﻿Ci lɛɛkarɛ hɔ kʊ Pol a ba  TIMOTE  ma.
1.
Mɔɔ mɩŋŋa Pol nɩ ci naa do barɛ. Woso kʊ wɔɔ bʊmbɔrɛzaa m bɩ kan Krista Yeezuu k'an wɔɔ taaheerlɛ bɩ k'ɩ zaa ka, mɔɔ nɩ m ba Krista Yeezuu zibəəzaa. 
Ci bɩ ba mɔɔ nawʊrɛ ɩbɩɩ ma, Timote, mɔɔ nyɩ paan… sɩrakarɛ nɔ ʊ, a yɛ mɔɔ nawʊrɛ kʊ Zɩ Woso kan wɔɔ Zuuba Krista Yeezuu kɩ n barka, kan cicirzɛrɛ kɩ, kan laafɩɩ kɩ ka ɩ ʊ. 
Amba mɔɔ yɛ ɩ han, m hʊrlɛ ma, kʊ m ta Masedʊan ʊ bɩ, gɔɔta ɩ nyɩnta Efɛɛzɩ ʊ, k'ɩ gʊɔɔ kʊ ŋ nɩ ŋʊaar hɔ dɩndam nɔ wɔɔ da jɩm ʊ. 
A hɩ ŋ nɩ sɔ kʊ ŋ nɩ biisi minno kan yaabɔɔ tɔrɔ gaandarɛrɔ sʊʊra jintoo wɔɔ kɩ to. Minno wɔɔ duro, bɩsɩkarɛ ŋn'ɩ zɛm nɩ bala, ŋ bɩr a dam Woso hɔɔnhɔ barɛ kʊ wɔɔ n'a dɔm sɩrakarɛ nɔ ʊ bɩ han y. 
Meerbaa naa do ba ɩbɩɩ nawʊm kan ŋ kɩ, kʊ ŋ n'a da ma, ŋnɩ heer hu yɩ, kʊ ŋʊarɛ n nyɩnta ŋ heer ʊ, kʊ ŋ nɩ hɔɔndarɛ mɩŋŋa yɩ, ŋnɩ sɩra ka paan…. 
Gʊɔɔ gɔsɩnnɔ a gʊ zaa kʊ wɔɔ hɩnka naa ma, ŋnɩ nyaam, meerbaa yaarsɩrɔ nɔ ʊ. 
Ŋ ʊ, Woso lɛrɔ hɔdonno n a mɩ, an bɔkarɛ hɔ kʊ ŋ mɩŋŋɔɔ n'a hɩm, ŋn'ɩ som la kan paŋŋa kɩ bɩ, ŋn'a jɩ dɔ y. 
Wɔɔ dɔ wɔɔ ʊ Moyiisi lɛrɔ wɔɔ mɩŋŋa, k'a ɩ yɩrɛ ɩ ʊ, gʊaa ɩ zuŋ ʊ amba a a ga m bɩ m. 
Ʊ a tɔ da ʊ nɔ ʊ, ʊ ʊ, n nɩ lɛrɔ wɔɔ ka gʊɔɔ tɩrgɔɔ tɔ ma y, a ka n y'a ʊ bayɛrɛzannɔ tɔ ma, kan bɩsɩkənno kɩ, gʊɔɔ bʊnyaarɔ kɩ, mimbʊnyaabənno kɩ, kan gʊɔɔ kʊ ŋ bɩr Woso daŋ ʊ rɔ wɔɔ kɩ, kan gʊɔɔ kʊ ŋ nɩ Woso hɔ gore bɔŋ ʊ rɔ wɔɔ kɩ, gʊɔɔ kʊ ŋ n'a zɩrɔ kan a dɔɔ kɩ meeyaa bɔŋ ʊ rɔ wɔɔ kɩ kan gərzenno kɩ, 
jaandənno kɩ, kan gʊɔɔ yaarɔ wʊta kan kʊ kɩ zannɔ kɩ, kan gʊɔɔ kʊna ŋnɩ ŋ hɛɛ zannɔ kɩ, ŋʊaarzannɔ kɩ, kan ŋʊaarkasɛtɩzannɔ kɩ. Lɛ bɩ ka n y'a ʊ sɔ mim haay k'a nɩ hɔdɩndarɛ mɩŋŋa bɩ zarm tɔ ma. 
