mariasa inaaqianna kuqiranaki taikee fandinnanara faqa iridanoo.
PRO 16:5 Ramoo ramaaida nári nifaaqa mara maree uri mariasara Yaaweefa fidiaqaa midanoo. Misa narirafa sia niaqaannoo kaqi naruanno.
PRO 16:6 Anee aiqama kari Yaaweena ufasaa mapukusee marinanoo mifa ani numoo taikaannoo. Yaaweena ufasaa mundufi finanoo sia moo mandainaina aniki kambiqaannoo.
PRO 16:7 Ani marirafa nirafa andeeqanoo marinanoo Yaaweefa minara asasinoo ani namuqaa aqoondi kamma amaqaannoo.
PRO 16:8 Anee qoodaa qumiasana andeeqara aatata maraseenana andeeqara oosana mau finanoo ani marirafa firaa qumisana faqaana marirana uriaqaranoo mariannoo.
PRO 16:9 Anee moo ainainara aneenna iriranaki qimirinanoo Yaaweefa narí irimarinnai ani mara ubeekaannoo.
PRO 16:10 Yaaweefa maqasaa uriqararana dadaaqifanoo andeeqara ufa nimidanoo. Mina ufa qirafa aiqama kari kuqaa kai marirannoo.
PRO 16:11 Yaaweefa aiqama sikeerara andeeqara sikeera kai marinaqa aiqama feefauru faqa andeeqarafa kai mariani fee qidanoo.
PRO 16:12 Uriqararausa manda oosanara fidiaqaammidaqa. Kaamanna fannoo andeeqara oosana marainnana mi andeeqara oosannanannai mina mapuku amaqaannoo.
PRO 16:13 Uriqararafa kuqaa anoona ufa qimariasara aididanoo. Kafa mifa anoona uf qimariasara asasammasee dadaaqidanoo.
PRO 16:14 Uriqararafa aanoo qimasee kuqaa naruannoo. Irirana faqaafa narí irira ufannai mina aanooqirana asooama amaqaannoo.
PRO 16:15 Uriqararafa naanaidara qinanoo aiqamausa nimuqusa amiqimma nimaqaannoo. Uriqararana asasirafa aukuanai aakuara foora aiqama amiqi amiqimma nimaqaidanoo.
PRO 16:16 Anee amiqira irirana marasainafa mifa koora faqa siruaa faqa uraaqaranoo mariannoo.
PRO 16:17 Andeeqara aatata fimariasa misa manda oosana maree mariasa aanara qeeraira midaqa. Niku raanaki qafamasaida nimariasa misa kaqi marifaranoo.
PRO 16:18 Nári nifaaqa mara maree uri mariasa kuridiranaki ooqu fidaqa. Ramoo ramaa imariasa aqufi marianaki aqu fidaqa.
PRO 16:19 Sarauidaqa nári mara maree qumi mariasa misa uriqararanaki maridaqa. Kafa manda oosana maree mariasa ramoo ramaairana faqa moosa ainaina ummuara marasee raina nimimariasa ureeqarausa maridaqa.
PRO 16:20 Ani aakapainna ufana amiqimmasee irinanoo ani marirafa amiqiannoo. Yaaweena saqarikinana anee asasinnaranoo.
PRO 16:21 Irirana faqaa fasiqara amiqirafa irirana faqaafee qifaranoo. Irirana faqaa fasiqa ufa fannoo adiafaa inoo irirana pooduqaidanoo.
PRO 16:22 Faiqí moo fannoo amiqira irirana faqaafa marifanoo mi irirafa maqakaqari ururee mari nammari fara foora amiqira irirana mi fasiqana amidanoo. Furufari mariasa nári furufarirafa nári naridanoo.
PRO 16:23 Irirana faqaa fasiqa ufa qirara oonumafi irisee ufa qidanoo. Mi ufana iriafanoo adiafaa inoo iriaqaa kai midanoo.
PRO 16:24 Amiqira ufa fannoo adiafaa ira ainainara foora faiqí naundurai adiafaa irana faqa amiqi amiqirana faqa nimidanoo.
PRO 16:25 Faiqí anaasee moo aanara andeeqara aanammifoo qimariafanoo mifa kuqi maria aanafa maridanoo.
PRO 16:26 Ainaini mari fasiqafa daara raandoo qimasee ainainidanoo. Narí aarararanara iriseenoo ainainidanoo.
PRO 16:27 Manda oosana maree mariasa akaqausa mandaikamma nimaqara aanara kai randaidaqa. Misa ufa fannoo idara foora nitakuqidanoo.
PRO 16:28 Manda oosana maree mariasakiqari munuqi miniqirafa kambiqafi daraanidanoo. Miqi mariasa mi ufanannai amiqira aqoondi rakeemma aqidaqa.
PRO 16:29 Faiqí narimari asa nári niqoondi nikaruqimasee rarisameeqeenoo mandainainaki quqaidanoo.
PRO 16:30 Afu atindari maqee marifa mandoosana kambiqaanifeera miqidanoo. Afauru uqmairí marifa mandainaina kambiqaanifeera miqidanoo.
PRO 16:31 Aandau akiiqa faqaana akiiqa fannoo uriqararausa qatara foora maridanoo. Andeeqara mariranannai kai mi ainainna paquridaqa.
PRO 16:32 Moo fannoo narí aanoo rafaaqafusee reendeenira ufa kai qimarifa maqasaa karaambaiqa uraaqaranoo maridanoo. Narí mariranasaa rakisi marifa moo maqannaasa narusee misa maqa maaqa maree marina uraaqaranoo maridanoo.
PRO 16:33 Kaatara foora sararammasee Anutuna aidiranara iriraree qiafanoo Anutufa narí kai akooroomma nimidanoo.
PRO 17:1 Aadana narana narí aqoondi faqa reendeenammasee neemarifa uriqararafa maridanoo. Firaa qoomaqa sakasee nári tinoo taanoo rirana namu faqa nee mariasa oorudupirausa maridaqa.
PRO 17:2 Moo fasiqa ainaina faqaana faiqi fannoo narí akoona asaurirana ami marinanoo mina amiqira ainainira faiqi fannoo mi faiqina iraaqaranoo maridanoo rakisi amaqaannoo. Kaasooaqee mi fasiqana faiqi namu nári nikoona qumiasana rainaidaqa mina andeeqara ainainira faiqi faqa raina amifaranoo.
PRO 17:3 Koora faqa siruaa faqa tasirisiri mandee qafaandee inoo Yaaweefa faiqí nimuqusa nimanammasee qafaidanoo.
PRO 17:4 Manda oosana maree mariasa manda ufauqa kai iridaqa. Unnufa qimariasa unnufa kai iridaqa.
PRO 17:5 Anee kudi fasiqauqara uteeti qinana mi kudi fasiqausa auquna Anutunara faqa uteeti qinnaranoo. Moo fannoo moo mandainainaki aqufinana anee minara naanaidara qinana sia kaqi marinnaranoo Anutufa ani aruannoo.
PRO 17:6 Ninaaku nitaatoosa nári ninaiqimarara nasuriandee iqa faiqiuqa nári ninausa nikausara nasuridaqa.
PRO 17:7 Amiqira fasiqa anaasee sia unnufa qidaqa. Kuqaa ufa sia furufarirausaindi maridanoo.
PRO 17:8 Umee raqeera nimimaria feefaurufa fadueera foora dadaaqifaqa auqararee qiana kaqi auqeefaranoo fee qidaqa.
PRO 17:9 Anee faiqí anaasee aniara ruaqeera ani mandaikamma amaqaifana minninnisaa. Misa ani mandaikamma amaqaifana kaqi mina irina fidana anee aqoondikirana rakeemminnaranoo.
PRO 17:10 Anee irirana faqaa fasiqa moodaannai qimaminanoo mifa kai kaqi iriannoo. Anee quandakinana furufarira fasiqa saamu qumaree moomoo wan handeereeta kari arusee qimaminanoo mifa siamma qiriannoo.
PRO 17:11 Kuqirafa faiqí narimari fasiqafara foora aiqama kari mandainaina uqeeree maria fasiqa anaaseesa naridanoo.
PRO 17:12 Anee kaasau faini aanaaqi rausumaree aanai oonu mina anoona paquri masainanoo ani rufiarafa mariannoo. Furufarira fasiqa narí furufarira aatata fimarinana paquri maseenana firaa mandainainaki marinnaranoo.
PRO 17:13 Moo fannoo amiqira ainaina moona amifanoo qumareenoo mina akiiqara manda ainaina amifanoo minara mandainaina kai mi fasiqana maaqaki naaruara mariannoo.
PRO 17:14 Tinoo rira oosana fannoo aandaani tatiara foora idanoo. Tinoo rirafa kambiqainana kai kaqi rafaaqafu sainanoo sia kambiqaani.
PRO 17:15 Manda oosana maree mari fasiqana idukiranara faqa andeeqara fasiqa fifau rumbaranara faqa Anutufa mi oosana qandara fidiaqaa midanoo.
PRO 17:16 Faiqí moo fannoo irirana sia maraifa nanaree fifau sukura feefauridanoo fee mina irirafa sia maridanoo.
PRO 17:17 Amiqira aqoondi fannoo aiqama kari aniara aididanoo. Faiqí ani ainaina sia fifau maridaqa anee ummaaraki aqufinaqa ani dadaqirara maridaqa.
PRO 17:18 Akaqausa amiqira irirana siaisa kai moona aaqarana akiiqara idaqa.
PRO 17:19 Faiqí moo fannoo numoo kambiqara oosanara aidi marifa mifa rakirana kambiqaranara faqa aididanoo. Aneenna afaaqa amooqinana anee ummaarara randaida miqimariananoo.
PRO 17:20 Manda irirana faqa mandufa faqa kai qimarifa sia amiqirana paquriannoo kuridirana kai paquriannoo.
PRO 17:21 Moo fasiqa faiqi namu furufarira ainaina auqaifaqa misa ninaukoo naundura ummaara faqa aiaaee qirana faqa kai maraidaqa.
PRO 17:22 Anee asasi mariananoo mifa anee marasinna namasaananoora foora maisaidanoo. Faiqí moo fannoo afaaqa rumbanoo marifa aiqamausa nifaaqa rumbaidanoo.
PRO 17:23 Manda oosana maree mari siaasafa umeenni umeereemaria feefauruna maraseenoo sia amiqimmasee ufa rainaidanoo.
PRO 17:24 Irirana faqaa fasiqa fannoo irirana narí oorisaa kai quqaqaifanoo maridanoo. Irirana siai fasiqafa aiqama aanai afu munu maqee mini maqee ifanoo sia amanaikidanoo.
PRO 17:25 Furufarira faiqiuqa nári nikoona oori runirana amidaqa. Nári ninoona sukaqarana amidaqa.
PRO 17:26 Andeeqara fasiqa fifau arirana rumbarana amiafanoo sia andeeqaidanoo. Andeeqara rakisirausa narirafa aaqara oosana maridanoo.
PRO 17:27 Irirana faqaasa moodaa moodaa ufa kai qidaqa. Uqbiqasee mariasa irirana faqaasa maridaqa.
PRO 17:28 Furufarira fasiqa narí ooki kadara masainaqa faiqí anaasee minara irirana faqaa fee qifaranoo. Mi fasiqafa narí ooki amiqimmasee ititasaifaqa misa minara akeepamasee irimari fasiqa fee qifaranoo.
PRO 18:1 Faiqí sia nári niqoonausa faqa moodaanaki kiasa náriara kai iridaqa. Nana ainainaree aiqamausa andeeqarafee qimasee irimarianara mi fasiqausa sia asasidaqa.
PRO 18:2 Furufarira fasiqa amiqira oosanara sia irinara sia minara iridanoo. Mifa aiqama kari narí amiqirafa marina uqannifiqarara kai aididanoo.
PRO 18:3 Numoo faqa nisaurirafa faqa moodaanaki fidaqa. Ummuarira oosanaki keeqafinara asaurirafa mina afaaqasaa kambiqaidanoo.
PRO 18:4 Faiqí ookinaa ufa faruma firaafara foora mandinoo maridanoo. Mina irirafa qumi mari nammarifara foora asooaidanoo rukukuqnama amaqaidanoo.
PRO 18:5 Manda oosana maree mariasa kootaki dadaaqinana aaqara oosana mareennaranoo. Andeeqara oosana maree marina fifau kootaki quqeenana mina faqa aaqara oosana kai mareennaranoo.
PRO 18:6 Furufarirausa aanoo qirana oosana arasee nariqa nariranara innaaru qidaqa.
PRO 18:7 Furufarira fasiqa ookinaa ufa fannoo narí kuridi amaqaidanoo. Mifa narí ufaki ufaanakiara foora aridanoo.
PRO 18:8 Munuqi miniqira ufa fannoo kaaqa adiafaaira narana miqirafa maridanoo maasa kaaqa mina nambiqarara dididanoo.
PRO 18:9 Ainainiafanoo raindaani mari fasiqafa ainaina deedeepinoo turitaari marina aanna reemarifa maridanoo.
PRO 18:10 Yaaweefa afeeka faandaamurara foora maridanoo. Andeeqara fasiqa anaasee minaki kukeeqafi sia kuridifaranoo.
PRO 18:11 Ainaina faqaasa nári qumiasanara maasa kisaaqa faandaamura fee qimasee fifau nári ainaina saqarikidaqa.
PRO 18:12 Sia kaqi moona ameemaanai keeqeefara mifa narí mara maree quminaqa mina ameemaanai keeqeefaranoo. Nári nimoo qimariasa kuridira aataa fidaqa.
PRO 18:13 Moona ufa amiqimmasee irisee ufa qia, sia miqinana furufariranaki faqa manda asauriranaki aqufinnaranoo.
PRO 18:14 Ani kaqi marira aidirafa anee aurinanoo ani pooduqaannoo. Anee sia miqinanoo ani mi oosanafa taikafuannoo.
PRO 18:15 Irirana faqaasa maqee maqee fuka irirana irirara deedaqidaqa.
PRO 18:16 Anee uriqarara fasiqa qafaanee qimasee moo ainaina mina amira ainaina mara maree finanoo amanaika miannoo.
PRO 18:17 Faiqí kootaki qimannimisaafaqa irisee kuqaa fee qidaqa. Moo fannoo mi ufana quandafi qimanniminaqa indaaruqaa ufara boo narí kai narí amooqidanoo mifoo qifaranoo.
PRO 18:18 Afeeka fasiqauqa moo ainainara aanooqidaqa narafumau narafumau idaqa masisara foora quandasee qafeeqa doo dinni dinni asooqaidaqa.
PRO 18:19 Aneenna akaqaafasauqa dadaaqinaqa misa afeeka faandaamurara foora anisaa itita amaqeefaranoo. Anee misara aanoo qinaqa misa nári kooqi itita saifana sia keeqeennaranoo.
PRO 18:20 Faiqí moo fannoo narí ookinaa ufannai narana paqurinanoo amuaqu ianno. Narí afauru saaqaraa ufa fannoo amuaqu iannoo.
PRO 18:21 Afai afauru qaaraiki marifa maridanoo mifa kai faiqí narirdanoo kafa faiqí dada qidanoo. Aneena ufa qimaseenana mi ufafa qiqa fawa qumaraannoo fee qimaseenana iria.
PRO 18:22 Adeedaana kumaara fannoo adeedaana maanaaqa paqurimmasee marainanoo Yaaweefa irinoo asasa miannoo.
PRO 18:23 Ainaina siaifa kudi fasiqa fifimmasee ufa qimari fasiqafa maridanoo. Qumiasana tiafa kaukaata ufa kai qimarifa maridanoo.
PRO 18:24 Moomoosa aqoondiki marinafa sia kisaaqasaa mi aqoondikirafa mariannoo. Moodaa moodaa amiqira aqoondi afaaqasaa aqoondi marifa mi fasiqana mi amiqira aqoondina oosana fannoo narí moodaa fidika faqa amiqi marina arusee uraaqaranoo maridanoo.
PRO 19:1 Kudi fasiqa fannoo andeeqara aatata fimarifa maridanoo mifa uriqararafa maridanoo. Ufa rukiee marifa furufari marifa ureeqanoo maridanoo.
PRO 19:2 Sia oonu mafi irirana maraifa aaqamaki kaqiruna ubeekaidanoo. Kai kaqi fimarifa kaqi runna fiaikatee finoo aaqaidanoo.
PRO 19:3 Akaqausa sia irirana maraa oosanafa kai nariqa mandaikamma nimaqaifaqa fifau quandaki Anutuna qoomma amaqaidaqa.
PRO 19:4 Qumiasana faqaana aqoondiuqa moomoo maridaqa. Kudi fasiqa aqoondi moodaafa ani qafeenoo ainaina siai fee qimasee anirandee fuannoo.
PRO 19:5 Kootaki unna ufa qinana rumbaranaki finnaranoo. Unnufa qinana sia ummaara fiaaqareennaranoo.
PRO 19:6 Aiqamausa uriqarara fasiqa aqoondikiranaki keeqeefaranoo. Ainaina nimi mari fasiqanara aiqamaus minara unna qimasee qini qiqoondi fee qidaqa amooqidaqa.
PRO 19:7 Kudi fasiqa aiku asauku mina minnisaidaqa mina aqoondiuqa faqa firaaqoo minara nikooqaidanoo. Narí nammeera qimasee naaraifaqa sia iridaqa.
PRO 19:8 Faiqí moo fannoo irirana maraifa amiqi amiqidanoo. Amiqira iriranara aidi mari fasiqafa aiqama ainaina auqainafa anoonaikammiannoo.
PRO 19:9 Kootaki unnufa qimari fasiqafa sia rumbaranaki sia fuannoo fuannoo. Unnufa qimarifa narí kuqirana paquriannoo.
PRO 19:10 Furufarira fasiqa qumiasana qambaanai maridanoo manda marira maridanoo. Faiqí moo fannoo ureeqararafa faiqí firaasa uriqararafaikinoo maridanoo mandaikamminoo maridanoo.
PRO 19:11 Amiqira irirana faqaafa sia qusufa qimasee aanoo qidanoo narí aanoo qirana rafaaqa fidanoo. Miqi mari fasiqafa moo manda ufa qimamiafanoo sia irinoora foora inara narí afaaqa qareenaranee qidanoo iridanoo.
PRO 19:12 Karaambaiqa fasiqa aanoo fannoo kaasau fainiara foora rairai qifaqa faiqí anaasee rufiaidaqa. Mina asasirafa qifi faramuara foora asooama nimaqaidanoo.
PRO 19:13 Furufarira fasiqauqa nári ninaukoo nisauriranaki quqannisaidaqa. Anaasee moo fannoo mina aanoo qirafa namudisaa kapatuara foora kapi kapida maridanoo.
PRO 19:14 Qumiasana saqama nári nikausa saaqaraana maraidaqa. Yaaweefa kai irirana faqaa anaasee faiqí nimidanoo.
PRO 19:15 Kudoosaapee maria oosanafa faiqarana kai amidanoo. Ainaina sia inafa aandaroo aruannoo.
PRO 19:16 Anee Anutna aakapara ufa mau finana kisaaqasaa marinnaranoo. Anee aakapara ufara qikoofee qinana kuqinnaranoo.
PRO 19:17 Anee kudi fasiqa anaasee narana aina nimidana Yaaweena amiara foora imariananoo kasooaqee Yaaweefa mina akiiqara ani faqa amiannoo.
PRO 19:18 Aneenna faiqi namu ufa irirana amanasaa marifana miqoo naakapaa anee sia miqinana anee misa dadaaqianaqa mandaki aqufidaqa.
PRO 19:19 Qusufa qimasee aanoo qimari fasiqafa ariranaki aqufuannoo. Anee minakinaana feefauru masainanoo mifa kafaa kai mi ummaarana auqaannoo.
PRO 19:20 Aakapara ufa faqa iria. Anee miqinana kasooaqee irirana faqaafa marinnaranoo.
PRO 19:21 Faiqí atikuraki irirana oosana oosana marifanoo firannaira iridanoo. Yaaweena irirafa kuqaa anoona kambiqaannoo.
PRO 19:22 Faiqí moo kaaqa ainainara rimaria oosana faqaafa asaurirana maraidanoo. Qumiasana siaifa andeeqara fasiqa fannoo unna ufa qimari fasiqana uraaqaranoo maridanoo.
PRO 19:23 Yaaweenara rufieenana maa maqanasaa kisaaqasaa mainnaranoo. Yaaweenara rufiainanoo sia mandainaina ani afaaqai aqufuannoo.
PRO 19:24 Akaqausa kaaqa kudoosaapee mariasa difaaniki narana qumaraseeqa nooki quqarara nikooqaidanoo.
PRO 19:25 Aanoo qimari fasiqana arinanoo irirana siaisa mina qafeeqa irirana mareefaranoo. Irirana faqaana aakapainanoo dauni irirana moo faqa moo faqa maraannoo.
PRO 19:26 Manda irirana faqaa faiqi fannoo kai narí akoona mandaikamma amaqeenoo narí anoona aiqamasaifanoo fifaqa mi oosanausa nisaurirana firaana maraidaqa.
PRO 19:27 Oo qini qimaaku naamuaqira ufa iriseenana akooqaifana finana anee irisaanna ufana minnisee furufara minnaranoo.
PRO 19:28 Ufa qimarianaki unna quandara ufa qimarifa andeeqara koota oosanara akooqaidanoo. Manda oosana maree mariasa aaqara oosana adiafaa iranara ridaqa.
PRO 19:29 Andeeqaranara nikooqee marisa sandufa misa nimaarusirafa maridanoo. Qunnaana samu furufari mariasa narirafa maridanoo.
PRO 20:1 Moomoo biaqa nammmari neemarianafa ani fufufarirana faqa faaqa fuisee qirana faqa amiannoo. Nammari moomoo narana irirana sia marifa maridanoo.
PRO 20:2 Karaambaiqa aanoo qirafa kaasau fainiara foora rairai qidanoo. Faiqí moo fannoo mi karaambaiqana aranaqarana amirafa kuquannoo.
PRO 20:3 Faiqí moo fannoo narí maraqunara irisee tinoorirana faqa rakiranara faqa qeerairidanoo. Furufarirausa qusufa qimasee rakiranaki faqa aanooqiranaki faqa aqufidaqa.
PRO 20:4 Kudoosaapee mari fasiqafa saikira aukuana sia ainainifa aiqira aukuana naranara randainanoo aararaannoo.
PRO 20:5 Faiqí irirana faqaana irirafa faruma difukunara foora maridanoo. Faiqí irirana faqaafa kai mi fasiqana irirana meemaindaraana uqeera koorooiannoo.
PRO 20:6 Faiqi moomoosa fifau náriara faiqiara nimuqusirana faqaasa maridee qidaqa moodaa moodaa kai miqirausa maridaqa.
PRO 20:7 Andeeqara fasiqa amiqira oosana auqaifaqa mina faiqí namu asasidaqa.
PRO 20:8 Kaaraambaiqa fannoo narí qaarisaa ooqumarifi faiqí anaasee andeeqa nisaidanoo narí afunnoo kai mandainaina qafaidanoo.
PRO 20:9 Yafee faiqí moo fannoo kuqaa qinee anukarausee qiannoofee. Yafee faiqí moo fannoo qini mandainaina ruka taikeenoo fee qianno fee. Sia moo fannoo kuqaa miqi qiannoo.
PRO 20:10 Furufarira sikeera faqa furufarira amanira taqu faqa maridanoo. Yaaweefa aiqamaqarara fidiaqaa midanoo.
PRO 20:11 Faiqiuqaindi nári auqee maria oosnafa nári marirana kooroo idanoo. Anee misa andeeqaranara faqa amiqiranara faqa iri mariananoo.
PRO 20:12 Aaqoo irimarina faqa afu qafeemarina faqa Yaaweefa maasa auqu nimaqanau.
PRO 20:13 Anee faiqarafa faiqarafa ina nidana kudi marinnaaranoo. Ainaina inanoo moomoo narana marinana neennaranoo.
PRO 20:14 Ainaina feefauru firaafa marinara feefauri mariasa moomoo ufa qidaqa. Mifa mi ainainna feefaurummasee doo oonu dupira feefauru aqusee marainara narí amooqidanoo.
PRO 20:15 Amiqira irirana faiqí anaasee qimannimi marifa koora faqa siruaa faqa uraaqaranoo maridanoo.
PRO 20:16 Anee moo maqannaana ufaasu ainainee feefauru aminana anee furufarirafa maridana amiananoo. Miqimari fasiqafa moo anaasee aanai paquri masainanoo aniannee qinanoo mifa furufarira oosana faqaafa maridanoo kaqi fuannoo.
PRO 20:17 Qunna qimasee maree mari ainainafa aaqee adiaafa irafa mariannoo inaaqianna oommaaniara foora ooki kammu kammu qiannoo.
PRO 20:18 Anee amiqira aakapara ufa iriseenana ainaina auqainanoo anoona kambiqaannoo. Anee rakiranaki finana irirana faqaasa ufa iriseenana fua.
PRO 20:19 Munuqi miniqi marifa kukeeqara ainainara mandaika midanoo kooroo idanoo. Anee kaaqa ufa qimariasara qeerairia sia misa naaqandandia.
PRO 20:20 Faiqi moo fannoo narí anoona akoona aqurarainafa qausana qoomara foora dauni dimbaannoo.
PRO 20:21 Maqa fee qumiasana fee kai kaqi marainafa aaqee amiannoo marikinoo doo mandaika miannoo.
PRO 20:22 Faiqí moo fannoo mandoosana ani aminana anee sia narí miqianauree qia. Ani irirafa Yaaweenasaa mundusainanoo mifa ani dadaaqiannoo.
PRO 20:23 Unnaqira amanira ainainara Yaaweefa fidiaqaa midanoo. Unnaqira sikeerara faqa mifa akooqaidanoo.
PRO 20:24 Yaaweefa maasa qiku amaaqa uqaqifiqaidanoo daamua qidanoo. Faiqí naqimmasee narí aiku amaaqara iriannoo fee sia amana.
PRO 20:25 Faiqí moo sia oonumafi iriranaki moo ainaina Anutuna auqu ramasee asauku uqeerasee tatufirana amianauree qimarifa mandaika midanoo. Kasooaqee irisee narí aaqaranara oonumafi iriseenoo akooqaannoo.
PRO 20:26 Irirana faqaa karaambaiqa fannoo aiuqummasee yafee aaqainnana qafamasee mina rumbaidanoo sia minasa qimudaoo qidanoo.
PRO 20:27 Faiqí maraquna Yaaweena qooma maridanoo. Faiqí naundurai qaidanoo narí mariranasa niranara randaidanoo narí amanidanoo.
PRO 20:28 Uriqararafa faiqí aanaaseera amuqusirana faqa anoona ufa qirana faqa mi oosana qanda fannoo mi uriqararana mapuku amaqaannoo.
PRO 20:29 Kumaaraauqa nári nimudaanai qiranara nári nimooqidaqa. Nauraiqiuqa nári aandaunamu qafaida nári nimooqidaqa.
PRO 20:30 Aaqee mari fasiqa anaaseena arinana afaaqa ateeka seenana aakirana afaimma sainanoo andeeqasee mariani. Ariisainafa mina aunduraki faqa amuqusaki faqa findaukama saannoo.
PRO 21:1 Yaaweefa maqasaa karaambaiqa irirana kaikaa nammariara foora ireeda kai minni fua mai ania qifanoo miqidanoo.
PRO 21:2 Anee aneenna marirana niranara andeeqanoo maridanoo fee qinanoo Yaaweefa ani qafamaseenoo ani amanammasee qafaannoo.
PRO 21:3 Faiqí anaasee amiqira oosana auqaranafa tatufirana suqa amirana umaqqaranoo maridanoo.
PRO 21:4 Manda oosana maree mariasa nári noori uqeerarafa faqa nári nimooqirafa faqa misa nifiqee fimarifaqa misa aaqaidaqa.
PRO 21:5 Amiqimmasee oonumafi irisee ainaina auqeenana moomoo ainaina faqaafa marinnaranoo. Aaqmura aamura inana sia moomoo ainaina faqaafa marinnaranoo.
PRO 21:6 Unnaqira aatata marasainna ainainafa sia kisaaqasaa ani faqa mariannoo. Mi ainainafa kai kaqi ani kuqiranaki quqaannoo.
PRO 21:7 Manda oosana maree mariasa nári faiqí narirafa nári rarisameeqee nári nariranaki quqaidanoo. Misa amiqira oosana auqarara nikooqaidanoo.
PRO 21:8 Aaqara oosana faqaa fasiqa aana eendaandiraa aana maridanoo. Aaqarana siaisa andeeqara oosana auqaidaqa.
PRO 21:9 Tiqeera maqaki maridana amana marinnaranoo. Firaa maqa amiqira maqa tiaki rairai qimari anaaseena faqa maridana manda marira marinnaranoo.
PRO 21:10 Manda oosana maree mariasa aaqara oosana auqarara naararee rafoora idanoo. Akaqausara faqa niqoonausara faqa sia nimudaoo idaqa.
PRO 21:11 Ufa rukiee mari fasiqana arifaqa irirana siaisa mina qafamasee irirana mareefaranoo. Aamuaqira ufa irirana faqaana qimaminanoo irirana moo faqa moo faqa maraannoo.
PRO 21:12 Andeeqara Anutufa manda oosana maree mariasa nári maaqaki auqee maria ainainara iridanoo. Mifa manda oosana maree mariasa kuridiranaki quqannisaannoo.
PRO 21:13 Kudi fasiqa fannoo dadaaqiaqeera nammeera qinana anee sia irinana kasooaqee anee faqa nammeera qinaqa sia moo fannoo iriannoo.
PRO 21:14 Faiqí moo fannoo ani faqa aanoo qimarinana anee kukeeqasee ainaina amisainanoo mina aanoo qirafa taikaannoo.
PRO 21:15 Amiqira ainaina kambiqaifaqa andeeqara fasiqa anaasee asasidaqa. Manda fasiqa anaasee mina qafamasee ummaara maraidaqa.
PRO 21:16 Amiqira irirana minnisee auianoo nifa kuqirafa mina afeesidanoo.
PRO 21:17 Faiqí moo fannoo amiqira ainaina faqa amiqira mariranara faqa rimarifa sia ainaina marifa mariannoo.
PRO 21:18 Andeeqara fasiqauqa ummaaraki aqufirara iafaqa manda oosana maree maria fasiqausa misa nimaaqa maqaidaqa.
PRO 21:19 Aadana maqa maaqaki aneennaraa maridana amana marinnaranoo. Aanoo qida rairai qimari anaaseena faqa maridana mandaika minnaranoo.
PRO 21:20 Irirana faqaasa maaqaki moomoo amiqira ainaina faqa fadameena faqa maridanoo. Irirana siaisa nárindi aaqee nama taikasee kaqi maridaqa.
PRO 21:21 Kuqaa qira oosana faqa amuqusira oosana faqa auqeenana maa maqanasaa kisaaqasaa marinnaranoo. Akaqausa aniara andeeqara fee qimasee uriqarara auqu amifaranoo.
PRO 21:22 Irirana faqaa karaambaiqa fannoo nimudaanai qimariasa faandaamura narisaa ititaqaana ooruree rapeepammasee narunifaqaaqa iannoo.
PRO 21:23 Anee sia ummaaraki aqufiraree qimasee aneenna afaurusaa amiqimmasee rakisia.
PRO 21:24 Aanoo qimarifa faqa ufa itairi marifa faqa faiqí moora uteeti qidaqa. Mifa narí amooqiranara kai afeekaiki marifa maridanoo.
PRO 21:25 Aininirara raindaani marifa ainainirara akooqaidanoo. Narí mi oosanafa narí kuqaa aridanoo.
PRO 21:26 Miqira fasiqauqa ainaina qimiaqee kai qimasaida iridaqa. Andeeqarausa sia miqidaqa afaarida kaqi nimidaqa.
PRO 21:27 Manda oosana maree mariasa tatufirana suqaranara Yaweefa fidiaqaa midanoo. Manda iriranannai tatufirana suqaa fanoo Yaaweefa fidiaqaa idanoo.
PRO 21:28 Kootaki unnufa qimarifa narí kuridiannoo. Anoona ufa kai andeeqasee qimarina ufa asasammasee iridaqa.
PRO 21:29 Manda oosana maree mariasa fifau andeeqarausa naanna raqa nidaqa. Andeeqarausa nári marirana niranara oonumafi irisee nidaqa.
PRO 21:30 Faiqí faiqi irirana faqa amiqira irirafa faqa sia ani dadaaqiannoo. Anee Yaaweena namuqaakiannanara sia dadaaqiannoo.
PRO 21:31 Misa fifau rakiranaki firara qoosauqa deedaqidaqa. Yasaweefa narí kai rakirana uri qararana nimidanoo.
PRO 22:1 Andeeqara auqu amirafa moomoo ainaina faqa munnimma faqa uriqararafa maridanoo. Siruaa faqa koora faqa ureeqarafa maridanoo.
PRO 22:2 Ainaina faqaafa faqa kudi faqa amanaqarakai maridaqa. Yaweefa miqanda auqu quqanau.
PRO 22:3 Irirana faqaafa moo ummaara anifanoo qafeenoo amaanaidanoo. Irirana siaifa kaqi minaki fidanoo mi ummaarana maraidanoo.
PRO 22:4 Yaaweena ufa mau fidana aneenna mara maree quminana moomoo qumiasana munnimma faqa uriqarara auqu maraseenana kisaaqasaa marinnaranoo.
PRO 22:5 Aneenna mariranara amuqusinana anee manda oosana maree mariasa nári aatata fidaqa arimaria ufaannaki aruanoo qimasee rufia.
PRO 22:6 Faiqi aanaaqisaa amiqira aana aamuaqinanoo mifa faiqí firaanaikinoo mimau kai fuani.
PRO 22:7 Kudi fasiqa fannoo ainaina faqaana ainainira faiqi maridanoo. Dinnaa munnimma maree marifa munnimma nimi marina ainainira faiqi maridanoo.
PRO 22:8 Anee unnaqira oosana ummaqusainanoo mandainaina minakiqari kambiqa finoo quandaki ani aruannoo. Anee sia kaifaa faiqí mandaikamma nimaqeennaranoo.
PRO 22:9 Afaarinana aneenna narana kudi fasiqauqa naiad nimia. Miqinana anee amiqi amiqirana mareennaranoo.
PRO 22:10 Andeeqara oosanara fidiaqaa imari fasiqana mara aqusainanoo aanooqirafa faqa rairai qirafa faqa taikaannoo.
PRO 22:11 Anee anukara amuqusara faqa amiqira ufa qiranara faqa rinanoo maqasaa ani uriqarafa ani aqoondi mariannoo.
PRO 22:12 Yaaweefa amiqira iriranara faqa anoona ufa qiranara faqa rakisida nindafaida maridanoo. Unna qimariasa ufa Yaaweefa akooqoo kooroomma sainaqa aiqamausa irifaranoo.
PRO 22:13 Ainainirara raindaani marifa maaqaki ooqufaaqee maridanoo fifau unna qimasee kaasau faini madaanai marida ooquraana daruandoo qimasee maaqaki kai maridanoo.
PRO 22:14 Aatata nimari anaaseena maraqa nirafa ufaanara foora maridanoo. Yaaweefa arana qeemarisa mi ufaannanaki aridaqa.
PRO 22:15 Faiqi aanaaqiuqa furufarammasee nári aatata fifana unnaana samu narinanoo misa furufarirafa taikaannoo.
PRO 22:16 Ani ainaina moomoo kianifeera kudi fasiqauqa mandaikamma nimaqeenana kafaa ainaina moomoo faqaana munnimma aminana anee faqa kudi marinnaranoo. Moodaa fasiqa aiku asauku taikasee moo fasiqa asauku qara taikasee 30 irirana faqaa ufa.
PRO 22:17 Irirana faqaasa ufa qimannimiana iriaqa. Misa qimannimira ufa amiqimmasee iriaqa.
PRO 22:18 Mi ufafa ani iriranaki marinana afaurusaaqari moona qimamidana asasia.
PRO 22:19 Yaaweena saqarikiaqeera maa ufana inni qimannimidaqa.
PRO 22:20 Qinee moodaa fasiqa aiku asauku taikasee moo fasiqa asaukuqara oonu marasee 30 amiqira naamuaqira ufa faqa irirana faqa akara ruma nimaqeeqa.
PRO 22:21 Miqimmasee anee anoona ufara amiqimmasee irinnaranoo. Faiqí aniara anoona ufara randaannee qifana anee amiqimmasee paqurimmasee qimanniminaranoo.
PRO 22:22 Sia kudi fasiqeee qimasee mina ainaina kaqi maraa. Sia kootaki mina rafaaqafua.
PRO 22:23 Yaaweefa kudi fasiqa dadaaqinoo misa ufa iriannoo. Misa mandaikamma nimaqainausa nariqa faqa mandaikamma nimaqaannoo.
PRO 22:24 Anee sia qusufa qimasee kai kaqi aanoo qimari fasiqana aqoondikia.
PRO 22:25 Anee mina oosana irisee sia amana mi oosanna minniseennaranoo, arinnaranoo.
PRO 22:26 Moo fannoo ufaasu munnimma maraseenoo sia amana mina akiiqara feefauru iraree qinana sia anee amana aiqamasee mina akiiqara ianauree qia.
PRO 22:27 Anee faqa mina akiiqara sia amanaikinana sia feefauru niminaqa misa aniree ani aiqama ainaina marasee faiqara qaari faqa mareefaranoo.
PRO 22:28 Inni nikeeku nikaaku ooqai maqa oosummaqoona sia rapatutumma mafisaa.
PRO 22:29 Amiqira ainaina imarifa karaambaiqa ainainiranaki mariannoo. Miqira fasiqa fannoo sia oorudupira fasiqa auqu siaina ainainira faiqikiannoo.
PRO 23:1 Anee uriqarara fasiqa faqa ooqu marifi narana naidana aneenna iriranaki mifa narana aminara iria.
PRO 23:2 Anee moomoo narana neemarianafa maridana aneenna aidirana rafaaqafua.
PRO 23:3 Anee sia mina amiqira naranara aqaara raani. Mifa ani akaru qiandoora sia irimariananoo.
PRO 23:4 Anee sia moomoo munnimma ainaina mararee qimasee afeeka taikaa.
PRO 23:5 Anee moomoo munnima marasainanoo kai kaqi taikaannoo. Mi munnimmafa aqoosa arufinanoo uqaumuara foora aqamaree sandaannoo.
PRO 23:6 Anee tatamaqimari fasiqana narana sia naa. Sia mina amiqira naranara amukaani.
PRO 23:7 Miqira fasiqa fannoo unna qimasee fifau aniara moo faqa moo faqa naannee qidanoo. Aunduraki aniara qoodaa naannee qidanoo fifau afauru fannoo kai miqi qidanoo.
PRO 23:8 Anee mina narana namaseenana raudamaki finana fidinnaranoo. Anee fifau mina faqa amiqira ufa qiananoo.
PRO 23:9 Anee sia furufarira fasiqa ufa amia. Mifa ani ufara sia asasiannoo.
PRO 23:10 Sia maqa ooqai oosu maqoona mafi moosaa quqaa. Fiaiqi faiqi maqa faqa sia maraa.
PRO 23:11 Yaaweefa misa afeeka itita nimaqarafa maridanoo. Mifa misa saaroo qinoo ani ufa amiannoo.
PRO 23:12 Ani qimami mari fasiqafinnai aaqoo quqasee amiqimmasee iria.
PRO 23:13 Faiqi aanaaqi ariranara sia amuqusinana minnisaa. Saamunnai kaqi arua sia kuquannoo.
PRO 23:14 Miqiannanannai anee misa marirana asumu mara quqaananoo.
PRO 23:15 Qini qimaaku anee irirana faqaafa marinaqa qinee asasianaura.
PRO 23:16 Anee irirana faqaasa ufa qinaqa qinee iriqa nasurianauranoo.
PRO 23:17 Anee sia manda oosana maree mariasa oosanara aidiani. Anee aiqama kari Yaaweena ameemaanai kai maria.
PRO 23:18 Anee miqinana kasooaqee ani marirafa amiqimmiannoo.
PRO 23:19 Qini qimaaku qini ufa iriseenana irirana faqaafa maria. Aneenna nirana mariranara amiqimmasee iria.
PRO 23:20 Sia moomoo nammari neemariasa faqa moomoo narana neemariasa faqa moodaanakikia.
PRO 23:21 Nammari moomoo neemariasa faqa moomoo narana neemariasa faqa qusasaa ainainara sarau ifaranoo. Narana namasee faasaana faiqaqee marifa qusasaa qamunna anaqi anaqirana afisusee mariannoo.
PRO 23:22 Aneenna akoona ufa iria. Sia mina ufa irinana sia amanaikinnaranoo. Ani anoofa asooaqainana amiqimmasee rakisia, sia akooakaa ia.
PRO 23:23 Kuqaa anoona qira ufa faqa amiqira irirana faqa afeekaikammasee maraa. Firaa ainaina marinara sia uqasaina moo fannoo feefauriani.
PRO 23:24 Irirana faqaa faiqi anoofa akoofa firaaqoo asasidaqa. Misa asasirana oosana maifaqa asasidaqa.
PRO 23:25 Miqinaqa ani anoofa faqa akoofa faqa aniara asasiaqa. Aneenna anoona afaaqa amiqirana aminanoo asasiani.
PRO 23:26 Qini qimaaku qini ufa amiqimmasee iria. Saina qini marirafa ani quqafiqaani.
PRO 23:27 Dapi maraqa nua aanaaseefa faqa moo fasiqa anaaqa faqa dikaanda miqirafa meemaqoo maridanoo. Faiqí minaki kuqira ufaanakiara foora aridaqa.
PRO 23:28 Misa ummuarira fasiqara foora maridaqa aniara rakisidaqa. Mi anaaseefa moomoo fasiqa furufara masaifaqa nariqa faiqí anaasee faqa mariana rakeeidaqa.
PRO 23:29 Yausee noori runusee marifaree. Yausee aanooqiranaki numudaqee marisa maridee. Yausee muamunda faqaasa maridee. Yausee fidika nifu namu faqa maridee.
PRO 23:30 Uainna nammari kisaaqasaa neemariasa kai mi ainainausa maraidaqa. Osana oosana nammari amanammasee qafeemariasa mi mandainainausa qafaidaqa.
PRO 23:31 Sia mi nammarina kaafaki adiasaina taatuqee arinanoo qaqaara raani. Mi nammarifa qaqarinnanara sia ani qaqaara raani. Asanandai adiasaina fadameenara foora farindeenoo ooqu finanoo sia qaqaara raani.
PRO 23:32 Mi nammarina nama taikasainanoo ukadiqara foora ani ukaqa amiannoo.
PRO 23:33 Anee namasainanoo ani afu mookamma finana sia ainaina amiqimmasee qafeennaranoo. Ani atikuraki irirafa furufara mafinana sia amiqimmasee irirafa aniki kambiqainana sia amiqimmasee ufa qinnaranoo.
PRO 23:34 Anee namaseenana sipakiara foora ooruku nammariki fimariandee idana teeqe taaqimminaranoo. Sipa faakanasaara foora faiqararidana meemai nammari qafainanoo amuqusammiannoo.
PRO 23:35 Amuqusinana anee maaqi qinnaranoo. Misa qini daruafaqa sia aupuraidaqee qinnaranoo. Misa saamu samu qini daruafanoo sia didafinoofee qinnaranoo. Qinee faisee findifinaqa moo faqa naanauree qinnaranoo.
PRO 24:1 Sia manda oosana maree mariasa oosanara rua. Sia misa aqoondikia.
PRO 24:2 Misa iriranaki faiqí mandaikamma nimaqarara kai randaidaqa. Misa aiqama kari ummaara kambiqaanifeera kai ufa qidaqa.
PRO 24:3 Amiqira iriranannai faqa oonu mafi iriranannai faqa maaqa atunara foora aruseeqa usakaidaqa.
PRO 24:4 Amiqira irirafa mari maaqanaki amiqira ainainauqa qumbiqanoo maridanoo.
PRO 24:5 Irirana faqaa marirafa afeeka faqaa marirana uriaaqaramasee maridanoo. Amiqira irirafa afeeka faqaasa kaaqa urinnaaqaranoo maridanoo.
PRO 24:6 Anee moo maqannaasa faqa rakirarinana irirana faqaasiannai irirana mara mareenana rakirannai fua. Moomoo irirana faqaa fasiqa ufa iriseenana rakirana uriqareennaranoo.
PRO 24:7 Amiqira irirafa firaa farumara foora marifaqa furufarirausa sia iridaqa. Misa firaa ufa suqiranaki oonuree sia ufa qiaqaa ifaqa noo qumunimmasee maridaqa.
PRO 24:8 Maqee maqee mandainainara randee mari fasiqanara ummaara oosana aree marifee qidaqa.
PRO 24:9 Furufarirausa mandainaina auqarara kai iridaqa. Aiqama misa auqee maria ainainausa numoo ainaina kai maridanoo. Faiqí ramoo ramaa imari fasiqanra manda fasiqee qimasee qafaidaqa.
PRO 24:10 Ufarurira aukuana anee kudoosaapeenana anee afeeka siaifa marinnaranoo.
PRO 24:11 Kootaki faiqí quqasee fifau kuqa ariraree qifana anee minakinaana mareeqee kaqini quqaa.
PRO 24:12 Sia ani ainaina marida fee qia. Anutufa iridanoo mifa kai ani marirana rainaannoo fee qia. Mifa anisaa rakisidanoo, mifa iridanoo anee auqee mariannana akiiqara mifa amiannoo fee qia.
PRO 24:13 Oo qini qimaaku anee ookasaasa anoona naa. Mifa amiqirafa maridanoo afaurusaa quqasainanoo adiafaa iannoo.
PRO 24:14 Anee maana faqa iria. Amiqira irirafa ookasaasa anoonara foora adiafaa irafa maridanoo. Anee mina qumareenana kasooaqee amiqiranaki marinnaranoo.
PRO 24:15 Sia manda oosana maree mariasa naanna reenana andeeqarausa maaqa rapeemmasee minakinaa ainaina ummuariraee qimasee tipundaa ria.
PRO 24:16 Andeeqarausa moomoo kari aqufiqa misa amana findififaranoo. Mandainaina fannoo manda oosana maree mariasa narusainaqa kuridifaranoo.
PRO 24:17 Ani namuqaa mandainainaki aqufifana sia asasia. Mifa aiku rupauraki saamurinana sia nasuria.
PRO 24:18 Anee asasinanoo Yaaweefa ani qafainanoo akooqaannoo narí aranaqarana rafaaqafusee sia naruannoo.
PRO 24:19 Anee sia manda oosana maree mariasa marirana qinee faqa miqiraree qimasee iria. Sia misa mariranara rua.
PRO 24:20 Manda oosana maree mariasa sia misa kasooaqee marirafa mariannoo. Misa qausana qooma dauni maqa raquraminoo dimbaannoo.
PRO 24:21 Oo qini qimaaku, anee Yaaweena ameemanai faqa (maqasaa karaambaiqa nimeemaanai faqa maria). Ufa rukiee mariasa faqa sia moodaanakikia.
PRO 24:22 Miqi maria fasiqausa kai kaqi uqanna mandaikifaranoo. Moo mandainaina Anutufa faqa maqasaa rakisirafa faqa misasaa quqeefaranoo. Akaqa amiqira ufa maaqoo maridanoo.
PRO 24:23 Irirana faqaasa maa ufana faqa qimannimiqau. Siaasa fannoo kootaki akaqausa dadaaqinoo akaqausa rafaaqa finanoo sia andeeqaannoo.
PRO 24:24 Siaasa fannoo aaqee mariasara sia aaqarana marisee qinaqa faiqí anaasee aiqamausa mi siaasanara fidiaqaa ifaranoo.
PRO 24:25 Siaasa fannoo aaqee mariasara sia rufiarai kaqi ummaara niminafa reemindeemiriranaki maridanoo amiqira mariranaki asasida mariannoo.
PRO 24:26 Kuqaa anoona ufa qimaminafa ani aqoondi uqanna maridanoo.
PRO 24:27 Anee ququsa auquseenana ainaina masainanoo anoona koorooinana miqoo kai maaqa usakasee maria.
PRO 24:28 Anee kootaki oonuree sia aaqarana siaisara unna qimasee rafaaqa fua. Sia ani afauru fannoo unnufa qiani.
PRO 24:29 Sia maaqi qia, mifa ummaara qimindee kai iqa narí faqa ummaara amianee qia. Sia maaqi qia, qinee maa fasiqana narí mandainaina akiiqara kai aruannauree qia.
PRO 24:30 Qinee furufarira fasiqa ainainirara raindaani mari fasiqana afuqaki nidaqa qafeeqa.
PRO 24:31 Amuka faqaafa faqa firaa andanda faqa mina rafaaqafinoo marifaqa qafeeqa. Ooni faandaamura mi afuqanasee auquqaafa rapeemmaki aqufinoo marifaqa qafeeqa.
PRO 24:32 Qinee mina qafaidaqa oonu mafi iriqa. Oonu mafi iridaqa irirana mareeqa.
PRO 24:33 Ainainirara raindaani mariasa maaqi qidaqa. Maasa kaqikaaqoo faiqararee qidaqa. Maasa kaqikaaqoo idooamasee findifuanauree qidaqa.
PRO 24:34 Doo misa miqianara misa aiqama ainaina fannoo taikafuannoo. Sarau irafa faiqí nári mari fasiqafara foora ani aruannoo.
PRO 25:1 Maa aaquqira ufafa Sooroomoonna akaqa aaquqira ufa maridanoo. Yuda maqannaa karaambaiqa Heeseekaiaafa fuka bukaki akara rumaqoofa maridanoo.
PRO 25:2 Maasa Anutuna auqu uqeeree marunafa mifa moomoo ainaina narí iriranaki kukeeqee marinara miqidaqa. Minara maasa mina uriqarara auqu amidaqa. Maqassaa karaambaiqauqa mina oosana maasa qima qimianara maasa misa firaa nuqu nimidaqa. Miqi kai masee maqasaa karaambaiqa irirafa firaafa marinara sia amiqimmasee iriranaura.
PRO 25:3 Maasa sia innaarunai mari ainainnara faqa ooruku nammari meemai mari ainainnara faqa irianaura.
PRO 25:4 Faiqí siraa tasirisirimmasee apaapa mara aqusee anoona amiqirana kai uqasaifanoo ainaina akoofasa fannoo mara maree munusee auqidanoo.
PRO 25:5 Maqasaa karaambaiqa manda ufa aakapee mariasa mara aqusaifanoo mina rakisi amaqarafa afeekaikiannoo.
PRO 25:6 Anee maqasaa karaambaiqa afusaa oonuree sia aneennara faiqí firaasee qia. Sia aneennara uriqararausee qia.
PRO 25:7 Anee sia faiqí firaasa nimaaqa maqasee misa qannusaa ooqu maria narí anirainaqa ani aiqaifanoo sia andeeqaannoo. Minara anee kaiqeesa faqa marinaqa nariqa kai ani aaraifana oonu faiqí firaasa faqa ooqu maria.
PRO 25:8 Anee aneenna aqoonnana moo ainaina qafamasee sia aaqmuraaqmura inana kootai munu koorooia. Moo fasiqa mi ainainnara amiqimmasee irimarifa aniree ani ufa rafaaqafu sainana anee naqaa fee innaree.
PRO 25:9 Anee aneenna aqoonnana faqa ufa rainaidana kai kaqi mi fasiqafinnai oonuree mi ufana andeeqa taikaa. Anee moo kukeeqara ufa iriseenana sia mi ufana koorooia.
PRO 25:10 Anee minauqa kooroo inanoo mi fasiqafa asaurinaqa faiqí aniara sia umee ufa kukeeqaifee qimasee asaurirana amifarahnoo.
PRO 25:11 Faiqí moo fannoo amiqira ufa qinafa amiqira ainaina koorannai auqusee siruaannai afaaqa auquqaafara foora mina ufa maridanoo.
PRO 25:12 Faiqí moo fannoo irirana faqaa fasiqa aauqima nimaqara ufa irisee eedoo qinafa koorannai auqira fidinaanu naaqooki uqee mariana faqa uraaqararafa maridanoo.
PRO 25:13 Ufa maree fuani feera aiqainafa andeeqasee narí rakisirafa qinna ufana qimanniminanoo misa mi ufafa asasirana nimiannoo. Faiqí afuqaki narana unaki marifanoo suani arifanoo fuka nammari naindee iannoo.
PRO 25:14 Faiqí moo fannoo moo ainaina nimiraree qimasee qima afeekaikammaseenoo sia nimifa aadana oonnamuara foora maridanoo. Mifa ufai uqinoo oonnamu rakee ifanoo aaku sia rindee idanoo.
PRO 25:15 Reendeenira ufa fannoo amudaani raqa ummooquka midanoo, miqimmasainaqa rakisirausa faqa ani ufa irifaranoo.
PRO 25:16 Anee ookasaasa anoona kaaqa adiafaa imari ainainna paqurimmasee aneenna amana kai naa. Moomoo namasee fidinafaara.
PRO 25:17 Sia aneenna aqoonana maaqai maqee maqee namummaqaa, miqinanoo mifa aniara akooqainanoo fidiaqaammiannoo.
PRO 25:18 Narí aqoonnanara unnufa qimarifa qaseemara foora faqa aaruqira feefannaira foora narí aqoonnana aridanoo.
PRO 25:19 Anee manda aukuana unna qimari fasiqanasaa dadaaqiani fee qimasee mundinana anee afai rufidira fara foora narana neemariananoo. Anee aiku pipisaaqa usirafara foora aana fimariananoo.
PRO 25:20 Oori runusee marina aaqa oorureenana asasira idi rainanoo akooqaannoo. Suaraki faiqí moo fannoo qamunna akusee marifana rafaqaamma maraana suara arindee innaranoo. Moona afaaqa aurimarinaki ooruku anoona adieera foora iananoo.
PRO 25:21 Ani namuqaa aararainana narana amia. Nammariara aidinana nammari aminanoo naani.
PRO 25:22 Anee miqinanoo mina asaurirafa idara foora qaannoo. Yaaweefa mina akiiqara ani amiannoo.
PRO 25:23 Munuqi miniqirafa noori runirana maree anidanoo. Suani ataaqeendari ufai fannoo aaku maree anindee idanoo.
PRO 25:24 Tiqeera maqaki maridana amana marinnaranoo. Firaa maqatiaki rairai qimari manda anaaseena faqa maridana mandainainaki marinnaranoo.
PRO 25:25 Nianaindari aninna amiqira ufana asooara nammariara foora nainanoo rukukuqama amiaqaannoo.
PRO 25:26 Manda oosana maree mariasa andeeqara fasiqara anee maa manda oosanna marannee qimasee sandanainai qifanoo eedoo qimasee auqeenoo mifa faqa mandaikammiannoo. Amiqira nammari mookoofa amanee kai randaida qumimarina neemarianaki dumuna kai qumbiqanoo mariannoo andeeqara fasiqa mandaikirausa ufara eedoo irafa miqinoo maridanoo.
PRO 25:27 Anee adiafaa ira ainaina neeneesainanoo mandaika miannoo. Anee aneennara uriqararanara randainanoo mifa faqa mandaika miannoo.
PRO 25:28 Faiqí moo fannoo narí aranaqarana sia qumaraifa maqusa faandaamura rapee inoo marifaqa akoosa mariafaqa namuqaa keeqaaqaa inoo mariara foora inoo maridanoo.
PRO 26:1 Furufarira fasiqa mareeqee uriqararafaikinanoo sia andeeqaannoo. Suani aukuana aaku riara foora midanoo. Nandi aiqira aukuana aaku rindee midanoo.
PRO 26:2 Aaqarana siai fasiqafa unna qimasee aqurarainna ufafa sia mina qumaraannoo. Mi ufafa ufiniara foora kaqi aqanoo oonuree aniree inoo nidanoo, sia saqariasaa uqaidanoo.
PRO 26:3 Qoosa sana samu aridaqa. Qainna doonki ooki quqasee mi sanda atina qumaraafanoo nifiqee fidanoo. Miqi kai iqa furufari mari fasiqana unnaanna samu arinanoo iriannoo.
PRO 26:4 Sia anee furufarira fasiqa fannoo ani manda ufara irainana mina faqa ufa qia. Ani faqa mi furufarirafa aaku finana miqinafaara.
PRO 26:5 Furufarira fasiqa fannoo furufarira ufa ani qimaminana anee mina ufa rukiasee saa manda ufa qiaanoo qia. Anee sia miqinanoo mifa nariara irirana faqaasee qinoo narí amooqiandoora.
PRO 26:6 Anee furufarira fasiqa moo ufara aiqeenana aneenna aiku ateekeera foora innaranoo. Anee ummaarara randee mariananoo.
PRO 26:7 Furufarira fasiqa ookiqari irirausa ufa qinafa sia mi ufafa narí dadaaqiannoo, aiku mandaikirafara foora maridanoo.
PRO 26:8 Anee futufeetiki ooni quqasee aqusainanoo sia mariannoo fuannoo. Anee furufarira fasiqa mareeqee uriqararanaika masainanoo futufeetikiara foora aqinnaranoo.
PRO 26:9 Faiqí moo biaqa nammari amiqimma namasainnana amukafaqaa ainaina asaukuki quqasainanoo kaqi qumarainanoo asauku tapooqainanoo sia iriannoo. Anee irirana faqaasa ufa furufarira fasiqa qiaminanoo mifa miqi kai inoo narí afaaqa aruannoo.
PRO 26:10 Faiqí moo fannoo furufarira fasiqa fee kaqi nimari fasiqanee mareeqee narí ainainiranaki quqainafa aiqamausa naridanoora foora idanoo.
PRO 26:11 Furufarira fasiqa fannoo ooqai furufarira ainaina auqeeundee inoo kaifaa auqaidanoo. Fainiara foora fidisee quandafi kaifaa naidanoo.
PRO 26:12 Furufarira fasiqa kaqikaaqoo amanaikianoo. Nariara irirana faqaasee qimarifa sia amnaikiannoo. Furufarira fasiqa ooreeqarafa uqanna maridanoo.
PRO 26:13 Ainainirara raindaanimari fasiqana unna irirafa maaqimminoo maridanoo. Kaasau faini aanai maridanoo kaaqa ukaqee marifa marifaqa daruandooree qidanoo sia ainainai fidanoo.
PRO 26:14 Ainainirara raindaanimarifa narí qaarisaa faiaqeeidanoo quanda qaandida maridanoo. Mifa kooqi qainnara foora quanda qaandida maridanoo.
PRO 26:15 Kudoosaapee marifa narana mareeqee ooki quqarara akooqaidanoo.
PRO 26:16 Ainainirara raindaani marifa narí iriranara uriqarara fee qidanoo. Qisauku dinni taikasee dinni qaaa marasee (7) irirana faqaasa irirana urinnaaqaraqa maridaqee qidanoo.
PRO 26:17 Sia tinooriranaki aqufua. Anee miqinana faini aaqoora foora qumarainanoo ukaqa amiannoo.
PRO 26:18 Faiqí moo fannoo unna qinanoo moo fannoo kuqaamifoora mandainainaki aqufuannoo. Aqufifanoo mifa maaqi qiannoo oo qinee fifau unna qiqa uteeti qunnanara anee mandainainaki aqufuananoofee qiannoo. Miqi mari furufarira fasiqafa ida qeemari duru feefana indaamma uqirafa nidanoo narinaa nidanoo.
PRO 26:20 Ida ati taikaifanoo doo ida imbaidanoo. Munuqi miniqirufa miqi kai inoo taikainanoo aanoo qirafa taikaannoo.
PRO 26:21 Ida kudima idaunisaa quqasainanoo dauni atooqafinoo qaannoo. Ida aadana faqa idaki quqasainanoo firaaqoo qaannoo. Manda ainaina oosana areemarifa ummaara kambiqaani feera miqidanoo.
PRO 26:22 Munuqi miniqirufa fannoo adiaafaa ira narana miqirafa mina aranandaki maridanoo.
PRO 26:23 Amiqira ufa qimari fasiqafa aundurai mandaikirafa maridanoo, mi fasiqafa qafee miqirafa apatasaa anukarafa akara faqaafa aundurai kudima arirafa maridanoo.
PRO 26:24 Qaara irirana mau fimarina ufa fannoo amiqirafa maridanoo. Aundurakiqari nikaru qidanoo miqidanoo.
PRO 26:25 Mi fasiqafa amiqira ufa ani qimaminana sia mina ufa iria. Mina aunduraki manda ufa oosana oosana qumbiqanoo maridanoo.
PRO 26:26 Mi fasiqafa narí fidiaqaa ira mandufa amiqira ufannai dadapaani maseenoo mimau amiqi amiqi marinaqa aiqamausa mifa manda ainaina auqee marina qafeearanoo.
PRO 26:27 Faiqí moo fannoo madika indufuseenoo moo fannoo minaki aqufuani fee qimarifa narí aqufidanoo. Faiqí moo fannoo oonitia umbaqi aminanoo moo fasiqa aruani fee qifanoo oonu aruakinanoo narí aruannoo.
PRO 26:28 Unna qimari afaurufa kuqaa anoona ufara fidiaqaa midanoo. Unna qimasee amiqi amiqi marifa mifa mandaikamma nimaqaidanoo.
PRO 27:1 Anee duna auqararee qinna ainainnara sia qimasee aneenna amooqia. Anee maqee kambiqaaninna ainainnara sia irimariananoo.
PRO 27:2 Sia aneenna amooqia, saina moo aanaamuru fannoo ani amooqiani.
PRO 27:3 Furufarira fasiqa fannoo firaa umaarara ainaina auqaidanoo. Mi ummaarafa ooni umaara faqa nukuda umaara faqa uriaaqaranoo maridanoo.
PRO 27:4 Aanoo qirafa faqa aranaqarafa faqa mandainaina maridanoo. Aqoonnanara rairai qirafa misa firaafa maridanoo.
PRO 27:5 Manda ainainaki mari fasiqanara qaoo qirafa minara aidirana uriaaqaranoo maridanoo. Mifa sia ani aidirana qafaani.
PRO 27:6 Anee aaqamasainanoo ani aqoondi fannoo ufannai aidafuma aminafa mifa andeeqara aqoondi mariannoo. Namuqaa fannoo unnaqimasee amooqira ufa moomoo anisaa quqaannoo.
PRO 27:7 Faiqí moo fannoo amuaqu inoo marinanoo kaaqa adiafaa imarina ookasaasa anoona aminanoo minnisaannoo. Faiqí moo fannoo aarara marifa sukaqee mari narannara adiafaa irafee qimasee kaqi naannoo.
PRO 27:8 Faiqí moo fannoo narí maaqa quqasee aiqama tinai nimarifa ufini aanna raidanoo narí aanaamukiqari quqasee furufara inoo aiqamai nidanoo.
PRO 27:9 Afundimari ainainna afaaqai akusaananoo afunda afaaqai ifanoo aundura asasidanoo. Aneenna aqoondi amiqira aamuaqira ufa qiaminanoo mi aamuaqira ufafa amiqira afundara foora ani rafaaqafuannoo.
PRO 27:10 Aneenna aqoondi faqa aneenna akoona aqoondiara faqa sia qaunua. Anee umaaraki aqufinana sia aneenna nianai mari akaqaafasaanara dadaaqiannee qia. Aneenna adeedi mari aqoondifinnai oonurainanoo mifa ani dadaaqiannoo.
PRO 27:11 Qini qimaaku anee irirana faqaafa marinaqa qinee asasianaura. Yafee aniara qini diqifaqa ani irirana mau fiqa misa rafaaqafuanauree qinanee.
PRO 27:12 Irirana faqaafa mandainaina anifanoo iriseenoo amaaraidanoo. Irirana siaifa kaqi oonurama minaki aqufinoo ummaara maraidanoo.
PRO 27:13 Anaamurundari sia irimarinna fasiqafa aniree qinana munnimma aminana anee furufarirafa mariananoo. Miqimari furufarira fasiqafa dapi maraqa nua aanaaseena munnimma amisee maraanoo.
PRO 27:14 Anee aneenna aqoondi kananaana afaurirna findifinana firaaqoo faaqa rumasee amandeenana mina aquraree mariananoo.
PRO 27:15 Aaku rikari kapatu fannoo aqufidanoo sia taikaidanoo. Manda anaasee fannoo mina kaukaata qirafa kapatu aanna raidanoo.
PRO 27:16 Anee ufai qumanee rafaaqa fidanee anee fadameena aki mariana asaukuki qumaraidanee, sia. Miqi kai inana sia amana mi aanaaseena kaukaata qirana rafaaqa finnaranoo.
PRO 27:17 Qumi faqa saasuna faqa marasee narisaa anrisaa anainanoo afaidaannoo. Faiqí moo fannoo narí aqoondi faqa moodaaqoo marida narí qimami narí qimamiafanoo ufa fannoo narí dadaaqi narí dadaaqinoo andeeqaannoo.
PRO 27:18 Anee murisaa amiqimmasee rakisinanoo irainana anee tiqisee neennaranoo. Miqi kai inoo ainainira faiqi fannoo narí uriqararana ainainasaa amiqimmasee rakisinafa uriqarafa mariannoo.
PRO 27:19 Faiqí moo fannoo nammari afainni kikiqammafi narí oori afiri nammariki qafaidanoo. Mifa narí mariranara faqa iriranara faqa iriseenoo miqirafa maridanoo fee qiannoo.
PRO 27:20 Faiqí moo moo kuqimariafanoo sia kuqira maqa maaqa umbiqaidanoo, kaqi kai kuqida maridaqa. Miqi kai inoo sia amana faiqí narí aidirana aiqama afaqanoo munu taikaannoo.
PRO 27:21 Idannai koora faqa siruaa faqa tasirisirimmasee amanammasee qafaidaqa. Miqi kai iqa faiqí marirafa kai faiqiara kooroo idanoo.
PRO 27:22 Anee furufarira fasiqa kuqa ariara foora masainanoo sia mina furufarirafa minaki marifa taikaannoo kaqi mariannoo.
PRO 27:23 Anee aneenna sipsipasaa faqa burimakausaa faqa amiqimmasee rakisia.
PRO 27:24 Ani munnimma fannoo sia kisaaqasaa mariannoo. Maqasaa karaambaiqa aiku asauku sia kisaaqasaa marifaranoo.
PRO 27:25 Ani andanda kisaaqaikinana ateekasainanoo fuka andanda kambiqaani.
PRO 27:26 Anee aneenna sipsipa asausinnoo aneenna qamunna auqua. Anee aneenna mimmi akaqana nimisee minasaaqaraa munnimma marasaannananno maqa feefauria.
PRO 27:27 Aneenna mimmi akaqafa kaqi marina naamma anoona tatisee anee faqa aneenna faiqi namu faqa aneenna dadaaqi maria manaaqausa faqa naaqa.
PRO 28:1 Manda oosana maree marifa sia moo arirafa marifanoo kaqi fifau sandaidanoo. Andeeqara oosana faqaafa kaasau faini raioonnara foora pasoosidanoo.
PRO 28:2 Ufa rukiee maria maqanaasa misa uriqararausa qusasaa mariqa moo fannoo mina maraqusee kikiqidanoo. Irirana faqaafa irirana rainee marifa mifa andeeqa nimaqaidanoo kisaaqasaa mariannoo.
PRO 28:3 Kudi fasiqauqa manda rakisira rakisi nimaqee marifa aaku firaafara foora rinoo narana aina madaikamma aqimarifa maridanoo.
PRO 28:4 Andeeqara ufara nikooqee marisa ufa rukiee mariasa dadaaqidaqa. Andeeqara ufa mau fimariasa ufa rukiee mariasa itita nimaqaidanoo.
PRO 28:5 Manda oosana maree mariasa sia andeeqara oosanara iridaqa. Yaweenara inaaru qimariasa misa andeeqara oosanra amiqimmasee iridaqa.
PRO 28:6 Moonoo ainaina faqaafa eendaanidira aatata nimarifa ureeqarafa maridanoo. Kudi fasiqa andeeqaraqoo kai nimarifa mina urirarafa maridanoo.
PRO 28:7 Sanda ufamau fimarifa kumaaraafa iriana faqaafa maridanoo. Moo kumaara fanoo kaaqa narimari fasiqana aqoondiki marifa narí akoona asaurirana amidanoo.
PRO 28:8 Faiqí moo fannooo narí munnimma ufaasu nimiseenoo mina akiiqara firaaqoo ootupamasee maree marifa sia mi munnimmana uaqeeiannoo. Mi munnimmafa aiqaree kudi fasiqauqara amuqusi mari fasiqafinnai fuannoo.
PRO 28:9 Faiqí moo fannoo Yaaweena sandufa ameesuqinafa Yaaweenara inaaru qinanoo Yaaweefa mina innaaru irinoo fidiaqaammiannoo.
PRO 28:10 Andeeqarausa rarisameeqee manda ainaina auqarafaki uqeemarifa narí ufaanaki narí aridanoo. Asakadiki ikariri sia marifa Anutufa mina akiiqara amiannoo.
PRO 28:11 Ainaina faqaafa unnaqimasee nariara irirana faqaasee qidanoo. Kudi fasia fannoo kuqaa irirana faqaafa maridanoo mifa misa oosanara amiqimmasee iridanoo.
PRO 28:12 Andeeqara fasiqa uriqarafaikinaqa faiqí anaasee aiqamausa firaaqoo asasifaranoo. Manda oosana maree marifa uriqararafaikifaqa faiqí anaasee rufiasee kukeeqeefaranoo.
PRO 28:13 Faiqí anaasee moo fannoo narí aaqarana kukeeqee marifa sia amiqirana maraannoo. Kooroommasee minnisainnana Anutufa afauaannoo.
PRO 28:14 Aiqamakari Yaaweena ufa mau finana asasiranaki marinnaranoo. Ufa rukieenana mandainainaki marinnaranoo.
PRO 28:15 Manda oosana maree mari karaambaiqafa kudi fasiqa anaasee manda rakisira rakisinnimaqee marifa kaasau kuarara foora faqa kaasau fainiara foora faqa maridanoo.
PRO 28:16 Narí maqannaa mandaikamma nimaqee mari urirqararafa irirana oorudupirafa maridanoo. Unna qira oosanara akooqee marifa kisaaqasaa rakisi nimaqaannoo.
PRO 28:17 Faiqí kuqa arinafa narí madika indufidanoo. Sia moo fannoo mina dadaaqiannoo.
PRO 28:18 Kuqaa qira oosana mareenana amiqimmasee marinnaranoo. Sia kuqaa qifa oosana mareenana kai kaqi tautummaki manda ainainaki aqufinnaranoo.
PRO 28:19 Maqa auqee mari fasiqafa mina narana moomoo maidanoo. Fifau faafau inoo nifa kudi mariannoo.
PRO 28:20 Kuqaa qira oosana faqaasa Anutufa firaaqoo amiqi amiqimma amaqaanoo. Kai kaqi moomoo munnimma ainaina faqaasa mariraree qimariasa aupuraranaki aqufifaranoo.
PRO 28:21 Kootaki moo fasiqa dadaaqinara moo fasiqa mandaikamma amaqarafa manda oosana maridanoo. Akaqa siaasauqa noo rafaaqafia munnimma maraseeqa miqidaqa.
PRO 28:22 Kaaqa ainainara tatamaqi mari fasiqafa kai kaqi moomoo ainaina maranaa qidanoo, miqi marifanoo sia irirai miqi mari kudikirafa doo mina amaarusinoo maridanoo.
PRO 28:23 Anee faiqí moo manda oosana marainara qaoo qinanoo mifa minara kasooaqee dufi dufi qinanoo mina dufi dufi qira ufa fannoo fadameena akira ufa uraaqaranoo maridanoo.
PRO 28:24 Faiqí moo fannoo narí anoofa akoona ainaina ummuarammasee sia manda oosana maree fee qinafa mifaa faiqí ainaina mandaiki mariasa naanna raidanoo.
PRO 28:25 Ainainara tatamaqi mari fasiqafa ummaara uqeeraidanoo. Yaaweenasaa mundi mari fasiqafa moomoo ainaina faqaafa maridanoo amiqimmasee mariannoo.
PRO 28:26 Faiqí moo fannoo narí irirana mau fimarifa fufufarirafa maridanoo. Faiqi moo fannoo irirana faqaasa aatata fimarifa asooaranaki maridanoo.
PRO 28:27 Faiqí moo fannoo kudi fasiqauqa nimimarifa mifa sia sarau iannoo. Kudi fasiqauqa sia nimimarina faiqí aquraraidaqa.
PRO 28:28 Manda oosana maree mariasa uriqararausai kiafaqa faiqí anaasee kukeeqaidaqa. Mi manda oosana maree mariasa kuqifanoo andeeqarausa kaifaa rakisi nimaqeefaranoo.
PRO 29:1 Kaukaata qimari fasiqana moomoo kari andeeqaafanoo sia irimarifa qusasaa radamu saifanoo mina andeeqara aana sia mariannoo.
PRO 29:2 Andeeqarausa rakisirausaikiafaqa aiqama fasiqa anaasee asasidaqa. Manda oosana maree mariasa rakisirausaikiafaqa aiqama faiqí anaasee ummaara maraidaqa.
PRO 29:3 Irirana faqaafa marinanoo ani anoofa akoofa asasiannoo. Dapi maraqa nua aanaaseefinnai fimarifa narí munnimma aiqama aqu taikaidanoo.
PRO 29:4 Maqasaa karaambaiqa fannoo andeeqara oosananoo maa maqa maaqana rakisifanoo afeekaikinoo maridanoo. Munnimmara iridanoo rakisifanoo mifa rakisimari maqa maaqafa maaniki aqufidanoo.
PRO 29:5 Faiqí moo fannoo narí aqoonnana fadameena akira ufa ami marifa narí mina ufaana fufidanoo.
PRO 29:6 Manda oosana maree mariasa nári aaqarafa nári ufaana fufufifaqa aridaqa. Andeeqee mariasa asasammasee idiana faqa fidaqa.
PRO 29:7 Amiqira fasiqa fannoo kudi fasiqa ummaarara faqa iridanoo. Manda oosana maree marifa sia miqira ainainara iridanoo.
PRO 29:8 Ufa rukiee mariasa nári maqannaasa nirana fundakida aanooqirana uqeera nimidaqa. Irirana faqaasa aanooqirana asooama nimaqaidaqa.
PRO 29:9 Irirana faqaafa furufarirana afiqee kootai munusaifanoo furufarirafa aanooqimasee uteeti qidanoo.
PRO 29:10 Faiqí fidika ruiqarara rimariasa andeeqara fasiqara fidiaqaa midaqa. Andeeqara fasiqauqa misa mariranasaa itita nimaqaidaqa.
PRO 29:11 Irirana siaisa nariqa aanooqirana akooqoo koorooidaqa. Irirana faqaasa nári naundurai kai nári ufa rafaaqa fidaqa.
PRO 29:12 Uriqararafa unna ufa irimarifa marinaqa aiqama mina dadaaqimariasa unna ufa qimariasa kai marifaranoo.
PRO 29:13 Kudi fasiqa faqa minasaa rakisi marina faqa Yaaweefa kai nifu nimiqaifanoo.
PRO 29:14 Uriqararafa kudi fasiqa andeeqaranara qimarifa naaru naaru rakisi nimaqaannoo.
PRO 29:15 Faiqi aanaaqi arusee andeeqainafa amiqiannoo. Faiqi aanaaqiuqa nári irirana mau fiqa nári ninausa nisaurirana nimifaranoo.
PRO 29:16 Manda oosana maree mariasa uriqararausai kifanoo mandoosana fannoo firaafaikiannoo. Andeeqarausa manda oosana maree mariasa saamurifaqa qafeefaranoo.
PRO 29:17 Aneenna faiqi namu andeeqara ufa naakapainaqa misa andeeqara aatata fifana anee asasinnaranoo.
PRO 29:18 Anutuna itita nimaqarafa sia mari maqa maaqanaki sia mina sandufa maridanoo. Anutuna sandufa mau fimariasa asasiranaki maridaqa.
PRO 29:19 Anee ufannai kai ainainira faiqi ufa qimaminanoo siamma iriannoo. Mifa ani ufa amiqimmasee irisee sia mimau fuannoo.
PRO 29:20 Irirana siaifa kaqikaaqoo amana maridanoo. Sia irirana irisee ufa qimarifa mandaika uqanna inoo maridanoo.
PRO 29:21 Anee aneenna ainainira faiqi faiqi aanaaqisaaqari aidi maru ainainna amisainanoo kaqi kaaqoo marinoo mi ainainira faiqifa ani aiqama ainaina maraannoo.
PRO 29:22 Qusufa qimarifa moomoo aanoo qirana faqa ummaara faqa uqeeraidaqa.
PRO 29:23 Narí auqu uqeeree marifa asauriranaki aqufuannoo. Narí mara maree qumi marifa uriqarara auqu maraannoo.
PRO 29:24 Ummuarira fasiqa dadaaqinara aneenna kai aneenna namuqaakinnaranoo. Kootaki oonuree anoona ufa qinaqa mina akiiqara misa aupurarana amifaranoo. Mifa kukeeqainanoo Anutufa mina aqurara ufa qiannoo.
PRO 29:25 Anee faiqiara rufieenana aneenna ufaana fufi mariananoo minaki aneenna arinnaranoo. Yaaweena saqariki marifa amiqiranaki maridanoo.
PRO 29:26 Aiqamausa maqasaa uriqararana oorisaa oonuree andeeqaranara iraidaqa. Sia minannai nári andeeqarana mareefaranoo Yaawee finnaindaraana mareefaranoo.
PRO 29:27 Andeeqarausa manda oosana maree mariasara fidiaqaa midaqa. Manda oosana maree mariasa andeeqarausara fidiaqaa midaqa.
PRO 30:1 Maa ufana Akurafa Yakeena amaaku fannoo Itieerana faqa Ukarana faqa akararuma niminau. Mifa maaqi qinau, Anutufa sia qini faqa maridanoo, Anutufa sia qini faqa marifaqa sia qini dadaaqirausa maridaqa.
PRO 30:2 Qinee aandaura foora maridaqa. Faiqí irirafa sia qiniki maridanoo.
PRO 30:3 Qinee sia amiqira iriranara iridaqa. Qinee sia uqanna Anutunara iridaqa.
PRO 30:4 Yafee innaarunai oorureenoo fee uminau. Yafee ufai narí asaukunnoo afapita qumareenoo fee. Yafee nammari qamunnasaa sakasee qumaraannoo fee. Yafee aiqama maqa atiuqa auquseenoo fee atukaramma quqanau. Mina auqu yafee. Yafee mina amaaku auqu. Anee iridana qimaqiminaqa iria.
PRO 30:5 Anutuna ufa aiqama anoona kai kambiqaidanoo. Mifa qi ufafa anoona kai kambiqaidanoo. Mifinnai fimariasa mifa rakira saqariara foora itita nimaqaidanoo.
PRO 30:6 Sia innee mina iriranasaa inneeqa irirana ootupaaqa. Mifa inni ootupara ufara unna fee qimaseenoo niqiannoo.
PRO 30:7 Qinee qaara ainainara Anutuna iraidaqa. Qinee kaqi maa maqanasaa marunaqoo qiminaqa marasee kuqua.
PRO 30:8 Nikaru qirana faqa unnufa faqa nianai futeeqa quqaa. Kaaqa kudikirana sia qimia, kaaqa moomoo ainaina faqa sia qimia. Qiqa qimana kai qimia.
PRO 30:9 Qinee moomoo ainaina faqaasa maridaqa aniara sia irianoora. Qinee ainaina siaisa maridaqa moosa ainaina ummuariqa qeeqa Anutuna auqu rafaaqa fuanoora.
PRO 30:10 Innee moo fasiqa ainainira faiqiara sia mandufa qiaqa. Mina rakisirafa irisee quandafi inni niqinaqa manda mareefaara.
PRO 30:11 Akaqa fasiqa anaasee narí nikausa manda afaaqooqa nimisee narí ninausa sia amiqimma nimaqaidaqa.
PRO 30:12 Akaqausa náriara ikairi siaisee qidaqa. Misa numoo marifaqa misa Anutuna afusaa ikairi faqaasa maridaqa.
PRO 30:13 Akaqausa náriara amiqirausee qidaqa. Misa náriara kaaqa amiqirausee qidaqa.
PRO 30:14 Akaqausa nifauru keedai miqirafa maridanoo. Misa nifauru musuka miqirausa maridaqa, minannai ainaina siaisa nambiqeefaranoo. Minanna kai kudi mariasa rukeefaranoo.
PRO 30:15 Tumooka qaara manaaqa faqaafa maridanoo. Aiqama qara moodaa nuqu faqaasa maridaqa. Miqanda nuqu Qini Qimia. Qaara faqa qaara faqa ainaina fannoo sia doo amanee qidanoo. Kaqi moo faqa moo faqa qimiaqee qidanoo.
PRO 30:16 Moo kuqirausa maqa maaqara qidanoo, Moo anaasee narí afaaqi faqa moomoo kari faiqeenoo sia faiqi maraidanoo. Moo aadana maqa maaqa fannoo aakuara aididanoo. Moo ida fannoo fifau faafau qaidanoo.
PRO 30:17 Faiqí moo fannoo narí akoonara uteeti qimaseenoo narí anoona asooqa ufa rukiainafa duee dueena fannoo mina afu qimbaannoo. Mina amaqi meemoonauqa rapeeifaranoo.
PRO 30:18 Qinee qaara faqa qaara faqa ainaina oosanara randaidaqa sia iridaqa.
PRO 30:19 Moo meemoona fannoo innaarunai qaqanoo nimari oosanna faqa moo sakani fannoo oonimau nimari oosanna faqa moo oosana sipa fannoo nammari amuaqumau nimari oosanna faqa moo faiqí faqa maanaaqa faqa nariara nariara rimaria oosannara sia iridaqa.
PRO 30:20 Dapi maraqa nua aanaaseesa maaqimidaqa moo ainaina qumee namaseenoo oorindanaindaraana rukaseenoo sia qinee ummuari marunausee qidanoo.
PRO 30:21 Qaara faqa qaara faqa ainaina maqa fannoo akooqainara maa maqafa kasidanoo.
PRO 30:22 Moo ainainira faiqi fannoo karaambaiqaiki marina faqa moo furufari mariasa moomoo narana neeneesaafanoo nimuaqu imarina faqa moo fidiaqaa imaria aanaaseefa faiqí maree marina faqa moo ainainira maanaaqa fannoo narí rakisira aanaaseena uriqararafaikirana mi ainainausara maqa fannoo akooqaifanoo kasidanoo.
PRO 30:24 Maa maqanasaa qaara faqa qaara faqa ainaina kaqikaa ainaina maridaqa misa irirafa firaafa maridanoo.
PRO 30:25 Moo ainaina tarika mifa afeeka siai ainainafa maridanoo. Suani aukuana narana suqu quqasee aaku aukana mina naidaqa.
PRO 30:26 Moo ainaina qiroosa maridaqa misa faqa afeeka siaisa maridaqa. Misa nári maaqa firaa ooniuqa qambaana usakaidaqa.
PRO 30:27 Moo ainaina pandaaqa maridaqa misa uriqararafa sia maridanoo sia qimannimidanoo misa nariqa kai andeeqasee irasasaa kai fidaqa.
PRO 30:28 Moo ainaina rufeeka maridaqa. Mifa kaqikaa ainaina maridanoo amana asaukunnai qumareennaranoo. Faiqí firaasa uriqararausa maaqaki kaqi nimarifa maridanoo.
PRO 30:29 Kafaa qaara faqa qaara faqa ainainausa amiqimmasee nimariasa maridaqa.
PRO 30:30 Moo raioonna aiqama aandau urinnaaqarara afeeka faqaafa sia moo aandaura rufiee maridanoo.
PRO 30:31 Moo ainaina kookooraana akoona fannoo anaasee kookooraana qambaanai kaqi sumoosumidanoo. Moo ainaina mimmi akoona fannoo moomoo indaaru nifiqanoo nidanoo. Moo ainaina maqasaa karaambaiqa fannoo ufa nimi marifa maridanoo.
PRO 30:32 Anee furufarammasee aneenna auqu uqeereenana kafaa oonu mafi iriseenana aneenna oo rafaaqa fua. Anee manda oosanara tipundaarinana aneenna oo rafaaqa fua.
PRO 30:33 Anee burimakau naamma anoona tatisee minannai adiafaa imari ainainna pataqa auqinnaranoo. Anee faiqí aikiru rumasainanoo fidika qumuannoo. Miqi kai masee aanooqirana uqeerasainanoo rakirafa kambiqaannoo.
PRO 31:1 Maa ufausa karaambaiqa Reemueerana anoofa qimaqoofa maridanoo.
PRO 31:2 Anee qini didira qimaaku qinee aniara innaaru qiafana kambiqoonafa mariananoo. Qinee nana ufa fee ani qimamianauree.
PRO 31:3 Sia aneenna afeeka aanaaseesaa taikaa. Sia aneenna munnimma aiqama aanaaseesaa taikaa. Anaaseeuqa karaambaiqauqa faqa narimaria ainainausa maridaqa.
PRO 31:4 Reemueera maa ufana iria. Karaambaiqauqa sia uainna nammari naaqa. Sia afeeka nammariara indaandi qiaqa.
PRO 31:5 Misa mina nammasee sandufa qaunifoora. Faiqí nimeemaanai oorudupiqa mariasa ufa sia irisee mandaikamma nimaqeefoora.
PRO 31:6 Afeeka nammari faiqí qusasaa kuqifaninausa ainaina maridanoo. Firaa ummaaraki mariasa ainaina maridanoo.
PRO 31:7 Kuqifandinausa amana namaseeqa narí kudikiranara aunuaqa. Misa namaseeqa noori runiranara aunuqaqa.
PRO 31:8 Anee ufa qiranaki ufa mammaqi mariasa aneenna kai dadaaqi andeeqannisaa. Anee dadaaqirana siaisa ufa qiranaki dadaaqiaqa.
PRO 31:9 Anee ufa qiranaki misa dadaaqira ufa qinana andeeqara rakisirafa marinnaranoo. Anee kudi fasiqauqa faqa ainaina siaisa faqa itita nimaqainaqa andeeqaranaki mariaqa.
PRO 31:10 Amiqira anaasee andeeqara irirana faqaa anaasee mararafa kaaqa kadaapi maridanoo. Mina feefauru amiqira oonda faqa uraaqararafa kaaqa firaa feefauru maridanoo.
PRO 31:11 Mina afaaqi irirafa mi aanaaseenasaa kai mundinoo marifanoo sia moo ainainara sarau iannoo.
PRO 31:12 Mi anaaseefa mari kamuqoo narí afaaqi amiqi amiqi kaimma amaqaidanoo.
PRO 31:13 Mi anaaseefa sipsipa asausinnai faqa amiqira sandannai faqa moomoo qamunna auqidanoo.
PRO 31:14 Mi anaaseefa sipara foora nianaindaraa narana maree anidanoo.
PRO 31:15 Kananaana eendai findinoo narí maaqaki mariasa narana suqasee narí ainainira maanaaqauqa auqee fandinna saikanara qimannimidanoo.
PRO 31:16 Mi anaaseefa amiqira maqa qafamasee feefauridanoo. Narí ainaina nimisee maraqai munnimmanannai feefaurummaseenoo narí asaukunnai anukamasee adiafaa ira ainaina uainna ummaqidanoo.
PRO 31:17 Mi anaaseefa oori minaki munduseenoo amudaanai qimasee ainainidanoo. Mifa afeeka anaasee kaaqa amudaanai qimarifa maridanoo.
PRO 31:18 Mi anaaseefa narí ainainara anoona kai fee qidanoo. Qooma qumbiqaidanoo qeemarifanoo ainaininoo fifiifanoo eenda amuqusai munu taikaidanoo.
PRO 31:19 Mi anaaseefa narí sanda sufuseenoo narí qamunna auqidanoo.
PRO 31:20 Mi anaaseefa kudi fasiqauqa faqa ainaina siaisa faqa afaarinoo nimidanoo.
PRO 31:21 Suara aaku aukuana mi anaaseefa faasai deedaqammaqaina asausi faqaa qamunna narí maaqaki mariasa aiqama nimifaqa afisusee amiqimmasee maridaqa.
PRO 31:22 Mi anaaseefa faiqara qaarisaa ufiqira qamunna auqidanoo. Mifa aakianda amiqira sandannai auqira qamunna kai afisidanoo.
PRO 31:23 Aiqama uriqararausa mina afaaqiara uriqararafee qidaqa. Mi fasiqafa maqusa qambaanai faiqí firaasa faqa marida ufa qimarifaqa aiqamausa mina ufa iridaqa.
PRO 31:24 Mi anaaseefa qamunna faqa nooiqandi mariana faqa auqi marifaqa ainaina faqaasa ani feefauridaqa.
PRO 31:25 Mi anaaseena afeeka faqa andeeqarana faqa mifa qamunnara foora afisinoo maridanoo. Mifa kasooaqee kambiqaaninna mandainainnara sia rufiaidanoo paasoosidanoo.
PRO 31:26 Mina ookiqari firaa amiqira irirafa kai uridanoo.
PRO 31:27 Mi anaaseefa narí faiqi namu faqa narí afaaqi faqa ainainasaa rakisidanoo. Sia kudoosaapaidanoo.
PRO 31:28 Mi anaaseena faiqi namu nári ninoonara asasiafanoo mina afaaqi fannoo faqa mina amooqidanoo idiki keeqaidanoo maaqi qidanoo.
PRO 31:29 Moomoo anaasee amiqira ainaina auqee mariasa maridaqa, anee misa narusee uriqararafa mariananoo.
PRO 31:30 Moo anaasee fifau reendeenirafa maridanoo. Amiqira afaaqa faqaafa mina amiqirafa dauni taikaannoo. Yaaweena ufa mau fimari aanaaseena kai amooqiaqa.
PRO 31:31 Mifa auqai ainaina akiiqara uriqarara auqu amia. Mifa auqai ainainna fannoo mina auqu uqeerarana amidanoo.
MAT 1:1 Maa akarafa Anutuna asauku mundirana Abarahaamana ati Yisunara qidanoo. Karaambaiqa Dafidina ati maridanoo. Mina akeeku akaaku mina oosana maaqimminoo maridanoo.
MAT 1:2 Abarahaamafa Isakeena akoofa marinau. Isakeefa Yakooboona akoofa marinau. Yakooboofa Yudana faqa mina akaqaafasaa faqa nikoofa marinau.
MAT 1:3 Yudafa faqa Peereesana faqa Seeraana faqa nikoofa marinau. Miqanda ninoofa Tamaafa marinau. Peereesafa Qeeseeroona akoofa marinau. Qeeseeroonafa Aramana akoofa marinau.
MAT 1:4 Aramafa Aminadafana akoofa marinau. Aminadafa Naasoona akoofa marinau. Naasoofa Saramoona akoofa marinau.
MAT 1:5 Saramoonafa Booasina akoofa marinau. Booasina anoofa Raqabafa marinau. Booasifa Oobeetana akoofa marinau. Oobeetana anoofa Rusioofa marinau. Oobeetafa Yeeseena akoofa marinau.
MAT 1:6 Yeeseefa karaambaiqa Dafidina akoofa marinau. Dafidifa Sooroomoona akoofa marinau. Sooroomoona anoofa Quriana anaaqa Dafidifa rafiaqoofa marinau.
MAT 1:7 Sooroomoonafa Reeqoobooamana akoofa marinau. Reeqoobooanafa Abisaana akoofa marinau. Abisaafa Asaana akoofa marinau.
MAT 1:8 Asaafa Yeeqoosafatana akoofa marinau. Yeeqoosafatafa Yooramana akoofa marinau. Yooramafa Usiana akoofa marinau.
MAT 1:9 Usiafa Yootamana akoofa marinau. Yootamafa Aqasana akoofa marinau. Aqasafa Qeeseekiana akoofa marinau.
MAT 1:10 Qeeseekiafa Manaseena akoofa marinau. Manaseefa Amoona akoofa marinau. Amoofa Yoosiana akoofa marinau.
MAT 1:11 Yoosiafa Yeekooniaana faqa mina akaqaafasaauqa faqa misa nikoofa marinau. Babiroonia karaambaiqa fannoo narí maqusaindari anireenoo narí sundiauqa qimannimufaqa Yuda maqannaasa akaqausa naru taikeenoo akaqausa Babiroonia maqa maaqai nifiqasee karabusaki quqasoofaqa Yeekooniaana faqa mina akaqaafasaauqa faqa karabusa marunaki kambiqaqau.
MAT 1:12 Babiroonia maqusaindaraa karabusa taikaseeqa narí maqusai anireenoo Yeekooniaafa Seearatieena maqanau. Seearatieefa Seerubaabeerana akoofa marinau.
MAT 1:13 Seerubaabeerafa Abiutana akoofa marinau. Abiutafa Eeriakimana akoofa marinau. Eeriakimafa Asoorana akoofa marinau.
MAT 1:14 Asoorafa Sadookana akoofa marinau. Sadookafa Aakimana akoofa marinau. Aakimafa Eeriudana akoofa marinau.
MAT 1:15 Eeriudafa Eeriasarana akoofa marinau. Eeriasarafa Matana akoofa marinau. Matanafa Yakooboona akoofa marinau. (Mi Yakooboofa moo marinau.)
MAT 1:16 Yakooboofa Yooseefaana akoofa marinau. Yooseefaafa Mariana afaaqi marinau. Mariafa Anutuna asauku mundirana Yisuna anoofa marinau.
MAT 1:17 Maaqimmasee Abarahaanasaaqari qisaukuqara taikasee qikunni ooqu qaara faqa qaara faqa marasee oosana kambiqafufanoo Dafidinaki ootupanoo maridanoo. Dafidifa misa Isaraee maqannaasa karaambaiqa marinau. Karaambaiqa Dafidinasaaqari oonu arufufanoo miqi kai inoo qisaukuqara taikasee qikunni ooqu qaara faqa qaara faqa marasee oosana kambiqafufanoo minakiqari Babiroonia karaambaiqa fannoo karabusa mareenoo narinoo inau. Babiroonia karaambaiqa karabusa oosana raquramifufanoo miqooqari kafaa miqikai inoo qisaukuqara taikasee qiku qaara faqa qaara faqa ooqu marasee oosana kambiqafufanoo misaki Anutuna asauku mundirafa ootupa mafi kambiqanau. (Yisufa kambiqoo aukuana faiqí anaasee siara irannimimarufa maaqimminoo marinau. Kumaaraa maanaaqa ninausa nikausa utaaqama nimaqaqoofaqa marida nariara nariara nianasaa rufiasee mariqau. Miqiqa maridaqa maanaaqa faqa akoonaiqi faqa innooqafufaqa misa ninausa nikausa narana suqasee naidaqa susumasee doo firaaqoo kooroomasoofaqa miqanda kaqi naadu naadu mariqau. Miqimmasooqooqari doo moodaa aukuana aiqaramafufanoo doo moo aukuanasaa amundeeqee faiqí faqa moodaanaki quqasoofaqa mariqau. Yooseefaasa Mariasa miqimmasee firaaqoo kooroomasoofaqa naadu naadu marunakina Anutuna maraqunannai Yisufa Mariana aranandaki kambiqanau.)
MAT 1:18 Ooqai Anutuna asauku mundirafa Yisufa mina maqoo ufafa maaqimminoo maridanoo. Mina anoofa Mariafa faqa mina áqoonafa Yooseefaafa faqa qutaaqama amaqarafa mariqau. Miqanda naadu naadu mariqau. Miqinoo maridanoo Mariafa amuaquqaikinau. Anutuna kaaqa areenara maraquna fannoo Mariana aranandakina anoonaikufanoo amuaquqaikinau.
MAT 1:19 Yooseefaafa andeeqara faiqi Anutuna ufa irimarufa marinau. Sia Mariana mifa faiqi mara aminau. Minara iriseenoo Yooseefaafa Marianara amuqusufanoo ufa firaana qiqa Mooseena sandufamau fiqa Mariana arifoo qimasee qumee kai minnisararee qinau.
MAT 1:20 Miqi qimaseenoo Yooseefaafa irisee fimarufanoo karaambaiqa qangiroo fannoo qainasaa akooqoo qimaminau. Yooseefa, anee Dafidina mi oosanafa mariananoo. Anee aneenna aqoonnanara sia rufia, sia qumuarimari manaaqafa maridanoo mifa amuaquqaiki ainainafa Anutuna kaaqa areenara maraquna fannoo quqasaifanoo anoonaikinoo. Sia minnisaa kaqi maraa.
MAT 1:21 Mariafa mari inanoo faiqi akoonaiqi maqaannoo. Maqasainana anee mina auqu Yisunee qia. Mina auqu oosana maaqimminoo mariannoo. Furufariranakinaana qumbaqi uqeerannisaaninafa mariannoo. Mifa kasooqaqee narí maqannaasa nariqa mandainaina numookinaana qumbaeeqeenoo amiqiraqoo quqaannoo. Minara anee Yisu nee qia.
MAT 1:22 Qangiroo miqi qufanoo ooqai Anutufa tamummaqara fasiqa qimannimu ufafa anoonaikinau. Mi tamummaqara fasiqafa maaqi qimasee qimaqoofa.
MAT 1:23 Maanaaqa moo fannoo mari inanoo amuaquqaikiannoo. Amuaquqaikinoo faiqi maqaannoo. Mina auqu Imanueera nee qifaranoo. Mi auquna oosana maasa ufakiqari maaqimminoo maridanoo. Anutufa doo maqee maasa faqa maridanoo.
MAT 1:24 Miqi qimasoofanoo qainasaa Yooseefaana afunni aroofanoo tautinoo findifinoo karaambaiqa qangiroo ufa kai maranau. Minara misa amundeeqee narí afaaqi amufanoo doo narí anaukoo maaqaki mara quqanau.
MAT 1:25 Mara quqaseenoo amuaquqaiku kamuqoo sia ameesaaqusinoo ninau, kaqi marinau. Miqi marufanoo Mariafa narí amaaku maqasoofanoo Yooseefaafa mina auqu Yisu nee qinau.
MAT 2:1 Eeroodeefa rakisimaru aukuanai Yisufa Yuda maqa maaqaki moo maqusaki Beetareeqeemma maqusai kambiqanau. Yisufa kambiqoofaqa irirana faqaasa fasau asaana rimarusa, fasau asaana rumasoofanoo uqannifiqoofaqa suani afu oosana qaanaindari nianaindari faiqaqa aniufaqa Yeerusareenni aniqau. Misa aniree Yeerusaree maqannaasa irammiriqa qiqau.
MAT 2:2 Inni Yuda maqannaa karaambaiqai kianinafa kambiqaina, yamaqusanaki fee maridanoo fee maasa qeeqa maqusai nianai maridaqa narí karaambaiqa maqooqoo fasau irafufaqa qafamaseeqa mi faiqinara dufi dufi qimamaqarara anidaqa.
MAT 2:3 Miqi qufanoo rakisirafa Eeroodeefa mi ufana iriseenoo maa fuka karaambaiqafa qini maqa maaqa maraandoo qimaseenoo aranaqoofanoo tautinau. Tautumasoofaqa Yeerusaree maqannaasa misa aiqama naaquqanau. Misa Eeroodeenara rufiaqau. Fuka karaambaiqa namufaqa maasa faqa daruandoo qimasoofanoo naaquqanau.
MAT 2:4 Eeroodeefa tautumaseenoo aiqama amaana maqasaa rakisimarusa misa uriqararausa kai Anutuna sandufara irimarusa faqa aiqama suqu quqaseenoo irammirinoo qinau. Tamummaqarausa akarakinaana yamaqusanai fee Anutuna asauku mundirafa kambiqaannoo fee qufaqa misa qiqau.
MAT 2:5 Yuda maqa maaqa Beetareeqeemma maqusaki kambiqaannoo. Anutuna tamummaqara fasiqa ooqai maaqi qimasee qimaqoofa Beetareeqeema maqusara akara rumaqoofa maridanoo.
MAT 2:6 Inni Yuda maqannaaki kaqikaa maqusa auqu Beetareeqeemma maridanoo kasooqaqee auqu firaa maqusa uriqarara maqusa mariannoo. Mi kaqikaa maqusanakiqari karaambaiqa firaafa kambiqafinoo mariannoo. Mifa qini Anutuna faiqí anaasee Isaraee maqannaasa rakisinnimaqaannoo. Mi ufana Anutuna tamummaqara fasiqa qimaseenoo akara rinau.
MAT 2:7 Eeroodeefa mi ufana iriseenoo fasau asaana rimarusa qumee naaramma quqaseenoo irammirinoo qinau. Mi fasauna innee indaaru qafoofanoo kambiqoo kamuqoo mina oosanara idaaqamasee andeeqasee qimaqimiaqee qinau.
MAT 2:8 Irammiriseenoo misa niqiqaidanoo unna qimaseenoo qimanniminoo qinau. Innee Beetareeqeemma maqusai oonu mi faiqinara amiqiuqanna masee randasee paqurimasee oonurandee aniree qini faqa qimaqimifaqa qinee faqa miqi kai iqa oonu amooqianaura.
MAT 2:9 Mifa miqi qufaqa misa findimeeqee Beetareeqeemma maqusai fiqau. Aanai fimarufanoo fasau fannoo aana amummaqa uqannifiqanau. Mi fasaufa misa nariqa maqusai suani oosanaindari maridaqa qafoo fasaufa kai mi fasaufa kai nifiqanoo fifiufanoo faiqi aanaaqi maruqoo mina amummaqa kasoo inoo marinau.
MAT 2:10 Misa mi fasaufa faiqi aanaaqi maruqoo kasoo inoo marufaqa qafamaseeqa nimuqusa idaaqufaqa nimudaani itairi fufaqa susumamaqaqau.
MAT 2:11 Misa oonureeqa maaqaki keeqafufaqa faiqi aanaaqi kaqikaaqoo afeekaikinoo narí anoona Mariana faqa marufaqa ireeda rufia rufia idaqa ooru keeqafi qafaqau. Mi fasiqausa naaquqoofaqa ooqumarifufaqa noorindari maqasaa kummara mafufaqa amooqimamaqaida susumamaqaqau. Misa Yisunara amooqimaseeqa karaambaiqa nimimaru ainaina minammamiqau. Sia kaiqeesa nimimaruna Yisuna amiqau. Amiqira ainaina idukusee koora munnimma aabaa kai amiqau. Kaifaa afundimaru saqari anoona makaqa anoona fooqaana misa mina faqa aabaa amiqau nári maqusai firaa feefaurummamaree anuna maree mini aabaa amiqau. Kaifaa moo saqari anoona afundi maruna faqa, mandeefana anoona fooqaafa miqi kai iqa aabaa mina amiqau.
MAT 2:12 Miqimmasee marufanoo qaina nifu naroofaqa Eeroodeefa marinnai sia kafaa anirandee fuaqa. Anutufa miqi qufaqa misa moo aatata qumee nimaaqa fiqau.
MAT 2:13 Fasau asaana rimarusa misa fufanoo Anutuna qangiroo moo fannoo Yooseefaana qainasaa afunnareenoo qinau. Eeroodeefa faiqi aanaaqiara randasee rutukirara qidaqinoo. Anee faiqi qisanoosa nifiqeenana Beetareeqeemma maqusara rufiasee Isipa maqusai oonu marinaqa kasooqaqee qinee qianana ooqurandee urua.
MAT 2:14 Miqi qufanoo Yooseefaafa findifinoo eendamuqusai faiqi qisanoosa nifiqeenoo sandeenoo Isipa maqannai ooquree marinau.
MAT 2:15 Eeroodeefa kaqi marufanoo minni marinau. Maaqi qimasee Anutuna ooqeenaa ufa narí tamummaqara fasiqasaa qimaqoofa anoona kambiqanau. Maaqi qimasee mi fasiqafa qinau. Qinee qeeqa qimaaku Isipa maqanaindaraana aaraanauranoo qinau.
MAT 2:16 Eeroodeefa fasau asaana rimarusa nifeesida marusianoo akaru qimasee moo aatata fifufanoo Eeroodeefa minara irinoo aranaqeenoo sia kaiufanoo narí firisuaiqauqa niqiqoofaqa misa Beetareeqeemma maqusa faqa dinni dinni marusa faqa akoonaiqi aanaaqi kai aiqama rutuku taikanau. Eeroodeefa fasau asaana rimarusara mi fasaunara irammirusara minara oonu mafi iriseenoo faiqi naridaqa Yisuna faqa aruaqeera minaramma irinau. Minara irisee qaara aukuana mararausa faqa qambaana aukuana mararausa faqa aanaaqi maqee maqarausa faqa minara iriseenoo akoonaiqi kai aiqama rutuku taikanau.
MAT 2:17 Faiqi aanaaqi aiqama rutuku taikasoofanoo Anutuna tamummaqara fasiqa auqu Yeereemaia mina ufa anoona kambiqanau. Mifa qinau.
MAT 2:18 Innee iriaqa, Ramma maqusai aanaaseeuqa ufa anoona kambiqaannoo. Ikifaafau faqa faaqa fuisee faqa mariannoo. (Yuda maqannaa anaaseera Raseerana araamummaakee qimariqau.) Raseerana araamummaaka nári faiqi aanaaqiara ikiraqeefara moosa aniree nuqa maseeqa idaaqidaaqa maseeqa misara doo taikaaqee qifaqa siamma irifara. Misa nimuqusa mandaiki marifaqa miqiqa maridaqa misa faiqiuqaindi sia mariafaqa miqidaqa. Tamummaqara fasiqa ufa miqi qimasee akara rinau.
MAT 2:19 Yooseefaafa Isipa maqusai kaqi marufanoo Eeroodeefa kuqufufanoo Anutuna qangiroo moo fannoo Yooseefaana qainasaa afunnareenoo akooqoo qimaminau.
MAT 2:20 Findifi doo fua. Faiqi qisanoosa nifiqee kaifaa Isaraee maqusai ooru fua. Ooqai faiqi ariraru fasiqafa doo kuqinoo.
MAT 2:21 Miqi qufanoo Yooseefaafa irinoo faiqi qisanoosa nifiqeeno kaifaa anirandeenoo Isaraee maqasaa ooru finau. (Isaraee firaa maqa maaqa marunaki minaki dinni atinai Yuda maqa maaqa marinau.)
MAT 2:22 Yuda maqasaa oonureenoo Eeroodeena mina amaaku auqu Aakeerausifa doo mifa narí akoona ainaina afapita qumareenoo rakisirafa marinau. Yooseefaafa minara iriseenoo rufiee marinau. Qainasaa afunnaroofanoo Isaraee maqa maaqa dinnatinni Kariree maqa maaqaki oonu marinau.
MAT 2:23 Miqoo kaqikaa maqusai Nasareeteenni naaruara marinau. Miqi qunara Anutuna ooqai maru tamummaqara fasiqauqa misa ufa kambiqanau. Yisufa sia kambiqoo kamuqoo ooqai maaqi qimasee minara akara riqau. Misa minara Nasareetee fasiqa fee qifaranoo fee qiqau.
MAT 3:1 Yisufa kumaaraa marufanoo mi fasannai Yoohaneefa nammari nimimarufa kooroomafinoo afeekaikamaseenoo Anutuna ufa faiqí anaasee maqusa maqusa qimanniminoo ninau. Yuda maqannaasa aadana maqannai faiqí oodaa marunnai Yoohaneefa miqoo oonureenoo qimannimimarinau.
MAT 3:2 Mifa maaqi qimasee fuki faaki qidanoo qimannimimarinau. Anutuna ququsa qusasaa innisaa ititafuannoo. Minara innee aiqamausa inneeqa mandainainara quqasee quandafina Anutufinnai noori ubeekaaqa.
MAT 3:3 Yoohaneefa miqi qimasee qimannimimarufanoo ooqai Anutuna tamummaqara fasiqa Eesaia mifa qimaqoo ufafa anoona Yoohaneenaki kambiqanau. Mifa maaqi qimasee akara rinau. Faiqí moo fannoo faiqí sia marunnaindari aadana maqannaindari ufa fifi qimasee faiqí anaasee maaqi qimasee qimannimidanoo. Karaambaiqa anianifeera mina aana afisuaqa. Aana eendirana andeeqasaifanoo karaambaiqa fuani. Miqi qimasee akara rinau.
MAT 3:4 Mi fasiqafa Yoohaneefa qamunna sia amiqirana afisimarinau. Aadaika aadaikirafa kammeera kisaaqa asausinnai auqirana afisirafa nimarinau. Tamummaqara fasiqa naanna ramasee miqimmasee marinau. (Kammeera fannoo firaa aandau qoosara foora maridanoo. Asausi kisaaqandauqa maruna mina marasee sufusee qamunna auquqaqee afisimariqau.) Yoohaneefa aandau apatannai qamunanda rafaaqafu rumbanau. Mina narana sia narana uqanna. Ookasaasa anoona faqa kaasau oofaafana faqa mina auqu pandaaqa oofaafana mina kai neemarinau.
MAT 3:5 Misa Yeerusaree maqusanaasa faqa Yuda afumakinaasa faqa Yooradanna nammari dinni dinni afainni marusa faqa aiqama Yoohaneefa maruqoo suqiqa marida Yoohaneena ufa irimariqau.
MAT 3:6 Suqumaraidaqa misa nári mandainainara akooroomaseeqa minnisarara kooroo qimarufanoo Yoohaneefa nammariki rafusu ooqu marinnimaqasee marufaqa rumannimaqoofaqa nammarikiqari findifiqau.
MAT 3:7 Farisai amaana ufa qimariasa faqa Sadikai amaana ufa qimariasa misa faqa nammari mararara aniroofanoo Yoohaneefa niqidanoo qimanniminau. Innee sakani faiqi ukadiqa faiqi namuara foora nári nariranara rufiamaree sandee mariafanoo. Yafee innee qumee aaquqima nimaqaifaqee innee Anutuna aranaqaranara rufiamareeqa unna qimasee nammari rumannimaqaannanara qinisaa mandaaqeefaree.
MAT 3:8 Innee kuqaa naundura quandarausee maridaqee. Unna qimariafanoo. Andeeqara oosana maraifaqa qafeeqa inniara kuqaa naundura quandarausee qianaura.
MAT 3:9 Yoohaneefa kaifaa qimanniminau. Innee inneeqara maasa Abarahaana aiku asauku maridaqee sia Anutufa daruannoo fee qimariasa. Maasara amiqirausee qimariasee qimariafanoo. Miqi qimaria ufana sia qiaqa. Qini ufa iriaqa Anutufa maa fifau ooniuqara qinanoo amana Abarahaana aiku asauku kambiqeefaranoo. Nanaree innee fifau maasa Abarahaana aiku asauku maridee qida fee. Fifau faafau ufa dapi ufa qimariafanoo.
MAT 3:10 Doo Anutuna saasunara foora saqari atuka ateekarara rauqiaqee idanoo. Sia naundura quandainausa Anutufa narirafa qusandaannoo. Yasaqari fee sia andeeqasee qaqamma irainafa kudi saqari Anutufa mina ateeka idaraannoo.
MAT 3:11 Kuqaa qinee Yoohaneesa nammari kai inni rumannimaqaida. Inniqa mandainaina minnisee Anutuna ufamau firanara koorooianifeera fifau nammari kai rumannimaqaida. Kasooqaqee qini qinaaqiannai moo fannoo kambiqaannoo. Mifa qini uridaaqaraannoo. Qinee ooreeqarausa mina ameemaanai marianaura. Naqimmasee fee qinee mina dadaaqianauree mifa firaafa qini faqa uridaaqararafa maridanoo. Mifa sia fifau nammarinnai kai inni ooqumarinimaqaannoo. Mifa Anutuna kaaqa areenara maraquna inni naakunnimaqaannoo. Mifa kudimakirana idaqaanifeera idannai faqa inni rumannimaqaannoo Yoohaneefa oofaafana kikiqa usuna maa maqanasaaqaraasara qidanoo qinau. Innee Yisuna asaukuki faiqí anaasee oofaafanara foora doo maridaqa. Kaqikaaqoo utitiqamanniseenoo mina adi fuaqa aquannoo. Anoona narí mareeqeenoo narí maaqaki quqaseenoo aanaaqmaara mandoosana maree mariasa idaraannoo. Ida firaana sia dimbeemari idanaki araannoo.
MAT 3:13 Mi fasannai Yisufa Karidaiaandari qumureenoo Yooradanna nammari afainni Yoohaneefa nammari rumamaqaanifeera quminau.
MAT 3:14 Qumuroofanoo Yoohaneefa saa qimaseenoo Yisuna qimaminau. Qinee ani nammari rumamaqaananoo siamma amanaikiannoo. Anee qini rumaqimaqainanoo amana mariannoo.
MAT 3:15 Miqi qufanoo Yisufa maaqi qimasee qimaminoo qinau. Maqee kaqi rumaqimaqaa, Anutuna ufamau kai fidaqa maaqanda andeeqaanauranoo. Miqi qufanoo Yoohaneefa irinoo eedoo qimaseenoo Yisuna nammariki ukuqnamaseenoo mara uqeeranau.
MAT 3:16 Yoohaneefa Yisuna nammariki keeqa amaqasoofanoo findifufanoo mikari kai innaaruna rakeeufanoo Anutuna naaquqara andeeqara maraquna fannoo Yoohaneefa qafoofanoo nakipurunara foora mambufanoo qumureenoo Yisunasaa quqanau.
MAT 3:17 Quqamafufanoo innaarunaindaraa ufa maaqi qimaseenoo akooqoo Yisunara qinau. Maa fasiqafa kaaqa qini qimuqusira qimaaku marifaqa minara qini qimuqusa asooaifaqa susuidaqa.
MAT 4:1 Miqooqari nammari mara mareenoo Anutuna maraquna fannoo Yisuna rarisameeqeenoo fifau saqanna aadana maqasaa oonikinai quqasoofanoo marinau. Sia fifaufau. Afaannauqa firaafa amanammasee qafaanifeera quqasoofanoo marinau. Oonu marufanoo afaannauqa firaafa Yisuna amanammasee qafaanee qimaseenoo anireenoo maaqi qimaseenoo amanammasee qafanau.
MAT 4:2 Yisufa sia narana marufanoo, qaara fasiqa niku nisauku taikasee eenda faqa faasaana faqa aiqaroofanoo aararanau. Miqimmasee faasaana taikoofanoo firaaqoo aararoofanoo kudoosaapanau.
MAT 4:3 Kudoosaapee marufanoo afaannauqa firaafa mandainainara amanammasee qafarara anireenoo Yisuna qimaminoo qinau. Anee kuqaa Anutuna amaaku mari inana maaqi qimasee kooroo inaqa qafaa, maa oonisara qinanoo feemu kamambinana nainanoo amuaqu inaqa qafaa.
MAT 4:4 Yisufa iriseenoo afaannauqa firaana qimaminau. Anutuna akarakina minara maaqimminoo maridanoo. Faiqí narana kai namasee sia amana marifara. Anutuna ookinaa ufa namufaqa namaseeqa neeqa amana marifaranoo. Qinee mina Anutuna ufamau kai fuanaura. Ani ufa siamma irianaura.
MAT 4:5 Miqi qufanoo afaannauqa firaafa Yisuna afiqeenoo Yeerusareenni amaana maqa, Isaraee maqannaa naaquqara firaa amaana maqa meeraqoo sandaaqai maruna mina ataufakaaqa faakana kisaaqa atisaa muru quqasee qimaminau.
MAT 4:6 Kuqaa anee Anutuna faiqi fee sia fee. Kuqaa Anutuna faiqi mari inana maaqooqari rafusakinana maqasaa meemai aqufinaqa aiqamausa ani qafaaqa Anutuna akara moo minara maaqimminoo maridanoo. Anutufa narí qangiroouqa niqiqainaqa misa nisauku qufiqisaifana minasaa aqufinaqa rafusifaranoo, sia oonisaa aiku rupaurinnaranoo. Minara anee maaqooqari rafusaki aqufinaqa misa ani dadaaqifana sia maqasaa arinnaranoo. Faiqí anaasee qafamasee kuqaa anee Anutuna asauku mundira fee qifaranoo.
MAT 4:7 Afaannauqa firaafa miqi qimasoofanoo Yisufa qimaminau. Anutuna akara kafaa maaqimminoo maridanoo. Anee aneenna karaambaiqa Anutuna sia amanammasee qafeennaranoo. Sia uqanna.
MAT 4:8 Yisufa miqi qimasoofanoo afaannauqa firaafa mina iriseenoo kaqi afeekaikamaseenoo Yisuna kafaa afiqamareenoo aaqana kisaaqasaa afiqee muruseenoo aiqama maqa maaqa maqusa maqusa misa nári areenaranaki marina Yisuna uqafiqaseenoo qimaminoo qinau.
MAT 4:9 Anee maqasaa oorindari rupaitamafinana qini Anutusara foora qimooqinaqa qinee maa aiqama ainainna uqafiqasaunnana ani kaimmamianaura.
MAT 4:10 Yisufa mi ufana iriseenoo kaifaa qimaminoo qinau. Sadanna see maree fua. Anee iria. Anutuna akara moo maaqimminoo maridanoo. Innee inneeqa Anutuna kai amooqiaqa. Karaambaiqa Anutufa mifa qinnandee kai iaqa. Qinee mina ufa kaimma irianaura.
MAT 4:11 Yisufa miqi qimasoofanoo Sadannafa quqasee finau. Fufanoo qangiroouqa Yisufinnai qumureeqa narana aina amidaqa amiqi amiqiqau.
MAT 4:12 Mi kamusaqa rakisirafa Eeroodeefa Yoohaneena nammari rumannimaqee maruna karabusakina rumba quqanau. Yisufa minara iriseenoo Karidaia maqusai finau. Miqoo oonureenoo kaqikaa maqusa moo auqu narí maqusai Nasareetee, miqoo oonu marinau.
MAT 4:13 Kaqikaaqoo miqoo marinoo quqaseenoo Kapeeranauma maqusai Karidaia faruma atinni mi maqusanai ooqu marinau. Kapeeranauma maqusai Seepuruna maqa maaqa faqa Napatari maqa maaqa faqa miqoo Kapeeranauma maqusa maridanoo.
MAT 4:14 Yisufa Kapeeranauma maqusai ooqu marufanoo Anutuna tamummaqara fasiqa auqu Eesaia, mina ooqeenaa ufa anoona kambiqanau.
MAT 4:15 Mifa qinau. Seepuruna maqa maaqaki mariasa faqa Yooradanna nammari dinnafai mariasa faqa faruma dinni, ooruku nammari dinni qambaana maqa maaqaki mariasa faqa Kariree maqa maaqaki aanaamuru oosana oosana mariasa faqa innee aiqama faiqí anaasee asukunaki mariasa maqee kaaqa qarana qafeefaranoo. Kuqiranakiara foora asukunaki mariasa inniki maqee kaaqa qarafa radiqifinoo mariannoo. Tamummaqara fasiqa miqi qinau.
MAT 4:17 Yisufa Kapeeranauma maqusai ooqu maridanoo maa ufana oosana arasee faiqí anaasee maaqi qimasee qimannimimarinau. Innaaruna ququsa adeediranoo maridanoommi, innee inneeqa mandainaina kiqari quandasee Anutufinnai noori ubeekaaqa.
MAT 4:18 Yisufa Kapeeranauma maqusai maridanoo moo faasaana Kariree faruma afaiqara fidanoo qaara fasiqa narí qisafasaasa paqurinau. Miqanda nuqu Peetooroosa Andurusa mariqau. Miqanda firaa pateeuqa nammariki aqimariqau. Misa noodaanna kai arimarusa mariqau. Misa ainaina doo mi ainainna faqaasa mariqau.
MAT 4:19 Yisufa miqanda paqurimasee qimanniminoo qinau. Inneeqara qini faqa aniaqa. Inneeqara maqee maqee noodaanna maree mariaqanda mariafanoo qini faqa anireeqa faiqí noodaannara foora mareeqee Anutuna ququsaki quqeefaranoo.
MAT 4:20 Miqanda mi ufana iriseeqa nári pateeuqa ainaina faqa quqasee findimeeqee Yisuna faqa fiqau.
MAT 4:21 Yisufa miqanda nifiqeenoo miqooqari faruma afaiqara fidanoo kaifa qaaraiqisa fasasa paqurinau. Miqanda nuqu Yameesa Yoohaneesa miqanda nikoona auqu Seebeedi. Sia nammari nimimaru Yoohaneefa marinau, mina amarafa marinau. Miqanda nári nikoona faqa kanuqaki ooqumaridaqa fafaa eendaki nári pateeuqa nammariki aqusee noodaanna maraanee qidaqa deedaqimariqau. Misauqa faqa noodaanna ainainirana faqaasa mariqau.
MAT 4:22 Yisufa naaramasoofaqa miqanda findifufaqa nári kanuqa faqa nári nikoona faqa minnisee Yisuna faqa fiqau.
MAT 4:23 Mifa Karidaia maqa maaqa aiqama fiqu fiqu inoo nidanoo innaaruna ququsara fuka ufa qimanniminoo ninau. Aurimarusa faqa oosana oosana ainaina maree marusa faqa teeroouqee marusa faqa idaaqamannimaqee marianu.
MAT 4:24 Miqi marufanoo mina auqu aiqamai daraaninau. Siria maqannaasa faqa aiqama iriqau. Iriseeqa amiqi marusa misa aiqama oosana oosana aurirana maree marusa faqa kaaqa nidafi marusa faqa faiqí fueena naundurai keeqeemarusa faqa fuseenasana nári marusa faqa niku nisauku aadanusi marusa faqa aiqama Yisufinnai maraida munu quqee marufanoo Yisufa andeeqannisee marinau.
MAT 4:25 Mifa maqusa maqusa fimarufaqa faiqí anaasee moomoo suqumaree mina faqa fimariqau. Karidaia maqa maaqaindaraasa faqa qisaukuqara taikasee maqusa marunaki marusa faqa Yeerusaree maqannaasa faqa Yuda maqa maaqa afumaki marusa faqa Yooradanna nammari dinnafai marusa faqa suqu maree mina faqa fiqau.
MAT 5:1 Mi fasannai mi aukuanna Yisufa faiqí anaasee moomoosa narí faqa fimarusa niqafamaseenoo qufaqa kaqikaa amuaqunamusaa ooru narí faiqi namufaqa faiqí anaasee faqa fiqu fiqumma ooqu marifufanoo ufa maa qimaria amaana ufana qimanniminau.
MAT 5:3 Faiqí moo fannoo nariara qinee qeeqara sia amanaikidee qimasee dadaaqi marifa dadaaqinaqa minannai kai andeeqasee marianauree qimarifa mifa uqanna anoona asasiranaki maridanoo. Innaaruna ququsara Anutufa amianinnanara asasidanoo.
MAT 5:4 Noori runusee soofari mariasara foora marifa narí aaqaranara faqa faiqí aanaaseera faqa irisee oori runusee marifa mifa uqanna anoona asasiranaki mariannoo. Anutufa amiqi amiqirana amianinnanara asasidanoo.
MAT 5:5 Reendeeni mariasa misa uqanna anoona asasiranaki marifaranoo. Anutufa narí innaarunai qumiasana nimianinnanara asasidaqa.
MAT 5:6 Faiqí anaasee andeeqasee Anutuna iriranamau firaa iriranara aiqama irirana arusee uriqarara iriranee qimasee mi mau fimariasa misa uqanna anoona asasiranaki maridaqa. Anutufa misa dadaaqinaqa mi mau kai fifaranoo. Minara asasidaqa.
MAT 5:7 Niqoonausara qimudaoo qimasee nifauee mariasa misa uqanna anoona asasiranaki maridaqa. Anutufa misara faqa qimudao̱o qimasee nifauama nimaqaaninnanara asasidaqa.
MAT 5:8 Anaaqi faiqiara foora nisakadiki sia ikairi marisa misa uqanna anoona asasiranaki maridaqa. Anutufa narí oori faqa narí marirana faqa uqannifiqaaninnanara asasidaqa.
MAT 5:9 Tinoo taanoo rirana uqeeraafaqa asooarana nimida faafaa qimariasa misa uqanna anoona asasiranaki marifaranoo. Anutufa misara qini faiqi namu fee qianinnanara asasidaqa.
MAT 5:10 Anutuna iriranamau firana akiaqara narinausa misa firaa asasiranaki marifaranoo. Anutufa narí innaaruna ququsa nimianinnanara asasidaqa.
MAT 5:11 Faiqí anaasee qini duqu saara inniara fidiaqaaidaqa naridaqa mandaikamma nimaqaidaqa oosana oosana mandainainara inniara unna qimarifaranoo. Miqifaqa innee anoona asasiranaki mariaqa.
MAT 5:12 Qini ufa saara arirana akiaqara Anutufa innaarunnai firaa feefaurutia quqannimaqaifanoo maridanoo. Minara irisee sia noori runuaqa, firaaqoo asasiaqa. Sia inni kai narirafa maridanoo. Ooqai Anutuna tamummaqara fasiqauqa faqa miqi kaimmidaqa narimariqau.
MAT 5:13 Qinee sia fifau inni maa ufana qimannimidaqa. Innee qini ufa irimariasa maa maqa maaqanasaa oorukuara foora mariafanoo faiqí anaasee aiqama adiafaamma nimaqaanifeera. Innee qini maa ufana rukiaifaqa faiqí anaasee yai fee adiafaairana paqurifaree. Ooruku indeemariasa amiqira ooruku indasee maaqaki quqaidaqa. Manda ooruku indasee qafaafanoo mandaikifaqa doo aqusaafanoo madaapeekammidanoo. Innee qini maa ufana rukieeqa manda oorukuara foora marifara, manda oorukuara foora madaapeeki aqusaifaqa marifara.
MAT 5:14 Innee qini ufa irimariasa maa maqa maaqanasaa qoomara foora mariafanoo. Maqusa moo fannoo aaqanasaa maridanoo faiqí anaasee aiqamausa arumundari qafaaqa sia kukeeqanoo maridanoo, akooqoo maridanoo. Innee qoomara foora miqikai iqa, kaaqa qaidaqa akooqoo mariafanoo, qaidaqa arumuki faqa kaaqa qeemariafanoo.
MAT 5:15 Faiqí moo fannoo rambi qumbiseenoo sia kukeeqarannai quqaani, uqeeraraqoo quqaqainanoo aiqama maaqakinaasa faqa kaaqa qamannimaqaannoo.
MAT 5:16 Innee miqi kai iqa rambi fooqaana niqoonausaki kaaqa qamannimaqaifaqa misa inni andeeqaranara qafamasee quandafinaqa inneeqa innaarunnai nikoonara susuiaqeera.
MAT 5:17 Innee iriaqa. Mooseena sandufa irimariafa faqa nikoona tamummaqara fasiqauqa ufa irimariana faqa, sia mina rukiararau qumidau. Mi ufafa anoonaikianifeera qinee qumidaqa.
MAT 5:18 Simai, qini ufa iriaqa innaaaruna faqa maqa faqa firaa ainaina maridanoo. Mooseena sandufa faqa firaa ufa maridanoo sia dauni taikaannoo. Ati faqa kaqikaafa faqa sia uqanna taikaannoo kaqi uqanna mariannoo. Mooseena sandufa fifi inoo anoonaikinnaqoo miqoo innaaruna faqa maqa faqa mi sandufana faqa doo miqoo kai taikaannoo.
MAT 5:19 Faiqí moo fannoo Mooseena sandufa aiqama muduka uqeeraidanoo ati kai rukiainafa faiqí moo aakapeenoo anee faqa miqiannee qinafa mifa innaaruna maqusa ureeqarafa mariannoo. Faiqí moo fannoo Mooseena sandufamau fidanoo naakapainafa mifa innaaruna maqusa uriqararafa mariannoo.
MAT 5:20 Innee iriaqa Mooseena sandufa akoofasauqa faqa Farisai amaana ufa qimariasa faqa misa irirafa sia andeeqanoo maridanoo sia uqanna innaarunnai fifaranoo. Innee faqa inneeqa andeeqara oosana misa nimana kai ooreeqaqa maridaqa sia amana innaarunai fifaranoo. Inni andeeqara marirafa misaindi firaaqoo oorinaaqaramasee marinaqa innee amana innaaruna ququsaki fifaranoo.
MAT 5:21 Yisufa kaqi qimannimidanoo qinau. Maasa Yuda maqannaasa qikeeku qikaaku ufa maaqimminoo maridanoo. Sia innee faiqí naruannee qimasee kuqa naruaqa. Ya fee faiqí moo fannoo faiqí naruannee qimasee kuqannarinafa kootai maridana ufa mareennaranoo.
MAT 5:22 Mi ufafa miqimminoo marifaqa qinee minara maaqi qidaqa. Ya fee faiqí moo fannoo sia firaa ainaina kaifau koota maridanoofau, fifau narí akaqaafasaara aanoo inafa maqusai kootaki ufa maraannoo. Ya fee faiqí moo fannoo fifau narí akaqara furufara midanoo mifoo qinafa mifa firaa kootaki maridanoo ufa maraannoo. Ya fee faiqí moo fannoo fifau narí akaqara manda ufa qimamaqainafa karaambaiqa marinannai oonuraina ani idaki mara aquandoora.
MAT 5:23 Yisufa moo ufa qimanniminau. Innee inneeqa Anutuna amira ainaina aandau fee ooni fee nana ainaina fee Anutuna amianauree qimasee amaana maqaki munuseeqa inniqa nikeeku nikaaku Mooseena sandufa afaqaidee qimasee imarundee iqa, Anutuna amianee qimaseenana aneenna akaqaafasaa faqa ani aqiranara irisee sia kaqi Anutuna amiaqa.
MAT 5:24 Aandau aina mina quqaseeqa oonurandee inneeqa nikaqaafasaa faqa moodaaqoo ufa qimaseeqa reendeenamma finaqa doo miqoo kai aandau aina Anutuna qaindasaa quqaa.
MAT 5:25 Yisufa moo ufa maaqi qimasee qimannimidanoo qinau. Faiqí moo fannoo aniara mandaikamma qimaqaannee qimasee ani kootai afiqee finana aanai munu dauni andeeqa taikeenana aqoondikia. Sia andeeqa taikainanoo ani mareeqeenoo kiapana munu amiannoo.
MAT 5:26 Mifa ani mareeqee firisuaiqa aminanoo ani rumbaannoo. Simai, qini ufa iriaqa. Anee rumbaranaki marinanoo ani numoo akiaqa aiqama uqanna taikafinana mikari kai misa ani iduku aiseefaranoo.
MAT 5:27 Maasa Yuda maqannaasa ufa maaqimminoo maridanoo. Innee sia moo fasiqa anaaqa ummuariaqa. Mi ufafa miqinoo marifaqa qinee minara maaqi qidaqa Maasa Yuda maqannaasa qikeeku ufa maaqimminoo maridanoo. Innee sia moo fasiqa anaaqa ummuariaqa. Mi ufafa miqimminoo marifaqa qinee minara maaqi qidaqa.
MAT 5:28 Qine e kuqaa ufa qimannimidaqa faiqí moo fannoo moo anaasee qafamasee iriranakiqari umee kai mina mararee qinafa anee doo aaqamaseenana mina faqa aneenna amuqusakiqari manda o osana auqaananoo.
MAT 5:29 Ani asaukuannai afu fannoo ani aaqaranaki quqaisainana mi afuna pitaqima aqua. Moodaa afaaqa taikafinanoo amiqirafa mariannoo. Anutufa aiqama afaaqa idaki aqusainanoo manda mariannoo.
MAT 5:30 Ani asaukuannai asauku fannoo ani aaqaranaki quqaisainana mi asaukuna ateeka aqusaa. Moodaa afaaqa taikafinanoo amiqirafa mariannoo. Aiqama afaaqa Anutufa idaki aqusainanoo manda mariannoo.
MAT 5:31 Maasa Yuda maqannaasa qikeeku qikaaku ufa maaqimminoo maridanoo. Faiqí moo fannoo narí anaaqa minnisaanauree qimasee sia fifau minnisaannoo. Papiqasaa maa anaaseefa qini qinaaqa mariuna doo minniseeqa miqi qimaseenoo mi papiqanasaa akara rumeeqeenoo mi anaaseena amiannoo. Amiseenoo doo aqiqaannoo.
MAT 5:32 Mi ufafa miqimminoo maridanoo, qinee Yisusa minara maaqi qidaqa. Faiqí moo fannoo narí anaaqa aqiqee mariana sia ummuari mari anaaseena amiqimari anaaseena fifau aqiqee marifa mi fasiqafa narí anaaqa mareeqeenoo ummuariranaki quqaidanoo. Quqasaifanoo faiqí moo fannoo mi anaaseena maraifa mifa faqa ummuarammidanoo.
MAT 5:33 Maasa Yuda maqannaasa qikeeku qikaaku ufa maaqimminoo maridanoo. Faiqí moo fannoo Anutuna afusaa ainainiani qinafa kuqaa mi ainainna ia. Sia Anutuna afusaa unna qia.
MAT 5:34 Mi ufafa miqimminoo maridanoo, qinee minara maaqi qidaqa. Sia Anutuna afusaa ufa afeekaikamandee asauku uqeeraaqa. Sia mi oosanna araaqa.
MAT 5:35 Sia innaarunaira qimasee amana aqiqaa. Miqoo Anutufa ufaqira qaari miqoo ufiqinoo maridanoo. Sia maa maqa maaqanara qimasee nimana aqiqaaqa. Maa maqa maaqanakina Anutufa aiku ramaqai maqa maaqafa maridanoo, naaquqaani sia nimana aqiqaaqa.
MAT 5:36 Sia Yeerusareeara qimasee nimana aqiqaaqa. Yeerusaree firaa karaambaiqa Anutuna maqusa maridanoo, qimasaida qimariana minnisaaqa. Inneeqa nikiaqa kikiqa ususaida nimana aqiqee mariana sia miqiaqa. Innee amanee inneeqa kai moo fannoo eekara nikiaqa auqida fee moo fannoo dunduqarira nikiaqa auqida fee, sia amana auqifara. Anutufa kaimmauqinau. Naaquqaani sia nimana aqiqaaqa.
MAT 5:37 Minara innee eedoo qiaqeera eedoo kai qiaqa. Innee qaoo qiaqeera andeeqasee qaoo kai qiaqa. Anee moo ainaina kikiqa usinana aneenna amuqusa ookiqari mandainaina marinakiqari moo ainaina kikiqa ususee unna qiananoo.
MAT 5:38 Ooqeenaa Mooseena sandufa maaqi qimaqoofa marida qinee iridaqa. Faiqí moo fannoo moona afu dimbaqaifaqa, faiqí firaasa ufa qimasee mina aru fasiqana narí afu dimbeefara. Kafaa moo fannoo asaukusamu moo oori arifanoo afai rufidifaqa faiqí firaasa ufa qimasee aru fasiqana narí afai rufidifaranoo.
MAT 5:39 Mi ufafa miqimminoo maridanoo, qinee Yisusa minara maaqi qidaqa. Moo fannoo mandaikammamaqainana anee sia kaifaa quandafi narí mandaikammamaqaa. Moo fannoo ani aapaasa arinana sia aanoo ia, sia qaoo qia, dinni faqa kai quandasainanoo dinni faqa aruani.
MAT 5:40 Faiqí moo fannoo kootai ani afiqee munuseenoo kootammamaqaseenoo ani siuta raipaqu marainnana sia oori runua, moo faqa amiqirana raipaueeqee kaqi aabaa mina faqa amia.
MAT 5:41 Faiqí moo fannoo qafee faqaa fee sundia fee kiapa fee aniara qini faqa qini ainaina faqa sia feefauru amianaura kaqi qifiqeenana moo maqusai munuqisaannee qinana anee oori quqaseenana sia feefauruara iriseenana oori runua, mi maqusana fiaaqaree moo maqusai eedoo qimasee munaisaa.
MAT 5:42 Faiqí moo fannoo munnimma fee qamunna fee qinana kaqi amia. Sia qaoo qia. Faiqí moo fannoo ani moo ainaina ufaasu qimiannee qinana sia qaoo qia, kaqimmamia.
MAT 5:43 Misa ufa maaqinoo maruna iridaqa. Inneeqa niqoondiara nimuqusaki nidiani. Inneeqa namuqaara fidiaqaamiani. Misa ufa miqimminoo marifaqa minara qinee iridaqa maaqi qidaqa.
MAT 5:44 Inneeqa namuqaara faqa nimuqusaki nidiani. Innee qini ufa irinausa mina saara narifaqa misara faqa quandafi innaaru qiaqa. Anutufa misa amiqi amiqianifeera innaaru qimannisaaqa.
MAT 5:45 Miqiqa kai Anutufara foora marifaranoo. Mifa Anutufa miqiranara kai mifa qifanoo suani fannoo aiqamausa Anutuna namuqaaki mariasa faqa aqoondiki mariasa faqa aiqamatinai kaaqa qamannimaqaidanoo. Miqiranara kai Anutufa qifanoo aaku ridanoo andeeqarausa faqa sia andeeqarausa faqa ainaina ummaqusaafanoo kambiqa nimaqaidanoo.
MAT 5:46 Innee inni nidinausa kai nidinaqa innee naqimmasee Anutufa mina akiaqara maasa feefauru qimiannoo fee qifaree. Sia nimiannoo. Innee miqinaqa unna qira takisa maree mariasa naanna reemariasa mariafanoo.
MAT 5:47 Innee inni nidirausara kai nidinaqa amana amana kai mariafanoo. Innee sia aanaamuru urinaaqaraida. Misa faqa narí aidi narí aidirana amana amana kai mariafaqa minara qinee inni qimannimiqa. Inni namuqaara faqa nimuqusaki nidiani sia aqoondiara kai nidiani.
MAT 5:48 Inni innaarunnai nikoofa andeeqarana fiqararafa maridanoo. Sia namuqaa fee qidanoo, sia maana qini qiqoondi fee qidanoo aiqamausa amiqi amiqimannimaqaidanoo. Innee faqa miqi kai iqa mina aanna raaqeera qidaqa.
MAT 6:1 Yisufa narí faiqi namufaqa faiqí anaasee faqa maaqi qimaseenoo qimanniminoo qinau. Innee qini ufa irimariasa Anutunara iriseeqa moo amaana saika fee aqoonausa dadaaqira fee mina auqarara sia aiqamausa nifusaa auqaaqa. Kukeeqasee reendeenamasee auqaaqa. Aiqamausa nifusaa mi ainainna auqainafa minara faiqí anaasee aiqamausa qiqafaaqeera miqinnaranoo. Miqinana Anutufa siamma innaarunai mina akiaqara ani feefauru amaqaannoo. Qumee kai aiqama ainaina narí Anutuna afusaa kai dadaaqinanoo Anutufa doo narí qafaida mina akiaqara ani feefauru innaarunai quqammamaqaannoo.
MAT 6:2 Qaaraiki mariasa misa moo amiqira ainaina dadaaqinoo aqoonausee Anutunee nimiani qimaseenoo maqusa qambaana oonuree ukeena fuaqasee faiqí anaasee nifusaa dadaaqinaqa qiqafamaseeqa qimooqiaqeera qimariasa doo nariqa miqoo taikaida miqidaqa. Innee sia misa naanna raaqa.
MAT 6:3 Innee moo amiqira ainaina dadaaqammamianeera qumee kai maqandanai amia, faiqí nifusaa qafee foora.
MAT 6:4 Qumee kai amimarinanoo inni nikoofa aiqama qumee ainaina qafee marifa mina akiaqara ani feefauru quqammamaqaannoo.
MAT 6:5 Innee innaaru qidaqa misa qaaraiki mariasa naanna sia raaqa. Misa amaana maqaki kikiqamafidaqa qimariasa maqusa qambaanai kikiqama fidaqa qimariasa innaaru qidaqa. Faiqí anaasee aiqama qiqafaaqee qidaqa miqidaqa. Qinee anoona ufa uqanna inni qimannimidaqa. Doo misa miqiana akiaqara doo faiqí nimooqirana kai maraidaqa. Miqoo taikaida miqidaqa.
MAT 6:6 Innee innaaru qidaqa inneeqa maaqaki inneeqa kai keeqafinana kooqi ititaseenana qumee kai inneeqa nikoonara innaaru qifanoo, aiqama ainaina kukeeqarana faqa qafee marifa ani qafamaseenoo mina akiaqara amaqaannoo.
MAT 6:7 Innee innaaru qidaqa aanaamuru mariasa naanna sia raaqa. Misa sia ufara randaidaqa ufa fannoo urirara kai urirara kai qidaqa. Misa Anutufa maasara amiqimmasee irianifeera qimasaida miqidaqa.
MAT 6:8 Misa naanna sia raaqa. Inni nikoofa sia innee irammiriaqoo kai iridanoo. Ooqai mifa irimarifa maridanoo. Minara fifau ufa urirara kai urirara kai qidaqa sia innaaru qiaqa.
MAT 6:9 Innee innaaru qirara maaqi qimasee innaaru qiaqa. Oo innaarunai qikoofa faiqí anaasee aiqama ani auquara uriqaramasee naaquqaani.
MAT 6:10 Ani innaarunai ququsa maa maqanasaa kambiqaani, innaarunai ani aiku asauku mariasa ani iriranamau kai andeeqasee fimariasa maridaqa maasa maa maqanasaa qaraasa misa naanna ramasee mi iriranamau kai fuaqaana.
MAT 6:11 Anee maqee faasaana maasa qimanasaa narana qimia.
MAT 6:12 Akaqausa maasa manda ainaina qimimariana maasa minnisaanana miqikai inana anee faqa maasa manda ainaina akiaqara maraqu qisa.
MAT 6:13 Sia anee maasa rarisameeqeenana afeeka nimaniraqoo quqaqisaa. Manda fasiqa asaukuki marunnana anee Anutufa uqeereeqee kaqinni amiqiraqoo quqaqisaa.
MAT 6:14 Yisufa mi ufanara kaifaa maaqi qimasee qimanniminoo qinau. Innee inneeqa niqoonausa faqa aanaamuru faqa manda oosana akiaqara mininnisaifanoo innaarunai nikoofa inni manda oosana akiaqara faqa minnisaannoo.
MAT 6:15 Innee inneeqa niqoonausa faqa aanaamuru faqa manda ainaina sia mininnisaifanoo inni nikoofa miqi kai inoo sia innindi faqa mara aqunnisaannoo.
MAT 6:16 Innee narana minnisee naararee marinaqa innaaru qidaqa qaaraikimariasa naanna sia raaqa. Misa narana minnisee innaaru qiaqeera noori runusee doona akiiseeqa maridaqa faiqí anaasee sia narana naidammiafoo qiaqeera miqidaqa. Qinee anoona ufa uqanna inni qimannimidaga. Misa miqoo kai taikaida miqidaqa.
MAT 6:17 Innee narana minnisee innaaru qiaqeera sia miqi iaqa. Innee nammari auqamasee qamunna amiqirana afisusee nikiaqa auqamaseeqa naanaidara qidana faiqí anaasee ani qafamasee maaqi qifara, maafa sia narana minnisaidanoo innaaru qidanoo miqi qiaqeera miqinnaranoo. Anutufa kai inni nikoofa aiqama qumeendaraa ainaina faqa qafee marifa mifa kai qafamasee mina akiaqara animmamaqaannoo.
MAT 6:19 Innee maa maqa maaqanasaa sia aiqama qumiasana oosana oosana mareeqee quqaseeqa afeediaqa. Taafi aruani, atauku aruani, qooqoosa aukuani, ummuara fasiqa aniree ummuara mareefaara.
MAT 6:20 Innaarunai kai qumiasana oosana oosana afeedi iseenana miqoo marinanoo sia taafi aruannoo sia qooqoosa aukuannoo sia ummuara fasiqa mareefara amiqira qoo kaqi mariannoo.
MAT 6:21 Inni irirafa inni nimuqusa inniqa qumiasana mariqoo kai miqoo kai irirafa mariannoo. Minara innaarunai kai qumiasana afeediaqeera qidaqa. Inni irirafa miqoo kai mariannoo.
MAT 6:22 Faiqí nifiriki niqafeemarifa afaaqa kaaqa qarafa maridanoo narí ainainara sia tatamaqifa kaqi paapaa idanoo nimimarifa. Faiqí moo fannoo oori akooqarafa narí ainaina kaaqa tatamaqimarifa maridanoo. Inni noori nifu miqifaqa innee asukunakinai mariafanoo.
MAT 6:24 Moodaa fasiqa fannoo sia amana qaara rakisiraqanda moodaa kari ainainamma nimaqaannoo. Mifa indaaruqaa rakisiranara akooqaannoo moo rakisiranara aidiannoo. Sia miqinoo mifa moo rakisiranasaa atooqaannoo moo rakisirana minnisaannoo. Innee miqi kai iqa mariafaqa sia amana Anutunara faqa maqasaa qumiasanara faqa moodaanaki sia amana ainainamma nimaqeennaranoo.
MAT 6:25 Minara qinee qimannimidaqa. Innee sia inneeqa kaqi mariranara nimuqusiaqa. Inni narana neemariana faqa nammari neemariana faqa qamunna afisimarianara faqa sia minara yai fee maraanau yai fee maraanau qiaqa. Qamunna narana oorudupirafa marinara sia minara irinanoo umaara raani. Anee sia kuqimariananoo kaqi mariannanara minara kai asasiaqa. Aneenna kaqi mariannanara mina akiaqara firaa ainaina maridanoo narana faqa nammari faqa qamunna faqa oorudupirafa maridanoo.
MAT 6:26 Innee kaaqa qamunna naranara rimariasa qinee nindafaidaqa. Qufini sia narana ummaqidaqa sia aiqidaqa, sia afeedidaqa, kaqi narana naidaqa. Anutufa misa nimidanoo. Anutufa ufini ririmma kaqikaa ainaina dapi ainaina narana niminoo inani. Innee faiqí firaa ainaina mariafanoo uriqaraqa mariafanoo inni faqa nimiannoo.
MAT 6:27 Amanee anee aneenna kuqirana amuqusiranannai aneenna marirana firarisamasee kisaaqasaa marinnaree. Sia amana. Doo nanaree fifau naranara ummaara raidanoo fee.
MAT 6:28 Nanaree fifau qamunnara yai fee maraanau yai fee maraanau qidanee. Innee nandaki kaasau taatuqee tamookeena qafamasee minara iriaqa sia ainainidaqa sia qamunna akunusee afisidaqa. Anutufa taatuqee qamunnara foora afisuamaqaidanoo.
MAT 6:29 Ooqai Sooroomoonafa mifa amiqira qamunna qaueesa reemaru qamunnana afisimarufa, koora ainaina faqa afisimarufa, sia mifa maa kaasau taatuqeena afufeenaara imarindee sia mina qamunna uriqararafa marinau, mina qamunna ureeqarafa marinau, doo saa qamunnara ummaara raranara doo minnisaaqa.
MAT 6:30 Kaasau qusau ainaina Anutufa qamunnara foora nimidanoo. Sia mina kisaaqasaa marira ainainau nimidanoofau. Maqee kasidanoo duna ateekasee ida araseefandinna ainainafa maridanoo. Innee faiqí sia miqirausa. Innee kisaaqasaa inni aukuana marifara. Anutufa qusau ainaina ririmma qamunna nimidanoo inni faiqí fiqaramasee nimiannoo. Innee faiqí qamunna ainara kai nimuqusimarianara Anutunara kaqikaaqoo kai irirana Anutunasaa rusi mariafanoo, aaqaida miqimariafanoo.
MAT 6:31 Innee sia nimukaina maaqiaqa nana qamunnee afisuanauree nana naranee naanauree, nana nammari fee naanauree. Sia miqi qiaqa.
MAT 6:32 Anutuna ufa sia irimariasa misa miqi qidaqa. Innee sia misa naanna raaqa. Innee inni innaarunai nikoonara kai iriaqa. Mifa faasai inni narana inni qamunna ainainara faasamma iridanoo.
MAT 6:33 Innee Anutuna ququsara faqa inni andeeqarafa Anutuna andeeqara fara foora marinaqa mi irirafa kai marinanoo niqinaaqa mara quqaseeqa fifanoo maasa narana aina faqa qamunna ainaina faqa Anutufa qimiannoo.
MAT 6:34 Minara qinee inni qimannimidaqa maqeera kai iriaqa. Duna faasaana ainainara sia irinanoo ummaara raani. Duna narí kai narí aiqama kambiqaaninna ainainara rakisiannoo. Faasaambaasaana maqee ainainara kai iriqa fuaqa qidaqa.
MAT 7:1 Yisufa qinau sia inneeqa niqoonausa aaqaranara maqee maqee misa niqiaqa. Anee miqinanoo Anutufa miqi kai inoo ani aaqaranara ani faqa aqiannoo.
MAT 7:2 Anee mi aikana kai raquru niminaqa Anutufa mi aikanannai kai ani faqa raquru amiannoo. Anee nana aqira ufa faiqí anaasee akaqausa niminanoo Anutufa mi ufanannai kai aninna rafaaqafu amaqaannoo.
MAT 7:3 Anee nanaree aneenna akaqaafasaa afuki saqari arai marifanee ufa qidanee. Mee ani afuki muduka saqari akatia marinara anee sia fee iridanee.
MAT 7:4 Aneenna akaqaafasaara nana oosana maraidanee mai anirainaqa mee ani afuki saqari arai marina mara aquanee qidanee. Aneenna afuki firaa saqari akatia marinara siamma iri mariananoo.
MAT 7:5 Qaaraiki marianafa mandaiki marianafa. Aneenna naaree aneenna afukina mee firaa saqari akatia marina mara aquseenana andeeqaseenana afu maqaseenana miqoo quandafinana aneenna akaqaafasaa afuki kaqikaa saqari arai marinnana mara aqinanoo andeeqara oosana mariannoo.
MAT 7:6 Innee amiqira narana faini nimidee. Sia nimimariafanoo. Faini sia mi amiqira naranna aminnanara iriannoo amina namaseenoo kaqi quandafinoo ani ukaqa amiannoo. Aneenna afaaqa auqira ainaina kuarauqa nimidee, sia nimi mariafanoo rakeekaamminoo doona ramasaannoo. Miqi kai masee innee furufarira fasiqa anaasee irimari ainainna sia nimiaqa. Sia irifaranoo. Faini kuara rakeekaa inoo doona ramasaani.
MAT 7:7 Anee ainainara sarauqinana Anutunara innaaru qinanoo ani amiannoo. Ainainara sarauqinana Anutufinnai randainanoo mifa uqafiqaani. Ainainara sarauqinana Anutuna kooqi arinanoo mifa kooqi rafaqaamasee ani amiani.
MAT 7:8 Aiqama ireemariasa mareefaranoo. Randeemariasa paqurifaranoo. Kooqi arimarifa mifa kai kooqi paqurinoo maaqaki keeqafinoo irai ainaina maraannoo.
MAT 7:9 Innee faiqi nikausa qimannimidaqa inneeqa nimaaku aniara naranara innaaru qifaqa ooni nimifaree. Sia ooni nimifaranoo inneeqa nimaaku noodaannara innaaru qifaqa amanee innee manda sakani nimifaree. Sia sakani nimifaranoo.
MAT 7:11 Innee manda oosana maree mariasa mariafanoo inneeqa faiqi namu innaaru qiafaqa amiqira ainaina kai nimimariafanoo. Innaarunai nikoofa amiqirafa uqanna maridanoo minara innaaru qimarinausa minara narí firaaqoo amiqirana amana kai amiqira ainaina kai nimiannoo.
MAT 7:12 Anee nana oosanaree aididanoo fee faiqí anaasee ani amifaree, anee amiqira oosana kai qimia qee qimariananoo. Doo anee naaree miqira amiqira oosanna kai faiqí anaasee maqee maqee kaqi nimia. Mooseena sandufa faqa tamummaqarausa ufa faqa misa ufa anoona mi ufanaki kooroo inoo maridanoo.
MAT 7:13 Innee innaaruna aatata fiqa tiqeera kooqiki keeqafi fuaqa. Idaki fimaria kooqifa firaafa maridanoo. Mi aanafa faqa firaafa kai maridanoo. Nianasaa mafi aqirafa firaaqoo maridanoo. Faiqí anaasee moomoosa maqee maqee miqoo fimariaqoo maridanoo.
MAT 7:14 Kaqi marira kooqi tiqeeraikinoo maridanoo, mi aanafa faqa tiqeeraikinoo maridanoo, afeeka aatata maridanoo. Faiqí anaasee moodaa moodaa mi tiqeera kooqina paqurida fimariafa maridanoo. Innee miqoo kai fuaqa.
MAT 7:15 Innee unna qira amaana ufa qimannimira fasiqauqara eerairiaqa. Misa maaqeena faini reendeenira faini apata afisirafa aniraannoo, minara rufiaaqa. Aundurai kaasau faini miqirafa maridanoo. Ukaqa nimiandoora minara rufiaaqa.
MAT 7:16 Maaqimmasee misa oosana iriaqa. Naqimmasee saqari qafararee. Anee oonureenana qaqamma kai qafaa. Moo saqari qafainanoo qaqamma iranoo marinara amiqira fee qinnaranoo. Moo saqari fannoo amiqira amanee maridanoo qaqamma siaifa, adusa maridanoo. Unna amaana ufa qimannimimaria fasiqausara miqi kai inoo saqari kikiqa usirafa maridanoo. Kamukamuna qaqamma fannoo amuka faqaa sandasaa iranoo marinanee diqinnaree. Sia miqoo iranoo mariannoo. Faafisa qaqamma fannoo reereeroondaanasaa iranoo marinanee tiqinnaree. Sia miqoo iranoo mariannoo.
MAT 7:17 Amiqira saqari fannoo amiqira qaqamma kai iraidanoo. Mina dinni manda saqari fannoo manda qaqamma kai iraidanoo.
MAT 7:18 Amiqira saqari fannoo sia amana manda qaqamma iraannoo. Kafaa mina dinni manda saqari fannoo sia amana amiqirana iraannoo.
MAT 7:19 Saqari moo fannoo manda qaqamma adusa iraifaqa ateeka idaraidaqa.
MAT 7:20 Amaana ufa qimannimimaria fasiqausa saqariara foora mariannoo. Minara qinee inni qimannimida. Amaana ufa qimannimimaria fasiqausa naaqa oonuree misa marinna oosana nimarinna oosana qafaa. Qafamasee andeeqee mari fasiqanara amiqira amaana ufa qimari fee qiaqa. Mina dinni aaqee mari fasiqanara manda amaana ufa qimari fee qiaqa.
MAT 7:21 Yisufa kafaa maaqi qimasee qimanniminau. Faiqí fifau misa nookiqari qiniara karaambaiqee karaambaiqee qimariasa sia innaaruna ququsaki fifaranoo. Qini innaarunai qikoona iriranamau fimariasa misa kai innaaruna ququsaki keeqeefaranoo.
MAT 7:22 Innaarunai keeqeemaria aukuanafa kambiqafinaqa moomoosa maaqi qimasee qimaqimifaranoo. Oo karaambaiqa karaambaiqa. Maasa maqasaa maridaqa aniara maasa ani amaana ufa qimannimiaafanausa maridaqa. Maasa fueenasana aruna ani auqu ramasaida innaaru qimasee mara aqunniseeunausa maridaqa. Maasa miqi mariafanausa maridaqa. Doo maasa ani auqu ramaseeqa moomoo firaa afeeka ainaina auqimariafanausa maridaqa, doo anee minara irisee maasa faqa innaaruna ququsaki mara quqaqisaa.
MAT 7:23 Misa miqi qifaqa qinee maaqi qimasee misa nifusaa qimannimianaura. Qinee sia uqanna inniara irimariafanausa. Doo qini qifusaaqari fuaqa. Inni oosana eendaandirafa maridanoo. Doo fuaqa.
MAT 7:24 Faiqí moo fannoo qini dookinaa ufa iriseenoo sanafaunaana anoona qinee qimaqaunamau kai andeeqasee fimarifa, mifa nana ainaina fooqaa fee maridanoo fee. Mifa amiqirafa irira fasiqa fooqaafa maridanoo. Narí maaqa atuna meemai ooniki mapukusee arusaifa maridanoo.
MAT 7:25 Mi maqafa marifanoo aaku firaafa riri ifanoo nammari maaqa ameemaanai taatarunna mandi maree ooqufinoo ufai firaafa uqinoo sia mi maqana rapee inoo. Ooniki maaqa usakaqoonara sia rapeeinau. Faiqí moo fannoo qini ufa irimarifa mi maqana akoofara foora mariannoo.
MAT 7:26 Faiqí moo fannoo maa ufana maa qinee qunnufana qini dookinaana iriseenoo minnisee marifa mifa nukudasaa maaqa usakeemari fasiqafara foora maridanoo.
MAT 7:27 Mi maqafa marifanoo aaku firaafa riri ifanoo nammari aufinoo maaqa ameemaanai taatarunna mandinoo ooqufinoo ufai firaafa uqinoo maaqa arinoo rapeepaa inoo maqasaa pauta qifanoo maqa rakeemaseenoo aqufinoo. Qini ufa irisee minnisee reereeroondaana arakana aufeena faiqi mariasa mi maqana akoofara foora marifaranoo.
MAT 7:28 Yisufa mi ufausa qimaqoosa faiqí anaasee moomoosa irufanoo naaquqee marufaqa qiqau.
MAT 7:29 Maa fasiqafa sia maasa uqannifiqee mari fasiqausara foora maridanoo. Maafa nariara Anutufara foora maridee qidanoo qimannimidanoo.
MAT 8:1 Yisufa amuaqu namusaa faiqí anaasee ufa qimannimiseenoo qumuroofaqa faiqí anaasee moomoo anireeqa Yisuna faqa aanaaqiana rumbarausa fimariqau.
MAT 8:2 Fimarufanoo faiqí moo fannoo karoora arimarufa Yisuna oorinni ani mapamufufanoo Yisuna qimaminau, oo maasa rakisirafa ani afeeka amana maridanoo qinee minara iridaqa. Aneenna irirafa eedoo qimaseenana qini karoora rukaqisaa.
MAT 8:3 Yisufa mi ufanara iriseenoo narí asauku minasaa munduseenoo asasammasee qinau. Eeoo doo qiananoo amana qiqa irirafa eedoo qidanoo rukammaisaanaura. Miqi qimasoofanoo miqoo kai mina karoora taikanau.
MAT 8:4 Mina karoora taikasoofanoo Yisufa qimaminau. Simai sia uqanna moodaa fasiqa qimamia. Findifinana munu amaana maqasaa aanaiqikirana aneenna afaaqa karoora arimaruna uqafiqainanoo aiququmasainana Mooseefa ufa qimaqoomau ainaina mara maree amaana maqaki qaindasaa suqarana tatufinana Anutuna amia. Faiqí anaasee qafamasee doo mina karoora taikeefoo qimasee sia aniara eerairiaqeera. (Ooqai Mooseefa karoora narinausa sia maqusai aniaqee qimaqoofa. Andandakinai kai nuaqee qimaqoofa. Faiqí moo fannoo narí karoora taikaseenoo amaana maqaki ani kikiqamafufanoo amaana maqasaa rakisirausa qafamasoofanoo doo maqusai fuannee qufanoo doo kaifaa maqusai finau. Kaqikaa ainaina amaana maqaki Anutunara dufi dufi qimasee nimiseenoo doo maqusai kaifaa finau.)
MAT 8:5 Yisufa miqooqari Kapeeranauma maqusai finau. Miqoo oonu marufanoo Roomma maqannaa sundia saideena moo fannoo Yisu finnai anireenoo dadaaqiranara irammirinau.
MAT 8:6 Oo rakisirafa qini ainainira fasiqa maaqaki faiqaqee aurimarifaqa, minara ani qimamidaqa. Mifa aiku asauku pipisaaqa usufifanoo kuqiara foora inoo marifaqa. Aurirafa firaafa arimarifaqa, aupuree marifaqa. Amanee anee qini ainainira fasiqa idaaqamaqisaa.
MAT 8:7 Miqi qimasoofanoo Yisufa qinau. Amana qinee minni oonureeqa idaaqammianaura.
MAT 8:8 Roomma maqannaa sundia saideena fannoo Yisuna findifinoo mina maaqai firanara iriseenoo qaoo qinau. Sia fua. Sia qini manda maaqaki anee keeqaanneera. Qinee aanaamuru fasiqa ooreeqarausa maridaqa. Anee qini uriqararafa qini maaqaki keeqafinaqa qisauruanoora.
MAT 8:9 Qini uriqarara sundiauqa moomoosa mariafaqa qinee misa nimeemaanai maridaqa misa ufamau fidaqa. Qinee akaqa sundiauqa rakisirausa maridaqa. Qinee ufa kai moora fuannee qimarunanoo mifa doo fidanoo. Moora ufannai kai qimamimarunanoo mi ainainna auqaidanoo. Anee Yisufa faqa maqasaa ainaina faqa aurirana oosana oosana ainaina faqa uriqararafa marianaqa qimamidaqa. Minara anee miqooqari kai maridana ufannai kai aurirafa taikaannee qinanoo qini ainainira fasiqa aurirafa taikaannoo.
MAT 8:10 Yisufa mi ufana iriseenoo tautufanoo aaquqoofanoo faiqí anaasee mina faqa rumbarausa fifiusa qimanniminau. Qini ufa iriaqa. Maa Roomma maqannaa fasiqafa firaaqoo qini saqarikidanoo qinee Isaraee maqannaasaki qeeqa maqannaasaki maqusa maqusa nidaqa sia moo maaqira amiqira fasiqa paquriqa, aanaamuru maridanoommi.
MAT 8:11 Kaifaa minara qianaura qini ufa iriaqa. Suani oosanaindari faqa amuqundari faqa nianaindari faiqí anaasee moomoo aanaamuru aniree innaaruna ququsaki keeqafi Abarahaamana faqa Isakeena faqa Yakooboona faqa ooqumarifi Anutuna qoomaqa sakasee neefaranoo.
MAT 8:12 Maa Isaraee maqannaasa innee Abarahaamana aiku asauku marunausa kaqi innaarunai keeqaanauree qimariasa maqee sia keeqeefaranoo Anutufa inni nifaqeeqeenoo madaanai asukunaki aqunnisaannoo. Miqoo innee niranaqainaqa firaaqoo faaqa quqasee nifai sandurifaranoo.
MAT 8:13 Miqi qimaseenoo Yisufa faiqí anaasee qimanniminoo quandafinoo sundia saideena qimaminau. Doo aneenna maaqai fua. Aneenna irirana qinisaa rusisaannanara doo ani ainainira faiqi andeeqafinoo. Doo anirandee amaaqa fua. Miqi qimasoofanoo mi kamuqoo kai mi aurira fasiqafa moosaa mariufa doo findifinau.
MAT 8:14 Yisufa miqooqari Peetooroona maaqai finau. Oonuree qafoofanoo Peetooroona airaamaku anaasee aurimarinau. Afaaqa ididi marufanoo aurida faiqaqee marufanoo.
MAT 8:15 Yisufa mina qafeenoo asauku qumaranau. Asauku qumaroofanoo aurirafa taikanau. Taikafufanoo mi anaaseefa aaqee findifinoo narana aina Yisuna aminau.
MAT 8:16 Mi eenoonnai mi maqusaanaasa nári aurimarusa faqa fueenaikimarusa moomoosa faqa nifiqee Yisufinnai minni quqee mariqau. Minni quqasoofanoo Yisufa ufannai fueena niqiqoofaqa quqasee fiqau. Aurusa Yisufa misa aurirana faqa taikannisanau.
MAT 8:17 Taikaseenoo ooqeenaa tamummaqara fasiqa moo auqu Eesaia mina ufa anoona kambiqanau. Mifa ooqai Yisufa sia kambiqooqoo maaqi qimaseenoo Yisunara akara rinau. Mifa maasa auriranara faqa maasa kudoosaaparana faqa mara aquannoo. Maasa aurira ummaara narí kai mina uqeera qumaraannoo. Miqi qimasee akara rinau.
MAT 8:18 Moo faasaana nammari afainni marufaqa faiqí anaasee aiqama suqu maree Yisuna qafaanee qimasee ani marida qafee mariqau. Yisufa faiqí anaasee moomoo tatusee animarufanoo nindafeenoo narí faiqi namu qimanniminau. Doo uqeeraaqa doo inni saimbaqa kanuqaki keeqafi nammariki fitaqa maree muqafainai nianai fida innisaimbaqa kai mariaqa.
MAT 8:19 Misa findifi uqeeree marufanoo faiqí moo fannoo Mooseena sandufa irimarufa Yisufuqoo anireenoo qimaminoo qinau. Oo qini karaambaiqa anee yatinai fee maqusa maqusa finaqa qinee faqa ani faqa fuanaura, sia minnisaanaura.
MAT 8:20 Miqi qufanoo Yisufa narí maaqi qimasee qimaminau. Anee qiniara amiqira maaqaki faiqee mari fee qidanee qini faqa firaree qidanee. Kaasau fainiuqa oonaamarai faiqee mariasa maridaqa ufiniuqa aanaamuki faiqeemariasa maridaqa. Qinee faiqí nimaaku yai fee qeeqa qikiaqa rumasee fee faiqaanauree sia faiqara qoo marisa maridaqa. Doo qini faqa finnaree.
MAT 8:21 Miqi qimasoofanoo Yisuna faiqi namukiqari moo fannoo anireenoo qinau. Qinee ani faqa fuanaura kaqikaa qoo mariseeqa qini qikoofa kuqirarammi marifaqa. Mifa kuqufinaqa akundamasee ani faqa fuanaura. Amanee qinee miqianauree.
MAT 8:22 Yisufa mina ufa iriseenoo maaqi qimasee qimaminau. Maqee uqanna qini faqa ania. Naaruara kuqiranaki fifandinausa misa kai nári niqoonnana akundeefaranoo.
MAT 8:23 Yisufa miqi qimaseenoo kanuqaki akaramafufaqa mina faiqi namu mina aanaaqiana akaraqau. Akaramafufaqa kanuqaki nammari amuaqumau fimarufanoo Yisufa minaki afaaqa umooqukufanoo faifufanoo nammari qambaanai oonuroofanoo ufai firaafa uqinoo nammari amakaurinoo kanuqa aundurai keeqanau. Kanuqa teeqi taaqufaqa Yisuna faiqi namu mina qafamasee kanuqa namufaqa nammariki ukuqnaana qimasee kaaqa rufiaqau. Yisufa sia minara irinau mana mana faiqaqee marinau.
MAT 8:25 Mina faiqinamu rufiamaree Yisufinnai oonuree afauramasee faaqa ridaqa qimamiqau. Oo maasa karaambaiqa maasa nammariki ukuqnaidaqa kuqirarammidaqa. Anee maasa qumaree qumbaqinnisaa.
MAT 8:26 Yisufa misa ufa iriseenoo qimanniminau. Oo kaaqa innee fifau rufiee mariasa. Sia qinisaa irirana rusimariasa mariafanoo. Miqi qimaseenoo findifufanoo ufai faqa nammariara faqa qaoo qufanoo nammari faqa ufai faqa kasoomafinoo dai qimafinau.
MAT 8:27 Miqi qufaqa ufai faqa nammari faqa firaaqoo uqiufa kasoomafufaqa mina faiqinamu naaquqoofaqa qiqau. Maa fasiqafa naqira fee maridanoo fee. Ufai faqa nammari faqa mina ufa irisee eedoo qidaqa.
MAT 8:28 Miqooqari nammari dinnafainai nianai Kadareenee maqa maaqa munu kanuqa fannoo raquraminau. Maqasaa aqufufaqa mi maqusanaindari faiqí qaaraqanda aniqau. Faafasaaqa fueena miqanda naundurai maruqanda, faiqí madikee marunnai maruqanda, faiqí anaasee aiqama miqandara rufiee maruqanda mariqau. Faiqí narimaruqanda mariqau. Faiqí anaasee miqanda maruqoo sia fimarusa, kaaqa miqandara rufiee mariqau.
MAT 8:29 Miqanda Yisufunnai aniroofanoo naundurakiqari afaannauqa fannoo maaqi qimasee faaqa rumasee Yisuna qimamiqau. Anee Anutuna amaaku marianafa anee nanaree anidanee anee nanaree maasa soodaaidanee anee nanaree kaqiqoo kasaaqai anireenanee maasa idaki aquqiseennaree.
MAT 8:30 Kaqikaaqoo nianai akoosaqa kuarauqa eemani naida moomoosa misaqa naidaqa mariqau. Afaannauqa faiqí naundurakiqari kuarauqara Yisuna qimamiqau. Anee maasa diqiqainaqa amanee kuarauqaki keeqaanauree.
MAT 8:32 Miqi qufanoo Yisufa qinoo. Eeoo amana, doo innee misaki keeqafuaqa. Yisufa niqiqoona iriseeqa aiqamausa mi fasiqaqanda naunduraindari rafudamakufaqa doo kuarauqaki keeqafiqau. Keeqafufaqa kuarauqaindi munari minari ufaqa ameemai sandee ooqu fiqa nammari farumaki bururu qufaqa aqufufaqa aiqama kuqu taikaqau.
MAT 8:33 Kuarasaa rakisimaru fasiqausa mina qafamaseeqa naaquqoofaqa quqasee sandamaqaraasiqa maqusai kaimbiqau. Maqusai anireeqa Yisunara faqa afaanna naundurai keeqeemaru faiqi qandara faqa kuarauqara faqa faiqí anaasee aiqama qimannimiqau.
MAT 8:34 Misa iriseeqa mi maqusaanaasa faiqí anaasee aiqama tatufaqa nammarafainni Yisufuqoo ooqureeqa Yisuna qafamaseeqa qiqau. Doo maasa maqa maaqaki sia ania. Doo see moosaa fua. Maasa aniara rufiaidaqa.
MAT 9:1 Miqi qufanoo Yisufa narí faiqi namufaqa sipaki kafaa keeqafufanoo nammariki fifiufanoo narí maqusai Kapeeranauma nammari amuaqumau oonuranau.
MAT 9:2 Oonuroofaqa faiqí mi maqusanaindari moo auruna aiku asauku pipisaaqa usufufanoo maruna aindusu mareeqa Yisufuqoo maree aniqau. Misa irirafa Yisunaki marunara Yisufa mina qafamaseenoo quandafinoo aurira faiqi qimaminau. Sia rufiaqa rufiaqa ia. Afaaqa quqaa. Doo qinee ani mandainaina numoo minnaiseeqa.
MAT 9:3 Mooseena sandufa irimarusa miqoo marusa mi ufana iriseeqa maaqi qimasee narí qimami narí qimami qiqau. Maafa nariara Anutusa maridee qidanoo. Akasaa. Maasa faiqí firaasa faiqí miqi qiasa kuqa nárí marunausa maridaqa.
MAT 9:4 Yisufa misa ufa iriseenoo quandafinoo maaqi qimasee qimanniminau. Naqi fee qifaqee mi manda irirana inneeqa nitikuraki maraqa nidee.
MAT 9:5 Innee qiniara maa fasiqafa sia numoo taikarana amana fee qidee. Qinee moo firaa afeekainaina inni nifusaa iananoo anoona kambiqainaqa qafamaseeqa qiniara kuqaa faiqí numoo taikarana amanammifoo qifaranoo sia kambiqainaqa unnammifoo qiaqa.
MAT 9:6 Anutufa kuqaa uqanna numoo taikarana qini qiminoo. Miqi qimaseenoo quandafinoo pipisaaqa qusirana qimaminoo qinau. Aneenna qaindasaaqari findifinana aneenna qaari qamunna raqandaammamareenana doo akumaree amaaqa fua.
MAT 9:7 Miqi qufanoo mi aurira fasiqafa findimaqee narí amaaqai doo finau.
MAT 9:8 Faiqí anaasee misa mina qafamaseeqa niminaandi raqeeqa nisausi kambiqoofaqa nimudaani qumooqukamambufaqa miqoo Anutufa narí afeeka Yisuna amunara minara oonumafi irisee amooqidaqa asasiqau.
MAT 9:9 Yisufa miqooqari moosaa fimarufanoo faiqí moo fannoo mina auqu Mataioo narí oopisaki marufanoo Yisufa qafanau. Mi oopisana takisa aqimaru oopisanaki marinau. Takisa maree maru fasiqausa ummuari marusa misa moomoo maraseeqa akaqana naríara quqasee dinni ati kaamanna amimariqau. Minara faiqí anaasee kaaqa nikooqee marinau. Mataioofa mi munnimma ainainna maree marufa marinau. Yisufa Mataioona qafeenoo aaramaseenoo qinau. Doo qini faqa ania. Mataioofa Yisuna ufa iriseenoo findimeeqeenoo mina faqa finau.
MAT 9:10 Yisufa marikinoo Mataioona maaqai mina faqa narana narara finau. Yisufa narí faiqi namufaqa mina maaqaki ooqumarifi narana neemarufaqa faiqí maqusa maqusa munnimma takisa maraqanusa faqa oosana oosana mandainaina maraqanusauqa faqa Mataioona faqa ani ooqumarifufaqa narana naqau.
MAT 9:11 Ooqumarifufaqa narana nee marufanoo Farisai amaana ufa qimarusauqa anirama qafamasee Yisuna faiqi namu qumee naaramasee qimannimiqau. Naqi fee qifanoo fee inni rakisirafa manda fasiquaqa faqa ummuariqanuasa faqa naidanoo fee.
MAT 9:12 Yisufa misa ufa iriseenoo quandafinoo maaqi qimaseenoo nári qimanniminau. Sia amiqirausa tutaqa finnai fidaqa aurimariasa kai tutaqa finnai fidaqa. Maa namusa auruasara foora maridaqa qinee tutaqausara foora maridaqa.
MAT 9:13 Innee tamummaqara fasiqa akara anoonara oonu randasee qafaaqa. Mifa maaqi qimasee akara rinau. Qinee Anutusa sia tatufira aandau aina fee oosana oosana ainaina fee qimiranara dididanoo, faiqí anaasee nariara nariara nimuqusifaqa nifauee mariana minauqara qini dididanoo, Anutufa miqi qimaqoofaqa qinee Yisusa mimau fidaqa maaqi qidaqa. Sia qinee andeeqee mariasa naarararee qimasee qumu maridaqa innee manda fasiqa anaasee fee qimasee nifaqee mariasa misa Anutufinnai ubeekaaqeera naarararee qimasee qumuafanausa maridaqa.
MAT 9:14 Mi kamusaqa Yoohaneefa nammari nimimaruna faiqinamu Yisufinnai anireeqa irammiriqa qiqau. Maasa Yoohaneefa nammari nimimarina faiqi namufaqa Farisai amaana ufa irimariasa misa faiqi namufaqa nári narana minniseeqa naararee marifaqa Anutunara innaaru qidaqa. Ani faiqi namu naqi fee ifaqee sia miqidee kaqi narana naidee qufanoo Yisufa iriseenoo qimanniminau. Amundara fasiqa faqa aqoondi namufaqa maqusai ani marinaqa naqimasee naararee marinee kaqi marifaree, sia miqifaranoo asasammasee narana suqasee neefaranoo. Minara qini faiqi namu qini faqa amundara fasiqara fooqaasa maridaqa asasammasee qini faqa naidaqa maridaqa. Kaqikaa qoo mi anaaseena afaaqi qini rumbamaree munu darusaifaqa mikari kuqaa nimuqusa mandaikinaqa naararee marinaqa innaaru qifaranoo. Yisufa Yoohaneena faiqi namu kaqi qimannimidanoo qinau.
MAT 9:16 Ooqeenaa qamunna anaqinoo marina fuka qamunna ati qumaree sia nauraa qamunnasaa akunirafa maridanoo. Fuka qamunna ati fannoo nauraa qamunna doo firaaqoo anaqiannoo. (Yisufa maqasaa maru aukuana misa uainna nammari tatisee aandau apatannai auqira taquki adiasee kisaaqasaa maaqaki quqasoofanoo marinau. Marikinoo amiqinoo marufaqa mina mara maree maqee maqee neemariqau. Uainna nammari misa maqee maqee nee maru nammarifa marinau. Mifa aandau apatannai auqira taquara qufaqa, maasa qeeqa ufakiqari taqu uqannee qidaqa.)
MAT 9:17 Yafee faiqí moo fannoo nauraa tunda taqu maraseenoo fee fuka nammari adiaannoo fee. Sia miqiannoo. Ruqia finanoo aiqama nammari qumiqaraandoora. Fuka taqu andasee fuka nammari minaki adiasainanoo mina amana mariannoo. (Yisufa narí fuka ufa fuka taquara faqa qamunnara faqa mina kikiqa usinau. Farisai amaana ufa faqa Yoohaneena amaana ufa faqa amana maridanoo ooreeqanoo maridanoo. Qini fuka ufa uriqararafa maridanoo. Misaindi sia amana qinindi fabaqa irafa mariannoo.)
MAT 9:18 Yisufa Yoohaneena faiqi namu ufa qimannimi marufanoo amaana maqasaa rakisirafa moo fannoo Yisufinnai anireenoo oorindari mapamufufanoo Yisuna qimaminau. Doo qini qiraamuna maqee uqanna doo kuqinoo. Anee anireenana aneenna asauku minasaa mundusainanoo mifa findifuani.
MAT 9:19 Miqi qufanoo Yisufa findifinoo narí faiqi namufaqa mina faqa finau.
MAT 9:20 Fimarufanoo anaasee moo fannoo aanaaqianaindari oonureenoo mina qamunna ati ireeda auqanau. Mi anaaseefa kisaaqandaikufa qisaukuqara taikasee qikunni ooqu qaaraqanda aukuana marasoofa marinau.
MAT 9:21 Mi anaaseefa narí kai qimmirinau. Qinee oonuree mina qamunna atikai umee auqamasaananoo qini fidika taikaannoo. Miqi qimasoofa maridanoo oonuree mina aanaaqianaindari faiqí anaaseekiaqa qumee oonuree mina qamunna ati kai ireeda auqaanau.
MAT 9:22 Mina qamunna auqamasoofanoo Yisufa quandafinoo qafamaseenoo qinau. Qini qiraamuna sia rufia afaaqa quqasee maria anee aneenna irirana qinisaa rusiranannai kai ani aurirafa doo taikeenoo, mifa kai. Miqi qimasoofanoo miqoo kai mi anaaseena aurirafa taikanau.
MAT 9:23 Taikafufanoo Yisufa miqooqari fifiufanoo amaana maqasaa rakisirana maaqa marunnai mina araamuna kuqinoo maru maqanaki oonureenoo faiqí anaasee moomoosa tutuqidaqa ikifaafau qidaqa ufireena aina fuaqaidaqa iki raqeemarufanoo Yisufa oonu nindafanau.
MAT 9:24 Oonurama nindafeenoo qimanniminau. Doo raudamaki fuaqa, aiqama fifainiaqa maa manaaqafa sia kuqinoofau faiqaqee idanoo. Miqi qimaseenoo quandara ufa qimannimisoofaqa misa quandafiqa naanaidara uteeti qidaqa qiqau. Unna qia. Doo kuqinoo maridanoo.
MAT 9:25 Yisufa misa aiqama niqiqamaseenoo mina maaqaki keeqafinoo mi manaaqana asauku qumaroofanoo doo findifinau.
MAT 9:26 Miqooqari aiqama maqusa maqusa fiqu fiqu iqa marusa Yisufa mi manaaqana findifumasoo ufafa aiqamai daraanufaqa iriqau.
MAT 9:27 Mi manaaqafa findifufanoo Yisufa moosaa fimarufanoo faiqí qaaraqanda nifu dimbaraqanda aanaaqiana fidaqa faaqariqa fida qiqau. Oo Dafidina ati anee maaqanda qiqafainanoo ani amuqusinana maaqanda dadaaqia.
MAT 9:28 Yisufa maaqaki keeqafufaqa mi fasiqaqanda mina aanaaqiana keeqaqau. Keeqafufanoo Yisufa irammirinoo qinau. Inneeqara qini afeekara nanee fee qidee. Inniqara nifu andeeqaranara qiniara amaneefee fee qimasee anidee, sia amanaikiannoo fee qidee qufaqa miqanda qiqau. Eeoo maaqanda aniara amanafee qidaqa.
MAT 9:29 Yisufa mi ufana iriseenoo qimanniminau. Inneeqara qiniara amanafee qianara miqi qianara sia nipatiani andeeqannisaanaura.
MAT 9:30 Miqi qufanoo mikari kai miqanda nifu andeeqannisanau. Miqanda nifu maqasoofanoo Yisufa maaqi qimasee qimanniminau. Nimambaina qimaseenoo qimanniminau. Doo inneeqara sia uqanna faiqi anaasee akaqausa qimannimiaqa. Maa ufana kukeeqammasaaqa.
MAT 9:31 Miqanda mi ufana iriseeqa minufa rukiasee maqusai oonureeqara faiqí anaasee aiqama atinai qimannimiqaniqau.
MAT 9:32 Miqanda fufanoo mi maqusanaasa moo fasiqa afiqee aniqau. Ufa sia qimaruna aanna apeequnirana afaanna faqa mina aundurai maruna afiqee aniqau.
MAT 9:33 Minisoofanoo Yisufa mina aundurakinaa afaanna aqiqamasoofanoo afaanna fannoo raudamakufanoo mi fasiqafa ufa andeeqasee qinau. Miqiufaqa faiqí anaasee mina qafamasee nimudaani qumooqukammafinoo nifaaqa sia qumaroofaqa mina qafeeqa qiqau. Isaraee maqannaa sia ooqai maa ainainafa maruna, maqee kai.
MAT 9:34 Miqi qufaqa Farisai amaana ufa irimarusa minara kaukaata qimaseeqa qiqau. Yisufa afaannauqa firaanannai faiqí naundurakinaa afaannauqa niqiqaidanoo.
MAT 9:35 Miqooqari Yisufa maqusa maqusa kaqikaa maqusa firaa maqusa amaana ufa innaaruna ququsaki fimaria ufana qimanniminooninau. Kaqikaa aurirana faqa firaa aurirana faqa andeeqannisanooninau.
MAT 9:36 Yisufa faiqí anaasee nindafamaseenoo firaaqoo amuqusufanoo qinau. Boo faiqí anaasee sia rakisirafa marisa, kaqi fifau tia maridaqa. Sipsipauqa fooqaasa rakisirana siaisa maa fasiqa anaaseesa maridaqa. Kaasau fainiara foora marida, aukuana aukuana sia amiqimmasee marida, mi manda kaasau faininara rufiaqa rufiaqa kaimmidaqa, aukuana aukuana miqi kaimmida marida, dadaaqirana siaisa rakisirana siaisa maridaqa.
MAT 9:37 Yisufa mi ufana qimaseenoo quandafinoo maaqi qimaseenoo ufa qinau. Doo afuqakinaa narana tatafinoo rairaainoo maridanoo. Dadaaqi aiqira fasiqa sia amanaiki mariafaqa.
MAT 9:38 Minara innee suana akoofinnai innaaru qiaqa. Innaaru qifanoo Anutufa aiqifandinausa niminaqa dadaaqiqa suana aiquaqeera. Dadaaqifaqa innaarunai ufa qimannimifaqa innaaruna ququsaki fuaqeera suana kikiqa usuqoofanoo maridanoo.
MAT 10:1 Yisufa narí faiqinamu qisaukuqara taikasee qikunni ooqu qaaraqanda naaramma quqaseenoo Anutuna afeeka nimufaqa faiqí anaasee naunduraki maru afaannausa faqa misa aurirana oosana oosana faqa teeroouqee marusa faqa aiqama aiqaraanifee qimasee afeeka niminau.
MAT 10:2 Mina faiqi namu qisaukuqara taikasee qikunni qaaraqanda ooqu marasee misa nuqu maaqimmasee mariqau. Indaaru Simoona mina auqu moo Peetooroofa faqa mina akaqa Andurufa faqa moo fasiqa Yameesafa faqa mina akaqa Yoohaneefa faqa miqanda nikoofa Seebeedifa marinau.
MAT 10:3 Moo fasiqa Firipifa faqa moo fasiqa Paatooroomaiufa faqa, moo fasiqa Toomasifa faqa moo fasiqa Mataioofa faqa mifa takisa maree marufa faqa moo fasiqa Yameesana amarafa mifa Arifaiusana amaaku faqa moo fasiqa Tadiusafa faqa, moo fasiqa Simoonafa sia indaaruqaa Simoonafa mina amarafa (mifa nári Isaraee maqannaa nári kaamanaikiaqeera qimaru fasiqafa) mifa faqa moo fasiqa Yudasifa faqa, mifa Keerioota maqusaindaraafa mifa kai Yisunara qumee queeqaaninafa maridanoo.
MAT 10:5 Maa namusa qisaukuqara taikasee qikunni ooqu qaaraqanda marasee Yisufa Isaraee maqa maaqaki minakina niqiqeenoo qimanniminau. Anaamuru maqusai sia fuaqa. Samaria maqusai faqa sia fuaqa.
MAT 10:6 Isaraee maqannaaki kai fuaqa. Misa sipsipara foora fifau faafau qiqanuasa misaki kai fuaqa.
MAT 10:7 Innee fidaqa maaqi qimasee qimannimiaqa. Innaarunai ququsa fannoo adeediranoo maridanoo.
MAT 10:8 Miqi qimasee qimannimiseeqa misa aurirana taikannisaaqa misa kuqirausa findifumannisaaqa karoora faqaasa rukannisaaqa afaanna naunduraki marisa afaqannisaaqa. Sia innee feefaurummasee maraasa. Kaqi maraasa. Doo miqi kai iqa kaqi nimiaqa.
MAT 10:9 Munnimma sia aakauqaki rua. Kaqi fua.
MAT 10:10 Sia uqa tafu maree fua. Sia qaara siuta maraaqa. Sia niku aanaamu maraaqa. Sia saunu maraaqa. Ainainira faiqiuqa ainainidaqa minakinaa narana marasee naidaqa. Minara innee ainaini mariafanoo minakinaana naaqa. Sia narana ainaina maree innee faqa fuaqa. Kaqi samu fuaqa.
MAT 10:11 Innee moo maqusai oonureeqa irammiriaqa yafasiqa fee amana maridanoo maasa mina faqa marianauree qiaqa. Misa qimannimifaqa mi maqusanaki marinna kamuqoo mi fasiqana faqa kai mariaqa.
MAT 10:12 Mi fasiqana maaqaki keeqafinana qimamia. Anutuna amiqi amiqira asooarafa inni faqa mariani.
MAT 10:13 Mi maqanakinaasa amiqi amiqifana ani ufa sainanoo misa faqa mariani. Sia amiqi amiqifana aneenna afaaqooqa qira ufa oonurandee maree ania.
MAT 10:14 Yamaqusanai fee yamaqannaaki fee sia inni ufa irisee sia inni amiqi amiqifaqa innee mi maqusanakiqari raudamaki fiqa kookooma afaqa qumaree ninaamarasee fuaqa.
MAT 10:15 Qinee mi maqusanaasara anoona ufa qimannimidaqa. Numoo aukuana aninaqa inni ufa sia irifandinna maqusanaasa Anutufa naridanoo sia nifauaannoo firaaqoo naruannoo. Soodooma maqusa faqa Koomoora maqusa faqa misa naridanoo kaqikaaqoo nifauaannoo narirafa ooreeqanoo mariannoo.
MAT 10:16 Iriaqa, qinee inni niqiqaanaqa innee sipsipara foora kaasau faini qambaana inni niqiqaidaqa. Faiqí oodaa mariafanoo faiqí moomoosa inni narusee naaqaammidammia. Minara innee sakani maaso̱o aanna reeqa reendeenamasee nuaqa. Nakipurunara foora kaqi muquriqa marida, reendeenammida mariaqa.
MAT 10:17 Innee qini ufa maraqa nidaqa faiqiara rufiaaqa. Misa qini ufasaara innikinaana akaqausa mara maree Kansoora marinnannai munu quqasee inniara manda fasiqa fee qimaseenoo kootamannimaqeefara. Akaqausa amaana maqaki inniara Anutuna ufa rukiee mariafaqee qimasee sandasamu moomoo kari inni nifaaqa ateekeefaranoo.
MAT 10:18 Misa inni akaqausa kiapafinnai maree fifaranoo, mandaikammida ufa rukiee marifaqee unna qimasee nifiqee kiapafinnai fifaranoo, karaambaiqa marinnai kootara inni maree fifaranoo. Qini duqusaara miqifaranoo. Misa oosana oosana mandainaina qini ufa taikaanifeera miqimma nimaqeefaranoo. Anutufa qumee misa faqa aanaamuru mariasa faqa qiniara iriaqeera miqimannimaqaannoo.
MAT 10:19 Misa inni rumbamaree nári mariannai nifiqee fifaqa naqi fee qianau naqi fee qianau sia qiaqa. Mikari kai qini qikoona maraquna fannoo qimannimina ufana mi ufana kai qimannimiaqa.
MAT 10:20 Nana ufa fee innee miqoo qifaree sia innindi inni nikoona maraquna fannoo innikiqari ufa qiannoo.
MAT 10:21 Misa inniara qinisaa atooaranara fidiaqaammifaranoo. Nári nikaqaafasaauqa kuquaqeera narí uqeeqee narí uqeeqee ifaranoo. Nári qisakoosa faqa narí uqeeqee narí uqeeqee ifaranoo. Faiqiuqaindi quandasee nári ninausa nikausa kuquaqeera uqeeqeefaranoo.
MAT 10:22 Qini duquara aiqamausa inni fidiaqaama nimaqaannoo. Yafa yafee kaqi maraqa fifi iqa taikara aukuana paqurinausa, qinee mikari misa qumara asumu mariranaki quqaanaura.
MAT 10:23 Misa inni moo maqusaki narifaqa innee moo maqusai sandeeqa qiniara miqoo qimannimiaqa. Qinee anoona ufa qimannimidaqa. Innee Isaraee maqusa maqusa aiqama qiniara qimannimimarifaqa sia aiqama qimannimi taikainnaqoo qinee faiqí nimaaku kaifaa innaarunaindari qumuanaura.
MAT 10:24 Faiqí moo fannoo sia narí uqannifiqeemaria fasiqana amana maridanoo sia mina uriqararafa maridanoo ureeqarafa maridanoo. Ainainira fasiqa faqa sia mina rakisirana uriqaranoo maridanoo ureeqanoo maridanoo.
MAT 10:25 Faiqí qinee uriqararausa ufa qimannimi marunausa daruseeqa miqi kaimmiqa qini faiqi namu qini ureeqarausa inni narifaranoo. Faiqí misa rakisirana arusee mina faiqi namufaqa miqi kai iqa narifara. Misa nikoonara afaannee qimasee faiqi namuara faqa miqi kai iqa afaannee qifaranoo. Misa mi manda ainainna oosana oosana qini qimifara, miqi kai iqa inni faqa nimifaranoo.
MAT 10:26 Minara sia misara rufiaaqa. Aiqama ainaina maqee rafaaqafinoo marifa kasooqaqee Anutufa innaarunai aiqama kooroo iannoo. Aiqama kukeeqara ainaina faqa kasooqaqee Anutufa aiqamausa nifusaa kooroo iannoo. Minara sia maqee faiqí anaasee inniara mandufa qifandinnanara rufiaaqa.
MAT 10:27 Qinee asukunai kukeeqafi qimannimunnana mi ufana faasaana paasoosamasee qimannimiaqa. Nupinupi qimasee qimannimunnana findi fiqa mi ufana fifi qimasee firaaqoo qimannimiaqa. Sia faiqiara rufiaaqa.
MAT 10:28 Faiqí nipata kuqa narifandinausa sia misara rufiaaqa. Misa inni naunduraindaraa nimana sia amana kuqa narifaranoo. Moo fannoo Anutufa inni nipata faqa nimana faqa amana idaki kuqa narirana amanaiki marifa minara kai rufiaaqa. Faiqí nipata kai narifandinnanara sia rufiaaqa.
MAT 10:29 Manda ufini ririmma moomoo maridanoo. Kaqikaa ainaina fifau ainaina maridanoo. Mina feefauru sia maridanoo. Mi kaqikaa ufinifa sia fifaufau maqasaa aqufidanoofau, innaarunai nikoofa irimarifanoo maqasaa aqufidanoo.
MAT 10:30 Innee sia fifau rufiaaqa. Inni nikiaqa asausi ririmma Anutufa nisaana rumaqaisa mariafanoo.
MAT 10:31 Minara sia rufiaaqa. Inni feefauru uriqaranoo maridanoo. Dapi ufini feefauru sia maridanoo.
MAT 10:32 Yafa yafee qini Yisusara faiqí nifusaa sia rufieenoo qinee Yisunaindi fee qinafa qinee minara innaarunnai qikoona afusaa qinindi fee qianaura.
MAT 10:33 Yafa yafee qiniara faiqí anaasee nifusaa asaurusee sia qinee Yisunaindi fee qimasee kukeeqainafa qinee minara faqa innaarunnai qikoona afusaa kukeeqamma amaqaanaura.
MAT 10:34 Innee qiniara tinoorirana asooarana mara maree maasa maqasaa fasiqa anaasee qimiannoo fee qida fee. Qinee sia tinoorirana asooararau qumidau duru feefara qumidaqa.
MAT 10:35 Faiqi namu nári nikoonara ameesa uqiranara qumidaqa. Fuka aanaaseeuqa nári ninoonara ameesa uqiranara qumidaqa. Fuka anaaseeuqa nári ninaakuquara nimeesa uqiranara qumidaqa.
MAT 10:36 Narí faqa moodaa maqaki mariasa narí mi fasiqana firaa namuqaa marifaranoo.
MAT 10:37 Yafa yafee mina anoona akoonara firaaqoo aididanoo fee qiniara ooreeqara fee qidanoo fee, mifa sia qini qimanasaa, sia amana qini faqa fifaranoo. Yafa yafee mina amaaku faqa araamuna faqa firaaqoo aididanoo fee qiniara ooreeqara fee, mifa faqa sia qini qimanasaa sia amana qini faqa fifaranoo.
MAT 10:38 Kasooqaqee misa aunirira saqarisaa qini darifaranoo. Yafee qini ufasaara qini dariranaki paasoosamandee fuaninafa, mifa qini qimanasaa mariannoo, qini faqa fuannoo. Faiqí anaasee moo fannoo qinee kuquannanaki rufiasee sia finafa, mifa sia qini qimanasaa mariannoo sia qini faqa fuannoo.
MAT 10:39 Faiqí anaasee moo fannoo narí kaqi mariranara tatamaqamandeenoo rakisi qumarainafa mi marirafa kai kukupamaki aqufuannoo. Faiqí anaasee moo fannoo qiniara iriseenoo narí maqee marirana aquaninafa narí maqee marirana maraannoo.
MAT 10:40 Faiqí anaasee yafee moo fannoo inni dadaaqinafa mifa qini faqa qiqoondikidanoo. Qini dadaaqinafa qini qikoona qini diqiqoona mina faqa aqoondikidanoo.
MAT 10:41 Faiqí anaasee yafee moo amaana ufa nimimarinna fasiqanara oo Anutuna ufa qimannimimari fee qimaseenoo dadaaqinafa Anutufa amaana ufa nimimarina akiaqara innaarunai feefauru amiannoo. Faiqí anaasee yafee moo fannoo andeeqara fasiqara oo andeeqara fasiqa mari fee qimasee dadaaqinafa Anutufa minara andeeqara fasiqa mina feefauru innaarunai amaqaannoo.
MAT 10:42 Faiqí anaasee yafee moo fannoo maa faiqi anaaqisa asooara nammari neemariana niminaqa qinisaa atooeemariasa minara irisee amiqi amiqimmasee niminaqa, kuqaa anoona ufa qimannimidaqa, mifa sia uqanna mina akiaqara sia maraannoo. Anutufa amiannoo.
MAT 11:1 Yisufa mina faiqi namu qisaukuqara taikasee qikunni ooqu qaaraqanda marasee mi ufana oosana oosana qimannimiseenoo miqooqari misa maqusa maqusa nidanoo qimannimimarinau.
MAT 11:2 Yoohaneefa nammari nimimarufa karabusaki maridanoo asauku mundirana oosana oosana irinau. Iriseenoo amiqimmasee irianau qimaseenoo narí faiqi namu Yisufinnai niqiqanau.
MAT 11:3 Yoohaneena faiqi namu Yisufa maruqoo oonuree irammiriqa qiqau. Anee ooqai tamummaqara fasiqa kambiqaannoo fee qimaqoofa anee mifee maridanee. Anee Anutuna asauku mundira fee maridanee. Maasa mooree afeesianauree.
MAT 11:4 Qimasoofanoo Yisufa qinau. Maaqoo innee animariaqoo ainaina auqaunnanara faqa ufa qimannimunnanara faqa minara kai oonuree Yoohaneena qimamifanoo mifa qiniara iriannoo.
MAT 11:5 Nifu dimbarausa maqannisaidaqa, niku eendirausa amiqimmannisaunaqa nidaqa. Karoora narimariasa rukannisaidaqa. Naaqoo aunirausa ufa iridaqa. Kuqimariasa findifumannisaidaqa. Kudi fasiqauqa qinee amiqira fuka ufa innaarunai ququsa ufa misa qimannimidaqa. Mi ufana oonuree Yoohaneena qimamifanoo mifa qiniara iriannoo.
MAT 11:6 Moo fannoo sia qiniara qaara irirana irimarifa mifa asasimarifa mariannoo. Qinisaa mikimmaki marifa sia asasiannoo. Mi ufana faqa Yoohaneena qimamiaqa.
MAT 11:7 Yoohaneena faiqi namu fifufanoo Yisufa faiqí anaasee Yoohaneenara qimanniminau. Fifau maqa maaqa kaasau aadana maqa maaqa innee Yoohaneena qafarara fiqa innee nana qafararee fiqee iqau. Fifau andanda kasinaree fiqee iqau. Sia uqanna minara fiqau.
MAT 11:8 Innee nana qafararee andandai fiqee iqau. Faiqí amiqira qamunna afisimarina mina qafararee fee qimasee fiqee iqau. Oo sia uqanna minara fiqau. Miqirausa sia kaasau maqa maaqaki maridaqa karaambaiqa maaqaki amiqiranaki maridaqa.
MAT 11:9 Nana qafararee innee fiqee iqau. Anutuna tamummaqara fasiqa qafararee fee qimasee fiqee iqau. Kuqaa Yoohaneefa Anutuna tamummaqara fasiqafa marufa ooqu qafaqau. Sia misa kai, Yoohaneefa tamummaqarausa uriqaramasee tamummaqarafa marifaqa innee qafaafanoo.
MAT 11:10 Ooqeenaa akara minara kai qidanoo. Mi akaranaki Anutufa maaqi qimasee Yoohaneenara qidanoo. Iriaqa. Qinee qini ufa maree marinnana ani Anutuna asauku mundirana ani oorinni aqiqaanauranoo mifa ani aana ani oorinni afisumaree finana anee mi mau fuanneera.
MAT 11:11 Akarakinaa ufa miqi qinoo marinara qinee Yisusa anoona ufa qimannimidaqa. Anaasee faiqiuqaindi moomoo maridaqa. Yaanaasee fee Yoohaneena uriqararana maqanoofee inau. Sia moo fannoo mina uriqararana maqanau. Innaaruna ququsa mariasa ureeqarausa misa kai Yoohaneena uriqararausa maridaqa.
MAT 11:12 Qinee anoona ufa qimannimidaqa. Yoohaneefa nammari nimimari aukuanaindari faiqí anaasee rakiranannoo maqusa maree mariandee miqi kaimasee nimudaanai qimasee innaaruna ququsaki keeqarara qimasee innaaruna ququsa maree mariasa maridaqa.
MAT 11:13 Anutuna ooqeenaa tamummaqeemaru fasiqausa faqa Mooseena sandufa faqa misa ooqai oosana arasee kasooqaqee kambiqaaninnanara tamummaqasee fifiufanoo Yoohaneenasaa taikaqau.
MAT 11:14 Misa Eeriaafa anirarammifoo qufanoo doo Yoohaneefa mifa ani maridanoo, innee mi ufanara nidinaqee irifaree sia fee nidinaqee sia irifara.
MAT 11:15 Aaqoo fainafa iriaqa, sia aaqoo fainafa sia iriaqa.
MAT 11:16 Maqee marunausa nanara foora maridaqee fee qianauree. Misa maqusaki faiqi uqaindiara foora maridaqa. Misa moosara maaqi qimasee naraqi naraqi qidaqa.
MAT 11:17 Maasa ukeena fuaqaunaqa innee faqa sia dadaaqi idi ree mariafanoo. Kaifaa maasa quandafiqa iki anai fakiki raunaqa sia mina faqa dadaaqi mariafanoo. Innee dapikammi mariafanoo.
MAT 11:18 Misa miqi qimasee miqi qiafaqa qinee Yisusa minara maaqi qidaqa. Maa maqee marunausaki miqimminoo maridanoo. Yoohaneefa anireenoo uainna nammari faqa narana uqanna faqa sia nanau, dapi narana kai noofaqa innee minara afaanna keeqafifanoo miqidanoommifoo qiqau.
MAT 11:19 Qinee faiqí nimaaku anireeqa narana faqa nammari faqa naunaqa innee qiniara manda fasiqa marida, kaaqa neemarifa, kaaqa nammari neemarifa, kaaqa ummuarimaria takisa munnimma mareemariasa niqiqeemariasa aqoondiki marifa, mandoosana mareemariasa aqoondiki marifa. Innee qiniara miqi qimariafaqa qinee minara maaqi qidaqa. Yoohaneefa nammari nimimarifa faqa qinee faqa maaqanda Anutuna iriramau andeeqasee fimarunanoo mina anoona koorooidanoo. Innee maqee mariasakiqari sia inni ufa fannoo anoonaikidanoo, qaaraikammida miqimariafanoo.
MAT 11:20 Mifa miqi qimaseenoo mi maqusa maqusana misaki nimarufaqa misakina aurirana andeeqannisanoo nidanoo firaa naaquqara ainaina firaa ainaina auqeemarufaqa qafeemariqau. Qafamasee irisee sia naundura quandaqau. Mi maqusa maqusanara maaqi qimasee Yisufa nuqu ramasee niqinau.
MAT 11:21 Koorasinna maqannaasa maqusa maaqa namufaqa qinee inniara qimudao̱o qidaqa inni narirafa firaafa mariannoo. Beetasaida maqannaasa maqusa maaqa namufaqa inniara faqa qimudao̱o qidaqa. Inni narirafa faqa firaafa mariannoo. Taia maqusa faqa Sidoonna maqusa faqa aanaamuru aamina mariasa qinee misakina miqimandee faiqí sia amanaiki maria ainaina misakina auqaanaqau naundura dauni quandaiqini. Misa danda doona nifaaqai nikiaqaki akuseeqa nári mandoosanara ikiraqasee minniseefau dauni quandasee qini ufamau fini.
MAT 11:22 Qinee kuqaa anoona ufa inni qimannimidaqa. Firaa numoo aukuana anirainanoo Anutufa Taia maqusanaasa faqa Sidoonna maqusanaasa faqa naridanoo kaqikaaqoo afauaanno. Innee Koorasinna maqusanaasa faqa Beetasaida maqusanaasa faqa sia afauaannoo firaaqoo inni naruannoo.
MAT 11:23 Kapeeranaumma maqusanaasa innee inneeqara uriqararausee qimasee inni maqusara faqa unna qimasee innaaruna amana kai maridee qimariasa. Kasooqaqee Anutufa ani mindari rarisammeeqeenoo idaki aqunnisaannoo. Soodooma maqusanaasa mandoosana maree marufanoo Anutufa narinau. Qinee Soodooma maqusaki faiqí sia amanaiki mari ainaina inni Kapeeranaumma maqusaki auqaafanandee iananoofau maqee mi maqusafa kaqi mariqini.
MAT 11:24 Firaa koota aukuana Soodooma maqusanaasa narirafa mariannoo kaqikaaqoo rauqi nimaqaannoo. Kapeeranaumma maqusanaasa inni narirafa firaatia uqanna sia rauqi nimaqaannoo. Qinee inniki maridaqa qinee qunnufana sia irimarianara inni narirafa firaafa mariannoo.
MAT 11:25 Mikari Yisufa innaaru qimasee qinau. Qini qikoofa, maa maqana faqa innaaruna faqa rakisirafa dufi dufi ani ufa qinee maqee maqee maa ufana qimannimimarunnanara irirana faqaasa nifusaa rafaaqafunniseenana kaiqeesa nifusaa kooroo mannimaqee mariananoo.
MAT 11:26 Eedoo dufi dufi anee qini qikoofa ani aidirafa miqimminoo maridanoo.
MAT 11:27 Aiqama ainaina qini qikoofa qiminau. Yafa yafee amaakuara iridanoo fee sia moo fannoo. Akoofa kai minara iridanoo. Yafa yafee akoonara iridanoo fee, sia moo fannoo amaaku kai minara iridanoo amaaku fannoo narí kai irisee uqannifiqarausa misa minannai qini qikoonara iridaqa.
MAT 11:28 Aiqama kadaapiri mariasa faqa naudura qumaara firaana maree mariasa faqa, qinee unnannai aniraifaqa qinee naundura idooarana nimianauranoo.
MAT 11:29 Qini qumaara qainda dinni qumaree nifaariki rusisee qini dookinaa ufa maraaqa. Qinee reendeenirausa qimuqusa muqufi ubiqarausa maridaqa innee qini ufa oosana marasaifaqa naundura asooarana adooarana nimianaura.
MAT 11:30 Qini qumaara qainda siamma akumu aruannoo sia qumaara marinara asooarana adooarana paqurifaranoo.
MAT 12:1 Mi aukuanna moo Saririqasaa Yuda maqannaasa amaana faasaanasaa Yisufa narí faiqi namu faqa maqusamau uita ququsa qambaanai fimarufanoo mina faiqi namu naararee marusa nári oosana marasee uita ruqoosasee rafarisee fuka naqa fimariqau. Miqunara sia ummuarammidammiafoo qimariqau, aiqamausa nári sandamau fida miqimmi mariqau.
MAT 12:2 Farisai amaana ufa qimarusa misa nindafamasee Yisuna ufa amianneera ufa quandasee qimamiqa qiqau. Qafaa ani faiqi namu Saririqa sandufa rukiaidaqa narana unaku naidaqa Mooseefa minara qaoo qinau. Naqi fee ifaqee miqi fee.
MAT 12:3 Yisufa iriseenoo qinau. Innee aaqaida miqi qimariafanoo Dafidina akara sia fee asaanari fee. Mifa faqa mina faiqi namufaqa naararoofaqa misa Anutuna amaana maaqaki Nooba maqusai marunaki keeqafufaqa amusarara feemu Anutuna amimaru feemuna naqau. Misa miqi mandee sandufa rukiaqau. Mi feemuna Anutuna maaqaki rakisirausa kai naaqee qimaru feemuna marasee naqau. Innee sia fee mina asaanari fee.
MAT 12:5 Innee ooqeenaa sandufa moo sia fee asaanari fee. Anutuna maaqaki aanaiqiki mariasa misa Saririqa sandufa maqee maqee rukiaidaqa amaana maqaki ainainidaqa mariasa numoo siaisa maridaqa miqidaqa.
MAT 12:6 Qineemma ufa qimannimidaqa. Qinee Anutuna amaana maqa uriqararausa maaqoo maridaqa. Misa qini ufa irisee sakuma ruqoosasee naifanoo amana mariannoo.
MAT 12:7 Akara moo maaqimminoo maridanoo. Qinee Anutusa inniara inneeqa niqoonausara nimuqusinaqa nifauaaqa minara qini didiannoo. Qaindasaa maqee maqee aandau tatufirana qimiranara qini qikooqaidanoo. Mi akarana miqi qimasoofaqa qinee Yisusa maaqi qidaqa innee mi akarana oosanara irifaqau qeeqa faiqi namuara naararee marinara innee nimuqusifaqau sia niqini.
MAT 12:8 Qinee faiqí nimaaku amaana faasaana faqa mina sandufausa faqa uriqararausa maridaqa. Qinee amaana faasaana sandufa sia rukiaaqee qunaqa sia rukiaidaqa. Qinee qunaqa naidaqa numoo sia maridanoo.
MAT 12:9 (Mooseena sandufa nári amaana Saririqa sia kaqikaaqoo ainainiqee qinau. Yisuna aukuana misa mi mau kai fimariqau.) Yisufa sakumara qimannimiseenoo miqooqari Yisufa misa faqa misa amaana maqaki keeqanau.
MAT 12:10 Minaki asauku sufirafa misa faqa keeqafi marinau. Farisai amaana ufa irimarusa mi asauku sufiranara Yisuna irammiriqa qiqau. Maasa amaana Saririqa sandufa amanee amaana Saririqasaa faiqí moo fannoo mandaikirana andeeqaanauree aaqaida miqianauree. Misa Yisunara eedoo qinaqa Mooseena sandufa rukiaidanoo fee qimasee qumarasee aruanee qimaseeqa miqi qiqau.
MAT 12:11 Yisufa minara iriseenoo qimanniminau. Saririqasaa firira aandau madikaki aqufifaqa innee umbaqidee sia fee umbaqidee. Sia amaanara irisee kaqi umbaqi mariafanoo.
MAT 12:12 Nana fannoo fee uriqaranoo maridanoo fee. Aandau fee faiqí fee. Aandau sia uriqaranoo maridanoo, faiqí kai uriqaranoo maridanoo. Minara maasa sandufa fannoo mandaiki marifa aurimarifa Saririqa amaanasaa amiqi amiqimannimaqarana amana maridanoo qidanoo. Miqi qimaseenoo asauku sufirana qimaminau. Asauku uqua.
MAT 12:13 Miqi qufanoo mi fasiqafa asauku uqinau. Uqusoofanoo asauku amiqinau, dinni asaukuara foora amiqinau.
MAT 12:14 Farisai amaana ufa qimarusa qafamaseeqa misa aanoomandee raudamafufaqa suqufi narí qimami narí qimami qiqau. Naqimmandee maasa Yisuna aruanauree qimariqau.
MAT 12:15 Yisufa mi ufana iriseenoo findimeeqee moosaa finau. Faiqí anaasee aiqama mina faqa fufanoo aurimarusa mandaikimarusa aiqama andeeqannisanau.
MAT 12:16 Andeeqanniseenoo aranaiqi qimaseenoo qimanniminau. Qumee uqannandaaqa kukee uqanna saaqa sia qinee andeeqasaunnanara kooroo qiaqa.
MAT 12:17 Miqi qimasoofanoo tamummaqara fasiqa Eesaia mina ufa anoona kambiqanau.
MAT 12:18 Mifa ooqai maaqi qimasee Yisunara akara rinau. Qafaa, qini dadaaqira faiqi, qinee mina utaaqamamaqaunafa. Qinee minara qimuqusidanoo qini daundura minara asasidanoo. Qini maraquna mina aakufuannoo. Mifa aanaamuru mariasa faqa kiapausara foora andeeqannisaannoo. Sia Isaraee maqannaa kai.
MAT 12:19 Mifa sia dapi ufa oosana oosana firaaqoo qiannoo. Sia faaqa rumasaida qiannoo. Maqusaindari sia mina ufa irifaranoo.
MAT 12:20 Mifa eendira saka sia ramooramaa mamaree raudaannoo. Amannaikiasa mandainaina rafaaqa fimarinara sia mifa aanoommasee qimannimifa fifimandee reendeenamandee naakapee marifa. Mifa miqimmamaree reendeenammamaree fifi inanoo numoo aukuana raquramiseenoo miqoomma uriqaraannoo.
MAT 12:21 Minaki maqusa maqusa aanaamuru mariasa minaki doo irirana rusifaranoo. Eesaiafa miqi qimasee Yisufa sia qumu maru aukuana Yisunara akara rumaqoofa maridanoo.
MAT 12:22 Faiqí moo faafasaaqa aundurai marufanoo afu dimbeeqeenoo ufa faqa sia qimaruna faiqí anaasee afieeqa Yisufinnai minisoofanoo andeeqanau. Andeeqasoofanoo mi fasiqafa afu maqeenoo ufa qinau.
MAT 12:23 Faiqí anaasee aiqama qafamasee naaquqoofaqa qiqau. Maanaree maasa afeesi marunafa mifee. Dafidina atikiqari findifuanina fee qimaqoofa doo maana mifee.
MAT 12:24 Farisai amaana ufa qimarusa mi ufana iriseeqa qiqau. Maafa afaanna rakisirana Beeraseebura minannai afaanna faiqí naunduraki marina aqiqaidanoo.
MAT 12:25 Yisufa misa ufa iriseenoo qimanniminau. Moo maqusanaasa furufariqa raina rainirausa, doo mi maqa maaqafa dapikammiannoo. Moodaa oosana mariasa mi oosanausa rainarainiqa maqasaa aqufifaranoo.
MAT 12:26 Sia Sadannafa narí kai quandaki narí aqiqaannoo. Miqidanoofau narí raineenoofau mina afeeka fannoo maqasaa aqufiqini. Miqinanoo naqimmasee mina aiku asauku afeekaikamandee marifaree. Sia afeekaikifara furufariqa dapikammifaranoo.
MAT 12:27 Innee Farisai amaana ufa qimariasa inni faiqinamu Sadannanannai fee afaanna aqiqaida fee Anutunannai fee afaanna aqiqaida fee. Anutunannai kai afaanna aqiqeemariafanoo. Inni faiqi namu miqianannai inni manda ufa qaoo qidanoo. Qinee Beeraseeburanannai quandafi afaanna nári niqoonausa niqiqaananoo siammamanaikiannoo. Qinee Anutuna maraqunannai kai afaanna aqiqeeqa.
MAT 12:28 Qinee Anutuna maraqunannai afaanna aqiqaananoo doo Anutuna amiqira ququsa fannoo doo innisaa radiqiseenoo ititannimaqeenoo.
MAT 12:29 Naqimandee moo fannoo Sadanna maaqakinaa ainaina indaa iraree. Maaqa akoona naaree rumbasee mina ainaina indaa ia. Maa aaqoo afu furufarirana maaqa akoona doo qinee rumbaseeqa mi maqanakinaana doo qinee mareeqa.
MAT 12:30 Faiqí moo fannoo sia qini qiqoondi marirafa mi fasiqafa qini namuqaa maridanoo. Sia qini dadaaqida oonu suqu ani suqu imarifa mareeqaida aquraaruki marifa maridanoo. Miqi kai inoo faiqí moo fannoo innaaruna ququsara sia faiqí anaasee suqu quqainafa, mifa furufarammida nifaqanoo nidanoo. Qinee suqu quqaunaqa innee Farisai amaana ufa irimariasa furufaramida nifaqee mariafanoo.
MAT 12:31 Misa Yisunara Sadannanannai afaanna niqiqeefoo qunara, Yisufa minara iriseenoo qimannimidanoo qinau. Oosana oosana manda marirana faqa manda ufa faqa Anutufa amana mina numoo faiqí mininnisaannoo narí maraqunara aqirana minara kai sia mininnisaanoo.
MAT 12:32 Anutuna maraquna aqira ufa mina akiaqara Anutufa sia mininnisaannoo. Maa kamusaqa marira aukuana faqa naaru kamusaqa marira aukuana faqa sia uqanna amana Anutufa mina akiaqara mininnisaannoo. Qinee faiqí nimaakuara diqira ufara minara Anutufa amana mininnisaannoo.
MAT 12:33 Saqari amiqirafa maridanoo mina qaqamma faqa amiqirafa kai maridanoo. Saqari mandaikirafa maridanoo mina qaqamma faqa mandaikirafa kai maridanoo. Saqari qaqamma fannoo kai saqari anoona kooroo idanoo. Miqi kai iqa inni Farisai amaana ufa qimariasa inni manda ufa oosana manda saqari qaqamara foora maridanoo.
MAT 12:34 Innee sakani faiqi miqirausa inni naundura mandamuqanoo maridanoo. Inni naundurai moomoo ainaina marinakiqari ufa uridanoo. Minara naqi fee mandee inni naundurakiqari amiqira ufa uruannoo fee. Sia amana miqirafa. Faiqí afauru fannoo narí amuqusaki mari ainainara kai ufa qidanoo.
MAT 12:35 Amiqira fasiqa mina amuqusa qumiasanakiqari amiqira ainaina maree uridanoo. Manda fasiqa mina amuqusa ookiqari mandainaina oosana oosana kambiqaidanoo.
MAT 12:36 Qinee qimannimidaqa numoo aukuana anirainaqa faiqí misa nariqa aiqama dapi ufa oosana oosana Anutuna afusaa kooroommasaifanoo minara ufa qiannoo.
MAT 12:37 Maqee marira aukuana ookinaa ufa Anutufa iridanoo. Numoo aukuana anirainanoo inni maqee maria aukuana ufa fannoo inni mareeqeenoo amiqiranaki fee quqaannoo fee Anutuna nariranaki fee mara quqaannoo fee.
MAT 12:38 Miqi qimasoofaqa Mooseena sandufa irimarusa faqa Farisai amaana ufa qimarusa faqa misa Yisuna akaru qiraree qimasee qimamiqau. Ufasaa rakisirafa anee moo ainainara qinanoo mookinaqa maasa mina qafeeqa aniara kuqaa Anutuna asauku mundira fee qianaura.
MAT 12:39 Yisufa quandafi qimanniminau. Innee maqee mariasa manda oosana maree mariasa Anutunara nikooqaifaqa minnisee mariasa innee kai moo ainainara qifanoo kambiqaina qafaanee qidaqa. Sia qinee moo fuka ainaina auqaana qafeefara. Nauraa ainaina Yoonaafa tamummaqara fasiqa ooqai firaa noodaanna aranandaki marunara foora miqirana maqee qafeefaranoo.
MAT 12:40 Yoonaafa firaa noodaanna aranandaki qaaramoo faasaana faqa eendaki faqa marinau. Miqi kai iqa qinee faiqí nimaaku qaaramoo faasaana faqa qaaramoo eendaki faqa maqa aundurai madikaki marianaura.
MAT 12:41 Nineefa maqusa marusa numoo aukuana anirainaqa misa findifi inni maqee mariasa niqifaranoo. Misa Yoonaana ufa iriseeqa nári mandainaina maqasaa quqasee quandafufaqa Anutuna afusaa reendeenammiqau, maqee qinee Yoonaana uriqararausa inniki maridaqa innee sia inneeqa mandainaina minnisaidaqa minara misa inni niqifaranoo.
MAT 12:42 Seebaa maqusaindari anaasee rakisirafa moo fannoo numoo aukuana anirainanoo mifa faqa Nineefa maqusanaasa faqa findifiqa maqee mariasa niqifaranoo. Mifa nianaindari Sooroomoona mina irirana iriannee qimasee aninau. Maqee qinee Sooroomoona uriqararausa animaridaqa innee sia qini ufa irimariafanoo, minasaara mi anaasee rakisirafa numoo aukuana anirainanoo inni niqiannoo.
MAT 12:43 Maa maqee mariasa kaifaa maaqimminoo mariannoo. Innee manda faafasaaqa faiqí naunduraki marifara foora marifara. Mi faafasaaqafa mi fasiqana aundurakiqari raudamakinoo fifi inoo fiqu fiqu inoo aadana maqa maaqa oombura maqa maaqaki aakaaqaki adooaranara randaisianoo fiqu fiqu imarinau.
MAT 12:44 Fiqu fiqu idanoo sia paqurinoo narí kai oonumafi iriseenoo qinau. Qinee qeeqa ooqeenaa maaqaki kaifaa keeqaanaura. Qinee qeeqa ooqai mariafanna fasiqana aunduraki kafaa keeqaanaura. Miqi qimaseenoo mi fasiqa finnai anireenoo qafanau. Fifau maaqara foora maridanoo, damunamminoo maridanoo, rapeeiranaki ititanoo maridanoo aiqama ainaina andeeqanoo maridanoo.
MAT 12:45 Mifa mina qafamaseenoo oonureenooafaanna moodannai qisauku dinni oonu qaaraqanda maraseenoo narí manda oosana uriqararausa kai nifiqee anireenoo mi fasiqana aunduraki aiqama keeqafufaqa minaki mariqau. Mi fisiqana inaaqiana manda marirafa fiqaramaseenoo firaaqoo mandaikinoo marinau. Ooqai mi fasiqafa moodaa manda faafasaaqa maru aukuana kaqikaaqoo mandainainaki marinau. Innee maqee manda marira mariasa miqikai mandee marifaranoo.
MAT 12:46 Yisufa miqikaimmasee faiqí anaasee ufa qimannimi marufaqa Yisuna narí anoofa faqa mina akaqaafasaauqa faqa aniree naambeeqai kikiqamafufaqa qimamianee qufanoo faiqí moo fannoo mina irisee maaqaki oonu Yisuna qimaminau.
MAT 12:48 Mifa iriseenoo mi fasiqana qimaminau. Naqi fee ifanee anee qini qinoofa faqa qini qikaqaafasaauqa faqa madaanai mariaafoo q inanee.
MAT 12:49 Maa mariaa qimaseenoo narí faiqi namu asauku mundinoo qinau. Maaqaimee mariasa misa qini qikaqaafasaa qini qinausara foora maridaqa.
MAT 12:50 Faiqí anaasee yausee innaarunai qini qikoona iriranamau fimariasa misa kai qini qikaqa faqa qini dauna faqa qini qinausa faqa maridaqa.
MAT 13:1 Mi faasaanna Yisufa mi maqanakiqari raudamakufanoo firaa taatarunna afainni ooqu reenoo miqoo ooqu marinau.
MAT 13:2 Ooqu marifufaqa faiqí anaasee fifau andandara foora ruqufu aqufi ititafufanoo mifa kanuqaki akaramafinoo ooqu marifinoo minakiqari qimannimufaqa faiqí anaasee nammari afainni maridaqa mina ufa irimariqau.
MAT 13:3 Mifa kanuqakiqari oosana oosana quandara ufa qimanniminau. Mifa maaqi qinau. Faiqí moo fannoo Yuda maqannaafa nári oosana maraseenoo raisa fooqaana ummaqirara maqa rumaqoonaki qaqama kaqi aaqee marinau.
MAT 13:4 Mi fasiqafa aaqee marufanoo qaqamma akaqafa aanasaa niku ree maruqoo faqa aaqamaki aqufufanoo ufiniuqa aniree mina kai naqau kaqindaraana sia naqau.
MAT 13:5 Akaqafa aaqamaki oonisaa aqufinau. Maqa sia moomoo marufanoo maqa tootooqi marunara dauni kambiqanau.
MAT 13:6 Kambiqafufanoo suani urureenoo arusoofanoo maqa eeraqoo marufanoo atuka sia meemai keeqoonara suani arufanoo aadanusinoo kuqinau.
MAT 13:7 Akaqafa amuka faqaa ainaina marunaki aqufufanoo amuka faqaa ainaina fannoo urureenoo rafaaqafinoo arusanau.
MAT 13:8 Akaqafa amiqira maqasaa aqufufanoo qaqamma moomoo iranau. Akaqafa urureenoo qambaana irara iranau. Akaqafa urureenoo oodaa iranau.
MAT 13:9 Aaqoo faqaafa irinana anee kai andeeqasee iria.
MAT 13:10 Yisuna faiqi namu mina ufa iriseeqa mariufaqa mifunnai anireeqa irammiriqau. Naqaaifanee quandara ufa kai qimannimidanee, akooqoo kooroomasee qimannimiaqaana.
MAT 13:11 Yisufa iriseenoo qinau, innee innaaruna maqusa qumee irirana iriaqeera, misa sia iriaqeera quandara ufa qimannimidaqa.
MAT 13:12 Faiqí anaasee moo fannoo innaaruna maqusa irirana irinanoo Anutufa moo faqa mina amifanoo minaindi moomoo kammiannoo, faiqí anaasee moo fannoo innaaruna maqusa irirana siaifa moodaa marinnana Anutufa mina aiqama maree finanoo kaqisamu mariannoo.
MAT 13:13 Misa nifu maqaidaqa sia qafaidaqa, misa naaqoo marifaqa sia iridaqa, minara qinee quandara ufa qimannimidaqa sia iriaqeera qimannimidaqa.
MAT 13:14 Misara tamummaqara fasiqa Eesaia mina ufa anoona kuqaa kambiqeenoo. Minara qimasee akara rumaqoona anoona kambiqanau. Mifa minara maaqi qimasee qinau. Kuqaa innee naaqoonnai qini ufa iriseeqa naunduraki sia irifaranoo. Kuqaa innee nifunnoo qinee auqee marunna ainaina tataqafi qafamaseeqa naaqoonnai siamma irifaranoo.
MAT 13:15 Maa maqannaasa nimuqusa kudoosaapanoo maridanoo. Misa naaqoo auninoo maridanoo, misa nári nifu nári tautasee maridaqa. Misa nifunnai qafamasee irifoora misa naaqoonnai irifoora. Misa naundura iriaraasifoora. Misa quandafinaqa qinee ianannai anifaqa qinee misa amiqianoora. Tamummaqara fasiqa ufa miqimminoo maridanoo.
MAT 13:16 Innee qini faiqi namu inneeqa nifu qafee mariana inniqa naaqoo irimariasa marianara asasiaqa, inneeqa kai qafaidaqa, inneeqa asasiranaki mariafanoo inneeqa qini ufa oosana iridaqa.
MAT 13:17 Qinee anoona ufa inni qimannimidaqa. Tamummaqara fasiqauqa faqa reendeenirafa andeeqara fasiqauqa faqa misa ooqai maridaqa innee maqee maqee qafeemarianara kaaqa nimuqusufaqa minara qafaaqaa kaimmasee sia qafaqau. Misa innee maqee qini ufa irimariana kaaqa nimuqusifaqa iriraree qimasee iriaqaa kai qimariqau. Sia iriqau.
MAT 13:18 Qaqamma aaqee mari fasiqana quandara ufa oosana irisaifaqa qimannimianaura.
MAT 13:19 Moo fannoo qini ququsakinaa ufa iriseenoo sia irinoo manoo manaa imarifa, qaqamma mina amuqusaki kakasammasaifanoo manda faiqi fannoo animaree fifinoo. Maafa qaqamma fooqaana aanasaa kukupee marifanoo siara foorammidanoo.
MAT 13:20 Oonisaa kukupanoo marifa mina oosana maaqimminoo maridanoo. Misa Anutuna ufa irisaidaqa asasammasee mi ufana maraifanoo sia atuka misaki amiqimmasee ausinoo kaqi meeraqoo rusinoo maridanoo, qusasaa qimasee minnisaidaqa. Mi ufanasaara narirafa kambiqaifaqa misa quqasee fuaniqiana saamuridaqa.
MAT 13:22 Amuka faqaanaki aqufu qaqammafa moo fasiqara foora maridanoo. Mifa Anutuna ufa irinoo maqasaa kadaapirirana faqa kaaqa ainainara munnimmara amuqusirana faqa mi ainainafa mi ufana anukaki kukuqinoo sia qaqamma iraidanoo, sia anoona kambiqaidanoo.
MAT 13:23 Qaqamma amiqira maqasaa kakasinoo moo fasiqara foora maridanoo. Mifa mi ufana iridanoo oosana amiqimandee iridanoo. Mifa kuqaa qaqammara foora iraidanoo. Moo uriqararafa amiqimma qaqamma irafinoo irairaammidanoo. Moo qambaanai marifa narí amanasaa iraidanoo. Moo ureeqarafa miqi kaimidanoo narí amanasaa iraidanoo.
MAT 13:24 Quandara ufa moo Yisufa faiqí anaasee noorinni mara quqanau. Manda oosana maree marusara faqa amiqira oosana maree marusara faqa misauqara quandasee qimanniminau. Innaaruna maqusai faiqí moora foora maridanoo. Mifa narí ququsaki amiqira qaqamma ummaqinau.
MAT 13:25 Faiqí misa faiqaqeeufanoo mina namuqaa fannoo anireenoo kukura asumu sakuma maruqoo ummaquseenoo finau.
MAT 13:26 Sakuma urureenoo uri rupipoosufaqa kukura faqa qafaqau.
MAT 13:27 Mina dadaaqira faiqiuqa ququsa akoona oonu qimamida qiqau. Rakisirafa, anee kuqaa fee ani amiqira qaqamma kaifee ummaqinee. Nanaindari fee kukura kambiqaidanoo fee.
MAT 13:28 Mifa iriseenoo qinau. Imboo namuqaa fannoo kai ummaqinoo. Qimasoofaqa mina faiqi namu qiqau. Amanee maasa oonuree rarakuanauree qimasoofanoo mifa qinau. Sia innee kukura rarakuaqa, sakuma faqa rarakifoora.
MAT 13:30 Saina kaqi mariani. Miqanda moodaa karammiqa mariafaqa. Aiqama akuqamafinaqa qinee qimannimianaqa innee kukura indaaru ateeka rumbasee ida araaqeera. Inaaqiana sakuma ateekasee qini maaqaki quqaaqa.
MAT 13:31 Yisufa moo quandara ufa misa noorinni quqanau. Innaaruna ququsaki fifandinausa qumini qaqama miqirausa maridaqa. Faiqí mina qaqama narí ququsaki ummaqinau.
MAT 13:32 Mina qaqama kaqikaana uqanna maridanoo. Mifa urureenoo qambaanai oorufinoo firaa saqariara foora aiqama aakaaqakinaa andanda uriqararafa maridanoo. Miqinoo marifaqa ufiniuqaindi anireeqa mina asaanai aanaamu usakaidaqa.
MAT 13:33 Mifa quandara ufa moo qimanniminau, Anutuna ufa aiqamai daraaniranara qimanniminau. Innaaruna ququsaki fimariasa ooruku anoonara foora maridanoo. Anaasee mina marasee feemuki adiasaafanoo aiqama ati qaidanoo.
MAT 13:34 Maa ufana faiqí anaasee moomoo marufanoo Yisufa quandara ufakiqari kai qimanniminau.
MAT 13:35 Yisufa maaqi qimannimisoofanoo ooqeenaa tamummaqara fasiqa mina ufa anoona mikari kambiqanau. Tamummaqara fasiqa qinau. Qinee doo raqasee quandara ufa kai qianaura. Maqa quqoo aukuana kukeeqoo ufana kukeeqanoo mariifa qinee mi ufana maqee quandara ufakiqari kooroo qimannimianaura. Tamummaqara fasiqa ufa miqi qimaqoo ufafa maridanoo.
MAT 13:36 Yisufa faiqí anaasee qimannimiseenoo minniseenoo maaqaki keeqanau. Mina faiqi namu mifunnai oonureeqa qiqau. Kukurara quandara ufa qimanniminaqa iriaqa.
MAT 13:37 Miqi qufanoo mifa qinau. Faiqí nimaaku qinee amiqira qaqamma ummaqi marunausa maridaqa.
MAT 13:38 Ququsaki maa maqanasaa mariasa maridaqa. Amiqira qaqamma karaambaiqa aiku asauku mariasa maridaqa. Kukura manda faiqi mina aiku asauku mariasa maridaqa.
MAT 13:39 Namuqaa kukura ummaqinafa Sadannafa kai maridanoo. Sakuma ateekara aukuana, maa maqee marira kamuqoo taikara aukuana maridanoo. Sakuma ateekara fasiqauqa misa qangiroouqa maridaqa.
MAT 13:40 Kukura ateekasee rumbeeqee idaki aqifanoo taikara aukuana miqimminoo mariannoo.
MAT 13:41 Mi aukuanna qinee faiqí nimaaku qeeqa qangiroouqa niqiqaanaqa misa Anutuna ququsakinaana manda findi fira findi fimariasa narí oosana uqannifiqanoonifa faqa manda oosana mariasa faqa maramaree auru firaafa imarinnanaki minaki aqifaranoo. Miqoo faiqí misa qikindaqeefara nifai riqifaranoo.
MAT 13:43 Miqooqari andeeqarausa suaniara foora kaimmifaranoo. Innaarunnai nári nikoona maqusaki maridaqa kaaqa qeefaranoo. Naaqoo faqaasa mariafanoo inneeqa kai andeeqasee iriaqa.
MAT 13:44 Innaaruna ququsaki keeqeemaria ufafa koora miqirafa maqaki kukeeqanoo maridanoo. Faiqí moo fannoo paqurimasee qafeenoo kaifaa kukeeqaannoo. Kukeeqaseenoo asasammaseenoo narí ainaina oosana oosana akaqausa nimiseenoo mina akiaqara munnimma maraseenoo quandaki koora mari maqa maaqana feefaurummasee mi koorana indufuannoo.
MAT 13:45 Kafaa innaaruna ququsaki keeqeemaria ufafa faiqí moora foora maridanoo. Mi fasiqafa koora aina feefaurimarifa koorara maqusamau randanoo nidanoo.
MAT 13:46 Oonda firaa feefaurimaria oondana paqurimaseenoo narí ainaina aiqama moosa nimiseenoo minasaaqaraa munnimma maraseenoo nariara mi firaa oondana maraannoo.
MAT 13:47 Kaifaa Yisufa minara qinau. Innaaruna maqusa pateeree maria uqara foora maridanoo. Misa mi pateeuqana nammariki ramasee noodaanna oosana oosana minaki uqaridanoo.
MAT 13:48 Pateeuqa qumbiqafifaqa uqeereeqee afainni quqaidaqa. Quqaseeqa misa ooqu marifiqa amiqira noodaanna taquki mara upeekasee manda noodaanna mara teeqimmaqidaqa.
MAT 13:49 Maa marira aukuanna taikafinanoo miqimminoo mariannoo. Qangiroouqa rafudamafiqa manda oosana maree mariasa faqa amiqira oosana maree mariasa faqa raineefara.
MAT 13:50 Misa mandaikirausa ida firaa auruki mara aqifara, minaki iki raqaidaqa nifai riqifara.
MAT 13:51 Miqi qimaseenoo Yisufa narí faiqi namu irammirinau. Innee maa ufana oosana irida fee. Miqi qufaqa misa eedoo qiqau.
MAT 13:52 Yisufa iriseenoo kaifaa maaqi qimasee qimanniminau. Mooseena sandufa irimari fasiqafa moo fannoo Anutuna ququsaki mariranara irimarifa maridanoo mifa faiqí firaafara foora maridanoo narí maaqakiqari ooqeenaa amiqira irirana faqa fuka amiqira irirana faqa marasee ani uqafiqaannoo.
MAT 13:53 Yisufa maa quandara ufausa taikaseenoo mi maqusana minniseenoo narí maqusai uqanna oonureenoo misa amaana maqaki keeqafinoo qimanniminau. Misa mina ufa irisoofanoo naaquqoofaqa qiqau. Yai fee maa fasiqafa maa irirana faqa maa idaaqammannisarana faqa irinoo fee.
MAT 13:55 Maa fasiqafa kamundaa amaaku maridanoo. Mina anoofa Mariafa maasa faqa maaqooqaraafa maridanoo. Mina akaqaafasaa Yameesana amarafa faqa Yooseefaana narí akoona amarafa faqa, Simoonafa faqa, Yudasina amarafa faqa maasa faqa maridaqa.
MAT 13:56 Mina asooqmaakamara faqa kaqi misa maaqoo maridaqa. Maa fasiqafa yai fee maa amiqira irirana mareenoo fee. Maasa minara qikooqaidanoo.
MAT 13:57 Miqi qimasoofaqa misa minara oonumafi irisee ooimariqau. Yisufa misa ufa iriseenoo qimanniminau. Tamummaqara fasiqa maqusa maqusa mina fidanoo faiqí anaasee minara naaquqaifaqa ufa iriaqaa kai idaqa. Narí maqusanaasa uqanna faqa narí ainaina faqa sia irifara nikoo nikaa ifaranoo.
MAT 13:58 Yisufa miqi qimasoofaqa misa sia minaki irirana rusiqoonara Yisufa sia moomoo firaa ainaina naaquqara ainaina miqoo auqinau.
MAT 14:1 Mi aukuanna Eeroodeefa Karidaia maqannaa uriqararafa firaafa marinau. Roomma maqannaa kiapana ameemaanai ureeqanoo marida rakisinoo marinau. Faiqí anaasee misa Yisuna amooqimammaree anufanoo Eeroodeefa irinoo narí aiku asauku maaqi qimasee qimanniminau.
MAT 14:2 Maafa Yisufa Yoohaneefa nammari nimimarufa kuqiranakiqari findifinoo Yisunaikinoo maridanoo, maa afeeka firaa ainainna auqaidaqinoo fee qinau.
MAT 14:3 Eeroodeefa narí akaqa anaaqa auqu Eeroodia nammarina maroofa mi anaaseefa qufanoo iriseenoo Yoohaneena rumbeeqeenoo karafusaki quqasoofanoo marinau. Yoohaneefa Eeroodeena narí akaqa anaaqa Eeroodia nammarina maroonara aqinoo qinau. Anee sandufa rukieenana mi anaaseena maraananoo. Miqi qufanoo mi ufanara aranaqoofanoo Eeroodia nammarina ufara karafusaki rumba quqanau.
MAT 14:5 Eeroodeefa Yoohaneenara kuqaruani qinaqa faiqí anaasee minara irifoora. Misa aiqama Yoohaneenara Anutuna tamummaqara fasiqa fee qufanoo Eeroodeefa minara oonumafi iriseenoo minara rufieenoo sia arinau minnisee kaqi rumbanau.
MAT 14:6 Eeroodeena maqoo aukuanafa kindaaramambufanoo miqoo faiqí anaasee suqu maree oomaqammanee mariqau. Eeroodia nammarina araamuna fannoo sukuraki maridanoo aaduma idi rama akoofasa quqamaqoofa maridanoo qoomaqammanee maruna qambaanai faiqí anaasee nifusaa findifi idi ranau. Eeroodeefa mi manaaqafa idi roona qafoofanoo kaaqa amiqi amiqinau.
MAT 14:7 Afaaqa amiqi amiqufanoo narí amana aqiqeenoo mi manaaqana qimaminoo qinau. Anee nanaree aidinana qimaqiminaqa qinee minakaimmamianaura idi raannana akiaqara amianaura.
MAT 14:8 Mi manaaqafa Eeroodeena ufa iriseenoo sandeenoo narí anoona Eeroodia nammarina oonu qimamisoofanoo irinau. Yoohaneefa Eeroodeena faqa mi anaaseena faqa niqunara mi manaaqana anoofa aranaqee marufanoo mariufa mari maridanoo narí araamuna fannoo oonuree narí anoona qimamufanoo mina anoofa mikari Yoohaneena arira irirana paqurinau. Oo doo maqee mifa qini diqufa kuquannoo. Miqi qimaseenoo Eeroodia nammarifa narí araamuna qimaminau. Anee oonuree qinanoo Eeroodeefa Yoohaneena akiaqa ituqu piritasaqa saka amiani qufanoo mi manaaqafa mi ufana iriseenoo ani randeenoo Eeroodeefinnai oonureenoo narí anoona ufa kai qimaminau.
MAT 14:9 Eeroodeefa mi ufana irisoofanoo aundura mandaikinau. Faiqí anaasee nifusaa qeeqa qimana aqiqamasaunnanara oonumafi iriqa qisauruanoo qimaseenoo eedoo kai qinau. Eedoo qimasee narí firisuaiqauqa niqiqanau, oonuree Yoohaneena akiaqa tuqumaree mina amiaqee qufaqa firisuaiqauqa misa iriseeqa karafusa maaqaki keeqafiqa Yoohaneena akiaqa tuqiqau.
MAT 14:11 (Mi maqannaasa mina fidika maqasaa aqufuandoo qimaseeqa piritaki sakaqau sia nararau miqiqau. Kaqi fifau fidika aqufuandoo qimasee miqiqau.) Yoohaneena akiaqa misa tuqu piritasaqa sakamaree mi manaaqana mina amiqau. Amisoofanoo mifa maree munu narí anoona aminau.
MAT 14:12 Yoohaneena faiqinamu mifa kuqunara iriqa ani karafusa maqakinaana ani mina iri mara mareeqa munu madikaqau. Madikamaseeqa misa Yisufunnai oonureeqa mi ufana qimamiqau.
MAT 14:13 Yisufa mi ufana Yoohanee arunara iriseenoo ummaararoofanoo nammariki ooquree kanuqaki narí faiqi namufaqa akaramafufanoo nariara faiqí sia marutinai finau. Faiqí anaasee Yisuna sipa fannoo nammariki fimarufaqa qafamasee faiqí anaasee maqusa maqusa tatufufaqa maqamau afaindanai miqoombiqau.
MAT 14:14 Yisufa kanuqakiqari maqasaa aqufinoo nindafoofaqa moomoosa ani marufanoo. Oonureenoo misara amuqusufanoo misaki aurimarusa aurirana taikannisanau.
MAT 14:15 Eendi marufaqa mina faiqinamu mina ufa irimarusa anireeqa Yisuna qimamiqau. Maa maqa maaqanaki faiqí siai maqa maaqaki, suani doo keeqaidanoo. Anee faiqí anaasee niqiqainaqa maqusa maqusa narana feefaurummasee namasee faiqaaqa.
MAT 14:16 Yisufa iriseenoo maaqi qimasee narí faiqi namu qimanniminau. Innee fifau niqiqeefaara. Inneeqa kai narana nimiaqa.
MAT 14:17 Miqi qimasoofaqa misa qiqau. Maasaki feemu rumbarafa moodaannai qisauku kai maridanoo. Noodaanna qaaraqanda kai maridanoo.
MAT 14:18 Yisufa iriseenoo qinau. Doo mina kai qini qimiaqa.
MAT 14:19 Miqi qimaseenoo faiqí anaasee aiqama qimanniminau. Aiqama andanda rasoonookammasee ooqumariaqa. Miqi qimaseenoo mifa feemu moodaannai qisaukunamu faqa noodaanna qaaraqanda faqa qumareenoo innaarunnai oori uqeeraseenoo Anutunara dufi dufi qimaseenoo feemu ruqi ruqimaseenoo narí ufa irimarusa nisaukuki quqasoofaqa misa qumareeqa faiqí anaasee nimiqau.
MAT 14:20 Faiqí anaasee aiqama namasoofaqa nimuaqufaqa Yisuna ufa irimarusa uqa qumareeqa misa ooqu maruqoo fiqu fiqu idaqa narana andaanauqa uqariqau. Qisaukuqara taikasee qikunni qaaraqanda uqa qumbiqasee maraqau.
MAT 14:21 Mi naranna noosa faiqí kai ooni saqari maqusa manda samu muquiqa mariqau. Faifa tauseenna mariqau. Anaasee faqa faiqi faqa ootupa mafufaqa maaqa maaqa qumbiqa maqiqau.
MAT 14:22 Namasoofanoo Yisufa narí ufa irimarusa niqiqeenoo qinau. Innee sipaki qini doorinni nammari dinni afainni fimarifaqa qinee faiqí anaasee niqiqamasee kasoo fuanaura.
MAT 14:23 Mifa faiqí anaasee niqiqamaseenoo nariara aaqanai innaaru qiraree qimasee akaramafinoo innaaru qinau. Mi eendanaki aaqanai naríara marinau.
MAT 14:24 Yisufa aaqanai marufaqa mina faiqi namu sipaki faruma qambaanai oonuroofanoo ufai firaafa noorindari uqinoo nammari amakaurinoo mina ufa irimarusa sipaki kadaapirida fimariqau.
MAT 14:25 Iqaqarafa qusaramafufanoo Yisufa nammari amuaqumau aiku ramammaree misa unnai finau.
MAT 14:26 Nammari amuaqumau fimarufaqa mina faiqi namu qafamasee afaanna fee qimaseeqa kaaqa rufiamaree faaqariqau. Yisufa iriseenoo qimanniminau. Sia rufiaaqa. Inneeqa nimuqusa ubiqaaqa. Qinee maridaqa.
MAT 14:28 Peetooroofa Yisuna ufa iriseenoo qinau. Karaambaiqa kuqaa anee maridana qinaqa anee ianannai nammari amuaqumau qinee faqa fuanaura.
MAT 14:29 Yisufa iriseenoo qinau. Doo ania. Peetooroofa iriseenoo sipakiqari raudamakufanoo nammari amuaqumau Yisufunnai finau.
MAT 14:30 Fimarufanoo ufai firaafa uqufanoo rufiamareenoo doo nammariki ukuqnanau. Nammariki ukuqnaidanoo faaqarumaseenoo Yisuna aaraidanoo qinau. Karaambaiqa qini qumaraa.
MAT 14:31 Yisufa iriseenoo dauni mina asauku qumareenoo qinau. Anee nanaree qaara aundura irinanee. Anee sia qinisaa irirana rusi mariananoo.
MAT 14:32 Miqi qimaseenoo miqanda sipaki akaraqau. Akaramafufanoo ufai taikanau.
MAT 14:33 Sipaki kaqi marusa misa mina qafamaseeqa naaquqoofaqa Yisuna oorinni anireeqa noorindari mapamufufaqa Yisuna amooqiqa qiqau. Kuqaa anee Anutuna amaaku mariananoo qiqau.
MAT 14:34 Misa sipaki nammari dinni afainni taqakufaqa Keeneesareetee maqusai oonu raqau.
MAT 14:35 Mi maqusaanaa fasiqauqa oonuree mina oori qafamaseeqa maafa auruasa andeeqee marifa qimaseeqa ufa quqasoofanoo maaqa maaqa maqusa maqusa ufa finau. Aurimarusa aiqama suqeeqeeqa Yisufunnai quqaqau.
MAT 14:36 Aurimarusa misa anireeqa maasa moomoosa marida Yisufa sia maasa aiqama andeeqaqisaandoora qamunna atikai amanee maasa kaqi auqaananoo aurirafa taikaannoo fee qufanoo Yisufa eedoo qimasoofaqa mina qamunna ati auqamasoosa aurirafa aiqama taikeenoo amiqi uqannammannisanau.
MAT 15:1 Farisai amaana qimarusa faqa Mooseena sandufa irimarusa faqa Yeerusareendari Yisufa maruqoo irammiriqau.
MAT 15:2 Nanaree ani faiqi namu ooqeenaasa faiqí firaasa sandufa rukiee fee sia narana nisaauqusee nee fee.
MAT 15:3 Yisufa iriseenoo qimanniminau. Innee faqa nanaree Anutuna sandufa rukiasee fee inneeqa sandufa kai afeekaikidee.
MAT 15:4 Anutufa maa sandufana quqanau. Inneeqa ninausa nikausara asasamandee amiqidaqa misa nuqu uqeeraaqa. Kaifaa moo quqanau, faiqí moo fannoo narí anoona akoonara manda ufa qinanoo arusaina kuquannoo.
MAT 15:5 Anutufa mifa miqi qimasoofaqa innee maaqi qimasee mi ufana moomau fimariafanoo. Faiqí moo fannoo mina anoofa akoofa sarauida mandaikida amiqiannee qinna sandufanara doo qinee Anutuna amiseeqa sia ani amana amianaura. Miqi qimaria fasiqa aanaaseesara innee doo andeeqaidammiafoo qimariafanoo mifa narí anoofa akoona sia dadaaqianifeera qidaqa aaqee mariafanoo.
MAT 15:6 Miqi kai mandee fifau inniqa ufa fannoo Anutuna sandufa arimariafanoo.
MAT 15:7 Innee kaaqa ufa qimannimisaida maqandanai manda oosana maraqanuasa. Anutuna tamummaqara fasiqa Eesaia, kuqaa uqanna inniara qimasee akara rinau. Mifa maaqi qinau.
MAT 15:8 Maa maqannaa fasiqa anaaseesa nifauru fannoo kai unnaqimasee qini duqu uqeereemariasa, nimuqusa kaqinni ubeekarausa mariafanoo.
MAT 15:9 Misa faiqí qimaria sandufana qumaree unnaqimasee Anutuna sandufammifoo qimaseeqa faiqí anaasee naamuaqidaqa. Miqi qimasaidaqa Anutunara innaaru qifanoo siammiriannoo. Tamummaqara fasiqa Eesaiaafa inniara miqi qimasee akara rinau.
MAT 15:10 Miqi qimaseenoo Yisufa faiqí anaasee aiqama naaramaseenoo qimanniminau. Farisai amaana ufa qimariasa nári faiqi namuara sia nisaaqusee neeaafoo qunara qimanniminau. Iriaqa, innee maa ufana oosana iriaqa.
MAT 15:11 Nooki fimari naranainainafa sia faiqí putaamma nimaqaidanoo. Nooki qari urimari mandufafa mifa faiqí putaamma nimaqaidanoo.
MAT 15:12 Miqi qimasoofaqa mina faiqi namu anireeqa qimamiqau. Sia fee iridanee. Farisai amaana ufa qimariasa misa ani ufa iriseeqa noori runidammia.
MAT 15:13 Misa miqi qufanoo Yisufa qimanniminau. Aiqama ainaina innaarunai qikoofa sia ummaqu ainaina moo fannoo qummaquqaifanoo Anutufa rarakuannoo. Sia misara rufiaaqa, Anutufa rarakuannoo.
MAT 15:14 Saina misa kaqi mariaqa. Misa nifu qimbarausa nisaadaki mariasa. Afu qimbarafa kai afu qimbarana asaadakinoo fifi inoo aiqamaqara kai madikaki aqufifaranoo.
MAT 15:15 Peeteeroofa qinau. Maa quandara ufana qiannana qimaqiminaqa irianaura.
MAT 15:16 Yisufa iriseenoo qimaminau. Aneenna faqa irirana siai fee maridanee.
MAT 15:17 Aiqama ainaina ooki quqasaananoo aranandaki ooqureenoo umiqaree fimarinara sia fee iridanee.
MAT 15:18 Aiqama ookiqari urimari mandufafa amuqusakiqari uridanoo. Mi mandufausa kai faiqí anaasee putaamma nimaqaidanoo. Mi ufanara qidaqa.
MAT 15:19 Amuqusakiqari manda irirana faqa faiqí narirana faqa moona anaasee maree mariafa faqa maanaaqa kumaara rarisee mariafa faqa ummuari mariafa faqa fifau akaru qimasee quandasee qimariafa faqa aqoonnanara mandufaqiranara faqa mifauqa kai faiqí putaamma nimaqaidanoo. Sia nisaaqumaseeqa narana neemariafa sia mifa faiqí anaasee putaamma nimaqaidanoo.
MAT 15:21 Yisufa miqooqari Taia maqa maaqa faqa Sidoonna maqa maaqa faqa marutinai finau.
MAT 15:22 Miqooqari Kannaana maqannaa anaasee fannoo aanaamuru anaasee anireenoo Yisuna qimaminau. Anee Dafidina ati karaambaiqa mariananoo. Anee qiniara amuqusiani. Qini qiraamuna ooqeena aakinoo marifaqa ooqeena fannoo maqee maqee qini qiraamuna mara furufari marifaqa aurirana amimarifaqa minara ani qimamidaqa.
MAT 15:23 Yisufa iriseenoo sia irinoora foora kaqi finau. Mina faiqi namu anireeqa Yisuna fukifaaki qiqau. Anee mina aqiqaa maqee maqee mifa maasara faaqari marifanoo qikooqaidanoo.
MAT 15:24 Misa maaqi qimasoofanoo Yisufa qimanniminau. Dapikamambiqa Isaraee maqannaa sipsipara foora mariasa, misara kai dadaaqirara qumidaqa.
MAT 15:25 Qimasoofanoo mi anaaseefa mina oorinni ani ooqumarifufanoo qiki raqaida qimaminau. Karaambaiqa anee qini dadaaqia.
MAT 15:26 Yisufa iriseenoo qimaminoo qinau. Kamaa suqasee faiqiuqaindi nimiraree qimasee sia quandaki faini nimia, sia mi oosanafa miqinoo maridanoo.
MAT 15:27 Qimasoofanoo mi anaaseefa qinau. Kuqaa qiananoo. Kuqaa ani dadaaqira ainaina Isaraee maqannaasaindi maridanoo. Kuqaa qinee moo maqannaasa fainiara foora maridaqa. Anee iria, faini fannoo narí akoofa kamaa naida kakasamasaina andaana suqunaidaqa. Anee andaana kai qiminanoo qini qiraamuna dadaaqiani.
MAT 15:28 Yisufa mi ufana iriseenoo qimaminau. Imboo maa anaaseeo̱o Anee qinisaa irirana rusirana firaafa marianafa. Anee aneenna innainaina mifa kai kambiqaannoo. Miqi qimasoofanoo mi anaaseena araamuna mikari kai nianai marunnai ooqeena taikasoofanoo mi manaaqafa amiqinoo marinau.
MAT 15:29 Yisufa miqooqari findimeeqeenoo Kariree nammari afaiqara ooru finoo aaqanai akaranau. Akaramafufanoo ooqu marinau.
MAT 15:30 Faiqí anaasee qafamasee moomoosa mina afaqee ooru fiqau. Misa niku arirutimarusa faqa misa nifu qimbarausa faqa niku eendirausa faqa sia ufa qusa faqa oosana oosana teeroomaree marusa faqa maree oorureeqa Yisuna aikusaqa quqasoofanoo mifa aiqama misa aurirana andeeqa taikannisanau.
MAT 15:31 Faiqí anaasee mina qafamaseeqa naaquqanau. Sia ufa qusa ufa qufaqa niqafamaseeqa arirutimarusa nimarufaqa niqafamaseeqa nifu qimbarausa faqa nifu maqasoofaqa niqafamaseeqa maa faiqi anaaseesa ooqai mandaikimarusa maqee amiqiqa maridaqa misa niqafamaseeqa naaquqoofaqa misa aiqama Isaraee maqannaa Anutunara asasiqau.
MAT 15:32 Yisufa narí faiqi namu naaramasee qimanniminau. Qinee maa maria fasiqa anaaseesara qimuqusifaqa narana sia marifaqa qaaramoo faasaana mariaasa. Qikoo misa fifau niqiqarara aanai kudoosaapee foora.
MAT 15:33 Mina faiqinamu iriseeqa qimamiqau. Yaqoo fee narana marinaqee misa nimianauree andandakinai marifaqa moomoosa mariafaqa.
MAT 15:34 Yisufa iriseenoo irammirinau. Naquma feemu fee innee maqee̱ idee qufaqa misa qiqau. Qisauku dinni taikasee dinni ani qaaraqanda marasee feemu marifaqa noodaanna faqa kaqikaafa qaaraqanda marifaqa.
MAT 15:35 Mifa iriseenoo faiqí anaasee aiqama maqasaa ooqumariaqee qufaqa ooqu mariqau.
MAT 15:36 Ooqu marifufanoo Yisufa feemu dinni qisauku taikaseenoo dinni ani qaaraqanda maraseenoo (7) mi feemuna faqa noondaana faqa maraseenoo Anutuna dufi dufi qimaseenoo ruqi ruqi maseenoo narí faiqi namu nisaukuki quqasoofaqa qumareeqa faiqí anaasee nimiqau.
MAT 15:37 Faiqí anaasee noofanoo nimuaquqinau. Nimuaqumambufaqa Yisuna faiqi namu andaanauqa suqeeqee uqaki riqau. Dinni qisauku taikasee dinni oonu qaara marasee uqa (7) qumbiqaqau.
MAT 15:38 Faiqí neemarusa ooni saqari auqiqa maqi tauseena (4,000) mariqau. Anaasee faqa faiqi faqa ootupamafufanoo meeraqoo marinau.
MAT 15:39 Yisufa misa niqiqamaseenoo sipaki keeqafinoo Makadana moo maqusanai finau.
MAT 16:1 Farisai amaana ufa qimarusa faqa Sadikai amaana ufa irimarusa faqa misa Yisunara kuqaa Anutuna amaaku fee maridanoo fee qianeera uneemaana qimasee amanammasee qafaaneera qiqau. Firaa ainaina mookira ainaina innaarunaindaraa ainaina uqaqifiqasainaqa qafamasee kuqaa aniara Anutuna faiqi fee qianauranoo.
MAT 16:2 Yisufa minara iriseenoo qimanniminau. Eendifanoo innaaruna taatuqeendifaqa duna ufidaannoommifoo qidaqa qimariafanoo.
MAT 16:3 Iqaqaifanoo kananaana asukuna arifaqa aaku rirarammifoo qimariafanoo. Innee innaaruna qafaidaqa irimariafanoo maqee maa aukuanna qinee marunna aukuana innee mina qafamasee sia irimariafanoo. Innee nanaree miqi qimariafaqee.
MAT 16:4 Mandainaina mareemariasa faqa maqee maqee inneeqa Anutuna minnisee mariasa miqi mariasa innaarunaindaraa ainaina faiqí sia amanaiki maria ainaina auqamasee uqaqifiqainaqa aniara kuqaa mindaraa fee qianauree qimariafanoo. Qinee fuka innaarunaindaraa ainaina sia uqannifiqaanaura. Nauraafa ooqai kuqu fasiqafa Yoonaanaindi mifa kai kaqi maridanoo mifa qaaramoo faasaana faqa qaaramoo eendaki faqa noodaanna firaana aranandaki marinau. Mi ufana qimaseenoo quqasee finau. (Yisufa narí kuqufinoo qaaramoo eenda faqa faasaana faqa madikaki marianinnanara quandaseenoo miqi qinau.)
MAT 16:5 Yisufa narí faiqi namufaqa nammari faruma dinnafainni kanuqaki oonu raqau. Mina faiqi namu feemuara randoosia qiqau. Oo doo aunusee kaqi samu aniqa.
MAT 16:6 Miqi qimasoofanoo Yisufa qimanniminau. Innee Farisai amaana ufa qimariasa faqa Sadikai amaana ufa irimariasa faqa misa atiqee mari ooruku anoonara foora rufieeqa eerairiaqa.
MAT 16:7 Misa iriseeqa narí qimami narí qimamimasee qiqau. Oo maasa feemuara randaunanoo mifa ooruku anoonara qidaqinoo.
MAT 16:8 Yisufa mi ufana iriseenoo qimanniminau. Innee qinisaa irirana rusirana sia amana maridanoo. Innee nanaree sia feemu maraanara narí qimami narí qimami qidee.
MAT 16:9 Innee sia fee iridee. Moodaannai qisauku (5) feemu faqa faifa tauseena (5,000) fasiqa noonara, doo aunidee sia fee iridee. Mikari naquma ataraasa uqa fee riqau.
MAT 16:10 Kafaa moo kari moodaannai qisauku taikasee dinni oonu qaaramarasee (7) feemu faqa maqi tauseena (4,000) fasiqa faqa noonara doo innee mina faqa aunidee sia fee iridee. Mikari naquma ataraasa uqa fee riqau.
MAT 16:11 Innee nanaree sia qini oosanara iridee, sia qinee feemuara qunaqa. Farisai amaana ufa irimariasa faqa Sadikai amaana ufa qimariasa faqa misa manda oosanara rufiaaqee qimasee ooruku anoonara qiqa.
MAT 16:12 Misa mi ufana iriseeqa mi ufa oosanna doo naaqooki iriqau. Mifa sia ooruku anoonara eerairiranara qinau. Farisai amaana ufa qimariasa faqa Sadikai amaana ufa qimariasa faqa misa manda irirana uqannifiqaranara quandasee ooruku anoona kikiqa usinau.
MAT 16:13 Yisufa Seeseeria Firipai maqa maaqaki oorureenoo narí faiqi namu irammirinau. Faiqí misa faiqí nimaaku qiniara nana fasiqee fee qidee.
MAT 16:14 Misa iriseeqa qimamiqau. Moo fannoo aniara Yoohaneefa nammari nimimarufa kuqiranakiqari findifinoo marifa maridanoommifoo qidaqa. Moo fannoo tamummaqara fasiqa Eeriaa fee qidaqa. Moo fannoo tamummaqara fasiqa Yeerimaiaa fee qidaqa. Moo fannoo Anutuna tamummaqara fasiqauqakiqari moo fannoo fee qidaqa.
MAT 16:15 Yisufa misa ufa iriseenoo quandafinoo narí faiqi namu irammannimaqanau. Innee qiniara yafasiqanee fee qidee qimasoofanoo Simoona moo auqu Peetooroofa Yisuna qimaminau. Anee ooqai Anutuna asauku mundirafa mariananoo anee kaqi marira Anutuna amaaku mariananoo.
MAT 16:17 Yisufa iriseenoo narí qimaminau. Oo Simoona Yoonaana amarana amaaku, maqasaa fasiqa sia miqi qimasee ani qimamiaqini. Innaarunai qini qikoofa mifa kai ani aaqoosaa rinoo. Minara anee asasimarianafa mariananoo ani qimaminoo.
MAT 16:18 Qinee ani qimamidaqa. Anee Peetooroofa ani auqu oosana oonifa mariananoo. Qini qikoofa qiniara uqafiqainasaa mi ufafa firaa ooniara foora marinara qinee mi firaa ooninasaa qini amaana maqa usakaanaura. Qini saqariki mariasa qumareeqa qeeqa amaana maqaikamandaanaura. Mi ooninasaa qini maaqa usakaanaura. Kuqirafa sia amana mi amaana maqana rafaaqa fuannoo.
MAT 16:19 Peetooroofa, qinee innaaruna kooqi atuasee keeqeemariana kiqa anoonara foora ani amianaura. Anee maa maqanasaa moo ainainara anee iriseenana mandaikammi ifoo qinaqa qinee faqa innaarunnai miqi kai iqa mandaikammiifoo qianaura. Anee amiqi ifoo qinaqa qinee faqa innaarunai miqi kai iqa amiqimmi ifoo qianaura.
MAT 16:20 Miqi qimaseenoo Yisufa narí faiqinamu qimanniminau. Afeekaikamasee qumee uqannandaaqa. Qinee ooqai Anutuna asauku mundira fasiqa marunausa minara sia moosa qimannimiaqa, kukeeqaaqa.
MAT 16:21 Mikari oosanarasee miqooqari narí kuquaninnanara qimannimi maree finau. Mifa Yeerusareenni ooru firanara faqa qimanniminau. Faiqí firaasa faqa amaana maqasaa rakisimarusa faqa Mooseena sandufa uqannifiqee marusa faqa misa firaa dinee miqoo narí Yisuna amiranara qimanniminau. Kuqariranara faqa qaaramoo faasaana findi fuaninnanara faqa qimanniminau.
MAT 16:22 Peetooroofa maa ufana iriseenoo Yisuna kaqinni mareeqee quqaseenoo aaqooki qaoo qinoo qimaminau. Oo karaambaiqa, saa. Ani kuqiranara Anutufa qaoo qiannoo maa ainainausa siamma ani arifaranoo.
MAT 16:23 Yisufa iriseenoo quandaseenoo Peetooroona qimaminau. Sadanna see maree fua, qinaaqiannai aiqaree fua anisaa qikuamaki aqufuanoora. Anee sia Anutuna irirana maree marianafa, fifau faiqí irirana maree marianafa.
MAT 16:24 Qinee aunirira saqarisaa kuquanaura. Faiqí anaasee moo fannoo qini iriranamau finafa miqi kai iannoo. Narí marira ainaina mai uturuqu quqaseenoo qiqa duqusaara qiqa ufasaara, qiqa daanna ramasee kaqi kuqariranaki keeqaani.
MAT 16:25 Moo fannoo narí kaqi mariranara tatamaqianinafa narí kaqi marirana taikaannoo. Moo fannoo qiniara narí maaqoo marirana minnisainafa mifa narí kaqi marirana kasooqaqee paquriannoo.
MAT 16:26 Faiqí moo fannoo aiqama maqa maaqa nariara maraseenoo aiqama minaki mari ainaina nariara kai afapitee marifa kuqinoo narí aunduraindaraafa kuridiranaki finanoo narí uriqaraidanoo fee. Oo sia uqanna uriqaraidanoo. Kuqiranakiqari mi fasiqafa nana feefauru Anutuna amiseenoo kaifaa narí ainainannoo fee narí aunduraindaraana idakinaana kaifaa maraannoo fee. Sia amana maraannoo.
MAT 16:27 Minara qinee faiqí nimaaku qumuanaura, qini qangiroo namufaqa qini qikoona kaaqa areenaranaki qumuanaura, aiqama faiqí anaasee misa saika auqee mariana akiaqara nimirara qumuanaura.
MAT 16:28 Kuqaa anoona ufa qinee qimannimidaqa innikiqari faiqí qaaramoo sia kuqirai kaqi marifaqa qinee faiqí nimaaku qeeqa innaaruna ququsa uriqarara ququsa namufaqa inni nifusaa qumuanaura.
MAT 17:1 Miqi qimaseenoo qisauku dinni taikaseenoo dinni oonu moodaa marasee faasaana taikaseenoo Yisufa Peetooroona faqa Yameesana faqa mina akaqa Yoohaneena faqa minamusa nifiqeenoo aaqanai náriaraa naadumai ooru fiqau.
MAT 17:2 Miqoo misa ooru roofanoo Yisufa moo afaaqa amiqira afaaqa maranau mina afiri suaniara foora kaaqa amaqinau mina qamunna faqa eekara aruaqinau nifu qafoofanoo nifu faqa daroodaraa inau.
MAT 17:3 Miqi masoofanoo ooqai taikaseeqa Anutuna faqa innaarunai maruqanda Mooseefa faqa Eeriaafa faqa akooqoo maqasaa misa nifusaa anireeqa Yisuna faqa ufa qiqau.
MAT 17:4 Peetooroofa qafamasee Yisuna qimaminau. Karaambaiqa, dufi dufi anee maasa qifiqee adiafaa irannai mai uruananoo. Anee qinaqa kaqikaa uiqaana maqa qaaramoo auquanaura. Anindi moo, Mooseenaindi moo, Eeriaanaindi moo.
MAT 17:5 Peetooroofa kaqi qimarufanoo kaaqa qarana asuru fannoo aiqama rafaaqa finau. Ufa moo, asurukiqari Yisunara qimanniminau. Maafa qini qimaaku qini kaaqa minara qimuqusidanoo. Qini didirafa minasaa maridanoo, mina ufa iriaqa.
MAT 17:6 Yisuna faiqi namu mi ufana iriseeqa kaaqa rufieeqa noorindari maqasaa aqufiqau.
MAT 17:7 Maqasaa mapamiqa marufanoo Yisufa anireenoo asauku misasaa mundinoo qinau. Findi fuaqa sia rufiaaqa.
MAT 17:8 Miqi qufaqa misa kaqi kaaqoo uqeerafufaqa murufi Yisuna kai qafaqau sia faiqí moo marinau.
MAT 17:9 Misa miqooqari Yisuna saimbaqa aaqanaindari qumimarufanoo Yisufa maaqi qimasee afeekaikamasee qimanniminau. Innee aaqanasaa mee qafaa ainaina sia innee moosa qimannimiaqa. Qinee faiqí nimaaku kuqiranakiqari findi fuanaqa miqoo kai qimannimiaqa.
MAT 17:10 Miqi qimasoofaqa mina faiqi namu iraida qiqau. Maasa Mooseena sandufa uqannifiqee mariasa ooqeenaa tamummaqara fasiqauqa akara asaanarumasee moo fasiqara Eeriaana aanna ree marifa Anutuna asauku mundirana afunni aniannoo fee qidaqa. Misa yafasiqanaree miqi qidee qufanoo Yisufa qimanniminoo qinau. Misa kuqaa qidaqa. Eeriaana aanna ree marifa asauku mundirausa qini qifunni aiqama ainaina andeeqaanifeera indaaru aniannoo.
MAT 17:12 Qinee qimannimidaqa, iriaqa. Kuqaa Eeriaana aanna ree marifa qini qifunni doo aninoo. Aniroofaqa misa minara sia irirai narí iriranannai kai dapikamasoofanoo kuqinau. Miqi kai mandee qinee faiqí nimaaku kaqikaaqoo misasaa farindamaki aqufuanaura.
MAT 17:13 Miqi qimasoofaqa mina faiqi namu iriseeqa Yisufa Yoohaneefa nammari nimimarunara Eeriaana kikiqa ususeenoo qidaqinoo qiqau.
MAT 17:14 Misa aaqanaindari qumureeqa faiqí anaasee suqiqa maruqoo qumuroofanoo faiqí moo fannoo Yisuna oorinni rufiaidanoo ani aqoori saunara finoo tootoonasaa ooqu marifinoo qiki raqaidanoora foora Yisuna qimaminau.
MAT 17:15 Oo karaambaiqa, qini qimaakuara amuqusinana dadaaqia. Mifa fuseenasana arimarifaqa amiqimmasee auri marifaqa. Maqee maqee kaqi idaki aqufidanoo maqee maqee nammariki aqufidanoo.
MAT 17:16 Qinee qeeqa qimaaku afiqeeqa ani faiqi namu mariaqoo munusaunaqa sia amana misa mi aurirana taikaafaqa, minara ani qimamidaqa.
MAT 17:17 Yisufa mina iriseenoo aiqamausa qimanniminau. Innee qini ufasaa irirana rusirafa siaisa mariafanoo kaaqa foomboo rimariasa mariafanoo. Qinee kisaaqasaa inniki marunaqa innee sia dauni irimariafaqa. Kisaaqasaa fee ubiqafi inni manda oosana ummaara maraqa fuanauree. See mi kumaaraana maree mai aniaqa qufaqa miqimmiqau.
MAT 17:18 Yisufa mi afaannana aqiqoofanoo fufanoo mi kumaaraana mikari kai miqoo kai andeeqa aisanau.
MAT 17:19 Yisuna faiqi namu kaqikaaqoo marikiqa oonurandee qumee kai anireeqa Yisuna qimamiqau. Maasa nanaree afaanna aqiqaunanoo fee sia finoo fee.
MAT 17:20 Yisufa qinau. Innee qinisaa irirana rusirafa kaqikaafa marinara kai miqiafanoo. Qinee kuqaa anoona ufa qimannimidaqa. Inneeqa irirana rusirafa maqana qaqama miqirafa kaqikaafa marinaqau maa aaqannara qifanoofau meeqai fini. Innee miqi marifaqau aiqama ainaina amanammifoo qini.
MAT 17:22 Yisuna faiqi namu Kariree maqa maaqai moodaarunna moodaasaa suqiqa maridaqa nimarufanoo Yisufa maaqi qimasee qimanniminau. Faiqí nisaukuara qinee faiqí nimaaku fuanaura.
MAT 17:23 Misa qini kuqa darifaqa qaaramoo faasaana kaqi mariqa findi fuanaura. Miqi qimasoofaqa Yisuna faiqi namu minara oonumafi irufanoo nimuqusa mandaikinau.
MAT 17:24 Misa Kapeeranaumma maqusa oonuroofaqa amaana maqa takisa maree marusa misa Yisunara nisauruseeqa Peetooroofa maruqoo oonuree iraidaqa qiqau. Ani firaafa amaana maqa takisa sia fee aqidanoo fee qimasoofanoo Peetooroofa eeoo aqidanoo qinau. Miqi qimaseenoo kaqikaaqoo maaqaki keeqoofanoo Yisufa mina moo auqu ramasee qimaminoo qinau. Simoona maa maqanasaaqaraasa misa oosana maaqimminoo maridanoo. Moo maqannaasa namuqaa afeekaikamasee narirarammasaida namuqaandi kai fee takisa maraida fee, nárindi nári maqannaasaindi fee kai maraidee qufanoo Peetooroofa mina iriseenoo qinau.
MAT 17:26 Namuqaandi kai maraidaqa. Narí maqannaasa uriqararausa mariafanoo sia uqanna misaki maraidanoo. Yisufa iriseenoo qinau. Kuqaa qiananoo, miqi marifaqa uriqararausa niku nisauku nifaaqa quqasee maridaqa. Maasa uriqararana Anutuna aiku asauku marunausa marida. Nanaree fifau Anutuna amaana maqa takisianauree.
MAT 17:27 Sia niminaqa maasara noori runifoora. Saina anee tafa mara maree nammariki ooquree aquseenana indaaruqaa noodaanna rarisamaseenana oo raqaseenana qafaa. Moodaa munnimma minaki mariannoo. Anee qiniara faqa aneennara faqa mi munnimmana mareeqeena amaana maqa takisa maree mariasa niminanoo ufa taikaani.
MAT 18:1 Mi aukuanna mina faiqi namu Yisufuqoo aniree irammirida qiqau. Innaaruna ququsaki yafee uriqararafa maridanoo fee.
MAT 18:2 Mifa iriseenoo faiqi aanaaqi moo miqoo maruna aaroofanoo aniroofanoo mareeqeenoo narí faiqi namu qambaanai quqaseenoo qimanniminau.
MAT 18:3 Qinee kuqaa anoona ufa inni qimannimida. Innee sia oonu quandakinaqa sia kafaa aanaaqi aanaaqi kammafinaqa innaaruna ququsaki sia fifaranoo.
MAT 18:4 Moo fannoo narí kai maa kaqikaa faiqiara foora fifimandeenoo marinafa mifa innaaruna ququsaki uriqararafa mariannoo.
MAT 18:5 Yafee moo fannoo qini ufara iriseenoo quandafinoo faiqi aanaaqi maaqaairana asasammasee aqoondikinafa mina faqa qini faqa miqi kai inoo qiqoondikiannoo.
MAT 18:6 Faiqí moo fannoo qinisaa atooqee mari kaqikaa faiqina mandoosana uqafiqainanoo mi faiqifa saamurinanoo, mi fasiqana mi mandoosanna uqafiqeemari fasiqana mina numoo uriqaranoo mariannoo mandainainaki maridanoo. Faasai mi fasiqafa ooni firaatia qumareenoo narí anukaki ususeenoo nammariki aqufinoo narí kai narí arinoofau narí numoo oorudupinoo mariqini. Mi faiqi anaaqina manda oosanna uqafiqainanoo mi numoofa firaafa mariannoo.
MAT 18:7 Maa maqanasaa manda ainaina moomoo minaki mariannoo. Mi manda ainainna aukuana aukuana sia taikaannoo kaqi mariannoo, faiqí mara quqaidanoo. Minara numoo firaatia mari ifoo qidaqa qimudao̱o qidaqa. Mandainaina oosana oonu rarisainafa mi fasiqanaki faqa firaa numoo tia mari ifoo qidaqa. Minara qinee qimudaoo qidaqa.
MAT 18:8 Ani asauku fannoo fee, aiku fannoo fee ani ani rarisameeqeenoo manda oosanaki quqeemarinnana mina ateeka aqua. Aiku asauku siainafa marira maqaki keeqafinana amana marinnaranoo. Aneenna aiku asaukuara amuqusinana kaqi manda oosana marasee mari inafa mifa naaruara marira idaki rafuseeqee aqusainafa sia amana marinnaranoo. Mandaikamminnaranoo.
MAT 18:9 Ani afu aaqoo fannoo fee ani rarisameeqee manda oosanaki quqaidanoo fee mina diqi aqua. Anee moodaa afu aaqoo faqa kaqi mariranaki keeqarafa amana marinnaranoo. Aiqama afu aaqooqara kaqi maridanoo ani rafuseeqee idaki aqusainana sia andeeqeennaranoo. Mandaikamminnaranoo.
MAT 18:10 Innee aufariaqa. Sia uqanna faiqi aanaaqi moo fannoo maaqirafa akoo uqannaqaani. Innee mi oosannara eerairiaqa. Minara qimannimianaura. Innaaruna maqusai qangiroouqa maqasaaqaraa faiqi aanaaqi misa naadu naadu rakisinnimaqara qangiroouqa qini innaarunaindaraa qikoona oorisaa kikiqidaqa nári faiqi aanaaqi maa maqanasaaqaraasa rakisinnimaqaranara Anutuna qimamidaqa mina oorisaa maridaqa.
MAT 18:12 Innee maaqianna ufana nana iraranee irifaree. Faiqí moo mina sipsipa moomoo marida moodaannai qisauku fasiqa arusee marufanoo misakiqari moodaa kai auianau. Misasaa rakisi maru fasiqafa aiqama sipsipa anusaa suqu quqaseenoo misakiqari moodaa auianoo marunara randarara finau. Qinee kuqaa ufee qida fee. Kuqaa, aiqama sipsipasaa rakisi mari fasiqausa miqifaranoo.
MAT 18:13 Mi fasiqafa mi sipsipana paqurimaseenoo kaaqa minara asasiannoo. Moomoo sia auianoo mariasara mana maniannoo.
MAT 18:14 Miqi kai mandee qini innaarunai qikoofa faiqi aanaaqi moo kuridiranara akooqaidanoo. Aiqama uqanna kaqi naaruara mariranara innaarunai nikoofa aididanoo.
MAT 18:15 Ani aqoonafa ani mandaika mamaqainana anee mi finnai oonuree narí mandoosanara qimamia. Inneeqara kai mariaqa sia moo fannoo mariani. Mifa ani ufa irisainana doo anee aneenna aqoonnana kafaa aqoondikina marinnaranoo.
MAT 18:16 Mifa ani ufa sia irinana anee Mooseena sandufamau finana faiqí qaara fee moodaa fee nifiqeenana aqoonna finnai fua. Misa maasa faqa ani mandainaina qafee fee qiaqeera, ani dadaaqiaqeera ani ufa anoonaikianifeera.
MAT 18:17 Mifa misa ufa faqa sia irinana amaana maqaki keeqeemariasa qimannimiaqa. Amaana maqaki keeqeemariasa ufa sia irifaqa aamina maqannaara foora mamaqaa sia mina faqa ufa qia, manda takisa maree maria fasiqausara foora fidiaqaa mamaqa.
MAT 18:18 Qinee anoona ufa inni qimannimidaqa. Innee maa maqanasaa moo ainainara iriseenana mandaikammiifoo qiafaqa qinee faqa innaarunai miqi kai iqa mandaikammiifoo qianaura. Innee amiqimmiifoo qiafaqa qinee faqa innaarunai miqi kai iqa amiqimmiifoo qianaura.
MAT 18:19 Qinee kaifaa moo ufa qimannimidaqa. Qaara fasiqa maa maqanasaa maqasaaqaraa nana ainainaree moodaaqoo naundura quqasee iraifanoo innaarunai qini qikoofa mi ainainna nimiannoo.
MAT 18:20 Yai fee qaaraqanda fee qaaramoo fee qini duquara iriseeqa suqiqa misa qambaanai qeeqa faqa qumee maridaqa inniki marida dadaaqianaura.
MAT 18:21 Qimasoofanoo Peetooroofa anireenoo qinau. Oo karaambaiqa naquma kari fee qini qiqoonafa manda oosana qiminaqee mina akiaqara minnaisaanauree. Moodaa qisauku taikasee dinni oonu qaara marasee kari fee minnaisaanauree.
MAT 18:22 Yisufa qimaminoo qinau. Sia moodaa qisauku taikasee dinni oonu qaara marasee kari fee qidaqa. Moodaa fasiqa aiku asauku taikasee moo fasiqa oonu moodaannai qisauku taikasee fasiqa aiku asauku miqumma kari aqoonnana manda oosana akiaqara minnaisaaneera qidaqa. Fiqaramasee moomoo kari minnaisaaneera qidaqa.
MAT 18:23 Minara qinee moo ufa qimamianaura. Innaaruna maqusa maaqimminoo maridanoo. Firaa rakisirafa moo marinau. Mi rakisirafa narí dadaaqi maru fasiqausa suqusee ufaasu nimiafanna munnimmana andeeqaanauree qimasee suqinau.
MAT 18:24 Suqusee ireemarufanoo misakiqari moo fannoo narí karaambaiqa munnimma moomoo fiqaramasee nariara firaa munnimma moomoo rafaaqafinau.
MAT 18:25 Mi fasiqafa sia amana narí karaambaiqa amufanoo narí faiqi namu qimanniminau. Moosa mina anaaqa faqa faiqi namufaqa nimisee innee minasaaqaraa feefauru mareeqee qimiaqa, mi munnimmana akiaqariani.
MAT 18:26 Mi fasiqafa iriseenoo amuqusufanoo oorindari maqasaa rupaita mafufanoo qiki raqaidanoo iranau. Oo qini karaambaiqa, qiniara kasooinaqa qinee aiqama ani munnimma amianaura.
MAT 18:27 Mina karaambaiqa iriseenoo amuqusufanoo mina aika tatuseenoo idukuseenoo quqaisanau.
MAT 18:28 Mi dadaaqira fasiqafa raudamakufanoo maqusai ooqureenoo aqoonna dadaaqira fasiqa qafeenoo anukaki qumareenoo qinau. Qinee munnimma kaqikaana amiafannana kaqi kaqi mara qimia.
MAT 18:29 Miqi qufanoo mina dadaaqimaru fasiqafa maqasaa aqufinoo reendeenamandee qinau. Oo qiniara kasoo inaqa qinee ani munnimma amianauree qimasoofanoo mina aqoonafa afeekaikamaseenoo mi fasiqana karafusaki quqanau. Qini kaqikaa munnimma qiminaqa idukuanee qinau.
MAT 18:31 Karafusaki quqasoofaqa mina aqoonausa qafoofanoo nimuqusa kaaqa mandaikufaqa misa nári karaambaiqinnai oonuree aiqama mifa auqoo oosana oosanara qimamiqau.
MAT 18:32 Karaambaiqa fannoo iriseenoo mina dadaaqira fasiqa aaramaseenoo qimaminau. Anee manda dadaaqira fasiqa mariananoo. Anee qini reendeenamasee qima qimianaqa ani aika aiqama tatu aqiqa.
MAT 18:33 Naqaa fee ifanee sia fee anee miqikai inana aneenna aqoonnanara amuqusinanee. Qinee aniara miqunandee iaqaana.
MAT 18:34 Miqi qimaseenoo aranaqoofanoo arira maqaki quqasee qinau. Misa miqoo ani ariisaifana kaifaa qini firaa munnimma qiminaqa idukuanaura.
MAT 18:35 Yisufa mi ufana qimaseenoo narí faiqi namu maaqi qimasee qimanniminau. Innee faqa sia inneeqa niqoonausa inneeqa naundurannoo misa nikiaqara mi aikana sia tatiqa aunifanoo qini innaarunai qikoofa faqa miqi kai inoo inni aika sia tatuannoo.
MAT 19:1 Yisufa maa ufausa taikaseenoo Kariree maqa maaqa minniseenoo Yudeea maqa maaqai ooqu finoo Yooradanna nammari dinni afainni marinau.
MAT 19:2 Miqoo oonu marufaqa faiqí anaasee moomoo afaqee oonu roofanoo misa aurirana taikannisanau.
MAT 19:3 Farisai amaana ufa qimarusa misa miqoo anireeqa Yisuna ueeqasee amanammasee qafararee qimasee qimamiqa qiqau. Amanee faiqí fannoo oosana oosana ainainara qimaseenoo narí anaaqa minnisaannoo fee, Mooseena sandufa rukiaseenoo fee miqiannoo fee.
MAT 19:4 Yisufa iriseenoo qinau. Sia fee innee Mooseena akara asaanaridee. Oosana arooqooqari Anutufa oosana araseenoo misa auqinau. Faiqí faqa anaasee faqa oosanaraseenoo auqinau. Sia fee innee mi akaranara iridee.
MAT 19:5 Anutufa minara maaqi qinau, qinee oosana arooqooqari faiqi faqa anaasee faqa auquafannanara faiqí narí anoona akoona minnisee narí anaaqa faqa moodaanakikiannoo. Miqoo nariqa miqanda moodaa marifaranoo.
MAT 19:6 Yisufa minara kaifaa qimanniminau. Miqanda sia qaaraqanda marifaqa moodaa amaqiara foora marifaranoo. Anutufa moodaanaki aquminafa sia uqanna faiqí idukuaqa.
MAT 19:7 Farisai amaana ufa qimariasa mina iriseeqa qiqau. Mooseefa sandufa akara ruma quqaqoofa marida. Minnisara papiqa akara rumeeqee anaasee amisee aqiqaa. Mooseefa miqi qimaqaifana Yisu anee naqi fee qidanee.
MAT 19:8 Yisufa iriseenoo qinau. Inni irirana mandaikinara inni nimuqusa sia amaqi marifa afeekaikinoo amatooki marinara minara kai Mooseefa akooqee marufanoo inneeqa ninaaqara minnisaaqee qinau. Indaaru kuradoo aukuana sia miqinoo marinau. Miqoo Anutufa miqandara apiqa mariaqee qinau.
MAT 19:9 Qinee qimannimidaqa, faiqí yafee narí anaaqa sia ummuarimari anaaseena andeeqara anaasee kaqi minniseenoo moo anaasee marainafa, mi fasiqafa qumuarammidanoo.
MAT 19:10 Mina faiqi namu aniree qimamidaqa qiqau. Faiqí anaasee miqiqa maridaqa amana faiqí nariqa kai maridaqa adeedaana mariaqaana. Maasa andeeqaidee sia fee andeeqaidee.
MAT 19:11 Yisufa misa ufa iriseenoo qimanniminau. Faiqí aiqama maa inni ufa sia amana maraaqeera. Anutufa miqiannee qinausa misa kai adeedaana amana marifara, sia aiqama miqifaqa.
MAT 19:12 Nifaandama itirausa misa maqookari kai nifaandama siaisa misa sia amana anaasee maraaqeera. Kaifaa akaqausa nifaandama itirausa faiqí kai nifaandama itinnimaqasoosa maridaqa. Misa faqa sia amana anaasee maraaqeera. Kaifaa anaasee siaisa moo, misa innaaruna maqusara kai irisee nariqa kai anaasee siaisa maridaqa. Andeeqasee marianauree qimasee Anutunara kai irisee miqidaqa. Misa faqa sia amana anaasee maraaqeera. Yafee mi sandufana amana marinafa mifa kai maraani.
MAT 19:13 Misa faiqí anaasee, nári faiqi aanaaqiuqa moomoo nifiqee Yisufuqoo aniqau. Yisunara mina asauku misasaa munduseenoo innaaru qianifeera nifiqee aniqau. Yisuna faiqi namu faiqí anaasee nári faiqi aanaaqi farafara qiaafoo qimasee niqiqamasoofanoo Yisufa qinau. Saifaqa maree aniaqa. Sia rafaaqafunnisaaqa. Innaaruna maqusa miqirausaindi maridanoo.
MAT 19:15 Miqi qimaseenoo narí asauku misasaa nikiaaqa munduseenoo nifaaqooqa qimaseenoo findimeeqeenoo moosaa finau.
MAT 19:16 Faiqí moo fannoo Yisufinnai anireenoo qimamidanoo qinau. Qufasaa rakisirafa nana amiqira saika auqamamaqaananoo fee Anutufa innaarunai naaruara marirana qimiannoo fee.
MAT 19:17 Yisufa iriseenoo qimaminau. Anee naqaa ifanee qiniara amiqira ainainara iraidanee. Moodaafa kai Anutufa mifa kai amiqirafa maridanoo. Sia moo amiqirafa maridanoo. Anee naaruara mariranaki keeqararee qidanee. Doo amana, anee Mooseena sandufa asaana rumasee mi mau kai fua.
MAT 19:18 Miqi qimasoofanoo mi fasiqafa iraidanoo qinau. Nana sandufee maraanauree. Yisufa qimaminoo qinau. Innee sia kuqa naruaqa, sia faiqí anaasee ummuariaqa, sia ainaina ummuariaqa sia kootaki moosara unna ufa qiaqa.
MAT 19:19 Aneenna anoona akoona nuqu uqeeraidana nimuqusa idaaqammannisaa. Anee aneennara amuqusianandee kai inana aqoonausara amuqusiani.
MAT 19:20 Mi kumaaraafa iriseenoo qinau. Anee qianandee mi sandufausa doo aiqama maraqaunausa maridaqa. Nana saika fee moo faqa qinee auqamasaananoo fee Anutufa naaruara marirana qimiannoo fee.
MAT 19:21 Yisufa iriseenoo qimaminau. Anee innaarunai atisaa kai mariananoo. Anee aiqama maraannee qimaseenana aneenna qumiasana aiqama mara mareenana moo atinai nimiseenana feefauru maraseenana kudifasiqauqa nimisainanoo ani qumiasana ani afeesara innaarunai mariannoo. Miqinana doo ania, qini faqa fua.
MAT 19:22 Mi kumaaraafa mi ufana iriseenoo oori akooqamaseenoo finau. Narí ainaina moomoo marunara minara oonumafi iriseenoo oori akooqamaseenoo finau.
MAT 19:23 Mifa fifufanoo Yisufa narí faiqi namu maaqi qimasee qimanniminau. Kuqaa ufa anoona ufa qinee qimannimidaqa. Faiqí moo fannoo ainaina faqaafa innaaruna maqa maaqaki keeqaaneera anuqinnara mammaqamminnaranoo.
MAT 19:24 Qinee kafaa qianaura. Amanee qoosa fannoo uka aamarai keeqaannoo fee. Sia amana fuannoo titiqiannoo. Doo miqi kai masee ainaina faqaa fasiqa innaaruna kooqiki keeqarara anuquannoo.
MAT 19:25 Mina faiqi namu mi ufana iriqa tautiqa qiqau. Ani ufa miqinoo marinanoo fee, yafee moo fannoo amana innaarunnai ooru fuannoo fee sia amana fuannoo.
MAT 19:26 Yisufa quandafinoo misa nári nindafamasee qimanniminau. Faiqiki maa ainainnafa sia amana maridanoo. Anutufa aiqama ainaina amana marifa maridanoo.
MAT 19:27 Peetooroofa iriseenoo qimaminoo qinau. Maasa qiqafa. Maasa aiqama ainaina quqasaunausa ani faqa fidaqa. Minara Anutufa nana ainainee maasa qimiannoo fee.
MAT 19:28 Yisufa iriseenoo misa qimanniminau. Qinee kuqaa anoona ufa inni qimannimidaqa. Fuka maqa maaqa Anutufa kasooqaqee auqusainaqa qinee faiqí nimaaku qini firaa kaaqa qara ufirira qaarisaa, qaari ufiqisee minasaa ooqu mari finaqa faiqí aanaaseesaa rakisi marianaqa innee qini faqa fimariasa innee qisaukuqara taikasee qikunni ooqu qaara marasee nári ufirira qaarisaa qini faqa ooqu marififaranoo. Innee miqooqari Isaraee maqannaa qikunni ooqu qaara marasee oosana Yakooboona faiqi namu atikiqari kambiqarausa misa niku nisaukusaa rakisifaranoo.
MAT 19:29 Yafee moo fannoo qini duquara iriseenoo narí maaqa faqa narí akaqaafasaauqa faqa narí asooqmaaka faqa narí anoona akoona faqa narí faiqi faqa narí saqamainaina faqa aiqama minnisainaqa sia mina akiaqara kai amianaura. Fifau faqa amianaura innaarunai naaruara marirana faqa amianaura.
MAT 19:30 Moomoosa maqee uriqararausa mariasa misa innaarunnai ooruree ureeqarausa marifaranoo. Moomoosa maqee ureeqarausa mariasa misa innaarunai ooruree uriqararausa marifaranoo.
MAT 20:1 Minara Yisufa qimanniminau. Anufufa innaarunai mariasa maaqi qimasee rakisinnisaidanoo maaqoo uriqararausa miqoo ureeqarausa marifaranoo kafaa maaqoo ureeqarausa miqoo uriqararausa marifaranoo. Qinee mina rakisira oosana ainaina faqaa fasiqa kikiqa usuanaura. Iriaqa. Faiqí ainaina faqaafa moo fannoo faiqí uainna qaqama ummaqimaru fasiqafa moo fannoo narí uainna qaqama akuqanoo marufanoo iqaqoofanoo raudamafinoo maqusai qumureenoo narí uainna qaqama diqi marusara randanau. Moodaa suanisaa ainainimaru fasiqausara ufaasu ainainimariasara randanau. (Mi aukuanna misa oosana maaqimminoo marinau. Qaqama akuqamafufanoo mi ainainna akoofa kananaana maqusai oonureenoo akaqausa qimanniminau. Innee qini qaqama tiqi qimifaqa maqee faasaanara kai eendi marinaqa moodaa faasaanara mi munnimmana kai nimianaura.)
MAT 20:2 Mi fasiqafa paqurimandeenoo ainainira fasiqauqa faqa ufaasu ainainimarunana akiaqara mi munnimmanara ufa qimariqau. Ufa qiqiseeqa andeeqaseeqa doo narí ainaini marunnai niqiqoofaqa fiqau. Misa moodaa faasaana ainainiuna akiaqara moodaa munnimma deenariasee qimarusa minara andeeqaseeqa ainainai fiqau. Kananaana saarisufa namufaqa ainainai fimariqau.
MAT 20:3 Suani kaqikaaqoo urureenoo keekooqufanoo ainaina faqaa fasiqa fannoo maqusai kafaa oonureenoo nindafoofaqa faiqí moomoosa kai ooqu faaqee iqau.
MAT 20:4 Nindafamaseenoo qimanniminau. Innee faqa qini uainna ququsaki fifaqa fafaa eenainaqa inni ainainirana akiaqara kai nimianaura. Qimannimisoofaqa eedoo qimasee fiqau.
MAT 20:5 Suani qambaanai ainaina faqaafa kaifaa maqusai oonureenoo akaqausa qimannimisoofaqa misa faqa ainainirannai fiqau. Suani afu muqunni mara ubeekoofanoo kafaa oonureenoo kaifaa miqi kai masee akaqausa qimannimisoofaqa misa faqa fiqau.
MAT 20:6 Eenoofanoo mi fasiqafa kafaa maqusai oonuree nindafoofaqa faiqí akaqausa kaqi ooqufaaqee marufanoo nindafeenoo qinau. Naqaa fee ifaqee innee kaqi kai maa faasaanna mariafanoo, doo eeneenoommi.
MAT 20:7 Misa iriseeqa qiqau. Faiqí moo fannoo sia qifaqa maasa mareeqa kaqi maridaqa. Miqi qimamufanoo mifa misa faqa narí ainainai nifiqee finau.
MAT 20:8 Eendufanoo mi fasiqafa narí rakisira fasiqa aaramaseenoo qinau. Anee maqee ainainiasa nifiqee miniseenana ainainiaana akiaqara feefauru nimia. Inaaqianna fimariasa misa indaaru nimia. Misa nifunni fimariasa misa ninaaqianna nimia. Kaifaa suani qambaanaikifaqa fuasa misa ninaaqianna nimia. Suani keekooqifaqa fuasa misa ninaaqianna nimia. Maqee iqaqaifaqa fuasa misa ninaaqianna uqanna nimiaqee qimasoofanoo miqimminau.
MAT 20:9 Eeneemaru inaaqianna fuasa misa aniroofanoo deenariasa munnimma moodaa moodaa niminau. Miqi kai masee aiqamausa niminau.
MAT 20:10 Maqee iqaqoo fimarusa mina qafamasee misa náriara firaaqoo mararara qiqau. Misa aniroofanoo rakisirafa moodaa deenariasa munnimma kai niminau.
MAT 20:11 Misa maraseeqa noori runiqa naundaufa naundaufa qidaqiqau.
MAT 20:12 Maasa maqee iqaqaifaqa oonu maridaqa ainaini marunanoo suani dari marifaqa kadaapiridaqa qidaqa. Minara maasa munnimma moomoo qimia. Eenee marifaqa fuasa misa ainaina imariana amana oonu dupimasee nimia.
MAT 20:13 Ainaina faqaafa iriseenoo qimanniminau. Qini qiqoondiuqa sia qinee furufaramannisaida nimidaqa. Andeeqasee nimidaqa. Faasai kananaana innee faqa qinee faqa andeeqaqaunaqa innee moodaa deenariasee qiana kai doo mina kai nimidaqa.
MAT 20:14 Doo innee mina kai maraaqa, inneeqaindi uqanna doo maree fuaqa. Qinee indaaru maqee iqaqai fuasa faqa inaaqiana eeneemari fuasa faqa qeeqa kai irisee amana amana kai nimiqauna.
MAT 20:15 Munnimma qinindi uqanna marifaqa nimidaqa. Sia moonaindifau. Qeeqa kai iriseeqa amana afaaramma nimaqaanaura. Innee qini afaariranara minaree inni nikoo qaidanoo fee.
MAT 20:16 Yisufa minara narí faiqi namu qimanniminau. Miqi kai masee Anutuna ququsaki indaaru fimariasa misa nári ainainirana akiaqara marasee ureeqarausara fooqiara marifaranoo. Ninaaqianna fimariasa miqi kai masee nári akiaqara mareefaranoo misa uriqararausara foora marifaranoo. Aiqamausa amana amana kai mareefaranoo.
MAT 20:17 Yisufa Yeerusaree maqusai oorufinau. Ooru fidanoo narí faiqi namu qisaukuqara taikasee qikunni ooqu qaara marasee faiqi namu faqa ooru finau. Faiqí anaasee aana ititafufanoo Yisufa narí faiqi namu nifiqeenoo faiqí anaasee irifoo qimaseenoo aanafaiqara fidanoo narí faiqi namu qimanniminau.
MAT 20:18 Maaqi qimasee qimanniminau. Innee iriaqa. Maasa Yeerusareenni ooru fidaqa, ooruraananoo faiqí moo fannoo munnimmara mamareenoo qiniara uqeeqasainaqa amaana maqasaa rakisirausa faqa Mooseena sandufa irimariasa faqa qini qumareefaranoo. Misa qini qumareeqee kuqiranaki quqaqimaqeefaranoo.
MAT 20:19 Misa qini qumare̱eqee Roomma maqannaasa kiapafa faqa narí sundiauqa faqa qini mara nimifara. Misa qiniara naanaidara qidaqa uteeti qidaqa qiniara amarau qidaqa raitasaa qainna ateeka rumbeeqoo samunannai amiqimandee daridaqa qifaaqa radiqisaifanoo fidika qumuannoo. Miqimmaseeqa misa qini mara maree aunirira saqarisaa quqaseeqa pirimma darusaifaqa kuquanaura. Kuqiranaki qaaramoo faasaana mariqa doo findi fuanaura.
MAT 20:20 Seebeedina amaakuqara Yameesa Yoohaneesa miqanda ninoofa Yisuna faqa fimarufanoo miqoo anireenoo asauridanoo reendeenidanoo kaqikaa ainainara qianeera qinau.
MAT 20:21 Yisufa iriseenoo qinau. Nana ainainee ani amianauree qimasoofanoo mi anaaseefa qinau. Amanee anee firaa karaambaiqaikinana qini faiqiqara mareeqeenana aneenna aaqa moo fannoo dinni moo fannoo dinni quqasainaqara mi qanda ani faqa karaambaiqaikiqa marifaqa mi qanda nuqu uqeeranoo mariani. Miqi qimasoofanoo Yisufa maaqi qimaseenoo narí qimaminau.
MAT 20:22 Anee iraannanara mi oosannara siammiri mariananoo minarammiridaqa. Miqi qimaseenoo mi fasiqaqanda maaqi qimasee irammirinau. Qinee manda nammari naannanara qiqa inneeqara faqa amanee namasee inneeqara qini faqa nipatara aupure̱efaree. Mi qanda iriseeqa qiqau. Eedoo maa qanda amana naanaura.
MAT 20:23 Yisufa iriseenoo qimanniminau. Kuqaa inneeqara qinee naanna nammarina neefaranoo minara qinee iridaqa. Qini daaqa quqannimaqee fandinnanara sia qini saika sia qinindi, qini qikoofa mifa kai mi ainainna faqaafa maridanoo. Kasooqaqee qinee innaarunai karaambaiqaikianaqa ya fasiqanaree qini qikoofa qini daaqa marianee qinafa mifa kai qini daaqa mariannoo. Ooqai qini qikoofa narí kai irisee qimaqoosa kai misa kai qini daaqa quqannimaqaannoo.
MAT 20:24 Qisaukuqara taikasee fasiqa kaqi marusa mi ufana irufanoo miqandara niranaqanau.
MAT 20:25 Yisufa minara iriseenoo aiqama naarama quqaseenoo qimanniminau. Anaamuru mariasa nári karaambaiqauqa nári aanoonnai kaiqeesa rakisinnimaqasaifaqa nári uriqararausa amiqimmasee misa uriaaqarama nimaqaidaqa. Nári faiqí firaafa ufa nimisaifaqa sia auqaafanoo naridanoo. Ufa nimifaqa misa kaqi ainaina auqeemariasa. Anaamuru mariasa miqimmida maridaqa.
MAT 20:26 Inniki sia miqinoo marianifeera qidaqa. Yafasiqa fee inni karaambaiqaikiraree qinafa mifa inni ainainira faiqi kamambinoo mariannoo.
MAT 20:27 Yafasiqa fee inni uriqararafa mariraree qinafa mifa inni dadaaqira saika maree marinafa mariani.
MAT 20:28 Innee qini daanna raaqa innee qini qiqafaaqa. Qinee faiqí nimaaku firaasa maridaqa, sia faiqí anaasee qini ainainamma qisaaqeerau qumidau. Qinee inni ureeqarausa inni ainainamma nimaqararee qimasee qumiqa. Qeeqa kuqiranannai moomoosa aaqarana akiaqara idukiraree qimasee minara faqa qumiqa. Minara innee narinni narinni qini daanna raaqa.
MAT 20:29 Misa Yeerikoo maqusakiqari findifufaqa Yeerusareenni ooru fimarufanoo faiqí anaasee moomoosa mina faqa fimariqau.
MAT 20:30 Aana afainni qaara fasiqaqara nifu dimbaraqanda ooqu faaqee marufanoo. Yisufa moomoosa faqa mi aatata fimarufaqa miqanda misa nikufa iriseeqa Yisunara faaqa rumasee nameera qiqau. Oo, Dafidina ati marianafa maasa mandaikiqa marida maasara ani amuqusinana dadaaqia.
MAT 20:31 Miqi qimasee faaqa rumasee nameera qufaqa faiqí anaasee aiqama miqanda aanoo imasee nimambaina qimasee qaoo qiqau. Nimambaina qimasoofaqa miqanda siammiriqau firaaqoo uqanna nameera qiqau. Oo Dafidina amaaku faiqí firaafa maasara ani amuqusinana dadaaqia.
MAT 20:32 Yisufa misa maruqoo ooru kasoomafinoo iramma nimaqanau. Naqi fee inniqara mannisaanauree.
MAT 20:33 Qimasoofaqa miqanda qiqau. Faiqí firaafa anee maaqanda qifu maqannimia.
MAT 20:34 Miqi qimasoofanoo Yisuna kaaqa amuqusufanoo asauku nifusaa mundinau. Mikari kai misa nifu maqasoofaqa miqanda Yisuna faqa fiqau.
MAT 21:1 Misa Yeerusaree maqusa adeedi ramasoofanoo kaqikaa maqusa moo auqu Beetapaisa mi maqusafa aaqanasaa maridanoo, mi aaqanna auqu Oorifa aaqana, miqoo oorureenoo narí faiqinamukiqari qaaraqanda naaramaseenoo qimanniminau.
MAT 21:2 Inneeqara kaqikaa maqusaki oonureeqa muqutinai mi maqusanaki doonki maridanoo, narí aanaaqindiri maridanoo oonureeqara miqanda ninukaki sanda rumbaqoona idukuseeqa miqanda nifiqeeqa aniaqa.
MAT 21:3 Faiqí moo fannoo inni irainaqa maaqi qimasee qimamiaqa. Karaambaiqa maa doonkiqanda maraannee qifaqa maaqanda maraidaqa. Miqi qimasee qimamifanoo mifa maree fuaqee qiannoo. Mi ufana qufanoo ooqeenaa tamummaqara fasiqa ufa anoona kambiaanifeera miqi qinau.
MAT 21:5 Mi tamummaqara fasiqafa ooqai Yisufa sia marukamuqoo maaqi qimasee papiqaki akara rinau. Sioonna maqusanaasa maa ufana qimannimiaqa. Inni karaambaiqa innee iannai uridanoommi. Reendeenamasee doonkisaa uridanoommi doonki aanaaqi akoonasaa ooqu marifinoo uridanoommi. Tamummaqara fasiqa akara miqimminoo maridanoo.
MAT 21:6 Yisuna faiqiqara Yisufa qimaqoo doonkina narí faiqi faqa nifiqee Yisufinnai fiqau.
MAT 21:7 Nifiqee munusoofaqa nári qamunna doonki aanaaqi ataufakaaqa ufiqisoofanoo Yisufa minasaa ooqumarifufanoo Yeerusareenni ooru finau.
MAT 21:8 Faiqí anaasee nári karaambaiqa miqi mandaida anianinna oosana marasee misa qamunna qumareeqa aatata ufiqimarufaqa akaqausa saqari asaana amanee namufaqaana ateeka ufiqí maree fiqau. Doonki fannoo mi mau fuanifeera miqiqau.
MAT 21:9 Faiqí anaasee moomoo indaaru fufanoo aanaaqiana anufanoo mifa qambaanambinau. Misa aiqama Yisunara fifi faaqariqa kaanina mareeqa maaqi qimasee idi ramamaqaqau. Anee Dafidina ati marianafa Anutufa ani amiqi amiqimaisaani. Anutufa qufanoo animarifa Anutufa ani amiqi amiqiani. Innaarunai marinausa faqa ani amiqi amiqiaqa. Miqimmamareenoo Yeerusaree maqusaki Yisufa ooru keeqanau.
MAT 21:10 Yisufa Yeerusaree maqusai ooruroofaqa faiqí anaasee mi maqannaasa tutuqida qiqau. Maana yafee qufaqa mina faqa ooru fusa qiqau, ooqeenaa akara tamummaqara fasiqa maanara qinau maana mifa maridanoo. Mina auqu Yisufa Nasareetee maqusaindaraa fasiqa maridanoo. Nasareetee maqusai Kariree maqa maaqaki marifa maridanoo.
MAT 21:12 Yisufa Yeerusareenni oorureenoo Yeerusaree firaa amaana maqaki keeqanau. Keeqafufanoo aiqamai aiquqinau. Ainaina nimidaqa feefauru maree marusa faqa munnimma nimidaqa ainaina maree marusa faqa Yisufa nindafa masee aiqama rapatutu meeqeenoo nifaqasoofaqa fiqau. Kaqi munnimma qumareeqee amaana maqasaa munnimma kafaa nimimarusa Yisufa misa nindafamaseenoo misa qainda munnimma namufaqa teeqimma quqanau. Anutuna qaindasaa tatufira nakipuruna mini nimisaida munnimma maree marusa faqa misa ainaina faqa teeqimma quqanau.
MAT 21:13 Miqidanoo maaqi qimasee qimanniminau, ooqeenaa ufa maa amaana maqanara Anutufa maaqi qimasee akara rumaqoofa maridanoo. Qini maaqa faiqí anaasee qiniara innaaruqira maqa marianifee qimaqoofa maridanoo. Anutufa miqi qimaqoofaqa innee ummuarira maaqa aannandaafanoo innaaru qira maaqa mara quandeeqee ummuarira maqaikamandaafanoo.
MAT 21:14 Yisufa amaana maqaki kaqi marufaqa nifu dimbarausa faqa naununu apirirausa faqa Yisufa maruqoo aniree marufanoo nifu maqanniseenoo niku andeeqannimaqeenoo imarinau.
MAT 21:15 Miqi marufaqa faiqiuqaindi anikeeqafufaqa Yisunara maaqi qimasee idi raqau. Dafidina ati Anutu anee amiqi amiqimmanda.
MAT 21:16 Amaana maqasaa rakisi marusa misa Yisuna qafoofanoo, faiqí anaasee amiqi amiqimmanniseenoo faiqiuqaindi idi ramamaqoofanoo minara irufanoo niranaqanau. Niranaqoofaqa Yisuna qimamida qiqau. Anee maa idina iridanee, sia fee iridanee. Miqi qufanoo Yisufa iriseenoo nariqa qimanniminau. Eeoo qinee iridaqa, ooqeenaa akara ufa sia fee innee faqa iridee. Mifa maaqi qinau. Anee faiqi aanaaqiuqa nári nimariasa faqa sakasee mariasa faqa nári nookiqari anoona nimooqira ufa uridanoo. Sia fee innee mi ufana iridee.
MAT 21:17 Mifa miqi qimaseenoo misa faqa Yeerusaree maqusa faqa minniseenoo Beetani maqusai ooqu faiqanau.
MAT 21:18 Iqaqoofanoo aatata ooqurandee kafaa Yeerusaree maqusai urimarufanoo aararanau.
MAT 21:19 Aararoofanoo aana afainni saqari misa nee maria saqari faafisa fooqaana qafamaseenoo qaqamara randoofanoo sia marinau, amanee kai marinau. Qafamaseenoo fifau saqari maaqi qimasee aqinau. Naaru naaru siamma anisaa qaqama iraani. Miqi qufanoo mikari kai mi saqarifa aadanusinau.
MAT 21:20 Mina faiqinamu mina qafamasoofanoo naaquqoofaqa qiqau. Naqi fee mandee kaqi kaqi mandee aadanusinoo fee.
MAT 21:21 Yisufa minara iriseenoo qimanniminau. Qinee anoona ufa inni qimannimidaqa. Innee Anutunasaa irirana rusiseeqa minara moodaa irirafa marinaqa innee sia oonumafi irifanoo sia qaara irirafa marinanoo, maa faafisana qunnandee kai iqa innee faqa miqi kai ifaranoo firaa ainaina faqa innee miqifaranoo. Maa firaa aaqana oorifa aaqanara faqa qifanoo uqeerakinanoo ooruku nammariki aqufuannoo.
MAT 21:22 Kaifaa anee nanainainaree Anutunara iraidanee anee aneenna irirana Anutunasaa rusisainafa marinana anee moo ainainara innaaru qinanoo mifa mi ainainna kai ani amiannoo.
MAT 21:23 Miqi qimannimiseenoo mifa Yeerusareenni ooru finau. Oorureenoo amaana maqaki kafaa keeqanau. Keeqafinoo faiqí anaasee qimannimimarufanoo amaana maqasaa rakisimarusa faqa Yuda maqannaasa faiqí firaasa faqa anireeqa maaqi qimasee quandasee Yisuna irammiriqau. Ya fasiqa fee aniara qifanee maasa ainaina maa amaana maqanakinaa teeqi taaqi maqi nanee. Yafee ani dadaaqifanee anee faiqí anaasee faqa andeeqannimaqaidanee.
MAT 21:24 Misa miqi qimasoofanoo Yisufa nariqa qimanniminau. Qinee inni moodaa ufa iraanaqa innee mina oosana qimaqimifaqa qinee faqa innee qini iraanara qini diqiqoo oosanara inni qimannimianaura.
MAT 21:25 Yisufa maaqi qimasee irammannimaqanau. Yoohaneefa nammari nimimarufa faiqí anaasee moomoo rumannimaqarana Anutuna ufamau fee rumannimaqeenoo fee faiqí moo ufamau fee rumannimaqeenoo fee innee minara nanee fee qidee. Misa minara quandafufaqa Yisunara iriandoo qimasee naundaindari narí qimami narí qimami qiqau. Maasa Yoohaneena nammari nimiranara Anutuna ufamau fimaru fee qifanoo Yisufa maasara nanaree innee mina iriaqaanna sia iriqau. Miqi qiandoora.
MAT 21:26 Kafaa maasa Yoohaneena nammari nimimari fasiqanara faiqí ufamau fimaru fee qianaqa faiqí anaasee afeeka ufa maasa qimiqa darifoora, Yoohaneenara Anutuna kuqaa tamummaqara fasiqee qimariasa mariafaqa maasa darifoora.
MAT 21:27 Misa miqi qimaseeqa quandasee akooqoo Yisuna qimamiqa qiqau. Sia maasa ani irarufa iridaqa. Yisufa minara iriseenoo qimanniminau. Qinee iraunnanara sia innee kooroomasee qini qimaqimiafaqa qinee faqa innee iraanara qini diqiqoonara sia kooroomasee inni qimannimianauranoo.
MAT 21:28 Yisufa maa ufana kafaa faiqí firaasa faqa amaana maqasaa rakisimarusa faqa quandasee qimanniminau. Qinee moo ufa inni qimannimianaqa innee irisee mi oosanna qini qimaqimiaqa. Faiqí moo marinau, mina amaaku qaaraqanda mariqau. Mi fasiqafa narí amaaku indaaruqaa faiqi qimaminau. Qini uainna qaqama afuqaki aqufinana ainainia qimasoofanoo indaaruqaa faiqi fannoo qaoo qimaseenoo minnisee mariufanoo kafaa oonumafi iriseenoo doo ainainai finau.
MAT 21:30 Mina akoofa qufanoo qaoo qufanoo quandafufanoo inaaqianaa faiqi qimaminau. Anee fua, ainainai fua. Miqi qufanoo mifa eedoo kai qimasee aanai oonureenoo oonumafi iriseenoo minnisanau.
MAT 21:31 Mi fasiqaqanda indaaruqaa fee inaaqianaa fee nári nikoona ufa aindusinoo fee qifaqa qinee irianaura. Misa iriseeqa qiqau. Indaaruqaafa mifa narí akoona ufa aindusinau innaaqianaafa sia aindusinau. Yisufa minara iriseenoo maaqi qimasee misara akooqoo qimanniminau. Miqi kaimmaseeqa kaaqa faiqí maraqanua anaaseesa faqa ummuarira takisa munnimma maree mariasa faqa misauqa Anutuna ufara eedoo qimasaidaqa inni indaaru kamannisee Anutuna ququsaki keeqaidaqa.
MAT 21:32 Yoohaneefa nammari nimimarufa inniara amaana maqasaa rakisirausara inniqa mandainaina ninaaqiannai quqasee nimeesuqusee noori Anutufinnai noori ubeekaaqa. Yoohaneefa miqi qimaseenoo inni qimannimisoofaqa innee siamma iriafanoo ummuarira takisa munnimma maree mariasa faqa kaaqa faiqí maraqanua anaaseesa faqa misa kaimma Yoohaneena ufa irisee Anutufinnai quandafiqa andeeqasee fiqau. Kaifaa innee amaana maqasaa rakisirausa misa andeeqasee fuana nikooqaifaqa Anutufinnai noori ubeekaranara qaoo qimasee mina ufara nikooqaifaqa inneeqa qimaqaamau kai fimariafanoo.
MAT 21:33 Yisufa mi ufana qimannimiseenoo kafaa moo ufa quandafufanoo maaqi qimasee qimanniminau. (Yisufa nariqa munnimma maree maru saikanara irisee uainna sanda ummaqirana kikiqa ususeenoo narí arifandinnanara qimanniminau. Maaqoo maasa sia uainna saikara iridaqa. Maasa munnimma maree maria saikafa koofi kai marinara Yisuna uainna kikiqira ufara maasa quandasee koofi kikiqa usuanaura.) Yisufa qimanniminoo qinau. Iriaqa, faiqí moo fannoo ainainafaqaafa ququsa auquseenoo koofi asumu ummaquseenoo nári oosana maraseenoo koofi qambaanai qainda afeeka meeraqoo sandaaqai auquseenoo minni maridanoo ummuarira fasiqara kaasau aandau ainainara rakisiaqeera qainda auqinau. Koofi nammaruqi maria difaani firaana faqa auqinau. Koofi innooqafufanoo mina akoofa rakisira fasiqausa qufaasu niminoo qinau. Innee qini koofisaa rakisiqisee marifaqa qinee qambaanai oosusaanaqa innee dindanai rafarisee nimiseeqa ooni maraaqa dindanai rafarisee nimiseeqa ooni mara qini qimaqaaqa qinee moosaa fuanauree qimasee moosaa finau.
MAT 21:34 Aiqama koofi anoona mafufanoo ainaina akoofa nianaindari narí ainainira faiqiuqa niqiqeenoo qinau. Innee ooquree qini oosukinaa koofi qini oondaraana tiqisee maree mini qimiaqa.
MAT 21:35 Mina ainainira faiqiuqa ooquroofaqa ququsasaa rakisimarusa mandoosana marasee misa nariqau. Moo saamu samu ariqau moo ooni samu ariqau moo kuqa ariqau.
MAT 21:36 Ainaina akoofa minara iriseenoo moomoo niqiqamasee qimanniminau. Innee ooqu qini oondaraa koofi itiqimaree mini qimiaqa qufaqa misa ooquroofaqa kaifaa narinau.
MAT 21:37 Koofi akoofa naqi fee masee qianaqee qini koofi mareefaree minara irusianoo. Inaaqiana uqanna narí amaaku uqannara iriseenoo qimaminau. Anee ooqu maree mini qimia. Misa aniara rufiaaqeera qimasoofanoo mina amaaku ooqu roofaqa ququsasaa rakisimarufa faqa mina aiku asauku faqa mina amaaku qafamasee qiqau. Maafa maa koofina akoona amaaku anireenoo marai mina faqa kuqarusaa, fafaa mifa maa maqana maraandoora mina arusee maasa kai maraanaura.
MAT 21:39 Misa miqi qimaseeqa mi faiqina qumareeqa rariseeqa aqoosai munusee kuqamma ariqau. Yisufa narí arifandinnanara qidanoo koofi akoona amaakuara qinoo.
MAT 21:40 Yisufa mi ufana qimannimiseenoo amaana maqasaa rakisirausa irammirinoo qinau. Ququsa akoofa miqoo ooqurainna kari naqi fee masee ainainira rakisirausara iannoo fee.
MAT 21:41 Misa minara iriseeqa qiqau. Mifa qumureenoo mi fasiqausa rairai qimannimiaqeenoo aanoo imannimaqeenoo kuqannaruannoo. Kafaa randaseenoo moo amiqira fasiqa mara quqasainanoo mifa ququsasaa andeeqasee rakisiannoo. Qaqama ireenoo akuqainna kari, ququsa akoofa narí oosaaqaraanara narí qinoo maramaree mini qimia qinanoo tiqisee mara maree munu amiannoo.
MAT 21:42 Misa miqi qimasoofanoo Yisufa mina iriseenoo misa narí arifandinnanara iriseenoo kafaa quandaseenoo nariqa qimanniminau. Ooqeenaa akara maaqi qimasee qimaqoofa marida. Faandaamura auqi maria fasiqausa sabeena moo marasee qafamasee mandaikira fee qimasee minnisaqau, moo faandaamura auqimarusa mi sabeenna kai mara maree amiqira fee qimaseeqa faandaamura afeekaikamma umaraaninnana rakiaqau. Boo qafaaqa, Anutufa amiqira ainaina auquseenoo. Ooqeenaa akara miqimminoo maridanoo sia fee innee asaana ridee. Doo aunidee.
MAT 21:43 Miqi kai inoo Anutufa narí ququsa inni Isaraee maqannaakinaana mara maree moo maqannaaki quqasaifaqa mi maqannaasa amiqimmasee Anutuna ufamau fifaranoo. [
MAT 21:44 Maa ufana 44 qusa kamu sia ooqeenaa papiqaki marunara sia maaqoo akara riqa.]
MAT 21:45 Amaana maqasaa rakisimarusa faqa Farisai amaana ufa irimarusa faqa iriseeqa maasara quandaidanoommifoo qimaseeqa niranaqee marufaqa Yisunara rumbara ufa qimariqau. Faiqí anaasee moomoosa mina aaqa marufaqa misa minara Anutuna tamummaqara fasiqa maridanoo maasa minara rumbaanaqa faiqí anaasee maasa diqiqa tutuqi foora. Miqi qimasee minnisee sia Yisuna rumbaqau.
MAT 22:1 Yisufa kafaa faiqí anaasee qimanniminau. Quandara ufa kai maaqi qimasee qimanniminau.
MAT 22:2 Anutufa narí ququsakinaasara maaqi qimasee rakisidanoo. Firaa karaambaiqa moo kikiqa usuanaura. Mi firaa karaambaiqafa mina amaaku amundararee qimasee firaa qoomaqa suqanau.
MAT 22:3 Suqaseenoo narí faiqi namu niqiqeenoo qinau. Maqusa maqusa fifainiqa eenda qimannimunausa nifiqee minisaifaqa narana naaqa. Qimasoofaqa fifainiqau. Faiqí oonu naaramasoofaqa misa qaoo qimasee minnisaqau.
MAT 22:4 Karaambaiqa fannoo mina iriseenoo kafaa akaqausa niqiqeenoo qinau. Eenda qimannimunausa innee oonu nifiqaaqa. Narana faqa oosana oosana aandau faqa oonidakinaana faqa doo aiquaqa. Kaqi kaqi iaqa. Doo aiqama deedaqinoo maridanoo.
MAT 22:5 Qimannimunausa maqusa maqusa mariasa qimannimisoofaqa iriseeqa naanaidara qimasee minnisaqau. Moo fannoo narí ainainnai finau. Moo fannoo narí burimakau ququsa auqiraree qimasee finau. Moo fannoo narí situaqai finau.
MAT 22:6 Moo maqusanaasa mina faiqinamu saamu samu nariqau, manda oosana nimiqau, kuqa nariqau.
MAT 22:7 Karaambaiqa fannoo minara iriseenoo narí faiqi namu maaqi qimasee qimanniminau. Innee findifuaqa, maqusa maqusa qini faiqi namu narimariasa aiqama naru taikasee misa maaqa idaraaqa miqi qufaqa misa miqimmiqau.
MAT 22:8 Miqimmasee aniroofanoo karaambaiqa qimanniminau. Amundarana qoomaqa deedaqinoo marida. Faiqí anaasee qinee indaaru naaraunaqa misa oosana sia andeeqanoo marifaqa sia ania.
MAT 22:9 Doo innee kaifaa fuaqa. Aana kindooraki mariasa faqa aana fimariasa faqa uiqaana mariasa eenda sia qimannimunausa kai nifiqee aniaqa.
MAT 22:10 Mina faiqi namu minara iriseeqa faiqiara randarara fifainiqau. Amiqirausa faqa mandaikirausa faqa paqurinausa misa nifiqee aniaqa. Miqi qufaqa misa fiqau. Miqi kai iqa karaambaiqa maqusai faiqí anaasee qumbiaqa mariqau. (Mi aukuanna amundara qoomaqa sakaseenoo amundara qamunna kooqikinaana maraseenoo nimufaqa afisusee keeqafufaqa neemariqau.)
MAT 22:11 Faiqí anaasee mi qoomaqanaki ooqu marifufanoo karaambaiqa fannoo anireenoo faiqí anaasee nimandanoo fidanoo oonu qafoofanoo moo fannoo sia karaambaiqa qamunna afisirafa kooqisaa amu qamunna sia afisirafa kaqi ooqu marinau.
MAT 22:12 Oonurama qafeenoo qinau. Qini qiqoondi, naqi fee ifanee sia qinee qamunna kooqiki qamunna amunnana sia afis inanee. Naqi fee ifanee sia amundara qamunna afis inanee. Nanaree fifau ooqu marinanee. Miqi qufanoo mi fasiqafa kaqi kasoomafinau, sia ufa qinau.
MAT 22:13 Minara karaambaiqa fannoo qafamaseenoo aranaqoofanoo quandafinoo narí faiqi namu qimanniminau. Innee sanda qumaree maana aiku asauku ruumbeeqee aqoosai asukunai aquaqa. Aqoosai minni asukunai aqusaifanoo minni ooqumaridanoo iki raqaidanoo afai riqidanoo aupuraidanoo mariani. Aiqama aqoosai mariasa miqi kaimmidaqa.
MAT 22:14 Yisufa mi ufana maaqi qimasee rafaaqafinoo qinau. Anutufa moomoo naaramasaifaqa. Misa aniraifanoo Anutufa misakinaana moodaa kai moodaa kai nariara maraidanoo. Moomoosa sia amanaikidaqa.
