﻿1 Zaan.
5.
Gʊaa niŋŋə haay k'a sɩra ka a ʊ, Yeezuu bɩ Krista m, Woso nyɩ m. Gʊaa niŋŋə haay k'a Zɩ ŋʊa, a a Nyɩ ŋʊa sɔ. 
Hɔ k'a n'a hɩnkarɛ a ʊ, wɔɔ Woso nyɩnɔ ŋʊa bɩ ba n nɩ: Kʊ wɔɔ Woso ŋʊa, ʊ nɩ zure a lɛrɔ ʊ. 
Ba wɔɔ ŋʊarɛ kan Woso kɩ bɩ n na: Kʊ wɔɔ n a lɛrɔ si. B'a lɛrɔ wɔɔ, mɔr gorezaa bɛɛ y. 
Bala, gʊaa haay kʊ Woso y'a yɩ bɩ bʊr durnya ra. Hɔ k'a bʊr durnya ra bɩ, wɔɔ sɩrakarɛ m. 
Nka ɩ bʊr durnya ra? Kʊ bɩ m, gʊaa k'a sɩra ka, a ʊ, Yeezuu bɩ, Woso Nyɩ m. 
Yeezuu Krista ɩ bʊr durnya ʊ, an a hɩnka hi m kan ma kɩ. Hi bɛɛ m bala y, hi m kan ma kɩ. Bɩ, Sɛnt-Ɛspri n'a kasɛtɩ kam, bala, Sɛnt-Ɛspri m sɩra. 
Ŋ kaakʊ, ŋ n'a kasɛtɩ karɛ: 
Sɛnt-Ɛspri, hi kan ma kɩ. Bɩ ŋ kaakʊ rɔ wɔɔ kasɛtɩ deem ŋ n'a karɛ. 
Kʊ wɔɔ ɩ gʊɔɔ kasɛtɩ sire, Woso kasɛtɩ bɩ gʊtabaa lɛ da. Ba Woso kasɛtɩ bɩ n na: A kasɛtɩ ka a Nyɩ b'ʊ. 
Gʊaa k'a sɩra ka Woso Nyɩ b'ʊ, a ɩ kasɛtɩ naa do m a heer ʊ. Gʊaa k'a n sɩra ka Woso ʊ bɩ, Woso ba an nawʊm ŋʊaarzaa. K'a n sɩra ka kasɛtɩ kʊ Woso a ka a Nyɩ b'ʊ bɩ minto. 
Ba kasɛtɩ bɩ n na: Woso mɩsɩrbaa k'a nyarɛ ba ʊ bɩ ka wɔɔ ʊ, bɩ mɩsɩrbaa bɩ do ɩ Nyɩ bɩ zi. 
Gʊaa k'a nɩ kan Nyɩ bɩ kɩ, a ɩ mɩsɩrbaa m. Gʊaa k'a ba kan Woso Nyɩ bɩ kɩ, a ba mɩsɩrbaa bɩ do nɩ y. 
Naa haay gʊrsɩra ba mɔɔ ʊ awɔɔ ma, awɔɔ k'a nɩ sɩra kam Woso Nyɩ b'ʊ bɩ, k'awɔɔ n a dɔ a ʊ, a ɩ mɩsɩrbaa k'a nyarɛ ba ʊ bɩ m. 
Hɔ k'a nɩ wɔɔ heer bam kookoo Woso zi bɩ ba n nɩ: Kʊ wɔɔ hɔ niŋŋə yɛ han an zu a hɔɔnhɔ ʊ, a y'a tʊr kam wɔɔ ma. 
Bɩ kʊ wɔɔ dɔ, ʊ ʊ, kʊ bɔ wɔɔ yɛ han a y'a tʊr kam wɔɔ ma bɩ, wɔɔ dɔ wɔɔ ʊ, wɔɔ ɩ hɔ kʊ wɔɔ yɛ bɩ m. 
Kʊ gʊaa a danyɩ yɩ, an nɩ mimbʊnyaa barɛ, mimbʊnyaa bɩ do bɩr tam zɛ bɩncɛ ʊ, k'an yaa da. Woso mɩsɩrbaa kaŋ ʊ, kʊ mimbʊnyaa bɩ do bɩr tam zɛ bɩncɛ ʊ paan… y. Bala, mimbʊnyaa ta ʊ, an nɩ tam zɛ bɩncɛ ʊ. Mimbʊnyaa bɩ do minto bɛɛ mɔɔ ʊ, a yaa da y. 
Zibəə bʊnyaa haay bɩ, mimbʊnyaa m. Bɩ, mimbʊnyaa haay bɛɛ nɩ tam zɛ bɩncɛ ʊ y. 
Wɔɔ dɔ wɔɔ ʊ, gʊaa niŋŋə haay kʊ Woso a yɩ bɩ bɩr mimbʊnyaa bam dʊntɔ y. Bala, Woso Nyɩ b'ɩ dɔm ma, *Bʊnyaabarɛzaa bɩr heer bam ma y. 
Wɔɔ dɔ wɔɔ ʊ, Woso gʊɔɔ m wɔɔ m, bɩ durnya haay jilli ɩ *Bʊnyaabarɛzaa wɔ ʊ. 
Bɩ wɔɔ dɔ sɔ wɔɔ ʊ, Woso Nyɩ bʊr, an bɩ wɔɔ hɔɔn gu, k'ʊ Woso paan… bɩ dɔ. Bɩ Woso paan… Nyɩ Yeezuu Krista nɔ wɔɔ n ta ʊ. A m Woso paan…, a m mɩsɩrbaa k'a nyarɛ ba ʊ bɩ. 
M nyɩnɔ ŋʊarɛrɔ, a b'a ka a *wosobaawɔnnɔ wɔɔ da ʊ y.
