﻿Yankpaŋii.
8.
N sunman ki a bo tee n naa bik nba mɔɔr n naa biime, ki mi-i cheta sɔnjouk ni, ki n saa fit mɔɔt a tankpinn, ki sɔɔ baka sii kaa li po. 
N saa jiia, ki saan nana n naa ŋaak, ki li sii tee siaminba ki a saa tumiin lomm. N saa tura damanin nba ki n jii tilɔɔna nyun ki ŋaa na ki a nyu. 
N yur kpaak a niigaŋ paake, ŋaan ki a niidiitu barimin. 
Jerusalem poob, satir mɔb nanin nan i kan te lomm n baar, ŋaan ki li yoo daa ki baari. 
Ŋma poe nyii kunkoouk po, ki lɔn u yɔɔk nii ki baat na? Poo lomm yaŋ N fiina, tilontik na nyakire, siaminba ki bi din mara na. 
A daa jikit a par ki teen sɔɔ, see min kuukɔɔ; a daa lor sɔɔ see min kuukɔɔ. Lomm mantik paar ki tee nan kuun nae; ki niɔŋ mɔk paŋ ki tee nan kuun mɔŋ nba tee biaŋinba na. Li tuu tan yit ki tee muyeruko, ki di nan muu nba tuu yabit ki di biaŋinba na. 
Ki nyun ki fit kpeent, nyunmɔnn ki be ki saa fit kpeeniri. Ŋaan li-i tee ki sɔɔ koor a wun daa lomm nan u mɔkinti, li joontu tan sii tee feie ki u saa la. 
Ti waarɔ be, ki tee sapaanbik, ki u biaa daa waar. Ti saa teenɔ nlee, li-i tee ki naasinbik baat ki daakɔ? 
Ti waarɔ na-i bonni tee dikpinn, ti bo saa maa salimpeena difoouko u paak. Ki u bonni biaki tee gann, ti bo saa chaan kpek taabiie ki kɔrɔ. 
N tee dikpinne, ki n biaa na tee li ditɔɔtii. N yɔɔk mi nan mi-i be u boor, n tuu mɔk parmaasire. 
Solomonn mɔk sarwaauk siaminba ki bi yi Baal Hamonn na ni. Kpaara be leŋ maŋ, ki u jikit u sarwaauk na ki teemm, ŋaan gaan salimpeenbina tusir tusir. 
Ki Solomonn tuu gaar salimpeenbina tusire, ki kpaara na mun tuu biar nan salimpeenbina kobii ŋanlee-lee, ki li tee bi tora; ki n baka kaa. N mɔk n tiɔŋ sarwaauko. 
N yɔɔk, a te man gbat a kunkɔr kpaab na ni; n kɔɔnanleeb na guua, a fan pak. 
N yɔɔk, baat n boor; a tee nan kɔɔk koo pajak nba tuu be kunkona nba ki bonnunubit be leŋ nae.