MAT 22:15 Yisufa mi ufana faiqí anaasee qimannimisoofaqa Farisai amaana ufa irimarusa nári faiqi namu naaramaseeqa suqu quqaseenoo Yisuna rumbara ufa maaqi qimasee oonumafi irimariqau. Maasa irarufara fuseemmasee umaraanaura, oosana oosana ufara mina irammirifanoo mifa moo kaqikaa ufa manda ufa qinaqa doo miqoo tautumandee rumbaanauree qiqau.
MAT 22:16 Miqi qimaseeqa misa nári faiqi namu faqa Eeroodeena aqoondi mariasa faqa moodaanaki Yisufinnai oonu reeqa unna qimasee amiqira aqoondiara foora mafufaqa noori quqasee reendeenamaseeqa maaqi qimasee irammiriqau. Oo ufasaa rakisirafa, anee andeeqara ufa qimarianafa, sia unnufa qimarianafa anee sia moonara amiqira fee qimasee amiqira ufa qimamianafa, sia moonara mandaikira fee qimasee mandufa qimamianafa, aiqamaqara anoona ufa kai qimannimimarianafa andeeqarafa mariananoo.
MAT 22:17 Maasa iraanana anee iriseenana mina oosana maasa qimaqimia. Maasa maqee maqee Roomma maqannaa kaamanna takisa munnimma amimarunausa maridaqa. Maasa miqidaqa Mooseena sandufa rukiaidee sia fee rukiaidee.
MAT 22:18 Misa Yisuna ufa iriseeqa mina rumbaaneera qufanoo Yisufa narí faasai misa mandoosana iriseenoo maaqi qimasee niqinoo qinau. Innee qaara ufa qimariasa mariafanoo mandaiki mariasa mariafanoo. Faiqí anaasee innee naamua qimasee quandafi mandoosana maree mariasa mariafanoo. Innee nanaree fifau qini qifusaa ititaidee qinee inni nindafaida.
MAT 22:19 Inneeqa takisa munnimma mini qini qimifaqa qafaa. Miqi qimasoofaqa misa takisa munnimma marasee amiqau.
MAT 22:20 Misa takisa munnimma amufanoo Yisufa mi munnimmana maraseenoo amiqi maseenoo aiququmaseenoo qinau. Maanasaa yana oori amanee maridanoo fee. Yana auqu fee mina amana ameemaanai akara rinoo maridanoo fee qufaqa misa qiqau.
MAT 22:21 Roomma maqannaa rakisirafa mina auqu Sisaa mina amana faqa mina auqu faqa maridanoo. Miqi qufanoo Yisufa qimanniminau. Doo Sisaana auqu minasaa akara rinoo marinara minaindi uqanna maridanoo doo narí ainaina doo narí amiaqa amisee quandafiqa Anutuna ainaina doo mina faqa narí amiaqa.
MAT 22:22 Miqi qufaqa misa tautumaseeqa mi ufana oosanara randasee quqasee fiqau.
MAT 22:23 Mi faasaanna Sadikai amaana ufa irimarusa anireeqa Yisuna irammiriqau. Misa maaqi qimasee qimarusa. Faiqí kuqidanoo sia minakiqari findifidanoo, akundamasaafanoo doo minaki taikaidanoo. Sadikai amaana ufa irimarusa miqiqa marunara maaqi qimasee Yisuna irammiriqau.
MAT 22:24 Oo maasa uqannifiqara fasiqa. Mooseefa maaqi qimasee faiqiara akara rinau. Faiqí moo fannoo faiqi sia maqarai kuqinanoo mina akaqa fannoo mina anaaqa maraannoo. Maraseenoo minasaa faiqi maqasainafa findifinoo indaaruqaa akoona qumiasana maraseenoo mina maqa maaqaki fuannoo. Mooseefa miqimmasee maasara akara rumaqoona maridanoo anee minara irinaqa maasa moo ufa ani qimamianaura.
MAT 22:25 Faiqí moo fannoo qisauku dinni taikasee dinni oonu qaara marasee faiqi namu maqasoofanoo indaaruqaafa innooqafinoo aanaaseesaa amundasoofanoo sia faiqi maqarai kuqinau. Kuqufufanoo mina aanaaqianaafa mi anaaseena kai kafaa maranau.
MAT 22:26 Mifa faqa mi anaaseena maraseenoo sia faiqi maqarai kuqinau. Kuqufufanoo misa ninaaqianaafa mi anaaseena kai maraseenoo sia faiqi maqarai kuqinau. Miqi kai inoo fifiufanoo faiqí qisauku dinni aiqama taikasee dinni oonu qaara maraseenoo mi anaaseenasaa sia faiqi maqarai kuqiqau.
MAT 22:27 Kuqufanoo mi anaaseefa faqa kuqinau.
MAT 22:28 Aiqama fasiqa anaasee kuqiranakiqari findifira aukuana findififanoo mi fasiqausa faqa mi anaaseefa faqa findifinanoo yana aanaaqee mariannoo fee. Qisauku dinni taikasee dinni oonu qaara marasee mi anaaseena maroosa mariqau. Yana aanaaqee mi anaaseefa mariannoo fee.
MAT 22:29 Yisufa mi ufana iriseenoo niqidanoo qimanniminau. Innee Sadikai amaana ufa irimariasa aaqee mariafanoo. Innee ooqeenaa tamummaqarausa akarakinaa ufa faqa Anutuna afeeka faqa sia irisaidaqa aaqee mariafanoo.
MAT 22:30 Aiqama findififandinna aukuana findifiqa faiqí afaaqa faqa anaasee afaaqa faqa taikaannoo aiqamaqara amanamana kai qangiroora foora kai afeeka marifaranoo. Qangiroouqa sia faiqí faqa anaasee faqara foora marifaranoo mookirausa idaaqirausa maridaqa faiqí anaasee kuqufiqa innaarunai oorureeqa qangiroora foora mafiqa sia amana narí maree narí maree ifaranoo. (Ooqai Abarahaafa faqa Isakeefa faqa Yakooboofa faqa maa maqanasaa maru kamuqoo Anutuna ufamau fimarunara Anutufa nariara minamusara Anutusee qinau. Minamusa kuqufiqa findifiqa doo Anutuna faqa innaarunnai ooru mariqau. Innaarunai Anutuna faqa kisaaqasaa marikufanoo Anutuna tamummaqara fasiqa moo fannoo Anutuna ufa minamusara quna iriseenoo akara rinoo qinau. Qinee minamusa Anutusa maridaqee qinau.)
MAT 22:31 Yisufa mi tamummaqarana aufakiana iriseenoo Sadikai amaana ufa qimariasa kaifaa maaqi qimaseenoo qimanniminoo qinau. Innee aaqamasee kuqiranakiqari sia findifiraree qiasa. Minara Anutufa inni qimannimiqoona sia fee innee mi akarana asaana rida fee.
MAT 22:32 Mifa kuqufusa findifi mina faqa marianara maaqi qinau. Qinee Abarahaana faqa Isakeena faqa Yakooboona faqa misa Anutusa qinee marunausa maridaqa. Anutufa sia ooqai misa maaqoo maru kamuqoo misa Anutusa mariafannaqee qinau. Ooqai kuqufusa doo findifiqa Anutuna faqa maqee marianara mi ufana misa Anutusa marunausa maridaqee qinau. Minara Abarahaana faqa Isakeena faqa Yakooboona faqa sia misara kuqiqa mariaafoo qiaqa. Kaqi Anutuna faqa innaarunai maridammiafoo qiaqa. Anutufa sia kuqirausa Anutufa maridanoo. Kaqi mariasa misa Anutufa maridanoo. Innee minara sia fee asaana rumasee irida fee.
MAT 22:33 Minara faiqí moomoosa iriseeqa mi ufanara anoona ufa fee qimasoofanoo naaquqanau.
MAT 22:34 Yisufa Sadikai amaana ufa irimarusa ufa arusoofaqa Farisai amaana ufa irimarusa minara iriseeqa minara ufa suquseeqa anireeqa Yisuna irammirianee qiqau.
MAT 22:35 Misakiqari sandufa oosana irimaru fasiqafa anireenoo Yisuna amanammasee qafaanee qimasee ufa quqanau.
MAT 22:36 Faiqí uqannifiqee marianna fasiqafa, Mooseena sandufa oosana oosana maridanoo. Nana sandufafee aiqama sandufa narusee urinaaqaranoo maridanoo fee.
MAT 22:37 Yisufa iriseenoo qinau. Uriqarara ufa maaqaamminoo maridanoo. Inni faakana Anutufa innee minara inneeqa nimuqusa nimana irirana mudukannoo minara nidinaqa minara ruaqa.
MAT 22:38 Mi ufafa aiqamufausa urinaaqaranoo maridanoo.
MAT 22:39 Mina aanaaqiana mina fooqaafa maaqimminoo maridanoo. Innee inneeqa nipatasaa amiqimmasee rakisidaqa rimariafanoo doo innee miqi kai iqa niqoonausara faqa rakisidaqa ruaqanani.
MAT 22:40 Mi ufaqandasaa aiqama ufa oosana oosana mi qandasaa mundidanoo. Ooqai Mooseena sandufa faqa Anutuna tamummaqarausa ufa faqa mi qandasaa faakana fooqaafa maridanoo mi qandasaa mundinoo maridanoo.
MAT 22:41 Farisai amaana ufa irimarusa miqoo suqiqa marufanoo, Yisufa misa nikiaaqa maa ufana qinau.
MAT 22:42 Ooqai asauku mundiranara innee minara nanee fee qida fee. Yana ati fee qidee. Miqi qimasoofaqa misa qiqau.
MAT 22:43 Dafidina ati fee qidaqa qufanoo Yisufa iriseenoo quandafinoo misa qimanniminoo qinau. Innee kuqaa Dafidinara Anutuna tamummaqara fasiqa fee qimariafanoo Anutuna maraquna fannoo Dafidina aakufufanoo maaqi qimasee akara rinau.
MAT 22:44 Anutufa maaqi qimasee qini karaambaiqa qimaminau. Anee qini Anutusa qisauku uqannai qini daaqa ooqumarifi marinaqa qinee ani namuqaauqa naru taikaseeqa ani aramandunna quqasaanana maria. Miqi qimasee Dafidifa akara rinau.
MAT 22:45 Yisufa mi ufana qimannimiseenoo kaifaa maaqi qimasee irammirinau, Dafidifa Anutuna asauku mundiranara qini karaambaiqa fee qunara naqimmasee asauku mundirafa moodaanaki Dafidina karaambaiqa faqa mina ati faqa mariannoo. Dafidifa andeeqaidanoo fee innee fee andeeqaidaqee aiqamaqara innee andeeqaidee.
MAT 22:46 Yisufa mi ufana qimannimufaqa sia mi ufana ati raqeeqee narí qimamiqau. Miqooqari nisaurusee sia kaifaa moo ufa Yisunara irammiriqau.
MAT 23:1 Miqi qukari Yisufa narí faiqi namufaqa faiqí anaasee moomoo faqa maaqi qimasee qimanniminau.
MAT 23:2 Mooseena sandufa akoofasauqa faqa Farisai amaana ufa qimarusa faqa Mooseena sandufa qimannimiranara qutaaqama nimaqarausa marida. Innee minara misa ufa amiqimandee iriseeqa mi mau kai andeeqasee fidaqa misa iandee kai sia iaqa. Misa nookiqari faiqí anaasee aana quqannifiqaidaqa quandafi moomau fimariana mi mau innee sia fuaqa.
MAT 23:4 Farisai amaana ufa qimariasa faqa Mooseena sandufa akoofasauqa faqa misa amusufa moomoo firaa qumaarara fooqiara arapeeda arueeqeenoo faiqí anaasee nimidanoo náriara sia kaqikaaqoo nári nisauku amukannoo dadaaqidaqa misa iandee innee sia miqi iaqa. (Mi aukuanna Isaraee maqannaasa Mooseena sandufamau fidaqa qisaaqamara foora ususeeqa minaki Mooseena sandufa papiqasaa akara rumasee ummauruara foora ususee nuaqee imariqau. Nariqa qamunna atisaa faqa faakasaa peepeenaana auquandee masee usuqirausa nimariqau. Kaqiqeesa faqa aiqamausa faqa miqimandee nimariqau. Farisai amaana ufa qimarusa firaatia auqusee qiqafaaqee qimasee qisaaqamasaa faqa qamunnasaa faqa firaatia auqu uqirausa nimariqau. Miqi marunara Yisufa maaqi qimasee niqinoo qinau.)
MAT 23:5 Misa faiqí aiqamausa nifusaa aiqama ainaina auqaidanoo fifau tasimiramandaida auqaidaqa. Qisaaqama firaana ususee Mooseena sandufa akara minaki usuqirausa nidaqa qamunna kisaaqamaseeqa faiqí nifusaa tasimiramandaida fidaqa.
MAT 23:6 Faiqí qoomaqa sakasee naidaqa Mooseena sandufa akoofasauqa faqa Farisai amaana ufa qimariasa faqa misa amiqira qoo kai ooqu marifidaqa naidaqa. Amaana maqaki faqa amiqira qoo kai faiqí nifusaa ooqu maridaqa faiqí anaasee qiqafaaqee qimasee miqimmidaqa.
MAT 23:7 Faiqí anaasee suqidaqa makeeti marunakina narí anufaqa uqeera qafeeqa, Oo maasa faiqí firaafa anee fee anidanee miqi qufanoo narí fifau sumoo summidanoo. Misa aatata fidaqa maqusa maqusa nimarufaqa faiqí misa nindafeeqa, oo maasa ufasaa rakisirafa misa miqi qunara kaaqa nidufaqa asasammidaqa. Misa iandee innee sia miqi iaqa.
MAT 23:8 Faiqí anaasee inniara maasa uqannifiqara fasiqa fee qifaqa qaoo qimasee qiaqa. Innisaimbaqa amanamana kai maridee qiaqa ooreeqarausa nikaqaafasaa kai maridee qiaqa. Anutufa kai innisaimbaqa uqannifiqara fasiqa maridanoo fee qiaqa.
MAT 23:9 Miqi kai iqa sia maqasaaqaraasara qikoo fee qimasee nimandaaqa. Innaarunai Anutunara innisaimbaqa aiqamausa qikoo fee kai qiaqa. Miqiqa innee amanaika kaimmifaranoo.
MAT 23:10 Inni saimbaqaki sia moonara karaambaiqee qiaqa minara minnisaaqa. Inni karaambaiqa moodaa Anutuna asauku mundirafa mifa kai maridanoo.
MAT 23:11 Moo fannoo inniki uriqararafa marinafa narí kai eedoo qimaseenoo misa dadaaqira ainainira fasiqa mariannoo.
MAT 23:12 Faiqí anaasee náriara uriqararausee qimariasa Anutufa misa farindamaki saamuriqa nisauriranaki quqaannoo. Faiqí anaasee nariara oorudupirausee qimariasa misa faakanaikamma nimaqaannoo.
MAT 23:13 Yisufa kaifaa misa qimanniminoo qinau. Innee Farisai amaana ufa qimariasa faqa innee Mooseena sandufa akoofasauqa faqa inni narirafa firaafa marinara qinee oonumafi iriqa qimudao̱o qidaqa. Innee faiqí amaana ufa qimannimisaidaqa maqandanai inneeqa kaqi ummuari mariasa. Faiqí anaasee akaqausa innaaruna ququsaki keeqarariafaqa innee rafaaqafunnimaqaida innee faqa sia keeqeefaranoo.
MAT 23:15 Inni narirana firaafa marinara minara qinee firaaqoo qimudao̱o qidaqa. Innee amaana ufa qimannimisaidaqa maqandanai mandainaina oosana oosana maree mariana. Innee mandoosana maree mariasa. Innee maqusa maqusa faiqiara randaidaqa inni ufa iriaqaainnana mina paqurimasee inneeqa ufa oosana qimamisaifanoo irinoo mi fasiqana mandoosana inni mandoosana uraaqaranoo maridanoo.
MAT 23:16 Nifu dimbarausa maasa aana quqannifiqee marunausee qimasee innee faqa nifu dimbarausa kai mariafanoo. Inni narirana firaafa marinara inniara firaaqoo qimudao̱o qidaqa. Innee maaqi qimasee aaqamasee qimariasa. Faiqí moo fannoo narí amana Yeerusaree amaana maqasaa qimasee aqiqaqamasee moo ainaina auqararee qinafa mifa fifau ufa fee qimasee, siamma auqaannoo. Innee minara aaqee mariafanoo. Faiqí moo fannoo narí amana amaana maqaki koora marinanaki aqiqamasee moo ainaina auqararee qinafa koora uriqarara ainaina marifaqee qimasee kaqi auqaannoo, sia minnisaannoo. Minara faqa innee aaqee maqi qimariasa.
MAT 23:17 Innee nifu qimbarausa maridaqa furufari mariafanoo. Innee amaana maqakinaa koorara uriqarara ainainee qimariafa aaqee mariafanoo. Koora fee amaana maqa fee uriqararafa maridanoo fee. Amaana maqa naaquqara amaana maqa marinara fifau koora minaki marifa naaquqarafa maridanoo. Anee amaana maqasaa qimasee aneenna amana aqiqainafa kaqi auqa naaquqarafa amaana maqa maridanoo.
MAT 23:18 Innee kaifaa maaqi qimasee aaqamasee qimariasa. Faiqí moo fannoo amaana maqakinaa qaindasaa qimasee narí amana aqiqamasee moo ainainara auqararee qinafa kaqi fifau dapi qainda fee qimasee sia auqaannoo. Faiqí moo fannoo amaana maqakinaa qaindasaa quqeemarinanaki narí amana aqiqamasee moo ainaina auqararee qinafa kuqaa mi ainainna auqaannoo. Innee miqi qidaqa aaqee mariafanoo.
MAT 23:19 Innee nifu dimbarausa naaqoo nifu furufarirausa miqi qimariafanoo. Qini ufa iriaqa. Nana ainainee uriqararafa maridanoo fee qainda fee minasaa Anutuna amianinna ainaina quqeemaria fee uriqararafa maridanoo fee. Innee qaindasaa Anutuna amida quqee mari ainainara uriqarara fee qimariana aaqee mariafanoo. Qainda naaquqara ainaina marinara minasaa quqee mari ainainafa faqa naaquqaidanoo. Minara qainda uriqararafa maridanoo. Anee amaana maqakinaa qaindasaa aneenna amana aqiqamasee moo ainaina auqararee qinanoo mifa kuqaa ani afaaqa rumbasaannoo. Innee aaqaida sia rumbaidanoo fee qimariafanoo.
MAT 23:20 Faiqí moo fannoo amaana maqakinaa qaindasaa narí amana aqiqainafa sia fifau qaindara kai qidanoo. Aiqama ainaina qaindasaa marinnanara faqa minara faqa qidanoo.
MAT 23:21 Faiqí moo fannoo Yeerusaree amaana maqaki narí amana aqiqainafa sia fifau amaana maqara kaifau qidanoofau. Mi amaana maqanaki marifa Anutunara faqa qidanoo.
MAT 23:22 Faiqí moo fannoo innaarunai narí amana aqiqeemarinafa sia innaarunaira kai qidanoo. Anutuna maqusa maridanoo. Miqoo Anutufa karaambaiqa qaari ufiqiraqoo ooqu marifi maridanoo naaquqara maqusa maridanoo, sia fifau maqusa Anutufa narí mari maqusafa maridanoo.
MAT 23:23 Innee Mooseena sandufa akoofasauqa faqa Farisai amaana ufa qimariasa faqa inni Anutufa narirana firaanara qinee qimudaoo qimannimaqaidaqa. Innee faiqí anaasee uqannifiqaidaqa kafaa quandafi maqandanai mareemariasa. Innee inneeqa qafuqakinaana oosana oosana adiafaaira ainaina, kaqikaa fifau ainaina maqee maqee raineeqee ati Anutuna amimariasa, innee mi kaqikaa ainainnara fifau munari minarida, firaa ainaina Mooseena sandufakinaa anoona ainaina innee minnisaidaqa. Andeeqara oosanara faqa faiqí aanaaseera nimudaoo qira oosana faqa anoona ufa kai qira oosanara faqa mi firaa akooqooqaraa ainainnana innee minnisaidaqa. Innee mi firaa ainainnatia namufaqa iaqaana, kaqikaa ainaina namufaqa iaqaana.
MAT 23:24 Innee nifu dimbarausa nisauku qumaree aana uqannifiqaidee qimariasa, innee faqa nifu dimbarausa mariafanoo. Innee kaqikaa fifau ainainara fifau munari minaridaqa nammariki nunuka fooqaafa marifaqa naandoo qimasee mara aquseeqa kaifaa quandafifaqa firaa ainaina akooqoo ainaina qoosara foora firaa aandau tia sia irirai kaqi nambiqee mariasa.
MAT 23:25 Farisai amaana ufa qimariasa faqa Mooseena sandufa akoofasauqa faqa inni Anutuna narirana firaafa marifaqa minara qinee inniara qimudao̱o qidaqa. Inni marirana kaafara foora maridanoo, innee kaafara foora adisaa kai findaukarausa aunduraki madaapee usirausa mariafanoo. Innee faiqí nariranannai misa ainaina maree mariafanoo. Innee inneeqa fanandiranannai minannai inneeqara kaaqa moomoo ainaina afaqa usimarianara inni naunduraki madaapee usirausa mariafanoo.
MAT 23:26 Farisai amaana ufa qimariasa nifu dimbarausa kai mariafanoo. Innee naaree kaafa aunduraira foora findaukamasee mariaqaana. Miqi qimasaifaqau aiqama kaafa aundura faqa adisaa faqa findaukarausa mariaqaana. Innee sia miqiafaqa.
MAT 23:27 Farisai amaana ufa qimariasa faqa Mooseena sandufa akoofasauqa faqa inni narirana firaafa marifaqa qinee inniara qimudao̱o qidaqa. Innee faiqí madikara fooqaana mariafanoo aunirira saqariara fooqaana apatasaa amiqira qumisa akusaafaqa faiqí misa mina qafamasee boo amiqira fee qidaqa. Innee miqi mariafanoo faiqí nifusaa amiqirausa mariafanoo inni naundura madikaki faiqí putaainoo nimudaani fannoo mandaikinoo maridanoo, kudi makirana oosana oosana inniki maridanoo.
MAT 23:28 Innee miqirausa mariafaqa faiqí inni niqafamasee maasauqa andeeqarausa maridammiafoo qidaqa inneeqa naundurai sia qafee mariafanoo, naunduraki putaainoo maridanoo, maqandanai maree maria oosana faqa ufa rukiarana oosana faqa doo afai raqaramminoo maridanoo.
MAT 23:29 Farisai amaana ufa qimariasa faqa papiqa akara rimariasa faqa inni narirana firaafa maridanoo minara qinee inniara qimudao̱o qidaqa. Inni nikeeku nikaaku nisaifaqausa Anutuna tamummaqara fasiqauqa narusee nikundaqau. Kaifaa innee misa faiqi namu quandafifaqa misa madikamaqoosa rukiseeqa qumisa qumaree saqarisaa fee oonisaa fee maqee maqee akusee amiqimariafanoo. Innee akidaqa maaqi qimasee qimariafanoo.
MAT 23:30 Maasa qikeeku qikaaku maru aukuana maridaqau sia maasa tamummaqara fasiqa naruafanaiqini misa fidika sia mariqini.
MAT 23:31 Oo innee miqi qidaqa inneeqa nikeeku nikaaku Anutuna tamummaqara faiqi nariusa misa faiqinamu maridee qimariafanoo.
MAT 23:32 Doo amana, inneeqa nikeeku nikaaku naanna raaqanani. Misa maroo mandainaina innee firaanaika masaaqanani.
MAT 23:33 Innee sakani faiqi namu mariafanoo ukadiqa faiqi namu mariafanoo Anutufa inni idaki aqiraree qinoo. Innee naqi fee masee umbaqaki fifaree. Sia amana miqifaranoo.
MAT 23:34 Yisufa kafaa Farisai amaana ufa qimarusa qimanniminau. Qinee tamummaqara fasiqauqa faqa Anutuna ufa irimariasa faqa Anutuna ufa uqannifiqeemariasa faqa qinee marunannai mariasa innee iannai niqiqaanaura. Innee misa nindafamaseeqa akaqausa aunirira saqarisaa narifaranoo. Akaqausa innee inni amaana maqaki raitasaa qainna ateekasaida rumbeeqoo samunannai nitaufakaaqa nariisaifanoo fidika radiqinoo qumuannoo. Akaqausa maqusa maqusa nifaqasaifaqa sandeefaranoo misa fidika faqa inni nikeeku nikaaku narusa misa fidika faqa inniki marianifeera, ooqai indaaru Abeerana fidika fifau kaqinni adianau. Miqooqari anidanoo moomoosa fidika fifausaqa adianoo ani ifanoo Seekariaafa Barakiana amaaku Yeerusaree amaana maqaki Anutuna naaquqara oosirana dinni marufanoo dinni qainda marufanoo, mi qambaanna fifau arusoofanoo kuqinau. Mi kamusaqa fidika moomoo fifau adianoo maridanoo.
MAT 23:36 Mi fidikafa inniki kai mariannoo inni nikeeku nikaaku nisaifaqausa misa maru kamuqoo numoo fifau faiqí nariu numoofa innee maa kamu saqa mariasaki mi numoofa inniki qumaara ramafuannoo.
MAT 23:37 Oo Yeerusaree Yeerusaree firaa maqusa aniki mariasa Anutuna tamummaqara fasiqauqa narusa mariafanoo. Anutufa faiqí faiqi niqiqoosa ooni saamu narimarusa. Moomoo kari sia asaanarida qinee kookooraanara fooqiara qiqoosa qairisee Yeerusareenni faiqi namu mafi sakaanee runaqa misa rukiee mariasa.
MAT 23:38 Doo mina akiaqara kasooqaqee inniqa maqusa faqa amaana maqa faqa sia faiqí mari maqa maaqafa naakundu maqa maaqafa mariannoo.
MAT 23:39 Innee qini ufa iriaqa. Doo sia kafaa qini qiqafeefaranoo. Innee naaru kasooqaqee qiniara, Oo amiqirafa Anutunakinaafa maasaki qumidanoo fee qifaranoo. Mi aukuanna kai kafaa innee qini qiqafeefaranoo.
MAT 24:1 Yisufa Yeerusareenni naaquqara amaana maqakiqari raudamakufanoo moosaa fimarufaqa mina faiqi namu Yeerusaree amaana maqa ooni maqa minakinaa amiqira usakara usakaqoona oosana oosana uqafiqee mariqau.
MAT 24:2 Yisufa misa ufa iriseenoo quandafinoo qimanniminau. Innee maa ooninannai afeeka usakara usakaqoona qafaidee, innee qini ufa iriaqa. Kaqikaaqoo sia uqanna maa ooniuqa aaku aaku irafa maqee marindee iannoo sia moodaa kaqi mariannoo aiqama qumbaqi aquseefaranoo. Miqi qimasee quqasee moosaa nifiqee finau.
MAT 24:3 Yisufa Oorifa aaqanasaa ooru ooqu marifufaqa mina faiqi namu oorureeqa naríara marufaqa ooru irammiriqau. Anee faasai amaana maqara qiannana yairee fee miqiannoo fee. Maasa anee qumira aukuana nana ainainee qafamasee fee oo Yisufa qumira aukuana doo adeedi reenoo fee qianauree. Maasa maa aukuanna naqi fee inaqee maasa miqoo qafee fee maa marunna aukuanafa taikaannoo fee qianauree.
MAT 24:4 Yisufa iriseenoo maaqi qimasee qimanniminau. Innee rufiaaqa moo fannoo unna ufa inni qimannimisee kaqi runna mara quqaani. Moomoosa anireeqa unna qimasee maasa asauku mundirausa maridee qifaranoo. Faiqí anaasee moomoosa misa ufa iriseeqa eedoo qimaseeqa fifaqa rarisameeqee kaqitinai ubeekeefaranoo.
MAT 24:6 Innee nianaindaraa rakira ufa irifaranoo adeedi rainnaqoo rakirana tutuqirana innee irifaranoo. Mi ufana iriseeqa siamma qiniara qumira aukuana doo aiqaree maqi qiaqa. Rakirafa kuqaa maqusa maqusa kambiaanifeera qidaqa. Maa marira aukuanafa sia dauni taikaannoo kaqikaaqoo kisaaqasaa mariannoo.
MAT 24:7 Maqusa maqusa firaa maqusa faqa kaqikaa maqusa faqa findifinaqa narari narari ifaranoo. Maqusa maqusa aandaroo naruannoo maqusa maqusa maqa kasiannoo.
MAT 24:8 Mi ainainausa mandaukuana oorisaa kai mariannoo kasooqaqee firaafa mariannoo.
MAT 24:9 Mina aanaaqiana faiqí anaasee maqusa maqusa inniara Yisuna faiqi namu fee qimasaida fidiaqaamma nimaqeefaranoo. Aiqama maa maqa maaqanaki mariasa inni nidafirana nimisee inni kuqannarifaranoo.
MAT 24:10 Moomoosa mina qafamasee rufiasee qini Yisusaki mariasa quqasee minniseefaranoo. Moomoosa narí ueeqee narí ueeqee qifaranoo narí akooqee narí akooqee ifaranoo.
MAT 24:11 Faiqí moomoo misa nariara Anutuna tamummaqara fasiqa fee qimariasa misa findifiqa faiqí anaasee qumareeqee kaqitinai ubeekeefaranoo.
MAT 24:12 Aiqama ainaina qumuarirana oosana oosana deedeepirana oosana oosana kambiqafinoo qumbiqeenoo maqa maaqa amana kai mariannoo. Miqi kai inoo moomoosa nariara nariara amuqusirana minniseeqa quandafinaqa narí ueeqee narí ueeqee ifaranoo.
MAT 24:13 Yafa uqannee narí akoona faiqi uqanna mi manda aukuanna aiqama ainaina kambiqainanaki finnaaqara maseenoo fifi inanoo taikara kooqi uqanna raquramisainafa mina akoofa Anutufa qumareeqeenoo asumu mariranaki quqaannoo.
MAT 24:14 Maa amiqira fasaasa ufana qini innaaruna ququsa ufa maqusa maqusa faiqí anaasee aiqama qimannimisaifaqa misa aiqama irisaifanoo mi kamuqoo taikara aukuana aniannoo.
MAT 24:15 Misa kaaqa fidiaqaa imaria manda ainaina qumareeqeeqa Yeerusaree naaquqara amaana maqakina quqasaifaqa Anutuna tamummaqara fasiqa auqu Danieerafa mifa minara akara rinau. Innee mina asaana rumasee amiqimmasee iriaqa. Misa mi mandainainna quqasaifaqa innee Yuda maqa maaqaki mariasa quqasee sandamaqaraasamasee aaqana aaqana daraaniaqa.
MAT 24:17 Faiqí maqusasaa mariasa sia nári maaqaki keeqafinaqa nári ainaina mareefaranoo náriara kai quqasee sandeefaranoo.
MAT 24:18 Afuqaki mariasa sia nári uqainara randasee maraaqa. Kaqi quqasee sandaaqa.
MAT 24:19 Nimuaqu uqafaqaa anaaseeuqa faiqi aanaaqi faqaasa faqa misa mi aukuanna mandaikammifaranoo. Naqimmasee amiqimmasee sandeefaree.
MAT 24:20 Innee maaqi qimasee innaaru qiaqa. Oo Anutufa sia mi sandara aukuanafa amaanasaa kambiqaani. Aaku aukuana faqa sia kambiqaani.
MAT 24:21 Yisufa mi aukuannara qimanniminoo qinau. Mi manda aukuanafa aninna aukuana aupurarana inaakufa kambiqaannoo. Ooqai aupurara aukuana faqa kasooqaqee aupurara aukuana faqa sia mi manda aupurarana amana mariannoo, ooreeqanoo mariannoo mifa uriqaranoo firaaqoo rafaaqafusee mariannoo.
MAT 24:22 Doo Anutufa mi manda aupurara aukuanna doo qusa mariannoo fee qinau. Sia qusaikinanoo faiqí anaasee sia amana kaqi marifara, aiqama kuqifara. Anutufa narí qutaaqamaqoosara narí ufamau fimariasara irinoo, misa sia kuquaqeera qusa kamu ramannisaannoo.
MAT 24:23 Mi aukuanna faiqí moo fannoo inniara mai qafaaqa Anutuna asauku mundirafa miqinni mari mirinni mari fee qinana siamma iriaqa, mina unnaqiannoo.
MAT 24:24 Mi aukuanna unna nisauku mundirausa faqa unnaqi maria tamummaqira fasiqausa faqa moomoo kambiqeefaranoo. Misauqaindi aninna aukuana misa qaini qainiqira ainaina mookira ainaina naaquqara ainaina auqamasee uqannifiqasainaqa Anutuna qutaaqamasee mina ufamau fimariasa nikaru qimasaana qinindi kiaqeera miqifaranoo.
MAT 24:25 Yisufa mi aukuannara mi unna fasiqausara maaqi qimasee narí faiqi namu qimanniminau. Innee mi aukuannara oonumafi iriaqa, eerairiaqa rufiaaqa. Doo maqee kamu doo kooroomma nimaqaunnana iriaqa.
MAT 24:26 Faiqí moo fannoo maaqi qimaseenoo ani qimaminoo. Asauku mundirafa aadana maqusa maridanoo, qinana siamma oonu qafaaqa minnimasaaqa, unna qidanoo. Faiqí moo fannoo asauku mundirafa maaqoo kukeeqanoo mari ifoo qinana sia uqanna oonu qafa. Anee minara unna qiifoo qia.
MAT 24:27 Qinee faiqí nimaaku sia kukeeqasee qumuanaura. Aakuasaara foora aiqamai innaarufa rakeemamaree fifaininanoo qinee faiqí nimaaku miqirafa tautumasee kaifaa qumuanaura, aiqama qiqafaaqeera.
MAT 24:28 Aandau kuqinoo maridanoo afundifaqa meemoonauqa sia minniseefara kuqaa uqanna dauni uqanna qumureeqa mi aandauna naidaqa. (Qini ufa irimariasa maqusa maqusa yatinai fee marifaree sia qiniara randeefaranoo. Qinee qumidaqa misa marifandinaqoo qeeqa kai irisee tautumasee akooqoo qumuree misa uqeeraanaura.)
MAT 24:29 Nimoosau maasau ira aukuana mi aukuanna taikasainanoo suani qimbafinanoo asukuna aruannoo. Quqoona faqa asukuna aruamaqaannoo. Fasau aiqama innaarunaindari kakasammifaranoo. Fasau faqa quqoona faqa maruqoo ooqeenaa marirafa rapikamafuannoo.
MAT 24:30 Mi kamu qoo qinee qumuanna kari innaarunai moo kira ainaina uqannifiqara ainaina quqasaanaqa mina naaree qafaifaqa qumuanaura. Faiqí anaasee aiqama maqasaa fasiqa anaasee aiqama qafamaseeqa nisaurusee ikifaafau qimarifaranoo. Mikari qinee asuruki qeeqa kaaqa qarananamu faqa qeeqa afeeka firaana faqa qumuanaqa faiqí anaasee maqusa maqusa aiqama qini qiqafamasee qiniara rufiasee ikiraqeefaranoo.
MAT 24:31 Mikari qinee ukeena firaa qoo fuaqaanaqa qini qangiroouqa daraanifara, aiqama maa maqa maaqana afaaqasasa qini qiku qisauku qinee qutaaqama nimaqaafanausa suqeeqeeqa moodaa saqa qinee marianannai suqu quqeefaranoo.
MAT 24:32 Yisufa kaifaa minara qimanniminoo qinau. Innee faafisa ammuni marina qafaaqa sia kaqinni ammunidanoo, narí aukuana narana aukuana ammunidanoo.
MAT 24:33 Aiqama ainaina qinee qimannimiqaunandee faafisa fooqaafa aiqama ainaina kambiqainaqa doo qinee kaifaa qumira aukuana adeedi afaisaammifoo qiaqa.
MAT 24:34 Maqee maria fasiqa anaaseesa akaqausa kaqi maridaqa aiqama ainaina qinee qimannimiafannandee kai inoo kambiqaannoo.
MAT 24:35 Innaaruna faqa innaarunakinaa ainaina faqa maqa faqa maqasaaqaraa ainaina faqa aiqama taikafuannoo. Qini dookinaafa sia taikarana amana naaru naaru anoona uqanna mariannoo miqi kaimminoo mariannoo.
MAT 24:36 Qinee qumira aukuanee qinee qumira faasaanee sia uqanna faiqí moo fannoo irimariafanoo. Innaarunai qangiroouqa faqa Anutuna amaaku qinee faqa siamma iridaqa, qini qikoofa narí kaimma qinee qumira aukuanara iridanoo.
MAT 24:37 Qinee faiqí nimaaku qumira aukuana Nooana aukuana fooqaasa marianaura.
MAT 24:38 Nammari samu naruna ataufakai mina maariqoo faiqí anaasee qoomaqandauru uqi mariqau. Miqida faiqí anaasee naramundee naramundee ida mariqau. Misa miqimmamaree fubaqa Nooana firaa sipaki keeqeemaru faasaana misa miqikaimmimariqau.
MAT 24:39 Misa mana mana idaqa amiqi amiqidaqa marufanoo nammari radiqinoo ooqi misa fatikaneenoo ooqufinau. Qinee qumuanna aukuana miqimmifaranoo. Mana mana imarifaqa kaqi qinee tautumannimaqaanaura.
MAT 24:40 Mikari moodaa afuqaki qaara fasiqa ainainimarifaranoo qinee tautummannimaqasee moo qumaree innaarunai ooru fuanaura moo quqasaanaura.
MAT 24:41 Qaara anaasee sana qaindi rimarifaqa qinee tautummannimaqasee moo qumaree innaarunai ooru fuanaura moo quqasaanaura.
MAT 24:42 Minara qinee inni qimannimidaqa. Deedaqida mariaqa. Sia kaqi mariaqa. Qinee inni karaambaiqa qumira aukuanara sia irimariafanoo. Minara innee deedaqiaqeera qidaqa.
MAT 24:43 Ummuari mari fasiqafa maaqa kooqi atuaseenoo ainaina ummuaramammaree fidanoo. Maaqa akoofa mifa ummuarira aukuana iriseenoofau rakisini. Sia irisaifanoo tautummamaqasee doo ummuaramammaree fifinoo.
MAT 24:44 Innee minara iriseeqa rakisida mariaqa. Innee qiniara faiqí nimaaku sia qumirarammifoo qimasee manoo manaa imarifaqa qinee tautumasee qumuanaura.
MAT 24:45 Ainaini mariasasaa rakisirafa amiqira fasiqa oosana maaqimminoo maridanoo. Mina firaafa minara qinoo. Anee qini ainainira faiqiuqasaa rakisida narana ainaina andeeqasee amiqimmasee nimisee rakisi marinaqa qinee moosaa fuanaura.
MAT 24:46 Mi ainainira fasiqausasaa rakisirafa narí firaana ufamau andeeqasee fimarinanoo mina firaafa ani paqurinanoo sia mina afusaa asauruannoo asasiannoo.
MAT 24:47 Iriaqa qinee anoona qimamidaqa mi fasiqana firaafa mina andeeqarana qafamaseenoo, narí aiqama ainainasaa rakisira saika mina amiannoo.
MAT 24:48 Ainaini mariasasaa rakisirafa moo manda fasiqa narí firaafa moosaa finanoo mifa minara sia dauni aniannoo fee qimasee narí ainainira faiqi namu sia amiqimmasee narana niminoo, misa narinoo misa kaukaata qimannimaqaidanoo quandafinanoo naríara qoomaqanduquseenoo faiqí akaqausa naaramaseenoo misauqa faqa namafinoo afeeka nammari moomoo misa saimbaqa namafidanoo furufaramma qafeenoo.
MAT 24:50 Miqi marinanoo sia rakisi marinna aukuana mina firaafa tautummamaqaseenoo anirama qafeenoo arusee ateeka ateekamma aqusaannoo.
MAT 24:51 Mi manda ainainira fasiqafa qaaraiki mariasa namufaqa mandainainaki mariannoo. Mifa miqoo misa faqa maridanoo ikifaafau qidaqa nifai riqidaqa marifaranoo. Qinee Yisusa qumira aukuana miqimminoo mariannoo. Tautumannimaqaanaura.
MAT 25:1 Qinee qumuanna aukuana anirainanoo innaaruna ququsa maaqimminoo mariannoo. Qisaukuqara taikasee maanaaqa mariqau. Misa nári rambi uqirausa maqusasaa asukuna rakisi marufanoo amundara fasiqa anufaqa misa faqa firaa maqaki narana naani qimasee afeesimariqau.
MAT 25:2 Moodaannai qisaukunamu furufari marusa maridaqa nári rambi kai uqusee marida afeesimariqau.
MAT 25:4 Moodaannai qisaukunamu irirana faqaasa rambi faqa minaki adiee maria nammarina faqa uqusee maridaqa afeesimariqau.
MAT 25:5 Amundara fasiqa sia dauni ani marufaqa, afeesimarufanoo nifuki aunduarufaqa mandaiki mariqau.
MAT 25:6 Eenda amuqusaikufanoo faiqí moo fannoo fifi qimaseenoo qimanniminau. Doo amundarafa ani ifoo.
MAT 25:7 Doo deedaqiaqee qufaqa, mi manaaqausa findifufaqa qooma quumbeeqee rambisaa muqurusoofanoo qanau.
MAT 25:8 Rambi nammari siaisa quandafiqa nammari faqaasara innaaru qiqau. Maasa faqa adia qimia, maasa qooma qimbafifaqa nammari sia marifaqa.
MAT 25:9 Nammari faqaasa misa qaoo qimasee qiqau. Sia amana inni adia nimianaura inni adia nimiseeqa maasa faqa randaanoora innee sandeeqa sutuaqai oonu feefauriaqa. Miqi qufaqa misa eedoo qimasee sutuaqai nammariara fiqau.
MAT 25:10 Misa fufanoo amundara fasiqa irirana faqaasa maruqoo anireenoo ai misa nifiqeenoo firaa maqaki keeqaqau. Keeqafufaqa misa kooqi ititaseeqa narana neemariqau.
MAT 25:11 Neemarufaqa furufari maru manaaqausa anireeqa naaraqau. Oo karaambaiqa kooqi atuasainaqa maasa faqa keeqafi naanaura.
MAT 25:12 Miqi qufanoo mifa iriseenoo qimanniminau. Sia qinee inniara iridaqa innee yai mariaasee, doo see fuaqa doo kooqi ititaseeqa.
MAT 25:13 Yisufa maanaaqauqa kikiqa qususeenoo narí faiqi namu qimanniminau. Innee sia qinee qumira aukuanara irimariafanoo sia deedaqifoora. Minara inni qimannimidaqa innee iridaqa qiniara rakisiaqa.
MAT 25:14 Mi ufana taikaseenoo Yisufa innaaruna ququsara moo ufa kikiqa usinoo qinau. Innaaruna ququsa maaqimminoo maridanoo. Ainaina faqaafa moo atinai fuani qimaseenoo narí ainainira fasiqauqa suquseenoo ufaasu narí ainaina faqa maqa maaqa faqa misasaa quqaseenoo rakisiaqee qinau.
MAT 25:15 Moo fasiqa narí ainainirana amana moodaannai qisauku koondaa amanee firaana aminau. Moo fasiqa narí ainainirana amana qaaraqanda koondaa amanee oorudupirana aminau. Moo fasiqa oorudupimasee narí ainainirana amana moodaa koondaa amanee amiseenoo qimanniminau. Innee maa munnimmana qumareeqa minannai inneeqa ainainirana uqeeraaqanani. Kasooqaqee aniraanaqa mina anoona munnimma faqa mina ati munnimma faqa qimiannee qimasee moo saa finau.
MAT 25:16 Moodaannai qisauku koondaa amanee qumaroofa minannai aiqama ainainirana nimisaidanoo nimimarufanoo dinni qisauku amanee mi ainainiranasaa aniranau. Moodaanakikufanoo qisukuqara amanee marasee marinau.
MAT 25:17 Qaara koondaa amanee maroofa miqi kai inoo kafaa qaara faqa qaara faqa aniranau.
MAT 25:18 Moodaa koondaa amanee maroofa mifa siamma ainaininau. Mifa madika indufuseenoo munnimma minaki quqasee kukeeqasanau sia furufarianifeera idaaqinoo marianifeera kukeeqanau.
MAT 25:19 Naaru kasooqaqee misa rakisirafa anireenoo naaramaseenoo munnimma oosana oosanara irammirinau.
MAT 25:20 Moodaannai qisauku koondaa maroofa anireenoo narí rakisirana maaqi qimasee qimaminau. Oo qini rakisirafa anee moodaannai qisauku koondaa kai qimunnana. Minannai ainainammasaunanoo dinni qisauku faqa mina ati munnimma faqa aniraifaqa doo qisaukuqara animmamidaqa.
MAT 25:21 Mina rakisirafa minara iriseenoo doo qimaseenoo irinau. Iriseenoo maaqi qimasee narí ainainira fasiqa qimaminau. Oo anee amiqira fasiqa oori runuseenana ainaini marianafa andeeqara fasiqa uqanna, anee kaqikaa ainainasaa faqa andeeqasee rakisimarianafa mariananoo. Minara qinee firaa ainaina aiqama ainainasaa rakisirana anisaa kai quqaanaura. Sia anee kaqi ainainira faiqifau marinnandia. Anee qini faiqiara foora marinnaranoo. Anee faqa qinee faqa moodaanaki asasirausa marianaura.
MAT 25:22 Miqi qimasoofanoo qaara koondaa amanee maroofa anireenoo narí rakisirana maaqi qimasee qimaminau. Oo rakisirafa anee qaara amanee qimunaqa minannai ainainammasaunanoo qaara faqa qaara faqaikamafifaqa, doo animmamiqa.
MAT 25:23 Narí rakisirafa mina ufa iriseenoo qimaminau. Oo anee faqa amiqira fasiqa oori runusee ainaini marianafa andeeqara fasiqa uqanna, anee kaqikaa ainainasaa faqa andeeqasee rakisi marianafa mariananoo. Minara qinee firaa ainaina aiqama ainainasaa rakisirana anisaa kai quqaanaura. Sia anee kaqi ainainira fasiqafau marinnandia. Anee qini faiqiara foora marinnaranoo.
MAT 25:24 Miqi qimasoofanoo moodaa koondaa amanee maroofa anireenoo narí rakisirana maaqi qimasee qimaminau. Oo rakisirafa qinee ani oosana iridaqa. Kaaqa anee munnimmara rimarianaqa qinee qafamaqaunausa.
MAT 25:25 Qinee ani koondaa amaneennai ainainammasaananoo ani munnimma furufariandoo qimasee minara rufiasee madika indufuseeqa minaki quqaqaunanoo mariina doo mina kai anamiqa.
MAT 25:26 Mina rakisirafa mina ufa iriseenoo raiqasee qimaminau. Anee manda fasiqa uqanna mariananoo, kudi uqanna aarara marianafa mariananoo. Anee qiniara kaaqa munnimmara rimariana fee q inanee.
MAT 25:27 Anee qini oosana miqinoo marinana anee qini munnimma naqaa fee ifanee qini munnimma beenaki quqaaqaana. Anee beenaki quqasainanoofau qini munnimma faqa ati munnimma faqa marinaqau qeeqa marani. Anee madikaki kai akundoonnanara kudi uqanna mariananoo.
MAT 25:28 Rakisirafa miqi qimaseenoo ainainimaru fasiqa namusa qimanniminau. Innee mina moodaa koondaa amanee mareeqee qisaukuqara mareemari fasiqana mina amiaqa.
MAT 25:29 Moo fannoo ainaina uaqee innana moo faqa amifanoo rairaa inoo mariani. Ainaina siainnana sia akaqa ainaina amifara, minaki oodaa marinnana mina rafia maraifanoo kaqi mariani.
MAT 25:30 Doo maa manda kudi fasiqana rarisameeqeenoo madaanai asukunaki aqusaaqa. Mi asukunanaki maridanoo ikiraqaidanoo afai riqidanoo mariani.
MAT 25:31 Qinee faiqí nimaaku qumuanna kari qeeqa rakisira afeeka namufaqa qeeqa qangiroo namufaqa maa maqanasaa qumuanaura. Qumureeqa ufaqira qaari amiqira qaari ufiqisee eekara ariranasaa ooqu marifinaqa maqasaaqaraasa ufa irisee andeeqannimaqaanaura.
MAT 25:32 Qinee ooqumari fuanaqa maqusa maqusa aiqama suqeeqee qeeqa doorisaa quqasee nindafeeqa qeeqa iriranannai inni rainannimaqaanaura. Qinee sipsipasaa rakisirausa fooqaasa marida. Misa sipsipa raineeqee aaduma quqaidaqa mimmi raineeqee aaduma quqaidaqa. Qinee qumuanna aukuanna qinee miqianaura.
MAT 25:33 Qinee sipsipa fooqaasa raineeqee qisauku uqannai quqaanaura. Mimmi fooqaasa qisaaqai raineeqee quqaanaura.
MAT 25:34 Rainannimaqaseeqa qinee firaa karaambaiqa quandafinaqa qisauku uqannaindaraasa maaqi qimasee qimannimianaura. Qini qikoona amaakummara mariasa aniaqa anireeqa aiqaree mina amiqira ququsaki keeqafi mariaqa. Ooqai maa maqa maaqafa sia marufanoo mi ququsana inniara quqaqoofa maridanoo.
MAT 25:35 Qini daararoofaqa narana qimusa mariafanoo. Qini nammariara didimarufaqa nammari qimusa mariafanoo. Qinee aanaamuru fooqaasa mariafana innee qini aqoondikiusa mariafanoo.
MAT 25:36 Qinee kaqisamu mariafana innee qamunna qimusa mariafanoo. Qinee aurimariafana innee aniree qini qiqafee sukudaakutiqa, qimudaoo qimaqimaqeeusa mariafanoo. Qinee karafusaki mariafana innee qini undara anireeqa aiaaee qimaqimaqoosa mariafanoo. Qinee minara iriseeqa inniara Anutuna amiqira ququsaki fuaqee qidaqa.
MAT 25:37 Miqi qianaqa misa qisauku uqannaindaraasa maaqi qimasee ufa qini qimaqimifaranoo. Oo karaambaiqa mina anee fee yairee fee ani aararee marufaqee narana amiqiafana. Nammariara aidufaqa yairee fee ani amiqiafana. Maasa sia ani qafaqiafana.
MAT 25:38 Yairee fee anee aanaamuru fooqaafa marunaqee ani aqoondikiqiafana. Yakari fee kaqisamu marunaqa qamunna ani amiafannanara qidanee.
MAT 25:39 Yairee fee aurimarunaqee maasa oonu ani qafaqiafana. Yakari fee anee karafusaki marunaqee maasa oonu ani qafaqiafana. Anee qinaqa maasa iriaqa.
MAT 25:40 Qinee misa ufa iriseeqa quandafiqa kooroo qimannimianaura, maa qini qikaqaafasauqa misaki ureeqarausa innee misa amiqimmannimaqaidaqa qini faqa amiqimmaqimaqee marusa mariafanoo minara amiqira ququsaki keeqaaqeera qimannimidaqa.
MAT 25:41 Qinee misa qimannimiseeqa quandafinaqa qisaaqaindaraasa maaqi qimasee qimannianaura. Innee Anutuna aqira ufa innisaa marisa innee idaki aqufuaqa. Anutufa Sadannanara faqa narí manda qangiroouqa faqa afaannauqa faqa ida aqufuanifeera auquqoofa maridanoo naaru naaru qeemari idafa sia qimbeemari idafa, innee minaki aqufuaqa.
MAT 25:42 Qini daararee marufana naranara qaoo qimasee sia qimusa mariafanoo. Qini nammariara didufaqa qaoo qimasee sia qimusa mariafanoo.
MAT 25:43 Qinee aanaamuru fooqaasa mariafana innee qini aqoondikiranara qaoo qusa mariafanoo. Qinee kaqisamu mariafana, qaoo qimasee sia qini qamunanda qimusa mariafanoo. Qinee aurida mariafana innee sia oonu qini qiqafoosa mariafanoo.
MAT 25:44 Qinee miqi qimasee misa qimannimianaqa misa quandasee maaqi qimasee qini qimaqimifaranoo. Oo karaambaiqa yakari fee naranara aararanoofee inau nammariara aidinoo fee inau. Yairee fee aanaamuru fooqaafa marunaqee kaqi samu marinee inau. Yairee fee aurimarinee inau. Yairee fee anee karafusaki marinee inau. Anee yakari fee miqunaqee maasa sia amiqi amiqiafana. Anee qinaqa maasa irianaura.
MAT 25:45 Qinee misa ufa iriseeqa maaqi qimasee kooroommasee qimannimianaura. Maa qini qikaqaafasauqa misaki ureeqarausa sia innee amiqimmannimaqaidaqa qaoo qunara mi fasannai qini faqa sia amiqimmaqimaqoonara, qaoo qunara minara qinee inniara idaki fuaqee qidaqa.
MAT 25:46 Miqi qimasaina misa naaru naaru nariranaki keeqafina marifaranoo. Andeeqee mariasa misa naaru naaru mariranaki keeqafi marifaranoo.
MAT 26:1 Yisufa maa ufana oosana oosana qimannimi taikaseenoo maaqi qimasee narí faiqinamu qimanniminau.
MAT 26:2 Qaara faasaana taikainanoo maasa Yeerusaree maqusai ooruree ainnaaqarara qoomaqa sakasee naanaura. Anutufa maasa qifaqnausa qikeeku qikaaku Isipa maqa maaqai marufanoo sia narinau ainnaaqaramasee Isipa maqannaasa kai narinau. Minara maasa Yeerusaree maqusai ooruree afaarurumaanaanaura. Miqoo faiqí moo fannoo qini uqeeqainaqa aunirira saqarisaa pirimmannoo qini darifaranoo.
MAT 26:3 Yisufa mi ufana narí faiqi namu qimannimimarufaqa amaana maqasaa rakisimarusa faqa Yuda maqannaa faiqí firaasa faqa moo atinai Kaiafasana maaqaki ufa suqidaqa Yisuna arira ufa suqidaqa qimmiriqau.
MAT 26:4 Ireeda qumee kai Yisuna qumaree ariraree qimmirimariqau.
MAT 26:5 Maaqoo Yeerusaree maqusai ainnaaqara qoomaqa suqa neemarinnana qambaana sia Yisuna qumaraanaura. Faiqí anaasee moomoo suqiqa mariasa qiqafamaseeqa ufa firaana qidaqa tutu qifoora.
MAT 26:6 Mikari Yisufa Beetani maqusai Simoona amarafa karoora arimarufanoo Yisufa taikaisoona mina faqa naidanoo mina maaqaki marinau.
MAT 26:7 Maridanoo Yisufa misauqa faqa narana neemarufanoo anaasee moo fannoo mifa maru maqanaki keeqafinoo firaa munnimma aqimaru fadameena idaaqira taqukinaana amiqira afundimaruna Yisufa narana nee marufanoo akiaqa amoondunna kaqi adiamaqanau.
MAT 26:8 Yisuna faiqi namu mina qafeeqa tautufanoo niranaqoofaqa qiqau. Maa fifau faafau ira anaaseefa naqi fee ifanee fifaunni rairaa inanee.
MAT 26:9 Naqi fee ifanee munnimma fainausa nimiseenana mina akiaqara firaa munnimma maraseenana kudi fasiqa anaaseeuqa nimiaqaana.
MAT 26:10 Yisufa misa ufa iriseenoo quandafinoo narí faiqi namu qaoo qimannimaqaidanoo qinau. Nanaree mi anaaseenara qaoo qida fee. Qifaaqa idaaqa uqannamma qimaqaanifeera adiaqimaqeenoo.
MAT 26:11 Inniki kudi fasiqa anaaseeuqa naaru naaru marifandia. Innee amana moomoo kari misa amiqi amiqifaranoo qinee sia kisaaqasaa inniki marianaura, kaqikaa qoo fuanaura minara mifa qini adiaqimaqeenoo.
MAT 26:12 Qini qifaaqa madikaki fuaninnanara minara mifa maasa faiqí kuqirana oosana mareenoo qini qifaaqa kuquaninnanara deedaqidanoo fadameena adiaqimaqeenoo.
MAT 26:13 Mi anaaseenara Yisufa kaifaa qimanniminau. Naaru naaru maqusa maqusa maaqa maaqa maa qinee marunna kamuqooqaraa ufa, amiqira ufa, faiqí anaasee qimannimidaqa maa anaaseenara fadameena adiaqimaqoona sia aunifara mina faqa qimannimifaranoo. Minara faqa qimannimidaqa sia faafaa qiaqa, sia qaoo qiaqa.
MAT 26:14 Yudasi Keerioota maqusaindaraafa, Yisuna faiqi namuki marufa, mi fasannai amaana maqasaa rakisi marusunnai oorureenoo irammirinoo qinau.
MAT 26:15 Innee naqi fee mandee feefauru qimifaqee Yisunara ueeqaanauree. Irammirisoofaqa misa ooni amiqau. Moodaa fasiqa aiku asauku taikasee moo fasiqa asaukuqara taikasee miqi mandee ooni amiqau.
MAT 26:16 Miqooqari faasaambaasaana Yudasifa Yisuna qumee misa nisaukuki quqaanifeera apuree marinau. Fiqu faiqu fidanoo apuranoo nimarinau.
MAT 26:17 Yuda maqannaasa misa aiqama Yeerusaree maqusai suqumaree Anutuna qangiroo misa nikeeku nikaaku ainnaaqarara qoomaqa afaarurumasaida qaaramoo faasaana mi feemuna neemariqau. Ooruku siai feemuara fooqaana neemariqau. Mi indaaru faasaanna Yisuna faiqi namu Yisufuqoo anireeqa irammiriqau. Ya maqanaki fee maasa Anutuna qangiroo ainaaqaroo afaarurira naranna ooruku siai feemu suqaanauree.
MAT 26:18 Yisufa iriseenoo qimanniminau. Innee Yeerusaree maqusai oorureeqa muqutinai moo fasiqa oonu paqurimasee maaqi qimasee qimamiaqa. Ufasaa rakisira fasiqa ani maaqaki ainnaaqarara qoomaqa suqasee naannoo. Narí aukuana adeediraifanoo ani maaqaki narí faiqinamu faqa narana naanee qinoo. Miqi qimasee qimamifanoo narí maaqa inni nimiani.
MAT 26:19 Mina faiqi namu iriseeqa miqimmiqau, miqoo ooru qoomaqirara deeda iqau.
MAT 26:20 Mi eendanaki Yisufa faqa narí faiqi namufaqa mi maqanaki ooqu marifufaqa eendaki narana neemariqau.
MAT 26:21 Misa neemarufanoo Yisufa maaqi qimasee qimanniminau. Qinee anoona ufa inni qimannimidaqa innikiqari faiqí moo fannoo qini ueeqaaninafa maridanoo.
MAT 26:22 Misa minara irisoofanoo suara naakinau. Suara naakufaqa moodaa moodaa Yisuna irammiriqa qiqau. Moo fannoo Yisu qinee fee mi ufana qifee. Moo fannoo miqi qinoo qinee fee qifee. Miqi qimasee aiqamausa Yisuna irammiriqau.
MAT 26:23 Yisufa iriseenoo kaifaa nariqa qimanniminau. Innikiqari moo fannoo maa difaaninakina asauku aqusee mara neemarifa qini ueeqaannoo.
MAT 26:24 Tamummaqara fasiqauqa akara fannoo qiniara faiqí nimaakuara doo kuquani fee qinoo maridanoo. Kuqaa qinee kaqikaa qoo kuquanaura ueeqasainaqa kuquanaura. Qini ueeqaaninna fasiqafa kuqaa maaqi qimasee nariara iriannoo. Nanaree qini qinoofa qini maqaqisoofaqee maridee. Qini numoo firaafa maridanoo fee qiannoo.
MAT 26:25 Miqi qimasoofanoo Yudasifa Yisunara irammirinoo qinau. Oo qini qafee faqaafa qiniaree ueeqee maqi qidanee qimasoofanoo Yisufa qinau. Aneenna kai qiananoo.
MAT 26:26 Misa nee marufanoo Yisufa feemu maraseenoo Anutunara dufi dufi qimaseenoo ruqiruqi maseenoo narí faiqi namu niminoo qinau. Maana marasee naaqa. Maana qini qifaaqa qimaqi kikiqusira feemu maridanoo.
MAT 26:27 Nimiseenoo uainna nammari mara mareenoo miqooqaraasa maqee maqee neemaru nammarina Yisufa mi uainna kaafana uainna minaki qumbiqarana maraseenoo Anutunara dufi dufi qimaseenoo narí faiqi namu niminoo qinau. Innee aiqama maanaki marasee naaqa.
MAT 26:28 Maa uainnafa qini fidika kikiqusira uainna nammari maridanoo. Qini fidikannai uqanna Anutufa moomoosa numoo aununnisaanifeera maa qini fidika raannoo. Maana qini fidika fannoo Anutuna nariara faqa faiqí aanaaseera faqa noori runiranaki marunara fukasaa moodaanaki kira ufa mapukueeqeenoo doo rafaaqafusai fidikafa maridanoo.
MAT 26:29 Innee iriaqa. Qinee anoona ufa uqanna inni qimannimidaqa. Sia maa marunna aukuana maa uainnana kaifaa naanaura. Kasooqaqee qini qikoona ququsaki innaarunai innee faqa qinee faqa moodaanaki maridaqa fuka uainnara foora ququfiqa naanaura.
MAT 26:30 Yisufa miqi qimasee qimannimisoofaqa misa namaseeqa Anutunara idi ramaseeqa raudamakufaqa asukunai Oorifa aaqanai ooru fiqau.
MAT 26:31 Miqoo ooru maridanoo Yisufa narí faiqi namu qimanniminau. Fafaa eendaki qini qumaraifandinnanara innee rufiasee quqasee sandeefaranoo. Anutuna tamummaqara fasiqa ooqai minara maaqi qimaqoofa maridanoo. Anutufa sipsipa rakisirana arinaqa sipsipa aiqama quqasee furufarifaranoo qimaqoofa maridanoo.
MAT 26:32 Yisufa minara kaifaa qimanniminau. Qinee kuqiranakiqari findimeeqee Kariree maqusai inni nifunni fuanaura. Innee qini qinaaqiana oonuraifaqa miqoo inni nindafaanaura.
MAT 26:33 Yisufa innee quqasee furufarifandia maqi qimaqoona Peetooroofa minara iriseenoo qinau. Qinee sia sandaanaura. Misa aiqama quqasee sandaifaqa qinee sia sandaanaura, ani faqa apamma fuanaura.
MAT 26:34 Yisufa mi ufana iriseenoo qimaminau. Fafaa eendaki kookooraana sia ufa qinana anee qaaramookinana iraifana qiniara sia qinee mina qafaidee qinnaranoo. Miqi qinanoo kookooraana ufa qiannoo.
MAT 26:35 Peetooroofa minara iriseenoo qinau. Qaoo, sia qinee aniara sia qafaidee qianaura ani faqa kuquanaura. Yisuna faiqi namufaqa misa aiqama miqi kai qiqau.
MAT 26:36 Miqooqari Yisufa nindiqeenoo saqamai asukunaki finau. Mi saqamana auqu Keetaseemanee saqama marinau. Miqoo mifa narí faiqi namuara ooqumarifi rakisiaqee qimaseenoo naríara kaqikaa qoo finoo naríara innaaru qiraree qinau.
MAT 26:37 Qimaseenoo mifa Peetooroona faqa Seebeedina amaakuqara Yameesa Yoohaneesa minamusa faqa kaqikaa qoo saqamaki nifiqamaree fidanoo narí kuquaninnanara irimarufanoo aundura mandaikimarufanoo akoo akaa imarufanoo miqi marinau.
MAT 26:38 Miqidanoo minamusa qimanniminau. Innee maaqoo saqama qambaanai marida nifu maqaidaqa qinisaa faqa rakisi qimaqaaqa. Qini qikoofa qini minniqisaaninnanara firaa qoo qimuqusimarifaqa, mi qimuqusirafa daruannoo fee qidaqa.
MAT 26:39 Miqi qimaseenoo mifa kaqikaa qoo nariara oonu oorindari mi saqamanaki maqasaa aqufufanoo innaaru qinoo qinau. Oo qini qikoofa amanee anee sia qini minniqisainaqee sia kuquanauree. Sia qeeqa didiranara iridaqa ani aidiranara dididanoo, anee qinaqa kuquanaura.
MAT 26:40 Miqi qimasee innaaru qimaseenoo doo findifinoo qaaramoo namu maruqoo anireenoo nindafoofanoo misa nisuku kaaqa faiqaqau. Ani nindafamaseenoo Peetooroona aaramaseenoo qinau. Peetooroo anee sia fee kaqikaa qoo qiniara rakisinanee.
MAT 26:41 Rakisidana innaaru qidana maria sia kaqi maria. Aneenna iriranannai kai qini dadaaqi marianafa, aneenna uqanna sia amanaiki mariananoo miqi marifana kudoosaapee marianaqa qafaidaqa.
MAT 26:42 Miqi qimaseenoo Yisufa kaifaa kaqikaa qoo oonureenoo innaaru qinoo qinau. Oo qini qikoofa anee amanee sia kuquana nammarina qiminnaree anee sia minniqisainaqee sia kuquanauree. Sia qeeqa iriranannaifau qidau anee qinandee, qinaqa miqimmiqa kuquanaura.
MAT 26:43 Miqi qimaseenoo kaifaa narí faiqi namu unnai oonu nindafoofaqa misa kafaa nisuku faiqee mariqau. Misa nifuki aunduari marufaqa faiqaqee mariqau.
MAT 26:44 Nindafamaseenoo ani quandakufanoo kafaa oonureenoo kafaa qaaramookinoo innaaru qinau. Indaaru qundee kai kaifaa miqi kai inoo innaaru qinau.
MAT 26:45 Innaaru qimaseenoo findimeeqeenoo narí faiqi namu maruqoo anireenoo nindafeenoo qimanniminau. Innee faiqaqee maridee idooaidee. Qini mareeqee manda oosana maree mariasa nisaukuki quqaaninna eendirafa doo anireenoo.
MAT 26:46 Doo findifi qafaaqa. Qini ueeqee mari fasiqafa doo ani maridanoo.
MAT 26:47 Mikari kai mi ufana qimarufanoo eendufanoo asukunai narí faiqi namukiqari faiqí moo auqu Yudasifa aninau. Faiqí moomoo mina saimbaqa duru feefa saamu faaqaana indaaii maree aniraqau. Yuda maqannaasa faiqí firaasa rakisirausa niqiqoofaqa Yudasina faqa aniraqau.
MAT 26:48 Faasai Yudasifa qimannimiseenoo innee asukunai aaqee foora qinee oonuree amooqaanaqa qafeeqa innee mina kai qumaraaqa.
MAT 26:49 Doo maqeeufanoo Yisufuqoo oonu reenoo oo qini qafee faqaafee qimaseenoo Yudasifa Yisuna amooqanau.
MAT 26:50 Miqi marufanoo Yisufa maaqi qimasee qimaminau. Oo qini qiqoondi anee nanaree aninanee. Miqi qimasoofaqa faiqí Yudasina faqa anusa aniree doo Yisuna amiqimmasee rakisisimma qumaraqau.
MAT 26:51 Qumaree marufanoo Yisuna faiqi namukiqari moo fannoo nariqa rakira kisaaqa paipana moo qumareenoo nariraree qimaseenoo moo fasiqa aaqoo dindanai aiqama ateeka aqinau. Amaana maqasaa rakisirana ainainira faiqi mina aaqoo ateekanau.
MAT 26:52 Yisufa mina qafamaseenoo qinau. Doo rakira paipana quqaa. Aiqama rakira ainainannai narimariasa minannai kai nári narifaranoo. Minara rakira paipana quqaa saina qini kai daruaqa.
MAT 26:53 Qinee qeeqa qikoonara iraananoo qangiroouqa nukudara foora qiminaqa dadaaqifaqa sia kuqunaura. Anee minara sia fee iridanee. Doo aneenna rakira paipana quqasaa.
MAT 26:54 Qini qikoofa narí qangiroouqa qiminaqa dadaaqifaqa naqi fee masee qinee kuquananoo Anutuna tamummaqara fasiqa ufa kambiqaannoo fee.
MAT 26:55 Yisufa miqi qimasee narí faiqiara qaoo qimaseenoo quandafinoo narí qumaree marusa qimanniminoo qinau. Qinee maqee maqee inni amaana maqaki qimannimi mariafannaqoo innee mikari miqoo qini qumaraaqaana. Maqee eendaki innee qumee kai duru saamu namufaqa qini qumaree mariafanoo. Qinee qumuari maruna fasiqausara maqi marunaqa innee asukunaki qini qumaree mariafanoo.
MAT 26:56 Misa mi oosana oosana ainainna Yisunara amisoofanoo ooqeenaa Anutuna tamummaqara fasiqauqa ufa anoona kambiqanau. Yudasina faqa anusa Yisuna qumaroofaqa mina faiqi namu aiqama mina qafamasee quqasee daraaniqa sandaqau.
MAT 26:57 Sandamafufaqa Yisuna qumaree marusa kaqi qumareeqa Kaiafasana maqusai maree fiqau. Kaiafasafa amaana maqasaa rakisirafa firaafa marunnai maree fiqau. Yuda maqannaasa faiqí firaasa misa faqa Kaiafasana maaqaki faasai suqimaruqoo miqoo maree fiqau.
MAT 26:58 Misa Yisuna afiqee fimarufanoo Peetooroofa ninaaqianna rufieenoo asukunai nifaaqmee nifaaqmee inoo finau. Misa Kaiafasana maaqaki Yisuna afiqee keeqafufanoo Peetooroofa naambeeqai aadumasaa sundiauqa saimbaqa ooqumarifi maridanoo Yisunara iridanoo imarinau. Misa arifaree naqi fee ifaree rumbeefaree, miqi qidanoo nindafee marinau.
MAT 26:59 Miqi marufaqa amaana maqasaa rakisimarusa firaasauqa faqa Yuda maqannaa kasoorauqa faqa miqoo suqiqa marida unna ufara randee mariqau. Miqidaqa qiqau. Ya fasiqa fee moo ufa oosana arasainaqee mina maree fee munu kiapana qimamifanoo fee aruannoo fee. (Mooseena sandufa maaqi qimaqoofa, moodaa fasiqa fannoo qinnufafa sia anoonaikiannoo. Qaara fasiqa fannoo kikiqamafi qinafa mifa anoonaikiannoo. Misa minara iriseeqa faiqí qaaraqanda mi ufana qifaqa Yisuna ariraree qiqau.)
MAT 26:60 Faiqí moomoosa maridaqa unna ufa oosana oosana qimariqau. Miqidaqa Yisuna ufara randee mariqau.
MAT 26:61 Randee marufanoo qaara fasiqa moodaa ufa andeeqaqau. Miqanda maaqi qimasee qimannimiqau. Yisufa maaqi qimasee qufaqa maaqanda iriqiafana. Qinee Anutuna amaana maqa Yeerusaree naaquqara amaana maqa aiqama rambairi aqusee qaaramoo faasaana amana qinee kaifaa usakaanauree qufaqa iriafannaqanda maridaqa.
MAT 26:62 Amaana maqasaa aanaiqikirausa misa uriqararafa mi ufana iriseenoo findifinoo Yisuna aaramaseenoo irammirinau. Anee miqanda ufa iridanee. Miqanda kuqaa fee qida fee.
MAT 26:63 Miqi qimasoofanoo Yisufa kaqi kasooinoo marinau. Amaana maqasaa aanaiqikirausa misa uriqararafa Yisuna qafamaseenoo narí afusaa qimaminoo qinau. Kuqaa maaqanda Anutuna afusaa marunausa marida. Anee anoona ufa kai qini qimaqimia. Kuqaa fee anee Anutuna asauku mundirafa uqannee maridanee, Anutuna amaaku uqannee maridanee.
MAT 26:64 Miqi qimasoofanoo Yisufa qinau. Anee qiniara qiannana, qini ufa iria, maa maqee innee qini qiqafee mariafanoo. Kasooqaqee sia maa qirausau marianau qiqafeefarau. Uriqararana Anutuna asauku uqannai mina aaqa ooqumarifi marianaura, mari inaqa kasooqaqee asurukina qumuanaura. Innee miqimaseeqa qini faiqí nimaaku qiqafeefaranoo.
MAT 26:65 Amaana maqasaa rakisimarusa firaafa Yisufa miqi qufanoo irufanoo niranaqee marusa oosana maraseenoo narí qamunna parara qinoo anaqi aquseenoo aiqama suqiqa marusa darara qimasee qimanniminoo qinau. Doo innee aiqamausa mina manda ufa iridee. Nariara Anutuna amaaku fee qinoo iridee. Sia maasa kafaa arira ufara randaanaura. Doo aneenna qimannimianaqa innee minara nanee fee qidaqee. Misa aiqamausa doo kuquanifee ufa kai qima afeekaikiqau.
MAT 26:67 Misa mi ufana qimaseeqa Yisuna oorinni anireeqa niqaara fidiamaqaqau. Fidiamaqaseeqa asukunakiqari misa nisauku samu oori aridaqa qiqau.
MAT 26:68 Anee tamummaqara fasiqa mari inana aneenna kai tamummaqasee qinaqa iria, yafee ani arinoo fee.
MAT 26:69 Amaana maqasaa rakisimarusa uriqararafa Kaiafasafa narí maaqa ainainirafa firaafa marunara ainainira maanaaqauqa akaqausa nifiqa quqasoofaqa ainainimariqau. Peetooroofa aadumai sukinni ooqufaaqeeufanoo ainainira maanaaqa moo fannoo Peetooroona paqurimaseenoo qimaminoo qinau. Anee faqa mi kariree fasiqana Yisuna faqa nimarianafa mariananoo.
MAT 26:70 Miqi qufanoo, Peetooroofa iriseenoo aiqamausa nifusaa mi manaaqana qimaminoo qinau. Sia ani ufa oosana iridaqa. Qinee sia mina faqa nunausee qimaseenoo naambeeqai ququsa kooqi marunnai ooquroofanoo maanaaqa moo fannoo kooqisaa rakisimarufa qafeenoo miqoo marusa qimanniminau. Maa fasiqafa Yisuna Nasareeteendaraana faqa marifaqa qafee marunafa.
MAT 26:72 Peetooroofa mi ufana iriseenoo kaukaata qimasee qaoo qinoo qinau. Sia qinee mi fasiqanara iridaqa.
MAT 26:73 Kafaa kaqikaa qoo marikamasoofaqa faiqí miqoo marusa anireeqa Peetooroona qimamiqa qiqau. Kuqaa anee mi fasiqana faiqi namuki mariananoo. Anee faqa mifa faqa kuqaa moodaa ufa qimariaqanda mariafanoo.
MAT 26:74 Peetooroofa mi ufana iriseenoo kaukaata qimaseenoo darara qimaseenoo niqinoo qinau. Sia uqanna qinee mi fasiqanara iridaqa. Nanaree unna qida fee. Miqi qimasoofanoo kookooraana ufa qinau.
MAT 26:75 Kookooraana ufa qimasoofanoo Peetooroofa Yisufa ufa qimamunara irinau. Yisufa qinoo. Qaaramoo kari ani iraifana anee qiniara sia fee qinanoo kookooraana ufa qiannoo. Peetooroofa mi ufanara oonumafi iriseenoo oo doo Yisuna ufa qiniara qifa anoona koorooinoo, qimaseenoo raudamakufanoo asauruseenoo firaaqoo ikiraqa mareenoo finau.
MAT 27:1 Mi eendanaki iqaqoofaqa amaana maqasaa aanaiqikirausa misa uriqararausa faqa Yuda maqannaa faiqí firaasa faqa suqusee Yisuna arira ufa qiqau.
MAT 27:2 Arira ufa andeeqaseeqa unna qimasee fifau sainanda qumarasee Yisuna asauku rumbamaree Roomma maqannaa kiapafa Piratoofa marunnai afiqee fiqau. (Firaaqoo mandoosana maraidanoo uriaqee marufa marufaqara foora sainandannai rumbamaree afiqee kiapafinnai fiqau.)
MAT 27:3 Piratoo finnai maree firari marufanoo Yudasifa Yisufa kuquaninnanara irufanoo narí afaaqakina akooqoofanoo Yisuna akiaqara munnimma amaana maqasaa rakisimarusa faqa faiqí firaasa faqa marunnai Yudasifa moodaa fasiqa aiku asauku taikasee moo fasiqa asaukuqara taikasee ooni mareenoo kafaa nimiraree qimaseenoo qinau.
MAT 27:4 Oo qinee furufaramaseeqa. Andeeqara fasiqara asakadiki sia ikairi marinara kuquanifeera qinee dapikamandeeqa oosana araunnanara. Minara qinee kafaa inni munnimma nimidaqa. Miqi qufaqa misa qiqau. Anee kai qianaqa maasa amiqa, aneenna kai minara iria.
MAT 27:5 Miqi qufanoo Yudasina aundura dapikufanoo munnimma mareenoo amaana maqakina aranaiqi teeqimmaquseenoo sandanau. Sandeeufanoo moosaa narí sanda anukaki ataakireenoo doo kuqinau.
MAT 27:6 Amaana maqasaa rakisimarusa Yudasina munnimma maraseeqa minaramma ufa qimariqau. Maasa maa munnimmana sia amaana maqaki quqaanaura, Mooseena sandufa miqimminoo maridanoo, fidika munnimma marifaqa.
MAT 27:7 Misa minara ufa qiqi andeeqaseeqa mi munnimmana qumareeqee nammari sakasee nee maru qafeena auqimaru fasiqana kaqikaa maqa maaqa minaindi feefauriqau. Amisee náriara mi maqana maraseeqa misa moo maqannaasa maasaki kuqifaqa mi maqanaki nikundaanee qimasee maraqau.
MAT 27:8 Minara miqimasooqooqari mi maqanara fidika maqa fee qimariqau.
MAT 27:9 Miqimaseeqa ooqeenaa tamummaqara fasiqa moo mina auqu Yeereemaia mina ooqeenaa ufa anoona kafaa maqee kambiqanau. Mifa maaqi qimasee akara rinoo qinau. Isaraee maqannaasa faiqí akiaqara munnimma maraseeqa qafee auqimaru fasiqana maqa maaqa feefaurumasee mareefara. Moo fasiqa taikasee moo fasiqa asaukuqara taikasee aqusee mareefara. Qinee Anutuna ufa irisee maraunaqa misa miqiqau. Yeereemaiaafa ooqai akara rumaqoo ufafa miqinoo marufaqa sia irirai misa mi mau kai fidaqa mi maqana maraqau.
MAT 27:11 Misausai maree fiqau. Yisufa Piratoona koota maqaki kikiqinoo marufanoo Piratoofa anireenoo Yisuna irammirinoo qinau. Anee kuqaa Yuda maqannaa karaambaiqa fee maridanee. Miqi qufanoo Yisufa anee qiannana qinee miqimmiqa maridaqee qinau.
MAT 27:12 Amaana maqasaa aanaiqikirausa misa uriqararausa faqa Yuda maqannaa faiqí firaasa faqa minara iriseeqa Yisunara ufa oosana oosana qidaqa kiapana qimami mariqau. Miqi qimarufanoo sia Yisufa ufa qimarinau, kaqi kasoo inoo marinau.
MAT 27:13 Piratoofa minara mina qafamaseenoo qimaminau. Misa oosana oosana ufa aniara qimariafana anee naqi fee imarifanee sia ufa qidanee.
MAT 27:14 Miqi qimarufanoo Yisufa sia uqanna misa ufa itairiseenoo rukianau. Ufa sia qinau kaqi kasoo inoo marufanoo kiapafa qafeenoo aaquqoofanoo qafanau.
MAT 27:15 Mi kamusaqa kiapausa faiqí anaasee Anutuna qangiroo ainnaaqarara qoomaqa neemarufanoo karafusa fasiqa moo idukusoofaqa minara faqa asasiaqeera. Kiapausa oosana mi oosanna maqee maqee miqimmimariqau.
MAT 27:16 Mikari faiqí moo fannoo karafusaki marinau. Mina auqu Barabasifa. Sia kai fifaufau mina karafusa quqaqau. Faiqí akooqooqaraafa auqufaqaafa marufa karafusinau.
MAT 27:17 Piratoofa minara faqa iriseenoo Yuda maqannaasa miqoo suqiqa marusa naaramasoofaqa suqumaree moodaaqoo aniroofanoo qimanniminoo qinau. Qinee maa kari Barabasinee idukunauree, Yisuna inni karaambaiqee idukuanauree.
MAT 27:18 Yuda maqannaasa uriqararausa Yisunara sia anoona marunara fifau mina afairiqa nimarusa marunara Piratoofa misa miqi qimaruna iridanoo Yisunara idukuanee qinau.
MAT 27:19 Piratoofa ufa irira maqaki ooqumarifi marufanoo narí anaaqa fannoo narí maaqakiqari pasa akara rumaseenoo moo fasiqasaa quqasoofanoo minisoofanoo Piratoofa asaana rumaseenoo qafanau. Narí anaaqa fannoo qinoo. Sia Yisuna arua. Asauku raqandaamasee ireeda maria. Qaina daaquqara qaina qini qifunnareenoo. Mi andeeqara fasiqanara qainammaqaunanoo daunduraki mandaiki marifaqa. Sia anee mina aruanee qimasee akara rinau.
MAT 27:20 Amaana maqasaa aanaiqikirausa faqa Yuda maqannaa faiqí firaasa faqa Piratoofa Yisuna idukiraree quna iriseeqa quandafufaqa faiqí anaasee fukifaaki qiqa Piratoona qimamiaqeera qiqau. Barabasina kai idukuani Yisufa kuquani.
MAT 27:21 Piratoofa kaifaa faiqí anaasee aiqama irammirinoo qinau. Miqandakina yanee qinee idukuanauree. Miqi qimasoofaqa misa aiqama qiqau. Barabasina kai idukua.
MAT 27:22 Piratoofa minara iriseenoo kaifaa qimanniminoo qinau. Qinee Barabasina idukiqa asauku mundirana Yisunara nanee fee qianauree. Qimasoofaqa misa aiqamausa aunirira saqarisaa aruanee qiqau.
MAT 27:23 Piratoofa kaifaa misa irammirinoo qinau. Nana mandainainee marinaqee qinee aruanauree qimasoofaqa misa aiqamausa darara qimasee qiqau. Aunirira saqarisaa arua.
MAT 27:24 Misa ufa firaaqoo qidaqa tutuqimarufanoo Piratoofa misa sia qini ufa iriafaqammu qimaseenoo qafee maraseenoo nammari saka uqeera mareenoo misa nifusaa quqaseenoo asauku nammari uqinoo qinau. Maa fasiqana aruannanara doo qisauku nammari uqiqa. Mina fidika sia qini qisakadiki mariani. Doo innikina mariannoo doo.
MAT 27:25 Miqi qimasoofaqa faiqí anaasee moodaa kari faaqa quqasee qimamiqau. Doo mina fidika maasaki faqa maasa faiqi namuki faqa mariannoo.
MAT 27:26 Piratoofa minara iriseenoo Barabasina idukueeqeenoo niminoo Yisuna mareeqeenoo narí sundiauqa nimufaqa misa miqoo nariqa maqusasaa quqasee raitasaa qainna rumbeeqoo samuna ataufakaaqa aru ummooqukamaseeqa doo afiqee aunirira saqarisaa ariraree qimasee deedaqiqau.
MAT 27:27 Piratoona sundiauqa miqoo naambeeqai Yisuna ariiseeqa kafaa anirandee kiapana maaqaki munuseeqa aiqama sundiauqa niqoonausa naaroofaqa moodaaqoo anireeqa maridaqa Yisuna qamunna raipaqusee moo qamunna Roomma maqannaa sundia qamunna taatuqee qamunna afisuamaqasee saatunanda fooqaana maraseeqa saaeemma qumaree Roomma maqannaa rakisirana qafeera foora saaeemma qumaree Yisuna akiaqasaa aranaiqi afisu amaqoofanoo akiaqa tapooqaanifeera miqiqau. Afisu amaqaseeqa Roomma karaambaiqa qunaana fooqaana Yisuna asauku uqannai quqamaqaseeqa noorindari fataafimafufaqa ataasataasa qidaqa qiqau. Oo Yuda maqannaa karaambaiqa. Maasa uriqararafa.
MAT 27:30 Miqi qimaseeqa firaaqoo ataasa ataasa qidaqa misa niqaara fidamaqaseeqa mina qunaana asaukuki naana rafia qumaree akiaqakinai ariqau.
MAT 27:31 Ataasataasa qiqi amaqaseeqa mina taikaseeqa taatuqee qamunna kaifaa raipaquseeqa kafaa narí qamunna afisu amaqaseeqa aunirara saqarisaa arifandinaqoo afiqee fiqau.
MAT 27:32 Afiqammaree aanai fidaqa sundiauqa Sireenee maqusanaindaraa fasiqa mina auqu Simoona amarana moo Simoona aanai paqurufaqa misa nári oosana mareeqa nári faaqaana uqafiqaseeqa Yisuna aunirira saqari aku amaqeeqa afeekaikamasee qiqau. Maree maasa faqa ania. Miqi qufanoo misa faaqaanara rufiamareenoo Yisuna aunirira saqari akumaree finau.
MAT 27:33 Yisuna afiqee fifiufaqa Koorookata maqa maaqaki ooru fiqau. Koorookata mi ufana oosana faiqí akiaqa amudaani aaqana maridanoo.
MAT 27:34 Sundiauqa miqoo oorureeqa misa uainna nammariki sukaqeemaru saqari anoona afaaqa iri quqaanifeera uainna nammariki adiaseeqa Yisunara maana marasee naannee qufanoo Yisufa afaurusaa kai quqaseenoo qumboommasee qafeenoo minniseenoo sia noofaqa misa mina qumarasee aunirira saqarisaa rummamaqasee pirimma aruatukarasee uqeera rakiqaseeqa mina qamunnanda faasai raipaqu quqaqoona qumaree kaatara foora sararamandeeqa doo náriara náriara mi qamunnausa maraqau.
MAT 27:36 Qamunna mara taikaseeqa misa ooqu marifufaqa rakisimariqau.
MAT 27:37 Misa Yisuna arira ufa raufiqira saqarisaa akara rumaseeqa Yisuna akiaqai aunirira saqarisaa quqaseeqa pirimmannai ariqau. Maaqi qimasee akara riqau. Maa fasiqafa Yuda maqannaa karaambaiqa maridanoo fee qinau.
MAT 27:38 Moo qumuarimaru fasiqana Yisuna dinni atinni narí aunirira saqarisaa pirimmannoo aruseeqa uqeera rakiqaqau. Kafaa moo qumuari maruna narí aunirira saqarisaa Yisuna dinni atinai pirimmannoo aruseeqa uqeera rakiqaqau.
MAT 27:39 Faiqí anaasee mina aaqa fiqaree aiqaree imarusa misa Yisuna murufi qafaidaqa ataasataasa idaqa qufoonaridaqa qiqau. Anee fee amaana maqa moodaa faasaana rapeemasee qaaramoo faasaana kafaa usakararee qimariana fee.
MAT 27:40 Anee kuqaa fee Anutuna amaaku maridanee. Mina amaaku maridana aneenna kai tatuakinana quminaqa maasa aniara kuqaa Anutuna amaaku fee qianaura.
MAT 27:41 Amaana maqasaa aanaiqikirausa uriqararausa faqa Mooseena sandufa akoofasauqa faqa Yuda maqannaa faiqí firaasa faqa misauqa faqa miqi kai masee ataasataasidaqa qufoonaridaqa qiqau.
MAT 27:42 Maafa faiqí anaasee mareeqee Anutuna asumu mariranaki mara quqannisaannee qimarifa nariara sia amanaikinoo. Kuqaa fee anee Isaraee maqannaa karaambaiqee maridanee. Kuqaa miqinana anee karaambaiqa maridana maqee maqasaa tatuaki aqufinaqa maasa aniara kuqaa karaambaiqee qianaura.
MAT 27:43 Mifa nariara Anutuna amaaku fee qimarifa Anutunasaa afaaqa quqarafa marifanoo Anutufa minara iridanoo fee sia fee iridanoo fee. Iridanoofau qumureenoo mina dadaaqinoofau asumu mariranaki quqani.
MAT 27:44 Qumuari maru fasiqaqanda dinni dinni nári aunirira saqarisaa maruqanda miqi kai qimaseeqa Yisuna ataasa ataasa qimamaqee mariqau.
MAT 27:45 Mi faasaanna kai asukuna firaafa aiqama maqa maaqa ititannimaqanau. Suani afu urureenoo uriufanoo mina akiaqa amummaqa qambaanai ururoofanoo asukuna arunnimaqanau. Suani muqunni qubeekoofanoo asukuna taikoofanoo suani fannoo kafaa kaaqa qanau.
MAT 27:46 Suani afu muqunni qubeekoofanoo asukuna kaqi marufanoo Yisufa firaa kari faaqarinoo qinau narí ufakiqari qinau. Eeri eeri rama sabakatani. Mina oosana maaqimminoo maridanoo. Qini Anutu, qini Anutu, naqi fee ifanee anee qiniara minniseenanee.
MAT 27:47 Miqi qufaqa faiqí anaasee mi saqa marusa Eeriaana aaraidanoommi maqi qimasoofanoo moo fannoo paadura au fooqaana ateekamareenoo maara maaqanufasiqausa manda uainna nammariki raaraamaseenoo aika maraseenoo qundaqiseenoo minaki rutaquseenoo mara muru Yisuna ooki aakuamaqanau. Qumbifiqamma naanifeera afaurusaa quqasoofanoo qumbifiqamma nanau.
MAT 27:49 Miqi marufaqa akaqausa qiqau. Saa. Eeriaafa qumureenoo dadaaqiannoo fee. Kaqi kasooiqa marida qafaaqa.
MAT 27:50 Mikari Yisufa firaa kari faaqa quqaseenoo kuquqaraasinau.
MAT 27:51 Mifa kuqufanoo aaqee kai Yeerusaree amaana maqakina ititaqoo qamunnafa naaquqara maqasaa ititaqoo qamunnafa mirindari aiqama raaqumareenoo muqufi aqinau. Firaafa maqa kasinau, firaa ooniuqa afoo afaainau.
MAT 27:52 Faiqí madika faqa oo raqanau. Oo raqasoofanoo ooqai kuqusa Anutuna ufa irimaru fasiqa anaaseesa maqee kuqiranakiqari findifumafi miqoo mariqau.
MAT 27:53 Yisuna kuqiranakiqari findifufaqa mi kuqirausa akooqoo Yeerusaree maqusai oonuroofaqa faiqí anaasee moomoosa nindafaqau.
MAT 27:54 Maara maaqanu fasiqausa Yisunasaa rakisidaqa ooqumari fufaqa rakisiusa asukuna qoofaqa maqa kasufaqa qafamasoofaqa nimuqusufaqa kaaqa rufiaqau. Rufieemarufaqa qiqau. Oo kuqaa uqanna maafa Anutuna amaaku uqanna mariifa kuqinoo.
MAT 27:55 Yisufa aunirara saqarisaa marufaqa Kariree maqa maaqaindaraa aanaaseeuqa ururee Yisunara dadaaqiannee qimasee uru anaaseesa nianai uru kikiqiqa marida qafee mariqau.
MAT 27:56 Misakiqari Yisuna anoona amaraqanda mariqau, moo amarafa Makadara maqusaindaraafa faqa moo amarafa qaara kumaaraaqara Yooseefaasa Yameesasa ninoofa faqa (Maa Yooseefaafa sia Yisuna akoofau mina amarafa kumaaraa marinau) moo anaasee Seebeedina anaaqa faqa mi anaaseesa faqa miqoo ani kikiqiqa maridaqa Yisuna kuqirana qafee mariqau. (Yisuna aukuana narí maqannaasa maaqimmasee madika indufusaida kuqufusa nikundee mariqau. Misa ooni firaana kasaaqa aamara auquseeqa minaki keeqafufaqa dinni dinni moomoo aamara auqiiseeqa kuqusa minakiaqa naadu naadu nikundee mariqau. Moodaa kai moo kari akundeeqa mina afunda taikoofanoo kaifaa moo fannoo kuqufaqa miqikai imariqau. Sia moodaa karifau nikundee mariqau. Moo kari moo kari nikundee mariqau.)
MAT 27:57 Mi eenoonnai Aramatia maqusanaafa Yooseefaana amarana mifa faiqí firaafa ainaina faqaafa. Mifa Yisuna ufa irira faiqi kammafinoo kukeeqanoo marufa marinau.
MAT 27:58 Mifa Piratoona oopisai oonureenoo Yisuna iriara oonureenoo Piratoona irammirinau. Amanee Yisuna iri qinee marasee fee akundaanauree qufanoo Piratoofa irinoo narí maara maaqanu fasiqausa qimanniminoo qinau. Innee maa fasiqana Yisuna iri mara amifanoo akundaani.
MAT 27:59 Yooseefaana amarafa iriseenoo oorureenoo Yisuna iri auniriranasaa aruqoona tatuseenoo fuka qamunnasaa kukuqinau.
MAT 27:60 Kukuqamaseenoo Yuda maqannaasa oosana mareenoo narí ooni aamarakina quqanau. Yooseefaafa nariara kuquana misa qini iri minaki akundamaqisaaqeera ooni aamara auquqoonaki Yisuna iri minaki quqanau. Quqaseenoo firaa ooni quanda quandammeeqee aamarasaa ititaqau.
MAT 27:61 Miqi marufaqa aanaaseeqara oonaamara adeedi ooqu marida qafee mariqau. Miqanda nuqu moodaa nuqufaqaaqanda Mariana amaraqanda kai maruqanda mariqau. Miqanda madikee marufaqa ooqumarida qafeeufaqa eendufaqa maqusai fiqau.
MAT 27:62 Yuda maqannaasa narana ainaina deedaqamaqoo faasaana taikoofaqa mi eenoonnai amaana maqasaa aanaiqikirausa uriqararausa faqa Farisai amaana ufa irimarusa faqa suqufufaqa rumbarausa Piratoo finnai narí oopisai oorureeqa irammiriqa qiqau.
MAT 27:63 Oo amiqirafa mi unna fasiqafa kaqi maridanoo qaaramoo faasaana mariqa findifuaqee qinoo.
MAT 27:64 Amanee aneenna maara fasiqausa niqiqainaqa ooni aamarasaa qaaramoo faasaana rakisiaqa. Mina faiqi namu ani qummuarammeeqee quqaseeqa unna qifoora. Doo findimmeeqee Anutufinnai fiifoo qimasee faiqí anaasee unna qimasee qimannimi foora. Indaaru unnaqimarifa marifaqa minara Yisuna faiqi namu kafaa unnufa qifanoo mi ufafa firaafaikiandoora. Minara ani qimamidaqa misa rakisiaqeera.
MAT 27:65 Piratoofa minara iriseenoo quandafinoo aanoomasee qimanniminau. Innee qini Roomma maqannaa rakisimaria maara fasiqausa maraaqa. Misa kai amiqimmasee rakisiaqa.
MAT 27:66 Miqi qufaqa amaana maqasaa aanaiqikirausa ooni aamara maruqoo oonureeqa qima ainaina qumaree ooni kooqisaa faqa kooqi afainni faqa atukaraseeqa ititaqau. Moo fannoo mi ooni kooqina mara aquqaifaqa qafaanee qiqa mi qimana quqaqau. Miqimaseeqa maara fasiqausa miqoo quqasee amaana maqasaa aanaiqikirausa doo nimaaqa fiqau.
MAT 28:1 Nariqa amaana faasaana saririqa taikoofanoo iqaqoo kananaana amaanasaa eendai qaara anaaseeqanda moodaa nuqu faqaaqanda Mariana amaraqanda miqanda sia Yisuna anooqanda moo fannoo Makadana maqusaindaraafa moo fannoo moo maqusaindaraafa miqanda Yisuna akundoo ooni aamara qafaanee qimasee fiqau.
MAT 28:2 Oonuree qafoofanoo miqoo kai maqa firaafa kasufanoo innaarunaindari Anutuna qangiroo moo fannoo qumureenoo ooni kooqi ititaqoona quanda quandammeeqeenoo kaqini quqaseenoo narí minasaa ooqu marifi marinau.
MAT 28:3 Mina oori afiri aakuasaa idauru miqirafa marinau. Mina qamunna kaaqa eekara kaaqa qarafa marinau.
MAT 28:4 Maara fasiqausa rakisiusa Anutuna qangiroo qafeeqa kaaqa rufiaseeqa aiqama naindiri roofaqa noorindari maqasaa kuqiara foora mambiqau.
MAT 28:5 Maqasaa noorindari faiqaqeeufanoo qangiroo fannoo anaasee oonuroosa maaqi qimasee qimanniminoo qinau. Innee sia rufia rufiaqiaqa. Innee Yisuna aunirira saqarisaa pirimmannoo aruqaanara randaidaqa qinee iridaqa.
MAT 28:6 Kaqi maridanoo inni qimannimi undeemminoo maridanoo. Sia maaqoo maridanoo. Doo kuqiranakiqari findifinoo doo finoo. Innee mai anireeqa mifa mariiqoo qafaaqa. Sia maridanoo.
MAT 28:7 Innee qafamaseeqa sandee oonu mina faiqinamu maaqi qimaseeqa qimannimiaqa. Yisufa kuqiranakiqari findifinoo doo Kariree maqa maaqai inni noorinni fidanoo innee miqoo qafeefaranoo miqoo mariannoo. Doo mi ufana kai inni qimannimiqa doo fuaqa.
MAT 28:8 Anaaseeqanda qangiroo qafeeqa mina ufa iriseeqa kaaqa naaquqanau. Yisunara kuqiranakiqari findifu ufana irufanoo naundurai asasinoo naaquqoofaqa mi anaaseeqanda mina faiqi namu ufa qimannimianee qimasee fidaqa.
MAT 28:9 Yisufa aanai mi anaaseeqanda tautummannimaqasee kikiqinoo marida nimandanau. Miqi qimasee qimannimisoofaqa misa naaquqoofaqa mina aiku qumaree noorindari maqasaa faifufaqa qimudao̱o qidaqa amooqira ufa qimamiqau.
MAT 28:10 Miqi marufanoo Yisufa maaqi qimasee qimanniminau. Innee sia rufiaaqa. Sandee oonu qini faiqi namu qimannimifaqa Kariree maqusai ooru fiqa miqoo qiqafeefaranoo.
MAT 28:11 Mi anaaseesa Yisuna ufa iriseeqa fiqau. Misa fimarufaqa maara fasiqausa ooni aamaraki rakisimarusa misa faqa rufiaseeqa kuqiara foora iqa mariusa findimeeqee Yeerusaree maqusai oorureeqa amaana maqasaa aanaiqikirausa aiqama ufa qimannimiqau. Qangiroora ooni kooqi ititarana rafaqaaunara qimannimiqau.
MAT 28:12 Amaana maqasaa aanaiqikirausa misa Yuda maqannaa faiqí firaasa faqa suqufufaqa minara ufa qimasee iriqau. Ufa qiqi andeeqaseeqa misa mi maara fasiqausa naaramaseeqa munnimma firaatia uqanna nimiseeqa maaqi qimasee qimannimiqau.
MAT 28:13 Faiqí anaasee inniara Yisunara iraifaqa innee maaqi qimasee qimannimiaqa. Maasa eendakina kaaqa faiqaqeeunaqa Yisuna faiqi namu anireeqa ooni kooqi atuaseeqa Yisuna iri qaindusu mareeqa doo kukeeqamaseeqa. Miqi mandaafaqa iqaqaifaqa amaaqa kai qafeeqa.
MAT 28:14 Miqi qimasee qimannimiaqa. Kiapafa firaafa Piratoofa mifa irisainaqa maasa oonureeqa andeeqaanaura sia mifa inni naruannoo.
MAT 28:15 Mi maara fasiqausa misa eedoo qimaseeqa munnimma mara maree miqi qimasee faiqí anaasee qimannimi maree fiqau. Yuda maqannaa faiqí anaasee mi ufana kai Yisunara qimariqau.
MAT 28:16 Yisuna faiqi namu qisaukuqara taikasee qikunni ooqu moodaa marasee Kariree maqa maaqai fiqau. Yisufa kaqi maridanoo mi aaqannara qimannimiqoonara mi aaqannasaa ooru fiqau.
MAT 28:17 Miqoo oorureeqa Yisuna qafeeqa reendeenamasee amooqira ufa qimamiqau. Moodaa moodaa qaara irirana iri mariqau. Mifee, yafee, afaanna fee.
MAT 28:18 Mina faiqi namu miqoo ooru miqiqa marufanoo Yisufa adeedi anireenoo maaqi qimasee qimanniminau. Innaaruna faqa maqa faqa firaa uriqararana Anutufa qini qiminoo. Moo fannoo sia qini uriqarafa mariannoo. Doo qinee kai.
MAT 28:19 Innee minara irisee maqusa maqusa aiqama daraani mafiqa qimannimifaqa misa faqa qini qiku qisauku kammafi mariaqeera. Misa qini qiku qisauku kammafi marifaqa innee misa nammari auqamannimaqaaqa. Nammari auqamannimaqaseeqa maaqi qimasee qiaqa. Akoona faqa amaaku faqa Anutuna naaquqara andeeqara maraquna faqa misa nuqusaa nammari auqamannimaqaidaqa. Innee Yisuna aiku asauku kammafuanara minara mapuku nimaqaanifeera nammari auqamannimaqaidaqa. Doo miqi qiaqa.
MAT 28:20 Aiqama ufa qimannimiafannana misa faqa mi ufana aiqamausa uqanna qimannimifaqa iriseeqa mi ufana qumaraaqeera, mi ufanamau kai fuaqa. Innee maqusa maqusa fifaqa qinee faqa qumee inni faqa fuanaura. Innee miqi marifaqa qinee qumee kai inni faqa nuanaura. Sia inni mininnisaanaura kasoo innaaruna faqa maqa faqa taikara aukuana inniqa saimbaqa moodaanaki kianaura.
MAR 1:1 Maa akarafa asauku mundirana Yisunara Anutuna amaakuara amiqira fasaasa ufa qidanoo.
MAR 1:2 Anutuna ooqeenaa tamummaqara fasiqa auqu Eesaiaafa Yoohaneefa nammari nimarunara maaqi qimaseenoo akara rinau. Iriaqa qinee qini ufa maree marinnana qini Anutusa qisauku mundirana ani oorinni aqiqaananoo fidanoo ani aana afisuannoo.
MAR 1:3 Aadana maqa maaqakiqari moo fannoo maaqi qimasee fi fi qinoo faaqaridanoo faiqí anaasee qimamidanoo. Innee karaambaiqa fuaninna aanna afisuaqa, andeeqara qoo kai karaambaiqa nuani.
MAR 1:4 Mi tamummaqara fasiqana ufamau kai maaqimasee oosana araqau. Yoohaneefa nammari nimi marufa aadana maqa maaqakiqari findifinoo faiqí anaasee nammari rumannimaqaidanoo maa ufana qimanniminau. Inneeqa mandainainakiqari quandaki nammari marasaifanoo Anutufa inni mandainaina akiaqara mininniseenoo sia naruannoo.
MAR 1:5 Yudeea maqa maaqaki marusa faqa Yeerusaree maqusaki marusa faqa mi saqa marusa moomoosa Yoohaneefa marunnai Yooradanna nammari afainni marunnai ooqu reeqa nári mandainainara kooroomasoofanoo Yoohaneefa Yooradana nammariki mara quqasee keeqamannimaqasee uqeerasoofaqa findifiqa miqooqari fifainiqau.
MAR 1:6 Yoohaneefa sia amiqira qamunna afisinau tamummaqara fasiqa naanna ramasee aadaika aadaikirafa, kameera asausinnai auqira qamunna afisusee aandau apatannai auqira pikapa qamunna rafaaqafuseenoo marinau. (Kameera qoosa fooqaa ira aandau maridanoo.) Yoohaneena narana naafaa oofaafana nariqa minara pandaaqa oofaafanee qimaruna faqa ookasaasa anoona faqa kai nee marinau.
MAR 1:7 Yoohaneefa maaqi qimasee faiqí anaasee qimanniminoo qinau. Qini qinaaqiannai kambiqaaninnafa qini firaaqoo uriqararafa mariannoo. Qinee Yoohaneesa kasooqaqee kambiqaaninna fasiqana mina kaaqa ureeqarausa maridaqa. Naqimasee fee qinee mina dadaaqianauree ureeqara ainainira fasiqauqakiqari ureeqararausa maridaqa sia amana mina dadaaqianaura.
MAR 1:8 Qinee nammarinnai kai rumannima qaidaqa mifa naaquqara maraqunannai inni ruma nimaqaannoo.
MAR 1:9 Yoohaneefa miqimmasee kaqikaaqoo marikufanoo Yisufa Kariree maqa maaqakiqari Nasareetee maqusaindari Yoohaneefa maruqoo ooquroofanoo Yooradana nammariki Yisuna nammariki tupamamaqanau.
MAR 1:10 Yisufa nammarikiqari findifinoo qafoofanoo innaaruna rakeemafufanoo Anutuna maraquna fannoo nakipurunara foora Yisunasaa qumu quqanau.
MAR 1:11 Quqamafufanoo innaarunaindaraa ufa moo maaqi qimasee Yisunara qinau. Anee qiqaindi uqanna qimuqusira qimaaku marianafa qinee aniara amiqimasee qiqaara raidanoo.
MAR 1:12 Doo miqooqari uqanna Anutuna maraquna fannoo Yisuna aqiqeenoo aadana maqa maaqaki kaasau maqa maaqaki sia faiqi marunnai nianai fuannee qufanoo finau.
MAR 1:13 Mifa miqoo oonu maridanoo qaara fasiqa niku nisauku faasaana marisoofanoo Sadannafa anireenoo manda oosana maraanifee qimaseenoo amanamasee qafoosianoo. Kaasau aandauqa miqoo marufanoo Yisufa marikufanoo aararoofanoo kudoosaapoofaqa qangiroouqa qumureeqa dadaaqiqau.
MAR 1:14 Yuda maqannaasa karaambaiqa Eeroodeefa Yoohaneena nammari nimimaruna karafusaki rumbasoofanoo miqooqari Yisufa Kariree maqa maaqaki oonuree faiqí anaasee Anutuna amiqira fasaasa ufa qimannimida maaqi qimasee qimannimi marinau.
MAR 1:15 Andeeqara kamu doo ani maridanoo Anutuna rakisira ququsa doo adeedi ranoo maridanoo. Innee inneeqa mandainainakiqari quandakinaqa amiqira fasaasa ufa irisee inni irirana minasaa rusiaqa.
MAR 1:16 Moo kari Yisufa nammari farumma firaana Kariree maqa maaqaki maru nammarina afaimau fidanoo noodaanna mi nammarinaki maree maru fasiqaqanda nári qisafasaasa nindafanau. Miqanda nári oosana maraidaqa firaa pateeuqa nammariki aqusaida noodaannauqa rumafi marufaqa maree mariqau. Moo fasiqa auqu Simoonafa marinau, mina akaqa mina faqa maruna auqu Andurufa marinau.
MAR 1:17 Yisufa miqanda nindafamasee qimanniminoo qinau, inneeqara qini faqa aniraifaqa faiqí anaasee noodaannara foora mareeqee Anutuna ququsaki quqeefaranoo fee qufaqa miqanda nári pateeuqa miqoo quqasee Yisuna faqa fiqau.
MAR 1:19 Yisufa miqooqari kaqikaaqoo nammari afaiqara fidanoo qaaraqanda qisafasaasa paqurinau, miqanda Seebeedina amaakuqara mariqau. Miqanda nuqu Yameesana faqa narí akaqa Yoohaneesandiri mariqau. Sia nammari nimimaru Yoohaneefa marinau, mina amarafa marinau. Miqanda nári kanuqaki ooqu maridaqa fafaa eendaki nári pateeuqa nammariki aqusee noodaanna maraanee qidaqa deedaqi mariqau.
MAR 1:20 Yisufa miqanda niqafamasee naaroofaqa nári nikoona Seebeedina faqa narí ainainimarusa faqa quqanniseeqara Yisuna fi afaqee fiqau.
MAR 1:21 Minamusa Yisuna faqa fi fiufaqa Kapeeranaumma maqusai oonu raqau. Yuda maqannaasa amaana saririqa sabatee qimarunasaa Yisufa nariqa amaana maaqaki keeqafinoo faiqí anaasee amaana ufara naakapanau.
MAR 1:22 Mina ufa irimarusa firaaqoo naaquqanau. Sia Mooseena sandufa akoofasauqara foora qimanniminau, narí Anutufara foora qimannisoofanoo naaquqanau.
MAR 1:23 Yisufa qimannimi marufanoo faiqí moo aundurai faafasaaqa marufa amaana maqaki keeqafi faaqa quqasee Yisuna qimaminau, Yisu anee Nasareetee maqusanaafa anee nanaree maasa soodaaqidanee, anee maasa daru taikararee anidanee, qinee aniara iridaqa anee Anutuna naaquqara ufa maree marianafa mariananoo.
MAR 1:25 Yisufa mina aundurakinaa afaanna amambaina qimasee qimaminau anee ufaseenana mi fasiqanakiqari rafudamaki fua, qufanoo mi faafasaaqafa mi fasiqana qumaree udamudami firaaqoo masee firaa kari aqnaakinakiqari faaqa quqaseenoo rafudamaki sandanau.
MAR 1:27 Faiqí anaasee mina qafamasoofanoo naaquqoofaqa narí qimami narí qimamiqa qiqau. Maa fasiqafa Yisufa nanee maridanoo, nana fuka naakaparufa qinoo fee. Maa fasiqafa narí Anutufara foora narí afeeka ufannai kaasau afaannauqa qimannimifaqa eedoo kai qimasee rafudamaki fiqa.
MAR 1:28 Miqiunara Kariree maqa maaqaki Yisuna aufakiana fannoo kaqi kaqi ufanoo aiqamai daraaninau.
MAR 1:29 Misa mi amaana maqanakiqari rafudamakufaqa Simoonasa Andurusa maaqaki fiqau. Yameesa Yoohaneesa misa faqa fiqau. Yoohaneefa nammari nimimaruna amarafa Yisuna aiku asaukukirafa marufa misa faqa finau.
MAR 1:30 Simoona airaamaku anaasee aidafi marufanoo afaaqa ididi marufanoo faiqaqee marinau. Yisufa maaqaki keeqafufaqa mi anaaseenara Yisuna qimamiqau.
MAR 1:31 Yisufa iriseenoo mifa marunnai oonureenoo asauku qumareenoo uqeeroofanoo mina afaaqa ididiufa taikoofanoo aaqee findifinoo narana ainaina niminau.
MAR 1:32 Eeneemarufanoo suani keeqoofanoo miqoo marusa nári faiqí anaasee auri marusa faqa fueena faafasaaqa marusa faqa aiqama nifiqee
MAR 1:33 Yisufinnai minisoofanoo aiqama mi maqusanaki marusa mi maqannaasa ani mara uqusee miqoo suqi mariqau.
MAR 1:34 Yisufa moomoo aurirana oosana oosana aurirana andeeqanniseenoo faafasaaqa marusa moomoosa miqimma quqannimufaqa rafudamaki sandaqau. Misakina faafasaaqauqa Yisufa Anutuna amaaku marunara irisee kooroo iandoo qimasoofanoo Yisufa misa ufara qaoo qufaqa sia ufa qirai kaqi rafudamakidaqa sandaqau.
MAR 1:35 Mi eendanaki faiqee kananaana uqanna eendai Yisufa findifinoo maaqakiqari raudamakinoo maqusai ooqureenoo ooqiqaree faiqí sia maru maqa maaqanai oonu maridanoo Anutunara innaaru qimarinau.
MAR 1:36 Simoonafa faqa mina aqoondiuqa faqa randaqa nida Yisuna paqurimasee qimamiqa qiqau, aiqamausa aniara randaidaqee qufanoo Yisufa qinau, maasa maa maqa maaqanaki maqusa maqusa moo maqusai fuanauranoo. Anutufa misauqaki faqa qimannimianee qimasee diqiqaisa maridaqa.
MAR 1:39 Miqi qimaseenoo Yisufa Kariree maqa maaqaki oonuree aniree idanoo nári amaana maaqakiaqa keeqafida qimannimidanoo naundurai faafasaaqa marusa niqiqee marufaqa rafudamakida fimariqau.
MAR 1:40 Manda namuana karoora ari maru fasiqafa moo fannoo Yisuna oorini aqoori saunara fufanoo firaaqoo innaaru qinoo qinau. Oo karaambaiqa anee aidinana qini karoora darimarina rukaqisaina taikaani. (Mi aukuanna misa mi auriranara firaaqoo rufiasee mina narimarusa naadumasaa nianasaa quqee mariqau.)
MAR 1:41 Yisufa mi fasiqana qafoofanoo amuqusa mandaikufanoo asauku uqeerasee mina afaaqasaa munduseenoo qinau, eeoo qini dididanoo doo rukafua qufanoo doo miqoo uqanna aaqee miqi qimarufanoo karoora ruka taikanau.
MAR 1:43 Ruka taikafufanoo Yisufa amambaina qimasee qimaminau, aniki kai taikafuani, sia moo fasiqa qimamia. Anee andeeqasee amaana maaqaki mari aanaiqikirana uqafiqasainanoo ani afaaqa karoora arimarina aiquqummaseenoo aniara anukanoo mariaanoo qiannoo. Miqi qinana anee karoora nárí marisa taikarausa aandau tatufirana Mooseena sandufamau fidana Anutuna tatufirana suqa amia. Suqamisainaqa aiqamausa ani karoora rukarana qafamasee sia aniara eerairiaqeera. Miqi qimasee Yisufa mi fasiqana aqiqoofanoo finau.
MAR 1:45 Mi fasiqafa karoora taikafufa sia Yisuna ufa irisee umee ranau miqooqari fidanoo aiqamai qimanniminoo finau. Firaaqoo qimannimi marufaqa moomoosa umbiqoofanoo Yisufa aadumai marufaqa faiqi anaasee moomoosa mifunnai fimariqau.
MAR 2:1 Qaaraqanda fee qaaramoo faasaanee aiqaroofanoo Yisufa narí maqusai Kapeeranaumma maqusai anireenoo narí maaqaki keeqafufaqa faiqí anaasee minara iriseeqa mi maqanaki moomoo keeqee qumbiqafufanoo kooqiki faqa naambeeqai faqa qumbiqaqufufanoo Yisufa maaqaki maridanoo Anutuna ufa qimannimi marinau.
MAR 2:3 Qimannimimarufaqa faiqí qaara faqa qaara faqa moo fasiqa aiku asauku kuqirana qaindusumaree mina ainaina faqa aniree Yisuna uqafiqaanee rufaqa faiqí ititafufaqa keeqarara anuqusia misa maaqamau akaramafiqa.
MAR 2:4 Yisuna akiaqa amummaqa nári eefeeda maaqa asaana rapeemandeeqa mi fasiqana narí qainda namufaqa minaki upeekasee quiqa quiqa ufanoo meemai Yisuna aaqa quqaqau.
MAR 2:5 Misa irirafa firaaqoo Yisunasaa atooqoonara Yisufa qafamasee aiku asauku kuqirana qimaminoo qinau. Qini qimaaku ani mandainaina akiaqa minnaisaidaqa.
MAR 2:6 Mooseena sandufa akoofasauqa miqoo ooqumarifi irufanoo nikooqoofaqa nári naunduraki oonu mafi iriqa qiqau.
MAR 2:7 Maa fasiqafa naqifeemasee unna qimasee paasoosidanoo Anutuna amaaqa maqaidanoo fee mi ufana qidanoo fee. Sia faiqí moo fannoo amana faiqí mandainaina taikannisaannoo Anutufa kai amana miqiannoo.
MAR 2:8 Miqi qimasoofanoo Yisufa aaqee uqanna misa naundurakinaana iriseenoo quandaki qimanniminau. Innee naqi fee qifaqee inneeqa naaqookinaana mi mandufana qidee.
MAR 2:9 Qinee maa fasiqanara mandainaina numoo minnaisaidee qunnana innee qiniara sia amanaikiaanoo fee qidee, qinee faiqí nimaaku maa maqanasaa maridaqa faiqí mandainaina taikarana qini afeeka marinara kooroomma nimaqaanaura maa firaa afeeka ainainannai kooroomma nimaqaanaura qinee maa fasiqanara aneenna qaindasaaqari findifinana mi qaindanara maree amaaqa fua qianaqa qinee mandainaina taikannisaana afeeka qafeefara. Miqi qimannimiseenoo quandaki mi aiku asauku kuqirana qimaminoo qinau.
MAR 2:11 Ani qimamidaqa anee findifinana aneenna qainda mara maree amaaqa doo fua.
MAR 2:12 Miqi qimasoofanoo aiqamausa nifusaaqari mi fasiqafa findifinoo narí qainda mara qumareenoo doo amaaqa kaqi kaqi finau. Misa qafamasoofanoo firaaqoo naaquqoofaqa Anutuna amooqidaqa qiqau. Maasa sia uqanna maaqira ainaina qafaunausa maridaqa.
MAR 2:13 Yisufa kafaa anirandee Kariree firaa farumma maruqoo fufaqa faiqí anaasee moomoo mina afaqee oonuroofanoo Anutuna ufa qimannimimarinau.
MAR 2:14 Mifa mi saqa oonuree aniree idanoo faiqí moo narí maqannaasa takisa munnimma mareeqeenoo Roomma maqanna nimimaruna paqurinau. Mi fasiqana auqu Reefifa mina akoofa Arafaiusafa marinau. Reefifa narí oopisaki ooqumarifi marufanoo Yisufa mina qafamasee aniree qimaminoo qinau. Anee qini faqa fua qufanoo, Reefifa iriseenoo aaqee findifinoo Yisuna faqa finau.
MAR 2:15 Yisufa marikinoo moo kari Reefina maaqaki keeqafi narana nee marufanoo manda oosana maree marusa faqa takisa munnimma maree marusa faqa Yisuna faqa nimarusa misakiqari akaqausa Yisufa narí faiqinamu faqa Reefina maaqaki ooqu marifi narana nee mariqau.
MAR 2:16 Mooseena sandufa akoofasauqa Farisai amaana ufa qimarusa anirama qafamaseeqa Yisufa manda oosana maree mariasa faqa takisa munnimma maree mariasa faqa naidanoo fee qimasee Yisuna faiqi namu umee irammiriqa qiqau. Naqaa fee qifanoo fee takisa munnimma maree mariasa faqa manda oosana maree mariasa faqa narana naidanoo fee asaurirana sia fee marifanoo.
MAR 2:17 Miqi qufanoo Yisufa misa ufa irisee qimanniminau. Faiqí anaasee amiqimasee mariafaqa sia tutaqausiannai fidaqa, aurimariasa kai tutaqa finnai fidaqa. Sia qinee andeeqarausa naararara qumuafanausa maridaqa, faiqí anaasee innee manda oosana maree mariasee qimasee nifaqee mariasa misara Anutufinnai ubeekaaqeera naaraaqeera qinee qumuafanausa maridaqa.
MAR 2:18 Moo kari Yoohaneefa nammari nimimaruna aiku asauku faqa Farisai amaana ufa qimarusa niku nisauku faqa Anutufa maasa ufa irianifee qimasee narana marufaqa mina minniseeqa naararee marufaqa innaaru saika kai qimariqau. Akaqausa Yisufunnai oonuree irammiriqau, naqi fee qifaqee ani aiku asauku sia misa naanna raida Yoohaneena aiku asauku faqa Farisai amaana ufa qimariasa niku nisauku faqa narana sia narai naararee marifaqa innaaru qidaqa, ani aiku asauku nanaree sia miqidee qufanoo
MAR 2:19 Yisufa qimanniminoo qinau, nimundara qoomaqa sakasee naidaqa suqimariasa naararee maridee miqidee. Oo sia uqanna miqifara. Amundara fasiqa miqoo maridaqa asasira faasaana marifaqa narana naida maridaqa.
MAR 2:20 Kasooqaqee moo aukuana misa amundara fasiqa qini misakinaana rumbamaree munu darusaifaqa mikari qini qiku qisauku narana minniseeqa naarara maridaqa innaaruqifaranoo.
MAR 2:21 (Yisufa Farisai amaana ufa qimarusa faqa Yoohaneena nammari mareemarusa faqa misara ooqeenaa Mooseena sandufa nári niku nisauku qimannimi marunakinara kikiqususee qamunnara faqa uainna nammariara faqa mina kikiqammusinau. Kafaa narí qumu fuka ufana narí faqa nimarusa qimannimunara fuka uainna faqa fuka qamunna faqa kikiqusinoo maaqi qimasee qimanniminau.) Sia faiqí moo fannoo fuka qamunna ati ateekarana marasee nauraa qamunnasaa ititaanee qimasee akunuannoo. Miqinanoo fuka qamunna ati fannoo ooqeenaa qamunna afauqaqarafa rakeeinoo firaaqoo anaqiannoo.
MAR 2:22 Yafee faiqí moo fannoo nauraa tunda taqu maraseenoo fee fuka nammari adiaannoo fee. Sia miqiannoo. Ruqia finanoo aiqama nammari qumiqaraandoora. Fuka taqu andasee fuka nammari minaki adiasainanoo mina amana mariannoo. (Yisufa maqasaa maru aukuanna misa uainna nammari tatisee aandau apatannai auqira taquki adiasee kisaaqasaa maaqaki quqasoofanoo marinau. Marikinoo amiqinoo marufaqa mina mara maree maqee maqee neemariqau. Uainna nammari misa maqee maqee nee maru nammarifa marinau. Mifa aandau apatannai auqira taquara qufaqa, maasa qeeqa ufakiqari taqu uqannee qidaqa.)
MAR 2:23 Yisufa moo faasaana Saririqasaa Yuda maqannaasa amaana faasaana narí faiqi namufaqa maqusamau nidanoo sakuma ummaquqoo ququsanaki fidanoo mina faiqi namu fi sakuma rasaufu maree naqafufanoo Farisai amaana ufa qimarusa nindafamasee Yisuna qimamiqau. Ani faiqi namu Mooseena sandufa, Saririqa sandufa rukiaidaqa sakuma ruqoosaidaqa ainainidaqa.
MAR 2:25 Yisufa mina iriseenoo quandafi maaqi qimasee qimanniminau. Innee Dafidina oosana sia fee innee asaana ridee. Ooqai Saurooofa mina arirarufanoo sandeenoo aararee marufanoo Anutuna amaana maqaki Nooba maqusai marunaki keeqafinoo Anutuna amimaru feemuna marasee namasee akaqana marasee narí faiqi namufaqa nimufaqa naqau. Mooseena sandufa rukiasee nanau, aanaiqikirausa kai nee maria feemuna marufanoo sandufa rukiasee kaqiqeefa nanau. Mi aukuanna Abiatarafa aanaiqikirausa uriqararafa marinau. Innee moomoo kari mina asaana rimariafa mina oosana innee sia fee minara iridee.
MAR 2:27 Anutufa narinaindari faiqí dadaaqi mari ainainee qimasee Saririqa amaana faasaana auqeeqeenoo faiqí niminau. Sia kaqinaindari Saririqa amaana faasaanara irisee faiqí auqeeqeenoo amaana faasaana aminau.
MAR 2:28 Minara qinee faiqí nimaaku amaana faasaana faqa mina sandufausa faqa uriqararausa marunausa maridaqa qinee misara naaqee qunaqa naidaqa miqi marifanoo sia numoo mariannoo.
MAR 3:1 Yisufa moo faasaana kafaa mi amaana maqanaki keeqafi qafoofanoo faiqí moo asauku sufirafa faiqí anaasee moomoo namufaqa keeqafi marinau.
MAR 3:2 Akaqa fasiqa anaasee Yisunara ufa qianee qimasee amaarusidaqa asauku sufirana faqa Yisuna faqa amiqimasee ninda fee mariqau. Yisufa Saririqasaa fee faiqí asauku sufirana andeeqaannoo fee Mooseena sandufa rukiaannoo fee qidaqa qafee mariqau.
MAR 3:3 Yisufa amaana maqaki faiqí anaasee amaana ufa qimannimidanoo asauku sufirana aaramasee qinau anee mai aniree aiqamausa nifusaa kikiqia qimaseenoo quandaki faiqí anaasee irammirinoo qinau. Mooseena sandufa Saririqa faasaana sandufa fannoo maasara naqi fee qidanoo maasa minasaa faiqí anaasee dadaaqafee ianauree kuridianauree maasa faiqí marirana asumufee marannimianauree kuridi taikannimaqaanauree miqi qufaqa misa sia ufa qiqau kaqi kasoomafiqau.
MAR 3:5 Yisufa mina qafamasee raiqara oori maraseenoo faiqí anaasee aiqama munu ninda fee mini ninda fee maseenoo misa aaqarana afeeka irirana nindafa masoofanoo misara amuqusinau. Amuqusufanoo mi asauku sufira fasiqana qimaminoo qinau aneenna asauku ratutaa qufanoo asauku ratutasoofanoo mina asauku amiqinau.
MAR 3:6 Farisai amaana ufa qimarusa minaki marusa qafamaseeqa amaana maqakiqari rauda makufaqa Eeroodeena ufa irimarusa faqa suqufufaqa Yisuna arira ufa qimariqau.
MAR 3:7 Miqooqari Yisufa Kariree farumma firaa farumma tia marunnai ooqufufaqa faiqí anaasee moomoosa afaqa maree ooqu fiqau. Akaqausa Kariree maqa maaqakiqari aniqau, akaqausa Yudeea maqa maaqakiqari aniqau akaqausa Yeerusaree maqusakiqari aniqau akaqausa Idumeea maqa maaqakiqari aniqau akaqausa Yooradana nammari dinni afainni marusa aniqau, akaqausa Tiree maqusakiqari faqa Sidoonna maqusakiqari faqa misaqa marusa faqa aniqau. Doo mi fasiqa anaaseesa moomoosuqanna tatufufaqa Yisufa imaru ainainausara iriseeqa qafararee qimasee ani suqiqau. Faiqí anaasee moomoosa Yisuna auqaidaqa radamuaqaammimariqau.
MAR 3:9 Yisufa misakinaana moomoo aurimarusa andeeqannisee marunara faiqí anaasee aiqama oosana oosana aurirana maraqanusa nisaukukoo Yisuna auqaananoo maasa aurirana taikaanifee qimasaida Yisuna auqaidaqa radamuaqaa imariqau. Yisufa minara iriseenoo narí faiqinamu qimanniminau innee kanuqa rarisama daaqa nammariki quqaaqa misa qini radamifaqa kanuaki akaraanaqa sia radamuaqa qufaqa misa miqimmiqau.
MAR 3:11 Faiqí anaasee faafasaaqa naunduraki marusa Yisuna qafamasoofaqa naunduraki maru faafasaaqausa faasai misa Yisuna qafamaseeqa faaqa quqasee koorooiqa qiqau. Anee Anutuna amaaku mariana fee qufanoo Yisufa nimambaina qimasee qaoo qinoo qinau sia innee afaannauqa qiniara kooroo iaqa.
MAR 3:13 Mi fasannai Yisufa amuaqu namusa oorureenoo narí aiku asauku marianee qimarusa naara masoofaqa aniroofanoo Yisufa misakinaana qisaukuqara faqa qiku ooqu qaara marasee nuqu reenoo qini faqa mariaqee qimasee nuqu reenoo niqiqoo fasiqausee qimasee qimanniminoo qinau, qinee inniara rusandeesamumasee mareeqa qinee inni niqiqaanaqa maqusa maqusa nidaqa qimannimiaqa.
MAR 3:15 Faiqí anaasee faafasaaqa naunduraki marina aqiqee marunna afeekana nimianaqa aqiqeefaranoo.
MAR 3:16 Maanamusa Yisufa rusandeesamumandee maranau. Simoona Yisufa moo auqundanau Peetooroonee qimasee rusandeesamumandee mina faqa narí faiqi namuki quqanau. Seebeedina amaakuqara Yameesafa faqa narí akaqa Yoohaneena faqa miqanda Yisufa moo nuquranau Booaneeraqeesafa mi nuquna oosana innaarunai qimarina fooqaaqandee qimasee miqanda faqa rusadeesamumasee narí faiqi namuki quqanau.
MAR 3:18 Andurufa faqa Firipifa faqa Baratooroomeeufa faqa Mataioofa faqa Toomasifa faqa moo Yameesafa Arafaiusana amaaku maruna faqa Tadeeusafa faqa moo Simoonafa nári kaamannaikiaqeera qimarufa.
MAR 3:19 Yudasifa Keerioota maqusaindaraafa Yisunara kasooqaqee uqeeqaaninafa mina faqa misauqa faqa mareeqeenoo narí faiqi namuki quqanau.
MAR 3:20 Miqooqari Yisufa narí maaqai Kapeeranaumma maqusai maaqaki keeqafufaqa faiqí anaasee moomoo uqanna maaqaki ani umbiqafufanoo narana naani quna minniseenoo narí faiqi namufaqa sia nanau.
MAR 3:21 Faiqí anaasee Yisunara doo furufara mandeeaafoo qufaqa mina atiuqa niranaqoofaqa Yisuna oonu rarisee anirara deedaqiqau.
MAR 3:22 Mooseena sandufa akoofasauqa akaqausa Yeerusaree maqusaindari qumusa Yisunara maaqi qimasee qimariqau. Mifa afaannauqa uriqararafa Beeraseeburafa mina aundurai marifa maridanoo fee qiqau. Akaqausa Yisunara afaanna uriqararausa afeeka amimariafanoo minannai afaannauqa niqiqaidanoo fee qimariqau.
MAR 3:23 Yisufa minara iriseenoo faiqí anaasee naaramma quqasoofaqa aniroofanoo moo ainaina kikiqa ususeenoo quandara ufa kai qimanniminoo qinau. Naqimasee Sadannafa quandaki Sadannana aqiqaannoo fee sia amanaikianoo.
MAR 3:24 Moo maqannaasa narinni narinni rakiqa rakeekaa iqa doo mi maqannaasa taikee kuridifaranoo.
MAR 3:25 Moodaa oosana moodaa maaqaki mariasa rakuakiqa doo misa faqa taikeefaranoo.
MAR 3:26 Sadannafa narí ququsakinaasa faqa miqikai inoo rakuakinanoo sia amana kisaaqasaa mariannoo moodaa moodaa inoo taikaannoo.
MAR 3:27 Ummuarimari fasiqafa naqimandee afeeka fasiqa maaqa rapeemaseenoo mina ainaina ummuariannoo fee sia amanaikiannoo. Mi ummuari mari fasiqafa anireenoo sanda qumareenoo mi afeeka fasiqana rumba quqaseeno miqoo mina maaqaki keeqafi mina ainaina ummuariannoo. Qinee Anutuna afeekannai Sadannana rumba quqaseeqa mina afaannauqa faiqí nauduraki mariasa niqiqaidaqa.
MAR 3:30 Misa Yisunara afaanna mina aundurai maridanoo mifoo qimarunara mi ufana qinau.
MAR 3:28 Maa ainainara kai iriaqa sia aunuaqa. Faiqí anaasee oosana oosana mandainaina faqa oosana oosana manda ufa qirana faqa moomoo kari qimariana faqa Anutufa minauqa akiaqara amana mininnisaannoo.
MAR 3:29 Moo fannoo Anutuna naaquqara maraqunara manda ufa qinanoo Anutufa mina akiaqara sia uqanna minnaisaannoo mi ufana qimarifa naaru naaru fimaria idanaki aaqarana marasaifanoo sia uqanna Anutufa minnaisaannoo.
MAR 3:31 Yisufa miqida maaqaki ufa qimannimimarufanoo mina akaqaafasaa mina anoona saimbaqa naambeeqai ani kikiqiqa maridaqa Yisuna qimamianeerufanoo sia amanaikufaqa faiqí moo aqiqee oonu Yisuna qimaminanoo aniani fee qiqau.
MAR 3:32 Maaqaki Yisuna fiqu fiquiqa ooqu mariqa marusa mi ufana irisee qimamiqau ani anoofa faqa ani akaqaafasaa faqa madaanai maridaqa ani aareeaa maqi qufanoo Yisufa iriseenoo miqoo marusa irammirinoo qinau. Yafee qini qinoo fee yafee qini qikaqaafasaa fee qimaseenoo narí faqa marusa munu ninda fee mini ninda fee maseenoo qinau. Qafaaqa, maaqoo qini qinausa qini qikaqaafasaauqa maridaqa, qini qikoona iriranamau fimariasa misa kai qini qikaqaafasaa qini dauna qikaqa qini qinausa maridaqa.
MAR 4:1 Yisufa kaifaa Kariree nammari afainni ooqu maridanoo Anutuna ufa miqoo suqi marusa qimannimi marinau. Faiqí anaasee moomoo mina ufa iriraree qimasee aiqama anireeqa Yisuna ititasoonara mifa kanuqaki akaramafufanoo nammariki afiqa quqaqoofanoo munu kasoomasee maridanoo minakiqari nammari afaisaa faiqí anaasee marusa Anutuna fasaasa ufa qimannimimarinau.
MAR 4:2 Yisufa sia akooqoo qimanniminau, quandara ufakiqari qimannimidanoo maaqi qimasee qimanniminau.
MAR 4:3 Innee amiqimmasee iriaqa faiqí moo fannoo maasa Yuda maqannaasa oosana mareenoo maqa rumaseenoo raisa fooqaana ummaqirara mina qaqama marasee minaki aaqasoofanoo ururanau.
MAR 4:4 Mifa miqoo aaqaidanoo akaqa qaqama fannoo aatata niku ree mariaqoo faqa aqufufaqa ufiniuqa aniree mina kai namasaqau.
MAR 4:5 Akaqa qaqama ooni meemai maqaki marufanoo minasaa maqa oodaa marunasaa aaqasoofaqa sia moomoo maqa marunara maqa tootooqi marunara dauni ururamafi marufanoo suani firaafa qoofanoo mina atuka sia meemai keeqoonara suani arufanoo aadanusinau.
MAR 4:7 Aaqasoofanoo akaqa qaqama amuka faqaafa marunaki aaqamakinoo aqufinoo kambiqafufanoo amuka faqaa ainaina fannoo mina arusaifanoo mandaikinoo marida sia qaqama ireenoo.
MAR 4:8 Akaqa qaqama fannoo amiqira maqasaa aqufufanoo maqakiqari urureenoo kambiqafinoo doo qaqama ireenoo, akaqafa oodaa ireenoo akaqafa amiqimasee ireenoo akaqafa fiqaramasee ireenoo.
MAR 4:9 Yisufa mi ufana qimannimidanoo maaqi qinau. Innee naaqoofaqaasa kai maa ufana qimannimunnana iriaqa.
MAR 4:10 Qimannisoofaqa fufaqa Yisufa naríara marufaqa akaqausa mina faiqi namu qisauku qara taikasee qikunni ooqu qaara mararausa faqa aniree quandara ufa oosanara iroofanoo qimanniminoo qinau.
MAR 4:11 Anutufa narí ququsakinaa qumee irirana qimannimiannee qimasaifaqa qimannimidaqa akaqausa aqoosai mariasa quandara ufa kai qimannimunaqa iridaqa.
MAR 4:12 Tamummaqara fasiqauqa misara maaqi qimasee akara riqau. Misa maqee maqee qafaidaqa sia qafeefaranoo. Misa iriqaraasamasee siamma irifaranoo. Misa irifau Anutufinnai ubeekama fifanoofau misa mandainaina akiaqara minninnisani. Minara qinee Yisusa quandara ufa kai qimannimidaqa.
MAR 4:13 Yisufa narí faiqi namufaqa faiqí akaqausa faqa qaqama aaqaranara irammirufanoo maaqi qimaseenoo akooqoo kooroomasee qimanniminau. Innee sia fee mi quandara ufana oosana iridee. Innee sia mina iriqa naqi fee mandee aiqama quandara ufa irifaree.
MAR 4:14 Qaqama aaqee mari fasiqafa Anutuna ufa qaqamara foora aaqaidanoo.
MAR 4:15 Moo kari akaqa ufa faiqí naunduraki aanasaara foora aaqasaafanoo iriafanoo Sadannafa ufiniara foora mina aaqee uqanna aakueeqee aqidanoo.
MAR 4:16 Akaqa fasiqa anaasee naunduraki ooni maqasaara foora qaqama fannoo aqufidanoora foora mi ufana irisee asasamasee marasaafanoo sia meemai anoona ooqu finara sia kisaaqasaa maridanoo, mi ufana saara ummaara fee, ariranee, kambiqafifaqa dauni minnisaidaqa.
MAR 4:18 Akaqa fasiqa anaasee amuka faqaa ainainaki aaqee maria qaqamara fooqaana maridaqa. Misa Anutuna ufa iriseeqa maaqoo maria ummaara kadaapirirafa faqa munnimmara rimariafa faqa oosana oosana ainainara rimariafa faqa mi ufausa kai Anutuna ufa radamusaifanoo sia qaqama iraidanoo.
MAR 4:20 Akaqa fasiqa anaasee amiqira maqasaa aaqee maria fara foora maridaqa, misa Anutuna ufa irisee maraanara qaqammara foora iraidanoo akaqafa oodaa iraidanoo akaqafa amiqimasee iraidanoo akaqafa fiqaramasee iraidanoo.
MAR 4:21 Yisufa kaqi qimannimidanoo qinau. Faiqí moo fannoo qooma qumbimaree difaani ameemaanai sia minni quqaidanoo beeta ameemaanai sia minni quqaidanoo akooqoo quqaqaifanoo kaaqa qaanifeera.
MAR 4:22 Miqikaimmasee kasooqaqee aiqama kukeeqee mari ainaina oosana oosana Anutufa mareeqee akooqoo quqaannoo aiqama rafaaqa fimari ainaina faqa akooqoo quqaannoo.
MAR 4:23 Innee naaqoo faqaasa iriaqa.
MAR 4:24 Yisufa kafaa maaqi qimasee qimanniminau, innee naaqoo irimari ufanara amiqimandee rakisiaqa. Anee nana ufa fee faiqí anaasee niminanoo Anutufa mi ufanannai kai aninna rafaaqafu amaqaannoo sia aneenna qinnana amana kaifau ani rafaaqafu amaqaannoo fau fiqaramasee ani rafaaqafuamaqaannoo.
MAR 4:25 Faiqí moo ainaina uqaqee marinnana moo faqa Anutufa amiannoo. Faiqí moo fannoo ainaina siainnana kaqikaa ainaina marinnana Anutufa mara marainanoo kaqi samu uqanna mariannoo.
MAR 4:26 Yisufa kaifaa qimanniminoo qinau. Anutuna ququsa maqasaa fasiqa anaaseeki sia akooqoo kambiqaidanoo kukeeqanoo mari ifa kambiqeenoo akooroo idanoo, mifa faiqí moo fannoo narí afuqaki qaqama aaqaidanoora foora kambiqaidanoo.
MAR 4:27 Mi fasiqafa qaqama aaqasee eendaki faiqeenoo faasaana narí ainainai oonuree aniree miqi marifanoo doo qaqama aaqaqaifa doo kambiqafinoo. Mi fasiqafa sia kambiqarana oosana irifanoo narí kai doo kambiqafinoo.
MAR 4:28 Maqa fannoo naamma amifanoo kambiqafinoo qaqama iraidanoo. Indaaru ummaqusainanoo radiqifinoo afumu kambiqafinoo doo urureenoo afufeenaarinoo doo qaqama ireenoo qaqama anoona kambiqaidanoo.
MAR 4:29 Qaqama akuqamafifanoo mi fasiqafa paipana qumaree ateeka maree munu maaqaki quqaidanoo.
MAR 4:30 Yisufa kaqi qimannimidanoo moo quandara ufa qimannimidanoo irammirinoo qinau. Anutuna maqasaa ququsakina faiqí anaasee mariasa nanara fooree maridee. Nana quandara ufannai fee kooroo ianauree.
MAR 4:31 Qinee maaqi qimasee qimannimianaura, qumini qaqama fooqaana kaqikaana faiqí moo fannoo mina maramareenoo ummaqusainanoo kambiqafinoo firaa tia saqariara foora aiqama aakaaqakinaa andanda uriqararafa maridanoo. Mina asaana firaanaikinanoo ufini aniree mina asaana auqaanai aanaamu usakaidaqa.
MAR 4:33 Yisufa narí ufa oosana oosana quandara ufakiqari faiqí anaasee nári irirana amana kai qimanniminau.
MAR 4:34 Sia sia quandara ufakiqari qimanniminau quandara ufakiqari kai qimannimi marinau. Mifa narí faiqi namufaqa naaduma marunnai minni mi quandara ufana oosana kooroommanniminau, maqee maqee miqimmi marinau.
MAR 4:35 Mi faasaanna eenoofanoo Yisufa narí faiqi namu qimanniminoo qinau. Doo anifaqa sipaki akaramafinaqa Kariree farummaki fitaqamareeqa muqafainni nianai fuaqa.
MAR 4:36 Misa eedoo qimasee faiqí anaasee minnisee Yisufa ooqu marunaki akaramafufaqa Yisuna afiqee farumaki fiqau, akaqausa mariqa kanuqaki misa saimbaqa fiqau.
MAR 4:37 Misa faruma qambaanai fimarufanoo ufai firaafa uqinoo nammari amakaurufanoo sipaki nammari teeqinoo qumbiqararinau.
MAR 4:38 Yisufa kanuqa atinni akiaqa qunusaa rumasee faiqaqeeufaqa mina faiqi namu rufiasee aniree afaurida qiqau ufasaa rakisirafa findifua maasa kaqi kaaqoo nammariki ukuqnaidaqa kuqirarammidaqa anee sia fee maasara iridanee.
MAR 4:39 Yisufa findifinoo ufaira doo saa qimasee nammariara amakaura doo taikaa qufanoo ufai uqirafa taikeenoo nammari amakaurirafa taikafinoo doo firaaqoo dai qimafinau.
MAR 4:40 Dai qimafufanoo Yisufa quandakinoo narí faiqi namu niqidanoo qimanniminoo qinau Innee nanaree rufiaidee. Innee qini saqarikirafa siaisee maridee qufaqa misa firaaqoo rufiasee naaquqoofaqa narí qimami narí qimami qiqau. Maa fasiqafa nanee, sia faiqí faqa afaannauqa faqa kai mina ufara eedoo qidaqa, ufai faqa nammari faqa mina ufara eedoo kai qidaqa.
MAR 5:1 Doo miqooqari kanuqa fannoo Kariree farummaki fifiufanoo nammari dinnafai nianai Keerasa maqannaasa maqa maaqa munu raquru aminau.
MAR 5:2 Yisufa kanuqakiqari maqasaa aqufufanoo faiqí moo faafasaaqa aunduraki marufa Yisufinnai aniranau.
MAR 5:3 Mi fasiqana maqannaasa faiqí iri mara maraida ooni aamarai akundee mariqau. Mi fasiqafa mi ooni aamaranaki faiqee marufa marinau. Moomoo kari misa mina qumareeqa sainandannai mina aiku asauku rumba quqasoofanoo afeekaikamandeenoo asaukusaaqaraa sainanda rakeemma aquseenoo aiku rumbaqoo sainanda turi mandee mina rakeemma aqusoofaqa sia amana mina qumaree mariqau. Mina afeeka uriqaranoo marunara misa sia amanaikiqa minnisoofanoo faiqí madikamaqoonakiaqa faqa aaqana aaqanakiaqa faqa faaqa quqanoo nidanoo oonisamu qumaraidanoo narí afaaqa ateekanoonufa marinau.
MAR 5:6 Yisufa kanuqakiqari aniroofanoo mi fasiqafa ooni aamaraki nianaindari Yisuna qafamaseenoo sandee anireenoo Yisuna oorinni aqoori saunara finoo oorindari firaa kari faaqa quqaseenoo Yisuna aaramaseenoo qinau. Oo Yisufa anee firaaqoo uriqarara Anutuna amaaku mariananoo. Anee nanaree maasa soodaa qidanee. Qinee afeekaikamandee ani qimamidaqa. Anee Anutunara irisee sia qini darua.
MAR 5:8 Mi fasiqafa sia fifau miqi qinau. Yisufa mina aundurakinaa afaannara anee manda afaanna maa fasiqana aundurakiqari rafudamaki fua qunara mi fasiqafa miqi qinau.
MAR 5:9 Yisufa mina ufa iriseenoo irammirinau ani auqu yafee qufanoo mi fasiqana aunduraindari afaanna fannoo qinau. Maasa moomoosa qusidaqa marunnanara maasa duqu qusirausee qidaqa.
MAR 5:10 Miqi qimasoofanoo afaannauqa faqaa fasiqa fannoo narí aundurakinaa afaannauqara kafaa kafaa Yisuna qimaminau. Sia maa maqa maaqanakiqari misa niqiqaa. Miqi qimaseenoo Yisuna qimamimarufanoo. Mi nammarina afainni ameemai adeedi kuara moomoo andanda neemariqau. Mi fasiqana aundurakimari afaannauqa kuarauqara Yisunara afeekaikiqa qiqau maasa diqiqannee qimasee diqiqainaqa kuarauqa naunduraki fua qufanoo Yisufa doo fuaqee qufaqa mi afaannausa mi fasiqana aundurakiqari rafudamakufaqa kuarauqa naunduraki keeqaqau. Kuarauqa naunduraki keeqoofaqa mi ameemanaindari sandamaqaraasufaqa farummaki bururu qufaqa aiqama kuqu taikaqau. Mi kuarausa tu tauseenna (2,000) kuara mariqau ooni saqari auqiqa mariqau nukudara foora mariqau.
MAR 5:14 Mi kuarausasaa rakisi maru fasiqausa mi kuarausa nindafamasee quqasee sandamaqaraasamasee maqusai marusa faqa uiqaana maaqakiaqa marusa faqa qimannimiqau. Qimannimisoofaqa aiqama qafararee qimasee aniree qafoofanoo moomoo afaanna aundurai mariu fasiqafa andeeqasee qamunna afisusee irirana marasee miqoo ooqumari fi marufaqa ani qafoofanoo naaquqee naindiri ranau.
MAR 5:16 Faasai mariusa Yisufa afaanna niqiqoona faqa kuara nammariki aqufunara faqa qafoosa misa maqusaindari aniroosa aiqama ainainara qimannimisoofaqa misa iriseeqa Yisunara rufiaseeqa mifinnai ooquree kafaa kafaa irammiridaqa qiqau maasa maqa maaqakiqari amanee anee finnaree qiqau.
MAR 5:18 Yisufa eedoo qimasee kanuaki akareemarufanoo afaanna aundurai mariu fasiqafa Yisunara afeekaikamaseenoo irammirinoo qinau amanee qinee ani faqa funauree qimasee fuki faaki qinau.
MAR 5:19 Yisufa irisee qaoo qimasee qimaminoo qinau. Anee aneenna maaqai anirandee oonureenana aneenna anoona akoona atiuqa qinee karaambaiqa ani firaaqoo dadaaqunnanara faqa firaaqoo aniara amuqusunnara faqa qimannimia.
MAR 5:20 Miqi qimasoofanoo anirandee narí maqa maaqai oonuree qisaukuqara taikasee maqusanaasee qimarusa aiqama qimannimimaree fiqu fiqu qidanoo Yisufa dadaaqunara qimanniminoo nimarinau. Aiqamausa mi ufana irimarusa firaaqoo naaquqoofaqa naindiri roofaqa oo kuqaa fee miqinoo fee qiqau.
MAR 5:21 Yisufa miqooqari kanuqaki akaramafufanoo nammari taqamaree dindanai kafaannai finau. Miqoo oonuroofaqa faiqí anaasee moomoosa Yisuna ani mara ititasaqau.
MAR 5:22 Mi maqusanaki amaana maqasaa rakisimaru fasiqafa mina auqu Iairusafa anireenoo Yisuna oorini maqasaa aqufufanoo afeekaikamandee fuki faaki qinoo irammirinau.
MAR 5:23 Qini qiraamuna kaqikaa qiraamuna aurimarifaqa amanee anee anireenana aneenna asauku minasaa quqasainanoo findifuani kuquandoora qufanoo Yisufa mina faqa findifi finau. Fimarufaqa moomoosa titiqimafufaqa fidanoo misa rusadeesamumandee fimarinau.
MAR 5:25 Miqoo misaki anaasee moo marinau. Qisaukuqara taikasee qikuni ooqu qaara marasee aukuana kisaaqandaikimaru anaaseefa marinau, mifa moomoo tutaqausunnai fimarufanoo sia andeeqoofanoo firaa teeroo quqaranaki marinau. Mi anaaseefa tutaqausunnai narí munnimma maqee maqee aqii taikasoofanoo sia mina aurirafa taikanau maqee maqee firaanaikinau.
MAR 5:27 Mi anaaseefa Yisuna afeekara iriseenoo faiqí aanaaseekiaqa qumee mina aanaaqiannai oonuree maaqi qimasee irinau, qinee oonuree mina qamunna kai auqamasaananoo mina afeeka fannoo qini aurirana taikaqisaannoo. Miqi qimasee faiqí anaasee titiqimafufanoo aanaaqianaindari misakiaqa rusandeesamu mandeenoo ani mina qamunna ati kai auqamasoofanoo narí aundurakiqari fidika reereeufa taikanau, narí aurirafa taikaranara narí irinau.
MAR 5:30 Yisufa narí faiqí andeeqara afeeka narisaaqari funara iriseenoo faiqí anaasee qambaanai quandafi irammirinau yafee qini qamunna auqeenoo fee qufaqa narí faiqi namu qimamiqa qiqau, moomoosa ani ititafuanakina nanaree anee yafee qini qamunna auqee maqi qidanee moomoosa ititafuanaki fimarinanoo.
MAR 5:32 Yisufa sia misa ufa irinau kaqi randee marinau.
MAR 5:33 Mi anaaseefa narí aurirafa taikoonara iriseenoo aindirireenoo aaquqoofanoo Yisuna aikuki oorindari ani kummaramafufanoo aiqama anoona ufa kai qimaminau.
MAR 5:34 Yisufa iriseenoo qimaminoo qinau Oo qini qiraamuna aneenna irirana qinisaa rusimarianafa mifa kai ani andeeqeenoo doo asooaranaki fua ani aurirafa doo taikeenoo. Miqi qimarufanoo Iairusana maaqaki marusa aniree Iairusana qimamiqau sia ufasaa rakisirana kadaapi arua doo ani araamuna kuqufinoo.
MAR 5:36 Yisufa sia misa ufa irinau. Iairusana qimaminoo qinau, Sia rufiaa, qinisaa kai aneenna irirana mundua qimasoofaqa aiqama mina faqa aniusa aiqama Iairusana maaqaki keeqararufanoo Yisufa qaoo qimaseenoo narí faqa Peetooroona faqa Yameesafa faqa mina akaqa Yoohaneefa faqa doo minamusa kai Iairusana faqa nifiqamareenoo Iairusana maaqaki ooru fiqau.
MAR 5:38 Misa Iairusana maaqai oonuroofanoo Yisufa faiqí anaasee ikifaafau qirana faqa faaqa fuisee qirana faqa munari minari qirana faqa nindafamaseenoo maaqaki keeqafinoo qimanniminoo qinau. Nanaree munari minari ida fee qikiraqaidee maa faiqifa sia kuqinoo maridanoo faiqaqee idanoo.
MAR 5:40 Misa minara irisee Yisunara naanaidara qimasee uteeti qufanoo Yisufa aiqama niqiqamaseenoo faiqi anaukoo faqa mina aiku asauku qaaramoo faqa maanaaqa kuqiraqoo nifiqee keeqanau.
MAR 5:41 Yisufa mi kuqira manaaqana asauku qumareenoo nári ufakiqari kaqikaa manaaqa qinee ani qimamidaqa doo findi fua qimasoofanoo mifa aaqee findifinoo doo ninau. Minaki marusa mina qafamasoofanoo naaquqeenoo naindiri ranau. Mi manaaqafa qisaukuqara taikasee qikunni ooqu qaara aukuana marasoo maanaaqafa marunara naaquqanau.
MAR 5:43 Yisufa afeekaikamasee qimanniminau innee maa manaaqana andeeqaqaunnufana umeeraaqee qimasee quandaki maanaaqara qinau maa manaaqana narana amifanoo naani qimasoofaqa miqimmiqau.
MAR 6:1 Yisufa mi manaaqana mara findifummaseenoo miqooqari findifinoo narí maqusai Nasareetinni finau, narí faiqi namufaqa mina faqa fiqau.
MAR 6:2 Nasareetee maqusai Yuda maqannaa marunara nariqa amaana Saririqasaa amaana maqaki keeqafufanoo Yisufa Anutuna ufa qimannimi marufaqa misa irisee tautumasee qiqau. Maafa maa amiqira iriranna yai fee mareenoo fee, yafee maa irirana aminoo fee naqimasee faiqí sia auquaqaa ira ainaina auqidanoo fee.
MAR 6:3 Maasaki kamundaa mariifa mifa kai maridanoo, mina anoofa Mariafa maridanoo maaqooqaraa anaasee faiqi maridanoo, mina akaqaafasaauqa Yameesana amarafa faqa Yooseesa faqa Yudasina amarafa faqa Simoona amarafa faqa maaqooqaraasa marifanoo Yisufa misakinaafa maridanoo. Mina asooqmaaka faqa maaqookai maridaqa. Misa minara miqi qimasee nikoo fee qiqau.
MAR 6:4 Yisufa mina iriseenoo maaqi qimasee qimanniminau. Tamummaqara fasiqa moo fannoo maqusa maqusa fidanoo qimanniminaqa misa iriseeqa mina ufara kuqaa fee qifaranoo narí maqannaasa faqa narí ainaina faqa narí moodaa fasiqa anaasee faiqi faqa mina ufa siamma irifaranoo.
MAR 6:5 Yisufa narí maqannaasara miqimmidammia maqi qimasee sia amana moo fasiqa anaasee mandaikirausa andeeqannimaqararee qinau. Qaaramoo aurusasaa kai asauku quqasoofaqa findifiqau. Narí maqannaasa nári irirana sia minasaa mundunara irisee firaaqoo tautinau. Yisufa miqoo narí maqusai Nasareeteendari dinni dinni fiqu fiqumma marusa misa qimannimimarinau.
MAR 6:7 Qimannimiseenoo narí faiqi namu naarama quqaseenoo manda afaanna faiqí anaasee naundurai marusa misa niqiqara afeeka nimiseenoo qaaraqanda qapamandee qaaraqanda qapamandeenoo qimanniminoo qinau, Sia moo ainaina maree fuaqa saunu kai qara maree fuaqa, feemu faqa uqa faqa munnimma faqa sia maree fuaqa, niku aanaamu afisumareeqa siuta moodaa afisumaree sia aabaa moo maraaqa.
MAR 6:10 Innee maqusa maqusa fidaqa moo maqusaki oonu raifanoo mara quqainna maaqanaki quqasaina sia namummaqaqa nuaqa minaki kai faiqaida nuaqa, minakiqari moo maqusa fiqa fuaqa.
MAR 6:11 Innee moo maqusai fifaqa misa sia inni mara quqeeqa sia inni ufa irifaqa innee fidaqa kookoomma afaqa ninaamarasee fuaqa. Innee miqiqa Anutuna naruaninnanara misa aaquqima nimaqeefaranoo. Yisufa miqi qimaseenoo niqiqoofaqa maqusa maqusa fidaqa faiqí anaaseera nári mandainainara nimeesuquaqeera qimannimiqa fiqau.
MAR 6:13 Qimannimidaqa moomoosa naunduraki afaanna faafasaaqa marusa niqiqamannimi marufaqa rafudamakida fimariqau. Miqiqa fidaqa aurusa nikiaaqa sauna fadameenara fooqaana adiasoofaqa findifi mariqau.
MAR 6:14 Yisuna aufakiana ufa fannoo aiqama atinai daraanimambunara Eeroodeefa mi ufana faqa iriseenoo tautinau. Akaqausa Yisunara Yoohaneefa nammari nimimarufa kuqiranakiqari findifinoo firaa ainaina auqeemari fee qufaqa akaqausa Yisunara Eeriaafa ooqeenaa tamummaqara fasiqa mifa kaifaa kambiqanoo maridanoo fee qufaqa akaqausa ooqeenaa tamummaqara fasiqa fooqaafa kambiqanoo maridanoo fee qiqau.
MAR 6:16 Eeroodeefa mi ufausa iriseenoo narí qinau, Qinee ooqai Yoohaneena nammari nimimaruna anuka ateekasaafanafa mifa kai kuqiranakiqari anida qinoo.
MAR 6:17 Ooqai Eeroodeefa narí kai qimannimufaqa sundiauqa Yoohaneena nammari nimimaruna rumbamaree karabusa maaqaki quqaseeqa firaa sainanda qumareeqa rumba quqasoofanoo marinau. Eeroodeefa sia fifau Yoohaneena mareeqee rumbaranaki quqanau.
MAR 6:18 Yoohaneefa nammari nimimarufa maqee maqee anaasee qummuarunasaara aqunara rumba quqanau. Eeroodeefa narí akaqa Firipina anaaqa Eeroodia nammarina kaqi narí afaaqi faqa marufanoo qummuarunara Yoohaneefa qimaminoo qinau Anee aneenna akaqa anaaqa Eeroodia nammarina qummuaramminana maraananoo Anutuna ufa rukiasee miqiananoo.
MAR 6:19 Eeroodia nammarifa Yoohaneena ufa irisoofanoo afaaqai kaqi ati qanoo marufanoo maridanoo mina ariranara randee marufanoo Eeroodeefa qaoo qufanoo sia arinau.
MAR 6:20 Eeroodeefa Yoohaneenara irirana andeeqara qikairi siai fasiqa fee qimasee minara rufiaseenoo karafusaki seenoo ititasoofanoo sia Eeroodia nammarifa arinau. Eeroodeefa maqee maqee Yoohaneena faqa ufa qiranara aidi marufanoo maqee maqee Yoohaneena aaramasee ufa qimamimarinau. Yoohaneena ufa fannoo Eeroodeefa maqee maqee Yoohaneena faqa ufa qufanoo Yoohaneena ufa fannoo Eeroodeena raquramufanoo aqu ufafa afaaqai ati qanoo marunara siamma irimarinau kaqi maqee maqee Yoohaneena karabusaki marunna aaramasaida ufa narí qimami narí qimami qimariqau.
MAR 6:21 Doo anaasee Eeroodia nammarifa rakisinoo fifiufanoo aruaninna faasaana paqurinau. Mi fasaanna faiqí Eeroodeefa Eeroodia nammarina afaaqi narí anoofa narí maqoo faasaannara iriseenoo qoomaqa firaana suqaseeno kaamanna uriqararausa faqa sundiauqa uriqararausa faqa Kariree maqa maaqaki faiqí firaasa faqa naaramasoofaqa anireeqa nee mariqau.
MAR 6:22 Misa nee marufanoo anaasee Eeroodia nammarina araamuna fannoo anireenoo misa noorinni idi amiqirana raidanoo aqoori raqee marinau. Aqoori raqee marufaqa misa irufanoo adiafaa qufanoo Eeroodeefa qoomaqa nimiufa mi manaaqana aaramasee aiqamausa nifusaa qimaminau, ani amiqira idi akiaqara nana ainainee qinaqee amianauree qinau. Sia kai ufa kai qinau narí amana naaree aqiqamaseenoo qimaminau, Anee nana ainainaree aididanoo fee anee qinaqa mi ainainna ani amianaura. Anee Kariree maqa maaqa dinni rakisianee qinaqa qinee qambaana oosusee dinni ani amianana anee misasaa rakisia qufanoo narí anoofinai oonureenoo qinau, nanaree qimamianauree qufanoo mina anoofa maqee Yoohaneefa nammari nimi marifa kuquanifee qimasee Eeroodeenara qikaru qiandoo qimaseenoo akiaqa tupumma maree minisaifaqa qeeqa qifunnoo mina qafamasee kuqaa kuqiifoo qianauree qimasee narí araamuna qimaminau. Yoohaneefa nammari nimimarina mina anuka ateeka maree mina akiaqa mini qimiaqeera kai qia qufanoo mina araamuna fannoo anirandeenoo sandee oonureenoo Eeroodeena qimaminoo afeekaikamandee qimaminau anee maqee uqanna Yoohaneefa nammari nimimarina anuka tuqusee fidika maaqamau iandoora qimasee saqari difaaniki akiaqa quqasee mini qimiannee qufanoo Eeroodeefa firaaqoo uqanna akooqamafinau.
MAR 6:26 Akooqoofanoo sia amana qaoo qinau. Aiqamausa nifusaa narí amana aqiqamasoonara asauruseenoo narí sundia moo aqiqoofanoo karafusa marunaki oonureenoo Yoohaneena anuka ateekaseenoo saqari difaaniki mina akiaqa quqaseenoo maree mini Eeroodia nammarina araamuna amufanoo mifa mareeqeenoo narí anoona aminau.
MAR 6:29 Yoohaneefa nammari nimimaruna faiqi namu mifa kuqunara irisee ani mina iri maree munu akundaqau.
MAR 6:30 Yisufa narí faiqi namu niqiqoofaqa maqusa maqusa nidaqa qimannimunara faqa auqoonara faqa Yisuna mini qimamiqau.
MAR 6:31 Qimamimarufaqa faiqí anaasee moomoosa aniree qumbiqafunara narana narafa sia amanaikufanoo Yisufa narí faiqi namu maaqi qimasee qimanniminau. Aniaqa innisaimbaqa faiqí sia mariannai oonuree idooaaqa. Miqi qimaseenoo narí faiqi namufaqa nammari afainni ooquree kanuqaki akaramafufaqa nammari amuaqumau fiqau.
MAR 6:33 Faiqí anaasee moomoosa nindafamaseeqa oo Yisufammi maqi qimasee nári maqusaki nári maqusakiqari oonu maree ani mareeufaqa Yisuna kanuqa fannoo munu maqanamu raquru amufanoo nindafoofaqa faiqí anaasee moomoosa faasai afainni qusi mariqau.
MAR 6:34 Yisufa kanuqakiqari maqasaa aqufinoo faiqí anaasee moomoo nindafamasoofanoo firaaqoo amuqusufanoo qinau. Oo maaqoo mariasa sipsipa aandaurafoora rakisirafa siaisa mariafanoo fee qimaseenoo Anutuna ufa oosana oosana ainainara qimanniminau.
MAR 6:35 Eenoofaqa Yisuna faiqi namu Yisuna qimamiqau, doo eendidanoo anee niqiqainaqa kaqikaa maqusakiaqa narana feefauriaqa maaqoo faiqí siaiqoo maridanoo fee qufanoo Yisufa qinau inneeqa kai narana nimiaqa qufaqa misa qiqau, maasa sia amanaikianaura maasa moomoo ooni mareeqa oonu moomoo feemu feefaurumasee minisee nimianaqa naifanoo sia amanaikiannoo, maasa sia amanaikidaqa qufanoo Yisufa qinau. Inni feemu naqummee maridanoo oonu qafaaqa qufaqa misa oonu qafamaseeqa aniree qimamiqau, maasa feemu moodaanai qisaukunamu, noodaanna qaaraqanda faqa maridanoo fee qufanoo.
MAR 6:39 Yisufa qimanniminoo qinau. Innee faiqí aanaaseera qifaqa misa raina rainamafinaqa naadu naadu ruumbaku finaqa qusau rasoonookamasee ooqumari maree fuaqa qufaqa faiqí anaasee eedoo qimasee ruumbakiranakiqari padimambufaqa ooqu marifiqau. Akaqa ruumbakiranakiqari wan handareeta mariqau akaqa ruumbakiranakiqari qaara fasiqa niku nisauku taikasee qisaukuqara taikasee fasiqa anaasee mariqau.
MAR 6:41 Ooqu marifufanoo Yisufa mi moodaannai qisauku feemuna qumaree noodaannaqara faqa qumaree sandaaqai oori uqeerasee Anutunara dufi dufi qimaseenoo mi feemuna ruqi ruqi mandeenoo narí faiqi namu nisaukuki quqasoofaqa faiqí anaasee ooqu mariranakiaqa nimi maree fimariqau. Yisufa miqikai inoo noodaanna faqa ruqi ruqi mannimufaqa mina faqa nimi maree fufaqa noofanoo nimuaqufaqa akaqana kaqi quqaqau.
MAR 6:43 Yisuna faiqi namu mina ataraasa qumaree qisaukuqara taikasee qikunni ooqu qaara marasee uqa qumbiqaqau.
MAR 6:44 Mi naranna nee marusa faifa tauseenna fasiqa mariqau, anaasee faqa faiqiuqaindi faqa mariqau. Ooni saqari auqusee moomoo uqanna mariunara faifa tauseenna fee qinoo maridanoo.
MAR 6:45 Yisuna faiqi namu narana ataraasa mara maroofanoo Yisufa narí faiqi namuara afeekaikamandee fuki faaki qinoo niqiqoofaqa misa mina afunni kanuqaki akaramafi Beetasaida maqusai nammari dinni afainni fiqau.
MAR 6:46 Misa fimarufanoo Yisufa faiqí anaasee niqiqamasoofaqa fufanoo mifa narí faiqi namu nimanda maseenoo naríara amuaqunamusaa ooru maridanoo Anutunara innaaru qimarinau.
MAR 6:47 Eendufanoo Yisuna faiqi namu kanuqaki nammari qambaanai nimarufanoo Yisufa naríara maqasaa maridanoo misa nindafoofanoo ufai fannoo misa noorindari anidanoo kanuqa mara furufarimarufaqa purannai puridaqa kadaapindi mariqau. Inaaqiana kookooraana ufaqi maru kamuqoo Yisufa misunnai fidanoo nammari amuaqumau aiku ramasee finau. Mifa kanuqakinaasa finnaaqareera foora fimarufaqa Yisuna faiqi namu afaanna fee qimasee rufiasee faaqariqau.
MAR 6:50 Misa faaqarumasoofanoo Yisufa qimanniminoo qinau. Sia maparaa iaqa nifaaqa quqasee kasooiaqa qineemma anidaqa. Yisufa miqi qimaseenoo misa faqa kanuqaki akaramafufanoo misaki ooqumari fufanoo ufai fannoo taikafinau. Taikafufaqa Yisuna faiqi namu maparaa iqa naundura faqa furufariqau.
MAR 6:52 Yisufa moodaanai qisauku feemu ruqi ruqi mandee nimufaqa noofanoo amanaikunara mina faiqi namu sia mina anoonara andeeqasee irusa maridaqa nammari amuaqumau anunara faqa sia iriqau.
MAR 6:53 Misa miqooqari kanuqaki nammari amuaqumau fiqa munu maqa raquramufaqa fitaqa mareeqa mafi kanuqa qususeeqa doo Keeneesareeta maqa maaqammifoo qimaseeqa kanuqakiqari aqufiqa maqasaa oorufufaqa misaqa marusa miqooqaraasa Yisufammifoo qimaseeqa sandeeqa maqusa maqusa qimannimufaqa nariqa aurimarusa qaarisa rumba maraidaqa yatinnai fee Yisufa fuannoo fee qimasaida aurimariasa qaarisaa rumba maraidaqa Yisuna oorinni mini quqee mariqau.
MAR 6:56 Yisufa ya maqusanai fee ya taunnaki fee ya ainaini marunaki fee finau nári aurimarusa nifiqa maraidaqa mifa funnai munu makeetaki firaa saqa marunaki quqasee Yisunara nári nimuqusa ookiqari firaaqoo qimamiqau. Maasa sia kadaapi amirara qimamidaqa aurimariasa ani qamunna ati kai auqamasaida findififara qidaqee qufanoo Yisufa eedoo qufaqa mina qamunna auqee marusa amiqi mandee findifi mariqau.
MAR 7:1 Farisai amaana ufa qimarusa faqa Mooseena sandufa akoofasauqa faqa faiqí anaasee narana nararee qimasaida nisauku nammari uqidaqa miqi fee maaqi fee qimasaidaqa fifau sandufa oosana oosana quqee mariasa mariqau. Misa Yeerusaree maqusaindari qumuree ani mara Yisuna uqufufaqa nindafoofaqa Yisuna faiqi namu narana neemariqau sia Farisai amaana ufa qimarusa nisauku nammari uqirainni kaqi nee mariqau.
MAR 7:3 Farisai amaana ufa irimarusa faqa Yuda maqannaa aiqamausa faqa nári ninaaku nitaatoosa naanna raidaqa aiqama kari nisaaqusaida narana nee mariqau, sia nisaaqusee sia narana nee mariqau.
MAR 7:4 Makeetaki maree maru ainaina nammari uqusee suqasee nee mariqau, misa sia minara kaifau miqi qimariqau oosana oosana ainainara miqi qimariqau. Misa kaafauqa faqa susufinauqa faqa disauqa faqa faiqara qaari faqa nisauku faqa miqimasee maaqimasee nammari uquaqee qimarufaqa miqiqa fidaqa akeekamasaida miqi mariqau.
MAR 7:5 Farisai amaana ufa qimarusa faqa Mooseena sandufa akoofasauqa faqa kaaqa firaaqoo minauqara fuki faaki qimarusa marunaki Yisuna faiqi namu sia nisaauqirai kaqi narana noofaqa qafamasee Yisuna aqiqa qiqau. Naqee fee qifaqee ani faiqi namu maasa qikeeku qikaaku oosana minnisee sia nisaauqirai kaqi narana naida fee qufanoo Yisufa qimanniminoo qinau. Ooqeenaa tamummaqara fasiqa Esaiaafa andeeqasee inniara tamummaqaseenoo inniara manda qaara irirana maree mariasee qinau. Mifa inniara maaqi qimasee Anutuna ufa akara rinau. Maa fasiqa anaaseesa nifauru fannoo kai unnaqimasee qini duqu uqeeree mariasa, nimusa kaqinni ubeekarausa mariafanoo.
MAR 7:7 Misa faiqí qimaria sandufana qumaree unnaqimasee Anutuna sandufammifoo qimasee faiqí anaasee naamuaqidaqa. Miqi qimasaidaqa Anutunara innaaru qifanoo siammiriannoo.
MAR 7:8 Yisufa mi tamummaqara fasiqana ufa qimannimiseenoo narí maaqi qimasee qimanniminau. Innee Anutuna ufa mafi quqaseeqa faiqí aaquqira ufamau kai fimariasa mariafanoo.
MAR 7:9 Innee inneeqa kaaqa iriqaraasamandee iriranannai inneeqa faiqí faiqi ufa faiqí anaasee qimannimianee qimaseeqa Anutuna ufa mareeqee ninaaqiannai quqaseeqa.
MAR 7:10 Mooseefa Anutuna ufa qimannimidanoo maaqi qimasee qimanniminau. Inneeqa ninaukoora asasammandee amiqida misa nuqu uqeeraaqa. Faiqí moo fannoo narí anoona akoonara manda ufa qinnana mi fasiqana kuqammarusaaqa.
MAR 7:11 Innee minara maqee maaqi qimasee aaqee mariafanoo faiqí moo fannoo narí anoona akoona dadaaqimarina nimianauree qimasee kafaa oonu mafi irisee sia nimidanoo amaana maqaki quqasee Anutuna amidee qimaria fasiqanara sia aaqaida andeeqaidee qimariafanoo. Miqidaqa Anutuna ufa mafi quqaseeqa inneeqa ufa kai uqeeree mariafanoo. Doo innee Farisai amaana ufa qimariasa miqira aaqara ainaina moomoo uqeeree mariafanoo.
MAR 7:14 Yisufa miqi qimaseenoo Farisai amaana ufa qimarusa niqiseenoo miqoo faiqí anaasee moomoo marusa kafaa naaramaseenoo aniaqee qufaqa aniroofanoo qimanniminoo qinau. Innee aiqamausa qini ufa irisee amiqimmasee iriaraasiaqa.
MAR 7:15 Sia moo ainaina fannoo faiqí anaasee ooki namasainanoo mifa maaqinaki putaamma amaqaannoo faiqí anaasee naunduraindari urimari manda ufafa mifa faiqí putaamma nimaqaidanoo.
MAR 7:16 Innee naaqoo faqaasa kai naaqoo iriani.
MAR 7:17 Doo miqooqari Yisufa narí faiqi namu faqa faiqí anaasee mininniseenoo maaqaki keeqafufaqa mina faiqi namu ooruree mi ufana qimannimunna oosanara iraqau.
MAR 7:18 Iroofanoo Yisufa qimanniminau. Inni irirafa faiqí anaasee irirafa oorudupirausa mariafanoo. Sia fee innee mi ufa oosanna iri fee sia moo ainaina ooki quqasaananoo aundurai ooqufi marifa sia mifa faiqí putaamma nimaqaannoo, sia aunduraki ooqureenoo amuqusakifau keeqaidanoofau sia miqidanoo aranandaki ooqureenoo umiqaraidanoo. Mi ufana qunannai Yisufa aiqama naranara idaaqira fee kai qinau.
MAR 7:20 Yisufa minara kafaa narí faiqi namu qimannimidanoo qinau. Faiqí narí naundurakiqari urimari manda ufafa kai faiqí putaamma nimaqaidanoo.
MAR 7:21 Faiqí aunduraki amuqusa ookiqari manda irirafa kambiqaidanoo faiqí rarisameeqeenoo mandainaina mararanaki quqannisaidanoo, mifa kai rarisameeqeenoo aaqaranaki faqa ainaina ummuariranaki faqa faiqí kuqa nariranaki faqa faiqí anaasee narí ummuari narí ummuariranaki faqa moosa ainainara rirana faqa oosana oosana mandoosana faqa nári nikaruqirana faqa nári nifaaqa kooroo irana faqa nariara nariara rairai qirana faqa nariara nariara munuqi miniqirana faqa narí afaaqa amooqirana faqa furufarira oosana faqa mifauqaindi faiqí naundurakiqari ururee marifa mifauqa kai faiqí anaasee putaamma nimaqaidanoo.
MAR 7:24 Yisufa mi maqa maaqana minniseenoo moo maqa maaqa Tiree maqa maaqaki oonureenoo moo maqaki faiqí anaasee maqee maqee qinee funnanai anunannai ititee mariafaqa sia qiqafaaqee qimasee qumee ireeda keeqanau. Sia mifa amana kukeeqaranaki marinau. Anaasee moo fannoo narí araamuna aundurai qooqeena faafasaaqa marufanoo Yisufa ani marunara iriseenoo aniree Yisuna amuqusa ookiqari dadaaqiranara dadaaqinanoo findifuanifeera mina aikuki maqasaa rumafinau.
MAR 7:26 Mi anaaseefa Siria maqa maaqakiqari Fooeenisia maqusaki kambiqarafa aanaamuru anaasee marufa anireenoo Yisunara qini qiraamuna aunduraki mari qooqeenaa faafasaaqa aqiqainanoo rafudamaki fuani fee qufanoo Yisufa qimaminoo qinau.
MAR 7:27 Maasa Isaraee maqannaa Anutuna faiqi namuara foora mariasa misa naaree narana nimirafa andeeqanoo maridanoo. Faiqiuqaindi narana marasee fainiuqa aqu niminafa sia andeeqanoo maridanoo fee qufanoo mi anaaseefa qinau.
MAR 7:28 Oo maa fasiqa faiqiuqaindi naidaqa ataraasa fainiuqa aniree neemariasa maridaqa. Kuqaa qinee aanaamuru fainiara foora maridaqa ataraasara kai qinee innaaru qidaqa.
MAR 7:29 Miqi qufanoo Yisufa qimaminoo qinau anee mi ufana qiannana akiaqara doo ani maaqai fua. Doo ani faiqi aunduraindari doo faafasaaqa rafudamaki finoo qufanoo mi anaaseefa narí maaqai oonuree qafoofanoo doo mina araamuna qaarisa faiqaqee marufanoo kuqaa faafasaaqa rafudamaki fifinau.
MAR 7:31 Miqooqari Yisufa Tiree maqa maaqaki minniseenoo Sidoona maqusai keeqafi fiqummakufanoo Kariree farumma afainni ooqu ranau. Ooqu fidanoo qisaukuqara taikasee maqusa misaqa marusa finnaaqareenoo fimarufaqa akaqausa faiqí moo aaqoo aunirana ufa qirara mammaqi maruna afiqamaree mini Yisufa maruqoo mini quqasee aranaiqi qimamiqau. Anee maa fasiqanasaa aneenna asauku mundusainanoo andeeqaani.
MAR 7:33 Miqi qimasoofanoo Yisufa mi fasiqana mareeqeenoo faiqí anaasee moomoo marunara iriseenoo kaqi atinai quqaseenoo narí asauku amuka faiqí aaqoo aamarai upeekaseenoo qaqaara fidiseenoo mi fasiqana amaakiri asaukunnai auqamaseenoo oori innaarunai uqeeraseenoo nupi nupi qimaseenoo narí ufakiqari qimaminoo qinau eefafata maasa ufakiqari doo ruiqaannee qinau.
MAR 7:35 Miqi qimasoofanoo aaqee kai mina aaqoo ititarafa ruqiafufanoo mina amaakiri rumbarafa idukufufanoo andeeqasee ufa qinau.
MAR 7:36 Ufa qimasoofanoo Yisufa aiqamausa aranaiqi qimanniminoo qinau, sia maanara moosa qimannimiaqa qinau. Yisufa kafaa kafaa qaoo qimarufaqa misa moo faqa moo faqa qimannimiqa fimariqau.
MAR 7:37 Aiqamausa mi fasiqana andeeqoonara irufanoo naaquqamasoofaqa maaqi qiqau. Doo qafaaqa mifa amiqimandee idaaqamandee aiqama ainaina oosana oosana aurirana andeeqaidanoo. Mifa naaqoo auni mariasa faqa andeeqannisaidanoo ufa sia qiasa faqa ufa qirana nimidanoo.
MAR 8:1 Yisufa Kariree nammari afainni kaqikaaqoo ooqu marikufaqa faiqí anaasee suqumaree miqoo ani Yisufa maruqoo usufufanoo ufa qimannimimarufanoo qaaramoo faasaanaikufanoo misa narana taikafufanoo Yisufa narí faiqi namu naarama qimanniminoo qinau.
MAR 8:2 Qinee maa fasiqa anaaseesara qimuqusammidaqa qaaramoo faasaana qini faqa mariafanoo maqee doo narana misaindi sia maridanoo.
MAR 8:3 Qinee sia narana nimirai kaqi niqiqaanaqa fidaqa aanai kudoosaapee foora, akaqausa nianaindari ani maridaqa qufaqa mina faiqi namu irammiriqa qiqau. Maa aadana maqa maaqanaki maridaqa yai fee narana paqurimandee maa moomoo fasiqa anaaseesa nimana nimianauree qufanoo Yisufa irammirinoo qinau inni feemu naqummee maridanoo fee qufaqa misa moodaannai qisauku dinni ani qaara marasee feemu maridanoo fee qiqau.
MAR 8:6 Yisufa faiqí aanaaseera maqasaa aiqama ooqu mariaqee qufaqa aiqama ooqu marifufanoo mi feemuna dinni qisauku taikaseenoo dinni ani qaaraqanda marasee feemu (7) maraseenoo Anutunara dufi dufi qimaseenoo ruqi ruqi maseenoo narí faiqi namu nisaukuki quqasoofaqa aiqama fasiqa anaasee amana kai nimimaree fiqau. Noodaanna kaqikaanauqa akaqana marasee dufi dufi qimaseenoo mina faqa narí faiqi namu nimisoofaqa nimiqau.
MAR 8:8 Aiqamausa neeneesoofanoo nimuaqumminau. Foo tauseenna (4,000) fasiqa anaasee nukudara foora miqoo mariusa nimuaqu inau.
MAR 8:9 Misa namammaree soona ataraasa Yisuna faiqi namu dinni taikasee dinni ani qaaraqanda (7) marasee uqa rumasoofanoo Yisufa faiqí anaasee niqiqoofaqa daraanimambufanoo Yisufa narí faiqi namufaqa sipaki akaramafufanoo nammari amuaqumau moo maqa maaqai Daramanuta maqa maaqai finau.
MAR 8:11 Miqoo Farisai amaana ufa qimarusa Yisuna faqa raiqara ufa oosana araqau. Misa Yisuna ufaanara foora fufusee aruanifeera qimasee Yisunara faiqí sia auqaaqaa ira ainaina auqamasainaqa maasa aniara kuqaa Anutuna faiqifee qianaura.
MAR 8:12 Miqi qimasoofanoo Yisufa narí aundurai qimiridanoo qinau. Akasaa yairee fee inni manda oosana taikaannoo fee, qimaseenoo akooqoo qimanniminoo qinau, nanaree maqee mariasa mookira ainainara maqee maqee findifinaqa qafaanee qida fee, doo qinee qimannimidaqa sia qinee miqimandee Anutuna afeekara kooroomasee uqannifiqaanauranoo.
MAR 8:13 Miqi qimasee Yisufa kanuqaki akaramafinoo Kariree nammari amuaqumau dinni afainai fidaqa kaqi kaaqoo nammari qambaana oonuree mina faiqi namu aafaqara aunusoonara moodaa feemu kai marufaqa aiaaee qiqau.
MAR 8:15 Yisufa naranara aiaaee qunara iriseenoo moo ainaina kikiqa ususeenoo qimanniminau, Innee amiqimmasee aufariaqa, Farisai amaana ufa qimariasa faqa Eeroodeena faqa minauqa feemu ooruku ati qaranara rufieeqa aufariaqee qufaqa mina faiqi namu iriseeqa tautumasee narí qimami narí qimamiqa qiqau maasa aafaqa sia maree anunnanara mi ufanara Yisufa qidaqinoo fee qiqau.
MAR 8:17 Yisufa faasai misa ufa iriseenoo qimanniminoo qinau. Innee nanaree aafaqa sia marinara narí qimami narí qimami qidee Innee sia fee iridaqee. Inni irirafa kaqi fee ummaara raidanoo fee
MAR 8:18 Innee nifu faqaasa sia fee qafaidee, innee naaqoo faqaasa sia fee iridee.
MAR 8:19 Qinee moodaannai qisauku (5) feemu ruqi ruqimmasee faifa tauseenna (5,000) fasiqa anaasee nimiafannanara sia fee innee naaqooki oonumafi iridee, innee mikari naqumma uqee ataraasa uqariqee iqau, qufaqa misa qiqau qisaukuqara taikasee qikunni ooqu qaara marasee (12) uqa riqiafana.
MAR 8:20 Miqi qimasoofanoo Yisufa kafaa irammirinoo qinau kafaa qinee dinni taikasee dinni ani qaara marasee (7) feemu ruqi ruqimmasee maqi tauseena fasiqa (4,000) sia kasoo fasiqa moomoo fasiqa uqanna nimiafanaqa naqumma uqee mina ataraasa riqee iqau qufaqa misa qiqau dinni taikasee dinni ani qaara marasee (7) uqa riqiafana.
MAR 8:21 Miqi qimasoofanoo Yisufa qimanniminoo qinau. Innee mina qafamasee sia fee qini afeekara iridee. Moodaa feemu marifa doo mina mandee nimiana amanaikammiannoo.
MAR 8:22 Misa Beetasaida maqusai aniroofaqa faiqí moo afu dimbarana afiqee anireeqa Yisuna aaramaseeqa qiqau, amanee afu dimbarana auqainanoo fee afu maqaannoo fee qufanoo Yisufa mi afu dimbara fasiqana asauku qumareenoo rarisameeqeenoo maqusa aqoosai quqaseenoo aqaara afuki fidiseenoo asaukuqara minasaa rusiseenoo irammiridanoo qinau, anee akaqa ainaina qafaidanee qufanoo mi fasiqafa oori uqeeraseenoo qinau faiqí qini qifusaa saqariara foora nidaqee qufanoo Yisufa kafaa narí asaukuqara mina afusaa quqasoofanoo mi fasiqafa afu maqasoofanoo mina afu amiqufanoo aiqama ainaina amiqimasee qafanau.
MAR 8:26 Yisufa qimaminau doo aneenna maaqai fua sia maqusai faiqí anaasee moomoo mariaqoo fua kaqinni andandandanai fua qufanoo doo finau.
MAR 8:27 Yisufa narí faiqi namu faqa miqooqari Seesareea Firipi maqusa, mina maqa maaqaki maru maqusanakiaqa finau. Aanai fidanoo narí faiqi namu iranau, innee iriaqa faiqí anaasee qiniara ya fasiqanee fee qidee qufaqa misa qiqau akaqausa aniara Yoohaneefa nammari nimi mari fee qidaqa akaqausa aniara ooqeenaa tamummaqara fasiqa Eeriaa fee qidaqa, akaqausa aniara ooqeenaa tamummaqarausakiqari moo fannoo kuqiranakiqari findifinoo maridanoo fee qidaqa.
MAR 8:29 Miqi qufanoo Yisufa náriara qinau innee qiniara nanee fee qidee qufanoo Peetooroofa qinau anee Anutuna asauku mundirafa mariananoo.
MAR 8:30 Miqi qufanoo Yisufa afeekaikamandee qimanniminau. Doo kuqaa uqanna qiananoo. Sia innee minara qiniara akaqausa qimannimiaqa, umeendaaqa.
MAR 8:31 Miqi quqooqari narí kuquaninnanara oosana arasee narí faiqi namu qimannimidanoo maaqi qinau. Qinee faiqí nimaaku firaa aupurarana maraanaura. Faiqí firaasa aanaiqikirausa uriqararausa faqa Mooseena sandufa akoofasauqa faqa misa qini minniqisee nikooqaannoo. Misa qini kuqa darusaifanoo qaaramoo faasaana aiqarainanoo Anutufa mara qini findifumaqisaannoo.
MAR 8:32 Yisufa akooqoo uqanna narí kuqiranara qimannimunara Peetooroofa irufanoo akooqoonara Yisuna mareeqee aaduma quqaseenoo qaoo qunara Yisufa quandaki narí faiqinamu nindafamaseenoo Peetooroona aqinoo qinau. Oo Peetooroo anee Sadannafa anee see fua, ani irirafa faiqindi maridanoo sia Anutunaindi.
MAR 8:34 Miqi qimaseenoo narí faiqinamu faqa naarama quqaseenoo qimanniminoo qinau, moo fannoo qini faqa fuani qinafa narí maaqoo mariranara minniseenoo qini ufa saara qini daanna ramasee eedoo qimasee kuqiranaki fuannoo.
MAR 8:35 Moo fannoo narí marirana amiqimasee rakisianee qinafa mifa narí marirana kakasiannoo moo fannoo qini saara qini amiqira fasaasa ufa saara kuqarinafa mifa narí marirana asumu maraannoo.
MAR 8:36 Moo fannoo aiqama maqa maaqa rakisiranatia kammafinanoo nariara minakinaa aiqama ainaina maraseenoo narí aunduraindaraana kuridiranaki finoo nana ureeqara fasiqa mariannoo sia uriqararafa mariannoo.
MAR 8:37 Faiqí anaasee kuqufifaqa nana maqasaa taikaaninna ainaina Anutuna amisee naundurakinaana kuridiranakinaana mareeqee asumu mariranakina quqaannoo fee sia amana kaifaa maraannoo.
MAR 8:38 Faiqí anaasee moo fannoo maa maqee maria manda aukuanasaa qiniara faqa qini ufara faqa faiqí nifusaa asaurusee nikooqainausa qinee faiqí nimaaku qeeqa qikoona areenarana namufaqa naaquqara andeeqara qangiroouqa faqa innaarunaindari qumureeqa mi fasiqa anaaseesara faqa qisaurusee qikooqaannoo.
MAR 9:1 Yisufa kaqi qimannimidanoo maa ufana faqa qimanniminoo qinau, innee iriaqa innee maaqoo mariasakiqari akaqausa sia kuqirai kaqi marina kamuqoo Anutuna ququsa afeekaikamandee qumirana innee mina qafeefaranoo. Sia taikara faasaanara qidaqa kaqi kasaaqaindari qumiranara qidaqa.
MAR 9:2 Doo miqooqari dinni qisauku taikasee dinni ani moodaa marasee afuru faiqeenoo doo findimeeqeenoo Yisufa Peetooroona faqa Yameesana faqa Yoohaneena faqa doo minamusa faqa aaqana kisaaqasaa nifiqamaree oorureenoo aadumasaa sia faiqí maruqoo oorureenoo miqoo misa nifusaa Yisuna afaaqa qamunna moo kammafinau.
MAR 9:3 Mina qamunna aiqama dupuqa aruaqufufanoo aiqama eekara aruaqufufanoo nifu faqa daroo daraa inau. Sia maqasaaqaraa fasiqa amana qamunna miqimandeeqa nammari uqusaifanoo eekara arinoo dupuqara maqi aruaquannoo.
MAR 9:4 Eeriaasa faqa Mooseesa faqa ooqai tamummaqara fasiqaqanda maridaqa kuqiqa ooru fuqanda miqoo aaqanasaa Yisuna faiqinamu nifusaa kooroomafufaqa Yisuna faqa ufa qimarufaqa Yisuna faiqinamu nindafaqau.
MAR 9:5 Nindafaidaqa firaaqoo maparaaida rufiaidaqa ufa qiranara randee marufanoo Peetooroofa Yisuna aaramaseenoo qinau Oo ufasaa rakisira maasa maaqoo marunanoo amiqimminoo amanee maasa maaqoo uqiqaana maqa qaaramoo auquanauree, aniara moo Mooseenara moo Eerianara moo usakaanauree. Rufiaqa rufiaqidanoo ufa qiranara randoosia miqi qinau. Miqi qimasoofanoo asuru fannoo anireenoo aiqama misa dukunimaqasoofanoo asurukiqari ufa moo kambiqeenoo maaqi qinau. Maafa qini qimuqusira qimaaku marifa, innee mina ufa kai iriaqa.
MAR 9:8 Yisuna faiqinamu mi ufana iriseeqa kaqi kaqi miqoo munu randee mini randee ufanoo, sia faiqí miqoo marufanoo Yisufa kai miqoo misa faqa marinau.
MAR 9:9 Mi ainainafa taikoofaqa misa Yisuna saimbaqa mi aaqannasaaqari ooqu fimarufanoo Yisufa maaqi qimasee afeekaikamandee qimanniminau. Innee meerai aaqanasaa qafaanara ooquree sia uqanna qimannimiaqa. Qinee faiqí nimaaku kuqiranakiqari findi fuannaqoo miqoo kai qimannimiaqa.
MAR 9:10 Mi faiqinamusa eedoo qimasee sia qimannimiqau, Yisufa kuqiranakiqari findifuaninnara minara kai narí qimami narí qimami umee kai qimariqau. Misa miqi qidaqa Yisuna iramiriqa qiqau, Mooseena sandufa akoofasauqa minakiqari maaqi qidaqa. Faiqí moo fannoo Eeriaafarafoo qira fasiqa mifa naaree findifumafinanoo miqooqari Anutuna asauku mundirafa kambiqaannoo fee qidaqa. Misa miqi qidaqa nanee fee qidee miqi qidee qufanoo Yisufa maaqi qimasee qimanniminoo qinau.
MAR 9:12 Kuqaa Eeriaafara maqi kambiqafinoo asauku mundirausa qinee aniannanara deedaqinoo. Doo qinee inni qimannimidaqa. Doo Eeriaafara maqi moo auqu Yoohaneefa nammari nimimarufa doo ooqai kambiqafi marufaqa faiqí anaasee akaqausa sia irirai tamummaqarausa ufamau fiqa nári manda nidiranakoo mareeqee mina kuqarusaqau. Qinee kafaa innimma irammirianaura tamummaqara fasiqauqa nanaree misa faiqí nimaakuara aupurarana firaana amiseeqa mareeqee aquseefaree.
MAR 9:14 Misa miqi qimammaree aaqanasaaqari ooqu fiufaqa Yisuna faiqi namu akaqausa sia ooru fusa maruqoo ooqu paqurimasee faiqí anaasee moomoosa suqimarufaqa ooqu nindafaqau. Mooseena sandufasaa rakisimarusa akaqausa miqoo faqa maridaqa Yisuna faiqi namu faqa ufa rainee mariqau.
MAR 9:15 Faiqí anaasee Yisuna qafamasee tautumasee sandee mifunnai oonureeqa amandaqau.
MAR 9:16 Yisufa anireenoo narí faiqi namu qimanniminoo qinau, nana ufaree innee Mooseena sandufasaa rakisi mariasa faqa ufa rainaidee qufanoo faiqí moo fannoo faiqí aanaaseekiqari Yisuna qimaminau. Qinee qeeqa qimaaku afiqee anee ianannai anidaqa. Manda afaanna fannoo mina aunduraki keeqafi marifanoo siamma ufa qidanoo.
MAR 9:18 Mi afaannafa mi faiqina arifanoo maqasaa kuqaki kuqaki aqufifanoo aiku asauku pipisaaqa qusufifanoo amaaqini datimambifanoo ookiqari qaqaara kai aniraidanoo. Qinee ani faiqi namu maaqoo mariasara afaanna afaqaaqee qunaqa misa miqiafanoo sia amanaikifaqa ani qimamidaqa.
MAR 9:19 Yisufa iriseenoo aiqama faiqí anaasee qimanniminau. Inni firaaqoo uqanna sia irirana qinisaa rusimarifanoo qinee kisaaqasaa fee inni manda furufarira ummaara dadaaqiqa nuanauree. Mi kumaaraana afiqamaree mai aniaqa qufaqa misa mi kumaaraana afiqee munusoofanoo minakinaa afaanna fannoo Yisuna qafamaseenoo mi kumaaraana mareeqeenoo fuseenasana aaku amaqaseenoo maqasaa rutuku quqasoofanoo mi kumaaraafa maqasaa aqufinoo quanda qaandi marufanoo qaqaara ookiqari ururama teeqinau.
MAR 9:21 Yisufa mina akoona irammirinoo qinau maafa kisaaqasaa maaqinoo mari fee qufanoo mina akoofa qinau Eeoo faiqi aanaaqisaaqari miqi marinau.
MAR 9:22 Moomoo kari mi afaannafa mina kuqaruanee qimaseenoo idaki fee nammariki fee kaqi mara aqi marufa maridanoo. Anee amanaikinana maasara amuqusinana dadaaqia.
MAR 9:23 Yisufa iriseenoo qinau sia qiniara amanaikiannee qia aneenna kai qinisaa irirana rusiranara kai iria. Faiqí Anutunasaa irirana rusimarifa aiqama ainaina amanaikammiannoo.
MAR 9:24 Mi kumaaraana akoofa mina iriseenoo faaqa quqaseenoo Yisuna qimaminoo qinau eeoo qinee anisaa irirana rusimarunausa maridaqa sia amanaikidaqa anee dadaaqia qufanoo Yisufa faiqí anaasee dindari dindari ani usufufanoo nindafeenoo misa qini ititaqimaqeefoo qimaseenoo mi kumaaraana aundurakinaa afaanna amambaina qimamiseenoo qinau. Qinee ani qimamidaqa mi kumaaraana aundurakiqari rafudamaki sandamafinana sia uqanna kafaa ani keeqaa qufanoo mi afaannafa faaqa quqaseenoo firaa fuseena sana mi kumaaraana aaku amaqaseenoo maqasaa rutuku quqaseenoo doo raudamaki sandamafufanoo mi kumaaraafa kuqiara foora maqasaa rumafufanoo aiku asauku pipisaaqa qususeenoo kuqiara foora mambinau. Miqi mambufaqa faiqí ani qafee doo kuqiifoo qiqau.
MAR 9:27 Miqi qufanoo Yisufa mina asauku qumaroofanoo doo findi finau.
MAR 9:28 Miqooqari Yisufa moo maqaki keeqafufaqa mina faiqi namu kukeeqasee aniree irammiriqa qiqau. Maasa nanaree mi kumaaraana aundurakinaa afaanna aqiqarara anuqi fee qufanoo Yisufa qinau Anutunara innaaruqirafa kai miqira afaannauqa niqiqaina fifaranoo sia moo ainainannai niqiqeefaranoo.
MAR 9:30 Misa mi maqusanaindari quqasee Kariree maqa maaqaki narí faiqi namu faqa faiqí anaasee sia iriaqee qimasee narí faiqi namu oosana oosana ufa qimannimiani qimaseenoo fidanoo Kariree maqa maaqakiaqa fidanoo qimanniminoo finau. Mifa maaqi qimasee qimanniminau. Faiqí misa qini faiqí nimaaku qumare̱eqee faiqí nisaukuki quqaqisaifaqa misa qini kuqa darusaifanoo qaaramoo faasaana aiqarainanoo Anutufa kuqiranakiqari qini mara findifumaqisaannoo.
MAR 9:32 Mina faiqi namu mi ufana iriseeqa sia mina oosanara iriqau irammirirana faqa sia irammiriqau rufiasee kaqi mariqau.
MAR 9:33 Misa Kapeeranaumma maqusai anireeqa maaqaki keeqafufanoo Yisufa narí faiqi namu irammirinoo qinau. Maasa aanai animarunaqa innee nana raiqara ufee qifee misa nisaurusee sia qimamiqau. Misa narikiqari yafee uriqararafa mariannoo qimasee minara raiqeeqa nisaurusee sia Yisuna ufa qimamiqau.
MAR 9:35 Yisufa ooqu marifinoo narí faiqi namu aiqama naaramasee mai aniaqee qimasee maaqi qimasee qimanniminau. Faiqí moo fannoo maqasaa mariasaki uriqararafaikinafa mifa narí kai ureeqaranaki fuannoo mifa aiqamausa dadaaqidanoo amiqira saika faqa nikooqeemari saikana faqa dadaaqiannoo.
MAR 9:36 Yisufa miqi qimaseenoo faiqi aanaaqi moodaa mareeqee misa noorinni kikiqamaseenoo asaukunnai mina kaqaramma qumareenoo qimanniminoo qinau.
MAR 9:37 Faiqí anaasee moo fannoo maaqira kaqikaa faiqi qini ufara irisee oonu asasamasee aqoondikinafa sia irirainni qini Yisusa faqa qiqoondikidanoo. Yafee moo fannoo qini oonu qifiqainafa sia qini kai qifiqaannoo qini diqiqoona faqa oonu afiqaidanoo.
MAR 9:38 Yoohaneefa Yisuna qimaminoo qinau, Oo ufasaa rakisirafa faiqí moo fannoo moosaa manda faafasaaqa naundurai mariasa ani auqusaa qimasee niqiqeemaru qafaqiafana, mifa sia maasaki nimarufa marunara qaoo qiqiafana.
MAR 9:39 Yisufa mina iriseenoo maaqi qinau sia minara qaoo qia. Mifa qini duqusaa moo firaa ainaina auqamaseenoo sia amana quandaki qini diqiannoo.
MAR 9:40 Maasa aana ititee mariasa maasa namuqaa maridaqa. Sia maasa aana ititee mariasa sia namuqaa maridaqa maasa qifeeqaree mariasa maridaqa minara sia mi fasiqanara qaoo qia.
MAR 9:41 Innee maa ufana iriaqa Innee nammariara nidinaqa innaaru qifanoo faiqí moo fannoo inniara asauku mundirana faiqi namu mariafanoo fee qimaseenoo nammari inni niminanoo Anutufa mina akiaqara mi fasiqana innaarunai quqamaqaannoo.
MAR 9:42 Miqi qimaseenoo Yisufa mi kaqikaa faiqina faasai misa noorinni kikiqunara kafaa qimanniminoo qinau, maaqira kaqikaa faiqi irirana qinisaa rusimarinafa moo fannoo mina mandoosana uqafiqainafa mi fasiqafa Anutuna firaa aqurararana ameemaanai mariannoo. Misa miqinna fasiqana qumaree firaa oonitia anukaki quqasee rumbasee afeeqa amifanoo ooruku nammariki aqufinoo kuqinoo oonu dupira arirafa mariannoo. Kaqikaa faiqi qinisaaqaraa irirana moosaa ubeekee marinafa firaa arirafa mariannoo.
MAR 9:43 Aninna asauku fannoo anirarisameeqeenoo mandoosanaki ubeekee marina mina ateeka aqua. Moodaa asauku faqaafa naaru asumu mariranaki firafa amana maridanoo. Aiqama asaukuqara faqaafa naaru naaru sia qimbeemari idanaki firafa mandaikirafa maridanoo. [
MAR 9:44 Miqoo naaru naaru kadiaru sia kuqidanoo kaqi maridanoo ida faqa sia dimbee marifa kaqi qaida mariannoo.]
MAR 9:45 Aninna aiku fannoo ani rarisameeqeenoo mandoosanaki ubeekainnana mi aikuna ateeka aqua. Anee moodaa aiku faqaafa naaru asumu mariranaki firafa amana maria. Aiqama aikuqara faqaafa idaki aqufirafa sia andeeqanoo mariani. [
MAR 9:46 Mi idanaki faiqí neemaria kadiarusa sia kuqidaqa ida fannoo faqa sia qimbaidanoo.]
MAR 9:47 Aninna afu aaqoo fannoo ani mareeqee Anutuna ufamau firanakiqari kaqinni ubeekee marina mina imbasaa. Anee moodaa afu aaqoo faqaafa Anutuna ququsaki keeqarana amana maria. Qaara afu aaqoo faqaafa idaki aqufirafa sia andeeqanoo mariani.
MAR 9:48 Miqoo faiqí neemaria kadiarusa naaru naaru sia kuqidaqa ida faqa naaru naaru sia dimbaida kaqi qaida maridanoo.
MAR 9:49 Anutufa ida qumareenoo nimanamandee qafarana ooruku anoonara foora aiqama qusasaa adia nimaqainaqa Anutuna ufasaa mapukufi mariaqeera nimaniannoo.
MAR 9:50 Ooruku amiqira ainaina maridanoo mina adiafaa irafa taikafinanoo naqimmasee adiafaairana maraannoo fee sia amanaikiannoo. Innee inneeqa naunduraki narinni narinni ooruku faqaasara foora maridaqa narinni narinni asooaranaki mariaqa.
MAR 10:1 Yisufa mariu maqusana minniseenoo Yudeeaa maqa maaqaki ooqu finau. Yooradanna nammari taqamareenoo dinni afainni fufaqa faiqí anaasee moomoosa mifa maruqoo aniroofanoo narí oosana maraseenoo ooqu marifinoo Anutuna fasaasa ufa qimannimimarinau.
MAR 10:2 Farisai amaana ufa qimarusa akaqausa Yisufa maruqoo aniree ufaanara foora fufusee Yisunara minaki aruanifeera maaqi qimasee narikai narí qimami narí qimami qiqau, Maasa faiqí narí anaaqa minnisarana irammirifanoo Yisufa minara aaqara ufa qinaqa mina ummarasee aruanaura. Miqi qimasee akooqoo Yisuna qimamiqau, Oo Yisu maasa Mooseena sandufa faiqí moo fannoo narí anaaqa minnisaranara eedoo qidanoo fee sia fee eedoo qidanoo.
MAR 10:3 Miqi qufanoo Yisufa iriseenoo irara ufa kai qimanniminoo qinau Mooseefa minara nana aaquqira ufa qimanniminoo fee qufaqa misa qiqau, Mooseefa nári ninaaqmaaka aqiqara papiqa akara rumeeqee nimiseeqa niqiqaaqee qidanoo.
MAR 10:5 Yisufa mina iriseenoo maaqi qimasee qimanniminau Mooseefa inni irirafa mandaikinara inni nimuqusa sia amaqi marifa ooni miqirafa amatooki marunara iriseenoo akoo akaa maseenoo inniara inneeqa ninaaqmaaka minnisaaqee qinau.
MAR 10:6 Ooqai indaaru Anutufa aiqama ainaina auqu quqaqoo aukuana sia miqinoo marinau. Miqoo akee faqaana faqa afaamu faqaana faqa auqu quqanau, miqi maqoonara kai faiqí aiqama narí anoofa akoona minniseenoo narí aanaaqasaa atooqafinanoo moodaafaikamambi marifaranoo minara sia kafaa misa qaaraikamambi marifaranoo moodaafaikamambi marifaranoo.
MAR 10:9 Miqinoo marinara Anutufa atooqaqoo ainaina sia uqanna faiqí rakeeiaqa.
MAR 10:10 Yisufa maaqaki keeqafufaqa mina faiqi namu aniree anaasee minnisaranara qunara iroofanoo mifa qimanniminoo qinau.
MAR 10:11 Faiqí moo fannoo narí anaaqa minnisee moo anaasee marainafa mi indaaruqaa anaaseena mandaikammamaqeenoo narí mi fasiqafa ummuariranaki mariannoo.
MAR 10:12 Miqi kai inoo anaasee moo fannoo narí afaaqi minnisee moo fasiqa marainafa ummuarirana mareenoo miqiannoo.
MAR 10:13 Faiqí anaasee akaqausa nári faiqi aanaaqiuqa nifiqee Yisufa narí asauku faiqi nikiaqasaa quqasee nifaaqooqa nimianifeera nifiqee aniroofaqa Yisuna faiqi namu misa farafara qifoo qimasee niqiqau.
MAR 10:14 Yisufa miquna qafamaseenoo narí faiqi namu aanoommasee qimanniminau. Saina faiqi aanaaqiuqa qinee marunannai aniaqa. Sia misara qaoo qiaqa Anutuna ququsa miqirausaindi marinara sia qaoo qiaqa.
MAR 10:15 Innee maa ainainnara kai irisee sia aunuaqa, faiqí anaasee moo fannoo sia kaqikaa faiqi naanna ramasee Anutuna ququsa marainafa naaru naaru mariranaki sia uqanna keeqeefaranoo.
MAR 10:16 Yisufa miqi qimasee narí faiqi namu qimannimiseenoo faiqi aanaaqiuqa oonumafi aripimma qumareenoo aiqamausasaa asauku quqaseenoo nifaaqooqa qinau.
MAR 10:17 Yisufa moosaa fidanoo aanai fimarufanoo faiqí moo fannoo afaqanoo fifiufanoo aanai oonu Yisuna paqurimandeenoo mina oorinni oonu aqoori saunara fufanoo qimaminau Oo amiqira andeeqara ufasaa rakisirafa nana kadaapi fee Anutuna rumamaqaananoo fee naaru marirana qimiannoo fee.
MAR 10:18 Miqi qufanoo Yisufa qinau anee nanaree qiniara amiqira fee qidanee. Sia moo andeeqarafa maridanoo Anutufa kai andeeqarafa maridanoo.
MAR 10:19 Anee Mooseena sandufa irimariananoo mi sandufafa maaqi qidanoo sia anee faiqí anaasee moodaa faqa kuqarua sia anaasee ummuaria sia ainaina ummuaria sia siaasinnai oonu moonara unnufa qia, sia moosa ainainara amuqusinana unnaqimasee maraa, aneenna anoofa akoonara amiqimasee ufa qimasee misa nuqu uqeeraa.
MAR 10:20 Miqi qimasoofanoo mi fasiqafa Yisuna qimaminoo qinau, Oo ufasaa rakisirafa qinee ooqai faiqisaa mi ufana iriisee mi mau fimarunausa maridaqa.
MAR 10:21 Mi fasiqafa miqi qufanoo Yisufa minara aidufanoo andeeqasee mi fasiqana oori qafamasee qinau. Anee moodaa ainainara kai sia auqaananoo. Anee aneenna ainaina aiqama marasee faiqí akaqausa nimisee minasaa munnimma maraseenana kudi fasiqausa nimisainanoo ani qumiasana ani afeesara innaarunai mariannoo, miqinana doo ania, doo qini faqa aniree fua qufanoo mi fasiqafa mina iriseenoo narí moomoo ainaina marunara amuqusufanoo oori runusee finau.
MAR 10:23 Mifa fufanoo Yisufa quandakinoo narí faiqi namu qimanniminoo qinau, ainaina moomoo faqaasa Anutuna ququsaki keeqaranara anuqifaranoo.
MAR 10:24 Yisuna faiqi namu ainaina faqaasa innaarunai fifaranoo fee qiqiusa mi ufana iriseeqa tautufanoo Yisufa kafaa qimanniminoo qinau. Oo qini faiqi namu Anutuna ququsaki keeqaranara kadaapiri mariafa maridanoo.
MAR 10:25 Kameera qoosa fooqaa aandau uka aamarai keeqarara anuquannoo, ainaina faqaasa Anutuna ququsaki keeqaranara fiqaramasee anuqaa mareefaranoo.
MAR 10:26 Yisuna faiqi namu mina irisee firaaqoo tautumafufaqa naaquqoofaqa narí qimami narí qimamiqau, Ainaina faqaasa sia innaarunai fifaqa yafee asumu mariranaki fuannoo fee sia moo fannoo amanaikiannoo.
MAR 10:27 Yisufa mina iriseenoo andeeqasee misa noori qafamaseenoo qimanniminoo qinau. Mi ainainna sia faiqí amanaikimari ainainafa maridanoo Anutufa kai amana aiqama ainaina amanaiki marifa maridanoo.
MAR 10:28 Peetooroofa mina iriseenoo Yisuna qimaminau. Qafa, maasa aiqama ainaina quqaseeqa kaqi samu uqanna ani faqa fidaqa qufanoo Yisufa narí qimaminoo qinau.
MAR 10:29 Kuqaa qiananoo, qinee maa ainainnara faqa qimannimidaqa moo fannoo qiniara faqa qini amiqira fasaasufara faqa narí maaqa fee narí akaqaafasaa fee narí asookinee narí anoonee narí akoonee narí faiqi namu fee narí maqa maaqa fee minauqa minnisainafa mifa maqee maria kamuqoo moomoo maraannoo. Maaqauqa faqa akaqaafasaauqa faqa asoommaaka faqa anausa faqa faiqi namu faqa maqa maaqa faqa moomoo fiqaramasee firaaqoo maraannoo, qini ufasaara arirana faqa maraannoo. Maqee kamu miqimasee maraannoo naaru anianinna kamuqoo naaru asumu marirana faqa maraannoo.
MAR 10:31 Maqee maria kamuqoo moomoo uriqararausa kasooqaqee innaarunai ureeqarausa marifaranoo. Maqee maria kamuqoo moomoo ureeqarausa misa kasooqaqee innaarunai uriqararausai kifaranoo.
MAR 10:32 Yisufa narí faiqi namu faqa Yeerusareenni ooru fidanoo indaaru fufaqa mina faiqi namu mina aanaaqiana ooru fidaqa Yeerusareenni faiqí firaasa Yisuna ariraree qimaru ufana nári iriaqeeida rufia rufiammiqa ooru fimariqau. Faiqí anaasee namufaqa ooru fusa misa faqa nimukee marufaqa ooru fiqau. Ooru fidanoo narí faiqi namu qisaukuqara taikasee qikunni ooqu qaara mararausa naaduma mara quqasee nariki kambiqaaninna oosannara narí kuquaninnanara qimanniminoo qinau.
MAR 10:33 Innee iriaqa maasa Yeerusaree maqusai ooru raanaqa faiqí misa faiqí nimaaku qini qumare̱eqeeqa amaana maqasaa aanaiqikirausa uriqararausa faqa Mooseena sandufa akoofasauqa faqa misauqa nisaukuki qini quqeefaranoo. Misauqa qiniara ufa qimaseeqa kuqiranaki qini mara quqaseeqa miqooqari mareeqee aanaamuru nisaukuki quqeefaranoo.
MAR 10:34 Anaamuru qini mara quqaseeqa ataasa ataasa qima qimaqaidaqa niqaara qini qifaaqai fidisaida qini qummairi qima qasaida, uaiaqa samu qumaree qini firaaqoo qini qifaaqa ateekeesee kuqa darifaranoo. Qaaramoo faasaana aiqarainanoo Anutufa qini mara findi fuannoo.
MAR 10:35 Seebeedina amaakuqara Yameesasa Yoohaneesa Yisufa maruqoo anireeqa qiqau. Oo ufasaa rakisirafa moodaa ainaina maasa aniara qimiannee qianauree qufanoo Yisufa nana ainainee qufaqa misa qiqau, anee aneenna areenarana innaaruna ququsaki keeqafina aneenna qaarisaa ooqumari finaqa maaqanda ani aaqa moo fannoo dinni moo fannoo dinni amanee ani aaqa uqanna ani afaaqasaa aqoondi kammafi fee maaqanda faqa uriqararausaikiqa marianauree, qufanoo Yisufa qimanniminoo qinau.
MAR 10:38 Innee inneeqa iraa ainainara sia irimariafanoo fifau faafaummi mariafanoo. Qinee manda nammari naannana innee faqa amanee neefaree. Qinee kuqira nammariki ruanaqa innee faqee amanee rifaree qufaqa miqanda qiqau amana maaqanda ruanauree qufanoo
MAR 10:39 Yisufa qinau Inneeqara kuqaa qini manda kuqira nammari neefaranoo, qini kuqira nammari rumaqimaqee fandinnana inneeqara faqa rifaranoo.
MAR 10:40 Qini daaqa uqanna qini qifaaqasaa qiqoondi innaaruna ququsaki dinni dinni ooqu marirafa sia qinindi, Anutufa akaqausaree qimasee deedaqamaqoosa mifa kai misa nimiannoo.
MAR 10:41 Yameesasa Yoohaneesa mi ufana ooru Yisunara iroonara akaqausa qisaukuqara fasiqa mina iriseeqa miqandara aanoo iqau.
MAR 10:42 Yisufa mina iriseenoo aiqamausa naarama narí unnai quqaseenoo qimanniminau, innee maa maqasaaqaraasa oosana irimariafanoo faiqí misara uriqararausee qimariasa nári aanoonnai faiqí anaasee kaiqeesara rakisi nimaqee mariasa. Misa uriqararausa ureeqarausara amiqimmasee misa uriaaqarama nimaqaidaqa.
MAR 10:43 Misa oosana miqimminoo maridanoo Inniki sia miqinoo mariannoo, Inniki moo fannoo uriqararafaikiraree qimarifa mifa aiqamausa dadaaqidanoo amiqira saika faqa nikooqeemari saikana faqa dadaaqamannimaqee marifa mariannoo.
MAR 10:44 Innikiqari moo fannoo narí kai indaaru nikiaqaikianee qinafa mifa narí kai eedoo qimasee aiqamausa dadaaqira karabusa saiki marifara foora aiqamausa dadaaqidanoo miqi marifa mariannoo.
MAR 10:45 Innee qini qiqafaaqa, qinee faiqí nimaaku sia faiqí anaasee qini ainaina maqimaqaaqeerau qumuafanausau maridaqau, qinee faiqí anaasee moomoosa ainainamma nimaqaseeqa misa Anutuna nariranakiqari feefauriraree qimasee qeeqa marirana misara kuqiranaki quqarara qumidaqa.
MAR 10:46 Yeerikoo maqusa Yooradanna nammari dinni afainni afaasasaa maridanoo. Yisufa Yeerusaree maqusai ooru fidanoo fiquakufanoo Yeerikoo maqusai aniranau. Miqooqari findifi narí faiqi namufaqa faiqí anaasee moomoosa faqa ooru fida maqusa atinni aanasaa ooru qafoofanoo aanai faiqí moo afu qimbarana mina auqu Baratimaeeusafa Timaeeusana amaaku fannoo nári oosana marasee miqimarusa aanasaa maridanoo faiqí anaasee fiqaree aiqaree imarusara narana maree maria munnimmara innaaru qimarufa marinau.
MAR 10:47 Mi afu imbara fasiqafa Yisunara Nasareeteendaraa fasiqa animariifoo qufanoo kafaa kafaa faaqa quqasaida nammeera maaqi qimasaida nammeera qimarinau. Oo Yisufa Dafidina ati marianafa anee qiniara irinanoo amuqusinana dadaaqia qufaqa moomoosa mina aqiqa qiqau doo ufasaa farafara qia qufanoo mi fasiqafa misa quna irinoo sia minnisanau misa aqurareeqee firaaqoo ambufuamufanoo firaaqoo faaqa quqaidanoo maaqi qinau, Oo Yisufa Dafidina ati marianafa anee qiniara irinanoo amuqusinana dadaaqia. Yisufa mina iriseenoo aanasaa kasoomambinoo qinau aaraifanoo aniani qufaqa misa qimamiqa qiqau. Doo asasia Yisufa aniara aniannee qidanoo qufanoo afu qimbarafa mina iriseenoo narí qamunna akuqoona mi saqanna afaqimma aquseenoo doo findi finoo Yisufinnai finau.
MAR 10:51 Oonuroofanoo Yisufa irammirinoo qinau. Anee qiniara naqimaqisaanifee fee q inanee qufanoo afu qimbarafa qinau. Oo ufasaa rakisirafa anee kaifaa qifu maqa qisaanneera qidaqa qufanoo Yisufa qimaminoo qinau. Doo fua ani aundura qinisaa rusirafa doo ani andeeqamaqanoo maridanoo. Miqi qufanoo doo aaqee uqanna mi fasiqana afu qimbarafa maqafufanoo doo Yisuna faqa aanai finau.
MAR 11:1 Yisufa narí faiqi namufaqa faiqí anaasee faqa Yeerusaree maqusa aaqa ooruree qaara kaqikaa maqusa nuqu Beetapaisa faqa Beetani faqa mi maqusa qanda naaqa ooruree Oorifa aaqana aaqa ooru raqau. Oorureenoo narí faiqi namukinaana qaaraqanda Yisufa narí niqiqeenoo indaaru fuaqee qimasee qimanniminau.
MAR 11:2 Inneeqara fimaria maqusafa marinaki oonureeqa fuka doonki akoona afaandama itirana saqarisaa sandannai anukaki qususee saqarisaa qusuqaafanoo marina paqurifaranoo. Sia faiqí moo fannoo mina ataufakasaa ooqu marifi fia kaqi maridanoo, innee mina sanda idukusee mi doonkina maree aniaqa.
MAR 11:3 Faiqí moo fannoo inniqarara naqi fee ida fee miqida fee qifaqa inneeqara maaqi qimasee qimamiaqa, maasa uriqararafa maa doonkina saika maridanoo taikasainanoo aaqee uqanna muqu nimiannoo fee qifaqa ani maraidaqa.
MAR 11:4 Yisufa miqi qimasee qimannimufaqa miqanda oonuree qafoofanoo doonki akoona afaandama itirana paquriqau, mifa maqusasaa moo maaqa kooqiki mari saqarinasaa qusuqoofanoo marinau. Miqanda oonu qafee iduki marufanoo akaqausa maqusasaa marusa aniree qiqau,
MAR 11:6 Naqiraree maraidee qufaqa miqanda Yisuna ufa kai qimannimufaqa doo maree fuaqee qiqau.
MAR 11:7 Miqanda mi doonkina mara maree Yisufuqoo miniseeqa nári oosana marasee nári qamunna mina ataufakaaqa ufiqisoofanoo Yisufa minasaa ooqu marifinoo Yeerusareenni ooru finau.
MAR 11:8 Faiqí anaasee moomoosa Yisuna qafamaseeqa nári karaambaiqa imaru oosanna mareeqa nári siuta raipaqueeqee aanasaa ufiqimarufaqa akaqausa saqari asaana amanee namufaqaana dinni dinni anaadookina saqari ateekeeqee aanasaa ufiqisoofanoo mi mau doonki fannoo finau. Fimarufaqa moomoosa inaaqiannai faqa oorinni faqa fidaqa maaqi qimasee faaqaridaqa asasidaqa qiqau Anutuna firaaqoo amooqiaqa.
MAR 11:10 Maasa qikoona Dafidina ququsaki marianinna karaambaiqana Anutufa amiqi amiqiani. Karaambaiqa Anutuna auqusaa Yisufa uridanoo. Anutuna firaaqoo amooqiaqa.
MAR 11:11 Miqi qidaqa afiaqa ooru fiufaqa Yeerusaree taunnaki keeqafufanoo Yisufa misa amaana maqa firaanaki keeqafufanoo aiqama ainaina aiquqiiseenoo doo rafudamakufanoo doo eendidanoommifoo qimaseenoo narí faiqi namu qisaukuqara taikasee qikunni ooqu qaara marasee nifiqamareenoo kafaa Beetani maqusai ooqu finau.
MAR 11:12 Misa faiqee iqaqoofaqa Beetani maqusaindari Yisufa Yeerusareenni ooru fidanoo aararoofanoo Yisufa qafoofanoo faafisa fooqaa ira saqari nianai marufanoo qaqama iranoo fee marinoo sia fee marinoo qimaseenoo aaqa oonuree qafoofanoo amanee kai marufanoo qaqama iree maru aukuana sia marunara sia iranau.
MAR 11:14 Yisufa mina qafamaseenoo mi faafisana aqinau anee maqee maaqooqari naaru naaru anisaaqaraana sia faiqí moo fannoo ani qaqama naannoo. Miqi qu ufana Yisuna faiqi namu iriqau.
MAR 11:15 Misa kafaa Yeerusaree maqusai ooru keeqafufanoo Yisufa misa amaana maqa fiqu fiqumma ququsa auquqoonaki keeqafufanoo minaki faiqí ummuari maru makeeti marusa ooru rapatutummeeqeenoo nifaqasoofaqa rafudamaki fifainiqau. Minaki marusa faiqí anaasee kaqi munnimma marasaida amaana maqakinaa munnimma faiqí anaasee nimisaidaqa minasaa qaraana ati munnimma ookaa mandee ummuaramasee maraaneera miqi mariqau. Yisufa misa qaindauqa faqa misa munnimma minasaa quqaqoonauqa faqa aiqama ooru qumaree teeqi taaqimaseenoo nakipuruna faiqí anaasee bisinisaiki marusa faqa misa ooqumari maru siaqausa faqa mareeqee teeqi taaqi maqinau.
MAR 11:16 Akaqausa ummaara maree mariasa amaana maqa fiqu fiqu auqira ququsa firuqiaki fimarusa faqa qaoo qufaqa minaki sia fiqau.
MAR 11:17 Miqimmaseenoo Yisufa quandakinoo miqoo marusa maaqi qimasee qimanniminoo qinau. Ooqeenaa tamummaqara fasiqauqa akaraki Anutufa maa maqanara maaqi qimasee qimaqoofa maridanoo. Qinee faiqí anaasee qini maaqara innaaru qira maqa fee qiaqee qidaqa. Anutufa miqi qimaqoofaqa qinee mimau maaqi qidaqa, innee maqee mariasa maa amaana maqana qumareeqa ummuari mariasa kukeeqara maqaikammi mariafanoo.
MAR 11:18 Amaana maqakina aanaiqikirausa uriqararausa faqa Mooseena sandufa iriqaraasi marusa faqa Yisufa miqi qunara aanoomasee iriseeqa Yisuna kuqarira aanara randee mariqau. Faiqí anaasee muduka uqanna moomoosa Yisuna ufa irufanoo naaquqoonara aanaiqikirausa Yisunara rufiee marunara ariranara randaqau.
MAR 11:19 Mi eenaaniannai Yisufa Yeerusaree maqusasaaqari narí faiqi namu nifiqee moosaa finau.
MAR 11:20 Faiqee iqaqoofaqa fidaqa misa kafaa mi faafisana fooqaaira saqari aaqa fidaqa qafoofanoo ammuqundari aiqama muqufi oosana amisee aiqama aadanusinoo marinau.
MAR 11:21 Peetooroofa mina qafamasee tautumasee Yisufa mi saqarina aqunara iriseenoo Yisuna aaramaseenoo qimaminoo qinau. Oo ufasaa rakisirafa anee qafaa anee aqisaananoo doo kuqinoo marinoo qufanoo Yisufa narí faiqi namu qimanniminoo qinau.
MAR 11:23 Innee maa ufana irisee sia aunuaqa inni irirafa Anutunasaa rusinoo marinaqa innee qifandinna ainainara kuqaa kambiqaannoo fee qiqa sia naunduraki qaara irirana iridaqa innee maa amuaqunamunara rafauruaki ooruku nammariki aqufua qifanoo Anutufa kuqaa aniara miqiannoo.
MAR 11:24 Minara qinee inni maa ufana faqa qimannimidaqa innee moo ainainara innaaru qidaqa inni irirafa doo mareera foora miqiunoo qimasee irirana Anutunasaa rusisaifanoo aiqama innaaru qimariana Anutufa inni nimiannoo.
MAR 11:25 Innee inneeqa mandoosana Anutunara minniqisaannee innaaru qidaqa inni mandaikamannimaqaasa misa ummaara aniki marina minnisee aunusaifanoo inni innaarunai nikoofa inni manda oosana akiaqara faqa mininnisaani. [Inni niqoonausa inni mandaikamma nimaqaifaqa inni mina irisee sia mina minnisee kaqi irimaree fifanoo Anutufa faqa innindi faqa miqi kaimmiannoo.]
MAR 11:27 Yisufa kafaa narí faiqi namu faqa Yeerusareenni oorureenoo firaa amaana maqa fiqu fiquira ququsaki keeqafinoo nimarufaqa minakinaana aanaiqikirausa uriqararausa faqa Mooseena sandufa akoofasauqa faqa aniree irammiriqa qiqau.
MAR 11:28 Oo Yisu anee maa maqanaki bisinisaiki mariasa nifaqasaana fuanara anee uriqarara fee maridanee miqidanee. Yafee aniara qifanee maanaki mariasa nifaqeenee qufanoo Yisufa nári qimanniminoo qinau.
MAR 11:29 Qinee faqa inniara modaa ufa iramannimaqaanaura. Innee qimaqimifaqa qiniara iraaufana faqa qimannimianauranoo.
MAR 11:30 Yoohaneefa nammari nimimarufa yafee minara nammari nimianee qufanoo nimimarinau, Anutu fee faiqí fee qufanoo nimimarinau.
MAR 11:31 Yisufa miqi qimasoofaqa narinni narinni raiqara ufa narí qimami narí qimami qiqau. Maasa naqi fee qianauree. Maasa Yoohaneenara Anutufa qimamiifoo qiananoo mifa maasara nanaree innee Yoohaneena ufara Anutuna ufa fee qimasee mi mau fuaqaana miqidee qiandoora.
MAR 11:32 Maasa Yoohaneenara faiqí kai qimamiaafoo qianaqa faiqí anaasee kaqiqeesa maasa darifoora misa Yoohaneenara Anutuna tamummaqara fasiqee qimariafa marifaqee qimasee Yisuna qimamiqa qiqau, maasa sia ani ufa anoona irida fee qiqau. Miqi qimasoofanoo Yisufa kafaa nári qimanniminau, Doo amana innee qinindiara sia qimaqimiafaqa qinee faqa innee qiniara yafee qimaminoo fee qianara sia qimannimianaura.
MAR 12:1 Yisufa miqi qimaseenoo quandara ufakiqari qimanniminoo qinau. (Yisufa Yuda maqannaasa mandoosana qimanniminnaree qimasee nári munnimma maree marianara uainna qaqamara qimanniminau. Maasakina sia uainna qaqama maridanoo koofi kai marinara mina kikiqusuanaura.) Faiqí moo fannoo koofi asumu ummaquseenoo ququsa auqu ititaseenoo koofi nammari uqimaria difaaninai firaana auquseenoo kisaaqa qainda auquseenoo aufarira fasiqa fannoo mi qaindanasaa akaramafifanoo maridanoo rakisida aufaridanoo. Mi saikafa taikaifanoo ququsa akoofa moo maqusai niannai firaree qimaseenoo akaqa fasiqauqasaa narí koofi ququsa niqiqamaseenoo maaqi qimasee qimanniminau. Innee qini koofi ququsa rakisidaqa qaqama irainna aukuana innee akaqana inneeqara mareeqa qini koofi akausa akaqana qimiaqee qimasee doo quqasee moosaa finau.
MAR 12:2 Koofi qaqama tiqi maru aukuana aniroofanoo koofi akoofa narí ainainira faiqi nianaindari aqiqoofanoo anireenoo koofi ququsasaa rakisi marusa qimanniminau. Innee uriqararana oondaraa koofi qaqama diqisee qimia qufaqa misa mandoosana marasee mina qumaree saamu samu ari ariiseeqa aqiqoofanoo kafaannai anirandee kaqisamu finau.
MAR 12:4 Kaqi samu oonuroofanoo afuqakoona qafamasee moo ainainira fasiqa aqiqoofanoo kafaa aninau. Aniroofaqa mina faqa miqi kai mandee ariisee saamu qumaree akiaqa rukamusee mina afaaqasaa asaurirana mara amufanoo anirandee maree narí akoofinnai finau.
MAR 12:5 Oonuroofanoo qafeenoo moo aqiqoofanoo aniroofaqa mina kuqammariqau. Ququsa akoofa mina iriseenoo akaqausa kafaa niqiqanau. Aniroofaqa akaqausa kaakadi nariqau akaqausa kuqa nariqau.
MAR 12:6 Mi fasiqana ainainira faiqiuqa doo taikasoofanoo narí amaaku uqanna doo moodaa narí amuqusimarufa mifa kai kaqi marinau. Ququsa akoofa maaqi qinau misa qini qimaakuara iriseeqa rufiasee koofi amifaranoo qimaseenoo mina aqiqanau.
MAR 12:7 Mina amaaku fannoo oonuroofaqa koofisaa rakisi marusa mina qafamasee maaqi qimasee narí qimami narí qimami qiqau, maafa ququsa akoona amaaku maridanoo doo aniaqa anifaqa arusaananoo maa ququsafa maasaindi kai mariani qimasee mina amaaku qumareeqa kuqaruseeqa rafuseeqee ququsa aqoosai aqusaqau.
MAR 12:9 Yisufa kaqi qimannimidanoo qinau, mi ququsana akoofa aniree naqi fee iannoo fee mifa aniree mi manda fasiqausa kuqa naruseenoo andeeqara fasiqauqasaa mi ququsana mara quqasee kafaa anirandee fuannoo.
MAR 12:10 Innee maaqoo mariasa tamummaqara fasiqauqa akara sia fee innee asaana ridee misa maaqi qimasee qiniara qidaqa sabeena kikiqususeeqa maaqi qimasee akara riqau. Faandaamura auqimaria fasiqausa sabeena moo marasee qafamasee manda saqari fee qimasee aqusoofanoo Anutufa mina kai urinnaaqarara fee qimasee faakanaikinoo maridanoo.
MAR 12:11 Karaambaiqa minnisoo sabeena marasee faakanaikinau. Oo amiqira faakana maridanoo.
MAR 12:12 Yuda maqannaasa Yisuna mi ufana iriseeqa oo maasara quandaidaqinoo manda koofi ququsasaa rakisirausara maasara qidaqinoo qimasee aanoommasee Yisufa mifa maasara amiqira sabeena aqusoosa maridee qidaqinoo, qimasee Yisuna rumbara ufa qidaqa faiqí aanaaseera rufiasee Yisuna minnisee moosaa fiqau.
MAR 12:13 Farisai amaana ufa qimarusa akaqausa faqa Eeroodeena ufa irimarusa akaqausa faqa aniree irarufara fusee ianee qimasee qimamiqa qiqau.
MAR 12:14 Oo ufasaa rakisirafa maasa aniara andeeqara ufa qimarianna fasiqa fee qidaqa sia anee faiqí ufara eerairamasee misiannai fimarianafa, anee sia faiqí nindafamaseenana miqimmiafaqee maaqimmiafaqee qimarianafa mariananoo anee Anutuna anoona ufamau firanara paasoosimarianafa mariananoo. Doo anee maasa qimaqimia maasa Roomma maqannaa uriqararana takisa munnimma aukuana aukuana amidaqa. Mooseena sandufamau fee fidee miqidee, aaqaidee miqidee. Maasa aquanauree sia fee aquanauree qufanoo Yisufa misa akaru qira oosana qafamaseenoo qimanniminoo qinau,
MAR 12:15 Innee nanaree qini fusee irara idee siruaa munnimma moo marasaifaqa qafaa qufaqa misa siruaa munnimma moo maree mini uqafiqaqau. Mifa qafamaseenoo qinau, yana oori amana faqa yana auqu amana faqee maa munnimmanasaa akara rinoo maridanoo fee qufaqa misa qiqau. Roomma maqannaa uriqararanaindi maridanoo fee qufanoo Yisufa qinau, doo amana qiafanoo mina auqu faqa mina oori faqa maa munnimmanasaa maridanoo sia moo naindi maridanoo naríndi uqanna akoorooidanoo minara doo naríndi maridanoo doo mifa qimiaqee qinaqa mina amiaqa Anutunaindi faqa doo narí Anutuna faqa amiaqa qufaqa misa mina iriseeqa kuqaa qimaseeqa firaaqoo Yisunara naaquqee marinau.
MAR 12:18 Sadikai amaana ufa qimarusa akaqausa Yisufinnai aniraqau. Sadikai amaana ufa qimarusa faiqí anaasee kuqufiqa sia findi fifandiafoo putaammifandiafoo qimarusa mariqau. Miqi qimarunara misauqa akaqausa Yisufinnai aniree irammirida qiqau,
MAR 12:19 Oo ufasaa rakisirafa Mooseefa maa sandufana akara rinoo qinau, faiqí moo fannoo anaasee maraseenoo sia faiqi maqarai kuqufinanoo mina akaqa fannoo mi anaaseena maraseenoo faiqi maqasainanoo findifinoo indaaru akoofa kuquna qumiasana saqamasaa rakisiannoo.
MAR 12:20 Moo aukuana moo fasiqa faiqi namu qisauku dinni taikasee dinni ani qaara marasee mariqau. Nifasaafa anaasee marasee sia faiqi maqarai kuqinau.
MAR 12:21 Kuqufufanoo mina aanaaqianaafa mi anaaseena marasee mifa faqa sia faiqi maqarai kuqinau. Miqanda ninaaqianaafa kafaa mi anaaseena marasee miqikai inoo sia faiqi maqarai kuqinau.
MAR 12:22 Kafaa miqooqaraasa mina marasaida kuqi kuqi taikafufanoo doo mi anaaseefa faqa doo kuqinau.
MAR 12:23 Doo kuqirausa findififandinna aukuana mi faasaannasaa aiqama dinni taikasee dinni ani qaara marasee mi anaaseena afaammaaka maridaqa yanaindikee iannoo fee qufanoo.
MAR 12:24 Yisufa maaqi qimasee qimanniminau. Innee firaaqoo aaqee mariasa inneeqa aaqee mariana oosana iridee sia fee iridee. Innee maanara aaqee mariafanoo, tamummaqarausa akarakinaa ufa faqa Anutuna afeeka faqa sia irimarianara aaqee mariafanoo.
MAR 12:25 Faiqí anaasee findififandinna aukuanna sia misa faiqí anaasee naanna ramasee narí maree narí maree mandee marifaranoo. Faiqí afaaqa faqa anaasee afaaqa faqa taikaseenoo qangiroora foora mambiqa idaaqirausa marifaranoo.
MAR 12:26 Kuqirausa findifiranara sia fee innee Mooseena sandufa asaana rumasee iridee. Mooseefa ooqai sipsipasaa rakisi maru aukuannai moo ainaina minaki qafoofanoo ida fannoo sasamimiki qeemarufanoo qafamaseenoo ooruroofanoo Anutufa minakiqari ooqai kuqusara Mooseena qimaminoo qinau. Qinee Anutusa maridaqa Abarahaamana faqa Isakeena faqa Yakooboona faqa Anutusa maridaqa. Akarakinaa ufa ooqai kuqufusara miqi qinoo marinara sia fee innee amiqimandee asaana ridee.
MAR 12:27 Mi ufana oosana maaqimminoo maridanoo Abarahaamafa faqa Isakeena faqa Yakooboona faqa ooqai kuqufusara Anutufa mi ufanannoo misa naunduraindaraanara sia taikee maqi kaqi maridaqa qini faqa mariaafoo qidanoo, qinee misa Anutusa maridee qidanoo. Naqimasee kaaqa taikafuasa misa Anutusa maridee qiannoo fee. Sia amana miqi qiannoo. Kaqi mariasa Anutusa maridee qidanoo. Minara innee Sadikai amaana ufa qimariasa firaaqoo uqanna aaqaidaqa kuqimariasara kaaqa taikambiaafoo sia findifidammia maqi qimariafanoo.
MAR 12:28 Mooseena sandufa uqannifiqee marifa moo fannoo Yisufa Sadikai amaana ufa qimariasa faqa ufaqi marufanoo Mooseena sandufa akoofasa fannoo faasai irinau. Yisufa Sadikai amaana ufa qimarusa narí ufannai misa ufa amiqimasee rafaaqafusoonara qafamaseenoo oo amiqira fee qimaseenoo narí faqa moo ufa Yisuna qimamianauree qimaseenoo qimaminau. Oo Yisu Mooseena sandufa moomoo kinaana nana sanda ufee uriqaranoo maridanoo fee qufanoo Yisufa qinau,
MAR 12:29 Maa ufafa aiqamausa urinnaaqararafa maridanoo. Isaraee maqannaasa iriaqa Karaambaiqa maasa Anutufa moodaa Karaambaiqa naríara maridanoo.
MAR 12:30 Innee faiqí faiqi inneeqa karaambaiqa inneeqa Anutunara inneeqa nimuqusa nimana nitukura irirana afeeka mudukannoo Anutunara nididaqa ruaqa. Mi ufafa uriqararafa maridanoo.
MAR 12:31 Mina aanaaqianaafa maaqimminoo maridanoo. Anee aneenna aqoonnanara aninna afaaqara foora aidindee aidiani. Sia sandufa moo miqanda uriqaranoo maridanoo miqanda kai.
MAR 12:32 Mi fasiqafa Mooseena sandufa akoofasa fannoo Yisuna mi ufana iriseenoo qinau. Oo ufasaa rakisirafa amiqimandee andeeqasee qiananoo anee qianandee kuqaa karaambaiqa mifa kai Anutufa maridanoo, sia moo Anutufa maridanoo mifa kai maridanoo.
MAR 12:33 Minara narí amuqusa aiqamannai faqa narí irirana aiqamannai faqa narí afeeka aiqamannai faqa Anutunara aidiani, narí aqoonnanara faqa narí afaaqara foora aidindee aidiani. Mi ufa qandannai finanoo uriqararafa mariannoo, tatufira aandau qaindasaa Anutuna suqamirafa faqa oosana oosana ainaina amimariafa faqa oorudupirafa mariannoo.
MAR 12:34 Yisufa mi fasiqana ufa iriseenoo oo irirana faqaa fasiqa fee qimasee qimaminoo qinau. Anee Anutuna ququsa adeedirana atisaa mariananoo. Miqooqari Yisunara naaquqoofaqa sia moo ufa iraqau.
MAR 12:35 Yisufa Yeerusaree firaa amaana maqaki faiqí anaasee amaana ufa qimannimidanoo moo ainainara irammirinoo qinau. Mooseena sandufa akoofasauqa asauku mundiranara Dafidina ati maridanoo fee qimariafaqa qinee minara, naqimandee Dafidina ati mariannoo fee qidaqa.
MAR 12:36 Anutuna naaquqara andeeqara maraquna fannoo Dafidina dadaaqufanoo maaqi qimasee akara rinau. Firaa karaambaiqa fannoo qini karaambaiqara maaqi qimasee qimaminau. Anee maaqoo qini Anutusa qini daaqa qini qisauku uqannai ooqu marifinaqa ani namuqaauqa narueeqee ani aramandunnai quqaanaura.
MAR 12:37 Dafidifa mi akaranaki asauku mundiranara qini karaambaiqee qinau, naqi fee masee Dafidina karaambaiqa faqa mina ati faqa aiqamaqara moodaa karinoo mariannoo fee. Innee minara irida naqi fee qidee.
MAR 12:38 Faiqí anaasee moomoo uqanna aniree asasamandee Yisuna ufa iriqau. Yisufa ufa qimannimidanoo maaqi qimasee moo ufa qimanniminau. Innee Mooseena sandufa akoofasauqa misa mandoosanara aufariaqa. Misa kisaaqa qamunna afisuseeqa maqusamau fee makeetaki fee nimarifaqa faiqí anaasee amiqimandee nimandaranara randaqa nidaqa kisaaqa qamunna afisuqirausa nidaqa.
MAR 12:39 Misa amaana maqaki keeqafidaqa naadumasaa amiqira siaqasaa ooqumari mariasa maridaqa, oomaqaki faqa amiqira qoo kai ooqumari mariasa maridaqa.
MAR 12:40 Misa adeedaana anaaseeuqara faiqí siaisa mariafaqee qimasaida misa maaqa maqusa saqama noopundu maqa aiqama ummuaramasee umarasee quandakiqa faiqí nifusaa faiqí qiqafaqee qimasee kisaaqasaa innaaru qimariasa maridaqa. Mina akiaqara misa narirafa naaru fiqaramasee mariannoo.
MAR 12:41 Yeerusaree firaa amaana maqakinaa difaani moo marufaqa faiqí anaasee minaki Anutuna amidee qimasaida munnimma minaki aqi mariqau. Yisufa mi difaanina aaqa ooqumarifi rakisi marufaqa faiqí anaasee minaki munnimma moomoo aqi mariqau. Ainaina faqaasa aniree nári munnimma moomoo minaki aqiqau, miqoo adeedaana anaasee moo ainaina siaifa kudi anaasee fannoo anireenoo narí munnimma qaaraqanda idaqara munnimma ataaqana fooqaana mi difaaninaki aqinau. Mi munnimmaqanda fannoo moodaa tooeeaa amana kai oodaa uqanna marinau.
MAR 12:43 Yisufa narí faiqi namu naarama moodaaqoo quqasee qimanniminoo qinau. Qinee mi kudi anaaseenara qimannimianaura, mifa aiqamausa urinnaaqaramasee munnimma aqinoo. Akaqausa nári moomoo munnimmakinaana ati ati aqia, maa kudi anaaseefa ainaina siaifa marifa narí aiqama munnimma narana aina feefaurianee qi munnimmana faqa aiqama aqinoo. Minara qinee mi anaaseenara firaaqoo aiqamausa naruseenoo aqinoo qidaqa.
MAR 13:1 Yisufa amaana maqakiqari rafudamaki fufanoo mina faiqi namukiqari moo fannoo Yisuna qimaminoo qinau. Oo ufasaa rakisirafa maa maqana qafaa, amiqira ooninnai auquqaa maqafa maridanoo.
MAR 13:2 Yisufa irisee qimaminoo qinau. Innee maa firaa amiqira maaqana usakarana qafaidee, kasooqaqee aiqama rapeepaamma furufaramambuannoo sia moo ooni narí amuaaqa narí amuaaqa maqee marindee inoo mariannoo.
MAR 13:3 Yisufa Yeerusaree firaa amaana maqakiqari raudamaki Oorifa aaqana amaana maqa adeedi marufanoo miqoo ooru ooqu marinau. Ooqu marifufaqa mina faiqi namukiqari Peetooroofa faqa Yameesafa faqa Yoohaneefa faqa Andurufa faqa minamusa qumee kukeeqaku narí maruqoo aniree qimamiqau.
MAR 13:4 Oo Yisu anee amaana maqa rapee ianinnanara anee qiannana yairee fee amaana maqa rapeepaa iannoo fee nana ainaina kambiqafina qafee fee oo doo mina rapeeia aukuanafa adeedi ree maqi qianauree qufanoo Yisufa minara naamuaqira ufa oosana arasee qimanniminau. Innee aufarida mariaqa, sia moo fannoo inni nikaruqiani.
MAR 13:6 Moomoosa aniree náriara unnaqimasee moo fannoo qinee asauku mundirausee qifanoo moo fannoo anireenoo qinee asauku mundirausee qimasee moomoosa misa nikaruqifaranoo.
MAR 13:7 Innee rakira daambeenda adeedi iriqa nianai marinara ufa kai iriqa sia munari minari furufari iaqa. Miqira ainaina kuqaa kambiqaannoo, kambiqafinaqa sia taikara aukuana aiqaree maqi qiaqa.
MAR 13:8 Moo maqannaasa nianaindari aniree moo maqannaasa faqa rakifaranoo, moo karaambaiqa fannoo adeediqari ani mara moo karaambaiqa aruannoo. Maqa kasirafa aiqamai mariannoo aandaroo faqa mariannoo. Mi ainainausa manda marira aurirana oorisaa kai mariannoo anaasee faiqi maqarara innaamunai aupuraandeemmiannoo.
MAR 13:9 Innee qini ufa irimariasa aufarida mariaqa, faiqí misa poorisa ufa qimannimifaqa inni ruumbeeqee kootaki quqeefaranoo. Misa inni mareeqee amaana maqaki quqasee saamusamu narifaranoo. Innee qini amiqira fasaasa ufa qimannimiaqeera qini ufasaara karaambaiqauqa faqa faiqí firaasa rakisirausa faqa nifusaa innee kikiqifaranoo.
MAR 13:10 Qini amiqira fasaasa ufa aiqama maqannaasaki naaree kooroo inoo marinanoo taikarafa inaaqianna kambiqaannoo.
MAR 13:11 Misa inni rumbasee mareeqee kootaki quqasainaqa innee sia naqi fee qianau naqi fee qianau naaree qiaqa. Koota kambiqafina Anutufa qimannimu ufana mina kai qimannimiaqa. Ani ookinaa ufa sia anindi mariannoo Anutuna naaquqara maraquna fannoo narí ufa inni niminaqa mina kai qifaranoo.
MAR 13:12 Faiqí misa nári nikaqaafasaauqa mareeqee kuqiranaki quqeefaranoo. Faiqí misa nári niku nisauku faqa mareeqee kuqiranaki quqeefaranoo faiqiuqaindi quandakiqa nári ninausa nikausa mareeqee kuqiranaki quqeefaranoo.
MAR 13:13 Aiqama maqannaasa inniara Yisunaindi fee qimasee fidiaqaa mannimaqeefaranoo. Innee minaki maridaqa fidaqa qini uaqee ida fifi inafa kuqira fee Yisufa qumira aukuanee paqurinafa asumu marirana maraannoo.
MAR 13:14 Kasooqaqee innee naaquqara fidiaqaaimari mandainaina qafeefaranoo mifa sia mariaqaa iraqoo Yeerusaree amaana maqaki kikiqinoo marina qafeefaranoo. Innee maa ufana asaana rimariasa mi ufana oosana amiqimandee iriaqa. Mi naaquqara mandainainafa kikiqa mambinaqa innee Yudeeaa maqa maaqaki mariasa quqasee aaqana aaqana sandamafuaqa.
MAR 13:15 Mi kamuqoo faiqí moo fannoo maaqa kooqi oorisaa mariinafa mi ainainafa kambiqafinana sia aneenna ainaina maaqaki maraanee qia doo miqooqari afiaki sandaa.
MAR 13:16 Faiqí moo fannoo afuqaki mariinana sia maaqai aniree aneenna qamunna aakauqa maraannee qia doo miqooqari kai quqasee ququsa rakeemandee sandaa.
MAR 13:17 Mi manda aukuanna nimuaqu uqa faqaa aanaaseeuqa faqa faiqi aanaaqi faqaasa faqa mandaiki marifaranoo sandaranara anuqifaranoo.
MAR 13:18 Innee maaqi qimasee innaaru qiaqa Oo Anutu sia mi manda aukuannafa suara aukuana kambiqaani qiaqa sandaranara anuqi foora.
MAR 13:19 Mi manda aukuanafa anirainaqa aiqamausa aupuraranaki firaanaki marifaranoo. Ooqai indaaru Anutufa aiqama ainaina auqunakiqari kaqiqaa aupurarafa oosana oosana marinau, maqee faqa miqikai idanoo kaqiqaa aupurarafa maridanoo. Kasooqaqee firaafa uqanna kambiqaannoo. Mifa taikainna kari sia miqirafa kambiqaannoo.
MAR 13:20 Mi manda aupurara aukuanna Anutufa qusandaannoo, sia qusarainanoo aiqama kuqu taikee foora. Anutufa narí rusandeesamumasee maroosara iriseenoo mi aukuanna qusaramannisaannoo.
MAR 13:21 Mi manda aukuanna faiqí moo fannoo inniara mai qafaaqa, asauku mundirafa mai marinoo moo fannoo asauku mundirafa muanni marinoo qinnana sia mi fasiqana ufa iriaqa mina unnaqidanoo.
MAR 13:22 Unnaqimaria asauku mundirausa faqa unnaqi maria tamummaqara fasiqausa faqa miqira aukuana moomoo kambiqeefaranoo. Misa Anutuna rusandeesamumandee maraqoo fasiqa anaaseesa nikaru qiani qimaseenoo naaquqara ainaina faqa sia faiqí amanaikimari ainaina faqa auqusaifanoo kambiqaannoo. Mi ainainannai nikaruqiani qimasaifanoo sia amanaikiannoo.
MAR 13:23 Qinee inniqa qini faiqi namu mi ainainna sia kambiooqoo qimannimiqa minara aufarida kai mariaqa.
MAR 13:24 Mi manda aupurara aukuannafa taikafinoo asukuna fannoo suani aruannoo aiqamai asukuna kai arufuannoo quqoona faqa sia kafaa kaaqa qaannoo fasauqa faqa inaarunaindari aiqama kapikeefaranoo. Innaarunai fasau faqa quqoona faqa nimari aanafa dapikammafuannoo.
MAR 13:26 Miqoo qinee faiqí nimaaku asuruki kooroo ianaura, qinee firaa afeeka namufaqa firaa areenarana namufaqa minaki kooroo ianaura.
MAR 13:27 Mikari qinee qeeqa qangiroouqa niqiqaanaqa misa aiqama maqa maaqa ati atinni oonuree aniree mandeeqa Anutuna rusandeesamumandee maroosa maramaree qinee marianannai nifiqee anifaranoo.
MAR 13:28 Yisufa kaqi qimannimidanoo narí faiqi namu qimanniminoo qinau. Innee faafisa fooqaa ira saqari qafamasee mina oosanara iriaqa, mi saqarifa ammuni mambinaqa innee minara saika aukuanee qifaranoo.
MAR 13:29 Innee miqi kai masee mi oosana oosana ainainnara qunafa kambiqainaqa taikara aukuana adeedi afaisaammi maqi qiaqa.
MAR 13:30 Innee maana faqa irisee sia aunuaqa maa ainainnausara aiqama qunafa maa maqee maria fasiqa anaaseesa akaqausa kaqi maria kamuqoo kambiqaannoo.
MAR 13:31 Innaaruna faqa maqa faqa aiqama fatikamafi aqusaannoo qini dookinaa ufa fannoo kai naaru naaru sia taikaannoo, kaqi mariannoo.
MAR 13:32 Mi taikara aukuannafa anianinnanara sia moo fannoo iridanoo mi faasaannara faqa suani yaqoo kamuqoo marinanoo fee kambiqaannoo fee, innaarunaindaraa qangiroouqa faqa qinee Anutuna amaaku faqa siamma iridaqa qini qikoofa narí kai mina iridanoo. Innee mi faasaannara sia irimariafanoo.
MAR 13:33 Innee minara aufaridaqa rakisidaqa qafaaqa.
MAR 13:34 Mi faasaanna faiqí moora foora ainaina faqaafara foora mariannoo. Mi fasiqafa narí ainainirana oosana oosana narí ainainira faiqiuqa aadu aadu nisaukuki quqaseenoo eendaki aufarira fasiqa qimaminoo anee aiqama ainainasaa amiqimasee rakisia qinee moosaa fidaqa qimasee finau.
MAR 13:35 Innee miqikai mandee amiqimandee aufarida mariaqa. Inni uriqararafa kaiqaa anianinnanara sia iri mariafanoo mifa eendaki aniannoo fee eenda amuqusai fee maqee kaari maqarana namufaqee aniraannoo fee suani maqee ururainanoo fee aniraannoo fee.
MAR 13:36 Mifa tautummamaqasee ainainimarinna kamuqoo faiqaqee innanaki qumurainana mandaikamminnaranoo.
MAR 13:37 Minara maqee qinee inni qimannimidaqa aiqamausa qimannimidaqa innee aiqamausara aufariaqee qidaqa qinee qumiranara rakisida mariaqa.
MAR 14:1 Yuda maqannaasa firaa qoomaqa suqarara qaaraqanda ainnaaqarara qoomaqana faqa ooruku siai feemu qoomaqana faqa suqarafa adeedi ramafinau. Qaara faasaana kaqi mariqa qaaramookufanoo qoomaqa suqarafa qusaramafufaqa suqaqau. Mi qoomaqafa adeedi ramafufaqa aanaiqikirausa uriqararausa faqa Mooseena sandufa akoofasauqa faqa suqufufaqa maasa naqimasee qumee faiqí anaasee sia irifaqee Yisuna umarasee aruanauree qiqau.
MAR 14:2 Misa qiqau maasa sia qoomaqaki Yisuna aruanaura faiqí anaasee aanoo mandee maasa faqa dari foora.
MAR 14:3 Yisufa Beetani maqusai Yeerusaree maqusa adeedi marufaqa manda namuana karoora arimaru fasiqana maaqaki marinau. Mi fasiqana auqu Simoona amarafa marinau. Yisufa mina karoora rukasoofanoo amiqimasee marinau. Yisufa mi maqanaki narana nee marufanoo anaasee moo mi maqanaki keeqanau. Mifa amiqira afundi maru fadameenna, moo sanda minauqu narada mina atuka rarakusee fadameena tatiqoofa afundimaruna firaa munnimma aqimaria fadameenna mi sandana anoona kai kaaqa amiqirafa maruna mina idaaqira ooninnai andina fooqaana auquqoonaki maru fadameenna uqirafa Yisufa maru maqanaki keeqafinoo mi fadameena taquna oosaa raudaseenoo mi fadameennana Yisuna akiaqa amoondunnaaqa adianau.
MAR 14:4 Faiqí anaasee akaqausa miqoo mariusa mi anaaseena qafamasee aanoommasee narí qimami narí qimami qiqau, nanaree maa fadameenna amiqira afundi marinna fifau rairaa inoo fee. Mifa mi fadameenna mareeqee moo fasiqa amiseenoofau tiri handareeta munnimma maraseenoofau kudi fasiqa anaasee nimini. Miqi qimasee afeekaikamandee mi anaaseena aqiqau.
MAR 14:6 Yisufa mi ufana iriseenoo qinau, See innee minnisaaqa, nanaree innee fifau mi anaaseena aqidee. Mifa amiqira idaaqira ainaina adia qimaqeenoo.
MAR 14:7 Kudi fasiqa anaasee naaru naaru inniki moomoo marifaranoo, innee inneeqa kai oonu mafi irisee mi kudi fasiqa anaaseesa dadaaqiaqa, qinee sia kisaaqasaa marianaura.
MAR 14:8 Maa anaaseefa kaqikaaqoo narí amanasaa qini dadaaqinoo. Mifa mi fadameenna qini qikundarana oorisaa qini irisaa adiaqimaqeenoo.
MAR 14:9 Maa ainainnara qimannimianaqa iriaqa sia aunuaqa, maa amiqira fasaasa ufana faiqí anaasee aiqama maa maqana afaaqasasa fidaqa qimannimidaqa maa anaaseefa maqee fadameena qini adia qimaqainara qimannimifaqa sia maa anaaseenara aunifaranoo.
MAR 14:10 Yisuna faiqi namu qisaukuqara taikasee qikunni ooqu qaara marasee faiqi namu misakiqari moo fannoo mina auqu Yudasifa Isakarioota maqusaindaraafa Yisuna mareeqee misa nisaukuki quqararee qimaseenoo raudamaki aanaiqikirausa uriqararausunnai qumee kukeeqaki finau.
MAR 14:11 Misa Yudasina ufa iriseeqa asasamasee munnimma amiraree qufanoo Yudasifa miqooqari Yisuna ueeqaaninna faasaanara rakisinau.
MAR 14:12 Yuda maqannaasa ooruku siai feemu qoomaqa aniroofaqa misa ainnaaqarara sipsipa aanaaqiuqa aruaninna faasaanasaa Yisuna faiqi namu aniree Yisuna irammiriqau, Maasa yamaqanaki yatinai fee ainnaaqarara qoomaqa deedaqianauree qufanoo Yisufa maaqi qimasee naamuaqinau
MAR 14:13 Innee Yeerusaree maqusai oorureeqa qafaifanoo faiqí moo fannoo qafeeki nammari qumbiqasee aku maree finaqa mina faqa finaqa mifa keeqainna maqanaki mina faqa mi maqanaki keeqaaqa. Keeqafiqa mi maqana akoona maaqi qimasee irammiriaqa, Ufasaa rakisirafa aniara maaqi qinoo, moo rumma qinee faqa qeeqa faiqi namu faqa ainnaaqarara qoomaqa naanna rummafa yai fee maridanoo fee qifanoo qinaqamma iriaqa.
MAR 14:15 Mi fasiqafa firaa rumma maaqa meeraqoo maru rummana firaa rummana narana quqee maru qaindafa faqa ooqumari maru siaqausa faqa deedaqira rumma inni uqannifiqaannoo. Innee minaki aiqama ainaina maasara deedaqamma qimaqaaqa qufaqa miqanda
MAR 14:16 Yeerusaree maqusai ooruree Yisuna ufa anoona kai kambiqafufaqa mimau kai fiqau.
MAR 14:17 Mi eenoonnai Yisufa narí faiqi namu faqa qisaukuqara taikasee qikunni ooqu qaara marasee faiqi namu faqa ooru keeqafi nee mariqau. Nee marufanoo Yisufa maaqi qimasee narí faiqi namu qimanniminau, Qinee maa ainainnara qimannimianauranoo, innikiqari moo fannoo qiniara ueeqaaninafa qini faqa naidanoo.
MAR 14:19 Mina faiqi namu mina irisoofanoo misa naundura furufarufaqa naadu naadu Yisuna irammiri mariqau, moo fannoo qinoo anee qiniaree q inanee qinee fee qifee moo fannoo moo fannoo miqi kai qimariqau.
MAR 14:20 Yisufa misa irarufa iriseenoo qinau, Innikiqari qisauku taikasee qikunni ooqu qaara mararausakiqari maa qini difaanikinaana asauku aqusee feemu marasee nee marifa mifa kai qiniara ueeqaannoo.
MAR 14:21 Qinee faiqí nimaaku tamummaqarausa akara ufamau qinee kuquanaura qini ueeqaaninna fasiqana numoo firaafa mariannoo. Mi fasiqafa sia kambiqainanoofau amana marini.
MAR 14:22 Misa ooqumarifi nee marufanoo Yisufa nariqa maqee maqee neemaru feemuna moo marasee dufi dufi qimaseenoo ruqi ruqi maseenoo narí faiqi namu niminoo maaqi qimanniminau. Innee maana marasee naaqa, qini qimaqi kikiqusira feemu maridanoo.
MAR 14:23 Miqi qimaseenoo kaafa moo maqee maqee nee maru uainna nammarina maruna maraseenoo minara Anutunara dufi dufi qimaseenoo narí faiqi namu nimufaqa aiqamausa mina qumaree minakinaana naqau. Yisufa narí faiqi namu mi uainna nammarina nimidanoo maaqi qimasee qimanniminau,
MAR 14:24 Maafa qini fidika kikiqusira nammarifa moomoosa adia nimaqeefandinafa maridanoo, qini fidika maafa Anutuna faqa faiqí anaasee faqa moodaanakikira ufa mapukunnimaqaaninafa maa fidikafa maridanoo.
MAR 14:25 Qinee qimannimidaqa sia kafaa uainna maaqoo maqasaa naanauranoo Anutuna ququsaki innaarunai ooru fidaqa fuka uainna amiqirana naanauranoo.
MAR 14:26 Miqi qimaseeqa misa moo amaana idi ramaseeqa maaqakiqari raudamaki asukunaki fiqa Oorifa aaqana ameemaanai ooru mariqau.
MAR 14:27 Misa miqoo oonuroofanoo Yisufa qimanniminoo qinau. Tamummaqarausa akara ufa fannoo maaqi qimasee qiniara qidanoo, Anutufa sipsipa rakisirana arusaifaqa mina sipasipauqaindi miqooqari quqasee daraanifaranoo. (Minara inni qimannimidaqa innee qini quqaqisee aiqama sandamafifaranoo.)
MAR 14:28 Qinee kuqiranakiqari findifiqa inni noorinni Kariree maqa maaqai fuanauranoo.
MAR 14:29 Peetooroofa Yisuna ufa iriseenoo qinau, Qinee sia uqanna ani minnisaanaura. Aiqamausa ani minnisaifaqa qinee sia minnisaanauree qufanoo Yisufa narí qimaminoo qinau. Oo Peetooroo anee iria, Fafaa eendaki iraifana anee qaaramoo kari qiniara siamma iri fee qinnaranoo. Miqi mandainanoo kookooraana qaara kari ufa qiannoo.
MAR 14:31 Peetooroofa mina iriseenoo Yisuna afeekaikamandee qimaminoo qinau, Qinee sia uqanna aniara sia iridee qianaura ani faqa kuquanaura. Miqi qimasoofaqa aiqama Yisuna faiqi namu miqikai qiqau.
MAR 14:32 Miqooqari misa Keeseemanee maqa maaqaki Oorifa aaqana ameemaanai marunaki asukunaki aniroofanoo Yisufa narí faiqi namu qimanniminoo qinau. Innee maaqoo ooqu marifi marifaqa qinee saqamaki oorureeqa innaaru qianauree qimaseenoo minamusara innee kaqi maaqoo marifaqa maa namusa kai qini faqa ooru fuaqa. Miqi qimaseenoo mifa Peetooroona faqa Yameesana faqa Yoohaneena faqa nifiqeenoo saqamai ooru fidanoo narí afaaqasaa quqeefandinna ainainara irimarufanoo firaaqoo amuqusimarufanoo aundura fifau faafau ufanoo minamusa qimanniminoo qinau.
MAR 14:34 Qini qimuqusaki qimuqusirafa firaaqoo maridanoo mi qimuqusirafa daruannoo fee qidaqa innee maaqoo maridaqa rakisiaqa.
MAR 14:35 Miqi qimasee Yisufa kaqikaaqoo oonureenoo narí kai maqasaa aqufinoo narí afaaqai anianinna aupuraranara sia keeqaanifee qimasee maa innaaruna qinau.
MAR 14:36 Oo qini qikoofa qini qikoofa, anee aiqama ainaina amanaikimarianafa mariananoo, qinee manda nammari naannanara anee qinisaaqaraana mareeqee kaqinni aqusa. Sia qeeqa didiranara iria, aneenna aidinna ainaina kai qifaaqai quqaa.
MAR 14:37 Yisufa miqi qimasee innaaru qimaseenoo kafaannai aniree narí faiqi namu qaaramoo marunnai aniree nindafoofaqa misa nisuku kaaqa faiqaqeeiqau. Yisufa Peetooroona moo auqu Simoona auqamasee qimaminau Simoona anee faiqaqee idanee anee sia fee amana qusasaa kai afu tautasee rakisinnaree. Innee aufaridaqa innaaru qida mariaqa innee miqidaqa sia nimaniranaki aqufifaranoo, inni irirafa kai afeeka marifaqa inneeqa uqanna kudoosaapee mariafanoo.
MAR 14:39 Yisufa miqi qimasee qimannimiseenoo kafaa anirandeenoo indaaru qundee kai inoo innaaru qinau. Innaaru qimaseenoo oonu nindafoofaqa mina faiqi namu kafaa nisuku faiqaqeeiqau misa nifu fannoo ummaarareenoo sia findi fuaqaa ufaqa findifi Yisuna kafaa qafamaseeqa nári faiqaranara nisaurusee ufara randaqau.
MAR 14:41 Yisufa kafaa oonu innaaru qimasee anireenoo narí faiqi namu qimanniminoo qinau. Innee kaqi fee faiqaidee kaqi fee idooaidee. Doo saa doo aupurara aukuana doo anireenoo, doo qafaaqa manda oosana maree mariasa nisaukuki ueeqaaninna fasiqafa qini mara quqaannoo.
MAR 14:42 Doo findi fifaqa fua. Doo qafaaqa qini ueeqee mari fasiqafa doo anidanoo.
MAR 14:43 Yisufa kaqi misa faqa ufa qimarufanoo Yisuna faiqi namukiqari qisaukuqara taikasee qikunni ooqu qaara mararanakiqari mina auqu Yudasifa aniranau. Amaana maqa aanaiqikirausa uriqararausa faqa Mooseena sandufa akoofasauqa faqa Yuda maqannaasa faiqí firaasa faqa maqusai kaqi maridaqa faiqí moomoo Yudasina faqa niqiqoofaqa rakira duru saamu qumareeqa Yudasina faqa asukunaki aniqau.
MAR 14:44 Faasai Yudasifa qimanniminau, asukunaki innee aaqee foora qinee oonureeqa mi fasiqana amooqaanamma qafaaqa, mee innee randeemaria fasiqana amooqaanaura. Innee mina rumbamaree amiqimandee rakisisee maree fuaqa.
MAR 14:45 Yudasifa anireenoo Yisufinnai oonureenoo oo ufasaa rakisira fee qimasee amooqanau.
MAR 14:46 Amooqoofaqa mina faqa anusa mina qafamaseeqa qumarasee rumbamaree amiqimmasee rakisi qumara maree maree fiqau.
MAR 14:47 Faiqí moo fannoo miqoo kikiqinoo mariufa mina qafamaseenoo narí rakira paipana qumareenoo nariraree qimaseenoo moo fasiqa aanaiqikirausa uriqararana ainainira faiqi aaqoo ateeka aqusanau. Yisufa qimanniminoo qinau.
MAR 14:48 Innee qiniara mandaikamma nimaqee mari fasiqa fee qimasee duru saamu indaaiqa aniree qini qumaraidee.
MAR 14:49 Faasaambaasaana moomoo kari akooqoo amaana maqaki keeqaidaqa faiqí anaasee ufa qimannimimarunausa maridaqa naqaa innee miqoo qini qumaraaqaana mariaasee. Tamummaqara fasiqauqa akara anoona doo mimau kambiqaani. Doo qini qumaree fuaqa.
MAR 14:50 Yisuna faiqi namu mina qafamasee quandaki miqooqari sandama qaraasa mambiqau.
MAR 14:51 Misa Yisuna mara maree fufanoo moo kumaaraa fannoo qamunna kai narí afaaqa ititaseenoo misa ninaaqiana fimarufaqa misa mina qafamasee mina faqa rumbaanee qimasee qumarararufanoo mi kumaaraafa mafi narí qamunna rakeemma aquseenoo kaqisamu sandamaqaraasamminau.
MAR 14:53 Misa Yisuna mara mareeqa aanaiqikirausa uriqararana maaqaki quqaqau. Mi maqanaki aanaiqikirausa uriqararausa faqa Mooseena sandufa akoofasauqa faqa Yuda maqannaa faiqí firaasa faqa minaki faasai eendaki suqiqa mariqau.
MAR 14:54 Peetooroofa misa ninaaqiana nianasaa qumee oonureenoo aanaiqikirausa uriqararana maaqa naambeeqai ooru keeqafinoo rakisimaru fasiqausa faqa ida aaqa ooqu marifi qaani marinau.
MAR 14:55 Aanaiqikirausa uriqararausa maaqaki maridaqa Yisuna kuqaruaneera mina ummaarara randoosia sia paquriqau. (Mooseena sandufa maaqi qimaqoofa, moodaa fasiqa fannoo qinnufafa sia anoonaikiannoo. Qaara fasiqa fannoo kikiqamafi qinafa mifa anoonaikiannoo. Misa minara iriseeqa faiqí qaaraqanda mi ufana qifaqa Yisuna ariraree qiqau.)
MAR 14:56 Moomoosa aniree Yisunara unnufa qufanoo sia misa ufa fannoo moodaa karinoo marinau. Misa ufa fannoo naadu naadu qufanoo sia amanaikinoo marinau.
MAR 14:57 Miqoo akaqausa findi fufaqa Yisunara unnufa maaqi qimasee qiqau, mifa maaqi qimasee qifaqa maasa iriqa qinee firaa amaana maqa faiqí usakaqoona aiqama rapeepaamma aquseeqa qaaramoo faasaana aiqarainaqa sia faiqí nisaukunnai usakaaqaairana usakasaanauree qifaqa iriqa qufaqa misauqa faqa sia amana amana kai mi ufana qiqau.
MAR 14:60 Misa miqi qimasoofanoo aanaiqikirausa misa uriqararafa aiqamausa nifusaa findifinoo Yisuna iranau. Misa ufa oosana oosana aniara qiafana ani ufa sia fee maridanoo fee qinaqa iriaqa qufanoo Yisufa sia ufa qinau, kaqi kasooinoo marinau, Miqi masoofanoo aanaiqikirausa misa uriqararafa qimaminau, anee kuqaa fee Anutuna asauku mundirafa maridanee, anee kuqaa Anutuna amaaku amooqimaria fee maridanee qufanoo Yisufa qinau eeoo qinee mina amaaku marunausa maridaqa, kasooqaqee innee qini faiqí nimaaku qiqafeefaranoo, qinee uriqararana Anutuna aaqa asauku uqannai ooqufaaqee mariana qiqafeefaranoo mari inaqa kasooqaqee innaarunaindari asuru namufaqa qumuanaqa mikamuqoo faqa innee qini qiqafeefaranoo.
MAR 14:63 Aanaiqikirausa uriqararafa mina iriseenoo aanoommaseenoo narí qamunna parara qima quqaseenoo qinau, maasa fifau faiqí ufara randaidaqa, doo mina manda ufa iriafanoo innee minara naqi fee qidee qufaqa misa aiqama qiqau mifa manda oosana fiqararafa maridanoo nariara Anutuna amaaku fee qidanoo, kuqiranaki kai fuani.
MAR 14:65 Miqi qimasoofaqa akaqausa Yisuna niqaara fida amaqaseeqa qamunnannai afu ruumbamaqaseeqa nisaukusamu oori aruseeqa iraqau, mina yafee ani arinoo fee qinaqa iria. Miqi qimasoofaqa minasaa rakisimaru maara fasiqausa mina mara mareeqa nisaukusamu oori ariqau.
MAR 14:66 Misa maaqaki Yisuna arira ufa qimarufanoo Peetooroofa maaqa kooqinni sundiauqa faqa idaki ooqufaaqee ufanoo aanaiqikirausa uriqararana ainainimaru manaaqafa aniree Peetooroona miqoo ida qaani marufanoo qafamaseenoo mi manaaqafa mina oori aiquqummaseenoo qimaminoo qinau anee Nasareeteendaraafa Yisuna faqa nuanafa mariananoo.
MAR 14:68 Peetooroofa mina iriseenoo qaoo qinoo qinau, qinee sia minara iridaqa sia anee qiannufana oosana iridaqee qimaseenoo findufumakufanoo mi maaqana ququsa kooqi marunnai fufanoo kookooraana ufa qinau.
MAR 14:69 Ufa qufanoo mi ainainira manaaqafa Peetooroona kafaa ooqu qafamaseenoo miqoo marusa qimanniminau Innee maana qafaaqa Yisuna faqa nimarifa maridanoo fee qufanoo Peetooroofa kaifaa qaoo qinau. Kaqikaaqoo marikufaqa miqoo mi fasiqausa marusa Peetooroona afeekaikamasee qimamiqa qiqau. Anee Yisuna faiqi namu marianafa mariananoo, anee naqi fee mandee qaoo qidanee, ani ufa fannoo ani kooroomamaqaifaqa iridaqa, anee Yisuna maqannaafa Kariree maqannaa marianafa mariananoo.
MAR 14:71 Peetooroofa mina irisee narí amana aqiqamasee qinau, qinee sia anoona ufa qimamiananoo Anutufa daruani. Qinee anee qiannanara sia uqanna minara iridaqee qufanoo miqi quqoo kai kookooraana kafaa ufa qinau. Peetooroofa mina ufa irisoofanoo aaqoo ruqianau Yisufa maaqi qimaqoo ufanara oonumafi irinau. Fafaa eendaki anee qaaramoo kari qiniara sia fee qinanoo kookooraana qaara kari ufaqiannoo. Peetooroofa mina iriseenoo asauruseenoo ikiraqamaree quqasee finau.
MAR 15:1 Iqaqoo kananaana aanaiqikirausa misa uriqararausa faqa Yuda maqannaasa faiqí firaasa faqa Mooseena sandufa akoofasauqa faqa aiqama uriqararausa faqa maasa asukunai qunnufafa sia anoonaikidanoo fee qimaseeqa iqaqoofaqa Yisuna kaqi kaqi ufa suquseeqa nariqa Yisuna arifandinna ufana kaifaa andeeqaseeqa. Misa ufa andeeqaseeqa Yisuna mara maree sainandannai rumbamareeqa afiqa mareeqa Roomma maqanna kiapana Piratoona amiqau.
MAR 15:2 Amisoofanoo Piratoofa Yisuna irammirinau. Anee kuqaa fee Yuda maqannaa karaambaiqa fee maridanee qufanoo Yisufa qinau anee qianandeemmiqa maridaqa.
MAR 15:3 Aanaiqikirausa uriqararausa aniree moomoo unnufa Yisunara qimariqau.
MAR 15:4 Piratoofa mina iriseenoo Yisuna kafaa irammirinoo qinoo, misa moomoo mandainainara aniara qidaqa, ani ufa sia fee marifanee anee sia fee qinnaree qufanoo Yisufa sia ufa qufanoo Piratoona aaquqanau.
MAR 15:6 Aukuana aukuana aiqama aukuana Piratoofa ainnaaqarara qoomaqa saara moo adiafaaira ainaina Yuda maqannaasa nimianauree qimasee rumbaranakinaana moo iduku niminau. Nári nidimaruna uqanna idukunniminau.
MAR 15:8 Mi aukuanna Yisuna ufa irimaria faasaana faiqí anaasee moomoo Piratoona oopisaki aniree qiqau. Anee ooqai aukuana aukuanasaa faiqí moo idukusee qimariannana maqee maa aukuanna faqa moo idukusee qimia. Karafusa marina moo iduku qimianee qimasaida farafara imariqau.
MAR 15:9 Piratoofa qinau, Amanee qinee Yuda maqannaa karaambaiqa Yisuna iduku niminauree qinau.
MAR 15:10 Piratoofa aanaiqikirausa uriqararausa sia anoona marunara fifau rairai qidaqa Yisuna mareeqee Piratoona amunara irinau. Minara kai Piratoona amanee qinee Yisuna iduku nimianauree qinau.
MAR 15:11 Aanaiqikirausa minara iriseeqa faiqí anaasee fuki faaki qufaqa misa Barabasinara iduku nimiannee qiqau. Mi aukuanna faiqí moo auqu Barabasifa karabusaki marinau. Mifa akaqausa saimbaqa rakiranaki faiqí moo kuqannarusoofaqa karafusaki quqaqau.
MAR 15:12 Misa Barabasinara qufanoo Piratoofa kafaa aiqamausa qimanniminoo qinau. Yuda maqannaasa karaambaiqa qimariana minara naqi fee ianauree qufaqa misa moomoosa kafaa faaqa quqasee qimamiqa qiqau, pirimmannai aunirira saqarisaa aruannee qufanoo Piratoofa misa irammirinoo qinau mifa nana manda oosana maraifaqee aruanauree qufaqa misa firaaqoo uqanna faaqa quqasee qiqau, pirimmannai aunirira saqarisaa aruaqee qufanoo Piratoofa faiqí anaasee moomoosa nidirana nimianee qimaseenoo Barabasina iduku nimiseenoo Piratoofa narí maara fasiqauqa nimisee maasa Roomma maqannaasa oosana marasee raitasaa qainna rumbeeqoo samu mina ataufakaaqa aru umooqukamasee afiqamareeqa muru aun irina saqarisaa pirimmannoo aruaqee qinau.
MAR 15:16 Piratoofa miqi qimasoofaqa sundiauqa iriseeqa Yisuna afiqamareeqa koota maqakiqari rafudamakufaqa miqoo Piratoona firaa amiqira maqa naambeeqai raitasaa qainna rumbeeqoo samuna Yisuna ataufakaaqa aru umooqukamaseeqa ataasa ataasa naaree qimasee fafaa aunirira saqarisaa aruanauree qimasee kiapana firaa maaqa naambeeqai munusee aiqama sundiauqa naaramasoofaqa anireeqa qamunna moo maara fasiqa misa qamunna taatuqee arirana afisuamaqasee amuka faqaa sanda saatunanda fooqaana mara maree karaambaiqa qafee fee qimasee Yisuna akiaqa aranaiqi afisuamaqasee nisauku niqinaaqa quqasee kiapana amandee mariandee mandee amandamasee qimamiqau, Oo Yuda maqannaa karaambaiqa sia dauni kuqinnaranoo kisaaqasaa marinnaranoo.
MAR 15:19 Miqi qidaqa sasamimi ateekarasamu qumaree mina akiaqa rupeemma amidaqa firaaqoo ataasa ataasidaqa mina afaaqai niqaara fidiamaqasee mina oorinni niqoori saunarafufaqa ataasa ataasa qimariqau.
MAR 15:20 Misa ataasa ataasa qirana taikafufaqa misa saasaakoona arira qamunna raipaqusee narí qamunna afisuamaqasee aunirira saqarisaa firimmannai arifandinnaqoo afiqee fiqau.
MAR 15:21 Maqusai ari iseeqa Yisuna doo afiqee fimarufanoo kudoosaapeenoo narí aunirira saqari sia amanaikufaqa maara fasiqauqa faiqí moo narí maaqaindari aniroona aanai paqurimasee mina auqu Simoona amarafa. Sia Yisuna faiqi namukinaafau mina amarafa moo fannoo mifa Sireenee maqusaindaraafa Areekasandeerana faqa Rufusana faqa nikoofa marinau. Sundiauqa minara Yisuna aunirira saqari aku maree fua qimasee arirarufanoo mifa misa faaqaanara rufiasee aku maree finau.
MAR 15:22 Miqimasee misa Yisuna afiqa maree fifi ufaqa Koorookata amuaqunamusaa afiqee fiqau. Mi maqa maaqana auqu faiqí nikiaqa amudaani fee qiqau.
MAR 15:23 Yisuna miqoo munu quqasee uainna nammari marasee moo marasinna minaki quqasee minara naanneera fuki faaki qufanoo qaoo qimasee sia nanau. (Mi marasinnana nári ufakiqari meerafee qimariqau. Mi marasinnafa namasainaqa sia afaaqa aidafuanifeera amufanoo aidafirana maraanee qimaseenoo sia mi marasinna nanau.)
MAR 15:24 Marasinnara qaoo qimasoofaqa misa mina qumaree aunirira saqarisaa rummamaqasee pirimmannai aruseeqa uqeereeqeeqa rakiaqau. Rakiaseeqa mina qamunnauqa faasai raipaqu quqaqoona mara maree kaatara foora sararamandee yafee maraannoo yafee maraannoo qimasaida maraqau.
MAR 15:25 Suani maqee ururoofaqa naina kirooka aunirira saqarisaa ariqau.
MAR 15:26 Yisuna arira oosana raufiqira saqarisaa akara rumasee aunirira saqari akiaqai aiqama qafaaqeera atukaraqau. Maaqi masee akara rinau. Maa fasiqafa Yuda maqannaasa karaambaiqa maridanoommi qimasee akararinau.
MAR 15:27 Maara fasiqauqa karafusakinaana faiqí mandaikamannimaqee maruqanda ruumba quqaqoona minakiqari mara maree Yisuna aaqa minisee nariqa auniriranasaa arusee Yisunaindi qambaanai rakiqasee miqanda aunirirana dinni dinni rakiaqau. [
MAR 15:28 Miqimasoofanoo ooqeenaa tamummaqara fasiqauqa akara anoona kambiqanau, misa qiqau, misa mina mareeqee manda oosana maree mariasaki quqeefaranoo.]
MAR 15:29 Yisufa aunirira saqarisaa dirinoo marufaqa faiqí anaasee moomoosa fiqaree aiqaree idaqa qufoonaridaqa ataasa ataasa qimasee manda ufa qida qiqau, anee maasa firaa amaana maqa rapeemasee qaaramoo faasaana kafaa usakeennaree.
MAR 15:30 Amana maqee aneenna kai tatuakinana maqasaa aqufinana asumu maria qimaru faqa aanaiqikirausa uriqararausa faqa Mooseena sandufa akoofasauqa faqa ataasa ataasa qidaqa narí qimami narí qimami qiqau, Mifa moomoosa asumu marirana nimirarimarifa nariara sia asumu mariannoo.
MAR 15:32 Doo maqee Anutuna asauku mundirafa maasa Isaraee maqannaasa karaambaiqa auniriranasaaqari tatuaki aqufinaqa maasa irirana minasaa rusisee kuqaa Anutuna amaaku fee qianaura. Manda fasiqaqara dinni dinni nári saqarisaa aruaqanda miqanda faqa Yisunara ataasa ataasa qimariqau.
MAR 15:33 Suani qambaana akiaqa amummaqa ururoofanoo mi maqa maaqana aiqamai asukuna rafaaqafinau. Suani afu safasasaa mundufanoo asukuna taikafufanoo kafaa suani qanau.
MAR 15:34 Asukuna taikararimarufanoo Yisufa faaqa rumasee Eeburu ufakiqari qinau Eeri Eeri rama sabakatani maasa ufakiqari qini Anutu qini Anutu, naqaa fee ifanee qini minni qiseenee qimasoofaqa akaqa fasiqa anaasee miqoo marusa mandirira iriseeqa qiqau, Doo iriaqa mifa Eeriana aaraidaqinoo qufanoo faiqí moo fannoo Yisuna aunirira saqari atukaki sandee oonureenoo paadura au fooqaana maraseenoo maara fasiqauqa nári maqee maqee neemaru uainna nammarinaki raaraamaseenoo aika maraseenoo minasaa rutaquseenoo Yisuna nammari naanifee qimasee uqeereeqee Yisuna afaurusaa quqasoofanoo qumbifiqamma namasoofanoo amu fasiqafa qinau, Doo maasa rakisia, Eeriaafa anireenoo aunirira saqarisaaqaraana tatuannoo fee sia fee tatuannoo.
MAR 15:37 Yisufa mi nammarina qumbifiqamma namaseenoo firaa kari faaqa rumaseenoo doo kuquaraasinau.
MAR 15:38 Kuqufanoo aaqee kai Yeerusaree firaa amaana maqakinaa qamunna dirirafa ammuqundari qambaana kai raaqumaree muqufi aqusanau. Mi qamunnafa naaquqara maaqasaa ititara qamunna marinau. Minaki faiqí sia keeqeemaria maqa marinau. Aukuana aukuana Anutuna aanaiqikirausa uriqararafa kai minaki sipsipa anaaqa fidika mara maree mi maqanaki raaraa imarinau. Doo maqee qamunna anaqinoo marifaqa faiqí anaasee Anutuna aaqa fimaria aana ititee marifa doo maqee atuanoo maridanoo.
MAR 15:39 Maara fasiqauqa uriqararafa aunirira saqarisaa rakisimarufa Yisufa faaqaruna faqa kuquna faqa qafamaseenoo aaquqoofanoo qinau, kuqaa maa fasiqafa Anutuna amaaku maridanoo.
MAR 15:40 Yisufa aunirira saqarisaa marufaqa anaasee akaqausa miqoo maridaqa nianasaa maridaqa rakisi mariqau. Misakiqari Saroomeefa faqa Mariana amarafa Makadara maqusaindari anufa faqa, Mariana moo amarana faqa mifa kumaaraa Yameesa Yooseesa ninoofa marufa marinau.
MAR 15:41 Mi anaaseenamusa Kariree maqusaindari Yisuna dadaaqimarusa mina faqa afaqaqa aniusa mariqau. Sia misa kai, moomoo aanaaseeuqa faqa Yisuna faqa Yeerusaree maqusai aniroosa ani marida aunirira saqarisaa rakisi mariqau. (Yisuna aukuana narí maqannaasa maaqimmasee madika indufusaida kuqufusa nikundee mariqau. Misa ooni firaana kasaaqa aamara auquseeqa minaki keeqafufaqa dinni dinni moomoo aamara auqiiseeqa kuqusa minakiaqa naadu naadu nikundee mariqau. Moodaa kai moo kari akundeeqa mina afunda taikoofanoo kaifaa moo fannoo kuqufaqa miqikai imariqau. Sia moodaa karifau nikundee mariqau. Moo kari moo kari nikundee mariqau.)
MAR 15:42 Yisufa kuqufufanoo suani dupufanoo Arimateea maqusaindaraafa mina auqu Yooseefaana amarafa aniranau.
MAR 15:43 Mi fasiqafa Yuda maqannaa ufa suqiranaki keeqeemarufa marinau, aiqamausa minara kaaqa andeeqara fasiqa fee qimarufa marinau, maqee maqee Anutuna ququsa innaarunaindari maqasaa kambiqaaninnanara rakisi marufa marinau. Yisufa kuqu faasaana sabata deedaqira faasaanee qimarunasaa Yooseefaafa Yisuna iri duna sabata faasaana aunirira saqarisaa kaqi dirinoo mariandoo qimaseenoo anireenoo paasoosamasee Piratoona maaqaki kaqi keeqa finoo Yisuna iriara qufanoo Piratoofa Yisufa dauni kuqunara tautumasee maara fasiqauqa misa uriqararana aaramaseenoo iranau. Yisufa kisaaqasaa fee kuqinoo fee qimaseenoo mi sundiana ufa iriseenoo Yooseefaanara doo maraannee qufanoo
MAR 15:46 Yooseefaafa raudamaki qamunna firaana moo feefaurumamaree oonuree Yisuna iri saqarisaaqaraana tatu quqaseenoo qamunnasaa kukuqa mandee aku mareenoo ooni aamara auquqoo madikanaki Yisuna iri quqaseenoo ooni firaana quanda quandammeeqeenoo ooni aamarasaa ititanau.
MAR 15:47 Mariana amarafa Makadara maqusaindaraa anaaseefa faqa Mariana moo amarafa faqa Yooseesana anoofa miqoo rakisida iri quqaranara qafee mariqau.
MAR 16:1 Yisuna iri kaqi ooni aamaraki marufaqa Mariana amarafa Makadara maqusaindaraafa faqa Mariana moo amarafa Yameesana anoofa faqa moo anaasee Saroomeesa faqa Sabata faasaana aiqaroofaqa kuqimariasa akunnimaqee maria marasinna feefaurumamaree Yisuna irisaa akuanee qimasee mi eendanaki deedaqiqau.
MAR 16:2 Kananaana iqaqoofanoo suani maqee ururoofaqa mi anaaseesa Yisuna akundoo ooni aamaranaki fiqau.
MAR 16:3 Aanai fidaqa misa narí qimami narí qimami qiqau, firaa oonitia fannoo ooni aamara ititanoo marifaqa yafee dadaaqinaqee umbaqi quqasee fee marasinna aku amaqeefaree qimasee oonu qafoofanoo ooni faasai quanda quandammeeqee mafi aquqoofanoo marinau.
MAR 16:5 Misa ooni qafamasee ooni aamaraki keeqafi qafoofanoo asauku uqannai kumaaraa moo fannoo qamunna eekara arirana afisusee ooqu marifufaqa qafamasee tautumasee kaaqa rufiaqau.
MAR 16:6 Tautumasee rufioofanoo mi kumaaraafa qimanniminoo qinau sia tautumasee rufiaaqa. Innee Yisu Nasareetee maqusaindaraana aunirira saqarisaa pirimmannai aruanara randee mariafanoo, mifa sia maaqoo maridanoo findi finoo maridanoo. Doo qafaaqa, maaqoo misa mina iri quqeeaa. Doo fuaqa maa ufana narí faiqi namufaqa Peetooroona faqa qimannimiaqa. Yisufa inni noorinni Kariree maqa maaqai finoo, innee miqoo oonureeqa narí qundee kai iqa mina qafeefaranoo.
MAR 16:8 Mi anaaseeuqa mina iriseeqa ooni aamarakiqari rafudamakufaqa sandamaqaraasammiqau. Kaaqa rufiarana faqa naindiri roofaqa sandaqau. Misa maqusai oonureeqa kaaqa rufiasee sia moosa qimannimiqau.
MAR 16:9 Yuda maqannaasa Saririqara amaanasaa fee qimasee amaanasaara indaaruqaa faasaanee qimariqau. Mi indaaruqaa faasaanna sandoo anaasee namusa anu faasaanasaa Mariafa Makadara maqusaindaraafa naaree Yisufa findifuna qafanau. Ooqai Yisufa kaqi maru kamuqoo faafasaaqa narí anoona amarana mi Mariana aunduraki faafasaaqa qisauku dinni taikasee dinni ani qaara marasee marufanoo Yisufa kaqi maruqoo mina aunduraindaraa faafasaaqa niqiqoofaqa rafudamaki sandamafiqau. Yisufa mi anaaseena afusaa narí kuqiranakiqari findifuna indaaru kooroo inau.
MAR 16:10 Yisufa mi anaaseena afusaa kooroomambunara Yisuna aiku asauku oonu maaqi qimasee qimanniminau,
MAR 16:11 Yisufa kuqiranakiqari findifinoo marifaqa qinee qafeeqee qufaqa misa kaqi minara soofaaridaqa ikiraqee maruqoo marufaqa mi anaaseenara unna qiifoo qiqau.
MAR 16:12 Yisufa kafaa moo oosana maraseenoo narí faiqi namukina qaaraqanda nifusaa kooroo inau. Miqanda Yeerusaree maqusaindari moo maqusa kaqikaa maqusai fimarufanoo Yisufa aanai nifusaa kooroomambufaqa miqanda oonurandee aniree Yisuna aiku asauku qimannimufaqa unna fee qiqau.
MAR 16:14 Yisufa mina inaaqiana narí faiqi namu qisaukuqara taikasee qikunni ooqu moodaa mararausa narana nee marufanoo kooroo inau. Kooroomafinoo misa mina qafee marusa unna fee qunara niqinoo qinau, inni irirafa ufa rukiee marisa mariafanoo sia qiqafee mariasa ufara innee irimariafanoo.
MAR 16:15 Yisufa miqi qimasee qimannimiseenoo kafaa maaqi qimasee qimanniminau. Innee maa maqa maaqana afaaqasasa aiqama maqannaa iannai uqanna oonureeqa qini amiqira fasaasa ufa qimannimiaqa
MAR 16:16 Qinisaa irirana rusimariasa irirana rusidaqa nammari maree mariasa misa innaarunai naaru marira asumu mareefaranoo. Qinisaa sia irirana rusimariasa misa nariranaki fifaranoo.
MAR 16:17 Qinisaa irirana rusimariasa maa afeeka ainainna misaki marinaqa qafeefaranoo, misa faiqí naundurakinaa faafasaaqa qini duqusaa niqiqeefaranoo misa moo maqannaasa ufa sia nári iri marianakiqari qifaranoo.
MAR 16:18 Faiqí kuqannarimari sakanifa ukaqanimisainaqa sia mandaikifaranoo. Misa ufaaqa namasee sia kuqifaranoo. Misa nári nisauku aurimariasasaa rusisaifaqa findi fifaranoo.
MAR 16:19 Yisufa narí faiqi namu faqa ufa qiqisoofanoo Anutufa mina uqeereeqeenoo innaarunai narí aaqa asauku uqannai quqasoofanoo miqoo ooqu marinau.
MAR 16:20 Yisufa innaarunai ooru fufaqa mina faiqi namu aiqamai fifainidaqa Yisuna amiqira fasaasa ufa qimannimiqa niqau. Misa miqi marufanoo Karaambaiqa qumee dadaaqufanoo faiqí anaasee misa ufara kuqaa fee qiaqeera faiqí sia auqaaqaa ira afeeka nimufaqa auqoofanoo anoona kambiqee marinau.
LUK 1:1 Oo maa fasiqa Tioofirusa maasaki Yisunasaaqari kambiqoo ainainara moomoo fasiqauqa amanamasee akara riqau, Yisufa kambiqooqooqari minara qimannimimarusa misa qimannimufaqa akara riqau.
LUK 1:3 Oo Tioofirusa qinee Rukaasa Yisufa kambiqooqooqari mifa niniunara randoorandaamasee amiqimasee iriseeqa qinee faqa padimasee akara ruanauree qimaseeqa akara rummamaqaidaqa.
LUK 1:4 Anee kuqaa anoona ufa tia irianneera akara rumamaqaidaqa.
LUK 1:5 Mi ufana oosana maaqimminoo marinau, Eeroodeefa Yudeeaa maqa maaqaki karaambaiqa maru kamuqoo Yisufa kambiqanau, mi aukuanna Yeerusaree amaana maqasaa rakisirafa moo mina auqu Seekariafa marinau. Amaana maqasaa rakisi marusa faiqí oosana oosanakiqari mariqau, nuqufaqaasa mariqau, Seekariafa Abiaana oosanakiqari marinau. Mina anaaqa Aaroona akeeku akaaku mina auqu Eerisabeeta nammarifa marinau.
LUK 1:6 Mi qafaqiqanda Seekariasa Eerisabeetasa andeeqasee Anutuna ufamau fimaruqanda mariqau. Aiqama karaambaiqa Anutuna aaquqira ufa faqa naamuaqira ufa faqa mi mau fimaruqanda mariqau.
LUK 1:7 Eerisabeeta nammarifa aafanaasee marunara miqanda asooqaqeeqa faiqi siaiqanda mariqau.
LUK 1:8 Moo kari narí saika faasaana Seekariafa Yeerusaree amaana maqaki keeqafinoo narí amaana maqasaa rakisira saika Anutuna afusaa mina saika qimari fee qimarufanoo maree marinau. Amaana maqasaa rakisi marusa misakiqari yafee amiqira unda imari nammarina amaana maqaki suqeemaria qaindanasaa suqaannoo fee qimasee masisa rutukiara foorammasee Seekariana uqannifiqasoofanoo findifinoo mi amiqira undana imaru nammarinaki ida qumbiaramasoofanoo qeemarufaqa mikari faiqí anaasee moomoo amaana maqa naambeeqai maqusai suqufufaqa innaaru qimariqau. Amiqira unda imari nammarina qumbiaramasaafanoo qaidanoo mina muna fannoo faiqí anaasee innaaru qimariafa mi ida munnara foora ooru fidanoo Anutuna aiki ambuidanoo misa innaaru koorooidanoo.
LUK 1:9 Seekariafa mi nammarinaki ida qumbi marufaqa faiqí anaasee madaanai innaaru qimarufanoo Seekariafa naríara amaana maqaki marifanoo mi nammarifa qeemaru qaindana aaqa Karaambaiqa Anutuna qangiroo moo fannoo miqoo kai kambiqafufanoo Seekariafa miqoo marufanoo qafanau.
LUK 1:12 Seekariafa mina qafeenoo tautinoo rufianau. Tataqanoo marufanoo mi qangiroofa Seekariana qimaminoo qinau. Seekaria sia rufiaa, Anutufa ani innaaru qirana irinoo ani anaaqa Eerisabeetana dadaaqinanoo ani amaaku maqaannoo, Maqasainana anee mina auqu Yoohaneenee qia.
LUK 1:14 Mi faiqina maqasainaqa ani faqa moomoosa asasifaranoo.
LUK 1:15 Anutufa minara amiqira fasiqa auqufaqaa fee qiannoo, uainna nammari fee afeeka nammari fee sia naannoo mina maqainnaqooqari Anutuna naaquqara maraquna fannoo aakufi mariannoo.
LUK 1:16 Mifa Isaraee maqannaa moomoosa Anutuna ufa minnisee kaqirunna fimariasa kafaa naarameeqee nariqa karaambaiqa Anutuna aramandunnai quqaannoo.
LUK 1:17 Mifa Anutuna ufa marasee qimannimimarifa mifa maqasaa fasiqa uriqararafa afeeka Anutuna tamummaqara fasiqa ooqai maruna Eeriaana fooqaafa afeeka mariannoo. Mifa faiqi nikausamara faiqi minnisee furufari mariasa quandakina nári faiqi namuara nimuqusinaqa moodaanaki kifaranoo. Ufa rukiee mariasa faqa mareeqeenoo andeeqee mariasa mariranaki quqaannoo. Miqi marifanoo mi fasiqafa faiqí anaasee mareeqee karaambaiqa qumiranaki amanaikianno.
LUK 1:18 Mi qangiroofa miqi qufanoo Seekariana aaquqoofanoo mi qangiroona qimaminoo qinau, naqimasee mi ainainafa kambiqaannoo fee, Sia amana, qinee nauraiqi maridaqa, qini qinaaqa faqa asooqa maridanoo.
LUK 1:19 Mi qangiroofa mina ufa iriseenoo quandafi qimaminoo qinau, Qinee Kabarieerasa maridaqa Anutuna afusaa kiki iqa marunausa maridaqa. Mifa kai qini diqiqaifaqa maa amiqira ufana ani faiqí asumu faiqi aanaaqi maqeemaria faasaana kambiqaannoo fee qunana sia iriananoo.
LUK 1:20 Anee qini ufa sia iriannana akiaqara ani ufa akia finana mariinana maa qimamunna ainainafa kooroomafinanoo ani ufa rakeeiannoo.
LUK 1:21 Seekariafa faqa qangiroo faqa Yeerusaree amaana maqaki mi ufana narí qimami narí qimamidaqa marufaqa faiqí anaasee maqusai Seekarianara kisaaqasaa afeesida marusia qiqau nanaree kisaaqasaa amaana maaqaki maridanoo fee qimarufanoo Seekariafa amaana maqakiqari raudeenoo qimannimirara oo raqoofanoo sia amanufanoo asaukunnoo qimanniminau.
LUK 1:22 Faiqí anaasee mina ufa akiafuna qafamasee oo amaana maqaki Anutuna kooroo irana moo qafeenoo fee qiqau.
LUK 1:23 Miqooqari Seekariafa amaana maqaki ainainirana taikasoofanoo moo fannoo mina amaaqaki aniroofanoo Seekariafa doo amaaqa finau.
LUK 1:24 Miqoo marufanoo mina anaaqa Eerisabeeta nammarifa amuaqu uqaikufanoo moodaannai qisauku quqoonasaa maaqaki kai marinau.
LUK 1:25 Eerisabeeta nammarifa qinau, doo maqee Anutufa faiqí anaasee nifusaa qinee kisaaqasaa marunna sia faiqi maqaunna qisaurirana taikaqiseenoo.
LUK 1:26 Eerisabeeta nammarifa amuaqu uqaikinoo marufanoo dinni taikasee dinni ani moodaa quqoona aiqaroofanoo Anutufa narí qangiroo moo auqu Kabarieerana aqiqoofanoo Kariree maqa maaqaki kaqikaa maqusa Nasareetee maqusai ooqufinau.
LUK 1:27 Mifa maanaaqa uqanna ufa qimamiraree qimaseenoo ooqufinau. Mi manaaqana auqu Mariafa. Yooseefaafa karaambaiqa Dafidina ati maraanifeera utaaqama amaqaqoofanoo maru manaaqana Mariana qimamiraree qimasee ooqufinau.
LUK 1:28 Mi qangiroofa Mariafa maruqoo anireenoo amandeenoo qinau. Asooarafa aniki mariani, karaambaiqa ani faqa kukeeqanoo maridanoo dadaaqidanoo doo firaaqoo ani amiqi amiqinoo.
LUK 1:29 Mariafa mina ufa iriseenoo tautinoo mina ufa anoonara firaaqoo randanau.
LUK 1:30 Miqufanoo qangiroo fannoo qimaminoo qinau, Oo Maria sia rufiaa doo Anutufa narí afaarirana anisaa quqeenoo.
LUK 1:31 Anee amuaqu uqaikinana akoonaiqi maqaseenana mina auqu Yisunee qinnaranoo.
LUK 1:32 Mifa uriqararafaikinaqa misa minara firaaqoo uriqarara Anutuna amaaku fee qifaranoo. Karaambaiqa Anutufa Yisuna mareeqeenoo mina akeeku akaaku Dafidina aanna ramasee uriqarara karaambaiqaikiannoo. Yakooboona atiuqa Isaraee maqannaasa naaru naaru misa karaambaiqaikianoo, naaru naaru sia taikaannoo miqinoo mariannoo.
LUK 1:34 Mariafa mi qangiroona ufa iriseenoo qinau, Qinee maanaaqa uqanna maridaqa naqimasee anee qianandee faiqi maqaanauree.
LUK 1:35 Qangiroo fannoo iriseenoo qimaminoo qinau, Anutuna naaquqara andeeqara maraquna fannoo ani aakufinanoo Anutuna afeeka anisaa mariannoo, minara misa mi naaquqara faiqi anaaqinara Anutuna amaaku fee qifaranoo.
LUK 1:36 Maria aneenna ati Eerisabeetanara iria asooqa faiqi maqarana sia amana marifa doo maqee dinni taikasee dinni ani moodaa quqoona aundurai amuaqu uqaikinoo maridanoo, minara ririmma miqinoo Anutufa sia moodaa ainaina sia amanaikiannoo doo aniara faqa qunnana amanaikiannoo.
LUK 1:38 Mariafa qangiroo ufa iriseenoo qimaminoo qinau. Qinee Anutuna ufamau fimarunausa maridaqa anee qianna ainainafa amana qiniki kambiqaannoo, miqi qufanoo qangiroo fannoo quqasee finau.
LUK 1:39 Mariafa miqoo kaqikaaqoo marinoo unnaaqa mammareenoo Nasareetee maqusaindari Yudeeaa maqamaaqai Seekariana maqusai kisaaqasaa faiqanoo fifiufanoo oorureenoo
LUK 1:40 Seekariana maaqaki keeqafinoo Eerisabeeta nammarina amandanau.
LUK 1:41 Eerisabeeta nammarifa Mariana amandarana irufanoo mina aranandakinaa faiqi fannoo kasinau. Kasufanoo Anutuna naaquqara maraquna fannoo Eerisabeetana aakufufanoo narí Mariana amuaqu uqaikianinnanara sia irufanoo maraquna fannoo mina qimamufanoo firaaqoo Mariana qimaminoo qinau.
LUK 1:42 Aiqama aanaaseekina Anutuna firaaqoo amiqi amiqi ianinafa mariananoo, anee maqeenna faiqi anaaqina Anutufa amiqi amiqi ianinafa mariannoo.
LUK 1:43 Oo qini karaambaiqa anoofa uriqararafa nanaree anee qini qiqafarara aninanee qinee oorudupirausa maridaqa.
LUK 1:44 Anee qini qimandaananoo qini faiqi qiranandakiqari asasinoo kooripoo inoo.
LUK 1:45 Karaambaiqa ani qimamu ufana irisee kuqaa fee qimasee iriannana akiaqara mifa ani amiqi amiqiannoo.
LUK 1:46 Mariafa mi ufana iriseenoo asasammaseenoo qinau, Qini qimuqusa karaambaiqa amooqidanoo, qini daunduraindari Anutunara asasidanoo innaarunai asumu marirana qimimarifammi.
LUK 1:48 Qinee oorudupimasee mina ufa irimarunausa marunanoo kaqi qiniara irinoo, firaa afeeka faqaa Anutufa firaa ainaina qiniki qinara, maaqooqari aiqama maqasaa fasiqa anaasee qiniara amiqi amiqi qifaranoo. Mifa naaquqara andeeqara auqu faqaafa maridanoo, mina ufara rufiee mariasa nifauarana nimidanoo.
LUK 1:50 Maqee mariasa faqa miqoo kambiqainausa faqa naaru kambiqainausa faqa nifauarana nimiannoo.
LUK 1:51 Narí amudaanaiqimari asaukuna uqeeraseenoo aanoo imaria fasiqa anaaseesa nári firannaira irimariasa raurukamasanau.
LUK 1:52 Mifa uriqaree maria karaambaiqausa qumara muqufi quqaseenoo ureeqarausa qumaree uqeeranau.
LUK 1:53 Mifa naararee mariasa amiqira narana ainaina nimuaqu mannimaqaseenoo moomoo narana faqaasa kaqisamu fuaqeera niqiqanau.
LUK 1:54 Mifa maasa Isaraee maqannaa nikeeku nikaaku ufa qimannimuna anoonaikamma nimaqanau, Mifa narí ainainira faiqi Isaraee maqannaasa dadaaqinau.
LUK 1:55 Abarahaamanara faqa iriseenoo amuqusufanoo dadaaqinoo mina aiku asauku faqa naaru naaru dadaaqiannoo.
LUK 1:56 Mariafa mi ufana qimaseenoo qima taikaseenoo qaarammoo quqoona miqoo Eerisabeeta nammarina faqa marinoo quqasee narí maqusai Nasareeteenni finau.
LUK 1:57 Mariafa narí maqusai fufanoo Eerisabeeta nammarifa marikinoo innaamunai oonureenoo akoonaiqi maqanau.
LUK 1:58 Maqasoofanoo mina maqusanaasa faqa mina ainaina faqa iriseeqa oo Anutufa maa asooqana amiqi amiqi inoo fee qimasee mina faqa asasiqau.
LUK 1:59 Maqasoofanoo mi faiqifa moodaa amaana marasoofaqa misa anireeqa Yuda maqannaasa oosana mareeqa nári fainanduidaqa nipata aukuannee qimasee mi faiqi anaaqina apata aukusee narí akoona amaranaikiraree qimasee aniusufiqau.
LUK 1:60 Miqi qufanoo mina anoofa Eerisabeeta nammarifa qinau, sia narí akoona amaranaikiaqa mina auqu Yoohaneefa mariannoo.
LUK 1:61 Misa iriseeqa qiqau, Oo ani atiuqaki sia mi nuqufa maridanoo, naqimasee fee mina auqu raanauree qimaseeqa faiqi aanaaqi akoona Seekariana ufa akiarana nisaukunnoo iramirufanoo Seekariafa papiqa faqa kirifi faqa asaukunnoo qimiaqee qufaqa amufanoo maa faiqina auqu Yoohaneefa mariannoo fee qimasee akara rinau. Akara rumasoofaqa aiqamausa qafamasee tautiqau.
LUK 1:64 Miqimaseenoo Seekariana ufa akiarafa rakeeinau. Rakeemafufanoo Anutuna amooqira ufa aiqamausa nifusaa qimarufaqa aiqamausa qafamasee rufieeqa niqoonausa qimannimufanoo miqooqari aiqamai Yudeeaa aaqana maqa maaqaki daraaninau.
LUK 1:66 Aiqama mi ufana irusa mi faiqi anaaqinara innooqafinoo nana firaa saikee maraanno fee qimasee randaqau, karaambaiqa afeeka minaki akooqoo marifaqa qafaidaqa.
LUK 1:67 Seekariana ufa rakeemafufanoo Anutuna naaquqara maraquna fannoo mina aakufufanoo tamummaqaseenoo ufa qinau.
LUK 1:68 Isaraee maqannaa Anutufa anireenoo narí faiqí anaasee idukunnisainara minara karaambaiqara dufi dufi qianaura.
LUK 1:69 Mifa amudaanai qimasee asumu maraaninnana narí ainainira faiqi Dafidina atikiqari uqeereeqeenoo.
LUK 1:70 Minara ooqai narí naaquqara tamummaqara fasiqauqannai maasa maa ainainnara qimanniminau.
LUK 1:71 Mifa maasa namuqaasaa ititannimaqasee aiqama maasara fidiaqaa imariasa afeeka rafaaqa fuannoo.
LUK 1:72 Mifa narí qimaqoo ufanara irianauree qeeqa naaquqara moodaanaki kira ufa iriseeqa mimau dadaaqianauree qinau. Mifa oori runusee Abarahaamana qimaminau, minaki mifa maasa namuqaa nisaukukinaana mareeqee paasoosiranaki quqaqisainaqa maasa kaqi marianna kamuqoo mina naaquqara andeeqara fasiqa anaasee mariannanara qimaminau.
LUK 1:76 Oo qini faiqi aanaaqi misa aniara firaa uriqarara Anutuna tamummaqara fasiqa fee qifaranoo. Anee karaambaiqa afunni fidana mina aana afisinnaranoo.
LUK 1:77 Anutufa maasara amuqusi marifa nifauee marifa maridanoo maasa innaarunai marira asumu mararafa doo suani qamannimaqeenoora foora inoo maridanoo innaarunaindari maasa kuqiranakiqara foora asukunaki mariasasaa qaannoo maasa asooara aatata niku raannanara qaannoo. Qini faiqi minara anee karaambaiqa faiqí anaasee qimannimia, nariqa mandainaina ikairi karaambaiqinnai maree aniraifanoo mininnisaannoo, minannai Anutufa innaarunai asumu marirana nimiannoo, Seekariafa doo mi tamummaqara ufana taikanau.
LUK 1:80 Seekariasa Eerisabeeta nammarisa faiqi aanaaqi fannoo innooqeenoo uriqarara maraquna faqaafa findifinau, Isaraee maqannaa nifusaa kikiqiranara deedaqidanoo kumaaraasaa kaasau maqa maaqaki kai marinau.
LUK 2:1 Mi aukuanna mi uriqarara kiapana auqu Aukustusafa marufaqa mina asauku ameemaanai aiqama aanaamuru mariqau, Aukustusafa narí asauku ameemaanai marusara nariqa nikeeku nikaaku maqusaki suqufiqa Roomma maqannaa kiapana papiqaki nuqu akararuanee qufaqa miqimmiqau.
LUK 2:2 Roomma maqannaasa indaaru nuqu maroo kari Kiriniusafa Siria maqa maaqaki kaqikaa kiapafa marinau.
LUK 2:3 Aiqama maqannaasa Aukustusana ufa iriseeqa andeeqasee nariqa nikeeku nikaaku maqusai nuqu maraaqeera suqi mariqau.
LUK 2:4 Yooseefaafa ooqeenaa Isaraee maqannaa karaambaiqa Dafidina ati marufa Kariree maqa maaqakiqari kaqikaa maqusa Nasareetee marufa miqooqari Yudeeaa maqa maaqaki kaqikaa maqusa Beetareeqeemma maqusai Dafidifa mariu maqusanaki auqu maraanifeera ooqu finau.
LUK 2:5 Mariafa Yooseefaana utaaqama amaqarafa amuaqu uqafaqa maridanoo Yooseefaana faqa ooqufinau.
LUK 2:6 Miqanda ooqu Beetareeqeemma maqusai ooquroofanoo Mariafa innaamunai firafa kambiqoofanoo narí ooqa faiqi akoonaiqi maaqimaseenoo maqanau.
LUK 2:7 Miqanda Beetareeqeemma maqusai ooquree faiqara maaqara randoosia faiqí anaasee moomoo suqufufaqa aiqamaki qumbiqafunara burimakau faiqee maru maqana qafamaseenoo Mariafa narí faiqi minaki maqanau, maqaseenoo suara aruandoo qimaseenoo qamunna kisaaqa anaqiranannai kukuqammeeqeenoo burimakau difaaniki faiqamaqanau.
LUK 2:8 Mi eendanaki faiqí akaqausa maqusa dinni atinai nariqa sipsipasaa rakisida marufanoo karaambaiqa qangiroo misa maruqoo kooroomafufanoo karaambaiqa kaaqa qarafa qoomara foora misa maruqoo rupannoo ufaqa firaaqoo rufioofanoo mi qangiroofa qimanniminoo qinau.
LUK 2:10 Sia rufiaaqa, amiqira fasaasa ufa aiqama maqa maaqakinaasa firaa asasira ufatia qimannimirara qumidaqa.
LUK 2:11 Maqee eendaki, inni innaarunai mareefandinnana asumu maraaninafa Anutuna asauku mundirafa karaambaiqa fannoo Dafidina maqusaki kambiqeenoo.
LUK 2:12 Maaqimasee paquriqa mifammifoo qiaqa, burimakau faiqeemaria maqanaki faiqi aanaaqi mina anoofa qamunna kisaaqa anaqiranannai kukuqammeeqeenoo burimakau narana amimaru difaaniki faiqama amaqaqaifanoo innee oonuree qafeefaranoo.
LUK 2:13 Miqi qufaqa innaarunaindaraa qangiroo moomoosa uqanna tautumasee kooroomafufaqa Anutunara asasira idi raidaqa maaqi qiqau.
LUK 2:14 Innaarunai sandaaqaindaraa Anutuna amooqirana amia, maqasaaqaraasakiqari Anutufa aidimarisaki naundura asooarafa misaki mariani.
LUK 2:15 Qangiroouqa mi idina ramaseeqa innaarunai oorufufaqa sipsipasaa rakisirausa narí qimami narí qimamiqa qiqau, doo maree Beetareeqeemma maqusai oonuree karaambaiqa fannoo qimannimi ainainara qafaa, qimasee sandee oonuree Yooseefaana faqa Mariana faqa faiqi aanaaqi burimakauqa difaaniki faiqaqee maruna faqa paquriqau, paqurimasee Yooseefaasa Mariasa qangiroo maa faiqinara qimannimu ufana qimannimufaqa akaqausa mi ufana ati irimarusa irufanoo naaquqanau.
LUK 2:19 Mariafa mi ufana iriseenoo aundura quqaseenoo minara firaaqoo iridanoo randanau.
LUK 2:20 Sipsipasaa rakisirausa anirandee fidaqa nariqa irunara faqa qafoonara faqa qangiroo ufamau fiqa paqurunara faqa asasira idi raqau.
LUK 2:21 Dinni taikasee dinni ani qaaramoo faasaana aiqaroofaqa Yuda maqannaasa nári fainanduqira oosana marasee akoonaiqi aanaaqi afaaqa ati auku aqusee auqu raqau. Misa Yisuna faqa miqiraree qimasee miqimasee auqu rararee qiqau, sia kaqi auqu raqau, Mariafa kaqi marukamuqoo qangiroo fannoo qimamu auquna Yisunee qiqau.
LUK 2:22 Ooqai Mooseena sandufa akara maaqi qimasee qimarinau. Aiqama anaasee faiqi maqasee innaamuna unda taqafufaqa amaana maqai ooruraida Anutuna aandau tatufirana suqa amiaqee qiqau. Aiqama ooqa faiqi akoonaiqiuqara faqa karaambaiqa utaaqama amaqasee amaana maqaki muru amiaqee qinau.
LUK 2:23 Mariana afaaqai innaamuna unda taikafufanoo Yooseefaasa Mariasa Anutuna sandufamau fidaqa Anutuna aandau tatufirana sia amanaikifaqa kudi fasiqauqa tatufirana qaara nakipuruna maramaree Yeerusaree amaana maqaki ooruree Mariana tatufirana suqamisee mikari kai faiqi aanaaqi Anutuna amiraree qimasee ooruree keeqaqau.
LUK 2:25 Moo nauraiqi auqu Simeeoonafa mi aukuanna Yeerusaree maqusai amaana maqaki ainainimarufa maridanoo kaaqa Anutuna ufara rimarufa Isaraee maqannaa asumu maraaninnanara afeesara marinau.
LUK 2:26 Anutuna naaquqara maraquna fannoo mina aakufufanoo qimaminau. Anee karaambaiqa Anutuna asauku mundirafa kambiqainana anee qafamaseenana kuqinnaranoo, sia kaqi kuqinnaranoo.
LUK 2:27 Moo faasaana mi maraqunafa Simeeoona aakapoofanoo amaana maqaki keeqanau, mikari kai Yooseefaasa Mariasa Yisuna rafusu maree amaana maqaki keeqafiqa Mooseena ufamau firaree qimasee keeqaqau.
LUK 2:28 Keeqafufanoo Simeeoonafa anireenoo mi faiqina rafususeenoo Anutunara asasira ufa qinoo qinau.
LUK 2:29 Oo karaambaiqa maqee anee qimaqimunna ufafa anoona kambiqeenoo maqee amana qinee ani ainainira faiqi marunausa asooaranaki kuquanaura.
LUK 2:30 Maqee qini qifu fannoo maqasaaqaraasa asumu maraaninnana qafeenoo maasa asumu maraaninnana anee aiqama maqannaa qafaaqeera deedaqiannana qini qifu doo qafeenoo.
LUK 2:32 Mifa ani maqannaa Isaraee maqannaasa ani areenarana nimianinafa maridanoo, qoomara foora qeenoo aanaamuru ani aana uqannifiqaaninafa marifaqa qeeqa qifunnai qafeeqa.
LUK 2:33 Yisuna anaukoo Simeeoona ufa iriseeqa tautiqa narí qafee narí qafee iqau.
LUK 2:34 Simeeoonafa Yisuna afaaqooqa qira ufa qimamiseenoo quandaki mina anoona Mariana qimaminoo qinau. Anutufa maa faiqi anaaqina narí kambiqaaninna ainaina uqannifiqaanifeera uqeereeqeenoo quqeenoo. Moomoo Isaraee maqannaasa mina qafamasee nikooqaifaqa maaniki aqu fifaranoo kaifaa moomoosa mina qafamasee findifiqa asumu marirana mareefaranoo. Akaqausa mina qafamasee nikoo qaifaqa minara aqira ufa qimasaifanoo doo minannai nári naunduraindaraa manda irirana kooroo iannoo.
LUK 2:36 Mi faasaanna anaasee asooqa moo mina auqu Anaa nammarifa Yakooboona amaaku Aseerana atikiqari kambiqarana Fanueerana araamuna marinau. Mifa maanaaqasaaqari faiqí marasee dinni taikasee dinni ani qaaraqanda marasee aukuana marinoo mina afaaqi kuqufufanoo miqooqari aukuana qaara faqa qaara faqa fasiqa arusee moo fasiqa qaara faqa qaara faqa moomoo aukuana adeedaana marinau. Mifa amaana maqakiqari sia raudee finau, eendaki faasaana minaki kai maridanoo Anutuna amooqira ufa qimamidanoo aarara maridanoo innaaru qimarinau.
LUK 2:38 Simeeoonafa Mariana qimamimarufanoo Anaa nammarifa anireenoo Yisunara Anutunai dufi dufi qimasee doo miqooqari mi faiqi anaqina Anutufa asumu marirana nimianinafa ani maridanoo fee qimasee aiqama Yeerusaree maqannaasaki akaqausa Anutuna asumu marirana afeesimariasa qimanniminoo ninau.
LUK 2:39 Yooseefaasa Mariasa Yeerusaree amaana maqaki aiqama Karaambaiqa sandufa taikasee Kariree maqa maaqai nári maqusa Nasareetee maqusai anirandee fiqau.
LUK 2:40 Miqoo marufanoo Yisufa innooqeenoo narí nidanoo amudaani afeekaikufanoo Anutuna amiqi amiqirafa minasaa marufanoo irirana fiqararafa marinau.
LUK 2:41 Ooqai Isaraee maqannaasa Isipa maqasaa mandainainaki marufanoo Anutufa narí qangiroo moo aqiqoofanoo Isaraee maqannaa ainnaaqareenoo Isipa maqannaa ooqa faiqi aiqama naru taikanau. Isaraee maqannaasa minara irisee miqooqari aukuana aukuana ainnaaqarara qoomaqa sakasaidaqa neemariqau. Aukuana aukuana Yisuna anoofa akoofauqa Yeerusaree maqusai ooruree ainnaaqarara qoomaqa sakasee neemariqau.
LUK 2:42 Yisufa (12) qisaukuqara taikasee qikunni ooqu qaara marasee aukuana marasoofaqa mina anaukoo Isaraee maqannaasa oosana marararee qimasee mina faqa afiqeeqa Yeerusaree maqusai ooru fiqau.
LUK 2:43 Misa miqoo ooruree moomoo afuru faiqaidaqa qoomaqa sakasee neemariqau. Qoomaqa taikaseeqa miqanda Yooseefaasa Mariasa narí aqoonausa faqa Yisunara doo fiifoo qimasee findimaqee nariqa maqusai fiqau. Yisufa Yeerusaree maqusai kaqi mariufanoo amaana maqaki kafaa keeqanau.
LUK 2:44 Yisuna anaukoo moodaa faasaana fimarufanoo eenoofaqa nári ainainaki faqa niqoonausaki faqa Yisunara randee mariqau.
LUK 2:45 Randoosia sia marufaqa kafaa anirandee Yeerusaree maqusai randararee qimasee ooru fiqau.
LUK 2:46 Qaara faasaana miqoo randaqa niniufaqa qaaramoo faasaana amaana maqaki keeqafi paquriqau, mifa Yuda maqannaasa amaana ufa akoofasauqa faqa minaki maridanoo misa ufa iriseenoo quandafi oosana oosana ufara misasaa irammiri marinau.
LUK 2:47 Irammiri marufaqa miqoo marusa oo irirana fiqararafammifoo qimasee rufiaqau.
LUK 2:48 Mina anaukoo qafeeqa tautiqa qiqau, maaqanda qimaaku anee nanaree maaqanda mandaikamma qimaqeenanee ani akoosandiri qimuqusimarifaqa aniara randaqa niniifaqa paquriqa.
LUK 2:49 Yisufa iriseenoo qinau, oo inneeqara sia fee iridee qinee naqimasee moosaa marianauree sia amana, qinee qeeqa qikoona maaqaki kai marianausa maridaqa. Inneeqara minara iriaqaana.
LUK 2:50 Miqi qufaqa miqanda sia mi ufana oosana iriqau.
LUK 2:51 Miqooqari Yisufa narí anaukoo faqa Nasareetee maqusai ooqu maridanoo narí anoona akoona ufa ameemaanai marufanoo mina anoofa Mariafa mi ufausa aundurai kai iridanoo marinau.
LUK 2:52 Yisufa miqoo marufanoo mina irirafa faqa amudaani faqa innooqee marufanoo Anutufa faqa faiqí anaasee faqa Yisunara nidi marinau.
LUK 3:1 Tibeeriusafa Roomma maqannaasa firaa kiapafa (15) qisaukuqara taikasee qikunni ooqu moodaannai qiku taikasee aukuana maru kamuqoo mi fasannai Yudeeaa maqannaasa kaqikaa kiapafa qaara auqu faqaafa marinau, Poontiusafa moo auqu Piratoofa marinau, Mi fasannai Kariree maqannaasa kaqikaa kiapafa Eeroodeefa marinau, Itureea maqannaasa faqa Tarakoonitisa maqannaasa faqa misa kaqikaa kiapafa Firipina amarafa Eeroodeena akaqa marinau, Abireenee maqannaasa kaqikaa kiapafa Risaniasafa marinau.
LUK 3:2 Yeerusaree maqusai Anutuna aanaiqikiraqanda Annasafa faqa Kaiafasafa faqa mariqau. Mi aukuanna Seekariana amaaku Yoohaneefa kaasau aadana maqa maaqaki marufanoo Anutuna ufa fannoo Yoohaneena aakufufanoo findifinoo Yooradanna nammari afaiqara marusaki oonuree aniree idanoo Anutuna ufa faiqí anaasee qimanniminoo nidanoo qinau.
LUK 3:3 Inneeqa manda marirana minnisee Anutufinnai ubeekaifaqa nammari ruma nimaqaanaura miqi masaifanoo Anutufa inni mandainaina mininnisee sia naruannoo.
