MAT 1:1 अब्‌राहमेन अवल्‌यात दावुदेन अवल्‌यात, ने ईसु मसीन खानदानी असी छे।
MAT 1:2 अब्‌राहम सी इसाक पयदा हयु, इसाक सी याकुप पयदा हयु, याकुप सी यहुदा ने तेरा भायस पयदा हया।
MAT 1:3 अळतेन यहुदा ने तामार सी फीरीस ने जेरह पयदा हया, फीरीस सी हेसर्‌यान पयदा हयु, ने हेसर्‌यान सी एराम,
MAT 1:4 अळतेन एराम सी अम्‌मीनादाब पयदा हयु, अम्‌मीनादाब सी नहसोन, ने नहसोन सी सलमन पयदा हयु।
MAT 1:5 सलमन ने राहाब सी बोआज पयदा हयु। बोआज ने रुत सी ओबेद पयदा हयु, ने ओबेद सी यीसे पयदा हयु।
MAT 1:6 ने यीसे सी दावुद राजु पयदा हयु। दावुद सी सुलेमान पयदा हयु जी पेहेल उरीय्‌याहन घरवाळी हतली।
MAT 1:7 सुलेमान सी रहबाम पयदा हयु, ने रहबाम सी अबीय्‌याह पयदा हयु ने अळतेन अबीय्‌याह सी आसा पयदा हयु।
MAT 1:8 आसा सी यहोसाफात पयदा हयु, यहोसाफात सी योराम पयदा हयु, ने योराम सी उज्‌जीयाह पयदा हयु।
MAT 1:9 उज्‌जीयाह सी योताम पयदा हयु, योताम सी आहाज पयदा हयु, आहाज सी हीजकीय्‌याह पयदा हयु।
MAT 1:10 हीजकीय्‌याह सी मनस्‌‌सीह पयदा हयु, मनस्‌‌सीह सी आमन पयदा हयु, ने आमन सी योसीय्‌याह पयदा हयु,
MAT 1:11 ने ईस्‌रायली जातीन माणसे काजे धरीन बेबीलोन ईलाका मां जाणेन टेमे, योसीय्‌याह सी यकुन्‌याह ने तेरु सगु भायस पयदा हया।
MAT 1:12 ने ईस्‌रायली जातीन माणसे काजे धरीन बेबीलोन जाणेन पछेन यकुन्‌याह सी सालतीयेल पयदा हयु, ने सालतीयेल सी जरुबाबील पयदा हयु,
MAT 1:13 जरुबाबील सी अबीहुद पयदा हयु, अबीहुद सी ईल्‌याकीम पयदा हयु, ने ईल्‌याकीम सी अजोर पयदा हयु,
MAT 1:14 अजोर सी सदोक पयदा हयु, सदोक सी अखीम पयदा हयु, ने अखीम सी ईलीहुद पयदा हयु,
MAT 1:15 ईलीहुद सी ईलीयाजर पयदा हयु, ईलीयाजर सी मतान पयदा हयु, ने मतान सी याकुप पयदा हयु,
MAT 1:16 याकुप सी युसुफ पयदा हयु, चु मरीयमेन अदमी हतलु, ने मरीयम सी ईसु पयदा हयु चु मसी कहवाये।
MAT 1:17 एरेन तसी अब्‌राहम सी दावुद लग चवदा पीड़ी हवी, ने दावुद सी बेबीलोन ईलाका मां धराय जाणेन टेमे लग चवदा पीड़ी हवी, ने बेबीलोन ईलाका मां धरायन ली जाती रया तत्‌यार तीनी टेम सी लीन मसी लग चोवदा पीड़ी हवी।
MAT 1:18 ईसु मसी असु पयदा हयु की तत्‌यार तेरी माय मरीयमेन मांगणी युसुफ साते हय गुयली, ने तींद्‌रे भेळा हवणेन सी पेहलुत चुखली-आत्‌मा सी भारीस हतली।
MAT 1:19 तत्‌यार तेरु अदमी युसुफ चु धरमी हतलु, ने तीनी काजे नाव-बद्‌दी करने नी चाहतेलु, तीनीक कळेत छुड़नेन वीच्‌यार करने बाजी गुयलु।
MAT 1:20 जत्‌यार चु हीनी वातेन वीच्‌यार मां पड़ रवलु ती मालीक भगवानेन सरग वाळु काहवाळ्‌यु तीना काजे सपनाम देखायन कह्‌वणे लाग्‌यु, “ए युसुफ! दावुदेन अवल्‌यात, तु बायर मरीयम काजे तारेन चां लावणे सी मां बीहे, काहाकी ज तेरा पेट मां छे, च चुखली-आत्‌मान भीणी सी छे।
MAT 1:21 तेरु एक पुर्‌यु हवसे ने तु हेरो नाव ईसु पाड़जी, काहाकी हयु आखा माणसेन तींद्‌रा पाप सी छुटकारु आपसे।”
MAT 1:22 ज आखो असो करीन हयो की ज बुल मालीक भगवानेन अघी सी आवणे वाळी वात देखान्‌यान साहरे कह्‌लो, च पुरो हवे,
MAT 1:23 “देखु, एक कुवारली पुरे भारीस हवसे, ने तेरु एक पुर्‌यु पयदा हवसे, ने हेरो नाव ईम्‌मानुएल पाड़जी,” तेरो मतलब छे “भगवानुत हामरे पुठ्‌ये छे।”
MAT 1:24 तत्‌यार युसुफ नीद मां सी जागीन मालीक सरग वाळा काहवाळ्‌यान हुकुम सामळीन तेरी बायर काजे ली आयु,
MAT 1:25 ने जत्‌यार लग पुर्‌यु पयदा नी हयु तत्‌यार लग युसुफ तेरे धड़े नी गुयु, ने चु तेरो नाव ईसु पाड़्‌यु।
MAT 2:1 जत्‌यार हेरोदेसेन राजान राज चाल रह्‌लो, तीनुत दाहड़ा मां यहुदीया जीलान बेतलहम गांव मां ईसु पयदा हयु, ती उगेवणा सी तारा देखीन रासी देखण्‌या यरुसलेम सहर मां आया।
MAT 2:2 ने पुछ्‌या की, “यहुदी माणसेन पुर्‌यु राजु पयदा हयु, चु कां छे? काहाकी हामु उपर उगवणु सी तारु उंगलु देख्‌या तेरेमां हामु पुछ रया ने तीना काजे हामु पांये पड़ीन आंधणे आवला छे।”
MAT 2:3 जत्‌यार हेरोदेस राजु जी वात सामळीन घाबराय गुयु, ने तेरे पुठ्‌ये यरुसलेम सहर मां रहणे वाळा बी आखा घाबराय गुया।
MAT 2:4 तेरेमां हेरोदेस राजु आखा मुख्‌या पुजारा ने यहुदी नीयम सीकाड़न्‌‌या मास्‌तर्‌याक भेळा करीन तीनुक पुछ्‌यु, “की मसी कां पयदा हवसे?”
MAT 2:5 चे कह्‌या की “यहुदीया जीलान बेतलहम सहर मां हवसे, काहाकी भगवानेन अघी सी आवणे वाळी वात बताड़न्‌या माणसेन साहरे असो लिखलो छे।
MAT 2:6 “ए बेतलहम सहर, तु यहुदीया देस वाळा, काहना बी मटला सहर नानु नी हय, काहाकी तारे सीत एक असलु राज करन्‌यु पयदा हवसे, चु मारा ईस्‌रायेली जातीन माणसेन गुवाळी करसे।”
MAT 2:7 तत्‌यार हेरोदेस राजु तारा देखीन रासी देखण्‌याक कळेन बुलायन तीनुक पुछ्‌यु की तारु तुहुंक काहनी टेमे देखाव पड़लु,
MAT 2:8 अळतेन चु असो कय्‌न तीनुक बेतलहम सहर मां मकल्‌यु, “जावु, तीना पुर्‌यान बारामां पतु करु, ने जत्‌यार जड़ जाय तत्‌यार मेसे खबर करु काहाकी मे बी आवीन तेरा पाये पड़ीस।”
MAT 2:9 ने चे राजान वात काजे मानीन चाल पड़्‌या, ने तीना तारा काजे चे उंगतेलु देखला चु तारु बी तींद्‌रे अगळ-अगळ चाल पड़्‌यु, ने चां पुर्‌यु हतलु, तीनी जागा पर जाय्‌न चु तारु उबु रय गुयु।
MAT 2:10 ने तीना तारा काजे देखीन चे बेसका खुस हय गुया।
MAT 2:11 चे तीना घर मां जाय्‌न तीना पुर्‌या काजे हेरी माय मरीयम साते देख्‌या, ने उबडा पड़ीन पुर्‌या काजे आंध्‌या, ने आपणा-आपणा थयलाम सी तीना काजे सनो, लुभान, ने मंहगलो ईत्‌तर भेट चड़ाया।
MAT 2:12 बाकुन भगवान सी सपना मां असी खबर जड़ी की, हेरोदेस धड़े पछा घुण जावु, तत्‌यार चे दीसरे वाट्‌ये सी आपसान देस मां पछा जाती रया।
MAT 2:13 अळतेन चे तारा देखीन रासी देखण्‌या चां सी जाती रया ने पछेन मालीक भगवानेन सरग वाळु काहवाळ्‌यु सपना मां ईसुन बास युसुफ काजे देखायन कह्‌यु, “उठ, ईना पुर्‌या काजे ने हेरी माय काजे लीन मीसर देस मां जाती रव; ने जत्‌यार लग मे तुसे नी कहं, तत्‌यार लग चांहान रवजी; काहाकी हेरोदेस ईना पुर्‌या काजे माराड़ने करीन हेरसे।”
MAT 2:14 तत्‌यार युसुफ उठीन पुर्‌याक ने हेरी माय काजे रातेत लीन मीसर देस मां जाणे करीन चाल पड़्‌यु।
MAT 2:15 ने हेरोदेस मरने लग चांहान रयु। काहाकी ज बुल मालीक भगवानेन अघी सी आवणे वाळी वात बताड़न्‌या माणसेन साहरे कह्‌लो छे, चो पुरो हवे की, “मे मारा पुर्‌या काजे मीसर देस सी बाहर बुलायु।”
MAT 2:16 जत्‌यार हेरोदेस राजा काजे असु पतु चाल्‌यु की, तारा देखीन रासी देखण्‌या मारे सी धुकु कर्‌या, तत्‌यार चु रीस सी भराय गुयु, ने आपसा माणसे काजे मकल्‌यु जसा रासी देखाड़न्‌या जी टेम देखाड़ला तीनी टेमेन अनसारे बेतलहम ने तेरे आड़े-धड़े वाळा आखा जे दुय सालेन ने तींद्‌रे सी नानला पुर्‌या हतला तीनु काजे माराड़ देदु।
MAT 2:17 तत्‌यार ज बुल मालीक भगवानेन अघी सी आवणे वाळी वात बताड़न्‌या माणसेन यीर्‌मयाहन साहरे कह्‌लो हतलो, चो पुरो हय गुयो।
MAT 2:18 “रामा सहर मां सी एक दया आवे तसी अवाज सामळाय, ने रड़नेन ने बेसका कलपणेन बी अवाज सामळाय; राहेल तेरा पुर्‌या वाटे रड़तेली, ने हुगी राखे तेबी हुगी नी रवतेली, काहाकी तेरा आखा पुर्‌या मर गुयला।”
MAT 2:19 ने जत्‌यार हेरोदेस राजु मर गुयु, तत्‌यार मालीकेन सरग वाळु काहवाळ्‌यु मीसर देस मां युसुफ काजे सपना मां देखायन कह्‌यु,
MAT 2:20 “उठ, पुर्‌याक ने तेरी माय काजे लीन ईस्‌रायेल देस मां पछु जाती रव, काहाकी चे ईना पुर्‌या काजे मारने हींडी रवला, चे मर गुया।”
MAT 2:21 तत्‌यार युसुफ सुयन उठ्‌यु, ने पुर्‌याक ने तेरी माय काजे लीन ईस्‌रायेल देस मां पछु जाणे करीन चाल पड़्‌यु।
MAT 2:22 बाकुन युसुफ असु सामळ्‌यु की अखीलु तेरा बास हेरोदेस राजान आवजी पर यहुदीया पर राज कर र्‌यु, तेरेमां चां जाणे सी बीही गुयु। ने तत्‌यारुत सपना मां भगवानेन हुकुम सामळीन गलील जीला मां जाती र्‌यु,
MAT 2:23 ने नासरत नावेन सहर मां जाय्‌न वसी ज्‌य, काहाकी च बुल पुरो हवे, ज भगवानेन बुल मालीक भगवानेन अघी सी आवणे वाळी वात बताड़न्‌या माणसेन साहरे कह्‌लो हतलो की: “ईसु नासरी कह्‌वाय्‌से।”
MAT 3:1 तीनु दाहड़ा मां युहन्‌ना बपतीस्‌मा आपणे वाळु आवीन यहुदीयान बयड़ा मां असु परचार करने बाजी गुयु,
MAT 3:2 “पाप भीणी सी मन फीराय्‌न भगवान भीणी वळु, काहाकी सरगेन राज धड़ेत आय लागलो छे!”
MAT 3:3 जु युहन्‌‌‌नु हयुत छे तेरे बारामां भगवानेन अघी सी आवणे वाळी वात बताड़न्‌या माणुस यसायु माणुस कहलु की, “बयड़ा मां एक आयड़ने वाळान आवाज सामळाय रय, की मालीकेन वाट काजे तीयार करु, ने तेर वाटे सयड़क काजे सुदी करु।”
MAT 3:4 चु युहन्‌‌‌नु उटड़ान कान्‌‌यान पुथल्‌यो पेहरी रवलु, ने चामड़ान पट्‌टु कमर मां बांदी रवलु। तेरो खाणो टिड्‌डा ने बयड़ा मायन मुहाळ हतलो।
MAT 3:5 तत्‌यार यरुसलेम सहर वाळा ने आखा यहुदीया जीला, ने यरदन नदीन आड़े-धड़ेन वाळा बेसका माणसे तेरे धड़े आया।
MAT 3:6 चे आपणा-आपणा पाप काजे मानीन भगवान भीणी वळता जाय्‌न यरदन नदी मां युहन्‌ना सी बपतीस्‌मा लेदा।
MAT 3:7 जत्‌यार युहन्‌ना बेसका फरीसी माणसे ने सदुकी माणसे काजे बपतीस्‌मा लेणे करीन तेरे धड़े आवतेला देख्‌यु, ती तीनुक कह्‌यु, “ए घड़सान पीला, तुहुंक कुण बताड़ देदो की आवणे वाळी रीस सी ढासु?
MAT 3:8 ने कदी तुहुं पाप भीणी सी मन फेरवु ती तसा वारु फळ बी लावसु,
MAT 3:9 ने आपणा-आपणा मन मां असा वीच्‌यार बी मां करु की हामु हामरा आड़ा-बुड़ान डाहलु बास अब्‌राहमेन अवल्‌यात छे; मे तुंद्‌रे सी कहं की, भगवान हीनु दगड़ा सी बी अब्‌राहम वाटे अवल्‌यात पयदा कराड़ सके।
MAT 3:10 ने झाड़कान मुळ्‌या पर कुरहाड़ मेकली छे, काहाकी जो झाड़को वारलु फळ नी लावे, तीना काजे काटीन आकठा मां नाख देसे।
MAT 3:11 मे ते पाणी सी तुहुं काजे मन फेरवणेन बपतीस्‌मा देदलु छे, बाकुन जु मारे पछळ आवणे वाळु छे, चु मारे सी बी मटु छे, मे तेरा खासड़ा हाकलने लायक बी नी हय, चु तुहुंक चुखली-आत्‌मा ने आकठा सी बपतीस्‌मा देसे।
MAT 3:12 तेरो सुपड़ो तेरा हात मां छे, ने ईसु तेरा खळा मायन कचराळा दाणा काजे वारु वाहळा मां उडाड़ीन चुखाळसे, ने तेरा गहुं काजे ते कणगी मां भेळु करसे, बाकुन चारा काजे जलम नी उल्‌हायें तीना आकठा मां नाख देसे।”
MAT 3:13 तीनी टेमे ईसु गलील जीलाम सी चालीन यरदन नदी मां युहन्‌ना धड़े बपतीस्‌मा लेणे आयु,
MAT 3:14 बाकुन युहन्‌‌‌नु असु कय्‌न ईसु काजे रुकणे बाजी गुयु, “मेसेक ते तारा हात सी बपतीस्‌मा लेणेन जरुवत छे, ने तु मारे धड़े काहा आयु र्‌यु।”
MAT 3:15 बाकुन ईसु तीना काजे असु जपाप आप्‌यु, “हय ते असोत हवणी दे, काहाकी हामु ईनीत रीते आखा वारलु काम माणसे काजे पुरो करनु जी भगवानेन मरजी छे।” तत्‌यार चु तेरी वात काजे मान लेदु।
MAT 3:16 ने तत्‌यार ईसु बपतीस्‌मा ली लेदु। ने जसु पाणीम सी बाहर नीकळ्‌यु, तत्‌यार सरग खुल गुयो। ने हयु भगवानेन आत्‌मा काजे पेरवान तसु उतरतेलु ने तेरे उपर आवतेलु देख्‌यु।
MAT 3:17 ने तत्‌यारुत, उपर सरग सी असी अवाज आवी की, “जु मारु लाटेक्‌लु पुर्‌यु छे। हेरेसी मे बेसकु खुस छे।”
MAT 4:1 तत्‌यार ईसु बपतीस्‌मा ली लेदु, ने अळतेन भगवानेन आत्‌मा ईसु काजे बयड़ा मां लीन गुय काहाकी भुतड़ा सी हेरी पारख हय सके।
MAT 4:2 ईसु चालीस दाहड़ा, ने चालीस रात, लग उपास रयु, तत्‌यार तीना काजे भुक लागी।
MAT 4:3 तत्‌यार पारखणे वाळु भुतड़ु तेरे धड़े आवीन तीना काजे असु कह्‌यु, “कदी तु भगवानेन पुर्‌यु हय, ती कय दे, की जे दगड़ा रुटा बण जाय।”
MAT 4:4 बाकुन ईसु भुतड़ाक जपाप आप्‌यु की, “खरला सास्‌तुर मां लिखलो छे, माणुस नीस्‌तु रुटा खाय्‌न नी जीवे, बाकुन हरेक तीना बुल सी जीवे जो भगवानेन मुंहडाम सी नीकळे।”
MAT 4:5 तत्‌यार भुतड़ु तीनाक यरुसलेम सहर मां लीन गुयु, चो सहर चुखलो कह्‌वाये, ने चां मंदीरेन मुंडेरी पर उबु कर्‌यु,
MAT 4:6 ने भुतड़ु ईसु काजे असु कह्‌यु, कदी तु भगवानेन पुर्‌यु हय, ती हया सी नेचु कुद जां; काहाकी खरला सास्‌तुर मां लिखलो छे की, भगवान मालीक आपसा सरग वाळा काहवाळ्‌या काजे हुकुम, आपसे ने चे तुसेक उपरुत झेल लेसे, “काहाकी तारे पाये दगड़ान ठेसु लग नी लागणे देय।”
MAT 4:7 ईसु तीना काजे कह्‌यु, “सास्‌तुर मां असो बी लिखलो छे की, ‘तु आपसा मालीक भगवान काजे घुण पारखे।’”
MAT 4:8 पछेन भुतड़ु ईसु काजे एक मटला बयड़ा पर ली गुयु, ने तीनाक कळीन आखा राजे ने तेरो सींगार देखाड़्‌यु।
MAT 4:9 ने ईसु काजे असु कह्‌यु, “कदी तु मेसेक पाये पड़ीन आंधसी, ती जो काय तु हय देख्‌यु चो आखो मे तुसेक आप दीस।”
MAT 4:10 तत्‌यार ईसु भुतड़ा काजे कह्‌यु, “ए भुतड़ा, छेटे हय जां, काहाकी खरला सास्‌तुर मां लिखलो छे, ‘तु आपसा मालीक भगवानेन पाये पड़ीन आंध्‌या कर, ने तेरीत सेवा चाकरी कर।’”
MAT 4:11 अळतेन भुतड़ु ईसु काजे छुड़ीन जाती रयु, ने भगवानेन सरग वाळा काहवाळ्‌या आवीन तेरी सेवा चाकरी करता रया।
MAT 4:12 जत्‌यार ईसु ज सामळ्‌यु की युहन्‌ना काजे जेल मां कुंड देदा, ती चु गलील जीला मां जाती रयु।
MAT 4:13 ने चु नासरत सहर मां नी रयु, ने नासरत सहर छुड़ीन कफरनहुम सहर मां रहणे बाजी गुयु, जबुलुन ने नप्‌ताली देस मां छे, चां जाय्‌न रहणे बाजी गुयु;
MAT 4:14 असो तेरेमां हयो की भगवानेन अघी सी आवणे वाळी वात बताड़न्‌या माणुस यसायान साहरे लिखलो हतलो, चो पुरो हयो।
MAT 4:15 “जबुलुन ने नप्‌तालीन देस दरीयान वाटे पर, ने यरदन नदीन बुडेवणा मां, ने नी-यहुदी माणसे गलील।
MAT 4:16 ने जे माणसे आंदारला मां जीवतेला, चे माणसे मटला वीजाळाक देख्‌या; ने जे मोतेन साहळान देस मां जीवतेला तींद्‌रे पर बेसको मटो वीजाळो पड़्‌यो।”
MAT 4:17 तीनी टेमे सी ईसु असु परचार करने बाजी गुयु की, “पाप भीणी सी मन फेरवु, काहाकी भगवानेन राज तुंद्‌रे धड़े आय लागलो छे।”
MAT 4:18 जत्‌यार ईसु गलील दरीया धड़े मायन जाणे बाजी रवलु, तत्‌यार ईसु तीनु दुय संगा भायस काजे देख्‌यु, सीमोन काजे चु पतरस बी कहवाये, ने अळी तेरु भायस अन्‌दीरीयास काजे दरीया मां जाळ नाखतेला देख्‌यु; काहाकी चे काहर्‌या हतला।
MAT 4:19 ईसु तीनुक कह्‌यु, “मारा चेला बणीन मार पछळ आवु, ने जसा तुहुं माछा धरीन भेळा करु तसात तुहुंक मे माणसेक भेळा करने ने तीनुक मारा चेला बणावणे सीकाड़ीस।”
MAT 4:20 ने चे तत्‌यारुत जाळ काजे चांहान रहणीदीन ईसुन चेला बणीन ईसु पछळ चाल पड़्‌या।
MAT 4:21 चां सी अगु जाय्‌न, ईसु अळी दीसरा दुय भायस काजे देख्‌यु, जब्‌दीन पुर्‌यु याकुप काजे ने अळी याकुपेन संगा भायस युहन्‌ना काजे। चे तींद्‌रा बास जब्‌दी पुठ्‌ये ढंड्‌या मां जाळ काजे सुदारतेला। ईसु तीनुक बुलायु।
MAT 4:22 चे तत्‌यारुत ढंड्‌याक ने तेरा बास काजे चांहान रहणीदीन ईसुन चेला बणीन ईसु पछळ चाल पड़्‌या।
MAT 4:23 ईसु आखा गलील जीला मां हींडतु-फीरतु यहुदी माणसेन भक्‌तीन घर-घरमां सीकाड़तु रयु, ने अळी भगवानेन राजेन खुस-खबर परचार करतु रयु। ने माणसे काजे आखी भाती-भातीन मांदवाड़ ने लुल्‌गाय सी वारु करतु रयु।
MAT 4:24 ने ईसुन आखा सीरीया देस मां खबर फेल गुय; तेरेमां चे माणसे जी भाती-भातीन मांदवाड़ ने दुख मां पड़ला हतला, ने तीनु माणसे मां भुतड़ान आत्‌मा लागली हतली, ने अळी फेफराळा ने लखवु लागला माणसे काजे ईसु धड़े लावतेला ने ईसु तीनु काजे वारु कर्‌यु।
MAT 4:25 तेरेमां गलील जीलाम सी, दस सहरेन परदेस दीकापुलीस, यरुसलेम, आखा यहुदीया जीला सी ने यरदन नदीन पार वाळा बेसका माणसेन टुळा की टुळा ईसु पछळ-पछळ आवतेला।
MAT 5:1 ईसु बेसका माणसेन टुळा काजे आवतेला देखीन बयड़ा पर चहड़ी गुयु, ने जत्‌यार ईसु चां बठी गुयु ती तेरा चेला बी तेरे धड़े आय गुया।
MAT 5:2 तत्‌यार ईसु तीनु माणसे काजे सीकाड़तु जाय्‌न कह्‌यु।
MAT 5:3 “जे आपसा जीव-आत्‌मा मां गरीब छे चे बरकतवाळा छे।” काहाकी सरगेन राज तींद्‌रोत छे!
MAT 5:4 “जे दुखी हय्‌न कलपे, चे बरकतवाळा छे; काहाकी तीनुक सांती जड़से।”
MAT 5:5 “जे भुळा-भाळा छे; चे बरकतवाळा छे; काहाकी चे धरतीन हकदार बणसे।”
MAT 5:6 “वारला काम वाटे जे भुकला ने तीसला छे चे बरकतवाळा छे; काहाकी भगवान तीनुक खावड़ाय्‌न नीरसा कर देसे।”
MAT 5:7 “जे दयाळा छे, चे बरकतवाळा छे; काहाकी भगवान तींद्‌रे पर दया करसे।”
MAT 5:8 “जे मन मां चुखला छे, चे बरकतवाळा छे; काहाकी चे भगवान काजे देखसे।”
MAT 5:9 “जे मेळ कराड़ने वाळा छे, चे बरकतवाळा छे! काहाकी चे भगवानेन पुर्‌या-पारी कह्‌वाय्‌से।”
MAT 5:10 जे वारलु काम करने सी दुख झेले, चे बरकतवाळा छे; काहाकी चे सरग वाळा भगवान पुठ्‌ये राज करसे!
MAT 5:11 तुहुं बरकतवाळा छे, जत्‌यार माणसे मार पछळ चालने सी तुंद्‌री नाव-बद्‌दी करे, ने अळी एला पाड़े ने लुच्‌चाय मेली-मेलीन तुंद्‌रा बारामां गलत वात करे।
MAT 5:12 तत्‌यार तुहुं खुस रवजु, काहाकी तुंद्‌रे वाटे सरगे मां बेसको मटो ईनाम जड़से। जी वात तसीत छे जसी की तुंद्‌रे सी पेहलेन भगवानेन अघली वात बताड़न्‌या काजे बी चे माणसे लग एला पाड़तेला।
MAT 5:13 तुहुं धरतीन माणसेन नण छे; बाकुन कदी नणुत मुळो हय जाय, ती पछेन तीनाक काय सी खारो करसु? ने चो काहना बी काम मां नी रहे, बाकुन तेरो अतरोत काम मां आवे की बाहर उराट देसे। ने माणसेन पाय तळे रंदळाये।
MAT 5:14 तुहुं कळीन माणसे वाटे वीजाळान तसा छे, ने चो साताय नी सके। जसों काहनोक सहर उचा बयड़ा पर वसलो रहे, तसात तुहुं बी रवजु।
MAT 5:15 माणसे दिवु धपाड़ीन चवकी तळे नी मेके, बाकुन दीवाळ्‌या पर मेके, चां सी चु दिवु, तीना आखा घरन्‌याक वीजाळो आपे।
MAT 5:16 तेरेन तसोत तुंद्‌रो वीजाळो माणसे पर चमके, काहाकी चे तुंद्‌रा वारलु कामेक देखे, ने जु तुंद्‌रु भगवान बास सरगे मां छे, चे बी तीना बासेन बड़ाय करसे।
MAT 5:17 तुहुं असा मां समजु की, हयु ईसु भगवानेन नेम कायदाक ने भगवानेन अघली वात बताड़न्‌यान किताप काजे रद करने आयु, मे रद करने नी आयु, बाकुन पुरो करने आवलु छे।
MAT 5:18 मे तुहुंक छाचलीन कह्‌वो की सरग ने धरती टळी जासे, बाकुन मुसान लिखलु कायदान एक नानुस आकड़ु ने एकेक टीपको बी पुरो हवे पाखुर नी टळे।
MAT 5:19 तेरेमां जे काय ईनी नानली सी नानली हुकुम मां सी कह्‌ली एक काजे बी तुड़से, ने तसुत माणसे काजे बी सीकाड़े, ने आखा सी नानलु कह्‌वाय्‌से; बाकुन जे काहनाक ईनी वातेक मानीन चालसे ने दीसराक बी तीनु वात पर चालने करीन सीकाड़से, ती हयु सरगेन राज मां मट्‌लु कह्‌वाय्‌से।
MAT 5:20 मे तुंद्‌रे सी छाचलीन कह्‌वो की कदी तुंद्‌रो वारलु काम यहुदी नीयम सीकाड़न्‌या मास्‌तर्‌या ने फरीसी माणसेन धरमेन काम सी बड़ीन नी रवे, ती तुहुं सरगेन राज मां कदी नी भराय सकु।
MAT 5:21 तुहुं ते सामळी रया, की पेहला माणसे सी कह्‌ली वात हतली की, खुन घुण करु ने जु काहनुक खुन करसे चु जेल मां डंड भुकत्‌से।
MAT 5:22 बाकुन मे तुहुंक असु कहं की, जे काहनाक आपसा भायस पर रीस करसे, चे जेल मां डंड भुकत्‌से, ने जे काहनाक आपसा भायस काजे नाव-बद्‌दी करे, चु मटला पंचु अगळ डंड भुकत्‌से, ने जे काहनाक आपसा भायस काजे असा कहें की ए डेड़-अकल्‌या ती चु नरकेन आकठा मां डंड भुकत्‌से।
MAT 5:23 हेरेसी कदी तु वेदी पर आपसी बादा चड़ावणे लाय रयु हय, ने चां सी तुसेक जी हेर आवे, की, मारु भायस, मार पर नराज हय रयु,
MAT 5:24 ती तु आपसी बादा काजे वेदी अगळुत रहणीदीन, पेहेल तारा भायस सी मेळ कर ले, ने अळतेन आय्‌न तारी बादा चड़ावजी।
MAT 5:25 तारु वेरी तुसे कुरुट-कचेवरी मां ली जाणे बाजी रवे, ने चु तत्‌यार वाटेत मां रवे, ती तु छाटुस जाय्‌न तेरे सी वात सार लेजी, नीते असो नी हय जाय की चु तुसे नीयाव करन्‌या सीपायड़ान हातेम सुप देय, ने सीपायड़ा तुसेक जेल मां कुंड देय।
MAT 5:26 मे तुसेक छाचलीन कह्‌वो, की जत्‌यार लग एकेक टकु भरी नी देय, तत्‌यार लग तुसेक जेल मां सी नी नीकळाये।
MAT 5:27 “तुहुं ज बी सामळी रया, की छीनाळो घुण करु।”
MAT 5:28 बाकुन मे तुंद्‌रे सी असु कहं की, जु काहनुक काहनीक बायरी पर छीनाळो करनेन गलत नींगा नाखे, चु आपसा मन मां छीनाळो कर लेदुलु छे।
MAT 5:29 कदी तारु जेवड़्‌यु डुळु उत्‌तर बणीन तुसेक पाप कराड़े, ती तीनाक नीकाळीन नाख दे; काहाकी तारे वाटे ज वारु छे की, तारा डील मां सी एक अंग नास हय जाय ने तारु आखु डील नरक आकठाम सी बचणु तार वाटे वारु छे।
MAT 5:30 ने कदी तारु जेवड़्‌यु हात तुसेक पाप कराड़े, ती तीनाक काटीन उराट दे; काहाकी तारे वाटे ज्‌य वारु छे की तारा डील मां सी एक अंग नास हय जाय ने तारु आखु डील नरक आकठाम सी बचणु तार वाटे वारु छे।
MAT 5:31 “असो बी कह्‌लो हतलो, जु काहनुक आपसी लाडी काजे छुड़ने हींडे, ती तीनीक छुड़नेन चिट्‌ठी लिखीन आप देणु चाहजे।”
MAT 5:32 बाकुन मे तुहुंक असु कहं की, जु काहनुक आपसी लाडीक छीनाळान वात छुड़ीन दीसरी वजे सी छुड़ देय, ती चु तीनीक छीनाळो कराड़े ने जु कुय तीनी छांडायली बायर काजे बणावे, चु बी छीनाळो करे।
MAT 5:33 “अळी तुहुं पेहला माणसेक कहली वातेक सामेळला हतला, की झुटी सगुन घुण खाजु, बाकुन भगवान मालीक अगळ खादली सगुन काजे पुरी करजु।”
MAT 5:34 बाकुन मे तुहुंक कह्‌वो की, तुहुं कदी सगुन खावु घुण; काहाकी सरग, भगवानेन राजगादी छे;
MAT 5:35 ने नी धरतीन, काहाकी ची तेरा पायेन चवकी छे; नीते यरुसलेम, तीना भगवानेन सहर छे, चु राजान राजु छे।
MAT 5:36 ने आपणा मुणकान एक बी सगुन घुण खावु; काहाकी तु एक कान्‌याक बी नी धवळा ने नी काळ्‌ळा कर सके।
MAT 5:37 ने तुंद्‌री वात “हव” हय ती “हव” कवजु ने “नी” हय ती “नी” कवजु, काहाकी ज काय एरे सी अदुस कहें, चो कुहर्‌या भुतड़ाम सी उब्‌जे।
MAT 5:38 “तुहुं पेहला माणसेक कहली वातेक सामळ्‌ळा हतला की, ‘डुळान बदले डुळु, ने दातेन बदले दात।’”
MAT 5:39 बाकुन मे तुहुंक असु कहं की कुहराय करन्‌या माणसे सी बदलु घुण लेवु; बाकुन जु काहनाक तारे जेवड़े गाल पर थापड़ देय, तेरे भीणी दीसरु गाल बी फेरवी देजु।
MAT 5:40 कदी काहनुक तारे पर कुरुट मां तारीक लड़ीन तारो कुरतो मांगणे हींडे, ती तीनाक तु चादरु बी आप देजी।
MAT 5:41 जु काहनाक तुसेक एक कुस असलुत चालाड़ीन ली जाय, ती तींद्‌रे साते दुय कुस चालीन जात रव।
MAT 5:42 जु काहनुक तुंद्‌रे धड़े मांगे, ती तीनाक तुहुं आप देजु; ने जु काहनुक तार सी उधार मांगे, ती तीनाक नी आपतु करीन मां कहुं।
MAT 5:43 “तुहुं पेहला माणसेन कहली वातेक सामळ्‌ळा हतला, की ‘आपणे धड़े वाळा सी परम करजु, ने आपणा वेरी सी कुहराय राख्‌जु।’”
MAT 5:44 बाकुन मे तुहुंक असु कहं की आपणा वेरी सी परम करु। ने जु काहनुक एला पाड़े तींद्‌रे वाटे दुवा करु,
MAT 5:45 ती तुहुं सरग मां रहणे वाळा बासेन पुर्‌या-पारी बणसु, काहाकी चु कुहराय ने भलाय करन्‌या दुयु भातीन माणसे पर दाहड़ु उंगाड़े, ने पापी ने धरमी दुयु भातीन माणसे पर पाणी पाड़े।
MAT 5:46 कदी तुहुं आपणा परम राखणेवाळा सी परम करु, ती तुहुंक काय फळ नी जड़े, काहाकी असा ते फाळु लेणे वाळा सरकारी आफसर बी करतेला।
MAT 5:47 “कदी तुहुं आपणा भायस काजे अतरात वारलु छे की करीन पुछ रया, ती तुहुं काहनो असो मटो काम कर रया? असा ते नी-यहुदी माणसे बी करे जे भगवान काजे नी माने।”
MAT 5:48 तेरेमां तुहुं पुरा-पुरा पाक्‌का बणु, जसु तुंद्‌रु सरग वाळु भगवान बास पुरु-पुरु पाक्‌कु छे।
MAT 6:1 “चेतीन रहु! तुहुं माणसे काजे देखाड़ने वाटे आपणा वारु काम मां करु, नी ते आपणा सरग वाळा बास सी काय बी फळ नी जड़से।”
MAT 6:2 तेरेमां जत्‌यार तु दान करे, ती आपणे अगळ फेप्‌यो मां वाजाड़े, काहाकी भक्‌तीन घर मां ढंगड़ा असात करे, चे ते गळ्‌ये ने दीसरा माणसे सी बड़ाय चाहे। मे तुहुंक छाचलीन कहं, तीनुक हींद्‌री बड़ायन फळ पेहलुत जड़ गुयो।
MAT 6:3 बाकुन जत्‌यार तु दान करु, ती जु तारु जेवड़्‌यु हात अगु करे, तीना काजे तारु डाखर्‌यु हात नी जाणनु चाहजे।
MAT 6:4 तुंद्‌रो धरम करलो काम सातायलो रवसे ती, तुंद्‌रा सातायला धरमेन कामेक देखण्‌यु भगवान बास तुहुंक ईनाम आपसे।
MAT 6:5 जत्‌यार तु दुवा करे, ती ढंगड़ा करन्‌या माणसेन तसा घुण करु, काहाकी माणसे काजे देखाड़ने वाटे भक्‌तीन घर मां ने सयड़केन मुड़ मां उबा रय्‌न दुवा करनु, तीनु काजे वारु लागे। मे तुंद्‌रे सी छाचलीन कहं की चे हींद्‌रा कामेन फळ ली लेदा।
MAT 6:6 बाकुन जत्‌यार तुहुं दुवा करु, ती आपणा घरेन कपरा मां जाय्‌न; बारनो दीन आपणा भगवान बास सी दुवा करजु। ती सातायली वात देखण्‌यु तुंद्‌रु भगवान बास तुहुंक ईनाम आपसे।
MAT 6:7 दुवा करनी वेळाय नी-यहुदी माणसेन तसा बक-बक घुण करु, काहाकी चे समजे की हींद्‌रे अदुस बुलने सी हींद्‌री सामळी लेसे।
MAT 6:8 तेरेमां तुहुं हींद्‌रेन तसा मां बणु, काहाकी तुंद्‌रु बास तुंद्‌रे मांगणे सी पेहलुत जाणे की तुहुंक काहनी चीजेन जरुवत छे।
MAT 6:9 तेरेमां तुहुं असा दुवा कर्‌या करु की: ए हामरा सरग वाळा भगवान बास, तु जु सरगे मां छे: तारो नाव चुखलो मानायणु चाहजे;
MAT 6:10 तारो राज आवे तारी मरजी जसी सरग मां पुरी हवे, तसीत ईनी धरती पर बी पुरी हवे।
MAT 6:11 दाहड़ीन हामुक चाहजे ततरोत खाणो आप्‌या कर।
MAT 6:12 ने जसा हामु हामरा गुना वाळा काजे माफ कर्‌या, तसुत तु बी हामरा गुना काजे माफ कर।
MAT 6:13 ने हामुक पारख मां घुण पाड़े, बाकुन कुहराय सी बचाड़; काहाकी राज ने ताकत ने सेक-सींगार जलम तारीत छे। आमीन।
MAT 6:14 तेरेमां कदी तुहुं माणसेन गुना माफ करसु, ती तुंद्‌रु सरग वाळु भगवान बास बी तुहुंक माफ करसे।
MAT 6:15 ने कदी तुहुं माणसेन गुना माफ नी करु, ती तुंद्‌रु सरग वाळु बास बी तुहुंक माफ नी करे।
MAT 6:16 जत्‌यार तुहुं उपास करु, ती ढंगड़ा करन्‌या माणसेन तसा तुंद्‌रा मुंहडा पर नुरपाणी नी उतार्‌नु चाहजे, ने चे हींद्‌रा मुंहडा लागाड़ रवे, काहाकी माणसे तीनुक उपास छे करीन जाणे। मे तुहुंक छाचलीन कहं की चे हींद्‌रो फळ ली लेदला छे।
MAT 6:17 बाकुन जत्‌यार तुहुं उपास करु ती, आपणा मुणका पर तेल लागाड़ीन मुंहडो धुवजु,
MAT 6:18 असा उपास करु ती, माणसेक मालुम नी पड़े, बाकुन भगवान बास काजे मालुम पड़से जी सातायली वात जाणे चु तुहुंक ईनाम आपसे।
MAT 6:19 आपणे वाटे धरती पर धन भेळो मां करु, जाहां वेधु खाय जाय ने कीटी लाग जाय, ने चां चुट्‌टा धाड़ु पाड़ीन ली जाती रवे।
MAT 6:20 बाकुन आपणे वाटे सरग मां धन भेळो करु, चां नीते वेधु खासे, ने नी कीटी लागे ने नी चुट्‌टा धाड़ु पाड़ीन चुरी करे।
MAT 6:21 काहाकी चां तुंद्‌रो धन छे, चां तुंद्‌रो मन बी रवसे।
MAT 6:22 डीलेन दिवु डुळु छे। तेरेमां कदी तारु डुळु वारु छे, ती तारो आखो डील बी वीजाळा मां रवसे!
MAT 6:23 बाकुन कदी तारु डुळु भुंडु छे, ती तारो आखो डील बी आंदारला मां रवसे; तेरे वजे सी चो वीजाळो तारे मां छे, कदी आंदारलो छे, ती चो आंदारलो कतरो मटो हवसे।
MAT 6:24 कुय माणसे दुय मालीकेन चाकरी नी कराये, काहाकी चु एक मालीक सी कुहराय ने दीसरा सी परम सी रवे, नीते एक मालीक साते हेळी-मेळीन रवसे ने दीसरा मालीक काजे भुंडोत जाणसे। तुहुंक भगवानेन ने धन-दोवलतेन दुयुन चाकरी नी कराये।
MAT 6:25 तेरेमां मे तुंद्‌रे सी कहं, की आपणा जीवेन वाटे जी फीकुर मां करु की हामु काय खासुन ने काय पीसुन; ने आपणा डीले पर काय पेहरसुन। ने काय जीव खाणा ने डील ने पुथल्‌या सी महंगो नी हय?
MAT 6:26 सरग वाळा चिरला काजे देखु! चे नीते वेरे, नीते काटे, ने नी खळा मां भेळो करे; तेबी तुंद्‌रु सरगेन बास तीनुक खावाड़े। काय तुहुं चिरला सी बेसका महंगा नी हय?
MAT 6:27 तुंद्‌रे मां असु कुण छे, चु फीकुर करीन आपणी उमर काजे बड़ाय सके? कुय नी।
MAT 6:28 ती हामरे धड़े पुथल्‌या नी हय करीन फीकुर काहा कर रया? तुहुं खेतेन फुलेक देखीन वीच्‌यार ते करु, चे कसाक अदे! ने चे तींद्‌रे वाटे मेहनत बी नी करे, ने तींद्‌रे वाटे दुरा काटीन पुथल्‌या बी नी बणावे।
MAT 6:29 तेबी मे तुंद्‌रे सी कहं की सुलेमान राजु बी, बेसकु ठट-बट मां रवतेलु, बाकुन तेबी तीना काजे तीनु फुले मायन एकान तसों बी पुथल्‌या पेहरीन वारु नी बणायो।
MAT 6:30 तेरेमां तत्‌यार भगवानेन खळा मायन चारा काजे, चो आज छे ने वाहणे चुल्‌हा आकठा मां धपाड़से, असला पुथल्‌या पेहरावे, ती ए कम भुरसु करन्‌या, तुहुं जाराक वीच्‌यार करु भगवान तुहुं नी पेहरावे काय।
MAT 6:31 तेरेमां तुहुं फीकुर करीन घुण कहुं की, हामु काय खासुन, ने काय पीसुन ने काय पेहरसुन।
MAT 6:32 काहाकी नी-यहुदी तीनी आखी चीज काजे हेरता रहे, बाकुन तुंद्‌रु सरगेन बास जाणे की, तुहुंक तीनी आखी चीजेन जरुवत छे।
MAT 6:33 तेरेमां पेहल तुहुं भगवानेन राजेन ने तेरे धरमेन हेरेमां रहु, ती जी आखी चीज तुहुंक जड़ जासे।
MAT 6:34 अळतेन वाहणेन फीकुर मां करु, काहाकी वाहणेन दाहड़ु, आपणी फीकुर आपसो कर लेसे; आजुन वाटे आजुत दुख बेसको छे।
MAT 7:1 कुय पर बी असलात नीयाव मां करु, असलुत भगवान बी तुंद्‌रु नीयाव नी करसे।
MAT 7:2 काहाकी जसा तुहुं असलात गुनु लागाड़ु, तसात तुंद्‌रे पर बी असलात गुनु लागाड़से; ने तीना नाप सी तुहुं नापसु, तीनात नाप सी तुंद्‌रे वाटे बी नापायसे।
MAT 7:3 तु काहा आपणा भायसेन डुळा मां कचरा काजे देखे, तारा डुळा मां भरायलु कचरु काहा नी देख रया?
MAT 7:4 जत्‌यार तारात डुळा मां डेंगु छे, ती तु आपणा भायस सी कसु कय सक्‌तेलु, की लाव मे तारा डुळाम सी कचरु नीकाळ दम?
MAT 7:5 ए ढंगड़ा करन्‌या, पेहल आपणात डुळा मां सी कचरु नीकाळ ले, तत्‌यार तु आपणा भायसेन डुळा मां सी कचरा काजे वारु देखीन नीकाळ सक्‌सी।
MAT 7:6 चुखली चीज कुतरा काजे मां आपु, ने मोती काजे सुहर्‌या अगळ मां नाखु; असो नी हवणु चाहजे की चे तीनी चीज काजे पाये तळे कुचरी देय ने पछा फीरीन तुहुंत काजे फाड़ देय।
MAT 7:7 मांगसु, ती तुहुंक आपसे; ने हेरसु ती तुहुं काजे जड़ी जासे; बारनो ठुकसु ती तुंद्‌रे वाटे उघड़ी जासे।
MAT 7:8 काहाकी जु कुय मागंसे, तीनु काजे आपसे; ने जे कुय हेरसे तीनु काजे जड़ी जासे; ने जु कुय बारनो ठुकसे, हींद्‌रे वाटे उघड़ी जासे।
MAT 7:9 तुंद्‌रे मां असु काहनु माणुस छे, की कदी तेरु पुर्‌यु तेरे सी रुटु मांगे, ती तीना काजे दगड़ु आपे?
MAT 7:10 नीते माछा मांगे, ती काय तुहुं तीनाक घड़सु आपसु?
MAT 7:11 अळतेन जत्‌यार तुहुं भुंडात हय्‌न, आपणा पुर्‌या काजे वारलु चीज आपणे जाणु, ती तुंद्‌रु सरगेन बास आपणा मांगणे वाळा काजे वारलु चीज काहा नी आपे।
MAT 7:12 हेरे वजे सी जो काय तुहुं चाहु की माणसे तुंद्‌रे साते करे, तसात तुहुं बी हींद्‌रे साते करु; काहाकी चुखला सास्‌तुर मां ने भगवानेन अघी सी आवणे वाळी वात बताड़ने वाळान बी सीकाड़नु असोत छे।
MAT 7:13 साकेड़ले वाट्‌ये मायन जावु, काहाकी चवड़ु छे चु वाट ने चु वाट नास हवे तीने वाट्‌ये ली जाय; ने बेसका छे जे तीने वाट्‌ये मायन जाय।
MAT 7:14 काहाकी साकेड़ली ने काठली वाट जी छे, ची वाट जीवन भीणी लीन जाय; थुड़ाक छे चे, तीनु काजे जड़ी जाय।
MAT 7:15 हामु लुच्‌चा भगवानेन अघी सी आवणे वाळी वात देखाड़न्‌या माणसे सी चेतीन रवु, चे गाडरान तसा सुदला बणीन तुंद्‌रेन्‌चां आवे। बाकुन चे लेंड्‌यान तसा आकेरला छे।
MAT 7:16 हींद्‌रा काम सी तुहुं तीनुक उळखी लेसु की। काय माणसे झाड़का सी अंगुर, नीते गखर्‌या-काटा सी अंजीरेन फळ तुड़े काय?
MAT 7:17 तेरे बदले हरेक एक वारलु झाड़का वारलु फळ लावे ने भुंडात झाड़का भुंडात फळ लावे।
MAT 7:18 वारलु झाड़का भुंडात फळ नी लाय सके, ने भुंडोत झाड़को वारलु फळ नी लाय सके।
MAT 7:19 जे-जे झाड़का वारलु फळ नी लावे, तीना काजे काटीन आकठा मां धपाड़ देसे।
MAT 7:20 हेरे वजे सी हींद्‌रा काम तुहुं उळखी लेसु।
MAT 7:21 जे माणसे मेसेक, ए मालीक, ए मालीक कय्‌न आयड़से, हींद्‌रे मां सी आखा सरगेन राज मां नी भराय सके, बाकुन जे मारा सरग वाळा बासेन मरजी पर चाले चेत सरगेन राज मां भरायसे।
MAT 7:22 तीने दाहड़े बेसका माणसे मेसेक असा कह्‌से, ए मालीक, ए मालीक, काय हामु तारे नाव सी भगवानेन अघी सी आवणे वाळी वात नी देखाड़्‌या, ने तारा नावे सी भुतड़ान आत्‌मा काजे नी नीकाळ्‌या, ने तारा नाव सी बेसको ताकुतेन काम नी कर्‌या काय!
MAT 7:23 तत्‌यार मे तींद्‌रे सी चुखोझण कय दीस, मे तुहुं काजे नी जाणो। ए पाप करने वाळा, मार धड़े सी छेटा हय जावु।
MAT 7:24 तेरेमां ज काहनुक मारी जी वात सामळीन माने, हयु तीना अक्‌कल वाळा माणसेन तसु छे, जु तेरा घर काजे चापर्‌या पर नेहु खुदीन बणायु।
MAT 7:25 ने पाणी पड़्‌यु, ने नदी आवी, आंधी आवी, ने तीना घर सी ठुकाय, तेबी च नी उदर्‌यो, काहाकी हेरु नेहु चापर्‌या पर खुदीन बणावलु हतलु।
MAT 7:26 “बाकुन जे काहनाक मारी जी वात सामळे ने तेरे पर नी चाले, चु तीना डेड़-अकल्‌या माणसेन तसु छे, चु तेरा घर काजे रेतळा पर नेहु खुदीन बणायु।
MAT 7:27 ने पाणी पड़्‌यु, ने नदी आवी ने आंधी आवी, ने तीना घर सी ठुकाय ने च आखो उदरी गुयो ने खत्‌तम हय गुयो!”
MAT 7:28 जत्‌यार ईसु जी आखी वात कय देदु, ती माणसे तेरी वात सामळीन चकराय गुया,
MAT 7:29 काहाकी चु यहुदी नीयम सीकाड़न्‌यान मास्‌तर्‌यान तसु नी बाकुन हकदारेन तसु तीनुक सीकाड़्‌यु।
MAT 8:1 जत्‌यार ईसु तीना बयड़ा सी नेचु उतर्‌यु, ती एक माणसेन मट्‌लु टुळु तेरे पछळ आयु।
MAT 8:2 ने देखु, एक कुड़ायलो तेरे धड़े आवीन ईसुक आंध्‌यु ने कह्‌यु, “ए मालीक, कदी तु चाहे, ती मेसेक वारु कर दे।”
MAT 8:3 ईसु तीनाक छीमीन असु कह्‌यु, “मारी मरजी बी असीत छे, तु चुखु हय जां!” ने हयु तत्‌यारुत कुड़ सी चुखा हय गुयु।
MAT 8:4 ईसु तीना काजे कह्‌यु, “देख, जी वात कुय काजे घुण कहें, बाकुन जाय्‌न पुजाराक बताड़जी ने मुसान कायदान अनसारे भेट चड़ावजी, ती आखा माणसे जाण जासे ने गवा बण जासे की तु वारु हय गुयु।”
MAT 8:5 जत्‌यार ईसु कफरनहुम सहर मां पुग्‌यु ती एक सुबेदार तेरे धड़े आवीन तेरे सी लीलघाय्‌न कह्‌यु,
MAT 8:6 “ए मालीक, मारा पावर्‌यान लखवु हय गुयु, ने घर मां पड़ीन एला कर रयु।”
MAT 8:7 ईसु तीना काजे कह्‌यु, “मे आवीन तीना काजे वारु कर दीस।”
MAT 8:8 सुबेदार जपाप आप्‌यु, “ए मालीक मे अतरु वारु नी हय की तु मारा घरेन साहळे आवे, बाकुन तु जात रय्‌न एक बुल कय दे, ती मारु पावर्‌यु वारु हय जासे।
MAT 8:9 काहाकी मे बी दीसरान हक मां रवण्‌यु एक नानुस हकदार्‌यु छे, ने सीपायड़ा मारे हक मां रहे जत्‌यार मे एक सी कहं ‘जां!’ ती चु जाय; ने दीसरा सी कह्‌, ‘आव!’ ती चु आवे; ने जत्‌यार मारा पावर्‌यु सी कह्‌, ‘ज कर!’ तीना काम काजे करे।”
MAT 8:10 ज सामळीन ईसु चक्‌कर मां पड़ गुयु, ने जे तेरे पछळ आवतेला तीनुक कह्‌यु, “मे तुंद्‌रे सी छाचलीन कहं की मे ईस्‌रायेली माणसे मां बी मेसेक अतरु पाक्‌कु भुरसु देखणे नी जड़्‌यु।
MAT 8:11 मे तुंद्‌रे सी कहं की उगेवणा ने बुडवणा सी बेसका माणसे आवीन अब्‌राहम ने इसाक ने याकुप साते सरग वाळा भगवानेन राज मां बठीन खाणो खासे।
MAT 8:12 बाकुन जे भगवानेन सरग राजेन हकदार्‌या माणसे छे, बाकुन चे भुरसु नी करे, तीनु काजे सरग राजेम सी बाहार आंदारला मां नाख देसे। चां कलपी-कलपीन रड़सु ने दात काजे ककड़ावता रवसु।”
MAT 8:13 तत्‌यार ईसु तीना सुबेदार काजे असु कह्‌यु, “जां, जसु तारु भुरसु छे, तसुत तारे वाटे बी हय जाय।” ने तेरु पावर्‌यु तत्‌यारुत वारु हय गुयु।
MAT 8:14 ईसु जत्‌यार पतरसेन घर मां आयु, ती पतरसेन सासुसेन सेरी आय रवलो देख्‌यु।
MAT 8:15 ईसु तीनी पर हात मेक्‌यु ने तेरो सेरी तत्‌यारुत उतरी ज्‌य, ने ची उठीन ईसुन चाकरी करने बाजी गुय।
MAT 8:16 जत्‌यार सांती वेळाय चे ईसु धड़े बेसका माणसे काजे लाया तींद्‌रे मां भुतड़ान आत्‌मा हतली ने ईसु तीनु आत्‌मा काजे तेरा बुल सी नीकाळ देदु; ने आखा मांदला काजे वारु कर्‌यु।
MAT 8:17 काहाकी ज बुल यसायाह भगवानेन अघी सी आवणे वाळी वात देखान्‌यान साहरे कह्‌लो हतलो च पुरो हवे, “चु आपसु हामरी आखी लुल्‌गाय काजे झेल लेदु ने हामरी मांदवाड़ काजे छेटु कर देदु।”
MAT 8:18 जत्‌यार ईसु तेरे चारे मेर एक मटला टुळा काजे देख्‌यु, ती डाबरान पली धड़े जाय्‌न हुकुम आप्‌यु की, तुहुं मेसेक ढंड्‌या मां बठाड़ीन दरीयान पली धड़ ली जाती रवु।
MAT 8:19 तत्‌यार एक यहुदी नीयमेन मास्‌तर्‌या ईसु धड़े आवीन कह्‌या, “ए मास्‌तर, जांहा बी तु जासी, मे तारे पुठ्‌ये आवीस।”
MAT 8:20 ईसु तीनुक कह्‌यु, “फुंदाळी खुखड़ीन दर रवे ने सरगे चिरलान बसणेन पुत्‌रु रवे; बाकुन माणसेन पुर्‌या वाटे ते मुणको ढाकणेन लग जागु नी हय।”
MAT 8:21 एक दीसरु चेलु ईसु काजे कह्‌यु, “ए मालीक मे तारे पुठ्‌ये आवीस बाकुन मेसेक मारा बासेन घर जाणी दे, की जत्‌यार चु मर जासे ती तीनाक गाड़ दीन मे तारे पुठ्‌ये आवीस।”
MAT 8:22 ईसु तीनाक कह्‌यु, “मरला काजे गाड़ने काम मरलात काजे करने दे; तु ते मारे पुठ्‌ये चाल।”
MAT 8:23 जत्‌यार ईसु ढंड्‌या मां बठ्‌यु ती तेरा चेला बी तेरे पुठ्‌ये बठ गुया।
MAT 8:24 ने, तीनी टेम दरीया मां उचकान बेसकी मटी आंधी आवी, ने दरीयान झलक ढंड्‌ये आपठायन बाकुन ईसु ते, सुवणे बाजी रवलु।
MAT 8:25 तत्‌यार चेला ईसु धड़े आवीन उठाड़्‌या ने कह्‌या, “ए मालीक हामुक!” बचाड़ नी ते “हामु आखा डुबीन मरने बाजी रया!”
MAT 8:26 ईसु तीनुक कह्‌यु, “ए! कम भुरसा वाळा, तुहुं काहा बीही रया!” तत्‌यार चु उठीन आंधी ने पाणी काजे लड़्‌यु, ने आखो सेळो पड़ गुयो।
MAT 8:27 ने चे चकराय गुया ने कह्‌णे लाग्‌या, “गुयु कसलु माणुस छे की आहळी ने पाणी बी हेरी वात काजे माने।”
MAT 8:28 जत्‌यार चु पली धड़े गदरेन्‌यान ईलाका मां पुग्‌यु, ती दुय माणसे तींद्‌रे मां भुतड़ान आत्‌मा हतली ची मसाण मां सी नीकळ्‌या ने ईसुक भेळा हवणे आया। चे अतरा ताकतवाळा हतला की कुय बी तीनी वाट सी जाय नी सकतेला।
MAT 8:29 चे आयड़ीन असा कह्‌या, “ए भगवानेन पुर्‌या, हामरे साते तारो काय काम छे? काय तु हामुक एला पाड़ने आय र्‌यु?”
MAT 8:30 हींद्‌रे सी ईतरेक छेटेस बेसकु मटु सुहर्‌यान टुळु चरने बाजी रवलु।
MAT 8:31 भुतड़ान आत्‌मा ईसुक असी कवीन लीलघायणे लागी की, “कदी तु हामु काजे अदमी मां सी नीकाळे, ती पला सुहर्‌यान टुळा मां मकली दे।”
MAT 8:32 ईसु तीनुक कह्‌यु, “जावु!” ने चे अदमी मां सी नीकळीन सुहर्‌यान टुळा मां भराय गुया, ने आखा टुळा आड़खा पर सी झपटीन पाणी मां डुबीन मर गुया।
MAT 8:33 ने सुहर्‌या काजे चारन्‌या गुवाळ्‌या ढास्‌या, ने सहर मां जाय्‌न हयो, च आखो कय देदा ने भुतड़ा लागला माणसेन काय हयो च बी कय देदा।
MAT 8:34 तत्‌यार आखा सहरेन माणसे ईसु सी मेळने करीन आयु, ने ईसुक देखीन लीलघाय्‌न कह्‌णे लाग्‌या की हामरी मुलकेम सी बाहर जाती रव।
MAT 9:1 अळतेन चु ढंड्‌या पर चड़ीन पली धड़े पुग्‌यु, ने आपसा गांव कपरनुह मां आयु।
MAT 9:2 तीनी टेमे थुड़ाक माणसे लखवान एक मांदवाड़ वाळा माणसे काजे खाट्‌ली पर मेकीन तेरे धड़े लाया। ईसु हींद्‌रु भुरसु देखीन, लखवान मांदला सी कह्‌यु, “ए पुर्‌या, तुसेक तारा पापेन माफी जड़ गुयली छे।”
MAT 9:3 तेरे वजे सी बेसका यहुदी नीयमेन मास्‌तर्‌या वीच्‌यार्‌या, “जु ते भगवानेन नाव-बद्‌दी करे।”
MAT 9:4 ईसु तींद्‌रा मनेन वात जाणीन कह्‌यु, “तुहुं तुंद्‌रा मन मां भुंडोत वीच्‌यार काहा कर रया?
MAT 9:5 एक जसों काय छे? ज्‌य कह्‌णु की, तारा पापेन माफी तुसेक जड़ गुय, नीते ज्‌य कह्‌णु, ‘की उठ ने चाल ने फीर।’
MAT 9:6 बाकुन तेरेमां तुहुं जाण लेवु की माणसेन पुर्‌या काजे कळी पर पाप माफ करनेन बी हक छे।” तत्‌यार हयु लखवान मांदला सी कह्‌यु, “उठ, तारी खाट्‌ली हाकलीन, तार घर जाती रव।”
MAT 9:7 चु उठीन तेरे घर जाती रयु।
MAT 9:8 माणसे ज देखीन बीही गुया, ने भगवानेन बड़ाय करने लाग्‌या जु माणसे काजे बी असु हक आप्‌यु।
MAT 9:9 ईसु चां सी अगु गुयु ने चु, मत्‌‌ती नावेन एक माणुस काजे फाळु उकाळनेन नाका पर बठलु देख्‌यु, ने तीना काजे कह्‌यु, “मारे पुठ्‌ये चाल।” चु उठीन ईसु पुठ्‌ये चाल पड़्‌यु।
MAT 9:10 एक दाहड़ु ईसु हेरा चेला पुठ्‌ये मत्‌‌तीन घर खाणो खाणे करीन बठ्‌यु, ती बेसका फाळु लेणे वाळा पापी माणसे आवीन, ईसु ने हेरा चेला साते खाणो खाणे बाजी रवला।
MAT 9:11 असो देखीन फरीसी माणसे ईसुन चेला काजे असा कह्‌या, “तुंद्‌रु मास्‌तर फाळु लेणे वाळा ने पापी साते काहा खाय रयु?”
MAT 9:12 ज सामळीन ईसु तींद्‌रे सी कह्‌यु, “दवा वारलु काजे नी चाहजे, बाकुन मांदला काजे चाहजे।
MAT 9:13 तेरेमां तुहुं जाय्‌न चुखला सास्‌तुर मां लिखली वात सीक लेवु: ‘मे जनवार्‌यान बादा नी चाहो बाकुन दया चाहो।’ काहाकी मे धरमी माणसे काजे नी, बाकुन पापी काजे बुलावणे आवलु छे।”
MAT 9:14 तत्‌यार युहन्‌नान चेला ईसु धड़े आवीन असा कह्‌या की, “हामु ने फरीसी माणसे उपास करजे, बाकुन तारा चेला उपास काहा नी पाळे?”
MAT 9:15 ईसु तीनुक कह्‌यु, “जत्‌यार लग दुल्‌लु तींद्‌रे पुठ्‌ये छे, ती काय अरात्‌या, दुखी हवसे काय? बाकुन चे दाहड़ा आवसे जत्‌यार दुल्‌लु तींद्‌रे सी अलग हय जासे, तत्‌यार चे उपास पाळसे।
MAT 9:16 “नवला पुथल्‌यान थीग्‌ळो जुन्‌ला पुथल्‌या पर कुय नी लागाड़े, काहाकी चो थीग्‌ळो तीना पुथल्‌या सी थुड़ोक अळी खेच लेय, ने चो अदुस फाट जाय।
MAT 9:17 ने माणसे नवलु अंगुरेन रस जुन्‌ली चामड़ान थयलि मां नी भरे, काहाकी असा करने सी थयलि फाटी जाय, ने पीयालु बगळी जाय ने थयलि रद हय जासे; बाकुन नवलु पीयालु नवली थयलि मां भरे ने चे दुयु बच जासे।”
MAT 9:18 ईसु तीनुक जी वात कवणे बाजी रवलु, एक हकदार आवीन तीना काजे आंध्‌यो ने कह्‌यु, “मारी बेटी हयुसुत मर गुयली छे, बाकुन तु आवीन तेरे पर हात मेक, ती ची जीवती हय जासे।”
MAT 9:19 ईसु उठीन तेरे पुठ्‌ये चाल पड़्‌यु ने तेरा चेला बी तेरे पुठ्‌ये चाल पड़्‌या।
MAT 9:20 तीनी टेमे एक बायर हतली, तेरे पोगराळो दुख लागलो बारे साल हय रवला, ने ची ईसु पछळ आय्‌न ईसुन पुथल्‌या काजे छीम लेदी।
MAT 9:21 काहाकी ची तेरा मन मां कवतेली, “कदी मे तेरा पुथल्‌यान छेवड़ाक छीमी लीस, ती मे वारु हय जायस।”
MAT 9:22 ईसु पछु फीरीन तीनीक देख्‌यु ने कह्‌यु “बेटी हिम्‌मत राख; तारु भुरसु तुसे काजे छुटकारु आप्‌यु।” अळतेन ची बायरी तत्‌यारुत वारु हय गुय।
MAT 9:23 जत्‌यार ईसु तीना हकदारेन घर मां पुग्‌यु ती पावळी आजाड़ने वाळाक ने माणसेन टुळाक रड़तेला देख्‌यु।
MAT 9:24 तत्‌यार ईसु कह्‌यु, “छेटा हय जावु, पुरे मरी नी, बाकुन सुय रय!” असु कह्‌यु अतरुत ने ईसुन हासी उड़ावणे बाजी गुया।
MAT 9:25 बाकुन जत्‌यार माणसेन टुळा काजे नीकाळ देदा, ती ईसु घर मां जाय्‌न पुरेन हात धर्‌यु, ने ची जीवती हय्‌न बठी हय गुय।
MAT 9:26 ने हीनी वातेन खबर तीना आखा देस मां चारे मेर मालुम हय गुयो।
MAT 9:27 जत्‌यार ईसु चां सी अगु जाणे बाजी गुयु, ने दुय आंदळा तेरे पछळ असा कय्‌न आवणे बाजी गुया, “ए दावुदेन अवल्‌यात, हामरे पर दया कर!”
MAT 9:28 जत्‌यार ईसु घर मां पुग्‌यु, ती चे दुय आंदळा तेरे धड़े आया, ने ईसु तींद्‌रे सी कह्‌यु, “काय तुहुंक भुरसु छे की मे ज्‌य कर सको?” चे ईसुक कह्‌या, “हव, मालीक।”
MAT 9:29 तत्‌यार ईसु तींद्‌रा डुळा छीमीन कह्‌यु, “तुंद्‌रु भुरसु छे, तसोत तुंद्‌रे वाटे हय जाय।”
MAT 9:30 ने चे देखणे बाजी गुया। ती ईसु तीनुक वारु समजाड़ीन कह्‌यु, “चेतीन, रवजु, जी वात कुय काजे घुण कवु।”
MAT 9:31 बाकुन चे घर मां सी जाती रया, ने अळतेन जी वात तीना देस मां आखे कय देदा।
MAT 9:32 ईसु खयड़े नीकळीन जाणे बाजी रवलु, ती माणसे एक गुंगा काजे तेरे मां भुतड़ान आत्‌मा चस्‌टी रवली, तीनाक बुलायतेलो नी ईसु धड़े लाया।
MAT 9:33 ने जत्‌यार ईसु भुतड़ा काजे नीकाळ देदु, ती गुंगो बुलने बाजी गुयो। तेरे वजे सी माणसेन टुळु चकराय गुयु ने असा कह्‌या, “ईस्‌रायेल देस मां असो वारु काम कदी नी देख्‌या।”
MAT 9:34 बाकुन फरीसी माणसे कह्‌या, “जु ईसु ते भुतड़ान आत्‌मान मुखीन जुर सी भुतड़ान आत्‌मा काजे नीकाळे।”
MAT 9:35 ईसु आखा सहर मां ने गांव मां फीरतु रयु, ने भगवानेन भक्‌तीन घर मां माणसेक सीकाड़तु रयु, ने भगवानेन राजेन खुस-खबरेन बारामां परचार करतु रयु, ने आखी भाती-भातीन मांदवाड़ ने लुल्‌गाय काजे वारु करतु रयु।
MAT 9:36 जत्‌यार चु माणसेन टुळा काजे देख्‌यु, ती ईसु काजे माणसे पर दया आय, काहाकी चे तीनु गाडरान तसा हींद्‌रु कुय राखवाळ्‌यु नी हतलु, चे दुख मां ने भटकला हतला।
MAT 9:37 तत्‌यार ईसु तेरा चेला काजे कह्‌यु, “मेर ते बेसकी छे, बाकुन मेर काटण्‌या दाहड़क्‌या थुड़ाक छे।
MAT 9:38 तेरेमां खेतेन मालीक सी लीलघाय्‌न कह्‌यु, की चु आपणा खेत मां मेर काटणे करीन दाहड़क्‌या मकली देय।”
MAT 10:1 ईसु आपसा बारे चेला काजे धड़े बुलायु ने तीनुक, भुतड़ा नीकाळनेन हक आप्‌यु, ने आखी भातीन मांदवाड़ ने आखी भातीन लुल्‌गाय काजे वारु करनेन हक आप्‌यु।
MAT 10:2 तीनु बारे नेवताळान नाव जो छे: पेहलु सीमोन, जु पतरस कह्‌वाये, ने तेरु भायस अन्‌दीरीयास; जब्‌दीन पुर्‌यु याकुप, ने तेरु भायस युहन्‌‌‌नु;
MAT 10:3 ने फीलीप्‌पुस, ने बरतुल्‌मे, ने थोमा, ने फाळु लेणे वाळु मत्‌‌ती, ने हलफाईन पुर्‌यु याकुप, ने तद्‌दे,
MAT 10:4 सीमोन, कनानी ने यहुदा ईस्‌करीयोती ने हयु ईसुक धुकु दीन धराड़ी बी देदु।
MAT 10:5 हीनु बारे चेला काजे ईसु ज हुकुम आपीन मकल्‌यु: नी-यहुदी माणसे भीणी घुण जावु, ने सामर्‌यान काहना बी सहर मां घुण जावु।
MAT 10:6 बाकुन ईस्‌रायेली जातीन माणसे मां जाजु, चे भगवान काजे ईसरीन खुवायला गाडरान तसा हय गुया।
MAT 10:7 ने वाट्‌ये चालता-चालता असो परचार करु, की सरगेन राज धड़ेत आय गुयलो छे!
MAT 10:8 मांदला काजे वारु करु, मरला काजे जीन्‌दा करु, कुड़ायला काजे चुखा करु, भुतड़ान आत्‌मा काजे नीकाळु। तुहुंक फुकट मां जड़लो छे, तुहुं बी फुकट मां आपु।
MAT 10:9 परचार करने जावु तत्‌यार, तुंद्‌री थयलि मां सनो, चांदी, नी ते पयस्‌या घुण ली जावु;
MAT 10:10 तुहुं वाट्‌ये वापरने करीन कांखुर जावु ती चां नीते झुळु राख्‌जु, नी दुय कुरता, नी खासड़ा, नी लाकड़ी लेजु, काहाकी दाहड़क्‌या काजे दाहड़की जड़नु चाहजे।
MAT 10:11 “काहना बी सहर मां नीते गांव मां जावु, ती चां पुगीन एक अदमीन पतु लागाड़ लेजु, ने चां सी तेरेन चां रवजु।”
MAT 10:12 तुहुं घर मां भरायु ती तीनुक संयबरकत आपजु।
MAT 10:13 कदी तीना घर मां माणसे भुरसु करन्‌यु रवसे, तीते तुंद्‌रो सांतीन संयबरकत हींद्‌रे पर हय जासे, बाकुन कदी चे भुरसु करन्‌या नी रहे, ती तुंद्‌रो संयबरकत तुंद्‌रे भेळु पछो आवसे।
MAT 10:14 जे कुय बी तुंद्‌रो आव-भाव नी करे, ने तुंद्‌री वात नी सामळे, ती तीना घर, ने तीना सहर सी नीकळता जाय्‌न आपणे पायेन धुळा काजे बी झाटकी देजु।
MAT 10:15 मे तुहुंक छाचलीन कहं की नीयावेन दाहड़े तीना सहरेन दुख सदोम ने अमोरा देसेन माणसेक अदुस डंड जड़से।
MAT 10:16 देखु, मे तुहुंक लेंड्‌यान तसा माणसेन ईचमां गाडरान तसु मकलो, तेरेसी घड़सान तसा कदर्‌या ने पेरवान तसा सुदा बणु।
MAT 10:17 बाकुन वेरी माणसे सी चेतीन रवु, चे तुहुंक धरीन पंचुन हात मां सुप देसे, ने तींद्‌रा भक्‌तीन घर मां ली जाय्‌न सपाटा देसे।
MAT 10:18 तुहुं मेसेक मानी रया करीन हकदार्‌या ने राजा अगळ ली जासे, काहाकी तुहुं मारा गवा छे। असा करीन तुहुं नी-यहुदी अगळ मारा गवा बणसु।
MAT 10:19 जत्‌यार चे तुहुंक धराड़ीन सीपायड़ान हात मां आप देसे, ती असी फीकुर घुण करु की हामु कसा ने काहली रीती सी कवसुन काहाकी ज काय तुहुंक कह्‌णु छे, च तीनीत टेमे बताड़ देसे।
MAT 10:20 काहाकी कह्‌णे वाळा तुहुं नी हय, बाकुन तुंद्‌रा भगवान बासेन जीव-आत्‌मा तुंद्‌रेम हय्‌न बुलसे।
MAT 10:21 भाय, भायस काजे अळी बास पुर्‌या काजे, मारने करीन धराड़से अळी पुर्‌या आयस बासेन वेला नी हवे ने तींद्‌रे भीणी उठीन तीनुक माराड़से।
MAT 10:22 मारा नाव पर भुरसु कर रया करीन आखा माणसे तुंद्‌रे सी भुंडा रवसे, बाकुन काहनु बी मरता लग गम खासे, चेत छुटकारु हात करसे।
MAT 10:23 जत्‌यार चे तुहुंक एक सहर मां एला पाड़े ती दीसरा सहर मां ढासी जाजु। मे तुहुं काजे छाचलीन कहं, की माणसेन पुर्‌या काजे पछु आवणे लग तुहुं ईस्‌रायेली देसेन आखा सहरेम फीरता-फीरता परचार करनेन काम पुरो नी कराये।
MAT 10:24 चेलु आपणा मास्‌तर सी मटु नी हय सके; ने पावर्‌यु आपणा मालीक सी मटु नी हय।
MAT 10:25 चेला काजे मास्‌तर, ने पावर्‌या काजे मालीक बराबर रहणुत वारु छे। कदी माणसे घरेन मालीक काजे भुतड़ु कह्‌यु, ती तेरा घरन्‌या काजे काय नी कह्‌या?
MAT 10:26 तेरेमां माणसे सी घुण बीहु; असो काय ढाकायलो नी हय, च उघाड़े असो नी हय; ने असो काय बी सातायलो नी हय, च मालुम नी हवे।
MAT 10:27 ज मे तुहुं काजे आंदारला मां कय रयु, तीना काजे तुहुं वीजाळो हवे तत्‌यार दीसरा काजे सामळाव जु; ज मे काय तुहुं काजे मन मां कह्‌लु च तुहुं, घरेन छत पर चहड़ीन परचार करजु।
MAT 10:28 ज डील काजे खत्‌तम करे, बाकुन आत्‌मा काजे खत्‌तम नी कर सके, तींद्‌रे सी मां बीहु; बाकुन तेरेत सी बीहु चु आत्‌मा अळी डील दुयु काजे नरक मां खत्‌तम कर सके।
MAT 10:29 काय एक पयस्‌या मां दुय घीनचीड़ा नी वेचाये? तेबी तुंद्‌रा सरग वाळा बासेन मरजी पाखुर तेरे मां सी एक बी मरीन भुयमां नी पड़े।
MAT 10:30 तुंद्‌रा मुणकान कान्‌या बी आखा गीणायला छे।
MAT 10:31 तेरेमां तुहुं बीहयु मां; काहाकी तुहुं तीनु घीनचीड़ा सी बड़ीन छे।
MAT 10:32 जु कुय बी माणसे अगळ मेसेक मान लेसे, तीना काजे मे बी आपणा सरग वाळा बास अगळ मान लीस।
MAT 10:33 बाकुन जु कुय बी माणसे अगळ मेसेक नी माने, ती मे बी आपणा सरग वाळा बास अगळ तीना काजे नीकारु कर दीस।
MAT 10:34 तुहुं मार बारामां असा समजी रया की मे कळी मां सुक-सांती लीन आवलु छे; मे सांती आपणे नी, बाकुन तलवार लीन आवलु छे।
MAT 10:35 मार पर भुरसु कर रया करीन, पुर्‌यु बासेन वीरुद करसे, ने पुरे मायन वीरुद करसे, ने उहड़ीस सासुसेन वीरुद करसे।
MAT 10:36 असा करीन मारा चेलान घरन्‌यात तेरा वेरी बण जासे।
MAT 10:37 “जे माय नीते बास काजे मारे सी अदुस परम करसे, चु मार पर भुरसु करन्‌यु नी हय; ने जे पुर्‌या नीते पुरे काजे मारे सी अदुस परम करसे, चु मार पर भुरसु करन्‌यु नी हय;
MAT 10:38 ने जे आपणु कुरुस लीन मारे पछळ नी चाले चु मारु भुरसु करन्‌यु नी हय।”
MAT 10:39 जु आपणा जीव काजे बचाड़से, चु खुवसे; ने जु मारे वजे सी आपणी जान खुवसे, तीना काजे जीवन जड़ जासे।
MAT 10:40 ज्‌य तुंद्‌रो आव-भाव करसे, चु मारो आव-भाव करे; ने ज मारो आव-भाव करे, चु मारा मकलने वाळा भगवानेन आव-भाव करे।
MAT 10:41 जु भगवानेन अघी सी आवणे वाळी वात देखाड़ने वाळा काजे भगवानेन अघी सी आवणे वाळी वात देखाड़ने वाळु छे करीन तेरो आव-भाव करे, तीना काजे भगवानेन अघी सी आवणे वाळी वात देखाड़ने वाळाक संयबरकत जड़से; ने जे वारलु माणुस काजे वारलु जाणीन आव-भाव करसे, तीना काजे वारलु माणुस काजे संयबरकत जड़से।
MAT 10:42 जु कुय ईनु नानला मां सी एक काजे मारु चेलु छे, करीन एक कळस्‌यु सेळो पाणी पावसे, मे तुंद्‌रे सी छाचलीन कह्‌वो की, चु कसु बी करीन आपणो फळ नी खुवे।
MAT 11:1 जत्‌यार ईसु तेरा बारे चेला काजे हुकुम आप देदु, ती चु तींद्‌रा सहर मां सीकाड़तु ने परचार करने करीन चां सी जाती रयु।
MAT 11:2 बपतीस्‌मा आपण्‌या युहन्‌नान चेला, ईसुन बारामां सामळ्‌या, ती चे जेलेम जाय्‌न युहन्‌ना काजे खबर कर्‌या। तत्‌यार युहन्‌‌‌नु तीनु चेला काजे मालीक ईसुन्‌चां जो पुछणे मकल्‌यु।
MAT 11:3 “काय आवणे वाळु मसी तु छे काय? की हामु काहनाक दीसरान वाट देखजे?”
MAT 11:4 ईसु जपाप आप्‌यु, “जो काय तुहुं देख्‌या ने सामळ्‌या, चो आखो युहन्‌ना काजे जाय्‌न कय देजु,
MAT 11:5 की आंदळा देखणे बाजी रया, लंगड़ा चालने फीरने बाजी रया कुड़ायला वारु हयन चुखा हवणे बाजी रया, ने बेहरा सामळने बाजी रया, ने मरला जीवता हय रया, ने गरीब काजे खुस-खबरेन वात सामळावे।
MAT 11:6 ने बेसकु वारु छे, जे मार वजे सी वीरखाय रया, बाकुन जे वीरखाये बीगुर, मार पर भुरसु नी करे।”
MAT 11:7 जत्‌यार चेला चां सी चाल देदा, ती ईसु युहन्‌नान बारामां माणसे सी कह्‌वणे बाजी गुयु, “तुहुं बयड़ा मां काय देखणे गुयला? काय वाहळा मां हालतेला सुट्‌या काजे देखणे गुयला काय?
MAT 11:8 कहुं ते खरा ती तुहुं काय देखणे गुयला? काय वारलु पुथल्‌या पेहेरला माणुस काजे? देखु, जे वारलु पुथल्‌या पेहरे, चे राजान हवेली मां रवे।
MAT 11:9 ती तुहुं काय देखणे गुयला? भगवानेन अघली वात बताड़न्‌या काजे देखणे गुयला? तीनु आक सी युहन्‌‌‌नु मटु माणुस छे तीनाक तुहुं देखणे गुयला।
MAT 11:10 जु हयुत युहन्‌‌‌नु छे तेरे बारामां असो लिखलो छे: ‘देख, मे मारा काहवाळ्‌या काजे तारे अगळ मकलो, जु तारे अगळ तारी वाट तीयार करसे।’
MAT 11:11 मे तुहुंक छाचलीन कह्‌वो, की जे बायरा सी पयदा हवला छे, चे युहन्‌ना बपतीस्‌मा देणेवाळा सी मटा नी हय; बाकुन जे सरगेन राज मां आखा सी नानला छे, चे तेरेसी मटु छे।
MAT 11:12 युहन्‌ना बपतीस्‌मा देणेवाळान दाहड़ा मां सी हय लग सरगेन राजेन वाटे बेसका मेहेनत कर रया, ने भगवानेन राज मां भरायणे करीन खुस-खबरेन नेवतो आखा काजे जड़ रयो राजेन हक काजे हात मां कर लेय।
MAT 11:13 युहन्‌ना लग आखा भगवानेन अघी सी आवणे वाळी वात देखान्‌यान ने मुसान साहरे लिखलो सास्‌तुर भगवानेन अघी सी वात कवता रया।
MAT 11:14 ने जी वात मान्‌नु हय ती मानी लेवु की युहन्‌ना हयुत एलीयु जु आवणे वाळु हतलु।
MAT 11:15 जतरा बी सामळी रया, चे वारु सामळीन समजणु चाहजे।
MAT 11:16 “मे हीनी पीड़ीन माणसेन बराबरी कुणी सी करो? जे तीनु पुर्‌यान तसा छे, जे हाटे मां बस रहण्‌या पुर्‌या सांय छे, जे आंबा-सांबा आयड़ीन असा कह्‌वे,
MAT 11:17 हामु तुंद्‌रे वाटे नाचणे पावळी आजाड़्‌या, ने तुहुं नी नाच्‌या; ने हामु तुंद्‌रे वाटे रड़ने करीन गीत गाया, बाकुन तुहुं नी रड़्‌या,
MAT 11:18 काहाकी युहन्‌‌‌नु ते, रुटु नी खादु ने नीते अंगुरेन रस नी पीदु, ने चे कह्‌वे, ‘तेरे मां भुतड़ान आत्‌मा छे।’
MAT 11:19 माणसेन पुर्‌यु खातु-पीतु आयु, ने चे कहें ‘देखु, हीजेरलु ने दारुड़्‌यु छे, ने माणसे सी फाळु लेणे वाळा ने पापीन दुस्‌तीदार छे!’ बाकुन अक्‌कल आपणेन काम सी छाचलु रवसे।”
MAT 11:20 तत्‌यार ईसु तीनु सहर वाळा माणसे काजे कीचवाय्‌न लड़ने बाजी गुयु, तींद्‌रे मां ईसु बेसका ताकुतेन काम करलु, काहाकी चे हींद्‌रो मन नी फेरव्‌यु।
MAT 11:21 “ए खुराजीन! सहर तुंद्‌रे वाटे बेसकी दुखेन वात छे, ए बेतसेदा सहर! तुंद्‌रे वाटे बेसकी दुखेन वात छे देख ताकुतेन काम तुंद्‌रे मां करला छे, कदी जे सुर सहर ने सीदोन सहर मां करलु रवतु, ती चे गंटाट्‌या पांगरीन, ने हींद्‌रा डील पर रखड़ु चुपड़ीन आपसा-आपसान मन पाप भीणी सी फेरवीन भगवान भीणी अळ जाता।
MAT 11:22 बाकुन मे तुहुंक कहं की, नीयावेन दाहड़े सुर ने सीदोन सहरेन माणसे काजे ज डंड जड़से, तेरे सी बी जादा डंड तुहुं काजे जड़से।
MAT 11:23 ए कफरनहुम! काय तु सरगे लग उचु हय जासी काय? नी तु ते पाताळेन बुन्‌दे लग पड़ीन जाती रवसी काहाकी जे ताकुतेन कामे तारे मां करला छे कदी जे काम सदोम सहर मां करतु ती चे आज लग नी सरतो।
MAT 11:24 अतरा मां मे तुहुंक कहं, नीयावेन दाहड़े, सदोम देसेन कुहर्‌या माणसे काजे ज डंड जड़से, तेरेसी बी अदुस डंड तुहुंक जड़से।”
MAT 11:25 तीनी टेमे ईसु कह्‌यु, “ए भगवान, सरगे ने कळीन मालीक, मे तारो तु बेसकु वारु कह्‌वो की तु हीनु वात काजे अक्‌कल वाळा ने समज वाळा सी साताड़ीन मेक्‌यु, ने नानला पुर्‌यु काजे देखाड़ीन आप देदु।
MAT 11:26 हव, ए बास, काहाकी तुसे जन वारु लागे।
MAT 11:27 “मारु भगवान बास मेसे आखो काय आप देदलु छे; ने पुर्‌या काजे छुड़ीन कुय बी बास काजे नी जाणे, हीनीत रीती सी बास काजे छुड़ीन कुय बी पुर्‌या काजे; नी जाणे ने चे तत्‌यारुत बास काजे जाणे तींद्‌रे पर पुर्‌यु बास काजे उजेंतु करे।
MAT 11:28 “ए आखा हारला ने भार दबायला माणसे, मारे धड़े आवु; मे तुहुंक आराम आपीस।
MAT 11:29 मारो जुड़ो आपणे उपर हाकली लेवु, ने मारे सी सीकु; काहाकी मे नीचळु ने मन मां सुदु छे; ने तुहुं तुंद्‌रा मन मां आराम जड़से।
MAT 11:30 काहाकी मारो जुड़ो हलको छे ने मारु भार फवरु छे।”
MAT 12:1 आरामेन दाहड़े ईसु ने हेरा चेला गहुंन खेते मायन जाणे बाजी रवला, ने तेरा चेला काजे भुक लागी तत्‌यार चे गहुंन उम्‌बी तुड़ीन चुळी-चुळीन खाणे बाजी गुया।
MAT 12:2 फरीसी माणसे ज्‌य देखीन ईसुक कह्‌या, “देख, तारा चेला ज काम कर रया, चो नीयम कायदा मां लिखलो छे, की आरामेन दाहड़े करनु वारु नी हय।”
MAT 12:3 ईसु तीनुक कह्‌यु, “काय तुहुं नी भण्‌या, की खरला सास्‌तुर मां लिखलो छे की दावुद राजा काजे ने, तेरा साते वाळाक भुक लागी तत्‌यार चु काय कर्‌यु?
MAT 12:4 चु कसु भगवानेन घर मां गुयु, ने चड़ावला रुटा खादु, तीना खाणा काजे नीते खाणु नीते तेरा साते वाळा खाणु, बाकुन मंदीरेन पुजारा वाटे अतरोत खाणेन वारु हतलो?
MAT 12:5 ज मुसान साहरे लिखला सास्‌तुर मां नी भण्‌या की मंदीरेन पुजारा आरामेन दाहड़े मंदीर मां आरामेन दाहड़ेन रीती काजे तुड़ देय ती बी चे गुनाळा नी रवे काय?
MAT 12:6 बाकुन मे तुहुं काजे कह्‌व, की भगवानेन सेवान-काम कर रयु चु मंदीर सी बी बेसकु मटु छे।
MAT 12:7 कदी तुहुं सास्‌तुर मां लिखली वात समजी जाता की, मे दया सी खुस हवो, बाकुन जनवार्‌यान बादा नी चाहजे, ती तुहुं नी-गुनाळा काजे गुनाळु नी ठेह्‌रावता।
MAT 12:8 माणसेन पुर्‌यु आरामेन दाहड़ान मालीक छे।”
MAT 12:9 चां सी चालीन ईसु तींद्‌रा भक्‌तीन घर मां गुयु।
MAT 12:10 चां एक माणुस हतलु, तेरु हात पांगळु हतलु चे ईसु पर गुनु लागाड़ने करीन तीनाक असा पुछ्‌या की, “काय आरामेन दाहड़े वारु करनु वारु छे?”
MAT 12:11 ईसु तीनु काजे कह्‌यु, “तुंद्‌रे मां असो कुण छे, तेरो एकुत गाडरो छे, ने तेरो गाडरो आरामेन दाहड़े गड्‌डा मां हीटी पड़े, ती चु तीना काजे धरीन बाहार नी नीकाळे काय?
MAT 12:12 माणुस ते गाडरा सी बेसको महंगो छे! तेरेमां आरामेन दाहड़े भलो करनु कायदान अनसारे वारु छे।”
MAT 12:13 तत्‌यार ईसु तीना माणुस सी कह्‌यु, “तारु हात लांबु कर।” ने चु लांबु कर्‌यु, ने तेरु हात दीसरा हातेन तसु वारु हय गुयु।
MAT 12:14 तत्‌यार फरीसी माणसे बाहर जाय्‌न ईसुन वीरुद मां असा वीच्‌यार कर्‌या, की हामु ईसुक कसा करीन मारजे।
MAT 12:15 ज्‌य जाणीन ईसु चां सी जाती रयु। ने बेसका माणसे तेरे पछळ पड़्‌या। ने ईसु आखा काजे वारु करतेलु।
MAT 12:16 बाकुन चु असु कय्‌न तीनुक चेतायु, “तुहुं दीसरा माणसे अगळ मारी बड़ाय करीन मेसेक उजेंतु घुण करजु।
MAT 12:17 काहाकी भगवानेन अघी सी आवणे वाळी वात बताड़न्‌या यसायान बुल पुरो करने करीन चु असु करतेलु; जसों लिखलो छे:
MAT 12:18 “देखु, ज्‌य मारु पावर्‌यु छे, हीनाक मे नेवाड़्‌लु छे, जु मारु लाटेक्‌लु पुर्‌यु छे, हेरेसी मारो मन खुस छे। मे मारी आत्‌मा हेर पर दीस, ने चु नी-यहुदी माणसे काजे नीयावेन खबर आपसे।
MAT 12:19 चु काहना साते लड़ाय नी करे, नी आयड़े, नी कुय हाटे मां तेरी अवाज सामळसे।
MAT 12:20 चु कुचळायला बुरे काजे नी तुड़े, ने कुळु आपतेला बामळा काजे नी उलवायणे देय, जत्‌यार लग चु नीयाव काजे आपते लग काम करसे।”
MAT 12:21 तत्‌यार चे आखा नी-यहुदी माणसे, मारा चेलान आस बण जासे।
MAT 12:22 तत्‌यार माणसे काहनेक दाहड़े आंदळा माणसेक ईसुन्‌चां लाया चु गुंगु बी हतलु, ने तीना माणसेम भुतड़ान आत्‌मा चस्‌टी रवली, ईसु तीना काजे वारु कर्‌यु, ने चु बुलने ने देखणे बाजी गुयु।
MAT 12:23 तेरेमां आखा माणसे असा कदी नी देख्‌या करीन ईसुन बारामां कहणे बाजी गुया, “हयु दावुदेन अवल्‌यात हसे?”
MAT 12:24 बाकुन फरीसी माणसे असा सामळीन कह्‌या, “ज ते भुतड़ान मुखी बालजबुलेन जुर सी माणसेम डीलेम सी भुतड़ा छेटे करे।”
MAT 12:25 ईसु तींद्‌रा मनेन वीच्‌यार जाणीन तीनुक कह्‌यु, “तीना काहना राज मां बेरजु पड़ जाय, च उजड़ी जाय, अळी काहनाक सहर नीते घरन्‌या तेरेमां बेरजु पड़ जाय, ती चे उजड़ी जासे।”
MAT 12:26 ने कदी भुतड़ु माणसेन डीलेम सी भुतड़ा काजे नीकाळे, ती हयु आपसान वीरुद करने बाजी जाय, ती हेरो राज कसों बणीन रवसे?
MAT 12:27 कदी मे भुतड़ान मुखीन मदत सी भुतड़ान आत्‌मा काजे नीकाळो ती तुंद्‌रा चेला कुणीन मदत सी भुतड़ा नीकाळे? तेरेमां चेत तुंद्‌रु हीसाब लीन तुंद्‌रु नीयाव करसे।
MAT 12:28 बाकुन कदी मे भगवानेन आत्‌मान मदत सी भुतड़ान आत्‌मा काजे नीकाळो, ती भगवानेन राज तुंद्‌रे ईचमां आय गुयलो छे।
MAT 12:29 नीते कसों कुय माणुस काहनाक ताकतवाळान घर मां भरायन तेरो धन हापकी सके चां लग की चु तीना ताकतवाळा काजे बांदी नी लेय? ती चु तेरा घरेन माल धन काजे हापकीन ली जाय सके।
MAT 12:30 जे मारे पुठ्‌ये नी हय चे मारे वीरुद मां छे, अळी जु मारे साते भेळो नी करे चु तीनुक खळवणेन काम कर रयु।
MAT 12:31 तेरेमां मे तुहुं काजे कह्‌वो, की माणसेन आखी भातीन पाप अळी खुड़ नीकाळनु माफ हय जासे, बाकुन चुखली-आत्‌मान वाक नीकाळसे तीनुक माफी नी जड़से।
MAT 12:32 जु कुय बी माणसेन पुर्‌यान वीरुद मां काय कह्‌वसे, तीनाक माफी जड़ जासे, बाकुन जु कुय बी चुखली-आत्‌मान वीरुद मां काय बी कह्‌वसे, तेरु पाप नी ते हीनी कळी ने अळी आवणे वाळी कळी मां बी माफी हवसे।
MAT 12:33 “कदी झाड़का काजे वारलु कह्‌वु, ती तेरा फळ काजे बी वारलु कह्‌वु, नीते झाड़का काजे भुंडोत कह्‌वु, ती तेरा फळ काजे बी भुंडोत कह्‌वु, काहाकी झाड़कान उळखान तेरा फळ सी हवे।
MAT 12:34 ए, घड़सान पीला, तुहुं भुंडात हयन कसा वारलु वात कय सकु? काहाकी जो मन मां भरायलु छे, चत तुंद्‌रा मुंहडाम सी बाहार आवे।
MAT 12:35 भलास्‌या माणुस आपणा वारलु कुठा मां सी वारु चीज नीकाळे, ने भुंडात माणुस भुंडा कुठा मां सी भुंडीत चीज नीकाळे।
MAT 12:36 “अतरामा मे तुहुं काजे कहं, नीयावेन दाहड़े चे एक-एक फालतु वातेन लेखु आपणु पड़से।
MAT 12:37 काहाकी तु तुंद्‌री वातेन वजे सी नी-गुनाळु, गीणायसु नीते गुनाळा गीणायसु।”
MAT 12:38 तीनी थुड़ाक यहुदी नीयमेन मास्‌तर्‌या ने फरीसी माणसे ईसुक पारखणे करीन असा कह्‌या, “ए मास्‌तर, हामुक वारलु कामेन सहलाणी देखाड़।”
MAT 12:39 “ईसु तीनुक जपाप आप्‌यु हीनी पीड़ीन कुहर्‌या ने छीनाळ्‌या माणसे एक सहलाणी देखणे हींडे!” बाकुन भगवानेन अघी सी आवणे वाळी वात देखान्‌या योनान सहलाणी अतरीत देखणे जड़से।
MAT 12:40 जसु योना तीन रात ने तीन दाहड़ा माछान पेट मां रवलु तसुत माणसेन पुर्‌यु बी तीन दाहड़ा ने तीन रात धरतीम माहीं रवसे।
MAT 12:41 नीनवे सहरेन माणसे नीयावेन दाहड़े हीनी पीड़ीन माणसे साते उठीन हीनुक डंड जड़े असा ठेरावसे, काहाकी चे योनान परचार सामळीन भीणी सी मन फेरव्‌या; ने देखु, जां चे छे जु योना, सी बी बेसकु मटु छे, भगवानेन वात सामळावण्‌यु उबु हय रयु।
MAT 12:42 दखवरा देसेन राणी नीयावेन दाहड़े हीनी पीड़ीन माणसे साते उठीन तीनुक डंड जड़े असा ठेरावसे, काहाकी ची राणी सुलेमानेन अक्‌कल सामळने करीन धरतीन खुणाम सी आवली, बाकुन देखु, जां छे चु सुलेमान सी बी अदु अकलवाळु उबु हय रयु।
MAT 12:43 जत्‌यार भुतड़ान आत्‌मा काहनाक माणुस काजे छुड़ीन जाती रवे, ती ची आराम करने करीन, उजाड़ी मां जागु हेरतु हींडे, ने जत्‌यार आराम करने करीन जागु नी जड़े।
MAT 12:44 तत्‌यार ची कह्‌वे, मे आपणा तीनात घर मां पछु जाती रय्‌स चां सी मे नीकळीन आवलु छे। ने पछी जाय्‌न तीना घर काजे सुंडलो, बाहरु-सुहरु करीन साप करलो ने जग-जग सींगारलो नर सुंडलो देखाय पड़े।
MAT 12:45 तत्‌यार ची जाय्‌न तेरे सी बी कुहेरला भुतड़ान आत्‌मा काजे भेळा करीन पुठ्‌ये ली आवसे, ने ची तीना माणसेम आवीन वसी जाय, ने च माणुस पेहले सी बी अदु गांडवाय जाय, हीनी कळीन भुंडला माणसेन एला बी असीत हय जासे।
MAT 12:46 जत्‌यार ईसु माणसेक सीकाड़नेत बाजी रवलु, तत्‌यार हेरी माय ने भायस बाहर उबा हय रवला ने ईसु काजे भेळा हवणे हींडी रवला।
MAT 12:47 काहनुस आवीन ईसु काजे कह्‌यु, “देख, तारी माय ने तारु भायस बाहार हुबा हय रया, चे तुसे काजे भेळा हवणे हींडे।”
MAT 12:48 ज्‌य सामळीन ईसु तीनाक कह्‌यु, “कुण छे मारी माय? ने कुण छे मारु भायस?”
MAT 12:49 ने हेरा चेला भीणी हेरु हात अगु करीन कह्‌यु, “देखु, मारी माय ने मारु भायस जेत छे।
MAT 12:50 काहाकी ज्‌य कुय मारा सरगेन बासेन मरजी पर चाले, हीयेत मारु भायस, ने मारी बहणीस, ने मारी माय छे।”
MAT 13:1 तीनेत दाहड़े ईसु घर मां सी नीकळीन दरीयान कीनारे धड़े जाय्‌न बठ गुयु।
MAT 13:2 ने दरीया धड़े ईसुन्‌चां बेसका माणसे आय लाग्‌या, ने चु ढंड्‌या पर चहड़ी गुयु, ने आखा माणसे दरीया धड़े उबा हय रवला।
MAT 13:3 ने ईसु तीनुक दाखलु मां बेसकी वात सीकाड़ने बाजी रवलु। एक बीज एरने वाळु किरसाण हेरा खेत मां बीज एरने गुयु।
MAT 13:4 एरता-एरता थुड़ाक बीज वाट धड़े पड़्‌या ने चिरला आवीन तीनुक ईछीन खाय गुया।
MAT 13:5 थुड़ाक बीज दगड़ाट्‌या जागा पर पड़्‌या, तीनुक बेसकु धुळु नी जड़्‌यु ने उंडु धुळु नी जड़नेन वजे सी चे छाटा उंगी गुया।
MAT 13:6 बाकुन दाहड़ु उंगीन तप्‌यु ती चे चीमाय गुया, ने मुळ उंडे नी गुया तेरेमां च धान चीमायन सुक गुयो।
MAT 13:7 थुड़ाक बीज झाड़का मां पड़्‌या ने काटाळस्‌या झाड़का मां मटा हय्‌न तीनुक चीबदी लेदा; ने मेर नी पाकी।
MAT 13:8 बाकुन थुड़ाक बीज वारलु जागा पर पड़्‌या, ने काहनाक सोव गुणा ने काहनाक सांठ गुणा काहनाक तीस गुणा पाक्‌या।
MAT 13:9 जतरा बी सामळी रया, “चे वारु सामळीन समजणु चाहजे!”
MAT 13:10 ईसुन चेला धड़े आवीन तीनाक असा पुछ्‌या, “तु माणसे काजे दाखला मां काहा सीकाड़े?”
MAT 13:11 ईसु हेरा चेला काजे असु जपाप आप्‌यु, तुहुं काजे सरगेन राजेन बारामां सातायली वात समजणेन वाटु जड़लु छे, बाकुन हाल दीसरा माणसेक नी जड़्‌यु।
MAT 13:12 काहाकी तेरे धड़े छे, तीना काजे आपसे ने तेरे धड़े बेसका हय जासे बाकुन तेरे धड़े काय बी नी हय तीना काजे ज्‌य काय बी तेरे धड़े छे चो बी मांग लीस।
MAT 13:13 मे हीनु काजे दाखला मां सीकाड़ो; की चे देखता जाय्‌न बी नी देखे ने सामळता जाय्‌न बी नी सामळे, ने नी समजे।
MAT 13:14 हींद्‌रे बारामां यसायाह ज्‌य भगवानेन अघी सी वात देखाड़ने वाळान पुरी हवे: तुहुं कान्‌टा सी ते सामळसु, बाकुन समजसु नी; ने डुळा सी देखसु, बाकुन तुहुंक नी पल्‌ले पड़े।
MAT 13:15 काहाकी हीनु माणसेन मन मटो हय गुयो, ने चे कान्‌टा सी जुर सी सामळे, ने चे तींद्‌रा डुळा काजे मीच लेदला छे; काय असो नी हवे की चे डुळा सी देखे, ने कान्‌टा सी सामळे, ने मन सी समजे, ने पछा फीर जाय, मे तीनुक वारु करीस।
MAT 13:16 बाकुन बरकतवाळा छे तुंद्‌रा डुळा, की चे हय वारु देखे; ने बरकतवाळा छे तुंद्‌रा कान्‌टा हय चे वारु सामळे।
MAT 13:17 काहाकी मे तुंद्‌रे सी छाचलीन कह्‌वो की बेसका भगवानेन अघी सी आवणे वाळी वात देखाड़न्‌यान अळी धरमी ने चाह्‌या की जी वाते तुहुं देखु, ची देखे, बाकुन नी देख्‌या; ने ज्‌य वात तुहुं सामळु, ची सामळे, बाकुन नी सामळ्‌या।
MAT 13:18 “हय तुहुं बीज एरने वाळान दाखलान मतलब सामळु।
MAT 13:19 ज्‌य कुय राजेन बुल सामळीन नी समजे, तेरा मन मां ज्‌य काय बीज एरलो हतलो, तीना काजे च भुतड़ो आवीन भगवानेन बुल हापकीन लीन जाती रवे। जु हयुत छे, ज वाटे धड़े बीज एरलो हतलो।
MAT 13:20 चापर्‌या वाळी जागा मां पड़ला बीज तीनु माणसेन सहलाणी छे चे भगवानेन बुल सामळतात खुस हय्‌न मान लेय।
MAT 13:21 बाकुन मुळे उंडा नी हवणेन वजे सी चे थुड़ाक दाहड़ा जीवे, ने जत्‌यार बुलेन वजे सी दुख नीते वेला हवे ती तत्‌यारुत भुरसु करनु छुड़ देय।
MAT 13:22 जे बीज काटाळस्‌या मां पड़्‌या, चे बीज माणसेन सहलाणी छे जे भगवानेन बुल काजे सामळे ते खरा, बाकुन अळी चे जीवणेन फीकुर करीन ने मातला बन्‌ने हेर करीन भगवानेन बुल काजे दड़पी देय, ने चे फळ नी लावे।
MAT 13:23 ज्‌य वारलु जागा मां बीज एरलो छे, ज्‌य हयुत छे, भगवानेन बुल काजे सामळीन समजे, ने फळ लावे; कुय सोव गुणा, कुय सांठ गुणा, ने कुय तीस गुणा।”
MAT 13:24 ईसु तीनुक एक अळी दाखलु कह्‌यु: “सरगेन राज तीना माणसेन तसों छे, चु तेरा खेत मां वारलु बीज एरलु छे।
MAT 13:25 बाकुन जत्‌यार माणसे सुवणे बाजी रवला, ती तेरु वेरी आवीन गहुं मां जळ-गहुं एरीन जाती रयु।
MAT 13:26 जत्‌यार डीरा नीकळे ने पान्‌टा लाग्‌या ती जळ-गहुंन बीज देखाव पड़े।
MAT 13:27 अतरामा पावर्‌या मालीकेन घर आवीन मालीक काजे कह्‌या, ए मालीक, तु ते तारा खेत मां वारलु गहुंन बीज नी एरलु? ती जळ-गहुंन कसा उंग्‌या?
MAT 13:28 ईसु तीनुक कह्‌यु, ज काहना वेरीन काम छे। ती पावर्‌या तीनाक पुछ्‌या ‘काय तारी मरजी हय?’ ती हामु जाय्‌न तीनु जळ-गहुं काजे उखाळ देजे।
MAT 13:29 मालीक कह्‌यु, ‘नी, असा मां करु नीते कांखुर मायन जळ-गहुं भेळा वारलु गहुं बी उखळी जासे।
MAT 13:30 काटणे लग दुयु काजे एक साते मटा हवणे देवु ने काटणेन टेम मां काटणे वाळा सी कवीस की पेहल जळ-गहुं भेळा करीन धपाड़ने करीन हींद्‌रा गाठड़ा बांद लेवु, ने गहुं काजे मारा खळा मां भेळा करु।’”
MAT 13:31 ईसु तीना काजे एक अळी दाखलु कह्‌यु: “सरगेन राज रायन दाणान तसों छे, तीना काजे कुय एक माणुस लीन आपणा खेत मां चुप देदु।
MAT 13:32 च ते दीसरा आखा बीज सी नानो ते देखाये बाकुन जत्‌यार मटो हय जाय तत्‌यार आखा झाड़का सी डाळ बण जाय ती सरगेन चिरला आवीन पुत्‌रा बांदी लेय।”
MAT 13:33 ईसु तीनुक अळी एक दाखलु: “सामळायु सरगेन राज तीना खाण्‌या-सुडान तसों छे, तीना काजे एक काहनीक बायरी लीन तीन चोवकी पीठा मां भेसकी, ने आखा पीठान खटासो हय ज्‌य।”
MAT 13:34 ईसु जी आखी वात दाखलु दीन माणसे काजे सीकाड़तेलु, ने तीनुक दाखला पाखुर ईसु तीनुक काय बी नी सीकाड़्‌यु।
MAT 13:35 की ज बुल भगवानेन अघी सी आवणे वाळी वात देखाड़ने वाळान साहरे असु कह्‌लु, “मे दाखलु कह्‌वणे करीन मारो मुंहडो खुलीस; मे तीनी वात काजे जी कळी घड़लु ती सी ढाकायली वात उजेंतु कयस।”
MAT 13:36 तत्‌यार चु टुळा काजे छुड़ दीन घर मां आयु, ने तेरा चेला तेरे धड़े आवीन कह्‌या, “खेतेन जळ-गहुंन दाखलान मतलब काय हवे चो हामुक समजाड़ी दे।”
MAT 13:37 ईसु तीनुक जपाप आप्‌यु, “वारलु बीज एरने वाळु किरसाण, माणसेन पुर्‌यु छे।”
MAT 13:38 ने खेत जी कळी छे, वारलु बीज भगवानेन राजेन माणसे छे, ने जळ-गहुंन बीज कुहर्‌या वेरीन माणसे छे।
MAT 13:39 चु वेरी जळ-गहुं एर्‌यु चु भुतड़ु छे; काटणी कळी मां खत्‌तम हवणी छे, ने काटण्‌यु सरग वाळा काहवाळ्‌या छे।
MAT 13:40 जसा माणसे जळ-गहुं भेळा करीन धपाड़ी देय, तसीत जी कळी खत्‌तम मां हवसे।
MAT 13:41 माणसेन पुर्‌यु तेरा सरग वाळा काहवाळ्‌या काजे मकलसे, ने चे तींद्‌रा राज मां सी आखा पाप करने वाळा काजे भगवानेन राजेम सी अलग करीन तीनुक भेळा करसे।
MAT 13:42 ने तीनुक आकठान डहरा धकली देसे, चे माणसे आकठी मां बेसका रड़से ने दात ककड़ावता रवसे।
MAT 13:43 तीनी टेमे वारलु माणसे आपणा बासेन राज मां दाहड़ान तसा चमकसे। जतरा बी सामळी रया, चे वारु सामळीन समजणु चाहजे।
MAT 13:44 “सरग वाळा भगवानेन राज खेत मां सातायला धनेन तसों छे, तीनाक काहनाक माणुस काजे जड़्‌यो ने साताड़ी देदु, ने धव हयु ने जाय्‌न तेरो आखो काय हतलो चो वेची देदु ने तीना खेत काजे मुल ली लेय।
MAT 13:45 “अळी सरगेन राज एक धंदु करने वाळान तसों छे, चु वारलु मोतीन हेर मां हतलु।
MAT 13:46 जत्‌यार तीना काजे एक बेसका महंगलो मोती जड़ी गुयो, ती हयु जाय्‌न आखो काय हतलो चो वेची देदु, ने तीनी मोती काजे मुल ली लेदु।
MAT 13:47 “सरगेन राज तीना मटला जाळेन तसों छे, ज दरीया मां नाख्‌यु, ने आखी भातीन माछा काजे सेमटी लावे।
MAT 13:48 ने जत्‌यार आखी जाळ माछा भराय जाय, ती माछा धरने वाळा तीना काजे भेळा करे, ने बठीन वारलु-वारलु माछी काजे ते ठाहरा मां भेळा कर्‌या, ने रद्‌दी-रद्‌दी काजे नाख देदा।
MAT 13:49 कळी खत्‌तम हवणेन टेमे बी असोत हवसे। सरग वाळु काहवाळ्‌यु धरती पर आखी दुर जासे, वारलु माणसेन ईचमां सी पापी काजे अलग करसे,
MAT 13:50 अळी तीनु काजे आकठान डहरा मां नाख देसे। चां चे माणसे तीना आकठान डहरा मां बेसका रड़से ने दात ककड़ावता रवसे।
MAT 13:51 “ईसु तेरा चेला काजे कह्‌यु तुहुं जी आखी वात काजे समजी गुया काय?” चे ईसुक कह्‌या “हव।”
MAT 13:52 ईसु तीनुक कह्‌यु, “तेरेमां एक-एक यहुदी धरमेन कायदु सीकाड़ने वाळु मास्‌तर्‌यु जु सरगेन राजेन चेलु बण्‌यु, तीना घरेन मालीकेन तसु छे, चु आपणा कुठाम सी नवली ने जुन्‌डली चीज नीकाळे।”
MAT 13:53 जत्‌यार ईसु जु आखु दाखलु कय देदु, ती चां सी जाती रयु।
MAT 13:54 ने नासरत सहर मां आय्‌न तींद्‌रा भक्‌तीन घर मां तीनुक असु सीकाड़ने बाजी गुयु, ती चे चकराय गुया ने कह्‌णे बाजी गुया, “हीना काजे अतरी अक्‌कल ने ताकुतेन काम करनेन जुर कां सी जड़्‌यु?”
MAT 13:55 काय जु सुतारेन पुर्‌यु नी हय? ने काय हेरी आयसेन नाव मरीयम, ने तेरा भायसेन नावे याकुप, युसुफ, सीमोन ने यहुदा हेरात भायस छे।
MAT 13:56 ने हेरी आखी बहणीस हामरे ईचमां ते रवे? ती हीनाक जी अक्‌कल ने जुर कां सी जड़्‌यु?
MAT 13:57 चे नासरत सहर वाळा, ईसु पर भुरसु नी कर्‌या, तेरेमां ईसु तीनुक कह्‌यु, “भगवानेन अघी सी आवणे वाळी वात देखाड़ने वाळाक आपणा सहर ने आपणात घर मां ईज्‌जत नी जड़े।”
MAT 13:58 माणसेन नी भुरसा देखीन, ईसु चां बेसका ताकुतेन काम नी कर्‌यु।
MAT 14:1 तीनी टेमे गलील जीलान राज करन्‌यु हेरोदेस राजु ईसुन बारामां सामळ्‌यु,
MAT 14:2 ने हेरा पावर्‌या काजे कह्‌यु, “गुयु युहन्‌ना बपतीस्‌मा आपणे वाळु छे! चु मर्‌या-सर्‌याम सी जीवतु हय ज्‌य, तेरेमां बेसका मटा ताकुतेन काम देखाड़ने बाजी रयु।”
MAT 14:3 काहाकी हेरोदेस राजु हेरा भायस फीलीप्‌युसेन बायरी हेरोदीयासेन वजे, सी युहन्‌ना काजे धरीन बांदीन जेल मां नाख देदा।
MAT 14:4 काहाकी युहन्‌ना तीना काजे कह्‌लु की भायसेन बायरी काजे राखणु तारे वाटे वारु नी हय।
MAT 14:5 तेरेमां चु युहन्‌ना काजे माराने हींडी रवलु, बाकुन गड़दी वाळा माणसे सी बीहतेलु काहाकी चे युहन्‌ना काजे भगवानेन अघी सी आवणे वाळी वात देखाड़न्‌यु मानतेला।
MAT 14:6 बाकुन जत्‌यार हेरोदेस राजु पयदा हवलु चु दाहड़ु आयु, ती हेरोदीयासेन पुरे हेरोदेस राजु तेरा मेजवान्‌यान ईचमां नाचीन देखाड़ी ने हेरोदेस राजु देखीन खुस हय गुयु।
MAT 14:7 तेरेसी ज देखीन हेरोदेस राजु सगुन खाय्‌न वायदु कर्‌यु, “जो काय तु मांगसी, च मे तुसेक आप दीस।”
MAT 14:8 हेरी माय हीनीक पेहलुत सीकाड़ देदली, “बपतीस्‌मा आपण्‌या युहन्‌नान मुणको तळी मां हींताळुत मांगाड़ीन आप दे।”
MAT 14:9 हेरोदेस राजु दुखी हयु, बाकुन हेरी सगुन, ने मेजवान्‌यान वजे सी, तीनी पुरेन वात नी काट्‌यु।
MAT 14:10 हेरोदेस राजु जेल मां युहन्‌नान मुणको काटीन लावु करीन माणसे काजे मकल्‌यु।
MAT 14:11 ने युहन्‌नान मुणको तळी मां लाया, ने तीनी पुरे काजे आप देदा, मुणको ची पुरे हेरी माय काजे आप देदी।
MAT 14:12 तत्‌यार युहन्‌नान चेला आया, जी वात सामळीन जेल मां गुया ने तेरा डील काजे ली जाय्‌न गाड़ देदा, ने अळतेन जाय्‌न ईसु काजे खबर कर्‌या।
MAT 14:13 जत्‌यार ईसु युहन्‌नान मरनेन खबर सामळ्‌यु, ती ईसु ढंड्‌या पर चहड़ीन चां सी काहनीक सुनसान जागा मां, एखलुत जाती रयु। माणसे ज सामळीन सहर-सहर सी नीकळीन ईसु पछळ चाल पड़्‌या।
MAT 14:14 ईसु ढंड्‌याम सी उतर्‌यु ती एक बेसकु मटु माणसेन टुळु देख्‌यु, ने तीनाक तीनु माणसे पर दया आय, ने तींद्‌रा मांदला काजे वारु कर्‌यु।
MAT 14:15 जत्‌यार सांती वेळाय तेरा चेला ईसु धड़े आवीन कह्‌या, “जी सुन्‌ली जागा छे, ने दाहड़ु ढळ गुयु; तेरेमां हय हीनु माणसे काजे जाणी दे, की जे गांव मां जाय्‌न आपणे-आपणे वाटे रुटा मुल ली लेय।”
MAT 14:16 ईसु चेला काजे कह्‌यु, “हीनुक मकलनु जरुड़ी नी हय! तुहुंत हीनु काजे काहीस खाणे आपु।”
MAT 14:17 चेला ईसुक कह्‌या, “जां हामरे धड़े पांच रुटा ने दुय माछा छे अळी दीसरो काय बी नी हय।”
MAT 14:18 ईसु कह्‌यु, “चे रुटा ने माछा काजे मारे धड़े लावु।”
MAT 14:19 तत्‌यार ईसु माणसे काजे चारा पर बठणे करीन कह्‌यु, ने तीनु पांच रुटा ने दुय माछा काजे लेदु; ने सरगे भीणी भाळीन भगवान काजे कह्‌यु तु बेसकु वारु छे करीन कह्‌यु, माछा ने पांच रुटा तुड़ी-तुड़ीन चेला काजे आप्‌यु, ने चेला माणसे काजे आप्‌या।
MAT 14:20 जत्‌यार आखा माणसे खाय्‌न आफरी गुया, ती चेला बचला रुटान टुकड़ा सी बारे चार्‌या भराय गुया।
MAT 14:21 ने खाणे वाळा बायरा ने पुर्‌या काजे छुड़ीन, पांचेक हजार अदमीत हतला।
MAT 14:22 तत्‌यार हयु तत्‌काल हेरा चेला काजे ढंड्‌या पर चहड़ने करीन कह्‌यु, मे माणसे काजे मकलो चां लग पली धड़े जाती रवु।
MAT 14:23 चु माणसे काजे मकलीन, दुवा करने करीन बयड़ा पर जाती र्‌यु; ने सांतु लग ईसु चां एखलुत हतलु।
MAT 14:24 तीनी टेमे ढंड्‌यो दरीयान ईचमां सहर सी बेसके छेटे हतलो ने लहर सी अथोन-अथो हालतेलो, काहाकी आहळो सांबो सी आवतेलो।
MAT 14:25 ने ईसु कुकड़ा वासणीक पाणी पर चालीन तींद्‌रे भीणी आयु।
MAT 14:26 चेला ईसु काजे पाणी पर चालीन आवतेलु देखीन घाबराय गुया। ने आयड़ीन कह्‌या, “जु ते भुतड़ु छे करीन!” ने बीही गुया जुर सी आयड़ने बाजी गुया।
MAT 14:27 तत्‌यार ईसु तीनुक कह्‌यु, “हिम्‌मत राखु! मेत छे, बीहु मां।”
MAT 14:28 पतरस ईसु काजे कह्‌यु, “ए मालीक, कदी तुत छे, ती मेसे तारे धड़े पाणी पर चालीन आवणेन हुकुम आप।”
MAT 14:29 ईसु हुकुम कह्‌यु, “आव!” तत्‌यार पतरस ढंड्‌या पर सी उतरीन ईसु भीणी पाणी पर चालीन जाणे बाजी गुयु।
MAT 14:30 बाकुन आहळी काजे देखीन बीही गुयु, ने जत्‌यार डुबणे बाजी गुयु ती आयड़ीन कह्‌यु, “ए मालीक मेसे बचाड़!”
MAT 14:31 ईसु तत्‌यारुत हात अगु करीन तीना काजे धर लेदु, “ने कह्‌यु, ए कम भुरसु करन्‌या, तु काहा संक्‌या कर्‌यु?”
MAT 14:32 जत्‌यार ईसु पतरस भेळु ढंड्‌या मां चड़ गुयु, ती आहळी हुगी रय गुय।
MAT 14:33 तेरेमां जे ढंड्‌या बठी रवला चेला ईसुन पाये पड़ीन आंध्‌या ने कह्‌या, “छाचलीन, तु भगवानेन पुर्‌यु छे।”
MAT 14:34 अळतेन चे पली धड़ गन्‌नेसरत सहर मां आया।
MAT 14:35 ती चां वाळा माणसे ईसु काजे उळखी लेदु ने आड़े-धड़ेन आखा देस मां खबर मकल्‌या ने आखा मांदला काजे ईसु धड़े लाया,
MAT 14:36 ने ईसु सी लीलघाय्‌न कह्‌णे लाग्‌या, की चु तीनुक तारा पुथल्‌यान कुर अतरुत छीमणी दे; ने जतरा तीना काजे धर्‌या ने चे वारु हय गुया।
MAT 15:1 तत्‌यार यरुसलेम सी थुड़ाक फरीसी माणसे ने यहुदी नीयमेन मास्‌तर्‌या ईसु धड़े आवीन असा पुछ्‌या।
MAT 15:2 “तारा चेला डाहा-बुड़ा रीती-भाती काजे काहा नी पाळता? ने हीया मुयळा हय बी हात नी धुवे ने रुटा खाय?”
MAT 15:3 ईसु तीनुक कह्‌यु, “तुहुं तुंद्‌रा डाहा-बुड़ान रीती नेम पाळने करीन भगवानेन हुकुम काहा तुड़ रया?”
MAT 15:4 काहाकी भगवानेन कवलु, तारा आयस-बासेन अबरु राख्‌जी, ने जे कुय बास नीते माय काजे भुंडात करीन कहें, तीनाक मार नाखु।
MAT 15:5 बाकुन तुहुं कह्‌वु की कदी कुय आपणा आयस-बास सी असु कय देय, गुयो काय बी मे तुहुंक आप सकतेलु, चो मे भगवान काजे भेट चड़ाय देदु।
MAT 15:6 असो नी हय की आपणा आयस-बासेन अबरु नी करे, तेरेन तसा तुहुं बी तुंद्‌रा डाहा-बुड़ान रीती सीकाड़ीन भगवानेन बुल काजे टाळ देवु।
MAT 15:7 ए ढंगड़ा करन्‌या! यसायाह तुंद्‌रे बारामां जी भगवानेन अघी सी आवणे वाळी वात देखाड़्‌यु वारु कवली छे,
MAT 15:8 जे माणसे मुंहडा पर ते मारी ईज्‌जत करे, बाकुन हींद्‌रो मन मारे सी छेटे रवे।
MAT 15:9 ने जे असलात मारी भक्‌ती करता रवे, काहाकी माणसेन रीत काजे भगवानेन कायदु छे, करीन सीकाड़े।
MAT 15:10 तत्‌यार ईसु माणसे काजे तेरे धड़े बुलायन तीनुक कह्‌यु, तुहुं आखा मारी “सामळु, ने समजु।
MAT 15:11 ज्‌य मुंहडा मां जाय, च माणसे काजे नी वीटाळे, बाकुन गुयो मुंहडा सी नीकळे, चत माणसे काजे वीटाळे।”
MAT 15:12 तत्‌यार चेला आवीन ईसु काजे कह्‌या, “काय तु जाणे की फरीसी माणसे काजे ज्‌य बुल सामळीन तीनुक वारु नी लाग्‌यो?”
MAT 15:13 ईसु जपाप आप्‌यु, “ज रुपो मारु सरगेन बास नी चुप्‌यु, तीनाक उखाळी नाख देसे।
MAT 15:14 हीनु काजे रहणी देवु; जे आंदळा छे, ने आंदळा कदी आंदळा काजे वाट देखाड़े ती दुयु डहरा मां कुद पड़से।”
MAT 15:15 जी वात सामळीन पतरस ईसु काजे कह्‌यु, माणसेन मुंहडाम कथो नीकळे च माणुस काजे वीटाळ देय च काय छे, “जु दाखलु हामु काजे समजाड़ दे।”
MAT 15:16 ईसु कह्‌यु, “काय तुहुं बी हय लग नी पल्‌ले नी पड़्‌यो काय?
MAT 15:17 काय तुहुं नी जाणु की ज्‌य काय मुंहडा मां जाय च पेट मां पड़े ने बाहरा बठणे जाय ती नीकळी जाय?
MAT 15:18 बाकुन ज्‌य काय मुंहडाम सी नीकळे, ची वात माणसेन मन सी नीकळे, ने जीत वात माणसे काजे वीटाळ देय।
MAT 15:19 काहाकी भुंडला वीच्‌यार माणसेम सी हव तींद्‌रा मनेम सी नीकळे, हत्‌या, बायरी साते भुंडोत काम छीनाळो, झुटी गवाय ने वाक नीकाळनु मन मां सी नीकळे।
MAT 15:20 आखी भुंडीत वात माणसेन मन मां सी नीकळे, बाकुन हात नी धुवे ने रुटा खाय ती माणुस काजे नी वीटाळे।”
MAT 15:21 ईसु चां सी नीकळीन, सुर ने सेदा ईलाका भीणी जाती रयु।
MAT 15:22 तीना परदेस सी एक कनानी जातीन बायरी नीकळीन आवी, ने आयड़ीन-आयड़ीन कवती रय, “ए मालीक! दावुदेन अवल्‌यात, मार पर दया कर! मारी पुरेन भुतड़ु चस्‌टी रयु, ने ची बेसकी एला कर रय।”
MAT 15:23 बाकुन ईसु तीनी काजे काय बी जपाप आप्‌यु। तत्‌यार ईसुन चेला ईसुन्‌चां आवीन ईसु सी लीलघाय्‌न कह्‌या की “हीनीक मकली, काहाकी हयी हामरे पछळ आयेड़ती-आयेड़ती आय रय।”
MAT 15:24 ईसु जपाप आप्‌यु, “भगवान मेसेक ईस्‌रायेली जातीन माणसेन्‌चां अतरुत मकली रयु, जे खुवायला गाडरान तसा छे, ने भगवान सी छेटे हय रया।”
MAT 15:25 बाकुन ची बायरी आयन, ने ईसु काजे आंधीन कह्‌णे बाजी गुय, “ए मालीक मारी मदत कर।”
MAT 15:26 बाकुन ईसु दाखलान साहरे तेरु भुरसु देखीन जपाप आप्‌यु, “पुर्‌या धड़े सी रुटु लीन कुतरा अगळ नाखणु वारु नी हय।”
MAT 15:27 ची बायरी बी तीनाक दाखला मां एक कड़ी जुड़ीन जपाप आपी, “छाचलीन वात छे मालीक! तेबी कुतरा मालीकेन ईस्‌टाळा रुटान बटका ते खाय लेय।”
MAT 15:28 तेरी वात सामळीन ईसु तीनी काजे जपाप आप्‌यु, “ए बायरी, तारु भुरसु बेसकु मटु छे। तारी मरजी पुरी हवे।” ने तत्‌यारुत तेरी पुरे वारु हय गुय।
MAT 15:29 ईसु चां सी जात रयु, ने गलील दरीया धड़े पुगीन, एक बयड़ा पर चहड़ीन बठ गुयु।
MAT 15:30 तत्‌यार बेसका माणसेन टुळा की टुळा ईसु धड़े आया। चे आपणे साते लंगड़ा, आंदळा, गुंगा, ठटळ्‌या ने दीसरा मांदला काजे ईसु धड़े लाया, ने तीनुक ईसुन पाये पर नाख देदा, ने ईसु तीनुक वारु कर्‌यु।
MAT 15:31 जत्‌यार माणसे देख्‌या की गुंगा बुलने बाजी गुया, ने ठटळ्‌या वारु हय जाय, ने भागड़ा चाले, ने आंदळा देखे ती ज्‌य देखीन चकराय गुया ने ईस्‌रायेली जातीन भगवानेन बड़ाय कर्‌या।
MAT 15:32 तत्‌यार ईसु तेरा चेला काजे साते बुलायु ने कह्‌यु, “मेसेक ईनु माणसे टुळा पर दया आवे, काहाकी जे तीन दाहड़ा लग मार साते छे, ने हींद्‌रे धड़े खाणे काय बी नी हय। मे तीनुक भुकला पछा मकलने नी चाहतु, काय असो नी हय जाय की वाटेत झामा खाय्‌न हीट पड़से।”
MAT 15:33 तेरा चेला ईसु काजे कह्‌या, “हामु काजे हीना उजाड़्‌या बयड़ा मां ईनु माणसेक खावाड़ने करीन अतरा रुटा कां सी लावजे?”
MAT 15:34 ईसु तीनु काजे पुछ्‌यु, “तुंद्‌रे धड़े कतरा रुटा छे।” चे कह्‌या, “सात रुटा, ने थुड़ाक नानला माछा छे।”
MAT 15:35 तत्‌यार ईसु माणसे काजे भुयमां बठणेन हुकुम आप्‌यु।
MAT 15:36 ने तीनु सात रुटा ने माछा काजे हात लेदु। ने तु बेसकु वारु छे करीन भगवान काजे कह्‌यु, ने भांजी-भाजीन हेरा चेला काजे आपतु गुयु ने चेला माणसे काजे वाटता गुया।
MAT 15:37 आखा खाय्‌न आफरी गुया ने चेला बचला टुकड़ा सी सात चार्‌या भर्‌या।
MAT 15:38 खाणे वाळा बायरा ने पुर्‌या काजे छुड़ीन चार हजार अदमी हतला।
MAT 15:39 तत्‌यार ईसु माणसेन टुळा काजे मकलीन ढंड्‌या मां बठीन, ने मगदन मुलके मां जाती रयु।
MAT 16:1 फरीसी माणसे ने सदुकी माणसे ईसु धड़े आया, ईसु काजे पारखणे करीन असा पुछ्‌या, “हामुक सरगेन काहींग सहलाणी देखाड़ तत्‌यार हामु तार पर भुरसु करजे की तु भगवानेन अगु सी आवलु छे।”
MAT 16:2 ईसु तीनुक कह्‌यु, “सांती वेळाय तुहुंक कहं, ‘मुसुम वारु रवसे, काहाकी सरग रातलो छे।’
MAT 16:3 ने संदारे एगात कह्‌वे, ‘आज आंधी आवसे, काहाकी सरगे रातलो आदळो छावाय रयो।’ तुहुं सरग भीणी देखीन जाण लेवु, बाकुन तुहुं हीनी टेमेन सहलाणीन बारामां राज काजे देखीन नी जाणाये।
MAT 16:4 हीनी पीड़ीन भुंडा ने छीनाळ्‌या माणसे सहलाणी हेरे, बाकुन योनान सहलाणी काजे छुड़ीन तुहुंक अळी काय बी सहलाणी नी जड़े।” जी वात कय्‌न ईसु तीनुक छुड़ीन हेरा चेला पुठ्‌ये दीसरे जागे जाती रयु।
MAT 16:5 चेला दरीयान पली धड़े गुया, बाकुन चे रुटा ली जाणु वीसरी गुयला।
MAT 16:6 ईसु तीनुक कह्‌यु, “देखु, फरीसी माणसे ने सदुकी पंथवाळा खाण्‌या-सुडा सी चेतीन रवजु।”
MAT 16:7 चे आपसा-आपसा कह्‌णे बाजी गुया, “आपणु रुटा नी लाया तेरेमां ईसु असु कय रयु।”
MAT 16:8 ईसु तींद्‌रा वीच्‌यार काजे जाणीन कह्‌यु, “कम भुरसु करने वाळा, तुहुं तुंद्‌रा मन मां असा काहा वीच्‌यार करु की रुटा नी लाया करीन ईसु असु कर रयु?
MAT 16:9 काय तुहुं हाल लग नी समज्‌या? काय तुहुं काजे तीनु पांच हजारेन पांच रुटा हेर नी आवता, तीने टेमे तुहुं कतरा मटला चार्‌या भरला?
MAT 16:10 मे तीनु चार हजार माणसे काजे सात रुटा, आफरीन खावाड़लु तीने टेमे तुहुं कतरा चार्‌या भरला?
MAT 16:11 तुहुं काहा नी समजता की, मे तुहुंक रुटान बारामां जो नी कह्‌यु, बाकुन मे ते फरीसी माणसे ने सदुकी माणसेन खाण्‌या-सुडा सी चेतीन रवजु करीन कह्‌यु।”
MAT 16:12 तत्‌यार चे समजी गुया की ईसु, रुटान पीठाम भेसकण्‌या खाण्‌या-सुडान बारामां सी नी, बाकुन, फरीसी माणसे ने सदुकी सीकापण सी चेतीन रवजु करीन कवलु।
MAT 16:13 ईसु केसर्‌या फीलीप्‌या परदेस मां आयु, ने हेरा चेला सी पुछणे आपसान बारामां असु पुछ्‌यु, “माणसे माणसेन पुर्‌या काजे काय कय रया?”
MAT 16:14 चे कह्‌या, “काहनाक ते युहन्‌ना बपतीस्‌मा आपणे वाळु कह्‌वे, ने काहनाक एलीयाह, ने काहनाक यीर्‌मयाह नीते भगवानेन अघी सी आवणे वाळी वात देखाड़न्‌या मां सी काहनुक एक हसे करीन कहें।”
MAT 16:15 ज सामळीन ईसु तीनुक कह्‌यु, “बाकुन तुहुं मेसे काजे काय कह्‌वु?”
MAT 16:16 सीमोन पतरस कह्‌यु, “तु जीवता भगवानेन पुर्‌यु मसी छे।”
MAT 16:17 ईसु तीना पतरस काजे कह्‌यु, “ए सीमोन, योनान पुर्‌या, तु वारु छे; काहाकी सीकार ने लुही नी, बाकुन मारु बास सरगे मां छे, चु जी वात तुसे बताड़्‌यु।
MAT 16:18 ने मे तुसेक कहं की तु पतरस छे, ने मे हीना दगड़ा पर आपणी मंडळी बणावीस, ने पाताळेन जुर तीना पर जुर नी कर सके।
MAT 16:19 मे तुसे काजे सरगेन राजेन कुची आपीस, ने ज काय तु कळी पर बांदीस, च सरगे मां बांदायसे, ने ज काय तु धरती पर छुड़सी, च सरग मां उघड़से।”
MAT 16:20 तत्‌यार ईसु आखा चेला काजे चेताय्‌न कह्‌यु, की कुयक बी घुण कहुं की मे मसी छे।
MAT 16:21 तीनी टेमे सी ईसु आपणा चेला काजे समजाड़ने बाजी गुयु, “जरुरी छे की, मे यरुसलेम मां जाम ने डाहा-बुड़ा माणसे, ने मुख्‌या पुजारान, ने यहुदी नीयमेन मास्‌तर्‌या मेसे काजे एला पाड़से, ने मार नाखसे; ने तीसरे दाहड़े मे मर्‌या-सर्‌याम सी जीवतु हय जायस।”
MAT 16:22 पतरस ईसु काजे अगु ली जाय्‌न असु कय्‌न लड़्‌यु, “भगवान असु नी करे! मालीक तारे साते असो कदी नी हवे।”
MAT 16:23 ईसु पछु फीरीन पतरस काजे कह्‌यु, “ए भुतड़ा, मारे धड़े सी छेटु जाती रव! तु मारे वाटे अड़चन बण रयु, काहाकी तु ते भगवानेन वात पर नी, बाकुन माणसेन वात पर मन लागाड़ीन कहणे बाजी रयु।”
MAT 16:24 तत्‌यार ईसु हेरा चेला काजे असु कह्‌यु, “कदी कुय मारु चेलु बणीन मारे पछळ आवणे हींडे, ती आपणे आप काजे भुल जाय ने आपसान कुरुस हाकलीन, मारा कह्‌याम चालनु पड़से।
MAT 16:25 काहाकी जु कुय बी आपणा जीव काजे बचाड़ने चाहसे, चु तेरा जीव काजे खुय देसे, ने जु कुय बी मारे वाटे जीव खुवसे, चु तीना जीव काजे हेर लेसे।
MAT 16:26 कदी माणुस आखी कळीन चीज काजे हेर लेय, ने आपसान जीव काजे खुय देय, ती तीना काजे काय फायदु जड़से? नीते माणुस आपणा जीवनेन आवजी मां काय आपसे।
MAT 16:27 माणसेन पुर्‌यु आपणा सरग काहवाळ्‌या साते आपणा बासेन सेक-सींगार मां आवसे, ने तीनी टेमे हीयु आखा काजे हींद्‌रा काम काजे देखीन ईनाम आपसे ने ते तीनु माणसेक डंड जड़से।
MAT 16:28 मे तुंद्‌रे सी छाचलीन कहं, की जे जां उबा हय रया, माणसे मां सी काहनाक असा छे, की जां लग माणसेन पुर्‌या काजे तेरा राज मां आवतेलु नी देखी नी लेय, तत्‌यार लग नी मरे।”
MAT 17:1 छव दाहड़ा हय गुया ने अळतेन ईसु पतरस ने याकुप ने तेरा भायस युहन्‌ना काजे पुठ्‌ये ली लेदु, ने तीनुक अगु एक मटला बयड़ा पर ली गुयु।
MAT 17:2 तींद्‌रे अगळ ईसुन सीकु बदली गुयु, ने तेरो मुंहडो दाहड़ान तसों चमकणे बाजी गुयो, ने तेरा पुथल्‌या वीजाळान तसा चमकणे बाजी गुया।
MAT 17:3 ने तीनु चेला काजे मुसु ने एलीयु ईसु साते वात करतेला देखाव पड़्‌या।
MAT 17:4 तेरेसी पतरस ईसु काजे कह्‌यु, “ए मालीक, आपणो जां रहणु वारु छे! कदी तारी मरजी हय ती मे जां तीन खपड़ी बणाय दम; एक तारे वाटे, ने एक मुसा वाटे, ने एक एलीया वाटे।”
MAT 17:5 चु ज कवणेत बाजी रवलु ने एक वीजाळो आदळो तीनुक ढाक लेदो, ने तीना आदळा मां सी ज सामळ्‌या, “जु मारु लाटेक्‌लु पुर्‌यु छे, हेरेसी मे बेसकु खुस छे: हेरीत वात सामळीन मानु!”
MAT 17:6 चेला असा सामळीन मुंहडान भुरसे पड़्‌या, ने बेसका बीही गुया।
MAT 17:7 तत्‌यार ईसु धड़े आवीन तीनुक कह्‌यु, “उठु, बीहु मां।”
MAT 17:8 तत्‌यार चे उचा भाळ्‌या, ती चां ईसु अतरुत देखाव पड़्‌यु।
MAT 17:9 जत्‌यार ईसु तीने बयड़े सी उतरने बाजी रवलु ती तीनु चेलाक हुकुम आपीन असु कह्‌यु, “जत्‌यार लग माणसेन पुर्‌यु मर्‌या-सर्‌याम सी जीवतु नी हवे, तत्‌यार लग ज काय बी तुहुं देखला छे च कुय काजे घुण कह्‌वु।”
MAT 17:10 मरनेन वात काटणे करीन चेला ईसुक असा पुछ्‌या, “ती यहुदी नीयमेन मास्‌तर्‌या काहा कह्‌वे की एलीयान पेहेल आवणु टाकलो छे?”
MAT 17:11 ईसु तीनुक जपाप आप्‌यु, “हव, असो लिखलो छे की एलीयु छाचलीन आवसे, ने आखो काय सुदारसे।
MAT 17:12 बाकुन मे तुंद्‌रे सी कह्‌वो, की एलीयु आय गुयु, ने माणसे तीना काजे नी उळख्‌या; बाकुन जसों चाह्‌या असोत तेरे साते कर्‌या। हीनी रीत सी माणसेन पुर्‌यु बी हींद्‌रे हात सी दुख हाकलसे।”
MAT 17:13 तत्‌यार चेला ज समजी गुया की ईसु आपणु काजे युहन्‌ना बपतीस्‌मा आपणे वाळान बारामां कवणे बाजी रयु।
MAT 17:14 ने जत्‌यार ईसु ने तीन चेला बयड़े सी उतरीन माणसेन टुळु वाट देख रवलु ती, ती एक माणुस ईसु धड़े आयो, ने मांडा टेकीन कह्‌यु,
MAT 17:15 “ए मालीक, मारा पुर्‌यु पर दया कर! काहाकी तीना काजे मीरगीन मांदवाड़ छे, ने चु बेसकु एला करे; ने पछुत-पछु आकठा मां ने पाणी मां पड़ जाय।
MAT 17:16 मे हीना काजे तारा चेला धड़े लावलु, बाकुन चे वारु कर नी सक्‌या।”
MAT 17:17 तीनाक असु कवतेला सामळीन ईसु चां भेळा हय रवला आखा माणसेक कह्‌यु, “ए भुरसु नी करने वाळा, मे कत्‌यार लग तुंद्‌रे साते रवीस? कत्‌यार लग तुहुंक सेण करतु रवीस? हीना पुर्‌या काजे मारे धड़े लावु।”
MAT 17:18 तत्‌यार ईसु तीना भुतड़ान आत्‌मा काजे लड़्‌यु, ने ची तीना पुर्‌या मां सी नीकळी गुय; ने चो पुर्‌यो तत्‌यारुत वारु हय गुयो।
MAT 17:19 अळतेन ईसु एखलुत हतलु तत्‌यार हेरा चेला आवीन तीनाक पुछ्‌या, “हामु हीना भुतड़ा काजे काहा नी नीकाळ सक्‌या?”
MAT 17:20 ईसु तीनुक कह्‌यु, “तुंद्‌रा भुरसु नी हवणेन वजे सी, काहाकी मे तुंद्‌रे सी छाचलीन कह्‌वो, कदी तुंद्‌रु भुरसु रायन दाणान बराबर बी रवसे, ती हीना बयड़ा सी कवसु, जां सी सरकीन वां जाती रव, जां सी सरकीन छेटु हय जासे; ने काय बी वात तुंद्‌रे वाटे नी हवे असी नी रवे।
MAT 17:21 बाकुन जी भुतड़ान जातीन दुवा ने उपास पाखुर नी नीकळे।”
MAT 17:22 जत्‌यार चे भेळा हय्‌न गलील जीला मां आया, ती ईसु हींद्‌रे सी कह्‌यु, “माणसेन पुर्‌यु माणसेन हात मां धराय जासे।
MAT 17:23 ने माणसे तीनाक मार नाखसे, ने चु तीन दाहड़ा मां मर्‌या-सर्‌याम सी जीवतु हय जासे।” ज सामळीन चेला काजे बेसको दुख लाग्‌यो।
MAT 17:24 तत्‌यार चे कफरनहुम सहर मां गुया ती मंदीरेन फाळु मांगणे वाळा पतरस धड़े आवीन पुछ्‌या, “तुंद्‌रु मास्‌तर मंदीरेन फाळु नी आप्‌तु काय?”
MAT 17:25 पतरस कह्‌यु, “हव, आपे।” जत्‌यार चु घर मां आयु, ती ईसु पतरस काजे पुछणे सी पेहलुत ईसु तीना काजे पुछ्‌यु, “ए सीमोन तु काय वीच्‌यार रयु? हीनी कळीन राजा फाळु काहना माणसे सी लेय आपसान पुर्‌या सी की दीसरा माणसे सी फाळु लेय?”
MAT 17:26 पतरस ईसु काजे कह्‌यु, “दीसरा माणसे सी।” ईसु पतरस काजे कह्‌यु, “ती पुर्‌या काजे फाळु नी आपणु पड़े।
MAT 17:27 बाकुन तेबी आपणु हीनु माणसे काजे नराज नी करता, तु दरीया धड़े जाय्‌न गळी नाख, ने जी माछी पेहेल नीकळे, हीनीक लीन; तेरो मुंहडो उघाड़ने सी तुसे काजे एक सीक्‌कु जड़से, तीना सीक्‌का काजे लीन मारे ने तारे वाटेन करीन आप देजी।”
MAT 18:1 तीनी टेमे चेला ईसु धड़े आवीन पुछ्‌या, “सरग वाळा भगवानेन राज मां आखा सी मटु कुण छे?”
MAT 18:2 तत्‌यार ईसु एक नानला पुर्‌या काजे धड़े बुलायन हींद्‌रे ईचमां उबु कर्‌यु,
MAT 18:3 ने कह्‌यु, “मे तुंद्‌रे सी छाचलीन कहं की जत्‌यार लग तुहुं पाप भीणी सी मन नी फेरवु चां लग तुहुं हीना नानला पुर्‌यान तसा नी बणु, तत्‌यार लग तुहुं सरगेन राज मां नी जाय सकु।”
MAT 18:4 जु कुय बी आपसा काजे हीना नानला पुर्‌यान तसु नानलु बणसे, चु सरग वाळा भगवानेन राज मां आखा सी मटु बण जासे।
MAT 18:5 ने जु कुय बी मारा नाव सी एक असला नानला पुर्‌यान आव-भाव करसे, चु मारु आव-भाव करे।
MAT 18:6 “बाकुन जु कुय बी हीनु नानला मां सी जे मारे पर भुरसु करे ने एक काजे ठुकर खावाड़ेन वजे बणे, तेरे वाटे ते ज वारु छे की मट्‌ली घट्‌टीन पुड़ तेरे गळा मां बांदीन, नेचु उंडला समुदर मां डुब जाय।
MAT 18:7 ठुकरेन वजे हीनी कळी पर बेसकी दुखेन वात छे! पापेन वजे ते बन्‌नु छे, बाकुन बेसकी दुखेन वात छे तीना माणुस वाटे तेरे साहरे पापेन उत्‌तर बणे।
MAT 18:8 “कदी तारु हात नीते तारु पाय तुसेक ठुकर खावाड़से, ती तीना काजे काटीन नाख दे, चो तारे वाटे वारु छे, ने लुला नीते भागड़ा हय्‌न जीवनेन राज मां भरायणु तारे वाटे वारु छे, नीते दुय हात ने दुय पाय रवे तेबी तु अमरेन नरकेन आकठा मां नाखाय जाय।
MAT 18:9 कदी तारा डुळा तुसेक ठुकर खावाड़से, ती तीना काजे नीकाळीन नाख दे, ने काणु हय्‌न जीवनेन राज मां भरायणु तारे वाटे वारु छे, नीते दुय डुळा रवे ने तु नरकेन आकठा मां नाखाय जाय।
MAT 18:10 “देखु, तुहुं हीनु नानला मां सी काहनाक काजे नानु घुण समजे, काहाकी मे तुंद्‌रे सी कह्‌वो की सरग मां हींद्‌रा सरग वाळा काहवाळ्‌या मारा सरगेन बासेन मुंहडो जलम देखे।
MAT 18:11 काहाकी माणसेन पुर्‌यु तीनु काजे हेरने करीन आवलु छे, चे भगवान सी छेटे हय्‌न खुवाय गुयला छे।
MAT 18:12 “तुंद्‌रु काय वीच्‌यार छे? कदी काहनाक माणसेन सोव गाडरा रवे; ने तींद्‌रे मां सी एक खुवाय जाय, ती काय चु एक कम सोव गाडरा काजे रहणीदीन, बयड़ा पर जाय्‌न तीनु खुवायला काजे नी हेरे?
MAT 18:13 ने कदी असो हवे की चु तीना काजे जड़ जाय, ती मे तुहुंक छाचलीन कह्‌वो की हयु तीनु एक सोव गाडरा सी अतरु खुस नी हवे, जतरु एक गाडरा सी खुस हवसे।
MAT 18:14 असुत तुंद्‌रा सरग वाळा बासेन मरजी जीत छे, असी मरजी नी हय की हीनु नानला मां सी एक बी खत्‌तम हय जाय।
MAT 18:15 “कदी तारु भाय तारे वीरुद मां गुनु करे, ती जां अलग ली जाय्‌न वात करीन तीनाक समजाड़; कदी चु तारी सामळे ती, तु तारा भायस काजे हेर लेदु।
MAT 18:16 कदी चु नी सामळे, ती अळी एक नीते दुय जणा काजे साते लीन जां, की ‘एक-एक गुनु दुय नीते तीन जणान गवा छाचली हय जाय असो चुखली-सास्‌तुर मां लिखलो छे।’
MAT 18:17 कदी चु तींद्‌री बी नी माने, ती मंडळी मां कय दे, बाकुन कदी हयु वां बी नी माने ती तु तीना काजे नी-यहुदी ने फाळु लेणे वाळान तसु जाण।
MAT 18:18 “मे तुहुंक छाचलीन कह्‌वो, ज काय तुहुं कळी पर बांदसु, च सरग मां बांदायसे, ने ज काय तुहुं कळी पर उघाड़सु, च सरग मां उघड़से।
MAT 18:19 “अळी मे तुंद्‌रे छाचलीन सी कहं, कदी तुंद्‌रे मां सी दुय जणा धरती पर काहनीक वात वाटे एक मन्‌या हय्‌न मांगसे, ती च मारा बास भीणी सी जु सरग मां छे, हींद्‌रे वाटे हय जासे।
MAT 18:20 काहाकी जां दुय नीते तीन मारा नाव सी भेळा हवसे, ती मे तींद्‌रे ईचमां रव।”
MAT 18:21 तत्‌यार पतरस धड़े आवीन ईसु सी कह्‌यु, “ए मालीक, कदी मारु भाय गुनु करतुत रवे, ती मे कतरा कावा तीना काजे माफ करीस? काय सात कावा लग?”