Hɔdɩndarɛ naa do a ga kʊ ʊ kan lemim nyɩnta kʊ Woso a da mɔɔ wɔ ʊ bɩ kɩ. Lemim bɩ do nɩ Woso k'a a so heernyɔɔ ʊ bɩ lɛbɔʊrɛ hɩnkarɛ. 
Mɔɔ ɩ yaa dam wɔɔ Zuuba Krista Yeezuu m barka, k'a paŋŋa ka mɔɔ ʊ kʊ m a zi ba bɩ minto. Mɔɔ ɩ yaa dam nɩ barka k'a gɩnga a ʊ, mɔɔ n ga a zibəə bɩ m an mɔɔ da ʊ bɩ minto. 
A n bɔkarɛ biisi bɩ, mɔɔ nyɩnta n meerbaa bʊnyaa ba ma, m fɩr ka a gʊɔɔ ma, m a sʊnsɔ wʊ. Bɩ, a mɔɔ cicir zɛ, bala, badɔ ɩ mɔɔ da naa haay barɛ ma, kʊ mɔɔ n sɩra ka bɩ tɔ ma. 
Wɔɔ Zuuba bɩ barka ka mɔɔ ʊ gʊta, an a ka mɔɔ n sɩra ka, m nɩ ŋʊarɛ m Krista Yeezuu nɔ ʊ. 
Meerbaa kʊ mɔɔ ʊ kʊ ma ba naa, sɩra m, gʊaa haay a ga m, an a si mɩŋŋa: «Krista Yeezuu bʊr durnya ʊ, k'a bɩ mimbʊnyaabənno bʊmbɔ.» Bɩ, mɔɔ mimbʊnyaa barɛ ɩ lɛ da. 
Bɩ, Woso mɔɔ cicir zɛ, k'an bɩr yɩrɛ ɩ ʊ, Krista Yeezuu a bʊraama gʊta hɩnka mɔɔ gʊr zi mɔɔ kʊ mɔɔ m mimbʊnyaabər gʊta k'a lɛ da bɩ, kʊ mɔɔ m yɩ makra gʊɔɔ kʊ ŋ nɩ zɛm bɩ sɩra ka ŋnɩ mɩsɩrbaa k'a nyarɛ ba ʊ yɩ rɔ wɔɔ tɔ ma. 
Bɩ, kʊ gʊɔɔ n a a lɛ bɔ Woso ʊ, ŋn'a da ʊ dɔmɩm haay, an cir an nɩ cirbəə m dɔmɩm haay, an nɩ mɩsɩrbaa m tee…, gʊaa bɩr a mɩŋŋa yɩrɛ y, a deem m Woso. Amina. 
M nyɩ Timote, ɩ b'ɩ dʊndɔ mɔɔ nawʊm, amba wosolɛsinnɩsora ganwʊrɛ meerbaa zannɔ nyɩnta ŋ n'ɩbɩɩ mim hɩ bɩ m, hɔ kʊ ŋ y'a hɩ bɩ tɔ da ɩ nɔ ʊ, ɩ sa ɩ zoobarɛ mɩŋŋa bɩ bam. 
Zoo bɩ ba sɩrakarɛ m, kan hɔɔndarɛ mɩŋŋa kɩ m. Hɔɔndarɛ mɩŋŋa bɩ do, gʊɔɔ gɔsɩnnɔ a to, a tore bɩ n a ka ŋ sɩrakarɛ n a zar. 
Yimene kan Alɛsandɩr k'ɩ gʊɔɔ wɔɔ duro barla, mɔɔ wɔ daa ŋ ma Sʊtaana wɔ ʊ, kʊ ŋ nɩ hɔɔn ka, kʊ ŋ b'a ya ŋnɩ Woso sʊnsɔ wʊ y. 