LUK 3:4 Yoohaneefa nauraa tamummaqara fasiqa akara rumaqoona ufamau finoo miqi marinau, mi tamummaqara fasiqafa maaqi qimasee akara rinau. Kaasau maqa maaqakiqari faiqí moo maaqi qimasee nammeera qidanoo faiqí anaasee qimannidanoo karaambaiqa anianinna aanna afisuaqa mina aana eendaandirana andeeqaa.
LUK 3:5 Arumukiranaki maqa apauru quqaina qumbiqaani amuaqunamu faqa aaqana faqa apaurinanoo afaasaikiani.
LUK 3:6 Eendaandira aana aiqama andeeqaa mandaikiranaki anukamasaina raununukaani miqimasaifaqa aiqama anaamuru Anutufa asumu maraaninnana qafeefaranoo.
LUK 3:7 Miqi qimasee tamummaqara fasiqa ooqai qimasee akararinau. Faiqí anaasee moomoosa uqanna Yoohanee finnai Yooradana nammari marunnai ooqureeqa nammari mararara ooqu fiqau. Yoohaneefa rumannimaqararee qimaseenoo misa nikaruqiranara irisee qimannimidanoo qinau, Innee ukadiqa faiqinamuara foora Anutufa nariranara rufiasee inneeqa manda oosanakiqari kambaaramasee asukaki qinee marunnaqoo aniree fee unna qimasee nammari marararee qidee. Anutuna aanoo irana innisaa aqufuaninafa yafee inni aaquqima nimaqaifaqee minakiqari sandee qinee unnaqoo aniree nammari nimirarunnana mandaaqaidee.
LUK 3:8 Innee maasa Abarahaamana atiuqa marunausa maridee qimasaida Anutufa asumu marirana kaqi qimianifee qimariafanoo, aaqaida miqi qimariafanoo. Inneeqa mandoosana minnisee andeeqara oosana maraifaqa qafeeqa inniara kuqaa naundura quandarausee qimasee amiqira saqari qaqamara foora iraidaqee qianaura. Innee fifau Abarahaamana ati fee qimariasa, mifa fifau ainaina maridanoo, iriaqa Anutufa amana qifanoo maa fifau ooniuqasaaqari faiqikammafi Abarahaamana atiuqasaa amana ootupaqa mariannoo. Innee Abarahaamara ati fee qimariana fifau ufa kai qimariafanoo.
LUK 3:9 Anutufa saasunara foora ateekarana doo rauqisee maridanoo, sia naundura quandainausa Anutufa narirafa qusandaannoo aiqamausa saqariara foora sia amiqira qaqama iraifanoo ateeka idaki aquannoo.
LUK 3:10 Faiqí anaasee Yoohaneena aaquqira ufa iriseeqa qiqau.
LUK 3:11 Oo Yoohanee maasa ani ufara naqi fee ianauree qufanoo Yoohaneefa qimanniminoo qinau, qaara siuta faqaafa siuta siaina moo amia narana faqaafa rainasee narana siaina amia.
LUK 3:12 Roomma maqannaa takisa munnimma maree mariasa faqa Yoohaneefa marunnai anireeqa iramiriqau, oo ufasaa rakisirafa maasa naqi fee ianauree qufanoo Yoohaneefa qinau.
LUK 3:13 Innee andeeqasee takisa munnimma kai maraaqa sia qummuarirana ootupamasee maraaqa.
LUK 3:14 Miqi qimasee qimannimisoofaqa Roomma maqannaa sundiauqa aniree iramiriqau, maasa faqa naqi fee ianauree anee maasara nanee fee qinnaree qufanoo Yoohaneefa qinau, Innee sia aanoo iranannai moosa munnimma qummuariaqa, sia unnufannai kootamasee moosa munnimma aina qummuariaqa. Inneeqa saika akiqara feefauru marasee sia minara manda ufa qimasee ninunu ruaqa. Minara amana fee qimasee nifaaqa quqaaqa.
LUK 3:15 Faiqí anaasee moomoosa Isaraee maqannaasa Yoohaneenara iriseeqa qiqau, ooqai Anutuna tamummaqara fasiqauqa Anutuna asauku mundirafa kambiqaannoommifoo qimaqoofa mifee qimasee misa naundura uqeeraqau.
LUK 3:16 Yoohaneefa minara iriseenoo qimanniminoo qinau, qinee fifau nammarinnai inni rumannimaqaidaqa, moo fannoo firaaqoo qini uriqararafa aniannoo, naqimasee fee qinee mina dadaaqianauree. Qinee fifau ainainara foora marianaura, mifa kaaqa uridaqaaqaramasee uriqararafa mariannoo. Mifa Anutuna maraqunannai faqa idannai faqa rumannimaqaannoo.
LUK 3:17 Maraqunannai rumannimaqarafa faqa kudimakirana qaaninna idannai rumannimaqarafa faqa minara oofaafana anoona faqa aanaaqmaara faqa kikiqa usidanoo. Mifa faiqí anaasee oofaafanara foora asaukunnoo utitiqa maseenoo aanaaqmaara fuaqa aquseenoo anoona mara maaqaki quqeenoo aanaaqmaara ida firaafa sia dimbeemari idanaki araannoo.
LUK 3:18 Yoohaneefa amiqira fasaasa ufa faiqí anaasee qimannimidanoo oosana oosana ufannai misa fuki faaki qimarinau, Anutuna ufamau fuaqeera qimannimimarinau.
LUK 3:19 Kariree maqa maaqaki kaqikaa kiapafa Eeroodeefa narí akaqa anaaqa mina auqu Eeroodiasa nammarina ummuara maraseenoo oosana oosana mandainaina faqa maree marinau. Yoohaneefa Eeroodiasa nammarina maroonara qaoo qufanoo Eeroodeefa narí mandainaina oosana fannoo uriqaroonara Yoohaneena rumbaranaki quqanau.
LUK 3:21 Yoohaneefa kaqi maru aukuana faiqí anaasee moomoosa nammari mareesoofanoo Yisufa faqa aniroofanoo Yoohaneefa mina faqa nammariki mara keeqaseenoo Yisufa nammarikiqari findifinoo innaaru qimarufanoo innaaruna rakeemafufanoo Anutuna naaquqara andeeqara maraquna fannoo nakipurunaika mafinoo Yisunasaa aqufufanoo innaarunaindari ufa moo kambiqeenoo qinau. Anee qini qimuqusimarianna qimaakufa mariananoo firaaqoo aniara dididanoo.
LUK 3:23 Yisufa (30) qini qiku qisauku taikasee moo fasiqa asaukuqara taikasee aukuana maraseenoo narí saika oosana aranau. Aiqama fasiqa anaasee sia mina oosana irirai minara Yooseefaana amaaku fee qimariqau. Yooseefaafa Eerina amaaku marinau.
LUK 3:24 Eerifa Matatana amaaku marinau. Matatafa Reefina amaaku marinau. Reefifa Meerakina amaaku marinau. Meerakifa Yanaina amaaku marinau. Yanaifa moo Yooseefaana amaaku marinau. Yooseefaafa Matataiasana amaaku marinau. Matataiasafa Amoosana amaaku marinau. Amoosafa Naqummana amaaku marinau. Naqummafa Eesirina amaaku marinau. Eesirifa Nakaina amaaku marinau. Nakaifa Maatana amaaku marinau. Maatafa moo Matataiasana amaaku marinau. Matataiasafa Seemeena amaaku marinau. Seemeenafa Yooseekana amaaku marinau. Yooseekafa Yoodana amaaku marinau. Yoodafa Yooannana amaaku marinau.
LUK 3:27 Yooannafa Reesana amaaku marinau. Reesafa Seerubabeerana amaaku marinau. Seerubabeerafa Seearatieerana amaaku marinau. Seearatieerafa Neerina amaaku marinau.
LUK 3:28 Neerifa Meerakina amaaku marinau. Meerakifa Adina amaaku marinau. Adifa Koosamana amaaku marinau. Koosamafa Eeramadamana amaaku marinau.
LUK 3:29 Eeramadamafa Yoosuana amarana amaaku marinau. Yoosuafa Eerieeseerana amaaku marinau. Eerieeseerafa Yoorimana amaaku marinau. Yoorimafa Matatana amarana amaaku marinau. Matatafa Reefina amarana amaaku marinau. Reefifa Simeeoona amarana amaaku marinau.
LUK 3:30 Simeeoonafa Yudana amarana amaaku marinau. Yudafa Yooseefaana amarana amaaku marinau. Yooseefaafa Yoonamana amaaku marinau. Yoonamafa Eeriakimana amaaku marinau.
LUK 3:31 Eeriakimafa Meereeana amaaku marinau. Meereeanafa Meennana amaaku marinau. Meennafa moo Matatana amaaku marinau. Matatafa Natannana amaaku marinau. Natannafa Dafidina amaaku marinau.
LUK 3:32 Dafidifa Yeeseena amaaku marinau. Yeeseefa Oobeedana amaaku marinau. Oobeedafa Booasina amaaku marinau. Booasifa Seeraana amarana amaaku marinau. Seeraafa Naasoona amaaku marinau. Naasoofa Aminadabana amaaku marinau. Aminadabafa Adimina amaaku marinau.
LUK 3:33 Adiminafa Aranina amaaku marinau. Aranifa Qeesaroona amaaku marinau. Qeesaroofa Peereesana amaaku marinau. Peereesafa Yudana amaaku marinau.
LUK 3:34 Yudafa Yakooboona amaaku marinau. Yakooboofa Isakeena amaaku marinau. Isakeefa Abarahaamana amaaku marinau. Abarahaamafa Teeraana amaaku marinau. Teeraafa Naqoorana amaaku marinau. Naqoorafa Seerukana amaaku marinau.
LUK 3:35 Seerukafa Reeuna amaaku marinau. Reeufa Peereekana amaaku marinau. Peereekanafa Eebeerana amaaku marinau. Eebeerafa Seeraana amaaku marinau. Seeraafa Kainnana amarana amaaku marinau.
LUK 3:36 Kainnafa Arafadana amaaku marinau. Arafadafa Seemana amaaku marinau. Seemanafa Nooana amaaku marinau. Nooafa Rameekana amarana amaaku marinau. Rameekafa Meetuseerana amaaku marinau.
LUK 3:37 Meetuseerafa Eenookana amaaku marinau. Eenookafa Yareedana amaaku marinau. Yareedafa Maqarareena amaaku marinau. Maqarareefa moo Kainnana amaaku marinau. Kainnafa Eenoosana amaaku marinau.
LUK 3:38 Eenoosafa Seetana amaaku marinau. Seetafa Adamana amaaku marinau. Adamafa Anutuna amaaku marinau. (Anutufa narí kambiqarafa marinau.)
LUK 4:1 Yoohaneefa Yisuna nammariki tupamasoofanoo findifufanoo Anutuna andeeqara naaquqara maraquna Yisunaki qumbiqafufanoo mi maraqunafa Yisuna rarisameeqeenoo kaasau aadana maqa maaqaki quqasoofanoo miqoo afaannauqa firaafa qaara fasiqa niku nisauku taikasee faasaana Yisunara mandainainaki aaqaranaki fuanifee qimaseenoo maara maqaseenoo amanamasee qafoosianoo.
LUK 4:2 Qaara fasiqa niku nisauku taikasee faasaana mikari Yisufa narana sia nanau, mi moomoo faasaanafa aiqaroofanoo Yisuna firaaqoo aararanau.
LUK 4:3 Firaaqoo aararoofanoo afaannauqa firaafa mina qafamasee Yisuna qimaminoo qinau. Anee kuqaa Anutuna amaaku maridana mee aaqa mari oonisara qinaqa feemu kammafinana naa.
LUK 4:4 Yisufa iriseenoo qimaminau, Anutuna akarakinaa ufa maaqi qinoo maridanoo faiqí sia narana kai namasee amana mariannoo. Anutuna ufamau fimariafa mifa kai naranara foora maridanoo, qinee sia ani ufamau fiqa ooniara qiananoo feemu kiannoo.
LUK 4:5 Miqi qufanoo afaannauqa firaafa Yisuna uqeeraseenoo maa maqa maaqanasaaqaraana aiqama karaambaiqauqa faqa misa ququsakinaasa faqa dauni uqafiqaseenoo qimaminoo qinau.
LUK 4:6 Maa aiqama afeeka ainaina faqaasa maqasaa faqa misa firaa qumiasana faqa Anutufa qini qimiqaifanoo qinindi maridanoo, qeeqa kai irisee moo fasiqa amana amianaura.
LUK 4:7 Anee qini doorinni aqoori saunarafi deendeenamafi qini Anutusara foora qimooqinaqa maa aiqama adiafaa ira qumiasana aiqama ani amianaura.
LUK 4:8 Yisufa mina ufa iriseenoo kaifaa qimaminoo qinau, Anutuna akarakinaa ufa maaqi qidanoo, anee karaambaiqa aneenna Anutuna kai amooqimasee mina ainaina kaimmamaqaa. Minara irisee sia ani ufamau fuanaura.
LUK 4:9 Miqi qufanoo afaannauqa firaafa kafaa Yisuna qumareeqeenoo Yeerusaree firaa amaana maqa ataufakai faakana kisaaqa atisaa quqaseenoo qimaminoo qinau, anee Anutuna amaaku maridana maaqooqari rafusaki meemai maqasaa aqufua sia mina amaaku maridana sia aqufua.
LUK 4:10 Anutuna akarakinaa ufa fannoo minara maaqi qidanoo Anutufa narí qangiroouqa niqiqainaqa anisaa rakisifaranoo.
LUK 4:11 Kafaa moo akaraki maaqi qidanoo misa nári nisaukunnoo qumaraifana sia oonisaa anee aiku rupaurinanoo aidafuannoo.
LUK 4:12 Yisufa qafeenoo iriseenoo afaannauqa firaana qimaminoo qinau, Anutuna akarakinaa ufa fannoo minara maaqi qidanoo anee sia karaambaiqa aneenna Anutuna amanamasee qafaannee qidanoo. Minara irisee sia maaqooqari aqufuanaura.
LUK 4:13 Afaannauqa firaafa aiqama karidanoo Yisuna akari maqaseenoo, Yisuna mafi quqaseenoo minnaiseenoo doo finau.
LUK 4:14 Yisufa Kariree maqa maaqai kafaa aniroofanoo Anutuna naaquqara maraquna fannoo mina faqa afeekaikamasee maridanoo dadaaqunara, mina aufakiana fannoo Kariree maqa maaqaki aiqamai daraaninau.
LUK 4:15 Yisufa misa amaana maqakiaqa maqusa maqusa fiqu fiqu inoo nidanoo qimannimimarufaqa aiqamausa mina amooqi mariqau.
LUK 4:16 Yisufa Kariree maqa maaqaki niniufanoo Nasareetee maqusai narí aanaaqisaa mariu maqusanaki oonureenoo Isaraee maqannaasa amaana Saririqasaa narí oosana maraseenoo amaana maqaki keeqanau. Keeqafinoo Anutuna ufa asaanariraree qimaseenoo findifufaqa misa Anutuna tamummaqara fasiqa Eesaiaana nauraa akara amifanoo airiseenoo maa ufana paqurimasee asaanarinau. (Ooqai misa papiqa akara rumasee qaara aikasaa kukuqa maqoona Yisufa duku dukumasee minaki maa ufana paqurimasee asaana rinau.)
LUK 4:18 Karaambaiqa maraquna fannoo qini daakinoo maridanoo, mifa kudi fasiqauqa amiqira fasaasa ufa qimannimiannee qimasee asauku qinisaa mundinau, rumbaqa mariasa idukuaki fuaqeera qini diqiqanau, nifu dimbarausa faqa nifu maqannisaaneera faqa qini diqiqanau, moo maqannaasa ani mara moo maqannaasa aupurarana nimimariana minakinaana idukuaneera faqa qini diqiqanau, karaambaiqa narí maqannaasa mandainainakinaasa maraaninna aukuanara qimannimirara qini diqiqaifaqa ani maridaqa.
LUK 4:20 Yisufa mi ufana asaana rumasee papiqa qaara aikannoo kukuqamasee rakisi maru fasiqana amiseenoo ufa qimannimirara qimasee ooqu marinau, mi amaana maqanaki Nasareetee maqusai marusa aiqamausa nifu Yisuna kai tataqa fiqau.
LUK 4:21 Yisufa maqee asaana rumasee qimannimi ufanasaaqaraana qimanniminoo qinau, maa ufana akarakinaana asaana rumasee qimannimimaruna mina anoona doo maqee uqanna kambiqeenoo.
LUK 4:22 Misa mina adiafaaira ufausa iriseeqa tautumasee narí qimami narí qimami qiqau, maafa Yooseefaana amaaku kai maridanoo fee qimasee nikooqanau.
LUK 4:23 Yisufa irisee qimanniminoo qinau, innee ooqeenaasa naamuaqira ufa qimaqimiqa maaqi qifaranoo oo tutaqafa anee aneenna aurirana aneenna marasinnanai kai aneenna aurirana taikaa kafaa qiniara maaqi qifaranoo anee Kapeeranaumma maqusai oosana oosana ainaina faiqí sia amanaiki mari ainaina auqaananara maasa iridaqa maqee aneenna maqusaki maasa qifusaa mi ainainna auqaa.
LUK 4:24 Qinee minara maaqi qimasee inni qimannimidaqa, Anutuna tamummaqara fasiqauqa sia moo fannoo narí maqusanaasa nifusaa uriqarara fasiqa mariannoo moo maqusanaasa minara uriqarara fasiqa fee qimasee mina ufa irifaranoo.
LUK 4:25 Innee qini ufa iriaqa ooqai Eeriaafa maru aukuana qaaramoo aukuana faqa (6) qisauku dinni taikasee dinni ani moodaa marasee quqoona faqa aaku sia uqanna rufanoo aandaroo firaafa aiqamai nárí marinau,
LUK 4:26 Mi aukuanna Isaraee maqannaa adeedaana anaasee moomoo marufanoo sia misa dadaaqinau Sidoona maqa maaqaki Sareefata maqusaki maru aanaamuru adeedaana anaaseena kai Anutufa Eeriaana aqiqoofanoo dadaaqinau,
LUK 4:27 Anutuna tamummaqara fasiqa Eerisaafa maru aukuana narí maqannaasa Isaraee maqa maaqaki karoora nárí marusa moomoo mariqau, Eerisaafa sia misa karoora taikannisanau, aanaamurua Siria maqusanaasa uriqararana auqu Naamana mina karoora kai taikamaqanau. Innee qiniara sia tamummaqara fasiqa fee qimariafanoo qiniara nikooqee mariafanoo qinee faqa miqi kai iqa qeeqa maqusanaasa inni sia amana dadaaqianaura.
LUK 4:28 Misa Nasareetee maqusai amaana maqaki marusa mi ufana iriseeqa aanoomasee Yisuna rarisamammaree Nasareetee maru aaqanasaa afiqeeqa rarisaqa ooruree ameemai aquaneerufanoo kuquani fee qimasoofanoo Yisufa misa qambaana kaqi fiqareenoo narí saikai finau.
LUK 4:31 Yisufa Kariree maqa maaqaki Kapeeranauma maqusai ooqureenoo Saririqasaa amaana maqaki faiqí anaasee Anutunara naamuaqinau.
LUK 4:32 Mina ufa irimariasa mina ufara naaquqanau, mifa narí Anutufara foora maridanoo qimannimufaqa doo tautiqa minara nidinau.
LUK 4:33 Qimannimi marufanoo mi amaana maqanaki faiqí moo kaasau afaanna aunduraki marufa Yisuna ufa irisee firaa kari faaqa rumasee qimaminoo qinau.
LUK 4:34 Oo Yisufa Nasareetee maqusanaafa anee nanaree maasa soodaa qidanee, maasa daru taikararee anidanee qinee aniara iridaqa anee Anutuna naaquqara ufa maree marianafa mariananoo.
LUK 4:35 Yisufa iriseenoo amambaina qimaseenoo qinau, anee ufaseenana mi fasiqana aundurakiqari raudamaki see fua, miqi qufanoo mi afaannafa aiqamausa nifusaa mi fasiqana maqasaa mafi aqusee sandeenoo sia aupurarana aminau.
LUK 4:36 Aiqamausa mina qafeeqa tautumasee narí qimami narí qimami qiqa qiqau, maa fasiqana ufa nana ufa fee maridanoo narí Anutufara foora afeekufannai kaasau afaanna qimannimifaqa eedoo kai qimasee raudee sandaafanoo naaquqaidanoo.
LUK 4:37 Miqooqari mi ufana munuqi miniqi ufanoo aiqamai daraaninau.
LUK 4:38 Yisufa amaana maqakiqari raudamaki Simoona maaqaki keeqanau. (Simoonafa Yisuna ufa irira fasiqa mina faqa nimarufa marinau.) Simoona mina airaamaku anaasee auri marufanoo afaaqa firaaqoo ididimarufaqa minara Yisuna qimamiqau.
LUK 4:39 Mifa iriseenoo mina qaari aaqa oonureenoo mi auriranara qaoo qufanoo taikoofanoo mi anaaseefa aaqee findifinoo narana deedaqamasee niminau.
LUK 4:40 Suani afu keeqoofanoo asooaa asooaa imarufaqa mi maqusaanaasa nariqa niqoondiuqa aurira fasiqa anaaseeuqa maraida minisee marufanoo Yisufa asauku aiqamausa nifaaqai quqasoofanoo aurirafa taikanau.
LUK 4:41 Afaannauqa faqa niqiqee marufaqa moomoosa naunduraindari raudamaki faaqana faqa sandaidaqa qiqau, anee Anutuna amaaku mariananoo fee qufanoo Yisufa miqooqari qaoo qinoo sia ufa qiaqee qinau, mi afaannausa Yisuna Anutuna asauku mundirafa marunara irimarusa marunara, minara mifa misa nimambaina qinau, innee ufaseeqa qufaqa misa sandamafiqau.
LUK 4:42 Mi eendanaki Yisufa faiqee iqaqoofanoo kananaana mi maqusanakiqari findimaqee faiqí sia marunnai Anutu finnai innaaru qirara finau, faiqí anaasee findifi minara yai fee finoo fee qimasee randamaree oonu paqurimasee sia moosaa fuannee qufanoo Yisufa qimanniminoo qinau.
LUK 4:43 Qinee Anutuna innaaruna ququsakinaa fasaasa ufa sia maaqoo kai qimannimirara, Anutufa qiniara aiqamai qimannimiannee qimasee diqiqamaqoosa maridaqa.
LUK 4:44 Miqi qimaseenoo mifa Yudeeaa maqa maaqai ooqureenoo aiqama maqusakiaqa fifainidanoo Anutuna ququsara qimannimi marinau.
LUK 5:1 Moo kari Yisufa Keeneesareeta farumma afainni kikiqinoo maridanoo Anutuna ufa qimannimi marufaqa faiqí anaasee moomoosa aniree irirara narí futeeqee narí futeeqee imariqau,
LUK 5:2 Noodaanna reemaru fasiqaqanda nariqa noodaanna reemaru kanuqaqanda mafi nammari afainni quqasee nariqa pateeuqa mareeqa moosaa oonu maridaqa akuni mariqau, Yisufa faiqí anaasee moomoosa niqafaidanoo kanuqa qafamaseenoo Simoonaindiki akaramafinoo qimamufaqa kaqi kaaqoo afeeqoofanoo nammari amuaqusaa oonuroofanoo Yisufa minaki ooqumarifinoo faiqí anaasee aiqamausa mina oorinni ani usufufanoo naamua qimarinau.
LUK 5:4 Ufa qimannimi taikaseenoo Yisufa Simoona qimaminoo qinau, kanuqa maree farummaki oonuree pateeuqa ramasee noodaanna umbaqia.
LUK 5:5 Miqi qufanoo Simoonafa qinoo akasaa maasa uriqararafa, maasa maqee eendaki nammariki patee moomoo kari ramasee sia uqanna moodaa noodaanna mareeqa anee qiannanara kaifaa raanaura.
LUK 5:6 Misa nariqa pateeuqa nammariki ramasoofanoo noodaanna moomoo mi pateeuqanaki umbiqafinoo pateeuqa rakeekaa inau.
LUK 5:7 Miqufaqa misa qafeeqa moo kanuqaki marusara nisauku aqufaqa misa aniree dadaaqiqa noodaanna mareeqee kanuqaki umbiqasoofanoo kanuqaqara faqa nammariki ukuqnaaqaa imariqau.
LUK 5:8 Simoona moo auqu Peetooroofa mina qafamasee Yisunara rufieenoo mina oorinni aqoori saunarafinoo qinau, oo karaambaiqa sia qini faqa maria qinee mandainaina maree marunausa maridaqa.
LUK 5:9 Yoohaneefa faqa Yameesafa faqa miqanda Seebeedeena amaakuqara miqanda Simoona dadaaqidaqa noodaanna reemaruqanda maridaqa noodaanna moomoo ramasoona qafoofanoo naaquqanau.
LUK 5:10 Naaquqoofanoo Yisufa Simoona qimaminau, anee sia rufiaa maaqooqari anee sia noodaanna reemarinnaranoo anee faiqí anaasee kai Anutuna ququsaki pateeuqakiara foora mara quqee marinnaranoo.
LUK 5:11 Miqooqari misa nariqa kanuqa rarisameeqee afainni quqasee nariqa noodaanna saika maree maruna aiqama ainaina minnisee Yisuna faqa fiqau.
LUK 5:12 Moo kari Yisufa moo maqusai marufanoo karoora aiqama afaaqai arimaru fasiqafa moo fannoo anireenoo maqasaa aqufinoo irammirinoo qinau, oo maa fasiqa ani aidirafa qinana amana anee qini karoora rukaqimaqeennaranoo.
LUK 5:13 Yisufa iriseenoo narí asauku uqeerasee minasaa munduseenoo qinau, Eeoo qini irirafa ani dadaaqiraree qidaqa, doo rukafinana maria qufanoo aaqee kai mina karoora rukafinau.
LUK 5:14 Yisufa mi fasiqana amambaina qimaseenoo qinau, anee sia maa ainainnara moona qimamia andeeqasee amaana maqaki aanaiqikirana aaqa oonu rainanoo mifa ani afaaqa aiququmaseenoo aniara anukanoo mariaanoo qiannoo, miqi qinana anee karoora narimarisa taikarausa aandau tatufirana Mooseena sandufamau fidana Anutuna suqamia, miqimasainaqa aiqamausa ani anukarana qafamasee sia aniara eerairifaranoo.
LUK 5:15 Minara Yisuna afeeka aufakiana sia taikanau, firaaqoo fifainufaqa faiqí anaasee moomoosa suqu maree Yisufunnai anireeqa mina ufa irufanoo misa aurirafa taikaanifeera aniqau.
LUK 5:16 Yisufa moodaakari moodaakari faiqí sia maruqoo oonureenoo Anutunara kisaaqasaa innaaru qimarinau.
LUK 5:17 Moo faasaana Yisuna moo maaqaki maridanoo faiqí anaasee Anutunara naamuaqida marufanoo Farisai amaana ufa qimarusa faqa Mooseena sandufasaa rakisirausa faqa mi maqanaki ooqu marifiqa irimariqau, Kariree maqa maaqakiqari faqa Yudeeaa maqa maaqakiqari faqa Yeerusaree maqusaindari faqa moomoosa ani maridaqa iri mariqau. Aurirana taikara afeeka karaambaiqa Anutufinnaindari Yisunasaa marufanoo aurusa andeeqannimaqee marinau.
LUK 5:18 Yisufa maaqaki qimannimi marufaqa faiqí anaasee akaqausa nári niqoonnana aiku asauku pipisaaqa qusirana qaindusu maree aniree maaqaki keeqafi Yisuna aaqa quqararee qimasee qafoofanoo faiqí anaasee moomoosa ititafufaqa sia amanaikiqa, quandaki naammaraaqa akaramafufaqa namudi rainasee mi fasiqana narí qaindasaa quqasee sanda quiqa quiqa ufanoo maaqaki faiqí anaasee qambaana Yisuna aaqa quqaqau.
LUK 5:20 Yisufa misa irirana narisaa firaaqoo mundunara iriseenoo mi pipisaaqa qusira fasiqana qimaminoo qinau, qini qiqoondi ani mandainaina numoo doo minnaisaidaqa.
LUK 5:21 Miqi qufaqa Mooseena sandufa akoofasauqa faqa Farisai amaana ufa qimarusa faqa nariqa naunduraindari kai qidaqa qiqau, maa fifau fasiqafa unnaqi masaidanoo narí ufannoo Anutuna amaaqa maqaidanoo faiqí sia amana moona mandainaina numoo taikarana amana maridanoo Anutufa kai amana miqiannoo.
LUK 5:22 Yisufa misa naunduraindaraa ufa iriseenoo qimanniminoo qinau, innee naqi fee qifaqee mi mandirirana inneeqa naunduraki iridee.
LUK 5:23 Qinee maa fasiqanara ani mandainaina numoo minnaisaidee qunnana innee qiniara sia amanaikiaanoo fee qidee qinee faiqí nimaaku maa maqanasaa maridaqa faiqí aaqarana akiaqara mininnisara afeeka faqaasa marunausa marinara maa firaa afeeka ainainannai kooroomma nimaqaanaura qinee maa fasiqanara aneenna qaindasaaqari findifinana mi qaindana maree amaaqa fua qiananoo miqinaqa qini mandainaina numoo minnaisara afeeka qafeefara. Miqi qimannimiseenoo quandaki mi aiku asauku kuqirana qimaminoo qinau. Doo findifi aneenna qaari mareenana amaaqa fua.
LUK 5:25 Miqi qufanoo mi fasiqafa findifinoo aiqamausa nifusaa narí faiqee maru qaarina mareenoo Anutunara dufi dufi qimammareenoo amaaqa finau.
LUK 5:26 Aiqamausa minaki marusa mina qafamasee firaaqoo tautiqa maaqi qimasee Anutuna asasiqau, maqee faasaana maasa maa fasiqana qafaunanoo nifaaqa qumooqukinoo.
LUK 5:27 Miqooqari Yisufa raudamaki moosaa fidanoo Roomma maqannaa kiapana takisa munnimma maree maru kuskusafa mina auqu Reefina amarafa narí oopisaki marufanoo Yisufa mina qafamaseenoo qimaminoo qinau, aniree qini faqa fua qufanoo Reefifa findifinoo aiqama ainaina minniseenoo mina faqa finau.
LUK 5:29 Moo kari Reefifa Yisuna narana suuqamiraree qimaseenoo Yisuna faqa narí aqoonausa takisa munnimma maree marusa faqa faiqí anaasee akaqausa faqa naaramasoofaqa mina maaqaki anireeqa firaa qoomaqa sakasee nee mariqau.
LUK 5:30 Neemarufanoo Farisai amaana ufa qimarusa faqa nári niqoonausa Mooseena sandufa akoofasauqa faqa Yisuna faiqi namu niqiqa qiqau, innee nanaree ummuara takisa munnimma maree mariasa faqa manda oosana maree mariasa faqa narana nammari naidee, nisauruaqa.
LUK 5:31 Yisufa mina iriseenoo qimanniminoo qinau, amiqimaria fasiqa anaaseesa sia tutaqafinnai fidaqa, aurimariasa kai tutaqafinnai fidaqa.
LUK 5:32 Qinee sia amiqimaria fasiqa aanaaseesara nariqa mandainaina minnisee Anutufinnai ubeekaaqeera qumu maridaqa, innee manda fasiqa anaasee fee qimasee nifaqee mariasa misara kai Anutufinnai ubeekaaqeera naarararee qimasee qinee qumuafanausa maridaqa.
LUK 5:33 Akaqausa Yisuna qimamiqa qiqau, Yoohaneefa nammari nimimaruna ufa irimariasa moomoo kari narana maridanoo mina minnisee naarara innaaru qidaqa, Farisai amaana ufa qimariasa misa ufa irimariasa faqa miqidaqa ani ufa irimariasa sia uqanna miqidaqa, narana nammari naida maridaqa.
LUK 5:34 Yisufa iriseenoo qimanniminau, maanaaqa amundara qoomaqaki suqimaria fasiqa anaaseesara naarara mariaqee qifaqa sia ani ufa irifaranoo amundara fasiqa marinara qoomaqa sakasee neefaranoo.
LUK 5:35 Misa mi anaaseena afaaqi qini rumbamaree munu darusaifaqa mikari kuqaa nimuqusa mandaikinaqa narana minnisee naarara innaaru qifaranoo. (Yisufa narí kuquaninnanara maanaaqa amundarana afaaqi kikiqa usinau. Yisufa narí kuqinanoo mina faiqi namu nimuqusa mandaikinaqa naarara maridaqa innaaru qifaranoo fee qinau.)
LUK 5:36 Yisufa moo quandara ufa qimanniminau, faiqí nauraa siuta akunirara sia amana fuka qamunnasaaqaraa ati anaqisee minasaa akunuannoo miqinanoo nauraa qamunna faqa fuka qamunna faqa mandaikiandoora, mina nauraa qamunna maridanoo minnisaa. (Nauraa qamunnara Yisufa Mooseena sandufara mina kikiqa ususee qimanniminau. Fuka qamunnara narí fuka ufara qinau.)
LUK 5:37 (Yisufa maqasaa maru aukuana misa uainna nammari tatisee aandau apatannai auqira taquki adiasee kisaaqasaa maqaki quqasoofanoo marinau. Marikinoo amiqinoo marufaqa mina mara maree maqee maqee neemariqau. Uainna nammari misa maqee maqee nee maru nammarifa marinau. Mifa aandau apatannai auqira taquara qufaqa, maasa qeeqa ufakiqari taqu uqannee qidaqa.) Yisufa minara iriseenoo quandara ufa moo qimanniminau, faiqí fuka nammari sia amana nauraa taquki adiaannoo, rukamufinanoo aiqama nammari rairaa iandoora.
LUK 5:38 Fuka nammari fuka taquki adiainanoo amanaikiannoo.
LUK 5:39 Faiqí nauraa uainna nammari namasee sia amana fuka uainna nammari naannoo. (Yisufa faiqí aanaaseera Mooseena sandufa ooqeenaa uainnara foora mina akoofasa mariafaqa qini ufa fuka uainnara foora marifaqa nikooqeefaranoo.) Ooqeenaana adiafaairafa uriqaranoo maridanoo fuka adiafaairafa oorudupinoo maridanoo.
LUK 6:1 Moo kari Yuda maqannaasa Saririqa amaanasaa Yisufa narí faiqi namufaqa maqusamau nidanoo sakuma ummaqiranaki fimarufaqa mina faiqi namu sakuma ruqoosasee rafarisaidaqa neemariqau.
LUK 6:2 Farisai amaana ufa irimarusa maridaqa niqafeeqa niqidaqa qimannimiqau, innee nanaree Mooseena sandufa rukiaidee maasa amaana Saririqasaa ainainidee qufanoo Yisufa qimanniminoo qinau. Innee sia fee karaambaiqa Dafidina oosana iridee mifa aararoofanoo Mooseena sandufa rukiasee Anutuna naaquqara amaana maqaki keeqafinoo Anutuna amaqee maru feemuna mara namaseenoo narí faiqi namufaqa akaqana maree muqu niminau, Mooseena sandufaki mi feemunara kaqiqeesa sia naaqee qidanoo aanaiqikirausa kai naaqee qu feemufa marinau.
LUK 6:5 Yisufa misa qimanniminoo qinau, qinee faiqí nimaaku uqanna amaana faasaana faqa mina sandufauqa faqa mina uriqararausa maridaqa. Qinee qeeqa faiqi namuara sakuma ruqoosa naaqee qiana amana misa neefaranoo.
LUK 6:6 Moo kari Isaraee maqannaasa Saririqa amaanasaa faasaana moo maqusai amaana maqaki keeqafi Anutuna ufa qimannimi marufanoo faiqí moo asauku uqannai asauku karaaduqarafa faiqí anaasee faqa maridanoo Yisuna ufa irimarinau.
LUK 6:7 Mooseena sandufasaa rakisirausa faqa Farisai amaana ufa qimariasa faqa misa faqa maridaqa Yisuna arirara aiquqi mariqau, mi fasiqana asauku karaaduqarana andeeqasainaqa Mooseena sandufa rukiasee saikidanoo fee qimasee uneemaana qimasee mina rumbarara qimarufanoo.
LUK 6:8 Yisufa misa naundurakinaa manda irirana iriseenoo mi asauku karaaduqarana aaramaseenoo qinau, anee findifi mai aniree aiqamausa nifusaa kikiqia qufanoo miqimminau.
LUK 6:9 Kikiqa mafufanoo Yisufa misa qimanniminau, qinee moodaa ainainara inni irammirianaura, innisaimbaqa sandufa Saririqa amaanara naqi fee qidanoo, maasara faiqí dadaaqiaqee qidanoo fee faiqí kuridiaqee qidanoo fee, maasa faiqí mariaqeera asumu mara nimaqaanauree faiqí sia mariaqeera naru taikannimaqaanauree.
LUK 6:10 Miqi qimasee Yisufa aiqamausa nifuki nifuki idanoo mi fasiqana asauku karaaduqarana qimaminoo qinau, anee aneenna asauku uqua qufanoo mi fasiqafa miqufanoo mina asauku amiqinau.
LUK 6:11 Amiqufanoo farisai amaana ufa qimarusa faqa Mooseena sandufa irimarusa faqa firaaqoo aanoo qimasee Yisuna uneemaana qimasee ariranara randaqau.
LUK 6:12 Mi fasannai Yisufa innaaru qirara amuaqu namusa ooruree mi eendanaki innaaru saika imarufanoo iqaqanau.
LUK 6:13 Iqaqoofanoo misaki rusandeesamumasee (12) qisaukuqara taikasee qikunni ooqu qaara marasee fasiqa nifiqaseenoo misa nuqu niqiqara fasiqauqee qinau.
LUK 6:14 Misa nuqu moo Simoonafa moo auqu Peetooroofa faqa mina akaqa Andurufa faqa Yameesafa faqa Yoohaneefa faqa Firipifa faqa Baratooroomeeufa faqa,
LUK 6:15 Mataioofa faqa Toomasifa faqa moo Yameesafa Arafaiusana amaaku faqa Simoona amarafa kaaqa nári kaamannara rimarufa faqa Yudasina amarafa Yameesana amaaku faqa moo Yudasifa
LUK 6:16 Keerioota maqusaindaraafa kasooqaqee Yisuna uqeeqaaninafa faqa mariqau.
LUK 6:17 Yisufa misa nifiqa quqaseenoo niqiqara fasiqauqee qimaseenoo mina ufa irimarusa moomoosa faqa amuaqu namusaaqari qumureenoo afaasai marufaqa faiqí anaasee moomoosa ani mariqau.
LUK 6:18 Yisuna ufa iriananoo aurirafa taikaanifee qimasee Yudeeaa maqa maaqaindari faqa Yeerusaree maqusaindari faqa Tiree maqusaindari faqa Sidoona maqusaindari faqa moomoosa aniree usufufanoo Yisufa ufa qimannimidanoo aurirana taikannisee marinau. Faafasaaqa naundurai marusauqa aniroofanoo afaqa niseemarinau.
LUK 6:19 Anutuna afeeka fannoo Yisuna afaaqaindari fidanoo faiqí anaasee andeeqannisee marufaqa aiqamausa nisaukunnai Yisuna afaaqa auqamasoofanoo aurirafa taikanau.
LUK 6:20 Yisufa narí faiqi namu nindafamasee qimanniminoo qinau. Innee kudimariasa Anutufa firaa asasirana inni nimidanoo Anutuna innaaruna ququsa innindi maridanoommi.
LUK 6:21 Innee maqee aandaroo nárí marisa Anutufa asasirana inni nimidanoo Anutufa inni nimuaquirana nimiannoommi. Innee maqee ikiraqee mariasa Anutufa firaa asasirana nimidanoo, Anutufa naanaidara qirana inni nimiannoo.
LUK 6:22 Faiqí akaqausa faiqí nimaaku uqanna qinisaara inniara fidiaqaa iqa nifeeqeeqa aasaandaana ufa faqa oosana oosana manda ufauqa faqa inni qima nimifanoo Anutufa firaa asasirana inni nimiannoommi.
LUK 6:23 Misa miqimmannimiqaifaqa innee minara asasammaseeqa idi raidaqa nasuriaqa, mina akiaqara innaarunai firaa qumiasana innindi afeediranaki maridanoommi, maasa qikeeku qikaaku ooqai maru tamummaqara fasiqara mi manda oosanna nimiiusa maqee faqa miqi kai iqa inni faqa nimifaranoo.
LUK 6:24 Innee maqee qumiasana faqaasa mariasa inni aupurarafa firaafa mariannoo, innee adiafaaira marirafa doo aiqaraannoo.
LUK 6:25 Innee maqee nimuaqu imariasa inni aupurarafa firaafa mariannoo, inni aandaroo naruannoo, innee maqee naanaidara qimariasa inni aupurarafa firaafa mariannoo, innee noori runirafa faqa qikifaafau qirafa faqa mariannoo.
LUK 6:26 Faiqí anaasee aiqamausa inni amiqi amiqira ufa qimannimi mariasa faqa nimooqi mariasa faqa inni aupurarana firaana Anutufa nimiannoo ooqai maasa qikeeku qikaaku unnaqira tamummaqara fasiqauqara miqi kai idaqa nimooqimarufanoo Anutufa aupurarana niminau.
LUK 6:27 Innee qini ufa irimariasa qimannimidaqa innee inneeqa namuqaara nimuqusi marinaqa misara ruaqa, inniara nikooqee mariasa amiqimmasee misara amiqi amiqimmannimaqaaqa.
LUK 6:28 Inni niquraree mariasa misa nimooqira ufa qimannimiaqa inni mandaikamma nimaqee mariasara Anutufa idaaqamanisaanifeera innaaru qiaqa.
LUK 6:29 Moo fannoo ani aapaasa arinana dinni faqa quandasainanoo aruani, faiqí moo fannoo ani saketa maree finana siuta faqa mina amia,
LUK 6:30 Faiqí moo fannoo nana ainainaree ani iramirinana anee mina amia, moo fannoo ani ainaina ummuaramamaree finana sia kafaa oonu maraa.
LUK 6:31 Anee nana oosanaree aididanoo fee faiqí anaasee ani amifaree, anee amiqira oosana kai qimiaqee qimariananoo. Doo anee naaree misa ani amira aidira oosana kai faiqí anaasee maqee maqee kaqi nimia.
LUK 6:32 Faiqí anaasee aniara aidimariasara kai nidinanoo nanaree fifau Anutunara mina akiaqara qini qimiannoo fee, sia ani amiannoo manda oosana maree mariasa naanna reemariananoo misa miqimmidaqa nariara nariara nididanoo.
LUK 6:33 Ani amiqi amiqi imariasara kai amiqi amiqinanoo Anutufa mina akiaqara sia ani amiannoo, manda oosana maree mariasa naanna reemariananoo misa miqi kai idaqa nariara nariara amiqi amiqidaqa.
LUK 6:34 Ani amimariasa kai ainaina niminanoo Anutufa mina akiaqara sia ani amiannoo, anee miqinana sia manda oosana maree mariasa urinnaaqa reennaranoo misa kasooqaqee mina akiaqara mina amana kai qimiaqee qimasee niminnaranoo.
LUK 6:35 Innee sia misa naanna raaqa, inneeqa namuqaara nimuqusi marinaqa misa amiqimmannimaqaaqa ufaasu ainainara innaaru qimariasa nimiseeqa sia mina akiaqara nifu maqaaqa innee miqidaqa firaa uriqarara Anutuna faiqi namu marifaranoo mina akiaqara firaa qumiasana Anutufa inni nimaqaannoo. Anutufa miqi marifa manda oosana maree mariasa faqa minara auni mariasa faqa amiqi amiqimmannimaqee marifa maridanoo, innee mina aanna raaqa.
LUK 6:36 Inni nikoofa aiqamausara amuqusi marifanoo nifauaidanoo innee faqa miqi kai iqa faiqí aanaaseera nimuqusinaqa nifauaaqa.
LUK 6:37 Innee niqoonausa sia niqurara ufa nimiaqa miqifanoo Anutufa inni faqa sia niquraraannoo, inneeqa niqoonausa kaukaata sia qimannimaqaaqa miqifanoo Anutufa inniara faqa sia kaukaata qiannoo, innee inneeqa niqoonausa inni mandaikamma nimaqee mariana minnisaifanoo Anutufa innindi faqa minnisaannoo.
LUK 6:38 Innee faiqí anaasee kaqi nimifanoo Anutufa inni faqa kaqi nimiannoo, mifa firaaqoo qumbiqasee rairaamasee inni nimiannoo, innee faiqí anaasee niminnandee kai maseenoo Anutufa inni faqa nimiannoo. Anee faiqí anaasee nimira oosana Anutufa qafamasee mi nimira oosanamau kai inni nimiannoo.
LUK 6:39 Yisufa quandara ufa moo maaqi qimasee faiqí anaasee qimanniminau, afu dimbarafa sia amana aqoonnana afu dimbarana asaadakinoo aana fuannoo, afiqee fuani innana aiqamaqara madikaki aqufifaranoo.
LUK 6:40 Akara maqaki keeqeemari kumaaraafa sia amana narí uqafiqee marina uraaqaraannoo, akara maaqaki keeqarafa taikaseenoo mikari narí uqafiqeemari fasiqana amanasaa mariannoo.
LUK 6:41 Yisufa kaqi qimannimidanoo qinau, anee nanaree aneenna akaqaafasaa afuki mari saqari araifa marifanee ufa qidanee. Mee ani afuki muduka saqari akatia marinara anee sia iridanee.
LUK 6:42 Anee naqimasee aneenna akaqaafasaara mai anirainaqa mee ani afuki saqari arai marina maraquanauree qidanee, ani afuki muduka saqari akatia maridanoo anee nikaru qimarianafa aneenna afuki naaree firaa saqari akatia marina maraquseenana andeeqasee afu maqeenana aneenna akaqaafasaa afuki kaqikaa saqari arai marina mara aqua. (Innee sia moo fannoo manda ainaina marainaqa aquraraaqa maqasaa fasiqa anaasee aiqamausa innisaimbaqaindi firaa saqari akatiara foora maridanoo.)
LUK 6:43 Amiqira saqari fannoo sia manda qaqama iraannoo, kafaa mina dinni manda saqari fannoo sia amiqira qaqama iraannoo.
LUK 6:44 Saqari qaqama fannoo saqari oosanara koorooinana anee irinnaranoo aiqama saqari qaqama irafinoo oosanara koorooidanoo. Anee naqi fee masee reereeroondaana sandasaaqaraana faafisa qaqama tiqinnaree sia minasaa iraannoo. Kaifaa naqi fee masee kaakuna sandasaa kamukamuna qaqama tiqinnaree sia minasaa iraannoo.
LUK 6:45 Faiqí faqa saqari faqa moodaa karidaqa amiqira fasiqa fannoo narí amuqusakinaa amiqira afeediranakiqari amiqira ufa qimannimiannoo, manda fasiqa fannoo narí mandamuqusa afeediranakinaana manda ufa qimannimiannoo, faiqí narí amuqusakimari ainainara kai ufa qidanoo.
LUK 6:46 Innee nanaree qini Yisunara karaambaiqee karaambaiqee qidaqa qini ufa sia irida fee, faiqí moo fannoo qinee marunannai anireenoo qini ufa irimarifa mina oosana maaqimminoo marida.
LUK 6:48 Mi fasiqafa maaqa akoona fooqaafa maridanoo, mi fasiqafa maqa amiqimasee meemaqoo indufuseenoo faakana oonisaa munduseenoo minasaa maaqa afeekaikamasee usakanau, nammari aufinoo mi maaqana arufanoo sia kasinau, faakana amiqimasee afeekaikinoo marinau.
LUK 6:49 Faiqí moo fannoo qini ufa iriseenoo mimau sia finafa moo maqa akoofara maqi maridanoo mi furufarira fasiqafa aanda maqasaa maaqa usakeenoo sia faakana afeekaikinau, nammari aufinoo mi maqana arufanoo rafauraki maqasaa aqufinoo firaaqoo kurusinau.
LUK 7:1 Yisufa mi ufausa aiqama faiqí anaasee qimannimiseenoo findimaqee Kapeeranaumma maqusai finau.
LUK 7:2 Ooquroofanoo Roomma maqannaa sundiauqa uriqararana ainainira fasiqa kaaqa aidi maru fasiqafa kuqira aurira aurimarinau.
LUK 7:3 Sundia uriqararafa Yisufa anunara iriseenoo Yuda maqannaa uriqararausa niqiqeenoo qinau.
LUK 7:4 Innee oonuree Yisuna iramiriaqa mifa amanee mai aniree qini ainainira fasiqa andeeqaannoo fee qufaqa misa Yisufinnai oonuree reendeenamasee fuki faaki qiqau, maasa diqiqaifasiqa Roomma maqannaa fasiqa kaaqa maasa Yuda maqannaara rimarifa amaana maqa maasa usakaqimufa ani dadaaqirana amana marifa amanee dadaaqinnaree.
LUK 7:6 Yisufa misa ufa iriseenoo eedoo qimaseenoo misa faqa sundia maaqai finau, aatata fifiufanoo maaqa adeedi ramasoofanoo mi fasiqafa narí aqoondiuqa niqiqeenoo qinau, innee oonuree maaqi qimasee Yisuna qimamiaqa, oo uriqararafa anee fifau aiku rurina mai ani mariananoo, nanaree anee firaa uriqararafa mai aniree qini manda maaqaki keeqafinaqa qisauruanoora, qinee ani afusaa firanara faqa sia amanaikidaqa qinee oorudupirausa maridaqa.
LUK 7:8 Qini uriqarara sundiauqa moomoosa mariafaqa qinee misa nimeemaanai maridaqa misa ufamau fidaqa, qini qimeemaanai moomoo sundiauqa faqa mariafaqa qinee moonara fuannee qunanoo fidanoo moonara aniannee qunanoo anidanoo qeeqa ainainira fasiqara maa ainainna auqaa qunanoo auqaidanoo, anee Yisufa uriqararafa mariananoo anee miqooqari kai aurirafa taikaannee qinanoo qini ainainira fasiqa fannoo findifuani.
LUK 7:9 Misa mi ufana Yisuna qimamufanoo tautumaseenoo faiqí anaasee moomoosa mina faqa anusa quandaki qimanniminau. Maa Roomma maqannaa fasiqafa firaaqoo qini saqarikidanoo Isaraee maqannaa qeeqa maqannaasa maqusa maqusa nidaqa sia miqira amiqira fasiqa qafeeqa, aanaamuru maridanoommi.
LUK 7:10 Miqi qufaqa misauqaindi niqiqoosa anirandee nariqa uriqararana maaqaki keeqafi qafoofanoo mi fasiqana ainainira fasiqa findifinoo amiqimasee marinau.
LUK 7:11 Marikinoo Yisufa moo maqusai mina auqu Nainna maqusai narí faiqi namufaqa faiqí anaasee moomoosa mina faqa finau, maqusa naambeeqai oonuree qafoofaqa mi maqusaanaasa faiqí kuqirana qaindusu maree akundarara ikifaafauna faqa aniqau, adeedaana anaasee amaaku moodaa marufa kuqufufaqa faiqí anaasee moomoosa faqa mina anoofa faqa akundarara maree anufanoo Yisufa niqafoofanoo firaaqoo amuqusufanoo mina anoona qimaminoo qinau. Sia ikiraqaaqee qimaseenoo asaukunnoo oonu mi qaindana auqoofaqa maree aniusa kasoomafufanoo Yisufa kuqira kumaaraa qimaminau.
LUK 7:13 Oo maa kumaaraa qinee ani qimamidaqa doo findifua qufanoo mi kuqira kumaaraafa rutaqinoo findifinoo ufa qinau.
LUK 7:14 Yisufa mina afiqamareenoo narí anoofinnai munaisoofaqa faiqí anaasee firaaqoo naaquqoofaqa Anutuna amooqidaqa qiqau. Uriqarara tamummaqara fasiqa doo maasaki akooqoo kooroomafinoo maridanoo fee qufaqa akaqausa maaqi qiqau. Anutufa doo narí maqannaasa ooqai qimaqoo dadaaqianinafa doo ani maridanoo.
LUK 7:17 Mi ufana Yisuna aufakiana fannoo miqooqari Yudeeaa maqa maaqaki mariasaki faqa mina atiqara mariasaki faqa fifaininau.
LUK 7:18 Yoohaneefa nammari nimimaruna faiqi namu Yisuna naaquqara aufakiana Yoohaneena qimamufanoo iriseenoo narí ainainira faiqi qaaraqanda naaramasee qimanniminoo qinau.
LUK 7:19 Inneeqara karaambaiqinnai oonuree maaqi qimasee iramiriaqa Qinee anianinnanara qiafanafa anee mifee maridanee moonaree rakisianauree, miqi qimasee qimannimisee niqiqoofaqa miqanda Yisufinnai oonuree iramiriqa qiqau.
LUK 7:20 Yoohaneefa nammari nimimarufa maasa diqiqaifaqa ani iraidaqa mifa asauku mundirafa aniannoommifoo qimaqoofa anee mifee maridanee moonaree maasa rakisianauree qufanoo, Yisufa mikari faiqí anaasee moomoosa aurimarusa faqa oosana oosana teeroo maree marusa faqa faafasaaqa naundurai marusa faqa nifu dimbarausa faqa andeeqanniseenoo Yoohaneena faiqiqara qimanniminoo qinau.
LUK 7:22 Inneeqara Yoohaneefinnai anirandee oonuree maqee maaqoo qafaida maria ainaina qinee Yisusa auqaunnanara qimamiaqa, nifu dimbarausa maqanniseeqa niku eendirausa andeeqannisaunaqa nidaqa karoora narimarisa rukanniseeqa naaqoo aunirausa ruiqanniseeqa kuqirausa findifumanniseeqa, kudi fasiqa anaaseeuqa amiqira fasaasa ufa innaarunaira qimannimiqa mi ainainausara oonuree aiqama Yoohaneena qimamifanoo mifa qiniara iriannoo, ooqai aniraree qimaqoosa doo misamma ani maridaqa.
LUK 7:23 Maa ufana faqa qimamiaqa, qiniara sia qaara irira irimariasa Anutufa asasirana nimiannoo.
LUK 7:24 Miqi qufaqa miqanda irisee fufanoo Yisufa faiqí anaasee moomoosa miqoo mariusa qimanniminoo qinau, Yoohaneefa nammari nimimarufa kaasau aadana maqa maaqanaki marufaqa innee mina ufa iriraree qimasee nana ainaina qafararee fee qimasee ooqu fi fee iqau, fifau andanda ufai fannoo kasimarina qafararee fee qimasee ooqu fi fee iqau. Yoohaneefa sia miqimarifa marinau.
LUK 7:25 Innee nana qafararee fee qimasee ooqu fi fee iqau, faiqí moo amiqira qamunna afisimarina qafararee fee qimasee ooqu fi fee iqau. Yoohaneefa sia miqimarifa, amiqira qamunna afisimariasa sia kaasau maqa maaqaki maridaqa uriqarara karaambaiqa maaqaki maridaqa.
LUK 7:26 Innee Anutuna tamummaqara fasiqa qafararee fee qimasee ooqu fiqau. Eeoo innee tamummaqara fasiqa ooqu qafaqau, sia kaqi tamummaqara fasiqafau ooqu qafaqau, tamummaqara fasiqauqa uriqararafa marunara oonu qafaqau.
LUK 7:27 Ooqeennaa akaraki Yoohaneenara maaqi qimasee akara rinoo maridanoo. Iriaqa, qinee qini ufa qimannimianinafa ani oorinni aqiqaananoo ani oorinni fidanoo ani aana afisuannoo.
LUK 7:28 Yoohaneenara miqi qimaqoofaqa qinee Yisusa minara maaqi qidaqa maa maqanasaa kambiqoosakiqari mifa uriqaranoo marifa maridanoo, mina dinni innaaruna ququsaki mariasa ureeqarausa misa Yoohaneena uriqararausa maridaqa.
LUK 7:29 Faiqí anaasee kaiqeesa faqa ummuarimari takisa munnimmana maree mariasa faqa Yisuna ufa Yoohaneenara quna amiqimasee iriqau, misa ooqai Anutuna andeeqara ufamau fidaqa, Yoohaneefinnai nammari maree marusa maridaqa Yisuna ufa amiqimasee iriqau.
LUK 7:30 Farisai amaana ufa qimariasa faqa Mooseena sandufasaa rakisirausa faqa misara Anutufa andeeqara aana naamua qufaqa misa rukiasee sia Yoohaneena nammari maroosa maridaqa Yisuna ufa faqa sia iriqau.
LUK 7:31 Yisufa misara iriseenoo maaqi qimasee faiqí anaasee qimanniminoo qinau, maa fasannai mariasa nana fooqaasee maridee, misa faiqiuqa maqusa qambaanai sararida mariasa fooqaasa maridaqa misa maaqi qimasee narí aqi narí aqidaqa maasa asasira idi raunaqa innee sia dadaaqi idi ree mariafanoo maasa quandaki qiki anai fakiki raunaqa innee mina faqa sia dadaaqiafanoo innee furufari mariasa mariafanoo.
LUK 7:33 Yoohaneefa nammari nimimarufa anireenoo uainna nammari sia nanau narana uqanna faqa sia nanau. Ookasaasa anoona faqa pandaaqa oofaafana faqa kai noofaqa innee minara qafamasee afaanna aundurai keeqafifanoo miqidanoommifoo qiqau.
LUK 7:34 Qinee faiqí nimaaku uqanna aniree uainna nammari faqa narana faqa naunaqa innee qiniara maa fasiqana qafaa kaaqa narana nammari namufaqa neemarifa maridanoo, ummuarimaria takisa munnimma maree mariasa faqa maasa qikooqaifaqa niqiqee mariasa faqa niqoondiki marifa maridanoo qiniara miqi mari fee qimariafanoo.
LUK 7:35 Irirana faqaasa irira ufa kai qimariafaqa innee ufa qaara ufa qimariasa marianara innee irirana siaisa mariafanoo.
LUK 7:36 Farisai amaana ufa irimarufa moo fannoo narana suqaseenoo Yisuna aaramasee aniree qini maaqaki narana naannee qufanoo Yisufa eedoo qimaseenoo mina maaqaki keeqafinoo ooqu marifinoo narana neemarinau. (Mi aukuanna mi maqusaanaasa narana quqee maru qaindana qambaana marufaqa misa mina fiqu fiqumma taatata afuru faiqaqee idaqa narana nee mariqau. Niku uquseeqa faiqaqee nee mariqau.)
LUK 7:37 Mi maqusanakiqari moo anaasee kisaaqasaa mandainaina maree marufa Yisufa Farisai amaana ufa irimaruna maaqaki narana neemarunaki marufanoo mi anaaseefa minara iriseenoo amiqira afundimaru fadameenna idaaqira taquki maruna mareenoo minaki anireenoo Yisuna aanaaqiannai anireenoo mifa aiku uquqoonnai kikiqinau.
LUK 7:38 Kikiqammafinoo qikiraqee marufanoo mina aukunu fannoo Yisuna aikusaa aqufufanoo narí akiaqa asausi kisaaqannai mina aikusaaqaraa aukunu rukaseenoo mina aiku amooqaseenoo afundi maru fadameena mi taqunakinaana mina aikusaa adianau.
LUK 7:39 Farisai amaana ufa irimarufa Yisuna aaroofa mina qafamaseenoo narí aundurai kai Yisunara maaqi qimasee qimmirinau, maa fasiqafa kuqaa Anutuna tamummaqara fasiqa maridanoofau maa anaaseefa mina aiku amooqainara iriqini, mifa kisaaqasaa manda oosana maree marunara iriseenoofau qaoo qini.
LUK 7:40 Yisufa mina irirana iriseenoo mina aaramasee qimaminoo qinau, Simoona qinee moo ainainara ani qimamidaqa, Simoonafa iriseennoo qinau, eeoo ufasaa rakisirafa doo qinaqa iria qufanoo Yisufa qinau, faiqí moo fannoo moomoo munnimma faqaafa maridanoo maqee maqee ufaasu munnimma akaqausa nimisaidanoo mina akiaqara faqa aabaa faqa maree marifa marinau. Mi fasiqafa faiqí qaaraqanda ufaasu munnimma niminau.
LUK 7:41 Moo fasiqa 500 munnimma moomoo aminau, kafaa moo fasiqa 50 munnimma oodaa kai aminau, nimufaqa maraqa niniufaqa aukuana aiqaramafufaqa kaifaa mi munnimmana narí amiraree qimasee sia amanaikufanoo mi munnimmana akoofa iriseenoo miqandara amuqusufanoo mina akiaqara sia maranau minnisanau.
LUK 7:42 Simoona anee miqandara nanee fee qidanee miqandakiqari yafee firaaqoo mi munnimmana akoonara aidiannoo fee firaa munnimma aabaa maroo fee kaqikaa munnimma aabaa maroo fee.
LUK 7:43 Simoonafa mina iriseenoo Yisuna qimaminoo qinau, abee firaa munnimma aabaa maroofa mifa kai minara aidiannoo fee qufanoo Yisufa qinau, anee andeeqasee qiananoo qimaseenoo quandafi mi manda anaaseefinnai oori ubeekamaseenoo qinau, Simoona anee maa anaaseena qafaidanee, qinee anoona ufa ani qimamidaqa maa anaaseena firaa mandainaina akiaqara doo minnisaunnanara koorooidanoo firaaqoo qiniara aidimarifanoo amiqi amiqimmaqimaqaidanoo kaqikaa aaqarana akiaqara minni aisainafa minni aisainanoo mi kaqikaa aaqara fasiqafa kaqikaa qoo minni aisainna fasiqanara aidiannoo.
LUK 7:44 Qinee ani maaqaki aniraunnana anee sia maasa oosana mareenana nammarinnai qiku nammari uquananoo, maa anaaseefa narí aukununnai qini qiku nammari uquseenoo narí akiaqa asausi kisaaqannai rukeenoo.
LUK 7:45 Qinee ani maaqaki aniraunnana anee sia maasa oosana mareenana qimooqaananoo maa anaaseefa aniree qini qiku qimooqaifa maridanoo.
LUK 7:46 Qinee aniraunnana anee sia maasa oosana mareenana makaqa anoona qikiaqaki adiaananoo maa anaaseefa amiqira afundimaru makaqa anoonna qini qikusaa adiaifanoo qikusaa adiaqimaqeenoo.
LUK 7:47 Ani kaqikaa mandainaina akiaqara sia rukaananoo sia qiniara aidinana sia amiqi amiqimma qimaqaananoo maa anaaseena firaa mandainaina tia rukaunanoo firaaqoo qiniara aidifanoo amiqi amiqimmaqimaqaidanoo.
LUK 7:48 Yisufa miqi qimaseenoo quandafi mi anaaseena qimaminoo qinau, Oo anaasee ani mandainaina akiaqara arirana doo qinee minni aiseeqa qufaqa akaqausa miqoo mariusa nariqa naundurai qimiriqau.
LUK 7:49 Maana yafasiqa fee nariara faiqí mandainaina akiaqara arirana minnisee marunausee qidanoo fee.
LUK 7:50 Yisufa mi anaaseena kafaa qimaminoo qinau, oo maa anaasee anee aneenna aunduraindari qinisaa rusimarianafa mifa kai ani innaarunai marira asumu aminoo doo asooaranaki fua.
LUK 8:1 Kaqikaaqoo marikinoo Yisufa kaqikaa maqusakiaqa faqa firaa maqusakiaqa faqa oonuree aniree inoo nidanoo Anutuna innaaruna ququsara amiqira fasaasa ufa qimanniminoo ninau. Mina faiqi namu qisaukuqara taikasee qikunnooqu qaara marasee fasiqa faqa anaasee akaqausa faqa mina faqa fiqau.
LUK 8:2 Sia fifau aanaaseeuqa mina faqa fiqau. Yisufa aurirana taikannisoosa faqa faafasaaqa faqaasa maraqunnisoo anaaseesa kai mina faqa fidaqa nariqa narana faqa munnimma faqa minannai Yisuna faqa mina faiqi namufaqa fidaqa dadaaqimariqau.
LUK 8:3 Mi anaaseesa nuqu Yisuna anoona amarafa Mariafa Makadara maqusaindaraafa Yisufa mina aundurakinaana dinni qisauku taikasee dinni ani qaaraqanda faafasaaqa nifaqoofa faqa moo anaasee Eeroodeena maaqasaa rakisirana Tusaana anaaqa mina auqu Yooanna nammarifa faqa moo anaasee Susaanna nammarifa faqa moomoo aanaaseeuqa mina faqa fiqau.
LUK 8:4 Yisufa fimarufaqa faiqí anaasee aiqamaindari moomoosa ani usufufanoo Yisufa quandara ufa qimanniminoo qinau.
LUK 8:5 Innee amiqimasee iriaqa faiqí moo fannoo maasa Yuda maqannaasa oosana mareenoo maqa rumaseenoo raisa fooqaana ummaqirara mina qaqama marasee minaki aaqasoofanoo ururanau. Mifa miqoo aaqaidanoo akaqa qaqama fannoo aatata niku ree mariaqoo faqa aqufufaqa ufiniuqa aniree mina kai namasaqau.
LUK 8:6 Akaqafa ooni amuaaqa maqa oodaa marunasaa aqufufanoo kambiqeenoo dauni aadanusinau, maqa afeekasaa nammari siainasaa kambiqeenoo aadanusinau.
LUK 8:7 Akaqafa reereeroondaana marunaki aqufufanoo reereeroondaana namufaqa kambiqoofanoo reereeroondaana fannoo rafaaqafu fufanoo aadanusinau.
LUK 8:8 Akaqafa amiqira maqasaa aqufinoo firaafa kambiqeenoo qaqama moomoo uqanna iranau, Yisufa kafaa qimanniminoo qinau, naaqoo faqaasa amiqimasee qini ufa iriaqa. (Mi aukuanna mi maqannaasa kaqikaa ainaina qaqama raisa fooqaana neemariqau, mina auqu uita, misa maqa rumasee nisaukunnoo mi qaqamana afaqa qumaraida aaqasoofanoo kambiqee marinau, qaqama irafufaqa ateekamaree munusee aindirumasee feemu uqusaidaqa neemariqau. Misaindi uita, raisa fooqaafa maasaindi sakuma maridanoo.)
LUK 8:9 Yisufa faiqí anaasee qimannimufaqa mina faiqi namu nariqa kai iramiriqa qiqau, sakuma fooqaana qaqamara quandara ufa qimannimiannana mina oosana maasa sia iridaqa qimaqiminaqa iria.
LUK 8:10 Yisufa iriseenoo qinau, Anutuna ququsakinaa qumee irirana Anutufa inniara qimannimianee qinau, faiqí anaasee sia kooroomasee qimannimia quandasee qimanniminaqa nifu qafamasee sia paqurifara naaqoonnai irisee sia naundurai quqeefara.
LUK 8:11 Raisa fooqaana qaqamasaa quandara ufa oosana maaqimminoo maridanoo, raisa fooqaana qaqama Anutuna ufa maridanoo.
LUK 8:12 Raisa qaqama niku reemariaqoo aqufifa maaqimmidanoo, Anutuna ufa irisaafanoo manda afaanna fannoo misa naunduraindaraana ufiniarafoo ani namammaree fifaqa qini saqarikirana faqa asumu mariranasaa faqa ititaanifeera.
LUK 8:13 Raisa qaqama ooni amuaaqa maqasaa aqufifa maaqimmidanoo, faiqí anaasee akaqausa Anutuna ufa irisee sia naundurai meemaqoo iriaraasidaqa aaqee kai irisee nimanamasee qafara aukuana kambiqafifaqa misa minnisaidaqa.
LUK 8:14 Raisa qaqama amuka faqaa ainainaki aqufifa maaqimmidanoo, faiqí anaasee akaqausa Anutuna ufa iriseeqa maqasaa adiafaaimari ainainara faqa oosana oosana qumiasana faqa munnimma maree mariana faqa ummaara narimari ainaina faqa amuka faqaa ainainara foora minasaa kukuqammafinoo radamifanoo adusa qaqama iraidanoo.
LUK 8:15 Raisa qaqama amiqira maqasaa aqufifa maaqimmidanoo, faiqí anaasee akaqausa Anutuna ufa irisee qumareeqa nári amiqira nimuqusaki ufa irisee eedoo qiranaki quqasee minaki maqeeiafanoo mariifa qaqama iraidanoo. Faiqí moo fannoo Anutuna ufa iriseenoo faiqí anaasee qimannimidanoo narí marirana faqa kooroo imarifa qaqama iraidanoo.
LUK 8:16 Yisufa kafaa qimannimidanoo qinau, faiqí moo fannoo qooma qumbiseenoo sia difaaninnai rafaaqa fuannoo, sia beeta ameemaanai quqaidanoo, faiqí anaasee mina maaqaki keeqafiqa amiqimasee qafaaqee qimasee qaindasaa diridanoo. Kasooqaqee faqa aiqama kukeeqara ainaina Anutufa kooroo iannoo aiqama rafaaqafira ainaina faqa Anutufa paqurimasee mareeqee akooqoo quqaannoo.
LUK 8:18 Innee Anutuna ufa irimariasa amiqimasee irisee maraaqa aiqama kaqikaa irirainaina faqaasa Anutufa moo faqa nimiannoo, irirainaina siaisa ati marina Anutufa rafiqa mara marainaqa kaqi marifaranoo. Innee minara Anutuna ufa iriseeqa rakisi qumaraaqa.
LUK 8:19 Yisufa miqoo faiqí anaasee qimannimimarufaqa mina anoofa faqa mina ainaina faqa aniree Yisuna faqa ufa qiraree qimasee qafoofanoo faiqí anaasee moomoo maaqaki umbiqafufaqa sia amana keeqaqau.
LUK 8:20 Faiqí moo fannoo mina qafamasee Yisuna qimaminau, ani anoofa faqa ani akaqaafasaauqa faqa misa ani faqa ufa qiraree qimasee madaanai kikiqiqa maridammia.
LUK 8:21 Yisufa mina iriseenoo aiqamausa qimanniminau, Anutuna ufa irisee eedoo qimasee mi mau fimariasa misa qini qinaukoo qikaqaafasaa uqanna mariafanoo.
LUK 8:22 Moo kari Yisufa narí faiqi namufaqa nammari afainni noodaanna reemaru kanuqanaki akaramafinoo qimanniminau, innisaimbaqa maa nammarina muqu afainai nianai fuanaura miqi qufaqa misauqa aikannai furufanoo kanuqa fannoo finau.
LUK 8:23 Misa fimarufanoo Yisufa kanuqaki faiqaqee marinau, faiqaqee marufanoo ufai firaafa uqufanoo nammari amakaurinoo nammari fannoo kanuqaki qumbiqeenoo ukuqnaaqaa ufaqa rufiee mariqau.
LUK 8:24 Yisuna faiqi namu Yisufinnai oonuree afauriqa qiqau, oo uriqararafa, uriqararafa, maasa doo ukuqnaidaqa kuqirarammidaqee qufanoo Yisufa findifinoo ufaira faqa nammariara faqa qaoo qufanoo kasooinoo firaaqoo dai qimafinau.
LUK 8:25 Miqi qimaseenoo Yisufa quandafi narí faiqi namu niqinoo qinau, innee qini saqarikirana yai fee quqee fee sia marifaqa rufiee mariafanoo qufaqa misa aiqamausa naaquqoofaqa rufiaidaqa narí qimami narí qimami qidaqa qiqau. Maana yafasiqa fee maridanoo mifa ufaira faqa nammari amakauriranara faqa qimannimifaqa mina ufa irisee eedoo qimasee kasoomafia.
LUK 8:26 Misa miqooqari kanuqaki nammari amuaqumau fifiufaqa muqafainai nianai Keerasa maqannaasa maruqoo oonuraquraminau, mi maqannaasa Kariree maqa maaqa dinni atinai mariqau.
LUK 8:27 Yisufa kanuqakiqari maqasaa aqufufanoo faiqí moo fannoo faafasaaqa mina aundurai marufa aniranau, mi fasiqafa kisaaqasaa kaqisamu nimarinau, sia narí maaqai marufa faiqí madikai marufa aniranau.
LUK 8:28 Faiqí anaasee moomoo kari sainnadannai mi fasiqana aiku asauku rumbasoofanoo faafasaaqa fannoo mi fasiqana afeekaikufanoo mi sainandana rakeemasoofanoo sandeenoo kaasau aadana maqa maaqai fimarinau. Mi fasiqafa Yisuna qafamasoofanoo faafasaaqa afaanna mina aundurai marufa faaqarinau. Yisufa mi faafasaaqana aqiqaaninnanara iriseenoo faaqa rumasee Yisuna oorinni maqasaa aqufinoo aranaiqi qimaminau, Yisu anee firaaqoo uriqarara Anutuna amaaku mariananoo anee nanaree maasa soodaa idanee, qinee firaaqoo ani iraidaqa, sia qini ambufuqua.
LUK 8:30 Yisufa mi faafasaaqana iramirinoo qinau, ani auqu yafee qufanoo mi faafasaaqafa qinau, maasa moomoosa maa fasiqana aundurai marunausa marunnanara maasa duqu qusirausee qidaqa.
LUK 8:31 Miqi qimasee Yisuna aranaiqi iramiriqa qiqau, anee sia maasa idaki niqiqaa qimasee qafoofanoo ameemai kuarauqa andanda naidaqa marufaqa Yisunara afeekaikiqa qiqau amanee maasa kuarauqa naundurai keeqaanauree qufanoo Yisufa doo fuaqee qufaqa mi fasiqana aundurakiqari raudamaki kuarauqa naunduraki keeqafufaqa mi kuarausa tautumaki ameemaindari sandaqa nammari afainni ooquree rafusaki nammariki aqufiqa ukuqnamafiqa kuqu taikaqau.
LUK 8:34 Kuarasaa rakisimarusa mina qafeeqa sandee ooruree maqusai marusa faqa uiqaana maaqakiaqa marusa faqa qimannimiqa fiqau.
LUK 8:35 Faiqí anaasee moomoosa maasa faqa qafararee qimasee Yisufinnai nammari afainni sandee ooqu fiqau, ooquree qafoofanoo faafasaaqauqa aundurakiqari fifu fasiqafa irirana maraseenoo qamunna rumbaseenoo Yisuna aikuki ooqufaaqee marufaqa qafoofanoo naaquqanau.
LUK 8:36 Keerakeeseenee maqannaasa maqusauqakiqari moomoosa suqumaree aniroofanoo Yisufa faafasaaqauqa niqiqoofaqa qafeeusa misauqa qimannimufaqa iriseeqa firaaqoo naaquqoofaqa Yisuna ireeda kai ireeda kai fuki faaki qida irammiriqa qiqau, amanee anee maaqooqari moosaa finnaree qufanoo Yisufa kanuqaki akaramafinoo mootinai finau.
LUK 8:38 Yisufa firarufanoo faafasaaqa aundurai mariu fasiqafa Yisuna aranaiqi irammirinoo qinau, amanee qinee ani faqa fuanauree qimasee fuki faaki qufanoo Yisufa mina aqiqeenoo qinau, aneenna maaqai oonuree Anutufa ani andeeqainara misa qimannimia miqi qufanoo mi fasiqafa narí maqusai oonureenoo Yisufa mina andeeqoonara aiqamai qimanniminoo ninau.
LUK 8:40 Yisufa anirandee kafaannai oonuroofaqa faiqí anaasee moomoosa minara rakisida mariusa asasammasee Yisuna afiqaqau, Yisufa kanuqakiqari maqai aqufufanoo miqoo amaana maqasaa rakisirafa mina auqu Iairusafa anireenoo Yisuna aikuki maqasaa aqufinoo aranaiqi iramirinoo qinau, amanee anee qini maaqai aniree dadaaqia, qini qiraamuna moodaa qisaukuqara taikasee qikunni ooqu qaara aukuana kai marasaifa kuqiraridanoo. Yisufa eedoo qimasee fimarufaqa faiqí anaasee moomoosa fidaqa narí afeeqee narí afeeqee idaqa Yisuna faqa fiqau.
LUK 8:43 Anaasee moo fannoo qisauku taikasee qikunni ooqu qaaraqanda aukuana kisaaqandaiki marufa tutaqausa moomoosa feefauru masaida mareemaru marasinna amufanoo sia taikanau, miqi marufanoo mina munnimma taikafufanoo kaqi marinau.
LUK 8:44 Yisufa faiqí anaasee namufaqa fimarufanoo mi anaaseefa Yisuna aanaaqiannai moomoosa ititafunakiaqa aniree qumee kai mina qamunna ati qumee auqamasoofanoo mina kisaaqandaikirafa aaqee uqanna taikanau.
LUK 8:45 Yisufa irammirinoo qinau, yafee qini duqeenoo fee qufaqa aiqamausa qaoo qufanoo Peetooroofa qinau, uriqararafa faiqí anaasee moomoosa ani afeeqaidammia qufanoo Yisufa kafaa qinau,
LUK 8:46 Moo fannoo qini duqaifanoo faiqí andeeqara afeeka qinikiqari fifaqa iriqammunani qinau.
LUK 8:47 Miqi qufanoo mi anaaseefa oo doo qini qiqafeenoommifoo qimaseenoo aindiri aindiri ufanoo Yisuna aikuki maqasaa aqufinoo aiqamausa nifusaa narí auriranara faqa mina qamunna auqoonara faqa aurirafa aaqee kai taikoonara faqa kooroo inau.
LUK 8:48 Yisufa mina ufa iriseenoo qinau, oo qini qiraamuna anee irirana qinisaa rusiannanara ani aurirafa taikeenoo, doo asooaranaki fua.
LUK 8:49 Yisufa miqi qimasee mi anaaseena qimamimarufanoo amaana maqasaa rakisirana maaqaindari faiqí moo fannoo anireenoo Iairusana qimaminau, anee Yisuna sia kadaapi amia, ani araamuna doo kuqufinoo.
LUK 8:50 Yisufa mina iriseenoo Yairusana qimaminau Iairusa anee sia rufiaa, qinisaa kai ani irirana mundinanoo ani araamuna amanaikiannoo.
LUK 8:51 Yisufa Yairusana maaqai oonureenoo aiqamausa keeqararufanoo qaoo qimaseenoo Peetooroona faqa Yoohaneena faqa Yameesana faqa mi manaaqana anoona akoona faqa minamusa kai nifiqeenoo maaqaki keeqanau.
LUK 8:52 Keeqafufanoo niqafoofaqa mi maqanaki moomoosa maridaqa ikifaafau qimarufanoo Yisufa qimanniminau, Sia ikiraqaaqa maanaaqa sia kuqinoo faiqaqee maridanoo qufaqa aiqamausa mi manaaqanara kuqaa kuqinoo fee qimasee Yisunara naanaidaraqiqa uteeti qiqau.
LUK 8:54 Yisufa mi manaaqafa rinoo marunnai oonureenoo mina asauku qumareenoo qimaminau, qini qiraamuna findi fua.
LUK 8:55 Miqi qufanoo aunduraindaraafa oonurandee ani keeqafufanoo aaqee uqanna findifufanoo Yisufa mina anaukoo qimanniminoo qinau, narana ani araamuna amiaqee qufaqa amufanoo nanau.
LUK 8:56 Mina anaukoo firaaqoo naaquqoofanoo Yisufa qimanniminau. Sia uqanna maa ainainnara moona qimamiaqa, kukeeqaaqa.
LUK 9:1 Yisufa narí faiqi namu (12) qisaukuqara taikasee qikunni ooqu qaara marasee naarama moodaaqoo quqaseenoo Anutuna afeeka faafasaaqa afaqara afeeka faqa aurirana oosana oosana taikara afeeka faqa niminau.
LUK 9:2 Nimiseenoo maaqanna maaqanna niqiqamaseenoo qimanniminau, innee Anutuna innaaruna ququsara faiqí anaasee qimannimidaqa misa aurirana taika nimaqaaqa, innee sia moo ainaina maree fuaqa saunu faqa aakauqa faqa narana faqa munnimma faqa aabaa qamunna faqa sia maree fuaqa kaqi fuaqa.
LUK 9:4 Maqusaki oonuraifaqa moo fannoo aqoondi kamannisainaqa mina maaqaki kai mariiqa minakiqari kai fuaqa.
LUK 9:5 Yamaqusanaasee inniara qaoo qifaqa Anutufa naruaninnanara aaquqimannimaqasee kookoomma afaqa ninaamarasee fuaqa.
LUK 9:6 Yisuna faiqi namu maqusa maqusa fidaqa amiqira fasaasa ufa faiqí anaasee qimannimisaidaqa aiqamai aurusa faqa taikannisee mariqau.
LUK 9:7 Eeroodeefa Kariree maqa maaqaki uriqarara kiapafa mi ainainnara iriseenoo firaaqoo randeenoo furufarinau. Akaqausa qiqau, Yoohaneefa nammari nimimarufa Eeroodeefa arusoofa kuqiranakiqari findifinoo mi naaquqara ainainna auqaidanoommi maqi qufanoo Eeroodeefa mi ufana iriseenoo randanau.
LUK 9:8 Ooqeenaa tamummaqara fasiqauqakiqari Eeriaa fee moo fannoo fee kafaa findi finoo fee akaqausa qufanoo Eeroodeefa qinau,
LUK 9:9 Yoohaneefa nammari nimimaruna akiaqa qinee ateekasaafananoo kuqinoo maridanoo. Maa fasiqafa Yisuna oosana oosana ainainara iridaqa mina yafee maridanoo. Miqi qimaseenoo Eeroodeefa Yisuna qafarara randanau.
LUK 9:10 Yisuna faiqi namu maqusa maqusa niniufaqa anireeqa nariqa nidaqa auqoo ainainara Yisuna qimamiqau. Yisufa misa nifiqeenoo faiqí sia marunnai Beetasaida maqusa aaqa fiqau.
LUK 9:11 Faiqí anaasee moomoosa iriseeqa afaqee minni oonu paquriqau. Yisufa misa naaramaseenoo Anutuna innaaruna ququsara qimannimiseenoo misaki aurusa andeeqannisanau.
LUK 9:12 Eenoofaqa Yisuna faiqi namu qisaukuqara taikasee qikunni ooqu qaaraqanda marasee aniree Yisuna qimamidaqa qiqau, anee faiqí anaasee niqiqainaqa maqusa maqusa uiqaana maqakiaqa fifainidaqa narana feefaurumasee naaqa, maana faiqí sia mariasaqa maridaqa.
LUK 9:13 Miqi qufanoo Yisufa qimanniminau, inneeqa kai narana nimifaqa naaqa, qufaqa misa qiqau, Maasa feemu moodaannai qisauku faqa noodaanna qaaraqanda faqa maqeeidaqa, faiqí anaasee moomoosa uqanna maridaqa amanee maasa situaqai oonuree narana moomoo feeraurianauree.
LUK 9:14 Miqi qufanoo Yisufa narí faiqi namu qimanniminoo, innee faiqí anaasee qimannimifaqa raina raina mafi qaara faqa qaara faqa fasiqa niku nisauku taikasee qisaukuqara faqa (50) moosaqa ooqu mariaqa kafaa qaara faqa qaara faqa fasiqa niku nisauku taikasee qisaukuqara faqa (50) moosaqa ooqu mariaqa miqi kai mafi ooqumari maree fuaqa qufaqa mina faiqi namu qimannimufaqa faiqí anaasee miqi mafi ooqumari maree fiqau. Misakiqari faiqí kai (5,000) faifa tauseenna mariqau, ooni saqari auqiqa mariqau.
LUK 9:16 Ooqu mari fufanoo Yisufa feemu moodaannai qisauku faqa noodaanna qaaraqanda faqa qumareenoo innaarunai oori uqeeraseenoo Anutufinnai dufi dufi qimasee asaukunnoo feemu faqa noodaanna faqa ruqi ruqimasee narí faiqi namusaa soofaqa misa qumareeqa faiqí anaasee nimiqau.
LUK 9:17 Nimufaqa noofanoo nimuaqufaqa ataraasa minnisoofaqa Yisuna faiqi namu minauqa suqusee uqaki rufanoo qisaukuqara taikasee qikunni ooqu qaaraqanda (12) uqa qumbiqanau.
LUK 9:18 Moo kari Yisufa naríara oonuree innaaru qimarufaqa mina faiqi namu oonuroofanoo irammirinoo qinau, faiqí anaasee qiniara nana fasiqa fee qidee qufaqa misa qiqau, akaqausa Yoohaneefa nammari nimimarufa kuqiranakiqari findifinoo fee qidaqa, akaqausa aniara ooqai kuqufufa Eeriaafa findifinoo fee qidaqa, akaqausa Anutuna ooqeenaa tamummaqara fasiqauqakiqari moo fannoo kuqiranakiqari findi finoo fee qidaqa.
LUK 9:20 Yisufa mina iriseenoo irammirinoo qinau misa miqi qiafaqa innee qiniara nanee fee qidee qufanoo Peetooroofa qinau, anee Anutuna asauku mundirafa mariananoommi qufanoo Yisufa aranaiqi qimanniminau innee mi ufana sia moo fasiqa qimamiaqa qinee faiqí nimaaku uqanna marunausa marianaqa faiqí firaasa faqa Anutuna aanaiqikirausa uriqararausa faqa Mooseena sandufasaa rakisirausa faqa firaa aupurarana qimiseeqa qiniara nikooqamasee kuqa darusaifaqa qaaramoo faasaana aiqarainanoo Anutufa qini mara findifu masee kaqi marirana qimiannoo.
LUK 9:23 Yisufa quandaki aiqamausa qimannimidanoo qinau, faiqí moo fannoo qini faqa firaree qimasee qini ufamau finafa narí marirana minniseenoo faasaambaasaana qini ufasaara kuqa dariranara amanaikidee qinafa qini faqa fidanoora foora qini ufamau fuannoo.
LUK 9:24 Qinee minara maaqi qimasee qimannimidaqa. Faiqí moo fannoo qinisaara kuqiranara amuqusi marinanoo narí marirana afeedi inafa mifa narí marirana kakasiannoo. Moo fannoo qiniara narí marirana maaqoo minnisainafa narí marirana asumu maraannoo.
LUK 9:25 Faiqí moo fannoo maa maqanasaa uriqarara faikamafinoo aiqama ainaina maqee idanoo mari inafa marikinoo kuqinoo narí aunduraindaraana kuridiranaki finanoo mi qumiasanafa fifau kadaapirumasee maroofa mariannoo.
LUK 9:26 Faiqí anaasee moo fannoo qiniara faqa qini ufara faqa faiqí nifusaa asaurusee akooqainafa marinaqa qinee faiqí nimaaku naaru inaarunaindari qeeqa areenarana faqa qeeqa qikoona areenarana faqa naaquqara andeeqara qangiroouqa faqa misa areenarana faqa minauqa namufaqa qumureeqa mi fasiqa anaaseesara faqa qisaurusee qikooqaannoo.
LUK 9:27 Innee maa ainainnara faqa iriaqa innee maqee mariasakiqari akaqausa sia kuqirai kaqimarifanoo Anutuna innaarunaindaraa ququsa qafeefaranoo.
LUK 9:28 Yisufa mi ufana qimannimiseenoo dinni qisauku taikasee dinni ani qaaramoo faasaana aiqaroofanoo Yisufa Peetooroona faqa Yoohaneena faqa Yameesana faqa nifiqeenoo moo aaqanai innaaru qirara ooru fiqau. Yisufa naríara innaaru qimarufaqa mina faiqi namu kaqi faiqaqee ufanoo.
LUK 9:29 Yisufa miqoo innaaru qidanoo moo oori afiri maroofanoo mina qamunna kaaqa eekara rinoo nifu daroodaraa inau. Qaara fasiqa tautumaki kooroomafufaqa Yisuna faqa ufa qimariqau. Miqanda Mooseesa Eeriaasa ooqai kuquqanda tautumaki miqoo maqasaa misa nifusaa innaaruna areenaranaki kooroomafiqa Yisufa qusasaa Anutuna ufamau finoo Yeerusaree maqusai kuquaninnanara Yisuna faqa ufa qimariqau.
LUK 9:32 Peetooroofa narí faqa maruqanda faqa faiqaqee mariufanoo findifiqa Yisuna kaaqa qarana faqa mi fasiqaqanda faqa niqa fee mariqau.
LUK 9:33 Mi fasiqaqanda Yisuna aisee firarufanoo Peetooroofa narí oosana sia irirai Yisuna qimaminoo qinau. Ufasaa rakisirafa, maasa maaqoo marunanoo amiqidanoo. Maasa qaaramoo uiqaana maaqa maaqoo usakaanaura, aniara moo Mooseenara moo Eeriaanara moo usakaanaura.
LUK 9:34 Peetooroofa kaqi ufa qimarufanoo oonamu fannoo anireenoo misa ititannimaqasoofaqa rufiaqau. Rufioofanoo oonamukiqari ufa moo maaqi qinau. Maana qini qimaaku maridanoo qinee rusandeesamumasee maraafanafa, innee mina ufa kai iriaqa.
LUK 9:36 Mi ufafa taikafufanoo misa qafoofanoo Yisufa naríara kai miqoo marinau. Miqooqari Yisuna faiqi namu miqoo mariusa mi ainainna qafoonara sia uqanna kooroo iqau. Kaaqa umeeraqau.
LUK 9:37 Faiqee iqaqoofaqa minamusa aaqanasaaqari ooquroofaqa faiqí anaasee moomoosa Yisuna ani paqurimasoofanoo misakiqari faiqí moo fannoo faaqa rumasee Yisuna qimaminoo qinau. Ufasaa rakisirafa qinee qeeqa qimuqusannai ani irammiridaqa anee anireenana qini qimaaku moodaa kai maqaqaunnana qafaa.
LUK 9:39 Faafasaaqa moo fannoo maqee maqee faaqa rumasee mina aakufifanoo rafuseeqee maqasaa aqusaifanoo teendaarooni marifanoo ookiqari qaqaara faka fakidanoo, maqee maqee miqidanoo sia adooaidanoo. Qinee ani faiqi namu maaqoo mariasasaa qeeqa qimuqusannai irammirunaqa amaniafanoo sia amana afaqeea.
LUK 9:41 Yisufa iriseenoo qimaminau, innee qini ufara sia anoonee qimariasa kaqi runna fimariasa mariafanoo. Qinee kisaaqasaa fee inni faqa marianauree kisaaqasaa fee inni ummaarara foora akuaqee ianauree. Miqi qimasee mi fasiqana qimaminau, aneenna amaaku maree mai ania qufanoo mi kumaaraafa ani marufanoo faafasaaqa fannoo mina arurutukueeqeenoo maqasaa aqusoofanoo teendaarooninoo qaqaara faka fakinau. Yisufa mi faafasaaqana amambaina qufanoo fifufanoo Yisufa mi faiqina andeeqaseenoo narí akoona kafaa aminau.
LUK 9:43 Faiqí anaasee mina qafamasee Anutuna naaquqara afeeka qafamasee rufiaqau.
LUK 9:44 Faiqí anaasee Yisufa auqoo ainainara naaquqoofaqa narí qimami narí qimami masoofanoo, Yisufa quandaki narí faiqi namu qimanniminoo qinau, innee maa qimannimianaqa sia aunuaqa amiqimasee iriaqa. Qinee faiqí nimaaku uqanna Anutufa qini mareeqee faiqí faiqi nisaukuki quqaqisainaqa darifaranoo fee qufaqa sia mi ufana oosana iriqau, Anutufa misa irirana ititasoofaqa sia iriqau, Yisuna irammirianee rusia minnisaqau.
LUK 9:46 Moo kari Yisuna faiqi namu maasakiqari yafee uriqararafa maridanoo qimasee narinni narinni ufa rainaqau.
LUK 9:47 Yisufa narikai misa ufa iriseenoo akooqoofanoo faiqi aanaaqi moo maraseenoo narí aaqa kikiqamasee mina kikiqa ususeenoo narí faiqi namu qimanniminau. Yafee moo fannoo qiniara irisee maa kaqikaa faiqina oonudupirana oonu asasammasee amiqi amiqimma aisainafa qini uqanna qiqoondikidanoo, kafaa yafee moo fannoo qini oonu asasammasee qiqoondikinafa qini diqiqoona Anutuna aqoondikidanoo. Innikiqari oorudupirafa mifa inni uriqararafa maridanoo.
LUK 9:49 Yoohaneefa mi ufana akiaqara Yisuna qimaminoo qinau. Oo maasa uriqararafa, innau moo fasiqa fannoo moosaa ani auqunnai manda faafasaaqa faiqí aundurakinaana aqiqee marufaqa maasa qafamasee qaoo qiqiafana, mifa sia maasa faqa nimarunara qaoo qiqiafana.
LUK 9:50 Yisufa mina iriseenoo qimaminau sia minara qaoo qiaqa, sia namuqaa maridanoofau miqini maasa qiqoondi maridanoo miqidanoo.
LUK 9:51 Yisufa Kariree maqa maaqaki niniufanoo innaarunnai oorufuaninna aukuana adeedi roofanoo Yeerusareenni oori quandanau.
LUK 9:52 Samaria maqa maaqaki faiqanoo fidanoo faiqí akaqausa niqiqoofaqa indaaru Samaria moo maqusaki faiqaaninnanara deedaqiaqeera qimannimirara niqiqanau.
LUK 9:53 Oonuree mi maqusaanaasa qimannimufaqa misa qiqau maasa namuqaa maqusai Yeerusaree maqusai fidanoo fee qimasee qaoo sia maaqoo faiqaannee qiqau.
LUK 9:54 Mina faiqiqara Yameesasa Yoohaneesa miqanda minara iriseeqa niranaqoofaqa Yisuna qimamiqau, Karaambaiqa amanee maasa innaarunaindaraa idara qinanoo qumuree misa qama taikaannoo fee qufanoo Yisufa quandaki miqanda nimambaina qimasee qaoo qimaseenoo aiqareenoo moo maqusai finau.
LUK 9:57 Misa aanai fimarufanoo faiqí moo fannoo Yisuna qimaminoo qinau. Anee yai fee maqusa maqusa finaqa qinee ani faqa fuanaura.
LUK 9:58 Yisufa iriseenoo qimaminoo qinau. Kaasau fainiuqa oonaamarai faiqaasa maridaqa ufiniuqa faqa ninaamu faqaasa maridaqa, qinee faiqí nimaaku yai fee qeeqa qikiaqa rumasee fee faiqaanauree, faiqara maqa siaisa maridaqa, qini faqa finnaree. Miqi qimasee qimamiseenoo Yisufa fidanoo moo fasiqa aaranau, anee aniree qini faqa fuannee qufanoo mi fasiqafa qinoo qini qikoofa kuqirarammi marifaqa mifa kuqufinaqa akundamasee ani faqa fuanaura amanee qinee miqianauree qufanoo Yisufa qinau. Saina naaruara kuqiranaki fifandinausa kai nariqa kuqinausa nikundaaqa. Anee Anutuna ququsaki keeqara ufa faiqí anaasee qimanniminanua.
LUK 9:61 Faiqí moo fannoo Yisuna qimaminau uriqararafa qinee ani faqa firaridaqa qeeqa maqusai naaree oonuree qeeqa qikaqaafasaa nimanda masee anianauree qufanoo Yisufa qimaminau.
LUK 9:62 Faiqí moo fannoo saunu qumareenoo nandi aumuru arumaree munu kasaaqai quqeemarifa miqimaria fasiqausa sia amana innaaruna ququsa saika amana mareefaranoo.
LUK 10:1 Marikinoo Yisufa faiqí moomoosa rusandeesamumaseenoo qaara kai qaara kai niqiqeenoo maaqanna maaqanna Yisufa narí fuaninnannai indaaru fuaqeera niqiqamaseenoo qimanniminau afuqakinaa nandi aiqi marianara foora tatafinoo rairaainoo maridanoo moomoo fasiqa anaasee maridaqa aiqu innaarunai quqeemariasa oodaa maridaqa. Innee suana akoofinnai innaaru qifanoo aiqifandinausa niminaqa dadaaqiqa suana aiquaqeera.
LUK 10:3 Doo fuaqa, qinee qini sipsipa aanaaqi kaaqa reendeenimariasa kaasau faini qambaanai inni niqiqaidaqa.
LUK 10:4 Innee afunee uqa aakauqa fee niku aanaamu fee sia maree fuaqa, aanai fidaqa faiqí sia nimandaaqa. Innee maqusai oonuree faiqí moona maaqaki keeqarara maaqi qiaqa Anutuna asooarafa maa maqanaki mariani.
LUK 10:5 Asooaranara rimari fasiqafa minaki marinana ani afaaqooqa qirana minasaa mariani, sia asooaranara rimari fasiqafa minaki marinana anee afaaqooqa qira ufa qimamiannana kafaa maraa.
LUK 10:7 Innee maqusa maqusa fidaqa yaqoo maaqaki fee keeqafiqa minaki maridaqa mifa niminna narana nammarina kaqi naaqa. Innee inniqa saika imari fasiqana kadaapirirana akiaqara amimariafanoo, doo innee faqa saika fasiqauqa mariafanoo, misa narana nimifaqa kaqi naaqa inni kadaapirirana akiaqara maridanoo. Sia aiqama maaqakiaqa keeqafida naqa nuaqa, moodaa maaqaki kai mariaqa.
LUK 10:8 Innee maqusa maqusa oonuraifaqa misa inni niqoondikidaqa narana nammari nimifaqa kaqi naaqa, namasee mi maqusanakina aurinausa andeeqannimaqasee maaqi qimasee qimannimiaqa. Anutuna innaaruna ququsa fannoo inni rafusu quqarirara adeedi ranoo maridanoo.
LUK 10:10 Innee moo maqusaki oonuraifaqa misa sia inni amiqi amiqimannimaqaifaqa innee maqusa qambaanai maridaqa maaqi qimasee qimannimiaqa.
LUK 10:11 Inni maqusa kookoomma fannoo maasa qifaaqai atooqafifaqa maasa rukeeqee inniqa nifaaqai aqiqa, maa ufana amiqimasee iriaqa Anutuna innaaruna ququsa fannoo inni naaqa ani marifaqa minnisaafanoo.
LUK 10:12 Qini faiqi namu qinee Yisusa inni qimannimidaqa kasooqaqee Anutufa faiqí anaasee ufa irira faasaana anirainanoo innee kookoomma nimaqaqoosa Anutufa sia rauqi nimaqaannoo Soodooma maqusanaasa manda oosana maree maruna akiaqara Anutufa kaqikaaqoo rauqi nimaqaannoo kookoomma akunnimaqaasa sia rauqi nimaqaannoo, kuqa naruannoo.
LUK 10:13 Oo Koorasinna maqannaasa maqusa maaqa namufaqa qinee inniara qimudaoo qidaqa inni narirafa firaafa mariannoo. Beetasaida maqannaasa maqusa maaqa namufaqa inni narirafa faqa firaafa mariannoo. Tiree maqusanaasa faqa Sidoona maqusanaasa faqa aanaamuru aamina mariasa qinee mi maqusaqandaki faiqí sia amanaikimari ainaina moo misaki auqaanaqau misa dauni dauni iriseeqau misa doona danda kookoomma afaqa nariqa nifaaqai akusee ikifaafau qifau nariqa manda oosana minnisee dauni quandasee qini ufamau fini. Kooroosinna maqusanaasa faqa Beetasaida maqusanaasa faqa inniki moomoo naaquqeemari ainaina auqaafannaqa sia inneeqa manda oosana minnisaqau. Firaa ufa irira aukuana anirainanoo Anutufa Tiree maqusanaasa faqa Sidoona maqusanaasa faqa naridanoo kaqikaaqoo nifauaannoo. Innee Kooroosinna maqusanaasa faqa Beetasaida maqusanaasa faqa sia nifauaannoo firaaqoo inni naruannoo.
LUK 10:15 Kapeeranaumma maqusanaasa inniara faqa qianaura inneeqa nifaaqara mara maree urimariana inni maqusara faqa unnaqimasee innaaruna maqusa fooqaa fee qimariafanoo mina akiaqara Anutufa inni maqusa namufaqa mindari rarisameeqeenoo idaki aqumisaannoo.
LUK 10:16 Yisufa quandafi narí faiqi namu qimanniminoo qinau. Ya fasiqa anaasee fee inni ufa irianinafa qini ufa uqanna iriannoo. Ya fasiqa anaasee fee inni ufa rukiainafa qini futeeqaannoo, ya fasiqa anaasee fee qini ufa sia irinafa qini diqiqaina Anutuna futeeqaannoo.
LUK 10:17 Yisufa niqiqoo fasiqausa maqusa maqusa niniufaqa anireeqa firaaqoo asasamasee Yisuna qimamiqau. Oo karaambaiqa firaa ainaina faafasaaqa maasa ani auqu ramasee niqiqaunaqa doo faiqí naunduraindari raudamaki sandeea. Yisufa irisee qimanniminau eeoo qinee Sadanna qafeeqa mifa innaarunaindari aakuasaara foora maqasaa aqufinau. Innee iriaqa qinee afeeka inni nimunaqa sakanisaa fee farukasaa fee niku ramasaifanoo sia ukaqa nimiannoo inni namuqaa Sadannana oosana oosana afeeka fannoo sia inni naruannoo.
LUK 10:20 Doo miqinoo marifaqa maa anoona ainaina qimannimidaqa, faafasaaqa inni ufa irisee eedoo qimarianara sia minara asasiaqa maa ainainnara asasiaqa, inni nuqu innaaruna ququsaki mari papiqanaki akararinoo maridanoo, minara kai asasiaqa.
LUK 10:21 Yisufa mi ufana qimannimisoofanoo Anutuna naaquqara maraquna fannoo Yisuna asasirana amufanoo Anutunara maaqi qimasee innaaru qinau. Oo qini qikoofa innaaruna faqa maa maqana faqa karaambaiqa dufi dufi anee qinee maqee maqee qimannimunnufana irirana faqaasa nifusaa rafaaqafunniseenana irirana siaisa qini faiqi namu kooroomannimaqee mariananoo. Eeoo qini qikoofa aneenna aidirafa miqimminoo maridanoo.
LUK 10:22 Yisufa kaqi innaaru qidanoo narí akoona qimaminau, qini qikoofa aiqama ainaina qini kai qimiqaifa maridanoo, faiqí moo fannoo sia ani amaakura amiqimasee iridanoo anee qini qikoofa kai amiqimasee qiniara irimariananoo kafaa faiqí moo fannoo sia qini qikoonara iridanoo amaaku fannoo kai aniara iridanoo qinee qeeqakai irisee quqannifiqee marunausa faqa aniara irifaranoo. Miqi qidanoo innaaru qimasee quandafi narí faiqi namu umeenni qimanniminau. Inni aiqama amiqira ainaina faiqí sia amanaikimari ainainauqa uqannifiqaunaqa qafamasaafanoo inni asasirafa firaafa maridanoo.
LUK 10:24 Qinee inni qimannimidaqa ooqai tamummaqara fasiqauqa faqa karaambaiqauqa faqa innee maqee qafeemaria ainainausa faiqí sia amanaikimaria ainainausa faqa qafaaqaa imarufaqa sia qafaqau, misa innee maqee qini ufa irimaria ufausa iriaqaa imarufaqa sia iriqau.
LUK 10:25 Yisufa miqi qimarufanoo Mooseena sandufa akoofasa fannoo anireenoo Yisuna akari maqararee qimasee qimaminoo qinau. Ufasaa rakisirafa qinee nana saika fee marasee naaru naaru mariranaki fuanauree qufanoo Yisufa qimaminau, ooqai tamummaqara fasiqauqa akarakinaa ufa anee asaana rumasee nana ufa fee irinanee.
LUK 10:27 Mi fasiqafa iriseenoo Yisuna qimaminau, maa ufana asaana riqa, innee inneeqa nimuqusa nimana afeeka faqa irirana faqa mi tiana aiqamannai iriranannai faqa karaambaiqa Anutunara nidimarinaqa nimuqusiani. Kafaa maaqi qimasee moo asaana riqa anee aneenna aqoonausara aninna afaaqara foora misara aidinoo amuqusiani.
LUK 10:28 Yisufa mi ufana iriseenoo mi fasiqana qimaminau, doo ani ufa anoona maridanoo mi ufamau kai fidana naaru naaru marirana paqurinnaranoo.
LUK 10:29 Mi ufana Yisuna qimamufa mi fasiqana Mooseena sandufa akoofasa asaurirana amiseenoo nariara andeeqaranaki marianauree qimaseenoo narí amoo qimaseenoo Yisuna kafaa irammirinau. Yafee qini qiqoonafa maridanoo fee qufanoo Yisufa qimaminau faiqí moo fannoo Yeerusareendari Yeerikoo maqusai ooqu fimarufanoo ummuarimaria fasiqausa aanai mina paqurimasee doo aru quqasee mina afaaqa ainaina maree fifufanoo kuqiara foora miqoo rinoo marinau.
LUK 10:31 Mi faasaanna amaana maqasaa aanaiqikirafa mi aatata ooqu fidanoo aru quqaqoo fasiqana qafeenoo dinni aana afaindaqa fiqa ranau.
LUK 10:32 Miqi kai inoo amaana maqaki ainainimarifa moo Reefina ati fannoo mi aatata ooqu fidanoo ooqurama qafamasee dinni aana afaindanai ooqiaaqaree finau.
LUK 10:33 Mina aanaaqiana faiqí moo fannoo Isaraee maqannaasa namuqaa marufa Samaria maqannaafa mi aatata ooqu fidanoo aru quqaqoo fasiqana misa namuqaa Isaraee maqannaana qafamaseenoo firaaqoo amuqusufanoo uainna nammari faqa fadameena faqa mina afaaqa ateekaranaki akuseenoo banisannai rumbaseenoo mi fasiqana rauseeqeenoo narí doonkisaa quqaseenoo afiqeenoo maqusai oonureenoo pasindiaqa maaqaki quqaseenoo minaki maridanoo rakisi marinau.
LUK 10:35 Faiqee iqaqoofanoo mi fasiqafa maaqasaa rakisirana qaaraqanda munnimma amiseenoo qimaminau anee maa munnimmana maraseenana maanasaa rakisimarinanoo munnimma sia amanaikinaqa anireeqa moo faqa ani amianauree qimaseenoo quqasee finau.
LUK 10:36 Yisufa mi ufana Reefina ati maru fasiqana qimamiseenoo irammirinau yafee aru fasiqana aqoónafa maridanoo fee qufanoo Reefina ati fannoo qinau, minara amuqusimari fasiqafa kai, qufanoo Yisufa qinau doo anee faqa fidana miqikai ia.
LUK 10:38 Miqooqari Yisufa narí faiqi namu faqa fidanoo moo maqusai oonuroofanoo anaasee moo mina auqu Maratafa Yisuna afiqeenoo narí maaqaki munuseenoo amiqi amiqimamaqanau.
LUK 10:39 Maratana anasaafa Yisuna anoona amarafa Mariafa mifa faqa maridanoo Yisufa Anutuna ufa qimannimimarufanoo Mariafa Yisuna aaqa ooqufaaqeeidanoo mina ufa irimarinau.
LUK 10:40 Yisufa faqa mina faiqi namufaqa marunara Maratafa naríara narana suqeenoo deedaqinoo imarufanoo aundura dapikufanoo Yisuna qimaminau karaambaiqa qini qinasaafa aiqama saika kadaapi qini kai qiminoo sia fee minara iridanee, qimaminanoo aniree dadaaqiani qufanoo Yisufa qimaminau oo Marata, Marata, ani oosana oosana narana suqaranara amuqusimarifanoo aundura dapiki marifana aaqee mariananoo.
LUK 10:42 Anee moodaa narana suqaaqaana mifa amanaikinoo maridanoo ani anasaafa Mariafa andeeqara ainaina mareenoo Anutuna ufa reendeenamafinoo iridanoo, qinee sia mi ainainna minasaaqaraana rafiaanaura.
LUK 11:1 Moo kari Yisufa moo atinai maridanoo innaaru qimarufanoo mina faiqi namukiqari moo fannoo oonureenoo qimaminau, Karaambaiqa Yoohaneefa nammari nimi marufa narí faiqi namu innaaru qira oosana uqannifiqoondee inana anee faqa maasa uqannifiqaa qufanoo Yisufa eedoo qimasee qinau, innee innaaru qirara maaqi qimasee qiaqanani. Qipoo ani auqu naaquqarafa uriqararafa mariani, Ani innaarunai ququsa maa maqanasaa kambiqaani
LUK 11:3 Maasa maqee maqee naanna narana qimia. Aiqamausa manda oosana maasa nimiafaqa mina akiaqara mininnisaidaqa minara anee maasa naanna ramasee mina amana kai maasa manda ainaina akiaqara minni qisaa, Anee sia maasa mareeqeenana afeeka nimaniranaki quqannisaa.
LUK 11:5 Miqi qimaseenoo Yisufa kafaa narí faiqi namu qimanniminau faiqí moo fannoo eenda amuqusai narí aqoondi maaqai oonuree qimamiannoo, Oo qini qiqoondi anee qaaramoo feemu qiminaqa qinee maree munu qeeqa qiqoondi amia, mifa nianaindari ani marifanoo qini narana sia marifaqa.
LUK 11:7 Miqi qinanoo mina aqoondi fannoo maaqi qiannoo Oo naqimasee findi fuanauree faiqi anaasee namufaqa faiqaqee idaqa kooqi ititanoo maridanoo.
LUK 11:8 Mi fasiqafa naqi fee iannoo narana amiranara akooqaidanoo mina aqoondi marianinnara faqa sia amana findifi mara amiannoo. Anee faqa ani aqoondi marinana sia asaurinnaranoo fuki faaki qimarinanoo ani fuki faaki qirana taikaanifeera findifi mara amiannoo.
LUK 11:9 Qinee minara irisee inni qimannimidaqa innee faqa miqikai iqa Anutunara innaaru qifanoo innee sarauinna ainaina inni nimiannoo, innee Anutufinnai randeeqa anoona paqurifara innee Anutuna kooqi arifanoo atuasee nimiannoo.
LUK 11:10 Aiqama innaaru qimariasa mareefaranoo randee mariasa paqurifaranoo kooqisaa kukusimariasa kukusifanoo atuaannoo.
LUK 11:11 Qinee faiqi nikausa inni qimannimidaqa inneeqa nimaaku noodaannara qifaqa manda sakani nimifaree, sia nimifara noodaanna nimifara.
LUK 11:12 Misa kookooraana auruara qifaqa innee faruka nimifaree sia nimifara.
LUK 11:13 Innee manda oosana maree mariasa marifanoo inneeqa faiqi namu innaaru qiafaqa amiqira ainaina kai nimimariafanoo. Innaarunai nikoofa amiqirafa uqanna maridanoo minara innaaru qimarinausa minara firaaqoo amiqirana amana kai narí naaquqara andeeqara maraquna nimiannoo.
LUK 11:14 Moo kari Yisufa faiqí aundurakinaa faafasaaqa aqiqarara imarufanoo, mi faafasaaqafa mi faiqina ufa rafaaqafufanoo sia ufa qimarinau. Yisufa faafasaaqa aqiqamasoofanoo mi fasiqafa ufa qinau. Faiqí anaasee mina qafamasee naaquqoofaqa rufiasee akaqausa Yisuna aqidaqa qiqau, afaannauqa uriqararafa mina auqu Beeraseeburafa afeeka Yisuna amifanoo quandaki faafasaaqa nifaqaidanoo.
LUK 11:16 Akaqausa mina ueeqararee qimasee qiqau Yisunara faiqí sia amanaikimari ainaina auqusainaqa maasa aniara kuqaa Anutufinaindari qumu fee qianaura.
LUK 11:17 Yisufa faasai misa naundurakinaa irirana iriseenoo narí afaannauqa afeekannai faafasaaqa aqiqoonara akooqoofanoo niqinoo qinau. Moo maqannaasa nariqa maqannaasa faqa oonu rakee ani rakeemafi rakidaqa sia kisaaqasaa marifara, dauni kuqifaranoo. Moodaa maqaki mariasa faqa oonu rakee ani rakee iqa qusasaa moodaa moodaa makidaqa furufarifaranoo. Sadannana ququsakinaasa miqikai iqa oonu rakee ani rakeemafiqa naqimasee afeekaikifaree. Innee qiniara afaannauqa uriqararana mina auqu Beeraseeburanannai faafasaaqa aqiqeenoo fee qimasaida unna qimariafanoo.
LUK 11:19 Qinee minannai faafasaaqa nifaqaanaqa innee yanee auqu ramasaidaqa faafasaaqa nifaqaidee, innee sia Beeraseeburana auqu ramasee miqi mariafanoo innee andeeqasee Anutuna auqu ramasee afaanna nifaqee marifanoo. Miqi marianara inniqa faafasaaqa nifaqee mariafa inni ufa fannoo qini diqira ufa qimariana ateekaidanoo.
LUK 11:20 Qinee sia Beeraseeburana afeekannaifau faafasaaqa nifaqaidau Anutuna naaquqara afeekannai nifaqee marunausa marunnanara akooqoo maridanoo. Miqi marunnanara Anutuna ququsa inniki doo animarinara kooroo idanoo.
LUK 11:21 Afeeka fasiqa Sadannafa amudaanaiqi marifa duru saamu deedaqamasee marifanoo mina aiqama ainaina amiqinoo mariannoo, sia moo fannoo ummuariannoo. Afeeka fasiqa Sadannana uriqararafa uqanna qinee Yisusa anireeqa mi fasiqana radamuseeqa mina faakana duru saamu ainaina mareeqeeqa qeeqa qiku qisauku nimianauranoo.
LUK 11:23 Faiqí moo fannoo sia qini qiqoondi marinafa qini namuqaa maridanoo sia qini dadaaqida oonu suqu ani suqu imarifa, mareeqaida aquraaruki marifa maridanoo.
LUK 11:24 Yisufa kaqi qimannimidanoo qinau. Manda faafasaaqa faiqí aundurakiqari maaqakiqariara foora raudee aadana maqa maaqa oombura maqa maaqaki aakaaqaki oonuree aniree inoo nidanoo adooaranara randaisianoo maaqi qimasee oonumafi irinoo qinau sainaqa qinee qeeqa quqasee aniafanna fasiqana aunduraki kafaa fua, qimaseenoo oonuree qafoofanoo mi fasiqana aunduraki maaqara foora damuninoo maridanoo andeeqanoo marufanoo qafamasee oooo qimasee kafaa oonurandee ani aqoonna faafasaaqauqa aiqamausa misa mandainaina uriqararausa kai dinni qisauku taikasee dinni ani qaaraqanda marasee (7) nifiqamareenoo mi fasiqana aunduraki keeqafi mariqau. Marufanoo ooqai moodaa faafasaaqa marufanoo mi fasiqafa kaqikaaqoo mandainainaki marinau, maqee firaaqoo mandaikuqanna inoo maridanoo.
LUK 11:27 Yisufa mi ufana qimannimufanoo anaasee moo fannoo faiqí anaasee qambaanaindari findifi qimaminoo qinau. Ani maqaseenoo naamma amimari anaaseefa aniara amiqira qimaaku fee qimaseenoo firaaqoo asasira anaasee maridanoo.
LUK 11:28 Miqi qufanoo Yisufa quandafi mi ufana qaoo qinoo qinau, abee Anutuna ufa irisee mi mau fimariasa misa kai firaaqoo asasirausa maridaqa.
LUK 11:29 Faiqí anaasee moomoosa Yisuna rafusu quqarumafufanoo Yisufa kaqi qimanniminoo qinau, Maa maqee aukuana maria fasiqa anaaseesa firaaqoo manda oosana maree mariasa misa Anutufinnaindari qiniara faiqí sia amanaikimari ainaina auquanaqa kuqaa Anutufinaindari anifeeqianaura fifau miqi qimariasa misa mi irirafa manda oosana nimidanoo.
LUK 11:30 Sia innaarunai kooroo ira ainaina fuka uqannifiqaanaura nauraafa Yoonaanaindi mifa kai kaqi maridanoo, Yoonaafa ooqai Nineefee maqusanaasa Anutuna ufa kooroomanniminau, miqi kai iqa qinee faiqí nimaaku uqanna maqee mariasa Anutuna ufa kooroomma nimaqaanaura.
LUK 11:31 Kasooqaqee naaru Anutufa faiqí anaasee ufa irira faasaanasaa Seebaa maqannaasa uriqarara anaasee fannoo findifi maa maqee mariasa inni niquraraannoo. Mi anaaseefa nianaindari Sooroomoonnana irirana faqaa ufa iriraree qimasee aninau. Doo maqee faasaana qinee Sooroomoonnana uriqararausa animaridaqa innee sia qini ufa irimariafanoo minasaara mi anaaseefa inni niquraraannoo.
LUK 11:32 Kasooqaqee naaru Anutufa faiqí anaasee ufa irira faasaanasaa Nineefee maqusanaasa findifi maqee mariasa inni niqurareefaranoo, misa ooqai Yoonaanakiqari Anutuna ufa iriseeqa nariqa manda ainaina maqasaa quqasee Anutuna afusaa reendeenammiqau. Maqee qinee Yoonaana uriqararausa animarunaqa innee sia qini ufa irimariafanoo minasaara Nineefee maqusanaasa inni niqura reefaranoo.
LUK 11:33 Yisufa kaqi qimannimidanoo qinau, faiqí moo fannoo qooma qumbisee difaaninnai sia rafaaqafuannoo akooqoo quqasainanoo kaaqa qeemarinaqa faiqí anaasee maaqaki keeqafi amiqimasee qafaaqee qimasee akooqoo quqaidanoo.
LUK 11:34 Anee paapaaira oosana faqaafa mariananoo afu aundura kaaqa qarafa marifa mariananoo. Anee tatamaqira oosana faqaafa mariananoo afu aundura asukuna arinoo maridanoo.
LUK 11:35 Inneeqa kai minara rakisiaqa inni nifu naundura kaaqa qarana tatamaqira oosana fannoo rafaaqafuandoora, inni nifu naunduraki tatamaqira oosana kaqikaafa faqa sia marinaqa inni naundurai marifa faqa innee nimaria oosana faqa kaaqa areenaannoo.
LUK 11:37 Yisufa ufa qimannimi taikasoofanoo Farisai amaana ufa qimarufa Yisunara aniree qini maaqaki oonuree narana naannee qufanoo eedoo qimasee mina maaqaki mina faqa oonuree ooqu marifi narana nanau.
LUK 11:38 Farisai amaana ufa qimarufa Yisuna oosana qafamasee tautinoo qinau, maa fasiqafa sia maasa oosana mareenoo asaaquirai naidanoo kaqi naidanoo ufa rukiee marifa maridanoo.
LUK 11:39 Karaambaiqa narí kai mina irirana iriseenoo qimaminoo qinau, Qini ufa iria, innee Farisai amaana qimariasa inni marirana pirita kaafa fooqaafa mariafaqa adisaa kai findaukee mariafanoo aunduraki faiqí narirana faqa mandainaina oosana oosana faqa ikairi faqa inni naundura qumbiqanoo maridanoo.
LUK 11:40 Innee furufari mariafanoo innee Anutunara pirita kaafa adi kai auqimarifee fee qidee aundura sia auqifee fee qidee mifa aundura faqa auqusee qafee marifa maridanoo
LUK 11:41 Innee inneeqa naundura anukamasaifanoo inni nifaaqa aiqama anukanoo mariannoo.
LUK 11:42 Oo Farisai amaana ufamau fimariasa inni narirafa firaafa mariannoo, innee inneeqara maasa Anutuna ufamau fidaqa afuqakinaana oosana oosana adiafaaira ainaina rainasee akaqana Anutuna amidaqee qimasee quandaki andeeqara marirana faqa Anutunara riranara faqa minnisee mariasa mariafanoo.
LUK 11:43 Oo Farisai amaana ufa qimariasa inni narirafa firaafa mariannoo inni mandoosana maaqimminoo maridanoo. Innee amaana maaqaki keeqaidaqa noorisaa ooqu mariranara firaaqoo rimariasa mariafanoo, innee makeetakiaqa fimariafaqa faiqí anaasee inni nooriara rufiasee amiqimasee nimandaranara rimariasa mariafanoo.
LUK 11:44 Inni nariranara irifanoo naaquqaani, innee faiqí madika sia qafoosara foora mariafanoo faiqí sia qafarai kaqi mi mau fidaqa inniara amiqira fasiqafee qimasaidaqa inni naunduraki putaa iranara sia irimariasa.
LUK 11:45 Yisufa miqi qufanoo Mooseena sandufa akoofasa moo fannoo qimaminoo qinau, Oo ufasaa rakisirafa anee mi ufanannai maasa faqa mandaikamma qimaqaananoo.
LUK 11:46 Yisufa iriseenoo mina faqa qimaminau, innee Mooseena sandufasaa rakisirausa inni narirafa faqa firaafa maridanoo naaquqaani. Innee inneeqa faiqí faiqi maqasaa sanda ufana oosana oosanannai niqoonausa ummaara narimari ummaarana faiqí anaasee nifaariki nimisee sia kaqikaaqoo dadaaqidaqa inneeqa nisauku amuka faqa sia quqasee minannai ummaara kaqikaaqoo dadaaqi mariasa mariafanoo.
LUK 11:47 Inneeqa nariranara irifanoo naaquqaani, inni nikausa Anutuna tamummaqara fasiqauqa kuqa narusee nikundee marufaqa, innee misa faiqi namu oonuree inni nikausamara nariusa madikasaa amiqira ooni fee saqari fee taatuqee andanda faqa ummaqi mariasa mariafanoo.
LUK 11:48 Innee inneeqa nikausa mandoosanara amiqira oosanee qimasee miqi mariafanoo misa tamummaqara fasiqauqa narusoofa innee misa madikai amiqi amiqimariasa mariafanoo.
LUK 11:49 Anutufa minara iriseenoo narí iriranannai maa ufana qinau, qini tamummaqara fasiqauqa faqa qini ufa mara nimimariasa faqa Isaraee maqannaasa mariannai niqiqaifaqa misa akaqausa kuqa narusee akaqausa aupurarana nimifaranoo.
LUK 11:50 Ooqai Abeerana ariranasaaqari nariqa aniifaqa Seekariana ariranasaa naaquqara amaana maqaki tatufira qainda dinni naaquqara oosirafa dinni qambaana Seekariana ariqau.
LUK 11:51 Mi aiqama kuqannarirana akiaqara qinee aiqama mareeqee maqee mariasasaa quqaanaura.
LUK 11:52 Innee Mooseena sandufa akoofasauqa inni narirafa firaafa marinara naaquqaani, innee innaarunai fimaria irirafa kooqi kiqara foora inneeqa rafaaqafusee sia atuasee keeqeefaranoo faiqí anaasee mi kooqinaki keeqarara imariafaqa innee rafaaqafi mariasa mariafanoo.
LUK 11:53 Yisufa mi maqusana minnisoofaqa Mooseena sandufa akoofasauqa faqa Farisai amaana ufa qimariasa faqa Yisuna ariraree qimasee oosana oosana ufannai ufaanara foora fufi mariqau.
LUK 11:54 Misa aranaiqi oosana oosana ainainara irammiriana aaqainaqa rumbaanauree qimariqau.
LUK 12:1 Mikari faiqí anaasee moomoosa uqanna Yisufinnai ani suqufufaqa narisaa narisaa faqa niku ree mariqau. Yisufa ufa qimannimiraree qimaseenoo narí faiqi namu naaree qimanniminoo qinau. Innee Farisai amaana ufa qimariasa misa atiqeemari ooruku anoonara foora rufieeqa eerairiaqa misa ooruku maaqimmidanoo misa faiqí anaasee amaana ufa qimannimisaida nariqa maqandanai mandainaina maraidaqa misa miqimaria ooruku anoonara foora innee eerairiaqee qidaqa.
LUK 12:2 Aiqama rafaaqafira ainaina kasooqaqee Anutufa aiqusaina akooqoo mariannoo aiqama kukeeqara ainaina faqa kasooqaqee kooroomafinoo akooqoo mariannoo. Farisai amaana ufa qimariasa qaaraikirana faqa kooroo iannoo.
LUK 12:3 Inni faqa qimannimidaqa innee asukunaki faiqí anaasee qimannimira ufa kasooqaqee Anutufa aiqamausa nifusaa faasaana kooroo inaqa irifaranoo. Nana ufa fee maaqaki moona aaqooki qimaminna ufana maaqa ataufakaaqara foora miqooqari fi fi qimasee aiqamausa qimannimifaranoo.
LUK 12:4 Qini qiqoondiuqa inni qimannimidaqa inni nipata kai kuqa narusee miqooqari moo mandainaina sia amana niminausara misara sia innee rufiaaqa.
LUK 12:5 Innee rufieefandinnanara qimannimiana qini ufa iriaqa, Anutunara innee rufiaaqa. Mifa amana inni nipata naruseenoo naunduraindaraa nimana faqa amana mareeqeenoo idaki aqirana amanaiki marifa, eeoo qinee minara qimannimidaqa minara kai innee rufiaaqa.
LUK 12:6 Kaqikaa ufini ririmma fifau ainaina sia feefauru imariafa maridanoo, mi fifau ainainnara Anutufa sia moodaa aunidanoo aiqamausara iridanoo rakisidanoo.
LUK 12:7 Inni nikiaqa asausi faqa Anutufa aiqamara iridanoo nisaana rumaqaisa mariafanoo ufini faqa inni nikiaqa asausi faqa fifau ainaina marifanoo rakisidanoo innee firaatia anoona ainaina mariafanoo inni feefauru uriqaranoo maridanoo amiqimasee innisaa rakisiannoo, minara sia rufia rufiaqiaqa.
LUK 12:8 Qinee maanara faqa inni qimannimidaqa yafasiqa anaasee fee moo fannoo faiqí anaasee nifusaa paasoosamasee nariara qinee Yisunaindi fee qinafa qinee faiqí nimaaku mi fasiqa anaaseesara Anutuna qangiroouqa nifusaa misara faqa qinindi fee qianaura.
LUK 12:9 Yafasiqa anaasee fee moo fannoo faiqí anaasee nifusaa asaurusee sia qinee Yisunaindi fee qinafa qinee faiqí nimaaku mi fasiqa anaaseenara Anutuna qangiroouqa nifusaa minara faqa sia qinindi fee qianaura.
LUK 12:10 Faiqí anaasee moo fannoo faiqí nimaaku qini manda ufa qimaqiminafa qinee mi ufana akiaqara minnaisaanaura. Faiqí anaasee moo fannoo Anutuna naaquqara maraqunara manda ufa qinafa Anutufa sia mina minnaisaannoo.
LUK 12:11 Kasooqaqee misa qini ufasaara inni qini ufa irimariasa rumbamaree amaana maaqaki fee siaasinnai fee nariqa uriqarara finnai fee munusaifaqa inni ufa iriraree qifaqa inneeqa nifaaqa ititara ufara faqa qimannimira ufara faqa sia randaaqa. Anutuna naaquqara maraquna fannoo qimanniminna ufana miqoo kai inni naakapaannoo.
LUK 12:13 Faiqí moo fannoo faiqí anaasee qambaanaindari findifinoo Yisuna qimaminoo qinau, Oo ufasaa rakisirafa maaqanda qikoofa narí ainaina maaqandasaa quqasee kuqifanoo qini qifasaafa nariara maraidanoo anee qini qifasaana qimaminanoo andeeqasee raina qimiani.
LUK 12:14 Yisufa mina ufa iriseenoo qimaminau, oo maa fasiqa yafee qiniara siaasa saika maraannee qinaqee qinee inniqara ainaina rainaanauree.
LUK 12:15 Miqi qimaseenoo quandafi faiqí anaasee minara qimanniminoo qinau, innee aiqama ainainara fanandiranara eerairiaqa. Faiqi anoona marirafa sia qumiasanasaa mundinoo maridanoommi.
LUK 12:16 Yisufa kaqi qimannimidanoo maa ufana quandara ufa qimanniminau. Faiqí moo fannoo moomoo ququsa faqaafa narana amiqimasee moomoo kambiqanau, mi fasiqafa mina qafamaseenoo narí kai qimirinoo qinau.
LUK 12:17 Qini narana moomoo uqanna marifaqa yai fee quqaanauree qimasee qimmiriseenoo qinau.
LUK 12:18 Qinee maaqianaura, narana unaku quqasee afeedimaria maaqafa kaqikaafa marifaqa qinee mina rapeemasee firaana usakaanaura.
LUK 12:19 Usakaseeqa qeeqa narana faqa qumiasana faqa minaki quqaseeqa qeeqaraa maaqi qianaura, Oo qinee maqee amiqiranaki maridaqa, qini amiqira ainaina moomoo aukuana amanaikinoo maridanoo, qinee narana nammari namasee amiqimasee aufadaranaki marianaura.
LUK 12:20 Miqi qufanoo Anutufa mi fasiqanara maaqi qinau, anee furufari marianafa maqee eendaki anee kuqinanoo ani marirafa taikaannoo. Miqooqari yafee ani firaa qumiasana maraannoo fee.
LUK 12:21 Yisufa mi ufana rafaaqafinoo qinau, maqasaa moomoo ainaina suqimariasa innaarunai naaru naaru marirana siaisa mi fasiqana aanna raida moomoo ainaina fifau suqidaqa furufaridaqa.
LUK 12:22 Yisufa narí faiqi namu kaqi qimannimidanoo qinau, qinee faasai qimannimunna ufanara irisee maaqi qidaqa innee kaqi marira naranara sia nimuqusiani inneeqa nifaaqai afisimaria qamunnanara faqa sia nimuqusiani.
LUK 12:23 Inni marirafa uriqarara ainaina maridanoo narana oorudupirafa maridanoo. Inni nifaaqa uriqarara ainaina maridanoo qamunna oorudupirafa maridanoo.
LUK 12:24 Kaammeesa qafaaqa mifa sia narana asumu ummaqidanoo sia narana aiqifa sia maaqa usakasee minaki afeedifa, Anutufa kai narana misa nimidanoo. Innee sia ufiniara foorau mariafanoo uriqarara ainaina mariafanoo inni faqa nimiannoo.
LUK 12:25 Innikiqari moo fannoo narí kuqiranara amuqusiranannai amanee narí marirana firarisamasee kisaaqasaa mariannoo fee, sia amanaikinaranoo.
LUK 12:26 Innee mi kaqikaa ainainnara sia amanaikiqa nanaree naranara qamunnara nimuqusidanoo fee.
LUK 12:27 Innee nandaki kaasau taatuqee tamookeena qafamasee minara iriaqa, mifa sia ainainidanoo sia narí qamunna akunusee afisidanoo qinee minara qimannimidaqa ooqai karaambaiqa Dafidina amaaku Sooroomoonafa kaaqa ainaina faqa munnimma faqa moomoo maree marufa sia tamookeena amanasaa marinau mina qamunna amiqirafa uqanna sia tamookeena qamunnara foora idaaqirafa marinau, oorudupirafa marinau.
LUK 12:28 Kaasau usau Anutufa kai misa qamunnara foora nimidanoo maqee kasidanoo duna ateekasee ida areemaria ainainafa maridanoo. Anutufa misa nimidanoo sia fee firaa ainaina tia inni faqa nimiannoo fee, nimiannoo. Innee Anutuna mandaaqarafa kaqikaafa kai maridanoo, fifau narana qamunnara nimuqusi mariafanoo.
LUK 12:29 Minara irisee maasa nana narana fee nammari fee maqee maqee naanauree qimasee minara sia nimuqusiani.
LUK 12:30 Maa maqanasaa Anutuna ufa sia irimariasa misa mi ainainausara kai maqee maqee randaidaqa, inni nikoofa inni narana qamunna ainainara faasai iridanoo nimiannoo.
LUK 12:31 Innee Anutuna ququsakinaa marirana irirana niqiniandamasee mi mau firanara naaree irifanoo Anutufa inni marira ainaina nimiannoo.
LUK 12:32 Oo innee qini faiqi namu, innee qini aandau aanaaqi firimariasara foora mariafanoo sia rufiaaqa inni innaarunai nikoofa asasamasee innaaruna ququsa inni nimiraree qidanoo.
LUK 12:33 Innee inneeqa qumiasana moosa nimisee feefauru maraseeqa kudi fasiqa anaasee nimiseeqa, mi andeeqaranannai innee sia afauqaqaaninna munnimmara foora maraseeqa afeediaqa inneeqa aiqama qumiasana innaarunai kai afeediaqa, miqoo sia oorudupiannoo sia ummuara fasiqa fannoo maraannoo sia qooqoosa aukuanno.
LUK 12:34 Inni qumiasana mariqoo kai miqoo kai inni nimuqusa ubeekanoo mariannoo. Innaarunai kai qumiasana afeediaqa.
LUK 12:35 Innee deedaqiqa mariaqeera qimannimidaqa, inneeqa qamunna atukarasee nooiqandamaseera foora qooma qumbinoo maridanoora foora deedaqiqa mariaqa.
LUK 12:36 Innee ainaina faqaana ainainira faiqiara foora deedaqiqa mariaqa. Misa uriqararafa amundara qoomaqara fifinoo mindari oonurandee anianinnanara rakisida marifara, mifa anireenoo kooqi arinaqa dauni atuasaifanoo keeqaannoo, innee misa naanna ramasee deedaqiqa mariaqa.
LUK 12:37 Amiqimasee afeesimariasa asasifaranoo misa uriqararafa anireenoo amiqimasee ainaini mariasee qimaseenoo narí qamunanda atukaramaseenoo narana suqaseenoo rakiqa nimiannoo.
LUK 12:38 Misa uriqararafa eenda amuqusai fee iqaqarooka fee anirainaqa amiqimasee rakisi inausa firaaqoo asasifaranoo.
LUK 12:39 Innee maa ufana faqa iriaqa, maaqa akoofa ummuarira fasiqa anianinnanara iriseenoofau rakisinanoofau sia kooqi rakeemasee ainaina maraiqini.
LUK 12:40 Qinee inni faqa qimannimidaqa, innee faqa deedaqiqa mariaqa, qinee faiqí nimaaku innee sia qiniara aniannoo fee qimarifandinna kamuqoo aniraanaura.
LUK 12:41 Yisufa miqi qufanoo Peetooroofa qinau. Oo karaambaiqa anee mi quandara ufana aiqamausaree qidanee maasara kai fee qidanee.
LUK 12:42 Karaambaiqa fannoo iriseenoo ainainimaru fasiqana kikiqusinoo qimaminau, ainaina faqaana ainainira faiqi irirana faqaafa andeeqasee rakisimarifa marinau.
LUK 12:43 Ainaina faqaafa mi andeeqara ainainira fasiqanara qimaminau anee qini maaqakinaa ainainasaa rakisisee ainainira faiqiuqa narana aandau andeeqasee nimiannee qimaseenoo moosaa finau.
LUK 12:44 Mi ainainira fasiqafa narí uriqararafa anianinna kamuqoo andeeqasee maridanoo firaaqoo asasiannoo. Qinee Yisusa qimannimiana iriaqa, mi ainainna faqaafa narí amiqira ainainira fasiqa andeeqarana qafamasee amiqira fasiqa fee qimaseenoo narí aiqama ainainatiasaa rakisiranaikammama qaannoo.
LUK 12:45 Moo kari ainaina faqaafa narí ainainira fasiqara qini ainainasaa rakisi marinaqa namummaqarara fuanee qimasee fifanoo mi ainainira fasiqafa quandaki narana faqa afeeka nammari faqa neeneeseenoo furufarinoo narí aqoonna ainainira fasiqa anaaseeuqa narinoo furufarinoo nimarinanoo mina uriqararafa sia aniannoommifoo qimaru kamuqoo sia irirai mana mana imarinanoo anirama qafeenoo ufa rukiee mariasa nári mariandeemaseenoo mina ateeka ateekamasaannoo.
LUK 12:47 Ainainira faiqi fannoo narí uriqararana ufa iriseenoo sia findifinoo mina ufamau finafa miqinna fasiqana saamu samu amudaani tureeraumasaannoo.
LUK 12:48 Ainainira faiqi moo fannoo narí uriqararana ufa sia irirai aruaninna manda ainaina marainanoo mina arirafa aufadarafa mariannoo, maqasaa fasiqauqa moomoo ainaina amimari fasiqanara minasaaqari moomoo ainaina mareefaranoo, Anutufa faqa miqikai iannoo, maqasaa fasiqauqa uriqarara ainaina amimari fasiqanara minasaaqari uriqarara ainaina aabaa faqa mareefaranoo, Anutufa faqa miqikai iannoo.
LUK 12:49 Yisufa faiqí anaasee qimannimidanoo qinau. Qinee maa maqanasaa mariasaki idara foora ufa raiqeeqa namuqaakirana oosana araanauree qimasee qumiqiafana, doo faasai ida arasaananoo qaida mariaqaana.
LUK 12:50 Qinee kuqira manda nammariara foora marasee naanaura, mina afeesara marunanoo qifaaqa rumbanoo maridanoo.
LUK 12:51 Innee qiniara tinoorimarianaki maa asooarana mara maree maqasaa fasiqa anaasee nimiannee fee qida fee, sia uqanna miqianaura, qinee maqasaa fasiqa anaasee ufa rainarana nimirara qumidaqa.
LUK 12:52 Maaqooqari qini ufasaara moodaa maaqaki moodaanai qisauku marinausa rainaki qaarammoo dinni fiqa namuqaakifara qaaraqanda miqikai iqa dinni fiqa namuqaakifara.
LUK 12:53 Qini ufasaara nikausa nári faiqi namu namuqaakamma nimaqeefara kafaa dinni kumaaraauqa nári nikausa namuqaakamma nimaqeefaranoo. Ninausa nári niraamuqmaaka namuqaakamma nimaqeefara kafaa dinni fuka anaaseeuqa nári ninausa namuqaakamma nimaqeefaranoo. Anaaseeuqa nariqa ninaakuqmaaka faqa rainafi namuqaakamma nimaqeefara kafaa dinni fuka anaaseeuqa nári ninaakuqmaaka aanaaseeuqa namuqaakamma nimaqeefaranoo.
LUK 12:54 Yisufa faiqí anaasee qimannimidanoo qinau, innee aaku qoonnamu suani keeqeemari qaannaindari urinaqa qafeeqa oo aaku ruannoo fee qifanoo doo aaku ruannoo.
LUK 12:55 Maaroosa ookeesa ufai uqifaqa innee minara aiqaiqimari aukuannee qimariafanoo doo kuqaa qimariafanoo.
LUK 12:56 Innee mandaikirausa qaara irirana maree mariasa, innee innaaruna faqa maqa faqa qafamasee andeeqasee kambiqaaninna ainainara andeeqasee iri mariafanoo, maqee qinee qumimarunna kamuqoora nanaree sia iridee qida fee.
LUK 12:57 Innee sia inneeqa kai andeeqara ufa irisee mi mau fuafanoo nanaree miqidee.
LUK 12:58 Faiqí moo fannoo ani afiqeenoo kootai finana anee aanai fidana mi ufana aanai taikaaqee qia, sia miqinanoo mi fasiqafa ani afiqeenoo siaasa aminanoo mifa mareeqeenoo foorisa aminanoo mifa mareeqeenoo rumbaranaki quqaannoo.
LUK 12:59 Anee minaki marinanoo ani mandainaina akiaqara taikafinana mikari kai raudeennaranoo. (Innee minara irisee qinee qumu marunna kamuqoo inneeqa mandainainara qini faqa ufa qidaqa mi ufana andeeqa taikaaqa, sia miqiqa Anutufinnai fifaranoo.)12|59|RUKA
LUK 13:1 Mi fasannai faiqí anaasee akaqausa anireeqa Yisuna qimamiqa qiqau, akaqa Kariree maqannaasa Anutuna tatufira aandau suqa amimarufanoo Piratoofa narí sundiauqa niqiqoofaqa anireeqa misa naru taikaqau. Miqimasoofanoo aandau fidika faqa faiqí fidika faqa moodaanaki quminau.
LUK 13:2 Yisufa mi ufana iriseenoo qimanniminoo qinau, innee mi Kariree maqannaasa akaqausa kuquanara nári maqannaasa urinnaaqaramasee manda oosana maroona akiaqara kuqiaa maqi fee qida fee.
LUK 13:3 Sia minarau kuqiaa, qinee minara inni qimannimidaqa, Innee faqa inneeqa manda oosana minnisee Anutufinnai ubeekaaqa, sia miqiqa innee faqa miqi kai iqa kuqifaranoo.
LUK 13:4 Qinee Yeerusaree maqusanaasara faqa qimannimidaqa, miqoo ooni maqa kisaaqa Sirooamma ooni maqa fee qimariana fannoo rapeemaki aqufinoo faiqí (18) qisaukuqara taikasee qikunni ooqu dinni taikasee dinni ani qaaramoo marasee fasiqa kuqa narinau. Innee mi fasiqausara Yeerusaree mariasa nári niqoonausa manda oosana urinnaaqaramasee maroona akiaqara kuqiaa maqi fee qida fee.
LUK 13:5 Sia minarau kuqiaa, Qinee inni qimannimidaqa, innee sia inneeqa manda oosana minnisee Anutufinnai ubeekeeqa innee faqa miqi kai ifaranoo. (Anutufa sia manda oosana akiaqara aaqee uqanna naridanoo, kisaaqasaa naaraidanoo mai andeeqara aatata aniaqee qidanoo, sia irifanoo miqoo naruannoo.)
LUK 13:6 Yisufa kafaa maa quandara ufana qimanniminoo qinau, faiqí moo fannoo narí afuqaki faafisara foora qaqama tiqisaidaqa neemaria saqarifa marinau, moo faasaana mi fasiqafa mina qaqama tiqi nararee qimasee oonuree qafoofanoo sia qaqama iroofanoo oori runuseenoo narí ainainira fasiqa qimaminoo qinau,
LUK 13:7 Qinee qaarammoo aukuana maa saqarina qafaunanoo sia qaqama ireenoo mifa fifau maqa ainoo naidanoo doo ateeka aqua qufanoo mi ainainira fasiqafa qinau.
LUK 13:8 Saina kaqi marinaqa moodaa aukuana qinee mina atukaki oora indufusee madaapee quqasee miqoo qafaanee qinau.
LUK 13:9 Sia irainaqa mikari kai ateeka aquanaura.
LUK 13:10 Moo Saririqa Yuda maqannaasa amaana qimaru faasaana Yisufa ufa suqira maqaki keeqafi Anutuna ufa qimannimimarufanoo moo anaasee fannoo faafasaaqa mina aunduraki marufanoo (18) qisaukuqara taikasee qiku dinni taikasee dinni oonu qaaramoo marasee aukuana kummaranoo kai marufa ataufaka rakisirara sia amanaikimarufa miqoo amaana maqaki ani marinau.
LUK 13:12 Yisufa mi anaaseena qafamasee aaramaseenoo qimaminoo qinau. Oo maa anaasee doo aneenna teeroo quqaranakiqari amiqina maria.
LUK 13:13 Miqi qimaseenoo Yisufa narí asauku minasaa quqasoofanoo aaqee kai ataufaka rakisufanoo findifinoo Anutunara dufi dufi qimarinau.
LUK 13:14 Amaana maqasaa rakisi marufa mina qafamaseenoo Yisufa amaanasaa mi anaaseena andeeqoonara aanoommaseenoo faiqí anaasee qimanniminau. Mooseena sandufaki maasara 6 faasaana ainainiaqee qinau, doo innee mikari kai aniree inneeqa aurirana taikaaqa, maasa amaanasaa sia aurirana taikaaqa.
LUK 13:15 Miqi qufanoo karaambaiqa fannoo quandafi qimaminoo qinau, innee unna qimasaidaqa qaaraiki mariasa, amaanasaa innee inneeqa mimmi burimakau sipsipa ainaina nifiqaidaqa nammarinni muqusee mariafaqa nammari naidaqa.
LUK 13:16 Maa anaaseefa Abarahaamana ati marifanoo Sadannafa kisaaqasaa (18) aukuana karabusaki quqaqaifanoo aupuraranaki marina, burimakau mimmi sipsipa uriqarara ainaina fee maridanoo fee mina kai amaanasaa idukirafa andeeqanoo maridanoo fee.
LUK 13:17 Miqi qufaqa Yisuna aqi marusa mi ufana iriseeqa nisauri marufaqa faiqí anaasee kaiqeesa Yisufa oosana oosana amiqira ainaina auqoonara asasimariqau.
LUK 13:18 Yisufa faiqí anaasee qimanniminoo qinau, Anutuna maqasaa ququsaki faiqí anaasee mariasa nana ainaina fooqaa fee maridanoo fee, qinee minara nana kikiqee usuanauree.
LUK 13:19 Qinee maaqi qimasee mina kikiqusuanaura. Mifa qumini qaqama fooqaafa mariannoo, faiqí moo fannoo qaqama mara mareenoo narí ququsaki ummaqusainanoo firaafa saqariara foora kambiqafinanoo ufiniuqa mina asaanasaa ninaamu usakeefaranoo. Anutuna ququsaki keeqafuasa miqidaqa mi saqarina fooqaana auqaanai idooaidaqa.
LUK 13:20 Yisufa kafaa qimanniminoo qinau, qinee Anutuna innaaruna ququsaki keeqafuasa nana ainaina kikiqa usuanauree, misa ooruku anoona fooqaasa maridanoo.
LUK 13:21 Anaasee moo fannoo sana qaindi anasee ooruku anoona minaki adiasainanoo aiqamai amiqimmasee ati qaanno.
LUK 13:22 Yisufa Yeerusaree maqusai oorufidanoo kaqikaa maqusauqakiaqa Anutuna ufa qimanniminoo oorufinau.
LUK 13:23 Ooru fimarufanoo faiqí moo fannoo irammirinoo qinau, Oo uriqararafa faiqí anaasee moodaa kai moodaa kai innaarunai asumu mariranaki keeqeefaree, qufanoo Yisufa qimaminau.
LUK 13:24 Anee tiqeera kooqiki afeekaikamasee amanammasee keeqaa, qinee minara qimannimidaqa iriaqa, faiqí anaasee moomoo amanidaqa sia amana keeqeefaranoo.
LUK 13:25 Mi maqana akoofa findifinoo kooqi atukarasainaqa misa madaanaindari kooqi aridaqa maaqi qifaranoo, kooqi atuaqisainaqa keeqaanee qifanoo maaqa akoofa maaqi qimasee qimannimiannoo.
LUK 13:26 Innee yaindaraasee qinee inniara sia iridaqa qinaqa misa maaqi qifara, anee maasa maqusai Anutuna ufa qimannimimarianafa mariananoo maasa ani faqa narana nammari nee marunausa maridaqa maasara irimarianafa mariananoo.
LUK 13:27 Maaqa akoofa mina iriseenoo kafaa qimannimiannoo, innee yaindaraasee maridee, innee manda oosana maree mariasa mariafanoo innee qini daaqa mariaqooqari moosaa fifuaqa. Yisufa mi ufanannai innaaruna kooqi kikiqa usinoo kafaa maa ufana miqoo marusa qimanniminau.
LUK 13:28 Qinee inniara maqee mariasara qidaqa kasooqaqee innee Abarahaamana faqa Isakeena faqa Yakooboona faqa Anutuna tamummaqara fasiqauqa aiqamausa faqa Anutuna innaaruna ququsaki marifaqa innee maqee qini faqa narana nammari nee marinausa aqoosai maridaqa niqafamasee innee firaaqoo nifai sandurinaqa ikiraqeefaranoo.
LUK 13:29 Faiqí anaasee suani oosanaindari faqa amuqundari faqa dinni dinni ataaqeendari faqa aniree Anutuna innaaruna ququsaki ooqu marifi moodaanaki mina qoomaqa sakasee neefaranoo.
LUK 13:30 Mikari maqee maqasaa inaaqianna mariasa mikari misa uriqararausa marifaranoo, maqee aukuana uriqaraqa marinausa mikari ureeqararausa marifaranoo.
LUK 13:31 Mikari Farisai amaana ufa qimarusa Yisufinnai aniree qimamiqa qiqau, anee maaqooqari findimmaqee moosaa fua, karaambaiqa Eeroodeefa ani kuqa ariraree qinoommi.
LUK 13:32 Yisufa iriseenoo qinau. Eeroodeefa faiqí nikaruqimasaida ueeqasaida narimarifa maridanoo innee maaqi qimasee qiniara qimamiaqa, qinee maqee faqa duna faqa faiqí anaasee naunduraki faafasaaqa nifaqeeqa aurinausa andeeqannisee ianaura, moona qeeqa saika taikaanaura, miqi qimasee Eeroodeena qimamiaqa.
LUK 13:33 Maqee fi fi inaqa duna faqa fi fi iqa Yeerusaree maqusai ooruraanaura Anutuna tamummaqara fasiqauqa aiqama Yeerusaree maqusaki kai narusee marufaqa kuqi mariqau, qinee nanaree minakiqari radukaki moosaa kuquanauree sia amana, qinee faqa Yeerusaree maqusaki kai oonuraanaqa misa narunde̱e kai masee qini faqa darifaranoo.
LUK 13:34 Oo Yeerusaree, Yeerusaree innee Anutuna tamummaqara fasiqauqa kuqa narusee mifa niqiqoosa oonisamu qumaree narimariasa. Qinee moomoo kari ani faiqí anaasee marasee kookooraanara foora sakarara imarunaqa innee qaoo qiafanoo.
LUK 13:35 Doo qusasaa inni maqusa faqa amaana maqa faqa faiqí anaasee sia marifanoo naakundu mariannoo, qinee kuqaa inni qimannimidaqa innee maaqooqari sia kafaa qini qiqafeefaranoo kasooqaqee innee qiniara maafa karaambaiqa aqiqaifanoo anidanoo fee Anutufa mina amiqi amiqianinafa qimasaidaqa mikari kai qini qiqafeefaranoo.
LUK 14:1 Yuda maqannaasa amaana faasaana moo Saririqa Farisai amaana ufa qimarusa misa uriqararana maaqaki Yisufa mina faqa narana nararee qimasee keeqafufaqa aqoonna Farisai amaana ufa qimarusa Yisuna qumarararee qimasee amiqimasee apuree mariqau.
LUK 14:2 Yisufa mi maqanaki ooqu marifufanoo aurimaru fasiqafa afaaqa autura ari maru fasiqafa Yisuna oorinni marinau.
LUK 14:3 Yisufa mina qafamasee miqoo marusa Farisai amaana ufa qimarusa faqa Mooseena sandufa akoofasauqa miqoo marusa faqa irammirinoo qinau, Qinee inni iraidaqa Mooseena sandufa fannoo inni amaanasaa faasaana faiqí aurinausa andeeqaranara eedoo qidanoo fee, qaoo qidanoo fee.
LUK 14:4 Misa mi ufana iriseeqa sia ufa qiqau, kaqi Yisuna kai tataqaqa mariqau, miqiqa marufanoo Yisufa mi aurira fasiqana qumareenoo mina aurirana taika amaqaseenoo aqiqoofanoo mifa fufanoo quandafi miqoo marusa qimanniminau.
LUK 14:5 Yafee moo fannoo innikiqari mina amaaku fee burimakau fee madikaki aqufinoo marinanoo amaanasaammifoo qimasee sia fee qumbaqiannoo fee. Sia uqanna amaanara irisee minnisee fara kaqi minakinaana qumbaqifaranoo. Doo qinee faqa maa aurira fasiqana madikakinaanara foora amaanasaa qumbaqiara maqi idaqa sia aaqaidaqa.
LUK 14:6 Misa Yisuna ufa irisee kuqaammifoo qimasee ufa qirara irusia sia ufa qiqau.
LUK 14:7 Mi Farisai amaana qimarufa narana firaaqoo suqaseenoo moomoosa naaroofaqa mina maaqaki ani keeqafufaqa amiqiraqoo ooqu mariranara randee marufanoo Yisufa niqafamasee misa aiqamausara qinau ufa see qini ufa iriaqa qimaseenoo akooqoo ufa maaqi qimasee qimanniminau.
LUK 14:8 Faiqí moo fannoo amundara qoomaqa suqasee ani aarainana oonu reenana sia aaqee oonuree amiqiraqoo kai ooqu maria.
LUK 14:9 Ani uriqararafa anirainanoo qoomaqa akoofa ani qafeenoo aqiqamasee uriqarara fasiqara miqoo ooqu mariannee qinana anee asauriranaki maridana mandaikiraqoo kai ooqu marinnaranoo.
LUK 14:10 Innee sia amiqira qoora randaaqa, faiqí moo fannoo inni naarainaqa maaqimmiaqa, Innee mina qoomaqaki keeqafiqa kaiqeesa ooqumari mariaqoo kai ooqumariaqa, Qoomaqa akoofa anirama ani qafeenoo aniara oo qini qiqoondi mai ururee amiqiraqoo ooqumaria, Miqi qinana anee aiqamausa nifusaa uriqararafaikinana asasinnaranoo.
LUK 14:11 Nariqa kai qinee uriqararausee qimariasa Anutufa nisauriranaki quqaannoo, nariqa kai qinee ureeqararausee qimariasa Anutufa misa uriqararanaki quqaannoo.
LUK 14:12 Miqi qimasee Yisufa quandaki mina aaroo fasiqana qimaminoo qinau, anee qoomaqa suqaseenana sia aneenna aqoondiuqa faqa akaqaafasaa faqa aneenna ainaina faqa aneenna ainainafaqaa aqoondiuqa faqa misauqa sia naaraa. Anee misa naarainaqa misa faqa miqi kai iqa ani faqa aaramasee amana kai amifaranoo.
LUK 14:13 Anee qoomaqa suqaseenana kudi fasiqauqa faqa niku nisauku mandaikirausa faqa arirutiqa nimariasa faqa nifu dimbarausa faqa misauqa kai naarama quqasainanoo Anutufa mina akiaqara inni amiqi amiqi iannoo.
LUK 14:14 Misa sia amana kafaa mina akiaqara ani amifaranoo minara kasooqaqee Anutufa amiqira oosana mareemaria fasiqa anaaseesa kuqiranakiqari mara findifu maseenoo mikari mina akiaqara ani faqa amiannoo.
LUK 14:15 Faiqí moo fannoo mi qoomaqanaki maridanoo Yisuna ufa iriseenoo qimaminau, Anutuna innaaruna ququsaki keeqafi minaki narana nee mariasa firaaqoo asasifaranoo.
LUK 14:16 Yisufa mina ufa iriseenoo kafaa quandara ufa qimaminau, faiqí moo fannoo qoomaqa firaana suqarara deedaqamaseenoo faiqí anaasee moomoosa naaranau.
LUK 14:17 Suqaidanoo narí ainainira faiqi aqiqeenoo anee fiqu fiqu idana faiqí anaasee qinee naaraunausa nifiqee minisainaqa qoomaqa naaqa doo aiqama ainaina deedaqinoo maridanoo.
LUK 14:18 Mina ainainira faiqi fannoo qimanniminoo nufanoo moo fannoo qinau, Qinee maqa doo feefaurumaqaqee idaqa mina qafarara fidaqa sia amana fuanaura.
LUK 14:19 Miqi qufanoo moo fannoo qinau, qinee qisaukuqara (10) purimakau ummaara rarisee marina feefaurumaqaqee idaqa mina amanamasee qafarara fidaqa sia amana fuanaura.
LUK 14:20 Miqi qufanoo moo fannoo qinau, qinee maqee kai anaasee amunda qimiqaafaqa sia amana fuanauree qufanoo ainainira faiqi fannoo misa ufa iriseenoo narí firaafinnai oonuree qimaminau. Mifa iriseenoo firaaqoo aanoommaseenoo qimaminau.
LUK 14:21 Anee dauni dauni sandeenana firaa aatata faqa kaqikaa aatata faqa maqusa qambaanai faqa oonureenana kudi fasiqa anaasee faqa mataammataakiqa nimariasa faqa nifu dimbarausa faqa arirutiqa nimariasa faqa mandaikirausa aiqama nifiqee qini qoomaqai ania qufanoo mina ainainira faiqi fannoo miqimminau. Misa nifiqee mini quqaseenoo narí firaafinnai oonureenoo qimaminau.
LUK 14:22 Doo ani ufamau fiqa nifiqamaree mini quqasaunanoo narana moomoo maridanoo faiqí anaasee sia amanaikidammia qufanoo qoomaqa akoofa qinau.
LUK 14:23 Doo findimmaqee oonuree nianai afuqakiaqa mariasa nifiqamaree qini qoomaqa amana kai minisainaqa naaqanani.
LUK 14:24 Innau, eenda naarauna sia aniasa sia uqanna qini narana kaqikaaqoo nifaurusaa quqeefaranoo.
LUK 14:25 Yisufa moosaa fimarufaqa faiqí anaasee moomoosa mina faqa fidaqa maasa faqa Yisuna faiqi namukiraree qufanoo Yisufa quandafi qimanniminau.
LUK 14:26 Faiqí moo fannoo qini faqa firaree qinna fasiqafa narí anoona akoona faqa faiqi anaasee faqa narí akaqaafasaa faqa asoommaaka faqa nariara faqa fidiaqaa maseenoora foomaseenoo qini faqa aniani.
LUK 14:27 Faiqí moo fannoo qini ufasaara sia eedoo qimasee narí aunirira saqari akumareenoora foora sia eedoo qimasee qini ufasaara kuqiranaki finafa sia mifa amana qini faiqi namuki keeqaannoo.
LUK 14:28 Faiqí moo fannoo maaqa usakararee qimaseenoo maaqa usakara ainainauqara naaree amiqimasee irinanoo sia amanaikina sia usakaani.
LUK 14:29 Mifa maaqa atuna faqa faakana faqa kai rakiqasainanoo aiqama ainaina sia amanaikina mina aqoonausa qafamasee naanaidara qimasee maaqi qifoora.
LUK 14:30 Maa fasiqafa maaqa usakarana oosana araseenoo mafi taikarana sia amanaikinoo.
LUK 14:31 Namuqaa karaambaiqa moo fannoo narí rakira fasiqauqa moomoosa faqa aniree nariranara iriseenoo maaqoo qaraa karaambaiqa fannoo mina moomoo rakira fasiqauqara iriseenoo naríndi oodaa marinara irinoo amanaikee ianauree sia amanaikee ianauree sia amanaikinaqa narirara imari karaambaiqana faqa ooqumari fi ufa qimasee reendeeniananoo asooarafa mariani.
LUK 14:33 Miqi qimaseenoo Yisufa minara qimanniminau, miqi kai masee innee faqa qini faqa firanara amiqimasee iriaraasamaseeqa inneeqa aiqama ainaina minniseeqa qini faqa aniaqa. Sia miqiqa sia amana qini faiqi namukifaranoo.
LUK 14:34 Miqi qimaseenoo Yisufa kafaa maa ufana qimanniminau, innee ooruku indee mariana sia adiafaa inaqa naqi fee masee kafaa adiafaairana quqeennaree, sia amanaikinnaranoo.
LUK 14:35 Sia adiafaa inna ooruku andanda atukaki teeqimasainanoo mi andandafa faqa mandaikammiannoo. Innee kaqinni aquaqaana. Mandainaina maridanoo. Innee qini faqa fifandinausa sia amiqimasee mi kadaapi oosanna irirainni kaqi firarianara qaoo qidaqa kasaaqai kudoosaapee marifanoo maaqa usakaaninafa maaqa faakana rakiasainaqa sia amanaiki foora, innee ooruku adiafaa siaina aanna ree foora kaqinni aqua noora. Innee naaqoofaqaasa mi ufana iriaqa.
LUK 15:1 Moo kari ummuarira takisa munnimma maree marusa faqa Yuda maqannaasa nikooqee marufaqa nifaqasoosa faqa Yisufunnai anireeqa mina ufa iriraree qimasee mina aaqa ani usimariqau.
LUK 15:2 Farisai amaana ufa qimarusa faqa Mooseena sandufa akoofasauqa faqa misa niqafamasee noori runusee muquriqa maridaqa naundaufa naundaufa qidaqa qiqau. Maa fasiqafa Yisufa maasa nifaqasoosa aniraafanoo misa faqa amiqi amiqi idanoo, sia miqikai idanoo misa faqa narana naidanoo miqidanoo.
LUK 15:3 Yisufa misa ufa iriseenoo quandara ufa moo maaqi qimasee qimanniminau.
LUK 15:4 Faiqí moo fannoo moodaannai qisauku fasiqa namu niku nisauku taikasee (100) sipsipa rakisi marinanoo moodaafa kai auia mafinanoo naqi fee iannoo, mi fasiqafa aiqama sipsipa kaqi quqaseenoo moodaara randaannoo.
LUK 15:5 Randanoo nini inoo paqurimaseenoo asasamaseenoo rafusu akumareenoo mini maqusai quqaseenoo narí aqoonausa naaramasee qimannimiannoo, aniree qini faqa asasiaqee qiannoo. Aiqama sipsipasaa rakisimari fasiqausa miqifaranoo.
LUK 15:7 Innaarunai mariasa mi fasiqana aanna reefaranoo moomoo (99) andeeqara fasiqa anaaseera sia asasifaranoo moodaafa furufaridanoo mandainaina maranoo nini inafa quandaki Anutufinnai ubeekainnanara minara firaaqoo asasifaranoo.
LUK 15:8 Moo anaasee fannoo qisaukuqara taikasee siruaa munnimma firaana maqee inanoo moodaafa maaqaki furufaramafinanoo mi anaaseefa naqi fee iannoo, mi anaaseefa qooma qumbisee damuna maraseenoo maaqaki aiqamai damunidanoo aiqama atinai amiqimasee randanoo ni ni inanoo paqurimaseenoo maraannoo.
LUK 15:9 Maraseenoo narí aqoonausa faqa aqoondiuqa faqa naaramaseenoo qimannimiannoo. Innee aniree qini faqa asasiaqa, qini siruaa munnimma furufaramambina doo paquriqa.
LUK 15:10 Qinee qimannimidaqa, Anutuna qangiroouqa mi anaaseena aanna reefaranoo moodaafa mandainaina maranoo ni ni inafa quandaki Anutufinnai ubeekainaqa minara firaaqoo asasifaranoo.
LUK 15:11 Yisufa kaqi qimannimidanoo qinau. Faiqí moo fannoo qaara faiqi faqaafa marinau, inaaqiannaafa narí akoona qimaminoo qinau.
LUK 15:12 Oo qipoo kuqiraridanee aneenna aiqama ainaina rainasee maaqanda qiminnaree doo maqee kai rainasee qiminaqa maree fuannee qufanoo mina akoofa eedoo qimaseenoo narí aiqama ainaina rainasee miqanda niminau.
LUK 15:13 Nimisoofanoo indaaruqaafa kaqi maqee inau inaaqiannaafa naríndi makeeta maseenoo munnimma kai mara mareenoo doo quqaseenoo niana maqusai oonu reenoo furufariranaki maridanoo narí munnimma aiqama fifaunni aqu taikanau.
LUK 15:14 Aqu taikasoofanoo mi aukuanna aandaroo firaafa mi maqa maaqanaki aiqamatinai nárí marufanoo mi fasiqana munnimma faqa narana faqa sia marufanoo aararee marinau.
LUK 15:15 Mifa mi maqusanakinaa fasiqasaa atooqafufanoo mi fasiqafa mina aqiqeenoo anee qini kuarauqasaa rakisiannee qimasee narana sia amufanoo aararee marufanoo mi kuarausasaa rakisidanoo kuarauaqa kunda nimidanoo nariara faqa nararee qimasee irufanoo sia Yuda maqannaasa nee marunee qimasee asauruseenoo minniseenoo aarara marinau.
LUK 15:16 Miqi marufanoo mi fasiqana irirafa kambiqoofanoo narí kai qimirinoo qinau.
LUK 15:17 Oo qini qikoona ainainira faiqiuqa misa nariqa nimana kai narana neemariafaqa qinee maaqoo daarara maridaqa kuqiraridaqa.
LUK 15:18 Qinee findifi qeeqa qikoofinnai oonureeqa maaqi qimasee qimamianaura oo qipoo qinee Anutuna ufa faqa ani ufa faqa rukiee marunausa maridaqa.
LUK 15:19 Qinee sia amana ani amaakuara foora marianaura, amanee ani ainainira faiqi kammafi marianauree.
LUK 15:20 Miqi qimaseenoo mi fasiqafa findifinoo aanai aqufufanoo narí akoofinnai finau, aanai meeaqoo ani marufanoo mina akoofa maqusasaaqari mara meeqa qafamaseenoo amuqusufanoo sandeenoo oonu mara narí amaaku aripimma qumareenoo amooqanau.
LUK 15:21 Miqufanoo mina amaaku fannoo maaqi qimasee narí akoona qimamidanoo reendeeninau. Qinee Anutuna ufa faqa ani ufa faqa rukiee marunausa maridaqa sia maqee amana ani amaaku marianaura.
LUK 15:22 Mina akoofa quandafi narí ainainira faiqiuqa naaramaseenoo qimanniminoo qinau, sia ainainira fasiqa qamunna ainaina amia, qini qimaaku marianifeera qamunna ainaina kai amia, dauni dauni amiqira qamunna mara mareeqa mini afisuamaqaaqa, rinna faqa asaukuki upeekasee aiku aanaamu faqa afisuamaqaaqa.
LUK 15:23 Miqimaseeqa oonu amiqira burimakau aanaaqi ainoo faqaana arusee deedaqamasee qoomaqa suqaaqa.
LUK 15:24 Qini faiqi maafa kuqi noora foora mafifa kaqi maridanoo anireenoo auiqanoo mariifa anireenoo. Miqi qufaqa qoomaqa sakasee neemariqau.
LUK 15:25 Miqi marufanoo indaaruqaa amaaku fannoo suanai mariufa maqusa naambeeqai anireenoo piripunna ufa faqa idi faqa irinoo narí akoona ainainira faiqi moo aaramasee irammirinau.
LUK 15:26 Mina naqi fee qidaqia qufanoo mifa qimaminau.
LUK 15:27 Ani akaqa fannoo narí akoona maaqaki aniraifanoo ani akoofa minara qini faiqi doo andeeqasee ani maridanoo fee qimasee purimakau aanaaqi amiqirana aruseenoo suqasee afaaru ridanoo.
LUK 15:28 Indaaruqaa amaaku fannoo mi ufana iriseenoo aanoommaseenoo marufaqa aaroofanoo ititinau. Ititammaseenoo marufanoo mina akoofa qumureenoo aaranau, aniree maaqaki keeqaa qufanoo mifa qinau.
LUK 15:29 Iria qinee moomoo aukuana karabusara foora ani ainaini marunausa maridaqa sia moodaa kari ani ufa rukiaunausa, anee miqi marunana nana ainainee qiminanee sia burimakau aanaaqi amiqira ainaina aruseenana sia fifau mimmi aanaaqi qimianaqa arusee qeeqa qiqoondiuqa faqa qoomaqa sakasee naunausa.
LUK 15:30 Ani manda faiqi fannoo ani aiqama ainaina mara mareenoo munu dapi maraqanua anaaseesasaa aqu taikaseenoo, aniraifana anee purimakau aanaaqi amiqirana arusee suqasee amiananoo.
LUK 15:31 Miqi qufanoo mina akoofa qimaminoo qinau, oo qini faiqi anee aiqama kari qini faqa mariananoo aiqama ainaina anindi maridanoo anee aneenna ainainaki ainaini mariananoo.
LUK 15:32 Ani akaqa fannoo kuqi noora foora inoo mariifa kaqi maridanoo auiqanoo mariifa aniraifaqa minara maqee maasa qoomaqa sakasee asasidaqa naunanoo amanaikinoo. Yisufa miqi qimaseenoo kafaa maaqi qimasee qimanniminau. Doo maa ufana anoona faasai qunnana maaqimminoo maridanoo. Innaarunai mariasa mi kumaaraana akoona aanna reefaranoo. Moomoo andeeqara fasiqa aanaaseera sia asasifaranoo, moodaafa mandainaina maranoo ni ni inoo quandaki Anutufinnai ubeekainnanara asasifaranoo.
LUK 16:1 Yisufa narí faiqi namu qimanniminoo qinau, faiqí moo fannoo ainaina faqaafa narí ainainasaa rakisianinnana moo mareeqee quqasoofaqa misa mi fasiqana ainaina faqaana qimamiqau.
LUK 16:2 Ainainasaa rakisirafa ani munnimma fifau rairaa idanoo fee qufanoo ainaina faqaafa mi fasiqana aareenoo anee munnimma aqi mariannana amiqi masee papiqasaa akara rumasee qiminaqa qafamasee ani aqiqaanaura anee sia kafaa ainainasaa rakisinnaranoo.
LUK 16:3 Miqi qufanoo mina ainainasaa rakisi marufa narí kai qimirinoo qinau, qini uriqararafa qini diqiqarara qimarifaqa nana ainainee ianauree qinee afeeka siaisa maridaqa madika indufirana sia amanaikidaqa kudi fasiqa maridaqa qiqoonausiannai narana innaaru qiranara qisauridaqa sia amana mi oosanna maraanaura.
LUK 16:4 Doo iridaqa qini qiqoondi moomoosaikiaqeera maa saikana taikasee misiannai firara maaqimmianaura.
LUK 16:5 Qinee qeeqa uriqararana faqa bisinisaikida marusara moo deedeepianauree qimaseenoo maaqimminau.
LUK 16:6 Mifa moo fasiqa aaramasee irammirinau, anee qini uriqararana ufaasu munnimma naqummee maqee idanee qufanoo mifa qinau, qinee moodaannai qisauku fasiqa niku nisauku taikasee (100) firaa tinna oorifa fadameena (sauna anoona fooqaana) mina akiaqara sia amiqiafana, kaqi maqee idaqa, miqi qufanoo ainainasaa rakisirafa qimaminau, anee qaara fasiqa niku nisauku taikasee qini qisaukuqara taikasee (50) munnimma kai qiminaqa ani munnimma akiaqara taikeenoo fee qimasee bukaki ateekaanauree qimaseenoo kafaa moona aaramasee irammirinoo qinau, anee qini uriqararana ufaasu munnimma naqummee maqee idanee qufanoo mifa qinau, qinee moodaannai qisauku fasiqa niku nisauku taikasee (100) raisa beeka akiaqara sia amiqiafana kaqi maqee idaqa, miqi qufanoo ainainasaa rakisirafa qimaminau, anee qaara faqa qaara faqa fasiqa niku nisauku taikasee (80) akiqara kai qiminaqa ani munnimma akiaqara taikeenoo fee qimasee bukaki ateekaanauree qinau, miqunannai mi fasiqafa narí firaana akaru qiranannai misa aqoondikinau.
LUK 16:8 Ainaina faqaafa mina unnaqira oosana qafamaseenoo oo irirana faqaa fee qinau, minara Yisufa qimannimidanoo qinau, maa maqanasaaqaraa fasiqa aanaaseeuqa nariqa munnimma ainaina maree mariana irirana faqaasa mariafanoo Anutuna ufa qoomasaa andeeqasee nimariasa irirana oorudupirausa sia misa irirana amanasaa maridaqa.
LUK 16:9 Qinee inni qimannimidaqa, maa maqanasaaqaraasa nári afeeka iriranannai kaaqa afeekaikamasee maaqoo mariranara iridaqa munnimma aina afeedidaqa. Innee faqa misa naanna ramasee kaaqa afeekaikamasee naaru marira afeedira ainainakiara munari minari masee inneeqa maaqooqaraa manda munnimmannai sarau imariasa dadaaqiqa innaarunai asumu mariranaki moomoo ainaina afeediaqa.
LUK 16:10 Yafee moo fannoo kaqikaa fifau ainainasaa amiqimasee rakisinafa firaa ainainatiasaa faqa amiqimmasee rakisiannoo, yafee moo fannoo kaqikaa ainainara unnaqi marifa firaa ainainatiara faqa unna qiannoo.
LUK 16:11 Anee maa maqanasaaqaraa munnimma qumiasana furufaramasee rakisinanoo naqi fee masee innaarunai finanoo Anutufa innaarunai mari firaa qumiasana munnimma anisaa quqasee rakisiannee qiannoo fee.
LUK 16:12 Anee moona ainaina furufara masee rakisinanoo yafee anindi amisee rakisiannee qiannoo fee.
LUK 16:13 Ainainira fasiqa moo fannoo sia amana qaara rakisiraqanda moodaa kari ainainamma nimaqaannoo, sia amana. Mifa indaaruqaanara akooqaannoo moo rakisiriranara aidiannoo. Mifa moo rakisiranasaa atooqeenoo inaaqianaana minnisaannoo, miqi kai iqa innee faqa Anutunara faqa maqasaa qumiasanara faqa moodaanaki sia amana ainainamma nimaqeennaranoo.
LUK 16:14 Farisai amaana ufa qimarusa mi ufana iriseeqa misa kaaqa munnimmara rimarusa maridaqa Yisunara uteeti qimariqau.
LUK 16:15 Yisufa iriseenoo qimanniminau, innee inneeqa kai maqasaa fasiqauqa nifusaa andeeqarausee qimariasa mariafanoo, Anutufa inni naunduraki qafee marifa maqasaa fasiqauqa amiqira ainainee qimarianara Anutufa mandainainee qidanoo.
LUK 16:16 Mooseena sandufa faqa tamummaqara fasiqauqa akarakinaa ufa faqa oosana arooqooqari misa ufa afeeka fannoo aiqamausa rafaaqafusee fi fi inoo Yoohaneefa nammari nimimaru aukuanna mini raquramiqoo taikanau. Miqooqari innaaruna ququsakinaana Anutuna amiqira fasaasaa ufa fannoo kai misa qimanniminoo fifaini marifaqa aiqamausa innaaruna ququsaki nimudaanai qimasaida keeqararidaqa.
LUK 16:17 Innaaruna faqa maqa faqa tautumaki taikarafa amana mariannoo, Mooseena sandufa faqa tamummaqara fasiqauqa ufa faqa kaqikaa ati kai sia amana taikaannoo afeeka mariannoo.
LUK 16:18 Faiqí moo fannoo narí anaaqa minnisee moo anaasee marainafa qummuarimari fasiqafa mariannoo, faiqí moo fannoo minnisainna aanaaseena marainafa mifa faqa qummuarimari fasiqafa mariannoo.
LUK 16:19 Yisufa Farisai amaana ufa qimarusa oosana kaaqa munnimmara qamunna amiqiranara rimarusa marunara iriseenoo maa ufana qimanniminoo qinau, faiqí moo fannoo ainaina fiqararafa maridanoo moomoo munnimma aqimaria qamunnana kai afisimarifa maridanoo, aiqama kari amiqiranaki kai marinau.
LUK 16:20 Kudi fasiqa moo fannoo mina auqu Rasarusana amarafa afaaqa namuana aanaaqi maqee maqee ainaina faqaana kooqiki ani raidanoo mina narana ataraasa tidaamarai aqufuna suqu nararee qimasee ani maridanoo mandainainaki marufanoo fainiuqa anireeqa mina namuana umboomasoofanoo marinoo kuqinau.
LUK 16:21 Mi kudi fasiqafa kuqufufaqa qangiroouqa mina afiqa maree innaarunai Abarahaamana aaqa quqasoofanoo firaa qoomaqa sakasee neemarinau.
LUK 16:22 Ainaina faqaa fasiqa faqa kuqufufaqa akundamasoofanoo idaki finau. (Mi idana auqu Aadeesaa ida fee qidaqa, kuqimariasa maqa maaqa taikara aukuanara afeesimaria idafa maridanoo fee qidaqa.) Ainaina faqaafa firaa aupuraranaki maridanoo afu murufi maqaseenoo nianai Abarahaamana faqa Rasarusana amarana faqa amiqiranaki ooqufaaqee marufanoo niqafanau.
LUK 16:24 Niqafamasee nammeera qimaseenoo qinau, oo qini qikoofa Abarahaama anee Rasarusana qimaminanoo narí asauku amukannai nammariki raaraamasee maree muqu qini qimaakiri qifaurusaa quqasainanoo asooaani qinee idaki firaa aupuraranaki maridaqa.
LUK 16:25 Abarahaamafa iriseenoo qimaminau, oo qini qimaaku anee maqasaa marunna kamuqoo amiqira ainainaki marunanoo Rasarusafa mandainainaki marinau, maqee Rasarusafa maaqoo asasiranaki marinana anee aupuraranaki mariananoo, innisaimbaqa qambaanai maani firaafa maridanoo, maaqoo marinausa sia amana minni fifaranoo mindari faqa sia amana mai anifaranoo.
LUK 16:27 Ainaina faqaafa Abarahaamana ufa iriseenoo qimaminau, qinee fifimasee ani qimamidaqa, amanee anee Rasarusana aqiqainanoo qini qikoona maaqai oorureenoo qini qikaqaafasaauqa moodaanai qisauku (5) maridammia, misa aaquqimannimaqainaqa sia maa aupurara maqusanaki aniaqa.
LUK 16:29 Abarahaamafa iriseenoo qimaminau, Mooseena akara faqa tamummaqara fasiqauqa akara faqa ani akaqaafasaauqa aaquqima nimiqaidanoo misa minaki kai iriaqa.
LUK 16:30 Ainaina faqaafa mi ufana iriseenoo Abarahaamana qimaminau, oo qini qikoofa Abarahaama, mi akarafa sia amanaikidanoo moo fannoo kuqiranakiqari findifinoo qimanniminaqa misa nariqa manda oosana minnisee sia maa aupurara maqusanaki anifaranoo.
LUK 16:31 Abarahaamafa qinau, ani akaqaafasaauqa Mooseena faqa tamummaqara fasiqauqa ufa faqa sia iriqa kuqiranakiqari findi finna fasiqana ufa faqa sia irifaranoo.
LUK 17:1 Moo kari Yisufa narí faiqi namu maaqi qimasee qimanniminau. Faiqí anaasee mandoosanaki mara quqannimaqee fandinausa kuqaa uqanna kambiqeefaranoo mi manda oosanna uqeerainna fasiqana arirafa firaaqoo uqanna mariifoo qidaqa qimudaoo qidaqa. Ooruku nammariki faiqí rafusu aqirafa firaa oonisanda rumbaseeqa anukaki ususee minaki aqirafa kaqikaa aupurarafa mariannoo, mi fasiqafa qini ufa irimari kaqikaa faiqina afiqasee manda aana uqafiqainafa mina arirafa firaafa uqanna mariannoo.
LUK 17:3 Minara innee amiqimasee inneeqa mariranasaa rakisiaqa. Ani akaqa fannoo manda oosana marainana anee qaoo qinanoo mifa aundura quandasee andeeqaraqoo finana anee mina manda oosanara sia kafaa aqia.
LUK 17:4 Mifa dinni taikasee dinni ani qaaraqanda (7) kari ani mandaikammamaqasee quandakinoo aniara qini mandainaina minnisaannee qinana eedoo qimasee minnisaa.
LUK 17:5 Yisufa niqiqoo fasiqausa minara Yisuna qimamiqa qiqau, oo karaambaiqa maasa daundurannai anisaa mundirana firaanaikamaqisaa qufanoo karaambaiqa fannoo maaqi qinau.
LUK 17:6 Innee qinisaa mundirana sia maridanoora foora maridanoo kaqikaa ainaina maqana qaqama miqirafa kaqikaafa kai marinaqau, innee minannai firaa ainaina auqini. Innee firaa saqari keefaadiara foora aneenna kai rafauru akinana ooruku nammariki aqufi kambiqaannee qifanoo mifa eedoo qimasee miqini. Innee qinisaa mundirana siara foora maridanoo sia amanaikifaranoo.
LUK 17:7 Yisufa nári miqoo qaraasa oosanara iriseenoo ufa qimannimidanoo qinau, Innikiqari moo fannoo mina ainainira fasiqa fannoo ani afuqai ainainiinoo fee firimaria aandausaa fee rakisiinanoo fee eendimarinanoo anirainana anee sia minara kaqi kaqi aniree aneenna narana naannee qinnaranoo.
LUK 17:8 Maaqi qinnaranoo, anee narana suqarara afisimaria qamunnana afisusee qini narana suqasainaqa qinee narana faqa nammari faqa namasaanana anee inaaqianna suqasee aneennara naa.
LUK 17:9 Ani ainainira faiqi fannoo ani ufamau finana anee sia minara dufi dufi qinnaranoo mi fasiqafa faqa dufi dufi qira ufara sia randaannoo narí feefauru saikee qinnaranoo.
LUK 17:10 Innee faqa miqikai iqa mina aanna raaqa, aiqama qinee Yisusa qimannimunna ufana afaqaqa fi fi iqa mafi taikasee sia qini dufi dufi qira ufara randaaqa, maaqi qiaqa maasa fifau ainainira fasiqauqa maridaqa feefauru mararara foora ainaini marunausa maridaqa.
LUK 17:11 Yisufa Yeerusaree maqusai firara Kariree maqa maaqa dinni marufanoo Samaria maqa maaqa dinni marufanoo Yisufa qambaanai fidanoo moo maqusaki firaree qimasai fimarufanoo karoora narimaru fasiqausa qisaukuqara taikasee (10) karoora nárí mariasa naannareeqa naadumasaqa kikiqammafiqa nammeera qimasee Yisuna qimamiqa qiqau, oo Yisu maasa uriqararafa anee maasara amudaqaani.
LUK 17:14 Yisufa misa niqafamasee qimanniminau, innee amaana maaqaki Anutuna aanaiqiki mariasa inneeqa nifaaqa ooruree uqannifiqaifaqa inni nifaaqa aiquqummaseenoo inniara anukarausee qifaranoo, miqi qinaqa innee aiqamausa nifusaa anukaqa maridee qifaranoo. Miqi qufaqa misa eedoo qimasee aanai fimarufanoo misa karoora taikafufaqa nariqa nifaaqa qafamaseeqa fufanoo moodaafa quandaki firaaqoo Anutunara dufi dufi qimammaree anireenoo Yisuna aikuki maqasaa aqufufanoo Yisunara dufi dufi qimamaqanau, mi fasiqafa Yuda maqannaa namuqaa, Samaria maqannaa marinau.
LUK 17:17 Yisufa mi fasiqana asasirana iriseenoo miqoo marusa qimanniminau. Qisaukuqara fasiqa karoora nárí marisa rukanniseeqa, dinni taikasee dinni ani qaara faqa qaara faqa marasee fasiqauqa yai fee fiaa, sia fee misa faqa aniree Anutunara dufi dufi qifaree sia Yuda maqannaasa ania Samaria maqannaafa kai aniree dufi dufi qidanoo.
LUK 17:19 Miqi qimasee Yisufa mi fasiqana qimaminau, doo findifi fua, anee qini saqarikiannanannai kai amiqiananoo.
LUK 17:20 Farisai amaana ufa qimarusa Yisuna iramiriqa qiqau, Anutuna ququsa yairee fee maqasaa kambiqafinoo faiqí aanaaseesaa Anutufa rakisiannoo fee qufanoo Yisufa qimanniminau, Anutuna ququsa fannoo sia akooqoo ainainara foora kambiqaannoo, sia moo fannoo maaqi qiannoo doo qafaa maaqoo kambiqeenoo doo qafaa meeqai kambiqeenoo Anutuna ququsa fannoo inni naundurai mari ainainafa maridanoo.
LUK 17:22 Miqoo Yisufa narí faiqi namu qimanniminau, kasooqaqee innee qinee anianna faasaanasaa qafaaqaa idaqa sia qafeefaranoo.
LUK 17:23 Akaqausa qini ququsa kambiqaaninnanara maaqi qifaranoo, meerai qafaa miqoo maridanoo, maaminni qafaa minni maridanoo misa miqi qifaqa siamma oonu qafaaqa.
LUK 17:24 Qini ququsa sia qumee kambiqaannoo aakuasaa uqinanoo innaaruna aiqama atinai kaaqa qamaquannoo, qinee faiqí nimaaku qumuanna faasaana aakuasaa aanna ramasee qumuanaqa tautumaki aiqamai daraaninaqa qiqafeefara.
LUK 17:25 Maqee mariasa firaa aupurarana qimisee diqiqeefaranoo.
LUK 17:26 Qinee faiqí nimaaku qumuanna faasaanafa Nooana aukuanara fooqaafa mariannoo.
LUK 17:27 Mi aukuanna faiqí anaasee idoo faakoo idaqa maanaaqa amundaidaqa narana nammari naidaqa mana mana imarufanoo Nooafa narí sipa firaanaki keeqafufanoo nammari fannoo tautumannimaqaseenoo faiqí anaasee aiqama naru taikanau.
LUK 17:28 Qinee qumuanna faasaana Rootana aukuanara foora mariannoo, mi aukuanna faiqí anaasee aiqamausa sia Rootana ufa iriqau narana nammari naidaqa makeetidaqa feefauru narami narami idaqa maaqa usakeeqa suana ummaqiqa mana mana idaqa marufanoo Rootafa Soodooma maqusakiqari findimaqee sandoofanoo innaarunaindari idauru fasafasimarufa qumureenoo aiqama naru taikanau.
LUK 17:30 Qinee faiqí nimaaku qumira faasaana maqasaa fasiqa anaasee mi furufara irirana maree marifaqa tautumasee qumuanaura.
LUK 17:31 Mi faasaanna akaqausa nariqa kooqiki mariinausa sia naamuki keeqafi ainaina indaaifaranoo, miqi kaimmasee akaqausa anaadoonni mariinausa sia maqusai aniree nári ainaina mareefaranoo.
LUK 17:32 Rootana anaaqa fannoo asumu marirannai sandanoo fidanoo oonu kasoo mafinoo quandafi aanaaqiannai afu maqaidanoo kuqinau.
LUK 17:33 Yafee moo fannoo narí mariranara amuqusinafa mina marirafa taikaannoo, yafee moo fannoo narí marirana minnisainafa mina marirana maraannoo.
LUK 17:34 Qinee qimannimidaqa, mi eendanaki faiqí qaaraqanda moodaanaki faiqaqee marifaqa qinee tautumasee moo innaarunai uqeerasee moo minnisaanaura.
LUK 17:35 Anaasee qaaraqanda sana aindi anee marifanoo tautumasee moo mareenoo moo minnisaannoo. [
LUK 17:36 Faiqí qaaraqanda anaadooki marifaqa tautumasee moo mareenoo moo minnisaannoo.]
LUK 17:37 Yisuna faiqi namu mina ufa iriseeqa iramiriqa qiqau, yatinai fee anee qianna ainainafa kambiqaannoo fee qufanoo Yisufa quandara ufa qimanniminau, aandau kuqinoo mariqoo kai quqaumu moomoosa minaki usidaqa. (Qini ufa irimariasa yai yai fee maridaqa sia qiniara randeefaranoo. Qinee qumiqa innee marifandinnaqoo irisee akooqoo tautumasee qumuree inni uqeeraanaura.)
LUK 18:1 Yisufa narí faiqi namuara sia nikoo nikaa masee innaaru qiranara minnisaaqee maqee maqee afeekaikamasee innaaru qiaqeera quandara ufa qimanniminau.
LUK 18:2 Moo maqusaki siaasa marinau, mifa manda fasiqa maridanoo sia Anutunara aaquqamasee andeeqara siaasa saika maranau, sia faiqí aanaaseera amuqusa imarinau.
LUK 18:3 Mi maqusanaki kai adeedaana anaasee moo marinau, mina afaaqi kuqufufa naríara kadaapiriranaki marinau, mifa maqee maqee siaasinnai oonuraidanoo sandanainai qimarinau, oo siaasa anee dadaaqinana qini mandaikamaqimaqee mariasara qaoo qia.
LUK 18:4 Siaasa fannoo kisaaqasaa mi adeedaana anaaseena ufa irinoo fidanoo narí kai qimirinoo qinau, Qinee sia Anutunara rufiqaunausa faiqí aanaaseera sia qimuqusimarisa maridaqa.
LUK 18:5 Maa anaaseefa narí ainaina ummuari mariafanoo narí ainainara qini daruaqaamminoo saina dadaaqiananoo taikaani.
LUK 18:6 Karaambaiqa Yisufa mi manda fasiqanara narí faiqi namu qimanniminoo qinau, Innee mi manda siaasana ufa irida fee.
LUK 18:7 Anutufa sia miqi marifa, amiqirafa maridanoo mifa narí faiqí anaasee eendaki faasaana misa ikiraqarana iriseenoo sia anuquannoo qinee qimannimida dauni dauni dadaaqiannoo.
LUK 18:8 Minara sia innaaruqiranara nikoo nikaa masee minnisaaqa, afeekaikamasee innaaru qiaqa, qinee faiqí nimaaku kafaa qumuree qafaanaqa faiqí anaasee Anutuna saqarikidaqa innaaru kaqi fee ida marifaree sia fee ida marifaree.
LUK 18:9 Faiqí anaasee akaqausa náriara andeeqarausee qimasaidaqa niqoonausara mandaikirausee qimasaidaqa fidiaqaa imarianara Yisufa niqafamasee maa quandara ufana qimanniminau.
LUK 18:10 Faiqí qaaraqanda Yeerusaree maqusai naaquqara amaana maaqaki innaaru qiraree qimasee keeqaqau, moo fannoo Farisai amaana ufa qimarufa moo fannoo qummuarira takisa munnimma maree marufa miqanda keeqaqau.
LUK 18:11 Farisai amaana ufa qimarufa innaaru qiraree qimaseenoo narí kai narí amoo qidanoo qinau, oo Anutuna qinee sia ainainara rimarunausa maridaqa sia unna ufa qunausa sia anaasee qummuarunausa sia aiqamausa naanna raunausa maridaqa. Oo dufi dufi sia maa umuarira takisa munnimmana maree marina aanna raunausa maridaqa, aiqama amaana aundurai qaara faasaaana narana minnisee daarara innaaru qimarunausa maridaqa qeeqa munnimma aiqama rainasee dinni qisauku taikasee dinni ani qaara faqa qaara faqa (9) munnimma qeeqaraa maraidaqa moodaa munnimma ani amidaqa, oo Anutu dufi dufi qinee miqi marunausa maridaqa.
LUK 18:13 Ummuarira takisa munnimma maree marufa innaaru qirara firaaqoo asauridanoo aadumasaa kikiqammafinoo sia innaarunai oori uqeereenoo kummaramafinoo narí aaqaranara aiaaee qidanoo asauku rootee rootee kidanoo narí aaqaranara asauruseenoo qinau, oo Anutufa qinee aaqee marunausa maridaqa anee qiniara amuqusia.
LUK 18:14 Yisufa mi fasiqaqandara narí faiqi namu qimanniminoo qinau, ummuarira takisa munnimma maree maruna mandainaina Anutufa taika aisoofanoo andeeqasee finau, Farisai amaana ufa qimarufa sia andeeqanau kaqi finau, nariara uriqararausee qimariasa Anutufa asauriranaki quqaannoo, nariara ureeqararausee qimariasa Anutufa uriqararanaikama nimaqaannoo.
LUK 18:15 Faiqí anaasee akaqausa nariqa faiqi namu nifiqamaree Yisufinnai munusaana misa nifaaqai narí asauku quqasee nifaaqooqa qimannimaqaanifeera nifiqee aniqau. Aniroofaqa Yisuna faiqi namu misa farafara qifoo qimasee niqiqau.
LUK 18:16 Yisufa misa niqira ufa iriseenoo qaoo qimasee faiqiuqaindi naaraifaqa mai aniaqee qimasee narí ufa irimariasa qimanniminau, faiqi aanaaqiuqa sia rafaaqa fuaqa, saifaqa mai aniaqa Anutuna ququsa miqirausaindi maridanoo.
LUK 18:17 Innee maanara kai irisee sia aunuaqa yafee moo fannoo sia kaqikaa faiqi naanna ramasee Anutuna ququsa marainafa sia uqanna minaki keeqaannoo, faiqi aanaaqi naanna ramasee Anutuna ququsa marainausa misa kai minaki keeqeefaranoo.
LUK 18:18 Moo kari Yuda maqannaasa uriqararausakiqari moo fannoo Yisuna irammirinoo qinau, Oo ufasaa rakisirafa andeeqarafa nana saikee auqamamaqaananoo fee Anutufa naaru naaru marirana qimiannoo fee qufanoo Yisufa qinau, anee nanaree qiniara andeeqara fee qidanee sia moo fannoo andeeqarafa maridanoo Anutufa kai andeeqarafa maridanoo.
LUK 18:20 Anee sandufa akara irimariananoo mimau finana maaqimmia anee sia anaasee ummuaria, anee sia faiqí anaasee kuqannarua anee sia ainaina ummuaria anee sia unna ufa qia aneenna anoona akoonara aidimarinana miqanda nuqu uqeeraidana amiqimasee rakisinnimaqaa qufanoo mi fasiqafa iriseenoo qinau.
LUK 18:21 Qinee mi ufausa kumaaraasaaqari aiqama mi ufamau fuafanausa maridaqa.
LUK 18:22 Yisufa iriseenoo qimaminau, moodaa ainaina kai anee sia amanaikianano anee aneenna qumiasana moomoo marina makeetamasee munnimma maraseenana kudi fasiqa aanaaseeuqa nimisainanoo ani qumiasana ani afeesara innaarunai mariani, miqimaseenana anee qini faqa ania.
LUK 18:23 Qufanoo mi fasiqafa iriseenoo mina qumiasana moomoo marunara firaaqoo oori runusee finau.
LUK 18:24 Yisufa mina oori runirana qafamaseenoo qimanniminau, qumiasana moomoo faqaasa Anutuna ququsaki keeqarara firaaqoo anuqidaqa.
LUK 18:25 Qoosa fannoo ukaamaraki ruqiqaki firafa sia amanaikiannoo, qumiasana moomoo faqaafa innaaruna ququsaki firara miqi kai inoo sia amanaikiannoo.
LUK 18:26 Miqoo marusa mi ufana irisee tautumasee Yisuna iramiriqa qiqau, anee qianandee ainaina faqaasa sia innaarunai fifaqa yafee moo fannoo innaarunai asumu mariranaki amana keeqaannoo fee sia moo fannoo amanaikiannoo, qufanoo Yisufa qinau, maqasaa fasiqa anaasee sia amanaikimaria ainaina Anutufa amanaiki marifa maridanoo.
LUK 18:28 Peetooroofa iriseenoo Yisuna qimaminau, maasa qeeqa maqusaina minnisee ani faqa nidaqa anee maasara naqi fee qidanee.
LUK 18:29 Yisufa qimanniminau, qinee maa ufana ani qimamidaqa, moo fannoo narí maaqa fee narí anaaqa fee akaqaafasaa fee narí anoona akoonee narí faiqi namu fee Anutuna ququsa saikaramamaree minnisainafa mifa maqee maria kamuqoo aabaa faqa maraannoo kasooqaqee anianinna aukuana naaru asumu marirana maraannoo.
LUK 18:31 Yisufa narí faiqi namu nifiqamaree aadumai oonureenoo qimanniminau, Innee iriaqa innisaimbaqa Yeerusareenni ooru fidaqa, miqoo marianaqa ooqai mariu tamummaqara fasiqauqa faiqí nimaaku qiniara akara rumaqoo ufafa anoonaikiannoo.
LUK 18:32 Qini maqannaasa qini mareeqee aanaamuru nisaukuki quqaqisaifaqa qiniara ataasa ataasa ufa faqa manda ufa faqa qidaqa niqaara fidi qimaqeefaranoo.
LUK 18:33 Misa qini uaiaqa samu firaaqoo qifaaqa ateekaseeqa munu kuqa darifaranoo, darusaifanoo qaarammoo faasaana aiqarainanoo Anutufa qini mara findifuma qimaqaannoo.
LUK 18:34 Yisuna faiqi namu mi ufana iriseeqa sia minara iriqau. Mi ufana anoona Anutufa kukeeqama nimaqaqaifaqa sia iriqau.
LUK 18:35 Yisufa faiqí anaasee moomoosa faqa Yeerikoo maqusaki firaree qimaseenoo aanasaa fimarufanoo naambeeqai aana afainni faiqí moo afu qimbarafa ooqufaaqee maridanoo faiqí anaasee fiqaree aiqaree imarufanoo narana mara nee maru munnimmanara innaaru qimarufa marinau.
LUK 18:36 Mifa faiqí anaasee moomoosa fiqaree marufanoo niku ai iriseenoo iramirinoo qinau, maana nana ainainee kambiqaidanoo fee qufaqa misa qiqau.
LUK 18:37 Yisufa Nasareetee maqusaindaraafa doo aiqaraidanoommifoo qufanoo mi fasiqafa iriseenoo faaqa rumasee qinau.
LUK 18:38 Oo Yisu Dafidina ati marianafa anee qiniara amuqusinana qini dadaaqia.
LUK 18:39 Faiqí anaasee indaaru fusa mina faaqarirana irisee mina aqiqa qiqau, anee ufasaa qufanoo mifa firaaqoo fi fi qimasee qinau, oo Dafidina ati marianafa anee qiniara amuqusinana dadaaqia qufanoo.
LUK 18:40 Yisufa kasoomafinoo mi fasiqana maree mai aniaqee qufaqa afiqamaree mini Yisuna aaqa quqasoofanoo Yisufa iramirinau,
LUK 18:41 Anee qiniara naqimma aisaanauree qidanee qufanoo mi fasiqafa qinau. Oo uriqararafa anee qini qifu maqaqisaanneera qidaqa qufanoo
LUK 18:42 Yisufa qimaminau, doo aneenna afu irirana qinisaa rusiananannoo amiqianano.
LUK 18:43 Miqi qimarufanoo aaqee kai mi fasiqana afu amiqimafufanoo Yisuna faqa fidanoo Anutunara dufi dufi qimammaree finau. Faiqí anaasee moomoosa Yisuna faqa fifiiusa mina qafamasee misa faqa Anutuna amooqimamaqaqau.
LUK 19:1 Yisufa Yeerikoo maqusamau fiqaree marufanoo faiqí moo ummuarira takisa munnimma maree marusa uriqararafa firaa qumiasana faqaafa mina auqu Sakiusafa Yeerikoo maqusaki marinau.
LUK 19:3 Mifa Yisuna qafarara kikiqufanoo sia amanaikinau, qusa fasiqa maridanoo faiqí anaasee ititafunara sia qafaanauree qimaseenoo faiqí anaasee finnaaqareenoo sandeenoo Yisufa fuaninna aannai oonureenoo saqariki akaramafinoo rakisi marinau.
LUK 19:5 Yisufa saqari atukaki oonureenoo murufi afu maqaseenoo Sakiusana qafamasee qimaminoo qinau, Sakiusa dauni dauni qumurainaqa maqee ani maaqaki oonuree ani faqa marianaura.
LUK 19:6 Sakiusafa maqai qumureenoo firaaqoo asasamaseenoo Yisuna afiqeenoo narí maaqai munusoofanoo marinau.
LUK 19:7 Yisufa mina maaqaki marufaqa faiqí anaasee aiqamausa noori runusee ninunuridaqa qiqau, maa fasiqafa manda oosana mareemari fasiqana maaqaki keeqafinoo adooaidanoo.
LUK 19:8 Sakiusafa narí maaqaki maridanoo findifinoo karaambaiqa Yisuna qimaminau Oo uriqararafa qini ufa iria, qinee qeeqa aiqama qumiasana qambaana rainasee dinni kudi fasiqa anaasee nimianaura, qinee faiqí anaasee nikaru qimasee misa munnimma ummuarira takisa maraafannana akiaqara kafaa nimisee aabaa qaara faqa qaara faqa kari nimianaura.
LUK 19:9 Yisufa irisee qimaminau, maqee faasaana naaru naaru asumu marirafa ani maaqaki ani maridanoo anee faqa Abarahaamana ati mariananoo.
LUK 19:10 Qinee faiqí nimaaku miqiqa auiqaqa nuasara randasee nifiqa quqasee asumu marirana nimiraree qimasee qumu maridaqa.
LUK 19:11 Sakiusana maaqaki mariiusa Yisufa Sakiusana qimamu ufana iriseeqa mina faqa Yeerusaree maqusai ooru fidaqa maaqi qimasee unna qimasee qiqau. Anutuna innaaruna ququsa maqee uqanna maqasaa Yeerusaree maqusai kambiqaannoo fee qimarufanoo Yisufa misa aaqara irirana iriseenoo qimanniminau.
LUK 19:12 Faiqí moo fannoo uriqararafa maridanoo niana maqusai firaa karaambaiqa marinnai oonuraananoo ooru dupira karaambaiqa qafee qiminaqa qeeqa ququsakinaasa rakisinnimaqaanee qimaseenoo firaridanoo narí ainainira faiqiuqa qisaukuqara taikasee (10) naaramasee koora munnimma naadu naadu nimiseenoo qimanniminau, qinee oonu marianna kamuqoo innee maa munnimmanannai ainaini marifaqa anireeqa maraanaura.
LUK 19:14 Mi fasiqafa fufaqa mina maqannaasa minara fidiaqaa imarusa faiqí moo aqiqeeqa anee inaaqiana oonuree firaa karaambaiqa qimamia mifa maasa rakisi qimaqaranara maasa qikooqaidanoo, miqi qimasee qimamiseenoo oonurandee ani marifanoo mi uriqarara fasiqafa karaambaiqa qafee mara mareenoo oonurandee anireenoo narí ainainira faiqiuqa munnimma nimusa naaramaseenoo qimanniminau, innee mai anireeqa qini munnimmannai saikiaanara qima qimiaqa qufanoo indaaruqaafa anireenoo qimaminau. Anee moodaa koora munnimma qimunaqa qinee minannai ainaina maseeqa qisaukuqara taikasee munnimma mareeqa doo amidaqa maraa.
LUK 19:17 Miqi qufanoo mina uriqararafa qimaminau. Oo amiqirafa anee amiqira ainainimarianafa mariananoo anee kaqikaa ainaina amiqimasee rakisiannana akiaqara qinee qisaukuqara taikasee maqusa ani amianana misasaa rakisinnaranoo.
LUK 19:18 Mifa fufanoo mina aanaaqiannaafa anireenoo uriqararana qimaminau, oo uriqararafa anee moodaa munnimma qimunaqa qinee minannai ainainamasee moodaannai qisauku munnimma mareeqa doo aninna amidaqa maraa, qufanoo mina uriqararafa qinau, anee aneenna saika akiaqara moodaannai qisauku maqusai rakisinnaranoo.
LUK 19:20 Ainainira faiqi moo fannoo anireenoo uriqararana qimaminau. Oo uriqararafa anee moodaa munnimma qimunnana kaqi maridanoo qinee mina kai aninna amidaqa qinee qamunnasaa sakasee raqandaamma kukeeqaqaunnana aninna amidaqa qinee sia minannai ainainiqa anee afeeka fasiqa marianaqa aniara rufieeqa kaqi quqaqaunnana.
LUK 19:21 Anee sia aneenna ainaina maree marianafa anee sia ummaqira ainaina aiqimarianafa moosaindi ummuari marianafa.
LUK 19:22 Miqi qufanoo mina uriqararafa qimaminau, anee mandainainimarianna fasiqafa mariananoo, qinee aninna ufasamu aninna aruanaura, anee qiniara afeeka fasiqa fee qimarianausa qinee moosaindi ummuari marunausa moosa ummaquqaana aiqi marunausa maridaqa anee miqi qimarianafa nanaree sia qini munnimma mareeqee beenaki quqeenanee anee miqimasaanaqa qinee aniree qeeqa munnimma faqa mina ati faqa maraunaiqini qimasee uriqarara fasiqa fannoo miqoo marusa qimanniminau, innee mina moodaa munnimma mara maree qisaukuqara taikasee munnimma maqeeina munu amiaqa qufaqa misa qiqau.
LUK 19:25 Oo uriqararafa mifa moomoo faqaafa maridanoo qufanoo mifa qinau.
LUK 19:26 Qinee anoona ufa qimannimiana iriaqa, aiqama ainaina moomoo faqaasa moo faqa ootupama nimifara, ainaina siainaindi oodaa maqeeina rafiqeefaranoo.
LUK 19:27 Maqee qiniara fidiaqaa imariasa qiniara sia mifa maasa rakisirafa marianifee qimariasa mareeqee qini qifusaa quqasee kuqa naruaqa. (Maa ufana Yisufa nariara quandasee qimaqoofa maridanoo, narí uriqarara karaambaiqa kasooqaqee marianinnanara mi ufana qinau. Yisufa sia aaqee uqanna Isaraee maqannaasa uriqararafaikiannoo kasooqaqee innaarunaindari qumureenoo maasa saiki marunnana qafamaseenoo mina akiaqara maasa qimiseenoo quandafi minara fidiaqaa imariasa naru taikaannoo.)
LUK 19:28 Yisufa mi ufana qimannimiseenoo naríara moomoosa noorinni indaaru Yeerusaree maqusai ooru finau.
LUK 19:29 Beetapaisa maqusa faqa Beetani maqusa faqa mi maqusa qanda moodaaqoo maruqanda Yeerusaree aaqa mariqau, Yisufa ooru fidanoo mi maqusa qanda adeedi ramaseenoo narí faiqi namukiqari qaaraqanda naaramasee qimanniminau.
LUK 19:30 Inneeqa noorinni mari maqusanaki oorureeqa maqusai firuqiaki oorureeqa doonki aanaaqi asaandaru quqaqaana, faiqí sia minasaa ooqu mariana paqurimasee mina iduku maree muqu qimiaqa.
LUK 19:31 Faiqí moo fannoo inniqarara nanaree idukidee qinaqa maaqi qimasee qimamiaqa, maasa uriqararafa minasaa ainainirara qidanoo.
LUK 19:32 Miqi qufaqa miqanda oorureeqa Yisuna ufamau kai fiqa paqurimasee iduki marufanoo mi doonkina akausa niqafamasee irammiriqa qiqau, inneeqara naqiraree idukidee qufaqa miqanda qiqau.
LUK 19:34 Maasa uriqararafa minasaa ainainirara qifaqa idukidaqa qimasee idukumaree Yisufinnai munuseeqa nariqa qamunna minasaa ufiqisee
LUK 19:35 Yisuna dadaaqufanoo minasaa ooqu marifinoo Yeerusaree maqusai ooru finau.
LUK 19:36 Aatata ooru fimarufaqa faiqí anaasee karaambaiqa miqi mandaida afiqee marundeemasee nariqa siuta raipaqusaida aatata ufiqisoofanoo doonki fannoo mi mau ooru finau.
LUK 19:37 Yeerusaree maqusa adeedi ramaseenoo Oorifa aaqanai ooru fimariaqooqari Yisuna faiqi namu faqa faiqí anaasee moomoosa faqa Yisufa aiqama ainaina firaa ainaina auqee marufaqa qafeeusa firaaqoo kaanina mareeqa Anutuna amooqidaqa minara dufi dufi qidaqa qiqau.
LUK 19:38 Karaambaiqa ufara animari uriqararana Anutufa amiqi amiqi iani. Innaarunai asooarafa mariani. Anutuna amooqirafa faqa mariani.
LUK 19:39 Farisai amaana ufa qimarusa faiqí aanaaseekiaqa fidaqa faiqí anaasee amooqira ufa iriseeqa Yisuna qimamiqa qiqau. Ufasaa rakisirafa aneenna faiqi namuara qaoo qinaqa ufa saaqa qufanoo
LUK 19:40 Yisufa qimanniminau, Qinee qaoo qianaqa tamummaqara fasiqauqa akara misa miqifandiafoo qimaqoona misa ufa taikainanoo maa aatata mari oonisaa faiqiara foora kaanina mareefaranoo.
LUK 19:41 Yisufa Yeerusaree maqusa adeedi ramaseenoo mi maqusanara faqa faiqí anaasee minaki mariasara faqa ikiraqanau.
LUK 19:42 Misa kuridifandinnanara iriseenoo ikiraqeenoo qinau, Oo Yeerusaree anee maqee asooaranaki marinna oosanara iriaqaana, doo maqee anee sia amana qafeennaranoo.
LUK 19:43 Qusasaa ani namuqaa anireeqa maara maqaseeqa ani aana kooqi ititaseeqa ani faandaamurasaa saqari kuradamaseeqa minasaa akara mafiqa maqusai aqufifaranoo.
LUK 19:44 Misa ani maqusa faqa faiqí anaasee faqa aiqama naru taikaseeqa ooni maqa moomoo marina rapeepaamaseefaranoo, sia moo ooni narisaa narisaa mariannoo. Qinee marunna kamuqoo Anutuna inni asumu marirana nimiraree qifaqa innee sia irirai mana mana imarianara inni narirafa kambiqaannoo.
LUK 19:45 Yisufa Yeerusaree maqusaki oorureenoo misa naaquqara amaana maqaki keeqafinoo minaki ummuarira bisinisa auqee marusa rapatutummeeqee quqaseenoo qimanniminau.
LUK 19:46 Anutuna tamummaqara fasiqauqa ooqeenaa akaraki maa maqanara maaqi qimaqoofa maridanoo. Anutufa qinau maa maqafa qini maaqa maridanoo, qinee minara innaaruqira maaqa mariannoo fee qidaqa. Anutufa miqi qimaqoofaqa qinee mi mau fidaqa maaqi qidaqa, innee mi amaana maqana qumareeqa ummuarimaria fasiqausa kukeeqara maqaikamaqaafanoo maridanoo. Miqi qimaseenoo Yisufa niqiqanau.
LUK 19:47 Miqooqari Yisufa maqee maqee mi amaana maqanaki faiqí anaasee naamua qinau.
LUK 19:48 Miqi marufaqa mi amaana maqanaki aanaiqikirausa faqa Mooseena sandufa akoofasauqa faqa faiqí firaasauqa faqa Yisuna kuqarira aanara randoofanoo sia amanaikufaqa, faiqí anaasee aiqamausa maqee maqee Yisuna ufasaa kai naundura quqaseeqa moodaa ufa sia irianoo qimasee kaaqa irimariqau.
LUK 20:1 Moo kari Yisufa faiqí anaasee mi amaana maqanaki Anutuna amiqira fasaasa ufa faiqí aanaaseeuqa qimannimimarufaqa amaana maqasaa aanaiqikirausa misa uriqararausa faqa Mooseena sandufa akoofasauqa faqa suqumaree Yisufinnai aniree iramiriqa qiqau.
LUK 20:2 Anee maa maqanaki bisinisaika imariasa nifaqaannana faqa aiqama oosana oosana ainaina auqimariannana faqa yana ufaree miqidanee yafee miqiannee qinoo fee.
LUK 20:3 Yisufa misa ufa iriseenoo qimanniminoo qinau, Qinee faqa innisaa moo ufara irammirianaura, Yoohaneefa nammari nimianifeera aqiqarana yaindari fee aninoo fee Anutufinnaindari fee aninoo fee maqasaa fasiqakiqari fee aninoo fee qufaqa misa narinni narinni ufa raineeqa qiqau, maasa Anutufinnaindari fee qifanoo Yisufa maaqi qiannoo innee nanaree sia mina ufa iri fee qiannoo.
LUK 20:6 Maasa Yoohaneenara maqasaa fasiqakiqari fee qianaqa faiqí anaasee Anutuna tamummaqara fasiqa fee qimasee oonisamu maasa kuqa darifoora.
LUK 20:7 Misa miqi qimasee qumee maqandanai qi qiseeqa quandafi akooqoo Yisuna qimamiqa qiqau, Yoohaneena aqiqoo fasiqanara maasa sia iridaqee qiqau.
LUK 20:8 Yisufa iriseenoo mina akiaqara qimanniminau, qinee yana ufasaa maa ainainna auqaidee minara faqa sia inni qimannimianaura. (Yisuna aukuana narí maqannaasa munnimma saika maraaqee qimasee uainna sanda ummaquseeqa mina qaqama tiqisee anoona tatisaidaqa minasaa munnimma maree mariqau. Mi oosannara maasa sia iridaqa koofi oosana maasa iridaqa. Mina aanna ramaseeqa koofisaa maasa munnimma maraidaqa. Maa ufana Yisufa uainna kikiqusuqoona mifa maasaki sia marinara maasa minara koofi fee qidaqa.)
LUK 20:9 Miqoo Yisufa faiqí anaasee quandara ufa moo maaqi qimasee qimanniminau. Faiqí moo fannoo koofi asumu moomoo ummaquseenoo marikufaqa narí maqannaasa akaqausa ufaasu nimisee qimanniminau. Innee qini koofisaa rakisiqisee marifaqa qinee qambaanai oosusee inni dinni qeeqaraa dinni maraanaura. Mi ququsana akoofa miqi qimannimiseenoo doo nianai oonureenoo kisaaqasaa marinau.
LUK 20:10 Koofi qaqama akuqee maru kamuqoo mi ququsana akoofa nianaindari ainainira faiqi moo aqiqeenoo qinau, anee oonuree qini koofi qaqamasaa rakisimariasara qinaqa qiqa oosaaqaraana qimaqaifana maree ania mini qimia qimasee aqiqoofanoo oonuroofaqa mi ququsanasaa rakisimarusa mandoosana maraseeqa mi ainainira fasiqana qumareeqa unnaana samu ariisee aqiqoofanoo kaqisamu anirandee finau.
LUK 20:11 Ququsa akoofa mina qafamaseenoo kafaa moo fasiqa aqiqoofanoo oonuroofaqa ququsasaa rakisimarusa miqi kai iqa mina faqa ari iseeqa mandaikammamaqasee asaurirana amiseeqa aqiqoofanoo kaqisamu anirandee finau.
LUK 20:12 Ququsa akoofa mina qafamaseenoo kafaa ainainira faiqi moo aqiqoofanoo oonu roofaqa misa mina faqa ariiseeqa rarisama aqiqau.
LUK 20:13 Ququsa akoofa mina qafamasee anunurumaseenoo qinau, qinee naqi fee ianauree, qinee qeeqa didira qimaaku aqiqaananoo oonu rainaqa minara rufiasee koofi qaqama amifaranoo.
LUK 20:14 Miqi qimaseenoo narí amaaku aqiqoofanoo oonu roofaqa misa qafamasee narí qimami narí qimami qiqau, maafa ququsa akoona amaaku maridanoo, doo maree mina kuqa arusaananoo maa ququsafa innisaimbaqaindi mariani.
LUK 20:15 Miqi qimaseeqa misa mina rafuseeqee aqoosai aquseeqa kuqa ariqau, Yisufa mi ufana qimannimiseenoo kafaa qimanniminoo qinau, mina amaaku arusaifanoo mi ququsana akoofa naqaa fee iannoo.
LUK 20:16 Mifa sia kaqi mariannoo oonu reenoo mi fasiqausa kuqa naruseenoo amiqira fasiqauqaindi mi ququsana nimiannoo. Faiqí anaasee mi ufana irufanoo naaquqoofaqa qiqau, oo mi mandoosannafa sia kambiqaani.
LUK 20:17 Yisufa iriseenoo misa niqafamaseenoo qinau, tamummaqara fasiqauqaindi ufa akara maaqi qinoo maridanoo, minoosanara randasee qafaaqa mi mandoosannara kai qidanoo, mifa maaqi qidanoo. Faandaamura auqi mariasa sabeena moo marasee qafamasee manda sabeena fee qimasee aqusoofanoo Anutufa mi sabeennana quandaki amiqira afeeka faakana fee qimaseenoo uriqarara faakanaikinoo marianifeera rakianau. Mi tamummaqara fasiqafa qiniara miqi qimaqoofaqa qinee minara maaqi qidaqa yafee moo fannoo mi sabeennanasaa turuqaki aqufinafa mi sabeennafa mi fasiqana ateekaa teeka masainanoo kuquannoo. Mi sabeena samufa moonasaa aqufinoo kuqa arusainanoo kookoomaikamafuannoo.
LUK 20:19 Mooseena sandufa irimarusa faqa amaana maqasaa aanaiqikirausa faqa Yisufa maasara mi ufana qidanoo fee qimasee miqoo kai qumaree rumbararee qimasee faiqí aanaaseera rufiasee kaqi kasoomafiqa mina qumararanara rakisi mariqau.
LUK 20:20 Rakisidaqa faiqí akaqausa feefauru nimiseeqa qimannimiqau, innee oonuree amiqira fasiqauqara foora oosana oosana ufara iraifanoo aaqara ufa qinaqa maasa ruumbeeqee Roomma maqannaa kiapana asaukuki quqaanaura.
LUK 20:21 Miqi qufaqa mi fasiqausa oonuree Yisuna maaqi qimasee qimamiqau, Oo ufasaa rakisirafa ani ufara iridaqa ani naamuaqira ufa andeeqasaidana qima nimimarianafa mariananoo anee sia faiqí nifaaqa niqafamasee oosana oosana ufa qimarianafa, anee Anutuna aanai fimaria ufana anoona kai qimarianafa mariananoo.
LUK 20:22 Anee maa ainainnara qimaqimia maasa maqee maqee takisa munnimma Roomma maqannaa uriqararana amidaqa, maasa Mooseena sandufa rukiaidaqee miqidee qufanoo,
LUK 20:23 Yisufa misa ueeqaranara iriseenoo qimanniminau.
LUK 20:24 Innee maasa siruaa munnimma moo mara uqaqifiqaaqa qufaqa uqafiqaqau, Yisufa qafamasee qinau, ya fasiqana oori amanee maanasaa maridanoo fee yana auqu fee maanasaa akara rinoo maridanoo fee qufaqa misa qiqau.
LUK 20:25 Roomma maqannaa uriqararanaindi fee qufanoo Yisufa qinau, faiqí moo fannoo sia moona ainainasaa narí auqu akara ridanoo ainaina faqaafa narí ainainasaa narí auqu kai quqaidanoo maa munnimmana Roomma maqannaa karaambaiqaindi maridanoo mina amana faqa mina auqu faqa maanasaa maridanoo doo mifa qimiannee qinaqa innee naríndi narí kai amiaqa kaifaa Anutunaindi faqa narí kai amiaqa.
LUK 20:26 Misa mina ufa irufanoo naaquqoofaqa kaqi kasoomafiqau, sia miqoo faiqí nifusaa ufannai kai ueeqasee qumarararee qiqau.
LUK 20:27 Sadikai amaana ufa qimarusa faiqí kuqiranakiqari sia findififaranoo fee qimarusa mariqau. Miqiqa marunara misakiqari akaqausa Yisufinnai anireeqa ueeqararee qimasee iramiriqa qiqau.
LUK 20:28 Oo ufasaa rakisirafa Mooseena sandufa fannoo maaqi qimasee maasa qimaqimidanoo. Faiqí moo fannoo sia faiqi maqarai kuqifanoo mina akaqa fannoo mina anaaqa maraseenoo faiqi maqasainanoo indaaruqaa fasiqa qumiasana maraannoo.
LUK 20:29 Mooseefa miqi qimaqoofaqa minara maasa ani iraidaqa. Moodaa fasiqa faiqi namu dinni qisauku taikasee dinni oonu qaaraqanda (7) mariqau, indaaruqaafa anaasee marasee sia faiqi maqarai kuqufufanoo mina aanaaqiannaafa mi anaaseena maraseenoo doo mifa faqa sia faiqi maqarai kuqinau.
LUK 20:31 Mina aanaaqiannaafa miqikaimasee mi anaaseena maraseenoo kuqinau.
LUK 20:32 Miqooqari mi oosanausa aiqamausa mi anaaseenasaa sia faiqi maqarai kuqutaikaqau, inaaqiannaafa uqanna mi anaaseena faqa kuqinau.
LUK 20:33 Oo Yisu faiqí anaasee kuqiranakiqari findififandinna faasaana mi anaaseefa ya fasiqana anaaqa fee mariannoo fee, mi oosanausa aiqama mi anaaseena kai maraqau.
LUK 20:34 Yisufa iriseenoo qimanniminau, maqee mariaqoo maa aukuanna kai faiqí anaasee narí maree narí maree idaqa.
LUK 20:35 Anutufa faiqí anaasee qini faqa innaarunai amanaiki mariasee qimariasa kuqiranakiqari mara findifu mannimaqasee innarunai quqasaifaqa sia kuqifaranoo naaru marifandinausa marinara sia narí maree narí maree ifaranoo.
LUK 20:36 Misa faiqí nifaaqa faqa anaasee nifaaqa faqa taikaseenoo qangiroora fooqaasa indaaqirausa maridaqa kuqiranakiqari findifi mariasa marianara Anutuna amaakuqmara maridaqa.
LUK 20:37 Mooseefa faqa akooqoo faiqí anaasee kuqiranakiqari findifi mariranara qimanniminau, ooqai Mooseefa kaasau maqa maaqaki marufanoo sasamimiki ida qee marufanoo Mooseefa oonu qafamasoofanoo Anutufa minakiqari ooqai kuqusara Mooseena qimaminau, Qinee Abarahaamana faqa Isakeena faqa Yakooboona faqa misa Anutusa maridaqee qufanoo Mooseefa mi ufana iriseenoo kasooqaqee akara rinau.
LUK 20:38 Anutufa sia kaaqa kuqi mariasa nikoofau maridanoofau Anutufa kaqi mariasa faqa kuqiranakiqari findifi mina faqa mariasa nikoofa maridanoo. Anutufa kuqufusara faqa kaqi mariasara faqa kaqi mariaafoo qidanoo. Minara Anutufa Abarahaamana faqa Isakeena faqa Yakooboona faqa nikoo fee qidanoo minamusa ooqai kuqusa kuqiranakiqari findifi qini faqa mariaafoo qimasee mi ufana qinau. Qinee Yisusa minara inni qimannimidaqa, kuqiranakiqari sia sia findifidammia, findifidaqa.
LUK 20:39 Mooseena sandufa akoofasauqa akaqausa mi ufana iriseeqa Yisuna amooqiqa qiqau, Oo ufasaa rakisirafa amiqira ufa qiananoo.
LUK 20:40 Misa kafaa miqooqari Yisuna irammiriranara rufiasee kaqi kasooiqau.
LUK 20:41 Kasoomafufanoo Yisufa misasaa ufa moora iramirinoo qinau. Tamummaqara fasiqauqa akara fannoo Anutuna asauku mundiranara kasooqaqee kambiqafinoo Dafidina atikiqari kambiqaannoo fee qidanoo mifa naqi fee masee andeeqaannoo fee.
LUK 20:42 Dafidifa narí idi papiqaki minara maaqi qimasee akara rinau. Karaambaiqa Anutufa qini karaambaiqa maaqi qimasee qimaminau. Anee aniree qini daaqa qini qisauku uqannai ooqumaria.
LUK 20:43 Maaqoo marinaqa qinee ani namuqaa mareeqee ani aramandunnai quqasaanana anee misasaa rakisia.
LUK 20:44 Dafidifa mi idi papiqanaki Anutuna asauku mundiranara qini karaambaiqee qidanoo minara iriseeqa iraidaqa, Anutuna asauku mundirafa naqi fee masee Dafidina karaambaiqa faqa mina ati faqa aiqamaqara moodaa kari noo mariannoo fee.
LUK 20:45 Yisufa mi ufana qimannimimarufaqa faiqí anaasee moomoo iri marufanoo Yisufa misa nifusaa quandafinoo narí faiqi namu qimanniminau,
LUK 20:46 Innee Mooseena sandufa akoofasauqara rakisi marifaqa aniraifaqa misa oosanara aufaridaqa eerairiaqa misa qamunna amiqirana kisaaqa afisusee faiqí nifumau nasuridaqa aatata fee faiqí suqiranaki fee faiqí anaasee misa reendeenamasee nimandaranara rimariasa maridaqa, misa amaana maqaki fee qoomaqanduqiranaki fee faiqí anaasee noorisaa kai ooqu marifi nári nifaaqa mara maree urimariasa maridaqa.
LUK 20:47 Misa faiqí anaasee nifusaa kisaaqasaa innaaru qidaqa maqandanai adeedaana anaasee saqama fee maqa fee maaqa fee ummuari mariasa mariafanoo mina akiaqara narirafa fiqaramasee mariannoo.
LUK 21:1 Yisufa Yeerusaree firaa amaana maqaki maridanoo nindafoofaqa faiqí anaasee Anutuna ataaka munnimma quqee mariqau. Ainaina moomoo faqaasa firaa munnimma aqimarufanoo qafee marufanoo misakiqari adeedaana anaasee moo fannoo ainaina siaifa kudi uqanna marufa anireenoo idaqarana ataaqana munnimma qaaraqanda kaqikaana aqusoofanoo Yisufa qafamaseenoo narí faiqi namu qimanniminoo qinau, Oo innee qafaaqa, maa kudi adeedaana anaaseefa aiqamausa urinnaaqara maseenoo mi anaaseefa aqinooi.
LUK 21:4 Ainaina faqaasa nári munnimma moomoo marunakinaana qumaree aqiqa, maa adeedaana anaaseefa kaaqa kudi uqanna marifa narí narana feeraurira munnimma aiqama uqanna moodaa marina doo aqinoo miqinara qinee urinnaaqaramasee aqinoommifoo qidaqa.
LUK 21:5 Yisufa narí faiqi namu faqa Yeerusaree firaa amaana maaqaki nimarufaqa misa aiqama ainaina firaa ainaina Anutuna amimaru ainainausa faqa amiqira ooninnai usakaqoona minauqa qafaqa nidaqa narí qimami narí qimami qimariqau.
LUK 21:6 Miqi qimarufanoo Yisufa qimanniminoo qinau, Innee maa amiqira ainainausa qafaidee, moo aukuana anirainanoo moomoosa anireeqa maa oonisa aaku aaku irana aiqama rapeemmeeqee maqasaa kai aqifaranoo sia moo ooni moonasaa aakinoo maqee marindee inoo mariannoo, aiqama maqasaa kaimmaqufuannoo.
LUK 21:7 Miqi qufaqa Yisuna faiqi namu irammiriqa qiqau, Oo ufasaa rakisirafa yairee fee mi ainainafa kambiqaannoo fee, nana ainainee mi aukuanna kooroo ira ainaina qafamasee fee oo mi ainainna kambiqaannoo fee qianauree. Miqi qufanoo Yisufa qimanniminoo qinau. Innee amiqimandee aiquqiaqa, moo fannoo nikaru qiandoo qimasee minasaa rakisiaqa. Moomoosa anireeqa qinee asauku mundirausa Yisusee qifaranoo, akaqausa doo Anutuna aukuana ani mariifoo qifaranoo. Innee mina irisee sia mi mau fuaqa. Innee firaa rakiranara faqa maqusa maqa maaqa furufarirana faqa qafamasee sia minara rufiaaqa sia minara iriaqa sia doo maqa taikarafa anireefoo qiaqa, miqira ainaina mi oosana oosanafa naaree kambiqaaninnanara siamma rufiaaqa.
LUK 21:10 Moo maqannaasa findifi moo maqannaa faqa rakifaranoo, moo karaambaiqa findifi moo karaambaiqa faqa rakuannoo maqa kasirafa firaafa moomoo naaquqarafa kambiqaannoo aandaroo aurirana oosana oosana maqa afaaqasasa kambiqaannoo naaquqara ainaina faqa maqa taikaaninna ainaina kudifaanara maqi asurukiqari kooroo iannoo.
LUK 21:12 Misa inni naaree qini ufasaara ruumbeeqee aupuraranaki quqeefaranoo. Misa qini ufasaara inni mareeqee firaa uriqararausa nifusaa faqa kaqikaa uriqararausa nifusaa faqa quqasaifaqa mikari inni ufa qimannimimari aukuana mariannoo.
LUK 21:14 Misa miqifaqa innee maaqi qiaqa oo maqee misa faqa amiqira fasaasa ufa Yisunara qimannimianauree qiaqa. Misa inni mara maree uriqararausa nifusaa quqasaifaqa sia innee minara oonumafi irisee firaaqoo naqi fee qianau naqi fee qianau qiaqa.
LUK 21:15 Mikari qinee qeeqa kai qumee dadaaqianaqa innee irirana faqaasa ufara foora qimannimifaqa inni namuqaakiqari moo fannoo sia amana inni ufa rukiasee qaoo qifara.
LUK 21:16 Mi aukuanna qini ufasaara inniqa ninausa nikausee inniqa nikaqaafasaa fee inni ati fee inni niqoondi fee misa inni uneemaana qimasee mareeqee kuqiranaki quqannimaqeefaranoo.
LUK 21:17 Qiniara aiqamausa inni fidiaqaa mannimaqeefaranoo. Miqi marifaqa minaki fimarifanoo inni nikiaqa asausi sia moodaa fannoo kakasiannoo Anutufa inni nifaaqasaa faqa rakisianoo.
LUK 21:19 Innee mi mandainainaki maridaqa sia aquraranara rufiasee qini duqu minnisaaqa, kaqi finnanannai kai inni marirana afeedifaranoo.
LUK 21:20 Innee moo maqannaa rakira fasiqauqa moomoosa anireeqa Yeerusaree maqusa puseemafifaqa innee irirana maaqi qiaqa oo maqee Yeerusaree maqusa taikarafa anireenoo fee qimasee Yudeeaa maqa maaqaki mariasa aaqanaaqana akareeqa sandeefaranoo, maqusai marinausa qafeeqa quqasee sandeefaranoo, ainainai finausa sia kafaa maqusai anifaranoo, doo mindari kai sandeefaranoo.
LUK 21:22 Anutuna ooqeenaa tamummaqara fasiqauqa ufa anoona kambiqaanifeera Anutufa narimari aukuana kambiqanoo maridanoo fee qiaqa.
LUK 21:23 Mi aukuanna nimuaqu uqafaqaa anaaseeuqa naaquqaranaki mandainainaki marifaranoo, sandaranara anuqifaranoo faiqi aanaaqifaqaa anaaseeuqa miqikaimasee naaquqaranaki kadaapiriranaki marifaranoo. Anutuna aranaqarafa maa maqa maaqanaki marianara naaquqarafa aupurarafa firaaqoo mariannoo.
LUK 21:24 Moo maqannaasa sundiauqa anireeqa maa maqannaasa aseemannai naruseeqa akaqausa ruumbeeqee aiqama maqa maaqai quqasaifaqa daraanimambifaqa Anutunara sia irimariasa aniree Yeerusaree maqusa maqee maqee nikunoo radamuseefaranoo Anutufa qumee eedoo qira aukuana kai miqifaranoo Anutufa taikaannee qinaqa doo miqoo taikeefaranoo.
LUK 21:25 Mi aukuanna suanafusaa faqa quqoona fasau nifusaa faqa maqa taikara ainaina kudifaanna kooroo irafa kooroomma nimaqasaanaqa qafeefaranoo. Mi aukuanna maqasaa fasiqa anaasee aiqama maqannaasa ooruku nammari ufa qiranara faqa firaa nammari amakauriranara faqa irisee rufiaseeqa maa maqa maaqana afaaqasasa kambiqaaninna aupuraranara faqa afeesidaqa rufiaqa rufiaqa idaqa kuquaqaa imarina marifara. Quqoona fasau mariqoo ooqai mari marirafa furufaramambinoo moo kamaakinaqa mina qafaifanoo maqasaa kambiqaaninna mandainainara afeesidaqa rufiaqa rufiaqa idaqa nári nimuqusa kuqifaqa kuqifaranoo.
LUK 21:27 Mi ainainausa oosana arasee kooroomambinaqa innee findifiqa ninuka uqeerasee qafaaqa inni innaarunai asumu marirafa adeedi ramafuannoo. Mikari qinee faiqí nimaaku innaarunaindari asuruki firaa afeeka faqa firaa areenarana faqa kooroomambi qumuanaura.
LUK 21:29 Yisufa mi ufana qimaseenoo maa quandara ufana qimanniminau, innee faafisa faqa aiqama saqari faqa ammuni faqa qafeeqa oo doo aukuanai aniree maqi qimariafanoo.
LUK 21:31 Innee miqikai iqa maa qimannimuna ainainafa kooroo mambinaqa maaqi qiaqa, oo Anutuna innaaruna ququsa adeedi ramafiifoo qiaqa.
LUK 21:32 Doo innee maa ufana faqa iriaqa maaqoo mariasa kaqi marifanoo mi aiqama ainainausa kambiqeefaranoo. Maqa faqa innaaruna faqa doo aiqama taikafuannoo qiqa dookinaa ufa sia taikaannoo kaqi mariannoo.
LUK 21:34 Innee minara irisee inneeqa mariranara rakisiaqa. Inni aaquqimannimaqaidaqa. Sia maqee maqee qoomaqamasaida naidaqa sia nammari namasee furufariaqa sia maaqoo maria ummaarana faqa minara kai mammaree fimarifaqa qinee innaarunaindari qumira aukuana tautuma nimaqaanafaara.
LUK 21:35 Mi faasaanna maa maqa maaqana afaaqasasa maria fasiqa anaaseesa tautuma nimaqaanaqa ufaanara foora naruanauranoo.
LUK 21:36 Innee maqee maqee aufarida maridaqa innaaru qimasaida mariaqa. Innee inneeqa afeeka afeekaikamasee qimannimunna mandainainausaki afeekaikamandee fiqaree qini faiqí nimaaku qifusaa amiqimandee kikiqiaqeera innaaru qiaqeera qidaqa.
LUK 21:37 Mi fasannai Yisufa faasaambaasaana firaa amaana maqaki faiqí anaasee minaki qimannimiiseenoo eenoofanoo rafudamakufanoo Oorifa aaqanasaa akara mafufanoo miqoo faiqanau.
LUK 21:38 Aiqama kananaana faiqí anaasee aiqama suqumaree firaa amaana maqaki Yisuna ufa irianee qimasaida keeqee mariqau.
LUK 22:1 Yisufa miqi marufanoo qoomaqa Yuda maqannaasa firaa qoomaqa ainnaaqarara qoomaqa adeedi ranau. Mi qoomaqana auqu moo sia ooruku qai feemuna qoomaqa nee imariqau. (Mi qoomaqanaki moomoo fasiqa anaasee aukuana aukuana suqumareeqa Yeerusareenni mi qoomaqana suqa nee mariqau.)
LUK 22:2 Amaana maqasaa aanaiqikirausa misa uriqararausa faqa Mooseena sandufa akoofasauqa faqa Yisuna kuqa ariranara qumee randee marufaqa faiqí anaasee Yisunara amiqira fasiqee qufaqa minara rufieeqa sia ariqau.
LUK 22:3 Misa miqida randee marufanoo Yudasifa Keerioota maqusaindaraafa Yisuna faiqi namukina qisaukuqara taikasee qikunni ooqu qaara marasee misaki marufa, mina aunduraki kai Sadannafa keeqafufanoo qumee oonureenoo amaana maqasaa aanaiqikirausa uriqararausa faqa amaana maqasaa rakisirausa faqa qumee suqinau. Yisuna ueeqa nimianinnanara moodaanaki ufa qimannimimarufaqa uneemaana munnimma amifandinnanara qimamiqau.
LUK 22:6 Yudasifa eedoo qimaseenoo miqooqari faiqí anaasee nifusaa qumee ramaseenoo kukeeqaseenoo Yisuna misa nisaukuki quqararee qimasee ueeqarara randanau.
LUK 22:7 Sia ooruku qai feemuna neemaru faasaana ainnaaqarara qoomaqara sipsipa aanaaqi aru faasaanasaa Yisufa Peetooroona faqa Yoohaneena faqa niqiqamasee qimanniminoo qinau. Inneeqara Yeerusaree maqusai ooruree maasara faqa ainnaaqarara qoomaqa deedaqifaqa ooru naanaura.
LUK 22:9 Miqi qufaqa miqanda qiqau yai fee ya maqanaki fee maaqanda deedaqianauree qufanoo Yisufa qinau, doo amiqimasee iriaqa, inneeqara Yeerusaree maqusaki ooruree fidaqa qafaifanoo faiqí moo fannoo nammari qafee maree keeqainnanaki keeqafi mi maqana akoona maaqi qimasee qimamia ufasaa rakisirafa aniara maaqi qinoo, moo rumma qinee faqa qini faiqinamu faqa ainnaaqarara qoomaqa naanna rummafa yai fee maridanoo fee qifanoo qinamma iriaqa. Miqi qimasee qimamifanoo mina sandaaqai moo rummaki uqannifiqainaqa minaki deedaqamasaifaqa innisaimbaqa fafaa eendaki minaki naanaura.
LUK 22:13 Miqanda iriseeqa Yeerusaree maqusai oorureeqa Yisufa qimaqoondee kai mi fasiqana faqa maaqa akoona faqa nindafamaseeqa Yisufa qundee kai maseeqa aiqama ainaina deedaqamaqaafanoo.
LUK 22:14 Doo eendufaqa Yisufa narí faiqi namu faqa keeqafufaqa qainda firaana fiqu fiqumma ooqu marifiqau. (Nári oosana marasee aiqamausa qainda fiqu fiqumma fufaqa nisaataa saunu areefufaqa ainnaaqarara aafaqa naqau.)
LUK 22:15 Misa miqi mambufanoo Yisufa narí faiqi namu maaqi qimasee qimanniminau. Maa ainaaqarara qoomaqana inni faqa narara firaaqoo dididanoo aupurarana oorisaa maridaqa.
LUK 22:16 Qinee sia maqee inni faqa kafaa naanaura, Anutuna innaaruna ququsa kambiqafinaqa maa ainaaqarara qoomaqana anoona oosana uqanna kambiqafinaqa miqoo kafaa naanaura.
LUK 22:17 Miqi qimaseenoo Yisufa firaa kaafa maraseenoo nariqa maqee maqee neemaru uainna nammarina umbiqarana narí faiqi namu niminoo qinau, Maana maraseeqa namataikaaqa qinee anoona ufa qimannimidaqa, qinee sia kafaa maqee inni faqa naanaura, Anutuna ququsa kambiqafinaqa mikari miqoo innaarunai naanaura.
LUK 22:19 Miqi qimaseenoo feemu moo maraseenoo Anutunara dufi dufi qimaseenoo ruqi ruqi maseenoo narí faiqi namu niminoo qinau. Maa feemufa qini qifaaqa kikiqusira feemufa maridanoo kuqiranaki inniara quqannimaqaanaura. Innee maqee maqee naidaqa qiniara naaqoo iridaqa naaqa.
LUK 22:20 Namasoofanoo Yisufa miqi kai inoo uainna adiara nafisa maraseenoo narí faiqi namu nimiseenoo qinau. Maa nafisanakinaa nammari qini fidika maridanoo. Anutufa inniara noori runiranaki marunara narí fuka moodaanaki kira ufa quqaidanoo, qini fidika inni adiannimaqaranaki maridanoo.
LUK 22:21 Yisufa kafaa qimanniminoo qinau innee doo qafaaqa maa qaindana fiqu fiqu iranaki inniki qiniara ueeqee marifa maridanoo.
LUK 22:22 Anutufa ooqai qumau kai qinee faiqí nimaaku kuquanaura, qini ueeqeemari fasiqafa firaa numoo minasaa aqufuannoo.
LUK 22:23 Yisufa miqi qimasoofaqa mina faiqi namu narí iree narí iree qiqau yafee miqiannoo yafee miqiannoo, qiqau.
LUK 22:24 Miqidaqa maaqi qiqau, yafee maasaki uriqararafa mariannoo fee mi ufana qidaqa raiqara ufa qiqau, miqi qimarufanoo Yisufa qimanniminoo qinau, maa maqanasaaqaraa karaambaiqauqa nári maqannaasa urinaaqara maseenoo fifau nariara faiqí anaasee dadaaqi marunausee qidanoo.
LUK 22:26 Innee, qini faiqi namuki sia mi oosanafa mariannoo, inniki uriqararafa innaaqianaafara foora mariannoo, inniqa karaambaiqa fannoo inni ainainira faiqiara foora mariannoo.
LUK 22:27 Yafee uriqaranoo maridanoo fee, qoomaqaki ooqumarifi neemari fasiqa fee, narana rakiqasee nimimari fasiqa fee uriqaranoo maridanoo fee. Narana rakiqasee nimimarifa mifa kai uriqarara fasiqa maridanoo, doo qinee narana nammari rakiqasee nimimarunausa maridaqa sia inni rafaaqafu nimaqasee uriqararausai kidaqa inni ainainira faiqiara maqi maridaqa inni dadaaqidaqa. Doo innee qini daanna raaqa.
LUK 22:28 Innee qini faiqi namu qini moomoo ummaara kadaapirirana dadaaqi mariasa mariafanoo.
LUK 22:29 Doo mina akiaqara qini qikoofa qiniara uriqarara karaambaiqee qimarindee kai iqa qinee faqa inniara qinee qeeqa karaambaiqa ququsaki keeqafinaqa narana faqa nammari faqa inniara qini saimbaqa neefandiafoo qidaqa.
LUK 22:30 Miqoo innee qini faiqi namu Isaraee maqannaa ufa irira qaindasaa ooqu marifi qisaukuqara taikasee qikunni ooqu qaara marasee Yakooboona faiqi namu atikiqari kambiqarausa Isaraee maqannaasa misasaa innee andeeqeefaranoo.
LUK 22:31 Miqi qimaseenoo Yisufa Simoona moo auqa Peetooroona qimaminoo qinau. Simoona anee qini ufa iria, Sadannafa aniara sandanainai qidanoo ani mareeqeenoo narí manda ququsaki quqararee qidanoo ani rarisamasee amanamasee qafaidanoo.
LUK 22:32 Oo Simoona qinee aniara innaaru qimaseeqa anee qini saqarikirafa sia taikaani. Anee kaqirunna oonureenana oonu quandakinana aneenna akaqaafasaauqa pooduamannisaa, qufanoo Peetooroofa qinau.
LUK 22:33 Oo karaambaiqa anee rumbaranaki fee kuqiranaki fee finaqa qinee faqa minaki fuanauree qufanoo Yisufa qimaminoo qinau Oo Peetooroo qinee anoonufa ani qimamidaqa fafaa eendamuqusai anee qaaramoo kari qiniara asaurusee sia qiniara Yisusara iridee qinanoo doo miqoo kai kookooraana ufa qiannoo.
LUK 22:35 Yisufa miqi qimaseenoo quandafufanoo aiqama qimanniminoo qinau, Ooqai qinee inni niqiqamasaafanaqa innee munnimma fee rusaka fee niku aanaamu fee sia maree fiqau, innee mikari moo ainainara sarau fee iqau qufaqa misa qiqau, Oo sia moodaa ainainara sarauqimariafanausa maridaqee qufanoo Yisufa qimanniminoo qinau, munnimma pausa marina mina maqee maraaqa rusaka marina mina maqee maraaqa, rakira paipana siainafa narí asausi faqaa siuta moona amisee mina akiaqara rakira paipana maraaqa.
LUK 22:37 Qinee maa ufana faqa qimannimidaqa. Anutuna tamummaqara fasiqauqa qiniara akara rumaqoofa doo maqee kambiqaidanoo. Doo maa akarafa faqa kambiqaannoo. Misa qiniara maaqi qidaqa misa mina mara maree manda oosana maree mariasa namufaqa aruannee qidaqa.
LUK 22:38 Miqi qimasoofaqa Yisuna faiqi namu maaqi qimasee qimamiqau, Oo karaambaiqa qafaa, rakira paipana qaaraqanda maaqoo maridanoo fee qufanoo Yisufa qinau doo ufa quqasee uqeeraaqa.
LUK 22:39 Yisufa miqi qimaseenoo doo narí faiqi namu faqa findifinoo narí maqee maqee fimaruqoo Oorifa aaqanasaa ooru finau.
LUK 22:40 Oorureenoo narí faiqi namu maaqi qimasee qimanniminau, innee maaqoo maridaqa innaaru qidaqa sia manda nimaniranaki keeqaaqa.
LUK 22:41 Miqi qimaseenoo mifa fiqareenoo aambaaka aqinoora foora naríara fiqaree Anutunara aqoori saunara finoo narí kuqirafa adeedi roofanoo minara innaaru qinoo qinau, Oo qini qikoofa anee eedoo qinaqa qinee manda nammari naannana mara aqusainaqa sia naa, sia qeeqa iriranamau fuanaura, aninna iriranamau kai fuanaura. [
LUK 22:43 Miqi qimaseenoo Yisufa afeekaikamandee innaaru qimasoofanoo tooqaamu fannoo fidikara foora aqinaaqa anireenoo maqai aqufufanoo kuquaqaamminau. Aqufufanoo innaarunaindari qangiroo moo fannoo akooqoo qumureenoo afeeka amufanoo afeekaikinau.]
LUK 22:45 Yisufa miqi qimasee innaaru qimaseenoo findifinoo narí faiqi namu qaaramoo marunnai oonu nindafoofaqa nimudaani rumafufaqa nisuku kaaqa faiqaqee mariqau. Yisufa oonu nindafamaseenoo qimanniminoo qinau, Innee naqaa fee ifaqee faiqaidee findi fiqa innaaru qiaqa, manda nimaniranaki aqufifaara.
LUK 22:47 Yisufa miqi qimaseenoo narí faiqi namu qimannimimarufanoo misakiqari Yudasifa faiqí moomoo asukunai nifiqeenoo anireenoo Yisuna amooqara rufanoo Yisufa qimaminau, Yudasi qini faiqí nimaakuara qimooqaranannai fee ueeqaidanee qufaqa Yisuna faiqi namu Yisuna qumarararufanoo qafamasee Oo karaambaiqa maasa rakira paipanannoo naruanauree qimasoofanoo misakiqari moo fannoo Yisufa qu ufana sia irirai rakira paipana qumareenoo moona akiaqa aaqamakufanoo asauku uqannai aaqoo ateeka aqinau. Mi fasiqafa amaana maaqaki aanaiqikirausa uriqararana uqanna ainainimaruna aaqoo ateeka aqinau.
LUK 22:51 Ateekasoofanoo Yisufa qafamaseenoo qinau, Doo amana, doo saa qimasee mi fasiqana aaqoo auqamasoofanoo andeeqamma amaqanau.
LUK 22:52 Andeeqaseenoo Yisufa quandakinoo, aanaiqikirausa uriqararausa faqa amaana maqasaa uriqararausa faqa misa poorisauqa faqa faiqí firaasa faqa aiqama Yudasina faqa anusa aiqama qimanniminoo qinau, nanaree innee rakira paipana saamu indaammamareeqa manda oosana mareemari fasiqanara foora qiniara qumararara anidee, qinee faasaambaasaana inni faqa firaa amaana maqaki marunausa marunaqa innee sia miqoo qumararai. Doo maqee eendaki innindi faqa asukunaki nimari afaanausaindi faqa maa eendafa innindi mandoosana maraaninafa maridanoo.
LUK 22:54 Miqi qimasoofaqa misa mina qumareeqa afiqa maree aanaiqikirausa uriqararana maaqaki quqaqau. Misa Yisuna maree fufanoo Peetooroofa rufiasee inaaqiana nifaamme nifaammee inoo fifiufanoo Yisuna quqoo maaqana naambeeqai faiqí akaqausa idarasee aani marufanoo mifa minaki oonuree aaninau.
LUK 22:56 Aani marufanoo mi maqanaki ainainimaru manaaqafa aniree andeeqasee Peetooroona oori qafamaseenoo oo maafa Yisuna faqa nimarifammi qimaseenoo quandafinoo miqoo marusa qimanniminau, maa fasiqafa Yisuna faqa marifa maridanoo mina faqa qumaraaqa.
LUK 22:57 Peetooroofa iriseenoo qaoo qinoo qinau, Oo maa manaaqa sia qinee minara iridaqa.
LUK 22:58 Kaqikaaqoo marikufanoo faiqí moo fannoo qafamaseenoo qinau anee Yisuna faiqinamuki mariana fee qufanoo Peetooroofa qaoo qimaseenoo qinau. Oo maa fasiqa qinee sia minakinaasau maridau qufanoo kaifaa marikufanoo faiqí moo fannoo anireenoo afeekaikamandeenoo qinau. Maa fasiqafa kuqaa Yisuna faqa marifa, Kariree maqannaa moodaa maqannaafa maridanoo fee qufanoo Peetooroofa qimaminoo qinau, Oo maa fasiqa sia ani ufa anoonara iridaqa. Miqi qimarufanoo kai kookooraana ufa qinau.
LUK 22:61 Ufa qufanoo Yisufa narí maruqooqari maaqakiqari quandafi Peetooroona qafoofanoo Yisuna narí Peetooroonara anee maqee eendaki qaaramoo kari qiniara sia iridee qinanoo kookooraana ufa qiannoo qimaqoona kookooraana ufa qufanoo Peetooroofa iriseenoo firaaqoo asauruseenoo rauda makufannoo aundurai sukaqoofanoo firaaqoo ikiraqa maree finau.
LUK 22:63 Mi eendanaki Yisunasaa rakisi marusa ataasa ataasa qimasaida ari mariqau. Aridaqa qamunna qumaree mina afusaa ititasee ariqa qiqau, yafee ani aridanoo fee qiqau. Misa oosana oosana manda ufa faqa qimamaqee mariqau.
LUK 22:66 Iqaqoo kananaana Yuda maqannaasa uriqararausa faqa aanaiqikirausa uriqararausa faqa Mooseena sandufa akoofasauqa faqa moodaanaki suqufufaqa Yisuna mareeqee misa suqiranaki quqaseeqa irammiriqa qiqau, anee maasa qimaqimia, kuqaa anee Anutuna asauku mundira fee maridanee qufanoo mifa qinau qinee qimannimianaqa sia innee qini ufa irifara qinee faqa moo ufara inni iraanaqa sia qimaqimifaranoo.
LUK 22:69 Doo maqee maaqooqari qinee faiqí nimaaku uriqarara Anutuna asauku uqannai mina aaqa ooqu marifi marianauree qufaqa misa aiqamausa qiqau.
LUK 22:70 Doo kuqaa fee anee Anutuna amaaku fee maridanee qufanoo Yisufa qinau Innee qimariandee qimarunausee qufaqa misa qiqau, doo maqee maaqooqari sia maa fasiqana manda ufa irimarusara randaanaura, doo maqee uqanna narí ookinaa manda ufa maasa daaqooki keeqaifaqa iriqa.
LUK 23:1 Miqi qimasoofaqa misa aiqama findifiqa Yisuna afiqeeqa Roomma maqannaa kiapafa Piratoofunnai afiqee munusee Yisuna arira ufa maaqi qimasee qimamiqau, Maa fasiqafa faiqí anaasee kaqi runna mara quqee marifa Roomma maqannaa karaambaiqa takisa munnimma sia aquaqee qimarifa nariara unnaqimaseenoo Anutuna asauku mundirafa qeeqaraa karaambaiqa maridee qimarifaqa irisee afiqee anidaqa.
LUK 23:3 Piratoofa misa ufa iriseenoo quandafi Yisuna qafamaseenoo irammirinoo qinau, Kuqaa fee anee maa maqannaasa karaambaiqa maridanee qufanoo Yisufa qinau, anee doo qimariananoo.
LUK 23:4 Piratoofa mina iriseenoo kafaa aanaiqikirausa misa uriqararausa faqa faiqí anaasee moomoosa faqa qimanniminoo qinau. Qinee maa fasiqanaki qafauna sia mina ummaara marifaqa iridaqa.
LUK 23:5 Yuda maqannaasa mina iriseeqa afeekaikamasee Piratoona qimamiqa qiqau, mifa qimannimu ufanannai rakirana uqeeraidanoo, mifa Kariree maqa maaqaindari oosana arasee mindari anufa aiqama Yudeeaa maqa maaqaki miqimmamaree aniufa maqee maasaki Yeerusaree maqusai anireenoo miqikai idanoo.
LUK 23:6 Piratoofa mina iriseenoo qinau, kuqaa fee maa fasiqafa Kariree maqannaa fee anidanoo fee qufaqa misa eedoo qufanoo Piratoofa oo Eeroodeena ququsakiqari ani maridanoo qimaseenoo Eeroodeefa maa kari Yeerusareenni animarinoo qimaseenoo Yisuna aqiqoofanoo mina sundiauqa afiqee Eeroodeefunnai fiqau.
LUK 23:8 Eeroodeefa Yisuna qafamase asasinau. Ooqai kisaaqasaa Yisuna aufakiana kai iriufa kisaaqasaa mina qafaaneerufa, saina kasooqaqee sia faiqí amanaikimari ainaina qini qifusaa auqainaqa qinee faqa qafaa, qimasee Yisuna qafamasee asasinau.
LUK 23:9 Yisufa oonuroofanoo Eeroodeefa oosana oosana ainainara iroofanoo sia ufa qinau, kaqi marinau. Amaana maqasaa aanaiqikirausa faqa Mooseena sandufa akoofasauqa faqa Eeroodeena aaqa anireeqa unna ufa afeekaikamandee Yisunara Eeroodeena qimamiqau.
LUK 23:11 Eeroodeefa faqa narí sundiauqa faqa ataasa ataasa qimasee mandufa qimamaqaqau. Misa ataasa ataasa qimamaqaidaqa karaambaiqa qamunna afisuamaqasee afiqee Piratoofinnai kafaa anirandee finau.
LUK 23:12 Ooqai Piratoosa Eeroodeesa namuqaaqara mariuqanda mikari Yisuna aqiqoofanoo Eeroodeefinnai fu kamuqoo miqanda naraqoondi naraqoondi kiqau.
LUK 23:13 Yisuna kaifaa afiqee anirandeeqa Piratoofinnai oonuroofanoo Piratoofa aanaiqikirausa uriqararausa faqa faiqí firaasa faqa faiqí anaasee moomoosa faqa naarama quqaseenoo qimanniminau, innee maa fasiqana afiqee qinee unannai aniana, faiqí anaasee kaqirunna mara ubeekee marifaqee qimasee afiqee anianara qimannimidaqa, qinee inni nifusaa oosana oosana ainainara irammirunanoo manda oosana oosanara qiana sia paquriqa.
LUK 23:15 Eeroodeefa faqa iramasee qafaifanoo sia mandainaina minaki marifanoo kaifaa aqiqaifanoo aninoo, qinee faqa minara maa fasiqanara sia moo numoo minaki maridanoo fee qidaqa, minara qinee sundiauqara akumbau akumbau auqira uaiaqa samu qumaree amiqimma firaaqoo ari ari isaifaqa idukuanee qidaqa. [
LUK 23:17 Piratoofa narí oosana mareenoo ainnaaqarara qoomaqaki aiqama aukuana karabusaki moo maruna iduku nimiseenoo kafaa maa aukuanna Yisunara miqi kai ianauree qimasee mi ufana qinau.]
LUK 23:18 Faiqí anaasee minara iriseeqa aiqamausa faaqa rumasee qiqau. Mina kuqaruaqa, Barabasina kai iduku qimia.
LUK 23:19 Barabasifa Yeerusaree maqusaki rakirana uqeeroonara faiqí kuqa narunara faqa karabusa mariufa marinau, minara idukuaqee qiqau.
LUK 23:20 Piratoofa Yisuna idukuaqeera faiqí anaasee kafaa naaroofaqa misa irisee faaqa quqasee qiqau. Mi fasiqana aunirira saqari saa arua, aunirira saqari marinnai fuani.
LUK 23:22 Piratoofa kafaa qaaramoo kinoo qimanniminau. Maa fasiqafa nana manda oosana mareenoo fee. Qinee sia kuqira ainaina minaki paquriqa,
LUK 23:23 Qinee akumbau akumbau auqira uaiaqa samu firaaqoo arusee idukuanauree qufaqa faiqí anaasee firaaqoo faaqa quqasee qiqau. Yisuna aunirira saqarisaa pirimmannai aruannee qimarufanoo misa ufa fannoo Piratoona rafaaqafusoofanoo Yisuna aruaqeera eedoo qimaseenoo Barabasina idukinau. Barabasifa rakiranara faqa faiqí narunara faqa rumbaranaki maruna idukinoo Yisuna mareeqee misa nári iriranamau fuaqee qimasee narí sundiauqa nimufaqa doo arirara, maree fiqau.
LUK 23:26 Misa arirara maree fidaqa faiqí moo auqu Simoona amarafa mifa nianaindari ani marufa Sireenee maqusaindaraafa mindari Yeerusaree maqusa aatata animarufaqa sundiauqa paquri mandee mina aranaiqi qumareeqa Yisuna aunirira saqari aku amaqoofanoo Yisuna aanaaqiana maree finau. Sia amana mi fasiqafa qaoo qiannoo misa faaqaana qafeenoo kuqiranara rufiasee aruaqaaufanoo kaqi eedoo qimasee doo maranau. (Yisuna faiqi namukiqari Peetooroofa marufa mina moo auqu Simoonafa sia mifau Yisuna aunirirana aku maranau, mina amarafa moo fasiqa fannoo Sireenee maqusaindaraafa aku maranau.)
LUK 23:27 Sundiauqa Yisuna afiqa maree fimarufanoo Yeerusareendaraa aanaaseeuqa Yisuna ufa irimarusa moomoosa mina aanaaqiana oobiqasee ikifaaqa quqasee ikiraqaqa fimariqau. Miqi mamaree fimarufanoo Yisufa quandafi ninda fee kasoomambinoo qimanniminau. Sia qiniara ikiraqaaqa inneeqara faqa inneeqa faiqi namuara faqa ikiraqaaqa.
LUK 23:29 Kasooqaqee naaru anianinna aukuanafa innisaa firaa narirafa aupurarafa mariannoo. Faiqi siaisa amiqirafa marifaranoo. Faiqi aanaaqi siaisa sia naamma nimimariasa misa amiqimasee aufadamasee sandeefaranoo fee qifaranoo, faiqi faqaasa qumaara reeqa manda kuqira kuqifaranoo.
LUK 23:30 Mi firaa narirafa kambiqafinaqa aaqana ameemaanai oonuree aaqana qimamiqa anee maasa rafaaqafusainaqa kuqufuananoo sia maa mandainainafa daruani fee qifandinausa.
LUK 23:31 Innee iriaqa, Roomma maqannaasa maqee qinee sia aaqee marunausa, fuka saqariara maqi marunausa, maaqi mandee darusaifaqa kasooqaqee Yuda maqannaasa manda oosana aaqarafa firaatia marinara inaakuna manda narirafa Roomma maqannaasa inni narifaranoo, minara qinee qimannimidaqa innee inneeqara kai ikiraqaaqa.
LUK 23:32 Sundiauqa mandainaina maree maruqanda qaaraqanda Yisuna faqa moodaakari nariraree qimasee miqanda Yisuna faqa nifiqee fiqau.
LUK 23:33 Nifiqee fifiufaqa kaqikaa amuaqu namusaa faiqí nimudaani fee qimaruqoo munuseeqa Yisuna pirimmannai aunirira saqarisaa aruseeqa uqeereeqeeqa kuradaqau, faiqí manda oosana maree maruqanda asauku uqannai aakaarinni moo narí auniriranasaa arusee uqeereeqee kuradaqau. Asaaqaitinnai moo miqikaimasee narí auniriranasaa ariqau.
LUK 23:34 Misa Yisuna arimarufanoo Yisufa innaaru qinoo qinau, Oo qini qikoofa misa mandainaina qini qimimariana minninnisaa sia mina akiaqara ia, misa nári imarianara sia iridaqa. Sundiauqa Yisuna aruseeqa kaatara foora sararamaseeqa mina qamunna raina rainiisee maraqau.
LUK 23:35 Miqi marufaqa faiqí anaasee kikiqiqa mafufaqa qafaidaqa misa uriqararausa Yisuna ataasa ataasa narí qimami narí qimami qiqau, Oo maa fasiqafa faiqí anaasee asumu nimimari fee qimarifa maana mifee doo maqee aneennaraa asumu marainna qafa. Mifa Anutuna asauku mundirafa rusandeesamu mandee maroofa maridanoofau doo maqee nariara asumu maraiqini.
LUK 23:36 Sundiauqa faqa ataasa ataasa qimamaqasee Yisuna uainna nammari amianee qimasee qiqau, anee kuqaa Yuda maqannaa karaambaiqa maridana minasaaqari asumu maria.
LUK 23:38 Yisuna aunirira saqarisaa akiaqai akara moo akara rinoo marinau, maaqi qimasee akara rinoo marinau, maa fasiqafa Yuda maqannaa karaambaiqa maridanoo.
LUK 23:39 Manda ainaina maree maruqanda nári auniriranasaa Yisuna aaqa maridaqa moo fannoo maaqi qimasee Yisuna aqinau, kuqaa fee anee Anutuna asauku mundira fee maridanee doo amana anee aneenna faqa maaqanda faqa mara aquqisainaqa asumu maria, qufanoo moo fannoo narí aunirira saqarisaaqari mina aqinoo qinau. Qusasaa anee faqa mifa faqa Anutuna afusaa kikiqifara anee sia fee Anutunara rufiaidanee mi manda ufana q inanee doo maasa namu Roomma maqannaa moodaa ufa ameemaanai maridaqa, maqee kuquanaura. Maaqanda kuqirafa andeeqanoo maridanoo, anindiri qeeqa ummaarara kuquanaura maa fasiqafa mandainaina siaifa kuquannoo.
LUK 23:42 Miqi qimaseenoo mi fasiqafa quandaki Yisuna qimaminoo qinau, Oo Yisu, anee aneenna ququsaki karaambaiqaikinana sia qiniara aunua, iria, qufanoo Yisufa qimaminoo qinau, Doo ani qimamidaqa maqee faasaana anee qini faqa innaarunai marinnaranoo.
LUK 23:44 Suani qambaanai akiaqa amummaqa suani qarafa taikafufanoo aiqama maqa maaqai asukuna arufanoo suani afu fannoo amannauna arufufanoo asukuna taikafufanoo suanifannoo kafaa qanau.
LUK 23:45 Asukuna kaqi marufanoo Yeerusaree naaquqara amaana maqaki ititara qamunna firaafa qambaana narí kai anaqinau.
LUK 23:46 Yisufa faqa miqoo kai firaa kari faaqa quqasee qinoo qinau, Oo qipoo qeeqa qimana ani asaukuki quqeeqa qimasee doo kaaqa kuqinau.
LUK 23:47 Sundiauqa rakisirafa miqoo maridanoo mi aiqama ainaina qafamaseenoo Anutuna amooqidanoo qinau, Oo maa fasiqafa amiqira fasiqa mariifa kuqinoo.
LUK 23:48 Faiqí anaasee moomoosa ani qafaida mariusa Yisufa kuquna qafamaseeqa anirandee nimaaqai fidaqa nimuqusi marufaqa ikifaafau iqa fidaqa mandaikammiqau.
LUK 23:49 Moomoosa Yisunara amiqi mandee irimarusa faqa aanaaseeuqa Kariree maqa maaqaindari Yisuna faqa anusa faqa sia dauni fifainiqau kaqi marida nianai marida qafee mariqau.
LUK 23:50 Faiqí moo Arimateea maqusaindaraafa Yeerusareenni animarufa mina auqu Yooseefaafa, sia Yisuna akoofau, mina amarafa.
LUK 23:51 Mifa amiqira fasiqa kaaqa andeeqara fasiqa, Anutuna ququsa innaarunaindari maqasaa kambiqaaninnanara afeesara marufa marinau. Mifa Yuda maqannaa ufa suqiranaki keeqeemarufa Yisuna arirara qufanoo qaoo qimarufa marinau. Yisufa kuqufanoo mi fasiqafa andeeqasee Piratoona oopisaki keeqafinoo irammirinoo qinau, amanee qinee Yisuna iri mara quqaanauree qufanoo Piratoofa irisee eedoo qinau. (Yisuna aukuana narí maqannaasa maaqimase madika indufusaida kuqufusa nikundee mariqau. Misa ooni firaana kasaaqa aamara auquseeqa minaki keeqafufaqa dinni dinni moomoo aamara auqiiseeqa kuqusa minakiaqa naadu naadu nikundee mariqau. Moodaa kai moo kari akundeeqa mina afunda taikoofanoo kaifaa moo fannoo kuqufaqa miqi kai imariqau; Sia moodaa karifau nikundee mariqau. Moo kari moo kari nikundee mariqau.) Piratoofa eedoo qufanoo narí akoona amarafa oonuree Yisuna iri aunirira saqarisaaqaraana maraseenoo qamunnannai kukuqamaseenoo mara maree ooni aamara indufirafa fuka marunaki sia moo minaki akundarafa marunaki minaki Yisuna iri quqanau.
LUK 23:54 Mooseena sandufa faiqí aunirira saqarisaa dirirara amaana faasaanara qaoo qinoo marunara mi eenoonnai nariqa amaana faasaana adeedi ranoo marufanoo dauni dauni Yisuna iri mareeqeenoo ooni aamaraki quqanau.
LUK 23:55 Karireendaraa aanaaseeuqa Yisuna faqa anusa Yooseefaana amarana faqa ooni aamaraki quqeemarufaqa qafamaseeqa oonurandee aniree nári oosana mareeqa nári marasinna fadameena oosana oosana Yisuna irisaa aku amaqarara anirandee oonu deedaqiqau. Saririqasaa misa Mooseena sandufamau fiqa nári amaana fee qimasee adooaqau.
LUK 24:1 Mi anaaseesa nári maqannaasa amaana faasaana Saririqa adooamaseeqa faiqee duna kananaana maasa amaanasaa kananaana eendai mi fadameenna marasinna ainaina deedaqamaqoona mareeqa Yisuna akundoo oonina aamaraki keeqarara fiqau.
LUK 24:2 Oonureeqa qafoofanoo narí kai ooni firaatia kooqisaa ititaqoofa quanda quandammeeqee kaqinni quqaqoofaqa qafamaseeqa kaqi keeqafi Yisuna iriara randoosia qafoofanoo sia marufaqa kaqi kikiqiqa maridaqa naqi fee ianaura naqi fee ianauree qidaqa tautu masee qafoofanoo qaara fasiqa kaaqa areenee maru qamunna afisira qanda misa naaqa kambiqafiqa kikiqiqau. Kikiqamafufaqa nindafeeqa qifu qafaanoo qimaseeqa ninuka tuqu naumoo amisoofaqa mi faiqiqanda qimannimiqa qiqau, innee nanaree findifimari fasiqanara kuqirausakiaqa randaidee.
LUK 24:6 Mifa sia maaqoo maridanoo, mifa findifinoo doo mifa fifinoo maridanoo. Mifa ooqai Kariree maqa maaqaki maridanoo inni qimannimimarufaqa innee iriusa sia fee iridee minara randaidee. Mifa maaqi qimasee inni qimanniminau, qinee faiqí nimaaku qini mareeqee manda fasiqa nisaukuki quqeefaranoo. Quqasaifaqa aunirira saqarisaa pirimmannai darusaifanoo qaaramoo faasaana inanoo Anutufa qini uqeera qisaannoo fee qufaqa innee sia irusee.
LUK 24:8 Miqi qimasee qimannimufaqa misa Yisuna ufara iriseeqa oonurandee maqusai anireeqa Yisuna faiqi namu qisaukuqara taikasee qikunni ooqu moodaa marasee marusa faqa faiqí anaasee akaqausa faqa mi ainaina ooni aamaraki oonu qafoonara qimannimiqau.
LUK 24:10 Mi anaaseesa nuqu Mariana amarafa Makadara maqusaindaraafa faqa, Yooannafa faqa Mariana amarafa moo Yameesana anoofa faqa akaqausa mi ainainausara Yisuna faiqi namu qimannimufaqa furufarufa maasa qimaqimiaafoo qimasee sia amiqimasee iriqau.
LUK 24:12 Peetooroofa misa ufa iriseenoo findimeeqee quqasee sandeenoo ooni aamaraki kummaramafufanoo mara meera qafoofanoo Yisuna iri kukuqu qamunnafa kai minaki marufanoo qafamaseenoo oonurandee aatata narí amaaqai fidanoo minauqaindiara irinoo finau.
LUK 24:13 Mi faasaannakai Yisuna faiqi namukiqari Yeerusareendari Eemausa maqusai fidaqara Yisuna arusoofanoo sia madikaki marunara narí qimami narí qimami qiqa fiqau.
LUK 24:15 Miqi qiqa fidaqa narí qimami narí qimami qimarufanoo Yisufa narí uqanna anireenoo miqanda faqa fimarufaqa miqanda qafamasee sia naaqoo irinau.
LUK 24:17 Yisufa qimanniminoo qinau, inneeqara aatata fidaqa nanaree narí qimami narí qimami qiqa fidee qufaqa miqanda irisee kasoomambufaqa noori runusee moo fannoo Kareeoopasafa Yisuna qimaminoo qinau, maa eenda ufana Yeerusaree maqusai ufa firaafa kambiqaina anee kai fee sia irinee qufanoo Yisufa qinau, nana ainainee kambiqeenoo fee qufaqa miqanda qiqau Yisuna Nasareetee maqusaindaraana arunara maaqanda qidaqa. Mi fasiqafa Anutuna tamummaqara fasiqa marufaqa Anutufa faqa faiqí anaasee faqa mina ufara faqa mifa auqo̱o ainainara faqa uriqararafa afeeka fee qimarufa marufaqa maasa aanaiqikirausa uriqararausa faqa maasa faiqí firaasa faqa Roomma maqannaara aruaqee qufaqa aunirira saqarisaa pirimmannai ariqau.
LUK 24:21 Mi fasiqafa maasa Isaraee maqannaa karaambaiqa Roomma maqannaa nisaukukinaana maasa qumaraaninna fee qidaqa asasimariafannana marufaqa kuqa ariqau, Maqee faasaanaqari mifa kuquqoo qaaramookifaqa maridaqa.
LUK 24:22 Maasakiqari anaasee akaqausa narí akundoo ooni aamaranai oonu qafaafanoo sia mina iri mari qafeeqa nifu pisipasa mandoofaqa qangiroo kai qafaafanoo qimanniminoo qinoo Yisufa kuqiranaki findifinoo qiafaqa maasakiqari akaqausa ooni aamarai oonu qafaifanoo anaasee indee kai inoo Yisuna kai sia qafeeqa.
LUK 24:25 Yisufa miqi quna iriseenoo kafaa miqanda maaqi qimasee qimanniminau. Oo furufarira qanda mariafanoo Innee sia dauni Anutuna tamummaqara fasiqa ufa iri mariafanoo kaaqa inneeqara anuqi mariafanoo.
LUK 24:26 Anutuna tamummaqara fasiqauqa asauku mundiranara mi oosana oosana aupurararana marasee miqooqari narí areenaranaki keeqaannoo fee qimaqoofanoo naqimasee fee sia kambiqarara, kambiqaannoo. Miqi qimaseenoo Yisufa Mooseena sandufa akarakinaanasaa oosana araseenoo tamummaqara fasiqa aiqama akarakinaana nariara akara rumaqoonara miqanda qimanniminoo aatata fimarinau.
LUK 24:28 Miqinoo ufa qinoo fifiufanoo Eemausa maqusa adeedi ramaseenoo Yisufa kaqi finoora foora ufaqa miqanda rafaaqa fidaqa qiqau.
LUK 24:29 Doo suani keeqaifanoo asukunaikidanoo anee maasa faqa ani maria qufanoo Yisufa eedoo qimasee misa faqa oonu marinau.
LUK 24:30 Miqanda narana deedaqi isee ooqu marifi naaneerufanoo Yisufa feemu maraseenoo Anutunara dufi dufi qimaseenoo ruqi ruqi maseenoo nimufaqa misa irirafa misa nifu faqa kambiqoofaqa oo Yisufammifoo qufanoo Yisufa doo miqooqari taikafinau.
LUK 24:32 Taikafufaqa miqanda narí qimami narí qimamiqa qiqau maaqanda aanai ani marunanoo mifa maaqanda faqa anidanoo akarakinaana maaqanda qimaqimimarifanoo maaqanda daundurai idara foora qamafi qimbafi imarifaqa maaqanda sia minara iriqau.
LUK 24:33 Miqi qimaseenoo miqanda aaqee quqasee Yeerusareenni kafaa fiqau.
LUK 24:34 Oonureeqa miqanda Yisuna faiqi namu qisaukuqara taikasee qikunni ooqu moodaa marasee marusa akaqausa namufaqa moodaaqoo marunaki miqanda oonureeqa mina faiqi namu qimannimiqa qiqau. Doo karaambaiqa kuqiranakiqari findfiinoo Simoonafa doo qafeenoo qufaqa miqanda nariqa aanai fi paquri funara faqa feemu marasee ruqi ruqi mandee nimufanoo nifu faqa naaqoo faqa irunara nári qimannimiqau.
LUK 24:36 Miqanda nári qafoonara qimannimimarufanoo karaambaiqa narí uqanna tautumannimaqasee nifusaa kikiqamambinoo qinau, innikina asooarafa mariani qufaqa aiqamausa tautumandee afaannee qimasee firaaqoo rufiaqau.
LUK 24:38 Yisufa nindafamaseenoo qimanniminau. Naqi fee ifaqee qaara irirafa inni naaqoosaa rinoo fee qini qisauku faqa qiku faqa pirimma daruqoona qafaaqa qinee qeeqa uqanna maridaqa. Innee aniree qini duqamasee qafaaqa qimaqi faqa qimudaani faqa kaqi maridanoo afaanna fannoo sia miqirafa maridanoo.
LUK 24:40 Miqi qimasoofaqa firaaqoo asasamasee oo doo kuqaa narimmifoo qimasee kafaa afaannasaaqari ani maridanoo fee qimasaida quqasaida rufiee mariqau. Miqi marufanoo Yisufa uqannifiqararee qimaseenoo irammirinoo qinau inni narana moo marinaqa qimifaqa naa qufaqa misa noodaanna aafaqa mareeqee amufanoo aiqamausa nifusaa qumaree nanau.
LUK 24:44 Namaseenoo maaqi qimasee qimanniminau qinee inni faqa kaqi maridaqa maa dariranara kuqiranara findifiranara qimannimiaafanausa maridaqa. Mooseena sandufa faqa tamummaqara fasiqauqa ufa faqa Dafidina idi akaraki faqa qiniara akara rumaqoo ufafa naqimasee sia kambiqararee doo mina anoona kambiqarana qafaafanoo.
LUK 24:45 Miqi qimasee Yisufa misa tamummaqara fasiqa ooqeenaa akara iriaqeera misa irirana quandaseenoo qimanniminoo qinau maaqimminoo akara oosana maridanoo, Anutuna asauku mundirafa aupurarana maraseenoo qaaramoo faasaana marinoo kuqiranakiqari findifinoo miqooqari Yisuna ufa irimariasa faiqí anaasee fuki faaki qimasee qimannimimarifaqa nári mandainainara nikooqamaseeqa Anutufinnai quandaki nári mandainaina akiaqara asauku mundirana auquara qimamifanoo minninnisaani, miqiqa ufa qimannimirafa faqa mandainaina minnisarafa faqa Yeerusaree maqusai oosana araseenoo aiqama maqa maaqai qimannimirafa daraanianno.
LUK 24:48 Innee qini qiqoondiuqa mi ainainausa qafee marusa mariafanoo.
LUK 24:49 Qini qikoofa Anutufa narí maraquna afeeka nimimari maraquna inni nimiraree qimasoona qeeqa kai oorureeqa niqiqaanaqa qumuree inni afeekaikamma nimaqaannoo. Innee sia Yeerusaree maqusa minnisaaqa maaqoo kai marifanoo naakufinaqa fifainiaqa.
LUK 24:50 Yisufa narí faiqi namu faqa narí aqoondiuqa faqa Yeerusaree maqusaindari nifiqeenoo Beetani maqusa amummaqa oonureenoo narí asaukuqara uqeeraseenoo nifaaqooqa qimannimaqaidanoo narí faiqi namu minniseenoo uqeerakinoo innaarunai ooru finau.
LUK 24:52 Miqoo marusa mina qafamasee Anutuna amooqimasee quandaki nimuqusaki asasirafa qumbiqafufaqa Yeerusareenni kafaa oonu maridaqa faasaambaasaana naaquqara amaana maqaki keeqafidaqa Anutunara dufi dufi qimamaqee mariqau.
JOH 1:1 Ooqai maa maqa maaqafa sia marunakinai Anutuna afeeka ufara foora Yisufa marinau. Mi afeeka ufara foora Yisufa Anutuna faqa marinau. Mi afeeka ufafa Anutufa kai marinau.
JOH 1:2 Oosana aroonakina mi ufafara foora Yisufa Anutuna faqa marufa marinau.
JOH 1:3 Mi ufanannai Yisunannai aiqama ainaina kambiqaqoofanoo maridanoo. Sia moo ainaina sia minannai kambiqanau. Aiqama ainaina mina Yisunannai kai kambiqanau.
JOH 1:4 Aiqama kambiqoo ainaina mina Yisunasaaqaraa marirana maraseenoo doo maridanoo. Mi marirafa maa maqanasaaqaraa fasiqa anaasee naundurai qoomara foora aurau rimarifa maridanoo.
JOH 1:5 Mi aurau rirafa asukunaki qaidanoo. Mi aurau rira qoomana asukuna fannoo sia amana qumaree rafaaqa fuannoo.
JOH 1:6 Anutufa qumee dadaaqufanoo maqasaa fasiqa moo nammari nimimaru Yoohaneefa kambiqafufanoo Anutufa qini saikaki fuannee qufanoo narí saikaki ani marinau.
JOH 1:7 Yoohaneefa kooroo irafa animarinau. Mi qoomana Yisunara kooroo irara aninau. Aiqama fasiqa anaasee mina ufa irisee Yisunara kuqaa anoonee qiaqeera aninau.
JOH 1:8 Mifa Yoohaneefa sia mi qoomafau marinau. Kaqi mi qoomanara kooroo ianifeera animarinau.
JOH 1:9 Anutuna ufa fannoo Yisufa anoona aurau rirafa marinau. Mi aurau rirafa faiqí aiqamausa naunduraki qeemarufa maridanoo maqasaa faiqi aanaaqi kammafinoo maa maqa maaqanaki quminau.
JOH 1:10 Mifa maa maqa maaqanaki ani marinau. Anutufa mi ufana Yisunannai maa maqa maaqanakinaa fasiqa anaasee auqu quqasoofanoo misaki akooqoo qumu marufaqa sia minara iriqau.
JOH 1:11 Mifa narí auqu maqa maaqanaki aniroofaqa mina maqannaasa minaki mariasa mina mareeqee aqusee minnisaqau.
JOH 1:12 Akaqausa asasammasee maroosa Anutuna ufa Yisufa misara innee Anutuna faiqi kamambi mariaqee qira ufa niminau. Minara kuqaa Anutunee qimasee naundura amimarusa mina faiqi kamambi mariaqee qira ufa niminau.
JOH 1:13 Anutuna faiqi miqimariasa kambiqafi mariasa sia maa maqa maaqanaki mariasakiqari kambiqaqau. Sia faiqí faiqi imariandeefau mafi kambiqaqau. Sia faiqí nári iriranannaifau Anutuna faiqi kammafi kambiqaqau. Anutuna iriranannai kai kambiqafufaqa mina faiqi namukiqau.
JOH 1:14 Mi ufafa Anutuna anoona ufa Yisufa faiqí faiqi kamambinoo maasaki qumu marinau. Qumumarufaqa mina afeeka eeraarirana maasa mina faiqi namu kuqaa qafaqau. Mifa narí akoona amaaku moodaa marunara narí akoonasaaqaraa afeeka eeraarirana faqa kaqi afaarirana faqa kuqaa anoona ufa qirana faqa maraseenoo qumbiqanoo maruna qafaqau.
JOH 1:15 Yoohaneefa nammari nimimarufa minara Yisunara kooroo inau. Mifa maaqi qimasee faiqí anaasee qimanniminoo qinau. Ooqai qinee qimannimiqia. Moo fannoo qini qinaaqianna aniannoo. Qinee kambiqaafannaqoo mifa ooqai mariufa marifaqa qini uriqarara fee qiafanafa maana Yisufa mifa maridanoo. Yoohaneefa miqi qimaseenoo minara qimanniminau.
JOH 1:16 Yisufa maaqoo qumu maridanoo narisaaqaraa amiqi amiqirana amuaaqa amuaaqa moomoo maasa aiqamausa qimufaqa mareemariqiafana.
JOH 1:17 Anutufa Mooseenannai narí sandufa narí amusufa maasa qiminau. Asauku mundirana Yisunannai narí kaqi asasamandee nimirufa faqa kuqaa anoona ufa qirana faqa maasa qiminau.
JOH 1:18 Sia moo fannoo Anutuna qafee marufa marinau. Narí amaaku moodaa narí akoona amuqusa uqanna mifa kai narí akoona faqa marida qafamaseenoo maa maqanasaa maasa qimannimirara quminau.
JOH 1:19 Yoohaneefa Yisunara kooroo qu ufafa maaqimasee animarinau. Yuda maqannaasa amaana maqa aanaiqikirausa faqa amaana maqaki dapi saika maree marusa misara Reefina aiku asauku fee qimarusa misa faqa Yeerusareenni suqufufaqa ufa qimaseeqa faiqí akaqausa nifeeqasee niqiqoofaqa Yoohaneenara irarara ooqufiqau. Yoohaneefa nammari nimimarufunnai Yooradanna nammarinni ooqureeqa maaqi qimasee iraqau. Oo Yoohanee, Anutuna tamummaqara fasiqauqa kambiqaaninna tamummaqara fasiqanara akara rumaqoofa anee maana mifee yafee.
JOH 1:20 Yoohaneefa misa ufa iriseenoo sia kaqi ufa qinau akooqoo kooroo qimasee qimanniminau. Qinee sia asauku mundirausau maridau.
JOH 1:21 Misa minara iriseeqa kafaa iraqau. Anee Eeriaafee maridanee. Maasa qimaqimia. Miqi qufanoo Yoohaneefa qinau sia qinee misau. Miqi qufaqa misa iraqau. Anee mi tamummaqara fasiqanara akara rumaqoo fee maridanee. Miqi qufanoo Yoohaneefa sia fee qinau.
JOH 1:22 Sia fee qimasoofaqa misa quandaki qiqau. Maasa niqiqaasa nana ufa fee aniara qimannimianauree. Anee yafee. Anee aneennara naqi fee qidanee.
JOH 1:23 Yoohaneefa misa ufa iriseenoo maaqi qimaseenoo qimanniminau. Anutuna tamummaqara fasiqa Eesaiaafa ooqai maaqi qimasee qiniara akara rinau. Qinee karaambaiqara nammeera qimasee qimannimira fasiqausa maridaqa. Kaasau maqa maaqakiqari maaqi qimasee nammeeraqidaqa. Innee karaambaiqa anianinna aanna andeeqaseeqa afisuaqa.
JOH 1:24 Yeerusareendari niqiqoosa misa Farisai amaana ufa qimarusa misa mina iriseeqa kafaa irammiriqau.
JOH 1:25 Oo Yoohanee, anee sia asauku mundirafa maridana. Anee sia Eeriafa maridana sia anee mi tamummaqara fasiqafa maridana. Anee sia misa maridana naqi fee idanee nammariki keeqannimaqaidanee.
JOH 1:26 Yoohaneefa misa ufa iriseenoo maaqi qimasee qimanniminau. Qinee nammariki faiqí anaasee keeqannimaqaidaqa. Inni qambaanai moo fannoo maridanoo innee minara sia irimariafanoo.
JOH 1:27 Mifa qini qinaaqianna anianinafa qini uriqararafa mariannoo. Naqimasee fee qinee mina dadaaqianauree. Qinee kuqaa ooreeqararausa uqanna maridaqa.
JOH 1:28 Yoohaneefa Yooradanna nammariki Beetani maqusai dinni afainni nammariki keeqannimaqee marufaqa misa aniree miqi qimasee iree mariqau.
JOH 1:29 Iqaqoofanoo kananaana Yisufa Yoohaneefunnai ooqu fimarufanoo Yoohaneefa qafeenoo narí faqa marusa maaqi qimasee qimanniminoo qinau. Innee qafaaqa maa fasiqafa Anutufa nifaueemari aandau aanaaqi narí qaindasaa kuquaninna aandaufa maasa aiqamausa maa maqanasaaqaraasa mandainaina minannai maraquqiseenoo Anutufa darira ufa ateekaqisaaninafa maridanoo.
JOH 1:30 Eenda qinee minara maaqi qunafa maafa qinee sia mariafanna kamuqoo marunara qini uriqararafa maridanoo qini qinaaqianna kambiqafi aniraannoo qunafa maana mifa maridanoo.
JOH 1:31 Qinee minara sia irimariafanausa maridaqa. Isaraee maqannaa nifusaa kooroo qiaqeera nammari auqamannimaqaqa anidaqa.
JOH 1:32 Yoohaneefa maaqi qimasee Yisunara qinau. Qinee Anutuna maraquna qafaunanoo mifa nakipurunaika mafinoo innaarunaindari qumureenoo Yisunasaa quqeenoo.
JOH 1:33 Qinee qeeqa kai asauku mundiranara sia amana mifee qianaura. Maa saikanara diqiqoofa Anutufa maaqi qimasee qimaqiminau. Anee faiqí moo qafainanoo qini maraquna fannoo akooqoo minasaa mundufinnanara minara faiqí anaasee qini naaquqara maraqunannai rumannimaqaanina fee qinnaranoo.
JOH 1:34 Maafa Anutufa rusandeesamu masee maroofa narí amaaku uqanna maridanoo. Qinee qeeqa qifunnai qafeeqa inni kooroomannimaqaidaqa.
JOH 1:35 Kananaana iqaqoofanoo Yoohaneefa nammari afainni narí ufa irimaru fasiqa qanda faqa marufanoo Yisufa aiqaranau.
JOH 1:36 Aiqaroofanoo Yoohaneefa amiqi mandee aiquqummaseenoo qinau. Innee maana qafaaqa Anutuna aandau aanaaqiara foora qaindasaa maasara kuquaninafa aiqaqaidanoo.
JOH 1:37 Yoohaneena ufa irimaruqanda mi ufana irisee Yisuna doo afaqee fiqau.
JOH 1:38 Afaqee fimarufanoo Yisufa quandafi nindafeenoo qinau. Inneeqara nanaree qini qifaqee anidee qufaqa miqanda qiqau. Ufasaa rakisira anee yai fee maridanee.
JOH 1:39 Yisufa iriseenoo qimanniminau doo aniree qafaaqa qufaqa miqanda mina faqa oonu mina maaqa qafamasee eenaanianna oonu qafamaseeqa mina faqa kaqi kaaqoo mariqau.
JOH 1:40 Mi fasiqaqanda Yisuna maaqa oonu qafamasee mina faqa maruqanda miqandakiqari moo fannoo Andurufa marinau. Mifa Simoona moo auqu Peetooroona akaqa marinau.
JOH 1:41 Andurufa narafasaana Simoona moo auqu Peetooroona kaqi kaqi paqurimaseenoo qimaminoo qinau. Maasa Anutuna asauku mundira fasiqa kambiqaannoo fee qimaqoofa doo maasa paquriqa qimaseenoo mina afiqammaree Yisufinnai finau.
JOH 1:42 Oonuroofanoo Yisufa Simoona aiquqummaseenoo qinau. Anee Yoohaneena amaaku Simoonafa mariananoo. Qinee aniara Keefasanee qianauree qinau. Mi auqu oosanna ooni fee qinoo maridanoo.
JOH 1:43 Moo kananaana Yisufa Kariree maqamaaqai fuaneera aanai Firipina paqurimandeenoo qimaminoo qinau. Doo Firipi qini faqa doo aniannee qinau.
JOH 1:44 Firipifa faqa Andurufa faqa Peetooroona faqa Beetasaida maqusaindari moodaa maqusanaasa mariqau.
JOH 1:45 Firipifa Natanaeeranara randasee paqurimaseenoo qimaminau. Mooseefa Anutuna sandufasaa faqa tamummaqara fasiqausa faqa kambiqaaninna fasiqanara ooqai akara rumaqoona maasa paquriqa. Mifa Yisufa Yooseefaana amaaku Nasareetee maqusaindaraafa maridanoo.
JOH 1:46 Natanaeerafa qinau, Akasaa naqimasee amiqira ainaina Nasareetee maqusaindari kambiqararee, sia kambiqaannoo. Miqi qufanoo Firipifa qinau aniree doo oonu qafa.
JOH 1:47 Firipifa mina afiqeenoo oonu roofanoo Yisufa Natanaeerana qafamaseenoo qimaminoo qinau. Oo maafa Isaraee maqannaa faiqí uqanna anidanoo. Sia qunna ufa minaki marifa andeeqarafa kai marifa maridanoo.
JOH 1:48 Natanaeerafa minara iriseenoo tautumaseenoo maaqi qimasee Yisuna qimaminau, anee naqi fee masee qiniara iridanee. Yisufa iriseenoo maaqi qimasee qimaminau. Natanaeera faasai Firipifa sia ani paquriqoo anee aneenna maqusai aneenna faafisa atukaki nianai marianaqa qinee ani aundurakinaa oosana faasai qafeeqa.
JOH 1:49 Natanaeerafa iriseenoo tautumakufanoo qinau. Ufasaa rakisirafa anee Anutuna amaaku marianafa. Anee Isaraee maqannaa karaambaiqa marianafa mariananoo.
JOH 1:50 Miqi qimasoofanoo Yisufa qinau. Qinee faasai faafisa atukaki mariana qafaunnanara minara qunnanara anee minaree qiniara Anutuna amaaku fee qidanee. Qini ufa iria. Maqee kaqikaaqoo uqafiqaunana qafaananoo. Kasooqaqee anoona firaaqoo uqannifiqaanaura.
JOH 1:51 Miqi qimasee mina faqa marusa qimanniminoo qinau. Qinee anoona ufa qimannimidaqa kasooqaqee innee innaarunai kudimanda rakee inaqa qafaifanoo qangiroouqa faiqí nimaaku qini qimummaqa ooraini qumaini imarifaqa nindafeefaranoo.
JOH 2:1 Qaara faasaana aiqaroofanoo Kannaa maqusai Kariree maqa maaqaki moo maqusaki maanaaqa amundarafa marinau. Yisuna anoofa Mariafa mi qoomaqanaki dadaaqidanoo marinau. Qoomaqa suqoosa Yisuna faqa narí faiqi namu faqa naaroofaqa fiqau.
JOH 2:3 Mi maqannaasa oosana maaqimminoo maridanoo. Maanaaqa nimundararee qimasaidaqa narana faqa uainna nammari nári maqee maqee nee maria nammarifa faqa namammaree munusaida nimundee mariqau. Mi qoomaqanaki uainna nammari namammaree kasaaqa munu taikasoofanoo Mariafa narí amaaku Yisuna qimaminoo qinau. Qini qimaaku doo uainna nammari taikanoo maridanoo.
JOH 2:4 Yisufa mi ufana iriseenoo narí afeeka kooroomma nimaqaaninnanara iriseenoo qimaminoo qinau. Oo qinnaqeefoo nanaree anee qini iraidanee. Kasooqaqee qinee firaa ainaina oosana oosana faiqí sia auqee mariana auquanaura anee maqee kasaaqai qimariananoo.
JOH 2:5 Yisuna anoofa mina iriseenoo quandafinoo qoomaqa dadaaqimaru fasiqausa mara quqaqoosa maaqi qimasee Yisunara qimanniminau. Nana ainainaree maafa qinaqa mifa qinandee kai iaqa.
JOH 2:6 Mi maqanaki ooni qafee firaafauqa dinni qisauku taikasee dinni ani moodaa marasee marinau. Yuda maqannaasa nári imarudeemasee minakina nammari marasee nisaaqumasaida narana neemariqau. Aiqama ooni qafee tintaramma miqirafa firaafauqa marinau. Nammari moomoo saka adiee marusauqa mariqau.
JOH 2:7 Yisufa qoomaqa suqara faiqiuqa mara quqaqoosa qimanniminoo qinau. Innee nammari sakasee maa ooni qafeesaki adiee marifanoo afaisaa kai uruani. Yisufa miqi qimasoofaqa misa aiqama mi ooni qafeesaki saka adioofanoo afaisaa qumbiqaqau.
JOH 2:8 Saka adia qumbiqasoofanoo Yisufa qimanniminoo qinau. Innee minakinaana sakamaree qoomaqasaa rakisimarina amifanoo namasee qafaani.
JOH 2:9 Miqi qimasoofaqa misa miqimmiqau. Qoomaqasaa rakisirafa mi nammarifa uainnaikamafuna oosana siamma irinau. Qoomaqa suqeemaru ainainira fasiqausa misa kai iriqau. Qoomaqasaa rakisirafa namasee qafoofanoo amundoo aanaaseena afaaqi aaramaseenoo qinau.
JOH 2:10 Aiqama qoomaqa suqee mariasa amiqira uainna naaree indaaru nimiafaqa naidaqa. Neeneesaafaqa inaaqianna manda uainna nimidaqa. Anee sia miqiananoo amiqira uainna uqanna kai inaaqianna nimiananoo.
JOH 2:11 Miqinoo Kariree maqa maaqaki Kannaana maqusai Yisufa narí saika oosana araseenoo faiqí sia auqoo ainaina amiqira oosana auqamasoofaqa faiqí anaasee qafaqau. Mifa mikari narí afeeka firaana uqannifiqoofaqa mina ufa irimaru fasiqausa Yisunara kuqaa Anutuna amiqira afeeka uqannifiqee mari fee qiqau.
JOH 2:12 Miqooqari Yisufa narí anoona faqa narí akaqaafasaa faqa narí ufa irimarusa faqa Kapeeranaumma maqusai ooqu fiqau. Miqoo ooquree qaaramoo faasaana kaqi marinau. (Ooqai Anutuna qangiroo moo fannoo Isaraee maqannaasa ainnaaqareenoo Isipa maqannaasa ooqa faiqiuqa kuqa narufaqa Isaraee maqannaasa quqasee sandaqau.)
JOH 2:13 Isaraee maqannaasa mi ainnaaqarara qoomaqana suqarara deedaqufanoo Yisufa minni Yeerusaree maqusai ooru finau.
JOH 2:14 Oorureenoo Yisufa naaquqara amaana maqaki keeqafinoo oonurama nindafoofaqa faiqí mi naambeeqanai marida Anutuna tatufirana suqararee qidaqa burimakau sipsipa nakipuruna narinni narinni feefaurimariqau. Miqidaqa firaa munnimma maraidaqa qummuaraikammi mariqau. Faiqí anaasee kaamanna munnimma mara maree munu nimufaqa misa naaquqara maqakinaa munnimma nári nimimariqau. Mina faqa amaana maqasaa rakisirausa nári faqa qummuaraikammi mariqau.
JOH 2:15 Yisufa anirama nindafeenoo sanda kukuqamma qumareenoo mi samuna burimakau sipsipa faiqí naru nifaqaaufaqa quqasee sandaqau. Munnimma kukuqimaru qaindausa ani qumareenoo teeqi maqusoofanoo mi munnimmausa maqandanandanamminau.
JOH 2:16 Mina miqimaseeno nakipuruna feefauru maree marusa maaqi qimasee qimanniminau. Maa ufinisa maanakinaana maanakiqari kai doo maree fifuaqa, sia mariaqa. Qini qikoona maaqa maa maqafa maridanoo. Innee sia mina marasee dapi feefaurira maqa fee qiaqa.
JOH 2:17 Miqi qimasoofaqa Yisuna faqa nimarusa ooqeenaa Anutuna tamummaqara fasiqauqa akarakinaa ufara oonumafi irisee qiqau. Ani maaqara qiqa didirafa idara foora qaidanoo fee qiqau. Yisuna faiqi namu minara iriqa maaqi qiqau. Ooqeenaa ufa anoona doo maqee Yisunaki kambiqeenoo fee qiqau.
JOH 2:18 Yisufa aandauqa amaana maqa naambeeqaindaraana niqiqamasoofaqa Yuda maqannaa uriqararausa quandafi Yisuna aqidaqa qiqau. Anee kuqaa karaambaiqa maridana faiqí sia amana auqeemaria ainaina firaa ainaina moo uqaqifiqainaqa maasa kuqaa aniara karaambaiqammifoo qianaura.
JOH 2:19 Yisufa mi ufana iriseenoo qinau. Amana, innee maa amaana maqana rapeemasaifaqa qinee qaaramoo faasaana kafaa uqeera kuradaanaura.
JOH 2:20 Yuda maqannaasa uriqararauasa minara iriseeqa qiqau. Akasaa maa maqana ooninnai auqimariafa firaafa maridanoo. Maasa qikeeku qikaaku (46) qaara fasiqa niku nisauku taikasee dinni taikasee dinni ani moodaa marasee aukuana aundurai maa afeeka maqana auquqoofa maridanoo. Anee naqimasee qaaramoo faasaana uqeera kuradarara qidanee.
JOH 2:21 Yisufa sia naaquqara maqara irinau. Narí afaaqara Anutuna naaquqara maqa fee qufaqa misa sia iriqau.
JOH 2:22 Yisuna faiqi namu faqa sia aaqee mi ufana oosana iriqau. Kasooqaqee Yisufa kuqiranakiqari findifufaqa miqoo Yisuna ufa irisee miqoo anoonara oonumafi iriqau. Miqoo faqa misa tamummaqara fasiqa akarara faqa Yisunara faqa kuqaa fee qiqau.
JOH 2:23 Mi fasannai ainnaaqarara qoomaqa kamuqoo Yisufa Yeerusareenni marufaqa moomoosa mina sia faiqí amana auqeemaria ainaina qafamasee kuqaa Anutuna asauku mundira fee qimariqau. Maa fasiqafa Anutuna afeeka eeraarirana kooroo imarifa maridanoo fee qimariqau.
JOH 2:24 Yisufa minara irinoo sia misaki paasoosamandee afaaqa quqanau. Mifa faiqí naunduraki irufanoo sia amanaikufanoo.
JOH 2:25 Sia moo fannoo faiqí naundurakinaana qimamiqau. Narí kai amiqimandee aiqamausa naundura mandirirana niqafamaseenoo misaki sia afaaqa quqanau.
JOH 3:1 Farisai amaana ufa qimarusaki faiqí moo auqu Nikoodeemusafa Yuda maqannaasa uriqararafa moo fannoo marinau.
JOH 3:2 Mi fasiqafa moo eenda asukunaki kukeeqakufanoo Yisufa maruqoo anireenoo qimaminoo qinau. Oo ufasaa rakisirafa anee Anutufinaindari anianafa ufasaa rakisirafa marianaqa maasa minara iridaqa. Sia fifau fasiqa narikai qinanoo faiqí teeroo ainaina aaqee taikaannoo, anee ianandee qiananoo taikaannoo. Anutufinaindari anianafa mariannanara mi afeeka ainaina auqimarianaqa maasa iridaqa. Anee nanufa fee maasa qimaqiminnaree.
JOH 3:3 Yisufa iriseenoo narí qimaminoo qinau. Qinee anoona ufa ani qimamianaura. Faiqí Anutufinaindari kafaa fukasaa aanaaqi aanaaqi kamafinausa kai Anutuna ququsaki keeqeefaranoo. Kaqi marinausa sia amana fifaranoo.
JOH 3:4 Nikoodeemusafa mi ufana iriseenoo kafaa Yisuna irammirinoo qinau. Naqimasee faiqí firaafa kafaa aanaaqi kamambinoo fee, narí anoona aranandaki keeqafinanoo fee kafaa maqaannoo fee. Yisu sia amana, sia minara qimariananoo.
JOH 3:5 Yisufa iriseenoo qimaminoo qinau. Qinee anoona ufa ani qimamidaqa. Faiqí kaqimarinausa sia uqanna Anutuna ququsaki keeqeefaranoo. Anaasee aranandaki kambiqainausa quandafi Anutuna maraqunannai faqa fukasaa aanaaqi kamafinausa kai Anutuna ququsaki keeqeefaranoo.
JOH 3:6 Faiqí nimaqifaqaasa quandaki nimaqifaqaasa maqeefaranoo. Anutuna maraquna fannoo quandaki maraquna faqaasa Anutunara irirana faqaasa maqaannoo.
JOH 3:7 Qinee aniara kafaa fukasaa aanaaqikinana kambiqaannee qunana sia anee minara irisee tautia.
JOH 3:8 Ufai oosana iria. Yaindari anidanoo fee. Yai fee fidanoo fee. Narí iriranamau fifana anee ufa kai irimariananoo. Anutuna maraqunannai faiqí moo fukasaa aanaaqi kirausa miqi kai idaqa. Anee sia mina oosana qafeennaranoo.
JOH 3:9 Nikoodeemusafa mi ufana iriseenoo Yisuna qimaminau. Naqimasee maa ainainnafa anee qianandee iannoo fee. Sia qinee minara iridaqa.
JOH 3:10 Yisufa iriseenoo maaqi qimasee narí qimaminau. Anee Isaraee maqannaa rakisirafa firaafa moo fannoo marianafa mariananoo anee naqimaseenee maa ufana oosana sia iridanee.
JOH 3:11 Qinee kaifaa anoona ufa ani qimamidaqa. Maasa irunna ufana kai ani qimamidaqa. Maasa qafee marunna ainainara kai inni qimannimiafaqa innikina moo fannoo sia maasa ufa irimariafanoo. Sia moo fannoo innaarunai ooru fimariasa maridaqa. Qinee faiqí nimaaku kai innaarunaindari qumuafanausa mindaraa ainainara irida maridaqa. Qinee maa maqanasaaqaraa ainainara ani qimamianana sia irinana naqimasee innaarunai ainainara qimamianana irinnaree.
JOH 3:14 Yisufa kafaa Nikoodeemusana qimamidanoo qinau. Ooqai aadana maqa maaqaki sakaniuqaindi Isaraee maqannaasa moomoo ukaqannimisoofaqa kuqimariqau. Mooseefa mina qafamasee koopaa saunu naaree auquseenoo mina aanaaqianna minannai kai sakani auquseenoo mi saununasaa kukukukuqamaseenoo doo uqeerasoofaqa kuqirarimarusa mina qafamaseeqa sia kuqiqau findifiqau. Qini faiqí nimaaku miqi kai masee qini darusee aunirira saqarisaa uqeera quqeefaranoo. Qinee miqoo airiqa marianaqa aiqamausa qini qiqafamasee irirana qinisaa rusirausa Anutufa narí naaru marirana nimiannoo.
JOH 3:16 Anutufa maa maqanasaa mariasara amuqusa firaaqoo qunara narí amaaku moodaa uqanna amiqirana maqasaaqaraasa nimuna mina saqarikinausa sia kuridiranaki fifaranoo Anutuna naaru mariranaki fuaqeera narí amaaku niminau.
JOH 3:17 Anutufa sia maa maqanasaaqaraa fasiqa anaasee narí ufa firaanaki mara aquanifeerau narí amaaku maa maqanasaa quqannisanau. Mifa faiqí anaasee nariranakinaana qumbaqeeqee naaru asumu mariranaki quqannisaanifeera Yisuna quqanau.
JOH 3:18 Maqasaa fasiqa anaasee Anutuna faiqi namukinausa mina saqarikinausa Anutuna narirafa sia misasaa maridanoo. Sia Anutuna faiqi namukinausa sia mina saqarikinausa doo ooqai Anutuna narirafa misasaa maridanoo. Misa Anutuna moodaa faiqiara sia misa nári irirana minasaa rusirai Anutuna narirafa minarakai doo misasaa maridanoo.
JOH 3:19 Anutuna narira oosana maaqimminoo maridanoo. Anutuna kaaqa qara qoomara foora Yisufa maa maqanasaa doo ani maridanoo. Faiqí nári oosana mandainaina maree marifanoo minara irinoo kaaqa qara qoomara Yisunara akooqaifanoo asukunara ridanoo.
JOH 3:20 Faiqí moo fannoo mandainaina maree marifa mifa kaaqa qaranara fidiaqaa imarifa sia faasaana kooroo iannoo. Narí manda oosana kooroo qianoo qimasee asukunaki kaqi maridanoo.
JOH 3:21 Yafa yafee moo fannoo anoona oosana marainafa mifa suanisaa qooma mariqoo aninafa narí Anutuna ufamau fimari oosanna akooqoo kooroo ianifeera akoosaqa anidanoo.
JOH 3:22 Mi aukuannai Yisufa narí faiqi namufaqa Yudeeaa maqa maaqaki ooquree marikinoo Yisufa qufaqa mina faiqi namu faiqí anaasee nammariki keeqamannimaqee mariqau.
JOH 3:23 Yoohaneefa nammari nimimarufa mifa faqa mi aukuanna moosaa faiqí anaasee nammariki keeqamannimaqee marinau. Mifa Saarimma maqusa aaqa Aeenoona nammariki keeqamannimaqee marinau. Miqoo nammari moomoo mandinoo marunara faiqí anaasee moomoo suqiqa marufanoo Yoohaneefa nammari auqamannimaqee marinau.
JOH 3:24 Yoohaneefa mi kamuqoo kaqi maru kamuqoo nammariki keeqamannimaqee marinau. Eeroodeefa sia karabusaki quqoo kamuqoo miqi marinau.
JOH 3:25 Yoohaneena faiqi namu faqa Yuda maqannaa fasiqa moo fannoo faqa Yuda maqannaa nammari keeqannimaqee maru oosannara ufa rainaqau.
JOH 3:26 Miqidaqa Yoohanee funnai oonuree qimamiqa qiqau. Oo ufasaa rakisirafa. Ooqai anee Yooradanna nammari dinni afainni qimannimuna fasiqafa Yisufa doo Yeerusareendari qumureenoo faiqí anaasee nammari auqamannimaqee marifaqa minni faiqí anaasee moomoo fidaqa.
JOH 3:27 Yoohaneefa mina iriseenoo maaqi qimasee qimanniminau. Sia moo fannoo kaqi iannoo. Anutufa aminafa kai miqiannoo.
JOH 3:28 Innee mi fasiqanara qini ufa qiafannanara irimariusa mariafanoo. Qinee minara maaqi qiafanafa. Qinee sia asauku mundirausa maridaqa. Qinee mina oorinni aniafanausa kai maridaqa.
JOH 3:29 Aqoondi fannoo amundara fasiqa aaqa maridanoo mina ufa iriseenoo asasidanoo. Narí aqoondi anaasee maree marinara asasidanoo. Qinee Yoohaneesa Yisunara iriseeqa asasidaqa. Mifa amundara fasiqara foora marifaqa qinee mina aqoondiara foora maridaqa mina ufa iriseeqa qini asasirafa firaafa maridanoo.
JOH 3:30 Mifa maqee maa fasannai uriqararafaikamambi mariannoo. Qinee qeeqa ooru dupirausaikamafi marianaura. (Yoohaneefa nammari nimimarufa mi ufana Yisunara qimasoofanoo maa papiqana akara rimarufa mina amarafa Yisuna faiqi namukinaa moo Yoohaneefa narí amarana ufa iriseenoo akara rumaseenoo kafaa narí ufa Yisunara maaqi qimasee akara rinoo qinau.)
JOH 3:31 Mirindari qumifa mifa aiqamausa uriqararafa maridanoo. Maa maqanasaa qaraafa maa maqanasaa qaraanara kai qidanoo. Innaarunaidari qumifa mifa aiqamausa uriqararafa maridanoo.
JOH 3:32 Yisufa innaarunaindari qumifa minni maridanoo mindaraa ainainara narí afu qafainara narí aaqoo irinara qimannimimarifaqa sia irimariafanoo.
JOH 3:33 Mi ainainna qimannimina irisee kuqaa anoonee qimasee marainna fasiqa aanaaseesa Anutunara kuqaa fee qimariasa maridaqa.
JOH 3:34 Anutufa innaarunaindari aqiqamasaifa Anutuna ookinaa ufa kai qimannimidanoo Anutufa narí maraquna muduka amiqaifanoo miqidanoo.
JOH 3:35 Yisuna akoofa Anutufa narí amaakuara amuqusifanoo minara ridanoo aiqama ainaina mina aramandunnai quqaidanoo.
JOH 3:36 Anutuna amaaku ufa irisee mara mina saqarikinafa doo mifa Anutuna naaru marirana marasee minaki maridanoo. Anutuna amaaku ufa irisee rukiainafa Anutuna firaaqoo aanooqirafa minasaa naaru mariannoo.
JOH 4:1 Faiqí anaasee moomoosa Yisufunnai fimariafanoo nammariki keeqamannimaqee marinau.
JOH 4:2 Yisufa sia narifau keeqamannimaqee marinau. Mina faiqi namu mina ufasaa kai keeqamannimaqee mariqau. Yisufunnai moomoosa fimarufanoo Yoohanee funnai moodaa moodaa kai fimariqau. Farisai amaana ufa qimarusa mi ufana iriseeqa munuqi miniqira ufa uqeeraaqaa ufanoo Yisufa iriseenoo Yudeeaa maqa maaqa mminniseenoo Kariree maqa maaqaki kafaa finau.
JOH 4:4 Yudeeaa maqa maaqa minnisee Kariree maqa maaqaki fidanoo Samaria maqa maaqa namuqaa maruna qambaanai oonuranau.
JOH 4:5 Miqoo fidanoo Yisufa moo maqusa auqu Sikara mi maqusana paqurinau. Ooqai Yakooboofa miqoo maridanoo nammari sia marufanoo madika indufuseenoo minakinaa nammari neeneeufanoo narí amaaku Yooseefaana amu nammarifa marinau. Meemai uqanna indufu maree nammari paqurinau. Sikara maqusa mi nammari madikana aaqa marinau.
JOH 4:6 Yisufa kisaaqa aatata fifi isoofanoo amudaani rufanoo miqoo Yakooboona nammari madika paqurimaseenoo mina afainni ooqu marinau. Suani qambaanaikufanoo madika afainni ooqu marinau.
JOH 4:7 Yisufa ooqu marifi marufanoo Samaria anaasee moo fannoo Yakooboona madikaki nammari sakarara ooqu finau. Ooquree nammari madikaki sakeemarufanoo Yisufa innaaruqinoo qinau. Maa anaasee anee nammari qini qimina naa.
JOH 4:8 Yisuna faiqi namu narana feefauriraree qimasee maqusai oorufufanoo Yisufa naríara mi nammarina afainni ooqufaaqee marida qafoofanoo mi anaaseefa nammari sakararee qimasee quminau. Qumuroofanoo Yisufa nammariara qufanoo mi samaria maqannaa anaaseefa tautinoo qinau.
JOH 4:10 Akasaa Yuda maqannaafammia. Sia Yuda maqannaasa Samaria maqannaasa kaafa piritaki naidammia. Qinee Samaria maqannaa maridaqammu. Anee naqi fee qidanee nammariara qiniara innaaru qidanee. Yisufa minara iriseenoo maaqi qimasee narí qimaminau. Anee Anutuna nimira ainainara faqa qiniara faqa irimarinafa maridanau qiniara irainaqau naaru marira nammari ani amini.
JOH 4:11 Mi anaaseefa mi ufana iriseenoo kafaa qimaminoo qinau. Oo maa fasiqa ani nammarianandaana faqa nammari rarisara sanda faqa sia maridanoo. Maa madikafa meemai kisaaqasaa maridanoo. Anee qianandee yaindaraanee naaru marira nammari mareennaree.
JOH 4:12 Maasa qisaifaqafa Yakooboofa ooqai maa madikana maasa indufu qisoona marifaqa maasa sakaidaqa. Narí faqa narí faiqi namu faqa narí sipsipauqa faqa maa madikanakinaa nammari neeneeusa mariqau. Anee aneennaraa Yakooboona uriqararausee qidanee.
JOH 4:13 Yisufa mi ufana iriseenoo kafaa qimaminoo qinau. Aiqamausa maa madikanakinaa nammari namasaifanoo kaifaa kaifaa sakasaida neemarifaranoo. Qinee nimianna nammarina naifandinausa sia kaifaa nammariara nidiannoo.
JOH 4:14 Qinee nimianna nammarina namasainafa mina aunduraindari naaru marira nammari maqee maqee uridanoo naaru marirana amiannoo.
JOH 4:15 Mi anaaseefa mi ufana iriseenoo Yisuna qimaminoo qinau. Maa fasiqa maqee kai mi nammarina qimina namasaananoo taikafinaqa sia maqee maqee qumu nammari saka, ireeda maria.
JOH 4:16 Yisufa mi ufana iriseenoo maaqi qimasee mi anaaseena qimaminau. Anee ooru aneenna afaaqi afiqee qumua.
JOH 4:17 Miqi qufanoo mi anaaseefa qinau, qinee faiqí siaisa maridaqa.
JOH 4:18 Miqi qufanoo Yisufa kafaa qimaminoo qinau. Oo doo anee ooqai moodannai qisauku fasiqa maroonafa mariananoo. Maqee maraqaanna fasiqafa sia ani afaaqifau maridanoo moona afaaqi maridanoo. Anee kuqaa anoona ufa kai qimaqimiananoo.
JOH 4:19 Mi anaaseefa mi ufana iriseenoo tautumaseenoo qinau Boo anee Anutuna tamummaqara fasiqa mariananoo qinee qafaidaqa.
JOH 4:20 Maasa Samaria maqannaasa maa aaqannasaa Anutunara innaaru qidaqa amooqidaqa. Innee Yuda maqannaasa Yeerusareenniara Anutuna amooqimaria maqusa fee qidaqa.
JOH 4:21 Mi anaaseefa miqi qufanoo Yisufa qimaminoo qinau. Innee Samaria maqannaasa fifau amooqi mariafanoo sia minara irimariafannoo. Maasa Yuda maqannaasa Anutuna amooqimarianara irimarunausa maridaqa. Anutufa Yuda maqannaannai aiqama aanaamuru Anutuna nariranakinaana uqeereeqeenoo narí aqoondikiranaki quqannisaannoo. Oo maa anaasee amiqimasee qini ufa iria. Qusasaa anira aukuana faiqí anaasee sia maa aaqannasaa fee Yeerusareenni fee Anutunara innaaru qifaranoo, fifau aiqamatinai qini qikoona amooqifaranoo.
JOH 4:23 Qusasaa anira aukuana doo maqee animaridanoo, faiqí anaasee kuqaa anoona Anutuna amooqimariasa kuqaa nári maraquna namufaqa kuqaa anoona ufa namufaqa amooqifaranoo. Anutufa miqiasara kai nariara qimooqidammiafoo qimaseenoo aididanoo.
JOH 4:24 Anutufa maraquna oosana faqaafa maridanoo. Minara Anutuna amooqimariasa nári maraqunannai faqa nári nimuqusa ookiqari faqa Anutuna amooqifaranoo.
JOH 4:25 Yisufa mi ufana mi anaaseena qimamufanoo mi anaaseefa quandafinoo Yisuna maaqi qimasee qimaminau. Anutuna asauku mundirafa mifa qumureenoo aiqama ainainara maasa qimaqiminaqa irianaura, qinee iridaqa.
JOH 4:26 Miqi qufanoo Yisufa qinau. Qinee misa maridaqa. Qinee ani faqa ufa qimarunausa misa maridaqa.
JOH 4:27 Yisufa miqi qimarufanoo doo mina faiqi namu Sikara maqusaindari qumuraqau. Qumuree qafoofanoo Yisufa Samaria anaasee faqa ufa qimarufaqa tautumaseeqa qumeekai qafee mariqau. Misa Yisunara nanaree randaidanee mina faqa ufa qidanee qianeerusia minnisaqau.
JOH 4:28 Yisuna faiqi namu maqusaindari qumufanoo mi anaaseefa narí nammariana miqoo quqaseenoo kaqisamu maqusai ooruree narí maqannaa akaqausa qimanniminoo qinau.
JOH 4:29 Innee qumuraifaqa muqusaanaqa qafaaqa. Ooqai aiqama ainaina qinee maree mariafanna ainainara kooroo ifaqa irunna fasiqafa Anutuna asauku mundira fee maridanoo fee. Doo mai qumuree qafaaqa.
JOH 4:30 Misa mina irisee doo nári maqusaindari ooqu Yisuna qafararee qimasee ooqu fiqau.
JOH 4:31 Mi anaaseefa maqusai oorufufaqa Yisuna faiqi namu Yisuna qimamiqau ufasaa rakisira doo narana naa qufanoo mifa nariqa qimanniminau. Qini narana moo maridanoo innee minara sia irimariafanoo.
JOH 4:33 Miqi qufaqa misa narí qimami narí qimami qiqau. Moo fannoo narana mina aminoo fee qufanoo Yisufa qinau. Qini narana narafa qini diqiqoonna Anutuna ufamau firafa maridanoo. Mina saika taikarafa qini narana maridanoo.
JOH 4:35 Innee maaqi qimariafanoo. Quqoona qaara faqa qaara faqa aiqarainaqa suana aiquanauree qidaqa. Qinee minara maaqi qidaqa. Innee oonu afuqaki qafaaqa doo maqee narana anaa maridanoo. Aiqira aukuana doo ani maridanoo. (Yisufa miqooqaraa fasiqa anaasee Anutuna ufa qimannimifaqa irifandinnanara aiqirana kikiqusinoo maridanoo.)
JOH 4:36 Yisufa minara kaifaa narí faiqinamu qimanniminoo qinau. Faiqí moo fannoo narana aiqimarifa mifa mina akiaqara maraidanoo. Naranara foora faiqí anaasee suqueeqeenoo innaarunai quqasainaqa naaruara marirana maraaqeera. Misa naaruara marirana marasaifanoo ummaqimarifa faqa aiqimarifa faqa moodaanaki asasifaranoo.
JOH 4:37 Maasa ufakiqari maaqi qidaqa. Moo fannoo ummaqidanoo moo fannoo aiqidanoo.
JOH 4:38 Qinee Yisusa inniara faiqí anaasee aiquaqeera foora innaarunaanai ubeekaaqeera niqiqeeqa. Mi afuqanaki innee sia mina ummaqimariafanoo. Akaqa fasiqa anaasee Anutuna naaru marira asumu mi afuqanaki ummaquqoofaqa innee kaqi unakusee misa kadaapisaa innee fifau faiqí anaasee mareeqee naaru mariranaki quqannisaafaqa fifau feefauru mareefaranoo.
JOH 4:39 Yisufa narí faiqi namu faqa ufa qimarufanoo mi Samaria anaaseefa narí maqusai oorureenoo aqoonausa maaqi qimasee Yisunara qimanniminau. Mifa qinee ooqai maraafanna ainainara qimaqimifaqa iriqa. Miqi qufaqa mi maqannaasa moomoosa Yisunara kuqaa Anutuna asauku mundira fee qiqau.
JOH 4:40 Miqi qimasee ooqureeqa Yisunara maasa faqa ani marianneera afeekaika mandee fuki faaki qimasoofanoo Yisufa misa faqa qaara faasaana marinau.
JOH 4:41 Miqoo moomoosa Yisuna ookinaa ufa iriseeqa kuqaa anoonee qimasee quandafufaqa mi anaaseena qimamiqa qiqau. Doo maqee maasa sia ani ufara kaifau anoonee qifarau. Narí ookinaa ufa iriseeqa minara kuqaa aiqama maa maqa maaqanakinaasa mandaindainakinaana mareeqee asumu mariranaki quqannisaanina fee qidaqa.
JOH 4:43 Yisufa Sikaa maqannaa faqa qaara faasaana marinoo quqaseenoo Kariree maqa maaqai narí maqa maaqai finau.
JOH 4:44 Yisufa narí maqa maaqara maaqi qinau. Tamummaqara fasiqa maqusa maqusa fidanoo faiqí anaasee minara aaquqaifanoo mina ufa iriaqaaifaranoo. Narí mina maqusanaasa nikoo nikaa masee sia minufa irifaranoo.
JOH 4:45 Yisufa Kariree maqa maaqai oonuroofaqa miqooqaraasa qafamaseeqa asasidaqamma minufa iriqau. Kariree maqannaasa akaqausa faqa Yeerusaree maqusai oorureeqa ainaaqarara qoomaqaki miqoo Yisuna qafamaqoosa faiqí sia auqaaqaa ira ainaina auqusoofaqa qafamaseeqa oorurandee qumu marufanoo Yisufa Kariree maqa maaqai qumuroofaqa asasamasee uru afiqee muquseeqa faiqí anaasee amiqimaseeqa minufa iriqau.
JOH 4:46 Yisufa Kariree maqa maaqakinaa kaqikaa maqusa auqu Kannaana maqusai ooqai nári uainna nammari taikafufanoo nammarinnai auqu maqusanaki oonuranau. Mi maqusanaki faiqí firaafa uriqararafa moo marinau. Mina amaaku kuqira aurira auridanoo Kapeeranaumma maqusai maridanoo kuqirari marinau.
JOH 4:47 Mi fasiqafa Yisunara Yudeeaa maqa maaqaindari Kariree maqa maaqaki animarunara iriseenoo miqoo oonureenoo Yisuna irammirinoo qinau. Oo ufasaa rakisirafa amanee anee qini faqa Kapeeranaumma maqusai oonuree qini qimaaku kuqira aurira aurimarina andeeqaqisaa.
JOH 4:48 Yisufa mina iriseenoo maaqi qimaseenoo narí qimaminau. Inniki sia moo fannoo qiniara kaqi kuqaa fee qimasee qinikina irifaranoo. Innee firaa ainaina faiqí sia amana auqaaqaa ira ainaina auqamasaanaqa qafeeqa kai qinikina irifaranoo.
JOH 4:49 Mi uriqarara fasiqafa minara iriseenoo qinau. Oo qini karaambaiqa qini faiqi kuqirarammidanoo doo qini faqa ania.
JOH 4:50 Yisufa iriseenoo maaqi qimasee qimaminoo qinau. Doo findifi fua ani maqusai doo ani amaaku findifuannoo. Mi fasiqafa mi ufana iriseenoo doo kuqaa fee qimasee doo quqaseenoo quandakufanoo aatata fidanoo qafoofaqa mi uriqarara fasiqana saika faiqiuqa aanai ani paqurimandee qimamiqa qiqau. Doo ani amaaku findifinoo, sia kuquannoo.
JOH 4:52 Mina akoofa mina iriseenoo findifuna oosanara irammirufaqa misa qiqau. Eenda suani qambaana mariifanoo miqinni qumifanoo doo ani faiqi afaaqa doo asooeenoo.
JOH 4:53 Mina akoofa Yisunara oonumafi iriseenoo qinau. Oo mi kamu qoo kai ani faiqi findifuannoo fee qifaqa irunna qoo kai doo findifinoo. Doo mi uriqarara fasiqafa narí faiqi anaasee faqa narí aiku asauku faqa Yisunara kuqaa Anutuna amaaku fee qimasee kuqaa mina saqarikiqau.
JOH 4:54 Doo Yisufa qaara kari Yudeeaa maqa maaqaindari anireenoo Kariree maqasaa qaara ainaina firaa ainaina kooroomasoofaqa qafaqau.
JOH 5:1 Yisufa Kariree maqamaaqai kaqikaaqoo marinoo doo miqooqari findimaqeenoo Yuda maqannaasa amaanara qoomaqirafa firaafa kambiqaaninnanara qufanoo Yisufa irisee minni ooru finau.
JOH 5:2 Yeerusaree maqusa faandaamura kooqi sipsipa kooqi fee qimarufa marinau. Mi kooqina aaqa nammari farumma firaafa marinau. Mi farummana afainni aana fiqu imarunnai qaindaira moodaanai qisauku qaindaira marinau. Mi farummana auqu Beetasata farummee qimariqau.
JOH 5:3 Mi qaindairana ameemaanai auqaanai aurirana oosana oosana maree marusa misa mina ameemaanai ooqumari maree mi farummana afaiqara fiqummambi mariqau. [
JOH 5:4 Karaambaiqa qangiroo moo fannoo inaarunaindari narí kai iriseenoo moodaa kari moodaa kari aqufufanoo mi nammarina auqeesoofanoo indaaru mi nammarinaki keeqoofa mifa keeqafufanoo narí aurirana taikasee fimarinau. Miqi marunara misa aurimarusa moomoosa Beetasata nammari afainni rakisida mariqau.]