MAT 18:22 ईसु पतरस काजे कह्‌यु, “मे तारे सी ज नी कव की सात कावा लग, बाकुन सात कावा नी बाकुन सत्‌तर गुणा लग माफ करजी।
MAT 18:23 “तेरेमां सरगेन राज, तीना राजान तसों छे, चु आपणा पावर्‌या सी लेखु लेणे चाहे।
MAT 18:24 जत्‌यार चु लेखु लेणे बाजी गुयु, ती तेरे अगळ एक जणाक लाया, तेरे पर राजान कुरुड़ु रुप्‌यान करजु हतलु।
MAT 18:25 बाकुन करजु छुटणे तेरे धड़े काय नी हतलो, ती मालीक कह्‌यु, गुयु हेरी बायर, ने पुर्‌या-पारी अळी ज काय तारो छे, आखो वेच दम, ने करजु देवाय जासे।
MAT 18:26 तत्‌यार चु पावर्‌यु पाय मां पड़ीन मालीक काजे आंध्‌यु ने कह्‌यु, ‘ए मालीक दम धर, मे आखो काय छे चो आप दीस।’
MAT 18:27 तत्‌यार तीना पावर्‌यान मालीक दया करीन तेरा करजा काजे माफ कर देदु, ने तीना काजे छुड़ देदु ने।
MAT 18:28 “बाकुन जत्‌यार चु पावर्‌यु बाहार नीकळ्‌यु, ती तेरु साते वाळु पावर्‌या मां सी एक जणु तीना काजे भेळु हयु, चु तेरा सोव चांदीन रुप्‌यान करजा वाळु हतलु; चु तीना काजे धर्‌यु ने तेरो गळु चीपदीन कह्‌यु, ‘ज्‌य काय बी तारे पर करजु छे चु आप देजी।’
MAT 18:29 तेरेसी तेरु साते वाळु पावर्‌यु भुयमां पड़ीन लीलघाय्‌न कह्‌यु, ‘दम धर, मे मारु आखु करजु आप दीस।’
MAT 18:30 चु नी मान्‌यु, बाकुन जाय्‌न तीना काजे जेल मां नाख देदु की जत्‌यार लग चु करजु नी आप देय तत्‌यार जात रवसे।
MAT 18:31 तेरे साते वाळा दीसरा पावर्‌या ज्‌य हयो च देखीन दुखी हया, ने जाय्‌न तींद्‌रा मालीक काजे आखी वात कय देदा।
MAT 18:32 तत्‌यार तेरु मालीक तीना पावर्‌या काजे बुलायु ने कह्‌यु, ‘ए भुतड़ा पावर्‌या, तु जु मारे सी लीलघाय्‌न कह्‌यु, ने मे तारु आखु करजु माफ कर देदु।
MAT 18:33 ती जसु मे तार पर दया कर्‌यु, असुत काय तु बी तारा साते वाळा पावर्‌या पर दया नी करनु चाहजे।’
MAT 18:34 ने तेरु मालीक रीसवाय गुयु ने तीना काजे डंड देणेवाळान हात मां आप देदु, की जत्‌यार लग चु आखु करजु नी आप देय, तत्‌यार लग हींद्‌रा हात मां रवे।
MAT 18:35 “हीनीत रीते कदी तुंद्‌रे मां सी कुय आपणा भाय काजे मन सी माफ नी करे, ती मारु बास सरगे मां छे, तुहुंक बी माफ नी करे।”
MAT 19:1 जत्‌यार ईसु जी वात कय देदलु, ती गलील जीला मां जाती रयु; ने यरदन नदीन पली धड़े यहुदीया जीला मां गुयु।
MAT 19:2 तत्‌यार माणसेन मट्‌लु टुळु ईसु पछळ चाली पड़्‌यु, ने ईसु चां मांदला माणसे काजे वारु कर्‌यु।
MAT 19:3 तत्‌यार फरीसी माणसे ईसुन पारख करने ईसु धड़े आवीन पारखणे करीन असा पुछ्‌या, “काय काहना बी उत्‌तर सी आपणी बायर काजे छुड़नु वारु छे?”
MAT 19:4 ईसु कह्‌यु, “काय तुहुं चुखली सास्‌तुर मां नी भण्‌या की, जु तीनुक बणायु चु सुरु सी अदमी ने बायरी काजे बणायु।
MAT 19:5 ईनी वजे सी माणुस आपणा आयस-बास सी अलग हयन, आपसी बायरी साते रवसे ने चे दुयु जणा एक डील बणीन रवसे।
MAT 19:6 अळतेन चे हय सी दुय नी, बाकुन एक डील छे। तेरेमां तीनाक भगवान जुड़लु छे, तीना काजे माणुस अलग नी करे।”
MAT 19:7 चे ईसु काजे पुछ्‌या, “ती मुसु ज्‌य काहा हुकुम आप्‌यु की छुड़णेन चिट्‌ठी आपीन घरवाळीक छुड़नु?”
MAT 19:8 ईसु तीनुक कह्‌यु, “मुसु तुंद्‌रे मनेन कयड़ाळा वजे सी तुहुंक आपणी-आपणी बायर काजे छुड़ देणेन हुकुम आप्‌यु, बाकुन सुरु सी असो नी हय।
MAT 19:9 ने मे तुंद्‌रे सी कह्‌व की, जे दीसरान उतरेन वजे सी आपणी बायर काजे छुड़ीन दीसरी सी ईयाव करे चु छीनाळो करे ने जे हीनी छुल्‌ली सी ईयाव करसे चु बी छीनाळो करे।”
MAT 19:10 चेला ईसुक कह्‌या, “कदी अदमीन बायर साते असु वेहवार छे, ती ईयाव करनु वारु नी हय।”
MAT 19:11 ईसु तीनुक कह्‌यु, “आखा जणा जी सीकापण हुकारी नी सके तीनु काजे अतरुत ज्‌य वाटु आपलु छे।
MAT 19:12 काहाकी काहनाक हीजड़ा असा छे, जे मायन पेट मां सी असा पयदा हवला छे; ने काहानाक हीजड़ा असा छे, तीनुक माणसे हीजड़ु बणाया; ने काहानाक हीजड़ा असा छे, चे सरगेन राज वाटे आपसा काजे हीजड़ा बणावला छे। जे तीना काजे हुकार सके चे हुकार लेय।”
MAT 19:13 तीनी टेमे थुड़ाक माणसे नानला पुर्‌या काजे ईसु धड़े लाया; की चु हींद्‌रे पर हात मेले ने दुवा करे, ईसुन चेला तीनु माणसेक लड़्‌या।
MAT 19:14 ईसु कह्‌यु, “पुर्‌या काजे मारे धड़े आवणे देवु, ने हीनुक मां रुकु, काहाकी सरग वाळा भगवानेन राज असलात छे।”
MAT 19:15 ने चु पुर्‌या पर हात मेलीन संयबरकत आपीन चां सी जाती रयु।
MAT 19:16 एक माणुस ईसु धड़े आवीन पुछ्‌यु, “ए मास्‌तर, मे काहनो भलो काम करो की जलमेन जीवाय जड़े?”
MAT 19:17 ईसु तीना काजे कह्‌यु, “तु मारे सी भलायन बारामां काहा पुछे? वारु ते एकुत छे, कदी तु जीवन मां जाणे चाहे ती भला काम करने वाळा भगवानेन हुकुम काजे मान्‌या कर।”
MAT 19:18 चु ईसुक कह्‌यु, काहनी हुकुम ईसु कह्‌यु, “खुन घुण करे।” छीनाळो घुण करे, झुट घुण देय;
MAT 19:19 आपणा बास ने आपणी मायन वात माननु, ने आपणे चांदे वाळा सी परम करजी।
MAT 19:20 चु जुवान ईसु काजे कह्‌यु, “जी आखी हुकुम काजे ते मे मानो; हय मारेमां काहानी वातेन कसर छे।”
MAT 19:21 ईसु तीना काजे कह्‌यु, “कदी तु पाक्‌कु बन्‌ने चाहे ती जां तारा धन काजे वेचीन गरीब काजे आप दे, ने तुसे सरगे मां धन जड़से; ने तु मारु चेलु बणीन मारे पुठ्‌ये चाल।”
MAT 19:22 बाकुन चु जुवान ईसुन वात सामळीन नराज हय्‌न जाती रयु, काहाकी चु बेसकु धन वाळु हतलु।
MAT 19:23 तत्‌यार ईसु तेरा चेला काजे कह्‌यु, “मे तुंद्‌रे सी छाचलीन कह्‌व की धन वाळा माणसे काजे सरग वाळा भगवानेन राज मां जाणु काठो छे।
MAT 19:24 तुंद्‌रे सी अळी कह्‌व की, भगवानेन राज मां धन वाळा काजे भरायणु उटड़ान सुईन नाचका मां भरायणु जादा सरल छे।”
MAT 19:25 ज्‌य सामळीन चेला बेसका घाबराय्‌न, “कवणे लाग्‌या पछे कुणीन छुटकारु हवसे?”
MAT 19:26 ईसु तींद्‌रे भीणी एक हेट्‌यु भाळीन कह्‌यु, “माणसे सी ज नी बणे, बाकुन भगवान सी आखो काय कर सके।”
MAT 19:27 ती पतरस ईसु काजे कह्‌यु, “देख, हामु ते आखो काय छुड़ीन तारा चेला बण गुयला छे। ती हामुक काय जड़से?”
MAT 19:28 ईसु तीनुक कह्‌यु, मे तुंद्‌रे सी छाचलीन कह्‌वो, की नवली कळी मां जत्‌यार माणसेन पुर्‌यु आपणी सेक-सींगारेन राजगादी पर बठसे, ती तुहुं बी जे मारे पछळ आवला छे, बारे राज गादी पर भरायन ईस्‌रायेलेन बारे खानदानी पर नीयाव करसु।
MAT 19:29 ने जु कुय बी घर, नीते भायसेक, नीते बहणीस, नीते बास, नीते माय, नीते नानला पुर्‌या नीते खेते काजे मारा नाव वाटे छुड़ देदला छे, तीना काजे सोव गुणा फळ जड़से, ने चे जलम जीवनेन हकदार्‌या बी हय जासे।
MAT 19:30 बाकुन बेसका माणसे हय अगळ छे, चे पछळ हय जासे, ने जे हय पछळ छे, चे अगळ हय जासे।
MAT 20:1 सरग वाळा भगवानेन राज तीना किरसाणेन तसों छे, चु तेरी अंगुरेन वाड़ी मां दाहड़क्‌या लागाड़ने करीन संदारे एगुत घर सी नीकळ्‌यु।
MAT 20:2 चु दाहड़क्‌या काजे चांदीन एक रुप्‌या मां दाहड़की राखलु, ने तीनुक तेरी अंगुरेन वाड़ी मां मकल्‌यु।
MAT 20:3 अळतेन चु नव बजेन नीकळीन दीसरा माणसे काजे हाटे मां रीकामा उबा हय रवला देखीन।
MAT 20:4 तीनुक कह्‌यु, तुहुं बी मारी अंगुरेन वाड़ी मां जावु, मे तुहुंक वारु दाहड़की आपीस।
MAT 20:5 ने चे बी वाड़ी मां काम करने करीन जाती रया, अळतेन चु बारे बजे ने तीनेक बजे खयड़े नीकळीन असुत दाहड़क्‌या हेरने करीन गुयु।
MAT 20:6 अळतेन चु पांचेक बजे अळी खयड़े नीकळ्‌यु चां दीसराक अळी उबा हय रवला देखीन तीनुक कह्‌यु, “तुहुं काहा जां दाहड़ु भरीन रीकामा उबा हय रया।”
MAT 20:7 चे तीना काजे कह्‌या, हामुक काहनु बी दाहड़की नी लागाड़्‌यु करीन हामु जां उबा हय रया। चु तीनु काजे कह्‌यु, तुहुं बी मारी अंगुरेन वाड़ी मां काम करने जावु।
MAT 20:8 सांती वेळाय अंगुरेन वाड़ीन मालीक, आपसा मुनीम सी कह्‌यु, दाहड़क्‌या काजे बुलायन लाव पछेन आवणे वाळा सी लागाड़ीन पेहल आवणेवाळा लग, आखाक दाहड़की आप दे।
MAT 20:9 जत्‌यार चे आया, ती चे पांच बजे कामे लागला, ती चु मुनीम तीनुक काजे चांदीन एकेक रुप्‌यु आप्‌यु।
MAT 20:10 जत्‌यार चे पेहल दाहाड़क्‌या आवला, चे असा समजी गुया की हामुक अदुस आपसे, बाकुन चु तीनुक बी चांदीन एकेक रुप्‌युत आप्‌यु।
MAT 20:11 जत्‌यार पयस्‌या लीन चे खेतेन मालीक पर कुर-कुर करने बाजी गुया,
MAT 20:12 चे कह्‌या जे पछला ते एकतु घंटु काम कर्‌या, ने तेबी तु तीनुक हामरे बराबर दाहड़की आप्‌यु, ने चे दाहड़ु भरीन भार हाकल्‌या ने तप काजे झेल्‌या?
MAT 20:13 तींद्‌रे मायन एक असु जपाप आप्‌यु, ए दुस्‌त, मे तारे सी काय बी बयमानी नी करो, मे तुसेक दाहड़ान दाहड़की चांदीन एक रुप्‌यु आपीस करीन तीयार नी हयु?
MAT 20:14 ज्‌य तारो छे, चो हाकलीन जाती रव; मारी मरजी असी छे, की जतरो तुसे आखो आप्‌यु ततरोत हीना पछळ आवला काजे बी आपो।
MAT 20:15 काय ज्‌य सय नी हय काय मे मारा पयस्‌या सी ज्‌य चाहो चो करो? तु मारी भलाय देखीन मार पर काहा कुहराय रयु?
MAT 20:16 हीनी रीती सी जे हय अगळ छे, चे पछळ हय जासे; ने जे पछळ छे, “चे अगळ हय जासे।”
MAT 20:17 ईसु यरुसलेम सहरेन वाट्‌ये अगु जाणे बाजी रवलु। ती चु बारे चेला काजे अथु ली जाय्‌न तीनुक कह्‌यु,
MAT 20:18 “देखु, हामु यरुसलेम सहर मां जाणे बाजी रया; ने माणसेन पुर्‌यु मुख्‌या पुजारान ने यहुदी नीयमेन मास्‌तर्‌या हात मां धराय जासे, ने चे तीना काजे मारनेन डंड सामळावसे।
MAT 20:19 ने चे तीना काजे नी-यहुदी माणसेन हात मां आपसे, की चे तीना काजे हासी मां उडाड़से ने सपाटा देसे ने कुरुस पर चड़ावसे, ने चु तीन दाहड़ाम मर्‌या-सर्‌याम सी जीवतु हय जासे।”
MAT 20:20 तत्‌यार जब्‌दीन पुर्‌यान माय, आपणा पुर्‌या काजे साते लीन ईसु धड़े आवीन आंधी, ने तेरे सी थुड़ोक मांगणे बाजी गुय।
MAT 20:21 ईसु तीनीक पुछ्‌यु, “तुसेक काय चाहजे।” ची कय, “जे मारा दुय पुर्‌या छे। तु तारा राज मां ईनु मायन एक तारे जेवड़्‌या हात भीणी ने एक तारे डाखर्‌या हात भीणी बसणेन हक आपजी।”
MAT 20:22 ईसु जपाप आप्‌यु, “तु नी जाणु की काय मांग रय। जु मे दुखेन पीयालु मे पीणेवाळु छे, तुहुं तीना दुखेन पीयाला काजे पी लेसु काय?” चे तीना काजे कह्‌या तु कह्‌यु तसोत हामु करसु।
MAT 20:23 तत्‌यार ईसु तीनुक कह्‌यु, “तुहुं मारु कटवरु ते पीसु, बाकुन मारे जेवड़्‌ये ने डाखर्‌ये हात मां काहानाक बी बठाड़नु मारो काम नी हय, बाकुन हींद्‌रे वाटे मारा बास भीणी सी तीयार करलो छे।”
MAT 20:24 ज्‌य सामळीन दस चेला तीनु दुय संगा भायस पर रीसाय पड़्‌या।
MAT 20:25 ईसु आपसा चेला काजे धड़े बुलायन कह्‌यु, “तुहुं जाणु की नी-यहुदी राजा हींद्‌रे पर राज करे; ने जे मटला छे, चे हींद्‌रे पर हक जमाड़े।
MAT 20:26 बाकुन तुंद्‌रे मां असला हकेन कायदु नी रहणु चाहजे; बाकुन जु कुय तुंद्‌रे मां मटा हवणे हींडे चु तुंद्‌रे मां पावर्‌यु बणसे।
MAT 20:27 ने चु तुंद्‌रे मां मुख्‌यु बणने हींडे, चु तुंद्‌रु आखान पावर्‌यु बणसे।
MAT 20:28 काहाकी माणसेन पुर्‌यु; ईनी कळी मां आपसी चाकरी कराड़ने नी, बाकुन आपसुत चाकरी करने, ने बेसका जणान जीव काजे छुड़ावने करीन आवलु छे।”
MAT 20:29 जत्‌यार चे यरीहो सहरेम सी नीकळीन जाणे बाजी रवला, ती माणसेन एक मट्‌लु टुळु ईसु पछळ चाल पड़्‌यु।
MAT 20:30 ने चां सयड़क धड़े दुय आंदळा, जे बठला हतला, जत्‌यार चे जो सामळ्‌या की ईसु जाणे बाजी रवलु, ती चे आयड़ी-आयड़ीन कह्‌वणे बाजी गुया “ए मालीक, दावुदेन अवल्‌यात, हामरे पर दया कर।”
MAT 20:31 माणसे तीनु आंदळा काजे हुगा हय रवु; करीन तीनुक लड़्‌या, बाकुन अळी बी आयड़ीन कह्‌या, “ए मालीक दावुदेन अवल्‌यात, हामरे पर दया कर।”
MAT 20:32 ईसु हुबु हयन तीनुक बुलायु ने कह्‌यु, “तुहुंक काय चाहजे?” मे तुंद्‌रे वाटे करो।
MAT 20:33 चे कह्‌या “ए मालीक, हामरा डुळा उघड़ी जाणु चाहजे।”
MAT 20:34 ईसु काजे तींद्‌रे पर दया आय तींद्‌रा डुळा धर्‌यु ने चे तत्‌यारुत देखणे बाजी गुया; ने ईसु पछळ चाल पड़्‌या।
MAT 21:1 जत्‌यार चे यरुसलेम धड़े गुया, ने जेतुन बयड़ा पर बेतफगे गांव धड़े आया, ती ईसु आपसा दुय चेला काजे ज्‌य कय्‌न मकल्‌यु,
MAT 21:2 “तुहुं पलो सांबो देखाये, तीना फळ्‌याम जावु। ने चां पुगतेत तुहुंक एक गदड़ी बांदली देखाव पड़से, ने तेरे पुठ्‌ये पीलो बी तुहुंक देखाव पड़से। तीना गदड़ाक छुड़ीन मार धड़े ली आवु।
MAT 21:3 कदी तुहुंक कुय काय कह्‌वे, ती तीनाक तुहुं असा कह्‌जु, मालीक काजे जो गदड़ो चाहजे ती कवजु की मालीक काजे हेरो काम छे, तत्‌यार चु तत्‌काल तीनुक मकली देसे।”
MAT 21:4 ज्‌य तेरेमां हयो की, ज्‌य बुल भगवानेन अघी सी आवणे वाळी वात देखाड़न्‌या माणसेन साहरे कह्‌लो चो पुरो हय जाय:
MAT 21:5 “सीयोनेन सहरे मां रहण्‌या माणसेक कह्‌वु, देख, तुंद्‌रु राजु तुंद्‌रे धड़े आवणे बाजी रयु। चु भुळु छे, चु गदड़ी पर बस रयु, बाकुन पीला पर सवारी कर रयु।”
MAT 21:6 चेला चाल पड़्‌या, ने चे ईसु कह्‌यु तसोत चे कर्‌या।
MAT 21:7 ने गदड़ीक ने पीला गदड़ाक ली आया, तेरे पर आपसा साल्‌या तीनु गदड़ाक पांगराय देदा, ने ईसु पीला गदड़ा पर सवारी कर्‌यु।
MAT 21:8 तत्‌यार बेसका माणसे आपसा साल वाट मां आथर्‌या, ने थुड़ाक माणसे झाड़कान डाळ्‌या काटीन वाट मां आथरीन तेरो आव-भाव कर्‌या।
MAT 21:9 ईसुन अगळ-अगळ जाता जाय्‌न ने पछळ-पछळ चालीन आवता जाय्‌न, जुर सी आयड़ी-आयड़ीन कवतेला, “दावुद राजान अवल्‌यात काजे होसान्‌ना कवतेला, जु भगवान मालीकेन नाव सी आवे, चु बरकतवाळु छे, आखाम सरगे मां रहण्‌या भगवानेक बी होसान्‌ना कवतेला।”
MAT 21:10 जत्‌यार ईसु यरुसलेम मां पुग्‌यु, ती आखा सहरेन माणसे कलो-कलो करता, जाय्‌न पुछणे बाजी गुया, ज्‌य कुण छे?
MAT 21:11 तत्‌यार ईसु पुठ्‌ये आवला माणसे कह्‌या, “भगवानेन अघी सी आवणे वाळी वात देखाड़न्‌यु ईसु छे, जु गलील जीलान नासरत सहर वाळु छे।”
MAT 21:12 ईसु भगवानेन मंदीर मां जाय्‌न तीनु आखा काजे, जे मंदीर मां लेणु देणु करतेला, तीनुक बाहर नीकाळ देदु, चु पयस्‌या आटे-साटे करन्‌यान टेबल्‌या ने पेरवा वेचण्‌यान चारला अंधला देदु।
MAT 21:13 ने तीनुक असु कह्‌यु, “चुखला सास्‌तुर मां लिखलो छे, की ‘मारो घर दुवान घर कह्‌वायसे।’ बाकुन तुहुं ते हीना काजे धाड़ु पाड़न्‌या ने चुट्‌टान खंगरु बणाय देदा!”
MAT 21:14 मंदीर मां आंदळा ने भागड़ा, ईसु धड़े आया, ने चु तीनुक वारु कर्‌यु।
MAT 21:15 बाकुन जत्‌यार मुख्‌या पुजाराक ने यहुदी धरम सीकाड़न्‌‌या मास्‌तर्‌या ईसुन मटला काम काजे, ने ज्‌य ईसु कर्‌यु, ने पुर्‌या काजे मंदीर मां दावुदेन अवल्‌यात काजे होसान्‌ना करीन आयड़तेला देख्‌या, ती चे बेसका रीसवाय गुया,
MAT 21:16 ने चे ईसु काजे कह्‌या, “जे काय कवणे बाजी रया चो तु सामळे काय?” ईसु तीनुक कह्‌यु, “हव सामळी रयु; तुहुं ज्‌य चुखली सास्‌तुर मां नी भण्‌या काय? पुर्‌या ने दुत पीण्‌या नानला पुर्‌यान मुंहडा सी तु आपसुत गुण गावाड़लु छे।”
MAT 21:17 अतरामा कय दीन ईसु तीनुक छुड़ीन सहर मां बाहार नीकळीन बेतन्‌या गांव मां जाती रयु ने चांहान आखी रात रयु।
MAT 21:18 दीसरे दाहड़े ईसु अगुत सहर भीणी जाणे बाजी रवलु, ती ईसु काजे भुक लागी।
MAT 21:19 सयड़केन धड़े अंजीरेन एक झाड़को देखीन चु तेरे धड़े गुयु, ने पान्‌टा काजे छुड़ीन चां काय नी जड़्‌यो तीना अंजीरेन झाड़काक कह्‌यु, “हय सी तारे मां जलम नी फळ लागणु चाहजे।” ने अंजीरेन झाड़को तत्‌यारुत सुक गुयो।
MAT 21:20 ज्‌य देखीन चेला घाबराय गुया ने चेला कह्‌या, “ज्‌य अंजीरेन झाड़को तत्‌काल कसों सुक गुयो।”
MAT 21:21 ईसु तीनुक कह्‌यु, “मे तुंद्‌रे सी छाचलीन कह्‌वो, कदी तुहुं भुरसु करु ने मन मां संक्‌या नी करु, ती जसु मे अंजीरेन झाड़काक कह्‌यु तसत हय गुयो तसात तुहुं बी कवसु तेबी हय जासे, बाकुन कदी तुहुं हीना बयड़ा सी बी कवसु की, उखळीन जां, ने समुदर मां जाय्‌न पड़ जां, ती तसों हय जासे।
MAT 21:22 ने ज्‌य काय तुहुं दुवा मां भुरसु करीन मागंसु ती चो भगवान तुहुंक आप देसे।”
MAT 21:23 ईसु मंदीर मां जाय्‌न सीकाड़ने बाजी रवलु, ती मुख्‌या पुजारा ने डाहा-बुड़ा माणसे ईसु धड़े आवीन पुछ्‌या, “तु ज्‌य आखो काम कुणीन हक सी करे? ने ज्‌य हक तुसे कुण आप्‌यो?”
MAT 21:24 ईसु तीनुक कह्‌यु, “मे बी तुंद्‌रे सी एक वात पुछो; कदी ची वात मेसे बताड़सु, ती मे बी बताड़ीस की ज्‌य काम कुणीन हक सी करो।
MAT 21:25 युहन्‌ना बपतीस्‌मा आपण्‌या काजे, बपतीस्‌मा काहा सी जड़लो? सरगेन भीणी सी की माणसे भीणी सी जड़लो?” जी वात सामळीन चे असा वीच्‌यार करने बाजी गुया, “कदी हामु कवजे सरगे सी भगवान आपलु, ती हयु कवसे, ‘ती तुहुं तेरे पर भुरसु काहानी कर्‌या?’
MAT 21:26 ने कदी कवसुन ‘माणसे भीणी सी’ ती हामुक हीनु माणसेन टुळा सी धाक छे, काहाकी जे आखा युहन्‌ना काजे भगवानेन अघी सी आवणे वाळी वात देखाड़न्‌यु माने।”
MAT 21:27 अळतेन चे ईसु काजे असा जपाप आप्‌या, “हामु नी जाणजे।” ती ईसु बी तींद्‌रे सी कह्‌यु, “ती मे बी तुहुंक।” नी बताड़तु की ज्‌य काम कुणीन हक सी करने बाजी रयु।
MAT 21:28 ईसु यहुदीन मुख्‌या माणसे काजे कवतु गुयु, “तुहुं काय वीच्‌यारु? एक माणसेन दुय पुर्‌या हतला; चु पेहला धड़े जाय्‌न कह्‌यु, ‘ए पुर्‌या, आज अंगुरेन वाड़ी मां काम कर।’
MAT 21:29 बाकुन चु पेहलु पुर्‌यु असु जपाप आप्‌यु, मे नी जाम, बाकुन थुड़ीक वार मां तेरा मन अंगुरेन वाड़ीम काम करने जाणेन वीच्‌यार आय गुयु ने चु काम करने गुयु।
MAT 21:30 अळतेन चु बास दीसरा पुर्‌या धड़े जाय्‌न असुत कह्‌यु, चु जपाप आप्‌यु, ‘हव मे जायस करीन कह्‌यु’ बाकुन चु नी गुयु।
MAT 21:31 हीनु दुय पुर्‌या मां सी काहनु बासेन मरजी पुरी कर्‌यु?” चे कह्‌या, “पेहलु पुर्‌यु।” ईसु हींद्‌रे सी कह्‌यु, “मे तुंद्‌रे सी छाचलीन कव की फाळु लेणे वाळा आफसर ने रंड्‌या तुंद्‌रे सी पेहले भगवानेन राज मां भरायसे।
MAT 21:32 काहाकी युहन्‌ना बपतीस्‌मा आपण्‌यु धरमेन जीवनेन वाट देखाड़तु जाय्‌न तुंद्‌रे धड़े आयु, ने तुहुं तेरे पर भुरसु नी कर्‌या; बाकुन फाळु लेणे वाळा ने आफसरेन ने रंड्‌या तेरी वात पर भुरसु कर्‌या। ने तुहुं ज्‌य देखीन पछेन बी मन नी बदले ने तेर पर भुरसु कर लेय।
MAT 21:33 “एक अळी दाखलु सामळु,” एक किरसाण हतलु, “अंगुरेन वाड़ी लागाड़्‌यु, तेरे चारे मेर वाड़ बांदयु, ने तीनी वाड़ी मां एक अंगुरेन रस नीकाळने करीन एक हळाव बणायु ने एक पाक्‌कु माळु बणायु, ने किरसाण काजे साजा मां आपदीन दीसरा देस मां जाती रयु।”
MAT 21:34 जत्‌यार अंगुर फळ आवरेन दाहड़ा आया, ती चु किरसाण हेरा गुलाम पावर्‌या काजे साजेल्‌या किरसाण भीणी अंगुरेन फळेन हीस्‌सु लेणे करीन मकल्‌यु।
MAT 21:35 बाकुन चे साजेल्‌या किरसाण चां तेरा पावर्‌या काजे धरीन, हींद्‌रेन मां सी काहानाक काजे ठुक्‌या, ने काहानाक काजे दगड़ाट्‌या, ने काहनाक काजे मारीत नाख्‌या।
MAT 21:36 अळतेन चु एक कावा अळी पेहला सी अदुस पावर्‌याक मकल्‌यु, ने चे किरसाण हींद्‌रे साते बी असात कर्‌या।
MAT 21:37 चे मारा पुर्‌यान ईज्‌जत राख्‌से करीन आकरी कावा हेरा पुर्‌या काजे भेळु हयु।
MAT 21:38 बाकुन किरसाण पुर्‌या काजे देख्‌या ती एक दीसरा काजे कह्‌या, जु ते वारीसदार छे, आवु, हीनाक बी मार नाखता ने हेरा धन पर कब्‌जु कर लेता।
MAT 21:39 अळतेन चे तीना काजे धर लेदा ने अंगुरेन वाड़ी सी बाहार नीकाळीन मार नाख्‌या।
MAT 21:40 अळतेन ईसु हेरा सामळन्‌या माणसेक पुछ्‌यु, “जत्‌यार अंगुरेन वाड़ीन मालीक पछु आवसे, ती चु तीनु किरसाण सी काय करसे?”
MAT 21:41 चे ईसु काजे कह्‌या, “चु तीनु कुहर्‌या माणसे काजे मारीन सार नाखसे; ने हेरी अंगुरेन वाड़ी दीसरा किरसाण काजे साजा मां आप देसे, जे टेम-टेम पर अंगुरेन मेरेन हीस्‌सु आप्‌या करसे।”
MAT 21:42 ईसु तीनु काजे कह्‌यु, “तुहुं चुखला सास्‌तुर मां ज्‌य कदी नी भण्‌या?” तीना दगड़ा काजे मीस्‌तर्‌या फालतु समजीन बाहार उराट देदा चु दगड़ुत घरेन पायेन खुणे वाळु दगड़ु बण ज्‌य? ज्‌य मालीक भीणी सी हयो ज्‌य; ने हामरी नींगा मां बेसकी वारु वात छे!
MAT 21:43 “तेरेमां मे तुंद्‌रे सी कह्‌वो की भगवानेन सरगेन राज तुंद्‌रे हात मां सी हापकी लेसे ने असी नी-यहुदी माणसेक आप देसे जे हेरो फळ लावसे, आप देसे।
MAT 21:44 जु हीना दगड़ा पर हीट पड़से, तेरो छेदर्‌या-छेदर्‌या हय जासे; ने तीना पर ज्‌य दगड़ु पड़से, तीना काजे दळ देसे।”
MAT 21:45 मुख्‌या पुजारा ने फरीसी माणसे ईसुन दाखलु काजे सामळीन समजी गुया की ईसु आपणेत बारामां कवणे बाजी रयु।
MAT 21:46 ने चे ईसु काजे धरने चाहतेला, बाकुन चे माणसेक देखीन बीही गुया काहाकी चे ईसु काजे भगवानेन अघी सी आवणे वाळी वात देखाड़न्‌यु मान तेला।
MAT 22:1 ईसु अळी तीनुक दाखला सामळावणे बाजी गुयु,
MAT 22:2 “सरगेन राज तीना राजान तसों छे, जु हेरा एक पुर्‌यान ईयाव पंगत देदु।”
MAT 22:3 ने चु हेरा पावर्‌या काजे मकल्‌यु, की नेवता नाखला माणसे काजे ईयाव मां खाणो-खाणे बुलावु; बाकुन चे आवणे नी हींडतेला।
MAT 22:4 अळतेन चु अळी पावर्‌या काजे असु कय्‌न मकल्‌यु, नेवता देदला माणसे सी कह्‌वु देखु, मे खाणो तीयार कर देदु, मारा बेल ने पाळ्‌ळा जनवार्‌या मार देदु, आखो तीयार छे; ने ईयावेन खाणा मां आवु।
MAT 22:5 बाकुन चे हीनी वात पर धीयान नी देदा: कुय आपणे खेते भीणी, कुय आपणा काम-धंदु करने जाती रया।
MAT 22:6 ने काहनास माणसे ते राजान पावर्‌या साते वारु वेहवार नी कर्‌या ने तीनुक मार नाख्‌‌या।
MAT 22:7 जी खबर सामळीन राजा काजे बेसकी रीस लागी, ने चु हेरा सीपायड़ा काजे मकल्‌यु, ने चे जाय्‌न तीनु खुणी माणसे काजे मार नाख्‌या, ने तींद्‌रा सहर काजे धपाड़ देदा।
MAT 22:8 तत्‌यार राजु हेरा पावर्‌या सी कह्‌यु, ईयावेन खाणो ते तीयार छे, बाकुन नेवता देदला माणसे खाणे नी आया, ने चे हीना ईयाव मां आवे असा नी बण्‌या।
MAT 22:9 तेरेमां चोवराया पर जावु ने जतरा माणुस तुहुंक जड़े, आखा काजे ईयावेन पंगत मां बुलाय लावु।
MAT 22:10 तेरेसी चे पावर्‌या रुहे पड़ गुया, ने काय भुंडात काय वारलु, जतरा जड़्‌या, आखा काजे भेळा करीन ली आया; ने ईयाव घर मेजवान्‌या सी भराय गुयो।
MAT 22:11 “जत्‌यार राजु मेजवान्‌या काजे देखणे आयु, ती हयु चां एक माणुस काजे देख्‌यु, चु ईयावेन पुथल्‌या नी पेहरी रवलु।”
MAT 22:12 राजु तीना काजे पुछ्‌यु, “ए भायस, तु ईयावेन पुथल्‌या नी पेहर्‌यु जां काहा आयु?” चु माणुस हुगुत हय रयु।
MAT 22:13 तत्‌यार राजु पावर्‌या काजे हुकुम आपीन कह्‌यु, हेरा हात-पाय बांदीन हीना काजे बाहर आंदारला मां नाख देवु, चां रड़नु ने दात ककड़ावणु रवसे।
MAT 22:14 भगवानेन पंगत बुलावला ते बेसका छे, बाकुन नेवाड़ला थुड़ाक छे।
MAT 22:15 तत्‌यार फरीसी माणसे भेळा हयन वीच्‌यार कर्‌या, की ईसु काजे काहनी वात मां फसाड़जे।
MAT 22:16 तेरेमां चे आपणा चेला काजे हेरोदीयान माणसे साते ईसु भीणी ज कवणे मकल्‌या, “ए मास्‌तर,” हामु जाणजे की तु छाचलु छे, ने भगवानेन वाट संय-संय सीकाड़े, काहाकी जीवन मां फीकुर नी करे, काहाकी तु माणसेन मुंहडा देखीन वात नी करे।
MAT 22:17 तेरेमां हामुक बताड़ तु काय वीच्‌यारे? काय राजा केसर काजे फाळु देणु वारु छे की नी हय?
MAT 22:18 ईसु तींद्‌रा भुंडात मन काजे जाणीन कह्‌यु, “ए ढंगड़ा करन्‌या, मेसेक काहा पारखणे बाजी रया?
MAT 22:19 फाळान सीक्‌कु मेसेक देखाड़ु, ती मे तुहुंक चु रुप्‌यु देखीन बताड़ीस!” “तत्‌यार चे तेरे धड़े एक रुप्‌यु लावीन ईसुक आप्‌या।”
MAT 22:20 ती ईसु तीनुक रुप्‌यु देखाड़ीन पुछ्‌यु, “जु छाप ने नाव कुणीन छापलो छे?”
MAT 22:21 “चे तीना काजे कह्‌या,” राजा केसरेन छे। तत्‌यार ईसु तीनुक कह्‌यु, “ज राजा केसरेन छे, च राजा केसर आपीन तेरो हक पुरो करु, ने ज भगवानेन छे, च भगवानेन काजे आपीन तेरो हक पुरो करु।”
MAT 22:22 असा सामळीन चे बीही गुया, ने ईसुक छुड़ीन जाती रया।
MAT 22:23 तीनेत दाहड़े सदुकी माणसे ईसुन्‌चां आया तींद्‌रु वीच्‌यार छे की मर्‌या-सर्‌याम पछु जीवतु नी हवे, चे आवीन ईसु काजे पुछ्‌या।
MAT 22:24 ए मास्‌तर, मुसा कवलु की कदी काहनाक अदमीन पुर्‌या नी हया ने मर जाय, ती तेरु भाय तीनी बायर सी ईयाव करीन आपणा भायस वाटे अवल्‌यात पयदा करनु चाहे।
MAT 22:25 एक कावा असो हवलो सात भायस हतला, पेहलु ईयाव करीन मर गुयु ने अवल्‌यात नी हवी ती तेरु भाय तीनी रांडायली काजे बणाय लेदु।
MAT 22:26 असा करीन चे सातु भाय तीनी बायर काजे बणाया ने एकेक करीन बीना अवल्‌यातेन मर गुया।
MAT 22:27 आकरी मां ची रांडायली बायर बी मर गुय।
MAT 22:28 तेरेमां ची मर्‌या-सर्‌या मां सी पछी जीवती हवसे ती ची सातु भायसे मां सी कुणीन बायरी रवसे? काहाकी ची आखान बायरी बण गुयली।
MAT 22:29 ईसु तीनुक कह्‌यु, “चुखला सास्‌तुर ने भगवानेन ताकत नी जाणु, तेरेमां तुहुं भुले पड़ रया।
MAT 22:30 काहाकी चे मर्‌या-सर्‌या मां सी जीवता हय्‌न चे नी ईयाव करसे, ने नी ते चे ईयाव वाळा मां देवायसे, बाकुन सरग मां भगवानेन सरग वाळा काहवाळ्‌यान तसा रवसे।
MAT 22:31 बाकुन मरला मर्‌या-सर्‌याम सी पछा जीवता हवणेन बारामां काय तुहुं असो बुल नी भण्‌या ज भगवान तुहुंक कवलु।
MAT 22:32 मे अब्‌राहमेन भगवानेन, ने इसाकेन भगवानेन, ने याकुपेन भगवानेन छे? हयु मरलान नी बाकुन जीवतेलान भगवान छे।”
MAT 22:33 ईसुन वात सामळीन माणसे घाबराय गुया।
MAT 22:34 जत्‌यार फरीसी माणसे ज सामळ्‌या की ईसु सदुकीन जातीन माणसेन मुंहडा बंद कर देदलु, ती चे भेळा हय्‌न वीच्‌यार कर्‌या।
MAT 22:35 ने तींद्‌रे मायन एक यहुदी नीयमेन मास्‌तर ईसु काजे पारखणे करीन असु पुछ्‌यु।
MAT 22:36 ए मास्‌तर, मुसान साहरे लिखला सास्‌तुर मां आखा सी मट्‌ली हुकुम काहनी छे?
MAT 22:37 ईसु तीनाक कह्‌यु, “तु भगवान काजे आपणा मालीक सी आपणा आखा मन ने आपणा आखा जीव ने आपणी आखी अक्‌कल सी परम राख्‌जी।
MAT 22:38 आखा सी मट्‌ली ने खास हुकुम छे।
MAT 22:39 ने दीसरु हुकुम बी हेरेन तसु छे, आपणा चांदेवाळा माणसे सी आपणेन तसुत परम राख्‌जी।
MAT 22:40 जीत दुय हुकुम आखी मुसान साहरे लिखला सास्‌तुर ने भगवानेन अघी सी आवणे वाळी वात देखाड़ने वाळान नेवु छे।”
MAT 22:41 जत्‌यार फरीसी माणसे भेळा हतला, ती ईसु तीनुक पुछ्‌यु,
MAT 22:42 “मसीन बारामां तुंद्‌रु काय वीच्‌यार छे? चु कुणीन अवल्‌यात छे?” चे ईसुक कह्‌या, “दावुदेन अवल्‌यात।”
MAT 22:43 अतरामा ईसु तीनुक पुछ्‌यु, ती दावुद भगवानेन जीव-आत्‌मा मां रय्‌न तीना काजे मालीक काहा कह्‌वे?
MAT 22:44 भगवान मालीक, मारा मालीक सी कह्‌यु, मारे जेवड़े आंगे बठ, जत्‌यार लग की, मे तारा वेरी काजे पाय मेलनेन पयड़ी नी बणाय दम।
MAT 22:45 कदी दावुद तीना काजे मालीक कहें, ती चु तेरु पुर्‌यु कसु हय सके?
MAT 22:46 ने ईसुन जपाप सामळीन तींद्‌री बुलती बंद हय गुय? तीने दाहड़े सी काहना बी अळी ईसु काजे अळी काहनी बी वात पुछणेन हिम्‌मत नी आवी।
MAT 23:1 अळतेन ईसु माणसे टुळा काजे ने आपसान चेला काजे कह्‌यु,
MAT 23:2 “यहुदी नीयम सीकाड़न्‌या मास्‌तर्‌या ने फरीसी माणसे मुसान गादी पर बस रया;
MAT 23:3 तेरेमां चे तुहुं काजे ज्‌य काय बी कहें चो ते करजु ने मांजु, काहाकी चे कह्‌वे ते खरा बाकुन चे करे नी।
MAT 23:4 चे बेसकु भारी बुज बांदीन माणसेन खांदा पर मेल देय; बाकुन आपसा आपणी आंगळी लग बी नी टेकवणे हींडे।
MAT 23:5 चे आखा काम माणसे काजे देखाड़ने करीन करे, चे आपणी तावीज काजे चवड़ी करीन बांदे ने आपणात पुथल्‌यान झालर काजे नांबा कर देय!
MAT 23:6 चे खाणो खाणे बठे चां मुख्‌या-मुख्‌या जागा ने भगवानेन भक्‌तीन घरेन पेहलु जागु गमे।
MAT 23:7 हाटे मां वारलु छे की करीन आव-भाव करनु ती माणसे अगळ तीनुक मास्‌तर कह्‌वायणु तीनुक बेसको वारु गमे।
MAT 23:8 बाकुन तुहुं गुरु कह्‌वायणे करीन मां हुकारु काहाकी तुंद्‌रु एकुत मास्‌तर छे ने तुहुं आखात आखा भायस छे।
MAT 23:9 धरती पर काहनाक बी आपणु बास करीन घुण कह्‌वु, काहाकी तुंद्‌रु एकुत बास छे, चु सरगे मां छे।
MAT 23:10 माणसे अगळ मास्‌तर बी घुण कह्‌वायु, काहाकी तुंद्‌रु एकुत मास्‌तर छे, चु मसी छे।
MAT 23:11 जु तुंद्‌रे मां मटु छे, चु तुंद्‌रु चाकरी करन्‌यु बणे।
MAT 23:12 जु कुय आपसा काजे मटु मानसे, तीना काजे भगवान नानलु कर देसे, ने जु आपसा काजे नानलु मानसे, तीना काजे भगवानुत मटु कर देसे।
MAT 23:13 “ए ढंगड़ा करन्‌या यहुदी नीयमेन मास्‌तर्‌या ने फरीसी माणसे तुंद्‌रे वाटे बेसकी दुखेन वात छे! तुहुं ते माणसे काजे सरगेन राज मां भरायणे सी रुकी रया, नी ते तुहुं आपसा बी सरगेन राजेम नी भरायु ने दीसरा काजे बी सरगेन राज मां नी भरायणे देवु।
MAT 23:14 ए ढंगड़ा करन्‌या यहुदी नीयमेन मास्‌तर्‌या ने फरीसी माणसे तुहुं वाटे बेसकी दुखेन वात छे! तुहुं रांडायला बायरान घर मां भरायन तीनुक ठग लेवु, ने माणसे काजे देखाड़ने करीन बेसकी वार लग दुवा करु, तेरेमां तुहुं काजे अदुस डंड जड़से!
MAT 23:15 “ए ढंगड़ा करन्‌या यहुदी धरम सीकाड़न्‌‌या मास्‌तर्‌या ने फरीसी माणसे, तुंद्‌रे वाटे बेसकी दुखेन वात छे! काहाकी तुहुं एक जणा काजे आपणा पंथ मां लावणे करीन समुदर एणकीन धरती मां फीरु, ने जत्‌यार तुंद्‌रा पंथ मां आवीन चेलु बण जाय ती तीना काजे आपणा सी बी दुय गुणा जादा गुनाळु बणाय देवु की चु नरकेन आकठी मां जाणेन लायक बण जाय।
MAT 23:16 “ए आंदळा अगळवाण्‌या तुंद्‌रे वाटे बेसकी दुखेन वात छे! काहाकी तुहुं कह्‌वु कदी कुय माणुस मंदीरेन सगुन खाय ती तेरो काय बी नी हवे, बाकुन कदी कुय माणुस मंदीरेन सनान सगुन खाय ती तेरी वात खरली उतरी जाय।
MAT 23:17 ए डेड़-अकल्‌या ने आंदळा कुण मटो छे; सनो मटलो छे नीते मंदीर मटु छे? जेरेसी मंदीर मट्‌लु छे तेरेसी चो सनो चुखलो हवे?
MAT 23:18 तुहुं ज्‌य बी कह्‌व कुय माणुस वेदीन सगुन खाय ती तेरा काय बी खरलो नी हय बाकुन कुय माणुस ज्‌य वेदी पर मेकली, भेटेन सगुन खाय ती तेरी वात खरी उतरी जाय।
MAT 23:19 ए आंदळा, कुण मटो छे; भेट मटी छे की वेदी मटी छे तेरे सी भेट चुखलो हय जाय?
MAT 23:20 तेरेमां खास वात जी छे की जु वेदीन सगुन खाय च तीनी वेदी पर मेकायलो छे, चीजेन बी सगुन खाय।
MAT 23:21 जु मंदीरेन सगुन खाय, चु हेरी ने हेरेमां रवणेवाळान बी सगुन खाय।
MAT 23:22 जु सरगेन सगुन खाय, चु भगवानेन राज गादीन ने तीनी राजगादी पर बसण्‌यान बी सगुन खाय।
MAT 23:23 “ए ढंगड़ा करन्‌या यहुदी धरम सीकाड़न्‌‌या मास्‌तर्‌या ने फरीसी माणसे, तुंद्‌रे वाटे बेसकी दुखेन वात छे! तुहुं पुदीनान, ने सुपेन ने जीरान दसवु वाटु ते भगवान काजे आपु बाकुन मुसान साहरे लिखला सास्‌तुरेन खास वात काजे छुड़ देदा ने नीयाव, ने दया, ने भुरसा काजे टाळ देदा; तुहुं दसवु वाटु आप्‌या करजु बाकुन नीयाव ने दया ने भुरसान खास वात पाळता रहणु चाहजे।
MAT 23:24 ए आंदळा अगळवाण्‌या, तुहुं मीचर्‌या काजे ते झार देवु, बाकुन उटड़ा काजे गीळ जावु।
MAT 23:25 “ए ढंगड़ा करन्‌या यहुदी धरम सीकाड़न्‌‌या मास्‌तर्‌या ने फरीसी माणसे, तुंद्‌रे वाटे बेसकी दुखेन वात छे! काहाकी जसा तुहुं कटवराक ने तळी काजे उपर-उपर ते वारु उजाळु बाकुन चे माहें आंदारला ने आपसान ने भलो करनेन वीच्‌यार सी भरायला छे।
MAT 23:26 ए आंदळा फरीसी माणसे, पेहले कटवराक ने तळी काजे माहें सी मांज लेवु ती उपर सी बी वारु मांजाय जासे।
MAT 23:27 “ए ढंगड़ा करन्‌या यहुदी धरम सीकाड़न्‌‌या मास्‌तर्‌या ने फरीसी माणसे तुंद्‌रे वाटे बेसकी दुखेन वात छे! तुहुं तीना चुनु फीरला मसाणेन तसा छे ज्‌य उपर सी ते वारुत देखाये बाकुन माहें ते मरला माणसेन हाटका ने आखी भातीन भुंडला चीज भरायली छे।
MAT 23:28 हीनी रीत सी तुहुं बी उपर सी माणसे काजे धरमी देखाय पड़ु बाकुन तुंद्‌रा मन मां ढंगड़ा ने पाप मां भरायला छे।
MAT 23:29 “ए ढंगड़ा करन्‌या यहुदी धरम सीकाड़न्‌‌या मास्‌तर्‌या ने फरीसी माणसे, तुंद्‌रे वाटे बेसकी दुखेन वात छे! तुहुं भगवानेन अघी सी आवणे वाळी वात देखान्‌यान मसाण सवारु ने धरमी माणसेन मसाण बणावु।
MAT 23:30 तुहुं असा कह्‌वु ते खरा, ‘कदी हामु हामरा डाहा बुड़ान टेम मां रवता, ती भगवानेन अघी सी आवणे वाळी वात देखान्‌यान खुन करने मां हामरा डाहा बुड़ान सात नी देदा।’
MAT 23:31 तेरेमां तुहुं आपणे आप सी गवाय देवु की जे भगवानेन अघी सी आवणे वाळी वात देखान्‌यान हत्‌या कर्‌या तींद्‌रा अवल्‌यात छे।
MAT 23:32 तेरेमां तुहुं आपणा डाह बुड़ान पापेन घड़ु पुरी रीत सी भर देवु।
MAT 23:33 ए घड़सा, ने फेणवाळा घड़सान पीला, तुहुं नरकेन डंड सी कसा बचसु?
MAT 23:34 तेरेमां देखु, मे तुंद्‌रे धड़े भगवानेन अघी सी आवणे वाळी वात देखान्‌या ने अकलवाळा ने यहुदी धरम सीकाड़न्‌‌या मास्‌तर्‌या काजे मकलो; तुहुं हींद्‌रे मां सी थुड़ाक काजे मार नाखसु ने कुरुस पर चड़ावसु, ने थुड़ाक काजे आपणा भगवानेन भक्‌तीन घर मां सपाटा मेकसु ने एक सहर सी दीसरा सहर मां मारता फीरसु।
MAT 23:35 तेरेमां धरमी हाबील सी लीन बीरीक्‌याहन पुर्‌यान जकर्‌या लग, तीनुक तुहुं मंदीरेन वेदीन ईचमां मार नाखला, जतरो धरमीन लुही धरती पर बगळाय गुयलो छे चो आखो तुंद्‌रे मुणका पर पड़से।
MAT 23:36 मे तुंद्‌रे सी छाचलीन कह्‌वो की जी आखी वात हीनीत टेमे माणसे पर आय पड़से।
MAT 23:37 “ए यरुसलेम, ए यरुसलेम! तु भगवानेन अघी सी आवणे वाळी वात देखान्‌या काजे मार नाखे, ने जे तारे धड़े मकली रया, तीनु काजे बी तु दगड़ा दीन मार नाखे। मे काय कावा चाह्‌यु की जसी कुकड़ी आपणा पीच्‌या काजे तेरा पाखड़ा तळे भेळी कर लेय असुत मे बी तारा पुर्‌या काजे भेळु कर लीस, बाकुन तुहुं नी चाह्‌या।
MAT 23:38 देखु, तुंद्‌रु मंदीर तुंद्‌रे वाटे उजाड़्‌या छुड़ी जासे।
MAT 23:39 काहाकी मे तुंद्‌रे सी कहं की हय सी जत्‌यार लग तुहुं नी कह्‌वु, ‘तु वारु छे, जु मालीकेन नाव सी आवे’ जत्‌यार लग तुहुं मेसे अळी कदी नी देखसु।”
MAT 24:1 जत्‌यार ईसु मंदीरेन्‌चां सी नीकळीन जाणे बाजी रवलु, ती तेरा चेला तीना काजे मंदीर देखाड़ने करीन तेरे धड़े आया, की मंदीर कसों छे।
MAT 24:2 ईसु तीनुक कह्‌यु, “तुहुं आखो ज देख रया नी। बाकुन मे तुहुंक छाचलीन कहो, जां दगड़ा पर दगड़ु बी नी रवे एक-एक दगड़ु उदारी नाखसे।”
MAT 24:3 जत्‌यार हयु जेतुनेन बयड़ा पर बसी रवलु, ती चेला एखलात ईसु धड़े आवीन कह्‌या, “हामुक बताड़ की जी वात कत्‌यार हवसे? तारो आवणेन ने कळीन खत्‌तम हवणेन काय सहलाणी रवसे।”
MAT 24:4 ईसु तीनुक जपाप आप्‌यु, चेतीन रवु! तुहुंक कुय बी भटकाड़नु नी चाहजे।
MAT 24:5 काहाकी बेसका माणसे असा रवसे चे मार नाव सी आवीन कह्‌वसे, मे मसी छे! ने बेसका काजे भटकाड़ी देसे।
MAT 24:6 तुहुं लड़ाय पर लड़ायन वात सामळसु, ती घाबरायु घुण, काहाकी असो ते हवण्‌यत छे, बाकुन तीनी टेमे कळजुग सरनु नी हय।
MAT 24:7 काहाकी जाती पर जाती, ने राजे पर राजेन माणसे भेळा हयन लड़ाय करसे, ने जागे-जागे काळ पड़से, ने धरती धदड़ीन फाट जासे।
MAT 24:8 जी आखी वात हीड़ा-पीड़ान सुरुवात हवसे।
MAT 24:9 तत्‌यार चे एला पाड़ने करीन तुहुं काजे धराय देसे, ने तुहुंक मार नाखसे, ने तुहुं मारी वात सामळसु ने मार नावेन वजे सी आखी जातीन माणसे तुंद्‌रा वेरी रवसे।
MAT 24:10 तत्‌यार बेसका माणसे मारे पर सी भुरसु करनु छुड़ देसे, ने एक दीसरा काजे धराड़से, ने एक दीसरा सी वेरी रवसे।
MAT 24:11 बेसका लुच्‌चा भगवानेन अघी सी आवणे वाळी वात देखाड़न्‌या उठीन हुबा हवसे, ने बेसका माणसे काजे भटकाड़से।
MAT 24:12 पाप अदणे सी बेसका माणसेन परम छे चु सेळाय जासे,
MAT 24:13 बाकुन जु मरता लग गम खासे, तेरुत छुटकारु हवसे।
MAT 24:14 भगवानेन राजेन ज्‌य खुस-खबर आखी कळी मां माणसे परचार करसे, ने सामळावसे, काहाकी चे आखी जाती मां गवा बण जाय, तत्‌यार कळजुग सरनेन टेम आय जासे।
MAT 24:15 तेरेमां जत्‌यार तुहुं तीनु उजाड़ने वाळी वात ने भुंडीत चीज काजे तेरी वात दानीयल भगवानेन अघी सी आवणे वाळी वात देखाड़न्‌यान साहरे हवली, चु चुखली जागा मां उबु हय रवलु देख्‌यु, जे भणे, चे समजे।
MAT 24:16 तत्‌यार चे यहुदीया जीला मां रवे चे बयड़ा मां ढास जाय।
MAT 24:17 जे घरेन बमड़ा पर रवे, चे आपणा घर मां समान लेणे घुण उतरु;
MAT 24:18 ने जे कदी खेत मां हय, चे आपणा पुथल्‌या लेणे पछा घुण आवु।
MAT 24:19 तीनु दाहड़ा मां जी भारीस ने दुत धावाड़ती हसे, तींद्‌रे वाटे बेसकी, दुखेन वात छे।
MAT 24:20 दुवा करता रहु काहाकी सीयाळान दाहड़ा मां, ने आरामेन दाहड़े ढासणु नी पड़े।
MAT 24:21 काहाकी तीनी टेमे मां असी भारी एला हवसे, जसों हीनी कळीन सुरु सी हय लग नी हयो ने कदी तसों हवसे।
MAT 24:22 कदी दाहड़ा नी कम करता ती, काहनु बी जीव नी बचे, बाकुन नेवाड़ला माणसेन वजे सी चे दाहड़ा कम हय जासे।
MAT 24:23 तीनी टेमे मां कदी कुय बी तुंद्‌रे सी कह्‌वे, की देखु, मसी जां छे! नीते वां छे! ती भुरसु घुण करु।
MAT 24:24 काहाकी लुच्‌चा मसी ने लुच्‌चा भगवानेन अघी सी आवणे वाळी वात देखाड़न्‌या उठीन उबा हय जासे, ने मट्‌ली सहलाणी, ने बेसका मटा-मटा काम देखाड़से कदी हय सके ते नेवाड़ला काजे बी भटकाड़ देसे।
MAT 24:25 देखु, मे पेहलुत तुंद्‌रे सी जी आखी वात कय देदु।
MAT 24:26 तेरेमां कदी चे तुंद्‌रे सी कह्‌वे, देखु, हयु ते बयड़ा मां छे! ती बाहार घुण नीकळी जावु, नीते देखु, हयु ते खुणा कपरा मां छे, ती तुहुं भुरसु घुण करु।
MAT 24:27 काहाकी जसी वीजळी उगवणी सी नीकळे ने बुडवणी लग वीजळे, तसोत माणसेन पुर्‌यान बी आवणु हवसे।
MAT 24:28 जां लास रवे, चांहान मटला घुवड़ा बी भेळा हवसे।
MAT 24:29 तीनु दाहड़ा मां गरा आवणेन तत्‌यारुत पछेन दाहड़ु उलवाय जासे ने चांदेन वीजाळो खत्‌तम हय जासे, ने तारा छे चे सरग सी भुयमां हीट पड़से ने सरगेन आखो ताकुतेन काम सी हाल जासे।
MAT 24:30 तत्‌यार माणसेन पुर्‌यान सहलाणी सरग मां देखाय जासे ने तत्‌यार कळीन आखी जातीन माणसे छाती ठुकीन रड़से; ने माणसेन पुर्‌या काजे मट्‌ली ताकत ने सेक-सींगार साते वादळा मां आवतेलु देखसे।
MAT 24:31 चु फेप्‌यान मट्‌ली आवाज भेळु आपणा सरग वाळा काहवाळ्‌या काजे मकलसे, ने चे कळीन उपर एक खुणा सी दीसरा खुणा लग, चारे-मेर सी तेरा नेवाड़ला काजे भेळा करसे।
MAT 24:32 “अंजीरेन झाड़का सी गुयु दाखलु सीकु। जत्‌यार तीनी डाळ मां कवळा डीरा फुटणे लग जाय ने नवला पान्‌टा नीकळने बाजी जाय, ती तुहुं जाण जावु की हय उंडाळु आवणे वाळु छे।”
MAT 24:33 एरेत तसोत जत्‌यार तुहुं हीनु आखी वाते काजे देखु, ती जाण लेजु की तेरो आवणेन टेम धड़ेत छे, बाकुन बारना मां आय गुया।
MAT 24:34 ने तुहुंक छाचलीन कहो की जी आखी वात ईनी पीड़ीन माणसेन मरनेन पेहलुत हवसे।
MAT 24:35 सरग ने धरती टळ जासे, बाकुन मारी वाते कदी नी टळे।
MAT 24:36 हयु दाहड़ु ने तीनी टेमेन बारामां कुय बी नी जाणे, नी ते सरग वाळु काहवाळ्‌यु, नी ने पुर्‌यु नी, बाकुन बास अतरुत जाणे।
MAT 24:37 जसों नुहुन दाहड़ा मां हवलो, असोत माणसेन पुर्‌यान आवणु बी हवसे।
MAT 24:38 काहाकी जसों पाणी मां डुबणे सी पेहला दाहड़ा मां, जां लग की नुह ढंड्‌या पर नी चहड़्‌यु, तीनु दाहड़ा लग माणसे खात्‌ला ने पीदला, ने तींद्‌रे मां ईयाव हवतेला।
MAT 24:39 ने जत्‌यार लग मुसळ धार्‌यु पाणी आय्‌न तीनु आखा काजे उह्‌वाड़ीन नी ली गुयो, तत्‌यार लग तीनुक काय बी पतु नी चाल्‌यु, तसोत माणसेन पुर्‌यान आवणु बी हवसे।
MAT 24:40 तीनी टेमे दुय जणा खेत मां हसे, ने एक काजे लीन जाती रवसे ने दीसरा काजे चांहान रहणी देसे।
MAT 24:41 दुय बायर घट्‌टी दळती रवसे ने एक काजे लीन जाती रवसे ने दीसरी काजे चांहान रहणी देसे।
MAT 24:42 तेरेमां जागला रवु, काहाकी तुहुं नी जाणु की तुंद्‌रु मालीक काहने दाहड़े आवसे।
MAT 24:43 बाकुन ज्‌य वारु रीती सी जाण लेवु, की कदी घरेन मालीक जाणतु की चुट्‌टु कतरी टेमे आवसे ती चु जागतु रवतु ने आपणा घर मां सी काय बी चुरी नी हवणी देतु।
MAT 24:44 तेरेमां तुहुं बी तीयार रवु, काहाकी तीनी टेमे तुहुं वीच्‌यार बी नी करसु ने, तीनी टेमे मां माणसेन पुर्‌यु आय जासे।
MAT 24:45 तेरेमां भुरसु करन्‌यु ने अक्‌कल वाळु पावर्‌यु कुण छे? तीनाक मालीक आपणा नकर्‌या-चाकर्‌या काजे सामाळन्‌यु राख्‌‌यु काहाकी चु टेमे-टेमे पर तीनुक खाणो आप सके?
MAT 24:46 वारु छे, हयु पावर्‌यु, तीनाक तेरु मालीक चोन काम करतु देखे।
MAT 24:47 मे तुंद्‌रे सी छाचलीन कह्‌व, मालीक तीना पावर्‌या काजे आपसान आखा माल-धन पर हकदार्‌यु बणावसे।
MAT 24:48 बाकुन कदी हयु बयमान पावर्‌यु वीच्‌यारने लागे की मारा मालीकेन आवणे मां वार छे,
MAT 24:49 ने हयु असु वीच्‌यारीन दीसरा साती गुलाम पावर्‌या काजे ठुकणे, बाजी गुयु ने दारुड़्‌या भेळु खाय ने दारुड़्‌यु बण जाय।
MAT 24:50 ती तीना पावर्‌यान मालीक असला दाहड़ा आवसे, जत्‌यार हयु तेरी वाट बी नी देखे, ने असी टेम मां तीना काजे पतु नी रवे।
MAT 24:51 तत्‌यार चु मालीक तीना काजे भारी मटु डंड आपसे, ने ढंगड़ा करन्‌या साते भेसकी देसे। ने चां रड़से ने दात ककड़ावता रवसे।
MAT 25:1 सरगेन राज तीनु दस कुवारली पुरेन तसों छे जी आपणु-आपणु दिवु लीन लाडा सी मेळने करीन गुय।
MAT 25:2 हींद्‌रे मां पांच डेड़ अकली ने पांच अक्‌कल वाळी हतली
MAT 25:3 डेड़ अकली पुरे आपसु दिवा ते लेदी, बाकुन आपणे साते तेल नी लेदी;
MAT 25:4 बाकुन अक्‌कल वाळी आपणा दिवा साते आपणा कुड़्‌या मां तेल बी भर लेदी।
MAT 25:5 जत्‌यार लाडान आवणे मां वार हय गुय ती ची आखी बकास्‌या लेणे लागी ने सुय गुय।
MAT 25:6 आधी राते चां कचाटु हय गुयु, देखु, लाडु आय रयु! तेरे सी मेळने चालु।
MAT 25:7 तत्‌यार ची आखी कुवारली उठीन आपणा-आपणा दिवा काजे वारु करने लागी।
MAT 25:8 ने डेड़ अकली ने अक्‌कल वाळी सी कह्‌वी आपणा तेल मां सी थुड़ोक तेल हामुक बी आपु काहाकी हामरा दिवा उलवायणी बाजी रया।
MAT 25:9 बाकुन अक्‌कल वाळी जपाप आपी, कदी ज्‌य हामरे ने तुंद्‌रे वाटे पुरो नी हवे; वारु ते ज्‌य छे की तुहुं वेचणे वाळा धड़े जाय्‌न आपणे वाटे मुल ली लेवु।
MAT 25:10 जत्‌यार ची मुल लेणे जाणे बाजी रवली ती लाडु आय ज्‌य, ने जी तीयार हतली, ची लाडा साते ईयावेन घर मां जाती रय ने बारनो बुजाय ज्‌य।
MAT 25:11 हेरे पछेन ची दीसरी रवली कुवारली बी आवीन कह्‌वणे लागी, ए मालीक, ए मालीक, हामरे वाटे बारनो उघाड़ दे।
MAT 25:12 चु मालीक जपाप आप्‌यु, मे तुंद्‌रे सी छाचलीन कह्‌वो, मे तुहुंक नी उळखो।
MAT 25:13 तेरेमां जागता रवु, काहाकी तुहुं नीते तीना दाहड़ा काजे उळखु नीते तीनी टेम काजे जाणु।
MAT 25:14 काहाकी जी तीना माणसेन तसों छे जु पारका देस मां जाणेन टेमे आपणा पावर्‌या काजे बुलायन आपणो धन पावर्‌या काजे आप देदु।
MAT 25:15 चु एक जणा काजे सनान पांच सीक्‌का आप्‌यु, दीसरा काजे दुय आप्‌या, ने तीसरा काजे एक आप्‌यु; अळतेन एक-एक काजे तींद्‌री ताकत देखीन आप्‌यु, ने तत्‌यार पारका देस मां जाती रयु।
MAT 25:16 तत्‌यार, तीनाक चांदीन पांच सीका जड़ला, चु तत्‌यारुत जाय्‌न हींद्‌रे सी लेणु-देणु कर्‌यु ने पांच सीका अळी कमाय लेदु।
MAT 25:17 हीनी रीत सी तीनाक चांदीन दुय सीका जड़ला, चु बी दुय सीका अळी कमाय लेदु।
MAT 25:18 बाकुन तीनाक एक चांदीन सीकु जड़ला चु जाय्‌न जागा काजे खुदीन ने आपणा मालीकेन रुप्‌या काजे साताड़ देदु।
MAT 25:19 “बेसका दाहड़ाम पछे तीनु पावर्‌यान मालीक आयु ने हींद्‌रे सी लेखु लेणे लाग्‌यु।
MAT 25:20 तीनाक चांदीन पांच सीका जड़ला, चु पांच सीका अळी लावीन कह्‌यु, ‘ए मालीक तु मेसेक पांच सीका आपलु, देख, मे पांच सीका अळी कमाय लेदलु छे।’
MAT 25:21 तेरु मालीक तीना काजे कह्‌यु, बेसकु वारु छे ने भुरसा लायक पावर्‌यु तु थुड़ाक मां ईमानदार रयु मे तुसे बेसका चीजे पर हकदार बणावीस। आपणा मालीकेन खुसी मां साजीदार बण।
MAT 25:22 ने तीनाक चांदीन दुय सीका जड़ला, चु बी आवीन कह्‌यु, ‘ए मालीक, तु मेसे दुय सीका आपलु, देख, मे दुय सीका अळी कमाय लेदु।’
MAT 25:23 तेरु मालीक तीनाक कह्‌यु, ‘तु वारु छे ने भुरसा लायक पावर्‌यु, तु थुड़ाक मां ईमानदार रयु; मे तुसे बेसका चीजेन हकदार बणावीस। आपणा मालीकेन खुसी मां साजीदार हय जां।’
MAT 25:24 तत्‌यार तीनाक चांदीन एक सीकु जड़लु, चु आवीन कह्‌यु, ए मालीक, मे तुसे जाणतेलु की तु बेसकु डाहवाळु माणुस छे, ‘तु जां काय बी नी वेरे चानती काटे, ने जां नी खवळे चानती भेळा करे।
MAT 25:25 तेरेमां मे बीही गुयलु ने जाय्‌न तारा एक सीका काजे जागा मां साताड़ देदु। देख, ज्‌य तारो, छे चो ज्‌य छे।’
MAT 25:26 तेरु मालीक तीना काजे जपाप आप्‌यु, ‘ए वेरी ने उजेगलु पावर्‌या, जत्‌यार तु ज्‌य जाणतेलु की जां मे नी एरो वां सी काटो, ने जां मे नी खवळ्‌यु चांहान सी भेळु करो?
MAT 25:27 ती तुसेक मारा धन काजे सवकार्‌या काजे लीन आप देतु, तत्‌यार मे आवीन आपणा धन काजे ईयाज समोत ली लेतु।
MAT 25:28 तेरेमां चु सीकु हेरसी ली लेवु, ने तेरे धड़े दस हजार रुप्‌या छे, तीना काजे आप देवु।
MAT 25:29 काहाकी तीना धड़े छे, तीना काजे अळी आप देसे; ने तेरे धड़े बेसका हय जासे; बाकुन तेरे धड़े नी हय, तीना सी ज्‌य बी तेरे धड़े छे, तेरे धड़े सी हापकी लेसे।
MAT 25:30 ने हीना पापी पावर्‌या काजे बाहार आंदारला मां नाख देवु, चां रड़नु ने दात ककड़ावणु रवसे।’
MAT 25:31 “जत्‌यार माणसेन पुर्‌यु राजु बणीन आवसे ने तेरा आखा सरग वाळा काहवाळ्‌या पुठ्‌ये आवसे, तत्‌यार चु आपसान राजगादी पर बठसे।
MAT 25:32 ने आखा जातीन माणसे तेरे अगळ भेळा करसे; ने जसु गुवाळ्‌यु गाडरा काजे बुकड़ा सी अलग कर देय, असुत चु तीनुक एक दीसरा सी अलग करसे।
MAT 25:33 चु गाडरा काजे आपणे जेवड़े आंग्‌ये उबा राख्‌से ने बुकड़ा काजे आपणे डाखर्‌ये आंग्‌ये उबा करसे।
MAT 25:34 तत्‌यार राजु आपणा जेवड़े आंग्‌ये वाळा सी कह्‌वसे, ए मारा बास सी बरकत जड़ला माणसे आवु, तीना राजेन हकदार बण जावु, ज्‌य कळीन सुरु सी तुंद्‌रे वाटे तीयार कर मेकलो छे।
MAT 25:35 काहाकी मे भुकलु हतलु, ने तुहुं मेसे खाणे करीन आप्‌या; मे पीसलु हतलु, ने तुहुं मेसे पाणी पीयाड़्‌या; मे पारका देसेन हतलु ने तुहुं मेसे तारा घर मां ठेराया;
MAT 25:36 मारे धड़े पेहरनेन पुथल्‌या नी हतला, ती तुहुं मेसे पुथल्‌या पेहराया; मे मांदलु हतलु, ने तुहुं मारी खबर लेदला मे जेल मां हतलु ने तुहुं मेसेक भेळा हवणे आया।
MAT 25:37 तत्‌यार धरमी तीना काजे जपाप आपसे, ए मालीक, हामु कत्‌यार तुसे काजे भुकलु देख्‌या ने खावड़्‌या? नीते पीसलु देख्‌या ने पाणी पीयाड़्‌या?”
MAT 25:38 हामु कत्‌यार तुसे पारका देस वाळु देख्‌या ने आपणा घर मां बठाड़्‌या? नीते नांगेरलु देख्‌या ने पुथल्‌या पेहराया?
MAT 25:39 हामु कत्‌यार तुसे मांदलु नीते जेल मां देख्‌या ने तुसे भेळा हवणे आया?
MAT 25:40 तत्‌यार राजु तीनुक जपाप आपसे, मे तुंद्‌रे सी छाचलीन कह्‌वो की तुहुं जे मारा हीनु नानला सी नानला भायसे मां सी काहनाक बी एक साते कर्‌या, च मारेत साते कर्‌या।
MAT 25:41 तत्‌यार चु डाखर्‌या आंगे वाळा सी कवसे, ए सराप वाळा माणसे, मारे अगळ सी तीना जलमेन आकठा मां जाती रयु, ज्‌य भुतड़ा ने तेरा सरग वाळा काहवाळ्‌या वाटे तीयार कर मेकलो।
MAT 25:42 काहाकी मे भुकलु हतलु, ने तुहुं मेसे खाणे करीन नी आप्‌या; मे पीसलु हतलु, ने तुहुं मेसे पाणी नी पीयाड़्‌या;
MAT 25:43 मे पारका देसेन हतलु, ने तुहुं मेसे आपणा घर मां नी बठाड़्‌या; मारा डील पर पुथल्‌यो नी हतलो, ने तुहुं मेसे पुथल्‌या नी पेहराया; मे मांदलु ने जेल मां हतलु, ने तुहुं मारी खबर नी लेदा।
MAT 25:44 “तत्‌यार चे जपाप आपसे, ‘ए मालीक, हामु तुसे कत्‌यार भुकलु, ने पीसलु, ने दीसरा देसेन, ने डील पर पुथल्‌यो नी, ने मांदलु, जेल मां देख्‌या, ने तारी चाकरी नी कर्‌यु?’
MAT 25:45 तत्‌यार चु तीनुक जपाप आपसे, ‘मे तुंद्‌रे सी छाचलीन कह्‌वो, की तुहुं जे हीनु नानला मां सी नानला मां काहनाक बी एक जणा साते नी कर्‌या, च मारे साते बी नी कर्‌या।’
MAT 25:46 ने जे जलमेन डंड भुकेतसे बाकुन धरमी जलमेन जीवन मां भराय जासे।”
MAT 26:1 जत्‌यार ईसु ज्‌य आखी वात कय देदु ती आपणा चेला सी कह्‌वणे बाजी गुयु।
MAT 26:2 “तुहुं जाणु की दुय दाहड़ान पछे फसहन तीहवार छे, ने माणसेन पुर्‌या काजे कुरुस पर चड़ावणे वाटे धराय जासे।”
MAT 26:3 तत्‌यार मुख्‌या पुजारा ने भगवानेन माणसेन डाहा-बुड़ा काइफा नावेन मटला पुजारान आंगणा मां भेळा हया।
MAT 26:4 ने चे एक दीसरा सी वीच्‌यार कर्‌या, की ईसु काजे धुका सी धरीन मार नाखजे।
MAT 26:5 बाकुन चे कवतेला की “तीहवारेन टेम नी हय, काय असो नी हवे की माणसे मां लड़ाय झगड़ा हय जाय।”
MAT 26:6 जत्‌यार ईसु बेतन्‌या गांव मां सीमोन कुड़ायलान घर मां हतलु।
MAT 26:7 ती एक बायरी दगड़ा काजे वार सीस्‌यान तसों बणायन तेरे मां बेसको महंगलो ईत्‌तर लीन ईसु धड़े आवी, ने जत्‌यार ईसु रुटा खाणे बठ रवलु ती ईसुन मुणका पर लावीन नाख देदी।
MAT 26:8 ज्‌य देखीन तेरा चेला रीसाय गुया ने कह्‌वणे लाग्‌या, “हीना ईत्‌तर काजे काहा फालतु मां रद कर देदी?
MAT 26:9 हीना ईत्‌तर काजे ते जादा पयस्‌या मां वेचीन गरीब काजे वाट देदी।”
MAT 26:10 जी वात जाणीन ईसु हींद्‌रे सी कह्‌यु, “बायरी काजे काहा एला पाड़ु? जी बायरी मार साते वारु करली छे।
MAT 26:11 गरीब ते तुंद्‌रे साते जलम रवसे, बाकुन मे तुंद्‌रे साते जलम नी रवु।
MAT 26:12 जी बायरी मारे डील पर ज्‌य ईत्‌तर रेचवली छे, चो मारा डील काजे गाड़ने वाटे तीयार करली छे।
MAT 26:13 मे तुंद्‌रे सी छाचलीन कह्‌वो, की आखी कळी मां जां काहा बी ज्‌य खुस-खबरेन परचार करसे हीनी बायरीन कामेन वात वीच्‌यार ने हेर करसे।”
MAT 26:14 तत्‌यार यहुदा ईस्‌करीयोती, ज्‌य बारे चेला मां सी एक हतलु, मुख्‌या पुजारा धड़े जाय्‌न कह्‌यु,
MAT 26:15 “कदी मे ईसुक तुंद्‌रे हात मां धराड़ दम ती मेसे काजे काय आपसु?” चे तीना काजे तीस चांदीन सीक्‌‌का गीणीन आप देदा।
MAT 26:16 ने चु यहुदा तीनी टेमे सी ईसुक धराड़ने करीन मुखु हेरतु रयु।
MAT 26:17 अखमीरी रुटान तीहवारेन पेहले दाहड़े, चेला ईसु धड़े आवीन पुछणे लाग्‌या, “तु काहा चाहे की हामु तारे वाटे फसह तीहवारेन तीयारी करजे?”
MAT 26:18 ईसु कह्‌यु, “सहर मां हीना माणुस धड़े जाय्‌न तीना काजे कह्‌वु, मास्‌तर कह्‌वे की मारी टेम साते आय गुयली छे। मे आपणा चेला साते तारेन चां फसहन तीहवार मनावीस।”
MAT 26:19 ने ईसुन चेला जसु ईसु कह्‌यु तसात कर्‌या ने फसहन तीहवारेन खाणेन तीयारी कर लेदा।
MAT 26:20 जत्‌यार सांती वेळाय हय गुय ती चु बारे चेला साते रुटा खाणे करीन बठ ज्‌य।
MAT 26:21 जत्‌यार चे खाय रवला ती ईसु कह्‌यु, “मे तुंद्‌रे सी छाचलीन कह्‌वो की तुंद्‌रे मां सी एक जणु मेसेक धरावसे।”
MAT 26:22 जी वात सामळ्‌या चे बेसका फीकुर मां पड़ गुया ने हींद्‌रे मां सी आखा जणा पुछणे लाग्‌या, “ए मास्‌तर, काय चु मे छे?”
MAT 26:23 ईसु जपाप आप्‌यु, “जु मारे साते तळी मां हात नाखलु छे, हयुत मेसे धराड़से।
MAT 26:24 माणसेन पुर्‌या काजे ते मरनु छे, जसों तेरा बारामां लिखलो छे; बाकुन तीनु माणुस वाटे बेसकी दुखेन वात छे, तेरे साहरे माणसेन पुर्‌या काजे धराड़से! कदी चु माणुस पयदा नी हवतु ती तेरे वाटे वारु रवतो।”
MAT 26:25 तत्‌यार तीना धराड़ने वाळु यहुदा कह्‌यु, “ए मास्‌तर, काय चु मे छे?” ईसु कह्‌यु, “तु आपसुत कय देदु।”
MAT 26:26 जत्‌यार चे खाय रवला ती ईसु रुटु लेदु, ने बरकत मांगीन तुड़्‌यु, ने चेला काजे आपीन कह्‌यु, “लेवु जु रुटु खावु; ज्‌य मारो डील छे।”
MAT 26:27 अळतेन ईसु कटवरु लीन तु बेसकु वारु छे करीन कह्‌यु, ने तीनुक आपीन कह्‌यु, “तुहुं आखा तेरे मां सी पीयु,
MAT 26:28 काहाकी ज्‌य पीयालु वायदान चो मारो लुही छे, ज्‌य बेसका माणसे वाटे पापेन माफी वाटे उहणे वाळो छे।
MAT 26:29 मे तुंद्‌रे सी कह्‌वो की अंगुरेन रस काजे हीना दाहड़ा लग घुण पीयो जत्‌यार लग तुंद्‌रे साते आपणा बासेन राज मां नवलु नी पीयो।”
MAT 26:30 अळतेन चे गीत गायन जेतुनेन बयड़ा पर जाणे बाजी गुया।
MAT 26:31 तत्‌यार ईसु तींद्‌रे सी कह्‌यु, “तुहुं आखा आजुत राते मार बारामां वीख्‌राय जासु, काहाकी चुखली-सास्‌तुर मां गुयो लिखलो छे, ‘मे गुवाळ्‌या काजे मारीस, ने गाडरान टुळा रावण्‌या-तीवण्‌या हय जासे।’
MAT 26:32 बाकुन मे मरलाम सी जीवतु हवणेन पछे तुंद्‌रे सी पेहेल गलील जीला मां जायस।”
MAT 26:33 तेरेसी पतरस तीना काजे कह्‌यु, “कदी आखा तारा बारामां ठुकर खाय्‌न छुड़ देसे बाकुन मे कदी बी नी तुसेक छुड़ो!”
MAT 26:34 ईसु पतरस सी कह्‌यु, “मे तुसेक छाचलीन कह्‌वो की आजुत राते कुकड़ा वासणीक पेहेल, तु तीन कावा तु मेसेक नी जाणो करीन कवसी।”
MAT 26:35 पतरस ईसु काजे कह्‌यु, “कदी मेसेक तारे साते मरनु बी पड़े, तेबी मे तुसेक नी जाणो करीन कदी नी कह्‌वो!” ने असात करीन आखा चेला बी कह्‌या।
MAT 26:36 तत्‌यार ईसु आपणा चेला साते गतसमनी नावेन एक जागा मां आयु ने आपणा चेला सी कह्‌वणे लाग्‌यु, “जान बठ रवजु, जत्‌यार लग मे वां जाय्‌न दुवा करो जां लग तुहुं जान रवजु।”
MAT 26:37 ईसु पतरस ने जब्‌दीन दुयु पुर्‌या काजे साते लीन गुयु ने ईसु फीकुर मां पड़ीन कांदरायणे बाजी गुयु।
MAT 26:38 तत्‌यार ईसु तीनुक कह्‌यु, “मारु जीव बेसकु दुखी छे, जां लग की मारु जीव नीकळनेत हींडे। तुहुं जां हुबा रवु ने मारे साते जागला रवु।”
MAT 26:39 अळतेन चु थुड़ुक अळी अगुस जाय्‌न मुंहडान भुरसे पड़्‌यु, ने असी दुवा कर्‌यु, “ए मारा बास, कदी हय सके ती ज्‌य दुखेन पीयालु मारे पर सी टळ जाय, ती बी जसु मे चाहो असु नी बाकुन जसु तु चाहे तसोत हवणे दे।”
MAT 26:40 अळतेन ईसु चेला धड़े आवीन तीनुक सुवतेला देख्‌यु ने पतरस सी कह्‌यु, “काय तुहुं मारे साते एक घंटु बी नी जागी सकु काय?
MAT 26:41 जागता रवु, ने दुवा करता रवु की तुहुं पारख मां नी पाड़े, आत्‌मा ते तीयार छे, बाकुन डील लुलो छे।”
MAT 26:42 अळतेन चु दीसरी कावा जाय्‌न जीत दुवा कर्‌यु, “ए मारा बास, कदी ज्‌य मारे पीये बीगुर नी टळ सके ती तारीत मरजी पुरी हवे।”
MAT 26:43 तत्‌यार ईसु आवीन तीनुक अळी सुवतेला देख्‌यु, काहाकी हींद्‌रा डुळा नीद सी भरला हतला।
MAT 26:44 तीनुक छुड़ीन चु जाती रयु, ने तीनुत बुले सी अळी तीसरी कावा दुवा कर्‌यु।
MAT 26:45 तत्‌यार ईसु चेला धड़े आवीन तीनुक कह्‌यु, हय सुवता रवु, “ने आराम करु? देखु ची टेम आय गुयली छे, ने माणसेन पुर्‌यु पापीन हात मां धराय जासे।
MAT 26:46 उठु, चालु; देखु, धुकु दीन धराड़ने वाळु साते आय रयु।”
MAT 26:47 ईसु असु कयत रवलु की यहुदा जु बारामां सी एक हतलु आयु, ने तेरे साते मुख्‌या पुजारा ने माणसेन डाहा बुड़ा भीणी सी माणसेन मट्‌लु टुळु तलवार्‌या ने डेंगा लीन आया।
MAT 26:48 ईसुक धराड़ने वाळु यहुदा तीनुक असु ईसारु कर्‌यु: “तीनाक मे जाय्‌न गुळु दीस हयुत छे; तीना काजे जाय्‌न धर लेजु!”
MAT 26:49 ने तत्‌यार ईसु धड़े आवीन कह्‌यु, “ए मास्‌तर, वारलु छे की!” ने चु ईसु काजे बेसकु गुळु देदु।
MAT 26:50 ईसु यहुदा काजे कह्‌यु, “ए दुस्‌तीदार, तीना काम वाटे तु आवलु छे, तीना काम काजे कर ले।” तत्‌यार चे धड़े आवीन ईसुक धर लेदा।
MAT 26:51 ईसुन साती मां सी एक जणु हात अगु करीन आपणा मीयान मां सी तलवार काजे नीकाळ लेदु ने मुख्‌या पुजारान पावर्‌यान दीन तीना पावर्‌यान कान्‌‌टा काजे काट नाख्‌‌यु।
MAT 26:52 तत्‌यार ईसु तीना काजे कह्‌यु, आपणी तलवार काजे मीयान मां मेकले “काहाकी जे तलवार सी मारसे चे आखा तलवार सी माराय जासे।
MAT 26:53 काय तु नी जाणे की आपणा बास सी मे लीलघाय्‌न कह्‌व, ने चु सरग वाळा काहवाळ्‌यान बारे टुळा सी बी जादा टुळु मारे धड़े हींताळ मकली देसे?
MAT 26:54 बाकुन चुखला सास्‌तुर मां जी वाते असोत हवणेन जरुरी छे, कसी पुरी हवसे?”
MAT 26:55 तीनी टेमे ईसु माणसेन टुळा सी कह्‌यु, “काय तुहुं तलवार्‌या ने डेंगा लीन मेसेक डाकु समजीन धरने आय रया काय? मे दाहड़ीन मंदीर मां भरायन सीकाड़्‌या करतेलु ने तुहुं मेसे नी धर्‌या।
MAT 26:56 बाकुन जे आखा तेरेमां हयो की भगवानेन अघी सी आवणे वाळी वात देखान्‌यान बुल पुरो हवे।” तत्‌यार आखा चेला ईसुक छुड़ीन ढास गुया।
MAT 26:57 तत्‌यार ईसुक धरने वाळा तीना काजे काइफा नावेन मुख्‌या पुजारा धड़े लीन गुया, चां यहुदी नीयम सीकाड़न्‌‌या मास्‌तर्‌या ने आड़ा-बुड़ा भेळा हय रवला।
MAT 26:58 पतरस छेटे-छेटे ईसु पछळ-पछळ मुख्‌या पुजारान आंगणाम लग गुयु, ने घर मां जाय्‌न ईसु साते काय करे ने काय हवे चो देखणे करीन राखवाळ्‌या पावर्‌या भेळु जाय्‌न बठ गुयु।
MAT 26:59 मुख्‌या पुजारु ने आखा माणसे भेळा हयन ईसु काजे मार नाखणे वाटे ईसुन वीरुद मां झुटी गवा हेर रवला।
MAT 26:60 बाकुन बेसका झुटी गवाय देण्‌या आवणे पर बी वाक नी नीकाळ्‌या। आकरी मां दुय जणा आया,
MAT 26:61 असा कह्‌या, “गुयु अदमी असु कवलु, की भगवानेन मंदीर काजे उदार सको ने हीनाक तीन दाहड़ाम अळी बणाय सको।”
MAT 26:62 तत्‌यार मुखी पुजारु हुबु हयन ईसु सी कह्‌यु, “काय तु काय बी जपाप नी देतु? जे माणसे तारा वीरुद मां काय गवाय देय?”
MAT 26:63 बाकुन ईसु हुगुत हय रयु। तत्‌यार मुखी पुजारु ईसुक कह्‌यु, “मे तुसे जीवतेला भगवानेन सगुन आपो की कदी तु भगवानेन पुर्‌यु मसी छे, ती हामरे सी कय दे।”
MAT 26:64 ईसु तीना काजे कह्‌यु, “तु आपसुत कय देदु; नीते मे तुंद्‌रे सी ज्‌य बी कवतु की हय सी तुहुं माणसेन पुर्‌या काजे आखा सी ताकत वाळा भगवानेन जेवड़े आंगे बठलु, ने सरगेन आदळा पर आवतेलु देखसु।”
MAT 26:65 हेरसी मुखी पुजारु हेरा पुथल्‌या फाड़्‌यु ने कह्‌यु, जु भगवानेन वाक नीकाळ्‌ळु छे हय हामुक गवान जरुवत नी हय? देखु तुहुं बी ज्‌य वाक सामळावला छे।
MAT 26:66 तुंद्‌रा आखान काय वीच्‌यार छे? चे जपाप आप्‌या जु गुना वाळु छे, हीनाक मुतेन डंड जड़नु चाहजे।
MAT 26:67 तत्‌यार चे ईसुन मुंहडा पर थुप्‌या ने तीना काजे धुमाट्‌या ने दीसरा थापड़ाया ने असा कह्‌या।
MAT 26:68 ए मसी हामरे सी भगवानेन अघी सी आवणे वाळी वात देखाड़ने वाळु करीन कह्‌वी की तुसे कुण ठुक्‌यो?
MAT 26:69 पतरस बाहर आंगणा मां बठलु हतलु, की एक पावरनी पतरस धड़े आय ने कय, “तु बी ते ईसु गलील जीला वाळा साते हतलु।”
MAT 26:70 पतरस आखा माणसे अगळ असो कवीन ईसु काजे नीकारु देदु, “मे नी जाणतु तु काय कय रय।”
MAT 26:71 जत्‌यार पतरस बाहर बारना धड़े गुयु ती दीसरी पावरनी पतरस काजे देखी ने जे वां हुबा हय रवला माणसे काजे कय, “जु बी ते ईसु नासरी साते हतलु।”
MAT 26:72 पतरस सगुन खाय्‌न अळी ईसु काजे नीकारु देदु, “मे तीना माणुस काजे नी जाणो!”
MAT 26:73 थुड़ीक वार मां माणसे चां हुबा हय रवला, चे पतरस धड़े आवीन तीना काजे कह्‌या, “छाचलीन तु बी हींद्‌रे मां सी एक छे, काहाकी तारी बुली तुसे उजेंती कर देदी की तु चांहान वालु छे।”
MAT 26:74 तत्‌यार पतरस झीचकारने ने सगुन खाणे लाग्‌यु! “मे तीना माणुस काजे नी जाणतु।” ने तत्‌काल कुकड़ु आस देदु।
MAT 26:75 तत्‌यार पतरस काजे ईसु कवलु ची वात हेर आय गुय, “ईसु कवलु कुकड़ा आसणेन पेहल तु तीन कावा मारो नीकारु कर देसी।” ने पतरस बाहार जाय्‌न उसकी-उसकीन रड़्‌यु।
MAT 27:1 जत्‌यार एगात आखा मुख्‌या पुजारा ने माणसेन डाहा बुड़ा ईसु काजे मार नाखणे करीन मुजगी कर्‌या।
MAT 27:2 चे ईसुक बांद्‌या ने ली जाय्‌न पीलातुस सरकारेन हात मां आप देदा।
MAT 27:3 जत्‌यार तेरु धराड़ने वाळु यहुदा देख्‌यु की तेरे उपर गुनु लाग गुयु ती हयु पसतायु ने हयु तीस चांदीन सीक्‌‌का काजे मुख्‌या पुजारा ने डाहा बुड़ा नेता भीणी पछु देणे लीन आयु
MAT 27:4 ने कह्‌यु, “मे नी-गुना वाळा खुन करीन धराड़ीन पाप कर्‌यु!” चे कह्‌या, “हामुक काय करनु? तुत जाण।”
MAT 27:5 तत्‌यार हयु तीनु सीक्‌‌का काजे मंदीर मां नाखीन जाती रयु, ने जाय्‌न आपसुत टांगायन मर गुयु।
MAT 27:6 मुख्‌या पुजारा तीनु सीक्‌‌का काजे लीन कह्‌यु, “तीनुक, दान पेटी मां मेकणु वारु नी हय, काहाकी जे खुनेन कीमत वाळा छे।”
MAT 27:7 तेरेमां चे मुजगी करीन तीनु सीक्‌‌का सी पारका देसेन माणसे काजे गाड़ने वाटे कुमाहरेन खेत मुल ली लेदा।
MAT 27:8 ईनी वजे सी च खेत आज लग लुहीन खेत कह्‌वाये।
MAT 27:9 तत्‌यार ज बुल यीर्‌मयाह भगवानेन अघी सी आवणे वाळी वात देखान्‌यान साहरे कह्‌वलो हतलो च पुरो हयो: “चे तीनु तीस सीक्‌‌का मतलब तीनु ठहरावली कीमत काजे तीनाक ईस्‌रायेली माणसेन अवल्‌यात मायन जतरा ठहरावलो हतलो ली लेदा,
MAT 27:10 ने जसों मालीक मेसेक हुकुम देदु तसोत कुमाहरेन खेतेन कीमतेन हीसाब मां दी देदु।”
MAT 27:11 जत्‌यार ईसु रोमी सरकार पीलातुस अगळ उबु हतलु, ती सरकार वाळु, तीना काजे पुछ्‌या, “तु यहुदीन राजु छे?” ईसु तीना काजे कह्‌यु, “तु आपसुत कय रयु।”
MAT 27:12 जत्‌यार मुख्‌या पुजारा ने आड़ा-बुड़ा नेता तीना उपर गुनु लागाड़ रवला, ती हयु काय बी जपाप नी देदु।
MAT 27:13 अतरा पर पीलातुस सरकार वाळु तीना काजे कह्‌यु, “काय तु नी सामळतु, की जे तुसे धराड़ने करीन कतरी गवाय दी रया।”
MAT 27:14 बाकुन हयु तीना काजे एक वातेन बी जपाप नी देदु, ने जां लग बी की सरकार वाळा बी घाबराय गुया।
MAT 27:15 सरकारेन असी रीत हतली की तीना तीहवार मां एक केदी काजे जेल मां सी छुड़तेलु, ने माणसे तीना काजे बी कह्‌वतेला तीनाक छुड़ दे तीना काजे छुड़ देदलु।
MAT 27:16 तीनी टेमे तींद्‌रेन्‌चां एक बरअब्‌बा नावेन एक अंजाण्‌यु माणुस जेल मां हतलु।
MAT 27:17 ने जत्‌यार चे भेळा हया, ती पीलातुस तीनुक पुछ्‌यु, “तुहुं कुणीन चाहु की मे तुंद्‌रे वाटे छुड़ दम? बरअब्‌बा काजे, की ईसुक चु मसी कह्‌वाये?”
MAT 27:18 काहाकी हयु जाणतेलु की हया तीना काजे कुहराये धराड़ला छे।
MAT 27:19 जत्‌यार हयु नीयावेन गादी पर बठी रवलु ती हेरी घरवाळी कय मकली, “तु तीना वारलु माणसेन लफड़ा मां हात घुण नाखे, मे आज सपना मां तेरे वजे सी बेसकी मटी दुख हाकेलु।”
MAT 27:20 मुख्‌या पुजारा ने डाहा बुड़ा नेता माणसे काजे समजाड़्‌या की चे बरअब्‌बा काजे छुड़नेन मांग करे, ने ईसु काजे खत्‌तम कराड़ देय।
MAT 27:21 सरकारी पीलातुस तीनुक पुछ्‌यु, “हीनु दुय मायन कुणीक तुहुं चाहु, की मे तुंद्‌रे वाटे छुड़ दम?” चे कह्‌या, “बरअब्‌बा काजे।”
MAT 27:22 पीलातुस तीनुक पुछ्‌यु, “ती मे ईसुक काय करो, जु मसी कह्‌वाये?” आखा तीना काजे कह्‌या, “तीना काजे कुरुस पर चड़ावु।”
MAT 27:23 सरकार कह्‌यु, “काहा, हयु काय गलत कर्‌यु?” बाकुन चे अळी बी आयड़ी-आयड़ीन कह्‌वणे लाग्‌या, “तीना काजे कुरुस पर चड़ावु।”
MAT 27:24 जत्‌यार पीलातुस देख्‌यु की जे मारी नी सामळता ने उल्‌टा हुड़ी रया ने वात अघी बड़े ती हयु पाणी लीन आखा माणसेन टुळु अगळ हात धुयु ने कह्‌यु, “मे हीना धरमी माणसेन खुन नी करतु ने काय बी खामी नी हय ईनी वात काजे तुहुं जाणु।”
MAT 27:25 आखा माणसे जपाप देदा, “हेरो खुन हामरे उपर ने हामरी अवल्‌यात पर हवणी दे!”
MAT 27:26 हीनी वात पर हयु बरअब्‌बा काजे हींद्‌रे वाटे छुड़ देदु, ने ईसु काजे सुटाटीन सीपायड़ान हात मां आप देदु, काहाकी तीना काजे कुरुस पर चड़ावे।
MAT 27:27 तत्‌यार रोमी सरकारेन पीलातुसेन सीपायड़ा ईसु काजे कीला मां ली जाय्‌न, चां आखा सीपायड़ान टुळा काजे भेळा कर लेदा,
MAT 27:28 ने तेरा पेहला पुथल्‌या नीकाळीन तीना काजे रातला रंगेन लांबला पुथल्‌या पेहराया।
MAT 27:29 ने काटाळ्‌यु मुकुट गुथीन तेरा मुणका उपर मेल्‌या, ने तेरा जेवड़े हात मां बुरीन सुटी धराय देदा, ने चे तेरे अगळ मांडा टेकीन तीना काजे हासी कर्‌या, ने कह्‌या, ए यहुदीयान राजा, वारु छे की?
MAT 27:30 ने तेरे उपर थुप्‌या, ने तीनीत बुरीन सुटीक हापकीन तेरे मुणके देदा।
MAT 27:31 अळतेन चे हासी-उडाड़ीन चे ईसुन रातलो झगल्‌यो नीकाळ देदा, ने तेरा पेहला पुथल्‌या पेहराया, ने कुरुस पर चहड़ावणे ली गुया।
MAT 27:32 जत्‌यार चे सहरेम सी नीकळीन जाणे बाजी रवला, ती तीनुक सीमोनेन नावेन एक कुरेन गांव मां रवण्‌यु सीमोन नावेन एक अदमी भेळु हयु, ने चे तीना काजे बीहाड़ीन ईसुन कुरुस काजे हाकलाड़्‌या।
MAT 27:33 चे तीनी जागा पर पुग्‌या, गुलगुता मतलब, माणसेन टुबरान जागु कह्‌वाये चां ली गुया,
MAT 27:34 चे ईसुक कड़वो चीज भेसकेलु अंगुरेन रस पीणे आप्‌या, बाकुन ईसु चाख्‌यु बाकुन पीदु नी।
MAT 27:35 तत्‌यार चे तीना काजे कुरुस पर चड़ाया, ने तेरा पुथल्‌या कुणी-कुणीक जड़से करीन चिट्‌ठी नाखीन तेरा पुथल्‌या वाट लेदा।
MAT 27:36 ने चां बठीन ईसुन देख-भाळ करने लाग्‌या।
MAT 27:37 ने चे ईसुक मुणका सी उपर कुरुस पर एक लाकड़ान पट्‌टी खीळा ठुकीन टांग देदा, तीनी पट्‌टी पर ईसुन जु गुनु लिखलु हतलु, “जु यहुदीयान राजु ईसु छे”
MAT 27:38 तत्‌यार तेरे भेळा दुय डाकु हतला एक जेवड़्‌ये आंग्‌ये ने दीसरु डाखर्‌ये आंग्‌ये कुरुस पर चड़ाय देदा।
MAT 27:39 ने चां आवणे-जाणे वाळा माणसे मुणका डुलावता-डुलावता जाय्‌न हासी उड़ाया ने तेरी जबरान वाक नीकाळ्‌या।
MAT 27:40 ने असा कवतेला, “ए मंदीर काजे उदारने वाळा ने तीन दाहड़ा मां पछु बणावणे वाळा, तु आपसाक ते बचाड़! कदी तु भगवानेन बेटु हय ती कुरुस सी उतरी आव।”
MAT 27:41 हीनीत रीत सी मुख्‌या पुजारा, यहुदी नीयम सीकाड़न्‌या मास्‌तर्‌या ने डाहा बुड़ा हेरी हासी उड़ाया।
MAT 27:42 हयु दीसरा काजे वाचाड़्‌यु, ने आपणे आप काजे नी बचाड़ सके। हयु ते ईस्‌रायेलेन राजु छे कदी हय कुरुस पर सी उतरी आवे ती हामु हीना पर भुरसु करसुन।
MAT 27:43 हयु भगवान पर भुरसु राख्‌‌यु; कदी चु चाहतु, ती हींताळ तीना काजे बचाड़ लेय काहाकी हयु कवलु मे भगवानेन पुर्‌यु छे!
MAT 27:44 हेरेन तसु डाकु बी जे तेरे साते कुरुस पर चड़ावला हतला चे हेरी नाव-बद्‌दी करतेला।
MAT 27:45 मांजणीक टेमे बारे बजे सी तीन बजे लग आखा देस मां आंदारलो छावाय रयो।
MAT 27:46 तीनेक बजे ईसु मटी अवाज मां आयड़ीन कह्‌यु, “एली, एली, लमा सबक्‌तानी?” हेरो मतलब “ए मारा भगवान, ए मारा भगवान, तु मेसे काहा छुड़ देदु?”
MAT 27:47 जे चां उबा हतला हींद्‌रेम सी बेसका माणसे ज सामळीन कह्‌या, “हयु ते एलीय्‌याह काजे आयड़ी रयु!”
MAT 27:48 हींद्‌रे मां सी एक जणु छाटु दवड़्‌यु ने पुतो लीन अंगुरेन रस मां डुबाड़्‌यु ने सुटी पर मेळीन ईसुक चुसाड़्‌यु।
MAT 27:49 दीसरा कह्‌या, “रहणी देवु, देखजे एलीय्‌याह तीना काजे बचाड़ने आवे की नी।”
MAT 27:50 तत्‌यार ईसु अळी मटला अवाज मां आयड़ीन जीव छुड़ देदु।
MAT 27:51 ने देखु, मंदीरेन पड़दु उपर सी नेचु लग फाटीन दुय भाग मां हय ज्‌य, ने धरती हाल गुय ने चापर्‌या फाटणे लाग गुयु,
MAT 27:52 ने मसाण्‌या उघड़ी गुया ने भगवानेन बेसका मरला चुखला माणसेन डील जीवता हय गुया।
MAT 27:53 ने चे मसाण्‌या मां सी जीवता हय्‌न नीकळीन चुखला सहर मां गुया ने बेसका माणसे काजे देखाया।
MAT 27:54 तत्‌यार सुबेदार ने जे तेरे साते ईसुन राखवाळी करतेला, चे आखो ज काय हय च देखीन बेसका बीही गुया, ने कह्‌या, “छाचलीन हयु भगवानेन पुर्‌यु हतलु!”
MAT 27:55 चां बेसका बायरा गलील जीला मां सी ईसुन चाकरी करती-करती तेरे साते आवली ची ज काय हयो च देखी रवली।
MAT 27:56 हींद्‌रे मां मरीयम मगदलनी, ने याकुप ने योसेपेन माय मरीयम, ने जब्‌दीन पुर्‌यान माय हतली।
MAT 27:57 जत्‌यार सांती हयो ती युसुफ नावेन अरीमतीया गांवेन एक पयस्‌या वाळु एक माणुस, ज्‌य आपसुत ईसुन चेलु बणलु हतलु, चु आयु।
MAT 27:58 हयु पीलातुस धड़े जाय्‌न ईसुन धड़ मांग्‌यु। ईनी वात पर पीलातुस तीना काजे हुकुम आप्‌यु, की डील ली जावु।
MAT 27:59 युसुफ धड़ ली लेदु, ने एक वारला चादरा मां वेलटी लेदु।
MAT 27:60 ने तीना काजे तेरा नवला मसाण मां मेक देदु, ची मसाण हयु चापर्‌या मां खुदाड़ रवलु, ने मसाणेन बारना पर मट्‌लु दगड़ु गबड़ायन जाती र्‌यु।
MAT 27:61 मरीयम मगदलनी ने दीसरी मरीयम चां मसाण अगळ बठी रवली।
MAT 27:62 दीसरे दाहड़े ज्‌य तीहवारेन दाहड़ान पछेन दाहड़ु हतलु, मुख्‌या पुजारा ने फरीसी माणसे पीलातुस धड़े भेळा हयन कह्‌या।
MAT 27:63 “ए माहाराज, हामुक हेर छे की हयु धुकु देणेवाळु जत्‌यार जीवतेलु हतलु, ती कवतेलु की मे तीन दाहड़ाम पछु मर्‌या-सर्‌या सी जीवतु हय जायस।”
MAT 27:64 तेरेमां हुकुम दे की तीन दाहड़ा लग मसाणेन राखवाळी करजे, असो नी हय जाय की तेरा चेला आवीन तीना काजे चुरी करीन ली जाती रवे, ने माणसे सी कह्‌वणे बाजी जाय की, हयु मरलाम सी जीवतु हय गुयु। तत्‌यार जु पछलु धुकु पेहले सी बी जादा हवसे।
MAT 27:65 पीलातुस तीनुक कह्‌यु, “तुंद्‌रे धड़े राखवाळ्‌या हय ते। जावु, ने वारु समज सी राखवाळी करु।”
MAT 27:66 तेरेमां चे राखवाळ्‌या काजे पुठ्‌ये लीन गुया, ने दगड़ा पर छाप लागाड़ीन मसाणेन राखवाळी कर्‌या।
MAT 28:1 आरामेन दाहड़ान पछे ने हाप्‌तान पेहले दाहड़े संदारे एगात वीजाळो हवतेत मरीयम मगदलनी ने दीसरी मरीयम मसाण्‌या मां देखणे आय।
MAT 28:2 चे देख्‌या, एक मटु भुकम आयु काहाकी मालीकेन एक सरग वाळु काहवाळ्‌यु सरगे सी उतर्‌यु ने धड़े आवीन सरग वाळु काहवाळ्‌यु चापर्‌या काजे उन्‌‌धु कर देदु, ने तीना चापर्‌या पर बठ गुयु।
MAT 28:3 तेरु सीकु वीजळीन तसों हतलो ने तेरो पुथल्‌यो बरफेन तसों उजल्‌ळो हतलो।
MAT 28:4 पेहरु देण्‌या बीहीयन सीयारी ली लेदा, ने मरलान तसा हय गुया।
MAT 28:5 सरग वाळु काहवाळ्‌यु तीनु बायरा काजे कह्‌यु, “मां बीहु, मे जाणो की तुहुं ईसु काजे गुयु कुरुस पर चड़ावला तीना काजे हेरने बाजी रय।
MAT 28:6 चु जां नी हय बाकुन आपणा बुल मां कवलु तसुत मरलाम सी जीवतु हय गुयु। आवु, चु जागु देख लेवु, जां मालीक काजे मेल्‌ला,
MAT 28:7 ने हींताळ छाटा जाय्‌न तेरा चेला काजे कह्‌वु की चु मरलाम सी जीवतु हय गुयु ने तुंद्‌रे सी पेहल गलील जीला मां जासे चां तुहुं तीना काजे देखसु देखु मे तुहुंक कय देदु।”
MAT 28:8 चे बायरा बीहीन ने बेसकी खुस हय्‌न मसाण मां सी पछा आवीन ईसुन चेला काजे कवणे वाटे दवड़ीन आवी।
MAT 28:9 तत्‌यार ईसु तीनु बायरा काजे भेळु हयु। ने कह्‌यु, “वारु छे की करीन कह्‌यु।” ची बायरी धड़े आवीन ने ईसुन पाय धरीन तीना काजे आंध्‌यु।
MAT 28:10 तत्‌यार ईसु तीनुक कह्‌यु, “बीहु मां; मारा भायसेक जाय्‌न कह्‌वु की गलील जीला मां जाती रवु, चां मेसे देखसु।”
MAT 28:11 चे बायरा जाणी बाजी रवला ने पेहरु देण्‌या मां सी थुड़ाक जणा सहर मां आया ने मसाण मां ज्‌य काय हयो चो मुख्‌या पुजाराक कवीन सामळाय देदा।
MAT 28:12 तत्‌यार चे डाहा-बुड़ा माणसे साते भेळा हयन मुजगी कर्‌या ने सीपायड़ा काजे बेसका पयस्‌या आपीन कह्‌या,
MAT 28:13 “असा कवजु की राते जत्‌यार हामु सुय रवला ती तेरा चेला आवीन ईसुन धड़ काजे चुरी करीन लीन जाती रया।
MAT 28:14 ने कह्‌या कदी जी वात रोमी सरकारेन कान्‌टा मां लग जाती रवसे ती हामु तीना काजे समजाड़ीन तुहुंक डंड सी बचाड़ लेसुन।”
MAT 28:15 अळतेन चे पेहरु देण्‌या पयस्‌या ली लेदा ने जसा तीनुक सीकाड़ला हतला तसात चे कह्‌या जी वात आज लग यहुदी माणसे मां चाल रय।
MAT 28:16 ग्‌यारे चेला गलील जीलान तीना बयड़ा पर गुयला, चां ईसु तीनुक बताड़लु।
MAT 28:17 चे ईसु काजे देखीन तीना काजे आंध्‌या बाकुन काहनाक-काहनाक काजे भुरसु नी हयु।
MAT 28:18 ईसु हींद्‌रे धड़े आवीन कह्‌यु, “सरगेन ने धरतीन आखु हक मेसे जड़लु छे।
MAT 28:19 तेरेमां तुहुं जावु, ने आखी जातीन माणसे काजे चेला बणावु; ने तीनुक बास, ने पुर्‌यु, ने चुखली-आत्‌मान नाव सी बपतीस्‌मा देवु,
MAT 28:20 ने तीनुक आखी वात जी मे तुहुंक हुकुम आपो, मान्‌ने सीकाड़। ने देखु, मे कळीन खत्‌तम हवणे लग जलम मे तुंद्‌रे साते रवीस।”
MAR 1:1 भगवानेन पुर्‌यु ईसु मसीन खुस-खबरेन बारामां असी सुरुवात हय।
MAR 1:2 जसु मालीक भगवानेन अघली वात बताड़ने वाळु यसायाह नावेन माणसेन किताप मां लिखलो हतलो: “चां कह्‌लु की, मे मारी वात बताड़ने वाळाक मे तुंद्‌रे अगळ मकलीस, ने चु तुंद्‌रे वाटे वाट सुदारसे।
MAR 1:3 उजाड़्‌या बयड़ा मां एक आयड़ने वाळान वात सामळाय रय, की मालीक भगवानेन वाट तीयार करु, ने तेरे वाटे सयड़क सुदी करु।”
MAR 1:4 तेरेमां बपतीस्‌मा आपणे वाळु युहन्‌‌‌नु आयु, ने उजाड़्‌या बयड़ा मां रहणे वाळा माणसेक परचार कर्‌यु की, “बपतीस्‌मा लेवु।” ने तीनुक कह्‌यु की, पाप करनु छुड़ देवु, “तत्‌यार तुंद्‌रा पाप काजे भगवान माफ करसे।”
MAR 1:5 ने यहुदीया ईलाका मायन ने यरुसलेम सहर मायन बेसका माणसे नीकळीन तेरे धड़े गुया; ने आपणा-आपणा पाप काजे मानीन यरदन नदी मां युहन्‌ना सी बपतीस्‌मा लेदा।
MAR 1:6 युहन्‌‌‌नु उटड़ान कान्‌‌‌यान पुथल्‌या पेहरी रवलु, ने कमर मां चामड़ान पट्‌टु बांदी रवलु, ने चु टिड्‌डा ने अळी बयड़ा मां मुहाळेन मखड़ा खाया करतेलु।
MAR 1:7 ने युहन्‌ना ज परचार करतेलु की मारे पछळ आवणे वाळु छे, चु मारे सी ताकतवाळु छे, “मे तेरे लायक बी नी हय की ढंगु अळीन खासड़ान बंद खुली सको।
MAR 1:8 मे ते तुहुं काजे पाणी सी बपतीस्‌मा देदु, बाकुन चु तुहुं काजे चुखली-आत्‌मा सी बपतीस्‌मा देसे।”
MAR 1:9 तीनु दाहड़ा मां ईसु गलील जीलान नासरत सहर सी आवीन युहन्‌ना सी यरदन नदी मां बपतीस्‌मा लेदु।
MAR 1:10 जसुत ईसु पाणी मां सी डुबीन बाहर नीकळयु, चां तत्‌यारुत च सरग खुल ज्‌य, ने चुखली-आत्‌मा पेरवान तसों भगवानेन आत्‌मा काजे उतरतेलु देख्‌यु।
MAR 1:11 ने सरग मां सी असो सामळायो की, जु मारु लाटेक्‌लु पुर्‌यु छे, “ने मे हेरे सी बेसका खुस छे।”
MAR 1:12 तत्‌यारुत भगवानेन आत्‌मा ईसु काजे उजाड़्‌या बयड़ा भीणी ली गुयु,
MAR 1:13 बयड़ा मां ईसु चाळीस दाहड़ा लग भुतड़ु पाप कराड़्‌ने पारखतेलु, ने ईसु जंगली जनवार्‌यान ईचमां रयु, ने सरग वाळा काहवाळ्‌या चां आवीन तेरी सेवा चाकरी करतेला।
MAR 1:14 युहन्‌‌‌नु जेल मां धराय गुयु, ने पछेन ईसु गलील जीला मां आवीन भगवानेन खुस-खबरेन बारामां परचार कर्‌यु।
MAR 1:15 ने कह्‌यु “की टेम पुरो हय गुयो,” ने भगवानेन राज तुंद्‌रे धड़े आय लागलो छे, “ने तुहुं पाप सी पछा मन फेरवीन भगवान भीणी आवु ने खुस-खबर पर भुरसु करु!”
MAR 1:16 ने ईसु गलील दरीया धड़े-धड़े जातलु चां माछा धरन्‌याक दुय भाय काजे देख्‌यु, सीमोन ने अन्‌दीरीयास काजे पाणी मां जाळ नाखतेला देख्‌यु काहाकी चे काहर्‌या हतला।
MAR 1:17 ईसु तीनुक कह्‌यु “मारे पछळ आवु; ती मे तुहुंक माछा धरनेन जागा पर माणसे काजे भगवानेन राज मां लावणे वाळा बणावीस।”
MAR 1:18 चे तत्‌यारुत जाळ काजे छुड़ीन ईसु पुठ्‌ये चाल पड़्‌या।
MAR 1:19 ईसु अघु जाय्‌न जब्‌दीन पुर्‌या याकुप ने तेरु भाय युहन्‌ना काजे ढंड्‌या मां जाळ सुदारतेला देख्‌यु।
MAR 1:20 ने ईसु तीनु काजे तेरा चेला बणावणे करीन तत्‌यारुत बुलायु ने चे आपसान बास जब्‌दी काजे दाहड़क्‌या पुठ्‌ये ढंड्‌या मां छुड़दीन ईसु पछळ चाल पड़्‌या।
MAR 1:21 तत्‌यार चु कफरनहुम मां आयु ने चु तत्‌यारुत यहुदीन आरामेन दाहड़े ईसु तींद्‌रा भक्‌तीन घर मां गुयु ने सीकाड़ने बाजी गुयु।
MAR 1:22 ने माणसे ईसुन खबर सामळीन देखतात रय गुया, काहाकी हयु तीनुक नीयमेन मास्‌तर्‌यान तसु नी सीकाड़तेलु, बाकुन एक मटला हकवाळान तसु तीनुक सीकाड़्‌यु।
MAR 1:23 तीनीत टेमे तींद्‌रा यहुदीन भक्‌तीन घर मां एक माणुस आयु, तेरे भुतड़ु लागी रवलु।
MAR 1:24 चु भुतड़ु आयड़ीन कह्‌यु की “ए ईसु नासरी, हामुक तार सी काय काम? काय तु हामुक नास करने आयु? मे तुसेक जाणो, की तु कुण छे? तु चुखला भगवानेन वात बताड़न्‌यु छे!”
MAR 1:25 ईसु तीना काजे लड़ीन कह्‌यु, “हुगु रव; ने कह्‌यु हेरेम सी नीकळी जां।”
MAR 1:26 तत्‌यार भुतड़ु तीना माणुस मां सी जुर सी आयड़ीन नीकळी गुयु।
MAR 1:27 ने आखा माणसे ज देखीन देखतात रय गुया ने आंबा-सांबा वीच्‌यार करने बाजी गुया की, जी काय वात छे, ज ते पेहली कावा देख्‌या ने नवली वात छे? ईसु पुरा हक सी भुतड़ा काजे कहें, ने चे हेरी कह्‌ली वात काजे माने।
MAR 1:28 ने ईसुन नाव तत्‌यारुत गलीलेन आखा ईलाका मां फेल गुयो।
MAR 1:29 ईसु तत्‌यारुत यहुदीन भक्‌तीन घर मां सी नीकळीन याकुप ने युहन्‌ना काजे एखला छुड़ीन ने चे सीमोन ने अन्‌दीरीयासेन घर मां आया।
MAR 1:30 सीमोनेन सासुस मांदवाड़ेन वजे सी खाट्ला मां सुय रवली, तेरेमां हेरी सासुसेन बारामां बताड़्‌यु।
MAR 1:31 तत्‌यार ईसु धड़े जाय्‌न तेरु हात धरीन बठी कर्‌यु; ने तेरो सेरी उतरी गुयो, ने ची तेरी सेवा चाकरी करने बाजी गुय।
MAR 1:32 सांती वेळाय दाहड़ु डुब्‌यु तत्‌यार आखा मांदला माणसे ने भुतड़ा लागला माणसे ईसु धड़े लाया।
MAR 1:33 ने आखा गांवेन माणसे तीना घरेन अगळ भेळा हय गुया।
MAR 1:34 बेसका माणसे चां भाती-भातीन मांदवाड़ सी मांदला हतला, तीनु काजे ईसु वारु कर्‌यु, ने तींद्‌रे मां सी बेसका भुतड़ा बी नीकाळ्‌यु काहाकी भुतड़ा ईसु काजे उळखतेला असु करीन ईसु तीनु काजे बुलने बी नी देदु।
MAR 1:35 वीजाळो हवणे सी पेहेल ईसु उठ्‌यु ने घरेक छुड़ीन दुवा करने वाटे उजाड़्‌या जागा मां जाती र्‌यु।
MAR 1:36 तत्‌यार सीमोन ने तेरा दुस्‌तीदार ईसु काजे हेरने लाग्‌या।
MAR 1:37 जत्‌यार ईसु तीनु काजे जड़ी गुयु; ती चे तीनाक असा कह्‌या, की “आखा माणसे तुसेक हेरने बाजी रया।”
MAR 1:38 ईसु तीनुक कह्‌यु, “चालु आपणु आड़े-धड़ेन गांव मां जाता ने चां बी आपणुक खुस-खबरेन परचार करनु छे, काहाकी मे जत काम करने वाटे दुनीया मां आयु छे।”
MAR 1:39 तेरेमां ईसु गलीलेन आखा जीला मां तींद्‌रा यहुदीन भक्‌तीन घर-घर मां जाय जाय्‌न परचार करतु रयु, ने भुतड़ा काजे नीकाळतु रयु।
MAR 1:40 एक कुड़ायलु माणुस ईसु धड़े आयु, “ने तेरे अगळ मांडा टेकीन लीलघाय्‌न कह्‌यु, कदी तु चाहे ती मेसेक वारु कर दे।”
MAR 1:41 ईसु काजे तेरे पर बेसकी तरस आय, की चु तीना काजे छीमीन कह्‌यु, “मे चाहो की तु चुखु हय जां।”
MAR 1:42 ने तत्‌यारुत तेरु कुड़ वारु हय गुयु ने चु चुखु हय गुयु।
MAR 1:43 तत्‌यार चु तीनाक तत्‌यारुत चेतायु ने जां करीन कह्‌यु,
MAR 1:44 ने तीनाक कह्‌यु, “सामळ जी वात कुय काजे घुण कहें, बाकुन जाय्‌न आपसा काजे पुजाराक देखाड़ ने आपसा चुखु हवणेन बारामां ज काय मुसु ठहरावलु छे तीनाक बादा चड़ाव की तींद्‌रा गवा बण जाय।”
MAR 1:45 बाकुन हयु जाय्‌न आखा काजे परचार करने लाग्‌यु, ने अतरे दुर लग की फेल गुयो, ईसु पछेन खुल्‌लाम-खुल्‌ला फीरी नी सक्‌यु, बाकुन बाहर जाय्‌न बयड़ा मां रयु, ने चारे मेरेन माणसे तेरे धड़े आवणे लाग्‌या।
MAR 2:1 थुड़ाक दाहड़ा मां ईसु पछु कफरनहुम गांव मां आयु, ने चां आखी दुर मालुम हय गुयो; की ईसु जां रहतेलु चो घर छे।
MAR 2:2 बेसका माणसे ईसुन चां आया ने आखो घर भराय गुया ने बारना मायन बी जागा नी रय। ने ईसु तीनु काजे खुस-खबरेन परचार करने बाजी गुयु।
MAR 2:3 ने एक लखवान मांदवाड़ मां पड़ रवला एक माणुस काजे चार जणा हाकलीन ईसु धड़े लाया।
MAR 2:4 बाकुन जत्‌यार माणसेक चां नी जावायो काहाकी चां गड़दी बेसकी हतली; ती चे घर पर चहड़्‌या ने बमड़े सी कवलु हेड़ देदा ने मांदला काजे ईसु अगळ खाट्‌ली भेळात उतार देदा।
MAR 2:5 ईसु तींद्‌रु भुरसु देखीन तीना लखवा मां पड़ला माणुस काजे कह्‌यु, “ए पुर्‌या तारा पापेन माफी जड़ गुयली छे।”
MAR 2:6 तत्‌यार थुड़ाक नीयमेन मास्‌तर्‌या बी चां हतला, चे तींद्‌रा मन मां वीच्‌यार करने बाजी गुया,
MAR 2:7 “जु माणुस काहा असु कवतु हसे? जु ते भगवानेन नाव-बद्‌दी करे! बाकुन भगवान काजे छुड़ीन कुय बी पाप माफ नी कर सके।”
MAR 2:8 तत्‌यारुत ईसु तींद्‌रा आत्‌मान मन मायन वात काजे जाण लेदु ने कह्‌यु “तुहुं मन मां असा वीच्‌यार काहा कर रया?
MAR 2:9 हेरेम वारु काय छे? काय लखवान मांदवाड़ वाळाक ज कह्‌णु की तारा पापेन माफी तुसेक जड़ गुय, कह्‌णु की उठ, तारी खाट्‌ली हाकलीन चाल पड़?
MAR 2:10 बाकुन हेरेसी तुहुं जान लेवु, की माणसेन पुर्‌या काजे धरती पर पाप माफ करनेन बी हक छे।” ईसु तीना लखवान मांदला माणुस काजे कह्‌यु,
MAR 2:11 “मे तार सी कहं की, उठ, तारी खाट्‌ली हाकलीन तार घर जाती रव।”
MAR 2:12 चु तत्‌यारुत उठ्‌यु ने वारु हय गुयु ने खाट्‌ली हाकलीन आखा अगळ सी नीकळीन जात रयु, ईना कामेक देखतात रय गुया ने, भगवानेन बड़ाय करने लाग गुया, ने कह्‌णे लाग्‌या की, “हामु असो कदी नी देख्‌या।”
MAR 2:13 ईसु नीकळीन अळी गलील दरीयान धड़के गुयु, ने चां मट्‌ली गड़दी आय ने ईसु तीनु काजे सीकाड़ने बाजी गुयु।
MAR 2:14 जसु ईसु जातलु तत्‌यार हलफाईन पुर्‌यु फाळु मांगण्‌या काजे जागा पर बठ रवलु देख्‌यु; ईसु तीनाक कह्‌यु, “मारे पछळ चाल।” ने चु उठीन हेर पछळ चाली पड़्‌यु।
MAR 2:15 जत्‌यार ईसु तेरे घर रुटा खाणे बठ्‌यु, तत्‌यार बेसका फाळु लेणे वाळा ने पापी माणसे, ईसु ने आपसान चेला पुठ्‌ये रुटा खाणे बठ्‌या; ने चे ईसु पछळ आवला हतला।
MAR 2:16 फरीसी माणसे ने थुड़ाक नीयमेन मास्‌तर्‌या, तींद्‌रे भेळु खात्‌लु देखीन, चे चेला काजे असा पुछ्‌या, की हयु पापी माणसे ने फाळु लेणे वाळा भेळु खाणो काहा खाय रयु?
MAR 2:17 ईसु जी वात सामळीन तीनुक कह्‌यु “डाक्‌टर वारलु काजे नी, बाकुन मांदला काजे चाहजे। तसु मे धरमी काजे नी बाकुन पापी माणसे काजे बुलावणे आवलु छे।”
MAR 2:18 युहन्‌नान चेला ने फरीसी माणसेन चेला उपास करे; तेरेमां चे आवीन ईसु काजे पुछ्‌या, “युहन्‌नान चेला ने फरीसी माणसेन चेला उपास करे, बाकुन तारा चेला उपास काहा नी करे?”
MAR 2:19 ईसु तीनुक कह्‌यु, जत्‌यार लग दुल्‌लु अरात्‌या पुठ्‌ये रवे, ती अरात्‌या उपास पाळे काय कदी नी करे। जत्‌यार लग मे तींद्‌रे पुठ्‌ये छे, चां लग चे उपास नी पाळे।
MAR 2:20 बाकुन चु दाहड़ु आवसे, तत्‌यार दुल्‌लु तींद्‌रे सी अलग हय जासे, ती तीना टेमे उपास पाळसे।
MAR 2:21 “कुय बी जुन्‌ला पुथल्‌या मां नवला पुथल्‌या सी थीग्‌ळो नी लागाड़े; नीते च थीग्‌ळो हेरेम सी खेची लावसे, नीते नवलो, जुन्‌ला सी बी जादा फाट जासे।
MAR 2:22 नवलु अंगुरेन रस काजे जुन्‌ली चामड़ान बन्‌‌‌ली थयलि मां कुय नी भरे, नेते अंगुरेन रस तीनी थयलि काजे फाड़ देसे, ने अंगुरेन रस ने चामड़ान थयलि दुयु नास हय जासे; बाकुन नवला अंगुरेन रस नवली चामड़ान बन्‌ली थयलि मां भरे।”
MAR 2:23 असो हयो की चु यहुदी आरामेन दाहड़े ईसु ने तेरा चेला खेते मायन जाणे बाजी रवला। तत्‌यार गहुंन उम्‌बी तुड़ीन ने चुळी-चुळीन खाता-खाता जातला।
MAR 2:24 तत्‌यार फरीसी माणसे ईसुक कह्‌या, “देखु; जे आरामेन दाहड़े काहा असो काम करे, ज काम हामरे नीयमेन अनसारे वारु नी हय!”
MAR 2:25 ईसु तीनुक कह्‌यु, “काय तुहुं ज कदी नी भण्‌या की जत्‌यार दावुद काजे जरुड़ी हतली, ने जत्‌यार चु ने तेरा साती भुकला हतला, तत्‌यार चु काय करलु?
MAR 2:26 हयु कसु अबीयातार मटला पुजारान दाहड़ान टेमे, भगवानेन मंदीर मां जाय्‌न चड़ावला रुटा काजे खादु, बाकुन तीना खाणा काजे नीयमेन अनसारे पुजाराक छुड़ीन अळी कुय बी तीनाक खाणेन हक नी हतलो, बाकुन दावुद खादु बी ने हेरा साती काजे बी देदु।”
MAR 2:27 तत्‌यार ईसु तीनुक कह्‌यु, “आरामेन दाहड़ु माणसे वाटे बणावलु छे, बाकुन असो नी हय, की माणसे आरामेन दाहड़े वाटे बणावला छे।
MAR 2:28 तेरेमां माणसेन पुर्‌यु आरामेन दाहड़ान बी मालीक छे।”
MAR 3:1 ईसु पछु तींद्‌रा यहुदीन भक्‌तीन घर मां गुयु; चां एक माणुस हतलु, तेरु हात सुकी गुयलु,
MAR 3:2 थुड़ाक फरीसी माणसे ईसु पर झुटु ईल्‌जाम लागाड़नेन तकाय रवला, ने चु आरामेन दाहड़ान नीयम तुड़ीन, जु मांदला काजे वारु करे, की नी करे असा करीन चे भाळी रवला।
MAR 3:3 ईसु सुकला हात वाळा माणुस सी कह्‌यु, “माणसेन ईचमां उबु हय जां।”
MAR 3:4 ने ईसु माणसे काजे पुछ्‌यु, “काय आरामेन दाहड़े नीयमेन अनसारे वारु करनु की बुरो करनु वारु छे, जीवेक बचाड़नु की मारनु वारु छे?” बाकुन चे माणसे हुगात हय रवला।
MAR 3:5 चे मन मां बेसका उदास हतला, करीन ईसु बेसकु दुखी हय गुयु, ने चे रीसवायन चारेमेर तीनु काजे देख्‌यु। ने ईसु तीना काजे कह्‌यु “तारु हात लांबु कर।” ने चु हात लांबु कर्‌यु, ने तेरु हात वारु हय गुयु।
MAR 3:6 तत्‌यार फरीसी माणसे बाहार जाय्‌न तत्‌यारुत हेरोदेस राजान माणसे बेसका असा वीच्‌यार करने बाजी गुया, की हामु ईसुक कसा करीन मारजे।
MAR 3:7 ईसु तेरा चेला पुठ्‌ये गलील दरीया भीणी गुयु, ने तत्‌यार गलील ईलाका वाळा मट्‌लु टुळु ईसु पछळ-पछळ आवतेला।
MAR 3:8 ने ईसुन मटला काम सामळीन यहुदीया, ने यरुसलेम, ने इदुमीया, यरदन नदीन पली धड़ वाळा ने सुर ने सेदा ईलाका वाळा माणसे वारु काम करे करीन माणसेन मटु टुळु तेरे धड़े आयु।
MAR 3:9 ईसु तेरा चेला काजे कह्‌यु “माणसेन टुळु बेसकु छे करीन मारे वाटे एक ढंड्‌यो तीयार करु काहाकी मे दड़पाय नी सको।”
MAR 3:10 काहाकी ईसु बेसका माणसेक वारु करलु, तेरेमां दीसरा बी मांदला माणसे वारु हवणे करीन ईसु काजे छीमणे धकलाय्‌तात जातला।
MAR 3:11 भुतड़ा लागला माणसे ईसु काजे देखता वार मां तेरे अगळ पड़ जातला, ने आयड़ीन कवतेला की, “तु भगवानेन पुर्‌यु छे।”
MAR 3:12 ने ईसु तीनुक चेतायु की, मेसेक उजन्‌तु घुण करु करीन कह्‌यु।
MAR 3:13 पछेन ईसु एक बयड़ा पर जाती रयु, ने गमे तीनाक तेरे धड़े बुलायु; ने चे तेरे धड़े आया।
MAR 3:14 तत्‌यार ईसु बारे जणा मारे पुठ्‌ये रहु, करीन नेवाड़ लेदु ने तीनुक नेवताळा छे करीन नाव देदु, ने चे परचार करने गुया,
MAR 3:15 ने माणसे मां सी भुतड़ा नीकाळनेन हक आपीन मकल्‌यु।
MAR 3:16 चे जे छे: सीमोन तेरो नाव चु पतरस राख्‌यु,
MAR 3:17 ने जब्‌दीन पुर्‌या याकुप ने याकुपेन भाय युहन्‌‌‌नु, तींद्‌रा नाव हयु, बुअनरगीस मतलब गाजणे वाळान पुर्‌यु राख्‌यु,
MAR 3:18 ने अन्‌दीरीयास ने फीलीप्‌पुस, ने बरतुल्‌मे, ने मत्‌‌ती ने थोमा, ने हलफाईन पुर्‌यु याकुप, ने तद्‌दे ने अळी सीमोन कनानी चु देसेन सेवा करने वाळु हतलु,
MAR 3:19 ने यहुदा ईस्‌करीयोती चु ईसु काजे धुकु दीन धराड़ देदलु।
MAR 3:20 तत्‌यार बयड़ा मां सी ईसु घर आयु। ने चां बी माणसे बेसका भेळा हय गुया; ईसु ने तेरा चेला काजे रुटा खाणेन बी टेम नी जड़ी।
MAR 3:21 जत्‌यार हेरा कुटुम वाळा ईसुन बारामां माणसे असा कवतेला की “ईसु संक्‌यु हय गुयु।” असा करीन ईसुन घरना ईसु काजे घर बुलावणे करीन चाल पड़्‌या।
MAR 3:22 यरुसलेम सी आवला थुड़ाक नीयमेन मास्‌तर्‌या बी कह्‌तेला की, “हेरे मां ते भुतड़ा छे,” ने “जु ईसु भुतड़ा काजे ढासाड़ने करीन डाहला भुतड़ान साहरु लीन भुतड़ा काजे माणसेम सी नीकाळे।”
MAR 3:23 तेरेमां ईसु तीनु काजे धड़े बुलायन दाखलु दीन तीनुक कह्‌यु, “भुतड़ु कसु भुतड़ा काजे नीकाळी सके?
MAR 3:24 कदी काहनाक देस टुट जाय ने लड़ाय हवे, ती च राज कसों संय रय सके?
MAR 3:25 ने कदी काहनाक घरेन माणसे मां लड़ाय हवे, ती चो घर कसों संय रय सके?
MAR 3:26 तेरेमां कदी भुतड़ान राज टुट जाय, ती तेरो राज्‌य कसों बणीन रवसे? तीनाक ते मरनु पड़से।
MAR 3:27 “बाकुन काहनु बी माणुस काहनाक ताकतवाळान घर मां भरायन तेरो समान कसु लुटसे, तत्‌यार लग की चु पेहेल तीना ताकतवाळा काजे बांदी नी लेय; तीत तेरा घर काजे लुट सके।
MAR 3:28 “मे तुंद्‌रे सी छाचलीन कहं, की माणसेन आखा पाप ने नाव-बद्‌दी करे, तेरी माफी जड़ जासे,
MAR 3:29 बाकुन जु काहनुक चुखली-आत्‌मान नाव-बद्‌दी करसे, तीनुक कदी पापेन माफी नी जड़े, बाकुन चु जलम पापेन गुनेगार रवसे।”
MAR 3:30 “काहाकी चे असा कह्‌तेला की ईसु मां भुतड़ान आत्‌मा भराय रय।”
MAR 3:31 तत्‌यार ईसुन माय ने भायस आया, ने बाहरुत उबा रय्‌न ईसु काजे बुलावणे करीन घर मां दीसरा काजे मकल्‌या।
MAR 3:32 माणसे तेरे आड़े-धड़े बसी रवला, चे कह्‌या “देख तारी माय ने तारा भायस ने बहणस्‌या तुसेक बाहार हेरी रया।”
MAR 3:33 ईसु जपाप आप्‌यु, “मारी माय ने मारु भायस कुण छे?”
MAR 3:34 ने ईसु चां आड़े-धड़े बसी रवला, तींद्‌रे चारे मेर भाळीन कह्‌यु “सामळु, जे अतरात मारी माय ने मारु भायस छे।
MAR 3:35 जे कुय भगवानेन मरजी पर चाले, चु मारु भायस ने मारी बहणीस ने माय छे।”
MAR 4:1 ईसु पछु दरीया धड़े माणसेक सीकाड़ने बाजी गुयु। अळी बेसका माणसे ईसु धड़े भेळा हया, की ईसु दरीया मां एक ढंड्‌याम जाय्‌न बठी गुयु ने आखा माणसे एक धड़े जागा पर दर्‌यान धड़के उबा रय गुया।
MAR 4:2 ने ईसु दाखलु दीन तीनु काजे बेसकी वात सीकाड़्‌यु ने सीकाड़तु जाय्‌न कह्‌यु,
MAR 4:3 “सामळु! एक जणु बीज एरने गुयु।
MAR 4:4 एरनेन टेम मां थुड़ाक बीज वाटे धड़े पड़्‌या ने चिरला आवीन ईछीन खाय गुया।
MAR 4:5 थुड़ाक बीज चापर्‌या मां पड़्‌या चां अदु धुळु नी जड़्‌यु, ने जादा धुळु नी जड़नेन वजे सी छाटा उन्‌‌‌गी गुया,
MAR 4:6 ने जत्‌यार दाहड़ु उन्‌‌‌गीन तप लाग्‌यु तत्‌यार च धान उन्‌‌‌गीन चीमाय गुयो ने जड़ नी धरनेन वजे सी सुक गुयो।
MAR 4:7 थुड़ाक बीज काटाळस्‌या झाड़का मां पड़्‌या ने चां मटा हय्‌न दड़पाय गुया ने चे फळ नी लाया।
MAR 4:8 बाकुन थुड़ाक बीज वारलु जागा मां पड़्‌या ने चे उंग्‌या ने काहनाक मटा हय्‌न तीस गुणा ने काहनाक सांठ गुणा ने काहनाक सोव गुणा दाणा पाक्‌या।”
MAR 4:9 तत्‌यार ईसु कह्‌यु, “कुणी धड़े कान्‌टा छे, चे सामळी लेय!”
MAR 4:10 जत्‌यार माणसे जाती रया ने ईसु एखलुत रय गुयु, ती तेरा बारे ईसुन चेला ने थुड़ाक दीसरा बी ईसु धड़े आवीन चे दाखलान मतलब पुछ्‌या।
MAR 4:11 ईसु तीनुक कह्‌यु, तुहुं काजे भगवानेन राजेन वात समजणेन अक्‌कल छे, बाकुन बाहार वाळा वाटे, आखी वात दाखला मां सामळावसे,
MAR 4:12 तेरेमां की, चे देखे बाकुन देखता जाय्‌न, बी नी उळख्‌या; ने चे सामळे ने, सामळता जाय्‌न बी नी समजी गुया। कदी चे सामळता ती समजीन भगवान भीणी अळ जाता, ती तींद्‌रा पाप माफ कर देतु।
MAR 4:13 ईसु तीनुक कह्‌यु, “काय तुहुं काजे जु दाखलु नी समज मां नी पड़तु, ती रवला दाखला काजे कसा समज्‌सु?
MAR 4:14 एरने वाळु बुले एरे।
MAR 4:15 जे वाटे धड़े छे बुले एराये, चे जे छे की जत्‌यार चे सामळ्‌या, ती भुतड़ु तत्‌यारुत आय्‌न बुले काजे ज तेरेमां एराय्‌लो छे, चु तीनाक ईछी ली जाय।
MAR 4:16 काहनाक माणसे ते चापर्‌या वाळा जागान तसा छे; चे भगवानेन बुल सामळीन खुसी-खुसी सी आवरी देय।
MAR 4:17 बाकुन आपसान माहीं बुलेन वारु जड़ नी धरनेन वजे सी थुड़ाक दाहड़ा वाटे लग रवे; ने पछेन बुले माने ती तींद्‌रे पर मुसकील ने नाव-बद्‌दी आवे ती चे तत्‌यारुत भुरसु खुय देय।
MAR 4:18 ने काहनाक माणसे असा छे की काटाळस्‌या झाड़ी मां एरला बीज छे, चे माणसे बुले काजे सामळ्‌या।
MAR 4:19 ने चे जीवेन फीकुर करीन ने मात-भर बणनेन लालुच ने आखी भातीन चीजेन फीकुर मां भगवानेन बुले काजे दड़पी देय, ने चे दाणा नी पाके।
MAR 4:20 ने काहनाक माणसे चे वारलु जागान तसा छे चां दाणान तसों भगवानेन बुल समाय जाय; जे भगवानेन बुल सामळे ने मानीन पाळे। ने चे दाणा पाके काहनाक तीस गुणा ने काहनाक सांठ गुणा, ने काहनाक सोव गुणा।”
MAR 4:21 ईसु तीनु काजे कह्‌यु, “काय हामु दिवा काजे असा करीन लावजे की ठाहरा तळे नीते खाट्‌ली तळे मेक्‌जे? काय असा करीन नी लावे की, दीवाळ्‌या पर मेके।”
MAR 4:22 ने काय बी चीज सातायलो नी हय, ची देखाय जासे। ने जी चीज ढाकायली छे, जी उघड़ी जासे।
MAR 4:23 कदी काहनाक ने सामळनेन कान्‌टा हय, चे वारु सामळी लेय।
MAR 4:24 पछेन अळी ईसु तीनुक कह्‌यु, “ज काय तुहुं सामळु तीनी वात पर मन लागाड़ीन वीच्‌यार करु। तीना नाप सी तुहुं नापसु तीनी नाप सी तुंद्‌रे वाटे बी नापायसे, तेरसी बी जादा तुंद्‌रे साते हवसे।
MAR 4:25 काहाकी तेर धड़े ज काय छे, तीनाक अदुस आपसे; ने तींद्‌रे धड़े काय नी हय, तेरे धड़े सी ज काय ईतरोक रय र्‌यो, च बी मांग लेसे।”
MAR 4:26 ईसु अळी एक दाखलु कह्‌यु, “भगवानेन राज असो छे, जसों की एक माणुस खेत मां बीज एरे।
MAR 4:27 ने राते सुय गुयु, ने एगुत जागे, ने चे बीज कसा उंगीन मटा हया करीन पतु नी चाल्‌यु।
MAR 4:28 धरती मां मेर आपसीत मटी हय्‌न पाकी जाय। पेहेल डीरी फुटे अळतेन उम्‌बी नीकळे ने उम्‌बी मां दाणा भराये।
MAR 4:29 बाकुन जत्‌यार दाणा पाकी जाय तत्‌यार चु तत्‌यारुत दातळा सी काटणेन तीयारी कर लेय, काहाकी काटणेन टेम आय गुय।”
MAR 4:30 ईसु तीनुक कह्‌यु, “आपणु काहना हीसाब सी उळख्‌सुन की, भगवानेन राज कसों छे? ने काहना दाखला सी समज्‌सु?
MAR 4:31 भगवानेन राज रायन दाणान तसों छे; जत्‌यार खेत मां एरे ती; चां दीसरा आखा बीजे सी नानला देखाये।
MAR 4:32 बाकुन जत्‌यार चुपी देय, ती अदी जाय ने आखी मेर सी मटो हय जाय, ने तेरा डाळखा बेसका मटा हय जाय ने चां सरगेन चिरला बी पुत्‌रु बणायन आराम करे।”
MAR 4:33 ईसु अळी बेसका दाखला दीन माणसेक बुले सामळाया करतेलु, जतरा सामळनेन मन हय, तत्‌रोत सामळावतेलु,
MAR 4:34 ने दाखला पाखुर ईसु तीनु काजे काय बी नी सीकाड़तेलु बाकुन एखला मां तेरा चेला काजे दाखलान मतलब सीकाड़तेलु।
MAR 4:35 तीनेत दाहड़े सांती वेळाय, ईसु चेला काजे कह्‌यु, “आवु, आपणु दरीयान पली धड़ जाता।”
MAR 4:36 ने ईसुन चेला तीनी गड़दी सी अलग हय्‌न, चेला तीना ढंड्‌या मां चहड़ी गुया, जां ईसु ढंड्‌या मां पेहलुत सी बसी रवलु, ने चां तींद्‌रे पुठ्‌ये दीसरा ढंड्‌या बी हतला चे बी जाणे बाजी गुया।
MAR 4:37 तत्‌यारुत दरीया मां मट्‌ली आंधी-हवा आवी ने झलक ढंड्‌ये बेसकी ठुकाय ने ढंड्‌या मां पाणी भरायतेलो।
MAR 4:38 बाकुन ईसु ढंड्‌यान पछला खुणा मां ईसु ईसों मेलीन सुय रवलु। तत्‌यार चेला ईसु काजे उठाड़्‌या ने तीनाक कह्‌या “ए मास्‌तर, हामु ते मरने बाजी रया, तुसेक फीकुर नी हय काय?”
MAR 4:39 तत्‌यार ईसु उठ्‌यु ने आंधी-हवा ने झलक काजे लड़ीन कह्‌यु, “हुगी रय जां।” ने आंधी-हवा ने झलक धीरी पड़ीन आखी हुगी रय गुय;
MAR 4:40 ने ईसु चेलाक कह्‌यु, “तुहुं काहा बीही रया? तुहुं काजे हाल बी भुरसु नी हय काय?”
MAR 4:41 चेला बेसका बीही गुया ने आंबा-सांबा कह्‌णे बाजी गुया, “जु कुण छे? की आंधी-हवा ने पाणीन झलक लग हेरी वात!”
MAR 5:1 ईसु ने तेरा चेला दरीयान पली धड़ गीरासेन्‌यान ईलाका मां गुया,
MAR 5:2 जत्‌यार ईसु ढंड्‌या मां सी उतर्‌यु; तत्‌यारुत भुतड़ा लागलो एक माणुस मसाण मां सी नीकळीन आयु।
MAR 5:3 चु माणुस मसाण मां रवतेलु। ने माणसे तीनाक साकळ सी बांदणेन कुसीस कर्‌या बाकुन, चु कुय सी नी बांदाय तेलु,
MAR 5:4 काहनाक तीनाक काय कतराक कावा हात मां साकळ ने पाय मां बी साकळ बांदी देदला, तेबी चु तुड़ी देदलु, ने चु साकळ काजे बटका-बटका कर देदलु, ने तीनाक कुय बी बदाड़ी नी सकतेला, काहाकी चु ताकत वाळु हतलु।
MAR 5:5 चु रात-दाहड़ु मसाण ने बयड़ा मां आयड़तु फीरतेलु ने तेरेत दगड़ा दी दीन बेहुस हय जातलु।
MAR 5:6 चु माणुस ईसु काजे छेटे सी आवतेलु देखीन दवड़ीन ईसु अगळ ढंगु अळीन मांडान भुरसे आंध्‌यु।
MAR 5:7 ने जुर सी आयड़ीन कह्‌यु “ए ईसु, आखा मां सी मुख्‌या भगवानेन पुर्‌या, मारे साते तारो काय काम छे? मेसे भगवानेन सगुन छे, की मेसेक डंड मां आपे।”
MAR 5:8 काहाकी ईसु तीनाक कह्‌तेलु की, “ए भुतड़ा ईना माणुस मां सी नीकळी जां।”
MAR 5:9 ईसु तीना माणुस काजे पुछ्‌यु “तारो नाव काय छे?” ने चु कह्‌यु, “मारो नाव ‘सेना’ छे; काहाकी हामु बेसका छे।”
MAR 5:10 ने भुतड़ा ईसु सी वीन्‌ती कर्‌या, “हामु काजे ईना ईलाका मां सी बाहार मां मकले।”
MAR 5:11 चां एक बयड़ान कड़खे सुहर्‌यान एक मटु टुळु चरने बाजी रवलु।
MAR 5:12 भुतड़ा अळी लीलघाय्‌न कह्‌यु, “हामु काजे पला सुहर्‌या मां मकली दे, तींद्‌रेम हामु रवसुन।”
MAR 5:13 ईसु भुतड़ा काजे हुकुम आप्‌यु; ने चे भुतड़ा तेरे मां सी नीकळीन सुहर्‌या मां जाय्‌न भराय गुया ने चे सुहर्‌या दुयेक हजार हतला, चे आखा सुहर्‌या दवड़ीन दरीया मां कुद पड़्‌या ने पाणी मां डुबीन मर गुया।
MAR 5:14 ज देखीन गुवाळ्‌या दवड़ीन फळ्‌या ने गांव मां जाय्‌न ज काय हयो, तेरी खबर कर देदा, ने आखा माणसे ज काय हयो च देखणे आया।
MAR 5:15 ने जत्‌यार दीसरा माणसे ईसु धड़े आया चां तीना माणुस काजे देख्‌या, तेरे पेहेल भुतड़ा लागी रवला। बाकुन चु वारु हय्‌न पुथल्‌या पेरीन बठी रवलु, तत्‌यार चे माणसे बीही गुया।
MAR 5:16 भुतड़ा लागला माणसेन ने अळी सुहर्‌यान काय हयो करीन, चे देख्‌णे वाळा पुछ्‌या, ने सुहर्‌यान बारामां जाय्‌न दीसराक कय देदा।
MAR 5:17 तत्‌यार माणसे आवीन ईसु काजे लीलघाय्‌न कह्‌या की, हामरा ईलाकाम सी जाती रव।
MAR 5:18 तत्‌यार ईसु पछु जाणे करीन ढंड्‌या मां बसणे बाजी गुयु; तीनाक पेहेल भुतड़ा लागी रवला, चु माणुस ईसु काजे लीलघाय्‌न कह्‌यु, “मेसेक तारे पुठ्‌ये आवणी दे।”
MAR 5:19 बाकुन ईसु तीनाक कह्‌यु, “नी मारे पुठ्‌ये मां आवे, घर पछु जां ने मालीक तारे पर दया करीन तारे वाटे कतरु वारु काम कर्‌यु, च तारा घर वाळाक बताड़।”
MAR 5:20 चु चां सी तेरा दीकापुलीस जीलाम आखे जागे जाय्‌न परचार करने बाजी गुयु की ईसु मारे वाटे बेसको वारु काम कर्‌यु, ने माणसे तेरी वात काजे सामळीन देखतात रय गुया।
MAR 5:21 गीरासेनीया ईलाका मां सी ईसु पछु ढंड्‌या मां बठीन दरीयान पली धड़ गुयु। ती चां धड़के माणसेन गड़दी चारे मेर लाग गुय।
MAR 5:22 याईर नावेन एक माणुस हतलु, चु तींद्‌रा भक्‌तीन घरेन मुख्‌या मायन एक हतलु, चु ईसुक देखीन पाये पड़्‌यु,
MAR 5:23 ने चु ईसु सी लीलघाय्‌न कह्‌यु, “मारी नानली पुरे मरनेत पर छे। तु दया करीन मारे पुठ्‌ये चाल, ने तेरे पर हात मेल, ने ची वारु हय्‌न जीवतेली रवे!”
MAR 5:24 तत्‌यार ईसु तेरे पुठ्‌ये चाली पड़्‌यु। ने मट्‌ली गड़दी बी पुठ्‌येत गुय। ने तेरे पुठ्‌ये चालन्‌या माणसे चीपदाय्‌न ने धकलाय्‌न ईसु पर पड़तेला।
MAR 5:25 एक बायर हतली, तेरे बारे साल सी पोगराळान दुख लागलो हतलो।
MAR 5:26 ची बेसकी परेसान हतली ने डाक्‌टर्‌या मां ईलाज कराड़ी-कराड़ीन आखा पयस्‌या सर गुयला, तेबी वारु नी हय। बाकुन जादास मांदी हय गुय।
MAR 5:27 ची ईसुन बारामां ज सामळीन गड़दी मां तेरे पछळ सी आय, ने ईसुन पुथल्‌या काजे छीमी लेदी।
MAR 5:28 काहाकी ची सुचतेली की, “कदी मे ईसुन पुथल्‌याक छीमी लीस, ती मे वारु हय जायस।”
MAR 5:29 असी करीन ची माणसेन टुळा मां धकलाय्‌न ईसुन पुथल्‌या काजे छीमी लेदी ने तत्‌यारुत तेरे लुही नीकळनु बंद हय गुयो, ने तेरा डील मां मालुम पड़ गुयो, की मे हीड़ा-पीड़ा मां सी छुटीन वारु हय गुय।
MAR 5:30 ने तत्‌यारुत ईसुन डील मां मालुम पड़ गुयो, की मारे मां सी छुटकारु आपणेन ताकत नीकळी छे, ने ईसु पछु फीरीन गड़दी मायन माणसेक पुछ्‌यु, “मारो झगल्‌यो कुण छीम्‌यो?”
