﻿Yaŋ.
45.
Mɔbonŋanae gbee n yur, ki n yin yaŋ na ki tur kpanbar, ki li tee nan sɔbtɔŋanɔ sɔbinii na. Ki n lamm teen siir nan lin yin. 
Fine tee jafaŋ ki gar jab kur, ki Yennu teen piisin a paak, ki a mɔb farik nan maan paku. 
Kpanbar jaann, fine mɔk baakir, ki a yur goon. 
Ii be taamm paak kii saa ki saa nyann, ki guur barmɔnii nan sikin-n-mɔŋ nan kasii binbeŋ. Ŋaant ki a nuu-ii tuun toonjaana. 
A tɔrbann peenii porin, ŋaant ki lin yek saar a datai parbiia, digbana niib n baa a taa po. 
Naangbouŋ nba ki Yennu tura na saa wei mɔkmɔk nan mɔkmɔk. Ki a saa dia a niib nan barmɔnii. 
A loon toonŋana, ŋaan ki loon toonbiit, li paak ki Yennu ganna, ki tura parpeenn, ki li gar kpanbarlia nba be. 
Ki tulaarii nba tee mir nan alos na be a liant paak, ki yan-yinna yiin yanii ŋaak nba ki bi ŋammir nan loobnyana na ni, ki a mɔk parpeenn. 
Kpanbara bonpoi pukin pooburchimm nba be a ŋaak ni na po. Ki pooyookir na see a naangbouŋ diitu po, ki lia salima liant. 
Kpanbar pooyookir, gbiintir maa yaa man beta linba: Tammit a niib po nan a baa ŋaaniib po. 
A fante saa te kpanbar na loona, turimɔ baakir, kimaan ŋɔɔe tee a chanbaa. 
Taya doo ni niib saa baar nan piinii ki tura, ki mɔkita sii koor a bin maŋ nana. 
Kpanbar pooyookir be ŋaak nie, ki fan bonchiann ki lia salima liant. 
Ki u saa lia baauŋ nba mɔk gungunbooru kur na, ki somm saan kpanbar boor, ki u poochiann sapaan-yɔɔsnba sii be u poor po ki chiantɔ, ki bi kur saa baar kpanbar boor. 
Ki bi saa somm nan parpeenn nan parmaasir, ki saa kɔɔ kpanbar ŋaak. 
Ki fin nba tee kpanbar na, a saa mar bonjai bonchiann, ki bi saa set a yeejamm seenu ni kii tee kpanbara, ki a saa teemm yudamm tiŋ na kur po. 
N yaŋ saa te ki niib-ii tian a sann yoo kur. Ki sɔɔ kur saa dont a sann yoo nan yoo. 