JOH 5:5 Faiqí moo kisaaqasaa aurimarufa misaki marinau. Moo fasiqa aiku asauku taikasee moo fasiqa asaukuqara taikasee dinni aiku taikasee dinni oonu qaaramoo marasee (38) aukuana dinee uqee marufa marinau.
JOH 5:6 Yisufa mi fasiqana qafoofanoo maqasaa faiqaqee ufanoo Oo kisaaqasaa aurimari fee qimaseenoo mi fasiqana maaqi qimasee irammirinau. Anee findifirara aididanoo fee.
JOH 5:7 Mi dinee fasiqafa mina iriseenoo maaqi qimasee qimaminau. Oo rakisirafa, Anutuna qangiroo maa nammarina auqamasaifaqa yafee qini mareeqee minaki quqaannoo fee qinee anuqi marunaqa moo fannoo kai kaqi kaqi aqufida taikasaida fidaqa.
JOH 5:8 Yisufa mina iriseenoo quandaki qimaminoo qinau. Doo findi finana aneenna qaari raqandaamamareena doo fua.
JOH 5:9 Doo mi fasiqafa aaqee uqanna doo mikari kai doo findi finoo narí qaari maramaree finau. Mi faasaanna Yisufa andeeqasoo faasaana Yuda maqannaasa Saririqa misa amaana faasaana marinau.
JOH 5:10 Yuda maqannaasa uriqararausa mi fasiqana aurimaruna qafamasee aqiqa qiqau. Maana amaana faasaana maridanoo maasa sandufa rukieenana aneenna qaari aakai maqeenana nanaree sandufa rukiaidanee.
JOH 5:11 Mi fasiqafa qinau, qini andeeqaqisaifa aneenna qaari raqandaamamaree fuannee qifaqa qeeqa qaari daakai maqa maree fidaqa.
JOH 5:12 Misa mina iriseeqa irammiriqau. Yafee aniara aneenna qaari raqandaainana fuannee qifanee mi fasiqafa sia Yisuna auqu irinau. Faiqí anaasee moomoo marufanoo misaki kukeeqafufanoo mi fasiqafa sia amiqimasee qafanau.
JOH 5:14 Kasooqaqee marikinoo amaana maqaki mi fasiqana paqurimandee Yisufa maaqi qimaseenoo qimaminau. Doo fee maqee qafeenee Doo findifuananoo doo maqee aneenna mandainaina minnimasaa. Sia miqinanoo kafaa mandainaina firaafa uqanna anisaa aqufuannoo.
JOH 5:15 Mi fasiqafa mina iriseenoo oonuree Yuda maqannaa rakisirausa paqurimaseenoo qimanniminoo qinau. Yisufa kai qini amiqi mandaifaqa findi fiqa.
JOH 5:16 Rakisirausa mina iriseeqa doo miqooqari Yisuna arira ufa qimariqau. Yuda maqannaa amaana faasaana andeeqaisoonara arirariqau.
JOH 5:17 Yisufa mina iriseenoo rakisirausa maaqi qimasee qimanniminau. Qini qikoofa sia moo faasaana minnisaidanoo aiqama faasaana ainainidanoo. Qinee faqa miqikaimmianauranoo.
JOH 5:18 Yuda maqannaasa mi ufana iriseeqa doo kuqa ariraree qiqau. Misa Yisunara amaana faasaana sandufa rukiasaifaqee qimariqau. Sia minara kai mifa Anutunara narí akoo fee qunara minara faqa arirari mariqau. Mifa Anutunara qini qikoo fee qunara misa nanaree maqasaa fasiqa fannoo unna qidana Anutuna amanakai maridee qidanee qimasee arirariqau.
JOH 5:19 Yisufa kafaa qimanniminau. Qinee kuqaa anoona ufa inni qimannimidaqa. Qinee sia moo ainaina qeeqaraa auqaidaqa qeeqa qikoona qafamasee mifa indeekai idaqa. Akoofa moo ainaina auqaifanoo amaaku miqikaimmidanoo.
JOH 5:20 Qini qikoofa narí amaaku qiniara kaaqa amuqusifanoo minara qiniara ridanoo narí aiqama ainaina auqaina qini faqa kai uqaqifiqaidanoo. Maqee maa fasiqafa firaa teeroo maraidanoo aukuana aukuana apatara aupuree marifanoo qini qikoofa dadaaqifaqa andeeqasauna innee mina qafee fee. Kasooqaqee qini qikoofa firaa ainaina dadaaqinaqa auqaanaqa qafee tautifanoo naaquqeenoo nimudaani faqa kai qumooqukamasaannoo.
JOH 5:21 Qini qikoofa kuqira fasiqauqa findifumannisaidanoo. Qinee faqa miqikai iqa qeeqa didiranannoo kai kaqi marirana akaqausa nimianaura.
JOH 5:22 Qini qikoofa sia maa maqanasaaqaraasa mandufa irisee andeeqannisaannoo. Narí amaaku qini qimiqaifaqa qeeqa qikoona Anutuna iriramau misa manda ufa andeeqannisaanaura.
JOH 5:23 Aiqamausa qini qikoona Anutunara naaquqaanifeera miqinau. Qiniara naaquqaindee kai iqa qini qikoonara naaquqaanifeera miqinau. Faiqí moo fannoo moona amaaku sia mina aqoondikinafa mina akoona faqa miqikai inana miqanda qisakoosa sia niqoondikinnaranoo.
JOH 5:24 Yisufa Yuda maqannaa rakisirausa kaqi qimannimidanoo qinau. Qinee kuqaa anoona ufa inni qimannimidaqa faiqí moo fannoo qini ufa irisee qini diqiqamaqoona saqarikinafa mifa doo naaru mariranaki maridanoo. Miqinna fasiqafa sia Anutuna arirufaki mariannoo. Anutuna narirana doo maa maqee aiqaaqareenoo kaqi mariranaki doo keeqanoo maridanoo.
JOH 5:25 Qinee anoona ufa inni qimannimidaqa. Moo aukuana doo adeedi ranoo marida doo animaridanoo maa maqanasaa kaqi maridaqa Anutuna nariranaki mariusa kuqufusa Anutuna amaaku qinaqa iriseeqa doo narirafa ainaaqarainaqa kaqi mariranaki keeqeefaranoo.
JOH 5:26 Kaqi marira oosana qini qikoonaki kai marifanoo faiqí anaasee nimidanoo. Miqikai inoo naramaaku qini faqa kai kaqi marira nimira oosana doo qini qimiqaisa maridaqa.
JOH 5:27 Mifa Anutufa narí amaakuara faiqí nimaaku fee qimasee faiqí anaasee mandainaina andeeqannisarana narí amaaku qinisaa quqaqaisa maridaqa.
JOH 5:28 Innee qini mi ufana irisee sia tautiaqa. Kasooqaqee moo aukuana anirainaqa aiqama madikaki kuqirausa mariasa misa faqa Anutuna amaaku qini ufa iriseeqa madikakiqari findi fifaranoo.
JOH 5:29 Akaqausa andeeqara oosana maree marusa findifi kaqi mariranaki fifaranoo. Akaqausa manda oosana maree mariusa misa findi fiqa Anutuna ufa firaanaki aqufifaranoo.
JOH 5:30 Yisufa kaqi qimannimidanoo qinau. Sia qeeqaraa moo ainainianaura. Anutufa dadaaqinaqa faiqí anaasee ufa irisee andeeqannisaanaura. Sia qeeqa iriranamau afeekaikamandee fidaqa. Qini qikoofa qini diqiqamaqaimau kai fidaqa.
JOH 5:31 Qinee qeeqaraa ufa qimannimianaqa siamma irifaranoo narikai qidaqinoo unna qidaqiifoo qifaranoo.
JOH 5:32 Anutufa qini dadaaqimarifa maridanoo mifa anoona ufa kai qiniara qimarifa maridanoo, sia qeeqa kai qianaura mifa dadaaqiannoo. Innee Yuda maqannaa rakisirausa ufa anoona iriannee qimasee faiqí niqiqaifaqa Yoohaneefa nammari nimimarifunnai ooquree iriqau.
JOH 5:34 Qinee sia maqasaa fasiqa moo qini dadaaqiranara randaidaqa Yoohaneenara qidaqa. Innee naaru mariranaki fuaqee qimasee maa ufana qimannimidaqa.
JOH 5:35 Yoohaneefa nammari nimimarifa qoomara fooqaana marinoo kaaqa qaidanoo rupannoo inau. Innee mina kaaqa qaranaki qusasaa kai keeqafiqa asasida mariqau.
JOH 5:36 Yoohaneefa nammari nimimaruna ufa anoona maru fanoo qinindi minaindi arusee uriqaranoo maridanoo. Qinee aniree faiqí sia amana auquaqaa ira ainaina qini qikoofa qimuna auqaqa fimarunna ainainna fannoo qini duqu firaaqoo uqeeraannoo. Uqeerainaqa qafamasee qiniara Anutufinaindari qumu fee qifaranoo.
JOH 5:37 Sia qinee auqee marunafa kai qini duqu uqeeraidanoo. Qini qikoofa qini diqiqamaqaifa mifa faqa qiniara ufa qidanoo dadaaqidanoo. Innee Yuda maqannaa uriqararausa ooqaindari sia mina ufa irimariafanoo. Innee sia mina afiri qafaanara sia uqanna mina iriranamau firanara irimariafanoo.
JOH 5:38 Innee qini qikoofa diqiqoonara sia mina irimariafanoo minara inniki sia mina ufa maridanoo.
JOH 5:39 Innee Mooseena sandufa faqa Anutuna tamummaqara fasiqauqa akarakinaa ufa asaana ridaqa naaru marira aanara randaidaqa mi sandufafa kai qiniara qimannimimarifaqa sia irimariafanoo.
JOH 5:40 Innee minara iridaqa sia qinee unnannai aniree naaru marirana maree mariafanoo.
JOH 5:41 Yisufa Yuda maqannaa rakisirausa kaqi qimannimidanoo qinau. Qinee sia inni naanna raida faiqí qimooqiaqee qirainainara randaidaqa.
JOH 5:42 Qinee inni irirana amiqimasee iridaqa niqafauna inni naundura nimuqusaki Anutunara rirafa sia maridanoo
JOH 5:43 Qini qikoofa Anutufa qini diqiqoofaqa qumu marunaqa sia innee qiniara irisee asasamasee qifiqee animariafanoo. Moo fannoo kasooqaqee narí manda aidiranafaqaafa anirainaqa innee mina asasamasee oonu afiqee anifaranoo.
JOH 5:44 Innee kaaqa naramooqirana naramooqiranara ridaqa Anutuna amooqiranara sia rimariafanoo.
JOH 5:45 Innee qiniaree quandafinoo Anutufinnai maasa darira ufa qiannoofee fee qidee sia qianaura. Mooseefa mifa kai inniara nimaarusirufa qiannoo. Innee maasa minasaa kai mundimariasee qimariafanoo.
JOH 5:46 Innee Mooseena sandufa fifau asaana rimariafanoo mina ufa iridaqau qiniara irini, qiniara akara rumaqoofa maridanoo.
JOH 5:47 Innee mina ufa ririmma sia irimariafanoo naqimasee qini ufa irifaree. Sia amana irifaranoo.
JOH 6:1 Yisufa Yuda maqannaa rakisirausa mi ufana qimannimiseenoo miqooqari Kariree firaa farumma dinni afainni finau. Mi farummana auqu moo marinau, Tibeeriasa farummee qiqau.
JOH 6:2 Faiqí anaasee Yisufa amiqi amiqiunara aurimarusa findifunara iriseeqa moomoosa uqanna afaqee fiqau.
JOH 6:3 Yisufa nammari afainni kaqikaa amuaqunamusaa narí faiqi namu faqa ooruree ooqumarinau. (Ooqai Isaraee maqannaa nikeeku nikaaku Isipa maqannaa karafusaki marufanoo Mooseefa qufaqa sipsipa aanaaqiuqa arusee mina fidikauqa tatiiseeqa nári kooqimau raaraamasoofanoo Anutuna qangiroo fannoo narirara anireenoo fidika qafamasee ainaaqareenno Isipa maqannaasa kai ooqa faiqiuqa narinau. Miqooqari Isaraee maqannaasa oosana arasee Anutuna qangiroo ainaaqaroo qoomaqana sakasaida neemariqau.)
JOH 6:4 Mi ainaaqarara qoomaqana Yeerusaree maqusai qusasaa kambiqararee qimarufanoo mi fasannai Yisufa Kariree nammari afainni marinau.
JOH 6:5 Yisufa nindafoofaqa faiqí anaasee moomoo narí marunnai amuaqunamusaa urimarufanoo nindafeenoo Firipina irammirinoo qinau. Yisufa faasai Firipifa ianinnanara iriseenoo Firipina kaqi amanamasee qafarara maaqi qimasee iranau. Firipi faiqí anaasee moomoo nianaindari uri mariafaqa yai fee misa narana feefauru mandee nimianauree.
JOH 6:7 Firipifa mi ufana iriseenoo maaqi qimasee qimaminoo qinau. Faiqí anaasee muduka moomoo mariafaqa moomoo ooni maramaree oonu feemu moomoo feefauru mamaree minisaifanoo sia misa nimana mariannoo. Moodaa moodaakai namasee naarara fifaranoo.
JOH 6:8 Yisuna faiqi namukiqari moo mina auqu Andurufa, Simoona moo auqu Peetooroona akaqa marufa mifa mina iriseenoo qinau.
JOH 6:9 Kumaaraa moo kaqikaafa mai maridanoo narí sakuma feemu moodaanai qisauku faqa noodaanna qaaraqanda faqa uaqee idanoo. Amanee mina mareennaree. Oodaa sia amanaikiannoo.
JOH 6:10 Yisufa mina iriseenoo qinau. Innee faiqí anaasee qimannimifaqa qusau rasooqnookamasee ooqumariaqa. Qusau moomoo misaqa marinau. Faiqí anaasee mina iriseeqa aiqama ooqumariqau. Faifa tauseenna fasiqa mariqau. Ooni saqarimma auqiqa mariqau.
JOH 6:11 Ooqu marifufanoo Yisufa mi kumaaraana sakuma feemu qumareenoo Anutunara dufi dufi qimaseenoo doo ruqi ruqimmeeqeenoo faiqí anaasee niminau. Noodaanna qaara faqa miqikaimasee niminau. Nimisoofaqa namasoofanoo aiqama nimuaqu inau.
JOH 6:12 Aiqama nimuaqumasoofanoo Yisufa narí faiqi namu qimanniminoo qinau. Ataraasa mareeqee uqa ruaqa sia kaqikaana rairaaiani.
JOH 6:13 Misa irisee eedoo qimasee ataraasa rumasee asaana rumasee qisaukuqara taikasee qikunni ooqu qaaraqanda marasee uqa qumbiqanoo marinau. Mi ataraasana moodaanai qisauku sakuma feemusaaqaraana uqariqau.
JOH 6:14 Mi fasiqa anaaseesa mina qafoofanoo sia faiqí undeeufanoo naaquqanau. Naaquqamasoofaqa qiqau ooqai tamummaqara fasiqauqa moo tamummaqara fasiqa kambiqaaninnanara akara rumaqoofa doo maana narimma animaridanoo.
JOH 6:15 Yisufa misa irirana iriseenoo misa afeekaikamasee qini qumareeqee maa maqana saaqaaraa karaambaiqaika maqimaqee foora qimasee quqaseenoo doo naríara quqasee aaqanai ooruree miqoo marinau.
JOH 6:16 Yisufa aaqanai fufaqa mi eendanaki sia kafaa qumunara mina faiqi namu Kariree nammari afainni ooqureeqa sipaki akaramafiqa nammari dinni afainai Kapeeranaumma maqusai nammari amuaqumau fitaqararee qiqau.
JOH 6:18 Misa kanuqaki fidaqa aikannai nammari ruakairisaidaqa fimarufaqa qaara maqusa fiaaqarana amanasaa kaiqaaqoo kisaaqasaa oonuroofanoo ufai firaafa uqinoo nammari faqa misa kanuqa faqa amakaurinau. Amakaurufaqa qafoofanoo Yisufa naríara misunnai kanuqaaqa animarinau nammari amuaqumau aiku ramasaida aninau. Misa mina qafamasee tautumasee kaaqa naaquqoofaqa rufiaqau.
JOH 6:20 Rufioofanoo Yisufa nindafeenoo qinau. Sia rufiaqa, qinee maridaqa.
JOH 6:21 Misa Yisuna mareeqee sipaki quqasee firaree qu maqusanai aaqee kai dauni oonuraqau.
JOH 6:22 Yisufa nimu feemuna noosa nimuqoo kai faiqaqau. Kananaana iqaqoofaqa findifi sipara randoosia moodaakai miqoo maruna.
JOH 6:23 Yisuna faiqinamu moo kanuqaki fufaqa Yisunara sia misa faqa fiifoo qimasee Tibeeriasa maqusai maqee maqee nimaru kanuqausa aniroofaqa doo minauqaki akaramafufaqa Kapeeranaumma maqusai Yisunara randarara minauqaki fiqau.
JOH 6:25 Misa Kariree nammari fitaqee muqu afainai oonureeqa Yisuna paqurimasee maaqi qiqau. Oo ufasaa rakisirafa anee yairee fee mai anireenee.
JOH 6:26 Yisufa iriseenoo quandaki qimanniminoo qinau. Qinee kuqaa anoona ufa inni qimannimidaqa. Qinee qeeqa afeeka uqannifiqaunnanara innee sia minara kai irisee qiniara randaidaqa. Innee feemu namasaafanoo nimuaquinoo maqee qumiqaraaninna ainainara innee minara kai qiniara randee mariafanoo. Yisufa kaifaa quandafufanoo qimanniminoo qinau.
JOH 6:27 Innee sia dauni putaa ira naranara ainainiaqa. Naaru marirana nimira naranara minara ainainiaqa. Qinee maa naranna qinee faiqí nimaaku inni nimianaura. Qini qikoofa Anutufa qiniara aidimarifanoo narí aiqama ainaina qini daaku qimaqasaina inni amana mi naaru marira naranna nimianaura.
JOH 6:28 Misa minara iriseeqa Yisuna irammiriqa qiqau. Nanee qimasee Anutuna ainainianauree.
JOH 6:29 Yisufa iriseenoo maaqi qimasee qimanniminau. Innee maaqimasee Anutuna ainainamaisaaqa. Narí aqiqainna fasiqana mina saqarikiqa minasaa naundura rusiaqa. Anutuna ainainirafa miqimminoo maridanoo.
JOH 6:30 Misa mi ufana iriseeqa kaifaa irammiriqa qiqau. Anee nana moo ainaina firaa ainaina auqainaqa maasa qafamasee aniara kuqaa Anutuna asauku mundira fee qianauree anee nana ainainee auqinnaree.
JOH 6:31 Maasa qisaifaqausa aadana maqa maaqaki pupusamuara foora aqufuna narana neemariqau. Mooseena akara minara maaqi qinau. Innaarunaidaraa feemu narana mifa niminau maqi qinau.
JOH 6:32 Miqi qimasoofanoo Yisufa kafaa qimanniminoo qinau. Mooseefa maru aukuanna pupusamuara maqi ira narana sia mifau nimimarinau. Anutufa innaarunaindari nimimarinau. Sia anoona narana nimimarinau. Doo maa aukuanna qinee qumu marunnaqoo qinisaaqari anoona naranara foora inni nimidanoo.
JOH 6:33 Anutufa nimunnaranna innaarunaindari qumu maridanoo maa maqanasaa mariasa naaruara marirana nimidanoo.
JOH 6:34 Mi fasiqa anaaseesa iriseeqa qiqau mi feemuna naaru naaru maasa qiminaqa naa.
JOH 6:35 Yisufa kaifaa qimanniminau. Qinee kaqi marira nimira narana marunausa maridaqa. Faiqí moo fannoo qinee marunannai anireenoo qini saqarikinafa mifa sia kafaa naranara foora aararaannoo sia kafaa nammariara foora aidiannoo.
JOH 6:36 Faasai inni qimannimundee kai innee imariafanoo innee qini qiqafaidaqa sia anoonee qimasee qinisaa naundura rusimariafanoo.
JOH 6:37 Qini qikoofa eedoo qira irirana niminausa misa qinee unnannai nári naundura ubeekama qimaqeefaranoo. Miqi mariasa qinee ianannai animariasa sia niqiqaanaqa fifaranoo.
JOH 6:38 Qinee qeeqa qikoona iriranamau innaarunaindari sia qinee qeeqa qumiqa, qipaqeena ufara mina ainainirara qumiqa minara qinee sia moona aqiqaananoo fuannoo.
JOH 6:39 Mina ainaina auqarafa maaqinoo marina qini qiminau. Aiqama qini qikoofa qini qutaaqama qimaqaqaisa kai sia moo fannoo kaqinni fuannoo. Aiqama uqanna taikara faasaana qinee misa uqeereeqee qeeqa naaru mariranaki quqaanaura.
JOH 6:40 Qini qikoofa maanara ridanoo. Mina amaaku qiqafee mariasa minasaa irirana rusimariasa mi kamuqoo kai naaru marirana mareefaranoo. Taikara faasaana qinee misa uqeereeqee naaru mariranaki quqannisaanaura.
JOH 6:41 Yuda maqannaasa uriqararausa mi fasiqa anaaseesaki mariasa misa Yisuna ufa irisee mifa nariara innaarunaindari qumuafanausa maridee qidanoo. Miqi qimasee dapi dapi ufa qimariqau.
JOH 6:42 Misa maaqi qiqau maafa Yisufa Yooseefaana amaaku maridanoo. Mina anausa akausara maasa iridaqa. Naqi fee qidanoo fee nariara innaarunaindaraasee qidanoo fee. Akooqooqaraafa maridanoo.
JOH 6:43 Yisufa iriseenoo qinau sia innee narinni narinni qiniara manda ufa qiaqa.
JOH 6:44 Sia faiqí moo fannoo kaqi qinee ianannai anifaranoo. Qini qikoofa rarisameeqee quqainna fasiqa aanaaseesa misa kai qini naundura ubeekama qimaqeefaranoo. Misa miqifaqa taikara faasaana misa uqeereeqee naaru mariranaki quqannisaanaura.
JOH 6:45 Ooqai tamummaqara fasiqa maaqi qimasee akara riqau. Anutufa aiqamausa naamuaqira ufa qimannimiannoo. Qinee mi ufana iridaqa maaqi qimasee inni qimannimidaqa. Aiqamausa qini qikoona ufa iriseeqa mina aamua qira ufa irimariasa qinee ianannai anidaqa.
JOH 6:46 Sia moo fannoo qini qikoona qafeenoo. Anutufinaindari qumufa kai mifa kai qini qikoona qafeenoo.
JOH 6:47 Qinee anoona ufa uqanna qimannimidaqa faiqí moo fannoo irirana qinisaa rusimarinafa naaru marirana doo mareenoo.
JOH 6:48 Qinee kaqi marira feemuara foora marunausa maridaqa.
JOH 6:49 Ooqai inni nikeeku nikaaku Mooseena faqa kaasau maqa maaqakina nimaru aukuanna innaarunaindaraa feemu minauqa manna fee qimariqau. Mi feemufa ufaasu marifandinna feemuna namasaida kisaaqasaa moomoo aukuana mariufaqa kaqi kuqimariqau.
JOH 6:50 Maa qinee kaqi marira feemuara foora maridee qimarunausa faiqí namasee sia kuqifandinna feemusa maridaqa.
JOH 6:51 Qinee kaqi marira feemu innaarunaindari qumu marunausa maridaqa. Faiqí anaasee moo fannoo qinee amianna feemuna namasainafa naaru naaru mariannoo. Qinee nimianna feemufa qini qimaqi maridanoo. Maa maqa maaqana afaaqasasa mariasa kaqi mariaqeera nimidaqa.
JOH 6:52 Yisufa miqi qimasoofaqa Yuda maqannaasa narí afumau narí afumau aanoo qidaqa qiqau. Naqimasee maa fasiqafa narí amaqi maasa qiminaqa naanauree qidaqinoo fee.
JOH 6:53 Yisufa iriseenoo qimanniminoo qinau. Qinee kuqaa anoona ufa qimannimidaqa. Innee qini faiqí nimaaku qimaqi fidika sia naifanoo sia kaqi marirafa inniki mariannoo.
JOH 6:54 Moo fasiqa anaasee fannoo qini qimaqi faqa qini fidika faqa namasainafa naaru marirana doo mareenoo, marainara taikara faasaana mina uqeeraanaura.
JOH 6:55 Qini qimaqi narana uqanna maridanoo qini fidika nammari uqanna maridanoo.
JOH 6:56 Faiqí anaasee moo fannoo qini qimaqi fidika neemarifa qiniki maridanoo qinee minaki faqa maridaqa.
JOH 6:57 Qini qikoofa Anutufa kaqi marira oosana faqaafa qini diqiqoofaqa maaqoo maridaqa minasaaqaraa marirana maraidaqa. Miqi kai inoo qini namasainafa qinisaaqaraa marirana maraannoo.
JOH 6:58 Doo qinee innaarunaindaraa naranara foora maridaqa. Sia inni nisaifaqausa neemaru naranausara foora maridaqa. Misa mina namasee mariiqa aiqama faiqí faiqi oosanamau fiqa kuqimariqau. Maa naranna namaseeqa naaru naaru kaqi marifaranoo.
JOH 6:59 Yisufa mi ufana Kapeeranaumma maqusai ufa suqira maqaki qimanniminau.
JOH 6:60 Yisuna faiqi namu akaqausa mi ufana iriseeqa qiqau. Oo yafee maa ufana amana iriannoo fee. Irisee sia auqaaqaa ira ufa maridanoo.
JOH 6:61 Misa miqi qimasee noori runusee randoofanoo Yisufa narí kai iriseenoo qimanniminoo qinau. Innee qini amiqira afeeka ufara rufiasee qini minnisararee qidee.
JOH 6:62 Qinee kafaa uqeeree qumuafannannai ooru fuanaqa innee mina qafamasee naqi fee ifaree. Mikari qini ufara kuqaa anoonee qimasee firaaqoo rufieefaranoo.
JOH 6:63 Amaqiara qunnana amaqi fifau ainaina maridanoo sia mina naaqee qiqa maraquna fannoo kai anoona maridanoo mifa kaqi marirana nimidanoo. Qinee qeeqa dookinaa ufa qimannimimarunafa mifa maraquna maridanoo kaqi marirana anoona maridanoo.
JOH 6:64 Doo qinee akooqoo kooroomasee qimannimunaqa innee akaqausa siamma irimariafanoo. Yisufa narí faiqi namu oosana faasai irinau. Misaki akaqausa mina ufa sia irusa faasai Yisufa nindafanau. Misaki moodaa fannoo ueeqaaninnana faasai qafanau.
JOH 6:65 Yisufa minara maa ufana atiki kafaa qimanniminau. Qinee minara faasai qunnana sia amana moo fannoo narí kai qinee ianannai aniannoo. Qini qikoofa dadaaqinanoo kai qinee ianannai aniannoo.
JOH 6:66 Miqi qimasoofaqa Yisuna faiqi namu moomoo Yisuna minnisee sia kafaa mina faqa firara qiqau.
JOH 6:67 Yisufa miquna nindafamasee quandafi narí faiqi namu (12) qisaukuqara taikasee qikunnoo ooqu qaara marasee faiqi namu maaqi qimasee qimanniminoo qinau. Innee faqa misa naanna reefaree qini minniqiseeqa fifaree.
JOH 6:68 Simoona moo auqu Peetooroofa mina iriseenoo Yisuna qimaminoo qinau. Oo karaambaiqa ani minnisee yanasaa fee atooqaanauree. Naaru marirana nimira ufa anee kai marananuananoo.
JOH 6:69 Doo maqee maasa aniara kuqaa anoonee qidaqa aniara Anutufinaindari naaquqarafa mariifoo qidaqa.
JOH 6:70 Yisufa iriseenoo kafaa qimanniminoo qinau qinee qeeqa kai qisaukuqara taikasee qikuqara marasee fasiqa naarauna qini faqa nimariafanoo. Moo fannoo inniki afaanna maridanoo.
JOH 6:71 Yisufa afaannee quna Yudasinara narí qumee qimirinau. Yudasifa Keerioota maqusanaafa moo fasiqa Simoona amaaku marinau. Yudasifa Yisuna (12) qisaukuqara taikasee qikunni ooqu qaara marasee faiqinamu misaki marufa marinau. Kasooqaqee mi fasiqafa Yisuna uqeeqasainaqa aunirira saqarisaa arifandinnanara Yisufa minara oonu mafi iriseenoo afaanna fee qinau.
JOH 7:1 Miqooqari Yisufa Kariree maqa maaqaki nimarinau. Sia Yudeeaa maqa maaqai finau. Yuda maqannaasa miqoo mina arira ufa qimarunara sia finau. (Ooqai Isaraee maqannaasa Isipa maqusaindari qaara fasiqa niku nisauku taikasee aukuana nifuru faiqaqa uqiqaana maaqaki fimarufanoo Anutufa innaarunai maridanoo narí afeekannai Isaraee maqannaasa maqasaaqaraasa qumee dadaaqidanoo aandau narana nimimarufaqa naqafimariqau. Kaasau maqa maaqai nini iusa oonu randee nári maqasaa Isaraee maqasaa animaridaqa aukuana aukuana Yeerusareenni suqufidaqa uqiqaanarasaida faiqeeunara iriseeqa minara afaarurumanaida nári naambeeqa nári naambeeqa uqiqaana maqa usakasaida dinni qisauku taikasee dinni ani qaara marasaida (7) faasaana minaki faiqaida qoomaqa sakasaida namasaida minara susu imariqau.)
JOH 7:2 Yuda maqannaasa qoomaqa firaafa uqiqaana maqa qoomaqa adeedi roofaqa Yisuna akaqaafasaa Yisuna qimamiqa qiqau.
JOH 7:3 Maa Kariree maqa maaqa minniseenana Yudeeaa maqa maaqaki fua. Oonurainaqa miqoo ani ufa irimariasa firaa ainaina auqee mariannana misa faqa uqannifiqaa.
JOH 7:4 Faiqí moo fannoo narí auqu uqeeraannee qimasee sia moo ainaina auqee mariana kukeeqaidanoo aiqama ainaina kooroomasainaqa aiqamausa mina qafaaqa, anee faqa miqiaqaana. [
JOH 7:5 Yisuna akaqaafasaa sia Yisunara irimariqau. Fifau maqasaa fasiqa fee qimariqau.]
JOH 7:6 Yisufa iriseenoo qimanniminoo qinau. Qini anoona aukuana sia adeedi ranoo maridanoo. Innee faiqí faiqi aiqama faasaanara maasa aukuanee qimariasa mariafanoo. Maa maqa maaqanasaaqaraasa sia inniara fidiaqaaidanoo. Qiniara kai fidiaqaaidanoo. Qinee maqee maqee misa manda ainainara kooroomannimaqaunaqa minara kai qiniara fidiaqaamaqimaqee mariafanoo.
JOH 7:8 Yisufa narí akaqaafasaa kaqi qimanniminau. Innee kai Yeerusareenni ooru fuaqa. Qinee sia mi qoomaqanara inni naanna ree akooqoo ooru fuanauara qini anoona aukuana sia qusa raidanoo.
JOH 7:9 Yisufa miqi qimaseenoo miqoo Kariree maqa maaqaki kaqi marinau.
JOH 7:10 Mina akaqaafasaa Yeerusaree qoomaqai ooru fufanoo Yisufa inaaqianna qumee moo aatata ooru finau.
JOH 7:11 Yeerusaree maqusa qoomaqaki Yuda maqannaa rakisirausa Yisunara randoosia narí qimami narí qimami qidaqa qiqau. Mifa yai fee marinoo fee.
JOH 7:12 Qimasoofaqa faiqí anaasee Yisuna aufakiana qumee narí qimami narí qimami qimariqau. Akaqausa Yisunara amiqira fasiqee qimariqau. Akaqausa faiqí anaasee nikaru qimari fee qimariqau.
JOH 7:13 Sia moo fannoo Yisunara akooqoo qimariqau. Narí Yuda maqannaa uriqararausara rufiasee qumee kai qimariqau.
JOH 7:14 Qoomaqa taikarara imarufanoo Yisufa Yeerusaree amaana maqaki keeqafinoo faiqí anaasee ufa qimanniminau.
JOH 7:15 Yuda maqannaa faiqí firaasa mina qafamasee firaaqoo tautiqa qiqau. Maa fasiqafa sia sukuraki keeqeemarifa. Naqi fee mandeenoo firaa irirana iridanoo fee.
JOH 7:16 Yisufa minara iriseenoo aiqamausa qimanniminoo qinau. Qinee qimannimira ufa sia qeeqaindi maridanoo qini diqiqoofa Anutufa mina ufa qimannimidaqa.
JOH 7:17 Qini ufa Anutunaindi fee qinee qeeqa fee qidee. Faiqí moo fannoo Anutuna iriranamau firarimarifa qini ufara Anutufa fee qiannoo.
JOH 7:18 Faiqí moo fannoo narí ufa kai qidanoo narí auqu kai uqeeraidanoo. Faiqí moo fannoo narí aqiqainna fasiqana auqu uqeerararee qimarifa mifa kuqaa ufa qidanoo, sia nikaruqirafa minaki maridanoo.
JOH 7:19 Mooseefa sandufa akara rumaqoona inni nimufaqa innee mina qumaree mi mau fimarunausee qimasaidaqa fifau qidaqa inniki moo fannoo sia mi mau fimariafanoo. Innee moo mau fidaqa qini kuqa darirara qimariafanoo.
JOH 7:20 Yisufa miqi qimasoofaqa misa aiqama maaqi qimasee narí qimamiqau. Ani aunduraki afaanna marifana anee miqi qimariananoo. Yafee moo fannoo ani kuqaruannoo fee sia moo fannoo.
JOH 7:21 Miqi qimasoofanoo Yisufa maaqi qimasee nári qimanniminau. Qinee faiqí sia auqaaqaa ira ainainna moodaa auqaunaqa innee aiqama tautiafanoo.
JOH 7:22 Mooseefa faiqi aanaaqiuqa nipata aukimarunara fainanduqu nisaaqee qimarinau, innee minara irisee maasa amaana Saririqasaa miqimariafanoo. Sia Mooseefau mi oosanna aranau. Narí akeeku akaakundi mareenoo miqi qinau.
JOH 7:23 Innee Mooseena sandufa rukiaanoo qimasee faiqi aanaaqiuqa maasa amaana Saririqasaa fainanduqidaqa nipata aukimariafanoo innee amaana Saririqasaa kaqi faiqi nipata aukidaqa nanaree Saririqasaa aurimari fasiqana idaaqamasaunnanara innee aanoo qida fee.
JOH 7:24 Innee fifau dapi iriranasaa faiqí ufa nimimarifanoo mina minnisaaqa. Kuqaa anoona iriranannai kai faiqí andeeqaaqa.
JOH 7:25 Yeerusaree maqusanaasa Yisuna qafamasee mina ufa iriqa maaqi qiqau. Maana misa kuqariraree qidaqa.
JOH 7:26 Qafaa mifa faiqí qambaana faiqí nifusaa kikiqamambi ufa qimannimimarifaqa sia misa mina qumaraannee qidaqa. Abee maasa uriqararausa faqa minara kuqaa Anutuna asauku mundirafee fee qidee.
JOH 7:27 Anutuna asauku mundirana oosana maasa siamma irianaura. Kaqi tautumannimaqaannoo. Maasa maa fasiqana oosana iridaqa, Nasareeteendaraafa maridanoo.
JOH 7:28 Yisufa firaa amaana maqaki faiqí anaasee qimannimidanoo mi ufana iriseenoo maaqi qimasee firaaqoo qimanniminau. Kuqaa fee innee qiniara iridee. Qinee yaindaraasee marunaqee innee kuqaa qiniara irida fee. Sia qinee qeeqa kai animaridaqa qini diqiqaifa mifa kuqaa anoona maridanoo. Innee kuqaa minara sia irimariafanoo.
JOH 7:29 Qinee minara iridaqa qinee mindari qumuafanausa mifa qini diqiqoofaqa qumumaridaqa.
JOH 7:30 Yuda maqannaa uriqararausa mi ufana irisee qumarararee qimasoosa minnisaqau. Yisuna kuqira aukuana sia adeedi roofanoo Anutufa qumee misa ititannisoonara minnisaqau.
JOH 7:31 Faiqí anaasee moomoosa Yisuna kuqaa Anutuna asauku mundira fee qiqau. Misa maaqi qimasee narí qimami narí qimami qidaqa qiqau. Asauku mundirafa anireenoo naqi fee mandeenoo maa fasiqana uraaqarainanoo fee moomoo faiqí dadaaqimari firaa ainainna uqannifiqaannoo fee. Sia amana. Doo maana mifa uqanna maridanoo.
JOH 7:32 Faiqí anaasee miqi qimasee narí qimami narí qimami qimarufaqa Farisai amaana ufa qimarusa iriseeqa tautumasee amaana maqasaa rakisimarusunnai oonuree qimannimiqa qiqau. Qimannimisoofaqa misa amaana maqasaa rakisimaru poorisausa qimannimiqau. Innee ooru Yisuna rumbasee maree aniaqa.
JOH 7:33 Misa oonuroofanoo Yisufa maaqi qimasee faiqí anaasee qimannimimarinau. Qinee qusasaa inni faqa marianaura. Quqaseeqa qusasaa qini diqiqoofinnai fuanaura.
JOH 7:34 Innee qiniara randee sia paqurifaranoo qinee fuanannai sia innee amana fifaranoo.
JOH 7:35 Yuda maqannaa uriqararausa mi ufana iriseeqa narí qimami narí qimami qiqau. Mifa yai fee finaqa maasa sia amana fuanauree. Mifa aanaamuru Kirisa maqannaa mariannai fee fuannoo fee. Yuda maqannaasa miqoo mariasa faqa maridaqa Kirisa maqannaasa narí ufa qimannimiraree fidanoo fee qida qinoo fee.
JOH 7:36 Mifa qinoo innee qiniara randasee sia paqurifaranoo. Qinee fuanannai innee sia fifaranoo. Mina ufoosana sia maasa iridaqa.
JOH 7:37 Uqiqaana maqa qoomaqa taikara faasaana uriqarara faasaanee qiqau. Mi faasaanna Yisufa findifinoo faiqí anaasee firaa kari qimanniminau. Yafasiqa anaasee fee nammariara aididanoo fee qinee iannaqoo nammari uqanna ani naa Anutuna tamummaqara fasiqa moo ooqai maaqi qimasee akara rinau. Kaqi marirana nimira nammari misa nimuqusa ookiqari ururee fuannoo fee qinau. Yafasiqa anaasee fee qiniara kuqaa anoonee qinafa misa nimuqusa ookiqari mi nammarifa ururee fuannoo.
JOH 7:39 Yisufa nammariara quna Anutuna maraqunara nammari kikiqa usinau. Kasooqaqee Yisunara kuqaa Anutuna faiqi fee qifandinausa misa mi maraqunna mareefaranoo. Mi aukuanna Yisufa kaqi maru aukuanna sia maraquna nimirafa marinau. Yisufa kuqiranakiqari findifinanoo afaaqa areenainanoo miqoo narí afeeka maraquna nimiannoo fee qinau.
JOH 7:40 Faiqí anaasee Yisuna ufa iriseeqa qiqau. Maafa Anutuna tamummaqara fasiqa kambiqaannoo fee qufa maafa mifa maridanoo.
JOH 7:41 Akaqausa minara maafa Anutuna asauku mundira fee qiqau. Akaqausa maaqi qimasee furufaramasee qiqau. Anutuna asauku mundirafa sia Kariree maqusakiqari kambiqaannoo.
JOH 7:42 Tamummaqara fasiqa akara minara Anutuna asauku mundirafa Dafidina ati mariannoo. Dafidina ooqeenaa maqusaki Beetareeqeemma miqoo kambiqaannoo fee qiqau.
JOH 7:43 Faiqí anaasee misa rainafufaqa akaqausa moo ufa qufaqa akaqausa moo ufa qufaqa qimariqau.
JOH 7:44 Akaqausa doo Yisuna qumarasee rumbaannee qimasee sia qumaree rumbaqau.
JOH 7:45 Amaana maqasaa rakisira poorisauqa Yisuna ufa kaqi irisee amaana maqasaa rakisirausa faqa Farisai amaana ufa qimariasa faqa maruqoo oonuroofaqa iraidaqa qiqau. Naqaa fee ifaqee sia rumbasee maree anidee.
JOH 7:46 Poorisauqa qiqau, sia moo fasiqa ufa fannoo maa fasiqana aanna raidanoo.
JOH 7:47 Farisai amaana ufa qimarusa mina iriseeqa niqidaqa qiqau. Doo mi fasiqafa inni faqa nikaruqinoo fee. Maasa uriqararausakiqari moo fannoo mina ufa irinoo fee. Farisai amaana ufa qimarifa moo fannoo irinoo fee. Sia uqanna iria. Maasa Mooseena sandufa irimarunausa maridaqa.
JOH 7:49 Maaqooqaraasa kaqiqee fasiqa anaasee Mooseena sandufa sia irianara Yisunara anoonee qidaqa. Anutuna aqira ufa misasaa maridanoo.
JOH 7:50 Nikoodeemusafa mifa faqa misaki marinau. Mifa ooqai qumee Yisufinnai fimarufa marinau.
JOH 7:51 Mifa misa Yisuna aqira ufa iriseenoo Yisuna saaroo qinau. Mooseena sandufa maaqimminoo maridanoo. Sia fifau faiqí moo arirafa maridanoo. Mina ufa naaree irisee mina mandainaina marinaqa minara qimasee aruananoo amana mariannoo qinau.
JOH 7:52 Misa mi ufana iriseeqa Nikoodeemusana aqidaqa qiqau. Anee faqa Kariree maqannaa fee maridanee. Anee tamummaqara fasiqauqa akarauqakiaqa asaanarumasee iria. Sia moo tamummaqarafa Kariree maqasaa kambiqaannoo. Miqi qimasee aiqama daraani mambufanoo Yisufa amaana maqakiqari raudamakufanoo Oorifa aaqanai oorufinau.
JOH 8:1 Oorifa aaqanai kaqimma ooru faiqeenoo iqaqoofanoo Yisufa Yeerusaree firaa amaana maqaki kaifaa ooquree keeqafufaqa faiqí anaasee moomoosa suqufufaqa mina fiqu fiqumma marufanoo ooqumarifi Anutuna ufa qimannimimarinau.
JOH 8:3 Mooseena sandufa akoofasauqa faqa Farisai amaana ufa qimarusa faqa anaasee moo fasiqa qummuari marufaqa aaqee oonu qafamasee qumaree doo maree aniqau. Yisufa maruqoo mini quqaseeqa maaqi qimasee qimamiqau.
JOH 8:4 Oo ufasaa rakisira maa anaaseefa qummuari marifaqa maasa qafamasee qumaree anidaqa.
JOH 8:5 Mooseena sandufa miqiasara oonisamu kai nariqa nini iqa kuqa narusaaqee qinoo maridanoo. Anee minara nana ufee qidanee.
JOH 8:6 Misa mi ufanannai puteera foora fufidaqa qiqau. Yisufa aruanifeera qimasaida miqi marufanoo Yisufa narí iriseenoo fifau kummaramafufanoo asaukunnoo maqa akara rinau.
JOH 8:7 Mifa maqa fifau akara rimarufaqa misa fuki faaki qidaqa mi anaaseena oonisamu aruanauree sia fee aruanauree ritidaqa ireemariqau. Kaqikaaqoo marikinoo Yisufa findifi qimanniminau. Yafee inniki moo fannoo numoo siainafa mifa kai oonisamu indaaru aunaa atufinoo maa anaaseena aruannoo fee.
JOH 8:8 Yisufa miqi qimaseenoo kafaa kummaramafinoo maqa akara rimarufaqa doo misa moodaa kai qaara kai idaqa nári aaqaranara nisaurusee findimeeqaida doo fifainimariqau. Faiqí firaasa naaree fufaqa kafaa miqoo oorudupirausa fufaqa kumaaraa inaaqianna doo fifiqau. Misa fifufanoo mi anaaseefa kai miqoo kikiqinoo marinau.
JOH 8:10 Yisufa findifinoo mi anaaseena irammirinau, misa yai fee fifee. Sia fee moo fannoo ani kuqira ufa amianinafa maridanoo fee. Aiqama fifee.
JOH 8:11 Mi anaaseefa qinau. Oo rakisira sia kuqira ufa moo fannoo qimimarifa maridanoo. Yisufa iriseenoo qinau. Doo qinee faqa sia kuqira ufa ani amianaura. Doo fua, sia kafaa manda oosana maraa.]
JOH 8:12 Moo kari Yisufa Yeerusaree amaana maqaki faiqí anaasee maaqi qimasee qimanniminau. Qinee maqasaaqaraasa qooma maridaqa. Yafasiqa aanaaseesa qini faqa finausa misa kaqi marira qooma mareefaranoo sia uqanna asukunaki fifaranoo.
JOH 8:13 Farisai amaana ufa qimarusa mina iriseeqa qimamiqa qiqau. Anee aneennara kai ufa qidana aneenna auqu uqeeree mariananoo. Miqianna ufafa sia anoonaikidanoo. Fifau ufa kai qimariananoo.
JOH 8:14 Yisufa mina iriseenoo qinau. Kuqaa qinee qeeqaraa ufa qidaqa. Qinee miqi qidaqa anoona ufa kai qidaqa. Qinee qeeqa kambiqafi aniafannanara iridaqa qeeqa fuannanara iridaqa. Innee sia qinee kambiqaafannanara irimariafanoo.
JOH 8:15 Innee faiqí faiqi ufa irisee dapi iriranannai faiqí anaasee rainannimaqee mariafanoo. Sia qinee moo fasiqa aanaaseera rainannimaqee marunausa maridaqa.
JOH 8:16 Qinee akaqausara rainannimaqaidaqau andeeqasee rainannisaunaiqini. Sia qeeqaraafau maridaqau ufa nimidaqau. Qeeqa qikoofa qini diqiqamaqoona faqa maridaqa dadaaqi marifaqa ufa qimannimidaqa.
JOH 8:17 Inni sandufa akara ufa moo maaqimminoo maridanoo. Qaara fasiqa moo ainaina nári nifunnai qafamasee munu kooroo qimasaifaqa aiqamausa minara anoona ufa fee qifaranoo.
JOH 8:18 Qinee qeeqaraa ufa qidaqa qini qikoofa qini diqiqoofa mifa faqa qini dadaaqifaqa anoona ufa tia qimannimidaqa.
JOH 8:19 Miqi qimasoofaqa Farisai amaana ufa qimarusa maaqi qimasee irammiriqau. Ani akoofa yai fee maridanoo ani dadaaqidanoo fee qufanoo Yisufa qinau. Innee qiniara faqa qini qikoonara faqa sia irimariafanoo. Innee qiniara irifau qini qikoonara faqa irini. Innee sia maaqandara irimariafanoo.
JOH 8:20 Yisufa maa ufausa Yeerusaree firaa amaana maqaki qimannimimarinau. Mi amaana maqanaki oosirafa moo marinau. Amaana maqaki quqee maru munnimma difaanifa minaki marufanoo mi oosiranaki Yisufa maridanoo mi ufausa qimanniminau. Misa Yisuna qumaraanee qimasee sia qumaraqau. Sia mina kuqira aukuana adeedi ranoo marunara Anutufa qumee rafaaqafusoofaqa sia qumaraqau.
JOH 8:21 Moo kari Yisufa maaqi qimasee Yuda maqannaa uriqararausa qimanniminau. Qinee moosaa fuanaqa qiniara randainaisia inneeqa mandainainaki kuqifaranoo. Qinee fuannaqoo innee sia amana fifaranoo.
JOH 8:22 Yuda maqannaasa uriqararausa mi ufana iriseeqa narí qimami narí qimami qiqau. Mifa maasara sia narí innai fuaqeera qidaqinoo. Maasa sia mina ufa iridaqa. Mifa narí fee narí aruannoo fee miqi qidanoo fee.
JOH 8:23 Yisufa iriseenoo qimanniminau. Innee maindaraasa mariafanoo qinee mirindaraasa maridaqa. Innee maa maqanasaaqaraasa mariafanoo qinee sia maa maqanasaaqaraasau maridau.
JOH 8:24 Qinee minara qunnana innee inneeqa mandainainaki kuqifaranoo. Innee sia qinee marunnanara anoonee qimariafanoo minara kuqaa innee inneeqa mandainainaki kuridifaranoo.
JOH 8:25 Misa uriqararausa mina iriseeqa qiqau. Anee yafee maridanee qufanoo Yisufa qinau. Indaaru qimannimiafanausa misa kai maridaqa.
JOH 8:26 Qinee moomoo ainainara inniara qimannimianaura. Qini diqiqamaqoofa mifa anoona ufa kai qimarifa mifinaindaraana kai inni maa maqanasaa mariasa qimannimidaqa.
JOH 8:27 Yisufa narí akoona aufakiana qimannimimarufaqa siamma irimariqau. Minara Yisufa kaifaa maaqi qimasee qimanniminau.
JOH 8:28 Kasooqaqee innee qini faiqí nimaaku uqeereeqee aunirira saqarisaa quqaqisaseeqa mikamuqoo qinee mariaafannanara irifaranoo. Qini qikoofa qimaqimiqoo ufana kai inni qimannimidaqa. Mikari innee minara faqa amiqimasee irifaranoo.
JOH 8:29 Qini diqiqoofa qini faqa maridanoo. Qinee mina aidira oosanamau kai fidaqa minara sia minniqisaifaqau qeeqaraafau maridaqau. Mifa qini faqa maridanoo.
JOH 8:30 Faiqí anaasee moomoosa mi ufana iriseeqa Oo kuqaa mifa Anutuna asauku mundira fee qimasee minasaa mundiqau.
JOH 8:31 Yisufa minara iriseenoo qimanniminau. Innee qini ufa qimannimunnana irisee mi mau maqee maqee fifaqa kuqaa qini faiqi namu marifaranoo.
JOH 8:32 Innee kuqaa anoona ufa kai irifaranoo. Anoona ufa fannoo inniqa mandainainakiqari inni idukuannoo.
JOH 8:33 Misa mi ufana iriseeqa qiqau. Maasa Abarahaamana ati maridaqa, sia moona rumbaranaki maridaqa. Nanaree anee maasara idukuaqee qidanee.
JOH 8:34 Miqi qufanoo Yisufa kafaa qimanniminoo qinau. Qinee kuqaa anoona ufa inni qimannimidaqa. Faiqí moo fannoo mandoosana maree marifa mi manda oosanafa mina rumbaqaifa maridanoo.
JOH 8:35 Faiqí moo fannoo moona ainaina iinoo oosana oosana ainaina narindiara foora iinoo. Kasooqaqee doo ainaini taikaseenoo mi aiqama ainainna narí amiseenoo doo kaqisamu fuannoo. Mi ainainna faqaana faiqi fannoo sia amana taikaannoo kaqi narí akoona amaaku mariannoo kaqi narí akoona amaaqa maqa finoo mina qumiasana maraseenoo sia ainainira faiqi naanna reenoo taikaannoo, kaqi miqoo mariannoo.
JOH 8:36 Qinee Anutuna amaaku maridaqa. Qinee inniqa manda oosanakiqari idukusaanaqa innee kuqaa idukiqa marifaranoo.
JOH 8:37 Innee Abarahaamana ati mariafaqa qinee minara iridaqa sia innee mina aanna reemariafaqa, qini ufa sia marararee qidaqa qini dariraree qimariafanoo. Abarahaamafa sia miqi marufa minara innee sia Abarahaamana faiqi namu uqanna mariafanoo.
JOH 8:38 Qini qikoofa qini uqaqifiqoona kai inni qimannimidaqa. Innee mina minniseeqa inneeqa nikoona moo Sadannana ufa irimariafanoo.
JOH 8:39 Misa mi ufana iriseeqa maaqi qiqau. Maasa qikoofa Abarahaamafa maridanoo. Yisufa minara qinau. Innee Abarahaamana faiqi namu maridaqau mina ufamau fini.
JOH 8:40 Qinee qeeqa qikoonasaaqaraa ufa kai inni qimannimimarunaqa innee quandafiqa qini darirara qimariafanoo Abarahaamafa sia mi oosanna maranau.
JOH 8:41 Innee inneeqa nikoona uqanna oosana maraidaqa miqi mariafanoo. Misa mi ufana iriseeqa qiqau. Maasa sia qummuara faiqifau maridaqau. Maasa moodaa fasiqa faiqi Anutufa narí uqanna maasa qikoofa maridanoo.
JOH 8:42 Yisufa misa ufa iriseenoo maaqi qimasee qimanniminau. Anutufa inni nikoofa marinaqau kuqaa innee qiniara rini. Qinee Anutufinaindari maaqoo qumumaridaqa. Qinee sia qeeqafau qumiqau mifa diqiqoofaqa qumiqiafana.
JOH 8:43 Innee naqaa fee ifaqee sia qini ufa oosana iridee. Innee qini ufa iriafanoo nikooqaidanoo miqidaqa sia irimariafanoo.
JOH 8:44 Afaanna nikoofa Sadannafa maridanoo. Innee mina faiqi namu maridaqa mina aanna ree mariafanoo. Ooqaindari faiqí kuqannarimarufa maridanoo. Sia anoonufakifau mapukinoo maridanoofau. Anoona ufa sia uqanna minaki marifa maridanoo. Mifa unna ufa qinoo narí oosanamau kai fidanoo. Mifa unna ufa qimarifa maridanoo unna ufa qimariasa nikoofa maridanoo.
JOH 8:45 Qinee kuqaa anoona ufa kai qimannimi marunnanara innee sia irimariafanoo.
JOH 8:46 Qini manda oosana moodaa maridanoo fee sia fee maridanoo. Innee qafee qiqa qimaqimiaqa. Qinee kuqaa anoona ufa kai inni qimannimunaqa naqi fee ifaqee innee sia minara anoonee qidee.
JOH 8:47 Anutufa dadaaqifaqa mina faiqi namu araamuqmaakaiki mariasa kai Anutuna ufa irifaranoo. Innee sia Anutunaindaraasau mariafanoofau sia qini ufa irimariafanoo.
JOH 8:48 Yuda maqannaa uriqararausa Yisuna ufa iriseeqa aqiqa qiqau. Anee manda Samaria maqannaa mariananoo afaanna moo ani aunduraki marifa mariananoo. Maasa kuqaa fee qidee, sia fee.
JOH 8:49 Yisufa iriseenoo qinau. Afaanna sia qiniki maridanoo. Qinee qeeqa qikoona auqu uqeeraidaqa innee qini duqu maqasaa quqeemariafanoo.
JOH 8:50 Qinee sia qeeqa duqu uqeeraranara randaidaqa. Moo fannoo qini duqu uqeerarafa maridanoo. Innee qini duqu maqasaa quqeemariafanoo Anutufa kai qini dadaaqinoo inni rafaaqa fuannoo.
JOH 8:51 Yafasiqa anaasee fee qini dookinaa ufa irisee marainafa mifa sia kuquannoo naaru mariannoo.
JOH 8:52 Yuda maqannaa uriqararausa mi ufana iriseeqa qiqau. Doo maasa ani oosana iriseeqa anee kuqaa afaanna faqaafa mariananoo, Abarahaamafa maasa qikoofa doo ooqai kuqinau. Anutuna tamummaqara fasiqauqa doo kuqiqau. Anee naqi fee masee maa ufana qidanee qini ufa irimariasa sia kuqifaree qidanee.
JOH 8:53 Maasa qikoofa Abarahaamafa kuqinau. Anee mina uriqarara fee maridanee qidanee. Anutuna tamummaqara fasiqauqa maqasaa fasiqauqa kuqufufana anee aneennaraa naqira fasiqee maridee qidanee.
JOH 8:54 Miqi qimasoofanoo Yisufa qimanniminau. Qinee qeeqa duqu fifau uqeerasaana sia anoonaikiannoo, fifau mariannoo. Qini qikoofa Anutufa qini duqu uqeeraidanoo dadaaqidanoo, innee unna qimasee minara maasa Anutunee qimariafanoo.
JOH 8:55 Innee ooqaindari sia mina auqu irimariafanoo. Qinee mina auqu iridaqa. Qinee minara sia iridau inni naanna reemarunausa unna ufa qimarunausee qini. Qinee qeeqa qikoonara iridaqa mina ufamau fimarunausa maridaqa.
JOH 8:56 Inni nikoofa Abarahaamafa ooqai kaqi maridanoo qinee maqee marunnanara kaaqa qafaaqaa imarufa marinau. Doo qiqafamaseenoo asasinau.
JOH 8:57 Yuda maqannaa uriqararausa mi ufana iriseeqa maaqi qiqau. Anee kumaaraa mariananoo. Anee naqimasee Abarahaamana qafanee inau, ooqai mariufa maridanoo.
JOH 8:58 Yisufa minara maaqi qimasee qimanniminoo qinau. Abarahaamafa sia kambiqoo aukuanna qinee maa marunausa mikamuqoo mariqiafana.
JOH 8:59 Yuda maqannaasa mina iriseeqa oo maa fasiqafa nariara Yaawee fee qidaqinoo qimasee aanoomasee oonisamu qumaree aruaneerufanoo mifa kukeeqakinoo amaana maqakiqari raudamaki moosaa finau.
JOH 9:1 Yisufa aatata fidanoo moo fasiqa mina anoofa innaamunai afu dimbarana maqaqoona qafanau. (Mi aukuanna nifu niku mandaikirausauqa mai mariandee sia amana ainainamasee naaqaa imariqau. Faasaana kaqi marida narana feefaurira munnimmara ireemarufaqa nimimarufaqa marasaida neemariqau misa nuqu iramasaida neemariasee qiqau.)
JOH 9:2 Yisuna faiqinamu mi afu qimbarana qafamasee Yisuna irammiriqa qiqau. Oo ufasaa rakisirafa maa fasiqafa yana mandainainasaa fee maaqinoo afu dimbanoo maridanoo fee. Narí akoona anoona mandainainasaa fee narindisaa fee miqinoo maridanoo fee.
JOH 9:3 Yisufa iriseenoo qimanniminoo qinau. Sia narí anoona akoonasaa qaraanau, sia narindisaafau afu dimbanoo maridanoofau. Anutuna afeeka kasirana qinikiqari kooroo ianifeera mina afu dimbanoo maridanoo.
JOH 9:4 Qini diqiqoofa qini qimiqoo ainainirana sia amana asukunaki auqaanaura maasa faasaana auqaanaura. Doo kaqikaaqoo eendinaqa sia miqoo faiqí moo fannoo auqaannoo.
JOH 9:5 Qinee maa maqa maaqanaki maridaqa misa qooma maridaqa, kaaqa qamannimaqaanaura.
JOH 9:6 Miqi qimasee Yisufa maqasaa aqaara fidaquseenoo asaukukoo doonaikamaseenoo afu dimbara fasiqa afusaa akuseenoo qimaminoo qinau.
JOH 9:7 Doo fua. Doo oonu Sirooamma farummaki aneenna oori afuakai ruquannee qinau. Sirooamma farumma auqu oosana niqiqamaqai farumma fee qinoo marinau. Mi afu qimbara fasiqafa eedoo qimasee oonu narí oori afuakai ruqufanoo afu aiqamaqara amiqimasee qoofanoo oonu quandakufanoo sandee kafaa aninau.
JOH 9:8 Mi fasiqana aqoonausa mina qafamasee moomoosa mina qafeemarusa mina qafamasee qiqau. Maa fasiqafa maaqoo maridanoo narana munnimmara ireemari fasiqa fee mifee.
JOH 9:9 Akaqausa doo mifa kai fee qiqau, akaqausa moo fannoo mina fooqaa fee qiqau. Mi fasiqafa narí irisee qinau. Qinee qifu dimbarausa maaqoo marunausa maridaqa.
JOH 9:10 Misa mina iriseeqa iraqau. Naqimasee afu maqeenee qufanoo mifa qinau.
JOH 9:11 Faiqí moo mina auqu Yisufa qaqaara fidiseenoo doonaikamaseenoo qini qifuki akuseenoo doo fua Sirooamma farummaki oori nammari uqua qufaqa miqi qifaqa nammari uqusaunanoo doo qifu maqeenoo.
JOH 9:12 Miqi qimaasoofaqa misa qiqau. Miqimasaifa yai fee finoo fee qufanoo mifa sia qinee irida fee qinau.
JOH 9:13 Miqi qimasoofaqa misa mi fasiqana afiqeeqa Farisai amaana ufa qimarusa uqannifiqanau.
JOH 9:14 Mi faasaanna Yisufa mi fasiqana afu maqoo faasaana misa amaana Saririqa marunara Farisai amaana ufa qimarusa marunnai afiqee fiqau.
JOH 9:15 Farisai amaana ufa qimarusa mi fasiqana afu maqoonara iroofanoo qinau. Mifa doona qini qifusaa akusaifaqa doori nammari uqunanoo qifu maqeenoo.
JOH 9:16 Farisai amaana ufa qimariasa akaqausa Yisunara maaqi qiqau. Maa fasiqana afu maqaifa sia Anutunaindarifau amaanasaa ainainimarifa manda fasiqa maridanoo. Akaqausa mina iriseeqa qiqau. Naqimasee mandainaina maree marinafa maa firaa ainainna amiqira ainaina auqararee sia amana fee qimasee mi ufanannai rainaqau.
JOH 9:17 Miqi qimasee Farisai amaana ufa qimarusa afu dimbarana irammiriqa qiqau. Anee mi fasiqana ani afu maqainaree qidanee. Anee minara nana ufee qidanee. Afu dimbarafa mina iriseenoo qinau. Mifa Anutuna tamummaqara fasiqa maridanoo fee qinau.
JOH 9:18 Yuda maqannaasa uriqararausa mina iriseeqa maaqi qiqau. Maana sia afu dimbarafau moo fasiqa maridanoo qimaseeqa misa mina anoona akoona naaramasee irammiriqa qiqau. Maa fasiqafa inniqara faiqi fee. Kuqaa fee anee mina maqoonna kari afu dimbaranee maqanau. Naqimasee maqee afu maqeenoo fee qufaqa mina anoofa akoofa uriqararausa amaana maqaki keeqeemariana qaoo qimaqiseefoo qimasee rufieeqa qimannimiqa qiqau. Maa fasiqafa maasa qimaaku maridanoo maasa minara iridaqa. Ooqai aanaaqisaa innaamunai miqirana maqaafanafa maridanoo maasa minara faqa iridaqa.
JOH 9:21 Mina afu maqainara yafasiqa fee mina afu maqeenoo fee siamma iridaqa faiqí maridanoo irammirifanoo qimannimiannoo.
JOH 9:22 Yuda maqannaa uriqararausa Yisunara faasa maaqi qimariqau. Faiqí moo fannoo Yisunara Anutuna asauku mundira fee qinnana maasa amaana maqakiqari aqiqaananoo raudamaki aqoosai finoo sia kaifaa keeqaannoo.
JOH 9:23 Mi ufanara afu dimbarana anoofa akoofa doo faiqimmifoo narí iraaqee qiqau. Misara rufiasee miqi qiqau.
JOH 9:24 Yuda maqannaa uriqararausa mina iriseeqa afu dimbarana kafaa aaramasee qiqau. Anee Anutuna afusaa kuqaa anoona ufa kai maasa qimannimia. Ani afu maqaifa mifa mandainaina maree marifa maridanoo.
JOH 9:25 Afu dimbarafa mina iriseenoo qimanniminau. Mi fasiqafa mandainaina maree mari fee sia qinee mina oosana iridaqa. Moodaa ainainara kai qinee iridaqa qinee qifu dimbarausa mariafanausa maqee qini qifu maqee marifaqa maridaqa minara kai qinee amiqimasee iridaqa.
JOH 9:26 Misa mina iriseeqa kaifaa irammiriqa qiqau. Mi fasiqafa nana ainainee auqu amifanoo ani afu maqeenoo fee.
JOH 9:27 Afu qimbarafa niqinoo qinau. Doo faasai qimannimisaunaqa sia irimariafanoo. Nanaree innee kaifaa qiana irifaree innee faqee mina faiqinamukifaree.
JOH 9:28 Misa mina iriseeqa aanoomasee mina aqiqa qiqau. Anee mi fasiqana ufa irimarianafa mariananoo. Maasa Mooseena ufa irimarunausa maridaqa.
JOH 9:29 Anutufa Mooseenannai maasa qimaqimufaqa maasa iridaqa. Mi fasiqafa Yisunara maasa sia mina oosanara iridaqa.
JOH 9:30 Afu dimbarafa mina iriseenoo niqinoo qinau. Innee moo irirana maree mariafanoo mifa qini qifu maqaqisaifaqa innee nanaree mi fasiqanara yaindari fee anidanoo fee qidee.
JOH 9:31 Anutufa sia manda oosana maree mariasa dadaaqidanoo. Faiqí anaasee minara rimariasa mina ufa irimariasa misa kai Anutufa dadaaqidanoo.
JOH 9:32 Ooqai oosana aroo aukuannasaaqari sia faiqí moo fannoo afu dimbarana nifu maqannisanau, maqee kai.
JOH 9:33 Maa fasiqafa sia Anutufinaindari aninaqau naqimandee maa firaa ainainna auqararee, siamma amanaikiannoo.
JOH 9:34 Yuda maqannaa uriqararausa mina iriseeqa qimamiqa qiqau. Anee mandainainaki kambiqoonafa mandoosanaki findifuanafa doo see fifuannee qimaseeqa misa amaana maqakiqari aqiqoofanoo raudamaki finau, sia kafaa anianifeera doo ateekaqau.
JOH 9:35 Misa afu qimbarana aqiqoonara Yisufa iriseenoo paqurimasee irammirinau. Anee faiqí nimaakuara Anutuna asauku mundira fee fee qidanee minasaa irirana rusidanee.
JOH 9:36 Mi fasiqafa Yisuna sia qafoofa maridanoo maaqi qinau. Doo mina uqaqifiqainaqa minara anoonee qimasee minasaa atooqaanaura.
JOH 9:37 Yisufa qinau doo anee qafaananoo doo mina faqa ufa qimariananoo.
JOH 9:38 Mi fasiqafa mina iriseenoo qinau. Oo Karaambaiqa aniara kuqaa Anutuna amaaku fee qidaqa qeeqa qimuqusa irirana aniki rusidaqa qimuqusannoo ani amooqimamaqaidaqa. Miqi qimaseenoo mi fasiqafa Yisuna oorinni maqasaa kummaramafinoo amooqinau.
JOH 9:39 Yisufa mina qafamasee miqoo marusa qimanniminoo qinau. Qinee maa maqanasaaqarasaa rainannimaqarara qumuafanausa maridaqa. Qinee nifu dimbarausa maqaaneera qumuafanausa nifu maqarausa dimbaaneera qumuafanausa maridaqa.
JOH 9:40 Farisai amaana ufa irimarusa miqoo marusa mina iriseeqa iramiriqa qiqau anee maasara faqee nifu dimbarausee qidanee.
JOH 9:41 Yisufa qinau. Inni nifu dimbanoo marinaqau inni numoo sia marini innee unna qimasee maasa qifu kaqi marifaqee qimarianara inni numoo kaqi maridanoo nifu dimbarausara foora mariafanoo.
JOH 10:1 Yisufa kafaa miqooqaraasaa qimannimidanoo sipsipara qinoo faiqiara qinau. Qinee anoona ufa qimannimidaqa. Faiqí moo fannoo sia sipsipa ququsa kooqiki keeqeemarifa kaqinaindari ququsasaa akareemarifa mifa qummuarimari fasiqafa mariannoo.
JOH 10:2 Sipsipa kooqiki keeqee marifa mifa sipsipasaa rakisimarifa maridanoo.
JOH 10:3 Sipsipa nikoofa moo fannoo anirainanoo kooqisaa rakisirafa kooqi atuasaifanoo sipsipa akoofa narí sipsipa nuqu ramasee naarainaqa mina ufa iriseeqa raudamaki narí faqa nifiqainaqa andanda narara fifaranoo.
JOH 10:4 Sipsipauqa nári rakisimarina ufa iriqa raudee qumuraifanoo mifa indaaru fifaqa misa mina aanaaqianna fidaqa.
JOH 10:5 Sipsipa sia moo fasiqa afaqee fifaranoo mina ufa irisee moo fannoo fee qimasee sandeefaranoo.
JOH 10:6 Yisufa mi quandara ufana qimannimufaqa siamma iriqau.
JOH 10:7 Minara iriseenoo kafaa kooroomasee qimanniminoo qinau. Qinee kuqaa anoona ufa qimannimidaqa qinee qeeqa kai sipsipa kooqi maridaqa.
JOH 10:8 Ooqai qini doorini indaaru anusa qummuari maru fasiqausa kai animariqau. Sipsipauqa sia misa ufa iriqau.
JOH 10:9 Qinee Anutuna ququsa kooqi maridaqa yafasiqa aanaaseefee kooqisaarafoo qinisaa keeqee marinafa Anutufa mi fasiqanaaseesa kuqiranakinaana marasee innaaruna asumu mariranaki quqaannoo. Mi fasiqanaaseesa Anutuna ququsaki sipsipara foora keeqee raudeeida narana neemarifaranoo.
JOH 10:10 Qummuarimari fasiqafa qummuaramasaina taikaanifeera fifau faafau qummuarianifeera faqa kuqannaruanifeera faqa kuridi nimaqaanifeera faqa aniannoo. Qinee faiqí anaasee asumu marirana nimianeera anidaqa. Sia kaqi dapi mariranarau qidau. Asumu marirana amiqirana moo faqa moo faqa rairaairana nimirara mina kai nimiraree qimasee qumidaqa.
JOH 10:11 Qinee sipsipasaa amiqimasee rakisimarunausa maridaqa. Sipsipasaa amiqimasee rakisimarifa narí sipsipasaara kuquannoo.
JOH 10:12 Feefauruara ainainimarifa sia miqiannoo kaasau faini anirainanoo rufiasee sandaannoo. Sandamafinanoo kaasau faini anireenoo sipsipa qumarainaqa daraanifaranoo.
JOH 10:13 Feefauruara ainainimarifa sia sipsipara amuqusiannoo feefauruara kai rakisidanoo.
JOH 10:14 Qinee sipsipasaa amiqira rakisirausa maridaqa. Qini qikoofa qiniara iridanoo. Qinee miqi kai iqa qeeqa qikoonara faqa iridaqa.
JOH 10:15 Miqi kai iqa qeeqa sipsipara iridaqa misa faqa qiniara faqa iridaqa. Qinee qeeqa sipsipasaara amana kuquanauree qidaqa.
JOH 10:16 Sia maaqooqaraasa kai qini ququsaki mariaqeera. Qini ququsa fannoo moomoo maqusanaasaki faqa maridanoo. Minakinaasauqa faqa nifiqa quqaanaura. Misa faqa qini ufa irisee eedoo qifaranoo. Miqoo moodaanaki marifaranoo moodaa rakisirafa misasaa mariannoo.
JOH 10:17 Qeeqa sipsipara qimuqusina qeeqa marirana misa nimaaqa maqaseeqa kuqirinaki quqasee kaifaa qeeqa marirana minakiqari maraanaura. Qinee miqiraree qunnanara qini qikoofa qiniara ridanoo asasidanoo.
JOH 10:18 Sia moo fannoo narí afeekannai qini marirana maraannoo. Qinee qeeqakai qeeqaraa irisee qeeqa marirana kuqiranaki quqaanaura. Qini qikoofa qinaqa qeeqa marirana kuqiranaki quqararee qimasee quqaanaura. Quqasee kafaa marararee qimasee maraanauranoo. Qini qikoofa miqi qimasee ufa qimaqimifaqa iridaqa.
JOH 10:19 Yuda maqannaasa miqooqaraasa Yisuna mi ufana iriseeqa rainafufaqa akaqausa qiqau. Maa fasiqana audurai afaanna maridanoo, marifanoo dapi dapi ufa qidanoo, nanaree innee mina ufa iridee.
JOH 10:21 Miqi qimasoofaqa akaqausa misa qimannimiqa qiqau. Akasaa afaanna aunduraki marinafa sia maa fasiqafa indeemasee ufa qiannoo. Afaanna fannoo amanee afu dimbarana maqaiseenoo fee sia amanaikiannoo.
JOH 10:22 Mookari Yuda maqannaasa Yeerusaree maqusai suqufufaqa amaana maqara qoomaqammasaida neemariqau. (Ooqai namuqaa amaana maqaki mini madaapee quqasoofaqa mina anukamaquseeqa doo miqooqari aukuana aukuana anukara qoomaqaqee qimasaida sakasaida neemariqau.) Suara aukuana mi qoomaqana imariqau Yeerusaree maqusai.
JOH 10:23 Yisufa Yeerusaree maqusai oorureenoo amaana maqa atisaa tida auquqoonasaa aakuara rufiasee minaki nimarinau. (Faiqí anaasee moomoo aaku suarara rufiaseeqa minaki kai mariqau.) Amaana maqa atimau tidasaa kisaaqa firaaqoo marinau. Yisufa Sooroomoona amarana maaqa atimau tidasaa nimarufaqa Yuda maqannaa uriqararausa ititaseeqa irammiriqa qiqau. Anee sia quandaqaandia, amiqimandee akooroomasee maasa qimaqimia, kuqaa fee Anutuna asauku mundira fee maridanee.
JOH 10:25 Yisufa maaqi qimasee qimanniminau. Doo qimannimuna siamma irimariafanoo. Qinee moomoo qeeqa qikoofinaindaraa ainaina auquseeqa minannoo inni uqannifiqaunausa maridaqa.
JOH 10:26 Innee sia qinee firimarunna aandau sipsipauqau mariafanoofau minara sia qiniara anoonee qimariafanoo.
JOH 10:27 Qini sipsipauqa qini ufa iridaqa qinee misara faqa iridaqa, misa minara aiqama qini faqa fidaqa.
JOH 10:28 Qinee naaru naaru marirana nimidaqa sia kuqifaranoo. Sia amana moo fannoo qini qisaukukinaana rafieefaranoo.
JOH 10:29 Qini qikoofa qini sipsipauqa qimufa aiqamausa uriqararafa maridanoo, sia moo fannoo mina asaukukinaana rafieefaranoo.
JOH 10:30 Qini qikoofa faqa qinee faqa moodaa marunnanara sia amana rafieefaranoo.
JOH 10:31 Yuda maqannaasa mi ufana iriseeqa aanoomasee oonisamu qumaree Yisuna arirarufanoo qinau.
JOH 10:32 Qinee moomoo amiqira ainaina auqaidaqa qini qikoofa qimu ainaina auqaidaqa innee nana amiqira ainainara irisee fee minasaara oonisamu qini darirara qidee.
JOH 10:33 Yuda maqannaa uriqararausa mina iriseeqa kafaa aranaiqi qimamiqa qiqau. Sia amiqira dadaaqira ainaina auqaananarau ariraridau. Aneenaraa Anutuna mandaikammamaqaidana anee aneennaraa maqasaa fasiqa marianafa anee Anutufaikina mariannanara ariraridaqa.
JOH 10:34 Yisufa mina iriseenoo qinau. Inni sandufa akaraki Anutufa qinau. Innee faiqí faiqi Anutunaikammida mariafanoo.
JOH 10:35 Sandufa andeeqanoo maridanoo naaru naaru sia aaqee mariafanoo, innisaimbaqa minara iridaqa. Anutufa narí ufa misasaa quqaseenoo misara Anutu fee qinau.
JOH 10:36 Anutufa qini maraseenoo maa maqa maaqanaki diqiqamaqoonaki maridaqa. Qinee qeeqaraa Anutuna amaaku fee qunnanara naqimasee fee minannai Anutuna mandaikamma amaqaanauree sia amanaikiannoo.
JOH 10:37 Qinee qini qikoofa auqamaqai ainaina auqaanaqa qafamasee kuqaa anoonammifoo qiaqaana. Qini qikoofa sia auqamaqai ainainna auqaanaqa qafamasee unnammifoo qiaqaana.
JOH 10:38 Innee qeeqaraa ufa qunnanara unna fee qimasaida qinee faiqí sia auqaaqaa ira ainainna auqaanaqa qafamasee qiniara kuqaa anoona fee qimasee kuqaa mina akoofa minaki marinara miqidanoo fee qiaqaana kaifaa mifa faqa nariki marinara miqidanoo fee qiaqaana.
JOH 10:39 Yisufa miqi qimasoofaqa misa qumaraaneerufanoo kaqimbinau.
JOH 10:40 Yisufa Yooradanna nammarinni ooqureenoo ooqitaqa mareenoo ooqai Yoohaneefa maridanoo nammari nimiuqoo miqoo ooqu marinau.
JOH 10:41 Faiqí anaasee moomoosa suqufufaqa Yisufa maruqoo maridaqa narí qimami narí qimami maaqi qiqau. Yoohaneefa nammari nimimarufa sia moo ainaina firaa ainaina auqanau. Yoohaneefa maa fasiqanara qufa doo aiqamainaina anoonaikidanoo.
JOH 10:42 Miqoo faiqí anaasee moomoosa Yisunara kuqaa Anutuna faiqi fee qimasee mina saqarikiqau.
JOH 11:1 Faiqí moo auqu Rasarusafa mifa Beetani maqusaindaraafa aurida marinau. Rasarusafa narí asookiqanda Mariana amarana faqa Maratana faqa misa Beetani maqusaindaraasa mariqau.
JOH 11:2 Mariafa maafa kasooqaqee amiqira afundimaru fadameena Yisuna aikusaa adiaseenoo narí akiaqa asausi kisaaqannai rukaaninafa maana mi Mariafa maridanoo. Sia Yisuna anoofau mina amarafa marinau.
JOH 11:3 Mi Mariana afasaafa Rasarusafa kuqira aurira maroofaqa mina asookiqanda qafamaseeqa faiqí moo aiqeeqa anee Yisuna ooqu afiqee uruannee qufanoo ooqu finau. Mifa maaqi qinau ani afaaqasaa aqoondi Rasarusafa kuqira aurirana maraidanoo.
JOH 11:4 Yisufa mi ufana iriseenoo narí faiqi namu qimanniminau. Rasarusafa aurida maridanoo. Sia kuqiranaki firarau Rasarusafa mi aurirana maraidanoofau mina auriranannai Anutufa narí amaaku qini duqu uqeeraanifeera mi aurirana maraidanoo.
JOH 11:5 Yisufa miqanda qisanasaasa faqa misa nisookinara faqa kaaqa misara rimarinau. Yisuna afaaqasaa aqoondi marunara rimarinau.
JOH 11:6 Rasarusana auriranara iriseenoo sia dauni finau qaara afuru faiqanau.
JOH 11:7 Qaara afuru faiqee iqaqoofanoo narí faiqi namu qimanniminau. Uqeeraifaqa innisaimbaqa kafaa qumurandee Yudeea maqa maaqai Rasarusafa aurida qina ooru qafa.
JOH 11:8 Miqi qufaqa misa tautumandee maaqi qiqau, Oo ufasaa rakisirafa innau kai Yuda maqannaa uriqararausa oonisamu ani arirara qufana kafaa fee miqoo fidanee.
JOH 11:9 Yisufa iriseenoo qinau, iqaqaifanoo kai suani urureenoo kaaqa qaidanoo. Faiqí miqi mariqoo nidaqa sia saamuridaqa. Misa maa maqanasaa kaaqa qarafa marifaqa qafaida sia saamuridaqa.
JOH 11:10 Faiqí moo fannoo asukunai nidanoo oonisaa aikuamaki saamuridanoo, sia kaaqa qarafa minaki marinara miqidanoo Anutufa qi faasaana ooru fiqa sia saamuruanaura kaaqa qeemarina ooru fuanaura.
JOH 11:11 Yisufa maaqi qimasee qimanniminau. Rasarusafa maasa qiqoondi doo faiqaqee ifaqa qinee oorureeqa afaurianaura.
JOH 11:12 Mina faiqi namu mina iriseeqa qiqau. Oo karaambaiqa mifa fifau faiqaqee idanoo findifuannoo amiqirafa.
JOH 11:13 Yisufa kuqiranara faiqeefoo qimasoofaqa misa sia iriqau.
JOH 11:14 Minara Yisufa kooroo qimasee qinau. Rasarusafa doo kuquaraasinoo maridanoo.
JOH 11:15 Dufi dufi sia qinee miqoo maridaqa inniara iridaqa kasooqaqee Anutuna afeeka qafeeqa kuqaa qiniara Anutuna amaaku fee qifaranoo doo uqeeraifaqa fua Rasarusafinnai.
JOH 11:16 Toomasina auqu qaara auqu marinau. Moo auqu Toomasifa moo auqu Qaaraqanda maqara fee qimariqau. Toomasifa Yisufa Yudeeaa maqa maaqai ooru firanara iriseenoo qinau. Doo uqeeraifaqa maasa ufasaa rakisirana faqa Yeerusareenni oorureeqa moodaanaki kuquanauree qimasoofaqa misa aiqama Yisuna faqa Yooradanna nammarindari ooru fiqau.
JOH 11:17 Narí Yisufa iriseenoo Beetani maqusai ooruroofaqa qimamiqau Rasarusafa doo innau kuqufufaqa akundamaqaafanoo qaara faqa qaara faqa eenda madikaki faiqaqee idanoo.
JOH 11:18 Beetani maqusa Yeerusaree aaqa uqanna maridanoo. (Beetani maqusa Ubandeenara foora marida Yeerusaree maqusa Faarumaaqaira foora marinau.)
JOH 11:19 Yeerusaree adeedi marunara moomoo mindaraasa qumuree Maratasa Mariasa dadaaqi ikifaafau qida rooípee mariqau. Nári nifasaafa Rasarusafa kuqunara ikiraqee mariqau.
JOH 11:20 Maratafa Yisufa ani qu ufana iriseenoo raudamakufanoo oonu afiqaidanoo minara qimamirara fufanoo Mariafa kaqi maaqaki marinau.
JOH 11:21 Maratafa Yisuna qafamasee qimaminoo qinau, Oo Karaambaiqa anee anirainanoofau sia qini qifasaafa kuqiqini. Qaara faqa qaara faqa faasaana doo kuqufifaqa akundamasee maridaqa.
JOH 11:22 Miqinoo marifaqa maridaqa, aneenna kai maqee nana ainainaree Anutufinnai nana ainainaree innaaru qinanoo ani amiannoo.
JOH 11:23 Maratafa narí asookifa kuqunara iridanoo miqi qimasee qimaminau. Yisufa irisee qimaminoo qinau, Anutufa ani afasaana kaifaa mara findifumaiseenoo kaqi marirana amiannoo.
JOH 11:24 Maratafa mina iriseenoo qinau maa maqa maaqafa taikara faasaana Anutufa qini qisookina uqeerasee kaqi marirana amiannoo qinee minara iridaqa.
JOH 11:25 Yisufa qimaminau, kuqiranakiqari mara findifirafa qiniki maridanoo. Kaqi marirana marirafa qiniki maridanoo. Yafasiqa anaasee fee qini saqarikinoo kuqinoo kaqi mariannoo kuqiranakiqari findifirafa qiniki marinara kaqi mariannoo.
JOH 11:26 Yafasiqa anaasee fee kaqi maridanoo qini saqarikinoo naaru sia kuquannoo kaqi marirana marirafa qiniki marinara naaru naaru sia kuquannoo. Marata anee minara kuqaa fee qidanee.
JOH 11:27 Maratafa iriseenoo qinau, eeoo karaambaiqa anee ooqai maa maqa maaqanaki qumuaneera asauku mundirafa Anutuna amaaku uqanna marianafa marianaqa qinee minara kuqaa iridaqa.
JOH 11:28 Maratafa miqi qimaseenoo quandaki maqusai oonureenoo qumee kai Mariana aaramasee qimaminau. Ufasaa rakisirafa anidanoo ani aaraidanoo.
JOH 11:29 Mariafa mi ufana iriseenoo kaqi kaqi findimeeqee kaqi unnaqufanoo oonu afiqarara finau.
JOH 11:30 Yisufa sia maqusai aninau. Aanai Maratafa paquruqoo miqoo kai kaqi marinau.
JOH 11:31 Mariafa raudamaki kaqi unnaqufanoo fufaqa Yuda maqannaasaa mina faqa mariusa mina qafamasee minara madikai ikiraqarara fidanoommifoo qimasee afaqee fiqau.
JOH 11:32 Mariafa Yisufa marunnai oonu qafeenoo oorindari maqasaa aqufinoo ufa qimaminau. Oo karaambaiqa anee animariananoofau sia qini qifasaafa kuqiqini.
JOH 11:33 Yisufa Mariana ikiraqarana qafoofanoo amuqusufanoo Yeerusaree maqannaasa faqa ikiraqoona qafoofanoo amuqusinoo mina aunduraki mandaikinau.
JOH 11:34 Miqimasee Yisufa irammirinoo qinau. Innee yai fee Rasarusana akundee fee qufaqa misa qiqau Karaambaiqa doo mai aniree qafa.
JOH 11:35 Miqi qufanoo Yisufa faqa ikiraqanau.
JOH 11:36 Yeerusaree maqusanaasa miqoo mariusa mina ikiraqarana qafeeqa qiqau. Oo qafa mifa minara kaaqa rimarifa ikiraqaidanoo.
JOH 11:37 Miqi qufaqa akaqausa niqira ufa qiqau. Mifa nifu dimbarausa amiqimannisee marifa nanaree Rasarusana qaoo qinanoo sia kuquaqaana.
JOH 11:38 Yisufa narí kai misa miqi qu ufanara akooqoofanoo narí aunduraki mandaikufanoo mi ufanara aiaaee qimaseenoo madikai oonuranau. Rasarusana iri ooni aamaraki quqasee ooni firaatia qumaree ititaqoofanoo marinau.
JOH 11:39 Yisufa qimanniminoo qinau. Innee maa oonina rafaqaameeqeeqa quanda quandamma aquaqa. Miqi qimasoofaqa Maratafa Rasarusana auna qinau, Oo karaambaiqa mifa qaara faqa qaara faqa afuru faififa marifaqa afunda mandaikammimarifaqa.
JOH 11:40 Yisufa iriseenoo qimaminau. Qinee faasai qimamunnana anee qini saqarikinana anee Anutuna afeeka eeraarirana qafeennaranoo.
JOH 11:41 Misa mina iriseeqa ooni firaatia afeeqeeqee mafi quqasoofanoo Yisufa narí oori uqeeraseenoo Anutunara akooqoo innaaru qinoo qinau, Oo qini qikoofa dufi dufi anee qini ufa irimarianafa mariananoo.
JOH 11:42 Anee maqee maqee qini innaaru qirana irimarianafa marianaqa. Maaqoo mariasa iriaqeera innaaru qidaqa. Maaqoo mariasa anee qini diqiqamaqoonnanara iriaqeera innaaru qidaqa.
JOH 11:43 Yisufa miqi qimaseenoo innaaru qimaseenoo firaa kari kuqirana aareenoo qinau. Rasarusa minakiqari rauda.
JOH 11:44 Miqi qimasoofanoo qamunna afaaqa kukuqamaqoofa kaqi marufanoo Rasarusafa findifinoo raudee qumuranau. Mina akiaqa faqa qamunna rumbaqoonarirandee qumuranau. Yisufa qimanniminoo qinau. Doo qamunna idukusaifanoo fuani, qimasoofaqa miqimandoofanoo andeeqasoofanoo finau.
JOH 11:45 Yeerusaree maqusanaasa moomoosa Rasarusanara ikiraqeeusa misa Yisufa Rasarusana findifumasoona qafeeqa kuqaa Anutuna faiqi fee qimasee minasaa mundiqa mariqau.
JOH 11:46 Misakiqari akaqausa Farisai amaana ufa qimarusa nimaaqai Yeerusareenni ooruree Yisufa Rasarusana findifunara niranaqarufa qimannimiqau.
JOH 11:47 Misa mina iriseeqa Farisai amaana ufa qimarusa faqa amaana maqasaa rakisimarusa faqa aiqama faiqí firaasa rakisirausa faqa moodaa qoo suqufi ufa qidaqa qiqau. Maasa naqi fee masee mina Yisuna rafaaqafuanauree. Maa fasiqafa Yisufa moomoo firaa ainaina naaquqara ainaina auqaidanoo.
JOH 11:48 Maasa mina afauaidaqa faiqí anaasee maasa minnisee minasaa kai atooqeefoora. Miqifanoo Roomma maqannaa sundiauqa anireeqa maasa faiqí anaasee faqa daru taikaidaqa maasa naaquqara amaana maqa faqa rapeepaamma aqifaranoo. Miqifaqa maasa Yuda maqannaa kuridianaura.
JOH 11:49 Misakina uriqararana auqu Kaiafasafa mifa qimanniminoo qinau. Inniki moo fannoo sia irirana faisa mariafanoo.
JOH 11:50 Faiqí anaasee maasa aiqama kuquanoora moodaa fannoo aiqamausara kuqifaqa amana maasa amiqimandee marianaura. [
JOH 11:51 Kaiafasafa sia narí kaifau mi ufana qimanniminau. Anutufa qimamunara kai mi ufana qimanniminau. Kaiafasafa Yisunara Yuda maqannaasa nikiaqara kuquannoo Anutuna faiqi namu mina ufa irimarinausara faqa moodaa iriranasaa mariaqeera kuquannoo fee qinau.]
JOH 11:53 Doo mi faasaannasaaqari Yuda maqannaa uriqararausa Yisuna arira ufa oosanarasee deedaqiqau.
JOH 11:54 Yisufa mina iriseenoo miqooqari sia Yudeeaa maqa maaqaki akooqoo nimarinau. Maqusa moo auqu Eefaraimma maqusai narí faiqi namufaqa ooqu marinau. Eefaraimma aadana maqa maaqa atisaa marinau.
JOH 11:55 Yisufa Eefaraimma maqa maaqaki marufanoo Yuda maqannaa qoomaqa firaa qoomaqa ainnaaqarara qoomaqa adeedi ranau. Aukuana aukuana Yuda maqannaa oosana ainnaaqarara qoomaqa adeedi ramafufaqa faiqí anaasee aiqama suqumaree miqoo Yeerusaree maqusai ooruraidaqa nári mandainaina findaukee mariqau. Aukuana aukuana miqimariqau.
JOH 11:57 Amaana maqasaa rakisimarusa faqa Farisai amaana ufa qimarusa faqa Yisunara faiqí anaasee qimannimiqau. Innee ninnabaqa Yisuna paqurimasee dadi oonurandee mini qimaqimifaqa maasa mina qumaraanaura.
JOH 11:56 Faiqí anaasee firaa amaana maqaki Yeerusareenni suqufufaqa Yisunara randaidaqa maaqi qimasee narí qimami narí qimami qiqau. Yisufa firaa qoomaqaki anifeeraannoo sia fee aniraannoo. Innee minara nana iriree iridee.
JOH 12:1 Mi ainnaaqarara qoomaqafa Yeerusaree maqusai adeedi reenoo dinni qisauku taikasee dinni ani moodaa faasaana aiqaqainanoo mi qoomaqafa kambiqarara imarufanoo Yisufa Beetani maqusai oonuranau. Yisufa Rasarusana kuqiranakinaana findifu maqusanaki aniranau.
JOH 12:2 Yisufa aniroofaqa (Rasarusana mara findifunara iriseeqa mina akiaqara qoomaqa firaana suqasee naida amiqau.) Maratafa qoomaqa sakeeqaida nimimarufanoo Rasarusafa Yisuna faqa ooqumarifi narana nanau. (Misa oosana maaqimminoo marinau. Misa qaindasaa fifandirifiqa nisaataa saunarasaida niku uqusaida neemarusa marida miqimandee neemariqau.)
JOH 12:3 Neemarufanoo Rasarusana asookifa Mariafa Yisuna anoona amarafa fadameena taqu firaana firaa feefauru aqusaida mareemaruna qumareenoo amiqira afundimaru fadameena mina auqu narada fadameena Yisuna aikumau adia amaqanau. Adia amaqaseenoo narí akiaqa asausi kisaaqa qumareenoo minannai utitiqanau. Miqimasoofanoo afunda firaafa misa maru maqanaki qumbiqanau.
JOH 12:4 Yisuna faiqi namukiqari moo fannoo mina auqu Yudasifa Keerioota maqannaafa Yisuna ueeqaaninna fasiqafa marinau. Mi fasiqafa Yudasifa amiqira afudimaru fadameena moomoo qafamaseenoo maaqi qinau.
JOH 12:5 Maa fadameenna firaa feefauru mareemaria fadameenafa. Nanaree fifau adieenee. Saina marinana qumiasana faqaana amiseenana moomoo munnimma 300 maraaqaana. Maraseenana kudi fasiqa anaaseeuqa kaqi nimiaqaana. (Mi aukuanna Yuda maqannaasa Mooseena ufa qaindusidaqa kudi fasiqauqa aiqama ainaina dadaaqiqa nimimariqau.)
JOH 12:6 Yudasifa sia kudi fasiqara irimarufa kaqi fifau ufa marunara miqi qinau. Mifa ummuarimarufa marinau Yisuna faiqi namu pausakinaana kaqi ummuarimarufa mifa maridanoo miqi qinau.
JOH 12:7 Yisufa mina iriseenoo narí maaqi qimasee qimaminau. Marianara sia miqi qia. Saina miqiani. Afundi fadameenna ataa kaqi marina qinee kuquananoo qini qifaaqai akuqimaqaani.
JOH 12:8 Anee kudi fasiqa anaaseeuqara qianandee. Kudi fasiqa aanaaseeuqa naaru naaru inniki marifaranoo. Qinee sia kisaaqasaa marianaura qusasaa taikaanaura. Saina fadameena adiaqimaqaani.
JOH 12:9 Yisufa Beetani maqusai animarufaqa Yeerusaree maqusaindari moomoosa qafarara ooqu fiqau. Kuqiranakiqari findifuna Rasarusana faqa qafararee qimasee ooqu fiqau.
JOH 12:10 Faiqí anaasee moomoosa Yeerusareendari Yisunasaa atooqaidaqa moomoo ooqu fiqau. Miqiufaqa amaana maqasaa rakisimarusa oommasee qiqau. Rasarusafa kuqiranakiqari findifunara irisee misa Yisunasaa atooqarara ooqu fimarifaqa saina Rasarusana faqa aruanauree qimasee deedaqiqau.
JOH 12:12 Faiqí anaasee ainnaaqarara oomaqara maqusa maqusaindari Yeerusaree maqusai suqusee mariusa Yisufa aanai urufaqa afiqarara moomoosa ooqu fiqau.
JOH 12:13 Ooqu afiqarara ooqu fidaqa koopeena amanee fooqaana moomoo ateekamaree ooqu fiqau. (Misa nariqa qimiriqa Yisunara maaqi qiqau. Ooqai Anutuna asauku mundirafa kambiqanoo marifa uridanoo. Mifa maasa qiqa karaambaiqaikirara uridanoo.) Misa ooqu fidaqa maaqi qimasee firaa kari faaqariqau. Anutuna amooqia mina auqu uqeeraa. Anutufa qufanoo kambiqarafa uridanoo, Anutufa mina amiqi amiqiani, Anutufa Isaraee maqannaa Karaambaiqa amiqi amiqiani.
JOH 12:14 Yisufa doonki moo maqee innooqee marunnasaa paqurimasee minasaa akaramafi ooqumari finoo Yeerusareenni ooru finau. Miqiuna ooqai tamummaqara fasiqa akara rumaqoomau ooru finau.
JOH 12:15 Yeerusaree maqusa moo auqu Sioona maqusee qimarinau. Minara ooqeenaa tamummaqara fasiqafa maaqi qimasee akara rinau. Innee Sioona maqusanaasa sia rufiaaqa. Inni karaambaiqa innee iannai uridanoommi, doonkisaa ooqu marifi uridanoo.
JOH 12:16 Yisuna faiqi namu faiqí anaasee qambaana Yisuna faqa ooru fiqau. Misa tamummaqara fasiqa akara iridaqa anoonara sia iridaqa fiqau. Kasooqaqee Yisufa kuqiranakiqari findifufaqa misa oonumafi iriseeqa qiqau. Maasa ooqai akara rumaqoomau Yisuna faqa Yeerusareenni ooru fiqiafana.
JOH 12:17 Yisufa Rasarusana aaroofanoo findifuna qafeeusa Yeerusaree maqusaki suqiqa marusa Rasarusanara qimannimiqau.
JOH 12:18 Faiqí anaasee moomoo mi ufana iriseeqa maaqi qiqau. Firaa ainaina auqeemarina ooqu afiqamaree uruaqee qimasee ooqu afiqee uriqau.
JOH 12:19 Farisai amaana ufa qimarusa oomasee maaqi qiqau. Qafaa doo maasa kadiqaidaqa faiqí anaasee minnikai quandaidaqa.
JOH 12:20 Yeerusareenni ainaaqarara qoomaqara suqimarusaki Kirisa maqannaasa nianai nári maqusaindari anusa faqa miqoo Yuda maqannaasa faqa animariqau. Misa faqa Anutuna qoomaqa sakasee namasee Anutuna amooqiraree qimasee animariqau.
JOH 12:21 Kirisa maqannaasa aniree Firipina irammiriqa qiqau. Oo maa fasiqa, Yisuna qafararee qidaqa amanee maasa qifiqee finaqa qafaanauree. Firipifa Beetasaida maqusaindaraafa Kariree maqa maaqakinaafa marufa.
JOH 12:22 Firipifa Anduruna paqurimasee misandiri Yisufuqoo oonuree Kirisa maqannaasara qimamiqau.
JOH 12:23 Yisufa misara iriseenoo qimanniminoo qinau. Anutufa faiqí nimaaku qini duqu firaaqoo uqeerara aukuana doo animaridanoo. Sia maa maqee imariasa imariandeefau maseenoofau qini duqu uqeeraannoofau. Qini firaa aupurara kuqiranannai qini duqu uqeerainanoo areenaannoo.
JOH 12:24 Qinee anoona ufa inni qimannimidaqa. Nandi asumu naríara kaqi maridanoo aaduma maridanoo. (Yisufa narí kuqiranara qidanoo nandi asumu kikiqa usinau.) Mifa maqaki ummaqusaifanoo putaa inanoo moomoo kambiqaannoo sia nariraa mariannoo.
JOH 12:25 Yafasiqa anaasee fee maaqoo narí mariranara rimarifa nandi asumuara foora sia kafaa kambiqaannoo mifa narí marirana kukupaannoo. Yafasiqa anaasee fee maaqoo maa maqanasaa narí mariranara akooqainafa maqaki ummaqusainanoo narí marirana afeediiseenoo naaru marirana maraannoo.
JOH 12:26 Innee Kirisa maqannaasa qimannimia. Yafasiqa anaasee fee qini ainainira faiqikiraree qimaseenoo aufadeemarifa mifa narí maaqoo marirana quqasee qini faqa finafa qinee fuannannai mifa faqa miqoo oonu marida qini dadaaqiannoo. Yafasiqa anaasee fee qini duqu uqeeraannoo mina auqu faqa qini qikoofa uqeeraannoo.
JOH 12:27 Yisufa Yeerusareenni oorufidanoo narí aaqa marusa qimanniminau. Maqee qini daundura fifau faafau inoo marifaqa nana ufee qianauree. Qinee naqimasee qeeqa qikoonara qiana qini kuqiranara qaoo qiannoo fee. Qinee firaa aupurarana marasee maa marunandee fuka kuquanauree qimasee qumuafanausa maridaqa doo qusasaa maridaqa naqimasee qaoo qiraree sia qaoo qianaura.
JOH 12:28 Miqi qimasee narí aaqa marusa qimannimiseenoo Yisufa quandafinoo narí akoonara Anutunara innaaru qinoo qinau. Oo qipoo, aneenna auqu amooqirana uqeeraa. Miqi qimasoofanoo Anutuna ufa inaarunaindari quminoo qinau. Doo qinee qeeqa duqu amooqirana uqeereeqa doo kafaa uqeeraanauree qinau.
JOH 12:29 Miqi qimasoofaqa faiqí anaasee moomoo Yisuna faqa Yeerusareenni ooru fimarusa mi ufana iriseeqa qiqau. Innaarunai qiifoo qufaqa akaqausa qiqau. Qangiroo moo fannoo mina faqa ufa qidanoommi.
JOH 12:30 Yisufa misa ufa iriseenoo qimanniminoo qinau. Sia qiniarau qidaqinoo inniara qidaqinoo.
JOH 12:31 Doo maqee Anutufa maa maqa maaqanakinaasa qini darifandinnanara narí aanooqira ufa nimiannoo. Doo maqee maa maqa maaqanaki uriqararafa Sadannafa taikaannoo.
JOH 12:32 Qini daruseeqa auniriranasaa quqaseeqa maqaki rakiqasee uqeeraqisaifaqa maqasaa aiqamatinaindaraasa suqu moodaaqoo qeeqa daaqa quqaanaura.
JOH 12:33 Miqimasee Yisufa narí kuquaninna oosana qimanniminau.
JOH 12:34 Qimannimufaqa misa qiqau. Maasa sanda akarakinaa ufa asauku mundiranara naaru naaru mariannoo fee qidaqa. Anee faiqí nimaaku aunirira saqarisaa kuqiraree qimariannana, naqi fee qidanee miqi qidanee. Faiqí nimaakuara anee qianafa yafee mifa maridanoo fee.
JOH 12:35 Miqi qimasoofanoo Yisufa mina iriseenoo qinau. Kaaqa qarafa inniki qusasaa mariannoo. Kaaqa qarafa mariqoo mi kaaqa qaranasaa kai mariaqa. Miqimmasee marifanoo asukuna fannoo sia rafaaqafuannoo. Asukunaki nimarifa sia aana qafaidanoo kaqimbidanoo.
JOH 12:36 Kaaqa qarafa mariqoo innee minara riqa anoonee qimasee mi mau fuaqa miqiqa innee kaaqa qaranafaqaasa mariaqa. Miqi qinoo qimannimiseenoo naríara moosaa finau. Miqoo oonu kukeeqanau.
JOH 12:37 Yisufa oosana oosana firaa ainaina faiqí anaasee nifusaa auqeemarinau. Sia misa minara oonumafi iriqau.
JOH 12:38 Ooqai Anutuna tamummaqara fasiqa moo auqu Eesaia mifa misa oosanara akara rumaqoofa maridanoo. Mifa maaqi qimasee akara rinau. Oo karaambaiqa, yafee moo fannoo maasa ufa irinoofeeinau sia moo fannoo. Karaambaiqa narí afeeka yau yausee uqannifiqoofaqee anoonee qidee. Sia moo fannoo kuqaa fee qinau.
JOH 12:39 Miqi qimasee ooqai akara rumaqoofa marufaqa umimmaqidaqa sia Yisunara anoonee qiqau. Eesaiaafa misara kaifaa maaqi qimasee akara rumaqoofa maridanoo.
JOH 12:40 Anutufa misa nifu dimbaqaifaqa maridaqa. Mifa misa nitikura ititaquqaifaqa mariaqeera. Misa nifu sia qafaaqeera misa naaqoo sia iriaqeera. Qinee unnannai faqa sia quandafifaqa sia amiqimannisaaqeera.
JOH 12:41 Eesaiaafa sia fifaufau maa ufana qimasee akara rumaqoofau maridanoofau. Mifa ooqaindari Yisufa sia kambiqooqoo afu pisipasamafinoo Yisuna afeeka eeraarirana qafaidanoo akara rimarufa maridanoo.
JOH 12:42 Kuqaa moomoosa Anutuna tamummaqarausa ufamau fidaqa Yisunara sia iriqau. Miqidaqa Yuda maqannaa uriqararausa akaqausa moomoosa Anutuna tamumaqarausa ufamau fidaqa Yisunara sia iriqau. Miqidaqa Yuda maqannaa uriqararausa akaqausa kukeeqasee Yisunara iri mariqau. Farisai amaana ufa qimarusa amaana maqakiqari maasa diqiqamasaifaqa sia kaifaa keeqaanauroo qimasaida qumeeree mariqau.
JOH 12:43 Misa sia Anutuna afusaa eedoo qiranara rimariqau. Faiqí nifusaa eedoo qiranara kai kaaqa rimarunara Yisunara kukeeqee mariqau.
JOH 12:44 Yisufa kafaa moo kari faiqí anaasee qimanniminoo qinau. Yafasiqa anaasee qini saqarikidanoo fee. Mifa sia qini kai, qini diqiqamaqoona mina faqa saqarikidanoo.
JOH 12:45 Yafasiqa anaasee fee qini qiqafaidanoo fee mifa qini diqiqamaqoona mina faqa qafaidanoo.
JOH 12:46 Qinee kaaqa qarausa maa maqa maaqanaki animaridaqa. Qiniki mariasa sia asukunaki mariaqeera animaridaqa.
JOH 12:47 Yafee moo fannoo qini ufa irisee sia auqainnana sia qinee qeeqa ufa amianaura. Sia qinee doori runira ufa nimiraree qimasee qumuafanausa maridaqa. Qinee faiqí anaasee Anutuna nifairiranakinaana qumarasee asumu marirana nimianeera qumuafanausa maridaqa.
JOH 12:48 Yafee moo fannoo qini minnisainafa qinee ufa qimarunnana minnisainaqa sia qeeqa ufa mina amianaura. Kasoo taikara faasaana Anutufa qini dookinaa ufa maqee qimannimimarunnana maraseenoo minannoo naruannoo.
JOH 12:49 Qinee sia qeeqa iriranannai ufa qimannimidaqa qini diqiqamaqoona qini qikoona uqaqifiqoo ainaina kai qimannimidaqa uqannifiqaidaqa.
JOH 12:50 Qinee qeeqa qikoona ufa iridaqa mina ufa fannoo kai naaru naaru marirana nimidanoo. Qinee minara iridaqa qeeqa qikoona ufa kai qimannimidaqa.
JOH 13:1 Anutuna ainnaaqarara qoomaqa adeedi ramafufanoo Yisufa maa maqana quqasee doo narí akoofinai firafa adeedi reemarufanoo minara Yisufa irimarinau. Maa maqa maaqanakinaasa narisaa atooqeemariasara amuqusufanoo ridanoo kaqi misara aidimarufanoo fidanoo kasaaqai munu kuqinau.
JOH 13:2 Yisufa narana eendaki sakasaida narí faiqi namufaqa neemarinau. Yudasifa Keerioota maqusaindaraafa indaaruqaa Simoona amarana amaaku mifa Yisuna faiqi namufaqa miqoo marufa faasai Sadannafa mina dadaaqufanoo Yisunara ueeqararee qidanoo deedaqimarinau.
JOH 13:3 Anutufa aiqama afeeka innaaruna faqa maqa faqa Yisuna aramandunnai quqaqoofanoo marufanoo Yisufa mina irida marinau. Narí Anutufinaindari qumufa iridanoo marinau. Narí kaifaa Anutufinnai ooru firafa adeedi ranoo marufanoo minara faqa irida marinau.
JOH 13:4 Yisufa narí faiqi namufaqa narana namaseenoo findifinoo narí siuta raipaqusee taura qumareenoo narí aranandauqanna rumbaseenoo difaani maraseenoo nammari minaki adiaseenoo narí faiqi namu niku nammaruqusaidanoo taurannai rukannimaqeemarinau. (Yisufa maru aukuana mina maqannaa oosana maaqimminoo marinau. Faiqí moo fannoo moo maqusaindari narí aqoondi qafararee qimasee ani mina maaqaki keeqafinanoo maaqa akoofa mi fasiqana qafeenoo narí ainainira fasiqa ureeqarana aaramasee qimaminoo anee maa fasiqana aiku nammaruquseenana taura qumaree rukasainanoo ooqumariani. Mi oosanna niku nammaruqira saika sia uriqararausa maree mariqau ureeqarausa faaqu fasiqa fooqaasa miqimariqau.)
JOH 13:6 Yisufa Simoona moo auqu Peetooroona aiku nammaruqirarufanoo Simoona moo auqu Peetooroofa qinau. Oo Karaambaiqa kuqaa fee anee qini qiku nammaruqiraree qidanee. Sia miqia, anee uriqararafa mariananoo.
JOH 13:7 Yisufa qinau, Eeoo nammari uquanaura anee maqee sia qini oosana irimariananoo kasooqaqee irinnaranoo.
JOH 13:8 Peetooroofa qinau, anee maasa uriqararafa mariananoo naaru naaru sia uqanna qini manda qiku nammaruqua. Yisufa mina iriseenoo qinau. Qinee ani aiku sia nammari uquanana maaqooqari anee sia qini faiqikinnaranoo.
JOH 13:9 Simoona moo auqu Peetooroofa mi ufana iriseenoo qinau. Oo karaambaiqa sia qiku kai nammaruqua qisauku faqa qikiaqa faqa aiqama nammari uqua.
JOH 13:10 Yisufa mina iriseenoo qinau. Faiqí nammari auqeemariasa aiqama nifaaqa amiqinoo maridanoo niku kai doona kookoomma akinoo maridanoo. Innee aiqama amiqiqa mariafanoo moodaa fannoo mandaikinoo marifaqa qafaidaqa.
JOH 13:11 Yisufa faasai narí ueeqee maruna qafaidanoo miqi qinau. Inni nifaaqa aiqama nammari uqinoo maridanoo. Moodaa fannoo kai sia nammari auqara fee qinau. Narí ueeqaaninnanara iriseenoo miqi qinau.
JOH 13:12 Yisufa narí faiqi namu niku nammari uquseenoo kafaa narí siuta afisumaree kafaa misa faqa ooqumari finoo qimanniminoo qinau. Qinee inni niku nammari uqunnanara iridee sia fee iridee.
JOH 13:13 Doo maqee mina nammari uqunnana oosana kooroo ianaura. Innee qiniara ufasaa rakisira fee karaambaiqee qimariafanoo. Doo mina kuqaa qimariafanoo qinee miqirausa maridaqa.
JOH 13:14 Qinee inni ufasaa rakisirausa inni karaambaiqa maridaqa ureeqarausa saika mareemariana misa naanna raidaqa inni niku nammari uqidaqa innee miqi kai iqa qini daanna reeqa ureeqara fasiqa anaaseera foora narí dadaaqi narí dadaaqiaqa.
JOH 13:15 Qinee uqannifiqaunnana qafeeqa qinee unandee kai iaqanani.
JOH 13:16 Qinee kuqaa anoona ufa inni qimannimidaqa. Ainainira fasiqa fannoo sia narí rakisirana uriqararafa maridanoo. Ufa maree fimari fasiqafa sia aqiqeemarina uraaqararafa maridanoo.
JOH 13:17 Innee maqee maa ufana anoona naaqooki irimariafanoo. Innee maa ufana irisee auqaifanoo asasirafa mariannoo.
JOH 13:18 Yisufa kaifaa narí faiqi namu maaqi qimasee qimanniminau. Anutuna tamummaqara fasiqauqa ooqeenaa akara oosana maaqimminoo maridanoo. Innikiqari moodaa fannoo qini narana qini faqa neemarifa mifa qini namuqaakinoo aranaiqi daruannoo. Maa akarana oosana inniki kambiqaannoo, sia inni aiqamara qidaqa. Qinee oonu mareeqee qeeqaindika maqaunausa mariafanoo moodaa fannoo kai.
JOH 13:19 Qinee maqeesaa qimannimidaqa sia kambiqai kamuqoo qimannimidaqa. Kambiqainaqa innee qiniara irifaranoo. Qinee qeeqaraa ufa qunausa doo misaki maridaqa.
JOH 13:20 Qinee anoona ufa kuqaa qimannimidaqa. Faiqí anaasee moo fannoo qinee inni niqiqamaqaanausa niqoondikinafa qini faqa qiqoondikidanoo. Faiqí anaasee moo fannoo qini qiqoondikamma qimaqainafa qini diqiqamaqoona faqa kai aqoondikidanoo.
JOH 13:21 Yisufa minara qimanniminsoofanoo narí aunduraki oonumafi irufanoo amuqusufanoo kafaa kooroomasee qimanniminau. Qinee anoona ufa qimannimidaqa innikiqari moo fannoo qiniara ueeqaannoo.
JOH 13:22 Yisuna faiqi namu mi ufana iriseeqa tautumakufaqa narí qafee narí qafee idaqa randaqau.
JOH 13:23 Yisuna afaaqasaa aqoondi fannoo mina aaqa ooqumarifi marinau.
JOH 13:24 Simoona moo auqu Peetooroofa mi fasiqana auqamaseenoo qinau anee karaambaiqa irammirisee iria. Yafasiqanaree qidanoo fee yafee ani ueeqaannoo fee.
JOH 13:25 Miqi qufanoo mi fasiqafa Yisuna aaqa firambaqafufanoo maqandanai irammirinau Karaambaiqa yafee ani ueeqaannoo fee.
JOH 13:26 Yisufa qinau, qinee feemu rakeemandeeqa sauna anoona fooqaanaki raaraamandee amianana qafa. Mifa kai qini ueeqaannoo. Miqi qimasee Yisufa feemu rakeemaseenoo sauna anoona fooqaanaki raaraameeqeenoo Yudasifa Keerioota maqannaa Simoona amarana amaaku aminau.
JOH 13:27 Yudasifa mi feemuna qumarasee namasoofanoo doo Sadannafa mina aundurai keeqanau. Miqufanoo Yisufa Yudasina qimaminoo qinau. Doo anee aneenna inna ainaina doo dauni dauni ia.
JOH 13:28 Miqoo marusa sia Yisuna ufa oosana iriqau.
JOH 13:29 Yudasifa Yisuna faiqi namu munnimmasaa rakisimarufa marufanoo Yisufa aqiqoofaqa misa narana aina fi fi maraanifeera aqiqee maqi qiqau. Kudi fasiqauqa munnimma nimiannoo fee qiqau.
JOH 13:30 Yudasifa mi feemuna mara namaseenoo findimeeqeenoo aaqee kai eendaki raudamaki finau.
JOH 13:31 Yudasifa fufanoo Yisufa kaifaa narí faiqi namu qimanniminoo qinau. Doo maqee faiqí nimaaku qini amiqi amiqira afeeka eeraarirafa doo kooroo inoo maridanoo.
JOH 13:32 Anutuna afeeka eeraarirafa qinisaa kooroo inoo maridanoo, Anutufa narí uqanna quandaki qini qifaaqa firaaqoo areenaannoo, qusasaa maqee uqanna miqiannoo.
JOH 13:33 Qini faiqi namu sia kisaaqasaa inniki marianaura. Yuda maqannaa qimannimiafannandee kai inni qimannimidaqa. Innee qiniara randee sia paqurifaranoo. Qinee fuannaqoo sia innee amana fifaranaoo.
JOH 13:34 Doo maqee qinee fuka aaquqira ufa qimannimidaqa. Innee nariara nariara nimuqusidaqa nariara nariara ruaqa. Qinee inniara qimuqusufaqa inniara rimariqia innee faqa qini daanna raaqa nariara nariara ruaqa.
JOH 13:35 Innee nariara nariara rimarifaqa aiqamausa inni nindafeeqa inniara boo Yisuna faiqi namu miqidammiafoo qiaqa.
JOH 13:36 Yisufa miqi qimasoofanoo Simoona moo auqu Peetooroofa irammirinoo qinau, Oo Karaambaiqa anee yai fee finaqee maasa sia ani faqa fuanauree. Yisufa iriseenoo qinau, Qinee maqee fuanannai anee sia amana qini faqa finnaranoo, kasooqaqee anee qini faqa finnaranoo.
JOH 13:37 Simoona moo auqu Peetooroofa iriseenoo qimaminau, Karaambaiqa anee naqi naqee qinee sia ani faqa fuanauree. Qinee aniara kuquanauranoo.
JOH 13:38 Yisufa mi ufana iriseenoo qimaminoo qinau, Kuqaa fee anee maqee qiniara kuqinnaree, qinee anoona ufa ani qimamidaqa fafaa eendaki kookooraana sia ufa qinnakamuqoo anee kuqiranara rufiaseenana qaaramoo kari qiniara sia qafaunausee qinanoo kookooraana ufa qiannoo.
JOH 14:1 Yisufa miqi qimaseenoo aiqama qimanniminoo qinau. Innee sia nimukee marinaqa maparaaiaqa. Innee Anutuna saqariki mariafanoo doo qini faqa saqarikiaqa.
JOH 14:2 Qini qikoona innaaruna maqusaki moomoo maqa narí aaqa narí aaqa maridanoo. Qinee maindari ooruree innee ooru fifandinna maqana auqirara ooru fidaqa. Minara qinee kuqaa anoona ufa kai inni qimannimidaqa. Sia anoona marinaqau sia qimannimunaiqini. Kuqaa anoona marifaqa qimannimidaqa.
JOH 14:3 Qinee innaarunai oorureeqa innee ooru fifandinna maqusana deedaqamasee qumu nifiqee minni murunnisaanaura. Innee qini faqa mariaqeera miqianaura.
JOH 14:4 Innee qinee marunnannai fimaria aanara irimariafanoo.
JOH 14:5 Toomasifa mi ufana iriseenoo qinau, Anee fimariannanara maasa sia iridaqa. Naqimasee fee mi aannara irianauree.
JOH 14:6 Yisufa iriseenoo maaqi qimaseenoo qimaminoo qinau, qinee mi aanausa maridaqa. Qinee kuqaa anoona ufa maridaqa. Naaru naaru marirafa qiniki maridanoo qinee misa maridaqa. Sia moo fannoo kaqi qini qikoofinnai fidanoo qinimau kai fifaranoo.
JOH 14:7 Innee qiniara irifau qini qikoonara faqa irini. Maqee mariaqooqari qini qikoonara iriqa qini qikoona qafee mariafanoo.
JOH 14:8 Firipifa mi ufana iriseenoo Yisuna qimaminoo qinau, Oo karaambaiqa aneenna akoona uqaqifiqainaqa qafamasee doo fee qianaura.
JOH 14:9 Yisufa mina iriseenoo akooqoofanoo raiqaseenoo qinau. Firipi qinee kisaaqasaa inni faqa mariafanausa marunana anee sia irirana irimariananoo. Yafasiqa anaasee fee qini qiqafainafa doo qini qikoona qafaidanoo. Anee nanaree qiniara aneenna akoona uqaqifiqaannee q inanee.
JOH 14:10 Firipi anee sia fee qini ufara anoonee qidanee. Qinee qipaqeenaki faqa maridaqa mifa qiniki faqa maridanoo sia fee anee mi ufana iridanee. Yisufa kafaa narí faiqi namu aiqama qimanniminoo qinau. Qinee inni ufa qimannimimarunafa sia qeeqa daundurakinaana qimannimidaqa. Qini qikoofa qiniki marifa narí irirana iriseenoo qifaqa narí qimau kai fidaqa qimannimidaqa.
JOH 14:11 Innee maa ufana irisee anoonee qiaqa. Qinee qeeqa qikoonaki maridaqa mifa qiniki faqa maridanoo. Innee qini ufara sia fee qimasee qinee auqaannainaina faiqí sia auqaaqaa ira ainaina nifunnoo qafamasee Anutufa mina faqa maridanoo fee qiaqa.
JOH 14:12 Qinee anoona ufa qimannimidaqa faiqí anaasee moo fannoo qini saqarikinafa qinee ianandee iannoo. Qinee qeeqa qikoofinnai fuannanara qini saqarikinafa sia qini daanna kai raannoo qini saika uraaqaranoo mariannoo. Mina oosana maaqimminoo maridanoo.
JOH 14:13 Innee innaaru qidaqa qini duqusaa qimasee innaaru qifaqa nimianaura. Sia moo ainaina sia nimianaura innaaru qifaqa nimianaura. Qini qikoona afaaqa areenarafa qinisaaqari faqa areenaanifeera nimianauura.
JOH 14:14 Innee qini duqusaa qimasee innaaru qifaqa qinee mi ainainna miqimannisaanauranoo.
JOH 14:15 Yisufa narí faiqi namu kaqi qimannimidanoo qinau. Innee qiniara riqa qinee qimannimiafannufana andeeqasee qumareefaranoo. Sia qiniara riqa sia qinee qiafannufana qumareefaranoo.
JOH 14:16 Qinee inni minnisee ooru fiqa qeeqa qikoona irammiriananoo Anutuna dadaaqira afeeka maraquna nimiannoo. Mifa kuqaa anoona ufa qiroosana maraquna qumu mariannoo, mi maraqunafa naaru naaru inni faqa mariannoo.
JOH 14:17 Maa maqanasaa mariasa sia qini Yisusa mandaaqee marinausa sia amana mi maraqunna mareefaranoo. Misa sia mina qafaidaqa sia minara irimariafanoo minara sia mareefaranoo. Mifa inni faqa mapukusee maridanoo kuqaa inni naundurai anoona mariannoo. Mifa inni faqa marifaqa innee mi maraqunna oosana irimariafanoo.
JOH 14:18 Qinee sia inni mininnisaanaura qinee oorureeqa Anutuna maraquna aqiqaananoo qumuree inni faqa marida dadaaqiannoo.
JOH 14:19 Kaqikaaqoo maa maqanasaaqaraa irirana faqaasa sia qini qiqafeefaranoo. Innee kai qini qiqafeefaranoo. Qinee kaqi marirausa maridaqa minara innee kaqi marirana mareefaranoo.
JOH 14:20 Qinee qeeqa qikoonaki maridaqa kafaa innee qiniki mariafanoo qinee inniki maridaqa. Anutuna maraquna qumuaninna faasaana mi faasaanna mi ufana oosana amiqimandee irifaranoo.
JOH 14:21 Yafasiqa anaasee fee qinee qimannimiafanna ufana irisee maree marifandinausa misa kai qiniara rifandinausa marifara. Qiniara rimarina fasiqa anaaseesara qini qikoofa misara faqa ruannoo qinee faqa mi fasiqa anaaseesara ruanaura qeeqaindi anoona afeeka uqannifiqaanaura.
JOH 14:22 Yudasina amarafa Yisuna irammirinoo qinau, Oo Karaambaiqa naqimaseenanee anee maasa qifusaa kai kooroo innaree maa maqa maaqanasaaqaraa irirana faqaasa nifusaa kukeeqararee qidanee.
JOH 14:23 Yisufa iriseenoo qinau. Yafasiqa anaasee fee qiniara rimarinafa qini ufa maree mari fasiqa anaaseefa mifa qiniara rimarifa mariannoo. Miqinna fasiqa anaaseena qini qikoofa Anutufa minara faqa ruannoo. Mifa faqa qinee faqa mi fasiqa anaaseesa innannai oonuree umee mina faqa marianaura, miqimaseeqa maasa inni nifusaa kai koorooianaura. Maqasaaqaraa irirana faqaasa nifusaa kukeeqaanaura.
JOH 14:24 Yafasiqa aanaaseesee sia qiniara rinausa misa qini ufa sia irifara. Qinee qimannimira ufa innee irimariafanoo, sia qinindi maridanoo, qini qikoofa qini diqiqamaqainaindi minaindi maridanoo.
JOH 14:25 Qinee maa ufausa inni faqa kaqi maridaqa qimannimidaqa.
JOH 14:26 Inni fuka dadaaqirafa naaquqara maraquna qini qikoofa kasooqaqee nimianinnafa mifa aiqama ainainara qimannimiannoo. Qinee faqa aiqama ufa qimannimiafannana mifa minara inni naaqoo auqainaqa oonumafi irifaranoo.
JOH 14:27 Qinee naundura asooarana inni nimidaqa. Qinee qiniki mari naundura asooarana inni nimidaqa. Maa maqanasaa mariasa sia misa naanna ramasee inni nimidau. Amiqimandee qeeqa asooarana nimianaura. Sia inni naundura rapikiani sia rufiaqa rufiaqiaqa.
JOH 14:28 Qinee maqee maaqooqari kafaa ooru fuanaura oorureeqa marikiqa oorurandee qumureeqa inni faqa marianaura. Sia qinee ooru fuannanara innee minara rufiaaqa. Innee kuqaa qiniara ridau qinee qeeqa qikoofinnai fuannanara susummaqimaqani. Qini qikoofa qini uriqararafa maridanoo minara susummaqimaqani.
JOH 14:29 Qinee maqee sia kambiqauna kamuqoo aiqama ainainara qimannimidaqa. Kambiqafinaqa innee qiniara iriaqeera qimannimidaqa.
JOH 14:30 Qinee sia amana inni faqa kisaaqasaa ufa qianaura. Maa maqanasaa rakisirafa Sadannafa doo anidanoo qini afeeka fannoo mina afeeka uraaqaranoo maridanoo.
JOH 14:31 Maa maqanasaaqaraasa qinee qeeqa qikoonara rimarunnana minara iriaqeera mina ufamau andeeqasee fidaqa qinee qeeqa kai irisee Sadanna asauku ameemaanai oonuree kuquanaura. Miqi qimaseenoo Yisufa narí faiqi namuara doo uqeeraifaqa maaqooqari moosaa fuanee qimasee uqeereenoo moosaa finau.
JOH 15:1 Yisufa fidanoo maa ufana narí faiqi namu qimanniminau. Qinee saunara foora qinee marunna saqarisa maridaqa. Qini qikoofa sauna saqamasaa rakisimarifa maridanoo.
JOH 15:2 Qini qikoofa Anutufa mi sauna saqarina sia irainanoo ateeka idaraannoo. Ireemari oosanna amiqimandee iraani fee qimasee anukamasaidanoo amiqimasee rakisidanoo.
JOH 15:3 Qinee qimannimimarunnufana innee irisee maraifanoo doo inni mandainaina rukannisaifaqa anukaraqoo mariafanoo.
JOH 15:4 Innee saqari asaanara foora qinisaa ariqa mariaqa. Innee sia qinisaa ariqa maridaqa sia qini amiqira marira nirana mareefaranoo.
JOH 15:5 Qinee saqari anoona maridaqa. Innee asaana miqirausa mariafanoo sia anoonasaa arufinafa sia sauna iraannoo. Qiniki marinausa qinee faqa misaki mariananoo saunara foora moomoo ireefaranoo. Innee inneeqaraa marinausa kudi marifaranoo qini faqa marinausa sauna amiqimasee ireemarifaranoo. Innee minara iriseeqa amiqimasee qinisaa atooqaifaqa qinee faqa inniki marianaura.
JOH 15:6 Faiqí moo fannoo sia qiniki marinafa sauna asaana miqirafa aadanusidanoo marinanoo saunasaa rakisimarifa asaana qafamasee aadanusinausa aiqama ateekasee suqeeqeenoo idaki aqusainanoo qamataikaannoo.
JOH 15:7 Innee qiniki marirara kai idaqa marifaqa qinee qimannimunna ufafa inniki marirara kai imarinaqa innee nana ainainaree qiniara iraifaqa nimianaura.
JOH 15:8 Innee andeeqara marirana qaqammara foora moomoo iraifanoo minannai qini qikoona amiqira afeeka eeraarira areenarana kooroomannimaqaannoo. Miqiuqanna iqa qini faiqinamuka mafifaranoo.
JOH 15:9 Qini qikoofa qiniara firaaqoo ridanoo qinee faqa miqikai iqa inniara firaa qoo ridaqa doo sia innee moo fannoo minakiqari aiaki fuaqa. Kaqi kai qini didiranaki mariaqa.
JOH 15:10 Innee qinee qimannimuna ufana irisee qumareeqa qini didiranaki marifaranoo. Qinee miqikaimasee qeeqa qikoona ufa iriseeqa qumareeqa mina aidiranaki maridaqa.
JOH 15:11 Qinee sia kaqi qimannimidaqa qini susuirafa inniki marianifeera inni susuirafa anoonaikianifeera qimannimidaqa.
JOH 15:12 Qinee ufa moo aaquqira ufa qimannianaura iriaqa Innee qini daanna ramasee nariara nariara ridaqa nidiani.
JOH 15:13 Faiqí moo fannoo narí aqoondi amaaqa maqasee kuqinna fasiqafa mina aidirafa aiqama nidirana arusee uriqaramaqaraasa uqanna inoo mariannoo.
JOH 15:14 Maqee maqee qini aaquqira ufa irisee mi mau fimariasa misa kai qini qiqoondiuqa maridaqa.
JOH 15:15 Qinee sia maaqooqari inniara qini ainainira faiqí fee qianaura. Rakisirafa narí fuaninnanara faqa auqaaninnanara faqa maraaninnanara faqa sia ainainira faiqiuqa qimannimidanoo miqimmianauree maaqimmianuree qidanoo narí kai. Ainainiaqee ufa kai qimannimidanoo. Qinee sia fifau saikira faiqi fee qidaqa inniara qini qiqoondi fee qimasaidaqa qinee qini qikoofa auqaaninna saika ufanara aiqama inni kooroomannimidaqa.
JOH 15:16 Sia innee qini rusandeesamumandee qini qumaraafanoo. Qinee naaree inniara rusandeesamumandee inni qumareeqa. Inni marirafa nirafa qini daanna ramasee mariaqeera qinindikiaqeera qimasee inni mareeqa. Mi marira oosanafa sia putaa iannoo afeeka kai mariannoo. Innee minara irisee nana sarauimari ainainaree qini qikoofinnai innaaru qimasee qini duqusaa innaaru qimasaifanoo nimiannoo.
JOH 15:17 Doo qeeqa aaquqira ufa maaqi qimasee qimannimidaqa. Innee nariara nariara ridaqa nidiaqa.
JOH 15:18 Maa maqanasaaqaraasa inniara fidiaqaammifaranoo maanara iriaqa indaaru qini Yisusara fidiaqaaiaasa mariafanoo innindi inaaqianna fidiaqaairafa mariannoo.
JOH 15:19 Innee qini faiqi namu maa maqa maaqanasaaqaraasa faqa moodaa irirana faqaasa marifaqau misa inniara maasaindi fee qimaseefau inniara rini. Qinee inni maa maqa maaqanakinaasa rusandeesamumasee qumaraqaunausa mariafaqa maqee sia misaindi marianara minara kaukaata qimannimaqaidaqa.
JOH 15:20 Maa ufana qimannimunnana kaifaa iriaqa ainainira fasiqa sia narí rakisirana uriqararafa maridanoo. Misa qini inni rakisirana dariqa quandaki inni faqa qini ufa irimariasa faqa narifaranoo, misa qini ufa iriqa quandaki inni ufa faqa irifaranoo.
JOH 15:21 Innee qinindi marianara oosana oosana mandainaina maa maqanasaaqaraasa inni nimifaranoo. Misa sia qini diqiqoonara Anutunara iridaqa miqifaranoo.
JOH 15:22 Qinee maa maqanasaaqaraasa mandainainara sia kooroomma nimaqaananoo fau sia misa manda numoo mariqini. Doo qinee misa mandoosanara kooroomasee misa qimannimiqauna iridaqa Anutuna narira ufa ameemaanai maridaqa sia amana unnufannai mina ititeefaranoo, narirafa kaqi naruannoo.
JOH 15:23 Faiqí moo fannoo qiniara fidiaqaammidanoo qini qikoonara faqa fidiaqaammidanoo.
JOH 15:24 Qinee misa nifusaa faiqí sia auqaaqaa ira ainaina auqaafannana sia maqasaa fasiqa moo fannoo mi ainainna auqoofanoo anoona kambiqanau. Qinee sia miqimaseeqa mi ainainna auqaananoofau misa numoo sia mariqini. Qinee oosana oosana ainaina auqaunaqa misa sia amiqimasee maaqanda qisakoosara irirai maaqandara fidiaqaamma qimaqaidaqa.
JOH 15:25 Mooseena sandufa ooqai misara akara rumaqoofa maridanoo. Mifa maaqi qimasee akara rinau. Misa kaqi fifau miqidaqa qiniara fidiaqaaida marifara. Anutuna ufa miqinoo maridanoo naqimasee moosaa fifaree. Minara misa qiniara fidiaqaaidaqa.
JOH 15:26 Yisufa kaqi narí faiqi namu qimannimidanoo qinau. Qinee ooru fuananoo fuka dadaaqirafa qumuannoo. Mifa kuqaa anoona ufa qira oosana maraquna mariannoo qini qikoofinaindaraafa mariannoo. Qinee qeeqa qikoofinaindaraana aqiqaananoo qumureenoo mifa qiniara qimannimiannoo.
JOH 15:27 Mifa inni naakinaqa innee faqa qiniara ufa qifaranoo. Innee oosanakiqari qini faqa niniaasa maridaqa qiniara ufa qifaranoo.
JOH 16:1 Innee aanai fiqa niku rupauraki saamuriqa qini minnisee foora minara naamua qimarunausa maridaqa.
JOH 16:2 Kasooqaqee faiqí misa nariqa amaana maqakiqarifee ufa suqira maqakiqarifee aanoommasee inni niqiqeefaranoo. Kasooqaqee nariqa aaqamasee kuqaa Anutuna dadaaqidee qiqa inni kuqa narifaranoo.
JOH 16:3 Misa qini qikoona Anutunara faqa qiniara faqa sia iridaqa miqifaranoo.
JOH 16:4 Maqee maa kamuqoo qinee marunnaqoo maa ainainnausara qimannimimariana irimarifanoo kasooqaqee kambiqainaqa inneeqa naaqoonnai oonumafi iriaqeera qidaqa. Qinee indaaru sia qimannimiqa qinee inni faqa kaqi maridaqara qiqa sia qimannimiafanausa qinee qusasaa firaridaqa qimannimidaqa.
JOH 16:5 Maqee qini qikoofa qini diqiqamaqoonnai ooru firaridaqa innikiqari moo fannoo sia qini iraidanoo anee yai fee fidanee miqidanee.
JOH 16:6 Doo qinee firara inni qimannimunaqa inni naundura qumaara raifaqa noori runusee mariafanoo.
JOH 16:7 Qinee anoona ufa qimannimidaqa qinee ooru fuanaqa innee amiqiranaki mariaqeera ooru fuanaura. Qinee sia ooru fuananoo fuka dadaaqirafa sia qumuree inni dadaaqiannoo. Qinee ooruree fuka dadaaqirana aqiqaananoo qumu inni faqa maridanoo dadaaqiannoo.
JOH 16:8 Fuka dadaaqirafa qumu maridanoo inni maqasaaqaraasa irirana aaqaidanoo fee qiannoo inni andeeqaranara faqa manda oosanara faqa Anutuna narira ufa nimianinnanara faqa aaqee mariafanoommifoo qimasee qimannimiannoo.
JOH 16:9 Maqasaa fasiqauqa qiniara sia irifaqee qidaqa minara nári manda oosanara amiqira oosana fee qimasaidaqa aaqaidaqa.
JOH 16:10 Qinee qeeqa qikoofinai ooru firaridaqa maqasaaqaraasa sia kaifaa qini qiqafeefaranoo, minara fuka dadaaqirafa maqasaaqaraasa andeeqara oosanara aaqee mariafanoo fee qiannoo.
JOH 16:11 Maa maqanasaaqaraa rakisirana aakaaqaindaraa fasiqa doo Anutuna arira ufa doo mi manda fasiqanasaa maridanoo. Minara Anutuna narira ufa fannoo maa maqanasaaqaraa fasiqa aanaaseesaa faqa maridanoo minara faqa misa sia andeeqasee iridaqa aaqaidaqa.
JOH 16:12 Qinee moomoo ainainara qimannimianaqa qumaara rainaqa siamma irifaranoo.
JOH 16:13 Miqimarianara kuqaa anoona ufa qira maraquna fannoo qumureenoo inni mareeqeenoo anoona ufa mariranaki mara quqaannoo. Sia mi maraqunafa narí kai ufa qimannimiannoo qini dookinaana kai irinoo inni qimannimiannoo. Mifa kasooqaqee kambiqaaninna ainainara tamummaqasee iriseenoo inni qimannimiannoo.
JOH 16:14 Mifa qini irira ufa mareeqee inni niminaqa minannai qini Yisuna asasirana qimimarifaranoo.
JOH 16:15 Qini qikoona Anutuna ainaina aiqama qinindi kai maridanoo. Minara qinee inni maana qimannimiqa kafaa qimannimidaqa. Qinee qeeqa irirana marasee anoona ufa qira maraquna qimamiananoo mifa quandaki inni qimannimiannoo.
JOH 16:16 Yisufa narí faiqinamu kaqi qimannimidanoo qinau. Kaqikaaqoo innee sia qini qiqafeefaranoo kaqikaaqoo marikiqa kaifaa qini qiqafeefaranoo.
JOH 16:17 Yisuna faiqi namu mina irisee akaqausa maaqi qiqau. Maa ufana nanaree qidanoo fee. Mifa nariara kaqikaa qoo sia qini qiqafeefaranoo fee qidanoo. Kaifaa kaqikaaqoo marikiqa qini qiqafeefaranoo fee qidanoo. Kaifaa nariara qeeqa qikoofinai firaree qidaqee qidaqinoo.
JOH 16:18 Mifa kaqikaa qoo fee qidaqinoo mi ufana oosanara maasa randaidaqa. Maasa sia mina ufa oosanara iridaqa naqi fee qidaqinoo fee.
JOH 16:19 Yisufa misa randaranara irisee maaqi qimasee qimanniminau. Qinee qiqa. Kaqikaaqoo sia qini qiqafeefaranoo. Kaqikaaqoo marikiqa qini qiqafeefaranoo. Innee minaree narí qimami narí qimami qidee.
JOH 16:20 Qinee anoona ufa qimannimianaura. Qinee kuquanna kamuqoo innee ikifaafau qifaranoo. Innee miqimariafaqa maqasaaqaraasa qiniara sia irimariasa susuifaranoo. Innee noori runusee marifaranoo qinee kuqiranakiqari findi fuanaqa kafaa mi noori runirana minnisee quandakinaqa asasifaranoo.
JOH 16:21 Anaasee moo fannoo amuaqu uqafaqa maridanoo oori runusee maridanoo, doo aupurarafa aidafirafa minaki marinara miqidanoo. Miqidanoo mariifanoo faiqi maqasaifanoo doo aupurarafa faqa aidafirafa faqa taikeefoo qimaseenoo doo qini faiqi kambiqaifaqee qimasee aidafiranara aunusee asasidanoo.
JOH 16:22 Innee mina aanna reefaranoo. Maqee kamuqoo noori runusee marifaranoo. Kasooqaqee qini qiqafamasaifanoo miqoo inni nimuqusaki asasirafa firaaqoo qumbiqanoo mariannoo. Mi asasirana sia moo fannoo mareemaria asasirafa mariannoo. Afeeka asasirafa amiqirafa kaqi mariannoo.
JOH 16:23 Qinee kuqiranakiqari findifiqa qeeqa qikoofinnai ooru marianaqa innee sia kafaa qiniara moo ainainara irammirifaranoo. Qinee anoona ufa qimannimidaqa. Innee qiniara faiqi namu maridee qimasee qini qikoona irammirifanoo iraifandinna ainaina oosana oosana nimiannoo.
JOH 16:24 Maa maria kamu sia moo ainainara qiniara aqoondi fee qimasee Anutufinnai innaaru qimariananoo. Irammiriaqa. Irammirifanoo nimiani. Innee asasirafa anoonaikianifeera Anutufa nimiannoo.
JOH 16:25 Qinee kukeeqara ufannai inni qimannimi mariafannana. Qusasaa sia qinee kukeeqaanaura kooroomandee qeeqa qikoona Anutunara akooqoo qimannimianaura.
JOH 16:26 Mi faasaanna anirainaqa qini duqusaa Anutunara innaaru qifaranoo. Innee innaaru qifaqa qinee sia qeeqa qikoona afusaa oonuree mi ainainnara inni fifau dadaaqianaura.
JOH 16:27 Qini qikoofa narí kai inniara aidimarifanoo iraifandinna ainaina eedoo qimasee nimmiannoo. Innee qiniara nidimarinaqa Anutuna faiqi fee qifanoo inniara faqa Anutufa aididanoo iraifandinna ainaina nimiannoo.
JOH 16:28 Qinee qeeqa qikoofinaindari maqasaa qumuafanausa maridaqa doo maqasaa taikeeqa qeeqa qikoofinai ooru fuanaura.
JOH 16:29 Yisuna faiqi namu mi ufana iriseeqa qiqau. Doo iria, doo maqee maasa kooroomasee qimaqimimariananoo.
JOH 16:30 Doo maqee maasa aniara aiqama ainaina irimariana fee qidaqa. Anee ufa qiananoo moo fannoo sia ani dadaaqimarifana aneennaraa kai qimannimimarianaqa maasa minara irisee kuqaa aniara Anutufinaindari qumi fee qidaqa.
JOH 16:31 Yisufa mi ufana iriseenoo kafaa qimanniminau. Doo innee maqee fee iriqaraasidee.
JOH 16:32 Doo moo aukuana adeedi ranoo maridanoo misa kai inni mara furufaramma nimaqeefaranoo. Innee inneeqa maaqa maaqa daraanimambifaqa qinee qeeqakai marianaura. Sia qinee kaaqa qeeqaraa maridaqa. Qini qikoofa qini faqa maridanoo.
JOH 16:33 Innee qinisaa atooaqa marifandinnanannai asooaranaki marifaranoo. Maa maqanasaaqaraa irirana mareemariasa aupurarana oosana oosana nimianinnanara maa ufana qimannimidaqa. Sia rufiaqa rufiaqiaqa doo qinee maa maqanasaaqarasa doo rafaaqafuseeqa, minara kaqi paasoosiaqa.
JOH 17:1 Yisufa mi ufausa narí faiqi namu qimanniminau. Qimannimiseenoo oori innaarunai uqeeraseenoo narí akoona Anutuna innaaruqinoo qinau. Oo qipoo doo qini kuqira aukuana adeedi ranoo maridanoo. Anee aneenna amaaku qini qifaaqa areenarana qimia. Qinee kafaa quandaki kaifaa aninna amianeera qimia.
JOH 17:2 Oo Anutu, anee aiqamausa rakisianneera afeeka eeraarira maraquna qiniki quqaqaananoo. Anee faiqí anaasee qumee rarisameeqaidana qimimariannana qinee misa naaru naaru marirana nimianeera mi afeekana qimiqaananoo maridanoo.
JOH 17:3 Naaru naaru marirafa maaqimminoo maridanoo. Maqasaa fasiqa anaasee misa ani moodaa kuqaa Anutunara irisee mi iriranamau firafa kafaa qini Yisusa ani asauku mundirausara anee diqiqoonausara miqikaimasee irisee mi iriranamau firafa, mifa kai naaru naaru marirafa maridanoo.
JOH 17:4 Qinee maa maqanasaaqaraasa doo ani afaaqa areenarana uqannifiqeeqa. Anee ainainirana qimiannana doo qinee taikaseeqa.
JOH 17:5 Oo qipoo qini mareeqeenana aneenna marianaqoo mara quqaqisee qifaaqa areenarana qimia. Ooqai oosana aroo aukuanna maa maqa maaqafa sia marunaki qifaaqa areenarana qimunnana mina kai kafaa qimia.
JOH 17:6 Anee maa fasiqausa qini faiqi namu maqasaaqaraa sakinaana qimimarianaqa aniara kooroomannimiqa. Misa anindi maridaqa. Anee misa qimimarianafa mariananoo. Misa ani ufa irisee eedoo qimariasa maridaqa.
JOH 17:7 Doo maqee misa qini aiqama ainaina anisaaqaraana doo iriqa.
JOH 17:8 Anee qimunna ufana qimannimunaqa irisee doo mareea. Qinee anikiqari qumuafannanara faqa misa kuqaa fee qidaqa. Anee qini diqiqoonnanara faqa anoonee qidaqa.
JOH 17:9 Qinee anee ianannai misara dadaaqianeera innaaru qidaqa, sia kaqiqeesa maqasaaqaraasarau innaaru qidaqau. Anee qimianausara kai anindi maridaqara innaaru qidaqa.
JOH 17:10 Oo qipoo qini aiqama ainaina anindi maridanoo. Kafaa ani aiqama ainaina qinindi maridanoo. Qini qifaaqa areenarafa qini faiqi namusaaqari kooroo idanoo.
JOH 17:11 Doo maqee qinee anee mariannaqoo ooru firaridaqa doo qinee maa maqanasaa taikasee minni ooru fuanauranoo. Misa kaqi maa maqanasaa marifaranoo. Oo naaquqara qikoofa. Ani auqu afeeka eeraarirana misasaa ititannimaqaani. Anee mi auquna afeeka eeraarirana qini qimunafa mifa misasaa ititaani. Ititannimaqasaanaqa maaqanda daanna ramasee moodaanakikiqa mariaqeera.
JOH 17:12 Ani auqu afeeka eeraarirana qimiannana minannai maa kamuqoo misa faqa maridaqa amiqimandee qeeqa faiqi namu rakisidaqa marunaqa maridaqa. Qinee misa ititannimaqeeqa, sia moo fannoo dapikiaqeera. Maaniki fimari fasiqafa Yudasifa mifa kai dapikinoo maridanoo. Sia kaqi dapikinoo, ani ooqeenaa akara anoona kooroo ianifeera dapikinoo.
JOH 17:13 Doo qinee anee ianannai ooru firaridaqa. Qinee maaqoo kaqi marunnaqoo ufa oosana oosana qimannimidaqa qimannimianaqa misa nimuqusakina asasirafa qumbiqanoo marianifeera qimannimidaqa.
JOH 17:14 Qinee ani aufakiana qeeqa faiqi namu qimannimunaqa qimannimiafaqa maa maqanasaaqaraasa akaqausa sia qini ufa irimariasa misa iriseeqa qini faiqi namu fidiaqaamma nimaqaidaqa. Qini faiqi namu ani ufa irisee maqasaaqaraasakinaa iriranara nikooqaidanoo innaarunaindaraa irirana marasaafaqa maqasaaqaraasa minara misa fidiaqaamma nimaqaidanoo. Misa qini daanna raidaqa sia maaqooqaraasau maridau.
JOH 17:15 Oo qipoo qinee aniara sia qini faiqinamu mareeqee moosaa quqaanneera qidaqa. Maaqoo maqasaa mariaqoo kai rakisianeera qimamidaqa, aakaaqaindaraa fasiqa fannoo misa qumaraandoora qimamidaqa.
JOH 17:16 Qinee sia maa maqanasaaqaraasaindi maridaqa, misa faqa qini daanna reeqa sia maa maqanasaa qaraasaindiara foora maridaqa.
JOH 17:17 Oo qipoo aneenna anoona ufannai misa mareeqee aneenaindikia. Ani ufa fannoo andeeqara ufa anoona maridanoo.
JOH 17:18 Anee qini maqasaa diqiqoonnana qinee faqa miqikai iqa quandaki misa maaqanna maaqanna niqiqaidaqa.
JOH 17:19 Qinee misaroo qiqa qeeqa qifaaqa ani amidaqa. Misa faqa nári marirana nirana kuqaa anindi fee qiaqeera miqidaqa anindi mariaqeera miqidaqa.
JOH 17:20 Sia qinee qeeqa faiqi namu maa mariasara kaifau innaaru qidau, maaqanna maaqanna aiqamai misa ufa irisee qiniara irifandinausa misara faqa innaaru qidaqa.
JOH 17:21 Anee faqa qinee faqa moodaanaki marunandee misa faqa maaqanda faqa moodaanaki mariaqeera innaaru qidaqa.
JOH 17:22 Maa maqanasaaqaraasa mina qafamaseeqa qiniara oo kuqaa innaarunaindaraa fee qiaqeera. Anee qifaaqa areenara eeraarirana qimiannana qinee mina maramaree misa faqa nimunaqa misa anindiri qisakoosa daanna reeqa moodaanaki mariaqeera.
JOH 17:23 Qinee misaki marianneera anee qiniki maria, miqimasainaqa kuqaa uqanna moodaanaki mariaqa. Miqimasaanaqa maa maqanasaaqaraasa niqafamasee Oo kuqaa Anutufa Yisuna aqiqanau foo qiaqeera, narí amaaku Yisunara faqa mina faiqi namuara faqa amanamana kai amuqusinoo aididanoommifoo qiaqeera.
JOH 17:24 Yisufa kaqi narí akoonara innaaru qidanoo qinau. Oo qipoo, maa qini faiqi namu anee qimunausa kasooqaqee qini faqa mariaqoo kai mariaqeera didifaqa innaaru qidaqa. Ooqai maa maqa maaqana sia maru aukuanna anee qiniara aidunara anee qifaaqa areenara eeraarirana qimunnana qini faiqi namu kasooqaqee mari iqa oorureeqa qafaaqeera innaaru qidaqa.
JOH 17:25 Oo andeeqara qikoofa maa maqanasaaqaraasa ani ufa sia irimariasa sia aniara iridaqa. Qinee kai aniara iridaqa maa qini faiqi namu anee qini diqiqamaqoonnanara misa iridaqa.
JOH 17:26 Anee qiniara amuqusidana aidimarina qini faiqi namu naundurai faqa marianifeera qimasee aniara maqee kooroo qimasaida qimannimiaafanausa maqee kafaa kafaa qimannimianaura. Maqee qinee faqa misa naundurai marianinnanara innaaru qidaqa.
JOH 18:1 Yisufa miqi qimasee innaaru qimaseenoo narí faiqi namu asukunai Yeerusaree maqusaindari nifiqeenoo Kidaroona noopundu fitaqeenoo dinni afainni saqamakina auqaana andanda ummaqiranaki idooararee qimasee narí faiqi namu faqa oonu marinau.
JOH 18:2 Ooqai moomoo kari Yisufa Yeerusaree maqusaindari fimaruqoo fiqau. Yudasifa minni fimarunara irimarufa maridanoo Yisuna ueeqaaninafa mi saqamanara faqa irimarufa miqoo finoo fee qimasee sundiauqa faqa amaana maqasaa rakisimaria firisuaiqauqa faqa Yudasifa eendaki nifiqee finau. Misa uriqararausa faqa, Farisai amaana ufa qimarusa faqa niqiqoofaqa saamu faaqaana indaaiqa asukuna marufaqa qooma qumaroofanoo Yudasifa mi saqamanaki Yisuna qumaraaqee qimaseenoo nifiqee finau.
JOH 18:4 Yisufa aiqama ainaina nariki kambiqaaninnanara irimarufa marufaqa misa oonuroofanoo Yisufa misa noorinni anireenoo iranau. Innee yafasiqanaree randaidee, qufaqa misa qiqau.
JOH 18:5 Yisuna Nasareetee maqannaanara randaidaqa qufanoo Yisufa qinau. Maa qinee misa maridaqa. Yudasifa Yisuna ueeqaaninafa misaki kikiqinoo marinau.
JOH 18:6 Yisufa miqi qimasee nariara kooroomasoonara misa tautumasee rufiaseeqa ninaaqianaindari oonurandeeqa maqasaa aqufiqau.
JOH 18:7 Yisufa kafaa irammirinoo qinau, innee yanaree randaidee qufaqa misa qiqau Yisuna Nasareetee maqannaanara randaidaqa.
JOH 18:8 Miqi qufanoo Yisufa kafaa qinau doo qinee kooroo iqa maana misa maridaqa. Innee qiniara kai randeeaafanoo, maa qini faiqi namu mariasa minnisaifaqa fuaqa.
JOH 18:9 Yisufa narí innaaru qimaru ufafa anoona kambiqaanifeera mi ufana qimanniminau. Mifa maaqi qimasee faasasaa innaaru qinau. Oo qipoo aiqamausa anee qimimarinausa sia misakiqari moo fannoo furufarianifeera. Faasasaa mi innaarunna qinau doo maqee mina anoona kambiqaina misa minnisee qini kai maraaqee qinau.
JOH 18:10 Simoona moo auqu Peetooroofa misa saamu faaqaana qafamaseenoo darifoo qimaseenoo mifa narí rakira paipana kisaaqa qumareenoo amaana maqasaa rakisirana ainainira faiqi aaqamasee asauku uqannai aaqoo aiqama atufu aqinau. Mi ainainira fasiqana auqu Marakusafa marinau.
JOH 18:11 Yisufa mina qafeenoo Peetooroona qimaminoo qinau. Saa, aneenna paipana narí aanaamuki upeekaa. Qini qikoofa manda nammari naannee qimaqoosa anee qiniara sia naannee fee qidanee. Qinee naanaura.
JOH 18:12 Yisufa miqi qimasoofaqa Roomma maqannaa sundiauqa faqa misa uriqararafa faqa Yuda maqannaa firisuaiqauqa faqa anireeqa Yisuna qumareeqa sandannai asauku rumbasee afiqeeqa.
JOH 18:13 Kaiafasana maaqaki quqaqau. Kaiafasafa mi aukuannai amaana maqasaa Anutuna aanaiqiki marusa uriqararafa marinau. Annasafa Kaiafasana airaamaku mina maaqaki marunaki munu minaki quqasoofanoo Annasafa ufa indaaru irinau.
JOH 18:14 Ooqai Kaiafasafa narikai tamummaqaseenoo Yuda maqannaasa qimanniminoo qinau Yuda maqannaasa maasakina moodaa fannoo maasa aiqamausa misa nikiaqara kuqinaqa amiqianauree qinau. Mina maaqaki Yisuna quqasoofanoo Annasafa naaree mina ufa irinau.
JOH 18:15 Misa Yisuna rumbamaree fufanoo Simoona moo auqu Peetooroofa faqa Yisuna faiqi namukiqari faiqí moo fannoo faqa misa ninaaqiana nifaqee fiqau.
JOH 18:16 Misa Yisuna afiqee amaana maqasaa aanaiqikirana maaqaki keeqoofanoo nifaqee anu fasiqafa amaana maqasaa aanaiqikirana aqoondi maridanoo kaqi mi maaqanaki keeqanau. Misa Yisuna afiqee mi maqanaki munuseeqa mi sandana idukuseeqa kaqi quqasoofanoo marinau. Peetooroofa maqusai kooqi afainni aqoosai marinau. Nifaqee anu fasiqafa kafaa raudamakinoo kooqisaa rakisimaru manaaqana qimamufanoo kooqi atuasoofanoo Peetooroofa faqa keeqanau. Keeqafufanoo maaqa kooqi adeedi ooru maridanoo qafeemarinau.
JOH 18:17 Maqusa kooqisaa rakisiu manaaqafa Peetooroona qafamaseenoo irammirinoo qinau. Anee Yisuna aqoondi fee qufanoo Peetooroofa qaoo qimasee sia fee qinau.
JOH 18:18 Suara narufaqa ainainimaru fasiqausa faqa firisuaiqauqa faqa Kaiafasana maaqa kooqinni maqusa saqanna idarasee fiqu fiqumma ida tookusiqa marufanoo Peetooroofa misaki oonu keeqafinoo ida qaani marinau.
JOH 18:19 Amaana maqasaa Anutuna aanaiqiki marusa uriqararafa Annasafa mifa Yisuna faiqi namuara faqa Yisufa faiqí anaasee qimannimira ufausara faqa mi ufanaramma Annasafa maaqaki Yisuna iree marinau.
JOH 18:20 Yisufa mina ufa iriseenoo maaqi qimasee Annasana qimaminau. Qinee faiqí anaasee moomoo suqimaruqoo kai ufa qimannimimariqia. Suqira maaqaki fee naaquqara amaana maqaki fee faiqí anaasee moodaaqoo suqiraqoo fee miqoo kai qinee naamuaqira ufa aiqama ufa qimannimimariqia. Sia qinee moo ufa kukeeqaranaki qimannimiqiafana. (Innee aaqamasee qini kukeeqaranaki irama qimaqee mariafanoo.)
JOH 18:21 Annasa anee nanaree qini iraidanee. Qini ufa irimariasa irammirinaqa qimamiaqa. Misa qini ufa oosana iridaqa.
JOH 18:22 Miqi qimasoofanoo poorisa moo fannoo asaukusamu Yisuna oori arinoo qinau. Anee nanaree amaana maqasaa rakisirana miqi qimasee qimamidanee.
JOH 18:23 Miqi qimasoofanoo Yisufa qimaminoo qinau. Qinee aaqara ufa moo qianana maaqoo mariasa aiqama kooroomasee qimannimia. Qinee andeeqara ufa qunnanara nanaree qini daridanee. Miqi qimasoofanoo Annasafa qinau, innee maana kafaa rumbamaree Kaiafasafinnai afiqee fuaqa. Kaiafasafa amaana maqasaa Anutuna aanaiqikirafa marufaqa mifa maruqoo moo maaqaki minni Yisuna afiqee fiqau.
JOH 18:25 Peetooroofa naambeeqai kaqi ida qaanimarufanoo faiqí moo fannoo mina iramirinau. Anee Yisuna faiqi namukiqari marianafee kuqaa fee. Miqi qufanoo Peetooroofa sia fee qinau.
JOH 18:26 Amaana maqasaa aanaiqikirana ainainira faiqi Peetooroofa Marakusana aaqoo ateekoona mina ati fannoo Peetooroona qafamaseenoo qimaminau. Faasai anee saqamai Yisuna faqa marianaqa ani qafaunausa.
JOH 18:27 Peetooroofa mina iriseenoo kafaa qaoo kai qinau. Qaoo qimasoofanoo kookooraana ufa qinau.
JOH 18:28 Kananaana iqaqoofanoo saarisufa namufaqa misa Yisuna Kaiafasana maaqakinaana afiqee Roomma maqannaa kiapana maaqaki munu quqaqau. Yuda maqannaasaa sia kiapana maaqaki keeqaqau. Duna iqaqainaqa maasa Anutuna qangiroo ainnaaqarara qoomaqa naannaqoo fee qimasee kiapafa moo maqannaafa marufaqa afaaqasaaqaraa aisoora maasa qifaaqasaa aqufinaqa qifaaqa mandaikinaqa sia naannoo qimasee rufiee sia mina maaqaki keeqaqau, kaqi naambeeqai madaanai kai mariqau.
JOH 18:29 Roomma maqannaa kiapafa Piratoofa misa nindafeenoo rauda mafufanoo Yisunara irammirinau. Innee nanaree fee qimasaidee maa fasiqanara ufa qidee.
JOH 18:30 Yuda maqannaasa iriseeqa qiqau, mifa sia manda oosana marainaqau sia maree mini ani amiaqini.
JOH 18:31 Miqi qufanoo Piratoofa qimanniminoo qinau, innee inneeqa kai inneeqa sandufamau mina maramaree fuaqa. Yuda maqannaasa mina iriseeqa qiqau, maasa sandufa fannoo maaqinna fasiqausa kuqannaruaqee qinoo maridanoo. Aunirira saqarisaa faiqí nariranara innee Roomma maqannaasa maasara qaoo qimasaidaqa inneeqa kai miqi mariafanoo. Minara maasa Yisuna Piratoo anisaa quqaidaqa.
JOH 18:32 Indaaru Yisufa narí kuqiranara narí faiqi namu qimannimuna mina anoona maqee kambiqeenoo.
JOH 18:33 Piratoofa misa ufa iriseenoo narí koota maqaki kaifaa keeqeenoo Yisunara mai uruannee qimasoofanoo Yisufa Piratoona koota maqaki keeqafufanoo Piratoofa Yisuna irammirinau. Kuqaa fee anee Yuda maqannaasa Karaambaiqee maridanee.
JOH 18:34 Yisufa iriseenoo qimaminoo qinau. Anee aneenna kai fee mi ufana qidanee moo fannoo ani qimamifanee qidanee.
JOH 18:35 Piratoofa minara Yisuna qimaminoo qinau. Anee qiniara Yuda maqannaa fee qimaqimidanee. Sia qinee inni oosana iridaqa. Ani maqannaasa Anutuna aanaiqikirausa uriqararausa misa kai qini maaqaki quqasaafana mariananoo. Anee nana mandoosana maraanaqee miqi fee.
JOH 18:36 Yisufa qinau, qini ququsa sia maa maqa maaqanasaaqaraa ququsa maridanoo. Qini ququsa maa maqanasaa marinaqau qini faiqinamu rakifaqau qini mareeqeefau idukuqisani. Sia qini ququsa maa maqanasaaqaraafa maridanoo.
JOH 18:37 Piratoofa mina iriseenoo kafaa Yisuna irammirinoo qinau, Kuqaa fee anee karaambaiqa moo maridanee. Yisufa mina irisee maaqi qinau. Anee qianandee kuqaa qinee Karaambaiqa maridaqa. Kuqaa anoona ufa kai qimannimirara qinee maa maqanasaa kambiqafi maridaqa. Kuqaa anoona ufara randeemaria fasiqa anaaseesa misa qini ufa iridaqa.
JOH 18:38 Piratoofa mina iriseenoo maaqi qinau, kuqaa anoona ufa qirafa mifa nanee maridanoo. Miqi qimaseenoo Piraatoofa raudamakufanoo Yuda maqannaasa naaramasee maaqi qimasee qimanniminau. Maa fasiqanaki sia arira ainaina moo marifaqa iridaqa.
JOH 18:39 Piratoofa kaqi qimannimidanoo qinau. Aukuana aukuana Anutuna qangiroo ainnaaqarara qoomaqa faasaana qini rumbaranaki mariasa aukuana aukuana moodaakai moodaakai karabusakinaana iduku nimimarunausa maridaqa. Maa aukuanna Yuda maqannaa karaambaiqa idukunnimianauree qufaqa firaa kari faaqarumasee qimamiqa qiqau, sia maana idukua. Barabasina kai idukua. Barabasifa faiqí narinoo rakinoo imarifa karabusaki maridanoo. Mina kai idukua. (Roomma maqannaasa faiqí narirana oosana maaqimminoo marinau. Sanda moomoo saamu atisaa qusi iqoona marufanoo mi sandana atinni arooqa aandau amudaani rukamirana raiqaranauqa qususee rumbaqoosamuna mi samunannai aiqamausa rumboosa narimaruna. Misamuna naaree Yisuna ari isoofanoo inaaqianna Piratoofa narí maaqaki mara quqasee mina ufara iranau.)18|39-40|YOOHANEE
JOH 19:1 Piratoofa Yuda maqannaasa ufa irisee Yisuna mareeqee narí sundia niminoo qimanniminau. Innee saamu atisaa sanda qusiranannai afaaqa turii umooqukamasaaqa qufaqa eedoo qimasee miqoo kai miqiqau.
JOH 19:2 Afaaqa turii qumooqukamaseeqa saatunanda fooqaana aukuseeqa saaeemma qumaree kukuqamasee Yisuna karaambaiqa qafee fee qimasee afisuamaqaqau. Qafee afisusee misa saasaakoona arira qamunna sundia qamunna fee qimasee afisuamaqaqau.
JOH 19:3 Sundiauqa nariqa sundia qamunna afisuamaqaseeqa anireeqa ataasa ataasa qimamaqee maaqi qiqau. Yuda maqannaa karaambaiqa afeeka anee mariana sia dauni kuqua miqidaqa ataasa ataasa qimariqau. Miqi qimasee misa nisaukusamu oori ariqau.
JOH 19:4 Misa miqi isoofanoo Piratoofa raudamakufanoo narí naambeeqai Yuda maqannaa moomoo marunnai qumureenoo qinau. Qinee Yisuna mareeqee inni nifusaa quqaanaura. Kuqira ainaina sia moo minaki marifaqa qinee qafaidaqa.
JOH 19:5 Miqi qimasoofanoo Yisufa saatunanda qafee afisirafa saasaakoona arira qamunanda rumbarafa raudamaki misa nifusaa kikiqinau. Piratoofa aiqama naaramasee qimanniminau. Innee qafaaqa. Doo mi fasiqafa maridanoo.
JOH 19:6 Amaana maqasaa Anutuna aanaiqikirausa uriqararausa faqa misa poorisauqa faqa Yisuna qafamasee firaakari faaqariqa qiqau, aunirira saqarisaa pirimma aruaqee qidaqa moomoo kari qimariqau. Piratoofa mina iriseenoo maaqi qimasee qimanniminau. Doo inneeqa kai mara maree aunirira saqarisaa pirimmannai aruaqa. Qinee mina qafaunanoo sia moo numoo minaki marifaqa qafaidaqa.
JOH 19:7 Yuda maqannaasa Piratoona ufa iriseeqa maaqi qimasee qimamiqau. Maasa sandufa maaqinna fasiqafa kuquannoo fee qidaqa. Mifa nariara Anutuna amaaku fee qimarifa marifaqa mina akiaqara arusaifanoo kuquannoo.
JOH 19:8 Piratoofa Yisunara Anutuna amaaku maridanoommi qimaseenoo firaaqoo rufianau.
JOH 19:9 Mifa kaifaa Yisuna afiqeenoo narí maaqaki oorureenoo irammirinau. Anee yaindari anuna fee qimaseenoo iroofanoo Yisufa sia ufa qimaminau.
JOH 19:10 Piratoofa mina qafamasee Yisuna kaifaa qimaminoo qinau. Anee sia fee qini qimaqiminnaree. Firimmannai aunirira saqarisaa arira aanoo qinindi maridanoo. Ani idukira aanoo irafa qinindi maridanoo. Anee sia fee minara iridanee.
JOH 19:11 Yisufa mina iriseenoo maaqi qimasee Piratoona qimaminau. Anee qiniara aanoo iannana sia aneennafau, Anutufa qinara kai maqee ani ufa ameemaanai quqaqisaifaqa maridaqa. Qinee minara maaqi qidaqa, qini qumare̱eqee ani asaukuki quqeemariasa misa numoo firaafa maridanoo anindi kaqikaafa.
JOH 19:12 Piratoofa Yisuna ufa iriseenoo firaaqoo mina aunduraki Yisuna idukiraree qimasee irinau. Yuda maqannaasa mina iriseeqa firaaqoo faaqarumasee qiqau. Anee maa fasiqana idukinaqa maasa aniara Roomma maqannaa karaambaiqinnai oonureeqa qimamianaura. Faiqí moo fannoo naríara karaambaiqee qimarifa Roomma maqannaa karaambaiqa namuqaa mariannoo.
JOH 19:13 Piratoofa misa ufa iriseenoo Yisuna afiqee madaanai ufa irimaru qaindanasaa ooqumarifinoo ufa irimaru qaindana aaqa ooni ausirirafa moomoo maruqoo qumu ooqumarifi ufa irimarinau. Yuda maqannaasa minara Kabatee qimariqau. Maasa ufakiqari ooni padiranee qidaqa.
JOH 19:14 Duna Anutuna qangiroo ainnaaqarara qoomaqa suqarafa mariannoo. Maqee suani qambaana marufanoo Piratoofa ufa irira qaindasaa ooqumarifi Yuda maqannaa qimanniminau. Doo maafa inni karaambaiqa maaqoo maridanoo.
JOH 19:15 Misa irisee faaqa quqasee kuqariraree kai qiqau. Aunirira saqarisaa firimmannai ariraree qiqau. Piratoofa mina iriseenoo Yisuna ariraree qusa qimanniminoo qinau. Innee kuqaa inneeqa karaambaiqa aunirira saqarisaa pirimmannai ariraree fee qidee. Miqi qufaqa amaana maqasaa Anutuna aanaiqikirausa uriqararausa Piratoona ufa irisee faaqa quqasee qiqau, maa fasiqafa sia maasa karaambaiqa maridanoo. Maasa karaambaiqa Roomma maqannaa karaambaiqa moodaa maridanoo mina auqu Sisaafa.
JOH 19:16 Piratoofa mina iriseenoo Yuda maqannaasa nisaukuki Yisuna quqanau. Inneeqa maree munusaifaqa sundiauqa aunirira saqarisaa pirimmannai aruaqa. Miqi qimasoofaqa misa Yisuna maree fiqau.
JOH 19:17 Yisufa Yeerusaree maqusaindari narí aunirira saqari akumaree fimarinau.
JOH 19:18 Fifiufanoo Eeburu ufakiqari faiqí nikiaqa amudaani fee qimaru amuaqunamusaa Koorookata amuaqunamusaa ooruree aunirira saqari maqai rumasee minasaa Yisuna mara airisee firimmannai Yisuna narí aunirira saqarisaa aruqapiriqau. Aruseeqa faiqí qaaraqanda mandainaina maraqanuqanda miqanda faqa nári aunirira saqarisaa dinni dinni naruaqapiriqau. Naruseeqa uqeereeqeeqa maqa aamara auquqoonaki rakiqaqau. Qaaraqanda dinni dinni Yisuna qambaanai rakiqaqau.
JOH 19:19 Piratoofa moo raufiqira saqarisaa ufa akara rumeeqeenoo narí rakira fasiqa moo amufanoo oorureenoo Yisuna akiaqa aunirira saqarisaa pirimmannai arinau. Mina akara oosana maaqimminoo marinau. Maa fasiqafa Yisufa Nasareeteendaraafa Yuda maqannaasa karaambaiqa maridanoo.
JOH 19:20 Yisuna aru maqa maaqafa Yeerusaree aaqa adeedi marufaqa faiqí anaasee moomoo mina akara qafaida asaana rimariqau. Mi akarafa Yuda maqannaasa ufa moo auqu Eeburu ufakiqari faqa Roomma maqannaasa ufa moo auqu Ratinna ufakiqari faqa Kirisa maqannaasa ufakiqari faqa akara rinoo marufaqa asaana rimariqau.
JOH 19:21 Yuda maqannaa amaana maqasaa Anutuna aanaiqikirausa uriqararausa mi akarana asaana rumasee Piratoona maqusai oorureeqa maaqi qimasee aaqara ufa qimamiqau, saa sia Yuda maqannaa karaambaiqa fee qimasee akara rua. Kaqi narí kai Yuda maqannaasa karaambaiqee qimari fee qimasee akara ruaqaana.
JOH 19:22 Piratoofa irisee maaqi qimasee kaukaataqimasee qimanniminau. Qinee akara runafa doo saina mifa kai mariani.
JOH 19:23 Roomma maqannaa sundia qaara faqa qaara faqa Yisuna aunirira saqarisaa aruseeqa mina qamunna anaqi anaqi iseeqa nimana kai rainaqau. Yuda maqannaasa kisaaqa qamunna moodaa afisirana sia afu aina marufa marufaqa kaqi uqara foora amiqimasee auqirafa marufaqa sundiauqa mina qafeeqa doo amiqirafa marifaqa sia anaqia, kaqi kaatara foora sararamasee uriqarainafa maraani. Miqi qimasoofanoo ooqeenaa tamummaqarausa akara anoona mikari kambiqanau. Mi ooqeenaa akarafa minara maaqi qimaqoofa. Misa qini qamunna raina rainamasee náriara náriara mareefaranoo. Kisaaqa qamunna moodaa mina sararamasee mareefaranoo.
JOH 19:25 Yisufa aunirira saqarisaa kuqirarifanoo mina aunirira saqari atukaki mina anoofa faqa narí auna qini qinoona faqa moo anaasee Karoopasana anaaqa Mariana amarafa Mariafa faqa moo anaasee Makadara maqusaindaraa Mariana amarafa Mariafa faqa minamusa miqoo kikiqiqa mariqau. (Qaaramoo anaasee Mariana amarausa kikiqiqa mariqau.)
JOH 19:26 Mirindari Yisufa qafoofanoo narí Yisuna faiqi namukiqari narí afaaqasaa aqoondi faqa qaaramoo anaasee mina anoona amarausa faqa kikiqiqa mariqau. Yisufa kuqiraridanoo narí anoona qafamaseenoo qimaminoo qinau. Oo qinnaqeefoo maa fasiqafa Yoohaneefa ani amaaku mariannoo qinee kuquananoo anisaa rakisiani.
JOH 19:27 Miqi qimaseenoo Yisufa quandakinoo narí afaaqasaa aqoondi maaqi qimasee qimaminau. Maafa ani anoofaikinoo marinana qinee kuquanana anee minasaa rakisia. Doo miqooqari mi fasiqafa Yisuna anoona afiqeenoo narí maaqaki soofanoo marinau.
JOH 19:28 Yisufa nariara irufanoo aiqama ainaina doo maqee anoonaikufanoo moodaa ooqeenaa akara nammariara qimaqoofa mifa kai sia anoona kambiqaifaqee qimasee minara maaqi qinau.
JOH 19:29 Qinee nammariara didimarifaqee qufanoo miqoo uainna nammari taqu sundiauqa misa manda uainna nammari sukaqee maru nammarifa miqoo maruna faiqí moo fannoo eeqaufooqaana ateekasee minaki raaraamasee qisoopa saqari asaana undaqiseenoo minasaa rutaqueeqee mara muru Yisuna afaurusaa mundusoofanoo qumbifiqia namaseenoo qinau. Doo qini ainainirafa taikeenoo qimasee aunirira saqarisaa anuka rooraiqinoo doo kuquqaraasinau.
JOH 19:31 Kuqufufanoo Yuda maqannaasa uriqararausa Piratoofa narí maaqai marunnai oonuree maaqi qimasee qimamiqau. Duna sabata naaquqara sabata mariannoo. Maqee kai aunirira saqarisaa mariasa niku itairisaana dauni kuqufifaqa nikundamasee duna amiqimandee sabata maraanaura.
JOH 19:32 Piratoofa eedoo qufaqa sundiauqa oonureeqa Yisuna aaqa dinni marunna aiku itairisee moo dinni maruna Yisuna faqa kuquna aiku itairisaqau.
JOH 19:33 Yisuna aiku itairianee qimasee qafoofanoo doo kaaqa kuqinoo marufaqa sia aiku itairiqau.
JOH 19:34 Sundia moo fannoo faaqaana qumareenoo Yisuna aqaasanasaa raquraminau. Raquru amufanoo fidika faqa nammari faqa minakiqari aniranau.
JOH 19:35 Aniroofanoo mi ainainna qafee marufa minara akara rinau. Mifa narí ufara kuqaa anoonee qidanoo innee faqa kuqaa anoonee qiaqeera akara rinau. Yoohaneefa afaqanoo nidanoo miqaa maaqaa imarufanoo qafeemarinau. (Yoohaneefa maa akarana akara rumaseenoo narí auqu sia kooroo iraree qimaseenoo maa akaranaki nariara Yisuna afaaqasaa aqoondi maridee qinau.)
JOH 19:36 Maa ainainnausa Yisuna arunara ooqeenaa akara anoonaikianifeera kambiqanau. Mi ooqeenaa akarafa maaqi qimaqoofa maridanoo. Sia mina amudaani moo fannoo raqaannoo. Sia uqanna moodaa raqaannoo. Miqi qimaqoo ufafa anoonaikufaqa sia mina aiku raqaqau.
JOH 19:37 Ooqeenaa akara moo maaqimminoo maridanoo. Faiqí moo fannoo faaqaanannai asauku mundirana raquramisainaqa faiqí anaasee kikiqamambinaqa qafeefaranoo. Mi ufafa faqa aunirira saqarisaa kambiqanau.
JOH 19:38 Sundiauqa Yisuna raquramisoofanoo Yooseefaana amarafa Arimateea maqusaindaraafa Piratoona maaqai oonureenoo Yisuna iri aunirira saqarisaaqaraanara innaaru qinau. Mi Yooseefaafa Yisuna ufa irimarufa maridanoo narí aundurai kai iriseenoo sia faiqí nifusaa kooroo inau, kaqi marinau. Yuda maqannaa uriqararausa irifoo qimasee rufiamaree kukeeqakufanoo Yisuna iriara Piratoofunnai naríara oonureenoo innaaru qinau. Amanee qiminaqa maree munu akundaanauree qinau. Miqi qufanoo Piratoofa eedoo qimaseenoo aqiqoofanoo Yooseefaafa Yisuna iri aunirira saqarisaaqaraana tatumareenoo finau.
JOH 19:39 Nikoodeemusafa ooqai indaaru asukunaki Yisuna faqa ufa qiqiufa maridanoo mifa Yooseefaana dadaaqinau.
JOH 19:40 Mifa faiqí akunnimaqasaida nikundee maru marasinna moomoo uqanna maraseenoo qamunnasaa adieeseenoo minannai Yisuna afaaqa kukuqiqau. Miqanda nári maqannaasa oosana maraseeqa kukuqamasee akundaqau.
JOH 19:41 Yisuna aruqoo mina aaqa saqama marinau. (Yisuna aukuana narí maqannaasa maaqimasee madika indufusaida kuqufusa nikundee mariqau. Misa ooni firaana kasaaqa aamara auquseeqa minaki keeqafufaqa dinni dinni moomoo aamara auqiiseeqa kuqusa minakiaqa naadu naadu nikundee mariqau. Moodaa kai moo kari akundeeqa mina afunda taikoofanoo kaifaa moo fannoo kuqufaqa miqikai imariqau. Sia moodaa karifau nikundee mariqau. Moo kari moo kari nikundee mariqau.)
JOH 19:42 Mi saqamanaki ooni aamara fuka marunaki sia moo akundoonaki. Mi ooni aamarafa adeedi marufaqa duna maasa Yuda maqannaasa sabata naaquqarafa mariannoo qimasee kaqi kaqi ufaqa Yisuna iri ooni aamaraki munu akundaqau.
JOH 20:1 Akundamasoofaqa mariiqa amaanasaa kananaana eendai Mariana amarafa Makadara maqusaindaraafa Yisuna ooni aamaraki akundamaqoona qafaanee qimasee finau. Oonuree qafoofanoo mina aamaraki ititaqoo oonina firaana mareeqee kaqinni quqaqoofanoo marida qafanau.
JOH 20:2 Mariafa mina qafamaseenoo anirandeenoo sandeenoo oonureenoo Simoona moo auqu Peetooroona faqa Yisuna afaaqasaa aqoondi qini faqa qimanniminoo qinau. Misa Karaambaiqa iri ooni aamarakinaana mara maree moosaa fifia. Sia maasa qafeeqa.
JOH 20:3 Yisuna faiqi namukiqari Peetooroofa faqa qinee Yoohaneesa faqa mina iriseeqa qafaanee qimasee sandaqiafana.
JOH 20:4 Maaqanda sandaidaqa qinee Yoohaneesa kaaqa sandeeqa Yisuna madika kooqinni oonuraqiafana.
JOH 20:5 Qinee sia keeqaqiafana kaqi oonu maridaqa aamaraki qafeemariafana. Miqoo maridaqa Yisuna kukuqamaqoo qamunnana mina kai qafee mariqafana.
JOH 20:6 Simoona moo auqu Peetooroofa aidaaqareenoo kaqi oonaamarai keeqanau. Mifa Yisuna kukuqamaqoo qamunna miqoo quqaqoona qafamaseenoo.
JOH 20:7 Mina akiaqa rumbaqoo qamunnana uturuqeeqeenoo aaduma kukuameeqee quqaqoofanoo marinau.
JOH 20:8 Qinee Yoohaneesa Peetooroona aanaaqiana keeqafi qafamaseeqa doo kuqaa findifiifoo qiqiafana. [
JOH 20:9 Yisufa kuqiranakiqari findifuaninna akaranara sia amiqimandee iriqiafana. Mana manammimariqiafana.]
JOH 20:10 Maaqanda qafamasee doo nimaaqa anirandee fiqiafana.
JOH 20:11 Mariana amarafa Makadara maqusaindaraafa ninaaqiana kafaa ooni aamara kooqinni oonu kikiqinoo marida ikiraqee marinau. Miqidanoo ooni aamaraki kummaramafi qafoofanoo qaara qangirooqara eekara qamunna afisiraqanda moo fannoo Yisuna akiaqa maruqoo ooqufaaqee marufanoo moo fannoo Yisuna aiku maruqoo ooqufaaqee marufanoo nindafanau.
JOH 20:13 Nindafoofaqa miqanda qiqau. Oo maa anaasee anee nanaree ikiraqaidanee. Mariana amarafa qinau. Misa qini karaambaiqa mara maraafaqa sia misa quqaqoona iridaqa ikiraqaidaqa.
JOH 20:14 Mariana amarafa miqi qimaseenoo quandaki qafoofanoo Yisufa mina aanaaqiannai kikiqinoo marufanoo mifa sia Yisunee qinau.
JOH 20:15 Yisufa maaqi qimasee Mariana amarana qimaminoo qinau, Oo maa anaasee anee nanaree ikiraqaidanee, yanaree randaidanee. Mariana amarafa Yisunara maa saqamanasaa rakisirafammifoo qimasee qimaminoo qinau, Oo maa fasiqa anee yai fee iri maanakinaana mara quqeenee. Anee qimaqiminaqa qinee mina maramaree fua.
JOH 20:16 Yisufa mina iriseenoo mina auqu ramaseenoo qinau, Maria, qufanoo Mariana amarafa tautumma quandaki qafeenoo Oo ufasaa rakisirafee qinau. Eeburu maqannaasa ufakiqari qinau, Rabooni, maasa ufakiqari ufasaa rakisira fee qinau.
JOH 20:17 Miqi qimasoofanoo Yisufa qinau, sia qeeqa qikoofinnai ooru fiqa minara anee sia qini qifaaqa qumaraa. Anee oonuree qini qikaqaafasaauqa qimannimia. Qinee qeeqa qikoofinnai faqa inni nikoofinnai faqa qeeqa Anutufinnai faqa inni Anutufinnai faqa ooru fidaqa.
JOH 20:18 Mariana amarafa mina iriseenoo sandee oonureenoo mina faiqi namu maaqi qimisee qimanniminau. Doo qinee karaambaiqa qafaunanoo mifa mi ufana qini qimaqiminoo.
JOH 20:19 Mi faasaanna mi eendanaki Yisuna faiqi namu maasa moo maaqaki keeqafufaqa Yuda maqannaasa doo Yisuna ariqa maasa faqa darifoo qimasee maasa misara rufiasee kooqi amiqimasee ititasee marufanoo Yisufa tautumannimaqeenoo maasa qambaanai kooroomafinoo qimanniminoo qinau. Sia rufiaaqa asooarafa inniki mariani.
JOH 20:20 Miqi qimaseenoo Yisufa narí asauku aqumusaa pirimma aruna kai fidika reemaruna uqannifiqeenoo aqaasanasaa faaqaana raquru amuna afaaqa ateekaqoona faqa uqannifiqoofaqa maasa qafamasee doo kuqiranakiqari findifuananoo fee qimasee kaaqamma asasiqiafana Yisufa kafaa qimanniminoo qinau, inni sia maparaa iaqa asooarafa inniki mariani. Qini qikoofa maa maqanasaa qini diqiqamaqoosa qinee miqikai iqa innee maaqanna maaqanna qini ufa qimannimiaqeera inni faqa niqiqaidaqa.
JOH 20:22 Miqi qimaseenoo Yisufa aidoo maasa fuaqaqimaqaseenoo qinau doo innee naaquqara Anutuna maraquna maraaqa.
JOH 20:23 Innee faiqí mandainaina numoo mininnisaifanoo Anutufa faqa mininnisaannoo. Sia mininnisaifanoo Anutufa faqa sia mininnisaannoo.
JOH 20:24 Yisuna faiqi namukiqari Toomasifa mifa qaara qapirafa maqaqoofa marufa moosaa mi eendanaki maridanoo sia Yisufa tautumasee maasaki kooroo una sia mifa qafanau.
JOH 20:25 Maasa Yisuna qafaafanausa Toomasina qimamiqaqiafana maasa Karaambaiqa qafaunausa maridaqa. Miqi qufanoo Toomasifa qinau, innee unna qimariafanoo qinee mina asaukusaaqaraa pirimma aamaraki fidika reemarinaki auqama qafeeqa mina aqaasanasaaqaraana faqa auqama qafeeqa kuqaa fee qianaura sia auqama qafeeqa unna fee qianaura.
JOH 20:26 Mi amaanafa aiqaroofanoo moo amaana eendaki maasa Yisuna faiqi namu faqa Toomasina faqa maaqaki keeqafi kooqi mundusee ititasee Yuda maqannaasa maasa dari maqi qimasee mariqiafana. Marufanoo Yisufa kafaa maasaki kambiqanau. Anireenoo qinau, sia rufiaaqa asooarafa inniki mariani.
JOH 20:27 Miqi qimaseenoo quandaki Toomasina qimaminoo qinau, aneenna asauku qini qisauku aqumusaa maaqoo quqasee pirimma aamara auqamma qafa. Aneenna asauku qini qiqaasanasaa faqa quqasee auqama qafa, aneenna maparaairana taikaa, kuqaa fee kai qia.
JOH 20:28 Toomasifa mina qafamaseenoo qinau. Qini karaambaiqa qini Anutufa.
JOH 20:29 Yisufa kafaa Toomasina qimaminoo qinau. Anee qini qiqafamaseenana kai qiniara kuqaa fee qidanee. Akaqausa sia qini qiqafaidaqa qini ufara kuqaa fee qifanoo Anutuna asasirafa misasaa mariannoo.
JOH 20:30 Yisufa moomoo firaa ainaina narí faiqi namu nifusaa kooroomasoofaqa sia maa papiqanasaa akara riqa. Akaqana kai akara riqa.
JOH 20:31 Maa ainainnausara akara rumaseeqa inneeqa Yisunara kuqaa asauku mundira fee qimasee Anutuna amaaku fee qimasee mi iriranannai mina auqunnai innee naaru naaru marirana maraaqeera akara rumannimaqeeqa.
JOH 21:1 Inaaqiana moo kari Yisufa kooroomambufaqa maasa mina faiqi namu qafaqau. Tibeeriasa nammari mandirana afainni maaqimandee kooroomandee uqannifiqanau.
JOH 21:2 Simoona moo auqu Peetooroofa faqa Toomasifa qaara qapirafa faqa Natanaeerafa Kannaana maqusa Kariree maqa maaqaindaraafa qini qikoona Seebeedeena amaakuqara faqa moodaanaki mariqiafana.
JOH 21:3 Marufanoo Simoona moo auqu Peetooroofa naríara qinee noodaanna pateeraanauree qufaqa maasa ani faqa fuanauree qimasee mina faqa fiqiafana. Maasa miqi qimasee kanuqaki akaramafi nammari qambaanai oonuree pateeuqa quqasaida uqeerasaida qafeemarufanoo iqaqanau. Sia uqanna moodaa noodaanna uqarinau.
JOH 21:4 Kananaana suani maqee ururoofanoo Yisufa nammari afainni kikiqinoo marufaqa maasa sia minara irisee Yisu fee qiqau. Yisufa maasa nammeera qimasee qimanniminau, Oo kumaaraauqa noodaanna maraidee qufaqa maasa qiqau, sia uqanna moodaa maraidaqa.
JOH 21:6 Yisufa iriseenoo maaqi qimasee qimanniminau, innee nisauku uqannai pateeuqa quqaseeqa noodaanna paqurifaranoo. Misa mina iriseeqa nariqa firaa pateeuqa nisaukuqannaindari aqusoofanoo noodaanna moomoo minaki qumbiqafufaqa rarisarara anuqimariqiafana.
JOH 21:7 Yisuna afaaqasaa aqoondi qinee Yoohaneesa Peetooroona qimamiqa qiqiafana Karaambaiqa muqufa maasa qimaqimifa maridanoo. Simoona moo auqu Peetooroofa mina iriseenoo narí qamunna quqaqoona qumareenoo aranandauqanna rumbamareenoo nammariki ooqurama aqufufanoo immapamamaree Yisufunnai finau.
JOH 21:8 Maasa Yisuna faiqi namu kanuqaki kaqimariaafanausa pateeuqaki noodaanna qumbiqanoo marufaqa rarisaqa aniufaqa afainni anireeqa. Maasa sia nianai marufaqa aambaaka maaqooqari aqimariana amanasaa marufaqa miqoo oonureeqa maasa sipakiqari maqasaa aqufufaqa miqoo idaraqoona qafaafannaqoo idarasee noodaanna suqaida feemu kaqi quqaqoofaqa qafaqiafana.
JOH 21:10 Yisufa maasa qimanniminau, noodaanna maqee maree anianakinaana akaqana maree aniaqa.
JOH 21:11 Simoona moo auqu Peetooroofa sipaki akaramafinoo noodaanna pateeuqa rarisama maqasaa quqanau. Quqasoofaqa maasa noodaanna asaana rumasee (153) moomoo uqanna firaafa kai marufanoo sia pateeuqa rakeeinau.
JOH 21:12 Yisufa maasa narí faiqi namu naaranau, doo aniree narana naaqa. Maasa minara yafee qianneerusia. Doo karaambaiqa akooqoo maridanoo qimasee sia iraqau, kaqimbiqiafana.
JOH 21:13 Maasa aniraafananoo Yisufa feemu faqa noodaanna faqa mareeqee niminau.
JOH 21:14 Yisufa kuqiranakiqari findifuqooqari qaara kari maasa narí faiqi namu kooroomannimaqanau. Doo qaaramookufanoo noodaanna qumbaqira faasaanasaa fee qimasee kooroo inau.
JOH 21:15 Maasa miqoo namasaafananoo Yisufa Simoona moo auqu Peetooroona qimaminoo qinau, Simoona, Yoohaneena amarana amaaku, anee qiniara aneenna amuqusakiqari fee aididanoo fee qini faiqi namu qiniara nidimarina ani qiniara aidirafa urinnaaqaranoo fee maridanoo fee. Peetooroofa iriseenoo maaqi qimasee qimaminoo qinau, eeoo Karaambaiqa qinee aniara dididanoo anee minara irimarinanoo. Yisufa iriseenoo kaifaa qimaminoo qinau, anee qini faiqi namusaa asumu aandaura foora naranara foora nimia.
JOH 21:16 Miqi qimaseenoo Yisufa kaifaa Simoona moo auqu Peetooroona qimaminoo qinau. Simoona Yoohaneena amarana amaaku, kuqaa fee anee qiniara aneenna amuqusakiqari fee aididanoo fee. Simoona moo auqu Peetooroofa qinau, Eeoo Karaambaiqa aniara didimarifana anee minara irimariananoo. Miqi qimasoofanoo Yisufa qinau, anee qini ufa irimariasa sipsipara foora rakisinnimaqaa.
JOH 21:17 Miqi qimasee Yisufa qaaramookufanoo Peetooroona irammirinoo qinau, Simoona Yoohaneena amarana amaaku kuqaa fee anee qiniara aidinoo fee. Peetooroofa Yisufa qaaramoo kari iroonara aundura rapikufanoo maaqi qimasee qimaminau, Oo Karaambaiqa anee aiqama ainainara irimarianafa qinee aniara didimarinara anee irimariananoo. Yisufa iriseenoo qinau, anee qini ufa irimariasasaa naranara foora nimia.
JOH 21:18 Qinee anoona ufa kai ani qimamidaqa. Anee kumaaraa maridana qamunanda anee rumbasee aneenna aidiranasaa nimariananoo, kasooqaqee anee nauraiqi quqainanoo faiqí moo fannoo ani asauku dinni dinni ratutasee rumbasee afiqee sia fuaqaannai ani akooqainnannai kuqinnanara afiqee fuannoo.
JOH 21:19 Yisufa mi ufanannai Peetooroofa aunirira saqarisaa kuquaninnana Peetooroofa mi kuqiranaki afaaqa areenarana Anutuna amiannoo. Yisufa Peetooroona qimami taikaseenoo mifa findifi fidanoo Peetooroonara doo anee qini qinaaqianna aniannee qimasee indaaru Yisufa finau.
JOH 21:20 Peetooroofa Yisuna faqa fidanoo quandaki Yisuna afaaqasaa aqoondi qini Yoohaneesa qiqafanau. Ooqai Yudasifa ueeqoo eendanaki narana neemarufanoo Yisuna aaqa marufa ueeqaaninnanara iroo fasiqafa qinee Yoohaneesa mi fasiqafa Peetooroona aanaaqiana fimariafananoo.
JOH 21:21 Peetooroona Yisuna iraidanoo qinau, Oo Karaambaiqa maa fasiqafa Yoohaneefa naqifeemasee kuquannoo fee.
JOH 21:22 Yisufa qimaminoo qinau, Peetooroo sia mi fasiqana ainainirafa ani saikafau maridanoofau, qinindi maridanoo. Qinee mi fasiqanara sia dauni kuqua, kasooqaqee qinee kafaa qumuanna aukuana ani paqurianauree qiananoofau miqimmiqini. Peetooroo sia ani saika maridanoo. Ani saika maafa maridanoo. Anee qini faqa fuannee qidaqa.
JOH 21:23 Yisufa miqi qimasoofaqa mina faiqi namu maaqi qimasee qini Yoohaneenara narí qimami narí qimami aaqamasee qiqau. Oo mi fasiqafa Yoohaneefa sia kuquannoo afeeka fee mariannoo. Yisufa sia minara sia kuquannoo fee qinau. Yisufa maaqi qinau, qinee mi fasiqanara kaqi marinaqa qinee qumuanna aukuanna qumu paquriananoofau miqimmiqini misaikana sia anindi, qinindi fee qinau.
JOH 21:24 Mi fasiqafa maa ainainna ufana qidaqa akara rimarunausa maridaqa. Maasa mina ufara kuqaa fee qimasee iridaqa.
JOH 21:25 Yisufa kuqaa moomoo ainaina auqinau, sia maa akaranakinaana kaifau auqinau. Maasa sia Yisufa auqoo ainaina aiqama akara riqa. Papiqa maa maqa maaqana qumbiqaandoora, oodaa kai akara riqa.
ACT 1:1 Oo qini qifasaafa Teeoofirusafa, Yisufa indaaru narí saika oosana araseenoo miqooqari mina ufa oosana oosana faqa mifa auqu ainaina faqa Anutufa mareeqee innaarunai quqoonara faqa qinee indaaruqaa papiqaki qinee Rukaasa akara rumamaqaafanafa maridanoo. Maqee maanaki dinnatinnai fuka akara rumamaqaidaqa.
ACT 1:2 Anutufa Yisuna mareeqee innaarunai quqoo kamuqoo mi indaaruqaa akarana taikaqiafana. Yisufa kaqi maridanoo Anutuna naaquqara maraqunnannai narí rusandeesamumasee maroo fasiqausa naamuaqira ufa oosana oosana qimanniminau.
ACT 1:3 Yisufa narí kuqiranakiqari findifinoo miqooqari qaara fasiqa niku nisauku taikasee faasaana maridanoo narí faiqi namu maruqoo moomoo kari kooroomambinoo misa faqa ufa qidanoo Anutuna innaaruna ququsakinaa mariranara ufa qimannimimarinau. Miqimandeenoo narí kuqiranakiqari findifinoo akooqoo mariranara uqannifiqanau.
ACT 1:4 Mi fasannai mi kamuqoo mina faiqi namu mina ufa irimarusa moodaanaki suqufufanoo Yisufa misa faqa maridanoo maaqi qimasee ufa qimanniminau. Qinee innaarunai ooru fuanaqa innee maa maqusana Yeerusaree maqusa sia quqasee fifainiaqa kaqi mariaqa. Qini qikoofa moo afeeka nimianinnanara qinee qimannimiafannana minara maaqoo kai marida rakisiaqa.
ACT 1:5 Yoohaneefa nammari rumannimaqee marifa kaqi fifau nammari uqannaki moomoosa rumannimaqee marinau. Anutufa qusasaa anoona ainainaki narí naaquqara andeeqara maraqunnaki inni rumannimaqaannoo.
ACT 1:6 Yisuna afaaqasaa aqoondiuqa mina faqa nimarusa misara niqiqoo fasiqausee qimariqau. (Yisufa maru aukuanna Roomma maqannaa kaamanna faqa sundiauqa faqa rakisinnimaqee marufanoo Yuda maqannaasa nikooqanau. Naqimasee Roomma maqannaa niqiqamasee fee maasa qeeqa rakisianauree qimariqau.) Minara Yisuna afaaqasaa aqoondiuqa Yisuna faqa suqufiqa irammiriqa qiqau. Oo Karaambaiqa maa aukuannee yairee fee anee Roomma maqannaa kaamanna aqiqamaseenee Isaraee maqannaa maasa nári kaamanna quqeennaree.
ACT 1:7 Yisufa mi ufana iriseenoo qimanniminoo qinau. Oosana oosana ainaina naaru kambiqaaninna aukuannai sia innindifau maridanoo. Qini qikoofa narí afeeka rakisirana quqaseenoo, sia inniara iriaqee qinau.
ACT 1:8 Maanara kai iriaqee qinau, qini qikoona naaquqara andeeqara maraquna fannoo qumuree inni naakufinaqa innee qini qiqafara fasiqauqa qiniara aiqamai qimannimimaree fifaranoo Yeerusaree maqusaki mariasa faqa Yudeeaa maqa maaqaki mariasaki faqa Samaria maqa maaqaki mariasaki faqa nianai aiqama atinnai mariasaki faqa qini qiqafara fasiqauqa qiniara kooroo ifaranoo.
ACT 1:9 Yisufa miqi qimaseenoo misa nifusaa miqooqari Anutufa kukeeqaranakiqari Yisuna akooqoo uqeerasoofanoo innaarunai oorufimarufanoo asuru fannoo qumu dukunimaseenoo misa nifusaa kai qumu afiqee ooru finau.
ACT 1:10 Misa miqookai tataaqa marufanoo qaara fasiqa eekara qamunna afisiraqanda miqoo misaki dadi findifufaqaqara kikiqiqau.
ACT 1:11 Miqanda maaqi qimasee aiqamausa qimannimiqau. Oo Kariree maqannaasa Innee nanaree innaarunai noori uqeerasee tataaqa maridee, innee fifau miqi mariafanoo. Anutufa Yisuna maqee inni nifusaa uqeereeqeenoo innaarunai muru quqeenoo doo Yisufa maqee innaarunai ooru findee kai miqikai inoo kasooqaqee kafaa qumuannoo.
ACT 1:12 Miqanda miqi qimasoofaqa Yisuna faiqi namu quqasee Oorifa aaqanasaaqari Yeerusaree maqusai kafaa ooqu keeqaqau. Oorifa aaqana sia nianai maridanoo. (Moodaa kirometera maaqiraqoo maridanoo dinni Qufoorai miqiraqoo Yeerusaree maqusa maridanoo.)
ACT 1:13 Misa kafaa Yeerusaree maqusaki keeqafiqa maqee maqee nariqa kai suqimaru maqanaki keeqaqau. Maarinni sandaaqai rummaki suqiqau. Misa nuqu Peetooroofa faqa Yoohaneefa faqa narí afasaafa Yameesafa faqa Peetooroona akaqa Andurufa faqa Firipifa faqa Toomasifa faqa Baratooroomeeufa faqa Mataioofa faqa Yameesana amarafa Arafaeeusana amaaku faqa Simoona amarafa moo misa minara nariqa kaamanaikiaqeera sandanainai qimaru fee qimariqau. Mifa faqa moo Yudasina amarafa faqa mifa Yameesana amaaku.
ACT 1:14 Minamusa anaasee namufaqa Yisuna anoona Mariana faqa Yisuna akaqaafasaa namufaqa maqee maqee suqufida moodaa naundurasaa fidaqa innaaru qimarusa mariqau.
ACT 1:15 Qaaramoo faasaana aiqaroofaqa Yisuna ufa irimarusa suqufufaqa ufa suqirara qiqau. Misa nisaanarirafa maaqinoo maridanoo. Qisauku dinni taikasee dinni ani moodaa marasee fasiqa niku nisauku taikasee fasiqa anaasee suqimariqau. Misa suqimarufanoo Peetooroofa misakiqari findifinoo maaqi qimasee qimanniminau.
ACT 1:16 Oo qini qiqoonausa. Ooqeenaa akara anoona maasaki doo anoonaikinoo Yudasifa sundia mareeqeenoo soofaqa Yisuna arunara anoonaikinoo. Ooqai naaquqara andeeqara maraquna fannoo Dafidina qimamifanoo Yudasinara akara rumaqoofa doo maqee mina anoona maasaki kambiqeenoo.
ACT 1:17 Yisufa Yudasina rusandeesamumandee maasa faqa ainainianifeera mareeqee maasaki quqasoofanoo marinau. [
ACT 1:18 Yudasifa Yisuna qumaraseenoo Yuda maqannaasa nisaukuki quqasoofaqa misa mina akiaqara feefauru amiqau. Amufanoo mifa mi feefauruna mara mareenoo moo maqa feefaurumandeenoo miqoo saamurufanoo amuaqu radiqufanoo arana kukupamafufanoo kuqinau.
ACT 1:19 Yeerusaree maqannaasa minara iriseeqa mi maqanara fidika maqa maaqee qidaqa. Yeerusaree maqannaasa nári ufakiqari mi maqanara Akeeradama fee qidaqa.]
ACT 1:20 Dafidifa narí idi papiqaki maaqi qimasee Yudasinara ooqai Yudasifa sia kambiqooqoo maaqi qimasee akara rinau. Mina maqa maaqa kaqi mariannoo Moo fannoo sia amana minaki marinnaranoo. Kafaa Dafidifa moosaa maaqi qimasee Yudasinara akara rinau. Moo fannoo mina amanasaa findifinafa mina amaaqa maqafi mariannoo.
ACT 1:21 Peetooroofa Dafidina ooqeenaa ufa kikiqa ususeenoo maaqi qimasee narí aqoonausa miqoo suqiqa marusa qimannimidanoo qinau. Maasaki qisaukuqara taikasee qiku nooqu qaara marasee mariafanausa maridaqa. Yudasifa doo kuqinoo moo fannoo mina amaaqaki kambiqaa. Sia kai fifau fasiqa fannoo miqiannoo. Ooqai oosanaree Yoohanee nammari nimimarufa marunaki maru fasiqafa miqooqari Yisuna faqa maasa faqa fifiufanoo Karaambaiqa Yisufa innaarunai ooru funa irufa mina qafoo fasiqafa kai Yudasina amaaqaki kambiqaannoo.
ACT 1:23 Peetooroofa miqi qimasoofaqa misa qaara fasiqa utaaqaqau. Miqanda nuqu Yooseefaana amarafa faqa Matiasafa faqa Yooseefaana amarafa moo auqu Barasabasifa kafaa moo auqu Yustusafa marinau.
ACT 1:24 Miqoo suqimarusa miqanda nuqurama quqaseeqa minee maraanau maanee maraanau qidaqa Anutunara maaqi qimasee innaaru qimariqau. Oo Karaambaiqa Yudasifa ani ufa irimariasaki mariifa doo narí manda nammari namaseenoo narí sanda arinoo maridanoo. Oo Karaambaiqa maasa qaaraqanda mareeqee quqaseeqa, anee miqandakinaana yafasiqa fee ani aididanoo fee Yudasina aikuki kambiqaannoo fee. Anee aiqama fasiqa naundurai irimarianafa minara maasa uqaqifiqa.
ACT 1:26 Miqi qimasee innaaru qimaseeqa masisa quandeera foora ufanoo Matiasana uqannifiqanau. Uqannifiqasoofaqa Matiasana mareeqee Yudasina aikukina mara quqaqau.
ACT 2:1 Yisufa innaarunai oorufu kamuqoo mina faiqi namu moomoo Peendeekoosa qoomaqira faasaanasaa misa aiqama Yeerusaree maqusai moodaa maaqaki nariqa kai keeqafimariqau.
ACT 2:2 Marufanoo kaqi kaqi ufanoo innaarunaindari firaa ufai uqidanoora foora qumureenoo mi maqanaki qumbiqa aqinau.
ACT 2:3 Uqimarufanoo idauru miqirafa qumureenoo raina rainamaki aiqamausa nikiaaqa aqufufaqa qafaqau.
ACT 2:4 Idauru miqirafa Yisuna ufa iri marusasaa aqufufanoo Anutuna naaquqara andeeqara maraquna naakufufaqa naundura qumbiqanoo marinau. Qumbiqafinoo Anutuna maraquna fannoo anoonaikufaqa moo maqannaa ufa nári sia irimaru ufausa qimariqau.
ACT 2:5 Mi fasannai Yuda maqannaasa kaaqa Anutunara rimarusa aanaamurunni daraaniqa mariusa oonurandee anireeqa Yeerusaree maqusai qoomaqa suqanarara qusimariqau.
ACT 2:6 Yeerusareenni suqimarusa ufai uqira ufa iriseeqa moomoosa Yisuna faiqi namu maruqoo suqiqa mariqau. Anaamurukiqari ani marusa Yisuna faiqi namu ufa iriseeqa akasaa qeeqa maqannaa ufa qidee qimasoofanoo naaquqanau.
ACT 2:7 Naaquqoofaqa randeeqa narí qimami narí qimami qiqau, Maa ufa qimaria fasiqausa Kariree maqannaasa kai maridaqa.
ACT 2:8 Misa maasa ufakiqari andeeqasee kai qida qiafaqa iridaqa. Naqi fee mandee maasa ufa iridee, sia maasa maqusai mariaasa maasa ufauqa qidaqa. Maasa moomoo maqa maaqaindari anunausa maridaqa.
ACT 2:9 Maasa akaqausa Paratia maqusaindari anunausa. Akaqausa Meedia maqa maaqaindari anunausa. Akaqausa Eeramma maqa maaqaindari anunausa. Akaqausa Meesoopootamia maqa maaqaindari anunausa. Akaqausa Yudeeaa maqa maaqaindari anunausa. Akaqausa Kapadoosia maqa maaqaindari anunausa. Akaqausa Poontiusa maqa maaqaindari anunausa. Akaqausa Asia maqa maaqaindari anunausa.
ACT 2:10 Akaqausa Firikia maqa maaqaindari anunausa. Akaqausa Pamafiria maqa maaqaindari anunausa. Akaqausa Isipa maqusaindari faqa, Ribia maqa maaqa Sireenee aaqa mariasakiqari faqa aniqa. Akaqausa Roomma maqusaindari anunausa.
ACT 2:11 Yuda maqannaasa faqa aanaamuru Yuda amaana ufa irimariasa faqa anunausa.Akaqausa Kareetee maqa maaqaindari anunausa. Akaqausa Arabia maqa maaqaindari aniqa. Maasa moomoo maqusaindari daadu daadu ufa qimarunausa ani maridaqa nári ufakiqari andeeqasee qiafaqa iridaqa. Misa Anutuna firaa ainaina auqunara qiafaqa iridaqa.
ACT 2:12 Misa aiqama naaquqeenoo naundura dapikufaqa narí qimami narí qimami qiqau. Maana nana oosanee kambiqaidanoo maaqidanoo fee. Maasa mina oosanara randaidaqa.
ACT 2:13 Akaqausa Yisuna faiqinamuara naakada qiqau. Maa fasiqausa nammari moomoo neeneesee furufarida fifau faafau aiqama maqannaa ufa qidaqa sia misa ufa iriaqa.
ACT 2:14 Peetooroofa mina iriseenoo Yisuna faiqi namusaimbaqa qisaukuqara taikasee qiku nooqu qaara marasee qirausasaimbaqa findifufanoo firaaqoo nammeera qimasee maaqi qimasee suqiqa marusa qimanniminau. Qini maqannaa Yuda maqannaasa innee aiqama Yeerusareenni ani mariasa qini ufa iriaqa. Qinee maqee qimannimianaqa amiqimandee iriaqa.
ACT 2:15 Maa fasiqausa sia nammarifau namasee furufaridau. Innee qafaaqa kananaana maridanoo suani maqee ururaidanoo. Minara sia amana nammarifau namaqaqee miqidafau ia.
ACT 2:16 Maa amiqira fuka ainainafa kambiqaina Anutuna tamummaqara fasiqa Yooeerafa ooqai akara rumaqoofa mina anoona doo maqee inni nifusaa kambiqeenoo. Yooeerafa maaqi qimasee ooqai akara rumaqoofa.
ACT 2:17 Anutufa qinau, Taikainna faasaana maa ainainna quqaanaura. Qinee qeeqa maraquna faiqí aiqamausa nifaaqai nammariara foora teeqimannimaqaanaura. Mi afeekanannai inni faiqinamu niraamuqmaaka naaru kambiqaaninna ainainara maqee qimasainanoo naaru kambiqaannoo. Inni kumaaraauqa faqa qaina anoona qaina qafeefaranoo. Faiqí asooqa nauraasa qaina misa nifunni areefaranoo.
ACT 2:18 Mi fasannai qinee Anutusa kaiqeesa ainainimariasa faiqí faqa aanaaseeuqa faqa nifaaqasaa qini maraquna adiama nimaqasaanaqa misa tamummaqeefaranoo.
ACT 2:19 Qinee mirinni innaarunai moo ainaina oosana oosana uqannifiqasaanaqa maqasaaqari qafeefaranoo. Maa maqanasaa moo naaquqara firaa ainaina auqusaanaqa qafamasee qini afeeka oosana qafeefaranoo. Fidika faqa ida faqa ida muna firaana faqa mariannoo.
ACT 2:20 Asukuna fannoo suani afu aruannoo. Fidika andandirafa quqoona ititaannoo. Karaambaiqa firaa kaaqa qara faasaana radiqisee qumuraannee qinna kamuqoo maa ainainnausa kambiqaannoo.
ACT 2:21 Mi fasannai yafa yafee Karaambaiqa auquara fifimasee aaree mariasa misa kai Karaambaiqa asumu mareefaranoo. Yooeerafa mi ufausa akara rumaqoofa maridanoo.
ACT 2:22 Peetooroofa Yooeerana ufa qimannimiseenoo maaqi qimasee aiqamausa suqiqa marusa qimanniminau. Innee Isaraee maqannaa fasiqauqa aiqama qini ufa iriaqa. Anutufa Yisuna Nasareetee maqannaana narí asauku mundirana inni nifusaa utaaqamaqoofa maridanoo. Anutufa dadaaqufanoo Yisufa faiqí inni qambaanai maridanoo inni nifusaa afeeka ainaina faqa naaquqara ainaina faqa uqannifiqara ainainauqa faqa auqusoofanoo minannai innee Yisunara innaarunaindaraa fee qiaqeera uqannifiqanau.
ACT 2:23 Anutufa faasai iriqaraasamaseenoo narí amaaku maqasaa mariasa nisaukuki quqasaanaqa misa mina arifaranoo fee qimaseenoo misa miqimmasee maaqimmasee aruaqee qimasee narí qimiriqoomau kai fuaqeera qimaseenoo inni nisaukuki Yisuna quqasoofaqa sia irirai mifa aamua qimaqoomau kai fidaqa mina mara maree kuqammariqau. Innee mina qumaree manda oosana maree maru fasiqausa nimisoofaqa misa qumareeqa aunirira saqarisaa pirimmannai arusoofanoo kuqinau.
ACT 2:24 Kuqufufanoo Anutufa sia minnisanau, kuqiranakinaana uqeera quqanau, kuqira aupuraranakinaana rakeemaseenoo uqeera quqanau. Kuqirana uriqararafa marunara kuqirafa sia amiqimasee amana kisaaqasaa qumaraannoo Dafidifa minara maaqi qimasee akara rumasoofanoo maridanoo. Karaambaiqa qini qifusaa faasaambaasaana marufaqa qafeemariqia. Mifa qini daaqa qini qisauku uqannai marinara sia qinee rufiaanaura.
ACT 2:26 Qinee minara irunanoo qini ufa asasirafa kai maridanoo qeeqa daunduraki asasirafa qumbiqanoo maridanoo. Qini qifaaqa faqa sia maparaa iannoo, Karaambaiqa afeesidanoo asasiannoo.
ACT 2:27 Anee sia qini qimana kuqiranaki minniqiseennara qifaaqa quqaidaqa sia maparaa ianaura. Aneenna naaquqara andeeqara fasiqa afaaqa madikaki akundamasainana anee qaoo qinanoo mina amaqi sia putaa iannoo.
ACT 2:28 Anee kaqi marira aana doo uqaqifiqeennaranoo. Anee qini faqa mariranannai qini daundurai asasirana qumbiqa qiminnaranoo.
ACT 2:29 Peetooroofa Dafidina ufa qimannimiseenoo maaqi qimasee narí qimanniminau. Oo qini qiqoonausa iriaqa. Dafidifa sia nariarau akara rinau, narí ati Yisunara akara rinau. Dafidifa maasa qikeeku qikaaku marifaqa minara innee amiqimasee iridaqa marianara qifaaqa quqasee amiqimasee maaqi qimasee qimannimianaura. Dafidifa kuqufufaqa akundaqau. Mina madika kaqi maridanoo maasa faqa.
ACT 2:30 Dafidifa Anutuna tamummaqara fasiqa marufa marinau. Anutufa maaqi qima afeekaikamandee qimaminau. Qinee Anutusa, anatikiqari kasooqaqee moo amiananoo Karaambaiqaikiannoo, ani aanna reenoo karaambaiqaikiannoo.
ACT 2:31 Dafidifa Anutufa kasooqaqee auquaninna ainainara iriseenoo narati asauku mundirafa kuqiranakiqari findifuaninnanara maaqi qimasee akara rinau. Anutufa sia suqirausa marianaki minninnisaannoo. Sia mina amaqi putaa iannoo.
ACT 2:32 Anutufa Dafidina ufamau maa Yisuna kuqiranakinaana findifumasaifaqa maasa maqee inni nifusaa kikiqimariasa mina qafeemarusa maridaqa.
ACT 2:33 Anutufa Yisuna uqeereeqeenoo narí aaqa asauku uqannai quqaseenoo narí naaquqara maraquna ooqai utaaqa amamaqoona Yisuna amifanoo mifa kafaa quandakinoo maasa adiama qimaqaifaqa maa maqee kambiqeemari ainaina innisaimbaqa qafaidaqa.
ACT 2:34 Dafidifa sia innaarunai ooru finau narí ati Yisufa ooru funara maaqi qimasee akara rinoo qinau. Anutufa qini Karaambaiqa qini atiara maaqi qimasee qimaminoo qinau.
ACT 2:35 Anee qini daaqa ooqu marifinaqa qinee ani namuqaa mareeqee ani aramandunnai quqasaanana anee rafaaqafusaa.
ACT 2:36 Minara innee aiqama Isaraee maqannaasa maa ainainnara aiqama amiqimasee iriaqeera qidaqa. Maa Yisuna innee aunirira saqarisaa aruna Anutufa mina kai mareeqeenoo Karaambaiqa asauku mundiranai kamandaifanoo maridanoo.
ACT 2:37 Miqoo suqufi mariasa aiqamausa mi ufana iriseeqa Oo maasa firaaqoo aaqeeqa qimasoofanoo naundura dapikufaqa Peetooroona faqa Yisuna faiqi namu faqa irammiriqa qiqau. Oo qiqoonausa naqi fee maasa ianauree.
ACT 2:38 Peetooroofa iriseenoo qimanniminoo qinau. Inni aiqamausa uqanna inneeqa mandainaina nimeesa uqusee Yisuna asauku mundiranaki keeqafiqa nammari rumannimaqaaqa. Miqi mandaifanoo Anutufa inni mandainainara minninnisaannoo narí naaquqara andeeqara maraquna inni nimiannoo. Sia feefauru qirafa kaqi nimirafa maridanoo.
ACT 2:39 Anutuna ooqai qima afeekaikamaqoonara narí maraquna inni faqa inni niku nisaukuara faqa aanaamuru mariasa faqa aiqama Anutufa naarainaqa aniannee qinausa faqa narí maraquna nimianauroo qinau.
ACT 2:40 Peetooroofa mi ufausa faqa ufa oosana oosana ufa faqa miqoo suqimarusa aaquqima nimaqaidanoo qimanniminau. Maa maqee mariasa mandoosanara narirara qumuannoo inni faqa naruani rufiasee Yisuna saqarikiaqa.
ACT 2:41 Miqi qimasoofaqa mi suaninasaakai faiqí anaasee moomoosa Peetooroona ufara kuqaa anoonee qimasee Yisunaindi kamambi nammari maraqau. Qaaramoo tauseenna fasiqa anaasee mi suaninasaa kai nammari marasee Yisuna faiqi namuki atooqaqau.
ACT 2:42 Miqoo miqimandee nammari maroosa Yisuna afaaqasaa indaaruqaa faiqi namu ufa maqee maqee irisee mi mau fimariqau. Misa maqee maqee Yisuna faiqi namu faqa moodaanaki kamambi maridaqa moodaa maqaki nariqa narana suqaqoona namaseeqa Yisuna aafaqa namaseeqa raudamaki firaa amaana maqaki keeqa fidaqa Anutunara innaaru qimariqau.
ACT 2:43 Yisuna afaaqasaa faiqi namu moo nuqu Yisufa niqiqoo fasiqausee qimariqau. Anutufa Yisufa niqiqoo fasiqausannai sia amana faiqí auqaaqaa ira ainaina naaquqara ainaina auqusoofaqa faiqí anaasee qafamasee Anutuna afeekara firaa ainainee qimaseeqa naaquqanau.
ACT 2:44 Yisuna ufa irimarusa aiqamausa faasaambaasaana moodaanaki marida aqoondikai mariqau. Misa miqidaqa nári qumiasana narí ami narí ami imariqau.
ACT 2:45 Misa maqa faqa nári ainaina oosana oosana faqa mootinai nimisee feefauru marasee nariki faiqí akaqausa ainaina siaisa marusa misa sarau imaru ainaina doo nimimariqau.
ACT 2:46 Faasaambaasaana Yeerusaree naaquqara amaana maqaki keeqafida innaaru qimariqau. Nári maaqakiaqa faqa maqee maqee suqufida narana neemariqau. Misa afaaramasee narana naida nimisee moodaanaki suqusee naidaqa Anutunara asasidaqa dufi dufi qidaqa aiqama faiqí anaasee amiqi amiqimannimaqaranara irisee asasimariqau. Maqee maqee faiqí anaasee akaqausa misa faqa Yisunara kuqaa anoonee qimariasa Anutufa qumee misa mareeqee ooqeenaasa faqa moodaanaki kamannimaqaidanoo.
ACT 3:1 Misa miqi marufanoo moo faasaana Peetooroosa Yoohaneesa Yeerusaree naaquqara amaana maqaki innaaru qirara ooru fiqau. Yeerusaree maqannaasa eeneemarufaqa amaana maqaki keeqafi innaaru qimariqau.
ACT 3:2 Peetooroosa Yoohaneesa eeneemaru innaaru qiraree qimasee kooqiki ooru keeqafi faiqí moo qafaqau. Ooqai maqasoonakiqari aiku mandaikirafa sia ainainirana amana marufaqa naratiuqa aindusumaraidaqa maqee maqee amaana maqa kooqiki quqasee marufanoo miqoo maridanoo munnimmara innaaru qimarufaqa akaqausa moodaa moodaa amimariqau. Qimudaoo qusa qaaraqanda amisoofanoo minannai naranaina feefaurumma neemarinau. Amaana maqa kooqiuqa moomoo marinau. Nuqufaqaa kooqiuqa mariqau. Mi fasiqana quqee maru kooqinara amiqira kooqi fee qimariqau.
ACT 3:3 Mi aiku mandaikirafa mi amiqira kooqinaki ooqu marifufanoo Peetooroosa Yoohaneesa minaki keeqafufanoo mi fasiqafa miqandara munnimmara qimiaqee qinau.
ACT 3:4 Innaaru qufaqa miqanda mi fasiqana ooriki qafamaseeqa Peetooroofa qinau. Anee maaqanda dooriki qiqafaa qufanoo mifa ainaina qimidaqiaafoo qimaseenoo miqanda nooriki nindafanau.
ACT 3:6 Nindafamasoofanoo Peetooroofa kafaa qimaminoo qinau. Sia qinee munnimma marisa maridaqa. Qinee moodaa ainaina marisa mina kai ani amianaura. Yisufa asauku mundirafa Nasareetee maqusaindaraafa qini qimuna mina ani amidaqa mina auqusaa ani qimamidaqa anee findimeeqee fua.
ACT 3:7 Peetooroofa miqi qidanoo mi fasiqana asauku uqannai asauku qumareenoo dadaaqufanoo aaqee uqanna mina aiku faqa mina aiku aummeena faqa afeekaikufanoo rutaqinoo findifumakufanoo oonuree aniree inau.
ACT 3:8 Miqimakufanoo Peetooroosa Yoohaneesa faqa amaana maqaki keeqaidanoo Anutunara susuqira idi raidanoo rafusaki rafusaki idanoo nidanoo keeqeemarinau.
ACT 3:9 Faiqí anaasee miqoo moomoosa mariusa mi fasiqana qafamaseeqa mina nirana faqa Anutunara susuqira idi rarana faqa qafamaseeqa qiqau, Oo amiqira kooqiki ooqufaaqee munnimmara innaaru qimari fasiqafa doo findifinoo amiqimasee nidanoo. Miqi qimasee tautufanoo naaquqoofaqa mina andeeqara oosanara randaqau.
ACT 3:11 Mi fasiqafa Yoohaneesa Peetooroosa firaaqoo dufi dufi qimaseenoo miqanda qumareenoo miqanda faqa maaqa tida atimau Sooroomoonaindi fee qimaru maqana atimau akaraqau. Faiqí anaasee moomoosa mina qafamasee sandeeqa oonu mi atimau rafusu uqarumasee mina qafeemarufanoo naaquqanau.
ACT 3:12 Peetooroofa moomoosa nindafamasee maaqi qimasee qimanniminau. Isaraee maqannaa fasiqauqa. Innee maa ainainna qafamasee nanaree tautiqa maasa tataqaidee. Innee maasara nariqa afeekannai fee nariqa andeeqaranannai fee maa fasiqana findifumaseeaafoo qidee. Oo sia uqanna.
ACT 3:13 Abarahaamana faqa Isakeena faqa Yakooboona faqa misa Anutufa maasa qikeeku qikaaku Anutufa maa fasiqana uqeereeqeenoo narí afaaqa areenarana narí ainainira faiqi Yisuna amifa maridanoo. Innee mina mareeqee maasa faiqí firaasa nimufaqa misa mareeqee Piratoona amufaqa innee miqoo aruaqee qiqau. Piratoofa idukiraree qufaqa innee afeekaikamasee aruaqee qiqau. Yisufa mifa aaduma amiqimandee andeeqarafa uqanna marufaqa innee faiqí narimarunara Piratoonara iduku qimiseenana Yisunara kaqi kuquanifee qusa. Innee miqi qimasee asumu marira oosana faqaana arusaqau. Anutufa mina kuqiranakinaana uqeera quqasoona maasa qafeemarunausa maridaqa. Maa Yisuna auqu afeeka fannoo kai maa fasiqana afeeka amifanoo findifinoo nidanoo. Innee maqee qafeemaria ainaina Yisuna auqu faqa narí auqusaa irirana rusiranannai faqa kambiqeenoo. Yisunasaa irirana rusiranannai maa fasiqana andeeqasaifanoo aiqamausa nifusaa findimeeqee nidanoo.
ACT 3:17 Qini qiqoonausa innee faqa inni faiqí firaasa faqa sia irirana iriqa Yisuna ariqau.
ACT 3:18 Ooqai uqanna Anutufa narí tamummaqara fasiqauqa ufannai narí asauku mundiranara kasooqaqee aupuraannoo fee qimaqoona doo inni nisaukuki quqasoofaqa mina ufa anoonaikiqa Yisuna ariqau.
ACT 3:19 Innee minara irisee inneeqa mandainainara nimeesuqusee Anutufinnai noori ubeekaifanoo inni mandainaina numoo rukannisainaqa innaarunaindaraa asooarana Karaambaiqa afusaaqaraana inni nimiannoo. Ooqai Anutufa inniara iriseenoo narí asauku mundirana Yisuna mareenoo kaifaa kasooqaqee innee iannai aqiqainanoo qumuannoo.
ACT 3:21 Mifa Yisufa asauku mundirafa kaqi innaarunai mariannoo. Kasooqaqee Anutufa aiqama ainaina fuka kambiqaaninna aukuannai mi kamuqoo Anutuna tamummaqara fasiqauqa ooqai qimaqoomau kai asauku mundirafa kafaa qumuannoo.
ACT 3:22 Ooqai Mooseefa maaqi qimasee qimaqoofa maridanoo. Karaambaiqa inni Anutufa inni tamummaqara fasiqa moo nimiannoo. Qini Mooseesa daanna reenoo innikiqari kai moo fannoo kambiqaannoo. Kambiqainaqa innee mina ufara eedoo kai qiaqa.
ACT 3:23 Innikiqari moo fannoo sia mi tamummaqara fasiqana ufa irifanoo faiqí aanaaseekinaana qumaree kaqinni quqasee miqoo kuqaruannoo. Peetooroofa Mooseena ufa miqi qimannimiseenoo nariara quandafinoo maaqi qinau.
ACT 3:24 Ooqai Anutuna tamummaqara fasiqauqa moomoo marufaqa naaru kambiqaaninna ainainara tamummaqasee akara riqau. Misakinaana moo tamummaqara fasiqa Samueerafa faqa marufanoo, narí faqa naraanaaqiana kambiqoosa faqa moodaa kari ufa qunannai maa maqee kambiqeemari ainainara kooroo inau.
ACT 3:25 Anutufa narí tamummaqaranauqannai maasa qikeeku qikaaku qima afeekaikirana oosana oosana nimiqoofa maridanoo. Sia misara kaifau quqanau. Maasa faqa naida qimidanoo. Anutufa maaqi qimaseenoo Abarahaamanasaa qima afeekaikinoo qinau. Ani aiku asauku misannai maa maqa maaqanaki maamaqanasaaqaraasa misannai amiqi amiqimannisaanaura.
ACT 3:26 Miqi qimasee Anutufa Abarahaamana faqa qimafeekaikunara irinoo narí ainainira faiqi Yisuna mara mareenoo inni maqanniminau. Aiqama maqasaaqaraasakina inniki naaree quqasee inneeqa mandainaina nimeesuquaqeera amiqi amiqirana faqa nimianifeera.
ACT 4:1 Peetooroosa Yoohaneesa faiqí anaasee miqi qimasee Sooroomoona tida atinni firaa amaana maqaki maruna qimannimimarufaqa amaana maqasaa aanaiqikirausa faqa amaana maqa poorisauqa faqa Sadikai amaana ufa irimarusa faqa anireeqa irimariqau.
ACT 4:2 Peetooroosa Yoohaneesa Yisufa kuqiranakiqari findifunara faqa faiqí anaasee faqa findififandinnanara faqa amiqimasee faiqí anaasee qimannimimarufaqa Yuda maqannaa rakisirausa aniree iriseeqa tautumaseeqa qiqau, faiqí anaasee Yisuna kuqiranakiqari findifunara iriseeqa maasa dari foora qimaseeqa aanoomasee Peetooroosa Yoohaneesa ruumbeeqee karabusa maqaki quqaqau. Eeneemarufaqa doo suani atisaa marufanoo duna ufa irianee qimasee mareeqee karafusaki quqaqau.
ACT 4:4 Faiqí anaasee moomoosa sia rakisirausa ufara eedoo qiqau. Peetooroona ufa iriseeqa moomoosa uqanna Yisunasaa irirana rusisoosa minasaa atooqaqau. Faifa tauseenna nukudara foora ira fasiqa anaasee mikari minasaa atooqaqau.
ACT 4:5 Faiqee iqaqoo kananaana Isaraee maqannaa faiqí uriqararausa faqa faiqí firaasa faqa Mooseena sandufa akoofasauqa faqa Yeerusaree maqusaki ufa suqimaru maqanaki suqimariqau.
ACT 4:6 Annasafa aanaiqikirausa uriqararafa faqa Kaiafasafa faqa Annasana aiku asauku faqa indaaruqaa Yoohaneena amarana faqa Areekasandeerafa faqa misa aiqama Yuda maqannaa faiqí firaasa faqa miqoo suqimariqau.
ACT 4:7 Misa miqanda Yisufa niqiqoo fasiqaqanda karafusakinaana mareeqee nári noorinni quqaqoofaqa aanoo imasee irammiridaqa qiqau. Inneeqara naqi mandaafanoo fee aiku mandaikirafa findifinoo fee. Nana afeekannai fee miqi fee, ya fasiqana ufa fee iri fee maaqi fee.
ACT 4:8 Peetooroofa naaquqara maraquna minaki qumbiqafunara findifinoo paasoosamandee maaqi qimasee misa qimanniminau. Oo maa fasiqausa faiqí firaasa faqa rakisirausa faqa qini ufa iriaqa.
ACT 4:9 Innee maasa aiku mandaikirana dadaaqi findifumasaunnanara innee minaree maasa iraidee.
ACT 4:10 Innee faqa Isaraee maqannaasa aiqama irifaqa mina oosana qimannimianaura. Maa fasiqafa kisaaqasaa aiku mandaikinoo marufa marifaqa maqee amiqirafa inni nifusaa kikiqinoo maridanoo. Yisufa Anutuna asauku mundirafa Nasareeteendaraa fasiqa innee aunirira saqarisaa pirimmannai arusoofanoo Anutufa mina kuqiranakinaana uqeera quqasoofa mina auqu afeekannai maa fasiqafa findifinoo maridanoo.
ACT 4:11 Tamummaqara fasiqa akara Yisunara maaqi qimasee akara rumaqoofa maridanoo. Innee maaqa usakeemarusa faakanara fidiaqaamasee tatu aqusoofa Narí kai sabeena afeeka faakana fannoo findifinoo rakiqanoo maridanoo. Tamummaqara fasiqa ufa miqimasee Yisunara akara rumaqoona innee sia irirai mi mau kai fidaqa mina arusoofanoo narí findifinoo maridanoo. (Mi aukuanna ooninnai kai usakee mariqau. Maasa sabeenannai maaqa usakee maruna marifaqa ooniara sabeena kikiqusidaqa.)
ACT 4:12 Innaarunai firana Yisuna moodaa naríara minannai kai innaarunai firafa maridanoo. Anutufa sia moo fasiqa maa maqanasaa quqaseenoo minannai innaarunai ooru fuaqee qinau. Sia uqanna, Yisufa kai.
ACT 4:13 Miqoo suqimarusa faiqí firaasa Peetooroosa Yoohaneesa ufa irisoofanoo naaquqoofaqa tautumaseeqa qiqau maaqanda sia sukuraki keeqeemaruqanda kaqi maruqanda maridaqa kaaqa paasoosamandee ufa qimariaqanda maridaqa Yisuna faqa nimariaqanda miqidammia maqi qiqau.
ACT 4:14 Faiqí aiku mandaikirafa miqoo Peetooroona faqa Yoohaneena faqa amiqimasee kikiqinoo marufaqa faiqí ufa qimarusa mina qafeeqa naqi fee qimasee qaoo qianau qimasee ufara randeemariqau.
ACT 4:15 Mi rakisirausa suqimarusa Peetooroosa Yoohaneesa niqiqamasoofaqa moosaa fufaqa nári miqoo maridaqa narinni narinni ufa qimariqau.
ACT 4:16 Misa maaqi qiqau, Maasa maa fasiqaqandara naqimasee fee miqandara qaoo qianauree. Yeerusaree maqusanaasa faqa aanaamuru misaki ani mariasa faqa aiqama maa moo ainaina firaa ainaina auqunara iridaqa maasa faqa sia amana mi ufanara qaoo qianaura akooqoo marifaqa.
ACT 4:17 Maasa miqanda sia kaqi idukuanauranoo aaquqimannimaqasee idukuanaura maasa miqanda naaramaseeqa qumeeraaqee qianaura maa ufana sia fifainianifeera qianaura maaqoo kai kaaqa taikaanifee qianaura.
ACT 4:18 Miqi qimasee misa Yoohaneesa Peetooroosa naaramaseeqa qaoo qiqau. Sia uqanna Yisuna auquara faqa mina ufara faqa sia kafaa kooroo qiaqa. Qumee uqanna raaqee qiqau.
ACT 4:19 Peetooroosa Yoohaneesa misa ufa iriseeqa qiqau. Innee inneeqa kai Anutuna afusaa andeeqara ainainara irimariasa mariafanoo. Maaqanda inni ufamau fee fuanauree mina ufamau fee fuanauree. Maasa inni ufamau sia fuanaura Anutuna ufamau fuanaura.
ACT 4:20 Maasa Yisunara qafee marunna ainainara daaqoo iri marunna ainainara naqi fee masee kukeeqaanauree sia kukeeqaaqaa ira ainaina maridanoo.
ACT 4:21 Miqi qimasoofaqa miqoo suqimaru rakisirausa afeekaikamandee qaoo qimasee idukiqu. Misa naqimandee miqanda nariraree, sia amana. Faiqí anaasee aiqama qafamaseeqa Anutunara asasidaqa idi reemariqau.
ACT 4:22 Mi moo ainainna auqaisoo fasiqafa aiku mandaikirafa sia kumaaraafau qaara fasiqa niku nisauku taikasee aukuana aiqaroofaqa andeeqaqau, faiqí firaana andeeqoonara asasidaqa minara idi reemariqau.
ACT 4:23 Misa miqanda idukusoofaqa Peetooroosa Yoohaneesa nári niqoondunnai Yisuna ufa irimarusa marunnai fidaqa faiqí firaasa faqa rakisirausa faqa misa qaoo qirufa oosana oosanara qimannimiqau.
ACT 4:24 Miqoo marusa irisee aiqamausa moodaanaki Anutunara asasamandee innaaru qiqa qiqau. Oo Karaambaiqa, Anee innaaruna faqa maqa faqa ooruku nammari faqa minaki mari ainaina oosana oosana faqa quqoonafa mariananoo. Anee aneenna naaquqara andeeqara maraqunannai aneenna ainainira faiqi Dafidinannai ani namuqaara qimannimiqoonnana Dafidifa ooqai minara maaqi qimasee akara rinau. Naqi fee qidee aanaamuru aanoo idee, Naqi fee qidee faiqí anaasee unnamaanna qidee, Maa maqanasaa karaambaiqauqa irirana deedaqidaqa. Rakisirausa suqufi Anutuna faqa narí asauku mundirana faqa kuridiraree qidaqa. Dafidifa miqi qimasee ani Anutuna namuqaara akara rinau.
ACT 4:27 Kuqaa maa maqusanai Yeerusareenni Eeroodeesa Piraatoosa aanaamuru faqa Isaraee maqannaa faqa suqufifaqa Anutufa ani aaduma amiqira ainainira faiqi ani asauku mundirana ariraree qiqau.
ACT 4:28 Anee ooqeenaana aneenna afeekannai aneenna iriranannai kambiqaaninnanara qunafa misa sia irirai anee qimaqoonna ufamau kai deedaqamandee ariqau.
ACT 4:29 Oo Karaambaiqa misa maasara sia faiqí anaasee aniara qimannimianee qia. Anee misa aaquqirufa maasa qimaqimimarifana anee faqa iriananoo. Anee maasa dadaaqinaqa maasa ani ainainira fasiqausa paasoosamandee Yisunara faiqí anaasee qimannimianaqa iriaqeera.
ACT 4:30 Oo Anutu aneenna asauku maasa qifaaqai quqaseenana aneenna naaquqara faiqi Yisuna auqunnai maasa naaquqara ainaina faqa faiqí aurinausa andeeqannisarana faqa auqusaanaqa qafamasee aniara anoonee qifaranoo.
ACT 4:31 Misa miqi qimasee innaaru qimasoofanoo misa maru maqafa faqa kasinau. Kasunakina Anutuna naaquqara maraquna fannoo miqoo marusa naunduraki qumbiqafunara paasoosamandee Anutuna ufa faiqí anaasee qimannimimariqau.
ACT 4:32 Yisuna ufa irimarusa moodaa iriranasaa moodaa naundurasaa mariqau. Sia moo fannoo moo ainainara qinindi fee qinau. Kaqi aiqama ainaina aiqamausaindi fee qinoo marinau.
ACT 4:33 Yisuna afaaqasaa aqoondi namu amiqimandee afeekaika uqannamandee Yisufa kuqiranakiqari findifuna aufakiana qimannimimariqau. Miqimarunara Anutufa dadaaqufaqa misa nariara nariara amiqi amiqidaqa afaarimarufaqa faiqí anaasee misara amiqimariasee qidaqa eedoo qimariqau.
ACT 4:34 Sia moo fannoo misaki narainaina sarauimarufa marinau. Faiqí akaqausa maqa fee maaqa fee moosa nimisee minasaa feefauru maraseeqa Yisufa niqiqoo fasiqausa nimufaqa misa miniseeqa raina rainamasee sarauimarusa nimana kai nimimariqau.
ACT 4:36 Miqi marufanoo faiqí moo auqu Yooseefaafa Yisuna akoona amarafa mifa ooqeenaa fasiqa Yakooboona amaaku Reefina nianasaaqaraa ati marinau. Mifa Sipurusa afumaki kambiqoofa marinau. Yisufa niqiqoo faiqi namusa mi fasiqanara moo auqu Baranabasi fee qimariqau. Mi auquna oosana faiqí anaasee pooduqara fasiqee qimariqau.
ACT 4:37 Baranabasifa narí maqa moona amiseenoo minasaa feefauru maraseenoo Yisufa niqiqoo fasiqausa nimufaqa misa narana mareemaria munnimmana siaisa qumaree rainasee nimiqau.
ACT 5:1 Yisuna ufa iri marusakiqari faiqí moo auqu Ananiasafa marinau. Mina anaaqa auqu Safiraa nammarifa marinau. Ananiasafa narí maqa moosa nimiseenoo feefauru minasaa maraseenoo naríara qumee dinni raina quqaseenoo dinni mareenoo Yisuna faiqi namu niqiqoosa nimida maaqi qimasee unna ufa qinau, aiqama munnimma nimidaqee qianau. Narí aanaaqandira moodaa ufa qimasee miqi qinau.
ACT 5:3 Anutufa dadaaqufanoo Peetooroofa faasai iriseenoo mi munnimmana qafamaseenoo qinau Ananiasa nanaree anee eedoo qiananoo fee Sadannafa ani amuqusa qumaraifanee unna ufa qidanee. Anee Anutuna naaquqara maraquna unna ufa qimamiananoo aneenna munnimma ati unna qimaseenana kukeeqasaannanara.
ACT 5:4 Mi maqafa anindi maruna nimunanoo kafaa mi munnimmafa anindi kai maridanoo. Anee aneennara munnimma ati rafaaqafinanoo amana andeeqanoo maridanoo. Aneenna aaqeenana anee unna ufa qimasee aiqama nimi fee qiannana, nanaree aneenna aunduraki mandainainara irinanee. Anee sia faiqifau unna ufa qimannimiananoofau. Anutuna unna ufa qimamiananoo.
ACT 5:5 Ananiasafa mi ufana irinoo doo miqookai tautumasee kuqinau. Moomoosa mi ufana iriqa kaaqa rufiaqau.
ACT 5:6 Kumaaraauqa mi maqanaki keeqafufaqa qamunannai Ananiasana iri kukuqamamaree mara maree maqaki akundaqau.
ACT 5:7 Kaqikaaqoo marinoo Ananiasana anaaqa Safiraa nammarifa Peetooroofa maru maqanaki urureenoo sia narí afaaqi kuqunara irinau.
ACT 5:8 Maaqaki ururoofanoo Peetooroofa iramaseenoo qinau. Kuqaa fee ani maqasaa munnimma ani afaaqi aiqamee qiminoo fee. Miqi qufanoo Safiraa nammarifa mifa faqa kai unna qinoo qinau eeoo aiqama uqanna inni niminoo.
ACT 5:9 Peetooroofa mina iriseenoo qinau. Naqaa fee ifanee aneenna afaaqi faqa moodaa ufa qimasee fee unna qimasee Anutuna maraquna amanidanee. Miqiannanara doo kumaaraauqa uru maridaqa. Ani afaaqi doo maqee kuqufifaqa doo muqu akundamaseeqa anee faqa maqee kuqinaqa miqoo mina aaqa akundeefara.
ACT 5:10 Miqi qimasoofanoo Safiraa nammarifa Peetooroona aikunni doo tautumasee kuqinau. Mi kumaaraasa miqoo urureeqa uru mina qafeeqa mara mareeqa narí afaaqi aaqa kai akundaqau.
ACT 5:11 Miqimasoofaqa Yisuna faiqi namu faqa akaqausa namufaqa minara iriufanoo kaaqa naaquqee marinau.
ACT 5:12 Yisuna afaaqasaa aqoondiuqa niqiqoo fasiqausa misa moomoo ainaina mookira mookira ainaina faiqí dadaaqira ainaina kai auqimarufaqa misa qafeemariqau. Yisuna ufa irimarusa moodaaqoo naaquqara amaana maqa aaqa Sooroomoona tida atinni maqee maqee innaaru qirara suqimariqau. Sooroomoona tida atinni kisaaqa marunara faiqí moomoo suqimariqau. (Sooroomoonafa ooqai kuqufinau. Yeerusaree amaana maqakina mina auqu quqaqoo tida atinni kaqi marufaqa minaki keeqafi qusimariqau.)
ACT 5:13 Yeerusaree maqusanaasa faiqí anaasee kaiqeesa Yisuna ufa irimarusara amiqirausee qimasaidaqa Yuda maqannaa uriqararausara rufiasaida maasa faqa dari maqi qimasee sia Yisuna ufa irimarusunnai misa maruqoo animariqau.
ACT 5:14 Faiqí faqa anaasee faqa moomoosa faasaambaasaana Yisunasaa irirana rusisoosa sia uriqararausara rufiaqau nifaaqa quqaseeqa niqiqoo fasiqausasaa atooqafi nimariqau.
ACT 5:15 Yisufa niqiqoo fasiqausa moomoo faiqí dadaaqira ainaina auqee marufaqa faiqí anaasee mina qafamasee nariqa maaqakiaqa faiqí aurusa faqa mandaikusa faqa dinee quqoosa faqa qaindusumaree aanasaa qaari qamunna ufiqiseeqa miqoo quqee mariqau. Miqimasoofanoo Peetooroofa aatata fimarufanoo mina amana fannoo misa mandaaqoofaqa aurirafa teeroo taikaani fee qimasee mini quqee mariqau. Peetooroofa moomoo andeeqannisaidanoo oonauqee anauqee maasaindi sia amanaikiandoora qimasee aanasaa quqee mariqau.
ACT 5:16 Faiqí anaasee Yeerusaree dinni dinni marufaqa nári auri marusa faqa fueenaiki marusa faqa nifiqaida niqiqoosa maruqoo quqasoofaqa aiqama uqanna idaaqamannisee mariqau.
ACT 5:17 Amaana maqasaa aanaiqikirafa uriqararafa Sadikai amaana ufa qimarufa narí aqoonausa faqa Yisufa niqiqoo fasiqausa auqu ainainara kaaqa rairaa qidaqa misa maaqi qiqau faiqí anaasee maasa minnisee misiannai atooqaidaqa. Sainaqa maasa misa rumbaanaura.
ACT 5:18 Miqi qimaseeqa misa Yisuna faiqi namu niqiqoo fasiqausa mareeqee karabusaki quqaqau.
ACT 5:19 Miqimasoofanoo eendakina Anutuna qangiroo moo fannoo qumureenoo ireeda karabusa kooqi atuaseenoo niqiqoo fasiqausa aiqama mareeqeenoo madaanai quqanau.
ACT 5:20 Quqaseenoo maaqi qimasee qimanniminau. Innee fafaa iqaqainaqa naaquqara firaa amaana maqaki keeqafi kikiqiaqa. Miqi mambiqa maa fuka mariranara Yisuna ufamau firanara faiqí anaasee naamuaqimannimiaqa.
ACT 5:21 Niqiqoo fasiqausa iriseeqa eedoo qimasee iqaqoofaqa amaana maqaki keeqafuafaqa faiqí anaasee Yisuna fasaasa qimannimiqau. Qimannimimarufanoo amaana maqasaa rakisirafa aanaiqiki marufa mifa faiqí firaasa kanasoorauqa faqa moomoo aiqama suqu quqaseenoo Yisuna faiqi namu karabusaki kaqi mariaa maqi qimasee amaana maqasaa rakisi maru poorisausa niqiqeenoo innee karabusakinaasa Yisuna faiqi namu niqiqoo fasiqauqa idukusee nifiqee uruaqa.
ACT 5:22 Poorisa karabusa maaqai ooquree randasee qafoofanoo sia mariqau. Ooqurandee kansoorauqa suqimarunaki keeqafinoo qimanniminau.
ACT 5:23 Maasa karafusa maaqaki ooquree amiqimasee qafaunanoo kooqi amiqimandee mundinoo mariinoo kooqiki maria poorisausa faqa kikiqiqa maridaqa rakisidaqa. Maasa kooqi atuasee qafaunanoo sia faiqí moo fannoo minaki maridanoo.
ACT 5:24 Amaana maqa poorisauqa rakisirafa faqa aanaiqiki marusa faqa mina iriseeqa misara oonu mafi iriseeqa randaqau.
ACT 5:25 Misa miqimasee randee marufanoo faiqí moo fannoo anireenoo qimanniminau. Innee iriaqa eenda karabusa maaqaki quqaasa misa amaana maqaki kikiqiqa maridaqa faiqí anaasee naamuaqira ufa qimannimidaqa.
ACT 5:26 Miqi qimasoofaqa poorisa rakisirafa narí poorisauqa faqa amaana maqaki oonuree oonu ireeda kai niqiqoo fasiqauqa amaana maqakinaana nifiqee aniqau. Aranaiqi oonu misa nifiqee anianaqa faiqí anaasee minaki marusa oonisamu ainnasamu qumaree darifoo qimasee ireeda kai oonu nifiqee aniqau.
ACT 5:27 Nifiqamaree mini suqimaru kansoorausa nifusaa kikiqamasaqau. Amaana maqasaa aanaiqiki marusa uriqararafa misa mara quqasee qimanniminau.
ACT 5:28 Maasa amiqimandee andeeqasee inni qimannimunaqa sia mi fasiqafa Yisufa kuqunara qimannimiaqee qunaqa doo innee maasa ufa rukiaseeqa aiqama qimannimiafaqa. Innee Yeerusaree maqannaasa aiqama qimannimisaafaqa misa aiqamausa quandakiqa mi fasiqana aruana akiaqara mina numoo maasaki quqararee qimariafaqa.
ACT 5:29 Peetooroofa mi ufana iriseenoo maaqi qimasee qimanniminau. Inni faiqí ufamau sia fuanaura. Maasa Anutuna ufamau kai fidaqa faiqí anaasee qimannimianaura.
ACT 5:30 Innee Yisuna aunirira saqarisaa pirimmannai kuqarusoofanoo maasa qikeeku qikaaku misa Anutufa mina kuqiranakinaana mara findifumasoofanoo maridanoo.
ACT 5:31 Anutufa miqooqaraana mareeqeenoo narí aaqa innaarunai quqasoofanoo maasa Isaraee maqannaa rakisirana faqa asumu mareemarina faqa maridanoo. Anutufa Isaraee maqannaara nári mandainainara nimeesuqusee rukaaqeera miqinau.
ACT 5:32 Anutuna ufa irisee mi mau fimariasa Anutufa narí naaquqara andeeqara maraquna kaqi misa nimidanoo. Mi naaquqara andeeqara maraqunna faqa maasa faqa Yisuna findifuna qafaafanausa maridaqa qimannimidaqa.
ACT 5:33 Ufa suqimarusa faiqí firaasa misa Peetooroona ufa iriseeqa firaa aanoommaseeqa naruaneera ufanoo misakiqari moo fannoo Mooseena sandufa akoofasa fasiqa mina auqu Kamarieerafa faiqí anaasee minara kaaqa irirana faqaa fee qimariqau. Mi fasiqafa ufa suqimarunakiqari findifinoo narirana qaoo qimaseenoo maasa nári kai ufa qianauree qimasee Yisuna faiqi namu niqiqoofaqa moosaa fiqau.
ACT 5:35 Misa fufanoo Kamarieerafa ufa suqimarusa maaqi qimasee qimanniminau. Isaraee maqannaa fasiqauqa innee iriaqa. Maa fasiqausa sia aaqee narirariaqa iriseeqa miqoo andeeqaaqa. Moomoo ufa rukiee mariasa maasaki mariusa marufaqa innee misa oosana irimarusa mariafanoo.
ACT 5:36 Ooqai faiqí moo auqu Teeudasafa mifa naríara firaasee qimasoofaqa 400 (maqi handareeta) fasiqa moomoo fasiqa minasaa atooqaqau. Rakiranaki mi fasiqafa taikoofaqa mina aiku asauku miqooqari daraanimambufanoo taikanau.
ACT 5:37 Miqooqari Roomma maqannaasa aiqamausa nuqu maroo aukuana faiqí moo auqu Yudasifa Yudasina amarafa Kariree maqannaafa mifa faiqí moomoo maraseenoo Roomma maqannaa kaamannara qikooqaifaqee qimasee misakinaana rakeeianauree qimaseenoo, rakiranaki kuqufaqa mina aiku asauku miqooqari daraanimambiqau.
ACT 5:38 Kafaa maqeera inni qimannimidaqa. Sia maa fasiqausa naruaqa. Saifaqa kaqi mariaqa. Misa ufa misa marirafa misa nirafa fifau faiqí ufa marinoo narí kai taikaani.
ACT 5:39 Anutuna ufa marinoo innisaimbaqa sia mina amana rafaaqa fuanaura. Innee Anutuna faqa rakifoora.
ACT 5:40 Misa aiqamausa Kamarieerana ufa iriseeqa mi maukaimbiqau. Misa Yisuna faiqi namu kafaa naaroofaqa aniroofaqa Yisuna aufakiana qimannimiranara qaoo qimasee unnaana samu moomoo kari nariiseeqa idukusoofaqa fiqau.
ACT 5:41 Yisufa niqiqoo fasiqausa nidafimarufaqa fidaqa sia noori runiqau asasammiqau. Misa Yisuna aruandeemasee maasa faqa daruafanoo Anutufa minannai maasa mareeqeenoo Yisuna amanakai mundusaifaqa minara maasa asasidaqa. Yisunasaara maasa daruafaqa asasidaqa.
ACT 5:42 Miqooqari Yisufa niqiqoo fasiqausa sia taikeeqa faasaambaasaana firaa amaana maqaki faqa maaqakiaqa faqa Yisuna asauku mundirana Yisuna aufakina amiqira fasaasa ufa suqusaida qimannimimariqau.
ACT 6:1 Miqooqari kaqikaaqoo kisaaqasaa maridaqa faiqí anaasee moomoo uqanna Yisuna ufasaa atooqaqau. Misakiqari Kirisa ufa qimaru Yuda maqannaasa faqa nári Yuda maqannaasa faqa tinoo taanoo rida mariqau. Niqiqoo fasiqausa maqee maqee munnimma rainasee sarauimarusa nimidaqa Kirisa ufa irimarusa nári adeedaana aanaaseeuqa sia andeeqasee munnimma nimunara ufa qiqau. Maqee maqee munnimma rainasee nimunnara ufa qiqau.
ACT 6:2 Qisaukuqara taikasee qikunni ooqu qaara marasee Yisufa niqiqoo fasiqausa ooqeenaasa Yisuna ufa irimarusa aiqama suqusee qimannimiqa qiqau. Maasa Anutuna ufa qimannimira saika minnisee quandaki munnimma raina nimira saika mararafa sia andeeqanoo mariannoo.
ACT 6:3 Oo maasa qiqoonausa inniki qisauku dinni taikasee dinni ani qaara marasee fasiqara randaaqa. Irirana faqaasa, andeeqara fasiqausa Anutuna naaquqara maraquna qumbiqarausa kai mara mini qimifaqa maasa munnimma rainara saika misasaa quqaanaura.
ACT 6:4 Maasa qeeqa Anutuna ufa nimirana faqa innaaru qirana faqa mi moodaa saikana maasaindi mariannoo.
ACT 6:5 Aiqamausa mi ufana iriseeqa amiqira fee qimaseeqa nári rusandeesamumandeeqa qisauku dinni taikasee dinni qaara marasee fasiqa quqasaqau. Misa nuqu moo fasiqa auqu Sateefeenafa firaaqoo Yisunasaa irirana rusimari fasiqafa naaquqara andeeqara maraquna qumbiqarafa marufa marinau. Moo fasiqa auqu Firipafa, moo fasiqa auqu Parookoorusafa, moo fasiqa auqu Nikanoorafa, moo fasiqa auqu Timoonafa moo fasiqa auqu Parameenasafa moo fasiqa auqu Nikoorausifa Antiooka maqusaindaraafa aanaamuru fasiqa misaki animarufa marinau.
ACT 6:6 Miqimandee fasiqa namu maree mini niqiqoo fasiqausa naaqa mini quqasoofaqa misa innaaru qimasee nisauku nikiaaqa quqaseeqa nifaaqooqa qimasoofaqa nariqa saika munnimma rainee maru saikanai fufaqa niqiqoo fasiqausa nári saika Anutuna ufa qimannimira saikai fiqau.
ACT 6:7 Miqimandoofanoo doo Anutuna ufa aiqamai daraaninau. Yeerusaree maqusai Anutuna ufa irimarusa moomoo kamambiqa fimariqau. Amaana maqasaa aanaiqikirausa faqa moomoo Yisuna ufara kuqaa anoonee qimasee minasaa atooqee mariqau.
ACT 6:8 Sateefeenafa naaquqara andeeqara maraquna fannoo minaki qumbiqafunara Anutufa firaaqoo dadaaqufanoo faiqí aanaaseeki oosana oosana amiqimannimaqara ainaina naaquqee maru ainaina faiqí aanaaseeki auqee marufaqa qafeemariqau.
ACT 6:9 Yuda maqannaasa Yeerusaree maqusaki akaqausa aaduma sukuraki keeqeemariasa náriara maasa aufadara irirana faqaasee qimariqau. Misa akaqausa Yuda maqannaasa Sireenee maqa maaqaindari mi sukuranaki keeqeemariqau akaqausa Areekasandiria maqusaindari ani keeqeemariqau. Akaqa Yuda maqannaasa kaiqeesa Sirisia maqusaindari anusa faqa akaqausa Asia maqannaindari anusa faqa moodaaqoo suqufufaqa Sateefeenana ufara qaoo qimasee ufa rainee mariqau.
ACT 6:10 Anutuna maraquna fannoo Sateefeenana ufa irira dadaaqunara sia mina ufa rafaaqafirana amana.
ACT 6:11 Mi aufadara irira fasiqausa mina qafamaseeqa minafasaasa qimaseeqa qumee firaa munnimma auqusee ummuarira fasiqausa nimiqa qiqau. Sateefeenara innee unna ufa oosana oosana uqeeraaqa qufaqa misa Sateefeenana unna qimasee maaqi qiqau. Mifa Mooseena sandufara faqa Anutuna ufara faqa qaoo qidaqa qifaqa maasa iridaqa.
ACT 6:12 Miqunara faiqí anaasee faqa faiqí firaasa faqa Mooseena sandufa irimarusa faqa niranaqoofaqa aanoomasee Sateefeena oonu qumareeqa amaana maqa rakisirausa ufa suqimarunakina mini quqaqau.
ACT 6:13 Quqasoofaqa unna ufa qimaru fasiqausa nifiqee aniroofaqa maaqi qimasee Sateefeenara unna qiqau. Maa fasiqafa maasa naaquqara amaana maqara faqa Mooseena sandufara faqa maqee maqee manda ufa qimarifa maridanoo.
ACT 6:14 Mifa maaqi qufaqa maasa iriafanafa maridanoo. Mifa maaqi qinau. Maa Yisufa Nasareetee maqusaindaraafa maa amaana maqana rapeepaamma aqusee Mooseena sandufa oosana oosana maasa qimu ufana mareeqee aadumai quqasainaqa maasa moomau fuanoo qidaqa.
ACT 6:15 Aiqamausa suqiqamarunakiqari noori Sateefeena funnai kai ubeekamafi qafaqau. Mina oori aiki qangiroo ooriara foora kaaqa qeemarufaqa qafaqau.
ACT 7:1 Amaana maqasaa aanaiqikirafa uriqararafa Sateefeena irammamaqeenoo qinau. Maa ufana kuqaa anoonee qidaqia.
ACT 7:2 Sateefeenafa misa aiqamausa qimanniminoo qinau. Oo qini qikausa qifasausa qini ufa iriaqa. Ooqai Abarahaamafa sia Qarana maqa maaqai oorufunaki kaqi Meesoopootamia maqusai marufanoo Anutufa kooroomambinoo qimaminau. Aneenna aiku asauku faqa aneenna maqa maaqa faqa minniseenana qinee aamua qianna maqanasaa fua.
ACT 7:4 Abarahaamafa mina iriseenoo eedoo qimasee Karadeea maqa maaqa minniseenoo Qarana maqusai oorureenoo miqoo marinau. Abarahaamana akoofa miqoo kuqufufanoo Anutufa qufanoo Abarahaamafa maa maasa marunna maqa maaqanaki Yuda maqa maaqai aninau.
ACT 7:5 Anutufa mi aukuanna sia maa maqa maaqana aminau. Sia kaqikaaqoo faqa aminau. Kaqi kasooqaqee qima afeekaikamasee ani faqa ani aiku asauku ani atiuqa nimianauree qinau. Qima afeekaikira aukuana Abarahaamana faiqi siaifa marufanoo mina aiku asaukuara qimaminau.
ACT 7:6 Anutufa maaqi qimasee qimaminau. Ani aiku asauku aanaamuru maqusai karafusaki marifaranoo, (400) maqi handareeta aukuana kisaaqa aukuana karafusaki marifaranoo. Mi anaamurusa firaa ummaara manda saika ani aiku asauku nimimarifaranoo.
ACT 7:7 Miqi marifaqa qinee Anutusa mi anaamurusa naruanauree qinau. Naruseeqa ani aiku asauku Isaraee maqannaasa nifieeqee maa maqa maaqanaki quqasaanaqa maridaqa maa maqa maaqanakiqari Isaraee maqa maaqakiqari qini Anutusa qimooqifaranoo.
ACT 7:8 Miqooqari Anutufa nári fainanduqira oosana Abarahaamana uqafiqanau. Abarahaamafa minara irisooqoo Isakeena anoofa maqasoofanoo dinni qisauku taikasee dinni ani qaaramoo marasee faasaana aiqaroofanoo mina akoofa mina fainanduqinau. Isakeefa faiqí kamafinoo Yakooboona maqaseenoo doo mina faqa fainanduqinau. Yakooboofa faiqí kamambinoo qisaukuqara taikasee qiku qaaraqanda ooqu maraseenoo faiqi namu maasa qikeeku maqaseenoo misa faqa fainanduqu nimaqanau.
ACT 7:9 Yakooboona faiqi namu nári nikaqa Yooseefaanara rairai qimamaqasee qumaraseeqa ruumbeeqeeqa Midianna maqannaa nimiseeqa feefauru munnimma marasoofaqa Midianna maqannaasa afiqamaree Isipi maqannaasa munnimmara muqu nimiqau. Miqoo Yooseefaafa karafusaki marufanoo Anutufa dadaaqunara aiqama kadaapirirana oosana oosanaki fidanoo andeeqasee fimarinau. Yooseefaafa Isipa maqannaa karaambaiqa Faraoona oorisaa kikiqamafuafanoo Anutufa Yooseefaana irirana faqa mina afaaqa oori faqa amiqirana aminau. Faraoofa Yooseefaanara andeeqara fasiqee qimasee mareeqeenoo narí maqa maaqa faqa Isipa maqa maaqa aiqama faqa narí aiqama ainainasaa minauqasaa Yooseefaanara anee rakisiannee qinau.
ACT 7:11 Miqoo aandaroo firaafa Isipa maqannaasa faqa Kannaana maqannaasa moo auqu Isaraee maqannaasa faqa narinau. Maasa qikeeku qikaaku naranara randee mariqau.
ACT 7:12 Isipa maqusai sakuma moomoo marufanoo Yakooboofa Yooseefaana akoofa Yooseefaanara sia uqanna irirai naranara kai iriseenoo narí faiqi namu maasa qikeeku qikaaku niqiqoofaqa indaaru ooquree sakuma maraseeqa nári nikaqa Yooseefaana qafamasee sia mina ooriara iriqau.
ACT 7:13 Innaaqianna ooqu fu kari Yooseefaafa narí afasausanamuara nariara kooroomanniminau. Miqimasoofanoo Faraoofa faqa Yooseefaana aiku asaukuara miqoo irinau.
ACT 7:14 Isipa maqusaindari Yooseefaafa narí akoofa Kannaana maqa maaqaki maruna ufa quqasoofanoo aiqamausa Isipa maqusai ooqu fiqau. Qaaramoo fasiqa niku nisauku taikasee moo fasiqa qisaukuqara taikasee moodaanai qiku ooqu marasee fasiqa anaasee Isipa maqusai ooqu fiqau.
ACT 7:15 Yakooboofa Isipa maqusai ooqu marinoo kaqikaaqoo marikinoo kuqinau. Mina faiqi namu maasa qikeeku qikaaku miqoo mari maree fiqa kuqiqau.
ACT 7:16 Misa kuqufiqa niqoonausa misa iri mara mareeqa nári maqa maaqa Kannaana maqa maaqai Seekeemma maqusa aaqa nikundee mariqau. Ooqai Abarahaamafa munnimmannai Qamoorana aiku asauku feefauru amiqoonaki mi maqa maaqanaki misa iri nikundee mariqau Sateefeenafa kaqi ufa suqunakiaqa ufa qimanniminoo ninau.
ACT 7:17 Anutufa ooqai Abarahaamana Kannaana maqa amiraree qimasee qima afeekaikamasoofanoo doo mina aiku asauku amira aukuana adeedi roofanoo maasa qikeeku qikaaku Isipa maqasaa moomoo kamambiqa fimariqau.
ACT 7:18 Misa miqiqa maridaqa moomoo marufanoo Isipa maqannaa karaambaiqa moo kambiqanau. Mifa Yooseefaafa aandaroo aukuana Isipa maqannaasa firaaqoo dadaaqi marunara sia irimarufanoo Isipa maqannaa karaambaiqa kambiqanau.
ACT 7:19 Mi fuka karaambaiqafa minauqu Faraoofa maasa qikeeku qikaaku nikaru qimasee firaaqoo mandaikamannimaqee marinau. Mi karaambaiqafa qufaqa maasa qikeeku qikaaku nári faiqi aanaaqi maqasee maaqakiqari aqusee marufaqa kuqi mariqau.
ACT 7:20 Miqimaru aukuana Mooseefa kambiqanau. Mifa faiqi aanaaqi amiqirafa kambiqanau. Mina anaukoo qaaramoo quqoonasaa narí maaqaki rakisiisee kaqinni andandai quqasoofanoo Faraoona araamuna paqurimasee nariara maraseenoo narí amaakuara foora f irinau.
ACT 7:22 Firimarufaqa Isipa maqannaasa irirana aiqama qimamisoofanoo irinoo innooqafinoo irirana faqaafa maridanoo aiqama ainaina oosana oosana uqeeree marufa maridanoo afeeka ufa qimarufa marinau.
ACT 7:23 Mooseefa qaara fasiqa niku nisauku aukuana maraseenoo faiqí firaafaikamafinoo narí maqannaa Isaraee maqannaa miqoo Isipa maqannaa karabusaki marusa niqafaanee qimasee finau.
ACT 7:24 Misaki nidanoo nindafoofanoo Isipa maqannaa moo fannoo Isaraee maqannaa narí aqoonnana mandaikamma maqoofanoo Mooseefa narí maqannaana dadaaqianee qimasee mi Isipa maqannaa fasiqana kuqammarinau.
ACT 7:25 Isaraee maqannaasa qini qiqafamaseeqa oo Anutufa maa fasiqanannai maasa maqee Isipa maqannaa karabusaki mariasa idukuannoo fee qimasee qini Mooseesara nidianifeera. Sia Isaraee maqannaa mina iriqau. Mana manammimariqau.
ACT 7:26 Faiqee iqaqoofanoo kananaana Mooseefa narí maqannaa Isaraee maqannaa nindafaida qafoofanoo Isaraee maqannaa qaaraqanda moodaa maqannaaqanda rakimariqau. Rakimarufanoo Mooseefa soodaa qianee qimaseenoo qinau. Inneeqara moodaa maqannaa mariafanoo nanaree rakidee.
ACT 7:27 Isaraee maqannaa narí aqoonnana arimarufa Mooseena afeeqaseenoo aqinoo qinau. Yafee aniara maasa karaambaiqa ufa irimari fee qinoo fee. Eenda anee Isipa maqannaa kuqaruanafa miqi kai inana qini faqa darinnaree.
ACT 7:29 Mooseefa mi ufana iriseenoo doo kooroo qinoo maridanoo Faraoofa mina akiaqara qini faqa daruandoo qimasee rufiasee quqasee sandeenoo Midianna maqa maaqai nianai oonu kisaaqasaa marikinoo anaasee marasee qaara faiqi maqanau.
ACT 7:30 Miqoo oonu maridanoo qaara fasiqa niku nisauku taikasee aukuana moomoo aukuana aiqaroofanoo Mooseefa faiqí firaafa marufanoo Anutuna qangiroo moo fannoo qumee sasamimiki idaqee marunakiqari ufa kai Mooseena qimamufanoo irinau. Sinai aaqana aaqa aadana maqa maaqai qee marinau.
ACT 7:31 Mooseefa tautumasee mi idauruna qafanau. Aaqa oonuroofanoo idaurukiqari Anutufa ufa moo qimaminoo qinau.
ACT 7:32 Oo Moosee qinee ani aanaakuna asaifaqana Abarahaamafa faqa Isakeefa faqa Yakooboofa faqa misa Anutusa maridaqa. Mooseefa Anutuna ufa iriseenoo aindiri aindiri ufanoo qafarara faqa eeraira eerairinau. Miqi marufanoo Anutufa kafaa qimaminoo qinau.
ACT 7:33 Aneenna aiku aanaamu uturuqu quqaa. Maa maqafa naaquqara maqa maaqa maridanoo. Ani aiku aanaamu maa maqana putaaidanoo.
ACT 7:34 Anee qini Anutusa ufa iria. Qinee qini faiqi namu Isarae maqannaasa Isipa maqasaa mariasa misa mandainainaki mariana faqa misa aupurarana faqa qafamasee misa qikiraqarana iriseeqa qumu misa nifiqaannanara irisee ani qimamidaqa. Doo findifi fua ani aqiqaidaqa Isipa maqusai kafaannai fua.
ACT 7:35 Sateefeenafa kaqi suqunakiaqa ufa qimanniminoo nidanoo qinau. Isaraee maqannaasa narí maqannaara Mooseenara akooqoofanoo nianai afeeqaqidaqa qiqau. Yafee aniara maasa Karaambaiqa ufa irimari fee qinoo fee qiqau. Anutufa narí qangiroo sasamimiki ida qeemaruna aqiqoofanoo mi Mooseena dadaaqufanoo narí maqannaasa Isipa maqannaa nisaukukiqari rafia qumaraseenoo moo maqasaa rakisinnimaqee marinau.
ACT 7:36 Mifa narí maqannaa Isipa maqa maaqakinaana amiqimasee nifiqeeqeenoo Sinai aadana maqa maaqaki finau. Nifiqee fidanoo Isipa maqa maaqaki faqa Taatuqee nammariki faqa aadana maqa maaqasaa faqa moo kamaakira oosana oosana ainaina uqannifiqanoo fimarinau. Qaara fasiqa niku nisauku taikasee aukuana kisaaqasaa miqimminoo fimarinau.
ACT 7:37 Maa Mooseefa Anutuna tamummaqara fasiqa kasooqaqee kambiqaaninnanara maaqi qinoo qimanniminau. Anutufa narí tamummaqara fasiqa moo inni nimiannoo. Mifa qinee Mooseesara foora inniqakiqari kambiqafi mariannoo, inni dadaaqiannoo.
ACT 7:38 Maa fasiqafa Mooseefa aadana maqa maaqaki Isaraee maqannaasa oobiqasee fimarunaki Mooseefa misa saimbaqa fimarinau. Misa Sinai aaqana aaqa marufanoo misa faqa nimarinau. Qangiroo fannoo Mooseena faqa aaqanasaa ufa qimarinau. Mooseefa kai Anutuna naaru marira ufa iriseenoo maasa qimaqimimarinau.
ACT 7:39 Maasa qikeeku qikaaku Mooseena ufa sia iriqa ruki aquseeqa Mooseena mafi aqusee kafaa Isipa maqasaa fuaneera qimariqau.
ACT 7:40 Mooseefa Sinai aaqanasaa ooru marufaqa misa Mooseena afasaana Aaroona aaramaseeqa qiqau. Mi fasiqafa Mooseefa maasa qifiqee anifa yai fee finoo fee. Anee Anutuna fooqaaira ainaina auqusainanoo mifa maasa indaaru fida aana uqannifiqaina fua.
ACT 7:41 Aaroonafa misa ufa iriseenoo mi fasannai kai burimakau aanaaqi koorannai auqusoofaqa minara maasa Anutu fee qimasee innaaru qimasee qoomaqamasee tatufirana suqamisee nári nisaukunnoo auquqoonara asasamasee qoomaqa sakasee naqau.
ACT 7:42 Anutufa mi manda oosanna qafeenoo misa marunnai ameesa uquseenoo qinau. Saina misa innaarunaindaraa fifau fasau ainara innaaru qiaqee qimasee mininnisanau. Miqi qimasoofanoo tamummaqara fasiqa ufa kooroo inau. Tamummaqara fasiqa maaqi qimasee akara rinau. Oo Isaraee maqannaasa Innee qaara fasiqa niku nisauku taikasee aukuana kisaaqasaa aadana maqasaa niniunara sia qiniarau innaaru qiqau. Unna innaaru qimariqau. Sia qiniarau tatufira aandau suqaqau.
ACT 7:43 Sia innee qini naaquqara uqiqaana maqa maree fimarunara irimariafanoo. Innee moo unna anutuna minauqu Moorookanara unna qimasee irimaree fidaqa unna qimasee qini kikiqa usimariafanoo. Innee inneeqa moo unna Anutuna minauqu Reefanna fee qimariafanoo. Mina fasau innaarunai maridanoo mina amana inneeqa nisaukunnoo auqufa maqasaa mari Reefanafa marifaqa innee minara innaaru qimariafanoo. Miqiana akiaqara qinee Anutusa doo inni futeeqeeqee Babiroonia maqa maaqa meemai misa nisaukuki quqaanaura. Tamummaqara fasiqa ufa miqi qinoo maruna mina kooroo qinau.
ACT 7:44 Sateefeenafa ufa suqunaki kai qimanniminoo ninau. Ooqai maasa qikeeku qikaaku aadana maqasaa nidaqa Anutuna sandufa qimannimira uqiqaana maqa misaki marinau. Mi uqiqaana maqafa Anutufa Mooseena qimamundee kai mi uqiqaana maqana usakee mariqau.
ACT 7:45 Mina maariqoo aukuana maasa qikeeku qikaaku taikafufaqa misa faiqi namu findifufaqa mi uqiqaana maqana kaqi maraqa nimariqau. Anutufa Yoosuana dadaaqufanoo Isaraee maqannaa maasa qikeeku qikaaku faqa mi uqiqaana maqana faqa mareeqee Kannaana maqa maaqai ooqureeqa naru nifaqaseeqa nári uqiqaana maqa miqoo usakaqau. Miqoo marikinoo Dafidifa kambiqafinoo karaambaiqaikinau.
ACT 7:46 Anutufa Dafidina andeeqara oosana qafamaseenoo minara rufanoo Dafidifa Anutunara irammirinoo qinau. Oo Yakooboona Anutu, ani maaqa uqiqaana maqa kai maridanoo. Amanee qinee ani afeeka maaqa usakaqaananee minaki marinnaree.
ACT 7:47 Anutufa sia Dafidinara qinau. Mina amaaku Sooroomoonara qufanoo mifa afeeka maqa usakanau.
ACT 7:48 Innee aiqama iriaqa firaaqoo uqanna uriqarara Anutufa maridanoo. Sia amana faiqí nisaukunnoo usakara maqaki amana mariannoo. Tamummaqara fasiqa Anutuna ufa minara maaqi qimaqoofa maridanoo fee qinau.
ACT 7:49 Innaarunai qini maaqa maridanoo qinee rakisinnimaqara maqusa maridanoo. Maqasaa innee mariafa qini qiku reemarunafa kaqikaa ainaina fifau ainaina maridanoo. Innee nana maqee qiniara usakeefaree. Qini qimana idooara maqusa yai fee maridanoo fee.
ACT 7:50 Aiqama maaqa auqimaria ainaina qeeqa kai auquafanausa maridaqa.
ACT 7:51 Sateefeenafa tamummaqara fasiqa ufa qimannimiseenoo niqidanoo qinau. Innee maaqoo suqimariasa qini ufa iriaqa. Innee aamina fasiqa miqirausa mariafanoo ooni mariafanoo naaqoo aunirausa sia Anutuna ufa irimariafanoo. Inneeqa nikeeku nikaaku ninaakusa miqirausa mariafanoo Anutuna maraquna fannoo inniki anirarimarifaqa inneeqa qaoo qimariasa mariafanoo.
ACT 7:52 Inni nikeeku naaku sia moodaa tamummaqara fasiqa sia mandaikamannimaqanau. Aiqama mandaikamannimaqee mariqau. Ooqai Anutuna andeeqara ainainira faiqi Yisunara kooroo imaru tamummaqara fasiqauqa faqa nárí mariqau. Doo maqee faqa innee mina uqanna ueeqasee kuqa nárí mariasa mariafanoo.
ACT 7:53 Innee Anutuna sandufa qangiroo asaukukinaana maree mariasa sia minara irimariafanoo kaqirunna fimariafanoo.
ACT 7:54 Miqi qimasoofaqa faiqí suqimarusa mina Sateefeena ufa irufanoo minara niranaqeenoo nifai sandurinau.
ACT 7:55 Anutuna naaquqara andeeqara maraquna Sateefeena aaku funara oori uqeeraseenoo qafoofanoo innaaruna rakeeufanoo Anutuna kaaqa qarana afaaqa areenarana akooqoo marufanoo qafanau. Yisufa Anutuna aaqa mina asauku uqannai kiqiqinoo marufanoo qafanau.
ACT 7:56 Sateefeenafa qafaidanoo naaramaseenoo qinau. Innee qafaaqa innaaruna rakeemambifaqa faiqí nimaaku Anutuna aaqa asauku uqannai kiqiqinoo marifaqa qafaidaqa.
ACT 7:57 Misa miqoo marusa aiqamausa mina iriseeqa irianoo qimasee firaakari faaqa rumaseeqa nisauku naaqoo aamara upeekaseeqa aiqamausa findimeeqee sandeeqa Sateefeena qumareeqa rarisamammareeqa mina rafusu qumaree aqoosai aqiqau. Aqoosai aquseeqa faasai kootaki Sateefeenara unna qimarusa misa kai oonisamu oonu qumaree ani qumaree ufaqa mi samuna mina arimariqau. Misa nári siuta qamunna nisauku rakisi qumaraandoo qimaseeqa raipaqueeqee moo kumaaraa Sauroona aikusaa aqusee Sateefeena arimariqau.
ACT 7:59 Misa oonisamu arimarufanoo Sateefeenafa karaambaiqara innaaru qimasee faaqa ridanoo qinau. Oo Karaambaiqa Yisufa qinee kuquanana anee qini qimana qumare̱eqee aneenna marianannai quqaa.
ACT 7:60 Miqi qimaseenoo Sateefeenafa aqoorisaa oorindari kummaramafufanoo firaa kari faaqa quqeenoo qinau. Oo karaambaiqa misa mandainaina qimiana sia misaki mi numoofa mariani, anee aunusaa. Doo miqi qidanoo kuqinau. Sauroofa misa qamunnasaa qummuarifoora rakisidanoo Sateefeena arunara eedoo qimasee marinau.
ACT 8:1 Mi faasaanna kai oosana araseenoo Yeerusaree maqusaki amaanasaa rakisimarusa uriqararausa Yisuna ufa irimarusaki narunnifaqaairana uqeeraqau. Yisuna afaaqasaa aqoondiuqa qisaukuqara taikasee qikunni ooqu qaara mararausara niqiqoo fasiqausee qimariqau. Miqimandee fasiqa Yeerusareenni kaqi mariqau. Kaiqeesa moomoosa rufiasee miqooqari daraaniqau. Akaqausa Yudeeaa maqa maaqai fiqa akaqausa Samaria maqa maaqai sandaqau.
ACT 8:2 Anutunara irimarusa andeeqarausa akaqausa Sateefeena iri ani mareeqa munu akundamaseeqa firaaqoo uqanna ikiraqaseeqa soofaari mariqau.
ACT 8:3 Miqooqari Sauroofa oosana areenoo Yisuna ufa taikaani fee qimaseenoo Yisuna ufa irimarusa narirara aanoommasee manda ufa qidanoo rairai qimarinau. Miqidanoo maqusasaa oorureenoo aiqama maaqakiaqa keeqafidanoo Yisuna ufasaara nariraramasaidanoo nisauku qumaraidanoo maqamau rarisaidanoo munu karafusa maaqaki quqeemarinau. Sia faiqí kai anaasee faqa qumaree rarisameeqaidanoo karafusa maqaki quqeemarinau.
ACT 8:4 Miqufaqa Yisuna ufa irimarusa mina irisee miqooqari quqasee moo maqusa moo maqusa daraaniqa mariqau. Miqunnai fidaqa Yisuna aufakiana qimannimimariqau.
ACT 8:5 Firipifa Yeerusaree maqusaindari sandoonaindari aanaamuru maqannaasaki ooqu finoo Samaria maqannaasa firaa maqusai ooqureenoo Anutuna asauku mundira fasiqara Yisunara qimanniminau.
ACT 8:6 Samaria maqannaasa moomoosa Firipina ufa andeeqasee iriqau. Mifa moo ainaina faiqí dadaaqimari ainaina auqamasoofaqa mina qafamaseeqa amiqimmasee mina ufa irimariqau.
ACT 8:7 Firipifa qufanoo afaannauqa faiqí naunduraki marusauqa faaqarumasee rafudamaki sandee mariqau. Kaqi niku nisauku uqiranauqa faqa ariruti marusa faqa andeeqannisee marinau.
ACT 8:8 Miqimmasoofaqa Samaria maqannaasa firaaqoo asasimariqau.
ACT 8:9 Mi maqusaanaana auqu moo Simoona amarafa mifa Samaria maqannaafa marinau. Mifa afunee ainaina faqaa fasiqa marinau. Moomoo aukuana afuneennai narí maqannaasa uqannifiqasoofaqa misa mina qafamasoofanoo naaquqee marinau. Simoonafa miqimarunara nariara uriqararausee qimasoofaqa aiqama tia uqanna minara kuqaa irirana faqaa fee qimasee minara kaaqa rimariqau. Miqidaqa mina maqannaasa minara Anutunaindaraa firaa afeekainainee qimariqau.
ACT 8:11 Mifa kisaaqasaa narí afuneennai narí maqannaa unna qimasee qimannimisoofaqa kaaqa mina ufa irimariqau.
ACT 8:12 Miqi marufanoo Firipifa qumureenoo Anutuna ququsara amiqira fasaasa ufa faqa Yisuna Anutuna asauku mundiranara qimannimufaqa faiqí anaasee iriseeqa kuqaa fee qimasee mina qumaraqau. Qumaroofanoo nammari rumannimaqee marinau. Faiqí faqa anaasee faqa rumannimaqee marinau.
ACT 8:13 Simoonafa narí faqa Yisunara iriseenoo kuqaa fee qimaseenoo nammari maranau. Nammari maraseenoo Simoonafa Firipina aaqa maridanoo mina faqa oonuree aniree imarinau. Firipifa oosana oosana firaa ainaina faiqí sia auqaaqaa ira ainaina faiqí anaasee dadaaqimaria ainaina auqufanoo Simoonafa mina qafoofanoo aaquqoofanoo marinau.
ACT 8:14 Yisuna afaaqasaa aqoondiuqa moo nuqu niqiqoo fasiqausa misa Yeerusaree maqusai maridaqa Samaria maqannaasara Anutuna ufara irida fee qimasee Peetooroona faqa Yoohaneena faqa niqiqamasoofaqa Yeerusaree maqusaindari Samaria maqannaasunnai ooqufiqau.
ACT 8:15 Ooqureeqa Samaria maqannaa Yisuna aufakiana fukasaa irimarusara innaaru qimariqau. Naaquqara andeeqara maraquna fannoo misa faqa naakuanifeera qimasee innaaru qimariqau.
ACT 8:16 Samaria maqannaasa Karaambaiqa Yisuna auqusaa kai nammari maraseeqa sia naaquqara andeeqara maraquna maraqau. Minara naaquqara maraquna fannoo sia misaki marinau.
ACT 8:17 Peetooroosa Yoohaneesa minara iriseeqa innaaru qimasee misa faiqí anaasee nikumu qumaree mapuku nimaqasoofanoo naaquqara andeeqara maraquna naakimarinau.
ACT 8:18 Simoonafa afunee fasiqa fannoo miqanda oosana nindafamasee qinee faqa marasee miqianee qimaseenoo munnimma maraseenoo Peetooroosa Yoohaneesa nimianaqa naaquqara maraquna qimifaqa qeeqa maqannaa miqimannisaanee qimasoofanoo Peetooroofa maaqi qimasee aqinoo qinau. Anee anee faqa aneenna munnimma namufaqa ida aqufua. Anee Anutuna kaqi nimira ainainara feefauru qiannanara minara aneenna munnimma namufaqa ida aqufua.
ACT 8:21 Maasa funnaqoo anee sia maasa faqa moodaa runna fuananoo. Ani irirafa ani amuqusaki Anutufa qafaifanoo sia andeeqanoo maridanoo.
ACT 8:22 Anee aneenna manda iriranakiqari quandakinana Anutunara innaaru qinanoo maa ani maa manda irirana akiaqara minnaisaani.
ACT 8:23 Qinee ani aundurai oosana qafaidaqa tuka amaneera foora sukaqarafa maridanoo. Aninna mandainaina fannoo naaqanara foora ani rumbanoo maridanoo.
ACT 8:24 Simoonafa mi ufana iriseenoo tautumaseenoo Peetooroosa Yoohaneesa minara qimanniminoo qinau. Oo inneeqara amanee inneeqara Anutunara innaaru qifanoo sia mandainaina oosana oosana innee qiandee sia qinisaa kambiqaani.
ACT 8:25 Peetooroosa Yoohaneesa Karaambaiqa aufakiana qimannimiseenoo qumurandee Yeerusareenni kafaa ooru fiqau. Ooru fidaqara Samaria maqusa kaqikaa kaqikaa maqusakiaqa Yisuna amiqira fasaasa ufa qimannimimaree ooru fiqau.
ACT 8:26 Anutuna qangiroo moo fannoo Firipina qimaminoo qinau. Anee doo deedaqia. Aana moo Yeerusaree maqusaindari aadana maqa maaqa aana fannoo qambaana fidanoo Kaasa maqusai ooqu fimari aana. Anee oonuree mi aannara randasee paquria. Doo uqeeraa qufanoo Firipifa mina iriseenoo deedaqi imaree doo miqoo finau. Firipifa fifiufanoo mi aanna paqurimaseenoo Eetioopia maqusaindaraa fasiqa moo mi aannai fimarufanoo paqurinau. Mi Eetioopia maqusaanaa fasiqa dunduqarirafa marinau. Narí maqannaa anaasee rakisirana uriqararana munnimma aina rakisimarufa uriqararafa marinau. (Afaandama itirafa marinau. Ooqai uqanna anaasee rakisirausa uriqararausa akaqausa nári ainaina dadaaqimarusa nifaandama itimariqau. Maqee sia mi oosanafa maridanoo. Ooqai uqanna marinau.)
ACT 8:28 Eetioopia maqannaa anaasee rakisirana auqu Kandaseenammarifa marinau. Minasaa rakisimaru fasiqafa afaandama itirafa kaaqa Anutunara rimaru fasiqafa, mifa Yeerusaree maqusai narí qoosa rarisee maru karanaki Yeerusareenni ooru Anutunara innaaru qimaseenoo ooru randeenoo amaaqai qumimarufano Firipifa paqurinau.
ACT 8:29 Naaquqara andeeqara maraquna fannoo Firipina qimaminoo qinau. Anee mina kara fimariqoo oonuraina qafaa. Eetioopia fasiqafa narí qoosa rarisee maru karanaki fidanoo ooqai tamummaqara fasiqa Eesaiaafa akara rumaqoona asaana rinoo fimarinau.
ACT 8:30 Fimarufanoo Firipifa sandee oonureenoo mina kara asaukunnai qumareenoo mi karana uqirafa aakaariqara sandanoo fidanoo iriseenoo irammirinau. Oo maa fasiqa, anee asaana rimariannana oosana iridanee sia fee iridanee.
ACT 8:31 Miqi qufanoo mi Eetioopia fasiqafa qinau. Moo fannoo kooroo inaqau irini siammiridaqa. Miqi qimasee Firipinara qini faqa uru ooqumariannee qimasoofanoo Firipifa mina qoosa rarisee maru karanaki kaqi fimarufanoo akaramafufanoo mi fasiqana aaqa ooqumarinau.
ACT 8:32 Mi Eetioopia fasiqafa Eesaiaana maa akarana asaana rimarinau. Misa mina qumare̱eqee sipsipa aandaura foora mareeqee ariranaki quqaqau. Misa sipsipa aanaaqi asausi aukimarufanoo sia dudeepeenoo faaqarimarifa maridanoo sipsipa aanaaqi qummaarumuara fooqaana ari marufanoo kai mumuqida marinau. Anutuna sipsipa aanaaqi arimarufanoo mumuqida marinau. Sia moodaakari ufa qinoo faaqarinau.
ACT 8:33 Misa firaaqoo asaurirana amiqau. Mina andeeqara ufa siamma iriqau. Doo mifa naríara kuqufinau. Mina anaiqi mina aiku asauku sia mariafa maridanoo sia minara ufa qifaranoo. Doo narí kai marufa doo kuqinau.
ACT 8:34 Mi Eetioopia fasiqafa mi ufana asaana rumaseenoo Firipina irammirinau. Tamummaqara fasiqa fannoo kuqu ufana qimaruna nariaree qimarinau fee moonaree qimarinau fee, qinaqa iria qufanoo Firipifa mi tamummaqara fasiqana ufasaa oosana araseenoo miqooqari finau. Miqooqari finoo Yisuna amiqira fasaasa ufa qimaminau.
ACT 8:36 Doo miqi qida narí qimami narí qimami aatata ooqu fidanoo Firipina qimaminau. Doo maana nammari adeedi maridanoo. Amanee anee Yisuna auqusaa qini nammariki keeqaqimaqeennaree. [
ACT 8:37 Firipifa mi ufana iriseenoo qinau. Anee aneenna amuqusa ookiqari Yisunara kuqaa anoonee qianaqa amana ani keeqamaqaanaura. Mi Eeetioopia fasiqafa qinau. Qinee Anutuna asauku mundiranara Yisunara kuqaa Anutuna faiqifee qidaqa. Anee kaqi keeqaqimaqaa.]
ACT 8:38 Miqi qimasoofanoo qoosa rarisee maru karana daraiuaana qimamifanoo kara rafaaqafusoofaqa Firipifa faqa mi Eetioopia fasiqafa uriqararafa faqa nammari qambaanai ooqureenoo Firipifa mi fasiqana qumare̱eqeenoo nammariki keeqamaqasaanau. Keeqamaqaseenoo asauku qumareenoo uqeerasanau.
ACT 8:39 Miqanda nammarikiqari afainni uru akaramafufanoo Anutuna maraquna fannoo Firipina afiqamaroofanoo sia miqoo mina faqa marinau. Mi eetioopia fasiqafa uriqararafa sia kafaa Firipina qafanau, asasamandeenoo narí karaki akaramafufanoo doo amaaqa finau.
ACT 8:40 Anutuna maraquna fannoo Firipina mareeqeenoo Asadooda maqusai munu quqasoofanoo miqooqari Yisuna amiqira fasaasa ufa qimanniminoo maqusa maqusa fifiufanoo Seesareea maqusai finau.
ACT 9:1 Yisuna faiqi namu mina ufa qimannimiqa nimarufaqa minasaara Sauroofa firaaqoo aanoo idanoo narirara rumbarara qidamarinau. Miqidanoo Sauroofa amaana maqasaa aanaiqikirausa misa uriqararana oonu qimaminoo qinau.
ACT 9:2 Anee papiqa akara rumaqiminaqa qinee Damasakusa maqusai ooruree Yuda maqannaa ufa suqinnanaki keeqafi Yisuna aatata fimariasa paqurimasee sia faiqí kai faiqí faqa anaasee faqa rumbamaree Yeerusaree maqusai karafusaki muqu quqaanauree qimasoofanoo eedoo qimaseenoo mi eedoo qira papiqana akara rumaminau.
ACT 9:3 Sauroofa Damasakusa maqusai mi papiqana uqirafa fidanoo narí sundia namufaqa fidanoo Damasakusa maqusa adeedi ramasoofanoo innaarunaindari kaaqa qarana amananda fannoo tautumma amaqaseenoo Sauroona fiqu fiqumafinau.
ACT 9:4 Sauroofa kaaqa rufiaseenoo maqasaa aqufumafufanoo irufanoo innaarunaindaraa ufa moo qinau Sauroo Sauroo anee nanaree qini daridanee.
ACT 9:5 Miqi qufanoo Sauroofa maaqi qinau. Oo Karaambaiqa anee yafee maridanee qufanoo maaqi qimasee qimaminau. Qinee Yisusa anee qini darimarianausa maridaqa.
ACT 9:6 Doo maqasaaqari findifinana fua maqusaki ooru rainanoo miqoo moo fannoo maridanoo, mifa ani aanara aamua qinana fua.
ACT 9:7 Sauroona faqa fusa sundiauqa Sauroofa maqasaa aqufufaqa qafamasee innaarunaindaraa ufa iriseeqa sia moo ainaina qafoofanoo naaquqoofaqa nimuqusamafufaqa sia ufa qiqau kaqi kasoomambiqau.
ACT 9:8 Sauroofa maqasaaqari findifufanoo afu dimbafufanoo sia moo ainaina qafanau. Mina sundiauqa mina asauku qumaree rarisameeqee Damasakusa maqusai quqaqau.
ACT 9:9 Sauroofa narí afu dimboonara faqa innaarunaindaraa ufa irunara faqa irufanoo aundura mandaikufanoo qaaramoo faasaana sia narana nanau sia nammari nanau sia afu maqanau.
ACT 9:10 Damasakusa maqusai Yisuna ufa irimarufa moo fannoo marinau. Mina auqu Ananiasafa marinau. (Sia Yeerusaree maqannaa Ananiasafau. Damasakusa maqusaindaraafa mina amarafa.) Mi fasannai qaina Ananiasana afunnaranau. Karaambaiqa fannoo mi qainnaki Ananiasana aaroofanoo qinau. Ananiasa qufanoo Ananiasafa qinau Oo Karaambaiqa maa qinee maridaqa qufanoo Karaambaiqa maaqi qimasee qimaminau. Ananiasa doo deedaqi fua. Anee andeeqara aatatee qimariana mi mau oonuree Yudasina maaqara randasee qafa. (Sia Yisuna ueeqoofau. Damasakusa maqusaindaraafa mina amarafa.) Mina maaqaki Tarasusa maqusaindaraafa Sauroofa maridanoo.
ACT 9:12 Doo mifa qainamaseenoo maridanoo. Mifa ani Ananiasana qafeenoo maridanoo. Qainasaa qafaifana anee oonureenana mina akiaqasa asauku munduseenana mina afu maqarana amiananoo irisee innaaru qidanoo maridanoo.
ACT 9:13 Ananiasafa mi ufana iriseenoo rufiaseenoo qinau. Oo Karaambaiqa faiqí moomoosa mi fasiqanara qini qimaqimiafaqa iridaqa. Mifa Yeerusaree maqusai ani aiku asauku anufa irimariasa mandoosana maranoo nifa maridanoo.
ACT 9:14 Mifa Yeerusaree amaana maaqa aanaiqikirausa misa uriqararana papiqa maramaree Damasakusa maqusai maasa aniara innaaru qimariasara rumbamaree Yeerusareenni ooqu fuanee qimasee urifa maridanoo.
ACT 9:15 Karaambaiqa mina ufa iriseenoo Ananiasana qimaminoo qinau. Sia anee minara rufiaa anee kaqi fua. Qinee mi fasiqanara rusandeesamumandee mareeqa. Mifa qini ainainira faiqi kamambi mariannoo. Mifa qini duqura qini daufakiana aanaamuru maqannaasa faqa nári karaambaiqauqa faqa Isaraee maqannaasa faqa qimanniminoo nuannoo.
ACT 9:16 Qinee qeeqa oosana uqafiqaanaura. Qini ufasaara kasooqaqee arirana faqa dinee faqa maraannoo.
ACT 9:17 Ananiasafa mi ufana iriseenoo maaqa paqurimandee qafoofanoo Sauroofa minaki marufanoo keeqafinoo asauku mina akiasaa munduseenoo qinau. Sauroo qini qikaqaafasaa Karaambaiqa Yisufa narí uqanna anee aanai uridana anee qafaananoo mifa kai qini qimaqimifaqa anee ianannai anidaqa. Afu kafaa maqaaneera faqa naaquqara andeeqara maraquna aniki qumbiqaaninnanara faqa diqiqaifaqa anidaqa.
ACT 9:18 Ananiasafa miqi qimasoofanoo Sauroona afusaa ititanoo mariufa saqari apata fooqaafa rafoomakufanoo maqai aqufufanoo doo mina afu maqanau. Afu maqafufanoo nammariki keeqammamaqanau.
ACT 9:19 Keeqamma amaqasoofanoo Sauroofa narana namaseenoo doo afaaqa amiqufanoo Yisuna faiqi namu faqa qaaramoo faasaana Damasakusa maqusai maridanoo misa dadaaqinau.
ACT 9:20 (Damasakusa maqusanaasa misa moo unna Anutunara qimarusa mariqau.) Yuda maqannaa akaqausa mi maqusanaki faqa mariqau. Minaki maridaqa naaduma amaana maqa usakasee minaki keeqafi Mooseena sandufa asaana rumasaidaqa anoona Anutunara innaaru qidaqa Yisunara sia iriqau. Sauroofa findifinoo andeeqaseenoo Yuda maqannaa amaana maqaki keeqafinoo Yisunara kuqaa Anutuna amaaku fee qinoo naamuaqufaqa iriqau.
ACT 9:21 Irisoofanoo naaquqoofaqa qiqau. Maa fasiqafa Yeerusaree maqusaki Yisuna aiku asauku narinoonufa maridanoo, miqooqari aanaiqikirausa uriqararana papiqa akara rumasoofanoo mareenoo maasa maqusai urufa Yisuna ufa irimarusa rumbamaree Yeerusareenni muqu quqaannee qufa maa mi fasiqafa ani maridanoo Yisuna ufara uqeeraanauree qidaqinoo. Misa Sauroonara naqaa fee fanoo fee qaara iriranamau fidaqinoo qimasee misa mi ufana qiqau.
ACT 9:22 Sauroofa faasaambaasaana andeeqaseenoo faiqí anaasee Yisunara qimannimidanoo narí irirana faqa maqee maqee firaanaikinau. Mifa Yisufa kuqaa Anutuna asauku mundirafa maridanoo fee qimaseenoo quandakinoo ooqeenaa tamummaqara fasiqauqa akarakinaana amiqimasee akooqoo kooroomasee uqannifiqoofaqa qafeeqa misa irirafa dapikufaqa misa qaara iriranamau fiqau.
ACT 9:23 Sauroofa moomoo faasaana Yisuna ufa qimannimimarufaqa Yuda maqannaa miqoo Damasakusa maqusanaasa misa Yisuna ufara nikooqeemarufaqa aanooomasee moodaanaki suqufiqa Sauroona arira ufa qiqau.
ACT 9:24 Damasakusa maqusa ooni faandaamura firaafa ititanoo marinau. Kooqiki kai fimariqau. Yuda maqannaasa Sauroonara kooqiki rakisimariqau. Eendaki faqa faasaana faqa rakisimarufanoo miqoo oonuraina qumarasee aruanauree qidaqa rakisimariqau. Moo fannoo Sauroona aqoondi misa ufa irinoo Sauroona kooroo qimasee qimaminau. (Mi maqusanasaa faandaamura fiqu fiquinoo marufaqa mi faandaamurana afuqaindari maaqa mi faandaamuranasaa rusisaida usakee mariqau. Sauroona aqoondi maaqa faqa minaki marufanoo mi maqafa faandaamura atisaa kaqikaaqoo ruqianoo marinau. Faiqí minaki keeqarana amana marinau. Aqoosaindari sia amana anifara. Afuqaindari amana fifara.)
ACT 9:25 Sauroona aqoondiuqa mina ufa irimarusa eendaki qumee Sauroona mareeqeeqa faandaamura afuqaki maru maqanakiqari meerai mi ruqiaranakiqari firaa afeeka uqaki rumaseeqa mi aamaranaki ruqieeqee maaminni quqaseeqa sanda quiqa quiqa ufanoo ooqufiufanoo maqasaa ooqureenoo uqeekakufanoo quqasee Yeerusareenni sandee fidanoo faiqanoo oorufiufanoo ooruranau.
ACT 9:26 Yeerusareenni oorureenoo Yisuna aiku asauku marunaki oonu keeqafufanoo dadaaqineerufaqa misa mina qafeeqa maasa darimari fee qimasee rufiasee daraaniqau. Mifa Yisuna ufara doo irida fee qufaqa misa minara unna qimaseenoo maasa qumaraandoo qimasee rufiasee sandaqau.
ACT 9:27 Baranabasifa anireenoo Sauroona dadaaqinoo aniqumareeqeenoo Yisuna afaaqasaa aqoondiuqa niqiqoo fasiqausee qimarusaki quqanau. Baranabasifa Sauroonara aanai ooru fimarufanoo karaambaiqa Yisufa mina afusaa kooroo inoo qu ufana faqa qimanniminau. Sauroofa Damasakusa maqusaki Yisuna aufakiana afeekaikamandee andeeqasee qimannimuna minara faqa qimannimisoofaqa kuqaa fee qiqau.
ACT 9:28 Miqooqari Sauroofa Yisuna faiqi namu faqa Yeerusaree maqusai marinau. Miqoo maridanoo paasoosamandeenoo Karaambaiqa aufakiana misaqa marusa qimanniminoo ninau.
ACT 9:29 Kirisa maqannaasa ufa qimaru Yuda maqannaasa Mooseena sandufa qimarusa irirana faqaasa Yeerusareenni animarufanoo Sauroofa Yisunara misasaimbaqa narí qimami narí qimami qidaqa afeekaikimariqau.
ACT 9:30 Miqidaqa misa aanoomasee Sauroona arirarufaqa Yisuna faiqi namu mina iriseeqa Sauroona mareeqee Seesareea maqusai quqasoofanoo doo miqooqari naríara Tarasusa maqusai narí maqusai finau.
ACT 9:31 Doo miqooqari Yisuna ufa irimarusa Yudeeaa maqa maaqaki marusa faqa Kariree maqa maaqaki marusa faqa Samaria maqa maaqaki marusa faqa asooaranaki mariqau. Faiqí anaasee moomoosa Yisuna ufara eedooqimasee minasaa atooaqau. Anutuna naaquqara andeeqara maraquna fannoo dadaaqunara misa nimana mapukinau. Misa aiqamausa Karaambaiqara naaquqoofaqa mina ufamau fimariqau.
ACT 9:32 Mi aukuanna Peetooroofa aiqama atinnai Anutuna faiqi namu marusa fiqu fiqu nindafee marinau. Moo kari Rida maqusai Yisuna faiqi namu nindafarara ooqufinau.
ACT 9:33 Miqoo faiqí moo auqu Aeeniasafa aiku asauku kaqi uqirafa doo miqoo naaruara faikaisee marufa marinau. Qisauku dinni taikasee dinni ani qaaramoo marasee aukuana marinau.
ACT 9:34 Peetooroofa mi fasiqana qafamaseenoo qimaminoo qinau. Aeeniasa Yisufa asauku mundirafa ani amiqimaisaidanoo. Doo anee findifinana qaari raqandaaia. Miqi qimasoofanoo Aeeniasafa findifinoo qaari raqandaainau.
ACT 9:35 Rida maqusanaasa faqa Saroona maqusanaasa faqa aiqamausa ani mina uqufufaqa qafamasee Oo qimasee quandaki Karaambaiqasaa kai atooqafiqau.
ACT 9:36 Moo maqusa auqu Yoopa mi maqusafa Rida maqusa aaqa maridanoo. Yoopa maqusai anaasee moo mina auqu Tabitaa nammarifa maridanoo. Yisuna ufa irimarufa marinau. Kirisa ufakiqari mi anaaseena auqu Doorakasa nammarifa marinau. Mi auquna oosana aandau fee qimariqau. Mi anaaseefa kaaqa kudi fasiqa anaasee afaarida nimimarufa aiqama kari maqee maqee misa nimimarufa marinau.
ACT 9:37 Miqimarufa maridanoo aurirana marasee kuqinau. (Misa maaqaki tida moo maqasaa marinau kafaa tida moo sandaaqai afeekaikirafa marufanoo minasaa faiqee mariqau. Ooninnai irirasu auquqoonasaa akaramafufaqa sandaaqai tida afeeka auquqoonnai ooru fiqau.) Tabitaa nammarifa kuqufufaqa aanaaseeuqa mina iri marasee nammari rumamaqasee sandaaqai tidasaa quqasee kasooqaqee akundararee qimasee quqaqau.
ACT 9:38 Yoopa maqusa faqa Rida maqusa faqa naraaqa naraaqa adeedi mariqau. Yoopa maqannaa Yisuna aiku asauku Peetooroofa Rida maqusai qumumarufaqa iriseeqa qaara fasiqa niqiqoofaqa qiqau. Oo Peetooroo maasa unnanai kaqi kaqi qumua.
ACT 9:39 Peetooroofa eedoo qimasee deedaqamamaree miqanda faqa ooqu finau. Yoopa maqusai ooquroofaqa mina afiqee maaqaki mirinni sandaaqa tidasaa muruquqasoofanoo nindafamaseenoo adeedaana anaasee moomoosa ikiraqeeusa findufufaqa Peetooroona uqusee mi anaaseefa auqu nimu siutana faqa asausi faqaa siuta faqa auqu nimuna Peetooroona uqafiqaida ikiraqee mariqau.
ACT 9:40 Peetooroofa mina iriiseenoo aiqama sufafaqa aqusoofaqa madaanai ooqufiqau. Ooqufufanoo Peetooroofa tidasaa aqoorisaunara fufanoo Anutunara innaaru qinau. Innaaru qiqiseenoo Tabitaa nammarina iri marutinai quandafinoo qinau. Tabitaa nammari doo anee findifua. Miqi qimaseenoo Tabitaafa afu maqaseenoo Peetooroona qafamaseenoo rutaqinoo findifinau.
ACT 9:41 Peetooroofa mina asauku qumareenoo dadaaqi findifumasanau. Findifumasoofanoo Peetooroofa Yisuna ufa irimarusa faqa adeedaana anaaseeuqa faqa naaramasee uqannifiqanau.
ACT 9:42 Doorakasa nammarina findifumasoo ufana Yoopa maqusai aiqamai daraanufaqa iriqa moomoosa karaambaiqara kuqaa fee qimasee minasaa mundiqau.
ACT 9:43 Peetooroofa moomoo faasaana Yoopa maqusai marinau. Peetooroona moo auqu Simoonafa marinau. Mifa Yoopa maqusai moo fasiqa narí amarana Simoona mina faqa marinau. Simoonafa sipsipa burimakau mimmi minamusa narusaidanoo nipata asukusaidanoo aurumma afeekaikamasaidanoo nimisaidanoo feefauru maree marinau.
ACT 10:1 Mi aukuanna mi fasannai Seesareea maqusai faiqí moo uriqararafa mina auqu Kooraneeriusafa marinau. Mifa Roomma maqannaa ammi kiateenna marinau. Narí faqa narí sundiauqa faqa Itari maqannaa sundia fee qimariqau.
ACT 10:2 Kooraneeriusafa kaaqa Anutunara rimaru fasiqafa marinau narí faqa narí faiqi anaasee faqa Anutunara innaaru qimarusa mariqau. Mifa Yuda maqannaa kudi fasiqauqa maqee maqee dadaaqidanoo narana ainaina nimimarufa marinau.
ACT 10:3 Moo faasaana mariufanoo eenoofanoo Kooraneeriusana afu kai pisipasamandoofanoo Anutuna qangiroo moo amiqimandee qafanau. Qangiroo mifa maaqaki anireenoo auquramasee aaranau Kooraneeriusa qufanoo tautumandeenoo rufiaseenoo mina kai tataqafinoo qinau. Oo qini uriqararafa nanaree randaidanee. Qangiroo mina iriseenoo maaqi qimasee qimaminau. Anutufa ani innaaruqirana faqa anee kudi fasiqauqara qimudaoo qimariannanara faqa qafaidanoo iridanoo aniara aididanoo.
ACT 10:5 Kooraneeriusa anee faiqí akaqausa niqiqainaqa Yoopa maqusai ooqu fuaqa faiqí moo ooqu afiqaa. Mina auqu Simoona moo auqu Peetooroofa ooruku nammari afaiqaannai faiqí moo aandau apata aurimari fasiqana narí amarana Simoona faqa maridanoo.
ACT 10:7 Qangiroo fannoo miqi qimasee qimamisee doo finau. Doo fufanoo Kooraneeriusafa mina ufamau finoo narí maaqai ainainimaru faiqiqanda faqa narí sundia moo faqa Anutuna ufa irimaruna narí ureeqarana naaramasee qangiroo qu ufana qimannimiseenoo Yoopa maqusai niqiqoofaqa Peetooroona afiqarara ooqu fiqau. (Miqooqaraasa maaqa usakasaidaqa maaqa tida aaku aakummasee qaaramoo tida marinau. Maqasaa moo tida marinau, mina maariqoo moo tida marinau. Meeraqoo maaqa ataufakaaqa moo tida annuara maqi auquqoonasaa ooqumarifi asooarana faqa suara faqa mareemarufa marinau.)
ACT 10:9 Kooraneeriusana sundia faqa ainainira faiqiqara faqa Yoopa maqusai fidaqa aanai fi faiqee fimarufanoo suani qambaanaikinau. Mikari Peetooroofa suani qambaanai maaqa ataufakaaqa innaaru qianee qimasee oorufinau.
ACT 10:10 Peetooroofa innaaru qimarufanoo aararoofanoo misa narana suqee marufanoo afu pisipasamandoofanoo moo ainaina qafanau.
ACT 10:11 Innaaruna rakeemambufanoo seera firaana dinni dinni sanda qusuqoona mi seeranaki aandau sakani ufini oosana oosana minaki uqarumaseenoo innaarunaindari mi seera sandana quqa quqaufanoo.
ACT 10:13 Peetooroona aaqa qumuroofanoo innaarunaindaraa ufa moo maaqi qinoo qimaminau, Peetooroo findifina maa seeranakinaa aandausa narusee naa, qufanoo Peetooroofa qafamaseenoo qinau. Oo Karaambaiqa akasaa. Maasa Yuda maqannaasa sia neemaru ainainafa kai maridanoo. Sia anukarafauqa maridanoo. Sia qinee amana naanaura.
ACT 10:15 Miqi qimasoofanoo innaarunaindaraa ufa moo maaqi qimasee qimaminau. Anutufa anukamaqai ainainara sia sia anukara fee qia.
ACT 10:16 Maa ainainnara qaaramoo kari qufanoo sia irufanoo kafaa qumu aiqama rarisameeqee innaarunai kafaannai quqanau.
ACT 10:17 Peetooroofa mi qainna oosanara randee marufanoo aundura mandaikinau. Randee marufanoo Kooraneeriusana faiqi namu Yoopa maqusai aniree Simoona maaqa paqurimasee kooqisaa aniree nammeera qiqau.
ACT 10:18 Simoona moo auqu Peetooroofa mai maridanoo fee qufanoo, Peetooroofa maaqa ataufakaaqa kaqi maridanoo qaina oosanara randeemarufanoo Anutuna maraquna fannoo qimaminau. Anee iria. Qaaramoo fasiqa aniara randaidaqa.
ACT 10:20 Anee findifi ooqi deedaqinana misa faqa fua. Sia oonumafi iria kaqi afaaqa quqasee fua. Qinee misa niqiqaunausa ani afiqarara anidaqa.
ACT 10:21 Peetooroofa ooqureenoo qimanniminau. Innee qiniara randee mariasa maana misa maridaqa. Innee nanaree qiniara randaidee qufaqa misa qiqau, Roomma maqannaa sundia kiateena maasa uriqararafa mina auqu Kooraneeriusafa maasa diqiqaifaqa anidaqa. Mifa andeeqara fasiqa Anutuna amooqimarifa amiqira fasiqa maridanoo. Yuda maqannaasa aiqama kaaqa minara rimariafa maridanoo. Anutuna qangiroo moo fannoo aniara oonu afiqee narí maaqakiara anirainaqa ufa moo qimamianee qifaqa anidaqa.
ACT 10:23 Peetooroofa misa ufa iriseenoo mareeqee maaqaki quqasoofaqa faiqeenoo iqaqoofanoo Peetooroofa faqa Yoopa maqannaa qaaramoo namu Yisuna ufa irimarusa Kooraneeriusana faiqi namu faqa fiqau.
ACT 10:24 Minamusa fifiufaqa aanai fifaiqee fifiufaqa Seesareea maqusa oonuraqau. Kooraneeriusafa narí atiuqa narí akaqaafasaa faqa narí maaqaki suqu quqasoofaqa maridaqa Peetooroona afeesimariqau.
ACT 10:25 Peetooroofa Kooraneeriusana kooqiki oonuree keeqararufanoo Kooraneeriusafa rafudamakufanoo mina aikuki qumi maree oorindari rumafinoo Anutufara maqi miqimaseenoo innaaru qiraree qufanoo Peetooroofa mina asauku qumaree uqeereenoo qinau, Doo findifua, qinee faqa sia Anutusa maridaqa faiqí faiqi maridaqa.
ACT 10:27 Peetooroofa Kooraneeriusana qimamidanoo maaqaki keeqanau. Keeqafi qafoofanoo faiqí anaasee aanaamuru moomoosa minaki mariqau. Minaki ooruree misa faqa maaqi qimasee qimanniminau.
ACT 10:28 Innee aiqamausa maasa Yuda maqannaasa oosana irimariafanoo. Maasa Yuda maqannaa aanaamuru maaqaki sia uqanna keeqafi misa faqa aqoondiki mariasa. Maasa amaana ufa minara firaaqoo qaoo qinoo maridanoo. Sia anukarausee qidaqa. Doo maqee Anutufa qiniara sia moo aanaamuruara sia anukara fee qimasee rufiaa, kaqi aqoondi kiannee qidanoo.
ACT 10:29 Qinee mina ufa irisaunnana anee qiniara aniannee qianaqa qinee sia inniara rufieeqa kaqi aniqa. Anee nanaree qini daareenanee.
ACT 10:30 Kooraneeriusafa mina iriseenoo qinau. Innau qinee qeeqa maaqaki eeneemarufaqa innaaru qimariafananoo faiqí moo fannoo mina qamunna kaaqa areenara qamunna faqaafa qini qifusaa kikiqamambinoo qimaqiminau.
ACT 10:31 Kooraneeriusa Anutufa ani innaaruqirana irinoo ani kudi fasiqauqa qimudaoo qimasee dadaaqimariannanara irinoo qafeenoo aniara aididanoo.
ACT 10:32 Doo anee faiqí niqiqainaqa Yoopa maqusai fuaqa. Faiqí miqoo mina auqu uqanna Simoona moo auqu Peetooroofa maridanoo. Mifa narí amarana Simoona faqa aandau apata aurimari fasiqana faqa maridanoo, ooruku nammari afai qaannai mina maaqa maridanoo fee qinau.
ACT 10:33 Qinee mi ufana iriseeqa aaqee uqanna aniara oonu afiqee aniaqee qiqa. Anee amiqimminana andeeqasee aniananoo. Doo maasa aiqama maa maqanaki ooqumarifi marunanoo doo Anutufa qiqafaidanoo. Karaambaiqa ani qimami ufana irianeera anidaqa.
ACT 10:34 Kooraneeriusafa miqi qimasee Peetooroona qimamisoofanoo mifa maaqi qimasee misa qimanniminau. Doo qinee maqee maa ainainna oosanara iridaqa. Anutufa sia maasa Yuda maqannaasara kai aididanoo kuqaa aiqama maqannaasa amanamana kai iaqeera aididanoo.
ACT 10:35 Aiqamausa Anutunara naaquqee marinaqa andeeqara oosana maraidaqa miqimarifandinausara qinindi fee qiannoo. Aiqama maqusanaasa amanamana kai iaqeera qidanoo.
ACT 10:36 Anutufa Isaraee maqannaa amiqira fasaasa ufa asooara ufa asauku mundirana Yisunannai qimanniminau. Mifa aiqama maqannaa Karaambaiqa.
ACT 10:37 Yudeeaa maqa maaqai firaaqoo kambiqoo ainainara Yoohaneefa nammari nimimaru aukuana oosanaraseenoo kambiqanoo maridanoo. Kariree maqa maaqaki oosanaraseenoo miqooqari aiqama Yudeeaa maqa maaqakina fifaininau. Innee maaqoo mariasa minara Yisunara doo irimariafanoo.
ACT 10:38 Anutufa narí naaquqara maraquna Yisuna Nasareetee maqusaindaraanasaa adiamaqasoofanoo Anutuna afeeka mareenoo aiqamai oonuree aniree inoo qimudaoo qinoo Sadannana auraarai mariusa qumareenoo aurimarusa faqa kaqi marusa faqa aiqamausa idaaqamannisanau. Anutufa qumee mina faqa nidanoo dadaaqufanoo mi oosanna oosanna ainainna auqeemarinau. Innee minara faqa doo irimariafanoo.
ACT 10:39 Yuda maqannaa maqusa faqa Yeerusaree maqusaki faqa Yisuna auqoo ainaina qinee faqa akaqausa faqa qifunnai qafaafanausa maridaqa. Misa mina mara maree pirimmannai aunirira saqarisaa ariqau.
ACT 10:40 Qaaramoo faasaana aiqaroofanoo Anutufa kuqiranakinaana mina uqeera findifinau. Findifinoo maasa qifusaa kooroomambinau.
ACT 10:41 Sia aiqamausa nifusaa kooroo inau. Anutufa maasa rusandeesamumandee maroosa maasa qifusaa kai kooroo inau. Anutufa kuqiranakiqari uqeerasoofaqa maasa mina faqa narana nammari naafanausa maridaqa.
ACT 10:42 Mikamuqoo maaqi qimasee maasa naamuaqinoo qinau. Innee qiniara maana faiqí anaasee noori kandamasee qimannimiaqa. Anutufa qini Yisusara kaqi mariasa faqa kuqirausa faqa misa rainasee idaki fee innaarunai fee quqannisaanausee qinau. Minara faqa inni aiqamausa maa maqee mariasa faqa qimannimidaqa.
ACT 10:43 Peetooroofa mi ufana Kooraneeriusana aiku asauku qimannimiseenoo maaqi qinau. Anutuna tamummaqara fasiqausa aiqama Yisunara qidaqa akara rimariqau. Maaqi qimariqau. Aiqamausa mina saqarikinausa Anutufa mina auqu afeekannai misa mandainaina numoo mininnisaannoo.
ACT 10:44 Peetooroofa miqi qimarufanoo Anutuna naaquqara andeeqara maraquna fannoo innaarunaindari qumureenoo aiqamausa Peetooroona ufa irimarusasaa rafaaqafu manimaqanau.
ACT 10:46 Maraquna fannoo naakufufaqa dadaaqufaqa moo maqannaa ufa sia irimaru ufausa qimariqau. Anutuna firaanaikiranara faqa firaaqoo amooqimariqau.
ACT 10:45 Yuda maqannaasa qaaramoonamu Peetooroona faqa Yoopa maqusaindari qumusa mi ainainna qafamaseeqa naaquqoofaqa qiqau. Oo Anutufa narí naaquqara maraquna aanaamuru faqa nimidanoo. Sia Yuda maqannaasa kai nimidanoo.
ACT 10:47 Peetooroofa miquna nindafamaseenoo Yuda maqannaasa narí faqa anusa qimanniminoo qinau. Maa fasiqausa Anutuna naaquqara andeeqara maraquna doo mareea, maasa Yuda maqannaasa iafanandeemmiafanoo. Yafasiqa fee moo fannoo nammari nimiranara qaoo qiannoo fee sia amana moo fannoo qaoo qiannoo. Doo nimia.
ACT 10:48 Miqi qimasoofaqa Anutuna asauku mundirana Yisuna auqusaa nammari maraqau. Miqimasoofanoo Kooraneeriusafa asasidanoo Peetooroonara kaqikaaqoo mariannee qufanoo eedoo qimaseenoo misa faqa qaaramoo faasaana marinau.
ACT 11:1 Yisufa niqiqoo fasiqausa Yeerusareenni marusa faqa Yisuna ufa irimarusa Yudeeaa maqa maaqai marusa faqa aanaamuru marusa misa faqa Anutuna ufa mareeaa maqi qiqau.
ACT 11:2 Peetooroofa Seesareea maqusaindari Kooraneeriusana maqusaindari Yeerusareenni ooru fufaqa miqooqaraasa Yuda maqannaasa Yisuna ufa irimarusa Mooseena sandufara rimarusa misa aiqama Peetooroona aqidaqa qiqau.
ACT 11:3 Anee aanaamuru maaqaki misa faqa mariaanafa misa faqa neeneeaanafa animariananoo. Sia Yuda maqannaa fainanduqirausa faqa mariaananoo. Naqaa fee ifanee miqinanee. Maasa Yuda maqannaasa sandufa rukieenana miqiananoo.
ACT 11:4 Peetooroofa mina iriseenoo oosanaindari aiqama ainainara qimanniminoo qinau.
ACT 11:5 Firaa seera moo dinni atinai moo dinni atinai qaara faqa qaara faqa atinai sanda rumbanoo marufanoo innaarunaindari moo fannoo mi sandausa quaqee idanoo quqaaqaa imarufanoo qini daaqa quqasoofaqa minakinaa ainaina amiqimasee qafaqiafana.
ACT 11:7 Innaarunaindaraa ufa moo qimaqiminoo qinau. Peetooroo doo findifi arusee naa qufaqa qinee maaqi qiqa. Oo Karaambaiqa sia uqanna. Sia sia anukara aandau qinee moo neemariqia. Maqee maana sia naanauree qimasaunanoo innaarunaindaraafa qinoo, Anutufa maa ainainnara anukarafauqa maridanoo fee qimasaifana anee sia minara sia anukara fee qia.
ACT 11:10 Mi ainainnara qaaramoo kari qaoo qunanoo doo qumu rarisama innaarunai quqeenoo.
ACT 11:11 Miqi marunanoo kai Seesareea maqusaindari qaaramoo fasiqa niqiqaasa aniree qinee marunna maqana kooqiki aniree qiniara randeeaa.
ACT 11:12 Anutuna maraquna fannoo qiniara kaqi rakeemasee misa faqa fuannee qinoo. Maa mariasa qikaqaafasaa qisauku dinni taikasee dinni ani moodaa marasee qini faqa Seesareea maqusai ooqu fiqau. Maasa aiqama ooquree Kooraneeriusana maaqaki keeqaqau.
ACT 11:13 Keeqafufanoo Kooraneeriusafa Anutuna qangiroo qafoonara maasa qimaqiminau. Mi qangiroofa mina maaqaki kikiqamambi qimaminoo qinau. Kooraneeriusa anee faiqí akaqausa niqiqainaqa Yoopa maqusai ooquree faiqí moo mina auqu uqanna Simoona moo auqu Peetooroo mina ooqu afiqee uruaqa.
ACT 11:14 Mifa urureenoo ufa qimannimisainaqa anee faqa ani aiku asauku faqa innaaruna asumu marirana oosana irifaranoo fee qinau.
ACT 11:15 Mi qangiroofa fufanoo Kooraneeriusafa narí ainainira faiqiuqa aqiqoofaqa qini qifiqee Kooraneeriusana maaqaki quqaqisoofaqa qinee Peetooroosa ufa qimannimirara oosana arasaunanoo naaquqara andeeqara maraquna fannoo ooqai indaaru maasa daakinoo mariufa maasa undee Kooraneeriusana maaqaki mariasa naakinau.
ACT 11:16 Miqi marufaqa qinee oonumafi iriseeqa Karaambaiqa maasa faqa maasaki maridanoo maasa qimaqiminoo qinau. Yoohaneefa nammariki keeqannimaqaidanoo kasooqaqee qinee maraqunaki keeqannimaqaanaura qufaqa iriafannana. Qinee mi ufana iriseeqa Kooraneeriusana maaqaki naakirana qafamaseeqa iriseeqa minara inni qimannimidaqa.
ACT 11:17 Maasa Yisuna asauku mundirana saqarikiafanoo Anutufa narí kaqi nimira ainaina narí naaquqara andeeqara maraquna maasa qiminau. Miqi kai masee Seesareea maqusai aanaamuru faqa kaqi niminoo. Qinee yausee maridee Anutunara qaoo qianauree. Sia amana.
ACT 11:18 Yeerusaree maqannaa Yisuna ufa irimarusa mi ufana iriseeqa doo ufa Peetooroona aqimaruna taikasee quandaki Anutunara asasidaqa qiqau. Oo Anutufa aanaamuru naundura quandarana faqa naaru naaru marirana faqa doo misa faqa niminoo. Sia maasa Yuda maqannaasaindi kaifau. Miqi qufanoo mi ufafa doo taikanau.
ACT 11:19 Mi ufa suqirana sia kambiqooqoo Sateefeenana arukari doo miqooqari Yisuna ufa irimarusa quqasee aanaamuru maaqa maaqa daraanimambiqau. Akaqausa Fooeenisia maqa maaqai fiqau. Akaqausa Antiooka maqusai fiqau. Akaqausa Sipurusa maqa maaqai fiqau. (Sipurusa ooruku nammari qambaanai amuaqunamu maridanoo. Faiqí anaasee moomoo miqoo mariqau.) Miqimasee aanaamuru maqusa marufaqa Yuda maqannaa misaki animarusa misakai Yisunara qimannimimariqau.
ACT 11:20 Akaqausa Sipurusa maqannaasa faqa Sireenee maqannaasa faqa Antiooka maqusai oonu maridaqa aanaamuru marusa asauku mundirana Yisuna amiqira fasaasa ufa aanaamuru qimannimimariqau.
ACT 11:21 Karaambaiqa afeeka dadaaqunara Antiooka maqannaasa aanaamuru moomoosa uqanna Karaambaiqa ufara asasamasee iriqa aiqamausa minasaa kaimma atooqaqau.
ACT 11:22 Antiooka maqannaa ufa fannoo Yeerusareenni ooruroofaqa misa irisee Baranabasina aqiqoofanoo Antiooka maqusai ooqu finau.
ACT 11:23 Ooqureenoo niqafoofanoo Anutufa mimaqusaanaasa dadaaqimarunara ooqu niqafamaseenoo asasinoo qimannimidanoo qinau. Innee inneeqa nimuqusa ookiqari kuqaa karaambaiqasaa mundufuaqa naaru naaru miqookai noori runuseeqa fuaqa.