MAR 5:31 तेरा चेला तीनाक कह्‌या, “जे माणसे ते चीपदाय्‌न ने धकलाय्‌न तारे पर पड़ रया ने तु काहा पुछी र्‌यु की; मेसेक कुण छीम्‌यो?”
MAR 5:32 तत्‌यार बी ईसु मेसेक कुण छीम्‌यो करीन देखणे चारे मेर भाळने बाजी गुयु।
MAR 5:33 तत्‌यार ची बायर मारो बेसको भलो हवलो छे असी जाणीन ची बीहती ने कापती जाय्‌न ईसु धड़े आवी, ने ईसुन पाये पड़ी ने ज काय हयो च छाचलीन बताड़ देदी।
MAR 5:34 ईसु तीनीक कह्‌यु, “मारी बेटी तु ते मारे पर भुरसु करी, तेरेमां तु हीड़ा-पीड़ा मां सी छुटीन वारु हय गुय। तु सुकेन जीवे जीवती रव।”
MAR 5:35 ईसु तीनीक कवणे बाजी रवलु, ती चां तीना याईरेनेन घर मां सी काहनाक आवीन मुख्‌या काजे कह्‌या, “तारी पुरे नी बची, ने मास्‌तर काजे काहा दमे।”
MAR 5:36 ईसु तींद्‌री वात काजे सामळ्‌यु बाकुन धीयान नी देदु ने मुख्‌या काजे कह्‌यु, “मां बीहे, बाकुन मारे पर भुरसु अतरुत राख।”
MAR 5:37 ने ईसु दीसरा काजे चाहात रहणीदीन पतरस ने याकुप ने अळी याकुपेन भायस युहन्‌ना काजे अतरुत तेरे पुठ्‌ये आवणे देदु।
MAR 5:38 ने ईसु तींद्‌रे पुठ्‌ये मुख्‌यान घर पुग्‌या; तत्‌यार घर मां बेसका माणसेक देख्‌यु ने रड़तेला ने आयड़ता सामळ्‌यु।
MAR 5:39 तत्‌यार ईसु घर मां जाय्‌न तीनुक कह्‌यु, “तुहुं काहा रड़ीन ने कलपी र्‌या? पुरे मरी नी बाकुन, सुवणे बाजी रय।”
MAR 5:40 चे माणसे ईसुन वात सामळीन हीनाक हासणे बाजी गुया, बाकुन ईसु तीनु आखा काजे घर मां सी बाहर नीकाळ देदु ने पुरेन आयस-बास ने अळी तेरा तीन चेला काजे लीन पुरे हतली, चां गुया ने पुरे मरीन पड़ी रवली।
MAR 5:41 ने ईसु पुरेन हात धरीन तीनीक कह्‌यु, “तलीता, कुमी!” तेरो मतलब छे, “पुरे मे तुसेक कहं की उठ!”
MAR 5:42 ने ची नानली पुरे तत्‌यारुत जीवती हय्‌न उठ गुय ने चालने फीरने लागी; ची पुरे बारे सालेन हतली। ने चे ज देखीन देखतात रय गुया।
MAR 5:43 पछेन ईसु तीनुक हुकुम आपीन कह्‌यु, जी वात कुय काजे घुण कहें, “ने अळी असु बी कह्‌यु, की पुरे काजे काहींग खाणे आपु।”
MAR 6:1 चां सी ईसु तेरा गांव नासरत भीणी चाली पड़्‌यु, ने तेरे पुठ्‌ये तेरा चेला बी आया।
MAR 6:2 ने चु यहुदीन आरामेन दाहड़े, भक्‌तीन घर मां जाय्‌न सीकाड़ने बाजी गुयु ने आखा तेरी वात सामळीन देखतात रय गुया। ने आंबा-सांबा पुछणे बाजी गुया “की असी अक्‌कल हीनाक कां सी जड़ी ने बेसको मटो काम करनेन ताकत कुण देदो?”
MAR 6:3 काय जु सुतारेन पुर्‌यु नी हय? चु मरीयमेन पुर्‌यु ने याकुप ने योसेस ने यहुदा ने सीमोनेन भाय छे? ने काय हेरा बहणस्‌या हामरा ईचमां नी रवे? तेरेमां चे हीनाक मान्‌या नी।
MAR 6:4 ईसु तीनुक कह्‌यु, “भगवानेन अघी सी वात बताड़ने वाळा ने आपसान गांव वाळा ने तेरा रीस्‌ता वाळा ने आपसान घरवाळाक छुड़ीन कुय बी ईज्‌जत नी करे।”
MAR 6:5 चां ईसु गांव मां बेसकु मटो काम नी कर्‌यु; बाकुन थुड़ाक मांदला माणसे पर हात मेलीन तीनुक वारु कर्‌यु।
MAR 6:6 ने ईसुक तींद्‌रु भुरसु नी करने सी मन मां असु कह्‌यु, की जे कसला माणसे छे, बाकुन चारे मेर गांव मां फीरतु रयु ने सीकाड़तु गुयु।
MAR 6:7 ईसु आपसान बारे चेला काजे बुलायु ने तीनुक भुतड़ा नीकाळनेन हक आप्‌यु; ने दुय-दुय जणा काजे मकल्‌यु।
MAR 6:8 चु तीनुक असु कह्‌यु, “कदी बाहार कांखुर जावु ती लाकड़ीक छुड़ीन दीसरो काय बी साते घुण ली जावु, नी ते रुटा, नी ते झुळु, नी ते बटवा मां पयस्‌या।
MAR 6:9 बाकुन तुहुं चाट्‌या पेहेरजु ने पेहेरलो झगल्‌योत पेहरीन जाजु, ने दीसरो काय घुण ली जावु।”
MAR 6:10 ने ईसु तीनुक कह्‌यु, “काहनाक घरवाळा आव करीन नेवता आपे, ती चांहान रवजु जां लग चु जागु छुड़े नी।
MAR 6:11 काहना बी जागे माणसे तुंद्‌रो आव-भाव नी करे ने तुंद्‌री वात नी सामळे ती चां सी आवणेन पेहेल पायेन धुळु चांहान झाटकी देजु काहाकी चे आवणे वाळा डंडेन बारामां बीहीन रवसे।”
MAR 6:12 तत्‌यार चे चां सी जाती रया, ने जाय्‌न असा परचार कर्‌या, की पाप करनु छुड़ीन मन फीरावु।
MAR 6:13 ने चे बेसका माणसे मां सी भुतड़ा नीकाळ्‌या ने मांदला काजे जेतुनेन तेल लागाड़ीन वारु कर्‌या।
MAR 6:14 असो करीन ईसुन नाव आखे दुर मालुम हय गुयो ने अतरो बी की हेरोदेस राजाक बी, ईसुन बारामां सामळ्‌यु ने कह्‌यु, “बपतीस्‌मा आपण्‌यु युहन्‌‌‌नु पछु जीव उठलु छे; तेरेमां हेरा बेसका मटा ताकुतेन काम हया।”
MAR 6:15 दीसरा माणसे कह्‌या, “जु एलीयु छे।” ने दीसरा माणसे कह्‌या, “नी, हयु अघी सी आवणे वाळी वात बताड़ने वाळा मायन एक छे।”
MAR 6:16 बाकुन जत्‌यार हेरोदेस जी वात सामळायु ती कह्‌यु, “तीना युहन्‌नान मुणको काटाड़ देदलु छे, ने जु पछु कसु जीव उठ्‌यु!”
MAR 6:17 हेरोदेस युहन्‌ना काजे धरीन ने हातकड़ी लागाड़ीन जेल मां बुजाड़ी देदलु। असो हयु हेरोदीयासेन वजे सी कर्‌यु, काहाकी हेरोदेस तेरा भायस फीलीप्‌पुसेन लाडी हेरोदीयास हतली, हयु हेरे साते ईयाव कर लेदलु,
MAR 6:18 काहाकी युहन्‌‌‌नु हेरोदेस राजा सी कहतेलु, “आपसा भायस फीलीप्‌पुसेन लाडी साते ईयाव करनु, तारे वाटे वारु नी हय।”
MAR 6:19 तेरेमां हेरोदीयास ईनी वात मां युहन्‌ना सी रीस करतेली, ने ची तीनाक माराड़ने हींडी रवली, बाकुन हयी हेरोदेसेन वजे असो नी हय सक्‌यो,
MAR 6:20 काहाकी हेरोदेस राजु युहन्‌ना काजे धरमी ने चुखलु माणुस करीन बीहतेलु, ने तेरी राखवाळी कराड़तेलु। हेरोदेस तेरी वात सामळीन बेसकु घाबराय तेलु; बाकुन खुस हय्‌न तेरी वात सामळतेलु।
MAR 6:21 बाकुन एक दाहड़े वारु टेम आय, जत्‌यार राजु हेरोदेस आपसा पयदावारीन तीहवारेन दाहड़े तीनी हेरोदीयास काजे वारु मुखु जड़ी गुयु। तीने दाहड़े राजु हेरोदेस तेरा गलील सरकारेन डाहला ने अळी सीपायड़ान डाहला ने अळी गांवेन काम करने वाळा मायन डाहला काजे पंगत मां खाणे बुलायु।
MAR 6:22 ती चां हेरोदेसेन पुरे आय ने नाची ने हेरोदेस काजे खुस करी ने तेरा मेजवान्‌या काजे बी। तेरेमां राजु तीनी पुरेक कह्‌यु, “तुसे काय बी चाहजे च मांग, मे तुसे आपी दीस।”
MAR 6:23 ने चु सगुन खाय्‌न कह्‌यु, “ज काय तु मांगी च आप दीस, भले तु आधो राज मांगसी चो लग आपी दीस।”
MAR 6:24 तत्‌यार ची पुरे बाहर जाय्‌न तेरी माय हेरोदीयास काजे पुछी, “मे काय मांग?” ची कय “बपतीस्‌मा आपणे वाळु युहन्‌नान मुणको मांग ले।”
MAR 6:25 पुरे तत्‌यारुत पछी राजा धड़े दवड़ीन गुय, ने तीनाक कही, “मे चाह की तु बपतीस्‌मा आपणे वाळा युहन्‌नान मुणको तळी मां मांगाड़ ले।”
MAR 6:26 पुरेन वात सामळीन राजु बेसकु दुखी हयु, बाकुन चु मान्‌तान वजे सी माणसे अगळ सगुन खाय्‌न कह्‌लु, तेरेमां तीनी पुरेन वात काजे नी टाळ्‌यु।
MAR 6:27 ने राजु तत्‌यारुत एक सीपायड़ा काजे कह्‌यु, की युहन्‌नान मुणको काटीन लाव ने चु जेल मां गुयु ने तेरो मुणको काट्‌यु,
MAR 6:28 ने युहन्‌नान मुणको काटीन तळी मां भरीन लायु, ने तीनी पुरे काजे आपी देदु ने ची पुरे तेरी माय काजे आप देदी।
MAR 6:29 जत्‌यार युहन्‌नान चेला जी खबर सामळीन आया, ने तेरा धड़ काजे ली गुया ने मसाण मां वारु गाड़ देदा।
MAR 6:30 ने ईसुन नेवताळा सेवा करने गुयला, चे ईसु धड़े पछा आवीन भेळा हय्‌न ज काय चे कर्‌या ने सीकाड़्‌या च आखो कय देदा।
MAR 6:31 पछेन ईसु तीनुक कह्‌यु, “जां ते बेसका माणसे आवता जाता रवे ने तुहुं काजे रुटा खाणेन लग टेम नी जड़े। अतरा मां ईसु तीनुक कह्‌यु चालु आपणु बयड़ा मां एक सुनसान जागा मां जाता चां जाय्‌न तुहुं थुड़ीक वार आराम कर सकु।”
MAR 6:32 तेरेमां चे ढंड्‌या मां बठीन एक सुनसान जागा मां जाती रया।
MAR 6:33 बेसका माणसे ईसुक जातला देखीन उळखी लेदा, ने आखा गांवे-गांवेन माणसे भेळा हय्‌न चां दवड़ी पड़्‌या ने ईसु ने तेरा चेला सी पेहेल पुगी गुया।
MAR 6:34 ईसु ढंड्‌या मां सी उतर्‌यु, चां बेसकु मटु माणसेक टुळा काजे देख्‌यु, ने तींद्‌रे पर दया आय, काहाकी चे तींद्‌रा गुवाळ्‌या पाखुर खुवायला गाडरान तसा हतला। ने ईसु बेसकी वात तीनु काजे सीकाड़ने बाजी गुयु।
MAR 6:35 जत्‌यार दाहड़ु ढळ गुयु, ने टेम हय गुय, ती ईसुन चेला धड़े आवीन कह्‌या, “जु सुनसान जागु छे, ने दाहड़ु बेसकु ढळ गुयलु छे।
MAR 6:36 माणसे काजे आड़े-धड़ेन खेत ने गांव मां जाणी देवु काहाकी चे आपसा वाटे खाणे करीन काहींग मुल ली लेसे।”
MAR 6:37 ईसु तीनुक कह्‌यु, तुहुंत ईनु काजे खाणेन आपु। चे तीनाक कह्‌या, “हीनुक आखा काजे खावाड़ने करीन जाजे ने आंठ महनान दाहड़ान दाहड़कीन पयस्‌या खरचु करीन रुटा मुल लावाय्‌से काय? असु तु काय कय रयु?”
MAR 6:38 तत्‌यार ईसु तीनुक कह्‌यु, “जाय्‌न देखु तुंद्‌रे धड़े कतरा रुटा छे।” चे जाय्‌न देख्‌या ने कह्‌या, “हामरे धड़े पांच रुटा ने दुय माछी छे।”
MAR 6:39 तत्‌यार ईसु चेला काजे हुकुम आपीन कह्‌यु आखा काजे नीळ्‌ळा चारा मां पंगत बठाड़ देवु।
MAR 6:40 चे आखा माणसे सोव-सोव ने पचास-पचास माणसेन पंगत बठी गुया।
MAR 6:41 ईसु चे पांच रुटा ने दुय माछी मांगीन हात मां लेदु, ने सरग भीणी उपर भाळीन भगवान काजे कह्‌यु तु बेसकु वारु छे। ने ईसु रुटा काजे भांजीन चेला काजे आप्‌यु ने चे चेला माणसे काजे वाटता गुया। ने माछी बी असुत करीन आप्‌यु।
MAR 6:42 ने आखा जणा खायलीन आफरी गुया।
MAR 6:43 ने चेला बचला रुटान कट्‌का, ने माछान खणका ईछीन भेळा कर्‌या, ती चे बारे चार्‌या भर्‌या।
MAR 6:44 चे खाणे वाळा अदमीत पांच हजार हतला, ने बायरा ने पुर्‌या अलग।
MAR 6:45 तत्‌यार ईसु तत्‌यारुत हेरा चेला काजे ढंड्‌या मां बठु करीन कह्‌यु, चे आपसा सी पेहेल बेतसेदा ईलाका मां ने च दरीयान पली धड़ जाती रवे, जत्‌यार लग की मे माणसे काजे मकली नी दम।
MAR 6:46 ने आखा माणसे काजे मकली दीन ईसु बयड़ा पर भगवान सी दुवा करने गुयु।
MAR 6:47 जत्‌यार सांती वेळाय हय तत्‌यार ढंड्‌यो दरीयान ईचमां हतलो, ने ईसु खळदाण पर एखलुत हतलु।
MAR 6:48 तत्‌यार ईसु चां रय्‌न चेलाक देख्‌यु की चे ढंड्‌या काजे चालाड़न्‌या घाबराय गुया, काहाकी आहळो तींद्‌रे सांबो आवणे बाजी रवलो। तत्‌यार ईसु कुकड़ा वासणीक पाणी पर चालतु जाय्‌न तींद्‌रे भीणी आयु ने तींद्‌रे धड़े मायन अघु जाणे हींडी रवलु।
MAR 6:49 बाकुन चे ईसु काजे पाणी पर चालतेलु देखीन असा समज्‌या गुया की हामु काजे भुतड़ुत देखाये ने चे आयड़ु कुद्‌या।
MAR 6:50 काहाकी चे आखा तीनाक देखीन घाबराय गुयला। बाकुन तत्‌यारुत ईसु तीनुक कह्‌यु “हिम्‌मत राखु, मेत छे, बीहु मां।”
MAR 6:51 तत्‌यार ईसु तींद्‌रे ढंड्‌या मां चहड़ी गुयु ने आहळी धीरी पड़ गुय ने चे बेसका देखतात रय गुया।
MAR 6:52 चे पांच हजार माणसे काजे खावाड़ने वाळान मटो काम समजी नी सक्‌या काहाकी तींद्‌रो मन काठो हय गुयलो।
MAR 6:53 ईसु ने तेरा चेला उतरीन गन्‌नेसरत ईलाका मां आया, ने ढंड्‌या काजे घाट पर लागाड़ देदा।
MAR 6:54 जत्‌यार चे ढंड्‌या मां सी उतर्‌या, तत्‌यार माणसे ईसु काजे तत्‌यारुत उळखी लेदा।
MAR 6:55 आड़े-धड़े आखा ईलाका मां सी दवड़ी-दवड़ीन मांदला काजे खाट्‌ली मां हाकलीन लाया ने जांहनड्‌ला बी माणसे सामळ्‌या, चांहान बी मांदला काजे ईसु धड़े लाया।
MAR 6:56 ने काहना बी गांव, सहर, नीते फळ्‌या मां जातलु, चां माणसे मांदला काजे हाटेम मेलदीन लीलघाय्‌न कवतेला की तारा पुथल्‌यान छेवड़ु अतरुत छीमणी दे। ने जतरा बी तीनाक छीम्‌या, चे आखा वारु हय जातला।
MAR 7:1 तत्‌यार थुड़ाक फरीसी माणसे ने मुसान नीयमेन मास्‌तर्‌या यरुसलेम सी आवीन ईसु धड़े भेळा हया,
MAR 7:2 चे ईसुन थुड़ाक चेला काजे हात धुया पाखुर रुटा खात्‌ला देख्‌या।
MAR 7:3 काहाकी फरीसी माणसे ने आखा यहुदी डाहला डाहलान रीतीन अनसारे चे जां लग हात नी धुवे चां लग खाय बी नी;
MAR 7:4 ने हाटेम सी आवीन जां लग उंघळी नी लेय चां लग खाणो नी खाय ने अळी बी बेसकी असी वात छे ची वात मान्‌ने करीन आवली जसों की, कटवरु, कळस्‌यु ने तांबान ठाहरा काजे मांजणु ने धुवणु।
MAR 7:5 तेरेमां चे फरीसी माणसे ने नीयमेन मास्‌तर्‌या ईसु काजे पुछ्‌या, “तारा चेला डाहला-डाहलान रीत पर काहा नी वेहवार करे जसा की हात धुया पाखुर रुटा खाय?”
MAR 7:6 ईसु तीनुक कह्‌यु, यसायु माणुस तुंद्‌रेन तसा ढंगड़ा करन्‌यान बारामां भगवान पेहलुत सी वात कह्‌लु हतलु, जसों लिखलो छे जे माणसे मुंहडा सी ते मारी ईज्‌जत करे बाकुन हींद्‌रो मन मारे सी बेसको छेटे रवे।
MAR 7:7 जे ते फालतु मारी भक्‌ती करे काहाकी माणसेन वात काजे नीयम करीन सीकाड़े ने असा समजे की जु हामरु नीयम हतलु।
MAR 7:8 “काहाकी तुहुं ते भगवानेन हुकुम काजे टाळीन माणसेन कह्‌लो मानी र्‌या।”
MAR 7:9 ने ईसु तीनुक कह्‌यु, “तुहुं आपसान रीत काजे मान्‌ने करीन चतुर बणीन भगवानेन हुकुम कसा तुहुं टाळ देवु।
MAR 7:10 काहाकी मुसु हुकुम देदलु की, ‘आपसान बास ने आपसान मायन ईज्‌जत कर’ ने ‘जु काहनुक बास ने माय काजे बुली दी देय, तीनाक मार देणु चाहे।’
MAR 7:11 बाकुन तुहुं कहुं की कदी काहनुक माणुस आपसान बास ने माय सी कहें ‘की मारी जीनी चीज सी तुहुंक फायदु हवणु हतलो च मे भगवान काजे आप देदु, ने हय तुंद्‌री सेवा नी करो।’
MAR 7:12 तत्‌यार तुहुं तीनाक तेरा बास ने तेरी मायन काय बी चाकरी नी करने देवु।
MAR 7:13 असा करीन तुहुं तुंद्‌री नेम काजे पाळे ने भगवानेन बुले टाळ देवु ने अळी असात बेसका काम करने बाजी र्‌या।”
MAR 7:14 तत्‌यार ईसु अळी माणसे काजे धड़े बुलायन तीनुक कह्‌यु, “तुहुं आखा मारी वात सामळु ने समजु।
MAR 7:15 असो काय बी नी हय, ची माणसे मां भरायन तीनुक वीटाळ देतु हय; बाकुन जो माणसेम सी नीकळे चोन तीनुक वीटाळ देय।
MAR 7:16 कदी तेरा सामळनेन कान्‌‌‌टा हय, चु सामळी लेय।”
MAR 7:17 जत्‌यार ईसु गड़दी मां सी नीकळीन घर आयु, ती चां तेरा चेला तीना दाखलान बारामां बताड़ करीन पुछ्‌या।
MAR 7:18 ईसु तीनुक कह्‌यु, काय तुहुं बी डेड़-अकल्‌या छे काय? काय तुहुं नी समजु, की जी चीज बाहर सी माणसेन माहें जाय ची तीनाक वीटाळ नी सके,
MAR 7:19 काहाकी च तींद्‌रा मन मां नी बाकुन पेट मां जाय ने बाहरी बठणे जाय, ती नीकळी जाय। असु कहींन हयु आखा खाणेन चीज काजे चुखलो ठहरायु।
MAR 7:20 पछेन ईसु कह्‌यु, ज काय माणुस मां सी नीकळे चत, माणुस काजे वीटाळ देय।
MAR 7:21 काहाकी माणसेन माहीं सी गलत वीच्‌यार, छीनाळो, चुरी, हत्‌या, खुदेन बायर छुड़ीन दीसरी बायर भीणी जाणेन मन।
MAR 7:22 भुंडोत काम, लालुच करन्‌यु, कुहराय करन्‌यु, दीसरा काजे ठगण्‌यु, दीसरान नाव-बद्‌दी करन्‌यु जी वात बाहर आवे।
MAR 7:23 जी आखी भुंडीत वात माणसेन माहीं सी नीकळे ने माणुस काजे वीटाळ देय।
MAR 7:24 पछेन ईसु चां सी उठीन सुर ने सेदा ईलाका मां आयु; ने चां एक घर मां गुयु ने चु चाहतेलु की मेसेक दीसरा कुय बी उळख्‌णु नी चाहजे। बाकुन चु उळखाय गुयु।
MAR 7:25 ने तत्‌यारुत चां एक बायर ईसु आय रयु करीन सामळीन आय ने तेरी नानली पुरेन भुतड़ु लागी रवलु, ने ची ईसुन पाये पड़ी।
MAR 7:26 ची बायर सीरीया देसेन सुरुफोनेसीया मां रहतेली ने ची नी-यहुदी वाळी हतली। ने ची ईसु सी जी लीलघाय्‌न कही की, भुतड़ा काजे मारी पुरे मां सी नीकाळ दे।
MAR 7:27 ईसु दाखलु दीन तीनीक कह्‌यु, “पेहेल पुर्‌या काजे खाय्‌न आफरनी दे काहाकी पुर्‌या भीणीन रुटा हापकीन कुतरा अगळ नाखणु वारु नी हय।”
MAR 7:28 ची बायर दाखला मां सी एक कड़ी जुड़ीन जपाप आपी, खरली वात छे, मालीक बाकुन तेबी कुतरा पुर्‌यान ईस्‌टाळा रुटान भुकरा काजे खाय लेय।
MAR 7:29 ईसु तीनीक कह्‌यु, “जी वात कही, तेरेमां तु आराम सी जाती रव, भुतड़ु तारी पुरे मां सी नीकळी गुयलु छे।”
MAR 7:30 ची चां सी तेरे घर जाय्‌न देखी, तत्‌यार तीनीक मालुम पड़्‌यो की भुतड़ु पुरे मां सी नीकळी गुयु ने तेरी पुरे वारु हय्‌न खाट्‌ली पर सुय रवली।
MAR 7:31 पछेन ईसु चां सी उठीन सुर ईलाका मां सी नीकळीन सेदा ने दीकापुलीस ईलाका मायन जातात गलील दरीया धड़े पुग्‌यु।
MAR 7:32 चां एक माणुस बेहरु ने चु बुबड़ु बी हतलु, तत्‌यार माणसे ईसु धड़े आवीन ईसु सी लीलघाय्‌न कह्‌या, की तारु हात हीना पर मेक।
MAR 7:33 तत्‌यार ईसु तीना काजे गड़दी मां सी अलग ली गुयु, ने आपसान आंगळी बेहरान कान्‌‌‌टा मां भर्‌यु ने तीनीत आंगळी पर थुपीन तीनी आंगळी सी जीप छीम्‌यु।
MAR 7:34 ने सरग भीणी भाळीन मटीस दम लीन कह्‌यु, “ईप्‌फत्‌तह!” मतलब “उघड़ी जां।”
MAR 7:35 ने तत्‌यारुत तेरा कान्‌‌‌टा उघड़ी गुया ने तेरी जीपेन गाठ बी छुट गुय ने चु चुखु झण बुलने बाजी गुयु।
MAR 7:36 तत्‌यार ईसु माणसेक हुकुम आपीन कह्‌यु, जी वात कुय काजे घुण कहुं, बाकुन जतरु तीनुक जुर दीन हुकुम आपीन कह्‌यु ततरा अदुस चे वातेन परचार करने बाजी गुया।
MAR 7:37 चे बेसका खुस हय गुया ने अळी-अळीन कह्‌णे बाजी गुया, “हयु ज बी कर्‌यु, आखो वारलु कर्‌यु; हयु बेहरा काजे सामळनेन, ने बुबड़ा काजे बुलनेन ताकत आपे।”
MAR 8:1 तीनु दाहड़ा मां अळी एक माणसेन मट्‌लु टुळु ईसु धड़े भेळु हयु। ने तीनु माणसे धड़े खाणेन काय नी हतलो। तत्‌यार ईसु तेरा चेला काजे धड़े बुलायन कह्‌यु,
MAR 8:2 “मेसेक हीनु माणसेन टुळा पर तरस आवे, काहाकी जे तीन दाहड़ा सी मारे पुठ्‌ये छे ने हींद्‌रे धड़े खाणेन काय बी नी हय।
MAR 8:3 हींद्‌रे मां सी काहनाक बेसके लांबे सी आवला छे। कदी हीनुक मे भुकलात घर मकलीस तत्‌यार वाटे झामा खाय्‌न पड़ जासे।”
MAR 8:4 ईसुन चेला जपाप आप्‌या, “जां बयड़ा मां ईनु माणसेक आफरीन खावाड़ने करीन अतरा रुटा कां सी लावसुन?”
MAR 8:5 ईसु चेला काजे पुछ्‌यु, तुंद्‌रे धड़े कतरा रुटा छे, “चे कह्‌या” सात रुटा।
MAR 8:6 तत्‌यार ईसु माणसे काजे भुयमां बसी जावु करीन हुकुम आप्‌यु, ने चु सात रुटा हात मां लीन रुटा वाटे भगवान काजे कह्‌यु, तु बेसकु वारु छे, ने चु माणसे काजे वाट देवु, करीन रुटा भांजीन तेरा चेला काजे आपतु गुयु ने चेला माणसेक वाटता गुया।
MAR 8:7 हींद्‌रे धड़े थुड़ाक नानला माछा बी हतला, माछा वाटे बी ईसु, भगवान तु बेसकु वारु छे करीन कह्‌यु। ने चे माछा बी माणसेक वाट देवु, करीन चु तेरा चेला काजे हुकुम आपी देदु।
MAR 8:8 चे आखा माणसे खायलीन आफरी गुया, ने चेला, बचला रुटान कट्‌का भेळा कर्‌या, तत्‌यार सात चार्‌या भराय गुया।
MAR 8:9 ने चां माणसे चार हजार हतला, ने तत्‌यार ईसु तीनु माणसे काजे अळाय देदु।
MAR 8:10 ने चु मामार तेरा चेला पुठ्‌ये ढंड्‌या मां बठीन दलमनुता ईलाका मां जाती र्‌यु।
MAR 8:11 पछेन थुड़ाक फरीसी माणसे ईसु साते लड़ाय झगड़ु करने बाजी गुया। ने तीनाक पारखणे करीन कह्‌या की “ईसु हामुक एक असी वारु कामेन सहलाणी देखाड़।”
MAR 8:12 ईसु तींद्‌रा ढंगड़ा देखीन हेरा जीव-आत्‌मा मां मटीत दम लीन कह्‌यु, “तुहुं ईनी पीड़ीन माणसे हय बी वारु कामेन सहलाणी काहा हेर र्‌या? बाकुन मे तुहुंक छाचलीन कहं की, तुहुंक काय बी सहलाणी नी जड़े।”
MAR 8:13 ने ईसु फरीसी माणसे काजे छुड़ीन अळी पछु ढंड्‌या मां बठी गुयु, ने दरीयान पली धड़ जाणे बाजी गुयु।
MAR 8:14 ईसु ने तेरा चेला ढंड्‌या मां जाणे बाजी रवला ने चे चेला रुटा लावणे वीसरी गुयला, ने ढंड्‌या मां तींद्‌रे धड़े एकुत रुटु हतलु।
MAR 8:15 ने ईसु तेरा चेला काजे दाखलु दीन असु कय्‌न संभ्‌ळीन रवजु कह्‌यु की, “फरीसी माणसेन खमीर ने राजा हेरोदेसेन खमीर सी संभ्‌ळीन रवु।”
MAR 8:16 चेला आंबा-सांबा वीच्‌यार करीन कह्‌या, “आपणु रुटा नी लाया तेरेमां ईसु असो कय र्‌यु।”
MAR 8:17 ने ईसु तींद्‌री जी वात जाणीन कह्‌यु तुहुं आंबा-सांबा हामरे धड़े रुटा नी हय करीन काहा वीच्‌यार करने बाजी र्‌या, हय बी तुंद्‌रो मन डेड़-अकल्‌या छे काय? तुहुंक हय बी जी वात समज मां नी आवती?
MAR 8:18 तुंद्‌रा डुळा छे, तेबी देखायतो नी? ने कान्‌‌‌टा हय्‌न, बी सामळायतो नी? ने तुहुंक जी हवली वात हेर नी हय?
MAR 8:19 जत्‌यार मे पांच हजार माणसेक पांच रुटा भांजीन आपलु, चां तुहुं रुटान कट्‌का ईछीन बेसका चार्‌या भरला? चे कह्‌या, “बारे चार्‌या।”
MAR 8:20 “ने जत्‌यार चार हजार माणसे वाटे सात रुटा भांजीन आपलु चां तुहुं भांजला रुटान कट्‌का, कतरा चार्‌या भरला?” चे ईसु काजे कह्‌या, “सात चार्‌या।”
MAR 8:21 अळी ईसु तीनुक कह्‌यु, “खाण्‌या-सुडान मतलब हय लग नी समज्‌या काय?”
MAR 8:22 ने अळतेन ईसु ने तेरा चेला बेतसेदा गांव मां गुया; ने माणसे एक आंदळा काजे ईसु धड़े लाया ने ईसु सी लीलघाय्‌न कह्‌या की “आंदळा काजे छीमीन वारु कर दे।”
MAR 8:23 ने ईसु आंदळान हात धरीन तीना काजे गांव मां सी बाहार लीज्‌‌यु ने तेरा डुळा मां थुपीन ने आपसान हात तेरा डुळा पर मेक्‌यु, ने तीनाक पुछ्‌यु “तुसेक काहींग देखाये काय?”
MAR 8:24 चु उपर भाळीन कह्‌यु, “माणसे काजे देख र्‌यु, बाकुन चे मेसेक असा देखाये की झाड़का चालने बाजी र्‌या।”
MAR 8:25 तत्‌यार ईसु अळी तेरा डुळा पर हात मेक्‌यु ने चु आंधळु तेरा डुळा उघाड़ीन देखणे बाजी गुयु। चु पछु आखो चुखो झण देखणे बाजी गुयु।
MAR 8:26 ईसु तीनाक असु कहींन घर मकल्‌यु, “ईना गांव मां पाय बी घुण मेले।”
MAR 8:27 ईसु ने तेरा चेला केसर्‌या फीलीप गांव मां जाती र्‌या; ने वाटे ईसु चेला काजे पुछ्‌यु की, “माणसे मेसे काय कहें?”
MAR 8:28 चे कह्‌या “काहनाक कहें, हयु ते बपतीस्‌मा आपण्‌यु युहन्‌‌‌नु छे, बाकुन काहनाक कह्‌वे एलीया छे, काहनाक भगवानेन अघली वात बताड़ने वाळा माणसे मायन काहनुक एक छे कहें।”
MAR 8:29 ईसु तीनुक पुछ्‌यु, “बाकुन तुहुं मेसेक काय कहुं, की मे कुण छे?” पतरस कह्‌यु, “छाचलीन तु भगवानेन मकेल्‌लु बचाड़ने वाळु मसी छे।”
MAR 8:30 तत्‌यार ईसु तीनुक चेताड़ीन असु कह्‌यु, “मारे बारामां जी वात कुय काजे घुण कहुं।”
MAR 8:31 तत्‌यार चु चेलाक सीकाड़्‌यु की, मे माणसेन पुर्‌यु छे, ने मेसे काजे ठहरावलो छे, की चु बेसकु दुख हाकलसे ने मुख्‌या ने, डाहला पुजारा, ने यहुदी नीयमेन मास्‌तर्‌या तीनाक फालतु समजीन मार देसे, ने चु तीन दाहड़ाम पछु जीवतु हय जासे।
MAR 8:32 चु जी वात संय-संय तेरा चेला काजे कय देदु। जी सहलाणी पतरस ईसु काजे अलग ली जाय्‌न लड़ने बाजी गुयु।
MAR 8:33 बाकुन ईसु पछु अळीन दीसरा चेला भीणी भाळ्‌यु ने तींद्‌रे अगळ पतरस काजे लड़ीन कह्‌यु, “ए भुतड़ा मारे सी छेटु जाती रव; काहाकी तु भगवानेन वात पर नी, बाकुन माणसेन वात पर मन लागाड़ीन कह्‌णे बाजी र्‌यु।”
MAR 8:34 ने ईसु माणसेन टुळाक ने चेला काजे धड़े बुलायन कह्‌यु, “जे कुय मारु चेलु बणीन मारे पुठ्‌ये आवणे हींडे, चु आपसान मरजी नी बाकुन मारी मरजी पुरी करनु चाहजे, ने आपसान कुरुस हाकलीन मारे पछळ चाले।
MAR 8:35 काहाकी जु कुय आपसान जीव काजे बचाड़ने चाहे, चु तेरा जीव काजे खुवसे बाकुन जु कुय मारे वाटे ने खुस-खबर वाटे तेरु जीव खुवसे हयुत आपसान जीव काजे बचाड़ लेसे।
MAR 8:36 कदी माणसे आखी कळी काजे हात करलेय, ने तेरा जीव खुय देय, ती तीनाक काय फायदु छे?
MAR 8:37 ने चु तेरा जीव पछु हेरने करीन तेरा जीवनेन आवजी मां काय आपसे?
MAR 8:38 जु कुय ईनी छीनाळा ने पापी दाहड़ा मां, माणसेन ईचमां मारे सी ने मारी वात सीकाड़ने सी लाजवाय्‌से, ती माणसेन पुर्‌यु बी, जत्‌यार चुखला सरग वाळा काहवाळ्‌या भेळु तेरा बासेन सेक-सींगार साते आवसे, तत्‌यार तीने दाहड़े तीना काजे लाजवाय्‌से।”
MAR 9:1 ईसु, चेला ने माणसेन अगळ ज कह्‌यु, “मे तुहुंक छाचलीन कहं की, जे जां उबा हय र्‌या, तींद्‌रेम सी काहना काहनाक असा बी छे, की जत्‌यार लग भगवानेन राज काजे ताकत भेळु आवतेला देख नी लेय, तत्‌यार लग चे नी मरे ने नी माने।”
MAR 9:2 छव दाहड़ा हय गुया ने पछेन ईसु, पतरस ने याकुप ने युहन्‌ना काजे पुठ्‌ये लीन एक मटला बयड़ा पर गुयु। चां चे एखलात हतला; ने चां चेलान अगळ ईसुन सीकु बदली गुयु।
MAR 9:3 ने तेरा पुथल्‌या उजाळा हय्‌न जग-जग पप्‌लने बाजी गुया ने अतरा बेसका उजाळा हय गुया की धरती पर काहनु बी धुबी अतरा नवा नी कर सके।
MAR 9:4 ने तीनु चेला, एलीयु ने अळी मुसु देखाव पड़्‌या; ने चे ईसु साते वात करने बाजी रवला।
MAR 9:5 पतरस ईसु काजे वात करतु जाय्‌न कह्‌यु, “ए मास्‌तर, जां रहणु हामरे वाटे बेसको वारु छे: तेरेमां हामु जां तीन खपड़ी बणावजे। एक तारे वाटे ने एक मुसा वाटे ने एक एलीया वाटे।”
MAR 9:6 काहाकी पतरस नी जाणतेलु की काय जपाप आपो, काहाकी हयु बेसकु बीही गुयलु।
MAR 9:7 तत्‌यार एक आदळो आवीन तीनुक टुप लेदो, ने तीना आदळा मां सी जी अवाज सामळाय “जु मारु लाटेक्‌लु पुर्‌यु छे; हेरी वात सामळु!”
MAR 9:8 तत्‌यार चां चेला तत्‌यारुत चारे मेर भाळ्‌या, बाकुन चां ईसु काजे छुड़ीन कुय नी, देखाव पड़्‌यो।
MAR 9:9 बयड़ा पर सी उतरतु जाय्‌न ईसु तीना चेला काजे ज हुकुम आप्‌यु जत्‌यार लग माणसेन पुर्‌यु मरला मां सी पछु जीवतु हय्‌न बठु नी हवे, तत्‌यार लग ज काय तुहुं देखला छे, च कुय काजे घुण कहुं।
MAR 9:10 चेला ईसुन वात मानीन जी वात तींद्‌रा मन मां राख्‌या; ने चे आंबा-सांबा वीच्‌यार कर्‌या की, “मरला मां सी जीवतु हय्‌न बठु हवणेन मतलब काय छे?”
MAR 9:11 ने चेला ईसु काजे पुछ्‌या, “असो हय ती, यहुदी नीयमेन मास्‌तर्‌या काहा कहें की पेहेल एलीयान आवणु टाकायलो छे?”
MAR 9:12 ईसु तीनुक कह्‌यु “हव छाचलीन, असोत लिखलो छे की एलीयु पेहेल आवीन आखो कय्‌न सुदारीन तीयार करसे, बाकुन माणसेन पुर्‌यान बारामां असो काहा लिखायलो छे, की तीनाक बेसकु दुख झेलनु पड़से, ने माणसे तीनाक नानु समजीन तेरो नाव-बद्‌दी करसे।
MAR 9:13 बाकुन मे तुहुंक कहं, एलीयु ते आय गुयलु छे, ने जत्‌यार चु आयु तत्‌यार माणसे जसों बी मन मां आयो तसों तेरे साते वेहवार कर्‌या। ने तेरा बारामां लिखलो छे।”
MAR 9:14 ईसु तीनु तीन चेलाक लीन दीसरा चेलान चां पछु गुयु ती, चां चे देख्‌या की दीसरा चेलान चारे मेर बेसकु माणसेन टुळु भेळु हय र्‌यु, ने थुड़ाक यहुदी नीयमेन मास्‌तर्‌या तींद्‌रे साते वात मां जखड़ी पड़ी र्‌या।
MAR 9:15 ने उचकान ईसु काजे देख्‌या तत्‌यार आखा माणसे देखतात रय गुया। ने तेरो आव-भाव करने करीन दवड़ीन आया।
MAR 9:16 ने ईसु तीनुक पुछ्‌यु, “तुहुं तींद्‌रे साते काहनी वात मां जखड़ी र्‌या?”
MAR 9:17 टुळा मां सी एक जणु जपाप आप्‌यु, “ए मास्‌तर, मे मारा पुर्‌या काजे तारे धड़े लावणे करीन लावलु, हेरे मां भुतड़ु भराय र्‌यु, चु बुबड़ु छे।
MAR 9:18 ने काहनी बी जागा पर भुतड़ु चस्‌टी जाय चांहान पाड़ देय, ने हीना पुर्‌यान मुंहडा मां फेसकड़ु आवे ने करकेड़ु हय जाय, ने दात बी ककड़ावे ने आकड़ाय जाय तेरे सी मे तारा चेला काजे कह्‌यु की, हेरे मां सी भुतड़ु नीकाळ दे करीन कह्‌यु बाकुन तीनाक चे नीकाळ्‌यु नी सक्‌या।”
MAR 9:19 ने असो सामळीन ईसु तीनुक कह्‌यु, “ए नी भुरसु करने वाळा माणसे, मे कत्‌यार लग तुंद्‌रे पुठ्‌ये रवीस ने तुहुंक सेण करीस? हीना पुर्‌या काजे मारे धड़े लावु।”
MAR 9:20 तत्‌यार चे तीना पुर्‌याक ईसु धड़े लाया। ने जत्‌यार ईसु तीनाक देख्‌यु ती चु भुतड़ु तीना पुर्‌या काजे मुयड़ी देदु, ने चु पुर्‌यु भुयमां पड़ी गुयु। ने मुंहडा मां सी फेसकड़ु नीकाळतु जाय्‌न वारु हवणे बाजी गुयु।
MAR 9:21 तत्‌यार ईसु तीना पुर्‌यान बास काजे पुछ्‌यु, “जु असु हवलु कतरा दाहड़ा हय गुयु।” ने चु कह्‌यु “नानलु हतलु ती सी छे।
MAR 9:22 भुतड़ु हीना काजे मारने करीन कांखुर आकठा मां ने कांखुर पाणी मां नाख देय; बाकुन कदी तुसेक बणे, तत्‌यार हामरे पर दया करीन हामरो भलो कर!”
MAR 9:23 ने ईसु तीनाक कह्‌यु, “कदी तुसेक बणे जाय ती! असु मेसेक काय लेणे कहें? भुरसु करने वाळा वाटे आखो हय सके।”
MAR 9:24 तत्‌यारुत तीना पुर्‌यान बास कलेप्‌तु जाय्‌न कह्‌यु, “मे भुरसु करो ने अळी बी मदत करीन मारा भुरसाक बड़ाव!”
MAR 9:25 तत्‌यार माणसे दवड़ीन आवीन भेळा हवणे बाजी गुया। ती ईसु तीना भुतड़ाक असु कय्‌न लड़्‌यु, ए बेहरा ने बुबड़ा भुतड़ा, मे तुसेक हुकुम आपो की हीना पुर्‌या मां सी नीकळी जां, ने पछु आवीन हेरे मां घुण भराये।
MAR 9:26 तत्‌यार भुतड़ु आयड़ीन, तीना पुर्‌या काजे बेसकु मुयड़तुत नीकळी गुयु। ने पुर्‌यो मरलोत हय गुयो ने आखा माणसे कह्‌णे बाजी गुया की, ज पुर्‌यु मर गुयु।
MAR 9:27 बाकुन ईसु पुर्‌यान हात धरीन उठाड़्‌यु ने पुर्‌यु उबु हय गुयु।
MAR 9:28 जत्‌यार ईसु घर आयु, ती ईसु एखलुत हतलु चां तेरा चेला तीनाक पुछ्‌या, “हामरे सी भुतड़ु काहा नी नीकळयु?”
MAR 9:29 चु चेलाक कह्‌यु, “असा भुतड़ान जात भगवान सी दुवा करे, पाखुर नी नीकळे।”
MAR 9:30 पछेन ईसु ने चेला चां सी गलील ईलाका मायन जाणे बाजी रवला। ने चु नी चाहतेलु की काहनाक मेसेक उळखी लेय,
MAR 9:31 काहाकी चु आपसा चेला काजे सीकाड़ने बाजी रवलु ने तीनुक कवतेलु, “माणसेन पुर्‌यु माणसेन हाते धराय जासे, ने चे तीनाक मार देसे; ने चु मरनेन तीन दाहड़ा मां पछु जीवतु हय जासे।”
MAR 9:32 बाकुन चेला ची वात नी समज्‌या नी, ने चे ईसु काजे जी वात पुछने बीहतेला।
MAR 9:33 पछेन चे कफरनहुम मां आया; ने ईसु घर मां आय्‌न तीनुक पुछ्‌यु, “वाट्‌ये तुहुं काहनी वात मां जखड़ी र्‌या?”
MAR 9:34 बाकुन आखा हुगात हय रवला, काहाकी वाटे चे ईनी वात मां जखड़ी पड़ी रवला की आपणे मां सी मटु कुण छे।
MAR 9:35 तत्‌यार ईसु बठी गुयु ने बारे चेला काजे बुलायु ने तीनुक कह्‌यु, “कदी काहनुक मटु बन्‌नु हय ती तीना काजे आखा सी नानु ने आखान पावर्‌यु बन्‌नु पड़से।”
MAR 9:36 ने चु एक नानला पुर्‌या काजे बुलायन तींद्‌रे ईचमां उबु कर्‌यु, ने तीना काजे खुळा मां लीन तीनुक कह्‌यु,
MAR 9:37 “ज कुय मारा नाव सी असा नानला पुर्‌या मायन काहनाक एकेन बी आव-भाव करे; चु मारी आव-भाव करे ने जे कुय मारी आव-भाव करे चु मारी अतरी नी बाकुन मेसेक मकलने वाळान बी आव-भाव करे।”
MAR 9:38 युहन्‌‌‌नु ईसु काजे कह्‌यु, “ए मास्‌तर, हामु एक माणुस काजे तार नाव सी भुतड़ाक नीकाळ तेलान देख्‌या ने हामु तीनाक कह्‌या, तु हामरे पुठ्‌ये चाल बाकुन चु हामरे पुठ्‌ये आवणे नी हींडी रवलु, अतरा मां हामु तीनाक कह्‌या ईसुन नाव सी भुतड़ा मां नीकाळे।”
MAR 9:39 बाकुन ईसु कह्‌यु तीनाक मारे नाव सी भुतड़ा काजे मां नीकाळे करीन घुण कहुं, काहाकी असो कुय नी हय जु काहनुक मारा नावेन ताकुतेन काम करीन थुड़ीक वार मां मारु वाक नीकाळतु हय।
MAR 9:40 काहाकी जु कुय आपणी वीरुद मां नी हय, चु आपणे वळु छे।
MAR 9:41 मे तुहुं काजे ईसु मसीन चेला छे करीन, असु कहं की ज कुय एक कळस्‌यु पाणी पावे ती मे छाचलीन कहं, “चु तेरा कामेन फळ कदी नी खुवे।”
MAR 9:42 “जे कुय ईनु नानला मां सी मार पर भुरसु करे ने काहनाक काजे पाप मां पाड़े ने तीनुक पाप कराड़े, ती तेरे वाटे ज वारु छे की तेरा गळा मां घट्‌टीन पुड़ बांदीन तीना काजे समुदरेन पाणी मां नाख देणु चाहजे।
MAR 9:43 कदी तारु हात पापेन उत्‌तर बणीन तुसेक पाप कराड़े, तीना हात काजे काटीन नाख दे; काहाकी दुय हात रवतात बी तु असी नरक आकठाम जाती रवसी, बाकुन ठटळ्‌यु हय्‌न अमर-जीवन हात करने सरगेम जासी।
MAR 9:44 काहाकी नरकेन आकठी मायन कीड़ा कदी नी मरे ने चां वाळो आकठो कदी नी उल्‌हायें।
MAR 9:45 कदी तारु पाय तुसे पाप कराड़े, तत्‌यार तीना पाय काजे तुड़ीन नाख देजी, काहाकी दुय पाय रवतात बी नरक-आकठी मां जाती रवसी, बाकुन लंगड़ु हय्‌न बी अमरेन जीवन हात करीन सरग मां जाणु वारु छे।
MAR 9:46 काहाकी नरक-आकठी मायन कीड़ा कदी नी मरे ने चां वाळो आकठो कदी नी उल्‌हायें।
MAR 9:47 कदी तारु डुळु उत्‌तर बणीन तुसेक पाप कराड़े, तत्‌यार तीना डुळा काजे नीकाळीन नाख दे। काहाकी दुय डुळा रवतात बी नरकेन आकठी मां नाखायसी, बाकुन काणु बणीन भगवानेन राज मां जाणु वारु छे।
MAR 9:48 काहाकी नरकेन-आकठी मायन कीड़ा कदी नी मरे ने चां वाळो आकठो कदी नी उल्‌हायें।”
MAR 9:49 काहाकी हर एक माणुस आकठा सी पारखायसे। जसों चड़ावु नण सी पारखाये।
MAR 9:50 नण ते वारलु चीज छे, बाकुन कदी नणुत मुळो हय जाय ने सवाद खुय देय, तत्‌यार च पछो काय सी ने कसों खारो करसु? “तेरेसी तुहुं आंबा-सांबा हेळी-मेळीन रय्‌न आपसान नणेन सवाद समाळीन राख्‌जु।”
MAR 10:1 पछेन ईसु तीना जागाक छुड़ीन यहुदीया ईलाका मां जाणे करीन यरदन नदीन पली धड़े गुयु, ने माणसेन गड़दी अळी तेरे धड़े भेळु हय गुयु; ने जसु हयु पेहेल सीकाड़तेलु तसुत तीनुक सीकाड़ने बाजी गुयु।
MAR 10:2 तत्‌यार फरीसी माणसे हेरे धड़े आवीन पारखणे करीन पुछ्‌या अदमी आपसान बायर काजे छुड़नु वारु छे काय?
MAR 10:3 ईसु तीनुक जपाप आप्‌यु, “मुसु तुहुंक काय हुकुम आपलु छे?”
MAR 10:4 फरीसी माणसे कह्‌या, “मुसु कह्‌लु की काहनुक चाहे ती चिट्‌ठी लिखीन झगड़ु भांजीन लाडी काजे छुड़ देणेन हुकुम आपलु छे।”
MAR 10:5 ईसु तीनुक कह्‌यु, “मुसु ते तुंद्‌रे वाटे जी हुकुम तेरेमां लिखलु की, तुहुं काजे काय बी समज मां नी आवतेली।
MAR 10:6 बाकुन भगवान कळी घड़्‌यु तेरसी पेहलुत जी हुकुम नी आप्‌यु बाकुन भगवान ते सुरु मां अदमी ने बायर करीन घड़्‌यु।
MAR 10:7 हेरे वजे सी अदमी तेरा आयस-बास सी अलग हय्‌न तेरी बायर साते भेळु रवसे।
MAR 10:8 ने चे दुय जणा एक डील बण जासे। तेरेमां हय सी चे दुय डील नी बाकुन एकुत डील छे।
MAR 10:9 तेरेमां तीनुक भगवान जुड़्‌लु छे, तीनुक कुय बी माणुस अलग नी करनु चाहजे।”
MAR 10:10 ने जत्‌यार चे घर गुया, तत्‌यार चेला एरे बारामां अळी ईसु काजे पुछ्‌या।
MAR 10:11 ईसु तीनुक कह्‌यु, “जु काहनुक माणुस पेहली लाडी काजे छुड़ीन दीसरी लाडी बणावे, चु पेहली लाडीन वीरुद मां छीनाळो करे।
MAR 10:12 ने कदी लाडी आपसान घरवाळाक छुड़ीन दीसरु घरवाळु करे चां ची बी छीनाळो करे।”
MAR 10:13 पछेन आस्‌या-बास्‌या तींद्‌रा पुर्‌या-पुरेक ईसु धड़े लावणे लाग्‌या; काहाकी ईसुन हात हीनु पर मेकाड़ीन संयबरकत मांगणे हींडी रवला बाकुन चेला तीनुक लड़्‌या।
MAR 10:14 ईसु चेला काजे लड़तेला देखीन रीसवायन ने तीनुक हुकुम आपीन कह्‌यु, “हीनुक मां रुकु पुर्‌या-पुरे काजे मारे धड़े लावणे देवु; काहाकी भगवानेन राज हींद्‌रेत तसलान छे।”
MAR 10:15 मे तुहुं काजे छाचलीन कहं “जे काय भगवानेन राजेन हक मां नानला पुर्‌या-पुरेन तसु भुरसु करीन नी रवे ती तीनुक तीना भगवानेन राज मां कदी नी जावाये।”
MAR 10:16 ने ईसु पुर्‌या काजे खुळा मां लेदु ने तींद्‌रे पर तेरु हात मेलीन संयबरकत आप्‌यु।
MAR 10:17 तत्‌यार ईसु यरुसलेम भीणी जाणे करीन वाटे लाग्‌यु, चां एक माणुस तेरे धड़े दवड़ीन आयु, ने तेरा पाये पड़ीन तीनाक पुछ्‌यु “ए वारलु मास्‌तर जलम जीवन हात करने करीन मे काय करो?”
MAR 10:18 ने ईसु तीनाक कह्‌यु, “तु मेसेक वारलु काहा कहें?” भगवान काजे छुड़ीन कुय बी वारलु नी हय बाकुन भगवान अतरुत वारलु छे।
MAR 10:19 तु हुकुम काजे जाणे की, “खुन घुण करे, छीनाळो घुण करे, चुरी घुण करे, झुटी गवाय घुण देय, कुय काजे ठगे घुण ने तारा आस्‌या-बासेन ईज्‌जत करजी।”
MAR 10:20 ने चु ईसुक कह्‌यु, “ए मास्‌तर जे आखा हुकुम ते मे नानलु हतलु तीन सी मान्‌तु आय रयु।”
MAR 10:21 ने ईसु तेरे भीणी बेसकु परम भाव सी भाळ्‌यु ने तीनाक कह्‌यु, “तारे मां एक वातेन कसर छे जां जतरो बी तारो छे तीनाक वेचीन गरीब काजे आखो आप दे ने अळतेन मारे पुठ्‌ये आवजी। असु करसी तत्‌यार तुसेक सरग मां धन जड़से।”
MAR 10:22 काहाकी चु माणुस बेसकु लकपती हतलु। तेरे मां चु ईसुन वात सामळीन चु बेसकु फीकुर मां पड़ गुयु ने दुखी हय्‌न पछु जात रयु।
MAR 10:23 ईसु चारे मेर भाळीन तेरा चेला काजे समजाड़तु जाय्‌न कह्‌यु, “जादा पयस्‌या वाळाक भगवानेन राज मां भरायणु बेसको काठो छे।”
MAR 10:24 ईसुन वात सामळीन चेला देखतात रय गुया। बाकुन ईसु अळी तीनुक कह्‌यु “मारा पुर्‌या! काहनुक धन पर भुरसु राखे तींद्‌रे वाटे भगवानेन राज मां जाणु बेसको काठो छे।
MAR 10:25 उटड़ान सुईन नाचका मायन नीकळी जाणु सरल छे, बाकुन लकपती माणसे काजे भगवानेन राज मां जाणु बेसको काठो छे।”
MAR 10:26 चेला बेसका देखतात रय गुया, ने आपसात कह्‌णे लाग गुया, “ती कुणीन छुटकारु हय सक्‌से?”
MAR 10:27 ईसु चेला भीणी भाळीन कह्‌यु, “माणसे सी ते ज नी हय सके, बाकुन भगवान सी हय सके, काहाकी भगवान आखो काय कर सके।”
MAR 10:28 पतरस ईसु काजे कह्‌णे बाजी गुयु, “देख, हामु ते आखो काय छुड़ीन तारे पछळ आय र्‌या।”
MAR 10:29 ईसु कह्‌यु, “मे तुंद्‌रे सी छाचलीन कहं, असा कुय नी हय जु मारे वजे सी ने खुस-खबरेन परचार करने करीन घर, खेत, भायस, बहणस्‌या, आयस-बास ने पुर्‌या-पारी काजे छुड़ देदु हय,
MAR 10:30 ने तुहुंक छाचलीन कहं की ईना जीवन मां घर ने भायस ने बहणस्‌या ने आस्‌या ने पुर्‌या ने खेत सी, सोव गुणा फायदु नी जड़से, ने गरात आवती रवसे बाकुन तीनाक आवणे वाळा दाहड़ा मां जलम जीवन जड़से।
MAR 10:31 बाकुन बेसका माणसे छे चे अगळ छे, बाकुन पछळ हवसे ने जे पछळ छे चे अगळ हय जासे।”
MAR 10:32 ईसु ने चेला यरुसलेमेन वाटे जातला ने वाटेत हतला, ने ईसु तींद्‌रे अगळ-अगळ जातलु, तेरा चेला ने पछळ-पछळ चालन्‌या दीसरा माणसे बी बीही रवला। अतरा मां ईसु बारे चेला काजे अळी अघु ली जाय्‌न तीनुक तेरे पर ज हवणे वाळो हतलो, च कह्‌णे बाजी गुयु।
MAR 10:33 “सामळु आपणु यरुसलेम जाणे बाजी र्‌या, चां माणसेन पुर्‌यु डाहला पुजारा ने यहुदी नीयमेन मास्‌तर्‌यान हातेम धराय जायस, ने चे तीनाक गुनाळु ठहराय्‌न मरनेन डंड आपीन, नी-यहुदी वाळा आड़जातीन सुपरुत कर देसे।
MAR 10:34 चे तेरी हासी उड़ाव्‌से ने तेर पर थुप्‌से ने सड़काय देसे, ने मार देसे, बाकुन पछु चु तीन दाहड़ाम मरला मां सी पछु जीवतु हय जासे।”
MAR 10:35 तत्‌यार जब्‌दीन पुर्‌यु याकुप ने युहन्‌‌‌नु ईसु धड़े आवीन कह्‌या, “ए मास्‌तर, हामरी आस जी छे, की ज बी हामु तार सी मांगसुन, च हामरे वाटे कर।”
MAR 10:36 चु तीनुक कह्‌यु, “तुंद्‌री काय आस छे, चो तुंद्‌रे वाटे करो।”
MAR 10:37 चे कह्‌या, “जत्‌यार तु तारी सेक-सींगार भेळु राज करने करीन, राजगादी पर बठ्‌सी, ती हामरे मायन एक काजे तारे जेवड़्‌ये आंगे ने एक काजे तारे डाखर्‌ये आंगे बसणेन हक आप्‌जी।”
MAR 10:38 ईसु तीनुक कह्‌यु, “तुहुं ज मांगणे बाजी र्‌या, तीनी वातेन मतलब तुहुंक मालुम बी नी हय। ज दुखेन पीयालु मे पीणेवाळु छे, चु पीयालु तुहुं पी सक्‌सु काय? ने ज दुखेन बपतीस्‌मा मे लेणे वाळु छे, चो बपतीस्‌मा तुहुं ली सक्‌सु काय?”
MAR 10:39 चे तीनाक कह्‌या, “तु कह्‌सी तसों हामु करसुन।” ने ईसु तीनुक कह्‌यु, “ज दुखेन पीयालु मे पीणेवाळु छे, चु पीयालु तुहुंक बी पीणु पड़से, ज दुखेन बपतीस्‌मा मे लेणे वाळु छे, च बपतीस्‌मा तुहुंक बी लेणु पड़से।
MAR 10:40 बाकुन मारा जेवड़्‌ये आंगे ने डाखर्‌ये आंगे कुणीक बठाड़नु छे, जी वात मारा हक मां नी हय। बाकुन जु जागु तीनुत काजे देसे, तींद्‌रे वाटे भगवान तीयार करलु छे।”
MAR 10:41 बाकुन जी वात सामळीन याकुपेन ने युहन्‌ना पर, दीसरा दस चेला रीसाय पड़्‌या।
MAR 10:42 ईसु तीनु आखा काजे धड़े बुलायन कह्‌यु, “तुहुं जाणु की, नी-यहुदी मां हकवाळा माणसे; तेरा जागा पर हक जमाड़ीन राज करे, ने तीना हक जमाड़न्‌या पर अळी दीसरा मटला माणसे हक जमाड़े।
MAR 10:43 बाकुन तुंद्‌रे मां असो नी हय। ज तुंद्‌रे मां मटु हवणे हींडे, चु तुंद्‌रु पावर्‌यु बन्‌नु चाहे।
MAR 10:44 ने कदी तुंद्‌रे मायन आखान डाहलु बन्‌ने हींडे, चु आखान हक मां रय्‌न पावर्‌यु बन्‌नु चाहे।
MAR 10:45 काहाकी मे माणसेन पुर्‌यु मारी सेवा चाकरी कराड़्‌ने नी आयु, बाकुन सेवा करने आयु, ने बेसका जणान जीव बचाड़ने करीन ने आपसा जीव हामरे वाटे देणे आवलु छे।”
MAR 10:46 ईसु ने तेरा चेला यरीहो गांव मां आयु, ने जत्‌यार ईसु ने तेरा चेला चां सी माणसेन एक मट्‌लु टुळु बी तींद्‌रे पुठ्‌ये यरुसलेम जाणे करीन चाली पड़्‌यु। चां एक आंधळु भीकारी सयड़क पर बठी रवलु। चु भीकारी तीमायुन पुर्‌यु बरतीमाय हतलु।
MAR 10:47 चु ज सामळ्‌यु की नासरत वाळु ईसु आवणे बाजी रयु, तत्‌यार चु आंधळु आयड़ी-आयड़ीन कह्‌यु “ए दावुदेन अवल्‌यात! ईसु मार पर दया कर।”
MAR 10:48 बेसका माणसे तीना काजे, हुगु रव करीन लड़ने बाजी गुया, चु अळी आयड़ीन कह्‌णे बाजी गुयु, “ए दावुदेन पुर्‌या, मार पर दया कर।”
MAR 10:49 तत्‌यार ईसु उबु रय्‌न हुकुम आपीन कह्‌यु, “हीनाक जां बुलावु।” ने माणसे तीनाक बुलायन कह्‌या, “हिम्‌मत राख!” ने उठ, “तुसे ईसु बुलावे।”
MAR 10:50 चु तेरु पुथल्‌या नाखी दीन, उछळीन ईसु धड़े आयु।
MAR 10:51 ईसु तीनाक कह्‌यु, “तु काय चाहे की मे तारे वाटे करो।” चु तीनाक कह्‌यु “ए मास्‌तर, मे पछु देखणे हींडी रयु।”
MAR 10:52 ईसु तीनाक कह्‌यु “जां, तारु भुरसु तुसेक वारु कर देदु।” ने चु तत्‌यारुत देख्‌णे बाजी गुयु ने हयु ईसु पछळ चाली पड़्‌यु।
MAR 11:1 तसात ईसु ने चेला, ने पुठ्‌ये चालन्‌या माणसे यरुसलेम गांव धड़े जेतुन झाड़कान बयड़ा पर बेतफगे ने बेतन्‌या गांव धड़े आया, चां ईसु तेरा चेला मां सी दुय काजे मकल्‌यु,
MAR 11:2 “तुहुं काजे पल्‌लो गांव देखाये चां जावु, ने चां जातान तुहुं काजे गदड़ीन पीलो बांदलो देखायसे; तेरे पर, हाल लग कुय नी बठ्‌यो, तीना काजे छुड़ीन ली आवु।
MAR 11:3 कदी तुहुंक काहनाक पुछे की हीना काजे काय करने छुड़ी रया? ती तुहुं कवजु, मालीक काजे ज गदड़ो चाहजे ने मालीक हीना गदड़ा काजे छाटुस पछु दी मकलसे।”
MAR 11:4 ने चे जाय्‌न च गदड़ीन पीलो वाटे धड़े आंगणा मां बांदायलो देखीन छुड़ने बाजी गुया।
MAR 11:5 ने चां उबा हय रवला, चे काहनाक कह्‌णे बाजी गुया, “गदड़ीन पीला काजे छुड़ीन काय करने हींडी र्‌या?”
MAR 11:6 जसु ईसु तीनुक कह्‌लु तसात चे तीनुक कय देदा; तत्‌यार चे गदड़ीन पीला काजे लीन जाणी देदा।
MAR 11:7 ने चे गदड़ीन पीला काजे ईसु धड़े लाया ने चे तींद्‌रा पुथल्‌या गदड़ान पीला पर नाख देदा। ने ईसु तीना गदड़ीन पीला पर बठ गुयु।
MAR 11:8 तत्‌यार बेसका माणसे तींद्‌रा पुथल्‌या ईसु अगळ-अगळ वाटे पर आथरी देदा ने दीसरा माणसे खेतेन सेडे सी पान्‌टा वाळा डाळखा काटी काटीन लाय्‌न आथरी देदा।
MAR 11:9 चे बी ईसुन अगळ-अगळ ने पछळ-पछळ जातला चे आयड़ी-आयड़ीन कवतेला, “होसान्‌ना मतलब ए मालीक हामुक वाचाड़! बरकतवाळु छे चे, जे मालीकेन नावे सी आवे!
MAR 11:10 आपणा बास दावुदेन राज चो आव्‌णे बाजी र्‌यो; बरकतवाळु छे! उंचा सरग मां भगवानेन बड़ाय हवे होसान्‌ना।”
MAR 11:11 ने ईसु यरुसलेम मां पुगीन मंदीर मां गुयु, ने चारे मेर वाळी आखी चीज काजे देख्‌यु, काहाकी दाहड़ु डुबणे वाळु हतलु, तत्‌यार ईसु चेला पुठ्‌ये बेतन्‌या गांव मां गुयु।
MAR 11:12 दीसरे दाहड़े ईसु ने चेला बेतन्‌या सी नीकळीन गुया, ती ईसु काजे भुक लागी।
MAR 11:13 ने चे छेटे रय्‌न एक अंजीरेन नीळ्‌ळा झाड़का काजे देखीन धड़े गुयु की काहींग चां खाणेन जड़ जाय, बाकुन पान्‌टाक छुड़ीन काय बी नी हतलो काहाकी फळ लागणेन टेम नी आय रवली।
MAR 11:14 ईनी वात पर ईसु झाड़काक कह्‌यु, “हय सी तारा फळ कदी नी लागे ने कुय काजे बी खाणेन नी जड़े!” ने चे सराप देतलान चेला सामळी रवला।
MAR 11:15 पछेन ईसु ने चेला यरुसलेम मां आया, ने ईसु मंदीर मां गुयु, ने चे लेण-देण कर तेला तीनु काजे बाहर नीकाळने लाग्‌यु, ने पयस्‌या अदलु-बदलु करन्‌याक ने पेरवा वेचणे वाळान चारला उथलाय दीन बाहार नीकाळ देदु।
MAR 11:16 ने ईसु मंदीर मां आखा काजे ठाहरा लीन आवणु जाणु बंद कर देदु।
MAR 11:17 ने सीकाड़तु जाय्‌न कह्‌यु, काय असो नी लिखलो हय की, मारो घर आखा देसेन माणसेन भक्‌तीन घर कवाय्‌से बाकुन तुहुं ते ईना घर काजे चुट्‌टान घर बणाय देदा!
MAR 11:18 ज सामळीन यरुसलेम मंदीरेन डाहलु पुजारु ने यहुदी नीयमेन मास्‌तर्‌या हतला। अतरा मां चे ईसु काजे मारनेन मुखु हेरने लाग्‌या। काहाकी आखा माणसे ईसुन सीकाड़नेन वात सी देखतात रय जातला ने ईसु सी बीहतेला।
MAR 11:19 ने सांती वेळाय ईसु ने तेरा चेला गांव छुड़ीन जात र्‌या।
MAR 11:20 पछेन संदारे तीनीत वाटे सी जाणे बाजी रवला, चां चे अंजीरेन झाड़का काजे मुळे लग सुकलो देख्‌या।
MAR 11:21 पतरस काजे ईसुन कह्‌ली वात हेर आवी, ने चु तीनाक कह्‌यु, “ए मास्‌तर देख। ज अंजीरेन झाड़को तीनाक तु सराप देदलु च सुकी गुयो।”
MAR 11:22 ईसु तीनु काजे कह्‌यु, भगवान पर भुरसु राखु।
MAR 11:23 मे तुंद्‌रे सी छाचलीन कहं, जु काहनुक ईना बयड़ा सी कहें की, तु उखळीन समुदर मां नाखाय जां, ने आपसान मन मां संका नी करु ने भुरसु राखे की, ज तु कहें च हय जासे ने तेरे वाटे चत हवसे।
MAR 11:24 तेरेमां मे तुंद्‌रे सी कहं, “की ज काय तुहुं दुवा करीन मांगु ने भुरसु कर लेवु की हामुक जड़ गुयो ने तुंद्‌रे वाटे जड़ जासे।
MAR 11:25 ने जत्‌यार बी तुहुं दुवा करने करीन उबा हवु, तत्‌यार कुय पर बी तुंद्‌रा मन मां रीस हय ती तीनाक माफ कर देवु; काहाकी तुंद्‌रु सरग वाळु बास जु सरग मां रवे, हयु बी तुंद्‌रु पापेन माफी आपसे।
MAR 11:26 ने कदी तुहुं दीसरान गुनु माफ नी करु, ती तुंद्‌रु बास सरग मां छे चु, तुंद्‌रा गुना काजे बी माफ नी करसे।”
MAR 11:27 पछेन चे यरुसलेम मां आया, ने तत्‌यार ईसु मंदीर मां फीरतेलु चां मंदीरेन डाहला पुजारा ने नीयमेन मास्‌तर्‌या ने डाहला तेरे धड़े आया।
MAR 11:28 ने चे तीनाक पुछ्‌या, जे काम तु काहना हक सी करे? जे काम करनेन हक तुसेक कुण आप्‌यो?
MAR 11:29 ईसु तीनुक कह्‌यु, “मे बी तुंद्‌रे सी एक वात पुछो; मेसेक तुहुं जपाप आपु ती, मे बी तुहुं काजे बताड़ीस की मे जे काम कुणीन हक सी करो।
MAR 11:30 युहन्‌ना काजे बपतीस्‌मा आपणेन हक भगवान भीणी सी जड़लो की माणसे भीणी सी? मेसेक बताड़ु।”
MAR 11:31 ने चे ईनी वात पर वीच्‌यार करने बाजी गुया; कदी आपणु कवसुन भगवान आपलु, ती चु कवसे, तत्‌यार तुहुं युहन्‌ना पर भुरसु काहा नी कर्‌या?
MAR 11:32 ने कदी आपणु कवसुन, माणसे हीनाक हक आपला छे, ती चां चे भेळा हय रवला माणसे सी बीहणु हतलो; काहाकी आखा माणसे युहन्‌ना काजे छाचलीन भगवानेन अघली वात बताड़ने वाळु मानतेला।
MAR 11:33 तेरेमां चे ईसु काजे असा कह्‌या, “हामुक मालुम नी हय।” ती ईसु तीनुक कह्‌यु, “मे बी तुहुंक नी बताड़तु की, ज काम कुणीन हक सी करो।”
MAR 12:1 पछेन ईसु दाखला मां तींद्‌रे सी वात करने लाग्‌यु, “एक माणुस खेत मां अंगुरेन वाड़ी लागाड़्‌यु ने खेतेन चारे मेर वाड़ी कर्‌यु ने अंगुरेन रस नीकाळने करीन एक हळाव बणायु, ने अंगुरेन खेत मां एक माळु बणायु ने काहनाक किरसाण काजे तेरी वाड़ी साजा मां आपीन, नांबे वाळा देस मां जाती रयु।”
MAR 12:2 पछेन अंगुरेन लागणेन दाहड़ा आया, तीना खेतेन मालीक तेरा एक पावर्‌या काजे साजेल्‌यान चां अंगुरेन वाड़ी मां फळेन वाटु मांगणे मकल्‌यु।
MAR 12:3 बाकुन चे पावर्‌या काजे धरीन ठुक्‌या ने तीनाक ठारलु पछु मकली देदा।
MAR 12:4 ने चु खेतेन मालीक अळी दीसरा पावर्‌या काजे मकल्‌यु, ने चे तीना पावर्‌यान मुणको फुड़ देदा, ने तेरो नाव-बद्‌दी कर्‌या।
MAR 12:5 पछेन अळी दीसरा काजे मकल्‌यु, ने तीनाक चे मार नाख्‌या, तत्‌यार चु अळी बेसका पावर्‌याक मकल्‌यु ने तींद्‌रे मां सी काहनाक काजे ठुक्‌या ने काहनाक काजे मार नाख्‌या।
MAR 12:6 अळतेन एकुत रय रवलु ने चु तेरु लाटेक्‌लु पुर्‌यु हतलु; अतरा मां तीनाक बी तींद्‌रे धड़े ज सुचीन मकल्‌यु की मारा पुर्‌यान आव-भाव करसे करीन।
MAR 12:7 बाकुन चे साजेल्‌या आपसात वात कर्‌या, जु ते तीना खेतेन हकदार छे, चालु हीना काजे बी मार नाख्‌ता तत्‌यार जी धन दवलत आपणी हय जासे
MAR 12:8 ने चे तीनाक धरीन मार नाख्‌या ने अंगुरेन वाड़ी मां सी बाहार नाख देदा।
MAR 12:9 “तेरेमां अंगुरेन वाड़ीन मालीक काय करसे?” चु आवीन तीनु साजेल्‌या काजे मार नाखसे ने अंगुरेन वाड़ी दीसरा काजे आप देसे।
MAR 12:10 काय तुहुं हाल लगुन चुखला सास्‌तुर मां नी भण्‌या काय? तीना दगड़ा काजे खास मीस्‌तर्‌या फालतु समजीन बाहार नीकाळ देदा, बाकुन हयुत दगड़ु खास दगड़ु बण गुयु;
MAR 12:11 ज ते मालीक भणी सी हयो; ने ज ते हामरी नींगा मां बेसकु वारु छे!
MAR 12:12 तत्‌यार चे ईसुक धराड़ने हींडी रवला; काहाकी चे समजी गुयला की जु हामरी नाव-बद्‌दी मां जु दाखलु कह्‌लु छे। बाकुन चे माणसे सी बीहेतेला ने ईसु काजे छुड़ीन जाती र्‌या।
MAR 12:13 तत्‌यार यरुसलेम वाळा डाहला पुजारा ने यहुदी नीयमेन मास्‌तर्‌या ने डाहला, थुड़ाक फरीसी माणसे ने हेरोदेन पाल्‌टी मायन थुड़ाक काजे ईसु धड़े मकल्‌यु, काहाकी तीनाक सवाल पुछीन तीनाक वात मां रुक देय।
MAR 12:14 चे आवीन ईसुक कह्‌या, “ए मास्‌तर हामु जाणजे की तु छाचलु छे, ने कुयन फीकुर नी करे, काहाकी तु माणसेन मुंहडा देखीन वात नी करे, बाकुन भगवानेन वाट संय देखाड़े। ती बताड़ रोमी राजा काजे फाळु आपणु वारु छे की नी छे? हामु फाळु आपजे की नी आपजे?”
MAR 12:15 तींद्‌रा ढंगड़ा जाणीन ईसु तीनुक कह्‌यु, “मेसेक काहा पारखणे बाजी र्‌या? एक चांदीन सीक्‌कु मारे धड़े लावु, ने मे तीना रुप्‌याक देखीस ने तुहुंक बताड़ीस।”
MAR 12:16 ने चे एक रुप्‌यु लावीन ईसुक आप्‌या, “ने ईसु तीनुक सीक्‌कु देखाड़ीन कह्‌यु, “सीक्‌का पर कुणीन नाव ने छाप छे?” चे कह्‌या रोमी राजान।
MAR 12:17 ईसु तीनुक कह्‌यु, “ज केसर राजान छे, च केसर राजा काजे आपु ज भगवानेन छे, च हक भगवान काजे आपु।” ने चे तेरी वात सामळीन बेसका देखतात रय गुया।
MAR 12:18 पछेन थुड़ाक सदुकी, कहें की माणसे मरलाम सी पछा जीवता नी हवे, चे ईसु धड़े आवीन पुछ्‌या,
MAR 12:19 “ए मास्‌तर, मुसु हामरे वाटे असु नीयम लिखलु छे की, कदी काहनाक ने भायन अवल्‌यात नी हवी ने मर जाय, ने चां तेरु भायस रांडायली बायर साते ईयाव करीन आपसान भायस वाटे अवल्‌यात पयदा करनु चाहे।
MAR 12:20 एक कावा असो हयो; सात भायस हतला, मट्‌लु भायस ईयाव करीन अवल्‌यात पाखुर मर गुयु।
MAR 12:21 तत्‌यार दीसरु भायस तीनी रांडायली बायर साते ईयाव कर लेदु ने चु बी अवल्‌यात पाखुर मर गुयु। ने असुत तीसरु भायस बी कर्‌यु।
MAR 12:22 असा करीन सातु भायस असात तेरे साते ईयाव कर्‌या, ने अवल्‌यात पाखुर मर गुया। पछेन आकरी कावा ची रांडायली बायर बी मर गुय।
MAR 12:23 अळतेन चे आखा मरीन पछा जीवता हवसे तत्‌यार ची कुणीन बायर कवाय्‌से? काहाकी ची ते सातु भायसेन लाडी बन्‌ली हतली।”
MAR 12:24 ईसु तीनुक जपाप देदु, “काय तुहुं असा करीन भुल मां पड़ र्‌या की तुहुं नीते भगवानेन लिखली चुखला सास्‌तुर काजे जाणु नीते भगवानेन ताकत काजे नी उळखु।
MAR 12:25 काहाकी जत्‌यार मरला माणसे पछा जीवता हवसे, तत्‌यार तींद्‌रेम ईयाव नी हवे, सरग मां सरग वाळान काहवाळ्‌या तसा रवसे।
MAR 12:26 मरलान पछा जीव उठणेन बारामां काय तुहुं मुसान किताप मां काटाळा झाड़कान बारामां लिखलो हतलो च नी भण्‌या काय, चां भगवान मुसा काजे कह्‌लु की, मे अब्‌राहमेन भगवान ने इसाकेन भगवान ने याकुपेन भगवान छे?
MAR 12:27 भगवान मरलान नी, जीवतान भगवान छे; तुहुं ते मट्‌ली भुल मां पड़ी र्‌या।”
MAR 12:28 यहुदी नीयमेन मास्‌तर्‌या मां सी एक आयु ने तीनु काजे वीच्‌यार करतेलान सामळ्‌यु ने असु देख्‌यु की, ईसु सदुकी काजे वारु ढंग सी जपाप देदु, तत्‌यार नीयमेन मास्‌तर्‌यु ईसु धड़े आय्‌न पुछ्‌यु की, “आखा मां सी मट्‌ली हुकुम काहनी छे?”
MAR 12:29 ईसु तीनाक कह्‌यु, आखा हुकुम मां सी ज हुकुम मटलो छे, ए ईस्‌रायल, सामळु! आपणु मालीक भगवान एकुत मालीक छे।
MAR 12:30 ने तु आपसा मालीक भगवान सी तारा आखा मन सी, ने तारा जीव सी ने तारी आखी अक्‌कल सी, ने तारी आखी ताकत सी परम कर।
MAR 12:31 ने दीसरु हुकुम असु छे, की तुहुं तुंद्‌रे आड़े-धड़े रहणे वाळा सी तारेन तसु परम कर। दीसरा हुकुम अळी ईनु दुय हुकुम सी मटी नी हय।
MAR 12:32 चे यहुदी नीयमेन मास्‌तर्‌या ईसु काजे कह्‌या, “ए मास्‌तर! जे आखो हुकुम संय छे। तु छाचलीन कह्‌यु, की मालीक अतरुत भगवान छे, ने तीनाक छुड़ीन कुय भगवान नी हय।
MAR 12:33 ने तीनाक आखा मन सी ने आखी अक्‌कल सी, ने आखा जीव, ने आखी ताकुतेन साते आपसान भगवान सी परम राख्‌जी, जे हुकुम, आखा काय बी जनवार्‌या काजे भगवान अगळ चड़ावणे सी ने अळी काहींग बादा चड़ावणे सी जादा वारु छे।”
MAR 12:34 जत्‌यार ईसु देख्‌यु की चु समजीन जपाप देदु, ती ईसु तीनाक कह्‌यु, “तु भगवानेन राज सी छेटे नी हय।” ने अळतेन ईसु काजे पारखणे करीन कुयन बी पुछणेन हिम्‌मत नी आय।
MAR 12:35 पछेन ईसु मंदीर मां सीकाड़तु जाय्‌न असु पुछ्‌यु, यहुदी नीयमेन मास्‌तर्‌या काहा कहें की मसी दावुदेन अवल्‌यात छे?
MAR 12:36 दावुद आपसुत चुखली-आत्‌मा सी भरायन कह्‌लु, की मालीक, मारा मालीक मसी सी कह्‌यु, तु मारे जेवड़्‌ये आंगे बठ, जत्‌यार लग की मे तारा वेरी काजे, तारा पाय तळे नी कर दम।
MAR 12:37 दावुद ते आपसुत मसी काजे मालीक कहें पछेन मसी दावुदेन अवल्‌यात कसु हय सक्‌से? ने ईसुन जी वात, माणसेन मट्‌लु टुळु खुस हय्‌न सामळी रवला।
MAR 12:38 चु सीकाड़तु जाय्‌न कह्‌यु, “यहुदी नीयमेन मास्‌तर्‌या सी चेतीन रवु, चे ते पाय मां सी नांबला पुथल्‌या पेरीन फीरे, ने हाट मां, वारु छे की, पुछीन तींद्‌री आव-भाव करनु पटे।
MAR 12:39 ने तींद्‌रा भक्‌तीन घर मां खास जागा पर बसणु ने तीहवार मां पाहनत्‌यान तसा खास जागा मां बठणु वारु गमे।
MAR 12:40 चे रांडायला बायरान घर धुकु दीन तींद्‌रा धन काजे ठगीन हापकी लेय, ने दीसरा काजे देखाड़ने करीन बेसकी वार दुवा करता रवे। बाकुन तीनु माणसे काजे डंड जादा जड़से।”
MAR 12:41 ईसु मंदीरेन दान पेटीन सांबु बठीन देखी रवलु, की दान पेटी मां कसा पयस्‌या भर र्‌या, ने बेसका लकपती पेटी मां बेसका पयस्‌या नाख्‌या।
MAR 12:42 अतरा मां एक गरीब रांडायली बायर दुय टका दान करी, तेरी कीमत बेसकी कम हतली।
MAR 12:43 तत्‌यार ईसु तेरा चेला काजे धड़े बुलायन तींद्‌रे सी कह्‌यु, “मे छाचलीन कहं की, मंदीरेन पेटी मां दान करने वाळा सी, जी गरीब रांडायली बायर आखा सी जादा दान करली छे।
MAR 12:44 काहाकी आखा तींद्‌रा माल धन मां सी दान कर्‌या, बाकुन जी रांडायली बायर गरीब हय्‌न बी आपसीन आखो कमायलो धन ने जीवन दान कर देदी।”
MAR 13:1 जत्‌यार ईसु मंदीर मां सी नीकळ्‌यु ती चां एक चेलु कह्‌यु, “ए मास्‌तर, देख, कतरा वारु दगड़ा छे, ने कतरा वारु बंगला छे!”
MAR 13:2 ईसु तीनाक कह्‌यु, “तु ते ईना मटला बंगला काजे देख र्‌यु ने घाबराय गुयु। बाकुन जे आखा दगड़ा उदार नाखसे; जां लग की ईना जागा पर दगड़ा पर दगड़ु बी नी बचे, ज की हेटु नी उराटी देय।”
MAR 13:3 जत्‌यार ईसु जेतुन झाड़कान बयड़ा पर मंदीरेन अगळ बठी रवलु, ती पतरस ने याकुप ने युहन्‌‌‌नु ने अळी अन्‌दीरीयास छेटास जाय्‌न पुछ्‌या
MAR 13:4 “हामुक बताड़ की जी वात की हवसे? ने जत्‌यार जी आखी वात पुरी हवणे पर रवसे, ने तीना दाहड़ान सहलाणी काय रवसे।”
MAR 13:5 ईसु तीनुक कह्‌णे बाजी गुयु, चेतीन रवु की; काहनुक तुहुंक भटकाड़ी नी देय।
MAR 13:6 बेसका मारो नाव लीन कवसे, मे मसी छे, ने चे बेसका माणसे काजे भटकाड़ी देसे।
MAR 13:7 जत्‌यार तुहुं लड़ायन ने झगड़ान हुकवाय सामळु ती घाबरायु घुण, काहाकी असो ते हवण्‌यो छे, बाकुन हेरो मतलब ज हय की हय आकरी आय गुय।
MAR 13:8 काहाकी एक देसेन माणसे दीसरा देसेन माणसे पर, ने एक राज्‌येन माणसे दीसरा राज्‌येन माणसे भीणी लड़ायसे ने चड़ाव करसे। जां-चां काळ पड़से। ने जां-चां धरती हालसे ने फाट जासे। जी दुखेन आवणे ने हवणेन सुरुवातुत रवसे।
MAR 13:9 बाकुन तुहुं आपसान बारामां चेतीन रवु; काहाकी माणसे तुहुं काजे धरसे ने मटला पंचुन अगळ ली जासे; ने तींद्‌रा भक्‌तीन घर मां तुहुं काजे ली जाय्‌न ठुकसे; ने मारा नाव सी राजा ने राज करन्‌या अगळ उबा करसे। काहाकी तुहुं मारा गवा बण जाय ने तींद्‌रे अगळ मारी वारलु खबर सामळावणेन मुखु रवसे।
MAR 13:10 ने आकरी हवणे सी पेहेल, खुस-खबरेन परचार आखा माणसे मां हवसे ने हवसे।
MAR 13:11 जत्‌यार चे तुहुंक पंचु अगळ ली जासे, चां पेहेल सी जी फीकुर घुण करु, की हामु काय कवसुन, बाकुन ज काय तुहुंक कह्‌णु छे तीनी टेम बताड़ी देसे चत कह्‌जु; काहाकी बुलने वाळा तुहुं नी हय, बाकुन चुखली-आत्‌मा रवसे।
MAR 13:12 तीनु दाहड़ा मां भायस तेरा भाय काजे, ने बास तेरा पुर्‌या-पारी काजे मारने करीन धराय देसे, ने पुर्‌या पुरे हेरा आयस बासेन वेला नी हवे ने तीनुक माराड़ देसे।
MAR 13:13 ने तुहुं मारा नाव पर भुरसु करी र्‌या करीन आखा माणसे तुंद्‌रे सी नाव-बद्‌दी करसे। बाकुन ज कुय मरता लग मार पर भुरसु करसे, तीनुक छुटकारु जड़से।
MAR 13:14 जत्‌यार तुहुं तीनी उजाड़ने वाळी नी गमे तसली चीज ने काम काजे देखीन जाहां च हवणु नी चाहजे ने चां तुहुं देख्‌सु भन्‌ने वाळा समज लेवु तत्‌यार जे यहुदीया मां छे चे बयड़ा मां ढास जाय।
MAR 13:15 ज घरेन छत पर हय ती, चु फालतु टेम काजे मां खुवे ने तेरा घर मां सी काय बी समान ली जाणे करीन नेचु घुण उतरे।
MAR 13:16 ने जे खेतेम हय, चु तेरा पुथल्‌या लेणे करीन पछु नी आवणु चाहे।
MAR 13:17 तीनु दाहड़ा मां बायरा भारास हसे, ने काहनीक धड़े नानला पुर्‌या हसे, ती तींद्‌रे वाटे ढास्‌णु बेसको काठो रवसे।
MAR 13:18 ने भगवान सी दुवा करता रहु, की असो सींगेन दाहड़ा मां नी हवणु चाहे।
MAR 13:19 काहाकी तीनु दाहड़ा मां असो दुख हवसे की च धरती बन्‌ली ती सी ने ज काय भगवान बणायु ती सी हय लग नी हयो ने च कदी नी हवसे।
MAR 13:20 कदी मालीक तीनु दाहड़ा काजे नी घटाड़तु ती कुय बी नी बचतो बाकुन मालीक पर भुरसु करने वाळा नेवाड़्‌ला माणसेन वजे सी तीनु दाहड़ा काजे घटायु।
MAR 13:21 तीनु दाहड़ा मां कदी काहनुक तुंद्‌रे सी कवे देखु मसी जां छे, नीते, देखु वां छे कवे ती तींद्‌रे पर भुरसु घुण करु;
MAR 13:22 काहाकी लुच्‌चा मसी ने लुच्‌चा अघली वात बताड़न्‌या आवसे ने चे कवसे मे मसी छे ने चे सहलाणी ने कदी देख्‌या नी च काम देखाड़से ने कदी हय सके ती भुरसु करने वाळा नेवाड़्‌ला माणसे काजे बी भटकाड़नेन कुसीत करसे।
MAR 13:23 बाकुन तुहुं चेतीन रहु! मे तुहुं काजे आखी वात पेहेल सी बताड़ देदु।
MAR 13:24 “तीनु दाहड़ा मां तीना दुखेन पछे दाहड़ु डुब जासे ने आंदारो हय जासे, ने चांद वीजाळो नी देय,
MAR 13:25 ने सरग मां सी तारा पड़ने बाजी जासे ने सरगेन आखी ताकत हालने बाजी जासे।
MAR 13:26 तत्‌यार माणसे माणसेन पुर्‌या काजे मट्‌ली ताकत ने सेक-सींगार साते आदळा मां आवतेला देखसे।
MAR 13:27 तीना टेम मां चु तेरा सरग वाळा काहवाळ्‌या काजे मकलीन धरतीन चार खुणा मां सी आपसा नेवाड़्‌ला माणसे काजे भेळा करसे।”
MAR 13:28 “अंजीरेन झाड़का सी जु दाखलु सीकु: जत्‌यार तेरी डाळ मां सी नवली नीळ्‌ळी डाळी ने पान्‌टा नीकळने बाजी जाय, ती तुहुं जाणी जावु की उन्‌ढाळान दाहड़ा आवणे वाळा छे।
MAR 13:29 असात जत्‌यार तुहुं ईनी वात काजे हवतेलान देखसु, ती जाण लेसु की आवणे वाळी टेम धड़ेत छे, मतलब बारना मात छे।
MAR 13:30 मे तुंद्‌रे सी छाचलीन कहं की जत्‌यार लग जी आखी वात पुरी नी हवे चां लग ईनी पीड़ीन माणसे मरे नी।
MAR 13:31 सरग ने धरती टळ हय जासे, बाकुन मारे बुले कदी नी टळे।
MAR 13:32 “दाहड़ा नीते टेम कत्‌यार आवसे तेरे बारामां कुय काजे मालुम, नी हय, नीते सरग वाळा काहवाळ्‌या काजे नीते; पुर्‌या काजे, बाकुन भगवान बास अतरुत जाणे।
MAR 13:33 देखु जागता रहु ने तीयार रहु काहाकी तुहुं नी जाणु की ची टेम कत्‌यार आवसे।
MAR 13:34 ज तीना माणसेन तसों छे, चु दीसरा तेरा घरेन काम छुड़ीन नाबे फीरने जाय, ने आपसान पावर्‌या काजे जपापदारी आपे, ने आखा काजे काम बताड़ीन जाय, ने झपलान राखवाळ्‌या काजे जागली करजी करीन कहें।
MAR 13:35 तेरेमां तुहुं बी जागता रहु, काहाकी तुहुं नी जाणु की घरेन मालीक कत्‌यार आवसे सांतु की, आदी राते, की कुकड़ा वासणीक की, दाहड़ु उंगे तत्‌यार।
MAR 13:36 असो नी हय जाय की चु उचकान आय लागे ने तुहुं सुवतेला तीनाक देखाव पड़ु।
MAR 13:37 ने ज मे तुंद्‌रे सी कय र्‌यु चीत वात आखा सी कहं की: जागता रहु।”
MAR 14:1 दुय दाहड़ा मां फसहन तीहवार ने खमीरी पाखुर रुटान तीहवार आवणे वाळु हतलु। मंदीरेन डाहला पुजारा ने यहुदी नीयमेन मास्‌तर्‌या ईसु काजे ठगीन धरनु ने मारनेन वीच्‌यार करने करीन भेळा हया।
MAR 14:2 बाकुन चे कह्‌तेला की, तीहवारेन दाहड़े असा नी करजे, “नीते असो नी हय जाय की माणसे मां दंगु हय जाय।”
MAR 14:3 जत्‌यार ईसु बेतन्‌या मां हतलु तत्‌यार चां एक माणुस सीमोन नावेन हतलु ने चु कुड़ायलु हतलु, तेरे घर मां ईसु रुटा खाणे बठी रवलु, तत्‌यार एक बायर वारलु गुळवळा दगड़ा मां महंगलो पीवर गंदायण्‌यो तेल लीन आय्‌न सीसीन ढाकणो उघाड़ीन ईसुन मुणका पर रेचवी देदी।
MAR 14:4 बाकुन थुड़ाक माणसे रीसवायन एक दीसरा काजे कह्‌णे बाजी गुया, जी ईना ईत्‌तर तेल काजे काहा रद कर देदी?
MAR 14:5 काहाकी ईत्‌तर तेल एक सालेन दाहड़कीन पयस्‌या सी बी महंगो वेचाय जातो, ने चे तेरु वाक नीकाळीन लड़ने बाजी गुया।
MAR 14:6 बाकुन ईसु कह्‌यु, “हीनीक काहा वेला पाड़ी र्‌या; रहणी देवु? हय ते मारे वाटे वारलाम-वारलु काम करली छे।
MAR 14:7 काहाकी गरीब माणसे ते तुंद्‌रे पुठ्‌ये जलम रवसे, ने तुहुं जत्‌यार चाहु, तत्‌यार तींद्‌री भलाय कर सक्‌सु; बाकुन मे तुंद्‌रे पुठ्‌ये जलम नी रव।
MAR 14:8 हयी ते ज करनु हतलो चत करी, ची मारा डील पर मेसे मारनेन पेहेल सी तेल रेचवीन मेसेक अघे करनेन तीयारी करली छे।
MAR 14:9 मे तुंद्‌रे सी छाचलीन कहं की आखी कळी मां जां-जां खुस-खबरेन परचार हवसे चां-चां माणसे हेरा ईना कामेन बी हेर करने करीन बताड़से।”
MAR 14:10 तत्‌यार यहुदा ईस्‌करीयोती ईसुन बारे चेला मायन एक हतलु, जु चेलु मंदीरेन डाहला पुजारान चां जाय्‌न कह्‌यु, काहाकी ईसु काजे तींद्‌रे हाते धराड़ी दम।
MAR 14:11 चे तेरी वात सामळीन बेसका खुस हय गुया, ने चे तेरे बदले पयस्‌या आपणेन वायदु कर लेदा। ने चे ईसु काजे धराड़नेन मुखु हेरने बाजी रवलु।
MAR 14:12 खमीरी पाखुर रुटा बणावणेन तीहवारेन पेहेले दाहड़े तीना तीहवारेन गाडरो मारीन बादा चड़ावतेला, चां ईसुन चेला ईसु सी पुछ्‌या, “तु काहना जागा पर फसहन खाणो खाणे करीन कय रयु? चां हामु जाय्‌न फसहन खाणो तीयारी करसुन?”
MAR 14:13 तत्‌यार ईसु तेरा चेला मायन दुय जणा काजे असु कय्‌न मकल्‌यु की, “सहर मां जावु, ने एक माणुस ठाहरा मां पाणी भरीन जासे चु तुहुं काजे भेळु हवसे, तत्‌यार तेरे पुठ्‌ये जाजु।
MAR 14:14 ने चु तीना घर मां जाय, तीना घरेन मालीक काजे कह्‌जु, ‘मास्‌तर असु कय रयु, की खाणो खाणेन मारु कमरु कां छे, चां मे मारा चेला पुठ्‌ये फसहन खाणो खाय सके?’
MAR 14:15 तत्‌यार चु तुहुंक घरेन उपर्‌नी मंजीलेन कमरा पर वारु जमाड़ीन ने आथरीन तीयार करलो, एक मट्‌लु कमरु देखाड़से। चां तुहुं आपणे वाटे खाणो तीयार करजु।”
MAR 14:16 ने चे दुय चेला सहर मां गुया, ने जसु चु तीनुक कह्‌लु हतलु, तीनुक तसत जड़्‌यो, ने चे फसहन खाणो तीयारी कर्‌या।
MAR 14:17 जत्‌यार सांतो हयो, ती ईसु तेरा बारे चेला पुठ्‌ये आयु।
MAR 14:18 जत्‌यार चे खाणे बठी रवला, ती ईसु कह्‌यु, “मे तुंद्‌रे सी छाचलीन कहं, तुंद्‌रे मायन एक जणु छे, चु मार साते खाणे बठी रयु, चु मेसेक धराय देसे।”
MAR 14:19 चे दुखी हय गुया ने तीनाक पुछ्‌णे बाजी गुया, ने अळतेन चे चेत पुछ्‌णे लाग्‌या की, “काय चु मेते नी छे?”
MAR 14:20 ईसु तीनुक जपाप आप्‌यु, “बारे मायन एक जणु छे, चु मारे साते एकुत तळी मां खाणे बाजी र्‌यु।
MAR 14:21 काहाकी माणसेन पुर्‌यु ते तसुत मरसे, जसों तेरा बारामां लिखलो छे, बाकुन तीना माणुस पर मोटु दुख काहाकी तेरे वजे सी माणसेन पुर्‌यु धराय जाय। कदी चु माणुस पयदा नी हवतु, ती तेरे वाटे भलो रहतो।”
MAR 14:22 जत्‌यार चे खाणे बाजी रवला, ईसु हात मां रुटु लेदु ने रुटु वाटे भगवान सी कह्‌यु की, तु बेसकु वारु छे, ने रुटु भांजीन तेरा चेला काजे आपतु जाय्‌न कह्‌यु, “लेवु, जु रुटु मारु डील छे।”
MAR 14:23 पछेन पीयालु लेदु ने तेरे वाटे भगवान सी कह्‌यु, तु बेसकु वारु छे, कय्‌न चेला काजे आप्‌यु, ने चे आखा तीना मां सी पीदा।
MAR 14:24 ने ईसु तीनुक कह्‌यु, जु पीयालु, मारा लुही मां बुली करला नवला कायदान सहलाणी छे, ज लुही तुंद्‌रे आखा वाटे उंह्‌लो छे।
MAR 14:25 मे तुंद्‌रे सी छाचलीन कहं, की मे जु रस तीनु दाहड़ा लग कदी नी पीयो जत्‌यार लग भगवानेन राज मां नवला अंगुरेन रस नी पीलम।
MAR 14:26 तत्‌यार चे भगवानेन भजन गाया ने जेतुन झाड़कान बयड़ा पर गुया।
MAR 14:27 तत्‌यार वाटे ईसु तीनुक कह्‌यु, तुहुं आखा मेसेक छुड़ी देसु, काहाकी लिखलो छे; मे गुवाळ्‌या काजे मार नाखीस, “ने गाडरा खळन्‌या-वळन्‌या हय जासे।
MAR 14:28 बाकुन मे पछु जीव उठीन तुंद्‌रे सी पेहेल गलील मां पुगी जायस।”
MAR 14:29 पतरस ईसुक कह्‌यु, “कदी आखा तुसे छुड़े ते छुड़े, बाकुन मे तुसेक कदी नी छुड़ो।”
MAR 14:30 ईसु पतरस काजे कह्‌यु, “मे तुसेक छाचलीन कहं, की तु आज रातेत दुय कावा कुकड़ा वासणेन पेहेल, तीन कावा मेसेक नीकारु करसी।”
MAR 14:31 बाकुन पतरस अळी हिम्‌मत करीन कह्‌यु, “कदी मेसेक तारे पुठ्‌ये मरनु बी पड़े, तेबी मे तारु नीकारु नी करो!” ने दीसरा चेला बी असात कह्‌या।
MAR 14:32 पछेन ईसु गतसमनी नावेन एक वाड़ी मां आयु ने चु तेरा चेला सी कह्‌यु, “मे दुवा करीन आवो, तत्‌यार लग तुहुं जांत बठजु।”
MAR 14:33 ने चु पतरस ने याकुप ने अळी युहन्‌ना काजे तेरे पुठ्‌ये ली गुयु; ने चां चु बेसकु दुखी हय्‌न लतपत हय रवलु।
MAR 14:34 ने तीनुक कह्‌यु, “मारो मन बेसको दुखी छे; ने अतरो बी की मारु जीव नीकळने वाळु छे, तेरेसी तुहुं जांहात रवु, ने चेतीन रहु।”
MAR 14:35 पछेन चु ईतरुक अघु गुयु, ने धरती भीणी अळीन दुवा करने लाग्‌यु की कदी हय सके ती जी दुख मार पर सी टळ जाय।
MAR 14:36 ने दुवा कर्‌यु की, “तु मारु बास छे, तु आखो काय कर सक्‌सी; तेरेमां ईना दुखेन पीयाला काजे मार धड़े सी छेटु कर ले; तेबी मे चाहो तसों नी बाकुन तु चाहे तसों हवणी दे।”
MAR 14:37 तत्‌यार ईसु तीनु चेला धड़े पछु आयु, ने तीनुक सुवतेला देखीन पतरस सी कह्‌यु, “ए सीमोन, तु सुवणे बाजी रयु? काय तु जाराक वार लग जागी नी सक्‌तु?”
MAR 14:38 “जागता, ने दुवा करता रहु की तुहुं पारख मां नी पड़ु। आत्‌मा ते तीयार छे, बाकुन डील कमजुर छे।”
MAR 14:39 चु अळी पछु जाती र्‌यु ने अळी तसुत दुवा कर्‌यु।
MAR 14:40 ने अळी पछु आय्‌न तीनु तीन जणा काजे सुवतेला देख्‌यु, काहाकी चे बेसका नीदरायला हतला; ने चे ईसु काजे काय कह्‌णु ने काय नी? ची वात तीनु काजे समज मां नी आय।
MAR 14:41 पछेन तीसरी कावा बी ईसु पछु तींद्‌रे धड़े आयु, “चां ईसु तीनुक कह्‌यु काय तुहुं हय लग सुवता ने आराम करता रवसु, बस अतरोत! टेम आय्‌जो, देखु माणसेन पुर्‌यु पापी माणसेन हातेम धराय्‌णे बाजी र्‌यु।
MAR 14:42 उठु, आपणु जाता, ने देखु, जां एक मेसेक धराड़ने वाळु माणुस धड़ेत छे!”
MAR 14:43 ईसु आपसाक धराड़ने वाळान बारामां असु कहणेत बाजी रवलु ने तीनीत टेमे यहुदा ईस्‌करीयोती चु बारे चेला मायन एक हतलु। तेरे भेळा बेसका माणसे आया चे तलवार्‌या ने डेंगा ली रवला, तीनु काजे मंदीरेन डाहला पुजारा ने यहुदी नीयमेन मास्‌तर्‌या ने मुख्‌या बी हतला चे मकल्‌या।
MAR 14:44 ईसु काजे धराड़ने वाळु यहुदा तीनुक जी सहलाणी आपलु की, “मे तेरे गुळु दीस हयुत ईसु रवसे, ने तीनाक धरीन सीपायड़ान सात मां समाळीन लीजाजु।”
MAR 14:45 यहुदा जसुत ईसु धड़े आवीन कह्‌यु, “ए मास्‌तर!” ने तेरे गुळु देदु।
MAR 14:46 ने तत्‌यारुत चे ईसु काजे धर्‌या ने बांद लेदा।
MAR 14:47 बाकुन ईसुन एक चेलु चां उबु हय रवलु चु मीयान मां सी तलवार नीकाळीन आखान डाहला पुजारान पावर्‌यान कान्‌टु तुड़ देदु।
MAR 14:48 ईसु तीनुक कह्‌यु, “काय तुहुं डाकु ने चुट्‌टु समजीन मारे भीणी तलवार्‌या ने डेंगा लीन मेसेक धरने आय र्‌या?
MAR 14:49 मे दाहड़ीन मंदीर मां तुंद्‌रे साते रय्‌न सीकाड़्‌या करतेलु, ने तत्‌यार तुहुं मेसेक नी धर्‌या। बाकुन चुखला सास्‌तुर मां लिखली छे, ची वात पुरी हवे।”
MAR 14:50 ने अळतेन आखा चेला ईसु काजे छुड़ीन ढासी पड़्‌या।
MAR 14:51 ने चां एक जुवान्‌यु तेरा डील पर लायलुनेन साल पांगरीन ईसु पछळ-पछळ जातलु। ने ईसु काजे लीजाण्‌या माणसे तीनाक बी धरनेन कुसीस कर्‌या।
MAR 14:52 बाकुन चु साल तींद्‌रे हात मां रहणे दीन नांगरलुत ढास पड़्‌यु।
MAR 14:53 तत्‌यार चे ईसुक डाहला पुजारान मुखीन चां ली गुया। ने दीसरा डाहला पुजारा, ने मुख्‌या, ने यहुदी नीयमेन मास्‌तर्‌या बी चां भेळा हय गुया।
MAR 14:54 पतरस छेटु रय्‌न तेरे पछळ-पछळ आखान डाहला पुजारान आंगणा मां गुयु, ने सीपायड़ा साते बठीन आकठा मां तापणे बाजी गुयु।
MAR 14:55 डाहला पुजारा ने यहुदीन आखा बसक वाळा पंचु, ईसु काजे मारने करीन गवा पुरावु हेरने बाजी रवला, बाकुन तीनुक गवा पुरावु नी जड़्‌यु।
MAR 14:56 काहाकी बेसका माणसे ईसु वेला नी हया, ने झुटी गवाय देदा, बाकुन तींद्‌री गवाय एक जसी नी हतली।
MAR 14:57 तत्‌यार ईतराक माणसे उठीन ईसु वेला नी हया ने झुटी गवाय देदा,
MAR 14:58 “हामु ईना ईसु काजे कवतेलान सामेळला छे की, माणसेन हातेन बणावला मंदीर काजे उदार दीस, ने तीन दाहड़ा मां दीसरु मंदीर बणाय दीस चु माणसेन हाते नी बन्‌लु हय।”
MAR 14:59 बाकुन चां बी तींद्‌री गवाय एक बी मेळ नी खादी।
MAR 14:60 तत्‌यार आखान डाहलु पुजारु ईचमां उबु रय्‌न ईसु काजे पुछ्‌यु “जे माणसे तारे वीरुद मां काहनी बी गवाय दी र्‌या, तेरु जपाप तु काहनी आपतु?”
MAR 14:61 बाकुन तेबी ईसु हुगुत हय रयु, ने काय बी जपाप नी आप्‌यु, डाहलु पुजारु अळी दीसरी कावा अळी तीनाक पुछ्‌यु, “काय तु परमवाळान वारलु पुर्‌यु मसी छे?”
MAR 14:62 “ईसु कह्‌यु,” हव मे छे, “ने तुहुं माणसेन पुर्‌या काजे आखा सी मटा ताकतवाळान जेवड़्‌ये आंगे बठलु ने सरगेन आदळा पुठ्‌ये आवतेलान देखसु!”
MAR 14:63 तत्‌यार आखान डाहलु पुजारु आपसान पेहेरला पुथल्‌या फाड़ीन कह्‌यु, “हय हामु काजे अळी गवा पुरावु नी चाहजे।
MAR 14:64 तुहुं नाव-बद्‌दी करता सामळी लेदला छे, हय तुंद्‌रु वीच्‌यार काय छे?” चे आखा हेरे वीरुद मां कह्‌या की, हयु गुनाळु छे ने हीना काजे मरनेन डंड आपणु चाहजे।
MAR 14:65 तत्‌यार तींद्‌रे मायन थुड़ाक तेरे पर थुप्‌णे लाग्‌या, ने तेरो मुंहडो टुपे ने काहनाक मार्‌या ने काहनाक पुछ्‌या की, भगवानेन अघी सी आवणे वाळी वात देखाड़, ने सीपायड़ा तीनाक ली जाय्‌न थापड़ाया।
MAR 14:66 जत्‌यार पतरस नेचु आंगणा मां हतलु, चां आखान डाहला पुजारान एक पावरनी तेर धड़े आय।
MAR 14:67 ने पतरस काजे आकठा धड़े तापतेला देखीन, ची सुदीत भाळीन कय, “तु बी तीना ईसु नासरी पुठ्‌ये हतलु।”
MAR 14:68 बाकुन पतरस नीकारु कर्‌यु, “काय जाणु तु काय कय रय, च मेसेक समज मां नी आवतो।” ज कय्‌न चु अळी बारनान फटक्‌या पर गुयु ने; कुकड़ु वास देदु।
MAR 14:69 ची पावरनी पतरस काजे अळी देखीन, चां उबा हय रवला माणसेक कय, “जु माणुस बी तींद्‌रे मायन एक जणु छे।”
MAR 14:70 बाकुन पतरस अळी दीसरी कावा नीकारु करे। थुड़ीक वार मां अळी चां उबा हय रवला माणसे पतरस काजे कह्‌या, “तु नीकारु नी कर सके, छाचलीन तु तींद्‌रे मायन एक छे, काहाकी तु, गलील वाळु छे।”
MAR 14:71 तत्‌यार पतरस सगुन खाय्‌न सय कय र्‌यु, “मे तीना माणुस काजे नी जाणो ने जसा तुहुं तेरे बारामां पुछी र्‌या, कदी मे लुच्‌चाय मेल रयु हय ती भगवान मेसे डंड देय।”
MAR 14:72 तत्‌यार तत्‌यारुत दीसरी कावा कुकड़ु वास देदु। पतरस काजे ईसु कवलु ची हेर आय गुय, “की दुय कावा कुकड़ु वासणे सी पेहेल तु मारो तीन कावा नीकारु करसी।” ने चु हीनी वात काजे हेर करीन रड़ने बाजी गुयु।
MAR 15:1 संदारे एगात मंदीरेन डाहला पुजारा ने मुख्‌या ने यहुदी नीयमेन मास्‌तर्‌या ने यहुदीन आखी पंचुन बसक हय ने चे मेळीन वीच्‌यार कर्‌या की ईसु काजे बांदीन पीलातुसेन हात मां सुप देदा।
MAR 15:2 पीलातुस ईसु काजे पुछ्‌यु, “काय तु यहुदी माणसेन राजा छे?” ईसु जपाप आप्‌यु, “असु तुत कय रयु।”
MAR 15:3 डाहला पुजारा ईसु पर बेसकी वात कय्‌न गुनु लागाड़ी रवला
MAR 15:4 पीलातुस तीनाक अळी पुछ्‌यु, “जे आखा तुसे बेसकी वात कय्‌न गुनु लागाड़ी र्‌या; काय तुसेक जपाप नी आपणु हय!”
MAR 15:5 ईसु अळी बी काय जपाप नी आप्‌यु, अतरामा पीलातुस देखतुत रय गुयु।
MAR 15:6 पीलातुस नावेन एक राज करने वाळु यहुदी गांव मां एक तीहवारेन दाहड़े काहनाक एक केदड़ाक छुड़तेलु, तीनाक हयु चाहे तीना काजे।
MAR 15:7 एक माणसेन नाव बरअब्‌बा हतलु, ने एक जेल मां बंद हतलु, चु तीनु माणसे पुठ्‌ये हतलु, जे सरकारेन वीरुद मां दंगा करला, ने चे हत्‌या करला।
MAR 15:8 जत्‌यार माणसेन गड़दी पीलातुसेन चां भेळा हया ने लीलघाय्‌न कह्‌णे लाग्‌या की जसु तु आपणी रीती-रीवाज मां जसु हामरे वाटे करतु आयु तसुत हय बी कर,
MAR 15:9 पीलातुस जपाप आप्‌यु, “काय तुहुं चाहु की मे तुंद्‌रे वाटे यहुदीयान राजा काजे छुड़ दम?”
MAR 15:10 काहाकी हीनाक पाक्‌को मालुम हतलो की मंदीरेन डाहला पुजारा ईसु काजे कुहराये धराड़ला।
MAR 15:11 बाकुन डाहला पुजारा माणसे काजे उकसाय्‌न पुछ्‌या, “तुहुं पीलातुस काजे असा कहुं, की तु हामरे वाटे ईसुक नी, बाकुन बरअब्‌बा काजे छुड़ दे।”
MAR 15:12 पीलातुस तीनु गड़दी काजे अळी पुछ्‌यु, “तीनाक तुहुं यहुदीन राजा कहुं, तेरे साते तुहुं काय चाही र्‌या की मे हेरे साते करो, तुहुं बताड़ु?”
MAR 15:13 चे पछात आयड़्‌या, “हीनाक कुरुस पर चड़ावु!”
MAR 15:14 पीलातुस तीनुक कह्‌यु, “काहा, हयु काय गुनु करलु छे।” बाकुन चे अळी जुर सी आयड़ीन कह्‌या “हीनाक कुरुस पर चड़ावु!”
MAR 15:15 तत्‌यार पीलातुस माणसेन गड़दी काजे खुस करने करीन बरअब्‌बा काजे तींद्‌रे वाटे छुड़ देदु, ने ईसु काजे सपाटा देवाड़ीन तीनाक कुरुस पर चड़ावणे करीन तींद्‌रा हात मां सुप देदु।
MAR 15:16 ने सीपायड़ा ईसु काजे तीनी सरकारेन मटला कीलान आंगणा मां ली गुया; ने चे बचला सीपायड़ा काजे बी बुलाय लेदा।
MAR 15:17 चे ईसु काजे जामण्‌या पुथल्‌या पेराया ने काटान मुड़ गुथीन तेरा मुणका पर मेल देदा।
MAR 15:18 तत्‌यार चे ईसुन हासी उडाड़्‌या, ने कह्‌या की “ए यहुदीयान राजा तु बेसका दाहड़ा लग जीवे!”
MAR 15:19 ने चे तेरा मुणका पर बुरीन सुटी मेळ्‌या, ने तेरे पर थुपतेला ने चे ढंगा अळीन ईसु काजे आंधणेन ढंगड़ा कर्‌या।
MAR 15:20 असा करीन चे ईसुन हासी उड़ावता जाय्‌न वार मुजु ली लेदा; ने पछेन जामण्‌या पुथल्‌या नीकाळ देदा; ने तेरात पुथल्‌या पेरायन, तीनाक कुरुस पर चड़ावणे बाहर ली गुया।
MAR 15:21 वाटे एक माणुस भेळु हयु तेरो नाव सीमोन हतलु चु सहर सी आवणे बाजी रवलु ने चु चां मायन नीकळ्‌यु ने हीना काजे सीपायड़ा जबरान मां धर्‌या काहाकी ईसुन कुरुस हाकली लेय। चु सीमोन कुरेन गांव वाळु हतलु ने सीकन्‌दर ने रुफुसेन बास हतलु।
MAR 15:22 ने सीपायड़ा ईसु काजे गुलगुता नावेन जागा मां ली जां, तेरो मतलब छे, “माणसेन मुणकान जागु।”
MAR 15:23 चां चे तीनाक बीगेड़लु अंगुरेन रस पाव्‌णे लाग्‌या बाकुन चु पीणे नी चाहतेलु।
MAR 15:24 तत्‌यार चे ईसु काजे कुरुस पर चड़ाया ने तेरा पुथल्‌या कुणीक-कुणीक जड़नु चाहे करीन चे चिट्‌ठी नाखीन देख्‌या की कुणीक काय जड़से, ने असा करीन तेरा पुथल्‌या वाट लेदा।
MAR 15:25 ने चे ईसु काजे संदारे नव बजे कुरुस पर चड़ाया।
MAR 15:26 ने तेरे पर जु झुटु गुनान बारामां पट्‌टी पर लिखीन तेरा मुणकान सी उपरुस कुरुस पर ठुक देदा तीनी पट्‌टी पर लिखलो हतलो, “जु यहुदी माणसेन राजु छे।”
MAR 15:27 ने चे ईसुन साते दुय चुट्‌टा काजे बी अलग-अलग कुरुस पर चड़ाया, एक तेरे जेवड़्‌ये आंगे ने एक तेरे डाखर्‌ये आंगे।
MAR 15:28 असो करीन जी वात खरला सास्‌तुर मां लिखलो हतलो च पुरो हयो की चु पापीन गिन्‌ती मां आवसे।
MAR 15:29 ईसु कुरुस हाकलीन लीजातलु तत्‌यार वाटेन आड़े-धड़ेन माणसे जाणे वाळा मुणको डुलाव्‌ता जाय्‌न ने ईसुन वाक नीकाळता जाय्‌न कह्‌या “हयु! मंदीर काजे उदार्‌ने वाळु ने तीन दाहड़ा मां बणावणे वाळु!
MAR 15:30 कुरुस पर सी नेचु उतरी आव ने आपसा काजे बचाड़ ले।”
MAR 15:31 असुत कय्‌न डाहला पुजारा ने यहुदी नीयमेन मास्‌तर्‌या ईसुन हासी उड़ावता जाय्‌न एक दीसरा काजे कह्‌या, “हयु ते दीसरा काजे बचाड़्‌यु ने आपसाक नी बचाड़ सक्‌तु काय?
MAR 15:32 हयु ईस्‌रायलेन राजु मसी हय ती, कुरुस पर सी उतरीन आवे ती हामु हीनाक देखीन हेरे पर भुरसु करजे!” ने ईसु साते दीसरा आड़े-धड़े दुय काजे कुरुस पर चड़ावला हतला, चे बी तेरी हासी उड़ाव्‌तेला।
MAR 15:33 खयारली टेमे ईलाका मां आखे दुर आंदारलो छावायलो रयो ने च तीन बजे लग रयो।
MAR 15:34 दीसु तीन बजे ईसु तत्‌यार मटीत अवाज मां आयड़ीन कह्‌यु, “ईलोई, ईलोई, लमा सबक्‌तनी?” हेरो मलतब छे, “ए मारा भगवान, ए मारा भगवान, तु मेसेक काहा छुड़ देदु?”
MAR 15:35 जे धड़े उबा हय रवला, तींद्‌रे मायन थुड़ाक ज सामळीन कह्‌या, “सामळु, जु ते एलीयु काजे बुलाय र्‌यु।”
MAR 15:36 ने एक जणु दवड़ीन जाय्‌न पुता काजे बीगड़ला अंगुरेन रस मां बुचळ्‌यु ने पुतो बुरीन सुटीन छेंड्‌ये पर झेलाड़ीन ईसुक चुसाड़्‌यु ने कह्‌यु “हींगा! देखु एलीयु हीनाक उतारने आवे की नी आवे!”
MAR 15:37 तत्‌यार ईसु जुर सी आयड़ीन तेरु जीव छांड गुयु।
MAR 15:38 ने मंदीरेन पड़दु उपर सी नेचु लग फाटीन अलग-अलग हय गुयु।
MAR 15:39 सीपायड़ान एक डाहलु ईसुन कुरुस अगळ उबु हय रवलु, तत्‌यार चु ईसु काजे असु आयड़ीन मरतेला देख्‌यु ती कह्‌यु, “छाचलीन जु माणुस भगवानेन!” पुर्‌यु हतलु।
MAR 15:40 थुड़ाक बायरा बी छेटे सी देखी रवला, तींद्‌रे मायन मरीयम मगदलनी, जुवान याकुप ने योसेसन माय मरीयम, ने सलोमी हतली।
MAR 15:41 जत्‌यार ईसु गलील मां हतलु ती जे बायरा तेरी मदत कर तेला। ने चां दीसरा बेसका बायरा बी हतला चे ईसु साते गलील ईलाका सी यरुसलेम मां आवला हतला।
MAR 15:42 जु दाहड़ु आरामेन दाहड़े सी पेहेल वाळु दाहड़ु हतलु, जु दाहड़ु तीयारीन दाहड़ु रवे, ने सांतो हय गुयलो।
MAR 15:43 अरीमतीया गांवेन रहणे वाळु युसुफ नावेन एक माणुस आयु, जु यहुदी पंचुन मेहमर हतलु, ने जु भगवानेन राजेन वाट देखी रवलु; जु युसुफ हिम्‌मत करीन पीलातुस धड़े गुयु ने ईसुन धड़ मांग्‌यु।
MAR 15:44 जी वात सामळीन पीलातुस देखतुत रय गुयु, की ईसु अतरु छाटु कसु मर गुयु, ने चु सीपायड़ान डाहला काजे बुलावीन पुछ्‌यु, काय ईसु मरलु बेसकी टेम हय गुय।
MAR 15:45 तत्‌यार पीलातुस सीपायड़ान डाहलान साहरे ईसुन बारामां आखी वात मालुम कर लेदु, तत्‌यार हेरो धड़ युसुफ काजे आपाड़ देदु।
MAR 15:46 तत्‌यार युसुफ लेफड़्‌ला सणेन पुथल्‌या मुल लेदु, ने धड़ काजे उतारीन तीना पुथल्‌या मां बांद लेदु, ने तीनाक मसाण मे गाड़ देदा चां चापर्‌या मां वारु घड़ली मसाण हतली ने चां मट्‌लु दगड़ु लागाड़ीन बुजी देदा।
MAR 15:47 ने मरीयम मगदलनी ने योसेसन माय मरीयम ईसुन धड़ काजे मेक तेला देखी रवली।
MAR 16:1 जत्‌यार आरामेन दाहड़ु खत्‌तम हय गुयु, ती मरीयम मगदलनी, ने याकुपेन माय मरीयम ने सलोमी, गंदायण्‌यु मसालु ईसुन धड़ पर तेल लागाड़ने करीन मुल लेदी।
MAR 16:2 हाप्‌तान पेहेले दाहड़े संदारे एगात जत्‌यार दाहड़ु उंग्‌यु, जे बायरा मसाण धड़े गुया
MAR 16:3 ने ची आपसी-आपसी एक दीसरी सी कह्‌तेली की हामरे वाटे दगड़ा काजे मसाणेन बारनाम सी कुण छेटु करसे।
MAR 16:4 जत्‌यार चे देख्‌या की दगड़ु गबड़ी रवलु चु दगड़ु मट्‌लु हतलु।
MAR 16:5 मसाणेन मांहे गुय ती चे एक नांबला धवळा पुथल्‌या पेहरला जुवान माणुस काजे जेवड़े आंगे बठी रवलु देख्‌या। ने चे बायरा घाबरायन बीही गुया।
MAR 16:6 चु तीनुक कह्‌यु, “बीहु मां तुहुं ते ईसु नासरी काजे, तीनाक कुरुस पर चड़ावला चु छे। चु जीव उठ्‌यु। चु जां नी हय जाहां चे मेल्‌ला।
MAR 16:7 बाकुन हय तुहुं जावु, ने तेरा चेला ने पतरस सी कवजु की चु तुंद्‌रे सी पेहेल गलील जासे। जसु तुहुंक पेहेल कह्‌लु की ईसु गलील ईलाकाम भेळु हवसे।”
MAR 16:8 ज आखो सामळीन चे बायरा बेसका कापता ने घाबरायता जाय्‌न मसाण मां सी ढास पड़्‌या, ने चे कुय सी ईसुन बारामां नी कह्‌या, काहाकी चे बीही गुयला।
MAR 16:9 हाप्‌तान पेहेले दाहड़े संदारे एगुत ईसु जीवतु हय्‌न पेहेल मरीयम मगदलनी काजे देखाव पड़्‌यु काहाकी हेरेम सी चु सात भुतड़ा नीकाळ्‌ळु।
MAR 16:10 मरीयम मगदलनी जाय्‌न ईसुन साती दुखी हतला ने रड़ने बाजी रवला। तीनु काजे जाय्‌न कय की ईसु जीवतु हय गुयु।
MAR 16:11 चे ज सामळ्‌या की ईसु जीवतु हय गुयु ने मरीयम तीनाक देखली छे, तेबी चे भुरसु नी कर्‌या।
MAR 16:12 अळतेन तीनु चेला मायन दुय जणा गांव भीणी जाणे बाजी रवला जत्‌यार ईसु दुसरुत भातु तीनुक देखाव पड़्‌यु।
MAR 16:13 चे दुय जणा बी दीसरा चेला काजे हीनी वातेन खबर कर्‌या, बाकुन चे तींद्‌रे पर बी भुरसु नी कर्‌या।
MAR 16:14 पछेन चे ग्‌यारे चेला रुटा खाणे बठी रवला, ती ईसु तीनुक बी देखाव पड़्‌यु, ईसु तींद्‌रु नी भुरसु करनेन ने भुरसु नी करनेन काठो मन हय गुयलो जाणीन ने तीनुक लड़तु जाय्‌न कह्‌यु, “जे मेसेक जीव उठीन बठु हवला देखला, तुहुं तींद्‌री वात पर भुरसु काहा नी कर्‌या।”
MAR 16:15 ने ईसु तीनुक कह्‌यु, “तुहुं आखी कळी मां जावु ने आखा माणसे काजे खुस-खबरेन परचार करु।
MAR 16:16 जे भुरसु करसे ने बपतीस्‌मा लेसे तींद्‌रुत छुटकारु हवसे, बाकुन जे भुरसु नी करसे तीनाक भगवानेन गुनाळु ठहरावसे।
MAR 16:17 भुरसु करने वाळान जी सहलाणी रवसे की, चे मारे नाव सी भुतड़ान आत्‌मा काजे नीकाळसे ने नवली-नवली बुली बुलसे।
MAR 16:18 कदी चे घड़सा धर लेसे ने दवा बी पी लेसे तेबी तीनुक काय बी नुकसाण नी हवे ने चे मांदला पर हात मेकसे ने चे वारु हय जासे।”
MAR 16:19 पछेन मालीक ईसु तींद्‌रे साते वात करीन पछेन सरग मां हाकलायन गुयु ने भगवानेन जेवड़्‌ये आंगे बठ गुयु।
MAR 16:20 ने ईसुन चेला जागे-जागे जाय्‌न परचार कर्‌या ने मालीक तींद्‌रे साते काम करतु रयु ने मटा काम सी।
LUK 1:1 बेसका माणसे: ईनी वीतली वात काजे लिखीन भेळा करनेन काम कर्‌या ची वात हामरे ईचमां वीतली हतली।
LUK 1:2 जे सबुत हामुक तींद्‌रे सी जड़लो छे जे सुरु सी ईनी वातेक देखणेवाळा ने जे भगवानेन पावर्‌या हतला।
LUK 1:3 हेरेसी, ए अंजाण्‌या थीयुफीलुस मे तार वाटे तीनी आखी वीतली वातेन बारामां एक चोव सी उजेंतु चतराये लिखणे बाजी रयु।
LUK 1:4 तु ज पाक्‌को जाण लेय की, जी सीकापण तुसेक जड़ली छे, ची खरली छे।
LUK 1:5 हेरोदेस यहुदीया जीलान राजु हतलु, तीनी टेमे अबीय्‌याह दळ मां जकर्‌या नावेन एक याजक हतलु, ने तेरी बायरी हारुनेन पुजारान जातेन हतली, तेरो नाव एलीसीबा हतलो।
LUK 1:6 ने चे दुय जणा भगवानेन नींगा मां धरमी हतला, ने चे मालीक भगवानेन आखा हुकुम ने नेम पाळने मां नी चुकतेला।
LUK 1:7 एलीसीबा आंझी हतली, ने दुयु जणा डाहला हय गुयला, तेरेमां तींद्‌री एक बी अवल्‌यात नी हयी।
LUK 1:8 एक कावा जकर्‌यु पुजारु टाकला दाहड़ान अनसारे आपसा टुळा भेळु भगवान अगळ पुजारान काम करने बाजी रवलु।
LUK 1:9 ती एक दाहड़ु पुजारान रीतीन अनसारे मालीक-भगवानेन मंदीर मां भरायन धुणी दीन भगवानेन पुजा-पाट करने करीन जकर्‌यान नावेन चिट्‌ठी नीकळी।
LUK 1:10 ने जकर्‌यु धुणी देणे बाजी रवलु, तीनी टेमे मां आखा माणसेन टुळु बाहर उबु रय्‌न भगवान धड़े दुवा करने बाजी रवलु।
LUK 1:11 तीनी टेमे जकर्‌यु वेदी पर धुणी देणे बाजी रवलु, ने मालीक भगवानेन एक सरग वाळु काहवाळ्‌यु तीनाक वेदीन जेवड़्‌ये आंग्‌ये देखाव पड़्‌यु।
LUK 1:12 ने तीना भगवानेन सरग वाळा काहवाळ्‌या काजे देखीन जकर्‌यु बेसकु बीहीन सीयारी ली लेदु;
LUK 1:13 बाकुन सरग वाळु काहवाळ्‌यु जकर्‌या काजे कह्‌यु, “ए जकर्‌या बीहे मां, तारी दुवा भगवान सामळी लेदु, ने तारी घरवाळी एलीसीबान एक पुर्‌यु हवसे, तु तेरो नाव युहन्‌ना पाड़जी।
LUK 1:14 तु खुस हवसी ने पुर्‌यु हयु करीन बेसका माणसे खुसी हवसे।
LUK 1:15 चु युहन्‌‌‌नु, मालीक-भगवानेन नींगा मां बेसकु मटु कहवायसे, ने अंगुरेन दारु ने काहनी बी नस्‌यान चीज नी पीये; ने चु आपसी मायन कुखेम सीत चुखली-आत्‌मा सी भरायलु रवसे।
LUK 1:16 ने ईस्‌रायेली जातीन बेसका माणसेन मन मालीक-भगवान भीणी पछु आळसे।
LUK 1:17 मालीक भगवान वाटे एक भुरसु करे असा असामी तीयार करने करीन चु युहन्‌‌‌नु मालीक-भगवान अगळ-अगळ चालसे। ने एलीया धड़े जु भगवानेन चुखली-आत्‌मा ने जुर हतलु, तेरेत साहरे युहन्‌‌‌नु ज काम करसे बासे-बासेन मन आपसा पुर्‌या-पारी भीणी आळसे; ने हुकुम नी माने तीनु काजे खरला धरम पर चालाड़नेन समज आपसे।”
LUK 1:18 जी वात सामळीन जकर्‌यु सरग वाळा काहवाळ्‌या काजे पुछ्‌यु, “मे जो कसु जाणो की असो हवणे वाळो छे? काहाकी मे ते डाहलु हय गुयु; ने मारी घरवाळी बी डाहली हय गुय।”
LUK 1:19 सरग वाळु काहवाळ्‌यु तीनाक जपाप आप्‌यु, “मे जीब्‌रायल छे, मे भगवान अगळ हजुर रवु। ने भगवान मेसेक तार पुठ्‌ये वात करने, ने तुसेक जी खुस-खबर सामळावणे मकेल्‌लु छे।
LUK 1:20 ने देख, तु मारी कह्‌ली तीनी वात पर भुरसु नी कर्‌यु, जी वात टेम आवसे ती पुरी हवसे। ने तीने दाहड़े लग जी वात पुरी नी हवे, तीने दाहड़े लग, तु गुंगु रवसी, ने बुली नी सके।”
LUK 1:21 असामी ते बाहर रय्‌न जकर्‌यान वाट देख रवला, बाकुन चु हय मंदीर मां अतरी वार काहा लागाड़ र्‌यु करीन चे सुच मां पड़ गुया।
LUK 1:22 जत्‌यार जकर्‌यु बाहर आयु, ती चु तींद्‌रे अगळ बुली नी सक्‌यु, हेरेसी चे जाण गुया की, हीना जकर्‌याक भगवानेन मंदीर मां काय ने काय भगवान भीणी सी देखाव पड़लो छे, ने चु गुंगुत रयु, ने तीनुक ईसारु करतुत रयु।
LUK 1:23 आपसा भगवानेन चाकरीन दाहड़ा पुरा हय गुया, ती चु जकर्‌यु आपसान घर जात रयु।
LUK 1:24 जी वात वीत गुय ने थुड़ाक दाहड़ाम पछेन जकर्‌यान घरवाळी एलीसीबा भारीस हय गुय; करीन ची पांच महना लग आपसा मन मां ज कह्‌ती जाय्‌न घर मां साताय रय।
LUK 1:25 की “माणसे मारी हासी उडाड़तेला, बाकुन हय मालीक भगवान मार पर दया करलु छे।”
LUK 1:26 एलीसीबा भारीस हवली तेरो छटवो महनो चाल रह्‌लो, ती भगवान, सरग वाळा काहवाळ्‌या जीब्‌रायल काजे गलील जीलान नासरत नावेन एक सहर मां एक कुवारली पुरे भीणी मकल्‌यु।
LUK 1:27 तीनी कुवारली पुरेन नाव मरीयम हतलो, ने तेरी मांगणी युसुफ नावेन एक जुवान पुर्‌या साते हय रवली। चु युसुफ राजा दावुदेन अवल्‌यात मायन हतलु।
LUK 1:28 सरग वाळु काहवाळ्‌यु मरीयम धड़े आवीन कह्‌यु, “तु खुस हय जां, भगवानेन गीण-दया तार पर छे, ने मालीक-भगवान तार पुठ्‌ये छे।”
LUK 1:29 सरग वाळा काहवाळ्‌यान साहरे जी सामळीन मरीयम बेसकी बीही गुय, ने असी वीच्‌यार करने बाजी गुय, की ईना बुलेन मतलब काय हसे ने काय नी।
LUK 1:30 ती सरग वाळु काहवाळ्‌यु तीनीक कह्‌यु, “मरीयम, बीहे मां, काहाकी भगवानेन गीण-दया तारे पर छे।
LUK 1:31 देख, तु भारीस हवसी ने तारु एक पुर्‌यु हवसे ने तु तेरो नाव ईसु पाड़जी।
LUK 1:32 चु बेसकु मटु कहवायसे, ने चु आखान डाहला भगवानेन पुर्‌यु कह्‌वायसे। मालीक भगवान तीनाक आड़ा-बुड़ा राजा दावुदेन राजगादी आपसे।
LUK 1:33 ने चु याकुपेन आखी अवल्‌यात पर जलम लग राज करसे, ने तेरो राज कदी नी सरे।”
LUK 1:34 मरीयम सरग वाळा काहवाळ्‌या काजे कह्‌यी, “मारो ते अदमी साते सोवसार नी हयो, ती तार साहरे कह्‌ली वात कसी पुरी हवसे?”
LUK 1:35 सरग वाळु काहवाळ्‌यु जपाप आप्‌यु, “तारे पर चुखली-आत्‌मा उतरसे, ने तार पर आखा सी डाहला भगवानेन जुरभर्‌यु साहळु पड़से। तेरेमां चु पयदा हवणे वाळु चुखलु पुर्‌यु, भगवानेन पुर्‌यु कह्‌वायसे।
LUK 1:36 तारीत भाय-बेटी एलीसीबान बारामां सामळ, ची आंझी हतली, ने हय डाहवाराम भारीस हवसे, ने तेरो छटवो महनो चाल रयो। ने तेरो पुर्‌यो हवणे वाळो छे।
LUK 1:37 काहाकी भगवानेक नी बणे, असो काय बी, नी हय।”
LUK 1:38 मरीयम कह्‌यी, “सामळ! मे मालीक-भगवानेन चाकरी करने वाळी छे। तु हय कह्‌यु, तसोत मार साते हवणे दे।” ने तत्‌यार सरग वाळु काहवाळ्‌यु तेरेन्‌चां सी जात र्‌यु।
LUK 1:39 तीनु दाहड़ाम मरीयम तीयार हय्‌न यहुदीया जीलान बयड़ाम वसण्‌या, एक सहर भीणी मामार गुय,
LUK 1:40 ने ची जकर्‌यान घर मां जाय्‌न एलीसीबा काजे “वारु छे की?” कह्‌यी।
LUK 1:41 ने ज सामळतेत एलीसीबान पेट मायन पुर्‌यो खुस हय्‌न उछळी पड़्‌यो, ने एलीसीबान चुखला-आत्‌मा सी भरायली हतली।
LUK 1:42 ने एलीसीबा मरीयम काजे जुर सी आयड़ीन कह्‌यी, “तु आखा बायराम सी बेसकी वारु छे ने तारा पेटे मायन फळ बी बरकतवाळो छे।
LUK 1:43 हय तु मारा मालीकेन माय बण गुय, ने भगवान, तुसे काजे मारेन्‌चां लावीन, मार पर अतरी दया काहा कर्‌यु हसे?
LUK 1:44 सामळ! जत्‌यार तु ‘वारु छे की?’ असी करीन पुछी अतरीत, ने मारा पेटे मायन पुर्‌यो खुस हय्‌न उछळी पड़्‌यो।
LUK 1:45 तु वारु छे, काहाकी तु जु भुरसु करी की मालीक भगवान जसों कह्‌लु, तसोत आखो हवसे!”
LUK 1:46 तत्‌यार मरीयम कह्‌यी, “मारु जीव, मालीक-भगवानेन गुण गावे,
LUK 1:47 ने मारी चुखली-आत्‌मा, मेसेक बचाड़न्‌या भगवान मां खुस हवे;
LUK 1:48 काहाकी चु आपसी नीचळी गुलाम पावरनी पर दया कर्‌यु; हेरेसी सामळु! हय सी आखी पीड़ीन माणसे मेसेक बरकतवाळी कह्‌से;
LUK 1:49 काहाकी आखाम ताकतवाळु भगवान मार वाटे बेसको मटो-मटो काम कर्‌यु, ने तेरो नाव ‘चुखलो’ छे;
LUK 1:50 जे भगवानेन बीहाणो मानीन जीवे, तींद्‌रे पर तेरी दया बन्‌ली रवे; हय तेरी दया, तींद्‌री पीड़ीडीट, तींद्‌रे पर बणी रवे।
LUK 1:51 चु आपसा हातेन जुर देखाड़लु छे; चु मटाय करन्‌या काजे रावण्‌या-तीवण्‌या कर देदलु।
LUK 1:52 चु ताकतवाळा राजा काजे तींद्‌री राजगादी पर सी हीट पाड़्‌यु; बाकुन नीचळा माणसेक उचा बणावलु छे।
LUK 1:53 चु भुकला माणसेक खाणु आपीन आफराड़ देदु, ने लकपती काजे ठारलात वळाय देदु।
LUK 1:54 चु तेरा पावर्‌या ईस्‌रायेली जातीन माणसेक मदत कर्‌यु, तीनुक हेर करीन दया कर्‌यु।
LUK 1:55 चु हामरा आड़ा-बुड़ा साते वायदु करलु, तेरेत अनसारे तेरी दया, अब्‌राहम ने तेरी अवल्‌यात पर जलम बन्‌ली रवसे।”
LUK 1:56 मरीयम तीनेक महना लग एलीसीबा पुठ्‌ये रवी, ने अळी आपसे घर जात गुय।
LUK 1:57 ने एलीसीबान फवरी हवणेन टेम आवी, ने तेरु पुर्‌यु पयदा हयु।
LUK 1:58 तेरे आड़े-धड़े रहण्‌या, ने सगासाइ वाळा सामळ्‌या की मालीक भगवान एलीसीबा पर बेसकु दया करलु छे, ने चे तेरे पुठ्‌ये भेसकायन खुस हया।
LUK 1:59 ने पुर्‌यो हवलो सात दाहड़ा पुरा हय गुया। ने अळी आठवे दाहड़े मुसान साहरे ईस्‌रायेली जातीन माणसेक आपला भगवानेन कायदान अनसारे पुर्‌याक चुखो करने आया तीनी टेमे, चे आखा तीना पुर्‌यान नाव जकर्‌यु पाड़ने बाजी गुया, चो नाव तीना पुर्‌यान बासेक मालुम हतलो।
LUK 1:60 बाकुन पुर्‌यान माय एलीसीबा कह्‌यी जकर्‌यु नाव मां पाड़ु, बाकुन युहन्‌‌‌नु नाव पाड़ु।
LUK 1:61 तत्‌यार चां आवला आखा माणसे तीनीक कह्‌या, “तारा सगासाइ मां बी, ज नाव काहनान नी हय।”
LUK 1:62 तत्‌यार आकरी मां चे आखा तीना पुर्‌यान बास जकर्‌यात काजे ईसारु करीन पुछ्‌या “तु तारा पुर्‌यान, काय नाव पाड़ने हींड र्‌यु?”
LUK 1:63 चु लिखणेन पट्‌टी ने सीलुक मांगाड़ीन लिख्‌यु, “हेरो नाव युहन्‌ना छे।” ने ज देखीन चां भेळा हवला आखा माणसे वीच्‌यार मां पड़ गुया।
LUK 1:64 तत्‌यारुत जकर्‌यान मुंहडो ने जीप खुल गुय, ने चु बुलने बाजी गुयु, ने भगवानेन गुण गावणे बाजी गुयु।
LUK 1:65 आड़े-धड़े रवण्‌या आखा माणसे चकराय्‌न बीही गुया ने यहुदीया जीलान बयड़ाम ने आखा कामेन, बी जी वात चारेमेर जाती रय।
LUK 1:66 ने आखा सामळन्‌या, पुर्‌यान बारामां आपसा-आपसा मनोम वीच्‌यारीन कह्‌या, “ज पुर्‌यो कसों हसे?” काहाकी मालीक-भगवान हेरे पुठ्‌ये हतलु।
LUK 1:67 तेरु बास जकर्‌यु चुखली-आत्‌मा सी भराय गुयु, ने चु ज कह्‌तु जाय्‌न भगवानेन अघी सी आवणे वाळी वात कह्‌णे बाजी गुयु:
LUK 1:68 ईस्‌रायेली जातीन मालीक भगवानेन बड़ाय हवती रहणु चाहजे, काहाकी चु आपसा माणसे पर दया करीन तीनुक हेर कर्‌यु ने तीनुक छुटकारु आप्‌यु।
LUK 1:69 चु आपसा पावर्‌या दावुदेन अवल्‌यात मां सी, आपणे धड़े एक ताकतवाळु बचाड़ने वाळाक मकेल्‌लु छे।
LUK 1:70 ईनी वातेन बारामां भगवान आपसा वाटे चुखला माणसेन साहरे तेरे बारामां ज कह्‌तु आय रवलु,
LUK 1:71 की हामरा वेरीन हातेम सी ने हामुक भुंडा कह्‌णे वाळान हातेम सी हामरु छुटकारु हय जाणु चाहजे।
LUK 1:72 चु हामरा आड़ा-बुड़ा पर दया करीस करीन कह्‌लु, ने आपसु चुखला वायदान हेर करीस करीन कह्‌लु,
LUK 1:73 जी सगुन चु हामरा बास अब्‌राहम अगळ खादलु ची जी छे,
LUK 1:74 आपणु आपणा वेरीन हातेम सी हामरु छुटकारु करजे, ने हामु हिम्‌मत करीन भगवान मालीकेन सेवा करता रवसु।
LUK 1:75 जीवे ती लग तेरी नींगाम चुखला रय्‌न, ने तेरा धरम पर चालीन तेरी सेवा करता रवजे।
LUK 1:76 ने ए मारा पुर्‌या! तु आखान डाहला भगवानेन अघी सी आवणे वाळी वात देखाड़ने वाळु कवायसी; काहाकी तु मालीक-भगवान वाटे वाट तीयार करसी, ने तेरे अगळ-अगळ चाल्‌या करसी।
LUK 1:77 तु भगवानेन माणसेक ज कवजी, की तुहुं भगवान धड़े पापेन माफी हात करीन कसा छुटकारु हात करसु।
LUK 1:78 जसु तु कवसी तसुत भगवान पाप माफ करसे काहाकी चु बेसकु दयाळु छे। जसु दाहड़ु उगतेत नवलु दाहड़ु सुरु हये, तसुत भगवानेन्‌चां सी बचाड़न्‌यु हामरेन्‌चां आवसे।
LUK 1:79 तत्‌यार चु पापेन आंदारला मां ने जलेमकी मोतन साहळा मां बस रया, तींद्‌रे उपर वीजाळो बी हवसे, ने तीनुक एक सांतीन जीवाय्‌न वाटे चालने करीन अगळ-अगळ चालीन अगवाय करसे।
LUK 1:80 ने चो पुर्‌यो मटो हवतो गुयो ने जीव-आत्‌मा मां ताकतवाळु हवतु गुयु, ने ईस्‌रायेली जातीन माणसे अगळ उजेंतो हवणे लग बयड़ा मां रयो।
LUK 2:1 तीनु दाहड़ाम रोमी राजा ओगस्‌तुस केसर एक असु राज हुकुम नीकाळ्‌यु, की ए मारा राजेन आखा कळीन माणसे! तुहुं मारा सरकारी किताप मां आपणो नाव लिखाड़ने करीन आपणा-आपणा सहर मां जावु।
LUK 2:2 जी पेहली कावा माणसेन गिन्‌ती हतली, तीनी टेमे क्‌वीरीन्‌युस सीरीया देस मां राजा हतलु।
LUK 2:3 आखा माणसे नाव लिखाड़ने करीन आपणा-आपणा सहर मां गुया।
LUK 2:4 बेतलहम सहरेन राजा दावुदेन खानदानीन हतलु। ने युसुफ, जु राजा दावुदेन अवल्‌यात मायन हतलु, चु हय नासरत सहरेम रहतेलु। ने युसुफ गलील जीलान नासरत सहरेम सी यहुदा जीलान बेतलहम सहर मां नाव लिखाड़ने करीन गुया।
LUK 2:5 ने मरीयम बी तेरे पुठ्‌ये चां नाव लिखाड़ने गुय ने तेरी मांगणी ईना युसुफ साते हय रवली, ने ईनी मरीयमेन पुर्‌यो हवणे वाळो हतलो।
LUK 2:6 जत्‌यार युसुफ ने मरीयम बेतलहम सहर मां हतला, ती मरीयमेन फवरी हयणेन टेम आय लागी।
LUK 2:7 चां धरम साळाम मां बी तींद्‌रे वाटे जागा नी जड़ी। ने ची एक ढुरेन वाड़ा मां जाती रय। मरीयम चां पेहेल मेहेल फवरी हवी, ने तेरु एक पुर्‌यु हयु, ने ची तीना पुर्‌या काजे पुथल्‌या मां वेलटीन ढुरेक चारु नाखण्‌या एक गवाण मां सुवाड़ देदी।
LUK 2:8 तीना ईलाकाम राते थुड़ाक गाडरा-गुवाळ्‌या बयड़े आपसा गाडरान राखवाळी करने बाजी रवला।
LUK 2:9 भगवानेन्‌चां सी एक सरग वाळु काहवाळ्‌यु तींद्‌रेन्‌चां आवीन उबु हय गुयु, ने भगवानेन सेक-सींगार, तींद्‌रे चारेमेर बी धपणे बाजी गुयो, ने चे बीहीन सीयारी ली लेदा।
LUK 2:10 बाकुन सरग वाळु काहवाळ्‌यु तीनुक कह्‌यु, “बीहु मां; सामळु, मे तुहुं काजे बेसकी खुसीन एक खुस-खबर सामळावो, जी आखा माणसे वाटे रवसे।
LUK 2:11 काहाकी आज तुंद्‌रु छुड़ावणे वाळु दावुदेन सहर बेतलहम मां, पयदा हवलु छे, हयुत मालीक ने मसी छे।
LUK 2:12 तीना पुर्‌याक उळख्‌णेन सहलाणी जी छे, की तुहुं तीनाक पुथल्‌या मां वेटळायलु ने ढुरेक चारु नाखण्‌या गवाण मां पड़ रवलु देख्‌सु।”
LUK 2:13 ने उचकाणुत तीना सरग वाळा काहवाळ्‌या पुठ्‌ये सरग वाळा काहवाळ्‌यान टुळु असा कह्‌ता जाय्‌न भगवानेन गुण गावतेलु देखाय देदु:
LUK 2:14 “आखाम उचा सरगे मां भगवानेन सेक-सींगार हवे, ने धरती पर रवण्‌या तीनु माणसेक सांती जड़से, तींद्‌रे सी भगवान खुस छे।”
LUK 2:15 जत्‌यार सरग वाळा काहवाळ्‌या पछा सरगे जात रया, ती गुवाळ्‌या आंबा-सांबा कह्‌या, “चालु आपणु बेतलहम सहर जाजे, ने मालीक जी वात आपणुक कह्‌लु छे, चां देख्‌सु।”
LUK 2:16 ने चे मामार बेतलहम सहर भीणी चाल पड़्‌या, ने चां ढुरेन वाड़ा मां जाय्‌न मरीयम ने युसुफ काजे देख्‌या, ने पुर्‌याक गवाण मां सुवाड़ रवला देख्‌या।
LUK 2:17 जत्‌यार गाडरान गुवाळ्‌या ईसुक देख्‌या, तत्‌यार चे गुवाळ्‌या मरीयम ने युसुफ काजे, पुर्‌यान बारामां ज सरग वाळा काहवाळ्‌या कह्‌ला च कय देदा।
LUK 2:18 गुवाळ्‌या तीनुक पुर्‌यान बारामां जी खबर पुगाड़्‌या ची खबर सामळीन दीसरा आखा माणसे चकराय गुया।
LUK 2:19 बाकुन मरीयम जी आखी वात हेर करीन ईनी वातेन बारामां वीच्‌यार करतीत रय।
LUK 2:20 गुवाळ्‌या काजे सरग वाळा काहवाळ्‌या जसों कह्‌ला, तसोन तसों देखीन ने सामळीन चे बयड़ा मां गाडरान्‌चां पछा भगवानेन गुणे गावता जाय्‌न जात र्‌या।
LUK 2:21 सात दाहड़ा हय गुया, ने आठवे दाहड़े पुर्‌याक चुखो करनेन टेम आयो। ईसु मरीयमेन कुख मां नी आयु ने पेहलेत सरग वाळु काहवाळ्‌यु मरीयम काजे ज कह्‌लु, तेरो नाव ईसु पाड़जी। ने चे आवीन रीत भात कर्‌या, ने पुर्‌यान नाव ईसु पाड़्‌या।
LUK 2:22 तेरेत अनसारे पुर्‌याक चुखो करनेन दाहड़ा पुरा हय गुया, ती युसुफ ने मरीयम, पुर्‌या ईसु काजे यरुसलेम सहरेन मंदीर मां, मालीक भगवान काजे आपणे करीन तेरे अगळ ली गुया।
LUK 2:23 मुसान साहरे ईस्‌रायेली जातीन माणसेक आपला मालीक-भगवानेन कायदा मां असो बी लिखलो छे: “माणसे ने जनवार्‌या डीट, पेहल पयदा हवला अदमी, मालीक भगवान वाटे चुखलो मानायसे।”
LUK 2:24 मालीक भगवानेन कायदा मां असो बी लिखलो छे, “पेरवान एक जुड़ो, नी ते पेरवान दुय पीला मारीन बादा चड़ावणु चाहजे।” ने चे बादा चड़ावणे करीन तीयारी बी कर्‌या।
LUK 2:25 तीनी टेमे सीमोन नावेन एक धरमी ने भक्‌ती करन्‌यु अदमी, यरुसलेम मां रवतेलु। ने चु ईस्‌रायेली माणसेन सांतीन वाट देख रवलु। ने तेरे पर चुखली-आत्‌मा छावाय रवतेलु,
LUK 2:26 ने चुखली-आत्‌मा तेरे अगळ जी वात उजेंती करलु “मालीक भगवान अघु सी आवणेवाळा मसी काजे देखे नी चां लग तु नी मरे।”
LUK 2:27 ईसुन आसी बास्‌या पुर्‌या ईसु धड़े भगवानेन कायदान रीती पुरी करने-करीन, मंदीर मां लाया। तत्‌यार सीमोन तीनात चुखली-आत्‌मान वाटे मंदीर मां आयु।
LUK 2:28 ती सीमोन ईसु काजे आपसा हातेम धर लेदु, ने भगवानेन गुण गावतु जाय्‌न कह्‌यु:
LUK 2:29 ए मालीक हय जु तारु चाकर्‌यु छे; सुक-सांती भेळ ईनी कळीम सी अळाय दे।
LUK 2:30 “मालीक भगवान! मारा डुळा तारा छुटकारा काजे देख लेदला छे,
LUK 2:31 ईनाक तु आखा देसेन माणसे अगळ तीयार करलु छे।
LUK 2:32 जु नी-यहुदी माणसे वाटे, छाचाय काजे उजेंतो करन्‌यो वीजाळो छे, ने जु तारा असामी ईस्‌रायेली माणसे वाटे सेक-सींगार छे।”
LUK 2:33 पुर्‌यान बारामां जी कह्‌वली वात सामळीन ईसुन आसी बास्‌या चकराय्‌न वीच्‌यार मां पड़ गुया।
LUK 2:34 सीमोन, ईसुन माय बास बरकत आप्‌यु, ने चु ईसुन माय मरीयम काजे ज कह्‌यु, “देख ईना पुर्‌याक, ईस्‌रायेली जाती मां बेसका माणसे भगवान अगा वळ जासे, ने बेसका माणसे भगवान काजे छुड़ देसे। ने जु एक असी सहलाणी छे तेरी माणसे वीरुद करसे।
LUK 2:35 असा करीन बेसका माणसेन हीया मनेम भुंड्‌ला वीच्‌यारे उजेंता हय जासे, ने तुसे काजे असो लागसे की, तारा जीवेम लग तलवार भराय गुय।”
LUK 2:36 ने चां मंदीर मां हन्‌ना नावेन एक, भगवानेन अघी सी आवणे वाळी वात बताड़ने वाळी हतली। ची आसेर कुळीन हतली, ने तेरा बासेन नाव फनुयेल हतलो। ची बेसकी डाहवी हय गुयली। ने ईयाव करीन सात साल लग हेरा घरवाळा पुठ्‌ये रवली।
LUK 2:37 ने तत्‌यार लग ची रांडायलीत रय। ने हय तेरी उमर आस्‌सी ने चार साल हय गुयली, ची मंदीर मात रहतेली। ने उपास ने दुवा करती जाय्‌न रात दाहड़ु भगवानेन सेवा भक्‌ती कर्‌या करतेली।
LUK 2:38 जत्‌यार मरीयम ने युसुफ मंदीर मां हतला, तत्‌यार हन्‌ना चां आवीन भगवानेन गुण गावणे बाजी गुय। ने जे माणसे यरुसलेम सहरेन छुटकारान वाट देख रवला, तीनु आखा काजे तीना पुर्‌यान बारामां कह्‌णे बाजी गुय।
LUK 2:39 मालीक भगवानेन नेम-कायदान अनसारे युसुफ ने मरीयम, आखी रीती-भाती कर लेदा, ने अळी गलील जीलान आपसा नासरत सहर मां पछा जात र्‌या।
LUK 2:40 पुर्‌यु मटु हवतु गुयो, ने ताकतवाळु हवतु गुयु ने अक्‌कल मां मटु हवतु गुयु; ने भगवानेन गीण-दया तीना पुर्‌या पर हतलो।
LUK 2:41 ईसुन माय बास हर साल फसह तीहवार वाळने यरुसलेम जाया करतेला।
LUK 2:42 जत्‌यार ईसु बारे सालेन हयु, ती चु बी तींद्‌रे पुठ्‌ये तीहवार वाळनेन रीतीन अनसारे यरुसलेम सहर मां गुया।
LUK 2:43 तीहवार वाळनेन दाहड़ा पुरा हय गुया, ने अळी ईसुन आसी बास्‌या पछा घर जाणे करीन यरुसलेम सी चाल पड़्‌या। ती चु पुर्‌यु ईसु यरुसलेम सहर मां रय गुयु; ने ज तेरा बास काजे ने माय काजे मालुम नी हतलो।
LUK 2:44 चे ज समजीन वीच्‌यार कर्‌या की ईसु तीना माणसेन टुळा मां भेळु हसे, जे पछा घर आवणे बाजी रवला; चे पुरा एक दाहड़ान चाल, चाल लेदा, तत्‌यार चे ईसु काजे आपसा सगासाइ वाळा मां, ने दुस्‌तीदार्‌यान ईचमां हेरने बाजी गुया;
LUK 2:45 बाकुन ईसु तीनुक नी जड़्‌यु; ती चे तीनाक हेरने करीन पछा यरुसलेम मां आया।
LUK 2:46 ने तीन दाहड़ा हय गुया, ने अळी ईसु मंदीर मां जड़ गुयु; ईसु यहुदी-नीयम सीकाड़न्‌या पुठ्‌ये बस रवलु, ने तींद्‌री वात सामळने बाजी रवलु, ने तीनुक सवाल पुछणे बाजी रवलु देखाय देदु।
LUK 2:47 तेरी अक्‌कल भरी वात सामळीन, चे आखा सामळन्‌या माणसे फीकुर मां पड़ गुया।
LUK 2:48 ईसुन माय बास बी तीनाक चां देखीन चकराय गुया; तेरी माय तीनाक कह्‌यी, “ए बेटा! तारु बास ने मे, तार वाटे बेसका फीकुरेम पड़ गुयला; हामु तुसेक आखे जागे हेर्‌या! तु हामरे साते असु वेहवार काहा कर्‌यु?”
