﻿Yaŋ.
27.
Yennu-e tee n yentu ki bia tee n tinntɔɔ; n kan tin sɔɔ jaŋmaanii. Yennu-e guun ki nyintin bonbiir kur ni; n kii mɔk jaŋmaanii. 
N datai-i pikinin a bin kpin yoo nba bi sii gbiatire ki baa tiŋ ni. 
Li-i lekii tee ki nibur set ki lintin, n yan kii puti. N datai-i lekii pikinin, n kii tiin jaŋmaanii; Yennu-e ki n teenɔ yada. 
N boi Yennu bonyenn kɔɔ poe, bonyenn kɔɔe ki n loon: N loon mii be Yennu ŋasaakake n manfoor ni kur, kii bari Yennu ŋant nba tee, ŋaan boi u sommir po. 
Ki n wahala yoo ki u tuu saa dɔkin n paak. U tuu saa bɔrin fanu, u ŋasaakak ni, ki donnin jɔfoouk paak. 
Ki n saa nyann n datai nba lintin na; ki u ŋasaakak niŋe ki n saa yikin nan kpinkpammuk, ki mann maruŋ, ki yin yaŋ ki dont Yennu. 
Yennu, gbiintir ki turin, yoo nba ki n yiina. Tinimin ninbaauk ki turin gatu. 
Yoo nba ki a yet a, “Baat ki tan jiantin” na, ki n jiin a, “Yennu, n baate.” 
A daa bɔrii a numm nanimi, a daa dont wutoor nanin, koo ki beer min a daabiri. N tinntɔɔ Yennu, fine tun ki tee n sommtɔɔ, a daa yêenin ki nyikinimi. 
N baa nan n naa saa fit ki yêtin, ŋaan Yennu saa gaarima. 
Yennu, wantin faa loon man tun linba tura, ki ŋmakitin ki man tɔkin sɔnŋanu, kimaan n mɔk datai bonchiann. 
A daa ŋaanin ki te ki n datai tuun linba ki bi loon ki teenimi, kimaan faak siara damm fiir ki biirin, ki nyint mabiit. 
N mi nan n sii be n manfoor ni, ki la Yennu bonŋana nba be tiŋ na paak. 
Teent Yennu yada, cheen a par, kii wakii. Teent Yennu yada. 