ACT 11:24 Baranabasifa andeeqara fasiqa marinau. Naaquqara andeeqara maraquna minaki qumbiqarafa marufa. Yisunasaa kaaqa mundirafa marinau. Mi fasannai faiqí anaasee Antiooka maqusanaasa moomoo karaambaiqasaa atooqeemariqau.
ACT 11:25 Baranabasifa Antiooka maqusaindari Tarasusa maqusai ooruree Sauroonara randarara finau.
ACT 11:26 Paqurimaseenoo afiqeenoo Antiooka maqusai animaridaqara faiqí anaasee moomoo Anutuna fasaasa ufa qimannimimariqau. Moodaa aukuana miqoo maraqau. Antiooka maqannaasa miqooqari oosana araseeqa Yisuna ufa irimarusara fuka nuqu Kristiannee qimariqau. (Maasa ufakiqari asauku mundirana aiku asauku kamambiqa mariasee qimariqau.)
ACT 11:27 Mi aukuanna Yeerusaree maqusaindari fuka tamummaqara fasiqauqa Antiooka maqusai ooqu fiqau.
ACT 11:28 Miqoo maridaqa misakiqari moo fasiqa auqu Akabusafa findifinoo Anutuna maraqunannai maaqi qimasee qimanniminoo qinau. Kasooqaqee aandaroo aiqama maqa maaqaki naruannoo. (Kasooqaqee Karaudiusafa Roomma maqannaa uriqarara kiapafa maru aukuana mi aandaroofa kambiqafinoo narinau.)
ACT 11:29 Antiooka maqannaa Yisuna aiku asauku nári niqoonausa Yudeeaa maqusai marusa aandaroo narunara dadaaqiaqeera qiqau. Aiqamausa nári nimana nimana kai munnimma qumaree Baranabasina faqa Sauroona faqa nimufaqa Yudeeaa maqa maaqai nimirara ooru fiqau.
ACT 12:1 Mi aukuannai mi fasannai Eeroodeefa Yudeeaa maqa maaqai faqa Kariree maqa maaqai faqa Peereeaa maqa maaqai faqa Samaria maqa maaqai faqa misa kiapafa firaafa Eeroodeefa maridanoo Yisuna ufa irimarusa narirana oosana arasee narimarinau.
ACT 12:2 Eeroodeefa Yoohaneena afasaana Yameesana qumaree rumbaseenoo rakinoo nu paipanannai anuka ateeka aqinoo kuqammarinau. Yuda maqannaasa Yisuna ufara nikooqeemarusa miqunna qafamasee asasammiqau.
ACT 12:3 Minara asasufanoo Eeroodeefa miqiaqoo fee qimasaida kafaa miqianauree qimaseenoo Peetooroona faqa qumarararee qimarinau. Ooruku siai feemu qoomaqunaki Peetooroona maaqimasee qumaranau.
ACT 12:4 Yameesana aruseenoo Eeroodeefa kafaa miqooqari ooruku siai feemu qoomaqunaki Peetooroona qumaraseenoo ruumbeeqeenoo karafusa maqaki quqasoofaqa sundiauqa moomoo rakisimariqau. Qisaukuqara taikasee qiku dinni taikasee dinni ani moodaa marasee sundiauqa eendaki faqa faasaana faqa rakisimariqau. Ainnaaqarara qoomaqa taikafinaqa mina maariqoo aiqamausa nifusaa aruanauree qinau.
ACT 12:5 Yisuna ufa irimarusa minara iriseeqa Anutunara maqee maqee firaaqoo Anutunara innaaru qimariqau. Peetooroona sia aruanifeera miqimariqau.
ACT 12:6 Moo faasaana Eeroodeefa duna iqaqaranasaa faiqí nifusaa Peetooroona afiqaseeqa faiqí nifusaa aruanauree qimasoofanoo mi eendanakina Peetooroofa sandaandoo qimaseenoo firaa sainanda qaaraqandannai rumbaseenoo karabusa maqaki quqanau. Sundia qaaraqanda minasaa rakisimarufanoo Peetooroofa miqanda dinni dinni qambaanai faiqanau. Moo fannoo Peetooroona dinni asauku namu faqa narí asauku namufaqa moo sainanda rumbanau. Kafaa dinni asauku namufaqa moo sundia asauku namufaqa moo sainandannai rumbanau. Akaqa sundiauqa kooqiki rakisimariqau.
ACT 12:7 Mi eendana qambaanai miqiqa marufanoo karafusa maaqaki qangiroo moo kikiqinoo marufannoo kaaqa qarafa firaafa qeemarufanoo qangiroo fannoo Peetooroona afaurinoo findifua qufanoo tautumma uqeera qafoofanoo sainanda asaukuqarasaaqaraa sainanda narí kai idukuaki maqasaa aqufiqau.
ACT 12:8 Aqufufanoo qimaminau, aneenna pikapa atukarasee aneenna aiku aanaamu upeekasee rumbasee aneenna asausi faqaa siuta afisumaree findifi doo qini faqa ania.
ACT 12:9 Peetooroofa mina iriseenoo aiqama ainaina mifa undee undeemamareenoo doo mina faqa maqusai raudanau. Peetooroofa qangiroo faqa fidanoo qainasaa miqidee qinau.
ACT 12:10 Misa kooqi afaisaa rakisimaruqoo qumureenoo quminnaaqareenoo doo miqoo madaanai marusakiaqa qumureenoo doo miqoo firaa kooqi qainnannai ititara kooqiki madaanai kooqiki qumuroofanoo narikai mi qainna kooqifa atuafufanoo miqanda maqusai raudamaki fiqau. Aatata ooqufidaqa kaqikaaqoo kisaaqasaa ooqufimarufanoo qangiroo fannoo mafi aisaseenoo tautumakinoo taikafufanoo Peetooroofa naríara kai kikiqinoo marinau.
ACT 12:11 Doo narí kai kikiqinoo maridanoo narí aundurannai kai irinoo qinau. Doo qinee maqee oonumafi iridaqa sia qainau. Anutuna qangiroo fannoo qini mareeqee Eeroodeena asaukukinaana mareeqee karafusakinaana idukueeqeenoo madaanai quqeenoo. Yuda maqannaasa qiniara kuquanifeera asasiaanakinaana mareeqee kaqinni quqaqiseenoo.
ACT 12:12 Miqi qimaseenoo Peetooroofa narí marianinnanara iriseenoo Yoohaneena amarafa moo auqu Marakafa mina anoona Mariana amarana maaqai finau. Sia Yisuna anoofau mina anoona amarana mina maaqai finau. Yisuna ufa irimarusa moomoosa suqiqa marida Peetooroofa sia kuquanifeera innaaru qimarufanoo Peetooroofa madaanai aniree asukunai kooqi arinau. Arimarufanoo ainaini maru manaaqafa mina auqu Roodanammarifa kooqi atuararee qimasee ooquroofanoo Peetooroofa faandaamura kooqiki aqoosaindari kooqi arinoo kooqi atuaanee qufanoo mi manaaqafa Peetooroona ufa kai iriseenoo firaaqoo asasamaseenoo sia kooqi atuanau, kaqi quqasee sandeenoo faiqí marunnai sandee oorureenoo qimanniminau. Oo Peetooroofa madaanai kikiqinoo maridanoo fee qufaqa misa qiqau saa anee furufarida qira saa mifa karabusaki maridanoo. Miqi qufanoo Rooda nammarifa asasidanoo kooripoo kooripoo qidanoo qimannimufaqa misa qiqau. Saa mina amana mina qangiroo maridanoo fee qiqau. (Ooqai mi kamuqoo Yuda maqannaasa nári faiqí anaasee faiqi namu mai marufanoo misa qangiroo innaarunaindaraasa rakisi nimaqee mariafaqee qimariqau.)
ACT 12:16 Misa miqi qidaqa narí qimami narí qimami marufanoo Peetooroofa kaqi aqoosai maridanoo kooqi arimarinau. Miqidaqa qumu kooqi atuasee Peetooroona qafoofanoo kaaqa naaquqanau.
ACT 12:17 Peetooroofa ururee asaukunnai misa ufara qaoo qimaseenoo Anutufa narí karabusakinaana maroo ufana qimannimiseenoo moo Yameesana faqa narí aiku asauku Yisuna ufa irimarusa faqa qimannimiaqee qimasee uriqaree Eeroodeefa maaqoo paqurimasee daruandoo qimasee moosaa kukeeqarannai finau.
ACT 12:18 Iqaqoofaqa kananaana Peetooroonasaa sundiauqa rakisiusa qafoofanoo sia marufaqa firaaqoo tutuqida randee mariqau.
ACT 12:19 Eeroodeefa minara iriseenoo randaaqee qufaqa randaqanusia sia paquriqau. Eeroodeena aranaqoofanoo narí sundiauqa rakisiusa minara ireeseenoo aiqama misa naru taikanau. Miqooqari Eeroodeefa Yudeeaa maqa maaqaindari Seesareea maqusai ooqu marinau.
ACT 12:20 Tiree maqusanaasa faqa Sidoona maqusanaasa faqa mi maqusaqanda Eeroodeena ququsaki maridaqa Eeroodeena maqasaaqaraa narana marasaida neemariqau. Nári maqa mandaikunara miqi mariqau. Eeroodeefa mi maqusaqanda rairai qimannimaqee marufaqa misa naranara irisee maasa naranara fimarunna aana ititaandoo qimasee moodaanaki suqufufaqa Eeroodeena faqa asooara ufa qianee qimasee qumiqau. Ooqureeqa Eeroodeena maaqasaa rakisimaru fasiqana mina auqu Baratusa mina aqoondikamasee munnimmaina amisee anee maasara amiqira ufa kai ooquree qimami marinaqa maasa innaaqiana ooquree mina faqa ufa qianauree qimasee mina aanaaqiana ooqureeqa Eeroodeena faqa ufa qiqau.
ACT 12:21 Ufa qu faasaana Eeroodeefa narí kiapausa qammunna amiqirana afisuseenoo amiqira siaqa kiapausaindi mina muqu quqasee minasaa marida ufa qimannimimarinau.
ACT 12:22 Ufa qimannimisoofaqa mi maqusaanaaqanda fifau unna qidaqa amooqidaqa faaqa quqasaida qimariqau. Maa fasiqafa Eeroodeefa sia faiqí faiqifau moo anutufa maridanoo.
ACT 12:23 Miqi qimarufanoo Anutuna qangiroo fannoo qumee Eeroodeena kuqammarusanau Eeroodeefa misa amooqira ufa irisee sia qaoo qimasee Anutuna amooqiaqee qira ufa sia qimannimuna akiaqara doo mina kuqammarinau. Mina aundurai qimi moomoo neeneesoofanoo kuqinau.
ACT 12:24 Eeroodeefa kaqi maru aukuana Yisuna ufa taikaanifee qimasaidanoo mina ufa irimariusa narinoo rumbeenoo imarinau. Anutuna ufa fannoo sia taikeenoo sia kaqi maruqoo kai marinau. Firaaqoo daraaninoo doo fifaininau.
ACT 12:25 Baranabasifa faqa Sauroofa faqa Antiooka maqusanaasa Yisuna ufa irimarusa munnimma auqusoona muru Yeerusaree maqannaasa nimisee Yeerusaree maqusaindari kafaa ururandee Antiooka maqusai kafaa ooqu fiqau. Miqanda moo kumaaraa qaara auqufaqaana moo auqu Yoohaneena amarafa moo auqu Maraka mi kumaaraana faqa afiqee Antiooka maqusai ooqu fiqau.
ACT 13:1 Antiooka maqusai Yisuna ufa irimarusaki Anutuna tamummaqara fasiqa akaqausa mariqau. Anutuna ufara qimannimimarusa akaqausa mariqau. Misa nuqu Baranabasifa faqa Simeeoonara dunduqarira fee qimarufa faqa mariqau. Rukiusafa Sireenee maqusaindaraafa moo fannoo marinau. Manaeenafa Eeroodeefa narí maaqaki firimarufa moo fannoo marinau. Sauroofa faqa marinau.
ACT 13:2 Mi namusa moodaanaki marufaqa maridaqa qusasaa narana minnisee naarara maridaqa Anutunara innaaru kai qida mariqau. Miqi marufanoo naaquqara andeeqara maraquna fannoo qimanniminoo qinau. Innee Baranabasina faqa Sauroona faqa mara quqasai naaduma quqasaifaqa miqanda naaduma qinee moo saika nimianauranoo qufaqa misa mi ufana irisee sia narana narai kaqi innaaru qimariqau. Innaaru qimasee Sauroona faqa Baranabasina faqa nisauku misasaa quqasee doo niqiqaqau.
ACT 13:4 Baranabasifa faqa Sauroofa faqa naaquqara maraquna fannoo niqiqoofaqa Seereeusia maqusai ooquree sipaki akaramafufaqa Sipurusa maqa maaqai fiqau. (Sipurusa maqannaasa aanaamuru naaduma ufa qimarusa mariqau. Yuda maqannaa akaqausa misaki oonu mariqau. Baranabasifa mindaraa Yuda maqannaafa maridanoo narí maaqai finau.)
ACT 13:5 Sipa fannoo Sipurusa maqusa moo auqu Saramisa maqusai munu quqasoofaqa miqanda sipakiqari maqasaa aqufufaqa Yuda maqannaa miqoo marusa ufa suqira maqaki keeqafufaqa Anutuna fasaasa qira ufa miqoo Yuda maqannaasa qimannimimariqau. Mi kumaaraafa moo fannoo misa faqa fufa Yoohaneena amarafa moo auqu Marakafa mifa faqa dadaaqidanoo qimannimimarinau.
ACT 13:6 Sipurusa maqa maaqa ooruku nammari fiqu fiqu inoo marufanoo firaa afuma marufaqa faiqí anaasee maqusa moomoo marinau. Sauroona faqa Baranabasi faqa, misa Saramisa maqusaindari maqamau fifiufaqa mi maqa maaqana dinni ati Paafoosa mi maqusanai fiqau. Mi maqusanaki afunee fasiqa moo paquriqau Yuda maqannaafa marufa marinau. Mina auqu Barayisunee qimariqau. Mifa nariara tamummaqara fasiqa fee qimarufa unna qirafa marinau.
ACT 13:7 Mi maqa maaqanaki maru kiapana auqu qaara auqu faqaafa marinau. Moo auqu Seerakiusafa moo auqu Paurusafa marufanoo uriqarara kiapafa marufanoo mi afunee fasiqafa mina aqoondi marinau. Mi kiapafa irirana faqaafa marufa mifa Baranabasina faqa Sauroona faqa naaramasee qinau. Aniree Anutuna ufa qifaqa iria qufanoo afunee fasiqa fannoo minasaa ititeemarinau. Kiapafa sia Yisunara irianifeera miqi marinau. Mi afunee fasiqana moo auqu Kirisa ufakiqari Eerimasa marinau.
ACT 13:9 Sauroona moo auqu Pauroonee qimariqau. Pauroofa Eerimasana rafaaqafiranara qafamasoofanoo naaquqara maraquna fannoo aakufunanoo afunee fasiqa ooriki qafamaseenoo qimaminau.
ACT 13:10 Anee Sadannana amaaku marianafa mariananoo anee aiqama ainaina andeeqara ainaina namuqaa marianafa mariananoo. Anee mandainaina nikaru qira ainaina aniki qumbiqanoo marifa mariananoo. Anee maqee maqee Anutuna kuqaa anoonufa qumareenana uiqaa iqammeeqeenana nimimarianna fasiqafa mariananoo.
ACT 13:11 Doo maqee Anutuna asauku fannoo ani rafaaqa fuannoo. Ani afuqara dimbafinana sia suani kaaqa qarana qafeennaranoo. Miqi qimasoofanoo afu aiqamaqara dimbanau asukuna arufufanoo miqoo miki makamminau. Yafee qini qisauku qumareenoo aana uqaqifiqaanoofee qinau.
ACT 13:12 Kiapafa mi fasiqana afu dimbarana qafamaseenoo Karaambaiqa fasaasa ufa irisoofanoo aaquqoofanoo kuqaa anoona fee qimasee irinau.
ACT 13:13 Pauroofa narí aqoonausa faqa Paatoosa maqusaindari maqamau ooruku nammari afainni ooqureenoo sipaki akara mafufanoo nammari amuaqumau Pamafiria maqa maaqaki Peeraka maqusai mi sipanaki finau. Miqoo oonureenoo Yoohanee moo auqu Marakafa akooqoofanoo quqaseenoo Yeerusareenni anirandee kafaa moo sipaki finau.
ACT 13:14 Baranabasisa faqa Pauroosa faqa Peereeka maqusaindari Pisidia maqa maaqai moo Antiooka maru maqusai maqamau fiqau. Miqoo oonuree marikiqa Yuda maqannaa misaki animarusa ufa suqira maqaki keeqafi ooqumariqau. Saririqasaa nári amaanasaa keeqafi ooqu mariqau.
ACT 13:15 Yuda maqannaa amaana maqasaa rakisirausa Mooseena sandufa faqa tamummaqara fasiqauqa ufa faqa asaana rumaseeqa Baranabasina faqa Pauroona faqa qafamasee qimannimidaqa qiqau. Oo maasa qikaqaafasaa inneeqara aamua qira ufa inniqaraki marinaqa faiqí anaasee qimannimifaqa maasa iriaqa.
ACT 13:16 Pauroofa findifinoo asaukunnai misa rafaaqa finoo qinau. Doo qinee qimannimianaura. Miqi qimaseenoo findifi maaqi qimasee qimanniminau. Oo qini qiqoonausa Isaraee maqannaa faqa aanaamuru mariasa faqa maa maqanaki Anutunara innaaru qimariasa qini ufa iriaqa.
ACT 13:17 Isaraee maqannaasa Anutufa maasa qikeeku qikaaku rusandeesamu mandeenoo nári maqusa minnisee Isipa maqa maaqai ooqureeqa faiqí asumu areeqa moomoosa kambiqaqau. Anutufa narí afeekannai nifiqeeqeenoo aadana maqasaa quqaseenoo qaara fasiqa niku nisauku taikasee aukuanasaa misa faiqí anaasee qummaara Anutuna arufanoo sia narinau, faiqiara maqi aakuseenoo rakisi nimaqeemarinau.
ACT 13:19 Miqooqari Kannaana maqa maaqaki marusa qisauku taikasee dinni ani qaara marasee maqannaasa naru taikaseenoo Isaraee maqannaa mi maqana Anutufa nimisoofaqa 450 aukuana kisaaqasaa moomoo aukuana minaki mariqau. Doo miqooqari faiqí anaasee rakisiaqeera Anutufa faiqí moomoo saika mafufaqa maridaqa rakisinnimaqee mariqau. Misa marikufanoo tamummaqara fasiqa Samueerafa kambiqanau. Siaasaiuqa fifiufaqa doo Samueeranasaa munu taikanau doo miqooqari tamummaqara fasiqauqa mariqau.
ACT 13:21 Maasa qikeeku qikaaku moo karaambaiqaikamma sainaqa maasaki mariani fee qufanoo Anutufa Beesaminna ati Sauroona amarana Kisana amaaku mina niminau. Sauroona amarafa qaara fasiqa niku nisauku taikasee aukuana rakisinnimaqee marinau.
ACT 13:22 Anutufa mina mafi afeeqasee Dafidina karaambaiqaikinau. Karaambaiqaika maseenoo Anutufa maaqi qimasee Dafidinara qinau. Dafidifa Yeeseena amaaku marifa qinee minara dididanoo. Mifa qini iriranamau fimarifa maridanoo naaru miqikai inoo qini iriramau fuannoo.
ACT 13:23 Dafidina ati moo fannoo Yisuna Anutufa mareeqeenoo Isaraee maqannaa asumu maree marianinnanara quqanau. Narí tamummaqara ufamau kai Yisuna quqanau.
ACT 13:24 Yisufa aniree qimannimira aukuana adeedi roofanoo Yoohaneefa nammari nimimarufa aiqama Isaraee maqannaasa maaqi qimasee qimanniminau. Inneeqa mandainaina minnisee Anutunai ubeekamafiqa mina ufa irisee nammari marasee mariaqa.
ACT 13:25 Yoohaneefa nammari nimimarufa mina saika aukuana taikaidanoo maaqi qimasee faiqí anaasee qimanniminau. Innee qiniara yafasiqanee fee qidaqee. Sia qinee innee afeesimaria fasiqausau maridau. Doo mifa qini qinaaqianna qusasaa aniraannoo. Mifa andeeqarafa mariannoo. Qinee mina ureeqarausa uqanna maridaqa, sia amana mina kaqikaaqoo dadaaqianaura.
ACT 13:26 Oo qini qiqoonausa Abarahaamana akeeku akaaku mariasa aanaamurundari aniree innaaru qimariasa faqa Anutufa maasa qumaraaninna ufana qiqaki quqeenoo.
ACT 13:27 Yeerusaree maqusanaasa tamummaqara fasiqa ufa asaana rumasee sia mina oosana amiqimandee irisee Yisuna qafamasee sia maasa asumu qumaraaninna fee qimasee tamummaqara fasiqa ufamau Yisuna arirariqau.
ACT 13:28 Misa mina arirufara randoosia Piratoofunnai afiqee munusoofanoo qufaqa ariqau. Aruseeqa tamummaqara fasiqa ufa undee undee kaimma taikaseeqa doo mina iri aunirira saqarisaa qaraana tatusee doo akundaqau.
ACT 13:30 Qaaramoo suanisaa marinoo Anutufa mina kafaa mara findifinau.
ACT 13:31 Findifumasoofaqa faiqí anaasee moomoosa kaqi maru kamuqoora mina faqa Kariree maqa maaqaindari Yeerusareenni nidaqa qafamaqoosa findi funa qafamaseeqa mifa findifunara Isaraee maqannaa qimannimidaqa kooroo idaqa.
ACT 13:32 Maasa mi amiqira fasaasa ufana mai aniree inni qimannimirara anidaqa. Ooqai maasa qikeeku qikaaku qima afeekaikamaqoona anoona kuqiranakinaana uqeera findi finannai maasa kooroomaqiminoo.
ACT 13:33 Dafidina idi akara firaa kamu 2 Anutuna ufara maaqi qinau. Anee qini qimaaku mariananoo Maqee qinee ani akausaikidaqa.
ACT 13:34 Kafaa Anutufa Yisunara kuqiranakiqari findifuaninnanara faqa sia putaaianinnanara faqa maaqi qinau. Qinee oosana oosana naaquqara amiqi amiqirana Dafidinasaa qima afeekaikamma qaafannana mina anisaa quqaanaura.
ACT 13:35 Minara Anutufa kafaa maaqi qidanoo. Anee aneenna kaaqa andeeqara fasiqa sia mina amaqi putaa irana amaqeennaranoo.
ACT 13:36 Dafidifa narí maru aukuannai Anutuna ainainirafa marinoo doo kuqinau. Kuqufufaqa mina iri mareeqee narí akeeku akaaku marunaki akundaqau. Miqimasoofanoo amaqi putaa inau.
ACT 13:37 Moo fannoo kuqiranakinaana Anutufa mara findifumasainafa mina amaqi sia putaa iannoo. Dafidifa minara akara rumaqoofa maridanoo.
ACT 13:38 Maa qini qikaqaafasaa Antiooka maqusai mariasa maa ufana amiqimandee iriaqa Innindi maridanoo. Inni numoo arirana minninnisarafa Yisufa maridanoo minara marifaqa maasa inni qimannimidaqa. Mooseena sandufa sia faiqí anaasee amana nári mandainaina sandara foora rumbannimaqaqoofa sia amana idukifaranoo. Aiqamatia Yisunara irirana rusiranannai kai minannai kai inni numoo akiaqa taikannisaannoo inni mandainaina sandara foora rumbarana idukunnisaannoo.
ACT 13:40 Innee maqee amiqimandee rakisiaqa ooqai Anutuna tamummaqara fasiqa moo fannoo aaquqimannimaqaqoofa innisaa kambiqaandoora. Mifa maaqi qimasee akara rumasee qinau.
ACT 13:41 Innee iriaqa, inni kuqaa naruaninna ainainara qimannimiafaqa innee mafi uteeti qimasaidaqa amarau qimariasa. Mi ainainna inni nifusaa kambiqainaqa qafamasee tautumasee kuqifaranoo. Innee maria kamuqoo qinee moo ainaina firaa ainaina auqusaananoo moo fannoo minara qimanniminaqa innee minara unna fee qifaranoo. (Pauroofa mi tamummaqara fasiqana ufannai aaquqimanniminoo qinau. Innee maqee ooqeenaasa naana ramasee Anutuna ufara unna fee qifoora. Innee maqee aukuana Yisunara unna fee qifoora.)
ACT 13:42 Pauroosa Baranabasisa Antiooka maqusai ufa suqira maqakiqari raudoofaqa faiqí anaasee maaqi qimasee qimannimiqau. Amanee inneeqara kafaa oonurandee moo Saririqa kafaa aniree qimannimiaqa.
ACT 13:43 Eedoo qimasee miqanda fufaqa Yuda maqannaa faiqí anaasee moomoosa faqa aanaamuru Yuda maqannaa amaana ufa irimarusa misa faqa miqanda nifaqee fimariqau. Mi niqiqoo fasiqaqanda mi fasiqa anaaseesa fuki faaki qimasee qimannimiqau. Innee maqee maqee Anutuna kaqi nimiranaki mariaqee qimasee marikinoo moo Saririqasaa Yuda maqannaa amaana maqaki keeqafufaqa mi maqusaanaasa aiqama Anutuna ufa iriraree qimasee keeqaqau.
ACT 13:45 Yuda maqannaasa moomoo aanaamuru nindafamaseeqa misa naundurai kaukaataqirafa qumbiqafufaqa Pauroona ufa rukiaidaqa manda ufa sukufa kai qimariqau.
ACT 13:46 Pauroosa Baranabasisa mina iriseeqa paasoosamandee ufa qimannimiqau. Anutufa narí ufara Yuda maqannaasa naaree qimannimiaqee qimaqoona doo inni qimannimiqaunaqa innee minara qaoo qimasee ititee mariafanoo. Innee inneeqara sia amana naaru naaru marirana maraanauree qidaqee miqidaqa ititeemariafanoo. Innee miqianara inni minniseeqa quandaki aanaamuru qimannimianaura.
ACT 13:47 Karaambaiqa fannoo maasa maa ufana qimaqimifaqa mai anidaqa aanaamuru qimannimianaura. Qinee inni niqiqeeqa aanaamurukiaqa qoomaikiaqeera kaaqa qaranara qimannimia. Aiqama aanaamuru maqa maaqaki mariasa innee misa innaarunai fimaria aannanara qimannimiaqeera niqiqaidaqa.
ACT 13:48 Miqoo aanaamuru marusa mi ufana iriseeqa asasammaseeqa karaambaiqa fasaasa ufara dufi dufi qidaqa amiqira ufa fee qimariqau. Misakina Anutufa rusandeesamumandoosa doo Yisuna saqarikiqa naaru mariranaki keeqaranara oosana araqau.
ACT 13:49 Miqimasoofanoo miqooqari misaqa dinni dinni marusakina doo karaambaiqa ufa fannoo daraaninau.
ACT 13:50 Yuda maqannaasa miquna qafamaseeqa aanoomaseeqa mi maqusanai faiqí firaasauqa faqa aanaamurukina Yuda maqannaa amaana ufa irimaru anaasee uriqararausa faqa nirana fundakusoofaqa Baranabasina faqa Pauroona faqa mareeqee aqoosai aqusaqau. Aqusoofaqa miqanda findifufaqa kookoomma afaqa qumareeqa misa ninaamu araseeqa quqasee Antiooka maqusaindari Ikooniumma maqusai fiqau.
ACT 13:52 Miqanda fufaqa mi maqusaanaasa Antiooka maqusanaasa Yisuna ufa irimarusa naaquqara maraquna fannoo naakinoo qumbiqafufaqa asasimariqau.
ACT 14:1 Pauroosa Baranabasisa Ikooniumma maqusai oonuroofanoo Antiooka maqusai kambiqoo ainainafa mina amana kai Ikooniumma maqusai faqa kambiqanau. Miqanda Yuda maqannaa amaana maqaki keeqaqau. Keeqafiqa amiqimasee qimannimunara Yuda maqannaasa faqa aanaamuru marusa faqa moomoo uqanna Yisunasaa mundiqau.
ACT 14:2 Yuda maqannaa akaqausa ufa rukiaseeqa aanaamuru qimannimidaqa ueeqasoofaqa iriseeqa misa faqa Pauroosa Baranabasisa ufara manda ufa fee qimaseeqa ufa rukiaqau.
ACT 14:3 Miqunara miqanda kisaaqasaa mi maqusanaki maridaqa paasoosamandee karaambaiqa dadaaqunara afeeka nimufaqa faiqí sia auqaaqaa ira ainaina faiqí anaasee dadaaqi maru ainaina oosana oosana auqusoofaqa faiqí anaasee qafeeqa tautumasee qiqau. Oo kuqaa uqanna miqandakina karaambaiqa kaqi nimira ufa kuqaa anoona maridanoo fee qiqau.
ACT 14:4 Mi maqusaanaasa qambaana rainaqau. Rainafiqa akaqafa Yuda maqannaasasaa atooqaqau. Akaqafa niqiqoo fasiqausasaa atooqaqau.
ACT 14:5 Anaamuru ufa rukiee marusa faqa Yuda maqannaasa faqa nári faiqí firaasa faqa moodaanaki suqufufaqa ufa qi qisee oonisamu Pauroosa Baranabasisa naruanee qufanoo moo fannoo aaquqimannimaqoofaqa miqanda mi ufana iriseeqa quqaseeqa rufiamareeqa Rikaoonia maqa maaqai sandaqau. Rikaoonia maqa maaqaki maqusauqa moomoo marufaqa qaara maqusa moodaaqoo maruqanda moo maqusa auqu Ristara, moo maqusa auqu Deerabee marufaqa doo miqanda Ristara maqusai naaree fiqau.
ACT 14:7 Miqoo oonu maridaqa Ristara maqusaki faqa Deerabee maqusaki faqa misaqa maru maqusausakiaqa faqa amiqira fasaasa ufa misa faqa qimannimimariqau.
ACT 14:8 Ristara maqusaki faiqí moo aiku mandaikirafa marinau. Maqookari mi kamuqooqari miqinoo marufa marinau, sia aana nufa.
ACT 14:9 Mi fasiqafa Pauroona ufa kaaqa irimarufanoo Pauroofa oonurama qafanau. Qafamasee maaqi qimirinau. Maa fasiqana irirafa Yisunasaa rusinoo marifa amanaikirafa maridanoo amana findifuannoo qimaseenoo mi fasiqana oori qafamaseenoo firaa kari maaqi qimasee qimaminoo qinau. Anee findifua. Andeeqaseenana rutaqina findi fua. Miqi qufanoo mi fasiqafa rutaqi findifinoo doo maqusamau oonuree aniree inau.
ACT 14:11 Faiqí anaasee mina qafamaseeqa faaqa fuisee qidaqa tutuqidaqa nári ufakiqari Rikaoonia ufakiqari maaqi qiqau. Anutuqanda faiqikamambi doo maasaki qumu maridaqa nidaqa, Yisufa niqiqoo fasiqaqandara Anutuqandee qiqau.
ACT 14:12 Mi maqusaanaasa Anutufara maqi unnaqira anutuqanda nimana auquqoofa misaki mariqau. Moo fannoo ureeqarafa ufa akoofasa mina auqu Eerameesafa marinau. Mi maqusaanaasa aiku mandaikirafa findifirana qafamaseeqa Pauroosa Baranabasisara maasa anutuqanda qumu maridammia maqi qimasee Baranabasinara anee maasa uriqarara anutufa ani auqu Seeusanee qiqau. Pauroonara anee ufa akoofasa maridana maasa ureeqara anutufa ani auqu Eerameesanee qiqau.
ACT 14:13 Misa firaa Anutuna Seeusana amaana maqa mi maqusana naambeeqai marinau. Mi amaana maqanasaa aanaiqikirafa Baranabasisa Pauroosa niqafamaseenoo tatufira aandau suqasee nimisee innaaru qiaqee qimaseenoo burimakau akoonauqa rarisamammaree minisee mina anukaki kukuqamma quqasee rarisamammareeqa faandaamura kooqiki munusoofaqa faiqí anaasee aiqama suqusee aniroofanoo Baranabasisa Pauroosa misa tatufirana suqaqimidee qimasoofanoo nikooqoofanoo kakeenna qaoo qiqau. Kakeenna qaoo qufaqa sia irufaqa miqanda nári qamunna qumaree rakeemmaqusee faiqiki oonuree aniree faaqa quqasee qimannimiqau. Maaqanda faiqí faiqi maridaqa. Inni fooqaasa maridaqa, sia anutusa maridaqa. Maasa anoona Anutuna amiqira fasaasa ufa qimannimirara anidaqa. Innee maa maaqiana fifau dapi ainaina maridanoo mina minnisee quandakinaqa kaqi marira Anutunara iriaqeera anidaqa. Mi kaqi marira Anutufa mifa kai innaaruna faqa maqa faqa ooruku nammari faqa minakimari ainaina oosana oosana faqa auqu quqanau. Ooqai mifa faiqí aanaaseera inneeqa manda iriramau kaqi fuaqee qimarinau.
ACT 14:17 Mi kaqi marira Anutufa innaarunaindaraa aaku faqa narana oosana oosana narí aukuanasaa moo narana narí aukuanasaa moo narana nimimarifa maridanoo. Innee mina qafamaseeqa innee faqa maraseeqa minara kai asasimariafanoo. Mi ainainna miqimarianannai narí marina kooroomannimidanoo. Innee mina qafeeqa minara kai asasiaqa. Faiqí anaasee mi ufana iriseeqa kaqikaaqoo indee indee qidaqa kafaa kaqikaaqoo mara mara ridaqa tatufira aandau nimianeera qimariqau.
ACT 14:19 Antiooka maqusa amarafa Pisidia maqa maaqaki moo Antiooka maqusa marinau. Mindaraa Yuda maqannaa akaqausa faqa Ikooniumma maqusaindari akaqausa faqa moodaanaki suqufufaqa Ristara maqusai oonureeqa miqooqaraasa faqa ufa qi qiseeqa Pauroona qumareeqa maqamau rarisaqa fifiufaqa faandaamura aqoosai aquseeqa oonisamu suqu qumaree misamuna Pauroona arimariqau.
ACT 14:20 Doo kuqinoommifoo qimasee quqasee fufanoo Pauroofa Yisunara ufa qimannimimarufaqa Yisuna ufa irimarusa mina aaqa anifiqu fiqu mambufanoo Pauroofa narí kai misa qambaanai findifinoo doo quqasee maqusai kafaa keeqanau. Iqaqoofanoo kananaana Pauroosa Baranabasisa findimaqee Deerabeera maqusai fiqau.
ACT 14:21 Miqoo Deerabeera maqusai oonu maridanoo amiqira fasaasa ufa qimannimi marufaqa moomoosa Yisuna aiku asauku kamambiqau. Deerabeera maqusanaindari Pauroosa Baranabasisa oonurandee aniree kafaa Ristara maqusai oonisamu aru maqusanai kafaa ani kaqikaaqoo marikiqa quqasee Ikooniumma maqusai kafaa ooqu fiqau. Miqoo faqa kaqikaaqoo mariqa quqasee Pisidia maqa maaqaki moo Antiooka maqusai kafaa fiqau.
ACT 14:22 Mi maqusausakiaqa nidaqa Yisuna ufa irimarusa fuki faaki qimaseeqa qiqau. Innee Yisuna ufasaa mundufiqa kuqaa anoonaikiaqa. Maasa aiqama moomoo mandainainaki maraqa kadaapiriqa fifi iqa Anutuna ququsaki keeqaanauree qidaqa. Minara innee faqa sia minnisaaqa kaqikai fuaqa.
ACT 14:23 Aiqama maqusakiaqa nidaqa Pauroosa Baranabasisa Yisuna ufa irimariasakinaana qumareeqaida rakisirausaiki mariqau. Quqasaida narana minnisee innaarukai qiaqee qimasaida maqee nariqa fukasaa karaambaiqasaa irirana rusimariasara misara rakisiaqee qimasee quqaqau.
ACT 14:24 Pauroosa Baranabasisa Pisidia maqa maaqaki oonuree aniree maseeqa Pamafiria maqa maaqai kafaa anirandee fiqau.
ACT 14:25 Miqoo miqanda Peeraka maqusai Yisuna fasaasa ufa qimannimiseeqa ooruku nammarinni Ataria maqusai ooqu fiqau.
ACT 14:26 Ataria maqusaindari sipaki akaramafufaqa Antiooka maqusai kafaa fiqau. Ooqai indaaru Antiooka maqusai oosana araqau. Miqoo Yisuna aiku asauku miqanda raineeqee Anutuna asaukuki quqasoofaqa Inneeqara karaambaiqa ufa maraqa nuaqee qimasoofaqa mi saikana maraqa nimariqau.
ACT 14:27 Baranabasisa Pauroosa Antiooka maqusai anireeqa Yisuna ufa iri marusa aiqama suqu quqaseenoo Anutufa miqandannai aiqama ainaina naamuaqinoo uqannifiqeenoo qimaseenoo Anutufa miqandannai aanaamuru kooqi atuasoofaqa misa faqa Yisunara iridaqa.
ACT 14:28 Miqi qimannimiseeqa miqoo Antiooka maqusai kisaaqasaa mariqau.
ACT 15:1 Yudeeaa maqa maaqakinaasa Yisuna ufa irimarusa akaqausa Antiooka maqusai ooqureeqa Yisuna ufa irimarusara maaqi qimasee unna qidaqa naamua qiqau. Innee Yisuna ufamau kai fidaqa sia Mooseena sandamau fimariafanoo sia fainanduqirausa sia innaarunai asumu mareefaranoo fee qiqau.
ACT 15:2 Pauroosa Baranabasisa mi Yudeea maqannaa fasiqausara qaoo qimasee mi ufanara firaaqoo ufa qi qisee ufa rainaqau. Miqi qimaseeqa misa moodaa ufa qimaseeqa qiqau Pauroosa Baranabasisa akaqausa maaqooqaraasa saimbaqa Yeerusareenni ooru fuaqa. Oorureeqa Yisuna afaaqasaa aqoondiuqa qimannimifaqa maa ufanara naqaa naqaa fee qifaqa oorurandee qumuree qifaqa iria.
ACT 15:3 Antiooka maqusanaasa Yisuna ufa irimarusa misa niqiqamasoofaqa Yeerusareenni ooru fidaqa ooriqaree Fooeenisia maqa maaqai faqa Samaria maqa maaqai faqa Pauroosa Baranabasisa nariqa niniunara faqa aanaamuru moomoosa quandaki Anutufinnai ubeekoonara faqa qimannimiqa fimariqau. Yisuna ufa irimarusa minara iriseeqa firaaqoo asasiqau.
ACT 15:4 Yeerusareenni minamusa ooruroofaqa Yisuna ufa irimarusa miqoo marusa faqa nári faiqí firaasa faqa Yisuna afaaqasaa aqoondiuqa minamusa ooqu nifiqeeqee quqasoofaqa maridaqa Baranabasisa Pauroosa nári niniuna oosana oosana aamina maqannaa moomoosa Yisunasaa atooqeeuna mi fasaasausa qimannimimariqau.
ACT 15:5 Farisai amaana ufa qimarusa akaqausa Yisuna ufa irisee mina aiku asauku faqa miqoo Yeerusareenni mariqau. Misa faqa Baranabasina faqa Pauroona faqa ufa irisee findifiqa maaqi qiqau. Anaamuru mariasa Yisuna ufara eedoo qidaqa sia kaqi mariaqa maasa Yuda maqannaa fainanduquseeqa Mooseena sandamau fidaqa innaaruna aana mareefaranoo.
ACT 15:6 Yisuna faiqi namu niqiqoo fasiqausa moomoosa misa faiqí firaasa faqa minara iriseeqa moodaanaki suqufufaqa ufa qimariqau.
ACT 15:7 Kisaaqasaa mi ufana qida mariqau. Miqi marufanoo nindafoosia Peetooroofa findifi maaqi qimasee qimanniminoo mi ufana rafaaqafinau. Qini qikaqaafasaa Anutufa sia maasa kaifau, aanaamuru faqa amiqira fasaasa ufa irisee eedoo qiaqee qimaseenoo innikinaana qini qumareenoo, anee oosana areenana aanaamuru qimannimia qufaqa miqimmiqiafana.
ACT 15:8 Anutufa faiqí aiqama nimuqusa naundura irimarifa maridanoo. Mifa aanaamuruara faqa eedoo qimaseenoo naaquqara maraquna maasa undee miqikai inoo misa faqa niminau.
ACT 15:9 Sia maasa faqa misa faqa raineenoofau qinau, amanamana kai fee qimasee misa mandainaina numoo nariqa Yisuna saqarikiranannai mininnisanau.
ACT 15:10 Anutufa miqimmaqaifaqa innee nanaree firaa qumaara mareeqee fifau misa nifaariki quqaidee. Mooseena sandufa qaaraikinoo maridanoo amiqirafa faqa ummaara nimarifa faqa marinara maasa qikeeku qikaaku maasa faqa qumaara tafirana sia amanaiki mariafanausa maridaqa.
ACT 15:11 Innee sia miqiaqa. Maasa Yisuna saqarikamasoofanoo Karaambaiqa Yisufa narí afaariranannai maasa utaaqeenoo. Anaamuru miqi kai masaafanoo doo misa faqa miqikaimminoo utaaqamannimaqeenoo.
ACT 15:12 Peetooroofa miqi qimasoofaqa aiqama daimambi irimarufanoo Baranabasisa Pauroosa nári niniunara oosana oosana qimannimufaqa iriqau. Miqanda aanaamurukiaqa nimarufanoo Anutufa miqandannai faiqí sia auqaaqaa ira ainaina auqusoofaqa faiqí anaasee qafoonara mi ufana miqoo Yeerusareenni suqimariasa qimannimimariqau.
ACT 15:13 Baranabasisa Pauroosa ufa taikasoofanoo Yameesafa findifinoo ufa moo qimanniminau. Oo qini qikaqaafasaa qini ufa iriaqa.
ACT 15:14 Anutufa aanaamuruara amuqusufanoo misakinaana akaqausa mareeqeenoo nariara narindikiaqeera maranau. Mi ainainna oosanara Peetooroofa faasai maasa doo qimaqiminoo.
ACT 15:15 Doo miqunaki ooqai tamummaqara fasiqa akara kooroo inau. Minara maaqi qimaqoona.
ACT 15:16 Qinee kasooqaqee kafaa qumuanauree qinau. Qumureeqa Dafidina aiku asauku maaqa rapeeiara maqi inoo marifaqa kafaa qumuree usakaanaura. Mina maqusa urisinoo marifaqa mina faqa rukianaura.
ACT 15:17 Miqianaqa maaqanna maaqanna karaambaiqara randaaqeera. Aiqama maqannaasa naaraanausa qini ufara anifaranoo.
ACT 15:18 Qinee karaambaiqa ooqai maa ufausa kooroo qiafanausa maridaqa.
ACT 15:19 Yameesafa mi tamummaqara ufana qimannimiseenoo nariara qinau. Qinee maa ainainnara irunafa maaqimminoo maridanoo. Anaamuru mariasa moo maqannaasa quandaki Anutufinnai ubeekeemariasa sia kadaapi fifau ruanaura.
ACT 15:20 Sia misa miqifaqa maasa akara kai rumeeqee misa nimianaura. Akaqa ufa maa ufausa kai uqannifiqaanaura. Faiqí moo fannoo narana maraseenoo moo unnaqira Anutunara innaaru qimasee aminana miqira narana sia naaqa. Faiqí anaasee narí ummuari narí ummuarinnanara sia mina maraaqa. Aandau moo anukaki ataakirarana fidika kaqi maaqinaki marinnana siamma naaqa. Fidika kaqinni tati aqusee amaqi kai naaqa, fidika sia mina naaqa. Doo miqi kai qimasee qimannimiaqa.
ACT 15:21 Aiqama maaqanna maaqanna mariasa aiqama Saririqa Yuda maqannaa amaana maqakina Mooseena sandufa ooqaindari aukuana aukuana aanaamuru asaana rumasaidaqa qimannimimariafaqa Mooseena sandufa oosana oosana amana irifaranoo. Maasa miqi kai iqa anoona ainaina kai qimannimianaura.
ACT 15:22 Yisuna ufa irimarusa aiqama Yeerusaree maqusakinaasa Yisuna faiqi namu niqiqoosa faqa faiqí firaasa faqa Yameesana ufa irisee eedoo qimaseeqa qiqau. Maasa qeeqakina akaqausa suqumareeqa Baranabasina faqa Pauroona faqa Antiooka maqusa niqiqaifaqa ooqureeqa mi ufana qimannimiaqeera. Miqi qimaseeqa faiqí moo auqu Yudasifa mina moo auqu Barasabasi mina faqa Sirasina faqa mara quqaqau. Aiqamausa miqandara amiqira fasiqa andeeqaraqandee qimarusa mariqau. Misa miqanda mareeqee Sauroosa Baranabasisa nimiseeqa papiqa akara rumeeqee nimiqau.
ACT 15:23 Mi papiqanaki ufa maaqimminoo marinau. Innee Antiooka maqannaa faqa Siria maqannaa faqa Sirisia maqannaa faqa sia innee Yuda maqannaafau mariafanoo, aanaamuru mini maqaqoosa mariafanoo maasa Yisuna faiqi namu mifa niqiqoosa faqa faiqí firaasa faqa maasa inni nikaqaafasaa nifasausamara inni nimandaidaqa.
ACT 15:24 Maasakiqari faiqí akaqausa nári kai innee unnai ooqureeqa fainanduqira ufa faqa Yuda maqannaasa sandufa oosana oosana faqa qimannimufaqa iriseeqa qaara irirana maraqau. Sia maasa niqiqaafanau ooqu fiqau. Nári iriranannai ooqu fiqau.
ACT 15:25 Maasa minara iriseeqa moodaanaki suqufiqa ufa qimaseeqa Baranabasina faqa Pauroona faqa qaara fasiqa mara quqasaafaqa miqanda faqa innee iannai ooqufifaranoo. Minamusa inni ufa qimannimiaqeera.
ACT 15:26 Baranabasisa Pauroosa sia kuqiranara rufieemariasa kai paasoosamasee Karaambaiqa Yisuna asauku mundirafa mina saika uqeeree mariasa maridaqa.
ACT 15:27 Maasa indaaruqaa Yudasina amarana faqa Sirasina faqa innee iannai niqiqaanaqa ooqureeqa papiqakinaa ufa nookiqari qimannimifaqa iriaqa.
ACT 15:28 Anutuna naaquqara maraquna fannoo maasa faqa moodaa karakaimmidanoo. Sia maasa moomoo sandufa innisaa quqaanaura. Maa qaaramoo sandufana kai innisaa quqaanaura. Maa qaaramoo firaa ufa namuna kai inni nimianaura.
ACT 15:29 Faiqí moo fannoo narana maraseenoo narí moo unnaqira anutunara dufi dufi qimaseenoo inni niminafa sia mina naaqa minnisaaqa. Innee aiqama aandau fidika sia naaqa. Ataakirara aandau sia mina amaqi naaqa. Faiqí anaasee narinni narinni ummuarirana sia maraaqa. Innee maa qinee qunnainaina sia mareeqa amiqiranaki marifaranoo. Doo maa ufana taikeenoo.
ACT 15:30 Yisuna faiqi namu Yeerusaree marusa mi akarana rumeeqee ufa maree marusa nimufaqa mareeqa Antiooka maqusai ooqu fiqau. Antiooka maqusai ooqureeqa Yisuna ufa irimarusa suquseeqa papiqakinaa ufa asaana rufaqa irufanoo amiqikaimminau. Mina iriseeqa firaaqoo asasamaseeqa qiqau. Maa ufafa maasa pooduqara ufa maridanoo fee qiqau.
ACT 15:32 Yisuna ufa irimarusa nariara nariara qikaqaafasaa fee kai qimariqau. Yudasina amarafa faqa Sirasafa faqa Anutuna tamummaqara fasiqaqara maruqanda. Miqanda kisaaqasaa nári nikaqaafasaa faqa maridaqa pooduqara ufa faqa qimannimimariqau.
ACT 15:33 Yeerusareendari qumusa mariufaqa Antiooka maqannaa Yisuna ufa irimarusa susummasee nimandamasoofaqa Yeerusareenni kafaannai ooru fiqau.
ACT 15:35 Pauroosa Baranabasisa miqanda sia Yeerusaree maqusai ooru fiqau kaqikaaqoo kisaaqasaa Antiooka maqusai mariqau. Miqanda faqa akaqausa namufaqa karaambaiqa ufa oosana oosana ufa asaana rumasee naamua qimannimimariqau.
ACT 15:36 Mariufanoo Pauroofa Baranabasina qimaminoo qinau. Doo findifinaqa anindiri ooqai niniaafannanakinai maaqanna maaqanna nidaqa niuqia.
ACT 15:37 Baranabasifa eedoo qimaseenoo Yoohanee amarana moo auqu Maraka kafaa afiqararee qimasoofanoo Pauroofa qaoo qinau.
ACT 15:38 Ooqai maasa faqa finoo Pamafiria maqusaindari oonurandee anufa saina kaqi mariani. Sia maasa faqa aiqamai ninoo kasaaqaindari oonurandee anufa.
ACT 15:39 Miqi qinoo Baranabasisandiri ufa rainaqau. Ufa rainasee rakeemaki naadu naadu fiqau. Baranabasifa Marakana afiqamaree sipaki akaramafufanoo Sipurusa afumai narí maqa maaqai finau.
ACT 15:40 Antiooka maqannaa nikaqaafasaa marusa Pauroosa Sirasisa mara quqasee innaaru qimasee qiqau. Anutuna afaarirafa inneeqara Anutuna saika maree marifanoo inniqara rakisinnimaqaani.
ACT 15:41 Qimasoofaqa miqanda Siria maqa maaqaki faqa Sirisia maqa maaqaki faqa oonuree aniree idaqa Yisuna ufa irimarusa afeekaika mannimaqee mariqau.
ACT 16:1 Pauroosa miqooqari Deerabee maqusai faqa Ristara maqusai faqa finau. Mi maqusa qanda narí aaqa narí aaqa adeedi marinau. Miqoo Pauroofa Yisuna ufa irimaru kumaaraana moo paqurinau. Mina auqu Timootifa. Mina anoofa Yuda maqannaa anaasee marinau mina akoofa Kirisa maqusaindaraafa aanaamuru marinau.
ACT 16:2 Ristara maqusai nikaqaafasaa marusa faqa Ikooniumma maqusai nikaqaafasaa marusa faqa aiqama Timootinara amiqira kumaaraa fee qimariqau. (Yuda maqannaasa aiqama Mooseena sandufamau fidaqa Isaraee maqannaa fee qiaqeera fainanduqimariqau. Miqunara fainandammuidee qimariqau.)
ACT 16:3 Pauroofa Yisuna ufa maqusa maqusa qimannimiraree qimaseenoo Timooti anirainaqa innisaimbaqa fidaqa Yisuna ufa qimannimiqa fiqu fiquia. Misaqa fiqu fiqumma marusa Yuda maqannaasa aiqama Timootina akoonara aanaamurufee qida irimarusa mariqau. Pauroofa Yuda maqannaasa Timootinara qaoo qifoo qimasee Yuda maqannaasa fainanduquamaqaseeqa afiqee fimariqau.
ACT 16:4 Misa maqusakiaqa oonuree aniree maseeqa Yeerusareenni maru niqiqoo fasiqausa faqa faiqí firaasa faqa misa sandufa suquseeqa papiqasaa akara rumaqoona mi ufana qimannimidaqa qiqau. Innee sia Yuda maqannaasa sandufa oosana oosana irisee qumaara naruani. Yisuna faiqi namu niqiqamaqoo fasiqausa misa sandufauqa minamuna kai rakisi qumaraaqee qufaqa miqimmimariqau. Miqi marufanoo maqusa maqusa Yisuna ufa irimarusa afeekaikamandee mapukusee mariqau. Faiqí moomoosa faasaambaasaana iriseeqa doo misasaa atooaqau.
ACT 16:6 Pauroosa Sirasasa miqooqari Firikia maqa maaqaki faqa Karatia maqa maaqaki faqa oonuree aniree idaqa qimannimimariqau. Miqooqari misa Asia maqa maaqai fuaneerufanoo naaquqara maraquna fannoo misa rafaaqafusoofaqa oonurandaqau. Sia minaki qimannimianneera miqinau.
ACT 16:7 Misa miqooqari Misia maqa maaqaindari oosirana fiaaqaree Bitinia maqa maaqa firaree qufanoo Yisuna maraquna fannoo rafaaqafufaqa oorurandee Misia maqa maaqa qambaanai ai aikatee Tarooasa maqusai ooruku nammari atinni mariqau.
ACT 16:9 Misa miqoo Tarooasa maqusaki marufanoo Pauroona qaina afu naranau. Qainaki Maseedoonia maqannaa fasiqa qafanau. Mi fasiqafa Pauroona fuki faaki qidaqa qainasaa aaramasee qinau. Anee mai Maseedoonia maqa maaqai aniree maasa dadaaqia.
ACT 16:10 Miqi qufanoo Pauroofa maasa qimaqimufaqa maasa minara Anutufa maasa Maseedoonia maqa maaqai amiqira fasaasa ufa qimannimiaqeera qidaqi qimasee doo deedaqiafannana.
ACT 16:11 Maasa Tarooasa maqusaindari sipaki akaramafi andeeqasee Samootarakee maqusai oonuraafannana iqaqoofanoo kananaana Neeapoorisa maqusai Maseedoonia maqa maaqaki maru maqusana mi sipanaki fiqiafana.
ACT 16:12 Miqoo maasa sipakiqari maqasaa aqufufaqa Firipi maqusai adeedi maru maqusai maqamau fiqiafana. Firipi maqusa Maseedoonia maqa maaqakinaa maqusauqa moomoo marinau. Aiqama maqusauqa aruseenoo Firipi maqusa mifa uriqarara maqusa firaafa marinau. Roomma maqannaa kiapausa kaamanna firaa taunna marinau. Roomma maqannaa sundiauqa kiapausa faiqí anaasee miqoo moomoo ani mariqau.
ACT 16:13 Moomoo taunnakiaqa Yuda maqannaasa miqoo asaqi ani marusa nári amaana maqa usakee mariqau. Akaqa taunnakiaqa sia usakee mariqau. Saririqasaa Yuda maqannaasa raudamakufaqa nammari afainni ooqu ooqumarifufaqa miqoo naríara amaana qimasaidaqa ooqu randee maqusai urimariqau. Maasa Firipi maqusai ani marikammasee Yuda maqannaasa innaaru qirana oosana iriseeqa Saririqasaa Firipi maqusaindari raudamakiqa nammari afainni Yuda maqannaasara ooqu randaqiafana. Paqurimasee Yuda maqannaa aanaaseeuqa kai marufaqa misa faqa ooqu marifi ufa qimannimiqiafana.
ACT 16:14 Mi anaaseesakiqari moo fannoo mina auqu Ridia nammarifa sia Yuda maqannaa anaasee Tiatira maqannaa anaasee marinau. Mifa qamunnasaa akimaru qumisana mi ainainiranaki maru anaaseefa maridanoo Yuda maqannaasa amaana ufa qimarufa marinau. Pannoona arira qumisa ainainiranaki marufa maridanoo firaa munnimma aqimaru ainainasaa rakisimaru anaaseefa marinau. Mi anaaseefa Anutunara rimarufa marinau. Anutufa kukeeqasee dadaaqunara Pauroona ufa amiqimasee irinau.
ACT 16:15 Mi anaaseefa faqa mina maaqaki akaqausa marusa faqa iriseeqa nammari maraqau. Nammari maraseenoo maaqi qimasee sandanainai qidanoo maasa qimaqiminau. Innee qiniara kuqaa Karaambaiqa saqarikidanoo fee qimasee innee aiqamausa qini maaqaki ani amiqimasee mariaqee qufaqa doo maasa miqimmiqiafana.
ACT 16:16 Moo faasaana kafaa innaaru qiraree qimasee nammari afainni ooqufimariafananoo moo maanaaqa fannoo maasa aanai paqurinau. Mi manaaqafa faafasaaqa aakimarufa marufanoo mi faafasaaqafa dadaaqufanoo mi manaaqafa kasooqaqee kambiqaaninna ainainara maqee maqee tamummaqaseenoo doo mifa quqoo kai mina anoona kambiqee marinau. Moomoosa mi manaaqa funnai oonureeqa qimamidaqa qiqau. Feefaurumasaifana maasaki kasooqaqee kambiqaaninna ainainara akooroomasee qimanniminaqa mina akiaqara feefauru amianauree qufaqa mi manaaqanasaa rakisimarusa miqi qufaqa firaa munnimma auqu ramasaida maree mariqau.
ACT 16:17 Maasa Pauroona faqa fufanoo mi manaaqafa maasa faqa fimarinau. Fidanoo faafasaaqa dadaaqufanoo firaa kari faaqarumaseenoo maaqi qimasee narí tamummaqasee misaqanna marusa aiqamausa qimanniminau. Maa fasiqa namusa firaa Anutuna uriqararana saika faiqi namu maridaqa innaarunai fimari aana uqannifiqarara ani mariasa maridaqa.
ACT 16:18 Faasaambaasaana moomoo kari mi ufana qimanniminoo nimarinau. Miqi marufanoo Pauroofa qafoofanoo akooqoofanoo quandaki minakinaa faafasaaqa qimaminoo qinau. Yisufa Anutuna asauku mundirafa qimaqimifaqa qimamidaqa anee maa manaaqana aunduraindari rafudamaki fua. Miqi qufanoo miqookai mi faafasaaqafa raudamaki sandanau.
ACT 16:19 Mi manaaqana rakisirausa mina qafamasee boo qimasee naqimasee maasa minasaaqaraana munnimma firaana maraanauree. Miqi qimasee aanoomasee Pauroona faqa Sirasina faqa qumareeqa rarisamammaree kiapana oopisaki quqaqau. Mi oopisafa sia kaqinni marinau, makeeta qambaanai marufaqa misa Pauroosa Sirasisa rarisamasee mi oopisanaki quqasee aiqama kiapausa naaramasee unna qimasee qiqau.
ACT 16:20 Maa fasiqa qanda Yuda maqannaaqanda maasa taunnaki anireeqa mandainaina oosana oosana uqeeraidaqa.
ACT 16:21 Misa nári sandufa qimaqimiafaqa kaqi runna kai ubeekamaqimaqaidaqa. Maasa Roomma maqannaa sandufa ameemaanai maridaqa nanaree kaqi runna ubeekamaqimaqaida fee.
ACT 16:22 Faiqí anaasee aiqama minara kuqaa kuqaa qufaqa kiapausa iriseeqa niranaqoofaqa Pauroosa Sirasisa qamunna uturuqusee miqanda mara quqasee sundiauqa qimannimufaqa unnana samu naruaqee qufaqa amiqimandee firaaqoo nariqau.
ACT 16:23 Naruseeqa karabusa maqaki quqasee minasaa rakisimaruna qimamiqau.
ACT 16:24 Anee amiqimasee maaqanda rumbaa qufanoo mifa karabusa qambaana oosiranaki quqaseenoo niku nisauku saqari mammaaqai quqasee rumbanau. (Miqanda quqasee sandaifanoo misasaa rakisiinafa mifa kuquannoo. Karabusa rakisirafa narí kuqiranara rufiaseenoo amiqimasee ummarasee rumbanau.)
ACT 16:25 Eendamuqusai Pauroosa Sirasisa nifaaqa nidafimarufaqa aupuraidaqa sia mi aupurarannara iriqau kaqi innaaru qidaqa Anutunara amooqidaqa minasaa asasira idi reemarufaqa karabusauqaindi moomoosa irimariqau.
ACT 16:26 Miqi marufanoo firaaqoo tautumafufanoo maqa inaakufa kasi kasinau. Mi maqafa kasinoo karabusa maqa faqa aiqama kasi kasimma quqasoofanoo karabusa kooqiuqa narikai atuafufanoo karabusa rumbeeqoo sainandausa faqa narí kai idukuakidanoo narí kai maqasaa aqufinau.
ACT 16:27 Karabusa rakisirafa kaaqa kai tiqinoo mariufa tautinoo findifinoo qafoofanoo karabusa kooqi atuanoo marufanoo qafeenoo Oo aiqama karabusa fasiqa doo sandamambi misa miqiana akiaqara firaasauqa qini darifoora saina qeeqa kai qeeqa darusee kuquanee qimaseenoo narí rakimaru paipana qumareenoo minannai narí raquru amianeerufanoo Pauroofa rumbara maqakiqari mina qafamaseenoo firaakari faaqa rumasee qimaminau. Sia anee aneenna asumu kuridia, maasa aiqama kaqi maridaqa.
ACT 16:29 Karabusa rakisirafa mina iriseenoo qoomara nameeraqufaqa qooma qumbi amufanoo qumareenoo sandeenoo rumbara maqaki Pauroosa Sirasisa kuqaa anoonaufa qimariaqandee qimasee aaquqeenoo aindiriroofanoo miqanda nikukina ooqi mareenoo maqasaa aqufinau.
ACT 16:30 Miqooqari findifinoo miqanda mi maqanakinaana nifiqeenoo madaanai ooqureenoo irammirinoo qinau. Inneeqara qini naqimasaifaqee innaarunai asumu marianauree.
ACT 16:31 Miqi qufaqa miqanda qiqau karaambaiqa Yisunasaa munduseenana doo minaki keeqaa. Miqinana innaarunai asumu marinnaranoo. Anee faqa ani maaqaki mariasa faqa miqinaqa miqiaqa.
ACT 16:32 Miqi qimasee Karaambaiqa ufa oosana oosana mi fasiqana faqa mina maaqaki marusa faqa qimannimiqau.
ACT 16:33 Karabusasaa rakisirafa miqanda ufa iri iseenoo mi eendamuqusanaki Pauroona faqa Sirasina faqa maramareenoo saamu nariiqoona nammarinnai fidika auqeeseenoo narí faqa narí aiku asauku faqa aiqamausa amaana nammari maraqau.
ACT 16:34 Miqooqari karabusa rakisirafa Pauroona faqa Sirasina faqa nifiqee narí maaqaki murusee narana nimisoofaqa naqau. Karabusasaa rakisimarufa narí aiku asauku faqa doo maqee Anutunaki keeqafuafanoo maasaki asasirafa uriqaranoo maridanoo fee qiqau.
ACT 16:35 Iqaqoofanoo kananaana Roomma maqannaa kiapafa poorisa niqiqoofaqa Innee oonuree qifanoo karabusasaa rakisirafa eenda rumbaqaiqanda idukisainaqa fuaqa.
ACT 16:36 Karabusasaa rakisirafa mina iriseenoo Pauroona qimaminoo qinau. Maasa kiapausa ani faqa Sirasina faqa idukuaqee qiafaqa doo inneeqara amanammi doo fuaqa. Kaqi ireeda kai amiqimasee fuaqa.
ACT 16:37 Miqi qufanoo Pauroofa mina iriseenoo maaqi qimasee Poorisa qimanniminau. Maaqanda Roomma maqannaasa ququsaki marunausa maridaqa. Misa nariqa sandufa rukiaasa. Sia andeeqasee maaqanda fuanaura. Iria, kaqi fifau sia ufa iriranaki aiqamausa nifusaa maaqanda dariisee karabusaki maaqanda quqaannanara. Doo maqee fee misa maaqandara ireeda kukeeqaki qumee fuaqee qida fee, sia fuanaura. Misa nariqa kai akooqoo aniree maaqanda idukusaifaqa fuanaura.
ACT 16:38 Poorisa mi ufana maree munu kiapausa qimannimufaqa iriseeqa Roomma maqannaa ququsaki maruqandara iriseeqa Roomma maqannaa firaa kiapafa minara iriseenoo maasa daruandoo qimasee kaaqa rufiaqau.
ACT 16:39 Rufiaseeqa misa karabusa maqaki oonureeqa Pauroosa Sirasisa qimudaoo qimasee reendeenamasee nifieeqeenoo madaanai quqasee qimannimiqau. Doo inneeqara raudamakiqa Firipi maqusaindari moosaa fuaqa.
ACT 16:40 Miqi qimasoofaqa Pauroosa Sirasisa eedoo qimasee raudamaki Ridia nammarina maaqaki keeqaqau. Miqoo misa Yisuna ufa irimarusa paqurimasee pooduqara ufa oosana oosana qimannimiseeqa doo quqasee moosaa fiqau.
ACT 17:1 Pauroosa Sirasisa Firipi maqusaindari findifi fidaqa Amafipoorisa maqusa faqa Apooroonia maqusa faqa fi aikateeqa Teesaroonika maqusai oonuraqau. Mi maqusanaki Yuda maqannaa amaana maqa marinau.
ACT 17:2 Pauroofa naroosana mareenoo minaki keeqafinoo misa faqa ufa qinau. Tamummaqara fasiqauqa akarakinaana asaana rumaseenoo minakinaa ufa qimannimufaqa narí qimami narí qimami qimariqau. Qaaramoo Saririqasaa miqimarinau.
ACT 17:3 Pauroofa tamummaqara ufakinaana qumareenoo asauku mundirafa aupuramasee kuqunara faqa Anutufa mina kafaa mara findifunara faqa qimannimimarinau. Miqidanoo Pauroofa qimanniminoo qinau Maa fasiqafa Yisufa qinee qimannimunafa mifa kai ooqai Anutuna asauku mundirafa maridanoo.
ACT 17:4 Yuda maqannaa iriseeqa akaqausa Pauroofunnai fiqau. Kirisa maqannaasa Anutunara rimarusa moomoosa iriseeqa misa faqa misasaa atooqaqau. Uriqarara aanaaseeuqa moomoosa faqa iriseeqa kuqaa fee qimasee misa faqa atooqaqau.
ACT 17:5 Yuda maqannaa akaqausa nikooqee marusa rairai qimasee aanaamuru moomoo nifiqaidanoommifoo qimasee manda fasiqauqa kudi fasiqauqa naaramasoofaqa moodaanaki suqufiqa taunna qambaanai oonuree aniree masee aanoo firaana uqeeraqau. Misa suqufufaqa Yasoona maaqa oonu upukamaseeqa Pauroosa Sirasisara maridammiafoo qimasee rapeemasee nindafoo faqa sia marufaqa Yasoona faqa Yisuna ufa irimarusa akaqausa kai mi maqanakinaana paqurimasee maqamau rarisee kiapausunnai munuseeqa maaqi qiqau. Nindafa maa fasiqausa aiqama maqusa maqusa mandufa uqeeraqa niniaasa ifaqa maa maqusanaki faqa aniraafanoo Yasoonafa mareeqeenoo narí maaqaki quqasaifaqa faiqeeqa. Misa maasa Roomma maqannaa karaambaiqa sandufa aiqama rukiaidaqa misa maasa Roomma maqannaa karaambaiqa minauqu Sisaana arusee narí karaambaiqa moo mina auqu Yisufa mina auqu uqeeraidaqa miqidaqa.
ACT 17:8 Miqi qimasoofaqa faiqí anaasee aiqamausa kiapausa faqa mi fuka karaambaiqafa kambiqafinanoo maasa Roomma maqannaa qeeqa karaambaiqa namufaqa daruandoo qimasee firaaqoo tautiqau.
ACT 17:9 Kiapausa Yasoona saimbaqa Yisuna ufa irimarusa faqa aiqama munnimmara qufaqa nimisoofaqa idukiqau.
ACT 17:10 Yisuna ufa irimarusa marufanoo eendufaqa Pauroosa Sirasisa nifiqa quqasoofaqa asukunai Beereea maqusai fiqau. Mi maqusanai oonureeqa Yuda maqannaasa amaana maqaki keeqaqau.
ACT 17:11 Beereea maqusanaasa sia Teesaroonika maqannaa naanna ree marusa misa irirana irimarusa mariqau. Misa faasaambaasaana afeekaikamandee karaambaiqa fasaasa ufa iriqau. Misa tamummaqara fasiqauqa ufa akarakinaana randasee qafee mariqau Pauroona ufara kuqaa anoonee sia fee anoonee qimasee akarakinaa ufauqara randaqau.
ACT 17:12 Miqidaqa Yuda maqannaasa faqa Kirisa maqannaasa faiqí firaasa moomoo faqa Kirisa maqannaa aanaaseeuqa moomoo faqa misa aiqama Yisunara kuqaa anoonee qimasee irimariqau.
ACT 17:13 Teesaroonikai maru Yuda maqannaasa minara iriseeqa Beereea maqusai oonuree faiqí anaasee aiqama nirana fundakusoofaqa Yisuna ufa irimarusa faiqí firaasa nifasausaikirausa Pauroona umee aqiqoofanoo ooruku nammari afainni finau. Sirasifa faqa Timootifa faqa kaqi miqoo mariqau.
ACT 17:15 Pauroona afiqee fusa Ateensa maqusai munu aiseeqa oonurandee anireeqa Sirasisa Timootisa qimannimiqa qiqau. Pauroofa inniqara naaraidanoo doo Ateensa maqusai fuaqa.
ACT 17:16 Pauroofa Ateensa maqusai Timootisa Siraasisa nifeesidanoo nindafoofaqa Ateensa maqusanaasa maqannai faqa ooninnai faqa saqarinnoo faqa oosana oosana ainaina nimana auqusee maasa Anutu fee qimasee innaaru qimariqau. Pauroofa mina qafamasoofanoo akooqanau.
ACT 17:17 Firaaqoo akooqoofanoo akooqeenoo apatufanoo Yuda maqannaa amaana maqaki keeqafufanoo Yuda maqannaasa faqa aanaamuru minaki anikeeqeemarusa faqa Yisunara ufa qimarinau. Maqusa qambaanai faqa faiqí anaasee faqa aiqamai ufa qinoo ninau.
ACT 17:18 Ateensa maqusai irirana fiqararausa maqee maqee suqida marunaki suqimariqau. Oosana oosana sukuraki keeqeeusa Ateensa maqusai maqee maqee suqimariqau. Eepikurianna sukura tisaauqa moo iriranamau fimariasa faqa Sitookika sukura tisaauqa misa moo iriranamau fimariasa faqa Pauroona ufa atikai iriseeqa noori uqeeraseeqa Pauroonara maaqi qimasee uteeti qidaqa qiqau. Maa iriranna siai fasiqafa narí afaaqa fifau amooqida nana ufee qidanoo fee. Akaqausa maaqi qiqau. Mifa aanaamuru Anutusara qidanoo. Pauroofa Yisufa kuqiranakiqari findifunara qimannimufaqa misa tautumasee dapi ufa qidaqa uteeti qimariqau.
ACT 17:19 Misa miqi qimasee Pauroona afiqamaree firaa akara maaqa mina auqu Areeoopakusa mi maqanaki fiqau. Firaa irirana faqaasa kai minaki suqimarunaki afiqee fiqau. Minaki suquseeqa Pauroonara irammiriqa qiqau. Anee fuka ufa qimannimianaqa maasa mina irirara suqidaqa.
ACT 17:20 Mi ufana qiannanaki maasa akaqainainara randaidaqa. [
ACT 17:21 Ateensa maqusanaasa faqa aanaamuru animarusa faqa oosana oosana fuka irirana irianee qidaqa minara kai irimaree fimariqau. Misa minara Pauroona irammiri mariqau.]
ACT 17:22 Pauroofa mina iriseenoo misa noorinni findifinoo qimanniminoo qinau. Oo innee Ateensa maqusanaasa qinee mai anidaqa inni oosanara qafaidaqa iridaqa kaaqa innee Anutuna oosana oosana ainainannai nimana auquseeqa maasa Anutusee qimasaidaqa innaaru qiqanuasa.
ACT 17:23 Qinee inni maqusai oonuree aniree niniiqa inneeqa aandau arusee tatufimari qaindausa qafeeqa. Innee moomoo Anutusara oosana oosana innaaru qimariasa mariafaqa qinee qafeeqa. Aiqama qaindauqasaa mi anutusa nuqu akara rinoo marifaqa qafeeqa. Mooqaindasaa akara kai rinoo marifaqa qafeeqa. Sia maasa irunna Anutunee qimasee akara kai rumaqaafaqa qafeeqa. Mee innee sia irimaria Anutuna minara innaaru qimarianara mina auqu oosana koorooianaura.
ACT 17:24 Anutufa innaaruna faqa maqa faqa aundurakinaa ainaina marina minauqa auqu Anutufa maridanoo. Mifa innaaruna faqa maqa faqa auqufa mi ainainna karaambaiqa maridanoo. Sia faiqí nisaukunnai auqueeqee amaana maqaki quqaqaafau maridanoofau.
ACT 17:25 Mifa narí kai naanna faqa marirana faqa faiqí faiqi nimimarifa maridanoo. Mifa nana ainainaree sarauimarifa marinaqee maasa qeeqa iriranannai kadaapirumeeqee amianauree, sia amana. Aiqama ainaina narí kai auquqoofa kai maridanoo.
ACT 17:26 Mifa kai moodaa fasiqa auquqoonasaaqari kai aiqama maqannaa kambiaqa maridaqa. Mifa narikai oosana aroonakiqari aiqama aanaamuru quqannisaqoosa kai maridaqa. Mifa qufaqa misa marirana oosumma nimaqoonakiaqa kai marimaree fimariafanoo.
ACT 17:27 Sia fifau, ooqai Anutufa miqinau. Asukunaki maridaqa Anutunara mikimmakidaqa randaidaqa paqurinafa paquriaqee qimaqoona miqimaqoona miqi mariafanoo. Sia Anutufa faiqí nianai marifa maridanoo. Faiqí naaqa maridanoo.
ACT 17:28 Mina mariranaki kasiranaki maasa maridaqa. Inni ufasaa rakisirausa misa faqa minara maaqi qimariafanoo maasa faqa mina faiqi namu kai maridaqee qidaqa.
ACT 17:29 Misa miqi qimaqoona qinee minara minakina ookaamasee qinee maaqi qidaqa. Maasa Anutuna faiqi namu maridaqa naqimasee maasa quandakina qeeqa qikoona amana koorannai siruaannai ooninnai mina ammeemmee rianauree. Sia andeeqanoo maridanoo.
ACT 17:30 Ooqai faiqí misa Anutunara randaidaqa asukunakinai mikimaki anidaqa mariqau. Anutufa mi kamuqoora doo aunuseenoo sia misa furufarirana akiaqara narinau maqee maa kamuqoo aiqama aanaamuru nári mandainainakiqari quandakiqa Anutufinai ubeekaaqee qidanoo.
ACT 17:31 Mifa aiqama maqannaasa moodaa faasaana ufa irisee narí andeeqaranannai andeeqannisaannoo. Doo mifa utaaqamaqaifanoo mi faasaannafa maridanoo. Ufa irimari fasiqafa faqa utaaqamaqaifa maridanoo. Mi ufana irimari fasiqana Anutufa kuqiranakinaana mara findifunannai kooroo inoo maridanoo.
ACT 17:32 Irirana faqaasa suqimarusa kuqiranakiqari findifunara qimannimufaqa akaqausa naanaidara qimariqau. Akaqausa kafaa moo kari irianee qiqau.
ACT 17:33 Miqi qimasoofanoo Pauroofa raudamakinoo finau.
ACT 17:34 Fufanoo faiqí akaqausa minasaa atooqafi mina ufa irimariqau. Moo fasiqa auqu Dioonisiusafa ufa suqira maqa Areeoopakusa suqira maqaki keeqee marufa marinau. Anaasee moo auqu Damariasa nammarifa mifa faqa faiqí anaasee akaqausa misa faqa Pauroona ufara kuqaa fee qimasee minasaa atooqaqau.
ACT 18:1 Pauroofa Sirasina faqa Timootina faqa nifeesu sianoo Ateensa maqusa quqaseenoo Koorinti maqusai finau.
ACT 18:2 Koorinti maqusai qiqoo adeedi marufanoo oonureenoo faiqí moo paqurinau. Mina auqu Akuiraafa marinau. Akuiraafa Poontiusa maqa maaqai kambiqoofa Itari maqa maaqai oonu marinau. (Itari maqa maaqaki Roomma maqasaa firaa kiapafa miqoo marufanoo mina maqusa marinau.) Itari maqa maaqai mariufanoo firaa kiapafa minauqu Karaudiusafa Yuda maqannaa aiqama asaqunnimaqasoofaqa quqasee daraaniqau. Akuiraafa Yuda maqannaa marufanoo asaqusoofanoo narí anaaqa Pirisira nammari sandiri Koorinti maqusai finau.
ACT 18:3 Oonu marufanoo Pauroofa mina paqurimaseenoo mina faqa maridanoo dadaaqidanoo burimakau apatannai uqiqaana maaqa usakee marinau. Akuiraasa Pauroosa mi ainainnirana akoofasaqara marida usakeemariqau.
ACT 18:4 Pauroofa aiqama kari Saririqasaa Yuda maqannaa ufa suqira maaqaki keeqafidanoo naamuaqira ufa Yisunara qimannimimarinau. Yuda maqannaa faqa Kirisa maqannaa faqa qimannimimarinau.
ACT 18:5 Sirasisa Timootisa Maseedoonia maqusaindari aniroofanoo Pauroofa sia Saririqa kai aiqama faasaambaasaana Anutuna asauku mundirana Yisunara Yuda maqannaasa naamuaqima nimaqee marinau.
ACT 18:6 Miqimarufanoo nikooqoofaqa Yuda maqannaa Pauroona mandufa sukufa qimamaqaqau. Miqi qufanoo Pauroofa rutaqi findifinoo doo narí asaukunnai narí afaaqaindaraa kookoomma aisoora fatikeeqee Yuda maqannaa ninaamu aranau. Inneeqamma dapikirana oosana araafanoo. Qinee amiqirannai inni mara quqaunaqa inneeqa kai mandaatata fimariafanoo doo innindi kai, sia qinindifau maridanoo. Doo maqee maaqooqari doo qinee inni Yuda maqannaa minnisee aanaamuru qimannimianaura.
ACT 18:7 Pauroofa miqi qimaseenoo misa minniseenoo aanaamuru fasiqa maaqaki oonu marinau. Mi fasiqana auqu Titiusa moo auqu Yusatusafa maridanoo mina maaqa Yuda maqannaa ufa suqira maaqa adeedi marufanoo Pauroofa minaki marinau. Titiusafa moo auqu Yusatusafa Anutunara innaaru qimaru fasiqafa aanaamuru maridanoo Yuda maqannaasa amaana ufa irifa maqee Yisuna ufa irimarufa marufanoo Pauroofa mina faqa oonu marinau.
ACT 18:8 Yuda maqannaa ufa suqira maqasaa rakisirafa minauqu Kirisipusafa maridanoo Yisuna ufara kuqaa fee qimarufa narí faiqi anaasee faqa Koorinti maqannaasa moomoosa faqa kuqaa fee qimasee nammari maraqau.
ACT 18:9 Pauroofa moo eendaki faiqaqee ufanoo qainasaa maaqimasee afunnaranau. Qainaki Anutufa Pauroona qimaminoo qinau. Pauroo sia anee maaqooqaraasara rufiaa. Anee kaqi ufa qida maria. Sia anee minnisaa.
ACT 18:10 Qinee ani faqa kukeeqai maridaqa dadaaqidaqa. Maa Koorinti maqusanakina faiqí anaasee moomoo qinindi maridaqa qinee ani namuqaaki mariasa rafaaqa fuanaqa sia misa aidafirana ani amifaranoo.
ACT 18:11 Pauroofa mina iriseenoo afaaqa quqasee miqoo marinau. Maridanoo Anutuna ufa qimannimimarinau. Miqidanoo aukuana moodaa maraseenoo moo aukuana qambaanasaa finoo taikanau.
ACT 18:12 Pauroofa miqoo Koorinti maqusai kaqi marufanoo Kirisa maqasaa rakisimaru kiapafa taikafufanoo Roomma maqannaa kiapafa firaafaikirafa moo fuka kiapafa aqiqoofanoo ooqeenaana amaaqaki animarinau. Mi kiapana auqu Karioofa marinau. Miqoo maria Yuda maqannaasa Pauroona namuqaa fuka kiapafa animariqoo fee qimasee Pauroona qumaree rariseeqa fuka kiapafinai munuseeqa maaqi qimasee unna qimasee qimamiqau. Kiapa, maa fasiqafa maasara Roomma maqannaa sandufa rukiaranaki maasa qifeeqaidanoo. Mifa maasara inneeqa naaruqaa oosana minniseeqa maqee qini fuka oosana qimannimunnana mi mau fidaqa Anutunara innaaru qiaqee qidanoo ufa rukiaranaki maasa qifeeqaidanoo.
ACT 18:14 Miqi qufanoo Pauroofa ufa qianeerufanoo Karioofa Yuda maqannaasa maaqi qimasee qimanniminau. Maa ufana sia sandufa rukiarafa maridanoo sia moo mandainaina maraidanoo. Miqinoo marinaqau inni ufa andeeqaseefau irini.
ACT 18:15 Maa ufana fifau ufa kai oosana oosana ufa faqa nuqu faqa inni sandufa kai maridanoo. Qinee miqira fifau ainaina sia qinee irianaura inneeqa kai.
ACT 18:16 Miqi qimaseenoo kiapafa aanoomasee fukifaakiufaqa koota maqakiqari Yuda maqannaasa raudamakufaqa miqooqaraasa, Yuda maqannaa amaana maqasaa rakisirana mina auqu Soosateeneesana qumara maree mini kiapana kooqiki quqasee unnaanasamu firaaqoo uqafiqaqau. Karioofa mina qafoofanoo akooqoofanoo sia minara irinoo mana manamminau.
ACT 18:18 Miqooqari Pauroofa Koorinti maqusai faiqí firaasa nifasausaikirausa misa saimbaqa kaqikaaqoo kisaaqasaa marinau. Koorinti maqusai kaqi maridanoo minniseenoo mina dinatinni Keenakareea maqusai oonu mi maqusanaki maridanoo Yuda maqannaa naanna raanee qimaseenoo moo ainainara qima afeekaikamandeenoo akiaqa maqanamu faqa indufu aquseenoo quqaseenoo sipaki akaramafufanoo Pirisira nammarina faqa Akuiraana faqa miqanda qisafaaqi faqa Siria maqa maaqai finau.
ACT 18:19 Sipa fannoo ooruku nammari taqamareenoo Siria maqa maaqai fidanoo Eefeesusa maqusai naaree oonuranau. Oonureenoo Pauroofa Yuda maqannaa ufa suqira maqaki keeqafufanoo Yisunara naamuaqimasoofaqa misa qiqau anee kisaaqasaa maridana maasa qimaqimia qufanoo Pauroofa maaqi qimasee narí qimanniminau. Anutufa qiniara kafaa aniannee qinnanara kafaa oonurandee anianaura. Miqi qimaseenoo Pirisira nammarina faqa Akuirana faqa miqoo Eefeesusa maqusai quqanniseenoo sipaki akaramafufanoo Isaraee maqa maaqai Seesareea maqusai finau.
ACT 18:22 Sipa fannoo Pauroona afiqee Seesareea maqusai munaisoofanoo afiuqakufanoo maqamau Yeerusareenni ooru finau. Oorureenoo narí Yisuna ufa irimariasa narí akaqaafasaakirausa nindafeenoo kaqikaaqoo misa faqa marinoo oorurandee Antiooka maqusai indaaru mariunnai kafaa finau.
ACT 18:23 Antiooka maqusai kaqikaaqoo marinoo kafaa findifinoo Karatia maqa maaqaki faqa Firikia maqa maaqaki faqa oonuree anireenoo Yisuna ufa irimarusa pooduqara ufa qimanniminoo nufaqa Yisuna ufara afeekaikiqau.
ACT 18:24 Yuda maqannaa fasiqa moo auqu Apooroosafa Areekasandiria maqusai kambiqoofa mi fasiqafa Eefeesusa maqusai ani marinau. Mifa amiqimandee kaaqa ufa qimarufa. Mooseena sandufara faqa tamummaqara ufa akara faqa kaaqa mi ufausa amiqimandee irimarufa marinau.
ACT 18:25 Yisuna ufa irimarusa mi fasiqana Yisuna ufa amiqimasee qimamisoofanoo irimarufa marinau. Mifa maqee maqee andeeqasee Yisunara faiqí anaasee qimannimidanoo kaaqa fuki faaki qimarufa marinau. Mifa ooqai Yoohaneefa nammari nimimaru nammarina maroofa Yisuna nammariara sia irinau.
ACT 18:26 Apooroosafa mifa Eefeesusa maqusai anireenoo Yuda maqannaa ufa suqira maqaki paasoosamandaida qimannimimarufanoo Akuirafa faqa Pirisira nammarifa faqa mina ufa iriseeqa nári maaqaki mara quqaseeqa andeeqasee Anutuna aanara mariranara Apooroosana aamua qimariqau.
ACT 18:27 Apooroosafa Kirisa maqa maaqai firaree qimasoofaqa Eefeesusa maqusannaasa Yisuna ufa irimarusa mina akaqaafasaakirausa dadaaqira ufa pasaki maaqi qimasee akarariqau. Innee Kirisa maqannaasa innee amiqimasee maa fasiqana oonu afiqeeqee quqaaqa. Miqimasee akara rummamufanoo mareefinau. Kirisa maqa maaqai maridanoo Apooroosafa Yisuna ufa irimarusa firaaqoo dadaaqinau moomoosa Anutufa kukeeqasee dadaaqufaqa Yisunara irisee minasaa mundimariqau. Miqirausa Apooroosafa dadaaqimarinau.
ACT 18:28 Yuda maqannaasa faqa akooqoo maqusa qambaanai Apooroosafa oori runuseenoo Yuda maqannaasa Yisunara afeekaikamasee qimannimufaqa moomoosa Yisunara doo kuqaa anoonee qimariqau. Apooroosafa Mooseena sandufakinaana tamummaqara fasiqa akarakinaana Anutuna asauku mundirafa kuqaa Yisufa marinara uqannifiqasoofaqa moomoosa iriqa kuqaa Yisufa Anutuna asauku mundira fee qimariqau. Apooroosafa mi maqusanaki maridanoo Yisuna ufa irimarusa pooduqamannimaqanau.
ACT 19:1 Apooroosafa Koorinti maqusai marufanoo Pauroofa Asia maqa maaqai anireenoo maqusa maqusa maqamau oonuree aniree Yisuna aufakiana qimanniminoo ninau. Miqidanoo Eefeesusa firaa taunnakina ooqu finau. Ooqureenoo Yisuna ufa irimarusa akaqausa paqurimasee irammirinoo qinau.
ACT 19:2 Innee indaaru Yisunasaa mundiqau, mikari naaquqara andeeqara maraquna maraqeeiqau. Misa mi ufana iriseeqa qiqau. Maasa sia naaquqara maraqunara iridaqa. Maridanoo fee sia fee maridanoo fee, sia maasa minara iridaqa.
ACT 19:3 Pauroofa minara iriseenoo kaifaa irammirinoo qinau. Innee indaaru nana nammari fee maraqau. Qufaqa misa qiqau. Maasa Yoohaneefa nammari nimimaruna nammarina maraafanausa maridaqa.
ACT 19:4 Pauroofa mina iriseenoo maaqi qimasee qimanniminau. Yoohaneena nammari fannoo nári mandainainasaaqari quandee marifa maridanoo. Yoohaneefa nammari nimimarufa kaqi maru aukuana Isaraee maqannaasa maaqi qimasee qimanniminoo qinau. Qini qinaaqianna kambiqainna fasiqafa minasaa kuqaa mundufuaqa. Yoohaneefa miqi qinoo Yisunara qinau.
ACT 19:5 Mi Eefeesusa maqannaasa Pauroona mi ufana iriseeqa doo Karaambaiqa Yisuna nammari maraqau.
ACT 19:6 Nammari marasoofanoo Pauroofa misasaa asauku mundusoofanoo naaquqara maraquna fannoo misa naakufufaqa aanaamuru ufa sia irimaru ufana qimariqau. Misa Anutuna ufara faqa qimariqau.
ACT 19:7 Miqi qimarusa qisauku taikasee qikunni ooqu qaara marasee Eefeesusa maqannaa ufa oosana qimarusa mariqau. Naaquqara maraquna fannoo misaki aqufufanoo Pauroofa maridanoo qaaramoo quqoonasaa Yuda maqannaasa Eefeesusa maqusai ani misa faqa mariasa nári naaduma ufa suqira maqaki keeqafi paasoosamasee Anutuna ququsara naamuaqima nimaqee marinau.
ACT 19:9 Akaqausa Pauroona ufa iriseeqa karaambaiqa Yisuna ufamau firanara nikooqoofaqa sukufa manda ufa kai aiqamatia qiqau. Pauroofa miqi quna iriseenoo Yisuna ufa irimarusa narí akaqaafasaakirausa nifiqamareenoo misa Yuda maqannaasa rakeemma quqaseenoo raudamaku fanoo mi taunnanaki kai moo ufa suqira maqaki keeqanau, mi ufa suqira maqana akoofa minauqu Tiranusafa marinau. Aiqama faasaambaasaana Pauroofa mi ufa suqira maqanaki faiqí anaasee nifiqamareenoo minaki murusaidanoo Yisuna aufakiana narí qimami narí qimami qimariqau.
ACT 19:10 Pauroofa miqimammaree fimarufanoo qaara aukuana aiqaroonara Asia maqa maaqaki marusa Yuda maqannaa faqa Asia maqannaa faqa misaqa marusa faqa aiqama Karaambaiqa ufa iriqau.
ACT 19:11 Anutufa Pauroonakinaana faiqí sia amana auqaaqaa ira ainaina faiqí nifaaqa andeeqee mariana naaquqara ainaina misa nifusaa auqusoofaqa qafeeqa Yisunara kuqaa anoona fee qiqau.
ACT 19:12 Faiqí anaasee aurimarusa nikaqaafasaa Pauroona ankisa fee qamunna fee ani mara maree aurimarusa nimufanoo aurirafa taikee marinau, faafasaaqa naakirafa rafudamaki sandeemarinau.
ACT 19:13 Yuda maqannaasa akaqausa misa faqa faafasaaqa naakimarusa niqiqeemarusa mariqau. Miqi qimasee aanoomasee Pauroona faqa Sirasina faqa qumareeqa rarisamammaree kiapana oopisaki quqaqau. Mi oopisafa sia kaqinni marinau, makeeta qambaanai marufaqa misa Pauroosa Sirasisa rarisamasee mi oopisanaki quqasee aiqama kiapausa naaramasee unna qimasee qiqau. Moodaa fasiqa faiqinamu qisauku dinni taikasee dinni ani qaraqanda marasee faafasaaqa niqiqee marusa mariqau.
ACT 19:14 Misa nikoona auqu Sikeefaafa marinau Yuda maqannaasa Anutuna aanaiqikirausa uriqararafa marinau. Mi fasiqana faiqi namu Pauroona oosana qafeeqa maasa faqa mina oosana amanamasee qafaanauree qimaseeqa, faiqí moo faafasaaqa aakimaruna oonuree auqamaseeqa qiqau. Anee Yisuna auqu Pauroofa qimannimimarina irisee anee raudamaki see fifua qufanoo faafasaaqa fannoo maaqi qimasee narí mi fasiqana aunduraindari misa qimanniminau. Ee, maa, qinee Yisunara iridaqa Pauroonara faqa iridaqa innee yau yausee maridee qinee sia inniara iridaqa.
ACT 19:16 Miqi qimaseenoo faiqí narí aqoondiki maru fasiqana dadaaqufanoo findifinoo firaaqoo uqanna misa nárí nárí iseenoo misa qamunna anaqi maroofaqa kaqisamu maaqakiqari rafudamaki quqasee sandaqau.
ACT 19:17 Eefeesusa maqusa marusa faqa Yuda maqannaa animarusa faqa mi ufana irisoofanoo kaaqa naaquqoofaqa Karaambaiqa Yisuna auqu firaaqoo uqeeraqau.
ACT 19:18 Yisuna ufa irimarusa miquna iriseeqa Pauroofunnai suqumaree anireeqa nariqa mandainaina oosana oosana kooroo iqau.
ACT 19:19 Yisuna ufa irimarusakiqari aukainaina mandainaina afunee ainaina maraqa nusauqa nariqa manda ufa akaraki quqaqoona moodaanaki suquseeqa aiqamausa nifusaa firaaqoo idaraqau. Idaqoo papiqana feefaurimaruna moodaanaki asaana rumasoofanoo maaqimminau. Firaa munnimma tia (K50,000) aqimaruna ida raqau.
ACT 19:20 Doo miqimasoofanoo Karaambaiqa ufa aiqama atinai daraanimambufanoo doo afeekaikamafinoo atukaramafinau.
ACT 19:21 Mi ainainna taikasoofanoo mina maariqoo Pauroofa qinau. Qinee maaqooqari Maseedoonia maqa maaqai faqa Kirisa maqa maaqai faqa oonuree anireemaseeqa Yeerusareenni kafaa ooru fuanaura. Miqoo ooru maridaqa Roomma maqusa oonu qafaanaura.
ACT 19:22 Miqi qimaseenoo Pauroofa Timootina faqa Eerasatusana faqa niqiqoofaqa Maseedoonia maqa maaqai indaaru fiqau. Pauroofa Asia maqa maaqai kaqi mariufanoo ninaaqiana finau.
ACT 19:23 Eefeesusa maqusai kaqi marufanoo moo mandainaina Karaambaiqa ufamau fimarusaki kambiqanau. Mi aukuanna misa Yisuna ufara Karaambaiqa aana fee qimariqau.
ACT 19:24 Asia maqannaasa nári moo unna anutunara anaasee anutufa marinau maqi qimariqau. Mi anaaseena auqu Arateemisa nammarifa marinau. Mi anaasee anutuna amana Eefeesusa maqusa firaa amaana maqaki marinau. Ooninnai auqira amaana maqa firaatia amiqirafa uqanna marinau. Eefeesusa maqusai faiqí moo auqu Deemeetiriusafa maridanoo mi amaana maqana qafaidanoo mina amana kai siruaauqa maraseenoo idaki tasirisirimaseenoo moomoo kaqikaanauqa auqiiseenoo faiqí anaasee nimufaqa feefaurummasaidaqa maraidaqa nári maaqaki munu quqasaidaqa innaaru qimariqau. Deemeetiriusafa siruaa auqimarusa uriqararafa marufaqa misa aiqama mi saikanannai munnimma maree mariqau.
ACT 19:25 Deemeetiriusafa siruaa auqimarusa naarama moodaanaki quqaseenoo qimanniminoo qinau. Oo maa fasiqausa maasa saikasaaqari munnimma kambiqaidanoo.
ACT 19:26 Innee mi fasiqana Pauroonara iridaqa mina oosana irimariafanoo. Maasa qisaukunnai auqimarunnanara sia Anutufa uqannee qidanoo. Mifa Eefeesusa maa maqusanaki faqa Asia maqa maaqaki aiqamai faqa Yisunara qimannimifaqa misa kuqaa fee qimasee maasa Arateemisa nammarina minnisaidaqa.
ACT 19:27 Miqidaqa maasa saika munnimma maree marunnana qusasaa mandaikiannoo. Maasa uriqarara anaasee anutuna Arateemisa nammarina amaana maqa faqa mandaikiannoo. Maasa anutufa Arateemisa nammarifa mifa faqa ureeqaannoo. Asia maqannaasa faqa aiqama maqannaasa faqa Arateemisa nammarinara innaaru qimariana doo taikeefaranoo.
ACT 19:28 Faiqí anaasee mi ufana irisoofanoo niranaqoofaqa firaaqoo faaqa fuisee qimaseeqa qiqau. Eefeesusa maqannaa Arateemisa nammarifa firaatia uriqararafa maridanoofee qiqau.
ACT 19:29 Mi ufafa aiqama atinnai daraanufaqa faiqí anaasee suqu fiqa dadaaqiaqee qimasee Maseedooniandaraa qanda Pauroona aqoondiqara Kaiusana faqa Aristarakusana faqa Pauroona faqa Eefeesusa maqusai animaruqanda qumareeqara rarisamammaree sandeeqa firaa ufa suqira maqaki keeqafi minaki mi fasiqaqanda quqaqau.
ACT 19:30 Pauroofa misa nindafamaseenoo minaki keeqaaneerufaqa Yisuna ufa irimarusa mina rafaaqafusaqau. Asia maqa maaqaki marusa uriqararausa Pauroona aqoondiuqa ufa moonasaa quqasoofanoo mini qimaminoo qinau anee sia minaki keeqaa, kuqinafaara.
ACT 19:32 Faiqí anaasee moomoo uqanna firaa ufa suqimaru maqanaki keeqafufaqa firaaqoo faaqa fuisee qimariqau. Akaqausa moo faaqariqau akaqausa moo ainaina faaqariqau. Muduka tia nanaree maasa fifau faaqarida fee qimasee siamma iriqau, kaqi fifau faaqarimariqau.
ACT 19:33 Yuda maqannaasa Areekasandeeranara anee findifi qimannimianee qufaqa faiqí anaasee mina qafamaseeqa oo mifee manda fasiqa marifaqee minaree faaqa fuisee qiqi ifee. Areekasandeerafa findifinoo asaukunnoo ufa rafaaqafinoo qaoo qimasoofaqa misa aiqama mina qafamasee Yuda maqannaa moo anutunafaqaa fee qimasee faaqa rida qiqau. Eefeesusa maqannaa Arateemisa nammarifa uriqarara Anutufa maridanoo. Misa mi ufana kai firaaqoo faaqa fuisee qidaqa mari mariufaqa kisaaqasaa uqanna faaqa quqaida mariqau.
ACT 19:35 Eefeesusa maqusa uriqararafa moo fannoo rafaaqafinoo miqinoo fubaqa rafaaqafuseenoo qimanniminau. Eefeesusa maqannaa fasiqauqa qini ufa iriaqa. Eefeesusa maqusa Arateemisa nammarifa rakisimari maqusafa maridanoo. Sia moo fannoo minara qaoo qinoo maridanoo. Mina naaquqara ooni innaarunaindari aqufuna maasa mina faqa mina amaana maqa faqa rakisidaqa.
ACT 19:36 Sia moo fannoo amana mi ainainnara qaoo qiannoo. Minara innee doo asooaaqa sia furufaramasee moo ainaina auqaaqa.
ACT 19:37 Maa fasiqa qanda innee maramaree aniana sia moo amaana maqakinaana qummuari mariaqanda sia maasa anaasee anutunara moo ufa qia. Nanaree fifau nifiqee ani fee.
ACT 19:38 Deemeetiriusafa faqa narí moodaa saika faqaasa faqa moo fasiqa ufa amiraree qinanoo maasa ufa irira suqirafa maridanoo ufa andeeqee maria fasiqausa miqoo maridaqa misa miqookai nári ufa andeeqaaqa.
ACT 19:39 Ufa andeeqee mariasa sia amanaikifanoo faiqí anaasee ufa suqirafa narí qaanaa kai ufa suquaqa.
ACT 19:40 Roomma maqannaasa maa fifau tutuqirana iriseeqa maasa diqifaara, misa maasara iraifaqa nana ufa fee qimannimianuree sia ufa oosana maridanoo.
ACT 19:41 Miqi qimaseenoo aiqamausa niqiqoofaqa fifainiqau.
ACT 20:1 Eefeesusa maqusaki firaa tutuqirafa taikoofanoo Pauroofa Yisuna ufa irimarusa suqu quqaseenoo pooduqara ufa qimannimiseenoo nimandamaseenoo doo quqasee Maseedoonia maqa maaqai finau.
ACT 20:2 Maseedoonia maqa maaqaki oonuree aniree idanoo Yisuna ufa irimarusa pooduqara ufa maqee maqee qimannimimarinau. Miqoo qaraasa pooduqama nimaqaseenoo quqasee Kirisa maqa maaqai ooqureenoo miqooqari moo quqoona maranau.
ACT 20:3 Pauroofa Kirisa maqa maaqaindari sipaki akaramafufanoo Asia maqa maaqai firaree qufaqa Yuda maqannaasa irisee mina arirarufanoo moo fannoo iriseenoo Pauroona qimamufanoo rufiaseenoo kafaa Maseedoonia maqa maaqakinai fiqummakufanoo Tarooasa maqusai firaree qinau.
ACT 20:4 Soopateerafa Piriqusana amaaku Beereea maqusaindaraafa Pauroona faqa finau. Aristarakusafa faqa Seekundurafa faqa Maseedoonia maqannaaqanda Pauroona faqa fiqau. Deerabee maqusaindaraafa Kaiusafa faqa finau. Tikikusafa faqa Taroofimusafa faqa Asia maqannaaqanda Timootifa faqa minamusa Pauroona faqa fiqau.
ACT 20:5 Minamusa indaaru sipaki akaramafufaqa Tarooasa maqusai oonu marida maasara qifeesimariqau.
ACT 20:6 Maasa Firipi maqusai ooruku siai feemu qoomaqamasee namammaree Tarooasa maqusai Pauroona faqa fiqiafana. Maasa moodaannai qisauku afuru sipaki faiqee fifiufaqa Tarooasa maqusai oonuree maasara qifeesimarusa oonu paquriqiafana. Miqoo Tarooasa maqusai maasa aiqamausa qisauku dinni taikasee dinni oonu qaara marasee faasaana mariqiafana.
ACT 20:7 Saririqa eendaki maasa faqa Yisuna ufa irimarusa aiqamausa faqa moo maaqaki suqufiqa Yisunara afaarurira narana naqau. Pauroofa kananaana fuanee qu eendanaki kisaaqasaa qimannimimarinau. Mi maqanaki tida moo maqasaa marinoo kafaa tida moo sandaaqai auquqoofa maridanoo eefeeda mirinni akinoo maridanoo. Mi maqanaki suqimarunaki eendaki qooma moomoo qeemarinau.
ACT 20:9 Faiqí anaasee sandaaqai tidasaa suqimarufanoo Pauroofa mi eenda amuqusanaki ufa kisaaqasaa qimarufanoo kumaaraa moo fannoo uinduaqa parangasaa akaramafinoo ooqufaaqeeida ufa irimarinau. Mi kumaaraana auqu Eeutikusafa marinau. Pauroofa kisaaqasaa ufa qimarufanoo Eeutikusafa afu aunduarufanoo kaaqa faifinoo sia ufa iridanoo uinduaqasaaqari aunduaramakufanoo saamurinoo maqasaa pautaqinoo aqufinau. Aqufufaqa misa ooqu mina uqeerasee qafoofanoo doo kaaqa kuqinoo marinau.
ACT 20:10 Pauroofa ooqurama mi kumaaraana amuaaqa aakufufanoo oonumafi kaqaramma qumareenoo qinau sia qisee qufoo qiaqa kaqi maridanoo.
ACT 20:11 Miqi qimasoofaqa misa qumurandee ooruree Yisunara afaaruruma naqau. Afaaruruma namasoofanoo Pauroofa kafaa qimanniminoo fifiufanoo iqaqoofanoo quqasee Asoosaa maqusai maqamau finau. Fufaqa misa mi kumaaraana doo kasi marufaqa afiqamaree maaqaki munu quqasoofanoo misa nifaaqa asasinoo amiqi amiqinau.
ACT 20:13 Maasa Pauroona faqa nimarusa Pauroona mi maqusanai aiseeqa faasai sipaki akaramafifaqa Tarooasa maqusaindari Asoosaa maqusai nammari amuaqumau fiquakifaqa miqoo oonureeqa Pauroona afiqarara fiqummakufaqa fiqiafana. Pauroofa naríara faiqí anaasee qimannimisee kananaana maqamau Asoosaa maqusa oonuree inni faqa sipaki fuanauranoo maasara qimasoofaqa maasa miqiqau.
ACT 20:14 Maasa sipa fannoo Asoosaa maqusai oonuroofaqa Pauroona fi afiqeeqa Mitireena maqusai fiqiafana.
ACT 20:15 Miqooqari findimeeqee sipaki fifiufaqa kananaana Kioosa maqusai oonu raqiafana. Oonu miqoo mariqa quqaseeqa kafaa eendaki sipaki fifiufaqa kananaana Samoosa maqusai oonu raqiafana. Doo miqooqari fiqaree eendaki sipaki fifiufaqa kananaana Mireetusa maqusai oonu raqiafana.
ACT 20:16 Pauroofa sia Asia maqa maaqai kisaaqasaa kasooiraree qinau. Sia Eefeesusa maqusai kasooqianee qimasee fiqaree Yeerusareenni kaqi kaqi firaree qimasee miqoo Peendeekoosa qoomaqa nararee qimasee kaqi fiqarararee qinau.
ACT 20:17 Sipa fannoo Mireetusa maqusai oonuroofanoo Pauroofa moo fasiqasaa ufa quqaseenoo anee maqamau oonuree Eefeesusa maqusanaasa Yisuna ufa irimariasa qini qikaqaafasaakirausa rakisirausa mai qumu Mireetusa maqusai qumu irisaifaqa fuanauree qufanoo finau.
ACT 20:18 Eefeesusa maqusanaasa mi ufana iriseeqa Mireetusa maqusai ooquroofanoo Pauroofa maaqi qimasee qimanniminoo qinau. Ooqai indaaru qinee Asia maqa maaqai oosana arasaafannaqooqari innee qini oosana qafeemarusa mariafanoo qinee reendeenamandee inniki Anutuna saika faiqi maridaqa inniki saikimariqiafana. Yuda maqannaasa misa qini qimaarusiranannai qikiraqarana faqa daukunu rarana faqa inniki saiki mariafannanara qini qimimariqau.
ACT 20:20 Qinee inniqa maaqakiaqa faqa maqusa qambaana faqa Yisunara qimannimi mariafanausa maridaqa. Qimannimidaqa sia moo dadaaqira ufa qeeqa daundurai sia kaqi maridanoo aiqama qimannimiqiafana.
ACT 20:21 Qinee Yuda maqannaa faqa aanaamuru faqa amanamana kai doori runusee qimannimimariqiafana. Inneeqa mandainainara rufiasee quandakinaqa Anutufinnai noori ubeekamaseeqa Karaambaiqa Yisuna asauku mundirana saqarikiaqa. Miqi qimasee aauqimannimaqee mariqiafana. Innee minara faqa irimariasa mariafanoo.
ACT 20:22 Doo maqee qinee Yeerusareenni oorufidaqa nana ainainee qiniki kambiqaannoo fee, sia qinee mina iridaqa.
ACT 20:23 Qinee maqusa maqusa nimarunanoo naaquqara maraquna fannoo miqooqaraasa qimannimisoofaqa misa quandaki qini qimaqimufaqa. Anee Yeerusareenni ooru rainaqa rumbarana faqa qini qifaaqai ifitiqnarana faqa qimifaranoo fee qimarinau.
ACT 20:24 Qinee minara iriseeqa qeeqa mariranara fifau ainainee qimaseeqa Karaambaiqa Yisufa qimu saikanara mina taikarara kai kuqaa anoonee qidaqa qeeqa mariranara siamma iridaqa. Anutuna afaarira amiqira fasaasa ufa faiqí anaasee kooroomannimirana mina kai Yisufa qimu saikafa maridanoo.
ACT 20:25 Qinee innikiaqa Anutuna ququsaki marira firaanara qimannimiqa niniaafanausa marida. Maqee sia innee kafaa qini doori qiqafeefaranoo.
ACT 20:26 Doo qinee maqee maa suaninasaa doori runusee inni qimannimidaqa. Innikiqari moo fannoo Yisuna ufara dapikinafa narindikai mariannoo sia qinindi.
ACT 20:27 Anutuna irirana aiqama uqanna qimannimiseeqa sia kaqikaana qeeqa qumareeqa aiqama nimiseeqa.
ACT 20:28 Innee faiqí anaasee Yisuna ufa iri mariasasaa rakisimariasa mariafanoo. Innee asumu aandaura fooqana rakisimariasa mariafanoo Innee inneeqa marirana amiqimasee rakisiinaqa inneeqa asumu firira aandaura foora amiqimasee faiqí anaasee rakisiaqa. Anutuna naaquqara andeeqara maraquna fannoo inni nisaukuki rakisirana quqaranara amiqimasee rakisiaqa. Anutufa narí amaaku uqanna fidikannai maqee maa maqanasaa adiaseenoo minannai Yisuna ufa irimariasa feefaurummaseenoo doo narindikinoo, innee mi asumu aandauna firidaqa reendeenamandee rakisiaqa.
ACT 20:29 Qinee fuanaqa kaasau fainiara foora kaaqa afaidee mariasa aniree asumu aandau sia rauqi nimaqeefaranoo kaqi naruneefaranoo.
ACT 20:30 Inneeqa rakisirausakinaana akaqausa unnufa qimasee inneeqa nikaqaafasaa mareeqee kaqirunna ubeekeefaara.
ACT 20:31 Innee amiqimasee mi ainainnara rakisiaqa. Qinee qaaramoo aukuana faasaana eendaki daukunu reemarufaqa inni aiqama amiqimasee naamua qimariafanausa maridaqa.
ACT 20:32 Doo qinee maqee Anutuna asaukuki mina afaarira ufaki mara inni quqeeqa. Mi ufana afeeka fannoo amana innisaa rakisinnimaqaidanoo afeekaikirana nimiseenoo inni mareeqeenoo Yisunaindikiqa mariasaki misa saimbaqa ookaamaseenoo Yisufa misa nimira saqama qumiasana mirinni innaarunai inni faqa misa faqa nimiannoo.
ACT 20:33 Qinee inniki maridaqa sia qinee moona amiqira qamunnafee siruaa fee akaqainainafee sia qini qimuqusimarusa maridaqa.
ACT 20:34 Qinee maa qeeqa qisaukunnai ainaina masaidaqa narana mareemaria munnimmana marasaidaqa qiqa faqa nusa rakisinnimaqaidaqa maasa sia innindi maraqiafana. Innee minara amiqimasee irimarifanoo.
ACT 20:35 Qinee unandee kadaapiriranannai mandaikimarusa amiqi amiqiafana Yisufa minara maaqi qinau. Amiqira asasirafa sia ainaina maree marianakifau maridanoofau. Ainaina dadaaqirana nimiranaki anoona asasirafa minaki maridanoo. Innee sia aunuaqa moosa dadaaqirara kai iaqa.
ACT 20:36 Pauroofa mi ufana qimanniminoo maqasaa niqoori saunaraaqee qufaqa aiqamausa miqimafufanoo Anutunara innaaru qinau.
ACT 20:37 Innaaru qimasoofaqa aiqamausa ikiraqeeqa Pauroona oonumafi kaqaramma qumareeqa amooqaqau.
ACT 20:38 Pauroofa sia qini kafaa qiqafeefaree qunara firaaqoo noori kandeeqa ikiraqaqau. Misa miqidaqa Pauroona afiqeeqeeqa sipaki quqaqau.
ACT 21:1 Pauroofa maasa faqa sipaki akaramafufaqa maasa Eefeesusa maqannaasara nimudaooqidaqa nimandamaseeqa doo mafi rakeemma quqasee sipaki fiqiafana. Maasa andeeqasee fifiufaqa Koosa maqusai oonu kasoommasee miqoo faiqeeqa. Iqaqoofanoo kananaana kafaa fifiufaqa Roodeesa maqa maaqai oonuree kaqi fiqareeqa Patara maqusai fiqiafana.
ACT 21:2 Patara maqusai maasa sipa moo paqurimasee Fooeenisia fimaru sipana paqurimasee minaki akaramafi fiqau.
ACT 21:3 Patara maqusaindari fifiufaqa Sipurusa afuma qafamaseeqa mina aikundanai fiaikateeqa andeeqasee Siria maqa maaqai fiqiafana. Siria maqa maaqai fidaqa misa maa ummaara ainainna Tiree maqusai quqaaqee quna fidaqa doo mi Tiree maqusana paqurimasee miqoo kasooiqau. Miqoo sipa maree fu ummarana minakinaana mareeqee maqasaa quqeemarufaqa maasa Tiree maqusai Yisuna ufa irimarusara randasee paqurimasee amaana moodaa misa faqa mariqia. Misa faqa marufaqa miqooqaraasa maraquna fannoo qimannimufaqa Pauroonara sia Yeerusareenni ooru fuannee qimariqau.
ACT 21:5 Doo misa faqa marikiqa findifi sipaki aniafanaqa faiqí anaasee faqa nári faiqi namufaqa moomoosa aniree ooruku nammari afainni oondaanisaa niqoori saunarafufaqa innaaru qimasoofaqa misa nimandamaseeqa sipaki akaramafufaqa misa nári maqusai ooru fiqau.
ACT 21:7 Sipaki Tiree maqusaindari maasa Tooreemaisa maqusai oonu raqiafana. Miqoo oonuree Yisuna ufa irimarusa miqoo marusa niqafamasee moodaa faasaana misa faqa mariqiafana.
ACT 21:8 Miqooqari sipaki fiqa kananaana Seesareea maqusai oonu raqiafana. Oonureeqa Firipina maaqa maru qaannai ooru mina faqa mariqiafana. Firipifa Yisuna fasaasa qimanniminoo nufa marinau. Ooqai Yeerusareenni marufaqa niqiqoo fasiqausaki maridanoo mina mareeqee quqasoofanoo qisauku dinni taikasee dinni ani qaara marasee marusaki maridanoo munnimmaina raina nimimarufaqa mariufa Firipifa marinau.
ACT 21:9 Firipina araamuna qaara faqa qaara faqa maanaaqa mariqau. Anutuna maraquna fannoo mi manaaqausa naakufufaqa Anutuna ufa faiqi anaasee qimannimirana akoofasaikiqa maridaqa qimannimimariqau.
ACT 21:10 Maasa Firipina faqa qaaramoo faasaana mariafananoo Yudeeaa tamummaqara fasiqa moo fannoo mina auqu Akabusafa Yudeeaa maqa maaqaindari qumuranau.
ACT 21:11 Mifa maasunnai anireenoo Pauroona pikapandauru ani qumareenoo minannai narí aiku asauku kukuqamma rumbaseenoo qinau. Anutuna naaquqara maraquna fannoo maaqi qimasee qidanoo. Maa pikapana akoofa Yeerusareenni ooru rainaqa maaqimmasee ruumbeeqee aanaamuru nimifaranoo.
ACT 21:12 Maasa mi ufana iriseeqa maasa aiqama miqoo mariafanausa afeekaikamaseeqa sia uqanna Yeerusareenni oorufuani arifaranoo fee qiqiafana.
ACT 21:13 Pauroofa mi ufana iriseenoo qinau. Innee nanaree miqimasee ikiraqaidee miqi qiafanoo qini qimuqusa mandaikamma qimaqaidee. Qinee Yeerusareenni ooru raanaqa Karaambaiqa Yisunara qini rumbarana faqa qini darirana faqa doo qinee sia rufiaidaqa minara deedaqamma uqirausa nidaqa.
ACT 21:14 Pauroofa miqi qimasoofaqa maasa qaooqirana minniseeqa maasa faqa Anutuna iriramau kai fidaqa sia ititaanaura sai kai fuanifee qiqiafana.
ACT 21:15 Maasa miqoo Seesareea maqusai kaqikaaqoo mariqa maasa qeeqa ainaina deedaqamamaree Yeerusareenni maqamau ooru fiqiafana.
ACT 21:16 Seesareea maqusaindari maasa qikaqaafasaa kirausa akaqausa maasa faqa ooru fiqau. Misa maasa ooruree marianna maqana uqaqifiqarara maasa faqa ooru fiqau. Maasa Masoona maaqaki marifaree qiqau. Masoonafa ooqai indaaru Yisuna ufa irimarufa marufaqa Sipurusa maqusaindaraafa marinau.
ACT 21:17 Maasa Yeerusareenni ooruraafannanoo Yisuna aiku asauku qumu amiqi amiqimandee qumu qifiqee ooru fiqau.
ACT 21:18 Maasa miqoo ooru faiqaafananoo iqaqoofanoo Pauroofa Yameesana qafarara finau. Yisuna ufa irimarusa aiqama miqoo marufanoo Pauroofa nimandamaseenoo narí aanaamuru maaqa maaqa nimarufanoo Anutufa narí Pauroonannai aiqama ainaina auqeeunara qimanniminau.
ACT 21:20 Misa aiqamausa Pauroona ufa iriseeqa Anutunara aiqamausa dufi dufi qimasee asasiqau. Asasamasee Pauroona qimamiqa qiqau. Oo maasa ati, maaqoo Yuda maqannaasa Yeerusareenni mariasa misa fasaasa ufa qimamianaura. Yuda maqannaasa moomoo tauseenna doo Yeerusareenniara ridaqa. Misa Mooseena sandufasaa kaaqa minara faqa Yisunara faqa ridaqa. (Yuda maqannaasa Mooseena sandufa iridaqa maasa fainanduqiranee qidaqa.)
ACT 21:21 Pauroo misa aniara maaqi qidaqa, anee aanaamuru maqusa maqusa nidana Yuda maqannaa minakiaqa mariasauqa anee misara Mooseena sandufa minniseeqa maasa fainanduqirana minnisaaqee qimariannanara Yuda maqannaa oosana minnisaaqee qidanoommifoo qidaqiafaqa maasa iridaqa. Aniara Yeerusareenni aniifoo qifaqa misa aniara iriseeqa aanoo qifaranoo.
ACT 21:23 Minara iriseeqa maasa qimamiannaqoo kai fua. Maaqoo qaara faqa qaara faqa fasiqa maridaqa. Misa maasa Yuda maqannaa oosana marasee doo qima afeekaikamasee nikiaqa maqa namufaqa indufu aqiranara nisauku uqeeraseeqa Anutuna afusaa qima afeekaikamandee maridaqa.
ACT 21:24 Misa firaa amaana maqaki keeqafi nári aanaamuru mandainaina nipatasaa marina rukaseenana anee misa faqa keeqafi aneenaindi faqa rukasainanoo Anutuna afusaa anukanoo marinnaranoo. Findaukamasee anee aneenna munnimma faqa misa munnimma faqa aqua. Aqusaifana anee minamusa faqa nári nikiaqa asausi maqanamu faqa indufu aquaqa. Miqi masainaqa aiqamausa ani qafamaseeqa anee Mooseena sandufa rukiarana aniara qunara unna qiaafoo qiaqeera. Misa aniara kuqaa Mooseena sandufamau fimarifa maridanoo qiaqeera ani aruannee qinausa sia ani arifara.
ACT 21:25 Yisuna ufa irimarusa uriqararausa Yameesana maaqaki Pauroonara qimaseeqa maaqi qiqau. Maasa aanaamuruqa mariasa Yisuna aiku asauku kamambuasa pasa akara rumasee maaqi qimasee qimannimiqia. Innee narana moo unna anutunaree afaannaree misara dufi dufi qimariana mina minnisaaqa. Aandau fidika faqa sia naaqa. Ufaanaki arira aandau fidikana qusinoo marina mina faqa minnisaaqa faiqí anaasee narí ummuari narí ummuarimariana faqa minnisaaqa.
ACT 21:26 Pauroofa misa ufa iriseenoo qaara faqa qaara faqa fasiqa namu nifiqamareenoo iqaqoofanoo kananaana amaana maqaki keeqafinoo misa saimbaqa Mooseena sandufa andeeqasee finoo aanaamuru mandainaina narí apatasaa maruna rukanau. Miqimaseenoo Pauroofa amaana maqaki keeqafinoo Anutuna aanaiqikirausa qimanniminau. Qisauku moodaannai taikasee dinni ani qaaraqanda marasee faasaana maasa qifaaqasaa mandainaina anukee marianaura. Mina maariqoo mina taikasaanaqa mina maariqoo miqoo innee aanaiqikirausa aandau aruseeqa Anutunara tatufirana suqaifanoo maasa rukasaunnana taikaani.
ACT 21:27 Pauroofa mi fasiqa namusa faqa amaana maqaki dinni qisauku taikasee dinni ani qaara marasee faasaana amaana maqaki marinoo taikooqookari Asia maqasaa Yuda maqannaa marusa amaana maqaki Pauroona qafamasee aiqamausa nirana fundakuseeqa faaqa fuisee qiqa Pauroona kari qufaqa aniqumaraseeqa qiqau.
ACT 21:28 Isaraee maqannaa fasiqauqa anidadaaqiaqa. Maa fasiqafa maaqa maaqa maqusa maqusa nidanoo unnaqi noo nifa maridanoo. Isaraee maqannaara manda ufa qimarifa, Mooseena sandufara qaoo qimarifa maa amaana maqanara faqa ufa manda qimarifa maridanoo. Doo mifa maqee aanaamuru maree maa amaana maqanaki mini quqasaifanoo doo maa amaana maqafa putaa inoo maridanoo.
ACT 21:29 Misa Eefeesusa maqannaa aanaamuru fasiqa Taroofimusana Pauroona faqa madaanai maqusai marufaqa qafamasee mina faqa amaana maqaki mari ifoo qimasee sia qafarainni faaqa rumasee Pauroona arirara qiqau.
ACT 21:30 Mi ufafa amaana maqakiqari radiqifufanoo dinni dinni daraaninau. Aiqama dindari dindari moodaanaki anireeqa Pauroona amaana maqakiqari qumaree maqamau rarisameeqee kooqinni aqusoofaqa amaana maqasaa aanaiqikirausa amaana maqaki mandaikiandoo qimasee kaqi kaqi ufaqa amaana maqa kooqi ititasaqau. Faiqí anaasee moomoosa usufufaqa Pauroona saamu uqafiqee mariqau. Kuqa aruanee qimasaida miqi mariqau.
ACT 21:31 Moo fannoo sandee oonureenoo Roomma maqannaa saideena qimaminoo qinau Yeerusaree maqannaasa aiqama suqiqa tinoorirafa firaafa maridanoo fee qimasoofanoo Saideena fannoo narí sundiauqa namufaqa sandamaqaraasinoo misa usi marunakina aniramasoofaqa Pauroona ariuna minnisee náriara kai rakeeiqau.
ACT 21:33 Saideena fannoo Pauroofuqoo anireenoo ani mina qumaraseenoo narí sundiara qaara sainandannai rumbaanee qimaseenoo ariusa irammirinau. Maa fasiqafa nana ainaina mandainainee maraqaifaqee innee arii fee qufaqa moo fannoo moo ufa qufanoo moo fannoo moo ufa qufanoo Roomma maqannaa Saideena dindari dindari ufa fifau faafau ufa kai qufanoo Saideena fannoo sia ufa anoona irinoo Pauroona mareenoo narí ququsaki munu quqasoofanoo marinau.
ACT 21:35 Roomma maqannaa sundiauqa Pauroona afiqee fimarufaqa Yuda maqannaasa aanoomaseeqa Pauroona kooqi aaqa ooruroofaqa aruanneerufaqa sundiauqa mina aindusueeqeeqa uqeereeqeeqa maarinni ququsa qambaanai quqaqau. Faiqí anaasee sandee fidaqa Pauroonara doo kuqarua kuqarua qimariqau.
ACT 21:37 Sundiauqa nári ququsaki quqaanneerufanoo Pauroofa Saideena irammirinoo qinau. Amanee faiqí anaasee qimannimianauree qufanoo Saideena fannoo tautumaseenoo qinau. Anee Kirisa maqannaasa ufa irimariana fee. Qinee ooqai aniara Isipa maqannaafa rakirana uqeeraseenoo 4,000 fasiqauqa Kaammanna faqa ufa rainee marusa nifiqee munu aadana maqa maaqai faiqi sia marunnai uqoona fee maridanee. Miqi qufanoo Pauroofa qaoo qimasee qinau.
ACT 21:39 Qinee Yuda maqannaa maridaqa. Qinee Sirisia maqa maaqaki Tarasusa maqusai uriqarara maqusai kambiqarausa maridaqa. Amanee qinee faiqí anaasee qimannimia.
ACT 21:40 Saideena fannoo mina iriseenoo eedoo qufanoo Pauroofa kooqi irirasusaa akaramafufanoo asaukunnai misa ufa quna qaoo qimasoofaqa misa mina iriseeqa kasoomafufanoo Pauroofa nári Yuda maqannaasa ufakiqari qimanniminoo qinau.
ACT 22:1 Pauroofa narí maqannaasa qimannidanoo narí afaaqasaa ititeenoo maaqi qimasee qimanniminau. Oo maa fasiqausa qini qikaqaafasaa qini qikausamara. Innee qini ufa irisaifaqa qeeqa irirana nimia.
ACT 22:2 Qaara auqu, moo auqu Heeburu maqannaa ufa moo auqu Yuda maqannaa ufa marinau. Misa Pauroonara Heeburu maqannaa ufa nári ufa qidaqinoo fee qimasee aiqama dai qimafiqau. Miqimambufanoo Pauroofa qimanniminoo qinau.
ACT 22:3 Qinee Yuda maqannaa fasiqa maridaqa Sirisia maqa maaqaki Tarasusa maqusai kambiqaafanausa maridaqa. Ooqai qinee kumaaraasaa maridaqa maa maqusanaki Yeerusaree maqusaki Kamarieerana sukuraki kisaaqasaa mariaafanausa maridaqa. Qinee Kamarieerana sukuraki maridaqa maasa qikeeku qikaaku sandufa amiqimasee aiqama iriaraasiafanausa maridaqa. Innee maqee Anutunara afeekaikamandee minara rimariafaqa qinee maqee nindafaidaqa. Qinee inni naanna reereeaa fanausa maridaqa.
ACT 22:4 Ooqai Yisunasaa atooqeemarusa kuqa kai nári mariafanausa maridaqa. Qinee faiqí faqa anaasee faqa rumbasee karabusaki aqimarifanausa maridaqa.
ACT 22:5 Amaana maqasaa aanaiqikirausa misa uriqararafa mifa qini ufa anoona iridanoo. Amaana maqa kansoorauqa faqa qini ufara kuqaa fee qifaranoo. Misa kai pasa akara rumasee Damasakusa maqusai maria Yuda maqannaasa nimiannee qufaqa qinee mi pasana maramaree Damasakusa maqusai ooru Yisuna ufa irimarusa rumbamaree nifiqee muqu Yeerusareenni quqaaneera ooru fuafanausa maridaqa.
ACT 22:6 Qinee mi pasana mara maree Damasakusa maqusa adeedi ramasaafananoo suani qambaana marufanoo innaarunaindari idauru kaaqa qarafa qumureenoo qini fiqu fiqumma aiqama rafaaqafuqisoofaqa qinee maqasaa aqufiqiafana. Innaarunaindari ufa moo qufaqa iriqia. Sauroo Sauroo anee nanaree qini dariraridanee qufaqa qinee Oo Karaambaiqa anee yafee qiafananoo mifa qinau. Qinee Yisusa Nasareeteendaraasa maridaqa. Anee darunausa maridaqa. Mina ufa fannoo miqi qimasee qini qimaqimufaqa qini faqa fimarusa kaaqa qarana qafaqau ufa sia iriqau.
ACT 22:10 Qinee mina irammiriqa qiqiafana Oo Karaambaiqa qinee naqi fee ianauree qiafananoo Karaambaiqa innaarunaindari qinau. Anee findifinana Damasakusa maqusaki fua. Miqoo oonu rainanoo faiqí moo fannoo Anutufa qinara ani qimamiani.
ACT 22:11 Kaaqa qarana fannoo qini qifu dimbasoofaqa qini faqa fusa qisauku qumaroofaqa Damasakusa maqusai fiqiafana.
ACT 22:12 Damasakusa maqusaki faiqí moo auqu Ananiasa Mooseena sandufamau fimarufa Yuda maqannaa miqoo marusa minara andeeqara fasiqa fee qimarufa.
ACT 22:13 Mifa qinee mariafannaqoo anikikiqamambufanoo Oo Sauroo, qini qikaqa, anee afu maqaa, qufanoo kai qifu maqasee mina qafaqiafana.
ACT 22:14 Maasa qikeeku qikaaku Anutufa aniara rusandeesamumandee aniara mina iriranamau fuanneera mina ainainira faiqi andeeqarana Yisuna qafaanneera mina Yisuna ufa irianeera qinoo.
ACT 22:15 Pauroo anee Yisuna afunnai qafoonafa mariananoo minara afu qafoonnanara aiqamausa qimannimia aaqoo irunnara aiqamausa qimannimia.
ACT 22:16 Nanaree kaqi maridanee doo findifinana nammari maraa. Yisuna aaramasee irammirinanoo ani mandainaina rukaannoo.
ACT 22:17 Ananiasafa miqi qimasoofaqa qinee Damasakusa maqusaindari maaqoo Yeerusareenni ani maridaqa amaana maqaki innaaru qimariafananoo qifu kai pisipasamandee Karaambaiqa akooqoo qimaqiminoo qinau. Doo kaqi kaqi maa Yeerusaree maqusaindari quqasee moosaa fua. Anee maaqooqaraasa qiniara qimanniminaqa sia irifaqa.
ACT 22:19 Miqi qimaqoofaqa qinee maaqi qimamiqia. Oo Karaambaiqa qinee ani ufa irimarusa ufa suqira maaqakiaqa keeqafida rarisamasee nariisee karabusaki quqee mariafanausa maridaqa. Maaqooqaraasa minara amiqimasee qini oosana iridaqa.
ACT 22:20 Misa Seeteefeena arimarufaqa qinee faqa miqoo maridaqa dufiaree aridee qimasee arimaru fasiqausa qamunnasaa rakisi mariafanausa maridaqa.
ACT 22:21 Karaambaiqa qini mi ufana iriseenoo qimaqiminoo qinau. Doo anee findifua maaqooqari aanaamuru nianai mariasaki ani aqiqaidaqa.
ACT 22:22 Pauroofa Yeerusaree maqannaasa narí saamu uqafiqee marusa qimannimidanoo aanaamuru nuquroofaqa misa mina iriseeqa aanoomaseeqa fifau faafau ufa qiqa faaqa quqasee mi ufana qima rukiaqau. Misa maaqi qiqau doo maree munusee mina aru aquaqa. Mina marirafa sia amana maridanoo.
ACT 22:23 Miqi qidaqa Yuda maqannaasa faaqa rumaseeqa niranaqoofaqa nári qamunna qumareeqa minannai rutatidaqa kookoomma afaqeeqee mina aanaamu raqau.
ACT 22:24 Roomma maqannaa kiateenna fannoo narí sundiauqa maaqi qimasee qimanniminau, innee maa fasiqana inneeqa ququsaki quqasee uaiaqa samu ariisaifanoo narí mandainaina kooroo iani. Yuda maqannaa faaqaruana oosana kooroo iani. (Roomma maqannaasa maqa maaqai kambiqoosa mi ququsanaki marunausee qimarunara sia moo sundia fee firisuaiqa fee amana kai rumbarana, arirana sia amana mina rumbeefaree arifaree. Moo maqannaasa Roomma maqannaasa rakisinnimaqee mariasa kaqi rumbeefaree kaqi arifaree. Moo maqannaafa firaa feefaurumasee Roomma maqannaasa ququsaki keeqafifanoo mi sandufana mina afaaqasaa ititaannoo.)
ACT 22:25 Sundiauqa Pauroona rumbasoofanoo uaiaqasamu arirara deedaqufanoo Pauroofa kuboora qimaminoo qinau Innee amanee Roomma maqannaa ququsakinaa fasiqa arifaree, sia amana arifaree kootaki qini ufa sia amiqimasee rainasee iriafanoo kaqi fifau darirari mariafanoo.
ACT 22:26 Kuboora fannoo iriseenoo Saideena oonu qimamidanoo qinau. Anee sia mi fasiqana arua. Roomma maqannaa ququsakinaafa maridanoo, qufanoo, Saideena iriseenoo rufieenoo Pauroo finnai oonuree iranau. Kuqaa fee anee Roomma maqannaa ququsakinaa fee maridanee. Pauroofa eedoo qinau.
ACT 22:28 Saideena kaifaa qinau. Qinee firaa munnimma aquseeqa Rooma maqannaa ququsaki fuafanausa maridaqee qufanoo Pauroofa qinau. Sia qinee munnimma aquafanausa maridaqa qini qikoofa minaki marunara qinee Roomma maqannaa ququsaki kambiqarausa maridaqa.
ACT 22:29 Sundiauqa mi ufana iriseeqa nisauku raqandaa mamaraqau. Saideena faqa mi ufana iriseenoo Oo qinee Roomma maqannaa sandufa rukiasee sia ufa irirainni sainandannai rumbaafanausee qimasee qini uriqararafa minara irisee qini faqa daruandoo qimasee nariara rufianau.
ACT 22:30 Saideena fannoo Yuda maqannaasa firaaqoo amoosau maqaranara oosana irianee qimasee iqaqoofanoo kananaana Pauroona sainanda idukuseenoo amaana maqa aanaiqiki marusa uriqararausa faqa misa kansoorauqa faqa naarama quqaseenoo Pauroona mareeqee misa noorinni quqanau.
ACT 23:1 Saideena fannoo Pauroona mareeqeenoo misaki quqasoofanoo misa noori andeeqasee nindafamasee qimanniminau. Qini maqooqooqari sia mandainaina fannoo qini qumaraidanoo Anutuna afusaa maridaqa.
ACT 23:2 Aanaiqikirausa misa uriqararafa Ananiasafa mina iriseenoo Pauroona aaqa marusara nisaukusamu oori itairi amifanoo unna ufa taikaani qufanoo aaqa mariufa oori rukaminau.
ACT 23:3 Arufanoo Pauroofa Ananiasana kafaa qimaminau. Anutufa ani faqa aruannoo anee qaaraiki marianafa mariananoo. Anee qini ufa iriseenana Mooseena sandufa qaannai qini qimani mariananoo Mooseena sandufa faiqí sia ufa irirai sia aruannee qimarifana anee Mooseena sandufa ammuqundari fidana mi fasiqanara qini daruannee qimariananoo.
ACT 23:4 Pauroofa miqi qimasoofanoo Pauroona aaqa marusa qiqau. Anee nanaree Anutuna aanaiqikirausa misa uriqararana manda ufa qimamidanee qufanoo Pauroofa qinau.
ACT 23:5 Oo qini qikaqaafasaa mifa aanaiqikirausa uriqararanara siamma iridaqa. Tamummaqara akara fannoo maaqi qinoo maridanoo Innee sia inneeqa maqannaasa uriqararausa manda ufa qimannimaqaaqa.
ACT 23:6 Miqi qimasee qimannimidanoo miqoo suqiusa nindafaidanoo narikai oonumafi irinau, maa suqimariasa qaarasaa fimariasa nariara nariara rairai qimariaqanda, dinni mariasa Farisai amaana ufa qimariasa maridaqa dinni mariasa Sadikai amaana ufa qimariasa mariafanoo. Minara iriseenoo kaifaa firaa kari qimanniminoo qinau. Oo qini qikaqaafasaa qini qikoofa Farisai amaana ufa qimarufa marifaqa qinee faqa minaki qidaqa. Faiqí moo kuqiranaki findifunara qinee minara kai maa kootanaki maridaqa.
ACT 23:7 Miqi qimasoofaqa Farisai amaana ufa qimarusa faqa Sadikai amaana ufa qimarusa faqa ufa rainaqau.
ACT 23:8 Sadikai amaana ufa qimarusa sia kuqirausa findifidammiafoo qimarusa qangiroora faqa sia maridanoo fee qimarusa faiqí nimana faqa sia maridanoo fee qimariqau. Farisai amaana ufa qimarusa mi ainainanamunara kuqaa maridanoo fee qimarusa mariqau.
ACT 23:9 Misa Pauroofa Farisai amaana qunara iriseeqa suqidaqa miqoo kai firaaqoo narí aqi narí aqimariqau. Farisai amaana ufa qimarusa sandufa akoofasauqa findifiqa afeekaikamandee maaqi qiqau. Maasa sia moo mandainaina maa fasiqa anasaa marifaqa paquriqa. Qangiroofee amanafee qimamifanoo fee maaqi qidanoo fee.
ACT 23:10 Miqi qimasoofaqa Sadikai amaana ufa qimarusa faqa Farisai amaana ufa qimarusa faqa firaaqoo ufa rainarafa kambiqanau. Miqi marufanoo Roomma maqannaa Saideena fannoo narí sundiauqa qimanniminoo, innee Pauroona mareeqee inneeqa ququsaki quqasaaqa, misa mina qambaana rammisiseefaara, qufaqa misa nári sundia ququsaki quqasee rakisimariqau.
ACT 23:11 Miqi qimasoofanoo mi eendanaki Karaambaiqa qangiroo moo fannoo qumureenoo Pauroona oorisaa akooqoo kikiqinoo maridanoo ufa qimaminoo qinau. Pauroo sia rufiaa, paasoosia, anee maaqoo Yeerusareenni qiniara kooroo qianandee Roomma maqusai miqikai innaranoo. Qangiroo miqi qimaseenoo Pauroona qimamisoofanoo taikanau.
ACT 23:12 Iqaqoo kananaana Yuda maqannaa akaqausa Pauroona arira ufa narí qimami narí qimami suqiqau. Ufa andeeqaseeqa qima afeekaikamasee nammari faqa narana faqa auramasee Pauroona aruanee qiqau. Aruseeqa mikari kai narana nammari naanee qiqau.
ACT 23:13 Qaara fasiqa niku nisauku taikasee Yuda maqannaa fasiqauqa kai narana auramasee Pauroona ariraree qiqau.
ACT 23:14 Auramaseeqa misa nári amaana maqa aanaiqikirausa faqa uriqararausa faqa unnai oonuree qimannimiqa qiqau. Maasa narana auramasee Pauroona aruseeqa innaaqiana narana naanauranoo.
ACT 23:15 Innee faqa kansoorauqa faqa Roomma maqannaa Saideena maaqi qimasee uaqee iaqa anee Pauroona mara maree kansoorauqa maaqaki quqasainaqa maasa Yuda maqannaasa amiqimasee Pauroona oosana irianaura. Innee miqi qifanoo Saideena fannoo afiqee finaqa maasa aanai maara maqaseeqa Pauroona aruanaura.
ACT 23:16 Miqi qimarufanoo Pauroona anauqi mina auna faiqi fannoo qumee iriseenoo sundia ququsaki keeqafinoo Pauroona qimaminau.
ACT 23:17 Pauroofa narí arifandinna ufana iriseenoo kuboora qimaminau. Anee maa kumaaraana afiqamaree Saideeninnai munusainanoo ufa qimamiani. Miqi qufanoo kuboora fannoo afiqeenoo Saideenunnai munu quqaseenoo qinau Pauroofa qiniara maa kumaaraana afiqee munusainanoo moo ufa qimamianifee qifaqa afiqee anidaqa qufanoo Saideena fannoo mi kumaaraana afiqeenoo umeenni munuseenoo irammirinau. Nana ufaree anidanee.
ACT 23:20 Miqi qufanoo mi kumaaraafa qimaminau. Yuda maqannaasa duna Pauroonara amiqimandee mina ufa oosana iriraree qia. Misa aniara afiqee munu quqararammifoo qidaqa.
ACT 23:21 Anee sia misa ufa iria, qaara fasiqa niku nisauku taikasee fasiqa aanai maara maqafiqa Pauroona arirara qia. Misa qima afeekaikamandeeqa doo narana auramaseeqa aruseeqa nararee qia. Doo misa maqee deedaqidaqa ani ufaramma afeesida maria.
ACT 23:22 Saideena fannoo mina iriseenoo maaqi qimasee narí qimaminau. Anee maa ufana qini qimaqimiannanara sia moo qimamia saina anikikai mariani. Miqi qimaseenoo mi saideennafa mi kumaaraana aqiqanau.
ACT 23:23 Aqiqamaseenoo Saideena fannoo quandakinoo qaara kubooraqanda mara quqaseenoo qimanniminau. Inneeqara maaqimandee sundiauqa deedaqiaqa. Sundia maqamau fifandinausa qisaukuqara fasiqa niku nisauku taikasee fasiqa (200) minamusa deedaqiaqa. Qoosasaa akaramafi fifandinausa qaaramoo niku nisauku taikasee moo fasiqa asaukuqara taikasee fasiqa (70) faqa qoosauqa faqa deedaqiaqa. Qisaukuqara fasiqa niku nisauku taikasee (200) faaqaana faqaasa maqamau fifandinausa faqa deedaqiaqa. Doo maqee eendakina doo Seesareea maqusai Pauroona afiqee ooqu fuaqa. Qaaramoo qoosa deedaqiaqa Pauroofa fuaninnana. Innee andeeqasee maasa firaa kiapafa Feerisafa marinnai Seesareea maqusai Pauroona afiqee fuaqa. Miqi qimasoofaqa misa mina iriseeqa deedaqiqau.
ACT 23:26 Miqi qimaseenoo Saideena fannoo Feerisana maaqi qimasee Pauroonara pasaki amaqanau. Oo maasa amiqira kiapafa Feerisafa, Qinee Karaudiusasa moo duqu Risiasasa ani amandaidaqa. Yuda maqannaasa maa fasiqana qumaree ariraree qiafaqa qinee minara Roomma maqannaa ququsakinaa fee qimasee ooqu rafiaeeqee qeeqa sundiauqa ququsaki quqeeqa.
ACT 23:29 Qinee misa mina amoosau maqaana oosanara randeeqa misa kansoorakina quqasaunanoo sia rumbarafa arira ainaina marifaqa Yuda maqannaa nári oosana maridanoo miqianannai kai mina arirara qidaqa.
ACT 23:30 Misa qumee maara maqasee mina arirara qiafanoo moo fannoo qumee qimaqimifaqa anee ianannai aqiqaidaqa. Qinee mina amoosau maqaasara ani afusaa innee faqa mifa faqa andeeqaaqeera qidaqa.
ACT 23:31 Saideena fannoo mi ufana akara rumaseeqa sundiauqa nimisoofaqa Pauroona afiqeeqa qoosasaa akaramafufaqa mi eendanaki Antipatiriasa maqusai ooqu fiqau.
ACT 23:32 Iqaqoofanoo kananaana nikumau fusa ooqurandee Yeerusareenni uriqau. Qoosasaa fusa Pauroona afiqeeqa Seesareea maqusai ooqu fiqau.
ACT 23:33 Misa Seesareea maqusai ooquree Saideena papiqanamu faqa Pauroona faqa firaa Kiapana amiqau.
ACT 23:34 Firaa kiapafa mi papiqana asaana rumaseenoo Pauroona irammirinau anee yaindaraa fee qufanoo mifa qinau. Qinee Sirisia maqasaa kambiqaafanausa maridaqa.
ACT 23:35 Firaa Kiapafa mi ufana iriseenoo Pauroona qimaminau. Ani amoosau maqaasa qumuraifaqa ani ufa irianaura. Miqi qimaseenoo poorisa qimaminoo qinau. Maa fasiqana mareeqee Eeroodeena firaa maaqaki quqasaifanoo marinaqa eendaki faasaana rakisiaqa.
ACT 24:1 Pauroofa moodaannai qisauku namu faasaana narí ufa afeesara marufanoo doo amaana maqa aanaiqikirausa misa uriqararafa Ananiasafa Yuda maqannaa faiqí firaasa faqa moo fasiqa Roomma maqannaa sandufa faqa ufoosana faqa amiqimasee irimarufa mina auqu Teeraturusafa misa aiqamausa Seesareea maqusai Yeerusaree maqusaindari ooqu fiqau.
ACT 24:2 Ooqureeqa firaa kiapana afusaa Pauroona amoosau maqoo ufana qimamiqau. Misa Teeraturusana aaroofanoo firaa kiapana afusaa kikiqamambinoo maaqi qimasee Pauroonara qinau. Oo Feerisafa anee idaaqirafa amiqirafa uqanna mariananoo. Anee aneenna iriranannai maasa rakisimariannanara maasa amiqimandee maridaqa. Anee fuka sandufa moomoo quqaidana maasara amiqimasee mariaqeera miqimariananoo.
ACT 24:3 Maasa maqee maqee ani irirana qumareeqa dufi dufi qidaqa.
ACT 24:4 Qinee kisaaqasaa ufa qiananoo ufa aukuana aiqaraandoora qusasaa qidaqa. Amanee anee maasa ufa kaqikaana iria.
ACT 24:5 Maa fasiqana manda oosana fannoo sabeena aada miqirafa maasa raquru qimimarifaqa fataidaqa. Pauroofa aiqama maqusa maqusa fidanoo Yuda maqannaasa nirana fundakinoo nidanoo. Nasareetee maqusanaa fasiqa irirana uriqararafa maridanoo.
ACT 24:6 Sia minara kaifau, maa fasiqafa Pauroofa maasa naaquqara amaana maqa Yeerusareenni putaaifaqa maasa mina qumareeqa maasa sandufannai andeeqee marunanoo Roomma maqannaa Saideena fannoo firaa aanoo iranannai maasa qisaukukinaana rafieenoo.
ACT 24:8 Saideena fannoo mina auqu Risiasafa maasara ani afusaara mi kootana andeeqaaqee qifaqa qumu qimamidaqa. Anee maa fasiqana irammirinanoo mifa maasa ufa anoona qiannoo.
ACT 24:9 Teeraturusafa miqi qufaqa Yuda maqannaasa aiqama kuqaa anoonee qiqau.
ACT 24:10 Firaa kiapafa Teeraturusana ufa iriseenoo doo Pauroona asaukunnai aaranau. Doo anee findifi aneenna ufa qia qufanoo Pauroofa findifi Feerisana qimaminoo qinau. Oo Feerisafa anee kisaaqasaa qini maqannaa Yuda maqannaa ufa andeeqee marianafa mariannanara qinee dufi dufi ani afusaa qidaqa.
ACT 24:11 Innaunni kai qinee Yeerusaree maqusai Anutunara innaaru qiraree qimasee ooru fiqiafana.
ACT 24:12 Qinee amaana maqaki sia aanoo ufa moo qimannimiqiafana. Faiqí nirana sia qinee fundakiqiafana. Amaana maqaki fee nári faiqí suqunaki fee sia qinee Yuda maqannaasa nirana fundakunaqa misa qiqafeeaa.
ACT 24:13 Misa maqee ani mariasa qini qimoosau maqee mariana sia mina anoona paqurimasee kooroo ifana irinnaranoo.
ACT 24:14 Qinee moodaa ainainara kai kooroomasee ani qimamianaura. Qinee maa fuka aatatamau fidaqa minannaikai maasa qikeeku qikaaku Anutunara innaaru qidaqa. Mi aannara Yuda maqannaasa mi aannara kaqirunna fiaanoo qidaqa qini qimoosau maqaidaqa dariraridaqa. Qinee Mooseena sandufa akara aiqama iridaqa mi mau fidaqa tamummaqara fasiqauqa akara faqa iridaqa mi mau fidaqa.
ACT 24:15 Maa Yuda maqannaasa faqa qinee faqa maasa moodaa iriranamau fidaqa kasooqaqee Anutufa aiqama fasiqauqa andeeqarausa faqa mandaikirausa faqa kuqiranakinaasa faqa mara findifumanniseenoo misa ufa iriannoo.
ACT 24:16 Qinee Pauroosa Yuda maqannaasa naanna raida moodaa ainainara afeekaikidaqa, Anutuna afusaa faqa faiqí nifusaa faqa aiqama kari mandoosana maraaqaa imarifaqa eerairidaqa sia mi mandoosanna ummaarafa qini daakuanifeera aufadara maraquna kai aiqamausa nifusaa qini daakuanifeera.
ACT 24:17 Pauroofa Feerisana kaqi qimamidanoo qinau. Qinee moomoo anaamuru maqusai niniifaqa moomoo aukuana maraseeqa qinee munnimma maramaree Yeerusaree maqusai ooruree qeeqa maqannaasa nimiraree qimasee aandau tatufirana suqasee Anutuna amiraree qimasee amaana maqaki keeqafi mariqiafana. Sia moomoosa faqa mariqia, sia aanoo iranaki mariqia amiqimasee mariafananoo Asia maqannaa Yuda maqannaasa mi maqanaki qini qiqafamaseeqa unnaqimasee maa manda oosanna uqeeraqau. Misa kai mai qumureeqa ani afusaa qini qimoosau maqoo ufana qiaqaana.
ACT 24:20 Qinee Yeerusaree maqannaa kansoora nifusaa kikiqiafannana maa qumu mariasa maridaqa qini ufa iriqau. Misa qini manda oosana kooroo iaqaana.
ACT 24:21 Qinee kansoorauqa nifusaa kikiqamafufaqa moodaa ufa kai qinee qiafanaqa misa qini darirariqau. Kuqiranakiqari findififandiafoo qiafannanara qini darirariqau.
ACT 24:22 Feerisafa Yisuna aanara irimarufa maridanoo Pauroona ufa iriseenoo maaqi qimasee qimaminau. Anee kaqi marinanoo Saideena Risiasafa qumurainaqa ani ufa andeeqaanaura. Miqi qimaseenoo mi kootana rafaaqa finoo Poorisa qimaminoo qinau, Anee Pauroona afiqeeqee rumbaranaki quqasee rakisia. Mina qimaminoo qinau, Anee Pauroona rakisimarinaqa mina aqoondi fee akaqaafasaa fee kaqi anireeqa mina faqa ufa qiaqa narana amiaqa sia qaoo qia.
ACT 24:24 Feerisana anaaqa mina auqu Durusi nammarifa Yuda maqannaa anaasee marinau. Qaaramoo faasaana aiqaroofanoo Feerisafa narí aanaaqandiri anireenoo Pauroona aaramasee asauku mundirana Yisuna ufara iroofanoo amiqimandee qimaminau.
ACT 24:25 Pauroofa faiqí anaasee aiqamausa andeeqasee niroosanara faqa mandoosana fannoo dindari oonu rarisee anirarisee ifaqa minniseeqa maasa qiqa qimanara iriseeqa mi mau kai firanara faqa oonumafi irisee minnisaaninnanara Anutuna koota firaafa marianinnanara faqa qimamimarufanoo Feerisafa narí mandoosana firaanara iriseenoo Anutunara rufiammaree qaoo qinau. Saina kaqimarinaqa saika sia marinaqa aniraanana qimaqimia.
ACT 24:26 Feerisafa Pauroonara narí qumee kai qimirinoo qinau. Pauroofa munnimma qiminaqa idukuanauree qimaseenoo maqee maqee karabusakinaana aaramasaida ufaqimarufanoo Pauroofa sia amufanoo kaqi karabusaki marinau.
ACT 24:27 Miqi marufanoo qaara aukuana aiqaroofanoo Roomma maqannaa kiapafa Feerisanara anee moosaa finanoo moo kiapafa ani amaaqa maqaannoo. Feerisafa minara iriseenoo Yuda maqannaasa maaqoo qaraasa qiniara misa niqoondi fee qiaqeera Pauroona narí maaqa uqannakinaana mara maree karabusaki rumbaseenoo quqasee fufanoo fuka kiapafa Poorakiusafa moo auqu Feestusafa mifa anireenoo Pauroona rumbaranaki paqurinau.
ACT 25:1 Fuka kiapafa Feestusafa qaaramoo eenda faiqeenoo Seesareea maqusaindari Yeerusaree maqusai oori quqarara ooru finau.
ACT 25:2 Yeerusareenni ooru marufaqa amaana maqasaa aanaiqikirausa firaasa faqa Yuda maqannaasa faiqí firaasa faqa Pauroona ufa oosana amoosau maqeeunara qimamiqau. Miqi qimasee maaqi qimasee Feestusana qimamiqau, Oo maasa kiapafa amanee anee Pauroona mareeqee Yeerusareenni quqasainaqa ufa irianauree. Misa aanai maara maqasee aruanneera quandasee miqi qimasee qimamiqau.
ACT 25:4 Feestusafa misa ufa iriseenoo qinau. Pauroofa Seesareea maqusai karabusaki maridanoo. Qinee qusasaa ooqu fuanaura.
ACT 25:5 Inni faiqí firaasa qini faqa ooquraifaqa miqookai Pauroona nana mandoosana maraqainaqa misa qifaqa qinee irianaura.
ACT 25:6 Feestusafa miqi qimaseenoo qisaukuqara taikasee afuru faiqeenoo doo Seesareea maqusai kaifaa ururandee ooqu finau. Iqaqoofanoo kananaana ufa irimaruna maaqaki keeqafi narí qaindasaa ooqu marifinoo Pauroona aaroofanoo aniroofaqa Yeerusaree maqannaasa Pauroona fiqu fiqu mambufaqa mandufa uqanna oosana oosana Pauroonara qimasee sia mina anoona paquriqau.
ACT 25:8 Misa taikoofanoo Pauroofa narí oosanara Feestusana qimaminau. Oo firaa kiapafa qinee sia Yuda maqannaasa sandufa rukieeqa. Sia naaquqara amaana maqa putaa manniseeqa maasa Roomma maqannaa firaa Kiapana sandufa sia rukieeqa.
ACT 25:9 Feestusafa mina iriseenoo nariara Yuda maqannaa aqoondikianee qimaseenoo Pauroona irammirinoo qinau. Amanee anee Yeerusareenni oorureenana Yuda maqannaa faqa qini qifusaa misa ani amoosau maqeeaanara andeeqeennaree.
ACT 25:10 Pauroofa mina iriseenoo Feestusana qimaminau. Maa ufa irimaria maqafa sia anindi kai Roomma maqannaa firaana ufa irira maqa maaqoo maridanoo mina sandufa maaqoora qidanoo maaqoo andeeqaaqaana. Qinee sia Yuda maqannaa mandaikamma nisaunausa maridaqa anee mi ufana amiqimasee irimariananoo. Qinee moo sandufa rukiaanaqau moo mandainaina auqeefau sia qinee kuqiranara rufiaunaiqini. Misa qini qimooosau maqara ufa oosana sia maridanoo sia moo fannoo qini mareeqee misa nisaukuki quqaannoo. Qinee Roomma maqusai mari kiapana firaana minauqu Sisaanasaa mina afusaa oonuree qianaura.
ACT 25:12 Miqi qimasoofanoo Feestusafa quandaki narí ufa irimarusa faqa ufa qi qiseenoo Pauroona qimaminoo qinau. Anee Sisaana afusaa ufa andeeqararee qiananoo. Anee Sisaana afusaa ufa andeeqararee qiannanara, doo qinee aqiqaanana minni finnaranoo. (Mi aukuana Seesareea maqusaindari sipaki akaramafufaqa fifiufaqa Itari maqa maaqai Roomma maqusai fimariqau.)
ACT 25:13 Ufa taikaseenoo Pauroofa karabusaki maridanoo sipa afeesara marinau. Marikufanoo moo kiapafa narí anasaasandiri fuka kiapana auqu Akaripaafa marufa aninau, mina anasaana auqu Beeranisa nammarifa marinau.
ACT 25:14 Miqanda ani marikufanoo Feestusafa Pauroona ufa oosana oosana qimaminoo qinau. Indaaru mariu kiapafa Feerisafa maaqoo marufanoo moo fasiqa karabusa marufaqa karabusa rumbaqoofa kaqi maridanoo.
ACT 25:15 Qinee Yeerusareenni oonuraafanaqa amaana maqa aanaiqikirausa misa uriqararausa faqa faiqí firaasa faqa mi fasiqanara mandufa oosana oosana qimaqimisee mina aruannee qiqau.
ACT 25:16 Qinee mina iriseeqa Roomma maqannaasa sanda sia miqinoo maridanoo. Narí amoosau maqainnanara sia fifau nimianaqa arifara. Maasa Roomma maqannaasa sandamau fidaqa miqanda moodaaqoo kikiqamambi ufa dinni dinni andeeqasee iriseeqa miqoo aaqarana marinaqa nimianaqa arifara sia marinaqa sia nimianauranoo.
ACT 25:17 Misa mai Seesareea maqusai qumuraafaqa qinee sia furufariqa iqaqaifaqa kananaana mi fasiqana karabusakinaaana aaraafananoo aniroofaqa mina amoosau maqoosa findifiqa dapi dapi ufa qiqau. Qinee minara moo ainaina mandaikammannimaqee foora irunanoo sia marifaqa. Misa nári amaana sandufara kai iridaqa maana amoosau maqaidaqa arirara qidaqa. Misa faiqí moo mina auqu Yisufa minara kuqinau maqi qiafanoo Pauroofa minara doo findifiifoo qifaqa mina saara mina arirara qidaqa.
ACT 25:20 Miqi qiafaqa qinee Pauroonara amanee ani faqa Yeerusareenni afiqee murusaanaqa mi ufana qini qifusaa andeeqeefaree qunanoo Pauroofa Sisaana afusaa iraree qimaseenoo maaqoo qinee rumbaranaki mariiqa kasooqaqee Sisaa finnai qeeqa ufa mina afusaa andeeqararee qifaqa eedoo qimasaunanoo kaqi karabusaki maridanoo.
ACT 25:22 Akaripaafa Feestusana ufa iriseenoo qinau amanee qinee mina ufa irianauree. Miqi qufanoo Feestusafa qinau, Oo amana duna kananaana iria.
ACT 25:23 Iqaqoofanoo kananaana Akaripa faqa narí anasaana Beeranisa nammarifa faqa aniree maqi qimasee miqooqaraasa faiqí firaasa faqa sundiauqa faqa nammari auqamasee nifaaqa anukamasee amiqira ainaina nifaaqa nifaaqa iiseeqa aiqama aniree padi mafufanoo mi qambaanna miqanda rafudamakufaqa ufa irimaru maqanaki keeqaqau. Keeqafufanoo Feestusafa sundia moo aqiqoofanoo Pauroona karabusa maqakinaana afiqee mini quqanau.
ACT 25:24 Quqasoofanoo Feestusafa aiqama maaqi qimasee qimanniminau, Oo Karaambaiqa Akaripa innee aiqamausa maaqoo ani mariasa qini ufa iria. Maa fasiqanara ufa qidaqa. Yuda maqannaasa maaqooqaraasa faqa Yeerusaree mariasa faqa aiqama maa fasiqana amoosau maqee mariafanoo. Misa minara kuquanifeera firaaqoo faaqa quqaida maridaqa. Qinee mina iriseeqa kuqannaruaninna ainainara randauna sia maridanoo narikai Roomma maqusanaa firaana mina auqu Sisaana auquraifaqa qinee doo amana fee qiqa.
ACT 25:26 Qinee mina aqiqeeqa nana ufa fee pasakina akara rumamiana maree fuannoo fee, sia marifaqa, randaunaisia. Qinee minara mina mareeqee inni nifusaa maaqoo quqeeqa Karaambaiqa Akaripa ani faqa afusaa quqasaanana anee mina ufa irisee qimaqiminaqa qinee mina ufa oosana irisee akara rumma firaa Kiapana Sisaana amaqaanaura.
ACT 25:27 Naqi fee mandee qinee fifau aqiqaanauree. Qinee Yuda maqannaasa Pauroona amoosau maqeemaria ufana andeeqasee akooqoo papiqasaa akara rumasaananoo andeeqaannoo.
ACT 26:1 Karaambaiqa Akaripaafa iriseenoo quandaki Pauroona qimaminau, Aneenna ufa qinaqa iria. Pauroofa mina iriseenoo asauku uqeeraseenoo maaqi qimasee narufa qinoonunara qinau.
ACT 26:2 Oo Karaambaiqa Akaripa, ani afusaa ufa qiannanara dufi dufi qidaqa. Yuda maqannaasa qimoosau maqee maria ufana qimamianaura.
ACT 26:3 Anee Yuda maqannaa mariana faqa misa oosana oosana ufa qimariana faqa anee irimarianafa marianaqa qinee minara ani ufa qimamirara dufi dufi fee qidaqa. Amanee anee qini ufa iria. Aiqama Yuda maqannaasa qinee kumaaraasaaqari findifuafannana irimariafanoo.
ACT 26:4 Qinee sia kaqi nimarunausau maridau qeeqa maqusaki faqa Yeerusaree maqusaki faqa mariafanausa marunaqa Yuda maqannaa minara faqa iridaqa.
ACT 26:5 Qinee Farisai amaana ufa qimariafanausa marunaqa Yuda maqannaasa misa minara iridaqa qumee raidaqa. Farisai amaana ufa qimariasa misa kaaqa Anutuna ufara afeekaikimariasa maridaqa.
ACT 26:6 Qinee naaru kasooqaqee kambiqaaninna ainainara irimaree fidaqa. Ooqai Anutufa maasa qikeeku qikaakusaa qimafeekaikunara qini maqannaasa eendaki faqa faasaana faqa Anutunara innaaru qidaqa maridaqa. Kasooqaqee kambiqaaninna ainainara Anutufa qimafeekaikunara maasa irimaree fidaqa. Mi ainainafa inaaqiana kambiqaaninnanara minara Yuda maqannaasa qini qimoosau maqaidaqa. Mi ainainafa Anutufa kuqiranakinaana mara findifira ainaina mina maridanoo. Yuda maqannaasa nanaree sia iridee unna fee qidee.
ACT 26:9 Ooqai qinee faqa Yisuna Nasareetee maqusaindaraana auqu taikaanifee qimasee qaini qainiqa imariqiafana.
ACT 26:10 Minara Yeerusaree maqusai ooruree aanaiqikirausa misa uriqararana ufa irisee Anutuna faiqi namu moomoo rumbannisee mariafanausa maridaqa. Miqimaqoosa akaqausa narufaqa qinee faqa dufi dufi amiqimmiaafoo qiafanausa maridaqa.
ACT 26:11 Qinee Yuda maqannaa ufa suqira maaqaki keeqafufaqa Yisuna ufasaara narimariafanausa maridaqa. Misa qumareeqa Yisuna ufara minnisaaqee qimasee narimariqiafana. Qinee misa minara firaaqoo aanoomaseeqa moo maqusai nianai fimariafanausa maridaqa.
ACT 26:12 Qinee Yeerusareenni ooruree aanaiqikirausa misa uriqararana pasa mara mareeqa Damasakusa maqusai ooruree Yisuna ufa irimarusa rumbarara ooru fimariafananoo suani qambaanai innaarunaindari idauru miqirafa suaniara foora firaatia qini faqa fusa aiqama rafaaqafusanau.
ACT 26:14 Miqimasoofaqa maqasaa aqufuafananoo minakiqari ufa moo Heeburu ufakiqari maaqi qinau. Sauroo Sauroo anee nanaree qini darina nidanee. Qinee faaqaanannai ani kaqikaaqoo ani afaaqai mundunara anee aneenna kai faaqaana aaru pooduqaani qiannana arumaraananoo firaaqoo aidafidanoo.
ACT 26:15 Qinee miqi qufaqa irammiriqa qiqiafana. Oo Karaambaiqa anee yafee qiafananoo mifa qinau. Qinee Yisusa anee darunausa maridaqa.
ACT 26:16 Doo anee findifinana fua. Qinee aniara qini ainainira faiqikianneera ani afusaa kooroo iqa. Anee maqee qafaannanara faqa kasooqaqee kambiqaaninnanara faqa aiqamai qimannimianeera ani afusaa kooroo idaqa.
ACT 26:17 Qinee Yuda maqannaasaki faqa aanaamuru maqannaasaki faqa ani aqiqaanaura. Misa ani arirarifaqa rafaaqa fuanauranoo.
ACT 26:18 Anee misa nifu maqannimaqeera foora asukunakinaana mareeqeenana kaaqa qaranaki quqannisaaneera, anee misa Sadannana rafaaqafiranakinaana mareeqee Anutunaindi kianneera, misa qini saqarikiranannai misa numoo taikannisaananoo Anutufa narí rusandeesamu masainausaki quqasainaqa misa faqa minaki marifaranoo.
ACT 26:19 Oo Karaambaiqa Akaripa qinee aanasaa qifu pisipasamandai innaarunaindaraa ainaina qafaafanna ainaina sia mi ufana rukiaafanausa maridaqa.
ACT 26:20 Indaaru Damasakusa maqusai oosana arasee Anutuna fasaasa ufa qimannimiqiafana. Miqooqari Yeerusaree maqusai faqa Yudeeaa maqa maaqai faqa aanaamuru marusa faqa qimannimidaqa maaqi qimasee qimannimiqia. Inneeqa manda nirana marirana nimeesuqusee quandakina Anutufinai ubeekamafifaqa Anutufinnai marirana nirana marasainaqa kuqaa Anutuna aanai ubeekamafiaafoo qiaqeera.
ACT 26:21 Minara kai qinee Yeerusaree naaquqara amaana maqaki marunaqa dariraridaqa.
ACT 26:22 Anutufa qini dadaaqimarinara maqee inni nifusaa kikiqiqa maridaqa uriqararausa faqa ureeqarausa faqa nifusaa Yisunara kooroomannimidaqa. Ooqai tamummaqara fasiqauqa faqa Mooseefa faqa qimarundee kaimmidaqa misa maaqimmiqau. Anutuna asauku mundirafa Yisufa teeroo firaana mareeufanoo kuqinoo mi kuqiranakiqari findifinoo findifirana indaaru nikamannisaannoo.
ACT 26:23 Miqinnanannai asauku mundirana Yuda maqannaa faqa aanaamuru maqannaa faqa maa anutuna ufa fannoo qoomara fooqaana doo innikina doo anireenoo. Misa miqi qimaqoona marifaqa qinee faqa minara kai qidaqa.
ACT 26:24 Pauroofa miqi qimasee nariara ufa qimarufanoo Feestusafa quandakufanoo faaqa quqaseenoo qimaminau. Akasaa doo anee furufarammiananoo. Ani irirana firaafa ani mandainainaki afeeqamifana aqufuananoo.
ACT 26:25 Pauroofa mina iriseenoo maaqi qimasee qimaminau Oo Feestusa uriqararafa, qinee sia furufarau qidau miqidau. Noori runusee kuqaa anoonainaina qimaria ufana qidaqa.
ACT 26:26 Oo Karaambaiqa Akaripa qinee ani afusaa paasoosamasee maa ainainnara kooroo idaqa anee sia sia irimarianafa mariananoo, irimarianafa mariananoo. Anee maa ainainna qafaidana oonumafi irimarianafa mariananoo. Sia kukeeqaranaki maa ainainnafa marifa akooqoo marifa maridanoo.
ACT 26:27 Oo Karaambaiqa Akaripa anee tamummaqarausa ufa irisee kuqaa anoona fee qidanee anee miqi qimarianaqa qinee iridaqa.
ACT 26:28 Akaripaafa mi ufana iriseenoo Pauroona qimaminoo qinau. Anee maa qusa ufanannoo qiniara Yisuna faiqiki quqee fee qidanee.
ACT 26:29 Pauroofa mina iriseenoo Akaripaana qimaminoo qinau. Qusa ufa fee kisaaqa ufa fee sia qinee minara iridaqa. Qinee aniara faqa maa qoo maridaqa qini ufa irimariasara faqa innaaru qidaqa aiqamausara qinee imarunandee iqa Yisuna saqari kiaqeera qidaqa, sainandannoo rumbaqimaqarafa kai sia.
ACT 26:30 Pauroofa miqi qufaqa Akaripaafa faqa firaa kiapafa faqa Beeranisa nammarifa faqa findimeeqee raudamaki fiqau. Fidaqa narí qimami narí qimami maaqi qiqau. Maa fasiqafa sia karabusa ainaina qafeemarifa sia kuqannarira ainaina qafeemarifa maridanoo.
ACT 26:32 Akaripaafa minara maaqi qinau Pauroofa narí sia Sisaana auqureenoofau doo idukiqini, Sisaana auquramaseenoo saina minni fuani.
ACT 27:1 Sipa Itari maqusai fimaru sipafa moo fannoo aniroofanoo Feestusafa narí sundiauqara ufaqa misauqa Pauroona faqa karabusa akaqausa faqa mi sipanasaa quqanau. Saideena auqu Yuriusafa narí sundiauqa namufaqa mi sipanaki Pauroona saimbaqa nifiqee finau. Mi saideenna aiku asaukuara Augustoona ammi suqira fee qimariqau.
ACT 27:2 Maasa Pauroona faqa fuanna sipafa Adaramitiuma maqusaindaraa sipa marinau. Mi sipafa narí qumaara ainaina deedaqamaseenoo Asia maqa maaqandanai firaree qufaqa doo maasa akaramafuafananoo qifiqee finau. Faiqí moo Aristarakusafa Maseedoonia maqa maaqaindaraafa Teesaroonika maqusaindaraafa doo maasa faqa finau.
ACT 27:3 Fifiufaqa eendaki faqa fimariqau. Iqaqoofanoo Sidoona maqusai oonuraqau. Saideena Yuriusafa reendeenidanoo Pauroona amiqimasee qimaminau. Anee Sidoona maqusai ani aqoondiuqa marifana misa faqa oonu faiqainaqa naranaina amifana sipaki akaramafi maree fua qufanoo doo miqimminau.
ACT 27:4 Sidoona maqusai mariqa sipaki akaramafufaqa fufanoo ufai kaqinaindari anufanoo sipa sia andeeqasee fuaqaaufaqa Sipurusa afuma qaannai ooru fiqumaki fiqiafana.
ACT 27:5 Maasa Sirisia maqa maaqaikundanai fifiufaqa Risia maqa maaqaki firaa taunna auqu Miraa miqoo oonuraqiafana.
ACT 27:6 Oonuroofanoo Saideena fannoo sipa moo paqurinau. Areekasandiria maqusaindaraa sipa Itari maqa maaqai fimaru sipafa marufanoo Saideena maasa aiqama mara quqasoofaqa fiqau.
ACT 27:7 Miraa maqusaindari moomoo faasaana eendaki mi sipanaki anuqiqa fimariqau. Fidaqa Nidusa maqusa amummaqa oonuraafananoo ufai kaqinaindari aimaree anufaqa quandakufaqa ooruku nammari amuaqumau Kareetee afuma ooquree mina auqaanai sia ufai uqunnai mindanai fiqiafana. Miqoo Saramoonee maqa Iroosa Oorikiraqoo fee qimaruqoo fiqummakufaqa anuquseeqa Raseea maqusa amummaqa oonuraqau. Oonuree firaa farumma qafamasee minaki kiateenna fannoo narí sipa maree minaki keeqafi marufanoo ufai faqa ooruku nammari faqa sia arinau. Miqunara mi farummana auqu mandaaqa farummee qiqau.
ACT 27:9 Ufai fannoo kaqinaindari anufaqa maasa kisaaqasaa miqoo maridaqa Itarinni fuanee qu aukuana taikanau. Anutuna faqa moodaanaki qoomaqa suqaani qu aukuanafa doo ainnaaqaramafinoo sia amana fifaranoo. Pauroofa mina qafeenoo maaqi qimasee naamuaqinau.
ACT 27:10 Oo maa fasiqausa maasa maaqooqari fuananoo mandaikammiannoo. Sipa faqa sipakinaa qumiasana faqa maasa faqa kuridi taikaanaura.
ACT 27:11 Saideena fannoo sia Pauroona ufa irinau sipa akoona faqa kiateenna faqa misa ufa kai irinau.
ACT 27:12 Misa maru farummafa sia kisaaqasaa qaaramoo quqoona amana marufaqee qimasee saina maasa sipaki moo farumma Kareetee maqa maaqaindaraa farumma moo mina auqu Finisa miqoo amanamasee qafaanaura. Miqoo fuaninna farummafa amiqirafa marifaqa ufai sia ani marunnai amiqimasee mandaaqai kisaaqasaa mariannee qiqau. Aiqamausa eedoo qufaqa moodaa moodaa maramarariqau.
ACT 27:13 Misa Finisa farummaki fuanee qufanoo ufai fannoo mitinai ubeekoofaqa misa asasamaseeqa ankaqa ooqu rarisameeqee sipaki quqasee Kareetee maqa mammaaqandanai fiqau. Misa fimarufanoo fimarunaindari ufai firaa tia uqanna maqamau aninau.
ACT 27:15 Mi ufaifa sipa ooru arufaqa mara ubeekoofanoo sia amanaikufanoo quqaseeqa ufai namufaqa kaqi fiqau.
ACT 27:16 Sipa fannoo kaqikaa maqanamu mina auqu Kauda mina fiquimarufaqa mina mandaaqa maridaqa kaqikaa kanuqa sandannai rarisee maruna kadaapi rumeeqee sipasaa amuaqundari fataafimamaqasee rumbaqau. Misa sipa nammari kasi kasinoo qambaana afooiandoora qimasee sanda firaana qumaraida qambaana qambaana rumbee mariqau. Misa ufai fannoo fuaqa aminanoo Ribia maqasaa aruandoo qimasee seera sandaaqai maruna idukueeqeeqa sipaki quqasee doo kaqi ufai namufaqa fiqau.
ACT 27:18 Ufai firaafa uqinoo nammari amakaurufanoo sipa teeqi taaqufaqa rufiasee sipa ummaara maridanoo ukuqnaandoo qimasee sipakinaa ummaara aiqama nammariki aqusoofanoo sipa fannoo aufadanau. Iqaqoofanoo kananaana kai sipa ummaara raidanoo qimasee minakinaa ainaina oosana oosana aiqama mareeqee ooruku nammariki aqusaqau.
ACT 27:20 Moomoo eendaki faasaana sia suani fasau qafaqau minara misa firanara randoosia. Ufai firaafa uqanna uqimarufaqa maasa qeeqa marirafa doo taikeefoo qiafannana.
ACT 27:21 Sipakinaasa moomoo eendaki faasaana sia narana neemariqau, naarara kai mariqau. Minara Pauroofa misa qambaanai findifinoo qimanniminoo qinau. Innee qini ufa iriaqaana Kareetee maqusaki kai mariaqaana. Miqimaseefau sipakinaa ainaina firaa feefauru aqimariana sia aqunaiqini kaqi mariqini. Doo maqee qinee inni fuki faaki qidaqa doo paasoosiaqa. Sia inneeqa moodaa kuqifaranoo, sipa kai kuquannoo. Qinee Anutunaindi maridaqa mina ainainira faiqi maridaqa. Eenda eendaki Anutuna qangiroo moo fannoo qinee marunannai aniree qimaqiminoo qinau.
ACT 27:24 Pauroo sia rufiaa, anee kuqaa Roomma maqannaa firaa kiapana oorisaa kikiqinnaranoo. Anutufa narí amiqira oosana uqeereeqeenoo aiqama sipakimariasa ani aminoo, sia moo fannoo kuquannoo.
ACT 27:25 Doo maa faiqisa sia nimuqusa tiakiaqa, paasoosiaqa. Anutufa qimaqimindee kai iannoo. Qinee mina irisee mina saqarikidaqa.
ACT 27:26 Kaqikaa qoo ufai fannoo maasa sipa maramaree kaqikaa maqanamu raquramiannoo.
ACT 27:27 Maasa qisaukuqara taikasee qikunni ooqu qaara faqa qaara faqa eendaki faasaana Meediteeraneeana ooruku nammari amuaqumau fimarufaqa booskurauqa oonumafi iri iseeqa eenda amuqusai Oo maasa moo maqa maaqa adeedi anireeqa qimaseeqa sanda kisaaqa marasee ummaararoo ainaina mina atisaa qususee nammariki aqusee qafaqau. Nammari 120 amana meemai faruma difukunaki marufaqa qafaqau. Kafaa moosaa oonuree kafaa aquseeqa qafaqau. Nammari 90 amana kaqikaa faruma ausaanaikiranaki kai marinau.
ACT 27:29 Booskurauqa mina qafamasee eendaki oonisaa aruani qimaseeqa sipa araqeemusaaqari qaara faqa qaara faqa qankaqa quqasoofanoo maqa qumaroofaqa misa iqaqaranara innaaru qimariqau.
ACT 27:30 Booskurauqa maasa sipa oorinni qankaqa quqaidee unna qimasee kanuqa mareeqeeqa nammariki quqasee minaki aqufi quqasee sandaaneera imarufanoo Pauroofa qafamasee Saideena faqa sundiauqa faqa qimanniminoo qinau booskurauqa sia marifaqa innisaimbaqa aiqama kuquanauranoo. Booskurauqa kanuqaki quqasee fidamia qufanoo sundiauqa kanuqa sanda ateekamufanoo kanuqa nammariki pautaqi aqufinoo kaqisamu finau.
ACT 27:33 Iqaqarara kaarimaqoofanoo Pauroofa fuki faaki qidanoo qinau. Innee qisaukuqara taikasee qikunni ooqu qaara faqa qaara faqa eendaki faasaana sia nee mariasa mariafanoo. Kisaaqa kamusaqa innee sia moodaa ainaina naafanoo.
ACT 27:34 Qinee inni fuki faaki qidaqa doo narana marasee namasee sia kuqua. Sia inniki moo fannoo abandiakaannoo. Innee kaqi rumbaqa marifaranoo.
ACT 27:35 Pauroofa miqi qimaseenoo feemu maraseenoo ruqi ruqimaseenoo innaaru qimaseenoo noofaqa tautumma qafeeqa amiqimmi ifoo qimaseeqa maasa faqa aiqamausa naqau.
ACT 27:37 Maasa mi sipanaki marusa nisaanarirafa maaqimminoo marinau 276 fasiqa moomoo uqanna mariqau.
ACT 27:38 Aiqama namasee nimuaqu mambufaqa raisa fooqaaira narana mina auqu uita misa mina mareeqee ooruku nammariki teeqimasoofanoo sipa aufadanau.
ACT 27:39 Iqaqoo kananaana maqa afaisaa maridaqa yamaqa maaqanai fee marida fee qida sia irimariqau. Booskurauqu qafoofanoo nammari muqufi rainee maruqoo oonureeqa dinni kaqi ooqu fimarunna minniseeqa dinni farumma oonu mandi marunaki keeqararee qimasee amanamandee qafaanee qiqau.
ACT 27:40 Miqi qimasee ankaqa sanda ateekasoofanoo aiqama nammariki aqufiqau. Sipa sitiaqa ainaina rafaaqa fimaru sandana aukusoofanoo akaqausa mina ati qumaroofanoo seera sipa oorisaa uqeerasoofanoo ufai fannoo mina arinoo rariseenoo oorindari finoo mi farummanaki keeqafiqa maqa raquramianee qiqau.
ACT 27:41 Sipa fuaneera maseenoo aaqamakufanoo nukuda raquraminoo oorindari utusamafi kasooinoo marinau. Araqeemu nammari fannoo firaaqoo aridanoo rukakamumasanau.
ACT 27:42 Sundiauqa karabusa fasiqauqara nammari amuaqumau fimariasa quqasee sandee maqi qimasee aiqama naru taikaaneerufanoo Saideena fannoo Pauroonara amuqusufanoo qaoo qimaseenoo qinau. Nammari amuaqumau fimariasa sipasaaqari nammariki aqufi nammari amuaqumau maqee fuaqa. Sia nammari amuaqumau fimariasa sipa rufadaairana ati aina qumareeqa minasaa ooqu marifi fuaqa. Doo maasa miqimandeeqa aiqamausa maqasaa fiqau.
ACT 28:1 Maasa aiqama nammarikiqari afainni akaramafufaqa qafaafana aiqama amiqimandee mariqiafana. Miqooqaraasa iroofaqa mi maqana auqu Marata fee qiqau.
ACT 28:2 Marata maqannaasa maasa amiqi amiqimaqisaqau. Aaku rufaqa suara darufaqa misa idaraseeqa mara quqaseeqa maasa qiqoondikiqau.
ACT 28:3 Pauroofa ida asaida maramareenoo idaki aqusoofanoo sakani minaki kukeeqanoo mariufa asauku aakusee miqoo dirinoo marinau.
ACT 28:4 Marata maqannaasa mina qafeeqa maaqi qimasee unna ufa qiqau, maa fasiqafa faiqí narimarifa marifanoo. Misa nimana fannoo mi sakanina aundurai keeqafifanoo nararidanoo. Ooruku nammariki sia kuqunara sakani fannoo mina aridanoo.
ACT 28:5 Pauroofa asauku rutatufanoo sakani idaki aqufufanoo Pauroofa sia aurinau.
ACT 28:6 Marata maqannaasa mina qafamasee qiqau kaqi kasooiqa maridaqa qafa mifa innooqaannoo fee maqasaa aqufinoo kuquannoo fee qimasee kisaaqasaa fifau qafee mariqau.
ACT 28:7 Pauroofa sia kuqufaqa misa minara moo anutu fee qiqau. Maasa sipa maqasaa raquru amuqoo karaambaiqa auqu Pubariusafa mina afuqa anaadoo aaqa raquraminau. Pubariusafa Marata maqannaa karaambaiqa marinau. Mifa maasa qumu qifiqeenoo murusoofaqa qaaramoo faasaana mina faqa mariqiafana.
ACT 28:8 Pubariusana akoofa aurinoo marinau. Mina aurirafa afaaqa idididanoo aratootooki marinau. Pauroofa minara iriseenoo mina maaqaki keeqafinoo innaaru qimaseenoo narí asauku mina afaaqasaa mundusoofanoo aurirafa taikanau.
ACT 28:9 Miqimasoofaqa qafamaseeqa mi maqannaasa mi saqanna marusa nári aurirausauqa naakidaqa minisee marufanoo aurirana taikannisee marinau.
ACT 28:10 Maasa qaaramoo quqoona Marata maqasaa mariqiafana maasa sipa moo mina auqu Moodaa Karira Anutuqanda maasa mina paquriqiafana. Areekasandiria maqannaa sipa fannoo Itari fimaru sipafa ufaira rufiasee Marata maqasaa faasai ani kukeeqanoo marinau. Maasa mi sipanaki akaramafuafanaqa Marata maqannaasa narana faqa oosana oosana ainaina faqa aanasaa naaqee qimasee quqasoofaqa maasa mareeqa Itari maqa maaqai fiqiafana.
ACT 28:12 Fifiufaqa Sisiri afuma firaannai oonuree firaa taunnaki Sirakusee maqusai raquramisee qaaramoo afuru miqoo faiqaqiafana.
ACT 28:13 Doo miqooqari sipaki nammari amuaqumau fifiufaqa Itari maqa maaqa atisaa firaa taunna Reekiumma maqusai kasooiqiafana. Iqaqoo kananaana ufai maasa inaaqianaindari uqinoo seera fuaqoofanoo dadaaqufaqa kaqi kaqiufaqa qaara faasaana kai Puteeoori maqusai sipa kasooinau. Puteeoori maqusa Roomma maqusa Kaamanna maqusai marinau. Aiqama sipauqa Puteeoori maqusasaa munu afiqusee marufaqa maqamau Roomma maqusai fimariqau.
ACT 28:14 Puteeoori maqusaki Yisuna ufa irimarusa paqurimasee misa faqa moodaa amaana mariqiafana. Doo miqooqari andeeqasee Roomma maqusa andeeqasee maqamau fiqiafana.
ACT 28:15 Roomma maqusai Yisuna ufa irimarusa akaqausa marusa ooqai Pauroofa animarunara iriseeqa aanai kaqikaa maqusa Apiusana makeeta faqa qaaramoo pasindiaqa maqa maqusa faqa maruqoo Yisuna ufa irimarusa qumu qifiqee Roomma maqusai ooru fiqau. Pauroofa misa nindafoofanoo amuqusaki idaaqufanoo Anutunara dufi dufi qimasee doo misa faqa Roomma maqusai oorufinau.
ACT 28:16 Maasa Roomma maqusai ooruroofanoo Kiapafa Pauroonara aaduma moo maqaki marinanoo sundia kai rakisianifee qinau.
ACT 28:17 Pauroofa mi maqanaki qaaramoo afuru faiqeenoo Roomma maqusai maru Yuda maqannaasa uriqararausa naaramasoofaqa suqumaree Pauroona maaqaki aniroofanoo Pauroofa ufa qimanniminoo qinau. Oo qini qikaqaafasaa, sia qinee moo ainaina qeeqa maqannaasaindi mareeqa sia maasa qeeqa qikeeku qikaaku sandufa rukiaafanausa maridaqa Yeerusaree maqannaasa qini ruumbeeqeeqa Roomma maqannaa nimia.
ACT 28:18 Kiapausa Seesareea maqusai qini mandainainara randoosia sia moo kuqira ainaina qiniki marinau. Minara misa qini idukuanee qufaqa Yuda maqannaa afeekaikamandee aanoo ufaqa qinee quandaki Sisaana auqureeqa sia qeeqa maqannaasa ufa nimiraree qimaseefau maa ufana oosana areefau nariqa kai.
ACT 28:20 Minara qinee inni qimannimianeera naaraida. Anutuna asauku mundirafa anianinnanara Isaraee maqannaasa irimaree fidaqa minara kai qini qisauku maa sainandafa rumbanoo maridanoo.
ACT 28:21 Yuda maqannaa uriqararausa mi ufana iriseeqa Pauroona qimamiqa qiqau. Maasa sia Yudeeaa maqannaa ufa moo aniara iriqa, sia moo fannoo pasa akara ruma aniara maasa qimaqeenoo. Sia moo fannoo mindari aniree aniara manda ufa qia. Maa fuka ufana Yisunara aiqama maqa maaqaki mariasa nikoo fee qidaqa, maasa minara ani ufa irianauree qidaqa.
ACT 28:23 Miqi qimaseeqa moo suaniara utaaqamasoofanoo mi faasaannasaa Yuda maqannaa moomoo aniree Pauroona maaqaki keeqafufanoo Pauroofa Anutuna ququsa ufara naamua qimarinau. Kananaana oosana araseenoo eendirana paqurinau. Pauroofa tamummaqara fasiqausa akarakinaa ufa faqa Mooseena sandufa faqa minakinaanannai Yisunara naamua qinau.
ACT 28:24 Akaqausa Pauroona ufa irisee kuqaa anoonee qimasee iriqau. Akaqausa sia iriqau.
ACT 28:25 Pauroofa mina qafamaseenoo qimanniminoo qinau. Anutuna naaquqara maraquna fannoo tamummaqara fasiqa Eesaiaana ooqai aakufinoo dadaaqufanoo inni nikeeku nikaaku naaru kambiqaaninna ainainara qimanniminau.
ACT 28:26 Mifa maaqi qinau. Eesaiaa anee oonureena Isaraee maqannaasa maaqi qimasee qini ufa qimannimia. Innee kisaaqasaa qini Anutusa ufa iridaqa sia ufa irifaranoo. Innee kisaaqasaa qini ufa nifunnai qafee marifanoo sia mina anoona paqurifaranoo.
ACT 28:27 Innee maa maqannaasa nitikura ummaarandanoo maridanoo ooni miqirafa maridanoo. Misa nariqa naaqoo nisaukunnai ititeemariasa maridaqa. Misa narikai nári nifu dimbeemariasa maridaqa. Misa nári nifunnai qafeefoora naaqoonnai irifoora nitikurannai oonumafi irifoora. Misa qini Anutu finnai quandeefoora, qinee misa amiqimannisaannoora.
ACT 28:28 Pauroofa miqimasee qimannimiseenoo maa ufanannai rafaaqafinoo qinau. Anutufa inniara maa ufana iriaqee qinau. Doo Anutuna faiqí mareeqee narí asumu mariranaki quqeemaru ufafa doo aanaamuru maaqa maaqai daraaninoo. Misa irifara innee sia irimariafanoo. Miqi qimasoofaqa Yuda maqannaasa Pauroona maaqakiqari raudamaki fidaqa narinni narinni ufa rainaqa fiqau.
ACT 28:30 Pauroofa maru maqana ufaasu maqaki marinau maqee maqee munnimma aqusaida marinau. Qaara aukuana mi maqanaki marufaqa moomoosa aniree marufanoo naarama quqasaidanoo Anutuna ququsara qimannidanoo Karaambaiqa Yisufa asauku mundiranara faqa paasoosamasee naamua qimarinau. Sia moo fannoo qaoo qimarinau. Eedoo kai qimariqau.
ROM 1:1 Qinee Pauroosa Anutuna asauku mundirana Yisufa mara firiqai faiqisa maridaqa mina ainaina dadaaqimaruna faiqisa maridaqa. Anutufa qini maqasaa fasiqa Anutufa faiqí aanaaseekinaana rusandeesamumasee narí amiqira fasaasa ufara qimannimiannee qimaqoosa maridaqa.
ROM 1:2 Mi amiqira fasaasa ufana naaru kambiqaaninnanara Anutufa ooqai uqanna narí tamummaqara fasiqauqa narí ookiqari qimannimisoofaqa quandafiqa faiqí anaasee qimannimisee quandakiqa naaquqara akaraki quqaqoofa maridanoo.
ROM 1:3 Mi amiqira fasaasa ufana narí amaaku narí asauku mundirana Yisunara maasa karaambaiqara qidanoo. Mifa Dafidinakiqari kambiqoonara maasa maqasaa fasiqee qidaqa. Anutufa narí firaa afeekannai kuqiranakinaana Yisuna mara findifumaseenoo minannai uqannifiqasoofaqa iriseeqa misa minara Anutuna amaaku innaarunaindaraafa naaquqarafee qidaqa.
ROM 1:5 Yisuna minannai Anutufa qini amiqi amiqinoo qimannimira fasiqaikamambi maridana aiqama maqannaa naarama minisee Yisuna amiqira fasaasa ufa qimannimisainaqa iriseeqa mi mau fiqa Yisuna auqu uqeeraaqeera qiniara qimaqoosa maridaqa.
ROM 1:6 Aiqama maqannaasara qidaqa inni Roomma maqannaasara faqa qidaqa Anutufa inniara narí asauku mundirana Yisunaindi kiaqeera qimaqoofa maridanoo.
ROM 1:7 Anutufa inni Roomma maqannaasa faqa naarameeqeenoo qini qiku qisauku kiaqeera qimaqoosa mariafaqa. Qinee Pauroosa minara iriseeqa inni akara rumannimaqaunafa maridanoo. Anutufa maasa qikoofa faqa narí asauku mundirana Yisuna maasa karaambaiqa faqa narí amiqi amiqira oosana faqa narí aundura asooarana faqa inni nimiani.
ROM 1:8 Maa ufanannai inni qimannimiranara qianaura Anutuna asauku mundirana minannai qinee Pauroosa inni Roomma maqannaasara Anutu finnai dufi dufi qimamaqaidaqa. Aiqama maqannaasa innee Yisuna saqarikiranara irimarifaqa minara qinee Pauroosa innaaru qimamaqaidaqa dufi dufi qidaqa.
ROM 1:9 Qinee aiqama kari maqee maqee inni Roomma maqannaasara iridaqa Anutufinnai maqee maqee innaaru qimarunnanara minara Anutufa iridanoo. Qinee qeeqa qimuqusa ookiqari qeeqa iriranannai Anutunara eedoo qira dadaaqira ainainiranakina maridaqa. Maridaqa narí amaaku amiqira fasaasa ufa faiqí anaasee qimannimidaqa. Qinee inniara Roomma maqannaa faiqí aanaaseera innaaru qidee qunanoo Anutufa kuqaa fee qiannoo.
ROM 1:10 Qinee ooqaindari inni maqusai oonuree inni nindafarara irida marunnanara maqee Anutufa qini dadaaqinaqa inni maqusai oonu mariannanara minara faqa innaaru qidaqa.
ROM 1:11 Qinee firaaqoo inni nindafarara qidaqa innaarunaindaraa amiqi amiqirana moo inni naida nimianaqa innee Anutunaki afeekaikamafi mariaqeera iridaqa.
ROM 1:12 Qinee minara maaqi qidaqa qinee faqa innee faqa narí dadaaqi narí dadaaqirara innee Yisuna saqarikirana faqa qinee faqa Yisuna saqarikirana faqa narí dadaaqi narí dadaaqiaqa.
ROM 1:13 Innee Roomma maqannaasa maa ufana iriaqa. Qinee inni maqusai moomoo kari firari mariafananoo moo ainaina rafaaqafinau. Qinee moomoo maqusanaasaki sia Yuda maqannaasaki nimariafanausa miqidaqa misakinaana oonu rarisameeqee Yisunaki quqeemarunausa inniki faqa ooqaindari miqianee qidaqa.
ROM 1:14 Aamina maqannaa faqa irirana faqaasa faqa aikara foora daruqoofanoo maridanoo. Misa aiqama Yisunufa qimannimianaqa irifanoo mi aikana darirafa tatinoo qifaaqa aufadaannoo.
ROM 1:15 Mi aikana tatiranara irisee qinee inni Roomma maqannaasa faqa Anutuna amiqira fasaasa ufa qimannimiraree qidaqa.
ROM 1:16 Anutuna amiqira fasaasa ufa Anutufa faiqí mareeqee asumu mariranaki quqeemari afeekafa maridanoo minannai Yuda maqannaa naaree aanaamuru mariasa innaaqiana irisee mi mau finausa Anutufa asumu mareeqee quqaannoo. Minara qinee mi amiqira fasaasa ufanaki qeeqa daundura firaaqoo mara quqaidaqa.
ROM 1:17 Anutufa faiqí anaasee aaqeemariasa narí namuqaaki mariasa sia naruseenoo mareeqeenoo narí aqoondikidanoo narí amiqira fasaasa ufa minara kooroo idanoo. Maasa Yisuna saqarikirana mifa kai Anutunara aqoondikirana nimidanoo. Ooqeenaa tamummaqara fasiqauqa akara minara maaqi qinoo maridanoo. Faiqí anaasee Anutuna saqarikiranannai mina aqoondikinausa misa kai naaru naaru marirana mareefaranoo.
ROM 1:18 Faiqí anaasee mandainaina faqa kudimakirana faqa miqanda Anutuna anoona ufa rafaaqafifaqa sia irida maridaqa, minara Anutuna aanoo qirana narirafa inaarunaindari akooqoo misasaa qumu maridanoo.
ROM 1:19 Maanara Anutufa misa naridanoo. Faiqí faiqi Anutunara irimari ainainafa akooqoo maridanoo. Anutufa narí kai uqannifiqasoofanoo marifaqa sia irimariafanoo.
ROM 1:20 Ooqai Anutufa maa maqa maaqana auquqooqari mina kukeeqarana idaaqirana faqa mina naaru naaru marira afeeka faqa innaarunaindaraa andeeqara marirana faqa narí auqu quqoo ainainaki akooqoo marufa maridanoo. Faiqí faiqi Anutufa auqu quqoo ainainaki qafamasee sia Anutunara irida fee qifaranoo. Miqi qimasaidaqa unna qimarifanoo Anutufa mi ufana sia iriannoo kaqi naruannoo.
ROM 1:21 Misa Anutunara iridaqa sia minara dufi dufi qidaqa, kafaa sia mina auqu uqeeraidaqa. Misa quandaki nári irirafa firaaqoo furufariranaki kai maridaqa misa nitikura fifau maridanoo asukuna kai qumbiqanoo maridanoo.
ROM 1:22 Misa náriara irirana faqaasee qimasaida unna qimasaidaqa furufariranaki maridaqa.
ROM 1:23 Misa Anutuna naaru naaru marira areenarana mafi quqasee Anutuna innaaruqirana faqa amooqirana faqa mafi quqasee fifau faiqí faiqi amanauqirana faqa ufini amanauqirana faqa aandau amanauqirana faqa amuaqundari maqamau nimarina amanauqirana faqa marasee maasa Anutu fee qimasee minara innaaru qidaqa amooqidaqa.
ROM 1:24 Faiqí misa nári furufarirafa miqinoo firaafa marifanoo Anutufa misa mareeqeenoo nariqa nimuqusimari mandainainaki quqasaifaqa faiqí narinni narinni ira ainainara nisaurira ainaina kai maraidaqa.
ROM 1:25 Misa Anutuna anoona ufa mareeqee kaqinni quqaseeqa unna ufa mareeqee nifusaa quqasee minara kuqaa fee qidaqa. Naaru naaru amooqimaria Anutuna aiqama ainaina auqu quqoo Anutunara minnisee quandaki Anutufa auqu quqoo ainainara fifau ainainara innaaru qimasee maasa Anutu fee qimasee mi mau fidaqa.
ROM 1:26 Anutufa faiqí anaasee nári manda niranara qafamasaifanoo akooqaifanoo kaqi minaki nifeeqaidanoo. Minara aanaaseeuqa faqa nári nifaaqmaaka minnisee andeeqara oosana minnisee narinni narinni oosana oosana manda marirana maraidaqa.
ROM 1:27 Faiqí miqi kai iqa nári ninaaqmaaka faqa amiqira oosana minnisee nariara nariara ridaqa idara foora nitakuqidanoo. Faiqí misa narinni narinni nisaurira ainaina maraseeqa mina akiaqara nári nifaaqasaa aurirana aidafirana marasee aupuraidaqa.
ROM 1:28 Faiqí anaasee Anutuna anoona ufara nikooqaifanoo Anutufa misa mareeqeenoo mandainainakina sia fuaqaa ira mandainainakina quqasaifaqa minaki fidaqa. Miqianara maa manda ainaina oosana oosanafa qumbiqaidanoo, manda oosana faqa, kaaqa ainainara rimarina faqa nariara nariara fidiaqaa imariana faqa nariara nariara rairai qirana faqa faiqí kuqannarirana faqa narí afumau narí afumau irafa faqa nári ueeqee narí ueeqee imariana faqa manda oosana oosana faqa nariara nariara munuqi miniqi imariana faqa misa Anutunara fidiaqaa imariana faqa kaukaata qimariana faqa nári nifaaqa nimooqirana faqa nariara kai firaaqoo ufaqí marina faqa maqee maqee mandoosanara randeemariana faqa nári ninaukoo ufa rukiee mariana faqa sia nári andeeqaramau firanara uriqararanee qimariasa, faqa nariqa qimannimira ufa rukiee mariana faqa sia nári nikaqaafasaara amuqusirana faqa mi manda ainainnausaki fimariasa maridaqa.
ROM 1:32 Anutufa minaki fimariasara kuqiranaki fimariaa maqi qida qifaqa iridaqa kaqi minaki fidaqa. Sia minakaifau miqidau firaa manda oosana marasee akaqausa mi mandainainaki dadaaqimariasara misara faqa eedoo qimaseeqa asasidaqa.
ROM 2:1 Oo qini qiqoondi sia anee akaqausara aaqeeaafoo qinana anee faqa mi aaqarana maree marianafa mariananoo. Anee faqa naqimasee Anutuna arirana eerairinnaree, Anee akaqausara miqinana anee faqa mi manda oosanna kai maree mariananoo aninna qaoo qira ufa fannoo aninna aruannoo.
ROM 2:2 Faiqí anaasee mi manda oosanna maree marifanoo Anutufa kai misara narira ufa qiannoo. Anutufa sia aaqaidanoo andeeqaidanoo misa narira ufa ameemaanai quqannisaannoo.
ROM 2:3 Qini qiqoondi anee sia amana akaqausara qaoo qinnaranoo, anee qaoo qidee qidana aneenna faqa minaki fimarianafa mariananoo. Anee miqi mariannanara naqimandeenee Anutuna ariranara eerairinnaree, sia amana eerairinnaranoo.
ROM 2:4 Inniara Anutufa aneenna mandainainakiqari mifinnai ubeekeefandinnanara reendeenamasee rakisidanoo maridanoo. Innee minara Anutufa reendeenira oosana marainara innee minara furufarira oosana fee fee qimaseeqee kaqi mi mandoosannaki marida fee. Anutufa inniara reendeenira oosana fannoo sia furufarira oosanafau maridanoofau. Inneeqa mandainaina minnisee quandaki narinnai ubeekaaqee qimari oosanafa maridanoo innee sia fee minara iridaqee.
ROM 2:5 Inni naaqooki ooni ititanoo marifaqara foora sia ufa irimariafanoo. Miqianara Anutuna andeeqara ufa faqa mandainaina akiaqara narira ufa faqa kooroo inna faasaana mikari inniqa mandainaina fannoo inniqa narira ufa firaaqoo uriqaramafuannoo.
ROM 2:6 Mi faasaanna Anutufa aiqama fasiqa anaasee nári maree mariana akiaqara kai nimiannoo.
ROM 2:7 Akaqa fasiqa anaasee amiqira oosana kai maraqa nidaqa innaarunai areenarana faqa innaarunai nuqu uqeerarana faqa naaru naaru mariranara faqa randaidaqa. Miqi mariasa Anutufa naaru marirana nimiannoo. Akaqausa nári nifaaqara kai ridaqa andeeqarana futeeqaidaqa aaqaranaki kai fidaqa. Misasaa Anutufa narí aanoo qirana faqa narí aranaqarana faqa nammariara foora adiannimaqaannoo.
ROM 2:9 Nidafirana faqa aupuranara faqa Anutufa aiqama mandoosana maree mariasa misa nimiannoo. Yuda maqannaasa naaree nimiseenoo innaaqiana aanaamuruqa nimiannoo. Anutufa miqi kai inoo aiqama andeeqara oosana maree mariasa nimooqirana faqa nuqu uqeerarana faqa nimuqusaki asooarana faqa nimiannoo. Yuda maqannaasa naaree nimisee innaaqianna aanaamuru mariasa nimiannoo.
ROM 2:11 Miqimasee Anutufa aiqama maqannaara amana amana kai nári maree mariana akiaqara nimimarifa maridanoo nimiannoo.
ROM 2:12 Anutufa narí sandufa Mooseena qimamufanoo mifa quandasee Yuda maqannaasa qimannimisoofaqa misa mi sandufana qumarasee marusa maridaqa, misa mandoosana maraifanoo Anutufa Mooseena sandufannai misa qumaree naruannoo. Anaamuru mariasa Anutufa Mooseena amu sanda ufana sia mina ameemaanai maridaqa kaqinni maridaqa, misa mandainaina oosanara minni kaqinni marinannai naruannoo.
ROM 2:13 Sia Mooseena sandufa naaqoonnai irimariana sia minau Anutufa narafusaa andeeqaranaki faiqí anaasee quqaidanoofau, mi sandufana marasee imariana andeeqasee auqee marianannai kai Anutufa narí andeeqaranaki quqannisaannoo.
ROM 2:14 Misa Yuda maqannaasa Mooseena sandufa maree mariasa maridaqa aanaamuru mariasa Mooseena sandufa siaisa mariasa maridaqa misa nári iriranannai Mooseena sandufara sia irirai kaqi mi mau fidaqa, doo Anutuna ufamau fimariasa maridaqa. Mi oosanafa Anutuna sandufa naunduraki akara rinoo marifaqara foora kooroo ifaqa miqidaqa. Anaamuru mariasa Anutuna ufa sia irimariasa nariqa kai moo oosanara manda oosanee qimasee moo oosanara amiqira oosanee qimasee qimariafa mifa kai Anutuna sandufa ooqai kukeeqasee quqaqoofa naundurakiqari kooroo idanoo.
ROM 2:16 Kasooqaqee anianinna faasaana Anutufa narí asauku mundirana Yisunannai faiqí anaasee aiqama naunduraki kukeeqarana kooroomaseenoo rainannimaqaannoo, Qinee Pauroosa Anutuna amiqira fasaasufa faiqí anaasee qimannimiqa nidaqa minara qimannimidaqa.
ROM 2:17 Innee Yuda maqannaara qidaqa anee Yuda maqannaa mariananoo anee Mooseena sandufa saqariki marianafa mariananoo, anee Anutunara fifau iridee qimasee firaaqoo ufa qidana aneenna auqu uqeeree marianafa mariananoo, anee Anutuna andeeqara aanara irimarianafa mariananoo. Anee Mooseena sandufakinaana amiqira aanara faqa manda aanara faqa rainasee irimarianafa mariananoo, anee aneennara nifu dimbarausa aana uqannifiqee marunausee qimarianafa mariananoo anee aneennara asukunaki mariasa misa qooma maridee qimarianafa mariananoo, anee aneennara furufarirausa irirana nimimarunausa qimarianafa mariananoo faiqiuqaindi amiqira aana uqannifiqee marunausee qimarianafa mariananoo. Anee Mooseena sandufa minakiqari aiqama irirana faqa anoona ufara faqa qinee irida fee qimarianafa mariananoo.
ROM 2:21 Doo qinee aniara qianaura, anee uqannifiqee marianafa mariananoo, nanaree sia aneennara faqa mina mareenee. Anee misara sia ummuariaqee qimaseenana doo aneenna ummuari marianafa mariananoo.
ROM 2:22 Anee misara sia faiqí anaasee narí ummuari narí ummuari iaqee qidana, anee faqa sia fee ummuaridanee. Ooninnai saqarinnai unna qira Anutunara foora mina amana auqimarianara fidiaqaa imariananoo fee anee fee mi unnaqira anutuna amaana maqakina keeqafida minakinaa amiqira ainainara fifau ainainee qimaseenanee kaqi maraidanee.
ROM 2:23 Anee aneennara Anutuna sandufa qumaree marunausee qidana aneenna auqu firaaqoo uqeeree marinafa, aneefee Anutuna ufa rukiaseenanee asaurirana amidanee.
ROM 2:24 Ooqeenaa tamummaqarausa akarakina inniara maaqi qidanoo. Anaamuru inni Yuda maqannaa mandoosana qafamasee quandaki Anutunara manda ufa qidaqa.
ROM 2:25 Innee Yuda maqannaasa inneeqara fainanduqirausee qidaqa miqianara Anutuna faiqi namufee qimariafanoo. Qinee Pauroosa minara maa ufana qidaqa. Innee miqi mariasa Mooseena sandufamau amiqimandee fidaqa inni fainanduqirafa amiqira ainaina mariannoo, mina ufa rukiaseeqa fifau nipata aukirafa, sia Anutuna faiqi namu mariafanoo aamina aanaamuara foora marifaranoo.
ROM 2:26 Aamina aanaamuru mariasa sia Yuda maqannaasa fainanduqimarusa misa nári kai sia irirai Mooseena sandufamau andeeqaramau fimarifanoo Anutufa mina qafamaseenoo Yuda maqannaara foora mariaafoo qiannoo.
ROM 2:27 Anaamuru mariasa sia Yuda maqannaasa fainanduqimarusa misa andeeqaseeqa Anutuna ufamau fifaqa innee Yuda maqannaa fainanduqimarusa Mooseena sandufa inni ufakiqari akara rirana rukiasaifanoo aanaamuru aamina maqannaa nári andeeqarafa inni Yuda maqannaasa mariranara mandainainee qiannoo.
ROM 2:28 Yafee Yuda maqannaa uqanna Anutuna aiku asauku uqanna maridanoo fee, apatasaa kooroo irafa mifee anoona maridanoo fee. Anutuna ufamau fimariasa mi fee anoona maridanoo fee.
ROM 2:29 Sia apatasaafau anoona maridanoo naundura nimuqusakiqari Anutuna ufamau fimariasa misa anoona maridanoo fainanduqirausara foora maridaqa. Sia Mooseena sandufa irirana irirafa mifau Anutuna aiku asauku kamannimaqaidanoofau. Anutuna maraquna naundurai saikisa misa kai Yuda maqannaa uqannara foora Anutuna aiku asauku maridaqa. Miqifandinna fasiqausa sia faiqí nimooqiranafau maraidau, Anutuna amooqiranara ridaqa randasee maraidaqa.
ROM 3:1 Qinee minara irammirisee qimannimianaura Yuda maqannaasa aanaamuru urinnaaqaraqa maridee kaqi fifau fee miqiqa marida fee. Misa fainanduqirausa misee aanaamuru urinnaaqaraidee kaqi fifau fee miqi qida fee.
ROM 3:2 Oo sia fifau miqi qidaqa misa uriqararafa firaafa maridanoo. Doo qinee oosanarasee maaqi qimasee qimannimianaura, Anutufa narí ufa Yuda maqannaasasaa quqaqoofanoo marinau.
ROM 3:3 Akaqausa sia narisaa quqaqoonara irisee andeeqaramau fiqa rukiasee kaqi runnambiqau. Anutufa misa furufarirana qafamaseenoo qinee faqa misa qima afeekaikamma nimiafanna ufana qinee faqa misa naanna reeqa rukiaanauree qianauree.
ROM 3:4 Qinee Pauroosa minara maaqi qidaqa. Oo sia uqanna Anutufa mi mandoosanna maraannoo anoona ufa kai qimarifa maridanoo. Faiqí anaasee unnufa kai qimariasa kai mariafanoo sia Anutufa miqiannoo andeeqasee anoona kai qiannoo. Ooqeenaa akara Anutunara maaqi qinoo maridanoo. Ani ookinaa ufara aiqamausa anoona ufa fee qifaranoo. Misa ani ufara amanamandee irifanoo anoonaikammiannoo. Dafidina akarakinaa ufa Anutunara miqimminoo maridanoo.
ROM 3:5 Misa faiqí faiqi unna qimasee maaqi qimasee Anutuna andeeqaranara qidaqa. Maasa faiqí faiqi qiqa aaqarafa quandaki Anutuna andeeqarana mara maree kooroomeeqeenoo uqeerainaqa maasa qeeqa aaqaranara amiqira ainainee qianauree. Miqooqari maasa maaqi qianaura mandainaina akiaqara maasa Anutufa darinaqa maasa maaqi qianaura Anutufa aaqaidanoo daridanoo fee qianaura.
ROM 3:6 Qinee Pauroosa minara maaqi qidaqa. Oo sia uqanna Anutufa aaqaidanoo. Anutufa sia uqanna aaqaidanoo, narí andeeqarafa marinara maasa andeeqaqisaannoo mina andeeqarafa sia marinanoofau sia amana maasa aiqama maqannaasa ufa iriseenoo andeeqaisaiqini.
ROM 3:7 Misa faiqí faiqi unna qimasee maaqi qimasee Anutuna anoona ufara qidaqa, maasa qiqa unna ufa fannoo Anutuna anoona ufa kooroomafi uqeerainanoo qiqa unna ufa amiqirafa maridanoo nanaree Anutufa qiqa unna ufa akiaqara qiqa daruannoo fee.
ROM 3:8 Qinee mi manda ufanara eedoo qaanaqau maaqi qiaqini, Doo aniaqa maasa manda marirana uqeeraseeqa minannai amiqira marirana kambiqasaanee qiaqa. Mi manda ufana uqeereemaria fasiqausa Anutufa misa mara mareenoo nári nariranaki quqaannoo. Sia aaqaidanoo miqidanoo, andeeqaidanoo miqidanoo. Mi aaqara ufana qimariasa qini Pauroosara faqa unna qimasee Pauroofa maasara manda marirana uqeerasee minannai amiqira marirana kambiqaanifeera qimasee minannai qini diqidaqa aaqee mariafanoo.
ROM 3:9 Doo qinee kafaa Pauroosa minara maaqi qimasee iraidaqa, Anutufa maasa Yuda maqannaasee, aanaamuru mariasee, uriqaraida fee qidanoo amana amana kai fee maridee qidanoo. Qinee Pauroosa oo sia moo uriqarara fee qidanoo doo qinee faasai qimannimiqa sia moo fannoo uriqararafa mariaafoo qidaqa aanaamuru faqa maasa Yuda maqannaasa faqa nári mandainaina ameemaanai ureeqaqa mariaafoo qidaqa.
ROM 3:10 Ooqeenaa tamummaqara fasiqausa akara minara maaqi qinoo maridanoo. Aiqama maa maqa maaqanaki mariasakiqari moodaa fasiqa sia uqanna andeeqarafa maridanoo, aiqamausa miqirausa kai maridaqa. Misakiqari sia moodaa fasiqa Anutuna aanara randaidanoo.
ROM 3:12 Aiqama fasiqa anaasee uqanna Anutuna afusaaqari quandaki kaqi runnamma ubeekamasee aaqaranaki fimariafanoo. Sia moodaa fannoo amiqira oosana maraidaqa sia uqanna.
ROM 3:13 Misa noo aamara faiqí madikara foora oo raqanoo marifaqa faiqí kurididaqa. Misa ufa fannoo sakani ukaqa nimiranara foora inoo maridanoo faiqí kuqannaruaqaa ufa kai qimariasa.
ROM 3:14 Misa nookiqari sukufa kai qidaqa niquraree mariasa.
ROM 3:15 Misa dauni faiqí kuqannarirana aupurarana nimimariasa.
ROM 3:16 Miqi mariasa fimariaqoo kai faaqa fuisee qirana faqa aiqama ainaina kuridi kaaridiqa turi taariqa fidaqa.
ROM 3:17 Misa sia asooara aana qafeeqa sia Anutunara naaquqaranara irimariasa maridaqa. Ooqeenaa tamummaqara fasiqauqa akara Yuda maqannaara faqa aanaamuru mariasara faqa amana amana kai miqi mariasee qimaqoofa maridanoo.
ROM 3:19 Mooseena sandufakina mina ameemaanai mariasara qidanoo qimarifaqa maasa minara iridaqa. Faiqí anaasee aiqama maa maqannaasa náriara andeeqarausee qimaria ufana oosana oosanauqa aruseeqa aiqamausa mareeqee Anutuna narira ufa ameemaanai quqaaqeera Mooseena sandufa ani maridanoo.
ROM 3:20 Sia faiqí anaasee moo fannoo Mooseena sandufannai andeeqara fasiqaikamambi Anutuna afusaa mariannoo. Sia minarau Mooseena sandufa ani maridanoofau. Faiqí anaasee maasa aaqee marunausee qiaqeera Mooseena sandufa ani maridanoo.
ROM 3:21 Doo maqee kamuqoo Anutuna afusaa andeeqafi marira oosana doo kooroo inoo maridanoo. Sia Mooseena sandufarau qidau, aaduma moo ufara qidaqa. Mooseena sandufa faqa tamummaqarausa ufa faqa doo minara kooroomasee maaqimminoo maridanoo.
ROM 3:22 Faiqí anaasee narí Anutuna asauku mundirana saqarikiranannai Anutufa mareeqee narí afusaa andeeqaranaki quqaidanoo. Aiqamausa asauku mundirana Yisuna ufa irisee minasaa rusimariasa miqi qimariasa aiqama maqannaasa Anutufa mareeqee narí afusaa andeeqaranaki quqaidanoo sia raina rainiannoo.
ROM 3:24 Aiqama maqannaa fasiqa anaasee aaqoonara Anutuna innaaruna asumu mariranasaaqari nianai mariafanoo minara Anutufa narí afaariranakiqari kaqi nimira ainaina narí asauku mundirana Yisunannai misa mareeqeenoo narí afusaa andeeqaranaki quqanniseenoo nári mandainainakinaana idukunnisanau.
ROM 3:25 Anutufa Yisunannai faiqí anaasee mandainaina akiaqara mininnisaaninafa kambiqaanifee qimasee Yisuna aqiqamasee nimufaqa aunirira saqarisaa ariqau. Mi fasiqa anaaseesa nariqa Anutuna andeeqaranaki sia amanaikiqa Yisuna saqarikidaqa. Minaki keeqaranannai Anutufa misa mandainaina taikannisaidanoo. Anutufa narí andeeqara oosana kooroo ianifeera qimaseenoo narí asauku mundirana aunirira saqarisaa quqaseenoo minannai faiqí anaasee mandainaina akiaqara narí maranau. Ooqai maru aukuana Anutufa faiqí anaasee sia mandainainara narimarinau kisaaqasaa kasooinoo marida nifauee marinau.
ROM 3:26 Maqee mari aukuana dauni ufa qimasee andeeqannisaidanoo narí andeeqarana kooroo ianifeera faiqí anaasee mareeqee narí afusaa innaaruna andeeqaranaki quqaidanoo. Anutufa Yisuna mareeqeenoo aunirira saqarisaa aruseenoo minannai maasa mandainaina taikaqisanau. Miqiranannai Anutufa qaara ainaina kooroo idanoo, narí andeeqarana faqa Yisuna ufasaa irirana rusisee mi mau fimariasa mareeqee narí afusaa andeeqaranaki quqannisarana faqa kooroo idanoo.
ROM 3:27 Yuda maqannaasa Mooseena sandufamau fidaqa náriara andeeqarausa maridee qimasee nári nipatara nimooqida maridaqa. Sia sandufa miqinoo maridanoo Anutuna ufasaa irirana mundinoo marifa narí mina mandaaqee marinafa mifa kai andeeqarafa maridanoo. Mifa kai Anutuna innaaruna andeeqaranaki quqaqisaidanoo.
ROM 3:28 Minara maasa maaqi qidaqa Yisuna saqarikiranannai kai Anutuna innaaruna andeeqaranaki keeqafi mariannoo, sia Mooseena sandufamau finnanannai innaaruna andeeqaranaki keeqeefaranoo.
ROM 3:29 Anutufa Yuda maqannaa Anutufa kai fee maridanoo, aanaamuru mariasa Anutufa faqa maridanoo fee. Doo Yuda maqannaa faqa aanaamuru aiqamausa faqa Anutufa maridanoo.
ROM 3:30 Anutufa moodaa maridanoo, moodaamau fimarifa maridanoo. Yuda maqannaasa Yisuna saqarikiranannai Anutufa mareeqeenoo narí afusaa andeeqaranaki quqannisaannoo aanaamuru faqa narí afusaa andeeqaranaki quqannisaannoo anaamuru mariasa faqa miqi kai masee Yisuna saqarikinnanannai narí andeeqaranaki quqaannoo.
ROM 3:31 Miqunannai maasa Yisuna saqarikidaqa sia minannai Mooseena sandufa mareeqee aqidaqa, sia miqidaqa maasa minannai Mooseena sandufa uqeeraidaqa mi mau fidaqa, minara mi sandufana anoona paquridaqa.
ROM 4:1 Innee Roomma maqannaasaki Yuda maqannaa akaqausa maridaqa. Maasa Yuda maqannaa qikeeku qikaaku Abarahaamafa naqaafeeinau. Mifa andeeqara mariranannai fee Anutuna afusaa andeeqarafa maridanoofeeinau. Sia minannaifau miqinau Abarahaamafa miqinoo maridanoofau Anutuna afusaa narí andeeqaranara asasini. Sia amana narí asasirafa marinau, Mooseena akarakinaa ufa minara maaqi qinoo maridanoo. Anutufa Abarahaamanara qinau anee moomoosa nikausaikina marinnaranoo. Miqi qunara Abarahaamafa iriseenoo oo kuqaa kambiqaannoo fee qimasee narí irirana Anutuna mi ufanasaa rusiseenoo afaaqa quqasee kisaaqasaa rakisi marinau. Anutufa mina qafamaseenoo Abarahaamanara oo Abarahaamafa qini ufasaa ani irirana rusimarianafa mariananoo andeeqarafa mariananoo fee qinau, minara Abarahaamafa sia narí andeeqaranara narasasirafa marinau.
ROM 4:4 Faiqí moo fannoo moo fasiqa ainainama isainanoo ainaina akoofa mina feefauru amiannoo. Aminanoo sia kaqi fifau qimiifoo qiannoo, narí mina ainaina kadaapirina akiaqara aminoo. Faiqí moo fannoo sia narí kadaapiriranasaa andeeqarana maraidanoo kaqi narí irirana Anutuna ufasaa mundimarina Anutufa miqi mari fasiqana kaqi mareeqeenoo narí afusaa andeeqaranaki quqaidanoo. Anutufa faiqí faiqi aaqee mariasara andeeqarausee qimarifa maridanoo faiqí aanaaseeuqa sia nariqa kadaapirifa, kaqi mi ufanasaa nári irirana rusisainna fasiqa anaaseesa Anutufa narí andeeqaranaki mara quqannisaannoo.
ROM 4:6 Anutufa aaqee maru fasiqa anaaseesa sia narinau, misara andeeqara fasiqa anaaseera foora kaqi mareeqee narí andeeqaranaki quqanau. Dafidifa minara maaqi qimasee akara rinau.
ROM 4:7 Anutufa mandainaina akiaqara mininnisoo fasiqa anaaseesa firaaqoo asasidaqa. Nári mandainaina Anutufa rafaaqafusoonara asasidaqa.
ROM 4:8 Anutufa nári mandainaina akiaqara sia irisee naruannoo, mina akiaqara aunusee sia kafaa minara ufa qiannoo. Miqira fasiqa anaaseeuqa minara irisee asasidaqa. Doo Dafidifa miqimmasee akara rinau.
ROM 4:9 Dafidifa mi asasirausara Yuda maqannaasara kai fee fee qinau. Sia miqinoo maridanoo. Anaamuru mariasa faqa asasifandia maqi qinau. Qinee Pauroosa faasai Mooseena akarakinaana Abarahaamanara qunafa maaqimminoo maridanoo. Abarahaamafa Anutuna ufa irisee narí irirana minasaa rusisoonara Anutufa minara kai irisee mina mareeqeenoo narí andeeqaranaki quqanau.
ROM 4:10 Yairee fee Anutufa narí andeeqaranaki quqanoo fee inau. Abarahaamana fainanduqu sooqoo fee miqinau sia fainanduquaqoo fee miqinau. Sia fainanduqira qoo mi fasannai mareeqee quqanau. Abarahaamafa Anutuna ufasaa narí irirana rusisoonara Anutufa mareeqeenoo narí andeeqaranaki quqaseenoo mina kooroo ianifeera Abarahaamanara fainanduquannee qufanoo miqinau. Miqi kai inoo Abarahaamafa aiqama Anutuna ufasaa irirana rusiranannai Anutuna andeeqaranaki keeqee marusa nikoofaikinoo marinau. Miqi kai inoo sia fainanduqirausa nári irirana Anutuna ufasaa rusisoosa Abarahaamafa misa nikoofaikinau.
ROM 4:12 Sia fainanduqirausa faqa fainanduqirausa faqa nikoofaikinoo marinau. Fainanduqirausa Yuda maqannaasa sia minara irisee Anutuna andeeqaranaki keeqaidaqa, misa nári nikeeku nikaaku Abarahaamafa mariundee kai iqa sia nári fainanduqiranara iriseeqa nári irirana Anutuna ufasaa rusisoosa Anutuna andeeqaranaki keeqeefaranoo. Abarahaamafa sia fainanduqiraqoo narí irirana Anutuna ufasaa rusinau. Maqee fainanduqirafa mifa mariundeemmiaqa.
ROM 4:13 Anutufa maa maqa maaqanara Abarahaamafa narí aiku asauku saimbaqa maqa maaqa fee qinoo qimafeekaikinau. Sia Abarahaamafa Anutuna sandufamau andeeqasee finoofau mina akiaqara maqa maaqara qima afeekaikirana marano̱ofauinau. Mifa Anutufa ufasaa narí irirana rusisoonara minara kai Anutufa mina mareeqeenoo narí afusaa andeeqaranaki quqaseenoo maqara qimafeekaikinau.
ROM 4:14 Anutufa narí nimianinna ainaina Kannaana maqa maaqa faqa asumu marirana faqa narí sandufamau kadaapirumasee fimariasa kai niminanoofau faiqí nári irirafa mina ufasaa mundirafa fifau kamambuannoo Anutuna ufa qima afeekaikira ufa faqa fifau maridanoo sia dadaaqiannoo.
ROM 4:15 Sandufa fannoo Anutuna aranaqarana mareeqeenoo faiqisaa quqaidanoo. Sandufa marinnaqoo kai sandufa rukiarafa mariannoo. Sandufa sia marinnaqoo mina rukiarafa faqa sia miqoo mariannoo.
ROM 4:16 Qinee Pauroosa Abarahaamanara kafaa qidaqa. Anutufa nimianinna ainainara Kannaana maqa maaqa faqa asumu marirana faqa qima afeekaikirafa Abarahaamafa Anutuna ufasaa irirana rusisoona minasaa mundinoo maridanoo. Miqiunara Anutufa nimianinna ainaina maa maqana faqa asuma marifandinnana faqa Abarahaamana narí aiku asauku faqa misasaa oonu aruakinausa faqa kaqi nimira ainainara foora mariannoo. Sia Anutuna ufaki kadaapirumasee fimariasaindi kai mi ainainausa marifaranoo Abarahaamana aanna ree mariasa, Anutuna ufasaa kaqi irirana rusimariasa misaindi faqa mi ainainausa mariannoo. Maasa Anutuna ufasaa rusimariasa nikoofa Abarahaamafa maridanoo. Maasa mina aanna ree mariasa kai mina aiku asauku maridaqa.
ROM 4:17 Anutuna ooqeenaa akara minara faqa maaqi qinoo maridanoo. Qinee ani Abarahaamana mareeqeeqa moomoo maqannaasa nikoofaikianeera quqeeqa. Doo maasa mi ufana iriseeqa maaqimmidaqa, Abarahaamafa narí irirana rusisoo Anutufa narí qimafeekaikunara anoonee qidanoo. Mi Anutufa kuqirausakinaana mareeqee kaqi mariranaki quqee marifa maridanoo mina ufa fannoo qufanoo sia maru ainainafa kambiqanau.
ROM 4:18 Abarahaamafa nauraiqi kuqiara foora inoo marufanoo Anutufa moomoo maqannaa nikoofaikianeera qimamufanoo Abarahaamafa mina ufasaa irirana rusiseenoo sia asasiaqaa iraqoo asasammaseenoo afeesinau. Minara mifa kuqaa moomoo maqannaa nikoofaikamambinau. Ooqeenaa akara minara maaqimminoo maridanoo. Anisaa aniaruakinausa moomoo marifaranoo.
ROM 4:19 Anutufa mi ufana Abarahaamana qimamu aukuana kuqirana adeedi ramasee wan handeereeta aukuana adeedi ramasee marinoo narí anaaqa Saraqana faqa faiqi maqara aukuana ooqai uqanna taikafufanoo marunara amiqimasee iriseenoo, Anutufa faiqi aanaaqiara qimamunara iriseenoo sia Anutuna ufa afaimma quqanau, kaqi mina irirafa mina ufasaa irirana rusisee kuqaa kambiqaannoo fee qimaseenoo marinau.
ROM 4:20 Abarahaamafa narí Anutunasaa narí irirana rusiqoofa sia quqasee finau, sia mifa Anutuna ufara qaara aundura irinau. Abarahaamafa narí irirana Anutunasaa rusisoofanoo quandakinoo Abarahaamana afeeka amufanoo faiqi kambiqaaninnanara Anutunara asasinau.
ROM 4:21 Anutufa qimamu ufanara Abarahaamafa afeekaikamandeenoo Anutunara kuqaa afeeka maridanoo qimiannoo fee qimasee asasinau. Anutufa Abarahaamana mi irirana qafamaseenoo doo minara Abarahaamana mareeqeenoo andeeqara fasiqa fee qinau, Abarahaamafa narí irirana Anutunasaa rusisoonara minara andeeqarafee qinau.
ROM 4:23 Andeeqara fee qu ufafa sia Abarahaamanara kaifau miqi qimasee akara rinau, maasara faqa akara rinau. Maasa Karaambaiqa Yisufa kuqiranakinaana uqeeroonasaa irirana rusimarinau maasara faqa akara rinau. Maasa Anutufa mareeqeenoo andeeqara fasiqa anaasee kianinausa maasarammakara rinau.
ROM 4:25 Anutufa Yisuna mareeqeenoo maasa aaqee marunnanara faiqí nisaukuki nimisoofaqa kuqariqau. Maasa Anutuna afusaa andeeqarausa mariaqee qimasee kuqiranakinaana Yisuna uqeeranau.
ROM 5:1 Maasa qeeqa irirana Anutunasaa rusiseeqa marianara doo maqee sia Anutuna aranaqaranaki aanoo iranaki maridaqa Anutufa narí andeeqaranaki quqaqisoofaqa minara doo maqee mina asooaranaki amiqiranaki maridaqa. Anutuna asauku mundirana maasa karaambaiqa Yisufa minannai kai mi asooaranaki maridaqa.
ROM 5:2 Yisufa maasara kuqiranannai faqa maasa qeeqa Yisuna ufasaa irirana rusisaunnanannai faqa Yisufa maasa mareeqee Anutuna kaqi afaariranaki quqasaifaqa maasa maqee minaki kikiqiqa maridaqa. Minaki maridaqa, kasooqaqee innaarunai areenarana naida qimiannoo minara iridaqa asasidaqa afeesidaqa susuidaqa.
ROM 5:3 Sia minara kai asasidaqa maqee marianaki ummaara oosana oosanakina maridaqa minaki faqa asasidaqa. Mandainaina ummaara darinaqa mi ummaarafa sia amiqimasee daruannoo minasaaqari afeeka marasee sia dauni Anutuna ufamau firarana kudoosaapaanaura.
ROM 5:4 Maasa oosana oosana ummaarakina sia umooqukida kaqi fimariananoo Anutufa mina qiqafamaseenoo eedoo qiannoo. Mina eedoo qira ufa fannoo quandaki maasa qifeeqarainaqa maasa Anutuna narí areenarana qimianinnanara asasamasee afeesidaqa maridaqa.
ROM 5:5 Mi asasirana afeesirafa sia qisaurirana qimiannoo Anutufa narí naaquqara maraquna kaqi qimimarifa maridanoo. Anutufa narí naaquqara maraqunannai maasa naunduraki nammariara foora narí aidirana maasa naunduraki adiaqimaqeenoo narí areenarana naida qimiannoo.
ROM 5:6 Ooqai maasa Anutuna andeeqaranara sia amanaikiqa oorudupiqa mariafananoo Anutuna andeeqara aukuanasaa Yisufa maasa mandoosana maree mariafanausara maasara kuqunnimaqanau.
ROM 5:7 Faiqí moo fannoo sia moo fasiqara qimudaoo qimasee mina amaaqa maqasee fifau kuquannoo, abee sia fee faiqí moo fannoo moo fasiqara amiqira fasiqara qimudaoo qimasee mina amaaqa maqasee kuquannoo fee.
ROM 5:8 Yisufa sia maasara amiqirausee qimaseenoo maasa qimaaqa maqaseenoo kuqinau. Maasa qeeqa mandainainaki kaqi mariafananoo asauku mundirafa maasara kuqunnimaqanau. Miqunannai Anutufa narí kaaqa maasara amuqisirana aidirana kooroomaseenoo maasa uqaqifiqanau.
ROM 5:9 Asauku mundirafa maasa mandainaina nariara mareenoo kuqinoo narí fidika teeqinoo maasa mandainaina akiaqara taikoonannoo Anutufa minannai maasa daundurakinaana mareeqee narí andeeqaranaki innaaruna mara quqaqisanau. Anutufa mina kuqiranara irisee taikara faasaana narí aranaqaranakinaana kuqaa uqanna asumu mareeqeenoo quqaqisaannoo.
ROM 5:10 Maasa Anutuna namuqaa marufanoo mifa narí amaaku maasa mandainaina arirana maroonara iriseenoo mina kuqiranannai aqoondi kamma quqaqisaifaqa maridaqa. Asauku mundirafa kuqunannai Anutuna aqoondi kamambi maridaqa kafaa Yisuna kaqi mariranannai mifa taikara aukuana Anutuna aranaqaranakinaana kuqaa uqanna maasa mina aqoondiuqa mareeqee asumu mariranaki quqaqisaannoo.
ROM 5:11 Sia mina kai, Anutufa maasa aqoondi kamma qimaqoonara irisee Anutunara dufi dufi qidaqa asasidaqa. Anutuna asauku mundirafa Yisufa maasa karaambaiqa minannai maasa Anutuna aqoondi kiqa asasidaqa.
ROM 5:12 Ooqai indaaru moodaa fasiqasaaqaraafa Adamanasaaqaraafa maa maqa maaqanaki aaqarafa aninau. Doo mi aaqarana akiaqara kuqirafa moodaa kari ani marinau. Moodaa fasiqa Adamanasaaqari aiqama maa maqana afaaqasasa maria fasiqa anaaseesa mifa aaqoona akiaqara misasaa faqa kuqirafa rafaaqa finoo marufa maridanoo.
ROM 5:13 Aiqamausa aaqoonara rafaaqafinoo maridanoo Mooseena sandufa sia ani marukamuqoo aaqarafa doo ani marufa maridanoo. Mi aukuanna mi fasannai sandufa akara rirana sia marunara Anutufa sia misa rukiaranara irinau.
ROM 5:14 Indaaruqaa fasiqa Adamana saaqari mi kamusaqa kuqirafa aniufanoo mini Mooseena raquraminau. Mi kamusaqa misa aaqarana Anutufa sia irinau, kuqirafa kaqi kai aiqama maqannaa kaqi kai rafaaqafunnimaqanoo marinau. Sia aiqamausa Adamana aanna ramasee Anutuna ookinaa ufa rukiaqau. Nariki moo aaqarafa kaqi marunara kuqirafa kaqi kai rafaaqafunnimaqanoo marinau. Adamafa kasooqaqee kambiqaanina fasiqana Yisuna kikiqusirafa marinau.
ROM 5:15 Miqanda sia amana amana kai maridaqa Anutuna kaqi nimira ainaina Yisufa sia Adamana aaqarafara foora maridanoo, mifa aaduma maridanoo. Dinni kuqaa faiqí moomoosa mi moodaa fasiqana Adamana aaqaranaki kuqiqau. Mina dinni Anutuna kaqi afaarirafa Adamana aaqarana uraaqaranoo maridanoo. Anutuna kaqi nimira naaru marirafa moomoosa nimufa moodaa fasiqannai afaaramandee naaru marirana nimufa mifa faqa Adamana aaqarana uraaqararafa maridanoo. Mi moodaa fasiqafa Anutuna asauku mundirafa Yisufa maridanoo.
ROM 5:16 Anutufa afaaramandee naaru marirana nimianinnafa moodaa fasiqa Adamana mina aaqarana uraaqaranoo maridanoo. Mi ooreeqarana faqa mi uriqarafa faqa miqanda rainarafa maaqimminoo maridanoo, dinni mi moodaa fasiqana narí moodaa kari aaqamasoona akiaqara Anutufa nimaarusira ufa quqaqoofa maridanoo mina dinni faiqí anaasee moomoosaki aaqarafa kambiqafi marufanoo Anutufa sia minara narinau, kaqi narí afaarinoo niminoo qinau, doo andeeqarausa mariafanoo nimaarusira ufa doo taikeenoo fee qinau.
ROM 5:17 Qinee kuqaa anoona ufa qimannimianaura. Kuqaa moodaa fasiqa faiqi Adamana mina aaqarana akiaqara kuqirafa kambiqeenoo aiqama maa maqa maaqana afaaqasasa mariasa kuqirafa oosana araseenoo manda rakisira rakisinnimaqaidanoo marifa maridanoo. Mi ufana dinni kuqaa moodaa fasiqasaaqaraa ainainirafa asauku mundirafa Yisufa mina ainainirafa Adamana uraaqaranoo maridanoo. Faiqí anaasee Anutuna rairaaira afaarirana faqa mina kaqi nimira andeeqarana faqa maree mariasa misa Yisufa asauku mundiranannai sia Adamana kuqiranaki marifaranoo innaarunai kaqi mariranaki afeekaikirausa marifaranoo.
ROM 5:18 Dinni moodaa fasiqa Adamana oosana maaqimminoo maridanoo, mi moodaa fasiqana aaqaranasaa faiqí anaasee aiqamausa kuqira ufa ameemaanai maridaqa. Mina dinni miqi kai masee moo fasiqa Yisuna moodaa kari andeeqaina akiaqara kuqira ufakinaana idukueeqeenoo kaqi mariranaki quqaidanoo.
ROM 5:19 Dinni moodaa fasiqa ufa rukiarana akiaqara faiqí anaasee moomoo aaqaranaki aqufiqau. Mina dinni miqi kai masee moodaa fasiqa Yisufa Anutuna ufamau firana akiaqara moomoo fasiqa anaasee Anutuna andeeqarausaikiqa marifaranoo. Minara qinee Pauroosa qiqa, (Yisufa ooqeenaa Adamana kikiqusirafa marinau maqi qidaqa.) (Mooseefa sia kambiqoo kamuqoo mina sandufa sia marufanoo faiqí anaasee nári mandainainara mana mana imariqau.)
ROM 5:20 Anutufa narí sandufa nimaarusira ufa Mooseenasaa nimufaqa nári mandainainara irufanoo firaanaikinau, miqinoo firaanaikianifeera Anutufa aminau. Faiqí anaasee mandainaina firaaqoo ooru fimarufanoo Anutuna afaarirafa mina aakaarinni ooraaqareenoo ooriqaranoo marinau.
ROM 5:21 Dinni aaqarafa kuqiranannai aiqama maasa rafaaqa fidanoo mina dinni miqi kai masee Anutuna afaarirafa Yisuna andeeqaranannai maasa rakisiqimaqaidanoo qifiqeeqeenoo innaaruna asumu mariranaki quqaqisaidanoo. Anutuna asauku mundirana maasa karaambaiqa Yisunannai qifiqeeqee quqaidanoo.
ROM 6:1 Anutufa narí afaarirana maasa qimunara minara naqi fee qianauree. Maasa maaqi qimasee aaqamasee qianauree, maasa mandainaina aaqaranaki kaqi mariananoo Anutufa mina minnisaina afaarirafa firaanaikee iannoo fee qianauree.
ROM 6:2 Oo sia uqanna maasa miqi qianaura Yisufa aunirira saqarisaa kuqinau, maasa mina faqa kuqiira foora iqa marunnanara maqee maria mandainainakiqari kuqiira foora iqa maridaqa. Naqimasee maqee mari mandainainaki fuanauree doo kuqiara foora iqa maridaqa.
ROM 6:3 Innee maa ainainnara amiqimasee iridee sia fee iridee. Maasa Asauku mundirana Yisuna auqusaa nammari maraafannaqoo maasa Yisuna saimbaqa narí kuqiranaki keeqeeqa nammari mina kikiqa ususeeqa mareeqa.
ROM 6:4 Maasa nammari maraafannanannai maasa Yisuna namufaqa qikundeera foora iqa narí kuqirana naida qimidanoora foora qinoo, mina akoofa narí kaaqa areenara afeekannai narí asauku mundirana kuqiranakinaana mara findifuna, maasa miqi kai masee maasa fuka mariranaki mariaqeera qinoo maasa kuqiranakiqariara foora findifumaqisanau. Maasa Yisuna faqa kuqiqa moodaanaki kammidaqa miqikaimasee mina faqa findi fiqa mina moodaa kaqi mariranaki marianaura.
ROM 6:6 Maasa maa ainainna iridaqa, maasa manda marira nirana ameemaanai maridaqa. Doo maasa minakiqari idukuanifeera Anutufa maasa mareeqeenoo asauku mundirana faqa aunirira saqarisaa kuqannarinau. Maasa sia kaifaa ooqeenaa marirana maraqa nuaqeerau miqinau.
ROM 6:7 Miqinoo marifaqa maasa minara maaqi qidaqa, faiqí moo fannoo kuqinanoo mina manda marira nirana mina afaaqasaaqaraafa idukuannoo sia kafaa amana minaki nuannoo. Maasa Yisunasaimbaqa kuquafannanara miqi qidaqa.
ROM 6:8 Maasa Yisuna faqa kuqiranaki keeqaafanausee qidaqa maasa mina faqa findifi mariraree qidaqa.
ROM 6:9 Maasa asauku mundiranara doo kuqiranakiqari findifinoo sia kafaa kuquannoo miqunara kuqirana afeeka sia kaifaa rafaaqafuannoo fee qidaqa.
ROM 6:10 Mina kuqirafa mandainaina akiaqara arirafa moodaa kari kuqunara sia kaifaa maa maqanasaaqaraa mandainaina fannoo mina rafaaqafuannoo. Doo maasa mandainaina mina rafaaqafirana faqa, kuqirana faqa doo taikeenoo. Doo maqee findififa mina marirafa Anutuna faqa maridanoo.
ROM 6:11 Innee mi irirana marasee maaqimandee iriaqa. Maasa mandainainaki maridaqa kuqufiqa doo sia minaki maridaqa maasa faqa kuqirausa maridaqa doo maqee asauku mundirana Yisuna faqa kuqiranakiqari findi fiqa mina faqa Anutuna kaqi mariranaki maridaqee qidaqa.
ROM 6:12 Minara maqee manda marira nirana fannoo sia maasa qifaaqa rakisiqimaqaannoo, qaoo qiaqa. Sia maasa faiqí faiqi manda nidiranamau fuaqa.
ROM 6:13 Manda oosana moo inni qumarainaqa sia inniqa nifaaqa minakina eedoo qimasee quqaaqa. Sia miqiaqa maaqiaqa, innee kuqiranakiqari findifi mariasara foora aiqama nifaaqa eedoo qimasee Anutuna aramandunnai rumafifanoo mina inni nifaaqa mareeqeenoo narí andeeqara saikaki quqaanifeera mina aramandunnai inneeqa nifaaqa quqaaqa.
ROM 6:14 Maqee innee sia Mooseena sandufa nimaarusira ufa ameemaanai mariafanoo innee Anutuna afaarirana ameemaanai mariafanoo minara mandainaina fannoo sia inni rafaaqa fuannoo.
ROM 6:15 Maasa sia Mooseena sandufa nimaarusira ufa ameemaanai maridaqa Anutuna mandainaina minnisara afaarirana ameemaanai maridaqara qiqa manda oosanaki kaqi qifaaqa quqasee maraanauree. Oo sia uqanna.
ROM 6:16 Innee maanara iridaqa maasa Yuda maqannaa ooqeenaa oosana irimariafanoo, maasa akaqausa karafusara foora moo fasiqa qeeqa qifaaqa amisee mina ainaina auqamaisaidaqa. Yafasiqanee ainaina maisaanauree, mi fasiqana qeeqa qifaaqa mina aramandunnai quqasaananoo mifa qini rakisi qimaqainaqa mina ufara eedoo kai qianaura. Qinee manda oosanara faqa Anutuna ufa iriranara faqa miqandara qidaqa. Inneeqa nifaaqa mara maree manda oosana ameemaanai quqasaifanoo inni mareeqeenoo kuqiranaki quqannisaannoo, miqooqari mina dinni Anutunai ubeekamafi minufara eedoo qimasaifanoo mifa narí andeeqaranaki quqannisaannoo.
ROM 6:17 Oo Anutunara dufi dufi qiaqa. Innee ooqai mandainaina ufa ameemaanai marusa mariafanoo maqee innee inneeqa aiqamausa naundurannai qinee Pauroosa qimannimuna naamuaqira anoona ufa ameemaanai mariafanoo minara innee manda rumbaranaki marufanoo Anutufa idukunnisoofaqa mina andeeqara rumbaranaki fuafanoo.
ROM 6:19 Inneeqa faiqí faiqi sia afeeka irirana faqaasa mariasa mariafaqa qinee Pauroosa kaqi maa ufana inneeqa irimariana amana kai qimannimianaqa iriaqeera qimannimidaqa. Ooqai innee inneeqa nifaaqa faiqí faqa anaasee faqa nariara nariara fanandirana faqa oosana oosana mandainaina faqa moo faqa moo faqa aaku aakummafifaqa mariafanoo mina aramandunnai kai inneeqa nifaaqa quqasaafanoo doo maqee miqi kai iqa inneeqa nifaaqa aiqama andeeqara oosanamau fimariana aramandunnai quqasee maqeeidaqa naaquqara andeeqara mariranaki mariaqeera.
ROM 6:20 Ooqai innee manda oosana rumbaranaki maridaqa sia andeeqara ummaara ameemaanai mariqau sia minara irimariafanoo.
ROM 6:21 Mi manda ummarafa ooqai mariunara maqee nisauri mariafanoo. Innee mi mandainainaki maridaqa minakiqari nanee moo amiqira ainaina mareeusee. Maqee minara iriseeqa ooqai maraafannainainara nisaurirainaina maraqiafanoo qidaqa. Mi manda oosanamau fifiiufa kuqiranai kai ubeekee marinau.
ROM 6:22 Doo maqee innee mandainainakiqari idukiqa mariafanoo Anutuna rumbaranaki keeqafi mariafanoo. Doo innee miqiunara inni marirafa aiqama doo minaindi kakai mafi mariinaqa taikara aukuana innaarunai marirana inni nimiannoo.
ROM 6:23 Dinni manda oosana fannoo narí ainainimariasa naarama quqaseenoo narí ainainirana akiaqara feefauru nimidanoo mi feefaurufa kuqirafa kai maridanoo. Kafaa mina dinni Anutuna kaqi nimira ainaina innaarunai naaru marirafa sia ainainirana akiaqara maridanoo, mina asauku mundirafa maasa karaambaiqa Yisufa mina faqa moodaanaki kiqa maridaqa mina namufaqa innaarunai naaru marirana kaqi nimirafa mariannoo.
ROM 7:1 Oo qini qikaqaafasaa Roomma maqannaa mariasa qinee Pauroosa maqee ufa qimannimirara innee amiqimasee irimaru ufana qimannianaura. Faiqí anaasee sandufa faqa Mooseena sandufa faqa faiqí anaasee kuqiqa mi sandufana sia irifaranoo. Kaqi maru kamuqoo misa mina irisee mina ameemaanai maridaqa.
ROM 7:2 Nimundara fasiqa anaaseera foora sanda ufa ameemaanai maridaqa. Mi anaaseena afaaqi kaqi marinanoo mi anaaseefa narí afaaqindiri sanda ufa ameemaanai maridanoo narí afaaqisaa atooqanoo mariannoo, afaaqi kuqu finanoo mina anaaqa fannoo kaqi fifau mariannoo sia sandufa ameemaanai mariannoo sia narí afaaqisaa atooaannoo.
ROM 7:3 Mi anaaseena afaaqi kaqi marinanoo quandaki moo fasiqa marainnanara qummuarimari anaasee fee qifaranoo. Mina afaaqi kuqufinanoo sandufasaaqaraafa doo idukinoo maridanoo, quandakinoo moo fasiqa marainnanara sia minara ummuarimari anaasee fee qifaranoo.
ROM 7:4 Doo innee qini qikaqaafasaa innee faqa Mooseena sandufa ameemaanai mariasa doo innisaimbaqa qifaaqa fannoo Yisuna saimbaqa kuqinau. Doo mi kuqiranakiqari mina Yisuna namufaqa findifiqa minaindikiqa Anutuna ainainiranaki andeeqasee anoona ainaina imarinakina mariaqeera mariafanoo.
ROM 7:5 Ooqai maasa qeeqa faiqí faiqi iriranamau manoo manaa iqa fimariafananoo Mooseena sandufa anireenoo maasa manda oosana afaurammeeqee mara uqeera kikiqa maseenoo quandakinoo mareeqeenoo kuqirana ameemaanai quqaqisanau. Minara Mooseena sandufa nimaarusira ufa fannoo maasa karafusara foora rumbaqimaqanau.
ROM 7:6 Doo maqee iriaqa, maasa Yisuna faqa kuqiara foora iqa maridaqa maasa karafusa rumbaqa marianasaaqari idukuaki maridaqa sia kafaa ooqeenaa mariranaki fuanaura. Maasa Mooseena sandufamau fuannana mifa maasa mandainaina mara uqeera quqaannoo minara mi mau sia fuanaura, fukamau Anutuna maraquna aatata fuanaura.
ROM 7:7 Minara maasa Mooseena sandufara mandainainafee qianauree. Oo sia miqinoo maridanoo. Mooseena sandufa innee moosa ainainara sia nimuqusianifee qidanoo sia miqinoo marinaqa qinee moosa ainainara qimuqusimarina mina aaqee unoo qunara sia irini mana mana kaimmunaiqini. Minara Mooseena sandufakinaafa doo kooroomandee mandainainara qimaqimifaqa qisauriqa.
ROM 7:8 Mooseena sandufa fannoo moosa ainainara sia nimuqusiaqee qinoo marifanoo qini manda irirafa irisee quandakinoo firaaqoo moosa ainainara amuqusidanoo. Minara sandufa sia maru kamuqoo mandoosanara oonumafi irirafa kuqinoo marufaqa mana mana imariafannana.
ROM 7:9 Mooseena sandufa sia maru aukuana sia faiqí anaasee narufaqa sia kuqiara foora imariqau kaqi maridaqara foora imariqau. Mooseena sandufa nimaarusira ufa kambiqafufaqa misa naundurai manda oosana uqeera niminoo narinau. Miqimandaifanoo Anutuna kaqi marira nimira ufa fannoo kuqirana kai niminoo.
ROM 7:11 Misa naunduraki mari mandainaina fannoo misa narirara rakisinoo marifanoo Anutuna sandufa aniraifanoo mina qumareenoo minannai misa naru quqeenoo.
ROM 7:12 Mooseena sandufa faqa Anutuna naamuaqira ufa faqa andeeqarafa naaquqarafa amiqirafa maridanoo.
ROM 7:13 Amiqira ainaina fannoo fee misa kuqa narinoo fee qianauree. Oo sia miqinoo maridanoo. Misa naundurakinaa mandainaina fannoo kai amiqira ainaina mara mareenoo minannai misa narinoo. Miqi mandainanoo misa naundurakinaa anoona mandainaina akooqoo kooroo ianifeera miqinoo. Doo mi mandainainafa Mooseena sandufa saaqari innooqeenoo firaanaikinoo maridanoo.
ROM 7:14 Qinee Mooseena sandufara kuqaa innaarunaindaraa ainainee qidaqa. Qini daundurakinaa mandainaina fannoo ainainira fasiqara foora qini feefaurummeeqeenoo nararamandunna quqaqisaqaisa mina rumbara saikaki maridaqa.
ROM 7:15 Qinee mi saikanaki maridaqa qeeqa auqee marunna saikoosanara faqa sia iridaqa. Qinee amiqira oosanara didimarina marararee qidaqa sia maraidaqa. Qinee dapi manda oosana fidiaqaaira oosana kai maraidaqa.
ROM 7:16 Qini irirafa qikooqeemari mandoosanna maraidaqa Mooseena sandufa fannoo qiniara aaqee mariifoo qimasaifanoo qini irirafa faqa mina irirafa faqa moodaaqoo apinoo marifaqa. Oo Mooseena sandufara anoona mariifoo qidaqa.
ROM 7:17 Miqidaqa sia qeeqa maraqunafau mi manda oosanna maraidau. Mandainaina fannoo qini daundurai marifa mifa qini qifeeqaraifaqa mi manda ainainna maraidaqa.
ROM 7:18 Qeeqa daundurakinaafa amiqira oosanna maraannee qifaqa qini irirafa anuqidanoo sia amanaikidanoo. Mina iridaqa maaqi qidaqa qiqa faiqí faiqi qimuqusaki amiqiroosanna sia minaki marifanoo fee qidaqa.
ROM 7:19 Amiqiroosanna auqararee qimasaidaqa miqooqari quandakifaqa qikooqeemari mandoosanna kai auqaidaqa.
ROM 7:20 Qinee qini qikooqeemari mandainaina auqaananoo sia qeeqafau auqaidau qini daundurakinaa mandainaina fannoo mina auqaidanoo.
ROM 7:21 Qinee amiqira ainaina iraree qunanoo mandainaina kai qini doorinni aniraifaqa mina kaimma auqaidaqa. Mi sandafa kai qini daundurai irirana qimidanoo.
ROM 7:22 Qini qimuqusa ookina Anutuna sandufara asasidanoo qiqa qifaaqaki mari manda ainaina mifa kai qini raineeqeenoo narí rumbaranaki quqaidanoo.
ROM 7:24 Qiqa manda qifaaqa fannoo qiqa daundura mareeqeenoo kuqiranaki quqaidanoo. Oo qinee nanaree kaaqa mandainainaki maridee firaaqoo doori runidee. Qeeqa qifaaqa qimana namufaqa kuqiranaki fuananoo yafee aniree minakinaana qini qimana mareeqee kaqi naaru mariranaki quqaqisaannoo fee.
ROM 7:25 Oo dufi dufi Anutufa narí asauku mundirana Yisuna maasa karaambaiqannai qini mareeqeenoo naaru mariranaki quqaqisaannoo. Doo maqee qinee minara maaqi qidaqa. Qini marirafa maaqimminoo maridanoo qeeqa qimuqusa daundurakinaa irirafa Yisunannai kai Anutuna sandufamau fidaqa qeeqa faiqí faiqi manda nirana marirana mandainaina sandamau fidaqa.
ROM 8:1 Maasa Anutuna asauku mundirana Yisuna faqa moodaanaki marifanoo Anutuna maraquna fannoo kaqi marirana niminoo kuqirana manda sanda faqa manda oosana faqa minaki marunnana idukuqisaifaqa maridaqa. Minara maqee asauku mundirana Yisuna faqa moodaanaki mariasa sia Anutuna kuqira ufa ameemaanai maridaqa.
ROM 8:3 Mooseena sandufa nimaarusira ufa sia amana maasa uqeereeqeenoo maasa faiqí faiqi maasa marirafa kudoosaapaunanoo minara sia maasa uqeeraqiseenoo. Mooseena sandufa kadiqo̱ofanoo miqoo Anutufa moo oosanannai anoonaikinau. Mifa narí amaaku aqiqoonannai maasa faiqí faiqi naundurakinaa mandainaina arinau. Yisufa faiqí faiqi naundurakinaa manda ainaina maraquanifeera narí faiqí faiqi fooqaanaikamasee aqiqoofanoo quminau.
ROM 8:4 Maasakiqari akaqausa sia faiqí faiqi iriranamau fimariasa Anutuna maraquna sandufamau fimariasa maasara Anutufa qiqafeenoo sia maasa andeeqarafa Mooseena sandufa amana ooru maridanoo, ooreeqanoo maridanoo. Anutufa mina qafamaseenoo maasa andeeqarafa Mooseena sandufa amana kai ooru fuanifee qimasee narí amaaku aqiqoofanoo quminau.
ROM 8:5 Faiqí faiqi naundurakinaa manda iriranamau fimariasa nári naundurakinaa irirafa nariqa rafaaqafunnisaifaqa mi mau fidaqa. Anutuna maraquna ufamau fimariasa maraquna aidimari ainainafa misa nitikuraki keeqafi rakisi qumaraifaqa mi mau fidaqa.
ROM 8:6 Faiqí faiqi nidimari manda ainainafa ani atikuraki rakisinana kuqirannai ubeekanoo maridanoo kafaa mina dinni Anutuna maraquna fannoo narí aidirafa ani atikuraki rakisinana mifa ani mareeqeenoo kaqi mariranaki faqa asooaranaki faqa ubeekama amaqaannoo.
ROM 8:7 Faiqí faiqi manda nidirafa nitikuraki rakisimarisa Anutuna namuqaakammiqa maridaqa, sia Anutuna sandufamau fidaqa, fidaqau sia amanaikiaqini.
ROM 8:8 Nári faiqí faiqi iriranamau fimariasa sia amana Anutuna aidiramau fifaranoo.
ROM 8:9 Innee Roomma maqusai mariasa qini qikaqaafasaauqa innee sia miqimariasa Anutuna maraquna fannoo innikina marifaqa innee sia faiqí iriranamau fimariasa mariafanoo innee maraquna ufamau fimariasa mariafanoo. Asauku mundirana maraquna siaifa sia minaindi maridanoo.
ROM 8:10 Asauku mundirafa inni naundurai namummaqainaqa mina maraquna fannoo inni nifaaqa mandainaina fannoo narinoo marinnana sia minara iridanoo qafaidanoo Yisuna kuqiranara iriseenoo kaqi marirana inni nimana kaqi nimidanoo.
ROM 8:11 Anutuna maraquna fannoo Yisufa kuqiranakinaana marafindifinau. Yisuna mara findifu maraqunafa kai inni faiqí nifaaqa kuqiqa marifanoo kasooqaqee mi kuqirana uqeereeqeenoo kaqi marirana nimiannoo, narí maraquna inniki marinnanannai miqiannoo.
ROM 8:12 Oo qini qikaqaafasaauqa maasa moo ummaara ameemaanai maridaqa maasa faiqí faiqi manda nidirana ameemaanai sia maridaqa. Yisuna maraquna ummaara ameemaanai maridaqa.
ROM 8:13 Innee maqee faiqí faiqi iriranamau fiqa doo kuqifaranoo. Anutuna maraquna ufa irisee minannai innee inneeqa manda oosana kuqaruseeqa innee sia kuqifaranoo kaqi marifaranoo.
ROM 8:14 Anutuna maraquna fannoo nifiqee fimarisa Anutuna faiqi namu maridaqa.
ROM 8:15 Anutufa narí nimimari maraqunafa sia inni manda rumbaranaki quqaseenoo rufiarana nimiannoo, mifa sia miqidanoo maaqimmiannoo inni mareeqeenoo inni Anutuna faiqi namu kammasainaqa mina afeekannai kai qifaaqa quqasee maasa Anutunara maasa qikoonee qidaqa.
ROM 8:16 Anutuna maraquna fannoo aniree maasa qeeqa maraquna minasaa ootupamasaannanara maasa maraquna qimamida maaqi qidanoo innee Anutuna faiqi namu mariafanoo fee qidanoo.
ROM 8:17 Anutufa narí faiqí aanaaseera amiqi amiqira ainaina afeeda maqimaqaina maasa mina faiqi namu marianara minara maasa mifa innaarunai quqannimaqaqai qumiasana kasooqaqee maraanaura. Anutufa narí asauku mundirana amaqaqai qumiasana faqa maridanoo mifa mina faqa maasa mirinni innaarunai naida qimiannoo. Maqee maria aukuana asauku mundirana kuqira aupurarana dadaaqi maraananoo innaarunai mina kaaqa areenarana faqa naida qimiannoo.
ROM 8:18 Maqee mari aukuana Yisuna kuqu aupurarana dadaaqi marainafa faqa maasa oosana oosana ummaara marainnana faqa kaqikaafa maridanoo, kasooqaqee innaarunai narí areenarana naida qimianinafa qafaananoo firaafa uqanna mariannoo sia maqee aupuraranara qianaura fifau ainainara foora maridanoo.
ROM 8:19 Anutufa auqu quqoo ainainausa innaarunaindaraana faqa maqasaaqaraana faqa mi ainainausa aiqama moodaanaki kaaqa aupurarana maraidaqa Anutuna faiqi namu faiqí faiqi misa kuqiranakiqari findifiranara afeesidaqa. Misa kaaqa firaaqoo minara afeesida maridaqa. Maasa Anutuna faiqi namu saimbaqa putaa iranakiqari idukuaqee qimasee kaaqa afeesidaqa.
ROM 8:20 Innaarunai faqa maqasaa faqa mari ainainafa aiqama putaa inoo mandaikinoo rakeeinoo madaapeekammidanoo. Sia narí kai miqidanoo Anutufa narí qimaqoomau fidanoo miqidanoo. Anutufa minauqa faqa faiqí narira ufa ameemaanai quqaqoosa maridaqa madaapeekidaqa. Mi putaaira marirafa qumaarandanoo maridanoo mina aufadara ufa faqa maridanoo maaqimminoo maridanoo.
ROM 8:21 Aiqama mari ainainafa narí putaa kiqari kasooqaqee idukufuannoo. Idukufinoo Anutuna faiqi namu nári idukiranaki faqa idaaqira areenaranaki faqa keeqafi moodaanaki marifaranoo.
ROM 8:22 Oosanasaaqari aiqama Anutufa auquqoo ainainafa anaasee inaamunai aupuraida ikiraqee marianara foora maqee putaa irafa ummaarandanoo maridanoo.
ROM 8:23 Sia auquqoo ainainafa kai aupuraidanoo maasa faqa qeeqa faiqí faiqi manda marira nirana aupurarana aupuraidaqa, kasooqaqee Anutufa firaa qumiasana maasa innaarunai qimiannoo, maqee oosana arasee nimira ainaina narí maraquna nimiqoosa maridaqa. Maasa Anutunara afeesidaqa aupuraidaqa mifa maasa aiqama qipatasaa marirana iriranakinaana idukusainaqa narí faiqi namu kamambiqa innaaruna ququsaki mariaqeera minara qeeqa faiqí faiqi manda marira nirana aupuraranara aupuraida afeesida maridaqa.
ROM 8:24 Maasa Yisunasaa irirana rusiseeqa minara asasammasee afeesidaqa minannai innaaruna asumu marirana mareeqa. Asasamandee afeesimaria ainainafa anirainaqa qafamasee maasa sia afeesianaura. Sia moo fannoo narí qafeemari ainainara afeesidanoo, doo ani maridanoo.
ROM 8:25 Maasa sia qafaa ainaina kambiqaannoommifoo qidaqa ubiqafi reendeenamandee asasamasee afeesidaqa.
ROM 8:26 Miqikai inoo Anutuna maraquna fannoo anireenoo maasa Yisuna saqarikiranara kudoosaapee mariasa dadaaqidanoo. Maasa nana innaaru fee qianauree qimasaidaqa nana ainaina kikiqususaidaqee innaaru qianauree qimarufanoo Anutuna maraquna fannoo maasa ooreeqara innaaru qirana qafeenoo innaarunai ooru maasara Anutunai firaaqoo dadaaqidanoo pisoopisoo mandee innaaru qidanoo, faiqí faiqi ufa sia amanaikifanoo ammaqasaidanoo firaaqoo Anutufinnai maasara innaaru qidanoo.
ROM 8:27 Anutuna maraquna fannoo Anutuna faiqí aanaaseera Anutunnai firaaqoo pisoopisoo mandee innaaru qidanoo, sia fifau, Anutuna iriramau kai misara innaaru qidanoo. Anutufa faiqí nimuqusaki mari ainainara faasai qafee marifa marinara maraquna ireefandinna ainainara faqa faasai iridanoo moodaa irirana marinara maraquna maasara ireemari ainainara iridanoo.
ROM 8:28 Maasa maa iriranna iridaqa faiqí faiqikinaana narí asumu mariaqeera qimasee narí rusandeesamumandee maroosa Anutunara nidimarisara Anutufa misasaa rakisidanoo oosana oosana ummaara mandainainna misasaa quqeemarina misa dadaaqida fee qidanoo misasaa quqaidanoo.
ROM 8:29 Anutufa faiqí faiqikinaana rusandeesamumandee maroosa sia fifaufau maranau. Misa narí amaaku Yisunaikamambi mifara foora mariaqeera misa rusandeesamumasee mareeqeenoo utaaqama nimaqasoofaqa mariqau. Miqimasainanoo Anutuna amaaku fannoo moomoosa maqasaaqaraasa mina akaqaafasaara foora maridaqa mifa misa ooqu faiqí nifasaafara foora mafinoo marianifeera utaaqamma amaqanau.
ROM 8:30 Anutufa narí maraqoosa naaramasoofaqa aniroofanoo mareeqeenoo narí mariranaki quqanau. Anutufa sia fifau naarama quqanau, naaramasee narí afusaa andeeqaranaki quqanau, minaki quqaseenoo innaarunai kaaqa areenarana faqa naida niminau.
ROM 8:31 Maasa maa ufana aiqama irisee Anutunara naqi fee qianauree. Anutufa maasa dadaaqimarifa marinanoo yafee maasa amana rafaaqa fuannoo. Sia amana moo fannoo maasa amana rafaaqa fuannoo.
ROM 8:32 Anutufa sia narí amaakuara irinau kaqi maasara qimudaoo qimasee kuqiranaki quqanau. Mifa narí amaaku uqanna ririmma kaqi qiminau nana ainainee moo ainaina sia qimiannoo, aiqama ainaina kaqi afaarida qimiannoo.
ROM 8:33 Yafee Anutufa rusandeesamumasee maroo fasiqa aanaaseera mandainainara qimammaree nifairiannoo fee sia moo fannoo miqiannoo Anutufa narí uqanna misara mandainaina siaisee qidanoo.
ROM 8:34 Yafee moo fannoo mina faiqi namu kuqira ufa nimiannoo fee. Sia moo fannoo amana miqiannoo. Anutuna asauku mundirafa Yisufa doo kuqufufanoo Anutufa kuqiranakinaana mara findifumasee kaqi mariranaki quqasaifanoo doo maqee Anutuna aaqa asauku uqannai maridanoo maasara Anutuna oorisaa innaaru qidanoo.
ROM 8:35 Yafee moo fannoo asauku mundirana amuqusiranakinaana maasa rakeemasee kaqinni quqaannoo fee. Sia uqanna moo fannoo amanaikiannoo. Amanee mandainaina oosana oosana fannoo mina amuqusiranakinaana rakee iannoo fee qimuqusimari ummaara fee amanee Yisuna amuqusiranakinaana rakee iannoo fee Yisuna ufasaara narirafa mifee amana rakee iannoo fee. Aararee marinee amanee rakee iannoo fee kudikira fee rakee ianno fee ariranara deedaqirafa amanee rakee iannoo fee kuqirafa amanee mina amuqusiranakinaana rakee iannoo fee. Sia moo ainaina amana rakee iannoo.
ROM 8:36 Tamummaqara fasiqa akaraki minara maaqi qidanoo. Maasa Anutuna ufamau fimariasa faasaambaasaana aiqama kari Anutunasaara dariranara eerairidaqa. Anutuna ufa siaisa misa maasa kuqiranaki fimaria sipsipausara foora maasa maaqimma qidaqa, kuqa dariraridaqa.
ROM 8:37 Tamummaqara fasiqauqa miqi qimaqoofaqa qinee Pauroosa mi aiqama ainainausara qinee maaqi qidaqa. Sia moo manda ainaina fannoo Yisufa maasara amuqusiranakinaana ani mara rakee iannoo mi mandainaina oosanna oosannafa maasa darirari marifanoo mi dariranna sia rafaaqafuannoo. Maasara amuqusimarifa asauku mundirafa maasa mareeqee uriqararanaki quqaqaisa maridaqa.
ROM 8:38 Qinee Pauroosa maa ainainnara amiqimandee mapukusee iridaqa, sia moo innaarunaindaraa rakisira fee moo afeeka fee maqee mari ainaina fee kasooqaqee kambiqaaninna ainaina fee kuqa dariranee kaqi mariranee.
ROM 8:39 Innaarunai mari ainaina fee maa maqanasaa mari ainaina fee, Anutufa auqu quqaqoo ainainakiqari sia amana moo ainaina fannoo Anutuna amuqusiranakinaana ani qumaree rakee iannoo. Anutuna asauku mundirafa Yisufa maasa karaambaiqa fannoo maasa mareeqeenoo minaki quqaqaisa maridaqa sia moo ainaina fannoo minakinaana ani qumaree rakee iannoo.
ROM 9:1 Qinee Pauroosa anoona ufa kai qimannimidaqa. Qinee asauku mundiranaindi maridaqa sia unna ufa qimarunausa maridaqa. Qini daakirafa Anutuna naaquqara andeeqara maraquna fannoo mifa rakisimarifaqa sia qinee unna ufa qianaura. Qinee qeeqa maqannaasa Isaraee maqannaara qimannimianaura.
ROM 9:2 Misara firaaqoo qimuqusimarifaqa qikiraqaidaqa qeeqa maqannaasa qeeqa moodaa qimaqi moodaa fidika rainarausara miqidaqa. Misa Yisunara sia fee qimasee arunara oonumafi iriqa ikiraqaidaqa.
ROM 9:3 Misa Isaraee maqannaasa asauku mundiranasaaqaraana rakeemmiqa maridaqa. Anutuna narira ufa ameemaanai marianara qinee rakeemaseeqa minni misa nimaaqa maqaanaqa misa aiqaree asauku mundiranasaa atooqafiqa naaru kaqi mariranaki mariaqaana.
ROM 9:4 Misa Isaraee maqannaasa Anutufa aiqama maqannaasakinaana rusandeesamumandee Isaraee maqannaa maroosa mariafanoo, Anutufa misa mareeqeenoo narí faiqinamukamasee narí areenarana raina nimiqoosa mariafanoo. Anutufa narí moodaanaki kira ufa oosana oosana moomoo nimiseenoo narí sandufa faqa Mooseenasaa quqasoona faqa niminau, misa Anutuna amooqirafa anoonamau fimariasa, misa Anutuna qima afeekaikira ufa moomoo maree marusa.
ROM 9:5 Misa ooqeenaasa faiqí nuqufaqaasa Abarahaamana faqa Isakeena faqa Yakooboona faqa misauqa faiqi namu niku nisauku mariasa, misa asauku mundirafa mi maqannaasaki qumu kambiqafufaqa moodaa maqannaa marusa maridaqa. Anutufa aiqamausara rakisidanoo, naaru naaru mina amooqiaqa. Kuqaa.
ROM 9:6 Qinee Isaraee maqannaasara irisee sia Anutuna qima afeekaikira ufara kadiqee maqi qidaqa. Anutufa sia aiqama Isaraee maqannaasa rusandeesamumandee narí faiqi namu mariaqee qimasee maranau.
ROM 9:7 Abarahaamana aiku asauku atiuqa faqa sia aiqama Anutuna aiku asaukukiqau. Minara qidaqa, Anutufa maaqi qimasee Abarahaamana qimaminau. Ani faiqi namukinaana Isakeena aiku asauku kai ani aiku asauku fee qianaura.
ROM 9:8 Mi ufana Anutuna qimamira ufara qinee maaqi qidaqa. Abarahaamana dapi anaasee Qakaarana kaqi fifau maroona faiqi namu sia Abarahaamana aiku asauku fee qinoo maridanoo. Anutufa qima afeekaikiranannai maqoo faiqina mina aiku asaukuara Abarahaamana aiku asauku anoona uqannee qidaqa.
ROM 9:9 Anutuna qima afeekaikira ufa maaqimminoo marinau. Qinee qeeqa andeeqara aukuana aniree Saraqana dadaaqiananoo faiqi maqaannoo.
ROM 9:10 Sia mifa kai, maana faqa Reebeekanara faqa qimannimianaura, Reebeekafa qaara faiqifaqaafa marinau, miqanda nikoofa maasa qikeeku qikaaku Isakeefa marinau.
ROM 9:11 Reebeekafa faiqi maqaaninnaqanda mi faiqiqanda nuqu indaaruqaa faiqi auqu Eesaufa mariannoo fee qinau. Mina innaaqianna maqaaninna faiqina auqu Yakooboonee qinau. Miqanda sia kambiqaraqoo Anutufa indaaruqaa faiqiara innaaqianaa faiqi mina ainainamma aisaaninna fee qimasee afaaqooqa qinau. Sia miqanda kambiqaqa maridaqau mandoosana fee amiqira oosana fee maraidammiafoo qimaseenoofau mi ufana quqanau. Anutufa moodaa maroo oosanafa Anutufa miqandara afaaqooqa quna sia nariqaqara oosanasaarau afaaqooqa qinau, narí irirana aidiranasaa munduanifeera indaaruqaafa Eesaufa quandaki innaaqianaana mina ainaina maisaannoo fee qinau.
ROM 9:13 Ooqeenaa akarakinaa ufa maaqimminoo minara maridanoo. Qinee Yakooboonara dididanoo Eesaunara qikooqaidanoo fee qinau.
ROM 9:14 Miqandara irisee Anutunara naqi fee qianauree Anutunara sia andeeqee maqi qianauree. Oo sia uqanna miqi qianaura andeeqanoo marifa Anutufa maaqi qimasee Mooseena qimaminau. Qinee qeeqa iriranannai kai faiqí anaasee akaqausa narusee akaqausa nifauaanaura, qeeqa iriranannai kai akaqausara qimuqusianaqa marasee amiqi amiqianaura.
ROM 9:16 Minara aiqama ainaina sia faiqí nidiranasaa mundinoo maridanoo Anutuna amuqusiranasaa mundinoo maridanoo.
ROM 9:17 Ooqeenaa akaraki Mooseefa Faraoona maaqi qimasee qimaminau. Qinee Anutusa ani Faraoona mareeqee Isipa maqannaa karaambaiqai kianneera quqaqiafana, qinee Anutusa ani Faraoofa qini ufa rukioonara ani kuqaruanaura. Minannai qinee qeeqa afeeka faqa qeeqa duqu faqa aiqama maqa maaqa afaaqasasa mariasa iriaqee qimasee ani quqaqiafana.
ROM 9:18 Doo maqee maasa mi ufana iriseeqa Anutunara maaqi qidaqa. Anutufa narí kai irisee akaqausara amuqusifanoo amiqi amiqimmidanoo kafaa Anutufa narí kai iriseenoo akaqausa ufa rukiara oosana nimidanoo.
ROM 9:19 Innee mina iriseeqa quandaki maaqi qimasee aaqamasee qini qimaqimifaranoo. Ani ufa miqinoo marinaqa maasa mandoosana maraananoo naqimasee Anutufa maasara aaqee mariasee qiannoo fee. Naqimasee maasa Anutufa auquqisoo mandoosanara iriseeqa rakeemaki amiqira oosanamau fuanauree.
ROM 9:20 Qinee mina iriseeqa maaqi qimasee ani qimamianaura, Anutufa aniara aaqee mariaanoo qimasee afairirana anee yafee maridanee quandaki narí qimaminnaree anee kaqikaafa mariananoo. Qafee auqiranara iria. Faiqí moo fannoo maqa maraseenoo qafee auqimarifanoo mi qafeefa sia quandakinoo mi fasiqanara aqidanoo anee nanaree qini maaqimmasee auqidanee, sia qafee fannoo miqi qidanoo.
ROM 9:21 Mi fasiqafa qafee auqimarifa narí iriranannai kai maqa qumaree turi iseenoo atakuseenoo mi maqana rainasee akaqana qumareenoo narí iriranannai kai amiqirana akara rirana auqidanoo kafaa mina dinni ati quqaqoona raina qumareenoo narí iriranannai kai moo kaqi dapi qafee kai auqidanoo.
ROM 9:22 Anutufa miqikai maseenoo maasa auquqimaqanau. Maasaki akaqausa manda qafeera foora maasa akaqausa auquqimaqaseenoo idaki fifandinausee qidanoo. Sia aaqee kai minara naruannoo naaru kasooqaqee mina akiaqara naruannoo. Kisaaqasaa narí aanoo irana rafaaqafusee mari inanoo naaru naruannoo. Miqoo narí aanoonnai faqa narí afeekannai faqa miqoo mandoosana maree mariasa kuridi nimaqaannoo.
ROM 9:23 Kafaa mina dinni amiqira qafeera foora kasooqaqee maasa mina kaaqa areenarana mareefandinausa akaqausa auquqisanau, mina amuqusa maasa ubeekanoo marisa maasasaa kai mina idaaqira moomoo areenarafa kooroo ianifeera maasasaa nammariara foora narí areenarana adiannimaqanau.
ROM 9:24 Doo maasa daaree mariasa doo misa kai doo maa maridaqa sia Yuda maqannaasakiqari kaifau, aanaamurukiqari faqa Anutufa daaree marisa maridaqa.
ROM 9:25 Ooqai tamummaqara fasiqa moo auqu Qooseeaafa mifa minara maaqi qimaqoofa. Sia qeeqa maqannaasa naarama quqasee qini faiqi anaasee fee qianaura. Qini qikooqeemari maqannaasara qinee quandaki misara qini didimariasee qianaura.
ROM 9:26 Akaqausara innee sia qini faiqi namu fee qimaria maqusakinaasa doo qimaria maqusanaasara kai misara kaqi marira Anutuna faiqi namu fee qifaranoo. Doo Qooseeaana ufa miqinoo maridanoo.
ROM 9:27 Isaiaafa Isaraee maqannaara maaqi qimasee akara rinau. Isaraee maqannaasa nukuda moomoora foora iqa mariafanoo misakinaana Anutufa oodaa kai mareeqeenoo asumu mariranaki quqaannoo.
ROM 9:28 Mi aukuanna mikari Anutufa dauni dauni mandainaina akiaqara marasee aiqama maqannaasa minannai naruannoo Anutufa faiqí aanaaseera kisaaqasaa nifeesida mariranasaa doo taikeefoo qimasee aiqamausa tautumasee naruannoo. Minara Isaraee maqannaasa oodaa kai Anutuna saqarikamandainanoo oodaa kai asumu mariranaki mara quqaannoo.
ROM 9:29 Isaiaafa kafaa Isaraee maqannaara maaqi qimasee akara rinau. Karaambaiqa uriqararafa sia maasa ati oodaa mara quqasainanoofau Soodooma maqusa faqa Koomoora maqusa faqa naanna ramaseenoofau aiqama taikasani, daridanoo oodaa mafi quqasoosa qaaramoo maridaqa.
ROM 9:30 Doo minara maasa naqi fee qianauree. Maana kai qianaura. Anaamuru mariasa sia Anutuna afusaa andeeqaranaki keeqararee qidaqa sia amani mariasa doo misa narí irirana Yisunasaa rusisee minannai mina andeeqaranaki keeqafi maridaqa.
ROM 9:31 Misa miqiqa marifanoo Anutufa rusandeesamumasee maroo fasiqanaaseesa Isaraee maqannaasaa misa Mooseena sandufakiaqa randasee mi iriranannai Anutuna andeeqaranaki fuanauree qidaqa aana sia minaki marinara sia irirai munari minaridaqa aaqamaki kaqi runnambiqau.
ROM 9:32 Naqi fee mandee sia paquriqau. Misa Anutufinnai firana nári kadaapiriranasaa kai mundinoo maridanoo sia saqarikirafa minasaa mundinoo maridanoo. Misa anoona aana Yisunamau fimarianara qaoo qimasee Yisunara oonisaara foora niku amaki saamuriqau.
ROM 9:33 Ooqeenaa tamummaqara fasiqa akarauqa mi ooninara maaqi qiqau. Qinee Anutusa mi oonina Sioona maqusai quqaqaanaqa faiqí anaasee mi ooninasaa niku rupaurifaranoo. Faandi ooni miqirana qinee mi oonina quqasaanaqa minasaa farindamaki saamurifaranoo. Moo fannoo narí irirana minasaa rusiqainafa sia kadooparaannoo. Tamummaqarausa Yisunara miqimmasee ooqai akara riqau.
ROM 10:1 Oo qini qikaqaafasaauqa Roomma maqusai mariasa. Qeeqa qimuqusa ookiqari qeeqa maqannaasa Isaraee maqannaasara Yisufinnai aniree mina asumu marirana maraaqeera firaaqoo qimuqusidanoo. Qinee Pauroosa misara Anutufinnai firaaqoo innaaru qidaqa.
ROM 10:2 Misa Anutunara aidiranaki keeqaranara rirafa firaaqoo marifaqa qinee nindafaunaqa sia anoona iriranamau fida Anutunara ridaqa, kaqi runnambidaqa.
ROM 10:3 Misa Anutufa faiqí mareeqeenoo narí afusaa andeeqara oosanaki quqaranara sia irimariafaqa nariqa kai nári firoosana nariqa kai uqeerasee mi mau fidaqa, sia Anutuna andeeqaranaki fimaria oosana iriseeqa sia mina ameemaanai keeqaidaqa.
ROM 10:4 Anutuna asauku mundirafa Mooseena sandufamau Anutuna andeeqaranaki amanimariana aru taikeenoo narí Yisunasaa naaqoo rusimariasa kai Anutuna andeeqaranaki keeqaidaqa.
ROM 10:5 Anutuna andeeqara oosanaki faiqí finara maaqi qimasee Mooseefa akara rinau. Faiqí moo fannoo aanaaqisaa findifunakiqari andeeqasee Mooseena sandufamau fidanoo sia moo kari aaqainafa amiqisaa finafa kuqinoo innaaruna asumu marirana maraannoo.
ROM 10:6 Kafaa mina dinni asauku mundirana saqarikiranannai asumu marirafa maaqimminoo maridanoo. Mooseefa kafaa minara maaqi qidanoo. Innee Mooseena sandufamau fimariasa fifau firaaqoo munari minari mariasa innaarunai asumu mariranaki firaree qimariasa. Innee innaarunai ooruree asauku mundiranara randasee paqurimasee afiqee qumu dadaaqianifee qimariana fifau sia amanaikimari ainainara fifau kadaapirumasee maree mariafanoo. Asauku mundirafa doo qumu marinoo. Innee fifau maqa ameemaanai ooqu keeqafi asauku mundiranara paqurimandee afiqee murusaifanoo mifa dadaaqianifee qimariafanoo fifau sia amanaikimari ainainara fifau kadaapiri mariafanoo. Asauku mundirafa doo kuqiranakiqari findifinoo maridanoo.
ROM 10:8 Akara fannoo maasa inni qimannimira ufara maaqi qidanoo. Anutuna qimannimira ufa inni naaqa maridanoo inni nifaurusaa maridanoo inni nimuqusaki maridanoo. Miqimmasee Mooseefa maasa faiqí anaasee qimannimimari ufanara Yisunasaa irirana mundiranara qidanoo.
ROM 10:9 Maaqi qimasee qimannimidaqa, anee aneenna afaurunnai Yisufa kuqaa karaambaiqa maridanoo fee qimasee, aneenna amuqusa ookiqari kuqaa Anutufa Yisuna kuqiranakinaana uqeeranau maqi qimasainanoo Anutufa narí asumu mariranaki ani mara quqaannoo.
ROM 10:10 Maasa qeeqa qimuqusannai Anutuna andeeqaranaki fidaqa qeeqa qifaurunnai mina kooroo iranannai Anutuna asumu mariranaki fidaqa.
ROM 10:11 Tamummaqarausa ufa minara maaqi qidanoo. Anutunasaa irirana rusirafa sia mi rusiranarau kadooparaannoo.
ROM 10:12 Mi ufana aiqamausara qidanoo Yuda maqannaa faqa aanaamuru faqa sia rainarafa maridanoo Anutufa aiqamausa narí aaree mariasa dadaaqirafa maridanoo. Aiqamausa amana amana kai Anutufa narí aaree mariasa firaaqoo naundura marirana amiqi amiqimannimaqaannoo.
ROM 10:13 Tamummaqara fasiqa akarakinaafa minara maaqi qidanoo. Aiqamausa karaambaiqa dadaaqianifeera aareemariasa misa Anutuna asumu mariranaki fifaranoo.
ROM 10:14 Naqimasee faiqí anaasee karaambaiqara sia irirana minasaa rusimarinausa aareefaree sia amana aareefaranoo. Sia karaambaiqara irimariasa naqimandee fee irirana minasaa rusifaree. Moo fannoo oonu qimanniminaqa irifaranoo sia oonuree qimannimifaqa sia irifaranoo.
ROM 10:15 Naqi fee maseenoo fee moo fannoo oonu qimannimiannoo fee moo afeeqaseeqa mina ati uaqeeifanoo amana oonu maridanoo qimannimiannoo. Tamummaqara fasiqa minara maaqi qimasee akara rumaqoofa maridanoo. Amiqira fasaasa ufa maree animariasa anirafa amiqirafa maridanoo. Tamummaqara fasiqa miqi qimaqoofa maridanoo.
ROM 10:16 Misa amiqira fasaasa ufa mini qimannimisoofaqa sia aiqamausa iriqau akaqausa kai iriqau. Eesaiaafa minara maaqi qimasee akara rinau. Oo karaambaiqa maasa qimannimira ufa yausee iriaa, akaqausa moodaa kai iriaa. Eesaiaafa miqi qimasoofaqa qinee Pauroosa minara maaqi qidaqa. Faiqí anaasee sia fifau kaqi Yisuna saqarikidaqa, mina aufakiana naaree irisee miqoo Yisuna saqarikidaqa, Yisuna aufakiana sia fifau naaqooki kambiqaannoo, faiqí qimannimiafanoo naaqooki kambiqafifaqa saqarikidaqa.
ROM 10:18 Qinee Pauroosa minara iraidaqa Yuda maqannaasa ooqaindari sia fee Anutuna ufa irideeaa. Eeoo kuqaa misa iriaa, akarakinaafa misara maaqi qidanoo. Misa ufa fannoo aiqama maqa afaaqasasa Yuda maqannaa fimaruqoo daraaninau. Misa ufa fannoo maqa dinni dinni ati munu raquraminau.
ROM 10:19 Qinee Pauroosa kafaa iraidaqa, Isaraee maqannaa Anutuna ufa iriqee iqau sia fee iriqau. Mooseena ooqai akarakinaa ufa dauni qimaqimida maaqi qidanoo. Qinee Anutusa qumee Isaraee maqannaasa naundurai saikiafanaqa fifau moo maqannaasara Anutuna ufa iridammiafoo qimasaidaqa rairai qimannimaqaidaqa. Qinee Anutusa qumee fuki faaki qunaqa furufarira maqannaasa qini ufa irisaifaqa qini faiqi namu Yuda maqannaasa mina qafamasee mi maqannaasara rairai qimasee doo mi rairai qiranannai nári faqa qini ufa irifaranoo.
ROM 10:20 Mooseefa miqi qimasoofanoo Eesaiaafa aranaiqi kooroomasee mi furufarira maqannaasa aanaamuruara maaqi qinau. Qinee eedoo qimasaunaqa sia qiniara randeemaria fasiqa anaaseesa qini Anutusa paquriqa. Sia qini daaree mariasa nifusaa qinee oonu kikiqiqa.
ROM 10:21 Miqi qimaseenoo Isaraee maqannaasara maaqi qinau. Qinee faasaambaasaana inni rafusira runaqa innee ufa rukieeqa kaqirunna fimaria maqannaasa maridaqa rafusiranara rufiee mariafanoo.
ROM 11:1 Qinee Pauroosa kafaa Isaraee maqannaara iraidaqa, kuqaa fee Anutufa Isaraee maqannaasara qaoo qimasee mininnisanau. Oo sia uqanna minnisanau. Qinee Pauroosa Isaraee maqannaa faqa maridaqa qinee Abarahaamana aiku asauku marunausa maridaqa, qinee Yakooboona amaaku Beesaminna ati maridaqa marunnanara Anutufa sia narí Isaraee maqannaara qaoo qimasee minnisanau. Ooqai oosanaraseenoo maa maqa maaqanakina rusandeesamumandee maroosa mariafanoo. Ooqeenaa tamummaqarausa akarakinaana Eeriaafa Isaraee maqannaasara nifairidanoo niqidanoo afeekaikamandee Anutunara innaaru qinoo qinau.
ROM 11:3 Oo karaambaiqa Isaraee maqannaasa ani ufara minniseeqa furufariqa ani tamummaqara fasiqauqa kuqa naruseeqa ani aandau tatufira ooni qaindauqa rapeepaamma aqiqa. Qinee Eeriaasa qeeqaraa kai ani ufamau fimarunaqa misa minara irisee qini faqa kuqa dariraree qimariafaqa ani qimamidaqa.
ROM 11:4 Eeriaafa miqi qimasoofanoo Anutufa qimaminoo qinau, Oo sia aneennara kai qini ufamau fimarianafa mariananoo. Qinee qisauku dinni taikasee dinni oonu qaaraqanda tauseenna fasiqa anaasee moomoosa uqanna utaaqamaqaunausa maridaqa sia unna Anutuna Baaranara innaaru qimariasa qiniara kai innaaru qimariasa maridaqa.
ROM 11:5 Eeriaana aukuana miqinoo marinau maqee aukuana Isaraee maqannaasaki miqimminoo maridanoo, Anutufa misakinaana akaqausa utaaqamasoofanoo narí amuqusiranannai utaaqamasoosa maridaqa.
ROM 11:6 Minamusa Anutufa sia misa nirana marirana oosana qafamasee amiqira fee qimasee utaaqamannimaqanau, narí amuqusiranannai kai misa utaaqamannimaqanau. Anutufa faiqí utaaqamannimaqara oosana fannoo misa nimariana misa mariranasaa mundinoo marinanoofau sia anoona amuqusiranasaa mundinoo marini, minasaa kai mundinoo maridanoo.
ROM 11:7 Isaraee maqannaasara nanee fee qianauree, maaqi qianaura, Isaraee maqannaasakinaana akaqausa Anutufa utaaqama nimaqaqoosa kai Anutufa naaroo ufana irisee mifinnai fiqau. Aiqama tia naaqooki ooni ititarausa maridaqa sia nári randee maru aanna paquriqau.
ROM 11:8 Tamummaqara fasiqausa misara maaqi qiqau. Anutuna nimuqusaki faqa nitikuraki faqa ummaarararana nimisoofaqa mi kamuqooqari aunduaridaqa kudoosaapaida maridaqa nifu qafaida sia qafaidaqa, naaqooki faqa sia iridanoo.
ROM 11:9 Dafidifa faqa maaqi qimasee misara akara rinau. Misa qoomaqa sakasee ooqu marififanoo namuqaa anireeqa misa ititaannoo. Misa miqoo kuridiqa nári mandainaina akiaqara mareefara.
ROM 11:10 Misa sia qafaaqee qimasee Anutufa misa nifusaa ititaannoo. Nári ummaara fannoo aiqama kari nári nitaufakaaqa mariraika kai idanoo nitaufaka saaeemminoo maridanoo. Miqimasee Dafidifa misara akararinau.
ROM 11:11 Qinee Pauroosa Isaraee maqannaara maaqi qimasee iraidaqa, Yuda maqannaasa Yisunasaa farindamaki saamuriqa kuridiranaki taikaranaki aqufiqee iqau. Sia uqanna miqiqau. Isaraee maqannaa aaqoonara Anutuna asumu marirafa aanaamurusaa aqufinau, Yuda maqannaasa aanaamuruara rairaiqiaqeera miqinau.
ROM 11:12 Yuda maqannaasa aaqaranara Anutuna firaa amiqi amiqirana aanaamuru aiqama maqa afaaqasasa mariasa niminau. Yuda maqannaasasaaqaraana aanaamuru amiqi amiqirana maraqau, kasooqaqee taikara aukuana Yuda maqannaasa Anutufa aiqama mareeqeenoo aanaamuru nimuna akiaqara firaa amiqi amiqiranaki uriqararanaki Yuda maqannaasa quqaannoo.
ROM 11:13 Qinee Pauroosa Yuda maqannaara inni qimannimiseeqa kafaa maqee inniara aanaamuru qimannimidaqa, Anutufa aanaamuru qimannimiranara diqiqoosa maridaqa inniki ainainimarunnanara asasidaqa.
ROM 11:14 Anaamuru qimannimi marunaqa Yuda maqannaa inniara Anutuna ufara iridammiafoo qimasee rairai qimasee misa faqa irisee irirana mi ufanasaa rusiaqeera asasidaqa.
ROM 11:15 Yuda maqannaasa Anutufa mininnisoofaqa aanaamuru aniree Anutuna aqoondikiqau. Kasooqaqee Anutufa quandaki Yuda maqannaa kafaa marainaqa kuqiranakiqari findifiara foora ifaranoo.
ROM 11:16 Maasa Yuda maqannaasa Anutuna amira ainainara maaqi qidaqa. Innee feemu adiana kai raqeeqee Anutuna amifanoo mi feemufa aiqama minaindikakaimminoo mariannoo, kafaa innee saqari oosana amifanoo mi saqarifa minaindikai mariannoo.
ROM 11:17 Doo qinee mi iriranamau fidaqa minara maaqi qidaqa. Oorifa saqari asumu saunara foora maridanoo. Asumu saqari ammuqu akaqafa raqanoo marifanoo kaasau oorifa saqari asaana raqeeqee minakina mini ookaamandee ummaqusainanoo minakiqari kambiqaannoo. Innee aanaamuruara kaasau oorifara foora mariafanoo. Yuda maqannaasa oorifa saqari asumu oosana maridaqa. Anutufa inni aanaamuru mariasa kaasau oorifa asaanara foora asumu oorifa minaki ookaamasaifanoo kambiqafifaqa innee maqee Yuda maqannaa akaqausa faqa misaindi oosana amiqi amiqiranasaaqaraana animaree mariafanoo. Innee aanaamuru mariasa asumu oorifa ammuqu raqaranaki innee ookaairausa mariafanoo, sia misara raqara asaanara fidiaqaa iaqa. Innee naqimaseeqee noori uqeeraseeqa inneeqara amiqirausee qidee innee ammuqu mariafanoo, sia ammuqu fannoo saqari oosana pooduqaidanoo, oosana fannoo ammuqu poonduqaidanoo, minara sia innee oosana mariasara Yuda maqannaasara fidiaqaa iaqa.
ROM 11:19 Innee minara irisee maaqi qifaranoo Anutufa maasa aanaamuara iriseenoo asumu saqari ammuqu raqafufanoo maasara kai iridanoo fee qifaranoo.
ROM 11:20 Qinee Pauroosa minara maaqi qidaqa Innee doo kuqaa qiafanoo, Anutufa Isaraee maqannaa sia irirana mina ufasaa rusimarufanoo aadana asaanara foora raqanau, innee irirana mina ufasaa rusimarunara inni mareeqee minaki ookaa inau. Innee minara irisee sia noori uqeeraaqa, rufiaaqa.
ROM 11:21 Anutufa mi saqarina naríndi Yuda maqannaasara sia amuqusinau sia Yisunara irisoonara kaqi ateekanau innee faqa rufiaaqa kaqinni faqa ateekaannoo, kaasaummia.
ROM 11:22 Maanara amiqimasee iria sia aunuaqa Anutufa narí qaara oosana maaqimminoo maridanoo mina dinni kaaqa faiqí anaaseera amuqusirafa maridanoo kafaa mina dinni manda ainainara aanoo irafa maridanoo. Mifa mandainainaki saamurimariasara aanoo irafa kai maridanoo, innee kaqi mina afaariranaki maqee maqee fimarifanoo mifa inni nifauamaseenoo amiqi amiqiannoo, minnisaifanoo inni faqa Yuda maqannaara foora aadana asaanara foora inni rauda aqusaannoo.
ROM 11:23 Yuda maqannaasa nariqa dapi nirana minnisee quandaki kafaa aniraifanoo Anutufa misa qumaree nári nimaaqaki kafaa ookaa iannoo, Anutufa mina faqa amanaikamiannoo.
ROM 11:24 Asumu saqari asaana ateekasee narí amaaqakina ookaamandainanoo dauni ururaannoo, mi oosanafa sia kadaapirirafa maridanoo. Kaasau saqari asaana ateekasee asumu maraqa nua oosanaki ookaa inanoo sia dauni dauni kambiqaannoo kadaapiruannoo. Minara irisee Anutufa Yuda maqannaasa oorifa saqari asaanara foora raqaqa mariasa amana mareeqee narí amaaqakina kaifaa ookaa inoo sia kadaapiruannoo. Innee aanaamuru mariasa kaasau oorifa saqariara foora mariafanoo asumu saqarikina innee ookaamaqaifaqa mariafanoo. Innee sia Anutufa kafaa Yuda maqannaa ookaa ianinnanara sia amanee qiaqa, doo Anutufa amana sia kadaapi maridanoo, kaqimma ookaa iannoo.
ROM 11:25 Oo qini qikaqaafasaauqa moo kukeeqara ufa inniara iriaqeera qimannimianaura, innee maa ufana iriseeqa inneeqa noori uqeerarana mara maqaruseeqa miqooqari reendeenamandee marifaranoo. Mi anoona ufafa maaqimminoo maridanoo. Isaraee maqannaasa naaqooki ooni ititarafa sia naaruara miqinoo mariannoo. Anutufa qinoo aanaamuru marinausakiqari qinee qeeqa qiafanausa misa kai Yisufinnai irirana ubeekaifaqa Yuda maqannaa naaqooki ooni ititarana tatusaanaqa misa faqa anifaranoo.
ROM 11:26 Maaqimmasee aiqama Isaraee maqannaasa Anutuna asumu marirana mareefaranoo. Tamummaqara fasiqauqa maa ufamau mareefaranoo. Asumu maree marifa Sioona maqusai moo auqu Yeerusaree mi maqusanaindari aniree asumu marirana nimiannoo. Mifa Yakooboona aiku asauku mina atiuqa mariasa mandainaina aiqama rukannisaannoo.
ROM 11:27 Mikari qinee Anutusa Yuda maqannaasa aaqarana akiaqara mara aqunniseeqa qinee Anutusa qeeqa moodaanakikirafa ufa Abarahaamana faqa Isakeena faqa Yakooboona faqa ufa qiafannana mikari mi ufana anoona doo anoonaikiannoo. Tamummaqarausa ufa miqinoo marinara qinee Pauroosa maaqi qidaqa.
ROM 11:28 Yuda maqannaasa Yisuna amiqira fasaasa ufa minnisoonara Anutuna ufaasu namuqaa kammiqa maridaqa. Sia fifau, inni aanaamuru mariasara iriseenoo Anutufa miqimma nimaqasoofaqa miqidaqa. Anutufa Abarahaamana Isakeena Yakooboonara iriseenoo, aiqama aanaamurukinaana rusandeesamumandee maroonara iriseenoo misasaa aruakinausa misa amiqi amiqimma nimaqoonara iriseenoo Isaraee maqannaasara qini qiqoondi fee qidanoo.
ROM 11:29 Anutufa narí rusandeesamumasee maree mariasara faqa narí amiqi amiqimma nimaqee mariasara faqa sia qaara iriranaikidanoo andeeqaidanoo sia kaaqa Isaraee maqannaa namuqaakinoo, ufaasu kai.
ROM 11:30 Innee aanaamuru marusa ooqai ufa rukiee marusa mariafanoo doo maqee Yuda maqannaasa ufa rukioonara faqa innee mina ufa irunara Anutuna nifauarana maree mariasa mariafanoo.
ROM 11:31 Miqi kaimmasee innee aanaamuru Anutuna nifauarana maree mariafanoo Yuda maqannaasa faqa Anutuna nifauarana maraaqeera ufa rukiaranaki quqasoofaqa mariafanoo.
ROM 11:32 Anutufa aiqama maqannaasa narí nifauara oosana uqannifiqaanifeera aiqama maqannaasa ufa rukiarana ameemaanai mara quqasoofaqa Anutuna nifauarana oosana qafaaqeera.
ROM 11:33 Oo Anutuna irirafa ainaina faifa firaaqoo maridanoo. Mina irirafa faqa auqarafa faqa firaaqoo farummara foora meemai unaurinoo maridanoo. Mina naamuaqira ufa oosana yafee mina iriannoo fee, sia amanaikidaqa. Mina nirana yafee iriannoo fee.
ROM 11:34 Tamummaqara fasiqauqa minara maaqi qiqau. Yafee karaambaiqa irirana faasai iriannoo fee yafee fuki faaki iannoo fee.
ROM 11:35 Yafee moo ainainara qufiqeenoo qimianifee qimasee amiannoo fee. Sia moo fannoo amanaikiannoo. Doo tamummaqara fasiqa ufa miqimminoo maridanoo qinee Pauroosa minara maaqi qidaqa.
ROM 11:36 Naqimasee moo fannoo Anutuna moo ainaina amiannoo fee narí kai aiqama ainaina auqufa minaindi kai maridanoo. Aiqama ainaina minasaa qaraafa kai afeekaikinoo maridanoo. Aiqama areenarafa naaru naaru Anutunaindi kai mariannoo. Kuqaa.
ROM 12:1 Oo qini qikaqaafasaauqa, Anutufa inniara amuqusirana faqa amiqi amiqirana faqa firaaqoo marinara afeekaikamandee qeeqa qimuqusa ookiqari inni qimannimidaqa innee inneeqa marirana nipata aandau tatufiranara foora Anutuna amiaqa, Anutuna ufamau fidaqa mina aidira ainaina andeeqasee marirana mina mina amiaqa. Miqiqa inniqa Anutunara innaaru qirafa amooqirafa anoonaikiannoo.
ROM 12:2 Minara irisee maaqimmiaqa sia maa maqa maaqanasaa mariasa naanna raaqa. Innee eedoo qifanoo Anutufa inni nitikura amiqimmasee firaaqoo quandanniseenoo naunduraki nirana faqa quandannisaannoo. Innee miqimmaseeqa Anutuna irirana faqa Anutuna aidirana faqa amiqiranee qimariana faqa idaaqiranee qimariana faqa amiqimandee irifaranoo.
ROM 12:3 Qinee Pauroosa Anutufa afaarida nimimari ainainara irisee maaqi qidaqa. Innee sia inneeqara amiqirausee qimasee firaaqoo inneeqa nimooqiaqa innee andeeqasee reendeenamaseeqa inneeqa nimana kai irirana iriaqa. Aiqamausa náriara qidaqa Anutufa faiqí anaasee dadaaqira nimirana irisee mina amana kai nariqa kai iriaqa, sia noori uqeerasee inneeqara firaaqoo irirana faqaasee qiaqa.
ROM 12:4 Maasa qipata moomoo ati ootupanoo maridanoo. Mi ootupara atisa naadu naadu ainaina quqee mariasa maridaqa.
ROM 12:5 Maasa miqirausa maridaqa asauku mundiranasaa ootupaqa marunausa moomoosa naadu naadu nipata atiara foora mariasa moodaa qipatara foora mafiqa Yisunaindi maridaqa narisaa narisaa atooaqa maridaqa narisaa narisaa mundiqa mariaqeera.
ROM 12:6 Minara maasa aiqamausa irisee nariara nariara aadu aadu akoofasaiki marinna ainaina marasee minannai Anutufa nimuna akoofasaikirana amana kai minannai kai aiqamausa narí dadaaqi narí dadaaqiaqa. Anee Anutunaindaraa ufa irisee faiqí anaasee ufa qimannimi marianafa maridana, Anutufa narí saqarikirana amuna mina amana kai qimannimia.
ROM 12:7 Anee dadaaqimarianafa akoofasa maridana doo misa dadaaqia. Anee ufa akoofasa maridana doo mina ati qimannimia.
ROM 12:8 Anee reendeenamandee fuki faaki qirana akoofasa maridana doo miqimmia. Faiqí anaasee moo fannoo narí akaqa nimira ainaina akaqausa raina nimidanoo sia akoo akaa ida nimia, oori inaa inaa ida nimia. Anee faiqí anaasee rakisi marinafa maridana anee faqa eeraaramasee ainainia. Faiqí aanaaseera qimudaoo qimasee dadaaqi mariasa sia nikoo nikaa mandeeqa miqia, asasammandee oori inaa inaa idana dadaaqiaqa.
ROM 12:9 Inniki nariara nariara nimuqusirafa inniqa nimuqusannai kai nariara nariara nimuqusiaqa. Innee aiqama manda mariranara fidiaqaamasee amiqira marirana kai rakisisimma qumaraaqa.
ROM 12:10 Innee aiqama asauku mundirana mandaaqaqa mariasa minara irisee nariara nariara qikaqaafasaa fee qimasee nariara nariara nifaaqasaa aqoondiara foora nariara nariara andeeqasee ridaqa asasiaqa. Inneeqa niqoonnanara maasa uriqararanee qimasee maqee maqee mina auqu kooroo qia.
ROM 12:11 Innee inneeqa oosana oosana ainainiranaki maridaqa nimudaanai qimaseeqa kadaapiruaqa sia kudoosaapaaqa. Inniqa nimuqusaki karaambaiqara nidirafa qumbiqanoo marinaqa mina ainainammidee qidaqa asasamandee mi kadaapina riqa fuaqa.
ROM 12:12 Innee Yisufa qumuaninnanara afeesidaqa asasidaqa kai mariaqa, maqee maria kadaapirira ummaarafa rafaaqafinaqa naundura asooamasee kasooqaqee ubiqafiqa reendeenamasee kaqi kai minaki fuaqa, maqee maqee innee aiqamausara faqa aiqama ainainara faqa innaaru qimannisaaqa.
ROM 12:13 Innee niqoonausa Yisuna ufa irimariasa nana ainainaree sarau imariasa inneeqaindi misa faqa rainasee naida nimiaqa. Sia qafee marinna aanaamurufa faqa anirainana amiqi amiqimandee maaqa aminanoo tootooqiranaki fuani.
ROM 12:14 Faiqí anaasee akaqausa Yisuna ufasaara nárí niqifaqa innee quandakinaqa sia minara iriaqa amiqi amiqira afaaqooqa kai qimannisaaqa, sia niquraraaqa amiqi amiqima nisaaqa.
ROM 12:15 Faiqí anaasee akaqausa asasifaqa innee faqa dadaaqiqa asasiaqa. Faiqí anaasee akaqausa ummaara narinaqa ikiraqaifaqa innee faqa dadaaqiqa ikiraqaaqa.
ROM 12:16 Aiqama narinni narinni maridaqa moodaanaki kiqa maridaqa aqoondikidaqa mariaqa. Sia innee inneeqara uriqararausee amiqirausee qimasee noori uqeeraaqa. Kaqiqeesa ooreeqararausa faqa aqoondi kiaqa. Sia misa ooreeqararausara noori runusee noori uqeeraaqa.
ROM 12:17 Moo fasiqa anaasee fannoo ani mandaikammamaqainana sia anee mina akiaqara mina mandaikammamaqa, aiqama fasiqanaasee amiqira oosanee qimariana, mi oosanna amanamasee mi oosanamau kai fuaqa.
ROM 12:18 Anee aiqama fasiqa anaasee faqa asooaranaki kai mariaqa, misa sia amanaikifana aneennakai kafaa kafaa amanida qafaa.
ROM 12:19 Moo fannoo ani arinoo mandaikammamaqainana sia anee mina akiaqara arua, Taikara aukuana Anutuna aanoo irafa minasaa mariannoo fee qimasee miqoo minnisaa. Tamummaqara fasiqa akara minara maaqi qinoo maridanoo. Karaambaiqa maaqi qinoo qinee mandainaina akiaqara nimianaura, ani arifaqa qeeqa kai mina akiaqara qianaura.
ROM 12:20 Kafaa moo fannoo maaqi qinoo. Ani namuqaa fannoo aararee marinana narana kaqi amia. Nammariara mifa aidinana kaqi amia. Anee miqinana aneenna amiqira iriranannai asaurirana mina aminnaranoo. Qinee Pauroosa minara mi tamummaqara fasiqana ufamau fuaqeera qimannimidaqa.
ROM 12:21 Faiqí anaasee mandainaina fannoo sia inni rafaaqa fuani, inneeqa amiqira oosanannai misa mandoosana rafaaqafuaqa.
ROM 13:1 Aiqama kaamanauqa faqa uriqararausa faqa Anutufa kai quqaidanoo. Sia moo fannoo narí kambiqaidanoo, Anutufa eedoo qinara kai kambiqafi maridaqa. Minara irisee innee aiqamausa misa ufamau kai fuaqa.
ROM 13:2 Faiqí anaasee moo fannoo kaamanauqa ufa rukiee marinafa Anutufa quqaqai fasiqausa ufa rukiee mariafa marinnarannoo. Anutufa quqaqoo fasiqausa ufa rukiainafa mi fasiqausa saaqaraa aanoo irana aneenna kai mareeqeena aneenna afaariki rusimariananoo.
ROM 13:3 Manda oosana maree mariasa kai kaamanna rakisirausara rufiaaqa, amiqira oosana mareemariasa sia misara rufiaaqa. Anee kaamanna fasiqa fee uriqarara fee misa nifusaa mana mana kai iraree fee qidanee doo amana andeeqara oosana marasee miqia. Miqinanoo mifa amooqira ufa kai ani amiannoo.
ROM 13:4 Kaamanna uriqararafa Anutuna saikira fasiqa maridanoo ani amiqimmasee marianneera ainainidanoo, anee manda oosana mareenana minara rufiaa mina akiaqara ani arirasamu doo asaukuki uaqeeidanoo. Mifa mandoosana maree mariasasaa Anutuna aanoo irana mareeqeenoo misasaa quqeemarifa maridanoo.
ROM 13:5 Innee minara irisee uriqararausa ufara aiqama eedoo eedoo kai qiaqa, sia Anutuna aanoo iranara kai iriseeqa eedoo qiaqa, aneenna aakiranara andeeqanoo marifaqee qimasee eedoo qiaqa.
ROM 13:6 Kaamanna fasiqauqee kansoorauqee uriqararausee, misa aiqama Anutuna ainainiranaki maridaqa faiqí anaasee andeeqannisaida maridaqa minara inneeqa takisa munnimma nimirana eedoo qimasee nimiaqa, minannoo ainainidammia.
ROM 13:7 Inneeqa takisa munnimma aiqama aquaqa, kaqikaa takisa kansoora takisa faqa kaamanna firaa takisa faqa aquaqa, aiqama uriqararausara amiqira fasiqee qimasee misa noorinni rufiaqa rufiaqa idaqa fuaqa.
ROM 13:8 Sia moona ummaara ameemaanai keeqana maria aufadaranaki kai maria. Moodaa ummaara ameemaanaki kai keeqaqa mariaqa. Nariara nariara nidimarinaqa mi moodaa ummaaranaki kai keeqaqa mariaqa. Faiqí anaasee moo fannoo narí aqoonna fasiqanaaseera amuqusinanoo Mooseena sandufa doo qumareenoo mi sandufana anoona paqurinoo kooroo idanoo.
ROM 13:9 Mooseena sandufakinaafa akaqafa maaqimminoo maridanoo. Sia faiqí anaasee narí ummuari narí ummuariaqa. Faiqí faqa anaasee faqa faiqi faqa sia kuqannaruqa misa fidika sia ruqiaaqa. Sia narí ainaina narí ainaina ummuariaqa. Sia moona ainainara amuqusinana marara aaqoo iria. Mi sandufausa faqa akaqa sandufauqa faqa moodaa ufa fannoo mi sandufausa aiqama rafaaqafinoo maridanoo mi moodaa ufafa maaqimminoo maridanoo. Anee aneennara amuqusi marianandee maseenana mi amuqusirafa kai aqoonnanara amuqusiani. Mi ufafa aiqama sandufa aruseenoo mifa anoonaikidanoo.
ROM 13:10 Faiqí anaasee moo fannoo aqoonna fasiqa anaaseera amuqusi marinafa naqimaseenoo moona mandaikammamaqaannoo fee, sia miqiannoo. Minara qinee qiqa, aqoonnanara amuqusi marifa aiqama Mooseena sandufamau fimarifa maridanoo.
ROM 13:11 Innee mi fasiqana aanna raaqa. Doo maa aukuanna iqaqara aukuana maridanoo faiqaranakiqari findifira aukuana doo ani maridanoo. Ooqai innee inneeqa irirana Yisuna ufasaa rusisoofa doo ani aniifanoo doo inneeqa asumu marira aukuana doo adeedi ramasee ani maridanoo. Minara faiqaranakiqari findi fira aukuanee qidaqa.
ROM 13:12 Doo asukuna taikararidanoo, iqaqarafa qusasaa aniannoo, maasa asukunaki nimariafanna manda oosanna oosanna mafi taikaseeqa faasaana amiqira oosana amiqira marirana duru feefara foora indaamma qumaraaqa.
ROM 13:13 Maasa faasaanasaa nidara foora aiqamausa nifusaa andeeqarausaikakai mambi mariaqa. Sia mandainaina maraani qimasee moodaanaki suquaqa. Sia nammari namasee furufariaqa, sia faiqí faqa anaasee faqa narinni narinni ummuariaqa. Faiqí faqa anaasee faqa sia narí afaaqa narí afaaqa kooroo iaqa. Sia rakuaqa, sia nariara nariara rairai qiaqa.
ROM 13:14 Innee inneeqa faiqí faiqi manda iriranamau fidaqa fanandimariana minniseeqa mi aanausa oonu ititee ani ititeemma atukaraseeqa quandaki Anutuna asauku mundirafa Yisufa maasa karaambaiqa mina andeeqaranaki fimariana mina qumareeqa mi duru saamunannai maasa faiqí faiqi manda marirana manda nirana faqa rakuaqa.
ROM 14:1 Qinee Pauroosa Roomma maqusanaasa Yisuna ufa irimariasa qimannimidaqa. Innikina oosana oosana fasiqa anaasee mariafanoo. Akaqausa afeekaikamasee Yisuna mandaaqaqa maridaqa irirana minasaa kai mundusee fimariasa maridaqa, akaqausa irirafa sia Yisunasaa mapukimariasa mi fasiqausa irirafa oorudupirausa maridaqa. Innee sia amiqira irirana faqaasa kai mara maree inni suqiranaki quqaaqa irirana oorudupirausa faqa mareeqee kaqi moodaanaki quqaaqa. Sia misa moo iriranara rairaiqiaqeera mareeqee quqaaqa. Misa faqa Yisuna ufa irimariasa mariafaqa kaqi quqannisaaqa. (Ooqai Pauroofa maru aukuanna aandau aruseeqa unna Anutunara tumunnai auqira afaannara dufi dufi qimaseeqa makeetimariqau. Yisuna ufa irimarusa namasaifanoo unna Anutuna maraquna kafaa daakuandoo qimasee rufieemariqau.)
ROM 14:2 Faiqí moo fannoo narí iriranannai sia minara iridanoo kai aiqama narana aandau naidanoo, sia Anutuna ufa rukiaida miqidanoo. Faiqí moo fannoo irirana oorudupirafa aandau namasee qeeqa irirana kuridianoo qimasee narana kai naidanoo.
ROM 14:3 Innikina aiqama aandau narana neemarifa sia quandaki aandau sia nainnanara fidiaqaamasee qinee qeeqaraa ani uriqararausee sia qia, Kafaa aandau sia nainnafa sia quandaki kaqi neemarinara qaoo qimannisaaqa.
ROM 14:4 Innee aiqamausa Yisuna ainainimariasa mariafanoo. Innee naqi fee mandee moo fasiqa ainainirana aqifaree. Mi fasiqafa moo fasiqa Yisuna ainainirafa maridanoo, mina uriqararafa kai mina oosana irisee mara uqeereeqee narí andeeqarana amanakai kikiqammaisaannoo karaambaiqa fannoo amana mina dadaaqinanoo anoonaikiannoo.
ROM 14:5 Faiqí moo fannoo moo faasaanara uriqarara faasaanee qidanoo. Faiqí moo fannoo aiqama faasaanara amanamana kai fee qidanoo. Aiqamausa naadu naadu nári irirana mapukusee irisee doo mi mau fuaqa.
ROM 14:6 Moo fannoo moo faasaanara uriqarara faasaanee qimarifa karaambaiqa auqu uqeeraidanoo miqi qidanoo. Moo fannoo aiqama aandau narana neemarifa karaambaiqa auqu uqeeraidee qidanoo miqidanoo, Anutunara dufi dufi qidee qida neemarifa miqidanoo. Akaqa ainaina sia neemari fasiqafa mifa faqa minannai Anutuna auqu uqeeraidee qidanoo miqidanoo, Anutunara dufi dufi qida sia neemarifa miqidanoo.
ROM 14:7 Maasa qeeqa mariranaki maridaqa sia qeeqa qeeqa rakisida maridaqa, maasa kuqirana faqa sia qeeqa rakisidaqa karaambaiqa fannoo kai rakisidanoo, maasa kaqi maridaqa karaambaiqa ainainiranaki maridaqa maasa kuqiqa karaambaiqaindi maridaqa mifinnai fidaqa. Doo qinee minara kooroo idaqa maasa kaqi maridee kuqidee karaambaiqaindi maridaqa.
ROM 14:9 Asauku mundirafa kuqirausa faqa kaqi mariasa faqa karaambaiqa marianifeera auniriranasaa kuqinoo minakiqari findifinau.
ROM 14:10 Qinee Pauroosa minara irisee iraidaqa. Anee yafee maridanee aqoonnana oosana qafamaseenee aqinanee. Anee yafee maridanee aqoonnanara akooqaidanoo fee. Maasa aiqamausa Anutuna afusaa kikiqammafuananoo mifa maasa oosana qafammaseenoo raina qimaqaannoo, minara sia aqoonnana aqisee akooqaani, anee ureeqarafa mariananoo.
ROM 14:11 Ooqeenaa tamummaqara fasiqausa minara maaqi qidaqa. Anutufa qinau. Qinee kaqi marira Anutusa uriqararausa marunnanara qini ufa amiqimasee iriaqa. Aiqamausa qini doorisaa noorindari aqufiqa qimooqifaranoo. Aiqamausa qiniara Anutu fee qifaranoo.
ROM 14:12 Doo qinee Pauroosa minara maaqi qidaqa. Maasa aiqamausa qeeqa nirana, marirana, qirana Anutuna afusaa kooroo ianaura. Minara iridaqa aqoonnanara ireeda kai qiaqa.
ROM 14:13 Nariara nariara ireeda kai marida sia munuqi miniqi qidaqa sia aaqara ufa nariara nariara qiaqa, sia maasa miqiaqa, maaqiaqa, maasa Yisuna ufa irimarunausakina maridaqa moo ainaina maraananoo qini qiqoonafa qiqafamaseenoo doo narí faqa mareenoo aaqaranaki aqufinaqa doo qinee mi ainainnara sia maraanaura rufiaanaura.
ROM 14:14 Qinee Pauroosa Karaambaiqa Yisunasaa atooaqa marunnanannai aiqama naranara anukara fee kai qimasee naidaqa. Faiqí anaasee moo fannoo moo ainainara sia anukara fee qinafa mina amuqusakinaafa mi ainainnara rufiaannoo.
ROM 14:15 Anee moo narana amiqira naranee qimasee namasainanoo ani akaqaafasaa ani qafamaseenoo mifa faqa neenoo minasaa farindamakinoo moo mandainainaki aqufinana anee mina afaasuaa qiananoo mifa mandainaina numooki aqufinoo. Anee miqinana sia aneenna akaqaafasaara amuqusinana dadaaqiananoo. Asauku mundirafa akaqaafasaara minara faqa kuqinau anee nanaree fifau amiqira naranara neemarianannoo mandoosanaki quqeenanee. Anee miqinaqa faiqí anaasee ani oosana oosana naranara kaqi nifaaqa quqasee neefandinnanara mandoosanee qifaranoo.
ROM 14:17 Anutuna ququsaki mariasa maasa nirana marirana sia narana nammarisaafau mundinoo maridanoofau. Anutuna naaquqara maraquna nimimari ainainausa andeeqarana faqa asooarana faqa asasirana faqa minamusasaa maasa marirana nirana mundinoo maridanoo. Faiqí anaasee moo fannoo asauku mundirana ainainidanoo narí akaqaafasaauqara amuqusimarifanoo dadaaqinoo rakisinanoo Anutuna amooqirafa faqa faiqí faiqi eedoo qirana faqa maraannoo.
ROM 14:19 Maasa minara irisee Yisuna aiku asaukuki nidaqa maasaki asooarana faqa narí afeekaiki narí afeekaikiqa Anutuna ufamau fuaqee qimasee mi mau fuaqa.
ROM 14:20 Anutufa maasa moomoosa Yisuna moodaanaki quqaqoofaqa maasa sia mina kuridiqa furufariaqa. Aiqama narana amana nee mariafa maridanoo maasa moo amiqira narana namasaananoo maasa qikaqaafasaa moo fannoo qiqafamasee quandaki aaqaranaki aqufinanoo maasa mi naranna naunnanara aaqarafa maridanoo fee qianaura.
ROM 14:21 Andeeqasee nimariaanafa maaqimminoo maridanoo akaqa narana nammari fee namasaananoo qini qikaqaafasaa moo fannoo fee qini qiqafamaseenoo minasaa aiku amakinanoo kuridiranaki aqufuandoora mi narana nammarina narara rufiaanaura. Nana ainainasaa fee qini qikaqaafasaa aiku amaki kuridiranaki aqufuannoo fee qimasee mi ainainara rufiaanaura.
ROM 14:22 Aninna irirafa narana nammariara sia faiqí aanaaseeki kooroomandee minasaa aanoo irafa raiqarafa kambiqaani Anutusandiri kai kukeeqasee iriaqa. Faiqí moo fannoo narana nammari nainara mina aakirafa sia qaoo qinafa mifa amiqira fasiqa asasiranaki mariannoo.
ROM 14:23 Kafaa mi fasiqafa moo ainaina namaseenoo oonumafi iridanoo Anutufa minara andeeqeefoo qiannoo fee sia andeeqeefoo qiannoo fee qimasee qaara aundura irirafa mi fasiqafa mi narana nammarina namasainnanara Anutufa aaqee maqi qiannoo, sia Yisuna saqarikiranara irisee neenoo irirana furufaramandee neenoo, miqinnanara Anutufa aaqeenoo fee qiannoo. Maasa moo ainainana andeeqara fee mariannoo fee aaqara fee mariannoo qimasee qaara daundura irisee kaqi oonu qumarainafa aaqarafa maridanoo.
ROM 15:1 Maasa Yisuna saqarikiranaki afeekaiki mariasa quandaki ureeqarausa qumaara dinni ati dadaaqi akumaraa, sia maasa qeeqa didiranamau kai fua.
ROM 15:2 Maasa naadu naadu qeeqa qikaqaafasaa narí Yisuna saqarikirana dadaaqiananoo afeekaikiani. Sia aneennara iria, aneenna akaqaafasaa amiqi amiqianifeera minara irisee dadaaqia.
ROM 15:3 Asauku mundirafa ririmma, sia narí aidiramau finoo, narí akoona Anutuna aidiramau finoo tamummaqara fasiqa minara maaqi qimasee akara rinau. Faiqí anaasee Anutuna aqira ufa mandufa qimarifa qinisaa aqufinoo. Tamummaqara fasiqa mi ufana qimasee akara rinau.
ROM 15:4 Aiqama tamummaqara fasiqauqa akarakinaa ufa sia fifau akara riqau maasa naamuaqidee qimasee akara riqau, maasa mi akaranakinaa ufa dadaaqidaqa fuki faaki qirana faqa ubiqafi marirana faqa marasee miqandannai Yisunara asasammasee afeesirana maraaqeera akara riqau.
ROM 15:5 Anutufa ubiqafi marirana akoofa faqa dadaaqira fuki faaki qirana akoofa faqa maridanoo. Miqi mari Anutufa inni dadaaqinaqa innee asauku mundirana Yisuna aanna ramaseeqa innikina sia aanoo irafa mariannoo moodaa irirafa mariannoo. Moodaa irirafa innikina marinaqa aiqamausa moodaa ufa kai qimasee asauku mundirana maasa karaambaiqa Yisuna akoona Anutuna amooqiaqa.
ROM 15:7 Asauku mundirafa inni qumaroonara irisee innee nariara nariara aqoondikifaqa faiqí anaasee inni nindafamasee amiqira oosana maraidammiafoo qimaseeqa inni Anutuna amooqiaqeera. Anutufa narí qimaqoo ufamau fuanifee qimasee asauku mundirafa Yuda maqannaa mara firira faiqiara foora ainainammannimaqara faiqi kamambinoo marinau. Anutufa Abarahaamana aiku asauku faqa qima afeekaikammasoonara kambiqaanifeera qimasoofanoo asauku mundirafa Yuda maqannaasa ainainammannimaqara faiqi kamambinau. Anaamuru mariasa anireeqa Anutufa misara amuqusufanoo nifauaranara faqa Anutuna auqu uqeerasee amooqiaqeera asauku mundirafa minara faqa Yuda maqannaasa ainainammannimaqara faiqi kinau. Tamummaqarausa akarakinaana minara maaqi qinau. Qinee aanaamuru namufaqa maridaqa misa saimbaqa aniara dufi dufi qianaura. Miqooqari anauqu uqeeraseeqa idi raida ani amooqianaura.
ROM 15:10 Tamummaqarausa akarakinaafa moo maaqi qidanoo. Innee aanaamuru mariasa Anutufa utaaqama nimaqee marisa Yuda maqannaasa saimbaqa dufi dufi qimasee asasiaqa.
ROM 15:11 Moo tamummaqarafa maaqi qinau. Aiqama aanaamuru mariasa karaambaiqa amooqiaqa. Aiqama maqannaasa firaaqoo mina amooqiaqa.
ROM 15:12 Kafaa moo tamummaqarafa maaqi qinau. Yeeseena atiki moo kambiqaannoo, mifa findifinoo aanaamuru rakisiannoo, misa quandaki nári irirana minaki rusifaranoo. Tamummaqarausa ufa Yisunara miqimmiqau.
ROM 15:13 Anutufa maasa innaarunaira afeesirana oosanafaqaafa maridanoo, mifa kai innee mina saqarikiranannai aiqama asasirana faqa asooarana faqa innikina qumbiqannimaqaannoo, Anutuna naaquqara andeeqara maraquna afeeka fannoo inni dadaaqinanoo innaarunaira asasammasee afeesirafa mi asasirafa qumbiqeenoo teeqiannoo.