LUK 2:49 बाकुन ईसु तीनुक जपाप आप्‌यु, “तुहुं मेसेक काहा हेरतेला? तुहुंक मालुम नी हतलो काय? की मेसेक मारा बासेन घर मां रहणु जरुरी छे।”
LUK 2:50 बाकुन ईसुन माय-बासेक ईसुन कह्‌वली वातेक नी समज्‌या।
LUK 2:51 तत्‌यार ईसु आपसा माय बास पुठ्‌ये आपसा नासरत सहर मां पछु आवती र्‌यु, ने चु आखी वातेम आसी-बासेन हुकुम मान्‌तु रयु; ने तींद्‌रा हक मां रयु; ने तेरी माय मरीयम ईनी आखी वात काजे हेर राखी, ने तेरे बारामां आपसा मनोम सुचती वीच्‌यारती रय।
LUK 2:52 ने जसा साल वीत गुया, ईसु अक्‌कल मां, ने डीलो मां मटु हवतु गुयु, ने भगवान ने माणसे तीनाक बेसका परम करता रया।
LUK 3:1 अळी रोमी राजान राज तीबीरीयास राज करलु पंद्‌रेक साल हय गुया, तीने टेमे पुंतीयुस पीलातुस यहुदीया जीलाम राजपाटन भार सामाळतेलु; ने हेरोदेस गलील जीलाम राज करतेलु, ने तेरु भायस फीलीप्‌यु इतुर्‌या ने तोरकानीतीस जीला मां राज करतेलु ने लीसानीयुस, अबीलेने जीला मां राज करतेलु।
LUK 3:2 ने हन्‌ना ने काइफा यरुसलेमेन मंदीर मां भगवानेन मुखी पुजारा हतला, तीनु दाहड़ाम भगवान जकर्‌यान पुर्‌यु युहन्‌ना काजे खुस-खबर सामळायु। तीने टेमे युहन्‌ना उजाड़्‌या बयड़ाम रवतेलु।
LUK 3:3 ने युहन्‌ना यरदन नदीन आड़े-धड़े आखा ईलाका मां हींडी फीरीन असु परचार करने बाजी गुयु ने “पापेन माफी वाटे, पाप भीणी सी मन फेरवीन भगवान भीणी मन फेरव्‌यु ने बपतीस्‌मा लेवु।”
LUK 3:4 जसों भगवान अघी सी आवणे वाळी वात देखाड़न्‌या वाटे यसायान किताप मां लिखलो छे: उजाड़्‌या बयड़ा मां काहनुक असु आयड़ी र्‌यु, मालीक-भगवान वाटे सयड़क तीयार करु। ने तेरे वाटे वाट सुदी करु।
LUK 3:5 आखी घाटी भर देसे, ने आखा बयड़ा ने बयड़ी सवताळ कर देसे, ने जी वाट वाकी छे, तीनी वाट काजे सुदी कर देसे, ने कड़खा-कड़खाम वाट सवताळ करीन चुपड़ी कर देसे।
LUK 3:6 ने आखा माणसे भगवानेन छुटकारा काजे देख्‌से!
LUK 3:7 जे माणसे युहन्‌नान हाते बपतीस्‌मा लेणे आवला, तीनुक असु कह्‌यु, “ए घड़सान पीला! भगवान भीणी सी आवणेवाळी रीस सी ढासु करीन कुण तुहुं काजे कह्‌यो?
LUK 3:8 तुहुं पाप भीणी सी मन फेरवीन भगवान भीणी वळ गुया हय, ती ईनी वातेन गवाय तुंद्‌री जीवाय वाटे देखाड़, हामरा आड़ा-बुड़ान डाहलु बास अब्‌राहम छे, असु वीच्‌यार आपसा मनेम मां करु; मे तुहुंक कहं, हेर राखु, भगवान ईनु दगड़ाम सी बी अब्‌राहम धड़े अवल्‌यात पयदा कर सके।
LUK 3:9 ने हय झाड़कान जड़ मां कुरहाड़ मेकली छे। काहाकी जो झाड़को वारलु फळ नी लावे तीना झाड़का काजे काट देसे ने तीनाक आकठा मां धपणे करीन नाख देसे।”
LUK 3:10 ने माणसे तीनाक असा पुछतेला, “ती हामु हय काय करजे?”
LUK 3:11 चु तीनुक कह्‌यु, “तीना धड़े दुय कुट हय, ती चु एक कुट तीनाक आप देणु चाहजे, तेरे धड़े नी हय, ने तीना धड़े खाणु हय, चु बी तेरे धड़े नी हय तीनाक आप देणु चाहजे।”
LUK 3:12 थुड़ाक फाळु उकाळने वाळा बी बपतीस्‌मान रीत लेणे आया, ने तीनाक असा पुछ्‌या, “ए मास्‌तर हामुक काय करनु चाहजे?”
LUK 3:13 चु युहन्‌‌‌नु तीनुक कह्‌यु, “जतरो लेणे करीन वात ठेहरावलो छे, ततरोत मांगु, हेरे सी जादा घुण मांगु।”
LUK 3:14 ने सीपायड़ा बी तीनाक पुछ्‌या, “हामुक काय करनु चाहजे?” चु तीनाक कह्‌यु, “काहना बी धड़े जुर करीन पयस्‌या मां मांगु ने काहनाक पर झुटु गुनु मां लागाड़ु ने आपसी कमाय मां नीसरा रहु।”
LUK 3:15 माणसे वाट देखीन हेर कर रवला, ने युहन्‌नान बारामां आपसा मनेम वीच्‌यार करने बाजी गुया की कांखुर मायन हयुत मसी ते नी हय।
LUK 3:16 ती बपतीस्‌मा आपण्‌यु युहन्‌‌‌नु ने आखा काजे कह्‌यु, मे ते तुहुं काजे पाणी सी बपतीस्‌मा आपो; बाकुन एक मार पछळ आवणे वाळु छे, चु मारे सी ताकतवाळु छे। मे तेरा खासड़ान बंद छुड़े असु नी हय; बाकुन चु तुहुं काजे चुखली-आत्‌मा मां ने आकठा मां बपतीस्‌मा आपसे।
LUK 3:17 तेरो सुपड़ो तेरा हात मां छे, ने चु आपसा खळा मां गहुं काजे चुखाळसे ने कणगी मां भरसे, बाकुन गहुंन चारा काजे उलाह्‌ये नी असली आकठी मां नाखीन धपाड़ देसे।
LUK 3:18 असी बेसकी वात सीकाड़तु जाय्‌न युहन्‌‌‌नु माणसे काजे समजाड़तेलु ने खुस-खबर सामळावतेलु।
LUK 3:19 राजा हेरोदेस आपसा भाय फीलीप्‌पुसेन घरवाळी हेरोदेस काजे राख लेदलु, ने बेसका भुंड्‌ला कामे करलु, तेरेमां युहन्‌‌‌नु तीनाक लड़्‌यु।
LUK 3:20 ती हेरोदेस राजा बपतीस्‌मा आपण्‌या युहन्‌ना काजे जेल मां कुंडीन दीसरा भुंड्‌ला कामे सी बी जादा भुंडो काम कर्‌यु।
LUK 3:21 बेसका साल वीत गुया ने अळी ईसु यरदन नद्‌ये गुयु चां बपतीस्‌मा आपण्‌यु युहन्‌‌‌नु बेसका माणसेक पाणी मां डुबाड़ीन बपतीस्‌मा आपतेलु। दीसरा माणसे बपतीस्‌मा ली लेदा, ने अळी, बपतीस्‌मा आपण्‌यु युहन्‌‌‌नु ईसु काजे बी बपतीस्‌मा आप्‌यु। जसु ईसु बपतीस्‌मा लेदु ती, चु दुवा कर्‌यु; जत्‌यार चु दुवा करने बाजी रवलु तत्‌यार सरग उघड़ी गुयो।
LUK 3:22 ने भगवानेन चुखलु आत्‌मा एक पेरवान तसों ईसु पर उतर्‌यो ने तत्‌यारुत भगवान बास सरगेम रय्‌न ईसुक कह्‌यु, “तु मारु लाटेकलु पुर्‌यु छे, मे तार पर बेसकु खुस छे।”
LUK 3:23 तीनी टेमे ईसुन उमर तीसेक सालेन हतली। तीनी टेमे चु आपसुत वात सीकाड़ने बाजी गुयु, माणसे ईसुक, युसुफेन पुर्‌यु समजतेला ने युसुफ, एलीन पुर्‌यु हतलु,
LUK 3:24 ने एली, मत्‌तातेन पुर्‌यु हतलु, ने जु मत्‌तात, लेवीन पुर्‌यु हतलु, ने जु लेवी मलकीन पुर्‌यु हतलु, ने जु मलाक्‌यु योन्‌नान पुर्‌यु हतलु, ने जु योन्‌ना, युसुफेन पुर्‌यु हतलु,
LUK 3:25 ने जु युसुफ, मत्‌‌तीत्‌यान पुर्‌यु, ने जु मत्‌‌तीत्‌यु आमोसेन पुर्‌यु हतलु, ने जु आमोस, नहुमेन पुर्‌यु हतलु, ने जु नहुम, असल्‌यान पुर्‌यु हतलु, ने जु ओसल्‌यु, नगाहान पुर्‌यु हतलु।
LUK 3:26 ने जु नगुहु, मातान पुर्‌यु हतलु, ने जु मातु, मत्‌‌तीत्‌यान पुर्‌यु हतलु, ने जु मत्‌तीत्‌यु, सीमीन पुर्‌यु हतलु, ने जु सीमी योसेखेन पुर्‌यु हतलु, ने जु योसेख योदान पुर्‌यु हतलु,
LUK 3:27 ने जु योदाहा, युहन्‌नान पुर्‌यु हतलु, ने योन्‌नु रेसान पुर्‌यु हतलु ने जु रेसु जरुबाबीलोनेन पुर्‌यु हतलु, ने जु जरुबाबील, सालतीयेलन पुर्‌यु हतलु ने जु सालतीयेल, नेरीन पुर्‌यु हतलु,
LUK 3:28 ने जु, मलकीन पुर्‌यु हतलु, ने जु मलकी, अद्‌दीन पुर्‌यु हतलु, ने जु अद्‌दी कोसामेन पुर्‌यु हतलु, ने जु कोसाम, इलमोदामोन पुर्‌यु हतलु, ने जु इलमोदाम, एरोन पुर्‌यु हतलु,
LUK 3:29 ने जु एर, जोसुवान पुर्‌यु हतलु, ने जु जोसुवा, एलीआजारेन पुर्‌यु हतलु, ने जु एलीआजार यरीमोन पुर्‌यु हतलु, ने जु योरीम, मत्‌तातेन पुर्‌यु हतलु, ने जु मत्‌तात लेवीन पुर्‌यु हतलु,
LUK 3:30 ने जु लेवी, सीमोन पुर्‌यु हतलु ने जु सीमोन्‌यु यहुदीयान पुर्‌यु हतलु ने जु यहुदा, युसुफेन, पुर्‌यु हतलु, ने जु युसुफ, योनामेन पुर्‌यु हतलु ने जु योनाम, इल्‌याकीमेन पुर्‌यु हतलु,
LUK 3:31 ने इल्‌याकीम, मेल्‌यान पुर्‌यु हतलु, ने जु मेल्‌यु, मीन्‌नान पुर्‌यु हतलु, ने मीन्‌नु मत्‌तान पुर्‌यु हतलु, ने जु मत्‌ता, नातानोन पुर्‌यु हतलु, ने जु नातान, दावुदेन पुर्‌यु हतलु,
LUK 3:32 ने दावुद, यीसेन पुर्‌यु हतलु, ने जु यीसे ओबेदेन पुर्‌यु हतलु, ने जु ओबेद, बोआजेन पुर्‌यु हतलु, ने जु बोआज, सलमन पुर्‌यु हतलु ने जु सलमन, नहसोन पुर्‌यु हतलु,
LUK 3:33 ने जु नहसोन, अम्‌मीनादाबेन पुर्‌यु हतलु, ने जु अम्‌मीनादाब, अदमीन पुर्‌यु हतलु ने जु अदमीन, अरनीन पुर्‌यु हतलु ने अरनीन, हेसर्‌यान पुर्‌यु हतलु, ने जु हेसर्‌यान, फीरीसेन पुर्‌यु हतलु, ने जु फीरीस यहुदीयान पुर्‌यु हतलु,
LUK 3:34 ने जु यहुदा, याकुपेन पुर्‌यु हतलु, ने याकुप इसाकेन पुर्‌यु हतलु, ने जु इसाक, अब्‌राहमेन पुर्‌यु हतलु, ने जु अब्‌राहम, तीरहनेन पुर्‌यु हतलु, ने जु तीरह, नाहोरेन पुर्‌यु हतलु,
LUK 3:35 ने जु नाहर, सेरुगेन पुर्‌यु हतलु ने जु सेरुगेन रेवुन पुर्‌यु हतलु ने जु रेवु फीलीगेन पुर्‌यु हतलु ने जु फीलीग, एबीरेन पुर्‌यु हतलु, ने जु एबीर, सीलहेन पुर्‌यु हतलु,
LUK 3:36 ने जु सीलह, केनानेन पुर्‌यु हतलु, ने जु केनान, अरफक्‌सदेन पुर्‌यु हतलु, ने जु अरफक्‌सद, सेमनेन पुर्‌यु हतलु ने जु सेम, नुहान पुर्‌यु हतलु, ने जु नुह, लीमीकेन पुर्‌यु हतलु,
LUK 3:37 ने चु लीमीक, मथुसीलहेन पुर्‌यु हतलु, ने जु मथुसीलह, हनोकेन पुर्‌यु हतलु ने जु हनोक, यीरीदेन पुर्‌यु हतलु, ने जु यीरीद, महलेलन पुर्‌यु हतलु, ने जु महलेल, केनानेन पुर्‌यु हतलु,
LUK 3:38 ने जु केनान, एनोसन पुर्‌यु हतलु, ने जु एनोस, सेतन पुर्‌यु हतलु, ने जु सेत, आदमेन पुर्‌यु हतलु, ने जु आदम, भगवानेन पुर्‌यु हतलु।
LUK 4:1 ईसु यरदन नदी मां बपतीस्‌मा ली लेदु, ने चु भगवानेन चुखली-आत्‌मान साते हय्‌न, चां सी चुखली-आत्‌मान अगवाय मांत उजाड़्‌या बयड़ाम गुयु;
LUK 4:2 ने भुतड़ु आवीन चाळीस दाहड़ा लग पारख करतु रयु; ने तीनु दाहड़ाम ईसु काय नी खादु, ने जत्‌यार पारखणेन दाहड़ा पुरा हय गुया, ती तीनाक भुक लागी।
LUK 4:3 तत्‌यारुत भुतड़ु आवीन ईसु काजे असु कह्‌यु, “कदी तु भगवानेन पुर्‌यु हय, ती ईना दगड़ाक कय दे की रुटु बण जाय।”
LUK 4:4 बाकुन ईसु भुतड़ा काजे कह्‌यु, “चुखला सास्‌तुर मां लिखलो छे, ‘माणुस रुटा खायलीन जीवतु नी रवे।’”
LUK 4:5 तत्‌यार भुतड़ु ईसु काजे ली गुयु; ने पापण्‌या पाड़तात वार मां कळीन आखा देस ने राज देखाड़्‌यु।
LUK 4:6 ने भुतड़ु ईसु काजे कह्‌यु, “मे तुसेक कळीन ईनु आखा देस पर, ने तींद्‌रा धन पर हक आपीस, ने राज करने दीस। काहाकी ज मेसेक आपलो छे, ने ज मे चाहो तीनात काजे आप दम।
LUK 4:7 हेरेसी कदी तु मारा पाये पड़ीन मेसेक आंधसी, ती मे ज आखो, तुसेक आप दीस।”
LUK 4:8 बाकुन ईसु भुतड़ा काजे कह्‌यु, “चुखला सास्‌तुर मां लिखलो छे, ‘तु आपसा मालीक भगवान काजे आंद; ने तेरीत सेवा भक्‌ती कर!’”
LUK 4:9 तत्‌यार भुतड़ु ईसु काजे यरुसलेम सहरेन मंदीरेन मुंडेरी पर उबु कर देदु, ने असु कह्‌यु, “कदी तु भगवानेन पुर्‌यु हय ती जां सी आपसुत कुद पड़।
LUK 4:10 काहाकी चुखला सास्‌तुर मां ज बी लिखलो छे ‘भगवान तारी राखवाळी कराड़ने करीन, आपसा सरग वाळा काहवाळ्‌या काजे हुकुम आपसे।
LUK 4:11 ने चे तुसेक उपरुत झेल लेसे, ने तारे पाये दगड़ान ठेसु लग नी लागणे देय।’”
LUK 4:12 ईसु भुतड़ाक असु कह्‌यु, “ज बी लिखलो छे तु आपणा मालीक भगवानेन पारख मां करे।”
LUK 4:13 जत्‌यार भुतड़ु आखे भात्‌ये ईसुक पारखी लेदु, ने मुखु जड़से ती ईसु भीणी पछु आवीस, करीन चां सी जाती रयु।
LUK 4:14 चुखली-आत्‌मा सी भरायन ईसु गलील जीला मां पछु आयु, ने तेरो नाव चारेमेर आखा कामेन हुकवाय उड गुय।
LUK 4:15 ने चु तींद्‌रा भक्‌तीन घर-घरमां जाय्‌न तीनुक वात सीकाड़तु रयु, ने आखा तेरो नावलीन तेरी बड़ाय करतेला।
LUK 4:16 ईसु नासरत सहरेम आयु, चां तीनाक तेरा माय बास पाळी पुसीन मटु करला। ने जां चु आपसी टेमेन अनसारे यहुदी माणसेन आरामेन दाहड़े, भगवानेन भक्‌तीन घर मां जाय्‌न, चुखलु सास्‌तुर भन्‌ने करीन उबु हय गुयु।
LUK 4:17 ने तीनाक भगवान वाटे यसायान किताप भन्‌ने करीन आप्‌या। किताप उगाड़ीन ईसु, चु जागा हेर्‌यु, चां ज लिखलो हतलो,
LUK 4:18 “मालीक भगवानेन चुखली-आत्‌मा मारे पर छे, काहाकी चु मेसेक नेवाड़्‌लु छे; ने मेसेक गरीबेक खुस-खबर सामळावणे, ने गुलामी करन्‌या माणसेक छुड़ावणे ने आंदळान डुळा उगाड़ने करीन मकेल्‌लु छे। ने वेला पाड़ायलाक छुड़ावणे मकेल्‌लु छे।
LUK 4:19 ने मालीक भगवानेन खुसीन लांबला टेमेन, जुर-जुर सी परचार करने मेसेक मकेल्‌लु छे।”
LUK 4:20 तत्‌यार ईसु, किताप बंद कर देदु, ने मंदीरेन पावर्‌या काजे आप दीन बसी गुयु; ने भगवानेन भक्‌तीन घरेन आखा माणसे तेरे भीणी देखी रवला।
LUK 4:21 तत्‌यार चु तीनाक असु कह्‌णे बाजी गुयु, “चुखली-सास्‌तुरेम जी लिखली वात आज तुहुंक सामळतेत पुरी हय गुयली छे।”
LUK 4:22 ने आखा तीनाक बेसका वारु कह्‌णे बाजी गुया, ने जु गीण-दयान वात चु हीनुक कवलु, तीनी वातेन साहरे, चे चकराय गुया; ने असा कह्‌णे बाजी गुया “जु युसुफ्‌यान पुर्‌यु नी हय काय?”
LUK 4:23 ईसु तीनुक कह्‌यु, “तुहुं मेसेक जु कवाड़ु कवसुन कवसु की ‘ए डाक्‌टर! आपसात काजे वारु कर।’ ने तुहुं ज बी कह्‌सु की हामु सामळी रया की ‘तु कफरनहुम सहर मां काय करलु छे।’ च जां आपणा सहरेम बी कर।”
LUK 4:24 अळी ईसु कह्‌यु, “मे तुहुंक छाचलीन ज कहं, काहना बी भगवानेन अघी सी आवणे वाळी वात देखाड़ने वाळु माणुस, आपसात सहरेम ईज्‌जत नी जड़े; बाकुन दीसरी जागे ईज्‌जत जड़े।”
LUK 4:25 “ने मे तुहुंक छाचलीन कह्‌वो, एलीयान दाहड़ा मां तीन साल ने छव महना लग पाणी नी पड़्‌यु, ने आखा देसेम बेसकु काळ पड़लु, ती तीनी टेमे ईस्‌रायेल देस मां बेसका रांडायला बायरा हतला।
LUK 4:26 बाकुन तेबी भगवान, एलीया काजे तीनु मायन काहनान्‌चां नी मकल्‌यु, बाकुन दीसरा देसेन सेदा सहरेन धड़े वाळा सारफत सहरे मां एक रांडायली भीणी अतरुत मकल्‌यु।
LUK 4:27 ने भगवानेन अघी सी आवणे वाळी वात देखाड़न्‌या एलीसा जीवतेलु हतलु, तीनी टेमे ईस्‌रायेल देस मां बेसका कुड़ायला हतला। तेबी चु सीरीया देस मां रहणे वाळा नामान काजे छुड़ीन काहना काजे वारु नी कर्‌यु।”
LUK 4:28 जी वात सामळीन जतरा बी भगवानेन भक्‌तीन घर मां बसी रवला, चे आखा माणसे बेसका रीसाय गुया।
LUK 4:29 चे उठ पड़्‌या ने ईसु काजे सहरेन बाहर नीकाळ देदा। तीना बयड़ा पर तींद्‌रो सहर वसलो हतलो तीना बयड़ान चटी पर तीनाक धकलीन पाड़ने करीन ली गुया।
LUK 4:30 तेबी चु तींद्‌रे ईचमां सी नीकळीन जात र्‌यु।
LUK 4:31 ईसु गलील जीला मां सी दीसरा सहर कफरनहुम मां आयु, ने तींद्‌रे आरामेन दाहड़े भगवानेन भक्‌तीन घर मां, माणसेक वात सीकाड़ने बाजी रवलु।
LUK 4:32 ने माणसे ईसुन वात सामळीन चकराय गुया, काहाकी तेरा बुले जुर भर्‌या हतला।
LUK 4:33 तीना भगवानेन भक्‌तीन घर मां एक माणुस हतलु, तेरेमां भुतड़ान आत्‌मा भराय रवली। चु माणुस जुर सी आयड़ीन कय पड़्‌यु।
LUK 4:34 “ए नासरत मां रहण्‌या ईसु! हामरे साते तारो काय काम छे? तु हामुक सारने करने आवलु छे काय? मेसेक मालुम छे की तु कुण छे? तु ते भगवान सी मकेल्‌लु चुखलु माणुस छे।”
LUK 4:35 ने ईसु तीनाक लड़ीन कह्‌यु, “हुगु रव ने ईना माणुस मां सी नीकळी जां।” ने भुतड़ु तीना माणुस काजे भुयमां आसटीन नुकसाण करे, पाखुर तेरेमां सी नीकळी गुयु।
LUK 4:36 आखा माणसे बीही गुया ने आपसा-आपसात वात करीन कह्‌या, “जी कसला बुल छे! हयु हक ने जुर भेळ भुतड़ान जमेक हुकुम आपे ने चे नीकळी जाय।”
LUK 4:37 हेरेसी ईसुन वात चारे मेर तीना आखा ईलाका मां खुणे-कुपरे फीर गुय।
LUK 4:38 चु भगवानेन भक्‌तीन घर मां सी नीकळीन सीमोनेन घर गुयु। सीमोनेन सासुसेन बेसको जुरे सेरी आय रह्‌लो, ने माणसे ईनीक वारु कर दे, करीन ईसुक लीलघाय्‌न कह्‌या।
LUK 4:39 ईसु तेरे धड़े जाय्‌न सेरीक लड़्‌यु, ने लड़तात वार मां सेरी उतरी गुयो। ने ची तत्‌यारुत उठीन तींद्‌री खातरी करीन तींद्‌री चाकरी करने बाजी गुय।
LUK 4:40 तीने दाहड़े, दाहड़ु डुब गुयु ने अळी आखा माणसे भाती-भातीन मांदवाड़ मां पड़ला माणसे काजे ईसु भीणी लाया। ईसु एक-एक जणा पर हात मेकीन तीनुक वारु करतेलु।
LUK 4:41 “तु भगवानेन पुर्‌यु छे” असा आयड़ता जाय्‌न भुतड़ान आत्‌मा बेसका माणसे मां सी नीकळतेला। बाकुन चु तीनुक लड़तेलु, ने बुलने नी देदलु, काहाकी भुतड़ान आत्‌मा जाणतेली की जु मसी छे।
LUK 4:42 दीसरे दाहड़े एगुत ईसु घर सी नीकळीन एक उजाड़ी जागाम जात र्‌यु। ने माणसे तीनाक हेरता-हेरता तेरे भीणी गुयु, ने तीनाक असा कह्‌या, हामरेन्‌चां सी मां जाय।
LUK 4:43 बाकुन चु तीनुक असु कह्‌यु, “मेसेक दीसरा सहरेम बी भगवानेन राजेन खुस-खबरेन वात सामळावणु छे-काहाकी भगवान मेसेक ज सामळावणे करीन मकेल्‌लु छे।”
LUK 4:44 ने चु यहुदा जीलान तींद्‌रा भक्‌तीन घर-घरमां खुस-खबर सामळावतु रयु।
LUK 5:1 एक दाहड़ु ईसु गन्‌नेसरत दरीया धड़े उबु हय रवलु, ने माणसे भगवानेन वात सामळने करीन हुड़ु-हुड़ु आवतेला, ने धकलाय्‌न तेरे पर पड़े असा हय जातला।
LUK 5:2 तीनी टेमे चु दरीया धड़े दुय ढंड्‌या उबा कर रवला देख्‌यु, ने काहर्‌या ढंड्‌याम सी उतरीन जाळ धुवणे बाजी रवला।
LUK 5:3 तीनु ढंड्‌या मायन एक ढंड्‌यो सीमोनेन हतलो, तीना ढंड्‌या मां भरायन ईसु असु कह्‌यु, ईना ढंड्‌याक धड़े सी थुड़ाक उंडा पाणी मां ली जावु। तत्‌यार चु तीना नानला ढंड्‌याम बसीन माणसेक सीकाड़ने बाजी गुयु।
LUK 5:4 जत्‌यार ईसु सीकाड़ी दीन नवराय गुयु, ती ईसु सीमोन काजे असु कह्‌यु, “ढंड्‌यो अळी उंडास पाणी मां ली जावु, ने माछा मारने करीन आपणी-आपणी जाळ नाखु।”
LUK 5:5 ती सीमोन्‌यु असु कह्‌यु, “ए मालीक! हामु आखी रात माछा मारने करीन मेहनत कर्‌या, बाकुन ईतराक माछा बी नी धराया; तेबी तु कह्‌वे, ती मे माछा धरने करीन पाणीम जाळ नाखीस।”
LUK 5:6 जत्‌यार सीमोन्‌यु ने तेरा साते वाळा काजे ईसु कह्‌यु तसा कर्‌या ती तीनुक बेसका माछा धराय गुया, ने माछान भारे तींद्‌री जाळ फाटणे बाजी गुय।
LUK 5:7 तत्‌यार चे तींद्‌रा साते वाळा काजे जे दीसरा ढंड्‌या मां हतला, तीनु काजे हात पालवीन मदत करने बुलाया, ने चे साते वाळा आवीन दुय ढंड्‌याम माछा ढीक लागाड़ीन भर लेदा, ने चे ढंड्‌या डुबे-डुबे तसा हय गुया।
LUK 5:8 ज देखीन सीमोन्‌यु पतरस ईसुन पाये मां हीट पड़्‌यु, ने असु कह्‌यु, “ए मालीक मे ते पापी माणुस छे, अळी तु मार सी छेटे रव।”
LUK 5:9 जाळेम बेसका माछा पड़ गुया, करीन चु ने तेरा साती चकराय गुया।
LUK 5:10 अळी तसात जब्‌दीन पुर्‌या याकुप ने युहन्‌‌‌नु बी चकराय गुयु चे सीमोनेन साती हतला। ने तत्‌यारुत ईसु सीमोन काजे असु कह्‌यु, “बीहे मां, हय सी तु माछा काजे नी धरे, बाकुन माणसे काजे मारा चेला बणावणे करीन भेळा कर्‌या करसी।”
LUK 5:11 चे ढंड्‌या काजे दरीया धड़े ली आया, ने माछा धरनेन धंदा सुदे, आखो छुड़ दीन ईसु पछळ चाल पड़्‌या।
LUK 5:12 जत्‌यार ईसु एक दाहड़ु एक सहर मां हतलु, ती ईसुन्‌चां एक माणुस आयु, तेरो आखो डील कुड़ मांदवाड़ मां भरायलो हतलो। चु ईसु काजे देखीन मुंहडान भुरसे हीट पड़्‌यु, ने लीलघायतु जाय्‌न असु कह्‌यु, “ए ईसु मालीक! कदी तु चाहे, ती मेसेक वारु कर दे।”
LUK 5:13 ईसु हात लांबु करीन ज कह्‌तु जाय्‌न तीनाक छीमीन कह्‌यु, “तु चुखु हय जां, जीत मारी मरजी छे।” ने तत्‌यारुत तेरो कुड़ जाती र्‌यो।
LUK 5:14 तत्‌यार ईसु तीनाक असु कह्‌यु, “जां, वारु हय गुयु करीन आपसा काजे भगवानेन पुजाराक देखाड़जी ने मुसान साहरे टाकली बादा चहड़ावजी ने तु वारु हय्‌न चुखु हय गुयु करीन आखा माणसे तारा गवा बण जासे। बाकुन जी वात काहना काजे बी घुण कह्‌वे।”
LUK 5:15 तेबी ईसु आखे दुर नावसाद्‌यु हय गुयु, ने हुड़-हुड़ु, माणसे तेरी वात सामळने, ने वारु हवणे करीन तेरेन्‌चां आवतेला।
LUK 5:16 बाकुन ईसु तींद्‌रे धड़े सी अलग हय्‌न चां आखी सुन्‌ली जागा हय, चां-चां जाय्‌न दुवा कर्‌या करतेलु।
LUK 5:17 ईसु काहनेस दाहड़े वात सीकाड़ने बाजी रवलु। फरीसी माणसे ने भगवानेन नीयम सीकाड़न्‌या मास्‌तर्‌या चां बस रवला। चे गलील जीलाम सी, ने यहुदीया जीलान गांवेडीट सी, ने यरुसलेम सहर सी आय रवला; ने मालीक-भगवानेन आरगाय आपणेन ताकत ईसु पुठ्‌ये हतली।
LUK 5:18 ने देखु! तीनी टेम मां थुड़ाक माणसे लखवान मांदवाड़ वाळा माणसेक खाट्‌ली पर हाकलीन लाया ने चे जां ईसु हतलु, तीना घर मां ली जाय्‌न ईसु अगळ मेलने हींडतेला।
LUK 5:19 चां हुड़ु-हुड़ु माणसे हतला ने तीना लखवान मांदवाड़ वाळाक चां नी ली जाय सक्‌या, ने चे घर पर चहड़ी गुया, ने छतेन नळ्‌या हेड़ देदा। ने तीना लखवान मांदवाड़ वाळा माणुस काजे खाट्‌ली भेळुत ईसु अगळ उपर सी उतार देदा।
LUK 5:20 ने तीना लखवा वाळा माणसे काजे लावण्‌यान भुरसु देखीन ईसु तीना लखवान मांदवाड़ वाळाक कह्‌यु, “ए माणुस! तु पाप ते करलु, बाकुन तुसेक तारा पापेन माफी जड़ गुयली छे।”
LUK 5:21 जी वात सामळीन यहुदी नीयमेन मास्‌तर्‌या ने फरीसी माणसे आपसा मनेम वीच्‌यार करीन कह्‌या, “जु कुण छे, गुयु भगवानेन नाव-बद्‌दी कर र्‌यु? भगवानेक छुड़ीन असु कुण छे, तीना पापी माणसे काजे माफी आपणेन हक छे?”
LUK 5:22 तींद्‌रा मनेम वीच्‌यार काजे जाणीन ईसु तीनाक कह्‌यु, “तुहुं आपसा मनेम असा वीच्‌यार करीन काहा वातेम लड़ाय रया?
LUK 5:23 काय कह्‌णु वारु छे? ‘तुसेक तारा पापेन माफी जड़ गुय’ कह्‌णु वारु छे की ‘उठ ने चाल फीर’ कह्‌णु वारु छे?
LUK 5:24 बाकुन माणसेन पुर्‌या काजे धरती पर पापीक माफी आपणेन हक छे, ज तुहुं जाण लेवु एरेन, मे असु कह्‌यु।” अळी ज कयदीन ईसु लखवान मांदवाड़ वाळाक कह्‌यु, उठ, “ने तारी खाट्‌ली हाकलीन तार घर जाती रव।”
LUK 5:25 ने चु तत्‌यारुत आखा अगळ सी उठीन उबु हय गुयु, ने तारी खाट्‌ली हाकलीन भगवानेन बड़ाय करतु जाय्‌न हेरे घर जाती रयु।
LUK 5:26 ने चे आखान आखा चकराय्‌न भगवानेन गुण गावता र्‌या। तींद्‌रेम डर भराय गुयो, ने चे कह्‌तेला, “आज हामु भाती-भातीन काम देखला छे।”
LUK 5:27 ने अळी ईसु बाहर नीकळ्‌यु। ती चु फाळु लेण्‌यान डाहला काजे फाळु लेणेन नाका पर बसीन फाळु उकाळतेलान देख्‌यु। तेरु नाव लेवी हतलु। ने ईसु तीनाक असु कह्‌यु, “मारु चेलु बणीन मार पछळ चाल पड़।
LUK 5:28 ती चु फाळु लेण्‌यु आखो काम छुड़ देदु, ने उठीन ईसु पछळ चाली पड़्‌यु।”
LUK 5:29 चु लेवी, ईसु काजे आपसे घर मां ली जाय्‌न बेसकी मटी पंगत कर्‌यु; ने फाळु लेण्‌या ने बेसका मेजवान्‌या ईसु भेळा रुटा खाणे बठ्‌या।
LUK 5:30 ने फरीसी माणसे ने यहुदी नीयम सीकाड़न्‌या कळे-कळे वात करीन ईसुन चेलान वात नीकाळीन तीनुक कह्‌या, “तुहुं फाळु उकाळन्‌या ने पापी माणसे साते बसीन काहा खावु-पीयु?”
LUK 5:31 ज जाणीन ईसु तीनुक कह्‌यु, “वारलु काजे डाक्‌टर नी चाहजे, बाकुन मांदला काजे डाक्‌टर चाहजे।
LUK 5:32 मे धरमी माणसे नी, बाकुन पापी माणसेक पाप भीणी सी भगवान भीणी मन फेरवणे करीन, बुलावणे आवलु छे।”
LUK 5:33 थुड़ाक माणसे ईसुक कह्‌या, “युहन्‌नान चेला ते अळी-अळीन उपास करे ने भगवान वाटे दुवा कर्‌या करे, ने असात फरीसी माणसेन चेला बी उपास करे बाकुन तारा चेला ते उपास करे पाखुर खाय ने पीये करे!”
LUK 5:34 ईसु तीनुक कह्‌यु, “जत्‌यार लगुन अरात्‌या दुल्‌ला पुठ्‌ये रवे, तत्‌यार लगुन चे उपास करे काय?
LUK 5:35 बाकुन जे दाहड़ा बी आवसे, जत्‌यार दुल्‌लु तींद्‌रे सी अलग हय जासे, तत्‌यार चे तीनी टेम मां उपास पाळसे।”
LUK 5:36 ईसु तीनुक एक दाखलु बी सामळायु, “कुय बी नवला पुथल्‌याम सी फाड़ीन, जुन्‌ला पुथल्‌या मां थीग्‌ळो नी लागाड़े। ने कदी लागाड़से, ती च नवलो पुथल्‌यो ते फाटीन बीगड़ी जासे, ने च नवला पुथल्‌यान थीग्‌ळो जुन्‌ला पुथल्‌या पुठ्‌ये मेळ बी नी खाय
LUK 5:37 ने असात काहनाक जुन्‌ला चामड़ान थयला मां, नवला अंगुरेन रस नी भरे। असो भरसे, ती नवलु अंगुरेन रस, चामड़ान थयला काजे फाड़ देसे, ने असो करीन चामड़ान थयलु बी फाट जासे, ने नवलु अंगुरेन रस बी नाखायन उही जासे, ने रद हय जासे।
LUK 5:38 बाकुन अंगुरेन नवलु रस चामड़ान नवला थयला मां भरनु चाहजे।
LUK 5:39 काहनुक माणुस बी जुन्‌लु अंगुरेन रस पीन, नवलु अंगुरेन रस पीणेन हेर नी करे, काहाकी जुन्‌लु अंगुरेन रस पीन कह्‌वे, की जुन्‌लु अंगुरेन रसुत वारु छे।”
LUK 6:1 ईसु ने तेरा चेला आरामेन दाहड़े गहुंन खेत मायन नीकळीन जाणे बाजी रवला। ने तेरा चेला गहुंन उम्‌ब्‌या तुड़ीन हाते सी चुळी-चुळीन खाता जातला।
LUK 6:2 तत्‌यार थुड़ाक फरीसी माणसे असा कह्‌णे बाजी गुया की, “ज काम आरामेन दाहड़े नी करनु चाहजे, बाकुन च काम तुहुं काहा करने बाजी र्‌या?”
LUK 6:3 ईसु तीनुक कह्‌यु, “जत्‌यार दावुद ने तेरा साती भुकला हतला, ती दावुद काय कर्‌यु?” तुहुं ज नी भण्‌या काय?
LUK 6:4 चु भगवानेन मंदीर मां जाय्‌न भेटन रुटा ईछीन आपसु बी खादु, ने तेरा साते वाळा काजे बी खाणे करीन आप्‌यु। चे रुटा ते भगवानेन पुजाराक अतरात खाणु चाहजे।
LUK 6:5 ने ईसु तीनुक अळी कह्‌यु, “माणसेन पुर्‌यु आरामेन दाहड़ान बी मालीक छे। माणसे काजे आरामेन दाहड़े काय करनु चाहजे, ने काय नी करनु चाहजे, तेरु फेसलु करनु मारा हक मां छे।”
LUK 6:6 ईसु काहनेस दीसरे आरामेन दाहड़े भगवानेन भक्‌तीन घर मां जाय्‌न वात सामळावणे बाजी रवलु। ने चां एक माणुस हतलु, तेरु जेवड़्‌यु हात सुकी रवलु।
LUK 6:7 यहुदी नीयम सीकाड़न्‌या ने फरीसी माणसे ईसुन गलती नीकाळने तकाय रवला, की ईसु आरामेन दाहड़े सुकला हात वाळाक वारु करे की नी करे
LUK 6:8 बाकुन ईसु तींद्‌रा वीच्‌यार जाणीन सुकला हात वाळाक कह्‌यु, “उठ ने ईचमां उबु हय गुया।” चु उठीन ईचमां उबु हय गुयु।
LUK 6:9 ईसु तीनु माणसे काजे कह्‌यु, मे तुहुंक पुछो-आरामेन दाहड़े काय करनु वारु छे, भलाय करनु वारु छे की कुहराय करनु वारु छे, “ने जीव बचाड़नु वारु छे की मारनु वारु छे?”
LUK 6:10 ती ईसु तीनु आखा माणसे पर नींगा नाखीन ईसु तीना माणुस काजे कह्‌यु, “तारु हात लांबु कर।” चु हात लांबु कर्‌यु ने तेरु हात वारु हय गुयु।
LUK 6:11 बाकुन भगवानेन धरमेन वात सीकाड़न्‌या ने फरीसी माणसे बेसका रीसाय पड़्‌या, ने आपसा-आपसात वीच्‌यार करीन असा कह्‌या, आपणु ईसुन वीरुद मां काय करजे?
LUK 6:12 तीनु दाहड़ा मायन एक दाहड़ु ईसु दुवा करने करीन बयड़ा पर गुयु, ने चां आखी रात भगवान सी दुवा करतु रयु।
LUK 6:13 जत्‌यार दाहड़ु उंग्‌यु, तत्‌यार ईसु हेरा चेला काजे साते बुलायु, तींद्‌रेम सी देखीन बारे जणा काजे नेवाड़ीन तीनुक, खुस-खबरेन नेवताळा बणायु।
LUK 6:14 सीमोन काजे; हेरो नाव ईसु पतरस बी पाड़्‌यु; तेरा भायस अन्‌दीरीयास; काजे; ने याकुप ने युहन्‌ना काजे; ने फीलीप्‌पुस काजे; ने बरतुल्‌मे काजे;
LUK 6:15 ने मत्‌‌ती काजे; ने थोमा काजे; ने हलफाईन पुर्‌यु याकुप काजे; ने सीमोन काजे, जु भगत कह्‌वायतेलु,
LUK 6:16 ने याकुपेन पुर्‌यु यहुदा काजे, ने यहुदा ईस्‌करीयोत काजे; जु ईसु काजे धरावण्‌यु बण गुयु।
LUK 6:17 ईसु तींद्‌रे पुठ्‌ये बयड़े सी उतरीन एक सोवताळ जागा मां उबु हय गुयु। चां तेरा दीसरा चेला बी हतला। अतरात नी, बाकुन चां माणसेन एक बेसकु मट्‌लु टुळु बी हतलु तीना टुळाम आखा यहुदीयान ने यरुसलेमेन ने दरीयान धड़े वाळा सुर ने सेदा सहरेन माणसे बी हतला।
LUK 6:18 चे ईसुन वारलु वात सामळीन ने आपसी मांदवाड़ सी वारु हवणे करीन आय रवला, ईसु धड़े आवीन तीनुक वारु कर्‌यु। भुतड़ान आत्‌मा सी वेला पाड़ायलाक बी ईसु, तीनु आत्‌मान हाते मां सी छुड़ावीन वारु करतेलु।
LUK 6:19 आखा माणसे ईसु काजे छीमणे हींडतेला, काहाकी ईसु मां सी ताकत नीकळीन आखा काजे वारु करतेली।
LUK 6:20 ईसु आपसा चेला भीणी देखीन कह्‌यु, बरकतवाळा छे तुहुं, जे हय गरीब छे! काहाकी भगवानेन राज तींद्‌रोत छे।
LUK 6:21 बरकतवाळा छे तुहुं, जे हय भुकला छे! तुहुं आफरी जासु। बरकतवाळा छे तुहुं, जे हींताळ रड़ र्‌या! तुहुं अळी खुस हय्‌न हास्‌सु।
LUK 6:22 बरकतवाळा छे तुहुं, जत्‌यार माणसे तुंद्‌री नाव-बद्‌दी करे, ने तुंद्‌री वात काट देसे, ने तुहुंक नेवाड़ देसे; ने तुहुंक वीटेळ्‌ळा कय्‌न, तुहुंक जात सी बाहर कर देसे। काहाकी तुहुं माणसेन पुर्‌याक ईसुक मानु!
LUK 6:23 जत्‌यार असो हय ती, तुहुं खुस हय्‌न नाच्‌जु, काहाकी सरग मां तुहुंक बेसकु मटु ईनाम जड़से, तुहुंक वेला पाड़न्‌यान आड़ा-बुड़ा बी भगवानेन अघली वात बताड़न्‌या माणसे काजे असात वेला पाड़्‌या करतेला।
LUK 6:24 बाकुन गरा तुंद्‌रे पर; जे हय लकपती छे; काहाकी तुहुं पेहेल सी मजा ली लेदा। ने तुंद्‌रे वाटे काय बी सुक नी बच्‌यु।
LUK 6:25 गरा तुंद्‌रे पर; जे हींताळ आफरला छे, तुहुं अळी भुकला रवसु। गरा तुंद्‌रे पर; जे हींताळ हासी र्‌या! काहाकी तुहुं अळी कलपसु ने कलपी-कलपीन रड़सु।
LUK 6:26 गरा तुंद्‌रे पर; जत्‌यार आखा माणसे तुंद्‌री वात काटे बीगुर, जलम तुहुंक वारु कह्‌वे, काहाकी हींद्‌रा आड़ा-बुड़ा बी भगवानेन नाव लीन लुच्‌चाय मेकण्‌या माणसे काजे, तुहुं बेसका वारु कय्‌न असुत वेहवार करला।
LUK 6:27 “बाकुन मे मारी वात सामळने वाळा काजे कह्‌वो: आपणा दुस्‌मन सी वारु रहु; जे तुंद्‌री कुहराय करे, तींद्‌रो भलो करु।”
LUK 6:28 जे तुहुंक सराप आपे, तीनुक तुहुं बरकत आपु। जे तुंद्‌री वात कहीन तुंद्‌रु अपमान करे तींद्‌रे वाटे दुवा करु।
LUK 6:29 जो तुंद्‌रा एक गाल पर थापड़ देय, तेरे भीणी दीसरु गाल बी फेरवी देजु। जु तुंद्‌रु कुट बी हापके हीनाक आपणु कुरतु बी लेणी देवु।
LUK 6:30 जु तुंद्‌रे धड़े मांगे, ती तीनाक तुहुं आप देजु, ने जु तुंद्‌रे धड़े तारी चीज हापकी लेय, तेरे धड़े पछु मांगणेन हेर मां करु।
LUK 6:31 ने तीना वेहवार काय दीसरा धड़े तुहुं चाहु की चु वेहवार तुहुं दीसरा साते बी कर्‌या करु।
LUK 6:32 कदी तुहुं आपणा परम राखणेवाळा सी परम करु, चे तुहुंक परम करे, ती तुहुंक बरकत जड़से काय? काहाकी पापी माणसे बी तीनु काजे परम करे, जे तीनुक परम कर्‌या करे।
LUK 6:33 कदी तुहुं तींद्‌री भलाय करु, जे तुंद्‌री भलाय करे, ती तुहुंक बरकत जड़से काय? काहाकी पापी माणसे बी, जे तींद्‌री भलाय करे, तींद्‌रोत भलो करे।
LUK 6:34 कदी तुहुं तीनु काजे उधार आपु, जे उधार लेदलो तुहुंक पछो आपी देय, ती हेरेम तुहुंक काय बरकत जड़से? काहाकी पापी बी उधार आप्‌लो चो पछो आप देसे करीन उधार आपे।
LUK 6:35 बाकुन आपणा वेरी सी परम करु, ने तींद्‌री भलाय करु, ने मे काहलाक काजे उधार आपीस, ती चु उधार आप्‌लो चो पछो नी आपे, असी आस करीन उधार आपु। ने तीत तुहुं काजे बेसकु मटु ईनाम जड़से; ने तुहुं आखान डाहला भगवानेन पुर्‌या-पारी बण जासु, काहाकी भगवान तींद्‌रे पर बी दया करे, जे भगवान धड़े सी हात करीन बी भगवान काजे बेसकु वारु छे नी कह्‌वे, ने तींद्‌रे पर बी दया करे, जे कुहराय कर्‌या करे।
LUK 6:36 जसु तुंद्‌रु सरग वाळु भगवान बास दयाळु छे, तसात तुहुं बी दयाळा बणु।
LUK 6:37 ने काहनाक बी नीयाव मां करु, ती तुंद्‌रु नीयाव नी हवे; तुहुं कुय पर गुनु मां लागाड़ु, ती तुंद्‌रे पर बी गुनु नी लागाड़े। दीसराक माफी आपु ती तुहुंक बी माफी जड़ जासे।
LUK 6:38 आपु ती तुहुंक बी भगवान आपसे, दड़पी-दड़पीन ने हालाड़ी-हालाड़ीन भरीन तुंद्‌रा खुळाम पड़से; काहाकी तीना नाप सी तुहुं नापसु तीनीत नापे तुंद्‌रे वाटे बी नापायसे।
LUK 6:39 ईसु तीनुक एक अळी दाखलु दीन सामळायु आंधळु आंदळा काजे वाट देखाड़ सके काय? नी देखाड़ सके। कदी देखाड़से, ती दुय जणा गड्‌डा मां हीट पड़से।
LUK 6:40 चेलु मास्‌तर सी मटु नी हय, बाकुन पुरी-पुरी वात सामळीन चालसे ती चु आपसा मास्‌तरेन तसु बण जासे।
LUK 6:41 जत्‌यार तुहुंक आपसा डुळा अगळ देवायलु डेंगु नी देखायतु, ती तुहुं आपसा भायसेन डुळाम भरायलु कचरु काहा देख र्‌या?
LUK 6:42 जत्‌यार तुहुंक आपसात डुळा अगळ देवायलु डेंगु नी देखायतु ती आपसा भायस काजे कसा कह्‌सु की, भायस! मेसेक तारा डुळाम भरायलु कचरु नीकाळने दे? ए ढंगड़ा करन्‌या! पेहले आपसात डुळा अगळ देवायलु डेंगु छेटे कर ले। तीत तुसेक आपसा भायसेन डुळाम भरायलु कचरु नीकाळने टेमे वारु देखायसे।
LUK 6:43 असो काहनो बी वारलु झाड़को नी हय, तेरेमां रीकामो फळ लागतो हय, ने असो काहनु बी रीकामु झाड़कु नी हय, जो वारलु फळ लावतो हय।
LUK 6:44 आखा झाड़कान उळखाण तींद्‌रा फळ सी हये। काहाकी माणसे काटाळ्‌या झाड़काम सी, अंजीरेन फळ नी तुड़े; ने काटाळ्‌ळा झाड़काम सी अंगुरेन फळ नी तुड़े।
LUK 6:45 भलु माणुस आपसा मन सी भलाय वात नीकाळे; ने भुंडुत माणुस आपसा मन सी कुहरायन वात नीकाळे; काहाकी जो मनेम भरायलो रहे, चीत वात तेरा मुंहडाम सी नीकाळे।
LUK 6:46 “मे जो कह्‌वो च ते तुहुं मान्‌ता नी, ती तुहुं मेसेक ए मालीक, ए मालीक! काहा कय र्‌या?
LUK 6:47 जु मारे साते आवीन मारी वात सामळे ने तीनी वातेक मानीन जीवे, तेरे बारामां मे कह्‌वो की चु कुणीन तसु छे?
LUK 6:48 चु तीना माणसेन तसु छे, जु घर बणावणी टेमे उंडुत पायु खुद्‌यु ने तीना घरेन पायु ढाटा पर सी उठाड़ीन घर बांदीन बणायु। अळी जत्‌यार नदी आवी, ने पाणीन झलक तीना घरेन आफटायु, बाकुन ची झलक तीना घर काजे उदारी नी, काहाकी च घर बेसको पक्‌को बन्‌लो हतलो।
LUK 6:49 बाकुन जु मारी वात सामळे, ने तीनी वात काजे मानीन नी जीवे, चु तीना माणुस जसु छे, चु धुळाम पायु खुदीन पायु बांदे पाखुर, घर बांदीन बणायु, ने पाणीन झलक तीना घरेन आफटायु, ती चो घर तत्‌यारुत उदरी गुयो, ने खत्‌तम हय गुयो।”
LUK 7:1 जत्‌यार ईसु माणसेक आखी वात सामळाय देदु, ने अळी कफरनहुम सहर मां पछु गुयु।
LUK 7:2 चां एक सुबेदार हतलु, तेरु एक पावर्‌यु हतलु, तीना पावर्‌या काजे, चु सुबेदार बेसकु परम करतेलु। चु पावर्‌यु बेसकु जबर मांदु पड़ रवलु, ने चु मरने वाळु हतलु।
LUK 7:3 चु सुबेदार ईसुन बारामां सामळ्‌यु, ने अतराम चु यहुदी माणसेन थुड़ाक डाहलास अदमी वाटे ईसु धड़े असी वीन्‌ती कय मकल्‌यु, तु आय्‌न मारा पावर्‌या काजे वारु करीन बचाड़ ले।
LUK 7:4 चे ईसु धड़े आवीन असी वीन्‌ती कर्‌या, जु सुबेदार बेसकु वारु माणुस छे, अतरे तु तेरी मदत कर।
LUK 7:5 काहाकी हयु हामरा माणसे सी परम करे, ने हामरे वाटे भगवानेन भक्‌तीन घर बणाय मांग्‌लु छे।
LUK 7:6 ईसु तींद्‌रे पुठ्‌ये चाल पड़्‌यु, ने ईसु तेरे घर धड़े पुगणे वाळु हतलु। ती सुबेदार आपसा दुस्‌तीदार्‌यान साहरे ईसु भीणी असो कय मकल्‌यु, “ए मालीक!” तु वेला करीन अगु मां आवे काहाकी मे अतरु मटु नी हय की तु मारा घरेन साहळे आवे।
LUK 7:7 मे असु लग नी समजी गुयु ने तुसेक भेळु हवणे लग नी आयु, बाकुन जात रय्‌न तु एकुत बुल कय दे, ती मारु पावर्‌यु वारु हय जासे।
LUK 7:8 मे बी दीसरान हक मां रवण्‌यु एक नानुस हकदार्‌यु छे। मारा हक मां सीपायड़ा रवे। जत्‌यार मे एक जणा काजे जां कह्‌वो, ती चु जाय ने दीसरा काजे आव कह्‌वो ती चु आवे ने मारा काहनाक पावर्‌या काजे ज कर कहं; ती चु तीना काम काजे करे।
LUK 7:9 जी वात सामळीन ईसु चकराय गुयु ने, चु आपसे पछळ आवतेला माणसे भीणी देखीन असु कह्‌यु, “मे तुहुंक ज कहं की ईस्‌रायेली माणसे मां बी मेसेक अतरु पाक्‌कु भुरसु देखणे नी जड़्‌यु।”
LUK 7:10 ने तीनु माणसे काजे सुबेदार मकेल्‌लु, चे माणसे पछा घर जाय्‌न तीना मांदला पावर्‌या काजे वारलु देख्‌या।
LUK 7:11 दीसरे दाहड़े, ईसु नाईन नावेन सहर मां गुयु। ईसुन चेला ने माणसेन एक मट्‌लु टुळु बी ईसु साते हतली।
LUK 7:12 जसा चे सहरेन बारना धड़े पुग्‌या, तीनुक थुड़ाक माणसे सोवताळ जागा मां आवतेला भेळा हया। चे एक मरला माणसे काजे गाड़ने ली जाणे बाजी रवला। मरलु माणुस एक रांडायली बायरीन एकुत पुर्‌यु हतलु। माणसेन एक मट्‌लु टुळु रांडायली साते हतलु।
LUK 7:13 तीनीक देखीन मालीक ईसु काजे बेसकी दया आवी। ने ईसु तीनीक असु कह्‌यु, “रड़े मां।”
LUK 7:14 तत्‌यार चु सीवड़ी धड़े गुयु ने सीवड़ी काजे धर्‌यु। सीवड़ी हाकलने वाळा उबा रय गुया। तत्‌यार ईसु मरला काजे कह्‌यु, “ए जुवान उठ!”
LUK 7:15 मरलु तत्‌यारुत उठीन बसी गुयु, ने वात करने बाजी गुयु! ईसु तीनाक तेरी मायन सुपरुत कर देदु।
LUK 7:16 आखा माणसे बेसका जबर बीही गुया, चे भगवानेन बड़ाय करता जाय्‌न असा कह्‌या, “भगवान आपसे वाटे माणुस काजे हामरे मां सी उबु करलु छे। छाचलीन भगवान आपसुत, आपसा माणसेक बचाड़ने आवलु छे!”
LUK 7:17 ईसुन ईना वारु कामेन खबर आखा यहुदा जीला मां, ने आड़े-धड़ेन आखा जागा मां जाती रया।
LUK 7:18 युहन्‌नान चेला युहन्‌ना काजे ईनी आखी वातेन खबर आप्‌या।
LUK 7:19 तत्‌यार युहन्‌‌‌नु आपसा चेला मायन दुय चेला काजे बुलायन मालीक ईसु धड़े ज पुछणे मकल्‌यु, “आवणे वाळु मसी तुत छे काय, की हामु काहनाक दीसरान वाट देखजे काय?”
LUK 7:20 ने जे दुय चेला ईसु धड़े आय्‌न कह्‌या, “बपतीस्‌मा आपण्‌यु युहन्‌‌‌नु हामुक तारे धड़े ज पुछणे मकेल्‌लु छे, की आवणे वाळु मसी तुत छे काय, की हामु काहनाक दीसरान वाट देखजे काय?”
LUK 7:21 तीनी टेमे ईसु बेसका मांदला माणसेक, मांदवाड़ मां सी, ने हीड़ा-पीड़ाम सी, ने भुतड़ान आत्‌मान कब्‌जाम सी छुड़ायु; ने बेसका आंदळान डुळा उगाड़ देदु, ने चे देखणे बाजी गुया।
LUK 7:22 ने ईसु युहन्‌नान चेला काजे कह्‌यु, “ज काय तुहुं देख्‌या ने सामळ्‌या, च युहन्‌ना काजे जाय्‌न कय देवु, की आंदळा देखणे बाजी गुया ने, लंगड़ा चालने फीरने बाजी गुया, कुड़ायला वारु हय्‌न चुखा हय गुया; ने मरला जीवता हय गुया, ने गरीब काजे खुस-खबरेन वात सामळावे।
LUK 7:23 ने वारु छे चु, जु मार पर पाक्‌कु भुरसु करे!”
LUK 7:24 बपतीस्‌मा आपण्‌या युहन्‌नान साहरे मकेल्‌ला पछा जात रया, तत्‌यार ईसु बपतीस्‌मा आपण्‌या युहन्‌नान बारामां कह्‌णे बाजी गुयु, तुहुं उजाड़्‌या बयड़ा मां काय देखणे गुयला? वाहळा मां हालतेला सुट्‌या देखणे गुयला काय?
LUK 7:25 कहुं ते खरा! तुहुं काय देखणे गुयला? चमकण्‌या पुथल्‌या पेहरला माणसेक देखणे गुयला काय? देखु, जे चमकण्‌या पुथल्‌या पेहरे ने मुजा मस्‌ती मां रवे, चे माणसे ते मट्‌ली हवेली मां रहे।
LUK 7:26 असो नी हय ती तुहुं काय देखणे गुयला? काहनाक भगवानेन अघी सी आवणे वाळी वात बताड़ने वाळा काजे देखणे गुयला काय? छाचलीन! मे तुहुंक कहं, जतरा बी माणसे भगवानेन अघी सी आवणे वाळी वात बताड़न्‌या हतला, तीनु आखा सी युहन्‌‌‌नु मटु माणुस छे, तीनाक तुहुं देखणे गुयला।
LUK 7:27 ने हयुत युहन्‌‌‌नु छे, तेरा बारामां लिखलो छे, की सामळ! मे मारु काहवाळ्‌यु तारे सी पेहेल मकलीस। चु तारे अगळ तारे वाटे वाट सुदारसे।
LUK 7:28 मे तुहुंक कह्‌वो, माणसे मां बपतीस्‌मा आपण्‌या युहन्‌ना सी मटु कुय नी हय। तेबी, मे कह्‌वो की भगवानेन राज मां, जु आखाम सी नानु छे, चु बपतीस्‌मा आपण्‌या युहन्‌ना सी बी मटु छे।
LUK 7:29 ने आखा माणसे ने फाळु लेण्‌या बी बपतीस्‌मा आपण्‌या युहन्‌नान सामळीन, बपतीस्‌मा आपण्‌या युहन्‌ना धड़े बपतीस्‌मा लेदा ने भगवानेन मरजी पुरी कर्‌या ने भगवान काजे छाचु मान लेदा।
LUK 7:30 बाकुन फरीसी माणसे ने कायदु सीकाड़न्‌या मास्‌तर्‌या, बपतीस्‌मा नी लेदा ने आपसा बारामां भगवानेन मरजी टाळ देदा।
LUK 7:31 बाकुन मे ईनी पीड़ीन माणसे काजे कसु उळखो? ने कुणीन तसा छे करीन कह्‌वो?
LUK 7:32 हीया हाटे मां बठी रवण्‌या पुर्‌यान तसा छे, जे आंबा-सांबा आयड़ीन कहें; की हामु तुंद्‌रे वाटे नाचाड़ने करीन पावळी आजाड़्‌या, ने तुहुं नी नाच्‌या, हामु तुंद्‌रे वाटे रड़ने कलपणेन गीत गाया बाकुन तुहुं नी रड़्‌या।
LUK 7:33 काहाकी बपतीस्‌मा आपण्‌यु युहन्‌‌‌नु रुटु बी नी खादु ने अंगुरेन रस बी नी पीदु, ने तुहुं मेसेक कय रया की हेरे भुतड़ु लाग र्‌यु करीन।
LUK 7:34 अळतेन माणसेन पुर्‌यु बणीन आयु, ने खातु-पीतु आय र्‌यु; ने तुहुं कहुं, देख हयु माणुस; हीजेरलु ने पीण्‌यु छे, ने फाळु लेण्‌यान ने पापी माणसेन दुस्‌तीदार छे।
LUK 7:35 बाकुन भगवानेन अकल, भगवानेन आखा पुर्‌या-पारी वाटे, पुरावा भेळे उजेंती हवणे बाजी रय।
LUK 7:36 काहनुस फरीसी माणसे ईसु काजे आपसे घर खाणेन वीन्‌ती कर्‌यु; ती ईसु तीना फरीसी माणसेन घर आवीन रुटा खाणे बठ्‌यु।
LUK 7:37 ने सामळु, तीना सहरेन एक पापी बायर काजे ज मालुम हय गुयो की ईसु फरीसी माणसेन घर मां रुटा खाणे बाजी र्‌यु। ची चां संगमरमर नावेन दगड़ान ठाहरु मां बेसकी महंग्‌लो ईत्‌तर लीन आवी।
LUK 7:38 ने ची पापी बायर रड़ती जाय्‌न, ईसुन पाय धड़े उभी रय गुय, ने तेरा आसा ईसुन पाये पर चुह्‌वाड़ीन ईसुन पाय काजे भीग्‌वणे बाजी गुय, ने ईसुन पाय काजे आपसा कान्‌या सी नुछी, ने पाये गुळु दीन पाये पर ईत्‌तर लागाड़ी।
LUK 7:39 ज आखो देखीन, फरीसी माणुस, जु ईसु काजे खाणे करीन वीन्‌ती करलु, चु आपसा मन मां कह्‌यु, “कदी जु भगवानेन अघी सी आवणे वाळी वात बताड़ने वाळु माणुस रवतु, ती जु छाचलीन जाणी जातु की, जी बायर हीनाक छीमणे बाजी रय, ची कुण छे, ने कसली छे, हयी ते पापी बायर छे।”
LUK 7:40 तेरा मनेम वात जाणीन ईसु तीना फरीसी माणसे काजे कह्‌यु, “सीमोन, मे तुसे काहींग कह्‌णे हींडो।” चु सीमोन ईसु काजे जपाप आप्‌यु, “ए मास्‌तर, कव।”
LUK 7:41 ईसु कह्‌यु की “काहनाक सवकारेन दुय करजा वाळा हतला, एक जणु पांच सोव रुप्‌यान करजा वाळु हतलु, ने दीसरु पचास रुप्‌यान करजा वाळु हतलु
LUK 7:42 बाकुन तींद्‌रे धड़े मालीक काजे करजु देणे काय नी हतलो, अतराम सवकार दुय जणाक माफी आप देदु। हय मे कहं, तीनु मायन कुण तीना सवकारेक परम करसे?”
LUK 7:43 सीमोन कह्‌यु, “मारी नींगा मां, चु जादात परम करसे जेरु जादा करजु माफ हयु।” ईसु तीनाक कह्‌यु, “तु सय वीच्‌यारीन कह्‌यु।”
LUK 7:44 ने ईसु तीनी बायरी भीणी देखीन, सीमोन काजे कह्‌यु, “ईनी बायरीन बारामां वीच्‌यार ते कर? मे तारे घर आयु, ने तु मेसेक पाय धुवणे, पाणी लग नी आप्‌यु, बाकुन जी मारा पाय आसा सी धुवी ने कान्‌या सी नुछी।”
LUK 7:45 ने तु मेसेक गुळु नी देदु, बाकुन जत्‌यार सी मे ईना घर मां आयु, तत्‌यार सी हय लग, जी मारे पाये गुळा दी रय।
LUK 7:46 ने तु मार मुणका पर जेतुनेन झाड़कान तेल नी चुपड़्‌यु, बाकुन जी मारा पाये पर ईत्‌तर चुपड़्‌ली छे।
LUK 7:47 तेरेसी मे तुसेक कहं, “हेरा बेसका जादा पाप हतला, बाकुन ईनीक माफी जड़ गुय। काहाकी जी बेसकी परम करे। बाकुन तीनाक जाराक माफी जड़ी, चु जाराक परम करे।”
LUK 7:48 ने अळी ज कयदीन ईसु तीनी बायरीक कह्‌यु, “तारा पापेन माफी तुसेक जड़ गुय।”
LUK 7:49 ने तीनी टेम मां जे माणसे ईसु पुठ्‌ये रुटा खाणे बसला, चे आपसा मनेम असा वीच्‌यार करने बाजी गुया की हयु कुण छे, जु पापेन माफी बी आपे?
LUK 7:50 बाकुन ईसु तीनी बायरी काजे कह्‌यु, “तारु भुरसु तुसेक बचाड़ लेदलु छे। ने तु सांती सी जाती रव।”
LUK 8:1 पछेन असो हयो की ईसु भगवानेन राजेन खुस-खबर माणसे काजे सामळावतु जाय्‌न सहर-सहर ने गांव-गांव फीरने लाग्‌यु, ने बारे चेला तेरे पुठ्‌ये हतला।
LUK 8:2 ने थुड़ाक ईसु पर भुरसु करन्‌या बायरा बी हतला, तीनुक ईसु भुतड़ान आत्‌मान कब्‌जाम ने मादवाड़ कब्‌जाम सी छुड़ावीन, ने चां तींद्‌रे मायन, मरीयम, तेरो नाव मगदलनी हतलो, ने तेरेमां सी ईसु सात भुतड़ान आत्‌मा नीकाळलु।
LUK 8:3 ने राजा हेरोदेसेन मंत्‌री खुजान घरवाळी योअन्‌ना ने सुसन्‌ना, बेसका दीसरा बायरा आपसा पयस्‌या आपीन ईसुन ने तेरा चेलान चाकरी करतेला।
LUK 8:4 जत्‌यार बेसकु मटु माणसेन टुळु, भेळु हवणे बाजी रवलु, ने सहर-सहर मां सी माणसे ईसु धड़े आवणे बाजी रवला तीनी टेम मां ईसु ज दाखलु सामळायु:
LUK 8:5 काहनुक किरसाण माणुस बीज एरने गुयु, ने एरता एरतान थुड़ाक बीज वाट पर पड़्‌या। चे बीज माणसेन पाय तळे कुचाय गुया ने सरगेन चिरला आवीन तीनु बीज काजे ईछीन खाय गुया।
LUK 8:6 ने थुड़ाक बीज चापर्‌या वाळी जागाम पड़्‌या। ने पाणी नी जड़्‌यो, अतराम चे उंगी गुया ने चीमायन सुकी गुया।
LUK 8:7 ने थुड़ाक बीज काटासळ्‌या झाड़का मां पड़्‌या, ने काटासळ्‌या झाड़का मटा हय्‌न तीनु उंगला बीजेक दड़पी देदा; ने मेर नी पाकी।
LUK 8:8 ने थुड़ाक बीज वारलु जागाम पड़्‌या, “ने चे उंग्‌या ने सोव गुणा फळ लाया।” अतरो कय दीन अळी ईसु जुर सी आयड़ीन कह्‌यु, “जतरा बी सामळी र्‌या, चे वारु सामळीन समजणु चाहजे।”
LUK 8:9 ईसुन चेला ईसु सी असा पुछ्‌या, “ईना दाखलान मतलब काय छे?”
LUK 8:10 ने ईसु तीनुक कह्‌यु, तुहुं काजे भगवानेन राजेन सातायली वात जाणनेन समज भगवान आपलु छे, पर तुहुंक छुड़ीन दीसरा काजे दाखलान साहरे भगवानेन वात सामळावो, हेरेसी की तीनुक देखीन बी वारु नी देखाये तसों, ने सामळीन बी, नी समजे।
LUK 8:11 दाखलान मतलब ज छे; बीज भगवानेन बुल छे।
LUK 8:12 ने वाटे पर पड़ला बीज तीनु माणसेन सहलाणी छे; जे भगवानेन बुल सामळे ते खरा, बाकुन भुतड़ु आवीन तींद्‌रा मनेम सी भगवानेन बुल ईछी ली जाय, कांखुर मायन असो नी हय जाय की चे भुरसु करीन छुटकारु हात कर लेय।
LUK 8:13 चापर्‌या वाळी जागा पर पड़ला बीज, तीनु माणसेन सहलाणी छे, जे भगवानेन बुल सामळतात खुस हय्‌न मानी लेय, बाकुन तींद्‌रा जड़े उंडा नी धरने सी चे थुड़ाक दाहड़ा लग भुरसु करे, ने पारखणेन टेम आवे, ती भुरसु छुड़ देय।
LUK 8:14 जे बीज काटाळ्‌या झाड़काम पड़्‌या, चे बीज तीनु माणसेन सहलाणी छे, जे भगवानेन बुल सामळे ते खरा, बाकुन अगा जाय्‌न चे ईनी जीवनेन फीकुर मां, ने माल धन कमायणे मां, ने ईनी जीवनेन मुजा मस्‌ती मां भेसकायन ने भगवान आपलु तीनी जीवनेन पुरो फळ नी लावे।
LUK 8:15 ने वारलु जागाम पड़ला बीज, तीनु माणसेन सहलाणी छे, जे भगवानेन बुल सामळीन भुळा ने वारु मन मां जापताये मेले, ने भगवान काजे गमे तसों काम करता जाय्‌न दम धरीन भगवान वाटे जलम पुरो फळ लावे।
LUK 8:16 कुय बी दिवु धपाड़ीन ठाहरा तळे नी मेके, ने नी खाट्‌ली तळे मेके, बाकुन चु तीनाक दीवाळ्‌या मां मेके, तेरे वाटे माहें आवणे वाळा माणसे काजे वीजाळा मां वारु देखाये।
LUK 8:17 असो काय बी सातायलो नी हय, च उजेंतो नी हवे, ने असो काय बी ढाकायलो नी हय, च उजन्‌तो नी हवे।
LUK 8:18 “तेरेमां तुहुं हेरा बारामां चेतीन रहु की तुहुं कसा सामळु? काहाकी जेरे धड़े काहींग छे, तीना काजे अळी बी आप देसे; ने जेरे धड़े काय नी हय, तेरे धड़े जो बी हसे चो बी पछु ली लेसे, तीनाक चु आपणोत समजे।”
LUK 8:19 ईसुन माय ने भाय तीनाक भेळा हवणे आया, बाकुन बेसकी गड़दी हतली, चे तीनाक भेळा नी हय सक्‌या।
LUK 8:20 ने माणसे ईसुक असा कह्‌या, “तारी माय ने तारा भायस बाहर उबा हय रया, चे तुसेक बाहर भेळा हवणे हींडे।”
LUK 8:21 ईसु तीनु माणसे काजे असु कह्‌यु, “मारी माय ने मारा भायस जेत छे, जे भगवानेन बुल सामळे, ने माने।”
LUK 8:22 एक दाहड़ु ईसु आपसा चेला काजे असु कह्‌यु, “चालु आपणु दरीयान पली धड़े जाजे।” ने चे ढंड्‌या मां बस गुया, ने पली धड़े जाणे बाजी गुया।
LUK 8:23 ढंड्‌यो पाणी मां जाणे बाजी रवलो, ने ईसु सुय गुयु; तीनी टेमे दरीया मां आंधी आवी, ने ढंड्‌या मां पाणी भरायणे बाजी गुयो, ने चे आफत मां पड़ गुया।
LUK 8:24 तत्‌यार चेला ईसु धड़े आवीन तीनाक जागाड़्‌या ने कह्‌या, “ए मालीक! ए मालीक! हामु डुबणे बाजी र्‌या।” तत्‌यारुत ईसु जाग गुयु, ने चु आंधी काजे ने दरीयान झलक काजे झीचकार्‌यु, ने आंधी ने दरीयान झलक सेळी पड़ गुय।
LUK 8:25 ने ईसु आपसा चेलाक असु कह्‌यु, तुंद्‌रु भुरसु कां छे? बाकुन चे बीही गुया, ने चे चकराय गुया, ने चे-चेत असा कह्‌या, “जु असु काहनु माणुस छे? चु आंधी ने पाणी काजे लग हुकुम आपे, ने चे हेरी वात माने।”
LUK 8:26 अळी चे ढंड्‌याम सी उतरीन गीरासेन्‌यान ईलाका मां पुग्‌या, ज गलीलेन दरीयान पली धड़े हतलो।
LUK 8:27 ईसु जसु ढंड्‌याम सी उतर्‌यु, तत्‌यार तीना सहर वाळु एक माणुस ईसु धड़े आयु। तेरे बेसका भुतड़ा लागी रवला। ने चु बेसका दाहड़ा सी पुथल्‌या नी पेहरतेलु, ने घर मां नी रवतेलु, बाकुन मसाण्‌या मां रया करतेलु।
LUK 8:28 भुतड़ान आत्‌मा लागली माणुस ईसु काजे देखीन आयड़ी पड़्‌यु, ने पाये पड़ीन जुर सी असु कह्‌यु, “ए आखान डाहला जुर भर्‌या भगवानेन पुर्‌या ईसु! मार साते तारो काय काम छे? मे तारे धड़े लीलघायो की, मेसेक वेला मां पाड़े।”
LUK 8:29 भुतड़ान आत्‌मा तेरे अळी-अळीन चस्‌टी जातला, ने तीना माणसे काजे आपसा कब्‌जा मां कर लेदला; अतरोत नी बाकुन, माणसे तीना माणसे काजे साकळ्‌या ने कड़ा, सी बांदीन कब्‌जाम करतेला, तेबी चु, चे साकळ्‌या ने कड़ा तुड़ देदलु, ने ची आत्‌मा तीना माणसे काजे उजाड़्‌या बयड़ा मां, जां-चां लीन फीरतेला। ईसु भुतड़ान आत्‌मा काजे तीना माणुस मां सी नीकळनेन हुकुम आप्‌यु।
LUK 8:30 ईसु तीना माणसे काजे पुछ्‌यु, “तारो नाव काय छे, चु कह्‌यु ‘सेना’ काहाकी तीना माणुस मां बेसका भुतड़ा भराय रवला।”
LUK 8:31 ने तीना माणसेम भरायला भुतड़ान आत्‌मा, ईसु काजे अळी-अळीन असी वीन्‌ती कर्‌या: हामुक मापाये नी तसला उंडला डहराम जाणेन हुकुम मां आपे।
LUK 8:32 चां बयड़ा पर सुहर्‌यान एक बेसकु मटु टुळु चरने बाजी रवलु। अतरे तीना माणसेम भरायली आत्‌मा ईसु धड़े असी वीन्‌ती कर्‌या, “हामुक सुहर्‌या मां भरायणेन हुकुम आप दे। अतरे ईसु तीनु भुतड़ान आत्‌मा काजे हुकुम आप देदु।”
LUK 8:33 तत्‌यार भुतड़ान आत्‌मा तीना माणुस मां सी नीकळीन सुहर्‌या मां भराय गुया, ने चु सुहर्‌यान टुळु जुर सी ढासीन कड़खाम सी दरीया मां कुद पड़्‌यु ने पाणी मां डुबीन मर गुयु।
LUK 8:34 ज देखीन सुहर्‌या काजे चारने वाळा ढास गुया, ने चे सहरेम ने गांव मां जाय्‌न ज बी हयो तेरे बारामां कय देदा।
LUK 8:35 ने ज हयो च देखणे करीन सहर वाळा माणसे सहरेम सी नीकळीन आया, ने चे ईसु साते आवीन तीना माणसे काजे देख्‌या, तीनाम सी ईसु भुतड़ान आत्‌मा नीका‌ळु हतलु, चु माणुस पुथल्‌या पेहरीन हुगु हय्‌न, ईसुन पाय धड़े बस रवलु। ने चे तीनाक देखीन बीही गुया।
LUK 8:36 चे ज आखो तींद्‌रे डुळे सी देख्‌णे वाळा, चे माणसे काजे आखी वात कह्‌या, की काहनी भाते भुतड़ान आत्‌मा सी भरायलु माणुस वारु हय गुयु।
LUK 8:37 तत्‌यार गीरासेन्‌यान ईलाका वाळा माणसे ने आड़े-धड़ेन आखा माणसे ईसु धड़े असी वीन्‌ती कर्‌या, तु हामरे धड़े सी जात रव, काहाकी चे बेसका बीही गुयला। ने ईसु ढंड्‌याम बसीन जाणे हींडतेलु।
LUK 8:38 बाकुन तीनी टेमे चु वारु हवलु माणुस असी वीन्‌ती कर्‌यु की “मेसेक बी तारे पुठ्‌ये आवणे दे।” बाकुन ईसु तीना माणसे काजे वळावतु जाय्‌न कह्‌यु, “तु तारे घर पछु जात रव, ने भगवान तारे वाटे काय-काय करलु छे च आखो माणसे काजे देखाड़ दे।”
LUK 8:39 ने अळी चु माणुस तेरे घर पछु जात र्‌यु। ने ईसु मार वाटे असो-असो काम करलो छे। करीन आखा सहर मां तत्‌यारुत जाय्‌न परचार करने लाग्‌यु।
LUK 8:40 जत्‌यार ईसु पछु गलील जीलाम आयु, ती माणसे खुस हय्‌न तेरो आव-भाव कर्‌या, काहाकी आखान-आखा तेरी वाट देखी रवला।
LUK 8:41 तीनी टेमे याईर नावेन एक माणुस हतलु, चु भगवानेन भक्‌तीन घरेन मुख्‌यु हतलु, चु ईसु धड़े आवीन ईसुन पाये पर हीट पड़्‌यु ने असी वीन्‌ती कर्‌यु, मारे घर चाल,
LUK 8:42 काहाकी बारेक सालेन तेरी एकुत पुरे हतली, ने ची मरने वाळी हतली। ने ईसु तेरे पुठ्‌ये चाल पड़्‌यु, ने जत्‌यार ईसु जाणे बाजी रवलु, तत्‌यार माणसे तेरे चारे मेर बेसकी गड़दी कर रवला। ने धकलाय्‌न तेरे पर पड़े-पड़े असा हय जातला।
LUK 8:43 ने तीनी टेमे एक बायर बारे साल सी पोगराळा दुख मां वेला कर रवली। ने ची वारु हवणे करीन आखो कमायलो डाक्‌टर्‌या काजे आपीन खरचु कर देदली बाकुन तेबी ची काहना बी डाक्‌टर्‌या सी वारु नी हवी।
LUK 8:44 ची ईसु पछळ आवीन ईसुन पुथल्‌यान कुर छीम लेदी, ने तत्‌यारुत ची पोगराळा दुख, सी वारु हय गुय।
LUK 8:45 ने तत्‌यार ईसु कह्‌यु, “मेसेक कुण छीम्‌यो?” जत्‌यार आखा मे नी छीम्‌यु, मे नी छीम्‌यु, कहीन मना करने बाजी गुय, ती पतरस ने तेरा साती कह्‌या, “ए मालीक! तुसेक मालुम नी हय काय? की चारे मेर सी माणसे तुसेक घेरवी रया, ने तारे पर धकलाय्‌न पड़े-पड़े तसा हय र्‌या।”
LUK 8:46 “बाकुन ईसु तीनुक कह्‌यु, काहनुक ने काहनुक मेसेक छीमलु छे, काहाकी मेसेक मालुम पड़ गुयो की मारेम सी ताकत नीकळ्‌ळी छे।”
LUK 8:47 जत्‌यार बायरी काजे मालुम पड़ गुयो की, मेसेक सातणे नी बणे, ती ची काप‌ती जाय्‌न ईसु धड़े आवीन तेरा पायेम हीट पड़ी ने आखा माणसे अगळ आखी वात कय देदी की ईसुक काहा छीमली, ने हय मे छीमीन तत्‌यारुत वारु बी हय गुय।
LUK 8:48 ईसु तीनीक कह्‌यु, “पुरे, तु भुरसु करी, काहाकी तु वारु हवली छे, ने हय सांती सी जात रव।”
LUK 8:49 ईसु ज कहणे बाजी रवलु तत्‌यारुत काहनुस भगवानेन भक्‌ती करन्‌या घरेन मुख्‌या धड़े आवीन असो कह्‌यु तारी पुरे ते मर गुय। हय तु मास्‌तर काजे परेसान मां करे।
LUK 8:50 बाकुन ईसु ज सामळीन तीना भगवानेन भक्‌ती करन्‌या मुख्‌या काजे कह्‌यु, “बीहे मां, बाकुन भुरसु कर, ने तारी पुरे बची जासे।”
LUK 8:51 चु घर पुगीन पतरस, युहन्‌ना ने याकुप ने तीनी मरली पुरेन आस्‌या-बास्‌या काजे छुड़ीन कुय काजे बी तेरे पुठ्‌ये घर मां नी आवणे देदु।
LUK 8:52 ने तीनी मरली पुरे धड़े आखा रड़ने बाजी रवला, ने तीनी पुरेन करता, आखा माणसे रड़ी-कलपी रवला, तीनुक ईसु कह्‌यु, “रड़ु मां! जी नी मरी, बाकुन सुवणे बाजी रय।”
LUK 8:53 चे माणसे जी वात जाणीन ईसुक हासणे बाजी गुया, काहाकी चे वारु रीती सी जाणतेला, की ची पुरे मर गुयली छे।
LUK 8:54 बाकुन ईसु पुरेन हात धरीन, तीनी पुरे काजे कह्‌यु, “ओ पुरे! उठ!”
LUK 8:55 ने तत्‌यारुत टेम तेरु जीव पछु आय गुयु, ने ची जीवती हय गुय ने तत्‌यारुत ची उठीन उबी हय गुय। ने ईसु तीनी पुरेन माय-बास काजे कह्‌यु, “हीनीक मामार रुटा खावाड़ु।”
LUK 8:56 तेरा माय-बास चकराय गुया, बाकुन ईसु तीनुक कह्‌यु “जां आखो काय हयो च कुय काजे घुण कहुं।”
LUK 9:1 ईसु तीनु बारे चेला काजे बुलायु, ने तीनु आखाक, भुतड़ा काजे ढासाड़ने ने आखा मांदला काजे वारु करनेन ताकत ने हक आप्‌यु।
LUK 9:2 ने अळी ईसु चेला काजे भगवानेन राजेन परचार करने, ने मांदलाक वारु करने, करीन मकल्‌यु।
LUK 9:3 चु तीनुक कह्‌यु, “जत्‌यार तुहुं जावु ती वाट्‌ये वापरने करीन काय बी घुण ली जावु, नी ते डेंगु, नी झुळु, नी रुटा, नी पयस्‌या ने दुय पुथल्‌या घुण ली जावु।
LUK 9:4 तीना बी घर मां जावु, चांहान रवजु; ने मकलने लग चांहान रवजु।
LUK 9:5 कदी माणसे तुंद्‌रो आव-भाव नी करे, ती तींद्‌रा सहरेम सी नीकळनेन टेमे, आपणा पायेन धुळु बी झाटकी देजु।”
LUK 9:6 अतराम चे ईसु धड़े सी जात र्‌या, ने आखी दुर खुस-खबर सामळावता रया, ने माणसे काजे वारु करता जाय्‌न गांव-गांव हींडता र्‌या।
LUK 9:7 गलील जीलान राजा हेरोदेस तीनी आखी वातेन बारामां सामळीन घाबराय गुयु, काहाकी थुड़ाक माणसे कह्‌तेला की बपतीस्‌मा आपण्‌यु युहन्‌ना मर्‌या-सर्‌याम सी पछु जीवतु हय गुयलु छे।
LUK 9:8 ने थुड़ाक माणसे असा कह्‌तेला, एलीयु, देखाय देदलु छे, ने थुड़ाक माणसे असा कह्‌तेला की जु बास दादान टेमे भगवानेन अघी सी आवणे वाळी वात बताड़न्‌या मायन काहनुक जीवतु हय गुयलु छे।
LUK 9:9 बाकुन हेरोदेस असु कह्‌यु, “युहन्‌नान ते मे मुणको काटाड़ देदलु, ने हय ज कुण छे, तेरा बारामां मे असी वात सामळो?” अतरे हेरोदेस ईसु काजे देखणे हेर करतेलु।
LUK 9:10 ईसुन नेवताळा पछा आवीन ज काय कर्‌या च आखो कय देदा, ने अळी ईसु आपसा चेलाक कळ्‌येत अलग करीन बेतसेदा नावेन सहर ली जाती र्‌यु,
LUK 9:11 बाकुन बेसका माणसेन टुळा काजे पतु हय गुयु, ने चे ईसु पछळ चाल पड़्‌या। ईसु खुस हय्‌न तीनुक आव-भाव करीन भेळु हयु, ने भगवानेन राजेन बारामां तींद्‌रे साते वात करने बाजी गुयु, ने जे मांदला काजे ने जे वारु हवणे हींडतेला, तीनु मांदलाक वारु कर्‌यु।
LUK 9:12 दाहड़ु ढळे ने ईसुन बारे नेवताळा ईसु धड़े आवीन तीनाक असा कह्‌या, “जां ते आपणु उजाड़्‌या जागाम छे, ने तीनु माणसेक अळाय दे, ने हया आड़े-धड़ेन गांव मां ने वस्‌तीया जाय्‌न आपसा धड़े रह्‌वणेन ने खाणेन तज्‌बु लागाड़से।”
LUK 9:13 ईसु तेरा चेला काजे कह्‌यु, “तुहुंत माणसे काजे खाणो आपु।” चे असा कह्‌या, “हामरे धड़े ते पांच रुटा ने दुय माछा अतरात छे।” तींद्‌रे वाटे हाटेम जाय्‌न खाणो मुल लावणु पड़से काय?
LUK 9:14 चां पांचेक हजार अदमी हतला। ईसु आपसा चेला काजे असु कह्‌यु, “अलग पचास-पचास माणसेन पंगत बठाड़ देवु।”
LUK 9:15 ने ईसु कह्‌यु तसात चे, तीनु आखा काजे बठाड़ देदा।
LUK 9:16 ने अळी ईसु चे पांच रुटा ने दुय माछा हातेम धर्‌यु, ने सरगे भीणी भाळीन तीनु रुटा वाटे ने माछा वाटे भगवान काजे तु बेसकु वारु कह्‌यु, ने माछा ने रुटा भांजी-भांजीन आपसा चेलाक पंगत मां वाटणे करीन आपतु गुयु।
LUK 9:17 ने आखा माणसे खायलीन आफरी गुया। ने रुटान बचला टुकड़ान बारे चार्‌या भराय गुया।
LUK 9:18 जत्‌यार ईसु एक दाहड़े एक सुन्‌ली जागा मां दुवा करने बाजी रवलु, ने तेरा चेला हेरे पुठ्‌ये हतला। ईसु तीनुक असु पुछ्‌यु, मे कुण छे, “मारा बारामां माणसे काय कहें?”
LUK 9:19 हेरा चेला कह्‌या, “काहना कवे, बपतीस्‌मा आपण्‌यु युहन्‌ना छे; ने काहना-काहना कहें, एलीयु छे; ने काहनाक माणुस असा कहें की जु ते बास दादान टेमेन एक भगवानेन अघी सी आवणे वाळी वात बताड़ने वाळु जीवतु हय र्‌यु।”
LUK 9:20 ईसु तीनुक अळी पुछ्‌यु, “तुहुं मेसेक काय कह्‌वु की मे कुण छे?” पतरस कह्‌यु, “तु भगवान मसी छे।”
LUK 9:21 तत्‌यार ईसु आपसा चेलाक चेताड़ीन असु कह्‌यु, “तुहुं जी वात काहनाक घुण कह्‌वु।”
LUK 9:22 ईसु आपसा चेला काजे असु कह्‌यु, “मे माणसेन पुर्‌यु बणीन आय र्‌यु, ने मेसेक दुख झेलनु छे; डाहला ने भगवानेन डाहला पुजारा ने यहुदी-सास्‌तुर सीकाड़न्‌या माणसेन पुर्‌या काजे हेटु समजीन मार नाख्‌से, बाकुन तीनाक तीन दाहड़ा मां जीवतु हय्‌न बठु हवणु छे।”
LUK 9:23 ईसु हेरे पछळ आवणे वाळा आखा काजे असु कह्‌यु, “कदी काहनुक मारे पछळ आवणे हींडे, ती आपणु नीकारु करनु पड़से। ने दाहड़ीन आपसु कुरुस हाकलीन मार पछळ आवणु पड़से।
LUK 9:24 काहाकी जु आपसु जीव बचाड़ने हींडे, चु तीनाक खुय देसे ने जु मारे वाटे आपसु जीव खुय देय, चु तीना जीव काजे बचाड़ लेसे।
LUK 9:25 कदी माणुस आखी कळीक हात कर लेय, ने आपसु जीव खुय देसे, नी ते आपसा जीवन नुकसाण हय, ती काय नफु जड़से?
LUK 9:26 कदी काहनुक मेसेक ने मारी वात काजे हव करीन मान्‌ने मां लाजवाय्‌से; ती माणसेन पुर्‌यु आवण्‌यु बी तीनाक, तीने दाहड़े तीनाक लाजवाड़से, जत्‌यार चु आपसान, ने आपसा बासेन चुखला सरग वाळा काहवाळ्‌यान सेक-सींगार भेळु आवसे।
LUK 9:27 मे तुहुंक छाचलीन कहो की जां उबा हय र्‌या, तीनु माणसे मायन थुड़ाक असा माणसे छे, जे भगवानेन राज काजे देखे नी चां लग नी मरे।”
LUK 9:28 ईसु ज कय देदु ने अळी, आठेक दाहड़ाम, पतरस, युहन्‌ना ने याकुप काजे पुठ्‌ये लीन एक बयड़ा पर दुवा करने करीन चहड़्‌यु।
LUK 9:29 ने जत्‌यार ईसु दुवा करने बाजी रवलु, तत्‌यार ईसुन मुंहडान सीकु बदली गुयु, ने तेरा पुथल्‌या धवळा हयन, चमकणे बाजी गुया।
LUK 9:30 चे दुय अदमी मुसु ने एलीयु हतला, ने ईसु साते वात करने बाजी गुया।
LUK 9:31 ने उचकाणुन, दुय अदमी सेक-सींगार भेळा देखाय देदा, ने भगवानेन मरजीन अनसारे यरुसलेम मां हवणे वाळी ईसुन मरनेन बारामां वात वीच्‌यार करने बाजी रवला।
LUK 9:32 बाकुन पतरस ने पतरसेन साती जे घुर्‌राटीन सुवणी बाजी रवला, चे हय पुरा जाग गुया, ती चे ईसुन सेक-सींगार काजे ने तीनु दुय अदमी काजे देख्‌या, जे ईसु पुठ्‌ये उबा हय रवला।
LUK 9:33 ने जत्‌यार मुसु ने एलीयु ईसु धड़े सी जाणे बाजी गुया, ती पतरस मन मां वीच्‌यार करे पाखुर उचकाणुन ईसु काजे असु कय देदु, “मालीक! जां रवणु हामरे वाटे कतरो वारु छे! हामु तीन तम्‌बु ताणीन उबा कर देजे एक तारे वाटे, एक मुसा वाटे ने एक एलीया वाटे।”
LUK 9:34 चु पतरस ज कह्‌णे बाजी रवलु, ती आदळो आय्‌न तींद्‌रे पर छावाय गुयो, ने चे आदळाम घेराय गुया करीन बीही गुया।
LUK 9:35 ने चे तीना आदळाम सी जे बुल सामळ्‌या, “हयुत मारु लाटेक्‌लु पुर्‌यु छे, ने हयुत मारु नेवाड़लु पुर्‌यु छे, तुहुं हेरी सामळीन मानु।”
LUK 9:36 जे बुल सामळायणु बंद हय गुयो ने अळी चां ईसु एखलु रय गुयु; ने चेला ज देखीन चेला हुगात रय गुया, ने चे ज काय बी देखला, तेरे बारामां, चे तीनु दाहड़ाम काहनाक बी नी कया।
LUK 9:37 दीसरे दाहड़े जत्‌यार चे बयड़े सी उतर्‌या, ती एक बेसकु मटु माणसेन टुळु ईसुक भेळु हवणे आयु।
LUK 9:38 ने देखु, एक माणुस तीना टुळाम सी आयड़ीन कह्‌यु, “मास्‌तर! मे तारे धड़े असी वीन्‌ती करो, मारा पुर्‌या पर दया करीन मदत कर, हयु मारु एकुत पुर्‌यु छे।
LUK 9:39 उचकाणुन, हेरे भुतड़ान आत्‌मा चस्‌टी जाय, ने हयु उचकाणुन आयड़ी पड़े; ने भुतड़ान आत्‌मा हीनाक पीळ्‌ळीन नस्‌टा खाची देय, ने ईना पुर्‌यान मुंहडाम सी फेसकड़ु आय जाय; ने हीनाक रंदळी रंदळीन एला पाड़े!
LUK 9:40 ने मे तारा चेला धड़े असी वीन्‌ती करलु, मारा पुर्‌याम सी भुतड़ु नीकाळ दे; बाकुन तीनुक भुतड़ु नीकाळते नी आयो।”
LUK 9:41 ईसु जपाप आपीन असु कह्‌यु, “ए नी भुरसु करने वाळा ने नी मानने वाळा माणसे मे कां लग तुंद्‌रे पुठ्‌ये रवीस ने तुंद्‌री वेठतु रवीस? तारा पुर्‌याक जां ली आव।”
LUK 9:42 पुर्‌यु ईसु धड़े आवणे बाजी रवलु, ने भुतड़ान आत्‌मा तीनाक भुयमां आसटी देदु, ने मुयड़ीन नस्‌टा खेच देदु, बाकुन ईसु भुतड़ान आत्‌मा काजे झीचकार्‌यु, ने ईसु तीना पुर्‌याक वारु करीन आपसा बासेन हातेम पछु आप देदु।
LUK 9:43 ने भगवानेन जुरभरी ताकत देखीन आखा माणसे चकराय गुया। तत्‌यार आखा माणसे ईसुन छेल भात्‌या काम काजे देखीन चकरायणे बाजी रवला; तत्‌यार ईसु आपसा चेलाक कह्‌यु,
LUK 9:44 “मे ज कहो च वारु हेर राख्‌जु, काहाकी माणसेन पुर्‌यु माणसेन हाते हय्‌न धरायणे वाळु छे।”
LUK 9:45 बाकुन जी वात चेला काजे समज मां नी आय। जी वात तींद्‌रे सी सातायली रय, ने ज तीनुक समजाय तेलो नी। ने हेरा बारामां ईसु काजे पुछणे सी चे बीहतेला।
LUK 9:46 बाकुन आखा चेला असा पुछीन वातेम जखड़ी पड़णी बाजी गुया, “आपणे मां आखाम मटु कुण छे?”
LUK 9:47 ने ईसु तींद्‌रा मनेम वीच्‌यार काजे जाण लेदु, ने एक पुर्‌या काजे साते बुलायु, ने तींद्‌रे अगळ उबु कर्‌यु।
LUK 9:48 ने तीनु चेलाक असु कह्‌यु, “ज कुय मार नाव सी ईना पुर्‌यान आव-भाव करे, च मारो आव-भाव करे, ने ज मारो आव-भाव करे, च तेरो आव-भाव करे, जु मेसेक मकेल्‌लु छे काहाकी ज तुंद्‌रे मां आखाम नानलु छे, चु आखाम सी मटु छे।”
LUK 9:49 युहन्‌ना कह्‌यु, “ए मालीक! हामु एक माणसेक तारे नाव सी भुतड़ाक नीकाळतेला देखला ने हामु तीनाक कह्‌या, तु हामरे पुठ्‌ये चाल, बाकुन चु हामरे पुठ्‌ये आवणे नी हींडतेलु, ने हामु तीनाक कह्‌या, ईसुन नाव सी भुतड़ाक मां नीकळे।”
LUK 9:50 ईसु युहन्‌नाक ने दीसरा चेलाक असु कह्‌यु, “तीनाक घुण रुकु काहाकी, ज तुंद्‌री वीरुद नी करे, च तुंद्‌रे अळु छे।”
LUK 9:51 जत्‌यार ईसुन सरगे जाणेन टेम आय गुया, ती ईसु यरुसलेम सहर जाणेन पाक्‌कु वीच्‌यार करीन जाणे बाजी गुयु।
LUK 9:52 ने चु काहवाळ्‌यु तेरे अगळ मकल्‌यु; ने चे ईसुन रवणेन तज्‌बु करने, करीन सामरीया माणसेन एक गांव मां भराया।
LUK 9:53 बाकुन सामरीया जीलान तीना गांव वाळा माणसे ईसुन आव-भाव नी कर्‌या, काहाकी ईसु चां मायन यरुसलेम सहर मां भगवानेन भक्‌ती करने जाणे बाजी रवला।
LUK 9:54 ने हेरा चेला याकुप ने युहन्‌‌‌नु ज देखीन असा कह्‌या, “ए मालीक! तु कहें ती हामु ज कय देजे की सरगे सी आकठी पड़ जां, ने हीनुक खत्‌तम कर दे।”
LUK 9:55 बाकुन ईसु पछु फीरीन तीनुक लड़्‌यु, ने असु कह्‌यु, तुहुं काहनी आत्‌मान साहरे असो कह्‌णे बाजी र्‌या, जो तुहुंक मालुम नी हय काय? माणसेन पुर्‌यु ते माणसेक मारने नी बाकुन बचाड़ने आवलु छे।
LUK 9:56 ने अळी चे आखा, दीसरा गांव मां जात र्‌या।
LUK 9:57 जत्‌यार ईसु ने तेरा चेला वाट्‌ये-वाट्‌ये जाणे बाजी रवला, तत्‌यार काहनुस ईसु धड़े आवीन ईसुक असु कह्‌यु, “तु जां जासी चां, मे बी तारे पुठ्‌ये-पुठ्‌ये आवीस।”
LUK 9:58 ईसु कह्‌यु, “फुंदाळी खुखड़ी रहणे वाटे तींद्‌रा दर छे, ने सरगेन चिरला वाटे रह्‌वणे करीन तींद्‌रा पुत्‌रा छे, बाकुन माणसेन पुर्‌या वाटे मुणको मेल्‌ने लग जागा नी हय।”
LUK 9:59 काहनाक दीसरा काजे ईसु कह्‌यु, “मारे पछळ आव।” बाकुन चु कह्‌यु, “ए मालीक! मेसेक पेहेल मारा बासेक गाड़ी आवणे दे।”
LUK 9:60 ईसु तीनाक कह्‌यु, “तु जाय्‌न भगवानेन राजेन खुस-खबर सामळाव। मरला काजे आपणा मरला काजे गाड़नी दे।”
LUK 9:61 एक अळी दीसरु आवीन ईसुक कह्‌यु, “ए मालीक! मे तारे अनसारे चालीस, बाकुन मेसेक पेहले मारा घरन्‌या माणसेक अळाय आवणे दे।”
LUK 9:62 ईसु तीनाक कह्‌यु, “जु कुय हळ जुपणे करीन हळ धर लेय ने अळी पछु फीरीन देखे, चु भगवानेन राजेम भराये असो नी हय सके।”
LUK 10:1 हेरे पछळ मालीक सत्‌तर चेला काजे नेवाड़्‌यु, जीनु-जीनु सहरेम ने गांव मां चु आपसु जाणे वाळु हतलु, चां दुय-दुय जणा काजे आपसा अगळ मकली देदु।
LUK 10:2 ने चु तीनुक कह्‌यु, “मेर ते बेसकी छे, बाकुन दाहड़क्‌या थुड़ाक छे; अळी खेतेन मालीक भगवान धड़े असी वीन्‌ती कर्‌यु, तु आपसी मेर काटणे करीन दाहड़क्‌या काजे मकली दे।”
LUK 10:3 मे तुहुंक लेंड्‌यान ईचमां गाडरान तसु मकलो।
LUK 10:4 अळी तुंद्‌रे मायन कुय बी बटवु, ने थयलि, ने खासड़ा घुण ली जावु ने वाटे मां कुयबी वारु छे की करीन घुण कह्‌वु।
LUK 10:5 तीना बी घर मां भरायसु, ती आखान पेहले ज कह्‌जु, ईना घर मां सुक-सांती आवणु चाहजे।
LUK 10:6 कदी चां कुय काजे सुक-सांती चाहती हय, ती तीना पर तुंद्‌री सुक सांती रवसे, नी ते ची सुक-सांती तुंद्‌रे धड़े पछी आवती रवसे।
LUK 10:7 तीनात घर मां बठी रवजु ने तेरे धड़े जो हय, चो खाजु-पीजु; काहाकी दाहड़क्‌या काजे दाहड़कीन हक छे। ईने घर ने पले घर घुण जावु।
LUK 10:8 तीना सहरेम जासु ने जे माणसे तुंद्‌रो आव-भाव करसे ने जो काय तुहुंक खाणे आपसे, चो खाय लेजु।
LUK 10:9 चां वाळा मांदला माणसेक वारु करजु, ने तीनुक कवजु, भगवानेन राज तुंद्‌रे धड़े आय लागलो छे।
LUK 10:10 बाकुन कदी तुहुं काहना सहरेम जावु ने माणसे तुंद्‌रो आव-भाव नी करे, ती तींद्‌रा हाटेम जाय्‌न असा कह्‌जु,
LUK 10:11 हामरा पायेम लागलु तुंद्‌रा सहरेन धुळु लग हामु तुंद्‌रे अगळ झाटकी देजे। तेबी तुहुं ज जाण लेजु की भगवानेन राज तुंद्‌रे धड़े आय लागलो छे।
LUK 10:12 मे तुहुंक ज कहो, नीयावेन दाहड़े सदोम सहरेन माणसे सी तीना सहरेन माणसेक जादा डंड जड़से।
LUK 10:13 ए खुराजीन सहरेन माणसे! तुंद्‌रे पर सराप पड़े! ए बेतसेदा सहरेन माणसे! तुंद्‌रे पर सराप पड़े! जे चकराये असा बेसका वारु काम तुंद्‌रेम हवलो छे, कदी च काम सुर सहरेम ने सेदा सहरेम रवण्‌या माणसेन ईचमां हवतो, ती चे काय कत्‌यारुन गंटाट्‌या पांगरीन ने आपसा डीले पर रखड़ु चुपड़ीन आपसा पाप भीणी सी मन फेरवीन भगवान भीणी हय जाता।
LUK 10:14 बाकुन नीयावेन दाहड़े सुर सहरेन ने सेदा सहरेन कुहर्‌या माणसे सी तुहुंक अदुस डंड जड़से।
LUK 10:15 ने ए कफरनहुम सहरेन माणसे! सरगे लग उचा हाकलाय जासु काय? नी, बाकुन तुहुं पाताळेम लग नेचा धकलाय जासु?
LUK 10:16 “जे तुंद्‌री सामळीन माने, चे मारी सामळीन माने, ने जे तुंद्‌रु नीकारु करीन तुहुंक नेचा समजे, चे मारु नीकारु करीन मेसेक नेचा समजे। ने जे मारु नीकारु करीन मेसेक नेचा समजे, चे तीना सरग वाळा बास भगवानेन नीकारु करीन तीनाक नेचु समजे, जु मेसेक मकेलु छे।”
LUK 10:17 सत्‌तर ने दुय चेला खुस हय्‌न पछा आया ने असा कह्‌या, “ए मालीक! तार नाव सी भुतड़ान आत्‌मा लग हामरा हुकुम काजे मानीन हामरा हक मां हय जाय।”
LUK 10:18 ईसु तीनुक असु कह्‌यु, मे, भुतड़ा काजे वीजळीन तसु सरगे सी नेचु पड़तेलु देख रवलु।
LUK 10:19 सामळु! मे तुहुंक घड़सा काजे ने ईछा काजे पाये तळे कुचरनेन हक आपलु छे, ने मे तुहुंक वेरी भुतड़ान आखा जुर पर बी हक आपलु छे। ने काहने बी भात्‌ये तुंद्‌रो नुकसाण नी हवे।
LUK 10:20 बाकुन तेबी भुतड़ान आत्‌मा तुंद्‌रु हुकुम मानीन तुंद्‌रा हक मां छे, करीन तुहुं खुस घुण हवजु, बाकुन भगवान तुंद्‌रु नाव सरगेम लिख र्‌यु, करीन खुस हवजु।
LUK 10:21 तीनेत टेमे चुखली-आत्‌मान साहरे ईसु बेसकु खुस हय गुयु, ने कह्‌यु, “ए बास! सरग ने धरतीन मालीक! मे तारा नावेन गुण गावो, काहाकी तु ईनी आखी वात काजे अक्‌कल वाळान ने हुनर वाळा सी सातीन मेल रयु, ने डेड़-अकल्‌या पुर्‌या अगळ उजेंती कर्‌यु। हव, ए बास! तुसेक ज वारु लागे।
LUK 10:22 “मारु भगवान बास मेसे आखो काय आप देदलु छे। बाकुन भगवान बासेक छुड़ीन ज कुय बी नी जाणे की पुर्‌यु कुण छे, ने पुर्‌या काजे छुड़ीन कुय बी नी जाणे की भगवान बास कुण छे। बाकुन चे माणसे अतरात जाणसे तीनुक पुर्‌यु जी वात उजेंतु कर देसे।”
LUK 10:23 तत्‌यार ईसु चेला भीणी पछु फीरीन कळ्‌येन तीनुक कह्‌यु, की तुंद्‌रेन तसा ईनी वात काजे देखणेवाळा बरकतवाळा छे।
LUK 10:24 काहाकी मे तुहुं काजे कहो की, जी वात तुहुं देख्‌या ने सामळ्‌या चे बेसका खरा भगवानेन अघी सी आवणे वाळी वात बताड़ने वाळा ने राजा देखणे ने सामळने हींडतेला बाकुन चे नी देख्‌या ने नी सामळ्‌या।
LUK 10:25 ने एक दाहड़ु यहुदी सास्‌तुर सीकाड़न्‌यु ईसु धड़े आयु, ने ईसुक पारखणे करीन चु ज पुछ्‌यु, “ए मास्‌तर! अमर जीवाय हात करने करीन मे काय करो?”
LUK 10:26 ईसु तीनाक जपाप आप्‌यु, मुसान चुखला सास्‌तुर मां काय लिखलो छे, तु काय भन्‌यु ने समजु।
LUK 10:27 यहुदी-सास्‌तुर सीकाड़न्‌यु जपाप आप्‌यु, “की तु आपणा मालीक भगवान काजे आपणो आखो लागाड़ीन, ने आपणो आखो जीव, लागाड़ीन, ने आपसु आखु जुर लागाड़ीन, ने आपसी आखी अक्‌कल लागाड़ीन परम कर। ने तार साते वाळा सी आपणेन तसु परम कर।”
LUK 10:28 ईसु तीनाक असु कह्‌यु, “तु वारु जपाप आप्‌यु, चत कर, ती तुसेक अमर जीवाय जड़से।”
LUK 10:29 बाकुन चु यहुदी-सास्‌तुर सीकाड़ने वाळु आपसाक धरमी कह्‌वाड़नेन हेर करीन ईसुक दीसरु सवाल पुछ्‌यु, “मार धड़े वाळु कुण छे?”
LUK 10:30 ईसु तेरा सवालेन जपाप मां तीनाक जी काहनी सामळायु, “एक दाहड़ु एक माणुस यरुसलेम सी यरीहो सहर भीणी जाणे बाजी रवलु। वाट्‌ये डाकु तेरे धड़े सी पेहरला पुथल्‌या हापकी लेदा ने तीनाक बेसका ठुक्‌या, ने अदमरतु नाखदीन जात र्‌या।”
LUK 10:31 ने अळी एक पुजारु तीने वाट्‌ये नीकळ्‌यु ने चु तीना माणुस काजे देख्‌यु ती चु टळीन अगु जात र्‌यु।
LUK 10:32 अळतेन एक लेवी बी तीने वाट्‌ये मायन नीकळ्‌यु। जत्‌यार चु तीना माणुस काजे देख्‌यु, ती धड़े आयु, ने तेरे भीणी मामार देख्‌यु। ने चु बी आडु देखीन अगुत जात र्‌यु।
LUK 10:33 हय एक तीसरु माणुस चां आयु, चु आपणा माणसे मायन बी नी हतलु। बाकुन चु सामरी जीलान एक अंजाण्‌यु माणुस हतलु। जत्‌यार चु लुटायला माणसेक देख्‌यु तत्‌यार चु तेरे पर दया कर्‌यु।
LUK 10:34 चु तेरे धड़े आयु, तेरा घाव पर अंगुरेन रस लागाड़्‌यु ने तेल चुपड़ीन पट्‌टी बांद्‌यु। ने अळी चु तीना माणुस काजे आपसा गदड़ा पर बठाड़ीन एक धरम साळा मां ली गुयु, चां चु अळी तेरी सेवा-चाकरी कर्‌यु।
LUK 10:35 दीसरे दाहड़े चु धरम-साळान मालीक काजे दुय रुप्‌या आपीन कह्‌यु, “ईना माणसेन वारु चाकरी करजी ने कदी जादा रुप्‌या लागे ती मे पछु आवणेन टेमे तुसेक आप दीस।”
LUK 10:36 ईसु जी काहनी पुरी कय्‌न तीना यहुदी-सास्‌तुर सीकाड़ने वाळा काजे पुछ्‌यु, तीनु तीन माणसे मायन कुण तीना डाकुन साहरे ठुकायला माणसेक खरलु परम देखाड़ीन धड़े वाळु बण्‌यु, “तीनाक चुट्‌टा लुट लेदला?”
LUK 10:37 यहुदी सास्‌तुर सीकाड़न्‌यु, जपाप आप्‌यु, “जु तेरे पर दया कर्‌यु, चु तीना डाकुन साहरे ठुकायला माणसेक खरलु परम देखाड़्‌यु।” ईसु तीनाक कह्‌यु, “जां ने तु बी तेरेन तसुत कर।”
LUK 10:38 ईसु वाट्‌ये चालतु-चालतु एक गांव मां गुयु, ने मारथा नावेन एक बायर ईसु काजे आपसे घर ली जाय्‌न आव-भाव करी।
LUK 10:39 ने मारथान एक बहणीस हतली तेरो नाव मरीयम हतलो, ची मालीक ईसुन पाय मां बसीन तेरी वात सामळतेली।
LUK 10:40 बाकुन मारथा काम करी-करीन घाबराय रवली। ती ची ईसु धड़े आवीन असी कही, “ए मालीक! तुसे मारी ईतरीक बी फीकुर नी हय काय, मार बहणीस आखो काम करने वाटे मेसे एखलीत छुड़ देदी। तीनीक कय दे की, मारी मदत करे।”
LUK 10:41 मालीक ईसु तीनीक जपाप आप्‌यु, “ए मारथा! ए मारथा! तु बेसकी वातेन बारामां फीकुर ने हरबड़ करने बाजी रय।
LUK 10:42 बाकुन तारेम एक वातेन कसर छे, ने मरीयम तीनी एक वारलु वातेक नेवाड़ लेदली छे, जी वात तेरे धड़े सी कुय नी हापके।”
LUK 11:1 एक कावा ईसु दुवा करने एक जागा पर दुवा करने बाजी रवलु। ने जत्‌यार चु दुवा कर लेदलु, ती तेरा चेला मायन एक चेलु तीनाक असु कह्‌यु, “ए मालीक ईसु! जसु बपतीस्‌मा आपण्‌यु युहन्‌‌‌नु आपसा चेलाक दुवा करने सीकाड़्‌यु। तसुत तु बी हामुक दुवा करने सीकाड़।”
LUK 11:2 ईसु तीनु चेलाक कह्‌यु, जत्‌यार तुहुं दुवा करु, ती तीनी टेमे असा दुवा करजु: ए भगवान बास: तारो नाव चुखलो मानायणु चाहजे; आखा माणसेम तारो राज आवणु चाहजे।
LUK 11:3 दाहड़ीन, हामुक चाहजे ततरोत खाणो हामु काजे आप्‌या कर।
LUK 11:4 ने हामरा पाप काजे माफ कर, काहाकी हामु बी हामरा गुनेगार काजे माफ कर्‌या। अळी हामुक पारख मां घुण पाड़े।
LUK 11:5 ईसु तीनुक अगु कह्‌तु गुयु, “मान लेवु की, कदी तुंद्‌रे मायन कुयन एक दुस्‌तीदार साते हय, ने तु तेरे भीणी आधली राते तेरे धड़े जाय्‌न कह्‌वे, ए दुस्‌तीदार, मेसे तीन रुटा उधार लाय्‌न दे।”
LUK 11:6 काहाकी मारु एक दुस्‌तीदार बेसके नांबे सी मेजवान्‌यु आवलु छे, तीनाक ते खावाड़ने वाटे मारे धड़े काय बी रुटा नी हय।
LUK 11:7 ने चु घरमां सी जपाप आप्‌यु की, मेसे दुख मां देय, हय ते बारनो बंद छे, ने पुर्‌यु बी मारे भेळु सुवणे बाजी र्‌यु। तेरेसी मे उठीन तुसे काय बी नी आप सको।
LUK 11:8 मे तुंद्‌रे सी कहो की, चु तेरु दुस्‌तीदार हवणे पर बी तीनाक उठीन नी आपे। ती बी सरम छुड़ीन मांगणेन वजे सी तीनाक जतरा रुटान जरुवत छे, ततरा रुटा उठीन आपसे।
LUK 11:9 मे तुहुंक कहो की, मांगसु ती तुहुंक आपसे। ने हेरसु ती तुहुंक जड़ी जासे। ने बारनो ठुकसु ती तुंद्‌रे वाटे उघड़ी जासे।
LUK 11:10 काहाकी जत्‌यार जु कुय मागंसे, ती तीनाक आपसे। जे कुय हेरसे ती तीनाक जड़ी जासे। ने जु कुय बारनो ठुकसे, तेरे वाटे खुली जासे।
LUK 11:11 “मान लेवु, तुहुं एक बास छे ने तुंद्‌रु पुर्‌यु तुंद्‌रे धड़े माछा मांगे, ती काय तुहुं तीनाक घड़सु आपसु?
LUK 11:12 कदी चु तुंद्‌रे धड़े आंडा मांगे, ती काय तुहुं तीनाक ईछु आपसु।
LUK 11:13 कदी तुहुं भुंडा हय्‌न बी तुंद्‌रा पुर्‌याक वारलु चीज आपणे जाणु, ती सरगेन बास आपणा मांगणे वाळाक चुखली-आत्‌मा काहा नी आपे? चु मांगणे वाळाक आपसे।”
LUK 11:14 ईसु एक गुंगा करने वाळी भुतड़ान आत्‌मा काजे नीकाळने बाजी रवलु। भुतड़ान आत्‌मा नीकळी गुय ती गुंगड़ु बुलने बाजी गुयु। तीनाक देखीन माणसे चकराय गुया।
LUK 11:15 बाकुन तुंद्‌रे मायन थुड़ाक माणसे कह्‌या, की जुते भुतड़ान मुख्‌या बालजबुलेन मदत सी भुतड़ान आत्‌मा काजे नीकाळे।
LUK 11:16 थुड़ाक माणसे ईसु काजे पारखणे वाटे तेरे सी सरगेन एक सहलाणी मांग्‌या।
LUK 11:17 ईसु तींद्‌रा मनेन वीच्‌यार जाणीन तीनुक कह्‌यु, तीना देस मां बेरजु पड़ जाय, ती च देस टीक नी सके ने, उजड़ी जाय, ने तीना घर मां झगड़ु हय जाय, ती च घर खत्‌तम हय जाय।
LUK 11:18 कदी भुतड़ु आपसान वीरुद करने बाजी जाय ती, भुतड़ान राज कसु चालसे? थुड़ाक सुचु ते खरा, काहाकी तुहुं मार बारामां ज कय र्‌या की तु भुतड़ान मदत सी भुतड़ान आत्‌मा काजे नीकाळ र्‌यु।
LUK 11:19 कदी मे भुतड़ान मदत सी भुतड़ान आत्‌मा काजे नीकाळो, ती तुंद्‌रा पुर्‌या कुणीन मदत सी भुतड़ान आत्‌मा काजे नीकाळे? हेरेसी चेत तुंद्‌रु हीसाब लीन तुंद्‌रु नीयाव करसे।
LUK 11:20 बाकुन कदी मे भगवानेन ताकत सी भुतड़ान आत्‌मा काजे नीकाळो, ती तुहुं हय ज जाण लेवु की भगवानेन राज तुंद्‌रे ईचमां आय गुयलो छे।
LUK 11:21 “जत्‌यार एक ताकतवाळु माणुस हत्‌यार हातेम लीन तेरा घरेन राखवाळी करे, ती तेरो माल-धनेक चुट्‌टा नी ली जाय, ने तेरो आखो माल-धन बच रवे।”
LUK 11:22 बाकुन कदी कुय तेरे सी जादा ताकतवाळु माणुस दवड़ीन तेरे धड़े आवीन तेरे साते लड़ाय करीन तीनाक जीत लेय, ने तीना ताकतवाळा माणुस धड़े सी, च आखो हत्‌यार हापकी लेय, तीनु हत्‌यार पर चु भुरसु करतेलु, ने तेरो माल-धन लुटीन दीसरा माणसे वाटी देय।
LUK 11:23 “जु मारे पुठ्‌ये नी हय, चु मारु वीरुद मां छे, ने जु मारे साते भेळो नी करे, चु खुय देय।”
LUK 11:24 जत्‌यार भुंड्‌ली भुतड़ान आत्‌मा काहनाक माणुस मां सी नीकळीन जाय, ती चु आराम करने करीन, सुकला जागाम, जागा हेरती हींडे, ने जत्‌यार आराम करनेन जागा नी जड़े ती ची कह्‌वे की मे मारा तीना घर मां पछी जाती रय्‌स, चां सी नीकळीन आवली छे।
LUK 11:25 ने चु भुतड़ु पछु आवीन देखे ती तीनाक च घर झाटकीन बाहरलो ने सींगारलो देखे।
LUK 11:26 ती ची भुंड्‌ला भुतड़ान आत्‌मा पछी जाती रवे ने जाय्‌न तेरे पुठ्‌ये सात कुहर्‌या भुतड़ा काजे भेळा करीन ली आवे। ने तीनु माणसेम आवीन भराय जाय ने चु माणुस पेहले सी बी जादा बीगड़ी जाय,
LUK 11:27 ईसु जी वात कह्‌वणे बाजी रवलु, तत्‌यार गड़दी मां सी काहनीक बायर ईसु धड़े आवीन जुर सी आयड़ीन, कय की तुसे पयदा करीन मटु करने वाळी, “बरकतवाळी छे ने चे धाया जे तु धायु।”
LUK 11:28 बाकुन ईसु तीनी बायरीक कह्‌यु, “हव, तु वारलु वात कय; बाकुन चे जादा बरकतवाळा छे, चे भगवानेन वात सामळीन तेरी माने।”
LUK 11:29 जत्‌यार तेरे चारेमेर बेसका माणसे भेळा हय गुया, तत्‌यार ईसु कह्‌णे बाजी गुयु, ईनी पीड़ीन माणसे पापी छे! जे सहलाणी हेर र्‌या, योनान सहलाणीक छुड़ीन ईनुक काहनी बी सहलाणी नी जड़े।
LUK 11:30 जसु योना नीनवे सहर मां रवण्‌या माणसे धड़े एक सहलाणी बण गुयलु। तसुत माणसेन पुर्‌यु बी ईनी पीड़ीन माणसे धड़े एक सहलाणी बण जासे।
LUK 11:31 नीयावेन दाहड़े दखणाव सी राणी ईनी पीड़ीन माणसे भेळी उठसे ने हीनुक गुनेगार ठेहरावसे, काहाकी ची सुलेमानेन अक्‌कल भरी वात सामळने करीन धरतीन काकड़ेन छेव सी आवली, ने सामळु! जां ते सुलेमान सी बी वदु अक्‌कल वाळु उबु हय रयु।
LUK 11:32 नीयावेन दाहड़े नीनवे सहरेन माणसे ईनी पीड़ीन माणसे भेळा उठसे ने ईनुक गुनेगार ठेहरावसे, काहाकी चे योनान मुंहडे जुर सी कह्‌वली भगवानेन वात सामळीन, पाप भीणी सी मन फेरव्‌या, ने देखु! जां ते योना सी बी बेसकु मटु भगवानेन वात सामळावण्‌यु छे।
LUK 11:33 कुय बी दिवु धपाड़ीन तळ घरेन सातायली जागा मां नी मेले, ने कांगणी तळे नी मेळे बाकुन दिवा काजे दीवाळ्‌या पर मेले, हेरेसी की घर मां आवणे जाणे वाळा काजे वीजाळो जड़े ने वारु देखाये।
LUK 11:34 तुंद्‌रा आखान डीलेन दिवु तुंद्‌रा डुळा छे, हेरेसी तुंद्‌रा डुळा वारु देखे ती तुंद्‌रो आखो डील बी चुखो देखाये बाकुन जत्‌यार तुंद्‌रा डुळा वारु नी देखे ती तुंद्‌रो डील बी आंदारला मां छे।
LUK 11:35 हेरेसी मे तुहुंक कह्‌वो चेतीन रवु-कांखुर मायन जो वीजाळो तुंद्‌रेम छे, चां आंदारो ते नी हय जाय।
LUK 11:36 कदी तुंद्‌रो आखो डील वीजाळाम रवे ने तेरु काहनु बी भाग आंदारला मां नी रवे, ती चो आखो डील वीजाळाम भराय रवसे, “जसु काहनु बी दिवु धपीन आपसा वीजाळा काजे छुड़ीन आखे दुर वीजाळो कर देय।”
LUK 11:37 जत्‌यार ईसु वात बताड़्‌यु ती काहनुक फरीसी माणुस लीलघाय्‌न कह्‌यु “मारेन्‌चां रुटा खाणे चाल” ने ईसु तेरेन्‌चां जाय्‌न रुटा खाणे बठ्‌यु।
LUK 11:38 बाकुन ईसु हात धुयन खाणे नी बठ्‌यु, करीन चु फरीसी माणसे चकराय गुया ने तीनाक वारु नी लाग्‌यो।
LUK 11:39 मालीक ईसु तीना फरीसी माणसेन वीच्‌यार जाणीन तीनाक कह्‌यु, “तुहुं ते कटवरा ने तळी काजे उपर सी वारु मांजु, बाकुन तुंद्‌रा हीया-मन मां लुच्‌चाय ने भुतड़ान आत्‌मा भरायली छे।”
LUK 11:40 ए डेड़-अकल्‌या माणसे! जु भगवान बाहर वाळु अंग बणायु, चु माहें वाळो अंग नी बणायु काय?
LUK 11:41 बाकुन ती ज माहें छे च भुकला काजे दान कर देवु, ती तुंद्‌रे वाट्‌ये आखो चुखो हय जासे।
LUK 11:42 बाकुन फरीसी माणसे! तुंद्‌रे पर गरा आय पड़े! काहाकी तुहुं पुदीनान ने सुदाब नावेन जड़ा बुटीन दसवु हीस्‌सु, ने भाती-भातीन भाजी-पालान दसवु हीस्‌सु बी आपे ते खरा, बाकुन भगवानेन नीयाव ने परम काजे टाळ देवु; तुहुंक ते जे दुय काम करता रवणु हतलो ने काहनी बी वात नी टाळनु हतलो।
LUK 11:43 ए फरीसी माणसे! तुंद्‌रे पर गरा आय पड़नु चाहजे! काहाकी तुहुंक भगवानेन भक्‌तीन घर मां बसणे करीन खास गादी चाहजे ने हाटेम वारु छे की? करीन पुछण्‌या चाहजे।
LUK 11:44 तुंद्‌रे पर गरा आय पड़नो चाहजे! काहाकी तुहुं तीनु मसाणेन तसा छे, जे देखाव नी पड़े, “ने तीनु मसाण पर माणसे हींडे-फीरे बाकुन तीनुक पतु नी चाले की जां मसाण छे।”
LUK 11:45 ज सामळीन एक यहुदी धरमेन कायदा सीकाड़न्‌यु, ईसु काजे कह्‌यु, “ए मास्‌तर! असी वात कय्‌न हामरी नाव-बद्‌दी कर र्‌यु।”
LUK 11:46 ईसु कह्‌यु, ए यहुदी धरमेन कायदान मास्‌तर्‌या! तुंद्‌रे पर गरा आय पड़नु चाहजे! काहाकी तुहुं माणसे पर नेम-कायदा पाळनेन बुज नाख देवु ने तीनुक भारलो हाकलाड़े बाकुन हाकलने करीन आपसान आंगळी ईतरीक बी नी लागाड़ु।
LUK 11:47 तुंद्‌रे पर गरा आय पड़नु चाहजे! काहाकी तीनु, भगवानेन अघी सी आवणे वाळी वात बताड़ने वाळा माणसे काजे तुंद्‌रा डाहा-डाहा मार देदला। तुहुं ते तींद्‌रा मसाण बांदीन गातु बणावु।
LUK 11:48 अतरे तुहुं ईनी वातेन गवाय देवु, ने आपसा डाहा-डाहा असला काम सी राजी छे; काहाकी चे तीनाक मार नाख्‌या ने तुहुं तींद्‌रा मसाण बणायन बांदु, ने तींद्‌रु गातु बणावु।
LUK 11:49 हेरेसी भगवानेन अक्‌कल बी कह्‌, मे हींद्‌रे भीणी भगवानेन अघी सी आवणे वाळी वात बताड़ने वाळा माणसे काजे ने मारा नेवताळा काजे मकलीस; ने चे तीनु मायन बेसका काजे मार देसे, ने बेसका काजे वेला पाड़से।
LUK 11:50 जी धरती बणने सी पेहलुत, सी भगवानेन अघी सी आवणे वाळी वात बताड़ने वाळान लुही उहवाड़्‌यु। तींद्‌रे आखा सी लेखु ईनी पीड़ीन माणसे सी लेसे।
LUK 11:51 धरमी हाबील सी लीन जकर्‌यान लग लुही चुह्‌वाड़्‌या, तीना जकर्‌या काजे वेदीन मंदीरेन ईचमां मार देदला, तुहुंक छाचलीन कहो की तींद्‌रु लेखु ईनी पीड़ीन माणसे सी लेसे।
LUK 11:52 “यहुदी धरमेन कायदान मास्‌तर्‌या! तुंद्‌रे पर गरा आय जाणु चाहजे! काहाकी तुहुं भगवानेन अकलेन कुची ते ली र्‌या, बाकुन तुहुं खुद ते नी भराया ने दीसराक बी नी भरायणे देदा।”
LUK 11:53 जत्‌यार ईसु तीना घर मां सी नीकळ्‌यु जे यहुदी-सास्‌तुर सीकाड़न्‌या ने फरीसी माणसे कीचवाय्‌न ईसु पछळ पड़ गुया ने बेसकी वात पुछीन वेला पाड़न्‌या झुम गुया।
LUK 11:54 काहाकी चे ईसुन मुंहडा सी नीकळने वाळी वात धरीन, फसाड़नेन तीयारी मां हतला।
LUK 12:1 तीनी टेमे हुड़ु-हुड़ु माणसे भेळा हय गुया, ने माणसे, माणसे पर हीटी पड़े असा हय जातला। तत्‌यार ईसु आखान पेहेल आपसा चेलाक कह्‌वणे बाजी गुयु, फरीसी माणसेन ढंगड़ा सी चेतीन रवजु।
LUK 12:2 असो काय बी सातायलो नी हय, ज्‌य उघड़ीन उजेंतो नी हवे, असो काय बी ढाकायलो नी हय ज कुय काजे मालुम नी पड़े।
LUK 12:3 हेरेसी जी वात तुहुं आंदारला मां कह्‌वला छे, ची वात वीजाळा मां सामळायसे ने जी वात तुहुं घरेन कपरा मां कुर-कुर कान्‌टा मां सामळ्‌या हय ची वात घर पर उपर चहड़ीन परचार कह्‌वसे।
LUK 12:4 मे तुहुं मारा दुस्‌तीदार्‌या काजे कहो-जे माणसे तुंद्‌रा डील अतरात नुकसाण करे ती तींद्‌रे सी मां बीहु। बाकुन चे ते अळी अगा काय बी नी बीगाड़ सके।
LUK 12:5 मे तुहुंक देखाड़ो की कुणी सी बीहणु चाहजे। भगवान सी बीहु, तेरे धड़े मारीन ने नरक मां नाखणेन बी हक छे। हव, मे तुहुंक अळी-अळीन कहो की-तीना सी अतरात बीहु!
LUK 12:6 “दुय पयस्‌या मां पांच घीनचीड़ा नी वेचाये काय?” तेबी भगवान तींद्‌रे मांयन एक काजे बी नी ईसरे।
LUK 12:7 हव, तुंद्‌रा मुणकान आखा कान्‌या बी गीणायला छे, तेरेसी मां बीहु काहाकी तुंद्‌रु भाव ईनु घीनचीड़ा सी अदु छे!
LUK 12:8 मे तुहुंक कहो काहनु बी माणुस मेसेक दीसरा माणसे अगळ मेसेक मान लेसे। तीनाक माणसेन पुर्‌यु बी भगवानेन सरग वाळा काहवाळ्‌या अगळ मेसेक मान लेसे।
LUK 12:9 बाकुन जु माणुस मेसेक दीसरा माणसे अगळ नीकारु करसे, तीनाक मे बी भगवानेन सरग वाळा काहवाळ्‌या अगळ नीकारु कर दीस।
LUK 12:10 “जु माणसेन पुर्‌यान वीरुद मां कायबी कवसे, तीनाक माफी जड़ जासे, बाकुन चुखली, आत्‌मान नाव-बद्‌दी करने वाळा माणुस काजे कदी माफी नी जड़े।
LUK 12:11 “जत्‌यार माणसे तुहुंक भगवानेन भक्‌तीन घर मां, ने नीयाव करन्‌या ने राज करन्‌या अगळ घीसीन ली जासे, ती ईनी वातेन फीकुर घुण करु की हामुक कसा आपसा काजे बचाड़ने करीन अगा हय्‌न काय कवसुन;
LUK 12:12 काहाकी तीनीत टेमे चुखली-आत्‌मा तुहुंक सीकाड़से की तुहुंक काय-काय कह्‌वणु चाहजे।”
LUK 12:13 एक दाहड़ु माणसे ईसुन वात सामळने बाजी रवला। तत्‌यार टुळा मां सी एक अदमी ईसुक कह्‌यु, “ए मास्‌तर! मारा भाय काजे कय दे की चु मेसेक तीना माल-धन मायन मारु वाटु आप देय, तीना माल-धन काजे हामरु बास मरनेन टेमे हामरे धड़े रहणीदीन जाती रवलु।”
LUK 12:14 ईसु तीनाक कह्‌यु, “ए माणुस! मारे धड़े तारु नीयाव करनेन ने वाटु पाड़नेन हक नी हय, काहाकी मेसेक कुय नी कह्‌यो की मे तुंद्‌रे दुय जणान ईचमां रय्‌न हींद्‌री चीजेन वाटा पाड़ दे।”
LUK 12:15 तत्‌यार ईसु तीना माणसे काजे कह्‌यु, चेतीन रवु ने हायाळ्‌ळा मां बणु! कुय अदमी कतरु बी लकपती हय, “तेरो मतलब ज नी हय की तेरी उमर वदी जासे।”
LUK 12:16 तत्‌यार ईसु तीनुक एक अमीर अदमीन दाखलु सामळायु: “एक मालदार अदमी धड़े एक खेत हतलो; तेरे मां बेसकी मेर पाकी।”
LUK 12:17 चु अमीर माणुस आपसा मन मां असु वीच्‌यार कर्‌यु, मारी आखी मेर मेकणे वाटे मारे धड़े कणगी नी हय।
LUK 12:18 ती चु कह्‌यु, मेसेक मालुम छे की मे काय कर सको मे जुन्‌ला कणग्‌या काजे वेखड़ी दीस, ने तींद्‌रे सी मटा कणग्‌या बणायस। तत्‌यार मे मेर ने रवली आखी चीज तींद्‌रे मां मेकीस।
LUK 12:19 ने मे मारा जीव काजे कवीस तारे धड़े बेसका साल लग, बेसको धन भेळो करलो छे, हेरेसी आराम कर, खा-पी ने मुजा कर!
LUK 12:20 बाकुन भगवान तीना अदमी काजे कह्‌यु, ए डेड़-अकल्‌या! ईनीत राते तारु जीव तारे धड़े सी मांग लीस ने तु मर जासी ने तु जो आपसा वाटे भेळो करलु छे, च आखो हय कुणीन रवसे? ने हय कुण ईनी चीजेन मुजा लेसे?
LUK 12:21 जु दाखलु कयदीन ईसु अगु कह्‌यु, “जु आपसा वाटे धन भेळो करे, चु माणुस बी हेरे डेड़-अकल्‌यान तसु मरीन सर जासे; बाकुन भगवानेन नींगा मां चु अमीर नी हय।”
LUK 12:22 चु हेरा चेला काजे कह्‌यु, हेरेसी मे तुहुं काजे कहो, काय खाय्‌न जीवसु, ने डील पर काय पेहरसुन करीन फीकुर घुण करु।
LUK 12:23 काहाकी जीव खाणा सी वदु मंहगलो छे ने डील पुथल्‌या सी महंगो छे।
LUK 12:24 कागळान बारामां वीच्‌यार करु; चु नी ते वेरे, नीते काटे, ने नी ते तींद्‌रे धड़े दाणा मेकणे कणग्‌या हय; तेबी भगवान तीनुक पेट भरीन खावाड़े। तुहुं चिरला सी बेसका महंगा छे।
LUK 12:25 तुंद्‌रे मायन असु कुण छे, जु फीकुर करीन आपसी जीवाय्‌न ईतरीक बी उमर बड़ाय सके?
LUK 12:26 कदी तुहुंक अतरो नानो काम बी करता नी आवड़े, ती अळी दीसरी वातेन फीकुर काहा करु?
LUK 12:27 बयड़ा मायन फुलेक देखीन वीच्‌यार करु; हये कसाक अदे! ने हये नी मेहनत करे, ने नी दुरा काटे, तेबी मे तुहुंक कह्‌वो की सुलेमान राजाक बी आपसा पुरा ठट मां ईनु फुलेन तसा पुथल्‌या पेहरीन वारु नी।
LUK 12:28 तेरेमां कदी भगवान खळदाण मायन चारा काजे, जो आज छे ने वाहणे सुकीन चुल्‌हा मां धपणे वाटे हय जासे। तेबी असा पुथल्‌या पेहरावे ती ए कम भुरसा करने वाळा, ती चु तुहुंक काहा नी वारलु पुथल्‌या पेहरावसे?
LUK 12:29 अळी काय खासुन ने काय पीसुन करीन खाणे-पीणेन हेर मां करु ने काहनी बी वातेन फीकुर मां करु।
LUK 12:30 ईनी कळीन माणसे ईनी आखी चीजेन फीकुर मां पड़ता रवे। बाकुन तुंद्‌रु सरगे मां रहण्‌यु बास जाणे की तुहुंक काय-काय चाहजे।
LUK 12:31 बाकुन तुहुं भगवानेन राजेन हेर करु, ती तुहुंक जी चीज बी जड़ जासे।
LUK 12:32 ए नानला टुळा! बीहु मां, काहाकी तुंद्‌रु बास तुहुंक राज आपणे करीन खुस छे।
LUK 12:33 आपणो धन वेच देवु, ने दीसरा गरीब माणसे काजे दान कर देवु। आपणे वाटे असा बटवा तीयार करु, जे कदी जुना हय्‌न फाटे नी। सरगे मां आखो धन भेळो करु, जो कमी नी हवे, ने तेरे धड़े चुरी करने चुट्‌टु नी जाय सके। ने तीना धनेक थयलि काटण्‌यु कीड़ु नी खाय।
LUK 12:34 काहाकी चां तुंद्‌रो धन छे, चां तुंद्‌रो मन बी रवसे।
LUK 12:35 “तुंद्‌री कमर वारु कसीन बांदली रवणु चाहजे, ने तुंद्‌रा दिवा धपला रवणु चाहजे।
LUK 12:36 तुहुं तीनु माणसेन तसा बणी जावु, जे हामरु मालीक ईयाव मां सी पछु कत्‌यार आवसे करीन वाट देख र्‌या, ने जत्‌यार तींद्‌रु मालीक ईयाव करीन पछु आवीन बारनो ठुके ती चु उतवाळुस तेरे वाटे बारनो उगाड़ देय।
LUK 12:37 वारलु छे चे चाकरी करन्‌या, तीनुक मालीक आवे, तत्‌यार जागला देख्‌यु! मे तुहुंक छाचलीन कहो चु मालीक आपसु कमर बांदीन वारती बणी जासे ने तीनुक खाणे बठाड़से ने एक-एक जणा काजे खाणु वाटीन खावाड़से।
LUK 12:38 ने बेसका वारु छे चे चाकरी करन्‌या, जत्‌यार मालीक आधी राते ने कुकड़ा वासणीक आवे, तत्‌यार तीनुक असात जागला देखे!
LUK 12:39 तुहुं ज ते वारु रीते जाणु-की कदी घर धेणी काजे मालुम रवे की चुट्‌टु काहने टेमे आवसे, ती चु आपसा घर मां चुरी नी हवणे देय।
LUK 12:40 तुहुं बी तीयार रवु, काहाकी तीने टेमे तुहुं तेरा आवणेन बारामां वीच्‌यारु बी नी, तीनेत टेमे माणसेन पुर्‌यु बी आवसे।”
LUK 12:41 तत्‌यार पतरस तीनाक कह्‌यु, “ए मालीक! तु, जु दाखलु हामरे वाटे कय र्‌यु, की आखा वाटे कय र्‌यु?”
LUK 12:42 मालीक कह्‌यु, “असु कुण ईमानदार ने अक्‌कल वाळा जुगाड़-करन्‌यु माणुस छे, तीनाक तेरु मालीक आपसा पावर्‌यान मुख्‌यु बणावे ने कहें की तु मारा पावर्‌याक खाणे-पीणेन चीज टेमे-टेमे आप्‌या करजी?”
LUK 12:43 वारलु छे चु चाकरी करन्‌यु, तेरु मालीक आवे, तत्‌यार चु तीनाक सुपरुत करलो काम करतेलु देख्‌यु,
LUK 12:44 मे तुहुंक छाचीन कह्‌वो-चु मालीक तीनाक, आपसा आखा माल धन पर मुख्‌यु बणावीन ठेहरावसे।
LUK 12:45 बाकुन कदी चु चाकरी करन्‌यु आपसा मन मां वीच्‌यार करने बाजी जाय, मारु मालीक आवणे मां वार लागाड़ र्‌यु, करीन चु दीसरी पावरनी काजे ने पावर्‌या काजे ठुकणे, ने खाणे-पीणे ने दारु पीन छाकणे बाजी जाय।
LUK 12:46 ती तीना चाकरी करन्‌यान मालीक असलेस दाहड़े आवसे जत्‌यार चु तेरी वाट नी देख र्‌यु हय ने असलेत टेम मां आवसे ची टेम तीनाक समज मां नी आवे। मालीक तीनाक बेसकी मटी डंड आपसे ने नी भुरसा करे असला भेळु भेसकी देसे।
LUK 12:47 “आपणा मालीकेन मरजी जाणीन बी चु चाकरी करन्‌यु, मालीकेन मरजीन अनसारे काम नी कर्‌यु, अळी चु बेसकु कायनी मार खासे।”
LUK 12:48 बाकुन जु मालीकेन मरजी जाणे पाखुर गलत काम कर्‌यु, चु तेरे सी थुड़ुक मार खासे। ने तीनाक बेसको आपलो छे, तेरे धड़े बेसको मांग्‌से, ने तीनाक बेसको आपलो छे तेरे धड़े तीनाक आपला सी वदु मांगसे।
LUK 12:49 मे धरती पर आकठी लीन धपाड़ने आवलु छे, ने मारी हेर जी छे की जी आकठी हय माणसेन जीवाय मां धपी जाय ती बेसको वारु हय जाय।
LUK 12:50 मेसेक ते एक अळी बपतीस्‌मा लेणु छे, ने चो बपतीस्‌मा नी लेवाये, ती लग मे कांदरायलु रवीस।
LUK 12:51 मे धरती पर सांती लीन आवलु छे, तुहुं असो समजी र्‌या काय? मे तुहुं माणसेक अलग-अलग करने आवलु छे।
LUK 12:52 काहाकी हय सी कदी, एक घर मां पांच जणा हसे, ती तींद्‌रे मायन तीन जणा दुय जणान वीरुद करसे, ने चे दुय जणा तीनु तीन जणान वीरुद करसे।
LUK 12:53 बास आपसा पुर्‌यान वीरुद करसे, ने पुर्‌यु आपसा बासेन वीरुद करसे, माय आपसी पुरेन वीरुद करसे, ने पुरे आपसी मायन वीरुद करसे। सासुस आपसी उहड़ीसेन वीरुद करसे, “ने उहड़ीस आपसी सासुसेन वीरुद करसे।”
LUK 12:54 ईसु तेरे पछळ आवणे वाळा बेसका माणसे काजे कह्‌यु, “कदी तुहुं बुडवणा सुदा सी आदळा नीकळते देखु, ती तत्‌यार कहुं, ‘की पाणी आवसे’ ने असोत हवे बी।”
LUK 12:55 जत्‌यार दाखणाव सुदे सी वाहळो आवे, ती कहुं की, आंधी आवसे ने असोत हवे।
LUK 12:56 ए ढंगड़ा करन्‌या ढंगी! तुहुं सरगेम हवणेवाळी ने, धरती पर हवणेवाळी वात बेसका वारु आकणी लेवु, ती ईनु दाहड़ाम काय हय र्‌यो च काहा नी आकणता?
LUK 12:57 तुहुं आपसा जीव सी काहा नी वीच्‌यारतु की सय काय छे?
