﻿Luk.
3.
Kpanbara yudaanɔ Taiberias nba din dii naan bina piik nan ŋanŋmu ni, ki Ponsius Pailat mun tee Judea yudaanɔ, ki Herod mun tee Galilii batsaakɔɔ, ki u waarɔ Filip mun tee Iturea nan Trakonitis batsaakɔɔ, ki Laisanias tee Abilene batsaakɔɔ, 
ki Annas nan Kayafas mun tee mannteeb yudamm, li yoo na ki Yennu jii u maan ki tur Jɔɔnn nba tee Sekaria bija na; ki u din be muuk ni. 
Ŋanne ki Jɔɔnn din lin Jɔɔdann mɔkir po kur, ki mɔɔntir ki teen niib a bin nyik bi toonbiit ki wun wurib Yennu nyunwuru, ki Yennu n nyik chabib. 
Linba na tee nan Yennu sɔkinii Aisaya nba din sɔb Yennu gbouŋ ni biaŋinba nae a: “Nisɔɔ be muuk ni ki hoot a: ‘Ŋammit man ti Yomdaanɔ baaru sɔnu ki turɔ, ki ŋamm u sɔnii ki lii took. 
Baat kur saa gbee ki naa; ki jɔɔt nan kunkona kur saa bit ki naa. Sɔnu nba ŋmar siaminba kur, li saa sont fanu; sɔnboota saa piin ki lat naa, 
ki tingbouŋ niib kur saa la biaŋinba ki Yennu saa tinnib.’ ” 
Ŋann maŋe ki niib bonchiann din baar Jɔɔnn boor a wun wurib Yennu nyunwuru; ki u betib a, “Yimm waalabirii na. Ŋmee kpaani a yin tin nyi Yennu wutoor nba yaa lin baar i paak na ni? 
Ii tuun man linba saa wann nan i set nyik i toonbiita. I daa daan i para ni nan Abraham tee i yeeja. N beerie, Yennu saa fit fiin tana nba na ki lin kpant Abraham yaaboona. 
Pajar poŋ teen siira a wun chɔɔ tiinii; ki tiik nba kur ki loon lɔɔnŋana, bi saa chɔɔre ki lu muu ni.” 
Ki nibur maŋ din boiɔ a, “Ki ti ji saa teen nlee?” 
Ki u jiin a, “Wunba mɔk liata ŋanlee, see ki u paat yenn ki tur wunba ki mɔki, ki wunba mɔk jeet, wun wat tur wunba ki mɔki.” 
Ŋanne ki lampogaartesiab mun baar a wun wurib Yennu nyunwuru, ŋaan boiɔ a, “Chanbaa, timm saa teen nlee?” 
Ki u betib a, “I daa gaan likirii ki gaar baa senni biaŋinba na.” 
Ki kunkɔnkɔnna mun baar ki tan boiɔ a, “Ki timm muni, ti saa teen nlee?” Ki u betib a, “I daa mukisir sɔɔ ki gaan siari, koo ki fa faak ki paa niib; i numm n gboo i paauk nba ki i gaan na.” 
Tɔn, ki niib ji piin ki dukii dudukit bi para ni ki mɔk dindann Jɔɔnn po, a li pasiar u sii tee Yennu Niganntɔɔ Masia-e. 
Li yoo maŋ ki Jɔɔnn bet bi kur a, “Min ŋarin wuuri nyume, ŋaan wunba cheen baat. N ki ŋan nan ki n lot u taasaŋmii. Ŋɔɔe saa jii Yennu Seyeeŋ nan muu ki wuur i para. 
U dia dilenn ŋmanii a wun lenn bonŋann, ki nyinn dibin ki wuun u bɔɔr ni, ŋaan lu fouŋ na muu nba kan mi kpeen ni.” 
Jɔɔnn nba din mɔɔntir barŋanii maŋ ki teen niib na, u din pak pinpakbooru booru ki kpaamm. 
U bia din kpaan batsaakɔɔ Herod, kimaan u din fat u mɔŋ waarɔ ŋaapoo Herodias ki kɔɔn, ki bia tun toonbiit bonchiann ki pukin. 
Li poorpoe ki u tan kɔɔn Jɔɔnn dansarik, ki li mantik tee bonbiir. 
Yoo nba ki Jɔɔnn din wur niib na kur Yennu nyunwuru na, ki Yiisa tan baar u boor, ki u wur u mun Yennu nyunwuru. Leŋ maŋe ki Yiisa mei Yennu, ki sanpaapo tan loot, 
ki Yennu Seyeeŋ sik u paak ki tee nan ŋmann na, ki kunkɔr nyii sanpaapo ki yet a, “Fine tee n Bilonkak; fine ki n numm gboo.” 
Yoo nba ki Yiisa din piin Yennu toonn na, ki u tee nan bina piintaa na. Niib din mi a u tee Joosef bijae. 
ki Heli baa tee Matat, ki Matat baa tee Liifai, 
ki Joosef baa tee Matatias, ki Matatias baa tee Amos, 
ki Nagai baa tee Maat, ki Maat baa tee Matatias, 
ki Joda baa tee Joanann, ki Joanann baa tee Resa, 
ki Neri baa tee Melki, ki Melki baa tee Adi, 
ki Er baa tee Joosua, ki Joosua baa tee Elieser, 
ki Liifai baa tee Simeonn, ki Simeonn baa tee Juda, 
ki Elayakim baa tee Melea, ki Melea baa tee Menna, 
ki Defid baa tee Jese, ki Jese baa tee Obed, 
ki Nasonn baa tee Aminadab, ki Aminadab baa tee Adminn, 
ki Juda baa tee Jakɔb, ki Jakɔb baa tee Aisak, 
ki Nahor baa tee Serug, ki Serug baa tee Reu, 
ki Sela baa tee Kainann, ki Kainann baa tee Afaksad, 
ki Lamek baa tee Metusela, ki Metusela baa tee Enok, 
ki Kainann baa tee Enos, ki Enos baa tee Sef, 