ROM 15:14 Oo qini qikaqaafasaauqa qinee Pauroosa inni Roomma maqusai mariasara qidaqa. Qinee inniara amiqirafa faqa irirana faqa qumbiqarausee qidaqa innee Roomma maqusanaasa amiqira irirana narí uqafiqee narí uqafiqee qimariasa amana mariafanoo.
ROM 15:15 Innee miqi marifaqa qinee maa pasanakina sia reendeenamandee inni naaqoo auqeeqa oosana oosana ainainara inni naaqoo firaaqoo auqeeqa.
ROM 15:16 Anutufa amiqira ainainirana qini qiminau. Qinee asauku mundirana Yisuna saikaki quqaqisaifaqa maridaqa aanaamuru qimannimiranaki maridaqa. (Mooseena uqiqaana maaqakina Anutuna aanaiqikira fasiqauqa sipsipa aanaaqi amiqirana kai faiqí aanaaseendi mara maree mini ooninnai auqira qaindasaa quqasee arusee aandau tatufirana Anutuna suqa amimariqau.) Qinee aanaamuru faqa Anutuna faqa aanaiqikirausara foora marunnanara maa akaranaki afeeka ufa inni nimiqa, kaqiqeesa marifaqau sia afeeka ufa qimannimini ireeda kai qimannimini inni aanaiqikirausa maridaqara afeeka ufa qimannimidaqa. Anutuna naaquqara andeeqara maraquna fannoo aanaamuru mariasara Anutunaindi fee qimasee misauqa marirana nirana Anutuna aidirana amana kai mariaqeera minara kai Anutunai aanaiqi kirausaikidaqa maridaqa.
ROM 15:17 Qinee asauku mundirana Yisunasaa moodaanaki kamambi maridaqa maqasaa mi saikanaki marunanoo didimarifaqa asasidaqa.
ROM 15:18 Asauku mundirafa naaquqara maraquna qimifanoo dadaaqifaqa qeeqa ufannai faqa qeeqa kadaapiriranannai faqa sia faiqí maraaqaa ira ainainannai faqa minauqannai qinee aanaamuru Anutuna ufa qimannimimariafanaqa iriqa mi mau fidaqa, asauku mundirafa dadaaqinara firaaqoo qifaaqa quqasee afeekaikamandee qimannimianaura. Qinee miqidaqa amiqira fasaasa ufa asauku mundiranara aiqama ufatia qimannimiqa Yeerusaree maqusa dinni Iririkumma maqusa dinni mi qambaana saqanna mariasa aiqamausa qimannimimaree fifainidaqa.
ROM 15:20 Asauku mundirana aufakiana sia irimariasa kai qimannimiqa, qeeqa ufa moona ufa amuaaqa rusianoora saina sia irimariasa kai qimannimia, ooqai indaaru doo qinee mi iriramau fidaqa. Mi mau fidaqa tamummaqara fasiqa ufamau fidee qidaqa.
ROM 15:21 Ooqai mi tamummaqara fasiqana ufa minara maaqi qinoo maridanoo. Sia minara qimannimusa mina qafeefaranoo. Sia irusa minara naaqoo irifaranoo.
ROM 15:22 Qinee Pauroosa moomoo kari inni Roomma maqusai fuaneerunanoo oosana oosana ainainirafa rafaaqafufaqa doo maqee maa saqa saika taikasee moomoo aukuana innee iannai fuanee qimarunausa doo maqee qusasaa firaridaqa. Qinee Sipeena maqusai fidaqa inni Roomma maqusanaasa faqa namummaqeeqa inni faqa asasammasee marikammasaanaqa innee Sipeena maqusai fuannana qiku auqirana dadaaqiaqee qidaqa.
ROM 15:25 Inni maqusai fuani qunausa doo maqee Yeerusaree maqusai fuanaura oonureeqa oonurandee aiqareeqa inni maqusai fuanauranoo. Yeerusaree maqusai ooru fidaqa miqoo Anutuna ufa irimariasa dadaaqianaura.
ROM 15:26 Maseedoonia maqa maaqakinaasa faqa Kirisa maqa maaqakinaasa faqa Yisuna ufa irimariasa nariqa munnimma aiqamausa ruaummasaafaqa Yeerusareenni Anutuna ufa irimarusa ainaina naranara sarauirausa mi munnimmana nimiraree qimasee qinisaa saafaqa maree ooru firarammidaqa.
ROM 15:27 Maseedoonia maqa maaqaki mariasa faqa Kirisa maqa maaqaki mariasa faqa nariqa kai ruaummasee Yeerusaree maqusanaasa nimiraree qidaqa, sia qineefau qiqau. Indaaru Yuda maqannaasa nári innaarunai fira amiqira ufa Yisuna ufara aanaamuru naida nimisoonara mi aikana narinoo marina mi aikana tatiqa maqasaa amiqi amiqira ainainara munnimma nimifaranoo. Anaamuru mariasa miqiaqaana andeeqara oosana maridanoo.
ROM 15:28 Qinee maaqooqaraasa suquseeqa nimira munnimma mareeqa Yeerusaree maqannaasa aiqama uqanna munnimma nimiseeqa oorurandeeqa inni Roomma maqannaa faqa qumu maridaqa asasidaqa amiqidaqa marianaura, doo marikiqa Sipeena maqa maaqaki oonuree misa faqa Yisunara qimannimianauranoo.
ROM 15:29 Qinee inni Roomma maqannaa iannai oonuree maa ainainnara iridaqa. Qinee asauku mundirana afaaqooqa qiranasaa fidaqa mina amiqi amiqirana inni nimianaura.
ROM 15:30 Oo qini qikaqaafasaa qinee Pauroosa afeekaikamasee inni qimannimidaqa. Innee qiniara Anutufinnai innaaru qiranannai qini dadaaqiaqa, Inneeqa nimuqusa ookiqari afeekaikamandee qiniara innaaruqiaqa. Innee faqa qinee faqa asauku mundirafa Yisufa maasa karaambaiqa minasaa atooqafi marunausa maridaqa minara irisee qiniara innaaru qiaqa. Anutuna naaquqara andeeqara maraquna fannoo nariara náriara nimuqusirana maasa firaaqoo qimuna innee minara faqa iriseeqa qiniara innaaru qiaqa.
ROM 15:31 Qinee maindari Yeerusareenni ooruree misa nimiraree qia munnimmana nimianaqa Anutuna ufa irimariasa minara asasiaqeera innaaru qiaqa. Miqoo Yeerusareenni qinee marianaqa innee Anutunara innaaru qimaqimaqaaqa Yeerusareenni mariasa Anutuna ufa sia irimariasa qini darirarammidammia. Innee misara innaaru qiqa qini sia daruaqee innaaru qiaqa.
ROM 15:32 Qinee Yeerusaree maqusaindari amiqimandee oorurandee qumuraananoo Anutufa qinnanara inni Roomma maqannaasa faqa kaqikaaqoo idooamaseeqa asasammaseeqa aiqaree fuanaura.
ROM 15:33 Anutufa maasa asooara oosana fannoo inni aiqama Roomma maqannaa faqa mariani. Kuqaa.
ROM 16:1 Oo qini qiqoondiuqa Roomma maqusai mariasa anaasee moo fannoo Keenakareea maqusai Yisuna ufa irimariasa dadaaqimari anaaseefa maasa nisookifa mina auqu Fooeebee nammarifa qusasaa innee iannai Roomma maqusai fuannoo.
ROM 16:2 Mifa andeeqara anaasee marinoo oonurainaqa innee Anutuna faiqi namu naanna ramasee karaambaiqa ufa irimari anaasee fee qimasee amiqimandee qumaree rakisidaqa mi anaaseefa moo ainaina ummaara moo bisinisa Roomma maqusai auqainaqa innee kaqi dadaaqiaqa. Mi anaaseefa moomoo fasiqa anaasee dadaaqirafa qini faqa dadaaqira qiqoondi maridanoo.
ROM 16:3 Inni Roomma maqusai maria fasiqa anaaseeqanda, anaasee auqu Pirisikaa nammarifa maridanoo afaaqi auqu Akuiraafa mi qafaqiqanda qini dadaaqirana nári kuqiranara paasoosamandee moomoo kari nimeekaranaki fidaqa qini dadaaqimariasa maridaqa, asauku mundirana Yisuna ainainirana dadaaqi mariaqanda maridaqa. Sia qini kai dadaaqimariaqanda aiqama aanaamuru Yisuna ufara suqufi qimariasa misa faqa dadaaqimariaqanda marianara misa faqa qinee faqa miqandara dufi dufi qidaqa. Qinee maa pasanaki mi qafaqisa nimandaida.
ROM 16:5 Mi qafaqisa maaqaki Yisuna ufara suqufi qimariasa amaana maqa sia marinara suqufida qimariasa misa faqa maa pasanaki nimandaidaqa. Qini qifaaqasaa qiqoondi auqu Eepaeeneetusafa aiqama Asia maqannaakina indaaru asauku mundirana aqoondikufa, qinee maa pasanaki mina faqa amandaidaqa.
ROM 16:6 Moo anaasee auqu Maria nammarifa (sia Yisuna anoofau mina amarafa) firaaqoo inni Roomma maqusanaasara kadaapirufa maridanoo qinee mina faqa amandaidaqa.
ROM 16:7 Qini maqannaa Yuda maqannaa fasiqa anaasee qini faqa karabusaki maruqanda nuqu Andaroonikusafa faqa Iunia nammarifa faqa mi qafaqisa naaree Yisuna saqariki maruqanda maridaqa qinee innaaqianna. Yisufa niqiqoo fasiqausa amiqimandee miqandara iri mariqau. Qinee miqandara faqa maa pasanaki nimandaidaqa.
ROM 16:8 Qini qifaaqasaa qiqoondi moo auqu Ampariatusafa mifa faqa maasa faqa karaambaiqa ufaki maasa faqa moodaanaki mariufa inni faqa marifaqa mina faqa maa akaranakiqari amandaidaqa.
ROM 16:9 Asauku mundirana ainainiranakina maasa faqa moodaanaki mariufa. Urabanusana faqa inni faqa marina amandaidaqa, Qini qifaaqasaa qiqoondi moo auqu Sarakisafa inni faqa marina amandaidaqa.
ROM 16:10 Apeereesana faqa amandaidaqa, mifa aukuana aukuana asauku mundiranasaa atooqafinoo mina ainainirana faakanaikirafa marifa. Aristooburusana faqa mina aiku asauku faqa nimandaidaqa.
ROM 16:11 Qini qiqoonna Yuda maqannaa Eeroodioonana mina faqa amandaidaqa. Narakisusana narí aiku asaukukiqari Yisuna ufa iri mariasa nimandaidaqa.
ROM 16:12 Anaasee qaaraqanda asauku mundirana ainainiranaki maru aanaaseeqanda nuqu Tirifaee nammarifa faqa Tirifoosa nammarifa faqa miqanda faqa nimandaidaqa. Anaasee moo qini qifaqasaa qiqoondi Karaambaiqa saika firaaqoo uqanna maree marifa mina auqu Peerasisa nammarina faqa amandaidaqa.
ROM 16:13 Karaambaiqa saikaki mariasakiqari amiqirafa mina auqu Rufusafa mina anoofa faqa qinee faqa mina amaakuara foora marunnanara miqanda qisanoosara nimandaidaqa.
ROM 16:14 Maa fasiqa namusa nuqu raanaura. Asinakaritusafa faqa Fareekoonafa faqa Qeerameesafa faqa Pataroobasafa faqa Qeeramasafa faqa minamusa faqa aiqama Yisuna ufa irimariasa faqa misa nimandaidaqa.
ROM 16:15 Firoorookusafa faqa Iuriafa faqa Neereeusafa narí asookisandiri faqa Oorimpasafa faqa aiqama Anutuna ufa irimariasa faqa misa faqa mariasa faqa nimandaidaqa.
ROM 16:16 Innee suqidaqa nariara nariara nikaqafasaara foora narí sukukee narí sukukee iaqa. Aiqama maqusa maqusa asauku mundirana ufara suqufi qimariasa misa faqa inni Roomma maqannaa nimandaidaqa.
ROM 16:17 Oo qini qikaqaafasaauqa qeeqa qimuqusa ookiqara afeekaikamandee inni qimannimidaqa. Akaqausa rainara ufa oosana areemarisara eerairiaqa. Misa Yisuna saqariki mariasa akaqausa kuridi nimaqaidaqa innee maroo andeeqara ufana ateekaidaqa, misara rufiasee nianai mariaqa.
ROM 16:18 Miqi mariasa sia maasa karaambaiqa asauku mundirana ainainau idau, misa nári nidimari mandainainara kai randaida iridaqa. Misa nári nimanira ufannai faqa nári nifaurunnai kai susumma nimaqaranannai faqa amiqira fasiqa anaasee iriranara uneemaana qidaqa.
ROM 16:19 Aiqama maqannaasa inni Roomma maqannaasara iridaqa innee Yisunasaa atooaqa marianara irimariafaqa qinee faqa iridaqa asasidaqa. Qinee inniara oosana oosana amiqira oosanara akoofasauqa mariaqee qidaqa, oosana oosana mandoosanara aaminaikiaqee qidaqa.
ROM 16:20 Anutufa maasa asooarana oosana faqaafa qusasaa Sadannana inni niku ameemaanaira foora mareeqeenoo quqasee radamusaannoo. Karaambaiqa Yisuna afaarirafa inni faqa mariannoo.
ROM 16:21 Maaqoo qini faqa mariasa nári nimandarana inni nimidaqa misa nuqu Timootifa qini moodaa ainainirana dadaaqi marifa inni nimandaidanoo Rukiusafa faqa Iasoonafa faqa Soosipateerafa faqa misa aiqamausa qini maqannaa Yuda maqannaa mariasa misa faqa inni nimandaidaqa.
ROM 16:22 Qinee Teeratiusausa Pauroona ookinaana iridaqa maa pasana akara rimarunausa maridaqa, maqee qinee faqa Yisuna ufa irimarunausa maridaqa inni nimandaidaqa.
ROM 16:23 Yisuna ufara suqufi qimariasa Kaiusana maaqaki maqee maqee suqidaqa, qinee Pauroosa faqa mina maaqaki marunanoo mi fasiqafa Kaiusafa inni Roomma maqannaasa nimandaidanoo. Qeeqa maqee marunna maqusanaasa munnimma kansoora munnimma rakisimarifa mina auqu Eerasatusafa faqa maasa qikaqaafasaa Kuaratusafa faqa inni nimandaidaqa.
ROM 16:24 Maasa karaambaiqa asauku mundirafa Yisufa mina afaarinoo kaqi nimira oosana inni aiqamausa faqa mariani.
ROM 16:25 Doo maasa Anutuna areenarana amia, Ooqai oosana aroonakiqari kukeeqara anoona ufa Isaraee maqannaasa faqa aanaamuru maqannaasa faqa Anutufa asumu mariranaki quqaaninna ufana kukeeqanoo mariufa maqee Yisunaki koorooinoo maridanoo. Mi kooroo ira ufafa inni Yisuna saqariki mariana minaki inni amana mapuku nimaqaannoo. Amiqira fasaasa ufa asauku mundirana Yisunara qinee qimannimiqa nunnana, inni Yisuna saqarikirana mi ufanasaa mundinoo maridanoo. Amana Anutufa inni Yisunaki saqarikirana mapukusee quqannisaanoo.
ROM 16:26 Ooqai mi kukeeqara anoona ufafa maqee naaru naaru marira Anutufa ufa qufanoo mi kukeeqara ufafa aiqamausakina akoosaqa kooroomafifanoo marifaqa qafaidaqa iridaqa. Anutufa ufa qufanoo Yisufa sia kambiqooqoo tamummara fasiqauqa Yisuna aufakiana kooroo iqau. Maqee faqa aiqama maqannaa qimannimiafaqa mi ufanasaa irirafa rusififaqa iridaqa eedoo qimasee mi mau fuaqeera.
ROM 16:27 Moodaa mari Anutufa naríara aiqama ainainara irimarifa, mina asauku mundirana Yisunannai naaru naaru areenarafa minaindi mariani. Kuqaa.
1CO 1:1 Qinee Pauroosa maa pasana akara rumannimaqaidaqa Anutufa narí iriranannai qini maqasaa fasiqa daaramaseenoo narí asauku mundirana Yisufa niqiqoo fasiqausaki qini quqaqoosa maridaqa maa pasana akara rumannimaqaidaqa. Maasa qikaqaafasaa Soosateeneesafa maa pasanaki mifa faqa qinee faqa nianaindari inni nimandaidaqa.
1CO 1:2 Innee Koorinti maqusai Anutuna ufara suqimariasa akara rumannimaqaidaqa Anutufa inniara narí aiku asauku mariaqeera utaaqamaqaisa mariafanoo, innee mina asauku mundirana Yisunasaa atooqaanara Anutunaindi kammiqa mariafanoo, Anutufa narí faiqi namu mariaqeera narí innai fuaqeera inni naareenoo, sia innee kai minaindi mariafanoo, aiqama maqanaa maasa karaambaiqa asauku mundirana Yisuna aaree mariasa misa faqa innee faqa minaindi mariafanoo. Yisufa misa faqa maasa faqa karaambaiqa maridanoo.
1CO 1:3 Maasa qikoofa Anutufa faqa maasa karaambaiqa asauku mundirafa Yisufa faqa miqanda kaqi afaarirana faqa naundura asooarana faqa inni Koorinti maqannaasa nimiani.
1CO 1:4 Anutufa innee mina asauku mundirana Yisuna saqarikianara narí afaarirana inni niminoo.
1CO 1:5 Innee Yisunaki marianara Anutufa oosana oosana amiqira ufa qirana faqa oosana oosana amiqira irirana faqa mi ainainaqanda moomoo nimunara qinee Pauroosa minara iriqa qeeqa Anutunara inniara maqee maqee dufi dufi qidaqa.
1CO 1:6 Innee maasa karaambaiqa asauku mundirana Yisunara innaarunaindaraafa kooroo iranara afeesimariafanoo asauku mundirana amiqi amiqirana aufakiana inni naunduraki mapukusee marinara Anutufa moomoo narí dadaaqi narí dadaaqirana akoofasaikirana niminau.
1CO 1:8 Anutufa maa mariaqooqari amiqimmandee rakisinoo fifi inaqa sia kasaaqai kuridifaranoo taikara aukuana andeeqasee paqurifaranoo. Miqunara mikari maasa karaambaiqa asauku mundirana Yisufa qumira faasaana Anutufa maasa niuqummasee moo aaqarana sia paquriannoo.
1CO 1:9 Anutufa inniara narí amaaku narí asauku mundirana maasa karaambaiqa Yisuna faqa aqoondikiaqeera inni naaree marifa marinara sia inni nikaruqimasee kasaaqai mininnisaannoo innee minasaa nifaaqa quqeemariafa maridanoo.
1CO 1:10 Qini qikaqaafasaa Koorinti maqannaa mariasa, maasa karaambaiqa asauku mundirafa Yisufa inni qimannimira saika qimunara irisee inni reendeenamandee kai qimannimidaqa, inneeqa sia raina rainida furufariaqee qimasee moodaa ufa qimasee moodaanaki mariaqa kuqaa uqanna moodaanaki mariasa maridaqa moodaa irirana faqa moodaannai firana faqa mariaqa.
1CO 1:11 Moo anaasee auqu Karooeena nammarifa mina aiku asauku innikina manda ainaina, raiqara ainaina qafamasee akooqoo qimaqimiafaqa iriqa.
1CO 1:12 Misa akooqoo qimaqimiafaqa doo qinee akooqoo inni qimannimianaura. Inniki naadu naadu moona ufa iriqa moona ufa iriqa ufa moo qimariana qambaanai raiqarafa aaqarafa maridanoo. Moo fannoo qinee Pauroona aiku asauku marunausee qiafanoo moo fannoo qinee Apooroosana aiku asauku marunausee qiafanoo moo fannoo Peetooroona aiku asauku marunausee qiafanoo moo fannoo asauku mundirana aiku asauku maridee qimasaida miqira raiqara ufa aaqarafa maridanoo.
1CO 1:13 Qinee Pauroosa minara maaqi qidaqa asauku mundirafa narí apata auku moodaa moodaa maqaisee maridee sia aukaakinoo marunara innee faqa sia rakeekaa iaqa. Qinee Pauroosee inniara aunirira saqarisaa kuqi fee qiqiafana. Sia kuquafannanara sia qini kikiqusuaqa. Innee nammari maraqau qini Pauroosa duqusaa fee nammari maroosee maridee. Asauku mundirana auqusaa qimasee nammari maroonara mina aiku asauku kai mariaqa.
1CO 1:14 Qinee sia innikina nammari moomoo rumannimaqaqiafana minara Anutunara dufi dufi qidaqa.
1CO 1:15 Qinee Kirisipusana faqa Kaiusana faqa nammari rumannimaqaafannana. Doo daaqoo irifaqa Sateefanasana faqa narí aiku asauku faqa inamusa kai nammariki keeqannimaqaqiafana. Akaqausa faqee nammariki keeqannimaqaafananee doo maqee aunusee sia iridaqa, minara sia moo fannoo qiniara aiku asauku kammambi nammari mareeunoo qifaranoo.
1CO 1:17 Asauku mundirafa sia qiniara nammariki keeqannimaqaannee qimasee diqiqeenoo amiqira fasaasa ufa qimannimiannee qimasee qini diqiqeenoo sia faiqí faiqi iriranamau qimannimiannee qinoofau qini diqiqeenoofau. Qinee faiqí faiqi iriranamau qimannimiqa asauku mundirafa auniriranasaa kuqu afeeka ufana ureeqanoo marina sia irifoora.
1CO 1:18 Asauku mundirafa aunirira saqarisaa kuqu ufana kuridiranaki fimariasa irisee furufarira ufa fee qidaqa. Maasa asumu mariranaki fimariasa sia miqi qidaqa mi ufanara Anutuna afeeka mi ufanara kai mari ifoo qidaqa.
1CO 1:19 Ooqai tamummaqara fasiqauqa minara maaqi qimasee akara riqau. Irirana faqaasa Anutunara sia irimaria irirana qinee qeeqa Anutusa kuridinnimaqaanaura. Aiqama firaa irirana irimariasa aiqama misa maa maqanasaaqaraa irirana rukasaanauranoo. Tamummaqarausa ufa oosana miqiminoo maridanoo.
1CO 1:20 Qinee Pauroosa minara kafaa maaqi qidaqa. Irirana faqaasa iriranara minara naqi fee qianauree. Uriqarara sukuraki keeqee mariasara naqi fee qianauree. Maa maqa maaqanasaaqaraa ufa akoofasauqa iriranara naqi fee qianauree. Misara maaqi qianaura, doo Anutufa ooqai uqannifiaqoofa kooroo inoo maridanoo qimaqiminoo. Maa maqa maaqanakinaasa irirafa Anutunara furufarirafa maridanoo.
1CO 1:21 Anutufa narí firaa iriranaki maridanoo quandakinoo sia misa nári iriranannai qiniara iriaqee qimaseenoo faiqí auqu quqanau. Miqooqari maasara Yisuna aufakiana qimannimifaqa, misa minara furufarira ufa qimariafa, qimannimifaqa iriseeqa misa irirana minasaa rusimariasa asumu marirana Anutufa nimianifee qinau.
1CO 1:22 Yuda maqannaasa faiqí sia amana auqaaqaa ira ainaina uqaqifiqasainaqa ani ufara kuqaa fee qiraree qimariasa. Anaamuru Kirisa maqannaasa firaa iriranakinaa irirana qimaqimifaqa kuqaa fee qianauranoo.
1CO 1:23 Maasa sia mi maqannaaqanda naanna raidaqa, maasa asauku mundirafa aunirira saqarisaa kuqunara minara kai qimannimiafaqa Yuda maqannaasa mina irisee aanoo qiafaqa aanaamuru irisee furufarira ufee qimariafanoo.
1CO 1:24 Anutufa utaaqamannimaqaisa mi ufana iriseeqa Yuda maqannaasakiqari faqa aanaamurukiqari faqa mi ufanara asauku mundirana kuqirafa Anutuna firaa irirana faqa mina uriqarara afeeka faqa maridanoo fee qidaqa.
1CO 1:25 Anee Anutuna irirana iriseenana minara furufarammi ifoo qinanoo Anutuna mi irirafa faiqí irirana urinaaqaranoo maridanoo. Anee Anutuna moo ainainara sia afeeka ainainammiifoo qinanoo Anutuna mi sia afeeka ainainafa faiqí afeeka urinaaqaranoo maridanoo.
1CO 1:26 Oo Koorinti maqannaasa, maanara naaqooki iriaqa inni Anutufa naaroo aukuanna Yisuna saqariku aukuanafa innee mikari irirana faqaasa moomoosee mariqee iqau. Faiqí faiqi irirana faqaasa sia moomoo inniki mariqau. Faiqí faiqi afeeka faqaasa sia moomoo inniki mariqau, sia faiqí uriqararausa moomoo inniki mariqau.
1CO 1:27 Anutufa faiqí faiqi irirana faqaasa nisauriranaki quqaannee qimasee misakiaqa furufari mariasee qimariasa Anutufa mi furufarira fasiqa anaaseesara faqa nári irirana faqa qumareenoo minara qini amiqira irirana faqaasee qidanoo. Anutufa maqasaaqaraa afeeka faqaasa nisauruaqee qimasee faiqí faiqi akaqausara sia afeekee qimariasa Anutufa mi sia afeeka fasiqa anaaseesa faqa nári irirana namufaqa qumareenoo minara qini afeeka faqaasee qinau.
1CO 1:28 Anutufa faiqí faiqi uriqarara fasiqa anaasee fee qimariasa kuridianifeera misa nikooqee maria fasiqa anaaseesee qimariasa faqa misa fidiaqaa imaria fasiqa anaaseesee qimariasa faqa nári irirana namufaqa misakinaana nariara rusandeesamumasee qumareenoo uriqarara ainainee qidanoo.
1CO 1:29 Miqunara sia faiqí moo fannoo Anutuna oorisaa narí irirana amooqiannoo.
1CO 1:30 Anutufa inni mareeqeenoo asauku mundirana Yisunasaa atooqaseenoo asauku mundirana qumareenoo maasa iriranee qimaseenoo maasa mareeqeenoo narí andeeqaranaki qiseenoo narí aiku asauku uqannaikamma qimaqeenoo maasa manda ainainakinaana idukuqisoofaqa marunnanara maasa tamummaqara fasiqa ufamau kai fuannanara minara maaqi qimasee mifa akararinau. Faiqí moo fannoo nana ainainaree moo ainaina amooqianauree qimasee sia narí amooqirana uqeeraani karaambaiqara kai amooqiani.
1CO 2:1 Oo qini qikaqaafasaauqa qinee Pauroosa Koorinti maqusai oonuree Anutuna anoona ufa sia ooqai irirana faqaasa ufannai faqa sia uriqarara iriranannai faqa qimannimiqiafana.
1CO 2:2 Qinee qeeqa maaqi qimasee qimiriqa, qinee Koorinti maqannaasa qimannimidaqa qeeqa irirana aunusee asauku mundirana Yisunara kai qimannimianaura, mifa auniriranasaa kuqunara firaaqoo qimannimianauree qiqa.
1CO 2:3 Qinee minara iriseeqa innee iannai oonureeqa qeeqa ummooqukiranara iriseeqa maparaa idaqa daindiri ree marinaqa sia faiqí faiqi irirana faqaasa ufa faqa naufakiana faqa Yisunara qimannimiafannana. Qimannimi mariafananoo Anutuna maraquna afeeka fannoo amiqimasee qini ufa anoona uqannifiqanau.
1CO 2:5 Innee minara iriqa inneeqa Yisuna saqarikirana sia irirana faqaasa iriranasaa fau mundinoo marinau. Anutuna afeekasaa mundinoo maridanoo.
1CO 2:6 Qinee sia faiqí irirana marasee aiqamausa qimannimidaqa, akaqausa Anutunara firaaqoo mapukusee irimariasa kuqaa qinee irira ufa misa qimannimidaqa. Sia maa maqanasaaqaraasa iriranau misa qimannimidau, sia maa maqanasaa rakisimari afeekausa iriranau qimannimidau doo misa afeeka taikaidanoo.
1CO 2:7 Qinee qimannimi marunna irirafa Anutuna ooqai kukeeqara irirana innaarunai asumu nimimarina qimannimidaqa mi irirana faiqí sia nifu qafaafa. Maa maqa maaqafa sia maru kamuqoo Anutufa mi irirana utaaqamaseenoo minannai maasa narí areenaranaki innaaruna ququsaki keeqaaqeera utaaqanau. Qinee mi irirana misa qimannimidaqa.
1CO 2:8 Ooqai maa maqa maaqanasaa rakisirausa sia mi irirana iriqau. Iriqau innaaruna areenaranakinaa karaambaiqa sia qumareefau aunirira saqarisaa arini.
1CO 2:9 Ooqai tamummaqara fasiqa minara maaqi qimasee akara rinau. Faiqí sia qafee maru ainainnara sia iri maru ainainara sia faiqí moo fannoo minara kambiqaannoo fee qimaru ainainnara, miqira ainaina kai Anutufa deedaqammaseenoo nariara rimariasa kai nimiannoo.
1CO 2:10 Qinee Pauroosa minara maaqi qidaqa. Maasa inni saimbaqa Roomma maqannaasa namufaqa Anutufa narí maraqunannai narí ooqai kukeeqara irirana qiminau. Anutuna maraquna fannoo aiqama ainainara randasee aiquqummasee qafaidanoo. Sia akooqoo ainaina kai qafaidanoo Anutufa naaru kambiqaaninna kukeeqara ainaina farumara foora unaurinoo marina mina faqa aiquqummasee irimarifa marunara Anutufa narí ooqai kukeeqaqoo irirana inni saimbaqa qiminau.
1CO 2:11 Faiqí naundurakinaa maraquna fannoo mi fasiqana aundurakinaa irirana aiqama iridanoo. Miqi kai inoo Anutuna maraquna fannoo Anutuna aundurakinaa ainainara aiqama iridanoo.
1CO 2:12 Inni saimbaqa sia maa maqa maaqanasaaqaraa maraquna maroosa maridaqa. Inni saimbaqa Anutufa niqiqoo maraquna maroosa maridaqa Anutufa minannai innaarunai asumu mareemariana faqa minasaaqaraa naundura adiafaairana faqa niminau.
1CO 2:13 Qinee minara irisee maaqi qimasee qimannimidaqa, maasa sia faiqí irirana uqannifiqee maria iriranau qimannimidau, Anutuna maraquna maasa uqaqifiqoo ufana inni qimannimidaqa. Maasa innaarunaindaraa ainainara Anutuna maraquna maroo fasiqa anaaseesa qimannimidaqa mi ufana kai inni qimannimidaqa.
1CO 2:14 Anutuna maraquna siai fasiqa anaaseesa sia amana Anutuna maraquna faiqí anaasee dadaaqimari afeekana nimimarina sia amana mareefaranoo. Misa mi ainainna qafamaseeqa sia minara iridaqa furufara ainainee qidaqa. Sia mina oosana iridaqa maraquna maree mariasa kai amana mina oosana aiquqummaseeqa irifaranoo.
1CO 2:15 Maraquna maree maria fasiqanaaseesa innaarunaindaraa ufa aina aiqama raina raina masee irimarifaranoo. Maraquna siaisa kaiqeesa sia amana maraquna faqaasa maree mariana oosana irifaranoo.
1CO 2:16 Ooqeenaa tamummaqara fasiqa minara maaqi qimasee akara rinau. Yafee moo fannoo Karaambaiqa iriranakinaana iriannoo fee. Yafee moo fannoo Karaambaiqa aamuaqira ufa amana amiannoo fee, sia amana moo fannoo miqiannoo. Tamummaqara fasiqa ufara qinee Pauroosa minara maaqi qidaqa. Sia moo fannoo amana aamuaqira ufa Anutuna amiannoo mifa nimimarifa marinara. Maasa kai asauku mundirana irirana doo mareeqa.
1CO 3:1 Oo Koorinti maqannaasa qini qikaqaafasaa ooqai qinee inni maqusai mariaafanausa, innee sia maraquna faqaasara foora faiqí faiqi iriranamau fimarufaqa qinee sia maraquna iriramau inni qimannimiqiafana. Inni irirafa maa maqa maaqanasaaqaraa irirafa inniki marinara Yisuna saqarikiranaki innee sia faiqiara foora mariafanoo faiqi aanaaqiara foora aamina mariafanoo.
1CO 3:2 Innee sia faiqiara foora mariafanoo faiqi aanaaqiuqa irirana fooqaasa marufaqa qinee sia narana uqanna nimiqiafana naammara foora inni nimiqiafana, innee narana uqanna sia amanaikufaqa ninuqiqiafana. Doo maqee aukuana faqa sia amana innee narana naaqaa inoo maridanoo.
1CO 3:3 Innee maa maqa maaqanasaaqaraasa naanna ree mariasa aaqaida miqimarifanoo, innee nariara nariara rairai qidaqa ufa rainee marianannai maa maqa maaqanasaaqaraasa naanna ree mariana aaqarafa kooroo idanoo.
1CO 3:4 Innikiqari Koorinti maqusanaa Yisuna ufara suqimariasakiqari moo fannoo qinee Pauroona aiku asauku marida mina ufamau fida fee qidanoo kafaa moo fannoo qinee Apooroosana aiku asauku marida mina ufamau fidee qimasaida aaqaida miqi qimariafanoo sia fee mi oosanafa innikina maqasaaqaraasa naanna ree mariana kooroo idanoo fee. Doo kooroo idanoo.
1CO 3:5 Apooroosa faqa Pauroosa faqa maaqanda uriqararaqandee maridee sia uriqararaqanda marisa maridaqa. Maaqanda fifau Anutuna ainainira fasiqaqara kai maridaqa, inni rarisameeqee Yisuna saqarikiranaki quqee mariaqanda kai maridaqa. Maaqanda karaambaiqa saika aadu aadu nimimarunnaqanda kai maridaqa.
1CO 3:6 Qinee Koorinti maqusai inni iriranaki qaqammara foora aaqasaafananoo Apooroosafa aniree nammariara foora adiasoofanoo Anutufa kambiqarana aminau.
1CO 3:7 Aaqee mari fasiqafa faqa nammari adiee mari fasiqafa faqa kai fifau maridanoo, Anutufa kambiqarana amufa mifa anoona maridanoo.
1CO 3:8 Aaqee mari fasiqana saika faqa nammari adiee mari fasiqana saika faqa amana amana kai maridanoo. Anutufa naadu naadu narí ainaini marina akiaqara feefauru kasooqaqee nimiannoo. Maaqanda moodaanaki Anutuna ainainiranaki maridaqa ainainidaqa innee afuqa qambaanai Anutuna ainainirafa mariafanoo. Qinee Pauroosa moo ainaina kikiqa usuanaura, innee Koorinti maqannaasa Anutuna maaqa mariafanoo.
1CO 3:10 Anutufa maaqa usakee maria iriranna qini qimusa maridaqa maaqa usakarana akoofasa qinee faakana faqa maaqa atuna faqa arusaunanoo moo fannoo asaanidanoo. Qinee andeeqasee maaqa atuna arusaunanoo moo fannoo sia fifau maaqa asaaniannoo andeeqee mari fasiqafa ireeda amiqimaseenoo kai maaqa asaaniannoo.
1CO 3:11 Anutufa narí asauku mundirana Yisuna doo moodaa faakana narí maaqaki rakiqeenoo, sia amana moo faakana rakiarafa mariannoo doo mifa kai mariannoo.
1CO 3:12 Oosana oosana maaqa usakee mariasara foora maridaqa akaqausa amiqimasee faiqí anaasee dadaaqidaqa mapuku nimaqaidaqa, akaqausa sia amiqimasee mapuku nimaqaidaqa moo fannoo koora fooqaa iranannai maaqa asaanimarifa amiqirafa maaqa asaanimarifa maridanoo, moo fannoo mina oorudupirana siruaannai maaqa asaanimarifa maridanoo. Moo fannoo mina oorudupirana firaa munnimma aqimaria ooninannai asaanimarifa maridanoo. Moo fannoo mina oorudupirana saqarinnai asaanimarifa maridanoo. Moo fannoo mina oorudupirana eefeedannai maaqa asaanimarifa maridanoo. Moo fannoo misa oorudupirafa fiaarunnai maaqa asaanimarifa maridanoo. Inni Koorinti maqannaa Yisunara qimannimiqa maaqa atuna rakiqannimaqaannee qiafanausa mariafanoo maaqa asaana imariasara qunnana misa miqooqari innikina ookaamandee maaqa asaanara foora moo faqa moo faqa qidaqa.
1CO 3:13 Asauku mundirafa qumuaninna aukuannai maaqa asaanira oosana aiqamausa nifusaa kooroo iannoo. Mi faasaannana Anutuna ida fannoo aiqama fasiqa ainainirana qamafinoo kooroo iannoo. Mi idafa aiqamausa ainainirana amanamandainanoo mina anoona kooroo iannoo.
1CO 3:14 Faiqí moo fannoo maaqa atunasaa ookaamandee usakee marina ida sia qama taikasainanoo Anutufa mina qafamaseenoo mi fasiqanara amiqimmandee usakee maqi qimasee feefauru amiannoo.
1CO 3:15 Faiqí moo fannoo mandainainannai usakee marina, ida qama taikasainanoo sia feefauru amiannoo. Mi fasiqafa mifa kaqisamu innaarunai asumu mariranaki fuannoo maaqakiqari raudamakinoo idauru aanaaqi ainaina sia uqirafa kaqi sandaannoo.
1CO 3:16 Innee maana iridee sia fee iridee innee Yisuna ufara suqimariasa Anutuna amaana maqara foora mariafanoo, Anutuna maraquna fannoo narí maaqara foora inniki maridanoo.
1CO 3:17 Moo fannoo Yisuna ufa suqimarinanaki misa raiqara ufee oosana oosana manda ufa niminaqa raindaanifanoo Anutuna maaqara foora rapee inanoo Anutufa mi fasiqana kuridisaannoo. Anutuna amaana maqa naaquqarafa anukarafa maridanoo innee misa mi maqafa mariafanoo.
1CO 3:18 Sia moo fannoo narí narí akaru qiannoo. Inniki moo fannoo nariara maqasaa fasiqaki irirana faqasee qimarifa narí maqasaa irirana amooidanoo sia anoona irirana faifa, mi fasiqafa nariara ureeqafinoo reendeenamafinanoo miqoo amana anoona irirana oosana araannoo.
1CO 3:19 Maqasaa fasiqauqa iriranee qimariana Anutufa minara furufara qidammiafoo qidanoo. Ooqeenaa tamummaqara fasiqa minara maaqi qimasee akara rinau. Anutufa irirana faqaasa qumaree nári firaa iriranaki ufaanakiara foora naridanoo.
1CO 3:20 Tamummaqarafa moo fannoo minara maaqi qimasee akara rinau. Karaambaiqa firaa irirana faqaasa iriranara fifau ainaina maridanoo fee qidanoo.
1CO 3:21 Innee Koorinti maqannaasa minara irisee sia moo fannoo faiqí irirafa afeekainainara irisee amooqiannoo. Innee Koorinti maqannaa Yisuna ufara suqimariasa kaaqa rakeekaamasee akaqausa Pauroosanaindifee qidaqa akaqausa Apooroosanaindi fee qidaqa akaqausa Peetooroonaindi fee qidaqa aaqaida miqi qimariafanoo. Innee sia misaindi mariafanoo misa innindi maridaqa. Aiqama maa ainainna inni dadaaqi mari ainainausa maridanoo. Pauroona faqa Apooroosana faqa Peetooroona faqa maa maqa maaqafa faqa kaqi marirana faqa kuqirana faqa maqee mariana faqa naaru marinnana faqa aiqama maa ainainausa inni dadaaqi mari ainainausa maridaqa innee asauku mundiranaindi mariafanoo kafaa asauku mundirafa Anutunaindi maridanoo. Innee minara irisee fifau ammuqundari qidaqa Pauroonaindi fee Apooroosanaindi fee Peetooroonaindi fee qimariafanoo Anutunaindi maridammia.
1CO 4:1 Innee Koorinti maqannaasa maasara maaqi qiaqa. Asauku mundirafa Yisufa maasa mina ainainira faiqiuqa Anutuna ooqai kukeeqara anoona ufara rakisiaqee qimaqoosa maridaqa.
1CO 4:2 Ainaina faqaafa narí ainainasaa rakisi mari fasiqanara akooqoo andeeqara fasiqa kai maraannoo. Narí ainainasaa amiqimasee rakisi marina kai narí ufa irimari faiqina kai mara quqaannoo. (Qinee Pauroosa Anutuna rakisira faiqiara foora maridaqa. Qinee inniki ainainidaqa qeeqa irirana qeeqa uriqararanasaa rusisee inniki ainaini mariqiafana.)
1CO 4:3 Qinee inniki ainaini marunaqa innee qini ainainirana amanifaqa sia inni qimaniranara irianaura uriqararafa Anutuna ufa kai irianaura maqasaa fasiqa moo fannoo iriranannai qini ainainirana amanifaqa qeeqa uriqararana mina ufara kai irianaura. Qinee qeeqa faqa qeeqa ainainiranara andeeqaida fee sia fee andeeqaida fee qimasee sia qeeqa iriranara irianaura qini ainainirana andeeqee mari uriqararafa kai mina iriranara kai irianaura.
1CO 4:4 Innee qiniara qiafanoo qiqa daakirafa sia ummaara darifaqa kaqimbidaqa. Qini daakirafa qini darinoo fee sia fee darinoo sia qiniara andeeqara ainainira fee qidanoofau Karaambaiqa mifa kai qini saikara iridanoo ufa qiannoo.
1CO 4:5 Innee minara irisee sia maasara kasaaqaindari ufa qiaqa. Karaambaiqa innaarunaindari quminna faasaana kai taikara ufa qimannimirafa mariannoo. Mikari karaambaiqa sia ooqai akooqoo mariu irirana kukeeqara irirana oosana oosana irirana minakinaana uqeereeqeenoo aiqamausa nifusaa kooroomannimaqaannoo. Aiqama fasiqa anaasee naundurakinaa oosana auqeefandiannana deedaqirana akooqoo aiqamausa nifusaa mara quqasainaqa qafeefaranoo. Mikari aiqama fasiqa anaasee nári maqasaa andeeqara nirana marirana amana kai Anutuna amooqirana mareefaranoo. Mikari Anutufa maasa saika oosana aiquqummasee minara ufa qiannoo. Maasa mina ufamau fimariafanausa marunnanara innee sia ufannai maasa saika kasaaqaindari aruaqa.
1CO 4:6 Oo qini qikaqaafasaa mariasa innee aiqamausa andeeqasee Anutuna akara ufamau fuaqee qimasee Apooroosasandiri maaqanda kikiqususee qimannimiaqeera maaqanda qimannimiranara qiqa. Anutuna ufa inni indaarunnikamma nimaqee mariasara sia moora amiqira fee qimasee moora manda fee qimasee rairaiqiaqa sia miqiaqa.
1CO 4:7 Inniki akaqausa náriara uriqararausee qimariana unna qimariasa mariafanoo. Yafee mi uriqararana niminoo fee, Inniki mari ainainna aiqama Anutufa kai niminau. Innee minara iriaqa, naqaa fee qifaqee qeeqa kai maraafanausa firaaqoo uriqaraqa maridee qidee. Anutufa kai aiqama ainaina niminau.
1CO 4:8 Innee Koorinti maqannaasa unna qimasee aiqama ainaina maraafanausee qimariafanoo, innee inneeqara unna qimasee ainaina faqaasee qimariafanoo, doo innee unna qimasee karaambaiqara foora mariafaqa maasa sia. Innee Koorinti maqannaasa karaambaiqa mariaqaana. Innee kuqaa karaambaiqa marifaqau maasa maqee mandainainaki marunnana taikaseefau inni faqa kuqaa karaambaiqaikiqa marini.
1CO 4:9 Maasa Yisufa niqiqoo fasiqausa Anutufa ureeqarana nimiqoosammia maqi qimasee qeeqa kai oonu mafi iridaqa nimiqaifaqa maasa minaki maridaqa. Maasa namuqaa nisaukukiara foora marianaqa aiqamausa faiqí faqa qangiroo faqa nifusaa ataasa ataasa qidaqa darifandinausa miqirausa maasa maridaqa.
1CO 4:10 Maasa niqiqoo fasiqausa asauku mundirana ufasaara furufarirausee qimariafaqa innee Koorinti maqanna Yisuna ufara suqimariasa asauku mundirana ufakina innee inneeqara irirana faqaasee qimariafanoo. Maasa Yisuna ufa qimannimi marunausa kudoosaapeera foora unaqa innee nimudaanai qidaqa afeeka mariafanoo. Maasa faiqí nifusaa fidiaqaa imariasara foora maridaqa innee misa nifusaa uriqararausa mariafanoo.
1CO 4:11 Maasa Yisufa niqiqoo fasiqausa ooqai faqa maqee marunnana faqa daara raidanoo nammariara sia amanaikidanoo maasa manda qamunna rakeekaa irana afisidaqa, misa maqee maqee unnaanasamu oonisamu saamusamu maasa daridaqa maasa maaqa siaisa kaqi maqusamau faiqaqa nidaqa.
1CO 4:12 Maasa qeeqa kadaapiriranannai tooqaamu darirananai minannai ainainamasee naidaqa. Faiqí maasa diquraraafaqa maasa amiqi amiqimmannimaqaidaqa. Misa mandaikamma qimaqaafaqa maasa kaqi kai mina maraqa fidaqa.
1CO 4:13 Misa mandufa maasara qiafaqa maasa amiqira ufa kai misa qimannimidaqa. Maasa maa maqa maaqanakinaasa madaapeera foora maridaqa ooqai miqiqa aniusa maqee faqa aiqama maqannaasa madaapee aqi maria madikara foora marisa maridaqa.
1CO 4:14 Qinee Pauroosa inni Koorinti maqusanaasa sia nisaurirana nimiaqeera mi ufana qimannimisee akara ridaqa, qeeqa qimuqusa qeeqa faiqi namu mariafaqara foora naamua qidaqa.
1CO 4:15 Innee asauku mundirana ufamau fidaqa inni ufasaa rakisirausa fuki faaki qimariasa nukudara foora mariafaqa qinee moodaa inni nikausara foora maridaqa. Ooqai indaaru qinee amiqira fasaasa ufa maree aniree inni Koorinti maqannaa nimiafanaqa irisee asauku mundirana Yisuna ufamau fimariafaqa miqiafannanara inniqa nikausaikiqa maridaqa.
1CO 4:16 Qinee minara irisee qeeqa qimuqusa ookiqari reendeenamandee inni qimannimidaqa innee inni nikausa qini daanna raaqa.
1CO 4:17 Innee qini daanna raanee qimasee Timootina aqiqaananoo innee iannai fuannoo. Maaqanda karaambaiqa ainainiranaki maridaqa mifa qini qimuqusa andeeqara qimaakuara foora maridanoo. Mifa innee iannai oonuree qini fuka marirana asauku mundirana Yisunaki marira oosana qimannimiannoo. Aiqama maqusa maqusa nidaqa Yisuna ufa irimariasa suqusaida naamuaqimaqaafannana Timootifa mi ufana inni naaqoo auqaannoo.
1CO 4:18 Innikiqari akaqausa qini Pauroosara sia kafaa mai aniree maasa qiqafaannoo qifoo qimasee noori uqeerarausa nimariafanoo.
1CO 4:19 Karaambaiqa eedoo qinaqa innee iannai oonu nindafaanaura. Oonureeqa innikina noori uqeeree mariasa sia misa náriara firaa ufa qinnanara oonu qafaanaura misa auqi maria ainainna kai marinaqa qafaanaura. Anutuna afeeka misaki marinaqa auqeemarinnana kai qafaanaura Anutuna afeeka sia misaki mari ifoo qidaqa.
1CO 4:20 Anutuna innaarunai ququsaki fimariana maa maqanasaa marirana sia fifau ufasaa mundinoo maridanoo Anutuna afeeka dadaaqinoo auqiranasaa mundinoo maridanoo.
1CO 4:21 Oo Koorinti maqannaasa Yisuna ufa irimariasa aaqeemariana inneeqa kai iriaqa, unnaanasamuara foora uqirausee anianauree inniara qimuqusirana faqa reendeenirana faqa miqandee uqirausa anianauree. Inneeqa kai irisee inneeqa marirana andeeqasee mariaqa.
1CO 5:1 Oo Koorinti maqannaa Yisuna ufara suqimariasa inni ufa moo iriqa firaa manda oosana inniki marifa aamina maqannaasa firaaqoo mandoosana maree mariasa faqa sia maree maria oosana mareenoo inniki Yisuna ufa irimariasaki moo fannoo narí anoona aqoonnana narí akoona anaaqa mareenoo.
1CO 5:2 Mi ainainafa inniki marifaqa naqi fee mandee noori uqeerasee inneeqa nifaaqa amooqidee minara innee nisauruaqa, inni naunduraki soofaaraikinoo mariani, mi fasiqana inneeqakinaana naqiraree kaqi maridanoo, innee suqimarianakiqari mi fasiqana aqiqaaqa.
1CO 5:3 Qinee qeeqara qianaura kuqaa qinee moosaa nianai marida qini maraquna inni faqa maridanoo miqoo marifaqa karaambaiqa Yisuna auqusaa doo mandoosana marai fasiqana aqiqara ufa qiqa qinee inni faqa maridaqara foora doo aqiqara ufa qiqa.
1CO 5:4 Innee moodaanaki suqimarifanoo qini maraquna faqa inni saimbaqa suquannoo, Karaambaiqa Yisuna afeeka miqoo maasa faqa marinaqa innee mi manda fasiqana mareeqee inni suqiranakiqari aqiqaifanoo mi aiqaranannai Sadannana amifanoo mina apata kuridinanoo karaambaiqa quminna faasaana mina aundurakinaana kai asumu maraannoo.
1CO 5:6 Oo Koorinti maqusanaasa innee inneeqara kaaqa andeeqarausee qimasaida inni noori uqeerara oosana sia andeeqanoo maridanoo. Innee maa ooqeenaa ufana iridaqa maaqimminoo maridanoo. Narana moodaa qoo suqu quqasainanoo kaqikaafa moodaa putaa inanoo aiqamafa minasaaqaraana putaa iannoo.
1CO 5:7 Inneeqakinaana mi manda fasiqana maraqusaifanoo aiqama andeeqanoo mariani. Miqoo innee amiqira naranara foora mariaqa. Mi manda fasiqana aqiqaranara qidaqa ooqai Mooseena aukuana ainnaaqarara qoomaqa maruna kikiqususee sipsipa aanaaqi Anutuna suqa amisee nariqa ooruku fooqaa ira ainaina nariqa maaqakinaana aiqama doo maraquseeqa ainnaaqarara qoomaqa sakasee neemariqau. Doo maqee maria aukuana asauku mundirana aunirira saqarisaa sipsipa aanaaqiara foora doo kuqa arusee Anutuna amisaafanoo doo maasa mandoosana taikaqiseenoo maasa marirana faqa andeeqa qiseenoo maasa putaaira oosana taikaqisaifanoo aidaaqareenoo minara maasa aidaaqarara qoomaqa deedaqinoo marifoo qidaqa. (Isaraee maqannaasa ooqai ainnaaqarara qoomaki ooruku siai feemu kai neemariqau. Maasa ooruku moo maqee maridanoo misaindi moo marinau.)
1CO 5:8 Doo maqee maasa ainnaaqarara qoomaqara foora suqufi naannana suqufi ooruku siai feemuara foora naanaura. Naranaki mari oorukufa manda oosanara faqa faiqí anaasee narí ummuari narí ummuari imariana faqa kikiqusidanoo. Ooruku siai feemu kikiqusimariafa Yisuna ufamau fidaqa nisakadiki ikairi sia marirana faqa anoona ufa qimariana faqa minara qidanoo. Maasa putaaira oosana taikaqisoofaqa maqee amiqira naranara foora putaaira oosana faqa aaqara oosana faqa taikasee nisakadiki ikairi siaisa anoona ufa qimariasa naanna ramafi marianaura.
1CO 5:9 Qinee Pauroosa ooqai inni Koorinti maqannaasa Yisuna ufara suqimarusa pasa akara rumannimaqaafannana. Mi pasanaki inniara faiqí anaasee narí ummuari narí ummuari mariasa faqa sia aqoondikamma nimaqararee qimasee misara eerairiaqee qimasee akara rumannimaqaqiafana.
1CO 5:10 Innee akaqausa qini mi ufana irisee aaqaafanoo maqee qinee qiafannufana kafaa kooroo ianaura. Innee Koorinti maqusanaasaki sia Yisuna ufa irimariasa kai maridaqa aaminauqaindi faqa moomoosa maridaqa. Qinee sia inniara aamina fasiqa anaasee narí ummuari narí ummuariqa nimaria fasiqa anaaseeuqa faqa kaaqa ainainara rimaria fasiqa anaaseesa faqa unna ufa qimasaida ummuari maria fasiqa anaaseeuqa faqa tumunnai auqi maria afaannara innaaru qimaria fasiqanaaseeuqa faqa sia mi aiqama ainainna maree mariasara eerairiaqee qiqa, innee eerairiani qinnana moomoosa maa maqa maaqanasaa marianara fasauki fee quqoonasaa fee ooru atooqafi foora.
1CO 5:11 Sia qinee miqi qiqiafana maaqi qiqiafana. Inniki moo fannoo nariara Yisuna ufa irimarinafa inni nikaqaafasaa maridee qinafa faiqí anaasee ummuari mari fee kaaqa ainainara rimari fee tumunnai auqira afaannara innaaru qimari fee mandufa qidanoo faiqí anaasee niqi mari fee nammari namasee furufari mari fee unna qimasaida ummuari mari fee miqira fasiqa aanaaseera Yisuna ufa iri marianaki maria fasiqa anaaseesara eerairidaqa misa faqa sia ooqu marifi narana naaqa, misasaaqaraafa innisaa aqufuandoora.
1CO 5:12 Yisuna ufa sia irimariasa aqoosai mariasa sia narira ufa qinee nimmianaura mi saikafa sia qini saika maridanoo. Anutufa kai misa narira ufa nimiannoo. Inneeqa kai inneeqa nikaqaafasaa kimariana Yisuna ufara suqimariasa aaqaifaqa ufa nimirafa innindi mariannoo. Ooqai tamummaqara fasiqa moo fannoo minara maaqi qimasee akara rinau. Inniqa suqiranakiqari mandoosana maree marina aaduma mara quqaaqee qidanoo. Qinee Pauroosa minara inniki mandoosana maree mari fasiqana aqiqaaqee qidaqa.
1CO 6:1 Innee Koorinti maqannaa Yisuna ufa irimariasa inneeqa nikaqaafasaa kimariana mara maree kaiqee siaasinnai mara maree fimariafanoo. Inneeqakiqari aneenna akaqaafasaa kimariannana faqa ufa raineenana, Yisunara sia irimarinna siaasi finnai sia maree fua, sia uqanna miqiaqa aaqaida miqi mariafanoo. Anutuna ufa irimariasa kai mina andeeqaaqaana.
1CO 6:2 Kasooqaqee Yisufa qumuaninna aukuana maqee mariaqoo Anutuna faiqi namu mi aukuanna aiqama maa maqa maaqanakinaasa siaasiuqa marifaranoo sia fee minara innee iridee. Mi aukuanna innee Yisuna ufa irimariasa aiqama maa maqa maaqanasaaqaraasa aaqarana oosana oosana aaqarana andeeqanniseefaranoo, doo maqee inni ufa suqiranaki aaqarana marasaifaqa aiqama maa maqa maaqanasaaqaraasa andeeqannisee fandinausa mariafanoo inneeqa kai amana andeeqeefaranoo.
1CO 6:3 Mi aukuanna maasa siaasa maridaqa qangiroo ufa faqa irianaura, sia fee innee minara iridee. Doo maasa miqidaqa maqee marunna aukuana aaqarana marasaifaqa amana irianaura.
1CO 6:4 Innee miqi mariana inniki moo mandufa kambiqafinaqa innee mina mareeqee aqoosai mariasa nimifaree.
1CO 6:5 Nisauruaqa, sia fee inni Yisuna ufara suqiranaki moodaa ufa andeeqarana akoofasa maridanoo fee, inniki maridanoo sia fee mi fasiqafa amana ufa rainee mariaqanda ufa andeeqaannoo fee maridanoo amana andeeqannisaannoo.
1CO 6:6 Innee Yisuna ufara iri mariasa sia andeeqannisee mariafanoo, inneeqa nikaqaafasaa kimariasa mara maree sia Anutuna ufa iriasaki quqee mariafanoo aaqaida miqi mariafanoo.
1CO 6:7 Inniki koota ufa marinaqa kaqi siaasinnai maree fimariafa innee Yisuna ufamau fimariana minasaaqari aikatamaki kaqinni aqufuanara kooroo idanoo. Yisuna ufa irimarifa moo fanoo mandufa aminana kaqi iriaqaana Yisuna ufa moo fannoo irimarifa ani ainaina ummuarinnana kaqi minnisaaqaana.
1CO 6:8 Inni sia andeeqasee maridaqa kaqi maree mariafanoo narinni narinni aaqamannimaqee mariafanoo narinni narinni ainainamma ummuaramasaidaqa siaasinnai maree fidaqa, innee kaiqeesa miqimannimaqee marifanoofau mifa faqa aaqarafa marini, inneeqa nikaqaafasaa kimariasa kai miqimmannimaqee mariafanoo firaaqoo aaqaida miqimariafanoo.
1CO 6:9 Anutufa narí ququsaki naaru marirana sia mandoosana maree mariasa nimiannoo sia fee innee minara iridee. Innee sia inneeqa nikaruqimasee mandoosana maraqa nidaqa innaarunai firaree qiaqa. Dapi maraqa nua fasiqa anaaseesa faqa tumunnai auqira afaannara innaaru qimariasa faqa moona afaaqi anaaqa narí ummuari narí ummuari mariasa faqa faiqí anaasee aqoonna fasiqa anaasee aafeeqaidanoo mi oosanna maree mariasa faqa ainaina ummuari mariasa faqa kaaqa ainainara rimariasa faqa nammari namasaida maqee maqee furufari mariasa faqa manda ufa qimariasa faqa unna qimasaida ummuari mariasa faqa mi oosanausa maraqa nuasa faqa sia uqanna Anutuna innaaruna ququsaki keeqeefaranoo.
1CO 6:11 Koorinti maqannaasa innee akaqausa miqi marusa marufanoo inni mi manda ainainafa doo rukanoo maridanoo, nári nifaaqara Anutuna amidee qimariasa mariafanoo. Asauku mundirafa Yisufa maasa karaambaiqa minasaa rusiranannai faqa Anutuna naaquqara andeeqara maraqunannai faqa miqandannai innee Anutuna afusaa andeeqaranaki mariafanoo.
1CO 6:12 Moo fannoo nariara maaqi qiannoo qinee amana maridaqa aiqama ainaina mandainainee qimariana faqa amana maraanaura, anee miqi qianaqa qinee minara maaqi qidaqa kuqaa anee aiqama ainaina mareennaranoo moomoo ainaina sia ani dadaaqiannoo ani kuridiannoo. Qinee qiqa irirafa maaqi qimasee qimmiridaqa qinee akooqoo marida aiqama ainaina amana maraanauree qimmiridaqa qinee minara maaqi qianaura. Moo mandainaina fannoo qini mareeqee narí marinaki quqaqisaifanoo mi maraqunafa daakufuandoora rufiee sia mina maraanaura.
1CO 6:13 Faiqí moo fannoo anaasee ummuarianeera qimasee mina kikiqa maaqi qimasee usuannoo narana fannoo aranaqumundi maridanoo. Kafaa arana fannoo naranaindi maridanoo. Mi ufana saaqari mifa unna qimasee maaqi qimasee ookaa iannoo, anaasee faiqindi marifaqa kaqi maraanauree qiannoo. Qinee Pauroosa minara maaqi qidaqa Anutufa narana faqa arananda faqa naríndi naríndi quqasoofa kasooqaqee miqanda kuridiannoo maasa faiqí qifaaqa sia ummuariranaindi maridanoo Karaambaiqaindi andeeqaranaindi maridanoo kafaa karaambaiqa maasa qipatasaa rakisiqimaqeenoo amiqimmaqimaqaidanoo andeeqara marirana nimimarifa marinara andeeqara oosana kai maraaqa.
1CO 6:14 Anutufa narí afeekannai maasa karaambaiqa kuqiranakinaana uqeera quqoofa mifa kai maasa qifaaqa faqa kuqiranakinaana uqeera quqaaninnanara inniqa nifaaqaki andeeqara oosana kai maraaqa.
1CO 6:15 Inniqa nifaaqa asauku mundirana afaaqa atiuqa maridanoo. Amanee asauku mundirana afaaqa ati mareeqee dapi maraqa nua aanaaseena afaaqasaa quqaanauree oo sia uqanna amana miqianaura.
1CO 6:16 Faiqí moo fannoo narí afaaqa mareenoo dapi maraqa nua anaasee finnai finanoo mi fasiqana afaaqa fannoo mi anaaseena afaaqandiri moodaanaki atooqafuannoo. Oo innee sia minara irimariafanoo. Ooqeenaa akara minara maaqi qimasee akooqoo qidanoo Miqanda moodaa nifaaqaikamambi maruqanda marifaranoo.
1CO 6:17 Qinee Pauroosa minara maaqi qidaqa moo fannoo karaambaiqasaa apamambi marinafa karaambaiqa amuqusandiri moodaanaki apainoo mariannoo.
1CO 6:18 Faiqí anaasee narummuari narummuariranara eerairiaqa. Moo fannoo oosana oosana mandainaina marainafa mi manda ainainafa sia narí afaaqa mandaikammamaqaannoo. Faiqí moo fannoo moo anaasee ummuarinoo narí afaaqa uqanna mandaikamma maqaidanoo.
1CO 6:19 Innee sia fee maanara iridee, innee doo irimariafaqa qimannimidaqa inni nifaaqa Anutuna naaquqara andeeqara maraquna amaana maqa miqirafa maridanoo. Anutufa narí maraquna innikina quqasoofanoo marinara innee inneeqa nifaaqa Anutuna amooqira mariranaki quqasaifanoo mariani. Inni nifaaqa sia innindi maridanoo.
1CO 6:20 Anutunaindi mariafanoo. Mifa narí amaakunnai firaa feefaurumasee inni marasee nariara quqaqoosa mariafanoo minara innee inniqa nifaaqa Anutuna amooqira mariranaki quqasaifanoo mariani.
1CO 7:1 Innee Koorinti maqannaasa pasa akara rumasee oosana oosana ainaina qiniara iree mariafanoo. Maqee innee akaraki iree maria ufana qinee inniqa qimannimianaura. Inneeqa faiqí anaasee nimundaranara qiafaqa maaqi qimannimianaura. Faiqí nariara adeedaana maridanoo andeeqarafa mariannoo.
1CO 7:2 Kafaa mina atiki maaqi qianaura. Faiqí anaasee narí ummuari narí ummuarirafa moomoo marinara aiqama fasiqauqa nári ninaaqa maraaqa, aiqama aanaaseeuqa nári nifaaqmaaka marasee andeeqasee mariaqa.
1CO 7:3 Afaaqi fannoo narí anaaqa aidimarina amiani miqikai inoo anaasee fannoo narí afaaqi aidimarina amiani. Aiqamaqara nariara nariara nidimari ainainna narí ami narí ami iaqa.
1CO 7:4 Anaasee fannoo sia narí afaaqa rakisirafa maridanoo narí afaaqi fannoo mina afaaqasaa rakisidanoo, miqi kai masee faiqí fannoo sia narí afaaqara rakisirafa maridanoo narí anaaqa fannoo mina afaaqasaa rakisidanoo minara qinee qidaqa nariara nariara nidimari ainainna narami narami iaqa.
1CO 7:5 Minara irisee sia innee nariara nariara qaoo qiaqa. Anutunara kisaaqasaa amiqimasee innaaru qiannee qimasee faiqí faqa anaasee faqa moodaaqooqara ufa qimaseenana naquma amaanee marasee akeeka masee aura masee maraanauree qimaseenana aadu aadu mambinana Anutunara kisaaqasaa innaaru qiaqa. Innaaru qimaseenana kafaa moodaanaki kiaqa kisaaqasaa aadu aadu ina mariannanara Sadannafa nimanamandee qafaina sia afeeka marina eedoo qifoora minara kafaa moodaanaki kiaqa.
1CO 7:6 Faiqí nári ninaaqa mararanara faqa anaasee nári nifaaqmaaka mararanara faqa qunnana sia aranaiqi afeekaikamandee qiqa kaqi qimannimidaqa marararee qimaseenana doo maraa.
1CO 7:7 Qiqa irirafa maaqimminoo maridanoo. Aiqamausa qini daanna ree adeedaana mariaqaana. Anutufa narí irirananai naadu naadu marirana nimifaqa maridaqa faiqí moo adeedaana marinanee, faiqí moo anaasee faqaafa marinanee Anutufa kai nimidanoo.
1CO 7:8 Doo maqee maanaaqa kumaaraa uruna mariasa faqa faiqí anaasee kuqufuafaqa adeedaana mariasa faqa inni qimannimidaqa innee qini daanna ree adeedaana mariqa amiqirafa marifaranoo.
1CO 7:9 Innee sia adeedaana amanaikiqa doo amundaaqa. Anaaseera faiqiara ani aundurai idara foora atakuqinana doo sia amanaikinoo amundarafa idara foora atakuqirana uriqararafa maridanoo.
1CO 7:10 Qinee nimundarausara naamuaqira ufa qimannimianaura sia qeeqaindifau karaambaiqaindi qimannimianaura. Amundara anaasee moo fannoo sia amana narí afaaqi minnisarafa maridanoo.
1CO 7:11 Minniseenoo adeedaana kai mariani. Adeedaana mari naisia quandaki narí afaaqi kai kaifaa maraannoo. Faiqí faqa miqikai inoo sia narí anaaqa minnisaani.
1CO 7:12 Doo adeedaana ufa qimaseeqa doo akaqausa qimannimianaura, sia karaambaiqa ufafau qimannimianaura qeeqa ufa qimannimianaura. Faiqí moo fannoo Yisuna ufa irimarifa mina anaaqa sia Yisuna ufa irimarifa maridanoo mi anaaseefa narí afaaqi faqa amiqimasee marinanoo sia mina afaaqi fannoo aqiqaannoo mina faqa mariannoo.
1CO 7:13 Anaasee moo fannoo Yisuna ufa irimarinafa marinanoo mina afaaqi sia Yisuna ufa irinafa maridanoo kaqi narí anaaqa faqa amiqimasee maridanoo mi anaaseefa sia narí afaaqi aqiqaannoo.
1CO 7:14 Yisuna ufa irimari anaaseefa narí afaaqindiri moodaa fara maqi mafuanara mi anaaseefa narí afaaqi mareeqeenoo Anutuna aqoondikiranaki quqaidanoo miqidanoo. Kafaa Yisuna ufa irimari fasiqafa narí aanaaqandiri moodaa fara foora mafuanara narí anaaqa sia amaana ufa irimarina maramareenoo Anutuna aqoondikiranaki quqaidanoo miqidanoo. Sia miqinoo marinanoofau miqanda faiqi namu aamina maqannaara foora mariaqini, maqee Anutufa misa faqa aqoondi kiannoo.
1CO 7:15 Faiqí fee anaasee fee sia Yisuna ufa irinafa narí kai minnisee finafa amana saina fuani, sanda moo fannoo sia inniara sia rakisisimma umaraaqee qidanoo. Anutufa inniara sia kaukaataqiranaki mariaqee qidanoo asooaranaki mariaqeera naarameeqee narí ququsaki quqaqaifaqa minara qimannimidaqa, saifanoo fuani marinoo mariani.
1CO 7:16 Yisuna ufa irimari anaaseefa ani afaaqi ani faqa maridanoo mifa faqa innaaruna asumu marirana paquriannoo fee sia fee paquriannoo. Kafaa Yisuna ufa irimari fasiqafa ani anaaqa ani faqa maridanoo mifa faqa innaaruna asumu marirana paquriannoo fee sia fee paquriannoo.
1CO 7:17 Qinee Pauroosa aiqama maqusa maqusa nidaqa maa ufana Yisuna ufara suqimariasa qimannimidaqa. Innee aiqamausa sia moo saika auqaaqa Karaambaiqa inniara mariaqee inna saikana kai maraaqa, Anutufa inni naaroofaqa Yisuna ufa irirara anukamuqoo maroo saikana kai maraaqa sia moo kiaqa mi saikanaki kai mariaqa, sia maqee moo kiaqa.
1CO 7:18 Yuda maqannaa fasiqa fannoo Anutuna ufa irisee Yisufinnai anirainafa sia mini narí Yuda maqannaasa fainanduqirana sia asauruani saina kaqi mariani. Anaamuru fasiqa moo fannoo Yuda maqannaasa fainanduqirana siaifa Anutuna ufa irisee aninafa sia quandaki fainanduquani saina kaqi mariani.
1CO 7:19 Fainanduqira fee sia fainanduqira fee mina fifau ainaina mariannoo. Anutuna naamuaqira ufamau eedoo qimasee finafa mifa anoona maridanoo.
1CO 7:20 Aiqama fasiqa Anutufa naaroofaqa eedoo qu kamuqoo maru marirafa mifa doo sai kaqi minaki mariani. (Pauroona aukuana akaqausa faaqu fasiqausa nári ainainirana sia amanaikiqa ainaina faqaana karabusara foora ainaina maisee mariqau. Sia feefauru maree mariqau. Kadaapirumasee narana faqa maaqa faqa kai maree mariqau. Misa nuqu ainainira fasiqee qimariqau. Mi aukuanna ainaina faqaasa akaqausa faqa faaqu fasiqauqa faqa Yisuna ufa iriqau. Pauroofa minara irisee maa ufana qimanniminau.)
1CO 7:21 Anutufa ani aaroo kamuqoo anee moona ainainira fasiqa marunafa saina kaqi maria, sia quqasee moosaa fua kasooqaqee idukirafa kambiqainana miqoo kai idukusainana fua.
1CO 7:22 Faiqí moo fannoo ainainimarinafa marinanoo karaambaiqa aarainanoo mi ainainiranaki kaqi maria Karaambaiqa idukira fasiqara foora mariananoo. Miqikai masee asauku mundirafa idukira fasiqa aaraifanoo kaqi narí ainainiranaki mariani asauku mundirana ainainira fasiqara foora mina ainainiranaki mariananoo.
1CO 7:23 Innee Yisuna ufa irimariasa Anutufa firaa feefauru aqusee inni maroonara irisee sia moo fasiqa ainainiranakiara foora keeqafinaqa mandoosana ufa ameemaanai mariaqa kaqi idukiqa mariara maqi idaqa Anutuna ufamau fuaqanani.
1CO 7:24 Oo qini qikaqaafasaa innee aiqama Yisuna ufa irirara anukamuqoo marirana minaki kai maridaqa Anutuna aqoondikiranaki maqee maqee mariaqa.
1CO 7:25 Doo maqee anaasee siaisa faqa faiqí siaisa faqa qimamianaura. Qinee Karaambaiqa amuqusirana maree marunausa marunnanara qini ufa irisee minasaa munduaqa, sia qinee karaambaiqa ufara inni qimannimidaqa qeeqa ufa qimannimidaqa.
1CO 7:26 Innee Koorinti maqannaa Yisuna ufa irimariasa innee maqee aukuana Yisuna ufasaara firaa mandainaina nariranaki mariafaqa minara irisee qimannimidaqa, aiqama fasiqa maqee maria mariranaki kai mariaqa.
1CO 7:27 Ani anaaqa maridanoo fee sia mina minnisaa, anee adeedaana maridanee sia aanaaseera randasee maraa.
1CO 7:28 Anee anaasee maraseenana sia aaqaananoo. Maanaaqa moo fannoo kumaaraa mareenoo sia aaqaannoo. Maqee maria deedeepira aukuana Yisuna ufasaara faiqí anaasee faqaasa firaa ummaaraki mariafanoo minara irisee innee maqee Koorinti maqusai mari ummaarana sia maraaqee kaqi kasooiqa mariaqee qidaqa.
1CO 7:29 Oo qini qikaqaafasaa qinee ufa qunnana anoona maaqimminoo maridanoo. Innee Koorinti maqusai ummaaraki marianara moomoo faasaana sia kaqi marifaranoo sia moomoo kari Anutuna ainainiranaki marifaranoo. Innee minara irisee anaasee faqaasa adeedaanara foora mariaqa kaqi kai ainainamamaree fuaqa.
1CO 7:30 Innee iki raqee mariasa sia iki raqeera maqi iaqa kaqi kai Anutuna ainainirana ainainiqa fuaqa. Innee naanaindara qimariasa sia naanaindara qidara maqi mariaqa kaqi kai Anutuna ainainirana ainainiqa fuaqa. Innee ainaina feefauri mariasa faqa sia anindiara foora mariani.
1CO 7:31 Innee maqasaa ainaina feefauru nimisaida ainaina maree mariasa sia kaaqa minara afeekaikiaqa, mana mana imariasara foora mariaqa. Maa maqa maaqafa maaqoo marinafa sia kisaaqasaa mariannoo. Qusasaa taikaannoo.
1CO 7:32 Innee ummaara siaisa mariaqeera qimannimidaqa. Anaasee siaifa karaambaiqa ainainiranara kai irimaree fidanoo karaambaiqa eedoo qiranara kai irinoo fidanoo.
1CO 7:33 Anaasee faqaafa maa maqanasaaqaraa ainainara kai irimaree fidanoo maqee maqee narí aanaaqara aidimari iriramau fidanoo, qaara irirana faqaafa maqasaaqaraa irirana faqa Karaambaiqa irirana faqa minaki maridanoo. Adeedaana aanaaseeuqa faqa maanaaqauqa faqa karaambaiqa saikara kai irimaree fidaqa. Misa nári naundura faqa nifaaqara faqa karaambaiqaindi fee kai qimasee karaambaiqa saikara kai iridaqa. Faiqifaqaa anaasee fannoo narí afaaqi aidimari iriramau fidanoo maqasaa ainainara kai iridanoo.
1CO 7:35 Sia qinee sandannaifau inni rumbaidau. Maa manda deedeepa aukuannara iridaqa. Inni dadaaqiraree qidaqa maa ufana qidaqa. Qinee inniara andeeqara aatata ufamau fuaqeera kai qidaqa naakapaidaqa. Innee sia kaqikaana raina quqaaqeera muduka uqanna karaambaiqa saikaki mariaqeera qimannimidaqa.
1CO 7:36 Kumaaraa maanaaqa utaaqaraqanda nimundaranara qaoo qimasee mi kumaaraafa kafaa quandakinoo aanaaseera aidirafa afeekaikifanoo mi kumaaraafa doo maraanauree qimaseenoo doo amana maraannoo sia aaqaidanoofau miqidanoo.
1CO 7:37 Faiqí moo fannoo Yisuna ufasaara nariranara irisee miqinafa sia moo fannoo qaoo qinoo kai narí uqanna sia qini utaaqa maqimaqarana maraanauree qinafa mina irirafa kuqaa afeekaikinafa narí aundurakiqari amiqimmandee qaoo qinafa sia mi manaaqana maraannoo andeeqaidanoo miqiannoo.
1CO 7:38 Kumaaraa narí utaaqamamaqara manaaqana marainafa andeeqaidanoo miqiannoo. Moo kumaaraa fannoo mina narí utaaqamamaqara manaaqana sia marararee qifa mifa firaaqoomma uriqareenoo.
1CO 7:39 Anaaseeuqa nári nifaaqmaaka faqa kaqi marianara sia oonuree aniree iqanuaqa. Nári nifaaqmaaka kuqufuafaqa miqoo nári nidimari fasiqana amana mareefara. Moodaa ainaina kai mariannoo, Yisuna ufa irimarinna anaaseefa Yisuna ufa irinnana kai maraannoo.
1CO 7:40 Mi anaaseefa kaqi adeedaana maridanoo aufadaranaki mariannoo. Qinee mi ufana qunnana qeeqaindi qeeqa irirana maaqi qidaqa Anutuna maraquna fannoo dadaaqidanoo fee qidaqa.
1CO 8:1 Innee Koorinti maqusanaa Yisuna ufara suqimariasa unnaqira afaanna naranara iraafaqa inni minara qimannimianaura. (Inni maqannaasa Yisuna ufa sia irimariasa misa tumunnai auqira afaanna amaana maqaki aandau arusee suqasee unnaqira afaanna amaana maqaki qoomaqa naida tumunnai auqira afaannara dufi dufi qimasee animma amidaqee qimasee nári neemariafaqa innee akaqausa misa dadaaqidaqa mi oosannara qini iree mariafanoo. Innee Yisuna ufa irimariasa akaqausaki náriara maasa aaqaidaqa miqira aandau naida fee qimariafanoo, mi aandaufa maasa daundurakinaana kuridiandoo qimasaidaqa qimiridaqa naida fee qimariafanoo. Akaqausa náriara maasa irirana faqaasa noori uqeerasee fifau tumunnai auqira afaanna marifaqa kaqi naanauree qimariafanoo.) Qinee Pauroosa minara kuqaa fee qidaqa moo irirana minasaa ookaaidaqa maaqi qidaqa. Miqira irirafa narí aidirafa narí aundurai umbiqafinara oori uqeeraidanoo nasuridanoo narí kai narí kurididanoo. Moo irirafa amiqirafa maaqi qidanoo. Faiqí nariara nariara amuqusira irirafa mi irirafa sia kurididanoo faiqí anaasee nifeeqareenoo pooduqaifanoo anoonaikidanoo.
1CO 8:2 Moo fannoo nariara aiqama ainainara irimarunausee qimarifa sia anoonaikira irirana irimarifanoo Anutufa mi iriranara akooqaidanoo.
1CO 8:3 Faiqí anaasee moo fannoo Anutunara aidimarifanoo Anutufa amiqimmandee misara iridanoo aididanoo.
1CO 8:4 Yisuna ufa sia irimariasa tumunnai auqira afaannara innaaru qimasee aandau narana neemariafaqa innee Yisuna ufa irimariasa mi naranna naanara iraafaqa qinee Pauroosa minara maaqi qidaqa. Tumunnai auqira afaanna oosana innisaimbaqa iridaqa mifa sia mari ainainna kikiqusirafa maridanoo fifau ainaina kai maridanoo. Maasa moodaa Anutufa marinara minara kai amiqimmandee iridaqa.
1CO 8:5 Maa maqa maaqanaki faqa innaarunai faqa moomoo oosana oosana afaannee qimariafa maridanoo. Mi afaanausa misa uriqararausa faqa Karaambaiqauqa faqa unna qimasee maridammiafoo qidaqa.
1CO 8:6 Sia maasa misauqara iridaqa maasa Yisuna ufa irimariasa Anutufa aiqamausa nikoofa moodaa kai marifaqee qidaqa, aiqama ainaina auqu quqoo fee qidaqa maasa mi Anutuna ainainammaisaranara maridaqa. Sia moo karaambaiqa maridanoo maasa karaambaiqa, asauku mundirafa Yisufa mifa kai marifaqee qidaqa. Minannai Anutufa sia maru ainainanna aiqama ainaina auquqoofa maridanoo, maasa minasaaqaraa mariranasaa maridaqa. Minara maasa aiqama narana amana naanaura. Kaqi narana faqa fifau afaanna aandau faqa aiqamaqara namasee mina neemariafa sia aaqarafa maridanoo. Moo ainaina aaqarafa maaqimminoo maridanoo. Aiqama Yisuna ufa irimariasa sia maa qunnanara iridaqa. Akaqausa ooqaindari sia Yisunara iru aukuanaindari mi fifau afaanna amaana maqanaki maqee maqee keeqafiqa narana namasee mi narannara mi afaannanaindi fee qimariqau, kafaa maqee faqa Yisuna ufa iridaqa sia afaannara innaaru qidaqa kaqi keeqafi namasaidaqa unna qimasaida afaanna marifaqee qimasaidaqa kaqi mi narannara Anutuna namuqaandi fee qimasee boo Anutuna namuqaa aqoondikidaqa aaqaidee qimasaidaqa nári maraquna nári naakirafa ummaara nimifaqa maasa daunduraki putaairana qimifaqee qidaqa.
1CO 8:8 Qinee Pauroosa minara maaqi qidaqa. Sia fifau narana fannoo maasa mareeqee Anutuna aqoondikiannoo. Maasa sia neeqa sia Anutuna oorudupianaura kaqi neeqa sia ooraaqaraanaura. Narana fifau ainaina maridanoo maasa iridaqa.
1CO 8:9 Innee afaanna amaana maqakinaa naranara mana mana imariasa minara eerairiaqa. Mi narannara akaqausa rufiee mariasa irirana oorudupimariasa ani mana mana iranasaaqari arufarindamaki mandainainaki aqufifaara.
1CO 8:10 Anee irirana afeeka faqaafa tumunnai auqira afaanna amaana maqaki keeqafi mana mana mandee narana nainanoo ani akaqaafasaa moo fannoo irirana amannaikimarifa fukasaa Yisuna ufa irimarifa ani qafamaseenoo afaanna amaana maqaki keeqafi narana nainanoo mina aundurakinaana akamummasainanoo mi fifau afaanna finnai kaifaa minni ubeekeenoo aqoondikiandoora.
1CO 8:11 Oorudupimasee iri mari fasiqafa afaanna naranara rufiee mari fasiqafa maridanoo. Mi fasiqafa afaanna narana mana mana mamaree neemaria fasiqausa oosana qafamaseenoo narí faqa namaseenoo minasaa arufarindamaki kuridiranaki aqufidanoo. Fifau kuridiranaki aqufuannoo asauku mundirafa minara faqa kuqufammi.
1CO 8:12 Innee mana mana irirana faqaasa inneeqa nikaqaafasaa oorudupira irirana arimariafanoo, miqi marianannai inneeqa nikaqaafasaa mandaikamma nimaqaidaqa, miqianannai asauku mundirana faqa mandaikammamaqee mariafanoo.
1CO 8:13 Qinee Pauroosa minara maaqi qidaqa qinee afaannara dufi dufi qira narana aandau namasaananoo qini qikaqaafasaa qini qiqafeenoo minasaaqaraana mandainainaki aqufinaqa qinee naaru naaru sia uqanna afaanna aandau naanaura qini qikaqaafasaa sia aqufuanifee qimasee sia naanaura.
1CO 9:1 Qinee Pauroosa kuqaa Yisufa diqiqoo fasiqausa maridaqa kuqaa qinee Yisuna maasa karaambaiqa qafaafanausa maridaqa qinee sia moona karabusaki maridaqa qinee qeeqa iriranannoo maa saikana maraidaqa. Qinee Karaambaiqa saika inniki maraafannana mina anoona innee Yisuna ufa uqeeraafanoo.
1CO 9:2 Akaqausa qini Pauroosara sia Yisufa aqiqoo fasiqafee qimariafaqa innee Koorinti maqusanaasa sia qiniara miqi qimariafanoo. Innee Karaambaiqa ufa irisee mi mau fimariafanoo mifa kai Yisufa qini diqiqoonara koorooidanoo.
1CO 9:3 Faiqí anaasee akaqausa qini saikoosanara diqiafaqa maaqi qimasee qeeqasaa ititaidaqa misa qimannimidaqa.
1CO 9:4 Qinee Yisuna ufa maqusa maqusa oonuree aniree idaqa Yisunara qimannimimarunnana akiaqara mi maqannaasa narana nammari kaqi qimifanoofau andeeqarafa mariqini.
1CO 9:5 Yisuna niqiqoo fasiqausa Yisuna akaqaafasaauqa faqa Peetooroona faqa nári ninaaqmaaka Yisuna ufa irimaria anaaseeuqa nindiamaree misa faqa maqusa maqusa nidaqa. Yisuna ufa qimannimiafaqa neeqa kaqi narana nimiafaqa naidaqa. Qini Pauroosa miqifau andeeqaraqoo marini, sia miqidaqa Baranabasisandiri maaqanda kai fee ainainammasaida naidee. Maaqanda qeeqa ainainammasaida feefauru marasaidaqa naidaqa Yisuna ufa qimannimiqanidaqa.
1CO 9:7 Sundia moo fannoo fee ammi fee rakiranaki fidaqa ainainamandaida naidee sia fee. Sia uqanna miqidaqa. Uainna qaqamma ummaqimari fasiqafa narí naaree diqisee namaseenoo inaaqianna moosa nimidanoo. Sipsipasaa rakisimarifa narí kadaapiriranasaa mina naamma anoona naidanoo. Doo qinee faqa maqusa maqusa nidaqa Yisunara qimannimimarunnana narana nammari kaqi qimifanoofau qeeqa kadaapi akiaqara nani, sia miqidaqa.
1CO 9:8 Sia qinee faiqí faiqi ufamau kai fidaqa Yisuna ufa qimannimimarunnana akiaqara narana narara qimannimidaqa.
1CO 9:9 Mooseena sandufa miqinoo marifaqa qidaqa. Mifa maaqi qimasee akara rinoo maridanoo. Inneeqa sakuma maqusasaa teeqimasee burimakau mareeqee miqoo quqasaifanoo burimakau fannoo oonuree aniree idanoo aikunnai rafarimarinaqa sia mina oori arooriaqa, sia mina oori rumbaaqa, saifanoo akaqana naidanoo rafariani. Qinee Pauroosa minara maaqi qidaqa. Anutufa burimakaura kai fee iridanoo fee miqi qinau, maasara faqee miqi qinau.
1CO 9:10 Oo sia misarau miqi qinau, maasara irinoo miqi qinau. Ummaqimarifa faqa aiqi marifa faqa minakinaana nararee qidanoo ainainidanoo.
1CO 9:11 Baranabasisandiri inni Koorinti maqusanaasa naunduraki innaarunaindaraa asumu ummaqusaafananoo kambiqaidanoo. Sia fee maqee mi kadaapirirana akiaqara maqasaa narana kaqi qimifaqee naanauree.
1CO 9:12 Akaqausa inniki kaqikaaqoo kadaapiri maruna akiaqara kaqi narana nimiafaqa naidaqa, maasa fiqaramasee inniki kadaapiri marunnana akiaqara inni narana marasee naunaiqini sia kaqi marasee naidaqa. Anutufa amanammifoo qifaqa maasa sia miqidaqa. Asauku mundirana Yisuna amiqira fasaasa ufa inni naundurai sia keeqaandoo qimasee daara rarana faqa kadaapirirana faqa oosana oosana saika auqee marunnanara faqa qimannimiqiafana.
1CO 9:13 Anutuna firaa amaana maqa Yeerusaree maqusa marinaki ainaini mariasa misa minakinaana nariqa narana maraidaqa. Faiqí anaasee sipsipa arusee aandau tatufu Anutuna amaana maqaki amimariana minaki ainainimariasa aanaiqiki mariasa náriara akaqana marasee naidaqa innee minara amiqimasee irimariafanoo.
1CO 9:14 Karaambaiqa Yisufa miqi kai masee narí ufa qimannimi mariasara qimannimiqa fidaqa misakinaana narana marasee naaqee qinau.
1CO 9:15 Mi andeeqara oosanafa marifaqa qinee sia miqiqa maa pasana akara runnana innee narana sia kaqi qimiaqee qidaqa akara rumannimaqaidaqa. Akaqausa qini maa ufanara fifau dapi ufammifoo qifoora sia inni narana marasee kaqi naanaura kuqiranaki fuanaura, qeeqa kadaapinnoo feefaurirafa amana. Miqi marifaqa Anutuna ufamau fiqaramasee funnanara qeeqa qimooqidaqa. Sia moo fannoo mi ainainniannanara qimooqirana aruannoo. Ainainamaseeqa feefaurumasee naanaura.
1CO 9:16 Kuqaa qinee Pauroosa Yisuna amiqira fasaasa ufa oonuree aniree idaqa qimannimi marunausa maridaqa, sia miqiannanara qeeqa qimooqidaqa qeeqa duqu uqeeraanaura. Yisufa qimaqimunara miqidaqa. Sia miqianaqau mandainaina qambaanai mariaqini.
1CO 9:17 Qinee qeeqa kai qimannimira saika mareefau feefauruara qunaiqini. Anutufa daakapainara ainainidaqa mina akiaqara sia feefauruara innaaru qidaqa qimira saika marifaqa kaqi maraidaqa.
1CO 9:18 Qeeqa saika akiaqara nana feefauru fee maraidee, Anutufa amana kadaapi akiaqara narana marasee naannee qifaqa qinee sia miqidaqa amiqira fasaasa ufa sia feefauruara irisee kaqi didifaqa qimannimunafa mifa qini feefaurirafa maridanoo. Kaqi qimamidaqa qeeqa andeeqara kadaapirirana akiaqara sia maraida kaqi qimannimira asasirafa mifa qini amiqira feefauru maridanoo.
1CO 9:19 Qinee sia moo fasiqa ainaini marunausara foora maridaqa kaqi fasiqara foora maridaqa Yisufinnai moomoosa aniaqeera aiqamausa ainainira faiqi kammambi maridaqa.
1CO 9:20 Qinee Yuda maqannaasaki Mooseena sandufa ameemaanai mariasaki ainainidaqa misa naanna ramafi misa marirana maraidaqa. Qinee sia Mooseena sandufa ameemaanai maridaqa, misa sandufa ameemaanai mariasa moomoosa Yisuna ufara aniaqeera qinee faqa mina ameemaanai maridara foora naaraidaqa.
1CO 9:21 Miqi kai iqa aanaamuruki ainainidaqa aanaamuru moomoosa Yisuna ufara aniaqeera aanaamuara foora Yuda maqannaasa sandufara nianasaa tatiaqa maridaqa qimannimidaqa. Miqunnanannai sia Anutuna sandufa rukiaida miqidaqa. Qinee asauku mundirana sandufa ameemaanai qinee kuqaa maridaqa.
1CO 9:22 Qinee Yisuna ufara sia andeeqasee saqariki mariasaki ainainidaqa misa faqa moomoosa aniaqee qimasee misa naanna ramafi maridaqa. Qinee oosana oosana qaini qaini qiranannai faiqí anaasee maraanee qimasee aiqama fasiqa anaasee naanna ramafiqa misa naaraidaqa.
1CO 9:23 Qinee maa ainainniranaki maridaqa moomoo oosana oosana ummaara kaqi maraidaqa qinee faqa innee faqa mi amiqira fasaasa ufanasaaqaraa naundurakina adiafaairana maraannanara miqidaqa.
1CO 9:24 Inni maqusai Koorinti maqusai faiqí moomoosa suqufiqa narí amani narí amani sandeemariana maqee maqee kambiqee marifaqa qafeemariafanoo. Sandee mariasaki moomoo sandaidaqa moodaa fannoo kai urinaaqareenoo qafee maraidanoo. Innee faqa misa naanna ramasee Yisuna aatata sandee fidaqa uriqarara qafee marararee qimasee sandaaqa.
1CO 9:25 Aiqama sandee maria fasiqausa ooqaindari amanidaqa kaqiqoo afeekaikamandee mariiqa sandara aukuana anirainaqa kaqi sandeefaranoo. Misa sia mi kadaapiriranara iridaqa, uriqarara qafeeroo kai qimasaida kaqiqoo afeekaikamasee nimanida sandaidaqa. Misa dauni afauqaqee mari qafeenara kisaaqasaa kadaapiridaqa. Maasa misa naanna ramasee kisaaqasaa kadaapiridaqa, sia afauqaqee mari qafeenaranoofau idau miqidau, naaru naaru marira qafeeroo qidaqa kadaapiridaqa andeeqaidaqa.
1CO 9:26 Minara iriseeqa sandeeqa taikee aniaqoo andeeqasee fidaqa. Qinee bookseena akoofasa fasiqara foora sia fifau faafau qisauku aqidaqa andeeqasee kai qisauku aqiara foora idaqa.
1CO 9:27 Qeeqa qifaaqa qini ufa amiqimmandee iriaqeera firaaqoo qeeqa qifaaqa dariara foora idaqa, qeeqa qimudaani faasasaa afeekaikidaqa. Qinee aiqamausa naaramasee aniree bookseenara foora amaniaqee qimaseeqa qeeqa faqa amanianee qimasee oorudupiananoo Anutufa manda saikammiaanoo qimasee diqiqaandoo qimasaidaqa faasasaa afeekaikidaqa.
1CO 10:1 Oo Koorinti maqusanaasa qini qikaqaafasaauqa ooqai Mooseefa Isipa maqusaindari maasa Yuda maqannaasa qikeeku qikaaku nifiqee nári maaqai fiqau. Qinee minara qimannimianaura. Misa Isipa maqusaindari sandeemarufanoo namuqaa nári maaqi qimasee Anutufa qufanoo qoonnamu fannoo misa ninaaqiannai aiqamausa ititafufaqa amiqimasee aniree Taatuqee nammari taqamareeqa fiqau.
1CO 10:2 Mi qoonnamunaki faqa mi nammarina Taatuqee nammari taqoonara amaana nammari kikiqusidanoo faqa Mooseefa mi nammarinaki misa aiqama ukuqnamaseenoo uqeeraseenoora foora masoofaqa aiqamausa Mooseenaindi kammambiqau.
1CO 10:3 (Misa miqooqari kaasau maqa maaqaki fimarufanoo Anutufa aiqama kananaana kananaana narana maqasaa quqasoofaqa marasaidaqa neemariqau. Nammariara nidufanoo Anutufa Mooseenara qufanoo oonikiqari nammari qumufaqa naqau.) Qinee Pauroosa minara maaqi qidaqa. Misa aiqamausa innaarunaindaraana moodaa feemu naqau, aiqamausa innaarunaindaraa nammari moodaa naqau. Mi nammarifa innaarunaindaraa oonikiqariara foora qumimarufaqa naqau. Mi oonifa asauku mundirafa misa faqa kukeeqasee nimarufa marinau.
1CO 10:5 Misa miqiqa fidaqa sia minara irirai moomoosa uqanna mandoosana marasoofanoo Anutufa qufaqa misa kuqufanoo misa iri fannoo mi aadana maqa maaqanaki furufaramminau.
1CO 10:6 Mi aiqama ainainausa maasa aaquqimaqimaqarafa maridanoo, maasa faqa mina irisee sia misa naanna raanaura, sia manda nidi mari ainainnara randaanauranoo sia misa naanna reeqa tumunnai auqira afaannara faqa innaaru qianaura. Mooseena akara minara maaqi qimasee qidanoo. Faiqí anaasee ooqumari fi narana neeneesee nammari moomoo neeneesee mandidi raanauree qimasee findi fiqa idi ree mariqau.
1CO 10:8 Qinee Pauroosa miqunara qimannimianaura maasa sia misa naanna ramasee faiqí anaasee narí ummuara narí ummuarianaura. Misa miqimarunara moodaa faasaana (tuenti tiri tauseena) nukudara foora teeqiqau moomoosa uqanna raurukaqau.
1CO 10:9 Maasa sia misa naanna reeqa karaambaiqa amanamandee qafaanauranoo. Misa akaqausa miqimarunara sakani fannoo narimarufaqa kuqimariqau.
1CO 10:10 Innee sia misa naanna reeqa Anutunara ninunuruaqa. Misa miqi marunara kuqira qangiroo fannoo aniree moomoo narinau.
1CO 10:11 Mi aiqama ainainausa akaqausa aaquqima nimaqaaqeera misasaa kambiqanau. Maasa maqee mariasa aaquqimaqimaqaaqeera Anutufa qumee dadaaqufaqa miqooqaraafa moo fannoo akararinau. Maasa taikara aukuana adeedi rainaqa marinara aaqaranara rufiaaqeera aaquqidaqa.
1CO 10:12 Faiqí moo fannoo nariara qeeqa afeekaikiranannai kikiqiqa maridee qinafa rufiaa, anee Isaraee maqannaasa naanna ramasee aqufinafaara.
1CO 10:13 Aiqama nimanirafa innisaa aqufinafa aiqama maqannaaki maqee maqee kambiqee mari ainainafa maridanoo. Anutufa minara iridanoo narí dadaaqira ufara kai iriannoo. Iridanoo firaa nimanirafa anireenoo inni urinaaqareenoo rafaaqafinafa anirainanoo Anutufa afeeka niminaqa innee amana mi nimariranaki mari inaqa mina uriaaqaree faranoo. Anutufa ititaseenoo fimariaana uqafiqainana fi ruiqakinana finnaranoo.
1CO 10:14 Oo qifaaqasaa qini qiqoondiuqa tumunnai auqira afaannara innaaruqiranara nianasaa rufiaaqa.
1CO 10:15 Innee Koorinti maqusanaasa ooqeenaasa irirana faqaasa mariafanoo. Inneeqa kai qini ufa irisee oonumafi rainasee iriaqa.
1CO 10:16 Maasa aafaqa naidaqa kaafakinaa nammariara Anutunara dufi dufi qimasaidaqa mi kaafanakinaana naidaqa asauku mundirana fidika naida fee qimasaidaqa maasa kaqikaa feemu faqa ruqi ruqimasee naidaqa maasa asauku mundirana amaqi naida qimifaqa naidee qidaqa mi feemuna naidaqa.
1CO 10:17 Moodaa feemu kai marina maasa moomoosa ruqi ruqimasee neemarianara moodaara foora maridaqa.
1CO 10:18 Qeeburu maqannaasa moo nuqu Isaraee maqannaasa nariqa aandau tatufira oosanara iriaqa. Faiqí anaasee moo fannoo aandau maramaree Anutuna aanaiqiki maru fasiqana amisoofanoo aandau tatufinoo nariara akaqana marasee neemarufanoo aandau akoofa narí aiku asauku faqa muduka nanau. Misa qiqau, maasa Anutuna tatufira qaindasaa qaraana naida qimifaqa naidaqa mina faqa moodaanaki maridee qimariqau.
1CO 10:19 Doo qini ufa oosana naqi fee inoo maridanoo fee doo maqee mi ufana koorooianaura. Inni maqusanaasa narana maraseeqa tumunnai auqira afaanna amidee qimasee tatufimariafanoo. Mi tumunannai auqimaria afaannana amana sia anoonau kaqi fifau tumu kai maridanoo. Mi narana tatufirafa faqa sia anoonau, kaqi narana kai maridanoo.
1CO 10:20 Sia Yisunara irimaria fasiqauqa mi fifau naranna marasee sia Anutunau amisee dufi dufi qidau, afaannauqa nimisee dufi dufi qidaqa miqidaqa. Innee Yisuna ufa irimariasa afaanna naida nimimaria naranara innee sia mina naaqeera qidaqa qikooqaidanoo.
1CO 10:21 Innee karaambaiqa aafaqa naidaqa Yisuna kaafakinaana nammari namasee sia amana quandakina afaanauqa kaafakinaa nammari neefaranoo, innee Yisuna aafaqa naidaqa karaambaiqa qaindasaaqaraa feemu namasee sia quandaki afaannauqa qaindasaaqaraa feemu neefaranoo.
1CO 10:22 Innee Yisuna aafaqa namasee quandaki afaanauqa aafaqa namasaifanoo karaambaiqa Yisuna qafamaseenoo rairaiqiannoo. Innee Yisufa inniara rairaiqianifee qimasaida fata fata idee miqidee, innee maasara karaambaiqa uraaqaraidee qida fee miqidee, sia amana karaambaiqa uriqareefaranoo firaa nariranaki aqufifoora.
1CO 10:23 Akaqausa minara maaqi qidaqa. Maasa amana aiqama oosana amiqirana faqa mandaikirana faqa minauqa maraanauree qiafaqa qinee Pauroosa minara maaqi qidaqa. Kuqaa aiqama nana ainaina amana maraanaura, sia aiqama ainaina amiqirafa maridanoo. Akaqausa maaqi qidaqa aiqama oosana amana maasa maraanauree qiafaqa qinee minara aiqama oosana sia faiqí anaasee dadaaqimaria oosanafa marifanoo fee qidaqa akaqana kuridirafa maridanoo.
1CO 10:24 Sia moo fannoo narí aidi mari ainainna narí iriranaki uriqaranoo mariani aqoonausa nidimari ainaina kai narí iriranaki uriqaranoo mariani.
1CO 10:25 Innee Koorinti maqusanaasa aandau maree makeetai fimariana akaqaandau arusee aukusee tumunnai auqira afaannara dufi dufi qimasee makeetaki quqasaafaqa feefauridaqa. Akaqaandau kaqi arusee auku quqasaafa feefauridaqa. Innee Yisuna ufa irimariasa makeetaki keeqafi inneeqa aandau marararee qimasee oonuree sia tumunnai auqira afaannara dufi dufi qinnanara iramasee eerairiaqa kaqi mana mana maraaqa. Aninna karaambaiqa saqarikiananoo aninna aakirafa marina sia minara irisee eerairiaqa, kaqi maraaqa.
1CO 10:26 Ooqeenaa tamummaqara fasiqauqa akara minara maaqi qinoo maridanoo. Maa maqa maaqafa faqa minaki aiqama ainaina marifa faqa karaambaiqaindi kai maridanoo.
1CO 10:27 Qinee Pauroosa minara aiqama ainaina kaqi naaqee qidaqa. Inni Koorinti maqusanaasaki Yisunara sia irimariasa moomoo maridaqa. Misakiqari moo fannoo aniara mai aniree qini faqa narana naannee qinana aidinana kaqi mina faqa oonuree mina faqa narana naa. Anee mi naranna aandauna naaneera aneenna aakiranara kaqi kaaqoo oonumafi irinana sia eerairia kaqi naa.
1CO 10:28 Anee mi naranna naanee qinanoo moo fasiqa fannoo qimaminoo tumunnai auqira afaanara dufi dufi qira narana maridanoo qinana anee ani qimami fasiqana aakiranara irisee sia naa.
1CO 10:29 Sia aninna aakiranarau qidau ani qimami fasiqana aakiranara qidaqa. Innikiqari moo fannoo maa qunnufana irisee maaqi qiannoo, nanaree qinee moona aakiranara iriananoo fee mifa qini ititaqimaqaannoo fee.
1CO 10:30 Doo qinee qeeqa naranara Anutunara dufi dufi qimaseeqa nanaree moo fannoo aniree qini narana aandaura qaoo qiannoo fee.
1CO 10:31 Qinee Pauroosa minara maaqi qidaqa Innee narana nammari aiqama ainaina neemarianara sia fee naanauree, naanauree, nana ainaina innaree, Anutuna amooqira ufa kambiqee marimau kai fuaqa.
1CO 10:32 Inni marirafa kaqi mana manifaqa nindafamaseeqa Yuda maqannaasee aanaamuru fee Yisuna ufa iri mariasee inni niqafamasee noori runifaara. Innee minara irisee mi oosannara eerairiaqa.
1CO 10:33 Innee qini daanna raaqa sia qinee qeeqa didirana qeeqa qifaaqa amiqi amiqiranara iridaqa aiqamausara iriseeqa misa nidiranamau fidaqa, aiqamausa innaaruna asumu maraaqeera miqidaqa.
1CO 11:1 Qinee asauku mundirana Yisuna aanna raidaqa innee miqikai iqa qini daanna raaqa.
1CO 11:2 Oo Koorinti maqannaasa innee qiniara maqee maqee irisee Yisuna ufa irimariasa sandufa qinee qimamiafanna ufamau fimarianara inni nimooqidaqa.
1CO 11:3 Qinee maa moodaa ainainnara kai inniara iriaqeera qimannimidaqa, aiqama fasiqa nári ninaaqmaaka urinaaqararausa maridaqa kafaa asauku mundirafa aiqama fasiqa urinaaqararafa maridanoo. Anutufa asauku mundirana uraaqararafa maridanoo. (Pauroofa narí maqannaa anaasee oosanara qimaqoofa sia maasaki maridanoo. Anaaseeuqa nariqa andeeqara oosana marasee narí nifaaqmaaka nimeemaanai oorudupi mambunara kooroo ianifeera qamunnannai nikiaqa rumbarausa amaana maqaki keeqee mariqau. Sia nikiaqa rumbasaidaqa keeqee marusa nisaurirana mara nimimariqau. Ummuari mari anaaseena paqurimasee asaurirana maraanifee qimasaida akiqa maqa namufaqa indufu aqimariqau.)
1CO 11:4 Qinee Pauroosa faiqí narí anaaqa uraaqararanara irisee maaqi qidaqa. Faiqí moo fannoo akiqa rumbarafa amaana maqaki keeqafi aiqamausa nifusaa innaaru qina fee Anutuna ufa qimannimina fee asauku mundirana asaurirana amiannoo.
1CO 11:5 Anaasee moo fannoo amaana maqaki keeqafi Anutuna ufa qimannimiannoo fee innaaru qiannoo fee akiaqa sia rumbarafa mi anaaseefa narí afaaqi asaurirana amidanoo ummuari mari anaaseena amanakai maridanoo, akiaqa maqa faqa indufira anaasee amana amana kai maridaqa. Saina akiaqa qamunnannoo rumbasee amaana maqaki keeqafinoo innaaru qiannoo fee Anutuna ufafee qimannimiannoo fee, andeeqanoo mariani.
1CO 11:6 Anaasee moo fannoo sia akiaqa rumbarafa amaana maqaki keeqaina see munusee akiaqa maqa faqa indufu aqusaa. Anaasee akiaqa maqa faqa indufirafa asaurinoo akiaqa qamunannai rumbarafa amaana maqaki sia asaurirainni kaqi keeqaannoo.
1CO 11:8 Indaaru Anutufa sia aanaaseesaa qaraana faiqí auqinau, faiqisaaqaraana anaasee auqinau.
1CO 11:9 Anutufa sia anaasee dadaaqianifee qimasee faiqí auqinau, faiqiara iriseenoo anaasee auqinau.
1CO 11:7 Faiqí Anutuna amana faqa Anutuna areenarafa faqa minaki marifa marinara sia akiqa rumbarafa amaana maqaki keeqaannoo. Anaasee faiqí areenarafa minaki marifa marinara akiqa rumbarafa mariani.
1CO 11:10 Qangiroora maasa qiqafaidammiaafoo qimasee nári nifaaqmaaka ureeqarausa marianara koorooianifeera nikiaqa rumbara anaasee amaana maqaki keeqaaqa.
1CO 11:11 Maasa karaambaiqa ufamau fidaqa maa irirafa kai mariani, anaasee naríara aadumai marianinafa fifau mariani, faiqí miqikai masee aadumai marianinafa fifau mariani.
1CO 11:12 Indaaru anaasee faiqisaaqari kambiqanau miqikai inoo miqooqari faiqí fannoo aanaaseekiqari kai kambiqaidanoo doo mi aiqama ainainaqanda Anutunakiqari kai kambiqanoo maridanoo. Faiqí fannoo akiqa asausi kisaaqa marinaqa faiqí anaasee narí kai nariara nariara irisee mandainainee qimasee nisaurifaranoo. Anaasee kisaaqa akiaqa asausifaqaanara sia miqidaqa amiqiranee qidaqa mi anaaseefa minara firaaqoo nasuridanoo. Anutufa anaasee kisaaqa akiaqa asausi inni nikiaqa paranna rafaaqafuanifeera niminau. Inneeqa kai iriaqa, anaasee sia akiaqa rumbara anaasee fannoo aiqamausa nifusaa amaana maqaki innaaru qirafa andeeqaidanoo fee sia fee andeeqaidanoo. Sia andeeqaidanoo. Innee minara irimariafanoo.
1CO 11:16 Faiqí moo fannoo yafee ufa rainaani qimasainaqa maa ufana kai qimamianaura, maasa maaqooqaraasa faqa Anutuna ufara maqusa maqusa suqimariasa faqa mi ufamau kai fidaqa sia moo oosana maraidaqa.
1CO 11:17 Innee Koorinti maqusanaasa Anutuna ufara suqidaqa sia amiqimmandee suqimariafanoo mandainaina kai kambiqaidanoo, minara maa ufana sia nimooqidafau qimannimidaqau.
1CO 11:18 Innee Anutuna ufara suqidaqa raina rainidaqa aanooqimariafaqa qimaqimiafaqa qinee iriqa akaqanara kuqaa fee qidaqa. [
1CO 11:19 Aaqarausa faqa andeeqarausa faqa moodaanaki marifanoo kuqaa rainarafa kambiqaannoo. Miqimasainanoo aaqee mariasa faqa andeeqarausa faqa kooroo ifaranoo.] (Pauroona akara rumannimu aukuana Yisuna ufa irimarusa sia maqee maasa imarunandee aafaqa neemariqau, misa nári ainainirana taikasee eendaki aafaqa nararee qimasee nári narana deedaqammamaree mara maree moodaa maqaki mini quqasee qoomaqa sakasee namasee inaaqianna feemu marasee ruqi ruqi masee uainna nammari misa maqee maqee neemaru nammarina namufaqa innaaru qimasee namasee fifaini mariqau. Faiqí anaasee oosana oosana suqiqau. Ainaina faqaasa faqa kudi fasiqa faqa oosana oosana ainaini mariasa faqa nariqa ainainirana taikasee eendaki aniree moodaanaki suqiqau. Akaqausa furufara maseeqa narana moomoo namataikasoonara ninnaaqiana anusa naararanau. Akaqausa uainna nammari moomoo neeneesee sipakiqa furufariqau, Pauroofa minara iriseenoo maaqi qimasee akara rumannimaqanau.)
1CO 11:20 Innee Koorinti maqannaasa Karaambaiqa qoomaqa suqufi naani qimasee innee sia kuqaa suqufi mina nararee qimaseefau aniafanoofau furufaridaqa naidaqa moosaindi faqa neemariafanoo.
1CO 11:21 Akaqausa nári maree ania naranna sia naida nimidaqa nariqa kai naafaqa akaqausa naarara maridaqa, akaqausa uainna nammari moomoo naida furufarida. Miqiafanoo mi qoomaqafa sia karaambaiqaindi maridanoo.
1CO 11:22 Innee maaqa siaisee maqee maqee neemaria narana nammarina sia minaki naidee, innee Anutuna ufara suqimariasa fidiaqaamma nimaqaidee miqidee, innee nara ainaina siaisa nisaurirana nimianee fee qidee miqidee. Innee minara irisee qiniara nana ufee qimaqimiannoo fee qidee. Abee nimoofee qianauree. Oo sia uqanna nimooqianaura.
1CO 11:23 Ooqai qinee karaambaiqa ufa irisee qimannimiafanna sandufana maqee faqa kafaa qimannimianaura, karaambaiqa Yisufa Yudasifa ueeqoo eendanaki feemu asaukunnai qumareenoo Anutunara dufi dufi qimaseenoo, ruqi ruqi maseenoo maaqi qimasee narí faiqi namu qimanniminau. Maa feemufa qini qimaqi kikiqa usinoo maridanoo innimma kuqiranaki quqannimaqaanaura. Qinee kuquannanara aunifoora oonumafi iridaqa feemu maqee maqee naqafuaqa.
1CO 11:25 Misa mi feemuna namaseeqa kaifaa miqoo narana namasoofanoo Yisufa uainna maru kaafana nariqa maqee maqee neemaru nammarina qumareenoo maaqi qimasee qimanniminau. Maa kaafanaki mari uainna qini fidika kikuqusinoo maridanoo. Anutufa maqasaa fasiqa anaaseera qini faqa moodaanaki kira ufa marifanoo qini fidika fannoo mi ufana mapukira fidika maridanoo. Innee mina naqa fidaqa qiniara irisaidaqa naqa fuaqa. Yisuna ufa miqiminoo marifaqa qinee Pauroosa minara maaqi qianaura.
1CO 11:26 Maa maqee kamuqoo Karaambaiqa sia kafaa qumi mari kamuqoo innee mina yakamuqoo fee maa feemuna faqa maa uainnana faqa naqa fidaqa innee Karaambaiqa kuqiranara kooroo idaqa.
1CO 11:27 Qinee minara irisee maaqi qidaqa faiqí moo fannoo mina oosana furufarira fasiqa fannoo Karaambaiqa feemu fee mina kaafakinaa uainna fee furufara mandee namaseenoo karaambaiqa amaqi faqa fidika faqa mara maree furufara mamaqaidanoo naannoo.
1CO 11:28 Aiqama fasiqa anaasee nariqa kai nári naundura marirana irirana aiquqummasee oonumafi irirana iriseeqa feemu faqa kaafakinaa uainna faqa naaqa.
1CO 11:29 Karaambaiqa afaaqa oosana sia irimarifa kaqi fifau feemu faqa uainna faqa neemarifa Anutufa aruaninna ufana narí naidanoo narí afaaqai mafi quqaidanoo.
1CO 11:30 Innee Koorinti maqannaasa miqianara moomoosa aurimariafanoo kudoosaapee mariafanoo akaqausa doo kuqiqa maridaqa.
1CO 11:31 Maasa indaaru qeeqa daundura marirana qimanammandee andeeqasee naananoofau sia Anutuna darira ufa ameemaanai marunaiqini.
1CO 11:32 Maa maqanasaaqaraasa Yisuna ufa sia irimariasa kuridiranaki fidaqa maasa misa faqa fuanoora maqee kamuqoo karaambaiqa niuqummasee naridanoo.
1CO 11:33 Qini qikaqaafasaauqa maa ufana iriseeqa karaambaiqa qoomaqa naani qimaseeqa qinaaqiana aninausara nifeesamasai faqa aniraifaqa doo moodaa kari oonuree naaqa.
1CO 11:34 Moo fannoo aararainafa aneenna maaqaki oonu namasee ania. Miqimandee moodaanaki keeqafifanoo Anutuna narira ufa fannoo sia innisaa mariani. Doo qina kai qimannimiqa qinee innee iannai fiqa akaqa ufa qimaqimuna andeeqaanaura.
1CO 12:1 Doo maqee qinee Anutuna naaquqara andeeqara maraquna nimimari ainainnara qimannimianaura. Qini qikaqaafasaauqa qinee minara anoona ufa iriaqee qidaqa qimannimidaqa.
1CO 12:2 Ooqai innee aamina maru kamuqoo manda fasiqa fannoo inni rarisameeqee sia ufa qimaru tumunannai auqira afaannunnai ubeekee marufaqa mina ufa ameemaanai fimariqau.
1CO 12:3 Doo maqee innee maanara irimariafanoo Anutuna maraquna fannoo rakisimari fasiqafa sia amana Yisuna aqurarara ufa amiannoo kafaa mina dinni kai Yisufa karaambaiqa maridanoo fee qimariasa Anutuna naaquqara andeeqara maraquna fannoo misa dadaaqinara miqi qidaqa.
1CO 12:4 Oosana oosana innaarunaindaraa ainaina faiqí anaasee dadaaqianifeera nimirafa marifanoo moodaa maraquna fannoo kai aiqama mi aiqama ainainna maqasaa fasiqa anaasee nimidanoo.
1CO 12:5 Maasa Anutuna ainainirafa oosana oosana ainainirafa maridanoo moodaa karaambaiqa ainainammidaqa.
1CO 12:6 Anutuna ufara suqimariasa dadaaqirafa oosana oosana maridanoo moodaa Anutufa kai aiqama aadu aadu akoofasaikirana faiqí anaasee nimifaqa minannai quandaki narí dadaaqi narí dadaaqiaqeera.
1CO 12:7 Anutufa Yisuna ufa irimariasaki aiqama fasiqa anaasee naadu naadu narí maraquna koorooianifee afeekana nimufaqa quandaki minannai narí dadaaqi narí dadaaqiaqeera nimidanoo.
1CO 12:8 Anutuna maraquna fannoo moo fasiqa irirana faqaana ufa qimannimimarina amidanoo kafaa mi maraqunafa moo fasiqa aiqama ainainara irirana amidanoo.
1CO 12:9 Mi moodaa maraqunafa kai Yisuna mandaaqarana moo fasiqa amidanoo, moo fasiqa mi maraqunafa faiqí anaasee aurirana taikannisara afeeka amidanoo.
1CO 12:10 Anutuna maraquna fannoo faiqí sia amana auquaqaa ira ainaina afeeka moo fasiqa amifanoo mi fasiqafa afeeka ainaina auqaidanoo, moo fasiqa Anutuna afeeka amifanoo Anutuna ufa afeekaikamandee qimannimidanoo. Mi maraqunafa moo fasiqa afeeka amifanoo maraquna nimimariasa faqa moo unna qira maraquna nimimarina faqa mi fasiqafa kai rainasee nindafaidanoo. Mi maraqunafa moo fasiqa afeeka amifanoo aanaamura ufakiqari sia narí iri maru ufanakiqari amaana maqaki ufa qimannimidanoo. Mi maraqunafa kai faiqí moo afeekaikamma amifanoo aanaamura ufakiqari narí sia iri mari ufanakiqari faiqí anaasee qimannimisaifanoo moo fasiqa fannoo sia mi ufana oosana irirainni maraquna fannoo kai mina qimamifanoo mifa indee kai idanoo mina oosana qimannimidanoo.
1CO 12:11 Mi oosana oosana ainainna nimimarifa moodaa maraquna kai maridanoo. Mifa narí kai narí aidiramau raina raina mandaida aadu aadu dadaaqira akoofasaikirana nimidanoo.
1CO 12:12 Asauku mundirana afaaqa moodaara foora maridanoo mina atiuqa moomoo maridaqa afaaqa sia rainanoo maridanoo moodaa maridanoo.
1CO 12:13 Miqikai masee maasa aiqama Yuda maqannaasa faqa aanaamuru moomoo maqannaa mariasa faqa karabusaki ainainimariasa faqa iduki mariasa faqa maasa aiqama moodaa maraqunannai nammari marasee moomoo atiuqa moodaana apataika kai iqa mariasa Yisuna apata mariafanoo Anutufa moodaa maraquna nammariara foora nimifaqa naunnanara miqidaqa.
1CO 12:14 Faiqí moo adaka sia muduka maridanoo moomoo afaaqa ootupanoo maridanoo.
1CO 12:15 Mi fasiqana aiku fannoo qinoo sia qinee asauku mariaqaana minara qinee sia maa fasiqana afaaqau maridau. Qinee Pauroosa minara maaqi qiqa kuqaa aiku fannoo sia asauku kinoo sia mi ufana qinnanannai moona afaaqaikianau kaqi mi fasiqana afaaqa mariannoo.
1CO 12:16 Mi fasiqana aaqoo fannoo qinoo qinee sia maa fasiqana afu marunnanara sia mina afaaqau maridau. Qinee Pauroosa minara maaqi qidaqa kaqi mi aaqoofa sia afukinoo sia mi ufana qinnanannai moona afaaqai kiannoo kaqi mi fasiqana afaaqa mariannoo, sia sia miqiannoo.
1CO 12:17 Mi fasiqana aiqama afaaqa afu kai marinanoofau naqi fee mandee ufa iriannoo fee. Mina afaaqa aaqoo kai marinanoofau naqi fee mandee udiraannoo fee.
1CO 12:18 Anutufa kai narí iriseenoo narí aidiranannai faiqí afaaqa aiqama ainaina afaaqa quqaqoofa maridanoo.
1CO 12:19 Aiqama ainaina moodaa ainaina kai marinanoofau sia faiqí afaaqa marini.
1CO 12:20 Doo miqinoo moomoo afaaqa atiuqa moodaa afaaqara foora ootupanoo maridanoo.
1CO 12:21 Faiqí afaaqaindaraa afu fannoo sia amana asaukuara anee fua sia qini dadaaqi marianna ainainafa mariananoo, sia qiannoo. Kafaa akiqa fannoo sia aikuara anee fua sia qini dadaaqi marianna ainainafa mariananoo. Sia miqi qiannoo.
1CO 12:22 Maasa qeeqa qifaaqa ati dauni nidafidanoo ummooquki mari atiuqara fifau ainainee qiananoo sia marinaqa naqi fee ianauree.
1CO 12:23 Maasa qeeqa qifaaqa atiuqa ureeqara atiuqee qimariana maasa misasaa firaaqoo amiqimmandee misasaa rakisidaqa. Nifu qafaafaqa nisaurimaria atiuqa maasa amiqimmandee rakisidaqa qamunnannai ititaidaqa.
1CO 12:24 Nifu qafaafanoo nidi mari atisa sia amiqimmandee ititaidaqa kai akooqoo maridanoo. Anutufa kai narí iriranannai maasa qifaaqasaa atiuqa maaqimasee ootupanau, Ureeqara atiuqa uriqarara rakisirana maraanee qimasee ootupanau.
1CO 12:25 Miqi marianara sia maasa qifaaqa rainarafa maridanoo aiqama aadu aadu qifaaqa ati fannoo nariara nariara amanamana kai amuqusidanoo narinni narinni rakisidanoo.
1CO 12:26 Moodaa qifaaqa ati didafifanoo aiqama qifaaqa didafidanoo, kafaa mina dinni moodaa qifaaqa amooqifanoo aiqama qifaaqa asasidanoo.
1CO 12:27 Qinee Pauroosa inni Koorinti maqannaara qidaqa innee Yisuna ufara suqimariasa aiqama asauku mundirana afaaqara foora mariafaqa aiqama mina afaaqasaa afaaqa fannoo narí amaaqa narí amaaqaki kai mariafanoo.
1CO 12:28 Innee Yisuna ufa iridaqa nuasa suqiranaki Anutufa miqikai inoo inni faiqí anaasee mareeqeenoo maaqimmasee quqannisoofaqa mariafanoo. Anutufa Yisufa niqiqoo fasiqausa inniki uriqararausaikinau, miqooqari misa ureeqarausa Anutuna ufa faiqí anaasee maqusa maqusa qimannimimarusa faqa inniki quqanau. Doo misa ureeqarausa ufasaa rakisirausa maqusaki qimannimimarusa Anutufa inniki quqanau. Kafaa miqooqari faiqí anaasee oosana oosana ainainirausa quqanau. Akaqausa faiqí sia amana auquaqaa ira ainaina auqimariasa quqanau. Akaqausa aurirausa andeeqee marusa quqanau. Akaqausa faiqí anaasee narí dadaaqi narí dadaaqi marusa quqanau. Akaqausa ufa suqirausasaa amiqimmandee rakisirausa quqanau. Akaqausa aanaamuru ufakiqari narí sia irimaru ufanakiqari Yisuna ufa suqiranaki qimannimimarusa Anutufa quqanau.
1CO 12:29 Innikiqari sia aiqamausa Yisufa niqiqoo fasiqausa mariafanoo, sia aiqamausa maqusa maqusa qimannimiqanusa maridaqa. Sia aiqamausa maqusai naamuaqira ufa qimannimimariasa maridaqa. Sia aiqamausa faiqí sia amana auqaaqaa ira ainaina auqimariasa maridaqa.
1CO 12:30 Sia aiqamausa aurirana taikanniseemaria fasiqausa maridaqa. Sia aiqamausa aanaamuru ufakiqari nári sia irimaria ufanakiqari qimannimimariasa maridaqa. Mi anaamuru ufanakiqari nári sia irimariafanoo maraquna afeeka fannoo dadaaqifaqa mi ufana oosana sia aiqamausa irimariana kooroo ifaranoo.
1CO 12:31 Innee inneeqa irirana Anutuna afeekannai narí nimira afeeka oosana oosana faqa akoofasaikirana oosana oosana faqa misauqakinaana uriqararana kai ummarararee qimasee afeekaikiaqa. Doo qinee mi firaa uriqarara oosana uqanna maaqoo kooroo ianaura.
1CO 13:1 Mi firaaqoo uriqarara oosana koorooirafa maaqimminoo maridanoo, faiqí anaasee aiqamausa nariara nariara uriqarara ainainee qimasee misara nimuqusirafa mifa mina maridanoo. Qinee qeeqa Anutuna maraquna afeekannai aanaamuru moomoo maqannaa ufakiqari sia iria maria ufanakiqari faqa qangiroo ufakiqari faqa Yisuna ufara suqiranaki qimannimunanoo qeeqa qimuqusaki faiqí aanaaseera uriqarara ainainee qimasee misara nimuqusirafa sia marifaqa qeeqa kai qeeqa firaa ufatia fifau kammee kammee qidaqa.
1CO 13:2 Anutuna maraquna fannoo oosana oosana afeeka qiminaqa qinee qeeqa kai Anutuna ufa amiqimasee qimannimianaqee qinee aiqama ainainara irisee aiqama kukeeqara ainainara irisee fee, qinee qeeqa Yisuna saqarikirafa afeeka marinaqee aaqana moo mafi moosaa quqaanauree, mi aiqama ainaina afeekafa qiqa daundurai afeekaikifanoo faiqí aanaaseera uriqarara ainainee qimasee misara qimuqusirafa sia marifaqa qinee sia maridara foora maridaqa.
1CO 13:3 Qinee qeeqa aiqama ainainatia mareeqee ainaina siaisa kaqi nimiqee qeeqa qifaaqa faqa mareeqee idaki aquanauree miqidaqa faiqí aanaaseera uriqarara ainainee qimasee misara qimuqusirafa sia qini daundurai marifaqa mi ainainaqanda sia qini dadaaqianara miqidaqa.
1CO 13:4 Faiqí aanaaseera uriqarara ainainee qimasee misara qimuqusirana qinee Pauroosa kooroo ianaura. Faiqí aanaaseera nimuqusirafa maaqimminoo mariannoo, reendeenamandee ubiqafi misa ufa irirafa mariannoo, fifimmasee faiqí aanaaseera qimannimirafa mariannoo. Faiqí aanaaseera nimuqusirafa sia rairaiqirafa mariannoo, sia nariara oori uqeerasee mariannoo, sia narí amooqirafa mariannoo.
1CO 13:5 Faiqí aanaaseera nimuqusirafa sia adi namufaqa marifa maridanoo sia nariara kai irimarifa maridanoo, sia dauni kaukaatufa qimarifa maridanoo, sia akaqausa mandaikammamaqaanara irimaree fimarifa maridanoo.
1CO 13:6 Faiqí aanaaseera nimuqusirafa sia mandoosanara asasidanoo kuqaa anoona ufa qiranara asasidanoo.
1CO 13:7 Faiqí aanaaseera nimuqusirafa sia minnisee finanoo akooqaidanoo, misa mina mandaikamma maqaafanoo kaqi kai irisee minni saidanoo, faiqí aanaaseera amiqira irirana irimaree fimarinafa faqa aaqainausakiara sia misara taikee maqi qirafa faqa oosana oosana ainaina amiafanoo reendeenamambi ubiqafi kaqi mi manda oosanna fee amiqira oosana fee kaqi mara maree fimarifanoo amuqusirafa miqiminoo maridanoo.
1CO 13:8 Faiqí aanaaseera nimuqusirafa naaru naaru marira ainaina maridanoo sia taikarafa maridanoo. Maqee kamuqoo Anutuna maraquna akaqausa naakifaqa amiqimasee qimannimirafa maqee maridanoo ufaasu ainaina kai maridanoo. Akaqausa sia nári irimaria ufana qimannimirafa maridanoo mifa faqa taikaannoo, amiqira irirafa maridanoo marinoo aiqaraannoo.
1CO 13:9 Anutufa maqee qimimari irirafa faqa qimimarifaqa faiqí anaasee qimannimira ufa faqa maqee atisaa maridanoo.
1CO 13:10 Kasooqaqee Yisufa qumira aukuana firaafa anirainanoo maqee atisaa marirafa taikafuannoo.
1CO 13:11 Qinee Pauroosa faiqi aanaaqi mariafanna kamuqoo qini ufa faqa qini didirafa faqa qini irirafa faqa faiqi aanaaqindi marinau, maqee faiqí kammambunanoo faiqi aanaaqi irirafa doo taikafinoo. Yisufa qumuaninna aukuanna miqikai iannoo.
1CO 13:12 (Pauroofa maru aukuanna manda tanuka kai marinau. Mi manda tanukana kikiqusidanoo maa ufana qinau.) Maasa tanukaki qeeqa doori qafaidaqa sia amiqimmandee qeeqa qimana qafaidaqa. Maasa maqee qafee marunafa miqirana ati kai qafaidaqa, Yisufa quminna aukuana maasa mina faqa narí oori narí oori andeeqasee qafaanaura. Maqee marunna irirafa ati kai maridanoo, Yisufa quminna aukuana maasa irirafa anoona mariannoo. Miqoo maasa irirafa Anutufa maasara amiqimasee irindee kai inoo anoona irirafa maasaki faqa mariannoo.
1CO 13:13 Doo maqee kamuqoo maa qaaramoo ainainna kai maridanoo. Yisunasaa irirana rusirana faqa naaru kambiqaaninnanara asasamandee afeesirana faqa faiqí aanaaseera faqa Anutunara faqa uriqarara ainainee qimasee misara nimuqusirana miṉamufa kai maqee kamuqoo kaqi maridaqa misakiqari nimuqusirafa kai uriqararafa maridanoo.
1CO 14:1 Faiqí aanaaseera nimuqusirafa uriqararafa maridanoo fee qidaqa minara inni Koorinti maqannaasa qimannimidaqa, Innee minara irisee faiqí aanaaseera nimuqusirafa maraanauree qimaseeqa mina mararara kai kadaapiruaqa. Anutuna maraquna nimi mari afeeka oosana oosana faqa akoofasaikirana oosana oosana faqa, minauqa faqa innee inneeqa irirana ummarararee qimasee afeekaikiaqa. Miqidaqa faiqí anaasee Anutuna ufa qimannimira afeeka minara uriqarara fee qimasee firaaqoo randasee maraaqa.
1CO 14:2 Faiqí moo fannoo narí sia irinna aanaamurusa ufakiqari qimannimimarifa sia faiqifau qimannimidanoofau Anutuna faqa ufa qidanoo. Faiqí sia mina ufa iridaqa moosa ufa marifaqa. Mifa Anutuna maraquna afeekannai kukeeqara anoona ufa qidanoo.
1CO 14:3 Faiqí moo fannoo Anutuna maraquna fannoo dadaaqifanoo Anutuna ufa narí ufakiqari qimannimifanoo nimuqusaki mandaikisa mina ufa iriafanoo dadaaqirana faqa pooduqarana faqa amiqi amiqirana faqa maraidaqa.
1CO 14:4 Moosa ufakiqari narí sia iri maria ufanakiqari qimannimimari fasiqafa narí kai narí dadaaqidanoo, Anutuna ufa nári ufakiqari qimannimimarifa aiqama Yisuna ufara suqimariasa dadaaqidanoo uqeeraidanoo.
1CO 14:5 Qinee inniara aanaamuru ufakiqari sia irianakiqari aiqamausa minakiqari ufa qiaqee qidaqa. Mi oosanna uriqararafa maaqimminoo maridanoo Anutuna ufa nári ufakiqari qimannimirafa Anutuna maraquna nimimarifa qinee inniara minara firaaqoo qiaqee qidaqa ridaqa. Anutuna ufa nári ufakiqari qimannimimarifa uriqararafa maridanoo, aanaamuru ufakiqari sia iria ufanakiqari qimarifa ureeqarafa maridanoo, mi moo ufanakiqari qimarinnana faiqí moo fannoo aniree nári ufakiqari mi ufana qimanniminanoo andeeqasee irifanoo amana mariannoo miqimasee Yisuna ufara suqimariasa dadaaqirana mareefaranoo.
1CO 14:6 Oo qini qikaqaafasaa kasooqaqee innee iannai oonureeqa aanaamuru ufakiqari qimannimisee naqimandee dadaaqianauree. Sia dadaaqirafa mariannoo. Anutuna maraquna fannoo aamuaqira ufa qimannimira fee, qimannimiranee, irira ufa fee Anutuna maraquna dadaaqira ufa qimannira fee naamuaqira ufa fee nári ufakiqari qimannimianaqa aiqamausa dadaaqirana mareefaranoo. Moosa ufakiqari sia dadaaqirana mareefaranoo.
1CO 14:7 Fifau sia kasi mari ainainna ufireena faqa kookaanauru faqa piripunna faqa marifaqa sia minauqakiqari amiqimmandee fuaqaidaqa minakiqari idi sia amiqimmandee fuaqaifanoo idirainna fasiqa anaaseesa naqi fee mandee irifaree, sia irifara.
1CO 14:8 Rakira karaambaiqa fannoo sia amiqimandee kaanina uqeeraifaqa naqimandee rakirana aiqamausa uqeereefaree, sia uqeeree faranoo.
1CO 14:9 Innee miqikai iqa maraquna fannoo naakinaqa aanaamuru ufakiqari sia irianakiqari ufa qifaqa naqimasee ani ufa oosana irifaree sia uqanna irifaranoo. Ani ufa fannoo fifau ufaira foora uqidanoo.
1CO 14:10 Maa maqa maaqanakina moomoosa ufa maridanoo aiqamausakina misa ufa anoona maridanoo.
1CO 14:11 Anaamuru moo fannoo findifi nári ufakiqari qini qimaqimifaqa qinee siamma irianaura. Qinee mi fasiqanara aanaamuru fee qiana mifa qiniara aanaamuru fee qiannoo.
1CO 14:12 Innee Koorinti maqannaasa kaaqa Anutuna maraquna fannoo nimimari afeekanara kai firaaqoo rimariasa mariafanoo. Mi afeeka iriranakiqari maanara kai afeekaikiaqa. Yisuna ufara suqimariasa misara dadaaqiqa firaaqoo uqeeree maria ainainnara kai nidinaqa uqeeraaqeera qidaqa.
1CO 14:13 Faiqí moo fannoo maraqunannai aanaamuru ufakiqari qimannimidanoo narí faqa faiqí anaasee faqa sia irifanoo kafaa Anutunara innaaru qinanoo moo afeeka aminanoo sia irimaria ufanakiqari qimarina anoona irisee quandasee kooroommasee kafaa nári ufakiqari qimanniminaqa doo iriaqeera.
1CO 14:14 Maraquna fannoo dadaaqinaqa sia iria ufanakiqari innaaru qiananoo qini qimana fannoo kai kuqaa innaaru qiannoo qiqa irirafa sia innaaru qiannoo.
1CO 14:15 Qinee minara naqi fee qianauree qinee maaqimmianaura, qinee qeeqa qimana faqa qeeqa iriranannai faqa innaaru qianaura. Qinee Anutunara idi raidaqa qeeqa qimanannai faqa qeeqa iriranannai faqa Anutunara idi raanaura.
1CO 14:16 Innee Yisuna ufara suqimariasa suqimarifanoo moo fannoo Anutuna maraquna fannoo aakinanoo narí amana fannoo kai aanaamuru ufakiqari innaaru qinanoo moo kaqiqee fasiqa fannoo ani marida iridanoo naqimasee mifa iriseenoo Anutunara mifa faqa eedoo qiannoo fee. Mifa sia uqanna amana ani ufa oosanara iriannoo.
1CO 14:17 Ani Anutunara dufi dufi qira ufa amiqimmasee qinanoo moo fasiqa fannoo sia amiqimasee irinanoo ani ufa fannoo sia mina dadaaqiannoo.
1CO 14:18 Qinee Pauroosa maanara Anutunara dufi dufi qidaqa, qinee firaaqoo moomoo kari inni fiqaramasee aanaamuru ufakiqari daadumai maridaqa innaaru qidaqa.
1CO 14:19 Yisuna ufara suqimariasaki suqidaqa qinee sia miqidaqa. Misaki maridaqa nári ufakiqari misa naamuaqianee qidaqa moodaannai qisauku ufa kai amana kai qusa qimannimiranara dididanoo. Moosa ufakiqari misa sia iri maria ufanakiqari kisaaqasaa qimannimianaqa sia irifoora qikooqaidanoo.
1CO 14:20 Oo qini qikaqaafasaa sia inni irirafa faiqi aanaaqi iriranara foora mariani, faiqí firaasa iriranara foora mariani. Oosana oosana mandainainara minara kai inni irirafa faiqi aanaaqindiara foora nisakadiki qikairi siaisa mariaqa.
1CO 14:21 Tamummaqara fasiqauqa minara maaqi qimasee akara riqau. Karaambaiqa qinoo qinee maa maqannaasa qimannimianaura. Qinee aanaamuru ufa qimariasa niqiqaanaqa qimannimifaranoo. Qinee aanaamuru nifaurunnai qimannimianaura. Qini qiku qisauku aiqama mi ufana irisee nikooqainaqa sia irifaranoo. Tamummaqara fasiqa ufa miqimminoo marifaqa qinee Pauroosa minara maaqi qidaqa.
1CO 14:22 Qinee maraqunannai aanaamuru ufa qiranara maaqi qidaqa Yisunara sia irimariasa irisee minara kuqaa fee qiaqee qimasee náriara Anutuna narira ufa ameemaanai marianara iriaqeera mi ufafa maridanoo. Yisunara doo irimariasara sia misarau maridanoo, doo misa iridaqa. Maraqunannai Anutuna ufa nári ufakiqari qimannimirafa Yisuna ufa irimariasa iriaqee ainainna maridanoo, mina ufa sia irimarinausa sia mina irifaranoo mina anoonara randee faranoo.
1CO 14:23 Yisuna ufara suqimariasa aiqama suqusee maridaqa aiqamausa moodaa kari aanaamuru ufakiqari dapi dapi ufa qimarifanoo kaiqee fasiqa fee aamina fasiqa fee minaki ani keeqafiqa inniara furufari mariasee qimasee sandaannoo.
1CO 14:24 Aiqamausa suqidaqa Anutuna ufa nári ufakiqari narí qimami narí qimami qimarifanoo kaqiqee fasiqa fee aamina fasiqa fee inniki keeqafinoo irinoo narí mandoosanara aundurai oonumafi iriannoo. Narí irinnufafa narí raquru amiannoo.
1CO 14:25 Narí mandirirafa aundurai kukeeqanoo marinafa aiqama kooroomambinanoo mifa anuka kummarammafinoo Anutuna amooqidanoo maaqi qiannoo kuqaa Anutufa maaqoo inni faqa maridanoo fee qiannoo.
1CO 14:26 Oo qini qikaqaafasaauqa, maa qinee qunna ufana anoona koorooianaura. Innee innaaru qiraree qimasee suqidaqa moo fannoo idi moo oosana araannoo moo fannoo naamuaqira ufa oosana araannoo, moo fannoo Anutunaindaraa ufa irisee qimannimiannoo moo fannoo aanaamuru ufakiqari qimannimisainanoo moo fasiqa maraquna fannoo dadaaqinanoo mi ufana anoona kooroomannimiannoo. Aiqama ainaina Yisuna ufara suqimariasa dadaaqirafa kai mariani.
1CO 14:27 Misa aanaamuru ufakiqari qimannimiani qimasee qaaraqanda kai fee qaaramoo kai findifinana moodaa moodaa fannoo kai qimannimiaqa, miqooqari moo fannoo misa ufa anoona nári ufakiqari kooroommasee qimannimiani.
1CO 14:28 Yisuna ufara suqiranaki koorooimarinna fasiqafa sia marinana sia aanaamuru ufakiqari qimannimiani. Narí kai narí aundurakiqari Anutuna faqa ufa qinafa amana narí kai qiani.
1CO 14:29 Qaaraqanda fee qaaramoo fee Anutufa ufa niminnana qifaqa aiqamausa suqimariasa irisee misa ufa raina rainammasee iriaqa.
1CO 14:30 Inni ufa suqiranaki faiqí moo fannoo ooqu marinafa Anutunaindaraa ufa marasainanoo ufa qimanniminna fasiqafa ooqu marinanoo mifa findifi qimannimiannoo.
1CO 14:31 Innee aiqama amana Anutuna ufa qimannimiaqa moodaa kai moodaa kai findifidaqa amana qimannimifaranoo. Miqimandaifaqa aiqamausa misa irirana iriseeqa dadaaqirana mareefaranoo.
1CO 14:32 Maraquna fannoo inni naakifaqa Anutuna ufa qimannimirana dadaaqirana nimifaqa sia dapi dapi furufariaqa innee inneeqa kai inneeqa nifauru naundurasaa rakisimariasa marianara amiqimasee rakisiaqa.
1CO 14:33 Anutufa sia maasara dapi dapi furufariranaki mariaqeera daarama quqeenoo asooaranaki andeeqasee mariaqeera daarama narí ufa iriranaki quqeenoo. Anutuna ufara suqimariasa maaqanna maaqana moodaa oosana qimannimiafanaqa maree mariafaqa inni faqa qimannimidaqa.
1CO 14:34 Yisuna ufara suqiranaki anaasee sia findifi ufa qimannimiaqa, kaqi ooqufaaqee mariaqa. Yuda maqannaasa sandufamau kai fiqa faiqí ufa ameemaanai kai mariaqa.
1CO 14:35 Anaasee moo ainainara irararee qimaseenoo sia paamma qimasee iraannoo, kasooqaqeenoo maaqaki oonureenoo narí afaaqisaa iraannoo. Yisuna ufara suqiranaki anaasee findifi ufa qinafa asaurirafa mariannoo. (Koorinti maqannaasa akaqausa Pauroona ufara sia anoona ufa fee qimasee nári iriranamau fimarufanoo Pauroofa minara maaqi qimasee qimanniminoo qinau.)
1CO 14:36 Oo Koorinti maqannaasa Anutuna ufa fannoo innikiqari fee indaaru kambiqeenoo fee innee inneeqara maasa kai mareeunoo fee qidee.
1CO 14:37 Innikqari moo fasiqa fannoo nariara Anutuna tamummaqara fasiqausee qimaseenoo fee maraquna qimimari afeekana faqaasee qimaseenoo fee mi fasiqafa qinee Pauroosa akara rumannimunnufanara kuqaa Anutuna naamuaqira ufa fee qinafa anoona mariannoo. Qini maa ufanara sia iridee qinafa innee minara unna qira fasiqa maridanoo fee qimasee mina ufa faqa sia iriaqa.
1CO 14:39 Oo qini qikaqaafasaa Koorinti maqannaasa inneeqa Anutuna ufa faiqí anaasee qimannimiranara maraanauree qimasee afeekaikida mina mararara kai kadaapiruaqa, akaqausa sia irimaria ufanakiqari maraqunannai qimannimifaqa sia qaoo qiaqa.
1CO 14:40 Innee ufa suqiranaki iriranamau kai andeeqasee maqee maqee fuaqa.
1CO 15:1 Oo qini qikaqaafasaa ooqai qinee Pauroosa Yisuna amiqira fasaasa ufa qimannimiafannana, innee mina irisee maqeeiafanoo inni irirafa minasaa rusisoofa mapukinoo marinara inni naaqoo auqaidaqa.
1CO 15:2 Yisuna amiqira fasaasa ufa qimannimiafannana, innee mina rakisi mapuku qumareeqa innaarunai asumu marirana maree mariafanoo. Abee innee indaaru kuqaa fee iriqee iqau unna qimasee iridee qifaara.
1CO 15:3 Qinee sia qinee qeeqa ufa kaifau qimannimiafannanau. Yisuna aiku asauku mariannaindari anu ufana firaaqoo uriqarara ufa qimannimiafannana. Mi ufana oosana maaqimminoo maridanoo. Asauku mundirafa tamummaqara fasiqauqa akarakinaa ufamau finoo maasa mandainainara kuquqimaqanau.
1CO 15:4 Kuqufufaqa misa mina iri akundamasoofanoo qaaramoo faasaana marinoo tamummaqara fasiqa akarakinaa ufamau finoo kuqiranakiqari findifinau.
1CO 15:5 Findifufanoo Peetooroona afusaa koorooinoo miqooqari qisaukuqara taikaseenoo qikunni ooqu qaaraqanda mareenoo niqiqaaninna fasiqausa aiqama nifusaa koorooufaqa qafaqau.
1CO 15:6 Qafamasoofanoo miqooqari narí ufa irimarusa faifa handareeta fasiqa anaesee moomoo uqanna nifusaa moodaa kari kai kooroo inau. Misauqakiqari akaqausa asooqaqee kuqufufaqa, moomoosa kaqi maridaqa.
1CO 15:7 Miqooqari Yisufa Yameesana afusaa kooroomambinoo miqooqari niqiqaaninna fasiqausa nifusaa kooroomambinoo qimanniminau.
1CO 15:8 Inaaqianna uqanna qini Pauroosa qifusaa faqa koorooinau. Qinee daaduma uqanna moo oosanakiqari amaneendaraasa eedadara foora mariafanausa maridaqa Yisufa qini qifusaa kambiqoofaqa qafaqiafana.
1CO 15:9 Qinee Yisufa niqiqoo fasiqausakina ureeqarausa maridaqa. Qinee Anutuna ufara suqimariasa aupurarana nimiafanausa marunnanara naqi fee ifaqee misa qiniara Yisufa niqiqoo fasiqafee qida fee, sia qinee misa nimana maridaqa.
1CO 15:10 Anutufa sia qini ureeqaranara irinoo kaqi narí afauaranannai qini mareeqeenoo narí niqiqoo fasiqausaki quqaqiseenoo ufa qimannimiannee afeeka qimufanoo sia qiniki mandaikinau. Qinee aiqama niqiqoo fasiqausa urinaaqaramasee faiqí aanaaseeki maqusa maqusa kadaapiriqa, sia qeeqa kaifau miqidau Anutufa qimu afeekafa qiniki kasinara miqidaqa.
1CO 15:11 Yisufa maasara kuqinoo findifunara qimannimunnufana akaqa niqiqoo fasiqausa nookinaanee iridee qini dookinaanee iridee, mi ufana kai maasa qimannimisaafanaqa minasaa inni irirafa rusinoo maridanoo.
1CO 15:12 Maasa asauku mundirafa kuqiranakiqari findifunara maasa qimannimiafanaqa innikiqari akaqausa naqimasee kuqirausara sia findififaranoo fee qida fee.
1CO 15:13 Kuqirausa kasooqaqee sia kuqiranakiqari findifirarifanoofau asauku mundirafa miqi kai inoofau sia findifu qini.
1CO 15:14 Ooqai asauku mundirafa kuqiranakiqari sia findifinaqau maasa qimannimira ufafa sia marinaqau sia qimannimunaiqini, innee inneeqa irirana rusimari ainainafa sia mariqini.
1CO 15:15 Kuqirausa kuqiranakiqari sia findififanoofau asauku mundirafa faqa sia findi fiqini. Anutunara asauku mundirana kuqiranakiqari uqeeree maqi qiafannanara kuqirausa kuqiranakiqari sia findififaqau maasa qimannimiafanna ufanara unna ufa fee qini.
1CO 15:16 Kuqirausa sia findi fifaqau asauku mundirafa faqa sia findifiqini.
1CO 15:17 Asauku mundirafa kuqiranakiqari sia findifinaqau inniqa saqarikirafa kai fifau ainainara foora sia mari ainainnaki faqa innee inneeqa mandainainaki kaqi auiamakifau furufarammiaqini.
1CO 15:18 Kuqirausa kuqiranakiqari sia findififaqau moomoosa asauku mundiranasaa irirana rusisaida kuqimariasa sia innaarunai fini auiamakifau furufariaqini.
1CO 15:19 Maasa maaqoo marunna kamuqoora kai iriseefau asauku mundirana minasaa irirana rusidau, maasa mandainaina firaafa mariqini, aiqama maqannaasa maqa afaaqasasa mariasakiqari maasa dinee teeroo uriqaranoo mariqini.
1CO 15:20 Anoona ufa maaqimminoo maridanoo. Doo kuqaa asauku mundirafa kuqiranakiqari findi finau, mina findifirafa maasa kuqirausa findifirana qima afeekaikidanoo mapukidanoo. Doo kuqaa maridanoo.
1CO 15:21 Ooqai indaaru moodaa fasiqannai kai kuqirana kambiqanau, miqi kai inoo moodaa fasiqannai kuqiranakiqari findifirafa kambiqanau.
1CO 15:22 Maasa aiqama fasiqa anaasee Adamana faiqi namu marunnanara kuqidaqa, miqikai inoo asauku mundirana faiqi namu marianara Anutufa misa kuqiranakinaana uqeera quqaannoo.
1CO 15:23 Sia dapi dapi Anutufa kuqiranaki uqeeraannoo andeeqaseenoo mara findifuannoo, asauku mundirana naaree doo mara findifumaqoofanoo maridanoo miqooqari mifa quminna aukuana mina aiku asauku mareeqee findifuma nimaqaannoo.
1CO 15:25 Anutufa narí asauku mundirana mapuku amaqaseenoo qimaminau. Anee aiqama ainainasaa rakisimaree fimarinaqa qinee Anutusa aiqama namuqaa afaannainaina mareeqeeqa ani asauku mundirana aramandunnai quqasaanana anee maqa mammaaqai radamusainaqa kaifaa rakisianauranoo.
1CO 15:26 Inaaqianna radamuaninna namuqaafa kuqirafa maridanoo mina faqa radamuannoo.
1CO 15:24 Miqoo taikarafa kambiqaannoo Asauku mundirafa afaannauqa uriqararausa faqa misa faiqí firaasa faqa misa afeeka fasiqauqa aiqama mareeqeenoo narí aramandunnai quqaseenoo radamuseenoo narí ququsakinaasa aiqamausa mareeqeenoo narí akoona amiannoo.
1CO 15:27 Tamummaqara fasiqausa akarakinaafa minara maaqimminoo maridanoo. Anutufa aiqama ainaina mina aramandunnai kai quqaannoo fee qidanoo. Tamummaqara fasiqa minara miqi qimasoofaqa qinee minara maaqi qidaqa. Anutufa aiqama ainaina mina aramandunnai quqararee qidanoo sia nariarau mina aramandunnai quqararee qidaqinoofau.
1CO 15:28 Anutufa aiqama ainaina mareeqeenoo asauku mundirana rakisirana ameemaanai quqasainanoo asauku mundirafa mina amaaku fannoo quandaki Anutuna aramandunnai narí keeqaannoo, aiqama ainaina quqoona aramandunnai keeqafinanoo miqooqari Anutufa aiqama ainainatia uqanna uriqararafa mariannoo. (Pauroofa maru aukuanna faiqí moo fannoo Yisuna ufa irimarufa sia nammari mararai kuqufufanoo moo fannoo qaara kari nammari maree marinau. Mifa nariara faqa kuqunara faqa maree marinau. Mi aukuanna mi oosannara Pauroofa qimannimirara maaqi qinau.)
1CO 15:29 Inni Koorinti maqannaasaki kuqirausara nammari maree marusara misara naqi fee qianauree. Kuqirausa kuqiranaki sia findifuafaqa innee nanaree fifau misaree qimasaida fifau nammari maraidee. Innee yanee dadaaqidee miqidee.
1CO 15:30 Maasara faqa iriaqa maasa Yisuna ufa saara aiqama faasaana moomoo kari aupurarana narirana eerairirana maraidaqa.
1CO 15:31 Qini qikaqaafasaa, qinee aiqama faasaana kuqiranara aniraannoo qidaqa eerairidaqa. Qinee sia kaiqeesa maana koorooidaqa. Innee maasa karaambaiqa asauku mundirana Yisunaki fimarianara nimooidaqa minara kai kooroomannimidaqa. (Pauroona aukuana Roomma maqannaasa sia Yisuna ufa irimariasa nári oosana maraidaqa faiqí anaasee qafaifanoo adiafaa ianifee qimasee ooni faandamuraki faiqí faqa kaasau aandau faqa mara quqasoofaqa rakimariqau. Yisuna ufa irimaru ufafa taikaanifeera mara quqasoofanoo kaasau aandau naru neemarinau. Pauroofa minara iriseenoo Koorinti maqannaasa qimannimidanoo mina kikiqusimarinau. Koorinti maqusanaasa maa ufana qimanniminoo qinau.)
1CO 15:32 Qinee Pauroosa Eefeesusa maqusai kaasau aandaura foora marufaqa misa faqa rakimariqiafana. Kuqirausa sia kuqiranakiqari findififaqau qinee maaqoo Eefeesusa maqusai mi fasiqausa faqa rakidaqa nana ainainee maraanauree qimasee misa faqa rakiqiafana, fifau maaqoo maria fasiqaanaaseesa qiqafaaqee qimasee fee rakiqiafana. Oo sia miqi qiafana. Kuqaa kuqiranakiqari findi fuanauree qidaqa miqi qiafana. Faiqí firaasa unna ufa moo minara maaqimminoo maridanoo. Duna maasa kuquannanara maqee narana nammari moomoo naa. Qinee Pauroosa minara maaqi qidaqa. Kuqirausa kuqiranakiqari sia findififaqau anoonammifooqini, findififaranoo unna qimariafanoo.
1CO 15:33 Innee sia mi unna ufana iriaqa, Moo amaana ufa minara maaqi qidanoo, Mandoosana maree maria aqoondisa inni marirana putaamma nimaqeefaranoo.
1CO 15:34 Innee Koorinti maqannaasaki akaqausa kuqirausa sia findifi maria ufana qimariasa inni putaamma nimaqaifaqa innee misa mandoosana maraseeqa furufarirana maree mariafanoo. Innee mina minnisee kafaa andeeqara irirana marasee inneeqa mandoosana quqasee andeeqaramau fuaqa. Inneeqa nisauruaqa innikiqari akaqausa Anutuna afeekara sia amiqimasee iri marifanoo kaqi meeramau irirana irimariafanoo.
1CO 15:35 Inniki moo fannoo kuqirausa findi firanara maaqi qiannoo, kuqirausa doo putaamminoo maridanoo naqimasee fee findi fifaree, nana afaaqee findi fuannoo fee.
1CO 15:36 Anee furufarimarianafa mi ufana qimariananoo. Anee nandi ummaqusainanoo sia aaqee kambiqaannoo mifa putaa mambinanoo mina uapaaqi fannoo inaaqiana kambiqaannoo.
1CO 15:37 Innee sakuma qaqama fee moo narana qaqama fee ummaqidaqa sia narana faqa amanee faqa ummaqi mariafanoo qaqama kai ummaqi mariafanoo. Ummaqusaafanoo sia qaqama kai kambiqaidanoo narana anoona namufaqa amanee namufaqa kambiqaifaqa qafee mariafanoo.
1CO 15:38 Anutufa narí iriranannai aiqama aadu aadu qaqama nári aadu aadu kambiqaaninnana anoona namufaqa amanee namufaqa nimidanoo. Anutufa aiqama qaqama andeeqasee narí kai anoona amidanoo.
1CO 15:39 Kasimari ainaina nimaqi miqi kai idanoo sia aiqama moodaa nimaqi faqaasa maridaqa. Faiqí moo nimaqi faqaasa maridaqa aandau moo nimaqi faqaasa maridaqa, ufini moo nimaqi faqaasa maridaqa, noodaanna moo nimaqi faqaasa maridaqa.
1CO 15:40 Innaarunaindaraa nifaaqa faqaasa faqa maqasaaqaraa nifaaqa faqaasa faqa aaduma maridaqa. Innaarunaindaraa nifaaqa areenarafa moo maridanoo maqasaa qaraasa nifaaqa areenarafa moo maridanoo.
1CO 15:41 Suani afu narí areenarafa aaduma moo maridanoo, quqoona narí areenarafa aaduma moo maridanoo, fasau narí areenarafa aaduma moo maridanoo, fasau misaki faqa aadu aadu areenarafa maridaqa.
1CO 15:42 Kasooqaqee kuqirausa kuqiranakiqari findififanoo miqiminoo mariannoo. Faiqí anaasee kuqufifanoo mina iri akundee mariafa maqasaaqaraafa maqa maridanoo. Kuqiranakiqari Anutufa uqeerasainanoo mi afaaqafa naaru naaru marira afaaqa mariannoo.
1CO 15:43 Nikundee mari nifaaqafa ummooqukidanoo mandaikidanoo, kasooqaqee kuqiranakiqari Anutufa uqeerasainanoo afu qafainanoo idaaqirafa amiqirafa afeeka mariannoo.
1CO 15:44 Nikundee maria nifaaqafa maqasaaqaraa nifaaqa ufaasu marifa maridanoo. Anutufa uqeerasainanoo naaru marianinna innaarunai nifaaqa mariannoo. Maqasaa nifaaqa ufaasu nifaaqa maaqoo mariana amana kai marifa maridanoo. Mifa marinanoo innaaruna naaruara marira nifaaqa amana kai marifa kuqaa mariannoo.
1CO 15:45 Tamummaqara fasiqauqa akara minara maaqimminoo maridanoo. Indaaruqaa fasiqa Adamafa kasimaruna auquqoofa marinau. Qinee Pauroosa minara maaqi qidaqa. Adamana aanaaqiannaa fasiqa Yisufa maqee marirana faqa naaru marirana faqa nimimari maraqunafa maridanoo.
1CO 15:46 Sia naaru marirafa naaru kambiqaidanoo maqasaaqaraafa naaree kambiqaidanoo, miqooqari kai naaru marirafa kambiqaidanoo.
1CO 15:47 Indaaruqaa Adamafa maqasaaqaraa kookoomannai auqirafa marinau. Inaaqianna Adamafa Yisufa innaarunaindari quminau.
1CO 15:48 Maqasaaqaraasa nári nikoona Adamana fooqaasa maqa nifaaqafaqaasa maridaqa. Innaarunai fimariasa innaarunaindaraa fasiqa Yisuna afaaqaikirausa marifaranoo.
1CO 15:49 Maqee maasa maqannai auqira fasiqa afaaqa afisiqa moodaa karammiqa maridaqa kasooqaqee maasa miqikai masee innaarunaindaraa fasiqa afaaqa afisusee miqi kai iqa moodaa karakaimmianaura.
1CO 15:50 Oo qini qikaqaafasaa qini Pauroosa ufa anoona maaqimminoo maridanoo. Faiqí nimaqi faqaasa faqa fidika faqaasa faqa sia Anutuna ququsaki keeqafifanoo naida nimiannoo. Ufaasu maqasaa ainaina faqa sia amana naaru marirana maraannoo.
1CO 15:51 Innee amiqimmandee iriaqa, kukeeqara ufa qimannimianaura, maasa sia aiqama kuquanaura. Qusasaa uqanna Anutufa tautumaqimaqaseenoo maasa moo kamaakamma qimaqaannoo.
1CO 15:52 Nifu tasunduna tasunduna kaqi kaqi idanoo miqirafa kai inaaqianna ufireena fannoo fuaqainanoo Anutufa maasa moo kamaakamma qimaqaannoo. Mi ufireenna fuaqasainanoo kuqirausa minakiqari naaru marira nifaaqa faqaasa findififanoo maasa aiqama moo kamma qimaqaannoo.
1CO 15:53 Ufaasu maqasaa nifaaqa faqa sia kaqi ooru fifaranoo naaru marirana naaree afisumareeqa ooru fifaranoo. Kaqi mariasa kuqifandinausa misa afeeka nipata naaree afisumaree amana innaarunai ooru fifaranoo.
1CO 15:54 Ufaasu maqasaaqaraa nipata faqaasa kuqifandinausa naaru marira nifaaqa sia kuqimaria nifaaqana afisumareeqa doo miqoo ooqeenaasa akara anoona kambiqaannoo. Misa maaqi qiqau. Anutufa doo kuqirana aiqama nambiqama taikaseenoo mina uraaqaranoo maridanoo. Kuqirana rafaaqafirafa doo taikeenoo. Kafaa moo akarakinaa ufa minara maaqi qidanoo.
1CO 15:55 Oo kuqirafa maasa rafaaqafimarianafa ani uriqarara afeeka yaifee maridanoo. Doo taikeenoo. Oo kuqirafa ani aupurara afeeka maasa qimimarianafa yaifee maridanoo. Doo taikeenoo.
1CO 15:56 Akara miqinoo marifaqa qinee Pauroosa minara maaqi qidaqa. Maasa aiqamausa mandoosana fannoo kai aupurara afeeka kuqirana amifanoo doo kuqirafa maasa daridanoo. Kafaa mandainaina fannoo mina narira afeeka Anutuna nimaarusira sandufakiqari kambiqaidanoo.
1CO 15:57 Oo Anutufinnai dufi dufi qidaqa. Maasa inni saimbaqa karaambaiqa asauku mundirana Yisunannai kuqirana faqa mandainaina faqa maasa uriqaraqa maridaqa.
1CO 15:58 Oo qini qikaqaafasaa doo minara iriseeqa sia kasi kasiaqa mapukuseeqa atukaraqa mariaqa. Karaambaiqa marirana nirana mariana maqee maqee minaki kai noori runusee mariaqa. Karaambaiqa marirana niranaki marianara aiqama saika naaru marira anoona marifa maridanoo karaambaiqa marirana nirana sia moo fannoo anoona siaifa maridanoo. Anoona marifa kai maridanoo.
1CO 16:1 Oo Koorinti maqannaasa innee Yudeea maqa maaqaki Anutuna saika maree mariasa narana sarauqi marianara munnimma kaqi nimiranara qini iraafaqa minara inni qimannimidaqa. Qinee Karatia maqa maaqaki Yisuna ufara suqimarusa qimannimiafannaqoo miqoo kai fuaqa.
1CO 16:2 Aiqama amaana faasaanasaa aiqama fasiqa anaasee akaqa munnimma aaduma raina quqaaqa. Narí ainainirana akiaqara munnimma firaana marainafa mina amana kai kaqikaana quqaani kaqikaana marainafa doo narí maraina amana kai kaqikaana quqaani, qambaana amana marainafa doo mina amana kai quqaani, innee aiqama amaanasaa amaanasaa miqikai idaqa raina quqeesaifanoo innooqafinaqa qinee inni maqusai oonuraanna kari munnimma suqirana sia mariani doo faasai suqinoo mariani.
1CO 16:3 Innee maqee andeeqara fasiqauqa mara quqasaifaqa qinee oonuraanaqa mi munnimmana faqa pasakina akara rumasaanaqa misa mi pasana faqa mi munnimmana faqa mareeqa Yeerusareenni muru kaqi nimiaqa.
1CO 16:4 Innee qiniara faqa ooru fuannee qifaqa qini faqammooru fifaranoo.
1CO 16:5 Qinee maaqooqari Maseedoonia maqa maaqakina oonuree aniree iqa ninii taikasee innee mariannai fuanaura.
1CO 16:6 Inni maqusai oonureeqa kaqi kaaqoo kisaaqasaa inni faqa marianauree, aukuana aiqaramafinaqa qambaanasaqa suara aukuana qaaramoo quqoona inni faqa marianauree. Doo miqooqari moosaa fuanaura yaifee fuanauree maqee sia iridaqa.
1CO 16:7 Karaambaiqa eedoo qinnanara kaqikaaqoo kisaaqasaa inni faqa marianauree qidaqa. Miqoo inni fi inni nindafee firanara qidaqa.
1CO 16:8 Qinee maqee Eefeesusa maqusai kaqi marianaura. Yeerusareenni Yuda maqannaasa qoomaqa suqanee maru quqoonafa anirainaqa qinee minasaa Eefeesusa maqusaindari Maseedoonia maqa maaqaki ooruree minni oonuree aniree masee miqooqari innee iannai Koorinti maqusai fuanauree qidaqa.
1CO 16:9 Maqee Eefeesusa maqusai maaqoo firaa saika anoona saika maridanoo, moomoosa qini ufa ititee mariasa mariafaqa saikidaqa.
1CO 16:10 Qinee Timootinara qimannimianaura, mifa inni maqusai oonurainaqa innee mina amiqi amiqimmasaifanoo afaaqa quqaani, mifa qini daanna ree marifa karaambaiqa ainainiranaki marifa maridanoo.
1CO 16:11 Timootifa Yisuna ufa irimariasa qini qikaqaafasaauqa saimbaqa mootinai aiquqaki mai aniraree qimasee inni maqusai naaree anireenoo mai qinee minara rakisi marunnannai Eefeesusa maqusai anianifeera qidaqa. Innee Timootinara kumaaraa fee qimaseeqa sia minara nikoo nikaa iaqa amiqimmandee dadaaqifanoo asooaranakiqari findifinoo mai aniani.
1CO 16:12 Doo maqee maasa qikaqa Apooroosanara qianauranoo. Qinee innee iannai qikaqaafasaauqa faqa namummaqee fiqa anianneera qidaqa fuki faaki qunanoo sia fidanoo ititammasee kaqi maridanoo maqee sia fuanauree sia andeeqara aukuanee qidanoo. Kasooqaqee andeeqara aukuana kambiqafinanoo fuannoo.
1CO 16:13 Inni Koorinti maqusanaasa maqee maa ufana qimannimianaura. Innee maqee maqee aufarida mariaqa, innee Yisuna saqarikiranaki minaki mapukufina kikiqammambuaqa innee maqee maqee paasoosida mariaqa, afeekaikiqa mariaqa.
1CO 16:14 Inneeqa maridaqa aiqama nirana marirana nimuqusi marinaqa narí dadaaqi narí dadaaqi qiqanuaqa.
1CO 16:15 Innee Sateefanasana faiqi anaasee aiku asaukuara irimariafanoo, misa Akaia maqa maaqakiqari oosanarasee Yisuna saqarikusa mariasa maridaqa. Misa Anutuna ufa irimariasa ainainamma nisee mariasa maridaqa, narí faiqi anaasee faqa nári marirana minaki kai nifaaqa quqasee auqaidaqa. Oo qini qikaqaafasaauqa inni qimannimidaqa. Miqinna fasiqana aanna reeqa mina ufamau fuaqa, akaqausa misa dadaaqimariasa misa ufamau faqa fuaqa.
1CO 16:17 Mi fasiqafa Sateefanasafa faqa Fooratunatusafa faqa Akaikusafa faqa misa mai aniroofaqa nindafaida asasiqiafana, misara inni Koorinti maqusanaasa ani ani anireera foora qufaqa asasiqiafana.
1CO 16:18 Misa inni asasirana nimimariandee kai iqa qini qimiqau. Miqira fasiqauqara aiqamausa iriaqaana.
1CO 16:19 Asia maqa maaqaki Yisuna ufara suqimariasa misa inni nimandaidaqa. Maaqoo Akuirafa faqa narí anaaqa Pirisikira nammarifa faqa nári maaqaki Yisuna ufara suqimariasa faqa inni firaaqoo amiqimmandee Yisuna ufa irimariasara foora inni nimandaidaqa.
1CO 16:20 Maaqoo mariasa Yisuna ufa irimaria qikaqaafasaauqa faqa inni nimandaidaqa. Innee nariara nariara nikaqafasaa fee qimasee narí amooqee narí amooqee iaqa.
1CO 16:21 Faiqí moo fannoo qini dookinaana iriseenoo maa pasana akara rinau, maa qusa ufana atisaa qeeqa qisaukunnai akara ruanaura. Qinee Pauroosa inni nimandaidaqa.
1CO 16:22 Karaambaiqara sia amuqusimarinafa aqurarara ufa minasaa mariannoo. Nári ufakiqari maranata, maasa ufakiqari maasa karaambaiqa qumuannee qidaqa.
1CO 16:23 Karaambaiqa Yisufa narí afaarira oosana inni faqa nimiani.
1CO 16:24 Maasa aiqamausa asauku mundirana Yisunaki mariasara irisee qini qimuqusirafa inniki mariani.
2CO 1:1 Anutufa qufaqa qinee Pauroosa asauku mundirana Yisufa niqiqoo fasiqausaikamambi marunausa maridaqa. Qinee qeeqa qikaqaafasaa Timootisandiri maa akarana rumannimaqeeqa. Innee Koorinti maqannaa Anutuna ufara suqimariasa faqa aiqama Akaia maqa maaqaki Anutuna ufa irimariasa faqa inni aiqama nimandaidaqa.
2CO 1:2 Anutuna asauku mundirana maasa karaambaiqa Yisuna faqa narí akoona Anutuna faqa miqanda amiqi amiqira afaarirana faqa naundura asooarana faqa inniki mariani.
2CO 1:3 Asauku mundirana innisaimbaqa karaambaiqa Yisuna akoofa Anutufa minara maasa aiqamausa dufi dufi qimamaqaaqa, innisaimbaqara amuqusimari qikoofa innisaimbaqa qifaueemarifa maridanoo, aiqama dadaaqirafa mifinnaindari qumimarifa maridanoo innisaimbaqa mina kai dufi dufi qimamaqaaqa.
2CO 1:4 Innisaimbaqa qeeqa daundura ummaaraki marunnana Anutufa mi ummaaranaki dadaaidanoo. Innisaimbaqa oosana oosana ummaaraki mariasa Anutufa innisaimbaqara misa dadaaqiaqee qimaseenoo innisaimbaqa naaree dadaaqinau. Misa dadaaqidaqa Anutufa innisaimbaqa dadaaqirana qimuna mina kai maasa qumaree quandaki minannai dadaaqidaqa.
2CO 1:5 Asauku mundirana moomoo aupuraranaki marufaqa maasa faqa minaki marunanoo aupurarana maasa faqa naida qiminoo. Miqi kai inoo asauku mundirafa narí dadaaqirana faqa firaaqoo maasa naida qimifaqa.
2CO 1:6 Maasa Yisuna ufasaara aupurarana maraidaqa sia fifaufau maraidau, inni dadaaqirana faqa innaarunai asumu marirana maraaqeera aupurarana maraidaqa. Asauku mundirafa maasa dadaaqifaqa maasa minasaaqaraana qumaree inni faqa dadaaqidaqa. Innee maasa maroo aupurarana maraseeqa minaki ubiqafiqa maraqa fuaqeera dadaaqidaqa.
2CO 1:7 Innee maasa aupurarana ati maroondee kai iqa maasa Yisufinnaindaraa dadaaqirana ati faqa mareefaranoo. Maasa minara iriseeqa maasa irirafa innisaa mundinoo maridanoo sia minnisaananoo maqasaa aqufuanoo.
2CO 1:8 Maasa Asia maqa maaqaki fiqu fiqu imariafananoo firaa aupurarana qimufaqa minara inni naaqoo auqaida qimannimidaqa. Mi aupurarafa firaaqoo ummaara qimufaqa maasa doo maqee kuqirarammidaqee qiafannana.
2CO 1:9 Maasa misara kuqa darira ufa doo qima afeekaikiaafoo qunaqa sia daria. Mi qimaarusirafa sia fifau kambiqeenoo Anutufa qumee dadaaqunara miqimmasoofaqa sia qinee qeeqara afeeka fasiqafee qianaura qeeqa iriranara Anutunasaa kai munduanifee qimaseenoo qumee mi qimaarusiranara kambiqaanifee qufanoo kambiqanau, kuqiranakinaana uqeeree marifa dadaaqufaqa minakiqari maridaqa.
2CO 1:10 Mifa firaa qimeekaranakinaana maasa uqeereeqee qisaifaqa maridaqa kafaa miqi kaimmiannoo. Mifa kafaa maasa minakinaana uqeereeqeenoo quqaqisaifaqa sia rufiaida minara irirafa minasaa rusinoo maridanoo.
2CO 1:11 Miqi marinara innee moomoosa maasara innaaru qifanoo Anutufa maasa amiqi amiqima qisainaqa moomoosa mina qafamasee quandaki Anutufinnai dufi dufi qifaranoo.
2CO 1:12 Oo Koorinti maqannaasa maasa maqusa maqusa nidaqa inni faqa mariafananoo qini daakirafa irirafa maaqimandee qimaqimidanoo. Maasa inni faqa mariafananoo sia faiqí irirafa maasa uqaqifiqanau. Anutufa dadaaqufaqa narikinaana akooqoo anoona ufa faqa noori runusee auqarafa faqa, Anutuna afaarira amiqi amiqira afeeka faqa mifauqa kai rakisiqimaqee marifaqa inni faqa maridaqa minara maasa irisee nasuridaqa.
2CO 1:13 Maasa innee asaana rimariana faqa irimariana faqa amana kai akara rumannimaqaidaqa.
2CO 1:14 Maqee innee akaqainaina innee sia amiqimmasee irimariafanoo. Mi ainainausara amiqimasee iriaqeera dididanoo. Innee mi ainainausara amiqimasee iriseeqa, karaambaiqa Yisufa qumuaninna faasaannasaa maasa inniara nasurifandinnandee kai iqa innee maasara nasurifaranoo.
2CO 1:15 Qinee minara iriseeqa kuqaa kambiqannoommifoo qimasee qaara kari inni maqusai oonuree qaara kari idaaqamannisararee qimasee sia fiqa.
2CO 1:16 Qinee maindari Maseedoonia maqa maaqai fidaqa innee iannai fi ninda fee firaree qiqa kafaa mindari anidaqa ai nindafararee qimaseeqa sia fiqa sia nindafeeqa. Yudeea maqa maaqai ooru fidaqa inni dadaaqirana maraanauree qimaseeqa innee iannai sia fiqa.
2CO 1:17 Qinee firara qunnanara innee qiniara furufarirafee fee qidee, innee qiniara narí aidiramau kai fidanoofee fee qidee qinee innee iannai firara qunnanara innee qiniara qaaraiki marifee fee qidee.
2CO 1:18 Anutuna afusaa marida innee iannai firara sia qaara irirafa qiniki maridanoo.
2CO 1:19 Asauku mundirafa Yisufa Anutuna amaakuara Sirasifa faqa Timootifa faqa qinee Pauroosa faqa qimannimimarunnana sia mifa qaara irirana faqaafa maridanoo, mifa Yisufa maqasaa fasiqa maasara sia qaara ufa qimarifa eedoo kai qimarifa maridanoo.
2CO 1:20 Mifa kai Anutuna moomoo ufa maasara qima afeekaikamasee mapukirafa maridanoo. Minara faiqí anaasee Anutunara amooqida innaaru qidaqa asauku mundirana Yisunannai maasa Yisuna ufa irimariasa aiqamausa eedoo qimasee inni dadaaqidaqa.
2CO 1:21 Anutufa narí uqanna inni saimbaqa asauku mundiranaki marinara dadaaqifaqa innisaimbaqa minara kuqaa anoonee qidaqa. Mifa innisaimbaqa narí saikaki mara quqararee qimaseenoo narí asauku innisaimbaqasaa munduseenoo utaaqamaseenoo naríndi fee qimaseenoo narí naaquqara andeeqara maraquna maasa qimuqusa ooki quqaseenoo kasooqaqee innaarunai nimira ainaina ati kai maqee uqannifiqaidanoo kasooqaqee innaarunai anoona firaana nimiannoo.
2CO 1:23 Qinee Anutuna afusaa maridaqa mifa qini qimuqusaki irimarifa marifaqa sia unna qimasee maaqi qimasee qimannimianaura. Qinee Asia maqa maaqai oonuree aniree masee inni Koorinti maqannaasaki sia fiqa. Nisaurirana nimianoo qimasee qeeqa kai sia fiqa.
2CO 1:24 Maasa sia inniara miqimmasee maaqimmasee qiaqee qidaqa doo innee mapukusee Yisuna saqarikiranaki mariafanoo, innee sia nisaurirana maraaqeera asasiranaki mariaqeera dadaaqidaqa.
2CO 2:1 Qeeqa irirana maaqi qimasee iriqa. Sia qinee nisaurirana nimiqa misiannai kaifaa fuannee qiqa.
2CO 2:2 Qinee nisaurirana nimiananoo yafee quandafi asasirana qini qimiannoo fee sia moo fannoo asasirana qimiannoo qiqa ufasaara noori runimariasa kai maridaqa aiqama noori runusee marifoora.
2CO 2:3 Minara qinee mi pasana akara rumannimaqeeqa. Qinee qini asasamma qisainausiannai oonureeqa noori runirana nimianoo qimasee pasa kai akara rumannimaqasaanaqa innee inneeqa aaqara oosana andeeqasaifaqa qinee ooruraanaqa innee asasiranaki marifanoo innee qini qifaaqa faqa asasifaranoo.
2CO 2:4 Qini qimuqusa firaaqoo uqanna inniara qimuqusifaqa ikiraqaidaqa akara rumannimaqeeqa, sia inni nifaaqa rumbaanifeera akara rumannimaqeeqa qeeqa firaaqoo inniara qimuqusinara iriaqeera akara rumannimaqeeqa.
2CO 2:5 Inni Yisuna ufa irimariasakiqari faiqí moo fannoo narí aaqaranannai inniki moomoosa nifaaqa rumbarana niminau sia qifaaqa rumbarana qini qiminoo inni nifaaqa rumbarana nimiqaifaqa qinee nisaurirana firaana nimianoora minara sia nifaaqa ritianauranoo.
2CO 2:6 Doo innee moomoosa aaqamaqoo fasiqana Yisuna ufara suqiranakiqari aqiqamasoona arirafa doo amanaikamambinoo doo narí mandainaina minniseenoo doo innee mina mandainaina akiaqara minni aisasee idaaqamamaqaaqa, innee sia miqifanoo firaaqoo akooqainanoo Yisuna ufa minni uqannaseenoo kaasau uqaandoora.
2CO 2:8 Inneeqa mi fasiqanara kuqaa nimuqusianara oonu qimamifanoo iriani.
2CO 2:9 Minara kai qinee mi akarana rumannimaqeeqa. Qinee inniara naamua qunna ufana irifaree sia fee irifaree qimasee nimanamandee qafarara pasa akara rumannimaqeeqa.
2CO 2:10 Innee Koorinti maqanaasa mi fasiqana mandainaina akiaqara minnisee moodaanaki kifaqa qinee faqa mina mandainaina minnisee mina faqa moodaanaki kianaura. Innee moo mandainaina mandaikamma qimaqoonara qinee inni minniseeqa, mikari moo mandaikamma qimaqaqau fee sia fee miqimma qimaqaqau fee minara qinee asauku mundirana afusaa marunausa inniara irisee minninisaidaqa.
2CO 2:11 Maasa Sadannana mandiriranara iridaqa mifa maasa uridaaqaraandoora mandainaina maraana akiaqara mininniseeqa kafaa moodaanaki kiaqa.
2CO 2:12 Qinee Pauroosa Asia maqa maaqaki fiqu fiqu idaqa Tarooasa maqusai oonureeqa asauku mundirana amiqira fasaasa ufa qimannimiraree qiafananoo Karaambaiqa faasai kooqi atuqeenoora maqi inoo marufaqa mi maqusanaki saika amiqimasee firaaqoo uqeeraqiafana.
2CO 2:13 Miqoo maridaqa maasa qikaqaafasaa Titusafa inni maqusaindari ani ifoo qimaseeqa randaidaqa sia paquriafannanara qimuqusa mandaikufaqa miqooqaraasa nimandamasee Maseedoonia maqa maaqaki minara randarara fiqiafana.
2CO 2:14 Oo Anutunara dufi dufi qiaqa. Innisaimbaqa asauku mundirana faqa moodaanaki kamambi maridaqa minakiqari Anutufa narí narunakinaana Anutuna asumu firiara foora innisaimbaqa nifiqee asauku mundiranara kaanina mareeqa idireeqa maree maqusaira foora miniqaasa rakiranara foora uriqararausa maridaqa. Miqooqari innisaimbaqa Anutufa mareeqeenoo asauku mundirana ufa amiqira afundara foora nimifaqa aiqama aanaamurunni daraaniqa qimannimiqa nidaqa. (Ooqai Pauroona aukuana Roomma maqannaasa sundiauqa faqa misa karaambaiqauqa faqa namuqaa maqusai oonureeqa misa naruseeqa misa ainaina faqa faiqí kaakadi narirausa rumbamareeqa nariqa maqusai nifiqamaree fiqau. Nariqa maqusa adeedi oonureeqa padi mafufaqa nári indaaru fiqa rumbaqoosa ootupa ootupa rumbara rumbaseeqa nifiqee narirara maqusa qambaanai narirara nifiqee fiqau. Rumbarausa ninaaqiana afundi maru ainaina ida muquru mareeqa fimarufanoo mi afundafa misa qambaanamma afundi marinau. Mina anaaqiana sundia firaafa Karaambaiqa misa sufafaqa maree finau. Rumbaqoosa mi afundanara maasa kuqunna afundafa qidanoo fee qiqau. Sundiauqa faqa kaiqeesa faqa mi afundiranara amiqira afunda fee qiqau.)
2CO 2:15 Pauroofa minara iriseenoo Koorinti maqannaasa nariara maaqi qimasee qimanniminau. Maasa faiqí anaasee qambaanai fidaqa asauku mundirana ufa amiqira afundara foora uqirausa nidaqa akaqausa mi ufana irimariasa asumu mariranaki fifaranoo, akaqausa mi ufana sia irimariasa kuridiranaki fifaranoo.
2CO 2:16 Kuridiranaki fifandinausa mi ufana mi afundirana udiramasee faiqí kuqa narimaria manda afundanafee qidaqa. Asumu mariranaki fifandinausa mi afundana udiramasee naaru marirana maree maria afundanee qidaqa. Minara irisee nana irirana faqaa fee maa saikana amanaikiannoo fee.
2CO 2:17 Maasa amana mi saikana maraanaura. Akaqausa Anutuna ufara fifau oorudupira ainainee qimasee minasaaqaraana manda munnimma maraidaqa. Miqi qimariasa sia mi saikana amana mareefaranoo. Maasa sia misa naanna raidaqa. Anutufa maasa mi saikanaki diqiqoosa marunnanara mina afusaara foora maridaqa asauku mundirana ainainira faiqi maridaqa noori runusee faiqí anaasee qimannimidaqa.
2CO 3:1 Maasa sia qeeqa qimooqidaqa anoona ufa kai qimannimidaqa. Maasa innee inannai fiqa sia akaqausa naanna reeqa moona akara mara maree inni munu uqannifiqasee inni faqa suquanaura. Maasa inni maqusaindari moosaa fiqa sia inniara pasa akara rumaqimifaqa maree fuanauree qianaura.
2CO 3:2 Innee Koorinti maqannaasa maasa akarara foora sia papiqasaa akara rinoo maasa qimuqusasaa akara riara foora iqa mariafanoo, aiqamausa asaana rumasee iriaqeera akara rinau akooqoo maridanoo.
2CO 3:3 Asauku mundirafa narí uqanna mi pasana akara ruumbeeqee maasa qisaukuki quqasaifaqa inni nimiqa. Sia Mooseefa maru kamuqoo iundee kai idaqa sia kirifinnai oonisaa akara rinoo maridanoo. Kaqi marira Anutufa narí maraqunannai faiqí faiqi maasa qimuqusasaa akara rinoo maridanoo.
2CO 3:4 Maasa irirafa asauku mundiranasaaqari Anutunasaa mundinoo marinara mi ufana qiqa.
2CO 3:5 Sia maasaki moo afeeka marifaqa maasa maa saikana amana maridaqa, maasa afeeka Anutufinnaindari kai qumuree maasa uqeeraidanoo.
2CO 3:6 Mifa mi ainainirana amanaikirana qimifaqa kai narí fuka moodaanaki kira ufa mi saikanaki maridaqa. Mina fuka moodaanaki kira ufa sia nimaarusira ufa akara riranasaa mundinoo maridanoo. Anutuna naaquqara andeeqara maraquna faiqí naunduraki marina minasaa mundinoo maridanoo. Mooseena sandufa akararufa mifa kuqirana kai nimidanoo, Anutuna maraquna fannoo kaqi marirana nimidanoo.
2CO 3:7 Ooqai Anutufa Sinai aaqanasaa narí sandufa Mooseena qimamidanoo qaara ooni marasee minasaa akara rumaminau. Akara rumamidanoo narí Anutuna kaaqa areenarana kooroomambufanoo Mooseena oori afiri faqa kaaqa qamafufaqa Isaraee maqannaasa mina oori qafoofanoo nifu daroo daraa ufaqa rufiaqau. Marinoo Mooseena ooriki kaaqa qarafa kasooqaqee taikamaree muqufi taikanau. Ooqai Mooseena sandufa faiqí kuqirana nimimarifa kaaqa areenaranakina ani ufa marufanoo maqee kamu Anutuna naaquqara andeeqara maraquna fannoo kaqi marirana nimimarifa mina kaaqa areenarafa firaaqoo uriqararafa maridanoo.
2CO 3:9 Narira ufa ameemaanai quqeemariafa firaa kaaqa areenaranaki ani ufa marinanoo Anutuna andeeqaranaki quqee marifa mina kaaqa areenarana amana kai fee mariannoo fee sia amana kai firaaqoo uriqaranoo maridanoo.
2CO 3:10 Maqee maasa Mooseena sandufara maaqi qidaqa. Maqee maria kaaqa areenara ainaina fannoo firaaqoo daroo daraa idanoo doo nauraa areenarana rafaaqafusaifanoo doo mifa aiqareenoo.
2CO 3:11 Mooseena sandufa qusasaa maru ainainafa mina areenarafa firaafa marinanoo naaru naaru marira ainaina areenarafa firaaqoo uriqaranoo maridanoo.
2CO 3:12 Maasa mi naaru marirafa anianinnanara asasamandee afeesidaqa paasoosamandee Yisuna ufa qimannimidaqa. Maasa sia Mooseena aanna reeqa qamunna qummaree nikiaqasaa afisusee oorisaa areenarana rafaaqafidaqa. Mooseefa qamunna qumareenoo Isaraee maqannaara narí ooriki takukandaa rimarina mina taikee marina qafeefoo qimasee qamunna oori afisinau.
2CO 3:14 Mi aukuanna Isaraee maqannaa irirafa doo ititanoo marufaqa sia Anutuna ufa oosana iriqau. Mi kamuqooqari ani ani ufaqa maqee kamuqoo kaqi mi qamunnafara foora misa irirafa ititanoo marifaqa ooqeenaa moodaanaki kira ufa asaana ridaqa sia mina oosana iridaqa. Faiqí asauku mundiranasaa atooqafinanoo kai miqoo kai mi qamunnana fooqaana rafaqaa iannoo.
2CO 3:15 Isaraee maqannaa doo maqee kai Mooseena sandufa asaana ruafanoo mi qamunnafa kai misa irirana ititannimaqaidanoo.
2CO 3:16 Mi qamunnana rafaqaairafa tamummaqara fasiqa ufamau kai kambiqaidanoo. (Ooqai Mooseefa Isaraee maqannaasa Isipa maqusaindari nifiqamaree Sinai aaqana ameemaanai oonureenoo Anutuna uiqaana maqa usakanau. Mooseefa mi uiqaana maqana usakanau. Mooseefa mi uiqaana maqanaki keeqafinoo Anutuna faqa ufa qi qiufanoo rafudamafufanoo maqusai faiqí anaasee maruqoo misa faqa ufa qirara ufannoo ooriki qafoofanoo oori takukandaari marinau. Ufa takaseenoo kaqinni fufanoo ooriki takukandaarirafa ireeda kai rukeemarinau. Faiqí anaasee mina rukarana qafee maqi qimasee qamunna oori akuamaqee marinau. Kaifaa uiqaana maqaki Anutuna faqa ufa qirara keeqafinoo rafaqaa imarinau.) Mi tamummaqara fasiqafa minara maaqi qinau. Mooseefa kaqinni marufanoo qamunna oori rafaaqafinoo marinau. Anutuna uiqaana maqaki keeqeenoo karaambaiqa innai oori ubeekeenoo mi qamunnana rafaqaa inau.
2CO 3:17 Akara fannoo karaambaiqara qidanoo Anutuna maraqunara karaambaiqee qidanoo. Karaambaiqa maraquna mariqoo sia ititarafa maridanoo idukirafa maridanoo.
2CO 3:18 Doo maasa aiqamausa doorisaa qamunna rafaqaa irausara foora maridaqa karaambaiqa kaaqa qareenarafa innisaimbaqa doorisaara foora kaaqa qameeqeenoo aiqamai daroo daraa idanoo. Innisaimbaqa miqimammaree fidaqa Anutuna maraquna fannoo innisaimbaqa karaambaiqa fooqaanaikamma qimaqanoo fidanoo fimarifanoo innisaimbaqa areenarafa firaanaikinoo fidanoo. Karaambaiqa Anutuna maraquna saika maridanoo.
2CO 4:1 Anutufa maasa mandoosana akiaqara dariraru sianoo narí nifauarana qimisaifanoo marinara maasa namu Yisuna aufakiana qimannimiranaki quqaqisaifaqa nidaqa sia nikoonikaa idaqa sia kudoosaapaidaqa.
2CO 4:2 Maasa namu asukunaki nimaria oosana nisaurira oosana faqa doo mareeqee ninaaqiannai aqusee nimeesuqusee sia unnamaanna qidaqa sia nikaruqiranaki nidaqa kaqi akoomau faiqí nifusaa nidaqa. Maasa Anutuna ufa qumaree sia munu eendi mini eendidaqa anoona ufa qirana kai uqeereeqee akooqoo nifusaa quqaidaqa. Maasa miqi kaimmaseeqa qeeqa nirana marirana Anutuna afusaara foora miqi kaimmaseeqa aiqama maqannaasa nifusaa andeeqaanaqa misa naakirafa qiqafamasee sia qaoo qifarannoo.
2CO 4:3 Maasa amiqira fasaasa ufa qimannimunaqa akaqausa sia iriasa innaaruna aanara randaidaqa auiqeera foora iasa marianara naaqooki ooni ititanoo maridanoo. Mi naaqoonaki ooni ititarausa maa maqanasaa manda afaanna Sadannafa misa naaqoo nifu ititaqaifanoo Anutufara foora moodaa karirafa asauku mundirafa mina kaaqa areenarana amiqira fasaasa ufa qoomara foora aninaqa misara sia qafaaqee qimasee naaqoo nifu ititeenoo.
2CO 4:5 Maasa namu sia qeeqara qidaqa faiqí anaasee qimannimidaqa, maasa asauku mundirana karaambaiqa Yisuna minara kai kooroomannimidaqa. Maasa namu Yisuna auqu uqeeraidaqa Yisunara inni qimannimidaqa inniki rumbara fasiqara foora ainaina mannisaidaqa.
2CO 4:6 Ooqai indaaru Anutufa asukunakiqari kaaqa qaranara qaani fee qufa mi moodaa Anutufa kai narí areenarana maqee maasa qitikuraki qoomara foora qeenoo. Anutuna areenarafa narí asauku mundirana oorisaa areenaidanoo mi areenarana aufakiana innisaimbaqa iriaqee qimasee Anutufa innisaimba maasa qitikuraki qoomara foora qaidanoo.
2CO 4:7 Mi areenarana aufakiana firaa munnimma aqimari ainaina fara foora marifa maasaki fifau maqannai auqira qafeera foora maasaki quqaqaifaqa sia faiqí faiqi ainainimariana amanasaa ainainidaqa, fiqararafa marunara ainainidaqa. Anutufa mi fiqaramasee ainainirana narindikai marinara akooroo ianifeera narí areenara aufakiana maasaki fifau maqannai auqimaria ainainaki quqanau.
2CO 4:8 Maasa Yisunara qimannimimarunaqa minara nikooqee mariasa dindari dindari fuseeidaqa sia amiqimandee ititaafanoo Anutufa sandara apootaana quqasaifaqa miqoo quqasee sandeeqa maasa yaifee fuanau yaifee fuanau qimasee sia kaaqa quqasee minniseeqa, misa maasa qifaqamaree fiqa sia Anutufa kuqaa minniqiseenoo. Misa daru quqasaafaqa sia kaaqa kuqiqa.
2CO 4:10 Yisuna arundee dari dari isoofaqa qini qifaaqa ufaanakuru moomoo marifaqa maraqa nidaqa maaqi qidaqa. Mi ufaana kurunannai Yisuna marirana maasa qifaaqasaa aiqamausa nifusaa kooroo ianifeera mina kuqirafa faqa ufaanakuru fannoo maasa qifaaqasaa marina mina kuqirana akooroo ianifeera maridanoo.
2CO 4:11 Maasa kaqi marunaqa Yisuna naaru marirana maasa faiqí faiqi qifaaqasaa koorooianifeera mina ufasaara kuqiranaki maqee maqee fidaqa.
2CO 4:12 Minara maasaki kuqirafa kasinara inni Koorinti maqanaaki naaru marirafa kasidanoo.
2CO 4:13 Tamummaqara fasiqa minara maaqi qimasee akara rinau. Qinee qeeqa irirana Anutuna ufasaa rusisaafannanara qimannimiqiafana. Qinee Pauroosa mi mau fidaqa qinee minara maaqi qidaqa. Maasa faqa irirana rusirafa marinara qimannimidaqa.
2CO 4:14 Maasa maana faqa iridaqa, karaambaiqa Yisuna kuqiranakinaana uqeeroofa maasa innisaimbaqa Yisuna faqa uqeera narí oorisaa quqaqisaannoo.
2CO 4:15 Maa aiqama ainainausa inni dadaaqirafa kambiqaidanoo Anutuna afaarirafa moomoo fasiqa anaasee iannai fifaqa iriseeqa misa dufi Anutunara qirafa firaaqoo kambiqafinoo mina amooqirafa firaanaikiannoo.
2CO 4:16 Maasa minara iriseeqa sia kudoosaapaidaqa minnisaidaqa. Maasa faiqí qifaaqa kuqaa qumidaqa doo kuqirannai ubeekaidaqa daundurakinaafa faasaambaasaana fukaikakai iqa maridaqa.
2CO 4:17 Kuqaa maasa maqee marunnanaki ufaasu unmaara darirafa maridanoo doo mifa kai firaa areenarana naaru marira areenarana sia amaniaqaairana doo kaaqa firaatia qimiannoo.
2CO 4:18 Sia maasa maqee qafee marunna ainainasaa maasa irirafa mundidanoo, maasa sia qafee marunna ainainara kai iridaqa. Akooqoo qafee maria ainainafa qusasaa taikaidanoo, sia akooqoo qafee mari ainainafa naaru naaru mariannoo.
2CO 5:1 Maasa maqee maa maqanasaa marunna qifaaqafa uiqaana maaqa miqirafa rapeemambinanoo Anutufa innaarunnai maaqara foora narí moo usakaannoo, naaru marira maqa usakaqisaannoo.
2CO 5:2 Doo maqee kamuqoo maasa qifaaqa uiqaana maaqara foora afisinoo marifaqa maridaqa innaarunai mari maqana afisiranara firaaqoo ridaqa ikiraqaidaqa.
2CO 5:3 Innaarunai mari maqana afisiqa sia kaqisamu akooqoora foora marianaura.
2CO 5:4 Maasa qeeqa uiqaana maaqakiara foora qeeqa qifaaqaki maridaqa maasa qeeqa ummaara ameemaanai maridaqa faaqaridaqa. Maasa sia qeeqa maqasaa qifaaqa minnisararee qidaqa, maaqoo marunna qifaaqafa kaqi marinaqa naaru marira qifaaqa mina amuaaqa afisuanauree qidaqa. Miqimmasainanoo ufaasu marinna ainaina naaru mariranakina keeqeenoo kukeeqafuanifeera qidaqa.
2CO 5:5 Anutufa kai maasa deedaqamaqiseenoo mi ainainna kambiqainaqa maasa deedaqamaseenoo innaarunai oosana oosana aiqama ainaina qimianinnana mina ati maqee maria kamuqoo narí maraquna qimidanoo.
2CO 5:6 Maasa maqee maqee paasoosirafa maasaki qumbiqanoo maridanoo, maana maasa maqee iridaqa, maasa maa uiqaana maqanaki maqee maridaqa sia karaambaiqa maaqaki mirinni maridaqa.
2CO 5:7 Maasa maqee marunafa sia qafee marunna aanafa maridanoo kaqi Yisunasaa kaqi mundufi sia qafarai fidaqa.
2CO 5:8 Paasoosirafa maasaki qumbiqanoo maridanoo maa uiqaana maqafa maasa qifaaqa minnisee karaambaiqa faqa narí maaqara faqa minni f irinara faqa minara kai iridaqa ridaqa.
2CO 5:9 Maasa moo uriqarara ainainara dididanoo maaqoo maaqaki fee maridee, meerai maaqaki fee marianauree, mina aidiramau firanara firaaqoo ridaqa.
2CO 5:10 Asauku mundirafa ufa qiminna faasaana maasa aiqamausa mina afusaa kikiqianaura. Kikiqamambuananoo narí kai maasa maa maqanasaa marunnana akiaqara amiqira ainainee mandainainee mina akiaqara aadu aadu qimiannoo.
2CO 5:11 Maasa karaambaiqara rufiaranara iridaqa faiqí anaasee aaquqimannimaqaidaqa. Anutufa maasa anoona mariranara akooqoo iridanoo innee Koorinti maqannaasa maasa anoona marirana faqa amiqimasee abee iridee sia fee iridee.
2CO 5:12 Maasa sia maa ufanannai maasa nuqu uqeeraidaqa maasa innee maasara nifaaqa amiqianifeera qimannimidaqa. Akaqausa faiqí afaaqa qafeemarianara kai asasimariasa sia aundurakinaa ainaina asasimariasa misa maasa diqifaqa innee irisee mi ufanannai rafaaqa fuaqa.
2CO 5:13 Akaqausa maasara furufarirausa maridammiafoo qiafaqa, mi furufariara foora qiranannai maasa Anutuna auqu uqeeraidaqa miqidaqa. Akaqausa maasara sia furufarirausa andeeqarausa maridammiafoo qiafaqa mi andeeqaranannai inni dadaaqiqanidaqa.
2CO 5:14 Asauku mundirana amuqusirafa maasa rakisi qimaqaidanoo. Maqee maasa maanara iridaqa moodaa fasiqa fannoo aiqama fasiqa anaaseera kuquqimaqanau, minara faqa maasa maaqi qidaqa aiqama fasiqa anaasee mandoosana mariranakiqari kuqiara foora iqa maridaqa.
2CO 5:15 Mifa aiqamausara kuqunnimaqasoonara kaqi mariasa minara irisee sia náriaraa kai irisee mana mana ifaranoo minara iriseeqa mina ufamau fidaqa andeeqeefaranoo. Misara irisee kuqunnimaqeenoo findifunara mina ufamau fidaqa andeeqasee marifaranoo.
2CO 5:16 Doo maqee maaqooqari maasa sia faiqí faiqi iriranannai faiqí aanaaseera irianauranoo maqee maaqooqari oosanaraseeqa misara qimuqusianauranoo. Ooqai maasa asauku mundiranara faqa faiqí faiqi iriranannai minara iriafannana doo maqee sia miqidaqa doo maqee minara uriqarara fee qidaqa. Faiqí anaasee moo fannoo asauku mundiranaki atooqanoo marinanoo Anutufa mi fasiqa anaaseena ooqeenaa manda irirana doo taikeenoo fuka irirana aqoonna fasiqa anaaseera amuqusirana niminoo. Doo minannai Anutufa faiqí anaasee fukaikamaqaifaqa maridaqa.
2CO 5:18 Mi aiqama anainausa Anutufinaindari kai anidanoo, maasa namuqaakiqa mariafannana narí asauku mundiranannai maasa mareeqeenoo narí faqa moodaanaki quqeenoo kafaa maasara innee quandaki faiqí anaasee oonu mareeqee qini faqa moodaanaki quqaaqee qinoo.
2CO 5:19 Maasa qimannimira ufa maaqimminoo maridanoo Anutufa narí asauku mundiranannai aiqama maa maqa maaqana afaaqasasa mariasa oonu mareeqee narí aqoondikiranaki quqanau. Anutufa faiqí anaasee aaqarana sia qafaida sia irida mara quqannimiqaidanoo. Mifa narí moodaanaki kira ufa maasasaa quqaseenoo innee faiqí anaasee mareeqee qini faqa moodaanakikirana inni nimida fee qinoo.
2CO 5:20 Doo maqee maasa asauku mundirana aanaiqikirausara foora maridaqa maasasaaqari Anutufa aiqamausara nameera qidanoo. Maasa asauku mundirana ufa inni Koorinti maqusanaasa fuki faaki qidaqa innee Anutunara eedoo qifanoo mifa inni namuqaakiranakiqari quandakinoo inni aqoondikamma nimaqaani.
2CO 5:21 Anutufa narí andeeqarana innisaimbaqa naida qimianifeera narí amaaku qimamiseenoo maasa mandainaina aiqama qumareeqeenoo minasaa quqasoofanoo mina akiaqara kuqinoo taikannimaqanau. Asauku mundirafa mandoosana siaifa miqinau.
2CO 6:1 Qinee Pauroosa qini faqa maria namusa maasa Anutuna aanaiqikirausara foora maridaqa Anutuna faqa moodaanaki ainainidaqa inni Koorinti maqannaasa fuki faaki idaqa doo innee Anutuna kaaqa afaarira anoona doo maraafanoo sia quqasaifanoo maqasaa aqufi rairaaiani.
2CO 6:2 Anutufa minara maaqi qimasee tamummaqara fasiqa qimannimufaqa akara riqau. Qinee qeeqa didira aukuana innee qiniara dadaaqianifee qinna nameeraqirana iriqa. Qinee asumu marirana nimira aukuana inni ufa irisee dadaaqiqa. Qinee Pauroosa minara maaqi qidaqa. Maa kamuqoo kai Anutuna dadaaqirana maree maria kamuqoo maridanoo. Maqee faasaana Anutufa innaaruna asumu nimifaqa mareemaria faasaanafa maridanoo.
2CO 6:3 Akaqausa maasa inniki saikiranara aaqeeaafoo qifoora maasa qeeqa rakisidaqa inni niku nimaarusirafa mariandoo qimasee eerairidaqa.
2CO 6:4 Maasa qeeqa aiqama ainainaki maasa Anutuna ainainira faiqi namu marunnanara kooroo iaqeera qimasee firaaqoo reendeenamandee ummaara faqa kadaapirirana faqa tooqaamu darirana faqa aupurarana oosana oosana maraidaqa.
2CO 6:5 Maasa maa namusa darirana faqa karabusaki rumbaqimaqarana faqa moomoo fasiqa aanoomandee aniree dari dariisoona faqa maqee miqidaqa. Maasa daararee marifaqa sia faiqarana mareeqa kisaaqasaa kadaapiriri ifaqa nifaaqa ummooqukamandee maridaqa ainainidaqa.
2CO 6:6 Maasa qisakadiki qikairi siaisa amiqimandee andeeqasee marunnanannai faqa maasa iriranannai faqa reendeenamasee ubiasee mariranannai faqa qimuqusifaqa dadaaqunnanannai faqa maasa qeeqara Anutuna ainainira faiqi marunnanara koorooidaqa. Maasa Anutuna naaquqara maraqunannai faqa maasa anoona ufa kai qimarunnanannai faqa Anutuna afeekannai faqa maasa qeeqara Anutuna ainainira faiqi marunnanara koorooidaqa. Andeeqara oosana nimirafa maasa duru saamuara foora marifaqa akaqausa maasa daruafaqa misamunannai qeeqasaa rukiqasee misa naruani qimasee misamunannai misa narirara foora idaqa.
2CO 6:8 Akaqausa maasara amiqira ufa qidaqa akaqausa manda ufa qidaqa, akaqausa maasara sukufa qidaqa akaqausa qimooqidaqa akaqausa maasara unnufa qidammiafoo qimariafaqa maasa anoona ufa kai qidaqa.
2CO 6:9 Faiqí anaasee maasara fifau fasiqee qimariafaqa akaqausa maasara Anutuna ufa maraqa nuasee qimasee amiqimmasee maasara iridaqa. Akaqausa maasara kuqirausara foora mariaa maqi qiafaqa innee qiqafaidee maasa kaqi maridaqa sia kuqiqa maridaqa. Misa daruafaqa maasa sia kuqidaqa kaqi maridaqa.
2CO 6:10 Maasa maqee maqee qifaaqa kudoosaapanoo marifaqa Anutunara oonu mafi irisaidaqa maqee maqee asasidaqa. Maasa kudi fasiqara foora maridaqa moomoo fasiqa anaasee innaarunai ainaina faqaasaikamma nisaidaqa. Maasa maa maqanasaa ainaina siaisa maridaqa aiqama innaarunaindaraa ainaina maasaindi maridanoo. Mi aiqama ainainnannoo maasa Anutuna amiqira ainainira faiqiuqaindi marunnanara akoorooidaqa.
2CO 6:11 Oo qini qiqoondiuqa Koorinti maqusai mariasa. Maasa inni akooqoo kooroommasee inni qimannimiqa qimuqusa oo raqafimarufaqa qeeqa daunurakinaana nimuqusira irirana inni qimannimiqa.
2CO 6:12 Maasa inniara sia qeeqa qimuqusa rafaaqa fusee kaqikaaqoo ummeereeqa akooqoo aiqama qimannimiqa innee inneeqa kai inneeqa nimuqusa mandaikammida rafaaqafusee sia maasara nimuqusi mariafanoo.
2CO 6:13 Innee qini faiqinamuara foora mariafaqa maqee qimannimianaura. Innee maasa daanna reeqa innee maasara nimuqusinaqa akooqoo maasa faqa ufa qiaqa.
2CO 6:14 Oo Koorinti maqusanaasa innee Yisuna ufa irimariasa faqa sia irimariasa faqa sia moodaanaki qaindusira saqariara foora ainainiaqa, sia amana amana kai inni faqa fifaranoo. Naqimmasee andeeqarana faqa aaqarafa faqa naqimandee moodaanaki qaindusu maree fifaree, sia amana. Naqimmasee kaaqa qarafa faqa asukuna faqa moodaanaki mariannoo, sia amana.
2CO 6:15 Naqimmasee asauku mundirafa faqa kudi fasiqa Sadannafa faqa moodaa ufara eedoo qifaree sia amana, namuqaa maridanoo. Yisuna ufa irimarifa faqa sia Yisuna ufa irimarifa faqa naqimmasee fee moodaanaki kifaree.
2CO 6:16 Naqimmasee Anutuna amaana maqaki mariasa faqa tumunnai auqira afaanna faqaasa faqa moodaanaki kifaree, sia amana. Maasa kaqi marira Anutuna amaana maqara foora maridaqa. Anutufa minara maa anoonufana tamummaqara fasiqa qimamufanoo akara rinau. Qinee qeeqa maaqa misaki usakasee marianaura. Qinee misa Anutusa marianaqa misa qini qiku qisauku marifaranoo.
2CO 6:17 Minara karaambaiqa maaqi qimasee qimannimidanoo. Mandoosana maree mariasa faqa moodaa maqusaki maridaqa misa mandoosanara eerairiaqa. Innee mandainaina maree mariasa mandoosanara rufiasee sia mina umaraaqa. Innee miqidaqa anukaranaki marifaqa qinee aiqama ainaina uriqarara karaambaiqa fannoo inniara qinindi fee qinaqa innee qini faiqinamu qini qiraamummaaka marifaranoo.
2CO 7:1 Oo qini qiqoondiuqa, mi qimafeekaikira ufausa tamummaqarausannai qimaqo̱o ufausa maasara qinau. Minara irisee innisaimbaqa oosana oosana qikairi qifaaqasaaqaraanee daunuraindaraanee aiqama findaukamaqusee Anutunara rufiaida daaquqee marinaqa andeeqasee anukaranaki mariaqa.
2CO 7:2 Oo Koorinti maqusanaasa qini qiqoondiuqa, innikinaana maasa siamma moo fasiqa mandaikamma amaqaafanausa, maasa sia moo fasiqa mandoosanaki quqaafanausa maasa sia moona rafaaqafu amaqasee mooainaina umaraafanausa, innee minara nimuqusinaqa maasa umaraaqa.
2CO 7:3 Qinee sia inni niqirara miqidaqa ooqai qimannimiafanandee kai qidaqa qimannimidaqa. Maasa inni Koorinti maqannaara kaaqa qimuqusidanoo nididanoo innisaimbaqa kaqi maridee innisaimbaqa Yisuna ufasaara kuqi fee inni faqa moodaanaki marianaura.
2CO 7:4 Qinee inniara kuqaa Yisuna ufa irimariasee qidaqa qinee inniara nimooqidaqa asasidaqa. Maasa oosana oosana ummaaraki maridaqa inniara iriseeqa paasoosidaqa asasirafa qumbiqeenoo rairaaidanoo. (Pauroofa Koorinti maqannaasa akara ruma Titusana amufanoo munu nimisee oonurandee Pauroofinai aninau. Pauroofa Koorinti maqannaara qini akarakinaa ufara nanee fee qiaafoo qimasee maa ufana akara rumannimaqanau.)
2CO 7:5 Maasa Maseedoonia maqa maaqai oonu Titusafa inni maqusaindari aniranara afeesida maridaqa sia qifaaqa quqeeqa. Yisuna ufa qimannimi marunaqa moomoosa dindari dindari anireeqa aanooqidaqa kaukaata qimarufaqa qeeqa daundurai rufiarafa marifaqa innee Koorinti maqannaasara maasa akarakinaa ufara faqa maasara rufieefoo qifoora qinee rufiaidaqa.
2CO 7:6 Maasa miqi mariafananoo Titusafa inni maqusaindari mai aniree maasa paqurinau. Mifa anunannai qifaaqa rumboosa amiqimarufa Anutufa maasa qifaaqa amiqinau.
2CO 7:7 Sia Titusafa anirafa kai maasa qifaaqa amiqinau. Mifa inni maqusai oonuroofaqa innee mina idaaqammamaqoonara qimaqimufaqa firaa dufi dufi qiqa qifaaqa asasinau. Titusafa inni Koorinti maqannaasara qini Pauroosara kaaqa qafaaqaa imariasee qinau. Mifa inniara nári mandainainara kuqaa mandainainee qimasee noori runusee amiqira qoo fidaqa qiniara manda ufa qimariasara saaqee qimasee qini dadaaqidaqa. Doo mi ufana iriseeqa qinee Pauroosa firaaqoo inniara asasidaqa.
2CO 7:8 Qinee moo akara rumannimaqaafanafa mi ufafa inni qumaroofaqa innee mina qafamasee innee noori runusee inniqa mandoosana minnisaqau. Qinee iriseeqa sia inni noori runiranara qaara daundura iriqa. Qinee inni noori runiranara iriseeqa sia kisaaqasaa qimudaoo qiqa qusasaa kai qimudaoo qiqa.
2CO 7:9 Doo maqee qinee firaaqoo asasidaqa qeeqa akara rumma inni nimiafannana minarau asasidau. Inni nifaaqa ummaara reemarifa inni mandainainakinaana mareeqeenoo amiqirannai ubeekainara minara qinee asasidaqa. Inni nifaaqa ummaara rarana sia inni narinoo Anutufa mina mareenoo inni dadaaqinoo.
2CO 7:10 Nifaaqa ummaara rarafa Anutufa minannai inni maramareenoo faiqí nimuqusakinaana mara quandeeqeenoo innaaruna asumu mariranaki quqeemarifa mi nifaaqa ummaara rarafa amiqirafa maridanoo kai fifau maqasaa nifaaqa ummaara rarafa mifa kuqimariafa maridanoo.
2CO 7:11 Qinee Pauroosa pasa akara rumasee inni mandoosanara akooroo qiafanaqa noori runiusa mariafanoo. Inni noori runirana Anutufa qumareenoo minannai oosana oosana amiqira oosanauqa inniki auqinau. Maqee innee sia furufari mariafanoo noori runusee amiqimandee fimariafanoo. Innee inneeqa andeeqaranara koorooianifeera kaaqa andeeqasee fimariafanoo. Innee mandoosanara maqee firaaqoo nikooqaidanoo. Qinee Pauroosa inniki mandoosana kikiqusunaqa innee irisee qini Pauroosara faqa Anutunara faqa dari maqi qimasee dauni mi manda oosanna andeeqee mariafanoo. Innee qini akara maraseeqa qiniara noori runida mariafanoo maqee innee qiniara nimuqusidaqa qiniara amiqira irirana irimariafanoo. Innee firaaqoo Anutunara faqa irimariafanoo. Maqee moo fannoo inniki mandoosana marainaqa innee kaqi kaqi oonu qaoo qimasee afiqee mariafanoo. Ooqai qinee minara qimannimiafanaqa innee sia maroofanoo mi nifaaqa ummaarararafa inni nisakadiki sia ikairi marina kooroo idanoo.
2CO 7:12 Qinee akaraki afeeka ufa rumaqaafannana sia inniki aaqee mari fasiqanara qimasee akara riqiafana, sia narí mandaikammamaqoonara qimasee akarariqiafanoo. Qinee Anutuna afusaa maridaqa, maa ufanara akara riqa, innee maasasaa atooarana faqa rirana faqa mina firaafa inni nifusaa akoorooianifeera akara riqa.
2CO 7:13 Minara maasa Titusana ufa irunanoo nifaaqa amiqimminoo. Sia maasa qifaaqa kaifau amiqinoofau Titusana afaaqa faqa amiqikaimminoo. Innee Koorinti maqusanaasa idaaqamasoofanoo mina afaaqa inniara amiqufaqa maasa qafamasee asasiqiafana.
2CO 7:14 Qinee inniara firaaqoo inni nuqu uqeereeqa Titusana qimamiafannana, innee miqoo kai mina amana kai mariafanoo. Titusafa nidafammaseenoo asasinoo. Maasa maqee maqee ooqai anoona ufa kai inni qimannimi mariqiafana. Miqi kai iqa inniara Titusana qimamiafannufafa doo anoonaikinoo.
2CO 7:15 Titusafa inni maqusai oonuroofaqa innee inneeqa mandoosanara irisee Pauroofa ufa firaana qiandoo qimasee rufiaaqa rufiaaqa iranannai faqa naindiriraranannai faqa afieeqee inneeqa maqusai quqasee qini ufa minasaaqaraana irisee eedoo qimasee maroonara Titusafa qafamaseenoo qimaqimidanoo inniara rirafa maqee maqee firaanaikidanoo.
2CO 7:16 Doo maqee qinee Pauroosa mina iridaqa maaqi qidaqa. Qinee sia inniara maqee qaara daundura marifaqa qinee qeeqa qifaaqa firaaqoo innisaa quqaidaqa asasidaqa.
2CO 8:1 Oo Koorinti maqusai maasa qikaqaafasaa mariasa. Yisuna ufara suqimariasa Maseedoonia maqa maaqaki mariasa Anutuna amiqi amiqirafa misaki saikinara innee iriaqeera qimannimidaqa.
2CO 8:2 Firaa ummaarararafa misa kadaapi rirana niminau. Marufanoo mi kadaapirirafa Yisunasaa atooqee marusa firaaqoo nimanamandee qafanau. Misa miqiqa maridaqa minakiqari firaaqoo asasamandee nariqa munnimma afaaramandee Yudeea maqannaasa Anutuna ufara suqimarusa dadaaqi naida nimiqau. Misa nári kudikiranara siamma iriqau kaqi nimiqau.
2CO 8:3 Qinee maa ainainnara amiqimandee iridaqa qimannimidaqa, misa nári munnimma marunna amanakai nimiqau sia mina amana kai nimiqau kai fiqarammasee aabaa faqa nimiqau.
2CO 8:4 Misa nári iriranannai aniree aranaiqi afeekaikamasee maasa irammiriqa qiqau. Amanee maasa faqa Yudeea maqa maaqaki Anutuna ufara suqimariasa naararee mariasa maasa munnimma nimiqee dadaaqianauree. Nariqa mi dadaaqiranara sia ummaara fee qiqau adiafaairana qimimarianara maasa nimianauree qiqau.
2CO 8:5 Maasa mi ufana iriseeqa asasamasee tautiqa oo sia mi amiqira irirafa kammbiqeefoo qunaqa misaki kambiqeenoo. Maseedooni maqannaasa nariqa naundura irirana faqa nári ainaina faqa karaambaiqa naaree amisee quandaki Anutuna iriranamau nári marirana maasa faqa qimiqau.
2CO 8:6 Maseedoonia maqannaasa oosana miqinoo marinara innee Koorinti maqannaasa faqa miqiaqeera Titusana fuki faaki qiafanoo inni qimannimidanoo. Ooqai Titusafa inni faqa maridanoo Yudeea maqannaa nimianinna munnimmanara oosana arasee qimanniminau. Doo maqee Titusafa mi nimuqusira saikana kaifaa uqeerarara fuki faaki qidaqa.
2CO 8:7 Innee Koorinti maqannaasa oosana oosana ainaina moomoo faqaasa mariafanoo. Innee Anutuna saqarikirafa faqa Anutuna ufa qimannimirana faqa irirafa faqa oosana oosana dadaaqira saika eedoo qimasee kasida uqeeree mariana faqa maasara faqa nimuqusimariana faqa mi ainainausa innindi moomoo maridanoo. Doo maasa inniara Yudeea maqannaasa nimiaqeera faqa qidaqa inni afaararifa minaki faqa moomoo mariani, mi nimuqusira saikafa mariannoo.
2CO 8:8 Qinee Pauroosa sia naamuaqira ufa inni qimannimidaqa naakapara ufa inni qimannimidaqa. Anaamuru dadaaqiranara naakapaidaqa minannai inniqa nikaqaafassara nimuqusirana nimanamandee qafaidaqa inni Koorinti maqannaasa nimuqusirafa Maseedoonia maqannaasa nimuqusirana amanafee maridanoo fee qimaseeqa nimanammandee qafaidaqa.
2CO 8:9 Innee asauku mundirana Yisuna maasa karaambaiqa amuqusira dadaaqiranara amiqimandee irimariafanoo mifa innaarunai ainainafaqaafa uriqararafa marinoo inniara irisee maa maqanasaa qumu ainaina siaifara maqi mafinoo marinau. Yisufa narí ainaina siaifara maqi iranannai innaarunai ainaina faqaasa mariaqeera miqi marinau.
2CO 8:10 Yudeea maqannaasa narana feefaurira munnimma nimiranara qinee Pauroosa qini irirafa minara maaqi qidanoo. Innee ooqai aiqaqoo aukuanna Yudeea maqannaasa munnimma nimiraree qimasee suququqoo munnimmana narana feefauru maraaqee qimasee suqu quqasee minnisoona maqee kaifaa uqeerasaifanoo fifi inanoo taikaannoo. Innee aiqama maqannaasakiqari innee naaree iriseeqa mi saikana oosana uqeeree mariasa mariafanoo.
2CO 8:11 Doo maqee findifiqa mi saikana auqaifanoo taikaani. Indaaru innee minara ufa suqusee nimudaanai qimasee ufa qiqa fifiaana maqee miqi kai iqa nimudaanai qimasee munnimma nimirafa taikafuani sia kisaaqasaa mariani. Innee aiqama munnimma nimiseeqa inneeqa kuridifaara, qinee sia minarau inni qimannimidau. Innee inni munnimma aabaa marina mina nimiaqa sia marinafa sia aquaqa.
2CO 8:12 Inni munnimma amanaikinaqa nimisainanoo Anutufa narindiara foora dufi dufi qiannoo. Sia amanaikinana aqusainanoo Anutufa sia minara dufi dufi qiannoo. Sia amanaikinana sia aqua.
2CO 8:13 Qinee sia moo maqannaasa aufadarana nimirara inni Koorinti maqannaa ummaara firaana nimidaqa, sia miqidaqa. Maqee aukuana inni narana firaafa mari kamuqoo narana siaisa dadaaqiaqa, kasooqaqee moo aukuana innee mandainainaki marifaqa misa inni dadaqifaranoo. Miqidaqa aiqama amana kai mariaqa.
2CO 8:15 Ooqai tamummaqara fasiqauqa minara maaqi qimasee akara riqau, Ooqai maqasaa narana moomoo suqimaru fasiqausa sia rairaa iqau. Maqasaa narana oodaa suqimaru fasiqausa sia naararee marinau, nimana kai marinau.
2CO 8:16 Qinee Pauroosa Titusana oosana qafamasee Anutunara dufi dufi qidaqa, maasa daanna raidanoo firaaqoo inni Koorinti maqusanaasa dadaaqiraree qidanoo.
2CO 8:17 Maasa minara Koorinti maqusai inni maqusai fuannee qunanoo mifa sia kai eedoo kai qinoo narí iriranannai asasammaseenoo innee iannai kafaa fuannoo.
2CO 8:18 Maasa moo fasiqa faqa mina faqa aqiqaanauranoo mi moo fasiqafa aiqamai Yisuna amiqira fasaasa ufa qimanniminoonufa marunara Yisuna ufara suqimariasa minara amiqira fasiqafee qidaqa.
2CO 8:19 Sia mifa kai, aiqama Yisuna ufara suqimariasa mi fasiqanara inni Yuda maqannaasa nimianinna narana feefaurira munnimmana utaaqammasee anee Koorinti maqannaasa munnimma faqa akaqa maqannaasa munnimma faqa mara maree Pauroona saimbaqa Yudeea maqannaasa muru nimia. Miqinnanannai maasa nimuqusira saika marasee karaambaiqa areenarana faqa maasa eedoo qimasee dadaaqirana faqa kooroomambuannoo.
2CO 8:20 Akaqausa raiqara ufa qifoora maasa amiqimandee inni moomoo afaaramandee nimifandinna munnimmana maasa rakisianaura.
2CO 8:21 Maasa irirafa minara maaqimminoo maridanoo. Maasa Karaambaiqa Anutuna afusaa faqa maqasaa fasiqa nifusaa faqa andeeqaramau fidaqa rakisianaura.
2CO 8:22 Titusana faqa moo fasiqa faqa indaaru fuaqee qiaqa maqee maasa qikaqa moo faqa miqandasaa mara quqaanaura miqanda faqa fuannoo, maasa moomoo kari mina amanamandee qafaunanoo amiqimarifa maqee maqee eedoo qimasee dadaaqimarifa maridanoo. Doo maqee mifa inni Koorinti maqannaasara irisee mina irirafa inniki mundinoo marinara firaaqoo asasammasee inni faqa dadaaqiannoo.
2CO 8:23 Titusafa qini faqa moodaanaki inniara dadaaqimarifa maridanoo. Maasa qikaqaafasaa Titusana faqa innee iannai fimariaqanda maridaqa Yisuna ufara suqimariasa miqanda utaaqamaqaaqanda maridaqa, asauku mundirana areenarana maree mariaqanda maridaqa.
2CO 8:24 Minamusa oonu raifaqa innee misara nimuqusimarinaqa rakisinnimaqaaqa. Miqinnanara Yisuna ufara maqusa maqusa suqimarinausa Pauroofa Koorinti maqusanaasa nimooqiranara anoona ufa fee qiaqeera.
2CO 9:1 Anutuna ufa irimariasa Yudeea maqannaasa munnimma nimirara qianara innee doo irimariafanoo qinee fifau akara rumannimaqeeqa.
2CO 9:2 Innee eedoo qimasee dadaaqimariasa mariafaqa qinee iridaqa, qinee inni nimooqimasee Maseedoonia maqannaasa qimannimiqa. Qinee inniara maaqi qimasee qimannimiqa, Kirisa maqa maaqaki mariasa Koorinti maqusanaasa misa naaree maa eenda aiqarai aukuana eedoo qimasee deedaqiqau. Qinee miqi qimasee Maseedoonia maqannaasa inni Koorinti maqannaasara qimannimiafanaqa doo misa faqa mi ufana irisee maasa faqa dadaaqiraree qimasee findifia akaqa maqannaasa kai sia findi fia.
2CO 9:3 Qinee inniara ufa qiafannana fifau ufa kai qianoora qeeqa qikaqaafasaauqa mareeqee inniki quqeeqa misa oonuree inni munnimma suqu moodaaqoo quqaaqeera qini ufa anoonaikianifeera inniki quqaaqee qidaqa.
2CO 9:4 Qinee faqa Maseedoonia maqannaa akaqausa qini faqa inni Koorinti maqusai ooquraifaqa sia deedaqiranaki maasa ooquraana innee nisaurifaqa maasa faqa Maseedoonia maqannaasa qini faqa ooqu fifandinausa nisaurifoora qinee inniara qifaaqa quqasee inniara ufa qiqa.
2CO 9:5 Qinee minara iriseeqa qeeqa qikaqaafasaauqa niqiqamasaunaqa indaaru ooqureeqa inni nimifandinna munnimmara deedaqamandaifaqa qinee inaaqianna ooquraanaqa innee inneeqa iriranannai kai nimira oosana koorooiaqa sia qinee qimannimiana nimiaqa inniqa nidirafa kai qinaqa kaqi nimiaqa. Ooqeenaa irirafa maaqimminoo maridanoo.
2CO 9:6 Moodaa asumu ummaqimarifa moodaa kai aiquannoo moomoo ummaqimarifa moomoo aiquannoo. Qinee Pauroosa minasaaqari inni dadaaqira oosanara maaqi qidaqa.
2CO 9:7 Innee minara irisee inneeqa iriranannai kai munnimma aquaqa, sia mina aqusee ufaqirafa mariani sia moonara daakapaifaqa aqi fee qia Anutufa asasammandee aqimari fasiqanara aididanoo minara asasammasee aquaqa.
2CO 9:8 Inniqa nimana kai narana maraaqee munnimma Anutufa amana nimiannoo sia inni munnimma amana kaifau nimmiannoo aabaa faqa niminaqa minannai nana ainainaree dadaaqirafa kambiqaannoo fee innee faqa amana minannai dadaaqiaqa.
2CO 9:9 Ooqai tamummaqara fasiqauqa minara maaqi qimasee akara rumaqoofa maridanoo. Amiqira fasiqauqaindi kudi fasiqauqa afaaridaqa nimidaqa. Misa amiqi amiqirafa sia taikaannoo naaru naaru mariannoo.
2CO 9:10 Anutufa inni Koorinti maqannaa faqa dadaaqammiannoo. Mifa asumu faqa neemaria narana faqa nimimarifa maridanoo inni nimana asumu inni nimisainaqa ummaqusaifanoo Anutufa kambiqarana nimiannoo innee afaaramandee moo maqannaa narana dadaaqifanoo innee kafaa kafaa miqiaqee qimasee inni Anutufa irairaairana nimiannoo.
2CO 9:11 Anutufa maqee maqee narana ainaina moomoo niminaqa innee mina qafeeqa amana maqee maqee akaqausa dadaaqiaqa. Innee maasasaaqari dadaaqimaria maqannaasa inni dadaaqiranara quandaki Anutunara dufi dufi firaaqoo qifaranoo.
2CO 9:12 Inni dadaaqira saika fannoo sia Anutuna ufara suqimariasa kai dadaaqidanoo Anutunara dufi dufi qirana faqa oondainni nammariara foora aqufidanoo.
2CO 9:13 Inni dadaaqira ainainirafa innee Anutuna ufamau firana kooroo iannoo. Moomoosa mina qafammasee Anutuna amooqifaranoo misa inni afaaramasee naida nimirana qafammasee kafaa innee asauku mundirana fasaasa ufasaa atooqafi mundiqa marinnana faqa qafammasee sia ufa kai qimasee anoonee qimasee Anutuna amooqifaranoo.
2CO 9:14 Innee dadaaqimariasa inniara nidimarinaqa inni amiqi amiqiranara innaaru qifaranoo. Anutufa mookira afaarirana inni nimunara Anutufinnai inniara nidimarinaqa inni amiqi amiqiranara innaaru qifaranoo.
2CO 9:15 Anutufa narí afaarinoo maasa qimunara mina uriqararafa aiqama ainaina arusee firaafa maridanoo minara maasa aiqamausa dufi dufi qimamaqaaqa.
2CO 10:1 Qinee Pauroosa maa ufana reendeenamandee qimannimidaqa. Akaqausa qiniara nianai maridanoo aanoo ufa kai qimari fee inni faqa maridanoo reendeenidanoo fee qidaqa. Qinee miqi qianara maaqi qidaqa. Qinee asauku mundirana amiqi amiqirana faqa ireeda marira oosana faqa mina afusaa maridaqa reendeenamasee qimannimidaqa qinee innee iannai oonuraanaqa sia qini qirana fundakuaqa maasara maqasaaqaraa irirana irisee qimariaafoo qimariasa amana aanoomannimaqaanaura, sia sia amana mariannoo, amana mariannoo.
2CO 10:3 Kuqaa maasa maa maqa maaqanaki maridaqa sia minakinaa irirana marasee rakiara foora idaqa.
2CO 10:4 Maasa rakimaria duru saamu sia maa maqa maaqanakinaa duru saamuarau qidau. Maasa Anutuna afeeka ufa marina minannai duru saamuara foora rakidaqa. Minannai maasa Sadannana faandaamura rapeepaamma aqidaqa.
2CO 10:5 Maasa mi duru saamunannai unnufa qimariana doo kuqaridaqa. Minannai faqa Anutunara kooroo ira ufara qaoo qimasee noori uqeerasee maasa minara uriqararausee qimariasa minannai misa faqa naridanoo. Maasa mi unna ufana qimariasa uriqaranoo marina Anutuna duru saamuara foora qumareeqa ooru rarisameeqee maqasaa muqufi rudammiqi quqaidaqa. Maasa qeeqa qitikurakinaa mandirirana aiqama oosana oosana mandirirana rakiranannai naruseeqa aiqama oonu qumaree ani qumareemmeeqee karaambaiqa asauku mundirana aramandunnai quqasainaqa qeeqa qitikurakinaa irirana mina ufamau fuaqeera.
2CO 10:6 Innee Koorinti maqusanaasa miqirausa mariafanoo maasa inni mareeqee asauku mundirana aramandunnai quqasoofaqa mina iriranaki fimariafanoo innee minakiqari kaqi runnai fifaqa qini qirana fundakusaifaqa maasa inni náriara foorammasee rarisameeqee quqasaanaura, sia misa qiandee reendeena kai ianaura aanoommasee qianaura.
2CO 10:7 Innee faiqí nifusaa akooqoo ainaina faiqí nipata kai qafamasee eedoo qimariasa aaqee mariasa mariafanoo sia naunduraki qafee mariasa mariafanoo. Inniki moo fannoo asauku mundirana ainainira fasiqee qimarifa sia nariara kai miqi marunausee qiannoo maasara nipata mandaikirausee qimariana maasa faqa asauku mundirana ainainira fasiqa maridaqa.
2CO 10:8 Asauku mundirafa maasara qinee niqiqaafanna fasiqausee qimasee mi uriqarara afeekana qimufaqa minara firaaqoo ufa qufaqa innee irisee qiniara firaaqoo narí amooqimari fee qiafaqa iriseeqa sia minara qisauridaqa, sia qini afeeka inni rakeemma aqirafa maridanoo inni dadaaqirafa pooduqammannisarafa maridanoo.
2CO 10:9 Qinee sia qeeqa pasannai inni rufiarana nimiraree qidaqa.
2CO 10:10 Akaqausa maaqi qifaranoo Pauroofa narí akara riranaki afeekaikamandee qimaqimidanoo, narí uqanna anireenoo reendeenidanoo narí ufa faqa fifau mariannoo.
2CO 10:11 Miqi qimariasa maa ufana iriaqa, maasa nianai maridaqa akaraki qianna ufafa faqa naaqaqari marida qimariannufafa faqa amanamana kai mariannoo.
2CO 10:12 Miqi qimaria fasiqausa náriara uriqararausee qidaqa miqi qimariafanoo. Maasa sia miqi qimariasasaa qeeqa qimanianaura. Misa furufari mariasa maridaqa. Misa nanasaa fee narí amani narí amani idee nári iriranannai kai nariqa uriqarara ainainee qimasee minannai kai nári nimanidaqa. Sia Yisuna iriranannai narí amani narí amanidaqa.
2CO 10:13 Maasa qeeqara qianaura maasa qeeqa qimooqira oosirana sia fiaikataanaura miqooqari kai oorurandanoo mariannoo. Qinee sia akaqausa naanna ree moona oosiranaki mariasara qeeqa qimooqianauranoo qiqa qoosuki marinausara kai qeeqa qimooqianaura. Anutufa maasa saika maree marunna oosirana narí kai quqaqaifanoo maridanoo minaki kai maridaqa innee faqa minaki kai mariafanoo.
2CO 10:14 Innee minaki marianara iriseeqa inniki oonureeqa sia finnaaqaraidaqa. Maasa asauku mundirana amiqira fasaasa ufa mara mareeqa sia mi oosirana fiaikateeqa minaki kai maridaqa innisaimbaqa mariqiafana.
2CO 10:15 Maasa Anutufa qimu oosiranaki kai inniki ainainidaqa, akaqausa fiaikatammasee ainainidaqa maasa sia misa fuaqoo fidaqa qeeqa ainainiranara qeeqa qimooqidaqa. Maasa Anutufa qimu oosiranaki maqee maqee miqoo kai minaki kai ainainidaqa maasa inniara maaqi qidaqa, Koorinti maqannaasa Anutunasaa atooarafa firaanaikinoo maasa saika mi oosiranaki firaanaikiannoo.
2CO 10:16 Inniki ainainirana taikasee miqooqari kai inni finnaaqareeqa moo atinai moo fannoo sia ainainimarinaki oonuree minaki amiqira fasaasa ufa qimannimianaura. Miqimmasee sia qinee akaqausa naanna reeqa misa moosaa afuqaki ainainamasee nári nimooqidaqa. Qinee sia miqianaura qeeqara fukasaa moo afuqakiara foora ainainianauranoo.
2CO 10:17 Ooqeenaa tamummaqara fasiqauqa minara maaqi qimasee akara riqau. Faiqí moo fannoo sia narí amooqirafa mariani. Karaambaiqa auquqoo ainainara kai amooqiaqa.
2CO 10:18 Qinee Pauroosa minara maaqi qidaqa. Karaambaiqa fannoo moo fasiqara amiqira fee qinafa kai amiqira fasiqa mariannoo, narí kai nariara amiqira fasiqee qinafa sia anoona marina fifau mariannoo.
2CO 11:1 Inni Koorinti maqusanaasa qinee Pauroosa furufaramandee qimannimianaqa irisee sia minnisaaqa kaqi minara irisee sia minnisaaqa kaqi minara irisee mariaqa.
2CO 11:2 Qinee inni Koorinti maqannaasara qeeqa qiraamunara foora mareeqeeqa asauku mundirana utaaqama amaqaqaunanoo minaindikiqa mariaqeera minara rairaiqidaqa. Innee andeeqara maanaaqara foommafiqa mina faqa mariaqa. Maqasaa qaraa rairaiqiranau nimidau. Anutunaindaraa rairaiqirana nimidaqa.
2CO 11:3 Ooqai sakani fannoo narí kaaqa irira unnufannai Eeuana akaru qundee kai inni irirafa faqa iandoora. Asauku mundiranasaa kai inni irirafa amiqimandee andeeqasee mundinoo mari inanoo kaqi runna fifoora minara qinee inniara rufiaidaqa.
2CO 11:4 Ooqai indaaru maasa Yisunara qimannimiafanaqa. Miqooqari maasa fuafanaqa akaqausa innee unnai oonurandee inniki aniree inni unna amaana ufa qimannimiqau. Akaqausa dapi fasiqauqa anireeqa Yisunara moomau qimannimufaqa innee aaqamaseeqa asasammasee misa mara quqaseeqa misa manda ufamau fimariafanoo. Misa maraquna faqa misa unna fasaasa ufa faqa sia maasa qiafannamau qimannimiafaqa náriara moomau qimannimiafaqa innee kaqi maraafanoo.
2CO 11:5 Mi unnaqira fasiqausa náriara Yisufa niqiqoo fasiqausa uriqararausee qidaqa. Qinee Pauroosa sia misa ureeqarasau maridau misa uriqararausa maridaqa.
2CO 11:6 Misa ufa akoofasauqa mariafaqa sia qinee amiqimandee misa naanna raunausa mammaqidaqa kasooqaqee ufa qimannimidaqa, iriranara amiqimandee iriseeqa misa oorinaaqaramasee qimannimiqiafana. Maasa aiqama kari oosana oosana ufannai maasa amiqira irirana akooqoo kooroommasee qimannimiqiafana.
2CO 11:7 Qinee sia unnaqi maria fasiqausa naanna reeqa qinee Anutuna amiqira fasaasa ufa inni qimannimidaqa kaqi kaaqoo mina akiaqara munnimma moodaa faqa sia uqanna maraqiafana. Innee Anutuna afusaa uriqararausa mariaqee qimasee qinee reendeenamafiqa oorudupi mafifaqa qeeqa ainainiranannai qeeqa narana ainaina mara naidaqa sia inni narana mareeqa. Qinee aaqaidee miqi mari qiafana.
2CO 11:8 Qinee inniki ainaini marunaqa moo maqannaasa Yisuna ufara suqimariasa misa nári narana marara munnimma qimiafaqa qeeqa narainaina minannai maraqiafana. Qinee inni dadaaqidaqa misa munnimma ummuariara foora maraqiafana.
2CO 11:9 Qinee inniki mariafanna kamuqoo qeeqa narana munnimma sia marufaqa sia inni munnimma moodaa marasee narana mara naqiafana. Qini qikaqaafasaauqa Maseedoonia maqannaasa nariqa munnimma mareeqee qini qimana kai qimufaqa marasee narana mara nee mariqiafana. Ooqai miqi mariafannana kafaa maqee maaqoo marunnaqooqari sia innindi maraanaura. Innee aaqarana marasaifaqa naqimmasee fee inni aaqara ufannai andeeqannisaanauree inni narana munnimma qimunara irisee qisauruanoora. Qinee Pauroosa minara inni qimannimidaqa.
2CO 11:10 Qinee asauku mundirana anoona ufa oorisaa maridaqa qima afeekaikira ufa qimannimidaqa sia uqanna inni narana ainaina maraanauranoo aiqama Kirisa maqa maaqaki mariasa narana ainaina sia uqanna maraanauranoo, sia moo fannoo qini ufa aruannoo.
2CO 11:11 Qinee nanaree maa ufana inni qimannimidee. Qinee inniara qimuqusirana siaisee maridee maa ufana qimannimidee. Qinee inniara qimuqusimarunnana Anutufa doo iridanoo.
2CO 11:12 Ooqai iafanandee kai iqa maqee sia inni narana munnimma maraanaura. Unnaqira niqiqoo fasiqausa inniki ani mariasa inni narana munnimma maraidaqa náriara Pauroona ainaini marina aana raidee qimasee maasa faqa niqiqoo fasiqausa maridee qifoora sia qinee misa naanna ramasee inni narana munnimma maraanaura. Sia qinee nári nifaaqa mara maree urimaria oosana dadaaqianaura.
2CO 11:13 Mi fasiqausa sia kuqaa niqiqoo fasiqausau maridau misa nikaru qira niqiqoo fasiqausa maridaqa, nariqa ainainiranara unna ufa qimasee asauku mundirafa anoona niqiqoo fasiqausara foora quandakiqa misa nimammana usufiqa nikaru qidaqa.
2CO 11:14 Sia minara tautiaqa, Sadannafa faqa miqi kai imarifa maridanoo, mina aanandaidaqa miqidaqa, mifa kaaqa qara qangiroo nimammana usufinoo marifa marifaqa misa mina aannandaidaqa miqidaqa.
2CO 11:15 Sadannana ainaini maria fasiqausa andeeqara fasiqauqa nimammana usufiqa ainainirafa sia firaa ainaina, nárindi maridanoo. Kasooqaqee taikara aukuana andeeqasee mi manda oosanna amana kai mareefaranoo.
2CO 11:16 Qinee kafaa inni qimannimidaqa sia moo fannoo qiniara furufarira fasiqee qiannoo. Inniki unna ufa qimaria fasiqausa furufarirausa firaaqoo nári nuqu uqeeraidaqa nári nimooqimariasa maridaqa. Innee qiniara furufarira fasiqee qifaqa qinee faqa furufaramasee misa naanna raanaura.
2CO 11:17 Karaambaiqa sia maasara miqiaqee qifaqa qinee kaqikaaqoo furufarammasee misa naannaree qeeqa qimooqianaqa innee mi unna qimaria fasiqausa ufa iriandee iqa qini ufa faqa iriaqeera.
2CO 11:18 Moomoo unna ufa qimariasa faiqí faiqi irirana marasee nári nuqu uqeeraidaqa nári nimooqidaqa. Doo qinee faqa miqimmianaura.
2CO 11:19 Innee Koorinti maqannaasa inni irirafa firaaqoo marisa mariafanoo furufarira fasiqauqa ufa qimariasa innee asasammasee misa marasee misa ufa irimariafanoo.
2CO 11:20 Misa inni nikaruqimasee inni ainaina ummuari mariasa maridaqa, misa innikinaa uriqarausara foora maridaqa inniara miqiaqa maaqiaqa qimariafaqa misa ufaanara foora fufusee inni rarisameeqee minaki mara aridaqa. Misa náriara uriqararausee qidaqa inniara ureeqarausee qidaqa. Misa nisaukusamu inni noori rukamidaqa. Misa miqi mandee inni nimiafaqa innee aaqamasee kaqi misa mareeqee inneeqa ufa suqiranaki quqasee innee misa ufa amiqimmasee irimariafanoo.
2CO 11:21 Qinee Pauroosa innikina mariafannaqoo misa oosana maraaqaana qinee qisauridaqa qimannimidaqa qinee maparaa imarunausa sia misa oosana maraqiafana. Inniki unnaqira niqiqoo fasiqausa nariqa nuqu uqeerasee nári nimooqidaqa qinee misa furufarirana amana kai qeeqa furufariannana qimooqianaqa iriaqa.
2CO 11:22 Misa náriara sia Kirisa maqannaasa ufa kai qidaqa maasa qikeeku qikaaku Heeburu ufa qimarunausee qiafaqa qinee faqa miqi kai qimarunausa maridaqa. Misa náriara Isaraee maqannaasa Anutuna utaaqa maqoosa maridee qiafaqa qinee faqa misa kai maridaqa. Misa náriara Abarahaamana aiku asauku Anutuna qima afeekaikira ainaina maraanausee qiafaqa, qinee faqa misa kai maridaqa.
2CO 11:23 Misa náriara asauku mundirana aiku asauku maridee qiafaqa qinee faqa furufarira fasiqara foora qidaqa qinee misaki misa uriqararausa maridaqa. Qini asauku mundirana mi ainainnara irunnana misaindi ooraaqaranoo maridanoo. Qinee Yisuna ufa saara karabusaki misa urinnaaqarammasee moomoo kari rumbeeqa. Raitasamunnai qifaaqa ateekeeufa moomoo kari misa narirana urinnaaqaramasee qini qifaaqa ateekaqau. Qinee kuqirara madikakiqari moomoo kari misa narirana urinnaaqaramasee findi fiqa.
2CO 11:24 Moodaannai qisaukunamu kari Yuda maqannaasa raitasamu darimariqau, moodaa fasiqa aiku asauku taikasee moo fasiqa qisaukuqara faqa moodaannai qiku faqa dinni qiku eera kai muqu quqasee kari minannai dariqau. Sia moodaannai miqimandee dariqau, moodaannai qisauku amanasaa miqimandee daru qimaqaqau.
2CO 11:25 Roomma maqannaasa faqa qaaramoo kari miqi uqannamandee dariqau. Moodaa kari misa oonisamu misa daru qimaqaqau. Qaaramoo kari ooruku nammariki sipaki moo maqusai Yisuna ufa qimannimirara fidaqa sipa fannoo mandaikufaqa ooruku nammariki ukunnaqa mariqiafana sia kuqiqiafana. Moo kari miqi mambufaqa eendaki faqa faasaana faqa ooruku nammari qambaanai qimmapiqa afainni aniqiafana.
2CO 11:26 Qinee Yisuna ufa qimannimiqa nimariafanaqa moomoo aukuana maqusa maqusa nuafannanakina qinee moomoo kari qimeekee mariqiafana nammari aufunaki faqa nipuraraa fasiqauqaki faqa Yuda maqannaasaki faqa aanaamuru mariasaki faqa firaa taunaki faqa kaasau maqa maaqa oombura maqa maaqaki faqa ooruku nammari firaa farumaki faqa qikaru qimaru aqoondisa faqa misauqakina moomookari kuqirara qimeekeeqa.
2CO 11:27 Qinee minaki fidaqa kadaapirirana faqa tooqaamu darirana faqa maraidaqa moomoo kari sia faiqeeqa, qinee daararee marufaqa nammariara didimarufaqa nimariqiafana, qinee moomoo kari qini maaqa faqa narana faqa qamunna faqa sia marufaqa kaqi qisukunni faiqaqa nimariqiafana.
2CO 11:28 Moomoo ainaina ummaara maraqa nuafannana kiqari moodaa ainainara kai qianaura. Maqusa maqusa Yisuna ufara suqimarianara kai qinee oonumafi iriqa nidaqa.
2CO 11:29 Moo fannoo misakiqari ummooqukinoo kudoosaapaifaqa qinee faqa mina aanna raidaqa kudoosaapaidaqa. Moo fannoo misakiqari mandainainaki aqufifaqa qini daundura faqa rapikifaqa mi ummaarana maraidaqa.
2CO 11:30 Qinee qeeqa qimooqiqa qeeqa ummooqukiranara qimooqianaura.
2CO 11:31 Anutufa maasa karaambaiqa Yisuna akoofa naaru naaru mina auqu amiqi amiqirafa kai mariani, mifa kai qiniara sia unnaqi mari fee qidanoo, iridanoo.
2CO 11:32 Ooqai qinee Damasakusa maqusai mariafananoo misa karaambaiqa mina auqu Areetasafa narí ureeqarana aqiqoofanoo narí sundia namufaqa maqusa kooqiki ititafufaqa qini qumaraanee qimasee maqusa kooqikiaqa rakisimariqau.
2CO 11:33 Qini qiqoondiuqa minara irisee kaqitinai qini mareeqee firaa pateeuqaki rumasee sanda minasaa qususee faandaamura meerai marufaqa miriqoo qambaanaqari kaqikaa kooqi auqiranakiqari qini ruqiaeeqeeqa quiqa quiqa qufaqa maqasaa aqufufaqa quqasee sandaqiafana.
2CO 12:1 Qinee qeeqara qimooqianafa sia anoonaikiannoo, kaqi fifau qeeqa qimooqianaura. Karaambaiqa qifu pisipasamandeenoo kukeeqara ainaina kooroomma qimunara qimannimianauranoo. (Anutufa Pauroona uqeereenoo innaarunai quqasoofanoo innaaruna ququsakinaa ainaina qafoonara narí auqu kukeeqasee Koorinti maqannaasa qimannimidanoo moo fasiqa fee qidanoo.)
2CO 12:2 Ooqai qinee Yisuna ufa irimaru fasiqanara iriqia. Karaambaiqa Anutufa kaqi kai mina uqeereeqeenoo qaara innaaruna ooraaqareenoo qaaramoo kiranaki Anutufa marunaki quqanau. Mifa kuqaa fee afiqa miqoo quqanoo fee inau kai afu pisipasamaseenoo mina amana mara uqeereeqeenoo innaarunai quqanau fee inau. Qinee sia iridaqa Anutufa kai iridanoo.
2CO 12:3 Qinee kafaa qimannimiqa mi fasiqana uqeereeqeenoo innaarunaki moo auqu Paradisee minaki quqanau. Kuqaa fee miqinoo fee afu kai fee pisipasinoo fee Anutufa kai iridanoo.
2CO 12:4 Mi fasiqana miqoo quqasoofanoo maridanoo oosana oosana ainainara irinau sia faiqí ufa amana qimari ainaina irinau naaquqara ainainara Anutufa qaoo qinau sia faiqí minara qimannimiannee qinau. Sia faiqí qira ainainara irinau.
2CO 12:5 Miqinna fasiqanara qinee amooqianaura sia qeeqara qimooqianaura qeeqa ummooqukiannanara qimooqianauranoo.
2CO 12:6 Qinee qeeqa qimooqifau sia furufarirafa mariqini kuqaa anoona ufa kai mariqini. Qinee sia qeeqara qeeqa qimooqianaura. Faiqí anaasee qini dooki qiqafamasee qini dookinaa ufa irisee nariqa kai qiniara iriaqa. Qinee qeeqa duqu uqeeraranannai misa fifau qini duqu firaaqoo uqeeree foora.
2CO 12:7 Qinee amiqira ainaina naaquqara amiqira ainaina qafaafannanara qiqa duquara firaaqoo uqeeraifaqa aaqaranaki fuanoora Anutufa Sadannanara kaqikaaqoo eedoo qufanoo qifaaqasaa moo aupurarana qimiqoofanoo maqee maqee darimariafaqa sia qeeqa duqu uqeereeqa kaqi qumee kai andeeqasee marianifee qimasaida darimarifaqa maridaqa qidaqa.
2CO 12:8 Qinee qaaramoo kari karaambaiqinnai innaaru qiqa anee maa aurirana maraquqisaannee qiafananoo mifa qaoo qimasee qinau. Qeeqa kaqi nimira dadaaqirana amiafanafa doo mifa kai doo ani amana mariannoo, qiqa afeeka fannoo kudoosaapee mariasaki amiqi mandee kambiqaidanoo.
2CO 12:9 Qinee Pauroosa mina iriseeqa maaqi qidaqa qinee qeeqa kudoosaapee marunnanara asasammasee amooqidaqa. Asauku mundirana afeeka fannoo qini rafaaqa fuanifeera qeeqa ummooqukiannanara amooqidaqa.
2CO 12:10 Asauku mundirana ufasaara mandufa faqa kudoosaaparana faqa kadaapirirana faqa, Yisuna ufasaara darirana faqa tinoo taanoo rirana faqa tinaakurirana faqa qiminaqa mareeqa doo amana amiqira fee qianaura. Qinee qeeqa kudoosaapee marunna kamuqoo mi kamuqoo kai afeekaikidaqa.
2CO 12:11 Qinee inniki ani maria fasiqausa unnaqira niqiqoo fasiqausa naannaraqa maridaqa furufarira fasiqara foora maa ufana qimannimidaqa. Inneeqa kai inni oosana fannoo qini mara furufariranaki quqaqisaidanoo. Innee Koorinti maqannaasa qiniara Yisuna anoona ufa qimaqimi mari fasiqa fee qiaqaana. Innee inniki ani maria unnaqira niqiqoo fasiqausara fifau unna qidaqa uriqararausee qimariafaqa misa qiniara ureeqara fasiqee qidaqa. Kuqaa qinee kaqi fifau fasiqa maridau qinee sia misa ureeqarausa marunaiqini, misa urinaaqararausa maridaqa.
2CO 12:12 Qinee kuqaa Yisufa diqiqoo fasiqausa maridaqa aiqama ainaina kooroomannimaqee mariafanaqa qafee mariqau. Innee sia irufaqa qinee kaqi reendeenamandee uqannifiqee mariqiafana. Faiqí sia amana auqaaqaaira ainaina faqa naaquqee maru ainaina faqa Anutunara faqa kooroomannimaqee maru ainainna faqa reendeenamandee uqannifiqaafannana. Minannai kai qinee niqiqaafanna fasiqausa marunnanara kooroomma nimaqaqiafana.
2CO 12:13 Qinee maqusa maqusa Yisuna ufara suqimarusa faqa inni saimbaqa faqa amana amana kai inniki maridaqa qimannimiafannana. Sia misa amiqimannimaqasee inni mandaikamma nimaqasee qimariqiafana. Moodaa ainaina kai inniki moo kiqiafanafa mifa kai qeeqa narana munnimma sia amanaikufaqa qinee sia inni narana munnimma irammirisee mareeqa. Mi moodaa ainainnara kai iridaqa qinee aaqeefee miqi fee qidaqa. Innee moo ainaina akiaqara minni qisaaqa.
2CO 12:14 Qinee ooqai inni maqusai qaara kari fuafanausa kafaa maqee qaaramoo kifaqa doo qusasaa fuanauranoo, fidaqa sia inni narana munnimma ainaina maraanaura. Faiqi aanaaqiuqa sia nári ninaukoo narana munnimma ainaina nimidaqa, misa kai nári faiqi namu nimidaqa qinee inni nikausara foora maridaqa qeeqa narana munnimma aiqama faqa qeeqa marirana faqa inni asasammandee nimirarammidaqa.
2CO 12:15 Qinee inni nikausara foora maridaqa firaaqoo inniara qimuqusufaqa innee qini faiqiara foora quandakina firaaqoo qiniara faqa nimuqusiaqaana. Qinee kai inniara firaaqoo qimuqusidanoo.
2CO 12:16 Innee maa ufanara eedoo qifaranoo. Qinee inniki maridaqa sia narana munnimma mi ummaarana inni nimiqiafana. Innikiqari moo fannoo qiniara maaqi qiannoo Pauroofa nikaruqimasee unnufannai maasa mara quqasoofaqa maasa mina ufaanakiara foora arufuananoo maasa narana munnimma maraandoo qifoora.
2CO 12:17 Doo qinee naqifeemmasee fee inni miqi qiqiafana. Qinee maindari qeeqa ufa maraqa nuasa niqiqaafanaqa sia inni maqusai ooqureeqa sia qini duqusaafau inni munnimma narana mara mareeqau muru qimifau.
2CO 12:18 Qinee Titusana iraafananoo eedoo qimasee innee unnai finau, moo fasiqa Yisuna ufa irimarufa qini qikaqaafasaa mina faqa aqiqaafananoo Titusana faqa finau. Innee minara Titusafa maasa qikaru qimaseenoo fee maasa ainaina mareefoo qida fee. Sia fee qinee Pauroosa faqa Titusafa faqa moodaa irirana maraseeqara moodaamau fimarunnanara irida fee.
2CO 12:19 Innee mi ufana iriseeqa qiniara maaqi qifaranoo. Pauroofa narisaa faqa narí faqa marinausa faqa misasaa faqa ititaidanoo miqidanoo fee qifaranoo. Maasa sia miqianaura, asauku mundirafa maasara qundee kaimmidaqa. Qini qifaaqasaa qiqoondiuqa maasa Anutuna afusaa maridaqa aiqama ainaina auqeemaria ainaina inni dadaaqidee qidaqa auqaidaqa.
2CO 12:20 Qinee inni maqusai oonureeqa moo ainainara rufiaanaura. Inni marirafa sia amiqirafa oorudupirafa mariandoora qinee qidaqa. Koorinti maqannaasa innee qiniara mookamaseenoo qiqa qimiifoo qifoora anee sia reendeenamandee maasa qimaqiminnaranoo aanoommasee maasa qimaqimiifoo, qifoora. Qinee inni maqusai oonureeqa maa ainainausara rufiaidaqa, ufa rainarafa aanooqirafa mariandoora nariara nariara rairaiqifoora nariara nariara idara foora qeefoora, kaaqa ainainara rimariasa narifoora, nariara nariara mandufa qifoora munuqi miniqira ufa qifoora narí nuqu uqeerasee nimooqifoora dapi dapi qifoora.
2CO 12:21 Qinee innee unnai oonu raananoo Anutufa qini mareeqeenoo qisauriranaki quqaannoo. Qinee inni mandoosanaki oorureeqa inni nifusaa ikiraqasee soofaariara foora iqa qisauruanoora. Inniki moomoosa ooqaindari mandoosana marasee sia minara oonumafi irisee nisaurusee minnisaqau. Akaqausa faiqí faqa anaasee faqa narí ummuari narí ummuarirana minannai furufaridaqa akaqausa faiqí anaasee dapi maraqanua fasiqa anaaseesa faqa akaqausa ufa rukiasee nári mandoosana manda iriranamau fimariasa mariafaqa sia minara oonumafi irisee nisaurusee minnisaqau.
2CO 13:1 Doo maqee qaaramoo kifaqa inni Koorinti maqannaa nindafarara fuanaura. Qinee oonuraanaqa moodaa fasiqa aniree inniki mandoosanara qinnana siamma irianaura tamummaqara fasiqa akara ufamau fiqa qaara fasiqafee qaaramoo fasiqafee mi mandainaina qafee marianara kooroo qifaqa qinee minara anoonee qimasee ufa qianaura.
2CO 13:2 Qinee ooqai indaaru innee unnai fiqiafana inaaqiana kafaa fiqa maa ainainara qimannimiqiafana, maqee moosaa marunannaindari kafaa mi ufana kai qimannimianaura. Maqee oonureeqa sia qiaafannandee ireeda qimannimianura, maqee sia moo fannoo qinee ufannai náriara foora qiananoo rufiaki sandaannoo.
2CO 13:3 Innee qiniara randee mariafanoo. Asauku mundirafa Pauroonasaaqari kuqaa fee ufa qidanoo fee unna qidanoo fee qiniara qimariafanoo. Qinee innee iannai oonuraana kari asauku mundirafa qinisaaqari qimannimirana firaaqoo qimannimiannoo. Asauku mundirafa inni ufa iridanoo sia kudoosaapaannoo narí afeeka inni uqannifiqaannoo.
2CO 13:4 Mifa kudoosaaparanaki aunirira saqarisaa kuqufa marifa Anutuna afeekannai findufumafinoo mi afeekaikiranaki maridanoo. Maasa Yisuna faqa moodaanaki maridaqa kudoosaapaqa maridaqa maasa inni Koorinti maqannaasaki oonuree ufa qidaqa maasa Anutuna afeekannai asauku mundirana faqa kuqiranakiqari findifidaqara foora afeekaikamandee maridaqa qimannimianaura.
2CO 13:5 Inneeqa kai inneeqa marirana nimanamandee qafaaqa, kuqaa fee Yisuna mandaaqara oosanamau fidee. Asauku mundirafa inni naunduraki marifaqa innee minara iridee sia fee iridee innee kaaqa uqanna kadiqaqa maridee.
2CO 13:6 Maasa innee iannai oonuraanaqa innee maasa sia kadiqaqa maridee qifaranoo.
2CO 13:7 Maasa inniara Anutunara innaaru qidaqa sia inniara mandoosanaki aqufuaqee qidaqa. Sia maasa saika inniki anoonaikianifee qimasaidau innaaruqidaqau, inniara andeeqaramau fuaqee kai qimasee innaaru qimannisaidaqa. Maasa kadiqarana amana, inni andeeqaranara kai iridaqa.
2CO 13:8 Sia maasa amana Anutuna anoona ufa ititaanaura mina dadaaqirana kai amanaikirafa maridanoo.
2CO 13:9 Maasa qeeqa kudoosaapaida inneeqa afeekaikifaqa maasa mina qafammasee asasianaura. Innee amiqimandee andeeqarausaikamambi mariaqeera innaaru qidaqa.
2CO 13:10 Karaambaiqa afeeka uriqararana qimuna, sia inni rapeepaamma aqira uriqararana qiminau, inni pooduqarana qiminau. Qinee innee iannai oonureeqa karaambaiqa uriqararana qimuna mara maree aanoomandee inni ufa sia nimianoo qimasee moo atinai marunaqooqari maa akarana rumannimaqaanaqa inneeqa kai andeeqasee marifaqamma oonu nindafa.
2CO 13:11 Qini qikaqaafasaa doo maqee akara taikaanaura. Innee kaaqa andeeqaranara afeekaikamasee marararee qimariasa mariafanoo, qini ufa qunnana amiqimasee iriaqa, sia nariara nariara rairaiqiaqa, moodaanaki maridaqa asooaranaki mariaqa. Faiqí aanaaseera nimuqusirana nimimari Anutufa faqa naundura asooarana nimimari Anutufa faqa inni faqa mariani.
2CO 13:12 Anutuna ufa irimaria fasiqa anaaseesa aiqama inni nimandaidaqa.
2CO 13:13 Asauku mundirafa Yisufa maasa karaambaiqa mina asasamasee dadaaqira oosana faqa Anutufa faiqí aanaaseera nimuqusirana faqa naaquqara andeeqara maraquna moodaanaki kirana faqa inni aiqamausaki faqa mariani.
GAL 1:1 Qinee Pauroosa Yisufa diqiqoo fasiqausa maridaqa maa pasana akara rumannimaqaidaqa. Sia faiqí faiqi moo fannoo qini mareeqee Yisufa niqiqoo saikanaki quqaqoosa maridaqa, sia Anutufa moo fasiqara qufanoo qini mara quqanau. Anutuna asauku mundirafa Yisufa faqa narí akoona Anutuna faqa Yisuna kuqiranakinaana uqeera quqoofa miqandakai qini rafaaqafusee mara quqaqoosa maridaqa maa saikanara qidaqa.
GAL 1:2 Maaqoo maria nikaqaafasaasa dadaaqida inni Karatia maqannaasa nimandaidaqa, Karatia maqa maaqaki Yisuna ufara suqimariasa inni nimandaidaqa.
GAL 1:3 Maasa aiqamausa qikoofa Anutufa faqa mina asauku mundirafa Yisufa maasa Karaambaiqa faqa Anutuna idaaqira amiqi amiqirana faqa naundura asooarana faqa inni nimiani.
GAL 1:4 Maasa qikoofa Anutufa qufanoo asauku mundirafa iriseenoo eedoo qimaseenoo mi mau finau maqee kamuqoo marunna mandainaina afeekaikiranakinaana maasa idukuaqeera narafaaqa maasa mandainaina akiaqara aunirira saqarisaa paasoosamasee quqanau.
GAL 1:5 Anutuna areenarana faqa amooqirufa faqa naaru naaru amimariani, doo miqiani.
GAL 1:6 Oo Karatia maqannaasa qinee inni oosanara tautummiqa. Innee dauni aaqee uqanna Anutuna minnisaafaqa qinee minara iriseeqa tautiqa, mifa narasauku mundirana idaaqirana kaqi nimiranannai inni naarama quqasoofaqa innee aaqee uqanna quqasee sandeeqa moo amiqira fasaasa ufara foora randoofaqa iriseeqa tautiqa.
GAL 1:7 Sia moo amiqira fasaasa ufa maridanoo moodaa kai maridanoo, faiqí anaasee akaqausa asauku mundirana amiqira fasaasa ufa qumaree mareeqee kaqinni ubeekeeqa minannai furufarirana inni nimimariafanoo.
GAL 1:8 Indaaru maasa Yisuna amiqira fasaasa ufa inni qimannimiafannana doo maqee maasee moo fannoo fee innaarunaindaraa qangiroo moo fannoo fee moo fuka aaqee maria fasaasa ufana qimannimufaqee Anutuna aqurarara ufa misasaa mariannoo.
GAL 1:9 Maasa ooqai qimannimiafannanasaa kafaa maqee qimannimidaqa, moo fannnoo maasa ooqai qimannimiafannana moosaa qimasee qimanniminafa mifa Anutuna aqurarara ufa ameemaanai mariannoo.
GAL 1:10 Faiqí nifusaa qeeqa qimoofee qida fee nasurida fee miqi qidaqee oo sia uqanna qinee miqianaura. Anutuna kuqaa eedoo qira ufara qinee randaidaqa. Qinee faiqí nifusaa fifau nasuridaqa miqi qidafau sia asauku mundirana ainainiranaki marini maqee maqee qini darirara kai qiafaqa moo ainainiranaki funaiqini.
GAL 1:11 Oo qini qikaqaafasaauqa qinee maa ainainnara qimannimianaura. Qinee qimannimianna fasaasa ufana sia faiqí auquqoofa maridanoo.
GAL 1:12 Sia faiqikinaana qinee mareeqa, sia moo fannoo qimaqimifaqa iriqa asauku mundirafa Yisufa narí uqanna kooroomambi qimaqiminau.
GAL 1:13 Qinee ooqai kumaaraa mariafana Yuda maqannaa amaana ufa amiqimandee firaaqoo qimariqiafana. Qinee Yuda maqannaasa amaana ufara qeeqa qikiaqauqa urinnaaqaramasee mi ainainna qiqiafana. Qinee misa urinnaaarammasee firaaqoo maasa qikeeku qikaaku oosana maraqiafana. Qinee minaki fidaqa Anutuna ufara faqa Yisuna ufara faqa suqimarusa sia nifauaqiafana afeekaikamandee misa mandaikamma nimaqaqiafana. Qinee minara amiqimandee taikaanee qidaqa mandaikamma nimaqaqiafana.
GAL 1:15 Anutufa sia qini mandoosanara irinoo narí idaaqira amiqi amiqira mariranaki marinoo qini qinoofa sia qini maqoo kamuqoo narí ainainira saikaki marianifeera ooqai indaaru qini daarama mi saikanaki quqaqisoofaqa kisaaqasaa sia iriqiafana, mana mana kai qiqiafana.
GAL 1:16 Anutufa qiniara narí amiqira fasaasa ufa aanaamuru qimannimiannee qimaseenoo Damasakusa maqusai fimariafanna aanasaa narí amaaku qini uqaqifiqanau. Uqaqifiqasoofaqa sia moo fasiqunnai oonureeqa Yisuna aufakiana iriqia, narí amaaku uqaqifiqaannee qimaseenoo sia Yisufa niqiqoo fasiqusakina ooqai marusakina Yeerusareenni sia ooruree iraafanaqa qimaqimiqau. Sia qinee miqi qiafana qinee andeeqasee quandaki Arabia maqa maaqai oonu marikiqa oonu randeeqa anireeqa kafaa Damasakusa maqusai fiqiafana.
GAL 1:18 Yisufa indaaru kooroommaqooqooqari qaaramoo aukuana aiqarammafufaqa Yeerusaree maqusai ooruree Peetooroo funnai mina qafamasee aqoondikianauree qimaseeqa mina faqa qaara amaana maraqiafana.
GAL 1:19 Mi kamuqoo sia Yisufa niqiqoo fasiqausa nindafaqiafana misakiqari Yisuna akaqa Yameesana mina kai qafaqiafana.
GAL 1:20 Qinee maa akaranakinaa ufa anoona kai qidaqa sia unna ufa qidaqa. Faiqí sia Yisuna fasaasa ufa qimaqimiqau, Yisufa narí kai qimaqiminau. Anutuna afusaa maridaqa anoona ufa kai qidaqa.
GAL 1:21 Qinee Yeerusareenni qaara amaana maraseeqa Siria maqa maaqaki faqa Sirisia maqa maaqaki faqa oonu kisaaqasaa mariqiafana.
GAL 1:22 Mi aukuanna mi kamuqoo Yudeea maqa maaqaki maridaqa Yisuna ufara suqimarusa sia qini qiqafaqau.
GAL 1:23 Akaqausa qiniara qimannimunara irimarusa kai mariqau. Misa maaqimandee qiniara qimannimiqau. Maasa mandaikamma qimiqeemaru fasiqafa doo maqee quandaki narí naru taikee maru ufana qimannimidanoo.
GAL 1:24 Misa mi ufana iriseeqa Anutufinnai qiniara dufi dufi qimariqau.
GAL 2:1 Qinee Pauroosa Siria maqa maaqaki faqa Sirisia maqa maaqaki faqa kisaaqasaa qisaukuqara taikasee qikunni qaara faqa qaara faqa ooqu marasee aukuana maraseeqa Baranabasina faqa Titusana faqa nifiqamareeqa Yeerusareenni ooru fiqiafana.
GAL 2:2 Anutufa narí maraqunannai kukeeqasee qimaqimunara ooru fiqiafana. Miqoo ooruree Yisuna ufara suqimarusa misa uriqararausa faqa kai ufa qidaqa, aanaamuru Yisunara qimannimiafannufana oosana oosana qimannimiqiafana. Misa sia irifaqa qini saika ooqai faqa maqee faqa sia amiqimandee qini dooki iriranaki qaoo qifoora minara qinee qimannimiqa.
GAL 2:3 Qini qiqoondi Titusafa aanaamuru Kirisa maqusaindari qini faqa Yeerusaree maqusai ooru marufaqa Yuda maqannaasa Yisuna ufa irimarusa minara maasa sia Yuda maqannaa naanna ramasee Titusana fainanduquaneera qiqau, kaqi mana mana imariqau.
GAL 2:4 Faiqí akaqausa Yuda maqannaa unna qimasee Yisuna ufara suqimarunausee qimasee maasaki umee ani keeqafufaqa Titusana qafammasee mina fainanduquaqee qufaqa maasa qaoo qiqiafana. Misa nipuraraa fasiqara foora kukeeqasee maasaki ani keeqee mariqau. Maasa Yuda maqannaasa faqa aanaamuru faqa asauku mundirana Yisunaki marunara sia nariara nariara rufieeqa amiqi mandee moodaanaki Mooseena sandufakiqari idukiara foora marunara nipuraraa fasiqara foora minaki ani keeqafufaqa maasa mareeqee Mooseena sandufaki rumbaranakiara foora kafaa quqaaneera nipuraqau.
GAL 2:5 Maasa sia misa ufara eedoo qiqiafana. Inni aanaamuru mariasara iriseeqa sia eedoo qimasee Titusana fainanduqiqiafana. Yisuna amiqira fasaasa ufa anoona ufara kai innee aanaamuru mapukusee maraaqee qimasee sia misa ufa fainanduqirufa iriqiafana.
GAL 2:6 Qinee Pauroosa Yeerusareenni ufa qimarunaki maridaqa Yisuna ufara suqimarusaki maridaqa faiqí misara uriqararausee qimarusa faqa ufa qimarufaqa iriafanaqa sia moomau fiqau qinee fimariafannamau mi mau kai fiqau. Qinee faiqí misara uriqararausee qiqa, Anutufa sia faiqí nifaaqa qafamaseenoo uriqararausee ureeqarausee qidanoo minara qinee sia uriqararausee qiqa sia ureeqarausee qiqa amana amana kai mariaa maqi qimasee qeeqa aanaamuru faiqí aanaaseeki saika maree marunnana kooroomasee paasoosamandee kaqi qimannimiqiafana. Qimannimiafanaqa uriqararausee qimariasa sia qaoo qimasee moosaa fiaanoo qiqau.
GAL 2:7 Misa qiniara maaqi qiqau, ooqai Yisuna amiqira fasaasa ufa Yuda maqannaasa qimannimirafa Peetooroonasaa Anutufa quqanau, doo maqee kamuqoo mifa aanaamuru mi ufanakai qimannimirafa qini Pauroonasaa quqee maqi qimasee maanara faqa irimariqau.
GAL 2:8 Anutuna afeeka fannoo kai Peetooroona mara quqa amufanoo Yuda maqannaasaki fidanoo qimanniminau, miqi kai inoo Anutuna afeeka fannoo qini Pauroosa mareeqeenoo aanaamurukina mara quqasoofaqa fuafannaqa minara faqa irimariqau.
GAL 2:9 Yisuna ufa irimariasa uriqararausara foora mariasa Yameesafa faqa Peetooroona faqa Yoohaneefa faqa qini ufa iriseeqa maaqi qiqau. Oo kuqaa Anutufa ani mareeqeenoo kuqaa aanaamuruki quqeenoo, anee aanaamuruki ainaininaqa maasa Yuda maqannaasaki ainainianauree qimasee qini faqa Baranabasina faqa nisauku ruqunnaseeqa doo fuaqee qimasee moodaa ufa kai maaqi kai qimasee qimaqimiqau. Inneeqara Pauroosa faqa Baranabasina faqa Yudeea maqa maaqaki maria kudi fasiqausara Yisuna ufa irimariasa maqee maqee iridaqa dadaaqiaqa. Miqi qufaqa qinee iriseeqa maaqi qiqiafana, qinee minara kai afeekaikianauranoo fee qiqa. Mi ufa suqirana Yeerusareenni maridaqa qimaqimiqau.
GAL 2:11 Doo miqooqari moo aukuana ai randoofaqa Peetooroofa Antiooka maqusai qinee mariafannaqoo aniroofaqa qinee aiqamausa nifusaa Peetooroona afusaa aqiqiafana, akooqoo mifa aaqamasoonara afusaa aqiqiafana.
GAL 2:12 Yuda maqannaasa nári sandufa qiqa aanaamuru mariasa faqa sia moodaanaki misa saimbaqa narana naanauree qiqau. Peetooroofa Antiooka maqusai maridanoo misa Yuda maqannaasa sandufa rukiaseenoo miqooqaraa aanaamuru Yisuna ufa irimariasee qimaseenoo maqee maqee misa saimbaqa moodaaqoo ooqu marifidanoo narana nee marinau. Miqinoo marufanoo Yameesafa Yeerusaree maqusai maridanoo akaqa Yuda maqannaasa niqiqoofaqa Antiooka maqusai ooqu fiqau. Misa ooquroofanoo Peetooroofa nindafamaseenoo rufiamareenoo aadumai nianasaa oonu ooqu marifufanoo qimmirinoo qinau. Maa fuka Yuda maqannaasa Yeerusareendari qumuraasa qiniara sia fainanduqirausa faqa narana naidanoommifoo qifoo qimasee rakeemasee aadumai ooqu marifinoo narí narana nanau. Yuda maqannaasa Yisuna ufa irimarusa misakiqari akaqausa aanaamuru marusara maaqi qiqau.
GAL 2:13 Yuda maqannaasa qikaqaafasaauqa Peetooroona faqa miqoo marusa Peetooroona oosana qafamasee misa faqa miqi kai iqa Yeerusareendari qumusara rufiamareeqa Peetooroofa ooqu marutinai ooqu marifiqa nári narana naqau. Misa sandeeqa Baranabasina faqa firarisameeqee nári manda maparaa iranaki quqasoofanoo aadumai ooqu marifi nanau.
GAL 2:14 Qinee misa miqiu oosanna qafamaseeqa maaqi qiqiafana, misa sia amiqira fasaasa ufa anoona ufamau andeeqasee fidaqa eendaandammida miqi mariafanoo, miqi qimasee Peetooroona aiqamausa nifusaa afusaa aqiqiafana, anee Yuda maqannaafa mariananoo aanaamuru oosana marasee aanaamuru faqa moodaanaki mariananoo, anee nanaree maqee aanaamuruara asaurusee rakeemasee aadumasaa ooqu marinanee. Anee miqiannana aanaamuruara sia fee amanaikinanee miqinanee. Anee aanaamuru mareeqeenana Yuda maqannaasaki quqasainaqa innaarunai firana amanaikidee miqidanee.
GAL 2:15 Qinee miqi qimasee Peetooroona aqisee maaqi qimasee aiqamausa qimannimiqa. Kuqaa maasa Yuda maqannaaki kambiqarausa maridaqa. Maasa sia aanaamuru mariasa, misa Anutuna ufara sia irirai mana mana imariasa.
GAL 2:16 Sia maasa Mooseena sandufasaaqari firanannai Anutuna innaarunai firana amanaikiranaki keeqaanaura, asauku mundirana Yisunasaa rusiranannai kai Anutuna innaarunai firana amanaikiranaki keeqaanaura. Sia faiqí moo fannoo Yuda maqannaasa sandufannai Anutuna innaarunai amanaikiranaki keeqaannoo.
GAL 2:17 Maasa Yuda maqannaasa Anutuna innaarunai amanaikiranaki keeqararee qimasee asauku mundiranasaa atooqafiqa quandakiqa boo aanaamuru mariasa naanna ramafiqa mandoosana maree marunausee qianauranoo. Maasa miqidaqa asauku mundira fee maasa mareeqee mandainainaki quqeenoo fee qianauree.
GAL 2:18 Oo sia uqanna miqinoo maridanoo. Qinee Pauroosa Mooseena sandufannai Anutuna innaarunai amanaikiranaki keeqaranara qaoo qimarunausa maridaqa, qinee maqee quandaki minara eedoo qiqa Mooseena sandufa rukiaanaura.
GAL 2:19 Mooseena sandufara qinee maaqi qianaura doo mifa qini aaqarana qimaqiminoo darusaifaqa kuqiqa maridee qidaqa. Qinee Anutuna saikara findifi minaki mariaqeera qini darusaifaqa kuqiara foora iqa maridaqa. Asauku mundirafa auniriranasaa kuqinoo qinee faqa minandiri kuqiara foora iqa maridaqa doo maqee sia qeeqaraa kasida maridaqa, asauku mundirafa qini daundurai marinara kasida maridaqa. Qinee maa maqee kasira marirafa Anutuna amaaku maqee maqee saqarikidaqa maridaqa, mifa qiniara amuqusinoo narí marirana quqanau.
GAL 2:21 Qinee Anutuna idaaqira kaqi nimirana qimifaqa sia qaoo qimasee minnisaanaura, faiqí moo fannoo Mooseena sandufasaaqari Anutuna innaarunai amanaikiranaki keeqainanara asauku mundirafa fifau kuqinau maqi qidaqa.
GAL 3:1 Oo Karatia maqannasa innee furufari mariasa yafee inni mandirirana naakunimaqeenoo fee Yisunasaa rusirana afainoo fee. Qinee Pauroosa inni Karatia maqannaasa nifusaa asauku mundirafa aunirira saqarisaa kuqunara amiqimasee kooroomasee inni nifusaa qimannimiafanaqa inni nifusaa kuqinoora fooqaana innee amiqimasee irimariafanoo, doo maa moodaa ainainara kai irammirianaqa qimaqimiaqa, innee Mooseena sandufa maraqa nuana minannai fee Anutuna maraquna maraaqee iqau, Yisuna amiqira fasaasa ufa irisee irirana minasaa rusiranannai fee Anutuna maraquna maraaqee iqau, minasaa irirana rusiranannai kai maraqau.
GAL 3:3 Innee naqiaqooqari fee firaa furufariranaki fi fee, innee Anutuna maraquna naakusee minannai oosana arasee andeeqasee fidaqa kafaa maqee mariaqooqari nanaree innee mina afaimma quqasee faiqí faiqi iriranamau maqee maaqooqari fidee.
GAL 3:4 Indaaru Anutuna maraquna inni naakufufaqa amiqira oosana inniki kambiqafinau doo maqee innee minara fifau ainainee fee qidaqee. Sia fee innee minara iriafanoo nimuqusidanoo fee.
GAL 3:5 Anutufa narí maraquna afaaramasee inni maqee maqee nimidanoo faiqí sia auquaqaa ira ainaina auqimarifaqa innee qafee mariafanoo. Innee Mooseena sandufamau fimarianara Anutufa narí maraquna inni nimidanoo fee amiqira fasaasa ufa iriqa irirana minasaa rusimarianara Anutufa narí maraquna inni nimidanoo fee. Minannai kai narí maraquna inni nimidanoo.
GAL 3:6 Oosana aroo ufafa irirana rusimarianara maaqi qidanoo Abarahaamana auqu ramasee mina kikiqusinoo maaqi qidanoo. Ooqai Anutufa Abarahaamana nauraiqi marufanoo qimaminau. Abarahaama anee faiqi siaifa mariananoo anee moomoo maqusanaasa nikoofa marinnaranoo. Abarahaamafa mina iriseenoo oo kuqaa kambiqaannoo qimaseenoo narí irirana Anutuna ufasaa rusisee afaaqa quqasee marinau. Anutufa Abarahaamafa narí irirana Anutunasaa rusisoona qafamaseenoo minara maaqi qinau. Oo doo Abarahaamafa qini Anutufa innaarunai firana amana kai mari fasiqafa maridanoofee qinau.
GAL 3:7 Qinee Pauroosa minara maaqi qidaqa innee Karatia maqannaasa amiqimandee maana iriaqa. Kuqaa Yuda maqannaasa Abarahaamana maqasaaqaraa ati mina moodaa maqannaasa mariafanoo Anutufa Abarahaamana atiara moosee qidanoo maaqi qidanoo. Abarahaamana aanna reemariasa Anutuna ufasaa irirana rusimariasa misa kai Abarahaamana aiku asauku anoona uqanna maridaqa.
GAL 3:8 Anutufa ooqai indaaru aanaamuru maqannaara nári irirana Anutunasaa rusinausa Anutuna innaarunai firana amana keeqeefandiafoo qimasee akara rumaqoofa maaqi qinau. Anutufa ani Abarahaamanasaaqari aruruki akinanoo aiqama maa maqa maaqana afaaqasasa mariasa amiqi amiqimma nimaqaannoo fee qimaqoofa maridanoo.
GAL 3:9 Anutufa qufanoo Abarahaamafa mi ufana nariara irisee doo kuqaa fee qunara Anutufa Abarahaamana amiqi amiqinau. Doo maqee aukuana miqi kai iqa aiqama irirana Anutunasaa rusimariasa Abarahaamanasaaqaraa amiqi amiqirana Anutufa raina nimidanoo.
GAL 3:10 Aiqama maqannaasa Mooseena sandufamau fidaqa minannai Anutuna innaarunai firana amanaikidaqa keeqaanauree qimariasa aaqamaki Anutuna niqurararufa nimaarusirufa ameemaanai maridaqa.
GAL 3:11 Tamummaqara fasiqauqa akara minara maaqi qinoo maridanoo, Anutunasaa irirana rusimarianannai Anutuna innaarunai firana amanaikiranaki keeqeemariasa misa kai maqee oosana arasee naaru marirana mareefaranoo. Maasa mina irisee maa ufanara kooroo ifoo qidaqa sia faiqí moo fannoo Mooseena sandufa mararanannai Anutuna innaarunai amanaikiranaki keeqaannoo.
GAL 3:12 Mooseena sandufa sia Anutuna saqarikirafa minasaa mundinoo maridanoo. Mooseena sandufa fannoo faiqí minasaa kaaqa andeeqasee firafa minasaa mundinoo maridanoo. Tamummaqarausa akara minara maaqi qidanoo, Mooseena sandufamau kaaqa andeeqasee fimarifa kai naaru mariranaki keeqaannoo fee qimasoofaqa maasa sia amanaikidaqa sia keeqaanaura.
GAL 3:13 Asauku mundirafa Mooseena sandufamau fimariasa Anutuna niqurararufa ameemaanai rumbaqa marunara iriseenoo asauku mundirafa narí kai Anutuna niqurara ufaikamambinoo maasa daaqa qumureenoo minaki rumbaqa marusa idukuqisanau. Tamummaqara fasiqauqa akara minara maaqimminoo maridanoo. Saqarisaa dirifi kuqimariasa aiqamausa Anutuna niqurararufa ameemaanai mariasa maridaqee qidanoo.
GAL 3:14 Asauku mundirafa saqarisaa dirifi kuqinau. Anutufa ooqai Abarahaamanasaaqaraa amiqi amiqirana aanaamuru mariasa nimianifee qimasoofanoo asauku mundirafa saqarisaa dirifi kuqinau. Asauku mundirana Yisunannai aanaamuru mariasa Anutufa Abarahaamanasaa qima afeekaikira amiqi amiqirana misa faqa raina mareefaranoo. Maasa faqa qeeqa Yisuna saqarikiranannai Anutufa narí maraquna nimiraree quna faqa maraanaura.
GAL 3:15 Oo qini qikaqaafasaauqa maasaki mari ainaina kikiqususee qianauranoo. Faiqí qaaraqanda moo ainainara qimasee qima afeekaikamasee mi ainainna papiqasaa akara rumasee nariqara nuqu minasaa akara rumasee sia amana mi ufana minniseefara, mi mau kai fifaranoo.
GAL 3:16 Miqi kaimmasee Anutufa narí qima afeekaikira ufa Abarahaamanasaa faqa mina atisaa faqa quqaseenoo akara rinau. Ooqeenaa akara fannoo sia narí atiuqa moomoo fasiqa anaaseera qidanoo. Mifa maaqi qidanoo, ani ati kaimma qima afeekaikirana amianauree qidanoo asauku mundiranara moodaara qinau.
GAL 3:17 Qinee Pauroosa minara maaqi qidaqa Anutufa Abarahaamana narufa amiseenoo doo qinee mi mau kai fuanaureeqimasee qimafeekaikinau. Miqooqari (430 aukuana) aukuana moomoo uqanna aiqara mafufanoo Mooseena sandufa fannoo kasooqaqee innaaqiana kambiqafinoo sia amana Abarahaamana qimamu ufana rafaaqafuannoo kaqi mariannoo.
GAL 3:18 Anutufa Abarahaamanara Kannaa maqa maaqakinaa saqama namufaqa faiqi namufaqa aiku asauku namufaqa amiraree qimasee Anutufa mi maqa maaqa saqamana Abarahaamafa narí sandufamau funara sia irirai ooqai narí qima afeekaikammaqoo iriranasaa narí afaarinoo aminau.
GAL 3:19 Maasa minara irisee Anutufa naqiraree sandufa Mooseena aminoo fee inau. Mooseenakiqari fifiufanoo Anutufa qima afeekaikira ufa qimamufa Abarahaamana ati anoona uqanna kambiqaaninanaki Mooseena sandufa taikaannoo. Mi qambaana kamusaqanna aaqarana kooroomma nimaqaanifeera Anutufa mi sandufana quqanau. Anutuna qangiroouqa mina sandufa Mooseena amufanoo Mooseefa Anutuna faqa maqasaa fasiqa faqa aanaiqikinoo maridanoo maqasaa narí aqoonausa niminau.
GAL 3:20 Anutufa sandufa quqeemarufa faqa faiqí anaasee mi ufamau fimariasa faqa marianara aanaiqikirafa Mooseefa mina qambaana maridanoo. Abarahaamana qima afeekaikirana amuaukuanafa sia miqinoo maridanoo. Abarahaamafa sandufamau firafa sia marunara aanaiqikirafa faqa sia marinau. Anutufa naríara qima afeekaikira ufannoo Abarahaamana qimaminau. Maasa minara uriqarara oosanee qidaqa.
GAL 3:21 Maasa minara iridaqa Mooseena sandufa fannoo Anutuna ufara qima afeekaikirufa Abarahaamana amunafa rafaaqafidanoo fee qianauree. Sia amana rafaaqa fuannoo. Mooseena sandufa oosana maaqimminoo maridanoo. Faiqí anaasee Mooseena sandufamau fidaqa mina akiaqara sia amana naaru marirana mareefara. Miqira sandufa Anutufa sia niminau. Niminaqau mi sandufana mareefau innaarunai fini.
GAL 3:22 Ooqeenaa akara fannoo aiqama maqannaasara nári mandoosana afeeka ameemaanai kuridiranaki maridaqee qidanoo. Qinee Pauroosa minara maaqi qidaqa Yisunasaa irirana rusimariasa Anutufa narí qima afeekaikamandee maqee oosana arasee naaru marirana nimiannoo fee qidaqa, mi nimirafa asauku mundirana Yisunasaa rusimarianasaa mundinoo maridanoo. Aiqama ainaina nári mandoosana afeeka ameemaanai marianara Yisunasaa irirana rusimarianannoo kai aikaquannoo.
GAL 3:23 Yisuna saqarikira aukuana sia maruqoo Mooseena sandufa fannoo mina afeesidanoo maasa karabusara foora rumbaseenoo maramareenoo Yisuna saqarikira aukuana kooroomambufanoo minaki quqaqisanau.
GAL 3:24 Asauku mundirafa qumuaninna aukuannasaa Mooseena sandufa fannoo maasa uqannifiqara fasiqara foora marinoo maasa Yisuna saqarikiranannai Anutuna finnai innaarunai firana amanaikiranaki keeqaaqeera maasa nifiqamaree asauku mundirana aaqa munu qisanau.
GAL 3:25 Doo maqee Yisunasaa rusirafa ani maridanoo ooqai uqaqifiqee marufa Mooseena sandufa sia maqee rakisi nimaqaidanoo.
GAL 3:26 Innee aiqama Yisuna saqarikiranannai asauku mundiranaki keeqafi marianara Anutuna amaaku kamambi marianara innee inneeqa nammari maroonannai innee asauku mundirana andeeqara marirana qamunnara foora akumaree minaki fuaqa.
GAL 3:28 Doo minakiqari sia Yuda maqannaasa faqa aanaamuru faqa naaduma moo kiqa maridaqa sia karabusa ainaini mariasa faqa idukirausa faqa moo kiqa mariafanoo sia faiqí faqa anaasee faqa mookiqa mariafanoo amana amana kai mariafanoo. Innee aiqama asauku mundirana Yisuna faqa moodaanaki maridaqa aiqamausa amana amana kai moodaa mariafanoo.
GAL 3:29 Innee asauku mundiranaindi marianara Abarahaamana ati mariafanoo. Abarahaamana atiuqa marianara Anutufa Abarahaamana amiqi amiqirana qima afeekaikuna mi amiqi amiqira ainainna kasooqaqee innaarunai inni faqa nimiannoo.
GAL 4:1 Mi ufanasaa ootupammasee maa ufana ainainafaqaafa faqa narí amaakuara faqa qimannimianaura. Faiqí moo fannoo kuqufinanoo mina faiqi mina aiqama ainaina maraanoo. Mina akoofa kaqi maru kamuqoo mina faiqi sia innooqanoo marufanoo kaqi narí akoona ainainira faiqiara foora maridanoo. Narí akoofa narí amaakuara narí ainainira faiqiara foora marifanoo saika ummaqirana dadaaqi marinara narana aandau amidanoo. Narí akoona aiqama ainaina maraaninafa maridanoo kaqi fifau ainainira faiqiara foora narí akoona faqa maridanoo.
GAL 4:2 Mina faiqi kumaaraa marifaqa mina akoona ainainira faiqiuqa mi faiqina faqa mina akoona ainaina faqa rakisiqa fifi ifaqa mina akoofa doo innooqee maqi qimasaifanoo mi faiqifa ainainasaa rakisidanoo.
GAL 4:3 Miqi kai iqa maasa sia innooqeera fooqaa ira kamuqoo maasa maa maqa maaqanasaaqaraa irira sandufa ameemaanai mariqiafana. Anutufa maa aukuanara andeeqara aukuanee qimaseenoo narí amaaku aqiqanau. Aqiqamaseenoo maasa Mooseena sandufa ameemaanai mina rumbaranaki mariusa minakiqari feefauru aquseenoo idukusoofaqa findifiqa Anutuna amaaku kamambi mariaqeera Yisufa maa maqa maaqanasaaqaraa anaasee aranandaki rumafufanoo maqasoofanoo Mooseena sandufa ameemaanai maa maqanasaa kambiqafi marinau.
GAL 4:6 Anutufa inniara mina amaaku fee qiaqeera qimaseenoo narí amaaku maraquna inni nimuqusaki aqiqoofanoo keeqafi maridanoo, mi maraqunafa inni dadaaqifaqa innee faiqi aanaaqiara fooqaana Anutunara qini qikoo fee qimariafanoo.
GAL 4:7 Miqinara innee sia maqee fifau ainainira faiqi marifaranoo, innee faiqí faqa anaasee faqa kuqaa Anutuna faiqi araamuqmaakaikammafi mariafanoo. Doo marifanoo narí amaaku amianinnana innaarunai mari saqamana mareefandinausa mariafanoo. Anutufa narí kai qifaqa innee mina amaaku araamuqmaaka mina innaarunai mareefandinausa mariafanoo.
GAL 4:8 Ooqai innee Karatia maqa maaqaki marusa sia Anutuna aaqa oonuree amiqimasee irimariqau afaanna ainaina sia Anutunaki maru ainaina innee mina rumbaranaki mariusa mariqau.
GAL 4:9 Doo maqee uqanna Anutunara irimariafanoo, Anutufa faqa doo inniara faqa iridanoo. Doo nanaree innee miqooqari kafaa quandaki kafaa manda umooqukira kuquaqaaira maqasaa irirana innai faqa inniqa nauraa manda sandufa innai faqa quandee fee. Innee Anutuna faiqikiranakiqari quandaki fifau maqasaa irirana rumbaranaki fidee miqidaqee. Saina Yisunasaa rusirafa kai mariaqaana.
GAL 4:10 Innee Karatia maqannaasa kaaqa Yuda maqannaasa oosana oosana sabata faasaanara rimariasa mariafanoo aaqaida miqi mariafanoo. Kaaqa inni moo quqoonara naaquqaifaqa Anutunara iri maria quqoona fee qimasaida minara kai irimariasa mariafanoo. Aukuanara faqa qambaana saqannara faqa kaaqa minara ridaqa minannai innaaruna aana maraanauree qidaqa aaqee mariasa mariafanoo.
GAL 4:11 Qinee Pauroosa inniki marunausa inniara rufiaidaqa. Inniki ainainiafanafa fifaunni maqasaa rairaa idanoommi maqi qidaqa.
GAL 4:12 Oo qini qikaqaafasaa mariasa inniara afeekaikamandee qimannimidaqa. Qinee Pauroosa Yuda maqannaasa mariaafanausa maridaqa misa oosana faqa Mooseena sandufa faqa minnisee aanaamuru naanna ramasee Yisuna saqarikammasee mina ameemaanai maridaqa. Innee faqa miqi kai iqa qini daanna reeqa Mooseena faqa Yuda maqannaasa faqa sandufa minnisee Yisuna kai saqarikiaqa.
GAL 4:13 Qinee aaqee indaaru amiqira fasaasa ufa inni qimannimiafanna oosannara irimariafanoo, qinee aurida mariafannanara inni maqa maaqaki kisaaqasaa maridaqa qimannimiqiafana.
GAL 4:14 Qinee auruafanaqa qiqafee sia qiniara nikooqoofaqa qini mandaikamaqisasee minniqisaqau. Qini aurirafa firaaqoo inni narufaqa minniqisaaneerusia sia minniqisaqau. Idaaqa kai maqisee marufaqa mariqiafana. Innee qiniara Anutuna qangiroora foora mari ifoo qimasee qini qumaraqau. Innee asauku mundirana Yisuna qumaroondeemmiqa qini qumarasee amiqi amiqimmaqisaqau.
GAL 4:15 Mi fasannai innee firaaqoo qiniara asasimariqau, maqee naqi fee ifaqee sia miqidee. Inni ooqai mariranara maaqi qidaqa innee firaaqoo qiniara qimudaoo qimasee qini dadaaqianee qimasee inneeqa firaa uriqarara ainaina kaqi qimuqini inneeqa nifu faqa pitaqimeeqee kaqi qini qimuqini.
GAL 4:16 Doo maqee Yisuna anoona ufa qimannimunnanannai fee qini namuqaa kamambi maridee. Oo sia miqifanoo andeeqaannoo.
GAL 4:17 Akaqa fasiqa anaasee aaqee mariasa inni faqa ani maridaqa moo unna ufa qimannimi mariasa inniara unna qimasee firaaqoo ridaqa amiqi amiqidaqa ueeqaidaqa sia amiqira iriranarau miqidaqau, misa inni mara mareeqa qini Pauroosasaa qaraana rakee iaqeera miqidaqa, misa irirafa innee iannai ubeekanoo marifaqa inni iriranara nári iannai ubeekamasee misa ufa iriaqeera miqidaqa.
GAL 4:18 Akaqausa inni rarisamaseeqa inneeqa irirana misasaa atooqara oosanafa qaaraikamminoo maridanoo. Moo mandoosana moo amiqira oosana maaqimminoo maridanoo. Misa inni rarisamasee misa manda oosana maraaqee qira oosanafa mandoosana maridanoo. Misa inni rarisamasee amiqira oosana maraaqee qira oosanafa amiqira oosanafa maridanoo. Ooqai qinee Pauroosa inni faqa mariafanaqa inni irirafa qinisaa atooqafi innee qiniara ridaqa mariusa mariafanoo maqee nianai marunaqa innee qiniara minnisee unna ufa qimariasara kai misara kai rimariafanoo.
GAL 4:19 Qini faiqi namu qini qimuqusimaria faiqi namusa mariafanoo. Anaasee moo fannoo faiqi aanaaqi maqaidanoo aupuraidanoo maqaidanoo. Qinee miqikaimmasee amiqira fasaasa ufa inni qimannimisee asauku mundirana andeeqara oosana marirana nirana inniki kambiqaanifeera inniara aupuraidaqa qimannimidaqa.
GAL 4:20 Oo qinee maqee nianai maridaqa inni faqa mariaqaana nianai maridaqa inniara amiqira irirana iriaqaana kaaqa inniara daunduraki umaara raidanoo.
GAL 4:21 Innee indaaru Mooseena sandufakiqari idukufi Yisuna ufasaa atooqafi mariaasa maqee Mooseena sandufa ummaara ameemaanai munari minari kafaa keeqararee qimariasa mariafanoo. Innee sia fee mi sandufana iridaqee minaki kaifaa keeqaidee.
GAL 4:22 Mifa maaqi qidanoo, Abarahaamafa qaara faiqi maqoofa maridanoo, moo indaaruqaa faiqi anoofa ainainira anaasee rumbarafa marinau, moo faiqi inaaqiannaana anoofa idukira anaasee Abarahaamana anaaqa uqanna marinau.
GAL 4:23 Abarahaamana amaaku Isamaeerafa rumbara anaasee faiqi marinau, faiqí anaasee imarundee inoo kai faiqi maqanau. Idukira anaasee Saraqana faiqi aadumasaa kambiqanau Anutufa qima afeekaikamasoofanoo Saraqafa qaafa anaasee asooqa maridanoo Abarahaamana faiqi maqanau.
GAL 4:24 Mi anaasee qanda qaara irirana kikiqammusiqa maridaqa. Moo Qakaarafa Sinai aaqanasaa kambiqara anaasee marifa marifaqa mina faiqi namu Mooseena sandufa ameemaanai rumbaranaki kambiqarausa maridaqa.
GAL 4:25 Qakaarafa Arabia maqa maaqaki mari aaqanna kikiqammusinoo maridanoo maqee maria Yeerusaree maqusa kikiqa faqa usinoo maridanoo mi maqusana faqa mi maqusanaki maria fasiqa anaaseesa faqa rumbaranaki Mooseena sandufa nimaarusira rumbaranaki maridaqa.
GAL 4:26 Abarahaamana moo anaasee Saraqafa sia rumbara ainainira anaasee, sia Mooseena sandufa rumbaranaki marifa idukira anaasee marifa maasa Yisunasaa rusimariasa ninoofa uqanna maridanoo. Mifa innaarunai fuka Yeerusaree maqusara foora Yisunasaa rusimariasa firaa maqusa misa ninoofa uqanna maridanoo.
GAL 4:27 Ooqeenaa akarakinaa idi fannoo Saraqanara maaqi qidanoo, Innee faiqi siai anaaseesa asasiaqa, faiqi siai anaaseeuqa sia aupurarana faaqarimariasa, doo maqee innee asasiranara kai faaqaruaqa. Afaaqi minnisai asooqa adeedaana, nifaaqi faqaasa uraaqaramasee moomoo faiqi maqaannoo. (Abarahaamafa Isamaeerana anoona mifinnai oori ukeekeenoo narí anaaqa uqanna Saraqarana mafi ameesuqusoofanoo mariufanoo mifa faqa asooqanamuki Abarahaamana faiqi uqanna Isakeena maqanau. Minara faiqí minnisainna aanaaseefa faiqi moomoo maqeenoora foora firaaqoo asasiannoo fee qinau.)
GAL 4:28 Qinee Pauroosa minara maaqi qidaqa. Saraqana amaaku Isakeefa Anutuna qima afeekaikira ufasaa kambiqanoo marinau, doo maqee innee qini qikaqaafasaauqa miqi kaimmasee Anutuna ufasaa mina faiqi namu kammambiqa mariafanoo.
GAL 4:29 Mi aukuanna Isakeena aukuana faiqí anaasee undee mandoofanoo kambiqoofa Isamaeerafa quandakinoo Anutuna maraqunannai kambiqoona Isakeena mandaikammamaqanau, doo maqee faqa mi oosanafa miqikaimminoo maridanoo. Mooseena sandufa ameemaanai mariasa inni aana ititaidaqa.
GAL 4:30 Ooqeenaa tamummaqara akara fannoo minara maaqi qidanoo, Rumbara anaasee faqa narí faiqi faqa aqiqamasaina moosaa fifuani. Rumbara anaasee amaaku Isamaeerafa idukira anaasee amaaku Isakeena faqa sia mina akoona ainaina moodaanaki maraani.
GAL 4:31 Doo minara qini qikaqaafasaauqa inniqasaimbaqa sia rumbara anaasee faiqi namu maridaqa idukira anaasee faiqi namu maridaqa, Yisuna idukiranaki maridaqa.
GAL 5:1 Asauku mundirafa Mooseena sandufakinaana idukueeqee narí idukiranaki quqaqaifaqa maasa minaki maridaqa, doo minara iriseeqa idukira fasiqara foora doo minaki mapukusee maridaqa sia kafaa sandufa oosana oosana rumbaranaki firaree qiaqa.
GAL 5:2 Innee maana iriaqa qinee Pauroosa qimannimidaqa, indaaru innee asauku mundirana saqarikiqau. Kafaa maqee moo fannoo inniara Yuda maqannaasa fainanduquseeqa Yisunasaa ookaamambiqa innaarunai fuaqee qinaqa innee miqifanoo Yisufa sia amana inni dadaaqiannoo fifau ainainara foora mifa maridanoo.
GAL 5:3 Qinee kafaa qimannimianaura afeekaikammasee qimannimianaura moo fannoo inniara Yuda maqannaasa fainanduquaqee qinaqa fainanduquseeqa Mooseena sandufa ameemaanai doo minaki oonuraafanoo sia Yisuna namufaqa fuaqa mi mau kai fuaqa.
GAL 5:4 Mooseena sandufannai Anutuna innarunai amanaikiranaki firaree qimariasa doo Yisunasaaqaraana doo inneeqa ateekaseeqa mariafanoo Anutuna kaqi afaarinoo nimiranasaaqaraana aqoosai mariafanoo.
GAL 5:5 Maasa sia miqidaqa sia sandufasaa ookaaidaqa, maasa irirafa Anutunasaa kai mundiqa maridaqa mifa narí kai maasa mareeqeenoo narí innaaruna amanaikiranaki quqaqiseenoo fee qimasee irirana minasaa kai rusisee maridaqa. Inniqasaimbaqa Yisuna saqariki marunanoo Anutuna maraquna fannoo minasaaqari maasa dadaaqifaqa maasa Anutuna innaarunai keeqaannanara asasamandee afeesidaqa.
GAL 5:6 Maasa asauku mundirana Yisuna faqa moodaanaki maridaqa Yuda maqannaasa fainanduqirana faqa sia fainanduqirana faqa miqanda fifau ainaina maridaqa. Anoona ainaina maaqimminoo maridanoo. Nariara nariara uriqarara ainainee qimasee nariara nariara amuqusirafa inni Yisunasaa rusirana akooroo imarifa mi ainainafa anoona uqanna maridanoo.
GAL 5:7 Oo Karatia maqa maaqaki mariasa innee amiqimasee mi mau fimarusa mariafanoo, nanaree innee maqee anoona ufa minnisee mandoosana maree fee.
GAL 5:8 Anutufa inni naarammeeqee Yisunaki quqee marifa mifau inni mareeqee kaqi runna quqeenoofau.
GAL 5:9 Faiqí moo fannoo adudu fooqaafa inni qambaanai moodaa mari ifa mifa kai aiqamausa radiqifinoo inni nifaaqai sukaqamannimaqaifaqa aiqamausa kaqirunna firaridaqa.
GAL 5:10 Qinee Pauroosa inni Karatia maqa maaqaki mariasara andeeqara aatata firanara iridaqa, maridaqa. Maasa inni faqa karaambaiqasaa atooaqa marirafa qini qifaaqa quqarana qimidanoo, inniara sia moo iriranamau fifaranoo fee qidaqa inni mara moo aatata ubeekee mari fasiqausara qinee sia iridaqa, Anutufa misa naruannoo fee qidaqa.
GAL 5:11 Oo qini qikaqaafasaauqa qeeqara qimannimianauranoo qinee Yuda maqannaasa fainanduqira ufa asauku mundiranasaa ookaammasee minannai innaarunai firaree qimariana mi ufana maqusa maqusa qinee qimannimi marianaqau misa sia maqee maqee qini darimariaqini. Fainanduqira ufa Yisunasaa ookaairafa anoona marinoofau qinee asauku mundirana aunirira saqarisaa arunara qimannimianaqau sia daruqini. Yisunasaa mundirunara kai qimannimimarunaqa iridaqa darimariafanoo. (Misa mi aukuanna faina kafaqianda uqidee qimasaida Yuda maqannaasa maasa Anutuna faiqi namu fee qimariqau. Nifaandama itirausara inni nianasaa naadumasaa mariaqee qimariqau. Pauroofa minara irisee maa ufana qimanniminau.)
GAL 5:12 Inni Karatia maqannaasa mareeqee moo aatata quqeemariasara qidaqa misa nári fainanduqiranara kai qidaqa nári nifaandama itirana faqa minaki ookaammaseeqa doo naadumasaqanna maridaqa sia aaqaranaki inni fuki faaki qima quqaaqeera.
GAL 5:13 Oo qini qikaaqaafasaauqa inniara qinee qianaura. Innee inneeqa mandainaina rumbaranaki mariafanoo Anutufa minakinaana inni naarameeqeenoo Yisuna idukiranaki quqeenoo. Doo innee minaki maridaqa inni nifaaqa manda nidimari ainainafa sia quandakinoo innisaa rakisidanoo inni nikaruqiranannai minni ubeekamannimaqaani. Sia miqiaqa maaqiaqa inneeqa nariara nariara rirafa nimudaoo qirafa inni nifiqeeqeenoo nariara nariara dadaaqiranaki quqaani.
GAL 5:14 Mooseena sandufa aiqamatia maa moodaa ufanaki anoona kambiqaidanoo, mi ufafa maaqimminoo maridanoo. Innee inneeqa niqoonausara inniqa nifaaqara foora nidinaqa dadaaqiaqa.
GAL 5:15 Innee aandaura foora narí aidafirana narí aidafirana narí ukaqami narí ukaqami irana narí ami narí ami idaqa rufiaaqa qusaasa innee narinni narinni naru taikaseefaara, minara nariara nariara nidiranara qidaqa.
GAL 5:16 Qinee Pauroosa minara inni qimannimidaqa. Sia innee inniqa maqasaa irirannai ubeekaaqa. Anutuna maraquna fannoo inni naakinoo marifa maqee maqee inni naaqooki amiqira oosana maraaqeera qimaseenoo mandoosanara aaquqidanoo. Innee mi ufamau fiqa sia uqanna inneeqa maqasaa iriranamau fifaranoo.
GAL 5:17 Maqasaa fasiqa anaasee maqasaa irirafa faqa Anutuna maraquna aidimari ainainafa faqa maasa naunduraki narí maqauruamaqee narí maqauruamaqee idaqa miqanda namuqaa marianara innee firaree qimariaqoo sia amana fifaranoo. Minara innee Anutuna maraquna ufamau fuaqa.
GAL 5:18 Anutuna maraquna fannoo inni rakisifaqa innee sia Mooseena sandufa ameemaanai mariafanoo.
GAL 5:19 Faiqí faiqi maqasaa irirana oosana kaqi akooqoo maridanoo. Mina oosana maaqimmasee koorooidanoo, faiqí anaasee narí ummuari narí ummuarirana faqa adi namufaqira oosana oosana faqa irirana siaisa furufarida kaqi mandainaina maraqanuana faqa saqarinnai unnaqira Anutuna amana auqusee irirana mina amimariana faqa aukainaina ufaaqa afaannainaina maraqanuana faqa, faiqí anaasee namuqaa kirana faqa rakirana faqa rairaiqirana faqa qusufa qimasee aanooqirana faqa, aiqama ainaina náriara kai fatusimariana faqa, naadu naadu rakeekaammasee nariqa kai naadu naadu suqimariana faqa, nariara nariara rairai qimariana faqa nammari namasee furufarirana faqa, misa suqufifaqa oosana oosana mandoosana uqeeree mariana faqa oosana oosana mandoosana maraidaqa. Qinee ooqai aaquqima nimaqaafanausa kafaa maqee faqa aaquqimannimaqaidaqa, mi oosanna maree mariasa sia uqanna Anutuna ququsaki keeqeefaranoo.
GAL 5:22 Anutuna maraquna fannoo sia miqi maria mandoosanakina uqannifiqaidanoo. Innee mina ufamau fifanoo inni mareeqee amiqira saqari qaqammara foora ireefaranoo. Maa amiqira oosanausa ireefaranoo, nariara nariara uriqarara ainaina maridee qimasee nariara nariara rirana faqa Anutunara asasirana faqa naunduraki asooarana faqa faiqí aanaaseera reendeenira irirana faqa amiqimandee dadaaqi mariana faqa afaarirana faqa amiqira ainaina afaarirana faqa sia minnisee firafa miqookai marida auqainna ainaina auqaida marirana faqa fisoofisoommasee ufa qirana faqa narí mandoosanara akooqamasee andeeqasee fimarina faqa Anutuna maraquna fannoo mi ainainausa kai uqannifiqaidanoo, sia moo sandufa fannoo mi amiqira ainainausara qaoo qiannoo.
GAL 5:24 Asauku mundirana Yisunaindi mariasa misa nariqa faiqí faiqi irirana marirana faqa nári maqasaa irirana faqa aunirira saqarisaa Yisuna namufaqa kuqa kai aru quqee mariasa maridaqa.
GAL 5:25 Anutuna maraquna fannoo maqee oosana arasee naaru marirana qimimarifa marinara mifa kai maasa marirana nirana rakisiani.
GAL 5:26 Sia maasa qeeqara doori uqeeraseeqa amiqirausee qimasee qeeqa qimooqia sia nariara nariara sukufa qia sia nariara nariara rairai qiaqa.
GAL 6:1 Qini qikaqaafasaauqa inniki moo fannoo mandainainaki aqufinaqa qafeeqa Anutuna oosanara irimariasa mina mareeqee andeeqaranaki quqaaqa, sia aanoomasee miqi iaqa reendeenamandee miqi iaqa anee mi fasiqana dadaaqidana aneenna marirana faqa rakisia, anee faqa minaki aqufinafaara.
GAL 6:2 Innee narí ummaara narí ummaara dadaaqiaqa, miqiqa innee asauku mundirana sandufamau kaaqa andeeqasee fimariafanoo.
GAL 6:3 Faiqí moo fannoo ureeqarafa nariara uriqararausee qimasee sia qinee oorudupirausa dadaaqianauranoo fee qimarifa narí kai narí akaruqidanoo miqi qidanoo.
GAL 6:4 Aiqama fasiqa anaasee nariqa kai nári marirana nirana nári kai amanamasee qafaaqa, sia moo naindisaa amanamasee qafaaqa narikai narí marirana auqarana amiqirafa marinanoo narí kai qafamasee asasiannoo.
GAL 6:5 Aiqamausa nári umaara nári kai marasee quandaki aqoonausa faqa dadaaqiaqa.
GAL 6:6 Akaqa fasiqauqa Yisuna ufa inni qimannimifaqa innee misa ufa irimariana akiqara quandaki narana munnimma, maaqa, ainaina naida nimiaqa. Miqidaqa innee misa ummaara dadaaqifaranoo.
GAL 6:7 Innee sia inneeqa nikaru qiaqa, sia innee amana Anutuna afusaa ititasee furufariranaki quqeefaranoo, mifa maasa oosanara iridanoo. Anee narana asumu ummaqinana mina kai unakinnaranoo, anee nana mandoosana niminana anee mina kai mareennaranoo.
GAL 6:8 Faiqí moo fannoo narí faiqí faiqi manda nidiranannai manda maqaki ummaquseenoo minakinaana kuqirana kai unakuannoo. Mifa Anutuna maraquna oosana marasee Anutuna afuqaki ummaquseenoo minakinaana naaru marirana kai unakuannoo.
GAL 6:9 Minara iriseeqa amiqira mariranara sia kudoosaapeeqa minnisaaqa maasa sia minniseeqa kaqi mi mau fidaqa kasooqaqee unnakirana paqurianaura.
GAL 6:10 Minara irisee maana qimannimidaqa maasa aiqamausa amiqira dadaaqirana dadaaqiaqa sia moodaakari kai, maqee maqee dadaaqirafa kambiqafinana dadaaqiaqa. Aiqamausa dadaaqidana niqoonausa Yisuna saqariki mariasa firaaqoo dadaaqiaqa.
GAL 6:11 Doo qinee Pauroosa moo fasiqa qimami marunanoo mifa akara ridanoo doo maqee qeeqa kai kirifi qumaree ati rafaaqafira ufa qeeqa kai firaaqoo akara ridaqa.
GAL 6:12 Inniki nipatasaa akooqoo mari ainainara kai darara qimasee nimooqimariasa nariqa nimooqiaqee qimasaidaqa inni fainanduqiranara sandanainai qida miqiaqee qimariasa maridaqa. Misa sia kuqaa anoonainainau auqaidau fainanduquaqee qidau, misa asauku mundirana aunirira saqarisaa arunara qimannimiafaqa mina akiqara Yuda maqannaasa darifoo qimasee fainanduqira oosana Yisuna kuqiranasaa ootupamasaifaqa Yuda maqannaasa niranaqarafa asooaifanoo sia daruaqeera.
GAL 6:13 Misa inniara Yuda maqannaa fainanduqira oosana maraaqee qimariasa nári sia Mooseena sandufamau fimariasa misa inni Karatia maqannaara fainanduqira oosanara eedoo qianara kai nári nimooqiaqeera qimasaidaqa inni fuki faaki qidaqa.
GAL 6:14 Qinee qeeqara qidaqa qinee maasa karaambaiqa, asauku mundirafa, Yisufa aunirira saqarisaa kuqunara minara kai qinee uqeerasee amooqianauranoo. Mi auniriranasaa kuqunannai maa maqa maaqanasaaqaraa ainaina kuqinoo mari ifoo qidaqa sia kasidanoo minannai faqa qinee faqa kuqiara foora qimarunausa marunanoo maa maqa maaqanakinaa mandainaina sia qini qumaraidanoo.
GAL 6:15 Fainanduqira fee, sia fainanduqira fee, sia mifa anoona ainaina maridanoo. Anoona ainaina faiqí anaasee kuqaa naundurakinaafa fukaikamambinaqa andeeqasee marirafa mifamma anoona maridanoo.
GAL 6:16 Innee mi iriranamau fimariasa qimannimianaura Anutufa naundurai asooarana faqa Anutufa aidira nifauarana inniki faqa aiqama Anutuna faiqí anaasee maqasaa mariasaki faqa mariani.
GAL 6:17 Qini Pauroosa rafaaqafira ufa maaqimminoo maridanoo. Sia moo fannoo kafaa qiniara Yisuna ufara sia andeeqasee qimannimimari fee qifaranoo. Qinee kuqaa uqanna Yisuna karabusa ainainira fasiqa maridaqa Yisuna ufa andeeqasee qimannimiafannana akiaqara qini darufa qifaaqasaa qufaanakuru aanaaqi marifa mifa qiniara kuqaa Yisunaindi fee qimasee akoorooidanoo. Misa qini darusaafaqa mi ufaanakurunara Yisuna akarara foora maridanoo, aiqamausa qini qiqafamasee Yisunaindi fee qiaqeera.
GAL 6:18 Maasa karaambaiqa asauku mundirana Yisuna afaarirafa inniki mariani. Kuqaa.
EPH 1:1 Qinee Pauroosa Anutuna iriranannai asauku mundirana Yisunaindi maridaqa, mifa diqiqoo fasiqausa maridaqa. Anutuna maqasaa fasiqa anaasee Eefeesusa maqusai mariasa asauku mundirana Yisuna ufamau andeeqasee maqee maqee fimariasa inni maa akarana rumannimaqaidaqa.
EPH 1:2 Maasa qikoofa Anutufa faqa maasa karaambaiqa asauku mundirafa Yisufa faqa narí afaarirana faqa narí asooarana faqa inni nimiani.
EPH 1:3 Maasa dufi dufi qirana maasa qikoona Anutuna faqa maasa karaambaiqa Yisuna faqa nimiaqa. Maasa asauku mundiranaki keeqafufanoo mina akoofa Anutufa amiqi amiqirana maasa Yisuna namufaqa qiminau. Mifa innaarunaindaraa amiqira dadaaqirana qimaqaifanoo miqoo innaarunai maridanoo, minara maasa dufi dufi qimamaqaidaqa.
EPH 1:4 Ooqai maa maqa maaqana sia auqu kamuqoo faiqí faqa sia maru kamuqoo Anutufa moomoosa kambiaqa marifandinausa kinaana maasa rusandeesamumandee marararee qimaqoosa maraqaisa maridaqa. Narí asauku mundirana Yisunannai maasa maraqoosa sia aaqarausa mariaqeera noori kandamasee andeeqarausa mariaqee qimasee maasa rusandeesamumasee maraqoosa maridaqa.
EPH 1:5 Sia faiqí maru kamuqoo Anutufa narí aidiranannai maasara maaqimminau, qeeqa qisauku mundiranannai misa qini faiqi namu qiraamuqmaakai kammambifaqa qeeqa unnannai misa mara quqaanauree qinau. Anutuna aidirafa fuaninnana miqiminoo maridanoo.
EPH 1:6 Anutufa narí kaaqa qara areenara afaarirana narí amuqusira amaaku kaqi nimimari ainainnara foora kaqi niminau. Minara maasa qimuqusa ookiqari idaaqira ainaina uqannee qiaqeera kaqi niminau.
EPH 1:7 Anutufa narí asauku mundirana kuqiranannai maasa mandainainakinaana idukuqiseenoo maasa mandoosana akiaqara minniqisainaqa marianaura. Maasa minara irisee Anutuna firaa afaariranara akooqoo uqanna marifaqa qafamasee irisee naqimasee maraanauree minara rufiaida furufaridaqa.
EPH 1:8 Anutufa narí irirana firaana faqa qafeemariana faqa maraseenoo minannai ooqai marararee qimaqoona maraseenoo narí kukeeqara irirana asauku mundiranannai aiqama qimaqoo ainaina anoonaikianifeera qimasee mina maa kamuqoo kooroomasee narí faiqi namu araamuqmmaakai kiranara maasa qimaqiminau.
EPH 1:10 Anutufa narí kai irinoo andeeqara aukuanee qimasee narí ooqai kambiqaaninna ainainara qimarufa taikaannoo minara qimarufa maaqimmiannoo Anutufa aiqama ainainna auquqoo ainainafa innaarunai mari ainaina faqa maaqoo mari ainaina faqa oonu maree ani mareeqeenoo moodaanaki quqaseenoo asauku mundirafa misa nikiaqasaa mariannoo.
EPH 1:11 Anutufa mi aiqama ainainna narí ooqai fuanee qimaqoomau fidanoo miqidanoo. Anutufa narí ooqai fuanee qimaqoomau fidanoo maasa narí aiku asauku mariaqee qimasee faiqí aanaaseeki rusandeesamumandee maasa maranau. Sia kaqi miqinau, asauku mundiranannai kai mina aiku asauku mariafanausa maridaqa. Ooqai indaaru oosana aroo aukuanna mi irirana maraqoomau fidanoo asauku mundiranannai maasa maraidanoo.
EPH 1:12 Maasa asauku mundirana irirana naaree indaaru irisee minara afeesimariasa maasa Anutuna kaaqa areenaranara dufi dufi qidaqa.
EPH 1:13 Innee Eefeesusa maqannaasa faqa miqikai iqa mariafanoo. Amiqira fasaasa ufa innaaruna asumu marirana nimi maria ufana innee iriseeqa kuqaa anoonufee qufanoo Anutufa narí naaquqara maraquna nimiani qimasoofa inni niminoo minannai nariara utaaqanau.
EPH 1:14 Anutuna maraquna nimirafa Anutufa innaarunai qimianinna ainainnara qima afeekaikamma utaaqamaqoofa maridanoo, mifa Anutufa kuqaa mandainaina akiaqara rumbaranakinaana idukirana qimiannoo fee qimarifa maridanoo, maasa minara irisee Anutuna kuqaa areenaranara dufi dufi qidaqa.
EPH 1:15 Qinee Pauroosa minara iriseeqa innee Eefeesusa maqannaasa Karaambaiqa Yisuna saqarikiranara irisee faiqí aanaaseera Anutuna ufa irimariasara ridaqa dadaaqidaqa minara iriseeqa iriafannaqooqari qinee Pauroosa inniara Anutufinnai dufi dufi qidaqa. Qinee maqee maqee inniara innaaru qidaqa, maasa karaambaiqa asauku mundirana Yisuna kaaqa areenarana akoofa
EPH 1:17 Anutufa narí maraquna inni niminanoo mifa irirana faqa Anutuna oosana faqa kooroomannimaqainaqa innee minara iriaqeera innaaru qidaqa.
EPH 1:18 Anutufa inni naaramasee narí areenaranara afeesiaqee qimarianara innee iriaqee qimasee inniara innaaru qimasaanaqa inni nifu nitikura quandasainaqa areenarana nimianinnanara afeesiaqeera innaaru qidaqa. Naaquqara amiqi amiqirafa idaaqirafa moomoo uqanna narí maqasaa fasiqa anaasee innaarunai nimirara qima afeekaikidanoo nimiannoo minauqara faqa inniara iriaqeera innaaru qidaqa.
EPH 1:19 Maasaki mina ufasaa irirana rusimariaqooqari Anutuna afeeka fannoo maasaki ainaini marinara faqa innee iriaqeera qinee Pauroosa inniara innaaru qidaqa. Anutufa asauku mundirana kuqiranakinaana uqeerasee innaarunai narí aaqa narí asauku uqannai ooqumaruqoo firaa afeeka faqa maasaki ainainimarifa faqa amana amana kai moodaa firaa afeeka maridanoo.
EPH 1:21 Miqoo innaarunai asauku mundirafa aiqama ainainasaa uriqaramafi rakisidanoo, aiqama innaarunai uriqararausa faqa faiqí firaasa faqa afeekafaqaasa faqa karaambaiqauqa faqa misauqa faqa urinaaqaramafi rakisidanoo. Mifa aiqama afeeka nuqu faqaasa maa maqa maaqanaki mariasa faqa innaarunai mariasa faqa urinaaqaramafi rakisidanoo.
EPH 1:22 Anutufa aiqama ainaina mareeqeenoo asauku mundirana aramandunnai quqaseenoo mina mareeqeenoo Yisuna ufara suqimariasa nikiaqasaa quqasaifanoo aiqama ainaina uriqarara karaambaiqa maridanoo.
EPH 1:23 Yisuna ufara suqimariasa Yisuna adakara foora maridaqa, aiqamai mariainainafa qumbiqeemarifa narí adakaki Yisuna ufara suqimariasaki firaaqoo maridanoo.
EPH 2:1 Qinee Pauroosa sia Yuda maqannaara qidaqa innee aanaamuru mariasara qidaqa, ooqai inniqa ufa rukiarana faqa aaqarana faqa miqiunna akiaqara kuqiranaki mariusa mariqau, mi aukuanna maa maqa maaqana mandoosanamau kai fimariqau. Anutuna ufa rukiee mariasa maqee rakisi mari afaannafa Anutuna innaaruna meerai marifanoo mina ameemaanai marina, mina ufara eedoo kai qimarusa mariqau.
EPH 2:3 Maasa faqa aiqamausa aanaamuru Anutuna ufa rukiee mariasa naanna ramasee maasa qeeqa faiqí faiqi mandiriranamau fidaqa qeeqa qifaaqa irirana afaariqa kaqi qeeqa manda didiramau kai fiqiafana. Maasa Yuda maqannaasa aanaamuru naanna ramasee qeeqa qifaaqa afaaramasee mina akiaqara Anutuna aranaqaranaki firaridaqa.
EPH 2:4 Anutufa mina qafamaseenoo maasara amuqusirana faqa nifauarafa faqa firaatia marifanoo asauku mundirana saimbaqa maasa faqa kuqiranakinaana uqeera qiseenoo sia moo ainaina, Anutuna afaarirafa kai innaaruna asumu mariranaki quqanniseenoo.
EPH 2:6 Anutufa maasa asauku mundirana Yisunasaa atooarana qafamaseenoo mina namufaqa kuqiranakinaana uqeeraqiseenoo Yisuna namufaqa Anutuna innaaruna mariasasaa rakisi nimaqaaqee qifaqa miqoo rakisirausaikiqa marianaura.
EPH 2:7 Sia Anutufa fifau miqinau, narí firaa afaarirana faqa, maasa asauku mundirana Yisunaki keeqarana qafamaseenoo narí firaa aidirana amuqusirana faqa naaru kambiqainausa uqannifiqarara miqinau.