LUK 12:58 जत्‌यार तुहुं आपसा दुसमन पुठ्‌ये जेल मां जाणे बाजी र्‌या हय, ती वाटे तेरे साते वीच्‌यारीन झगड़ु भांग लेवु। कांखुर मायन असो नी हय जाय की चु तुहुंक नीयाव करने वाळान भीणी ली जाय, ने नीयाव करन्‌यु तुहुंक, सीपायड़ान हात मां कर देय, ने सीपायड़ा तुहुंक जेल मां कुंड देय।
LUK 12:59 मे तुहुंक कहुं, “जत्‌यार लग तुहुं एकेक पांचपाय नी आप देवु तत्‌यार लग चां सी नी नीकळाये।”
LUK 13:1 तीनी टेम मां थुड़ाक माणसे ईसु काजे तीनु गलील ईलाकान माणसेन बारामां कह्‌वणे आय गुया, चे यरुसलेमेन मंदीर मां जनवार्‌या मारीन बादा चड़ावणे आवला, पीलातुस तीनु सीपायड़ान साहरे माराय्‌न तींद्‌रो लुही तींद्‌रा बादा चड़ावला जनवार्‌यान लुही मां भेसकी देदलु।
LUK 13:2 ईसु तींद्‌री खबर सामळीन तीनुक कह्‌यु, “गलील ईलाका मां रवण्‌या दीसरा आखा माणसे सी ज माणसे जादा पापी हतला, ने एरेन करीन हींद्‌रे पर गरा आय पड़ी, असा तुहुं समजी र्‌या काय।
LUK 13:3 मे तुहुंक कहो, असो हय; बाकुन कदी तुहुं पापेम सी मन फेरवीन भगवान सुदा नी अळु, ती आखा हींद्‌रेन तसात मरीन सर जासु।”
LUK 13:4 चे दुय कम वीस माणसे पर सीलोम नावेन मुंडेरी पड़ी ने दड़पाय्‌न मर गुया, चे यरुसलेम सहर मां रवण्‌या दीसरा माणसे सी जादा गुनाळा हतला, असा तुहुं समजी र्‌या काय?
LUK 13:5 मे तुहुंक कहो असो नी हय; बाकुन कदी तुहुं पापेम सी मन फेरवीन भगवान सुदा नी अळु, ती आखा हींद्‌रेन तसात मरीन सर जासु।
LUK 13:6 ती ईसु ज दाखलु सामळायु, “काहनाक माणसेन अंगुरेन वाड़ी हतली, तीनी अंगुरेन वाड़ी मां एक अंजीरेन झाड़को हतलो। चु तीना अंजीरेन झाड़का पर फळ हेरने करीन आयु, बाकुन तीनाक एक बी फळ नी जड़्‌यो।
LUK 13:7 ती चु अंगुरेन वाड़ी मां काम करन्‌या माणसे काजे कह्‌यु, देख, मे तीन साल लग ईना अंजीरेन झाड़कान फळ हेरने आय र्‌यु, बाकुन मेसेक एक बी फळ नी जड़्‌यो। ईनाक काट नाख काहाकी ज झाड़को ईना जागाक फालतु रुक र्‌यो?
LUK 13:8 बाकुन वाड़ी मां काम करन्‌यु माणुस कह्‌यु, ‘मालीक! ईने साल बी ईनाक रहणे दे। मे एरे चारेमेर खुदीन खद भरीस।
LUK 13:9 कदी ज आवणे वाळा साल फळे ती, वारु छे, नी ते ईनाक काटाड़ नाख्‌जी।’”
LUK 13:10 ईसु एक भगवानेन भक्‌तीन घर मां आरामेन दाहड़े माणसे काजे वात सामळावणे बाजी रवलु।
LUK 13:11 चां बेसका यहुदी-माणसे भेळा हय रवला। चां एक बायर बी हतली, तीनी बायरीन मांदी पाड़नी भुतड़ान आत्‌मा चस्‌टी रवली। ची तीनी बायर काजे ढंगी आळ देदली, ने ची काहली बी रीत सी सुदी उबी नी हवतेली। ने ची बायर दुय कम बीस साल लग ढंगी-ढंगी चालतेली।
LUK 13:12 ईसु तीनीक देखीन धड़े बुलायु, ने तीनीक जुर सी कह्‌यु, “वो बायर, तु हय मांदवाड़ मां सी छुटीन, वारलु हय गुय!”
LUK 13:13 ईसु तेरे पर हात मेक्‌यु, ने तत्‌यारुत ची सुदी हय गुय, ने भगवानेन बड़ाय करने बाजी गुय।
LUK 13:14 तीना भगवानेन भक्‌ती करन्‌या घरेन मुख्‌यु रीसाय गुयु, काहाकी ईसु तीनी बायरी काजे आराम करनेन दाहड़े वारु करलु। यहुदी-माणसे आराम करनेन दाहड़े काहनो बी काम करनु गलत समजतेला। हेरेसी चु मुख्‌यु, माणसेक कह्‌णे बाजी गुयु, “हाप्‌ता मां काम करने वाटे छव दाहड़ा छे, तीनु छव दाहड़ा मां काम करनु चाहजे। अतरा ईनु छव दाहड़ा मायन काहने बी दाहड़े आवीन वारु हवु, बाकुन आरामेन दाहड़े वारु हवणे करीन घुण आवु।”
LUK 13:15 जी वात सामळीन मालीक ईसु जपाप आप्‌यु; ए ढंगड़ा करन्‌या कदी तुंद्‌रु बेल नी ते गदड़ो पीसलो हय, ती तुहुं तीनाक आरामेन दाहड़े बी पाणी पीवाड़ने खुटे सी नी ली जावु काय?
LUK 13:16 जी बायर ते आपणा माणसे मायन छे। जी बायर बी अब्‌राहमेन पुरे छे, हीनीक मांदी पाड़नी भुतड़ान आत्‌मा दुय कम बीस साल लग चस्‌टीन आपसा कब्‌जाम कर रवली। आराम करनेन दाहड़े हेरेमां सी मांदु करन्‌यु भुतड़ु छेटु करनु, वारु नी हय काय?
LUK 13:17 ईसुन जी वात सामळीन ईसुन वीरुद करन्‌या आखा माणसे लाजवाय गुया, बाकुन दीसरा आखा माणसे, ईसु बेसकु वारु काम कर्‌यु, करीन बेसका खुस हय गुया।
LUK 13:18 ईसु कह्‌यु, “भगवानेन राज कुणीन तसों छे? मे ईना राज काजे काहने चीजे करीन तुलो?
LUK 13:19 च रायन एक बीजेन तसों छे, तीनाक काहनुस माणुस ली जाय्‌न आपसा खेतेम एर देय। ने च वदतो-वदतो झाड़को बण गुयो। ने सरगेन चिरला तेरा डाळ्‌या मां आवीन पुत्‌रा बणावीन रवणे बाजी गुया।”
LUK 13:20 ईसु अळी कह्‌यु, “मे भगवानेन राज काजे काहने चीजे सी तुलो?
LUK 13:21 भगवानेन राज तीना खाण्‌या-सुडान तसु छे, तीनाक लीन काहनीक बायर तीन चोवकी पीठा मां भेसकी, ने आखु पीठान जेवणु आय गुयु।”
LUK 13:22 ईसु सहरे-सहरेम, ने गांव-गांव वात सीकाड़तु जाय्‌न यरुसलेम भीणी जाणे बाजी रवलु।
LUK 13:23 काहनुक माणुस हीनाक पुछ्‌यु, “ए मालीक! छुटकारु हात करन्‌या थुड़ाक माणसे छे काय?” ने ईसु तीनुक कह्‌यु,
LUK 13:24 साकेड़ले बारने मायन भगवानेन राजेम भरायणेन पुरी-पुरी कुसीत करु, काहाकी मे तुहुंक कहो बेसका छे माणसे भगवानेन राजेम भरायणे करसे, बाकुन भराय नी सके।
LUK 13:25 जत्‌यार घरेन मालीक उठीन बारनो बन्‌द कर देदु हय, ने तुहुं बाहर उबा रवीन बारनो ठुकीन कह्‌वणे बाजी जासु, मालीक! हामरे वाटे बारनो उघाड़ दे। ती चु तुहुंक कह्‌वसे, तुहुं कुण छे मेसेक नी मालुम हय।
LUK 13:26 ती तुहुं कह्‌वणे बाजी जासु, हामु तारे अगळ खादा पीदा ने तु हामरा हाटेम वात सीकाड़तेलु!
LUK 13:27 बाकुन चु तुहुंक कह्‌वसे, तुहुं कुण छे च मेसेक नी मालुम हय, ए आखी भातीन पाप करन्‌या! तुहुं आखा मारेन्‌चां सी छेटे हय जावु!
LUK 13:28 जत्‌यार तुहुं अब्‌राहम, ने इसाक, ने याकुप ने भगवानेन अघी सी आवणे वाळी वात आखा माणसे काजे भगवानेन राज मां देखसु, बाकुन आपसे काजे बाहार नीकाळता देखसु, ती तुहुं कलपी-कलपीन रड़सु ने दात काजे ककड़ावता रवसु।
LUK 13:29 उगेवणा ने बुडवणा सी, धुराव ने दखणाव सी माणसे आवसे ने भगवानेन राजेन पंगत मां भेसकायसे।
LUK 13:30 ने देखु, जे पछळ छे, “चे अगळ हय जासे ने थुड़ाक जे अगळ छे, चे पछळ हय जासे।”
LUK 13:31 तीनी टेमे थुड़ाक फरीसी माणसे आवीन ईसुक कह्‌या, “जां सी नीकळीन जाती रव, काहाकी हेरोदेस राजु तुसेक मारने कर रयु।”
LUK 13:32 ईसु तीनुक कह्‌यु, “जाय्‌न तीनी फुंदाळी खुखड़ीक कय देवु: मे आज ने वाहणे माणसे मां भरायला भुतड़ान आत्‌मा काजे छेटु करीस ने मांदलाक वारु करीस ने तीसरे दाहड़े काम पुरो कर दीस।”
LUK 13:33 तेबी मेसेक आज, ने वाहणे ने परुनदाहड़े काम करतुत रवणु छे, काहाकी असो हय नी हय सके की काहनु बी भगवानेन अघी सी आवणे वाळी वात बताड़ने वाळा काजे यरुसलेम सहर छुड़ीन दीसरे जागे मारे।
LUK 13:34 ए यरुसलेम! ए यरुसलेम! तु भगवानेन अघी सी आवणे वाळी वात बताड़ने वाळा काजे मार नाखे ने भगवान तीनु माणसे काजे तारे धड़े मकेल्‌लु तीनु माणसे काजे बी तु दगड़ाटीन मार नाखे। जसी कुकड़ी आपसा पीच्‌या काजे आपसा पाखड़ा तळे भेळा कर लेय, तसुत मे बेसका कावा तारी अवल्‌यात काजे मारा पाखड़ा तळे भेळा कर लेय, बाकुन तुहुं मारु नीकारु कर देदा।
LUK 13:35 देखु, तुंद्‌रो घर उजड़लो छुट जासे। ने मे तुहुंक कहो, तुहुं मेसेक तत्‌यार लग नी देखु, जत्‌यार लग तुहुं ज नी कहुं, बरकतवाळु छे चु, जु मालीक भगवानेन नाव सी आवे!
LUK 14:1 यहुदी माणसेन आरामेन दाहड़े ईसु फरीसी माणसेन एक मुख्‌यान घर रुटा खाणे गुयु; ने चे माणसे ईसु काजे मारनेन तीयारी मां हतला।
LUK 14:2 ने देखु, एक माणुस ईसु अगळ हतलु, तीना काजे पाण झेलु रुग हतलु।
LUK 14:3 ने ईसु यहुदी धरमेन मास्‌तर्‌या ने फरीसी माणसेक कह्‌यु, “आरामेन दाहड़े मांदला माणसेक वारु करनु सय छे, की नी हय?”
LUK 14:4 बाकुन चे हुगात रय र्‌या। अतरा मां ईसु तीना मांदला माणसेक वारु कर देदु, ने तीनाक वळायन छेटे मकली देदु।
LUK 14:5 ने ईसु तीनु काजे कह्‌यु, “तुंद्‌रे मायन असु कुण छे, तेरु पुर्‌यु नी ते बेल आरामेन दाहड़े कुवा मां हीट पड़े, ने चु तीनाक आरामेन दाहड़ेत तत्‌यारुत बाहर नीकाळीन नी लावे?”
LUK 14:6 ने जी वात सामळीन चे ईसु काजे काय बी जपाप नी आप सक्‌या।
LUK 14:7 मेजवान्‌या काजे मामार-मामार बसणेन वारु जागा नेवाड़तेला देखीन ईसु तीनुक एक दाखलु सामळायु,
LUK 14:8 जत्‌यार बी कुय तुसेक ईयाव मां नेवतो आपीन बुलावे, ती तु आखाम पेहली जागाम घुण बठे। कांखुर मायन असो ते नी हय जाय की नेवता आपण्‌यु तारे सी बी जादा अंजाण्‌याक नेवता आपीन मेजवान्‌यु बुलायु हय।
LUK 14:9 चु बी आय जाय ती तुहुं दुयु जणा काजे नेवता आपीन बुलावणे वाळु आवीन तुसेक कह्‌वे, ईनाक हेरी जागा आपु ने तुसेक लाजवाय्‌न आखाम पछळ जाय्‌न बसणु पड़े।
LUK 14:10 बाकुन जत्‌यार तुसेक नेवता आपीन बुलावे, ती तु जाय्‌न आखाम पछला जागा पर बस जां। तेरे सी नेवता आपीन मेजवान्‌यु बुलावणे वाळु आवीन तुसेक ज कह्‌वे, ए दुस्‌तीदार! अगु आवीन बस जां। ईने रीते आखा मेजवान्‌यान अगळ तुसेक ईज्‌जत जड़से ने तारी बड़ाय करसे।
LUK 14:11 काहाकी जु आपसा काजे मटु समजे, तीनाक नानु बणाय देसे, ने जु कुय बी आपसा काजे नानु समजे, तीनाक आखा सी मटु बणाय देसे।
LUK 14:12 जु ईसुक नेवतो आपीन खाणे बुलावलु तीनाक बी ईसु कह्‌यु, “जत्‌यार तु दीसु नी ते राती खातरी करीन माणसेक पंगत बठाड़े ती आपसा दुस्‌तीदार काजे, आपसा भायस काजे, ने आपसा भाय-बेटा काजे, ने आड़े-धड़े वाळा मालदार काजे घुण बुलावे, काहाकी कांखुर मायन असो नी हय जाय की चे बी तुसेक नेवतो आपीन बुलाय लेय ने पछी खातरी करीन बदलु चुकाड़ देय।
LUK 14:13 बाकुन जत्‌यार तु पंगत देय, ती गरीब, लुल्‌ला, लंगड़ा ने आंदळा काजे बुलावजी।
LUK 14:14 ने तु बेसकु वारु कह्‌वायसी काहाकी तींद्‌रे धड़े पछो आपणेन काय नी हय, बाकुन जत्‌यार धरमी माणसे पछा मर्‌या-सर्‌याम सी जीवता हवसे ने दाहड़े पछा वाळ देसे।”
LUK 14:15 ईसु पुठ्‌ये रुटा खाण्‌या मायन काहनुस ईसुन वात सामळीन ईसु काजे कह्‌यु, “चे बेसका वारु छे, जत्‌यार भगवानेन राजेन वेस मां आवसे तीने टेमे भगवान साते बसीन रुटा खासे।”
LUK 14:16 तीना माणसेन वात सामळीन ईसु तीनुक जी काहनी सामळायु! काहनेस दाहड़े एक बेसकी मटी पंगत देदु, ने चु बेसका माणसेक नेवता आप्‌यु।
LUK 14:17 जत्‌यार खाणो बण गुयो, ती पंगतेन टेम मां चु आपसा एक पावर्‌या काजे नेवता आपलु तींद्‌रे सी ज कय मकल्‌यु खाणो-खाणे चालु, हय आखो खाणो तीयार छे।
LUK 14:18 बाकुन चे नी आया ने आखान-आखा हामुक नी आवाये करीन माफी मांगणे बाजी गुया; पेहलु कह्‌यु, मे हय एक खेत मुल लेदलु छे, ने च खेत देखणे करीन जाणु छे; अतराम मे तारे सी वीन्‌ती करो की मेसेक नी आवाये, मेसेक माफ कर दे।
LUK 14:19 दीसरु कह्‌यु, मे पांच जुड़ी बेल मुल लेदलु छे, ने तीनुक जुपीन देखणु छे। अतराम मे वीन्‌ती करो की मेसेक नी आवाये, मेसेक माफ कर दे।
LUK 14:20 ने तीसरु कह्‌यु, “हय मारु ईयाव हवलु छे, अतराम मेसेक नी आवाये मेसेक माफ कर दे।”
LUK 14:21 पावर्‌यु पछु आयु ने चु आपसा मालीक काजे जी वात बताड़ देदु। जी वात सामळीन मालीक बेसकु रीसवाय गुयु, “तत्‌यार चु आपसा पावर्‌याक हुकुम आप्‌यु ‘सहर मां गळ्‌ये-गळ्‌ये उतवाळुस जाय्‌न गरीब, लुला, आंदळा ने पांगळा काजे बुलाय लाव।’ पावर्‌यु मालीकेन हुकुम मानीन बुलावणे जाती र्‌यु।
LUK 14:22 ने चु पावर्‌यु पछु आवीन मालीक काजे कह्‌यु, ए मालीक! ‘जसु तु कह्‌यु, तसुत मे माणसेक बुलाय लायु। तेबी माणसेक बसणे वाटे जागा बच रय।’
LUK 14:23 तत्‌यार मालीक आपसा पावर्‌याक कह्‌यु, सयड़के ने खेतन वाड़ी मां जां, ने चां वाळा माणसेक बी पंगत मां बुलाय लाव। मारो घर माणसे सी भराय जाणु चाहजे।
LUK 14:24 मे हेरेन करीन कहो की तीनु माणसेक मे पेहल बुलावलु, तींद्‌रे मायन कुय बी मारी पंगतेन खाणो लग नी चाखणु चाहजे।”
LUK 14:25 ईसु पुठ्‌ये-पुठ्‌ये एक बेसकु माणसेन टुळु जाणे बाजी रवलु। ती ईसु पछु फीरीन माणसेक कह्‌यु,
LUK 14:26 कदी कुय मारे साते आवे, ने आपसा माय-बास, घरवाळीक, ने आपसान पुर्‌या ने भाय-बहणस्‌याक ने आपसा जीवेक मारे सी जादा परम करे, ती चु मारु चेलु नी बण सके।
LUK 14:27 जु कुय आपसान कुरुस नी हाकले; ने मारे पछळ नी आवे; चु बी मारु चेलु नी बण सके।
LUK 14:28 तुंद्‌रेम असु कुण छे, जु मटलो घर बणावणे हींडे, बाकुन पेहले बसीन खरचान हीसाब नी जुड़े की घर बणावणे वाटे मारे धड़े खरचु हय की नी हय?
LUK 14:29 कांखुर मायन असो नी हय जाय की नेहु खुदीन दगड़ान नेहु उठाड़ लेय बाकुन पुरो नी हवे ती आखा देखणे वाळा ज कह्‌ता जाय्‌न तेरी हासी-उड़ावसे,
LUK 14:30 की जु माणुस बणावणे ते बाजी गुयु बाकुन पुरो घर नी बणाय सके, ने बणावते-बणावते पुरो घर नी बण्‌यो।
LUK 14:31 ने असु काहनु राजा हसे, चु दीसरा राजा साते लड़ायणे जातु हय, ने पेहले बसीन जु वीच्‌यार नी करे की जु वीस-हजारेन टुळु लीन मारे भीणी आवणे बाजी र्‌यु, तेरे साते मेसेक दस हजार टुळु लीन लड़ाय मां जीत जड़ जासे काय?
LUK 14:32 कदी तीनाक लड़ाय मां जीत जड़ जासे असु भुरसु नी हय ती चु छेटेत रय्‌न तेरे भीणी ज कय मकेलसे की आपणु लड़ाय नी करता बाकुन मेळ कर लेजे।
LUK 14:33 “ईनीत रीती सी तुंद्‌रे मांयन जु आपसो आखो काय मारे वाटे छुड़ी नी देय, ती लग चु मारु चेलु नी हय सके।”
LUK 14:34 नण वारु चीज छे, बाकुन कदी च आपसोत मुळो हय जाय, ती च काहने चीजे पछो खारो हवसे?
LUK 14:35 च नण नी ते खेतेम काम आवे, ने नी चो खुदेन काम आवे; तीना नण काजे माणसे बाहर धुळाम ली जाय्‌न नाखसे। तेरे धड़े सामळन्‌या कान्‌टा हय, ती चे सामळी लेय।
LUK 15:1 एक दाहड़ु ईसु माणसेक सीकाड़ने बाजी रवलु, सामळन्‌या मां बेसका फाळु उकाळन्‌या हकदार्‌या ने पापी माणसे बी हतला, चे यहुदी धरमेन कायदाक नी पाळतेला।
LUK 15:2 ने यहुदी धरमेन फरीसी माणसे ने यहुदी-सास्‌तुर सीकाड़न्‌या वात करता जाय्‌न कह्‌वणे बाजी गुया, “जु माणुस ते पापी साते बसीन मजा करे ने तींद्‌रे साते रुटा बी खाय।”
LUK 15:3 तत्‌यार ईसु तीनुक एक दाखलु कय्‌न सामळायु,
LUK 15:4 मान लेवु तुंद्‌रे मायन कुय धड़े सोव गाडरा हय, ने तीनु मायन एक खुवाय जाय। ती चु काय करसे? चु दीसरा एक कम सोव गाडराक बयड़ा मां रहणी देसे, ने तीना खुवायला गाडरा काजे तत्‌यार लग हेरसे, जत्‌यार लग च जड़ी नी जाय।
LUK 15:5 ने जत्‌यार च जड़ जाय, ती चु तीनाक खांदा पर बठाड़ीन घर ली आवसे।
LUK 15:6 ने घर आवीन आपसा दुस्‌तीदार्‌या ने पुठ्‌ये वाळा काजे पंगत मां बुलावसे ने खावाड़से ने चु तीनाक कवसे, मेसेक खुवायलो गाडरो जड़ गुयो। अतराम मारे साते भेसकायन खुस हय जावु।
LUK 15:7 मे तुहुंक कहो की, “ईनी रीते भगवान तीना पापीन करता बेसकु खुस हवसे, जु पाप करनु छुड़ देय ने भगवानेन मरजीन अनसारे काम करने बाजी जाय। बाकुन तीनु एक कम सोव धरमी माणसेन करता अतरो जबर खुस नी हवे, चे ज वीच्‌यारे की हामु धरमी छे, ने हामुक पापेम सी मन फेरवीन भगवान भीणी वळनु जरुड़ी नी हय।”
LUK 15:8 ईसु एक दीसरु दाखलु सामळायु, मान लेवु काहनी बायर धड़े चांदीन दस सीक्‌का हय ने तींद्‌रे मायन एक खुवाय जाय ती। ची काय करसे? ची दिवु धपाड़से ने खुवायला सीक्‌का काजे हेरने करीन आखो घर बाहरसे। ची आखे जागे धीरी रवीन हेरसे। जत्‌यार लग चु सीक्‌कु नी जड़े तत्‌यार लग हेरसे।
LUK 15:9 जड़ जासे ती ची आपसा दुस्‌तीदार्‌याक ने घर धड़े वाळाक बुलावसे ने तीनुक कवसे, मे बेसकी खुस छे, काहाकी मेसेक खुवायलु रुप्‌यु जड़ गुयु।
LUK 15:10 मे तुहुंक कहो ईनी रीते जत्‌यार एक पापी पाप करनु छुड़ देय, ने भगवानेन मरजीन अनसारे काम करने बाजी जाय ती भगवान आपसा सरग वाळा काहवाळ्‌या भेळ खुस हये।
LUK 15:11 अळी ईसु एक दीसरु दाखलु सामळायु, काहनाक एक माणसेन दुय पुर्‌या हतला।
LUK 15:12 एक दाहड़ु नानलु पुर्‌यु हेरा बास सी आवीन कह्‌यु, ए बास! माल धनेन जु मारु वाटु छे, चु मेसेक आप दे। अतराम तेरु बास दुय पुर्‌याम तींद्‌रु वाटु पाड़ देदु।
LUK 15:13 थुड़ाक दाहड़ा हय गुया ने अळी नानलु पुर्‌यु आपसा आखा धनेन हीस्‌सु वेच देदु, ने पयस्‌या भेळा करीन काहनाक दीसरा देसेम लांबेत जाती र्‌यु, ने चां चु आपसा आखा पयस्‌या गलत काम मां उजाड़ देदु।
LUK 15:14 जत्‌यार चु आखो काय उजाड़ देदु, ती तीना देसेम बेसकु काळ पड़्‌यु, ने चु भुकलु घाबराय गुयु; काहाकी तेरे धड़े पयस्‌या नी हतला।
LUK 15:15 हेरे सी चु तीना देसेम एक अमीर माणसेन चां काम करने गुयु। चु तीनाक आपसा खेते मां सुहर्‌या चारने करीन मकली देदु।
LUK 15:16 चु अतरु भुकलु घाबराय गुयु, की ज खळ सुहर्‌या खात्‌ला, च खळ खाणे हींडतेलु, बाकुन चु खळ बी तीनाक खाणे करीन नी आपतेला।
LUK 15:17 आकरी मां, चु वीच्‌यार कर्‌यु की मे कतरु गांडु छे। चु आपसाक कह्‌यु, मारा बासेन घर मां आखा दाहड़क्‌या काजे पेट भरीन रुटा जड़े, ने मे जां भुकलु मर र्‌यु।
LUK 15:18 मे मारा बासेन्‌चां पछु जायस ने तीनाक कवीस, “बास मे तारा वीरुद मां ने भगवानेन वीरुद मां पाप करलु छे।
LUK 15:19 मे तारु पुर्‌यु कवायणेन हकदार्‌यु, नी हय। बाकुन मेसेक तारा एक दाहड़क्‌यान तसु मेसेक राख ले।”
LUK 15:20 ती चु असु वीच्‌यार करीन आपसा बासेन घर भीणी चाल पड़्‌यु। हय चु आपसा बासेन घर सी छेटेस हतलु, की तेरु बास तीनाक देख लेदु, ने चु गीण-दया सी भराय गुयु। ने आपसा पुर्‌या काजे भेळु हवणे करीन चु दवड़ीन गुयु ने तीनाक गळे लागाड़्‌यु, ने तीनाक बेसकु गुळा देदु।
LUK 15:21 ती पुर्‌यु तीनाक कह्‌यु, बास! मे सरग वाळा भगवानेन वीरुद मां ने तारे वीरुद मां पाप करलु छे। मे तारु पुर्‌यु कवायणेन हकदार्‌यु नी हय।
LUK 15:22 बाकुन बास आपसा पावर्‌याक बुलायु, ने तीनुक कह्‌यु, उतवाळास जाय्‌न आखाम सी वारु पुथल्‌या लाय्‌न ईना मारा पुर्‌याक पेहरावु, एक मुंदी हातेन आंगळी मां पेहरावु ने पाये मां खासड़ा पेहरावु।
LUK 15:23 ने अळी आपणु आखाम वारलु केवड़ु लाय्‌न मारु। ने एक मट्‌ली पंगत देसु, ने खुसी मनावसु।
LUK 15:24 काहाकी मारु जु पुर्‌यु मर गुयलु, बाकुन हय जीवतु हय गुयु। चु खुवाय गुयलु, बाकुन हय जड़ गुयु। ती अळी खुसीन पाल्‌टी सुरु हय गुय।
LUK 15:25 तीनी टेमे तेरु मट्‌लु पुर्‌यु खेतेम हतलु। ने जत्‌यार चु मट्‌लु भायस खेतेम सी घर आवीन घर धड़े आयु, ती चु वाजा-गाजा सामळीन ने माणसे काजे नाचतेला देखीन चकराय गुयु।
LUK 15:26 ने चु एक पावर्‌याक बुलायु, ने तीनाक पुछ्‌यु की ज काय हय र्‌यो।
LUK 15:27 चु पावर्‌यु जपाप आप्‌यु, तारु नानलु भायस वारु पछु घर आवती र्‌यु, करीन तारु बास हामुक आखाम मट्‌लु केवड़ु मांगाड़ीन माराल्‌लु छे।
LUK 15:28 जी वात सामळीन चु मट्‌लु भायस बेसकु रीसवाय गुयु, ने घर मां लग नी गुयु; बाकुन तेरु बास बाहर आयु ने तीनाक घर मां ली जाणे करीन आयु ने मनावणे बाजी गुयु।
LUK 15:29 बाकुन चु आपसा बासेक कह्‌यु, देख, मे अतरा साल लग तारी सेवा करतु आय र्‌यु, ने कदी तारी वात नी टाळ्‌यु। बाकुन तु मेसेक मारा दुस्‌तीदार्‌या पुठ्‌ये मारीन खाणे ने खुसी मनावणे करीन तु मेसेक एक बुकड़ो लग नी आप्‌यु।
LUK 15:30 बाकुन तारु जु नानलु पुर्‌यु घर छुड़ीन जाती रवलु, ने तारा आखा पयस्‌या रंडीन्‌चां जाय्‌न उजाड़ देदु, ने हय चु पछु घर आयु, ती तु तेरे धड़े आखाम मट्‌लु केवड़ु मांगाड़ीन मार्‌यु!
LUK 15:31 मटला पुर्‌यान वात सामळीन तेरु बास तीनाक कह्‌यु, मारा बेटा, तु जां जलम सी मारे पुठ्‌ये रवे। ने मारो आखो तत्‌रो तारोत छे।
LUK 15:32 बाकुन हय खुस हवणु चाहजे, ने पंगत मां बसीन खाणान मजा लेणु चाहजे काहाकी तारु भायस मर गुयलु, “बाकुन हय जीवतु हय गुयु। चु खुवाय गुयलु बाकुन हय जड़ गुयु।”
LUK 16:1 ईसु हेरा चेला सी बी कह्‌यु, “काहनाक अमीर अदमीन एक पयस्‌यान हीसाब राखण्‌यु पावर्‌यु हतलु। माणसे तीना अमीर माणसेन्‌चां जाय्‌न तीना पयस्‌यान हीसाब राखण्‌या पावर्‌या पर जु गुनु लागाड़्‌या की जु पावर तारो धन उजाड़ने बाजी र्‌यु।”
LUK 16:2 अतराम चु अमीर माणुस तीना पयस्‌यान हीसाब राखण्‌या पावर्‌या काजे बुलायन कह्‌यु, ज मे तारा बारामां काय सामळने बाजी रयु। तारा पयस्‌यान हीसाब-किताप देखाड़, काहाकी तु हय सी पयस्‌यान हीसाब करनेन पावराय सी छेटे हय जां।
LUK 16:3 ती चु पयस्‌यान हीसाब-किताप करन्‌यु मने-मन ज वीच्‌यारतु जाय्‌न कह्‌यु, मे हय काय करो? मारु मालीक मेसेक ईनी पावराय सी छेटु करने बाजी रयु। ती हय काय करो, काहाकी धुळु खुदणेन ताकत ते मारेम नी हय; ने माणसे धड़े पयस्‌या ने दाणा मांगणे मां मेसेक सरम आवे।
LUK 16:4 जत्‌यार मे पयस्‌यान हीसाबेन पावराय सी छेटे हय जायस, ती माणसे मेसेक आपसे घर मारु आव-भाव करीन आसरु देणु चाहजे। करीन मेसेक काय करनु चाहजे, हव हय, मेसेक समज मां आयो की मेसेक काय करनु चाहजे,
LUK 16:5 असु वीच्‌यार करीन चु आपसा मालीकेन करजा वाळा माणसेक एक-एक करीन बुलायु। ने पेहला माणसे काजे पुछ्‌यु, तारे पर मारा मालीकेन कतरु करजु छे।
LUK 16:6 चु करजा वाळु माणुस कह्‌यु, सोव मण तेल। तत्‌यार पयस्‌यान हीसाब करन्‌यु पावर्‌यु कह्‌यु, तारा खातान चापड़ु हातेम ले, ने बसीन उतवाळुस पचास मण लिख दे।
LUK 16:7 अळी चु दीसराक पुछ्‌यु, तारे पर मारा मालीकेन कतरु करजु छे? चु करजा वाळु माणुस कह्‌यु, सोव कुंटल गहुं। तत्‌यार पयस्‌यान हीसाब करन्‌यु पावर्‌यु कह्‌यु, तारा खातान चापड़ु हातेम लीन, ने बसीन उतवाळुस आस्‌सी कुंटल लिख दे।
LUK 16:8 मालीक तीना पापी पयस्‌यान हीसाब करन्‌या पावर्‌या काजे बेसकु वारु कह्‌यु काहाकी चु बेसकु चतराये काम कर्‌यु; काहाकी ईनी कळीन माणसेन अवल्‌यात आपसा लेण-देण मां वीजाळान अवल्‌यात सी वदु हुस्‌यार छे।
LUK 16:9 तेरेमां मे तुहुंक कह्‌वो ईनी कळीन धन साहरे आपसा वाटे दुस्‌तीदार्‌या बणाय लेवु, तेरेसी पापेन धन सर जासे, ती चे आवणेवाळी जलमेन रहणेन जागे तुंद्‌रो आव-भाव करसे।
LUK 16:10 “जु नानली सी बी नानली वातेम ईमान राखे, चु मट्‌ली वातेम बी ईमानदार छे, ने जु नानली सी बी नानली वातेम लुच्‌चु छे, चु मट्‌ली वातेम बी लुच्‌चु छे।
LUK 16:11 कदी तुहुं ईनी कळीन धन मां बी भुरसा लायक नी बण्‌या, ती तुंद्‌रे पर भुरसु करीन, तुहुंक छाचलो धन कुण आपसे?
LUK 16:12 ने कदी तुहुं पराया धन-दोवलत मां ईमान नी राख्‌या, ती तुहुंक, तुंद्‌रोत धन दोवलत कुण आपसे?
LUK 16:13 “कुय बी पावर्‌या दुय मालीकेन चाकरी नी कराये; काहाकी चु एक मालीक सी कुहराय ने दीसरा मालीक सी परम सी रवे। नीते एक मालीक साते हेळी-मेळीन रवसे ने दीसरा मालीक काजे भुंडोत जाणसे। तुहुंक भगवानेन ने धन-दोवलतेन दुयुन चाकरी नी कराये।”
LUK 16:14 फरीसी माणसे, पयस्‌यान हायाळ्‌ळा हतला, अळी चे जी वात सामळीन माणसे अगळ ईसुन हासी उडाड़तेला।
LUK 16:15 ईसु तीनु फरीसी माणसे काजे कह्‌यु, “तुहुं माणसे अगळ ते धरमी हवणेन ढंग करु बाकुन भगवान ते तुंद्‌रा हीया मन काजे जाणे।” काहाकी जी वात माणसेन नींगा मां बेसकी वारु छे, ची वात भगवानेन नींगा मां भुंडीत आवे असी छे।
LUK 16:16 “भगवानेन कायदान सास्‌तुर ने भगवानेन अघली वात बताड़ने वाळा युहन्‌नान टेम लग हतला, पेहले सीत भगवानेन राज मां भरायणे करीन खुस-खबरेन नेवतो आखाक बेसको जड़ रह्‌यो। ने माणसे ईना राजेन बेसका उतवाळास भरायणे बाजी रया।”
LUK 16:17 “सरग ने धरती टळनु ते नक्‌खी छे, बाकुन नेम कायदान एक बी आकड़ान नानोस टीपको पुरो हये पाखुर नी टळे।”
LUK 16:18 ईसु अगु कवतु गुयु, “जु कुय आपसी घरवाळीक छुड़ीन, काहनीक दीसरी बायरी साते ईयाव करे, चु छीनाळो करे; ने जु कुय तीनी छुल्‌ली बायरी साते ईयाव करे, चु बी छीनाळो करे।”
LUK 16:19 ईसु एक दाखलु अळी कह्‌यु “एक बेसकु लकपती माणुस हतलु, चु बेसका महंगा जामण्‌या पुथल्‌या ने चमकण्‌या पुथल्‌या पेहरतेलु, ने दाहड़ीन वारु सुक मां रवीन मजा करतेलु।
LUK 16:20 तीना लकपतीन बारना पर लाजर नावेन एक गरीब माणुस पड़ रवलु, तेरे आखे डील मां फुड़ा नीकळी रवला। तीनाक चे काहनाक चां नाख दीन जात रह्‌लो
LUK 16:21 ने चु गरीब माणुस, आपसो पेट भरने करीन, लकपती माणसेन इस्‌टाळो खाणेन हेर करतेलु; बाकुन च बी तीनाक नी जड़तेलो, ने कुतरा लग आवीन तेरा डील पर फुड़ा काजे चाटतेला।
LUK 16:22 ने अळी एक दाहड़ु चु गरीब लाजर मर गुयु, ने सरग वाळा काहवाळ्‌या तीना लाजरेन जीव काजे सरगेम लीजाय्‌न अब्‌राहमेन खुळाम बठाड़ देदा। ने अळी एक दाहड़ु चु अमीर माणुस बी मर गुयु, ने तीनाक गाड़ी देदा।
LUK 16:23 ने चु नरक मां बेसकु वेला करतु जाय्‌न उपर देख्‌यु, बेसके लांबे रय्‌न अब्‌राहमेन खुळा मां लाजर काजे देख्‌यु
LUK 16:24 चु अमीर माणुस आयड़ीन कह्‌यु, ‘बास अब्‌राहम! मारे पर दया कर, ने लाजर काजे मारेन्‌चां मकली दे, हेरेन करीन चु आपसी आंगळीन छेंडु पाणी मां भीजवीन मारी जीप काजे सेळवी देय, काहाकी मे ईनी आंच मां बेसकु वेला कर र्‌यु!’
LUK 16:25 अब्‌राहम तीना लकपती माणुस काजे कह्‌यु, बेटा, तु धरती पर वारु जीवन काजे हेर कर की तुसेक धरती पर वारु जीवाय मां सुकुन-सुक जड़लु, ने लाजर काजे दुखुत-दुख जड़लो; हय हीनाक जां सुक ने सांती जड़ रय, ने तीनेत हीसाबे तुसेक वेला करनु पड़ रयो।
LUK 16:26 ने ईनी वातेक छुड़ीन जी वात बी छे की हामरे ने तारे ईचमां एक बेसकी मटी खुय छे; अतराम कदी कुय तारेन चां जाणे बी हींडे, तेबी चु नी जाय सके; ने कदी कुय हया सी ईनी धड़े आवणे बी हींडे, तेबी हया सी तीनाक ईनी धड़े नी आवाये।
LUK 16:27 चु लकपती माणुस अब्‌राहम काजे कह्‌यु, ए अब्‌राहम बास! मे तारे धड़े वीन्‌ती करो की तु लाजर काजे मारा बासेन घर मकली दे।
LUK 16:28 काहाकी मारा पांच भायस छे, ने लाजर मार घर जाय्‌न जां आखो जो हयो तीनी वातेन गवा देसे, ने तीनुक जी वाते कहीन चेताय देसे। नी ते कांखुर मायन तींद्‌रे धड़े बी असोत असो ने चे बी ईना वेळान जागा मां आवती रवे।
LUK 16:29 अब्‌राहम तीना लकपती माणुस काजे कह्‌यु, मुसान ने भगवानेन अघी सी आवणे वाळी वात बताड़ने वाळान किताप तींद्‌रे धड़े छे, तीनुक तींद्‌री सामळनु चाहजे।
LUK 16:30 चु लकपती माणुस अब्‌राहम काजे कह्‌यु, ‘ए बास अब्‌राहम; चे तींद्‌री वात काजे सामळे; बाकुन कदी मरला माणसे मायन कुय तींद्‌रेन्‌चां जाय, ती चे पापे भीणी सी मन फेरवीन भगवान भीणी आवसे।’
LUK 16:31 बाकुन अब्‌राहम तीना लकपती माणसेक कह्‌यु, जत्‌यार चे मुसान ने भगवानेन अघी सी आवणे वाळी वात बताड़ने वाळान लिखली वात नी सामळता, ती कदी मरला मायन कुय बी जीवतु हय्‌न तींद्‌रेन चां जाय्‌न कवसे तेबी चे तेरी नी माने।”
LUK 17:1 एक दाहड़ु ईसु आपसा चेलाक कह्‌यु, “पाप कराड़नेन पारख ते जलम आवती रवसे, बाकुन तीना माणसे पर गरा आय पड़े, तेरे साहरे पाप करनेन पारख आवे!
LUK 17:2 जु कुय ईनु नानला मायन एक काजे बी पटाड़ीन पाप करनेन पारख मां पड़े तेरे वाटे ते ज्‌य वारु छे की तेरा गळा मां घट्‌टीन पुड़ गळा मां बांदीन तीनाक दर्‌या मां नाख देणु चाहे।
LUK 17:3 ईनी वातेम तुहुं चेतीन रवु, “कदी तुंद्‌रु भाय काहनु बी गुनु करे, ती तीनाक असु गुनु नी करनु करीन समजाड़ देवु, ने कदी चु गुना सी भगवान भीणी वळे, ती तीनाक माफी आप देवु।
LUK 17:4 कदी चु एक दाहड़ाम सात कावा तुंद्‌रे वीरुद गुनु करे, ने चु सात कावा आवीन तुसेक कवे भाय मे तारे वीरुद मां गुनु करलु छे मेसेक माफ कर दे, ती तुहुं माफ करता रवजु।”
LUK 17:5 ने ईसुन नेवताळा मालीक ईसुक कह्‌या, “तु हामरा भुरसा काजे बड़ाव।”
LUK 17:6 मालीक ईसु तीनुक कह्‌यु, “कदी तुंद्‌रु भुरसु रायन दाणा बराबर बी हवतु, तत्‌यार तुहुं ईना सहतुतेन झाड़काक कवता, की ‘उखळीन दर्‌या मां चुपाय जां रव!’ ती चो तुंद्‌री वात मान लेतु।
LUK 17:7 “तुंद्‌रे मायन असु कुण छे, तेरु पावर्‌यु हळ जुपतु हय, नीते गाडरा चारतु हय, ने जत्‌यार खेतेम सी पछु आवे, ती चु तीनाक कवे की आव, उतवाळुस खाणो-खाणे बस जां?
LUK 17:8 ने तीनाक ज कवणे रहणीदीन ज कवे, ‘मारे वाटे खाणो रांद; ने जत्‌यार लग मे खाय नी लम तत्‌यार लग कमर बांदीन मेसेक खाणो आपतु रव। अळी तेरे पछेन तु बी खाय पीय लेजी।’
LUK 17:9 जाराक वीच्‌यार करु! मारु पावर्‌यु मारु हुकुम मानीन मारी बेसकी चाकरी कर्‌यु करीन मालीक तीनाक ‘तु बेसकु वारु कर्‌यु’ कवसे काय? नी कवे।
LUK 17:10 तुहुं बी ईना पावर्‌यान तसात छे, अतरे आखा हुकुम पाळीन अळी तुहुंक कवणु चाहे, ‘हामु पावर्‌या अतरात छे; ज काम कर्‌या भाग हतलो, च काम अतरोत हामु करला छे।’”
LUK 17:11 ने एक कावा जत्‌यार ईसु यरुसलेम जाणे बाजी रवलु ती चु गलील सामर्‌या जीलान काकड़ पर मायन गुयु।
LUK 17:12 काहनाक एक गांव मां भरायु ती तीनाक दस कुड़ायला माणसे भेळा हया।
LUK 17:13 ने चे कुड़ायला छेटेस उबा रय्‌न जुर सी आयड़ीन कह्‌या, “ए मालीक! ईसु! हामरे पर दया कर।”
LUK 17:14 ने ईसु तीनुक देखीन कह्‌यु, “जावु ने आपसा काजे भगवानेन पुजारा धड़े वारु देखाड़ लेवु, ने चे कुड़ायला माणसे पुजारा धड़े जाणे बाजी रवला।” ने जातेत-जाते वाटे वारु हय्‌न चुखा हय गुया।
LUK 17:15 तत्‌यार तींद्‌रेम सी एक अदमी देख्‌यु की मे वारु हय गुयु, ती चु तत्‌यार भगवानेन बेसकु वारु बड़ाय करतु जाय्‌न ईसु भीणी पछु आयु।
LUK 17:16 ने चु मांड्‌या वळीन ईसुन पायेम हीट पड़्‌यु ने भगवान काजे बेसकु वारु कवणे बाजी गुयु। चु माणुस यहुदी जातीन नी हतलु, बाकुन सामरी जीलान एक नी-यहुदी माणुस हतलु। बाकुन दीसरा नव जणा ईसु भीणी नी आया।
LUK 17:17 ती ईसु तीना माणसेक कह्‌यु, “दस माणसे वारु हवला छे! ती दीसरा नव कां छे?
LUK 17:18 ईना दीसरे देस वाळा काजे छुड़ीन दीसरा भगवानेन बड़ाय करने ने भगवान काजे ‘बेसकु वारु’ कवणे दीसरा काहा नी आया?”
LUK 17:19 अळतेन ईसु तीना अदमीक कह्‌यु, “उठ ने तारे घर जाती रव। तु मार पर भुरसु कर्‌यु करीन भगवान तुसेक वारु करलु छे।”
LUK 17:20 जत्‌यार फरीसी माणसे ईसुक पुछ्‌या की भगवानेन राज की आवसे, तत्‌यार ईसु तीनुक कह्‌यु, “भगवानेन राज उजेंतो नी आवे।
LUK 17:21 अळी माणसे ज नी कवे, ‘देखु, जां छे’ नी ते, ‘पलो वां छे!’ भगवानेन राज ते तुंद्‌रे ईचमां छे।”
LUK 17:22 ईसु आपसा चेला काजे कह्‌यु, “असी टेम बी आवसे, जत्‌यार तुहुं माणसेन पुर्‌यान दाहड़ा मायन एक दाहड़ा काजे देखणेन हेर करसु, बाकुन चु दाहड़ु तुहुंक नी देखणे जड़े।”
LUK 17:23 माणसे तुहुंक कवसे, देखु चु जां छे! नी ते, देख, चु वां छे! ती तुहुं तींखुर जाती घुण रवु ने नी तींद्‌रे पछळ जाजु।
LUK 17:24 काहाकी जसी वीजळी सरगेन एक धड़े सी दीसरे धड़े लग बी भबळीन देखाय देय, तसुत माणसेन पुर्‌यु आवसे तीने दाहड़े देखाय देसे।
LUK 17:25 बाकुन हय पेहले तीनाक बेसकु दुख हाकलनु पड़से ने ईनी पीड़ीन माणसे तेरु नीकारु करसे।
LUK 17:26 “जसों नुहुन दाहड़ाम हवलो, तसोत माणसेन पुर्‌यान दाहड़ा मां बी हवसे।
LUK 17:27 तीने दाहड़े लग नुह मटला ढंड्‌या मां नी भरायु, ती लग माणसे खाता-पीता रया, ने ईयाव करता रया। ने उचकाणुन ढंड्‌यो-पाणीम आयु ने चु आखाक डुबाड़ीन मार नाख्‌यु।
LUK 17:28 असो लुतेन दाहड़ा मां बी हवलो। माणसे खाता-पीता रया, लेणु-देणु करता रया, झाड़का चुपता रया, ने घर बणावता रया;
LUK 17:29 बाकुन तीने दाहड़े लुत सदोम सहरेम सी नीकळी गुयु, तीनेत दाहड़े भगवान सरगे सी आकठो ने गंधक पाणीन तसों सरगे सी पड़्‌यो, ने आखा मरीन सर गुया।
LUK 17:30 जत्‌यार माणसेन पुर्‌यान आवणु रवसे तीने दाहड़े बी असोत हवसे।
LUK 17:31 “तीने दाहड़े जु घर पर हय, चु समान लेणे करीन नेचु उतरीन घरमां घुण भराये ने जु खेतेम हय, चु बी पछु घर नी आवणु चाहजे।
LUK 17:32 तुहुं लुतेन घरवाळीक हेर करु की तेरे साते काय हयो।
LUK 17:33 जु आपसान जीवन बचाड़ने हींड्‌से चु तीनी जीवाय काजे खुय देसे, ने जु कुय आपसान जीवाय काजे खुय देसे, चु तीनी जीवाय काजे बचाड़ लेसे।
LUK 17:34 मे तुहुं काजे ज कह्‌वो, तीनी राते दुय जणा, एक खाट्‌ली पर सुय रया हसे, एक काजे ईछलीन जाती रवसे, ने दीसराक छुड़ देसे।
LUK 17:35 दुय बायरा एक साते घट्‌टी बसीन दळती हय ती तीनु मायन एक काजे ईछलीन ली जाती रवसे, ने दीसरीक छुड़दीन जाती रवसे।”
LUK 17:36 दुय माणसे खेते मां हसे, “एक काजे ईछलीन जाती रवसे; ने दीसराक छुड़दीन जाती रवसे।”
LUK 17:37 जी आखी वात सामळीन ईसुन चेला ईसुक पुछ्‌या, “मालीक! ज कां हवसे?” ईसु तीनुक कह्‌यु, “जां धड़ रवे, चांहान मटला घुवड़ा बी भेळा हवसे।”
LUK 18:1 दाहड़ीन अळी-अळीन दुवा करनु चाहजे, ने हिम्‌मत नी छुड़नु चाहजे, ज सीकाड़ने करीन, ईसु हेरा चेलाक एक दाखलु सामळायु।
LUK 18:2 “काहनाक सहर मां एक नीयाव करन्‌यु हतलु, चु, नी ते भगवान सी बीहतेलु, ने नी ते कुय माणसेन परवाय करतेलु।
LUK 18:3 तीनात सहर मां एक रांडायली बायर बी हतली। ची तीना नीयाव करने वाळान चां आवीन असी कह्‌या करतेली, ‘नीयाव करीन मेसेक गुनु लागाड़न्‌या सी बचाड़ ने मेसेक नीयाव आपाड़!’
LUK 18:4 चु बेसका दाहड़ा लग नीकारु करतु रयु, अळतेन चु आपसा मनेम कह्‌यु, मे नी ते भगवानेक बीहयो ने नी काहनाकेन परवाय करो,
LUK 18:5 बाकुन जी रांडायली बायर अळी-अळीन आवे, ने मेसेक परेसान करे, हेरेसी मे हेरु नीयाव करीस, तत्‌यार हयी, पछी अळी-अळीन नी आवे!”
LUK 18:6 मालीक ईसु अळी असु कह्‌यु, “सामळ्‌या की जु नी-धरमी नीयाव करन्‌यु काय कह्‌यु?
LUK 18:7 तेरेमां भगवान आपसा नेवाड़ला माणसे धड़े नीयाव करने मां वार लागाड़से काय? जे रात दाहड़ु आयड़ी-आयड़ीन तेरे धड़े दुवा कर्‌या करे?
LUK 18:8 मे तुहुंक कह्‌वो; चु उतवाळुस तींद्‌रे वाटे नीयाव करसे। तेबी जत्‌यार माणसेन पुर्‌यु आवसे, ती चु धरती पर माणसे मां भुरसु कर रवलु देखसे काय?”
LUK 18:9 ने ईसु तीनुक बी कह्‌यु, जे माणसे आपसा पर भुरसु करतेला की हामु बेसका धरमी छे, ने हय हामरेन तसा कुय धरमी माणसे नी हय। करीन चे दीसराक काय नी समजतेला। तीनु माणसेक ईसु जु दाखलु सामळायु।
LUK 18:10 दुय माणसे वीन्‌ती करने करीन यरुसलेम मंदीर मां गुया। तींद्‌रे मायन एक जणु फरीसी माणुस हतलु, ने दीसरु फाळु उकाळन्‌यु हतलु।
LUK 18:11 जु फरीसी माणुस एक धड़े उबु हय्‌न आपसा मन मां असी दुवा करने बाजी गुयु, ए भगवान, मे तुसेक बेसकु वारु कह्‌वो, काहाकी मे दीसरान तसु दीसरा धड़े हापकीन खाण्‌यु, ने लुच्‌चु ने दीसरान बायर साते छीनाळो करन्‌यु नी हय। दीसरा माणसे असा छे; बाकुन मे नी हय। ने ईना फाळु लेणे वाळान तसु बी नी हय।
LUK 18:12 मे हाप्‌ता मां दुय कावा उपास करो, ने ज काय बी मे कमायो, तेरु दसवु वाटु तुसेक आपु।
LUK 18:13 बाकुन फाळु लेणे वाळु छेटेत उबु हय रयु, ने सरगे भीणी देख्‌यु लग नी, बाकुन चु दुख मां आपसी छाती ठुकी-ठुकीन कह्‌यु, “ए भगवान, मे पापी छे। तु मार पर दया कर।”
LUK 18:14 ईसु असु कय्‌न दाखलु सार देदु, “मे तुहुंक जो कह्‌वो, की भगवान फरीसी माणसेन दुवा सामळी लेदु, ने तेरे पर गीण-दया करीन धरमी बणायु। ने चु हीनी रीते आपसान घर पछु गुयु जु कुय खुद काजे मटु समजे, भगवान तीनाक नानु कर देसे। बाकुन जु कुय खुद काजे नानु समजे तीनाक मटु कर देसे।”
LUK 18:15 एक दाहड़ु माणसे नानला पुर्‌या पर ईसुन हात मेकाड़ने करीन ईसुन्‌चां लाया। चेला ज आखो देखीन माणसेक झीचकार्‌या।
LUK 18:16 बाकुन ईसु पुर्‌या काजे आपसे धड़े बुलायु ने चेला काजे कह्‌यु, “ईनु नानला पुर्‌या काजे मारेन्‌चां आवणे देवु, हीनुक मां रुकु; काहाकी भगवानेन राज हीनु पुर्‌यान तसलु छे।
LUK 18:17 मे तुहुंक छाचलीन कव की जु कुय ईनु नानला-पुर्‌यान तसा भगवानेन राज नी हुकारे, चु भगवानेन राज मां कदी नी भराय सके।”
LUK 18:18 ने यहुदी माणसेन एक मुख्‌यु ईसु काजे ज पुछ्‌यु, “ए वारला मास्‌तर! अमर जीवन हात करने करीन मेसेक काय करनु पड़से?”
LUK 18:19 ईसु तीना मुख्‌या काजे कह्‌यु, “तु मेसेक वारलु काहा कवे?” कुय वारलु नी हय। बाकुन भगवान अतरुत वारलु छे।
LUK 18:20 तु कायदान हुकुम काजे ते जाणतु हसे, की छीनाळु नी करनु, खुन नी करनु, चुरी नी करनु, झुटी गवाय नी देणु, आपणा माय-बासेन ईज्‌जत करनु।
LUK 18:21 चु यहुदी मुख्‌यु जपाप आप्‌यु, “ईनु आखा नेमेन पाळण ते मे बी पुर्‌या बुदीम सीत करतु आय रयु।”
LUK 18:22 जो सामळीन ईसु तीनाक कह्‌यु की, “हय तारेम एक वातेन कसर छे। आपणो जो काय छे च आखो वेचीन गरीब माणसे काजे वाट दे, ने तुसेक सरगे मां धन जड़से। ने तु आवीन मारे पुठ्‌ये चाल पड़।”
LUK 18:23 चु मुख्‌यु ज सामळीन बेसकु नराज हय गुयु, काहाकी चु बेसकु लकपती हतलु।
LUK 18:24 ईसु ज देखीन मुख्‌या काजे कह्‌यु, लकपती माणसे काजे भगवानेन राज मां भरायणु बेसको काठो छे।
LUK 18:25 सुईन नाचका मायन उटड़ाक नीकाळनु सरल छे, बाकुन लकपती माणसेक भगवानेन राज मां भरायणु बेसको काठो छे।
LUK 18:26 बाकुन अतरा मां सामळने वाळा दीसरा माणसे कह्‌या, “असी वात छे, ती कुणीन छुटकारु हवसे?”
LUK 18:27 ती ईसु कह्‌यु, “हय माणसे सी नी हय सके च भगवान सी हय सके।”
LUK 18:28 ती पतरस ईसु काजे कह्‌यु, “देख, हामु हामरा आखा घर बार काजे बी छुड़ीन तार पछळ चालने बाजी गुयला छे।”
LUK 18:29 ईसु तीनुक कह्‌यु, “मे तुहुंक छाचलीन कव की असु कुय बी नी हय, चु भगवानेन राज वाटे घर-बार ने आपसी घरवाळी, भाय-बहणस्‌या, आयस-बास ने पुर्‌या काजे छुड़ देदु हय।”
LUK 18:30 ने तीनाक जां ईनी टेम मां काय नी जड़यो हय; तीनाक जां बी बेसको जड़से ने सरगे मां बी तीनाक अमर जीवाय जड़से।
LUK 18:31 एक दाहड़ु ईसु बाहरा काजे दीसरा सी छेटेस ली गुयु ने तीनुक कह्‌यु, “सामळु, आपणु यरुसलेम जाणे बाजी रया। यरुसलेम एक असी जागा छे। आखा मारा बारामां, हय माणसेन पुर्‌यान बारामां भगवानेन अघी सी आवणे वाळी वात बताड़ने वाळा माणसेन साहरे लिखली आखी वात पुरी हवसे।
LUK 18:32 मे यहुदी जातीन माणुस बणीन आयु, बाकुन मे तीनु माणसेन हातेम आपाय जायस, जे यहुदी नी हय। चे मारी हासी उड़ावसे, मेसेक वेला पाड़ीन मारी नाव-बद्‌दी करसे, ने तेरे पर थुप्‌से।
LUK 18:33 ने चे तीनुक सपाटा दीन ठुकसे, ने तीनुक घायल करीन मार नाख्‌से। बाकुन चु तीसरे दाहड़े पछु जीवतु हय जासे।”
LUK 18:34 बाकुन ईसुन चेला ईनी वात काजे काय बी नी समज्‌या। ईनु बुलेन मतलब तींद्‌रे वाटे ढाकायलो रयो। तीनुक नी समज मां आयो की ईसु तीनुक काय कवणे बाजी रवलु।
LUK 18:35 जत्‌यार ईसु यरीहो सहर धड़े आवणे बाजी रवलु, ती एक आंधळु सयड़क धड़े बसीन चां मायन आवणे-जाणे वाळा धड़े भीक मांगणे बाजी रवलु।
LUK 18:36 माणसेन टुळा काजे जातला ने पायेन चाल सामळीन चु आंधळु माणसेक पुछणे बाजी गुयु, च आखो काय हवणे बाजी रयो।
LUK 18:37 माणसे तीना आंदळा काजे बताड़ देदा की, “ईसु नासरी जां मायन जाणे बाजी रयु।”
LUK 18:38 तत्‌यार आंधळु जु कवतु जाय्‌न जुर सी आयड़्‌यु, “ए ईसु! दावुदेन अवल्‌यात! मारे पर दया कर।”
LUK 18:39 चे तीना आंदळा अगळ-अगळ जाणे बाजी रवला, चे तीना आंदळा काजे हुगु रय जां करीन झीचकारतेला, बाकुन चु आंधळु अळी बी जुर सी असु आयड़तेलु, “ए दावुदेन अवल्‌यात मारे पर दया कर।”
LUK 18:40 तत्‌यार ईसु उबु रय्‌न माणसेक हुकुम आप्‌यु की हीनाक मारे धड़े ली आवु ने जत्‌यार चु धड़े आयु ती ईसु तीनाक पुछ्‌यु।
LUK 18:41 “तुसेक काय चाहजे? की मे तारे वाटे करो?” चु आंधळु कह्‌यु, “ए मालीक मे अळी देखणे हींडो।”
LUK 18:42 ईसु तीनाक कह्‌यु, “ती तु देखणे लाग, ने जां, तारु भुरसु वारु कर देदलु छे।”
LUK 18:43 तत्‌यारुत चु देखणे लाग गुय। ने चु भगवानेन गुण गावतु जाय्‌न ईसु पछळ चाल देदु। ने ज देखीन आखा माणसे भगवानेन गुण गाया।
LUK 19:1 एक दाहड़ु ईसु यरीहो सहर मायन जाणे बाजी रवलु।
LUK 19:2 देखु चां जक्‌कय नावेन एक लकपती माणुस तीना सहर मां रवतेलु। चु फाळु उकाळन्‌यान मुख्‌यु हतलु।
LUK 19:3 चु सामळ्‌यु की ईसु चां मायन जाणे बाजी रयु। ईसु कुण छे, चो मालुम करने करीन, जक्‌कय ईसुक देखणे हींडतेलु। बाकुन जक्‌कय नानलु हतलु।
LUK 19:4 तत्‌यार चु गड़दी मां अघु दवड़ीन गुयु ने ईसुक देखणे करीन एक गुलरेन झाड़का पर चहड़ी गुयु। काहाकी ईसु तीनीत वाटे सी जाणे वाळु हतलु।
LUK 19:5 जत्‌यार ईसु तीना झाड़का तळे आयु, ती चु उपर देख्‌यु, ने तीना जक्‌कय काजे कह्‌यु, “ए जक्‌कय मामार उतरी आव! काहाकी आज मेसेक तारे घर रवणु छे।”
LUK 19:6 तत्‌यार चु जक्‌कय मामार उतर्‌यु ने खुस हय्‌न ईसुन आव-भाव कर्‌यु, ने हेरे घर ली गुयु।
LUK 19:7 ज देखीन आखा यहुदी-माणसे ईसुन वात करीन एक दीसराक कुड़-कुड़ करीन कवणे बाजी गुया, “ईसु ते एक पापीन घर मां मेजवान्‌यु बणीन आय रयु।”
LUK 19:8 बाकुन जक्‌कय उबु हय्‌न ईसुक कह्‌यु, “मालीक मे मारी आखी चीजेन आदु वाटु ईना गांवेन गरीब काजे आप दीस। कदी मे कुय सी धुकु दीन तेरे धड़े धन लेदु हय, ती मे तीनाक तेरो च्‌यार गुणा पछु वाळ दीस।”
LUK 19:9 तत्‌यार ईसु तीनाक कह्‌यु, “आज ईना घर मां छुटकारु आवलु छे, काहाकी जु बी अब्‌राहमेन एक अवल्‌यात मायन छे।
LUK 19:10 काहाकी माणसेन पुर्‌यु खुवायलाक हेरने, ने तीनुक बचावणे करीन आवलु छे।”
LUK 19:11 जत्‌यार माणसे जी वात सामळने बाजी रवला, ती ईसु एक अळी दाखलु सामळायु; काहाकी ईसु यरुसलेमेन गांव धड़े आय रवलु, ने माणसे ज देखीन समजी रवला की भगवानेन राज हय देखाय देणेवाळो छे।
LUK 19:12 तेरेमां ईसु कह्‌यु, एक लकपती माणुस राजु बणीन पछु आवणे करीन बेसके लांबे वाळा देसेम जाणेन तीयारी कर्‌यु।
LUK 19:13 ने चु लकपती माणुस आपसा दस गुलाम पावर्‌या काजे बुलायु ने तीनुक एक-एक जणाक कळदार रुप्‌या आपीन कह्‌यु, मेसेक पछु आवणे लग तुहुं वेपार करीन लेणु देणु करता रवु।
LUK 19:14 बाकुन तेरा गांव मां रवण्‌या तीनाक भुंडात समजाड़तेला, ने चे तेरे पछळ एक काहवाळ्‌यान साहरे तीना काजे कय मकल्‌या की हीयु हामरे पर राज नी करनु चाहे।
LUK 19:15 तत्‌यार लकपती माणुस लांबे वाळा देसेम सी राजु बणीन पछु आयु ने चु बुलावणे मकल्‌यु ने चु गुलाम पावर्‌या काजे धन आप्‌लु ने ज जाणने हींडतेलु, की एक-एक जणु लेणु-देणु करीन कतरु कमायु ने वेपार कर्‌यु।
LUK 19:16 पेहलु पावर्‌यु आवीन कह्‌यु, मालीक! तु मेसेक दस कळदार रुप्‌या आपलु, तीनु दस रुप्‌यान मे अळी दस कळदार रुप्‌या कमायलु छे।
LUK 19:17 मालीक तीनाक कह्‌यु, ए वारलु पावर्‌यु तु बेसकु वारु कर्‌यु! तु नानली सी नानली वातेम बी ईमानदार नीकळ्‌यु, हय तुसेक दस सहर पर हक आपो।
LUK 19:18 दीसरु पावर्‌यु आवीन कह्‌यु, मालीक! तारा पांच कळदार रुप्‌यान साहरे मे पांच कळदार रुप्‌या अळी कमायलु छे।
LUK 19:19 ने मालीक तीनाक बी कह्‌यु, तुसेक बी पांच सहर पर हक आपो।
LUK 19:20 हय तीसरु पावर्‌यु आवीन कह्‌यु, मालीक! देख, जु छे तारु कळदार रुप्‌यु, तीनाक मे एक पुथल्‌याम बांदीन मेक देदलु।
LUK 19:21 काहाकी मे तुसेक देखीन बीहतेलु, काहाकी तु बेसकु आकरु छे; तु जां नी मेले तीनाक ईछी ली जाय, ने जां तु नी एर्‌यु, तीनाक तु काट लेय।
LUK 19:22 चु मालीक तीनाक कह्‌यु, ए वेरी पावर्‌या! मे तुसेक तारात मुंहडा सी तारु नीयाव करीस। तु जाणतेलु की मे आकरु छे। ने जां नी मेलो चो ईछ ली जाम, ने जां नी एरु चो काट लम।
LUK 19:23 ती तु मारो धन सवकारेन्‌चां काहा नी मेल्‌यु? ने तत्‌यार मे पछु आवीन तीनु पयस्‌या काजे ईयाज समेत सवकार धड़े सी ली लेतु
LUK 19:24 ने मालीक साते उबा हय रवला आखा माणसेक कह्‌यु, ईना पावर्‌या धड़े सी चु कळदार रुप्‌यु, हापकी लेवु, ने जेरे धड़े दस कळदार रुप्‌या छे, तीनात काजे जु कळदार रुप्‌यु बी आप देवु।
LUK 19:25 चे उबा हय रवला आखा माणसे मालीक काजे कह्‌या, मालीक! हेरे धड़े ते दस कळदार रुप्‌या छे।
LUK 19:26 मालीक जपाप आप्‌यु, तेरे धड़े छे, तीना काजे अळी बी आपसे; बाकुन तेरे धड़े काय नी हय, तेरे धड़े सी, च बी मांग लेसे, ज तेरे धड़े छे।
LUK 19:27 बाकुन तीनु मारा वेरी काजे, तीनुक ज्‌य नी चाहतेला की मे तींद्‌रे पर राज करो तीनुक जां मारे अगळ मार नाखु।
LUK 19:28 जी वात कयदीन ईसु यरुसलेमेन गांव भीणी तेरा चेला अगळ-अगळ जाणे बाजी गुयु।
LUK 19:29 ने ईसु चालतु-चालतु बेतफगे ने बेतन्‌या गांव धड़े वाळा जेतुन नावेन बयड़ा पर पुग्‌यु। तत्‌यार ईसु आपसा दुय चेलाक धड़े बुलायु ने तीनुक ज कय मकल्‌यु।
LUK 19:30 “अगळ पला गांव मां जावु। ने जसा तुहुं गांव मां भरायसु, ती तुहुंक एक गदड़ान पीलो बांद रवलो देखसु। तेरे पर कुय बी माणुस कदी नी बठ्‌या। तीनाक छुड़ीन जां ली आवु।
LUK 19:31 कदी तुहुंक कुय पुछे की ईनाक काहा छुड़ रया? ती तीनाक कवजु” मालीक काजे ज गदड़ान पीलो चाहजे।
LUK 19:32 चे दुय चेला तसात कर्‌या जसु तीनुक कवला। जसु ईसु कय देदलु, तसात तीनुक एक गदड़ान पीलो बांद रवलो जड़्‌यो।
LUK 19:33 जत्‌यार चे तीनाक छुड़ने बाजी रवला, ती हेरा मालीक तीनुक देख्‌यु ने पुछ्‌यु “तुहुं हामरा पीला काजे काहा छुड़ रया?”
LUK 19:34 चे कह्‌या “मालीक काजे ज गदड़ो चाहजे।”
LUK 19:35 तत्‌यार चे पीलाक ईसु धड़े लाया ने चे पीलान पर पुथल्‌या पांगराय देदा ने तीना पीला पर ईसुक बठाड़ देदा।
LUK 19:36 ईसु पीलाक चालाड़ीन सहर भीणी ली गुया, ने माणसे आपसा पुथल्‌या ने चादरा तेरे अगळ वाट पर आथरीन तेरो आव-भाव कर्‌या।
LUK 19:37 ईसु जेतुन झाड़कान बयड़ान कड़खे यरुसलेम धड़े पुग्‌यु, ती ईसुक मान्‌ने वाळा बेसका माणसे, ईसु आयु करीन खुस हय गुया, ने वारु काम काजे देखीन भगवान काजे बेसकु वारु कह्‌वीन खुस हय्‌न तेरी बड़ाय करने बाजी गुया।
LUK 19:38 “बरकतवाळु छे चु राजु, जु भगवान मालीकेन नावे आवे। सरगे मां सांती छावाय रयो आखाम उचा रहण्‌या भगवानेन बड़ाय हय रय।”
LUK 19:39 ज सामळीन टुळा मां सी थुड़ाक फरीसी माणसे ईसु काजे कह्‌या, “ए मास्‌तर! तु तारा चेलाक झीचकारीन हुगु राख।”
LUK 19:40 बाकुन ईसु तीनु फरीसी माणसे काजे कह्‌यु, “मे तुहुंक कहुं कदी जे हुगा रय जासे ती, जे दगड़ा आपसात आयड़से।”
LUK 19:41 जत्‌यार ईसु यरुसलेम सहर धड़े आयु, ने चु सहरेक देखीन रड़्‌यु।
LUK 19:42 ने असु कह्‌यु, ए यरुसलेम सहर मां रहण्‌या माणसे कदी तुहुं बी हीने दाहड़े आपसी सुक-सांतीन वाट जाण लेता, ती भलो हवतो, बाकुन हय लग ची सातायली छे, ने तुहुंक नी देखायी।
LUK 19:43 काहाकी तारे पर चे दाहड़ा आवसे जत्‌यार तारा वेरी तारे चारेमेर आवीन तुसेक घेरी लेसे ने चारेमेर सी तुसेक दड़पसे।
LUK 19:44 ने ईनु भीतड़ान ईचमां तुसेक ने तारा पुर्‌याक धुळा मां मीलाड़ देसे ने गांवेन भीतड़ा उदरी जासे, ने दगड़ा पर दगड़ु बी नी रवणे देसे, काहाकी तुहुं भगवान भीणी सी मकेल्‌ला मसी काजे नी उळख्‌या।
LUK 19:45 ईसु मंदीरेन आंगणा मां भरायन लेणु-देणु करन्‌या वेपारीक बाहर नीकाळने बाजी गुयु।
LUK 19:46 ने तीनुक कह्‌यु, “खरला सास्‌तुर मां ज लिखलो छे, मारो घर दुवान घर कह्‌वायसे, बाकुन तुहुं ईना घरेक, डाकुन घर बणाय देदा।”
LUK 19:47 चु ईसु दाहड़ीन मंदीर मां माणसे काजे वात सामळावणे बाजी रवलु। ने ईसु काजे भगवानेन डाहला पुजारा ने यहुदी-सास्‌तुर सीकाड़न्‌या ने मालदार माणसे वीरुद करने बाजी गुया ने तीनाक मार नाखणेन मुखु हेर रवला।
LUK 19:48 बाकुन तीनुक काय बी नी बण्‌यु, ने तीनुक समज नी आयु की ज कसों करजे, काहाकी आखा माणसे बेसका तेरी वात सामळने चाहतेला।
LUK 20:1 एक दाहड़ु ईसु मंदीर मां माणसे काजे वात सीकाड़तु जाय्‌न खुस-खबर सामळावणे बाजी रवलु, भगवानेन डाहला पुजारा ने यहुदी-सास्‌तुर सीकाड़न्‌या डाहला-डाहला भेळा ईसु धड़े आवीन उबा हय रवला।
LUK 20:2 ने ईसु काजे कवणे बाजी गुया, “हामुक बताड़ की तु काहना हक सी ज आखो करने बाजी रयु? ने तुसेक जु हक कुण आप्‌यो?”
LUK 20:3 ईसु तीनुक जपाप आप्‌यु, “मे तुहुंक एक सवाल पुछो, तेरु जपाप मेसेक आपु।”
LUK 20:4 बपतीस्‌मा आपण्‌या युहन्‌ना काजे बपतीस्‌मान रीत आपणेन हक, सरग वाळु भगवान आपलु की माणसे आपला?
LUK 20:5 जी वात सामळीन चे ज कवता जाय्‌न आपसात वीच्‌यार कर्‌या, हामु काय कवजे? भगवान आपलु कवसुन, ती कवसे, तुहुं बपतीस्‌मा आपण्‌या युहन्‌नान वात काहा नी मान्‌या।
LUK 20:6 ने कदी माणुस आपलु करीन कवसु, ती ज माणसेन टुळु आपणुक दगड़ाय्‌न मार नाखसे, काहाकी आखा बपतीस्‌मा आपण्‌या युहन्‌ना काजे भगवानेन अघी सी आवणे वाळी वात बताड़ने वाळु माने।
LUK 20:7 अतराम चे जपाप आप्‌या, “काय जाणु हामुक मालुम नी हय, की ज हक युहन्‌ना काजे कुण आप्‌यो।”
LUK 20:8 ईसु तीनुक कह्‌यु, “मे बी नी देखाड़तु की मे ज आखो कुणीन हक सी करने बाजी रयु।”
LUK 20:9 ती चु माणसे काजे जु, दाखलु सामळावणे बाजी गुयु, एक कावा एक किरसाण अंगुरेन वाड़ी लागाड़्‌यु। ने ची वाड़ी दीसरा किरसाण काजे साजा मां आपीन, बेसका दाहड़ा लग दीसरा देसेम जात रयु।
LUK 20:10 जत्‌यार अंगुर काजे भेळा करनेन टेम आय, ती चु आपसा एक पावर्‌याक मेरेन वाटु लेणे करीन मकल्‌यु। बाकुन साजल्‌या किरसाण तीना पावर्‌याक ठुकीन ठारलुत पछु मकली देदा।
LUK 20:11 ने अळी चु दीसरा पावर्‌याक मकल्‌यु। बाकुन साजल्‌या किरसाण तीनाक बी ठुक्‌या, ने नाव-बद्‌दी करीन ठारलुत मकली देदु।
LUK 20:12 बाकुन अळी चु तीसरा पावर्‌याक मकल्‌यु बाकुन साजेल्‌या तीनाक बी ठुकीन, अंगुरेन वाड़ी मां सी घायल करीन नीकाळ देदा।
LUK 20:13 ती चु अंगुरेन वाड़ीन मालीक आपसा मन मां कह्‌यु, “हय मे काय करो? मे मारा लाटेक्‌ला पुर्‌याक मकलीस।” कांखुर मायन चे तेरी ईज्‌जत करीन तेरु आव-भाव करसे
LUK 20:14 बाकुन साजेल्‌या किरसाण तीनाक आवतेलु देखीन आपसा-आपसात मन मां कह्‌या, “जु ते अंगुरेन वाड़ीन मालीकेन पुर्‌यु छे, हीनाक आपणु मार नाखजे, ती जी आखी जागा आपणी हय जासे।”
LUK 20:15 ने चे साजेल्‌या किरसाण्‌या तीनाक अंगुरेन वाड़ी मां सी बाहर नीकाळ देदा। ने ठुकी-ठुकीन मार नाख्‌या। अळी देखु वाड़ीन मालीक तीनु साजेल्‌या किरसाण्‌यान काय करसे?
LUK 20:16 चु आयन तीनु, साजेल्‌या किरसाण्‌याक मार नाख्‌से ने अंगुरेन वाड़ी मां दीसरा साजेल्‌या किरसाण्‌क आप देसे। चे ज सामळीन ईसुक कह्‌या, भगवान असु नी करे, ती बेसको वारु हय जाय।
LUK 20:17 बाकुन ईसु तींद्‌रे भीणी देखीन कह्‌यु, ती धरम सास्‌तुर मां असो लिखलो छे? घर बांदण्‌या मीस्‌तर्‌या तीना दगड़ा काजे रीकामो समजीन बाहर उराटी देदा चु दगड़ुत खुणान दगड़ु बण गुयु।
LUK 20:18 जु कुय बी ईना दगड़ा पर पड़से, चु छेदर्‌या-छेदर्‌या हय जासे। ने कदी चु दगड़ु कुय पर पड़से ती तीनाक घेद्‌या-घेद्‌या कर देसे।
LUK 20:19 यहुदी-सास्‌तुर सीकाड़न्‌या ने भगवानेन डाहला पुजारा ईसुक तत्‌यारुत धरने हींडतेला, बाकुन चे माणसे काजे देखीन बीहतेला। चे वारु समजी गुयला, की ईसु जु दाखलु आपणेत बारामां कय र्‌यु।
LUK 20:20 ने चे ईसु काजे फसाड़नेन नींगा नाख रवला, ने ईसुन चुकसी लेणे करीन माणसेक मकल्‌या। तीनु काजे धरमी हवणे ढंगड़ा कराड़ीन ईसु काजे तेरी वातेम चुकाड़ने करीन मकल्‌या। ने ईसु चुक जाय ती रोमी नीयाव करन्‌यान हातेम ने हक मां सुपणे करीन मकल्‌या।
LUK 20:21 चे आवीन ईसु काजे पुछ्‌या, “ए मास्‌तर हामुक मालुम छे की, तु जो कवे चो छाचलीत कवे ने वारु सीकाड़े बी। ने हामु जाणजे बी की तु मुंहडा देखीन वात नी करे; बाकुन माणुस काजे भगवानेन छाचलीन मरजीन वात सीकाड़े।
LUK 20:22 हामुक जपाप आप, मुसान कायदान अनसारे रोमी राजान राजा केसर्‌या काजे फाळु आपणे हामरे वाटे वारु हय की नी हय?”
LUK 20:23 ईसु तींद्‌री कदर जाणीन तीनुक कह्‌यु,
LUK 20:24 “मेसेक चांदीन एक रुप्‌यु बताड़ु जां कुणीन सीकु ने कुणीन नाव छापलो छे?” ती चे कह्‌या केसर राजान।
LUK 20:25 ईसु तीनुक कह्‌यु, “ती जो राजान राजा केसर्‌यान छे, चो राजान राजा केसर्‌या आपु, ने जो भगवानेन छे चो भगवानेक आपु।”
LUK 20:26 चे तेरु जपाप सामळीन चकराय्‌न हुगा रय गुया, ने माणसे अगळ ईसु जे बी बुल कह्‌यु, तीनु बुलेम ईसुन काय बी असी वात नी नीकळ्‌यु।
LUK 20:27 बाकुन थुड़ाक सदुकी ईसु भीणी आया। तींद्‌रु असु वीच्‌यार‌ छे की, मरलाम सी पछु जीव उठणु हय नी। चे ईसु अगळ असु सवाल पुछ्‌या,
LUK 20:28 “ए मास्‌तर! मुसु हामरे वाटे जो हुकुम लिखलो छे, कदी कुय भायस आपसी घरवाळी हय ने अवल्‌यात पाखुर मर जाय, ती तेरु भायस आपसा भायसेन रांडायलीक बणाय लेणु चाहजे ने आपसा भायस वाटे अवल्‌यात पयदा करनु चाहजे।
LUK 20:29 सात भायस हतला, पेहलु भायस ईयाव कर्‌यु ने अवल्‌यात पाखुर मर गुयु।
LUK 20:30 अळी दीसरु भायस तीनी रांडायली बायरी काजे बणायु।
LUK 20:31 ने तीसरु भायस बी तीनी रांडायली साते ईयाव कर्‌यु, ने चु बी मर गुयु असा करीन एक-एक करीन सात भायस रांडायली काजे बणाया ने अवल्‌यात पाखुर मर गुया।
LUK 20:32 ने आकरी मां ची बायर बी मर गुय।
LUK 20:33 ती अळी चे पछा जीवता हवसे, ती ची बायर कुणीन घरवाळी कवायसे? काहाकी ची सातु जणान घरवाळी बन्‌ली।”
LUK 20:34 तत्‌यार ईसु तीनुक कह्‌यु, ईनी कळी मां माणसेन मांगणी ईयाव हवतु रवसे।
LUK 20:35 बाकुन जे माणसे जीवता हय्‌न नवली कळीन हकदार्‌या बणसे, तीनु माणसे मां मांगणी ईयाव नी हवे।
LUK 20:36 चे जी उठीन कदी नी मरे काहाकी चे सरग वाळा काहवाळ्‌यान तसा अमर रवसे। ने पछा जीवता हय्‌न जी उठणेन अवल्‌यात बणीन नवली जीवाय्‌न हकदार्‌या बी हय्‌न भगवानेन अवल्‌यात बी बण जासे।
LUK 20:37 बाकुन मर्‌या-सर्‌या माणसेक पछा जीवता हवणुत छे। मुसु बी जी उठणेन वात काजे धपतेला झाड़का मां उजेंती कर्‌यु। असो मालीक काजे अब्‌राहमेन भगवान, इसाकेन भगवान, याकुपेन भगवान कह्‌वाये।
LUK 20:38 भगवान मरला माणसेन भगवान नी हय, बाकुन जीवतेला माणसेन भगवान छे काहाकी तेरे अगळ आखा जीवतेला छे।
LUK 20:39 जी वात सामळीन तींद्‌रे मायन थुड़ाक यहुदी-सास्‌तुर सीकाड़न्‌या तीनाक कह्‌या, “ए मास्‌तर! तु बेसका वारु कह्‌यु!”
LUK 20:40 अळी तीनु काजे ईसु धड़े अळी काहनी बी वात पुछणेन हिम्‌मत नी हय।
LUK 20:41 ईसु तीनु काजे पुछ्‌यु, “मसी काजे, दावुदेन अवल्‌यात काहा कवे?”
LUK 20:42 काहाकी दावुद राजा ते भजनेन किताप मां आपसा जीव सी कवे, मालीक भगवान मारा मालीक भगवान काजे कह्‌यु: “तु मारे जेवड़े आंगे बस।
LUK 20:43 जत्‌यार लग मे तारा वेरीक तारा पाय मेलनेन पयड़ी नी बणाय दम।”
LUK 20:44 दावुद राजा आपसी जीवाय मां तीनाक मालीक कह्‌यु, “ती चु तेरु पुर्‌यु कसु कवायसे?”
LUK 20:45 चां बस रवला आखा माणसे ईसुन वात सामळने बाजी रवला, तत्‌यार ईसु आपसा चेला भीणी देखीन तीनु काजे कह्‌यु,
LUK 20:46 “यहुदी-सास्‌तुर सीकाड़न्‌या सी चेतीन रवु। काहाकी तीनुक गळा सी पायेम लग लांबला पुथल्‌या पेहरनु वारु लागे, ने हाटे मां दीसरा माणसेन मुंहडा वारु की? पुछे ती तीनुक वारु लागे। ने भगवानेन भक्‌तीन घर मां पेहली कुड़ची पर बसणु, ने पंगत मां पेहली जागा हेरनु, तीनुक बेसको वारु लागे।
LUK 20:47 चे रांडायला बायरान घर मां भरायन तीनुक धुकु दीन ठगी लेय, ने तींद्‌रा घर बारेक उजाड़ देय, ने दीसरा माणसेक देखाड़ने करीन लांबी-लांबी बेसकी वार लग दुवा करे। हीनुक भगवानेन घर सी नीयावेन डंड जादात जड़से।”
LUK 21:1 ईसु मंदीर मां हतलु, ती उचु देखीन लकपती माणसे काजे दान-पेटी मां आपणा-आपणा दान नाखतेला देख्‌यु।
LUK 21:2 तीनी टेमे मंदीर मां ईसु एक गरीब रांडायली बायरीक, दुय तांबान रुप्‌या धरम करतेली देख्‌यु।
LUK 21:3 ने तत्‌यार ईसु कह्‌यु, “मे तुहुंक छाचलीन कव की जी गरीब रांडायली बायर हीनु आखा माणसे सी आखाम अदु दान आपली छे।
LUK 21:4 काहाकी दीसरा, माणसे आपसा बेसका कमायला धनेम सी ईतरोक आपला छे, बाकुन जी गरीब हय्‌न बी जीवणे वाटे तेरे धड़े जो कमायलो हतलो, च आखो आप देदी।”
LUK 21:5 जत्‌यार ईसु काजे थुड़ाक चेला मंदीरेन बारामां असी वात कवणे बाजी गुया, “जु मंदीर कतरु वारु छे, वारलु दगड़ा सी ने छेल भात्‌या चीजे सी बेस सींगारलु छे।”
LUK 21:6 जी वात सामळीन ईसु तीनु काजे कह्‌यु, “असा दाहड़ा बी आवसे ईना मंदीरेन आखा तत्‌रा जो तुहुं हय देखी र्‌या च आखो उदरीन सर जासे ने दगड़ा पर दगड़ु बी जमलु नी रहणे देय।”
LUK 21:7 चे ईसु काजे पुछ्‌या, “ए मास्‌तर! ज आखो कत्‌यार हवसे ने जत्‌यार ज आखो पुरो हवसे तीनी टेमे काहनी सहलाणी देखाव पड़से?”
LUK 21:8 ईसु तीनु काजे कह्‌यु, चेतीन रवु, तुहुंक कुय मनवीन ठगी नी लेय, काहाकी बेसका माणसे मार नावेन आवसे ने कवसे, चु मसी मेत छे ने ची टेम बी आय गुयली छे। तुहुं तींद्‌रे पर भुरसु करीन तींद्‌री वात मानीन तींद्‌रे पछळ-पछळ घुण जावु।
LUK 21:9 जत्‌यार तुहुं लड़ाय झगड़ान ने खुन-खराबान वात सामळसु, ती तुहुं घुण घाबरायु काहाकी असो ते हवसे ने हवसे। बाकुन तीने टेमे तत्‌यारुत कळ नी सरे।
LUK 21:10 ती ईसु तीनुक अळी कह्‌यु, एक जातीन माणसे दीसरी जातीन माणसे साते लड़ाय-झगड़ु करसे, ने एक राजेन माणसे दीसरा राजेन माणसे साते लड़ाय झगड़ु करसे।
LUK 21:11 ने बेसकी जागाम बेसकी धरती धदड़ीन फाट जासे, जां चां काळ पड़से ने माणसेन रुग लाग जासे ने सरगे मां बी आज लग देख्‌या नी असली बीहाड़नेन सहलाणी सरगे मां बी देखाव पड़से।
LUK 21:12 “बाकुन ज आखो हवणेन पेहले बेसका माणसे मारा नावेन करता तुहुं काजे धरीन तुहुंक बेसका वेला पाड़से, ने यहुदी पंचुन हातेम आप देसे राजा ने रोमी नीयाव करन्‌या अगळ घीसीन लावसे ने चे तुहुंक जेलेम कुंड देसे।”
LUK 21:13 बाकुन ची टेम तुंद्‌रे वाटे मारा बारामां मां गवा देणेन वारलु मुखु बण जासे।
LUK 21:14 तेरेसी आपणा मन मां ठाणी लेवु की हामु पेहले सी बचणे करीन काय-काय कवसुन करीन फीकुर मां करजु।
LUK 21:15 काहाकी मे तुहुंक असु बुल ने अक्‌कल आपीस, की तुंद्‌री वीरुद करन्‌याक वातेम तुंद्‌रे साते लड़ाय नी पड़े ने तुंद्‌री वातेक काटी नी सके।
LUK 21:16 तुंद्‌रा माय-बास ने भाय ने धड़े वाळा ने तुंद्‌रा दुस्‌तीदार्‌या तुहुंक धराय देसे। ने तुंद्‌रे मायन बेसका जणाक माराय बी नाखसे।
LUK 21:17 ने तुहुं मार पर भुरसु कर र्‌या करीन मार नावेन आखा माणसे तुंद्‌रे साते बेसका रीस करसे।
LUK 21:18 बाकुन तेबी तुंद्‌री मुणकीन एक बी कान्‌या लग नुकसाण नी हवे।
LUK 21:19 तुहुं ईनी आखी वात मां गम खासु ती तुहुं तुंद्‌रा जीव काजे बचाड़ लेसु।
LUK 21:20 तत्‌यार तुहुं यरुसलेम गांव काजे चारेमेर सीपायड़ा सी घेरायलो देखसु, ती तुहुं समजी जाजु की हय गांव उजड़नेन टेम धड़ेस आय गुयलो छे।
LUK 21:21 तत्‌यार जे माणसे यहुदीया जीला मां हय चे बयड़ा मां ढास जाजु, ने जे यरुसलेम सहर मां हय चे माणसे बाहर नी नीकळनु चाहजे ने गांव मां हय चे पछा सहर भीणी घुण जावु;
LUK 21:22 काहाकी तीनु दाहड़ाम भगवान नीयाव करसे ने डंड आपणेन दाहड़ा हसे, ज काय भगवानेन सास्‌तुर मां लिखला बुल छे चे पुरा हवसे।
LUK 21:23 असली टेम मां जे भारीस ने पुर्‌या काजे दुत पावनी बायरीन कतरु मटु दुख छे! काहाकी जागे-जाग मां मटा दुखेन ने हीड़ा-पीड़ान दाहड़ा आवसे।
LUK 21:24 तीनु दाहड़ाम माणसे तलवारेन धारे सी काटायसे। तीनुक धरी-धरीन ने बांदीन आखा देसेम वाटी ली जासे; ने यरुसलेम सहर काजे नी-यहुदी माणसे तत्‌यार लग रंदळसे जत्‌यार लग तीनु नी-यहुदी माणसेन टेम पुरी नी हवे।
LUK 21:25 “दाहड़े, ने चांद, ने तारा मां, सहलाणी देखाव पड़से, ने धरतीन आखा देस-देसेन माणसेन जीवाय पर गरा ने हीड़ा-पीड़ा आवसे। ने चे दर्‌यान सुसवारु ने झलक देखीन घाबराय जासे।
LUK 21:26 ने माणसे बीहीन ने कळ पर आवणेवाळी आखी आफतेन वाट देखी-देखीन जीव मां जीव नी रवे, काहाकी सरगेन आखी ताकत हाल जासे।
LUK 21:27 ने तत्‌यार आखा माणसे-माणसेन पुर्‌या काजे ताकत भेळु ने सेक-सींगार भेळ आदळा पर बसीन आवतेलु देखसे।
LUK 21:28 जत्‌यार जी आखी वात हवणे बाजी जाय, ती तुहुं उठीन उबा हय जावु, ने उचा भाळीन देख्‌जु, काहाकी तुंद्‌रु छुटकारु धड़ेस रवसे।”
LUK 21:29 ईसु तीनुक एक दाखलु सामळायु, “अंजीरेन झाड़काक ने आखा दीसरा झाड़काक बी देखु।”
LUK 21:30 जत्‌यार तीनु झाड़कान डीरा फुटणे बाजी जाय, ने नवला पान्‌टा नीकळने बाजी जाय, ती तुहुं छाचलीन समजी जावु की हय उंडाळु आवणे बाजी र्‌यु।
LUK 21:31 ईनी रीती सी जत्‌यार तुहुं ईनी वातेक हवतेली देख्‌सु, ती तुहुं जाण जाजु की भगवानेन राज धड़ेत आय गुयलो छे।
LUK 21:32 मे तुहुंक छाचलीन कह्‌वो, की जी कवली वात जत्‌यार लग आखी पुरी नी हय जाय, तत्‌यार लग ईनी पीड़ीन माणसे कदी नी मरे।
LUK 21:33 सरग ने धरती टळ जासे, बाकुन जे मारा कवला बुल छे चे कदी नी टळे।
LUK 21:34 तेरेसी चेतीन रवु, की कांखुर मायन असु नी हवे, की नाचणे कुदणेन मन मां, ने नस्‌या मां ने ईनी कळीन जीवाय्‌न फीकुर मां तुहुं नीसरा हय जावु ने चे गरान दाहड़ा तुंद्‌रे पर उचकाणुन आय पड़े।
LUK 21:35 काहाकी चे गरान दाहड़ा आखी धरती पर रवणेवाळा आखा माणसे पर ईनी फांदेन तसा आय जासे।
LUK 21:36 तेरेसी जागता रवु ने आखी टेम मां दुवा करता रवु, काहाकी तुहुं ईनी आवणे वाळी आखी गरा सी बची सकु ने भुरसा भेळा माणसेन पुर्‌या अगळ उबा रय सकु असा बण जावु।
LUK 21:37 ईसु दीसु-दीसु दाहड़ीन मंदीर मां वात सीकाड़तेलु ने राते-राते बाहर जेतुन नावेन बयड़ा पर र्‌या करतेलु।
LUK 21:38 ने माणसे संदारे ईसुन वात सामळने करीन मंदीर मां भेळा हय जातला।
LUK 22:1 नी खमीरी रुटा बणावणेन तीहवार जु पासका नावेन तीहवार बी कवायतेलु, धड़ेस आय रवलो।
LUK 22:2 ने तीने टेमे ईसु काजे मारनेन वीच्‌यार करने करीन, भगवानेन डाहला पुजारा ने यहुदी-सास्‌तुर सीकाड़न्‌यान भेळा हया, बाकुन चे चां आवला माणसेक देखीन बीहतेला।
LUK 22:3 तीने टेमे यहुदा मां भुतड़ु भराय गुयु, जु ईस्‌करीयोत बी कवायतेलु, ने जु बारे चेला मायन एक हतलु।
LUK 22:4 चु ईसुक धराड़ने करीन भगवानेन डाहला पुजारा ने पेहरु देण्‌या सीपायड़ान डाहला सीपायड़ा काजे भेळु हय्‌न तींद्‌रे धड़े असु वात कर्‌यु की चु काहनी रीते सी, ईसु काजे तुंद्‌रा हातेम धराड़ दीस।
LUK 22:5 ने तीनाक भेळा हय्‌न बेसका खुस हय गुया ने चे तीना यहुदा इस्‌करीयोती काजे ईनी वातेन बदलाम पयस्‌या आपणेन वायदु कर्‌या।
LUK 22:6 यहुदा राजी हय गुयु ने चु हुगुत माणसेन नजर सी छेटे हय्‌न ईसु काजे धराड़ने करीन मुखु हेरतु रयु।
LUK 22:7 थुड़ाक दाहड़ा मां अखमीरी पाखुर रुटा बणावणेन तीहवार आयु, तीनाक पासकु तीहवार बी कवे। ईना तीहवारेन तीयारी करनेन टेम आवी। तीना तीहवारेन दाहड़े गाडरान एक पीलो मारनुत पड़तेलो।
LUK 22:8 अतरा मां ईसु हेरा चेला पतरस ने युहन्‌ना काजे धड़े बुलायु ने ज कय मकल्‌यु, “जावु ने आपणे वाटे पासका तीहवारेन खास खाणो तीयार करु।”
LUK 22:9 चे ईसुक पुछ्‌या, “तु काहा चाहे की हामु ईना खाणा काजे तीयार करजे?”
LUK 22:10 ने ईसु चेलाक जपाप आप्‌यु, “देखु यरुसलेम सहर मां तुहुं भरायसु, ती तुहुंक एक अदमी ठाहरा मां पाणी भरीन लावतेलु भेळु हवसे, ने तुहुं तेरे पछळ-पछळ जाजु ने चु तीना घर मां भरायसे तीनात घर मां तुहुं बी भराय जाजु।
LUK 22:11 ने तुहुं तीना घरेन मालीक काजे कवजु, मास्‌तर हामु काजे तुसेक ज कवणे करीन मकल्‌यु की, चो मेजवान्‌यान कमरु कां छे, चां मे मारा चेला भेळु पासका तीहवारेन खाणो खाम?
LUK 22:12 ने तुहुं काजे तीना घरेन मालीक माळा पर एक सींगारलु मट्‌लु कमरु देखाड़ देसे तुहुं चांहान पासका तीहवारेन खाणु तीयारी करजु।”
LUK 22:13 पतरस ने युहन्‌‌‌नु गांव मां गुया ने तसात देख्‌या, जसु ईसु कवलु, ने चे फसह तीहवारेन खाणो तीयारी करने बाजी गुया।
LUK 22:14 जत्‌यार सांतो हयो ती ईसु ने तेरा नेवताळान घर मां गुया, ने रुटा खाणे बठ्‌या।
LUK 22:15 ने जत्‌यार चे आखा पासका तीहवारेन रुटा खाणे बाजी रवला ती ईसु आपसा चेलाक कह्‌यु, “मे दुख झेलनेन पेहले ज खाणो तुंद्‌रे साते खाणेन हेर कर रवलु।
LUK 22:16 काहाकी मे तुहुंक कह्‌वो की, जत्‌यार लग भगवानेन राज पासका तीहवारेन खाणो खाणेन रीती पुरो नी हवे, तत्‌यार लग मे पासका तीहवारेन खाणो अळी नी खाम।”
LUK 22:17 ने अळी ईसु कटवरा काजे हातेम लेदु, ने भगवान काजे बेसकु वारु कह्‌यु, ने आपसा चेला काजे चो हाते वाळो पीयालो आपतु जाय्‌न कह्‌यु, “ईना पीयाला काजे लेवु, ने वाटी-वाटीन पी लेवु।
LUK 22:18 काहाकी मे तुहुंक कह्‌वो की, जत्‌यार लग भगवानेन राज ईनी धरती पर नी आवे, तत्‌यार लग हय मे जु अंगुरेन रस कदी नी पीयो।”
LUK 22:19 अळी ईसु हातेम रुटा लेदु, ने रुटा वाटे भगवान बेसकु वारु कहीन रुटु भांजीन आपसा चेलाक आपतु जाय्‌न कह्‌यु, “जु रुटु मारो डील छे। जो तुंद्‌रे वाटे आप र्‌यु। मेसेक हेर करने करीन असात रुटा वाटे भगवान काजे ‘बेसकु वारु छे’ कह्‌वीन रुटु भांजीन वाटी-वाटीन खाया करजु।”
LUK 22:20 तीनी रीती सी रुटु खायलीन पछे अळी ईसु पीयालो हातेम धर्‌यु ने कह्‌यु, “ज पीयालो मारा लुही मां बणावला नवला वायदान सहलाणी छे, जो तुंद्‌रे वाटे उहवाड़ने वाळो छे।”
LUK 22:21 बाकुन जु मेसेक धुकु दीन धराड़से, चु मार साते पंगत मां बसीन खाणे बाजी रयु।
LUK 22:22 काहाकी माणसेन पुर्‌या पर ते, जसों लिखलो छे तसों तेरे साते हवणे वाळो छे; बाकुन तीना माणुस पर गरा आय पड़े, जु धुकु दीन मेसेक धराड़से।
LUK 22:23 चेला एक दीसराक आंबा-सांबा पुछणे बाजी गुया, की हामरे मां असु कुण छे, जु तुसेक धराड़नेन काम करने वाळु छे।
LUK 22:24 चेला आंबा-सांबा असा पुछीन जखड़ी पड़े की, हामरे मां आखाम मटु कुणीक समजणु चाहजे?
LUK 22:25 ईसु तीनुक कह्‌यु, “नी-यहुदी राजा तींद्‌रे पर हक जमाड़ीन राज करे; ने जे तींद्‌रे पर हक जमाड़ीन चे ज कवणे हींडे की हामु मदत करन्‌या छे कह्‌वे।
LUK 22:26 बाकुन तुहुं असा घुण बणु काहाकी जु कुय तुंद्‌रेम मटु हवणे हींडे, चु आखाम नानु बणनु चाहजे। ने जु कुय हकदार्‌यु हय, चु आखान पावर्‌यु बणनु चाहजे।
LUK 22:27 मटु कुण छे, पंगत मां बसीन खाणु खाण्‌यु मटु छे की खाणो वाटण्‌यु वारती मटु छे? जु पंगतेम बसीन खाणो खाण्‌यु मटु नी हय काय? बाकुन मे तुंद्‌रेम खाणो वाटण्‌या वारतीन तसु छे।”
LUK 22:28 बाकुन तुहुं मारी आखी पारख ने आफत मां मारे पुठ्‌ये रया।
LUK 22:29 जसु मारु बास मेसेक राजु बणायन राज-पाट आपलु, तसात मे बी तुहुंक राजा बणायन राज-पाट आपो।
LUK 22:30 तेरेसी की तुहुं मारा राज-पाट मां मारी पंगत मां मारे पुठ्‌ये बसीन खादा-पीदा ने राजगाद्‌या पर बसीन ईस्‌रायेलेन बारे कुळीन माणसेन नीयाव करे।
LUK 22:31 ईसु पतरस काजे कह्‌यु, “ए सीमोन! ए सीमोन! सामळ भुतड़ु तुहुं आखा काजे गहुंन तसु चुळने करीन भगवान धड़े मांग लेदु।
LUK 22:32 बाकुन मे तारे वाटे भगवान सी लीलघाय कह्‌यु की। काहाकी तारु भुरसु भगवान पर सी छेटे नी हवणु चाहजे। ने जत्‌यार तु पछु भुरसु करसी ती आपसा भायसेक बी भुरसा मां लावीन काठा करजी।”
LUK 22:33 सीमोन पतरस ईसु काजे कह्‌यु, “मालीक मे तारे पुठ्‌ये जेल मां जाणे, ने मरने लग तीयार छे।”
LUK 22:34 बाकुन ईसु पतरस काजे कह्‌यु, “ए पतरस मे तुसेक कह्‌वो की तु आज, कुकड़ु वासणेन पेहले, तु तीन कावा ईसुक नी जाणो करीन कवसी।”
LUK 22:35 ने ईसु आपसा चेलाक कह्‌यु, “जत्‌यार मे तुहुंक बटवु, झुळु ने खासड़ा पाखुर मकेल्‌लु, ती तुहुंक काहनी बी वातेन कसर हवली काय?” “चे कह्‌या काहनी बी वातेन कसर नी हवी।”
LUK 22:36 अळी ईसु तीनु चेलाक कह्‌यु, “बाकुन हय तेरे धड़े बटवु हय, चु बटवु धरी लेवु, ने तेरे धड़े झुळु हय, चु झुळु ली लेवु, ने तेरे धड़े तलवार नी हय, चु आपसा पुथल्‌या वेचीन तलवार मुल ली लेवु।
LUK 22:37 काहाकी मे तुहुंक कह्‌वो की चुखला सास्‌तुर मां लिखलो छे की तेरी गिन्‌ती गुनेगार्‌याम हवसे। चो आखो मारे बारामां पुरो हवणेत वाळो छे काहाकी मारे बारामां जो काय लिखलो छे चो आखो पुरो हवणे वाळो छे।”
LUK 22:38 तत्‌यार चेला कह्‌या, “ए मालीक! देख जां हामरे धड़े दुय तलवार छे!” “बाकुन ईसु तीनुक कह्‌यु, बस अतरात रेट छे।”
LUK 22:39 तत्‌यार ईसु बाहर नीकळीन जेतुन नावेन बयड़ा भीणी चाल देदु, चु पेहले बी असुत चां जाया करतेलु। ने तेरा चेला बी तेरे पुठ्‌ये-पुठ्‌ये चाल पड़्‌या।
LUK 22:40 ईसु चां बयड़े जाय्‌न तीनु चेला काजे कह्‌यु, “पारख मां नी पड़नु चाहजे करीन दुवा कर्‌या करु।”
LUK 22:41 ने ईसु दगड़ु उराटीन नाखे अतरे लांबे हींद्‌रे सी छेटुस जात रयु, ने मांडा टेकीन कवतु जाय्‌न भगवान बास सी दुवा कर्‌यु।
LUK 22:42 “ए बास! कदी तु चाहे, ती जु दुखेन पीयालो मारे धड़े सी टाळ दे, बाकुन तेबी मारी मरजी नी, बाकुन तारीत मरजी पुरी हवणे दे।”
LUK 22:43 तत्‌यारुत तीनाक एक सरग वाळु काहवाळ्‌यु देखाय देदु, जु मालीक ईसु काजे ताकत आप्‌या करतेलु।
LUK 22:44 ने ईसु आपसी जीवाय मां बेसकु कलेप्‌तु जाय्‌न अळी बी पुरो मन लागाड़ीन दुवा करने बाजी गुयु, ने तेरु पसीनो, मटला-मटला लुहीन टीपकान तसु धरती पर पड़ने बाजी रवलु।
LUK 22:45 तत्‌यार चु दुवा करीन उठीन आयु, ने आपसा चेला भीणी गुयु, ने तीनुक सुवतेला देख्‌यु। काहाकी चे बेसका दुखी हतला।
LUK 22:46 चु तीनुक कह्‌यु, “तुहुं काहा सुवणे बाजी र्‌या? उठु ने तुहुं पारख मां नी पड़ु करीन दुवा करता रवु।”
LUK 22:47 ईसु चेला काजे ज कवणे बाजी रवलु, ने बेसका माणसेन टुळु ईसुन्‌चां आय गुयु; ने ईसुन बारे चेला मायन एक यहुदा इस्‌करीयोती नावेन एक चेलु बी तीना टुळा अगळ-अगळ आय रवलु, चु बी ईसु धड़े आयन ईसुन गुळु देदु।
LUK 22:48 ईसु तीनाक कह्‌यु, “ए यहुदा तु गुळु दीन माणसेन पुर्‌या काजे धुकु दीन धराड़ने बाजी रयु काय?”
LUK 22:49 ईसुन दीसरा चेला देख्‌या की धुकु हवणे वाळु छे करीन ईसुक कह्‌या, “ए मालीक हामु ईनुक तलवार सी झाटकाय देजे काय?”
LUK 22:50 ने तीनु चेला मायन एक चेलु, भगवानेन डाहला पुजारान मुख्‌यान पावर्‌या पर तलवारेन झाटकु देदु, ने तेरो जेवड़्‌यु कान्‌टु काट देदु।
LUK 22:51 बाकुन ईसु कह्‌यु, “हय रहणी देवु, बेसको हय गुयो, ने ईसु तेरु कांटु!” छीमीन तीनाक वारु कर देदु।
LUK 22:52 ने तत्‌यार ईसु भगवानेन डाहला पुजाराक; ने तेरे मंदीरेन राखवाळी करन्‌या सीपायड़ान डाहला सीपायड़ाक ने डाहा-डाहा काजे, जे तेरे भीणी जुर करीन आवला तीनुक कह्‌यु, “तुहुं मेसेक धाड़ु पाड़न्‌यु समजीन तलवार ने डेंगा लीन मेसेक धरने आय रया काय?
LUK 22:53 मे दाहड़ीत मंदीर मां तुंद्‌रे पुठ्‌ये हतलु, तेबी तुहुं मेसेक नी धर्‌या। बाकुन हय जी टेम तुंद्‌री छे? काहाकी हय आंदारलान हक छे।”
LUK 22:54 अळी चे ईसु काजे धरीन बांद लेदा ने तीनाक चां सी भगवानेन डाहला पुजारान मुख्‌यान घर ली जाणे करीन चाल पड़्‌या। पतरस ईतरुक छेटुस तेरे पछळ-पछळ जातलु।
LUK 22:55 डाहला पुजारान घर जाय्‌न ने माणसेन आंगणा मां आकठो धपाड़ीन आकठान चारेमेर बस गुया। पतरस बी तींद्‌रे पुठ्‌ये बस गुयु।
LUK 22:56 ने एक पावरनी पुरे पतरस काजे आकठान वीजाळे बस रवलु देखी, ने तेरे पर नींगा नाखीन कह्‌वी, “जु माणुस बी ते हेरेत पुठ्‌ये हतलु।”
LUK 22:57 बाकुन पतरस नीकारु करतु जाय्‌न तीनी पुरे काजे कह्‌यु, “ओ बहणीस! मे हीनाक जाणो लग नी।”
LUK 22:58 ईतरीक वार मां अळी काहनुक पतरस काजे देखीन कह्‌यु, “तु बी ते हीनु माणसे मायन छे। पतरस तीना माणसे काजे कह्‌यु, नी भाय! मे तीनु माणसे मायन नी हय।”
LUK 22:59 एक घंटुक हय गुयु ने अळी काहनुक दीसरु जुर करीन कह्‌यु, “खरान, जु बी ते तेरेत पुठ्‌ये हतलु। काहाकी जु ते गलील जीला मां रवण्‌यु छे।”
LUK 22:60 पतरस तीनाक कह्‌यु, “ए भायस मे नी जाणु की तु काय कह्‌णे बाजी रयु!” पतरस कह्‌णे बाजी रवलु, ने तत्‌यारुत कुकड़ु वास देदु।
LUK 22:61 तत्‌यार मालीक ईसु पछु फीरीन पतरस भीणी देख्‌यु ने तत्‌यारुत पतरस काजे ईसुन जी वात हेर आवी, जी वात मालीक ईसु तीनाक कवलु, की “आज कुकड़ु वासणेन पेहल, तु मेसेक तीन कावा मारु नीकारु करीन कवसी की मे ईसुक जाणो लग नी।”
LUK 22:62 ने तत्‌यारुत पतरस बाहर नीकळीन उसकी-उसकीन बेसकु रड़ने बाजी गुयु।
LUK 22:63 जे राखवाळी करने वाळा सीपायड़ा ईसुक धरीन लावला, चे तेरी हासी उडाड़ीन, ने तीनाक वेला पाड़ता जाय्‌न ठुकतेला।
LUK 22:64 ने चे सीपायड़ा ईसुन डुळे पाटु बांदीन तीनाक असा पुछता रया, कदी तु भगवानेन अघी सी आवणे वाळी वात बताड़ने वाळु हय, ती हामुक देखाड़, हामरे मायन तुसेक कुण देदो।
LUK 22:65 ने चे बेसकी वात नीकाळीन तेरी नाव-बद्‌दी करीन तेरे वीरुद मां वात कह्‌या।
LUK 22:66 दीसरे दाहड़े एगात यहुदी पंचुन आखा डाहला ने भगवानेन मंदीरेन पुजारा ने यहुदी नीयम सीकाड़ने वाळा आखा भेळा हय गुया, ने चे ईसु काजे नीयावेन मट्‌ली बसक मां बुलायन काय-काय पुछ्‌या।
LUK 22:67 कदी तु खरान मसी हय ती हामु काजे कय दे! “ईसु तीनुक कह्‌यु,” कदी मे तुहुंक कह्‌वीस, ती तुहुं भुरसु नी करु।
LUK 22:68 ने कदी मे तुहुंक काय पुछीस ती तुहुंक जपाप नी आपाये।
LUK 22:69 बाकुन हय सी माणसेन पुर्‌यु आखा ताकत वाळा भगवानेन जेवड़्‌ये आंग्‌ये जाय्‌न बस रवसे।
LUK 22:70 जी वात सामळीन आखान-आखा बस रवला चे कय पड़्‌या, “ती तु भगवानेन पुर्‌यु छे काय?” ईसु तीनुक जपाप आप्‌यु, “तुहुं कय रया, काहाकी मे भगवानेन पुर्‌यु छे।”
LUK 22:71 ईसुन मुंहडान वात सामळीन चे कह्‌या, “हय हामुक गवा-पुरावा देण्‌या नी चाहजे! काहाकी हामु आपसात हेरे मुंहडा सी आखी वात सामळी लेदला छे!”
LUK 23:1 तत्‌यार आखी बसकेन माणसे उठीन उबा हय गुया; ने चे ईसु काजे राजा पीलातुस भीणी ली गुया।
LUK 23:2 चे पीलातुस राजा अगळ ईसुन वात पर गुनु लागाड़ीन कवणे बाजी गुया: “चु हामरा माणसेक सरकारेन वीरुद मां भड़कावतेलु, ने तुहुं रोमी राजाक फाळु मां आपु कवतेलु सामळ्‌ळा छे, ने आपसा काजे मे मसी राजु छे, कवतेलु सामेळला छे।”
LUK 23:3 पीलातुस ईसुक पुछ्‌यु, “तु यहुदी माणसेन राजा छे काय?” ईसु जपाप आप्‌यु, “हव, जसु तु कय र्‌यु मे तसुत छे।”
LUK 23:4 तत्‌यार पीलातुस भगवानेन डाहला पुजाराक ने भेळा हवला माणसेक कह्‌यु, “मारी नींगा मां, जु माणुस रोमी सरकारेन कायदान वीरुद मां काय बी गुनु नी कर्‌यु।”
LUK 23:5 बाकुन चे जुर दीन अळी-अळीन कह्‌या की, “जु माणुस यहुदा जीला मां आखे दुर ‘सरकारेन वीरुद मां लड़ाय करजु’ करीन माणसेक सीकाड़तु आय र्‌यु। असो करनु ज्‌य गलील जीला मां सुरु कर देदलु। ने हय चु यहुदा जीला मां ईनात काम वाटे आवलु छे।”
LUK 23:6 ज सामळीन पीलातुस पुछ्‌यु, “जु माणुस गलील जीला मां रवण्‌यु छे काय?”
LUK 23:7 जत्‌यार तीनाक मालुम पड़्‌यो की ईसु गलील वाळु छे, ती पीलातुस ईसुक हेरोदेस भीणी मकली देदु, जु तीनी टेमे मां यरुसलेम मां हतलु,
LUK 23:8 हेरोदेस ईसुक देखीन बेसकु खुस हय गुयु। चु ईसुन बारामां बेसकी वात सामळी रवलु, ने बेसका कावा तीनाक देखणे बी हींडतेलु। चु ईसुन बारामां वारु-कामेन सहलाणी देखणेन हेर करतेलु।
LUK 23:9 अतराम हेरोदेस ईसु काजे बेसका सवाल पुछतु रयु, बाकुन ईसु तीनाक काय जपाप नी आप्‌यु।
LUK 23:10 भगवानेन डाहला पुजारा ने यहुदी-सास्‌तुर सीकाड़ने वाळा हतला। ने चे पुरो मन ने जुर लागाड़ीन ईसु पर गुनु लागाड़्‌या।
LUK 23:11 तत्‌यार हेरोदेस ने तेरा सीपायड़ा ईसुन हासी उड़ाया ने तेरी नाव-बद्‌दी कर्‌या, ने ईसुक चमकण्‌या ने जामण्‌या पुथल्‌या पेहराया ने पछा पीलातुस धड़े मकली देदा।
LUK 23:12 तीनी टेमे सी हेरोदेस ने पीलातुस साथी बण गुया। ने हेरे सी पेहेल चे दुय एक दीसरान वेरी हतला।
LUK 23:13 हय पीलातुसेन चां भगवानेन मंदीरेन डाहला पुजाराक ने हक करन्‌याक ने दीसरा माणसेक बुलायु; ने तीनुक कह्‌यु,
LUK 23:14 तुहुं ईना माणुस काजे माणसेन वीरुद मां माणसे काजे भड़कावणे वाळु समजीन मारे भीणी लावला छे, ने देखु, हय मे तुंद्‌रे अगळ ईनाक पारखी लेदु, ने मे जाण लेदु की, तुंद्‌रु हेरे पर गुनु लागाड़नु सय नी हय।
LUK 23:15 ने राजा हेरोदेस काजे बी मालुम पड़ गुयो की ईसु गुनाळा नी हय। अतरा मां चु पछु मकली देदु। जु माणुस काय बी गलत काम नी कर्‌यु ने मरनेन डंड आपे असु नी हय।
LUK 23:16 तेरेमां मे हीनाक मार खावाड़ीन छुड़ाय दीस।
LUK 23:17 जी वात पीलातुस राजा एरेन करीन कह्‌यु, काहाकी पीलातुस सालो डीट पासका तीहवारेन दाहड़े, यहुदी माणसेक खुस करने करीन एक केदीक जेल मां सी छुड़ देदलु।
LUK 23:18 पीलातुस राजा ईसुक मरनेन डंड नी आप रयु ज देखीन गड़दी मायन आखा माणसे आयड़ी देदा ने कह्‌या, “ईनाक मार नाखु ने बरअब्‌बा काजे छुड़ देवु।”
LUK 23:19 ईना बरअब्‌बा काजे जेल मां कुंड देदला, काहाकी जु यरुसलेम मां सरकारेन वीरुद मां दीसरा माणसे साते आपसा साती भेळ लड़ाय करलु। चु थुड़ाक माणसेक मारी बी नाखलु।
LUK 23:20 पीलातुस राजा ईसु काजे छुड़ने हींडतेलु, अतरा मां एक कावा अळी तीनी गड़दी मायन माणसे काजे समजाड़्‌यु।
LUK 23:21 बाकुन गड़दी मायन माणसे पछा आयड़ीन कह्‌या, “ईनाक कुरुस पर चड़ावु! ईनाक कुरुस पर चड़ावु!”
LUK 23:22 पीलातुस तीसरी कावा तीनु गड़दी मायन माणसेक कह्‌यु, “काहा? जु माणुस काय गुनु करलु छे? मेसेक हेरे मां मरनेन डंड आपे असु काय बी गुनु नी देखायतु। मे ईनाक सपाटा देवाड़ीन छुड़ाय दीस।”
LUK 23:23 बाकुन चे आयड़ी-आयड़ीन ईसु पछळ पड़ गुया की ईसुक कुरुस पर चड़ावु। ने तींद्‌रो आयड़नेन काम पुरो हयो।
LUK 23:24 अळतेन पीलातुस राजा, बरअब्‌बा काजे छुड़नेन ने ईसुक मरनेन डंड आपणे करीन तीयार हय गुयु।
LUK 23:25 पीलातुस राजा तीना माणुस काजे, जु दीसरा माणसे पुठ्‌ये लड़ाय करतेलु, ने माणसेन खुन करतेलु। करीन जेल मां कुंडाड़ देदलु। चु तीनाक छुड़ देदु ने तीनाक कह्‌यु, “तुहुंक जसा करने लागे तसा करु, ज कय्‌न ईसुक गड़दीन ने सीपायड़ान हातेम आप देदु।”
LUK 23:26 जत्‌यार चे सीपायड़ा ईसुक कुरुस पर मारने करीन गांव सी ठुक्‌ता लाया। तत्‌यार तीनुक वाटे कुरेन देस मां रवण्‌यु सीमोन नावेन एक माणुस भेळु हयु। चु तीने टेमे गांव मां सी सहरेम आवणे बाजी रवलु। चे सीपायड़ा तीनाक जबरान धर पाड़्‌या ने तीनाक कुरुस हाकलाड़ीन ईसु पछळ-पछळ चालाड़्‌या।
LUK 23:27 चां माणसेन बेसकु मटु टुळु ईसु पछळ चालने बाजी रवलु। तेरे मां थुड़ाक बायरा बी हतला जे छाती ठुकी-ठुकीन ईसु वाटे कलपी रवली।
LUK 23:28 ईसु तींद्‌रे भीणी देख्‌यु ने तीनुक कह्‌यु, “यरुसलेम मां रवण्‌या पुर्‌या मारे वाटे मां रड़ु। बाकुन आपणे वाटे ने आपणा पुर्‌या-पारी वाटे रड़ु।”
LUK 23:29 काहाकी चे दाहड़ा आवणे बाजी र्‌या जत्‌यार माणसे कवसे वारु छे चे बायरा, जे आंझ्‌या छे; ने तींद्‌रा पुर्‌या नी हया, ने जे रातेड़ला पुर्‌याक पाळ्‌या पुस्‌या नी।
LUK 23:30 तीनी टेमे माणसे बयड़ाक कवसे, हामरे पर हीट पड़। ने बयड़ायाक कवसे हामुक ढाक लेवु।
LUK 23:31 काहाकी जु काय बी गुनु नी कर्‌यु, तेरे साते माणसे असु एहवार कर रया, ती छाचली तींद्‌रे साते आवणे वाळा दाहड़ाम, तेरे सी बी जादा भुंडु एहवार हवसे, जे छाचलीन गुनु करला छे।
LUK 23:32 चे सीपायड़ा ईसु भेळा दीसरा दुय गुनेगार्‌याक बी कुरुस पर मार नाखणे करीन पठ्‌ये-पठ्‌ये ली गुया।
LUK 23:33 तीना जागाक मुणकान टुबरो कवे, तीनी जागाम चे आया, चे ईसु काजे चां कुरुस पर चड़ावीन हाते पायेम खीळा ठुक्‌या। चे दुय गुनेगार्‌याक बी कुरुस पर चड़ावीन हाते पायेम खीळा सी ठुक्‌या। एक काजे ईसुन डाखर्‌ये आंग्‌ये ने दीसराक जेवड़्‌ये आंग्‌ये।
LUK 23:34 तत्‌यार ईसु बास भगवान सी लीलघाय्‌न कह्‌यु, “ए बास ईनुक माफी आप दे! काहाकी जे नी जाणता, की जे काय कर र्‌या।” ने अळतेन चे सीपायड़ा चिट्‌ठी नाखीन ईसुन पुथल्‌या वाट लेदा।
LUK 23:35 चां बेसका माणसे उबा रय्‌न देखणे बाजी रवला, ती यहुदी मुख्‌या ईसुन हासी उडाड़ता जाय्‌न कह्‌या, “हयु दीसराक बेसकु बचाड़्‌यु। कदी जु छाचलीन भगवानेन साहरे नेवाड़लु मसी हय ती आपसा काजे बचाड़ लेणु चाहजे।”
LUK 23:36 सीपायड़ा बी तेरी हासी उड़ाया। चे ईसु भीणी आया ने तीनाक अंगुरेन कड़वलु रस आप्‌या,
LUK 23:37 “ने कह्‌या कदी तु छाचलीन यहुदीन राजु हय, ती आपसा काजे बचाड़ ले।”
LUK 23:38 ईसुन मुणका सी उपर कुरुस पर गुनान एक लाकड़ान पट्‌टी ठुकीन टांगली हतली, “तेरेमां असो लिखलो हतलो जु ते यहुदी माणसेन राजु छे।”
LUK 23:39 ईसु साते कुरुस पर टांगायला गुनेगार्‌या मायन एक ईसुन नाव-बद्‌दी करतु जाय्‌न पुछ्‌यु “तु भगवानेन नेवाड़लु छुड़ावणे वाळु नी हय काय? हय ती आपसाक ने हामुक बचाड़ ले।”
LUK 23:40 बाकुन दीसरु गुनेगार्‌यु झीचकारीन कह्‌यु, तुसेक भगवान सी ईतरोक बी बीहाणो नी लागतो काय? तु बी ते हयुत नीयावेन डंड भुकतणे बाजी रयु।
LUK 23:41 तु ने मे ते डंड आपे असात छे, जो आपणु कर्‌या तेरो फळ आपणुक जड़ रयो; बाकुन जु माणुस काय बी गुनु नी कर्‌यु, “ने गुना पाखुर नीयावेन डंड झेल र्‌यु।”
LUK 23:42 अळी चु ईसुक कह्‌यु, ए मालीक ईसु! जत्‌यार तु राजु बणीन राज करे, “ती मारी हेर राख्‌जी।”
LUK 23:43 ईसु तीनाक पछु कह्‌यु, “मे तुसेक छाचलीन कवो की, तु आजुत मारे पुठ्‌ये सरगे मां रवसी।”
LUK 23:44 तीनी टेमे दाहड़ान बारे बज रवली हसे, ने तत्‌यारुत तीन बजे लग आखी ईलाका मां आंदारो खुय हय रह्‌लो।
LUK 23:45 ने दाहड़ान वीजाळो बी जाती रवलो, तत्‌यार भगवानेन मंदीर मां चु पड़दु फाटीन दुय टुकड़ा हय गुयु।
LUK 23:46 तत्‌यार ईसु जुर सी आयड़ीन कह्‌यु, “ए बास! हय मे मारु जीव तारा हातेम आप दम।” ज कय्‌न ईसुन जीव नीकळ्‌यु गुयु।
LUK 23:47 रोमी सरकारेन सीपायड़ान एक डाहलु ज हयो च आखो देखीन भगवानेन बड़ाय करतु जाय्‌न कह्‌यु, “खरान, जु ते एक धरमी हतलु।”
LUK 23:48 जत्‌यार चां उबा हय रवला माणसे ज हयो च देख्‌या, ती चे फीकुर मां पड़ीन लाजवाय गुया, ने आपसी छाती ठुक्‌ता-ठुक्‌ता पछा सहरेम जाती र्‌या।
LUK 23:49 गलील जीलाम रवण्‌या ईसुन बेसका दुस्‌तीदार्‌या, तींद्‌रा बायरा बी हतला, ईसु पछळ-पछळ गलील सी आवला, चे बी छेटे उबा रय्‌न ज हयो च आखो देख रवला।
LUK 23:50 ने देखु युसुफ नावेन एक माणुस हतलु। चु एक वारलु माणुस हतलु, ने यहुदी धरमेन कायदाक पाळने मां ईमानदार हतलु, चु यहुदी धरमेन खास पंचुन मेहमर हतलु।
LUK 23:51 ने तेबी चु ईसुक डंड आप्‌या करीन राजी नी हतलु, चु यहुदा जीलान अरीमतीया सहर वाळु हतलु, चु बी तीना दाहड़ान वाट देख रवलु, चु तीनु दाहड़ाम भगवान राजु बणीन राज करसे।
LUK 23:52 चु राजा पीलातुस धड़े गुयु ने ईसुन लास मांग्‌यु।
LUK 23:53 ती अळी चु कुरुस पर सी ईसुन लास उतार्‌यु, ने तीनी लासेक एक चमकण्‌या चादरा सी एळटी देदु, ने एक मसाण मां मेल देदु। चु मसाण वारलु चापर्‌या मां खुदीन बणावलो हतलो। तेरे पेहल तीनी मसाण मां कुय काजे बी नी गाड़्‌या।
LUK 23:54 चु तीयारीन दाहड़ु हतलु, ने यहुदीन आरामेन दाहड़ु सुरु हवणे वाळु हतलु।
LUK 23:55 ईसु पुठ्‌ये गलील सहर मां सी आवला बायरा युसुफ पुठ्‌ये-पुठ्‌ये मसाण भीणी गुया ने देख्‌या। ने चे ज देख्‌या की ईसुन धड़ कसो करीन मसाण मां मेक रया।
LUK 23:56 अळी चे घर गुया ने लास पर लागाड़ने करीन मसालु ने वारु ईत्‌तर तीयार कर्‌या। बाकुन आरामेन दाहड़े, जसों धरमेन कायदान अनसारे तीनुक आराम करनु हतलो, करीन चे आराम कर्‌या।
LUK 24:1 गलील सहर मां सी ईसु पुठ्‌ये आवला बायरा, हाप्‌तान पेहले दाहड़े एगात मसाण पर आया। चे, चु गंदायण्‌यु मसालु ली गुया, चु ईसुन लास पर लागाड़ने करीन बणावला।
LUK 24:2 चे देख्‌या की बीड़ा वाळा चापर्‌यान दर पर देदलु दगड़ु, धकलीन एक धड़े हय रवलु।
LUK 24:3 ने चे बायरा चापर्‌यान दरेन बारना मायन मसाण पर गुया, बाकुन मालीक ईसुन धड़ चां नी जड़ी।
LUK 24:4 ज देखीन चे बायरा वीच्‌यार मां पड़ गुया। ती उचकाणुन दुय माणसे देखाय देदा, ने तींद्‌रे साते उबा हय गुया। तींद्‌रा पुथल्‌या बरफन तसा बी धपी रवला।
LUK 24:5 चे बायरा बीही गुया ने आपसो मुणको नेचो करीन भुयमात देख रवला। तत्‌यार चे माणसे तीनु बायरा काजे कह्‌या, “जु जीवतेलु छे, तीना काजे मरला माणसेन मसाण मां काहा हेर रया?
LUK 24:6 चु जां नी हय, काहाकी चु पछु जीवतु हय गुयु। जत्‌यार चु गलील सहर मां हतलु, ती चु तुहुंक काय कवलु? ची वात हेर करु!
LUK 24:7 चु कवलु, जु माणुस बणीन आयु, तीनाक पापी माणसे कुरुस पर चड़ावसे। बाकुन चु तीन दाहड़ाम पछु जीवतु हय जासे।”
LUK 24:8 तत्‌यार बायरा ईसु कवलु ची वात हेर कर्‌या,
LUK 24:9 ने मसाण पर सी पछा जाती र्‌या। ने ईसुन ग्‌यारे चेलाक ने दीसरा आखा जो देखला ने सामळ्‌या चो आखा काजे कय देदा।
LUK 24:10 नेवताळा काजे बताड़न्‌या बायरा मगदलनी सहरेन मरीयम, योअन्‌ना, याकुपेन माय मरीयम ने थुड़ाक दीसरा बी हतला।
LUK 24:11 बाकुन ईसुन चेला वीच्‌यार्‌या की बायरा जी वात कय रया ची असलीत वात हसे। ने चे तींद्‌री वात पर भुरसु नी कर्‌या।
LUK 24:12 तेबी तींद्‌रे मायन पतरस नावेन एक चेलु मसाण भीणी दवड़ीन गुयु। जत्‌यार चु चां जाती रयु, ती चु ढंगु वळीन मसाण मां माहें भाळ्‌यु, ने चमकण्‌या पुथल्‌या अतरात पड़ रवला देख्‌यु, तेर मां काय नी देख्‌यु बाकुन चु घाबरायलुत पछु आवती रयु,
LUK 24:13 तीने दाहड़े दुय चेला ईनी आखी वातेन बारामां वात करता जाय्‌न इम्‌मावुस नावेन गांव भीणी जाणे बाजी रवला। चो यरुसलेम सहर सी च्‌यारेक कुस छेटस हतलो।
LUK 24:14 चे दुय जणा जी कवली तीनी वातेन बारामां आंबा-सांबा वात ने वीच्‌यार करने बाजी रवला।
LUK 24:15 जत्‌यार चे वात-वीच्‌यार करने बाजी रवला, तीनी टेमे ईसु आपसुत आवीन, तींद्‌रे पुठ्‌ये-पुठ्‌ये चाल पड़्‌यु,
LUK 24:16 चेला पुठ्‌ये-ईसु हतलु, बाकुन चे तीनाक नी उळख्‌या।
LUK 24:17 ईसु तीनु चेला काजे कह्‌यु, “तुहुं वाटे चालता-चालता काहनी वातेन बारामां वात ने वीच्‌यार कर रया, चे उबा रय गुया। तींद्‌रु नुरपाणी उतरी रवलु।”
LUK 24:18 तींद्‌रे मायन एक जणु क्‌लयोपास नावेन हतलु, चु जपाप आप्‌यु, यरुसलेम सहर मां आवणे जाणे वाळा मायन तुत असु अनजाण्‌यु छे काय, जो नी जाणे की ईनु दाहड़ाम काय-काय हवलो छे।
LUK 24:19 ईसु तीनुक कह्‌यु, “चां काय हवलो छे, चे कह्‌या जी वात नासरत वाळा ईसुन छे! चु माणुस भगवानेन ने आखा माणसेन नींगाम, काम ने वातेम, भगवान वाटे जुर भर्‌यु माणुस हतलु।”
LUK 24:20 ने भगवानेन डाहला पुजारा ने हामरे पर हक जमाड़न्‌या पुडारी तीनाक धराय देदा, ने मरनेन डंड आपाड़्‌या ने कुरुस पर खीळा ठुकीन रोमी सीपायड़ा धड़े चड़ाय मांग्‌या।
LUK 24:21 हामु ते बेसकी मटी असी आस कर रवला, की जु ते ईसु, ईस्‌रायल देसेन छुटकारु करने वाळु छे, जी आज सी तीन दाहड़ा पेहलेन वात छे।
LUK 24:22 हामरे मायन ईतराक बायरा हामुक बेसका बीहाड़ देदा; चे संदारे एगात मसाण पर गुयला।
LUK 24:23 तीनुक ईसुन धड़ नी जड़ी। चे चां सी पछा आवीन हामुक कह्‌या की हामु काजे सरग वाळा काहवाळ्‌या देखाय देदा, चे जो कह्‌या की “ईसु जीवतेलु छे।”
LUK 24:24 जी वात सामळीन हामरे मायन थुड़ाक साती मसाण पर गुया, ने जसा बायरा तीनुक कवला, तसात आखो देखी पाड़्‌या, “बाकुन चे ईसु काजे नी देख्‌या।”
LUK 24:25 ती ईसु तीनुक कह्‌यु, ए डेड़-अकल्‌या! तुहुं भगवानेन अघी सी वात बताड़न्‌या माणसेन वात पर, भुरसु करने मां अतरा कम अकल्‌या काहा बण गुया!
LUK 24:26 मसी ईसु काजे दुख झेलीन, तेरी सेक-सींगार मां पछो भरायणु वारु नी हय काय?
LUK 24:27 ने ईसु मुसान लिखली सास्‌तुर मां सी ने भगवानेन अघी सी आवणे वाळी वात बताड़ने वाळा माणसेन सास्‌तुर मां सी चोवे-चोव दीसरा आखा खरला सास्‌तुरेम सी आपसान बारामां जो काय लिखलो छे, चो आखो तीनुक समजाड़्‌यु।
LUK 24:28 असा करीन चाल्‌ता-चाल्‌ता, तीना गांव मां जाती र्‌या, जां चे जाणे बाजी रवलु। मालीक ईसु काजे देखीन असो लागतेलो, की ईसु अळी अगुस जाणेन वीच्‌यार मां हतलु।
LUK 24:29 चे चेला ईसु काजे पाये पड़ीन कह्‌या, “तु हामरे पुठ्‌ये रय जां। काहाकी हय सांतो हय गुयो, ने दाहड़ु बी डुबीत गुयु।” ने ईसु तींद्‌रे पुठ्‌ये रहणे करीन घर मां गुयु।
LUK 24:30 तत्‌यार ईसु तींद्‌रे पुठ्‌ये रुटा खाणे करीन बठ्‌यु, ती चु रुटु हातेम धर्‌यु, ने भगवान काजे बेसकु वारु कय्‌न संयबरकत मांग्‌यु; ने चेलाक भांजी-भांजीन आप देदु।
LUK 24:31 तीने टेमे चेलान डुळा उघड़ी गुया। ने चे ईसु काजे उळखी लेदा, बाकुन ईसु तींद्‌रा डुळा अगळ सी अंछाप हय गुयु।
LUK 24:32 ती चेला आंबा-सांबा जो कह्‌या, “जत्‌यार चु वाट्‌ये चालतु जाय्‌न हामरे साते वात करतेलु ने खरला सास्‌तुरेन वात देखाड़तेलु, ती आपणु जीव भळ नी कर्‌यु काय?”
LUK 24:33 चे चेला तत्‌यारुत चां सी उठीन यरुसलेम सहर भीणी पछा गुया, जाय्‌न चे ग्‌यारे चेला काजे ने तींद्‌रा दीसरा साती काजे भेळा हय रवला देख्‌या।
LUK 24:34 चे ज कवणे बाजी रवला, “मालीक ईसु छाचलीन जीवतु हय गुयलु छे, ने चु सीमोन पतरस काजे देखाय देदु!”
LUK 24:35 तत्‌यार चे वाट्‌ये काय-काय हयो चो आखो कय देदा ने ज बी कय देदा की ईसु रुटु भांजीन आप्‌यु, ती हामु तीनाक उळखी लेदा।
LUK 24:36 मालीक ईसु जीवतु हय गुयलु छे, करीन चेला वात करने बाजी रवला, तत्‌यार ईसु आपसुत तींद्‌रे भीणी आवीन ईचमां उबु हय गुयु। ने तीनुक आखाक कह्‌यु, “तुहुंक सांती जड़े!”
LUK 24:37 बाकुन चे बेसका बीही गुया, ने समज्‌या की हामु काहनाक खतर्‌या भुतड़ा काजे देख र्‌या।
LUK 24:38 तत्‌यार ईसु तीनुक अळी कह्‌यु, “तुहुं काहा घाबराय रया?” ने तुहुं मनेन संक्‌या काहा कर रया?
LUK 24:39 मारा हात ने पाय देखु, ने जाण लेवु की मे छाचलीन हयुत ईसु छे। मेसेक छीमु ने देखु, काहाकी आत्‌मान मास ने हाटका नी रवे। बाकुन तुहुंक डुळा अगळ देखाय र्‌यो। की मारे मां मास ने हाटका छे।
LUK 24:40 तत्‌यार ईसु जी वात कवतु जाय्‌न तीनुक आपसा हातेन घाव ने पायेन घाव देखाड़्‌यु।
LUK 24:41 चे अतरा खुस हय गुया की चे सुच मां पड़ गुया ने भुरसु नी कर सक्‌या। काहाकी ज आखो तींद्‌री समज मां नी आयो। ईसु चेला काजे कह्‌यु, “जां तुंद्‌रे धड़े खाणेन काहींग छे काय?”
LUK 24:42 ने ईसु काजे भुंजला माछान एक टुकड़ु आप्‌या।
LUK 24:43 ने चु तीना माछान टुकड़ा काजे धर लेदु ने तींद्‌रा डुळा अगळ खाय गुयु।
LUK 24:44 ईसु तीनुक अळी कह्‌यु, “मारी जी वात, ची वात छे, जी मे तुहुंक सुरु सी कवतु आय रयु, की मुसान साहरे लिखली सास्‌तुर वाळी वात ने भगवानेन अघी सी आवणे वाळी वात बताड़ने वाळा माणसेन वात, ने भजन मां लिखली वात पुरी हवणेन हतली, जी मारा बारामां लिखली छे।”
LUK 24:45 अळी ईसु खरला सास्‌तुर समजाड़ने करीन तींद्‌रा मनेन ढाकणा उगाड़ देदु।
LUK 24:46 ने तीनुक कह्‌यु, असोत लिखलो छे, की मसी दुख भुगतसे ने तीसरे दाहड़े मर्‌या-सर्‌याम सी पछु जीवतु हय जासे।
LUK 24:47 जी खुस-खबर पेहले जां यरुसलेम मां माणसेक सामळावसे ने अळी आखा देसेन माणसे काजे सामळावसे। ने पाप भीणी सी मन फेरवीन भगवान भीणी वळनेन परचार तेरेत नावेन हवसे।
LUK 24:48 ने तुहुं आखा ईनी वातेन गवा छे।
LUK 24:49 ने देखु तीना चुखली-आत्‌मान बारामां मारु बास तुहुंक आपणेन वायदु करलु छे। तीना काजे मे तुंद्‌रे उपर सरगे सी उतारीस ने जत्‌यार लग तुहुं सरगे सी ताकत हात नी करु ती लग तुहुं ईनात यरुसलेम सहर मां रवजु।
LUK 24:50 तत्‌यार ईसु आपसा चेलाक सहर सी बाहर बेतन्‌या सहर धड़े ली गुयु। जत्‌यार चे चां पुग्‌या, ईसु आपसा हात उचा करीन संयबरकत आप्‌यु।
LUK 24:51 जत्‌यार चु तीनुक संयबरकत आपणे बाजी रवलु, ती चु ईसु तीनुक छुड़ीन सरगे हाकलाय गुयु।
LUK 24:52 ने चेला मांडा टेकीन ईसुक आंध्‌या ने अळी चे खुस हय्‌न यरुसलेम सहर मां पछा जाती र्‌या।
LUK 24:53 चां चे भगवानेन भक्‌तीन घर मां भेळा हय्‌न आखी टेमे भगवानेन बड़ाय करता र्‌या।
JOH 1:1 कळी घड़ायणे सी पेहलुत बुल हतलो, ने बुल भगवान पुठ्‌ये हतलो, ने बुल भगवानुत हतलु।
JOH 1:2 च बुल कळी सी पेहेल भगवान साते हतलो।
JOH 1:3 कळी मां ज आखो काय तेरे सीत बण्‌यो, ने ज काय बण्‌यो तेरेमां सी काय बी चीज तेरे पाखुर नी बण्‌यो।
JOH 1:4 हेरेम जीव हतलु, ने हयु जीव दुनीया मायन माणसे वाटे वीजाळो हतलो।
JOH 1:5 वीजाळो आंदारला मां चमक्‌यो ने आंदारलो तीनाक कदी नी उळखी सक्‌यो।
JOH 1:6 भगवान भीणी सी मकेल्‌लु एक अदमी ईनी कळी मां आयु, तेरो नाव युहन्‌ना हतलो।
JOH 1:7 ने चु युहन्‌‌‌नु तीना वीजाळान बारामां माणसेक गवा देणे आयु, काहाकी आखा माणसे तीनी गवायन साहरे तीना वीजाळा पर भुरसु कर्‌या।
JOH 1:8 चु युहन्‌‌‌नु, आपसुत च वीजाळो नी हतलु; बाकुन तीना वीजाळान बारामां गवाय देणे आवलु।
JOH 1:9 ज खरलो वीजाळो हतलो, चु कळी मां हय उजेंतु हवणेवाळु हतलु, ने चु आखा माणसे काजे आपसा वीजाळान साहरे भगवानेन छाचाय देखाड़न्‌यु हतलु।
JOH 1:10 कळीन आखा घड़न्‌या, तेरेत साहरे घड़ाया, ने चु कळी मां आयन देखाव पड़्‌यु, तेबी कळीन माणसे तीना काजे नी उळख्‌या।
JOH 1:11 चु आपसा यहुदी-माणसेन ईचमां आयन रयु, बाकुन तेरात माणसे तीनाक नी आवर्‌या।
JOH 1:12 बाकुन जतरा बी माणसे तीनाक आपसा जीवेम आवरीन, तेरा नाव पर भुरसु करे, चु तीनु आखा काजे भगवानेन अवल्‌यात बणनेन हक आप्‌यु।
JOH 1:13 चे नी ते खुन सी, ने नी ते डीलेन मरजी सी, नी आयस बासेन मरजी सी, बाकुन भगवानेन मरजी सी पयदा हया।
JOH 1:14 तेरेमां चु बुल कहंवायतेलु; ने चु माणुस बणीन धरती पर आयु, ने आपणे ईचमां रयु। ने हामु तेरी सेक-सींगार देख्‌या, जसा की भगवान बासेन एकुत लाटेक्‌ला पुर्‌यान गीण-दया ने छाचाय बी हतली।
JOH 1:15 युहन्‌ना तेरा बारामां असी गवाय देदु, ने आयड़ीन कह्‌यु, “जु हयुत छे, तेरे बारामां मे असु कह्‌लु, एक जणु आवणे वाळु छे, चु मार पछळ आय र्‌यु, चु मार सी मटु छे, काहाकी चु मार सी पेहेल हतलु।”
JOH 1:16 काहाकी हेरेत उगळता खजाना मां सी हामुक आखो जड़्‌यो, मतलब तीना खजाना मां सी आपणु काजे बेसकी गीण-दया हवली छे।
JOH 1:17 तेरेमां नेम कायदु ते मुसु देदलु, बाकुन गीण-दया ने छाचाय ईसु मसीन साहरे आपणेन्‌चां पुगली।
JOH 1:18 भगवान काजे कुय बी माणुस आज लग नी देख्‌या, बाकुन तेरु एखलु पुर्‌यु ईसु चु आपसुत भगवान छे, ने जलम भगवान पुठ्‌ये रवे, हयुत भगवान काजे आपसी जीवान साहरे देखाड़ीन पुरु उजेंतु करलु छे।
JOH 1:19 एक दाहड़े यरुसलेम सहर सी यहुदी माणसेन डाहला, चे भगवानेन मंदीरेन पुजारा काजे ने पुजारान मदत करन्‌या लेवी कुळीन माणसे काजे, युहन्‌ना भीणी असा पुछणे मकल्‌या की तु कुण छे?
JOH 1:20 तत्‌यार युहन्‌‌‌नु ज मान लेदु बाकुन मना नी कर्‌यु, “मे मसी नी हय।”
JOH 1:21 तत्‌यार चे तीनाक पुछ्‌या, “की तु कुण छे?” काय तु एलीयु छे? युहन्‌‌‌नु जपाप आप्‌यु। “मे नी हय ती काय?” तु चु भगवानेन अघली वात बताड़न्‌यु माणुस छे। “चु जपाप आप्‌यु,” मे नी हय।
JOH 1:22 तत्‌यार चे तीनाक कह्‌या, “ती तु कुण छे? जे हामुक मकल्‌या तीनुक हामु काय जपाप आपजे? तु तार बारामां काय कह्‌वे?”
JOH 1:23 चु युहन्‌‌‌नु कह्‌यु, जसों भगवानेन अघली वात बताड़न्‌यु यसायु कहंलु की: “मे बयड़ा मां आयड़ीन बुल सामळावण्‌यु छे: की तुहुं मालीकेन वाट सुदी करु!”
JOH 1:24 युहन्‌नान झड़ती करने करीन यरुसलेम सी मकेल्‌ला फरीसी माणसे बी हतला।
JOH 1:25 चे माणसे युहन्‌ना काजे अळी पुछ्‌या कदी तु मसी बी नी हय, “ने एलीयु बी नी हय, ने भगवानेन अघली वात बताड़न्‌यु माणुस बी नी हय, ती तु बपतीस्‌मा काहा आपे?”
JOH 1:26 युहन्‌ना तीनुक जपाप आप्‌यु, “मे ते तुहुं काजे पाणी सी बपतीस्‌मा आपो, बाकुन तुंद्‌रे ईचमां एक माणुस छे तीनाक तुहुं नी उळ्‌खु।
JOH 1:27 अळतेन मारे पछेन आवणे वाळु छे, मे तेरा खासड़ान बंद छुड़ने लायक बी नी हय।”
JOH 1:28 जी वात यरदन नदीन पार बेतन्‌या गांव मां हवली, चां युहन्‌‌‌नु बपतीस्‌मा आपतेलु।
JOH 1:29 दीसरे दाहड़े युहन्‌ना ईसु काजे तेरे भीणी आवतेलु देखीन कह्‌यु, “देखु जु भगवानेन साहरे मकेल्‌लु गाडरु छे, चु कळीन माणसेन पाप हाकलीन ली जासे।
JOH 1:30 जु चु छे तेरा बारामां मे कह्‌लु, की एक माणुस मारे पछळ आवणे वाळु छे, जु मारे सी बेसकु मटु छे मार सी अगळ छे, काहाकी चु मार सी पेहलुत हतलु
JOH 1:31 मेसेक बी जी वात पेहेल मालुम नी हतली, हयुत मसी छे, बाकुन भगवानेन मरजी जी हतली की ईस्‌रायली जातीन माणसे समजणु चाहजे की, मसी कुण छे, हेरेसी भगवान मेसेक पाणीम बपतीस्‌मा आपणेन सेवा आप्‌यु।”
JOH 1:32 ने युहन्‌‌‌नु जी गवाय आप्‌यु, मे आत्‌मा काजे पेरवान तसों सरगे सी उतरतेला देख्‌यु, ने चु तेरे पर बठ गुयु।
JOH 1:33 मे ते तीनाक उळखो नी बाकुन जु मेसेक पाणी सी बपतीस्‌मा आपणे वाळु मकेल्‌लु हयुत मेसेक कह्‌यु, “तेरे पर तु आत्‌मा उतरतेला ने बठतेला देख्‌यु, हयुत चुखली-आत्‌मा सी बपतीस्‌मा आपणे वाळु छे।”
JOH 1:34 ने मे देख्‌यु, ने गवाय देदु, “की हयुत भगवानेन नेवाड़लु पुर्‌यु छे।”
JOH 1:35 दीसरे दाहड़े युहन्‌‌‌नु ने तेरा दुय चेला चां आय रवला।
JOH 1:36 युहन्‌ना ईसु काजे चां मायन जातलु देख्‌यु ने तेरा चेला काजे कह्‌यु, “देखु हीयुत भगवानेन गाडरु छे।”
JOH 1:37 तत्‌यार चे दुयु चेला युहन्‌नान जी वात सामळीन ईसुन चेला बणने करीन, ईसु पछळ चाली पड़्‌या।
JOH 1:38 जत्‌यार ईसु पछु फीरीन तीनुक आवतेला देखीन तीनुक कह्‌यु, “तुहुं काय हेर रया?” चे ईसुक कह्‌या, “ए मास्‌तर तारु रवणेन जागु कां छे।”
JOH 1:39 ईसु तीनुक जपाप आप्‌यु, “आवीन देख लेवु।” तत्‌यार चे जाय्‌न ईसुन रहणेन जागु देख्‌या, ने तीने दाहड़े ईसु पुठ्‌ये रया ने तीनी टेमे सांती वेळाय चार बज रवली।
JOH 1:40 तीनु दुय जणा मां सी जे युहन्‌नान वात सामळीन चे ईसु पछळ चाली पड़्‌या, एक सीमोन पतरसेन भाय अन्‌दीरीयास हतलु।
JOH 1:41 अदरीयास ईसुन्‌चां सी पछु गुयु ती, चु सुदु सट पेहल आपसा संगा भाय सीमोनेन्‌चां गुयु, तत्‌यार कह्‌यु, “हामुक छुड़ावन्‌यु मसी जड़ गुयु, तीनाक आपणु खीरीस्‌त कहजे।”
JOH 1:42 पछेन अन्‌दीरीयास तीना सीमोन काजे ईसुन्‌चां लायु। ईसु सीमोन भीणी भाळीन कह्‌यु, “तु युहन्‌नान पुर्‌यु सीमोन छे, तु केफा कहंवाय्‌सी।” हीना केफा काजे युनानी बुली मां पतरस कह्‌वे।
JOH 1:43 दीसरे दाहड़े ईसु गलील जीला भीणी जाणेन हींडी रवलु। तीनी टेमे चु फीलीप्‌पुस काजे भेळु हयु ने कह्‌यु, “तु मारु चेलु बणीन मारे पछळ चाल पड़।”
JOH 1:44 ने जु फीलीप्‌पुस बी, अन्‌दीरीयास ने पतरस रवतेलु तीनात बेतसेदा सहर वाळु हतलु।
JOH 1:45 ने जु फीलीप्‌पुस, नतनएल नावेन आपसा दुस्‌तीदार काजे भेळु हवणे गुयु, ने तीनाक भेळु हय्‌न कह्‌यु तीना मसीन बारामां मुसु नीयम मां लिखलु छे ने भगवानेन अघली वात बताड़ने वाळा बी करला, च हामुक जड़ गुयो, चु नासरत सहरेम रहणे वाळु युसुफ्‌यान पुर्‌यु ईसु छे।
JOH 1:46 नतनएल फीलीप्‌पुस काजे कह्‌यु, “ए नासरत सहर मां सी नीकळी काहनी बी वारलु बरकत उबजी सके काय?” फीलीप्‌पुस नतनएल काजे कह्‌यु, “आवीन देख ले।”
JOH 1:47 ईसु नतनएल काजे हेरे भीणी आवतेलु देखीन कह्‌यु, “ने तेरा बारामां कह्‌यु, देखु जु ईस्‌रायली जातीन खरलु माणुस छे। हेरेमां काय बी खुट नी हय!”
