﻿Yankpaŋii.
6.
Poo nba mantik fan ki gar poob kur na, a yɔɔk na saan lee. A betit sɔnu nba ki a yɔɔk na tɔkin, ki lin te tin fit somma ki a kpaanɔ. 
N yɔɔk na saan u kpaab niŋa, ki li tee siaminba ki tinunubit be na. U kpaar u pei kpaab na nie, ki tikii puuk. 
Mine yen n yɔɔk, ki u mun yenin; u kpaar u pei titubira na nie. 
N yɔɔk, a mantik fan nan Jerusalem nba fan biaŋinba nae; ki bia fan nan Tirsa doo na, ki a fant na mantik teen yaarlituk. 
Fi-i goriin, a niɔŋ tuu kɔɔme ki dian. A yut na liane ki tee nan buunii nba tuu yab, ki nyi Gilead kunkona paak ki siik biaŋinba na. 
A nyana na peen, ki tee nan peburuŋ nba ki bi daa wurib nae; ki nan nyan-yenn na ki fokiti, ki li kur tɔɔ leer paak. 
A tankpina nba ki saarik dɔɔk na nyiriie. 
Kpanbar-i lekii mɔk poosaakab piinloob nan poobis piinniin, nan sapaamm nba kaa kanni, 
ŋaan fin kɔɔe ki n loon, ki a mantik ŋan ki tee nan ŋmann na. Fine tee a naa bonpoyemmir, ki tee a naa bilonkak. Ki poob kur goriia ki piaka; ki poosaakab nan poobis yiin yanii ki kpakitira. 
Ŋmee na, ki tan nyirii nan sanyiɔk na? U mantik fan, ki yeen, ki tee nan yonnu, koo ŋmaarik nba tuu nyɔkit biaŋinba na. 
N nyii tilontii boore ki sik maa n got tibis nba be baauk ni na, ki bia got fapaant nba be daan tilontii paak na, ki bia got tipuut nba be tilontlia paak na. 
Fine te ki a niɔŋ kɔɔn, ki n jekir nan taantoruk ŋmakit-tɔɔ nba teen siir nan tɔb na. 
Waan waak, Sulam sapaamɔ, ŋaant ki tii goriia, faa waa waak na. Poo lomm yaŋ Bee paake ki i loon mii waa waak niib sinsuuk ni, ki yii goriimi? 