EPH 2:8 Sia moo ainainannai Anutufa narí afaariranannai kai inni innaarunai asumu mariranaki quqannisaidanoo, innee Yisuna saqarikiranannai afaaramma nimaqaidanoo. Inni asumu nimirafa sia innee andeeqasee fimarianasaafau mundidanoofau, sia innee amiqira oosana marasaida kadaapiridee qimarianasaafau mundidanoofau, Anutuna kaqi nimiranasaa kai innaarunai asumu marirana maasa qimirana uqeereenoo.
EPH 2:9 Sia maasa qeeqa kadaapiriranannai innaaruna asumu maraanaura minara sia fifau maasa qeeqa qimooqira ufa mariannoo.
EPH 2:10 Anutufa maasa auqufa maridanoo sia fifau maasa auqinau, maasa asauku mundirana Yisunasaa atooqaranasaaqari andeeqasee nirana marirana mariaqee qimasee maasa auqinau. Doo ooqai mi andeeqara nirana marirana maasara deedaqammaqoofa maridanoo.
EPH 2:11 Yuda maqannaasa ooqaindari naríara kai Yuda maqannaasa fainanduqirausa Anutunaindi maridee qimasaida inni aanaamuruara sia maasa fainanduqirausa marunnanara aqoosai mariasa maridee qimariqau. Misa fifau nári fainanduqiranara qidaqa miqi qimariqau. Innee aanaamuru mariasa innee ooqai mariunara iriaqa.
EPH 2:12 Innee Eefeesusa maqusanaasa asauku mundiranasaaqari naaduma nianasaa mariusa mariafanoo, innee aanaamuru Anutufa maqasaaqaraasaki sia rusandeesamumandee nariara maroosa mariafanoo, aanaamuru nianasaa mariusa mariafanoo. Anutufa Yuda maqannaasa faqa moodaanakikira ufa oosana oosana qima afeekaikiranasaa mundiqa mariusa mariafaqa innee aanaamuru sia minaki marusa naaduma nianasaa marusa mariafanoo. Innee Eefeesusa maqusanaasa maa maqa maaqanaki maridaqa sia Anutunara faqa moo ainainara faqa irimariqau kaqi furufara kaimmiqaniqau, Anutuna siaisa mariqau.
EPH 2:13 Doo maqee innee asauku mundirana Yisunasaa atooqaana akiaqara inni ooqaindari nianai mariusa maqee Anutufa inni rarisameeqeenoo adeedi quqeenoo, asauku mundirafa aunirira saqarisaa kuqunannai kai miqinoo.
EPH 2:14 Anaamuru faqa Yuda maqannaasa faqa namuqaara foora niana niana rakee iqa mariaasa asauku mundirafa narí kai mareeqee moodaanaki quqaseenoo asooarana maasa qiminau. Yuda maqannaasa faqa aanaamuru faqa namuqaakiqa marufanoo qambaana faandamura ititanoo maruna asauku mundirafa narí afaaqannai faandaamura rakee mandoofaqa moodaanaki kiqau.
EPH 2:15 Mooseena sandufakina oosanoosana ainainara nimaarusirana mifa faandaamurara foora Yuda maqannaasa faqa aanaamuru faqa aiqamaqara rakeemaqoofaqa mariqau. Asauku mundirafa doo mina ruka taikasoofaqa mi atiqanda oonu maree ani maree asauku mundirana faqa moodaanaki kiqa asooaranaki maridaqa.
EPH 2:16 Asauku mundirafa narí aunirira saqarisaa kuqunannai Yuda maqannaa faqa aanaamuru faqa nariara nariara fidiaqaa imaruna aru taikanau, narí aunirira saqarisaa kuqunannai Yuda maqannaa faqa aanaamuru faqa rakimaruna taikaseenoo Yisufa mareeqeenoo mafi moodaanaki quqaseenoo mareeqeenoo Anutuna aanooqirana taikaseenoo narí akoona Anutunaki asooaranaki quqanau.
EPH 2:17 Miqi marunara asauku mundirafa narí amiqira asooara fasaasa ufa maree qumureenoo innee Anutunasaaqari nianai maria anaamurusa faqa Yuda maqannaa Anutuna aaqa mariasa faqa qimanniminau.
EPH 2:18 Maasa aiqamaqara Yuda maqannaa faqa aanaamuru faqa asauku mundiranannai kai amana maasa moodaa maraqunaki anireeqa maasa qikoona Anutuna afusaa kikiqianaura.
EPH 2:19 Ooqai innee moo maqannaara foora aanaamuruara foora mariasa mariafanoo doo maqee sia miqiqa mariafanoo innee doo maqee Anutuna aiku asauku mariasa Yuda maqannaasaki moodaa maqannaa kammambi innee mariafanoo.
EPH 2:20 Doo maqee sia Yuda maqannaa kai, innee faqa maaqara foora usakafifanoo asauku mundirafa Yisufa narí uqanna faakana miqirafa marinanoo Yisufa niqiqoo fasiqausa faqa Anutuna tamummaqara fasiqauqa faqa maaqa atunara foora marifanoo innee faqa maaqa asaanara foora misasaa faqa Yisunasaa faqa atukaramambiqa mariafanoo.
EPH 2:21 Yisufa uqanna faakanara foora maridanoo aiqama maaqa asaana afapita qumarasaifaqa afeekaikiqa mariafanoo karaambaiqa naaquqara amaana maqara foora usakaidanoo fimaree aimaree innooqaidanoo.
EPH 2:22 Innee aanaamuru asauku mundirana saqariki mariasa faqa aiqamausa Yisunaki mariasa faqa Anutufa inni qumareeqeenoo maaqara foora usakaseenoo narí maraqunannai mi maqanaki inniki mari maqafa maridanoo.
EPH 3:1 Qinee Pauroosa minara iriseeqa inni Eefeesusa maqannara Anutufinnai innaaru qidaqa. Qinee inni aanaamuruara qimannimunnana akiaqara asauku mundirana Yisuna rumbaranara foora Roomma maqannaasa rumbaranaki marunausa maridaqa inniara innaaru qidaqa.
EPH 3:2 Anutufa narí afaariranannai inni aanaamuru dadaaqiaqee qimasee qimunara innee amiqimmandee minara irimariafanoo.
EPH 3:3 Anutufa Yisunara ooqaindari kukeeqanoo marunara maqee aukuana qini kooroomaqimaqeenoo. Qinee maa pasanaki kaqikaaqoo minara inni qimannimiqa, innee mina asaana rumaseeqa iriqa qiniara asauku mundirana kukeeqara irirana amiqimmandee iridanoommifoo qifaranoo.
EPH 3:5 Ooqai narí kukeeqara irirana Anutufa sia kooroo inau, doo maqee narí maraqunannai amiqira niqiqoo fasiqausa faqa tamummaqara fasiqauqasaa faqa qimanniminoo.
EPH 3:6 Mina kukeeqara ufa maaqimminoo maridanoo. Yuda maqannaasa Anutuna amiqi amiqiranaki maridaqa, Yisuna amiqira fasaasa ufa fannoo inni aanaamuru faqa oonu mareeqeenoo Yuda maqannaa amiqi amiqiranaki quqannisaidanoo. Innee aanaamuru mariasa maqee Yuda maqannaasa saimbaqa moodaa nifaaqara foora maridaqa asauku mundirana Yisunakiqari Yuda maqannaasa qima afeekaikammaqoofa innee aanaamuru misa saimbaqa minaki marida maree mariafanoo.
EPH 3:7 Anutufa narí afeekannai naakaparana akoofasaikirana moo qimufaqa qinee minannai Yisuna amiqira fasaasa ufa saikira faiqikiqa maridaqa.
EPH 3:8 Qinee Anutuna aiku asauku maqasaa fasiqaki oorudupirausa marunanoo Anutufa sia minara irinoo kaqi mi naakaparana qiminoo diqiqamaqimaqeenoo asauku mundirana, innaarunai nimira amiqi amiqira ainaina moomoo ainaina sia amana asaana rirana amana mi ufanara aanaamuru qimannimiranaki qini quqaqisaifaqa maridaqa.
EPH 3:9 Anutuna ooqai kukeeqara irirafa maqee kooroommasee faiqí anaasee amiqimmandee iriaqeera faqa qini minaki faqa quqaqisaifaqa maridaqa. Anutufa aiqama ainaina auquqoofanoo marufa miqooqari moomoo aukuana narí kukeeqara irirana Yisunara kisaaqasaa rafaaqafuqoofanoo marinau.
EPH 3:10 Maqee aukuana kooroo ianifeera qimasee Yisuna ufara suqimariasa misannai Anutufa narí irirana quandaqaandidanoo uqannifiqaifaqa qafaidaqa mina amiqi amiqiranara innaarunai ameemaanai mariasa misa uriqararausa faqa rakisirausa faqa maqee uqannifiqaanifeera Yisuna kooroo idanoo.
EPH 3:11 Anutufa narí naaru naaru mariranaki maridanoo mi ainainna auquanauree qimaqoona maqee auqinau, narí asauku mundirana Yisunannai mi ainainna, narí ufara suqimariasakina narí irirana kooroo ianifeera auqinau.
EPH 3:12 Maasa Yisunasaa atooaqa marianannai faqa maasa mina saqarikiranannai faqa sia maasa nisaurida rufiaanaura, paasoosamasee Anutuna afusaa fuannanara mi eedoo qirafa maasaindi maridanoo.
EPH 3:13 Qinee Pauroosa minara irisee inni afeekaikamandaida qimannimidaqa. Qinee Yisuna ufa qimannimunaqa misa minara fifau qini karabusaki quqeeqa. Inni Eefeesusa maqannaasa qinee karabusaki marunna aupuraranara iriseeqa sia Yisuna ufa minniseeqa kudoosaapaaqa, innee minara maaqi qiaqa Pauroona karabusaki marirana maasa Eefeesusa maqusanaasa amiqimaqimaqaidanoo fee qimasee asasiaqa.
EPH 3:14 Qinee minara iriqa maasa qikoona Anutunara iriseeqa qiqoori saunarafiqa kummara mafi inniara qeeqa qimuqusannoo innaaru qidaqa.
EPH 3:15 Innaarunai mariasa faqa maqasaa mariasa faqa aiqamatia Anutunasaaqaraana nariqa nuqu uqanna maraidaqa.
EPH 3:16 Mi Anutunara inniara innaaru qidaqa, asauku mundirana innee saqarikiranannai mifa anireenoo inni naunduraki maaqakiara foora ani keeqaanifeera. Mifa narí maraqunannai narí areenarana firaanakiqari inni naunduraki afeeka niminaqa mapukusee mariaqa. Qinee inniara maaqi qidaqa innaaru qidaqa, innee inneeqa atukara foora faqa faakanara foora faqa nariara nariara nimuqusiranaki mapukusaaqa, innee Eefeesusa maqannaasa faqa Anutuna aiku asauku moo maqannaa mariasa saimbaqa afeeka marinaqa minannai asauku mundirana inniara amuqusinoo aidirana firaana iriaqeera innaaru qidaqa. Mifa inniara amuqusinoo aidirana mina kisaaqasaa aidirana faqa mina qusa kamu faqa mina meerai sandaaqaira faqa mina meemai farumara foora marirana faqa mina firaatiara iriaqeera qinee innaaru qidaqa.
EPH 3:19 Eeoo innee mina inniara amuqusirana firaanara iriaqeera innaaru qidaqa, sia amana moo fannoo firaaqoo iriannoo, firaafa maridanoo, mina amuqusirana firaafa maridanoo, innee mina amuqusirana firaana iriseeqa Anutuna umbiqarafa innikina umbiqaanifeera inniara innaaru qidaqa.
EPH 3:20 Anutuna afeeka fannoo maasaki saikiranannai naunduraki amiqi amiqirana nimiannoo, mina naunduraki dadaaqirafa maasa sia amana minara iramasee qimiannee qianaura sia amana maasa minara irianaura firaa ainainatia maridanoo.
EPH 3:21 Yisuna ufara suqimariasa nariqa asauku mundiranasaa atooaranannai Anutuna amooqirafa maqee kamuqoo faqa naaru naaru faqa mariani.
EPH 4:1 Qinee Pauroosa karaambaiqa Yisuna ainaini marunnana akiaqara Roomma maqannaa karabusaki maridaqa. Qinee karabusaki maridaqa inniara afeekaikamandee qimannimidaqa. Anutufa inni naaramasoofaqa innee asauku mundirana saqariki maru kamuqooqari inneeqa nirana mariranara andeeqasee marianifee qimasee inni naarama minaki quqeenoo. Inneeqa marirafa mina amanakai marianifeera qinee qeeqa qimuqusa ookiqari afeekaikamandee qimannimidaqa.
EPH 4:2 Sia Anutufa quqaqoo andeeqarana minnisee moomau fuaqa, innee maqee maqee sia urinaaqaraaqa oorudupimasee mariaqa, sia aanooiaqa, ireeda kai pisoopisoomandee mariaqa sia faiqí aanaaseera qusa ufa qimasee aanooiaqa kisaaqasaa ireeda kai idaaqammannimaqaaqa. Innee faiqí aanaaseera nimuqusinanoo nidimarinaqa mifa kooroo ianifee qimasee narinni narinni dadaaqifanoo mifa kooroo iani.
EPH 4:3 Anutuna maraquna fannoo inni moodaanaki mara quqasaifaqa mariafanoo innikina asooarafa inni moodaanaki afapita qumaraifaqa mariafanoo innee mina moodaanaki marirana amiqimasee rakisiaqa, rakee iani.
EPH 4:4 Maasa Yisuna ufa irimariasa moodaa nifaaqara foora maridaqa, Anutuna maraquna faqa moodaa maridanoo Anutufa moodaa ainainara afeesiranaki inni rarisama quqeenoo.
EPH 4:5 Karaambaiqa moodaa kai maridanoo, Yisuna saqarikirafa moodaa kai maridanoo, amaana nammari moodaa Yisuna auqusaa kai rumannimaqarafa maridanoo maasa aiqama maqa maaqakinaasa nikoofa Anutufa moodaa kai maridanoo, aiqamausa karaambaiqa mifa kai maridanoo mifa narí ufara suqimariasa aiqama naunduraki maridanoo aiqamausakiaqa ainainidanoo.
EPH 4:7 Asauku mundirafa nimira dadaaqira afeeka maasa aiqamausa qiminau narí moomoo dadaaqiranakinaana qiminau. Moo dadaaqira afeeka moo fasiqa aminau, moo dadaaqira afeeka moo fasiqa anaasee niminau. Nimisoofaqa minannai Yisuna saika maraaqeera niminau.
EPH 4:8 Ooqeenaa tamummaqara fasiqa asauku mundirafa dadaaqira afeeka qimianinnanara maaqi qimasee akara rinau. Mifa rakira karaambaiqara foora maridanoo namuqaa maqusaki ititasee misa narusee faiqí moomoo karabusa rumbasee misa ainaina faqa indaa mamaree nifiqamaree meerai narí maqusai oorureenoo narí maqannaasa qimannimifaqa mina amooqiafanoo ainaina raina niminau.
EPH 4:9 Mi tamummaqara fasiqana ufa kooroo irafa Yisunara maaqimminoo maridanoo.
EPH 4:10 Mifa narí maqusai meerai ooru funara maaqi qidanoo, mifa naaree meemai maqa ameemaanai ooqureenoo miqooqari mifa kai innaaruna maarini aiqama innaaruna maarinni oorureenoo narí marirana narí auqu amana kai marianifeera aiqama atinai narí irirana narí auqu amana kai quqasanau.
EPH 4:11 Mifa kaqi nimira dadaaqira afeeka faiqí anaasee niminau, mi dadaaqira afeekafa ainainirana akoofasaikiaqee qimasee akaqausee niqiqoo fasiqausa akoofasaikirana niminau, akaqausa faiqí anaasee qimannimirana akoofasaikirana niminau, akaqausa aamina maqannaasa qimannirana akoofasaikirana faqa paatoo saika akoofasaikirana faqa ufasaa rakisirana akoofasaikirana faqa niminau.
EPH 4:12 Anutufa sia fifaufau mi dadaaqira afeekana niminau, faiqí anaasee Yisuna ufara suqimariasa Yisuna afaaqara foora afeekaikamasee mariaqeera mi dadaaqira afeekana oosana oosana maasa qiminoo qinau, innee maa dadaaqira afeekana marasee minannai qini ufara suqimariasa afeekaikamannisaaqee qinau.
EPH 4:13 Maasa miqimamaree fidaqa maasa kasooqaqee moodaanaki kianaura. Anutuna amaakuara irirana faqaa irirana minasaa rusirana faqa miqiananannai mi moodaanaki kirafa amana kambiqaannoo, mikari maasa faiqí firaasa iriranara foora maraanauranoo maraseeqa asauku mundirana firaa irirana amana kai ooru mundufuanauranoo.
EPH 4:14 Mikari maasa sia faiqi aanaaqiara foora aiqama oosana oosana amaana ufa iriseeqa munari minari ianaura unna ufa qimaria fasiqausa nári nikaruqira finnai akaqausa aaqaranaki rarisama quqaidaqa maasa misa ufa iriseeqa sia ufaira foora aiqama saqari udammi udammianaura.
EPH 4:15 Maasa sia miqiaqa, maaqiaqa, nariara nariara qimudaoo qimasee ridaqa minaki maridaqa nariara nariara sia unnufa qiaqa, anoona ufa kai qidaqa maasa miqianannai faiqi aanaaqiara foora asauku mundirana maasa qikiaqa amanakai innooqamaree ooru mundufuanaura.
EPH 4:16 Asauku mundirafa narí ufa ameemaanai mariasa rakisimarifaqa misa minara maasa qikiaqa fee qidaqa. Faiqí afaaqa sia moodaa ainaina maridanoo oosana oosana afaaqa ati fannoo aadu aadu ainaina akoofasaikirana moodaanaki ootupamafifanoo moodaa fasiqa maridanoo. Asauku mundirafa maasa qikiaqa marifa maasa rakisimarifaqa maasa faqa miqi kai iqa faiqí afaaqa fooqaana aadu aadu akoofasaikirausa moodaanaki ootupanoo marifaqa maasa qikiaqa Yisunasaa atooaqa maridaqa mina afaaqaikiqa maridaqa. Maasaki aiqamausa naadu naadu nariqa saikirana andeeqasee maridaqa sia nariara nariara nikooqaani nariara nariara rinnanannai moodaanaki innooqafinoo amiqimmandee kambiqafi fuannoo.
EPH 4:17 Miqi marianara qinee Pauroosa Karaambaiqa auqusaa inni qimannimidaqa afeekaikamandee kafaa kafaa qimannimidaqa, sia Anutunara aamina maqannaasa naanna raaqa. Misa irirafa fifau faafaumminoo maridanoo. Innee andeeqasee mariaqa.
EPH 4:18 Misa nitikurakinaa irirafa asukunaki maridanoo Anutufa nimimari marirana sia misa kaqikaaqoo maraidaqa aanaamuruara foora sia maraidaqa, misa kaaqa irirana siaisa furufari mariasa nári qimaqaamau kai fimariasa, minara kai asukunaki maridaqa.
EPH 4:19 Misa nisaurirana taikarausa maridaqa nári nifaaqa marirana mandoosanai kai ubeekaidaqa oosana oosana nisaurimaria ainainna sia nisauridaqa fanandidaqa kaqi umaraidaqa.
EPH 4:20 Innee Eefeesusa maqannaasa miqira mandoosana sia asauku mundirana saaqaraana iriafanoo, innee minara irisee Yisuna aiku asauku kambiqafufaqa andeeqara irirana faqaasa inni mina anoona ufa inni qimannimiafaqa irimariafanoo.
EPH 4:22 Minara innee inneeqa ooqeenaa marirana nirana fatika aqusaaqa inni ooqeenaa marirafa inniqa mareeqeenoo inniqa manda nikaruqira nidiranaki quqasoofaqa miqoo innee inneeqa kai kuridimariafanoo.
EPH 4:23 Inni nimuqusaki manda nidira nidimarina faqa nitikura mandirira irimariana faqa taikasee innaarunaindaraana fuka amiqirafa kai mariani.
EPH 4:24 Inni innaarunaindaraa fuka marirafa Anutuna narí miqirafa maridanoo, mina anoona ufaki andeeqasee marirana faqa Anutuna ufa ameemaanai marirana faqa mina amooqirana faqa mi fuka marirafa anoona maridanoo, innee mi marirana kai qamunnara foora afisusee minaki maraqa nuaqa.
EPH 4:25 Doo minara maaqooqari sia unna ufa kafaa mariani, taikaani, aiqama narinni narinni anoona ufa kai narí qimami narí qimami qiaqa, maasa aiqamausa moodaa nifaaqara foora kai marunnanara naríndi naríndi marunnanara unna ufa sia qiaqa anoona ufa kai qiaqa.
EPH 4:26 Ani aanooirafa kambiqafinoo sia ani rarisameeqee mandainainaki quqaani, anee aanoo qinana doo mi faasaanasaa mi suanina keeqarana namufaqa taikaseena faiqaa sia kisaaqasaa aanooida maria, dauni taikaa, Sadannafa minaki keekafinoo mandainaina uqeeraandoora.
EPH 4:28 Ainaina ummuari mari fasiqafa ummuarirana taikaani, taikasee quandaki andeeqasee narí ainainamasee narí narana namasee kudi fasiqauqa faqa naida niminaqa naaqa.
EPH 4:29 Sia putaa ainaina afunda ainainara ufa qiaqa, faiqí anaasee pooduqamannimaqaida dadaaqimaria ufana kai qimasaifaqa misa iriseeqa amiqirana adiafaairana mareefaranoo.
EPH 4:30 Manda ufa qinanoo Anutuna naaquqara maraquna fannoo iriseenoo akooqaanoo. Anutuna maraquna fannoo inni faqa marifa Anutuna akarara foora naríndi fee qidanoo inniki akara rinoo maridanoo. Mi maraquna akarafa maaqi qimasee inniara qima afeekaikidanoo kasooqaqee Anutufa qinanoo Yisufa qumuree inniara qinindi fee qimasee maraannoo.
EPH 4:31 Doo maqee aukuana aiqama sukaqara ufa faqa qusufa qimasee darara qirafa faqa naunduraki mari aanooirafa faqa fatika aquaqa. Nariara nariara firaa kari nameera ufasaa niqimariafa faqa aquraree mariannana faqa sia kafaa mariani naundurakinaa nariara nariara fidiaqaa ira irirafa faqa taikaani.
EPH 4:32 Sia miqiaqa, maaqiaqa, nariara nariara ireeda kai nimuqusa reendeenirafa faqa dadaaqirafa faqa mariani, narinni narinni mandainaina minnisaaqa. Maasa oosana oosana ainainannai Anutuna mandaikamma amaqaafanausa marifanoo Anutufa asauku mundiranannai maasa darirana minniqisanau. Doo innee minara iriseeqa mina amana kai doo inniqa niqoonausa mandaikamma nimaqarana narí minnisee narí minnisee iaqa.
EPH 5:1 Innee Eefeesusa maqusanaasara Anutuna amuqusira aiku asauku marianara mina ammeemmeeriaqa asauku mundirafa maasara rinoo amuqusinoo narí marirana maasa qimaaqa maqasee kuqiranaki quqasoofanoo tatufira aandau suqara fara foora Anutuna aikiambu inau, innee faqa miqi kai iqa asauku mundirafa maasara rirana ameemmeerida nariara nariara ruaqa. Inni nariara nariara rirafa maqee maqee inniqa marirana rakisinnimaqaani.
EPH 5:3 Innee Anutuna maqasaa aiku asauku marianara inniki faiqí anaasee narí ummuari narí ummuari maria ufana faqa ikairi irirana faqa ainainara faqa aanaaseera faqa kaaqa fanandi mariana faqa sia mi oosanna maraaqa minara ufa qimariafa faqa doo taikaaqa.
EPH 5:4 Ikairi putaa ufa faqa furufarira ufa faqa uteeti qimasee naanaindara qimaria ufana faqa aiqama sia andeeqara ufa sia inniki amanaikinoo maridanoo Anutuna maqasaa aiku asauku mariafanoo. Innee sia miqaa miqaa iaqa, maaqiaqa innee maqee maqee Anutunara dufi dufi qirafa kai inniki mariani.
EPH 5:5 Innee maa moodaa ainainnara kai amiqimmandee iriaqa, faiqí anaasee narí ummuari narí ummuari mariasa faqa ikairi faqaasa faqa kaaqa ainainara rimariasa faqa miqaa qiqanuasauqa, asauku mundirana ququsaki faqa Anutuna ququsaki faqa sia uqanna kaqikaaqoo mareefaranoo. Kaaqa ainainara rimaria oosanafa mifa moo unna anutunara innaaru qimaria fara foora mina ufa iri maria fara foora maridanoo.
EPH 5:6 Minara moo fannoo mi oosana oosana manda ainainnara aufadamasee ufa qimasee narí furufarira ufannai inni nikaruqimasee mandainainaki fuaqee qinaqa sia uqanna innee mina iriaqa.
EPH 5:7 Maqee maqee Anutufa mi manda oosannara kai qaoo qimarifaqa sia irianannai kai Anutuna aanoo qirafa misasaa aqufidanoo. Minara qinee inni qimannimidaqa miqinna fasiqa anaaseesa sia misa faqa mariaqa, nianasaa rufiasee mariaqa. Minara qinee maaqi qimasee qimannimidaqa.
EPH 5:8 Ooqai innee Eefeesusa maqusanaasa faqa asukunaki mariusa mariafanoo doo maqee karaambaiqa Anutuna faiqí anaasee aiku asauku kamambi mariafanoo kaaqa qarana fooqaasa mariafanoo, doo minara iriseeqa kaaqa qaranaki mariasara foora ida mariaqa.
EPH 5:9 Kaaqa qarafa qafuqakinaa ainaina amiqi amiqifanoo kambiqaidanoo Anutuna kaaqa qaranaki mariasa miqi kai iqa kaaqa qaranaki maridaqa misaki amiqirana faqa andeeqarana faqa anoona ufa qirana faqa misaki kambiqaidanoo.
EPH 5:10 Innee karaambaiqa aidi mari mariranara randasee maraaqa.
EPH 5:12 Asukunaki mariasa kukeeqaranaki maridaqa oosana oosana manda nisauri maria ainainna maraifaqa maasa misara qisauruanoo qimasee sia misa oosanara kaqikaaqoo ufa qianaura.
EPH 5:11 Minara innee furufarira marirana maree mariasara faqa asukunakinaa oosana maree mariasara faqa rufiasee innee nianasaa mariaqa innee misa manda asukuna mareeqee aiqamausa nifusaa kaaqa qara qoo quqasaifaqa mi manda asukunaki mariasa nisaurirana marasee minnisaaqeera.
EPH 5:13 Mi manda ainainausa mareeqee aiqamausa nifusaa kaaqa qara qoo quqasaifanoo mi manda ainainausa oosana uqanna kaaqa kooroomambuannoo.
EPH 5:14 Aiqama ainaina asukunakinaana mareeqe kaaqa qara qoo aiqamausa nifusaa quqasaifanoo mi ainainausa faqa kaaqa qaranaikiannoo. Minara maasa idi moo maaqi qinoo maridanoo. Anee faiqee marianafa findi fua. Kuqiranakiqari findi finanoo asauku mundirafa suaniara foora anisaa qaani.
EPH 5:15 Mi ufafa miqinoo marinara innee Eefeesusa maqannaasa inneeqa mariranasaa amiqimmandee rakisiaqa. Sia aamina fasiqara foora mariaqa irirana faqaasara foora mariaqa.
EPH 5:16 Maa kamuqoo manda marira kamu marinara sia fifau suani afu afeesimarina kaqinni aiqaraani, aiqama faasaanara ainainira faasaanee qiaqa.
EPH 5:17 Minara innee sia furufariaqa Karaambaiqa inniara fuaqee qinaqa fifandinnanara faqa auqeefandinnanara faqa ooqai iridanoo innee mi iriranara randasee paqurimandee mi mau afeekaikamandee fidaqa qafaaqa.
EPH 5:18 Innee nammari namasee furufarirana sia maraaqa mifa inni kuridimarifa maridanoo Anutuna maraquna fannoo kai inni naakufinoo naundurai qumbiqafinaqa mariaqa.
EPH 5:19 Innee narí qimami narí qimamidaqa Anutunara amooqirafa inni naundurai qumbiqafina maridaqa Dafidina idi faqa amaana idi faqa Anutunara rara idi faqa mi idinannai narí qimami narí qimami qiaqa.
EPH 5:20 Maasa karaambaiqa asauku mundirana Yisuna auqusaa maqee maqee aiqama ainainara maasa qikoona Anutunara dufi dufi qiaqa.
EPH 5:21 Innee asauku mundiranara naaquqee marinara nariara nariara ureeqafi maridaqa reendeena mandee mariaqa.
EPH 5:22 Innee aanaaseeuqa faiqí ninaaqmaaka qimannimidaqa, innee faqa karaambaiqa aramandunnai maridaqara foora inneeqa nifaaqmaaka ufa ameemaanai miqimandee mariaqa.
EPH 5:23 Asauku mundirafa narí ufara suqimariasa innaaruna asumu nimimarifa maridanoo, misa uriqararafa maridanoo, anaasee nifaaqmaaka miqikai iqa nári ninaaqmaaka uriqara mafi marianara inneeqa nifaaqmaaka nimeemaanai ureeqaqa mariaqa.
EPH 5:24 Asauku mundirana ufara suqimariasa eedoo qimasee mina aramandunnai ooqu mari fidaqa mariandee kai iqa aanaaseeuqa nári nifaaqmaaka aiqama ufa ameemaanai mariaqa.
EPH 5:25 Faiqí inni faqa qimannimidaqa innee aanaaseeuqa nifaaqmaaka inni qimannimidaqa, innee faqa asauku mundirana aanna raaqa, Yisufa narí ufara suqimariasa narí aanaaqara foora misara kaaqa amuqusufanoo misa naaru mariaqeera qimasee narí marirana misara kuqiranaki paasoosamandee quqanau. Innee inneeqa ninaaqmakara miqi kai iqa uriqarara ainainee qimasee nimuqusinaqa ruaqa.
EPH 5:26 Fuka anaasee narí afaaqinnai fuanee qimaseenoo afaaqa anukamaseenoo amiqira siara qamunna afisumareenoo narí afaaqa akumbau fee namuana fee qikairi fee sia marifanoo andeeqa mareenoo narí afaaqinnai fidanoo. Asauku mundirafa narí ufara suqimariasa fuka anaaseera foora nammariara foora ruma nimaqaseenoo andeeqara amiqiranaki faqa nifaaqa idaaqiranaki faqa mareeqeenoo narinnai amiqiranaki quqaani fee qimaseenoo maasa narí ufannai nammariara foora ruma qimaqasaidanoo nariara kai mara quqeenoo, minara Yisufa narí ufara suqimariasara amuqusufanoo narí marirana misara kuqiranaki quqanau maqi qidaqa.
EPH 5:28 Faiqí nári ninaaqmaakara miqi kai mandee nári nifaaqara foora nimuqusiani, narí aanaaqara uriqarara ainainee qimasee amuqusimariafa narí kai nariara faqa uriqarara ainainee qidanoo amuqusidanoo.
EPH 5:29 Sia moo fannoo narí afaaqara akooqaidanoo amiqimmandee rakisidanoo narana amidanoo asauku mundirafa Yisufa narí ufa suqimariasara narí afaaqafee qimaseenoo rakisidanoo, innee faqa miqikai iqa inneeqa ninaaqmaakara qini qifaaqa fee qimasee amiqimasee rakisiaqa.
EPH 5:31 Ooqeenaa tamummaqara fasiqauqa akara mina maaqimminoo maridanoo, Anutufa qunara faiqí moo fannoo narí anoofa akoona minniseenoo narí aanaaqasaa atooqafinoo miqanda moodaa kara mafifaranoo.
EPH 5:32 Mi ufana maa ainainnara kikiqusidanoo anoona amiqirafa maridanoo asauku mundirafa faqa narí ufara suqimariasa faqa faiqí narí aanaaqara faqara foora inoo maridanoo moodaa kara mafuannoo.
EPH 5:33 Mi ufana inni faiqiara faqa qidanoo aiqama fasiqa nári ninaaqmaakara nári nifaaqara foora nári nimuqusiani, anaasee faqa nári nifaaqmaaka ufa ameemaanai eedoo qimasee mariaqa.
EPH 6:1 Faiqiuqaindi inniara qidaqa, inneeqa ninausa nikausa ufara eedoo kai qiaqa. Innee Yisuna ufara suqimariasaki marianara andeeqarafa mifa maridanoo.
EPH 6:2 Mooseena sandufara innee irimariafanoo minakinaafa aaquqira ufa qisaukuqara taikasee maridanoo. Minakinaana moo sandufa maasa mi mau fuanoo Anutufa moo ainaina maaqoo maa maqanasaa maasa qimirara qima afeekaikammaqoofa maaqimminoo maridanoo, inniqa ninausa nikausara naaquqaina misa ufamau fuaqa.
EPH 6:3 Fifanoo Anutufa inniara kisaaqasaa inneeqa maqa maaqaki maridaqa amiqiranaki mariaqee qimasee maasara qimafeekaikinau. Maasa mi ufanara uriqarara ufee qidaqa. Doo innee faiqiuaindi mi mau fuaqa.
EPH 6:4 Faiqi nikausamara inni qimannimidaqa sia inneeqa faiqi fifau nirana fundakifaqa aanoo iaqa, sia miqiaqa, maaqiaqa, Yisuna ufamau inni faiqiuqa andeeqee andeeqasaifaqa Yisuna ufasaa innooqaaqa.
EPH 6:5 Qinee Pauroosa innee moosa ainainimariasa qimannimidaqa. Inneeqa feefauru marara saikaki keeqafinaqa amiqimasee mina ainainammaisaaqa. Sia nifaaqa quqasee mana mana iaqa. Innee naaquqee marinaqa ainaina akoona anainammaisaaqa, innee asauku mundirana ainainidee qidaqa maqasaa ainaina akoona amiqimasee nimuqusannai ainainammaisaaqa.
EPH 6:6 Sia misa eedoo qira ufara kai irisee misa nifusaa kai ainainiaqa, inneeqa nimuqusannai Anutuna ufamau asauku mundirana ainainidara foora amiqimasee ainainamannimaqaaqa.
EPH 6:7 Sia fifau faiqí ainainamaiseera fooriaqa, karaambaiqa ainainammidee qimasee amiqimasee ainainamaisaa.
EPH 6:8 Innee miqidaqa maanara iriaqa, Karaambaiqa aiqama fasiqa amana amana kai nimidanoo moosa rumbara saikaki mariasee narí ainainira saikaki mariasee nári amiqira ainainirana akiaqara amana amana kai innaarunai nimiannoo.
EPH 6:9 Qinee ainainimariasara innee inneeqa ainaina akoona amiqimasee ainainammaisaa qee qimaseeqa innee ainaina akausa faqa qimannimidaqa innee faqa miqikai mandee inniqa ainainimariasasaa amiqimmandee rakisiaqa, amiqimasee ainainiaqee qimasee aanoo irana faqa narirari mariana faqa taikaaqa. Innee faqa maanara iriaqa, innee faqa inni ainainimariasa faqa moodaa rakisirafa innaarunai marifa, sia mifa ainainimariasara ureeqarausee qimasee kafaa quandaki rakisi nimaqee mariasara uriqararausee qimasee qaara irirana maraidanoo, moodaa irirana marasee amana amana kai rakisi nimaqaidanoo.
EPH 6:10 Maa ufana taikara ufa maaqimminoo maridanoo, innee karaambaiqa faqa maridaqa moodaanaki nimarifaqa mina firaa afeekannai inni faqa moodaanakikirana firaaqoo afeekaikamma mapukuaqa.
EPH 6:11 Sadannafa oosana oosana narí manda nikaru qiranannai inni naruannoo, innee minara rufiasee Anutufa niminna saqari duru saamunannai inneeqa nifaaqa ititaaqa.
EPH 6:12 Maasa Yisuna ufa irimariasa sia faiqí faqa rakidaqa maasa meerai Anutuna innaaruna ameemaanai maria manda afaanausa faqa rakidaqa, maa asukunaki maria kamuqoo mirindari rakimariasa faqa misa uriqararausa faqa misa faiqí firaasa faqa meeraindari maasa daruafaqa maasa misa faqa rakidaqa.
EPH 6:13 Innee minara iriseeqa Anutufa niminna duru saamu saqarina qumareeqa deedaqida mariaqa. Sadannafa mi manda faasaanna narirara anirainaqa innee amanaikiqa mariafanoo narí faqa aruafaqaammasee miqoo kai eeraaramasee ititaqa mariaqa, sia amana ainnaaqaraani.
EPH 6:14 Minara qimannimidaqa. Innee findifi deedaqida mariaqa Sadannafa inni mandoosana nimisee naruandoora. Roomma maqannaa sundia nifaaqa rafaaqafimariana kikiqususee inniara qianauranoo. Inneeqa fausanda niranaqumuki rumbee maria fara foora mifa inni anoona ufa kai qirafa mifa mariannoo. Inni nimuqusasaa ititee maria afeeka ainainara foora inni andeeqara oosana mariannoo.
EPH 6:15 Inni niku ititee mariafa niku aanaamuara foora mifa Anutufa faqa mari asooara amiqira fasaasa ufa maqee maqee aamina maqannaa qimannimirafa mifa inni niku aanaamuara foora ititarafa mariannoo. Mi andeeqara oosannausa marasaifanoo Sadannafa sia amana inni naruani.
EPH 6:16 Inniqa saqari ukeeqirira fara foora Yisuna saqarikirafa maridanoo. Innee Roomma maqannaa sundiara foora maqee maqee mi saqarina ukeeqirisee maraqa nifanoo Sadannafa narí feefa ida muquru qumaree inniara oosana oosana furufarira irirana minannai inni nifaaqa naqusee nariraree qimasee aqusainaqa innee Yisuna saqarikiranannai mina mafi ruki aquaqa.
EPH 6:17 Roomma maqannaa sundiauqa rakiranaki fidaqa qafee nikiaaqa afisusee nikiaqa rukamifoora afisimariqau. Inneeqa nikiaqaki ititee maria qafeenara foora Anutufa innaarunai asumu marirana nimufa maridanoo. Sadannafa inni kuridiranaki maqee maqee mara quqararinaqa innee mi qafeena afisusee asumu mariaqa. Roomma maqannaa sundiauqa rakira paipana dinni dinni afaifaqaanannai faiqí ateekeeqa raquru nimiqa imariqau. Inni raiqara paipana aseema fooqaafa marina Anutuna ufa maridanoo mina maraquna fannoo mi ufana nimu ufafa maridanoo. Sadannafa inni faqa rakinaqa mi samuna qumaree mina aruaqa.
EPH 6:18 Innee mi ainainausa maraidaqa innaaru qidaqa maqee maqee Anutuna dadaaqiranara faqa innaaru qiaqa. Anutuna maraquna afeekannai maqee maqee eendaki faqa faasaana faqa Anutuna maqasaa fasiqa anaaseera Anutufa amiqi amiqimma nimaqaanifeera innaaruqiaqa. Sia kudoosaapaaqa afeekaikamandee innaaruqiaqa.
EPH 6:19 Qini Pauroosara faqa innaaru qiaqa Anutufa oosana qimasainaqa qinee faiqí anaasee Yisunara qimannimianauree qimasee paasoosamandee qimannimianaura, Yisuna amiqira fasaasa ufa ooqai kukeeqanoo marifa maqee aukuana Anutufa faiqí anaasee kooroomannimaqeenoo.
EPH 6:20 Qinee Pauroosa mi amiqira fasaasa ufana aanaiqikirausa maridaqa. Kuqaa Roomma maqanna karabusaki maridaqa kuqaa aanaiqikirausa maridaqa. Anutufa qiniara paasoosamandee faiqí anaasee qimannimiannee qifaqa innee qiniara innaaru qifaqa paasoosamandee qimannimianaura.
EPH 6:21 Qinee Tikikusana aqiqaananoo qini daufakiana inni qimannimiannoo. Mifa maasa qimuqusi mari qikaqaafasaafa maridanoo, karaambaiqa saikaki amiqi amiqira ainainimarifa maridanoo. Mifa qini fasaasa ufa inni qimanniminaqa innee qini mariranara iriaqeera.
EPH 6:22 Mina qimannimianifeera aqiqaanaura inni nimuqusa pooduqaanifeera aqiqaanauranoo.
EPH 6:23 Maasa qikoofa Anutufa faqa maasa karaambaiqa asauku mundirana Yisuna faqa naunduraki asooarana faqa nariara nariara uriqarara ainainee qimasee nimuqusirana faqa Yisuna saqarikirana faqa inni aiqama qini qikaqaafasaauqa nimiani.
EPH 6:24 Innee aiqamausa maasa karaambaiqa asauku mundirana Yisunara sia taikee maria rirana rimariasa, Anutuna afaarirafa inni faqa mariani.
PHI 1:1 Qinee Pauroosa Timootisandiri asauku mundirana Yisuna rumbara ainainira fasiqaqara maridaqa maa akarana rumannimaqeeqa. Innee Firipi maqusai maria Anutuna aiku asauku maria fasiqa anaaseesa innee faqa innee ufa suqimariana rakisirausa faqa inni niqoonausa inni dadaaqi mariasa faqa, innee aiqamausa inneeqa irirana asauku mundirana Yisunasaa rusimariasa, inni akara rumannimaqaidaqa.
PHI 1:2 Maasa qikoofa Anutufa faqa mina asauku mundirafa maasa karaambaiqa Yisufa faqa nári afaarirana faqa nári naunduraki asooarana faqa nimiani.
PHI 1:3 Qinee inni Firipi maqannaasara daaqoo irifaqa Anutufinnai dufi dufi qimasee asasammasee inniara innaaru qidaqa.
PHI 1:5 Ooqai indaaru inni maqusai anireeqa Yisuna amiqira fasaasa ufa qimannimiafanaqa amiqimmandee dadaaqammamaree ani marufaqa nindafaafannanara inniara daaqoo iriseeqa Anutunara asasammamaqaidaqa.
PHI 1:6 Qinee maa ainainnara amiqimasee iridaqa Anutufa inniki amiqira saika uqeeroofa kaqi inniki mi saikana kai uqeeranoo fifi inoo taikara aukuana asauku mundirafa Yisufa quminna faasaanna miqoo kai taikaannoo.
PHI 1:7 Anutufa narí saika Yisunara qimannimira saika adiafaa imari saikana qimufaqa innee aiqama minaki marida dadaaqi marusa mariafanoo, minara inniara asasirafa andeeqarafa kai maridanoo. Ooqai sia qinee karabusaki mariafanna kamu qoo qinee Yisuna aufakiana faiqí anaasee kaqi nidaqa qimannimiseeqa naunduraki mapuku nisasee mariqiafana, akaqausa minasaa ootupeeqa aaqaranaki quqasoofaqa qinee oonuree mina ateekaafanaqa innee faqa dadaaqi marusa mariqau. Doo maqee faqa Roomma maqannaa karabusaki maridaqa innee faiqí anaasee mapukunnisee mariana qini dadaaqi mariasa marianara inniara Anutufinnai asasirafa andeeqanoo maridanoo.
PHI 1:8 Anutufa iridanoo qinee kuqaa anoona ufa inni qimannimidaqa. Inniara qini qimudaoo qirafa firaafa marina asauku mundirana Yisuna amuqusa ookiqari kambiqara qimudaoo qirafa maridanoo.
PHI 1:9 Innee amiqira oosana kai irisee maraaqee qidaqa maaqi qimasee inniara Anutufinnai innaaru qidaqa, Oo Anutu Firipi maqusanaasa nariara nariara rirafa maqee maqee innooqaidanoo kambiqaani mina sia aaqara irirafa anoona irirafa faqa rainasee akoofasaikira irirana faqa maasaki innooqeenoo uqannifiqainaqa uriqarara aana kai umaree fuaqeera qidaqa.
PHI 1:10 Anutufa miqinoo inni dadaaqinaqa asauku mundirafa qumira faasaanasaa innee ikairi siaisa, ufa siaisa maridaqa asauku mundirafa nimira amiqira anoonaikira marirafa inniki marifanoo aiqamausa mina qafammasee Anutunara dufi dufi qimasee amooqifaranoo.
PHI 1:12 Qinee Pauroosa Yisuna ufa maqusa maqusa qimannimi marunnana akiaqara karabusa rumbasaafaqa maridaqa. Nariqa qini rumbaqaafanoo Yisuna ufa aru rafaaqa firaree qimasee qinee rumbaqa maruna sia misa Yisuna ufa rafaaqa fia, qini rumbaranannai misa sia irirai mina muru pooduqaafanoo.
PHI 1:13 Qinee Roomma maqusai firaa uriqarara kiapana maaqa amiqira maaqa aaqa rumbara maqaki maridaqa mi firaa maqanasaa rakisi maria sundiauqa faqa rumkatasaa faqa qinisaa faqa rakisimaria poorisausa faqa aiqama maaqoo mariasa faqa qinee asauku mundirana ainainira faiqi mina ufasaara rumbaqa marunnanara irimarusa maridaqa sia qinee moo mandoosana maraafannanara iridaqa.
PHI 1:14 Qini qikaqaafasaauqa, maqusa maqusa Yisuna ufa irimariasa qinee karabusaki marunnanara iriseeqa misa paasoosirafa firaaqoo innooqamaree fidaqa faiqí anaasee Yisunara qimannimidaqa sia rufiaidaqa.
PHI 1:15 Misakiqari akaqausa nariara nariara rairaiqidaqa raiqaidaqa asauku mundirana auqu uqeeraidaqa, akaqausa moomoosa sia miqidaqa amiqira irirana iridaqa qimannimidaqa.
PHI 1:16 Miqi mariasa nimuqusa ookiqari qini Pauroosara ridaqa Yisunara amiqimaseeqa faiqí anaasee qimannimidaqa. Akaqausa Yisuna ufara kaukaata qidaqa mareeqee kaqirunna ubeekaidaqa, Anutufa qiniara anee minasaa ititaannee qifaqa ititaidaqa, qini dadaaqi mariasa miqi marunausa marunnanara irisee amiqimmandee qiniara ridaqa dadaaqidaqa.
PHI 1:17 Akaqausa rairaiqidaqa qimannimi mariasa sia nimuqusa ookiqarifau asauku mundirana saikara qimannimidau náriara nári nuqu uqeerararee qimasee miqi qidaqa. Misa Yisunara miqi qimasee qimannimifaqa Roomma maqannaasa mina irisee kafaa kafaa qini karabusaki amiqimma daruaqeera miqi qidaqa.
PHI 1:18 Qinee misa oosanara iridaqa sia firaaqoo misa oosanara oonumafi iridaqa. Qinee minara maaqi qidaqa. Akaqausa amiqira irirana marasee asauku mundiranara kooroo iafaqa asasidaqa, akaqausa aaqara irirana marasee asauku mundiranara qimannimiafaqa minara faqa asasidaqa, misa oosana oosana iriranannai asauku mundiranara kooroo ida fee qidaqamma asasidaqa. Sia qinee maqee kai asasianaura naaru naaru asasianaura.
PHI 1:19 Inni innaaru qirafa faqa asauku mundirana Yisuna maraquna faqa Roomma maqannaasa qumee dadaaqinaqa nári karabusakinaana qini iduku qimaqeefaranoo, qinee minara iriseeqa maqee maqee asasidaqa.
PHI 1:20 Qeeqa qimuqusa ookinaa didira irirafa maaqimminoo maridanoo. Qinee qeeqa saika Anutufa qimu saikana sia kudoosaapee minnisaanauranoo aiqama aukuana faqa maqee Roomma maqannaasa karabusaki marunnanara faqa qiniki qini paasoosirafa qumbiqafinaqa qeeqa Roomma maqannaasa darifaqa kuqiranannai fee qeeqa kaqi mariranannai fee qeeqa marirana aiqamannai asauku mundirana auqu uqeerarana qiniki marianifeera dididanoo.
PHI 1:21 Kaqi marirafa nana ainainee maridanoo fee, qini marirafa asauku mundiranara kooroo imarifa kai maridanoo, Roomma maqannaasa darifaqa kuqiqa amiqiranaki uriqararanaki marianauranoo fee qimasee minara dididanoo.
PHI 1:22 Qinee minara iridaqa kafaa maaqi qidaqa qinee sia darifaqa kaqi maridaqa amiqira anoona saika amana maraanauree qimasee minara faqa dididanoo.
PHI 1:23 Qaara irirafa qini daundurai maridanoo dinni dinni oonurarisee ani rarisee imariafaqa maridaqa. Roomma maqannaasa qini kuqa kai darifaqa qinee maa marirana minnisee asauku mundirafa marinnai firara firaaqoo dididanoo amiqira ainaina maridanoo.
PHI 1:24 Misa sia qini darifaqa kaqi marida qinee inni Firipi maqannaasa dadaaqirana uriqarara ainaina mariannoo.
PHI 1:25 Qinee minara iridaqa kaqi marianauree qidaqa. Qinee inni faqa maridaqa inni dadaaqianaqa inneeqa saqarikiranaki nidaqa inneeqa saqarikirana firaanaikidaqa inni asasirafa faqa firaanaikianifeera kaqi maridaqa dadaaqianaura.
PHI 1:26 Qinee Pauroosa karabusaki maridaqa innee qiniara irisee asasidaqa nasunasu rida mariaqa. Misa qini karabusakinaana idukifaqa innee iannai fuanaqa qini qiqafamasee asauku mundirana Yisunaki fidaqa qiniara fiqaramasee asasidaqa qimooqifaranoo.
PHI 1:27 Misa qini darifaree idukifaree inni irirana moodaa maaqimminoo mariani, innikina narinni narinni rirafa asauku mundirana amiqira fasaasa ufa irimariasa misa naanna ramafi mariaqa. Innee miqidaqa marifaqa qinee inni oonu nindafaanauree sia fee oonu nindafaanauree miqidaqa inni amiqira oosanara nianaindari irianaura, inni irirafa Yisuna amiqira fasaasa ufa saqarikirana faqa mi mau firana faqa minara kai iridaqa aiqama innee moodaa irirana faqa moodaa firanamau faqa moodaanaki ruumbakiqa maridaqa rakimariasa naanna ramasee mapukiqa marifaqa irianaura.
PHI 1:28 Yisuna ufara namuqaaki mariasara sia rufiaaqa, paasoosiaqa. Innee sia rufiaifaqa misa nári kuridifandinnanara irifaranoo. Inni innaarunai asumu marifandinnanara faqa irifaranoo. Anutufa narí kai uqannifiqaannoo.
PHI 1:29 Anutufa inni firaaqoo adiafaairanaki quqanniseenoo asauku mundirana ainainiranaki quqannisaifaqa innee minaki maridaqa sia inni irirana minasaa rusiranara kaifau inni niminoofau mina ufasaara nidafirana maree fandinnanara faqa inni niminoo.
PHI 1:30 Doo maqee innee Firipi maqannaasa qini Pauroosa rakimariasa naanna ramasee dadaaqiaqa. Ooqai innee qini qiqafoonakinaa rakirafara foora faqa maqee kaqi mari rakirafara foora faqa innee minara qiqafamasee irimariafaqa amana maqee dadaaqiaqeera qimannimidaqa.
PHI 2:1 Innee asauku mundiranaki nimariafanoo inni pooduqara afeekaikirana nimidanoo fee. Asauku mundirafa inniara rirana naunduraki amiqi amiqirana nimidanoo, innee Anutuna maraquna faqa moodaanaki maridaqa quandafi nariara nariara rirana naunduraki amiqi amiqirana nimidanoo, innee Anutuna maraquna faqa moodaanaki maridaqa quandafi nariara nariara idaaqidaaqida mariafanoo. Innee nariara nariara nimuqusi marifaqa idaaqidaaqida mariafanoo.
PHI 2:2 Qinee inni fuki faaki qidaqa afeekaikidaqa innee maaqimasaifaqa qinee amiqimasee inniara asasianaura. Innee moodaa irirana maraaqa, innee moodaa nidirana narí ami narí ami iaqa. Innee moodaa amiqira irirana faqa maraquna faqa maraaqa.
PHI 2:3 Sia moo ainaina qimianifee qimasee aundurai oonu mafi irisee aqoonnana oonu dadaaqiaqa. Sia manda fifau nifaaqa mara maree ooru firafa maraanifee qimasee aundurai oonumafi irisee aqoonnana dadaaqiaqa, innee sia miqiaqa, maaqiaqa, narinni narinni reendeenida mariaqa. Sia anee moosara mandaikira fee qimasee aneennara amiqira fee qia. Maqee maqee aqoonausara qini uriqararausee qimasee qinee misa ureeqarausa maridee qiaqa.
PHI 2:4 Sia innee inneeqa ainainara kai irimaree fuaqa, niqoonausa faqa amiqiranaki mariaqeera minara faqa iri maree fuaqa.
PHI 2:5 Innee inniqa nariara nariara irirafa asauku mundirana Yisunaindi miqirafa reendeenirafa amiqirafa marindee kai iaqa. Mina irirafa maaqimminoo marinau.
PHI 2:6 Mifa ooqaindari Anutufara foora marufa maridanoo. Sia narí afeekannai rakirara maqi mandee Anutuna amana ooru fuanauree qinau.
PHI 2:7 Narí kai iriseenoo narí uriqararana minniseenoo ureeqara ainainira faiqi irirana marasee marinau. Mifa faiqiara fooqaana mambinoo faiqí afaaqaki maa maqanasaa kooroomafinoo marinau.
PHI 2:8 Mifa reendeenirafa marinoo Anutuna ufara eedoo qimammaree finoo doo kuqiranara faqa eedoo qimasee kuqinau, manda kuqirana aunirira saqarisaa kuqinau.
PHI 2:9 Anutufa mina qafoofanoo afaaqa asasinoo aidufanoo mina akiaqara kuqiranakinaana uqeereeqeenoo innaaruna maarinni uriqararanaki quqaseenoo aiqama nuqu uriqarara auqu faqaana quqanau.
PHI 2:10 Aiqamausa uqanna innaarunaindaraasa faqa maqasaaqaraasa faqa maqa ameemaanaindaraasa kuqirausa faqa Yisuna auquara naaquqainaqa reendeenamasee niqoori saunarafiqa aiqamausa akooqoo asauku mundirana Yisunara maasa karaambaiqee qimasee mina akoona Anutuna amooqifaranoo. Minara qinee Pauroosa inni Firipi maqannaasa qimannimidaqa inni irirafa asauku mundirana Yisuna aanna kai reeqa nariara nariara fifimmaseeqa idaaqiaqa.
PHI 2:12 Oo qini qiqoondiuqa Firipi maqannaasa qinee ooqai inni faqa mariafanaqa innee qini ufa irisee eedoo kai imariqau. Doo qinee maqee innikiqari nianai maridaqa innee qini ufa irisee eedoo qinafa uriqarara ainaina mariannoo innee innaaruna asumu marirana doo marasee mariafanoo aaqamaki saamuruanoo qimasee rufiaqa rufiaqa irirana faqa naindiri naindirirana faqa mara maree fidaqa anoonaikirana mareefara.
PHI 2:13 Anutufa minara irisee inni naunduraki mina ufara eedoo qira aidirana faqa mi mau fira afeeka faqa inni naunduraki kambiqaanifeera maqee maqee ainainidanoo.
PHI 2:14 Innee maa maqa maaqanaki eendaandirausa faqa aaqee mariasa faqa qambaana mariafanoo Anutuna andeeqara faiqi namu qikairi siaisa anukarausa mariaqeera qidaqa innee aiqama ainainirana idaqa sia nikoo nikaa idaqa ninunuridaqa raiqaaqa, miqidaqa sia Anutuna andeeqara faiqi namu marifaranoo. Kaqi eedoo qimasee kadaapirirana maraaqa. Innee mi eendaandira fasiqa anaaseesaki maridaqa inni andeeqara nirana marirana fasau innaarunaki eendaki qeemarindee idaqa kaaqa qaida maridaqa naaru naaru marira fasaasa ufa qimannimiaqa. Innee miqida marifanoo asauku mundirafa qumuaninna faasaana qinee inniara qini saika anoonaiki ifoo qimasee asasianaura qini kadaapi faqa tooqaamu faqa sia fifau irairaainoo mariannoo anoonaikinaqa asasianaura.
PHI 2:17 Innee Yisunasaa irirana rusimariafa Anutuna tatufira aandau miqirafa maridanoo. Roomma maqannaasa qini qusasaa darusaifanoo qini fidika fannoo inni tatufira aandausaara foora adia finoo aiqamaqara moodaanaki Anutuna amaqaifanoo eedoo qimasee asasammasee maraannoo. Misa darifandinnanara qinee maqee asasammidaqa qinee asasammasee qeeqa nasurirana inni faqa naida nimianauranoo.
PHI 2:18 Innee faqa miqi kai iqa asasiqa qini asasirana dadaaqiaqa.
PHI 2:19 Qinee qusasaa Timootina aqiqaananoo innee Firipi maqannaa iannai fuanifee qidaqa karaambaiqa Yisufa dadaaqinaqa aqiqaanaura. Mifa innee iannai oonuree aniree qimaqiminanoo inni ufa fannoo qini daundurai pooduqama qimaqaannoo.
PHI 2:20 Timootifa kai qini daanna reenoo moodaa irirana inniara iridanoo amiqimasee inniara amuqusidanoo.
PHI 2:21 Maaqanna maaqanna moodaa modaa Yisuna saikara iridaqa. Aiqamatia sia asauku mundirana Yisuna saikara iridaqa nariqa ainainiranara kai iridaqa.
PHI 2:22 Timootifa narí ainainiranara narí amiqira oosana kooroo ifaqa innee minara irimariafanoo mifa faqa qinee faqa nariqa qisakoosara foora maridaqa moodaanaki Yisuna amiqira fasaasa ufa saikaki marunausa maridaqa.
PHI 2:23 Roomma maqannaasa qiniara naqi fee ifaree qinee minara iriseeqa innee iannai Timootina aqiqaananoo fuannoo. Qini qiqa irirafa karaambaiqasaa mundinoo maridanoo mifa dadaqinaqa qini idukusaifaqa qinee faqa innee iannai fuanauranoo.
PHI 2:25 Maa akara rirana Eepafarooditusanasaa rumasaananoo maree innee iannai fuannoo mi fasiqafa qini daaqa ainainida dadaaqidanoo rakiranara foora dadaaqimarifa ooqai innee ooqai qini dadaaqira munnimma minasaa quqasee aqiqoofanoo mai anireenoo mai qini faqa ani maridanoo amiqimasee qini dadaaqidanoo.
PHI 2:26 Mifa firaaqoo inniara ridanoo inni nindafaaqaa idanoo innee mifa anunara aiaaee qunara mifa irufanoo amuqusunara innee iannai kaifaa fuannoo.
PHI 2:27 Kuqaa mifa firaaqoo aurinoo kuqirara ameekamaseenoo Anutufa minara amuqusufanoo dadaaqufanoo findifinau, sia minara kaifau amuqusinau, qini Pauroosara faqa amuqusufanoo Eepafarooditusana firaa auriranakinaana mara findifinoo firaa ikiraqarana sia qiminau.
PHI 2:28 Minara qinee innee iannai firaaqoo aqiqararee qidaqa, innee mina qafamasee asasiaqeera aqiqaidaqa innee miqifanoo qini ikiraqarafa faqa taikaannoo.
PHI 2:29 Innee mina qafamaseeqa karaambaiqaki maru qikaqaafasaa fee qimasee asasammasee mina amiqi amiqiaqa, innee miqirausara aiqama naaquqamasee dadaaqiaqa.
PHI 2:30 Qinee asauku mundirana saikaki marufaqa Roomma maqannaa Poorisauqa qini qumareeqa rumbaranaki quqaqisaafaqa innee nianai marida sia amana dadaaqufanoo Eepafarooditusafa qini daadaaqiraree qimasee narí marunara paasoosamandeenoo kuqirana ameekeenoo, minara qinee miqirausara naaquqamasee dadaaqiaqee qidaqa.
PHI 3:1 Qini ufa taikarafa maaqimminoo maridanoo. Oo qini qikaqaafasaauqa Karaambaiqa asasirana firaana inni nimiani. Ooqai qinee akara rumannimaqaafanna ufanara sia rufiaidaqa mi ufafa inni ititannimaqee mari ufana kafaa qimannimidaqa minara maaqi qianaura.
PHI 3:2 Innee mandoosana maree mariasara eerairida aufariaqa misa kaasau fainiara foora maridaqa misa Yuda maqannaa oosana marida fainanduqiranara afeekaiki mariasa maridaqa. Misa fainanduqirana nariqa faina kafaqianda uqiranara anoona ainainee qimasaidaqa miqidaqa aaqaidaqa miqidaqa, maasa kai anoona faina kafaqianda uqimarunausara foora maree marunausa maridaqa.
PHI 3:3 Maasa Anutuna maraqunannai Anutunara innaaru qidaqa minannai kai maasa asauku mundirana Yisunaki marunnanara asasidaqa, maasa sia misa naanna ramasee nifaaqasaa akooqoo mari ainainnara anoonee qidaqa.
PHI 3:4 Akaqausa akooqoo faiqí nifusaa mari ainainnasaa mundusee minaki nifaaqa quqaida aaqaidaqa. Qini akooqoo qifaaqasaa amooqira ainaina moomoo maridanoo qinee minara fifau ainainee qidaqa minasaa mundufiqa qifaaqa quqarafa sia mariannoo.
PHI 3:5 Qini akooqoo qifaaqasaa amooqira ainaina maaqimminoo maridanoo qini Pauroosa maqooqooqari qisauku dinni ani qaara marasee qaaramooku faasaana marasoofaqa qini faina kafaqianduqi mariqau. Qinee Isaraee maqannaa kambiqarausa maridaqa Yakooboona amaaku Beensaminna ati maridaqa, Qeeburu maqannaasa uqanna mara maqarausa maridaqa.
PHI 3:6 Qinee firaaqoo Yuda maqannaasa sandufamau fimariafanausa marunnanara firaaqoo sandanainai qimasee Yisuna ufara suqimarusa nárí mariafanausa maridaqa. Mooseena sandufannai Anutuna andeeqarana amanaikirafa sia amanaikiannoo. Mooseena sandufannai andeeqarana marararee qimarusakiqari qinee misa uriqararausa Farisai amaana ufa qimarunausa mariafannana.
PHI 3:7 Ooqai qinee Yuda maqannaa Anutufinnai firaree qimaru ainainausara uriqarara ainaina anoona ainainee qimariqiafana doo maqee asauku mundiranara irisee mi aiqama ainainausara aaqarafa fifau ainainee qidaqa.
PHI 3:8 Sia mi ainainausara kai miqi qidaqa aiqama ainainara kaaqa fifau sia mari ainainnee qimasee quandaki anoona ainaina tia firaa ainaina, asauku mundirana Yisuna maasa karaambaiqara irimariana minara kai anoona ainaina fee qimasee minakai qumareeqa. Minara maraannee qimasee aiqama ainaina doo aquseeqa asauku mundirana maraani qimaseeqa mina faqa moodaanaki marianauree qimaseeqa aiqama ainainara fifau madaapee ainainee qimasee aquseeqa quandaki Yisuna qumareeqa. Doo maqee qinee sia qeeqa andeeqarana maraqa nidaqa sia Mooseena sandufannai mi andeeqarana maraqa nidaqa. Qinee maqee moo andeeqarana asauku mundirana saqarikiafannanannai Anutufa andeeqarana qimuna mina kai maqee maraqa nidaqa. Mi andeeqarafa Anutunaindari anifa Yisuna saqarikiranasaa mundinoo marifa marifaqa maraqa nidaqa.
PHI 3:10 Qinee sia moo ainainara irianauree qidaqa, asauku mundiranara faqa Anutufa mifa kuqiranakiqari findifu afeekanara faqa iriraree qidaqa.
PHI 3:11 Yisufa kuqiranaki keeqafinoo minakiqari findifufaqa qinee faqa kuqiranakiqari findifiqa naaru mariranaki fuanee qimasee maqee kamuqoo Yisuna aupurarana faqa mifa kuqu aidafirana faqa qinee faqa qeeqa qifaaqasaa maraidaqa.
PHI 3:12 Yisuna aupurarana faqa kuqu aidafirana faqa qeeqa qifaaqasaa maree marunnana qinee sia minannai amanaikiqa sia minannai kaaqa andeeqaidaqa. Qinee maqee maqee andeeqarana marararee qimasee sandaidara maqi qiara maqi idaqa. Asauku mundirafa Yisufa qiniara andeeqarafa marianifee qimaseenoo qini qumareeqeenoo naríndi kammaqaifaqa maridaqa.
PHI 3:13 Oo qini qikaqaafasaauqa qinee sia anoonaikamandee maridaqee qidaqa, sia amana miqianaura. Qinee maa moodaa ainainna kaimmidaqa qinee aiqaree inaaqiannai mari ainainara qeeqa aaqeeaafanna ainainnara aunumasee doorinni mari ainainna andeeqara oosana marirana kai qifu munduseeqa qumarararee qimasee fidaqa sandaidaqa.
PHI 3:14 Qinee narí amani narí amanira sandaranara foora taikaranasaa kai doori munduseeqa mi runna kai andeeqasee fidaqa miqoo feefauru marararee qimasaida sandaidaqa qini feefauru mararafa maaqimminoo maridanoo. Anutufa narí asauku mundirana Yisunannai maasa daarama sandaranara foora quqaqiseenoo maaqoo narí andeeqara mariranaki faqa naaru marirana faqa mariaqeera qifaqa mina mararara kai sandaidara foora masee fidaqa.
PHI 3:15 Maasa aiqamausa Yisuna ufa akoofasaikirausa mi irirana kai maraqa nuaqa. Innikiqari akaqausa moo irirafa marinanoo Anutufa inni minara qimannimiannoo.
PHI 3:16 Saina miqinoo mariani innisaimbaqa sia moo ufa irisee mi mau fuanaura maasa ooqai fuafannamau kai fuanaura.
PHI 3:17 Oo qini qikaqaafasaauqa innee aiqamausa qini kai qifaqee qini qimeemmeeriaqa, maasa inniara iriqa andeeqara aana uqannifiqaafanaqa doo maqee innee akaqausa innikiqari mi mau fimariasa niqafamasee innee faqa nifaqee mi mau fuaqa.
PHI 3:18 Qinee Pauroosa maa ufana ooqai moomoo kari inni qimannimiafanaqa doo maqee daukunu ree marifaqa inni qimannimidaqa, moomoosa asauku mundirana kuqirana mandaaqasee andeeqara oosana marasee fimarufaqa doo maqee quandaki mandoosana maraidaqa minannai asauku mundirafa aunirira saqarisaa kuqirana namuqaa kiqa mina kuqirana namuqaa kammamaqaidaqa.
PHI 3:19 Miqi mariasa maaqiqa fifi iqa idaki kai fifaranoo, nariqa aaqee maria nidirafa mifa misa Anutufara foora maridanoo, misa nisauri maria ainainnara kai amooqimasee noori uqeeraida nasuridaqa, misa maa maqanasaaqaraa ainainara kai iri mariasa maridaqa.
PHI 3:20 Innisaimbaqa sia miqirausa maridaqa maasa moo maqannaasara foora maridaqa innaaruna maqusanaasa marunnanara maasa karaambaiqa asauku mundirana Yisuna maasa asumu marirana qimimarifaqa innaarunaindari qumuaninnanara asasammasee afeesida maridaqa.
PHI 3:21 Mifa miqoo maasa ummooqukira maqasaaqaraa qifaaqa mareeqeenoo quandaseenoo narí kaaqa areenara afaaqa fooqaanaikammiannoo. Mifa aiqama ainaina mareeqeenoo narí aramandunnai quqara afeekannai maasa maqasaa qifaaqa mara quandaqisaannoo.
PHI 4:1 Oo qini qikaqaafasaa Firipi maqannaasa firaaqoo inniara qini qimuqusifaqa inniara daundurannoo oonu mafi iridaqa inniara dididanoo. Innee firaaqoo asasirana qimi mariasa mariafaqa innee qini moodaa fidikara foora marida qini asasirana qimimariafanoo. Minara inni qimannimidaqa Yisufa innaarunaindari qumuaninnanara asasammasee afeesida mariaqeera faasai qimannimiqa inni marifa miqimandee karaambaiqaki mapukusee mariaqa.
PHI 4:2 Oo aanaaseeqara Eeuoodiasa nammarifa faqa Sindikeesa nammarifa faqa inneeqara maqee maqee rairaiqirana minniseeqa aneenna aunannaasandiriara foora maridaqara karaambaiqaki amiqi amiqimasee moodaanaki mariaqa.
PHI 4:3 Oo qini Firipi maqannaa qifaaqasaa qiqoondi moodaanaki qini qifaaqasaa ainaini marianafa ani faqa qimamidaqa anee mi anaaseeqanda andeeqasaifaqa moodaanaki mariaqeera. Miqanda ooqai Yisuna fasaasa ufa maqusa maqusa nidaqa qini dadaaqidaqa qimannimi maruqanda maridaqarammia anee miqanda andeeqannisaa. Miqanda faqa Kareemeendana faqa aiqamausa qini faqa moodaanaki ainainimariasa faqa misauqa aiqamausa nuqu Anutuna naaru mariranaki fimariana bukaki misauqa nuqu maridanoo.
PHI 4:4 Innee Karaambaiqaki marianara maqee maqee asasida kai mariaqa, kafaa qimannimidaqa, asasiaqa.
PHI 4:5 Innee aiqamausa sia ramoo ramaaiaqa ireeda kai nirana marirana aiqamausa nimiaqa. Karaambaiqa qusasaa qumuannoommi.
PHI 4:6 Inneeqa oosana oosana sarauqira ainainara sia oonumafi irifanoo nimuqusiani, innee Anutunara innaaru qidaqa miqoo kai inneeqa sarauqi maria oosana oosana ainainara innaaruqiaqa. Innaaru qidaqa Anutunara dufi dufi qirana namufaqa innaaru qiaqa.
PHI 4:7 Innee miqifanoo Anutuna aundura asooarafa firaa ainaina tia maridanoo faiqí faiqi irirafa sia mina amana maridanoo, mi asooarafa inni nimuqusa faqa irirana faqa asauku mundirana Yisunakina mariafanoo miqoo inni rakisinnimaqaannoo.
PHI 4:8 Oo qini qikaqaafasaauqa qini taikara ufa maaqimminoo maridanoo, inni iriranara qimannimidaqa, innee inneeqa kai amiqira ainainara irirafa faqa uriqarara ainaina faiqí amooqimaria ainainnara irirafa faqa minauqara kai maqee maqee naaqoo nitikuraki inni irirafa qumbiqaani. Kuqaa qimaria ufana faqa naaquqara amiqira ainaina faqa andeeqarana faqa anukara ainaina irirana faqa idaaqira ainainara irirana faqa amiqira oosana ainaina Anutufa amana iriaqaa ira ainaina faqa mi ainainausara kai nitikuraki qumbiqanoo mariani.
PHI 4:9 Innee qini Pauroosasaaqaraa amiqira oosana qafeeusa mariafanoo minauqa maqee maqee qinee iafanandee kai iaqa. Qini ufakinaana faqa qinee iafanandee inafa mi mau kai fimarifanoo Anutufa naundura asooarana nimimarifa inni faqa nuani.
PHI 4:10 Qinee Pauroosa karaambaiqaki fidaqa maqee maqee firaaqoo inniara oonumafi iridaqa asisida maridaqa. Innee Firipi maqusanaasa ooqai narana feefaurira munnimma dadaaqiqa qimiqau. Doo miqoo kisaaqasaa marikiqa doo maqee kafaa qiniara iridaqa dadaaqi mariafanoo. Innee sia qiniara kaaqa aunusee mana mana imariafaqa minara qidaqa inneeqa maqusaindari nianaindari dadaaqirana sia amana maree animariafaqa minara innee sia qini dadaaqusa mariaasa maqee kaifaa dadaaqimariafanoo.
PHI 4:11 Sia qinee qeeqa daunduraki inniara minniqiseeaafoo qimasee ikiraqaidaqa, qeeqa marunnanaki marunnanara doo marida fee qimasee qifaaqa quqaidaqa doo mi ainainnara akoofasaikammidaqa.
PHI 4:12 Qinee sarauqiranaki marunnanara doo akoofasaikammiqa maridaqa, rairaa irinaki marunnanara faqa akoofasaikammiqa maridaqa. Qinee mi oosanna iridaqa doo irimarunausa maridaqa, qinee yai yai fee yaqoo aukuanee qimuaqu qumbiqanoo fee maridanoo fee daararee maridee, rairaa iranaki fee maridee sarauqiranaki fee maridee mi aiqama ainainausaki maridaqa sia munari minari idaqa doo qifaaqa quqasee mariranara akoofasaikammiqa maridaqa.
PHI 4:13 Asauku mundirafa narí afeeka qimufaqa minannai amiqiranee mandaikiranee kaqi maraidaqa.
PHI 4:14 Innee Firipi maqannaasa qini dadaaqianara dufi dufi qidaqa.
PHI 4:15 Ooqai indaaru inni maqa maaqa Maseedoonia minnisee amiqira fasaasa ufa maqusa maqusa qimannimiqa niniufaqa innee Firipi maqannaa Yisuna ufara suqimarusa kai sia moo maqannaasa inneeqa kai dadaaqiusa mariafanoo. Inneeqa kai narana munnimma qimufaqa minannai qeeqa narana aina maraseeqa namasaida ainainiqiafana.
PHI 4:16 Qinee Teesaroonika maqusai mariafanaqa innee moomoo kari qinee mandainainaki mariafanaqa innee dadaaqidaqa narana maree maria munnimmana qimaqee mariqau.
PHI 4:17 Qinee sia narana maree maria munnimma moo faqa moo faqa maraanauree qidaqa maa ufana qimannimidaqa, qinee inni nuquara afeedira ainaina innaarunai nimaqaanifee qidaqa maaqoo munnimma qimianara qidaqa.
PHI 4:18 Eepafarooditusafa inni maqusaindari inni maqannaafa maqee qunnanara inneeqa narana maree maria munnimmana minasaa soofanoo mini qimifaqa doo aiqama maraunnanara inni qimannimidaqa doo qini qimana kai maridanoo fiqaramasee faqa maridanoo. Mi munnimmana qimaqaafa tatufira aandau Anutuna suqa ami mariafara foora amiqira afunda aikiambu imarifara foora Anutufa asasammasee maree mari ainainna maridanoo.
PHI 4:19 Sia meerai kai inni afeedamma nimaqaannoo maaqoo faqa innee sarauqi maria ainainna inni nimana kai nimiannoo, narí innaarunai mari qumiasana moomoo marina narí asauku mundirana Yisunaki marina innee sarauqi maria narana ainainna inni nimana kai nimiannoo.
PHI 4:20 Maasa Anutufa maasa qikoofa mina amooqirafa naaru naaru mariani. Kuqaa.
PHI 4:21 Anutuna faiqi namu mina ufa irimariasa asauku mundirana Yisunaindi mariasa Firipi maqannaasa inni aiqamausa nimandaidaqa. Yisuna ufa iri maria qikaqaafasaasa qini faqa mariasa inni nimandaidaqa.
PHI 4:22 Maaqoo Anutuna ufa irimariasa aiqamausa inni Firipi maqannaasa nimandaidaqa, Roomma maqannaasa uriqarara fasiqa Sisaana maaqaki ainainimariasa misakiqari akaqausa Yisuna ufa irimariasa misa faqa inni firaaqoo nimandaidaqa.
PHI 4:23 Asauku mundirana Yisuna maasa karaambaiqa afaarirafa inniki aiqamausaki mariani.
COL 1:1 Innee Kooroosee maqannaakiqari akaqausa Anutuna faiqinamu mariafanoo innee faqa maasa faqa asauku mundiranaki maridaqa mina ufa iridaqa moodaa fidikara foora maridaqa asauku mundiranasaa atooqarausa mariafanoo qinee Pauroosa qeeqa qikaqaafasaa Timootinandiri inni Kooroosee maqannaa nimandaidaqa. Anutufa qufanoo asauku mundirana Yisufa diqiqamaqaifaqa faiqí faiqi maridaqa inni nimandaidaqa. Maasa qikoofa Anutufa narí amaaku maasara afaarinau mi afaarirana faqa inni naundura asooarana faqa inni nimianifeera qimannimidaqa.
COL 1:3 Maaqanda inniara innaaru qidaqa maqee maqee maasa karaambaiqa Yisuna asauku mundirana akoona maa maqanasaaqari innaaru qunafa Anutuna afusaa inniara dufi dufi qidaqa innaaru qimannisaidaqa.
COL 1:4 Maaqanda innee Kooroosee maqanaa akaqausa Anutuna asauku mundiranasaa atooqaqa marianara iriseeqa innee Anutuna ufa irimaria fasiqa anaaseesa aiqamausara nidimarifaqa dadaaqi marianara minara faqa iriseeqa Anutuna dufi dufi qimamaqaidaqa.
COL 1:5 Anutuna anoona ufa amiqira fasaasa ufa faiqí moo fannoo indaaru inni maqusai qimannimufaqa mi ufana naaru kambiqaaninna oosanara irimariafanoo. Innee naaru mareefandinna ainaina Anutufa innaarunai quqasee afeedidanoo. Innee mina innaarunai marararee qimasee asasammasee afeesidaqa Yisuna saqarikidaqa mina aidimariafanoo.
COL 1:6 Innee indaaru Anutufa narí amaaku maasara afaarinoo arunara innee mi afaariranara iriseeqa kai mi fasaasa ufana aiqama maqa maaqai daraanidanoo naundurakinaa amiqi amiqirana faiqí aanaaseeki kambiqaidanoo.
COL 1:7 Eepafaraasafa maasa moodaa saikimarifa asauku mundirana amiqira saikimarifa qini qimanasaa inniki fimarufa maridanoo mifa kai mi fasaasa ufana inni Kooroosee maqannaasa qimannimufaqa iriqau.
COL 1:8 Mifa inniara Anutuna maraquna fannoo aiqamausara aidirana inni nimufanoo qimaqimifaqa iriqa.
COL 1:9 Maasa indaaru mi ufana iriseeqa miqooqari inniara innaaru qidaqa. Maasa inniara Anutuna iriranamau fifandinnanara inni naundurai qumbiqaanifeera innaaru qidaqa. Anutuna maraquna fannoo nimi irirana faqa iriranamau fira irirana faqa inni naundurai qumbiqaanifeera minara faqa innaaru qimannisaidaqa.
COL 1:10 Innee miqi marifaqa Karaambaiqa undee kai imarifaranoo mifa maqee maqee inni marirafa amiqira marira maridaqa amiqisaa kambiqaaqeera Anutuna irirafa faqa firaaqoo inniki kambiqaannoo.
COL 1:11 Anutuna idaaqira eeraarirafa minasaaqari aninna afeekafa aiqama inni faqa afeeka niminaqa innee oosana oosana mandainaina ummaara fannoo innisaa kambiqainaqa ubiqafi reendeenidaqa asasammasee maraaqeera.
COL 1:12 Anutufa narí areenara maqusaki innaarunai narí nimianinna ainaina afeedimarina quqaseenoo innee ooru marasee miqoo mariaqeera inni mandainaina doo afaqaseenoo innee minara faqa iriseeqa innaarunai nikoonara asasammasee dufi dufi qimamaqaaqa.
COL 1:13 Maasa manda marira asukunaki marunanoo maasa rafaaqafuqisaifaqa marunanoo Anutufa qumareeqeenoo narí faiqi uqanna ququsaki quqannisaifaqa amiqiranaki maridaqa.
COL 1:14 Mi faiqinannai uqanna maasa mandainaina numoo minniqiseenoo minakinaana mara idukuqiseenoo.
COL 1:15 Anutufa kukeeqarafa marifanoo asauku mundirafa mina amaaku mina amammana ususeenoo maridanoo narí akoona oori afiri marasee mina nirana mina marirana mina maraquna maasaki doo andeeqasee narí akoonara kooroo idanoo. Mi asauku mundirafa aiqama ainaina Anutufa auquqoona urinaaqararafa maridanoo.
COL 1:16 Mina asauku mundiranasaa Anutufa aiqama ainaina innaarunai marina faqa maqasaa marina faqa akooqoo maria ainainausa faqa kukeeqara ainainauqa faqa Anutuna amiqira qangiroouqa faqa misa namuqaa afaanauqa faqa nári rakisirausa faqa nári uriqararausa faqa nári faiqí firaasa faqa mi aiqama ainainausa asauku mundiranannai Anutufa auquseenoo mina aummooki mara quqanau. Mina amooqimasee minaindikiaqeera Anutufa minannai auqusee narí aminau.
COL 1:17 Asauku mundirafa sia maqee kaifau marida ooqai marufa maa maqanasaa ainaina sia maruqoo marufa marinau. Doo maqa faqa minasaa mari ainainausa faqa innaaruna faqa minakinaa ainainauqa faqa asauku mundiranaki kai ookaamambida maridanoo.
COL 1:18 Asauku mundirafa narí ufa irimariasasaa rakisidanoo qimannimidanoo. Mifa misara narí adakee qidanoo nariara misa nikiaqafee qidanoo rakisinnimaqaidanoo. Mifa aiqama ainaina uriqararafaikirara kuqirausa findifimari aana afisufa maridanoo narí mina ufa iri mariasara narí adakee qimarisara misa kafaa minasaaqaraana aiqama kaqi marira kasirana maraidaqa minara aiqama ainaina uriqararafa maridanoo.
COL 1:19 Anutufa narí kai narí amaakuara asasamaseenoo qini daanna ramafi urinaaqaramafi mariannee qufanoo maridanoo.
COL 1:20 Anutufa qufanoo narí amaaku fannoo aiqama ainaina maqasaa qaraana faqa innaarunaindaraana faqa maramareenoo narí akoona aaqa munu moodaaqoo quqasoofanoo aqoondikamma nimaqanau. Narí amaaku asauku mundirafa narí fidika adioonannai asooarana quqasoofaqa moodaanaki kiqa maridaqa. Miqunara asauku mundirafa aiqama ainaina uriqararafa maridanoo.
COL 1:21 Ooqai indaaru innee Anutuna namuqaakama amaqaqau. Inni oosana fannoo manda marira marufanoo inni irirafa manda irirana kai irimarunara Anutufa inni futee aquseenoo namuqaakamma nimaqanau.
COL 1:22 Innee minni marufanoo Anutufa maqee inni mareeqeenoo narí aaqa quqaseenoo moodaanaki kinau. Narí amaaku narí afaaqa uqanna kuqiranannai kai inni moodaanaki aqoondikamma nimaqanau. Anutufa sia fifaufau miqinau. Inni marirafa nirafa amiqira marira andeeqara nira nuaqeera miqinau. Yisufa inni mareeqeenoo Anutuna afusaa kooroomasainaqa inniki sia moo nifasaasa ufa marianifeera nuqu siaisa mariaqeera minara Anutufa inni aqoondikamma nimaqanau.
COL 1:23 Ooqai indaaru Yisuna amiqira fasaasa ufa iriseeqa naaquqarana taikaseeqa innaarunai firara asasida maridaqa. Miqida mi nimuqusa idaaqirana sia kaifaa rufiarana maraaqa. Inni irirafa maqee maqee Yisuna mapukusee mina faakanara maqi masee mundiqa mari iaqa. Mi amiqira fasaasa ufana aiqama maqa maaqai qimannimisoofaqa qinee Pauroosa mina rumbara faiqi maridaqa mina saika faiqi maridaqa.
COL 1:24 Qinee Yisuna aufakiana qimannimunnanara minara qinee Roomma maqannaa rumbaranaki maridaqa, innisaara faqa rumbaqa maridaqa. Qinee sia minara doori runidaqa, doori quqasee asasida maridaqa. Yisufa narí aiku oosana mariasara aunirira saqarisaa aupurarana maranau. Mina aupuraranaki qinee faqa keeqeeqa ookaamambiqa rumbaqa maridaqa aupuraidaqa Yisunaindi fee qimasee kaqi asasidaqa.
COL 1:25 Yisufa narí aiku oosana mariasara Anutuna adakara foora mariaafoo qida nuqu raidanoo. Anutufa qufaqa qinee Pauroosa mi nidaka saikirana saikimaruna fasiqausa maridaqa inni dadaaqiaqeera aiqama maqannai ooqai Anutuna ufa kukeeqara ufa amiqimmandee kooroo iaqeera mi saikanaki Anutufa qini quqaqisaifaqa maridaqa.
COL 1:26 Anutuna ufa kukeeqara ufa maaqi qinoo maridanoo. Anutuna asauku mundirafa Yisufa inni faiqí faiqi naundurai maridanoo. Mina oosana maaqimminoo maridanoo kasooqaqee innee faqa innaarunai ooruree Anutuna ainaina adiafaa ira ainaina mina uriqararana afaaqa areenarana kaaqa qarana mareefaranoo. Anutuna kukeeqara ufa doo miqinoo maridanoo. Mifa mi ufanara maaqi qinoo. Maa qini amiqira kukeeqara ufa uriqarara kukeeqara ufa aiqama maqannaasa iriaqeera qini qiku qisauku mariasa kooroomannisaanauree qinoo. Anutuna asauku mundirafa faiqí faiqi naundurai mariranara faqa innaarunai mina faqa ooru mariranara faqa mi ufaqandara ooqaindari kukeeqeeuna maqee kamuqoo doo kooroomasee narí aiku asauku qimanniminoo.
COL 1:28 Maasa maa namusa asauku mundiranara aiqamausa qimannidaqa. Maasa aiqama fasiqa anaasee aaquqimannimaqaidaqa naamuaqidaqa amiqira iriranannai asauku mundiranasaa atooqeemariasa sia faiqi aanaaqiara foora iaqeera faiqí firaasara foora mafiqa Yisunaki mapukusee mariaqeera qimannimidaqa.
COL 1:29 Maa namusakiqari qinee Pauroosa firaaqoo kadaapiridaqa qimudaanaiqidaqa fuki faaki qidaqa qimannimidaqa. Sia qeeqa afeekannaifau miqidaqau Yisuna afeekannai miqidaqa faiqí firaasara foora mariaqeera miqidaqa.
COL 2:1 Qinee Pauroosa inniara kadaapi rimarunnana iriaqeera inni qimannimidaqa sia inni Kooroosee maqannaara kaifau kadaapiridaqau Raoodiseea maqusanaasa akaqausa Yisuna ufa irimariasa faqa innee aiqama sia qini doori qiqafee mariasa inniara kadaapiridaqa.
COL 2:2 Minara inni nimuqusa sia iani paasoosammasee mariaqeera innee moodaanaki kammafi nariara nariara ridaqa innee Anutuna ufa amiqimasee iriseeqa innee nifaaqa quqasee Anutunaki mapukuaqeera inniara kadaapi ridaqa. Innee amiqimasee Anutuna afeeka kukeeqara ufa uqeerasee iriaqeera. Mi kukeeqara afeeka ufafa asauku mundirafa narí uqanna maridanoo.
COL 2:3 Asauku mundirafa Anutufinnai fimaria irira kooqiara foora maridanoo. Anutuna aiqama irirafa oosana oosana adiafaaira irirafa anoona qira irirafa firaa qumiasanara foora Yisunaki mandaaqanoo maridanoo. Sia maa maqanasaaqaraa munnimma ainaina mararara iranau qidau innaarunai fimaria irirana faqa maaqoo nariara nariara nimuqusira nidiranara minara kai qidaqa. Innee faqa mina maraaqeera kadaapiridaqa.
COL 2:4 Kuqaa anoona afeeka irirana asauku mundiranasaa maridanoo. Qinee minara irisee maa ufana inni qimannimidaqa. Innee rakisidaqa qafaaqa sia moo fannoo innaarunai fimaria aanara unna qimaseenoo inni nikaru qiandoora mifa amiqimasee naakapainaqa kuqaammifoo qimasee fifoora qimannimidaqa.
COL 2:5 Qinee kaqi maaqoo maridaqa inni mariranara asasamannimaqaidaqa. Inni marirana amiqira marira maridaqa ufa qaindusi mariasa mariafanoo asasamannimaqaidaqa inni irirafa asauku mundiranasaa amiqimasee mapukinoo marinara asasamannimaqaidaqa. Qinee Pauroosa nianai marunanoo qini maraquna fannoo inni faqa maridanoo. Qinee inni faqa maridaqara foora qinee maqee maqee inniara iridaqa rakisinnimaqaidaqa.
COL 2:6 Inni Kooroosee maqannaasa akaqausa Anutuna asauku mundirana Yisunara maasa karaambaiqee qimasee umaraafanoo doo innee maqee minasaa mundiqa maridaqa nuaqa.
COL 2:7 Innee saqari atukara foora mapukusee Yisunaki mariaqa, sia rafauraki aqufuaqa afeekaikamasee aaku aakumafi Yisuna faakanasaa mundiqa mariaqa. Maasa qimannimiafannamau kai inni irirafa Yisunaki maqee maqee afeekaikiaqa. Inni irirafa maqee maqee Anutunara dufi dufi qimarifanoo inni naundurai qumbiqafi irairaaiani. Innee miqi kai iqa Yisunasaa mundiqa maridaqa nuaqa.
COL 2:8 Innee amiqimasee eerairiaqa faiqí moo fannoo unna ufa qira iriranannai inni rarisameeqee narí aiku oosanaki quqaandoora. Miqira fasiqa mina ufa fannoo irirana faqaa fasiqara foora ufa qiannoo. Mi ufafa faiqí anaasee nikaru qira ufa oosana siai ufafa fifau maqasaa ufa afaanna manika fannoo innaaruna faqa maqa faqa rakisidaqee qimari ufana. Sia asauku mundiranasaa oosana areemari ufafa maridanoo. Miqira ufara amiqimasee eerairiaqa.
COL 2:9 Sia asauku mundirafa fifau afaannafau maridanoofau. Anutuna aiqama afeeka marira irirafa muduka tia uqanna Yisunaki maqasaa qumu marinau.
COL 2:10 Innee minasaa maridaqa sia Yisuna marirana kai maree mariafanoo Anutuna marirafa minaki marina mina faqa maree mariafanoo. Afaannauqa rakisirausa uriqararausa mariafanoo faiqí moo fannoo misara anoonee qinaqa sia misara iridaqa rufiaaqa Yisufa kai misoo maasoo uriqararafa maridanoo misa faqa maasa faqa uriqaranoo maridanoo rakisinnimaqaidanoo.
COL 2:11 Yuda maqannaasa fainanduqirana oosana aanaaqi faiqi akoonaiqi fainanduqu nimaqasee misara Isaraee maqannaasaki maridaqa Anutuna faiqinamukiaqeera qimarusa maridaqa. Qinee Pauroosa mi oosanna kikiqa usidaqa maaqi qianaura. Innee Kooroosee maqannaasa asauku mundirana ufa irisee sia faiqí moo nisaukukoo innee fainanduqusee minaindikiaqeera qidaqa. Asauku mundirafa inni faiqí faiqi marirana manda marirana nirana aiqama uqanna narí maraqusoofaqa minaindikiqa mariafanoo. Asauku mundirafa maa manda maqanasaaqaraa nifaaqa qikairi faqa uturuqu aqiara foora masoofaqa doo mina turuqiara foora yanannai asauku mundiranaindi kammambi mariafanoo. (Yuda maqannaasa oosana maaqimminoo maridanoo. Faiqí moo fannoo misa amaana maqaki keeqararee qimaseenoo anirainaqa misa mina qumaree nammariki keeqammamaqaidaqa. Keeqammamaqaidaqa maaqi qidaqa. Maa fasiqafa kuqiranara foora keeqafinoo kuqiarafoora mafinoo findifinoo. Doo miqooqari amaana maqaki maqee maqee fidaqa.)
COL 2:12 Qinee Pauroosa minara inni Kooroosee maqannaasara maaqi qidaqa Yisufa aunirira saqarisaa kuqufufaqa inneeqa nifaaqa namufaqa kuqirana ameeraameeriqa Yisufa kuqiranakiqari findifufaqa innee faqa kuqirana ameeraa meeriranaki qari findifiqa fuka marirana mara maree findifi mariafanoo. Inni irirafa Yisunasaa mundunara mi ainainna kambiqafi maridanoo.
COL 2:13 Anutufa narí ufa Isaraee maqannaasa Mooseena sandufa qimanniminau. Innee nianai maridaqa sia Anutuna ufa irimariafanoo innee faiqí faiqi mariafanoo manda iriramau fimariafanoo. Innee inneeqa irirana Yisunasaa mundusoofanoo Anutufa minara inniara narí amaakusaimbaqa kuqiqau maqi qidanoo kaifaa inniara narí amaakusaimbaqa kuqiranakiqari findi fiqa minasaa mundufiqa marifaranoo fee qimaseenoo maasa maqasaa mandainaina taikaqiseenoo sia naruanauree qinau.
COL 2:14 Anutuna aaquqira ufa papiqaki marifaqa maasa mina irisee rukiasaida kaqi fimariafananoo Anutufa maasa darira ufa sia maasasaa qinau. Asauku mundirafa aunirira saqarisaa kuqirari marufanoo Anutufa maasa darira ufa oosana oosana qimaseenoo mara mareenoo Yisuna afaaqai munuseenoo aunirira saqarisaa pirimmannai aru atukaranau. Miqunara Anutufa maasara ufa siaisee qidanoo Mooseena sandufa nimaarusirafa fannoo sia amana inni naruannoo fee qidanoo.
COL 2:15 Anutuna asauku mundirafa kuqufinoo mi kuqiranannai afaannauqa rakisirausa uriqararausa misa aiqama misa afeeka qumooqukamaseenoo aiqamausa nifusaa nisaurirana nimiseenoo ufoonaridanoo narí amooqimaseenoo maridanoo.
COL 2:16 Faiqí akaqausa inni Kooroosee maqannaasa maaqi qimasee qimannimifaqa siammiriaqa. Misa maaqi qifaqa. Innee Mooseena sandufa maree akaqa narana nammari siamma naaqa. Innee aukuana idooaranara sia irimariafanoo fuka quqoona idooaranara faqa sia irimariafanoo Yuda maqannaasa amaanasaa idooarana mina faqa sia irimariafanoo mandaikammi mariafanoo sia Yisuna aiku oosanaki andeeqasee mariafanoo. Misa mi ufanannai inni rafaaqa fifaqa siamma iriaqa.
COL 2:17 Mi ainainnausa fifau nimanirafa maridanoo sia kuqaa anoonau. Sia moo ainaina kikiqa usuaqa. Asauku mundirafa mifa kuqaa anoona uqanna maridanoo innee mina faqa moodaanaki ootupamafi mariafanoo miqoo kai mariaqa.
COL 2:18 Faiqí akaqausa qummaararara ufannai inni rafaaqa firaree qifaqa sia mi ufana iriaqa. Misa fifau inniara unna qimasee maasa daanna reeqa kaaqa nisaunaasauriqa nuaqee qiqa misa inniara unna qimaseeqa qangiroouqara nimooqiaqee qidaqa miqi qifaranoo. Misa qainamasee náriara Anutuna ufa iriseeqee qimasee inni rafaaqafifara. Miqira fasiqauqa fifau nári nifaaqa nimooqi mariasa maridaqa. Misa nári manda marirana fannoo nári uqannifiqee marifaqa miqimariafanoo.
COL 2:19 Misa asauku mundirana minniseeqa nári aatata nifiqee firaree qidaqa mi ufanannai inni rafaaqafifaranoo. Asauku mundirafa maasa qikiaqa maridanoo mina adaka maasa maridaqa. Mifa maasa rakisinara amiqimasee moodaanaki maridaqa narí dadaaqi narí dadaaqidaqa Anutuna ufasaa innooqafi afeekaikidaqa. Mi fasiqausa nári qummaarannai inni rafaaqafimariasa maasa qikiaqa Yisuna minniseeqa nári aatata fidaqa mi ufanannai inni rafaaqafidaqa.
COL 2:20 Innee Yisuna aiku oosana mariasa mifa kuqufaqa innee faqa inneeqa irirana namufaqa kuqiarafoo mafi mariafanoo. Doo innee nanaree afaannauqa karaambaiqauqa misa ufa irisee rufiaidee kuqira fasiqa fannoo sia mi ainainausara iridanoo doo taikanoo maridanoo doo innee minara iriseeqa faiqí faiqi sandufa oosana oosanannai rafaaqafifaqa sia ooqai undee iqa eedoo qimasee mi mau fuaqa.
COL 2:21 Misa maa unnufanannai inni rafaaqafidaqa. Innee akaqa narana nammari sia naaqa innaarunai fira aana ititeefoora. Innee akaqa narainaina sia uqanna nifaurusaa quqaaqee qidaqa. Akaqa ainaina sia auqaaqa mi manda ainainafa inni naakuandooree qidaqa. Innee miqira unna sandufa sia iriaqa.
COL 2:22 Fifau maqasaaqaraa fasiqa sandufa inni naakapaidaqa. Maasa mi naranna namasaananoo sia niranandaki kasooiannoo kaqi aiqaraannoo sia innaaruna aana faqa ititaannoo kaqi aiqaraannoo.
COL 2:23 Innee mi fasiqausa sandufa iriseeqa unna qimasee irirana faqaasee qifaranoo. Misa maa ufana uqeeraidaqa. Innee qangiroouqa nimooqiaqeera qidaqa innee inneeqa nifaaqa firaa aupurarana nimisee minannoo innaarunai fuaqee qidaqa unna qimariafanoo. Mi unna fasiqausa mi naamuaqira ufana sia amana maasa daundurakinaa manda nidirana rafaaqa fuannoo, Yisuna saqarikirafa kai amana mina rafaaqa fuannoo.
COL 3:1 Asauku mundirafa kuqiranakiqari findifufaqa innee mina faqa findifiqa minara iridaqa inneeqa marira irirana innaarunai asauku mundirafa marinnai ubeekaida mariaqa. Miqoo Anutufa asauku mundirana firaa afeeka amufanoo mina aaqa maridanoo.
COL 3:2 Minara inneeqa irirana mirinni mari ainainnasaa rusisee iridaqa maaqoo maqasaa manda ainainara sia iriaqa.
COL 3:3 Innee kuqirana aannareeqa sia mandainainara iriaqa kuqiara foora iqa mariaqa.
COL 3:4 Inni marirafa Yisunasaa mundinoo marifanoo minaindi fannoo Anutunasaa mundinoo maridanoo. Asauku mundirafa innee maa maqanasaa anoona marirafa faqa marianara mifa narí kooroomasainaqa innee mina namufaqa ooru raifanoo narí afeeka kaaqa qara areenarana naida nimiannoo.
COL 3:5 Inneeqa maa maqanasaaqaraa nifaaqa ainaina adiafaairana arusaifanoo sia inni kaifaa mandoosana uqannifiqaani faiqí fannoo anaasee qummuarimariana faqa anaasee fannoo faiqí qummuarimarina taikaani. Inneeqa nifaaqa sia kooroo iaqa. Innee sia inneeqa mandoosana maraidaqa maanaaqa anaaseera indee indee qiqanuaqa adiafaa qiqa nuaqa doo mi irirausa taikafuani. Oosana oosana mandainaina marararee qimariafa mifa faqa taikafuani. Innee aiqama ainainara nimukee marina mi irirafa taikaani. Anutuna minniseeqa moo Anutunara foora innaaru qidee qimariasa faqa ainainara rimariasa faqa moodaanaki unna aatata fimariafanoo.
COL 3:6 Mi ainainausa moomoo maree mariasa Anutuna ufa rukiaida miqidaqa.
COL 3:7 Innee misa faqa mi mandirirana maree marusa mariafanoo.
COL 3:8 Doo maqee afaimma quqaaqa. Maa ainainausa faqa afaimma quqaaqa. Aanooqirana faqa kaukaataqirana faqa aqoonausa nifasaasa qirana faqa aqoonausa niquramaara rirana faqa maqee maqee faiqí fannoo aanaaseera amarauqirana faqa anaasee fannoo faiqiara amarauqirana faqa unna ufa qimasaida narí afasaasa narí afasaasa qira ufa faqa mi ufausa aiqama afaimma quqaaqa.
COL 3:10 Mi manda irirausa ooqeenaa irirana marirana afaimma quqasee fuka andeeqara marirana marasee qammunnara foora afisuaqa. Mi fuka marirana Anutufa auqusee nimuna Anutufa kaifaa aiqama kari fukara foora kai mannimidanoo. Miqinanoo maasa marirafa mina amanaikinaqa maasa minara amiqimasee iriaqeera miqidanoo.
COL 3:11 Fuka mi andeeqara marirana maree mariasa náriara uriqararausee ureeqarausee qimiriranara sia minara iridaqa, Yuda maqannaafee aanaamuru fee fainanduqirausee sia fainanduqirausee irirana faqaasee fuka aamina maqannaa fee anoona akoona faqaa fee fiaiqi faiqi fee fuka andeeqara marirana maree mariasa sia mi ufausara iridaqa. Asauku mundiranara kai kuqaa anoona maridanoo fee qidaqa.
COL 3:12 Innee Asauku mundiranara karaambaiqee qimariasa. Anutufa innee rusandeesamumaseenoo narí andeeqara marira iriranaki quqanniseenoo inniara rakisidanoo amuqusidanoo. Anutufa miqimarinaqa innee maa reendeenira marira ufana kaqi maraaqa. Nariara nariara qimudaoo qiaqa. Ufa qirana faqa nirana faqa ireeda kai qimannimiaqa. Fisoo fisoo imariasa naannaraqa mariaqa. Reendeenamafi ubiqasee mariasa naannaraqa mariaqa.
COL 3:13 Faiqí anaasee inni ritifaqa kaqi irisee nimaqaaqa. Asauku mundirafa inni mandainaina doo mininnisanau. Innikiqari nariara nariara ufa qiraree qimasee asauku mundirana aanna reeqa nariara nariara ufa qirana minnisee aunusaa.
COL 3:14 Mi andeeqara aiqama ainainna nariqa kai sia amanaikifanoo nariara nariara nimuqusinafa mifa mi aiqama amiqira ainainausa uriqararafa maridanoo moodaanaki suqu quqaseenoo adiafaa irana nimidanoo.
COL 3:15 Innee asauku mundiranaki mariasa moodaara foora marianara nariara nariara farafara qirana minnisee asauku mundirana asooarafa inni naundurai rakisimarinaqa moodaanaki kiqa mariaqa. Innee miqiaqee qimaseenoo Anutufa inni rusandeesamumasee mareeqee asauku mundiranaki quqanau. Doo Anutunara faqa maqee maqee dufi dufi qiaqa.
COL 3:16 Asauku mundirafa nimu ufana innee iriseeqa maqee maqee eedoo qidaqa mi mau kai fimarifanoo inni naunduraki mi adiafaairafa qumbiqaani. Innee mi mariranasaa fidaqa iriranannai kai narí andeeqee narí andeeqee iaqa. Firaa iriranannai aiqamausa narí aaquqimamaqaina narí aaquqimamaqaina iaqa. Anutuna maraquna fannoo amaana idi nimuna mi idina maqee maqee raqa nuaqa. Idi roona auqu Dafidifa mina idi faqa ooqeenaasa amaana idi faqa mi idisa maqee maqee raqa nuaqa. Raqa nidaqa Anutunara asasidaqa dufi dufi qidaqa mi idi namusa raqa nuaqa.
COL 3:17 Innee inneeqara karaambaiqa Yisuna faiqi namu maridee qimasaidaqa mina aannandaidee qidaqa ufa qimariana ainainimariana andeeqasee mina kai afaqaaqa. Innee karaambaiqa Yisuna maa maqanasaa koorooirausa maridaqa mifa innandee innandee kai idaqa mariaqa aiqama ainaina narí qinnaqoo kai fidaqa ufa qinana auqeenana qafeeqa mina aanna raidee qiaqa. Sia noori runusee miqiaqa inneeqa nikoona Anutuna asasamamaqaidaqa susummamaqaaqa. Anutuna asauku mundirana minannai Anutufa aana ruqiqasaifaqa asasirana Anutuna amiaqa.
COL 3:18 Faiqí ninaaqmaaka innee inneeqa nifaaqmaaka ooreeaqa mariaqa. Karaambaiqa niraamummaaka mina ufa irimaria anaaseesa nári nifaammaaka ooreeaqa maridaqa andeeqasee karaambaiqa aatata fidaqa miqimariafanoo.
COL 3:19 Anaasee nifaaqmaaka innee inneeqa ninaaqmaakara ridaqa nimuqusi marinaqa sia afeeka rakisira rakisinnimaqaaqa sia sukufa qimannimaqaaqa.
COL 3:20 Faiqiuqa inniqa ninausa nikausa ufa qinnana aiqama kari sia rukiaaqa eedoo kai qiaqa. Karaambaiqa faiqi namu inneeqa ninausa nikausa ufara eedoo qidaqa andeeqasee karaambaiqa aatata fidaqa miqi mariafanoo.
COL 3:21 Innee ninausa nikausa inneeqa faiqi namu sia maqee maqee nifairida niqiaqa. Miqifaqa misa quandafi inniara firaaqoo fidiaqaaifaranoo.
COL 3:22 Innee ainainira faiqiuqa mariasa innaarunai inni rakisirafa maridanoo inni saika oosana qafaidanoo. Innee maa maqanasaaqaraa rakisirausara faqa iriaqa aiqama kari misa ufara faqa eedoo qiaqa. Sia nári niqafainnaqoo kai andeeqasee ainainiaqa, kaqiqoo kaqiqoo faqa amiqimasee ainainiqa fuaqa. Miqi kai iqa sia faiqí anaasee nifusaa, inni nimooqiranara kai irisee ainainiaqa. Innee inneeqa nimuqusa ookiqari karaambaiqara naaquqainaqa minara irisee amiqimasee ainainiqa fuaqa.
COL 3:23 Inneeqa rakisirana ainainirana inneeqa nidiranannai kai auqaida mariaqa mi ainainna idaqa sia maqasaa fasiqa ainainiranee qiaqa.
COL 3:24 Kasooaaqee maasa innaarunai ooruraananoo minni maasa qeeqa kadaapiriri unnana akiaqara Karaambaiqa fannoo narí ooqai qimaqoo ufanasaa kai feefauru nimiannoo. Kaifaa innisaimbaqa aiqama rakisirausa ainainidaqa asasammasee auqaaqa. Asauku mundirafa mifa anoona rakisirafa maridanoo mina saikakaimmifoo qimasee sanaasamasee amiqimasee auqaaqa.
COL 3:25 Innee oosana oosana ainainidaqa mandainainira ainainifanoo Anutufa inni ufa nimiannoo. Sia inniara kaqi fifau saika faiqi fee qimasee minninnisaannoo. Inni mandainainirana niqafamaseenoo mina amana kai ufa nimiannoo.
COL 4:1 Innee faiqisaa rakisirausa inni ainainira fasiqauqa innee andeeqasee amana amana kai misasaa rakisinnisaaqa. Innee faiqisaa rakisirausa maa ufana iriaqa, inni rakisirafa innaarunai marifa inneeqa ainainira faiqi mandaikamma nimaqaifanoo inni faqa ufa nimiannoo.
COL 4:2 Innee Kooroosee maqannaa asauku mundirana Yisuna aiku oosanaki mariasa innee inneeqa ainainidaqa Anutuna ufamau fimarianara minara Anutuna maqee maqee innaaru qimamaqaaqa. Sia nifaurunnai kai unna innaaru qiaqa amiqimasee naundurannai innaaru qiaqa. Innaaru qidaqa maqee maqee Anutunara dufi dufi qimamaqaaqa.
COL 4:3 Innee innaaru qidaqa mai qini Pauroosa saimbaqa maaqoo rumbaqa qini faqa mariasara faqa innaaru qimannisaaqa. Ooqai asauku mundirafa kukeeqanoo marufanoo maqee kari akooroo inoo marifanoo Anutufa maasa dadaaqinaqa mina ufa aiqamai kooroomannimaqaannee qimaseeqa minara faqa innaaruqiaqa. Doo qinee maqee Roomma maqannaa rumbaranaki fifau maridaqa. Asauku mundiranara maqusa maqusa qimannimiafannanara Roomma maqannaasa sia maasa amaana ufafau qifoo qimaseeqa qini rumbaranaki quqaqaafaqa maridaqa. Innee minara iriseeqa qiniara faqa innaaruqimaqisaaqa.
COL 4:4 Ooqai tamummaqara fasiqauqa Anutuna asauku mundiranara sia amiqimasee irimariqau ati kai irimarufanoo maqee kamuqoo doo kambiqeenoo kooroo inoo maridanoo. Anutufa qiniara aiqama maqusa maqusa qimannimiannee qifaqa minara innee qiniara innaaru qimaqisee mariafaqa qinee miqimannisa.
COL 4:5 Innee Kooroosee maqannaa Yisuna aiku oosana mariasa innee Yisuna ufara nikoo nikaa imariasa faqa moodaa maqusaki mariafanoo. Innee misa nifusaa reendeenamasee irirana faqaasa naanna ramasee nuaqa. Innee misa faqa maridaqa innee sia fifau nifaurunnai kai ufa qiaqa, Yisunara qimannimiraree qidaqa deedaqammaqaifanoo mariani, iraifaqa dauni qimannimiaqa.
COL 4:6 Innee Yisuna ufa irimariasa sia misa rauqisee qimannimiaqa, kasooqaqee fifimmasee adiafaaira ufa qimanniminaqa irifaranoo. Innee miqimarifaqa faiqí anaasee inni iraifaqa andeeqasee anoona ufa kai qimannimiaqa.
COL 4:7 Qini Pauroosa Tikikusafa qini daufakiana inni qimannimiannoo Tikikusanara qini dididanoo mifa karaambaiqaindi maridanoo mina ainainira faiqi maridanoo amiqimaseenoo maasa dadaaqidanoo.
COL 4:8 Qinee Tikikusana maindari aqiqaananoo maasa daufakiana qimanniminanoo inni nifeeqaranoo mariannoo.
COL 4:9 Qinee Ooneesimusana faqa Tikikusana faqa miqanda innee mariannai niqiqaanaura. Ooneesimusafa mifa Kooroosee maqannaa maridanoo mifa faqa maasa qikaqaafasaa amiqirafa marifanoo maasa minara faqa nididanoo. Miqanda maaqoo oosana oosana ainaina koorooiranara inni qimannimifaranoo.
COL 4:10 Aristarakusafa mifa faqa mai qini faqa Roomma maqanaa rumbaranaki maridanoo nimandaidanoo. Baranabasina akaqaafasaa uqanna Marikoofa mai marifa mifa faqa inni nimandaidanoo. Qinee moo akaraki Marikoonara qimannimiafannana mifa oonurainaqa innee mina amiqimasee rakisi aisaaqa.
COL 4:11 Yusatusafa mifa faqa mai maridanoo mina auqu moo Yisuna auqu amaranaikirafa mifa faqa inni nimandaidanoo. Yuda maqannaa amaana ufa irimarusa misakiqari Yusatusafa faqa Marikoofa faqa Aristarakusafa faqa mi namusa kai qini faqa moodaa karida ainainimariasa maridaqa maa maqanasaa Anutuna ququsa firaafaikianifeera mi namusa kai maasa dadaaqidaqa. Misa miqi mariafaqa qinee rumbaranaki marunanoo qimuqusa isooaidanoo.
COL 4:12 Eepafaraasafa inni Kooroosee maqannaafa mai maridanoo inni nimandaidanoo. Mifa faqa asauku mundirana Yisuna ainainira faiqi maridanoo, mifa inni Kooroosee maqannaasara andeeqasee Anutuna ufa nimandakusee irisee mi mau andeeqasee fuaqeera afeekaikamasee innaaru qidanoo. Innee kooroosee maqannaasa faiqí firaasara maqi mafi amiqimasee Yisuna aiku oosanaki ooqumarifi afeekaikiqa mariaqeera innaaru qidanoo. Innee miqiaqeera Eepafaraasafa inniara maqee maqee afeekaikamasee innaaru qidanoo.
COL 4:13 Qinee Pauroosa mi fasiqana Eepafaraasana kadaapirirana qafaidaqa qimannimidaqa. Sia inni Kooroosee maqannaara kaifau qidanoofau, Raoodiseea maqannaa faqa Qieerapoorisa maqannaa faqara innaaru qimannisaidanoo.
COL 4:14 Rukaafa tutaqa saikimarifa maasa nidimarifa maridanoo mifa faqa inni nimandaidanoo. Deemasafa mifa faqa inni nimandaidanoo.
COL 4:15 Innee maa akarana iriseeqa quandafi Yisuna ufa irimariasa Raoodiseea maqanaa faqa nimandaaqa. Yisuna ufa irimariasa faiqí moo auqu Nimafana maaqaki suqimariasa mi nimandarufana mareeqeeqa misa faqa nimifaqa iriaqa.
COL 4:16 Maa akara ufana innee Kooroosee maqannaa nimaqeeqa. Innee mina asaana rumaseeqa iriseeqa faiqí moo fannoo mina mara mareenoo munu Raoodiseea maqannaa Yisuna ufa irimariasa qambaana asaana rinaqa iriaqa irisee mee nári Raoodiseea maqannaa nimu akarufana kaifaa mi fasiqafa misaindi mareenoo anireenoo inniqa maqannaaki asaana rinaqa misa nimaqaunna ufana faqa iriaqa.
COL 4:17 Arakipusafa karaambaiqa ufa irimarifa maridanoo. Innee afeekaikamasee qimamia. Anee sia qumooqukidana aunduaria. Afeekaikamasee auqa. Innee miqi qimaseeqa Arakipusana qimamiaqa.
COL 4:18 Faiqí moo fannoo ufa qunnana akararumasaifaqa qeeqa Pauroosa kaqi qeeqa duqu kai akara ridaqa maa akarana rafaaqafidaqa. Qinee inni nimandaidaqa. Qinee Roomma maqanna karabusaki kaqi marunnanara innee maqee maqee innaaru qimaqisaaqa. Anutufa narí marirana inni niminaqa innee amiqi amiqiaqeera nimiannoo mina maraaqa.
1TH 1:1 Innee Teesaroonika maqannaasa Anutunaki mariasa karaambaiqa Yisuna asauku mundiranaki faqa mariasa, innee Teesaroonika maqannaasa Yisuna ufara suqimariasa qinee Pauroosa faqa Sirasifa faqa Timootifa faqa inni nimandaidaqa, akara rumannimaqaidaqa. Anutuna kaqi nimira afaarirana faqa asooarana narí aundura faqa inni faqa mariani.
1TH 1:2 Maasa maaqoo marunna namusa inniara iriseeqa maqee maqee Anutufinnai dufi dufi qidaqa, maqee maqee inniara innaaru qimannimaqaidaqa.
1TH 1:3 Maasa inniara maqee maqee maasa qikoona Anutuna aaqoo auqaidaqa. Innee Yisuna saqarikidaqa miqianara Anutuna ufirira ainainirana maqee maqee imariafanoo. Innee Anutunara faqa faiqí aanaaseera faqa nimuqusa imarinara Anutufinnai kadaapiri mariafanoo. Innee Yisunara asasammasee afeesira irirafa karaambaiqa asauku mundirana Yisunaki atukaramasee marianara minauqara faqa maasa irisee Anutuna aaqoo auqaida inniara innaaru qimannimaqaidaqa.
1TH 1:4 Teesaroonika maqusanaasa qini qikaqaafasaa Anutufa inniara amuqusimarifa inni rusandeesamumasee maroonara maasa iridaqa.
1TH 1:5 Maasa Yisuna aufakiana sia noonnai kaifau inni qimannimidau, Anutuna afeekannai faqa mina naaquqara andeeqara maraqunannai faqa qeeqa faqa mi iriranamau fidaqa minannai faqa inni qimannimiafannana minara Anutufa inni rusandeesamunara iridaqa kuqaa fee qidaqa. Maasa inni faqa Teesaroonika maqusai mariafana qiqafoosa maridaqa inni dadaaqirara andeeqaseeqa mariafanausa maridaqa innee minara irimariafanoo.
1TH 1:6 Innee maasa andeeqarana qafamasee karaambaiqa faqa maasa faqa andeeqarana ameeraameerirana faqa maasa faqa andeeqarana ameeraameeri mariafanoo, inni maqannaasa Yisuna ufa irunara mina akiaqara inni aupurarana firaaqoo nimufaqa innee sia minara iriqau naaquqara maraquna nimimaru asasirana asasammasee karaambaiqa ufa kai maroosa.
1TH 1:7 Innee Teesaroonika maqannaasa miqiqa aiqama aanaamuru Yisuna ufa irimarusa inneeqa andeeqara oosana uqannifiqoonara innee Maseedoonia maqa maaqakina marusa faqa Kirisa maqa maaqakina marusa faqa uqannifiqoosa mariafanoo.
1TH 1:8 Sia mi maqa maaqa qanda kaifau karaambaiqa ufa iriqau, aiqama maqa maaqai innee Teesaroonika maqannaasa Anutuna ufa irufa, mi ufafa aiqamai daraaninoo fifaininau. Maasa fifau inniara mi maqannaasa fiqu fiqu idaqa qimannimiqa nimariafanaqa misa ooqai iriseeqa qimaqimiqa.
1TH 1:9 Ooqai maasa inni Teesaroonika maqusai oonuraafanaqa innee maasa asasamandee oonu qifiqasee amiqimasee maasa ufa irunara faasai mi anaamurusa irimariqau. Innee inneeqa dapi saqari Anutunara foora innaaru qimaruna minnisee quandaki kuqaa anoona kasi mari Anutufinnai ubeekaranara faqa faasai mi anaamurusa iriseeqa minara aiqamausa qimannimimariqau.
1TH 1:10 Innee mifunnai ubeekamafi mina amaaku innaarunaindari qumiranara afeesu afeesirafa kaqi afeesida marunara faasai aanaamuru minara faqa irimariqau. Anutuna amaaku Yisufa kuqiranakinaana mara findifufa, maasa Anutufa kasooqaqee naruaninnanakinaana Yisufa maasa asumu qumaree marifa innee mifa qumuaninnanara afeesida marunara aiqama aanaamuru faasaimma irisee qimaqimiafanoo.
1TH 2:1 Oo Teesaroonika maqannaasa qini qikaqaafasaauqa. Maasa namu inni maqusai fuafannakari sia kadiqamannisaqiafana, innee minara irimariafanoo.
1TH 2:2 Maasa namu Teesaroonika maqusai fuaneera Firipi maqusai oonuraafanaqa mandaikamma nimaqeeqa manda ufa qimunara irimariafanoo. Maasa inni maqusai oonuraafanaqa moomoosa aanooqima nimaqoofaqa oonumafi iriafananoo Anutufa paasoosirana nimufaqa mina ufa inni Teesaroonika maqannaasa qimannimiqiafana.
1TH 2:3 Maasa qimannimirafa faqa sia aaqaranasaa mundinoo maridanoo sia maasa mandainaina maraannanasaa mundinoo maridanoo, sia maasa ufa akaruqiranasaa mundinoo maridanoo.
1TH 2:4 Anutufa maasa nimanamasee inni qimannimiranara eedoo qimasee narí amiqira fasaasa ufa maasasaa quqasainaqa maasa maqee maqee Anutuna aidiramau kai inni qimannimidaqa. Anutufa maasa firana amanamasee qafeemarifa marifaqa minara irisee andeeqasee qimannimidaqa. Sia faiqí maasa ufa irisee eedoo qiaqeerau qimannimidau. Anutufa irisee eedoo qianinnamau kai inni qimannimidaqa.
1TH 2:5 Maasa Anutuna afusaa maridaqa sia nimooqira ufannaifau inni qimannimiqiafana. Maasa Yisuna ufa qimannimidaqa sia maqandanai oosana oosana ainaina ummuariraree qimasee Yisuna ufa firaaqoo qimannimiafanausa, andeeqeemariafanausa innee minara faqa irimariafanoo.
1TH 2:6 Maasa inni faqa maridaqa inni fee akaqausee sia misa nimooqira ufara randaqiafana.
1TH 2:7 Kuqaa maasa asauku mundirafa niqiqoo fasiqausa maqasaa fasiqauqa maridaqa, maasa minara irisee sia inniara qimooqiranee, ainainee qimiaqee qimariqiafana. Ninausa faiqi aanaaqi ireeda rakisi mariandee maasa miqikai mandee ireeda kai inni faqa maridaqa qimannimiafanausa sia inni moo ainaina maraqiafana.
1TH 2:8 Maasa inni Teesaroonika maqannaasara firaaqoo nimuqusimarunara sia Anutunaindaraa amiqira fasaasa ufa kai naida nimiqa, maasa qeeqa dariranara sia rufiqarai irirana faqa qimuqusa faqa kaqi marirana faqa nimiaqaaida mariqiafana.
1TH 2:9 Oo qini qikaqaafasaa maasa inni maqusai inni faqa mariafanaqa innee maasa oosana qafamasee irimariafanoo. Maasa narana maree maria saikana kadaapiriqa tooqaamu maraafana qafaqau. Maasa Anutufinnaindaraa amiqira fasaasa ufa qimannimiqa fifi inaqa innisaa oonu munduanaqa innee maasa naranara mamaraida miqidammiafoo qifoora faasaana faqa eendaki faqa qeeqa kai narana maree maria ainainirana kadaapiri mariafanaqa qafaqau.
1TH 2:10 Maasa innee Teesaroonika maqannaa faqa mariafanna kamuqoo sia Anutufa kai maasa marirana qafanau, innee faqa qiqafoofanoo. Maasa inni Yisunara rimarusa faqa maridaqa maasa anukarana faqa andeeqarana faqa pisoopisooirana faqa sia aaqarana faqa mariafanaqa qiqafee marusa maridaqa.
1TH 2:11 Faiqi nikausa amiqimmandee faiqi rakisidaqa maasa miqi kai iqa inni rakisimariqiafana.
1TH 2:12 Maasa innee mandainaina maroofaqa reendeenamma nimaqeeaafanausa maridaqa. Anutufa inni naaraidanoo kasooqaqee innaarunai ooruree narí areenarana faqa narí ququsara faqa mina faqa marasee narí faqa mariaqee qidanoo. Maasa inniara minara iriseeqa innee maqee mariaqooqari Anutuna aidiramau kai fuaqa, minara fuki faaki qimariqiafana.
1TH 2:13 Anutuna aufakiana maasasaa quqasoona inni qimannimiafaqa innee irisee umaraqau. Innee minara sia faiqí ufafee qimariqau. Anutuna ufafee qimasee umaraqau. Miquna qafamasee maasa Anutunara dufi dufi qidaqa. Kuqaa Anutuna ufa maridanoo innee mina ufa irimariasakina saikidanoo.
1TH 2:14 Ooqai Yuda maqannaasa nári niqoonausa asauku mundirana Yisuna ufa irimarusa irisoona akiaqara kadaapirirana nidafirana nimiqau. Innee Teesaroonika maqannaasa faqa asauku mundirana Yisuna ufa irisoofaqa inniqa niqoonausa nikooqoofaqa miqi undee kai iqa nidafirana aupurarana inni nimiqau.
1TH 2:15 Yuda maqannaasa ooqai Anutuna tamummaqara fasiqauqa kuqa nariqau, kafaa maa kamuqoo karaambaiqa Yisuna kuqamma arusaqau. Doo kafaa maqee maasa mandaikamma qimaqaidaqa. Misa Anutuna afusaa firaaqoo mandaikidaqa misa kaaqa faiqí narimariasa maridaqa.
1TH 2:16 Maasa Anutuna ufa faiqí asumu marararufa aanaamuru qimannimimarunaqa misa nikooqaifaqa maasa rafaaqafirara amanidaqa. Miqidaqa Yuda maqannaasa aaqarafa doo firaafa uriqaranoo maridanoo, doo maqee mandainaina akiaqara Anutuna aranaqarafa doo misasaa aqufinoo maridanoo.
1TH 2:17 Anutufa misara miqi qimarifaqa qinee Pauroosa maasa qeeqara maaqi qidaqa. Yuda maqannaa nifaqasaifaqa qusasaa maasa nianai rakeeiqa maridaqa, qifaaqa kai nianai rakeeiqa maridanoo. Maasa irirafa inniki marifaqa fuaneera firaaqoo amanunanoo sia amanaikifaqa kaqi maridaqa.
1TH 2:18 Qinee Pauroosa faqa qini faqa mariasa Teesaroonika maqusai innee iannai fuaneera amanunanoo sia ifaqa qinee qeeqa kai moomoo kari amanunanoo Sadannafa qini faqa ititaifaqa minniseeqa kaqi Ateensa maqusai maridaqa.
1TH 2:19 Yisufa quminna aukuana innee Teesaroonika maqannaasa faqa aanaamuru qimanniminausa faqa innee inni andeeqaranannai marifaqa qinee inniara Yisuna afusaa qeeqa faiqiara foora inniara asasianauranoo.
1TH 2:20 Maasa qeeqa qifaaqa amooqirana faqa asasirana faqa inniki marinara innee maqee marianara firaaqoo iridaqa kumaaraa Timootina aqiqeeqa.
1TH 3:1 Maasa inni Teesaroonika maqannaasara kisaaqasaa munari minari firariafanaisia doo maqee minnisee rakeemasee Ateensa maqusai maasa namu kaqi maridaqa maasa qikaqa Timootifa maasa faqa Anutuna saikaki marifa amiqira fasaasa ufa asauku mundiranara qimannimi noonifa maasa mina aqiqeeqa innee iannai inni pooduaanifeera innee Yisuna saqarikirana dadaaqianifeera, akaqausa inni nidafirana nimifaqa sia quandaki fuaqeera Timootina innee iannai aqiqeeqa. Aqiqamasee maasa kaqi Ateensa maqusai maridaqa. Maasa Yisuna ufasaara narirafa marianinnanara Anutufa ooqai maasara minaki fuaqee qimaqoo ufafa maridanoo. Innee minara faqa irimariafanoo.
1TH 3:4 Maasa Teesaroonika maqusaki maridaqa inni qimannimiqa Yisuna ufa saara narirafa kambiqaannoo fee qiafannana doo mifa kambiqaidanoo innee minara faqa irimariafanoo.
1TH 3:5 Qinee Pauroosa minara iriseeqa innee iannai Timootina aqiqeeqa. Qinee inni naufakiana sia uqanna iriqa kisaaqasaa mariranara qikooqaifaqa munari minariqa Timootina aqiqeeqa. Mifa oonureenoo Yisunasaa mundiranara irianifeera aqiqeeqa, Sadannafa inni nikarimaqasee qafaifanoo qini saika kadiqaannoo fee sia fee kadiqaannoo.
1TH 3:6 Doo maqee Timootifa oonurandee anireenoo inni adiafaaira naufakiana qifaqa iriqa. Mifa innee Yisuna saqarikirana faqa nariara nariara nimuqusirana faqa qimaqiminoo. Mifa innee maasara maqee maqee irimariana faqa maasa inni niqafaaqaairana amana amana kai innee maasa qiqafaaqaa imarianara Timootifa qimaqimifaqa iriqa. Ooqai maasa qifaaqa rumbanoo marifaqa mariunausa.
1TH 3:7 Innee Yisuna saqarikirafa kaqi marinara maqee iriseeqa qifaaqa asasifanoo kadaapirirana faqa aupurarana faqa doo aufadeenoo.
1TH 3:8 Inneeqa marirana mapukuseeqa karaambaiqa afusaa findififaqa maasa qifaaqa amiqiannoo.
1TH 3:9 Doo maqee maasa innee mapukusee marianara Anutuna afusaa dufi dufi qianaura. Maasa inniara Anutuna afusaa asasidaqa minara faqa dufi dufi qimamaqaida.
1TH 3:10 Maasa faasaana eendaki inniara Anutufinnai innaaru qidaqa, Anutufa dadaaqinaqa inni noori nindafamasee inneeqa Anutuna ufamau firana andeeqa nimifaranoo.
1TH 3:11 Maasa Anutufa maasa qikoofa narí uqanna, maasa karaambaiqa Yisufa faqa maasa aana afisusainaqa innee iannai fuanaura.
1TH 3:12 Karaambaiqa fannoo innee nariara nariara rirana firaanaikamma nimaqaani, inni aiqamausara nidirafa faqa maqee maqee firaanaikiani. Maasa inniara didirafa maqee maqee firaafaikidanoo. Innindi faqa miqi kai inoo maqee maqee firaafaikiani.
1TH 3:13 Miqifanoo Anutufa inni nimuqusa mapukusee afeekaikamma nimiannoo. Innisaimbaqa karaambaiqa Yisufa narí aiku asauku faqa kafaa qumureenoo inni mareeqeenoo andeeqarausa naaquqarausaikama nisainaqa maasa qikoona Anutuna afusaa kikiqifaranoo.
1TH 4:1 Oo Teesaroonika maqannaasa qini qikaqaafasaauqa qeeqa ufa maa ufana ati qimannimianaura. Maasa inni faqa mariafanna kamuqoo Anutuna aidiramau firanara qimannimiafanaqa mi mau fifiusa doo maqee kaqi mi mau fimariafaqa qinee iridaqa. Karaambaiqa Yisufa qimaqimiqoonara doo maqee inni fuki faaki qidaqa sia ooqai undee kai kaqikaaqoo Anutuna iriranamau fuaqa, moo faqa moo faqa afeekaikamasee mi mau fuaqa.
1TH 4:2 Inni faqa marianna kamuqoo Karaambaiqa Yisuna ufamau fuaqeera naamuaqira ufa oosana oosana naakapaafannana innee irimariafanoo.
1TH 4:3 Anutuna irirafa inniara maaqimminoo maridanoo inni andeeqara naaquqarafa marinaqa faiqí anaasee narí ummuari narí ummuarirafa sia inni rumbanoo mariani mandainainakiqari idukirausa naanna ramasee mariaqee qiaqa.
1TH 4:4 Anutufa inniara maaqiaqee qidanoo. Innee aiqamausa inneeqa nifaaqara naaquqara uriqarara ainainee qimasee rakisidaqa andeeqara oosana marararee qidaqa narí ummuari narí ummuarirana taika uqanna fuani.
1TH 4:5 Innee sia aamina maqannaasa sia Anutunara irimariasa naanna raaqa misa mandainaina fanandiranaki maridaqa innee sia misa naanna raaqa.
1TH 4:6 Sia inniki moo fannoo miqinoo narí aqoonausee moo maqannaasee mandaikamma nimaqaani. Ooqai maasa inni qimannimiafannana maqee kafaa aaquqimannimaqaidaqa Karaambaiqa fannoo mi umuarira oosannara narirafa maridanoo.
1TH 4:7 Anutufa sia maasara narí ummuari narí ummuariranaki mariaqeera maasa daarama narí ququsaki quqeenoofau. Maasa kaaqa andeeqaranaki mariaqeera maasa daarama quqanau.
1TH 4:8 Faiqí fee anaasee fee moo fannoo maa qinee qunnufana minnisainafa sia faiqí ufafau minniseefara Anutufa narí naaquqara andeeqara maraquna niminna ufana rukieefaranoo. Innee Teesaroonika maqannaasa Yisuna ufa irimariasa nariara nariara nidiranara innee irimariafaqa fifau qimannimidaqa. Anutufa narí kai narí aidi narí aidiranara qimannimifaqa irimariafanoo.
1TH 4:10 Innee Teesaroonika maqusanaasa Yisuna ufa irimariasa Maseedoonia maqa maaqaki maria nikaqaafasaasa mi amiqira oosanna nimiqoosa mariafanoo. Sia maqee iandee kai kaqikaaqoo nariara nariara nidiani moo faqa moo faqa firaaqoo nariara nariara nidiani.
1TH 4:11 Maasa ooqai inni faqa maridaqa qimannimiaafanandee kai qidaqa kafaa qimannimidaqa. Maa ainainausasaa nimana mundusaafanoo miqoo kai fuaqa. Aiqamausa inneeqa ainainiranasaa inneeqa rakisiaqa, aiqamausa inneeqa narana inneeqa ainaina inneeqa kai maraaqa.
1TH 4:12 Innee Yisuna ufa irimariasa miqi faqa mina ufara nikooqee mariasa inni nimooqiqa andeeqeeaafoo qifaranoo. Innee faqa miqidaqa sia moo ainainara sarauqinana moonasaa oonu mundua.
1TH 4:13 Qini qikaqaafasaauqa anoona ufa siaisa kuqufiqa sia findifidammiafoo qimasee ikifaafau qimariana. Innee faqa misa naanna reefoo qimasee kuqirausara anoona ufa iriaqee qimasee inni qimannimidaqa.
1TH 4:14 Maasa maaqi qidaqa inni qimannimidaqa. Yisufa kuqufinoo kafaa minakiqari findifinau. Miqunara maasa maaqi qidaqa Yisuna saqariki mariasa kuqufifanoo Anutufa Yisuna mara findifundee kai inoo misa faqa marafindifumma nimaqaannoo. Yisufa qumuaninna aukuana Yisuna faqa moodaanaki mariaqeera Anutufa marafindifumma nimaqaannoo.
1TH 4:15 Karaambaiqa naamuaqimaqoo ufafa maaqimminoo marifaqa qimannimidaqa. Karaambaiqa qumuaninna faasaanasaa maasa kaqi marianausa sia kuqirausa noorisaa ooru fuanauranoo.
1TH 4:16 Mi faasaannasaa innaarunaindari Anutuna daambeenda firaaqoo ruannoo, qangirooqua uriqararafa ufa qiannoo, Anutuna ukeena fuaqaannoo doo miqoo innaarunaindari karaambaiqa narí uqanna qumuannoo. Qumurainaqa kuqirausa kaqi maru kamuqoo asauku mundirana saqarikida mariusa misa naaree kuqiranakiqari findififaqa doo miqoo maasa mikari kaqi mariasa faqa kuqirausa faqa Anutufa moodaanaki afapita qumareenoo uqeerannisainaqa asurukina keeqakinaqa aanai ooru karaambaiqa paqurimasee mikari mina faqa naaru naaru marianaura.
1TH 4:18 Miqiannanara innee faiqí anaasee faiqi kuqufuafaqa nifaaqa rumbee marifaqa ikiraqee mariana mi ufana qimannimifanoo nifaaqa aufadaani.
1TH 5:1 Mi ainainna kambiqaaninna aukuanara maasa fifau akara rumasee qimannimianaura, ooqai doo innee irimariafanoo maaqimminoo mariannoo, karaambaiqa qumuaninna kari ummuara fasiqara foora kukeeqakinoo qumuannoo.
1TH 5:3 Faiqí anaasee maa aukuannara amiqiranaki asooaranaki maridee qimasee kaqi mana manida marifanoo doo miqoo kai rakeemasee firaa narirafa tautumannimaqaannoo. Sia moo ameekamasaannoo, anaasee innaamunai fimariandee iannoo sia aupurarafa sia mariannoo, mariannoo.
1TH 5:4 Innee Teesaroonika maqannaasa qini qikaqaafasaauqa, innee sia asukunakiara foora nimariasa mariafanoo. Yisufa qumira faasaana ummuarira fasiqara foora kambiqafi naqa innee sia tautumasee nisaurifaranoo.
1TH 5:5 Innee aiqamausa kaaqa qaranaki nimariasa faasaanara foora nimariasa mariafanoo sia maasa innisaimbaqa eendakiara foora nimarunausa sia asukunakiara foora nimariasara foora maridaqa.
1TH 5:6 Miqunara maasa innisaimbaqa sia faiqeemariasa naanna raaqa nifu maqasee mariaqa. Maasa innee faqa sia nammari neemariasa naanna ree furufariaqa kaqi amiqimasee marianaura.
1TH 5:7 Eendaki faiqí anaasee faiqaidaqa eendaki nammari namasee furufaridaqa.
1TH 5:8 Maasa sia miqimarunausa maridaqa kaaqa qaranaindi maridaqa maasa sia nammari namasee furufariqa nuaqaana kaqi mariaqaana. Maasa qeeqa Yisuna saqarikirana faqa qeeqa nariara nariara rirana faqa mi ainainaqandannai saqari kammandee ukee iriqa. Maasa asumu marianafa kasooqaqee kambiqaaninnanara asasidaqa rakisida maridaqa. Mi asasira afeesiranara pateeuqara foora qikiaqaki afisusee rakiranakiara foora maria. (Ooqai nikiaqa itairirausa suani qikiaqaki daruandoo qimasee pateeuqa nariqa nikiaqa itairiranasaa afisimariqau. Ooqai Yisuna aukuana Roomma maqanna rakira fasiqauqa ainna qafee afisusee rakiranaki nimariqau. Aiqama ainaina samu sia qikiaqa daruani fee qimasee afisiqau.)
1TH 5:9 Anutufa sia maasa rusandeesamumasee narí aranaqaranaki quqarareefau qinau. Asauku mundirana karaambaiqa Yisunannai asumu marirana maraaqee qimaseenoo maasa rusandeesamumasee maranau.
1TH 5:10 Mi asauku mundirafa minasaimbaqa maasara moodaanaki mariaqeera maasa darirana qimaaqa maqasee kuqufa findifinoo maridanoo narí kaifaa qumurainaqa kuqiqee kaqi maridee narí faqa mariaqeera maasa qimaaqa maqasee kuqinau.
1TH 5:11 Innee mi irirana iriseeqa soofaari mariasa mi iriranannai narí dadaaqi narí dadaaqidaqa narí amana narí amana mapukuaqa.
1TH 5:12 Oo maasa qikaqaafasaa maasa qeeqa qimuqusa ookiqari inni qimannimidaqa. Inniki Anutuna ufa saiki maria fasiqausa Anutufa mareeqeenoo mi saikanaki uqannisoosara qidaqa, misa inni naamuaqira ufa qimannimiafaqa amiqira fasiqafee qimasee naaquqamasee iriaqa.
1TH 5:13 Misa nári amiqira saikara irisee firaaqoo noosaa qiranara rufiaida misara nidiaqa. Innee nariara nariara nidimarinaqa asooaranaki mariaqa.
1TH 5:14 Qinee inni naamuaqi maruna fasiqausa qimannimidaqa, inni kudi fasiqauqara afeekaikamasee naakapaifaqa misa ainainiaqa, rufiee maria fasiqa anaaseesa nimana mapukunimaqaaqa, irirana oore̱eqarausa innee dadaaqiaqa, innee aiqamausa qambaanai reendeenidaqa asooamasee qimannimiqa fuaqa.
1TH 5:15 Innee maa ainainnara faqa rakisiaqa, moo fannoo ani mandaikammamaqainana akiaqara sia narí mandaikammamaqaa sia mi oosanafa mariani. Innee aiqama kari narinni narinni amiqira oosana kai narí ami narí amiaqa sia inneeqaki kai miqiaqa. Innee aiqama maqannaasaki maridaqa miqimannimaqaaqa. Inneeqa irirana nimana mi amiqira oosannasaa kai quqaaqa.
1TH 5:16 Innee aiqama kari Yisuna ufa irimariasa asasida kai mariaqa, aiqama eendaki faasaana innaaru qiqa fuaqa. Aiqama ainaina tiaki Anutunara dufi dufi kai qiaqa. Innee mi ufamau fidaqa asauku mundirana Yisunaki fidaqa Anutufa inniara fuaqee qimaqoomau fifaranoo.
1TH 5:19 Naaquqara andeeqara maraquna fannoo inni afeeka niminaqa sia mina rafaaqafuaqa.
1TH 5:20 Anutuna maraquna fannoo faiqí dadaaqinaqa sia nikoo nikaa iaqa, amiqimasee iriaqa.
1TH 5:21 Innee aiqama amaana ufa sia kaqi iriaqa aiqama ufa aiquqummasee iriseeqa anoona ufa kai iriaqa.
1TH 5:22 Oosana oosana mandainainara eerairiaqa.
1TH 5:23 Anutufa maasa naundurai asooarana nimimarifa inni mariranaki naaquqara andeeqara oosana firaaqoo nimiani. Mifa kai inni aiqama marirana nipatasaa faqa nimana faqa maraquna faqa aaqarafa sia mariani anukarafa kai mari mari inanoo asauku mundirafa karaambaiqa Yisufa miqiqa marinnanaki qumuani.
1TH 5:24 Innee inneeqa mandainainakiqari aniaqeera naaree marifa Yisufa sia akoo akaa imarifa maqee maqee dadaaqimarifa maridannoora anukara oosana nimiannoo.
1TH 5:25 Oo Teesaroonika maqannaasa maasa qikaqaafasaa, innee maasara maqee maqee innaaru qiaqa.
1TH 5:26 Innee aiqama inneeqa nikaqaafasaa nimandaidaqa moodaa fidikara foora nimandaaqa.
1TH 5:27 Qinee Pauroosa Karaambaiqa ufa irisee inniara afeekaikida qimannimida innee maa papiqana maraseeqa minakinaa akara ufa aiqama Yisuna ufa irimariasa asaana rumasee qimannimiaqa.
1TH 5:28 Asauku mundirana Karaambaiqa Yisuna afaarirafa inniki mariani.
2TH 1:1 Innee Teesaroonika maqannaasa Anutuna ufa irimariasa innee maasa qikoona Anutuna aiku asauku maqasaa fasiqa anaasee mariasa Anutuna asauku mundirana karaambaiqa Yisunaindi faqa mariasa qinee Pauroosa inni akara rumannimaqaidaqa, qaara fasiqa Sirasisa Timootisa faqa inni akara rumannimaqaidaqa.
2TH 1:2 Innaarunai nikoona Anutuna faqa Anutuna asauku mundirana karaambaiqa Yisuna miqanda kaqi nári afaarirana faqa nári naundura asooarana faqa inni nimiani.
2TH 1:3 Oo qini qikaqaafasaauqa maasa inniara maqee maqee Anutufinai dufi dufi qimamaqaidaqa. Innee Yisuna saqarikirafa firaaqoo kambiqainara iriseeqa sia minara dufi dufi qiana aaqaannoo. Inniara Anutufinnai dufi dufi qimarunafa andeeqaidanoo.
2TH 1:4 Innee Teesaroonika maqusanaasa Yisuna ufa irimarianasaara narirana faqa oosana oosana aupurarana faqa kaqi maraqa fimariana faqa Yisuna ufa kaqi iriqa fimarianara faqa iriseeqa maaqanna maaqanna fidaqa inni amiqira oosanara amaana maqaki keeqee mariasa qimannimidaqa qeeqa qimooqidaqa.
2TH 1:5 Anutuna andeeqara narira ufa anoona kasooqaqee maaqi qimasee kambiqaannoo, innee maqee Yisuna ufasaara aupurarana maraqa fimariana akiaqara kasooqaqee maaqimminoo mariannoo. Mi aupurarafa Anutuna marira ququsaki keeqarana amanaikamma nimaqaannoo.
2TH 1:6 Anutufa narí andeeqara oosana maraseenoo inni aupurararana nimimariasa mina akiaqara nári faqa aupurarana nimiannoo, innee mina ufasaara aupurarana mareemariasa asooarana nimidanoo maasa faqa nimiannoo.
2TH 1:7 Karaambaiqa Yisufa innaarunaindari narí afeekafaqaa qangiroo namufaqa ida aurunamu faqa koorooira faasaana asooarana maasa nimiseenoo aupurarana misa nimiannoo.
2TH 1:8 Miqimmandee kooroomafinoo Yisufa Anutunara sia irimariasa faqa maasa karaambaiqa Yisuna amiqira fasaasa ufara nikoo nikaa imariasa narirana nimiannoo.
2TH 1:9 Yisufa naaru naaru taikarana misa niminaqa naaru naaru karaambaiqa mariqooqari nianai naadumasaa maridaqa sia mina areenara afeeka qafeefaranoo.
2TH 1:10 Mi faasaannasaa Yisufa maasa faqa aiqama narí aiku asauku amooqirana irirara qumuannoo, aiqama mina ufa irimariasa naaquqarana faqa mararara qumuannoo.
2TH 1:11 Maasa mi ainainafa kambiqaaninnanara iriseeqa maqee maqee inni Teesaroonika maqusanaasara innaaru qidaqa Anutufa inni naundurai naakapaifaqa mina ufamau uqeerara aatata fimariafanoo minara qidaqa. Anutufa inni dadaaqinaqa inni marirafa nirafa uqeerara aana amana kai fuaqeera innaaru qidaqa. Anutufa narí afeekannai innee Anutuna ufamau firanara amiqiranee qimariana anoonaikiani, innee mina saqarikira saika faqa anoonaikiani.
2TH 1:12 Innee miqifaqa aiqamausa inni andeeqarana qafamasee Yisuna auqu areenarana amooqifanoo Yisufa quandafi inni nimooqiannoo, Anutufa faqa Anutuna asauku mundirafa karaambaiqa Yisuna faqa kaqi afaariranannai maa ainainafa mariannoo.
2TH 2:1 Doo maqee qinee Pauroosa Anutuna asauku mundirafa karaambaiqa Yisufa innaarunaindari kafaa qumiranara faqa maasa mina faqa moodaanaki suqu quqaranara faqa qimannimianaura. Akaqausa minara doo qumi ifoo qiafaqa innee minara irisee furufariqa munari minari imariafanoo.
2TH 2:2 Karaambaiqa qumira faasaanara doo aiqaqanau maqi qifaqa unna ufa qiaafoo qimasee sia dauni munuqi miniqira ufa irisee naundura dapikinaqa ninunuruaqa. Yafee moo fannoo mi ufana qimanniminoo fee, faiqí moo fannoo aaqara ufa tamummaqasee qimanniminoo fee, amaana ufa qimannimimari fasiqafa unna qimasee qimanniminoo fee, faiqí moo fannoo unna qimasee maasara pasaki akara rumasee qimaqimi ifoo qinoo fee.
2TH 2:3 Innee sia moo fannoo nikaru qinna ufana iriaqa. Yisufa qumira faasaana sia kaqi aniannoo maa ainainausa naaree kambiqafifanoo qumuannoo. Taikara aukuana adeedi rainaqa aiqama atinaindari faiqí anaasee firaaqoo Anutuna ufa rukiasee nariqa aatata fifaranoo. Mi aukuanna maqasaa manda fasiqa fannoo idaki fuaninafa kambiqaannoo.
2TH 2:4 Mi manda fasiqafa aiqama maaqanna maaqanna nariqa Anutunee qimaria ainainna faqa aiqama nariqa Anutunara innaaru qimamaqee mariana faqa kuqaa qimariana faqa unna qimariana faqa aiqama namuqaakama nimaqeenoo qaoo qiannoo.
2TH 2:5 Qinee Pauroosa inni Teesaroonika maqusanaasa faqa maridaqa mi ainainausara inni qimannimiafannana sia iridee auni fee.
2TH 2:6 Mandoosana maree mari fasiqanara maqee mi manda fasiqafa faqa narí mandoosana faqa kambiqaaqaa idanoo moo ainainara innee minara irimarianara maqee kari rafaaqafidanoo narí aukuanasaa mi manda fasiqafa kooroo iannoo.
2TH 2:7 Mi manda fasiqana mandainaina fannoo doo maqee maqasaa fasiqa anaaseeki oosana arasee qumee saikidanoo sia maqee anoonaikiannoo minasaa rafaaqafimari ainaina Anutufa uqeera marainanoo kooroo iannoo.
2TH 2:8 Kooroo inanoo karaambaiqa Yisuna oosunda fannoo mi manda fasiqana kuqammaaruannoo narí areenarana kooroo iranannai faqa narí qumira faasaana mi fasiqana rakeekaamasainanoo taikaannoo.
2TH 2:9 Mi manda oosana maree mari fasiqana oosana maaqimminoo mariannoo, mifa Sadannana firaa afeeka namufaqa anireenoo oosana oosana ainainna faiqí sia auqaaqaa ira ainaina faqa unna qimasee narí auqu uqeeree mari ainaina faqa naaquqara ainaina faqa uqeerasee anoonara foora uqannifiqaannoo.
2TH 2:10 Mifa oosana oosana nikaruqira mandainaina uqannifiqainaqa naaru idaki taikeefandinausa minara kuqaa fee qimasee irifara, misa innaarunai asumu marira anoona ufara sia nidimarifaqa sia oonu irianara mina akiaqara taikeefaranoo.
2TH 2:11 Minara Anutufa kuqaa anoona ufara sia iri mariasa mandainainara asasi mariasa naruaninnaqoo mareeqee quqararee qimaseenoo moo maraquna aaqara maraquna naakunnimaqainaqa mi maraqunafa misa naundurai saikinaqa unna ufara kuqaa anoona ufee qifaranoo.
2TH 2:13 Innee Teesaroonika maqusanaasa sia miqimariasa karaambaiqa inniara aidimarisa maasa doo inniara maqee maqee Anutufinnai dufi dufi qidaqammu. Anutufa narí maraquna afeekannai faqa innee anoona ufasaa mandaaqaranannai faqa inni Teesaroonika maqusanaasa innaarunai asumu marirana faqa Anutuna narí faiqí anaasee kammafi mariaqeera faqa oosana arooqooqari rusandeesamumasee inni maraanauree qimaqoofa maqee mareenoo.
2TH 2:14 Sia fifau inni mareenoo maasa amiqira fasaasa ufa inni qimannimiafannana minannai innee Anutuna asauku mundirana karaambaiqa Yisuna areenarana raina nimiraree qimaseenoo inni maranau.
2TH 2:15 Oo qini qikaqaafasaa qinee minara irisee qimannimidaqa maasa ooqai inni faqa maridaqa nookiqari qimannimiafanna anoona ufana faqa maaqooqari pasaki akara rumannimiafannana mi anoona ufana faqa innee mi anoona ufanaki mapukufinaqa afeekaikamasee kikiqammafi nisaukuki uaqee iaqa. Sia moo unna ufa iriaqa.
2TH 2:16 Anutuna asauku mundirafa karaambaiqa Yisufa faqa maasa qikoofa Anutufa maasara aidi marifa narí kaqi afaarira oosanakiqari naaru naaru paasoosirana faqa naaru kambiqaaninna ainainara asasammasee afeesirana faqa nimuqanda miqanda fannoo inni afeeka niminaqa andeeqara nirana marirana ufaqirana maraaqa, inni nimuqusaki sia Yisuna ufamau firanara naaquqarafa mariani paasoosirana kai umbiqa nimiani.
2TH 3:1 Qinee ufa qimannimiseeqa maa ufanannai taikaanaura. Innee Teesaroonika maqusanaasa maasara maaqi qimasee innaaru qiaqa. Maasa karaambaiqa ufa qimannimiafanaqa inniki anoona kambiqoondee kai aiqama anaamurunni miqi kai mafinoo dauni daraaninoo anoonaikiani.
2TH 3:2 Kafaa maaqi qimasee maasara innaaru qiaqa, Anutufa maasa manda fasiqauqa nisaukukinaana rafiqaani sia aiqama maqannaasa Yisuna ufa iridammia.
2TH 3:3 Karaambaiqa fannoo sia miqi marifa amiqimmasee rakisimarifa afeeka mapukirana nimiseenoo aakaaqaindaraa fasiqasaa ititannimaqaannoo.
2TH 3:4 Karaambaiqa fannoo inniara maasa nimuna asooarana nimidanoo innee maqee faqa kasooqaqee faqa sia manda iriramau fifaranoo maasa qimannimira ufamau kai andeeqasee fifaranoo.
2TH 3:5 Karaambaiqa fannoo Anutunara nidirana inni nimuqusaki quqaani. Anutuna ufamau nimandakufi maqee maqee firana Anutuna asauku mundirafa inni naunduraki quqaani.
2TH 3:6 Oo maasa qikaqaafasaauqa maasa Anutuna asauku mundirana karaambaiqa Yisuna auqu ramasee inni naaquqama nimaqaidaqa, inniki kudoosaapee mariasa innee sia misa naaqa mariaqa rufiasee nianai mariaqa misa sia maasa naamuaqira ufamau fimariasa maridaqammia.
2TH 3:7 Innee maasa oosana qafeeusa mariafanoo, maasa inni faqa maridaqa sia kudoosaaparausa mariqiafana innee maasa oosanamau kai fuaqaana innee minara irimariafanoo.
2TH 3:8 Maasa inni faqa maridaqa sia moona narana maaqa marirana kaqi maree mariqau, feefaurumasaidaqa maree mariqiafana. Maasa inni narainaina kaqi naanoo qimasee eendaki faqa faasaana faqa kadaapi rimariafana tooqaamu darusoofaqa mi narainainna akiaqara imariqau.
2TH 3:9 Maasa inniara iriseeqa miqi qiqiafana, innee mi oosanna qafamasee mi mau kai fuaqeera kadaapiriqiafana, innee narainaina kaqi qimifanoofau amana kai andeeqanoo mariqini, maasa Yisuna ufa qimannimiafannana akiaqara marini, innee maasa funnamau fuaqeera kadaapiriqiafana.
2TH 3:10 Maasa inni faqa maridaqa maa ufana qimannimiafannana kafaa kafaa qimannimidaqa, faiqí moo fannoo sia ainainifa narana faqa sia naannoo.
2TH 3:11 Maasa sia fifau inni qimannimidaqa inniki fooroopi mariasa marianara iriseeqa qimannimidaqa misa sia nariqa ainaina imariasa kaqi moosa ainaina deedeepi mariasa marianara iridaqa.
2TH 3:12 Anutuna asauku mundirana karaambaiqa Yisuna auqu ramasee mi fasiqausa fooroopi mariasa naaquqama nimaqaidaqa misa andeeqara mariramau fidaqa nariqa narainaina kadaapirumasee maraaqa.
2TH 3:13 Qini qikaqaafasaa innee andeeqasee nimariasa faqa qimannimidaqa. Innee inneeqa amiqira nira marira oosana maree mariana sia nikoo nikaamasee minnisaaqa kaqi kai fuaqa.
2TH 3:14 Innee maa akarana asaana rimarifaqa akaqausa mi ufana rukiee mariasa marifaqa innee rufiasee nianai marifaqa misa nisaurirana maraaqa.
2TH 3:15 Sia misa namuqaakama nimaqaaqa nikaqaafaasaara foora naaquqama nimaqaaqa.
2TH 3:16 Karaambaiqa narí kai naundurai asooarana oosana marifa aiqama kari oosana oosana mariranaki inni faqa naundura asooarana nimiannoo. Karaambaiqa inni aiqamausa faqa mariani.
2TH 3:17 Faiqí moo fannoo qini maa ufana akara rumasaifaqa qinee qeeqa qisaukunnai maaqi qimasee rafaaqafidaqa. Qinee Pauroosa inni nimandaidaqa. Innee maa akaranara moonaindi fee qifoora aiqama papiqa akara rumasee qeeqa qisaukunnai rafaaqafidaqa.
2TH 3:18 Anutuna asauku mundirana karaambaiqa Yisuna afaarirafa inniki mariani.
1TI 1:1 Oo Timooti anee kumaaraa marianafa anee qini qimaakuara foora mariananoo. Qinee ooqai ani qimamiafannana aninna irirafa qufana Yisufinnai quandoona Anutufa faqa narí asauku mundirafa Yisufa faqa maasa asumu maroofa maasa minasaa mundi marunafa mifa qini mara quqaqoosa minara asauku mundirafa Yisufa narí ainainianeera maqasaa fasiqa diqiqoosa maa papiqana qinee Pauroosa ani akara rumamaqeeqa.
1TI 1:2 Oo Timooti maasa qikoofa Anutufa faqa maasa karaambaiqa asauku mundirafa Yisufa faqa ani dadaaqiaqa, misa nariqa nifauarana ani amiaqa. Misa ani aundura asooarana faqa amiaqa.
1TI 1:3 Ooqai qinee Maseedoonia maaqa maqai fiqa aniara Eefeesusa maqusaki mariannee qiafannana maqee faqa miqi kai iqa miqoo mariannee qidaqa. Eefeesusa maqusaki mariasa akaqausa fuka unna amaana qimari ufana faiqí anaasee qimannimi mariasa mariafaqa minara anee qaoo qianneera miqoo mariannee qidaqa.
1TI 1:4 Anee maaqi qimasee qaoo qia. Misa nári uriuqa minnisaaqa misa nári nikeeku nikaaku nifaqnausa nifasaasa qimammaree kisaaqasaa fimariana minnisaaqa. Miqi qimaria ufafa ufa rainarana tinoorirana kai uqeeraidanoo sia Anutuna marirafa nirafa maasaki marina dadaaqidanoo. Anutufa maasara maaqoo fuannaanna sia mi manda dapi ufanannai paqurianaura maasa nári irirana Yisunasaa rusiranannai kai fuanna aanna paqurianaura.
1TI 1:5 Sia fifau mi unnana qimariasara qaoo qiannee qidaqa faiqí anaasee miqooqaraasa Yisunasaa rusirana sia unna qiaqa kuqaa kai qiaqa, kuqaa anoona uqannasaa mundusee fiqa nári nifaaqa qumaarararana siaisa aufadamasee nidaqa nári naunduraki ikairi siaisa nidaqa mi qaaramoo ainainakiqari faiqí aanaaseera nimuqusirana rirafa kambiqaidanoo.
1TI 1:6 Faiqí anaasee akaqausa mi anoonna ainainnakiqari quandakiqa fifau faafau qira ufa narí qimami narí qimami qianannai nariqa ninaakusamarara kaqi runna fimariafanoo.
1TI 1:7 Mi unna amaanna qimariasa paasoosamandee nári faqa sia irimaria ainainnara faqa ufara faqa kaqi paasoosamasee kaqi qimannimidaqa kafaa náriara Anutuna sandufa qimannimi marunausee qidaqa aaqaidaqa.
1TI 1:8 Anutuna sandufa Mooseenasaaqari qimannimu ufafa amiqira ainaina maridanoo. Faiqí anaasee mina andeeqasee irifanoo amiqira ainaina mariannoo.
1TI 1:9 Maasa oosana oosana sandufara maaqi qimiridaqa. Sia amiqira fasiqa anaaseerau maridau, ufa rukiee mariasara maridanoo Kaamanna ufa rukiee mariasa faqa Anutuna siaisa faqa Anutuna ufa rukiee mariasa faqa sia Anutunara irimariasa maqasaa ainainara kai irimariasa nári ninausa nikausa kuqa narimariasa faqa faiqí anaasee kuqa nárí mariasa faqa faiqí anaasee narinni narinni qummuari mariasa faqa faiqí fannoo aqoonna fasiqa aafeeqara oosana faqa anaasee fannoo aqoonna anaasee aafeeqara oosana faqa faiqi aanaaqi qummuari mariasa faqa unna ufa qimariasa faqa siaasa ufa irimarinaki mafi narí kai raqaseenoo moonara unna ufa qimariasa faqa aiqama anoona ufa rukiee mariasa faqa mi aiqama mandoosanna maraqa nuasara misara kai Anutufa narí sandufa misa qaoo qimaseenoo quqasoofanoo maridanoo. Misa nimaarusira sandufa quqasoofanoo maridanoo, sia mi aaqara oosanauqa maree mariasa kaifau nimaarusidanoofau oosana oosana ainaina Anutuna mapukira ufa rukiee mariasa faqa nimaarusidanoo.
1TI 1:11 Mee Anutuna mapukira ufa qunnana mifa maasa Anutuna amiqirana mina areenarana kooroo idanoo. Mina amiqira fasaasa ufa amana kai mi ufafa maridanoo. Mi fasaasa ufana Anutufa qinisaa quqasee anee Timooti qimannimiannee qu ufafa maridanoo.
1TI 1:12 Qinee mi saikanaki nimariafananoo maasa karaambaiqa asauku mundirafa qini ainainirana amana kai qimunara dufi dufi qidaqa. Mifa qiniara mi ainainirana amanaikammi ifoo qimaseenoo mara quqaqaisa maridaqa minara faqa maasa karaambaiqa asauku mundirana Yisunara dufi dufi qidaqa.
1TI 1:13 Ooqai indaaru qinee Pauroosa Yisunara mandufa qimariafanausa mina ainainimaru fasiqausa naru nifaqaa iqa niniaafanausa Yisuna faqa aquraraafanausa maridaqa. Anutufa qiniara sia Yisunara iridanoo fee qimasee sia narí mandoosanara iridanoo fee qimaseenoo sia qini darinoo, qini qifauamaseenoo narí afaarirana qinisaa nammariara foora adiaseenoo minasaa qeeqa irirana Yisunasaa rusirana faqa faiqí aanaaseera qimuqusirana faqa qiminau. Maasa aiqamausa asauku mundirana Yisunaki keeqee mariasa mi nimimaria ainainnaqanda Yisunasaa irirana rusirana faqa faiqí aanaaseera qimuqusirana faqa mi qaara ainainaqanda qiminau.
1TI 1:15 Maa ufana anoona ufa maridanoo qumaree iri maria ufafa maridanoo asauku mundirafa Yisufa manda oosana maree mariasa asumu maraanee qimasee quminau. Qinee Pauroosa mi mandoosanna uriqararausa mariafananoo Anutufa sia qini darinoo qifauanau. Asauku mundirafa Yisufa narí kasoomambi qini qifiqaranara firaana firaaqoo koorooianifeera mandoosana uriqararausa qini qifauanau. Miqimaseenoo Yisufa qini mareeqeenoo akooqoo quqasoofaqa naaru kasooqaqee Yisuna mandaaqasee naaru marirana maree mariasa qini kikiqususaidanoo qini mandoosana uriqaranoo maruna ririmma qifauamaseenoo minni qisanau. Innindi oorudupinoo maridanoo mina mandaaqasaifanoo kaqi inni faqa maraanauree qinau. Qinee minara irisee amooqira ufa maaqi qimasee qianaura.
1TI 1:17 Naaru naaru mari karaambaiqafa sia kuquaninafa maasa sia mina qafee marunafa moodaa Anutufa sia moo fannoo marifa uriqararana faqa areenarana faqa naaru naaru minaindi mariannoo.
1TI 1:18 Oo Timooti anee qini qimaakuara foora marianafa. Qinee maa ufana anisaa quqaidaqa. Ooqai tamummaqara fasiqauqa qimaqoofa ani qimamira ufa mi mau fidanoo. Ani ainainirafa andeeqara rakiara foora imariannana qini ufa fannoo ani duru feefara foora inoo mariannoo.
1TI 1:19 Amiqira rakirana rakidana ani Yisuna saqarikirana uaqeeia, afaaqa qumaara rarana siaina mina faqa uaqeeia. Faiqí akaqausa nári naaqoo irirafa qimannimifaqa andeeqasee fidaqa misa nári Yisuna saqarikira irirana munu furufarammaseeqa kurididaqa.
1TI 1:20 Qaara fasiqa Qimeenaeeusafa faqa Areekisandeerafa faqa miqandaqara miqi marufaqa qinee mareeqee Sadanna asaukuki quqaafanaqa misa Anutunara mandufa qirana taikaaqeera quqaqiafana.
1TI 2:1 Maa ainainna naaree ani aamuaqimamisaanana anee faqa Yisuna ufara suqimariasa faqa suqidaqa innaaru qidaqa maaqimasee innaaru qiaqa. Maa maqanasaa faiqí aanaaseesaa rakisinnimaqee marisara misa amiqimasee rakisinnimaqaaqeera innaaru qiaqa. Innee kaqiqeesa reendeenamasee asooaranaki mariaqeera misara innaaruqiaqa. Anutuna ufamau fidaqa andeeqara mariranaki mariaqeera aupuraranaki sia mariaqeera misara innaaruqiaqa, innee maqee maqee aiqama fasiqauqara faqa maa maqanasaa firaaqoo uriqararausa faqa kaamanna uriqararausara faqa Anutuna afusaa Anutufa misa dadaaqianifeera innaaruna qiaqa. Misara faqa dufi dufi qirana qiaqeera qidaqa.
1TI 2:3 Misara innaaru qirafa amiqira oosana maridanoo Anutufa maasa asumu maree marifa minara aididanoo. Mifa aiqama fasiqa anaasee asumu mariranaki ani mariaqeera qidanoo anoona ufamau fuaqeera qidanoo misara innaaruqira oosannara Anutufa aididanoo.
1TI 2:5 Moodaa Anutufa kai maridanoo moodaa fannoo kai narí Anutuna faqa faiqí anaasee faqa mara moodaanakikamma nimaqaidanoo. Mi fasiqafa Anutuna asauku mundirafa Yisufa maridanoo faiqí anaasee oonu kafaa marasee nariki quqaanifeera narí afaaqa kuqiranaki quqanau. Maasa mina qafamaseeqa maaqi qidaqa. Oo Anutuna narí aukuana maridanoo. Oo mifa kuqaa aiqama fasiqa aanaaseera asumu mariranaki mariaqeera miqidanoo.
1TI 2:7 Minara faqa qini Pauroosa qeeqa maqusaindari diqiqamasoofaqa qinee aanaamuru aiqama uqannifiqaidaqa Yisunasaa irirana rusirana anoona ufa faqa qimannimidaqa. Qinee sia unna qidaqa anoona ufa kai qimannimidaqa.
1TI 2:8 Yisuna ufara suqimarianaki faiqiara qinee maaqi qimasee naamuaqidaqa. Aiqamai maria fasiqausa aanooqirana siaina, ufa rainarana siaina, nári nisauku anukarausa uqeerasee innaaru qimariasa nári marirana nári nirana minauqara Anutunaindi fee qiaqeera, aiqama fasiqara miqi mariasee innaaru qiaqeera qidaqa.
1TI 2:9 Anaaseera qinee maaqi qidaqa. Aiqama nári nifaaqai mari siara qamunnana amiqimasee nári nifaaqa aanaamususee irirana faqaasaikamambi mariaqee qidaqa. Sia kaaqa firaaqoo oosana oosana ainaina nifaaqa auquaqa.
1TI 2:10 Niqoonausa dadaaqirafa mifa inni nifaaqa auqirafara foora mariani. Anutuna ufa irimaria anaaseesa andeeqara oosana miqiminoo maridanoo.
1TI 2:11 Yisuna ufara suqimaria maqanaki keeqaifaqa anaasee ufa siaina reendeenamandee Anutuna ufa iriaqa.
1TI 2:12 Yisuna ufara suqimaria maqanaki aanaaseeuqa sia kikiqa mafiqa Anutuna ufa qimannimiaqa. Misa sia faiqí urinaaqaramafi mariaqa qinee mina qaoo qidaqa misa ufa siainausa mariaqee qidaqa Yisuna ufara suqimaria maqanaki miqiaqee qidaqa.
1TI 2:13 Anutufa Adamana naaree auquseenoo doo mina inaaqianna Eeuana auqinau.
1TI 2:14 Sadannafa sia faiqí akaruqinau, anaasee kai akaru qimasoofanoo Anutuna ufa rukianau.
1TI 2:15 Doo maqee Anutufa sia aiqama aanaaseeuqa mina akiaqara naru taikaannoo faiqi maqaranasaa marifaranoo. Misa nári nifaaqa amiqimmandee aanaamususee maridaqa Yisunasaa irirana rusiseeqa mariaqa faiqí aanaaseera amuqusamasee mariaqa qikairi siaisa anukarausa mariaqa. Miqidaqa noori kandamasee maridaqa kaqi marifaranoo.
1TI 3:1 Maa ufana anoona ufa kai qinee Pauroosa qimannimianaura. Faiqí moo fannoo Yisuna ufara suqimariasasaa rakisiraree qimarifa amiqira ainainammiannoo.
1TI 3:2 Yisuna ufara suqimariasasaa rakisimari papatarafa narí nirana marirana sia aaqarafa mariannoo andeeqarafa marida andeeqasee rakisiannoo. Miqimarinna fasiqafa moodaa anaasee faqaafa kai mariannoo. Mifa oori runusee marifa mariannoo. Narí aakiranara iri marifa mariannoo. Narí qumiasana aina faqa marirana faqa andeeqasee quqeemarifa. Mi fasiqafa Yisuna ufara suqimariasasaa rakisiranaiki mari fasiqafa aanaamuru maqee maqee mina maqusaki aniraafanoo amiqi amiqidanoo nifiqa narí maaqaki quqasaida narana firidanoo. Mi fasiqafa Anutuna akarakinaa ufa andeeqasee qimannimi marifa mi oosanausa maree marifa Yisuna ufara suqimariasasaa rakisirafa amanaikiannoo.
1TI 3:3 Mifa sia nammari namasee furufaridanoo marifa faiqí anaasee sia nárí marifa mariannoo. Mifa fifira oosanara reendeenira oosanara kai rimarifa mariannoo. Mi fasiqafa sia kaaqa munnimmara rimari fasiqafa mariannoo.
1TI 3:4 Mifa narí faiqí aanaaseera amiqimasee rakisinnimaqee marifa maridanoo. Mi fasiqafa narí faiqi namuara qimannimifaqa eedoo qimasee reendeenamandee auqee marinausa mariaqa.
1TI 3:5 Mi fasiqafa narí faiqí anaasee sia amiqimasee rakisinoo naqimaseenoo fee Yisuna ufara suqimaria maqanaki keeqee mariasasaa rakisiannoo fee.
1TI 3:6 Yisuna ufara suqimariasasaa rakisiranaiki mari fasiqafa sia fukasaa Yisunasaa irirana rusimarina mara quqaa. Miqimari fasiqafa dauni narí oori uqeerasee narí afaaqa mara maree uridanoo amooqinoo dauni aaqaranaki aqufuandoora. Ooqai Sadannafa innaarunai miqimarunara Anutufa ateekanau. Maa fuka fasiqafa Yisuna mandaaqarana miqi kai inoo Anutufa ateekaandoora.
1TI 3:7 Yisuna ufara suqimariasasaa rakisiranaiki mari fasiqanara Yisuna ufara sia irimariasa faqa minara amiqira fasiqee qimariafa mariannoo. Miqi qimaria fasiqafa sia Sadannana namufaqa moodaa madikaki aqufinoo asauruannoo. Doo Yisuna ufara suqimariasasaa rakisimaria fasiqausa oosana doo miqiminoo mariani.
1TI 3:8 Doo qinee Pauroosa amaana maqasaa rakisirausara qimasee doo maqee misa oore̱eqara dadaaqirausara qianaura. Amaanufasaa rakisirausa dadaaqimariasara misa marirana nirana andeeqasee noori runusee mariasa mariaqa. Misa faqa sia nammari namasee furufariaqa. Misa faqa sia kaaqa ainainara rimarinausa mariaqa.
1TI 3:9 Misa akarakinaa Anutuna ufa qumareeqa mi mau fidaqa sia nifaaqa umaararaanifeera aufadaqa mariaqeera mariaqa.
1TI 3:10 Dadaaqimaria fasiqausa sia kaqi mareeqee dadaaqiranaki quqarafa mariaqa. Misa amanamasee qafeenana kai mareeqee dadaaqira saikaki quqaa.
1TI 3:11 Dadaaqi maria fasiqausa ninaaqmaaka faqa marirana nirana andeeqasee maridaqa sia munuqi miniqi qimariasa marifaranoo. Mi anaaseesa noori runusee maridaqa anoona ufa kai qimariasa mariaqa.
1TI 3:12 Yisuna ufara suqimariasa amaanufasaa rakisirausa dadaaqimarifa moodaa anaasee faqaafa mariani narí faiqi anaasee amiqimmandee rakisi marifa mi saikanaki mariani.
1TI 3:13 Amiqimasee kisaaqasaa papatara saika auqaqa fimariasa aiqamausa nifusaa uriqararana maraidaqa miqidaqa, misa asauku mundirana Yisunasaa irirana rusirana atukarasee mapukirana maraidaqa.
1TI 3:14 Qinee Pauroosa maa papiqana akara ridaqa qusasaa inni oonu nindafararee qidaqa.
1TI 3:15 Moo ainaina fannoo qini rafaaqafimarifaqa maridaqa maa papiqanakinaafa inni Anutuna aiku asaukuki nirana marirana naamuaqiannoo. Anutuna ufara suqiranaki keeqee mariasa misa Anutuna amaana maqara foora maridaqa. Anutuna anoona ufa faakana maridaqa.
1TI 3:16 Maasa Yisuna ufa irirana anoona ooqaindari kukeeqara ufa marifa Yisufa idaaqirafa firaafa maridanoo, sia amana moo fannoo minara qaoo qirafa. Yisufa maqasaa fasiqa nifiri kammafinoo koorooinau. Anutuna maraquna fannoo minara andeeqarafa maridanoo fee qinau. Qangiroouqa mina qafaqau. Faiqí moomoosa maaqanna maaqanna minara qimannimiqau. Maa maqa maaqanaki marusa minara kuqaammifoo qiqau. Anutufa mina mareeqeenoo innaarunai quqaqoofanoo maridanoo.
1TI 4:1 Anutuna kaaqa andeeqara maraquna fannoo kasooqaqee kambiqaaninna aukuanara maaqi qimasee akooqoo firaaqoo koorooidanoo. Mi kamuqoo akaqausa Yisunasaa irirana rusiranasaaqari rakeemaki unna qira afaanna ufa irifaranoo akaqausa afaanna uqanna ufamau fifaranoo.
1TI 4:2 Unna qimaria fasiqausa kai mi unna ufausa faiqí anaasee Yisuna ufana suqimariasa qimannimiqa nifaranoo. Mi unna qira fasiqausa nári mandoosanara sia qumaara naridanoo nariqa naaqoo irirana doo ida fannoo narinoora foora inoo marifaqa sia ummaara narifaqa nisaurifara.
1TI 4:3 Miqi maria fasiqausa unna qimasee anaasee mararanara mandoosanee qimasee akaqa naranara manda narana sia naaqee qifaranoo. Anutufa mi oosana oosana narannara faiqí anaasee naaqeera auqu quqaqoofa maridanoo. Mina ufa irimariasa mina anoona irimariasa dufi dufi qimasee naaqeera quqaqoofa.
1TI 4:4 Anutuna aiqama auqu quqaqoo ainainna aiqama amiqirafa kai maridanoo sia amana moo naranara mandaikira fee qianaura. Aiqama ainaina innaaru qimasee dufi dufi qimasee naaqa.
1TI 4:5 Anutuna ufa faqa maasa innaaru qirana faqa mi naranna anukamasainanoo amiqinoo mariannoo, Anutufa amiqiranee qiannoo.
1TI 4:6 Oo Timooti anee asauku mundirafa Yisuna amiqira ainainira faiqi maridana mina ufa irimariasa ani akaqaafasaauqa qini maa ufausa qimannimia. Yisunasaa mundira ufa faqa mina anoona ufa faqa ani ooqai mi ufanasaa fidana innooqana marianafa mariananoo. Miqidana qini maa ufausa aneenna akaqaafasaauqa qimannimia.
1TI 4:7 Fifau uri qirana maa maqanasaaqaraa uriuqaki sia minaki aqufua nianai tatiaaqa, fifau ufa. Anee Anutuna dadaaqidana rakiranakiara foora mariananoo minara maqee maqee aununu rakisiara foommasee amanamasee qafamasee afeekaikia.
1TI 4:8 Maa maqanasaaqaraa amudaani maqee maqee afeekaikamasee amanamasee qafarana kaqikaaqoo maa maaqanasaa kai amana maridanoo aneenna aundurakinaana maqee maqee afeekaikamasee amanamasee qafarana firaaqoo amiqirafa maridanoo, mifa maqee marirana faqa naaru marirana faqa amidanoo.
1TI 4:9 Mi ufafa anoona ufa maridanoo minasaa mundimariafa maridanoo.
1TI 4:10 Minara kai maasa kadaapirida nimudaanai qidaqa. Maasa qiqa qimuqusakinaa irirafa kaqi marira Anutunasaa mafi munduseeqa. Mifa aiqama fasiqa anaasee asumu maree marifa maridanoo, mina ufasaa rusimariasa kuqaa misa asumu maree marifa maridanoo.
1TI 4:11 Mi ufausa amiqimasee faiqí anaasee naamuaqia.
1TI 4:12 Oo Timooti anee kumaaraa mariananoo minara faiqí anaasee irisee sia ani ufa irifoora maa ufana ani qimamidaqa. Aneenna ufa faqa aneenna nirana faqa aneenna faiqí aanaaseera amuqusirana faqa aneenna Yisuna saqarikirana faqa aneenna andeeqasee marirana faqa amiqimasee andeeqasee akooqoo marinaqa qafeeqa faiqí anaasee Yisuna ufa irimariasa ani afaqaidaqa ani aanna raaqeera.
1TI 4:13 Oo Timooti qinee anee ianannai kasooqaqee fuanaura. Anee qini qifeesidana maqee maqee faiqí anaasee aiqamausa nifusaa Anutuna akarakinaa ufa asaana rumasee mina oosana kooroomannimisee mi mau fuaqee qimasee fuki faaki qia.
1TI 4:14 Ooqai Yisuna ufara suqimarusasaa rakisirausa ani sindimeera foora quqamaqeeqa nisauku ani afaaqai quqasee ani afaaqooqa qiqa Anutuna maraquna fannoo afeeka moo amuna afeekaikamasee amanamasee qafamasainaqa aiqamausa aniki doo maridanoo fee qiaqa.
1TI 4:16 Aneenna nirana mariranasaa faqa aneenna faiqí anaasee ufa qimannimiranasaa faqa rakisia. Qinee qimamunna ufamau andeeqasee finana ani nirafa marirafa andeeqasee marinana anee aneenna faqa ani ufa irimariasa faqa asumu mareennaranoo.
1TI 5:1 Oo Timooti anee Yisuna ufa irimariasa faqa maridana sia faiqí firaasa ufa arua. Faiqí firaasa ani akausara foora marifana reendeenamandee ufa qimannimia. Kumaaraauqa faqa aneenna akaqaafasaara foora kai ufa qimannimia anaasee firaasa faqa aneenna anausara foora amiqimasee kai ufa qimannimia. Maanaaqa aanaaseeuqa faqa aneenna asooqmaakara foora andeeqaseenana kai misa faqa ufa qia.
1TI 5:3 Adeedaana aanaaseeuqa misasaa rakisi mariasa sia marifana anee Yisuna ufara suqimariasa qimanniminaqa miqira adeedaanauqasaa andeeqara rakisira rakisinnimaqaaqa.
1TI 5:4 Adeedaana aanaaseeuqa marifanoo nári ninaiqimara faqa faiqi namufaqa marifana anee qimanniminaqa misa quandafi nári ninausa nitaatoosamara amiqimmandee rakisinnimaqaaqa. Anee miqidana maana faqa qimannimia, misa Anutuna ufamau fidaqa indaaruqaa ainaina mifa mariannoo. Misasaa dadaaqamannisaidaqa nári ninaukoo kadaapi akiaqara nimimariafanoo. Anutufa faqa mi oosannara aqaara raidanoo.
1TI 5:5 Adeedaana anaasee moo fannoo maridanoo minasaa rakisirafa moo fannoo sia marifa mifa kaaqa adeedaana uqanna maridanoo. Miqira adeedaana narí irirafa Anutunasaa mundirafa maridanoo eendaki faasaana Anutunara dufi dufi qidanoo maridanoo minara kai dadaaqiannee qidanoo innaaru qidanoo.
1TI 5:6 Adeedaana aanaaseeuqa oosana moo aaqaidaqa maridaqa nariqa nidimari ainainnara kai qiqanuasauqa maridaqa misa doo kuqiqa maridaqa miqiqa nidaqa.
1TI 5:7 Anee mi adeedaana anaaseesara qimanniminaqa andeeqasee mariaqa munuqi miniqi qiqani foora.
1TI 5:8 Mi ufana aiqamausa qimannimia. Maa ufana faqa qimannimia. Moo fannoo Yisuna ufa irimarifa narí aiku asauku faqa narí afaaqasaa aiku asauku faqa narana faqa qamunnaina faqa sia rakisinoo sia dadaaqinannai narí miqinnanannai Yisufa saqarikirana narí ateekeenoo aamina fasiqa mandoosana finnaaqaramasee mareenoo miqidanoo.
1TI 5:9 Oo Timooti ani Yisuna ufara suqimariasasaa rakisirausa mariasa maridana adeedaana anaasee asooqauqa misa náriara naaduma aanaaseesaa rakisiranaikiqa mariaqa. Sia kaqiqee adeedaanauqa mi saikanaki mara quqaa, qaara moo fasiqa niku nisauku taikasee aukuana (60) maraqaasa adeedaanaikida asooqaqee mariasa kai mi saikanaki quqasaina maria. Moodaa fasiqasaa amundoo adeedaanafa kai minaki mariani.
1TI 5:10 Mi anaaseefa ooqai afaari marufa marinnana mifa kai minaki mariani narí faiqi namu amiqimasee firimaru aanaaseefa marufa mifa kai mariani, aanaamuru dapi aanaamuru amiqimmandee rakisimarufa faqa Anutuna ufa maqusa maqusa nida qimannimimarusa faqa narana maaqa nimimarufa oosana oosana mandainainaki aqufimarusa dadaaqimarufa, oosana oosana amiqira ainaina eedoo qimasaida auqee marufa miqi maru anaasee asooqausa kai rakisirausaikiaqa. (Mi asooqa adeedaanausa saika Timootina aukuana maaqimminoo marinau. Misa fuka anaasee nári nifaaqmaaka faiqi namu rakisiaqeera qimannimidaqa naakapee mariqau. Aaqamaki kaqirunna fusa andeeqeeqeenoo Anutuna aanai ubeekee mariqau. Mandainainaki aqufusa andeeqasee Anutuna ufa naakapee mariqau.)
1TI 5:11 Oo Timooti sia kumaaraa adeedaana anaasee maramaree anaasee rakisiranaikia. Kumaaraa anaasee kaifaa faiqiara riqa asauku mundirana saika nimina minnisee foora.
1TI 5:12 Misa asauku mundirana saikaki marianauree qima afeekaikamasoona ateekeefoora.
1TI 5:13 Kumaaraa adeedaana anaasee moomoo suanisaa maaqakiaqa fifau nimariafanoo ainainira aukuana ainnaaqaree marisa mariafanoo. Misa miqiqa nidaqa manda uriqarara irirana marasee unnufa munuqi miniqi qiqa nidaqa sia qiaqaa ufa qiqa nidaqa.
1TI 5:14 Oo Timooti qinee Pauroosa kumaaraa adeedaana aanaaseera maaqi qidaqa, misa andeeqasee mariaqeera. Misa kaifaa moo fasiqa marasee faiqi minasaa maqasee nariqa faiqisaa rakisida andeeqasee mariaqa. Misa miqi marifanoo maasa namuqaa Yisuna ufara nikooqee marisa maasaki randasee sia mandoosana paqurimasee mandufa uqeeraaqa.
1TI 5:15 Akaqa adeedaana aanaaseeuqa Anutuna ufakiqari rakeemaki Sadannana afaqee doo fia.
1TI 5:16 Yisuna ufara suqimariasa misa rakisirausa akaqa adeedaana anaasee naunannaasa siaisasaa rakisifaranoo, akaqa adeedaana aanaaseera naunannaasa faqaasasaa sia rakisiraree qidaqa. Mi adeedaanausa nári naunannaasamara nifiqa quqasee rakisifaranoo. Miqifanoo Yisuna ufa suqimariasasaa rakisimaria rakisirausa sia mi umaarana maraaqeera. Doo adeedaana anaasee ufa taikasee kaifaa Yisuna ufara suqimariasara qianaura. Anutuna tamummaqara fasiqa ooqai marusa akaraki ainaini mariasara qidanoo purimakau kikiqusidanoo maaqi qidanoo. Innee inneeqa purimakau mara maree raisa adi fooqaana narí aikunnai rafarimarinaqa sia naani fee qimasee oori aanaamususaifanoo kaqi nuannoo, innee sia miqiaqa akaqana naidanoo afaaqa asasimarinanoo rafariani fee qimariqau. Mi tamummaqara fasiqausa akara minara kafaa maaqi qidanoo. Ainaini mari fasiqafa narí ainainimarina akiaqara feefauru maraannoo fee qidanoo. Timooti Yisuna ufara suqimaria maqanaki keeqee mariasa miqi kai iaqeera qidaqa. Yisuna ufara suqimariasasaa rakisirausa amiqimasee Anutuna saika uqeeree mariasa Anutuna ufa kadaapi rumasee asaana rumasee fuki faaki imariasa Yisuna ufara suqimariasa sia amana kai feefauru nimia fiqaramasee aabaara faqa nimia.
1TI 5:19 Faiqí moo fannoo Yisuna ufara suqimariasasaa rakisiranara anireenoo mi rakisiranara aaqaidanoommifoo qinaqa sia mi moodaa fasiqana ufa iriaqa, naríara qidaqinoo. Faiqí qaraqanda fee qaaramoo fee aniree minara qifaqa mina irisee andeeqaaqa.
1TI 5:20 Yisuna ufara suqimaria maqanaki keeqee marifa manda oosana marainaqa aiqamausa nifusaa minara qaoo qidaqa ufa qiaqa. Miqimasaifaqa aiqamausa rufiasee sia miqifaranoo.
1TI 5:21 Oo Timooti qinee Pauroosa Anutuna faqa asauku mundirana faqa naaquqara qangiroouqa faqa misauqa nifusaa qinee doori kandamaseeqa ufa ani qimamianaura. Qinee maqee maa papiqanakinaa ufa qimamunnana amiqimmandee mi mau kai fidana Yisuna ufara suqimariasasaa rakirausa nariqa saika amanakai feefauru nimisee andeeqasee nári aaqarana aiqamausa nifusaa koorooia. Sia moonara qiqoondifee qimasee mina aaqarana kukeeqaisaa, sia moonara aamoondi fee qimasee minaindi akooroo maisa. Aiqama misoo maasoo moodaanaki kammasee rakisinnimaqaa.
1TI 5:22 Anee sia dauni faiqí moo mareeqee Yisuna ufara suqimariasasaa rakisira saikaki quqasee sindimeera foora quqamaqaa. Anee sia moosa mandainainaki aqufua, aninna marirafa aninna afaaqa anukarafa kai mariani.
1TI 5:23 Timooti anee aranandaki maqee maqee aurimariananoo qinee minara irisee ani qimamidaqa, anee nammari uqanna kai maqee maqee neemariananoo anee sia mina kai naa, maasa maqee maqee neemarunnana uainna nammarina reendeenimarina mina kaqikaaqoo namasainanoo aurirafa taikaani.
1TI 5:24 Faiqí akaqausa misa mandainaina fannoo aiqamausa nifusaa akooqoo maridanoo. Miqira mandoosana fannoo nári nifusaa akooqoo misa rarisameeqeenoo mandainainaki quqaidanoo. Faiqí akaqausa mandoosana sia dauni qafeefara kasooqaqee akooqoo kambiqainaqa qafeefaranoo.
1TI 5:25 Miqi kai inoo amiqira oosana fannoo aiqamausa faiqí nifusaa akooqoo maridanoo. Kukeeqara amiqira oosana faqa sia kisaaqasaa kukeeqanoo mariannoo kasooqaqee mifa faqa akooqoo mariannoo.
1TI 6:1 Faiqí moo fannoo Anutuna auquara faqa maasa naamuaqira ufara faqa mandainainee qifoora maa ufana ani qimamianana anee Yisuna ufara suqimaria maqanaki keeqee marisa qimannimia. Ainainafaqaasa maa maqanasaa feefauruaree qimasaida ainaini mariasa anee maaqi qimasee misa naamuaqia, misa aiqama amiqimasee naaquqama nimaqainaqa nári rakisirausa ainainamannimaqaaqa.
1TI 6:2 Akaqausa ainainafaqaasa misa faqa Yisuna ufa iri mariasa mariafaqa innee misa ainainira faiqi mariasa sia misara faqa moodaa irirana maree marunausee qimasee mandufa nimiaqa. Innee minara iriseeqa andeeqasee fiqaramasee misa ainainamannisaaqa. Innee misasaaqaraa narana qamunnaina maree mariafanoo misara faqa Yisuna ufa irimariasee qimasee maasa misara didimariasee qimasee amiqimasee misa ainainamannisaaqa. Oo Timooti anee mi ufausa Yisuna ufara suqimaria maqanaki keeqee mariasa naamuaqimasee fuki faaki qia.
1TI 6:3 Faiqí moo fannoo maa qinee qunna ufana moo mau kaqirunna fidanoo karaambaiqa asauku mundirana Yisuna anoona ufara qaoo qidanoo Anutuna mapukira ufa siaifa maridanoo kaqirunna ubeekaidanoo, miqi qimari fasiqafa sia moo ainaina qafaidanoo kaqi narí afaaqa kai amooqidanoo miqidanoo.
1TI 6:4 Miqi qimari fasiqafa narí manda irirananai kaaqa kaqikaa ufa oosana oosana ufara fifau rainaidanoo tinoo taanoo ridanoo. Miqira oosana fannoo faiqí aanaaseekina nariara nariara rairaiqirafa uqeeraidanoo ufa rukiarana faqa naraqi naraqira ufa faqa nariara nariara mandirirana irimariana faqa maqee maqee tinoori maria ufa rainee mariana faqa uqeeraidanoo.
1TI 6:5 Faiqí akaqausa aaqee mariasa nári nifaurunnoo unna qidaqa. Misa Anutuna ufamau fidaqa firaa munnimma aina maa maqanasaa marararee qimariasa. Miqi qimariasa anoona ufa siaisa, irirafa taikarausa mi ufana qidaqa.
1TI 6:6 Doo kuqaa Anutuna ufa fannoo faiqí ainaina faqaasara foora mannisaidanoo. Faiqí moo fannoo kaiqeefa Anutuna ufa maree marifa quandaki narí maqee maree mari ainainnara doo qini qimana fee qimari fasiqafa ainainafaqaa fara foora maridanoo. Miqi qimarunara Anutuna ufa fannoo ainainafaqaa faikammamaqeera foora idanoo.
1TI 6:7 Maasa maa maqa maaqanaki faiqi aanaaqisaa nanee maree aniqiafana kaqi samu aniqiafana. Maasa maa maqa maaqanasaaqari fiqa nanee maree fuanauree, kaqi samumbuanaura.
1TI 6:8 Maasa qamunna faqa narana faqa maasa qimana kai doo maridanoo, doo fee qimasee nifaaqa quqaaqa.
1TI 6:9 Moomoo ainaina munnimmara randeemariasa manda nimaniranaki aqufidaqa. Nári moomoo ainainara munnimmara rimariafa nariqa furufariranara nidimarifa mifa mareeqeenoo nári ufaanaki nári naridaqa.
1TI 6:10 Munnimmara rimariafa mandainaina oosana oosana mandainaina oosana areemarifa maridanoo. Akaqausa ooqai Anutuna ufa irimarusa munnimmara ridaqa Yisuna ufa minnisee nariqa ummaara oosana oosana marasaafanoo mi ummaarafa nári nimuqusa radamidanoo.
1TI 6:11 Oo Timooti anee Anutuna ufa irimarianafa mariananoo, anee munnimma ainainara randee maria iriranamau fimariasara faqa mi manda ainainausara faqa eerairiaqa. Innee nimudaanai qimasee andeeqaranara faqa Anutufara foora irirana faqa Yisunasaa mundirana faqa faiqí aanaaseera nimuqusirana faqa kisaaqasaa Anutuna aanara afeekaikirana faqa faiqí anaasee ireeda reendeenamandee kai qimannimirana faqa mi ainainausara nimudaanai qimasee maraaqa.
1TI 6:12 Timooti anee Yisuna ufamau fidana narí amani narí amaniara foora amudaanai qimasee rakiranakiara foora urinaaqareenana naaru naaru marirana marasainanoo anindi mariani, mi andeeqara marira niranara Anutufa ani aarameeqee minaki quqeenoo. Ooqai anee Yisunasaa mundufunafa anee moomoosa nifusaa amiqimmandee Yisunara kooroounafa mariananoo mikari Anutufa mi amanirana ani amufa mariananoo.
1TI 6:13 Oo Timooti aiqama ainaina aidoo nimimarina Anutuna afusaa faqa, Piratoona oorisaa kooroounafa asauku mundirana Yisuna afusaa faqa qinee aaquqimasee qimamidaqa. Yisuna ufa asaana rumaseenana aiqama eedoo qimasee maraa, mi mau finana ani nirafa marirafa anukarafa sia aaqarafa mariani. Miqi kai ina fifi inana karaambaiqa Yisufa narí qumira aukuana paquria.
1TI 6:15 Anutufa amiqirafa moodaa rakisirafa aiqama uriqararausa urinaaqararafa aiqama karaambaiqauqa karaambaiqa mifa narí kai irisee andeeqara aukuanee qimaseenoo mi aukuanna kai Yisuna aqiqainanoo mai kafaa kooroomannimaqaannoo.
1TI 6:16 Anutufa mifa kai sia faiqí undee irafa aaduma marifa, mifa kai sia faiqí amana qafaaqaaira kaaqa qaranaki marifa, sia moo fannoo mina qafaida sia moo fannoo amana qafaannoo. Mina auqu uqeerarana faqa naaru naaru afeeka marirana faqa minaindi kai maridanoo. Kuqaa.
1TI 6:17 Oo Timooti anee ainainafaqaasa maaqi qimasee qimannimia. Innee ainainafaqaasa sia inneeqa nifaaqa nimooqiaqa. Sia innee taikeemaria munnimmanasaa inneeqa irirana munduaqa. Inni Anutunasaa kai inneeqa irirana munduaqa. Mifa aiqama ainaina afaaramasee maasa qiqaara raanifee ainaina qimimarinasaa kai inneeqa irirana munduaqa.
1TI 6:18 Oo Timooti anee ainainafaqaasa mi ufana qimannimisee maa ufana faqa qimannimia. Sia moomoo munnimma ainaina mararara kai iriaqa. Innee faiqí anaasee dadaaqiqa amiqira dadaaqirana dadaaqiaqa mi dadaaqirana nimimariananaki aniki ainaina moomoora foora mariannoo. Innee afaariaqa inneeqa ainaina naida nimiaqa.
1TI 6:19 Innee miqiqa moomoo innaarunai qumiasana moomoo suqusee marasee naaru kambiqainna aukuana inni faakanaikiannoo. Miqoo innee kuqaa amiqira marirana marasee marifaranoo.
1TI 6:20 Oo Timooti qinee moomoo fasiqa anaasee ani asaukuki quqasaanana anee amiqimasee afapita qumaraa. Dapi ufa Anutuna andeeqarufa sia minaki mari ufafa furufarira ufa raiqara ufa faqa akaqausa moo aaqara ufara unna qimasee irirana faqaasa ufa fee qidaqa mi ufausara aiqama anee faqa misa faqa eerairiaqa.
1TI 6:21 Akaqausa mi unna irirana faqaasa ufara doo iridaqee qinausa Yisuna ufasaa fimariaqooqari quqasee auiaidaqa. Doo. Anutuna afaarirafa inni aiqamausaki mariani.
2TI 1:1 Anutuna ufasaa asauku mundirana Yisufa narí ufara diqiqoosa maqasaa fasiqa Pauroosa maridaqa. Yisufa naaru naaru marirana qima afeekaikammandee qimiraree qimaqoona mifa nariki asauku mundirana Yisunaki maridanoo maasa minaki oonu maridaqa mi naaru marirana maraanaura.
2TI 1:2 Oo Timooti anee qini qifaaqasaa qimaakuara foora marianafa qinee maa akarana ani rumamaqaidaqa. Maasa aiqamausa faqa aiqama ainaina faqa nikoofa Anutufa faqa maasa karaambaiqa asauku mundirafa Yisufa faqa narí afaarirana faqa amuqusifanoo nifauarana faqa aundurai asooarana faqa ani amiani.
2TI 1:3 Qini qikeeku qikaaku sia moo ainaina rafaaqafinau Anutuna sandufamau amiqimasee fidaqa maqee maqee Anutunara innaaru qimariqau. Qinee faqa miqi kai masee misa naanna ramasee maqee maqee innaaru qidaqa aniara Timootinara dufi dufi qidaqa. Oo Timooti ani anoofa Eeunisa nammarifa faqa ani ataatoofa Rooisa nammarifa faqa miqanda noori kandamasee Yisunasaa amiqimasee mundiqa mariqau. Maqee anee faqa miqanda naanna ramasee mi oosanna kai maree mariana qinee iridaqa qafaidaqa. Mi irirafa kaqi aniki marifaqa qinee iridaqa.
2TI 1:4 Qinee ani quqasee fuafannana qiniara anee ikiraqoonnanara qinee minara iridaqa qinee faqa aniara didimarifaqa kasooqaqee ani qafamaseeqa firaaqoo asasianaurannoo.
2TI 1:5 Qinee aniara firaaqoo eendaki faqa faasaana faqa innaaru qimamaqaidaqa aniara dufi dufi qidaqa.
2TI 1:6 Minara qinee maana qimamidaqa ooqai qinee sindimeera foora ani quqamaqaafananoo Anutufa ani amu afaaqooqana anee amiqimasee rakisiinana kuqua.
2TI 1:7 Anutuna maraquna maasa qimufa sia maparaairana rufiarana qimidanoo, mina maraquna fannoo afeekaikirana faqa faiqí aanaaseera amuqusirana faqa qeeqa daundurai qimanasaa andeeqasee rakisirana faqa maasa qimidanoo.
2TI 1:8 Minara irisee maasa karaambaiqara sia asaurua. Qinee Pauroosa minasaara karabusaki marunnanara faqa sia asaurua kaqi paasoosamasee qimannimia. Anee faqa miqi kai inana Anutufa afeeka amiqaina anee faqa Yisuna amiqira fasaasa ufara kaqi aupuraranaki keeqaa.
2TI 1:9 Anutufa maasa asumu mareenoo maasa daaramasee mai aniannee qimasee qini faiqí anaasee uqanna mariafaqee qidanoo. Sia maasa oosana moo ainaina amiqirana qafeenoofau maasa asumu mareenoofau. Narí irirana narí afaarirana minannai kai miqinoo. Ooqai maa maqa maaqana faqa innaaruna faqa sia maru aukuanna narí mi afaarirana maasara narí asauku mundirana Yisunasaa quqaqoofanoo maqee maa aukuanna maasa asumu maree marifa asauku mundirafa Yisufa maa maqanasaa kooroomafinoo mi afaarirana maasa faiqí faiqi qiminau. Asauku mundirafa Yisufa kuqirana aru taikaseenoo narí amiqira fasaasa ufannai kaqi marirana faqa naaru naaru marirana faqa koorooinoo marifaqa maridaqa.
2TI 1:11 Qinee sia fifau oosana oosana aupurarana karabusaki maridaqau maraidau, Anutufa diqiqoofaqa maa maqanasaa qinee mina ufa faiqí anaasee naamua qidaqa Yisuna amiqira fasaasa ufa kooroomannimidaqa qimannimunnanara aupurarana qeeqa qifaaqasaa maraidaqa. Sia qinee minara qisauridaqa. Qinee qeeqa irirana irira fasiqasaa mundusauna maridanoo, qinee minara maana amiqimasee iridaqa, Yisufa narí afaaqooqa qimuna sia kadiqaannoo mifa amiqimasee dadaaqinoo fifi inoo narí qumira aukuana paquriannoo.
2TI 1:13 Oo Timooti qini kuqaa anoona ufauqa anee karaambaiqa ufara foora mina afaqamaree fua. Maasa asauku mundirana Yisunaki keeqafi marifanoo mifa Anutuna saqarikirana faqa faiqí aanaaseera nimuqusirana faqa maasa qimidanoo anee minaki maria.
2TI 1:14 Anutufa oosana oosana amiqira irirana anisaa quqaqoona mina naaquqara maraquna fannoo aniki marina mi afeekanannai mi oosana oosana irirana amiqimasee rakisia.
2TI 1:15 Oo Timooti anee maanara irimariananoo. Misa qini Roomma maqannaa ruumbeeqee karabusaki quqasoofaqa aiqama Asia maqa maaqakina qini qiqoondiuqa qini minnisee quqasee sandamafiqau. Fikeerusafa faqa Qeeramookeeneesafa faqa miqanda faqa quqasee sandaqau.
2TI 1:16 Ooneesifoorusafa mifa kai sia qinee karabusaki mariafannanara asaurinau. Roomma maqusai firaa taunna marufanoo qini sia dauni paqurinau anireenoo qiniara fiqu faiqu fumandee randaseenoo paqurimandee moomoo kari qini dadaaqimarinau. Qinee karaambaiqara mi fasiqana aiku asaukuara amiqi amiqi mannisaannee qidaqa.
2TI 1:18 Qinee karaambaiqara narí qumira faasaanasaa mi fasiqanara afauaannee qidaqa innaaru qidaqa. Qinee Eefeesusa maqusai mariafananoo mi fasiqafa Ooneesifoorusafa firaaqoo qini dadaaqiufa marifana anee Timooti anee minara irimariananoo.
2TI 2:1 Anutuna afaarirana dadaaqirana asauku mundirana Yisunaki mariainainafa marinaqa maasa minaki mariananoo maasaindi mariannoo. Oo Timooti mi afaarirana maraseenana minasaa mapukina maria.
2TI 2:2 Qinee moomoo fasiqa anaasee nifusaa ufa nimiafannana anee faqa mina irimariananoo. Mi ufausa maramareenana andeeqara fasiqauqasaa quqasainaqa misa qumareeqa quandafi niqoonausa faiqí anaasee qimannimiaqeera.
2TI 2:3 Anee faqa asauku mundirana Yisuna rakira faiqiara foora maridana aupuraidana anee faqa kadaapirina fua. Timooti anee rakira fasiqa oosana iria.
2TI 2:4 Sundiauqa rakiranaki fidaqa sia kaiqeesa maria marirana maridaqa nariqa aiqama ainaina minniseeqa doo rakira ainainara kai noori faqa irirana minni kai ubeekamasee nári karaambaiqa afusaa afeekaikamaseenoo rakirara kai iridaqa. Timooti anee faqa Anutuna saikaki fidana misa naanna raa.
2TI 2:5 Kafaa sandee maria fasiqausa oosana irimariana sia ufamau sandeenana taikara qoo oonu kasoomafinana sia feefauru mareennaranoo Timooti anee faqa mi ufamau sandeera foora amanamasee qafa.
2TI 2:6 Sia moo fannoo fukasaa narana unakusee naannoo. Narana ummaqi mari fasiqafa mifa kai indaaru unakusee naannoo mina kadaapirirana akiaqa mariannoo. Anee faqa Anutuna saikaki kadaapirina fifi inana naaru unakuseena suqaseenana neera foora innaranoo.
2TI 2:7 Anee mi ufana qunnana irisainanoo karaambaiqa fannoo dadaaqinana mi oosanna irinnaranoo.
2TI 2:8 Aneenna aaqooki asauku mundirana Yisunara iria, mifa Dafidina ati kuqiranakiqari findifufa maridanoo. Mina amiqira fasaasa ufa qinee qimannimi marunnana mina koorooidanoo.
2TI 2:9 Qinee mi amiqira fasaasa ufana qimannimunnanara aupuraidaqa. Misa qiniara mandoosana maree mari fee qimaseeqa qini qumareeqa sainandannai rumba quqeeqa. Kuqaa qinee sainandannai rumbaqa marida Anutuna ufa fannoo sia rumbanoo maridanoo kaqi idukinoo maridanoo.
2TI 2:10 Qinee minara iriseeqa, Anutufa rusandeesamumasee mareefandinna fasiqa anaaseesara irisee misa Yisunara iriaqeera oosana oosana mandainaina aiqama ainaina maraidaqa. Misa faqa asumu mariaqeera faqa naaru areenarana maraaqeera faqa mandainaina kaqi qeeqa qipatasaa maraidaqa. Mi asumu marirana faqa naaru areenarana faqa asauku mundirana Yisunaki kai maridanoo.
2TI 2:11 Maa ufafa kuqaa maridanoo. Maasa Yisuna faqa kuqiqa mina faqa findifuanauranoo.
2TI 2:12 Maasa mina faqa afeekaikamande fifi inaqa maasa kasooqaqee mina faqa rakisirausa marianaura. Maasa minara qaoo qiananoo mifa maasara faqa qaoo qiannoo.
2TI 2:13 Maasa mina akaru qiananoo mifa kai amana kai andeeqasee mariannoo. Mifa sia amana narí oosana minnisee maasa mandoosanamau fuannoo, andeeqarafa kai maridanoo.
2TI 2:14 Timooti mi ufausa ani Yisuna ufara suqimaria maqanaki keeqee mariasa qimannimidana maa ufana faqa Anutuna afusaa oori kandamasee aaquqimannimaqa. Misa sia kai fifau ufara tinoo taanoo riqa rairaiqiaqa. Mi oosanafa sia anoonaikidanoo faiqí anaasee kuridi mariafa mi oosanafa maridanoo
2TI 2:15 Anee aneennara Anutuna afusaa anee afeekaikamandee maridana saika maree mariananoo Anutufa aniara maaqi qianifeera oo maa fasiqafa amiqimmandee qini saika uqeeraidanoo qini anoona ufa amiqimasee andeeqasee qimannimimarifa sia narí saikara oonumafi irinoo asauruanifeera.
2TI 2:16 Akaqausa ooqai Yisuna ufaki mariusa oosana oosana fifau faafau ufa uqeeree mariafaqa anee minara eerairia. Anutuna andeeqarufa sia minaki mari ufana dapi ufa narí qimami narí qimamira fee qinnufana faqa furufarira ufara faqa anee minara rufiasee nianasaa fua. Mi ufafa faiqí anaasee Anutufinnaindaraana mareeqee kaqirunna ubeekeemarifa maridanoo.
2TI 2:17 Mi dapi ufana qimannimimariasa ufa fannoo fidika namuanara foora firaaqoo amaqi naidanoo firaaqoo qaidanoo mi dapi ufana miqi qifanoo firaanaikiandoora. Miqira ufa qimariasa nuqu Qimeenaiusafa faqa Fireetusafa faqa miqanda anoona ufa qimaria aana minnisee unna qimasee aiqamausa kuqiranakiqari findifirafa ooqai taikanoo maridanoo fee qidaqa. Miqira ufannai Yisuna ufamau fimariasa akaqausa nikuamannimiafaqa saamuridaqa.
2TI 2:19 Misa miqira ufa fannoo sia amana Anutuna ufa aruannoo, faakanara foora arufinoo sia kasiannoo. Mi faakannasaa maa ufana akara rinoo maridanoo Karaambaiqa narí faiqí aanaaseera iridanoo. Ya faiqi anaasee fee nariara karaambaiqaindi fee qinafa mifa mandoosana ameesuquseenoo andeeqara oosana maraannoo. Anutuna ufa faakanara foora marina oosana miqi mminoo maridanoo.
2TI 2:20 Ainaina faqaasa maaqaki qafee disa kaafaina piritaina oosana oosana maridanoo. Akaqana siruaannai auqirafa maridanoo akaqafa koorannai auqirafa maridanoo akaqafa saqarinnai auqirafa maridanoo akaqafa maqannai auqirafa maridanoo. Akaqana amiqira difaaniki narana saka faiqí nimimariafa maridanoo. Akaqausa mandaikirafa kai madaapeenni marifa maridanoo.
2TI 2:21 Faiqí moo fannoo madaapeenni mari difaanifara foora marifa narí anukamasainanoo ainaina saka neemaria difaanifara foora amiqirafa mariannoo. Miqinanoo mina akoofa mareeqee amiqira saikaki quqaannoo.
2TI 2:22 Nimuqusa anukarausa maqee maqee karaambaiqa aaraidaqa dadaaqiannee qidaqa anee misa faqa misa naanna raidana kumaaraa mandainainara nidiranara eerairiaqa andeeqaranara afeekaikamasee afaqaaqa, Yisunasaa irirana rusirana faqa faiqí aanaaseera nimuqusirana faqa naunduraki asooarana faqa afeekaikamasee afaqaaqa.
2TI 2:23 Furufarira ufa, dapi ufa rainarafa minauqara eerairiaqa. Miqi qimariasa aiqama kari aanooqiranaki aqufidaqa.
2TI 2:24 Anutuna ainainira fasiqa fannoo sia ufa rainainnanaki keeqaani. Mifa aiqamausara reendeenamandee ireeda kai qimannimiani mifa amiqimasee ireeda kai fifimmasee Anutuna ufa naamuaqiani.
2TI 2:25 Mifa ireeda kai mina ufara qaoo qimariasa andeeqannimaqaani. Mifa miqinanoo abee Anutufa dadaaqiannoo fee misa quandaki anoona ufai ubeekeefaranoo fee.
2TI 2:26 Sadannafa narí ufaanaki mara arinoo narí iriranamau quqasoofaqa fimarufaqa misa anoona ufasaa ubeekaifanoo nári irirafa kambiqafinaqa Sadannana ufaanakiqari aruruduku fifaranoo.
2TI 3:1 Oo Timooti anee maa ufana aaqoo iria. Taikara aukuana manda aukuana afeeka aukuana mariannoo.
2TI 3:2 Mi aukuanna mi kamuqoo faiqí náriara kai irifaranoo kaaqa ainainara rimarifaranoo, náriara firaaqoo ufa qimarifaranoo, firaaqoo náriara nári nimooqimarifaranoo, misa mandufa faiqí anaasee qimannimi marifaranoo, misa nári ninausa nikausa ufa rukieefaranoo, misa nimira ainainara sia dufi dufi qifaranoo kai mareefaranoo, sia Anutunara irifaranoo mana mana kaimmifaranoo.
2TI 3:3 Sia faiqí anaasee reendeenama nimaqeefaranoo. Sia faiqí anaasee nifaueefaranoo. Misa moosara munuqi miniqifaranoo. Kaaqa faiqí narimarisa kaasau fainiara foora kaaqa faiqí narimarifaranoo. Misa andeeqarausara fidiaqaammifaranoo. Misa kaaqa faiqiara ueeqee mariasa misa irirana siaisa kaqi minaki rakeemasee fimariasa misa kaaqa nári nimooqiqa nári nuqu uqeeree mariasa. Misa niqaara ree mari ainainnara kai riqa Anutunara sia rifaranoo.
2TI 3:5 Misa amaana ufa sia irifaranoo nipatakai qumareefaranoo, anoona amuqusakinaana sia qumareefaranoo. Timooti anee miqi mariasara eerairamandee nianai maria.
2TI 3:6 Misakiqari akaqa fasiqauqa nariqa unna amaana ufa qianeera furufari maria anaaseesa mandoosana maree maru anaaseesa maaqaki oonureeqa unna amaana ufa qimannimiseenoo misa afapita qumareenoo misa firaafaikinoo marifaqa mi irirana siai anaaseesa nári oosana oosana mandainaina nidudusaa aruqaafanoo innee doo mi mau kai fuaqee qifaqa mi mau kai fidaqa.
2TI 3:7 Miqimari anaaseesa Anutuna ufa anoonara maqee maqee oosana oosana amaana ufaki randaidaqa sia anoona paquridaqa.
2TI 3:8 Ooqai Mooseefa Isipa maqusai Faraoona asaukukinaana Isaraee maqannaasa idukumaree fuaneera qufanoo Faraoona afunee fasiqaqanda nuqu Yaneesafa faqa Yambareesafa faqa miqanda Mooseena itita amaqaqau. Maa maqee maria unna amaana ufana qimariasa misa miqanda naanna raidaqa, Anutuna anoona ufa ititaidaqa. Misa Anutuna anoona iriranara kadiqaidaqa oorudupidaqa misa mi irirafa kuqiara foora inoo maridanoo sia kasidanoo.
2TI 3:9 Ooqai Mooseena aukuana Yaneesasa Yambareesasa miqanda furufarirana aiqamausa qafamasee misa ufa minnisaqau. Maa maqee maria unna amaana ufana qimariasa aiqama sia misa ufa irifara, misa furufarirafa akooqoo marifaqa minniseefara akaqausa kai irifaranoo.
2TI 3:10 Oo Timooti anee sia miqi marianafa anee qini naamuaqira ufamau kai fimarianafa qini oosana maree marianafa qinee fimarunnaqoo kai anee fimariananoo qinee Yisuna anoona ufamau fimariafannana anee qiqafoonafa mariananoo Anutuna saikasaara daruafaqa sia rakeemasee minniseeqa reendeenamandee kaqi miqoo marunana anee qiqafaananoo. Qinee faiqí aanaaseera qimuqusi mariafannana anee mina faqa qiqafoonafa mariananoo. Qinee kisaaqasaa Anutuna aanara afeekaikirana anee qafaananoo.
2TI 3:11 Qinee Anutuna ufasaara darirana faqa aupurarana faqa mareemarunana anee qafaananoo. Qinee Antiooka maqusa faqa Ikooniumma maqusa faqa Ristara maqusa faqa mi maqusanakiaqa fimariafanaqa misa dariqa fimarufaqa firaaqoo aupuraqa fimariqiafana. Anee minara faqa irimariananoo. Karaambaiqa fannoo mi ainainnakinaana qini asumu mara quqasoofaqa maridaqa.
2TI 3:12 Aiqama maqasaa qaraasa asauku mundiranasaa irirana rusiseeqa miqooqari Anutuna andeeqara oosana maraifaqa narirana aupurarana mareefaranoo.
2TI 3:13 Mandoosana maree mariasa faqa unnaqi maria fasiqausa faqa nári mandoosana maraqa fidaqa ootupaqa fidaqa miqiqa fifi ifaqa firaanaikifaranoo. Misa akaqausa nikaru qiafaqa kafaa misa quandaki nári faqa nikaru qifaranoo.
2TI 3:14 Oo Timooti anee sia misa naanna reemariananoo. Qinee Anutuna anoona ufa ani aamuaqiafannana amiqimmandee qumaroonnana mi mau kai amiqimasee fua. Anee yanasaaqari fee Anutunaindaraa ufa irira oosana mareenanee. Doo miqikaimmasee mi fasiqafa indee kai inana naaru naaru miqi kai ia.
2TI 3:15 Oo Timooti anee aanaaqisaa Anutuna naaquqara akarakinaa ufa irimarianafa mariananoo anee minara faqa iria sia aunua. Mi naaquqara akararufafa asumu marira irirana ani amiannoo. Mi asumu marirafa asauku mundiranaki maridanoo.
2TI 3:16 Anutufa qimannimufaqa akara rumaqoo ufafa maridanoo Anutuna ufa qimannimimaria fasiqausa mina qumaraifanoo minakinaa ufa fannoo nári naamuaqiannoo nári aaqaranara qaoo qiannoo, nári eendaandirana andeeqaannoo nári andeeqasee firana naamuaqiannoo. Miqi qimasee Anutuna ufa qimannimimaria fasiqausa andeeqasee amanaikinaqa Anutuna saika oosana oosana uqeeraaqa.
2TI 4:1 Oo Timooti qinee Pauroosa Anutuna afusaa faqa asauku mundirana kuqirausa faqa kaqi mariasa faqa aaquqimannimaqee marina afusaa faqa doori kandamasee ani faqa aaquqimamaqaidaqa. Yisufa kaifaa kooroomafi aiqamausa rakisianinnanara iriseeqa ani aaquqimamaqaidaqa.
2TI 4:2 Anee Yisuna amiqira fasaasa ufara faiqí anaasee qimannimia, narí qanaa fee kaqiqoo fee sandanainai qimasee qimannimia, anee misa iriaqaa iaqee qimasee qimanniminaqa misa iriaqa anee mandoosana maree mariasara qaoo qia, anee faiqí aanaaseera nifeeqaraidana poodua. Anee ubiqafi sanaasamasee faiqí anaasee qimannimia.
2TI 4:3 Qusasaa sia anoona ufa naamuaqirana irifaranoo misa nári manda nidimari ainainna kai afaqee fidaqa nári naaqookinaa manda irirana naamuaqimariasa misauqa kai moomoo nifiqasee innee mi manda irirausa kai qimaqimiaqee qifaranoo.
2TI 4:4 Misa anoona ufara nimeesuqusee kai fifau uriara kai naaqoo rammatini imariasa.
2TI 4:5 Timooti misa miqimarifana anee aneenna kasoomambi ubiqafinana misa ani ariranee aupuraranee amimarifana kaqi kai fua. Amiqira fasaasa ufa naamuaqira saika maqee maqee marana fua, anee aneenna aiqama saikaki maridana Anutuna ainainira faiqi maridaqee qimasaidana marana fua.
2TI 4:6 Oo Timooti anee iria doo qini fidika ruqiqa qimaqeefandinnafa doo ani maridanoo. Doo qusasaa misa qini darifaqa qinee maa mariranakiqari doo taikasee fifuanauranoo.
2TI 4:7 Doo qinee amiqira rakiranakiara foora rakumaree uriqaramafiara foora mafiqa. Doo narí amani narí amanira sandaranaki qimudaanaiqimaseeqa sandaqa aniifaqa doo taikarana paquriqa. Qinee Anutuna ufa faqa marirana faqa andeeqasee qumaree sandeeqa taikarana aniree paquriqa.
2TI 4:8 Doo maqee sandaida uriqareemariasa feefauru qiniara deedaqinoo maridanoo. Karaambaiqa andeeqasee ufa nimimarifa qumira faasaana andeeqeemariasa qafee qini qikiaaqa afisuannoo. Mikari sia qini kai qimiannoo, moomoosa minara nidimarisa mina koorooiranara afeesidaqa nidimarifaqa afeesimariasa misa faqa nimiannoo.
2TI 4:9 Oo Timooti anee kaqi kaqi mindari aniree qiqafaa.
2TI 4:10 Deemasafa maa maqa maaqanakinaa ainainara kaaqa ridanoo qini minniqiseenoo doo Teesaroonika maqusai finoo Kareeseenasafa doo Karatia maqa maaqai finoo, Titusafa Daramatia maqa maaqai finoo.
2TI 4:11 Rukaafa sia rumbaranaki marifa kaqi marifa mifa kai qini faqa maridanoo. Anee Marikoona afiqee minisainanoo Anutuna saika qini dadaaqiani.
2TI 4:12 Tikikusafa qini faqa marina qinee doo aqiqaunanoo Eefeesusa maqusai finoo.
2TI 4:13 Qini suara qamunna Tarooasa maqusai faiqí moo auqu Karapoosana maaqaki quqaqaafannana anee aninana aimaree ania. Qini papiqauqa faqa qini akara papiqa faqa aimaree mini qimia.
2TI 4:14 Areesandeerafa mifa qainna faqa koopaa faqa auqimarifa mifa narí mandoosana mareenoo qini firaaqoo mandaikamaqimaqeenoo, mifa firaaqoo maasa qimannimira ufara akooqaidanoo anee faqa firaaqoo minara eerairia. Anutufa miqimarina akiaqara arirana mina amiannoo.
2TI 4:16 Qinee Roomma maqannaa kootaki indaaru kamu mariafananoo sia moo fannoo qini dadaaqinau aiqamausa qini quqaqisee sandamafufaqa qeeqaraa kai kooti mariqiafana. Qinee Anutunara sia mina akiaqara nimiannee qidaqa.
2TI 4:17 Misa fufanoo Karaambaiqa kai qumee qini pooduqee marufaqa qinee kootaki kikiqamafi Yisuna ufa aiqama amiqimasee aanaamuru aiqama qimannimiafanaqa iriqau. Miqimasaafananoo Anutufa kaasau aandau ookinaanara foora qini rafieenoora foora inau.
2TI 4:18 Karaambaiqa fannoo oosana oosana mandainainakinaana qini mareeqeenoo narí innaaruna ququsaki amiqimasee quqaqisaannoo. Mina areenarafa naaru naaru mariani, kuqaa.
2TI 4:19 Anee Pirisikira nammarifa faqa narí afaaqi Akuiraana faqa nimandaa, Ooneesifoorusafa faqa narí faiqi anaasee faqa nimandaa.
2TI 4:20 Erasatusafa Koorinti maqusai miqoo kasooinoo marinau Taroofimusafa aurimarufaqa Mireetusa maqusaki quqaqiafana.
2TI 4:21 Suara aukuana aniannoo anee naaree amanamasee qafeenana ania. Eeuburusafa faqa Pudeenasafa faqa Rinusafa faqa Karaudiafa faqa maaqoo maria qikaqaafasaasa faqa aiqamausa Timooti ani amandaidaqa.
2TI 4:22 Karaambaiqa maraquna fannoo ani faqa mariani Anutuna afaarirafa inni aiqamausa faqa mariani.
TIT 1:1 Qinee maqasaa fasiqa Pauroosa Anutuna ainainirannai diqiqoosa maridaqa. Asauku mundirana Yisuna ufa anindiri irimarunausa maridaqa Titusa animma akara rumamaqaidaqa. Rusandeesamumasee Anutufa qini qumareeqeenoo narisaa mundimariasara mapuku nimaqaaneera qifaqa ufa nimidaqa. Anutufa qiniara misa mareeqee Yisuna kuqaa anoona firaa iriranaki mara quqaannee qifaqa miqidaqa.
TIT 1:2 Mi kuqaa irirafa naaru naaru mariranaki fifandinnanasaa mundinoo mari irirafa maridanoo. Anutufa sia unna qimarifa anoona ufa qimarifa naaru marirana maasa qimiraree qinau. Ooqai maa maqa maaqafa sia maru kamuqoo mi kamuqoo kasooqaqee maasa qimiraree qima afeekaikinau.
TIT 1:3 Mifa ooqai naaru marirana kasooqaqee qimiraree qunara doo maqee maa fasannai andeeqara aukuannee qimaqoofa mina anoona Yisufa maa fasannai doo kooroo inoo maridanoo. Anutufa maasa mandainainakinaana qumaree marifa firaaqoo qimaqimina mi ufana qimannimidaqa.
TIT 1:4 Titusa qinee ani qimamiafannana anee aneenna irirana Yisunaki quqoonafa mariannanara qinee aniara qini qimaaku fee qidaqa anindiri Yisuna iriranamau fimarunnanaki keeqee marunnanara maa akarana ani rumamaqaidaqa. Yisufa asauku mundirafa maasa asumu maree marifa maridanoo. Mifa faqa mina akoofa Anutufa faqa narí afaarirana faqa narí asooarana faqa ani aaku amaqaani.
TIT 1:5 Qinee ufaasu Kareetee afumaki ani Titusana mafi aiseeqa fiqa. Anindiri miqoo maridaqa moomoo ainaina sia andeeqaranaki ani mafi aiseeqa anee mina andeeqaa. Anee maqusa maqusa Yisuna ufa irimariasasaa rakisirausa paqurimasee misa rakisirausaikia. Miqianneera faqa ani mafi quqeeqa.
TIT 1:6 Qinee Pauroosa aamuaqira ufa indaaru qimamiafannana Titusa anee sia aunua doo miqoo kai fua. Qinee maaqi qimasee qimamiafannana anee faqa maa ufana qimanniminaqa misa iriseeqa maraaqa. Yisuna ufa irimariasasaa rakisirausa sia moo aaqarafa misaki mariani. Andeeqarausa kai mariaqa, moodaa anaasee faqaafa mariannoo. Mina faiqi namu Yisuna ufa irimarinausa mariaqa sia kaukaata qimarinausa mariaqa, sia ufa rukiee marinausa mariaqa.
TIT 1:7 Yisuna ufa irimariasasaa rakisirausa Anutuna ainainiranasaa rakisirausa marianara sia moo aaqarafa misaki mariaqeera qidaqa. Misa sia aanooqirausa mariaqa. Sia qusasaa rakimarinausa mariaqa. Sia nammari namasee furufari mariasa mariaqa, sia dauni rakirana uqeerarausa mariaqa, sia ainaina munnimmara kaaqa nimuqusirausa mariaqa.
TIT 1:8 Yisuna ufa irimariasasaa rakisirausa afaarimariasa faqa kasimariasa faqa mi marirana marinausa kai mariaqa. Misa andeeqaranara kai rimariasa mariaqa. Misa nári naundura faqa nimanara faqa irimarinausa mariaqa. Misa andeeqarausa faqa anukarausa faqa nári marirana andeeqasee marifaqa mariaqa.
TIT 1:9 Yisuna ufa irimariasasaa rakisirausa misa amiqimasee Anutuna ufa anindiri qimannimiafannana irisee qumaree marinausa mariaqa. Misa Anutuna anoona ufannai pooduqainaqa akaqausa aaqara ufa qinausa iriseeqa quandafi andeeqasee nári manda oosanara qimannimiaqa.
TIT 1:10 Titusa anee saiki marianna maqusanakinaa fasiqa anaasee moomoosa Yisuna ufa irisee quandakifaqa noori rumbara andaama aanna ree mariasa marifaqa maaqanda ufa rukiasee moomoosa faqa nifiqeeqeenoo kaqirunna ubeekaidaqa nariqa mandoosanara qimannimiaqee qidaqa. Yuda maqanaasa kaaqa miqi mariasa maridaqa nári ufakiqari Yisuna ufasaa munduseeqa quandaki nári faqa akaqausa faqa nifiqamaree kaaqa kaqirunna ubeekee mariasa maridaqa.
TIT 1:11 Misa ufa taikaani fee qidaqa. Misa faiqí narí anaaqa faqa narí faiqi namufaqa mareeqeeqa munnimmara kai iriseeqa nisauruaqaana oosana oosana mandainainaki quqeemariasa maridaqa.
TIT 1:12 Moo Kareetee maqannaa fasiqa fannoo nariqa ufa qidanoo akara rimaru fasiqa fannoo ooqai kuqufa maaqi qimasee narí maqannaasara qimasee akara rinau. Kareetee maqannaasa maqee maqee unna ufa qimariasa maridaqa, kaaqa mandoosana maraidaqa fainiara foora imariasa maridaqa. Kudiki mariasa kaaqa narana moomoo neemariasa maridaqa.
TIT 1:13 Qinee Pauroosa minara maaqi qidaqa. Mi fasiqafa narí maqannaasara doo kuqaa miqi mariasee qinau. Titusa anee faqa minara irisee kooroomasee rakeemasee nimambaina qimasee aranaiqi qimannimia. Miqi qimasainaqa Kareetee maqannaasa sia kaqirunna fuaqa Anutunasaa saqarikirafa afeekaikamafi maridaqa anoona ufasaaqari quandaki unna ufa qimariasa naakapaifaqa sia misa naakaparana iriaqeera.
TIT 1:14 Yuda maqannaa uri ufa faqa anoona ufa minnisee mariasa sanda ufa faqa sia iriaqeera nimambaina qimasee qimannimianneera qimamidaqa unna ufa minnisaaqeera.
TIT 1:15 Qikairi siaisa aiqama ainaina qafamaseenoo minakinaa manda oosana sia irirai minakinaa amiqira oosana kai qafamasee minara asasidanoo. Nári maraquna kuqirausa nári marirana irirana putaa irausa anoona ufara sia fee qimasee aiqama ainainara mandaikinoo maridanoo fee qidaqa. Misa náriara maasa Anutunara iridaqee qimariasa.
TIT 1:16 Amiqi mariasa anirarisameeqee mandaki quqeemariasa misa nári nookiqari maasa Anutunara iridee qimasaidaqa quandaki nári auqee maria ainainafa moomau fimarifaqa maasa qafamasee unna qidammiafoo qidaqa. Faiqí aanaaseera fidiaqaaimariasa ufa rukiee mariasa mi manda fasiqausa maridaqa. Amiqira saikara sia amanaiki mariasa maridaqa.
TIT 2:1 Titusa doo misara qiqa maqee aniara qianaura. Anee Anutuna ufa amana kai qimannimidana mina marirana amana kai Kareetee maqannaa fasiqa anaasee qimannimia.
TIT 2:2 Faiqí firaasa maaqi qimasee qimannimia. Irirana faqaasa mariaqa, noori kandamasee mariaqa nári naundura nimanara oonumafi irimarinausa mariaqa. Nári Yisuna saqarikiranasaa mundufi mariaqa. Nariara nariara uriqarara ainainee qimasee nimuqusirafa mariani. Sia tipuqi mariasa naanna ramasee mariaqa reendeenamandee ubiqasee mariasa naanna raqa mariaqa.
TIT 2:3 Anaasee firaasa faqa miqi kai masee maaqi qimasee qimannimianaqa, misa marirana anukara anaasee kammambiqa mariaqa, misa moosara nifai sanduri mariana sia miqiaqa, sia manda nammarinnai nidudusaa aruaqa. Misa fuka aanaaseeuqa amiqira oosana uqannifiqasee naakapamasaifaqa misa nári nifaaqiara ruaqeera nári faiqi namuara faqa ruaqeera. Misa nári naundura nimanara iridaqa mariaqeera. Misa anukara anaasee mariaqeera misa amiqimmandee nári nifaaqi faiqi namu qumiasana ainainasaa rakisirausa mariaqeera. Misa afaaridaqa amiqi marinausa mariaqa. Misa nári nifaaqmaaka ufara eedoo qimarinausa mariaqeera Titusa anee qimannimia. Misa miqiqa marifanoo akaqausa ani nindafeeqa sia Anutuna ufara mandainainee qiaqeera.
TIT 2:6 Titusa anee miqi kai mandee kumaaraa faqa maa ufana qimanniminaqa, misa faqa nári naundura nimuqusa amiqimasee mariaqa.
TIT 2:7 Anee aneennara faqa aiqama ainaina amiqimmandee marinaqa misa ani qafeeqa miqimandee mariaqa. Anee kuqaa uqanna oori runusee maridana misa naakapamasee qimannimia.
TIT 2:8 Anee mapukirufa kai qimanniminaqa sia quandafi aniara fifau faafau ufa qiifoo qifaranoo. Anee mapukira ufa qimanniminaqa aniara nikooqee mariasa ani namuqaa faqa kaukaataqira ufa qianneera mina oosanara randeeqa nisaurifaranoo.
TIT 2:9 Doo aniara qiqa maqee feefauruara ainaini mariasara qianaura. Feefauruara ainainimaria fasiqausa anee maaqi qimasee qimannimia. Misa nári rakisirausa ufara sia rukiaaqa eedoo kai qiaqa. Nári rakisirausa asasiaqee ainainakaimmiaqa. Misa nári rakisiruasa ufa sia ati raqannimiaqa.
TIT 2:10 Misa sia nári rakisirausa ainaina qummuariaqa. Maqee maqee amiqira oosana kai maree mariaqa ainainira faiqiuqa andeeqasee marifanoo misasaa rakisirafa misaki afaaqa quqasee mariani. Ainaini maria faiqisa miqimandee amiqimmandee maridaqa aiqamausa Anutunara maasa innaarunai asumu marirana nimimarifa mina naakaparanara amiqiranee qimasee maasa faqa marararee qiaqa. Miqinoo marinara maa kamuqoo Anutuna afaarirana kooroomminoo maridanoo. Minannai aiqama maqannaasa innaarunai asumu marirana nimirafa doo kooroomminoo maridanoo.
TIT 2:12 Anutuna afaarirafa maanara daakapaidanoo. Oosana oosana ainaina sia Anutufinnai ubeekanoo mari ainainnara minnisaaqee qidanoo. Maa maqanasaaqaraa ainainara kaaqa rimariana nimuqusirana doo quqaaqee qidanoo. Maasa maa maqanasaa marunnaqoo qeeqa qimanara qeeqa daundurara iriseeqa aiqama ainaina sia maraa qee qidanoo. Anutuna afaarirafa maa maqanasaa marunnaqoo maasa nirana marirana kuqaa kai qiaqee qidanoo. Maasa maa maqanasaa maridaqa Anutuna fooqaa marirana qiaqee qidanoo.
TIT 2:13 Maasa miqiqa fifi iqa Yisuna innaarunaindari koorooira faasaanara asasammasee maaqoo afeesida mariaqee qidanoo. Mi faasaanna maasa Anutufa, maasa mandainaina numoo arusee innaaruna asumu marirana nimianinafa, Yisufa, Anutuna asauku mundirafa, firaa kaaqa qaranakiqari, quriqararanakiqari koorooiannoo.
TIT 2:14 Mifa maasa kuqirana nariara maraseenoo maasa sia maraaqeera maasa kuqiranaki mifa keeqanau. Sia fifaufau kuqinau. Maasa qeeqa mandainainakinaana mareeqeenoo maqee kamuqoo narí kaaqa qara andeeqara fasiqa anaasee kammannimaqaaneera kuqinau. Maasa minaindikuqanna iaqeera, maqee maria kamuqoo amiqira ainaina kai maasa aruqarara rimariasaikamma fuaqeera kuqinau.
TIT 2:15 Titusa anee mi ainainna maqee qinee qunna ainainna faiqí anaasee naakapaa. Anutufa ani qimaminara sia rufiaa. Afeekaikamasee qimannimia. Aneenna afeekaikamambinana fuki faaki qidana amiqira oosana andeeqara oosana maraaqeera qimannimia akaqausa mandoosana mareefoora qaoo qia. Aniara manda faiqi fee kaqikaa faiqi fee qifoora, Anutuna ufasaa afeekaikamafinana andeeqasee qimanniminaqa sia miqiaqa.
TIT 3:1 Titusa anee maa ainainnara faqa maqee maqee Kareetee maqannaasa naaqoo auqaina iriaqa. Misa kaamanna rakisirausara maasa uriqararausee qimasee eedoo kai qiaqa. Aiqama misa amiqira ainainiranara qifaqa kasi kasi kai iaqa.
TIT 3:2 Maa ainainnara faqa qimannimia. Misa sia mandufa moonara qiaqa. Misa reendeenira oosana faqa aqoondikira oosana faqa kai maraqa nuaqa. Misa aiqama fasiqa aanaaseera reendeenamandee kai aiqama ainaina iaqa.
TIT 3:3 Ooqai maasa faqa misa naanna raidaqa, furufariaafanausa maridaqa, ufa rukiee mariafanausa maridaqa, maasa kaqiruna ubeekeeaafanausa maridaqa, maasa faqa daundurakina qidudusaa arirafa qiqa qifaaqa rumbeeusa idukuqoosa maridaqa, maa maqanasaa amiqi amiqira ainaina fannoo maasa rumbeeusa maasa faqa aiqama aukuana qifai sanduriaafanausa maridaqa, moona ainaina qafaafananoo qimuqusidanoo qimukeeusa maridaqa, maasa faqa moosa nindafaafananoo fidiaqaamma nimaqee mariafanausa maridaqa, misa faqa maasa qiqafoofanoo miqikai inoo fidiaqaamma qimaqeemariqau.
TIT 3:4 Anutuna maasa asumu maraaninafa narí afaarirana faqa narí amuqusiranannai faqa akooroomaseenoo miqoo mifa maasa unnaqira manda ainainakinaana mareeqeenoo kaqinni quqannisanau, manda ququsaki mariafannana.
TIT 3:5 Sia maasa amiqira saikafau Anutufa qafamaseenoo mina akiaqarau maasa asumu maranau narí amuqusiranannai kai maasa asumu maranau. Kaifaa aanaaqi aanaaqi kammafirana mifa nammariara foora maasa findaukamannisanau. Minannai Anutufa maasa asumu maranau.
TIT 3:6 Anutuna naaquqara andeeqara maraquna fannoo Yisunannai maasa asumu maraaninnanasaaqari maasa unnannai anidanoo firaaqoo maasa daakuqimaqaidanoo.
TIT 3:7 Miqunara Yisuna afaariranannai kai maasa Anutuna afusaa andeeqarausaikiqa maridaqa naaru naaru marirana maraidaqa, asasidaqa afeesidaqa maridaqa.
TIT 3:8 Mi ufana anoona ufa kai qimamidana aninna irirafa minasaa rusimari ufafa maridanoo. Titusa qinee Pauroosa maa ufana faqa ani qimamianana anee Anutuna ufa irimariasa qimannimia. Misa sia fifau faafau ufa kai ida mariaqa. Misa aiqama kari andeeqara ainainiranaki maridaqa auqaaqeera qimanniminaqa maqee maqee minaki kai mariaqa. Mi ainainirafa aiqama fasiqa anaasee dadaaqi marifa maridanoo, anee mina uqeerasee afeekaikia.
TIT 3:9 Anee Anutuna ufa nimidana narafumau narafumau qinnanaki sia minaki aqufua. Saina aaduma mariani. Moo fannoo narí akeeku akaaku oosana oosana ufa qinafa sia anee minaki aqufuani, anee kaqinni maria. Mooseena sandufasaara tinoo taanoo riqa rakinausakina minaki faqa anee sia aqufua. Maa ainainna auqeemarinakina sia anoona faina fifau dapi ainaina auqee marinnanaki sia minaki aqufua.
TIT 3:10 Anutuna ufa qimariasakiqari moo fannoo mandoosanara sandanainai qimarinnana qaara kari kai aaquqira ufa qimamia. Kafaa fee qinana doo mina ameesa uqamaqaa.
TIT 3:11 Miqi mari fasiqana irirafa furufarirafa maridanoo. Mina mandoosana fannoo mina aaqarana koorooidanoo narí faqa narí aaqaranara faqa iridanoo.
TIT 3:12 Qinee Pauroosa Arateemasana fee Tikikusana fee anee mariannaqoo niqiqaana ani saikasaa oonu rakisifana anee Nikoopoorisa maqusai kaqi kaqi fua. Suara uqi mari aukuana qinee Nikoopoorisa maqusa oonu marianauree qidaqa. Anee amanaikinana miqoo oonuree qini paquria.
TIT 3:13 Anee Kareetee maqa maaqai kaqi maridana Seenaasifa irirana akoofasa marufa faqa Apooroosifa faqa nári finnannai fifana anee faqa miqanda dadaaqia. Moo ainainara miqanda sarauqifana kaqi mara nimisee dadaaqinaqa amiqimasee fuaqa.
TIT 3:14 Maasa niqoondi Kareetee maqannaauqa sia nisauku raqandaamasee mariaqeera naamuaqiaqa. Misa maqee maqee maqasaa anoona ainainirana kasi kasida niqoonausa faqa dadaaqi marinanaki maridaqa nári anoona ainaina auqee marianaki faqa maridaqa akaqausa niqoonausa naida nimiaqeera qimannimia. Miqimasainaqa misa saika sia fifau irairaaiani anoona kai kambiqaani.
TIT 3:15 Aiqamausa qini faqa maria fasiqausa ani Titusana amandaidaqa. Yisunasaa mundimariasa anee marianannai mariasa maasara rimariasa anee misa faqa nimandaa. Anutuna kaqi nimirafa innisaa faqa mariani.
PHM 1:1 Oo Fireemoona qinee Pauroosa Yisuna saika ufasaara Roomma maqannaa karabusaki marunausa maridaqa Timootifa maasa qikaqa sia rumbaranaki marifa kaqi marifa qini dadaaqifaqa ani Fireemoona pasa akara rumamaqaidaqa. Maasa qiqoondi moodaa ainainiranaki marianafa Fireemoona ani faqa Yisuna ufara ani maaqaki suqi mariasa faqa maasa qisookifa Afiaa nammarifa faqa maasa Yisuna ufasaara moodaa rakiranara fooraki marifa Arakipusafa faqa inni aiqamausa akara rumannimaqaidaqa.
PHM 1:3 Anutufa maasa qikoofa faqa karaambaiqa asauku mundirafa Yisufa faqa Anutuna afaarirana faqa narí naundura asooarana faqa inniki nimiani.
PHM 1:4 Oo Fireemoona qini qikaqa qinee aiqama kari aniara Anutufinnai innaaru qidaqa dufi dufi qidaqa.
PHM 1:5 Anee karaambaiqa Yisuna saqarikiranara faqa Anutuna ufa iri mariasara aidimariannanara faqa maqee maqee iridaqa aniara dufi dufi qidaqa.
PHM 1:6 Qinee aniara maaqi qimasee innaaru qidaqa. Maasa asauku mundirana faqa moodaa aanna fimariasa amiqi amiqirafa firaafa maridanoo, anee maqee maqee akaqausa faqa Yisuna ufa naida nimiseenana anee maqee maqee mi amiqi amiqirana anoonara irianeera aniara innaaru qidaqa.
PHM 1:7 Oo qini qiqoondi qinee ani oosanara iriqa, anee Anutuna ufa irimariasara amuqusimarifana amiqi amiqidana asasirana nimimariannanara qinee minara iriseeqa qinee faqa asasirana firaana faqa pooduqarana faqa mareeqa.
PHM 1:8 Asauku mundiranaki maaqanda maridaqa qinee ani afasausa maridaqa paasoosammasee aniara andeeqara oosana maraanneera qimamianee qidaqa sia miqianaura nariara nariara rirafa didimarifaqa kaqimma iraanaura. Qinee Pauroosa asauku mundirana Yisuna aanaiqikirausa mina ufa akiaqara Roomma maqannaasa rumbaranaki marunausa sia qimamianaura kaqimma Ooneesimusanara iraanaura.
PHM 1:10 Qinee maaqoo rumbaranaki marunanoo ani ainainira faiqi Ooneesimusafa aniroofaqa Yisuna aufakiana qimamunanoo Yisuna saqarikifaqa qinee minara qini qimaaku fee qimaseeqa mina akausee qidaqa. Mi fasiqanara aniara iraanaura.
PHM 1:11 Mina auqu Ooneesimusafa mi auquna oosana maaqi qinoo maridanoo amiqimasee ainainira fee qinoo maridanoo. Ani ainainiranaki sia ainainifa doo maqee qini ainainiranaki narí auqu oosana uqeereenoo kaaqa ainainidanoo ani ainainiranaki faqa kaaqa ainainiannoo.
PHM 1:12 Doo qinee maqee anee ianannai aqiqeeqa narí faqa qeeqa qimuqusa namufaqa aqiqaunanoo finoo.
PHM 1:13 Anee Fireemoonafa maaqoo maridanau qini aqoondiuqa aniraifanau narana aina dadaaqini. Anee sia mariannanara Ooneesimusana rafaaqa fuanee runaisia anee ianannai aqiqaidaqa.
PHM 1:14 Sia qinee mina rafaaqafiranannai ani dadaaqirana oonu rarisaanaura anee aneenna kai iriseenana Ooneesimusana aqiqainanoo oonurandee qinee unnannai aniani. Anee eedoo qina kai kafaa maraanaura sia eedoo qinaqa kaqi marianaura.
PHM 1:15 Nanaree Ooneesimusafa ani saikakiqari quqasee sandanau fee. Anutufa qumeenni fuki faaki qufanoo fee ani saikakiqari aaqamasee quqasee maaqoo Roomma maqusai anireenoo irirana mara maree anirandeenoo naaruara amiqimasee ani faqa marianifeera Anutufa qumee mina aundurai kai saikinoofeeinau.
PHM 1:16 Sia maaqooqari fifau ainainiranaki marifa mariannoo maasa qifaaqasaa qikaqa qimuqusimarifa asauku mundiranaki marifa mariannoo. Qinee minara uriqarara ainaina firaafee qidaqa. Doo maqee ani ainainirana faqa ani karaambaiqaki mari akaqaafasaafa faqa marinara ani uriqarara ainaina firaa ainaina mariannoo.
PHM 1:17 Oo Fireemoona anee qiniara ani faqa moodaannaana fimarunausee qinana qiniara foora Ooneesimusana oonu mareeqee kafaa aneenna saikaki quqaa.
PHM 1:18 Indaaru mifa ani mandaikammamaqeenoo fee mifa ani munnimma mareenoo fee mina akiaqara qinee mina amianaura.
PHM 1:19 Qinee qeeqa qisaukunnai maa akarana ridaqa qimamidaqa qinee Pauroosa mi munnimmana akiaqara ani amianaura. Qinee fifau ani qimamida anee irimariananoo. Qinee marunnanara anee mariananoo. (Anee ooqai idaki fimarunaqa qinee ani mareeqee kaqi asumu mariranaki mara quqa amaqaafanausa maridaqa.)
PHM 1:20 Oo qini qikaqaafasaa karaambaiqara irisee amiqi amiqimmaqimaqa, anee asauku mundiranaki marianna qikaqaafasaana aanna ramasee Ooneesimusana kaifaa mareeqee aneenna saikaki quqaa.
PHM 1:21 Qinee maa pasana akara ridaqa aniara sia qinee iraunna ainainna kai qimiannoo fee qidaqa moo faqa moo faqa qimiannoo fee qidaqa.
PHM 1:22 Anee maa pasanakinaa ufa irisee Ooneesimusana kafaa quqaidana maaqa deedaqia, qusasaa Anutufa inni innaaru qirana irisee qini idukusainaqa anee innannai fuanaura.
PHM 1:23 Eepafaraasafa asauku mundirana Yisuna ufa akiaqara qini faqa Roomma maqannaasa rumbaranaki marifa mifa faqa inni nimandaidanoo qini faqa moodaannaana ainaini mariasa Mareekoofa faqa Aristarakusafa faqa Deemasafa faqa Rukaafa faqa misauqa faqa inni nimandaidaqa.
PHM 1:25 Asauku mundirafa Yisufa karaambaiqa mifa kaqi afaarirafa inni aiqamausaki mariani.
HEB 1:1 Ooqai Anutufa narí marunara moomoo kari moomoo oosanannai faqa narí tamummaqara fasiqauqannai faqa maasa Isaraee maqannaa qikeeku qikaaku narí marunara naamua qimannimimarinau.
HEB 1:2 Maa maqee inaaqianna kamu narí amaakunnai maasa qimaqiminoo. Minannai kai Anutufa maqa faqa innaaruna faqa minakinaa ainainauqa faqa auquseenoo narí amaaku aiqamausakinaana marasee rusandeesamumasee amianauree quna taikara aukuana aiqama ainaina saqama anindi kammiannoo fee qimaqoofa maridanoo.
HEB 1:3 Mifa narí akoona Anutunasaaqaraa areenarana firaaqoo rupannooidanoo mifa Anutuna oori afiri amudaani narí akoofara foora mina amanakai uqanna maridanoo, narí afeekufannai innaaruna faqa maqa faqa aiqama ainaina uqeera afeekaikamaqoofanoo maridanoo. Mifa Anutuna amaaku fannoo faiqí faiqi mandainaina maqasaa qumu anukama rukaseenoo narí akoona aaqa innaarunai aiqama ainaina uriqararana asauku uqannai ooru ooqumarinau.
HEB 1:4 Anutufa qangiroo firaa nuqu ramaseenoo, narí amaaku auqu firaa auqu misa uriqarara auqu ranau. Mina amana kai narí amaaku qangiroo firaaqoo urinnaaqararafa maridanoo.
HEB 1:5 Anutufa maaqi qimasee narí amaakuara qinau. Anee qini qimaaku mariananoo. Maqee qinee ani akausaikiqa maridaqa. Anutufa sia qangiroora mi ufana qinau narí amaakuara kai miqi qinau. Anutufa narí amaakuara moo ufa maaqi qimasee qinau. Qinee mina akausa marianaura. Mifa qini qimaaku uqanna mariannoo. Sia qangiroorau miqi qinoofau narí amaaku Yisunara kai miqi qinau.
HEB 1:6 Anutufa narí ooqa faiqi maa maqa maaqanaki quqarara maaqi qinau. Qini qangiroouqa aiqama mina amooqifandia foo qinau. Anutufa qangiroouqara maaqi qinau. Anutufa narí qangiroouqara ufaira foora auquqaifaqa maridaqa. Mifa narí ainainira faiqi idauru miqirana qangiroouqa auqusaifaqa maridaqa.
HEB 1:8 Anutufa qangiroouqara miqiaqee qinau narí amaakuara maaqi qinau. Oo Anutu ani ufa irira qaari naaru naaru mariannoo. Andeeqarana namufaqa ani ququsaki mariasa rakisida marianafa mariananoo.
HEB 1:9 Anee andeeqara oosanara rimarianafa mariananoo. Anee mandainainara fidiaqaa imarianafa mariananoo. Minara kai ani Anutufa ani aqoonausakinaana rusandeesamumasee maraseenoo firaanaikamandoofa maridana asasimariananoo.
HEB 1:10 Anutufa kafaa narí amaakuara maaqi qinau. Anee karaambaiqa mariananoo oosana aroo aukuana maa maqa maaqana oosana arasee auqunafa mariananoo. Anee aneenna asaukunnai innaaruna faqa minaki mari ainainna faqa auqunafa marianafa mariananoo.
HEB 1:11 Mi ainainausa doo taikafuannoo aneenna kai kaqi marinnaranoo mi ainainausa ooqai mariu qamunnara foora ooqeenaafaikamafinoo afauqaqaannoo.
HEB 1:12 Aiqama qamunna fuka mari ifanoo nauraanaikidanoo faiqí mina raqandaamma quqasee fuka akidaqa. Maa maqa maaqana faqa innaaruna faqa anee auquqoonafa miqi kai inoo qamunnara foora nauraanaikinana raqandaama quqasee fuka mareennaranoo. Anee sia qamunnara foora sia nauraanaikinnaranoo anee naaru naaru marianandee kai ina marinnaranoo.
HEB 1:13 Anutufa narí amaakuara kafaa maaqi qinau. Anee maaqoo qiqa daaqa qisauku uqannai ooqumari finaqa ani namuqaa narusee oonumafi ani aramandunnai quqaanaura. Sia qangiroora miqi qinau. Narí amaakuara kai miqi qinau.
HEB 1:14 Qangiroouqa naqi fee iqa maridee. Misa aiqama maraquna kai maridaqa Anutuna ainainira ainaina maridaqa. Mifa innaarunaindari niqiqainaqa faiqí anaasee innaarunai fifandinausa dadaaqiaqeera niqiqaidanoo.
HEB 2:1 Minara maasa anoona ufa irimariafannufana qumareeqa amiqimma rakisi qumaraanauranoo. Sia miqifanoo maasa nammariara foora aufinoo maasa maree fuandoora.
HEB 2:2 Ooqai qangiroo qimannimu ufafa kuqaa anoonaiki marinau. Qangiroouqa ririmma innaarunai ureeqarausa maridaqa faiqí moo fannoo misa ufa irisee rukiasoofanoo Anutufa mina akiaqara narinau.
HEB 2:3 Maqee innaarunai firaafa uriqararafa maasaki ani maridanoo. Mifa maasa qumareeqee asumu marirana qimiraree qidanoo. Maasa mi firaa ainainnara iriseeqa minniseeqa naqi fee mandee Anutunara rufiasee yaifee fuanauree. Sia amana, kaqi darirafa kai firaafa mariannoo. Karaambaiqa narí uqanna oosana arasee narí innaarunaindaraa asumu qimiranara narí faiqi namu qimannimisoofaqa irisee quandaki maasa qimaqimiafaqa kuqaa fee qimasee iridaqa.
HEB 2:4 Maasa sia misa ufa kai irisee kuqaa fee qidaqa Anutufa misa ufa dadaaqammasoofaqa faiqí sia amana auqaaqaa ira ainainna firaa ainaina oosana oosana faiqí anaasee dadaaqimaru ainainna auqusoofaqa maasa mina qafeeqa kuqaa fee qidaqa. Anutufa narí iriranannai kai narí maraqunannai kai oosana oosana fasiqa anaasee dadaaqira akoofasaikirana faiqí anaasee niminau. Miqunnannai faqa maasa innaarunaindaraa asumu marirana qimianinnanara kuqaa fee qidaqa.
HEB 2:5 Maasa naaru fuka anianinna maqa maaqanara qidaqa. Anutufa sia qangiroora innee minasaa rakisiaqee qinau. Faiqí faiqi maaqoo qaraasa kai minara rakisiaqee qinau.
HEB 2:6 Ooqeenaa tamummaqarausa akara minara maaqi qidanoo. Oo Anutu, faiqí nanee mariafanee anee misara iridanee, kaqi fifau fasiqara minaree ani amuqusidanoo fee.
HEB 2:7 Anee faiqí auqeeqeenana qangiroo ameemaanai qusa aukuana qusa kamu quqaananoo. Anee kaaqa qarana faqa uriqararana faqa Karaambaiqara foora marirana nimiananoo. Maa maqanasaa ainaina aiqama uqanna uriqararanaikirana Anutufa nimiananoo. Tamummaqara fasiqa ufa miqi qimaqoofa maridanoo.
HEB 2:8 Mi tamummaqara fasiqana ufa maaqi qidanoo. Anutufa maa maqanasaaqaraa fasiqara innee aiqama ainaina uriqararausa mariaqee qinau. Sia akaqa ainainara kaifau qinoofau. Aiqama ainainara qinoo. Maasa maqee qafaidaqa sia maqasaa fasiqa faiqifau aiqama ainainara uriqaraidaqau.
HEB 2:9 Maasa quandaki Yisuna kai qafaidaqa. Anutuna afaariranannai kai Yisufa naaru asumu marirana qimiraree qimaseenoo maasa faiqí faiqi kuqirana narí faqa maraani qimaseenoo qangiroo nimeemaanai qusakamuqoo qumu maridanoo kuqunnimaqanau. Maqee mifa kaaqa qara qafee faqaafa, kuqaa firaaqoo uriqararafa maridanoo. Mifa kuquna faqa aupuroona faqa mina akiaqara innaarunai firaafa maridanoo.
HEB 2:10 Anutufa aiqama ainaina auqufa rakisinoo fimarifa maridanoo. Mifa aupurarana aidafirana Yisuna afaaqasaa quqoofa sia manda oosanau quqanau. Amiqira oosana andeeqara oosana mareenoo miqinau. Anutufa Yisunara andeeqara anoona marianifeera quandafinoo faiqí narí uriqararana naida nimianifeera aunirira saqarisaa aupurarana Anutufa aminau. Narí Yisufa mifa kai faiqí faiqi innaarunai asumu mariaqeera aana afisufa maridanoo.
HEB 2:11 Yisufa faiqí faiqi maraseenoo nári mandainaina findaukamaseenoo anukaranaki quqannisee marifa maridanoo. Mifa faqa ninukamaqaisa faqa moodaa nikoona faqaasa marianara Yisufa misara sia asauridanoo qini qikaqaafasaa fee qidanoo.
HEB 2:12 Yisufa minara maaqi qimaqoofa akaraki maridanoo. Oo Anutu aniara qeeqa qikaqaafasaa qimannimianaura. Qinee faiqí suquseeqa misa nifusaa ani amooqianaura.
HEB 2:13 Kafaa moo akaraki maaqi qidanoo. Qinee qeeqa irirana Anutunasaa rusianaura. Kafaa moo akaraki maaqi qidanoo. Doo qinee maaqoo maridaqa Anutufa qimu faiqi anaaqisa misa saimbaqa maridaqa. Akarakinaa ufa miqiminoo maridanoo.
HEB 2:14 Yisufa maqasaa fasiqa anaaseera narí faiqi aanaaqi fee qidanoo. Mi faiqi anaaqisa nimaqi faqaasa fidika faqaasa maa maqanasaaqaraasara Yisufa qidanoo. Yisufa narí uqanna qumureenoo faiqi aanaaqi Mariana aranandaki maasa faiqí faiqi fidika qimaqi mareenoo innooqanau. Mifa sia fifaufau miqinau. Narí kuqiranannai kuqirana rakisirana Sadannana rafaaqafuanifeera maasa qimaqi faqa fidika faqa maranau.
HEB 2:15 Yisufa kuqirana rakisirafa Sadannana rafaaqafuseenoo aanaaqisaaqari kuqiranara rufiasee rumbaqa maria fasiqa anaaseesa idukunnisaaneera kuqunnimaqanau.
HEB 2:16 Sia Yisufa qangiroouqa dadaaqidanoo. Faiqí faiqi dadaaqidanoo mifa akooqoo maridanoo. Moo akara fannoo minara maaqi qidanoo. Mifa Abarahaamana aiku asauku dadaaqimarifa maridanoo.
HEB 2:17 Yisufa narí akaqaafasaauqa maa maqanasaaqaraaasa dadaaqianee qimasee amiqimmandee misara maqi qiara mambiqa amiqimmandee misa aanaiqikianeera miqinau. Sia fifau Anutuna ainainira aanaiqikirafa mariannoo maqee maqee narí akaqaafasaa nifauee marianinafa oori runusee miqoo kai marianinna aanaiqikira uriqararafa mariannoo. Anutufa faiqí anaasee mandainaina minnisaanifeera Yisufa miqinau.
HEB 2:18 Indaaru Yisufa aupurarana aidafirana Sadannafa nimanamandee qafarana faqa doo amanamandee qafamaseenoo uriqaroofa maridanoo. Maqee minara maasa amiqimmandee dadaaqidanoo mifa doo mina oosana qafoofa irufa maridanoo.
HEB 3:1 Qini qikaqaafasaa innisaimbaqa Karaambaiqa aiku oosana marunausa maridaqa innee faqa qinee faqa Anutufa daarama quqasaifaqa ani mariasa maridaqa. Innee Yisuna qafaaqa qafaidaqa oonumafi iriaqa Anutufa aqiqamaqoofa maridanoo. Maasa qimarunna amaana ufana aanaiqikira uriqararafa marianifeera aqiqamaqoofa maridanoo.
HEB 3:2 Ooqai Mooseefa Anutuna aiku asauku Isaraee maqannaasaki aiqama ainaina auqeemaruna miqoo kai maridanoo oori runusee andeeqanoo kai marinau. Yisufa miqikai maseenoo narí asauku mundusee aqiqoofa Anutunara iriseenoo mina ainainirana andeeqaidanoo aidimarufanoo marinau.
HEB 3:3 Faiqí misa fuka maaqa qafamasee sia maaqa amooqidaqa faiqí maaqa usakai fasiqana kai amooqidaqa. Miqikai iqa, sia Mooseena amooqiaqa. Mifa fifau maaqa maridanoo Yisuna kai amiqimasee firaaqoo amooqiaqa. Mifa maaqa usakee marifa anoona uqanna maridanoo.
HEB 3:4 Sia maaqa moo fifau kambiqaidanoo. Aiqama maaqa usakeemarifa kai usakaidanoo. Anutufa mifa aiqama ainaina auqeemarifa marifanoo Yisufa Anutuna ameemaanai maaqa usakee marifa marinara Mooseena uraaqaranoo maridanoo.
HEB 3:5 Mooseefa Anutuna aiku asauku Isaraee maqannaasaki maqee maqee miqoo kai maridanoo oori runuseenoo andeeqanoo kai marinau. Mifa Anutuna ainainira faiqi maridanoo. Anutufa qimannimianinna ainainara faiqí anaasee qimannimimarufaqa irimariqau.
HEB 3:6 Yisufa sia kaqi ainainira faiqi maridanoo. Isaraee maqanaasa nikoofa amaaku uqanna maridanoo. Mifa Anutuna aiku asauku maqasaa mariasa rakisinnimaqee marifa miqoo kai mi saikanaki marifa andeeqasee misasaa rakisimarifa maridanoo. Maasa naaru naaru Yisuna saqarikidaqa minara asasidaqa paasoosidaqa miqidaqa maasa Anutuna faiqi namu mina aiku oosana marunausa maridaqa sia miqidaqa sia mina aiku asauku marunaiqini.
HEB 3:7 Anutuna naaquqara andeeqara maraquna fannoo maaqi qidanoo. Innee maqee Anutuna ufa iriaqa inni saimbaqa Isaraee maqannaa ninausa nikausa ooqai aadana maqa maaqaki fidaqa ititammasee ufa rukioondee innee siammiaqa. Misa Sinai aadana maqasaa Masaa maqasaa faqa Meeribaa maqasaa faqa nammari sia marunara Anutuna amanamandee qafaida naundaufa naundaufa qiqau.
HEB 3:9 Minara Anutufa maaqi qinau. Inni nikausa ninaakusa qini qimanammasee qafararee qimasaida munari minari idaqa qini qimaniqau. Qaara fasiqa aiku asauku taikasee aukuana aiqama amiqira ainaina quqannifiqaafanaqa qafeeqa mina minniseeqa quandaki moo ainaina kai mareemariqau.
HEB 3:10 Qinee minara iriseeqa qafamaseeqa maa Isaraee maqannaara qiranaqaidanoo. Qinee maaqi qimasee niqidaqa. Misa irirafa fifau faafau qidanoo aaqaidanoo. Misa kisaaqasaa qini faqa anidaqa sia qini oosana qafeeusa.
HEB 3:11 Qinee minara iranaqaifaqa maaqi qimasee qimafeekaikiqiafana. Sia uqanna misa qini faqa anusufiqa adooeefaranoo. Anutuna ufa miqiminoo marifaqa qinee minara maaqi qidaqa.
HEB 3:12 Qini qikaqaafasaauqa, innee amiqimandee rakisiaqa. Moo fannoo narí mandiriranannai faqa narí ufa rukiee marinannai faqa narí amuqusaki marinara kaqi marira Anutuna nimeesa uqamaqeefoora.
HEB 3:13 Maa aukuannasaqa innisaimbaqa kaqikai maridaqa maa ainainnara rakisiaqa, faasaambaasaana narí poodue̱e nári poodue̱e imariana. Innikina moo fannoo narí mandoosana fannoo rarisameeqee Anutuna ufara sia irianaki quqaandoora eerairiaqa.
HEB 3:14 Maasa indaaru paasoosamandee Yisuna qumareeqa. Maqeendari maqeesaa paasoosamasee Yisuna qumareeqa mina kai afaqaqa fifi inaqa taikainna aukuana qumarainaqa maasa mina faqa moodaanaki ainaini marunausara maqi mafiqa mina qumaraanaura.
HEB 3:15 Anutuna akara maaqi qidanoo, Innee maqee Anutuna ufa iridee sia fee iridee iriqa sia ooqai undee iaqa. Ooqai inni saimbaqa ninausa nikausa aadana maqa maaqaki Anutuna ufa irisee aanoo qidaqa mandufa qima rukiasee naaqoo siaisa mariundee sia maqee innee miqiaqa. Anutuna akara miqiminoo marifaqa qinee minara maaqi qidaqa.
HEB 3:16 Yau yausee Anutuna ufa irisee ufa rukiasee nimeesa uqiqau. Mooseefa Isipa maqanaindari nifiqee anusa misa kai miqiqau.
HEB 3:17 Yausaree qaara fasiqa niku nisauku taikasee aukuana Anutufa aanoomannimaqaannoo fee inau. Faiqí anaasee ufa rukiasee mandoosana maree marusa aadana maqasaa oonuree kuqu taikoosara misara kai aanoo qinau.
HEB 3:18 Anutufa misara maaqi qinau, Qini faqa anusufinausa sia uqanna qini faqa adooeefaranoo. Anutufa miqi qimasoofaqa qinee minara maaqi qidaqa. Mifa yausaree miqi qinoo fee. Mifa narufa iriseenoo rukiee marusara miqi qinau.
HEB 3:19 Maqee maasa mina qafamasee maaqi qidaqa. Sia naundura nimuqusa Anutuna ufasaa rusunara minara misa sia fuka maqa maaqaki Kannaa maqa maaqaki adooaranaki fiqau. Kaqi aadana maqa maaqaki kuqiqau.
HEB 4:1 Maqee maa aukuanna Anutufa maaqi qimasee qima afeekaikamma maasara qinau, Amana innee qinisaimbaqa qini amiqira adooqaranaki ani keeqafiqa qinisaimbaqa qidooaaqee qinau. Doo innisaimbaqa Anutufa aniaqee qimaqoo ufafa taikaandoora doo kaqi mariqoo amiqimasee rakisi qumaraaqa, sia keeqaannoo qimasee minara rufiaaqa maasaki moo mandainaina fannoo maasa qumarainaqa maasa sia mina adooaranaki keeqaanoora.
HEB 4:2 Ooqai inni saimbaqa Isaraee maqannaa ninausa nikausa Anutuna ufa iriqau. Maasa maqee doo irimmaseeqa amiqira fasaasa ufa maridanoo. Indaaru misa mi ufana iriseeqa aqummasaqau. Misa mi ufana naaqoonnai iriseeqa sia naundura nimuqusannai mi ufana qumaraqau. Sia minara kuqaa fee qimasee minasaa irirana rusiqau.
HEB 4:3 Maasa mi fasaasa ufana Anutufa qimafeekaikunara kuqaa fee qimasee minasaa rusiqa marunnanara maasa kuqaa Anutuna faqa keeqaidaqa mina adooaranaki adooaida adooaanaura. Mifa minara maaqi qimasee akaraki qinau. Qinee Anutusa maaqi qimasee aanoo qima afeekaikiafannana. Naaru naaru misa sia uqanna qini idooaranaki qini faqa keeqafi idooeefaranoo. Anutuna ufa miqiminoo maridanoo qinee minara maaqi qidaqa. Ooqai oosana aroo aukuana Anutufa kuqaa aiqama ainaina doo auqu taikasee adooamasee narí adooarana faqa quqannimaqasoofaqa irirana rukiasee sia keeqee sia iriqau. Anutufa minara iriseenoo sia kaqi fuaqee qinau, kaqi mifa maridanoo sia uqanna amana misa keeqeefaranoo kaqi kai qafa.
HEB 4:4 Akarakinaa ufa moo qisauku taikasee dinni ani qaara marasee faasaanara maaqi qidanoo. Anutufa narí kadaapirirana oosana oosana mi faasaanna quqasee adooanau.
HEB 4:5 Akarakinaa ufa moo idooaranara Anutufa maaqi qinau. Misa naaru naaru qinee maqa maaqa nimiannanaki, idooarana nimiannanaki sia qini faqa keeqafi idooeefaranoo. Anutuna ufa miqinoo marifaqa qinee minara maaqi qidaqa.
HEB 4:6 Indaaru marusa misa Anutuna amiqira fasaasa ufa irisee sia mina idooaranaki keeqaqau. Nariqa ufa sia irunnannai sia idooaranaki keeqaqau. Akaqausa Anutuna faqa keeqeefandinausa marianara moo keeqaaninna faasaana quqasee maqee kamuqoo fee qinau.
HEB 4:7 Indaaru aukuanasaaqari mi kamuqoo sia Anutuna ufa iriqau. Dafidifa kambiqoo aukuannai Anutufa Dafidina qimamufanoo maaqi qimasee akara rinau. Maqee maa faasaanna innee Anutuna ufa iriseeqa sia ititiaqa sia mana mana irirana iriaqa. Dafidifa mi ufana akara rinau.
HEB 4:8 Yoosuafa Isaraee maqannaasa nifieeqeenoo Yooradanna nammari taqamareenoo nári fuka maqaki idooaranaki quqannisanau. Anutufa sia mi idooaranarau qinau, moora qinau, Yoosuafa Anutuna adooaranaki quqannisainanoofau Anutufa sia moo faasaanara qini.
HEB 4:9 Mi moo faasaanafa kaqi maridanoo, Anutuna ufa irimaria fasiqa anaaseesa maqasaaqaraasa minaki keeqeefaranoo. Ooqai indaaru Anutufa aiqama ainaina auquseenoo qisauku dinni ani qaara maraseenoo amiqimasee idooanau. Mina fooqaa idooarafa kaqi marinaki Anutuna ufa iri maria fasiqanaaseesa keeqeefaranoo.
HEB 4:10 Faiqí anaasee moo fannoo Anutufa mariqoo keeqafinoo idooainafa mi fasiqa anaaseesa nári ummaara afaimma quqaseenoo amiqimma adooeefaranoo. Anutufa narí kadaapirirana minniseenoo idoo oondee mi fasiqa anaaseesa faqa miqikai iqa nári kadaapirirana afaimma quqaseeqa amiqimasee adooeeqa Anutufa undee ifaranoo.
HEB 4:11 Minara maasa sia ufa rukiasee manoo manaa iqanuaqa nimudaanai qimasee Anutuna faqa narí adooeemarinaki keeqaaqa. Sia moo fannoo maasaki ufa rukiasee innisaimbaqa Isaraee maqannaa ninausa nikausa naanna ree kaqinni aqufuaqa.
HEB 4:12 Anutuna ufa sia fifau ainaina maridanoo, afu maqee marifa kasimarifa maridanoo. Aseema miqirafa kaaqa dinni dinni firaaqoo raiqarafa naundurai ateekeemarifa maridanoo. Faiqí nimana faqa maraquna faqa moodaanaki marinaki miqoo faqa fimarifa. Nimudaani aqumu faqa akikimana faqa ruqiasee miqoo faqa fimarifa maridanoo. Faiqí naunduraki faqa nimuqusaki faqa nidimarina faqa oonumafi irimariana faqa minauqa faqa qafeenoo rainee marifa maridanoo.
HEB 4:13 Sia Anutuna afusaa moo ainaina kukeeqarana amana, sia amana miqiannoo. Aiqama ainaina faiqí anaasee Anutufa auquqoo ainainausa kai marinara narí afusaa akoosaqa akooqoo uqanna maridanoo. Maasa mi Anutuna afusaa qeeqa marunnanara andeeqaranara faqa aaqaranara faqa ufa qianaura.
HEB 4:14 Maasa aanaiqiki maria fasiqausa uriqararafa Anutufa narí mariqoo uqanna keeqafi maridanoo. Mi fasiqafa Yisufa Anutuna amaaku marinara maasa Anutuna amaana ufa qumaraunnana amiqimasee qumaraaqee qidaqa.
HEB 4:15 Maasa aanaiqiki maria fasiqausa uriqararafa maasa daunduraki ummaararee marifaqa maasa kudoosaapee marunnana sia sia qafee marifa maridanoofau, qafee marifa maridanoo. Sadannafa aiqama ainaina amanamasaifanoo sia mina qumaraifa qafamaqaifa kai maridanoo, minara kai maasara qimudaoo qimasee amuqusidanoo.
HEB 4:16 Minara maasa mifa daruaninnanara faqa sia rufia rufiaqiqa paasoosamasee mifa mari qaarinasaa oonu reera foora nári nifaueenoo amuqusianinnanara faqa qimiannee qiaqa. Miqoo kaqi nimirafa kaqi dadaaqirafa miqoo maridanoo. Maasa miqoo oonuraananoo Anutuna afauarafa amuqusirafa maasara mariannoo. Maasa ummaara faqa sarauqirana faqa darinnanara mifa dadaaqiannoo.
HEB 5:1 Maasa Heeburu maqannaasa faiqí misa aanaiqiki maru fasiqausa uriqararanara randasee paqurimmeeqee faiqí aanaaseesaaroo qianifeera Anutuna ainainiranaki quqaidaqa. Miqooqari mi fasiqafa faiqí anaasee mandainaina rukasainanoo Anutufa sia naruaninnanara iriseenoo maqee maqee amirainaina faqa aandau aruseenoo Anutuna tatufu suqa amirana faqa amidanoo.
HEB 5:2 Mi aanaiqikira fasiqafa faiqí faiqi maridanoo narí faqa amanna marinara faiqí anaasee furufarammasee aaqee marianara amuqusinanoo amana dadaaqiannoo.
HEB 5:3 Mi aanaiqikira fasiqafa mifa faqa faiqí kai maridanoo aaqee marifa marinara, sia faiqí aanaaseera kai aandau arusee tatufidanoo narí mandainainara faqa rukaanifeera nariara faqa Anutuna tatufuamidanoo.
HEB 5:4 Sia faiqí moo fannoo naríara uriqarara saikaki keeqaanauree qimasee naríara aanaiqiki mariasa uriqararafa maridanoo. Anutufa qifa kai aanaiqiki mariasa uriqararafa maridanoo. Mooseena afasaafa Aaroonafa ooqai miqi kai inau. Anutufa Aaroona aaroofanoo aanaiqikinau.
HEB 5:5 Yisufa asauku mundirafa miqi kai masee sia narí kai nariara uriqarara aanaiqikinau. Anutufa qunara kai miqinau. Mifa maaqi qimasee qimaminau. Anee qini qimaaku mariananoo. Maqee faasaana qinee ani akausaikammiqa maridaqa.
HEB 5:6 Miqi qimasee Anutufa kafaa maaqi qinau. Anee naaru naaru marinafa aanaiqikirafa mariananoo. Anee Meerakiseedeekana atiara foora marianafa mifara foora naaru naaru marinnaranoo. (Ooqai Meerakiseedeekafa Sareema maqusanaasa Anutuna faqa faiqí anaasee faqa aanaiqikirafa marinau.)
HEB 5:7 Yisufa maa maqanasaa Keetaseemanee saqamaki maridanoo aunirira saqarisaa kuquaninnanara Anutunara innaaru qidanoo qaoo qimirinau. Innaaru qidanoo firaaqoo faaqa rumaseenoo ikiraqaseenoo kuquaninnanara qaoo qimirinoo innaaru qinau. Anutufa mina reendeenirana qafamaseenoo mina aundura Anutufinnai ubeekaranara iriseenoo mina innaaruqirana iriseenoo dadaaqinau.
HEB 5:8 Yisufa nariara sia Anutuna amaaku fee qimasee mana maninau. Oosana oosana aupuraranannai Anutuna ufara aaqee kai eedoo qira oosana irinau.
HEB 5:9 Mifa aupuraranakiqari amiqiranaikamambinoo quandafi narí ufara eedoo qimarusa naaru naaru marirana oosanaraseenoo niminau.
HEB 5:10 Miqimasoofanoo Anutufa minara maaqi qinau. Anee aanaiqiki mariasa uriqararafa marianafa mariananoo. Anee Meerakiseedeekana fooqaafaikamambinana marinnaranoo.
HEB 5:11 Anutuna ufa narí amaakuara miqiminoo marifaqa qinee maa ufana inni qimannimidaqa. Maa ainainna afeeka ainaina maridanoo oosana oosana ainaina faqa inni qimannimianee qimasaunaqa innee anuqimariasa mariafanoo.
HEB 5:12 Innee faqa maqee faiqí uqannifiqaaqaana. Innee Anutuna akarakinaa ufa oosana ainaina faqa sia amiqimasee iri mariafanoo. Innee moosa qimannimiaqaaqoo sia amanaiki mariafaqa moosa inni qimannimidaqa. Innee ooqai narana uqanna naaqaana mariafanoo innee naamma naidara maqi kaimmimariafanoo sia innooqarausara foora mariafanoo.
HEB 5:13 Naamma neemariasa faiqi aanaaqi kai mariafanoo sia anoona ainaina manda ainainara rainasee iriaqaamminoo maridanoo.
HEB 5:14 Narana uqanna faiqí anaasee narana maridanoo. Misa doo akoofasa mariafanoo nimaakirisaa quqasee qafaidaqa mandaikinnana qafeeqa amiqirana qafeeqa miqidaqa akoofasa maridaqa. Innee faqa miqiaqaana. Qinee narana kikiqusidaqa amaana ufa qimannimira oosana miqiminoo maridanoo. Akoofasa fannoo iriseenoo rainaidanoo amiqiranara iridanoo mandaikiranara minnisaidanoo. Faiqi aanaaqi fooqaa fasiqa mifa mandaikirana faqa amiqirana faqa kaqi naannoo.
HEB 6:1 Maasa sia maqee marunnaqoo oosanaki kai maria, maqee doori mundusaannaqoo qambaanaira foora fua. Yisuna ufaki oosana ainaina aanaaqi kimarunnana inaaqiannai mafi quqasee doo maqee oorisaa fuanaura. Maasa qeeqa fifau aaqara oosana kadaapiriranannai innaarunai firaree qimarunnana mina minniseeqa Anutunasaa mundufuafannana doo maasa minara irimarunafa maridanoo. Nammari nimirana faqa asauku nikiaaqa mundusee nifaaqooqa qirana faqa kuqiranakiqari findifirana faqa naaru naaru idaki fimariana faqa doo irimariafanoo. Sia kafaa kafaa aanaaqiara foora naamma kai naidara foora ooqai iri maru ainainara kai kaifaa kaifaa minara kai iriaqa. Anutufa dadaaqimarinaqa maasa noorisaa findifinaqa indaaruara foora fidaqa maqee maqee Anutuna ufakinaana fuka iriseeqa mi mau fuanaura.
HEB 6:4 Anutuna ufamau fimariasa quandaki kaqinni aqufiqa naqi fee mandee aupuramasee quandakinaqa kafaa fifaree. Sia amana miqifara. Misa ooqai Anutuna qoomasaa fimariasa, misa innaarunaindaraa narana naidara foora imariasa maridaqa Anutuna naaquqara andeeqara maraquna mareemariasa.
HEB 6:5 Misa Anutuna ufa amanamandee qafamasee amiqira ainainara irimariafa maridanoo. Kasooqaqee Yisufa kafaa qumuaninna aukuanaki kambiqaaninna afeeka atiara irimariasa maridaqa.
HEB 6:6 Misa mi ainainausara nikooqaifaqa kaqirunna fidaqa sia amana misa kafaa aupuramasee quandakinaqa kafaa Anutuna aanai ubeekeefaranoo. Misa miqimariasa Anutuna amaaku kafaa aunirira saqarisaa quqasee pirimma aridaqa miqidaqa aiqamausa nifusaa asaurirana amidaqa miqi mariafanoo.
HEB 6:7 Anutufa maqa dadaaqidanoo aaku quqasaifanoo ridanoo maqasaa ainaini mariasa dadaaqidanoo narana minakiqari kambiqaifaqa neemariafanoo. Miqi kai masee faiqí anaasee Anutuna ufamau fimariasa misa Anutufa misa amiqi amiqiannoo.
HEB 6:8 Nimmuru faqa mandainaina amuka faqa mi maqanasaa kambiqafinanoo Anutufa qafamaseenoo fifau maqa maridanoo, qusasaa qinee mi maqana aquraraseeqa idakikai aquanauree qinau. Anutuna ufa minnisee mariasa miqi kai masee ida kai qamataikeefaranoo.
HEB 6:9 Maasa qiqoondi maasa inniara iridaqa, innee sia mina ufa minnisee mariasa mariafanoo. Innee Anutuna saqarikidaqa innaarunai asumu maree mariasa mariafanoo minakinaa amiqi amiqirana uriqararana innindi miqoo nifeedamma nimaqaqaifanoo maridanoo.
HEB 6:10 Anutufa sia qaaraiki marifa maridanoo, andeeqasee amana amana kai nimimarifa maridanoo. Mifa sia innee kadaapirinnana akiaqara aunuannoo, iridanoo. Innee Anutunara nidinara quandaki inneeqa niqoonausa Yisuna ufa irimariasara amiqimaseenoo nimuqusinaqa kaqi dadaaqifanoo Anutufa minara faqa sia aunidanoo, iridanoo mina akiaqara inni nimiannoo.
HEB 6:11 Maasa inniara maaqiaqeera inniara ridaqa. Inni Anutunara nidirafa asasirafa kasirafa miqiqa fifi inaqa taikainna aukuana kai mafi taikaaqa. Innee miqifanoo inni naundurakinaa nidirafa kuqaa anoonaikiannoo.
HEB 6:12 Maasa innee kudoosaapee foora qikooqaidanoo. Akaqausa nári irirana Yisunasaa rusiranannai faqa ubiqasee reendeenamasee marirana niranannai faqa ooqai Anutufa qima afeekaikammasee nimira naundura qumiasana doo maree mariafanoo. Maasa inniara misa naanna ramasee maridaqa naundura qumiasana maraaqeera qidaqa.
HEB 6:13 Ooqai Anutufa Abarahaamanasaa qima afeekaikammaqoona asauku uqeeraseenoo kuqaa miqianauree qimaqoona. Sia mina uriqararafa marunara narí asauku uqeeraseenoo yana auqu fee raanauree qusia narí auqu kai ramafeekaikinau.
HEB 6:14 Mifa maaqi qimasee Abarahaamana qimaminoo qinau. Qinee qima afeekaikammasee kuqaa amiqi amiqianaura. Ani aiku asauku akeeku akaaku faiqi maqannimaqaifaqa moomoo kambiqafi maa maqanasaa amanaikiqa marifaranoo.
HEB 6:15 Anutufa miqi qimasoofanoo Abarahaamafa mi ufana anoonara kisaaqasaa reendeenamasee afeesida marufanoo kasooqaqee uqanna Anutufa qimamu ainainafa koorooinau.
HEB 6:16 Faiqí moo fannoo qima afeekaikianee qimaseenoo asauku innaarunai uqeeraseenoo nariara urinaaqarara auqu ramaseenoo qima afeekaika maseenoo doo ufa qimaqoofa taikaidanoo.
HEB 6:17 Inaaqianna kambiqee mariasaki Anutuna qima afeekaikira marirana anoona mareefandinausa sia qini Anutusara qeeqa qima afeekaikiranara minnisee maqi qiaqeera misa qiniara kuqaa uqannee qimasee qiaqeera kooroomasee sia kai fifau qimafeekaikinau, narí auqu faqa ramaseenoo qimafeekaikinau.
HEB 6:18 Doo minara iriseeqa qaara ainaina, afeeka ainaina innikina kaqi mariannoo sia taikaannoo. Mi ainaina qanda moo ainaina Anutuna qima afeekaikirafa maridanoo. Moo ainaina Anutuna asauku uqeerarafa maridanoo. Mi ainaina qandara Anutufa sia amana unna qirafa mariannoo. Maasa Anutuna saqarikidaqa mina asumu mariranaki mariasa Anutufa maasa aranaiqi fuki faaki qidanoo maasa daikisaa marianinna innaarunai mariranara asasidaqa afeesidaqa mariaqeera qidanoo.
HEB 6:19 Maasa Yisunara asasira afeesirafa maasa qimuqusa sandara foora rakisiqumarainaqa mapukufi marifara. Yisunara asasira afeesirafa afeeka sandara foora sia rakeeirafa amiqirafa maridanoo. Maasa maa maqanasaa maaqoo marunnaqooqari mi sandafa firafa Anutuna naaquqara amaana maqaki firaa ititara qammunna tapooqaidanoo Anutufa innaarunai mariqoo kukeeqara maqaki miqoo dinni ati rumbanoo maridanoo dinni ati maasa maqasaa rumbanoo maridanoo maasa atukaramma qimaqaidanoo.
HEB 6:20 Yisufa miqoo maasasaa roo qimasee maasa doorinni indaaru ooru fufa maridanoo. Mifa miqoo aanaiqikirafa firaa uriqararafa naaru naaru marifa Meerakiseedeekana aanna rarafa maridanoo maasa kaqi dadaaqidanoo.
HEB 7:1 Meerakiseedeekafa Sareema maqannaa karaambaiqa marinau. Innaarunai uriqarara Anutuna karaambaiqa aanaiqikirafa faqa marinau. (Indaaru namuqaa karaambaiqa moomoo qumuree Soodooma maqannaasa faqa Koomoora maqannaasa faqa misaqa marusa naruseeqa misa ainaina sipsipa burimakau faiqí anaasee aiqama rumbaidaqa Rootana faqa rumbamaree nifiqee fiqau. Abarahaamafa minara iriseenoo narí ainaini marusa nifiqeenoo nifaqeeufanoo aanai oorumara naru nifaqaaqammamareenoo oonu paqurimaseenoo naru taikeenoo maindaraasa rumbee ooru fusa faqa misa ainaina burimakau sipsipaina Rootana faqa mareenoo oorurandee quminau.) Qumimarufanoo aanai Meerakiseedeekafa Abarahaamana paqurimandeenoo afaaqooqa qinau.
HEB 7:2 Qimasoofanoo Abarahaamafa rakiranaki maraqoo ainaina raineeqeenoo kaqikaana Anutuna amidee qimaseenoo mina aanaiqikirana Meerakiseedeekafa marufanoo aminau, Anutunara dufi dufi qida fee qimasee Meerakiseedeekana kaqikaana aminau. Meerakiseedeekana auqu oosana andeeqara karaambaiqee qiqau. Mina maqusa auqu Sareema maqusa mi auquna oosana asooara maqusafee qiqau. Minara mi fasiqafa andeeqarana faqa asooarana faqa karaambaiqa marinau.
HEB 7:3 Meerakiseedeekana aanaakuna akoona anoona misa oosana sia maasa minara iridaqa, sia akara rumaqoo maridanoo. Mina maqoo aukuana faqa sia iridaqa mina kuqira aukuanara faqa sia iridaqa. Miqinoo marifaqa maasa Yuda maqannaasa oosana marasee minara Anutuna amaakummi maqi qidaqa naaru naaru marufa maridanoo fee maasa qidaqa. Mifa naaru naaru Anutuna aanaiqikirafa marufa maridanoo fee qidaqa.
HEB 7:4 Doo Meerakiseedeekana qafaaqa, faiqí uriqararafa faiqí firaafa marufanoo Abarahaamafa maasa qikeeku qikaaku fannoo rakiranaki maroo ainainna mina aminau. Abarahaamana uriqararafa marunara miqinoo rainaminau.
HEB 7:5 Anutufa minara iriseenoo Reefina aiku asauku mareeqeenoo Isaraee maqannaa faqa Anutunara faqa aanaiqikiranaki quqaseenoo maaqi qimasee qimanniminau. Innee inneeqa nikaqaafasaa Isaraee maqanna qimannimifaqa aukuana aukuana nári narana ainaina kaqikaana raina nimiaqee qinau. Reefina aiku asauku Isaraee maqannaasa aanaiqikimarusa Abarahaamana aiku asauku maridaqa. Nári niqoonausa Isaraee maqannaasa misa faqa Abarahaamana aiku asauku kai maridaqa nári narana ainaina rainasee kaqikaana Reefina aiku asauku nimiqau.
HEB 7:6 Abarahaamafa Anutufa qima afeekaikamaqoo ufana irimarufa marufanoo uriqararafa marufanoo. Meerakiseedeekafa Anutuna aanaiqikirafa sia Reefina ati marufa maridanoo Abarahaamana uriqararafa maridanoo mina afaaqooqa qinau. Miqi qufanoo rakiranaki maraqoo ainaina kaqikaana raineeqee mina faqa aminau.
HEB 7:7 Nifaaqooqa qimaria fasiqausa sia manda fasiqa fannoo nifaaqooqa qidanoo. Faiqí uriqararafa auqu faqaafa akooqoo marifa mifa kai nifaaqooqa qidanoo, ureeqarausa nifaaqooqa qimannimaqaidaqa. Minara Meerakiseedeekafa Abarahaamana uriqararafa marinau.
HEB 7:8 Abarahaamana amaaku moo mina auqu Reefifa marinau. Reefina aiku asauku aanaiqikirausa faiqí faiqi misa faqa kuqimariasa maridaqa niqoonausa narana ainaina nimufaqa maraqau. Meerakiseedeekafa sia kuqirafa akarakinaa ufa marinara minara naaru naaru maru fee qimarufa maridanoo Abarahaamana narana ainaina amufanoo maranau.
HEB 7:9 Indaaru Abarahaamafa narí narana ainaina kaqikaana rainasee Meerakiseedeekana aminau.
HEB 7:10 Reefifa mi kamuqoo sia kambiqanau narí akoona aranandaki maridanoo narí akoona faqa qumee Meerakiseedeekana aminau. Doo maqee aukuana Meerakiseedeekana amu fasiqana Reefina aiku asuaku quandaki nári niqoonausunnai narana ainaina maraidaqa.
HEB 7:11 Mooseena sandufa faqa Anutuna sandufa faqa miqandufa moodaa ufa marinau. Mi ufafa Reefina aiku asaukusaa aanaiqiki marusakina moodaanaki kusinoo maridanoo aiqama sandufa fannoo misasaaqari Isaraee maqannaasaki amanaikinau. Reefina aiku asauku aanaiqikira oosana fannoo faiqí anaasee Anutuna afusaa kaaqa andeeqara anukarana niminoofau sia moo aanaiqikirafa inaaqianna Meerakiseedeekana fooqaafa kambiqaiqini. Sia Aaroona aiku asauku Reefina aiku asaukukiqari fuka moo quqeenoo Meerakiseedeekana mina aannaree marina naaru naaru marirana Yisuna kai quqanau.
HEB 7:12 Anutufa ooqeenaa aanaiqikirausa Reefina aiku asauku minniseenoo fuka aanaiqikirana quqararee qidanoo ooqeenaa sandufara Mooseena sandufara faqa sia amanaikiannoo, fuka sandufa mina amaaqaki quqasee miqoo kai fuka aanaiqikirana quqaannoo.
HEB 7:13 Maasa karaambaiqa Yisunara fuka aanaiqikiranara qidanoo fuka karaambaiqee qidanoo. Mooseefa Reefina aiku asaukuara qufaqa aanaiqikiqau. Yisufa sia Reefina ati marinau. Yudana ati marinau. Yudana aiku asauku moo fannoo sia aanaiqikira ainainiranaki mariqau, sia uqanna mariqau. Mooseefa faqa sia Yudana aiku asaukuara moora qufanoo misaikana maraqau sia uqanna qinau.
HEB 7:15 Doo fuka aanaiqikirafa kooroo irana namufaqa fuka sandufa faqa aanaiqikirausa oosana faqa mariannoo. Mifa akooqoo kooroo inoo maridanoo. Mi fuka aanaiqikirafa Meerakiseedeekana fooqaafa animaridanoo.
HEB 7:16 Isaraee maqannaa sandufa fannoo Reefina aiku asaukuara qufaqa aanaiqikiqau. Yisufa sia faiqí faiqi sandufa ameemaanaifau maridanoofau aanaiqikinau. Mifa naaru marifa sia taikarafa, mi afeekafa kai mina afeeqasoofanoo fuka aanaiqikinau.
HEB 7:17 Tamummaqara akara fannoo minara maaqi qidanoo. Anee aanaiqikirafa naaru naaru marinafa marinnaranoo, Meerakiseedeekana fooqaafa marinnaranoo. Mi tamummaqara ufafa miqiminoo maridanoo.
HEB 7:18 Indaaruqaa sandufa oosana doo mafi Anutufa quqeenoo mina afeeka fannoo sia amanaikifanoo kai fifau marunara mafi quqanau.
HEB 7:19 Mooseena sandufa fannoo moona kaaqa amiqira andeeqarana Anutuna afusaa sia amiaqaaufanoo mi sandufana mafi quqanau. Quqaseenoo doo maqee fuka ainaina firaaqoo uriqarara ainaina Yisunara asasira afeesirana maree mini quqasoofaqa minannai kai Anutuna aaqa uqanna fuanaura.
HEB 7:20 Doo kafaa Anutufa fuka aanaiqikiranara qimafeekaikinau. Ooqeenaa aanaiqikirausara sia miqinoo qimafeekaikinau.
HEB 7:21 Qimafeekaikira ufasaa Yisufa aanaiqikirafa kambiqanau. Miqimma afeekaikiranara Anutufa maaqi qimasee qinau. Qinee karaambaiqa Anutusa qima afeekaikira ufa doo quqeeqa. Sia qinee qeeqa iriranannai moosaa fuanaura. Anee naaru naaru aanaiqikirafa marinnaranoo.
HEB 7:22 Mi qima afeekaikira ufafa Yisuna mareeqeenoo sia ooqeenaa Anutuna faqa faiqí faqa moodaanaki qima afeekaikiranaki quqanau, aaduma uriqarara moodaanakikira ufa rakisirafaikamambi marinau.
HEB 7:23 Yisunara moo irirafa kaqi maridanoo. Indaaruqaa aanaiqikira fasiqauqa moomoo mariqau. Misakina kuqufimarufanoo moo fannoo kai aanaiqiki mariqau.
HEB 7:24 Yisufa sia misa naanna ree kuquannoo sia mina aanaiqikirafa moonasaa mariannoo, narí naaru naaru marinara nariki kai naaru naaru mariannoo.
HEB 7:25 Doo minara maqee faqa naaru faqa minannai Anutufa mariqoo fimarinausa Yisufa amana mareeqee narí akoona aaqa quqaannoo. Mifa naaru naaru marinara mifa narí akoona aaqa quqaseenoo naaru naaru misara narí akoona faqa ufa qinoo dadaaqiannoo.
HEB 7:26 Yisufa mifa maasa aanaiqikira uriqararafa maridanoo. Maasa mandainaina oosana oosana manda ainaina akiaqara amana kai Yisufa maridanoo. Mifa andeeqarana naaquqarafa maridanoo. Minaki sia moo aaqarafa mandaikirafa maridanoo. Mina manda maqasaa mariasakinaana aadumasaa Anutufa quqararee qimaseenoo mareeqeenoo innaarunai uqeera uriqararanaki quqaqaifanoo maridanoo.
HEB 7:27 Yisufa maqasaa fasiqa aanaiqikirausa uriqararausa naanna sia raidanoo. Misa maqee maqee faasaambaasaana aandau tatufirana nári mandainaina taikaanifeera tatufirana suqee mariqau. Naríndi naaree tatufusaida quandafi faiqí anaasee mandainaina numoo taikaanifeera aukuana aukuana tatufusee Anutuna ami mariqau. Yisufa sia misa naanna raidanoo, Mifa moodaa kari uqanna narí afaaqa Anutuna aru aminau. Doo sia kafaa kafaa Anutuna aru amiannoo, doo moodaa kari aru aminoo aiqamausa numoo taikanau.
HEB 7:28 Mooseena sandufa fannoo fifau faiqí faiqi mareeqeenoo aanaiqikirausa uriqararausaki quqanau. Anutuna qima afeekaikirafa narí auqu ramasee qima afeekaikirafa Mooseena sandufa naaree ani marifanoo Anutuna mi qimafeekaikirufafa Mooseena sandufa rafaaqafuamaqeenoo Anutuna amaaku uqanna mareeqeenoo aanaiqikira uriqararanaki quqanau, naaru naaru andeeqarafa marianinnana quqanau.
HEB 8:1 Maasa maa ufana akiaqa maaqimminoo maridanoo. Maasa aanaiqikira uriqararafa innaaruna uriqararana Anutufa mariqoo mina aaqa mina asauku uqannai maridanoo.
HEB 8:2 Mifa sia Mooseena aanna raidanoo sia faiqí usakaqaa uqiqaana maaqakifau ainainidanoofau. Anutufa usakaqoo maqana uqannakina ainainidanoo. Mi maqanaki innaarunai Anutufa mari oosiranaki aanaiqikirausa uriqararana ainainirana maraidanoo.
HEB 8:3 Aiqama aanaiqikira uriqararausa maqee maqee narana aandau arusaida Anutuna tatufu amidaqa. Mooseefa mi ainainiranaki misa quqanau. Doo maasa aanaiqikira uriqararafa Yisufa mifa faqa Anutuna tatufirana amirafa mariannoo.
HEB 8:4 Yisufa maa maqanasaa marinanoofau sia aanaiqikirafa mariqini. Maaqoo moomoo aanaiqikirausa aandau Anutuna aandau tatufida suqa amidaqa. Mooseena sandufamau fidaqa miqidaqa.
HEB 8:5 Mi aanaiqisa ainainirafa sia anoona maridaqa fifau amananda kai maridanoo. Innaarunai mari ainaina fifau amananda kai maridanoo. Mooseefa Sinai maqa maaqaki uqiqaana maaqa usakararee qufanoo Anutufa maaqi qimasee qimaminoo qinau. Qinee aaqanasaa uqafiqaunna maqana amana kai andeeqasee usakaa.
HEB 8:6 Indaaru maru aanaiqikirausa miqiqa marufanoo Anutufa maqee Yisuna firaaqoo uriqarara aanaiqikira ainainiranaki quqanau. Anutufa faqa faiqí faqa moodaanakikirafa Yisunaindi uriqararafa maridanoo, Mooseena moodaanakikira ufa sandufamau firanasaa mundinoo marunara ureeqararafa maridanoo. Yisunaindi uriqarara qima afeekaikiranasaa mundinoo marunara uriqararafa maridanoo.
HEB 8:7 Indaaru moodaanakikirafa anoonaikinanoofau Anutufa sia moo mara quqaiqini.
HEB 8:8 Anutufa Isaraee maqannaara maaqi qimasee akaraki niqira ufa qinau. Qinee karaambaiqa maaqi qidaqa, Doo qusasaa qinee fuka moodaanakikira ufa Isaraee maqannaa faqa Yudana aiku asauku faqa qianaura.
HEB 8:9 Ooqai misa nikeeku nikaaku faqa moodaanaki kira ufa quqaafannana. Sia miqifau ianaurau, moo kammianaura. Mi aukuannai misa Isaraee maqanna nisauku qumaree Isipa maqasaaqari nifiqee fimariafanaqa misa qini moodaanaki kira ufara nikooqoofaqa qini minni qisaqau. Minara misa qini qimaqimufaqa qinee minniseeqa sia iriqiafana.
HEB 8:10 Doo maqee ooqeenaa moodaanaki kira ufa minnisee Isaraee maqanna faqa fuka moodaanaki kira ufa maaqi qimasee quqaidaqa. Qini fuka moodaanaki kira ufa maaqimminoo maridanoo. Qinee karaambaiqa qidaqa. Qinee qusasaa qeeqa sandufa misa nitikuraki quqaanaura, quqaseeqa misa nimuqusasaa akara rumaqaanaqa sia aunuaqeera. Qinee misa Anutusa marianaura misa qini faiqi namu marifaranoo.
HEB 8:11 Sia moo fannoo narí aqoonnanara fuki faaki qiannoo. Sia moo fannoo narí aqoonnanara Anutunara iriannee qiannoo. Misa aiqamausa uriqararausa faqa ureeqarausa faqa qiniara irifaranoo.
HEB 8:12 Qinee misa aaqainnanara nifauaanaura. Qinee misa numoora siammirianaura aunuanaura.
HEB 8:13 Anutufa mi fuka moodaanaki kiranara qidanoo indaaruqaanara ooqeenaa fee qidanoo. Ooqeenaa ainaina minnisaifa doo afauqaqeenoo qusasaa taikafuannoo.
HEB 9:1 Indaaruqaa moodaanaki kira ufa maru kamuqoo Anutunara innaaruqira sandufa oosana oosana marinau. Faiqí nisaukunnai auqara uqiqaana maqa Anutunara amooqimaria maaqafa faqa marinau.
HEB 9:2 Mikamuqoo misa uqiqaana maqa usakaseeqa mina aundurai oosuseeqa, dinni oosirafa faiqí aanaiqikirausa keeqeemaru maqafa kooqi maqa naaquqara fee qiqau. Qoomauqa faqa Anutuna uqafiqee maru feemu faqa minasaa quqeemaru qainda faqa minaki marinau. Dinni oosirafa fiqaramasee naaquqara maqa faiqí minaki sia keeqee mariqau.
HEB 9:3 Firaa qamunna mi oosiranasaa ititanoo marinau. Mina dinni kooqi maqa marinau. Mina dinnatinai kukeeqaranaki firaaqoo naaquqara oosirafa mi atinai marinau.
HEB 9:4 Koora auqimaru qaindafa minaki marinau. Minasaa amiqundimaru ainainna suqee marufa marinau. Moodaanaki kira bookisa minaki faqa marinau. Mifa koora qannunnai rafaaqafirafa marinau. Mi bookisanaki koora auqimaru qafeefa marinau. Mi qafee auduranaki manna fee qimaru ainainafa innaarunaindaraa feemu quqasoofanoo Isaraee maqannaasa aadana maqa maaqaki maridaqa naararoofaqa randasee neemaru feemufa marinau. Ooqai Aaroonafa faqa Isaraee maqannaasa faiqí firaasa faqa nári saunu uqiqaana maqaki quqasoofanoo Aaroona saunusaa kai auqmara ururamafinoo misaindisaa sia ururanau. Mi saunufa faqa moodaanaki kira bookisaki quqasoofanoo marinau. Mooseefa Sinai aaqanasaa Anutuna moodaanaki kira ufa qaara oonisaa akara rinau. Mi akara rira ooniqanda faqa mi bookisanaki faqa quqasoofanoo marinau. Mi aiqama ainainausa moodaanaki kira bookisa moo auqu Anutufa nifauara bookisaki mariqau.
HEB 9:5 Mi bookisana afusaa dinni dinni Anutuna qangiroo nimanaqara maridanoo Anutuna areenarana koorooimaru qangirooqanda mariqau. Miqanda niqoosaqara dinni dinni mi qaindana dinni dinni rafaaqafinoo marinau. Mi qambaannasaa Anutufa faiqí anaasee mandainainara nifaueenoo minniseenoo imariqoo ititaidaqa. Doo maqee sia mi ainainausara qianaura.
HEB 9:6 Aanaiqikirausa maaqimasee ooqeenaa uqiqaana maqaki ainaini mariqau. Aanaiqiki marusa kooqi maqaki faasaambaasaana keeqafi nári ainainimariqau.
HEB 9:7 Aanaiqikirausa uriqararafa firaaqoo naaquqara maqa aunduraki aukuana aukuana moodaa kari kai mi naaquqara maqanaki keeqee marinau. Aiqama aukuana aukuana miqikaimma moodaa faasaana kai keeqee marinau. Mifa aandau fidika mara maree minaki Anutuna ami marinau. Narí numoora faqa faiqí anaasee numoora faqa mina akiaqara mi fidikana ami marinau. Mandainaina sia irirai marainnana akiaqara naruandoo qimasee miqi marinau.
HEB 9:8 Maaqira ainainana kai Anutuna naaquqara maraquna fannoo maasa moo ufa qimaqimidanoo. Minara maaqi qidanoo, kooqi maqa mifa mariannoo. Mee firaaqoo naaquqara oosirannai sia miqoo faiqí fimariaqoo sia miqoo aana maridanoo fee qidanoo.
HEB 9:9 Mi kooqi maqafa maa maqee maria kamuqoora kikiqa usidanoo, mina amananda maridanoo, maaqimminoo maridanoo. Anutuna ami maria ainainafa faqa aandau tatufusee ami mariafa faqa sia amana ami mari fasiqana amuqusa findaukamasainanoo anoonaikiannoo.
HEB 9:10 Anutuna ami maria ainainna faqa aandau tatufusee ami mariafa faqa mi namusa naranara faqa nammariara faqa nammarinnai findaukarana oosana oosana faqa qidaqa. Nipatasaaqaraa ainaina mi ainainafa ufaasu maridanoo. Anutufa fuka ainaina quqaranara minara afeesidanoo ufaasu maridanoo.
HEB 9:11 Asauku mundirafa doo ani maridanoo. Innarunai marira ainaina asumu faqa doo ani maridanoo. Mi amiqira ainainausa aanaiqikirafa uriqararafa asauku mundirafa doo ani maridanoo. Mooseena ainainimaru uqiqaana maaqafa ureeqaradfa marinau, maqee asauku mundirafa fuka firaa anoona uqiqaana maqaki innarunai ainaini marifa uriqararafa anoona uqanna ani maridanoo. Sia faiqí nisaukunnai auqi maria amaana maqafa maridanoo sia maa maqa maaqanasaaqaraa ainainau maridanoofau.
HEB 9:12 Asauku mundirafa innaruna kooqi maqaki ooru keeqakufanoo firaaqoo naaquqaranaki ooru keeqafinoo sia mimmi fidikafau burimakau aanaaqi fidikafau mandainaina akiaqara Anutuna amisee keeqanau. Narí kai narí fidika qumareenoo miqoo Anutufa maruqoo maasara aranaqarafa taikaanifeera amiseenoo minannai kai naaru asumu marirana maasa qimiannee qimasee maranau.
HEB 9:13 Mooseena uqiqaana maqakinaa sandufara aandau fidikara maaqi qidanoo. Faiqí anaasee mandainaina maraasara ikairifaqaasee qimasee mimmi fidika faqa burimakau akoona fidika faqa ikairi faqaasa akunnimaqaidaqa mi idanasaa danda faqa misa nifaaqasasa akusoofanoo Anutufa misara anukarausara maqi qirausa maridammiafoo qidanoo.
HEB 9:14 Fifau aandau fidika fannoo ririmma faiqí ikairi findaukaidanoo Anutuna asauku mundirana fidikara naqi fee qianauree. Mifa naaru naaru marira maraquna fannoo dadaaqifanoo narí uqanna anoona tatufirana amiranara foora Anutuna aminau. Mina fidika fannoo sia maasa ikairi kai findaukaannoo. Maasa qimana maraquna faqa mina faqa findaukaidanoo maasa mandoosana maree mariana faqa maasa kuqiranaki rarisama quqee mariana faqa Yisuna fidika fannoo mina faqa findaukaidanoo. Miqi mandainaqa maasa amana kaqi marira Anutuna ainainamminaura.
HEB 9:15 Miqimandaifanoo asauku mundirafa Anutufa faqa faiqí faqa moodaanaki kira ufa fuka ufa qima andeeqeeqeenoo quqaidanoo. Anutufa nuqu rainausa misa aniree maraaqeera. Naaru naaru afeedimari amiqira qumiasana saqama ainainara kasooqaqee innaarunai maraaqeera qidanoo. Indaaruqaa moodaanaki kira aukuana sia amana mi amiqira afeedira qumiasana saqamana maree mariqau. Misa mi aukuanna kaqi nári mandainaina fannoo faiqí nifaaqa rumbanoo marinau. Maqee asauku mundirana kuqirafa doo mi rumbarana nimirara idukinau.
HEB 9:16 Faiqí moo fannoo afaaqooqa qinafa faiqí mifa kuqinanoo mina afaaqooqa qirafa anoona kooroo iannoo.
HEB 9:17 Mi fasiqafa kaqi marinanoo mi ufafa kaqi miqinoo mariannoo kuqinanoo kai koorooiannoo.
HEB 9:18 Minara Mooseena moodaanaki kira ufa fannoo aandau kuqufanoo miqimandoofanoo doo mi ufana anoona koorooinau.
HEB 9:19 Mooseefa indaaruqaa moodaanaki kira ufa mina sandufa oosana oosana faiqí anaasee qimannimiseenoo burimakau mimmi fidika nammari namufaqa mareenoo naneeka amanee faqa taatuqee arira sipsip asausi faqa qumareenoo fidikaki raaraamma qumareenoo sandufa bukamau faqa faiqí anaasee nifaaqasasa faqa akuseenoo maaqi qimasee qimanniminau.
HEB 9:20 Maa aandauna kuqina fidika fannoo inni faqa Anutuna faqa moodaanaki kirana mapuku nimaqaidanoo, Anutufa inniara maa moodaanaki kira ufamau fuaqee qidanoo.
HEB 9:21 Miqikai inoo Mooseefa uqiqaana maqa afaaqasasa fidika mi aandau fidikana akinau. Akuseenoo maaqakina Anutufinnai innaaru qimaria ainainnasaa faqa aiqama akinau.
HEB 9:22 Miqidanoo Mooseena sandufamau aandau fidikannai kai aiqama ainaina anukee marinau. Faiqí mandainaina faqa fidika teeqiranannai mi manda ainainna anukee marinau.
HEB 9:23 Uqiqaana maaqaki auqeemaru ainainafa innaarunai maru ainainna fooqaafa mina amananda maqasaa marinau. Anutufa minara kai iriseenoo qufaqa misa aandau fidikannai aiqama ainaina anukee mariqau. Anoona ainaina innarunai maru anoona ainaina findaukarana sia aandau fidika amana maridanoo, moo uriqarara ainaina marasee arirafa kai amana maridanoo. Asauku mundirana arirafa mifa kai amana mariannoo.
HEB 9:24 Asauku mundirafa uqiqaana maqa faiqí nisaukunnai auqamaqoonaki innaarunai marina fooqaanaki miqiranaki sia keeqanau, mi maqanaki naaquqara oosiranaki sia keeqanau. Mifa andeeqasee innaaruna maqa maaqaki Anutufa maruqoo uqanna keeqafinoo kooroomafinoo maridanoo maasa dadaaqidanoo.
HEB 9:25 Yuda maqanna aanaiqikirausa misa uriqararafa aandau fidika mara mareenoo naaquqara oosiranaki keeqee marinau, aukuana aukuana keeqee marinau. Asauku mundirafa sia moomoo kari narí afaaqa Anutuna aru aminau.
HEB 9:26 Miqiqa moomoo kari arifanoofau maqa maaqa oosana aroonakiqari aupuraida marini. Ooqeenaa aukuana taikarara adeedirama fufanoo maqee aukuana kai asauku mundirafa moodaa kari kai kooroo mafinoo narí afaaqa Anutuna aru amiseenoo minannai maasa mandainaina rukannisanau.
HEB 9:27 Aiqamausa moodaa kari kuquannana amana kai Yisufa moodaa kari kuqinau, aiqamausa moodaa kari kai kuqufiqa miqooqari Anutuna faqa ufa qiranaki fifaranoo.
HEB 9:28 Yisufa mi mau kai finoo moomoosa numoo maraqunnisaanifeera narí afaaqa tatufirafara foora moodaannai Anutuna aru aminau. Mifa kafaa koorooiannoo. Sia kafaa numoo undarau qumuannoofau. Narí afeesara mariasara qumuree mareeqee asumu mariranaki quqannisarara qumuannoo.
HEB 10:1 Yuda maqanna Mooseena sandufa faqa uiqaana maqa ainaina faqa innaarunai mari ainainna mina amananda kai maridanoo siara foora inoo maridanoo. Naaru kambiqaaninna ainaina amananda oorudupirana amananda kai maridanoo. Mooseena uiqaana maqaki Mooseena sandufamau fidaqa moodaa tatufira oosana kai aukuana aukuana aandau kai suqa amu mariqau. Doo miqidaqa naqimasee mi sandufana Anutufinnai ani mariasa anoonaikamma nimaqaannoo fee, sia amana.
HEB 10:2 Mooseena sandufasaa Anutunara amooqiqa innaaru qimariasa kuqaa anukamma nimaqasainaqau misa nári numoora nisaurirana taikaseefau marini, aandau maqee maqee qaindasaa tatufi mariafa faqa sia marini.
HEB 10:3 Aukuana aukuana aandau tatufirafa mifa faiqí anaasee nári numoora naaqoo auqaifaqa maqee maqee aandau tatufidaqa.
HEB 10:4 Burimakau fidika faqa mimmi fidika faqa mifa sia amana uqanna faiqí anaasee mandainaina numoo maraqunnisaannoo.
HEB 10:5 Miqi marunara asauku mundirafa maa maqanasaa qumiraree qimasee maaqi qimasee Anutuna qimaminau. Anee aandau arusee qaindasaa tatufiranara, akooqaidanoo, Anee faiqí qifaaqa deedaqamma qimaqainanoo.
HEB 10:6 Anee aandau arusee qaindasaa muduka tatufiranara akooqaidanoo, numoo maraquaninna aandau suqaranara akooqaidanoo Yisufa miqi qimasee Anutuna qimaminau.
HEB 10:7 Minara Yisufa maaqi qimasee kaifaa Anutuna qimaminau. Oo Anutu doo qinee maaqoo maridaqa. Aneenna iriranannai kai qiniara ia. Mooseena sandufaki qiniara akara rinau. Doo mi mau kai qiniara ia. Yisufa miqi qinoo.
HEB 10:8 Yisufa miqi qimaqoonara qinee inni maaqi qimasee qimannimianaura. Yisuna indaaruqaa ufa maaqimminoo maridanoo. Oo Anutu anee aandau arusee suqa amiranara akooqaidanoo sia maraaqaaidana, faiqí numoo rukaranara aandau qaindasaa tatufiranara akooqaidanoo. Yisufa mi aandausa tatufimarunara irinoo sandufamau fidaqa miqimariaafoo qimaseenoo kaqi Anutufa minara akoo akaa imarunara qinau.
HEB 10:9 Yisuna inaaqianna ufa maaqi qidanoo, Oo, Anutu, doo qinee maaqoo maridaqa. Aneenna iriranannai kai qiniara ia. Asauku mundirafa mi ufamau fidanoo. Ooqai aandau tatufimaruna mara aqu taikaseenoo fuka narí amaqi fidika mina amaaqaki quqaseenoo maasara kuqu qimaqanau.
HEB 10:10 Yisufa asauku mundirafa Anutuna aidiramau kai fidanoo narí afaaqa aandaura foora Anutuna moodaa kari kai aru aminau. Miqunara kai maasa numoo ikairi findaukama qumaqanau.
HEB 10:11 Yuda maqannaa aanaiqikirausa faasaambaasaana aiqama faasaana moomoo aandau tatufimariqau. Moo faasaana tatufuna miqikai imariqau, moomoo aandau tatufimaruna faiqí numoo rukarana amana sia maruna fifau kadaapirida tatufimariqau.
HEB 10:12 Asauku mundirafa sia miqinau. Mifa moodaa kari kai moodaa amira aminau. Naaru naaru faiqí numoo taikaaninnana akiaqara aru aminau. Aru amiseenoo innaarunai Anutuna aaqa mina asauku uqannai ooru ooqumarinoo maridanoo.
HEB 10:13 Miqoo maridanoo Yisufa Anutunara narí namuqaa mareeqee aramandunnai quqaaninnanara afeesida maridanoo.
HEB 10:14 Moodaa kari aru amiranannai Yisufa mandainaina ooqai faqa maqee faqa rukannimaqee mariasa naaru naaru kuqaa andeeqarana niminau.
HEB 10:15 Anutuna naaquqara andeeqara maraquna fannoo asauku mundirana dadaaqida maaqi qidanoo.
HEB 10:16 Qinee misa faqa moodaanaki kira ufa maaqi qidaqa. Mi faasaannafa qinee qeeqa qifaaqa aru amianna faasaanna aiqarainaqa qeeqa sandufa misa nimuqusaki quqasaanaqa misa mi mau kai fida mariaqeera. Misa nitikuraki faqa akara rumasaanaqa sia uqanna aunuaqeera.
HEB 10:17 Miqi qimaseenoo Anutuna maraquna fannoo maaqi qidanoo. Qinee maaqooqari sia kafaa misa aaqarana faqa misa mandainaina ikairi faqa siamma irianaura aunuqannamma nimaqasaanaura.
HEB 10:18 Maasa mi ufana irisee minara maaqi. Anutufa maasa mandainaina minnisainna kamuqoo fifau aandau arusaida tatufi mariafa doo taikeennoo.
HEB 10:19 Qini qikaqaafasaa Yisufa kuqinoo narí fidika adioonannai maasa sia rufiaidaqa kaqi mana mana nifaaqa quqasee Anutuna naaquqara oosiranaki keeqaanaura.
HEB 10:20 Mifa fuka aana maasara afisinoo. Kaqi marira aana Anutunasaa ititara qamunna anaqiseenoo afisinoo, narí afaaqara qamunna kikiqa usidanoo.
HEB 10:21 Maasa aanaiqikirafa firaafa mifa Anutuna maaqasaa rakisirafa maridanoo.
HEB 10:22 Doo maasa minara iriseeqa Anutuna aaqa adeedi aniaqa. Kuqaa aneenna amuqusakiqari Anutunara ridana doo Anutuna aaqa adeedi aniaqa. Aneenna irirana mapukusee minasaa rusirafa doo adeedi ania. Ooqeenaa mandainaina ani aakirana afaimma quqaseenana anukarafa ania. Aneenna afaaqa amiqira nammarinnaira foora findaukamasee Anutuna aaqa adeedi ania.
HEB 10:23 Maasa innaarunai mariranara asasidaqa afeesidaqa kooroo idaqa. Maasa mi asasira afeesirana amiqimmandee qumaraaqa. Anutufa narí qima afeekaikira ufa sia minnisaannoo mifa qumaraannoo minara amiqimmandee rakisi qumaraaqa.
HEB 10:24 Maasa nariara nariara uriqarara ainainee qimasee nimuqusirafa marianinnanara fuki faaki qimase nisaukukoo dadaaqira dadaaqirafa kambiqaani. Narí amiqi amiqirana faqa fuki faaki qimasee narí dadaaqi narí dadaaqiaqa.
HEB 10:25 Akaqausa amaana maqaki maqee suqiranara nikooqaidanoo. Innee sia miqiaqa maqee maqee suquaqa. Karaambaiqa qumira faasaanara qusararanara irisee narí fuki faaki narí fuki faaki qimasee Anutuna ufara suquaqa.
HEB 10:26 Maasa Anutuna anoona ufa iridaqa kaqi iridaqa mandainaina maraqa fifi inaqa moo amiqira ainaina Anutuna amimarinafa sia mi numoona rukaannoo naaru naaru mariannoo.
HEB 10:27 Miqinna fasiqafa naaru kambiqaaninna ufa iriranara rufiasee afeesianno. Mikari mi fasiqafa ufa qirana iriseenoo firaa idaqeemari idanaki qamataikaannoo. Miqimasee Anutuna ufara sia fee qimariasa aiqamausa minaki aupureefaranoo.
HEB 10:28 Mooseena sandufa maru kamuqoo faiqí moo fannoo mi sandufana ameesuqirafa qaara fasiqee qaaramoo fasiqee qafamasee ufa qufanoo sia mina afauee mariqau. Doo mifa kuqimarinau.
HEB 10:29 Faiqí moo fannoo Anutuna amaakuara akooqainafa mina arirafa firaaqoo fiqaranoo mariannoo. Mi fasiqafa Anutuna moodaanaki kira ufa fidikara narí mi fasiqana numoo rukasainnanara qikoo fee qinafa faqa Anutuna afaari mari maraqunara faqa mandufa qinafa, mi fasiqana arirafa sia Mooseena aanna raannoo, fiqaranoo mariannoo.
HEB 10:30 Maasa Anutunara faqa mina ufara faqa iridaqa mifa maaqi qinau. Faiqí mandainaina akiaqara narirafa qinindi maridanoo fee qinau. Mifa kaifaa maaqi qinau. Karaambaiqa narí aiku asauku ufa irisee mandoosana marinanoo naruannoo sia marina sia naruannoo.
HEB 10:31 Mifa miqi qidanoo qinee minara maaqi qidaqa, kaqi marira Anutuna asaukuki aqufinafa firaa narirafa kaaqa naaquqee marifa maridanoo.
HEB 10:32 Indaaru innee Anutuna ufa iru aukuanna mi aukuannara maqee inni naaqoo auqaidaqa. Mi fasannai Anutunara asasirafa qoomara foora kaaqa qamannimaqoofaqa qafamasee kadaapi rumasee nidafimarufaqa Anutuna ufamau fifiufaqa sia kudoosaapaqau.
HEB 10:33 Akaqa faasaana faiqí anaasee aiqamausa nifusaa ataasa ataasa inni qimannimaqee mandaikamma nimaqaqau. Moo kari faiqí anaasee Yisuna ufa irimariasa nárí mariafaqa innee faqa misa ummaara dadaaqiqa akooqoo oonuree misa nisaukunnai dadaaqiqa amiqimma nimaqaqau.
HEB 10:34 Innee karabusaki mariasa dadaaqidaqa narana munu nimiranannai misa aupurarana inne faqa maree mariafanoo. Faiqí anaasee aniree aanoomasee inni maaqakinaa ainaina aiqama animaree fifuafaqa sia innee minara noori runuafanoo, innee asasa kai mandee mariafanoo. Innee inneeqa maa maqanasaaqaraa qumiasanara fifau oorudupira ainainee qimasee innaarunai uriqarara naaru marira ainainara maridanoo fee qimasee sia ikiraqaafanoo, innee asasimariafanoo.
HEB 10:35 Doo maqee faqa inneeqa paasoosirana sia quqaaqa. Mifa marifanoo mina feefauru naaru marirana nimiannoo ubiqafi marirafa inniki mariani. Innee sia ubiqafinaqa sia amana Anutuna iriranamau fifaranoo, sia mina qima afeekaikira marira innaaruna qumiasana mareefaranoo.
HEB 10:37 Anutuna akara ubiqafi mariranara maaqi qidanoo. Kaqikaaqoo qumirafa qusasaa qumuannoo. Sia kisaaqasaa fifau mariannoo doo qumuannoo.
HEB 10:38 Qini qiku qisauku andeeqarausa mariasa maqee maqee qinisaa irirana rusisee mariqa fifi inaqa mi mariranara kai qini didiannoo. Misa minara nikooqee marinausa misara qini faqa qikooqaannoo. Anutuna akara maasara miqi qinoo maridanoo.
HEB 10:39 Faiqí akaqausa Anutufinnai fuani qimasee fifi ifaqa aanai oonuree maparaamaki oonurandee quandaki ida aqufidaqa. Maasa sia misa naanna raidaqa. Maasa amiqimmandeeqa Anutuna mandaaqaifanoo doo Anutufa maasa asumu maraannoo.
HEB 11:1 Anutunasaa irirana rusimarinausa misa innaarunai kambiqaaninna ainainara asasamandee afeesidaqa. Misa minara kuqaa anoona maridanoo innaarunai maraanauree qida afeesida maridaqa. Misa sia qafeemari ainainnara anoonee qidaqa nifaaqa quqasee afeesidaqa.
HEB 11:2 Ooqa marusa miqimmi mariqau. Misa Anutunasaa irirana rusiranannai Anutuna eedoo qirafa misaki marinau.
HEB 11:3 Ooqai Anutufa narí ufannai maqa faqa innaaruna faqa auqusoofanoo maridanoo. Maasa Anutunasaa irirana rusiranannai mi ufanara kuqaa anoonee qidaqa. Mifa sia akooqoo maru ainainna qumareenoo maqee qafee marunna ainaina auqinau.
HEB 11:4 Kainafa Anutuna tatufirana suqa amiraree qimaseenoo ureeqarana suqa aminau. Abeerafa Anutunasaa irirana rusi marunanoo narí afasaana Kainana tatufirana uraaqaranau. Abeerafa Anutuna saqariki marunara Anutufa Abeeranara andeeqara fasiqafee qimaseenoo mifa amu ainainara asasinau. Abeerafa ooqai kuqinoo maridanoo mina ufa fannoo kaqi maasa qimaqimidanoo. Innee faqa miqikai mandee Anutuna saqarikiaqa. Miqi qidanoo Abeerafa naamua qidanoo.
HEB 11:5 Faiqí moo auqu Eenookafa Anutuna saqarikiranannai kai sia kuqufufanoo kaqi marufanoo Anutufa mara muru narí unnai quqanau. Misa miqooqaraasa Eenookana iriara randoosia minnisaqau. Anutufa kaqimma afiqa quqanau. Anutuna akarakinaa ufa Eenookanara maaqi qinoo maridanoo. Eenookafa andeeqara fasiqa marunara qini qiqaara ree marifaqa asasidaqa.
HEB 11:6 Sia faiqí moo fannoo dapi marirana niranannai Anutuna asasirana maraannoo, minara narí Anutunasaa irirana rusiranannai kai mina asasirana maraannoo. Faiqí anaasee moo fannoo faasa Anutunara kuqaa maridanoommifoo qimarinafa, Anutufa narí andeeqara oosanara randeemarisa amiqira ainaina innaarunai nimiannoommifoo qimarinafa mi ufaqanda qimaria fasiqa aanaaseesa kai Anutufinnai fifaranoo.
HEB 11:7 Anutufa kasooqaqee kambiqaaninna ainainara Nooafa sia qafee marunara aaquqimasoofanoo Nooafa narí irirana Anutunasaa rusimarunara irisee eedoo qimaseenoo firaa sipa auquseenoo narí faqa narí aiku asauku faqa minakimma asumu marinau. Auquseenoo Nooafa minannai aiqamausa maa maqanasaaqaraasa aiqama niqiseenoo rafaaqafunnimaqanau. Noofa Anutuna mandaaqaranannai kai Anutufunnaindaraa andeeqarana maraseenoo asumu marinau.
HEB 11:8 Abarahaamafa faqa Anutunasaa irirana rusi marufa marinau. Anutufa Abarahaamana aaramaseenoo qimaminau. Anee anirainaqa fuka maqa maaqa anindi kianinnana uqafiqaanaura, anee miqoo fua. Miqi qufanoo Abarahaamafa iriseenoo narí irirana Anutunasaa rusiranannai eedoo qimasee narí maqa maaqa minnisee sia qafee maru maqa maaqanaki kaqimbinau.