JOH 1:48 नतनएल ईसु काजे कह्‌यु, “तु मेसेक कसु उळखे?” ईसु तीनाक जपाप आप्‌यु, “हेरेसी पेहेल की फीलीप्‌पुस तुसेक बुलायु जत्‌यार तु अंजीर नावेन झाड़का तळे हतलु तत्‌यार मे तुसेक देखलु।”
JOH 1:49 नतनएल ईसुक कह्‌यु, “ए मास्‌तर” तु भगवानेन पुर्‌यु छे, “तु ईस्‌रायली माणसेन राजु छे!”
JOH 1:50 ईसु नतनएल काजे कह्‌यु, “मे तुसेक वारु कहलु, की तु अंजीर नावेन झाड़का तळे देखलु काय, तु तेरेमां मार पर भुरसु कर रयु? तु हेरेसी बी मटा-मटा काम देखसी!”
JOH 1:51 ईसु तीनाक ने दीसरा चेलाक असु कह्‌यु, “मे तुहुंक छाचलीन कहो की तुहुं सरग काजे उघड़लो, ने भगवानेन सरग वाळा काहवाळ्‌या काजे माणसेन पुर्‌यान्‌चां उतरतेला ने चां सी उपर चहड़तेला देखसु।”
JOH 2:1 पछेन तीसरे दाहड़े गलील जीलान काना सहर मां ईयाव हतलु। ने ईसुन माय बी चां हतली
JOH 2:2 चां ईयाव मां ईसु ने तेरा चेला काजे बी नेवता आपीन बुलाय रवला।
JOH 2:3 जत्‌यार चां अंगुरेन रस सर गुयु, ती ईसुन माय ईसुक कय, “हींद्‌रे धड़े ते अंगुरेन रस सर गुयु।”
JOH 2:4 ईसु हेरी माय काजे कह्‌यु, “तु मेसे असी काहा कय रय? मारे साते तारो काय काम छे? हय मारी टेम नी आय रय।”
JOH 2:5 ईसुन माय पावर्‌या काजे कय, “हीयु तुहुंक जु काय कहं चत करजु।”
JOH 2:6 चां दगड़ान छव बेसका-मटा गुळा मेल्‌ला हतला, हीनु गुळाम सी पाणी हेड़ीन यहुदी माणसे चुखा हवणे करीन हात-पाय धुवतेला। हीनु गुळाम सोवेक लीटर पाणी समायतेलो।
JOH 2:7 ईसु चां वाळा पावर्‌याक कह्‌यु, “गुळा मां पाणी भर देवु” ने चे पावर्‌या ईसुन वात मानीन उगेळतो पाणी भर देदा।
JOH 2:8 तत्‌यार ईसु तीनुक कह्‌यु, “हय ईतरोक पाणी नीकाळीन वारत्‌यान धड़े ली जावु।” चे पावर्‌या च पाणी नीकाळीन वारत्‌यान्‌चां ली गुया।
JOH 2:9 तत्‌यार वारती च पाणी चाख्‌यु अंगुरेन रस बण गुयो ने तीनाक नी मालुम हतलो की अंगुरेन रस कां सी लावला। बाकुन तीनु पावर्‌याक मालुम हतलो की कां सी लावला ती आरत्‌यु दुल्‌लाक बुलायन तीनाक कह्‌यु।
JOH 2:10 “कुय बी माणुस पेहली बार वारलु अंगुरेन रस आपे ने तत्‌यार माणसे पीन आफरी जाय तत्‌यार हळकु अंगुरेन रस आपे; बाकुन तु ते वारलु अंगुरेन रस हय लग मेल रवलु।”
JOH 2:11 ईसु गलीलेन काना सहर मां पेहली कावा वारु कामेन सहलाणी देखाड़ीन आपसुत सेक-सींगार देखाड़्‌यु। ने ज देखीन ईसुन चेला ईसु पर भुरसु कर्‌या।
JOH 2:12 हेरे पछेन ईसु ने हेरी माय ने हेरु भाय ने हेरा चेला कफरनहुम सहर मां गुया ने चां थुड़ाक दाहड़ा रया।
JOH 2:13 यहुदी माणसेन फसह तीहवार सातेत आय रवलु। तेरेमां ईसु यरुसलेम सहर मां जाती रयु।
JOH 2:14 चां ईसु मंदीर मां देख्‌यु की माणसे बेल गाडरा ने पेरवा वेचतेला देख्‌यु ने चां लेण देण वाळा वेपारी आटे-साटे करन्‌या बठ रवला देख्‌यु।
JOH 2:15 तेरेमां ईसु रासेन सपाटु बणायन आखा गाडरा ने बेल काजे मंदीर मां सी नीकाळ देदु ने लेण-देण करने वाळान पयस्‌या खडळी देदु ने ठेला गाडी काजे उन्‌धलाय देदु।
JOH 2:16 पेरवा वेचण्‌या काजे कह्‌यु, “ज आखो जां सी छेटा ली जावु। मारा बासेन घर काजे वेपारीन घर मां बणावु।”
JOH 2:17 ईसुन वात सामळीन ईसुन चेला काजे खरला-सास्‌तुर मां लिखली वात हेर आय गुय, “तारा घरेन धुन मां मेसेक आकठान तसी धपाड़ देसे।”
JOH 2:18 ईसुन वात सामळीन यहुदी माणसे ईसु काजे कह्‌या, “तु जो काय करने बाजी रयु? कदी भगवान तुसेक जो करनेन हक आपलु हय ती, ईनी वातेन पुरावु देणे करीन, हामुक चकराड़े असी एक वारु-कामेन सहलाणी देखाड़।”
JOH 2:19 ईसु तीनुक जपाप आप्‌यु, “कदी तुहुं भगवानेन हीना मंदीर काजे उदार नाखसु, ती मे हीनाक अळी तीन दाहड़ाम पछु बणाय दीस।”
JOH 2:20 जो सामळीन यहुदी माणसे ईसु काजे कह्‌या, “भगवान हीना मंदीर काजे बणावणे मां चालीस ने छव साल लागला, ती हय तु हीनाक तीन दाहड़ा मां बणाय देसी काय!”
JOH 2:21 बाकुन ईसु आपसा डीलेन मंदीरेन बारामां बताड़लु।
JOH 2:22 जत्‌यार ईसु जत्‌यार मर्‌या-सर्‌याम सी जी उठ्‌यु, ती ईसुन चेला काजे ईसुन साहरे मंदीरेक उदारनेन ने पछु उबु करनेन बारामां कह्‌ली वात हेर आय, ने चेला खरला-सास्‌तुरेन वात पर ने ईसुन कवली वात पर भुरसु कर्‌या।
JOH 2:23 पासका तीहवारेन दाहड़ा, मां, ईसु यरुसलेम सहर मां हतलु। तत्‌यार बेसका माणसे तेरा करला वारु कामेन सहलाणी देखीन ईसु पर भुरसु कर्‌या।
JOH 2:24 बाकुन ईसु हीनु काजे तींद्‌रा भुरसा पर नी छुड़्‌यु, काहाकी हयु आखा माणसे काजे जाणतेलु।
JOH 2:25 ने हीनाक जरुवत नी हतली, की माणसेन बारामां काहींग गवा पुरावु देय, काहाकी हयु आपसुत जाणतेलु की माणसेन मन मां काय छे?
JOH 3:1 यरुसलेम सहर मां नीकुदेमुस नावेन एक माणुस हतलु। चु यहुदी माणसेन एक पंचुन मुख्‌यु हतलु। चु फरीसी माणसे मायन हतलु।
JOH 3:2 चु राते नीकुदेमुस ईसु धड़े आयु ने ईसु काजे कह्‌यु, “ए मास्‌तर, हामु जाणजे की तु भगवानेन्‌चां सी सीकाड़न्‌यु बणीन आवलु छे, काहाकी जत्‌यार लग भगवान पुठ्‌ये नी हय ती माणुस कुय बी असो वारलु कामेन सहलाणी नी देखाड़ सके, जसु तु वारलु कामेन सहलाणी देखाड़े।”
JOH 3:3 ईसु नीकुदेमुस काजे कह्‌यु, “मे तुसेक छाची-छाची कह्‌वो की जत्‌यार लग कुय अळी पछु पयदा नी हवे तत्‌यार लग चु भगवानेन राज नी देख सके।”
JOH 3:4 नीकुदेमुस ईसुक पुछ्‌यु, “काहनु बी माणुस डाहलु हय्‌न अळी पछु कसु पयदा हय सके? छाचलीन चु आपसी आयसीन कुख मां अळी पछु जाय्‌न, दीसरी कावा ते, नी पयदा हय सके।”
JOH 3:5 ईसु नीकुदेमुस काजे कह्‌यु, “मे तुसेक छाचली-छाचली कहं, जत्‌यार लग काहनुक बी माणुस भगवानेन जीव-आत्‌मा अनसारे आपसा जीव-आत्‌मा मां पयदा नी हवे, तत्‌यार लग चु भगवानेन राज मां भराय नी सके।
JOH 3:6 काहाकी जु कुय डील सी पयदा हयु च डील छे; ने जु कुय भगवानेन आत्‌मा सी पयदा हयु चु आत्‌मात छे।
JOH 3:7 मे तुसेक जी वात कहं तुहुं आखा जीव-आत्‌मा मां पछा पयदा हवण्‌या छे, हीनी वातेक सामळीन तु घाबरायु मां।
JOH 3:8 आहळी तींखुर जाणे लागे तींखुर जाय ने तु तेरी अवाज काजे सामळे ते खरु, बाकुन ची कां सी आवे, ने कां जाय, च तुसेक मालुम नी पड़े। जु-जु भगवानेन जीव-आत्‌माम सी पयदा हवलु छे, चु हीनी आहळीन तसुत छे।”
JOH 3:9 जी वात सामळीन नीकुदेमुस ईसु काजे कह्‌यु, “ज असो कसों हय सके।”
JOH 3:10 ईसु, नीकुदेमुस काजे कह्‌यु, “तु ईस्‌रायली माणसेन मास्‌तर छे, तेबी तुसेक जी वात पल्‌ले नी पड़ती काय?
JOH 3:11 मे तुसेक छाचली-छाचलीन कह्‌वो हामु जे सरग वाळा छे, हामु ज जाणजे चत कहंजे ने हामु तीनाक देखला छे, तेरीत गवाय देजे, ने तुहुं माणसे हामरी गवाय काजे मान्‌ता काहनी।
JOH 3:12 मे तुहुंक धरती पर हये ची वात देखाड़्‌यु, तेबी तुहुं तीनी वात पर भुरसु नी कर्‌या, ने कदी मे तुहुंक सरगेम हये ची वात देखाड़ीस ती तुहुं कसा भुरसु करसु?
JOH 3:13 सरग मां उपर कुय बी नी गुयो, हयु अतरुत गुयु, जु सरग सी आयु तेरो मतलब माणसेन पुर्‌यु जु सरग मां छे।”
JOH 3:14 जसु मुसु माणसे काजे भगवानेन डंडेम सी बचाड़णे करीन उजाड़्‌या बयड़ा मां घड़सान मुरती बणायन खाम्‌बा पर टांगलु तसात माणसेन पुर्‌या काजे बी उपर चहड़ाय टांगसे ने असो हवणु जरुड़ी छे।
JOH 3:15 जु काहनुक माणसेन पुर्‌या पर भुरसु करे, चु तेरेत साहरे अमर जीवाय हात करसे
JOH 3:16 काहाकी भगवान ईनी कळीन पापी माणसे काजे अतरु परम कर्‌यु, की तेरु एकुत लाटेक्‌लु पुर्‌यु मरने करीन आप देदु, ने जु कुय तेरे पर भुरसु करे, चु खत्‌तम नी हवे बाकुन अमर जीवन हात करसे।
JOH 3:17 भगवान आपसा पुर्‌या काजे ईनी कळी मां माणसेन नीयाव करीन डंड आप्‌णेन हुकुम आपजी करीन नी मकल्‌यु, बाकुन तेरेमां मकल्‌यु की कळी मायन माणसे हेरे साहरे छुटकारु हात करसे।
JOH 3:18 ने जु काहनुक भगवानेन पुर्‌या ईसु पर भुरसु करे, तीनाक डंडेन हुकुम नी आपे; बाकुन जु कुय ईसु पर भुरसु नी करे, चु गुनावाळु गीणाय गुयलु छे, काहाकी चु भगवानेन एखला पुर्‌यान नाव पर भुरसु नी कर्‌यु।
JOH 3:19 भगवान नीयावेन दाहड़े माणसे काजे डंडेन फेसलु जु सामळावसे की ईसु वीजाळो हय्‌न कळी मां आवलु, बाकुन माणसे काजे वीजाळो नी बाकुन आंदारला सी अदु परम राख्‌या, काहाकी तींद्‌रा काम भुंडात हतला।
JOH 3:20 काहाकी जु कुय कुहराय करे, तीनाक वीजाळो गमे नी, ने तेरा कुहराय्‌न काम उजन्‌ता हय जासे करीन चु वीजाळा धड़े नी आवे।
JOH 3:21 बाकुन जु कुय छाचली वातेन अनसारे चाल्‌या करे, चु जी हिम्‌मत करीन वीजाळा धड़े आवे, ने जे वारलु काम भगवानेन मदत सी करलु छे, चे काम, ने जी वात दीसरा अगळ उजन्‌ती हय जाणु चाहजे।
JOH 3:22 थुड़ाक दाहड़ा हय गुया ने अळी ईसु, आपसा चेला भेळतुत यरुसलेम सहर छुड़दीन यहुदीया जीलान दीसरा जागाम जाती रयु। ने चां चु तींद्‌रे पुठ्‌ये रय्‌न बपतीस्‌मा आपणे बाजी गुयु।
JOH 3:23 तीनी टेमे चु युहन्‌‌‌नु बी सालेम सहर धड़े एनोन गांव मां पाणीन बपतीस्‌मा आपतेलु, काहाकी चां बेसको पाणी हतलो, ने माणसे आवीन बपतीस्‌मा लेदला।
JOH 3:24 बपतीस्‌मा आपण्‌या युहन्‌ना काजे राजु हेरोदेस तीनी टेम लग जेल मां नी कुंडाड़्‌यु।
JOH 3:25 चां युहन्‌नान चेला एक यहुदी माणसे साते चुखो करनेन रीतीन बारामां जखड़ी पड़्‌यु।
JOH 3:26 ने चे युहन्‌नान चेला युहन्‌ना धड़े आवीन कह्‌या, “ए मास्‌तर, जु माणुस यरदन नदीन पली धड़े तारे पुठ्‌ये हतलु, ने तेरी तु गवाय देदलु, ने चु बपतीस्‌मा आपणे बाजी रयु, ने आखा माणसे तेरे धड़े जाय।”
JOH 3:27 युहन्‌‌‌नु जपाप आप्‌यु, “काहना बी माणसेक सरग वाळु भगवान वाटु आपसे तीत असला सेवान काम जड़से।
JOH 3:28 मे तुहुंक ज कय देदलु की, ‘मे मसी नी हय, बाकुन मसीन काम सुरु हवणेन पेहेल भगवान मेसेक मकेल्‌लु छे।’ ने तुहुं मारी हीनी वातेन गवा छे।
JOH 3:29 नवली लाडी नवला लाडा धड़े रवे, बाकुन नवला लाडान खास दुस्‌तीदार, चु नवला लाडा धड़े हुबु रय्‌न तेरी सामळे चु तेरी वात सामळीन बेसकु खुस हय जाय। तसीत हय मारी खुसी पुरी हय गुय।
JOH 3:30 ज जरुड़ी छे, की चु बड़तु जाय ने मे कम हवतु जाम।
JOH 3:31 “जु उपर सी आवे, चु आखा सी मट्‌लु छे। ईसु अतरुत सरग वाळा भगवानेन्‌चां सी आयु, हेरेसी चु आखाम सी मट्‌लु छे, धरती सी छे, बाकुन चु धरती पर रवण्‌यु छे, चु धरतीन छे, ने धरती पर वाळान तसात वात करे
JOH 3:32 ईसु ज काय चु देख्‌यु ने सामळ्‌यु, तेरीत गवाय देय; ने कुय तेरी गवाय नी माने।
JOH 3:33 जु कुय ईसुन गवाय मान लेदु, चु ईनी वात पर छाप लागाड़ देदु की, भगवान छाचलु छे।
JOH 3:34 काहाकी तीनाक भगवान मकेल्‌लु छे, चु भगवानेन वात कहें, काहाकी भगवान आत्‌मा अमर जीवाय आपलु छे।
JOH 3:35 भगवान बास पुर्‌या सी परम करे, ने चु आखी चीज तेरा हात मां सुप देदु।
JOH 3:36 जु भगवानेन पुर्‌या ईसु पर भुरसु करे, अमर जीवन तेरीत छे, बाकुन जु ईसुक नी माने, चु अमर जीवन काजे नी देखे, बाकुन भगवानेन रीस तेरे पर रहे ने तीनाक डंड जड़से ने जड़से।”
JOH 4:1 फरीसी माणसे ईसुन बारामां ज सामळ्‌या की, ईसु बपतीस्‌मा आपण्‌या युहन्‌नान चेला सी अदुस चेला बणावे, ने तीनु चेलाक बपतीस्‌मा आपे
JOH 4:2 अदुस ईसु आपसुत बपतीस्‌मा नी आपतेलु बाकुन ईसुन खास चेला, दीसरा नवला चेला बणावणे करीन बपतीस्‌मा आपतेला।
JOH 4:3 ती ईसु यहुदीया जीला काजे छुड़ीन अळी पछु गलील जीला भीणी जाती रयु।
JOH 4:4 हीनी कावा ईसु, आपसा चेला पुठ्‌ये सामरीया जीला मायन गुयु।
JOH 4:5 जाते-जाते चे, सामरीया जीलान सुखार नावेन एक सहर धड़े पुग्‌या। चां एक खेत हतलो, च खेत अगला वाराम याकुप आपसान पुर्‌या युसुफ काजे आपलु।
JOH 4:6 चां याकुप्‌यान साहरे खुदाड़लु कुवु बी हतलु, तत्‌यार ईसुक चु कुवु देखायु, ईसु ते, चाली चालीन हारी पड़लु। अळतेन चु तीना कुवा धड़े चां बठ गुयलु। हय खयार दाहड़ु हय रवलु।
JOH 4:7 तीनी टेमे तीना कुवा पर एक सामरी बायर पाणी भरने आवी। तत्‌यार ईसु तीनीक कह्‌यु, “मेसेक पाणी पीयाड़ दे।”
JOH 4:8 काहाकी तेरा चेला खाणो मुल लेणे करीन सहर मां जाय रवला।
JOH 4:9 तीनु दाहड़ाम यहुदी माणसे सामरी माणसे साते छीट राखतेला, अळी ची सामरी बायर ईसु काजे कय, “तु यहुदी जातीन हय्‌न बी मारे धड़े पाणी पीणे करीन काहा मांगे? मे ते एक सामरी जातीन बायर छे।”
JOH 4:10 ईसु तीनीक जपाप आप्‌यु, “कदी तु ज नी जाण लेती की, भगवान तुसेक काहनु वाटु आपणे हींडे, ने जु तारे धड़े पीणे करीन पाणी मांग र्‌यु, चु कुण छे। कदी तु जाण लेती ती मारे धड़े पाणी मांगती, ने मे तुसेक अमर जीवेन पाणी आपतु।”
JOH 4:11 सामरी बायर ईसुक कय, “ए मालीक तारे धड़े ते कुवाम सी पाणी लाटणे करीन ठाहरु बी नी हय, ने कुवु उंडु छे; ती च अमर जीवन आपण्‌यो पाणी तु कां सी लावसी?
JOH 4:12 तु हामरा बास याकुप सी बी मटु छे काय? जु हामु काजे गुयु कुवु आपलु; चु बी हीना कुवाम सीत पाणी पीदलु, ने तेरा पुर्‌या ने तेरा पाळ्‌ळा जनवार्‌या लग हीना कुवाम सी पाणी पीदा।”
JOH 4:13 ईसु सामरी बायर काजे कह्‌यु, “ज कुय पाणी पीये तीनाक अळी पीस लागसे,
JOH 4:14 बाकुन मे आपीस च पाणी, जु बी पीसे तीनाक कदी पीस नी लागे। अतरोत नी बाकुन च पाणी तेरी जीवाय मां पाणीन झीर बण जासे। ने तेरी अमर जीवाय वाटे खळो-खळो उंहतो रवसे।”
JOH 4:15 तत्‌यार सामरी बायर ईसुक कय, “ए मालीक मेसेक च पाणी आप ती मेसेक अळी-अळी पीस नी लागे, ने मेसेक चां पछो पाणी भरने आवणु नी पड़े।”
JOH 4:16 ईसु तीनीक कह्‌यु, “जाय्‌न तारा घरवाळा काजे बुलाय लाव।”
JOH 4:17 ची बायर जपाप आपी, “मारु घरवाळु नी हय।” ईसु तीनीक कह्‌यु, “तु संय कय की मारु घरवाळु नी हाय।”
JOH 4:18 हव तु पांच लाडा कर लेदली, ने हय तु तेरे भेळे रय चु बी तारु घरवाळु नी हय, तु जी वात छाचलीन कय रय।
JOH 4:19 जी वात सामळीन बायर ईसुक कही, ए मालीक असो लागे की, तु भगवानेन अघली वात बताड़न्‌यु माणुस छे।
JOH 4:20 हामरा डाहा-डाहा हीना बयड़ा पर पुजा-पाट कर्‌या, ने तुहुं यहुदी माणसे कह्‌वु की पुजा-पाट करनेन जागु यरुसलेम सहर मां छे।
JOH 4:21 ईसु तीनीक कह्‌यु, “ओ बायर, मारी ईनी वात पर भुरसु कर, काहाकी असी टेम आवणे बाजी रय, की तीने टेमे तुहुं नी ते हीना बयड़ा पर ने नीते यरुसलेम मां भगवानेन पुजा-पाट करसु।
JOH 4:22 तीनाक तुहुं नी जाणु तेरी पुजा-पाट करु ने हामु तीनाक जाणजे तेरी पुजा-पाट करजे, काहाकी छुटकारु यहुदी जातीवाळा मसी मां सीत जड़से।
JOH 4:23 बाकुन हय ची टेम आवणे बाजी रय, ने हींताळ आय गुय, तीने टेमे छाचलीन भगवानेन पुजा-पाट करन्‌या, तेरा चुखली-आत्‌मा मां बणीन तेरी छाचली वातेन अनसारे भगवान बासेन भक्‌ती करसे। काहाकी भगवान बास आपसा वाटे असली भक्‌ती करन्‌यात काजे हेर र्‌यु।
JOH 4:24 भगवान जीव-आत्‌मा छे, ने तेरे मां छाचलीन भगवानेन भक्‌ती करन्‌या काजे तेरा जीव-आत्‌मा मां रय्‌न ने छाचे मन तेरी भक्‌ती करनु चाहजे।”
JOH 4:25 सामरी बायर ईसुक कय, “मेसेक मालुम छे, की छुड़ावन्‌यु मसी जु खीरीस्‌त कह्‌वाये, चु आवणे वाळु छे; जत्‌यार चु आवसे, तत्‌यार हामु काजे आखी वात कय देसे।”
JOH 4:26 ईसु तीनीक कह्‌यु, “मेत मसी छे, जु तारे साते वात करने बाजी र्‌यु।”
JOH 4:27 तीनी टेमे ईसुन चेला आय गुया, ने ईसु काजे एक बायर साते वात करतेलु देखीन वीच्‌यार मां पड़ गुया; तेबी कुय बी ज नी कह्‌यो की तु हेरे धड़े सी काय मांग रयु? “नीते तु हीनी साते काहा वात कर रयु?”
JOH 4:28 तत्‌यार ची बायर आपसीत वटळु चांहान रहणीदीन तेरा सहर मां जाय्‌न माणसेक ज कहंणे बाजी गुय।
JOH 4:29 “चालु, एक माणुस काजे देख लेवु! चु माणुस, मे ज करली च आखो कय देदु; कांखुर मायन हयुत मसी हसे?”
JOH 4:30 तीनी बायरीन वात सामळीन तीना सहर वाळा माणसे सहरेम सी नीकळीन ईसु काजे भेळा हवणे हुड़ु-हुड़ु आवतेला।
JOH 4:31 तीने टेमे ईसुन चेला ईसु सी लीलघाय्‌न कह्‌या, “ए मास्‌तर थुड़ोक खाय ले।”
JOH 4:32 बाकुन ईसु तीनुक कह्‌यु, “मारे धड़े खाणे वाटे असो खाणो छे, तीना खाणान बारामां तुहुंक मालुम नी हय।”
JOH 4:33 अतरात मां ईसुन चेला आपसा-आपसात कह्‌या, “कुय हेरे वाटे खाणो लायु हसे काय? करीन चु असु कय र्‌यु।”
JOH 4:34 जी वात समजीन ईसु तीनुक कह्‌यु, “मारो खाणो ज छे, की मारा मकलने वाळान मरजीन अनसारे चालो ने तेरो काम पुरो करो।
JOH 4:35 तुहुं ते असा कवता आय रया, मेर पाकणेन हय चार महना बच रया। बाकुन मे तुहुंक दाखलान साहरे कह्‌वो, आपसा पापण्‌या उपर करीन ईनु खेत भीणी देखु, ईनु खेतेन मेर पाकीन धवळी फक हय गुय काटणे वाटे तीयार हय गुय।
JOH 4:36 काटणे वाळाक दाहड़की जड़े ने अमर जीवाय वाटे फळ भेळा करे, काहाकी एरने वाळु ने काटणे वाळु दुयु खुस हवे।
JOH 4:37 काहाकी जु दाखलु संय छे, ‘एरने वाळु काहनुक दीसरु छे, ने काटणे वाळु काहनु दीसरु छे।’
JOH 4:38 मे तुहुंक पलो खेत काटणे वाटे मकल्‌यु जाहां तुहुं मेहनत नी कर्‌या, ने दीसरा मेहनत कर्‌या ने तुहुं तींद्‌रा मेहनतेन फळ मां भेसकाय गुया।”
JOH 4:39 चां सामरी बायर ईसुन बारामां असी गवा देदली की, “चु माणुस, मे ज करली च आखो कय देदु। अळतेन तीना सामरीया जीलान बेसका माणसे सामरी बायरीन मुंहडे ईसुन बारामां जी गवा सामळीन ईसु पर भुरसु करने बाजी गुया।”
JOH 4:40 तेरेमां तत्‌यार ची सामरी बायर ईसु धड़े आय ती ईसु सी लीलघाय्‌न कह्‌णे बाजी गुय की हामरेन्‌चां रव। अळतेन ईसु चां दुय तीन दाहड़ा लग रयु।
JOH 4:41 ने ईसुन वात सामळी बेसका दीसरा माणसे बी ईसु पर भुरसु कर्‌या।
JOH 4:42 ने अळी तीनी सामरी बायर काजे कह्‌या, “हय हामु तारी सामळीन ईसु पर भुरसु करने बाजी गुया; काहाकी हामु ईसुन वात सामळी लेदा, की छाचलीन हयु की हयु ईनी कळीन माणसेक पाप सी छुड़ावणे वाळु छे, करीन तेरे पर भुरसु कर रया।”
JOH 4:43 अळतेन दुय दाहड़ा वीती गुया, ने ईसु आपसा चेला भेळु सामरीया जीलाम सी नीकळीन गलील जीलाम जात रयु।
JOH 4:44 ईसु ते आपसुत असी गवा देदलु की, “भगवानेन अघी सी आवणे वाळी वात देखाड़न्‌यु, तीना काजे आपसान देस मां ईज्‌जत नी जड़े।”
JOH 4:45 जत्‌यार ईसु गलील जीलाम पुग्‌यु, ती गलील वाळा माणसे ईसु तेरेत अनसारे ईसु साते वेहवार कर्‌या। चे बी तीहवारेन टेमे यरुसलेम सहर गुयला, ने तीहवारेन दाहड़ाम ईसु यरुसलेम मां जतरा बी वारलु काम करलु, चे आखा काम देखला हतला करीन ईसुन आव-भाव कर्‌या।
JOH 4:46 तत्‌यार ईसु एक कावा अळी गलील जीलान काना सहर मां आयु, चां चु पाणी काजे अंगुरेन रस बणाय देदलु। ने हीना काना सहर साते वाळा कफरनहुम सहर राजान एक खास पावर हतलु, तेरु पुर्‌यु मांदलु हतलु।
JOH 4:47 चु ज सामळ्‌यु की यहुदीया सी ईसु आपसान गांव मां सी गलील जीलाम आय गुयलु छे, ती चु काना सहर मां ईसु धड़े गुयु, ने ईसु सी लीलघाय्‌न कह्‌यु की चाल मारा पुर्‌या काजे वारु कर दे। काहाकी तेरु पुर्‌यु मरने वाळु हतलु।
JOH 4:48 ईसु गलील वाळा माणसेन कम भुरसु देखीन कह्‌यु, “जत्‌यार लग तुहुं मटा कामेन सहलाणी नी देखु, तत्‌यार लग तुहुं मार पर भुरसु नी करसु।”
JOH 4:49 चु राजान खास पावर्‌यु ईसुक कह्‌यु, “ए मालीक मामार चाल नेते मारु पुर्‌यु मर जासे।”
JOH 4:50 ईसु तीना राजान खास पावर्‌याक कह्‌यु, “जां तारु पुर्‌यु नी मरे, चु जीवतेलु रवसे।” चु राजान पावर्‌यु ईसुन ईनी वात पर भुरसु करीन जाती रयु।
JOH 4:51 चु राजान खास पावर्‌यु वाटेत हतलु, ती तीना पावर्‌यान, पावर्‌या आय्‌न तीनाक भेळा हया ने कह्‌या, “तारु पुर्‌यु वारु हय गुयु ने जीवतु छे।”
JOH 4:52 चु तीनुक पुछ्‌यु, “काहने टेमे मारु पुर्‌यु वारु हवणे बाजी गुयलु, चे कह्‌या काल दीसु एक बजे तेरो सेरी उतरी गुयलो।”
JOH 4:53 तत्‌यार तीना मांदला पुर्‌यान बासेक जी वात हेर आवी की ईसु हीनीत टेमे ज कहंलु, “जां तारु पुर्‌यु जीवतु छे।” ने असु करीन चु राजान पावर्‌यु ने तेरा घरना आखा माणसे ईसु पर भुरसु कर्‌या।
JOH 4:54 ज पेहला मायन दीसरा मटा कामेन सहलाणी हतली, जु ईसु यहुदीया सी गलील जीलाम पछु आय्‌न देखाड़्‌यु।
JOH 5:1 अळतेन यहुदी माणसेन एक तीहवार आयु, ने ईसु यरुसलेम सहर अळी गुयु।
JOH 5:2 यरुसलेम सहरेम गाडरान फाटक धड़े एक कुंडान तसों हतलो, तीनाक ईब्‌रानी माणसेन बुली मां बेतसेदा कह्‌वे; ने हीना कुंडान चारे मेर पांच मांडवा हतला।
JOH 5:3 चां बेसका मांदवाड़ वाळा, आंदळा, लंगड़ा, ने पांगळा पाणी झलकायणेन वाट देखीन पड़ी रवतेला,
JOH 5:4 काहाकी ठहरावली टेम पर भगवानेन सरग वाळु काहवाळ्‌यु कुंडा मां उतरीन पाणीक गचळावतेला। पाणी हवतेत जु काहनुक पेहेल उतरे चे मांदवाड़ वाळा वारु हय जाय, चाहे तेरी काहनी बी मांदवाड़ हय।
JOH 5:5 तीना हळावेन चां एक माणुस हतलो, च दुय कम चालीस साल लग, चां मांदलु पड़ी रवलु।
JOH 5:6 ईसु तीनाक चां पड़ी रवलो देख्‌यु ने ज जाणीन की चु बेसका दाहड़ा सी असुत पड़ रवलु तेरेमां तीना मांदला काजे कह्‌यु, “तु वारु हवणे हींडे काय?”
JOH 5:7 च मांदलो ईसु काजे जपाप आप्‌यु, “ए मालीक, पाणी झलकाय्‌तात मेसेक हळाव मां उतारे असो कुय माणुस मारे पुठ्‌ये नी हय। ने मेसेक पुगणेन पेहलुत हळाव मां दीसरु मांदलो माणुस उतरी पड़े।”
JOH 5:8 ईसु तीनाक कह्‌यु, “उबु हय जां। ने तारी गुदड़ी हाकलीन चाल।”
JOH 5:9 च माणुस तत्‌यारुत वारु हय गुयो, ने तेरी गुदड़ी हाकलीन हींडणे बाजी गुयो चु दाहड़ु आरामेन दाहड़ु हतलु।
JOH 5:10 तेरेमां यहुदी माणसेन मुख्‌या तीना वारु हवला माणसेक कहंणे बाजी गुया, “आज आरामेन दाहड़ु छे। आज कायदान अनसारे तारे धड़े गुदड़ी हाकलनु वारु नी हय।”
JOH 5:11 चु वारु हवलु माणुस तीनुक कह्‌यु, जु मेसेक वारु करलु छे, चु मेसेक कहंलु छे, “उबु हय जां। ने तारी गुदड़ी हाकलीन जाती रव।”
JOH 5:12 चे तीनाक पुछ्‌या, चु कुण छे, चु तुसेक कह्‌यु की, “उबु हय जां ने तारी गुदड़ी हाकलीन जाती रव?”
JOH 5:13 बाकुन चु वारु हवलु, चु माणुस नी जाणतेलु की चु कुण छे, काहाकी चां जागा पर माणसेन गड़दी हवणे सी ईसु चां सी जाती रवलु।
JOH 5:14 अळतेन ईसु तीना वारु हवला माणुस काजे ईसु मंदीर मां भेळु हयु, ती ईसु तीनाक कह्‌यु, “देख तु वारु हय गुयलु छे, अळी पाप घुण करे। नीते कांखुर मायन तार पर एर सी बी अळी जादा गरा आय पड़से।”
JOH 5:15 चु माणुस जाय्‌न यहुदी माणसेक कह्‌यु की चु मेसेक वारु करलु चु ईसु छे।
JOH 5:16 ईसु आरामेन दाहड़े असो काम कर्‌यु, करीन यहुदी माणसे ईसु काजे दमणे बाजी गुया।
JOH 5:17 ईसु तीनु दमण्‌याक ज कह्‌यु, “मारु बास हय लगुन काम करने बाजी रयु ने मे बी काम करने बाजी रयु।”
JOH 5:18 ईनी वजे सी यहुदी ने अदुस तीनाक मार नाखणेन कुसीत करने लाग्‌या, काहाकी हयु आरामेन दाहड़े वाळा रीतीक अतरुत नी तुड़े, बाकुन भगवान काजे मारु बास कहीन आपसा काजे भगवान बराबर बी ठहरावतेलु।
JOH 5:19 ईसु तीनुक कह्‌यु, मे तुहुंक छाचलीन कहं भगवानेन पुर्‌यु आपसान मन सी काय बी नी कर सके, बाकुन चु आपसान भगवान बासेक करतेलु देखे; काहाकी ज-ज काम भगवान बास करे चत काम तेरु पुर्‌यु बी करे।
JOH 5:20 काहाकी भगवान बास ते पुर्‌या सी परम राखे ने ज-ज काम चु करे चो आखो तीनाक देखाड़े; ने चु हेरेसी बी मटा काम तीनाक देखाड़से ने चे काम देखीन तुहुं घाबराय जासु।
JOH 5:21 तुहुंक मालुम छे की भगवान मर्‌या सर्‌याक जीवता करीन बठा करे। तसुत पुर्‌या धड़े बी जीनुक गमे तीनुक नवलो जीवन आपणेन ने जीवता करीन बठा करनेन हक छे।
JOH 5:22 भगवान बास ते कुयन बी नीयाव नी करे, बाकुन माणसेन नीयाव करनेन आखो हक तेरा पुर्‌या काजे आप देदलु छे।
JOH 5:23 काहाकी आखा माणसे भगवान बासेन ईज्‌जत करे; तसान तसा आखा माणसे तेरा पुर्‌यान बी ईज्‌जत करनु चाहे। चु पुर्‌यान ईज्‌जत नी करे चु पुर्‌या काजे मकलन्‌या भगवान बासेन बी ईज्‌जत नी करे।
JOH 5:24 मे तुहुंक छाचलीन कहं, जु मारा बुले सामळीन मेसेक मकलन्‌या भगवान बास पर भुरसु करे तीनाक अमर जीवन जड़से ने नीयावेन दाहड़े तीनाक डंडेन हुकुम नी जड़े बाकुन चु मुत काजे छेकीन अमर जीवन हात कर लेदलु छे।
JOH 5:25 मे तुंद्‌रे सी छाचलीन कहं च टेम आवसे ने मरला माणसे भगवानेन पुर्‌यान बुल सामळसे ने जे सामळसे चे मर्‌या-सर्‌याम सी जीवता हय जासे।
JOH 5:26 काहाकी भगवान बास जीवनेन झीर छे, तसुत चु हेरा पुर्‌या काजे बी ज हक आपलु छे की तु बी जीवनेन झीर छे;
JOH 5:27 अतरोत नी बाकुन भगवानेन पुर्‌यु माणसेन पुर्‌यु बणीन आवलु छे, तेरेमां तीनाक माणसेन नीयाव करनेन बी हक आपलु छे।
JOH 5:28 मर्‌या-सर्‌याम सी जीवता हवणेन बारामां घुण घाबरायु काहाकी ची टेम आवणे बाजी रय, तीने टेमे जतरा बी मड़ायट्‌या मां गाड़ला छे चे आखा भगवानेन पुर्‌यान बुल सामळीन जीन्‌दा हय जासे ने मड़ायट्‌या मां सी नीकळीन आवसे।
JOH 5:29 जे भगवानेन नींगाम भलाय करला छे अमर जीवन वाटे मरलाम सी जीवता हय्‌न बठा हवसे, ने जे भगवानेन नींगा मां कुहराय करला छे, चे नीयावेन दाहड़े डंड भुकत्‌णे करीन मरलाम सी जीवता हय्‌न मड़ायट्‌याम सी नीकळसे।
JOH 5:30 मे मारी मरजी सी काय बी नी कर सको। तेरेत अनसारे नीयाव करो; ने मारु नीयाव छाचु छे काहाकी मे मारी मरजी सी नी बाकुन मे मकलने वाळा भगवानेन मरजी पुरी करो।
JOH 5:31 कदी मे मारा बारामां मे अतरुत गवा दम ती मारी गवाय छाचली नी हय।
JOH 5:32 एक अळी छे चु मारी गवाय देय ने मे जाणो की चु मारी गवाय देय ने तेरी गवाय छाचली छे।
JOH 5:33 तुहुं बपतीस्‌मान रीत आपण्‌या युहन्‌ना धड़े पुछणे करीन माणसे काजे मकल्‌या, ने तत्‌यार चु मारा बारामां छाचली गवाय देदु।
JOH 5:34 बाकुन मे मारा बारामां माणसेन गवाय नी चाहतु; जी वात तेरेमां कव की तुहुं पाप सी छुटकारु जड़े।
JOH 5:35 युहन्‌‌‌नु ते एक धपतेला दिवान तसलु हतलु, ने तुहुंक ईतरीक वार लग तीना दिवान वीजाळा मां खुस रहणु वारु लाग्‌यो।
JOH 5:36 बाकुन युहन्‌‌‌नु मारे बारामां जी गवा देदलु, तीनी गवाय सी मटी गवा मारे धड़े छे, काहाकी ज काम करने भगवान बास मेसेक मकेल्‌लु छे, चेत काम मे करने बाजी रयु ने चेत काम मारे बारामां जी गवा दी रया की मारु भगवान बास मेसेक मकेल्‌लु छे।
JOH 5:37 ने भगवान बास जु मेसेक मकेल्‌लु छे, चु मारी गवा देदलु छे। तुहुं कदी बी तेरो वचन नी सामळ्‌या ने तेरु सीकु नी देख्‌या।
JOH 5:38 ने हेरा बुल काजे मन मां बठाड़ीन नी राखे, काहाकी तीनाक हयु मकल्‌यु तेरे पर तुहुं भुरसु नी करु।
JOH 5:39 तुहुं चुखली-सास्‌तुर मां चाळवीन भन्‌ने हामु काजे अमर जीवन जड़से, असु वीच्‌यार करीन तुहुं चुखली-सास्‌तुर काजे चाळवीन भण्‌या बाकुन जीत चुखली-सास्‌तुर मारा बारामां असी गवा देदी आय रय की जु आवणेवाळु छे, हयुत अमर जीवन आपण्‌यु छे!
JOH 5:40 तेबी तुहुं जीवन हात करने करीन मारे धड़े आवणे नी हींडता।
JOH 5:41 मेसेक माणसे धड़े सी ईज्‌जत नी चाहती। मेसेक ईज्‌जत आपण्‌यु ते मारुत भगवान बास छे।
JOH 5:42 बाकुन मेसेक मालम छे की तुंद्‌रे माहें भगवानेन परम नी हय।
JOH 5:43 मे मारा भगवानेन नाव सी आवलु छे, तेबी तुहुं मेसेक मानीन मार पर भुरसु नी करता; कदी काहनुक दीसरु आपसान नावे आवे ती तुहुं तीनाक मानीन तेर पर भुरसु कर लेसु।
JOH 5:44 तुहुं ते आंबा-सांबा ईज्‌जत ने आव-भाव हात करने हींड रया, बाकुन तुहुंक एकुत भगवान सी ईज्‌जत ने आव-भाव जड़से ने तुहुं नी चाहता, ती तुहुं मारे पर कसा काय भुरसु करसु?
JOH 5:45 असा घुण समजु की मे भगवान अगळ तुहुं काजे गुनाळा ठहरावीस, तुंद्‌रे पर गुनु लागाड़ने वाळु ते मुसा छे, तेरे पर तुहुं भुरसु राख र्‌या।
JOH 5:46 काहाकी कदी तुहुं मुसा पर भुरसु करता ती मारु बी भुरसु करता काहाकी चु मारा बारामां लिखलु।
JOH 5:47 बाकुन कदी तुहुं मुसान लिखली वात पर लग भुरसु नी करु, ती मारी वात पर कसा भुरसु करसु?
JOH 6:1 थुड़ाक दाहड़ा हय गुया ने अळतेन, गलील सी ईसु आपसा चेला भेळुत गलील डाबरान पली धड़ जाती र्‌यु। ईना गलील डाबरा काजे तीबीरीयासेन मटलो डाबरो बी कहें।
JOH 6:2 ईसु, बेसका मांदला माणसेक वारु करतेलु। ईसुन ईनु मटा कामेन सहलाणी देखीन माणसेन एक मटुत टुळु ईसु पछळ चाल पड़्‌यु।
JOH 6:3 तत्‌यार ईसु बयड़ा पर चहड़ीन हेरा चेला पुठ्‌ये चां बठ गुयु।
JOH 6:4 यहुदी माणसेन फसहन तीहवार सातेत आय रवलु।
JOH 6:5 जत्‌यार ईसु बेसकु मटु माणसेन टुळा काजे हेरे भीणी आवतेला देख्‌यु, ती फीलीप्‌पुस सी कह्‌यु, “हीनु आखा माणसे काजे रुटा खावाड़ने वाटे कां सी मुल लावसुन?”
JOH 6:6 ईसु जी वात फीलीप्‌पुस काजे पंतारने करीन कहंलु, काहाकी ईसु काजे जी वात मालुम हतली की चु काय करने वाळु छे।
JOH 6:7 फीलीप्‌पुस ईसु काजे कह्‌यु, “दुय सोव दाहड़ान दाहड़कीन रुप्‌यान रुटा लावसु ने, ईतराक-ईतराक वाटसु तेबी हींद्‌रे वाटे पुरती नी हवे।”
JOH 6:8 ईसुन चेला मायन सीमोन पतरसेन सगु भायस अन्‌दीरीयास ईसु काजे कह्‌यु,
JOH 6:9 “जां एक नानलु पुर्‌यु छे तेरे धड़े जळ-गहुंन पांच रुटा ने दुय माछा छे, बाकुन अतरा माणसे मां काय हवसे।”
JOH 6:10 ईसु जपाप आप्‌यु, “माणसेक पंगते बठाड़ देवु।” तीना जागा पर बेसकु वारु चारु हतलु; चां माणसे बठी गुया। ने चां अदमी पांचेक हजार हतला।
JOH 6:11 तत्‌यार ईसु रुटा हातेम लेदु, ने रुटा लीन भगवान काजे कह्‌यु, तु बेसकु वारु, ने चु बठी रवला माणसेम चे रुटा वाटाड़ देदु। ने माछा बी तसुत वाटाड़्‌यु।
JOH 6:12 जत्‌यार माणसे खायलीन आफरी गुया, ती ईसु हेरा चेला सी कह्‌यु, “बचला रुटान कुटका भेळा कर लेवु, थुड़ाक बी रद नी हवणु चाहे।”
JOH 6:13 अळतेन चेला खायलीन रवला जळ-गहुंन रुटान कुटका काजे भेळा कर्‌या ती बारे चार्‌या भराय गुया।
JOH 6:14 माणसे ईसुन मटला कामेन सहलाणी देखीन कय पड़्‌या, “छाचली, चु भगवानेन अघी सी आवणे वाळी वात बताड़न्‌या माणुस ईनी कळी मां आवणे वाळु हतलु।”
JOH 6:15 ईसु ज जाण लेदु की माणसे आवीन मेसेक जबरान मां राजु बणावणे हींडे तेरेमां पछेन बयड़ा पर एखेलुत जाती रयु।
JOH 6:16 जत्‌यार सांती वेळाय हय ती ईसुन चेला गलील दरीया धड़े गुया।
JOH 6:17 चे ढंड्‌या मां बठीन दरीयान पली धड़ कफरनहुम सहर भीणी जाणे बाजी गुया। आंदारो बेसको हय गुयलो ने ईसु चां लग तींद्‌रे धड़े पछु नी आयु।
JOH 6:18 आहळीन वजे सी दरीया मां झलक बी आवणे बाजी गुय।
JOH 6:19 जत्‌यार चे पांच छव कीलुमीटर अगा जाती रवला, ती चे ईसु काजे दरीया पर ढंड्‌या भीणी चालीन आवतेलु देख्‌या ने चे बीही गुया।
JOH 6:20 बाकुन ईसु हेरा चेलाक कह्‌यु, “मेत छे, बीहु मां।”
JOH 6:21 अळतेन चे ईसुक ढंड्‌या मां बठाड़्‌या ने तत्‌यारुत च ढंड्‌यो तीना जागा पर गुयो, जां चे जाणे बाजी रवला।
JOH 6:22 दीसरे दाहड़े चु टुळु ने, एक दरीयान पली धड़ उबु हय रवलु, चे असा देख्‌या की जां एक काजे छुड़ीन अळी दीसरो ढंड्‌यो नी हतलो, ने ईसु आपसा चेला साते तीना ढंड्‌या पर चहड़ी नी रवलु बाकुन तेरा चेला अतरात गुयला।
JOH 6:23 तत्‌यार नानला दीसरा ढंड्‌या तीबीरीयास सी तीना जागा धड़े आया चे चां मालीक काजे तु बेसकु वारु छे, कय्‌न रुटा खादा।
JOH 6:24 हेरेसी जत्‌यार टुळु देख्‌यु की जां नीते ईसु हय ने नी हेरा चेला छे, ती चे ढंड्‌या पर चहड़ीन ईसु काजे हेरता जाय्‌न कफरनहुम जात रया।
JOH 6:25 दरीयान पली धड़े जत्‌यार चे ईसु काजे भेळा हया ती कह्‌या, “ए मास्‌तर तु जां कत्‌यार आयु?”
JOH 6:26 ईसु तीनुक जपाप आप्‌यु, “मे तुहुंक छाचलीन कहं, तुहुं मारे सी करला मटा कामेन सहलाणी देखीन तेरो मतलब समजी गुया करीन मेसेक नी हेर्‌या, बाकुन तुहुं रुटा खाय्‌न आफरी गुयला छे, करीन मेसेक हेर्‌या।
JOH 6:27 रद हवण्‌या खाणा वाटे मेहनत मां करु, बाकुन तीना खाणा वाटे मेहनत करु ज रद नी हवे, ने च खाणो अमर जीवन वाटे जलम टेकलो रहे, ने असो खाणो तुहुंक माणसेन पुर्‌यु आपसे, अटकळ राखु, भगवान बास माणसेन पुर्‌या पर छाप लागाड़ीन ज देखाड़लु छे की माणसेन पुर्‌यु अतरु माणसेक अमर जीवन आपणेन हकदार छे।”
JOH 6:28 माणसे ईसु सी पुछ्‌या, “तीना काम काजे भगवान चाहे तीना काम काजे करने वाटे हामु काय करजे?”
JOH 6:29 ईसु तीनु माणसेक जपाप आप्‌यु, “भगवानेन काम ज छे, की भगवान तीना काजे मकेल्‌लु छे, तीना पर तुहुं भुरसु करु।”
JOH 6:30 तत्‌यार चे माणसे ईसुक कह्‌या, “तु काहनी सहलाणी देखाड़े की हामु तीनाक देखीन तार पर भुरसु करजे? तु काहनो काम देखाड़े?
JOH 6:31 हामरा डाहा बुड़ा ते बयड़ा मां बेसका दाहड़ा लग मुसा वाटे आपलो मन्‌ना नावेन खाणो खादला ने तेरे बारामां चुखला सास्‌तुर मां लिखलो बी छे; चु तीनु काजे खाणे करीन सरग सी रुटा आप्‌यु।”
JOH 6:32 ईसु तीनुक कह्‌यु, “मे तुंद्‌रे सी छाचलीन कहं की मुसु तुहुंक चे रुटा सरग सी नी देदु बाकुन मारु बास तुहुंक खरला रुटा सरग सी आपे।”
JOH 6:33 काहाकी भगवानेन रुटु हयुत छे जु सरग सी उतरीन कळी माणसे काजे अमर जीवन आपे।
JOH 6:34 तत्‌यार चे माणसे ईसु सी कह्‌या, “ए मालीक चे रुटा हामु काजे जलम आप्‌या कर।”
JOH 6:35 ईसु तीनुक कह्‌यु, “अमर जीवनेन रुटु मेत छे; जु मारे धड़े आवसे ने मारे पर भुरसु करसे तीनाक कदी भुक नी लागे।
JOH 6:36 बाकुन मे तुहुंक कह्‌लु पेहेल बी कय देदलु की मेसेक देख बी लेदला छे, तेबी भुरसु नी करता। आखा चे माणसे भगवान बास मेसेक सुपलु चे आखा मारे धड़े आवसे।
JOH 6:37 तेबी मे हिम्‌मत नी हारो, भगवान बास तीनुक बी नेवाड़ीन मारा हातेम आप देय, चे आखा मारेन्‌चां आवसे ने मे तीनुक मारेन्‌चां सी कदी नी ढासाड़ो।
JOH 6:38 काहाकी मे मारी मरजी पुरी करने नी बाकुन मेसेक मकलन्‌यान भगवानेन मरजी पुरी करने करीन सरग सी धरती पर उतरीन आवलु छे।
JOH 6:39 ने मारा मकलने वाळान मरजी जी छे, ज काय हयु मेसेक आप्‌यु तेरे मां सी मे काय बी नी खुवो बाकुन तीनुक आकरी दाहड़े मर्‌या-सर्‌याम सी जीन्‌दा कर दीस।
JOH 6:40 काहाकी मारा बासेन मरजी जी छे की जु कुय मारा पुर्‌या काजे देखे ने तीना पर भुरसु करे। तीनाक अमर जीवन जड़से ने मे तीनाक आकरी दाहड़े मर्‌या-सर्‌याम सी पछु जीन्‌दा कर दीस।”
JOH 6:41 तेरेमां यहुदी माणसे तीना पर वाक नीकाळीन कुर-कुर करने बाजी गुया काहाकी ईसु कह्‌लु, “जु रुटु सरग सी उतर्‌यु चु मेत छे।”
JOH 6:42 ने चे कह्‌या, “काय जु युसुफेन पुर्‌यु ईसु नी हय काय, तेरा आयस बास काजे हामु उळख्‌जे? ती चु कसु कहें की मे सरग सी उतर्‌यु?”
JOH 6:43 ईसु तीनुक जपाप आप्‌यु, तुहुं तुहुंत कुर-कुर मां करु।
JOH 6:44 बाकुन जी वात समज लेवु, जत्‌यार लग मेसेक मकलन्‌यु भगवान बास तीनाक बी मनवीन मारे धड़े नी लावे तत्‌यार लग तीनुक मारे धड़े नी आवाये, असला माणसे काजे मे आकरी दाहड़े, मतलब नीयावेन दाहड़े मर्‌या-सर्‌याम सी पछु जीवतु करीन बठु कर दीस।
JOH 6:45 भगवानेन अघी सी आवणे वाळी वात बताड़ने वाळा माणसे आपसा किताप मां लिखलो छे, “चे आखा भगवानेन भीणी सी सीकाड़ला रवसे।” जे काहनाक मारा बास सी सामळ्‌या ने सीक्‌या, चे मारे धड़े आवे।
JOH 6:46 ज घुण समज्‌ता की काहनुक भगवान बास काजे देखलु छे, बाकुन जु भगवान बासेन आवजी पर तेरेन्‌चां सी आवलु छे, हय अतरुत भगवान बास काजे देखलु छे।
JOH 6:47 “मे तुंद्‌रे सी छाचलीन कहं, की जु काहनुक भुरसु करे, अमर जीवन तेरोत छे।
JOH 6:48 अमर जीवनेन रुटु मेत छे।
JOH 6:49 तुंद्‌रा आड़ा-बुड़ा बयड़ा मां मन्‌ना नावेन खाणो खादा, तेबी चे मर गुया।
JOH 6:50 बाकुन जु पल्‌लु रुटु छे, जु सरग सी उतरे, काहाकी काहनुक माणुस हेरेम सी खाय, ने मरे नी।
JOH 6:51 सरग सी उतर्‌लु अमर जीवन आपण्‌यु रुटु मेत छे, कदी काहनुक जु रुटु खासे चु जलम जीवतेलु रवसे ने जु रुटु मे ईनी कळीन माणसेन जीवन वाटे आपीस, चु रुटु मारो मास छे।”
JOH 6:52 अतरा मां चे यहुदी माणसे असा कह्‌ता जाय्‌न वातेम लड़ायणे बाजी गुया की, “जु माणुस आपसो मास खाणे करीन कसु दी सक्‌से।”
JOH 6:53 ईसु तीनुक कह्‌यु, “मे तुंद्‌रे सी छाचलीन कहं की, जत्‌यार लग तुहुं माणसेन पुर्‌यान मास नी खावु ने तेरो लुही नी पीयु चां लग तुहुंक जीवन नी जड़े।
JOH 6:54 जु मारो मास खाय ने मारो लुही पीये, अमर जीवन तेरोत छे; ने मे आकरी दाहड़े तीनाक मर्‌या-सर्‌याम सी पछा जीन्‌दा कर दीस।
JOH 6:55 काहाकी मारो मास छाचलीन खाणेन चीज छे, ने मारो लुही छाचलीन पीणेन चीज छे।
JOH 6:56 जु मारो मास खाया करसे ने मारो लुही पीया करसे चु मारेम वारु बणीन रवसे ने मे तेरेमां रवीस।
JOH 6:57 जसु जलम जीवण्‌यु बास मेसेक मकल्‌यु ने मे मारा बासेन वजे सी जीवलु रवीस, तसा की तसा जु मेसेक खासे चु मारे वजे सी जीवलु रवसे।
JOH 6:58 सरग सी उतेरलु रुटु मेत छे। जु रुटु तीना रुटान तसु नी हय, तीनाक आड़ा-बुड़ा खादा ने मर गुया; बाकुन काहनुक जु हीना रुटु काजे खासे चु जलम जीवलु रवसे।”
JOH 6:59 कफरनहुम सहर वाळा तींद्‌रा भक्‌तीन घर मां रय्‌न सीकाड़तु जाय्‌न ईसु जी आखी वात कह्‌यु।
JOH 6:60 ईसुन चेला मां सी बेसका जणा ज सामळीन कह्‌णे बाजी गुया, “जी ते काठी वात छे हीनीक कुण सामळाय सक्‌से?”
JOH 6:61 ईसु हेरा मन मां जी वात जाण लेदु की मारा चेला ईनी वातेन बारामां कुर-कुर कर रया। ईसु पुछ्‌यु, “काय ईनी वात सी तुहुंक ठुकर लाग रय काय।
JOH 6:62 कदी तुहुं माणसेन पुर्‌या काजे जां हयु पेहेल हतलु, चां उपर जातलु देखसु ती काय हवसे?
JOH 6:63 भगवानेन चुखली-आत्‌मा जीवन आपे। डील सी काय फायदु नी हय जी वात मे तुंद्‌रे सी कहंलु चे आत्‌मा छे ने जीवन बी छे।
JOH 6:64 बाकुन तुंद्‌रे मायन काहनाक असा छे, चे भुरसु नी करे।” काहाकी ईसु पेहलुत सी जाणतेलु की जे भुरसु नी करे चे कुण छे; ने कुण छे चे मेसेक धुकु देसे।
JOH 6:65 ईसु कह्‌यु, “ने मे तुहुं काजे ज कह्‌लु की काहना बी माणसेक भगवान बासेन मदत लेय पाखुर मारे धड़े नी आवाये।”
JOH 6:66 ज सामळीन ईसुन बेसका चेला ईसुन चां सी जाती रया, ने ईसुन सात छुड़ देदा।
JOH 6:67 तत्‌यार ईसु तीनु बारे चेला काजे कह्‌यु, “काय तुहुं बी जाणे हींडी रया?”
JOH 6:68 सीमोन पतरस ईसु काजे जपाप आप्‌यु, “ए मालीक हामु कुणी धड़े जाजे? अमर जीवन आपण्‌या बुले ते तारेत धड़े छे।
JOH 6:69 ने हामु जाण गुया ने भुरसु कर लेदा की, भगवानेन चुखलु माणुस तुत मसी छे।”
JOH 6:70 ईसु तीनुक जपाप आप्‌यु, “काय मे तुहुं बारे जणा काजे नी नेवाड़्‌यु? तेबी तुंद्‌रे मायन एक माणुस भुतड़ु छे।”
JOH 6:71 ईसु जी वात सीमोन ईस्‌करीयोतीन पुर्‌या यहुदीयान बारामां कह्‌लु, काहाकी ईसुन बारे चेला मायन एक हतलु, चु ईसु काजे धुकु देणेवाळु हतलु।
JOH 7:1 यहुदा जीला वाळा यहुदी मुख्‌या ईसुक मार नाखणेन वीच्‌यार कर रवला, तेरेमां चु यहुदा जीला मां जाणे नी हींडतेलु ने ईसु आपसा चेला भेळुत गलील जीलात मां सेवा करतु जाय्‌न हींडतु रयु।
JOH 7:2 बाकुन हीयु यहुदी माणसेन आसरान तीहवार सातेत आय रवलु।
JOH 7:3 तेरेमां ईसुन भायस ईसुक कह्‌यु, “जां सी यहुदी जीलाम जां काहाकी ज काय काम तु करे तीनु कामेक तारा आखा चेला बी देखे।
JOH 7:4 काहाकी असु काहनु नी हसे चु नाव कमाय्‌णे चाहे ने डुकायन काम करे। कदी तु ज काम करे ती खुद काजे कळी पर उजेंतु कर।”
JOH 7:5 काहाकी ईसुन भाय ईसु पर भुरसु नी करतेलु करीन चु असी वात कर्‌यु।
JOH 7:6 तत्‌यार ईसु तीनुक कह्‌यु, “मारे वाटे हाल लगुन वारु टेम नी आवी बाकुन तुंद्‌रे वाटे आखी टेम वारलु छे।
JOH 7:7 ईनी कळीन माणसे मे तुंद्‌रे सी कुहराय नी राखो, बाकुन जे मारे सी कुहराय राखे काहाकी मे तेरा वीरुद मां जी गवाय दम की तेरा काम भुंडात छे।
JOH 7:8 तुहुं तीहवार मां जावु, मे हय ईना तीहवार मां नी जातु, काहाकी हय लग मारी टेम पुरी नी हय रय।”
JOH 7:9 जी वात कय्‌न ईसु गलील जीलात मां रय गुयु।
JOH 7:10 जत्‌यार ईसुन भायस तीहवार वाळने जाती रया, ती ईसु बी गुयु, बाकुन उजेंतु नी हयु, चु हुगलुत चां गुयु।
JOH 7:11 खपड़ीन तीहवार मां यहुदी माणसे ईसु काजे हेरता जाय्‌न असा पुछतेला, “चु माणुस कां छे।”
JOH 7:12 खपड़ीन तीहवार मां माणसे ईसुन बारामां कळेन कळे बेसकी वात करतेला, “हयु भलु माणुस छे।” ने थुड़ाक कहंतेला, “नी हयु भलु नी हय बाकुन माणसे काजे भटकाड़ र्‌यु।”
JOH 7:13 कुय बी तेरे बारामां जुर सी वात नी करतेला, काहाकी चे यहुदी नेता सी बीहतेला।
JOH 7:14 तीहवारेन आदा दाहड़ा जाती रया, ने ती ईसु मंदीरेन आंगणा मां जाय्‌न सीकाड़ने बाजी गुयु।
JOH 7:15 ईसुन वात सामळीन यहुदी माणसे घाबराय्‌न ईसुन बारामां असा कह्‌या, “काहना बी गुरुन साहरे सीके बीगुर ईना माणसेम असी अक्‌कल कां सी आय गुय।”
JOH 7:16 असा कहण्‌याक ईसु कह्‌यु, “मारु भगवान बास मेसेक मकलने वाळु छे। वात सीकाड़ने वाळी मारी मनेन वात नी हय बाकुन मेसेक मकलने वाळान छे।
JOH 7:17 कदी काहनुक तेरी मरजी पर चालने हींडे, ती हयु ईनी भणावली वातेन बारामां जाण जासे की, ज भगवान भीणी सी छे, की मे मार भीणी सी कहंणे बाजी रयु।
JOH 7:18 जु काहनुक आपसुत खुद काय कह्‌वे, चु आपसान बड़ाय करनु चाहे, बाकुन जु आपणा मकलने वाळान बड़ाय करनु चाहे हयुत छाचलीन छे, ने हेरेम काय बी पाप नी हय।
JOH 7:19 काय मुसु तुहुंक नेम कायदु नी देदु काय? तेबी तुंद्‌रे मां सी काहनुक मुसान साहरे लिखला नेम कायदा पर नी चाले। तुहुं काहा मेसेक मारेन हींडी रया?”
JOH 7:20 माणसेन टुळाम सी काहनाक जपाप आप्‌या, “असो लागे तारे मां भुतड़ो भराय रयो। कुण तुसेक मारने हींडे?”
JOH 7:21 ईसु तीनुक जपाप आप्‌यु, “मे आरामेन दाहड़े एक मांदलाक वारु करलु करीन, ने तुहुं आखा देखीन चकराय रया।
JOH 7:22 हेरे वजे सी मुसु तुहुंक फतरी काटणेन रीती पाळनेन नीयम आप्‌यु, ज नी की मुसा भीणी सी बाकुन डाहा बुड़ा सी चालती आय रय ने तुहुं आरामेन दाहड़े माणसेन फतरी काट्‌या करु।
JOH 7:23 जत्‌यार आरामेन दाहड़े माणसेन फतरी काटाड़े, काहाकी मुसान नीयम नी टुटे, ती तुहुं मारे पर काहा रीस करु की मे आरामेन दाहड़े एक माणसे काजे वारु कर्‌यु।
JOH 7:24 मुंहडा देखीन दसा तसा नीयाव मां करु, वारु वीच्‌यार करीन खरु नीयाव करु।”
JOH 7:25 तीनी टेमे यरुसलेम सहर वाळा थुड़ाक यहुदी माणसे कहंणे बाजी गुया, “काय जु हयुत माणुस छे ने हय तीनाक हामरा पुडार्‌या मार नाखणेन वीच्‌यार कर रया।
JOH 7:26 ने देखु जु ते उजेंतु वात करने बाजी रयु, ने कुय हीनाक काय नी कह्‌ता। काय यहुदी नेता छाचलीन जाण लेदा काय हयुत मसी छे?
JOH 7:27 बाकुन हीनाक ते हामु जाणजे की, जु कां सी आवलु छे; बाकुन मसी जत्‌यार आवसे ती कुय नी जाणे की चु कां सी आयु।”
JOH 7:28 तत्‌यार ईसु मंदीर आंगणा मां सीकाड़तु जाय्‌न आयड़ीन कह्‌यु, “तुहुंक असो लागे की हीनाक उळखी रया, ने ज बी जाणु की मे कान छे। मेते मारी मरजी सी नी आयु, बाकुन मेसेक मकलने वाळु खरलु छे, तीनाक तुहुं नी जाणु।
JOH 7:29 मे तीनाक जाणो काहाकी मे तेरे भीणी सी आयु ने हयुत मेसेक मकेल्‌लु छे।”
JOH 7:30 थुड़ाक माणसे ईसुक धरीन ली जाणे हींडी रवला, बाकुन आज लग ईसुन मरने टेम नी आय, जी टेम भगवान नक्‌खी करलु।
JOH 7:31 तेबी माणसेन टुळा मां सी बेसका माणसे ईसु पर भुरसु कर्‌या, ने कहणे बाजी गुया, “अतरा चकराड़न्‌या वारु कामेन सहलाणी दीसरु काहनु बी, नी देखाड़ सके।”
JOH 7:32 फरीसी माणसे ज सामळ्‌या की, माणसे ईसुन बारामां कळे-कळे वात करने बाजी र्‌या; ती चे मंदीरेन डाहला पुजारा साते वात करीन ईसुक धरीन लावणे करीन मंदीरेन राखवाळ्‌या सीपायड़ा काजे मकल्‌या।
JOH 7:33 पछेन ईसु कह्‌यु, “हय मे ईतरीक वार तुंद्‌रे पुठ्‌ये रय्‌स। ने अळतेन मेसेक जु मकेल्‌लु छे, तेरेन्‌चां पछु जाती रय्‌स।
JOH 7:34 तुहुं मेसेक हेर्‌या करसु बाकुन मे तुहुंक नी जड़ो। ने मे जां जाणे हींडी र्‌यु चां तुहुंक नी आवाये।”
JOH 7:35 जी वात सामळीन यहुदी-मुख्‌या आपसा-आपसात कह्‌या, “जु काहा जासे की हयु हामुक नी जड़े, काय हयु पला धड़े जासे जे युनानी मां रावण्‌या-तीवण्‌या हय्‌न रवे ने युनानी काजे वारलु वात सीकाड़ देसे?
JOH 7:36 जां काय वात छे, ची जु कह्‌लु, की तुहुं मेसेक हेरसु बाकुन मे नी जड़ो; ने चां मे छे चां तुहुं नी आय सकु?”
JOH 7:37 खपड़ीन तीहवारेन खास दाहड़े जु पेहलु दाहड़ु छे, ईसु उबु हयु ने आयड़ीन कह्‌यु, “कदी कुय पीसलो हय ती मारे धड़े आवे ने पाणी पीणु चाहजे।
JOH 7:38 जु मार पर भुरसु करसे जसों चुखला सास्‌तुर मां अनसारे आवलो छे, तेरा डील मां सी जीवनेन पाणीन नदी उहवसे।”
JOH 7:39 ईसु ज बुल चुखली आत्‌मान बारामां कह्‌यु, ज कुय हेरे पर भुरसु करने वाळा हेरेत पर हतला; काहाकी आत्‌मा हय लग नी उतरी काहाकी ईसु हय लग तेरी सेक-सींगार लग नी पुग्‌यु।
JOH 7:40 ईसुन जी वात सामळीन माणसेन टुळा मां सी काहना-काहनाक जी वात कह्‌या, “छाचलीन हयु भगवानेन अघली वात बताड़ने वाळु माणुस छे।”
JOH 7:41 थुड़ाक माणसे कवतेला की, “जु मसी छे, बाकुन काहनाक कह्‌या, काहाकी मसी गलील जीलाम वाळु नी हय सके?
JOH 7:42 काय चुखली-सास्‌तुर मां ज नी लिखलो आयो काय मसी दावुदेन कळी मां पयदा हवसे ने बेतलहम गांव सी आवसे जां दावुद रहतेलु।”
JOH 7:43 असो करीन ईसुन बारामां माणसे मां बेरजु पड़ गुयु।
JOH 7:44 तींद्‌रे मायन थुड़ाक माणसे ईसु काजे धरीन ली जाणे हींडी रवला बाकुन तीनाक धरीन ली जाणे करीन कुयन हिम्‌मत नी हय।
JOH 7:45 तत्‌यार ईसुक धरने करीन गुयला मंदीरेन राखवाळ्‌या-सीपायड़ा मंदीरेन डाहला पुजारान्‌चां ने फरीसी माणसेन्‌चां पछा जाती रया। ती चे डाहला पुजारा ने फरीसी माणसे तीनुक कह्‌या, “तुहुं तीना ईसुक काहानी लाया?”
JOH 7:46 मंदीरेन राखवाळ्‌या सीपायड़ा जपाप आप्‌या, “चु माणुस जसी वात करे तसी वात आज लग कुय नी कर्‌यो।”
JOH 7:47 जी वात सामळीन फरीसी माणसे तीनुक जपाप आप्‌या, “काय चु तुहुंक बी भुले पाड़ देदु काय।”
JOH 7:48 कुय बी यहुदी नेता ने फरीसी माणसे मायन कुय बी ईना ईसु पर भुरसु नी कर्‌या?
JOH 7:49 बाकुन ईनु टुळाम माणसे काजे मुसा सी लिखली सास्‌तुर मालम नी हय, करीन जे ईसुन सामळीन भुले पड़ गुया। ने हींद्‌रे पर ते भगवानेन गरा छे।
JOH 7:50 नीकुदेमुस चु पेहेल ईसु काजे भेळु हवणे गुयलु, चु तीनु फरीसी माणसे मायन एक हतलु। चु तीनु काजे कह्‌यु।
JOH 7:51 काहना बी माणुस काजे पुछीन तेरा गुनान पतु लागाड़े बीगुर जसों तसों तेरु नीयाव करीन तीनाक तु गुनाळु छे, कहीन डंड आपणु आपसा नीयम अनसारे संय छे काय?
JOH 7:52 चे तीना नीकुदेमुस काजे जपाप आप्‌या, “तु बी गलील जीला वाळा पुठ्‌ये भेसकायलु छे? सास्‌तुर मां हेर ने भणीन देख तत्‌यार तुसेक मालुम पड़से की गलील जीलाम सी भगवानेन अघली वात बताड़न्‌यु माणुस उजेंतु हय्‌न आवण्‌यु नी हय।”
JOH 7:53 ने तत्‌यार चे आखा आपणे-आपणे घर जाती र्‌या।
JOH 8:1 ने ईसु जेतुनेन बयड़ा पर जाती र्‌यु।
JOH 8:2 ने चु संदारे एगुत मंदीर मां गुयु। ने आखा माणसे ईसु धड़े आया; ने चु बठीन तीनुक सीकाड़ने बाजी गुयु।
JOH 8:3 तीनी टेमे यहुदी-सास्‌तुर सीकाड़न्‌या ने फरीसी माणसे एक बायर काजे ईसु धड़े धरीन लाया, ची बायर काहनाक साते छीनाळो करतेली ने धर लेदला ने तीनी काजे माणसेन ईचमां उभी करीन ईसु काजे कह्‌या
JOH 8:4 चे यहुदी सास्‌तुर सीकाड़न्‌या ने फरीसी माणसे ईसु सी कह्‌या, “ए मास्‌तर जी बायर छीनाळो करतेली धराय गुय।
JOH 8:5 मुसु आपसा लिखला कायदान सास्‌तुर मां हामुक हुकुम आप्‌लु छे, की असली छीनाळी बायर काजे दगड़ा दीन मार नाखणु चाहजे। तेरेसी ईनी बायरीन बारामां तारो काय कहंणु पड़े?”
JOH 8:6 चे ईसु काजे पारखणे करीन जी वात कह्‌या, तेरेसी तीनुक ईसु पर गुनु लागाड़नेन काहनुस पुरावु जड़ जाय करीन बाकुन ईसु ढंगु अळीन आंगळे करीन धुळा मां लिखतु रयु।
JOH 8:7 जत्‌यार चे ईसुक पुछता रया ती ईसु उबु हय्‌न तीनुक कह्‌यु, “तुंद्‌रे मां जु कुय काय बी पाप नी कर्‌यु हय चु ईनी बायरीन आखाम सी पेहेल दगड़ु देणु चाहजे।”
JOH 8:8 ने ईसु अळी ढंगु अळीन धरती पर लिखणे बाजी गुयु।
JOH 8:9 बाकुन ज सामळीन डाहा-बुड़ा सी नानला लग आखान-आखा एकेक करीन जाती रया। ने चां ईसु ने ची बायरी रय गुया।
JOH 8:10 ईसु अळी उबु हय्‌न तीनी बायर काजे कह्‌यु, “ओ बायरी चे माणसे काहा जाती रया? तुसे कुय गुनाळी ठेहरावीन डंड नी आप्‌यो काय?”
JOH 8:11 ची बायर कय, “ए मालीक कुय बी मेसेक डंड नी आप्‌यो।” ईसु कह्‌यु, “जां मे बी तुसेक डंड नी आपतु जां ने हय सी अळी पाप घुण करजी।”
JOH 8:12 ने अळतेन मंदीर मां माणसे ईसु धड़े अळी भेळा हया, तत्‌यार ईसु तीनाक कह्‌यु, “मे कळीन माणसे वाटे वीजाळो मे छे। ज कुय मारु चेलु बणने करीन मारे पुठ्‌ये आवे चु अमर जीवन मां ली जाण्‌यो वीजाळो हात करसे अतरामा तीनाक पापेन आंदारला मां झटवायतु फीरनु नी पड़े।”
JOH 8:13 फरीसी माणसे ईसुक कह्‌या, “तु आपसात बारामां आपसुत गवा दी र्‌यु। हेरेसी तारी गवाय खरली नी हय।”
JOH 8:14 ईसु तीनुक जपाप आप्‌यु, “मेसेक मालुम छे, की मे कां सी आवलु छे ने कां जाणे बाजी र्‌यु। बाकुन तुहुं नी जाणता की मे कां सी आवलु छे ने कां जाणे बाजी र्‌यु। अतरामा कदी मे आपसुत मारा बारामां गवा दम; तेबी मारी गवाय खरली छे।
JOH 8:15 तुहुं ईनी कळीन माणसेन डीलेन अनसारे नीयाव कर र्‌या, बाकुन मे कुय बी असु नीवाय नी करो;
JOH 8:16 ने कदी मे नीयाव करो बी, ते मारु नीयाव छाचलु छे, काहाकी मे एखलु नी हय बास बी छे, चु मेसेक मकेल्‌लु छे।
JOH 8:17 तुंद्‌रा कायदान सास्‌तुर मां बी लिखलो छे, की दुय जणान गवाय छाचली रवे।
JOH 8:18 एक ते मे मारा बारामां गवाय दम ने मारु बास बी मारा बारामां गवाय देय चु मेसेक मकेल्‌लु छे।”
JOH 8:19 ज सामळीन चे ईसु काजे कह्‌या, “तारु बास कां छे।” ईसु जपाप आप्‌यु, “तुहुं मेसेक जाणु नी मारा बास काजे कदी मेसेक जाणु ती मारा बास काजे बी जाणु।”
JOH 8:20 ईसु मंदीर मां दान पेटी धड़े सीकाड़तु जाय्‌न जी आखी वात कह्‌यु, तेबी कुय बी ईसुक नी धर्‌या, काहाकी हय लग ईसुन मरने टेम नी आय, जी टेम भगवान नक्‌खी करलु।
JOH 8:21 ईसु अळी एक कावा माणसे काजे कह्‌यु, “मे जात रय्‌स, ने तुहुं मेसेक हेर्‌या करसु, बाकुन तुहुं तुंद्‌रा पापेन माफी हात कर्‌या बीगुर तुंद्‌रा पाप मां मर जासु। ने चां जात रय्‌स चां तुहुंक कदी नी आवाये।”
JOH 8:22 जी वात सामळीन यहुदी माणसे कह्‌या, “जु असु काहा कय रयु, जां मे जात रय्‌स चां तुहुंक कदी नी आवाये हेरो ज कहंणेन मतलब काय छे? कांखुर मायन जु जाणी बुजीन मरने ते नी हींडी र्‌यु?”
JOH 8:23 ईसु तीनु काजे कह्‌यु, “तुहुं सरगे सी नेचा ईनी धरती वाळा छे; तुहुं कळीन छे, ने मे ईनी कळीम वाळु नी हय।
JOH 8:24 तेरेमां मे तुहुंक कह्‌यु, की तुहुं तुंद्‌रा पाप मां मरसु काहाकी कदी तुहुं भुरसु नी करु की मे हयुत छे ती तुंद्‌रा पाप मां मरसु।”
JOH 8:25 ज सामळीन चे माणसे ईसुक कह्‌या, “तु कुण छे?” ईसु तीनुक कह्‌यु, “हयुत छे सुरु सी तुंद्‌रे सी कह्‌तु आय र्‌यु।
JOH 8:26 तुंद्‌रा बारामां मेसेक बेसको काय नीयाव करनु छे। बाकुन मारु मकेलने वाळु छाचलु छे, ने ज मे तेरे सी सामळळु छे, चोन ईनी कळीन माणसे काजे सामळावो।”
JOH 8:27 ईसु ते तीनु काजे भगवान बासेन बारामां कहंणे बाजी रवलु, बाकुन ची वात तीनुक पल्‌ले नी पड़े।
JOH 8:28 तत्‌यार ईसु कह्‌यु, “जत्‌यार तुहुं माणसेन पुर्‌या काजे ती जाणसु की मे हयुत छे; मे मारी मरजी सी काय बी नी कहो बाकुन जसु मारु बास मेसेक सीकाड़लु तसुत जी वात कहो।
JOH 8:29 मेसेक मकेलने वाळु मारे पुठ्‌ये; चु मेसेक एखलु नी मकल्‌यु काहाकी मे जलम चत काम करो तीनाक गमे च।”
JOH 8:30 ईसु जी वात कहंणे बाजी रवलु, ती बेसका माणसे तेरे पर भुरसु करने बाजी गुया।
JOH 8:31 जे यहुदी माणसे ईसु पर भुरसु कर्‌या, तीनुक कह्‌यु, “कदी तुहुं मारा बुल मांनीन रवसु, ती छाचलीन मारा चेला बण जासु।
JOH 8:32 तुहुं छाचाय काजे जाण लेसु, ने छाचाय तुहुंक गुलामी मां सी छुड़ाय देसे।”
JOH 8:33 चे ईसु काजे कह्‌या, “हामु ते अब्‌राहमेन अवल्‌यात छे, ने हामु कदी काहनान बी गुमाली नी कर्‌या। ती तु असु कसु कह्‌वे की छाचाय तुहुंक गुलामी मां सी छुड़ाय देसे।”
JOH 8:34 ईसु तीनु काजे कह्‌यु, “मे तुहुंक छाचलीन कहं, जु पाप करे चु पापेन गुलाम छे।
JOH 8:35 एक घरेन पावर्‌यान बारामां वीच्‌यार करु। मालीकेन पावर्‌यु नी बाकुन मालीकेन खरलु बेटुस घरेन हकदार्‌यु छे, ने चु अतरुत घर मां जलम रय सके,
JOH 8:36 हेरेसी कदी पुर्‌यु तुहुं काजे पापेम सी छुड़ावसे ती तुहुं छाचलीन पापेन गुलामी मां सी छुट जासु।
JOH 8:37 मे जाणो की तुहुं अब्‌राहमेन अवल्‌यात छे; तेबी मारो बुल तुंद्‌रा डील मां जागु नी हेरे, तेरेमां तुहुं मेसेक मारने हींडी रया।
JOH 8:38 तुहुं चत कय रया च मेसेक मारु बास देखलु, ने तुहुं च करु च तुंद्‌रा बास सी तुहुं सामळ्‌या।”
JOH 8:39 चे ईसु काजे जपाप आप्‌या, “हामरु बास ते अब्‌राहम छे।” ईसु तीनुक कह्‌यु, “कदी तुहुं अब्‌राहमेन अवल्‌यात रवता ती चत काम करता च अब्‌राहम करलु।
JOH 8:40 बाकुन हय तुहुं मारेन तसला माणसे काजे मारने हींडी रया, चु तुहुंक च खरलो बुल बताड़लु चु भगवान सी सामळ्‌या असो ते अब्‌राहम नी कर्‌यु।
JOH 8:41 तुहुं ते खरला बासेन तसु नी, बाकुन तुंद्‌रा दीसरा बासेन तसु वेहवार कर रया।” चे ईसु काजे कह्‌या, “हामु छीनाळा सी पयदा नी हया; हामरु एकुत बास छे, ने चु भगवान छे।”
JOH 8:42 ईसु तीनु यहुदी माणसेक कह्‌यु, “भगवान तुंद्‌रु बास नी हय। कदी भगवान तुंद्‌रु बास रवतु, ती तुहुं मेसेक उळखीन परम करता काहाकी मे मारी मरजी सी नी आयु। बाकुन भगवान मेसेक मकेल्‌लु छे। करीन मे भगवान बासेम सी नीकाळीन आवलु छे, ने मे हय जां हजुर छे।
JOH 8:43 तुहुं मारी वात काहा नी समजु? तेरेमां की तुहुं मारो बुल सामळी नी सकु।
JOH 8:44 तुहुं आपसा बास भुतड़ा सी छे, ने आपसा बासेन मरजी काजे पुरी करने हींडी र्‌या। हयु ते पेहलुत सी हत्‌यारु छे, ने छाचलु बणीन नी रयु, काहाकी छाचाय तेरेमां हय नी। जत्‌यार हयु झुट बुले, ती आपसा हीयान मनेम सी बुले, काहाकी हयु झुटु अतरुत नी हय, बाकुन आखी भातीन झुटेन बास झुटु छे,
JOH 8:45 बाकुन मे ज छाचलीन कह्‌वो, तुहुं माणसे मारे पर भुरसु नी करु।
JOH 8:46 तुंद्‌रे मायन कुण मेसेक पापी कहें? काय कदी मे छाचलीन कहं, ती तुहुं मारु भुरसु काहा नी करु?
JOH 8:47 जु भगवान भीणी सी छे, ने भगवानेन वात काजे सामळे। तेरेमां तुहुं मारी वात काजे नी मानु, तुहुं भगवान भीणी सी नी हय।”
JOH 8:48 ईसुन वात सामळीन यहुदी माणसे रीसवायन ईसु काजे कह्‌या, “हामु ते छाचलीन कय र्‌या की, तु सामरी जातीन छे, ने तारे भुतड़ु चस्‌टी र्‌यु?”
JOH 8:49 ईसु तीनुक जपाप आप्‌यु, “मारे भुतड़ु नी चस्‌टी र्‌यु। बाकुन मे मारा बासेन अबरु राख र्‌यु ने तुहुं मारु अबरु ली रया।
JOH 8:50 मेसेक मारी ईज्‌जत नी चाहजे, बाकुन एक जणु छे, चु मारु अबरु राखणेन हेर कर रयु, ने हयुत छाचलु नीयाव करन्‌यु छे।
JOH 8:51 मे तुंद्‌रे सी छाचलीन कहं, ज कुय माणुस मारा बुल काजे मानीन चालसे चु कदी नी मरे।”
JOH 8:52 जी वात सामळीन यहुदी माणसे ईसु काजे कह्‌या, “हय हामुक पक्‌को मालम पड़ गुयो की, तारे भुतड़ु चस्‌टी रयु। अब्‌राहम मर गुयु ने भगवानेन अघली वात बताड़न्‌यु मर गुयु, ने तु ज कय रयु की जु कुय मारा बुल काजे मानीन चालसे चु कदी नी मरे।
JOH 8:53 हामरा डाहा बुड़ान बास अब्‌राहम ते मर गुयु, ने भगवानेन अघली वात बताड़न्‌या बी मर गुया, तु अब्‌राहम सी मटु छे काय? तु आपसा काजे काय समजी रयु? तु कुण छे?”
JOH 8:54 ईसु जपाप आप्‌यु, “कदी मे मारीत ईज्‌जत करो ती तीनी ईज्‌जतेन काय बी दाम नी रवे। बाकुन मारी ईज्‌जत करन्‌यु मारु बास छे तीनाक तुहुं कहुं की चु तुंद्‌रु भगवान छे।
JOH 8:55 तुहुं ते तीनाक कदी नी उळख्‌या; ने कदी मे कहं की मे तीनाक कदी नी उळखो, ती ते मे तुंद्‌रेन तसु लुच्‌चु कहं; बाकुन मे तीनाक उळखो ने तेरा बुल पर चालो।
JOH 8:56 तुंद्‌रु बास अब्‌राहम मेसेक देखणे करीन मारे आवणेन दाहड़ाम वाट देखीन खुस हय गुयलु; ने चु मेसेक देखी बी लेदु ने खुस हय गुयु।”
JOH 8:57 जी वात सामळीन यहुदी माणसे ईसुक कह्‌या, “हय लगुन तारी उमर पचास साल बी नी हय ने तु असु कसु कय रयु की मे अब्‌राहम काजे देखलु छे?”
JOH 8:58 ईसु तीनुक कह्‌यु, “मे तुहुं काजे छाचलीन कहं अब्‌राहम पयदा नी हयु तेरे सी बी पेहलुन मेत छे।”
JOH 8:59 ज सामळीन यहुदी माणसे ईसुक मारने करीन दगड़ा ईछी लेदा बाकुन ईसु मंदीर मां सी कळेन जाती र्‌यु।
JOH 9:1 ईसु हेरा चेला भेळुत वाटे जाणे बाजी रवलु ती चु एक माणुस काजे देख्‌यु चु पयदा हयु ती सीत आंधळु हतलु।
JOH 9:2 ती ईसुन चेला ईसु काजे पुछ्‌या, “ए मास्‌तर कुण पाप कर्‌यु हसे ने जु आंधळु पयदा हयु। जु माणुस पाप कर्‌यु हसे की हेरा आयस-बास पाप कर्‌या हसे?”
JOH 9:3 ईसु जपाप आप्‌यु, “नी ते जु माणुस पाप कर्‌यु ने नी ते हेरा आयस-बास पाप कर्‌या बाकुन जु हेरेन करीन आंधळु पयदा हयु की ईनाक वारु करनेन सी हेरी जीवन मां भगवानेन ताकत देखाव पड़ जाय।
JOH 9:4 ने भगवान जु मेसेक मकेल्‌लु छे, आपणुक तेरो काम दीसुत पुरो कर लेणु वारु रवसे। बाकुन ची रात आवणे वाळी छे, तेरेमां कुयक काम नी कराये।
JOH 9:5 जत्‌यार लग मे कळी मां छे तत्‌यार लग कळीन वीजाळो छे।”
JOH 9:6 ज कयदीन ईसु भुयमां थुप्‌यु ने हाते करीन धुळु कालवीन आंदळान डुळा पर चुपड़ी देदु।
JOH 9:7 ने तीना आंदळा काजे कह्‌यु, “जां सीलोम नावेन हळाव मां तारा डुळा धुय ले।” सीलोम नावेन मतलब छे मकेल्‌लु। अतरा मां चु आंधळु माणुस जाय्‌न तीना हळाव मां डुळा धुय लेदु ने जत्‌यार चु पछु आयु तत्‌यार देखणे बाजी गुयु।
JOH 9:8 ईना आंदळान आड़े-धड़े वाळा ने उळखायता माणसे चे पेहल ईनाक भीक मांगतेला देखला चे ईनाक हय देखीन कह्‌या, “काय जु चु नी हय जां बठीन पेहेल भीक मांगतेलु?”
JOH 9:9 थुड़ाक माणसे कह्‌या, “जु हयुत छे। थुड़ाक माणसे कह्‌या जु चु आंधळु माणुस नी हय बाकुन तेरेन तसु देखाये।” बाकुन चु आंधळु माणुस कह्‌यु, “मे हयुत छे।”
JOH 9:10 ज सामळीन चे तीनाक पुछणे बाजी गुया, “ती तु कसु काय देखणे बाजी गुयु।”
JOH 9:11 चु माणुस जपाप आप्‌यु, “ईसु नावेन माणुस थुपे करीन धुळु मारा डुळा पर चुपड़ी देदु। ने मेसेक कह्‌यु, सीलोम नावेन हळाव मां तारा डुळा धुय ले। ने मे जाय्‌न डुळा धुय लेदु ने मे देखणे बाजी गुयु।”
JOH 9:12 ज सामळीन चे तीनाक पुछ्‌या, “चु कां छे।” ने चु कह्‌यु, “काय जाणु।”
JOH 9:13 वारु हय गुयला आंदळा माणुस काजे चां भेळा हवला माणसे फरीसी माणसे ने यहुदी माणसे धड़े लाया।
JOH 9:14 तीने दाहड़े ईसु धुळु कालवीन तीना आंदळान डुळा वारु करलु चु दाहड़ु आरामेन दाहड़ु हतलु।
JOH 9:15 अतरामा फरीसी माणसे बी तीना माणसेक पुछणे बाजी गुया, “तु कसु काय देखणे बाजी गुयु।” चु तीनुक कह्‌यु, “ईसु नावेन माणुस धुळु कालवीन मारा डुळा पर चुपड़ी देदु। ने मे धुय लेदु ती पछेन देखणे बाजी गुयु।”
JOH 9:16 जी वात सामळीन थुड़ाक फरीसी माणसे कह्‌या, “हीयु ईसु आरामेन दाहड़ु नी पाळतु। तेरेमां हीयु भगवानेन्‌चां सी नी आवलु हय।” ने जी वात सामळीन थुड़ाक फरीसी माणसे कह्‌या, “पापी माणुस असा वारु कामेन सहलाणी कसु देखाड़ सके?” अतरा मां ईसुन बारामां तींद्‌रे-तींद्‌रे मां वीरुद हय गुयु।
JOH 9:17 एक कावा अळी तीना आंदळा काजे पुछ्‌या, “जु माणुस तारा डुळा वारु करलु छे, तेरा बारामां तु काय कहें?” ने चु माणुस कह्‌यु, “चु एक भगवानेन अघी सी आवणे वाळी वात बताड़ने वाळु माणुस छे।”
JOH 9:18 जु माणुस पेहेल आंधळु हतलु, चु माणुस हय देखणे बाजी गुयु ईनी वातेम तीनु यहुदी मुख्‌या काजे भुरसु नी आयु ने चे तीना माणसेन आस्‌या-बास्‌या काजे बुलाया।
JOH 9:19 ने तीनुक पुछ्‌या, “जु तुंद्‌रु पुर्‌यु छे काय? जु पयदा हयु तीन आंधळु हतलु काय? ‘आंधळु हतलु’ कहुं ती हय जु कसु देखणे बाजी गुयु?”
JOH 9:20 चे आस्‌या-बास्‌या जपाप आप्‌या, “हामु जाणजे की हामरु पुर्‌यु छे, ने जु पयदा हयु तीन आंधळु हतलु।
JOH 9:21 बाकुन हय जु कसु देखणे बाजी गुयु जी वात हामुक मालम नी हय। हामुक ज बी नी मालम हय की हेरा डुळा कुण वारु कर्‌यो ईनात काजे पुछ लेवु। जु नानलु नी हय आपसान बारामां खुद बताड़ देसे।”
JOH 9:22 यहुदी डाहला भेळा हय्‌न जी वात नक्‌खी कर लेदला की कुय बी ईसु काजे मसी करीन मान लेसे ती आपणा भक्‌तीन घर मां सी बाहर नीकाळीन बाहरु कर देसुन। ने तीनाक वारु हय गुयला आंदळान आस्‌या-बास्‌या मन मां यहुदी मुख्‌यान धाक भराय गुयली।
JOH 9:23 तेरेमां तेरा आस्‌या-बास्‌या कहला की, “जु मटु हय गुयु ईनात काजे पुछ लेवु।”
JOH 9:24 चे यहुदी मुख्‌यान तीना वारु हय गुयला आंदळाक अळी बुलाया ने तीनाक कह्‌या, “भगवानेन आण घालीन कहं की मे तीना भगवानेन बड़ाय करीस। हामु जाणजे की चु माणुस पापी छे।”
JOH 9:25 चु जपाप आप्‌यु, “चु माणुस पापी हय की नी हय जी वात मेसेक मालम नी हय बाकुन मे अतरोत जाणो की मे आंधळु हतलु ने हय मे देखो।”
JOH 9:26 ने चे तीनाक अळी पुछ्‌या चु तारे काय कर्‌यु? “चु तारा डुळाक कसु वारु कर्‌यु?”
JOH 9:27 चु कह्‌यु, “मे तुहुं काजे पेहलुत कय देदु तेबी तुहुंक भुरसु नी आवतु, ती हय अळी काहा सामळने हींडी र्‌या? तुहुं बी तेरा चेला बणने हींड र्‌या काय?”
JOH 9:28 चे तीनाक बेसका लड़ीन कह्‌या, “तुत छे तेरु चेलु बाकुन हामु ते मुसान चेला छे।
JOH 9:29 हामु जाणजे की भगवान मुसा साते वात करलु बाकुन तीना ईसुन बारामां हामु जाणजे लग नी, की चु कां सी आवलु छे।”
JOH 9:30 चु वारु हय गुयलु माणुस तीनाक कह्‌यु, “जो! तुहुंक पल्‌ले नी पड़तो काय चु आंदळान डुळाक वारु कर देदु तेबी तुहुंक मालम नी हय की चु कां सी आवलु छे।
JOH 9:31 आपणु जाणजे की भगवान पापी माणसेन दुवा नी सामळे बाकुन तीना माणसेन दुवा सामळे जु भगवानेन भक्‌ती करतु हय ने भगवानेन मरजी पर जीवन जीवे।
JOH 9:32 कळी घड़ाय तीसी आज लग ज सामळने मां नी आयो की काहनु बी आंधळु पयदा वारी माणसेन डुळा उघाड़ीन वारु कर्‌यु हय।
JOH 9:33 कदी भगवान ईना माणसेक नी मकेलतु ती चु कसु मारा आंदळा डुळा उघाड़तु।”
JOH 9:34 चे यहुदी मुख्‌या वारु हय गुयला आंदळाक कह्‌या तुते पाप मां पयदा हयु ने पापेत मां पुसायु, “ने बेसकु! तु हामुक सीकाड़ने बाजी र्‌यु!” ने असु कहीन चे तीनाक तींद्‌रा घर मां सी खयड़े नीकाळ दीन बाहर कर देदा।
JOH 9:35 अळतेन ईसु सामळ्‌यु की फरीसी माणसे यहुदी मुख्‌या तीनाक चां बाहर कर देदला छे, ने अळतेन ईसु तीनाक भेळु हयु ती तीनाक कह्‌यु, “तु माणसेन पुर्‌या पर भुरसु करे काय?”
JOH 9:36 चु वारु हय गुयलु आंधळु माणुस कह्‌यु, “ए मालीक! मेसेक देखाड़ दे की माणसेन पुर्‌यु कुण छे, ने मे तेरे पर भुरसु करीस।”
JOH 9:37 ईसु तीना माणसेक कह्‌यु तु तीनाक देखलु छे, “ने चु तार साते वात करने बाजी र्‌यु ने हयुत माणसेन पुर्‌यु छे।”
JOH 9:38 चु वारु हय गुयलु आंधळु ईसु काजे कह्‌यु ए मालीक! मे भुरसु कर्‌यु ने चु ईसुन पाये पड़ीन आंध्‌यु।
JOH 9:39 ने ईसु कह्‌यु, “मे ईनी कळी मां नीयाव करने वाळु छे की जे आंदळा छे चे देखणे बाजी जाय बाकुन जे देखणे बाजी र्‌या चे आंदळा हय जाय।”
JOH 9:40 फरीसी माणसे मुख्‌या मायन थुड़ाक चां ईसु साते हतला ने चे ज सामळीन ईसु काजे कह्‌या, “छाचलीन हामु आंदळा नी हय। हामु बी आंदळा छे करीन तु कय र्‌यु काय?”
JOH 9:41 ईसु तीनु काजे कह्‌यु, “कदी तुहुं छाचलीन आंदळा रवता ती पापी नी गीणायता बाकुन हय ते तुहुं कय र्‌या की हामु देखजे ने तुहुं पापीत गीणाय र्‌या।”
JOH 10:1 ईसु कह्‌यु, “मे तुहुं काजे छाची-छाची कहं, की जु काहनुक गाडरान ईना वाड़ान झपला मायन गाडरान वाड़ा मां नी भराये, बाकुन गाडरान वाड़ो चहड़ीन एक धड़े मायन भराये, चु चुट्‌टु ने डाकु छे।
JOH 10:2 बाकुन जु गाडरान वाड़ान झपले मायन भराये, चु गाडरा गुवाळ्‌यु छे।
JOH 10:3 ने तेरे भीणी गाडरान वाड़ान झपले राखवाळी करन्‌यु झपलु उघाड़ देय। ने गाडरा तीना गाडरा गुवाळ्‌यान बुली सामळी लेय, ने चु आपसा एक-एक गाडरान नाव धरीन बुलावे, ने आपसा गाडराक खयड़े चारने ली जाती रहे।
JOH 10:4 ने जत्‌यार चु आपसा आखा गाडरा काजे खयड़े ली जाय, ती चु तींद्‌रे अगळ-अगळ चाले, ने चे गाडरा आपसा मालीकेन बुली समजी जाय, ने तेरे पछळ-पछळ आवे।
JOH 10:5 बाकुन कदी अंजाण्‌यु माणुस आयड़े ती चे गाडरा राखवाळ्‌यान अंजाणी बुली काजे नी उळखे, ने तेरे पछळ-पछळ नी जाय बाकुन तीनाक देखीन छेटा डास जासे।”
JOH 10:6 ईसु तीनुक जी वात दाखलु दीन कह्‌यु, बाकुन तीनुक तीना दाखलान मतलब समजायो नी।
JOH 10:7 तत्‌यार ईसु तीनुक अळी कह्‌यु, मे तुहुंक छाची-छाची कह्‌वो, गाडरान झपलु मेत छे।
JOH 10:8 जतरा मारे सी पेहेल आया चे आखा चुट्‌टा ने डाकु छे, बाकुन गाडरा तेरी नी सामळ्‌या।
JOH 10:9 झपलु मे छे, कदी काहनुक मारे मायन माहीं आवे, ती मे राखवाळी करीस, ने बाहर आवता जाता रवसे ने चारु जड़से।
JOH 10:10 चुट्‌टु काहनुक दीसरा काम आटे नी आवे, बाकुन चुरी करने अतरुत आवे, ने मारने ने खत्‌तम करने आवे, बाकुन मे असु करीन आयु की हीनुक नवलो जीवन जड़े ने पुरो की पुरो जड़े।
JOH 10:11 वारलु गुवाळ्‌यु मे छे! वारलु गुवाळ्‌यु गाडरा आटे आपसान जीव दी देय।
JOH 10:12 बाकुन दाहड़क्‌यु नीते गुवाळ्‌यु हय, ती गाडरान मालीक छे, लेंड्‌या काजे आवता देखीन गाडरा काजे छुड़दीन ढासी जाय, ने लेंड्‌या तीनुक धरे ने रावण्‌या-तीवण्‌या कर देय।
JOH 10:13 दाहड़क्‌यु असु करीन ढासी जाय की चु पावर्‌यु छे, ने तेरी गाडरान फीकुर नी करे।
JOH 10:14 वारलु गुवाळ्‌यु मे छे, मे मारा गाडरा काजे उळखो ने मारा गाडरा मेसेक उळखे।
JOH 10:15 जसु बास मेसेक उळखे ने मे बासेक उळखो ने मे गाडरा आटे मारु जीव दी दम।
JOH 10:16 मारा अळी बी गाडरा छे, चे ईना गाडरान वाड़ा मां नी हय। मेसे तीनुक बी लावणुत छे, चे मारी बुली सामळसे, तत्‌यार एकुत टुळु ने एकुत गुवाळ्‌यु रवसे।
JOH 10:17 बास असु करीन मारे सी परम राखे की मे मारु जीव दी दम, काहाकी तीना जीवेक पछु मांगणेन बी हक छे।
JOH 10:18 बाकुन मे मारी मरजी सी दम, ने मेसे तीनाक देणेन बी हक छे, ने तीनाक अळी पछु लेणेन बी हक छे, जी हुकुम मारा बास सी मेसेक जड़ी।
JOH 10:19 ईसुन जी वात सामळीन, यहुदी माणसेम अळी लड़ाय हय गुय।
JOH 10:20 तींद्‌रे मायन बेसका माणसे कवतेला, “हेरे भुतड़ा लागला छे, तुहुं हेरी काहा सामळु।”
JOH 10:21 बाकुन दीसरा माणसे कहतेला, “जी वात भुतड़ा लागला माणसेन नी हय, काहाकी भुत आंदळान डुळाक वारु कर सके काय?”
JOH 10:22 यरुसलेम मंदीर काजे भगवानेन हातेम सुपणेन तीहवार आयु। तीनु दाहड़ाम सींव पड़ रवली।
JOH 10:23 ईसु मंदीर मां सुलेमान नावेन आंगणा मां हींडतेलु।
JOH 10:24 तत्‌यार यहुदी नेता ईसुक घेर लेदा, ने कह्‌या, “तु हामरा मन काजे कां लगुन भुले पाड़तु रवसी? कदी तु मसी हय ती हामुक तसु छाची बताड़ दे?”
JOH 10:25 ईसु तीनुक जपाप आप्‌यु, “मे तुहुंक छाचलीन कय देदु की, मे कुण छे। बाकुन तुहुं भुरसु नी करता, ज काम मे मारा बासेन नाव सी करो, मारी गवा पुरावु देय की मे छाचलीन कुण छे?
JOH 10:26 तेबी तुहुं भुरसु नी करता, काहाकी तुहुं मारा गाडरा नी हय।
JOH 10:27 मारा गाडरा मतलब मारा चेला, मारी बुली काजे जाणी लेय, ने मे तीनुक जाणो, ने मारे पछळ-पछळ आवे।
JOH 10:28 ने मे तीनुक अमर जीवन आपो, ने हयु जीव कदी नी मरसे। ने कुय बी तीनाक मार हातेम सी नी हापके।
JOH 10:29 मारु बास, चु तीनुक मेसेक आप्‌यु, आखा सी मटु छे, ने कुय बी तीनुक बासेन हातेम सी हापकी नी सके।
JOH 10:30 मे ने मारु भगवान बास एक छे।”
JOH 10:31 ईसुन जी वात सामळीन, यहुदी माणसे ईसु काजे मारने करीन अळी दगड़ा ईछ्‌या।
JOH 10:32 ती ईसु तीनु काजे जपाप आप्‌यु, “मे मारा भगवान बासेन कह्‌याम तुहुंक बेसका मटा वारलु काम करीन देखाड़्‌यु। तीनु मायन काहना कामेन करीन मेसेक दगड़ाटीन मारने हींडी र्‌या?”
JOH 10:33 तत्‌यार यहुदी माणसे जपाप आप्‌या, “काहना बी वारलु कामेन करीन नी, बाकुन तु भगवानेन नाव-बद्‌दी कर र्‌यु करीन हामु तुसेक दगड़ाटीन मारने हींडी र्‌या, तु ते माणुस हय्‌न बी खुद काजे ‘मे भगवान छे’ करीन कय र्‌यु।”
JOH 10:34 ईसु तीनुक जपाप आप्‌यु, “तीना चुखला सास्‌तुर काजे तुहुं मानु, तेरेमां असो लिखलो छे भगवान कह्‌यु, तुहुं देवता छे” तुहुंक जी वात मालम नी हय काय।
JOH 10:35 पेहला वाराम तीनु माणसेन्‌चां आपसु बुल पुगाड़लु, तीनु काजे भगवान देवता करीन बुलाड़्‌यु। ने खरली सास्‌तुर मां लिखली वात कदी नी टळे।
JOH 10:36 बाकुन मेसेक ते चुखलु भगवान बास हक आपीन ईनी कळी मां मकेल्‌लु छे, ने मे भगवानेन पुर्‌यु छे करीन मे मारा बारामां कह्‌यु, ती तुहुं रीसवायन मेसेक तु भगवानेन नाव-बद्‌दी कर र्‌यु, करीन काहा कय र्‌या?
JOH 10:37 कदी मे मारा बासेन काम नी करो ती मारे पर भुरसु घुण करु।
JOH 10:38 बाकुन कदी मे भुरसु करो, ती भले मारे पर भुरसु मां करु, बाकुन तीनु कामे पर ते भुरसु करु, काहाकी तुहुं जाणु ने समजु की बास मारेम छे, ने मे बासेम छे।
JOH 10:39 जी वात सामळीन, यहुदी माणसे, अळी ईसु काजे धरने हींडी रवला, बाकुन चु तींद्‌रा हातेम सी नीस्‌टीन जाती रयु।
JOH 10:40 ईसु आपसा चेला पुठ्‌ये अळी यरदन नदीन पली धड़े जागा पर जाती र्‌यु, चां युहन्‌‌‌नु पेहेल बपतीस्‌मा आप्‌या करतेलु, ने चाहात रहणे बाजी गुयु।
JOH 10:41 बेसका माणसे ईसु धड़े आवीन कहतेला, “युहन्‌‌‌नु ते असो काहना बी मटा कामेन सहलाणी नी देखाड़्‌यु, बाकुन युहन्‌‌‌नु ईसुन बारामां ज काय हवलो, चो आखो छाचलीन हतलो।”
JOH 10:42 ने चां बेसका माणसे ईसु पर भुरसु कर्‌या।
JOH 11:1 बेतन्‌या गांव मां तीन भाय बहणस्‌या रहतेला, लाजर ने तेरे दुय बहणीस मारथा ने मरीयम, एक दाहड़े हेरु भाय लाजर मांदु पड़ गुयु।
JOH 11:2 जी चीत मरीयम हतली, ची मालीक ईसुन पाये पर ईत्‌तर रेचवीन आपसे कान्‌या सी तेरा पाये नुछली हेरुत भाय लाजर मांदलु हतलु।
JOH 11:3 तेरेमां मरीयम ने मार्‌था लाजरेन बहणीस ईसु धड़े असी कय मकली की, “ए मालीक, देख, तीनाक तु वारु परम राखे चु मांदलु छे।”
JOH 11:4 ईसु जी वात सामळीन कह्‌यु, “जी मांदवाड़ मर जाणु करीन नी आय, बाकुन भगवानेन बड़ाय हवणे करीन, ने ईनी मांदवाड़ेन साहरे भगवानेन पुर्‌यान बी बड़ाय हवे।”
JOH 11:5 ईसु लाजर काजे, ने तेरी बहणीस मारथा ने मरीयम काजे परम करतेलु।
JOH 11:6 तेबी जत्‌यार ईसु सामळ्‌यु, की लाजर मांदलु छे, ती जां लाजर रहतेलु चां जाणी बुजीन दुय दाहड़ा अळी रय गुयु।
JOH 11:7 जी दुय दाहड़ा बीती गुया, ने पछेन ईसु चेला काजे कह्‌यु, “चालु आपणु अळी पछा यहुदी जीलाम जाजे।”
JOH 11:8 बाकुन चेला ईसु काजे कह्‌या, “ए मास्‌तर! ईतराक दाहड़ा पेहलुस ते यहुदी डाहला नेता तुसेक दगड़ाटीन मारने हींडी रवला, ने तु पछु अळी चांहान जाणे हींडी र्‌यु?”
JOH 11:9 ईसु जपाप आप्‌यु, “काय दाहड़ान बारे घंटा नी रवे? कदी काहनुक माणुस दीसु चाले ती झट नी लागे काहाकी तीनाक ईनी कळीन वीजाळो देखाये।
JOH 11:10 बाकुन कदी काहनुक राते चाले ती झटवायसे, काहाकी चां वीजाळो नी रहे।”
JOH 11:11 ईसु जी वात कह्‌यु, ने पछेन कहणे बाजी गुयु, “आपणु दुस्‌तीदार लाजर सुय गुयु, बाकुन मे हीनाक जागाड़ने जाम।”
JOH 11:12 चेला कह्‌या, “ए मालीक। कदी चु सुय रयु हसे, ती वारु हय जासे।”
JOH 11:13 ईसुन चेला ज्‌य समज्‌या की लाजर छाचलीन सुवणे बाजी रयु हसे, बाकुन ईसु ते दाखलान साहरे ईसारु करीन कहणे बाजी रवलु।
JOH 11:14 तत्‌यार ईसु तीनुक सय-सय कय देदु, “की लाजर मर गुयु।”
JOH 11:15 मे लाजरेन मरने टेमे चां नी हतलु, तेबी मे तुहुं छे करीन मे खुस छे, “काहाकी हय तुहुं मारे पर पाक्‌कु भुरसु करने मुखु जड़ जासे। ती चालु, आपणु लाजर धड़े जाजे।”
JOH 11:16 तत्‌यार थोमु चु दीद्‌मुस बी कह्‌वाये, हेरे साते चेला सी कह्‌यु, “चालु, आपणु बी हेरे साते जाजे भले आपणुक बी हेरे पुठ्‌ये मरनु पड़े।”
JOH 11:17 जत्‌यार ईसु बेतन्‌या गांव मां पुग्‌यु, ती चु सामळ्‌यु की लाजर काजे मसाण मां मेकला चार दाहड़ा हय गुया।
JOH 11:18 बेतन्‌या गांव यरुसलेम सहर सी एक कुस लांबो हतलो।
JOH 11:19 ने बेसका यहुदी माणसे बी लाजरेन मरनेन खबर सामळीन हेरी बहणीस मारथा ने मरीयम काजे हुगा राखणे, ने तुहुं काठु जीव राख्‌जु करीन हेरा भायसेन बारामां कहंणे चां आय रवला।
JOH 11:20 जत्‌यार मारथा सामळी, की ईसु आवणे बाजी र्‌यु, तीनाक भेळी हवणे करीन अघीस गुय बाकुन मरीयम घरुत मां बस रय।
JOH 11:21 ईसु धड़े पुगीन मारथा ईसु काजे कय, “ए मालीक! कदी तु जां रहतु ती मारु भाय नी मरतु।
JOH 11:22 ने मेसेक मालम छे, की तु हय बी भगवान भीणी सी ज काय मांगीस, चोन भगवान तुसेक आपसे।”
JOH 11:23 ईसु मारथा काजे कह्‌यु, “तारु भाय पछु जीवतु हय जासे।”
JOH 11:24 ज सामळीन मारथा ईसु काजे कय, “मेसेक मालुम छे, की तीने दाहड़े आखा मरला माणसे मर्‌या-सर्‌याम सी पछा जीवता हय्‌न बठा हवसे, तीने दाहड़े मारु भाय बी तींद्‌रे भेलुत पछु जीवतु हय्‌न बठु हय जासे।”
JOH 11:25 ईसु मारथा काजे कह्‌यु, “मर्‌या-सर्‌याम सी पछा जीवता करीन बठा करन्‌यु, ने तीनुक अमर जीवाय आपण्‌यु मेत छे, जु बी मार पर भुरसु करे, चु मर बी जासे तेबी जीवतेलु रवसे।”
JOH 11:26 ने जु मार पर भुरसु करतु जाय्‌न जीवतेलु रवसे, तीनाक जलमकी मुतेन डंड नी जड़े तु ईनी वात पर भुरसु करे काय?
JOH 11:27 ती मारथा कय, “हव, मालीक! पाक्‌कु भुरसु करो की ईनी कळी मां आवणे वाळु भगवानेन पुर्‌यु तीनाक मसी कहवे चु तुत छे।”
JOH 11:28 ची असी कयदीन जाती रय ने आपसी बहणीस मरीयम काजे बुलावीन कळ्‌येन तीनीक कय, “मास्‌तर आय रयु, चु तुसेक बुलावे।”
JOH 11:29 ज सामळीन मरीयम छाटीत उठीन ईसु काजे भेळी हवणे चाल पड़ी।
JOH 11:30 ईसु हाल लगुन तीना गांव मां नी आयु, हय बी चु तीना जागा पर हतलु जां मारथा ईसुक भेळी हवली।
JOH 11:31 तत्‌यार ईतराक यहुदी माणसे हेरे साते घर मां हतला ने तीनाक हुगी रव ने काठु जीव राख, करीन कह्‌णे बाजी रवला, चे माणसे ज देख्‌या की ची उचकाणुन मरीयम उठीन खयड़े चाल पड़ी ती चे असा वीच्‌यार कर्‌या की जी मसाण पर रहणे जाणे बाजी रय, ने चे बी तेरे पछळ चाल पड़्‌या।
JOH 11:32 जत्‌यार मरीयम ती जागे पुगी जां ईसु हतलु, ती तीनाक देखतात ची तेरा पायेम हीट पड़ी ने कय ए मालीक! “कदी तु जां रवतु ती मारु भायस नी मरतु।”
JOH 11:33 ने ईसु मरीयम काजे ने तेरे पुठ्‌ये आवला यहुदी माणसेक रड़तेला देख्‌यु, ती ईसुन जीव भळ कर्‌यु, ने चु बेसकु दुखी हय गुई।
JOH 11:34 ने चु कह्‌यु, “तीनाक काहना जागा पर मेकला छे?” चे ईसुक कह्‌या, ए मालीक! चाल आवीन देख ले।
JOH 11:35 ने ईसु तत्‌यार कलपी-कलपीन रड़ने बाजी गुयु।
JOH 11:36 ईसु काजे रड़तेलु देखीन चां भेळा हवला माणसेम सी बेसका यहुदी माणसे कह्‌या, “देखु! जु ते लाजर काजे बेसकु परम करतेलु।”
JOH 11:37 बाकुन थुड़ाक माणसे कह्‌या, “जु ते आंदळान डुळा उघाड़ीन तीनाक देखता कर्‌यु ती जु लाजर काजे काहानी बचाड़्‌यु?”
JOH 11:38 ज सामळीन ईसुन जीव अळी भळ लेवायु, ने चु लाजरेन मसाण धड़े गुयु, ची मसाण बयड़ान खंगरा मां दर खुदीन बणावलो हतलो, ने तेरे पर एक चापरु दगड़ु मेल्‌लु हतलु।
JOH 11:39 ईसु माणसेक कह्‌यु, “चापरु दगड़ु हेड़ देवु।” मरला लाजरेन बहणीस मारथा कही, “बाकुन ए मालीक लाजर मरलु चार दाहड़ा हय गुया हय ते तेरो धड़ गंदायतो हसे।”
JOH 11:40 ईसु मारथाक कह्‌यु, “कदी तु भुरसु करसी, ती भगवानेन सेक-सींगार देखसी, असु मे तुसेक हय पेहलुस कह्‌लु बी।”
JOH 11:41 तत्‌यार चे माणसे चापरु दगड़ु हेड़ देदा ने ईसु सरग भीणी भाळीन कह्‌यु, ए भगवान बास! मे तुसेक बेसकु वारु कह्‌वो तु मारी दुवा सामळी लेदु।
JOH 11:42 तु ते मारी दुवा सामळ्‌या करे जी वात मेसेक पाक्‌को मालुम छे बाकुन मे जी वात आड़े-धड़े उबा हय रवला माणसे वाटे कय र्‌यु, “काहाकी चे ज देखीन भुरसु करे ने असा जाणे की ईना ईसुक भगवानुत हक आपीन मकेल्‌लु छे।”
JOH 11:43 असु कयदीन ईसु जुर सी आयड़ीन कह्‌यु, “लाजर! बाहर नीकळ।
JOH 11:44 चु मरलु लाजर जीवतु हय्‌न बाहर नीकळी आयु, तेरे मुंहडे ने हाते पाये पुथल्‌यान पाटा बांदला हतला, ईसु माणसेक असु कह्‌यु, हेरा पाटा छुड़ीन हीनाक जाणी देवु।”
JOH 11:45 जे यहुदी माणसे, मरीयम काजे भेळा हवणे आवला हतला, चे ईसुन बेसका मटा काम देख्‌या, ने तीनु मायन बेसका माणसे ईसु पर भुरसु कर्‌या।
JOH 11:46 बाकुन तीनु यहुदी माणसे मायन थुड़ाक जणा जाय्‌न फरीसी माणसे काजे ईसुन ईना मटला कामेन बारामां कय देदा।
JOH 11:47 ने मंदीरेन डाहला पुजारा ने फरीसी माणसे पंचु बठ्‌या ने कह्‌या, “आपणु काय करजे? हयु माणुस ते मटा कामेन सहलाणी देखाड़ने बाजी र्‌यु।
JOH 11:48 कदी आपणु हीनाक असुत करने देसुन ती हेरे पर आखा यहुदी माणसे भुरसु करने बाजी जासे, ने ईना काजे राजा बणाय देसे, तत्‌यार रोमी सीपायड़ा आवीन आपणु मंदीर ने आपणी आखी जाती काजे सार देसे।”
JOH 11:49 तींद्‌रे मायन एक जणु तेरो नाव काइफा हतलो, ने चु तीने साल मंदीरेन डाहला पुजारान मुख्‌यु हतलु चु पंचुन वात सामळीन तीनु काजे कह्‌यु, “तुहुंक ईतरोक बी मालुम नी हय काय?
JOH 11:50 जाराक वीच्‌यार ते करु आपणा माणसे वाटे एकुत माणुस मरसे ती आपणी आखी जाती बच जासे, आपणे वाटे च वारलु रवसे।”
JOH 11:51 चु जी वात आपसुत नी कह्‌यु, बाकुन चु तीने साल मंदीरेन डाहला पुजारान मुखी हवणेन नाते पेहेल सी हवणे वाळी वात कह्‌यु की ईसु भगवान आखा माणसे वाटे मरसे।
JOH 11:52 हेरो मतलब ज छे की ईसु यहुदी जाती वाटे अतरुत नी बाकुन, रावण्‌या-तीवण्‌या हवला भगवानेन आखा पुर्‌या-पारी तीनुक भेळा करने करीन मरसे।
JOH 11:53 तीनेत दाहड़े सी यहुदी पंचु वाळा मुख्‌या ईसु काजे मारने करीन पाक्‌कु वीच्‌यार कर्‌या।
JOH 11:54 ज जाणीन ईसु तीने दाहड़े सी यहुदीया जीलान माणसे मां उजेंतु नी हवणे चाहतेलु, बाकुन यहुदीया जीलान यरुसलेम सहर छुड़ीन उजाड़्‌या बयड़ा धड़े वाळा येफरेन नावेन सहरेम जाय्‌न चेला पुठ्‌ये रहणे बाजी गुयु।
JOH 11:55 यहुदी जातीन फसह तीहवार धड़ेत आय रवलु, ने तीना तीहवारेन पेहलुत आपसा काजे चुखा करने करीन बेसका माणसे गांव खेड़ाम सी यरुसलेम सहर मां आय रवला।
JOH 11:56 ने चे ईसु काजे हेरता-हेरता यरुसलेम मंदीरेन्‌चां उबा रय गुया, ने ईसु नी जड़्‌यु, ती चे एक दीसराक कहणे बाजी गुया, “तुंद्‌रु काय वीच्‌यार छे, चु तीहवार मां नी आवे काय?”
JOH 11:57 मंदीरेन डाहला पुजारा ने फरीसी माणसे काजे पेहलुत हुकुम आपीन ज कह्‌या, की तुंद्‌रे मायन कुय बी ईसुन बारामां मालुम हवे, की ईसु जां छे, ती आवीन कय देजु ने हामु तीनाक धराय देसु।
JOH 12:1 ईसु तीहवारेन छव दाहड़ा पेहेल यरुसलेम सहर धड़े, बेतन्‌या गांव मां गुयु, चां लाजर रहतेलु, तीनाक ईसु मर्‌या-सर्‌याम सी जीवतु करलु।
JOH 12:2 ने तींद्‌रे मायन एक घर मां ईसुन मेजवानी कर्‌या ने लाजर बी चां खाणे बठी रवलु, ने मारथा चां वारती बणीन खावड़ातेली।
JOH 12:3 तत्‌यार मरीयम आदु लीटर बेसको महंगलो ईत्‌तर लावीन ईसुन पाये पर रेचवी ने आपसे कान्‌या सी तेरा पाये नुछी, ने ईत्‌तरेन गंदे आखो घर गंदणु ईस्‌ट्‌यो च ईत्‌तर एक खास झाड़कान मुळेम सी नीकाळीन बणावलो पीवर ईत्‌तर हतलो।
JOH 12:4 ज देखीन ईसुन एक चेलु, यहुदा ईस्‌करीयोती चु ईसुक धराड़ने वाळु हतलु, चु कह्‌णे बाजी गुयु।
JOH 12:5 “च ईत्‌तर वेचती ती तीन सोव दाहड़ान दाहड़कीन पयस्‌या जड़ जाता, ने चे पयस्‌या बेसका गरीबेक आपीन मदत कर देणु हतलो।”
JOH 12:6 तीनाक गरीबेन फीकुर हतली, चु जी वात नी कह्‌यु, बाकुन चु चुट्‌टु हतलु। चु ते तींद्‌री पयस्‌यान थयलिन राखवाळी करन्‌यु हतलु, तेबी चु तीनी थयलिम सी ईत्‌तराक पयस्‌या चुरी कर लेदलु।
JOH 12:7 ईसु तीनाक कह्‌यु, “हीनीक रहणी देवु! काय मां कहुं हयी ते मारे डागेन तीयारी पेहेलुत सी करने बाजी रय।
JOH 12:8 काहाकी गरीब ते तुंद्‌रे पुठ्‌ये जलम लग रवसे बाकुन मे तुंद्‌रे पुठ्‌ये जलम लग नी रहो।”
JOH 12:9 जत्‌यार यहुदी बेसका माणसे काजे मालुम हय गुयो की ईसु बेतन्‌या मां आयु, ती चे ईसु छे करीन अतरात नी आया बाकुन बेसकास ते लाजर काजे देखणे आया, तीनाक ईसु मरलाम सी पछु जीवतु करलु।
JOH 12:10 तत्‌यार डाहला पुजारा लाजर काजे बी मारनेन मुजगी कर लेदला।
JOH 12:11 काहाकी ईसु ईना कामे सी बेसका यहुदी माणसे तीनु यहुदी डाहला पुजाराक छुड़ देदला ने ईसु पर भुरसु कर्‌या।
JOH 12:12 दीसरे दाहड़े तीहवार वाळने आवला माणसेन मट्‌लु टुळु, असा सामळ्‌या की ईसु यरुसलेम मां आवणे बाजी र्‌यु।
JOH 12:13 ने चे माणसे खजुरेन डाळ्‌या लीन तीनाक भेळा हवणे गुया, ने आयड़ी-आयड़ीन कह्‌या, होसान्‌ना! बेसकु वारु छे, ईस्‌रायलेन राजु, जे मालीक भगवानेन नाव सी आवे!
JOH 12:14 बाकुन ईसु काजे गदड़ीन एक पीलो जड़्‌यो, ती चु तेरे पर बठी गुयु, जसों की खरला सास्‌तुर मां लिखलो छे,
JOH 12:15 “सीयोन सहर मां रहण्‌या माणसेन टुळा” बीहे मां! देख, तारु राजा तुंद्‌रेन्‌चां आवणे बाजी र्‌यु, चु ते गदड़ीन पीला पर बठीन आवणे बाजी र्‌यु।
JOH 12:16 ईसुन चेलाक पेहेल मेहेल ते जी वात पल्‌ले नी पड़ी, बाकुन जत्‌यार ईसु मर्‌या-सर्‌याम सी जीवतु हय्‌न पछु सरगेन आपसा सेक-सींगार मां जाती र्‌यु, ती तीनुक पल्‌ले पड़ी की ईसुन बारामां असोत लिखलो हतलो ने तसा की तसा माणसे तीने दाहड़े तेरे साते वेहवार करला।
JOH 12:17 तत्‌यार टुळा मायन चे माणसे गवा देदा, चे तीने टेमे हेरे साते हतला, जत्‌यार हयु लाजर काजे मसाण मां सी बुलायन मर्‌या-सर्‌याम सी पछु जीवतु करलु।
JOH 12:18 तेरेमां माणसे हीनाक मेळने करीन आवला, काहाकी चे सामळ्‌या की हयु असु मटा कामेन सहलाणी देखाड़्‌यु।
JOH 12:19 ने च आखो देखीन फरीसी माणसे आपसा-आपसा कह्‌णे बाजी गुया, “देखु ते खरा, आखी कळीन माणसे ईसु पछळ चाल पड़्‌या, ने आपणु हीनुक बेसका रुकणे कर्‌या, तेबी हया नी रुकायता।”
JOH 12:20 चे माणसे तीहवारेन मुखा पर भगवानेन भक्‌ती करने यरुसलेमेन मंदीर मां आवला, तींद्‌रे मां ईतराक युनानी माणसे हतला।
JOH 12:21 चे गलील जीलान बेतसेदा गांव मां रहण्‌या फीलीप्‌पुस धड़े आवीन तेरे धड़े लीलघाय्‌न असा कह्‌या, “ए मालीक! हामु ईसु काजे भेळा हवणे हींडी र्‌या।”
JOH 12:22 फीलीप्‌पुस जाय्‌न अन्‌दीरीयास काजे खबर कर्‌यु ने, अंदीर्‌यास फीलीप्‌पुस भेळुत जाय्‌न ईसु काजे खबर कर्‌यु।
JOH 12:23 ईसु तीनु काजे आपसा मरनेन बारामां दाखला सी कह्‌यु, माणसेन पुर्‌यु दुख झेलीन सरग वाळा सेक-सींगार मां पछु जाणेन घड़ी आय लागली छे।
JOH 12:24 मे तुहुंक छाची-छाचीन कह्‌वो जत्‌यार लग गहुंन दाणु धुळा मां पड़ीन मरे नी, तत्‌यार लग चु एखलुत रहे, बाकुन कदी चु मर जाय, ती बेसका दाणा लावे।
JOH 12:25 जु काहनुक ईनी कळीन जीवाय मां आपसा जीव काजे जादा परम करे, चु आपसा जीवेक खुवसे, बाकुन जु काहनुक ईनी कळीन जीवाय मां आपसान जीव आपणे लग तीयार छे, ती चु आपसा जीव काजे अमर जीवन हेर लेसे।
JOH 12:26 कदी काहनुक माणुस मारी सेवा चाकरी करने हींडे ती तीनाक मारु चेलु बणीन मारा कह्‌याम चालनु चाहजे, जसु मे मुतेन वाटे हय चालने बाजी र्‌यु, तसात मारा चाकर्‌या चेलाक बी तीनेत वाटे चालनु पड़से, ने कदी काहनुक ईनी रीते मारी सेवा चाकरी करसे, ती मारु भगवान बास तेरी ईज्‌जत करसे।
JOH 12:27 ईसु अगु कह्‌तु गुयु, “हय मारु जीव कलपी र्‌यु।” मे ज कहं काय? ए भगवान बास! मेसेक हीना दुखेन घड़ीम सी वाचाड़ नी, मे असु नी कहं, काहाकी मे ईना दुखेन घड़ी काजे एठणे करीन ईनी कळी मां आवलु छे।
JOH 12:28 ए भगवान बास! “तारा नावेन सेक-सींगार उजेंतु देखाड़।” तीनीत टेमे सरगेम सी जु बुल सामळायु, मे सेक-सींगार उजेंतु देखाड़लु छे, “ने अळी उजेंतु देखाड़ीस।”
JOH 12:29 आड़े-धड़े उबा हय रवला माणसे ज सामळीन कह्‌या, “वादळो गुयो।” दीसरा माणसे कह्‌या, “सरग वाळु काहवाळ्‌यु हीनाक काय कह्‌यु।”
JOH 12:30 ईसु जपाप आप्‌यु, “ईना बुलेन अवाज मारे वाटे नी आवी, बाकुन तुंद्‌रे वाटे सरगे सी आवी।
JOH 12:31 हय भगवानेन वीरुद करन्‌या, ईनी कळीन नीयाव हवण्‌यो छे। हय, भगवान ईनी कळीन मुखी भुतड़ा काजे वार मां बाहर नीकाळ देसे।
JOH 12:32 जत्‌यार माणसे मेसेक धरती पर लाकड़ान कुरुस पर चहड़ावीन मारसे, ती मे आखी जातीन माणसे काजे मारे भीणी मनवी लीस।”
JOH 12:33 असु कय्‌न ईसु आपसा बारामां ज देखाड़ने हींडी रवलु, की मारी मोत असी हवणे वाळी छे।
JOH 12:34 ईसुन वात सामळीन माणसे ईसुक कह्‌या, खरला सास्‌तुर मां सी हामुक ज सीकणु जड़लो छे की, “आवणे वाळु छुड़ावन्‌यु मसी जलम जीवतेलु रवसे। ती तु असु काहा कय र्‌यु की माणसेन पुर्‌या काजे ईनी धरती पर लाकड़ान कुरुस पर चड़ावीन मारसे? जु काहना भातीन वाचाड़न्‌यु माणसेन पुर्‌यु छे, चु मरनेन हेर कर र्‌यु? जी वात हामुक समज मां नी आवती।”
JOH 12:35 तींद्‌री वात सामळीन ईसु तीनुक आपसा बारामां दाखलु दीन कह्‌यु, “तुंद्‌रे ईचमां वीजाळो हय छे, च ईतरीक वार भबळसे, जत्‌यार लग ज वीजाळो तुंद्‌रे ईचमां रवसे, ईना वीजाळा सी अगा चालता रहु। काहाकी आंदारलो तुहुं काजे टुपी नी लेय। काहाकी जु कुय आंदारला मां चाले ती ज नी जाणे की कां जाणे बाजी रयु।
JOH 12:36 जत्‌यार लग च वीजाळो तुंद्‌रे ईचमां छे, चां लग ईना वीजाळा पर भुरसु करु असा करसु ती तुहुं वीजाळान अवल्‌यात बण जासु।” ईसु ज कय्‌न जाती र्‌यु, ने तींद्‌रे देखतात जातु-जातु अंछाप हय गुयु।
JOH 12:37 ईसु ते माणसे अगळ चकराड़े तसा बेसका मटा कामेन सहलाणी देखाड़्‌यु, तेबी चे तेर पर भुरसु नी कर्‌या।
JOH 12:38 काहाकी भगवानेन अघली वात बताड़न्‌यु माणुस यसायु जी वात पेहलुत कह्‌लु ची वात पुरी हवे: “ए मालीक! कुण हामरी खबर पर भुरसु करलु छे? कुणी पर मालीकेन जुर देखाव पड़लु छे।”
JOH 12:39 असा करीन चे भुरसु नी कर्‌या, काहाकी यसायु अळी बी ज कह्‌लु,
JOH 12:40 “भगवान तींद्‌रा डुळा काजे आंदळा कर देदु, ने तींद्‌री मन काजे काठो कर देदलु छे, की कांखुर मायन असो नी हय जाय की चे देख लेय ने समजी लेय, ने मारे भीणी पछा आय लागे, ने मे हीनुक वारु कर दम।”
JOH 12:41 यसायु ते एक जागता सपना मां सेक-सींगार देख्‌लु, चु ते ईसुन बारामां पेहेल सी लिखी रवलु।
JOH 12:42 तेबी यहुदी मुख्‌या मायन थुड़ाक तेरे पर भुरसु कर्‌या ने दीसरा बेसका यहुदी माणसे बी ईसु पर भुरसु कर्‌या बाकुन फरीसी माणसेन धाके चे मुख्‌या उजेंता ईसु काजे नी मानतेला। तींद्‌रो ज बी बीहाणो हतलो की फरीसी माणसेन मुख्‌या हामुक आपणा भक्‌तीन घर मां सी नीकाळ देसे।
JOH 12:43 काहाकी माणसे सी जादा ईज्‌जत मांगणे हेर करतेला, बाकुन भगवान सी ईज्‌जत मांगणे वारु नी लाग्‌यो।
JOH 12:44 ईसु जुर सी आयड़ीन कह्‌यु, “जु मारे पर भुरसु करे, चु छाचलीन तेरे पर बी भुरसु कर र्‌यु, जु मेसेक मकेल्‌लु छे।
JOH 12:45 ने जु मेसेक देखे, चु तीनाक देखे जु मेसेक मकेल्‌लु छे।
JOH 12:46 मे वीजाळो बणीन कळी मां आवलु छे, तेरेमां चे आखा माणसे मारे पर भुरसु करे, चु आंदारला मां नी रहे।
JOH 12:47 कदी काहनुक मारी वात सामळीन बी जी वात तीनीक मानीन नी जीवे, ती हय मे तेरु नीयाव करीन तीना गुनावाळु नी ठहरावो, काहाकी मे ईनी कळीन मनख्‌यान नीयाव करीन गुनावाळु ठहरावणे नी आयु, बाकुन तीनुक छुटकारु आपणे करीन आवलु छे।
JOH 12:48 जु मेसेक नानु समजीन मारी सीकाड़ली वात काजे नी माने, तीनाक गुनावाळु ठहरावणे वाळु ते एक छे, ज मे सीकाड़लु छे की चे बुले तीनाक आवणे वाळा दाहड़ाम मतलब नीयावेन दाहड़े गुनावाळु ठहराय देसे।
JOH 12:49 मे मारी मरजी सी काय बी नी कह्‌यु, बाकुन माणसेक काय-काय कहणु चाहजे ने काय सीकाड़नु चाहजे भगवान बास, जु मेसेक मकेल्‌लु छे, चु की चु मेसेक हुकुम आपीन देखाड़लु छे।
JOH 12:50 मे जाणो की जे बुले कहणे करीन भगवान बास मेसेक हुकुम आप्‌लु छे, तींद्‌रेम अमर जीवेनेन ताकत छे, ने जसु भगवान बास मेसेक कहलु छे, तसु ने तसु मे सीकाड़ो।”
JOH 13:1 फसह तीहवारेन दाहड़ु आय लाग्‌यु, ने खाणो तीयार हय रह्‌लो। ईसु काजे मालुम हतलो, की जी कळ छुड़ीन भगवान बासेन्‌चां जाणेन मारी घड़ी आय गुयली छे। ईसु आपसा चेला काजे, जे ईनी कळी मां हतला, तीनुक पेहेल सीत परम करतु आय रवलु ने आकरी टेम लग तीनु काजे तसुत परम करतु रयु।
JOH 13:2 सांतो हय रह्‌लो तत्‌यार ईसु ने तेरा चेला तीहवारेन खाणो खाणे करीन बठी गुया, तीने टेमे लग भुतड़ु सीमोन ईस्‌करीयोतीन पुर्‌या यहुदीयान मन मां ईसु काजे धुकु दीन धरावणेन वीच्‌यार नाख देदलु।
JOH 13:3 ईसु जाणतेलु की मे भगवान बासेन्‌चां सी आवलु छे ने भगवान बास मारा हाते मां आखो काय आप देदलु छे ने मे तेरेन्‌चां पछु जाणे वाळु छे।
JOH 13:4 ने चु खाणो खाणे रहणीदीन उबु हय गुयु ने आपसो उपरनो झगल्‌यो नीकाळ लेदु ने कमर मां टुवाल बांद लेदु।
JOH 13:5 ती चु टगार्‌याम पाणी हेड़ लेदु, ने आपसा एक-एक चेलान पाय धुवतु गुयु, ने कमर मां बांदी रवलु, तीना टुवाल सी तींद्‌रा पाय नुछतु गुयु।
JOH 13:6 जत्‌यार ईसु सीमोन पतरसेन्‌चां पाय धुवणे करीन आयु, ती पतरस ईसु काजे कह्‌यु, “ए मालीक! तु मारा पाय धुवणे हय र्‌यु काय?”
JOH 13:7 ईसु पतरस काजे जपाप आप्‌यु, “मे ज करने बाजी र्‌यु, च तु हींताळ नी समजतु बाकुन तु अळतेन समजी जासी।”
JOH 13:8 पतरस ईसुक कह्‌यु, “मे तुसेक मारा पाय कदी नी धुवणी दम।” ईसु पतरस काजे कह्‌यु, “कदी मे तुसेक नी धुवों, ती मार साते रवणे मां हक नी जड़े।”
JOH 13:9 ज सामळीन सीमोन पतरस ईसुक कह्‌यु, “ए मालीक! असो हय ती तु मारा पाय अतरा नी बाकुन मारा हात ने मुणको लग धुय दे।”
JOH 13:10 ती ईसु पतरस काजे अळी कह्‌यु, “जु उंघळी लेदलु छे, तीनाक आपसा पाय अतरा धुवणु छे, तेरो आखो डील ते चुखलो छे। तुहुं ते चुखला छे, बाकुन आखा ने आखा चुखला नी हय।”
JOH 13:11 ईसु काजे मालम हतलो की मेसेक कुण धरावसे, चु कह्‌यु, “तुहुं आखा ने आखा चुखला नी हय।”
JOH 13:12 जत्‌यार ईसु तींद्‌रा पाय धुय देदु, ती आपसो झगल्‌यो पछु पेहरीन अळी पछु बठ गुयु, ने तीनुक कह्‌यु, “मे तुंद्‌रे साते ज वेहवार कर्‌यु, तीना वेहवारेन मतलब तुहुं समजी गुया काय?
JOH 13:13 तुहुं मेसेक मास्‌तर ने मालीकेन नाते बुलाड़ी र्‌या ने तुहुं सय कय र्‌या, काहाकी मे छाचलीन चु ने चु छे।
JOH 13:14 कदी मे तुंद्‌रु मालीक ने मास्‌तर हय्‌न बी तुंद्‌रा पाय धुयु ती तुहुं बी एक दीसरान पाय धुवणु चाहजे।
JOH 13:15 मे ते तुंद्‌रा पाय धुवीन तुंद्‌रे वाटे दाखलु देखाड़लु छे, ने जसु मे ने तुंद्‌रे साते वेहवार करलु छे, तसु तुंद्‌रे वेहवार तुहुं बी दीसरा साते वेहवार करु।
JOH 13:16 मे तुहुं काजे छाची छाचीन ज कहं, काय हक मां रहणे वाळु पावर्‌यु आपसान मालीक सी मटु नी हय ने मकलन्‌या सी मटु नी हय।
JOH 13:17 कदी तुहुं जी वात समजीन एरे अनसारे जीवु ती तुहुं बरकतवाळा रवसु।”
JOH 13:18 “मे तुहुं आखा काजे बरकतवाळा नी कह्‌तु काहाकी मे तीनु आखाक जाणो जीनुक मे नेवाड़लु छे बाकुन तींद्‌रे मायन एक जम छे, तेरे बारामां असो लिखलो छे जु मारु रुटु खादु, चु मेसेक लातावणे बाजी गुयु, ची वात पुरी हवसे करीन मे तीनाक बी नेवाड़लु छे।
JOH 13:19 हय मे तुहुंक पेहलुत ज कयदम, तेरेसी मारो कहंलो पुरो हय जाय, ती तुहुं भुरसु करसु, की मे चु ने चु छे।
JOH 13:20 मे तुहुंक छाची छाचीन ज कहं, जु काहनु मारे सी मकेल्‌ला माणसे काजे मानीन तेरो आव-भाव करे, चु मेसेक मानीन मारुत आव-भाव करे, चु मेसेक मकेलन्‌याक मानीन तेरुत आव-भाव करे।”
JOH 13:21 जी वात कयदीन ईसु जीवेम बेसकु कलपी गुयु, ने जी गवाय देदु काय वात नी सात्‌यु ने कह्‌यु, “मे तुहुंक छाची-छाची कहं तुंद्‌रे मायन एक जणु मेसेक धराय देसे।”
JOH 13:22 चेलाक ज नी समज पड़्‌यो की ईसु कुणीन बारामां कहंणे बाजी र्‌यु, ने चेला चकरायन एक दीसरा भीणी भाळने बाजी गुया।
JOH 13:23 तीनु बारे चेला मायन एक जणु, “ईसुन लाटेक्‌लु चेलु।” कहंवायतेलु। चु ईसुन छाती भीणी एक कड़्‌यु वळीन बठी रवलु।
JOH 13:24 सीमोन पतरस तीनाक ईसारु करीन जां कह्‌यु, “ईसुक पुछ, चु चेलु कुण छे।”
JOH 13:25 तत्‌यार चु असु की असु ईसुन छाती भीणी अळीन बठी रवलुत ईसुक कळेन पुछ्‌यु, “ए मालीक! जु कुण छे?”
JOH 13:26 ईसु तीनाक कळेन जपाप आप्‌यु, “मे तीनाक रुटान कवळ उलन मां चुपड़ीन आपीस, चु की चु मेसेक धरावण्‌यु छे।” ने चु रुटान कवळ चुपड़ीन सीमोन ईस्‌करीयोतीन पुर्‌या यहुदा काजे आप्‌यु।
JOH 13:27 ने रुटान कवळ धरीन मुंहडाम नाख्‌तुत यहुदान डीलेम भुतड़ु भरायन तीनाक कब्‌जाम कर लेदु। तत्‌यार ईसु तीना यहुदाक कह्‌यु, “ज काम तु करने हींड र्‌यु च छाटुस कर।”
JOH 13:28 बाकुन चां खाणो खाणे बठी रवला चेला मायन कुयक बी जी वात समज नी पड़ी की ईसु तीनाक जी वात काहा कह्‌यु।
JOH 13:29 यहुदा धड़े थयलि हतली, ने काहनाक-काहनाक ज समज्‌या की ईसु तीनाक ज कह्‌यु हसे की, आपणु तीहवार वाटे ज काय चाहजे च मुल ली लेजे, नी ते गरीबेक आप दे।
JOH 13:30 अळतेन रुटान कवळ खायलीन यहुदा तत्‌यारुत खयड़े जाती र्‌यु। तीने टेमे रात हय वागली।
JOH 13:31 यहुदाक खयड़े जाणी दीन ईसु कह्‌यु, “हय माणसेन पुर्‌या काजे भगवान पेहलुत सी ईज्‌जत जड़ली छे, ने माणसे अगळ भगवान काजे बी माणसेन पुर्‌यान कामे सी ईज्‌जत जड़ने वाळी छे।
JOH 13:32 ने माणसे अगळ माणसेन पुर्‌यान कामे सी भगवान काजे ईज्‌जत जड़से ती भगवान बी माणसेन पुर्‌या काजे सरग वाळु सेक-सींगार पछु आपीन ईज्‌जत करसे ने छाटुस ईज्‌जत करसे।
JOH 13:33 ए मारा लाटेक्‌ला पुर्‌या-पारी! मे अळी ईतरीक वार लग तुंद्‌रे पुठ्‌ये छे, अळतेन तुहुं मेसेक हेरसु ने जसु मे यहुदी मुख्‌याक कहलु, तसु हय मे बी तुहुंक कहो, जां मे जाणे हींड र्‌यु चां तुहुंक नी आवाये।
JOH 13:34 मे तुहुंक एक नवलु हुकुम आपो, तुहुं एक दीसरा पर परम राखु जसु मे तुंद्‌रे पर परम राख्‌यु तसा तुहुं बी एक दीसरा पर परम राखु।
JOH 13:35 कदी तुहुं एक दीसरा पर परम राखसु ती च देखीन आखा माणसे जाण लेसे की तुहुं मारा चेला छे।”
JOH 13:36 सीमोन पतरस ईसु सी पुछ्‌यु, “ए मालीक।” “तु कां जाणे हींड र्‌यु?” ईसु पतरस काजे कह्‌यु, “मे जां जाणे हींड र्‌यु चां तुसेक हींताळ नी आवाये बाकुन अळतेन तु चां आवसी।”
JOH 13:37 पतरस तीनाक कह्‌यु, ए मालीक! मेसेक हींताळ तु जाय चां काहा नी आवाये? “मे तार वाटे मारु जीव बी आप दीस।”
JOH 13:38 ईसु पतरस काजे जपाप आप्‌यु, “तु मारे वाटे आपसु जीव आप देसी काय? मे तुसेक छाची छाचीन ज कहं कुकड़ा वासणेन पेहलुत तु तीन कावा दीसरा अगळ असुत कह्‌सी की मे ईसुक जाणो लग नी।”
JOH 14:1 “तुंद्‌रु जीव घाबरायणु नी चाहजे। भगवान पर भुरसु करु, ने मारे पर बी भुरसु करु।”
JOH 14:2 मारा भगवान बासेन घर मां रहणे करीन बेसकु जागु छे, कदी नी रहतु ती तुहुंक पेहलुत कय देतु। मे तुंद्‌रे वाटे घरेन तज्‌बु करने करीन जाणे हींड र्‌यु।
JOH 14:3 ने मे जाय्‌न तुंद्‌रे वाटे आखो तीयार कर दीस ती तुहुंक लेणे करीन अळी पछु आवीस। ने तुहुंक मारेन्‌चां असु करीन ली जायस की जां मे रहो चां तुहुं बी रहु।
JOH 14:4 मे जां जाणे हींड र्‌यु, चां जाणेन वाट तुहुंक मालुम छे।
JOH 14:5 थोमा ईसुक कह्‌यु, “ए मालीक! हामुक ज बी मालुम नी हय की तु कां जाणे हींड र्‌यु ती हामुक चां जाणेन वाट कसा काय जाणसुन?”
JOH 14:6 ईसु थोमा काजे कह्‌यु, “वाट, छाचली ने जीवात मेत छे। मारेन्‌चां नी आवे ती तीनाक भगवान बासेन्‌चां नी जावाये।”
JOH 14:7 कदी तुहुं मेसेक उळखी लेता, ती मारा बासेक बी उळखी लेता, “बाकुन ज छाचलीन छे, की तीनाक तुहुं देखला छे, ने हाय सी मारा भगवान बासेक उळखी बी लेसु।”
JOH 14:8 फीलीप्‌पुस ईसुक कह्‌यु, “ए मालीक! हामु काजे तारु बास देखाड़ दे, हामरे वाटे अतरोत घणो।”
JOH 14:9 ईसु फीलीप्‌पुस काजे कह्‌यु, “ए फीलीप्‌पुस! मे अतरा दाहड़ा लग तुंद्‌रे पुठ्‌ये र्‌यु, ने तेबी तुहुं मेसेक नी उळखु? जु मेसेक देखलु छे। चु भगवान बास काजे बी देखलु छे। तु असु काहा कह्‌यु की हामु काजे बास देखाड़ दे।
JOH 14:10 तुसेक भुरसु नी आवतु काय की भगवान बास मारे मां छे, ने मे भगवानेन बास मां छे, मे जे बुले तुहुंक कह्‌वो चे बुले मारा नी हय बाकुन बास मारेम रवीन बुले ने मारे सी तेरा मटा काम करे।
JOH 14:11 मारी ईनी वात पर भुरसु करु की मे भगवान बास मां छे, ने भगवान बास मारेम छे, कदी मारी ईनी वात पर तुहुंक भुरसु नी आवतु ती कम सी कम ईना मटा कामे मारे सी हवे। तीनु कामेक देखीन ईनी वात पर भुरसु करु।”
JOH 14:12 मे तुहुं काजे छाचलीन ज कहं, जु मारे पर भुरसु करे, ने च बी मे करो चे काम करसे। मेते भगवान बासेन्‌चां जाणे बाजी र्‌यु। ने मार पर भुरसु करन्‌या ईनु कामे सी बी मटा काम करसे।
JOH 14:13 ने तुहुं ज काय मारे नावे भगवान बास सी दुवा करीन मांग्‌सु, च काम मे करीस तेरेसी पुर्‌यान सी मतलब मारे सी भगवान बासेन ईज्‌जत जड़े।
JOH 14:14 तुहुं ज बी मारे धड़े मार नाव सी दुवा करीन मांग्‌सु च मे काम करीस।
JOH 14:15 कदी तुहुं मारे सी परम करसु ती मारा हुकुम काजे बी पाळसु।
JOH 14:16 ने मे बास सी दुवा करीस ने चु तुंद्‌रेन्‌चां मारी आवजी पर एक दीसरु सात देण्‌यु मकलसे चु जलम तुंद्‌रे पुठ्‌ये रवसे।
JOH 14:17 मतलब छाचली जीव-आत्‌मा काजे मकलसे। तुहुं ते तीनाक जाणु, काहाकी चु तुंद्‌रे साते रहे बाकुन आवणे वाळा दाहड़ाम चु तुंद्‌रेत मां रवसे। बाकुन भगवानेन काम रुकण्‌या कळीन माणसे छाचली जीव-आत्‌मा काजे आपसा जीव वाटे जागु नी आपे काहाकी चे तीनाक देख्‌या बी नी ने उळखे बी नी।
JOH 14:18 “मे मरीस बाकुन तुहुं काजे एखला नाखीन नी जाम मे तुंद्‌रेन्‌चां अळी आवीस।
JOH 14:19 ईतरीक वार अळतेन ईनी कळीन माणसे जे मारे पर भुरसु नी करे चे मेसेक अळी नी देखे बाकुन तुहुं मेसेक अळी देखसु मे अळी जीवतु हय जायस ने जीवतेलु रवीस ने तुहुं बी जीवतेला रवसु।
JOH 14:20 मे पछु जीवतु हय जायस तीने दाहड़े तुहुं समजी जासु की मे मारा बासेम छे, ने तुहुं मारेम छे, ने मे तुंद्‌रेम छे।
JOH 14:21 “तींद्‌रे भीणी मारी हुकुम छे, चु मारी हुकुम जाणे ने तीनुक पाळे, ने चु मारसी परम राखे, तीनाक मारु बास बी परम राख्‌से ने तीनाक मे बी परम करीस ने मे आपसा काजे तेरे अगळ उजेंतु करीस।”
JOH 14:22 तत्‌यार ईस्‌करीयोती यहुदा नी बाकुन एक दीसरु यहुदा, ईसु काजे पुछ्‌यु “ए मालीक तु हामरे अगळ आपसाक उजेंतु करीस ने ईनी कळीन मनख्‌या पर उजेंतु नी करे?”