HEB 11:9 Abarahaamafa miqooqari aanaamuruara foora Anutufa qima afeekaikammaqoo maqa maaqanaki oonu marinau, Anutunasaa irirana rusiranannai kai miqinau. Narí maaqa uqanna ooqai maruna maaqa uqannaki marinau. Mi maqa maaqana minnisee fuka maqasaa narí faqa Yakooboona faqa Isakeena faqa uqiqaana maaqaki kai marusa mariqau. Aandau apatannai auqira uqiqaana maqaki mariqau. Miqanda faqa Anutuna qima afeekaikirana maree marusa mariqau. Miqanda faqa Anutuna qima afeekaikira ufa irisee mariqau.
HEB 11:10 Anutufa amiqira maqusa naaruara marira maaqa tuna rakiqasee auqusee amiraree qufanoo Abarahaamafa uqiqaana maaqaki maridanoo afeesida marinau.
HEB 11:11 Abarahaamafa narí anaaqa Saraqanandiri asooqa nauaraiqi mariqau. Saraqana faiqi maqara kamu doo taikafufaqa faiqi siaiqanda mariqau. Mi kamuqoo Anutunasaa irirana rusimarunannai kai ooqa faiqi Isakeena maqaqau. Ooqai Anutuna mandaaqee marunnannai kai faiqi maqaqau. Ooqai Anutufa faiqi amianauree qufaqa iriseeqa eedoo qimaseeqa nifaaqa quqasee kisaaqasaa mariuna maqaqau.
HEB 11:12 Abarahaamafa kuqinoora foora inoo marufaqa mina faiqi namu kambiqeeqa fasau nukuda miqirausa kambiqaqau.
HEB 11:13 Abarahaamafa narí faiqi namu moomoosa faqa Anutuna mandaaqaranaki mariufaqa kuqiqau. Misa sia Anutuna qima afeekaikirana anoona qafaqau. Nianaindariara foora naaqoo kai irisee asasammasee kasooqaqee kuqiqau. Nariaraa oo maasa maa maqanasaa aanaamuruara foora iqa mariafaqa asaqiraafaikiqa maridaqee qiqau.
HEB 11:14 Miqira ufa qimariasa moo maqara náriara mararara randaidaqa kooroo idaqa miqi qidaqa.
HEB 11:15 Misa irirafa sia nári ooqeenaa maqa maaqai ubeekaidaqa. Miqinaqau kafaa miqoo fuaqini.
HEB 11:16 Misa uriqarara maqara innaarunai maqara randaidaqa ani asaqiraafaira foora maridaqa. Miqi marunara maasa Anutu fee qimasoofanoo sia mifa asaurinau. Faasai innaaruna maqusa miqimariana akiaqara nimirara deedaqinoo maridanoo.
HEB 11:17 Anutufa Abarahaamana amanamandee qafaanee qufanoo Abarahaamafa Anutunasaa irirana rusirafa marunara Anutuna ufa iriseenoo eedoo kai qimaseenoo narí moodaa faiqi narí amuqusuqanna Isakeena kaqi rumbaseenoo qaindasaa quqasee arirarufanoo qaoo qinau. Anutufa faiqi ani aiku asauku moo amiraree qima afeekaikamaqoonara Abarahaamana amuna. Sia minara Abarahaamafa amuqusufanoo narí amaaku rafaaqa finau. Kaqi eedoo kai qimasee narí faiqi afiqeenoo arirarinau.
HEB 11:18 Anutufa ooqai Abarahaamana qimamu ufafa maaqimminoo maridanoo. Ani amaaku Isakeenasaaqari ani aruakinausa moomoo qinee qima afeekaikiranara kambiqeefaranoo.
HEB 11:19 Abarahaamafa sia minara iriseenoo narí faiqiara amuqusinau. Mifa kuqufinanoo Anutufa uqeeraannoommifoo qimaseenoo Anutuna ufamau arirarinau. Doo kuqaa Abarahaamafa narí faiqi Isakeena kuqiranakinaanara foora maranau.
HEB 11:20 Abarahaamana amaaku Isakeefa innooqafinoo Anutuna ufa iriseenoo mina saqariki marunara quandaki Yakooboosa Eesausa naaru kambiqaaninnanara amiqi amiqira ainainara nifaaqooqa qimannimaqanau.
HEB 11:21 Isakeena amaaku Yakooboofa innooqeenoo Anutuna saqariki marunara quandaki Isipa maqa maaqaki kisaaqasaa marinoo kuqiraridanoo narí amaaku Yooseefaana faiqiqara nifaaqooqa qimannimaqanau. Narí saunusaa aqini munduseenoo Anutunara innaaru qinau.
HEB 11:22 Yakooboona amaaku Yooseefaafa faqa Anutuna saqariki marunara kuqiraridanoo Isaraee maqannasa Isipa maqasaaqari moosaa fifandinnanara qimannimidanoo qimanniminau. Moosaa fiqa qini qimudaani faqa maree fuaqa.
HEB 11:23 Mooseena anaukoo misa faqa Anutuna saqariki marusa maridaqa sia Faraoonara rufiasee mina ufa rukiasee Mooseena maqasee kaaqa idaaqira faiqi anaaqimmifoo qimasee qaaramoo quqoonasaa kukeeqaqoofanoo marinoo nammari afainni kukeeqasoofanoo Faraoona araamuna paqurimaseenoo narí faiqiara foora firinau.
HEB 11:24 Mooseefa faqa innooqeenoo Anutuna mandaaqara fasiqa marinau. Minara mifa faiqí kammambinoo Faraoona araamuna faiqikiranara akooqoofanoo Isipa maqusanaasa minnisanau.
HEB 11:25 Mifa Faraoona maaqaki mariasa nári oosana oosana adiafaaira irira ainainee qimarunara mandainainee qimasee minnisee Anutuna faiqi namu Isaraee maqannaasa faqa aupuraanauree qimasee misa faqa finau.
HEB 11:26 Mooseena afu fannoo innaarunai qumiasana ainainasaa afu munduseenoo minara kai rimarufa marufanoo Isipa maqannaasa munnimma ainaina oosana oosana minnimmasanau. Mooseefa Isipa maqannaasa faqa nári aaqara adiafaairanaki keeqarara akooqoofanoo misa minnisee asauku mundirana kasooqaqee kambiqaaninnanara irisee mi aupuraranaki keeqeera maqi mafinau Isararee maqannaasa misa aupuraranaki dadaaqinoo keeqanau.
HEB 11:27 Mooseefa Anutuna mandaaqarafa marunara naneeka fooqaa saqari amanee maramaree sipsipa fidikaki raaraamma qumaree maaqa kooqimau akusoofanoo qangiroouqa faiqi narimarufa qumureenoo mina qafamaseenoo Isaraee maqannaa faiqi nifauamaseenoo sia narinau. Isipa maqannaa faiqiuqa kai narinau. Moosefa narí Anutuna mandaaqaranannai minara iriseenoo ainnaaqarara oosana kuradanau. Mooseefa Anutuna mandaaqarafa maridanoo miqinau. Minara kai Mooseefa Faraoona aanooqiranara sia rufianau paasoosamandee Isaraee maqannaa Isipa maqasaa marusakinaana nifiqee finau. Nifiqee fimarufaqa misa dapi ufa qimarufanoo Mooseefa kafaa oonurandee aniranara qaoo qimasee nifiqee fimarinau, Anutufa mina oorinni akooqoo maridanoora foora qufanoo andeeqasee nifiqee fimarinau.
HEB 11:29 Isaraee maqannaasa Anutuna mandaaqaranannai Taatuqee nammari fannoo qambaana raineenoo aadanusufufaqa aadana maqasaara foora taqaqau. Isipa maqannaasa misa naruannee qimasee misa ninaaqiana nammari qambaana aadana maqasaa oonu roofanoo nammari fannoo oonu maree ani maree maseenoo aiqama narutaikanau.
HEB 11:30 Isaraee maqannaa Anutuna mandaaqaranannai Yeerikoo maqusa ooni faandaamura rakeemasee ooru rameeqaqee aqufiqa nariqau. Misa qisauku dinni taikasee dinni ani qaara marasee faasaana mi faandaamurana fiqu fiqu masoofanoo mi faandaamurana rapeemasoofaqa oorureeqa aqufiqa nariqau.
HEB 11:31 Yeerikoo maqusaindaraa anaasee dapi maraqanu aanaaseefa mina auqu Raqaba nammarifa mifa faqa Anutuna mandaaqaranannai sia narí maqannaasa faqa kuqinau. Mi anaaseefa Isaraee maqannaa nipuraraa fasiqaqara amiqimmandee narana aina niminoo narí maaqa ataufakaaqa kukeeqannisanau. Maanara mi anaaseefa narana aina niminoo, nári maqannaasa naridaqa qini faqa dari maqi qimasee kukeeqannisanau. Minara mi anaaseefa sia Anutuna ufa rukiee marusa faqa kuqinau. Kaqi asumu marinau.
HEB 11:32 Moomoosara sia qianaura akara kisaaqaikiandoora. Akaqausa maaqimasee mariafaqa Kideeoonafa faqa Barakafa faqa Samasoonafa faqa Yeefataafa faqa Dafidifa faqa Samueerafa faqa Anutuna tamummaqara fasiqauqa moomoosa faqa misara minniseeqa misa ufara sia ufa qianaura.
HEB 11:33 Anutuna saqarikiranannai akaqausa akaqa maqannaasa maqusa maqusa naru taikaseeqa uriqaraqa mariqau. Akaqausa Anutuna saqarikiranannai kai andeeqara qoo fiqa Anutuna qima afeekaikira asumu marirana faqa innaarunaindaraa qumiasana kuqiqa ooru maraqau. Faiqí akaqausa kaasau kusinara foora firaafa mina auqu raioona misa marunaki namuqaauqa naruani fee qimasee rafuseeqee maramaaqinni raioona marunaki aqufufanoo Anutufa mi aandauna oori rafaaqafusoofaqa sia nariqau. Misa mi kaasau kusinara auqu raioonee qimariqau.
HEB 11:34 Faiqí akaqausa Anutuna ufa iri mariasa namuqaa nisaukuki soofaqa misa mareeqee ida firaana arasee minaki aqunnisoofaqa misa Anutuna saqarikiranannoo mi idana imbasee sia kuqiqau. Namuqaa fannoo aseemannai akaqausa naruaneerufaqa Anutuna saqarikiranannai quqasee sandaqau. Faiqí akaqausa sia afeekaikusa Anutuna saqarikiranannai afeekaikamasee moomoo maqannaa rakira fasiqauqa aiqama naru taikasee náriaraa kaqi mariqau.
HEB 11:35 Anaasee akaqausa nári faiqi namu kuqufufaqa Anutuna saqarikiranannai Anutuna tamummaqara fasiqauqa mara findifumasoofaqa mariqau. Faiqí akaqausara namuqaa innee Anutunara minnisaifaqa maasa sia inni naruanaura, sia inni ataasa ataasa qimasaida nifaaqa rakee ianauranoo fee qufaqa Anutuna saqarikiqa mina minnisaranara qaoo qufaqa ataasa ataasa idaqa narimariqau. Kuqu fasiqausa maaqi qiqau Anutufa maasa qumareeqeenoo uriqarara mariranaki quqaanifeera marida saina kuqua.
HEB 11:36 Faiqí akaqausa Anutuna ufamau fimariasa minasaara ataasa ataasa ufa qimaruna maree mariqau. Mandoosana maree mariasa akaqausa qumaraseeqa nári sanda qainnainaina atisa rumbaqoo sandasamu kaifaa kaifaa naridaqa nifaaqa ateekaateekamma ummooquki mariqau. Akaqausa sainandannai rumbamaree karabusaki quqeemariqau.
HEB 11:37 Misa akaqausa Anutuna ufasaara maramaree oonisamu kuqa nariqau. Misa akaqausa qumaree keedainnai qambaana tuqu raqaqau. Misa akaqausa qumaree aseemannai nárí mariqau. Anutuna ufamau fimarusa minasaara narimariafaqa akaqausa rufiasee nári maaqa minnisee qamunnara randeeqa mimmi apata fee sipsipa apata fee minauqa afisusaidaqa munnimma ainaina siaisa nariranara rufiasee kaqi dapi nimariqau. Faiqí anaasee fifau narusaida mandoosana mandoosana nimimariqau.
HEB 11:38 Maa maqanasaaqaraa irirana faqaasa marirafa mandaikamminoo maridanoo oorudupinoo maridanoo Anutuna ufa irimarusa narunnifaqaa ufaqa misa sandoosa misa irirafa urinaaqaranoo maridanoo. Innaarunai fifandinnanara urinaaqaraqa mariasa maridaqa. Minara misa kukeeqaqa nidaqa manda maqa maaqaki aaqana maqa maaqaki ooni aamaraki maqa aamaraki keeqafi rafudamaki iqa nidaqa maaqooqaraasa nariranara rufiaidaqa.
HEB 11:39 Mi fasiqa anaaseesa moodaanaki suqufi maridara foora iqa maridaqa ufa qidaqa. Misa aiqamausa Anutuna saqariki marianannai nuqufaqasaa maridaqa, misa maa maqanasaa maridaqa sia Anutuna qima afeekaikira ainaina afeeka ainaina mareeqa.
HEB 11:40 Anutufa maasara moo firaa irirana iridanoo. Indaaruqaasa maasa qifeesammidaqa. Sia misa náriara anoonaikifaranoo. Misa faqa maasa faqa moodaa kari innaarunai mareefandia maqi qidanoo.
HEB 12:1 Indaaru marusa Anutuna saqarikiusauqaindi maqee maasa qiqafaidaqara foora maridaqa. Maasa maa marirana misa nifusaa narí amani narí amani iqa maridanoo sandeera foora idaqa. Maasa indaaruqaasa nifusaa narí amani narí amanidaqa sandaidaqa moomoosa nifu qiqafaranara iriseeqa qinee uriqararausai kianee qimasee aiqama ainaina qumaararai ainainnara foora maasa mandainaina amiqimasee maasa rakisi qumaree marina afaieeqee maqasaa quqasee doo oori runusee doo oori munduqaannana kai raquramisee doo miqoo kai sanda maqaraasammasee fua.
HEB 12:2 Oosana arooqooqari fifi inaqa maasa saqarikirafa Yisufa kai maridanoo minasaa kai nifu mundusee fua. Yisufa maa maqanasaa maridanoo aunirira saqarisaa arirara qufanoo sia rufiasee minnisanau. Sia uqanna minnisanau. Kasooqaqee kuqiranakiqari findifi innaarunai ququsaki Anutuna aaqa marianinnanara iriseenoo mi asasiranra iriseenoo aunirira saqarisaa kuqiranara asauriranara siamma irinau fifau ainainee qimasee kaqi finau. Doo minara maqee Anutufa mariqoo mina aaqa asaukuqannai ooqumarifi maridanoo.
HEB 12:3 Doo maasa Yisuna aupuraranara iriaqa. Moomoo manda fasiqa anaasee Yisunara fidiaqaa imarufanoo sia kaukaata qinau kaqi mi umaarana mara maree fimarinau. Maasa mi oosannara iriseeqa sia nifaaqa kudoosaapamasee Yisuna aanai ubeekaranara minnisaaqa.
HEB 12:4 Mandainaina fannoo maasa maqee maqee darimarifaqa mina faqa quandaki rakuaqaammidaqa. Mi rakirafa sia inni fidika ruqieenoo kaqi mariafanoo kaqi fuaqa, sia minara kudoosaapaaqa.
HEB 12:5 Anutufa inni narí faiqi namuara pooduara ufa qimannimusa aunidee sia fee aunidee. Anutuna akaraki minara maaqi qimaseenoo anoonufa akara ridanoo. Qini qimaaku, Anutufa ummaara oosana oosanannai ariara foora ani inana sia minara rufiaa amiqimasee iria. Ani oosana uqafiqaidanoo amiqiraqoo fuanneera miqidanoo. Mifa aniara qaoo qinana sia anee minara kudoosaapaa sia oori runua.
HEB 12:6 Karaambaiqa fannoo mina amuqusi marisa kai naridanoora foora idanoo. Nariara qini faiqi fee qisa kai naridanoora foora idanoo. Akarakinaa ufa miqiminoo marifaqa qinee minara maaqi qidaqa.
HEB 12:7 Aneenna aidafira ummaarara qini qikoofa Anutufa dariara maqi qidanoo fee qia. Aneenna aidafiranara aupuraranannai Anutunara mina amaaku daridanoo fee qia. Aiqama faiqi nikausa aikannai qumaree nári faiqi namu mandoosana akiaqara naridaqa. Aiqamausa nári faiqi namu mandoosana akiaqara naridaqa.
HEB 12:8 Innee Anutuna fiqi namu faqa sia arirana mareenana sia mina faiqi marinnaranoo, dapi faiqí marinnaranoo.
HEB 12:9 Maa maqanasaa maasa qikoofa aikannai qumarasee mandoosana akiaqara darifaqa maasa minara rufiaidaqa mina aaqa maridaqa. Innaarunai qikoofa miqi kai masee dariara foora inaqa firaaqoo mina aaqa maridaqa naaru naaru marianaura.
HEB 12:10 Maa maqanasaaqaraa qikausa nári iriranannai maasa andeeqa qimaqaidaqa aikannai qumaree daridaqa. Anutufa maasa andeeqara oosana maraaqeera oosana oosana ummaarannai maasa dariara foora idanoo. Mifa narí andeeqarana naida qimiraree qidanoo maasa daridanoo.
HEB 12:11 Anutufa maasa ummaarannai dariara maqi ifaqa maasa sia minara asasidaqa doori runidaqa doo maasa miqoo qeeqa mandainaina akiaqara darirana taikasee andeeqasee marirana asooarana maraidaqa asasidaqa.
HEB 12:12 Innee nisauku kudoosaapaifaqa raqandaamasee mariasa nisauku uqusee afeekaikiaqa. Aiku aqoori qumooquki mariannana indindi mariannana minnisee mapukufinana aiku ramaseenana kikiqia.
HEB 12:13 Innee andeeqara aatata kai fifanoo aiku arinafa unufuannoo. Unufinana andeeqasee finnaranoo. Anee manda aatata afiqee finanoo anaiku firaaqoo mandaikiannoo. Anee andeeqara qoo afiqee finanoo ani aiku aidafimarifa taikafinanoo andeeqasee anee finnaranoo.
HEB 12:14 Innee aiqamausa mariasa namufaqa amiqimmandee asooaranaki marirana amaniaqa. Inni mariranakina amiqirafa andeeqarafa kai mariaqa. Sia miqiqa karaambaiqa sia qafeefaranoo.
HEB 12:15 Innee amiqimmandee rakisia, innee Anutuna afaariranaki fuanakiqari quandaki kaqinni ubeekee foora. Innee amiqimmandee rakisiaqa sia moo fannoo inniki saakunananda inniki kambiqafinoo aiqamausa sukaqarana nimiani.
HEB 12:16 Innee rakisiaqa. Sia inniki moo fannoo Esauna aanna raaqa. Mifa andeeqarana minnisee Anutuna ufa rukiasee moodaa naranannai kai afasaafa narí qumiasana narí akaqa doo aminau.
HEB 12:17 Amiseenoo miqoo kasooqaqee aupuranau. Aupureenoo narí akoo finnai anireenoo afaaqooqara qufanoo mina akoofa qinau. Sia, doo ani akaqa amiqa qufanoo Eesaufa ikiraqoofanoo aukunu qumimarufanoo randoo randoo sianoo sia paqurinau, doo taikambinau. Innee sia Eesauna aanna raaqa sia andeeqarana minnisaaqa.
HEB 12:18 Maqee aukuana innee sia Isaraee maqannaasa naanna raidaqa. Maa maqanasaa Sinai aaqana ameemaanai Anutuna ufa iriqau. Innee innaarunai mari Sinai aaqanara foora maridaqa Anutuna afusaa kikiqiqa mariafanoo. Ooqai Isaraee maqannaasa Sinai aaqana ameemaanai anireeqa sia ufa kai nifu qafoona mi aaqannasaa ida firaafa qoofaqa qafoona oonamu namufaqa aakuasaa namufaqa asukuna namufaqa rafaaqafufaqa aiqamausa qafamaseeqa rufiaqau.
HEB 12:19 Miqunakina ukeena qunaki faiqí ufa moo iriqau. Iriqa rufiasee qiqau. Maasa sia moo kaqikaa ufa irianaura, maasa daaquqaifaqa rufieeqa.
HEB 12:20 Mi ufana qidanoo maaqi qinau. Faiqí moo fannoo fee aandau fee maa aaqanna auqamasaifaqa oonisamu qumaree kuqamma arusaaqa. Misa mi ufana irufanoo kaaqa naaquqoofaqa maparaaiqau.
HEB 12:21 Mooseefa faqa Sinai aaqanasaa kambiqoo ainainna qafamasoofanoo kaaqa aaquqoofanoo aindiri aindirufanoo qinau. Qinee faqa qafaunanoo kaaqa daaquqeenoo daindiri reenoo.
HEB 12:22 Mi aukuanna Isaraee maqannaasa mi naaquqara ainainna nifu qafamasoofanoo nifaaqa ramasoofaqa rufiaqau. Maqee innee sia miqiranaki aniifaqa ani maridaqa. Innee Sioona aaqana uqanna kaqi marira Anutuna maqusaki ani mariafanoo. Innaarunai marira Yeerusaree maqusa qangiroo moomoo andandara foora marianaki innee ani mariafanoo.
HEB 12:23 Innee Anutuna ooqa faiqi innaarunai bukaki akara rirausa kai kaaqa firaaqoo suqimarianaki asasimarianaki ani mariafanoo. Innee Anutufiqoo ari mariafanoo. Mifa aiqamausa ufa irisee andeeqannisee marifa maridanoo. Andeeqara fasiqa kuqufusa innaarunai ooruree anoonaikamambiqa innee misa nimana namufaqa andeeqaranaki asasiranaki ani mariafanoo.
HEB 12:24 Ooqai Kainafa narí akaqa Abeerana arufanoo mina fidika teeqinau. Abeerana fidika fannoo Anutunara qini fidika akiaqara anee qiannee qidanoo. Maqee innee Yisuna fidika Abeerana ooriqararana teeqiraqoo ani mariafanoo. Yisuna fidika fannoo Anutunara maasa numoo akiaqara minniqisaannee qidanoo uriqaranoo maridanoo. Innee maqee fuka moodaanaki kira ufa quqee marianaki Yisunaki ani mariafanoo.
HEB 12:25 Minara innee Yisuna ufa sia sia iriaqa. Amiqimmandee rakisimaree iriaqa. Ooqai Mooseefa maa maqanasaaqaraafa qimannimimarufaqa sia iridaqa kuqimariqau. Maqee innaarunaindaraa fasiqa ufa rukiaanafa anee yaifee finnaree mina ariranakiqari rukiasee naqi fee innaree.
HEB 12:26 Ooqai Mooseefa maru aukuana Anutufa qufanoo Sinai aaqanasaa maqa kasinau. Anutufa minara maaqi qimafeekaikinau. Qinee ooqai maqa kasiafannana, kafaa qinee sia maqa kai kasianaura. Innaaruna faqa kasianauranoo.
HEB 12:27 Miqunnara maasa maaqi qidaqa iridaqa Anutufa narí aiqama ainaina auqu quqaqoona kafaa aiqama kasimmaseenoo doo mara aqu taikaannoo. Sia kasimari ainainafa mifa kai kaqi mariannoo.
HEB 12:28 Doo maasa sia kasira ququsaki maridaqa minara maasa susuia. Maasa minara quandakiqa Anutuna aidiranamau kai narí amooqia. Oori kandamasee rufiaqa rufiaqa qiranannai narí amooqia.
HEB 12:29 Maasa Anutufa sia fifau ainaina maridanoo. Ida qamataikannimaqee marifa maridanoo, minara aaqara oosanara rufiaaqa, ani faqa ida qamataikaandoora.
HEB 13:1 Innee asauku mundiranaki marianara nariara nariara moodaa fasiqa anaasee faiqiara foora uriqarara ainainee qimasee sia fifau noonnoo kai nimuqusi marinaqa nariara nariara ruaqa asaukunnoo auqaidana nariara nariara ruaqa. Miqi kai ida sia taikaaqa.
HEB 13:2 Anaamuru sia oori qafainna maqannaana amiqi mandee narana amiqa maaqa amiaqa. Akaqausa miqidaqa sia irirai qangiroo amiqi amiqiqau.
HEB 13:3 Innee karabusaki mariasara misa faqa karabusaki maridara foora amiqimmandee rakisinnimaqaaqa. Asauku mundirana ufasaara aupuree mariasa sia aunuaqa. Innee misa faqa moodaanaki aupuraranara foora nimuqusi marinaqa rakisinnimaqaaqa.
HEB 13:4 Innee aiqamausa faiqí anaasee nimundaranara uriqarara ainainee qiaqa. Faiqí aneesee aqumummasainafa sia moonaindi quandaki qumaraa. Aiqamausa inneeqa nammari kai neeqa andeeqasee mariaqa. Faiqí anaasee dapi narí maree narí maree qiqa nuasa faqa qummuariqa nuasa faqa Anutufa ufa iriseenoo naruannoo.
HEB 13:5 Inni irirafa marirafa munnimma ainainara sia kaaqa rida mariaqa, maqee maree maria ainainnara doo amana maridee qimasee afaaqa quqasee maria. Anutufa minara maaqi qinau. Qinee sia inni minnisee moosaa fuanaura. Inni faqa naaru marianauree qinau minara afaaqa quqasee maria.
HEB 13:6 Maasa mi ufana iriseeqa paasoosamaseeqa maridaqa maaqi qianaura. Karaambaiqa maasa dadaaqimarifa maridanoo Minara maasa sia rufiaanaura, Naqimasee maa maqanasaa qaraasa maasa darifaree. Sia amana darifaranoo.
HEB 13:7 Ooqai indaaru Anutuna ufa qimannimusara sia aunuaqa. Misa amiqi mariranara faqa misa kuqiranara faqa misa Anutuna saqarikiranara faqa iriseeqa misa nimeeraameera kai ida mariaqa.
HEB 13:8 Yisufa asauku mundirafa sia minaki oosana oosana irirafa marifa. Eenda faqa maqee faqa naaru naaru faqa amanamana kai andeeqara irira oosana marifa maridanoo. Innee faqa miqiaqa.
HEB 13:9 Akaqausa Anutuna ufara oosana oosana irirana uqeeraidaqa. Innee sia misa naanna reeqa oonuree anireeaiqa. Anutuna afaariranara mi irirafa kai inni nimana mapuku nimaqainaqa mariaqa, mifa andeeqarafa amiqirafa maridanoo. Oosana oosana sandufa moo narana neeqa moo narana sia neeqa mi ufana qimaqoonannai sia inneeqa nimana mapukusee marifaranoo, mi ufana maroosa sia mi ufafa misa nimana mapuku nimaqanau, sia misa dadaaqinau minara innee Anutuna afaariranara iriaqa.
HEB 13:10 Ooqai Yuda maqanna aanaiqikirausa Anutuna uqiqaana maqa rakisimarusa Anutuna ufamau fidaqa qaindasaa qaraa aandau tatufirana suqee maruna akaqana marasee naqau. Maasa aandau tatufi maria qaindara foora moo maridanoo. Ooqeenaa uqiqaana maqakinaasa sia amana minasaaqaraana marasee nooqini.
HEB 13:11 Ooqeenaa uqiqaana maqaki moodaa faasaana moodaanaki kira faasaanasaa misa uriqararafa aandau fidika mareenoo firaa naaquqara maaqaki oonureenoo qaindasaa teeqimaseenoo raudamaki mi aandauna apata amudaani amaqi aiqama sia naqau, mara mareeqa faiqí naambeeqai munu ida aree mariqau.
HEB 13:12 Mina amanakai Yisufa Yeerusaree maqusa naambeeqai kuqinau. Narí fidikannai faiqí anaasee mandainaina findaukama nisaanifeera miqinau.
HEB 13:13 Maasa faqa Yisuna dadaaqiqa ooqeenaa maaqa naambeeqaira foora Yisufa mariqoo mina asaurirana dadaaqi maraanauranoo.
HEB 13:14 Maasa kasooqaqee uqanna maa maqanasaa sia maridanoo. Maasa kasooqaqee kambiqaaninna maqusara innaarunaindaraanara rakisidaqa.
HEB 13:15 Doo minara maqee maasa maa maqanasaa maridaqa Yisunannai Anutuna dufi dufi qimamaqaidaqa. Maasa aandau tatufirana fooqaafa dufi dufi qirafa maridanoo. Maasa Anutunara kuqaa anoonnee qimaria noonakiqari minara dufi dufi qirafa maqee maqee kambiqaidanoo.
HEB 13:16 Maa ainainna faqa sia aunuaqa, narí amiqi narí amiqiaqa, inneeqa ainaina innee iriranannoo kai raineeqee niqoonausa narí ami narí amiaqa. Anutufa miqira ainainara amiqira tatufira aandaura foora maridanoo fee qidanoo qaqaara raidanoo.
HEB 13:17 Innee inneeqa uriqararausa qinnandee kai iaqa. Misa Anutuna saika maraidaqa inni nimanara maqee maqee rakisidaqa. Anutufa kasooqaqee misa innisaa rakisiranara iraannoo. Innee misa ufara eedoo qifaqa misa asasammasee mi ainainnammifaranoo. Innee misa ufa rukiaifaqa misa nifaaqa qumooqukidaqa nikoo nikaa ifaranoo. Misa nikoo nikaa idaqa sia inni dadaaqifaranoo.
HEB 13:18 Innee maasara maqee maqee innaaru qiaqa. Maasa qimana sia moo ainainara iridaqa andeeqaraqoo kai firanara ridaqa inni qimannimidaqa. Innee minara maasara faqa innaaru qiaqa.
HEB 13:19 Qinee qeeqara faqa inni qimannimidaqa. Innee qiniara faqa innaaru qifanoo Anutufa qini dadaa qinaqa innee innannai kaqi kaqi fua.
HEB 13:20 Naaru naaru moodaanaki kirana Yisufa asauku mundirafa kuqiranannai mina fidikannai doo mapukuseenoo maridanoo. Anutufa mina kuqiranakinaana uqeereeqeenoo faiqí anaasee rakisirana firaanaikamaqaifanoo maridanoo. Narí kuqiranannai faiqí aanaaseesaa rakisirafa maridanoo.
HEB 13:21 Anutufa asooarana faqaafa innee mina iriranamau fifandinna oosana akoofasaikirana inni niminaqa fuaqeera. Anutufa asauku mundiranannai maasa faqa mareeqeenoo narí aidira oosanaki narí iriranamau firanaki quqannisaani. Aiqama amooqirafa faqa kaaqa areenarafa faqa asauku mundiranaindi naaru naaru mariannoo. Kuqaa.
HEB 13:22 Oo qini qikaqaafasaa innee maa ufana amiqimasee asaana ruaqa. Dadaaqira ufa maridanoo sia kisaaqa akara riqa minara qimannimidaqa.
HEB 13:23 Qinee maa ainainnara faqa qimannimidaqa. Maasa qikaqa Timootifa doo Roomma maqannaa karabusaki Yisuna ufasaara rumbaqoofa idukinoo maridanoo. Mifa dauni dauni mai anirainaqa afiqee innee marinnaqoo oonureeqa maaqanda inni niqafaanaura.
HEB 13:24 Innee maasa qimandarana inni uriqararausa faqa aiqama Anutuna ufa irimariasa faqa qimannimiaqa. Itari maqannaasa maaqooqaraasaki mariasa inni nikaqaafasaa mariasa inni nimandaidaqa.
HEB 13:25 Anutuna afaarirafa inni faqa mariani.
JAM 1:1 Anutuna aiku asauku maaqa maaqa daraaniqa mariasa qinee Yameesasa inni nimandaidaqa. Qinee Anutuna eedoo qira rumbara saikara foora marunna fasiqausa maridaqa. Asauku mundirana Yisuna maasa karaambaiqa mina faqa eedoo qira rumbara ainainira fasiqara foora maridaqa nimandaidaqa.
JAM 1:2 Qini qikaqaafasaauaqa oosana oosana ummaara ainaina nimanamasee qafarafa innisaa aqufinaqa sia minara maparaaiaqa dufi dufi qimasee Anutufa sia minannai daridanoo, afeekaikamma qimaqaidanoo qimidanoo fee qimasee asasiaqa. Mi nimanira ainainafa inni firaaqoo narinaqa inni Anutuna saqarikirafa kaqi kai marinanoo inni mi saqarikirafa mifa inniki sabeenara foora afeekaikamasee mariaqeera mariannoo.
JAM 1:4 Innee miqiqa maridaqa Anutuna ufamau kisaaqasaa fimarifanoo inni marirafa nirafa muduka kaqi mariaqa sia kaqikaaqo sia amanaikiaqa kaqi amana kai muduka marianifeera miqiqa mariaqa.
JAM 1:5 Inniki akaqausa irirafa sia amanaikinausa Anutunai innaaru qifanoo nimiani. Anutufa paapaa imarifa amiqimasee irirana kaqi nimimarifa maridanoo.
JAM 1:6 Innee iriranara innaaru qidaqa sia oonumafi qaara irira iriaqa, oonumafi qaara irira irimariasa ufaira foora uqimariafanoo.
JAM 1:7 Miqinna fasiqausa sia karaambaiqaindaraana aundurai dadaaqirana mareefaranoo misa yaifee fuanau yaifee fuanau qinausa sia moo ainaina mareefaranoo.
JAM 1:9 Innee Yisuna ufara suqimariasaki Anutuna saqariki mariafanoo innikinaana kudi fasiqauqa nisaurimariasa Anutufa inni mara uqeerasee innarunai fuaqee qimaqainara noori uqeerasee asasiaqa. Inniki ainaina faqaasa kookuna qaqamara foora ufai fuaqa aqusainaqa taikafifaranoo.
JAM 1:10 Suani qeenoo firaaqoo aiqaiqinanoo kookuna aadanusinanoo afufeenaarirana kakasinanoo afu qafainanoo amiqi amiqirafa taikafuannoo. Miqi kai inoo ainaina faqaasa oonauqee ani auqee idaqa miqidaqa doo taikeefaranoo. Miqunara Anutufa ainaina faqaasa sandaaqaindaraana mareeqee maqasaa quqasainaqa misa faqa kudifasiqauqa faqa asasiaqa.
JAM 1:12 Faiqí akaqausa nimanamasee qafee mari ainainafa kisaaqasaa narimarifaqa Anutuna faqa kaqikai fidaqa miqimaria fasiqa anaaseesa amiqiranaki mariasa mariadaqa. Miqinna fasiqa anaaseesa mi nimanirana taikasaifanoo Anutufa ooqai qima afeekaikira feefauru naaru marirana nimiannoo narí Anutunara rimariasa kai nimiannoo.
JAM 1:13 Nimanira ainaina fannoo faiqí anaasee moo nifaaqasaa aqufinanoo sia Anutunaindari maa mandainainafa aniannoo fee qimasee oonumafi iriannoo. Mandainaina fannoo sia amana Anutuna amanamasee qafaannoo Anutufa faqa sia moo mandainainannai nimanamasee qafaannoo, sia miqidanoo.
JAM 1:14 Faiqí anaasee nári mandainainara nidirafa nári rarisameeqeenoo nári ufaanaki naridanoo.
JAM 1:15 Nári mi manda nidirafa innooqeenoo radiqififanoo mandoosana kambiqaidanoo. Mandoosana kambiqeenoo innoqafinoo kuqiranaki aqufidanoo.
JAM 1:16 Oo qini qikaqaafasaa maa maqa maaqanaki mariasa, sia Sadannafa nikaru qinnana iriaqa. Aiqama amiqira nimira ainaina idaaqirana kaqi nimira afeeka ainaina innaarunaindari qumidanoo. Anutufa innaarunaindaraa qoomauqaindi auquqoofauqa mindari mi amiqira ainainausa qumidanoo. Anutufa sia suani quqoonara foora oonuree aniree ifa moodaamau kai fimarifa.
JAM 1:18 Anutufa narí iriranannai kai narí anoona ufannai kai maasa narí fukasaa aanaaqi aanaaqikiranaki quqaqiseenoo maasa narí ufini aandau aiqama ainaina uriqararausai kamafi mariaqeera auquqisanau.
JAM 1:19 Oo qini didimari qikaqaafasaauqa maa ufana naaqoonnoo iriaqa. Innee dauni moonufa irisee kasooqaqee aneenna ufa qiaqa, sia qusufa qimasee aanooqiaqa.
JAM 1:20 Faiqí anaasee aanooqirafa sia Anutuna andeeqara oosana dadaaqi uqeeraidanoo.
JAM 1:21 Innee inneeqa aiqama manda kudimakira oosana faqa manda nira oosana faqa fatika aqusee mariaqa. Innee inneeqa afeeka minnisee Anutuna aramandunnai madoodoonaqa mariaqa, maridaqa Anutufa narí ufa inni nimuqusaki quqeemarina maraaqa. Mi ufananoo inni asumu maraannoo.
JAM 1:22 Sia anutuna ufa naaqoo kai irisee minnisee oo qinee. Anutuna ufa irimarunausee qiaqa. Miqi qidaqa nariqa nikaru qidaqa. Naaqoo iriseeqa nisaukukoo qumaraaqa.
JAM 1:23 Anutuna ufa irisee sia qumaree marifa tanukaki qafee mari fasiqafara foora maridanoo moodaannai qafamaseenoo quandaki oori kaqinni ubeekaidanoo narí oori qafai oosanara aunimarifa. Anutuna ufa irisee sia qumaree marifa miqirafa maridanoo.
JAM 1:25 Anutuna idaaqira aaquqira ufa faiqí nifaaqa idukirafa maridanoo. Faiqí anaasee moo fannoo maqee maqee amiqimmandee minaki qafee marifa sia kaqi fifau irisee aunimarifa irisee qumaree marifa mi fasiqafa nana ainainee auqainanoo Anutufa dadaaqinoo amiqi amiqimmiannoo.
JAM 1:26 Faiqí anaasee moo fannoo nariara Anutuna ufa irimarunausee qimasaidanoo sia narí afauruara amaakiriara oonumafi iridanoo kaqi oosana oosana mandufa urirara kai qimarifa mi fasiqafa Anutuna saqarikirafa sia maridanoo kaqi fifau marifa maridanoo narí afauru fannoo narí akaru qidanoo.
JAM 1:27 Maasa qikoofa Anutufa maa qaaramoo ainainausa maraanara kuqaa anoona qini saqarikirausammiafoo qidanoo. Moo oosana fiaiqi faiqi rakisirana faqa moo oosana adeedaana aanaaseeuqa nariqa aupuraranaki mariasa rakisirafa faqa moo oosana maa manda maqa maaqanakina mandoosanauqa qifaaqai aqufuandoo qimasee eerairinafa faqa mi ainainna namuna maree mariasara kuqaa anoona qini saqariki mariasee qidanoo.
JAM 2:1 Qini qikaqaafasaa mariasa. Asauku mundirafa Yisufa maasa karaambaiqa Anutuna kaaqa qarana uriqararafa maridanoo. Innee mina ufa iridaqa sia faiqí amiqira nifaaqa qafainnanara amiqira qamunna qafainnanara rainasee amiqira fasiqa fee qimasee minara amiqi amiqia, kafaa sia moona afaaqara manda fasiqa fee qimasee minara akoo akaa iaqa.
JAM 2:2 Innee amaana maqaki suqufi keeqaifanoo moo fasiqa ainaina faqaafa amiqira afaaqa qamunna afisirafa asaukuki rinna marinafa keeqaannoo moo fasiqa qamunna anaqanaqirafa keeqaannoo, innee amiqira afaaqa qamunna faqaanara amiqira fee qimasee amiqira qoo mara quqasaifanoo ooqu mariannoo manda afaaqa qamunna faqaanara kaqi kikiannee qifanoo kaqi kikiqinoo mariannoo fee maqasaa fee ooqu mariannoo fee. Innee miqidaqa manda iriranannai faiqí rainee mariafanoo.
JAM 2:5 Qini qikaqaafasaa mariasa qini ufa iriaqa. Anutufa ainaina siaisara rusandeesamu mandeenoo qafamaseenoo qumareeqeenoo narí saqariki mariasaki uriqararanaki mariaqeera narí innaaruna ququsa maraaqeera ainaina siaisa utaaqamannisaidanoo. Anutufa faasa nariara rimariasara niqafamasee qima afeekaikammasee innaaruna maqa maaqa nimiraree qimaqoofa maridanoo.
JAM 2:6 Anutufa miqimasee ainaina siaisa uqeeraifaqa inneeqa ufannai rainannimaqaidaqa unnaqimasee misara maqasaa ooqu mariaqee qimariafanoo. Yafa yafee inni Yisuna ufa irimariasa mareeqee ufaki siaasinnai quqaida fee, ainaina faqaasa kai miqidaqa innee aaqaidaqa misara amiqira qoo ooqu mariaqee qimariafanoo. Anutufa inniara narí amaakundi fee qimaqoofa marifaqa ainaina faqaasa kai miqiasara manda fasiqee qidaqa Yisuna uriqararana aquraraidaqa fidiaqaammamaqaidaqa.
JAM 2:8 Anutuna ququsakinaa ufa maaqi qimasee akara rinoo maridanoo, inneeqa niqoonausara inniqa nifaaqara foora nidianinani. Innee mi ufanamau fidaqa andeeqasee fifaranoo. Innee faiqí nifaaqa qamunna qafamasee rainee mariana mandoosana mareemariafanoo miqimarianara Anutuna sandufa fannoo inni rafaaqafidanoo.
JAM 2:10 Faiqí moo fannoo Anutuna sandufa aiqama qumaree marinafa moodaa kai aaqamasainafa mifa Mooseena sandufa rukiee marifa maridanoo.
JAM 2:11 Anutufa qinau sia innee faiqí anaasee narí qummuari narí qummuari iaqanani. Mifa kai innee sia faiqí anaasee kuqa naruaqee qinau. Anee sia anaasee qummuarinana kafaa quandaki faiqí arinana Anutuna sandufa rukiee marianafa mariananoo.
JAM 2:12 Anutuna sandufa sia faiqí rumbee marifa maridanoo faiqí iduki marifa maridanoo Anutufa mi sandufanasaa kasooqaqee inni ufa iriannoo minara mandainainakiqari idukira kasiqa naanna ramasee andeeqasee maridaqa ufa qiaqa.
JAM 2:13 Innee inneeqa niqoonausara sia nimuqusirana nimifanoo Anutufa faqa inniara faqa sia amuqusirana nimiannoo. Nariqa niqoonausara nimuqusidaqa dadaaqimariasa sia Anutuna ufara rufieefaranoo, amiqimasee marifaranoo.
JAM 2:14 Qini qikaqaafasaa mariasa, faiqí anaasee moo fannoo nariara Yisuna saqariki marunausee qidanoo sia narí marirana akooroo idanoo mi fasiqana saqarikirafa fifau maridanoo. Miqi mandee saqarikinafa amanee naaru naaru marirana amiannoo fee, sia amana amiannoo.
JAM 2:15 Qinee minara iridaqa moo ainaina kikiqa usuanaura. Inni nikaqaafasaa fee nisooqmaakee kuqaa sarauqimariasara qidaqa misa innee innannai aniree naranaree qamunnaree innaaru qifaqa innee sia nimiqa fifau nifaurukoo kai maaqi qia Anutufa inni amiqi amiqiannoo innee oonu qamunna afisusaifanoo inni nifaaqa tootoo qinaqa narana suqasee naaqa. Miqira ufa sia anoona maridanoo fifau ufa maridanoo. Anee kaqi kasinana nipatasaa sarauqi maria ainainna andeeqasee nimiaqaana.
JAM 2:17 Yisuna saqarikirafa miqi kaimminoo maridanoo fifau afaurunnoo akaqaafasaara anee oonu qammunna afisusee narana naa. Miqira ufa sia akaqaafasaa dadaaidanoo. Miqi kai inoo fifau afaurunnoo Yisuna saqarikidee qinafa sia asaukunno Anutuna ufa qumarasee inafa marinana ani Yisuna saqarikirafa kuqinoo maridanoo.
JAM 2:18 Faiqí anaasee moo fannoo minara qiannoo, anee Yisuna saqarikirana qumaree marianafa mariananoo qinee qisaukunnai Anutuna ufa qumaree marunausa maridaqa. Qinee Yameesasa minara maaqi qidaqa. Qinee naqimasee ani Yisuna saqarikirana qafaanauree asaukunnoo qumararafa sia marinaqa sia qafaanaura. Qinee Yameesasa qeeqa Yisuna saqarikirana qisaukunnai qumararana miqiqa inni uqannifiqaanaura.
JAM 2:19 Anee fee aneennaraa kai fee Anutufa moodaa mari fee qimasee mi iriranannai kai anee amiqiranaki maridee qidanee. Oo amana innee afaannauqa ufa moodaamau aamasee qimariasa mariafanoo. Afaannauqa faqa Anutunara moodaa mari fee qidaqa nariqa mandainaina akiaqara narifandinnanara iriafanoo naaquqaidanoo naindiri raidanoo.
JAM 2:20 Oo furufarira fasiqa anaasee asaukunnai dadaaqi qumararafa sia maridanoo Yisuna saqarikirafa narí kai miqoo marida fifau ainainara foora maridanoo. Qinee mi oosannara kafaa koorooianaura.
JAM 2:21 Maasa qifaqnafa Abarahaamafa naqimaseenoo fee Anutuna faqa moodaanaki kinau. Narí asaukunnai narí faiqi Isakeena qumareeqeenoo qaindasaa tatufira aandau suqa amianeera quqoonannai Anutuna faqa moodaanaki kinau.
JAM 2:22 Sia fee innee iridee. Abarahaamafa narí Anutuna saqarikirana faqa narí asaukunnai qumararana faqa miqandannoo narí dadaaqi narí dadaaqinau. Narí asaukunnai qumararafa narí saqarikirana dadaaqufanoo anoonaikinoo amiqinau.
JAM 2:23 Minara akarakina kuqaa maaqi qinau, Abarahaamafa Anutuna aamuaqira ufa irisee kuqaa fee qimasee saqarikufanoo Anutufa mina qafamaseenoo oo andeeqara fasiqa mareenoo qinau. Miqi qimaseenoo Anutufa Abarahaamanara qini qiqoondi fee qinau.
JAM 2:24 Doo innee Abarahaamana oosana qafamasee iriaqa, faiqí sia narí saqarikiranannai kaifau Anutuna faqa moodaanaki kidanoofau asaukunnai qumararanannai faqa moodaanaki kidanoo.
JAM 2:25 Yeerikoo anaasee moo Raqaba nammarifa dapi nuaanaaseefa marinau. Mifa miqi kai inoo narí asaukunnai qumarasee iranannai Anutuna faqa moodaanaki kinau. Mifa Anutunara irisee Yuda maqannaa qaaraqanda nipuraraa fasiqaqara narí maaqaki mara kukeeqaseenoo kafaa mareeqeenoo moo aatata quqasoofaqa fiqau.
JAM 2:26 Maa ufausa ati minara maaqi qinoo maridanoo. Faiqí amana sia marinanoo apata kai doo iri maridanoo kuqinoo mariannoo. Anutuna saqarikirafa naríara maridanoo miqinoo maridanoo asauku qumarasee inafa sia marinara doo kuqinoo maridanoo.
JAM 3:1 Qini qikaqaafasaa Yisuna ufara suqimariasakiqari innikiqari sia moomoosa ufasaa rakisirausaikiqa mariaqa. Maasa ufasaa rakisirausa afeeka ufa Anutufa kasooqaqee qimiannoo, kaqiqeesa oorudupinoo nimiannoo. Maasa aiqama aaqeemariasa maridaqa. Faiqí anaasee moo fannoo narí ookiqari sia aaqainafa doo mifa anoona paqurimaseenoo doo narí afaaqa ainaina marirana faqa andeeqasee rakisida mariannoo.
JAM 3:3 Maasa qainnannai qoosa ooki aaku amaqaseeqa mina uqirausa fidaqa quanda quanda imarifanoo aatata fidanoo. Sipa minara faqa iriaqa firaa ainaina tia maridanoo ooruku nammariki fidanoo ufai firaafa fuaqee marifanoo fidanoo minaki mari kiateenafa kaqikaa sitiaqa quandee marifanoo fidanoo.
JAM 3:5 Maasa qifauru ririmma kaqikaa ainaina maridanoo firaa ufa tia ririmma uqeeraidanoo. Kaqi idatiara foora firaa qusau nanda utauridanoo.
JAM 3:6 Maasa qifauru idati miqirafa maridanoo narí mariqooqari aiqama mandainaina oosana oosana aiqama maasa qifaaqasasa daraanidanoo. Mi idatifa Sadanna idati qumbisee quandakinoo maasa aiqama marirana nirana qumbiqaraidanoo.
JAM 3:7 Faiqí ooqai faqa maqee faqa amana kaasau ainaina oosana oosana aandau fee ufini fee noodaanna fee maqamau nimari ainainnee firifanoo reendeeniannoo.
JAM 3:8 Nári nifauru kai faiqí ooqaindari sia reendeenimariafa maridanoo. Sia amana faiqí rafaaqafirana amana maridanoo sukufa minaki qumbiqanoo maridanoo.
JAM 3:9 Maasa minakiqari maasa qikoona maasa karaambaiqara minakiqari dufi dufi qidaqa kafaa quandaki Anutufa narí amana kai maasa qiqoonausa auquqoosa niquraraidaqa.
JAM 3:10 Dufi dufi qirafa faqa niqurararafa faqa moodaa dookiqari kaimma ururaidanoo. Oo qini qikaqaafasaa mariasa mi ainainafa sia andeeqanoo maridanoo.
JAM 3:11 Maqakiqari ururee mari nammarifa sia moodaa aamaraindari sukaqee marifa faqa amiqimarifa faqa ururaidanoo.
JAM 3:12 Sia faafisa namufaqa keefaadi iraannoo. Sia kamukamuna sanda fannoo faafisa iraannoo. Sia ooruku nammari fannoo faqa nammari uqanna fabaqa iannoo. Maasa nifauru fannoo kai qaaraikidanoo. (Maaqoo misa saqari sia marifaqa kaqi maaqooqaraa saqari auquraidaqa. Faafisa maaqooqaraasaindi Yuda maqannaasaindi mina fooqaafa asumu faafis maridanoo. Keefaadiara oorifa saqari fee qimariqau. Kamukamunara kareepa fee qimariqau.)
JAM 3:13 Inniki moo fannoo nariara irirana faqaasee aiqama ufa oosanara irimarunausee qimarifa doo mi fasiqafa narí amiqira mariranannai faqa amiqira qumararanannai faqa reendeenirana namufaqa narí irirana namufaqa koorooianifeera.
JAM 3:14 Anee aneenna amuqusa ookiqari sukaqarafa faqa rairaiqirafa faqa ainainara kaaqa rirafa faqa urinana anee unna qimariananoo sia aneenna iriranara uriqarar fee qia.
JAM 3:15 Mi irirafa sia innaarunainadari qumidanoo maa maqa maaqanasaaqaraafa maridanoo sia innaarunaindaraafa, afaannaindi maridanoo.
JAM 3:16 Rairaiqirafa faqa oonititee anititee irafa faqa mariqoo miqoo dapi marirafa faqa mandainaina oosana oosana faqa mariqoo maridanoo.
JAM 3:17 Innaarunaindaraa irirafa indaaruqaafa sia ikairi faifa amiqirafa mifa naaree indaaru doo mina miqooqari asooarana nimirafa faqa fisoo fisooirafa faqa aiqamausara aqoondikirana faqa miqimarifa faiqiara qimudaoo qirafa qumbiqanoo maridanoo mi innaarunaindaraa irirafa mifa amiqira narana unakuseenoo afaaridanoora foora amiqira oosana nimimarifa mifa sia qaara ufa qirafa marifa. Mina marirana faqa sia qaaraikinoo maridanoo. Innaarunaindaraa irirafa miqiminoo maridanoo.
JAM 3:18 Asooeemariasa nári amiqira marirana qaqamara fooqiara asooaranaki ummaqusaafanoo minakiqari amiqimmandee andeeqarafa kambiqaidanoo.
JAM 4:1 Inniki rakirafa faqa tinoorirafa faqa marifa yaindari fee kambiqaidanoo fee. Inniqa naundurakinaa amiqira ainainara rirana faqa mandainainara rirana faqa oosana oosana ainainara naunduraki qoofana qaidaqa rakidanoo.
JAM 4:2 Innee akaqainainara rumammareeqa sia amana maraanaura moonaindi maridanoo qimasaidaqa faiqí narusee maraidaqa. Innee akaqainainara nimukee marifaqa sia amana maraanauree qimasee ufa rainaidaqa rakimariafanoo. Inneeqa rimaria amiqira ainainara Anutunara sia ireeqa sia maree mariafanoo.
JAM 4:3 Innee Anutunara iraifanoo inni manda iriranara iridammunoo qimaseenoo sia nimidanoo. Innee inneeqa nifaaqaroo qira nidirafa marifaqa mi nidiranasaa taikaanifeera Anutunara ireemariafanoo sia nimidanoo.
JAM 4:4 Innee ummuari mari anaaseena aanna raidaqa innee maanara sia fee iridee, innee Anutuna aqoondi fee qimasaida maa maqa maaqanasaaqaraasa ainaina aqoondikidaqa Anutuna namuqaaki mariafanoo sia fee minara iridee. Faiqí anaasee moo fannoo maa maqa maaqanakinaa ainaina aqoondikiannee qimaseenoo minara kai inoo Anutuna namuqaakidanoo.
JAM 4:5 Anutuna tamummaqara fasiqa akara moo maaqi qimasee anoonufa qidanoo, Anutufa maasaki quqoo maraqunafa maasara naríndi kai fee qimaseenoo rairaiqidanoo fee qimaseenoo akara rinau.
JAM 4:6 Sia rairaiqirana kai Anutufa sia qaara irirana iriaqeera minaindika kai iaqeera maqee maqee dadaaqirana qimidanoo. Anutuna akara minara kaifaa maaqi qidanoo, Anutufa nári nuqu uqeeraida nári nimooqimariasa rafaaqafidanoo qaoo qidanoo kafaa quandaki reendeeni mariasa afaarimariana faqa fisoo fisoo imariana faqa nimidanoo.
JAM 4:7 Innee mi ufana irisee inneeqa afeekaikirana minnisee Anutuna aramandunnai ooqumariaqa. Miqi mambiqa Sadannana naakaparana rafaaqafusee qaoo qifanoo sandaani.
JAM 4:8 Anutufa marinnai aaqa anifanoo mifa quandaki inni naaqa aniannoo. Innee mandoosana maree mariasa inneeqa ikairi nisaukusaa marina nammari uquaqa. Innee qaara ufa qimarisa inneeqa naundura anukaaqa.
JAM 4:9 Inneeqa naanaindara qirana minnisee ikiraqaaqa innee inneeqa asasirana minniseeqa noori runuaqa, innee noori kandamasee ikiraqeeqa ikifaafau iaqa.
JAM 4:10 Miqidaqa Anutuna afusa ureeqafifanoo Anutufa inni uqeeraani.
JAM 4:11 Qini qikaqaafasaa sia narinni narinni naraquraree naraquraree qiaqa. Faiqí anaasee moo fannoo narí akaqaafasaa aqurarara ufa qinafa Anutuna sandufa aqidanoo mina uriqararafaika midanoo. Anee anutuna sandufa aqinana anee sia mi ufana ameemaanai marianafa anee mi ufana uriqararausee qimariananoo.
JAM 4:12 Anutufa kai sandufa nimimarifa sandufa uriqararafa maridanoo. Mifa narí kai faiqí asumu araannoo fee narí kai naru taikaannoo fee. Innee yausee marida fee inneeqa nikaqaafasaa niqida fee urinaaqaraidee.
JAM 4:13 Innee maaqi qimariafanoo. Maqee fee duna fee qinee moo maqasaa oonureeqa bisinisamasee fee saikamasee fee firaa narana ummaquseeqa moo aukuana narana moomoo afuqai marinaqa mina akiaqara munnimma moomoo maraanaura. Innee miqi qimariasa qini ufa iriaqa.
JAM 4:14 Innee sia duna faasaana kambiqaaninnanara irimariafanoo. Innee nári nimooqidaqa sanapaaruna miqirausa maqa maaqa ititai qafauna dauni rakee idanoo.
JAM 4:15 Innee minara irisee duna moonara maaqi qiaqa Karaambaiqa irirafa miqinoo marinaqa maasa miqianauree maaqianauree qiaqaana. Mina irirafa sia miqinoo marinaqa sia mina maraanaura.
JAM 4:16 Innee sia miqi qimariafanoo maaqi qimariafanoo innee inneeqa nifaaqa nimooqimariafanoo firaaqoo inneeqa nuqu uqeeree mariafanoo. Miqi maria ufafa aaqeemariafa maridanoo.
JAM 4:17 Doo qinee maqee andeeqara aana uqannifiqeeqa sia mi mau fiqa aaqeefaranoo.
JAM 5:1 Doo innee kaaqa firaaqoo ainainafaqaasa qimannimidaqa qini ufa iriaqa. Innee dinee quqaida noori runimariafa qusasaa innisaa aqufuannoo aqufuaninnanara irisee ikiraqaaqa, ikiraqeeqa ikifaafau iaqa.
JAM 5:2 Inni moomoo ainaina doo putaamma taikeenoo inni qamunna amiqirana doo qooqoosa qumura neenee taikaseenoo inni koora munnimma moomoo faqa siuraa moomoo faqa doo taafi aiqama aru finoo mi taafi arirafa quandaki inni mandoosana kooroo inoo inni nimaqi ida kai qamataikaannoo. Innee maa maqee kamuqoo taikainna kamuqoo moomoo munnimma ainaina afeedi mariafanoo amuaaqa amuaaqa faqa rusimariafanoo.
JAM 5:4 Inneeqa munnimmara nimuqusinaqa ainainira faiqiuqa feefauru sia andeeqasee nimimariafanoo. Misa minara faaqari mariafaqa innee sia fee minara iridee. Misa inniara feefaururara faaqarirafa mifa firaaqoo ooru fimarifanoo karaambaiqa Anutufa uriqararafa innaarunai mariqoo ooru fifanoo iridanoo.
JAM 5:5 Innee maa maqanasaa maria kamuqoo aiqama ainainna amiqiranaki faqa nári nidimari ainaina moomoo maree marianaki faqa mariafanoo. Rakirafa anidanoo ani aqoonausa kuqa narimariafanoo innee inneeqa nifaaqa afeedidaqa narana moomoo naidaqa nainooki mariafanoo.
JAM 5:6 Innee moomoo munnimma faqaasa innee andeeqara fasiqauqa unnufannai kootaki narira ufa nimiseeqa kuqa nárí mariafaqa misa sia amana qaoo qiafaqa innee kaqi naruafaqa kuqidaqa.
JAM 5:7 Oo qini qikaqaafasaa Yisuna ufa irimariasa, karaambaiqa kafaa qumiranara ubiqafi kasoomambi marida afeesara mariaqa. Ququsa akoofa narana ummaqusee sia munari minari idanoo ubiqafi maridanoo moomoo narana ummaquqaina kambiqaranara ubiqafi afeesida maridanoo mifa aaku afeesara maridanoo aaku maqasaa quminanoo narana kambiqaannoo.
JAM 5:8 Innee miqi kai iqa karaambaiqa qumuaninnanara afeesiaqa, mifa qusasaa qumuannoo minara inneeqa nimana mapukusee maridaqa ubiqafi afeesiaqa.
JAM 5:9 Oo qini qikaqaafasaa sia nariara nariara munuqi miniqiaqa, miqifanoo Anutufa faqa inni faqa ufa nimiannoo. Maasa ufa andeeqaaninafa Anutufa adeediranoo maridanoo maasaki keeqarara deedaqida maridanoo. Minara nariara nariara sia munuqi miniqiaqa.
JAM 5:10 Qini qikaqaafasaauqa innee ooqai Anutuna tamummaqara fasiqauqa oosana irimariafanoo. Miqoo mikamuqoo marusa oosana oosana narirana nimufaqa misa qafeeqa ubiqafiqa kasoomambi maraqau. Innee misa naanna raaqa narifaqa miqiaqa.
JAM 5:11 Anutuna tamummaqara fasiqausa ubiqafi maroonara amiqira fasiqauqee qidaqa. Innee Yoobannara irimariafanoo, kisaaqasaa ubiqafi mariunara mina aanna raaqa. Yoobanna aidafirafa taikoofanoo mina ainainira faiquqa faqa ufai faqa maqa kasirana faqa mina ainaina mara furufarammasee taikaqoofanoo Anutufa quandaki firaaqoo amiqi amiqi maisanau. Karaambaiqa Anutufa amuqusirana faqa nifauarana faqa qumbiqarafa marunara amiqi amiqi maisanau.
JAM 5:12 Qini qikaqaafasaa qini ufa akiaqa maafa maridanoo. Sia inneeqa nimana niqiqaida ufa qiaqa sia innaarunai nisauku uqeerasaida ufa qiaqa sia moo ainaina kikiqususaida ufa qiaqa. Innee andeeqasee eedoo kai qiaqa andeeqasee qaoo kai qiaqa. Innee sia miqifanoo Anutuna ufa innisaa aqufuandoora.
JAM 5:13 Innikiqari moo fannoo mandainainaki maridanoo fee Anutunara innaaruqiani. Moo fannoo asasidanoo Anutuna amooqira idi raani.
JAM 5:14 Innikiqari moo fannoo auridanoo aurimaria fasiqa anaaseesa amaana maqasaa rakisirausa naaraifaqa misa aniree mi fasiqa anaaseena auriranara innaaru qimasee sauna anoona fooqaana akiaqa amoondunna karaambaiqa auqusaa qimasee adieefaranoo.
JAM 5:15 Misa naundura Yisunasaa mundusee innaaru qidaqa mi innaaruqirafa aurira fasiqa anaasee mara findifuannoo. Karaambaiqa fannoo marafindifidanoo mina aaqarafa marinanoo karambaiqa minnisaannoo.
JAM 5:16 Inni nariara nariara manda irira irimariannana akooroomaseenana nariara nariara amiqiaqa. Inni aurirana taikaanifeera nariara nariara innaaru qiaqa. Andeeqara fasiqa innaaruqirafa afeeka ainaina maridanoo.
JAM 5:17 Eeriana oosana ririmma maasara foora faiqí faiqi Anutuna tamummaqara fasiqa fannoo, mifa afeekaikamandee aaku sia ruanifeera innaaru qimasoofanoo qaara faqa qaara faqa aukuana faqa moo ati faqa aaku sia rinau.
JAM 5:18 Kafaa innaaru qimasoofanoo inaarunaindari aaku maqasaa qumufannoo narana kambiqanau.
JAM 5:19 Qini qikaqaafasaa innikiqari moo fannoo anoona ufara minnisee kaqirunna mandainainaki finanoo moo fannoo andeeqara fasiqa fannoo oonu mina qumareeqeenoo amiqira aanai ubeekainafa mi fasiqafa mandoosana marai fasiqana maraquna kuqiranakinaana uqeereeqeenoo kaqi mariraqoo quqaannoo. Mi andeeqara fasiqafa miqinannai moomoo mandoosana akiaqara faqa Anutuna afusaa rafaaqafu aisaseenoo aminau.
1PE 1:1 Qinee Peetooroosa Anutuna asauku mundirafa Yisufa narí faiqi namukiqari maa maqanasaa diqiqamaqai fasiqausa maa ufana inni akara rumannimaqaidaqa. Innee Anutufa inni rusandeesamumasee qumaroo fasiqa anaaseesa mariafanoo. Innee maaqooqari asaquakida Isaraee maqa maaqakiqari daraanimafusa Poontusa maqa maaqaki fusa faqa Karatia maqa maaqaki fusa faqa Kapadoosia maqasaa fusa faqa Asia maqasaa fusa faqa Pitinia maqa maaqaki fusa faqa inni aiqamausa maa akarana rumannimaqaidaqa.
1PE 1:2 Maasa qikoofa Anutufa maqee maa kari narí ianinnanara iriseenoo inni rusandeesamumaqoosa mariafanoo. Sia fifaufau rusandeesamuinau. Asauku mundirana Yisuna fidikannai findaukarausai kiaqeera faqa Yisuna ufara eedoo qimasee mi mau fuaqeera faqa Yisuna maraqunannai kaaqa andeeqara fasiqa anaasee kammafi mariaqeera inni rusandeesamumasee maranau. Anutuna afaarirafa faqa asooarana faqa inni naundurai qumbiqafinoo irairaamminoo mariani.
1PE 1:3 Karaambaiqa Yisufa Anutuna asauku mundirana akoonara Anutunara maasa aiqamausa dufi dufi qimamaqaidaqa. Maasa aaqarana akiaqara nifauarafa firaafa marinara narí asauku mundirafa kuqiranakiqari findifinoo fukasaa aanaaqi kammafi marirana maasa paqurimma qiminau. Naaru kambiqaaninnanara maqee asasiqa doo mi marirafa maasa qumbiqaqimaqaidanoo.
1PE 1:4 Amiqi amiqira ainaina Anutufa narí aiku asauku maasaree qimasee innaarunai rafaaqafimari ainaina maasa mina marararee qidaqa maasa minasaa kai qifu mundusee fidaqa. Mi amiqi amiqira ainainausa Anutufa inniara innaarunai quqaqaqee rakisidanoo sia putaa imariqoo sia nauraanaiki mariqoo sia taikeemariqoo maridanoo inniara rakisidanoo.
1PE 1:5 Mi ainainausa innindi maridanoo Anutuna afeeka fannoo inneeqa Yisuna mandaaqaranannai inni faqa mara afeedamma nimaqee mariasa mi ainainausa innindi maridanoo. Innee taikainna aukuana innaarunai findifi ooru firanara afeesara mariafanoo Anutuna afeeka fannoo innisaa rakisidanoo.
1PE 1:6 Maa maqee maria kamuqoo oosana oosana inni nimanirafa aupurarafa marianno (Anutufa qinanoo marianno) minara innee kaqi kaaqoo noori runiranaki marifaranoo. Mi nimanira ainainnausara iriseeqa asasiaqa.
1PE 1:7 Mi nimanira ainainausa inni Yisuna saqarikirana nimanidanoo anoonaikinoo marianifeera koorooidanoo. Faiqí maa maqanasaa mariasa koora mifa inaaqianna kasooqaqee taikeemari ainainafa qumareeqa idaki quqasee tasirisiri masaida apaapu aiqama uqanna aiqaree marifanoo narí idaaqirafa kai suqufifaqa doo minara amiqiranee qidaqa. Doo inniara Anutufa miqikai inoo nimaniranaki quqeemarinara inni Yisuna saqarikirafa sabeenara foora marianifeera inni idakiara foora nimanidanoo. Inni Yisuna saqarikirana mi nimaniranaki fiqa afeekaikiqa marinafa sia fifau koora munnimma inaaqianna taikee mari ainainna kikiqa usirafau mariannoofau kaaqa uqanna uriqarara ainaina mariannoo. Innee Yisuna saqarikirana afeekaikiqa marifanoo asauku mundirafa Yisufa innaarunaindari koorooinna faasaana innee amooqira ufa faqa areenarafa faqa uqeerarana faqa mikari niminaqa mareefaranoo.
1PE 1:8 Innee sia Yisuna qafoosa kaqi nimuqusi marifaqa minara ririaasa. Innee sia Yisuna qafoosa kaqi inneeqa irirafa minasaa rusimariasa mariafanoo mina ufamau fifiaasa. Miqimarianara innee firaaqoo kaaqa areenarana namufaqa asasimariafanoo. Mi asasiranara faiqí sia amana minara ufa qifaranoo uriqararafa maridanoo.
1PE 1:9 Sia fifau asasidaqa mariafanoo Innee inneeqa Yisuna saqarikirana anoona inni nimana qumareeqeenoo innaarunai asumu mariranaki quqaranara asasidaqa mariafanoo.
1PE 1:10 Ooqai Anutuna tamummaqara fasiqauqa maa inni nimana asumu mariranaki mara quqaaninnanara irisee firaaqoo amiqimasee queeqaaeeqamasee randaqau. Misauqa kaqi tamummaqasee kasooqaqee Anutufa misa mandainaina minninnisee amiqi amiqira afeeka innaarunai mareefandinna ainaina kaqi nimianinnanara oonumafi irisee akara rumasee mi ufana anoonara randaqau.
1PE 1:11 Misa Anutunara yairee fee miqiannoo fee naqimasaifanoo fee miqiannoo fee ya fasiqanannai fee miqiannoo fee qimasee randaidaqa oonumafi iriqau. Asauku mundirana maraquna fannoo mi tamummaqara fasiqausa naakufufaqa maa maqee aukuanara faqa asauku mundirafa firaa aupurarana maraaninnanara faqa mina taikaranaki firaa areenarana maraaninnanara faqa akooroomasee akara riqau. Ooqai sia kambiqoo kamuqoo akara rumasoofanoo maridanoo.
1PE 1:12 Anutufa sia mi tamummaqara fasiqausa maru kamuqoorau qimanniminau. Maa maqee maria kamuqoora inniara qimannimufaqa irisee akara rumaqoofa maridanoo. Mi tamummaqara fasiqausa minara iridaqa ainainiqau. Misa maa maqee innee irimaria anoona ufanara minara qimasee akara riqau. Mi anoonufana tamummaqara fasiqauqa ooqai akara rumaqoofa doo maa maqee maria aukuana amiqira fasaasa ufa Yisunara qimannimimariasa doo qimannimisaafaqa irimariafanoo. Anutuna naaquqara maraquna fannoo dadaaqifaqa inni maqusa maqusa mariasa daraanimambifaqa qimannimiafaqa irimariafanoo. Tamummaqara fasiqauqa ooqai akara rumaqoo anoona ufausa mina maqee irimariafanoo innaarunaindaraa qangiroouqa mi ufana misa iriafanoo iriaqaa kai imarifaqa firaaqoo Anutufa Yisuna maa maqanasaa arusee afiqoonara randaidaqa. Maasa faqa maa maqanasaa marunausa faqa sia mi ainainnana amana maridaqa.
1PE 1:13 Inneeqa nitikurakinaa irirana deedaqammasee mariaqa. Asauku mundirafa Yisufa koorooinna aukuanna amiqi amiqirana nimiannoo. Inneeqa naundurai irirana mi amiqi amiqiranasaa munduqaraasamaseeqa maridaqa rakisidaqa aufaridaqa mariaqa.
1PE 1:14 Innee Anutuna ufara eedoo kai qimasee qumaraaqa. Ooqai innee aamina maru kamusaqa maridaqa manda nidimaru ainainna sia maqee kamu kafaa mina mara ootupaaqa, innee aiqama marirana andeeqasee mariaqa, Anutufa inni naaree marifa kaaqa andeeqarafa maridanoo mifa indee kai iqa kaaqa andeeaqa mariaqa.
1PE 1:16 Ooqeenaa Anutuna tamummaqarausa ufa minara maaqimminoo maridanoo. Anutufa qinoo qinee kaaqa andeeqarausa maridaqara qiqa innee faqa miqi kai masee kaaqa andeeqarausaikida mariaqa. Tamummaqarausa ufa miqiminoo marufaqa akara rumaqoofa maridanoo.
1PE 1:17 Anutufa faiqí anaasee aiqamausa irirana qafee marifa maridanoo. Sia manda irirana iriseenoo moo dadaaqammamaqeenoo moo firaaqoo mandaikamamaqaidanoo nári maraana amana kai andeeqasee nimidanoo. Miqi mari Anutunara innaaru qidaqa maasa qikoo fee qidaqa maa mariaqoo noori runusee maridaqa aaqaranara rufiaidaqa mariaqa.
1PE 1:18 Inni nikeeku nikaaku fifau faafau mandirirana maqeeuna minakinaana inni idukusee mareeqee quqasainara mina akiaqara firaa ainaina maridanoo innee irimariafanoo. Mi feefaurirafa sia koora siruaa miqirafa maridanoo mifa taikee marifa maridanoo.
1PE 1:19 Inni idukirana akiaqara feefauru firaafa fiqararafa asauku mundirana fidika maridanoo. Sia teeroo namuana faina kaaqa amiqirana Anutuna aandau tatufimaruna fooqaana amiqirana mina kuqiranannai maasa idukinau. Maasa nikeeku nikaaku mandiriranakinaana idukinau.
1PE 1:20 Ooqai indaaru Anutufa sia maa maqa maaqana auqiraqoo asauku mundirana kaqi utaaqama nimaqaqoofanoo marinoo maa maqee taikara kamu maasaki doo kooroo inoo maasara aunirira saqarisaa kuqufanoo
1PE 1:21 Anutufa mina kuqiranakinaana uqeereeqeenoo areenaranaki quqanau. Innee minannai Yisunannai Anutunasaa mundiqa mariafanoo kafaa minannai kai inneeqa irirana minasaa rusirana faqa naaru innaarunai kambiqaaninna ainainara nidirana faqa minasaa ootupanoo maridanoo.
1PE 1:22 Maqee innee Anutuna anoona ufa irisee maraafanoo mi ufanannai inni ninukama findaukamaseenoo. Innee inneeqa niqoonausa mi ufana irimariasara kuqaa nimuqusidanoo nidimarifaqa minara kaifaa qinee qimannimidaqa inneeqa nimuqusa ookiqari noori kandamasee nariara nariara nimuqusidanoo nidiani.
1PE 1:23 Anutuna akarakinaa ufa fannoo ooqai kaqi marufa maqee marifa naaru naaru kaqi marianinafa innee minannai kafaa oorudupi mafi kafaa fukasaa aanaaqi kammafi mariafanoo. Sia maaqoo kuqimaria nikoona faiqi namu mariafanoo, Anutuna kasimari akarakinaa ufannai naaru naaru marianinna nikoona faiqi kammafi fukasaa aanaaqi kammambi mariafanoo.
1PE 1:24 Ooqeenaa tamummaqara fasiqa mina akara maaqimminoo marufa maridanoo. Aiqama faiqí faiqi taatuqee andanda miqirausa mariafanoo, taatuqee andanda qusau aadanusifanoo afufeenaarirafa kakasidanoo. Faiqí areenarafa miqiminoo maridanoo.
1PE 1:25 Anutuna karaambaiqa ufa fannoo sia miqinoo maridanoo naaru naaru mariannoo. Mi tamummaqara fasiqana ufa miqinoo marifaqa qinee Peetooroosa minara maaqi qidaqa. Mi amiqira fasaasa ufafa naaru naaru marira ufa maridanoo mina qimannimimariafaqa irimariafanoo. Tamummaqara fasiqana ufa miqiminoo maridanoo.
1PE 2:1 Innee minara iriseeqa inneeqa mandoosana aiqama fatika aqusaaqa. Unnaqira ufa faqa nikaru qimasee maree mariana faqa qaaraikimari ufana faqa nariara nariara rairaiqimaria ufana faqa aasaandaana qimaria ufana faqa faiqí anaasee niqimaria ufana faqa mi ufausa sia maqee kamu inniki mariani.
1PE 2:2 Fuka faiqi anaaqiara foora naamma anoona kai naidanoo innee faqa miqikai iqa fuka faiqi aanaaqiara foora Anutuna andeeqara ufa naamma anoonara fooqaana minara kai kaaqa ruaqa. Mina naqa fifi iqa innooqeera foora iqa asumu mariranaki oonuree marifaranoo.
1PE 2:3 Miqiqa karaambaiqinnai oonuree mina aaqa mariaqa. Innee karaambaiqa amiqi amiqirana doo namasee qafee mariafanoo adiafaa idanoo dadaaqirafa maridanoo.
1PE 2:4 Faiqí faiqi misa Anutuna amaana maqa usakee maru faakanara foora Yisunara nikooqoofaqa auniriranasaa arusee minnisaqau. Minnisoofanoo Anutufa qafamaseenoo qinee ooqai maa faakannara qutaaqamaqaafannana idaaqirafa maridanoo fee qimaseenoo maraseenoo amaana maqa usakararee qimaseenoo marasee kafaa rakiqanau.
1PE 2:5 Inneeqa eedoo qimasee Anutuna asaukuki inneeqa nifaaqa quqasaifanoo faakana namufaqa rakiqasee usakasainanoo faiqí naunduraki anoona amaana maqa kambiqaani. Kambiqainaqa innee minaki Anutuna aanaiqi kirausaikamambi marifaranoo. Maridaqa Anutuna aidirana tatufirana suqa amidara foora amiqira irirana marirana amooqirana amifaranoo. Asauku mundirana Yisunannai miqifaranoo.
1PE 2:6 Ooqeenaa tamummaqara fasiqa moo fannoo faakanara maaqi qimasee akara rumaqoofa maridanoo. Qinee Anutusa rusandeesamumasee utaaqamamaqaafanna faakana idaaqirana maraseeqa Isaraee maqasaa oosanarasee rakiqeeqa. Ya fasiqa anaasee fee irisee mina saqarikinafa sia kadiqaannoo anoonaikiannoo. Tamummaqara fasiqa ufa miqinoo maridanoo.
1PE 2:7 Innee Yisuna saqariki mariasa oo Anutuna faakana amiqira qoonda fee qinausa mariafanoo. Sia Yisuna saqariki mariasa Anutuna tamummaqara fasiqa inniara maaqi qidanoo. Innee maaqa usakaidaqa manda faakanee qimasee mareeqee aqusoofanoo fiqumaree kafaa amiqira faakana uriqararafai kammambi maridanoo.
1PE 2:8 Ooqeenaa tamummaqara fasiqa akra moo maaqimminoo maridanoo. Maa faakanasaa faiqí moomoosa niku qamaki saamurifaranoo Mi saqarifa misa niku amanniminaqa saamurifaranoo. Tamummaqarausa ufa miqimminoo maridanoo. Minara moomoosa Anutuna ufa irisee sia maroonara niku amaki saamuriqau. Anutufa misara mi iriranasaa saamurifandiafoo qimaqoona miqiqau.
1PE 2:9 Innee sia miqi mariasa mariafanoo. Innee Anutufa rusandeesamumasee maree marisa mariafanoo. Innee karaambaiqa Anutuna uriqararana aanaiqiki mariasa. Innee naaduma kaaqa andeeqara maqannaa mariafanoo. Innee Anutuna narí maqannaasa mariafanoo. Mifa inni asukunakinaana naaramasee mareeqee narí idaaqira kaaqa qara andeeqaranaki inni quqasaifaqa mariafanoo. Sia fifau minaki mara quqeenoo innee Anutuna idaaqira afeeka ainaina imarianara aiqamausa nifusaa koorooiaqee qimaseenoo inni mara narí kaaqa qara andeeqaranaki quqaidanoo.
1PE 2:10 Ooqai sia Anutuna maqannaasa marusa maqee minaindi mariafanoo. Ooqai innee Anutufa maasa qifauaranara qifauaranara qimudaoo qiranara innee sia irimariafanoo maqee innee mina maraafanoo inni faqa kukeeqafinoo qumee maridanoo.
1PE 2:11 Oo qini qiqoondiuqa, qinee Peetooroosa qeeqa qimuqusa ookiqari naamua qidaqa. Innee Yisunara irimariasa maa maqa maaqanaki maridaqa aanaamuruara foora asaqiraafaira foora mariafanoo. Miqiqa maridaqa maaqoo faiqí faiqi manda nidimari ainainafa inniara qini maraaqee qinaqa sia eedoo qimasee mina maraaqa. Mi manda ainainausa inni maraquna arimarifa maridanoo innee moo maqannaasara foora mariafanoo sia maraaqa.
1PE 2:12 Innee aamina maqannaaki nidaqa maridaqa inneeqa nirana marirana amiqimasee nifaqa misa inniara mandoosana mareemariasee qimasee inni nindafeeqa oo amiqimasee mariasa qimasee misa faqa quandafi Anutuna amooqiqa Yisufa innaarunaindari qumurainaqa amooqifaranoo.
1PE 2:13 Qinee Peetooroosa maanara faqa qimannimidaqa. Maqasaa kaamanna firaa uriqararafa faqa maaqa maaqa uriqararausa faqa karaambaiqa Anutufa misa quqanau, mandoosana mareemariasa narifaqa iriaqeera faqa amiqira oosana maree marisa nimooqira ufa nimiaqeera faqa mi uriqararausa karaambaiqa maqasaa quqanau. Innee inneeqara innaarunai karaambaiqa faiqi namu maridee qimasee aiqama maqasaa fasiqa anaaseesaa rakisi mariasa ureeaqa maridaqa misa ufara eedoo kai qiaqa.
1PE 2:15 Furufari mariasa inni Yisuna ufa irimariasa minara manda dapi ufa inni nimifaqa sia aanooqirana nariranannai rafaaqafuaqa. Anutufa inniara inneeqa amiqira nira mariranannai mi furufarirana qiqanuasa ufa rafaaqafuaqeera qidanoo.
1PE 2:16 Innee mandainainaki rumbara fasiqara foora sia nuaqa mandainainakiqari idukira fasiqara foora kaqi nifaaqa quqasee andeeqara oosanaki asasida fuaqa. Sia inniqa mandoosana kaifaa maraaqee qimaseenoo unna qimasee faiqí anaasee nifusaa mafi rafaaqafusee mandoosanakiqari idukirafara foora nuaqa. Anutuna rumbara fasiqa naanna ramasee kaqi nuaqa.
1PE 2:17 Innee sia aiqamausara qini qimana fee qimasee furufariaqa, aiqamausa nári uriqararana amanasaa mina afusaa rufiaaqa. Aiqama Yisuna ufa irimariasa niqoonausa Yisuna ufa irimariasara nimuqusinoo nidiani. Innee Anutunara naaquqaani. Kaamanna firaa uriqararanara faqa naaquqaani.
1PE 2:18 Qinee Peetooroosa kafaa qimannimidaqa. Innee maqasaa feefauruara ainaini mariasa inni rakisimariasa ufara eedoo qimaseeqa misa ureeaqa maridaqa misara naaquqamasee andeeqaseeqa misa ufamau fuaqa. Sia reendeeni maria rakisirausara kai miqiaqa aanoo qimarinausara faqa miqi kai iaqa.
1PE 2:19 Innee miqifanoo Anutuna eedoo qira ufa innisaa mariannoo. Inni rakisirausa fifau aanoomasee inni nariqee ummaara nimiqee ifaqa innee inneeqara Anutuna iriranamau fida fee qimasee reendeeniaqa. Reendeenifanoo Anutufa inni amiqi amiqimmannimaqaani.
1PE 2:20 Innee mandoosana maraifanoo inni rakisirausa mina akiqara narifaqa reendeenamasee maraifanoo Anutufa mi reendeenirana akiaqara sia inni nimiannoo inniqa mandoosana akiaqara maridanoo. Innee amiqimasee marifanoo inni rakisirausa fifau narifaqa fifimmandee maraifanoo Anutufa inniara eedoo qiannoo. Fifau narirana fifimmandee marainnanara minara kai Anutufa inni naarameeqeenoo narí ufa irimariasaki quqeenoo. Asauku mundirafa narí kai fifau aupurarana inniara maranau. Yisufa fifau aupurarana maranau. Doo innee mina afaqamareeqa mina aanna ramasee miqiaqa.
1PE 2:22 Mifa sia moo mandoosana maranau. Sia moo unna ufa mina afaurusaa marinau.
1PE 2:23 Misa aqurara ufa amufanoo sia mifa quandafi mina akiaqara nári niminau. Misa aupurarana mina apatasaa quqoofanoo sia mifa misa aanoo ufa niminau kaqi narí irirana Anutunasaa andeeqara ufa nimimarunasaa narí irirana quqasee kuqinau.
1PE 2:24 Asauku mundirafa narí kai maasa mandainaina aaqarana narí apatasaa mara quqaseenoo doo aunirira saqarisaa kuqirana maree finau. Maasa kuqirausara foora sia mandoosana maraaqeera kuqinau, amiqira oosana kuqiara foora iqa marida maraaqeera kuqinau. Mina afaaqa ateekaqoonannai maasa daundura uninoo maridanoo.
1PE 2:25 Innee sipsipa aandaura foora furufariqa auiaqa nuafanoo doo maqee Anutufa inni nimanasaa rakisimari finnai inni aandaura foora rakisimari finnai quqasaifaqa mina afaqee fimariafanoo.
1PE 3:1 Qinee Peetooroosa ainaini mariasara nári rakisirausa ureeaqa mariaqee qunnana innee faiqí ninaaqmaka faqa miqi kai iqa inneeqa nifaaqmaakara eedoo qimasee ureeqarausaikamambi mariaqa. Innee miqifaqa inni nifaaqmaaka akaqausa Anutuna ufara sia fee qimariasa maridaqa sia inni ufa fannoo misa dadaaqiannoo inni andeeqara marirafa kai uqannifiqaannoo. Innee inneeqa nifaaqmaaka faqa maridaqa andeeqara marirana marasee noori kandamasee marirana faqa marifaqa misa nári nifunnai inni andeeqarana qafeefaranoo. Sia afaaqa auqimari ainainnara irisee afaaqa amiqi amiqiaqa, akiaqaki afaaqa auqimariannana faqa afaaqa auqimaria oondana faqa siarara faqa qamunnara faqa sia minauqara irisee nifaaqa amiqi amiqiaqa.
1PE 3:4 Inni nifaaqa amiqi amiqirafa inniqa nimuqusa ookiqari amiqira marira marirafa minannoo kai nifaaqa amiqi amiqiani. Inni nifaaqa mari inanoo asooqaqaaninafa maridanoo, fisoo fisoomasee kasooqaqee aqumurira oosana fannoo mifa sia asooqaqee mariafa maridanoo minannai kai mara nifaaqa auquaqa. Mi oosannafa Anutuna afusaa amiqira oonda uqanna maridanoo.
1PE 3:5 Ooqai Anutuna ufa irimaru anaaseesa Anutufa innaarunai nimiraree quna minara asasammasee afeesidaqa maaqimasee nári nifaaqa auqimariqau. Misa nári nifaaqmaakara eedoo qimasee ureeaqa maridaqa minannai nári nifaaqa auqidara foora imariqau.
1PE 3:6 Saraqafa miqimaru anaaseefa marinau. Mifa narí afaaqi Abarahaamana ufara eedoo qimasee qini uriqarara fee qimarinau. Innee miqimandee amiqira oosana mareeqa sia oosana oosana ainainara rufieeqa Saraqana araamummaakai kamambiqa marifaranoo.
1PE 3:7 Qinee Peetooroosa doo aanaaseeuqara qiqa doo maqee anaasee nifaaqmaqkara qianaura. Anutufa kaqi marirana kaqi nimidanoo aneenna anaaqa faqa aneenna faqa mi mariranaki mariafanoo minara aneenna aanaaqara amanna fee qimasee amandakusee mina faqa maria. Innee miqimasee inneeqa ninaaqmaaka faqa marifanoo moo ainaina fannoo sia innee Anutunara innaaru qirana ititaannoo.
1PE 3:8 Mi ufana atisaa maaqimminoo marifaqa qimannimianaura. Innee Yisuna ufa irimariasa aiqama ainainara moodaa irirafa mariani aiqamausa moodaanaki kai nimuqusa quandaaqa. Innee nariara nariara nikaqaafasaara foora nimuqusidaqa aiqamausa nariara nariara ruaqa. Innee nariara nariara fifimmasee reendeenamasee miqidaqa nariara nariara qimudaoo qimasee narí dadaaqi narí dadaaqiaqa.
1PE 3:9 Mandoosana aminana sia quandakinana kafaa mandoosana amia. Aqurararufa aminana sia kafaa quandafi narí aquraraa. Mi manda oosanna akiaqara quandaki amiqi amiqirana kai amia. Anutufa amiqi amiqirana kai nimiraree qimasee inni naarama narí ququsaki quqaseenoo innee miqi kai iqa amiqi amiqirana kai mandoosana nimimariasa nimiaqa.
1PE 3:10 Ooqeenaa tamummaqara fasiqausa akara maaqimminoo maridanoo. Faiqí moo fannoo maa maria mariranaki amiqiranaki asasiranaki marianee qimaseenoo doo mi fasiqafa manda nirana taikaseenoo unnufa taikaseenoo manda marirana ameesa uquseenoo amiqira marirannai ubeekaannoo. Miqinna fasiqafa asooaranara randamareenoo afaqee fidanoo miqinoo fidanoo amiqirana paquriannoo.
1PE 3:12 Maqasaa fasiqa moo fannoo andeeqasee fimarifanoo Anutufa narí afu minasaa quqaseenoo rakisidanoo mina innaaruqirana maqee maqee iridanoo mariannoo, mandoosana maree mariasara ameesuqunnisaidanoo. Tamummaqarausa ufa miqiminoo maridanoo.
1PE 3:13 Qinee Peetooroosa kaifaa qimannimidaqa. Anee amiqira mariranara minara rumammaree marainanoo ya fasiqa fee manda marirana ani amiannoo fee sia ani amiannoo.
1PE 3:14 Faiqí moo fannoo ani andeeqarana akiaqara ani mandaikamamaqainanoo ani asasirafa firaafa mariannoo. Innee sia faiqiara rufiaaqa sia aiqama ainainara amandirinoo aindiri raani.
1PE 3:15 Innee maqee maqee inneeqa nimuqusaki asauku mundiranara naaquqainaqa mina mareeqee inneeqa karaambaiqaikiaqa. Akaqausa inni innaarunai ainainara asasammasee afeesimarianara iraifaqa innee faasai Yisuna saqarikiranara deedaqammaqainnana misa qimannimiaqa.
1PE 3:16 Sia raiqasee qimannimia, ireeda nimandakusee qimannimia. Inni nisakadiki anukarafa kai mariani. Faiqí akaqausa inniara asauku mundirana afaqee mariasee qimasee mandufa nimiseeqa inni amiqi marirana nindafamasee nisaurifaranoo.
1PE 3:17 Innee mandoosana maree marifaqa narifanoo amanaikammiannoo. Anutufa eedoo qinaqa amiqira oosana akiaqara fifau narifanoo uriqaraannoo.
1PE 3:18 Asauku mundirafa narí uqanna inniara kuqinau. Moodaa suanisaa moodaa kari kai aiqamausa mandoosanara kuqinau. Inni nisauku qumareeqeenoo Anutufinnai quqaaneera amiqirafa maasa manda fasiqa anaaseera kuqunnimaqanau.
1PE 3:19 Mifa asuku mundirafa mina afaaqa kuqufufanoo mina amana fannoo findifinoo kaqi mariranaki finoo kafaa miqooqari ooqai kuqusa nimana rumbaranaki marunaki ooqureenoo Anutuna ufa qimanniminau.
1PE 3:20 Ooqai Nooafa sipa firaana auqidanoo nammari anianinnanara faiqí anaasee minara faqa qimannimimarufaqa siammirimariqau. Anutufa faiqí anaasee Nooana ufa iriseeqa mandoosana minniseeqa sipaki keeqaaqeera nifeesusia doo kooqi ititaseenoo nammarinnai narinau. Nammari narusa nimana marunaki asauku mundirafa kuqiranakiqari findifinoo ooquree qimanniminau. Naru nammarifa dinni qisauku taikasee dinni ani qaaramoo marasee oodaa fasiqa anaasee asumu mara akoonnai quqanau.
1PE 3:21 Nooafa sipaki asumu mariunara maasa faqa maqee kamuqoo mina amana kai amaana nammari marasee asumu mariaqee qidaqa. Sia fifau nammari maraanannai nifaaqaindaraa qikairi rukarafa anoona maridanoo. Nammari maree mariana anoona maaqimminoo maridanoo. Aneenna aakirana amuqusa ookiqari Anutunara kuqaa qima afeekaikirafa kamasee nimirafa mifa anoona maridanoo. Mifa kai kuqaa nammari maree mariafa maridanoo. Mifa kai Yisuna kuqiranakinaana findifunannai inni asumu marirana nimidanoo.
1PE 3:22 Yisufa kuqiranakiqari findifinoo innaarunai oorufinoo Anutuna aaqa mina asauku uqannai ooqu marifufanoo Anutufa aiqama innaarunai narí qangiroouqa faqa Sadannana afaanauqa faqa misa oosana oosana afeekauqa faqa mareeqeenoo Yisuna aramandunnai quqaqoofanoo maridanoo.
1PE 4:1 Asauku mundirafa afaaqasaa aupurarana narí apatasaa maranau. Innee miqiannee qimasee afeekaikamandee deedaqammasee mariaqa. Yisuna ufasaara nipatasaa nidafirana mareemariasa miqooqari sia mandoosanna maree mariannai ubeekeefaranoo nikooqaina amiqira aanai ubeekeefaranoo.
1PE 4:2 Nipatasaa nidafirana naruqooqari innee maa maqanasaa maridaqa inniqa nidira mandainaina fannoo sia inni mara quqaannoo, Anutuna irirafa kai inni mareeqee quqaani.
1PE 4:3 Ooqai inni marirafa maaqimminoo marinau. Nári nifaaqa kooroo kooroo iranara faqa, faiqí anaasee nariara nariara kaaqa rirana faqa nammari namasee furufarimariana faqa faiqí anaasee suqufi manda oosana maree mariana faqa moomoosa suqufifaqa nammari neemariana faqa unnaqira anutunara innaaru qimasee mina auqusaa mandoosana maree mariana faqa innee minauqaki kai indaaru mariqau. Doo innee ooqaindari kisaaqasaa minaki kai mariusa mariafanoo doo saaqa amanaikiqa mariafanoo maqee sia minaki mariaqa.
1PE 4:4 Ooqai innee faqa misa faqa mandoosana qambaanai aqufiqa mariusa mariafanoo doo maqee sia misa faqa fuafaqa misa tautiqa aanooqiqa aasaandaana mandufa inni qimannimaqaidaqa.
1PE 4:5 Kasooqaqee misa faqa Anutuna afusaa nári mandoosanara kooroomasee mina akiqara mareefaranoo. Anutufa kaqi mariasara faqa kuqirausara faqa ufa iriseenoo rainaranara deedaqammasee maridanoo.
1PE 4:6 Minara kai amiqira fasaasa ufa Yisufa kuqirausa qimannimisoofaqa iriqau. Mi kuqirausa kaqi maaqoo marufanoo Anutufa aiqama faiqí anaasee imariandee kai inoo rainannimaqasoofaqa kuqiqau. Mi kuqirausa nimana Anutufara foora naaru naaru mariranaki mariaqeera amiqira fasaasa ufa qimanniminau.
1PE 4:7 Doo aiqama ainaina taikarafa adeediranoo maridanoo. Innee maqee maqee Anutunara innaaru qiraree qimasee inneeqa nimanara irisaida kai fuaqa maqee maqee aufaridaqa mariaqa. Innee sia miqiqa aaqara oosana mareeqa naqimasee Anutunara innaaruqifaree. Sia amanaikifara.
1PE 4:8 Aiqama amiqira ainaina urinaaqararafa maafa maridanoo, sia nifaurunnoo kai unna qimasee nariara nariara ruaqa, nisaukunnoo dadaaqirana faqa nimuqusannai faqa nariara nariara ruaqa. Nariara nariara nimuqusirafa moomoo manda oosana rafaaqafidanoo.
1PE 4:9 Innee narí maaqaki narí maaqaki keeqafi narana suqasee naraaree naraareemasaida naa. Anaamuru faqa paqurimandee miqi kai iaqa. Sia aundura rumbee marinana miqia aundura idukinoo marinana miqia.
1PE 4:10 Anutufa afaarinoo oosana oosana ainaina akoofasaikirana niminnana aqoonnana dadaaqianeera niminoo sia inneeqara kai maqeeiaqeera niminoo. Innee Anutufa nimimari ainainnasaa amiqira rakisiranara foora rakisidaqa naadu naadu niminna ainaina akoofasaikirana marasee minannai niqoonausa dadaaqiaqa.
1PE 4:11 Amaana ufa qimannimimari fasiqafa Anutuna ufa kai qimannimiani. Faiqí dadaaqimariasa Anutufa nimimari afeekanannai afeekaikamasee niqoonausa dadaaqiaqa. Miqinanoo aiqama ainainiranaki asauku mundirana Yisunannai Anutuna amooqira ainaina kambiqafuannoo aiqama areenarafa faqa afeeka faqa naaru naaru marianinafa minaindi Yisunaindi kai maridanoo. Kuqaa.
1PE 4:12 Oo qini qifaaqasaa qiqoondiuqa, qinee Peetooroosa qimannimidaqa. Innee Yisuna ufara aupurarana maree mariasa sia tautiaqa nanee moo manda ainaina maasaki kambiqeenoo fee qimasee munari minari sia iaqa.
1PE 4:13 Kaqi asasa kai iaqa. Maasa asauku mundirana aupurarana naida qimina maraidee kai qimasee asasiaqa. Miqifanoo innaarunaindari mina kaaqa areenarafa faqa kooroomambinaqa maasa asasirana qumbiqarausa marianaura.
1PE 4:14 Oo qini qifaaqasaa qiqoondiuqa, qinee Peetooroosa qimannimidaqa. Innee Yisuna ufasaara aupurarana maree mariasa asasiaqa kaaqa areenarana maraquna Anutuna maraquna maasa naakinoo maridanoo fee qimasee asasiaqa.
1PE 4:15 Yisuna auqusaara aupurarana nimifaqa asasiaqa, mandoosana akiaqara aupurarana nimiranara eerairiaqa. Innee Yisuna ufa irimariasa innikiqari sia moo fannoo fidika ruqiasainanoo kuquani sandufa rukiarafa faqa sia mariani, ummuarirafa faqa sia mariani, moosa mandainainaki keeqaranara innikiqari moo fannoo sia uqanna mi mandoosanna marasee mina akiaqara aupurarana maraaqa.
1PE 4:16 Innee Yisuna ufara aupurarana maraseeqa sia minara nisauruaqa, Yisuna auqu maasasaa marinara Anutunara dufi dufi qiaqa.
1PE 4:17 Anutufa aiqamausa ufa irira aukuana doo ani maridanoo. Anutufa narí faiqi namu ufa naaree iriannoo. Iridanoo misa faqa aupurarana nimiannoo. Miqi qimasee niminanoo Anutuna ufara nikooqee marisa naqi fee iannoo fee firaaqoo uqanna misa ufa nimiannoo.
1PE 4:18 Ooqeenaa tamummaqarausa akara minara maaqimminoo maridanoo. Andeeqara fasiqauqa nimeekamakida asumu mariranaki keeqaidaqa, Anutunara nikooqee marisa faqa mandoosana mareemariasa faqa naqi fee ifaree, firaaqoo mandaikifaranoo. Tamummaqara fasiqa ufa miqi qimaqoofa maridanoo.
1PE 4:19 Minara iriseeqa Anutuna iriranasaa aupurarana maree mariasa nári amiqira mariranannai nári nifaaqa nári auquqoo fasiqanasaa nári nifaaqa amiqimasee quqasee marifaranoo. Inni auqufa ooqai qima afeekaikammaqoofa marifanoo doo miqoo kai fuannoo sia rakeeiannoo.
1PE 5:1 Minara inni amaana maqasaa rakisimariasa qimannimidaqa. Qinee Peetooroosa amaana maqasaa rakisimarunausa maridaqa inni qimannimidaqa. Qinee asauku mundirana aupurarana qeeqa qifunnai qafaafanausa maridaqa, kasooqaqee innaarunaindaraa kaaqa qarafa akooroo inaqa qinee faqa akaqana marararee qidaqa inni qimannimidaqa.
1PE 5:2 Innee amaana maqasaa rakisirausa faqa amiqira asumu aandau rakisidara foora mariaqa Anutufa innee faiqí aanaaseera asumu aandaura foora rakisiaqee qidanoo. Sia nikoo nikaamasee rakisinnimaqaaqa Anutuna iriranamau kai asasammasee rakisinnimaqaaqa. Sia feefauruara kai irisee mi rakisira saikana maraaqa naundurakinaana dadaaqianee qimasee maraaqa.
1PE 5:3 Innee amaana maqasaa rakisimaria fasiqausa sia inneeqara uriqararausee qimasee fuki faaki qiaqa, innee fidaqa quandafi ireeda kai faiqí anaasee nifiqee andeeqaramau kai fuaqa.
1PE 5:4 Innee miqimasee faiqí anaasee rakisifanoo aandaura foora rakisirafa firaafa Yisufa innaarunaindari akooroomafinoo kaaqa areenara qafee inni nikiqasaa quqasee nimiannoo sia areenarafa taikaaninafa naaru naaru kaqi marianinafa.
1PE 5:5 Miqi kai iqa innee kumaaraauqa faqa inneeqa faiqí firaasa nimeemaanai miqi kai masee ureeaqa mariaqa. Innee aiqamausa oorudupi oorudupimafinaqa qamunnara foora afisusee mariaqa. Tamummaqarausa akara minara maaqi qidanoo. Anutufa faiqí anaasee nári nuqu uqeeree mariasa rafaaqafidanoo fifimariasa adiafaairana faqa amiqirana faqa nimidanoo.
1PE 5:6 Tamummaqara fasiqa ufa miqinoo marinara innee minara irisee Anutuna afeeka asauku ameemaanai ureeaqa marifanoo narí aukuana qumureenoo inni uqeera uriqararanaki quqannisaannoo.
1PE 5:7 Mifa Anutufa inniara amuqusimarifanoo rakisidanoo. Minara inniqa aiqama ainainara naundurakinaa ummaara rufiarana nimukee marina naindiri ree mariana minauqa moodaanaki uqeereeqee Yisuna minasaa kai aqusaifanoo dadaaqiannoo.
1PE 5:8 Innee inneeqa nimanara irisee aufarida mariaqa inni namuqaa Sadannafa kaasau fainiara foora fiqu faiqu idanoo yanee nambiqaanau yanee nambiqaanau qidanoo.
1PE 5:9 Aiqama maqa maaqaki inni niqoonausa Yisuna ufa irimariasa moodaa karammida aupuree mariafanoo. Minara irisee innee inneeqa Yisuna saqarikamma mapukusee maridaqa Sadannafa aninaqa ititaidaqa mariaqa.
1PE 5:10 Innee maaqoo maqasaa maridaqa kaqikaaqoo nidafirafa mariannoo. Marifanoo kaqi afaarirana akoofa Anutufa inni naaraidanoo narí naaru naaru kaaqa areenarana asauku mundirana namufaqa narí namufaqa inni nimiannoo. Innee maaqoo marifanoo mifa kai inni anoonaikama nimaqaannoo mifa kai naunduraki mapukirana nimiseenoo afeeka faqa afeeka maaqa atuna fooqaana nimiannoo.
1PE 5:11 Aiqama afeeka rakisinnimaqarafa naaru naaru minaindi mariannoo. Kuqaa.
1PE 5:12 Qini amiqira qikaqafasaa Sirafanusafa dadaaqifaqa maa kaqikaa akarana rumannimaqeeqa. Innee Yisuna ufaki mariafaqa qinee qimannimidaqa nifeeqaraidaqa, innee minaki maridaqa kuqaa Anutuna afaariranaki mariafanoo. Innee minaki mapukufi kikiqiaqa.
1PE 5:13 Yisuna ufa irimariasa Babiroonia maqusa mariasa faqa maridaqa Anutufa misa faqa rusandeesamumasee maroosa maa papiqanaki inni nimandaidaqa. Qini qimaaku Marikoofa mifa faqa inni nimandaidanoo.
1PE 5:14 Innee Yisuna ufa irimariasa imariandee narí amooqee narí amooqee iaqa. Innee asauku mundirana araamuqmaaka faiqinamu inni naundurai asooarafa mariani.
2PE 1:1 Qini Simoona moo duqu Peetooroosa qinee asauku mundirana Yisuna ainainira faiqi Yisufa maa maqanasaa diqiqamaqoo fasiqausa marunausa maa akarana inni rumannimaqaida. Maasa Anutufa maasa asumu maree marifa asauku mundirafa Yisufa narí andeeqaranannai amiqira oondara fooqaana narí saqarikirana maasa qiminau, inni faqa mi amiqira ainainna niminau.
2PE 1:2 Innee Anutuna faqa Yisuna maasa karaambaiqara faqa iridaqa mi iriranannai Anutufa narí kaqi nimirana faqa narí asooarana faqa inniki qumbiqafinaqa mariaqa.
2PE 1:3 Anutufa narí kaaqa qara amiqiranannai maasa daaree marina Yisunara irianara eedoo qinoo doo minannai narí innaarunaindaraa afeeka maasa qimanakai qimifaqa minannai Anutuna andeeqara marirana maa maqanasaa maraanaura.
2PE 1:4 Mi innaarunaindaraa afeekanannai narí kaaqa idaaqira amiqi amiqirana narí qima afeekaikammaqoona maasa qiminau. Mifa qima afeekaikammaqoo kaaqa amiqira ainainannai maasa maa maqanasaa mariafanna mandainainara fanandirana faqa putaairana faqa qima afeekaikammaqoo afeekana mara mareeqa fi ruqiqaki fidaqa Anutuna aunduraindaraa irirana andeeqara mariranaki mariraree qidaqa miqidaqa.
2PE 1:5 Innee innaarunaidaraa andeeqara marirana maraidaqa minara kai innee inneeqa Yisuna mandaaqaranasaa minasaa afeekaikamasee inneeqa andeeqara marirana minasaa ootupaaqa. Ootupamaseeqa Anutuna ufa asaana rumasee amiqimasee irirana faqa minasaa afeekaikamasee ootupaaqa. Kafaa miqooqari innee inneeqa nimanara iriseeqa mina faqa afeekaikamasee ootupaaqa. Kafaa miqooqari noori kandamasee maridaqa ainainirana faqa afeekaikamasee mina faqa ootupaaqa. Kafaa miqooqari Anutuna aanna rarana faqa afeekaikamasee ootupaaqa.
2PE 1:7 Kafaa miqooqari nári nikaqaafasaara foora nariara nariara aidirana mina faqa afeekaikamasee ootupaaqa. Kafaa miqooqari nariara nariara nimuqusirana mina faqa afeekaikamasee ootupaaqa.
2PE 1:8 Mi amiqira ainainausara innee sarauqi mariafanoo. Innee mi ainainausa moo faqa moo faqa maree marifanoo mifauqa inni dadaaqifaqa innee karaambaiqa asauku mundirana Yisuna iriranaki maridaqa sia fifau marifaranoo sia kadiqarausa marifaranoo innee kasi kasidaqa anoonaikimariasa marifaranoo.
2PE 1:9 Faiqí moo fannoo mi amiqira ainainausa sia marainafa mina afu dimbarafa sia qafaidanoo narí mandainaina findaukamaisoonara aunuseenoo miqidanoo.
2PE 1:10 Innee aiqamausa nifusaa maqee maqee moo faqa moo faqa afeekaikamasee Anutufa inni rusandeesamumasee maroonara kooroo iaqa.
2PE 1:11 Innee mi amiqira ainainausa afeekaikamasee inni Yisuna saqarikirana ootupamasaifanoo maasa karaambaiqa asauku mundirafa asumu maree marifa Yisufa mina qafamaseenoo narí naaru marira ququsaki firaa qoo kooqi atu aquseenoo inni naarameeqee minaki quqaannoo.
2PE 1:12 Qinee minara iriseeqa maa ainainausara maqee maqee naaqoo auqeemariana iriqa maraaqeera. Innee sia aunimariafanoo irimariafanoo anoona ufasaa afeekaikamafi atooqafi irimariafaqa kaifaa qimannimidaqa. Qinee maaqoo sia kuqidaqa kaqi maridaqa inni kafaa kafaa naaqoo auqaranara andeeqanoo mari ifoo qidaqa.
2PE 1:14 Qinee maa maqanasaa kuqiqa qipata qusasaa quqaanauree qidaqa iridaqa. Maasa karaambaiqa asauku mundirafa Yisufa akooqoo daamua qimaqooqoo kai qusasaa quqaanaura.
2PE 1:15 Qinee kaqi maridaqa afeekaikamasee qimannimidaqa kasooqaqee kuqufuanaqa moo ainaina kambiqainaqa amiqimasee irisaida narimau fuaqeera qimannimidaqa.
2PE 1:16 Sia maasa faiqí uri ufafau iriseefau asauku mundirana
2PE 1:17 Yisunara maa maqanasaa firaafa innaarunaindari qumunara qidafau maasa qeeqa qifunnai mina uriqararana qafaafannanara qimannimidaqa. Maasa qeeqa kai mina faqa naaquqara aaqanasaa mariafananoo firaa kaaqa qaranakiqari Anutuna ufa qumufaqa maasa iriqiafana, maafa qini didira qimaaku marifaqa qinee minara ridaqa asasidaqa. Mi ufanannai Yisuna auqu firaanaikinoo kaaqa areenarana aakuamaqoofaqa maasa miqoo marida qafeeqa iriqiafana.
2PE 1:19 Maqee maasa mina qafamaseeqa ooqeenaa tamummaqara fasiqauqa akarara kuqaa fee qimariafannana, maqee anoona qafamaseeqa doo kuqaa uqanna anoona fee qidaqa. Innee tamummaqara fasiqauqa ufa amiqimasee irifanoo naaqooki keeqainaqa amiqimandee marifaranoo. Misa ufa asukunaki qoomara foora kaaqa qaida maridanoo iqaqarana afeesiannoo duqudeeqiara foora Yisufa inni nimuqusaki kaaqa qaannoo.
2PE 1:20 Innee maa ainainna naaree iriaqa. Innee tamummaqara fasiqauqa ufa irimariana sia minakinaa moo ufa fannoo naríara aaduma anoona maridanoo. Si tamummaqara ufa moo fannoo faiqí iriranasaa kambiqanau. Naaquqara maraquna fannoo mi tamummaqara fasiqausa uqeereeqeenoo Anutuna iriranaki quqasoofaqa qafamasee nári maqannaa qimannimisee akara rumaqoofa maridanoo sia nári kai iriqau.
2PE 2:1 Ooqai Isaraee maqannaasaki unnaqira tamummaqara fasiqauqa aniree kaqiruna mara ubeekee mariqau. Maqee maa aukuanna misa undee kai iqa unnaqira amaana ufa qimanniminausa inniki kambiqeefaranoo. Mi fasiqausa Yisuna ufa iriusa rakeemaki kaqinni oonuraasauqa maridaqa qumee faiqí kuridinnisee maria unna amaanufana inniki uqeereefaranoo. Yisufa narí kuqu fidikanannai misa kuqiranakinaana feefauru fasiqanara sia irirai nikooqainaqa nári kuridirana nári kai mareeqee nári nifaaqai quqeefaranoo.
2PE 2:2 Miqifaqa innikiqari akaqausa misa ufa iriseeqa mi manda fasiqausa naanna ramasee faiqí anaasee qummuarira oosana mandoosana mareefaranoo. Miqifaqa faiqí anaasee akaqausa misauqa niqafamaseeqa quandaki anoona aanara manda aana fee qifaranoo.
2PE 2:3 Unna qida uqannifiqeemariasa kaaqa ainainara rimariasa maridaqa misa unnufa inni qimannimi marifaqa mi unnufanannai munnimma aina maree marifaranoo. Ooqaindari naaru kisaaqasaa misa ufa nimimarifa kuqira ufa misasaa quqasaifanoo mi kuqirafa misara nifeesidanoo. Misa kuridi nimaqee marifa Anutufa sia faiqaidanoo afu maqasee deedaqinoo maridanoo.
2PE 2:4 Ooqai innaarunaindaraa qangiroouqa akaqausa mandoosana marasoofanoo Anutufa sia nifauanau mareeqee idaki aquseenoo sainandannai rumbaqoosa ufa aukuanara afeesida kaqi maridaqa.
2PE 2:5 Ooqai indaaru maru fasiqausa mandoosana marasoofanoo Anutufa sia nifauanau nammari aufiranannai naruseenoo Nooana andeeqara oosana qimannimi maruna faqa narí faiqi namu dinni qisauku taikasee dinni ani qaaraqanda maraseenoo misa namufaqa asumu akoonnai quqanau.
2PE 2:6 Soodooma maqusa faqa Koomoora maqusa faqa Anutufa idannai aiqamausa naru taikanau. Maasa aiqamausa mandoosana akiaqa qafamasee rufiaaqeera naru taikanau.
2PE 2:7 Rootafa nariara andeeqarafa marinau misa nariara nariara qummuarirana faqa ufa rukiarana faqa Rootafa qafamaseenoo akooqee marufanoo Anutufa mina kai asumu akoonnai mara quqanau.
2PE 2:8 Mi andeeqara fasiqafa misa qambaanai marida faasaambaasaana misa mandufa irinoo misa mandoosana qafee marufanoo amuqusa mandaiki marinau.
2PE 2:9 Qinee Peetooroosa minara irisee maaqi qidaqa Anutuna ufa irimaria fasiqausa oosana oosana nimaniranaki aqufifanoo Karaambaiqa misa mi nimaniranaki dadaaqira oosana iridanoo dadaaqiannoo. Mandoosana maree mariasa narirana ameemaanai quqaqaifaqa maridaqa ufirira faasaanara afeesida rakisira oosanara Anutufa iridanoo maridanoo.
2PE 2:10 Anutuna ufara fidiaqaammasee nári manda nipata manda nidiramau fimariasa misa narira oosanara faqa Anutufa firaaqoo iridanoo. Unnaqira amaana ufa uqannifiqee mariasa misa inniki paasoosida aanooqidaqa maridaqa. Innaarunai kaaqa qee mariasara faqa sia naaquqaifaqa rufiaidaqa mandufa kai qangiroouqa faqa nimidaqa.
2PE 2:11 Mi qangiroosa afeeka mi manda fasiqausa afeeka urinaaqaranoo maridaqa mi fasiqausa ufa iriqa sia aanoomasee Anutuna afusaa oonuree misa nariranara qimamidaqa. Anutufa narí kai andeeqaannoo fee qimasee minnisaidaqa.
2PE 2:12 Unna qira amaana ufa uqannifiqee mariasa nariqa kuara fuseena iriranamau fidaqa innaarunai mari ainainnara sia irimaria ainainnara mandufa qimasaida kaasau aandaura foora ufaanaki narifandinausa kambiqaida miqidaqa. Miqi mariasa Anutufa kaasau aandaura foora kaqi naruannoo.
2PE 2:13 Misa kuridirana moomoosa nimifanoo Anutufa mina ati quandeeqee nariqa nimiannoo. Nári manda ainainara nidimarina faasaanasaa kaimma asasamandee maraidaqa. Innee Yisuna ufa irimariasa qoomaqa inni faqa moodaanaki qoomaqanduqidaqa nári nikaruqira oosana maraidaqa inni andeeqee mariasa nisaurirana manduqarana nimidaqa kudimakidaqa miqidaqa.
2PE 2:14 Unna qira amaana ufa uqannifiqee mariasa ummuari mari anaaseena mararee qimasaidaqa randaidaqa. Misa manda oosanara naararee marisa sia nimuaqu idanoo. Unna qira aana uqannifiqee mariasa misa furufari mariasa oonu rarisameeqee ufaana fainnai ubeekamasaifaqa ufaana aridaqa. Mi unnaqirana uqannifiqee mariasa naranara faqa ainainara faqa fanandirana akoofasa maridaqa. Misa Anutuna niqurarara ufa ameemaanai mariasa maridaqa.
2PE 2:15 Unna qida amaana ufa uqannifiqee mariasa misa andeeqara aana minniseeqa fifau dapi fukasaa fidaqa. Ooqai Baraamafa Boosoorana amaaku mandoosanna maree maria munnimmanara rumammaraidanoo kaaqa ridanoo namuqaa ufa irisee Isaraee maqannaasa nupuka naruaneera doonkisaa fimarinau.
2PE 2:16 Mina doonki fannoo faiqiara maqi ufa qidanoo akoona furufarira oosana rafaaqafimarinau. Minannai Anutufa Baraamana mandoosana qaoo qinau. Inniki unna qira amaanufa uqannifiqee mariasa Baraamana aatata fidaqa miqidaqa.
2PE 2:17 Unna qira amaanufa uqannifiqee mariasa aadaturu nammari miqirausa maridaqa asuru miqirana ufai fannoo kaqinni sufafaa quqaidanoo. Anutufa firaa asukuna misa afeedama nimaqaidanoo.
2PE 2:18 Mi manda fasiqausa nári nifaaqa amooqimariana faqa furufari marianara faqa ufa qidaqa. Faiqí anaasee akaqausa nári mandoosanakiqari findifi aaqee kai aanai ubeekarariafaqa mi mandoosanna maree mariasa misa mareeqee nári ufaanaki mara naridaqa. Mi fasiqausa nári mandainainara nidiranannai ufaana fufuseeqa minaki mara naridaqa.
2PE 2:19 Unna qira amaanufa uqannifiqee mariasa aaqee kai andeeqara aanai ubeekee mariasara unna qida uneemaana qimasee maasa manda oosanakinaana idukira oosana uqannifiqaanauree qimasaida nári kai faiqí kuridi maria oosana fannoo nári rumbannimaqaidanoo. Nana ainaina moo mandainaina fannoo faiqí afaaqa rumbasainafa doo mi ainainafa kai mina rafaaqafimari ainainafa maridanoo.
2PE 2:20 Miqi mariasa akaqausa asauku mundirana, Yisufa asumu maree marifa maasa karaambaiqa, misa akaqausa minara irimarianannai minannai maa maqanasaa kuridira mandainaina rafaaqafiranakinaana idukunnisaidanoo andeeqara aanai ubeekeeqa kafaa quandaki kafaa manda ainainaki aqufinausa mi fasiqa anaaseesa indaaru mandainainaki ida afaisaa mariaasa maqee doo firaaqoo uqanna ida qambaanaki mandainainaki aqufuafanoo.
2PE 2:21 Miqimari fasiqa anaaseesa andeeqara aana sia qafaifanoofau amana marini. Misa kaqikaaqoo qafamaseeqa innaarunaindaraa ufa rukiaidaqa kafaa quandaki fimariafanoo firaaqoo mandaikidanoo.
2PE 2:22 Misa ooqeenaasa ufamau fidaqa faini narí fidirana kafaa narí naidanoo, kuarara foora afaaqa nammari uqusainanoo kafaa oonu dikoomaki doona reeree mareenoo anidanoo misa miqimmidaqa.
2PE 3:1 Oo qini qifaaqasaa qiqoondiuqa qinee indaaru pasa akara rumasee inni nimaqaqiafana kaifaa maa maqee inaaqianna akara rumannimaqaidaqa. Aiqama akaraqaraki amiqira ufa inni nitikuraki quqarara nikaru qimaria fasiqausara inni naaqoo auqeeqa ooqeenaana naaquqara tamummaqara fasiqausa ufa qianaqa iriaqeera. Asumu maree marifa maasa karaambaiqa mina aaquqira ufa narí niqiqoo fasiqausannai inni qimannimu aaquqirufana iridaqa sia aunuaqa, irida mariaqa. Minara faqa inni naaqoo auqaida akara ridaqa.
2PE 3:3 Innee maa indaaruqaa ainaina iriaqa, sia iriqa furufari foora. Taikara aukuana akaqausa nári mandainainara nidirana mara quqeemariasa miqimariasa kambiqafiqa inniara ataasa ataasaida maaqi qifaranoo.
2PE 3:4 Yisufa kafaa qumiraree fee qinoo fee. Yaqoo fee maridanoo fee sia kafaa qumuannoo. Doo maasa qikeeku qikaaku doo kambiqafi kuqiqau. Oosana aroo aukuannasaaqari aiqama ainaina amana kai fidanoo.
2PE 3:5 Qinee Peetooroosa minara maaqi qidaqa. Mi aaqara ufana qimariasa maa ainainnara qikoomma irirara qaifaqee qidaqa unnaqimasaida sia iridaqa. Ooqai Anutufa maa maqa maaqana nammari aufiranannai kuridinau. Ooqai indaaru Anutufa qufanoo sia maru ainainnai maa maqa maaqana auqusoofanoo kambiqanau. Maa maqa maaqana nammarinnai auqusoofanoo nammarikiqari kambiqanau. Kafaa miqooqari nammari aufiranannai maa maqa maaqana ooqeenaana amiqimmandee kuridinau.
2PE 3:7 Maa maria maqa maaqana faqa innaaruna faqa Anutufa narí ufannai afeedidanoo idannai qamataikaanifeera afeedidanoo. Innaaruna faqa maqa faqa manda oosana maree mariasa faqa Anutufa afeeda maqaifaqa marida moodaa kari idaqama taikaannoo fee qidanoo. Minauqara faqa misa qikooqaifaqee qimasee unnaqidaqa sia iridaqee qidaqa.
2PE 3:8 Qini qiqoondiuqa maa ainainna sia aunuaqa amiqimasee iriaqa. Karaambaiqa irirafa maaqimminoo maridanoo moodaa faasaana faqa moomoo aukuana faqa (wan tauseenna aukuana faqa) amanamana kai fee qinoo maridanoo. Akaqausa karaambaiqa ufa anoonara sia dauni kambiqa qimaqaidanoo fee qidaqa noori runidaqa.
2PE 3:9 Karaambaiqa sia anuqidanoo, maa maqa maaqanakinaa fasiqa anaasee moodaa nariranara akooqaidanoo misa aiqama nári mandainaina nimeesuqusee noori Anutufinnai ubeekamafi minni kai fuaqeera minara amiqimasee kisaaqasaa aiqamausa nifeesidanoo. Kisaaqa aukuanara faqa qusa aukuanara faqa amanamana kai fee qidanoo amiqimasee nifeesidanoo.
2PE 3:10 Karaambaiqa kafaa qumira faasaana qumuara fasiqara foora tautumasee kambiqaannoo. Mi faasaannasaa innaaruna firaaqoo darara qirana namufaqa doo taikafuannoo. Innaarunaki mari ainainausa quqoona faqa suani faqa fasau faqa aiqama ida qama taikafuannoo, maa maqa maaqana faqa minaki mari ainainafa faqa aiqama qama taikafuannoo.
2PE 3:11 Miqinoo aiqama ainaina idaqama taikaaninnanara irisee innee minara nana oosana faqaasa marifaree fee qidee. Inneeqa rufiaseeqa mariranara naaquqara andeeqara marirana maridaqa Anutuna ufamau fidaqa faiqí anaaseeki andeeqasee mariaqa.
2PE 3:12 Innee Yisufa koorooianinna faasaanara afeesidaqa inneeqa andeeqara mariranannai mi faasaannara kaqi kaqi aniannee qimariafanoo. Mi faasaanna innaaruna faqa innaarunai maria fasau namufaqa aiqama ida firaanannai tasirisirimma taikafuannoo.
2PE 3:13 Anutufa fuka innaaruna faqa maqa faqa kuqaa auqu quqannimaqaanauree qima afeekaikammaqoofa maridanoo. Mi fuka maqanasaa andeeqarausa kai mi fuka maqanasaa maridaqa nifaaqa quqasee maasa maqusa uqannee qifaranoo. Maasa mi fuka maqusanara kai afeesida maridaqa.
2PE 3:14 Qini qiqoondiuqa innee mi faasaannara afeesida maridaqa Anutuna afusaa maridaqa nisakadiki qikairi siaisa mandainaina siaisa mariaqa innee faqa Anutuna faqa noori runirafa sia mi qambaanna mariani asooarana kai mariani.
2PE 3:15 Anutufa maasa qikaqaafasaa Pauroona narí irirana amufanoo maa akarana rumaqoomau qinee faqa mi mau kai fidaqa. Mifa maaqimandee akara rinau. Karaambaiqa sia dauni qumi marina sia fifau kisaaqasaa maridanoo, maasa nariranara akooqaifanoo maasa innaarunai asumu marirana maraaqeera kisaaqasaa nifeesidanoo. Pauroofa qinnaqoo miqoo kai inni irirafa miqoo kai fuani.
2PE 3:16 Pauroofa narí pasauqaki mi ufanara qidanoo miqi qimasee qimannimidanoo. Mina pasauqaki faiqí irisee sia dadi anoona iriaqaa ira afeeka ufa akaqafa maridanoo. Akaqausa irirana siaisa munuree miniree imariasa mi afeekufana iriqa mara saaeemmeeqee uqiqammeeqee kaqi runna ubeekaidaqa. Sia Pauroonaindi kaifau miqidau aiqama Anutuna ufa akarakinaana miqi kaimmidaqa nariqa kai nári kuridirana mara naakida miqidaqa.
2PE 3:17 Qini qiqoondiuqa qinee mi ainainnara aaquqimannimaqaunaqa irimariafanoo. Minara aufarida rakisida mariaqa. Ufa rukiee mariasa nári aaqaranannai inni rarisameeqee kaqirunna quqaidaqa. Miqifaqa innee ooqai mariu mariranaki fiqa saamurifaara.
2PE 3:18 Maasa Karaambaiqa maasa asumu maree marifa asauku mundirafa Yisufa mina amiqira marirana irirana minaki kai fidaqa maqee maqee innooqaaqa. Maqee faqa naaru naaru faqa mina amooqira ufa mariani. Kuqaa.
1JO 1:1 Qinee kaqi marira ufa anoonara Yisunara akara rumasee qimannimidaqa. Mi kaqi marira ufana Yisufa ooqai maa maqa maaqafa sia marunakina marufa maridanoo qinee mi ufanara qimannimidaqa. Maasa mi ufana anoona qifunnai qafeeqa daaqoonnai iriqiafana. Maasa qifu qafamasee qisaukunnai akooqoo kaqi marirana anoona marufaqa auqamasee qafeeqa qimannimidaqa.
1JO 1:2 Yisufa mi kaqi marira anoonafa kooroomafufaqa maasa mina qafeeqaramma inni qimannimidaqa. Mifa naaru naaru marirana anoona narí akoona Anutuna faqa marufa maasaki maa maqanasaa kooroomafunara minara inni qimannimidaqa. Maasa mina qafaafanna ainainara iriafanna ainainnara inni faqa qimannimidaqa. Maasa faqa mina akoona Anutufa faqa amaaku asauku mundirana faqa moodaanaki innisaimbaqa mariraree qimasee inni qimannimidaqa.
1JO 1:4 Innee faqa maasa faqa innisaimbaqa naundurai asasirafa qumbiqaanifeera inni maa ufana akara rumannimaqaidaqa.
1JO 1:5 Anutuna amaaku ufa moo maasa qimaqimufaqa maasa mina akooroomasee inni qimannimidaqa. Mi ufana maaqi qinoo Anutufa kaaqa qarafa qoomara foora sia kaqikaa asukuna marifa maridanoo. Mi ufana qimaqiminau. Maasa qeeqara Anutuna faqa aqoondi fee qimasee quandaki asukunaki keeqafidaqa maasa ufa faqa marirana faqa unna qidaqa, sia anoonamau fidaqa.
1JO 1:7 Maasa Anutuna aanna reeqa suanisaa rakeeiraqoo nunausa moodaanaki marunausa maridaqa nariara nariara aqoondi kammiqa maridaqa. Maasa Anutuna aanna reeqa kaaqa qara qoo fimarunanoo narí amaaku Yisuna fidika fannoo maasa aaqarana numoo aiqama findaukaidanoo.
1JO 1:8 Maasa náriara sia mandainaina marifaqee qidaqa narakaru narakaru qidaqa Anutuna anoona ufa sia maasaki maridanoo unna ufa kai maasaki maridanoo.
1JO 1:9 Maasa nári mandainaina oosana oosana Anutuna akooroomma nisainanoo mifa andeeqee marifa maridanoo andeeqa qimaqaannoo mifa maasa numoo taika qiseenoo maasa mandainaina aiqama anukama qisaannoo narí ufamau andeeqasee fimarifa maridanoo mi mau fuannoo.
1JO 1:10 Anutufa maasa aiqamausara aaqee mariasee kai qidanoo. Maasa náriara sia aaqee marunausee qimariana Anutunara unna qimari fee qidaqa miqi qidaqa mina ufa anoona sia maasaki marifaqa miqi qidaqa.
1JO 2:1 Qini faiqi namu sia innee aaqaaqeera maa ufana akara ridaqa. Yisufa asauku mundirafa andeeqarafa Anutuna afusaa maasufa dadaaqu fasiqafa maridanoo faiqí faqa anaasee faqa moo fannoo aaqaifanoo Yisufa minara iriseenoo maasa qikoofinnai oonureenoo maasa aaqarana andeeqa taikaannoo.
1JO 2:2 Anutuna asauku mundirafa mifa kai aandau tatufirafara foora maridanoo. Minannai maqasaa fasiqa anaasee mandainaina akiaqara taikanniseenoo doo maasa Anutufinnai mafi qisaidanoo. Sia maasaindi kai aiqama anaamurundi minannai kai taikannisaaninafa maridanoo.
1JO 2:3 Maasa Anutuna ufa iriseeqa mi mau fidaqa kuqaa Anutunara iridee qianaura.
1JO 2:4 Faiqí faqa anaasee faqa moo fannoo Anutuna aqoondi fee qimasee sia Anutuna ufamau finafa mifa unna qimarifa sia anoona ufa minaki marifa maridanoo.
1JO 2:5 Anutuna ufara eedoo qimasee mi mau finafa kuqaa Anutunara rimarifa mifa anoonaikinoo mariannoo. Maasa maaqi qimaseeqa maridaqa kuqaa Anutunaki maridee qianaura.
1JO 2:6 Faiqí faqa anaasee faqa moo fannoo qinee kuqaa Anutunaki maridee qimasee mifa asauku mundirana aanna ranoo marinaqa kuqaa Anutunaki marifa maridanoo, sia asauku mundirana aanna rainafa unna qimarifa maridanoo.
1JO 2:7 Qini qifaaqasaa qiqoondiuqa. Maa ufana sia fuka ufa maridanoo innee oosanaindari iri maria ufafa maridanoo. Ooqeenaa ufa irimariafa maridanoo.
1JO 2:8 Maa fuka ufafa ooqeenaanasaa ootupamasee inni qimannimidaqa akara ridaqa. Maa fuka ufana anoona asauku mundiranaki kooroo inoo maridanoo inniki faqa koorooma nimaqaidanoo, doo asukuna afaqaidanoo fuka kaaqa qarafa qoomara foora inni qambaanai qaidanoo.
1JO 2:9 Mi fukufana maaqimminoo maridanoo. Moo fannoo nariara Yisuna kaaqa qaranaki maridee qidanoo quandafi narí akaqaafasaara fidiaqaa inafa mifa sia kaaqa qaranaki maridanoo asukunaki kaqi maridanoo.
1JO 2:10 Moo fannoo narí akaqaafasaara rinafa mifa faasaana miqiranasaa maridanoo, sia minaki aiku amaki aqufirafa mariannoo.
1JO 2:11 Narí akaqaafasaara fidiaqaa imaria fasiqa anaaseesa asukunakiara foora maridaqa, asukunaki nidaqa firannai anirannaira randaidaqa mikimakanidaqa asukuna fannoo misa nifusaa ititanoo marifaqa miqidaqa.
1JO 2:12 Qini faiqi namu, qinee inniara akara ridaqa. Inni mandoosanara Anutufa narí asauku mundiranara iriseenoo doo inni mandoosana akiqaara mininnisoonara qinee inni akara rumannimaqaidaqa.
1JO 2:13 Innee faiqí firaasa indaaru Yisuna ufa irusa inni akara rumannimaqaidaqa. Innee Yisunara ooqai oosana arooqooqari marinara irimariasa mariafaqa minara inni akara rumannimaqaidaqa. Qinee inni kumaaraauqa faiqi namuara akara rumannimaqaidaqa. Innee aakaaqaindaraa fasiqa uraaqaramafuanara inni akara rumannimidaqa.
1JO 2:14 Qinee inni faiqi namu faqa akara rumannimaqaidaqa. Innee inneeqa nikoonara Anutunara irimariafaqara akara rumannimaqaidaqa. Innee faiqí firaasa innee Yisunara oosana arooqooqari marinara irimariasa mariafaqa minara inni akara rumannimaqaidaqa. Qinee inni kumaaraauqa faqa akara rumannimaqaidaqa. Innee nimudaanai qimariasa mariafaqa Anutuna ufa inni mariranaki marifa maridanoo innee aakaaqaindaraa fasiqa uraaqaramafuasa marianara inni akara rumannimaqaidaqa.
1JO 2:15 Innee sia maa maqa maaqanasaaqaraa mandirirana mariranara ruaqa. Minaki mari ainainnara faqa sia ruaqa. Innee maa maqa maaqanasaaqaraa manda iriranara rimarifanoo Anutunara rirafa sia inniki mariannoo.
1JO 2:16 Maa maqanasaaqaraa mandainaina oosana maaqimminoo maridanoo. Maasa manda daundurakiqari oosana oosana ainainara randeemarunnanara faqa maasa oosana oosana ainaina qafamasee marararee qimarunnanara faqa maasa nifaaqa amooqimariana faqa maa ainainausa aiqama sia maasa qikoofinaindari qumu mari ainainafa maridanoo aiqama maa maqanasaaqaraa ainaina kai maridanoo.
1JO 2:17 Maa maqa maaqanaki maria mandirirana marina ainainausa faqa faiqí nidimari mandainainausa faqa doo taikanoo qumidanoo kasooqaqee firaaqoo taikaannoo. Faiqí fee anaasee fee moo fannoo Anutuna iriranamau fimarifa sia maa maqa maaqana namufaqa taikaanno, kaqi naaru naaru mariannoo.
1JO 2:18 Qini faiqi namu, taikara aukuana adeediranoo maridanoo. Ooqai asauku mundirana namuqaa uriqararafa aniannoo fee qimasee qimannimiafannana doo maqee mina namuqaa moomoo kooroomafi maridaqa. Maasa mina qafeeqa taikara aukuana adeediranoo maridanoo fee qidaqa.
1JO 2:19 Mi namuqaasa maasaki mariusa rakeemaki namuqaakiqau. Misa maasaki maridaqa sia maasa irirana amiqimasee maroosa marusa. Misa kuqaa maasaindi maridau maasaki kaqi marini. Anutufa maasa dadaaqianee qimasee misa qumeenni niqiqoofaqa maasakiqari rakeemakufaqa fufanoo Anutufa minannoo misa mandoosana kooroo inau.
1JO 2:20 Innee sia misa naanna ree mariasa mariafanoo asauku mundirafa kuqaa narí naaquqara andeeqara maraqunna inni naakunnimaqee marifaqa mariafanoo innee Yisuna anoonufara irimariafanoo.
1JO 2:21 Innee Yisuna anoona ufa sia irifaqau sia akara rini irimarianara akara rumannimaqaidaqa. Sia unna ufa moo fannoo anoona ufakiqari kambiqaidanoo. Innee minara faqa irimariasa mariafanoo.
1JO 2:22 Yafee unnufa qimarifa maridanoo Yisunara sia Anutuna asauku mundira fee qimarifa mifa unna ufa qidanoo asauku mundirana namuqaa maridanoo.
1JO 2:23 Miqi qimarifa sia mina amaakuara kaifau qaoo qidanoofau mina akoona Anutunara faqa qaoo qimarifa maridanoo. Faiqí fee anaasee fee moo fannoo mina amaaku marainafa mina akoona Anutuna faqa maraannoo.
1JO 2:24 Ooqai indaaru Yisuna ufa iriusa mifa inni naunduraki marinara amiqimasee rakisiaqa. Yisuna ufa irufa inni naunduraki marinaqa doo innee minannai amaaku faqa narí akoona faqa atukarasee miqandaki marifaranoo.
1JO 2:25 Marifanoo asauku mundirafa narí uqanna moo ainaina maa ainainna naaru marirana qimiraree qinau.
1JO 2:26 Akaqausa inni ueeqasee nikaru qimarifaqa maana minara qimannimidaqa akara rumannimaqaidaqa.
1JO 2:27 Qinee inniara iridaqa asauku mundirafa narí ufa inni naakunnimaqoofanoo maridanoo. Mina ufa fannoo inniki maridanoo sia fifau moo fannoo aana inni uqannifiqaannoo. Mina ufa fannoo narí kai aiqama ainaina anoona ainaina faqa unna ainaina faqa rainasee qimannimidanoo sia moo unna qidanoo. Innee Yisuna ufa irisee eedoo kai qiaqa. Miqidaqa asauku mundiranaki kaqi mariaqeera qidaqa.
1JO 2:28 Oo qini faiqinamu Yisunaki mariafanoo kaqi minaki kai mariaqa. Miqi marifanoo narí innaarunaindari quminaqa sia innee nisaurusee kukeeqaaqa kaqi nifaaqa quqasee qafaaqa.
1JO 2:29 Innee asauku mundiranara irimariafanoo mifa andeeqeemarifa maridanoo. Innee maanara faqa doo iriaqa, faiqí fee anaasee fee moo fannoo andeeqara oosana marainafa mifa faqa Anutuna faiqiara foora maridanoo.
1JO 3:1 Innee qafaaqa maasa qikoofa Anutufa firaaqoo maasara amuqusifanoo rimarifa maridanoo. Maasara firaaqoo amuqusifanoo maasara narí faiqi namu fee qidanoo. Maa maqa maaqanasaaqaraasa Anutunara sia irunnanara mina faiqi namu maasara faqa sia iridaqa.
1JO 3:2 Qini qifaaqasaa qiqoondiuqa, maqee maria aukuana Anutuna faiqi namu maridaqa. Kasooqaqee innaarunai mina faiqi namu maridaqa nana amiqira ainaina fee moo faqa ootupamma qimiannoo fee maasa sia minara iridaqa sia akooqoo maridanoo. Moodaa ainaina kai maasa iridaqa. Asauku mundirafa innaarunaindari koorooinaqa maasa mifara foora marianaura. Maasa mina narí uqanna raquramisee qafamasee minara narí fooqaanaikammianaura.
1JO 3:3 Maqee maria kamuqoo asauku mundirana asasammasee afeesara mariasa minara indee indee idaqa nariqa mandoosana findaukaqa fidaqa.
1JO 3:4 Moo fannoo aaqee marifa Anutuna ufa rukiaidanoo aaqaidanoo. Qaqaqarana oosana oosana fannoo Anutuna ufa rukiarafa maridanoo.
1JO 3:5 Asauku mundirafa sia fifau koorooinau, maasa aaqee marunnana mara aquaneera koorooinau, minaki sia aaqarafa maridanoo innee minara irimariafanoo.
1JO 3:6 Minara maasa asauku mundiranaki mariasa sia kaqi mandainainaki nidaqa. Yafa yafee kaqi mandainainaki nida fee mifa asauku mundiranara sia irifa sia uqanna minara irimarifa maridanoo.
1JO 3:7 Qini faiqinamu nikaru qimari fasiqafa anireenoo inni ueeqaandoo qimasee maana inni qimannimidaqa aufariaqee qidaqa andeeqara qoo nimariasa andeeqarausa maridaqa asauku mundirana aanna rarausa andeeqarausa mariaqa.
1JO 3:8 Yafa yafee mandaikiraqoo kaqi nimarifa mifa Sadannanaindi maridanoo, Sadannafa nikaruqirafa maridanoo nikaruqiannoo. Ooqai oosana arooqooqari mandainainaki nimarifa Sadannafa maridanoo Anutufa narí amaaku maa ainainnara maa maqanasaa koorooinau, Sadannana mandainainirana arutaikaanifeera maa maqanasaa koorooinau.
1JO 3:9 Yafa yafee Anutuna faiqi maridanoo fee sia mi fasiqafa mandaikiraqoo nidanoo. Anutuna oosana anoona uqanna minaki maridanoo, Anutufa mina akoofa marinara sia amana mandaikiraqoo fimariannoo.
1JO 3:10 Doo qinee maqee Anutuna faiqi namufaqa Sadannana faiqi namufaqa akooroomasee qimannimidaqa. Faiqí anaasee moo fannoo sia andeeqara qoo nimarifa sia Anutuna faiqi maridanoo, narí akaqaafasaara faqa sia uriqarara ainainee qimaseenoo minara sia amuqusimarifa mifa sia Anutuna faiqi maridanoo.
1JO 3:11 Ooqai indaaru maa ufana innee irimarusa mariafanoo mi ufana oosana maaqimminoo maridanoo maasa nariara nariara uriqarara ainainee qimasee nimuqusiani.
1JO 3:12 Maasa sia Kaina aanna raa, mifa Sadannana faiqi maridanoo narí akaqa arinau. Kainafa nanaree narí akaqa arinoo fee inau. Narí auqoo ainaina mandaikufanoo, mina marirafa nirafa eendaandinoo marunara narí akaqa nirafa marirafa andeeqanoo marunara minasaara aanoomaseenoo arinau.
1JO 3:13 Qini qikaqaafasaauqa maa maqa maaqanakinaasa inniara fidiaqaaifaqa siamma innee minara tautiaqa. Kaina oosana maraifaqa misa inniara fidiaqaammifaranoo.
1JO 3:14 Maasa kuqirana minniseeqa kaqi mariranaki ani maridaqa. Maasa nariara nariara andeeqasee qimuqusunnanara minara maasa kaqi mariranaki animaridaqee qidaqa. Yafa yafee nariara nariara sia andeeqasee amuqusinafa kaqi kuqiranaki maridanoo sia anikeeqaidanoo.
1JO 3:15 Yafee faiqí moo fannoo narí akaqaafasaara fidiaqaa imarinafa mifa doo kuqa nárí marifa maridanoo. Innee maana iridaqa faiqí kuqa nárí mariasa sia naaru marirafa misaki maridanoo.
1JO 3:16 Maasa nariara nariara uriqarara ainainee qimasee nimuqusira oosana maaqimminoo maridanoo. Asauku mundirafa maasara amuqusidanoo narí marirana maasara aunirira saqarisaa quqasee kuqinau. Doo maasa faqa miqi kai iqa maasa qeeqa qikaqaafasaa Yisuna ufa irimariasa mina ufasaara kuqiranaki firariafaqa maasa misa rafaaqafunnimaqasee kaqi mariaqee qimasee misa nimaaqa maqasee kuquanaura.
1JO 3:17 Moo fannoo ainaina narí amanasaa maqeeifa narí akaqaafasaa sarauqiranaki marina qafamasee qimudaoo qimasee amiraree qimasee narí amuqusirana amuqusinanoo narí amuqusa muqufi rafaaqafuseenoo sia dadaaqinoo, naqimasee miqinna fasiqafa Anutunara qini qimuqusaki maridanoommifoo qiannoo fee. Sia amana maridanoo.
1JO 3:18 Qini faiqi namu, maasa nariara nariara uriqarara ainainee qimasee rirana sia afaurunnai kai qia. Asaukunnai anoona ainaina kai narí ami narí ami iranannai kai mina anoona kooroo inoo kambiqaannoo.
1JO 3:19 Maasa miqiannanannai kuqaa anoonasaa atooaqa maridee qianaura. Maasa miqiannanara maaqoo nidaqa maridaqa Anutuna afusaa mirinni maridanoo maasa qiqafainaqa paasoosianaura.
1JO 3:20 Maasa aaqamasaananoo maasa qimuqusa darinanoo Anutufa qimuqusa uriqararafa maridanoo maasa aiqama ainainara irimarifa maasara amuqusinoo sia daruannoo.
1JO 3:21 Maasa qimuqusirafa sia darinaqa Anutuna afusaa paasoosammianaura.
1JO 3:22 Paasoosidaqa maasa nana ainainaree sarau ianna ainainnara innaaru qiananoo Anutufa maasa qimiannoo. Maasa mina ufara qimuqusannoo eedoo qimasee Anutuna aidimari oosana maraidaqa iraanna ainainara qiananoo mifa qimiannoo.
1JO 3:23 Anutufa maa naakaparufana maasa qimaqiminau. Innee qini qimaaku Yisuna qini qisauku mundiranara inneeqa irirana minasaa rusisee quandaki narí mina ufamau fiqa nariara nariara uriqarara ainainee qimasee nimuqusiaqee qinau.
1JO 3:24 Yau yausee Anutuna naakapara ufamau fimarinausa misa Anutunaki marifanoo kafaa Anutufa misaki maridanoo. Anutufa narí maraquna nimiqoona minara Anutufa maasa daunduraki maridanoo fee qidaqa.
1JO 4:1 Qini qifaaqasaa qiqoondiuqa. Moomoosa náriara Anutuna maraquna maasaki marisee qimariana sia mina irisee aiqamausara kuqaammifoo qiaqa. Innee misa nimanamasee qafaaqa kuqaa Anutuna maraquna fee moona maraquna fee misaki maridanoo fee. Unna qimaria tamummaqarausa aiqamai daraanammiqa marianara qimannimidaqa.
1JO 4:2 Innee maaqimasee nimanamasee qafaaqa, kuqaa fee Anutuna maraquna misaki maridanoo fee. Ooqai maa maqa maaqafa sia maruqoo Anutufa innaarunai Yisunasaa asauku munduseenoo kasooqaqee anee aiqama maqasaaqaraasa asumu mareena fee qimaseenoo mina qimaminau. Doo maqee inniki moo fannoo maa akooqooqaraanara Yisunara mifammifoo qinafa mifa Anutuna maraquna faqaafa mariannoo.
1JO 4:3 Moo fannoo aaqara ufa qinafa asauku mundiranara sia miqi marifa maqasaa fasiqa faiqi fee qinafa mi fasiqanaki sia Anutuna maraquna marifa maridanoo. Mi fasiqafa asauku mundirana namuqaa maridanoo. Ooqai maasa mi fasiqanara aniannoo mifoo qiafanaqa iriusa mariafanoo maqee doo kooroo mandee ani maridanoo.
1JO 4:4 Qini faiqi namu innee Anutuna faiqi namu mariafanoo. Unna qira tamummaqara fasiqauqa innee misa urinaaqaramafi mariasa, inniki mari maraqunafa uriqaranoo maridanoo maa maqa maaqanakinaasa maraquna Sadannanaindi ureeqanoo maridanoo.
1JO 4:5 Misa maa maqa maaqanakinaa iriranamau ufa qimariafaqa maa maqa maaqanakinaasa misa ufa iridaqa moodaa maqannaasa maridaqa.
1JO 4:6 Maasa Anutunaindi maridaqa Anutunara irimari fasiqafa maasa ufa iridanoo. Yau yausee sia Anutunaindi mariasa misa sia maasa ufa iridaqa. Doo maasa miqimandee anoona maraquna faqa unna qira maraquna faqa rainasee iridaqa.
1JO 4:7 Oo qini qiqoondiuqa, maasa andeeqasee nariara nariara uriqarara ainainee qimasee ruaqa. Nariara nariara nimuqusirafa Anutunasaaqari animari ainainafa maridanoo. Nariara nariara andeeqara amuqusimarifa Anutuna faiqi maridanoo minara irimarifa maridanoo.
1JO 4:8 Faiqí moo fannoo sia andeeqasee amuqusinafa sia Anutunara iridanoo. Nimuqusirana anoona uqanna Anutufa maridanoo.
1JO 4:9 Anutufa narí amuqusira oosana maasa uqaqifiqeenoo. Mifa narí amaaku moodaa faiqi maa maqa maaqanaki aqiqamasoofanoo maasara kaqi marirana mina Yisunannai maraaqee qimasee aqiqoofanoo quminau.
1JO 4:10 Andeeqara amuqusirana anoona maaqimminoo maridanoo. Sia maasa Anutunara uriqarara ainaina fee qimasee rimariqiafana. Anutufa naaree maasara amuqusufanoo narí amaaku aqiqeenoo minannai maasa mandainaina akiaqara dariraree quna mina mara aquanifeera aqiqoofanoo quminau.
1JO 4:11 Qini qifaaqasaa qiqoondiuqa. Anutufa maasara miqimasee firaaqoo amuqusunara maasa miqi kai iqa quandaki nariara nariara uriqarara ainainee qimasee qimuqusiani.
1JO 4:12 Sia moo fannoo Anutuna qafoosa maridaqa maasa nariara nariara riranannai Anutufa maasaki maridanoo mina amuqusirana anoona doo maasaki anoonaikinoo maridanoo.
1JO 4:13 Maasa maaqi qimaseeqa Anutunara kuqaa maasaki marifaqa maasa minaki maridee qianauranoo. Mifa narí maraquna maasa qimunara maasa minaramma irianaura.
1JO 4:14 Maasa maa ainainna qafeeqa aiqama qimannimidaqa maasa qikoofa narí amaaku aqiqeenoo maa maqa maaqanasaaqaraasa mandainainaki mariasa qumareeqee uqeeraani fee qimasee aqiqanau.
1JO 4:15 Ya fasiqa anaasee fee maa maqanasaaqari Yisunara kuqaa Anutuna faiqi fee qinafa Anutufa minaki maridanoo mifa faqa nariki maridanoo.
1JO 4:16 Anutufa maasara amuqusirana maasa qeeqa minara iridaqa kuqaa fee qimasee minasaa mundidaqa. Anutufa nimuqusirana anoona marinara yafa yafee nariara nariara andeeqara amuqusiranaki marifa mifa Anutunaki faqa marifa maridanoo, kaifaa Anutufa minaki maridanoo.
1JO 4:17 Anutuna amuqusirafa sia fifau maasaki anoonaikidanoo. Anutuna ufa irira faasaana sia narí afusaa rufiaaqeera paasoosiaqeera mina amuqusirafa maasaki anoonaikidanoo. Maaqoo maria kamuqoo maasa marirafa Yisunaindi miqirafa maridanoo nariara nariara andeeqara nimuqusiranaki anoonaikinoo maridanoo. Nariara nariara andeeqara nimuqusira oosana sia maparaairafa minaki maridanoo.
1JO 4:18 Moonara rufiarafa sia kaqi kambiqaidanoo maasa manda ainaina akiqara daruandoo qimasaida rufiaidaqa. Maasa maqasaa didimari fasiqanara sia rufiaidaqa maasa didirafa rufiarana afaqasaifanoo didirafa kai maridanoo. Anutufa maasara amuqusimarifanoo maasara ridanoo. Maasa Anutunara rufiaidaqa Anutufa maasara rimarina sia iridaqara miqidaqa, Anutufa maasa dari marifaqara foora minara rufiaidaqa.
1JO 4:19 Anutufa indaaru maasara amuqusunara maasa minara irisee kuqaa fee qimasee quandaki Anutunara faqa nariara nariara faqa uriqarara ainainee qimasee ridaqa nimuqusidaqa.
1JO 4:20 Moo fannoo qinee Anutunara uriqarara ainainara rida fee qimasee quandaki narí akaqaafasaara fidiaqaa inafa unna qirafa mariannoo. Mifa narí afu qafee marina narí akaqaafasaa ririmma sia amuqusidanoo minau Anutuna sia qafee marina naqimandee fifau amuqusiraree sia amana.
1JO 4:21 Doo minara qinee qidaqa. Asauku mundirafa maa naakaparufana maasa qimaqimiqoona inni qimannimidaqa. Ya fasiqa anaasee fee Anutunara uriqarara ainainee qimasee rinafa mifa quandakinoo narí akaqaafasaara uriqarara ainainee qimasee faqa ruannoo.
1JO 5:1 Yafa yafee Yisunara Anutuna asauku mundira fee qinafa mifa Anutuna faiqi mariannoo. Moo fannoo akoonara rinafa mifa mi fasiqana faiqiara faqa ruannoo.
1JO 5:2 Maasa maaqiannanara Anutuna faiqi namuara ridaqee qianaura. Anutunara nimuqusinaqa mina ufamau andeeqasee fuannanara Anutuna faiqi namuara ridaqee qianaura.
1JO 5:3 Maasa Anutunara ruannana anoona maaqimminoo maridanoo. Mifa naakapainna ufara eedoo qimasee asaukunnai qumaraannanara doo mifa anoona maridanoo. Anutuna naakapara ufa sia firaa qumaara tia maridanoo aufadaidanoo.
1JO 5:4 Maasa Anutuna faiqi namu maa maqa maaqanasaaqaraa mandainaina amana maasa mina uraaqaraanaura. Maa ainainannai maasa maa maqa maaqanasaaqaraa mandainaina uraaqaraidaqa, Yisuna saqarikiranannai uraaqaraidaqa.
1JO 5:5 Yafasiqa anaasee fee maa maqa maaqanakinaa mandainaina uraaqaraannoo fee. Akooqooqaraana Yisunara Anutuna amaaku fee qinafa mifa maa maqanasaaqaraa mandainaina uraaqaranoo mariannoo.
1JO 5:6 Maa Yisufa asauku mundirafa narí anoona aranandakiqari fidika nammarisaaqari kambiqanau sia nammari kaifau nammari namufaqa fidika namufaqa apirirafa kambiqanau.
1JO 5:7 Anutuna maraquna fannoo kuqaa anoona ufa imarufa maridanoo mina koorooinau.
1JO 5:8 Qaaramoo ainaina kooroo imarifa maridanoo. Mi qaaramoo namufa moodaa ainainara kai qidaqa, mi namusa maraquna faqa nammari faqa fidika faqa maridaqa.
1JO 5:9 Maaqoo kootaki ufa qimariasa ufa iridaqa kuqaa fee qidaqa. Faiqí ufa marinanoo Anutuna ufa fannoo faiqí ufa uriqaranoo marinara mifa akooqooqaraana Yisunara qini qimaaku uqannee qimaqoofa marinara maasa minara kuqaa anoonee qimasee irianaura.
1JO 5:10 Yafa yafee Yisunara Anutuna amaaku fee qinafa narí aundurakinaafa faqa dadaaqinanoo kuqaa anoonee qiannoo. Yafa yafee Yisunara sia Anutuna faiqi fee qinafa mifa Anutunara unna qimari fasiqafee qidanoo Anutufa narí amaakuara qu ufanara unna fee qidanoo miqi qidanoo.
1JO 5:11 Anutufa narí amaakuara qu ufafa maaqimminoo maridanoo Anutufa naaru naaru kuqaa marirana maasa qiminau, mi marirafa maasaindi mina amaakuki marifa maridanoo.
1JO 5:12 Yafa yafee Anutuna amaaku qumarainafa doo mifa mi marirana namufaqa qumareenoo. Yau yausee sia Anutuna amaaku qumarainausa sia mi marirana faqa qumaraidaqa.
1JO 5:13 Innee Anutuna amaakuara irirana rusimariasa innee doo naaru marirana doo maree fee qiaqeera maa ufana akara rumannimaqaidaqa.
1JO 5:14 Maasa Anutuna iriranasaa maaqoo moo ainainara innaaru qiananoo kuqaa maasa qimiannoo maasa iridaqa, miqiannanara maasa Anutuna afusaa sia rufiaidaqa paasoosamasee innaaru qidaqa.
1JO 5:15 Maasa Anutunara moo ainainara innaaru qiananoo mifa iriannoo. Maasa minara iridaqa iraanna ainainna kuqaa qimiannoo fee qidaqa.
1JO 5:16 Faiqí moo fannoo moo mandoosana mareemarina sia andeeqasee kuqiranaki fimaria mandoosana marasainanoo mina akaqaafasaa fannoo qafamaseenoo Anutunara innaaru qinanoo mina mandainaina ateeka rukaiseenoo narí marirana amiannoo. Qinee kuqiranaki sia andeeqasee fimaria mandoosannara qidaqa. Andeeqasee kuqiranaki fimaria mandoosana maridanoo moo fannoo mi mandoosanna marainaqa innee sia minara innaaru qiaqa.
1JO 5:17 Aiqama aaqarafa mandoosana maridanoo akaqausa moo mandoosana sia kuqiranaki fimariafa maridanoo.
1JO 5:18 Maasa maana iridaqa sia Anutuna faiqi namu mandoosana maqee maqee maraqa fidaqa. Anutuna amaaku ititasaifanoo manda fasiqa fannoo sia amana mina mandaikamamaqaannoo.
1JO 5:19 Maasa maana iridaqa maasa Anutuna ainaina maridaqa. Maa maqa maaqanaki mariasa aiqama manda fasiqa aakaaqakinaa fasiqa aramandunnai maridaqa.
1JO 5:20 Maasa maanara iridaqa asauku mundirafa Anutuna amaaku uqanna maasa Anutunara iriaqeera mina irirana qiminau. Doo maqee maasa Anutuna amaaku asauku mundirana Yisunaki marianara moodaanaki kuqaa anoona Anutunaki maridee qidaqa. Miqiqa maasa anoona Anutunaki faqa anoona asumu mariranaki faqa maridaqee qidaqa.
1JO 5:21 Qini faiqi namu unna qira Anutufara fooqaa qira ainainara nianasaa rufiaaqa, kuqaa Anutuna inni nimuqusakinaana mara amaaramaseenoo mina amaaqa maqaandoora minara rufiaaqa.
2JO 1:1 Oo maa anaasee aneenna faiqi namufaqa qinee faiqí firaasa akara rumannimaqaidaqa. Qinee faqa Yisuna anoona ufa irimariasa saimbaqa ani aninna faiqi namuara faqa uriqarara ainainee qimasee qimuqusifaqa ridaqa Anutuna kuqaa anoona ufa maqee maasa daundurai maridanoo naaru naaru marianinafa marifaqa minara maasa aniara uriqarara ainainee qimasee qimuqusidanoo.
2JO 1:3 Maasa qikoofa Anutufa mina amaaku asauku mundirafa Yisufa faqa narí amuqusiranakiqari narí afaarirana faqa narí nifauarana faqa narí asooarana faqa innisaimbaqa qimiannoo.
2JO 1:4 Oo maa anaasee ani faiqi namu akaqausa Anutuna naakaparufamau fimariafaqa qinee minara irunanoo qifaaqa asasidanoo.
2JO 1:5 Minara qinee ani afeekaikamasee qimamidaqa maasa aiqamausa Yisuna ufa irisee naríara naríara uriqarara ainainee qimasee nimuqusiramau kai fuaqa. Doo mi ufana ani qimamidaqa sia fuka aakaparufau, ooqai oosanai irimarunnufana ani qimamidaqa.
2JO 1:6 Mi nimuqusirana qinee qunandee mina oosana maaqimminoo maridanoo. Maasa aiqamausa Anutuna naakapara iriramau fuaqee qinau. Mi naakaparufafa ooqai oosanaindari irimariafa maaqi qidanoo, innee aiqamausa naríara naríara uriqarara ainainee qimasee nimuqusiranaki mariaqa.
2JO 1:7 Moomoo nikaru qimariasa ueeqee mariasa maaqanna maaqanna daraaniqa maridaqa. Misa Yisunara asauku mundiranara sia faiqí faiqi kambiqanau foo qidaqa. Miqi maria fasiqausa ueeqee mariasa maridaqa asauku mundirana namuqaa kammidaqa.
2JO 1:8 Innee inneeqa nifaaqasaa rakisiaqa. Maasa ufa ooqai anoonaikimarifa sia maqee inniki taikaannoo aneenna maaqoo ainainirana akiaqara naaru innaarunai oorufinana amiqimasee maraanneera qimamidaqa.
2JO 1:9 Faiqí moo fannoo asauku mundirana ufamau sia fimarifa fiaikatee fimarifa mifa sia Anutuna faiqi mariannoo. Asauku mundirana ufamau kai fimarianafa sia asauku mundirafa kai minaki maridanoo, mina akoofa faqa minaki maridanoo.
2JO 1:10 Oo maa anaasee faiqí moo fannoo maa qinee qunnufana sia qimarinafa anirainana sia aneenna maaqaki mara quqaa. Sia minara amiqi amiqia.
2JO 1:11 Anee miqimarinna fasiqana amiqi amiqirufa qinana doo mina mandoosana dadaaqidana miqimariananoo.
2JO 1:12 Qinee ufa oosana oosana ani qimamiraree qimaseeqa sia papiqasaa rirana amana marifaqa. Ani maqusai kasooqaqee firara iridaqa. Minni oonureeqa dookiqari ani qimamiseeqa narí qimami narí qimamimasee asasifaranoo.
2JO 1:13 Ani auna faiqi namu mai mariasa maa qini pasaki inni nimandaidaqa.
3JO 1:1 Oo Kaiusafa anindiri Yisuna anoona ufa qimarianaki marunnanara qinee faiqí firaasa aniara qimuqusimarifaqa maa akarana ani amaqaidaqa.
3JO 1:2 Qini qifaaqasaa qiqoondi. Ani maraquna amiqiranaki doo maridanoo, ani afaaqa faqa aurirana dinee sia marianifeera aneenna aiqama ainaina faqa mina amana kai amiqiranaki marianifeera Anutunara innaaru qidaqa.
3JO 1:3 Oo Kaiusafa ani akaqaafasaa mai anireeqa aniara Yisuna anoona ufamau maqee maqee fimarianaqa qimaqimiafaqa mina iriseeqa asasidaqa. Kuqaa anoona maree mariannanara ani oosana koorooifaqa qinee qafeeqa.
3JO 1:4 Qini faiqi namukammafi mariasa kuqaa anoona aatata fimarianara minara kai irisee firaa asasirana qimidaqa. Sia moo ainaina mi asasirana amana kai maridanoo.
3JO 1:5 Oo Kaiusafa qini qiqoondi, Yisuna ufa maqusa maqusa qimannimiqanuasa ani maqusai oonuraafana oosana oosana dadaaqirana amiqimasaida nimimariananoo. Anee sia moo maqannaa fee qimasee minnisaanafa mariananoo.
3JO 1:6 Anee dadaaqimarianausa misa ani aufakiana qimaqimiafaqa iridaqa. Misa aniara maasa maaqooqaraasa amaana maaqaki keeqee mariasa nifusaa anee misara amuqusi mariannanara kooroo ida qiafaqa iridaqa. Anutufa afaarimarifa maridanoo anee faqa mina aanna reenana mi fasiqausa dadaaqinana anee Anutuna ainainira faiqi amana kai maria.
3JO 1:7 Yisuna ufa qimannimiqanuasa innee sia misa niqafoosa moo maqannaasa mariafanoo sia aamina maqannaa maqusa maqusa fidaqa misa munnimmaina marasaida naqa fimariqau. Yisuna auqusaa mina ufa kai maree fimariqau, misa maasa Yisuna ufa irimariasa faiqara maaqaina kai maraseeqa Anutuna ainainirausaika mafiqa nidaqa misaikana maraidaqa.
3JO 1:8 Maasa Yisuna ufa irimarunausa misa kadaapiriranara iriseeqa misa miqimasee anoona ufa saikimariasa moodaanaki dadaaqiqa maasa saika faqee qimasee maraaqeera ani qimamidaqa.
3JO 1:9 Qinee qusa akara riqa inni miqooqaraasa amaana maqaki keeqee mariasa nimiaqeera. Nimaqaunanoo Diootareefeesafa narí kai naríara uriqararausee qimarifa qini akarakinaa ufa sia irimarifa, kasooqaqee inniki qinee oonureeqa mina oosana inniki marina unna ufa mandufa maasara qimarina unnufa oosana oosana qimarina kooroo ianaura. Mifa sia minara kai idanoo Yisuna ufa qimannimiqanuasa miqoo oonuraafanoo sia misa dadaaqidanoo misa ititannimaqaidanoo. Miqooqaraasa amaana maqaki keeqee mariasa quandaki misa dadaaqiraree qiafanoo misara faqa quqasee doo fuaqee qidanoo.
3JO 1:11 Oo Kaiusa qini qifaaqasaa qiqoondi, anee manda ainaina qafamasee sia mina ammeemmeeria amiqira oosana qafamaseenana mina ammeemmeerina mina aanna rainanoo amana mariannoo. Andeeqara oosana maree mariasa misa Anutunaindi maridaqa. Mandainaina maree mariasa misa sia Anutunara irimariasa maridaqa.
3JO 1:12 Inniki faiqí moo marifa mina auqu Deemeetariusafa minara aiqamausa kuqaa andeeqara fasiqa fee qidaqa. Anoona ufa faqa mi fasiqanara andeeqara fasiqa fee qidanoo. Maasa kuqaa anoona ufa kai qimaruna innee irimariasa mariafanoo sia mi fasiqanara unna qidaqa. Maasa minara amiqira fasiqa fee qidaqa.
3JO 1:13 Qinee moomoo ufa ani qimamiani qimaseeqa sia amana papiqasaa akara riqa.
3JO 1:14 Kaqikaaqoo anee ianannai qinee firaree qidaqa. Oonureeqa amiqimmandee narí qimami narí qimami qianauranoo.
3JO 1:15 Yisuna asooarafa anifaqa mariani. Ani aqoondiuqa maaqoo qaraasa aiqamausa ani amandaidaqa. Maasa qiqoondiuqa miqoo mariasa nuqu ramasee qimannimia. Maasa misa nimandaidaqa.
JUD 1:1 Qinee Yudeesa maa pasana akara ridaqa. Qinee Yisuna ainainira faiqi Yameesana akaqa maridaqa. Qinee qeeqa qifasaanara Anutuna asauku mundirana Yisuna eedoo qimasee rumbara faiqiara foora ainaini marunna faiqisa maridaqa akara ridaqa.
JUD 1:2 Anutufa naaramasee qinee unnannai aniaqee qufaqa eedoo qimariasa inni akara rumannimaqaidaqa. Innee Yisuna asauku mundirana mandaaqee mariasa maa pasana akara rumannimaqaidaqa. Innee maasa qikoona Anutuna amuqusiranaki mariasa inni akara rumannimaqaidaqa. Anutuna nifauarafa faqa aundurakinaa asooarana faqa firaaqoo inniara amuqusirana faqa firaaqoo inni naunduraki maridanoo irairaaiani.
JUD 1:3 Oo qini qifaaqasaa qiqoondiuqa. Anutufa maasa innaaruna asumu marirana moodaa qimiqaifaqa minaki quqaqisainara akara ruani qimaseeqa minniseeqa moo ufa akara ruanaura. Anutufa moodaa kari nimu ufana maasa qimuna mi ufana rakira ufara foora afeekaikamasee uqeera aindusuaqa minara inni afeekaikamandee akara rumannimaqaidaqa.
JUD 1:4 Faiqí akaqausa Anutunara sia fee qimariasa qumee inniki keeqafiqa dapikidaqa. Misa Anutuna afaariranara kaqi nimiranara faqa iriseeqa quandakiqa mi ufana eendaandi iseeqa minannai faiqí aanaaseeki narí ummuari narí ummuari mariana faqa oosana oosana mandainaina faqa unna qimasee Yisunufa fee qimasaidaqa uqeeraseea. Misa maasa asauku mundirana Yisunara maasa uriqararana maasa karaambaiqara qaoo qidaqa rukiaidaqa. Ooqai tamummaqara fasiqauqa akarakinaa ufa misa firaa mandainaina akiaqa arirana aqufuaqee qufaqa doo maqee aqufidaqa.
JUD 1:5 Inni moo ainainara naaqoo auqaidaqa. Ooqai Anutufa Isaraee maqannaa Isipa maqusaindaraana rafiamareenoo aadana maqa maaqaki quqanau. Quqasoofaqa akaqausa quandaki Anutuna ufa rukiasee kaqirunna ubeekaqau. Miqiufanoo Anutufa sia nifauanau kaqi narinau.
JUD 1:6 Innee Anutuna qangiroouqara faqa sia fee iridee. Ooqai misa firaa uriqaranaki marufaqa mina minnisee nári qimaqoomau akaqausa fufanoo Anutufa sia nifauanau kaqi qumaraseenoo sainandannai ruumbeeqeenoo naaru rumbaranaki maqa ameemaanai asukunaki quqaqaifaqa maridaqa muanni Anutuna ufa irira faasaanara afeesida maridaqa. Mi faasaannasaa narira ufa qimannimiannoo minara afeesidaqa.
JUD 1:7 Innee Soodooma maqusa faqa Koomoora maqusa faqa misaqa maru maqusanaasa faqa innee iridee. Misa manda qangiroo naanna reeqa nári qimaqoomau fiqa faiqí anaasee narí ummuari narí ummuari iqa faiqí narí aqoonna fasiqa ummuariqa oosana oosana mandainaina faqa maroofanoo Anutufa aiqamausa mi oosanna qafeeqa rufiaaqee qimasee naaru marira idaki misa quqanau.
JUD 1:8 Miqikai masee maa maqee inniki mandoosana uqeeree mariasa ooqeenaasa naanna raidaqa. Maqee inniki mariasa qainamaseeqa Anutuna ufammifoo qimasee mi mau fiqa aaqamaki nariqa naridaqa. Misa Anutuna aanoora sia rufiaidaqa mina ufa rukiaseeqa nári qimaqaa aatata fidaqa. Mi mandoosanna maree mariasa innaarunai amiqirausa marianara mandufa qimannimaqaidaqa.
JUD 1:9 Anutuna amiqira qangiroouqa ririmma ooqai Mooseefa kuqufufanoo Sadannafa mina iri qumaraanee qufanoo amiqira qangiroouqakiqari uriqararafa moo fannoo mina auqu Mikaraafa mifa Sadanna faqa ufa rainanau. Ufa rainaidanoo sia inniki ani mariasa naanna ranau. Sia aqira ufa mandufa Sadannara qinau. Anutuna ufara iriseenoo kaqi maaqi qimasee reendeenamasee qimaminau. Oo Sadanna Anutufa aniara qaoo qidanoo.
JUD 1:10 Maa inniki mandoosana uqeeree mariasa sia amiqira qangiroo aanna raidaqa niranaqarufa oonumafi irisee kaqi qidaqa. Nári sia qafee maria ainainnara qimasaidaqa niqidaqa. Misa kaasau aandau aanna raidaqa. Misa nári irirana irisee aandau oosanamau fidaqa. Mi mau fimariafanoo nári mandoosana fannoo nári naridanoo.
JUD 1:11 Misa narirafa firaaqoo mariannoo. Minara irifanoo naaquqaani. Misa Kaina aatata fidaqa. Kainafa Anutuna ufa rukiee marufa maridanoo narí akaqa arinau. Misa kafaa Baraamana manda aatata fidaqa minaki keeqararee qimaseeqa narí rarisee narí rarisee mamaree fidaqa. Baraamafa munnimmara rumammareenoo unna qimasee Isaraee maqannaasa rarisameeqee mandainainaki quqee marinau. Misa moo fasiqa ooqeenaa fasiqa Kooraana aanna raidee qimasee Mooseenasaaqari rakeemaku aadumarunna nariara moo karaambaiqee qimasee fufanoo Anutufa mina faqa mina aiku asauku mina faqa fusa faqa narinau. Maa inniki mandoosana uqeeree mariasa nariqa kai nári narirana mareeqee Anutuna nariranaki quqaseeqa minaki maridaqa.
JUD 1:12 Innee Anutunara qoomaqa sakasee naidaqa neemarifaqa mee inniki mandoosana uqeeree mariasa nári mandainaina namufaqa anireeqa sia moosara oonumafi iridaqa nifaaqa quqaseeqa kaqi náriaraa kai firaaqoo narana naidaqa. Misa ufidaina aukuana aandaroo aukuana oonamuara foora aniraifaqa oo aaku asooara ainaina aniannoommifoo qimariafanoo kaqi aiqareenoo fifanoo ufai fannoo misa mareeqeenoo aqidanoo aaku sia marisa maridaqa, sia andeeqara oosana uqaqifiqeenoo aupurarana kai uqaqifiqeenoo. Mi fasiqausa sia qaqamma irai saqari fara foora maridaqa, irai aukuanna oosana rarakusee qafaafanoo aadana kai maridanoo sia nammari nammaridanoo.
JUD 1:13 Mi fasiqausa mandainaina fannoo nammari qaqaarara foora nári mandainaina akooqoo mandinoo marifaqa sia nisauridaqa eekara arinoo akooqoo maridanoo. Misa mee sandee mari fasauna aanna raidaqa, sandamammaree asukunaki munu qimbaidaqa. Anutufa mi fasiqausa maqa maaqa miqi kai masee firaa asukunaki meemai afeedama nimaqaifanoo maridanoo.
JUD 1:14 Ooqai Eenookafa mi manda fasiqausara tamummaqaseenoo akara rumaqoofa maridaqa. Adanasaaqari moodaannai qisauku oosana taikafufanoo dinni ani moodaa mareenoo qaaraikinoo Eenookafa kambiqanau. Mi Eenookafa maaqi qimasee tamummaqaseenoo akara rinau. Innee iriaqa Anutufa narí naaquqara andeeqara qangiroouqa moomoosa faqa qumureenoo aiqama maqasaa qaraasa suqusee ufa nimiannoo, mandoosana maree mariasa Anutunara sia irimariasa misa Anutuna ufa rukiasee mandainaina oosana oosana maree marianara Anutufa faqa narí qangiroouqa faqa narirara qumuannoo. Mi manda fasiqausa Anutunara mandufa oosana oosana qiranara Anutufa narirara qumuannoo. Doo Eenookana tamummaqara ufa miqiminoo maridanoo. Eenookafa misara miqi qimasoofaqa qinee maa inniki mandoosana uqeeree mariasara mi mau fimariafaqa maaqi qidaqa.
JUD 1:16 Mi fasiqausa maqee maqee aiqama ainainara naundaufa naundaufa qida maridaqa. Misa aiqama ainainara amiqira ainainara faqa sia maasa didifaqa mandainaina fee kai qidaqa. Misa nári mandoosanara nidirana aandi aususeeqa nariqa mi mau fidaqa. Misa firaaqoo nariara nariara nimooqimariasa maridaqa. Misa nári mandoosanara nidirannai ubeekarara faiqí akaqausa marasee nimooqaidaqa amiqi amiqidaqa misa maasa mandoosanamau fidaqa maasa duqu uqeereefaree qidaqa miqidaqa.
JUD 1:17 Oo qini qiqoondiuqa karaambaiqa Yisufa asauku mundirana mina faiqi namu ufa qimannimiqoona sia aunuaqa.
JUD 1:18 Misa maaqi qimasee inni qimannimiqau. Taikara aukuana anirainaqa faiqí moomoo kooroomafiqa nári mandoosanara nidiramau fidaqa inniara naanaidara qifaranoo.
JUD 1:19 Mi fasiqausa faiqí qambaana anireeqa rainee mariasa. Miqi mariasa sia Anutuna maraquna naakirausa maridaqa nariqa faiqí faiqi nidiramau kai fimariasa maridaqa.
JUD 1:20 Innee qini qiqoondiuqa sia miqimariasa mariafanoo. Innee Yisuna naaquqara ufaki mariasa mariafanoo maaqara foora auqiqa fifi inaqa minaki afeekaikiaqa. Innee Anutuna naaquqara maraqunannai maqee maqee innaaru qiaqa.
JUD 1:21 Maasa karaambaiqa Yisufa asauku mundirafa narí nifauarana firaanakiqari maasa sia daruannoo naaru naaru marirana maasa qimiannoo. Innee Yisuna qumiranara afeesidaqa Anutufa inniara nidimarinaki minaki kai mariaqa sia moosaa finana kuridia.
JUD 1:22 Inniki faiqí akaqausa Yisuna mandaaqaranara marammara ridaqa qaara irirana maree mariasa, sia innee miqimariasa aanoomannimaqaaqa nifauamasaifaqa mariaqa. Naaru marira idakinaana Yisuna ufannai kari qinaqa qumareeqee Anutuna afeeka ququsaki quqaaqa. Akaqausa mandoosana maree mariasa faqa nifauarana faqa rufiara ufa faqa qimannimisee qumareeqee Anutuna ququsaki quqaaqa. Innee miqi marifaqa misa mandoosana qafamasee sia minara ruaqa innee faqa minaki fifaara. Misa mandoosana ikairiara rufiasee fidiaqaa iaqa.
JUD 1:24 Anutufa innee mandainainaki aqufirarifanoo mifa amana inni ititannisainaqa sia aqufifaranoo. Mifa amana inni mareeqeenoo amiqimmandee ninukamasee asasirana inni nimisee narí afaaqa areenaranaki naroorisaa amana quqaaninafa.
JUD 1:25 Moodaa Anutufa maasa asumu maree marifa. Maasa karaambaiqa Yisufa ani asauku mundirafa minannai maasa amooqirana qimamidaqa afaaqa areenarana faqa uriqararana faqa afeeka faqa aiqamausa aniara naaquqarana faqa anindi maridanoo fee qidaqa amooqidaqa. Ooqai indaaru anindi marinau maqee anindi maridanoo naaru naaru anindi mariani. Kuqaa.
REV 1:1 Dauni kambiqaaninna ainainara Anutufa narí asauku mundirana Yisuna akooroommamufanoo mifa quandakinoo narí faiqi namu qimannimianifeera Yoohaneena kooroomma aminau. Asauku mundirafa maa ainainausara narí qangiroo aqiqoofanoo qumureenoo Yisuna ainainira faiqi Yoohaneena kooroomma aminau.
REV 1:2 Yoohaneefa aiqama ainaina qafeemaruna faqa irimaruna faqa qangiroo fannoo qimamuna aiqama maa papiqanaki kooroo inau. Maa ufana Yisufa asauku mundirafa narí akoona Anutuna anoona ufa Yoohaneena qimamufanoo akara rumaqoo ufafa maa akarafa maridanoo.
REV 1:3 Faiqí moo fannoo maa akarana asaana rinafa asasiannoo. Maa tamummaqara ufana irisee eedoo qinausa misa asasifaranoo. Maa ufanakinaa ainaina koorooinausa qusasaa kambiqainara maa ufana asaana rimariasa faqa eedoo qimariasa faqa asasifaranoo.
REV 1:4 Asia maqa maaqaki mariasa amaana maqa qisauku dinni taikasee dinni ani qaara mararanaki keeqee mariasa qinee Yoohaneesa akara rumannimaqaidaqa. Anutufa ooqai marufa maqee faqa kaqi marifa kasooqaqee naaru faqa marianinafa narí afaarirana faqa narí asooarana faqa inni nimidanoo. Anutuna ufa irira qaari oorinni Anutuna maraquna namu qisauku dinni taikasee dinni qaara marasee mariasa miqi kai mandee Anutuna afaarirana faqa asooarana faqa inni nimidaqa.
REV 1:5 Yisufa asauku mundirafa andeeqasee kooroo imarifa Anutuna ooqa faiqi kuqiranakiqari findifufa maa maqa maaqanakinaasa karaambaiqauqa uriqararafa marifa mifa faqa narí afaarirana faqa asooarana faqa inni nimidanoo. Mifa maasara amuqusammidanoo. Mifa narí kuqiranannai maasa mandainainakinaana idukunniseenoo maasa qumareeqeenoo narí akoona Anutuna aanaiqikirausa mariaqee qimaseenoo quqaqisaifaqa maridaqa. Anutuna asauku mundirana Yisuna afaaqa areenarana faqa afeeka faqa firaaqoo minaindi marianifeera.
REV 1:7 Qafaaqa, mifa Yisufa asuruki qumidanoo. Mina faaqaana raquramusa misa faqa kuqiranakiqari findifi qafeefaranoo. Maa maqa maaqanakinaa maqusa maqusa mariasa aiqama minara ikiraqeeqa soofaarifaranoo. Doo kuqaa uqanna miqifaranoo.
REV 1:8 Anutufa uriqararafa karaambaiqa ooqai marufa maqee faqa kaqi marifa naaru faqa kaqi marianinafa nariara maaqi qidanoo. Qinee oosana aroo aukuana mariafanausa naaru taikara aukuana faqa kaqi marianausa maridaqa.
REV 1:9 Yoohaneefa narí qafoo ainainna maaqi qimasee akara rinau. Qinee Yoohaneesa inni nifasausa nauraiqi maridaqa. Qinee innisaimbaqa Yisuna anoonufa qimannimunaqa nári unna Anutufa marifaqa kuqaa qira Anutunara nikooqaifaqa aupurarana faqa narirana faqa innisaimbaqa qimimariafaqa maraidaqa. Qinee faqa innee faqa Yisuna ququsaki marunausa maridaqa, maasa mina teeroo quqaranaki maraidaqa sia minara aupureeqa mina minniseeqa kaqi minaki doori runusee maraqa fidaqa, qinee Yoohaneesa Anutuna ufa faqa Yisuna koorooira anoonufa faqa qimannimiafannanara Roomma maqannaasa qini karabusa rumbaranaki qisoofaqa maridaqa. Ooruku nammari qambaana Patamoosa afumaki Roomma maqannaa karabusaki mariafananoo Yisufa oosana oosana ainaina kambiqaaninnanara qimaqiminau.
REV 1:10 Karaambaiqa qimaqoo faasaanna karabusaki mariafananoo amaanasaa Anutuna maraquna fannoo daakufufanoo inaaqianaindari firaa ufireena miqirafa faiqiara foora ufa qinau.
REV 1:11 Mi ufafa maaqi qimasee qimaqiminau. Yoohanee maqee uqafiqaanna ainaina anee papiqaki akara rumasee dinni qisauku taikasee dinni ani qaara marasee maqusanaasa nári amaana maqakiaqa keeqee mariasa akara rumannimaqaa. Eefeesusa maqusa amaana maqaki keeqee mariasa faqa Samirana maqusa amaana maqaki keeqee mariasa faqa Peerakamumma maqusa amaana maqaki keeqee mariasa faqa Tiatira maqusa amaana maqaki keeqee mariasa faqa Firadeerafia maqusa amaana maqaki keeqee mariasa faqa Raoodiseea maqusa amaana maqaki keeqee mariasa faqa miqimasee amaana maqanamuara akara rumannimia.
REV 1:12 Mi ufana qimaqimisoofaqa qinee yafee inaaqiannaindari qimaqimidanoo fee qimasee quandaki qafaafananoo rambi kuradee mari ainainausa qisauku dinni taikasee dinni ani qaara marasee marufanoo rambi aiqamasaa marida qeemarinau.
REV 1:13 Mi rambisa qambainai faiqiara foora kikiqinoo marufaqa qinee qafaqiafana. Mi fasiqana qamunna kisaaqa karaambaiqa qamunna maqasaa qumumarufaqa qafaqiafana koora auqira raitanda karaambaiqaindi mina aradauqanna rumbanoo marinau.
REV 1:14 Mina akiqa asausi qafeeqa eekara asausiara foora kaaqa eekara arinoo marinau. Mina afu fannoo idauru miqirafa qeemarinau.
REV 1:15 Mina aiku fannoo anukara barasara foora tandi tandimarinau. Mina ufa fannoo oondainni nammariara foora aiqanaiqana imarinau.
REV 1:16 Mina asaukuqannai asaukuki qisauku dinni taikasee dinni ani qaara marasee fasaunamu uaqee inau. Mina ookiqari qaseema miqirafa raiqarafa afaidarafa animarinau. Mina oori afiri suani qambaanai ururee firaaqoo qaindee imarinau.
REV 1:17 Qinee mina qafamasee kaaqa rufiasee mina aramandunnai maqasaa aqufiqa kuqiara foora iqa mariafananoo narí asauku uqannai qinisaa munduseenoo qimaqiminoo qinau. Oo maa fasiqa sia rufiaa. Qinee indaaruqaasa faqa inaaqianaasa faqa maridaqa.
REV 1:18 Qinee ooqai kaqi mariafanausa maridaqa, qinee kuquafanausa maridaqa doo qiqafa kaqi marunausa maridaqa naaru naaru marianaura. Qinee kuqiranara rakisirausa uriqararausa maridaqa mina kooqi kiqa uaqeeiunausa maridaqa kuqiranaki mariasa mandoosana mareeusa misa mariaqoo faqa uriqararausa maridaqa mina kooqi kiqa faqa uaqeeidaqa.
REV 1:19 Yoohanee anee qafa qafeemarianna ainainna irimarianna ainainna aiqama papiqaki akara rua. Maqee qafeemarianna ainainna faqa kasooqaqee kambiqaaninna ainainna faqa akara rua.
REV 1:20 Qini qisauku uqannai qisaukukinaa fasau qisauku dinni taikasee dinni ani qaaraqanda marasee fasau mina kukeeqarana oosana maaqimminoo maridanoo. Qisauku dinni taikasee dinni ani qaaraqanda marasee amaana maqasaa rakisimaria Paatoosa fasau maridaqa. Qisauku dinni taikasee dinni ani qaara marasee rambi kuradee maria ainainna mina kukeeqarana oosana maaqimminoo maridanoo. Maqusa maqusa amaana maqa mifa maridanoo. Qisauku dinni taikasee dinni ani qaaraqanda marasee amaana maqara qidaqa.
REV 2:1 Yoohanee anee Eefeesusa amaana maqasaa rakisimari paatoona maaqi qimasee akara rumasee qimamia.
REV 2:2 Oo Eefeesusa maqannaa Paatoo dinni taikasee dinni ani qaara marasee fasau narí asaukuki uqirafa ni fasiqafa ani qimamidanoo. Qisauku dinni taikasee dinni ani qaara marasee rambi kuradee mari ainainna qambaanai nimari fasiqafa Eefeesusa amaana maqasaa rakisimari paatoo maaqi qimasee qimamidanoo. Qinee anee auqee marianna saikana iridaqa anee kadaapiri mariannanara iridaqa anee sia feefauruara irisaidana maqee maqee kadaapiri marianaqa iridaqa. Anee mandoosana maree mariasara akooqee mariannanara qinee minara faqa iridaqa eedoo qidaqa. Akaqausa náriara unna qimasee Yisufa diqiqoo fasiqausee qufana anee misa faqa amanamasee qafoonanoo misa unna qirana anee paqurunafa mariananoo.
REV 2:3 Anee reendeenamasee miqoo kai fimarianafa mariananoo. Anee qiniara oosana oosana kadaapirirana marasee sia minnisaananoo kaqi marana fimariananoo.
REV 2:4 Akaqa ainainara kai aniara aaqeefoo qidaqa. Anee ooqai indaaru unandee sia qiniara amuqusidanoo.
REV 2:5 Ooqai muruqoo amiqiranaki mariunafa doo miaqoo qumuananoo. Inneeqa oosana quandaki ooqai undee kai iaqaana. Sia miqifaqa qinee innee marinannai inni rambi mariqooqaraana maraanaqa innee doo imbeefara.
REV 2:6 Inniki moo oosanara qinee amiqira fee qidaqa. Nikooraita unna amaana ufara innee qini daanna raidaqa fidiaqaammi mariafanoo. Nikooraita amaana ufa qimariasa aiqama faiqí faqa anaasee faqa moodaanaki maraqa nuafaqa innee misa ninda fee qini daanna ree fidiaqaa imariasa mariafanoo.
REV 2:7 Anutuna maraquna fannoo amaana maqaki keeqee mariasa aiqamai qimannimidanoo. Naaqoo faqaasa mina ufa kai iriaqa. Mandainainaki afeekaikamasee rakiranara foora maraqa fifi inaqa uriqaree mariasa qinee misa qimannimianaqa misa Anutuna innaaruna ququsaki keeqafi innaarunai asumu marirana nimira saqari qaqamma neefaranoo.
REV 2:8 Miqi qimaseenoo Eefeesusa amaana maqa Paatoonara ufa qimaseenoo quandakufanoo Samirana amaana maqasa Paatoonara Yoohaneena qimaminau. Yoohanee anee Samirana amaana maqasaa rakisimari Paatoona maaqi qimasee akara rumamia. Ooqai indaaruqaafa faqa inaaqianaafa faqa ooqai kuqufa findifi kaqi marifa Yisufa maa ufana ani qimamidanoo.
REV 2:9 Qinee inni kadaapiriranara iridaqa innee maa maqanasaa ainaina siaisa kudi mariafanoo innaarunai ainaina faqaasa mariafanoo qinee iridaqa. Sadannana faiqi namu akaqausa náriara unna qimasee Yuda maqannaa fee qimariasa inniara mandufa oosana oosana qimariana qinee iridaqa.
REV 2:10 Qini ufasaara kaqikaa qoo innee aupurarana mareefaranoo innee sia minara rufiaaqa. Innee iriaqa Sadannafa inni nimanamasee qafaaneera karabusaki akaqausa quqaannoo. Inni nidafirafa maa maqanasaa qusasaa mariannoo. Innee kaqi maraqa fifi inaqa kuqirana paqurinna aukuana qinee naaru marira qafee afisunnimaqaanaura.
REV 2:11 Anutuna maraquna fannoo aiqama maqusa amaana maqaki keeqee mariasa qimannimidanoo naaqoo faqaasa mi ufana iriaqa. Andeeqara oosana kaqi maraqa fifi inaqa Sadannana nimanirana uriqararausaiki mariasa inaaqianna kuqirafa sia misa naruannoo.
REV 2:12 Yisufa miqi qimasee Samirana amaana maqa rakisiranara Yoohaneena qimamiseenoo quandakinoo Peerakamumma amaana maqasaa Paatoona maaqi qimasee qimaminau. Yoohanee anee Peerakamumma amaana maqasaa rakisimari Paatoona maaqi qimasee mina faqa akara rumamia. Qaseema dinni dinni raiqarafa ookiqari animari fasiqafa Yisufa maa ufana ani faqa qimamidanoo.
REV 2:13 Innee Peerakamumma maqusanaasa Sadannana amaana maqa mariaqoo mariasa mariafanoo qinee iridaqa. Innee kuqaa qinisaa atooqee mariasa mariafanoo. Inni maqusai Sadannana amaana maqa mariqoo miqooqaraasa qini qiqoondi moo fasiqa qini Yisusara andeeqasee kooroo qimarina akiaqara mina auqu Antipasana kuqa arufaqa innee sia minara rufioosa kaqi kai qini saqariki mariasa mariafanoo.
REV 2:14 Akaqa ainainara kai inniara aaqaidammiafoo qidaqa. Inniki maqee Baraamafa ooqai mariu fasiqana aanna ree mariafanoo mi fasiqafa Baraamafa marufaqa inniki akaqausa mi oosanna maraidaqa. Ooqai Mooaba maqusanaasa karaambaiqa fannoo Barakafa Anutuna tamummaqara fasiqa moo auqu Baraamana munnimma amiseenoo anee naukarara ufa Isaraee maqannaa nimisainaqa kuquaqa. Miqi qufanoo Anutufa Baraamanara qaoo qufanoo quandakinoo Barakana qimamufanoo Isaraee maqanaasa mindaraasa unna Anutuna oorisaa naranara dufi dufi qimasee narana naidaqa mindaraa anaasee naafeeqee mariqau. Innee Peerakamumma amaana maqaki mariasa akaqausa Baraamana oosana maree mariafanoo.
REV 2:15 Miqi kai masee inniki Nikooraita amaana ufa irimariasa akaqausa mariafanoo.
REV 2:16 Innee inneeqa mandoosana kafaa quandaaqa. Sia quandaifaqa qinee innee mariaqoo anireeqa qeeqa dookiqari qaseemannai mi mandoosanna maree mariasa naruanauranoo.
REV 2:17 Anutuna maraquna fannoo aiqama maqusa amaana maqaki keeqee mariasa qimannimidanoo naaqoo faqaasa iriaqa. Ooqai Isaraee maqannaasa aadana maqa maaqakinai nimarufaqa kananaana kananaana innaarunaindaraa feemu nimiaafanausa maridaqa. Maa maqee mariaqoo mandainaina faqa rakiraridaqa mina uriaaqararausa qinee kukeeqara feemu innaarunai misa nimianaura. Eekara oonisaa nári fuka nuqu akara rirana moodaa kai moodaa kai nimianaura. Mi fuka auquna sia moo fannoo misa oosana iriannoo narí kai mina oosana iriannoo. Doo mi ufana Yisufa Peerakamumma amaana maqasaa Paatoonara Yoohaneena qimaminau.
REV 2:18 Rambi kuradee maria saqarina qambaanai marifa Yisufa miqi qimaseenoo quandaki Yoohaneena kafaa maaqi qimasee qimaminau. Yoohanee anee Tiatira amaana maqasaa Paatoona faqa maaqi qimasee akara rumamaqaa. Anutuna amaaku afu idara foora qeemarifa mina aiku faqa anukanoo mari barasara foora tandi tandi mari aikunannoo mandainaina radamimarifa Yisufa maa ufana inni qimannimidanoo.
REV 2:19 Innee Tiatira maqusanaasa qini Yisusara nimuqusidanoo qinee iridaqa, innee maqee maqee iriqa kai fimarianara faqa qinee iridaqa, innee qiniara iriseeqa inneeqa maqannaasa dadaaqimariafanoo. Innee sia kadaapi dari maqi qimasee minnisee mariafanoo kaqi maraqa fimarianara minara faqa iridaqa. Ooqai innee qini saika oodaa maree mariqau, maqee kamu firaaqoo maree mariafanoo qinee minara faqa iridaqa.
REV 2:20 Qinee inni moodaa ainainara kai inni niqidaqa. Innee mi manda anaaseena Yeeseebeera nammarinara saina kaqi marianifee qimariana. Mifa unna qimasee nariara Anutuna ufa maree marunausee qidanoo. Mi anaaseefa naakapaidanoo qini ufa irimariasa rarisameeqeenoo faiqí faqa anaasee faqa narí ummuari narí ummuariranaki quqaidanoo. Moo unna anutunara innaaru qimasaida narana neemarianaki faqa quqaidanoo.
REV 2:21 Qinee mi anaaseenara aneenna ummuariranakiqari quandaannee qimasee afeesunaisia maridaqa.
REV 2:22 Minara mina mareeqee narí rarisaqanua fasiqausa saimbaqa manda qaarisaa quqasaanaura minaki maridaqa teeroo firaana maraida marifaranoo. Misa nári mandoosana sia aupuramasee quandaifaqa qinee dauni miqianaura.
REV 2:23 Qinee mi anaaseena ufa irimariasa faqa kuqa narusaanaqa amaana maqaki keeqee mariasa qini oosana irifaranoo. Misa qiniara kukeeqara ainainara irimari fee qiaqeera naruanauranoo. Qinee aiqamausa nári nisaukunnai auqainnana akiaqara kai nimianaura.
REV 2:24 Innee Tiatira maqusanaasa sia mi manda anaaseena oosanna maroosa mariafanoo. Mina oosana mareemariasa Sadannana meemaqoo kukeeqara irirana irimariasa náriara unna qimasee akoofasa fee qidaqa. Qinee sia ummaara moo faqa innisaa quqaanaura.
REV 2:25 Maana kai qimannimidaqa. Inneeqa amiqira oosana uaqeeiana mina kai maramaree fuaqa, fifi inaqa qinee qumuanna aukuanna mina akiaqara maraaqa.
REV 2:26 Rakiranara foora iqa mandainaina uraaqarararee imariasa qini ufamau fimariasa mi mau fifi inaqa taikara aukuana paquriqa qini qikoofa afeeka qimuna quandaki misa nimianaura.
REV 2:27 Niminaqa kasooqaqee naaru misa moo maqannaasa urinaaqaramasee ainna faaqaanannai misa qafeera foora rukamifaranoo. Qinee iqaqara duqudeeqi faqa nimianaura.
REV 2:29 Anutuna maraquna fannoo amaana maqaki keeqee mariasa qimannimidanoo naaqoo faqaasa mi ufana iriaqa.
REV 3:1 Yisufa miqi qimasee Tiatira amaana maqasaa rakisirana qimamiseenoo quandakinoo Saradisa amaana maqasaa Paatoonara Yoohaneena qimaminau. Yoohanee anee maa ufana akara rumeeqeenana Saradisa amaana maqasaa rakisira Paatoona amaqaa. Anutuna maraquna dinni taikasee dinni ani qaaramarasee maraquna qumaree marifa dinni taikasee dinni ani qaaraqanda fasau qumaree marifa Yisufa inni Saradisa maqusanaasa qimannimidaqa. Qinee innee auqeemarianara iridaqa. Misa unna qimasee inniara kasimariasee qiafaqa qinee inniara kuqimariasee qidaqa.
REV 3:2 Innee minara iriseeqa tauti findifuaqa nimuqusa kaqikaaqoo kasimariqoo kaaqa kuqifoora dauni findi fuaqa. Inneeqa Anutuna saika mareemariana Anutufa qafaidanoo mina afusaa sia anoonaikidanoo minara qinee inniara tauti findifi fuaqee qidaqa.
REV 3:3 Innee ooqai qini ufa irimaria oosannara naaqoo irisee qini ufara faqa irisee eedoo qimasee mi mau fifanoo inneeqa mandoosana quandaaqa. Innee sia faiqaranakiqari tauti findififaqa qinee ummuari mari fasiqafara foora tautumannimaqasee anireeqa naruanaura.
REV 3:4 Inniki Saradisa maqusanaasa akaqausa sia qikairi faisa maridaqa. Innee qikairi siaisa qini faqa nifaranoo. Inni amiqira marirana amana kai eekara qamunna afisunnimaqasaanaqa qini faqa fifaranoo.
REV 3:5 Mandainaina fannoo inni maqee maqee rafaaqafimarifaqa mi manda ainainna uriqararausa inni naanna ramasee eekara qamunna afisunnimaqarara qidaqa inni nuqu faqa naaru kaqi marira papiqakinaana sia ateekaanaura kaqi marianifeera qidaqa. Qinee qeeqa qikoona oorisaa faqa mina qangiroo misa noorisaa faqa innee qikairi siaisara qini faiqi namu fee qianaura.
REV 3:6 Anutuna maraquna fannoo aiqama maqusa amaana maqaki keeqee mariasa qimannimidanoo naaqoo faqaasa mi ufana iriaqa.
REV 3:7 Yisufa miqi qimasee Saradisa amaana maqa Paatoona qimamiseenoo quandaki Firadeerafia amaana maqasaa rakisimarunara Yoohaneena qimaminoo qinau. Yoohanee anee maa ufana akara rumeeqeenana Firadeerafia amaana maqasaa rakisira Paatoona maaqi qimasee amaqaa. Ooqai Dafidifa kooqi kiqa uaqeeuna qinee Yisusa maqee mina uaqeeidaqa ani qimamidaqa. Qinee naaquqara andeeqarausa kuqaa anoona oosana oosana mareemarunausa maa ufana inni qimannimidaqa. Qinee kiqannai kooqi ititasaana sia amana moo fannoo atuarana amana maridanoo, kaifaa qinee kooqi atuasaananoo moo fannoo sia amana ititaannoo.
REV 3:8 Innee Firadeerafia maqusanaasara qinee inni aiqamausara amiqimasee iridaqa. Inni noorinni kooqi atuarana quqasaananoo moo fannoo sia amana mina ititaannoo. Inni afeeka kaqikaafa maridanoo innee qini naakapara ufamau fimariasa mariafanoo. Innee maqee maqee qiniara kai iridaqa mariasa mariafanoo.
REV 3:9 Iriaqa, Sadanna faiqi namu akaqausa mariasa náriara unna qimasee Yuda maqannaa fee qimasee qimariasa qinee misa mareeqee inni niramandunnai quqasaanaura. Aiqamausa mina qafeeqa oo Yisufa inniara amuqusifanoo miqidanoo fee qiaqeera.
REV 3:10 Qinee inniara reendeenamandee mariaqee qiafanaqa innee miqi mariasa mariafanoo. Miqi mariana akiaqara firaa teeroo maaqanna maaqanna nimanamasee qafaanaura miqianna aukuanna qinee inni mareeqee kaqi atinnai quqasaana asumu marifaranoo.
REV 3:11 Qinee qusasaa qumuanaura. Innee uriqaraqa mariana amiqimmandee rakisi qumaraaqa moo fannoo qumaraandoora.
REV 3:12 Maa maqanasaa mandainaina qambaanai uriqararana qinee mina qumareeqee qeeqa qikoona amaana maqaki quqasaananoo mifa faakanaikinoo mariannoo. Qinee mina afaaqasaa qeeqa qikoona Anutuna auqu quqaanaura, qeeqa Anutuna firaa maqusa fuka Yeerusaree auqu faqa mina afaaqai quqaanaura. Mi maqusafa innaarunaindari qini Anutufinnainadari kasooqaqee qumuannoo. Qinee qeeqa fuka duqu faqa mi fasiqana afaaqai quqaanaura.
REV 3:13 Anutuna maraquna fannoo aiqama maqusa amaana maqaki keeqee mariasa qimannimidanoo. Naaqoo faqaasa mi ufana iriaqa.
REV 3:14 Yisufa miqi qimasee Firadeerafia amaana maqasaa Paatoonara Yoohaneena qimamiseenoo quandaki Raoodiseea amaana maqasaa rakisiranara qimaminoo qinau. Yoohanee anee Raoodiseea amaana maqa rakisira Paatoora faqa maaqi qimasee akara rumamia. Qinee mapukusee marunna fasiqausa Yisusa inni qimannimidaqa. Qinee naaru naaru kuqaa anoona ainaina kai qimarunausa inni qimannimidaqa. Anutufa aiqama ainaina auqimaruna oosana qinee marunausa inni qimannimidaqa.
REV 3:15 Qinee innee auqee maru ainainnara iridaqa. Innee sia suaru qiqa mariafanoo innee sia idaidiqa mariafanoo Inni oosana amiqirafa marinaqau kaifaa minara faqa irini.
REV 3:16 Inni oosana suanisaa nammariara foora naunanoo ididi marifaqa fididaqa.
REV 3:17 Innee unna qimasee inneeqara aiqama ainaina oosana oosana faqaasee qimariafanoo. Inni nifaaqa rumbanoo marifaqa mandaikidaqa kudoosaapaqa maridaqa innee sia minara irimariafanoo. Innee kudi mariafanoo nifu qimbarausara foora mariafanoo kaqisamuara foora mariafanoo.
REV 3:18 Qinee maaqi qimasee inni naamua qidaqa, innee qini koora munnimmara foora feefaurumaseeqa minannai naundurakinaa qumiasana moomoo maraaqa. Innee qinisaaqaraa andeeqarana feefaurumasee eekara qamunnara foora marasee inneeqa nisaurirana manda nifaaqasaa afisuaqa. Inneeqa nifu marasinna minniseeqa qini marasinnara foora feefaurumasee inneeqa nifusanara foora narimarinaki akusaifanoo inni nifu amiqiani.
REV 3:19 Qinee nimuqusi maria fasiqa anaaseera kai mandainainaki keeqaafaqa qaoo qimasee naridaqa. Innee minara irisee kuqaa noori runusee inneeqa marirana quandaaqa.
REV 3:20 Iriaqa qinee Yisusa faiqí nimuqusa kooqi afaisaa kikiqammambiqa kooqi atuaannee qimasee kukusidaqa. Faiqí moo fannoo qinee kukusiannana irinoo narí kooqi atuqainaqa qinee mina amuqusa ooki keeqafiqa mina faqa naanaura mifa qini faqa naannoo.
REV 3:21 Qinee maa maqanasaa mandainainakiqari uriqararausa maridaqa qeeqa qikoosandiri narí rakisira qaarisaa ooqufaaqee idaqa. Maa maqanasaa mandainainakiqari rakirara foora uriqarainafa mifa miqi kai inoo qinee rakisira qaarisaa innaaruna ququsaki qini faqa ooqufaaqee mariannoo.
REV 3:22 Anutuna maraquna fannoo aiqama maqusa amaana maqaki keeqee mariasa qimannimidanoo. Naaqoo faqaasa mi ufana iriaqa.
REV 4:1 Qinee Yoohaneesa mi ufana irunanoo qifu pisipasifaqa moo ainaina qafeeqa. Innaarunai kooqiara foora atuanoo marifaqa qafeeqa. Minakiqari moo fannoo qimaqimifaqa iriqa mina ufa fannoo qufireena miqirana fuaqaidanoo miqidanoo qimaqiminoo anee mai ururainaqa kasooqaqee kambiqaaninna ainainna uqafiqaanaura.
REV 4:2 Miqi qimasoofanoo Anutuna maraquna daakufufaqa kooqiki keeqaki innaarunai ooru fiqiafana. Ooruree qafaafananoo ufa irira qaari ufiqiranasaa moo fasiqa marufaqa qafaqia. Mi fasiqafa Anutufa marinau. Mi qaarifa sia kaiqeesa qaari Anutuna narí rakisimari qaarina marinau.
REV 4:3 Mi fasiqafa Anutuna oori afiri pupu ooniara foora ooriki takunasoosa imarinau. Oondanda amiqirafa rakisimari qaarina ufiqirana fiqu fiqu inoo marinau.
REV 4:4 Mi qaarina ufiqirana atiqara moodaa fasiqa aiku asauku taikasee moo fasiqa asauku qaara faqa qaara faqa oonu marasee fasiqauqa nariqa rakisimari qaarinasaa fiqu fiqumma ooqu mariqa mariqau. Misa aiqama uriqararausa koorannai auqira qafee faqaasa eekara qamunna afisirausa nariqa qaarisaa Anutuna fiqu fiqu mafi ooqu marifi mariqau.
REV 4:5 Anutuna rakisimari qaarina qambaanaindari aakuasaa faqa innaarunai qirana faqa darara qirana faqa ruruqirana faqa qaari qambaanaqari ururoofaqa qafaqiafana Anutuna oorinni qisauku dinni taikasee dinni ani qaara marasee qoomanamu Anutuna oorinni qeemarufaqa qafaqiafana. Mi qoomausa Anutuna maraqunauqa marufaqa qafaqiafana.
REV 4:6 Anutuna oorinni ooruku nammari miqirafa tanukara foora mandinoo marinau. Mi nammarinasaa sia kaqikaaqoo dumuna qaisoora marinau amiqirafa uqanna marinau. Anutuna rakisira qaari dinni qaaraqanda dinni qaaraqanda aandau marinau. Noorinni faqa nitaufakai faqa aiqama nifaaqasasa nifu moomoo marinau.
REV 4:7 Moo fannoo raioona kaasau pusina fooqaafa firaatia marinau moo aandau burimakau aanaaqi miqirafa marinau moo aandau faiqí noorikira aandau marinau moo aandau quqaumu miqirafa aqoosa faqaafa marinau.
REV 4:8 Mi aandau namusa qisauku dinni taikasee dinni ani moodaa marasee niqoosa faqasaa mariqau. Mi namusa nifaaqasasa faqa naunduraki faqa nifu moomoo marinau. Mi namusa eendaki faqa faasaana faqa idi raida kai mariqau. Misa maaqi qimasee idi ree mariqau. Anutufa karaambaiqa afeeka uriqararafa naaquqarafa naaquqarafa naaquqarafa. Ooqai marufa maqee marifa kasooqaqee marianinafa maridanoo.
REV 4:9 Mi qaara faqa qaara faqa aandau namusa qambaana Anutuna rakisinnimaqee maru qaarinasaa dinni dinni mariasa maqee maqee Anutunara idi ree marusa mariqau. Misa qaari qambaana maruna Anutunara naaru naaru marianinnanara dufi dufi qira idi faqa mina auqu uqeerara idi faqa mina areenaranara faqa idi ree marusa mariqau.
REV 4:10 Mi aandaunamusa idi ramasoofaqa fiqu fiqumma marusa moodaa fasiqa aiku asauku taikasee moo fasiqa oonu qaara faqa qaara faqa marasee uriqararausa nári koora auqira qafee uturuqu quqasee noorindari maqasaa Anutuna oorinni kummarammafufaqa mina amooqimasee maaqi qimasee qimamiqau.
REV 4:11 Oo Karaambaiqa Anutufa anee amiqirafa. Anee amana areenarana faqa amooqirafa faqa afeeka faqa amana mareennaranoo. Anee aiqama ainaina auqunafa. Aneenna iriranannai marirana faqa kasirana faqa nimunafa marianafa mariananoo.
REV 5:1 Misa idi ramasoofaqa rakisinnimaqee maru qaarina qambaana marunna Anutuna asaukuki mifa papiqa kukuqirana asauku uqannai marufaqa qafaqiafana. Mi papiqana aunduraki faqa adisaa faqa akara marufaqa qafaqiafana. Sanda rumbarafa qisauku dinni taikaseenoo dinni ani qaara maraseenoo mi papiqana qambaana qambaana rumbanoo marufaqa qafaqiafana.
REV 5:2 Qinee miqoo qangiroo moo qafaqia amudaanai qimarufa afeeka qafamasaafananoo firaa kari nameera qinoo qinau. Yafee moo fannoo andeeqarafa marinafa maa sandausa rakeemaseenoo fee papiqa qairisee asaana ruannoo fee.
REV 5:3 Misa innaarunai faqa maqasaa faqa maqa ameemaanai kuqirausaki faqa randaafanoo sia moo fannoo amanaikinoo mi papiqana sanda rakeemaseenoo qairisee asaana ruaqaainoo marufaqa qafaqiafana.
REV 5:4 Qinee Yoohaneesa mi papiqana qafammasee ikiraqeeqa sia moo fannoo andeeqarausa amana mariafaqa qinee qafeeqa firaaqoo ikiraqaqiafana.
REV 5:5 Ikiraqee mariafananoo uriqararausakiqari moo fannoo qimaqiminoo qinau. Sia ikiraqaa afu qafaa Yakooboona faiqi namukiqari Yudana aiku asaukukiqari moo fannoo raioonara foora aiqama mandainaina urinaaqararafa Dafidina ati firaa auqu faqaafa mifa amana mi sandausa rakeemasee qairisee asaana ruannoo.
REV 5:6 Miqi qimasoofaqa qinee qafaafananoo sipsipa aanaaqi fooqaafa Yisufa Anutuna qaarisaa kikiqinoo marufaqa qaara faqa qaara faqa aandau faqa moodaa fasiqa taikasee moo fasiqa qaara faqa qaara faqa marasee uriqarara fasiqauqa faqa Anutuna qaari atiara fiqu fiqu iqa marufaqa qafaafananoo. Sipsipa aanaaqi qambaanai marinau. Mi sipsipa anaaqifa kuqufa kuqiranakiqari findifinoo marufaqa qafaqiafana mina aanai dinni qisauku taikasee dinni ani qaara marasee aanai kambiqanoo marufaqa qafaqiafana mina afu qisauku dinni taikasee dinni ani qaara marasee marufaqa mi afunamusa Anutuna maraquna namu aiqama maqa maaqai Anutufa niqiqoofaqa nimarusa nindafaqiafana.
REV 5:7 Mi sipsipa anaaqifa Yisufa qambaana qaarisaa Anutuna asauku uqannai uaqeeu papiqana marasoofaqa aandau namu faqa uriqararausa fiqu fiqumma marusa faqa aiqamausa mina aramandunnai noorindari aqufufaqa idi moo fuka raqau. Idi raidaqa piripuna arimarufa dinni nisaukuki marinau koora auqimaru qafeesa dinni nisaukuki marinau amiqira afundi maru ainainausa mi qafeesaki marinau, maaqanna maaqanna Anutuna ufa irimariasa innaaruqirafa mi qafeesaki mi amiqafundi maru ainainausa kikiqa usinoo marinau.
REV 5:9 Misa fuka idi maaqi qimasee raqau. Oo Yisufa sia moo fannoo amanaikiannoo anee aneenna andeeqaranannai kai aneenna akoona asaukukinaana papiqa marasee idukinnaranoo. Misa ani arusoofana aneenna kuqiranannai faiqí feefaurummeeqeenana Anutuna asaukuki quqanau.
REV 5:10 Aiqama kaqikaa maqannaa faqa firaa maqannaa faqa akaqausa aneenna fidikannai feefaurummeeqee Anutuna asaukuki aanaiqikiranaki quqoonafa kasooqaqee miqooqari misa maa maqanasaa uriqararausai kifaranoo.
REV 5:11 Qinee Yoohaneesa mi idina roofaqa irisee uqeerafi nindafaafanaqa qangiroo moomoo nukudara foora kikiqiqa mariqau. Aandau namufaqa uriqararausa namufaqa Anutuna rakisira qaari fiqu fiqumma kikiqiqa marusa ninaaqiannai nukudara foora qangiroouqa moomoosa fiqu fiqu mambufaqa miqoo marusa aiqamausa idi moo raqau, firaa kari maaqi qimasee raqau.
REV 5:12 Oo sipsipa aanaaqi anee faiqí arunaki reendeenamasee keeqoonafa ani andeeqarafa kai amanaikinoo marinara Anutufa uriqararana faqa ainaina moomoo faqa irirana firaana faqa afeeka faqa auqu uqeerarana faqa areenarana faqa ani amooqirana faqa ani Yisuna amiannoo.
REV 5:13 Misa mi idina ramasoofaqa kafaa iriseeqa aiqama innaarunaindaraa ainaina faqa maqasaa ainaina faqa ooruku nammarikinaa ainaina faqa maqa ameemaanaindaraana faqa aiqamai Anutufa auquqoo ainainausa moodaanakikammambiqa maaqi qimasee idi raqau. Qaarisaa ooqu marinoo marifa sipsipa aanaaqi faqa inniqara nimooqirana faqa nuqu uqeerarana faqa areenarana faqa afeeka faqa naaru naaru innindi marianifee qidaqa idi raidaqa.
REV 5:14 Misa miqi qimasee idi roofanoo qaara faqa qaara faqa aandau namu misa roo idina irisee kuqaa fee qufaqa miqoo uriqararausa marusa noorindari maqasaa rupaitamafufaqa Yisuna amooqimamaqaqau.
REV 6:1 Miqi qimasoofanoo sipsipa aanaaqi fannoo mi papiqana kukuqirana qumareenoo moo sanda rumbaqoona idukinau. Idukusoofanoo Anutuna aaqa qaara faqa qaara faqa aandau mariunakiqari moo mina ufa fannoo innaarunai miqirafa darara qimaseenoo qimaqiminau. Anee aniannee qufaqa qinee Yoohaneesa miqoo oonuraafananoo qoosa moo eekara arirafa marinau. Faiqí minasaa ooqufaaqeeu fasiqafa duru faqaafa marinau. Miqooqaraasa qafee afisuamaqasoofanoo maaqanna maaqanna rakiranannai narí aramandunnai quqararee qimasee finau.
REV 6:3 Mifa fufanoo sipsipa aanaaqi mi papiqana sanda moo rumbarana idukinau. Idukusoofanoo Anutuna aaqaqari aandau moo qiniara aniree qafaannee qinau.
REV 6:4 Qinee oonu qafaafananoo qoosa moo taatuqee arirafa animarinau. Miqooqaraasa qaseema firaana raiqarana mi qoosanasaa maruna amisee qimamiqau. Anee ooqu maqasaaqaraasaki maa qaseemanannai nirana fundakinaqa rakirana uqeera niminaqa narí ari narí ariaqa.
REV 6:5 Mifa fufanoo mi papiqana rumbarana sipsipa aanaaqi fannoo moo sanda idukinau. Idukusoofanoo Anutuna aaqaqari aandau moo findifinoo qiniara aniannee qufaqa oonu qafaafananoo qoosa moo runduqarirafa marinau. Mi qoosanasaa marufa sikeera uqusee marufanoo Anutuna aaqaqari aandau moo ookiqari ufara foora mi fasiqana qimaminau. Aandaroo aukuana maridanoo moodaa faasaana saikiana amana kai raisa nimia. Raisa sia marinaqa kamaa miqi kaimmasee rainasee nimia. Misa fadameena faqa nammari faqa sia anee mina arua saina kaqi nimia, narana ainaina kai aandaroo naruannoo.
REV 6:7 Miqi qimasoofanoo sipsipa aanaaqi mi papiqana rumbarana moo idukusoofanoo Anutuna aaqaqari aandau moo fannoo qiniara aniree qafaannee qinau.
REV 6:8 Qinee Yoohaneesa irisee oonuraafananoo qoosa moo afaaqa eeqaku arirafa marinau. Mina ataufakaaqa maruna auqu Kuqirafa marinau. Faiqí nimana madikakinaasa faiqiara fooqiara mi fasiqana faqa fidanoo narí dadaaqi narí dadaaqi mariqau. Miqoo innaarunai marusa maaqi qimasee qimamiqau. Innee qoosa faqa faiqí faqa faiqí nimana madikakinaasa faqa maqasaa fasiqaki ooquree duru feefannai faqa aandaroonnai faqa auriranannai faqa kaasau aandaunnai faqa moomoo fasiqa anaasee maqusa maqusa mariasa narida mariaqa.
REV 6:9 Misa fufanoo sipsipa aanaaqi mi papiqanasaa rumbarana moo sanda idukinau. Idukusoofaqa qinee miqoo aandau tatufimaru qaindana marufaqa qafaqiafana. Mi qaindana ameemaanai kuqirausa nimana moomoo marufaqa qafaqiafana. Sia fifau kuqirausa mariqau. Maqasaa maridaqa Anutuna ufa andeeqasee faiqí anaasee qimannimunara mina akiaqara narusoosa kuqiqa mariqau. Misa oosana Anutuna ufamau kai fimarunara minara narusoofanoo Anutufa misa nimana mareeqeenoo innaaruna qainda ameemaanai quqanau.
REV 6:10 Qinee Yoohaneesa qafeemariafanaqa firaakari mindari Anutunara nameera qiqau. Oo uriqarara karaambaiqa anee andeeqarafa naaquqarafa anoona ufa kai qimarianafa mariananoo. Yairee fee maqasaaqaraasa ufa iriseenee maasa daruana akiaqara nári narinnaree.
REV 6:11 Miqi qimasoofaqa innaarunai marusa eekara qamunna marasee aiqama nimisee qimannimiqau. Innee maana afisusee kafaa miqoo kaqikaaqoo idooaaqa. Inni nikaqaafasaa maqasaaqaraasa inni naanna reeqa Anutuna ufasaara kuqifanoo Anutufa mikari inni ufa faqa misa ufa faqa iriannoo.
REV 6:12 Miqi qimasoofanoo sipsipa aanaaqi mi papiqana rumbarana moo sanda idukinau. Idukusoofanoo maqa firaaqoo uqanna kasinoo suani afu arusoofanoo runduqarira qamunnaikinoo marinau. Quqoona faqa aiqama taatuqee arinoo fidikandandinau.
REV 6:13 Fasau saqari qaqamma miqirafa ufai uqifanoo adusa aiqama maqasaa kakasidanoo aiqama fasau maqasaa kakasinau.
REV 6:14 Innaaruna kudimanda fannoo papiqa fooqaana atindari raqandaamamaree mafi aiqama raqandaamma taikanau. Aaqana aaqana nári maruqooqari nári maruqooqari moosa minifi mafi quqaidanoo ooruku nammariki afumauqa faqa miqi kaimminau.
REV 6:15 Miqimarufa maqasaaqaraa karaambaiqauqa faqa uriqararausa faqa sundiaki kiateenauqa faqa ainaina faqaasa faqa nimudaanai qimarusa faqa faiqí aiqama karabusara fooqaana ainaini mariasa faqa kaiqeesa faqa aaqanasaa maru ooni aamaranaki keeqafi kukeeqafiqa aaqanara faqa ooniara faqa nameera qimasee qiqau. Innee maasasaa aqufiqa maasa dariqa kukeeqaqimaqaaqa. Qaarisaa ooqumarinoo marina afusaara rufiaidaqa ititaqimaqaa. Sipsipa aanaaqi aanooqiranasaa faqa ititaqimaqaa.
REV 6:17 Miqanda firaa aanooqira faasaana doo animaridanoo, sia moo fannoo amana misa nifusaa kikiqiannoo.
REV 7:1 Qinee Yoohaneesa mi ainainna qafammasaafanausa kafaa maa ainainna qafeeqa. Qangiroo qaara faqa qaara faqa safasa ati atisaa kikiqiqee maridaqa miqiqa maridaqa ufai maqasaa maqee maqee uqimari ufaina maqa maaqa mandaikianifee qimaseeqa ufai rafaaqafiisee maridaqa. Miqiqa mariafanoo sia ufai moo fannoo ooruku nammarisaa fee maqasaa fee saqarisaa fee sia fuaqeenoo.
REV 7:2 Misa miqiqa marufaqa qinee qangiroo moo qafaqiafana. Qangiroo moo fannoo suani oosana qaanaindari kaqi marira Anutuna akarainaina uqirafa anireenoo ufai rafaaqafimaru qangiroosa naaramasee qimanniminoo qinau. Anutufa inniara ufainnai maqa faqa ooruku nammari faqa mandaikamma nimaqaannee qifaqa eekaa kaqikaa qoo kaqi marifaqa qinee Anutuna ainainira faiqiuqa niqinaaqa Anutuna akara rumasaanaqa miqoo maqa faqa ooruku nammari faqa saqariuqa faqa ufai quqasaifanoo firaaqoo uqinoo mandaikamannimaqaani. Mi qangiroofa miqi qimasoofaqa Anutuna faiqi namu maqasaaqaraasa niqinaaqa akara rumasoofanoo moo fannoo asaana rumasee kooroomasee qimaqiminoo qinau.
REV 7:4 Isaraeena aiku asaukukiqari aiqama moodaanaki quqaseenoo wan handareeta faqa footi maqi tauseenna faqa (144,000) fifau nukudara foorammiqa mariqau. Miqimasee marunaki mi namusa kai niqinaaqa akara rumannimaqaseenoo Anutunaindi marifanoo ufai fannoo sia naruanifeera rumannimaqanau.
REV 7:5 Isaraee maqaanna faiqi namu niqinaaqa akara rumannimaqaqoosa misa naadu naadu oosaa oosaa kai mariqau. Yudana aiku asaukukiqari (12,000) tueerufa tauseenna moomoo Anutuna akara niqinaaqa rumannimaqanau. Reeubeenana aiku asaukukiqari (12,000) tueerufa tauseenna moomoo Anutuna akara niqinaaqa rumannimaqanau. Kadana aiku asaukikiqari miqi kai maseenoo 12,000 rumannimaqanau.
REV 7:6 Aseerana aiku asaukukiqari miqi kai masee 12,000 akara rumannimaqanau. Napatarina atiuqa marusa miqi kai masee 12,000 akara rumannimaqanau. Mannaseena aiku asauku marusa miqi kai masee 12,000 akara rumannimaqanau.
REV 7:7 Simeeoona atiuqa marusa miqi kai masee 12,000 akara rumannimaqanau. Reefina aiku asauku marusa miqi kai masee 12,000 akara rumannimaqanau. Isakeena atiuqa marusa miqi kai masee 12,000 akara rumannimaqanau.
REV 7:8 Seeburuna atiuqa marusa miqi kai masee 12,000 akara rumannimaqanau. Yooseefaana aiku asauku marusa miqi kai masee 12,000 akara rumannimaqanau. Beensaminna aiku asauku marusa miqi kai masee 12,000 akara rumannimaqanau. Miqimasee mi qangiroofa Isaraeena aiku asaukukiqari moodaanaki mara ruqaumaseenoo 144,000 fifau nukudara foora Anutuna akara niqinaaqa akara rumannimaqanau.
REV 7:9 Qinee Yoohaneesa mina qafamaseeqa quandaki qafaafana moo suqirafa marinau faiqí anaasee firaaqoo qusimariqau. Sia faiqí moo fannoo nisaanarirana amana moomoo uqanna mariqau. Misa aiqama firaa maqannaasakiqari faqa kaqikaa maqannaasakiqari faqa aiqama fasiqa anaaseekiqari faqa aiqama ufakiqari faqa Anutuna qaari oorinni sipsipa aanaaqi oorisaa aiqama ufa qimarusa kikiqammafiqau. Misa qamunna eekara afisirausa aufaqaa saqari asaana uqirausa Anutuna oorisaa kikiqiqau.
REV 7:10 Miqoo kikiqiqa maridaqa maaqi qimasee Anutunara firaa kari qimamiqa qiqau. Maasa Anutufa rakisira qaarisaa ooqumarifuananoo sipsipa aanaaqi faqa anisaaqaraana kai maasa naaru marirana maraidaqee qiqau.
REV 7:11 Miqi qimasoofaqa uriqararausa Anutuna rakisira qaari atimau fiqu fiqu iqa marusa faqa qaara faqa qaara faqa aandau marusa faqa marufaqa misa fiqu fiqu iqa maru qangiroosa misa kai maqasaa noorindari aqufufaqa Anutuna amooqiqa qiqau.
REV 7:12 Kuqaa amooqirana faqa areenarana faqa irirana faqa dufi dufi qirana faqa auqu uqeerarana faqa uriqararana faqa afeeka faqa naaru naaru maasa Anutunaindi kai maridaqa. Kuqaa fee qiqau.
REV 7:13 Qaari fiqu fiquqiranakiqari uriqarausakiqari moo fannoo quandaki qini Yoohaneesa irammirinoo qinau. Maa fasiqa anaaseesa yaindaraasee eekara qamunna afisirausa aiqama ufa qimarusakiqari ani maridee qufaqa qinee qiqiafana.
REV 7:14 Sia qinee iridaqa anee qimaqimia qiafananoo mifa kooroo qimasee qimaqiminau. Maa fasiqa anaaseesa Anutuna ufamau fimarusa minasaara narirana maree marusa minakiqari amiqimasee ani marusa maridaqa. Misa nári ikairi aanaaqi qamunna sipsipa aanaaqi Yisuna fidikaki nári qamunna nammaruqusee eekara arufifaqa afisusee maridaqa.
REV 7:15 Minara misa faasaana faqa eendaki faqa Anutuna naaquqara maqaki narí rakisinnimaqee maru qaarina oorisaa kikiqammambi eendaki faqa faasaana faqa amooqidaqa. Qaarisaa marifa Anutufa narí kai misa ititannimaqaannoo.
REV 7:16 Ititannimaqaidanoo sia kafaa misa naara raannoo, sia nammariara nidiannoo, sia suani ididirafa nifaaqai naruannoo.
REV 7:17 Sipsipa aanaaqi rakisira qaari qambaanai marifa mifa misa rakisirafa marinoo misa nifiqee munusainaqa kaqi marira nammari maqakiqari radiqisee ururee mariqoo neefaranoo. Anutufa misa naukunu rukasaina misa ikiraqarafa taikaannoo.
REV 8:1 Sipsipa aanaaqi fannoo mi papiqanasaa rumbara sanda inaaqianaana idukusoofanoo innaarunai qiqi ufa daiqimafinoo kaqikaaqoo kasoomafinau.
REV 8:2 Ufa sia qirafa taikasoofaqa kafaa qinee Yoohaneesa qafaafananoo qangiroo Anutuna afusaa kikiqammambi marusa dinni qisauku taikasee dinni ani qaara marasee miqimandee qangiroo ukeena moodaa kai moodaa kai amana kai misa niminau.
REV 8:3 Nimisoofanoo qangiroo moo fannoo koora auqimaru qafeena uqirafa anireenoo Anutuna aandau tatufimaru qaindana oorisaa kikiqammambinau. Faiqí anaasee innaaru qirafa mi qafeenaki maruna maree aniroofaqa misa amiqira afundimaru ainainna moomoo mi qafeenaki innaaru qirana namufaqa quqasoofanoo Anutuna oorinni maru qaindanasaa koora auqimarunasaa idara qoonaki teeqimasoofanoo idaqeenoo amiqira afundimaru ainainna faqa faiqí anaasee Anutuna ufamau fimariasa innaaruqirana faqa idaqoofanoo amiqira afunda fannoo Anutuna aikiambuinau.
REV 8:5 Qangiroo mi qafeena qumareenoo mi qaindanasaaqaraa ida auri maru qafeenaki afeeriqi quqaseenoo innaarunaindari maqasaa teeqimmaqinau. Teeqimmaqusoofanoo innaarunai qirana namufaqa aakuasaa uqirana namufaqa maqa kasirana namufaqa kambiqanau.
REV 8:6 Miqooqari qangiroo qisauku dinni taikasee dinni ani qaara marasee ufireena faqaasa fuaqarara deedaqiqau.
REV 8:7 Fuaqasoofanoo pupusamu faqa ida namufaqa fidika namufaqa moodaanakikirafa innaarunaindari maqasaa teeqinau. Teeqimasoofanoo maa maqa maaqanaki qaaramooki oosuseenoo moodaaki idaqama taikanau, saqari faqa miqoo marinauqa moomoo qamataikanau. Aiqama andanda faqa miqoo marinauqa qamataikaseenoo qaaraqandaki kaqi marinau.
REV 8:8 Qamataikasoofanoo doo mina inaaqianna qangiroo narí ufireena fuaqasoofanoo firaa aaqanara foora ida auri maruna rafaurinoo innaarunaindari ooruku nammariki aqufinau.
REV 8:9 Aqufufanoo ooruku nammari qaaramooki oosuseenoo qaaraqandaki kaqi marinoo moodaaki fidikaikamafinoo minakinaa noodaannaina kuqu taikafinoo sipauqa faqa qaara oosiranaki kaqi marinau, moodaa oosiranaki kuridifinau.
REV 8:10 Kuridifufanoo misa ninaaqiana qangiroo moo fannoo narí ufireena fuaqanau. Fuaqasoofanoo fasau firaafa mina auqu sukaqara fasau fee qiqau, mifa qoomara foora aurimaruna fuka nammariki maqasaa aqufufanoo qaaraqandaki quqaseenoo nammari amiqirafa, moodaaki faiqí anaasee mina namasoofanoo suka narufaqa moomoo kuqimariqau.
REV 8:12 Qinee Yoohaneesa mina qafamasaafananoo inaaqianna qangiroo moo fannoo narí ukeena fuaqanau. Fuaqasoofanoo suani afu qaaramooki oosuseenoo moodaaki amannauna arinoo qaaraqandaki kaqi mariqau. Quqoona faqa fasau faqa moodaanaki amannauna arinoo qaaraqandaki kaqi qee marinau. Suani faasaanasaaqari dinni ati qeemarinau, dinni ati sia qeemarinau eendaki quqoona faqa miqi kai inau.
REV 8:13 Qinee mina qafamasaafananoo quqaumu sandaaqai qaqamaree fidanoo firaa kari faiqiara maqi ufa qufaqa iriqiafana. Mifa qinau mandoosana naaquqarafa kambiqaannoo qangiroo qaaramoo namu ufireena fuaqeefandinausa misa fuaqaifandinna kamuqoo maqasaaqaraasa firaa mandainaina naaquqaranaki marifaranoo fee qinau.
REV 9:1 Quqaumu miqi qimasoofanoo qangiroo moo fannoo narí ufireena fuaqanau. Fuaqasoofaqa qinee Yoohaneesa qafaafananoo fasau moo innaarunaindari maqasaa aqufufa findifufanoo moo fannoo maqa ameemaanai madika mina kooqi kiqa amufanoo mi fasaufa faiqiara foora findifinoo madika kooqi atuasoofanoo idamuna moomoo firaa idamunara foora minakiqari ururanau. Urureenoo innaaruna faqa suani afu faqa aiqama ititafinau.
REV 9:3 Mi idamunnanakiqari pandaaqa moomoo qumureenoo maqasaa aqufiqau. Misa farukara foora naruaqeera Anutufa quqanau.
REV 9:4 Pandaaqa kaaqa andanda saqari amanee neemarusa marufanoo Anutufa minara qaoo qimaseenoo faiqí kai naruaqee qufaqa miqimiqau. Sia aiqama fasiqa anaasee naruaqee qinau. Anutuna akara niqinaaqa marinausa sia naruaqee qinau.
REV 9:5 Mi pandaaqausara faiqí kuqa nariranara qaoo qinau, kaqi aupurarana kai moodaannai qisauku quqoonasaa aupurarana firaana nimiaqee qinau. Mi pandaaqausa narirafa faruka naruqoofanoora foora nidafi marinau.
REV 9:6 Moodaannai qisauku quqoonasaa pandaaqa marinnakamuqoo faiqí anaasee kuqiranara randaida sia kuqifara aupuree marifanoo kuqirafa adeediramafinanoo doo miqoo taikasee fuannoo.
REV 9:7 Mi pandaaqausa rakiranaki nimaru qoosausara foora mariqau. Misa nikiaqa koora auqira qafeera foora marinau, misa noori faiqí noori fooqaasa mariqau.
REV 9:8 Misa nikiaqa asausi misisausa nikiaqara foora kisaaqandauqa marinau, misa nifai raioonara foora firaa nifai kisaaqa marinau. Misa nimuqusa rafaaqafirafa qainnara foora marinau, misa niqoosa ufa fannoo faiqí moomoosa sandaafanoo maqa ririqindee qimarinau.
REV 9:10 Misa nimeesa ati fannoo farukara foora faiqí raquru nimimarinau. Doo minannai faiqí anaasee moodaannai qisauku quqoonasaa aupurarana nimifaranoo.
REV 9:11 Misa saideenna uriqararafa maqa ameemaanai madika rakisirafa uriqararafa maridanoo. Yuda maqannaasa ufakiqari moo nuqu Heeburu ufakiqari mina auqu Abadoonnee qimariqau. Kirisa ufakiqari Apoorioonee qimariqau. Mi auquna oosana aiqama ainaina kuridi marinee qimariqau.
REV 9:12 Doo miqinoo indaaruqaa mandainaina taikanau. Qaaraqanda kaqi maridanoo.
REV 9:13 Pandaaqa taikafufanoo qangiroo moo fannoo narí ufireena fuaqanau. Fuaqasoofaqa qinee Yoohaneesa iriafananoo koora auqira qainda Anutuna afusaa marunakiqari ufa moo qufaqa iriqiafana. Mi ufafa koora auqira qainda aannai qaara faqa qaara faqa marunakiqari kambiqafinoo ufireena fuaqoo qangiroona qimaminoo qinau. Eeufarateesa nammariki qangiroo qaara faqa qaara faqa faiqí kuridi maria qangiroo namusa rumbaqa mariasa idukunnisaa.
REV 9:15 Idukunnisoofaqa maqasaaqaraa fasiqa anaasee qaaramoosaa oosuseenoo qaaraqandaki kaqi quqasee moodaaki aiqama naru taikaqau dinni ati firaaqoo kaqi quqanau. Anutufa ooqaindari misa deedaqamma nimufaqa mi aukuanna mi quqoona suaninasaa deedaqamma nimiqoosa nári rakira faiqiuqa faqa mi qangiroo namusa faiqí anaasee moomoo uqanna naru taikaqau.
REV 9:16 Mi qangiroo namu marusa rakira faiqiuqa tu handareta mirioona marufaqa nindafaqiafana (200,000,000). Fifau saqari amaneera foora moomoo uqanna qafaqiafana.
REV 9:17 Qinee Yoohaneesa qifu pisipasinoo marufaqa misa qoosauqa faqa misasaa mariasa faqa nindafaqiafana. Qoosasaa mariasa nimuqusa ititarafa akaqafa taatuqee idauruara foora mariqau akaqafa dirindaasi arirafa mariqau akaqafa tumana arirausa mariqau. Misa qoosauqa nikiqa raioona akiaqa miqirausa mariqau, misa nookiqari idauru namufaqa muna namufaqa nookiqari urimarinau.
REV 9:18 Misa qoosauqa nooki faqa nimeesaki faqa faiqí narira afeeka maridanoo. Misa nookiqari idauru namufaqa idamuna namufaqa maa maqana afaaqasasa mariasakiqari faiqí anaasee moomoo uqanna narutaikanau. Mi qoosausa nimeesa sakaniara foora faiqí ukaqannimidanoo faiqí aupurarana firaana maraidaqa.
REV 9:20 Mi narimaru ainainausa maqasaaqaraa fasiqa anaasee moomoo naru taikasoofaqa kaqi mariasa mina qafamasee sia rufieeqa sia nári mandainaina minniseeqa Anutu finnai ubeekeeqa. Kaqi maqeeidaqa. Misa kaqi kai afaannauqara innaaru qimariqau. Misa koorannai siruaannai booroosannai ooninnai saqarinnai Anutunara foora sia faiqí qafeemaria ainainna sia ufa irimaria ainainna sia nimaria ainaina, nisaukukoo auqusaidaqa minara innaaru qimariqau.
REV 9:21 Mi kaqimaria fasiqa anaaseesa sia narí ari narí arirana minniseeqa, sia aukainaina minniseeqa, sia faiqí anaasee qummuarirana minniseeqa, sia ainaina qumuarirana minniseeqa kaqi kai maridanoo.
REV 10:1 Miqimarufaqa qinee nindafaafananoo qangiroo moo amudaanai qimarufa innaarunaindari quminau. Mina qamunna sia qafaqiafana qoonnamu qamunnara foora kai afisirafa marinau, mina akiqa oondanda fiqu inoo marinau, mina oori afiri suani afu miqirafa daroo daraa imarinau, mina aikuqara saqari aadana kikiqinoo marifaqa idaree mariandee imariqau.
REV 10:2 Mina asaukuki papiqa kaqikaana asaana ruanifeera airiqoofanoo marinau. Mi qangiroofa qumureenoo asauku uqannai aiku ooruku nammarisaa ramaseenoo asaaqai aiku maqasaa ramaseenoo raioonara foora firaaqoo faaqarufanoo innaarunai qirafa dinni qisauku taikasee dinni ani qaara marasoofanoo innaarunai firaaqoo darara qimasee faiqiara maqi ufa moo qimaminau.
REV 10:4 Qinee Yoohaneesa innaarunai qira ufa irisee akara ruaneeriafananoo innaarunaindari qaoo qinoo qisauku dinni taikasee dinni ani qaaraqanda marasee innaarunai qira ufa sia akara rua, amiqimasee kukeeqaa qufaqa kukeeqaqiafana.
REV 10:5 Mi qangiroofa aiku ooruku nammariki faqa maqasaa faqa roofa asauku innaarunai uqeeraseenoo narí amana aqiqamaseenoo qinau. Anutufa naaru naaru marianafa innaaruna faqa maqa faqa ooruku nammari faqa quqoonafa minaki maru ainainausa auqunafa marianafa ani auqu ramasee maa ufana qidaqa. Sia moo kari faqa Anutufa nifeesida mariannoo.
REV 10:7 Inaaqianna qangiroo narí ufireena fuaqasainanoo Anutufa narí ooqai kukeeqaqai doo quqaannoo, ooqai narí tamummaqara fasiqauqa amiqira ufa qimannimuna doo miqoo taikeenoo miqiannoo.
REV 10:8 Miqi qimasoofanoo innaarunaindaraa ufa faasai qimaqimufa kafaa qimaqiminau. Anee qangiroo innai aiku ooruku nammariki faqa maqasaa faqa ramaqai finnai papiqa airirana maqeeina maraa qufaqa qinee Yoohaneesa mifunnai oonuree mi papiqana qimiannee qiafananoo qimaqiminoo qinau. Doo maraseenana namasainanoo aranandaki ooquree aseeundammiannoo, ookinaa ookasaasa anoonara foora adiafaammiannoo.
REV 10:10 Miqi qimasoofaqa qinee mina asaukukinaa papiqa marasee namasaafananoo dooki ookasaasara foora adiafaainau, qiranandaki ooqureenoo aseeundinau. (Ookasaasa anoona naaru kambiqaaninna ainainara irirana adiafaa irafa maridanoo. Oosana oosana mandainaina aupurarana narirana kambiqaaninafa aseeundirafa maridanoo.)
REV 10:11 Miqi masaafananoo qimaqiminoo qinau, anee Yoohaneefa anee kaifaa Anutuna ufa moomoosasaa quqaa moomoo faiqí anaasee faqa moomoo maqusanaasa faqa moomoo ufa qimariasa faqa karaambaiqauqa faqa amiqimasee Anutuna amiqira nifaaqooqa faqa manda nifaaqooqa faqa misa naaku nimaqainanoo misasaa kambiqaani.
REV 11:1 Miqi qimasoofanoo moo fannoo anireenoo nimanimaru kannapuna qiminoo qinau. Anee maana maree ooruree Yeerusareenni mari maqana Anutuna naaquqara amaana maqa faqa tatufira qainda faqa amanamasee qafamasee akara rua. Mi amaana maqanaki innaaru qimariasa Yisuna ufamau fimariasa minaindi marianara misa faqa nisaana rumasee akara rua.
REV 11:2 Amaana maqa naambeeqai sia amanamandee akara rua mina aamina maqannaasaindi aanaamurundi maridanoo. Misa qaara fasiqa niku nisauku taikasee quqoona faqa qaara quqoona faqa naaquqara maqusa Yeerusaree maqusa aniree nikunnai rafaaqafuseefaranoo.
REV 11:3 Mi kamuqoo mi aukuanna qinee Anutusa qini ufa kooroo qimaria fasiqaqanda soofaara qamunna afisiraqanda niqiqaanaqa qini ufa maqasaa mariasaki kooroo ifaranoo. Miqanda nuqu kooroo imariaqandee qinoo maridanoo.
REV 11:4 Miqanda aiqama maqa maaqasaa karaambaiqa Yisuna oorisaaqaara qooma miqiraqanda maridaqa.
REV 11:5 Faiqí akaqausa miqanda naruannee qimasaafanoo miqanda nookinaa ida fannoo naru taikaidanoo doo miqimasaifanoo miqanda naruanee qinausa kuqu taikeefaranoo.
REV 11:6 Anutufa mi kooroo ira fasiqaqanda afeeka niminaqa Anutuna ufa maqasaaqaraasa qimannimi marinna kamuqoo innaaruna ititasaifanoo aaku sia ruannoo. Mi kamuqoo Anutufa afeeka niminaqa aiqama nammari maa maqa maaqana afaaqasasa mari nammarisa nári nidiranannai nári iriseeqa arusaifanoo fidikaika kaimmiannoo. Mi afeekanannai nári kai irisee maqa aukarasaifanoo mandainaina oosana oosana kambiqeenoo faiqí anaasee nipatasaa narinoo aupurarana nimiannoo.
REV 11:7 Mi koorooira fasiqaqanda Anutuna ufa maqasaa fasiqa aiqama qimannimi taikasaifanoo maqa ameemaanai madikasaa rakisirafa kaasau aandau fannoo madikakiqari ururee doo miqanda faqa rakuannoo. Rakidanoo miqanda kuqa narusainaqa miqanda iri Yeerusaree maqusa qambaana akooqoo marifaranoo. Ooqai miqoo kai mi maqusanaki karaambaiqa aunirira saqarisaa pirimmannai ariqau. Mi maqusana auqu Yeerusaree marinau. Mandoosana maree maru maqusana kikiqammusidaqa Soodooma faqa Isipa faqee qidaqa. Mi kooroo ira fasiqaqanda iri Yeerusaree maqusa qambaana marifaqa aiqama firaa maqannaasa faqa kaqikaa maqannaasa faqa aiqama aanaamuru mariasa faqa aiqama ufa qimariasa faqa miqanda iri qaaramoo faasaana faqa moo faasaana atisaa faqa miqanda iri qafaifanoo nikundarara qaoo qimasaifanoo kaqi mariannoo.
REV 11:10 Aiqama maqasaaqaraasa miqanda kuqiranara irisee asasammasee qoomaqa suqasee namasee susu imarifanoo ainaina narí ami narí amidaqa miqandara maaqi qifaranoo miqandara maasa maqasaaqaraasa aupurarana qimimariaqanda doo kuqiqee qimasee asasifaranoo.
REV 11:11 Qaaramoo faasaana aiqaramafinanoo Anutufinnaindari kasimari aidoofa qumureenoo miqanda iriki keeqafinaqa kasiqa findififaqa aiqamausa miqanda niqafeeinausa nindafeeqa kaaqa rufieefaranoo.
REV 11:12 Mi tamummaqara fasiqaqanda findi fifaqa innaarunaindaraa ufa moo fannoo maaqi qimasee miqanda qimannimiannoo inneeqara doo mai innaarunai uruaqa qifanoo asuru fannoo miqanda namuqaa aiqamausa nifusaa mara uqeereeqeenoo innaarunai quqaannoo.
REV 11:13 Miqanda muru quqasainanoo miqoo kai maqa firaaqoo uqanna kasinoo Yeerusaree maqusaki mari maqausa moomoo rambairinoo aqufuannoo. Faiqí seefeena tauseenna (7,000) moomoo uqanna minaki kuqifaranoo. Moomoo uqanna nukudara foora faiqí anaasee kuqifaranoo, moomoo kaqi marifaranoo. Kaqi marinausa mina qafamaseeqa quandakiqa innaarunai mari Anutuna afeeka amooqifaranoo. (Qinee Yoohaneesa mi aiqama ainainna innaarunai maridaqa qafaafannana.)
REV 11:14 Doo indaaruqaaqanda mandainaina doo aru taikeenoo, moodaa kai dauni aniraannoo.
REV 11:15 Qinee Yoohaneesa qifu pisipasamandoofaqa innaarunai maridaqa qafaafananoo qangiroo moo fannoo inaaqianaafa narí ukeena fuaqanau. Fuaqasoofanoo innaarunai mari ufafa maaqi qimasee firaa kari kooroo inau. Doo maqee maaqooqari maqasaa rakisira afeeka maasa karaambaiqa faqa narí asauku mundiranaindi faqa maridanoo mifa naaru naaru mina rakisida mariannoo.
REV 11:16 Mi ufana qima taikasoofanoo faiqí uriqararausa Anutuna ufa irira qaari fiqu fiqu iqa marusa noorindari maqasaa aqufufaqa Anutuna amooqiqa qiqau.
REV 11:17 Oo Karaambaiqa Anutu aiqamausa uriqararafa firaafa anee maridana ooqai marunafa maqee marianafa. Doo anee aneenna firaa afeeka kooroomasee maqasaaqaraasa rakisi nimaqee mariannanara maasa minara ani dufi dufi qimamaqaidaqa.
REV 11:18 Aniara nikooqee mari maqannaasa aniara aanooqirafa qumbiqarausa mariafana ani Anutuna aanooqira aukuana nimirafa doo ani maridanoo. Kuqirausa findifu masee mandufa nimira aukuana doo ani maridanoo. Ani ainainira fasiqa tamummaqarausa misa kadaapirirana akiaqara nimira aukuana doo animaridanoo. Aiqama fasiqa anaasee uriqararausa faqa kaiqeesa faqa ani ufara rufiaida naaquqaida mi mau fimarisa faqa misa kadaapirirana amiqira akiaqara nimira aukuana doo animaridanoo. Maa maqa maaqana mariasa kuridi mariasa misa kuridira aukuana doo animaridanoo.
REV 11:19 Miqi qimasee uriqararausa Anutuna amooqimasoofaqa qinee quandaki qafaafananoo Anutuna amaana maqa innaarunai marufa kooqi atuafufaqa qafaqiafana. Mi amaana maqanaki Anutuna faqa faiqí faqa moodaanakikira ufa bookisara foora auquqoofaqa marufaqa qafaqiafana. Mi bookisanaki Anutuna ufa oonisaa akararirafa Mooseena ooqai amufa maru bookisana qafaqiafana. Qinee qafaafananoo aakuasaa uqinoo innaarunai qinoo maqa kasinoo firaa pupusamu aqufinau.
REV 12:1 Qinee Yoohaneesa miquna qafamaseeqa quandaki moo ainaina qafaqiafana. Innaarunai firaaqoo kooroo ira ainaina kikiqusirafa kambiqoofaqa qafaqiafana, anaasee moo fannoo suani afu miqira kurusa afisusee maru qafaqiafana aikuqara quqoonasaa ranoo marufaqa qafaqiafana mina akiaqaki afisira qafeesaa qisaukuqara taikasee qiku ooqu qaaraqanda marasee fasaunamu mina qafeesaa qeemaru qafaqiafana.
REV 12:2 Mi anaaseefa amuaqu uqaikinoo marufa innaamunara aurinoo aupureenoo faaqa rinau.
REV 12:3 Faaqa rimarufaqa qinee quandafi moo ainaina innaarunai mari ainainna kooroo ianinnana qafaqiafana. Qaareena qinaakuna qafaqiafana mina afaaqa aiqama taatuqee arinoo marinau mina akiaqa aambumanamu qisauku dinni taikasee dinni ani qaara marasee akiaqafaqaafa marinau. Aiqama akiaqasaa qafee afisinoo marinau, mina akiaqaaqa aanai qisaukuqara taikasee marinau.
REV 12:4 Mina ameesa fannoo innaarunaidaraa fasau moomoo nukudara foora rarisameeqeenoo maqai aqimarinau. Mi qaareenafa amuaqu uqaikira anaasee oorisaa kikinoo maridanoo faiqi maqasainanoo nambiqarara rakisidanoo.
REV 12:5 Mi anaaseefa akoonaiqi maqasoofanoo findifinoo qainna auqira samu qumareenoo aiqama aanaamurusaa rakisi nimaqaaninnana maqanau. Mi anaaseefa akoonaiqi maqasoofanoo Anutufa qaareena naandoo qimasee aranaiqi rafusueeqeenoo innaarunai narí ufa irira qaarisaa quqasoofanoo marinau.
REV 12:6 Miqiufanoo mi anaaseefa quqasee qaareenara rufiasee sandee aadana maqa maaqaki Anutufa deedaqammaqoonaki oonu marinau. Qaaramoo aukuana faqa moo aukuana atisaa faqa Anutufa miqoo rakisinau.
REV 12:7 Qinee Yoohaneesa qafeemariafananoo rakirafa innaarunai kambiqanau. Dinni qangiroo karaambaiqa mina auqu Mikaraafa Anutuna qangiroo namufaqa dinni qaareena narí manda qangiroo namufaqa maridaqa innaarunai rakimariqau.
REV 12:8 Mikaraafa Anutuna qangiroo namufaqa afeekaikamasee qaareena rafaaqafuseenoo narí faqa narí qangiroo namufaqa rafuseeqeenoo innaarunaindari maqasaa aqusanau. Anutufa aniara sia maaqooqari maaqoo mariannee qifaqa ani maqasaa rafusueeqee aqida fee qimasee aqusanau. Mi qinaakuna qaareenafa ooqai sakani marufa aiqama maa maqanasaaqaraasa ueeqee marufa marinau. Mina auquara Afaanna firaafa Sadannee qinau.
REV 12:10 Mikaraafa Sadanna maqasaa aqusoofaqa qinee Yoohaneesa qifu pisipasamasoofaqa innaarunai maridara fooqaana qafaafananoo ufa moo firaa kari nameera qinau, Anutuna asumu maree mariafa doo animaridanoo. Doo maqee Anutufa narí Karaambaiqa afeeka kooroomaseenoo. Doo maqee mina asauku mundirafa narí aanoo doo uqannifiqeenoo. Doo maqee maasa qikaqaafasaauqa maqasaaqaraasa nikaruqirafa eendaki faqa faasaana faqa Anutuna afusaa munuqi miniqi marifa Sadannafa innaarunakiqari aranaiqi futeeqa rafusueeqeenoo maqasaa doo aquseenoo.
REV 12:11 Maasa qikaqaafasaauqa maqasaa fasiqauqa Anutuna sipsipa aanaaqi kuqu fidikanannai doo Sadannana uraaqareenoo nári Anutuna anoona ufara kuqunannai faqa mina uraaqareenoo misa mi ufanara narí mariranara sia anoonee qimasee kaqi kuqiraree qimariasa maridaqa.
REV 12:12 Ufa firaaqoo kai qidanoo qinau. Innaarunaki mari ainainausa innee aiqama asasiaqa Sadannafa inniki marifa doo maqai aqufinoo. Innee maqasaa mariasa faqa ooruku nammariki mari ainainna faqa innee rufiaida mariaqa. Afaanna firaafa inniki ooqu finoo mina aanoo firaafa mariannoo narí qusasaa marianinnanara iriseenoo mina aanoo firaafa mariannoo fee qinoo.
REV 12:13 Qinee Yoohaneesa mi ufana iriseeqa quandaki qaareena maqasaa qafeeqa. Qaareena qinaakufa doo maqasaa aqufinoo maridano qafeenoo aanoomaseenoo quandaki faiqi maqoo aanaaseena arunaaneera afaqanoo fufanoo Anutufa firaa quqaumu aqoosa qaaraaqanda amufanoo qaqamareenoo aadana maqasaa Anutufa deedaqammaqoo maqanasaa aqufinoo asumu marinau. Qaaramoo aukuana faqa moo atikai marasoofanoo Anutufa rakisimarufanoo qaareena fannoo mi anaaseena ariranasaa Anutufa ititeemarinau.
REV 12:15 Qaareena fannoo mi anaaseena qafamasee aanoo qufanoo mina ookiqari nammari moomoo aufinau. Nammari aufinoo mi anaaseena mi samuna aruanifeera fufanoo maqa fannoo mi anaaseena soodaaqinoo maqa oo raqafufanoo nammari minaki kai keeqanau.
REV 12:17 Qaareena fannoo mina qafoofanoo firaaqoo uqanna aranaqoofanoo quandakinoo mi anaaseena ati aiku asauku marusa aiqama Anutuna aauqira sandufamau fimariasa Yisuna kooroo ira anoona ufamau fimariasa faqa naruanee qimasee fufa ooruku nammari afainni kikiqinoo marinau.
REV 13:1 Qinee Yoohaneesa qifu pisipasamandoo innaarunai maridaqara foora qaareena ooruku nammari afainni kikiqinoo marufaqa qafamasee akara rumaqaafananoo. Mifa miqoo kikiqinoo marufanoo ooruku nammarikiqari kaasau aandau moo fannoo ururoofaqa qafaqiafana. Mi kaasau aandauna aanai qisaukuqara taikasee marinau mina akiaqa dinni qisauku taikasee dinni ani qaara marasee akiaqafaqaafa marinau. Aiqama aanaisaa karaambaiqa qafee afisinoo marinoo aiqama akiaqamau narí Anutunara fidiqaaira manda nuquqa akararinoo marinau.
REV 13:2 Mi kaasau aandaufa firaa kusina fooqaatia faiqí narimarifa marinau. Mina aiku firaa samaada aikuara foora marinau. Mina oo aamara raioona oo aamara fooqaafa marinau. Mifa ooruku nammarikiqari ururoofanoo qafamaseenoo qaareena fannoo narí afaaqai maru ainainna mi kaasau aandauna ooruku nammarikinaana aminau. Narí rakisira qaari faqa aiqama maqannaasa rakisirana faqa mi kaasau aandauna amisoofanoo rakisinnimaqanau.
REV 13:3 Mi kaasau aandaufa marufanoo moo fannoo mina akiaqaki moo arufanoo kuqinoora fooqaana maseenoo aru afaaqana ateekaqoofa unufufanoo kaifaa findifinoo nammarikiqari ururoofaqa qafaqiafana. Aiqama maa maqana afaaqasasa mariasa mifa findifuna qafamasoofanoo naaquqoofaqa aiqama mina ufamau kaimbiqau.
REV 13:4 Qaareena fannoo firaa uriqarara afeekana kaasau aandau amunara minara aaqee maria fasiqa anaaseesa qaareenara innaaru qidaqa amooqi mariqau. Misa kaasau aandau oorinni faqa innaaru qimasee amooqiqa qiqau. Yafee maa kaasau aandauna amana maridanee. Sia uqanna. Yafee mina ariraramasee aruannoo fee, sia moo fannoo amana arifara.
REV 13:5 Mi manda kaasau aandaufa aiqamai rakisidanoo mandufa uqanna oosana oosana ufa qimarufanoo Anutufa sia qaoo qinau, qaara fasiqa niku nisauku taikasee moo fasiqa oonu qaara marasee quqoonasaa kaqi maridanoo mina kai qafee marinau.
REV 13:6 Mi kaasau aandaufa Anutuna faqa mina auqu faqa manda niqurarara niquraree marinau.
REV 13:7 Mifa Anutuna aiku asauku faqa rakinoo rafaaqafinau. Mifa kaqikaa maqannaa faqa firaa maqannaa faqa aiqama ufa qimariasa faqa aiqama maqusanaasa faqa rakisimarufanoo Anutufa sia qaoo qinau kaqi kai qafanau.
REV 13:8 Aiqama maa maqa maaqana afaaqasasa mariasa mi kaasau aandaunara Anutufara foora innaaru qimasee amooqifaranoo. Misa nári nuqu kaqi marifandinausa Yisuna bukaki akara rimariasa misa kai sia amooqifaranoo. Ooqai maa maqa maaqana sia maruqoo Anutuna sipsipa aanaaqi kuquna bukaki nuqu marisa kai sia kaasau aandau amooqifaranoo.
REV 13:9 Aiqama naaqoo faqaasa ufa iriaqa.
REV 13:10 Kasooqaqee kaasau aandau Yisuna ufasaara naruaninausara Anutufa ooqai irinau. Kaasau aandau fannoo rumbaaninausara faqa ooqai irinau. Mi narira aukuannai Anutuna ufa iri mariasa sia rufiasee minnisaaqa afeekaikamasee uaqee iaqa minasaa mundufi firana faqa kaqi kai fuaqa.
REV 13:11 Qinee Yoohaneesa mi kaasau aandauna qafamaseeqa quandakufaqa moo kaasau aandau maqakiqari ururoona qafaqiafana. Mina aanai qaaraqanda sipsipa aanaira foora ururanoo marinau. Mina ufa fannoo qaareena ufa qimarinau.
REV 13:12 Sipsipa aanaikirafa indaaruqaa kaasau aandau oorisaa kikiqammambi mina afeeka firaatia maranau. Mifa aiqama maqa afaaqasasa mariasara indaaruqaa kaasau aandaura amooqiaqee sia amooqifaqa naruanauree qinau. Mi indaaruqaafa kuqiraramasee afaaqa ateekarafa qunufunara innaaru qida amooqiaqee qinau.
REV 13:13 Sipsipa aanaikirafa inaaqianna aandau fannoo aiqamausa nifusaa faiqí sia auqaaqaa ira ainaina auqinau, aiqamausa nifusaa innaarunaindari ida fannoo maqasaa aqu fuannee qufanoo aqufinau.
REV 13:14 Mifa indaaruqaa kaasau aandau oorisaa faiqí sia auqaaqaa ira ainaina auqusoofanoo minannai maqasaaqaraasa aiqama nikaruqinau. Miqidanoo mifa aiqama maqasaaqaraasa qimanniminoo qinau, Innee afaaqa ateekasoofanoo kuqiraramandee findifuna amana auquaqa.
REV 13:15 Misa auqusoofanoo sipsipa Anutufa uqeeqararee qimasee narí namuqaa qumee afeeka amufanoo aanaikira aandau fannoo unnaqimasee narí afeeka fee qimasee aidoo indaaruqaa kaasau aandau amana auquqoonaki aidoo fuaqasoofanoo mina amana fannoo faiqiara foora ufa qinoo nariara sia innaaru qimasee amooqusa kuqa narinau.
REV 13:16 Sipsipa aanaikira aandau fannoo narirarufaqa aiqama maqannaasa kaiqeesa faqa uriqararausa faqa ainaina faqaasa faqa kudifasiqa faqa rumbee mariasa faqa idukimariasa faqa aiqama narí akara nári nisauku uqannai fee niqinaaqafee akara rumannisanau.
REV 13:17 Mi akarana sia marinausa sia ainaina nimisee mina akiaqara feefauru mareefaranoo, ainaina faqa sia amana munnimma aqusee mareefara. Mi akarana oosana kaasau aandau mina auqu nambaqa mariannoo.
REV 13:18 Irirana faqaasa maa ufana iriaqa. Irirana faqaasa mi nambaqana kaasau aandau nambaqa oosana irifaranoo. Mi nambaqafa faiqí auqu kikiqammusidanoo. Mi nambaqafa maaqimminoo maridanoo. Sikisa handareeta faqa sikisti sikisa faqa maridanoo, (666).
REV 14:1 Qinee mi ainainausa qafamaseeqa quandakufaqa qafaafananoo sipsipa aanaaqi kuqufa Yisufa Oorifa aaqanasaa moo auqu Sioona aaqana minasaa kikiqinoo marinau. Oorifa aaqana Yeerusaree maqusa aaqa maridanoo. Mina saimbaqa faiqí moomoo mariqau. Yisuna auqu faqa mina akoona auqu faqa niqinaaqa akara rirausa kai mariqau. Mi fasiqausa nisaanaruafanaqa wan handareeta faqa footi maqi tauseenna faqa Yisuna faqa mariqau, (144,000). Faiqí ooni saqari uqanna auqufiqau.
REV 14:2 Qinee mina qafaidaqa innaarunaindaraa ufa moo iriqiafana. Firaa kari innaarunai qiara foora qinoo firaa oondaindari nammariara foora aqufidanoora foora qufaqa iriqiafana. Miqimarunakina innaarunaindari piripunna ariufaqa iriqiafana.
REV 14:3 Yisuna saimbaqa Oorifa aaqanasaa mariusa wan handareeta faqa footi maqi tauseenna faqa misa aiqama Anutuna qaari oorisaa faqa qaara faqa qaara faqa aandau faqa uriqararausa faqa misauqa noorinni ubeekaqau. Noori ubeekaidaqa fuka idi moo raqau sia moo fannoo mi idina irifaranoo Yisuna faqa maru fasiqausa wan handareeta faqa footi maqi tauseenna faqa misa kai mi idina amana reefaranoo Yisuna fidikannoo feefaurirausa kai mi fasiqausa marufaqa qafaqiafana.
REV 14:4 Mi fasiqausa sia anaasee qummuari marusa amiqira maanaaqara foora andeeqarausa kai maridaqa. Misa sipsipa aanaaqi kuquna Yisuna faqa aiqamai fimarusa misa maqasaa fasiqa nandafiana neera fooridaqa misa Anutunaindi faqa Yisunaindi faqa maridaqa miqidaqa.
REV 14:5 Sia unna ufa misaki marusa sia aaqarafa misaki marusa.
REV 14:6 Qinee Yoohaneesa miqimaruna qafamasee quandafi qafaafananoo qangiroo moo fannoo innaarunai sandaaqai qaqamaree fufaqa qafaqiafana. Mifa amiqira fasaasa ufa naaru naaru marira ufa aiqama maa maqanasaaqaraasa firaa maqanaasa faqa kaqikaa maqannaasa faqa aiqama ufa qimariasa faqa aiqama maqannaasa faqa qimannimirara qaqamaree finoo firaa kari qinau.
REV 14:7 Innee Anutunara rufiasee mina afeeka uriqararanara amooqiaqa, doo mifa maqasaa mariasa ufa irirafa doo ani maridanoo. Mifa innaaruna faqa maqa faqa ooruku nammari faqa kaqi nammariuqa faqa minauqa auqufa maridanoo, mina oorisaa kumaramafi amooqiaqa.
REV 14:8 Mi qangiroofa miqi qimasoofanoo qangiroo moo fannoo mina aanaaqianna qaqamaree fidanoo Babiroonia maqusara anaasee kikiqa ususee qinau. Manda anaasee Babiroonia maqusa doo maqasaa aqufinoo maqusa naakundu kai saaeemaseenoo. Mi maqannaasa nári deedeepirana faiqí anaasee qummuarirana moomoo uainna nammariara foora aiqama maqannaasa nimufaqa namaseera foora aiqama maqannaasa nimufaqa namaseeqa furufarammidammia.
REV 14:9 Doo mi qangiroofa miqi qimasoofanoo mina aanaaqianna moo qangiroo fannoo qaqamaree finoo firaa kari nameera qimasee aiqamausa qimanniminoo qinau. Kaasau aandau fee narí amana auqiranaree amooqidaqa innaaru qimariasa mina akara niqinaaqa faqa nisaukusaa faqa akara rirausa misa Anutuna aanooqirana uainna nammariara foora nambiqeefaranoo. Anutuna aanooqiranara qidanoo ididimari uainnana kikiqa usidanoo. Sia nammari namufaqa uainna namufaqa asooarana nimifaranoo kaqi uainna kai ididi marina kai nári manda oosana akiaqara aanooqirana idara foora qeemarina nimiannoo. Aiqama kaasau aandau amooqimariasa faqa mina akara maree mariasa faqa misa aiqama Anutuna naaquqara andeeqara qangiroouqa noorisaa faqa sipsipa aanaaqi oorisaa faqa firaa idaqee marinaki aupuraranaki fifaranoo.
REV 14:11 Misa aupurararana nimimari mi idauru munafa naaru naaru ururaidanoo mariannoo. Faasaana faqa eendaki faqa sia asooarana mareefaranoo kaqi miqi kai minoo mariannoo. Kaasau aandau fee mina amana auqiranara innaaruqimariasee mina akara maree mariasee misa aiqama miqi kai mifarannoo.
REV 14:12 Mi aukuannai maqasaa Anutuna aiku asauku marianausa mi aupuraranaki reendeenamafi fifimafi marirana faqa Yisunasaa kaqi kai mundufi marirana faqa miqimandee mi aukuanna Yisuna ufamau fimariasa miqiaqa.
REV 14:13 Mi qangiroofa miqi qimasoofaqa qini qifu pisipasamasoofaqa qinee innaarunaira foora mariafananoo ufa moo qimaqiminau, Yoohanee anee maa ufana akara rua. Maa aukuannasaaqari karaambaiqaki keeqafiqa kuqifandinausa misa asasifaranoo. Anutuna maraquna fannoo mi ufana irisee dadaaqinoo qinau. Eeoo kuqaa nariqa kadaapi firaana ririseeqa kuqiqa adooaidaqa asasifaranoo. Nári kadaapirirana anoona kuqiranaki fiqa doo maree fidaqa asasifaranoo.
REV 14:14 Qinee Yoohaneesa mi ufana iriseeqa quandafi qafaafananoo eekara asurusaa faiqí moo fannoo faiqí nimaakuara fooqaana ooqufaaqee idanoo koora auqira qafee afisirafa asaukuki paipana afai raiqarana asaukuki uaqeeufaqa qafaqiafana.
REV 14:15 Mi fasiqafa asurusaa ooqumarifi marufanoo Anutuna innaarunai naaquqara amaana maqakiqari qangiroo moo fannoo raudee qumuree mi fasiqana firaa kari aaramaseenoo qinau. Doo narana qanaa marida aneenna paipanannai ateekasee maree ania. Doo maqasaa naranara foora akuqanoo maridanoo.
REV 14:16 Asurusaa marufa mina iriseenoo eedoo qimaseenoo doo narí paipana rauqimareenoo maqasaa aquseenoo narana ateekasee maree urinau.
REV 14:17 Maroofanoo qangiroo moo fannoo Anutuna naaquqara amaana maqaki innaarunai marunakiqari raudamaki anireenoo narí asaukuki paipana afai raiqarana uqirafa raudoofaqa qafaqiafana.
REV 14:18 Anutuna tatufira qaindasaa rakisimarufa qumureenoo paipana uqirafa qumuna aaramasee qimaminau. Anee doo uainna tatimaria sandafa maqasaaqaraasa mandoosana doo akuqanoo maridanoo, ateekamaree murusee misa fidika saunara foora tatia.
REV 14:19 Mina iriseenoo paipanafaqaafa narí paipana maqasaa uainna sanda ateeka mareenoo Anutuna aanooqirana tatimarunaki maqusai murusee naambeeqai aqinau.
REV 14:20 Aqusoofaqa misa tatisoofanoo fidika kai nammariara foora aufinoo faiqí ninuka kai urururufanoo nianai uqanna maree finau.
REV 15:1 Qinee innaarunai mariafana moo innaarunai koorooira ainaina naaquqara ainaina kambiqoo qafaqiafana maaqimasee kambiqanau. Qisauku dinni taikasee dinni ani qaara marasee qangiroo namu nári nisaukuki Anutuna taikaranaki aupurarana uqirausa aniqau. Mi aupurarana maqasaaqaraasa Anutuna ufa sia irimariasa nimisaifanoo Anutuna aranaqarafa taikaannoo.
REV 15:2 Qinee mina qafamasee quandaki ooruku nammariara foora tanuka minasaa maridanoora foora idauru namufaqa marufaqa qafaqiafana. Miqoo ooruku nammari afaisaa faiqí anaasee moomoo Anutuna ufa irimarusa usimariqau. Misa kaasau aandau akarara qaoo qimarusa misa kaasau aandau faqa mina amana auqirana faqa rakiara foora mina uriqararausa mariqau. Anutufa misa piripunna nimufaqa misa
REV 15:3 Anutuna ainainira faiqi Mooseena faqa sipsipa aanaaqi kuqufa faqa miqanda idi ree mariqau. Maaqi qimasee idi raqau. Oo Karaambaiqa aiqama afeekafaqaa Anutufa, Anee aiqamausa rakisi marianna oosanafa faqa anee imarianna oosana faqa idaaqirafa firaafa maridanoo. Anee aiqama maqusanaasa Karaambaiqa marianafa, Anee niniunafa andeeqarafa kuqaa marunafa marianafa.
REV 15:4 Oo Karaambaiqa yafasiqa fee sia aniara rufiaidanoo. Yafasiqa fee ani uriqararana sia koorooiannoo, Aneennaraa kai naaquqarafa mariananoo. Ani andeeqara ainainirafa aiqamausa qafamasee minara aiqama maqannaa aniree ani oorisaa aniree ani amooqifaranoo.
REV 15:5 Misa mi idina ramasoofaqa qinee Yoohaneesa qafaafananoo Anutuna amaana maqa innaarunai atuasoofaqa qafaafananoo minaki ooqai Mooseefa Anutuna uiqaana maqa usakaqoofa mina aundurai marufaqa qinee qafaqiafana.
REV 15:6 Dinni taikasee dinni ani qaara marasee qangiroouqa Anutufa faiqí anaasee nimianinna aupurarana uqirausa faasai nindafaafanausa misa Anutuna naaquqara amaana maqakiqari raudaqau. Misa qamunna anukarafa eekara arirafa marinau. Misa koora auqira raitanda naamma ameemaanai rumbarausa animariqau.
REV 15:7 Ani marufanoo Anutuna aaqa aandau qaara faqa qaara faqa marunakiqari moo fannoo koora auqimaru qafeesa dinni taikasee dinni ani qaaraqanda marasee qafeesa naaru naaru marira Anutuna aanooqirafa qumbiqara qafeeuqa aiqama qangiroouqa nisaukuki moodaa moodaa quqasanau.
REV 15:8 Quqasoofanoo innaarunai amaana maqa idamuna qumbiqanau. Anutuna afeeka faqa Anutuna areenarana faqa minasaaqari idamuna fannoo mi amaana maqanaki qumbiqanau, sia keeqarana amana marinau. Nisauku dinni taikasee dinni ani qaara marasee qangiroo misa aupurarana taikasoofanoo miqoo kai amana keeqaaqaainau.
REV 16:1 Amaana maqakinaa idamuna qafamaseeqa iriqiafana ufa moo innaarunai maru amaana maqakiqari ufa moo firaa qoo nameera qimaseenoo aupurarana maroo qangiroosa qimanniminau. Doo innee qisauku dinni taikasee dinni ani qaara marasee qafee Anutuna aanooqira qafee maraasa doo innaarunaindari maqasaa muqu teeqiaqa.
REV 16:2 Miqi qufanoo indaaruqaa qangiroo narí qafee mara maree innaarunaindari maqasaa muqu teeqinau. Teeqimasoofaqa maqasaa fasiqí anaasee kaasau aandaura innaaru qimarusa mina akara maree marusa misa nifaaqasasa kaaqa nidafidanoo afundidanoo eefeeda namuana fooqaafa moomoo narinau.
REV 16:3 Narusoofanoo kafaa mina aanaaqianna qangiroo moo fannoo narí qafee mareenoo muqu ooruku nammariki teeqimaqusoofanoo kuqira fasiqa fidikara foora kai mandifufanoo kuqira fasiqa fidikara foora maqufufanoo ooruku nammariki marida kasi maria ainainafa aiqama kuqu taikafinau.
REV 16:4 Kuqutaikafufanoo miqanda ninaaqiana moo qangiroo fannoo narí qafee mareenoo innaarunaindari nammari uqannaki muqu teeqimasoofanoo fidika kai qumbiqafinau.
REV 16:5 Qumbiqafufanoo nammarisaa rakisimaru qangiroo fannoo nameera qinau. Oo Anutufa naaquqarafa anukarafa ooqai marunafa maqee marianafa anee fidika naaqee qimasee nimiannanara andeeqarafa mariananoo.
REV 16:6 Misa maqasaa fasiqa Anutuna ufa irimaria fasiqanaaseesa faqa tamummaqara fasiqauqa faqa fidika ruqiee marianara anee fidika nimianaqa naidaqa. Nári oosanara saanara mina akiaqara fidika naidaqamiafoo qinau.
REV 16:7 Miqimandoofanoo Anutuna tatufira qaindasaaqari ufa moo qinau. Oo Karaambaiqa Anutufa uriqararafa aninna narirafa kuqaa andeeqarafa kai marifa mariananoo.
REV 16:8 Mi namusa miqimasoofanoo inaaqianna moo qangiroo fannoo suanisaa narí qafeekinaana muqu teeqimasoofanoo suani fannoo firaaqoo ididinoo faiqí anaasee firaaqoo idara foora nitakuqinau.
REV 16:9 Nitakuqufaqa aanoomasee quandaki Anutuna auqu ramasee aquraraqau. Mi oosana oosana aupuraranna marasee mi oosannana akoona aqurarasee sia nári mandainaina minnisee Anutuna amooqiqau. Kaqi maraqa fimariqau.
REV 16:10 Mi namusa miqi masoofanoo qangiroo moo fannoo narí qafeekinaana kaasau aandau qaarisaa teeqimasanau. Teeqimandoofanoo asukuna fannoo kaasau aandau ququsakinaasa ititannimaqasoofaqa nipatara aupuraidaqa naridaqa nidafirana faqa namuanara faqa aupuraidaqa nifai riqidaqa innaarunai Anutuna aqurara ufa kai qidaqa kaqi furufarammasee nári mandainaina kaqi mara maree fimariqau.
REV 16:12 Mi namusa miqimasoofanoo qangiroo moo fannoo narí qafeekinaana Eeufarateesa nammariki teeqimaqusoofanoo mi nammarifa aiqama aadanusinau. Suani oosanaindaraa karaambaiqauqa nári rakira fasiqauqa faqa rakiraramasee aniaqeera aadanusinau.
REV 16:13 Qinee Yoohaneesa mina qafaafananoo afaanna qaaramoo taka fooqaana mandaikirana qafaqiafana. Moo fannoo ooqai maru qaareena ookiqari ururanau moo fannoo indaaruqaa kaasau aandauna ookiqari ururanau, moo fannoo unna qira tamummaqara fasiqa ookiqari ururanau.
REV 16:14 Mi qaaramoo takausa oosana oosana ainaina sia faiqí auqaaqaa ira ainaina auqeemaru afaannausa faiqí rakisirausaikiqa mariqau. Mi qaaramoo afaanna namusa aiqama maqa maaqakina karaambaiqauqa nári sundia namufaqa nifieeqee rakiranaki quqee mariasa mariqau. Misa Anutuna faqa rakirara masaifanoo Anutufa uriqararafa misa aiqama naru taikaannoo.
REV 16:15 Miqimarufanoo Yisufa miqoo qini qimaqiminoo qinau. Qini ufa iria, qinee ummuarira fasiqara foora ireeda kai innaarunaindari qumuanaura. Nifu maqee marusa faqa qamunna deedaqirausa faqa asasifaranoo, sia kaqisamu fiqa faiqí nifusaa faqa Anutuna afusaa faqa sia nisaurifaranoo.
REV 16:16 Yisufa miqi qimaqimisoofanoo mi taka namusa aiqama karaambaiqa faqa nári sundia namufaqa nifieeqeenoo Isaraee maqasaa quqasanau. Mi maqa maaqana auqu Heeburu ufakiqari moo auqu Isaraee maqannaasa ufakiqari Aramakeedoona maqa maaqee qimariqau.
REV 16:17 Miqoo suqu quqasoofanoo inaaqianna qangiroo fannoo narí qafeekinaana ufaisaa muqu teeqinau. Teeqimasoofanoo Anutuna qaarisaaqari amaana maqaki marufa ufa moo firaa kari qinau. Doo taikeefoo qimasoofanoo aakuasaa uqinoo innaarunai qinoo oosana oosana ufa qinoo maqa naaquqarafa firaafa uqanna kasinau. Ooqai oosana arooqooqari sia maqa maaqimasee kasidanoo maana firaafa uqanna uriqararafa kasiannoo.
REV 16:19 Yeerusaree maqusa qaaramoo kamu afoomakinoo aiqama maqusanaasa taunna faqa kuridiannoo. Mikari Anutufa Babiroonia maqusara sia auninau. Narí kaafakinaa aanoo qirana idaqee mari nammariara foora adiasee Babiroonia maqannaasa nimisoofaqa namasee kuqiqau.
REV 16:20 Aiqama ooruku nammariki mari afumausa aiqama nammariki ukuqnama taikanau, aiqama aaqana faqa taikanau.
REV 16:21 Pupusamu innaarunaindari faiqisaa aqufinau firaa pupusamu moodaa moodaa fifiti kiroogaram qaara fasiqa niku nisauku taikasee moo fasiqa asaukuqara taikasee sikeera akara kamu aqufufaqa faiqí anaasee mi firaa pupusamuna qafamasee quandaki Anutuna aqurara ufa kai amiqau.
REV 17:1 Pupusamu taikafufanoo qafee teeqiusakiqari moo qangiroo fannoo qini daareenoo qinau, Yoohanee anee mai anirainaqa firaaqoo ummuari mari anaaseena kuridirana oosana uqafiqaa. Mi anaaseefa firaa taunna kikiqa usidanoo, moomoo nammari mina aaqa maridanoo. Mi moomoo nammarina kikiqa usirafa maridanoo faiqí anaasee moomoo maqusanaasara qidanoo.
REV 17:2 Maa maqanasaaqaraa karaambaiqauqa mi manda anaaseena aafeeqee mariafa maridanoo aiqama maqannaa fasiqa anaasee faqa maa anaaseena ummuarirana uainna nammariara foora neeneesaidaqa furufaridaqa.
REV 17:3 Miqi qimasee qimaqimisoofanoo Anutuna maraquna fannoo daakufufanoo mi qangiroofa qini mareeqeenoo innaarunaindari maqasaa muqu aadana maqasaa quqaseenoo mi anaaseena uqaqifiqanau. Mi anaaseefa taatuqee aandau kaasau aandau ataufakaaqa ooqu faaqee marinau. Mi kaasau aandauna afaaqasasa Anutunara fidiaqaa ira auqu moomoo mina afaaqasasa akararinoo marinau. Mi aandaufa dinni qisauku taikasee dinni ani qaara marasee akiqa faqaafa marinau, mina aanai qisaukuqara taikasee marinau.
REV 17:4 Mi anaaseena qamunna sia kaiqeesa afisimariana uriqararausa afisimaru qamunnanda saasaakoona arirana faqa taatuqee arirana faqa afisimarufa aiqama ainaina koorannai auqirana kai afaaqa auqirafa marinau. Firaa feefauru aqimari ooninna pupu ooni fooqaana faqa maranoo ninau. Mi anaaseena asaukuki koora auqira kaafa uqusee marinau. Mi kaafanaki ikairifaqaa ainaina faqa faiqí anaasee narí ummuari narí ummuarirana aiqama mi ainainafa mi anaaseenasaa aniqusirafa mi kaafanaki qumbiqanoo maridanoo. (Faiqí anaasee kikiqa usidanoo kuqaa qira Anutuna minniseeqa unna qira Anutuna amooqimarianara qidanoo.)
REV 17:5 Mi anaaseena aqinisaa mina auqu akara rinoo maridanoo auqu akooqoo maridanoo oosana kukeeqanoo maridanoo. Mina auqu maaqi qinoo maridanoo Firaa Babiroonia aiqamausa nári naumoosaa feefauru maree mariasa ninoofa faqa kaaqa aanaaseera rimariasa ninoofa faqa maridanoo.
REV 17:6 Qinee Yoohaneesa mina akara qafeeqa mi anaaseena oosana qafaunanoo furufaramminoo marifaqa qafeeqa. Mifa Anutuna maqasaaqaraa faiqí anaasee fidika faqa Yisuna ufara afeekaiki mariasa fidika faqa uainna nammariara foora misa narusee misa fidika neeneeseenoora foora furufarinoo nimari anaaseefa. Qinee mina qafamasaunanoo firaaqoo daaquqeenoo. Qangiroo fannoo miqiafananoo qiqafeenoo qinau.
REV 17:7 Anee nanaree aaquqaidanoo fee qinee mi anaaseena faqa mi aandauna faqa oosana kooroo qianamma iria.
REV 17:8 Anee kaasau aandau qafaanafa ooqai marufa maqee sia maridanoo, mifa qusasaa maqa ameemaanai madikakiqari urureenoo taikaranaki fuannoo. Naaru naaru mariranaki fimariasa Anutuna bukaki nuqu akara rinoo maridanoo, ooqai maa maqafa sia maru kamuqoo mi bukanaki misa nuqu akara rumaqoofa maridanoo. Maa maqanasaa mariasa sia mi bukanaki nuqu akara rumaqoosa misa mi manda kaasau aandauna qafeeqa kaaqa naaquqainaqa mina ufamau fifaranoo. Ooqai marinoo maqee sia maridanoo kafaa kasooqaqee kooroo ianinnanara tautumasee mina ufamau fifaranoo.
REV 17:9 Maa ufana irirana faqaasa kai irifaranoo. Mi kaasau taatuqee aandauna akiaqa dinni qisauku taikasee dinni ani qaara marasee akiaqafaqaafa maridanoo. Mi akiaqa namuna faqa dinni qisauku taikasee dinni ani qaara marasee aaqana namu kikiqa usinoo maridanoo mi anaaseefa minauqasaa ooqufaaqee maridanoo, karaambaiqauqaindi faqa miqimasee namu maridaqa.
REV 17:10 Moodaannai qisauku karaambaiqa doo taikafiqau, moodaa kaqi rakisidanoo maridanoo moo fannoo aniraannoo anirainanoo qusasaa taikaannoo.
REV 17:11 Mi kaasau aandaufa anaasee minasaa ooqumariufa ooqai marufa maqee sia maridanoo kasooqaqee kafaa kambiqaannoo. Ooqai indaaru mifa dinni taikasee dinni ani qaaramarasee karaambaiqa marunaki mariufa taikafufanoo kaifaa kambiqafinoo dinni ani qaaramoo kinanoo mifa qusasaa kuridiranaki fuannoo.
REV 17:12 Manda kaasau aandau aanai qisaukuqara taikarafa miqimandee kai kasooqaqee karaambaiqauqa maqasaa moodaa kari kambiqafi maridaqa faiqí anaasee rakisi nimaqeefaranoo. Mi namusa nári afeeka manda kaasau aandau naida amisaifanoo mifa misa faqa qusasaa faiqí anaasee rakisi nimaqaannoo.
REV 17:13 Mi karaambaiqausa qisaukuqara taikarausa moodaa irirana mariranasaa maridaqa nári afeeka faqa nári uriqararana faqa mi manda kaasau aandauna pooduaqida amimarifaranoo.
REV 17:14 Mi karaambaiqausa sipsipa aanaaqi Yisuna aruannee qimasee mina faqa rakifara. Yisufa narí rusandeesamumasee naaramaqaisa afeekaikamandee Yisuna faqa fimariasa misa saimbaqa mi karaambaiqausa naru taikeefaranoo. Mifa Yisufa aiqama karaambaiqa maridanoo aiqama uriqararausa urinaaqararafa maridanoo minara Yisufa quandaki misa faqa naru taikaannoo.
REV 17:15 Mi qangiroofa kafaa mi anaaseenara qimaqiminoo qinau. Mi anaaseefa nammari amuaqusaa ooqumaruna anee qafaananoo. Mi nammarifa moomoosa maqusa mariasa moomoo fasiqa anaasee ufa oosana oosana qimariasa kikiqamusinoo mi nammarinasaa maridanoo.
REV 17:16 Mi qisaukuqarana taikasee aanai nimanasaa karaambaiqauqa mariasa faqa manda kaasau aandau faqa mi umuari mari anaaseenara fidiaqaammidaqa mina aiqama ainaina marasaifanoo mifa kaqi samu mariannoo. Misa miqoo mina amaqi namasaifanoo doo idaqama taikafuannoo.
REV 17:17 Mi karaambaiqausa sia nariqa kai miqifaranoo. Anutufa qumee fuki faaki qinaqa misa sia irirainni misa nári iriranammifoo qimasee nári afeeka manda kaasau aandau amifaranoo. Anutufa narí ufa anoonaikianinna aukuanara afeesidanoo miqiannoo.
REV 17:18 Mi anaaseena anee qafaanafa mifa aiqama maaqa maaqa karaambaiqausa rakisi nimaqeemari maqusafa maridanoo.
REV 18:1 Qinee Yoohaneesa mi ainainausa qafamasee moo qangiroo qafaqiafana. Anutufa narí afeeka firaana amufanoo innaarunaindari maqasaa qumuroofanoo mina areenarafa firaaqoo aiqama maqa maaqasaa areeneenoo kaaqa qamaqinau.
REV 18:2 Mifa firaa kari maaqi qimasee nameera qinau. Mifa doo kuridinoo firaa Babiroonia maqusa doo aqufinoo kuridinoo. Mi nakundunaki afaannauqa faqa nimanauqaindi qikairi faqaasauqa faqa ufiniuqa afaanna ufini kai fidiaqaa irafauqa kai maridanoo.
REV 18:3 Mi maqusaanaasa nári ummuarirana faiqí anaasee narí deedeepa narí deedeepirana uainna nammariara foora aanaamuru mariasa niminoo innee naaqee qimasoofaqa neeneeusa maridaqa. Maqasaaqaraasa aanaamuru karaambaiqauqa Babiroonia faqa ummuaridaqa naafeeqeeusa maridaqa. Aiqama maaqa maaqa pisinisa uqeeree mariasa Babiroonia maqannaasa kaaqa ainaina moomoo irairaaimarinanoo minannai munnimma moomoo maree mariasa maridaqa.
REV 18:4 Mi qanqiroofa miqi qimasoofanoo innaarunaindaraa ufa qinee Yoohaneesa moo iriqiafana. Mifa maaqi qimasee Anutuna ufa irimariasa qimanniminoo qinau. Oo qini qiku qisauku innee mi maqusanakiqari doo aniaqa. Innee sia misa mandoosanaki keeqaaqa miqiqa sia misa nariranaki faqa keeqaaqa.
REV 18:5 Mi maqusaanaasa mandainaina fannoo naramuaaqa naramuaaqa inoo oorufiifanoo meerai innaarunai ooru maridanoo. Anutufa misa mandoosana qafaidanoo iridanoo.
REV 18:6 Misa inni mandaikamma nimaqoondee kai innee quandaki nári nimiaqa. Misa inni mandaikamannimaqoona akiaqara innee quandaki qaaraikamandee nimiaqa. Misa manda nammari inni nimunara innee quandaki mi kaafanaki kai idaqainna nammarina firaaqoo nimifaqa naaqa.
REV 18:7 Babiroonia maqannaasa nári nifaaqa areenarana faqa nári moomoo amiqira ainaina faqa nariqa maraqau. Mi ainainna amana kai innee aupurarana faqa ikifaafau qirana faqa misa nimiaqa. Misa náriara uriqararausee qimariana sia maasa keekoopau maridau. Maasa sia ikifaafau qianauree qimariana akiaqara aupurarana faqa ikifaafau qirana faqa nimiaqa.
REV 18:8 Misa miqi qimaria mandainaina akiaqara misa firaaqoo nidafirana faqa namuana faqa aurirana faqa ikifaafau qirana faqa aandaroo narirana faqa aiqama ainaina moodaa kari misa nifaaqa quqasaaqa. Misa mi maqusafa ida qama taikaannoo. Karaambaiqa Anutufa misa ufa irimarifa afeeka uriqararafa marifa maridanoo.
REV 18:9 Mi qangiroofa Babiroonia maqusara kaqi qinoo qinau. Maa maqa maaqanasaaqaraa karaambaiqauqa Babiroonia maqusaindaraa mandainaina maree mariasa mi maqusana idaqainna idamuna qafamasee firaaqoo ikiraqeefaranoo.
REV 18:10 Misa mi maqusana aupurarana qafamasee rufiasee nianai tatiaqa maridaqa maaqi qimasee faiqiara foora mi maqa maaqana qimamifaranoo. Oo mandainaina, Oo naaquqara ainaina maa firaa afeeka maqusa Babiroonia moodaa faasaana kai ani mandoosana akiaqara kuridi taikaananoo.
REV 18:11 Maqasaa pisinisa fasiqauqa faqa mi maqusanara ikiraqaida maaqi qifaranoo, sia mi maqannaasa kafaa maasa amiqira ainaina marasee feefauru qimifaranoo.
REV 18:12 Sia kafaa moo fannoo maasa koora faqa siruaa faqa firaa feefauru aqimaria oosana oosana ooniuqa faqa marasee feefauru qimifaranoo. Sia kafaa moo fannoo maasa amiqira qamunna oosana oosana saasaakoona arirana faqa fidika arirana faqa marasee feefauru qimifaranoo. Sia moo fannoo maasa amiqira saqari faqa eereefanta aanainnai auqimaria ainainna faqa firaa feefauru aqimaria saqarinannai auqimaria ainainna faqa booroosannai faqa qainnannai faqa amiqira ooninnai faqa auqimaria ainainna sia kafaa marasee feefauru qimifaranoo.
REV 18:13 Sia moo fannoo ooruku oosana oosana faqa amiqimasee afundimaru ainainna faqa makaqa nammari faqa fadameena faqa parauaqa faqa raisa faqa burimakau faqa sipsipa faqa qoosa faqa qoosa rarisee mari karana faqa karabusa ainainira faiqi faqa faiqí nimana faqa sia moo fannoo kaifaa mi ainainausa marasee munnimma qimifaranoo.
REV 18:14 Pisinisa imaria fasiqausa Babiroonia maqusara maaqi qimasee qifaranoo. Babiroonia maqannaasa innee niqaararee marifaqa adiafaa imarifaqa maree maria ainainausa doo kukeeqafinoo, ani munnimma moomoo faqa ani adiafaairafa kaaqa qaranasaa marina doo taikeenoo sia kafaa paqurinnaranoo.
REV 18:15 Pisinisaiki maria fasiqausa Babiroona maqannaasa amiqira ainaina feefaurumasee minannai firaa munnimma maree marusa mi maqusana aupurarana qafamasee rufiasee nianai tatiaqa marida ikiraqeesee soofaaramaseeqa maaqi qifaranoo.
REV 18:16 Oo maa firaa maqusa mandainaina naaquqarafa kambiqanoo maridanoo. Mi maqusafa aanaaseera foora saasaakoona arirana faqa fidika arirana faqa afisirafa koora auqimaria oondana faqa firaa feefauru aqimaria ooniuqa faqa afaaqa auqirafa doo maqee dadi taikafinoo.
REV 18:17 Miqi qimaseenoo mi qangiroofa sipa kiateenara maaqi qinau. Aiqama sipa kiateenauqa faqa nári pooskurauqa faqa nári pasindiauqa faqa aiqama ooruku nammari amuaqumau nidaqa ainaini marusa Babiroonia idamuna qafeeqa nianai tatieeqa ikiraqeeqa maaqi qifaranoo. Sia moo maqusa maa firaa maqusa auqu faqaafa miqirafa maridanoo.
REV 18:19 Miqi qimaseeqa kookooma afaqa qumaree nikiaqa amoondunna kukupamaseeqa maaqi qifaranoo. Oo mandainaina naaquqarafa firaa maqusa auqu faqaafa kukeeqeenoo. Aiqama sipaki nusa ooruku nammari amuaqumau nusa maa maqusanakinaasa ainaina moomoo nimisaida firaa munnimma maree marunausa doo dauni mi aiqama ainainafa qama taikeenoo.
REV 18:20 Mi qangiroofa miqi qimaseenoo quandakufanoo Anutuna aiku asauku Babiroonia maqusara qimanniminau. Innee innaarunai mariasa faqa Anutuna aiku asauku faqa Yisufa niqiqoo fasiqausa faqa Anutuna tamummaqara fasiqauqa faqa innee aiqama asasiaqa. Mi maqusafa inni nári ifa mina akiaqara Anutufa maqee mi maqusana arifanoo kuridinoo asasiaqa.
REV 18:21 Miqi qimasoofanoo qangiroo moo amudaanai qimarufa ooni firaatia minannai mi aukuanna maru fasiqanaaseesa sakuma andaana andaana rimariqau. Mi ooninna fooqaa tia rafusu qumareenoo ooruku namariki aranaiqi aqinoo qinau. Mi firaa maqusana auqu faqaana Babiroonia maqusa ooni aqunnana amana kai aqusainanoo kukeeqafinaqa sia kaifaa qafeefaranoo.
REV 18:22 Minaki piripunna arimariasa faqa kaqikaa ufireena fuaqee mariasa faqa firaa ufireena kookaanauru fuaqee mariasa faqa aiqama musika fuaqee mariasa faqa sia kaifaa mi maqusanaki qafeefaranoo. Oosana oosana ainaini mariasa misa kukusi mariafa sia kafaa irifaranoo, qaindi afai faqa siammirifaranoo.
REV 18:23 Sia minaki qooma qaannoo sia kafaa nimundarana tutuqirafa mariannoo. Babiroonia maqusai pisinisa imarusa faqa aiqama maqannaa pisinisa imarusa faqa urinaaqararausa mariqau. Inni aukainaina maraqa nuasa nariqa unnaqira aukainainannai aiqama maqannaasa nikaruqidaqa.
REV 18:24 Anutufa narí aiku asauku fidika faqa narí tamummaqara fasiqauqa fidika faqa aiqama maqasaa kuqimarusa faqa Babiroonia maqusaki paqurunara narirana nimiannoo.
REV 19:1 Mi qangiroofa Babiroonia maqusara ufa qimasoofaqa quandafi ufa firaana innaarunai qifu pisipasamasoonaki maridaqa iriqiafana. Mi ufafa faiqí moomoo suqiqa maridara foora qinoo maaqi qiqau. Anutuna amooqiaqa. Faiqí asumu maree mariana faqa kaaqa qarana faqa firaa afeeka faqa maasa Anutunaindi maridanoo.
REV 19:2 Mifa mi umuari mari anaaseefa maqasaaqaraasa putaamannimaqee marunna akiaqara Anutufa mina arinau. Miqunara mina ufa nimirafa kuqaa andeeqarafa maridanoo. Mi anaaseefa Anutuna ainainira fasiqauqa kuqa narunara Anutufa arinau.
REV 19:3 Misa kafaa faaqariqa qiqau. Anutuna amooqiaqa. Mi maqusana, Babiroonia maqusa idamuna fannoo naaru naaru ooru fimariannoo.
REV 19:4 Miqi qimasoofaqa faiqí firaasa moodaa fasiqa faqa qaara faqa qaara faqa Anutuna qaari fiqu fiqu iqa marusa faqa aandau qaara faqa qaara faqa marusa faqa Anutuna oorisaa noorindari maqasaa aqufidaqa Anutuna amooqidaqa qiqau, misa kuqaa qidaqia, Anutuna amooqiaqa.
REV 19:5 Miqi qimasoofanoo ufa moo Anutuna qaarisaaqari qufaqa iriqiafana. Aiqama Anutuna ainainimarusa minara rufieemarusa, kaqiqeesa faqa uriqararausa faqa aiqama maasa Anutunara amooqiaqa.
REV 19:6 Miqi qimasoofanoo ufa moo faiqí moomoosa suqidara foora firaa oondainni nammari aqufidanoora foora innaarunai qinoora foora miqira ufa fannoo maaqi qinau. Innee aiqamausa Anutuna amooqiaqa. Karaambaiqa maasa uriqarara Anutufa afeeka uqanna mifa narí aiqamai rakisinnimaqarana doo oosana araseenoo uriqaranoo maridanoo.
REV 19:7 Tatufirana aruaninna sipsipa anaaqifa Yisuna amundarafara foora doo animaridanoo, minara maasa susuiqa asasiaqa mina uriqararana amooqiaqa. Mina aanaaqara foora Anutufa fuka siara eekara arimaruna aminoo maa siarana iraannee qufanoo irasee deedaqinoo maridanoo. Mi eekara siarafa Anutuna maqasaa fasiqa anaasee andeeqara oosana kikiqamusinoo maridanoo.
REV 19:9 Mi ufana qimasoofanoo mi qangiroofa qini Yoohaneesa qimaqiminoo qinau. Yoohanee maa ufana akara rua. Maa ufausa Anutuna kuqaa anoona ufa maridanoo. Anutufa sipsipa aanaaqi amundara qoomaqara naaree marisa susuida asasimariasa maridaqa.
REV 19:10 Miqi qimasoofaqa qini daaquqoofaqa mi qangiroona aikuki doorindari aqufumafi amooqianeeriafananoo mifa qaoo qimaseenoo qinau. Oo anee sia miqia. Aiqama Yisufa kooroo ira anoona ufa qumaree mariasa ani faqa ani akaqaafasaauqa faqa moodaa ainainimarunausa maridaqara anee sia qini qimooqia Anutuna kai amooqia. Yisufa narí maru aukuana narí anoona ufa koorooinau. Mi ufafa kai Yisufa sia kambiqoo aukuana tamummaqara fasiqauqa naakufufaqa qimannimufaqa akara riqau.
REV 19:11 Mi qangiroofa miqi qimasoofaqa innaarunai marida qafaafananoo innaaruna rakeemambufaqa akooqoo mariqau. Qinee minaki qoosa moo eekara arirana qafaqiafana. Mina ataufakaaqa Yisufa ooqufaaqee maridanoo mina auqu qaara auqu faqaafa. Moo auqu amiqirafa mapukusee miqoo kai mari fasiqanee qinau. Moo auqu kuqaa ufa qimari fasiqanee qiqau. Narí andeeqara iriranannai kai faiqí anaasee ufa rainannimaqaidanoo minannai kai mandoosana maree mariasa rakirana marannimidanoo.
REV 19:12 Mina afu idauru miqirafa qeemarinau. Mina akiaqasaa karaambaiqa qafee moomoo afisinoo marinau. Mi fasiqana auqu narí afaaqai akara rinoo maridanoo sia moo fannoo qafaidanoo narí kai qafaidanoo.
REV 19:13 Mina qamunna afisimarufa fidika aanaaqi marinau. Misa mina auquara Anutuna ufafee qimariqau.
REV 19:14 Mifa narí qoosasaa aiqaroofanoo mina aanaaqianna Anutuna innaarunaindaraa rakira ammiuqa aiqama nári eekara qoosasaa nariqa qamunna eekara qamunna anukara qamunna afisirausa mina aanaaqianna mina afaqee fiqau.
REV 19:15 Mina ookiqari aseema raiqarafa ani marinau. Minannai aiqama maqannaa rafaaqafuannoo, qainna samu uqirafa nidanoo rakisinnimaqaannoo. Mifa uriqarara afeeka Anutuna aanooqirafa aranandaki idara foora aiqama maa maqanasaaqaraasa mina ufa sia irimariasa afapita qumareenoo moodaanaki afapita rapidau inanoo faiqí fidika fannoo sauna tatira fara foommiannoo.
REV 19:16 Mina qamunnasaa faqa mina aikusaa faqa mina auqu moo maaqi qimasee akara rirafa Karaambaiquaqa karaambaiqa uriqararausa uriqararafa maridanoo.
REV 19:17 Qinee Yoohaneesa mina qafamaseeqa quandaki qangiroo moo suanisaa kikiqinoo marina qafeeqa. Mifa aiqama ufini innaaruna ameemaanai nimariasa firaa kari nameera qimasee qimanniminoo qinau. Innee suqufiqa Anutuna firaa qoomaqa sakasee naaqa.
REV 19:18 Innee suqufiqa karaambaiqauqa faqa sundiauqa faqa misa kiateenauqa faqa qoosauqa faqa minasaa akaraqa mariasa faqa aiqama fasiqa rumbee mariasa faqa iduki mariasa faqa kaiqeesa faqa uriqararausa faqa Anutufa misa aiqama narusainaqa misa nimaqi anireeqa Anutufa qoomaqa sakaseenoo misa nimaqi aniree naaqa.
REV 19:19 Suanisaa maru qangiroofa miqi qimasoofaqa quandafi firaa rakirana qafaqiafana. Manda kaasau aandau faqa maa maqa maaqanasaa karaambaiqauqa faqa nári rakira sundiauqa moomoo faqa suqufi eekara qoosasaa marufa narí ammi sundia namufaqa naruannee qimasoofaqa rakirana uqeeraqau.
REV 19:20 Qoosasaa marufa manda kaasau aandau uraaqaramafinoo rumba quqaseenoo inaaqianna kaasau aandau namufaqa rumba quqanau. Mi inaaqianaa kaasau aandauna moo auqu unna qira tamummaqara fasiqa. Mi unna qira tamummaqarafa indaaruqaa kaasau aandau oorisaa faiqí sia auqaaqaa ira ainaina auquqoofa mi ainainnannai mifa faiqí anaasee nikaru qufaqa akaqausa niqinaaqa faqa nisauku uqannai faqa manda kaasau aandau akara maraqau. Akaqausa mi kaasau aandaunara innaaru qimariqau. Eekara qoosasaa nimarufa mifa kaasau aandau mareeqee unna qira tamummaqara fasiqa faqa kaqi kasi mariafaqa qumareeqee ida farumaki aqinau. Mi idafa firaaqoo aurukandaa kandaa idanoo afunda mandaikammimarinau.
REV 19:21 Eekara qoosasaa nimarufa narí ookiqari ani maru qaseemafa kaasau aandau ammi sundiauqa faqa maa maqa maaqana karaambaiqa ammi sundiauqa faqa aiqama naru taikasoofaqa innaarunai ufiniuqa qumuree aiqama misa nimaqi noofanoo nimuaqufaqa minnisaqau.
REV 20:1 Qinee Yoohaneesa miqimaruna qafamasee quandaki innaarunaindari qangiroo moo fannoo maqa ameemaanai kiqa faqa kisaaqa sainanda faqa asaukuki uqirafa maqai quminau.
REV 20:2 Qumureenoo qaareena qumaranau. Mi qaareenna moo auqu ooqeenaa sakani moo auqu Sadannafa moo auqu afaanna. Mi qangiroofa qumareenoo sainandannai rumbaseenoo maqa ameemaanai madikaki afeeqa aquseenoo rookamandeenoo amusaraseenoo wan tauseenna aukuana minaki mariannee qimasee quqanau. Mi kamuqoo sia maa maqa maaqanasaaqaraasa nikaruqiannoo. Mi wan tauseenna aukuanna taikasainanoo Anutufa kafaa idukusainanoo kaqikaaqoo kafaa nikaruqiannoo.
REV 20:4 Qaareena rumbasoofaqa qaari moomoo innaarunai ufiqinoo maru qafaqiafana. Minasaa ooqu mariqa marusara Anutufa innee faiqí anaasee ufa iriaqee qinau. Qinee miquna qafeeqa quandakufaqa faiqí nimana moomoo qafaqiafana. Misa Yisuna anoona ufa faqa Anutuna ufa faqa kooroounara narusa nimana marufaqa nindafaqiafana. Misa sia manda kaasau aandau fee mina amanaree innaaru qimarusa mariqau. Misa manda kaasau aandau akara niqinaaqa faqa nisaukusaa faqa qaoo qimarusa mariqau. Misa kuqiranakiqari findi fiqa asauku mundirana saimbaqa karaambaiqaika mambiqa faiqí anaasee rakisifaranoo. Mi uan tauseenna aukuanna minasaimbaqa rakisifaranoo qinee qafaqiafana.
REV 20:5 Akaqausa kasooqaqee wan tauseenna aukuana aiqarammafufanoo Anutufa inaaqiannaasa mara findifuannoo.
REV 20:6 Indaaru findifirausa Anutufa firaa asasirana niminaqa asasifaranoo. Inaaqianna findi firafa moo auqu inaaqianna kuqirafa mariannoo. Sia indaaru findifirausa urinaaqareefaranoo. Indaaru findifirausa Anutunaindi faqa asauku mundirana aanaiqikirausa maridaqa wan tauseenna aukuana Yisuna faqa faiqí aanaaseesaa rakisifaranoo.
REV 20:7 Mi uan tauseenna aukuanna aiqarainanoo Anutufa Sadanna narí rumbaranakinaana idukusainanoo raudamakinoo aiqama maqasaa mariasa kafaa nikaruqiannoo. Nikaruqimaseenoo naarainaqa moomoosa uqanna anireeqa nukudara foora qumbiqa aqufifanoo Anutufa aidimari maqusana Yeerusaree maqusa faqa Anutunara rimaria fasiqa anaaseesa faqa aiqama firaaqoo rafusu quqarumasee nariraree qiannoo. Aiqama maqannaasa suqimarusara Kookana maqannaasa faqa Makookana maqannaasa faqee qimarifaranoo. Rakuanee qimarufanoo innaarunaindari ida firaafa qumureenoo aiqama naru taikasoofaqa qinee qafaqiafana.
REV 20:10 Naru taikasoofanoo Anutufa faiqí anaasee nikaru qimaru afaannana rafuseeqeenoo ida farumaki afunda manda marunaki aqinau. Sia narí kai, ooqai manda kaasau aandau faqa unna qira tamummaqara fasiqa faqa marunaki afaanna rafusu aqinau. Miqoo misa maridaqa faasaana faqa eendaki faqa aupurarana maraidaqa naaru naaru marifaranoo.
REV 20:11 Qinee Yoohaneesa miqiqufaqa qafamaseeqa quandaki qafaafananoo firaa qaari ufiqirafa eekara arimarunasaa minasaa ooqumaru fasiqana faqa qafaqiafana. Mifa kooroo mafufanoo innaaruna faqa maqa faqa mina afusaaqari doo taikeenoo taikafinau.
REV 20:12 Qinee miqoo qafaafananoo kuqirausa aiqama kuqiranakiqari findi fiqa Anutuna qaari aaqa ufa qiraree qimasee kikiqiqa mariqau. Uriqararausa faqa oorudupirausa faqa amana amana kai Anutuna oorisaa kikiqiqau. Innaarunai mariasa mi kuqirausa akara papiqa qairiseenoo nisaana riqau. Papiqa moo kaqi mariasa nuqu papiqa faqa qairisee qafanau. Anutufa mi papiqanakinaana misa manda marirana nirana auqarana qafamaseenoo ufa mina amana kai niminau.
REV 20:13 Anutufa qufanoo ooruku nammari fannoo kuqirausa minaki marusa mareeqeenoo Anutuna afusaa quqasoofanoo kuqirana faqa maqa ameemaanai kuqirana faqa nariki maria kuqirausa mareeqee Anutuna afusaa quqaqau. Quqasoofanoo Anutufa aiqama nári mandainaina auqoona akiaqara ufa niminau.
REV 20:14 Kuqiranaki mariasa faqa maqa ameemaanai kuqiranaki mariasa faqa aiqama mareeqeenoo ida farumaki aqinau. Mi ida farumanaki aqimarianara inaaqianna kuqiranee qinau.
REV 20:15 Aiqamausa asumu maraaninausa papiqaki nuqu marisa misa kaqi marifaranoo mi papiqanaki nuqu sia marinausa misa aiqama mareeqee kaqi kasi marufanoo ida farumaki aiqama aqinau.
REV 21:1 Maa nauraa maqafa faqa innaaruna faqa ooruku nammari faqa doo taikanau. Taikafufanoo fuka innaaruna faqa maqa faqa ooqeenaana amaaqa maqasoofaqa qafaqiafana.
REV 21:2 Qinee qafaafananoo Anutufa qufanoo fuka naaquqara maqusa fuka Yeerusaree innaarunaindari qumureenoo ooqeenaa Yeerusaree amaaqa maqafufaqa qafaqiafana. Fuka anaasee amundaranara foora afaaqa auqirafa fuka maqasaa quminau.
REV 21:3 Qumuroofanoo ufa moo fannoo Anutuna innaaruna qaarisaaqari maaqi qimasee firaa kari qinau. Doo maqee Anutuna maqusa faiqiki qumu maridanoo. Mifa misa faqa marinaqa misa mina faiqí anaasee marifaranoo. Anutufa narí uqanna misa faqa marinoo misa Anutufa mariannoo.
REV 21:4 Mifa aiqamausa naukunu rukaannoo. Sia kafaa kuqirafa faqa ikifaafau qirafa faqa ikiraqarafa faqa nidafirafa faqa sia kafaa mifauqa mariannoo. Mi ooqeenaa ainainafa doo taikafinoo.
REV 21:5 Mi ufafa taikoofanoo qaarisaa marufa qini qimaqiminoo qinau. Doo qinee maqee aiqama ainaina fuka kai auqu quqaanaura. Maa ufausa akara rua, kuqaa anoona ufa maridanoo minasaa mundimaria ufafa maridanoo.
REV 21:6 Kafaa qimaqiminoo qinau. Doo aiqama ainaina taikeenoo. Qinee oosana araafanausa maridaqa taikaaninna aukuana faqaasa maridaqa. Nammariara nidimarisa fuka maqakiqari ururee mari nammarina, kaqi marira nammari asooarafa sia feefaurirafa kaqi nimianauranoo.
REV 21:7 Mandainaina rafaaqafusee uriaaqararausa qinee maa ainainna nimianaura. Qinee misa Anutusa marianaura misa qini qimaakumara marifaranoo.
REV 21:8 Maparaa imariasa faqa ueeqee mariasa faqa kaaqa ufa rukiee mariasa faqa faiqí anaasee kuqa narimariasa faqa kaaqa faiqí aanaaseera rimariasa faqa aukainaina maraqa nuasa faqa tumunnai faiqí nimana auqusaida minara rufiasaida innaaru qimariasa faqa aiqama oosana oosana unna ufa qimariasa faqa mi mandoosanna maraqa nuasa misa maqusai ida farumaki marifaranoo. Miqoo ida firaafa fasafasainoo mandundi marifa mariannoo. Mi idana auqu inaaqiannaa kuqirafa maridanoo.
REV 21:9 Miqi qimasee qimaqimisoofanoo qangiroo moo fannoo qisauku dinni taikasee dinni ani qaara marasee marusakiqari aupurarana maqasaa teeqimariasakiqari moo fannoo aniree qimaqiminoo qinau. Yoohanee anee mai anirainaqa auniriranasaa kuqu sipsipa anaaqina mina anaaqa amundarana ani uqafiqaanana qafa.
REV 21:10 Miqi qimasoofanoo Anutuna maraquna fannoo qini daakufufanoo qangiroo fannoo rafusueeqeenoo kisaaqa aaqanasaa quqaqisanau. Miqooqari naaquqara maqusa fuka Yeerusaree maqusa innaarunaindari Anutufinnaindari qumuna uqaqifiqanau.
REV 21:11 Qumimarufanoo faqa qumu marinanoo faqa minakiqari Anutuna kaaqa areenarafa minakiqari takunasoosa imarinau. Mi fuka maqusafa pupu ooni tanukaidara foora qeemarinau.
REV 21:12 Mi fuka maqusana faandaamurafa ooninnai auquqoofa marinau kisaaqa amatooki kamminoo marinau minaki qisaukuqara taikasee qiku ooqu qaaraqanda marasee kooqi marinau, aiqama kooqisaa qangiroo moo fannoo rakisimarinau. Mi kooqisasaa Isaraeena aiku asauku marusa qisaukuqara taikasee qikunni ooqu qaara marasee nuqu mi kooqisasaa akara rinoo marinau.
REV 21:13 Suani oosana ururee maruqaannai faandaamurasaa qaaramoo kooqi mi qaannai marinau. Suani keeqee maru qaannai qaaramoo kooqi marinau. Suani dinni ataaqee qaannai qaaramoo kooqi marinau. Suani dinni ataaqee qaannai qaaramoo kooqi faandaamurasaa marinau.
REV 21:14 Mi ooni faandaamurana oosanaki qisauku qara taikasee qikunni ooqu qaara marasee firaa ooniuqa marinau. Mi oonisasaa sipsipa aanaaqi Yisuna aiku asauku qisaukuqara taikasee qikunni ooqu qaara marasee marusa nuqu mi oonisasaa akara rinoo marinau.
REV 21:15 Mi qangiroofa qini qimaqimimaruna asaukuki ruraa koora auqimaruna uqusee mariunannai mi fuka maqusana faqa faandaamura faqa kooqiuqa faqa amanamasee qafanau.
REV 21:16 Mi fuka maqusana ataaqeenni faqa mina sandaaqai faqa amana amana kai marinau. Aiqama tu tauseenna faqa maqi handareeta faqa (2,400 kilometer) mina kisaaqa miqimaseenoo kisaaqa uqanna mi maqusana ati faqa marinau.
REV 21:17 Mi fuka maqusa faandaamurafa faina maqa qufisara foora auqirafa marinau. Mi qangiroofa faandaamura maqasaaqari ammuqunni amanamasee qafamaseenoo sikisti metera amana maridanoo fee qinau. Kisaaqa uqanna marinau.
REV 21:18 Mi faandaamurafa pupu ooninnai auqirafa marinau, mi maqusanaki maaqauqa koorannai karasakiara foora ruqiaki qafee marufa idaaqirafa uqanna marinau.
REV 21:19 Faandaamura oosanasaa firaa ooniuqa marufa firaa feefauru aqusaida maree maria ooniuqa mi firaa oonisasaa afaaqa auqiiqee mariqau. Faandaamura firaa ooniuqa qisaukuqara taikasee qikunni ooqu qaaraqanda marara ooni mapukira ooni nifaaqa auqira ooniuqa maridaqa, nuqu faqaa ooniuqa mariqau. Moo ooni afaaqa moo auqirafa mina auqu yasapeera marinau. Mifa saqari amanee arirafa amananda tanukaida qeemarufa marinau. Moo ooni afaaqa auqirafa mina auqu akafata marinau. Mifa dirindaasi ariranasaa indiri ooni arirafa marinau. Moo ooni auqu eemararada marinau. Mifa pupu ooni moo saqari amanee arirafa marinau.
REV 21:20 Moo ooni auqu saradoonikisa marinau. Mifa pupu ooni moo eekara faqa saapaani ooniara foora irafa faqa marinau. Moo ooni auqu kananeeriana marinau. Mifa taatuqee saapaani marinau. Moo ooni auqu koosa marinau. Mifa pupu ooni moo tumana arirafa marinau. Moo ooni auqu beerira marinau. Mifa arooqa ooni fooqaafa saqari amanee arirafa marinau. Moo ooni auqu toopasa marinau. Mifa pupu ooni miqirafa tumana arirafa marinau. Moo ooni auqu karaseedooni moo ooni marinau. Mifa pupu ooni miqirafa saqari amanee arirafa marinau. Moo ooni auqu tookueesa marinau. Mifa ooni moo saqari amanee arirafa marinau. Moo ooni auqu ameetisa marinau. Mifa arooqa ooni miqirafa pannoona arirafa amananda qafee marufa marinau. Faandaamura firaa ooniuqara mapukira ooni fee qiqau misa nuqu miqiminoo maridanoo. Qisaukuqara taikasee qikunni ooqu qaaraqanda marasee marinau.
REV 21:21 Fuka Yeerusaree maqusa qikunni ooqu qaara marasee kooqi marinau. Aiqama kooqi faandaamurasaa maaqa kooqiara foora auqinoo marinau. Ooni firaana qumaree minaki ititee maru oonisa feefauru aqimari oonisa firaa ooniuqa oonda firaana fooqaafa marufaqa qafaqiafana. Maqusa qambaana faqa naambeeqai faqa aiqama amiqira koorannai auqirafa amananda qafee marufa marinau.
REV 21:22 Qinee Yoohaneesa fuka maqusa Yeerusaree qafamaseeqa naaquqara amaana maqara randeeqa sia marifaqa qafeeqa. Amaana maqa marinoofau fifau mariqini. Karaambaiqa Anutufa uriqararafa sipsipa aanaaqi Yisufa faqa miqoo akooqoo marunara amaana maqa sia marinau.
REV 21:23 Suani faqa quqoona faqa marinaqau qafani. Sia mari qafeeqa. Maridanoofau fifau mariqini Anutuna narí firaa areenarafa firaaqoo kaaqa qamaqinoo maridanoo, sipsipa aanaaqi mi maqusana qoomara foora maridanoo.
REV 21:24 Aiqama maa maqa maaqanasaaqaraasa mi maqusana kaaqa qaranasaa nifaranoo. Misa karaambaiqauqa nári amiqira ainainauqa mi maqusanaki munu quqeefaranoo.
REV 21:25 Mi maqusa kooqisa aiqama faasaana atuanoo kai mariannoo eendaki faqa sia ititeefaranoo, sia eenda mariannoo kaaqa qarafa kai mariannoo, minara kooqi sia ititaidaqa.
REV 21:26 Aiqama maqa maaqasaa mariasa misa amiqira ainaina faqa misa uriqarara ainaina faqa maree aniree mi maqusanaki fuka Yeerusaree maqusaki kai quqeefaranoo.
REV 21:27 Sia moo manda ainaina fannoo mi maqusanaki keeqaannoo. Sia moo asaurira ainaina auqee mari fee unna ufa qimari fee sia mi maqusanaki keeqeefaranoo. Sipsipa aanaaqi fannoo maqasaaqaraasa narí papiqaki nuqu akara rumaqaisa misa kai mi maqusanaki keeqeefaranoo.
REV 22:1 Mi qangiroofa fuka Yeerusaree maqusa uqaqifiqaseenoo nammari miqoo maruna uqaqifiqanau. Mi nammarifa Anutuna faqa sipsipa aanaaqi Yisuna faqa maru qaarinakiqari qumuree fuka maqusa qambaana ooqu fimarinau. Mi nammarina auqu kaqi marira nammari fee qiqau. Amiqira nammari sia dumuna maqa maru nammarifa mi nammarifa mookoofa amanee kai randaida qumidanoo.
REV 22:2 Mi nammarina dinni dinni afai saqari kambiqanoo maridanoo. Mi saqarisa aiqama quqoonasaa qaqamma iraidanoo kai maridanoo. Mina amanee aiqama maqannaasa aurirana teeroo taikannisee marifa mi saqari amaneefa maridanoo.
REV 22:3 Moo ainainara Anutufa aqurarainna ainaina sia mi fuka maqusanaki mariannoo, doo taikafuannoo. Anutuna qaari faqa sipsipa aanaaqi qaari faqa mi fuka maqusanaki maridanoo mina aiku asauku mi maqusanaki mariasa mina amooqifaranoo.
REV 22:4 Misa mina oori qafeefaranoo misa niqinaaqa mina auqu akara rinoo mariannoo.
REV 22:5 Mi maqusanaki asukuna taikanoo maridanoo sia kafaa mariannoo. Misa sia qoomara suaniara iridaqa fifau maridaqa, Karaambaiqa Anutufa misa qooma marinaqa miqooqaraasa karaambaiqara foora naaru naaru rakisi nimaqeefaranoo.
REV 22:6 Mi qangiroofa mi ainainausa uqaqifiqaseenoo qimaqiminoo qinau. Mi ufausa aiqama qimamunafa kuqaa minasaa mundimariafa marifaqa qimamiqa. Karaambaiqa Anutufa narí maraquna tamummaqara fasiqauqa nimimarifa narí qangiroo niqiqaifaqa mina ainainira fasiqa aanaaseesa qusasaa kambiqaaninna ainainausa uqannifiqaanifeera mi ainainausa ani uqafiqeeqa.
REV 22:7 Yisufa inniara maqasaa mariasara maaqi qidanoo, qinee qusasaa kafaa ooqu fuanaura. Maa papiqanakinaa ufa irisee mi mau fimariasa misa asasifaranoo.
REV 22:8 Qinee Yoohaneesa mi ainainna aiqama qafamasee iriseeqa daaquqoofaqa uqaqifiqee mari qangiroona aikuki maqasaa aqufiqa amooqianeeriafananoo mifa qaoo qimasee qinau.
REV 22:9 Oo sia miqia Anutuna kai amooqia. Qinee ani faqa moodaa ainaini marunausa maridaqa ani afasausa tamummaqara fasiqauqa faqa moodaa ainaini marunausa maridaqa. Maa papiqanakinaa ufamau fimariasa misa faqa moodaa ainaini marunausa maridaqa. Sia qini qimooqia Anutuna kai amooqia.
REV 22:10 Mi qangiroofa kafaa qimaqiminoo qinau. Yoohanee anee maa papiqanakinaa ufa tamummaqara ufa maridanoo sia qumeeraa, qimannimia. Aiqama maa ainainausa qusasaa kambiqaannoo sia amana quandasee kaifaa kisaaqasaa fuannoo, qusasaa doo kambiqaannoo.
REV 22:11 Anaaseera fanandirana, faiqiara fanandirana, miqida nariara nariara rimariasa saina miqidaqa mariaqa, mandoosana mandoosana maree mariasa saina miqidaqa mariaqa. Amiqira oosana maree mariasa saina miqidaqa mariaqa. Maparaammasee amiqira oosana firaaqoo maree mariasa saina miqidaqa mariaqa.
REV 22:12 Doo iriaqa Yisufa inniara qidanoo. Qinee qusasaa ooqufuanaura. Innee maree marianna akiaqara uqirausa doo ooqu fiqa muqu nimianauranoo.
REV 22:13 Qinee oosana aroonakiqari marunausa maridaqa. Qinee taikaaninna aukuanna faqaasa maridaqa.
REV 22:14 Nári qamunanda nammari uqusee anukara qamunna faqaasa misa kai amana fuka Yeerusaree maqusa kooqiki keeqafiqa kaqi naaru marira saqari qaqamma amana diqisee neefaranoo. Miqimariasa asasifaranoo.
REV 22:15 Mi maqusana aqoosai kaaqa ufa rukiee mariasa faqa aukainaina maraqa nuasa faqa faiqí anaasee nariara nariara fanandi mariasa faqa faiqí anaasee kuqa narí mariasa faqa saqarinnai faiqí nimana auqusaida innaaru qimariasa faqa unna oosana auqimariasa faqa unna ufa qimariasa faqa misa aiqama aqoosai marifaranoo.
REV 22:16 Qinee Yisufa maa ufausa amaana maqaki keeqee mariasa qimannimiaqee qimasee qeeqa qangiroo aqiqeeqa. Qinee Dafidina oosanakiqari minati maridaqa. Qinee kananaana duqudeeqiara maqi kaaqa qeemarunausa maridaqa. (Yisuna saqariki mariasa aiqama mina aqoonausara foora mariafanoo misara Yoohaneefa moodaanaki sipsipa aanaaqi Yisuna anaaqa fee qidanoo maa papiqanaki qidanoo.)
REV 22:17 Anutuna maraquna faqa sipsipa aanaaqi Yisuna anaaqa faqa aiqamausara mai aniaqee qidaqa. Aiqama maa ufana irimariasa innee faqa quandafi niqoonausa naaraaqa aniaqee qiaqa. Yisufa naaru marira nammari nimianee qidanoo. Aiqama nammariara nidimarisa doo aniree naaqa. Sia feefaurifaranoo, nidimarinausa kaqi naaqa.
REV 22:18 Qinee Yoohaneesa aiqamausa maa papiqanakinaa tamummaqara ufa irimariasa doori kandamasee aaquqimannimaqaidaqa faiqí moo fannoo maa papiqanakinaa ufa moo narí ufa minasaa ootupamasee qinafa mina akiaqara Anutufa maa papiqanakinaa aupurarana narirana mara mi fasiqana ariranasaa ootupainanoo firaanaikiannoo.
REV 22:19 Kafaa faiqí moo fannoo maa papiqanakinaa tamummaqara ufa ati rafaaqafinanoo minara mi fasiqafa naaru marira saqari qaqama neemariana Anutufa rafaaqafuannoo sia naannee qiannoo mina naaquqara fuka maqusaki keeqaranara faqa Anutufa rafaaqafusee qaoo qiannoo. Maa papiqanakinaa ufamau sia fuanara qaoo qiannoo.
REV 22:20 Qinee maa papiqanakinaa ufa qima afeekaikammannimi marunausa Yisusa maaqi qimasee qimannimidaqa kuqaa uqanna qinee qusasaa innee iannai kaifaa ooqu fuanaura. Qinee Yoohaneesa minara maaqi qidaqa. Oo karaambaiqa Yisu doo qumuannee qidaqa.
REV 22:21 Karaambaiqa Yisuna amiqira afaarirafa inni aiqamausaki mariani.