JOH 14:23 ईसु तीना यहुदा काजे कह्‌यु, “कदी काहनुक मारे सी परम राख्‌से ती चु मारी सीकाड़ली वात काजे मानीन जीवसे ने मारु भगवान बास तेरे सी परम राख्‌से ने हामु तेरेन्‌चां आवसुन ने तीनाम रवसुन।
JOH 14:24 जी सीकाड़ली वात तुहुंक आप्‌यी र्‌यु ची आखी वात सीकाड़ली वात मारे वात मारे वावड़ते नी हय बाकुन मेसेक मकलन्‌या भगवान बास सी छे। चु मारे सी परम राखे चु मारी सीकाड़ली वात काजे मानीन नी जीवे ने मे आपसा काजे तेरे अगळ उजेंतु नी करो।”
JOH 14:25 “मे जी आखी वात तुंद्‌रे पुठ्‌ये रय्‌न तुहुंक कह्‌लु छे।
JOH 14:26 बाकुन चु सात देण्‌यु चुखली-आत्‌मा तीनाक भगवान बास मार नाव सी मकेलसे चु तुहुंक आखी वात सीकाड़से ने ज काय बी मे तुहुंक कह्‌लु छे, च आखो हेर कराड़से।”
JOH 14:27 मे तुहुंक जीवेन सांती आपीन जाम मारी सांती तुहुंक आपी जाम, जसा ईनी कळीन माणसे सांती आपे, तसली सांती तुहुंक नी आप्‌तु; ने तुहुं तुंद्‌रा जीवेन घुण घाबरायजु ने घुण बीहजु।
JOH 14:28 मे जाणे बाजी र्‌यु, मे भगवान बासेन्‌चां जाणे बाजी र्‌यु, चु भगवान बास मारे सी मटु छे, कदी तुहुं मार सी परम राखु ती जी सामळीन खुस हवजु।
JOH 14:29 मे ज आखो हवणेन पेहलुत तुहुंक कय देदलु छे। मे असु करीन कय देदु की, ज मे कहलु च हय जाय, तत्‌यार तुहुं मारी वात पर भुरसु करु।
JOH 14:30 हय ईनी कळीन मुख्‌यु भुतड़ु मेसेक मारने करीन आवणे बाजी र्‌यु, ने तुंद्‌रे साते जादा वार लग वात नी करो ने चु मेसेक कब्‌जाम नी कर सके।
JOH 14:31 तेबी मे तेरा कब्‌जाम हय्‌न मर जाम काहाकी मारा भगवान बासेन जीत मरजी छे; असु करीन की ईनी कळीन माणसे ज जाण लेय की मे बास सी परम राखो ने बास मेसेक ज काय हुकुम आप्‌लु, मे तसु की तसु करो। उठ! हय आपणु जां सी जाजे।
JOH 15:1 ईसु कह्‌यु, “अंगुरेन खरलु वेलु मेत छे। ने ईना अंगुरेन वेलान राखवाळ्‌यु किरसाण मारु भगवान बास छे।”
JOH 15:2 मारा डाळ्‌या मायन जे डाळ्‌या नी फळे, तीनुक मारु भगवान बास काट नाखे। ने जे डाळ्‌या फळे, चे डाळ्‌या अळी बी अदु फळनु चाहजे करीन तीनुक छाटे।
JOH 15:3 तुहुं काजे जी वात सीकाड़लु छे, तीनी वात सी तुहुं चुखा हय गुयला।
JOH 15:4 अळी अळीन फळ लावणे करीन मे तुहुंक चुखा करलु छे, जीनु डाळ्‌या काजे अंगुरेन वेला मां सी काट नाख्‌या, चे डाळ्‌या मारेम जुड़ायला नी हय, ने चे आपसात नी फळे। तीने रीते मारेम जुड़ायला नी रहे ती फळ बी नी लावे, ने तुहुं मारेम जुड़ायला रहु ने मे तुंद्‌रेम जुड़ायलु रवीस।
JOH 15:5 “चु अंगुरेन वेलु छे, ने तुहुं मारा डाळ्‌या छे, मार सी छेटे रय्‌न तुहुं काय बी नी कराये। ने जु मारेम जुड़ायलु रहे ने मे तेरेमां जुड़ायलु रवसे, चु बेसकु फळसे।”
JOH 15:6 जे मारेम जुड़ायला नी रहे चे तीनु डाळ्‌यान तसा छे, तीनुक किरसाण काटीन नाख देय ने चे सुक जाय ने किरसाण ईछीन आकठा मां नाख देय ने चे धप जाय।
JOH 15:7 कदी तुहुं मारेम जुड़ायला रवसु ने मारी सीकाड़ली वात काजे मान्‌ता रवसु, ती च बी चाहजे च दुवा करीन मांगजु ने मे तुहुंक आपी दीस।
JOH 15:8 असा करीन तुहुं बेसका फळ लावसु, ती मारा भगवान बासेन बड़ाय हवसे ने तत्‌यार तुहुं मारा पक्‌का चेला बण जासु।
JOH 15:9 जसु भगवान बास मारे सी परम राखलु छे तसुत मे बी तुंद्‌रे सी परम राखलु छे। तुहुं मारा ईना परम मां बणीन रवजु।
JOH 15:10 मे मारा भगवान बासेन हुकुम पाळतु जाय्‌न तेरा परम मां बणीन रवु, तसात तुहुं बी मारा हुकुम पाळसु ती मालम पड़से की तुहुं मारा परम मां बन्‌ला छे।
JOH 15:11 मे तुहुं काजे ज असु करीन कह्‌यु की, तुहुं काजे मारु हुकुम पाळनेन खुसी जड़ती रवे ने ची खुसी पुरी की पुरी जड़ जाय।
JOH 15:12 मारु हुकुम जु छे की जसु मे तुंद्‌रे सी परम करलु, तसा तुहुं बी एक दीसरा सी परम करता रवजु।
JOH 15:13 आपसा दुस्‌तीदार सी परम करीन तींद्‌रे वाटे मरनु आखा सी मटु परम छे। असलु परम सी मटु काहनु बी परम नी हय।
JOH 15:14 कदी तुहुं मारा हुकुम पाळसु ती तुहुं मारा खरला दुस्‌तीदार कहंवायसु।
JOH 15:15 पावर्‌या काजे मालम नी पड़े की तेरा मालीकेन मरजी काय छे, ने चु काय करने वाळु छे। बाकुन मे मारा बास सी सामळ्‌ळु च आखो तुहुंक कय देदलु छे, ने हय सी मे तुहुंक पावर्‌या नी कहं बाकुन दुस्‌तीदार कहीन।
JOH 15:16 “तुहुं मेसेक नी नेवाड़्‌या, बाकुन मे तुहुंक नेवाड़ीन तुहुंक मारे कामे लागाड़लु छे, की तुहुं मारो नाव लीन भगवान बास सी ज काय दुवा करीन मांगसु च भगवान तुहुंक आप देसे
JOH 15:17 मे तुहुं काजे जे हुकुम असु करीन आप र्‌यु की, तुहुं एक दीसरा पर परम राखता रहु।”
JOH 15:18 “कदी ईनी कळीन माणसे तुंद्‌रे पर भुंडा सुचे, ती तुहुं ज हेर राख्‌जु की तुंद्‌रे सी पेहेल चे मारे पर भुंडा सुचे।”
JOH 15:19 कदी तु ईनी कळीन माणसे रहता तत्‌यार चे तुहुंक आपणा समजीन परम राखता बाकुन मे तुहुं काजे ईनी कळीन माणसेम सी नेवाड़ लेदलु छे, करीन चे तुंद्‌रे बारामां भुंडा सुचसे।
JOH 15:20 मे तुहुंक जी वात कह्‌यु तीनीक हेर राख्‌जु की, पावर्‌यु आपसा मालीक सी मटु नी हय। मे तुंद्‌रु मालीक छे, तेबी माणसे मेसेक वेला पाड़्‌या असला माणसे तुहुंक बी वेला पाड़से ईनी कळीम वाळा माणसे मारी सीकाड़ली वात काजे नी मान्‌या ती तुंद्‌री सीकाड़ली वात बी नी माने।
JOH 15:21 असला माणसे, मेसेक मकेलन्‌या भगवान काजे नी उळख्‌या, ने मारी वीरुद कर्‌या, तुहुं ते मारो नाव ली र्‌या ने चे तुहुं काजे भुंडात करीन तुहुंक वेला पाड़से।
JOH 15:22 कदी मे नी आवतु ने हीनुक पापेन बारामां भगवानेन छाचली वात नी सीकाड़तु, ती हीनुक पाप नी लागतु बाकुन हय ते हींद्‌रे धड़े आपसा पापेन बारामां ढंगड़ा करनेन मुखु नी हय।
JOH 15:23 जु मेसेक भुंडु समजे, चु मारा भगवान बास काजे भुंडु समजे।
JOH 15:24 कदी मे तींद्‌रे अगळ चे मटा कामे नी करतु, चे कामे कुय बी दीसरु कदी नी कर्‌यु, ती तीनुक पाप नी लाग्‌तु बाकुन हय ते चे असा काम देखीन बी मेसेक नी मान्‌या ने सांबा मार भीणी ने मारा भगवान बास काजे भुंडा करला छे।
JOH 15:25 ज असो काहा हयो काहाकी खरला सास्‌तुर मां लिखलो हतलो च पुरो हवे चां असो लिखलो छे, की चे माणसे फालतु मां मारा वेरी बण गुयला छे।
JOH 15:26 मे तुंद्‌रेन्‌चां सात देण्‌या काजे मतलब छाचली जीव-आत्‌मा काजे भगवान बासेन चां सी मकलीस, जत्‌यार चु छाचली जीव-आत्‌मा भगवान बासेम सी आवसे ती चु मारे बारामां गवा देसे।
JOH 15:27 ने तेरे पुठ्‌ये तुहुं बी मारी गवाय देसु काहाकी तुहुं सुरु सीत मारे पुठ्‌ये रवला छे।
JOH 16:1 “मे तुहुं काजे जी आखी वात असु करीन कह्‌लु, छे की जत्‌यार माणसे तुहुंक वेला पाड़से, तत्‌यार तुहुं मार पर भुरसु छुड़ीन भटकाड़्‌यु घुण।
JOH 16:2 माणसे तुहुं काजे तुंद्‌रा भक्‌तीन घर मां सी नीकाळीन बाहर कर देसे, ने छाचलीन जी टेम आवणे बाजी रय की, माणसे ज समजीन तुहुंक मारसे की हामु ईनुक मारीन भगवानेन सेवा चाकरी कर र्‌या।
JOH 16:3 छाचलीन चे भगवान बासेक बी नी उळखे, ने मेसेक बी नी उळखे, ने चे तुंद्‌रे साते असा वेहवार करसे।
JOH 16:4 मे तुहुंक जी आखी वात असु करीन कह्‌लु छे, की जत्‌यार चे तुहुंक वेला पाड़से, ती तुहुं काजे आखी वात हेर आवणु चाहजे की, मे तुहुंक जी वात पेहलुत कयदीन काठु करलु छे।” अतरा दाहड़ा मे तुंद्‌रे पुठ्‌ये हतलु करीन मे जी आखी वात सुरु मां नी कह्‌यु।
JOH 16:5 बाकुन हाय मे तेरेन्‌चां जाणे हींडी र्‌यु, जु मेसेक मकेल्‌लु छे, ने तुंद्‌रे मायन काहनुक मेसेक बी छाचे मने ज नी पुछतु की तु कां जाणे हींड र्‌यु?
JOH 16:6 मे तुहुंक जी आखी वात कय देदु, करीन तुंद्‌रो मन सुच मां पड़ गुयो, ने तुहुं मेसेक नी पुछता।
JOH 16:7 बाकुन मे तुहुंक छाचलीन कह्‌वो की, मे जाती रय्‌स ती तुंद्‌रे वाटे वारु रवसे काहाकी मे नी जाम ती तुहुंक सात देण्‌यु तुंद्‌रेन्‌चां नी आवे बाकुन मे जायस ती तीना सात देण्‌या काजे तुंद्‌रेन्‌चां मकली दीस।
JOH 16:8 जत्‌यार चु सात देण्‌यु चुखली-आत्‌मा आवसे ती ची ईनी कळीन माणसेक तींद्‌रा पापेन बारामां ने तींद्‌रा धरमेन बारामां ने तींद्‌रा नीयावेन बारामां पुरावु भेळु गुनु देखाड़ीन समजाड़से।
JOH 16:9 कळीन माणसे मारे पर भुरसु नी करता, करीन चुखली-आत्‌मा तींद्‌रा पापेन बारामां तीनुक पुरावा भेळु गुनु समजाड़से।
JOH 16:10 मेते भगवान बासेन्‌चां जाणे हींड र्‌यु, ने जत्‌यार मे जाती रय्‌स ती तुहुं मेसेक नी देखु मारी आवजी पर चुखली-आत्‌मा तुंद्‌रे पुठ्‌ये रय्‌न कळीन माणसेक तींद्‌रा झुटा धरमेन बारामां पुरावा भेळु गुनु देखाड़ीन समजाड़से।
JOH 16:11 ईनी कळीन मुख्‌यु भुतड़ान नीयाव हय गुयला छे ने तेरा पापेन डंड तीनाक छाटुस भुकेतणु पड़से ने चुखली-आत्‌मा कळीन माणसेक बी तींद्‌रा झुटा नीयावेन बारामां पुरावु भेळ गुनु देखाड़ीन समजाड़से।
JOH 16:12 तुहुंक कहंणे करीन अळी बेसकी वात मारा मन मां आय रय बाकुन हींताळ कयस ती तुहुंक वेठाये नी।
JOH 16:13 जत्‌यार चु छाचलीन जीव-आत्‌मा आवसे, ती चु तुहुंक भगवानेन आखी छाचली वाटे ली जाणे अगवाय करसे काहाकी चु आपसे आवड़ते काय बी नी कह्‌वे, बाकुन चु ज काय मारे सी सामळसे चत कवसे ने आवणे वाळी वातेन बारामां बी तुहुंक देखाड़से।
JOH 16:14 चु मारी सेक-सींगार करसे, काहाकी ज काय मारो छे च बताड़से, ने आखी चीज जी बासेन छे ची मारी छे।
JOH 16:15 तेरेमां मे कह्‌यु की ज काय भगवान बासेन छे, च आखो मारो छे चु तीनाक लेसे ने तुहुंक बताड़से।
JOH 16:16 “ईसु आपसा चेलाक पेहलुत सी कह्‌तु गुयु, ईतरीक वार मां तुहुं मेसेक नी देखु ने अळी ईतरीक वार मां मेसेक देख्‌सु।”
JOH 16:17 ने ईसुन चेला मायन ईतराक चेला आपसा आपसात कह्‌या, “हयु आपणुक काय कय र्‌यु, च आपणुक समज मां नी आवतो हयु कह्‌यु की ईतरीक वार मां तुहुं मेसेक नी देखु ने अळतेन अळी ईतरीक वार मां तुहुं मेसेक देखसु चु ईतरीक वार पेहेले असु बी कह्‌लु, काहाकी मे भगवान बासेन चां जाणे हींडी र्‌यु।” ईनी दुय वातेन मतलब काय छे।
JOH 16:18 चे कह्‌या हयु ईतरीक वार मां कहें च काय कहंवाये हामुक समज मां नी आवतो की हयु हामुक काय कय र्‌यु।
JOH 16:19 ईसु ज जाण लेदु की हया मेसेक मारी ईनीक वातेक लीन सवाल पुछणे हींडे की ईतरीक वार मां तुहुं मेसेक नी देखु, ने अळी ईतरीक वार मां तुहुं मेसेक देख्‌सु करीन ईसु तीनुक कह्‌यु, “तुहुं आपसा-आपसा मारी ईनी वातेन बारामां वीच्‌यार काहा कर र्‌या?
JOH 16:20 मे तुहुंक छाची छाचीन ज कहं, ईतरीक वार मां तुहुं रड़सु ने कलेपसु बाकुन ईनी कळीन माणसे खुस हवसे, ने हय तुहुं दुखी हवसु ते खरा बाकुन अळतेन तुहुं दुखी हवणु रहणीदीन खुस हय जासु।”
JOH 16:21 “भारीस बायर फवरी हवणे वेळाय बेसकी वेला करीन कलपे, बाकुन जत्‌यार ची फवरी हय जाय ती, बेसकी खुस हवे। हय ईनी कळी मां एक पुर्‌यु पयदा हवलु, करीन ची एक वेलान वात काजे ईसरी जाय।”
JOH 16:22 असात हय ते तुहुं बी दुखी छे, बाकुन मे अळी तुहुंक भेळु हय्‌स तत्‌यार तुंद्‌रा मन मां खुसी आय जासे, ने तुंद्‌री खुसी तुंद्‌रे सी कुय सी नी हापकाये।
JOH 16:23 तीने दाहड़े तुहुं मारे सी काय बी नी पुछु मे तुहुं काजे छाची-छाची कह्‌वो, कदी तुहुं भगवान बास सी मारे नावे दुवा करीन काय बी मांगसु, ती चु तुहुं काजे आपसे।
JOH 16:24 आज लग तुहुं मारे नावे दुवा करीन काय बी नी मांग्‌या। मांगसु, ती भगवान तुहुंक आपसे, असु करीन की तुंद्‌री खुसी पुरी हय जाय।
JOH 16:25 “मे तुहुं काजे जी आखी वात दाखलु दीन कह्‌लु छे। असी टेम आवणे बाजी रय की मे तुहुं काजे अळी दाखलु दीन वात नी बताड़ो, बाकुन भगवान बासेन बारामां वात खुलीन बताड़ीस।
JOH 16:26 तीने दाहड़े तुहुं मारे नाव सी मांगसु ने मे तुंद्‌रे सी ज नी कवतु की मे तुंद्‌रे वाटे भगवान बास सी दुवा कर्‌यु।
JOH 16:27 बाकुन भगवान बास आपसुत तुंद्‌रे सी परम करे, काहाकी तुहुं मारे सी परम राखु ज भुरसु कर लेदला छे की मे भगवान बासेम सी आयु।
JOH 16:28 मे भगवान बास सी नीकळीन कळी मां आय गुयु, ने अळी पछु कळी काजे छुड़ीन भगवान बास भीणी जाणे बाजी र्‌यु।”
JOH 16:29 ईसुन चेला ईसु काजे कह्‌या, “देख, तु हय दाखलु दीन नी कवतु बाकुन चुखो झण कह्‌णे बाजी र्‌यु।
JOH 16:30 हय हामु समजी गुयला छे की, तु आखो काय जाणे। हामु तुसेक ज पुछणे हींड र्‌या तीनी वातेक बी तु पेहल सीत जाणी लेय ने तु जी हेर नी करतु की कुय तुसेक पुछणु चाहजे, तारेम काय बी कसर नी हय ने हामु भुरसु करजे की तु भगवान बास सी आवलु छे।”
JOH 16:31 ईसु तीनु काजे कह्‌यु, “काय तुहुं हय भुरसु करु?
JOH 16:32 बाकुन देखु! असी टेम आवणे बाजी रय ने आय गुयली छे, जत्‌यार तुहुं आखा की आखा रावण्‌या-तीवण्‌या हय जासु ने मेसेक एखलुत छुड़ीन जाती रवसु। तेबी मे एखलु नी हय काहाकी भगवान बास मार पुठ्‌ये छे।”
JOH 16:33 “हय, ईनी कळी मां तुहुंक वेला करनु पड़से तेबी काठु जीव करजु, मे ईनी कळीक जीत लेदलु छे। मे तुहुं काजे जी आखी वात असु करीन कह्‌लु छे की, आवणे वाळा दाहड़ाम दुख झेलता जाय्‌न बी तुहुं मारेम छे ची सांती हात कर लेय।”
JOH 17:1 जी वात कयदीन ईसु सरग भीणी भाळीन कह्‌यु, “ए मारा भगवान बास! तारा पुर्‌यान मरनेन घड़ी आय गुयली छे। ने तारा पुर्‌यान सेक-सींगार उजेंतु कर तेरे सी तारु पुर्‌यु बी तारु सेक-सींगार उजेंतु कर देय।
JOH 17:2 तु ते तारा पुर्‌या काजे आखा माणसे पर हक आपलु छे, की तीना हक सी चु आखा माणसेन ईचमां तारु सेक-सींगार उजेंतु करे ने तींद्‌रेम सी जत्‌यार बी माणसे तु तेरा हाते सुपलु छे, तीनु आखा काजे चु अमर जीवाय आप देय।
JOH 17:3 एकुत छाचलु भगवान तुत छे, ने मे ईसु तारे सी मकेल्‌लु छुड़ावन्‌यु मसी छे, तुसेक ने मेसेक जाणीन मान्‌ने सीत माणसेक अमर जीवाय जड़से।
JOH 17:4 ज काम तु मेसेक करने करीन आपलु हतलु, च काम करीन धरती पर तारो सेक-सींगार काजे उजेंतु करलु छे।
JOH 17:5 ए भगवान! कळी नी घड़ाय ने पेहलुन, मे तारे पुठ्‌ये हतलु, ने मे नी तारेन तसु सेक-सींगार मां हतलु हय मेसेक तीना सेक-सींगार मां पछु भेसकी ले।”
JOH 17:6 तीनु माणसे काजे तु ईनी कळीम सी नेवाड़ीन मेसेक सुपलु चे तींद्‌रे अगळ मे तारो नाव उजेंतु कर देदलु छे, छाचलीन चे माणसे तारात हतला, ने तु तीनु काजे मार हातेम सुप देदु, ने चे तारा बुल काजे मानीन पाळ र्‌या।
JOH 17:7 हय चे जाण गुया की ज काय तु मेसेक देदलु छे, च आखो तारो छे।
JOH 17:8 काहाकी ज बुले तु मेसेक देदलु, ने चे बुले तीनुक बी सामळाय देदु, ने चे मान लेदा ने छाची-छाची जाण लेदा की मे तारे सी आय र्‌यु ने भुरसु कर लेदा की तुत मेसे काजे मकल्‌यु।
JOH 17:9 हींद्‌रे वाटे मे जी दुवा करो ची दुवा तु सामळी ले, मे कळीन माणसे वाटे दुवा नी करतु, बाकुन तींद्‌रे वाटे करो जीनुक तु मारे हातेम सुपलु छे काहाकी चे तारात छे।
JOH 17:10 छाचलीन ज काय मारो छे च तारो छे, ने ज तारो छे च मारो छे। ने हींद्‌रे सी मारु सेक-सींगार उजेंतु हवलु छे।
JOH 17:11 “मे ईनी कळीक छुड़ीन तारेन चां आवणे हींड रयु, बाकुन हय जे चेला कळीत मां रवसे।” ए चुखला भगवान बास! तु ज नाव मेसेक आपलु छे तीने नावे हींद्‌री राखवाळी करो, तेरेसी चे आपणेन तसा एक हय जाय।
JOH 17:12 जत्‌यार लग मे हींद्‌रे साते हतलु, तत्‌यार लग तारा नाव सी हींद्‌री पुरी राखवाळी करतु रयु। तींद्‌रे मायन कुय बी ठायकुत नी सर्‌यु बाकुन एकुत जणु ठायकुत सर गुयु, जु सरने वाळु हतलु। खरला-सास्‌तुर मां लिखली वात पुरी हवणु चाहजे करीन असो हयो।
JOH 17:13 हय मे तारेन चां आवणे हींडी र्‌यु ने मे जी दुवा ईनी कळीम रय्‌न करने बाजी र्‌यु, तेरसी जी खुसी मारेम छे, ची खुसी जे चेला पुरी की पुरी हात करे।
JOH 17:14 मे तारी बुल हीनुक कय देदलु छे ने भगवानेन काम रुकण्‌या काजे ईनी कळीन माणसे हीनु काजे भुंडा कर्‌या काहाकी जसु मे ईनी कळीन माणसे साते संगात नी करो, तसात चे चेला बी ईनी कळीन माणसे साते सात संगात नी करे।
JOH 17:15 मे जी दुवा नी करतु की तु हीनु काजे कळी मां सी ली जाती रहे, बाकुन ज कहो की हीनु काजे भुंडात कामे सी बचाड़ीन राख।
JOH 17:16 जसु मे ईनी कळीन नी हय तसात चे बी ईनी कळीन नी हय।
JOH 17:17 ए भगवान बास तारा बुल चुखला छे ईना छाचला बुल सी ईनुक तारी सेवा वाटे चुखा करीन तीयार कर।
JOH 17:18 जसु तु मेसेक ईनी कळीन चाकरीन हक आपीन मकेल्‌लु छे, तसुत मे बी ईनुक ईनी कळीन चाकरीन हक आपीन मकेल्‌लु छे।
JOH 17:19 ने हींद्‌रा फायदा वाटे मे मारु जीव आपीन आपसाक नेवाड़ीन चुखु करो, काहाकी चे बी तारा छाचला बुले सी तारी सेवा वाटे नेवाड़ीन चुखा हय्‌न तीयार हय जाय।
JOH 17:20 “मे हींद्‌रे वाटे अतरुत दुवा नी करतु, बाकुन तींद्‌रे वाटे बी दुवा कर र्‌यु, जे आवणे वाळा दाहड़ाम हींद्‌री वात सामळीन मार पर भुरसु करसे।
JOH 17:21 मे तींद्‌रे वाटे असी दुवा करो की चे आखा एक मन हय्‌न एक सारका हय जाय करीन। ए भगवान बास! जसु तु मारेम छे, ने मे तारेम छे, तसात चे बी आपणेम भेसकायन एक सारका हय जाय काहाकी ईनी कळीन माणसे तीनुक देखीन असु भुरसु कर लेय की ईसुत भगवानेन मकेलन्‌यु छुड़ावन्‌यु मसी छे।
JOH 17:22 ने जु सेक-सींगार तु मेसेक आप्‌यु, चु सेक-सींगार मे तीनुक आप देदलु छे, काहाकी चे आखा एक मन हय्‌न एक सारका हय जाय जसा आपणु एक सारका छे।
JOH 17:23 मे तींद्‌रेम रवु, ने तु मारेम रहे ने चे आखा ने आखा एक सारका हय जाय ने ईनी कळीन माणसे ज जाण लेय की ईसु भगवानेन मकेल्‌लु मसी छे, ने जसु तु मार सी परम कर्‌यु तसु तु बी तीनुक परम करे।”
JOH 17:24 “ए भगवान बास! जी कळी नी घड़ाय ने पेहलुत मारे सी परम राखलु छे, ने सेक-सींगार आपलु छे। जे माणसे तु मेसेक आपलु छे, चे बी मे जां रहो चां रहणु चाहजे काहाकी चे बी मारु सेक-सींगार देखे।
JOH 17:25 ए धरमी भगवान बास! ईनी कळीन माणसे तुसे नी जाणता बाकुन मे तुसेक जाणो ने मारा चेला जाण लेदला छे, ईसु भगवानेन मकेल्‌लु मसी छे।
JOH 17:26 मे तारो नाव ईनुक बताड़ देदु ने बताड़तु रय्‌स, काहाकी जसु तु मेसेक मारे सी परम करलु, चु परम हींद्‌रेम रव ने मे हींद्‌रेम रहो।”
JOH 18:1 ईसु आपसा भगवान बास धड़े दुवा करीन नवराय गुयु, ने तेरा चेला पुठ्‌ये एक खुदराक एणकीन एक वाड़ी मां गुयु। तीना खुदरान नाव कीदरोन हतलो।
JOH 18:2 ईसु आपसा चेला पुठ्‌ये ईनी वाड़ी मां एकदम जाया करतेलु। ने ईसुक धुकुदीन धराड़ने वाळु चेलु यहुदा, बी ईनी वाड़ीक देख रवलु।
JOH 18:3 अळतेन यहुदा, रोमी सीपायड़ान टुळा काजे लीन, ने मंदीरेन डाहला पुजारा ने फरीसी माणसेन साहरे मकेल्‌ला मंदीरेन राखवाळ्‌या सीपायड़ा काजे लीन तीनी वाड़ी मां आय गुयु। चे कंदल्‌या, बेर्‌या ने हत्‌यार लीन आवला।
JOH 18:4 मारे पर काय-काय वीतसे च आखो जाणीन ईसु अघु गुयु। ने तीनु काजे कह्‌यु, “तुहुं कुणीक हेर र्‌या?”
JOH 18:5 चे तीनाक जपाप आप्‌या “ईसु नासरी काजे, ईसु तीनुक कह्‌यु मे छे।” तीनाक धराड़ने वाळु यहुदा बी तींद्‌रे धड़े उबु हय रवलु।
JOH 18:6 जत्‌यार ईसु कह्‌यु की, “मेत छे” ती चे पछास हय्‌न धरती पर हीट पड़्‌या।
JOH 18:7 ईसु तीनुक अळी पुछ्‌यु, “तुहुं कुणीक हेर र्‌या?” चे कह्‌या, “नासरत सहर वाळा ईसु नासरी काजे हेर र्‌या।”
JOH 18:8 ईसु जपाप आप्‌यु मे तुहुं काजे पेहलुत कय देदु की चु मे हयुत छे, “कदी तुहुं मेसेक हेर र्‌या ती तुहुं मारा ईनु चेला काजे जाणी देवु।”
JOH 18:9 ज असो काहा हयो की ज चु कह्‌यु पुरो हवणु चाहजे, “तीनुक चु मारे सुपरुत करलु छे, मे तीनु मायन एक काजे बी खुवायणी नी दम।”
JOH 18:10 तत्‌यार सीमोन पतरस आपसी तलवार मीयान मां सी नीकाळीन मंदीरेन डाहला पुजारा मुख्‌यान पावर्‌यान देदु। ने तेरो जेवड़्‌यु कान्‌टु काट नाख्‌यु तीना पावर्‌यान नाव मलखुस हतलो।
JOH 18:11 ने ईसु पतरस काजे कह्‌यु, “तलवार मीयान मां पछी भर ले। ज दुखेन पीयालु भगवान बास मेसेक पीणे करीन आप्‌लु छे च दुखेन पीयालु मां पीये करीन तु अड़चन काहा नाख र्‌यु?”
JOH 18:12 अळतेन रोमी सीपायड़ान टुळु, ने तींद्‌रु सुबेदार, ने यहुदी डाहला सी मकेल्‌लु मंदीरेन राखवाळ्‌या सीपायड़ा ईसु काजे धरीन बांद लेदा।
JOH 18:13 ने ईसु काजे धरीन पेहेल मेहेल ते हन्‌ना धड़े लीजा, जु मंदीरेन डाहला पुजारान मुख्‌यी पुजारु हतलु, काहाकी चु हन्‌ना, काइफान सेसरुस हतलु, चु काइफा तीने साल मंदीरेन डाहला पुजारान मुखी हतलु।
JOH 18:14 जु हयुत काइफा हतलु, चु यहुदी मुख्‌याक असु कय्‌न अगवाय करलु की आपणा माणसे भीणी एक माणुस मरनु वारु छे।
JOH 18:15 सीमोन पतरस ने एक अळी दीसरु चेलु ईसुन पछळ-पछळ चाल पड़्‌यु, चु दीसरु चेलु डाहला पुजारान मुख्‌यु हन्‌नान उळखायतु हतलु, ने चु चेलु ईसु पुठ्‌ये मंदीरेन डाहला पुजारान मुखीन घरेन आंगणाम लग गुयु, हीनाक कुय बी नी रुक्‌यो।
JOH 18:16 बाकुन पतरस झपले उबु रय गुयु, ने डाहला पुजारान उळखायतु, चु दीसरु चेलु तीने आंगणे सी पछु खयड़े जाय्‌न झपलान राखवाळ्‌या काजे पुछीन पतरस काजे माहें आंगणाम ली आयु।
JOH 18:17 ची झपलान राखवाळी पावरनी पतरस काजे कह्‌यी, “तु बी तीनु ईसुन चेला मायन नी हय काय?” पतरस कह्‌यु, “नी हय।”
JOH 18:18 सींगेन दाहड़ा हतला, ने घरेन पावर्‌या ने मंदीरेन राखवाळ्‌या सीपायड़ा आकठे तापणे बाजी रवला ने पतरस बी तींद्‌रे पुठ्‌ये तापतेलु।
JOH 18:19 अळतेन मंदीरेन डाहला पुजारान मुखी हन्‌ना ईसु काजे चेलान बारामां ने तेरी सीकाड़ली वातेन बारामां पुछ्‌यु।
JOH 18:20 ईसु जपाप आप्‌यु, “मे मनेन काय बी, नी सीकाड़्‌यु, मे माणसे अगळ उजेंतु कळी मां सीकाड़लु छे; ने मे जलम तुंद्‌रा भक्‌तीन घर मां ने मंदीर मां जां आखा यहुदी भेळा हया करे चां सीकाड़तु रयु।
JOH 18:21 ती तु मेसेक काहा पुछ र्‌यु? सामळन्‌याक असु पुछु की, हयु तुहुंक काय सीकाड़लु छे मे तीनुक काय कहंलु तीनुक मालुम छे।”
JOH 18:22 जत्‌यार ईसु जी वात कह्‌यु ती चां उबा हय रवला मंदीरेन राखवाळ्‌या सीपायड़ा मायन एक जणु ईसुन एक थापड़ देदु। ने कह्‌यु, “तु ते मंदीरेन मुखी पुजारा काजे असु जपाप काहा दी र्‌यु?”
JOH 18:23 ईसु तीनाक जपाप आप्‌यु, “कदी मे काय गलत वात कह्‌यु हय, ती पुरावु दीन देखाड़; बाकुन छाचली वात कह्‌यु हय ती मारे काहा देय?”
JOH 18:24 अळतेन हन्‌ना ईसु काजे असुत बांदायलुत मंदीरेन डाहला पुजारान मुखी काइफान्‌चां मकली देदु।
JOH 18:25 तीने टेमे सीमोन पतरस, आकठा धड़े उबु-उबु तापणे बाजी रवलु। तत्‌यार थुड़ाक माणसे पतरस काजे कह्‌या, “तु बी तेरा चेला मायन एक छे काय?” पतरस ईसुन नीकारु करतु जाय्‌न कह्‌यु मे नी हय।
JOH 18:26 मंदीरेन मुखी पुजारान एक पावर्‌यु, चु तीना पावर्‌यान दुस्‌ती बी हतली, तेरु कान्‌टु पतरस काट नाखलु, “चु पतरस काजे कह्‌यु मे तुसेक तीना ईसु पुठ्‌ये वाड़ी मां देखलु?”
JOH 18:27 पतरस ईसुन अळी नीकारु करतु जाय्‌न कह्‌यु, “मे नी हय” ने तत्‌यारुत कुकड़ु वास देदु।
JOH 18:28 अळतेन यहुदी मुख्‌या ने डाहला पुजारा ईसु काजे काइफान घर मां सी रोमी सरकारेन यरुसलेम राजवाड़ान हवेली वाळा कीलान आंगणाम ली गुया, ने तीने टेमे काय संदारो हय वाग्‌लो ईना रोमी राजवाड़ान राज करन्‌यु पीलातुस नी भुरसु वाळा यहुदी आड़जात्‌या बी हतला, ने यहुदी मुख्‌या ने पुजारा वीच्‌यार कर्‌या की हामु ईना आड़जात्‌या पीलातुसेन हवेली मां भरायसु ती हामु वीटळी जासुन। ने हामुक हामरा फसह तीहवारेन खाणो नी खावाये करीन चे यहुदी मुख्‌या ने पुजारा तीनी हवेली मां नी भराय।
JOH 18:29 ने राज करन्‌यु पीलातुस हवेलीम सी बाहर नीकळीन तींद्‌रे अगळ आयु ने कह्‌यु, “तुहुं ईना माणुस पर काहनु गुनु लागाड़ र्‌या?”
JOH 18:30 चे जपाप आप्‌या, “कदी जु गुनाळु नी रहतु, ती हामु हीनाक तारेन चां नी लावता।”
JOH 18:31 पीलातुस तीनुक कह्‌यु, “तुहुंत ईनाक ली जावु, ने तुंद्‌रा कायदान अनसारे हेरु नीयाव करजु।” यहुदी मुख्‌या कह्‌या “हामुक हक नी हय की काहनाकेन जीव लेणु।”
JOH 18:32 मारी मोत कसी हवसे करीन ईसु पेहलुत तेरा चेला काजे कहंलु। ने ईसुन कहला बुलेन अनसारे आखो हयो ने तेरेत अनसारे हय बी यहुदी मुख्‌या तीनाक मुतेन डंड आपाड़ने करीन पीलातुस साते वात कर्‌या।
JOH 18:33 अळतेन पीलातुस अळी पछु हवेली मां जात र्‌यु, ने ईसु काजे बुलायु ने तीनाक पुछ्‌यु, “तु यहुदी माणसेन राजु छे काय?”
JOH 18:34 ईसु पीलातुस काजे जपाप आप्‌यु, “जी वात तु आपसे आवड़तेत कय र्‌यु की मार बारामां काहना दीसरा तुसेक कहंला छे?”
JOH 18:35 पीलातुस ईसुक जपाप आप्‌यु, “मे यहुदी छे काय? तारीत जातीन माणसे, मंदीरेन डाहला पुजारा भेळा भेसकायन तुसेक धराय्‌न मारे सुपरुत करला छे। तु काहनु गुनु करलु छे?”
JOH 18:36 ईसु कह्‌यु, “मारो राज ईनी कळीन राजान तसों नी हय। कदी मारो राज, ईनी कळीन राजा तसों रहतो, ती मारा राखवाळ्‌या सीपायड़ा मारे वाटे लड़ाय करता, ने मे यहुदी माणसेन हातेम नी धरायतु। बाकुन मारो राज ईनी कळीन राजान तसों नी हय।”
JOH 18:37 च सामळीन पीलातुस ईसुक कह्‌यु, “ती, तु छाचलीन राजा छे काय?” ईसु पीलातुस काजे जपाप आप्‌यु, “तु वारुत कय र्‌यु काहाकी मे राजा छे ने मे छाचली वात ने गवा पुरावा आपणे करीन ईनी कळी मां पयदा हय्‌न आवलु छे ने जीत छाचली छे चु मारी वात सामळीन पाळे।”
JOH 18:38 “पीलातुस ईसु काजे पुछ्‌यु छाचली काय छे?” ज पुछीन पीलातुस अळी हवेलीम सी बाहर नीकळीन यहुदी मुख्‌या अगळ आवीन कह्‌यु, मेसेक ते हीना माणुस मां काय बी गुनु नी देखायतु।
JOH 18:39 बाकुन तुंद्‌री रीतीन अनसारे मे तुंद्‌रे वाटे फसह तीहवारेन टेमे एक केदड़ा काजे जेल मां सी छुड़तेलु, “ने तुंद्‌री मरजी हय ती तुंद्‌रे वाटे यहुदीन राजाक छुड़ दम?”
JOH 18:40 ज सामळीन चे एक कावा अळी आयड़ीन कह्‌या, “हीनाक मां छुड़े, बाकुन बरअब्‌बा काजे छुड़ दे।” ने चु बरअब्‌बा एक डाकु हतलु।
JOH 19:1 अळतेन पीलातुस ईसु काजे लीजाय्‌न सुटा देवाड़्‌यु।
JOH 19:2 ने सीपायड़ा काटाळ्‌या वेळान मुळ्‌यो गुथीन ईसुन मुणका पर मेक देदा ने जामण्‌यो झगल्‌यो पेहराया।
JOH 19:3 ने ईसु धड़े आवीन ईसुक हास्‌ता जाय्‌न कह्‌णे बाजी गुया, “ए यहुदी माणसेन राजा, वारु छे की!” ने चे तीनाक थापड़ाया।
JOH 19:4 पीलातुस अळी बाहर जाय्‌न माणसेक कह्‌यु, “देखु, मारी नींगा मां हेरेम काय बी खुड़ नी देखाव पड़तु, ज तुहुं बी जान्‌नु चाहजे, करीन मे तीनाक अळी बाहर लावलु।”
JOH 19:5 तीने टेमे ईसुन मुणका पर काटाळ्‌या वेळान मुळ्‌यो मेकलोत हतलो, ने तीनाक जामण्‌यो झगल्‌यो पेहरावलोन हतलो, तसुत चु बाहर आयु ने पीलातुस माणसेक कह्‌यु देख, “हयुत छे चु माणुस!”
JOH 19:6 मंदीरेन डाहला पुजारा ने मंदीरेन राखवाळ्‌या सीपायड़ा ईसु काजे देखीन, पीलातुस अगळ असा आयड़ी पड़्‌या की, “हीनाक कुरुस पर टांगीन खीळा ठुकीन मार देवु!” हीनाक कुरुस पर टांगीन खीळा ठुकीन मार देवु! पीलातुस तीनुक कह्‌यु, “मारी नींगा मां हेरेम काय बी खुड़ नी देखाव पड़तु ने ईनाक तुहुंत ली जावु ने तुहुंत ईनाक कुरुस पर टांगीन खीळा ठुकीन मार देवु!”
JOH 19:7 यहुदी मुख्‌या कह्‌या, “हामरे धड़े मुसान लिखला नीयम छे, तेरे अनसारे ईनाक मुतेन डंड जड़नु चाहजे, काहाकी आपसुत भगवानेन पुर्‌यु हवणेन दावु करलु छे।”
JOH 19:8 पीलातुस तींद्‌री जी वात सामळीन अळी बी बीही गुयु।
JOH 19:9 चु अळी हवेलीन आंगणाम ली जाय्‌न तीनाक पुछ्‌यु, “तु कां सी आवलु छे?” बाकुन ईसु तीनाक काय जपाप नी आप्‌यु।
JOH 19:10 ने पीलातुस ईसुक कह्‌यु, “तु मेसेक जपाप काहनी आपतु तुसेक नी मालम हय काय, की मारे भीणी तुसेक छुड़नेन हक छे नीते, ईना कुरुस पर टांगीन खीळा ठुकीन मार देवु, असु हुकुम आपणेन बी हक छे।”
JOH 19:11 ईसु पीलातुस काजे जपाप आप्‌यु, “कदी तुसेक उपर सरगे सी हक नी जड़तु ती तारु मारे पर काहनु बी हक नी रवतु ने चु मेसेक धराड़ीन तारे सुपरुत करलु छे, माणुस बेसकु पापी छे।”
JOH 19:12 ईसुन जी वात सामळीन पीलातुस, “ईसु काजे छुड़नेन वीच्‌यार कर्‌यु, बाकुन यहुदी मुख्‌या आयड़ी आयड़ीन कह्‌या, जु आपसा काजे राजा कह्‌वे चु आपणा रोमी राजान वीरुद करे। ने तीनाक डंड जड़नु चाहजे कदी तु ईनाक छुड़ देसी ती तु आपणा रोमी राजान दुस्‌तीदार नी हय।”
JOH 19:13 जी वात सामळीन पीलातुस ईसु काजे बाहर गब्‌बता नावेन जागा पर बुलायन ईब्‌रानी बुली ईना नावेन मतलब, “दगड़ान पयड़ी” हतलो ने पीलातुस तीना जागा पर आपसी नीयावेन गादी पर बस गुयु।
JOH 19:14 जु दाहड़ु, फसह तीहवारेन हाप्‌ताम वाळा आरामेन दाहड़ान तीयारीन दाहड़ु हतलु। ने मांजणीक टेम हय रवली, तत्‌यार पीलातुस यहुदी माणसेक कह्‌यु, “देखु, हयुत छे तुंद्‌रु राजा!”
JOH 19:15 ती यहुदी मुख्‌या अळी आयड़ीन कह्‌या ईनाक जां सी लीजा! ईनाक जां सी लीजा! “ने ईना कुरुस पर टांगीन खीळा ठुकीन मार देवु!” पीलातुस तीनु काजे पुछ्‌यु, “मे तुंद्‌रा राजा काजे कुरुस पर टांगीन खीळा ठुकाड़ो काय?” मंदीरेन डाहला पुजारा कह्‌या, “रोमी राजा काजे छुड़ीन हामरु काहनु राजा नी हय।”
JOH 19:16 पीलातुस ईसु काजे तींद्‌रे हातेम आप देदु, हेरेन करीन की, चे तीनाक कुरुस पर मार देय।
JOH 19:17 ने ईसु सीपायड़ान कह्‌णेन अनसारे कुरुस हाकलीन चालतु-चालतु ईब्‌रानी गुलगुता नावेन जागा पर गुयु। यहुदी माणसेन बुली मां ईना नावेन मतलब मुणको हतलो।
JOH 19:18 तीना जागा पर ईसु काजे ने तेरे भेळा दुय गुना वाळा माणसे काजे कुरुस पर टांगीन खीळा ठुक्‌या। ईचमां ईसु काजे ने एक काजे ईसुन डाखर्‌ये आंग्‌ये ने एक काजे जेवड़्‌ये आंग्‌ये कुरुस पर टांगीन खीळा ठुक्‌या।
JOH 19:19 पीलातुस एक लाकड़ान पट्‌टी पर ईसुन बारामां लिखाड़ीन तेरा मुणका सी उपर कुरुस पर ठुकाड़ देदु। तीनी पट्‌टी पर असो लिखलो हतलो, “ईसु नासरी यहुदी माणसेन राजा।”
JOH 19:20 ने जी वात ईब्‌रानी बुली मां, ने लातीनी बुली मां, ने युनानी बुली मां लिखली हतली। चां ईसु काजे कुरुस पर टांगीन खीळा ठुकला हतला, चु जागु सहरे धड़े हतलु ने बेसका यहुदी माणसे जी वात लिखली भण्‌या।
JOH 19:21 यहुदी मुख्‌या मायन डाहला पुजारा काजे जी लिखली वात नी जमी ने चे पीलातुस काजे कह्‌या, “यहुदी माणसेन राजा असा मां लिखु बाकुन असो लिखु की हयु कह्‌यु की मे यहुदी माणसेन राजा छे।”
JOH 19:22 पीलातुस तीनुक जपाप आप्‌यु, “मे ज लिखाड़ देदु चत रवसे।”
JOH 19:23 अळतेन सीपायड़ा ईसु काजे कुरुस पर टांगीन खीळा ठुकीन नवराय गुया, तत्‌यार चे ईसुन पुथल्‌यान चार वाटा पाड़्‌या एक-एक सीपायड़ा वाटे एकेक वाटु पाड़्‌या बाकुन ईसुन झगल्‌यो सीवीन बणावलो नी हतलो, बाकुन आखो की आखो गुथीन बणावलो हतलो।
JOH 19:24 ने चे वीच्‌यार करीन कह्‌या, आपणु हीना पुथल्‌याक नी फाड़ता, बाकुन चिट्‌ठी नाखीन देख लेता की ज कुणीक जड़से ज असो काहा कर्‌या की खरला सास्‌तुर मां लिखली वात ची पुरी हवे: “चे वेरी माणसे मारा पुथल्‌याक वाट लेदा, ने चे मारा पुथल्‌या वाटे चिट्‌ठी बी नाख्‌या।” ने छाचलीन सीपायड़ा असा की असा कर्‌या।
JOH 19:25 ईसुन कुरुस धड़े ईसुन माय ने ईसुन मायन बहणीस ने काइफान घरवाळी मरीयम मगदलनी मरीयम उभी हय रवली।
JOH 19:26 जत्‌यार ईसु चां आपसी माय काजे देख्‌यु ने तीना चेलाक बी देख्‌यु, जु ईसुन लाटेक्‌लु चेलु कहवायतेलु, ती चु आपसी माय काजे कह्‌यु, “ओ माय! देख, हयु तारु बेटु छे।”
JOH 19:27 अळतेन तीना चेलाक कह्‌यु, हयी तारी माय छे ने तीने टेम सी चु चेलु ईसुन माय काजे आपसी माय मान लेदु। ने आपसे घर ली जाय्‌न तेरी सेवा चाकरी करने बाजी गुयु।
JOH 19:28 अळतेन ईसु ज जाण गुयु की, हय आखो काय पुरो हय गुयलो छे ने खरला सास्‌तुर मां पेहलुत सी लिखलो हतलो, च पुरो करने करीन कह्‌यु, “मे तीसलु छे।”
JOH 19:29 चां एक ठाहरु हतलु तीना ठाहरा मां अंगुरेन कड़वलु रस भर रवला ने चे सीपायड़ा कड़वला रस मां एक पुतो डुबाड़ीन तीना पुताक जुफा नावेन झाड़कान एक सुट्‌ये झेलाड़ीन ईसुन मुंहडे टेकी देदा।
JOH 19:30 तत्‌यार ईसु अंगुरेन कड़वलु रस चाख्‌यु ती कह्‌यु, “पुरो हय गुयो।” ने आपसो मुणको हेटु वाळ लेदु ने आपसु जीव-आत्‌मा भगवान काजे आप देदु।
JOH 19:31 चु दाहड़ु फसह तीहवारेन हाप्‌तान वाळान खास आरामेन दाहड़ान तीयारीन दाहड़ु हतलु। आरामेन दाहड़े ईसुन ने दीसरा गुना वाळा धड़े कुरुस पर टांगलो नी रहणु चाहजे करीन यहुदी माणसे पीलातुस सी आवीन वीन्‌ती कर्‌या की कुरुस पर टांगीन खीळा ठुकला माणसेन पायेन हाटका तुड़ाय दे। ने तींद्‌रो धड़ कुरुस पर सी उतार मांग।
JOH 19:32 सीपायड़ा आवीन ईसुन आड़े-धड़े कुरुस पर टांगीन खीळा ठुकला माणसेन पायेन हाटका टुकड़ा-टुकड़ा कर देदा।
JOH 19:33 बाकुन अळतेन चे ईसु धड़े आवीन देख्‌या ती तीनुक मालम पड़्‌यो की चु मर गुयु ने चे तेरा पाय नी तुड़्‌या।
JOH 19:34 बाकुन तीना सीपायड़ा मायन एक सीपायड़ु ईसुन काखे भालु घुदल्‌यु ने कुखेम सी तत्‌यारुत लुही ने पाणी नीकळ्‌यो।
JOH 19:35 जतरा बी ज देख्‌या, चे गवाय देदा, ने तींद्‌री गवाय संय छे ने चु जाणे की चे संय कवे की तुहुं बी भुरसु करु।
JOH 19:36 जी वात तेरेमां हय की चुखला सास्‌तुर मां ज कहलो छे, च पुरो हवसे, “तेरा कुय हाटका बी नी तुड़े।”
JOH 19:37 पछेन एक अळी जागा पर ज लिखलो छे, “तीनाक चे गुपला छे, तीना पर चे नींगा करसे।”
JOH 19:38 ज आखो हय गुयो ने अळतेन अरीमतीया सहर वाळु युसुफ चु ईसुन चेलु हतलु, बाकुन यहुदी माणसेन धाके काहनाक बी नी कह्‌तेलु की मे ईसुन चेलु छे, बाकुन हय चु चेलु पीलातुस वीन्‌ती कर्‌यु की मेसेक ईसुन धड़ काजे गाड़ने ली जान दे, ने पीलातुस तेरी सामळी लेदु। ने चु युसुफ आवीन ईसुन धड़ ली जात र्‌यु।
JOH 19:39 नीकुदेमुस चु एक दाहड़ु राती वेळाय, ईसु काजे भेळु हवणे आवलु, चु बी चां एक सोव ने पंद्‌रे कीलु ईत्‌तर ने एलवो लीन आयु।
JOH 19:40 ने यहुदी माणसे जसा मरला माणसेन धड़ काजे गाड़ने ली गुया तसात चे ईसुन धड़ काजे वारु गंदायण्‌यु मसालु चुपड़्‌या ने धवळा पुथल्‌या मां गुचवी देदा।
JOH 19:41 तीना जागा मां ईसु काजे कुरुस पर टांगीन खीळा ठुकला तीनात जागा धड़े वाड़ी हतली, ने तीनी वाड़ीन खंगराम एक नवलो बीड़ो खुदलो हतलो, तीना बीड़ा मां हय लग कुय काजे गाड़्‌या नी।
JOH 19:42 हय यहुदी माणसेन आरामेन तीयारीन दाहड़ु खत्‌तम हवणे वाळु हतलु, ने आरामेन दाहड़ु सुरु हवणे वाळु हतलु। ने जो मसाण्‌या धड़ेत हतलो, करीन नीकुदेमुस ने युसुफ ईसुन धड़ काजे तीनात मसाण्‌या मां मेल देदा।
JOH 20:1 हाप्‌तान पेहले दाहड़े संदारे एगीत, मरीयम मगदलनी मसाण धड़े आवी, ने ची मसाण पर सी चापर्‌यु दगड़ु छेटे करलो देखी।
JOH 20:2 ची सीमोन ने पतरसेन्‌चां ने दीसरा चेलान चां दवड़ीन आवी, चु ईसुन लाटेक्‌लु चेलु कहंवायतेलु। ने ची तीनुक कही काहनाक माणसे मालीक ईसुन धड़ काजे मसाण सी नीकाळीन ली जात र्‌या। ने हामुक मालम नी हय की चे तीना धड़ काजे कां मेक र्‌या।
JOH 20:3 तत्‌यार पतरस ने ईसुन दीसरु चेलु मसाण भीणी दवड़ी पड़्‌या।
JOH 20:4 चे दुय भेळा दवड़्‌या बाकुन दीसरु चेलु पतरस काजे पछळ नाख दीन पेहलुत मसाण धड़े पुग गुयु।
JOH 20:5 चु ढंगु अळीन लेफड़्‌या पुथल्‌यान देख्‌यु बाकुन मसाणेन खंगरा मां माहें नी भरायु।
JOH 20:6 सीमोन पतरस तेरे पछळ-पछळ आयु, ने अळतेन मसाण धड़े गुयु मसाण खंगरा मां माहें गुयु, ने चु लेफड़्‌या पुथल्‌यान पड़ रवलु देख्‌यु।
JOH 20:7 ईसुन मुंहडा पर फेटको बांदलो हतलो च फेटको लेफड़्‌या पुथल्‌यान भेळतो हतलो, बाकुन दीसरे जागे दुर करीन मेल्‌लो देखाव पड़्‌यो।
JOH 20:8 ती चु दीसरु चेलु जु मसाण धड़े पेहलुत पुगी गुयलु, चु बी मसाणेन खंगरा मां माहें गुयु ने पुथल्‌यो देख्‌यु ने चु चेलु असु भुरसु कर्‌यु की ईसु पछु जीवतु हय्‌न बठु हय गुयु।
JOH 20:9 ज हवणेन पेहेल तीनुक जी वात समज मां नी आवी की, खरला-सास्‌तुरेन अनसारे ईसुन मर्‌या-सर्‌याम सी जीवतु हय्‌न बठु हवसे।
JOH 20:10 ने चे दुय चेला आपसा-आपसा जागा पर जात र्‌या।
JOH 20:11 मरीयम मगदलनी मसाण धड़े खयड़े रड़तेली, ने ची रड़ती-रड़ती ढंगी अळीन मसाण मां माहें नींगा करी।
JOH 20:12 ने तीना जागा पर ईसुन धड़ मेलायलो हतलो, चां ची उजळा पुथल्‌या पेहर रवला दुय सरग वाळा चाकर्‌या काजे देखी एक काय मुणका भीणी ने एक पायाता भीणी बस रवला देखी।
JOH 20:13 चे दुय सरग वाळा खबर लावण्‌या तीनी काजे कह्‌या, “ओ बायर जात! तु काहा रड़ रय?” ची कय “चे मारा मालीक काजे हाकली ली गुयला छे ने मेसेक नी मालम हय की चे तीनाक कां मेल र्‌या!”
JOH 20:14 ज कयदीन ची पछी फीरीन भाळी ने ची ईसु काजे उबु हय रवलु देखीम, बाकुन तीनीक जु ईसु छे करीन उळखायो नी।
JOH 20:15 ईसु तीनी काजे कह्‌यु, “ओ बायर जात तु काहा रड़ रय कुणीक हेर रय?” ची मरीयम तीनाक वाड़ीम काम करन्‌यु पावर समजीन तीनाक कय, “ए दादा! कदी तु तीना काजे ली गुयु हय ती मेसेक कय दे की तु तीनाक कां मेल र्‌यु ने तीनाक ली आवीस।”
JOH 20:16 ज सामळीन ईसु तीनीक कह्‌यु, “ओ मरीयम!” ची पछी फीरीन ईसुक उळखीन तीनाक ईब्‌रानी मां कय, “रबी।” यहुदी माणसेन बुली मां ईना बुलेन मतलब ए गुरु हतलो।
JOH 20:17 ईसु तीनी काजे कह्‌यु, “मे हय लग भगवान बासेन चां उपर सरग मां नी गुयु। ने मेसेक छीमीन मां रुके, बाकुन मारा भायसेन चां जाय्‌न तीनु काजे ज कय दे, की ईसु कय र्‌यु की, मे मारा भगवान बासेन्‌चां जाणे हींड र्‌यु, हयु हय सी तुंद्‌रु बी भगवान बास छे।”
JOH 20:18 मरीयम मगदलनी जाय्‌न जी वात चेला काजे कय की “मे मालीक काजे देखली छे, ने चु मेसेक बी वात कय मकल्‌यु।”
JOH 20:19 तीने दाहड़े, हाप्‌तान पेहले दाहड़े सांती वेळाय ईसुन चेला यहुदी माणसेन धाके आपसात बारनो दीलीन घरमां कुंडाय रवला। ने ईसु तींद्‌रे ईचमां आय्‌न उबु हय गुयु, ने चेला काजे कह्‌यु “तुहुंक सांती जड़े!”
JOH 20:20 ज कयदीन ईसु आपसा हातेन घाव, ने आपसी कुखेम घाव देखाड़्‌यु, ती तेरा चेला मालीक ईसु काजे देखीन खुस हय गुया।
JOH 20:21 ने ईसु तीनुक अळी कह्‌यु, “तुहुंक सांती जड़े! असु भगवान बास मेसेक मकेल्‌लु छे तसुत मे बी तुहुंक मकलो।”
JOH 20:22 ज कयदीन ईसु तीनु पर फुक्‌यु ने तीनुक कह्‌यु, “लेवु, जी चुखली-आत्‌मा, तुंद्‌रा जीवन मां ली लेवु।
JOH 20:23 तुहुं जीनु माणसेक पापेन माफी आपसु, तीनु माणसेक पापेन माफी जड़ जासे, ने तीनुक माणसेक तुहुं पापेन माफी नी आपु तीनु माणसेक पापेन माफी नी जड़े।”
JOH 20:24 जत्‌यार ईसु चेला धड़े आयु ती थोमा तींद्‌रे भेळु नी हतलु चु बी बारे चेला मायन एक हतलु, चु दीद्‌मुस कहवाये।
JOH 20:25 दीसरा चेला तीनाक कह्‌या, “हामु मालीक ईसु काजे देखला छे।” ती चु कह्‌यु, “जत्‌यार लग मे तेरा हातेम खीळान घाव नी देख लम ने खीळा सी पड़लो घावेम मारी आंगळी नी नाख दम ने तेरा कुखेम पड़ला घाव मां मारु हात नी नाख दम तत्‌यार लग मे भुरसु नी करो।”
JOH 20:26 आंठ दाहड़ा हय गुया, ने अळतेन ईसुन चेलान अळी घरमां हतला, ने थोमु बी तींद्‌रे भेळु हतलु तीने टेमे घरेन बारनो देदलो हतलो, तेबी ईसु तींद्‌रे ईचमां आवीन उबु रय गुयु ने कह्‌यु, “तुहुंक सांती जड़े!”
JOH 20:27 ती ईसु थोमा काजे हेरा हात देखाड़ीन कह्‌यु, “तारी आंगळी ईनु हातेन घाव मां नाख ने आपसु हात उरु कर ने मारा कुखेम वाळा घाव मां तारु हात नाख। ने तु नी भुरसु वाळु मां बणे बाकुन मारे पर भुरसु कर।”
JOH 20:28 थोमा ईसु काजे जपाप आप्‌यु, “ए मारा मालीक! ए मारा भगवान!”
JOH 20:29 ती ईसु थोमा काजे कह्‌यु तु ते मेसेक देखीन मारे पर भुरसु करलु छे। बरकतवाळ चे छे, जे मेसेक नी देख्‌या बाकुन मार पर भुरसु करे।
JOH 20:30 ईसु आपसा चेला अगळ अळी बेसका मटा कामेन सहलाणी देखाड़्‌यु बाकुन तीनु मटा कामेन सहलाणीन बारामां ईनी किताप मां लिखलो नी हय।
JOH 20:31 बाकुन जी वात जां असो करीन लिखली छे की तुहुं जु भुरसु करु की ईसुत भगवानेन पुर्‌यु मसी छे, ने तेरे पर भुरसु करीन तेरे नावे सी अमर जीवन हात कर लेय।
JOH 21:1 तीबीरीयास दरीया धड़े ईसु अळी आपसा चेला काजे ईनी रीती अळी उजेंतु देखाव पड़्‌यु,
JOH 21:2 एक दाहड़े, सीमोन पतरस, ने थोमा, चु दीद्‌मुस कह्‌वाये नतनएल चु गलील जीलान काना सहर वाळु हतलु ने जब्‌दीन दुय पुर्‌या ने ईसुन दुय दीसरा चेला, जे आखा भेळात हतला।
JOH 21:3 सीमोन पतरस तीनु काजे कह्‌यु, “मे ते माछा मारने जाम। ने चे दीसरा चेला काजे कह्‌या।” “हामु बी तारे पुठ्‌ये आवजे।” ने चे तेरे पुठ्‌ये चाल पड़्‌या, ने ढंड्‌या मां चहड़ीन बठ गुया, बाकुन तीने राते एक बी माछी हात नी लागी।
JOH 21:4 संदारे हवतात ईसु दरीया धड़े आय्‌न उबु रय गुयु, बाकुन चेला काजे ईसु नी उळख्‌यु।
JOH 21:5 तत्‌यार ईसु तीना चेला काजे कह्‌यु, “ए पुर्‌या! तुहुं काजे खाणे करीन एक बी माछी नी धराय काय?” चे चेला जपाप आप्‌या, “एक बी नी धराय!”
JOH 21:6 तत्‌यार ईसु तीनु काजे कह्‌यु, “ढंड्‌यान जेवड़्‌ये आंग्‌ये जाळ नाखु ने तुहुंक माछा हात लागसे।” चे जाळ नाख्‌या ने अतरा माछा जाळेम आया की तीनुक जाळ नी हाकलाय।
JOH 21:7 तत्‌यार चु चेलु, जु ईसुन लाटेकलु चेलु, “कह्‌वायतेलु, पतरस काजे कह्‌यु, जु ते आपणु मालीक ईसुत छे।” जत्‌यार सीमोन पतरस सामळ्‌यु की जु आपणु मालीक ईसुत छे ती चु नांगरलु हतलु करीन आपसो झगल्‌यो पेहरी लेदु ने ईसुक भेळु हवणे करीन दरीया मां मामार कुद पड़्‌यु।
JOH 21:8 बाकुन दीसरा चेला, माछा भरायली जाळ काजे हाकलता जाय्‌न ढंड्‌या काजे दरीया धड़े लाया। काहाकी चे दरीया धड़े सी जादा छेटा नी हतला। चे दरीया धड़े सी दुयेक सोव हात छेटा हतला।
JOH 21:9 जत्‌यार चे ढंड्‌याम सी उतरीन धड़े भुयमां आया, ती तीनुक चां रुटा ने धपतेला कुयलान ईंगाळा पर माछा मेकला देखाव पड़्‌या।
JOH 21:10 ईसु तीनु काजे कह्‌यु, “तुहुं हींताळ जे माछा धरला छे, तीनु मायन थुड़ाक ली आवु।”
JOH 21:11 सीमोन पतरस पछु ढंड्‌या मां गुयु, ने जाळ धड़े हाकली लायु। तीनु जाळेम डेड़ सोव ने तीन मटला माछा पड़ला हतला, ने अतरा माछा जाळेम पड़्‌या तेबी जाळ नी फाटी।
JOH 21:12 ईसु तीनु काजे कह्‌यु, “आवु, ईतरोक खाय लेवु।” चेला जाण लेदा की जु मालीक ईसुत छे। ने “तु कुण छे।” करीन ईसु काजे पुछणे, तीनु मायन कुय काजे बी हिम्‌मत नी कर्‌या।
JOH 21:13 ईसु धड़े आयु, ने खाणे करीन चु रुटु हातेम लीन तीनुक आप्‌यु, ने ईनी रीते माछा आप्‌यु।
JOH 21:14 असु करीन मर्‌या-सर्‌याम सी जीवतु हय्‌न ईसु तीसरी कावा आपसा खास चेला अगळ उजेंतु देखाव पड़लु।
JOH 21:15 खायलीन नवराय्‌न ईसु, सीमोन पतरस काजे पुछ्‌यु, “ए सीमोन, युहन्‌नान पुर्‌या! तु छाचलीन, हींद्‌रे सी जादा मेसेक परम करे काय?” पतरस ईसुक कह्‌यु, हव, “मालीक! तु जाणे की मे तारे सी परम करो।” ईसु सीमोन पतरस काजे कह्‌यु, “मारा गाडरा चार।”
JOH 21:16 ईसु दीसरी कावा अळी सीमोन पतरस काजे कह्‌यु, “ए सीमोन, युहन्‌नान पुर्‌या! तु छाचलीन मारे सी परम करे काय?” पतरस ईसु काजे जपाप आप्‌यु, “हव, मालीक! तु जाणे की मे तारे सी परम करो।” ईसु पतरस काजे कह्‌यु, “मारा गाडरान गुवाळी कर।”
JOH 21:17 ईसु अळी तीसरी कावा, पतरस काजे कह्‌यु, “ए सीमोन, युहन्‌नान पुर्‌या! तु छाचलीन मेसेक परम करे काय?” ईसु पतरस काजे तीसरी कावा ज पुछ्‌यु की तु छाचलीन मारे सी परम करे काय? करीन तीनाक बेसको दुख लाग्‌यो। ने पतरस ईसु काजे कह्‌यु, “मालीक! तुसेक आखी वात मालम छे, तु जाणे की मे तारे सी छाचलीन परम करो।” ईसु पतरस काजे कह्‌यु, “मारा गाडरा काजे चार।”
JOH 21:18 मे तुसेक छाचलीन कहो की जत्‌यार तु जुवान हतलु, ती आपसान कमर बांदीन जाहां बी चाहतेलु चां फीरतेलु, बाकुन जत्‌यार डुकरु हवसी ती आपसा हात फेलावसी ने दीसरा तारी कमर बांदीन जाहां तु नी चाहसी चां तुसे ली जासे।
JOH 21:19 हयु ईनी वात सी सहलाणी देदु, की पतरस कसु मरनेन सी भगवानेन सेक-सींगार करसे। ने तत्‌यार हयु तीनाक कह्‌यु, “मार कह्‌याम चाल।”
JOH 21:20 पतरस पछु फीरीन ईसुन तीना दीसरा चेला काजे पछळ-पछळ आवतेलु देख्‌यु, चु ईसुन लाटेकलु चेलु कहंवायतेलु। हयु चु की चु हतलु, जु तीहवारेन दाहड़े सांती वेळाय खाणेन टेमे ईसुन छाती भीणी वळीन, “ए मालीक! तुसेक धरावण्‌यु कुण छे?” करीन पुछलु।
JOH 21:21 अळतेन पतरस तीना चेलाक देखीन ईसु काजे पुछ्‌यु, “मालीक! एरे पर काय वीतणे वाळो छे?”
JOH 21:22 ईसु कह्‌यु, “कदी मेसेक पछु आवता लग हयु जीवतेलु रय जाय, ती ईनी वात सी तारो काय लेण देणु छे? तु ते मरता लग मारा कह्‌याम चालतु रव।”
JOH 21:23 ने ईसु पर भुरसु करन्‌या भायसे मां जी हुकवाय फीर गुय की हयु चेलु नी मरे, “बाकुन ईसु असु नी कह्‌यु की हयु नी मरे बाकुन ज कहंलु की कदी मेसेक पछु आवता लग हयु जीवतेलु रय जाय ती, ईनी वात तारो काय लेण देन छे?”
JOH 21:24 हयु चु की चु चेलु छे, जु ईनी वातेन गवा देणे करीन जी किताप लिखलु छे। हामु जाणजे की हेरी गवाय छाचली छे।
JOH 21:25 ईसु अळी बी बेसका काम कर्‌यु, कदी एकेक करीन तीनु कामेन बारामां लिखता ती, ती मे समजो की जे किताप लिखायता, चे किताप अतरा जादा हय जाता की ईनी कळी मां बी नी समाय्‌ता।
ACT 1:1 थीयुफीलुस मारु लाटेक्‌लु! मे मारी पेहली कितापेन तीनुक आखा कामेन बारामां लिखलु छे, च ईसु सुरु कर्‌यु ने आयन सीकाड़तु रयु।
ACT 1:2 ने जीने दाहड़े लग सरग मां नी हाकलायु तेर सी पेहले दाहड़े लग ईसु चुखली-आत्‌मा सी आपसान नेवाड़ला नेवताळा काजे जी वात सीकाड़तु रयु।
ACT 1:3 ने ईसु कुरुस पर दुख हाकलीन मर गुयु ने मर्‌या-सर्‌याम सी पछु जीवतु हय्‌न आपसा नेवताळाक बेसका पुरावा सी देखाव पड़्‌यु की चु जीवतेलु छे। असुत चु चाळीस दाहड़ा लग तीनुक देखाव पड़तु रयु, ने तींद्‌रे पुठ्‌ये भगवानेन राजेन बारामां वात करतु रयु।
ACT 1:4 ने चु तीनुक भेळु हय्‌न तीनुक हुकुम आप्‌यु की, “बास जु वायदु करलु छे चु वायदु पुरु हवणे लग तुहुं यरुसलेम सहर सी घुण जावु, ने तुहुं चु वायदु पुरु हवणे लग वाट देखता रवजु। मे तुहुं काजे तीना वायदान बारामां देखाड़ देदलु छे।
ACT 1:5 काहाकी युहन्‌‌‌नु ते पाणी सी बपतीस्‌मा देदु, बाकुन थुड़ाक दाहड़ान पछेन तुहुं चुखली-आत्‌मा मां बपतीस्‌मा लेसु।”
ACT 1:6 चे नेवताळा बयड़े भेळा हय्‌न ईसु सी पुछ्‌या, “ए मालीक, काय तु ईनेत टेमे ईस्‌रायल देसेन राज काजे बदली देसी काय?”
ACT 1:7 ईसु तीनुक कह्‌यु, “तीनी टेम काजे जाणनेन तुंद्‌रो काम नी हय तीनाक भगवान खुद आपसा हक सी ठहरावलु छे।
ACT 1:8 बाकुन जत्‌यार चुखली-आत्‌मा तुंद्‌रे पर उतरसे, ती तुहुं ताकत हात करसु; ने तुहुं यरुसलेम सहर ने आखा यहुदीया जीलाम, ने सामर्‌या सहरेम ने धरतीन ईनी धड़े सी पली धड़े लग मारा गवा बणसु।”
ACT 1:9 ज कय देदु ने अळी ईसु तींद्‌रे देखते-देखते उपर सरगे मां हाकलाय गुयु, ने वादळो तीनाक ढाक लेदो।
ACT 1:10 ईसुक जातलु देखीन चेला सरगे भीणी एक हेट्‌या देख रवला, तत्‌यार धवळा पुथल्‌या पेहरला दुय अदमी तींद्‌रे धड़े आवीन उबा हय गुया,
ACT 1:11 ने तीनुक कह्‌या, “ए गलील मां रहण्‌या माणसे, तुहुं काहा उबा हय्‌न सरगे भीणी देख रया? हीयुत ईसु, जु तुंद्‌रे ईचमां सी सरगे मां हाकलाय गुयलु छे, ईनेत रीते अळी पछु आवसे, जसा तुहुं हीनाक जातलु देखला छे।”
ACT 1:12 तत्‌यार चेला जेतुन नावेन बयड़े सी यरुसलेम पछा आया, चु बयड़ु यरुसलेम सहर सी धड़ेत एक कीलुमीटर लांबे हतलु।
ACT 1:13 जत्‌यार चे पुगीन घरेन उपरी कमरा पर गुया, जाहां चे थुबी रवला, चे पतरस ने, युहन्‌‌‌नु ने, याकुप ने, अन्‌दीरीयास ने, फीलीप्‌पुस ने, थोमास ने, बरतुल्‌मे ने, मत्‌‌ती ने हलफाईन पुर्‌यु याकुप ने सीमोन ने, याकुपेन पुर्‌यु यहुदा चां हतला।
ACT 1:14 हींद्‌रे पुठ्‌ये थुड़ाक बायरा ने ईसुन माय मरीयम ने, ईसुन भाय बी हतलु। चे आखा एक मन हय्‌न दुवा करने बाजी रवला।
ACT 1:15 थुड़ाक दाहड़ा पछेन पतरस ने भुरसु करने वाळा भायसेन मतलब एक सोव वीसेक जणान टुळा मां पतरस उबु हय्‌न कवणे लाग्‌यु।
ACT 1:16 “ए भायस्‌यो,” चुखला सास्‌तुर मां चुखली-आत्‌मा दावुदेन मुंहडा सी ज काय यहुदान बारामां पेहेल सीत कवलु हतलु, ची वात पुरी हवणुत हतलो। चु यहुदा, ईसुक धरन्‌यान अगवाय करन्‌यु हतलु।
ACT 1:17 काहाकी यहुदा ते आपणात टुळा मायन हतलु ने हेरु आपणी सेवान काम मां हीस्‌सु बन्‌लु।
ACT 1:18 चु पापेन कमाय सी एक खेत मुल लेदु, ने चु तीना खेतेन झाड़के जाय्‌न टांगाय गुयु, ने मुंहडान भुरसे पड़्‌यु, तेरो पेट फाट गुयो, ने तेरा आखा आतड़ा बाहर नीकळी गुया।
ACT 1:19 जी वात यरुसलेम सहर मां आखा रवण्‌या काजे पतु हय गुयु, तीना खेतेन नाव हकळदमा मतलब लुहीन खेत पड़ गुयो।
ACT 1:20 भजनेन किताप मां बी लिखलो छे की, तेरो घर उजड़ी जाणु चाहे ने; तेरेमां रहण्‌या एक बी नी बचणु चाहजे। ने तीना माणसेन, सेवा कामेन आवजी काहनु दीसरु ली लेय।
ACT 1:21 तेरेमां ज जरुड़ी छे की जत्‌यार मालीक ईसु हामरे ईचमां हतलु तत्‌यार जे माणसे जलम हामरा हतला, तींद्‌रेम सी काहनाक एक काजे नेवाड़े। मतलब तीनी टेम सी लागाड़ीन जत्‌यार सी युहन्‌‌‌नु माणसे काजे बपतीस्‌मा देणु चालु करलु ने जत्‌यार लग ईसु काजे हामरे ईचमां मां सी हाकलाय गुयलु। ईनु माणसे मां सी काहनाक एक काजे तीनाक मर्‌या-सर्‌याम सी जीवतु हवणेन हामरे साते गवा बणनु चाहजे।
ACT 1:23 तेरेसी चे दुय अदमी काजे सांबा लाया युसुफ काजे, जु बरसब्‌बास कवायतेलु ने तेरो नावठ्‌यो नाव युस्‌तुस हतलो, दीसरु मत्‌‌तीयास काजे,
ACT 1:24 ने जे भगवान धड़े असी दुवा कर्‌या, “ए मालीक! तु आखान मन काजे जाणे। हामुक ज देखाड़, की तु ईनु दुय मायन कुणी काजे नेवाड़्‌लु छे,
ACT 1:25 ने चु एक ईसुन नेवताळान रुप मां यहुदान आवजी पर ईनी सेवा-चाकरीन जागु हात करे तसा। तीना जागा काजे छुड़ीन यहुदा आपसे जागे जाती रयु।”
ACT 1:26 तत्‌यार चे तेरा बारामां चिट्‌ठी नाख्‌या ने चिट्‌ठी ईछा ती ची चिट्‌ठी मत्‌‌तीयासेन नावेन नीकळी। अळतेन चु मत्‌‌तीयास ईसुन ग्‌यारे नेवताळा मां भेसकाय गुयु।
ACT 2:1 जत्‌यार पेन्‌तेकुस्‌तेन दाहड़ु आयु, ती ईसुन आखा नेवताळा एक जागे भेळा हय रवला।
ACT 2:2 ती उचकाणुन आधीन तसलु घुळ्‌ळु सरगे सी आयु, ने तीना घर मां चे बसी रवला च आखो घर तीना घुळ्‌ळा सी भराय गुयो।
ACT 2:3 ने आकठान खळायती लपटेन तसी जीप्‌या चां अगळ देखायणे लागी। चे आकठा सी जीपे मां तींद्‌रेम सी हरेक पर आय्‌न उभी रय गुय।
ACT 2:4 चे आखा चुखली-आत्‌मा मां भराय गुया, ने भगवानेन चुखली-आत्‌मा तीनु काजे बुलनेन ताकत आपी, ने चे भाती-भातीन बुली बुलने बाजी गुया।
ACT 2:5 सरगेन नेचा ने यरुसलेम मां आखा देसेन आवला यहुदी नीयम काजे मानने वाळा माणसे रय रवला।
ACT 2:6 ने चे ईसुन नेवताळा काजे जत्‌यार चे अवाज सामळ्‌या तत्‌यार माणसेन एक मट्‌लु टुळु भेळु हय गुयु, जे माणसे ज सामळीन घाबरायणे लाग्‌या काहाकी चे भुरसु करने वाळा माणसे काजे आपणी खुदेन बुली मां बुलतेला सामळ्‌या।
ACT 2:7 चे आखान-आखा बेसका वीच्‌यारेम पड़ गुया, ने चकरायन कह्‌णे बाजी गुया, “सामळु जे बुलने वाळा आखान-आखा गलील देस मां रहण्‌या नी हय काय!
ACT 2:8 ती पछेन काहा आपणे मायेन हर एक जणु ईनु काजे आपणी-आपणी देसेन बुली बुलतेला कसा सामळने बाजी रया?
ACT 2:9 हामु ते पारथी ने मेदी ने एलामी ने, मेसोपोटामीया, मां रवण्‌या छे, ने यहुदीया ने कप्‌पुदुक्‌या, पुन्‌तुस ने आसीया,
ACT 2:10 फुर्‌गीया ने, पंफुलीया, मीसर ने लीबीया देस जो कुरेने आड़े-धड़े, ईनु आखा देसेम रवण्‌या, रोम मां रवण्‌या माणसे छे,
ACT 2:11 यहुदी धरम मानने वाळा माणसे, ने काहना यहुदी धरम धरीन नवला चेला बणन्‌या छे ने केरती मां रवण्‌या, ने अरब देस वाळा बी छे। हामु आखा आपणी-आपणी बुली मां हींद्‌रे सी भगवानेन मटला-मटला कामेन वात सामळने बाजी रवला।”
ACT 2:12 ने चे आखा घाबराय गुया, ने घाबराय्‌न एक दीसराक कवणे बाजी गुया, “ज असो काय हय रयो?”
ACT 2:13 बाकुन थुड़ाक दीसरा माणसे हास्‌ता जाय्‌न कह्‌या, “जे ते दारु पीन छाकी र्‌या।”
ACT 2:14 तत्‌यार पतरस ग्‌यारे नेवताळान ईचमां उबु हय गुयु ने अतरी जुर सी कह्‌यु की चे आखा सामळी लेय ने कह्‌यु, ए यहुदी माणसे ने यरुसलेम सहर मां रवण्‌या, तुहुं मारी वात कान्‌टा उघाड़ीन सामळु ने ज जाण लेवु।
ACT 2:15 जसा तुहुं समजी रया तसों नी हय ने जे माणसे छाकला नी हय, काहाकी हींताळ ते संदारेन नवुत बज रय।
ACT 2:16 ने सामळु जी वात बी छे, की ईनी वातेन बारामां भगवान योएल सी कह्‌लु जु भगवानेन अघली वात बताड़ने वाळु हतलु:
ACT 2:17 आकरी दाहड़ा मां काय हवसे तेरे बारामां भगवान कवे, की मे मारी चुखली-आत्‌मा आखा माणसेन डीलेम मकलीस ने तुंद्‌रा पुर्‌या ने पुरे भगवानेन अघली वात बताड़ने वाळा बणसे ने तुंद्‌रा जुवान माणसेक अघो काय करनु च जड़से ने तुंद्‌रा डाहला माणसे सपनाम वात करसे।
ACT 2:18 अतरात नी बाकुन अळी बी छे जे मारी सेवा करन्‌या ने सेवा करने वाळी पर बी तींद्‌रे मां बी मे मारी चुखली-आत्‌मा मकलीस, ने चे बी हवणे वाळी अघली वात बताड़से।
ACT 2:19 ने मे उपर सरगे मां बेसको वारु काम देखाड़ीस, ने नेचु धरती पर सहलाणी देखाड़ीस, मतलब लुही, आकठी, ने उड़तेला कुळान वादळो देखाड़ीस।
ACT 2:20 मालीकेन मटा-भारी ने सेक-सींगार भर्‌या दाहड़ा आवणेन पेहले दाहड़ु आंदारो हवणे बाजी जासे, ने चांद लुहीन तसु हय जासे।
ACT 2:21 ने तीनु दाहड़ाम जु मालीकेन नाव लीन दुवा करसे, तेरुत छुटकारु हवसे।
ACT 2:22 ए ईस्‌रायली जातीन मारा भायस्‌यो! मारी वात मन लागाड़ीन सामळु! तुहुं आपसात जाणु की भगवान ईसु नासरीन साहरे तुंद्‌रे अगळ ताकुतेन वारु कामेन सहलाणी देखाड़लु छे! तेरे सी पुरावा भेळ ज मालुम पड़ गुयलो की ईसु भगवान वगे सी मकेल्‌लु हतलु।
ACT 2:23 चु ईसु भगवानेन ठेहरावली युजनान अनुसार धरायलु ने तुहुं कायदाक तुड़न्‌यान हाते तीनाक कुरुस पर चड़ाया ने माराड़ देदा।
ACT 2:24 बाकुन भगवान मरनेन बंद छुड़ीन ईसु काजे मर्‌या-सर्‌याम सी पछु जीवाड़्‌यु। काहाकी ईसु माणसेन तसु मरनेन बंद मां रवे असु नी हतलु।
ACT 2:25 काहाकी ईसुन बारामां दावुद ज कवे, “मे जलम लग मालीक भगवान भीणी देख रवीस; चु मारे जेवड़्‌ये आन्‌गे रवे; तेरेसी मे कसला बी दुखेम कदी लथड़ीन नी पड़ो।
ACT 2:26 तेरेसी मारो हीयो मन बी बेसको खुस छे, ने आस छे, मारी चुखली-आत्‌मा बी बेसकी खुस छे; ने मारा डीलेन नुकसाण बी नी हये।
ACT 2:27 काहाकी तु मार जीव काजे मोतेन कळ मां नी नाखे। ने नी ते तु तारा चुखला भगत काजे सड़ने देय।
ACT 2:28 तु मेसेक जीवाय्‌न छाचली वाट देखाड़्‌यु; तारी हजरी मां रवणे सी मेसेक वारु खुसी जड़े।”
ACT 2:29 ए मारा भायसे, मे कुळधेणी राजु दावुदेन बारामां तुंद्‌रु धाक राखे बीगुर ज कय सको की चु मर गुयु ने तीनाक गाड़ बी देदा। ने तेरो मसाण आज लग हामरे ईचमां छे।
ACT 2:30 दावुद भगवानेन अघली वात बताड़ने वाळु माणुस हतलु, तेरेसी चु जी वात जाण तेलु, की भगवान सगुन खाय्‌न मेसेक ज कह्‌यु की मे तारीत कुळी मां सी एक जणा काजे तारी राजगादी पर बठाड़ीस।
ACT 2:31 तेरेसी जो काय अघो हवणे वाळो हतलो च देखीन दावुद ज कवलु; ने मारा डीलेन बी नुकसाण नी हये। काहाकी तु मारा जीव काजे मोतेन कळ मां नी नाखे। ने नी ते तु तारा छाचला पावर्‌या काजे सड़ने देय। जी वात दावुद, ईसु मसीन बारामां कवलु की चु मर्‌या-सर्‌याम सी पछु जीवतु हय्‌न बठु हवसे।
ACT 2:32 ईनात ईसु काजे भगवान मर्‌या-सर्‌याम सी पछु जीवतु करीन बठु कर देदलु छे ने हामु ईनी वातेन गवा छे।
ACT 2:33 ने ईना ईसु काजे भगवान आखी कळजुगेन हकदार्‌यु बणावीन आपसे जेवड़्‌ये आन्‌गे बठाड़ देदु, ने जु ईसु वायदु करला चुखली-आत्‌मा काजे भगवान सी आपलु छे, तीना काजे तुहुं देख रया, ने सामळी रया।
ACT 2:34 दावुद आपसु डील भेळु सरगे मां नी गुयु, बाकुन चु आपसुत कहें, मालीक भगवान मारा मालीक भगवान काजे कह्‌यु, “तु मारे जेवड़्‌ये आन्‌गे बठ,
ACT 2:35 जत्‌यार लग मे मारा वेरीक, तारा पाय तळेन जागु नी बणाय दम।
ACT 2:36 “ईस्‌रायली जातीन आखी कुळीन ज जाण लेणु चाहे की भगवान ईसु काजे मालीक बी, ने मसी बी ठेहराय देदलु छे तीना काजे तुहुं कुरुस पर चड़ाय देदला।”
ACT 2:37 ज सामळीन चे आपसान गलती काजे समजणे बाजी गुया ने चे पतरस काजे ने ईसुन दीसरा नेवताळाक पुछणे बाजी गुया, “ए भायस्‌यो! हामुक काय करनु चाहजे?”
ACT 2:38 पतरस तीनुक कह्‌यु, “तुहुं पाप भीणी सी मन फेरवीन भगवान भीणी वळु, ने तुंद्‌रे मायन एकेक जणु आपणा-आपणा पापेन माफी वाटे ईसु मसीन नावेन बपतीस्‌मा लेवु। ती तुहुं भगवानेन चुखली-आत्‌मान वाटु हात करसु,
ACT 2:39 काहाकी भगवानेन चुखली-आत्‌मान वाटु आपणेन वायदु तुंद्‌रे वाटे, ने तुंद्‌री अवल्‌यात वाटे छे, ने तीनु आखा वाटे छे, जे हींताळ छेटा छे ने तीनुक हामरु मालीक भगवान बुलावणे वाळु छे।”
ACT 2:40 पतरस अळी बेसका वातेन साहरे गवाय देदु, ने ज कवतु जाय्‌न तींद्‌रे धड़े रवणे करीन कह्‌यु, “तुहुं आपसा काजे ईनी पीड़ीन एक हेट्‌या माणसे सी बचाड़ु।”
ACT 2:41 जे पतरसेन वात पर भुरसु कर्‌या, चे बपतीस्‌मा ली लेदा; ने तीनेत दाहड़े तीनेक हजार माणसे ईसुन नेवताळा पुठ्‌ये भेसकाय गुया।
ACT 2:42 ने चे ईसुन नेवताळा धड़े सीकणे मां सात-संगात मां, ने ईसुन खातरीन पंगतेम खाणे मां ने ईसु धड़े दुवा करने मां साते रया।
ACT 2:43 ईसुन नेवताळान साहरे बेसको वारु कामेन सहलाणी हवतेली ती आखा माणसे बीहीन सीयारी ली लेदा।
ACT 2:44 ने आखा ईसु पर भुरसु करन्‌या भेळात रवतेला, ने तींद्‌रे धड़े जो काय बी हतलो तेरेमां आखान साजु हतलु।
ACT 2:45 चे आपणो-आपणो माल-धन ने खेत एच देद्‌ला, जे पयस्‌या-टका आवे, चे पयस्‌या-टका तीनाक चाहजे, तीनाक आप देदला।
ACT 2:46 चे आखा एक मन्‌या हय्‌न दाहड़ीन मंदीर मां भेळा हवतेला, ने आखान घर-घर जाय्‌न मालीकेन खातरीन पंगत मां भेसकायतेला ने सुदले मने भेळा हय्‌न खाणो खात्‌ला।
ACT 2:47 ने चे भगवानेन गुण गाया करतेला, ने आखा माणसे तींद्‌रे सी खुस हतला। ने जे-जे पाप सी छुटकारु हात करतेला, तीनुक मालीक ईसु दाहड़ीन तींद्‌रे पुठ्‌ये भेसकी देदलु।
ACT 3:1 पतरस ने युहन्‌‌‌नु मांजणीक वेळाय, दुवा करने मंदीर मां जाणे बाजी रवला।
ACT 3:2 ने तीनी टेमे माणसे एक माणुस काजे ली जाणे बाजी रवला, चु जलम सीत लंगड़ु हतलु। चे तीनाक दाहड़ीन लावीन मंदीरेन घाटाळ्‌ळा नावेन झपलान्‌चां बठाड़ देदला। ने चु मंदीर मां आवण्‌या-जाण्‌या धड़े भीक मांग्‌या करतेलु।
ACT 3:3 जत्‌यार चु पतरस ने युहन्‌ना काजे मंदीर मां भरायतेला देख्‌यु, ती तींद्‌रे धड़े जाय्‌न भीक मांग्‌यु।
ACT 3:4 पतरस ने युहन्‌ना तीना भीणी एक-हेट्‌या देख्‌या, ने पतरस कह्‌यु, “हामरे भीणी देख।”
ACT 3:5 ने चु काय जड़से करीन तींद्‌रे भीणी एक हेट्‌यु देख्‌यु।
ACT 3:6 बाकुन पतरस तीनाक कह्‌यु, “मार धड़े चांदी ने, नीते सनो हय बाकुन मार धड़े ज छे, च तुसेक आपो ईसु मसी नासरीन नाव सी चाल ने हींड-फीर।”
ACT 3:7 ने पतरस तेरु जेवड़्‌यु हात धरीन तीनाक उठाड़्‌यु, ने तत्‌यारुत लंगड़ान पायेम ने मांडाम ताकत आय गुय।
ACT 3:8 ने चु उछळीन मामार उबु हय गुयु, ने हींडणे-फीरने बाजी गुयु; ने भगवानेन गुण गावतु जाय्‌न, उच्‌चु कुद्‌तु-कुद्‌तु, पतरस ने युहन्‌ना पुठ्‌ये मंदीर मां जाती रयु।
ACT 3:9 आखा माणसे तीनाक हींडतेलु-फीरतेलु ने भगवानेन गुण गावतेलु देख्‌या,
ACT 3:10 माणसे तीनाक उळखीन कह्‌या, जु ते हयुत छे, जु मंदीरेन घाटाळ्‌ळा नावेन झपला पर भीक मांग्‌या करतेलु। तीना लंगड़ा साते ज काय बी हवलो, तीनाक देखीन चे चकराय गुया।
ACT 3:11 जत्‌यार चु माणुस पतरस ने युहन्‌नान हात धरीन पुठ्‌ये जाणे बाजी रवलु। तत्‌यार आखा माणसे चकरायन सुलेमानेन खपड़ा मां तींद्‌रेन्‌चां दवड़ता आया।
ACT 3:12 पतरस तीनुक आवतेला देखीन कह्‌यु, ए ईस्‌रायली माणसे! तुहुं ईना माणसेक देखीन काहा चकराय रया, ने हामरे भीणी एक-हेट्‌या काहा देख रया। तुहुंक असो लाग रयो की हामुक हामरे जुरे ने हामरी भक्‌तीन जुरे ईनाक हींडतु-फीरतु करला छे, बाकुन असो नी हय।
ACT 3:13 अब्‌राहमेन, इसाकेन ने याकुपेन भगवान, हामरा डाहा भगवान आपसा चाकर्‌या ईसु काजे सेक-सींगार भरलु छे। तुहुं ईना ईसु काजे सीपायड़ान हातेम धराय्‌न पीलातुसेन हात लगु कर देदा ने जत्‌यार पीलातुस तेरु नीयाव करीन छुड़नेन वीच्‌यार कर्‌यु, ती तुहुं हीनाक मां छुड़े करीन नीकारु कर देदा।
ACT 3:14 तुहुं चुखला ने वारलु माणसेक मां छुड़े करीन तेरु नीकारु कर देदा, ने आपसान करता हत्‌याराक छुड़ दे करीन कह्‌या।
ACT 3:15 ने असु करीन तुहुं जीवाय आपण्‌या काजे माराय नाख्‌या, बाकुन भगवान तीनाक मर्‌या-सर्‌याम सी जीवतु करीन बठु कर देदु; ने हामु ईनी वातेन गवा छे।
ACT 3:16 काहाकी हामु ईसु नाव पर भुरसु कर्‌या, ने ईनात नावेन जुरे ईना माणुस काजे, तीनाक तुहुं देखु, ने जाणु की जुर जड़लु छे। छाचलीन हयुत भुरसु जु ईसुन साहरे छे, ईनाक तुहुं आखा अगळ वारु करलु छे।
ACT 3:17 ने हय ए भायस्‌यो! मे जाणो की तुहुं ने तुंद्‌रा मुखी अनजाण्‌या हतला, एरेन करीन चे ईसु काजे कुरुस पर चड़ावीन माराड़ नाख्‌या।
ACT 3:18 बाकुन भगवान आपसा अघी सी आवणे वाळी वात देखाड़न्‌या माणसेन साहरे पेहले सीत कय देदलु की आवणे बाजी रयु तीना मसी काजे दुख झेलनु पड़से। असु करीन भगवान आपसान कवलो पुरो कर्‌यु।
ACT 3:19 तेरेसी तुहुं पाप भीणी सी मन फेरवीन भगवान भीणी वळु; ती तुहुं काजे भगवान माफ करसे।
ACT 3:20 तुहुं मालीकेन हजरी मां वारु जीव जीवणेन टेम जड़से। तत्‌यार भगवान तुंद्‌रे वाटे पेहले सी ठेहरावला ईसु मसी काजे तुंद्‌रेन्‌चां मकलसे।
ACT 3:21 जु मसी तीने टेमे लग सरगे मां रवसे, जत्‌यार लग चु आखी चीज काजे पेहल हतली तसीत नी बणावे; ईनी टेमेन ने वातेन बारामां, भगवानेन चुखलु अघी सी हवणे वाळी वात देखाड़न्‌या माणसेन कळी घड़ायी ती सीत कवता आय र्‌या।
ACT 3:22 जसु मुसु कह्‌लु, मालीक-भगवान तुंद्‌रे वाटे तुंद्‌रा भाय-बेटाम सी एक भगवानेन चुखला अघी सी आवणे वाळी वात देखाड़न्‌या काजे उबजाड़से, ने चु चुखलु अघी सी आवणे वाळी वात देखाड़न्‌यान ज काय तुहुं काजे कहें, चत सामळीन तुहुं तेरी वात मांजु।
ACT 3:23 बाकुन काहनु बी तीना चुखला अघी सी आवणे वाळी वात देखान्‌यान वात सामळीन नी माने, चु तीना काजे चु आपसा असामी मां सी अलग करीन मार देसे।
ACT 3:24 ने समुएल ने तेरे सी अळी आवला आखा भगवानेन अघी सी आवणे वाळी वात बताड़ने वाळा मसीन आवणेन बारामां ईनु दाहड़ान बारामां पेहले सीत कवला हतला।
ACT 3:25 तुहुं ते भगवानेन अघी सी आवणे वाळी वात देखान्‌यान अवल्‌यात छे, ने तीना वायदान साजेल्‌या छे, तीना वायदाक भगवान तुंद्‌रा डाहा-डाहा वाटे तीनी टेमे ठेहरायु, जत्‌यार चु अब्‌राहम काजे कह्‌यु, तारी अवल्‌यातेन साहरे धरती पर रवण्‌या आखी कळीन माणसे संयबरकत हात करसे।
ACT 3:26 भगवान तुंद्‌रे मायन एकेक जणा काजे कुहराय सी छुड़ावीन संयबरकत आपणे करीन, आपसा पावर्‌या काजे पेहले तुंद्‌रेन्‌चां मकेल्‌लु छे।
ACT 4:1 पतरस ने युहन्‌‌‌नु माणसेक कवणे बाजी रवला, ती पुजारु, मंदीर मां राखवाळी करन्‌या सीपायड़ान मुखी, ने सदुकी पंथवाळा माणसे तींद्‌रेन्‌चां जुर करीन आय गुया।
ACT 4:2 पतरस ने युहन्‌‌‌नु ईसु मर्‌या-सर्‌याम सी जीवतु हय गुयु करीन मर्‌या-सर्‌याम सी जीवतु हय्‌न बठु हवणेन बारामां ईसुन दाखलु देखाड़ीन परचार करीन सीकाड़तेला। तेरेसी चे बेसका रीसाय रवला।
ACT 4:3 अळी चे तीनु काजे धरीन दीसरे दाहड़े लग जेलेम कुंड देदा, काहाकी सांतो हय गुयलो।
ACT 4:4 बाकुन जे तींद्‌री वात सामळी रवला, तीनु मायन बेसका जणा ईसु पर भुरसु कर्‌या, ने ईसु पर भुरसु करन्‌या बायराक-पुर्‌याक छुड़ीन अदमी-अदमी पांचेक हजार हय गुया।
ACT 4:5 दीसरे दाहड़े यरुसलेम सहर मां भगवानेन मंदीरेन मुखीन, ने पुडारीन, ने नीयम सीकाड़न्‌या मास्‌तर्‌यान बठक हय।
ACT 4:6 ने चां भगवानेन डाहलु पुजारु हन्‌ना, ने काइफा, ने युहन्‌‌‌नु, ने सीकन्‌दर ने मुखी पुजारान घरन्‌या बी भेळा हतला।
ACT 4:7 चे पतरस ने युहन्‌ना काजे ईचमां उबा करदीन ज पुछणे बाजी गुया, “तुहुं कुणीन ताकत ने नावे ज काम करला छे?”
ACT 4:8 तत्‌यार चुखली-आत्‌मा पतरस मां पुरु भरायन कब्‌जा मां कर लेदु, ने ती पतरस तीनुक कह्‌यु, ए माणसेन मुखी ने पुडारी!
ACT 4:9 एक लंगड़ा माणसेन भलो हवलो छे, एरे बारामां आज हामु काजे तुहुं पुछणे बाजी रया की जु कसु वारु हवलु छे।
ACT 4:10 ती तुहुं आखा काजे ने ईस्‌रायली जातीन माणसे काजे मालुम हय जाणु चाहजे, की जु लंगड़ु माणुस ईसु मसी नासरीन नाव सी वारु हय्‌न, तुंद्‌रे अगळ उबु हय रयु। तुहुं तीना ईसु मसी काजे कुरुस पर चड़ाया, बाकुन भगवान तीना ईसु मसी काजे मर्‌या-सर्‌याम सी पछु जीवाड़ीन बठु कर देदलु छे।
ACT 4:11 जु ईसु हयुत छे, तीना दगड़ाक “मीस्‌तर्‌या” बेकार समजीन बाहर नाख देदा, चु दगड़ुत घरेन नेहान, खुणे वाळु दगड़ु बण गुयु।
ACT 4:12 तेरेसी ईसुक छुड़ीन काहना बी दीसरा माणसेन साहरे पाप सी छुटकारु नी जड़े, काहाकी सरगेन नेचो ईनी आखी कळी मां ईसु नाव छुड़ीन दीसरो नाव नी हय, तीने नावे आपणुक पापेम सी छुटकारु जड़तु हय।
ACT 4:13 जत्‌यार यहुदी मुखी पतरस ने युहन्‌नान हिम्‌मत देखीन चकराय गुया काहाकी जे ते अनपड़ ने सुदला माणसे छे; बाकुन अळतेन मालुम पड़्‌यो की जे ते ईसु पुठ्‌ये रवला हतला;
ACT 4:14 बाकुन वारु हवला माणसे काजे तींद्‌रे भेळतु उबु हय रवलु देखीन, तीनुक जपाप मां काय नी कह्‌वायो।
ACT 4:15 बाकुन चे पतरस ने युहन्‌ना काजे बठक सी बाहर मकली देदा ने आपसा-आपसा जु वीच्‌यार कर्‌या,
ACT 4:16 “हामु हीनुक काय करजे ने काय नी? काहाकी यरुसलेम मां रवण्‌या आखा माणसे काजे जु पतु हय गुयलु छे, की जु एक बेसका वारु कामेन सहलाणी देखाड़ला छे; ने आपणुक हीना कामेन नीकारु करता नी बणे।
ACT 4:17 बाकुन तेबी ईनी वातेन वदु परचार माणसे मां नी हवणु चाहजे, करीन आपणु ईनुक धमकी देदा, की तुहुं ईना ईसुन नाव लीन कुय साते अगा वात मां करु।”
ACT 4:18 अळी चे पतरस ने युहन्‌ना काजे अळी बुलावणे मकल्‌या ने तीनुक हुकुम आपीन कह्‌या, की तुहुं ईसुन नाव लीन कुय साते वात बी घुण करु, ने कुय काजे सीकाड़ु बी घुण।
ACT 4:19 बाकुन पतरस ने युहन्‌ना तीनु काजे ज जपाप आप्‌या, “तुहुंत नीयाव करीन कहं; हामु काजे भगवानेन नींगा मां, भगवानेन सामळने छुड़दीन तुंद्‌री सामळनु वारु रवसे काय?
ACT 4:20 काहाकी हामु ज देखला ने सामेळला छे, तेरा बारामां नी कवे, ने हुगात हय र्‌या ती हामुक नी जमे।”
ACT 4:21 तत्‌यार चे पतरस ने युहन्‌ना काजे अळी बेसका चेतावीन छुड़ देदा, काहाकी तीनुक डंड आपणेन तीनुक काय बी बाहनो नी जड़्‌यो, काहाकी ज वारु काम हयो हतलो तीना कामेन साहरे आखा माणसे भगवानेन बड़ाय करने बाजी रवला।
ACT 4:22 काहाकी तीना वारु कामेन सहलाणीन साहरे च माणुस वारु, तेरी उमर चाळीस साल सी वदु हतली।
ACT 4:23 जत्‌यार चे पतरस ने युहन्‌ना काजे छुड़ देदा, ती पतरस ने युहन्‌‌‌नु आपसा सातीन्‌चां आया, ने ज काय पुडारी ने भगवानेन मुख्‌या पुजारा कवला, च आखो तीनुक कय देदा।
ACT 4:24 ज सामळीन पतरस ने युहन्‌‌‌नु तींद्‌रा साती आखा मेळीन भगवान सी एक जसी वीन्‌ती कर्‌या, ए मालीक, तुत सरगे ने धरतीक, ने समुदर ने समुदर मां ज काय छे, च आखो बणावलु‌ छे।
ACT 4:25 तु चुखली-आत्‌मान साहरे आपसा पावर्‌या दावुदेन मुंहडे ज कवलु हतलु, नी-यहुदी माणसे असलात काहा आयड़े? आखा देसेन माणसे फालतु वीच्‌यार काहा कर रया?
ACT 4:26 धरतीन राजा, ने देस देसेन राज करन्‌या आखा भेळा हवे; चे मालीक भगवान भीणी ने तेरा नेवाड़ला राजा भीणी जुर करे।
ACT 4:27 काहाकी चे छाचलीन, चुखलु चाकर्‌या ईसुन वीरुद मां हय्‌न जाळसांदी बणाय रया, तीना काजे तु नेवाड़लु छे, हेरोदेस ने पुंतीयुस पीलातुस, ने नी-यहुदी ईस्‌रायली जातीन माणसे सहर मां भेळा हय रया।
ACT 4:28 हव, चे एरेन करीन भेळा हय रया की ज काय तारी ताकत ने मरजी सी पेहले सीत ठहरावलो छे, ज पुरो हय सके।
ACT 4:29 ए मालीक! हय, हींद्‌री धमकी काजे देख, की तारा पावर्‌या काजे जु वाटु आप की चे तारा बुल काजे बीहे बीगुर पुरी हिम्‌मत सी सामळावे।
ACT 4:30 ने तु माणसेक वारु करने करीन आपसुत हात अगु कर; ने तारा चुखला चाकर्‌या ईसुन नावे, सहलाणी ने भाती-भातीन वारु काम देखाड़?
ACT 4:31 जत्‌यार चे भगवान धड़े दुवा करीन नवराय गुया, ती चु जागु, जां चे भेळा हय रवला, हाल पड़्‌यु, ने चुखली-आत्‌मा तींद्‌रेम पुरु-पुरु भरायन तीनुक कब्‌जाम कर लेदु, ने चे हिम्‌मत सी भगवानेन बुल माणसे काजे सामळावणे बाजी गुया।
ACT 4:32 ईसु पर भुरसु करन्‌या माणसेन एक टुळु ने एक मन्‌या ने एक जसा हय्‌न रवतेला। कुय बी आपसा धन काजे आपसो नी समजतेला। ज काय तींद्‌रे धड़े रवतेलो, तेरेमां आखान साजु हतलो।
ACT 4:33 ईसुन नेवताळा पर जुर लागाड़ीन मालीक ईसुन मर्‌या-सर्‌याम सी जीवतु हय्‌न बठु हवणेन गवा देदला, ने तीनु आखा पर भगवानेन मट्‌ली गीण-दया हतली।
ACT 4:34 ने तींद्‌रेम कुय बी गरीब नी हतलो, काहाकी तींद्‌रे धड़े खेती नीते घर हतलो, तीनुक चे एच देद्‌ला,
ACT 4:35 ने तींद्‌रु दाम लावीन ईसुन नेवताळान पायेन्‌चां लायन मेल देदला; ने तीनुक ज चाहतेलो च तीनुक वाट देदला।
ACT 4:36 युसुफ नावेन एक सायपर्‌सेन लेवी कुळी मायन हतलु, जु कुपरुस मां पयदा हवलु हतलु, तेरो नाव ईसुन नेवताळा बरनाबास पाड़ला हतलो। बरनाबास मतलब दीलासु आपण्‌यान पुर्‌यु।
ACT 4:37 तेरु एक जागु हतलु, तीना जागा काजे चु वेचलु हतलु, ने चु जागान रुप्‌या लावीन ईसुन नेवताळान पाय मां मेल देदु।
ACT 5:1 हनन्‌या नावेन एक अदमी ने आपसी घरवाळी सफीरा खेत वेचणेन बारामां वीच्‌यार कर्‌या अळतेन एक खेत वेच देदु।
ACT 5:2 चु खेतेन दामेन एक वाटु आपसु राख लेदु जी वात तेरी घरवाळीक बी मालुम हतली, ने चु दीसरु हीस्‌सु लावीन नेवताळान पाय मां मेक देदु।
ACT 5:3 अतरा मां पतरस कह्‌यु, “हनन्‌या! तु भुतड़ा काजे तारा मन पर काहा राज करने देदु, ने भुतड़ान जी वात काहा मान लेदु की तु चुखली-आत्‌मा काजे लुच्‌चाय मेल ने खेत वेचलु तीना दामेन सी ईतराक रुप्‌या बचाड़ीन मेल ले?
ACT 5:4 वेचायणेन पेहले च खेत तारो नी हतलो काय? ने तीना वेचायला खेतेन दाम पर तारु हक नी हतलु काय? तु आपसा मन मां असलु वीच्‌यार काहा आवणे देदु? तु माणसेक नी, बाकुन भगवानेक झुट मेक्‌लु छे।”
ACT 5:5 हनन्‌या ची वात सामळ्‌युत ने हीट पड़्‌यु ने तेरु जीव नीकळी गुयु। ने जे बी एरे बारामां सामळ्‌या, चे बेसका बीही गुया।
ACT 5:6 अळतेन थुड़ाक जुवान्‌या उठीन हनन्‌या धड़ेक हाकलीन सीवड़ीन पुथल्‌या मां वेलट्‌या, ने बाहर ली जाय्‌न वोगे कर देदा।
ACT 5:7 ज हयो, तीनी वातेन बारामां हनन्‌यान घरवाळी काजे मालुम नी हतलो, तीनेक घंटा हय गुया ने अळतेन ची पतरस हतलु तीना घरमां आवी।
ACT 5:8 तत्‌यार पतरस तीनीक जु सवाल पुछ्‌यु, “मेसेक बताड़, तुहुं च खेत अतरात पयस्‌या मां वेचला काय?” ची जपाप आपी, “हव, अतरात पयस्‌या मां वेचला।”
ACT 5:9 तेरु जपाप सामळीन पतरस तीनी काजे कह्‌यु, “तुहुं दुय जणा मालीक भगवानेन चुखली-आत्‌मा काजे पारखणे करीन एक मन्‌या हय्‌न काहा राजी हय गुया सामळु! जे माणसे तारा धेणी काजे अळावीन वगे करने गुयला, चे पछा आवीन झपले उबा हय रया, ने हय चे तुसेक बी वगे करने बाहर ली जासे।”
ACT 5:10 जी वात सामळतेत ची पतरसेन पायेम हीट पड़ी, ने मर गुय, ने चे जुवान्‌या घरमां आवीन तीनीक मरली देख्‌या, ने चे तीनीक बी ईछीन बाहर ली जाय्‌न तेरा धेणीन मसाण धड़ेत अळावीन वगे कर देदा।
ACT 5:11 तेरेसी आखी मंडळीन माणसे ने जी वात सामळीन बीही गुया।
ACT 5:12 ईसुन नेवताळान साहरे बेसका वारु कामेन सहलाणी ने मटा-मटा काम माणसे मां देखाव पाड़्‌यु, ने आखा ईसुन नेवताळा एक मन्‌या हय्‌न सुलेमानेन खपड़ी मां भेळा हवतेला।
ACT 5:13 बाकुन दीसरा माणसे काजे ईसुन नेवताळा पुठ्‌ये भेसकायणे वारु नी लागतेलो बाकुन चे ईसुन नेवताळा काजे चे बेसका वारु छे करीन कवतेला।
ACT 5:14 बाकुन ईसु पर भुरसु करन्‌या बेसका अदमी ने बायरा आवीन मालीक ईसुन मां जादास-जादा अदु हवता गुया।
ACT 5:15 जत्‌यार पतरस जां मायन नीकळीन गुयु ती मांदला माणसे पर पतरसेन साहळु काहना ने काहनाक पर पड़से ने पड़से करीन माणसे, मांदला काजे सयड़क धड़े लावीन खाट्‌ली पर ने झुळना मां टुपाड़ीन मेल देदला
ACT 5:16 ने यरुसलेम सहरेन आड़े-धड़ेन सहर वाळा बी मांदला काजे भुतड़ा आत्‌मा लागला माणसे काजे लावतेला ने चे आखा वारु हय जातला।
ACT 5:17 ज आखो देखीन भगवानेन डाहलु पुजारु, ने सदुकी पंथवाळा तेरा आखा सात-संगात वाळा बेसका कुहरायणे बाजी गुया।
ACT 5:18 ने चे ईसुन नेवताळा काजे धरीन जेल मां कुंडी देदा।
ACT 5:19 बाकुन मालीक भगवानेन एक सरग वाळु भगवानेन अघली वात बताड़ने वाळु, जेलेन झपलु उगाड़ देदु, ने चु तीनाक बाहर ली जाय्‌न कह्‌यु,
ACT 5:20 “जावु, ने मंदीरेम उबा हय्‌न ईनी नवली जीवाय्‌न बारामां आखी वात माणसेक सामळावु।”
ACT 5:21 ने ईसुन नेवताळा सरग वाळा भगवानेन अघली वात बताड़ने वाळान वात सामळीन संदारो हवतात मंदीर मां जाय्‌न नवली जीवाय्‌न वात सामळावणे बाजी-गुया। तत्‌यार भगवानेन डाहलु पुजारु, ने सदुकी पंथवाळा तेरा आखा सात-संगात वाळा आवीन यहुदी माणसेन बसक ने ईस्‌रायली जातीन आखा पुडारी काजे भेळा कर्‌या, ने सीपायड़ाक कय मकल्‌या की तुहुं जेल सी ईसुन नेवताळा काजे ली आवु।
ACT 5:22 बाकुन जत्‌यार सीपायड़ा चां पुग्‌या, ती चे ईसुन नेवताळा तीनुक जेल मां नी जड़्‌या। ती चे सीपायड़ा पछा आवीन भगवानेन डाहला पुजारा ने सदुकी पंथवाळा ज कह्‌या,
ACT 5:23 “हामु जाय्‌न देख्‌या ती जेलेम वारु छत करीन बंद कर मेकलो हतलो, ने झपले पहरु देण्‌या झपले पहरु देदा जाय्‌न उबा हय रवला; बाकुन जत्‌यार हामु मांही गुया, ती चां सारा काहना नी हतलो।”
ACT 5:24 ची वात सामळीन मंदीरेन राखवाळ्‌या डखी ने भगवानेन डाहला पुजारी फीकुर मां पड़ गुया, ने ची वीच्‌यार करने बाजी गुया, “हय आपणु काय करजे।”
ACT 5:25 तीनेत टेमे काहनुक आवीन तीनुक जी खबर आप्‌यु, “देख, तीनु माणसे काजे तुहुं जेल मां कुंडी देदला, चेत माणसे मंदीर मां उबा हय्‌न माणसेक नवली जीवाय्‌न बारामां सीकाड़ने बाजी रया।”
ACT 5:26 तत्‌यार मंदीरेन राखवाळ्‌या सीपायड़ान डखी, आपसा सीपायड़ा काजे लीन गुयु ने ईसुन नेवताळा काजे धर लायु। बाकुन माणसे हामुक दगड़ाट देसे, करीन तीनुक जबरान धरीन नी लायु, काहाकी चे माणसेक देखीन बीहतेला।
ACT 5:27 चे ईसुन नेवताळा काजे लावीन मट्‌ली बठक अगळ उबा कर देदा; ने भगवानेन डाहलु पुजारु ईसुन नेवताळा सी सवाल पुछ्‌यु,
ACT 5:28 “हामु तुहुं काजे बेसका कयड़ा चेताड़ीन हुकुम आप्‌ला की ‘तुहुं ईसुन नाव लीन माणसेक घुण सीकाड़जु?’ तेबी तुहुं आखा यरुसलेम सहर मां ईसुन नाव लीन सीकाड़ने बाजी गुया, ने ईसुन लुहीन गुनु हामरे मुणका पर पाड़ने हींड रया।”
ACT 5:29 पतरस ने ईसुन नेवताळान चु जपाप आप्‌या, “माणसेन हुकुम सी भगवानेन हुकुम पाळनु बेसको वारु छे।
ACT 5:30 तीना ईसु काजे तुहुं कुरुस पर चड़ावीन खीळा ठुकीन मार नाख्‌ला, तीना ईसु काजे आपणा डाहा-डाहान भगवान मर्‌या-सर्‌याम सी जीवाड़ देदु।
ACT 5:31 ईनात ईसु काजे भगवान मालीक ने पापेम सी छुड़ावणे वाळु ठेहरावीन, आपसे जेवड़्‌ये आन्‌गे बठाड़ीन मट्‌लु हक आप देदु, ने चु ईस्‌रायली जातीन माणसे काजे पापे भीणी सी मन फेरवीन, भगवान भीणी वळनेन ताकत ने पापेन माफी आपे।
ACT 5:32 ईनी आखी वातेन गवा हामु छे, ने चुखली-आत्‌मा बी छे, ने चु चुखली-आत्‌मा, भगवान तीनु माणसेक आपलु छे, जे भगवानेन हुकुम काजे पाळे।”
ACT 5:33 जी वात सामळीन चे बेसका रीसाय गुया, ने ईसुन नेवताळा काजे मार नाखणेन वीच्‌यार कर्‌या।
ACT 5:34 यहुदी माणसेन मट्‌ली बसक मां गमलीयेल नावेन एक फरीसी माणुस हतलु, चु मुसान साहरे लिखली सास्‌तुरेन कायदा सीकाड़न्‌यु मास्‌तर हतलु, ने तेरी ईज्‌जत आखा करतेला। चु यहुदी माणसेन बसक उबु हय्‌न हुकुम आप्‌यु की “ईनु ईसुन नेवताळाक ईतरीक वार लग बाहर ली जावु।”
ACT 5:35 ने अळी चु बसक मायन ईस्‌रायली माणसेक कह्‌यु, “ए ईस्‌रायली जातीन माणसे, तुहुं ईनु माणसे साते ज काय करने हींड रया, च वारु वीच्‌यार करीन करजु।
ACT 5:36 काहाकी ईनु दाहड़ा सी पेहले थीयुदास नावेन एक माणुस ज कवतु जाय्‌न उबु हयु, ‘मे काही छे’ ने च्‌यारेक सोव माणसे तेरे पर भुरसु करीन तेरे पुठ्‌ये चाल पड़्‌या, बाकुन तीनाक काहनुक मार नाख्‌यु; ने दत्‌रा बी माणसे तेरे पुठ्‌ये हतला, चे आखा रावण्‌या-तीवण्‌या हय्‌न सर गुया।
ACT 5:37 अळतेन माणसेन गिन्‌तीन टेम आवी, तीने टेमे गलील जीला मां रवण्‌यु यहुदा उजेंतु हयु। चु ईतराक माणसे काजे तेरे भीणी कर लेदु। बाकुन तीनाक बी काहनुक मार नाख्‌यु। ने तेरे पर भुरसु करन्‌या बी रावण्‌या-तीवण्‌या हय गुया
ACT 5:38 तेरेसी मे तुहुं काजे कहं की तुहुं ईनु ईसुन नेवताळा सी छेटा रवणु, ने हींद्‌रा काम मां आड़ा मां देवायु, काहाकी हींद्‌री युजना ने काम माणसे वगे सी हसे ती ची आपसीत सर जासे।
ACT 5:39 बाकुन कदी जी युजना भगवान सुदी सी हसे, ती तुहुं हीनुक कदी सारी नी सकु; ने तुहुं भगवानेन वीरुद हय्‌न तेरे साते लड़ायण्‌या बी गीणायसु।” तत्‌यार चे बसक मायन ईस्‌रायली माणसे गमलीयेलन वात मान लेदा।
ACT 5:40 ने चे, ईसुन नेवताळा काजे बुलावणे मकल्‌या ने जत्‌यार तीनुक ली आया ती तीनुक ठुक्‌या; ने तीनुक जु हुकुम आपीन कह्‌या, “ईसुन नाव लीन कुय साते वात घुण करु।” ने अळतेन तीनुक छुड़ देदा।
ACT 5:41 ने ईसुन नेवताळा जी वात सामळीन ज कवता जाय्‌न खुस हय्‌न मट्‌ली सभा मां सी जाती रया, “कम सी कम हामरी ईसुन नावे नाव-बद्‌दी ते हयी।”
ACT 5:42 चे दाहड़ीत मंदीर मां, ने घर-घर जाय्‌न ईसुन वात सामळावता रया, ने ईसुन ची खुस-खबर सामळावता गुया की “ईसुत मसी छे।”
ACT 6:1 तीनु दाहड़ाम जत्‌यार माणसे जादात ईसुन चेला बणीन ईसु मां भेसकाया। ती युनानी बुली बुलन्‌या, ज कहीन कुर-कुर करने बाजी गुया, “दाहड़ीन खाणाम ने समान वाटे, ती हामरा रांडायला बायरा काजे टाळ देय ने तीनुक काय नी आपे।”
ACT 6:2 तत्‌यार ईसुन बारे नेवताळा, चेलान बसक बुलावीन कह्‌या, ज वारु नी हय की हामु खाणु वाटणेन करता वारती बणीन भगवानेन बुल छुड़ देजे।
ACT 6:3 तेरेसी ए भायस्‌यो, तुहुं आपसा मां सी वारलु गुण वाळा अदमी काजे नेवाड़ लेवु, तींद्‌रेम चुखली-आत्‌मा पुरु-पुरु भरायलु छे, ने चे अक्‌कल वाळा ने ईमानदार छे, ने हामु तीनुक खाणु ने समान वाटणेन हक आप देसु।
ACT 6:4 बाकुन हामु भगवान धड़े दुवा करता रवसु ने भगवानेन बुलेक वाटणेन चाकरी करता रवसु।
ACT 6:5 जी वात सामळीन आखा माणसे खुस हय गुया। ने चे स्‌तीफनुस काजे नेवाड़ लेदा तेरेमां चुखली-आत्‌मा पुरु-पुरु भरायलु हतलु, ने चु ईसु पर पाक्‌कु भुरसु करन्‌यु हतलु। ने चे फीलीप्‌पुस काजे, ने पुरखुरुस काजे, ने नीकानोर काजे, ने तीमोन काजे, ने परमीनास काजे, ने अन्‌ताकीया वाळा नीकुलावुस काजे जु यहुदी धरम काजे मान्‌ने बाजी गुयलु हतलु, नेवाड़्‌या।
ACT 6:6 ने चे तीनुक ईसुन नेवताळा अगळ उबा कर देदा ने ईसुन नेवताळा तीनु नेवाड़ला वाटे भगवान धड़े दुवा कर्‌या ने अळी तींद्‌रे पर आपसा हात मेल्‌या।
ACT 6:7 भगवानेन वात फेलायती गुय, ने यरुसलेम मां बेसका ईसु पर भुरसु करीन चेला बण गुया; ने भगवानेन डाहला पुजारान मट्‌लु टुळु ईना ईसुन भुरसा काजे मान लेदा।
ACT 6:8 स्‌तीफनुस भगवानेन गीण-दया ने भगवानेन जुरे सी भरायन माणसे मां सहलाणीन वारु काम देखाड़तेलु।
ACT 6:9 तीनी टेमे छुट्‌ला-माणसे नावेन यहुदी माणसेन भक्‌तीन घरे मायन हतला, कुरेनी ने सीकेन्‌दर्‌या ने कीलक्‌या ने आसीयान माणसे मां सी एक-एक जणु उठीन बेसका जणा स्‌तीफनुस साते वातेम जखड़ी पड़ने बाजी गुयला
ACT 6:10 बाकुन स्‌तीफनुस भगवानेन चुखली-आत्‌मान अगवाय मां ने भगवानेन अकलेन अगवाय मां बुलतेलु तेरेसी तीनुक स्‌तीफनुसेन वात काटायी नी सकी।
ACT 6:11 तेरेसी चे पयस्‌या आपीन थुड़ाक अदमीक जी झुटी गवा देवाड़्‌या, “हामु ईना स्‌तीफनुस काजे मुसान ने भगवानेन नाव-बद्‌दी करतेलु सामेळला छे।”
ACT 6:12 असा करीन चे माणसे काजे, ने पुडारी काजे ने यहुदी-धरम सीकाड़न्‌या मास्‌तर्‌या काजे भड़कावीन उचकाणुन स्‌तीफनुसन्‌चां आय लाग्‌या ने तीनाक धरीन मट्‌ली बसक अगळ ली गुया।
ACT 6:13 ने चां चे झुटा गवा उबा कर्‌या, ने चे झुटा गवा देण्‌या कह्‌या “जु अदमी दाहड़ीत ईना चुखला मंदीरेन ने मुसान साहरे लिखली सास्‌तुरेन नाव-बद्‌दी करे।”
ACT 6:14 काहाकी हामु ईनाक ज कवतेलु सामेळला छे, “ईसु नासरी ईना मंदीर काजे उदार देसे, ने मुसान साहरे आपली रीती-भातीक बद्‌ली देसे।”
ACT 6:15 मट्‌ली बसक मां बसला आखा माणसे स्‌तीफनुस भीणी एक हेट्‌या देख रवला, ती तीनुक, स्‌तीफनुसन मुंहडान सीकु सरग काहवाळ्‌यान तसु देखाय देदु।
ACT 7:1 भगवानेन डाहलु पुजारु पुछ्‌यु, “जे माणसे तारे पर जु गुनु लागड़ रया, चु गुनु सय छे काय?”
ACT 7:2 तत्‌यार स्‌तीफनुस कह्‌यु, ए डाहा-डाहा ने भायस्‌यो! मारी वात सामळु। जत्‌यार हामरु बास अब्‌राहम, हारान मां बसणेन पेहले मेसोपोटामीया मां रवतेलु, ती तीनी टेमे सेक-सींगार भर्‌यु भगवान तीनाक देखाव पड़्‌यु,
ACT 7:3 ने कह्‌यु, आपसो देस ने आपसा घर काजे छुड़ दे, ने तीने देस जां, ज देस मे तुसेक देखाड़ीस।
ACT 7:4 तत्‌यार अब्‌राहम कसद्‌यान देस हारान सहर मां बस गुयु। तेरु बास मर गुयु ने अळी भगवान तीनाक चां सी ईना देस मां लायु, जां तुहुं हींताळ रय र्‌या।
ACT 7:5 ईना देसेम भगवान तीनाक जागरी रीते काहनी जागा नी आप्‌यु, चां लग की पाय मेकणे करीन बी जागा नी आप्‌यु। बाकुन चु वायदु कर्‌यु की मे ज देस तुसेक ने अळी तारी अवल्‌यात काजे आपीस तीनी टेमे अब्‌राहमेन एक बी पुर्‌यु नी हतलु।
ACT 7:6 भगवान अब्‌राहम काजे ज बी कह्‌यु, तारी अवल्‌यातेन अवल्‌यात दीसरा देस मां परदेसीन तसा रवसे। ने चां आखा माणसे तीनुक गुलाम बणायन जुर जबरान काठो काम करावीन चार सोव साल लग वेला पाड़से।
ACT 7:7 अळी भगवान कह्‌यु, जुर जबरान काठो काम करावीन वेला पाड़न्‌या नी-यहुदी माणसे काजे, मे नीयाव करीन डंड आपीस, ने अळी काठो काम करन्‌या तीना देसेम सी नीकाळ लावीस ने ईनीत जागे मारी सेवा करसे।
ACT 7:8 ने भगवान ईब्‌राहीम वाटे फतरी काटणेन बुली कर्‌यु; ने असु करीन चु इसाकेन बास बण्‌यु ने आठवे दाहड़े तेरी फतरी काटायी। इसाक, याकुपेन बास बण्‌यु, ने याकुप बारे कुळेन डाहलु बास बण्‌यु।
ACT 7:9 कुळ धेण्‌या, युसुफ पर कुहरायतेला, तेरेसी चे युसुफ काजे मीसरे देस जाण्‌या वेपारी काजे वेच देदा; बाकुन भगवान युसुफ पुठ्‌ये हतलु।
ACT 7:10 चु आखी गरा सी युसुफ काजे बचाड़्‌यु। भगवान युसुफ काजे मीसरेन राजा फीरोन अगळ गीण-दया ने अक्‌कल आप्‌यु; ने चु राजा युसुफ काजे आपसा घरबारेन हकदार्‌यु बणाय देदु।
ACT 7:11 तीनी टेमे आखा मीसर देसेम ने कनान देसेम काळ पड़्‌यु; ने भारी गरा आवी, ने आपणा आड़ा-बुड़ा काजे खाणे करीन काय नी जड़्‌यो।
ACT 7:12 जत्‌यार याकुप ज सामळ्‌यु की मीसर देस मां अन जड़े, ती चु हामरा आड़ा-बुड़ा काजे चां पेहली कावा मकल्‌यु।
ACT 7:13 ने चे दीसरी कावा चां मीसर मां गुया, ती युसुफ आपसा भायस्‌यो काजे आपसी उळखाण कराड़्‌यु, ने फीरोन राजा काजे युसुफेन घरन्‌यान पतु चाल्‌यु।
ACT 7:14 तत्‌यार युसुफ आपसा याकुप ने तेरा आखा घरबार्‌या काजे बुलाय मांग्‌यु। चे आखा मेळीन पांच कम च्‌यार वीसु माणसे हतला।
ACT 7:15 याकुप मीसर देस गुयु। ने आपणा आड़ा-बुड़ा बी मरीन सर गुया।
ACT 7:16 अळी तींद्‌रा धड़ेक सकेम मां लाया, ने तीना मसाण्‌या मां अगे कर्‌या, जां अब्‌राहम सकेम मां हामरेन पुर्‌या धड़े चांदी आपीन मुल लेदलु।
ACT 7:17 बाकुन जत्‌यार भगवान अब्‌राहम साते जु वायदु कर्‌यु, चु वायदु पुरु हवणेन टेम धड़े आय रवली, ती आपणा माणसे मीसर देस मां बेसका हय गुया।
ACT 7:18 तत्‌यार मीसर मां एक नवलु राजा पयदा हयु, जु युसुफेन बारामां काय बी नी जाणतेलु।
ACT 7:19 चु आपणा जातीन माणसे साते काट राखीन वेला पाड़्‌यु। तेरेसी आपणा आड़ा-बुड़ा काजे आपसा पुर्‌या काजे मरने करीन बाहर नाखणु पड़्‌यो।
ACT 7:20 तीनी टेमे मुसु पयदा हयु। भगवानेन नींगा मां चु बेसकु वारु हतलु, ने तीन महना लग आपसा बासेन घर मां पुसायु।
ACT 7:21 ने जत्‌यार पुर्‌या काजे बाहर नदी मां नाख देदा, ती फीरोन राजान पुरे तीना पुर्‌या काजे ईछ लेदी, ने तीनाक आपसा पुर्‌यान तसी पाळी-पुसी।
ACT 7:22 ने मुसा काजे मीसर देसेन आखी वीद्‌या भणाया। ने मुसु वातेम ने काम मां जुर भर्‌यु बण गुयु।
ACT 7:23 जत्‌यार मुसु चाळीस सालेन हय गुयु, ती तेरा मन मां वीच्‌यार आयु की मे मारा ईस्‌रायेली भाय-बेटाक भेळु हव।
ACT 7:24 तींद्‌रे मायन एक जणा काजे वेला पाड़तेला देखीन मुसु तेरे वळ्‌यु नी हयु, ने मीसर देस वाळा काजे मारीन वेला पाड़नेन बद्‌लु लेदु।
ACT 7:25 मुसान वीच्‌यार जु हतलु की मारा भायस समजी जासे की भगवान एरे साहरे हामुक छुटकारु आपसे बाकुन चे तसा नी समज्‌या।
ACT 7:26 दीसरे दाहड़े मुसु दुय ईस्‌रायेली भाय-बेटा काजे लड़ायतेला देख्‌यु, ती चु तींद्‌रेन्‌चां आवीन तीनुक मेळ करावणे करीन तीनुक कह्‌यु, ए भायस्‌यो, तुहुं काहा आंबा-सांबा लड़ायन एक दीसरान नुकसाण कर रया?
ACT 7:27 बाकुन जु अदमी आपसा भाय-बेटा साते लड़ायन तेरो नुकसाण करी रवलु चु, मुसा काजे धकली देदु, ने कह्‌यु, कुण तुसे काजे हामरु मुखी ने नीयाव करन्‌यु बणावलु छे?
ACT 7:28 काल ते, तु तीना मीसर देस वाळा काजे मार नाख्‌यु। तसुत मेसे काजे बी मारने हींड रयु काय?
ACT 7:29 जी वात सामळीन मुसु चां सी ढास गुयु ने मीद्‌यान देस मां परदेसी बणीन रवणे बाजी गुयु। ने तीना मीद्‌यान देसेम तेरा दुय पुर्‌या हया।
ACT 7:30 जत्‌यार चां रवते-रवते चाळीस साल हय गुया, ती एक भगवानेन सरग वाळु काहवाळ्‌यु, सीनाय बयड़ा पर एक धपतेला काटाळ्‌ळा झाड़का मां देखाव पड़्‌यु।
ACT 7:31 ज देखीन मुसु चकराय गुयु, ने धपतेला झाड़का काजे देखणे करीन धड़ेस गुयु, ती चु मालीक भगवान काजे ज कवतेलु सामळ्‌यु,
ACT 7:32 मे तारा आड़ा-बुड़ान भगवान छे, अब्‌राहमेन, ने इसाकेन, ने याकुपेन भगवान छे। ज सामळीन मुसु थर-थर कापणे बाजी गुयु ने तीनाक धपतेलो झाड़को अळी देखणे हिम्‌मत नी चाली।
ACT 7:33 तत्‌यार मालीक मुसा काजे ज कह्‌यु, तु तारा पायेम पेहरला चीपल्‌या नीकाळ दे, काहाकी तु जां उबु हय रयु, ची जागा चुखली छे।
ACT 7:34 मे मीसर देस मां रवण्‌या मारा माणसेन वेला काजे देखलु छे; ने तींद्‌रो कासणु ने रड़नु सामेळ्‌लु छे; तेरेसी मे तीनुक छुड़ावणे करीन आवलु छे। हय तीयार हय जां। मे तुसेक मीसर देस मां मकलीस।
ACT 7:35 तीना मुसा काजे ज कवता जाय्‌न तेरु नीकारु करला, कुण तुसे काजे हामरु मुखी ने नीयाव करन्‌यु बणावीन तीना सरग वाळा भगवानेन काहवाळ्‌यान साहरे तींद्‌रेन्‌चां मकल्‌यु, जु तीनाक धपतेला काटाळ्‌ळा झाड़का मां देखाव पड़लु।
ACT 7:36 हयुत मुसु तीनुक मीसर देस मां ने रातला समुदर मां ने जंगल मां चाळीस साल लग मटो-मटो वारु काम ने सहलाणी देखाड़ीन तीनुक नीकाळ लायु।
ACT 7:37 जु हयुत मुसु छे, जु ईस्‌रायेली माणसे काजे ज कह्‌लु, भगवान तुंद्‌रात भायस्‌यो मां सी तुंद्‌रे वाटे मारेन तसु एक धरमी भगवानेन अघली वात बताड़ने वाळु उबु करसे।
ACT 7:38 मुसु जंगल मां आपणा माणसे मां उबु हय्‌न आपणा आड़ा-बुड़ा ने तीना सरगदुतेन ईचमां भान्‌गड़्‌यु बण्‌यु, जु सीनाय बयड़ा पर तेरे साते वाते लाग्‌यु। तीनाक जीवतेला भगवानेन बुली जड़ी, तेरेसी चु जी भगवानेन बुली आपणुक सामळावे।
ACT 7:39 बाकुन आपणा आड़ा-बुड़ा तेरी वात मान्‌ने नी हींड्‌या; बाकुन चे मुसान वात काजे टाळ देदा। ने मीसर देस भीणी आपसो मन लागाड़्‌या।
ACT 7:40 ने चे हारुन काजे कह्‌या, हामरे वाटे असु देवता बणाव, जु हामरे अगळ-अगळ चाल तसु; काहाकी जु मुसु हामु काजे मीसर देस सी लावलु, तेरो काय हयो ने काय नी जाणे हामुक मालुम नी हय।
ACT 7:41 तीनु दाहड़ाम चे केवड़ान मुरती बणायन तेरे अगळ जनवार्‌या मारीन चड़ाया; ने तेरी पुजा-पाट कर्‌या; ने चे हाते बणावली मुरतीन तीहवार वाळीन खुस हय गुया।
ACT 7:42 तेरेसी भगवान तींद्‌रे सी आडु देख लेदु, ने चु तीनु काजे सरगेन तारान पुजा करने करीन रवणे देदु; जसु भगवानेन अघली वात बताड़ने वाळा माणसेन किताप मां बी लिखलो छे: ए ईस्‌रायेली माणसेन घरना, तुहुं चाळीस साल लग जंगल मां, मारी पुजा-पाट करने करीन जनवार्‌याक मारीन बली चड़ावला ने रुटा करीन चड़ाया करतेला काय।
ACT 7:43 तुहुं मेलेक देवतान तम्‌बु काजे, ने रेफान देवतान तारा काजे आपसा खांदा पर हाकलीन ली गुयला, ने तुहुं तीनु मुरत्‌या काजे बी पुठ्‌ये ली गुयला तीनु काजे पुजणे ने आंधणे करीन बणावला हतला। तेरेसी मे तुहुं काजे बेबीलोन ईलाका सी बी लांबे मकली दीस।
ACT 7:44 जंगल मां हामरा आड़ा-बुड़ा धड़े गवान तम्‌बु हतलु। भगवान मुसा काजे ईना तम्‌बुन बारामां ज हुकुम आप्‌यु हतलु, मे तीना तम्‌बुन सहलाणी तुसे काजे देखाड़लु छे, तीनी सहलाणीन अनुसार तम्‌बु बणावजी।
ACT 7:45 पछेन चु तम्‌बु अगली पीड़ीन आपणा आड़ा-बुड़ा यहोसुन अगवाय मां जां ली आया; तीने टेमे चे नी-यहुदी धड़े जी धरती हापकी लेदला, काहाकी भगवान नी-यहुदी काजे आपणा आड़ा-बुड़ा अगळ सी नीकाळ देदलु; ने असु करीन चु तम्‌बु दावुदेन टेम लग आपणा आड़ा-बुड़ान हातेम रयु।
ACT 7:46 ईना दावुद पर भगवान गीण-दया कर्‌यु, ने दावुद जी हेर कर्‌यु की मे याकुपेन भगवान वाटे एक मंदीर बणावीस।
ACT 7:47 बाकुन सुलेमान याकुपेन भगवान वाटे मंदीर बणायु।
ACT 7:48 तेबी आखाम उचु रवण्‌यु भगवान माणसेन साहरे बणावला घर मां नी रयु, जसु भगवानेन अघली वात बताड़ने वाळु माणुस कवे,
ACT 7:49 सरग मारी राजगादी छे, ने धरती मारी पायेन पयड़ी छे, तुहुं मार वाटे काहनु मंदीर बणावसु? मालीक पुछे, मार वाटे आराम करनेन असु काहनु जागु छे, जां मे आराम करो?
ACT 7:50 काय ज आखो मार हात सी बणावलो नी हय काय?
ACT 7:51 ए काठला, ने मन ने कान्‌टान नी फतरी काटाड़ला माणसे! तुहुं जलम चुखली-आत्‌मान वीरुद कर्‌या करे। तुहुं तुंद्‌रा आड़ा-बुड़ान तसा छे।
ACT 7:52 तुंद्‌रा आड़ा-बुड़ा काहना भगवानेन अघली वात बताड़ने वाळु माणुस काजे वेला नी पाड़्‌या? चेते तीनु भगवानेन अघली वात बताड़ने वाळु माणुस काजे मार नाख्‌या, जे पेहले सी तीना वारलु माणसेन बारामां कवला, जु आवणे वाळु हतलु।
ACT 7:53 तुहुं काजे सरग वाळा भगवानेन अघली वात बताड़ने वाळान साहरे कायदु ते जड़्‌यु, बाकुन तीना कायदा काजे तुहुं पाळ्‌या नी।
ACT 7:54 जे स्‌तीफनुसेन वात सामळीन बेसका जबर रीसाय गुया, ने तेरे पर दात ककड़ावणे बाजी गुया।
ACT 7:55 बाकुन चुखली-आत्‌मा स्‌तीफनुस मां पुरु-पुरु भरायन कब्‌जा मां कर लेदु ने चु सरगे भीणी एक हेट्‌यु देख्‌यु, ने भगवानेन सेक-सींगार काजे ने ईसु मसी काजे भगवानेन जेवड़्‌ये आन्‌गे उबु हय रवलु देख्‌यु।
ACT 7:56 ने चु कय पड़्‌यु, “सामळु! मे सरगे काजे उघड़लो, ने माणसेन पुर्‌या काजे भगवानेन जेवड़्‌ये आन्‌गे बसी रवलु देख रयु।”
ACT 7:57 तेरी वात सामळीन चे आपसा कान्‌टा बुज लेदा, ने आखा एक वळा हय्‌न तेरे भीणी हुड़दीन आया।
ACT 7:58 ने तीनाक सहरे सी घीसड़ीन बाहर ली गुया, ने गवा देण्‌या माणसे आपसा पुथल्‌या नीकाळीन सावुल नावेन एक जुवान माणुस अगळ मेल देदा।
ACT 7:59 ने चे माणसे स्‌तीफनुस काजे दगड़ाटतात रया, ने चु असु वीन्‌ती कर्‌यु, “मालीक ईसु! मारा जीव काजे आवरी ले।”
ACT 7:60 ती चु मुंहडान भुरसे हीट पड़्‌यु ने जुर सी आयड़ीन कह्‌यु, “मालीक! ईना पाप-गुनान डंड ईनुक घुण आपे।” ने ज कयदीन चु मर गुयु।
ACT 8:1 सावुल स्‌तीफनुसेन हत्‌याम राजी हतलु। तीने दाहड़े सी माणसे यरुसलेमेन मंडळी काजे बेसका वेला पाड़नु सुरु कर देदा, ने ईसुन नेवताळा काजे छुड़ीन आखान-आखा यहुदीया जीला मां ने सामर्‌या जीला मां रावण्‌या-तीवण्‌या हय गुया।
ACT 8:2 ईसुन भगत माणसे स्‌तीफनुसेन लास काजे बेसका रड़ता जाय्‌न वगे कर देदा।
ACT 8:3 सावुल तीनी टेमे ईसुन मंडळी काजे वेला पाड़ी रवला; ने चु ईसुन आखा माणसेन घर-घर जाय्‌न अदमीक ने बायराक घीसड़ी-घीसड़ीन लाय्‌न जेल मां नाखतेलु।
ACT 8:4 जे माणसे अथा-अथान रावण्‌या-तीवण्‌या हय गुयला चे हींडी-हींडीन ईसुन खुस-खबर सामळावणे बाजी गुया।
ACT 8:5 ने फीलीप्‌पुस, सामर्‌या जीलान एक सहर मां जाय्‌न चां ईसु मसीन बमदीन परचार करने बाजी गुया।
ACT 8:6 जत्‌यार माणसे फीलीप्‌पुसेन वात सामळीन ने तेरे हाते हवतेली वारु कामेन सहलाणी देखीन, एक मन्‌या हय्‌न बेसका मन लागाड़्‌या।
ACT 8:7 काहाकी बेसका जणाम सी वीटेळ्‌ळा भुतड़ा आयड़ीन नीकळी गुयला, ने बेसका लखवान मांदवाड़ वाळा ने लंगड़ा वारका हय गुयला।
ACT 8:8 अळी तीना सहर मां खुसी आय गुई।
ACT 8:9 सीमोन नावेन एक अदमी फीलीप सी पेहलेत ईना सहरेम आय रवलु। चु जादुन खेल देखाड़ीन सामर्‌या सहर वाळाक चकराड़ रवलु, ने आपसा काजे मे बेसकु-भारी माणुस छे, करीन आपसा काजे बेसकु मटु समजतेलु।
ACT 8:10 नानला सी मटला लग आखा माणसे तेरी वात मान्‌ता हतला, ने कवतेला, “जु माणुस भगवानेन ची ताकत छे, जी बेसकी-भारी कवाये।”
ACT 8:11 चु बेसका दाहड़ा सी जादुन खेल-खेलीन आखाक चकराड़ रयु, आखा माणसे तीनाक बेसका मानतेला।
ACT 8:12 बाकुन जत्‌यार चे माणसे फीलीप्‌पुसेन साहरे भगवानेन राजेन खुस-खबर ने ईसु मसीन नाव सामळ्‌या, ईसु पर भुरसु कर्‌या ने बायरा ने अदमी बपतीस्‌मा लेणे बाजी-गुया।
ACT 8:13 ने सीमोन बी ईसु पर भुरसु कर्‌यु ने बपतीस्‌मा ली लेदु ने अळी फीलीप्‌पुस पुठ्‌ये रवणे बाजी गुया। ने फीलीपन साहरे वारु कामेन सहलाणी ने मटा-मटा बेसका वारु कामे देख्‌यु, ती चकराय गुया।
ACT 8:14 जत्‌यार यरुसलेम मां रवण्‌या ईसुन नेवताळा ज सामळ्‌या की सामर्‌या वाळा भगवानेन बुल काजे मान लेदा, ती चे पतरस ने युहन्‌ना काजे तींद्‌रेन्‌चां मकल्‌या।
ACT 8:15 चे जाय्‌न सामर्‌यान भुरसु करने वाळा वाटे भगवान धड़े दुवा कर्‌या की ईनुक चुखली-आत्‌मा जड़नु चाहजे।
ACT 8:16 काहाकी हय लग तीनु काजे चुखली-आत्‌मा नी जड़्‌यु, तीनुक मालीक ईसुन नावे बपतीस्‌मा अतरोत आप्‌ला हतला।
ACT 8:17 अतरे पतरस ने युहन्‌‌‌नु तींद्‌रे पर हात मेक्‌या ने तीनुक चुखली-आत्‌मा जड़ गुय।
ACT 8:18 सीमोन ज देख्‌यु की ईसुन नेवताळा माणसे पर हात मेके अतरात ने तीनुक चुखली-आत्‌मा जड़ जाय। तेरेसी चु तींद्‌रेन्‌चां रुप्‌या लावीन कह्‌यु।
ACT 8:19 “मे तेरे पर बी हात मेको तीनाक चुखली-आत्‌मा जड़ जाणु चाहजे, असु हक मेसेक बी आपु।”
ACT 8:20 बाकुन पतरस तीनाक जपाप आप्‌यु, “तारे पुठ्‌ये तारा रुप्‌या बी सर जाणु चाहे, काहाकी तु भगवानेन वाटा काजे रुप्‌या आपीन हात करनेन हेर कर्‌यु।
ACT 8:21 ईनी वातेम तारु हीस्‌सु बी नी हय, ने हक बी नी हय। काहाकी भगवान अगळ तारो मन सुदो नी हय।
ACT 8:22 हेरे सी तु तारा ईना भुंडा मन सी फीरीन भगवान सुदु वळ ने मालीक ईसु सी वीन्‌ती कर। कांखुर मायन भगवान तारा मनेन वीच्‌यारेन माफी आप देय ते आप देय।
ACT 8:23 काहाकी मेसेक चुखोझण देखाव पड़ रयो की तु आखी भातीन पाप मां फांदायलु छे।”
ACT 8:24 जी वात सामळीन सीमोन जपाप देदु, “तु जी बी वात कवलु छे, तसों मार धड़े नी हवणु चाहे, करीन तुहुं मालीक भगवान धड़े मारे वाटे वीन्‌ती करु!”
ACT 8:25 अळतेन चे ईसुन नेवताळा, मालीक ईसुन गवाय दीन ने भगवानेन बुल सामळावीन यरुसलेम पछा जात रया, ने वाट्‌ये-वाट्‌ये बेसका सामर्‌या जीलान गांव मां ईसुन खुस-खबर सामळावता गुया।
ACT 8:26 अळतेन मालीक भगवानेन एक सरग वाळु काहवाळ्‌यु फीलीप्‌पुस काजे कह्‌यु, “उठ यरुसलेम सी गाजा सहर भीणी जाणे वाळी वाट पर दाखणाव जां।” जी वाट उजाड़ी बयड़ा मां छे।
ACT 8:27 सरग वाळा भगवानेन अघली वात बताड़ने वाळान वात सामळीन फीलीप्‌पुस उठीन चाल पड़्‌यु। चां वाट्‌येत कुस देसेन एक माणुस जाणे बाजी रवलु, चु गतराड़ु हतलु ने कुस देसेन कंदाके राणीन एक मंत्‌री ने पयस्‌या टकान हीसाब राखण्‌यु हतलु, ने चु भगवानेन पुजा-पाट करने करीन यरुसलेम आवलु हतलु, ने पुजा-पाट करीन पछु जाणे बाजी रवलु।
ACT 8:28 चु आपसी घुड़ागाडी पर बस रवलु, ने भगवानेन अघली वात बताड़ने वाळु यसायान किताप भन्‌ने बाजी रवलु।
ACT 8:29 भगवानेन चुखली-आत्‌मा फीलीप्‌पुस काजे कह्‌यु, “अगु जां, ने घुड़ागाडी पुठ्‌ये चाल पड़।”
ACT 8:30 फीलीप्‌पुस दवड़ीन तेरेन्‌चां गुयु ने चु तीनाक भगवानेन अघली वात बताड़ने वाळु यसायान किताप भणतेलु सामळ्‌यु, ने तीनाक पुछ्‌यु, “तु जी वात भन्‌ने बाजी रयु, जी वात समजी रयु काय?”
ACT 8:31 चु अधीकारी जपाप आप्‌यु, “जत्‌यार लग कुय मेसेक नी समाजड़े, ती लग मे कसु समजो?” ज कयदीन चु फीलीप्‌पुस काजे आपसी घुड़ागाडी पर चड़ावीन बठाड़ लेदु।
ACT 8:32 खरला सास्‌तुरेन ज पाठ चु भन्‌ने बाजी रवलु, च पाठ ज हतलो तीना काजे गाडरान तसा मारने करीन ली गुया, ने जसों गाडरो तेरा कान्‌या काटणेन टेमे हुगो हय रवे, तसुत चु हुगु हय रयु, ने आपसो मुंहडो लग नी उगाड़्‌यु।
ACT 8:33 चु भुळु बणीन रयु, बाकुन ईने टेमे तेरु नीयाव नी हयु, ने तीनी टेमेन माणसेन बारामां कुण कवसे, काहाकी धरती पर सी तेरी जीवाय हाकलाय गुया।
ACT 8:34 ईनी टेमे गतराड़ु फीलीप्‌पुस काजे पुछ्‌यु, “तु मेसेक दया करीन देखाड़ की भगवानेन अघली वात बताड़ने वाळु माणुस जी वात कुणीन बारामां कय रयु, आपसा बारामां कय रयु की काहना दीसरान बारामां कय रयु?”
ACT 8:35 ती फीलीप्‌पुस ईनी खरली सास्‌तुरेम सी सुरु करीन ईसुन खुस-खबर सामळायु।
ACT 8:36 वाटे चालता-चालता चे पाणी हतलो चां आखा पुग गुया। पाणीक देखीन गतराड़ु कह्‌यु, “देख, पलो हयो पाणी। हय मेसेक बपतीस्‌मा लेणेम काय रुक छे?”
ACT 8:37 फीलीप्‌पुस कह्‌यु, कदी तु पुरो-पुरो मन लागाड़ीन भुरसु करे, ती ली सके। चु जपाप आप्‌यु, “हव, मे भुरसु करो की ईसु मसी भगवानेन पुर्‌यु छे।”
ACT 8:38 तत्‌यार गतराड़ु घुड़ागाडी चालाड़न्‌याक घुड़ागाडीक उबराक दे कह्‌यु, ने फीलीप्‌पुस ने गतराड़ु दुय जणा पाणी मां भराया ने फीलीप्‌पुस तीनाक पाणी मां बपतीस्‌मा आप्‌यु।
ACT 8:39 जत्‌यार चे पाणीम सी बाहर आया, ती मालीक चुखली-आत्‌मा फीलीप्‌पुस काजे ईछ ली गुय। गतराड़ु, तीना फीलीप्‌पुस काजे अळी नी देख्‌यु; ने चु गतराड़ु खुस हय्‌न आपसे वाटे-वाटे अगु चाल पड़्‌यु।
ACT 8:40 ने फीलीप्‌पुस असदोद मां देखाव पड़्‌यु, ने चु जत्‌यार लग केसर्‌या नी पुग्‌यु, ती लग सहरे सहरेम ईसुन खुस-खबर सामळावतु गुयु।
ACT 9:1 सावुल, भगवानेन डाहला पुजारान्‌चां गुयु, सावुल हय बी मालीक ईसुन चेला काजे धमकी दीन तीनुक माराड़ने हींडी रवला।
ACT 9:2 ने चु भगवानेन वाट देखान्‌या अगवाय करन्‌यान चां जाय्‌न, दमीस्‌क सहरेन यहुदी माणसेन भक्‌तीन घरेन नावे ईसुक मान्‌या अदमीक ने बायराक बांदीन यरुसलेम लावणेन हक मांग लायु।
ACT 9:3 बाकुन चालते-चालते सावुल दमीस्‌क सहर धड़े पुग्‌यु, ती उचकाणुन सरगे सी तेरे चारेमेर वीजाळो हय गुयो।
ACT 9:4 चु सावुल भुयमां हीट पड़्‌यु, ने तीनुक असु कवतेलु एक बुल सामळायु, “सावुल! ए सावुल! तु मेसेक काहा वेला पाड़े?”
ACT 9:5 सावुल कह्‌यु, “मालीक! तु कुण छे?” सावुल काजे पछु सामळायु। “मे ईसु छे, तीनाक तु वेला पाड़ रयु।
ACT 9:6 बाकुन हय तु उठीन सहरेम जां, ने तुसेक ज करनु चाहे च, मे तुसेक देखाड़ दीस।”
ACT 9:7 जे माणसे सावुल भेळा हतला, चे तसात उबा हय्‌न देखतात रया; काहाकी चे बुल ते सामळतेला बाकुन तीनुक कुय बी देखाव नी पड़्‌यो।
ACT 9:8 अळी सावुल भुयमां सी उठ्‌यु, ने डुळा उगाड़्‌यु बाकुन तीनाक ईतरोक बी नी देखायो। अळी तेरा साती तेरु हात धरीन तीनाक दमीस्‌क सहर ली गुया।
ACT 9:9 ने तीनाक तीन दाहड़ा लग काय बी नी देखायो, ने तीने टेमे चु खाणो बी नी खादु ने पाणी बी नी पीदु।
ACT 9:10 दमीस्‌क सहर मां हनन्‌या नावेन एक भुरसु करने वाळु चेलु रवतेलु। मालीक ईसु तीनाक देखीन कह्‌यु, “ए हनन्‌या!” चु हनन्‌यु कह्‌यु, “हव, मालीक मे सामळी रयु।”
ACT 9:11 ती मालीक तीना हनन्‌या काजे कह्‌यु, “उठीन, ‘सुदी’ नावेन गळी मां जां, ने यहुदान घर मां जाय्‌न तरसुस मां रवण्‌या सावुलेन बारामां पतु लागाड़ ले; काहाकी चु भगवान धड़े वीन्‌ती करने बाजी रयु।
ACT 9:12 ने चु दाखलु छे की ‘जु अळी पछु देखणे बाजी जाणु चाहे’ करीन हनन्‌या नावेन एक अदमी माहीं आवीन मार मुणका पर हात मेल रयु।”
ACT 9:13 हनन्‌या वात टाळतु जाय्‌न जपाप आप्‌यु, “ए मालीक! मे जाहान माणसे धड़े सी एरे बारामां सामळी रयु की चु अदमी यरुसलेम मां तारा चुखला माणसे काजे बेसकु वेला पाड़ीन नुकसाण करलु छे।
ACT 9:14 ने ‘जे माणसे तार नाव पर भुरसु करे, तीनु आखा काजे बांदीन ली आवणु चाहे।’ करीन हीनाक भगवानेन डाहला पुजारा धड़े सी हक जड़लु छे।”
ACT 9:15 बाकुन मालीक ईसु, हनन्‌या काजे कह्‌यु, तु जात रव! काहाकी मे हीना काजे आखा नी-यहुदी माणसे अगळ, ने राजा अगळ, ने ईस्‌रायली जातीन माणसेन अगळ मारो नाव उजेंतो करने करीन नेवाड़लु छे।
ACT 9:16 ने मार नावे हीनाक कसा दुख झेलनु पड़से, ची वात मे देखाड़ीस।
ACT 9:17 ती हनन्‌या चां सी उठीन सावुल हतलु, चां गुयु, ने घर मां जाय्‌न सावुल पर हात मेकीन कह्‌यु, “ए भाय सावुल, तु पछु देखणे बाजी जाणु चाहे करीन ने चुखली-आत्‌मा तारे मां पुरी भराय जाणु चाहे करीन, मालीक मतलब ईसु, मेसे काजे तारेन चां मकेल्‌लु छे, जु तुसे काजे वाटे देखाव पड़लु।”
ACT 9:18 ने तत्‌यारुत सावुलेन डुळा मां सी छलटान तसा काहींग पड़्‌यो, ने चु पछु देखणे बाजी गुयु ने उठीन पाणीम बपतीस्‌मा लेदु;
ACT 9:19 अळी खाणु खाय्‌न टणकु हय गुयु। ने चु सावुल दमीस्‌क मां रवण्‌या ईसुन चेला पुठ्‌ये थुड़ाक दाहड़ा रयु।
ACT 9:20 ने अळी चु मामार यहुदी माणसेन भक्‌तीन घर मां जाय्‌न जुर सी ईसुन परचार ज कय्‌न करने बाजी गुयु की “ईसुत भगवानेन पुर्‌यु छे।”
ACT 9:21 ने आखा सामळन्‌या चकराय्‌न कवणे बाजी गुया, “जु चु माणुस नी हय काय, जु यरुसलेम मां ईसुन नाव लीन वीन्‌ती करन्‌या काजे जनम सीत सारनेन कुसीत करतेलु? ने हयु जां बी एरेन करीन आवलु हतलु, की तीनुक धरीन भगवानेन पुजारान्‌चां ली जाय।”
ACT 9:22 बाकुन सावुलेन जुर अळी बी वदतु गुयु, ने चु पुरावु दी-दीन ज कवतेलु की “ईसुत मसी छे।” असु करीन चु दमीस्‌क मां रवण्‌या यहुदी माणसेन बुलती बंद करतु रयु।
ACT 9:23 जत्‌यार बेसका दाहड़ा हय गुया, ती यहुदी माणसे तीनुक मुजगी करीन मार नाखणेन जाळसांदी बणाया।
ACT 9:24 बाकुन सावुल काजे तींद्‌री जाळसांदीन बारामां पतु चाल गुयु। चे ते सावुल काजे रात दाहड़ु मारने करीन सहरेन झपला पर डेंगु लीन काठु पहरु दी रवला।
ACT 9:25 बाकुन राते सावुलेन चेला सावुलेक ली जाय्‌न चार्‌या मां बठाड़्‌या, ने सहरेन चारेमेर भीतड़ा पर सी चार्‌यो टांगीन नेचा उतारीन ढासाड़ देदा।
ACT 9:26 जत्‌यार सावुल यरुसलेम पुग्‌यु, ती चु ईसुन चेलान टुळा मां भेसकायणे कर्‌यु, बाकुन चे आखा तीनाक देखीन बीहतेला, काहाकी तीनुक भुरसु नी हयु की जु बी छाचलीन चेलु बण गुयलु छे।
ACT 9:27 बाकुन बरनाबास, सावुल काजे ईसुन नेवताळान्‌चां ली जाय्‌न तीनुक कह्‌यु की “सावुल काजे मालीक वाटे देखाव पड़्‌यु ने तेरे साते वार करलु छे, ने जु सावुल दमीस्‌क सहरेम बीहे बीगुर ईसुन नावेन परचार करलु छे।”
ACT 9:28 अळी सावुल यरुसलेम मां चेलान्‌चां आवतु-जातु रयु। ने चु बीहे बीगुर मालीकेन नावेन परचार करतु रयु।
ACT 9:29 ने चु युनानी बुली बुलन्‌या यहुदी साते वातेम जखड़ी रयु; बाकुन चे तीनाक मार नाखणेन कुसीत कर्‌या।
ACT 9:30 जत्‌यार सावुलेन भाय बंद्‌या काजे पतु चाल्‌यु ती चे तीनाक केसर्‌या सहर मां ली जात रया ने अळी तीनाक तरसुस मकली देदा।
ACT 9:31 तीनी टेमे आखा यहुदीया जीला मां, ने गलील जीला मां, ने सामर्‌या जीला मां ईसुन मंडळी काजे सुक-सांती जड़ी, ने ईसुन मां नवला माणसे जुड़ायता गुया; ने तीनी काजे मालीक ईसुन डर सी ने दीलासु आपण्‌या चुखला चुखली-आत्‌मा मां वदती जातली।
ACT 9:32 पतरस तीना आखा परगाणाम फीरी-फीरीन, लीद्‌दा मां ईसुन चुखला माणसेक भेळु हवणे गुयु।
ACT 9:33 चां तीनाक एनीयास नावेन एक माणुस भेळु हयु, चु आठ साल लग गुदड़ा मां पड़ी रवलु। काहाकी तेरे लखवु दुख हात लाग रवलो।
ACT 9:34 पतरस तीना काजे कह्‌यु, “ए एनीयास! ईसु मसी तुसेक वारु करे। उठ ने तारो गुदड़ो सय करीन मेल।” ने चु तत्‌यारुत उठीन उबु हय गुयु।
ACT 9:35 तत्‌यार लीद्‌दा ने सारोन मां रवण्‌या माणसे तीना वारु हवला माणसेक देख्‌या ने चे मालीक ईसु पर भुरसु करीन मान लेदा।
ACT 9:36 याफा मां तबीता मतलब दोरकास नावेन ईसुन एक चेली रवतेली। ची बेसकी दीसरान भलाय करतेली ने गरीबेक दान आप्‌या करतेली।
ACT 9:37 तीनु दाहड़ाम ची मांदी पड़ी ने मर गुय; ने माणसे तेरी लास काजे उंघळावीन घरेन उपरी कमरा मां ली जाय्‌न मेल देदा।
ACT 9:38 लीद्‌दा याफा सहर सी लांबे नी हतली, ने चेला ज सामळ्‌या की पतरस लीद्‌दा मां छे ती दुय अदमी काजे मकलीन तीनाक जी वीन्‌ती कर्‌या, की “तु मामार हामरेन्‌चां आव, ने वार मां लागाड़े।”
ACT 9:39 पतरस तत्‌यारुत तींद्‌रे पुठ्‌ये चाल पड़्‌यु ने जत्‌यार चु याफा मां पुग्‌यु, ती माणसे तीनाक उपरी पर ली गुया; ने आखा रांडायला बायरा रड़ता जाय्‌न आवीन तेरे चारेमेर उबा हय गुया; ने कुरतो ने पुथल्‌या दोरकास तींद्‌रे पुठ्‌ये रय्‌न बणावली हतली, चे कुरता ने पुथल्‌या देखाड़ने बाजी गुया।
ACT 9:40 ती पतरस आखाक बाहर मकली देदु, ने मांडा टेकीन भगवान धड़े दुवा कर्‌यु; ने लास भीणी देखीन कह्‌यु, “ए तबीता! उठ।” तत्‌यार ची आपसा डुळा उगाड़ देदी, ने पतरस काजे देखीन उठीन बठ गुय।
ACT 9:41 पतरस तीनीक हात धरीन उठाड़्‌यु, ने चुखला माणसेक ने रांडायला बायरा काजे बुलावीन तीनीक जीवती-जागती तींद्‌रे अगळ उबी कर देदु।
ACT 9:42 जी वात आखा याफा सहर मां फेलाय गुय, ने बेसका माणसे मालीक ईसु पर भुरसु कर्‌या।
ACT 9:43 ने पतरस थुड़ाक दाहड़ा लग याफा सहर मां सीमोन नावेन एक चमारटान्‌चां रयु।
ACT 10:1 केसर्‌या सहर मां कुरनेलीयुस नावेन एक माणुस रहतेलु, चु ईताल्‌या नावेन सीपायड़ान टुळान सुबेदार हतलु।
ACT 10:2 चु सुबेदार भगवानेन भक्‌ती करने वाळु हतलु, ने आपसा घराणा भेळ भगवानेक बीहीन जीवतेलु, ने यहुदी गरीब माणसेक बेसकु दान आपतेलु, ने दाहड़ीन भगवान सी दुवा कर्‌या करतेलु।
ACT 10:3 चु काहनेस दाहड़े मांजणीक वेळाय भगवानेन सरगे काहवाळ्‌या काजे असु कवतेलु सामळ्‌यु, “ए कुरनेलीयुस।”
ACT 10:4 चु कुरनेलीयुस सरग वाळा काहवाळ्‌या भीणी देखीन कह्‌यु, “ए मालीक काय वात छे?” ने सरगेन भगवानेन अघली वात बताड़ने वाळु कह्‌यु, “भगवान सी तु जी दुवा करे ची दुवा ने तु गरीबेक ज दान आपे, च दान तुसेक हेर करावणे करीन भगवानेन चां पुग गुयलु छे।
ACT 10:5 ने हय तु अदमी काजे याफा सहर मां मकलीन सीमोन काजे जां बुलाय ले, जु पतरस कहवाये।
ACT 10:6 चु सीमोन नावेन एक चामड़ान धंदु करने वाळान्‌चां मेजवान्‌यु जाय रयु। तीना सीमोन चमारटान घर समुदर धड़े छे।”
ACT 10:7 ने चु भगवानेन सरग वाळु काहवाळ्‌यु चां सी जाती रयु, ती कुरनेलीयुस आपसा दुय पावर्‌या काजे जे तेरे पुठ्‌येत रहतेला, ने एक भगत सीपायड़ा काजे बुलायु,
ACT 10:8 ने तीनुक आखी वात समजाड़ीन याफा सहर मां मकली देदु।
ACT 10:9 दीसरे दाहड़े वाटे चालता-चालता सहर धड़े आवणे बाजी रवला, ती पतरस मांजणीक वेळाय घरेन छत पर चहड़्‌यु ने भगवान सी दुवा करने बाजी गुयु।
ACT 10:10 ने तत्‌यार तीनाक भुक लागी, ने चु थुड़ोक खाणेन वीच्‌यार कर रयु बाकुन दीसरा खाणो रांदणे बाजी रवला ती पतरस चुखला चुखली-आत्‌मान कब्‌जा मां हय गुयु ने तीनाक मालुम नी रह्‌यो;
ACT 10:11 ने चु देख्‌यु, की सरग उघड़ी गुयो; ने लांबा-चोवड़ा चादरान तसी काहनीस चीज काजे सरगे सी आथराय्‌न, उतरने बाजी रय ने तेरा च्‌यारु खुणा धरती पर मेकाय रया।
ACT 10:12 ईनी धरती पर आखी भातीन च्‌यारपाया जनवार्‌या ने घीसाय्‌न चालन्‌या जनवार्‌या ने सरगेन चिरला हतला।
ACT 10:13 पछेन अळी एक वात सामळाय की, “ए पतरस उठ, ने ईनुक मारीन खा।”
ACT 10:14 बाकुन पतरस कह्‌यु, “ए मालीक, मे ईनुक कदी मारीन नी खाम, काहाकी मे मुयळ्‌ळी ने वीटेळ्‌ळी चीज आज लग नी खादु।”
ACT 10:15 पछेन दीसरी कावा अळी चीत वात सामळाय, “ज काय भगवान तीनी चीजेक चुखली कवलु छे, तीनी चीजेक तु वीटेळ्‌ळी घुण कवे।”
ACT 10:16 असो तीन कावा हयो; ने तत्‌यारुत चो चादरा साय चीज सरगे मां पछी हाकलाय गुय।
ACT 10:17 ने पतरस जो देखलु, तेरे बाराम संका वीच्‌यार करने बाजी रवलु, ती कुरनेलीयुस दुय पावर्‌या ने सीपायड़ु चमारटा सीमोनेन घर आय लाग्‌या ने सीमोनेन घर कां छे? करीन पुछणे बाजी रवला।
ACT 10:18 ने चे घर वाळा माणसेक बाहर रय्‌न आयड़ीन पुछ्‌या, “सीमोन, जु पतरस कह्‌वाये, जांत मेजवान्‌यु आय रयु, काय?”
ACT 10:19 पतरस च देखलु तेरे बारामां सुची रवलु, की आत्‌मा काय कवली, “देख, तीन माणसे तुसेक हेरता-हेरता आय रया।
ACT 10:20 तेरेसी उठीन नेचु जां, ने धाक राखे पाखुर तींद्‌रे पुठ्‌ये जात रव; काहाकी हीनुक मेत मकेल्‌लु छे।”
ACT 10:21 तत्‌यार पतरस नेचु उतरीन तीनु माणसेक कह्‌यु, “देखु, तीनाक तुहुं हेरता-हेरता आय रया, चु मेत छे। तुहुं काय कामे आय रया?”
ACT 10:22 चे माणसे कह्‌या, “टुळान सुबेदार कुरनेलीयुस धरमी ने भगवानेक बीहीन जीवण्‌यु छे आखा यहुदी जाती मां वारलु आव-भाव वाळु माणुस छे, चुखलु सरग वाळु भगवानेन अघली वात बताड़ने वाळु कवलु छे की तु पतरस काजे तारे घर बुलाय लाव ने जो काय चु कवसे तेरी वात सामळजी।”
ACT 10:23 तत्‌यार पतरस तीनुक घर मां माहें बुलायु ने आव-भाव करीन तींद्‌री मेजवानी कर्‌यु, ने चे चांहान रात रया। ने दीसरे दाहड़े पतरस तींद्‌रे पुठ्‌ये तीयार हय्‌न जाती रयु, ने तीना याफा सहर मां रवण्‌या ईसुक मान्‌या भाय-बेटा बी तेरे साते गुया।
ACT 10:24 दीसरे दाहड़े चे केसर्‌या पुग्‌या, ने कुरनेलीयुस तेरा भाय-बेटा काजे ने अळी थुड़ाक साथी काजे भेळा करीन तींद्‌री वाट देख तेलु।
ACT 10:25 जत्‌यार पतरस कुरनेलीयुसेन घर आयु ने तेरा घर मां भरायणे बाजी रवलु, ती चु कुरनेलीयुस काजे भेळु हयु, ने कुरनेलीयुस पतरसेन पाये पड़ीन पतरस काजे वारु छे की करीन कह्‌यु;
ACT 10:26 बाकुन पतरस तीनाक उठाड़ीन कह्‌यु, “उबु हय जां, मे बी सीरप एक माणुस छे।”
ACT 10:27 ने पतरस कुरनेलीयुस साते वात करतु-करतु घर मां भरायु, ने चां बेसका माणसे काजे भेळा हय रवला काजे देख्‌यु
ACT 10:28 चु तीनाक ज कह्‌यु, “तुहुं काजे जी वात मालुम छे की यहुदी माणसे वाटे, नी-यहुदी घर आवणु-जाणु ने तींद्‌रे पुठ्‌ये उठणु-बसणु कायदान वीरुद छे। बाकुन भगवान मेसेक कवलु छे की ‘तु काहना बी माणुस काजे मुयळ्‌ळु ने वीटेळ्‌ळु मां कवे।’
ACT 10:29 तेरेसी मेसेक बुलावणे आया, ती मे काय बी पुछे बीगुर जां आय गुयु; हय मे तुसेक पुछो की तु मेसेक काय कामे बुलाय रयु?”
ACT 10:30 कुरनेलीयुस कह्‌यु, “ईनेत टेमे, आज सी च्‌यार दाहड़ा पेहेल मे मारा घर मां मांजणीक दाहड़े भगवान धड़े दुवा करने बाजी रवलु, ती एक अदमी झळो-झळो करता पुथल्‌या पेहरीन मार अगळ उचकाणुन आवीन उबु हय गुयु।
ACT 10:31 ने कवणे बाजी गुयु, ए कुरनेलीयुस, जी दुवा तु भगवान सी करे ची दुवा, ने जे तु गरीबेक दान करे चे हेर कराड़ने करीन भगवानेन्‌चां पुग गुयलो छे।
ACT 10:32 तेरेसी हय तु अदमी काजे याफा मां मकलीन सीमोन काजे जां बुलाय ले, जु पतरस कवाये। चु सीमोन नावेन एक चमारटान घर मेजवान्‌यु जाय रयु। तीना सीमोन चमारटान घर समुदर धड़े छे;
ACT 10:33 ने तेरी वात सामळीन तत्‌यारुत माणसेक तारेन चां मकली देदु, ने तु जां आवीन वारु करलु छे। हय ज काय मालीक भगवान तुसेक कवणे करीन हुकुम आप्‌लु छे, च सामळने करीन हामु जां आखा भगवान अगळ हजुर छे।”
ACT 10:34 ज आखो सामळीन पतरस कह्‌यु, “हय मे छाचलीन समजी गुयु, की भगवान काहनान मुंहडा देखीन छीट नी राखे।
ACT 10:35 बाकुन जु काहनुक तीनाक बीहीन जीवे ने धरमेन काम करे, चु माणुस भगवान काजे गमे, भले चु काहनी बी जातीन माणुस कांखुर नी हय।
ACT 10:36 ने जीत सुक-सांती आपणी खुस-खबर छे, तीनी काजे भगवान ईसु मसीन साहरे ईस्‌रायेली जातीन माणसे काजे सामळावलु हतलु। ने हीयुत ईसु मसी आखान मालीक छे।
ACT 10:37 तुहुंक ते, तीनी मट्‌ली वीत्‌ली वातेन बारामां मालुम छे, जी गलील जीला मां सुरु कर्‌यु, ने युहन्‌‌‌नु बपतीस्‌मा आप्‌यु ने अळी तेरे बारामां खुस-खबरेन परचार हयो। ने ची वात आखा यहुदीया जीला मां पुग गुय।
ACT 10:38 तुहुं नासरेत वाळा ईसुन बारामां जाणु की भगवान तीनाक आपसी ताकत ने चुखली-आत्‌मा आपीन नेवाड़ लेदु, ने चु ईसु वारलु कामे करतु जाय्‌न भलाय कर्‌यु, ने जतरा बी भुतड़ान कब्‌जा मां हतला, तीनुक चु छुड़ावतु रयु; काहाकी भगवान तेरे पुठ्‌ये हतलु।
ACT 10:39 ने जु ईसु, यहुदीया जीला मां, ने यरुसलेम मां जे बी काम कर्‌यु, तीना आखा कामेन हामु गवा छे। बाकुन तीना ईसुक माणसे कुरुस पर मार नाख्‌या।
ACT 10:40 बाकुन भगवान तीनाक तीसरे दाहड़े मर्‌या-सर्‌याम सी जीवाड़्‌यु ने तीनाक उजेंतु देखाव पड़ने देदु।
ACT 10:41 आखा माणसे अगळ देखाव नी, पड़ने देदु, बाकुन तीना गवा देण्‌या अगळ उजेंतु कर्‌यु। तीनुक चु भगवान नेवाड़ लेदलु, मतलब हामरे अगळ उजेंतु कर्‌यु। चु मर्‌या-सर्‌याम सी जीवतु हय गुयु ने अळी हामु तेरे पुठ्‌ये खादा-पीदा
ACT 10:42 ने चु भगवान हामुक हुकुम आप्‌लु छे, की ‘तुहुं माणसे मां ईना ईसुन परचार करु; ने गवा देवु, की जु ईसु हयुत छे; तीना काजे भगवान जीवतेलान ने मरलान नीयाव करन्‌यु नक्‌खी करलु छे।’
ACT 10:43 ईना ईसुन बारामां आखा भगवानेन अघली वात बताड़ने वाळा माणसे असी गवा देदला, की जु कुय ईसु पर भुरसु करसे, तीनात काजे ईसुन नावे पापेन माफी जड़से।”
ACT 10:44 पतरस जी वात कवणे बाजी रवलु, ने चुखली-आत्‌मा तीनु भगवानेन बुल सामळन्‌या पर सरगे सी उतरीन आय लाग्‌यु।
ACT 10:45 नी-यहुदी माणसे काजे बी चुखली-आत्‌मान वाटु जड़ गुयु करीन पतरस पुठ्‌ये याफा सी आवला फतरी काटला यहुदी माणसे चकराय गुया, ने यहुदी माणसे बी ईसु पर भुरसु कर लेदला।
ACT 10:46 ने जे यहुदी माणसे नी-यहुदी माणसे काजे भात-भातीन बुली बुलतेला ने भगवानेन बड़ाय करतेला सामळी रवला। ती पतरस कह्‌यु,
ACT 10:47 “ईनु माणसे काजे हामुक जड़लु चु, चुखली-आत्‌मा जड़ गुयलु छे, ती हय ईनु काजे पाणी मां बपतीस्‌मा लेणे सी कुण रुक सके?”
ACT 10:48 ने पतरस जु हुकुम आप्‌यु की, “ईनुक बी ईसु मसीन नावे पाणीम बपतीस्‌मा आप देवु।” तत्‌यार चे बपतीस्‌मा लेण्‌या पतरस सी वीन्‌ती कर्‌या की “ईतराक दाहड़ा तु हामरेन्‌चां रव।” ने पतरस तींद्‌री वात मान लेदु।
ACT 11:1 ईसुन नेवताळा ने आखा यहुदीया जीला मां रहण्‌या ईसु पर भुरसु करन्‌या भाय-बेटा असा सामळ्‌या, की नी-यहुदी माणसे बी भगवानेन बुल मान लेदा।
ACT 11:2 जत्‌यार पतरस यरुसलेम मां आयु, ती फतरी काटणेन बारामां माणसे पतरसेन वात काटीन वाते-वातेम लड़ाय पड़्‌या।
ACT 11:3 ने कह्‌या, “तु नी-यहुदी माणसेन घर मां भरायु, ने तींद्‌रे भेळतु खाणु खादलु छे।”
ACT 11:4 ती पतरस, जो काय हयो चो आखो सुरु सी आकरी लग एकेक करीन समजाड़तु जाय्‌न कह्‌यु,
ACT 11:5 मे याफा सहर मां भगवान धड़े दुवा करने बाजी रवलु, ती मे चुखली जीव-आत्‌माम हय गुयु ने मारी चेत नी रयु ने मे जागतो-सपनो देख्‌यु, ने तत्‌यारुत सरग उघड़ी गुयो, ने चादरान तसों लांबो-चवड़ो काहनीक चीज काजे सरगे सी आथराय्‌न उतरीन मार भीणी आयो, ने तेरा च्‌यारु खुणा धरती पर मेकाय गुया।
ACT 11:6 मे तीनी चीजेक धीयान सी देख्‌यु। धरतीम आखी भातीन च्‌यारपाया जनवार्‌या, जंगली जनवार्‌या, ने घीसाय्‌न चालन्‌या जनवार्‌या ने सरगेन चिरला हतला।
ACT 11:7 ने मेसेक एक बुली सामळाय की ए पतरस! उठ, ने ईनुक मारीन खा।
ACT 11:8 बाकुन मे कह्‌यु, ए मालीक! मे ईनुक कदी मारीन नी खाम। काहाकी मे, मुयळ्‌ळी वीटेळ्‌ळी चीज आज लग नी खादु।
ACT 11:9 तेबी ची बुली दीसरी कावा अळी सरगे सी मेसेक सामळायी, भगवान तीनी चीजेक चुखली कवलु छे, तीनी चीजेक तु वीटेळ्‌ळी घुण कवे।
ACT 11:10 असो तीन कावा हयो; ने अळी चो चादरा साय चीज सरगे मां पछी हाकलाय गुयो।
ACT 11:11 ने अळी तीनु तीन अदमी काजे केसर्‌या सहरेम सी मारेन्‌चां मकल्‌यु, चे अदमी तीना घर मां हामु हतला, चां आय लाग्‌या।
ACT 11:12 तत्‌यार आत्‌मा मेसेक हुकुम आप्‌यु की तु हींद्‌रे पुठ्‌ये बे फीकर्‌यु हय्‌न जां। ने जे छव भायस बी मारे पुठ्‌ये चाल पड़्‌या; ने हामु तींद्‌रे पुठ्‌ये केसर्‌या सहरेम तीना कुरनेलीयुसेन घर गुया।
ACT 11:13 ने चु हामुक देखाड़्‌यु की मेसेक सरग वाळु भगवानेन अघली वात बताड़ने वाळु मार घरमां उबु हय रवलु देखाव पड़्‌यु, चु मेसेक कह्‌यु, तु याफा सहर मां तारा माणसेक मकलीन सीमोन काजे बुलाय ले, जु पतरस कवाये।
ACT 11:14 चु असी वात कवसे, तेरे साहरे तु ने तारो घराणो छुटकारु हात करसे।
ACT 11:15 ने जत्‌यार मे चां जाय्‌न तीनुक वात देखाड़ने बाजी गुयु, ती चुखली-आत्‌मा तींद्‌रे पर उतर्‌यु, जसु आपणे पर सुरु मां उतरलु।
ACT 11:16 तीनी टेमे मेसेक मालीकेन जु बुल हेर आयो, युहन्‌‌‌नु ते पाणी मां बपतीस्‌मा आपतेलु, बाकुन थुड़ाक दाहड़ा वीत जासे, ने अळी तुहुं काजे चुखली-आत्‌मान बपतीस्‌मा आपसे।
ACT 11:17 जत्‌यार भगवान तीनु नी-यहुदी काजे बी हयुत वाटु आप्‌यु जु आपणुक मालीक ईसु मसी पर भुरसु कर्‌या करीन आप्‌यु; ती हामु कुण कहवायजे, जे भगवानेन काम काजे रुक्‌जे?
ACT 11:18 जी वात सामळीन चे खुड़ काडण्‌या माणसे धीरा पड़ गुया, ने चे भगवानेन बड़ाय करने बाजी गुया, “ती ते भगवान नी-यहुदी काजे बी अमर जीवाय आपणे करीन तीनुक पाप भीणी सी मन फेरवीन भगवान भीणी वळनेन वाटु आप्‌लु छे।”
ACT 11:19 स्‌तीफनुसेन बाहने माणसे यरुसलेम मां जबरान ईसुन माणसेक वेला पाड़नु सुरु कर देदा। ने ईसुन माणसे रावण्‌या-तीवण्‌या हय्‌न एराय गुया, फीरता-फीरता चे फीनीके ने कुपरुस ने अन्‌ताकीया, सहर मां पुग्‌या; बाकुन चे ईसुन माणसे ईसुन खुस-खबर यहुदी माणसेक अतरात सामळावतेला।
ACT 11:20 बाकुन तीनु ईसुन चेला मायन थुड़ाक कुपरुस मां रवण्‌या, ने कुरेन मां रवण्‌या हतला, जे अन्‌ताकीया आवीन नी-यहुदी माणसे काजे बी मालीक ईसुन खुस-खबर सामळावणे बाजी गुया।
ACT 11:21 ने मालीक ईसुन ताकत तींद्‌रे पुठ्‌ये हतली, ने बेसका माणसे मालीक ईसु पर भुरसु करीन मालीक ईसु भीणी वळ गुया।
ACT 11:22 यरुसलेम मां रवण्‌या ईसुन मंडळी मां बी जी वात पुग गुय, ने चे बरनाबास काजे अन्‌ताकीया सहर मां तींद्‌रेन्‌चां मकली देदा।
ACT 11:23 ने बरनाबास चां जाय्‌न भगवानेन गीण-दया देखीन बेसकु खुस हयु; ने आखाक सीकाड़्‌यु, की तुहुं डील ने मन लागाड़ीन मालीक ईसु पर भुरसु करता रवु।
ACT 11:24 काहाकी बरनाबास एक वारलु माणुस हतलु; ने चुखली-आत्‌मा तेरेमां उगेळ्‌तु भरायलु हतलु ने ईसु पर तेरु भुरसु बी पक्‌कु हतलु। ने असा बेसका माणसे मालीकेन चेला बणीन तींद्‌रे पुठ्‌ये भेसकाय गुया।
ACT 11:25 तत्‌यार बरनाबास सावुल काजे हेरने करीन तरसुस सहर जात रयु।
ACT 11:26 ने चु तीना सावुल काजे हेरीन अन्‌ताकीया सहर मां ली आयु, ने चे एक साल लग ईसुन मंडळी काजे भेळा हवता रया, ने बेसका माणसेक सीकाड़ता रया, ने अन्‌ताकीया मां माणसे आखान पेहले ईसुन चेला काजे मसी कवणे बाजी गुया।
ACT 11:27 तीनु दाहड़ाम भगवानेन अघली वात बताड़ने वाळा माणसे यरुसलेम सी अन्‌ताकीया सहर मां आया।
ACT 11:28 तींद्‌रेम अगबुस नावेन एक जणु उबु हय्‌न भगवानेन चुखली-आत्‌मान अगवाय मां कह्‌यु, आखी कळी मां काळ पड़ने वाळु छे। जु काळ राजान राज क्‌लोदीयुसेन टेमे पड़लु।
ACT 11:29 तत्‌यार ईसुन चेला जु वीच्‌यार कर्‌या की एकेक जणु आपसा-आपसा रुप्‌या-टकान अनुसार यहुदीया जीलाम रवणेवाळा आपणा भाय-बेटान सेवा चाकरी वाटे ईतराक रुप्‌या-टका दी मकेलसु।
ACT 11:30 ने चे तसा वीच्‌यार्‌या तसात कर्‌या; ने चे पुडार्‌यान्‌चां, बरनाबास ने सावुल काजे रुप्‌या-टका दी मकल्‌या।
ACT 12:1 तीनी टेमे हेरोदेस राजा मंडळीन थुड़ाक माणसे काजे जबरान वेला पाड़नु सुरु कर देदु।
ACT 12:2 जु हेरोदेस राजु युहन्‌नान भायस याकुप काजे तलवार सी झाटकायन माराड़ नाख्‌यु।
ACT 12:3 ने जत्‌यार चु देख्‌यु की असो करने सी यहुदी माणसे खुस हया, ती चु पतरस काजे धरीन लावणे करीन सीपायड़ा काजे मकल्‌यु। चे दाहड़ा अखमीरेन रुटान तीहवार हतलु।
ACT 12:4 चु पतरस काजे धरीन जेल मां बंद कर देदु, ने तेरी राखवाळी करने करीन च्‌यार-च्‌यार सीपायड़ा काजे च्‌यार पहरा बणावीन मेल देदु। हेरोदेस राजान वीच्‌यार हतलु की मे ईनु काजे फसह तीहवारेन दाहड़े माणसे अगळ लावीस।
ACT 12:5 एरेन करीन चु जेल मां पतरसेन राखवाळी करने करीन पहरु दी रवला; बाकुन ईसुन मंडळीन माणसे अदुस पतरस वाटे भगवान सी असी दुवा करने बाजी रवला।
ACT 12:6 ने हेरोदेस राजा पतरस काजे दीसरे दाहड़े माणसे अगळ लावणे हींडतेलु, तीना दाहड़ान पेहले रात पतरस दुय हातकड़्‌या मां बांदायलु, दुय सीपायड़ान ईचमां सुवणे बाजी रवलु, ने झपला अगळ बी पहरु देण्‌या सीपायड़ा पहरु दी रवला।
ACT 12:7 एक कपरा मां उचकाणुन मालीकेन सरग वाळु भगवानेन अघली वात बताड़ने वाळु आवीन उबु हय गुयु। ने जेलेम वीजाळो हय गुयो; ने भगवानेन अघली वात बताड़ने वाळु पतरसेन कुख्‌ये टुचलीन तीनाक जागाड़्‌यु, ने कह्‌यु, “मामार उठ।” अतरा मां हातकड़्‌या आपसात छुटीन हीट पड़्‌या।
ACT 12:8 तत्‌यार सरगेन भगवानेन अघली वात बताड़ने वाळु हुकुम आपीन कह्‌यु, कमर बांद ले ने चीपल्‌या पेहेर ले। तत्‌यार तेरी वात सामळीन तसुत कर्‌यु। ने सरग वाळु भगवानेन अघली वात बताड़ने वाळु पतरस काजे अळी कह्‌यु, “पुथल्‌यो पेहेर ले ने मार पछळ आव।”
ACT 12:9 पतरस जेलेम सी नीकळीन सरग वाळा भगवानेन अघली वात बताड़ने वाळु पछळ चाल पड़्‌यु। बाकुन जु सरगेन भगवानेन अघली वात बताड़ने वाळु कर रवलु चो तीनाक पल्‌ले नी पड़्‌यो, खरलो छे की झुट्‌लो। बाकुन चु ज समजी गुयु की मे सपनो देखणे बाजी रयु।
ACT 12:10 ती चे पेहलु ने दीसरु पहरु छेकीन तीना लुहड़ान झपले लग आया, जो सहरे भीणी उघेड़तेलो। चु झपलु तींद्‌रे वाटे आपसुत उघड़ी गुयु, ने चे बाहर नीकळी गुया। ने चे गळी मायन आया अतरात ने सरग वाळु काहवाळ्‌यु उचकाणुन पतरस काजे चां रहणीदीन जाती रयु।
ACT 12:11 जत्‌यार पतरस काजे समज आय, गुय चु कह्‌यु “हय मेसेक छाचलीन पल्‌ले पड़ गुयो की ज हयो च खरलो छे। मालीक आपसा सरग वाळा भगवानेन अघली वात बताड़ने वाळा काजे मारेन्‌चां मकलीन मेसेक हेरोदेस राजान कब्‌जाम जेलेम सी छुड़ाय लेदलु छे। ने यहुदी माणसेन आस पर पाणी फेरवी देदलु छे।”
ACT 12:12 जत्‌यार पतरस काजे जी वात समज मां आय गुय, ती चु युहन्‌नान माय मरीयमेन घर जात रयु। ईना युहन्‌ना काजे मरकुस बी कवे। चां बेसका जणा भेळा हय्‌न भगवान धड़े दुवा करने बाजी रवला।
ACT 12:13 पतरस बाहर झपला काजे ठुक्‌यु, ने कुण छे करीन तीनाक देखणे, रुदे नावेन एक पावरनी तीने झपले लग आवी।
ACT 12:14 ची पावरनी पतरसेन बुली उळखी लेदी, ने झपलु उगाड़ने रहणीदीन पछी दवड़ीन गुय ने चां भेळा हवला काजे कह्‌यी, पतरस झपले उबु हय रयु।
ACT 12:15 चे तीनीक कह्‌या, “तु गांडी ते नी हय।” बाकुन ची पाक्‌कु भुरसु करीन कवतीत रय की मे जो कय रय, ची खरली वात छे। तत्‌यार चे कह्‌या, “चु पतरसेन राखवाळी करन्‌यु सरग वाळु काहवाळ्‌यु हसे।”
ACT 12:16 अतरी वार लग पतरस झपलु ठुकतुत रयु। जत्‌यार चे झपलु उगाड़्‌या ने पतरस काजे देख्‌या, ती चे बेसका चकराय गुया।
ACT 12:17 ने पतरस हात पालवीन हुगा राखणेन ईसारु कर्‌यु, ने काहनी रीती सी मालीक मेसेक जेल सी बाहर नीकाळ लायु चो तीनुक कय देदु; ने अळी चु कह्‌यु “याकुप ने दीसरा भायस्‌यो काजे ईनी वातेन खबर कर देजु।” ने कयदीन चु तीना घर मां सी नीकळीन चां सी दीसरी जागे जात रयु।
ACT 12:18 पतरस कां जात रयु करीन संदारे एगात सीपायड़ा कांदराय गुया; काहाकी तीनुक ज नी मालुम हतलो की तेरो काय हयो।
ACT 12:19 जत्‌यार हेरोदेस राजु दीसरा सीपायड़ा काजे पतरसेक हेरने करीन आखे दुर मकली देदु, ने तेबी तीनुक पतरस नी जड़्‌यु ती चु पहरु देण्‌या काजे पुछ्‌यु, बाकुन चे काय जपाप नी आप्‌या तत्‌यार हेरोदेस राजु दीसरा सीपायड़ा काजे हुकुम आप्‌यु की तुहुं ईनु पेहरु देण्‌या सीपायड़ा काजे मार नाखु, ने हेरोदेस राजु यहुदीया जीलान यरुसलेम सहर छुड़ीन केसर्‌या सहर मां जात रयु।
ACT 12:20 हेरोदेस राजु सुर ने सेदा सहरेन माणसे पर कीचवाय रवलु; हेरेसी सुर ने सेदा सहरेम रवण्‌या माणसे एक मन्‌या हय्‌न मुजगी करीन आया, ने हेरोदेस राजान पावर्‌या बलास्‌तुस काजे मानाड़ीन तेरी अगवाय मां तेरे साहरे हेरोदेस राजा धड़े वीन्‌ती कर्‌या की तु हामरे पर रीस मां करे बाकुन सुकुन जीवे रवणे दे। काहाकी तीनु काजे हेरोदेस राजान देस सीत खाणेनन चीजे जड़तेला।
ACT 12:21 एक दाहड़ु टाकले दाहड़े हेरोदेस राजु राजान पुथल्‌या पेहरीन ठट हय्‌न आपसी नीयावेन गादी पर बठ्‌यु, ने माणसेक सीकाड़ने बाजी गुयु।
ACT 12:22 माणसे आयड़ीन कह्‌या, “जे माणसेन बुले नी हय, बाकुन भगवानेन बुल छे।”
ACT 12:23 तीनीत टेमे मालीक भगवानेन एक सरग वाळु काहवाळ्‌यु हेरोदेस पर आय्‌न घाव कर्‌यु, ने तेरा डीलेम कीड़ा पड़्‌या ने मर गुयु, काहाकी चु भगवानेन सेक-सींगारेन बड़ाय नी कर्‌यु।
ACT 12:24 भगवानेन बुल बड़तो ने आखीदुर पुग्‌तो गुयो।
ACT 12:25 जत्‌यार बरनाबास ने सावुल यरुसलेम मां आपसो सेवा-चाकरीन काम पुरो कर लेदा, ती चे यरुसलेम सी मरकुस काजे लीन पछा अन्‌ताकीया सहर आवती रया। जु मरकुस युहन्‌‌‌नु कवायतेलु।
ACT 13:1 अन्‌ताकीया सहरेन मंडळी मां थुड़ाक, भगवानेन अघली वात बताड़ने वाळा माणसे, ने भगवानेन वात सीकाड़न्‌या हतला-जसा, बरनाबास, ने सीमोन जु काळु कहवायतेलु, ने कुरेन सहर मां रवण्‌यु लुकीयुस, ने गलील जीलाम राज करन्‌या हेरोदेस राजा पुसेन भाय मनाहेम ने सावुल।
ACT 13:2 जत्‌यार चे काहनेस दाहड़े उपास करीन मालीक भगवानेन भक्‌ती करने बाजी रवला, तत्‌यार भगवानेन चुखली-आत्‌मा तीनुक कह्‌यु, “मे तीना सेवान-काम वाटे बरनाबास ने सावुल काजे बुलावलु छे, तीना सेवान काम वाटे मकलने करीन, बरनाबास ने सावुल काजे अलग कर लेवु।”
ACT 13:3 जत्‌यार भगवानेन वात सीकाड़न्‌या ने भगवानेन अघी सी आवणे वाळी वात बताड़न्‌या माणसे उपास ने दुवा करीन नवराय गुया ने अळी चे बरनाबास ने सावुल पर हात मेकीन तींद्‌रे वाटे दुवा कर्‌या तीनुक तीना सेवान-काम सुप देदा ने तीनुक वळायन मकली देदा।
ACT 13:4 अळी चे बरनाबास ने सावुल चुखली-आत्‌मान अगवाय मां भगवानेन सेवान काम वाटे सीलुकीया गुया, ने चां सी मटला ढंड्‌या मां बसीन कुपरुस नावेन काळापाणी मां जाती रया।
ACT 13:5 ने सलमीस सहर पुगीन, चे यहुदी माणसेन भक्‌तीन घर मां भगवानेन खुस-खबर सामळाया। मरकुस कहवायण्‌यु युहन्‌‌‌नु बी तींद्‌रे पुठ्‌ये रय्‌न तींद्‌री सेवान काम करतेलु।
ACT 13:6 ने चे तीना काळापाणी मां आखी दुर फीरता-फीरता, पाफुस सहर मां पुग्‌या, चां तीनुक बार-ईसु नावेन एक यहुदी जातीन जादु देखाड़न्‌यु भेळु हयु। जु, मे भगवानेन अघली वात बताड़न्‌यु माणुस छे करीन ढंगड़ा करन्‌यु हतलु।
ACT 13:7 चु जादु करने वाळु बेसकु अकलवाळु हतलु, ने चु सीरग्‌युस-पोलुस पुठ्‌ये-पुठ्‌ये रवतेलु। जु सीरग्‌युस-पोलुस, बरनाबास ने सावुल काजे बुलावीन भगवानेन बुल सामळने हींडतेलु।
ACT 13:8 बाकुन जु बार-ईसु तेरो दीसरो नाव ईलीमास-मतलब जादु-देखाड़न्‌यु हतलु। जु बरनाबास ने सावुल भीणी जुर कर्‌यु। ने चु सहरेन हकदार्‌या सीरग्‌युसेन भुरसा काजे बीगाड़णेन कुसीत कर्‌यु।
ACT 13:9 बाकुन सावुल, जु पोलुस बी कवायतेलु। चुखली-आत्‌मान कब्‌जाम हय्‌न तीना ईलीमास भीणी एक हेट्‌यु देखीन कह्‌यु,
ACT 13:10 तु भुतड़ान पुर्‌यु छे, तारेम दीसराक धुकु देणेन वात ने दीसराक ठगणीन वात ठेसी-ठेसीन भरली छे। ने तु आखी भातीन वारुन वेरी छे। तु मालीकेन सुदी वाट काजे वाकी करने सी नी टळे काय?
ACT 13:11 हय देख, मालीक तुसेक डंड आपणे बाजी रयु, तत्‌यारुत ईलीमास आंधळु हय्‌न थुड़ाक दाहड़ा लग दीसुन वीजाळो नी देखे। तत्‌यारुत तेरे पर आंदारो छावाय गुयो, ने चु लथेड़तु जाय्‌न कुय मारु हात धरीन ली जासे करीन जां चां सुलेकणे बाजी गुयु।
ACT 13:12 जो हयो चो आखो देखीन सहरेन हकदार्‌यु, ईसु पर भुरसु कर लेदु; ने चु मालीक ईसुन बारामां सामळीन चकराय गुयु।
ACT 13:13 पोलुस ने तेरा साती मटला ढंड्‌या मां बसीन पाफुस सी पंफुलीया सी पीरगा सहर मां आया; ने चां युहन्‌‌‌नु तीनुक चां मेलदीन यरुसलेम पछु जाती रयु।
ACT 13:14 पोलुस ने बरनाबास पीरगा सी अगा जाय्‌न पीसद्‌यान अन्‌ताकीया मां पुग्‌या; ने चे आरामेन दाहड़े यहुदी माणसेन भक्‌तीन घर मां जाय्‌न बस गुया।
ACT 13:15 मुसान साहरे लिखलु सास्‌तुर ने भगवानेन अघली वात बताड़ने वाळा माणसेन किताप भणी भणीन अळी यहुदी माणसेन भक्‌तीन घरेन पुडारी, बरनाबासेन्‌चां ने पोलुसेन्‌चां जी वात कय मकल्‌या, “ए भायस्‌यो! कदी माणसेन सांती आपणे वाटे तुंद्‌रे धड़े काय बी वात हय ती कवु।”
ACT 13:16 तत्‌यार पोलुस उबु हय गुयु, ने हात पालवीन असु कवणे बाजी गुयु: ए ईस्‌रायली माणसे ने भगवानेक बीहीन जीवणे वाळा नी-यहुदी माणसे सामळु!
ACT 13:17 आपणु ईस्‌रायली माणसेन भगवान आपणा डाहा-बुड़ा काजे नेवाड़ लेदलु, ने जत्‌यार चे मीसर देस मां परदेसी बणीन रहतेला, ती तीनुक अगु बड़ावीन ने मटा बणायु, ने चु आपसा हातेन ताकत साहरे तीनुक चां सी नीकाळ लायु।
ACT 13:18 चु चाळीस साल लग उजाड़्‌या बयड़ाम तींद्‌री राखवाळी कर्‌यु।
ACT 13:19 ने हीयुत भगवान कनान देस मां सात जाती काजे सार देदु, ने चो देस आपणा डाहा-डाहान हक मां कर देदु।
ACT 13:20 हव असु करीन आपणा डाहा-डाहान डाहाला बास मीसरे देस मां पारका बणीन रय गुयला ती सी तींद्‌री अवल्‌यात साड़े चार सोव साल मां कनान देस मां अवल्‌यात। पछी आय गुय ने अळी जु भगवानेन अघली वात बताड़ने वाळु समुएल टेम लग नीयाव करन्‌या पुडारीक एकेक करीन उबु कर्‌यु।
ACT 13:21 अळी आपणा डाहा-डाहा आपसा वाटे भगवान धड़े एक राजान मांग कर्‌या, ती भगवान तींद्‌रे धड़े बीन्‌यामीन कुळीम सी कीसन पुर्‌यु सावुल काजे राजा बणाय देदु, ने चु राजु चाळीस साल लग राज कर्‌यु।
ACT 13:22 ने अळी भगवान सावुल काजे राज गादी पर सी छेटु करीन दावुद काजे तींद्‌रु राजा बणायु; ईना दावुदेन बारामां भगवान जी गवा देदु की “मेसेक एक माणुस मारा मनेन अनसारे जड़ गुयलु छे, जु यीसेन पुर्‌यु दावुद छे। चु दावुद मारी आखी मरजी पुरी करसे।”
ACT 13:23 ईना दावुदेन अवल्‌यात मां सी भगवान आपसा वायदान अनसारे ईस्‌रायेली माणसेन चां एक छुड़ावणे वाळा मसी काजे मकल्‌यु। तेरो नाव ईसु हतलो।
ACT 13:24 ईसुन आवणेन पेहले, युहन्‌‌‌नु आखा ईस्‌रायेली माणसे काजे, पापे भीणी सी मन फेरवीन भगवान भीणी वळनेन बपतीस्‌मान परचार करलु।
ACT 13:25 ने युहन्‌‌‌नु भगवानेन काम पुरो करनेत वाळु हतलु, ती चु कवलु, तुहुं मेसेक जु छुड़ावणे वाळु मसी समजी रया हसे, चु आवणेवाळु हतलु, बाकुन मे, चु नी हय। बाकुन चु ते हय आवणेवाळु छे। ने मे ते, तेरा चीपल्‌यान बंद छुड़ने लायक बी नी हय।
ACT 13:26 ए मारा ईस्‌रायेली भायस्‌यो, अब्‌राहमेन अवल्‌यात! आखा भगवानेन भक्‌ती करने वाळा नी-यहुदी माणसे छुटकारान खुस-खबर आपणु आखा काजे आपली छे।
ACT 13:27 यरुसलेम मां रवणेवाळा ने चां नीयाव करन्‌या मुखी ईसु काजे नी उळख्‌या, ने चे भगवानेन अघली वात बताड़ने वाळा माणसेन किताप मां लिखली वात काजे नी समज्‌या; जे आरामेन दाहड़ा डीट भणतेला। जाणी बुजीन तीनाक गुनाळु ठेहरावीन लिखली वातेक पुरी कर्‌या।
ACT 13:28 भले तेरेमां डंड आपे असु गुनु, तीनुक देखाव नी पड़्‌यु तेबी चे, पीलातुस सी लीलघाय्‌न कह्‌या की हीनाक माराड़ नाख।
ACT 13:29 ने ईसुन बारामां जो काय लिखलो हतलो, चो आखो पुरो कर लेदा, ती चे ईसुन धड़ कुरुस पर सी उतार लेदा, ने एक मसाण मां वगे कर देदा।
ACT 13:30 बाकुन भगवान तीना ईसुक मर्‌या-सर्‌याम सी पछु जीवतु करीन बठु कर देदु।
ACT 13:31 ने चु बेसका दाहड़ा लग तीनु माणसे काजे देखाव पड़तु रयु, जे तेरे पुठ्‌ये गलील जीलाम सी यरुसलेम मां आवला। हय चेत माणसे, दीसरा माणसे अगळ ईसुन गवा छे।
ACT 13:32 ने हामु तुहुं काजे तीना वायदान खुस-खबर सामळावजे, जु वायदु भगवान आपणा डाहा-बुड़ा साते करलु।
ACT 13:33 भगवान ईसु मसी काजे मर्‌या-सर्‌याम सी जीवतु करीन चु वायदु तींद्‌री अवल्‌यात वाटे मतलब आपणु आखा वाटे पुरु करलु छे, जसों भजनेन किताप दुय मां बी लिखलो छे, तु मारु पुर्‌यु छे; ने मे आज सी तारु बास बण गुयलु छे।
ACT 13:34 भगवान आपणे वाटे, ईसुक मर्‌या-सर्‌याम सी पछु जीवाड़नेन बारामां कह्‌यु, चु ईसु कदी नी सड़े। काहाकी भगवान तीनाक कवतेलु, मे तुसेक ची चुखली ने जलेमकी संयबरकत आपीस, जी संयबरकत मे दावुद काजे आपणेन बुली करलु हतलु।
ACT 13:35 हेरेसी चु एक अळी दीसरा भजन मां कवलु; तु तारा चुखला भगत काजे सड़ने नी देय।
ACT 13:36 पछेन दावुद तेरे टेम मां भगवानेन मरजी अनसारे तेरो सेवान काम पुरो करीन मर गुयु ने तीनाक तेरा डाहा-डाहा साते गाड़ देदा ने हेरो डील मसाण मां सड़ गुयो।
ACT 13:37 बाकुन भगवान तीनाक मर्‌या-सर्‌याम सी जीवाड़ीन पछु बठु कर्‌यु, तेरो डील नी सड़्‌यो।
ACT 13:38 ती तुहुं आखा ईस्‌राईली भायस्‌यो तुहुं काजे जाण लेणु चाहजे की ईसुन साहरे पापेन माफीन खबर तुहुंक आप देदला छे ने हेरेत साहरे जु कुय आखा जणा जे भुरसु करन्‌या छे हीनु पाप सी छुटकारु जड़ सक्‌से। तेरे सी तुहुंक मुसान लिखलु कायदु छुटकारु नी आपड़ सके।
ACT 13:40 हेरेसी चेतीन रवु, कांखुर मायन भगवानेन अघली वात बताड़ने वाळा माणसेन किताप मां पुरी नी हय जाय:
ACT 13:41 ए वात काड़ण्‌या, चकराय्‌न छेटे हय जावु! काहाकी मे तुंद्‌रा जमाना मां एक वारु काम करने वाळु छे, एक असो काम, कदी तुंद्‌रे मायन कुय बी एरे बारामां वात बी करसे, तेबी कुय काजे ईनी वात पर भुरसु नी आवे!
ACT 13:42 जत्‌यार पोलुस ने बरनाबास यहुदी माणसेन भक्‌तीन घर मां सी नीकळीन जाणे बाजी रवला ती माणसे तींद्‌रे धड़े वीन्‌ती कर्‌या, तुहुं आवते आरामेन दाहड़े ईनी वातेन बारामां कवजु।
ACT 13:43 ने जत्‌यार तींद्‌री भक्‌तीन बसक हय गुय, ती यहुदी माणसे ने नी-यहुदी धरम मान्‌या नवला चेला, पोलुस ने बरनाबासेन वात मान्‌ने बाजी गुया। पोलुस ने बरनाबास तीनुक समजाड़ीन कह्‌या, भगवानेन गीण-दया मां बन्‌ला रवु।
ACT 13:44 आवते आरामेन दाहड़े सहरेन आखा माणसे मालीक भगवानेन बुल सामळने करीन भेळा हय गुया।
ACT 13:45 बाकुन बेसका माणसे आवतेला देखीन यहुदी माणसे पोलुसेन नाव-बद्‌दी करने बाजी गुया, ने वीरुद करीन वात काटणे बाजी गुया।
ACT 13:46 पोलुस ने बरनाबास बीहे बीगुर कह्‌या, जरुड़ी हतलो की पेहले तुहुं काजे भगवानेन बुल सामळावणु हतलो, बाकुन तुहुं भगवानेन बुल नीकारु करीन सामळने नी हींडतेला, ने तुहुं आपसा काजे अमरकायान जलमेन जीवाय्‌न लायेक नी समज्‌ता; हेरेसी हामु हय नी-यहुदी माणसेन चां भगवानेन बुल ली जाजे।
ACT 13:47 काहाकी मालीक भगवान हामुक ज हुकुम आप्‌लु छे, मे तुहुंक नी-यहुदी माणसे वाटे वीजाळो बणावलु छे, एरेन करीन की तारे साहरे धरतीन खुणे-कुपरे लग माणसे छुटकारु हात करसे।
ACT 13:48 ने नी-यहुदी माणसे पोलुसेन ने बरनाबासेन वात सामळीन बेसका खुस हया ने चे मालीक भगवानेन बुलेन ईज्‌जत कर्‌या। जतरा माणसे अमरकायान जीवाय वाटे नेवाड़ला हतला, चे ईसु पर भुरसु कर लेदा।
ACT 13:49 ने तत्‌यार आखा सहर मां मालीकेन बुल फेल गुयो।
ACT 13:50 बाकुन यहुदी माणसे, मट्‌ली कुळीन भक्‌त माणसेन ने सहरेन बायरान जुर चड़ाय देदा, ने पोलुस ने बरनाबासेन वीरुद करावणे हुड़दीन आय लाग्‌या, ने तीनुक आपसान सहर मां सी नीकाळ देदा।
ACT 13:51 ने अळी पोलुस ने बरनाबास तींद्‌रे वीरुद मां आपसा पायेन धुळु झाटकीन ईकुनीयुम सहरे मां जात रया।
ACT 13:52 अन्‌तकीया सहर वाळा भुरसु करने वाळा चेला बेसका खुस हया ने पुरा-पुरा चुखला जीव-आत्‌मा सी भराय गुया।
ACT 14:1 असी वीतली वात ईकुनीयुम सहरेन यहुदी माणसेन भक्‌तीन घर मां पोलुस ने बरनाबास भेळात गुया, ने चे तीनुक समज आवी असो ईसुन बारामां देखाड़्‌या। ने तींद्‌री वात सामळीन यहुदी माणसे मायन ने युनानी माणसे मायन बेसका जणा ईसु पर भुरसु कर लेदा।
ACT 14:2 बाकुन ईसु पर भुरसु नी करन्‌या यहुदी माणसे, नी-यहुदी माणसेक वीखराड़ी देदा, ने भायस्‌योन वीरुद मां तींद्‌रा जीवेम काट करनेन वीच्‌यार नाख देदा।
ACT 14:3 पोलुस ने बरनाबास बेसका दाहड़ा चां रया, ने मालीक पर भुरसु करीन बीहे बीगुर ईसु भगवानेन बारामां वात करता रया, ने मालीक ईसु तींद्‌रे साहरे वारु काम ने सहलाणी देखाड़ीन आपसी गीण-दयान बुलेन गवा देदलु।
ACT 14:4 बाकुन तीना सहरेन माणसे मां लड़ाय हय गुय ने अलग-अलग हय गुया; ने असु करीन थुड़ाक यहुदी माणसे भीणी ने थुड़ाक ईसुन नेवताळा भीणी जाणे बाजी गुया।
ACT 14:5 बाकुन जत्‌यार यहुदी माणसे ने नी-यहुदी माणसे आपसा मुखी साते भेसकायन पोलुस ने बरनाबास साते खुटु वेहवार करने करीन तीनुक दगड़ाटणे करीन वीच्‌यार कर्‌या।
ACT 14:6 ती पोलुस ने बरनाबास तींद्‌री मुजगी जाण गुया, ने चे लुकावन्‌या जीलान लुसत्‌रा सहर मां, ने दीरबे सहर मां ढास पड़्‌या।
ACT 14:7 ने चे चां जाय्‌न बी खुस-खबर सामळावणे बाजी गुया।
ACT 14:8 लुसत्‌रा मां एक माणुस बस रवलु, तेरा पाय लुल्‌ला हतला चु पयदा हवलु ती सीत लंगड़ु हतलु, ने चु आज लग चाल्‌यु नी।
ACT 14:9 चु पोलुस काजे वात करतेलु सामळी रवलु, ने चु पोलुस भीणी एक हेट्‌यु देख रवलु, ने तीना लंगड़ा मां वारु हवणेन भुरसु हतलु।
ACT 14:10 अळी पोलुस जुर सी आयड़ीन कह्‌यु, “आपसा पायेन भुरसे उबु हय जां!” ने चु पोलुसेन वात सामळीन उबु हय गुयु ने चालने-फीरने बाजी गुयु।
ACT 14:11 पोलुसेन साहरे हवला वारु कामेक देखीन माणसे लुकावन्‌या बुली मां जुर सी आयड़ीन कह्‌या, “माणसेन रुप लीन देवता हामरे ईचमां उतरीन आवला छे।”
ACT 14:12 ने चे बरनाबास काजे गुयुस देवता ने पोलुस काजे हीरमेस देवता कवणे बाजी गुया, काहाकी पोलुस वात करने मां पुडारी हतलु।
ACT 14:13 ने गुयुस देवतान मंदीर सहरेन झपला अगळ हतलु। ने तीना मंदीर वाळु पुजारी बेल ने फुलेन माळा लीन चां आय लाग्‌यु। चु माणसे भेळु पोलुस ने बरनाबास वाटे बेल मारीन बादा चड़ावणे हींडतेलु।
ACT 14:14 बाकुन जत्‌यार नेवताळा बरनाबास ने पोलुस, चे ज सामळ्‌या, ती चे हींद्‌रा पुथल्‌या फाड़ देदा ने जुर सी आयड़ीन ज कवता जाय्‌न माणसेन टुळा मां भराय गुया,
ACT 14:15 “ए माणसे! हामु बी ते असात माणसे, छे जसा तुहुं छे जां हामु तुहुं काजे खुस-खबर सामळावणे आवला छे, काहाकी तुहुं हीनी फालतु वात काजे पछा फीरीन हीना जीवतेला भगवान भीणी आवती रहु जु सरग, धरती, समुदर ने तींद्‌रेम ज काय बी छे तीनाक बणायु।
ACT 14:16 वीत्‌या जमाना मां भगवान आखी जातीन माणसे काजे आपणे-आपणे दथा-तथा देवतान पुजा-पाट करीन जीवणे देदु, काहाकी चे तीनाक नी उळख्‌या।
ACT 14:17 बाकुन तेरा भला कामेन, सरगे सी पाणी पाड़तु रयु, ने टेम-टेम पर मेर पाकाड़तु रयु खाणेन सादन आपतु रयु, ने तींद्‌रा मनेक खुस करतु रयु।”
ACT 14:18 असो कयदीन पोलुस कायस करीन तीनु माणसेक तुहुं बेल काजे मारीन बादा चड़ावीन मारी पुजा-पाट मां करु करीन रुक्‌यु।
ACT 14:19 बाकुन ईतराक यहुदी माणसे अन्‌ताकीया सहरेम सी ने ईकुनीयुम सी आवीन माणसे काजे आपसा सुदा कर लेदा ने पोलुस काजे दगड़ाट्‌या, ने मर गुयु समजीन तीनाक घीसीन सहर सी बाहर ली गुया; ने चांहान नाखीन जात रया।
ACT 14:20 बाकुन जत्‌यार चेला पोलुसेन चारेमेर आवीन भेळा हय गुया, ती चु उठीन उबु हय गुयु, ती चु उठीन सहरेम गुयु ने दीसरे दाहड़े बरनाबास पुठ्‌ये दीरबे सहरेम जात रयु।
ACT 14:21 पोलुस ने बरनाबास दीरबे सहरेन माणसे काजे खुस-खबर सामळाया, ने बेसका चेला बणाया, ने लुसत्‌रा ने ईकुनीयुम ने अन्‌ताकीया पछा जात रया।
ACT 14:22 ने चे, चेला काजे हिम्‌मत देवड़ावता जाय्‌न तीनुक भुरसा मां काठा रवणे करीन जी वात सीकाड़ता रया, “आपणु काजे बेसका वेला करीन भगवानेन राजेम भरायणु छे।”
ACT 14:23 ने चे मंडळीन पुडारी बणावणे करीन माणसेक नेवाड़्‌या ने तीनुक पुडारी‌ ठेराया, ने उपास भेळा भगवान धड़े वीन्‌ती करीन, तीनुक मालीकेन हातेम आप देदा; तीना मालीक ईसु पर चे भुरसु कर्‌या।
ACT 14:24 तत्‌यार पोलुस ने बरनाबास पीसद्‌या जीलाक वेणकीन, दखणाव पंफुलीया जीला मां पुग्‌या।
ACT 14:25 ने पीरगा सहरेम भगवानेन खुस-खबर सामळावीन अताल्‌या सहरेम आया।
ACT 14:26 अळी चां सी चे भगवानेन गीण-दयान अनसारे सुपलो काम पुरो करीन मटला ढंड्‌याम बसीन अन्‌ताकीया सहरेम चाहात रया, जां सी चे काम सुरु करला।
ACT 14:27 जत्‌यार चे अन्‌ताकीया मां पुगीन, चे मंडळीन भुरसु करन्‌या माणसे काजे भेळा कर्‌या, ने ज काय हयो तत्‌यार भगवान तींद्‌रे पुठ्‌ये हतलु ने कसु नी-यहुदी वाळा माणसे वाटे बारनो उघाड़ देदु
ACT 14:28 चे बेसका दाहड़ा लग चां आखा चेला पुठ्‌ये रया।
ACT 15:1 थुड़ाक ईसु पर भुरसु करन्‌या यहुदी जातीन माणसे यहुदीया जीला सी अन्‌ताकीया आया, ने भायस्‌यो काजे ज सीकाड़ने बाजी गुया की “कदी तुहुं मुसान लिखला कायदान अनसारे फतरी नी काटाड़ु, ती तुहुंक पापेम सी छुटकारु नी जड़े।”
ACT 15:2 पोलुस ने बरनाबास तींद्‌री वात सी राजी नी हतला, हींद्‌रे मां लड़ाय हय गुय, तत्‌यार पोलुस ने बरनाबास हींद्‌रा थुड़ाक दुस्‌तीदार काजे ईनी परेसानी मां सी छेटे करने वाटे नेवताळा ने मुख्‌या धड़े यरुसलेम मां मकलनेन वीच्‌यार कर्‌या।
ACT 15:3 तेरेसी मंडळीन साहरे तीना काजे ईतराक अगास मेकणे गुया; ने फीनीके ने सामर्‌या मायन गुया ने चां वाळा आखा ईसु पर भुरसु करन्‌या ज कवता गुया की नी-यहुदी माणसे बी खुस-खबर पर भुरसु करीन भगवान भीणी हींद्‌रो मन फेरवी लेदा। ने आखा भाय जी वात सामळीन बेसका खुस हय गुया।
ACT 15:4 ने जत्‌यार चे यरुसलेम पुग्‌या, ती ईसुन, ने ईसुन मंडळी ने नेवताळा ने पुडारी तीनुक खुस हय्‌न भेळा हया, ने जे गुयला चे तीनुक कह्‌या की भगवान तींद्‌रे पुठ्‌ये रय्‌न कसा-कसा वारु काम कर्‌यु।
ACT 15:5 बाकुन फरीसी माणसेन टुळा मां जे ईसु पर भुरसु करला, तींद्‌रे मायन ईतराक उबा हय्‌न कह्‌या, “हीनु नी-यहुदी काजे फतरी काटणेन ने मुसान कायदा पाळनेन हुकुम आपणु चाहजे।”
ACT 15:6 तत्‌यार ईसुन नेवताळा ने पुडारी फतरी काटणेन ने मुसान कायदा पाळनेन वात पर वीच्‌यार करने करीन भेळा हया।
ACT 15:7 जत्‌यार बेसकी वार लग ईनी वात पर माथा-पच्‌ची हय गुय ने अळी पतरस उबु हय्‌न कह्‌यु, “ए भाय बेटा! तुहुं काजे मालुम छे की नी-यहुदी माणसे मां ईसुन खुस-खबर सामळावणे ने तीनुक ईसुन भुरसा मां लावणे करीन बेसका दाहड़ा पेहले भगवान मेसे काजे तुंद्‌रे मां सी नेवाड़ लेदु।
ACT 15:8 ने मन काजे पारखणे वाळु भगवान तीनु काजे बी चुखली-आत्‌मा आप्‌यु, जसु आपणु काजे चुखली-आत्‌मा आपलु। ने ईनी वातेन गवा देदु की भगवान हीनुक बी पापेम सी छुटकारु हात करनेन भुरसु आपलु छे।
ACT 15:9 ने ईसु पर भुरसान साहरे तींद्‌रो मन चुखो कर देदु ने हय तींद्‌रेम ने आपणेम काय बी छीट नी रय।
ACT 15:10 ती हय तुहुं भगवान काजे काहा पारखी रया? ने चेलान बुचाटा मां मुसान कायदान जुड़ो मेलीन काहा बुझु बणाय रया, तीना जुड़ा काजे आपणा डाहा-डाहा लग नी हाकल्‌या?
ACT 15:11 हव, हामु काजे पाक्‌कु भुरसु छे की तीने रीते चे मालीक ईसुन गीण-दयान साहरे पापेम सी छुटकारु हात करसे; तीनेत रीते आपणु बी मालीक ईसुन गीण-दयान साहरे पापेम सी छुटकारु हात करसु।”
ACT 15:12 चे आखा हुगा हय्‌न बरनाबास ने पोलुसेन वात सामळने बाजी रवला। ने चे तीनु सहलाणीन ने वारु कामेन बारामां वारु कह्‌णे बाजी रवला, जे सहलाणी वारु काम भगवान तींद्‌रे साहरे नी-यहुदी अगळ देखाड़लु हतलु।
ACT 15:13 सावुल ने पोलुस कय देदा ने अळी याकुप कवणे बाजी गुयु, ए भायस्‌यो, हय मारी वात सामळु।
ACT 15:14 सीमोन हामुक देखाड़्‌यु की भगवान नी-यहुदी माणसे पर गीण करीन आपसा नाव वाटे नेवाड़ लेदु।
ACT 15:15 ने जी वात भगवानेन अघली वात बताड़ने वाळा माणसेन वात सी मेळ बी खाय, जसों भगवानेन अघली वात बताड़ने वाळान किताप मां बी लिखलो छे,
ACT 15:16 हेरे पछेन मे आवीन, दावुदेन उदेरला तम्‌बु काजे पछु बणावीस, ने तेरा जुन्‌ला सुनसान घरेक, अळी पछु काठो बणायन उबा करीस।
ACT 15:17 तेरे सी आखा बचला नी-यहुदी माणसे मालीक काजे हेरे तसा, जे मारा नावेन कहवाये।
ACT 15:18 जी वात चु मालीक कह्‌वे, जु कळी घड़ायी ती सीत पीड़ीडीट काजे खबर करतु आय रयु।
ACT 15:19 हेरेसी मारु जु वीच्‌यार छे, की जे नी-यहुदी माणसे मां ईसु पर भुरसु करीन भगवान भीणी वळ गुयला तीनु काजे जाणी बुजीन वेला नी करनु चाहजे।
ACT 15:20 बाकुन आपणु तींद्‌रेन्‌चां जी चिट्‌ठी लिखीन दी मकेल्‌ला की “तुहुं मुरती पर चड़ावलो खाणो घुण खावु। ने गळु दड़पीन मारला काहना बी जनवार्‌यान सीकार घुण खावु, ने काहना बी जनवार्‌यान खुन घुण पीयु। ने छीनाळो घुण करु।
ACT 15:21 काहाकी पुराणा टेम सी मुसान नीयम कायदान परचार करन्‌या आखा सहर मां जड़े। ने चे आरामेन दाहड़े तींद्‌रा आखा यहुदी माणसेन भक्‌तीन घर मां मुसान कायदान किताप भणीन सामळावे।”
ACT 15:22 जी वात सामळीन आखी मंडळीन माणसेक, ईसुन नेवताळाक ने पुडारी काजे वारु लाग्‌यो, ने चे वीच्‌यार कर्‌या की आपणे मां सी थुड़ाक माणसे नेवाड़जे। ने चे यहुदा काजे नेवाड़्‌या, जु बरसब्‌बास कवाये। ने सीलास काजे नेवाड़्‌या, जु तीनु भायस्‌यो मां मुख्‌यु हतलु; ने तीनुक पोलुस ने बरनाबास पुठ्‌ये अन्‌ताकीया सहर मां मकली देदा।
ACT 15:23 ने तींद्‌रे हाते जी चिट्‌ठी मकल्‌या, तेरेमां लिखलो हतलो: “ए अन्‌ताकीया मां, ने सीरीया मां, ने कीलक्‌या मां रवण्‌या नी-यहुदी भायस्‌यो, तुहुं काजे ईसुन नेवताळा भीणी सी ने पुडारी भीणी सी आवीस ने आवजी कवजे!
ACT 15:24 हामु सामेळला छे की हामरेन्‌चां सी थुड़ाक माणसे तुंद्‌रेन्‌चां आवीन दत-तथी वात कय्‌न भटकाड़ देदला छे; ने तुंद्‌रा जीवक घाबराड़ देदला छे। बाकुन हामु तीनु काजे असली वात करनेन हुकुम नी आप्‌या
ACT 15:25 हेरे सी हामु आखान-आखा एक मन्‌या हय्‌न वीच्‌यार करला छे की हामु हामरेम सी तीनु माणसे काजे नेवाड़ला छे, तीनु माणसे काजे हामरा लाटेक्‌ला बरनाबास ने पोलुस भेळा तुंद्‌रेन्‌चां मकलजे।
ACT 15:26 जे चेत माणसे छे, जे मालीक ईसु मसीन नावे तींद्‌रु जीव आपणे लग तीयार हय गुयला।
ACT 15:27 ने हामु हींद्‌रे पुठ्‌ये यहुदा ने सीलास काजे मकेल्‌ला छे, जे तुहुं काजे आपणा मुंहडा सी जी आखी वात कय देसे।
ACT 15:28 चुखली-आत्‌मा काजे ने हामु काजे मालुम पड़्‌यो की ईनी कामकी वातेक छुड़ीन तुंद्‌रे पर काहनु अळी भार नी मेलनु चाहजे।
ACT 15:29 तुहुं मुरती पर चड़ावलो खाणो घुण खावु। ने गळु दड़पीन मारला काहना बी जनवार्‌यान सीकार घुण खावु, ने काहना बी जनवार्‌या घुण खावु। ने छीनाळो घुण करु। असु करीन तुहुं ईनी आखी वात सी छेटे रवजु ती तुंद्‌रो भलो हवसे। वारु रवजु।”
ACT 15:30 असा करीन चे तीनुक मकली देदा ने चिट्‌ठी लीन अन्‌ताकीया सहर मां गुया, ने चां जाय्‌न चे आखा भुरसु करन्‌या माणसे काजे भेळा करीन ची चिट्‌ठी तीनुक आप देदा।
ACT 15:31 ने चे तीनी चिट्‌ठी मां लिखली वात भणीन बेसका खुस हय गुया।
ACT 15:32 यहुदा ने सीलास जे भगवानेन अघली वात बताड़ने वाळा माणसे हतला, चे बी बेसकी वात कय्‌न तीनु भायस्‌यो काजे सांती आप्‌या। ने तींद्‌रा भुरसाक काठा कर्‌या।
ACT 15:33 ने चे थुड़ाक दाहड़ा चां रया, ने अळी चे तीनु भायस काजे आवसु ने आवजु कय्‌न, जे तीनुक मकेल्‌ला चां पछा जाती रया।
ACT 15:34 बाकुन सीलास काजे चांहान रहणु वारु लाग्‌यो,
ACT 15:35 ने पोलुस ने बरनाबास अन्‌ताकीया मां ईतराक दाहड़ा रया, ने बेसका दीसरा माणसे पुठ्‌ये रय्‌न चे माणसे काजे सीकाड़ता जाय्‌न मालीक ईसुन खुस-खबर सामळाया।
ACT 15:36 ईतराक दाहड़ा हय गुया ने अळतेन पोलुस बरनाबास काजे कह्‌यु “चाल, तीना-तीना सहर मां आपणु खुस-खबर सामळावला, तीना-तीना सहर मां जाय्‌न मालीक पर भुरसु करन्‌या भायस काजे देखता की चे काय करने बाजी रया।”
ACT 15:37 तत्‌यार बरनाबासेन हेर जी हतली, की आपणु युहन्‌ना काजे बी पुठ्‌ये ली जाता। जु मरकुस बी कवायतेलु।
ACT 15:38 बाकुन पोलुस तीनाक पुठ्‌ये ली जाणु ताले नी समज्‌यु, काहाकी चु पेहले पंफुलीया मां संगात छुड़ देदलु ने मालीक भगवानेन काम मां सात नी देदु।
ACT 15:39 ने तींद्‌रे मां माथा-पच्‌ची हय गुय: ने बरनाबास, मरकुस काजे लीन मटला ढंड्‌याम बठीन कुपरुस सहर जाती रयु।
ACT 15:40 बाकुन पोलुस, सीलास काजे नेवाड़्‌यु, ने भायस तीना वाटे भगवान धड़े गीण-दया मांगीन तीनाक मालीकेन हातेम सुप देदा।
ACT 15:41 ने चु फीरतु-फीरतु कीलक्‌या जीलाम ने सीरीया देसेन ईसुन मंडळी मां जाय्‌न तीनुक ईसुन भुरसा मां काठा करतु गुयु ने अघु-अघु जाती रयु।
ACT 16:1 अळतेन पोलुस दीरबे ने लुसत्‌रा मां बी गुयु चां तीमुथीयुस नावेन एक चेलु हतलु जु ईसु पर भुरसु करनी एक यहुदी जातीन बायरीन पुर्‌यु हतलु बाकुन तेरु बास युनानी हतलु।
ACT 16:2 चु तीमुथीयुस लुसत्‌रा ने ईकुनीयुम वाळा भाय-बंद मां बी वारलु बुल-चाल हतली।
ACT 16:3 पोलुसेन मरजी हतली की तीमुथीयुस हेरे साते जाय; ने जे यहुदी माणसे हींद्‌रे वजे सी हयु तीमुथीयुस फतरी काट्‌यु काहाकी चे आखा जाणतेला की तेरु बास युनानी हतलु।
ACT 16:4 ने चे सहरे-सहरे मां गुया ती तीनुक कायदा काजे पाळने करीन कवता गुया। चे कायदा यरुसलेम वाळा ईसुन नेवताळा ने पुडारी देखाड़ला।
ACT 16:5 हेरेसी ईसुन मंडळी भुरसा मां काठी हवती गुया ने गिन्‌ती मां दाहड़ीन अदु हवता गुया।
ACT 16:6 चे पोलुस ने तेरु साती फुर्‌गीया ने गलातीया परदेस मां सी हय्‌न गुया काहाकी चुखली-आत्‌मा हीनु आसीया मां बुल सामळावणे नी कय देदु।
ACT 16:7 अळतेन चे मुस्‌या काकड़ पर पुगीन बीतुनीयाम ईलाका जाणे कर्‌या बाकुन ईसुन आत्‌मा तीनु काजे बीतुनीया जाणे नी देदी।
ACT 16:8 तेरेसी चे मुस्‌या नीकळीन तरोआस मां आया।
ACT 16:9 ने चां पोलुस राते एक जागतो सपनो देख्‌यु की एक मकीदुनीया वाळु माणुस उबु हय र्‌यु, “ने पोलुस काजे लीलघाय्‌न ज कय र्‌यु की समुदर एणकीन मकीदुनीया जीला मां आवीन हामरी मदत कर।”
ACT 16:10 पोलुस ज जागतो सपनो देख लेदु ने अळतेन हामु मकीदुनीया मां ज समजीन जाणे हींडतेला की भगवान हामु काजे खुस-खबर सामळावणे करीन मकेलु छे।
ACT 16:11 तरोआस सी हामु मटला ढंड्‌या मां बठीन सुदा सुमात्‌रावे आया चांहा सी दीसरे दाहड़े नीयापुलीस मां आया
ACT 16:12 ने हामु नीयापुलीस सहर सी, चालीन फीलीपी सहरेम पुग्‌या, जो मकीदुनीया जीलान खास सहर छे, चां रोमी राजवाड़ान खास माणसे रवे, ने हामु ईतराक दाहड़ा चां रया।
ACT 16:13 यहुदी माणसेन आरामेन दाहड़े हामु ज समजीन सहरेम बारनो एणकीन सहर सी बाहरा नदी धड़े आया की चांहा यहुदी माणसे वाटे काहनो दुवा करनेन घर हसे ने चां पुगीन हामु चां भेळा हय रवला ईतराक बायरा धड़े वात करने बाजी गुया।
ACT 16:14 तीनु बायरा भेळी लुदीया नावेन एक थुवातीरा सहरेन एक बायर हतली ची जामण्‌या पुथल्‌या वेचणी हतली ने भगवानेन भक्‌ती करनी हतली पोलुसेन वात मन लागाड़ीन सामळने बाजी रवली ने मालीक ईसु तेरो मन उघाड़ देदु।
ACT 16:15 ने ची ईसु पर भुरसु करीन आपसा घर बार्‌या भेळी पाणी मां बपतीस्‌मा लेदी ने हामु काजे लीलघाय्‌न कय की कदी तुहुं मेसे काजे मालीक भगवानेन भक्‌ती करन्‌या समजी र्‌या हय ती मारे घर चालु ने मारे घर रवजु ने ची हामु काजे मानाड़ीन ली गुय।
ACT 16:16 जत्‌यार हामु एक दाहड़े दुवा करने घर मां जाणे बाजी रवला ती हामु काजे एक जुवान गुलाम पावरनी भेळी हयी तीनी मां हवणे वाळी वात कहण्‌यु भुतड़ु भराय रवलु ने ची तीना भुतड़ान साहरे माणसे काजे हवणे वाळी वात देखाड़ तेली ने तेरा मालक्‌या वाटे बेसका पयस्‌या कमाय लेतली।
ACT 16:17 ची पोलुस ने हामरे पछळ-पछळ आवीन आयड़ती जाय्‌न कह्‌वी जे माणसे आखा मां रवण्‌या भगवानेन चाकर्‌या छे ने तुहुं काजे छुटकारान खबर सामळावे।
ACT 16:18 ची बेसका दाहड़ा लग असीत करती रवी बाकुन पोलुस दुखी हय्‌न पछु फीरीन तीना भुतड़ा काजे कह्‌यु मे तुसेक ईसु मसीन नाव सी हुकुम आपो की हेरे मां सी नीकळी जां ने ची तीने टेमे नीकळी गुयु।
ACT 16:19 तत्‌यार तेरा मालक्‌या देख्‌या की हामरी कमायन आस जात रय ती चे पोलुस ने सीलास काजे धरीन हाटेन चवराया पर मुख्‌यान चां घीसड़ीन ली गुया।
ACT 16:20 अळी पोलुस ने सीलास काजे नीयाव करन्‌या मुख्‌यान चां लीन गुया ने तीना काजे कह्‌या ज देख जे अदमी यहुदी छे ने हामरा सहरेम माणसे मां गरबड़ी कर र्‌या।
ACT 16:21 ने चे असली रीती भातीन बारामां कय र्‌या जीनी रीती काजे माननु ने पाळनु आपणे वाटे वारु नी हय काहाकी आपणु रोमी माणसे छे।
ACT 16:22 तत्‌यार तींद्‌रे सांबा चां वाळा माणसे हुड़दीन आय गुया। ने नीयाव करन्‌या तींद्‌रा पुथल्‌या फाड़ीन डील पर सी छेटा कर देदा ने तीनु काजे ठुकणेन हुकुम आप्‌या।
ACT 16:23 ने चे पोलुस ने सीलास काजे बेसका ठुक्‌या ने तीनु काजे जेल मां बुजी देदा ने जेल राखवाळ्‌या काजे कह्‌या ईनु काजे वारु चतराये देखजु।
ACT 16:24 हुकुम सामळीन जेल राखवाळु तीनु काजे लीन माहें वाळी जेल मां बुज देदु ने तींद्‌रा पाये काजे लाकड़ा मां मेकीन ठुक देदा।
ACT 16:25 आधलीक रातेन हेर फेर मां पोलुस ने सीलास भगवान साते दुवा करीन भगवानेन गुणे गावणे बाजी रवला ने दीसरा केदी बी तींद्‌री दुवा ने भगवानेन गुण गावतेला सामळी रवला।
ACT 16:26 ने तत्‌यारुत चां उचकाणुन बेसकी जुरे धरती हाली ने जेलेन पाया हाल पड़्‌या ने तत्‌यारुत जेलेन बारना उघड़ी गुया ने आखा केदीन हात कड़्‌या ने पाय कड़्‌या उघड़ी गुया।
ACT 16:27 जेलेन राखवाळ्‌यु जागी गुयु ने जेलेन बारना उगड़ला देखीन ज्‌य समजी गुयु की केदी ठासी गुया तेरेमां चु मीयान मां सी तलवार नीकाळीन आपसा काजे तलवार दीन मारने हींडतेला।
ACT 16:28 बाकुन पोलुस जुर सी आयड़ीन तीना काजे कह्‌यु तु आपसा काजे मारीन आपसान ने नुकसाण मां करे काहाकी हामु जात छे।
ACT 16:29 तत्‌यार चु जेलेन राखवाळ्‌यु दिवु मांगाड़ीन माहें दवड़ीन गुयु ने कापतु जाय्‌न पोलुस ने सीलासेन पाये मां हीट पड़्‌यु।
ACT 16:30 ने चु तीनु काजे बाहार लावीन कह्‌यु ए मालक्‌या छुटकारु हात करने करीन मेसेक काय करनु पड़से।
ACT 16:31 चे कह्‌या तु, “मालीक ईसु मसी पर भुरसु कर ती तुसे काजे ने तारा घरन्‌या काजे छुटकारु जड़से।”
ACT 16:32 ने पोलुस ने सीलास तीना जेलेन राखवाळ्‌या ने तेरा आखा घरन्‌यान माणसे काजे मालीक ईसुन बुल सामळ्‌या।
ACT 16:33 ने चु जेलेन राखवाळ्‌यु तीनीत राती तीनु काजे ली जाय्‌न तींद्‌रा घाव धुयु ने चु तत्‌यारुत आपसा घरन्‌या भेळु पाणी मां बपतीस्‌मा लेदु।
ACT 16:34 तत्‌यार चु पोलुस ने सीलास काजे आपसान घर लीन गुयु ने तीनु काजे खाणो खावाड़्‌यु ने आपसा आखा घरबार्‌या पुठ्‌ये खुसी कर्‌यु काहाकी चे भगवान पर भुरसु कर्‌या।
ACT 16:35 संदारे हवतात नीयाव करन्‌या मुख्‌या हेरा सीपायड़ा काजे असी कय्‌न मकल्‌या की तीनु माणसे काजे छुड़ देवु।
ACT 16:36 जेलेन राखवाळ्‌यु पोलुस काजे जी खबर सामळायु की, नीयाव करने वाळु तुहुं काजे छुड़नेन हुकुम कय मकेल्‌लु छे, तेरेसी हय तुहुं सुकुन सी बाहार नीकळीन जाती रवु।
ACT 16:37 बाकुन पोलुस सीपायड़ा काजे कह्‌यु हामु रोमी सहर मां रवणेवाळा छे, तेबी हामरे पर लागाड़ला गुना जड़ने पाकुर चे हामु काजे आखा अगळ ठुकला ने जेल मां बुजी देदा ने हय हामु काजे काहा मकली र्‌या? असा हामु ती जाजे बाकुन चेत आवीन हामु काजे बाहार ली जाणु चाहजे।
ACT 16:38 सीपायड़ा आय्‌न नीयाव करन्‌या काजे जी वात सामळ्‌या ने पोलुस ने सीलास रोमी सहर मां रवणेवाळा छे, करीन बेसका बीही गुया,
ACT 16:39 ने चे नीयाव करन्‌या आवीन माफी मांग्‌या ने तीनु काजे जेल मां सी बाहर लीन गुया ने हीना सहर काजे छुड़ीन जाती रवु करीन वीन्‌ती कर्‌यु।
ACT 16:40 पोलुस ने सीलास जेल मां सी नीकळीन लुदीया बायरीन घर गुया, ने ईसु पर भुरसु करन्‌या भाय-बंद काजे भेळा हवीन तीनु काजे हिम्‌मत आप्‌या ने चां सी चाल पड़्‌या।
ACT 17:1 पोलुस ने सीलास अमफीपुलीस ने अपुलन्‌या सहर मायन थीसलुनीकी सहर आया चां एक यहुदी माणसेन भक्‌तीन घर हतलो।
ACT 17:2 चां पोलुस आपसी टेमेन अनसारे तीनु काजे मेळने गुयु ने तीना आरामेन दाहड़े लग तींद्‌रे साते चुखला सास्‌तुरेम सी वात देखाड़ीन दाखलु दी-दीन वात मां माथा-पच्‌ची हय गुय।
ACT 17:3 ने दाखला भेळु सास्‌तुरेन वाते काजे समजाड़्‌यु की ईसु मसी काजे दुख झेलने ने मर्‌या-सर्‌या मां सी जीवतो हवणु जरुड़ी छे, “ने चु ईसुत मसी छे तेरे बारामां परचार करे।”
ACT 17:4 तींद्‌रे मां सी थुड़ाक माणसे ईसु पर भुरसु कर्‌या ने भगवानेन भक्‌ती करन्‌या युनानी माणसे मां सी बेसका जणा ईसु पर भुरसु कर्‌या ने बेसकी उची कुळीन बायरा बी ईसु पर भुरसु कर्‌या ने पोलुस ने सीलास पुठ्‌ये भेसकाय गुया।
ACT 17:5 बाकुन यहुदी माणसे कुहरायणे बाजी गुया, ने चे थुड़ाक हाटे मायन गुंडा माणसे काजे भेळा कर्‌या ने टुळु बणीन दंगु कराड़ देदा। ने चे दवड़ीन आया ने यासोनेन घर अगळ भेळा हय गुया। ने चे असा कुसीत करने लाग्‌या कसा बी करीन पोलुस ने सीलास काजे सहरेन माणसे अगळ ली आवजे।
ACT 17:6 बाकुन जत्‌यार पोलुस ने सीलास यासोनेन घर मां नी जड़्‌या ती चे यासोन ने चां वाळा दीसरा भायस काजे घसड़ीन सहरेन नीयाव करन्‌या चां ली गुया ने आयड़ीन कह्‌या जे माणसे आखी कळी मां परेसान कर देदला छे ने हय चां बी आय गुयला छे।
ACT 17:7 ने यासोन तीनु काजे हेरा घर मां थुबाड़ रयु, चे आखा मटला राजान हुकुमेन वीरुद करे ने कह्‌वे की एक राजु अळी छे तेरो नाव ईसु छे।
ACT 17:8 जत्‌यार समजीन सहरेन माणसे टुळु ने सहरेन हकदार्‌या घाबराय गुया।
ACT 17:9 छुड़ावणे वाटे हकदार्‌यान लागणे वाळा पयस्‌या यासोन ने दीसरा माणसे सी लेदा ने तीनुक छुड़ी देदा।
ACT 17:10 ईसु पर भुरसु करन्‌या भायस तीनेत राते पोलुस ने सीलास काजे बीरीया सहरे मां मकली देदा ने चे बीरीया सहरे मां पुगीन यहुदी माणसेन भक्‌तीन घर मां गुया।
ACT 17:11 चे बीरीया सहर वाळा थीसलुनीकी सहर वाळा माणसे सी वदु वारु हतला ने चे बेसका मन लागाड़ीन भगवानेन बुल सामळ्‌या ने पोलुस कह्‌यु ची वात सय हय की नी हय करीन खरला सास्‌तुर मां हेरीन दाहड़ीन पारखतेला।
ACT 17:12 तींद्‌रे मां बेसका माणसे ईसु पर भुरसु कर्‌या ने भगवानेन भक्‌ती करन्‌या युनानी मां उची कुळीन बायरा बी ईसु पर भुरसु कर्‌या।
ACT 17:13 बाकुन थीसलुनीकी मां रहणे वाळा यहुदी माणसे काजे मालुम पड़ गुयो की पोलुस बीरीया मां भगवानेन बुलेन परचार करने बाजी गुयु ती चे चां बी दवड़ीन आय गुया ने माणसे काजे भड़काया ने तींद्‌रे पर जुर करने बाजी गुया।
ACT 17:14 तेरेसी ईसु पर भुरसु करन्‌या भायस पोलुस काजे तत्‌यारुत तु समुदर धड़े जात रव करीन कह्‌या बाकुन सीलास ने तीमुथीयुस चांहान रय गुया।
ACT 17:15 पोलुस काजे मेकणे जाण्‌या सीलास ने तीमुथीयुस काजे कह्‌या की तुहुं छाटास आवजु ने चे पोलुस काजे मेकणे करीन तेरे पुठ्‌ये चाल पड़्‌या ने चे पोलुस काजे मेकणे करीन एथेंस लग गुया।
ACT 17:16 जत्‌यार पोलुस एथेंस सहर मां तीमुथीयुस ने सीलासेन वाट देख रवला ती तीना एथेंस सहर मां बेसका देवतान मुरत्‌या देखीन पोलुस काजे आपसा जीवे मां बेसको दुख लाग्‌यो।
ACT 17:17 तेरेमां चे दाहड़ीन यहुदी माणसेन भक्‌तीन घर मां यहुदी ने भगवान काजे बीहणे वाळा युनानी सी वात-वात मां माथा-पच्‌ची करतेलु अतरोत नी बाकुन दाहड़ीन हाटे मां काहना बी रवतेला तींद्‌रे सी वात मां माथा-पच्‌ची करतेलु।
ACT 17:18 चां ईपीकुरी ने स्‌तोईकी मास्‌तर्‌या हतला “चे पोलुस साते वात मां माथा-पच्‌ची करतेला ने तींद्‌रे मां थुड़ाक कह्‌या जु बक-बक करन्‌यु हामु काजे काय कह्‌णे हींड रयु ने?” दीसरा कह्‌या जु दीसरा देवतान परचार करन्‌याक मालुम पड़े, काहाकी पोलुस ईसुन बारामां जी सीकाड़नेन वात आपतेला की ईसु मर्‌या-सर्‌या सी जीवतु हय्‌न बठु हय गुयलु छे।
ACT 17:19 तेरेसी चे तीना काजे धरीन अरीयुपगुस नावेन एक बयड़ी पर अकलेन बठक मां ली गुया, ने पुछ्‌या, तु जी नवली सीकाड़नेन वात माणसे काजे आपणे बाजी र्‌यु, तीनी सीकाड़नेन वात काजे हामु जाणने हींड रया।
ACT 17:20 काहाकी हामु काजे बेसकी घाबराड़ देय असी वात सामळावे तेरेसी हामु जाणने हींड रया की तेरो मतलब काय छे?
ACT 17:21 चां रहण्‌या आखा एथेंस सहर मां रहण्‌या आखा माणसे ने दीसरा देसेन माणसे नवली-नवली वात कह्‌वणे ने सामळने मां टेम लागाड़तेला ने तीनुक ईनी वाते मां मजा आवतेली।
ACT 17:22 तत्‌यार पोलुस अरीयुपगुस नावेन बठक मां उबु हय्‌न कह्‌यु, ए एथेंस वाळा माणसे मे देखणे बाजी रयु, की तुहुं देवता पर बेसका भुरसु करीन तींद्‌री पुजा-पाट करु।
ACT 17:23 मे जां फीरतु जाय्‌न तुंद्‌री पुजणेन चीज काजे देखणे बाजी रवलु, ती मेसे काजे एक असी बयड़ी देखाव पड़ी तीनी बयड़ी पर ज्‌य लिखलो हतलो, अन्‌जाण्‌या भगवान वाटे तेरेसी तुहुं तीना काजे जाणे पाकुर पुजा-पाट कर रया तेरे बारामां मे तुहुं काजे सामळावो।
ACT 17:24 जु भगवान कळी काजे ने तेरेमां जो काय छे, चो आखो बणावलु छे, ने सरग ने धरतीन मालीक छे ने माणसेन हात सी बणावला मंदीर मां नी रवे।
ACT 17:25 तीना काजे काहनी बी चीजेन फीकुर नी हय, तेरेसी तीना काजे काहनी बी चीज नी चाहती काहाकी चु आखा माणसे काजे जीवन ने जीवणेन दम आपे ने जो चाहजे आप्‌या करे।
ACT 17:26 चु ते एकुत माणुस मां सी आखी जातीन धरती पर रवण्‌या माणसे काजे बणायु, ने तींद्‌री रवणेन जागान काकड़ बांद देदु।
ACT 17:27 ज आखो असो करनेन पछळ भगवानेन मरजी जी हतली, की आखी जातीन माणसे भगवान काजे हेरनु चाहजे कांखुर मायन चे हेरता-हेरता तीना भगवान काजे हेर लेय तेबी चु भगवान आपणे मां सी काहाना बी सी छेटु नी हय।
ACT 17:28 काहाकी आपणु तेरेत मां जीवता रवजे, ने तेरेत मां हींडजे-फीरजे ने तेरेत मां टीकला रवजे। जसा तुंद्‌रे मायन थुड़ाक लिखण्‌या बी कह्‌ला छे, की हामु तेरात पुर्‌या-पारी छे।
ACT 17:29 काहाकी हामु भगवानेन पुर्‌या-पारी हय्‌न आपणु काजे ज नी समजणु चाहजे की भगवान माणसेन वीच्‌यार सी सनान रुप्‌यान नीते दगड़ान बणावली मुरतीन तसु छे।
ACT 17:30 वीतला जमाना मां माणसे ज जाणतेला की हामरे वाटे भगवानेन मरजी काय छे, तेरेसी चु तीनुक उचकाणुन डंड आप्‌यु बाकुन हय भगवान जु हुकुम आपलु छे, की आखे जागे माणसे पाप भीणी सी मन फेरवीन भगवान भीणी वळनु चाहजे।
ACT 17:31 काहाकी भगवान एक दाहड़ु टाकलु छे, तेरेमां चु एक माणसेन साहरे आखी कळीन माणसेन धरमेन ताकड़ी लीन नीयाव करसे ने चु तीना नीयाव करन्‌या माणुस काजे मर्‌या-सर्‌या माणसे मां सी जीवतु करीन बठु कर देदलु छे ने आखा काजे आपसान ठेहरावली वातेक उजेंतु करीन सबुत आप देदु।
ACT 17:32 तत्‌यार मर्‌या-सर्‌यान सी पछु जीवतु हवणेन वात सामळीन थुड़ाक माणसे हासी उड़ावणे बाजी गुया, ने थुड़ाक कह्‌या मर्‌या-सर्‌याम सी अळी जीवणेन बारामां हामु कदी नी सामळजे।
ACT 17:33 तत्‌यार पोलुस तीनु काजे छुड़दीन जाती र्‌यु।
ACT 17:34 बाकुन तेबी थुड़ाक माणसे पोलुसेन वात पर भुरसु कर्‌या ने तेरे पुठ्‌ये चाल पड़्‌या तींद्‌रे मां दीयेनीसीयुस हतलु जु अरीयेपागुस बठकेन एक मेहमर हतलु, ने दमरीस नावेन एक बायरी हतली, ने तींद्‌रे पुठ्‌ये अळी थुड़ाक माणसे हतला।
ACT 18:1 अळतेन पोलुस एथेंस सहर छुड़दीन कुरींथीस मां गुयु।
ACT 18:2 चां तीना काजे अक्‌वीला नावेन एक यहुदी माणुस भेळु हयु, ने चु पुन्‌तुस मां पयदा हवलु हतलु चु हेरी बायरी परीस्‌कीला पुठ्‌ये ईटली सी पेहलुस आवलु हतलु काहाकी क्‌लोदीयुस राजु आखा यहुदी माणसे काजे रोम सहर मां सी नीकळी जावु करीन हुकुम नीकाळ्‌यु। तेरेमां पोलुस तीनु माणसे काजे भेळु हवणे गुयु।
ACT 18:3 काहाकी पोलुसेन ने तींद्‌रु एकुत धंदु हतलु तेरेसी पोलुस तींद्‌रेत पुठ्‌ये रवीन काम करने बाजी गुयु, ने तींद्‌रो काम धंदु तम्‌बु बणावणेन हतलो, काहाकी चे तम्‌बु बणावण्‌या हतला।
ACT 18:4 पोलुस आरामेन दाहड़े यहुदी माणसेन भक्‌तीन घर मां जाय्‌न वाते मां माथा-पच्‌ची करतेलु ने यहुदी ने युनानी माणसे काजे समजाड़नेन कुसीत करतेलु।
ACT 18:5 जत्‌यार सीलास ने तीमुथीयुस मकीदुनीया सी आया, ती पोलुस भगवानेन बुलेन परचार करने मां आपसो पुरो मन लागाड़ रवलु, ने चु यहुदी माणसे अगळ गवाय देतु, रयु की ईसुत मसी छे।
ACT 18:6 बाकुन जत्‌यार चे माणसे पोलुसेन वीरुद करीन नाव-बद्‌दी करतेला ती पोलुस आपसान झगल्‌यो फाड़ीन तीनु काजे कह्‌यु, “तुंद्‌रु खुन तुंद्‌रा मुणका पर रहे! मे गुनाळु नी हय। मे हय सी नी-यहुदी मां ईसुन परचार करने जायस।”
ACT 18:7 असु कय्‌न पोलुस तीनु काजे छुड़दीन जात रयु, ने तीतुस युस्‌तुस नावेन एक माणसेन घर गुयु, जु भगवानेन भक्‌ती करन्‌यु हतलु ने तेरो घर यहुदी माणसेन भक्‌तीन घर साते चस्‌टायन बांदलो हतलो।
ACT 18:8 यहुदी माणसेन भक्‌तीन घरेन मुख्‌यु कीर्‌स्‌पुस आपसा आखान घरन्‌या भेळु मालीक ईसु पर भुरसु कर्‌यु, ने बेसका कुरींथी सहर वाळा माणसे बी पोलुसेन साहरे ईसुन बारामां वात सामळीन ईसु पर भुरसु करीन बपतीस्‌मा लेदा।
ACT 18:9 मालीक ईसु तीनीत राते सपना मां पोलुस काजे कह्‌यु, बीहे मां बाकुन भगवानेन वात कवतु रव ने हुगु मां रवे।
ACT 18:10 काहाकी मे तारे पुठ्‌ये छे, ने कुय बी तारो नुकसाण नी करे काहाकी हीना सहर मां मारा माणसे बेसका छे।
ACT 18:11 तेरेसी पोलुस माणसे काजे भगवानेन वात सीकाड़तु जाय्‌न चां डेड़ साल लग रयु।
ACT 18:12 जत्‌यार गल्‌लीयो अखाया देसेन राज-करन्‌यु हतलु, ती यहुदी माणसे मुजगी करीन पोलुस भीणी जुर करीन आया, तीना काजे कुरुट-कचेरी अगळ उबु करीन कह्‌या।
ACT 18:13 ने कह्‌या, जु अदमी भगवानेन भक्‌ती करनेन असु नीयम-कायदु सीकाड़े, जु मुसान साहरे लिखला नीयम-कायदा सी अलग छे।
ACT 18:14 पोलुस आपसुत कह्‌णे हींडतेलु ने तीनेत टेमे गल्‌लीयो यहुदी माणसे काजे कह्‌यु, “ए यहुदी माणसे कदी जु नीयावेन वीरुद मां काय बी गुनु करलु हसे, नीते मटु गुनु कर्‌यु हय, ती मे तुंद्‌री वात सामळीन तीयार रवतु।
ACT 18:15 बाकुन जे हीनी वात-वातेम लड़ायतेला, ती बेसका नावेन बारामां ने मुसान साहरे लिखला कायदान बारामां छे, तेरेसी ईनी वाते मां मे तुंद्‌रेम नीयाव करन्‌यु नी बणो, तुहुंत ईनी वातेन बारामां जाणु।”
ACT 18:16 ने चु गल्‌लीयो पोलुस काजे नीयाव करे तीनी कुरुट-कचेरी मां सी बाहर नीकाळ देदु।
ACT 18:17 ती आखा यहुदी माणसेन भक्‌तीन घरेन मुख्‌या सोस्‌थीनेस काजे नीयाव हवे तीनी कुरुट-कचेरी अगळुत धर पाड़्‌या ने बेसका ठुक्‌या, बाकुन गल्‌लीयो तीनी वात काजे देखी भाळीन काय बी नी कह्‌यु।
ACT 18:18 पोलुस बेसका दाहड़ा लग कुरींथी सहर मां रयु, ने हेरे पछळ चु भायसे काजे आवजु कय्‌न परीस्‌कीला ने अक्‌वीला पुठ्‌ये ढंड्‌या मां बसीन सीरीया भीणी चाल पड़्‌यु, ने चु बादा लेदु करीन कींख्‌राया मां आपसान मुणका काजे बुड़ायु।
ACT 18:19 अळतेन चे ईफीसुस पुग्‌या, ती पोलुस परीस्‌कीला ने अक्‌वीला काजे चांहान रहणीदीन यहुदी माणसेन भक्‌तीन घर मां जाय्‌न भगवानेन वातेन बारामां माथा-पच्‌ची करने बाजी गुयु।
ACT 18:20 चां वाळा माणसे लीलघाय्‌न कह्‌या थुड़ाक दाहड़ा अळी जां रय जां बाकुन पोलुस कह्‌यु मे नी रवतु कय देदु।
ACT 18:21 ने तीनु काजे छुड़ दीन जाणेन टेमे कह्‌यु भगवानेन मरजी रवसे तीते मे अळी तुंद्‌रेन्‌चां पछु आवीस, अळतेन पोलुस ईफीसुस सी ढंड्‌या मां बठीन चाल देदु।
ACT 18:22 ने अळतेन चु केसर्‌या सहर पुग्‌यु ने चां सी यरुसलेम सहर गुयु, ने चां वाळी ईसुन मंडळी काजे भेळु हय्‌न वारु छे की करीन कह्‌यु, अळतेन चु चांहा सी अन्‌ताकीया सहर मां जात र्‌यु।
ACT 18:23 पोलुस थुड़ाक दाहड़ा अन्‌ताकीया सहर मां रयु, ने चु गलातीया ने फुर्‌गीया फीरतु जाय्‌न आखा ईसु पर भुरसु करने वाळान भुरसा काजे काठु करतु रयु।
ACT 18:24 तीनी टेमे चां यहुदी माणुस हतलु, तेरो नाव अपुल्‌लोस हतलो, चु सीकेन्‌दर्‌या मां पयदा हवलु, चु अक्‌कल वाळु माणुस हतलु, खरला सास्‌तुर काजे वारु रीते जाण तेलु, चु ईफीसुस मां आयु।
ACT 18:25 तीना काजे मालीक ईसुन सीकाड़ने वाळी वात जड़ली हतली, ने मन लागाड़ीन ईसुन बारामां सय-सय सीकाड़तेलु बाकुन तीना काजे युहन्‌नान बपतीस्‌मान बारामां अतरोत मालुम हतलो।
ACT 18:26 चु भक्‌तीन घर मां बीहे बीगुर भगवानेन वात कवणे बाजी गुयु, परीस्‌कीला ने अक्‌वीला तेरी वात सामळीन तीना काजे चे तींद्‌रेन्‌चां लीन गुया, ने तीना काजे वारु रीते भगवानेन वात समजाड़्‌या।
ACT 18:27 जत्‌यार अपुल्‌लोस समुदर वेणकीन अखाया जाणे करीन पाक्‌कु वीच्‌यार कर्‌यु, ती दीसरा ईसु पर भुरसु करन्‌या भायस, तीना काजे हिम्‌मत देदा ने अखाया वाळा काजे ज लिख्‌या की तुहुं पोलुसेन आव-भाव करजु जत्‌यार पोलुस अखाया पुग्‌यु ती चां वाळा माणसे तेरी बेसकी मदत कर्‌या जे भगवानेन गीण-दया सी ईसु पर भुरसु करला।
ACT 18:28 काहाकी चु खरला सास्‌तुर मां सी समजाड़तु जाय्‌न कवतेलु, की ईसुत मसी छे, ने यहुदी माणसे अगळ खरला सास्‌तुर मां सी बेसका वात कय्‌न तींद्‌री बुलती बंद कर देदलु।
ACT 19:1 तीने टेमे असो हयो की जत्‌यार अपुल्‌लोस कुरींथीस सहर मां हतलु, तीने टेमे पोलुस ने चां आखा परदेस मायन फीरतु-फीरतु ईफीसुस मां आयु, चां तीनुक थुड़ाक चेला भेळा हया।
ACT 19:2 तीनु चेला काजे पोलुस पुछ्‌यु “जत्‌यार तुहुं ईसु पर भुरसु करला ती चुखली-आत्‌मा हात करला काय चे चेला कह्‌या?” हामु ते चुखली-आत्‌मान बारामां सामळ्‌या लग नी।
ACT 19:3 अतरे पोलुस तीनु काजे पुछ्‌यु ती तुहुं कुणीन बपतीस्‌मा लेदला छे? चे जपाप आप्‌या युहन्‌नान बपतीस्‌मा लेदला छे।
ACT 19:4 पोलुस कह्‌यु युहन्‌‌‌नु ज्‌य कय्‌न मन फीरावणेन बपतीस्‌मा आपलु की जु मारे पछळ आवणे वाळु छे हेरे पर मतलब ईसु पर भुरसु करजु।
ACT 19:5 ज्‌य सामळीन चे मालीक ईसुन नाव सी बपतीस्‌मा लेदा।
ACT 19:6 जत्‌यार पोलुस तींद्‌रे पर हात मेकीन तींद्‌रे वाटे भगवान सी दुवा कर्‌यु ती चुखली-आत्‌मा तींद्‌रे पर उतरीन तींद्‌रे मां भराय गुय ने चे भाती-भातीन बुली बुलने बाजी गुया ने भगवानेन अघे सी वात कह्‌वणे बाजी गुया।
ACT 19:7 चे आखा मेळीन बारे जणा हतला।
ACT 19:8 अळी पोलुस तीन महना लग यहुदी माणसेन भक्‌तीन घर मां जाय्‌न बीहे पाखुर भगवानेन राजेन बारामां यहुदी माणसे साते वाते मां माथा-पच्‌ची करतेलु ने समजाड़्‌या करतेलु।
ACT 19:9 बाकुन तींद्‌रे मां सी थुड़ाक माणसे पीटा हतला, ने पोलुसेन वात सामळीन ईसु पर भुरसु नी कर्‌या ने दीसरा अगळ ईना ईसुन टुळान बारामां वाक नीकाळनी बाजी गुया, अतरे पोलुस तींद्‌रे सी अलग हय गुयु, ने आपसान चेला काजे लीन चां सी जात रयु, ने चु दाहड़ीत तुरनुसेन भणावण्‌या घर मां भगवानेन वाटेन बारामां वात कय्‌न तींद्‌रे साते माथा-पच्‌ची करतेलु।
ACT 19:10 दुय साल लग चु असुत भगवानेन राजेन बारामां कवतु जाय्‌न समजाड़तु रयु, ने तेरी वात सामळीन आसीया मां रहण्‌या यहुदी माणसेक ने नी-यहुदी माणसेक मालीक ईसुन बारामां बुले सामळीन ईसु पर भुरसु कर्‌या।
ACT 19:11 भगवान पोलुसेन साहरे बेसका भारी काम देखाड़तु रयु।
ACT 19:12 जत्‌यार माणसे पोलुसेन डीले लागाड़ीन रुमाल ने फेटको मांदला साते ली जातला ती चे मांदला वारु हय जातला ने भुतड़ान आत्‌मा तींद्‌रे मां सी नीकळी जातला।
ACT 19:13 थुड़ाक यहुदी माणसे जागे-जागे बड़वाय करता फीरतेला, ज्‌य करने लाग्‌यु की तींद्‌रे मां भुतड़ान आत्‌मा रवे तींद्‌रे पर मालीक ईसु नाव ज्‌य कय्‌न फुक्‌या तीना ईसुन परचार पोलुस करे मे तुहुंक हेरीत सगुन आपो।
ACT 19:14 ने सक्‌कीवा नावेन एक यहुदी मुख्‌या पुजारान सात पुर्‌या हतला, चे बी असात बड़वाय करीन भुतड़ा नीकाळतेला।
ACT 19:15 बाकुन भुतड़ान आत्‌मा तीनु काजे जपाप आप्‌यु, मे ईसु काजे जाणो ने पोलुस काजे बी जाणो बाकुन तुहुं कुण छे?
ACT 19:16 अळतेन तीना माणसे मां भुतड़ान आत्‌मा हतली, चु माणुस झड़ दीन तींद्‌रे पर आय गुयु ने तीनुक हाराड़ देदु, तेरेमां चे नांगेरलात घायल हय्‌न तीना घर सी नीकळीन ढासी गुया।
ACT 19:17 ज्‌य हयो तेरी खबर ईफीसुस सहर मां रवण्‌या यहुदी माणसे मां ने नी-यहुदी माणसे मां जात रया ने चे आखा माणसे बीहीन बेसका घाबराय गुया ने हीने रीते मालीक ईसुन नावेन ईज्‌जत अळी जादा हवणे बाजी गुय।
ACT 19:18 तींद्‌रे मां सी बेसका जणा भुरसु करला, ने गलत काम करला आखा माणसे अगळ मान लेदा ने चां आया।
ACT 19:19 ने चे बड़वाय करन्‌या आपसा आपसान बड़वाय करनेन किताप तींद्‌रे चां लावीन भेळा कर देदा ने आखा अगळ तीनु कितापेन दाम चांदीन पचास हजार टका बराबर हतला।
ACT 19:20 असो करीन मालीक ईसुन वात माणसे काजे जादा समज मां आवती गुय ने बेसका माणसे ईसु पर भुरसु करता गुया।
ACT 19:21 जत्‌यार जी वात हय गुय, ती पोलुस आपसान जीवे मां असु वीच्‌यार कर्‌यु, की मे मकीदुनीया ने अखाया मायन यरुसलेम जायस चां जाय्‌न अळतेन रोम मां बी देखणे जायस।
ACT 19:22 तेरेमां पोलुस आपसा साती तीमुथीयुस काजे, ने ईरास्‌तुस काजे सेवा करने करीन मकीदुनीया मकली देदु, ने आपसुत आसीया मां थुड़ीक टेम अळी रयु।
ACT 19:23 तीने टेमे मालीकेन वाटेन वजे सी माणसेन टुळु वीरुद करीन बेसका माणसे दवड़ीन आया।
ACT 19:24 चां देमेतीरीयुस नावेन एक सनार्‌यु हतलु, ने तेर पुठ्‌ये मुरती बणावण्‌यु बी हतलु। चु तींद्‌रे सी, अरतीमीस नावेन एक देवीन मंदीरेन मुरत्‌या चांदीन बणाय मांगतेलु। ने असु करीन चु ने तेरा मुरती बणावण्‌या बेसका कमायतेला।
ACT 19:25 चु ईनु काम-धंदु करन्‌या दीसराक बी भेळा करीन कह्‌यु, ए माणसे तुहुं काजे ते मालुम छे, की ईना काम-धंदा मां आपणी बेसकी कमाय हवे।
ACT 19:26 बाकुन तुहुं देखु ने सामळु की चु पोलुस ईफीसुस ने आखा आसीया मां माणसे काजे ज्‌य कय्‌न समजाड़े ने मुरती लेणे वीचकाड़े की हाते सी बणावला मुरत्‌या देवता नी हय।
ACT 19:27 पोलुस असुत माणसे काजे समजाड़्‌या करसे ती जी डर छे की आपणु मुरती बणावीन वेचणेन काम धंदु बंद हय जासे ने मट्‌ली देवी अरतीमीसेन मंदीरेन ईज्‌जत बी जात रवसे करीन डर छे ने तीनी देवीन पुजा-पाट आखे आसीया ने आखी कळ करे।
ACT 19:28 जी वात सामळीन चे रीसवाय पड़्‌या ने आयड़ी-आयड़ीन कह्‌या, ईफीसुस्‌या सहर मां रवण्‌या अरतीमीस देवी बेसकी मटी छे।
ACT 19:29 सहरेन दीसरा माणसे बी तींद्‌रे मां भेसकाय गुया ने मकीदुनीया वाळा गयुस ने अरीस्‌तारकुस काजे धर लेदा जे पोलुस पुठ्‌ये हींडतेला ने आखान आखा एक मन्‌या हय्‌न उफरीवाळा मकेळा घर मां दवड़ी पड़्‌या।
ACT 19:30 जत्‌यार पोलुस तीनु माणसेन टुळान ईचमां जाणे हींड रवलु, बाकुन चेला तीना काजे चां जाणे नी देदा।
ACT 19:31 आसीया जीलान थुड़ाक हकदार्‌या पोलुसेन दुस्‌तीदार हतला चे हकदार्‌या जी खबर दी मकल्‌या ने लीलघाय सी कहें की तु उफरीवाळा मकेळा घर मां आवीन दुख मां घुण पड़े।
ACT 19:32 तीने टेमे गड़दी मां सी काहनास कांखुरुत आयड़ी रवला, ने काहना काहनाक कांखुरुत आयड़ी रवला, काहाकी बेसका माणसे काजे ज्‌य मालुम नी हतलो की काहा भेळा हवला छे।
ACT 19:33 तीनी गड़दी मां सी सीकेन्‌दर्‌या नावेन एक माणुस हतलु तीना काजे यहुदी माणसे तींद्‌रे मां सी नेवाड़ला हतला चे तीनाक समजाड़ीन गड़दी अगळ उबा कर देदा सीकेन्‌दर्‌यु हात पालवीन ईसारु करीन आपसा काजे बचाड़ने हींड रवलु।
ACT 19:34 बाकुन जत्‌यार तीनु काजे पतु चाल्‌यु की चु एक यहुदी माणुस छे ती चे आखान आखा एक जसा दुय घंटा लग आयड़ी-आयड़ीन कह्‌या ईफीसुस्‌यान सहरे मां रवण्‌या देवी अरतीमीस बेसकी मटी छे।
ACT 19:35 तत्‌यार सहरेन मंत्‌री गड़दी काजे हुगु राखीन कह्‌यु, ए ईफीसुस्‌यान सहरे मां रवण्‌या माणसे ईफीसुस सहर मां रवण्‌या माणसे मट्‌ली देवी अरतीमीस देवीन मंदीरेन ने सरग भीणी सी पल्‌ली मुरतीन राखवाळ्‌या चे ईनी वाते काजे आखी कळीन माणसे जाणे।
ACT 19:36 अतरे ईनी वाते काजे कुय नी काटी नी सके अतरे ज्‌य वारु छे की तुहुं हुगा रहु ने वीच्‌यार नीकाळे पाखुर काय मां करु।
ACT 19:37 काहाकी तुहुं तीनु माणसे काजे लावला छे चे नीते मंदीर मां धड़ु पाड़्‌या ने नीते आपणी देवीन वाक नीकाळ्‌या।
ACT 19:38 कदी देमेतीरीयुस काजे ने तेरे साते काम-धंदु करन्‌यान काहानी वाते मां वाक हय ती नीयाव वाटे कुरुट-कचेरी चालु छे ने चां नीयाव करन्‌या धेणी बी छे चां जाय्‌न एक दीसरान वाक नीकाळ्‌या करु।
ACT 19:39 बाकुन तुहुं काहींग पुछणे हींडे ती ईनी वातेन बारामां जाणने करीन सहरेन नेमेन बसक हय चां आवजु चां ईनी वातेन वीच्‌यार नीकाळु।
ACT 19:40 काहाकी आज जी बी दंगाय हवली छे, ची हामरे माथे पड़से तेरेसी जां हेरे बारामां वीच्‌यार नीकाळनु वारु नी हय काहाकी ईने टेमे ईनी गड़दी मां वाळा माणसे काजे हामरे सी काय बी जपाप नी आपाये।
ACT 19:41 ज्‌य कयदीन चु सहरेन पंचु काजे वळाय देदु।
ACT 20:1 माणसे दवड़ीन आया ने अळतेन चे सींग पड़ने बाजी गुयो, ती पोलुस ईसुन चेला काजे बुलावीन समजाड़्‌यु, ने तीनु काजे आवजु कयदीन चां सी मकीदुनीया भीणी चाल पड़्‌यु।
ACT 20:2 ने चु तीना परदेस मां सी हय्‌न ने माणसे काजे बेसकु सांती आप्‌यु चां सी युनान जीला मां जाती रयु।
ACT 20:3 ने पोलुस चां तीनेक महना रयु काहाकी यहुदी माणसे तीना काजे मारने करीन जाळसांदी नाख रवला, ने अळतेन वीच्‌यार नीकाळ्‌यु की मे ढंड्‌या मां बसीन सीरीया जात रवीस, बाकुन अळतेन चु अळी वीच्‌यार कर्‌यु की मे मकीदुनीया पछु जात रवीस ने चाल पड़्‌यु।
ACT 20:4 बीरीया सहर वाळु पुर्‌रुसेन पुर्‌यु सोपतुरुस ने थीसलुनीकीया मां रहणे वाळा अरीस्‌तारकुस ने सीकुन्‌दुस ने आसीया वाळा तुखीकुस ने तरुफीमुस ने दीरबे वाळु गयुस ने तीमुथीयुस तेरे पुठ्‌ये आसीया लग आया।
ACT 20:5 चे माणसे पेहलुत तरोआस मां जाय्‌न हामरी वाट देख रवला।
ACT 20:6 अखमीरी रुटान तीहवार हय गुयु, ने अळी हामु फीलीपी सहर सी मटला ढंड्‌याम बसीन तरोआस भीणी चाल पड़्‌या। ने पांच दाहड़ाम हामु तरोआस पुग्‌या। ने चां हामु सात दाहड़ा रया।
ACT 20:7 हाप्‌तान पेहले दाहड़े हामु रुटु तुड़ने वाटे भेळा हया, ती पोलुस माणसे सी वात कर्‌यु, ने चु दीसरे दाहड़े जाणे वाळु हतलु, ने तींद्‌रे सी वात कर्‌यु, ने आधली रात लग वाते करतुत रयु।
ACT 20:8 हामु तीना घरेन उपरी खुली मां भेळा हय रवला, चांहा बेसका दिवा धपाड़ीन मेल रवला।
ACT 20:9 ने युतुखुस नावेन एक जुवान पुर्‌यु खीड़की पर बठ रवलु, ने बेसकी नीद आय रवली जत्‌यार पोलुस बेसकी वार लग वाते करतु रयु, ती चु नीदेन झपकी मां तीसरी मंजील पर सी हीटी पड़्‌यु, ने जत्‌यार हाकलीन लाया ती चु मरी गुयलु।
ACT 20:10 बाकुन पोलुस नेचु उतरीन हेरेसी चस्‌टाय गुयु, ने गळे लागाड़ीन कह्‌यु “घाबरायु मां हयु जीवलुत छे।”
ACT 20:11 बाकुन चु उपर गुयु, ने रुटा काजे तुड़ीन वाट्‌यु ने खादु। ने हयु तींद्‌रे साते बेसकी वार ने तींद्‌रे सी दाहड़ु उंगते लग वात करतु रयु, ने पोलुस तीनुक छुड़ीन जाती रयु।
ACT 20:12 ने चे तीना जुवान पुर्‌या काजे चे जीवतेलु घर ली आया, ने बेसका सांती ने खुसी मां हय गुया।
ACT 20:13 हामु पेहलुत ढंड्‌या मां बसीन अस्‌सुस भीणी गुया, की चां सी हामु पोलुस काजे चड़ाय लेसुन, काहाकी हयु ज्‌य हेरेसी ठेरावलु हतलु की आपसु चालीन जाणे वाळु हतलु।
ACT 20:14 जत्‌यार पोलुस अस्‌सुस मां हामु काजे भेळु हयु, ती हामु तीना काजे ढंड्‌या पर चहड़ाया ने हामु मीलेतुस भीणी चाल पड़्‌या।
ACT 20:15 चां सी ढंड्‌या काजे छुड़ीन हामु दीसरे दाहड़े खीयुस गुया ने दीसरे दाहड़े सामुस मां जाय पड़्‌या अळतेन दीसरे दाहड़े मीलेतुस मां आया।
ACT 20:16 काहाकी पोलुस जाहां लग हय सके पेन्‌तेकुस्‌तेन दाहड़े लग यरुसलेम मां मामार जाणेन कुसीत कर रवलु, तेरेमां हयु नक्‌खी कर्‌यु की हयु ईफीसुस मां हुबु नी रवे ने अघुत जाती रवसे, काहाकी तीनाक आसीया मां रहणु नी पड़े।
ACT 20:17 हयु मीलेतुस सी ईफीसुस मां कय मकल्‌यु ने मंडळीन डाहा-बुड़ा माणसे काजे आपसा धड़े बुलायु।
ACT 20:18 जत्‌यार चे हेरे धड़े आया ती तींद्‌रे सी कह्‌यु तुहुं जाणु की पेहलेत दाहड़े सी जत्‌यार मे आसीया मां पुग्‌यु मे आखी टेमे तुंद्‌रे साते काहाली रीत सी रयु।
ACT 20:19 मतलब वारु भाव सी ने आसळा पाड़ी-पाड़ीन ने ईनु पारख मां ज्‌य यहुदीयान माणसेन कुहरायन वजे सी मार पर आय पड़ी मे मालीकेन चाकरी करतुत रयु।
ACT 20:20 ने जी-जी वाते तुंद्‌रे फायदान हतली तीनुक बताड़ने ने माणसे अगळ ने घर-घर सीकाड़ने सी कदी नी पछु हयु।
ACT 20:21 यहुदी ने नी-यहुदी माणसे काजे मे बराबर भाव सी मन फेरवणेन भगवान भीणी फीरु करीन कय रयु ने, आपणा मालीक ईसु मसी मां भुरसु करु करीन तीनुक कवतु रयु।
ACT 20:22 ने हय देखु मे चुखली-आत्‌मान अगवाय मां बांदायन मे यरुसलेम जाय रयु। मे नी जाणु की चां मार साते काय हवसे।
ACT 20:23 अळतेन ज्‌य की चुखली-आत्‌मा आखा सहर मां गवाय दी-दीन मार सी कह्‌वे की बांदायणु ने दुख तारी वाट देख रय।
ACT 20:24 बाकुन मारे वाटे आपणा जीवेन काय बी कीमत नी हय। मे ते बस दवड़नु ने तीनी सेवा काजे पुरो करने चाही र्‌यु तीनाक मालीक ईसु सी जड़लो छे चो गुयो छे भगवानेन गीण-दयान गवाय देणु।
ACT 20:25 हय देखु मे जाणो की तुहुं, आखा तींद्‌रे मां भगवानेन राजेन परचार करतु रयु, ने मेसे अळी कदी नी देखसु।
ACT 20:26 तेरेमां आज मे तुंद्‌रे अगळ गवाय दीन कह्‌वो की मे तुंद्‌रे मां सी काहनान बी लुहीन गुनाळु नी हय।
ACT 20:27 काहाकी मे भगवानेन आखी मरजी काजे तुंद्‌रे अगळ पुरी रीत सी बताड़ने मां कदी बी पछु नी पड़्‌यु।
ACT 20:28 हेरेसी आपणी ने आखा टुळान देख-भाळ करु तेरेमां चुखली-आत्‌मा तुहुं काजे मुख्‌या ठेरावलु छे की तुहुं भगवानेन मंडळीन राखवाळी करु तीना काजे हयु आपणा लुही सी मुल ली लेदलु छे।
ACT 20:29 मेसेक मालुम छे, की मारे जाणेन पछे तुंद्‌रे ईचमां धरन्‌या लेंड्‌या आवसे ने चे भुळा-भाळा टुळा काजे नी छुड़े।
ACT 20:30 ने अतरो बी की तुंद्‌रे आपणे ईचमां सीत असा माणसे बी उबा हवसे, जे चेला काजे आपसे पछळ चालाड़ने वाटे वात काजे गलत सलत वात सीकाड़से।
ACT 20:31 हेरेसी जागता रवु ने हेर करु की मे तीन साल लग रात ने दाहड़ु रड़ीन-रड़ीन एकेक काजे चेतावणी देणे नी छुड़्‌यु।
ACT 20:32 ने हय मे तुहुंक भगवान काजे ने हेरी बेसकी वारु दयान बुल काजे सुपी दम काहाकी तुहुं बड़ता जावु ने आखा चुखा हवला माणसे मां गवाय देणेन हक आप देसे।
ACT 20:33 मे काहनाक ने चांदीन, सनान नीते पुथल्‌यान हर कर्‌यु।
ACT 20:34 तुहुं आपसात जाणु की जेत हाते ने मारी ने मारा साते वाळान ज्‌य-ज्‌य चीज चाहजे चो पुरो कर्‌या।
ACT 20:35 मे तुहुं काजे आखो काय करीन देखाड़्‌यु की हीनी रीत सी मेहनत करता जाय्‌न लुला काजे समाळजु ने मालीक ईसुन बुल हेर राखणु जरुरी छे।
ACT 20:36 असो कहणेन पछे हयु मांडा टेक्‌यु ने तींद्‌रे आखा साते दुवा कर्‌यु।
ACT 20:37 तत्‌यार चे आखा रड़्‌या ने पोलुसेन गळे लागीन गुळा देणे लाग्‌या।
ACT 20:38 चे खास करीन हीनी वातेन दुखी हतला चो हयु कहलु की तुहुं मारो मुंहडो अळी नी देखसु तत्‌यार चे हीनाक ढंड्‌यान्‌चां पुगाड़्‌या।
ACT 21:1 जत्‌यार हामु तींद्‌रे सी अलग हय्‌न समुदर मां हामरो ढंड्‌यो छुड़ लेदा, ने सुदी सट वाटे कुस मां आया ने दीसरे दाहड़े रुदुस मां ने चां सी पतरा मां आया।
ACT 21:2 ने पतरा सी हामु एक ढंड्‌याम बसीन चाल पड़्‌या, चु फीनीके जाणे बाजी रवलु।
ACT 21:3 जत्‌यार सायपर्‌स देखायु ती हामु हीनुक डाखर्‌ये हात भीणी छुड़्‌या ने सीरीया भीणी जाय्‌न सुर मां उतर्‌या काहाकी चां ढंड्‌याम सी माल उतारनु हतलो।
ACT 21:4 ईसु पर भुरसु करन्‌या भेळा हय गुया, ती हामु चां सात दाहड़ा लग रया चे आत्‌मान सीकाड़ला हतला पोलुस सी कह्‌या की यरुसलेम मां पाय घुण मेले।
ACT 21:5 बाकुन चे दाहड़ा पुरा हय गुया, ती हामु चां सी चाल देदा ने आखा बायरा ने पुर्‌या भेळा हामुक सहरेन बाहार लग पुगाड़्‌या ने हामु दर्‌या धड़े मांडा टेकीन दुवा कर्‌या।
ACT 21:6 तत्‌यार एक दीसरा सी आवजु ने आवसुन कय्‌न हामु ते ढंड्‌या पर चहड़्‌या ने चे आपसे-आपसे घर जात र्‌या।
ACT 21:7 तत्‌यार हामु सुर सी पाणी मां हामरी चाल पुरी करीन पतुलीम्‌या मां पुग्‌या ने भायसे काजे आवजु ने आवसुन कय्‌न तींद्‌रे साते एक दाहड़ु रया।
ACT 21:8 दीसरे दाहड़े हामु चां सी चालीन केसर्‌या मां आया ने फीलीप्‌पुस खुस-खबरेन परचार करन्‌यान घर मां जु सात मां सी एक हतलु जाय्‌न हेरेन चां रया।
ACT 21:9 हेरी चार कुवारी पुरे हतली जी भगवानेन अघे सी वात देखाड़नेन वाटु जड़लु हतलु।
ACT 21:10 जत्‌यार हामु चां बेसका दाहड़ा रय लेदा ती अगबुस नावेन एक भगवानेन अघी सी आवणे वाळी वात बताड़न्‌या माणुस यहुदीया सी आयु।
ACT 21:11 हामरे धड़े आवीन पोलुसेन फेटको लेदु ने हेरा हात पाय बांदीन कह्‌यु चुखली-आत्‌मा ज्‌य कह्‌वे की तीना माणसेन ज्‌य फेटको छे तीना काजे यरुसलेम मां यहुदी माणसे हीनीत रीत सी बांदसे ने नी-यहुदी हात मां आप देसे।
ACT 21:12 जत्‌यार हामु जी वात सामळ्‌या ती हामु ने चांहान माणसे हेरेसी दुवा कर्‌या की पोलुस यरुसलेम मां नी जाणु चाहजे।
ACT 21:13 बाकुन पोलुस जपाप आप्‌यु तुहुं काय कय र्‌या की रड़ी रड़ीन मारा मन काजे मां तुड़ु मेसे मालीक ईसुन नाव वाटे यरुसलेम मां नी बाकुन बांदाय जाणे वाटे बाकुन मरने वाटे बी तीयार छे।
ACT 21:14 जत्‌यार चु नी मान्‌यु ती हामु ज्‌य कय्‌न हुगा हय गुया की मालीकेन मरजी पुरी हवे।
ACT 21:15 तीनु दाहड़ान पछे हामु तीयारी कर्‌या ने यरुसलेम भीणी चाल देदा।
ACT 21:16 केसर्‌या सी बी थुड़ाक चेला हामरे साते आय गुया। ने हामु काजे मनासोन नावेन सायपर्‌स मां एक पेहला चेलान चां ली आया की हामु हेरेन चां रय रवजे।
ACT 21:17 जत्‌यार हामु यरुसलेम मां पुग्‌या ती ईसु पर भुरसु करन्‌या भायस खुस हय्‌न हामु काजे भेळा हया ने आव-भाव कर्‌या।
ACT 21:18 दीसरे दाहड़े पोलुस हामरे पुठ्‌ये याकुप काजे भेळु हवणे गुया, चां आखा डाहा-बुड़ा भेळा हय रवला।
ACT 21:19 तत्‌यार चु पोलुस हीनु काजे आवजु ने आवीस कय्‌न जे काम भगवान हेरी चाकरीन साहरे नी-यहुदी मां करलु एक-एक करीन आखी वात बताड़्‌यु।
ACT 21:20 चे ज्‌य सामळीन भगवानेन बड़ाय कर्‌या अळतेन हीनाक कह्‌या ए भाय पोलुस देखे की यहुदी मां सी काय हजार माणसे भुरसु कर्‌या ने आखा मुसान साहरे लिखला कायदाक वाचाड़न्‌या बी छे।
ACT 21:21 ईसुक तारे बारामां सीकाड़ गुयलो छे की तु नी-यहुदी मां रवण्‌या यहुदी माणसे काजे मुसा सी छेटा हय जावु करीन सीकाड़े ने कह्‌वे की नी आपणा पुर्‌यान चामड़ी काटाड़ु ने नी रीती रीवाज पर चालु।
ACT 21:22 ती हय काय करनु चाहजे? माणसे जरुर सामळसे की तु आवलु छे।
ACT 21:23 हेरेसी ज्‌य हामु तारे सी कवजे चो कर हामरेन चां जां चार माणसे छे चे मान्‌ता लेदला छे।
ACT 21:24 हीनुक लीन तींद्‌रे साते आपसा काजे चुखु कर ने तींद्‌रे वाटे खरचु आप की चे मुणका काजे बुड़ावे तत्‌यार आखा जाणी लेसे की जी वाते हीनुक तारे बारामां देखाड़ली छे तींद्‌रे मां सी थुड़ीक छाचाय नी हय बाकुन तु आपसु बी मुसान साहरे लिखला कायदा काजे मानीन हेरे अनसारे चाले।
ACT 21:25 बाकुन हीयु नी-यहुदीन बारामां चे भुरसु करला छे हामु असा वीच्‌यार करीन चिट्‌ठी मकेला छे की चे तुहुं मुरती पर चड़ावला सीकार सी ने लुही सी ने गळु दड़पीन मारला सीकार सी ने छीनाळा सी बचीन रहु।
ACT 21:26 तत्‌यार पोलुस तीनु माणसे काजे लीन ने दीसरे दाहड़े तींद्‌रे साते चुखु हय्‌न मंदीर मां गुयु ने चां बताड़ देदु की चुखु हवणेन दाहड़े मतलब तींद्‌रे मां सी एक-एक जणा वाटे चड़ावु चड़ावे जांहा लग की दाहड़ा पुरा नी हवसे।
ACT 21:27 जत्‌यार चे सात दाहड़ा पुरा हवणे वाळा हतला ती आसीयान यहुदीया पोलुस काजे मंदीर मां आखा माणसे कीचवाड़्‌या ने असा आयड़ी-आयड़ीन हीनाक धर लेदा।
ACT 21:28 ए ईस्‌रायली मदत करु जु हयुत माणुस छे जु माणसे ने मुसान साहरे लिखला कायदा ने हीना जागान वीरुद मां एक-एक जागा आखा माणसे काजे सीकाड़े जां लग की नी-यहुदी काजे बी मंदीर मां लावीन जु हीना चुखला जागा काजे वीटाळ देदु।
ACT 21:29 चे तेरसी पेहल ईफीसुस वाळा तरुफीमुस काजे हेरे साते सहर मां देखलु ने समजाड़ला की पोलुस हीनाक मंदीर मां ली आवे।
ACT 21:30 तत्‌यार आखा सहर मां माणसे हाय-हाय कर्‌या ने माणसे दवड़ीन भेळा हया ने पोलुस काजे धरीन मंदीरेन बाहार घीसड़ीन लाया ने तत्‌यारुत बारनो बंद कर देदा।
ACT 21:31 चे पोलुस काजे मार नाखणे हींडी रवला। तीनेत टेमे सीपायड़ान मुख्‌यु सुबेदार काजे काहनुस जी खबर पुग्‌याड़्‌यु की, की आखा यरुसलेमेन सहरेन माणसे पोलुस भीणी जाय रया।
ACT 21:32 चु सुबेदार तत्‌यारुत सीपायड़ा ने सीपायड़ान दीसरा मुख्‌या काजे तेरे पुठ्‌ये लीन पोलुस काजे मारने हींडतेला तीनु यहुदी माणसे भीणी गुया। चे यहुदी सीपायड़ान मुख्‌या सुबेदार काजे ने सीपायड़ान दीसरा मुख्‌या काजे देख्‌या ती चे पोलुस काजे ठुकणे बंद कर देदा।
ACT 21:33 तत्‌यार सीपायड़ान मुख्‌या सुबेदार आवीन पोलुस काजे धर लेदु ने दीसरा सीपायड़ान मुख्‌या काजे कह्‌यु की “हेरे हातकड़्‌या लागाड़ देदु।” अळतेन चु सीपायड़ान मुख्‌या सुबेदार गड़दीम वाळा माणसेक पुछ्‌यु, “जु कुण छे ने जु काय गुनु करलु छे?”
ACT 21:34 गड़दीम वाळा माणसे मां काहनुस काहींग कय रवलु ने काहनुस काहींग कय रवलु। काहाकी तीना सुबेदार काजे ज मालुम नी पड़्‌यो की संय वात काय छे। तेरेमां चु सुबेदार दीसरा सीपायड़ान मुखी काजे हुकुम आप्‌यु की “हीना काजे कीला मां ली जावु।”
ACT 21:35 माणसेन गड़दी बेसकी हतली ने गड़दीम वाळा माणसे धकलावतेला तेरेमां कीलान फटक्‌यान चां जातात पोलुस काजे हाकलीन ली जाणु पड़्‌यो।
ACT 21:36 काहाकी माणसेन गड़दी ज आयड़तात हेरे पछळ पड़ी रवला की, “हीनाक मार नाखु!”
ACT 21:37 जत्‌यार सीपायड़ा पोलुस काजे कीला मां ली जाणे वाळा हतला, ती पोलुस सुबेदार काजे कह्‌यु, “काय मेसेक हुकुम छे काय मे तुसेक काय कहं?” सुबेदार पोलुस काजे जपाप आप्‌यु, “तुसे युनानी बुली आवड़े काय?
ACT 21:38 काय तु चु मीसरी ते नी हय, चु थुड़ाक दाहड़ा पेहल लड़ाय करलु, ने चु च्‌यार हजार माणसे काजे बयड़ा मां ली गुयलु?”
ACT 21:39 पोलुस कह्‌यु, मे ते कीलक्‌यान तरसुस सहर मां रहण्‌यु यहुदी माणुस छे। चु तेरे सी लीलघाय्‌न कह्‌यु, “तु मेसेक हीनु गड़दीन माणसे साते वात करने दे।”
ACT 21:40 जत्‌यार चु हुकुम आप्‌यु, “पोलुस फटक्‌या पर उबु रय्‌न हाते सी ईसारु कर्‌यु। जत्‌यार आखा माणसे हुगा रय गुया। ती चु ईब्‌रानी बुली मां ज कहणे बाजी गुयु:
ACT 22:1 “ए भायस्‌यो ने आखा डाहला बास, मेसेक वाचाड़ने करीन मे जो काय तुंद्‌रे अगळ कय रयु च सामळु।”
ACT 22:2 जत्‌यार माणसे पोलुस काजे ईब्‌रानी बुली मां बुलतेलु सामळीन अळी हुगा रय गुया। ती पोलुस तीनुक कह्‌यु,
ACT 22:3 मे ते एक यहुदी माणुस छे, ने मे कीलक्‌या तरसुस सहरेम पयदा हवलु। ने मे तरसुस मां मारा आसी-बास्‌या मेसेक पाळ्‌या-पुस्‌या ने मटु कर्‌या। ने तरसुस मांत गमलीयेल मास्‌तर मेसे काजे आपणा आड़ा-बुड़ान कायदा पुरान-पुरा सीकाड़्‌यु; ने मे भगवानेन कायदा पाळने मां तुंद्‌रेन तसुत हवस्‌यु ने उतवाळ्‌यु हतलु। जसा आज तुहुं आखा हवस्‌या ने उतवाळ्‌या छे।
ACT 22:4 चे माणसे हीनी वाटेन अनसारे चाल रवला मे अदमीक ने बायरा काजे धरी-धरीन बांदीन जेल मां नाखी देदलु। ने बेसकु वेला पाड़्‌यु ने माराड़ी बी नाख्‌यु।
ACT 22:5 मे ज बी कर्‌यु तीनी वातेन गवा आखा मंदीरेन डाहला पुजारा छे। पुजारा ने आखी बसकेन माणसे मारी ईनी वातेन गवा छे। मे माणसे काजे जेल बुजीन वेला पाड़ने, करीन मे भायस्‌योन नावे तींद्‌रे धड़े वेला पाड़नेन चिट्‌ठी लिखाड़ीन दमीस्‌क जाणे बाजी रवलु, की जे वां छे तीनुक बी सजा आपाड़ने करीन बांदीन यरुसलेम लावु।
ACT 22:6 जत्‌यार मे चालतु-चालतु दमीस्‌क धड़े पुग्‌यु, ती असो हयो की मांजणीक दाहड़े सरगे सी उचकाणुन वीजाळो मारे चारेमेर चमक्‌यो।
ACT 22:7 ने मे भुयमां हीट पड़्‌यु, ने मेसेक एक बुल सामळायु, ए सावुल, ए सावुल, तु मेसेक काहा वेला पाड़े?
ACT 22:8 मे जपाप आप्‌यु, “ए मालीक! तु कुण छे?” चु मेसेक कह्‌यु, “मे ईसु नासरी छे। तीनाक तु वेला पाड़े।”
ACT 22:9 मारा साती वीजाळाक ते देख्‌या ने वात करन्‌यान बुल घुगवान तसा सामळ्‌या तेबी चे सामेळ्‌ळा ने तेबी चे बुल नी समज्‌या।
ACT 22:10 तत्‌यार मे कह्‌यु, ए मालीक! मे काय करो? मालीक मेसेक कह्‌यु, उठीन दमीस्‌क जाती रव; ने ज काय तारे करने वाटे ठेहरावलो छे च आखो चां देखाड़ दीस।
ACT 22:11 जत्‌यार च वीजाळो तेज हतलो ती मेसेक काय बी देखाय नी देदो, ती मारा सातीन हात धरीन दमीस्‌क मां आयु।
ACT 22:12 ने चां भगवानेन कायदाक पाळन्‌यु ईसुन एक भगत हतलु। तेरो नाव हनन्‌या हतलो। चु चां रहणे वाळा आखा यहुदी माणसे मां आव-भाव वाळु हतलु। हीयुत हनन्‌या नावेन मारेन्‌चां आवलु
ACT 22:13 ने चु मारे धड़े आयु ने मारे साते उबु हय्‌न कह्‌यु, “ए भाय सावुल! अळी पछु देखणे बाजी जां।” ने मे तत्‌यारुत देखणे बाजी गुयु।
ACT 22:14 तत्‌यार चु कह्‌यु, हामरा डाह-डाहान भगवान तुसेक ठेहरावला छे की तु तेरी मरजी काजे जाणे, ने तीना धरमी काजे देखीन तेरी उजेंती वात सामळावे।
ACT 22:15 काहाकी तु ज देखलु छे ने सामळ्‌ळु छे तीनी वातेन गवा रवसी।
ACT 22:16 हय तु काहा वार लागाड़े, उठ ने बपतीस्‌मा ले ने तेरो नाव लीन तारा पाप काजे धुय दे।
ACT 22:17 जत्‌यार मे पछु यरुसलेम मां आयु ने मंदीर मां भगवान सी दुवा करने बाजी रवलु, ती चुखला जीव-आत्‌मान कब्‌जा मां हय गुयु ने मेसेक काय बी मालुम नी रह्‌यो।
ACT 22:18 ने मे मालीक काजे देख्‌यु ने चु मेसेक ज कवणे बाजी रवलु, उतवाळ करीन यरुसलेम सी मामार बाहर नीकळी जां, काहाकी चे मारा बारामां तारी गवाय नी माने।
ACT 22:19 मे मालीक काजे कह्‌यु, ए मालीक! कांखुर मायन हया सामळीन मान लेसे, काहाकी हीनुत ते मालुम छे की पेहेल मे तारे भुरसु करन्‌याक धरीन जेल मां कुंडतेला, ने जागे-जागे यहुदी माणसेन साहरे बणावला भक्‌तीन घर डीट तीनुक ठुकाड़तेलु।
ACT 22:20 ने जत्‌यार तारी गवाय देण्‌या स्‌तीफनुसेन लुही उहवतेलो ती तत्‌यार मे बी तीनी वातेम राजी हतलु ने चां लागु उबु हय रवलु। ने जे माणसे स्‌तीफनुस काजे मारने बाजी रवला तींद्‌रा पुथल्‌यान राखवाळी करने बाजी रवलु।
ACT 22:21 ने चु मेसेक कह्‌यु, तु जात रव, काहाकी मे तुसेक नी-यहुदी मां मारी गवा देणे करीन नांबे-नांबे मकलीस।
ACT 22:22 माणसे पोलुसेन जी वात जां लग ते सामळता रया; तत्‌यार जुर सी आयड़्‌या, “हीनाक मार नाखु। हीना काजे धरती पर जादा दाहड़ा जीवतेलु रहणु वारु नी हय।”
ACT 22:23 जत्‌यार चे आयड़ता जाय्‌न आपसा पुथल्‌या नीकाळीन उराटतेला, ने वाहळा मां धुळु उडाड़ तेला,
ACT 22:24 ती सीपायड़ान मेळान सुबेदार हुकुम आप्‌यु, “हीनाक कीला मां ली जावु, ने सपाटा दीन पारखु, तेरे सी जो मालम पड़से की माणसे हेरी वीरुद मां असा काहा आयड़ी रया।”
ACT 22:25 बाकुन जत्‌यार चे चापकाटणे करीन तीनाक चामड़ान पट्‌टा सी बांदी रवला, ती पोलुस तेरे साते उबु हय रवला सुबेदार काजे पुछ्‌यु, “काय ज सय छे की तुहुं एक रोमी माणुस काजे, ने चु बीना गुना वाळा काजे सपाटा दी रया?”
ACT 22:26 ती सुबेदार ज सामळीन सीपायड़ान डाहला मुखी सुबेदार काजे धड़े जाय्‌न कह्‌यु, “तु असो काहा करने बाजी रयु? तुसेक मालुम नी हय काय की जु ते रोमी माणुस छे।”
ACT 22:27 ज सामळीन सीपायड़ान डाहलु मुखी सुबेदार पोलुस धड़े आवीन पुछ्‌यु, “मेसेक देखाड़, काय तु रोमी माणुस छे काय?” पोलुस कह्‌यु, “हव!”
ACT 22:28 ज सामळीन डाहलु मुखी सुबेदार कह्‌यु, “रोमी राजेम रहणेन हक हात करने करीन मेसेक बेसका पयस्‌या आपणु पड़्‌यो।” पोलुस कह्‌यु, “मे ते पयदा हयु ती सीत रोमी राजेम छे।”
ACT 22:29 ज सामळीन चे माणसे पोलुस काजे सपाटा दीन पारखणे हींडी रवला, चे तत्‌यारुत पोलुस धड़े सी पछा हय गुया; ने सीपायड़ान डाहलु मुखी सुबेदार बी असु जाण लेदु की जु रोमी माणुस छे ने हयु पोलुस काजे धरीन बांदाड़लु छे, करीन बीही गुयु।
ACT 22:30 दीसरे दाहड़े सीपायड़ान डाहलु मुखी सुबेदार पोलुसेन हातकड़ी छुड़ देदु ने मंदीरेन डाहला पुजाराक ने आखी मट्‌ली बसक काजे भेळा करु करीन सीपायड़ाक हुकुम आप्‌यु। ने आखा भेळा हय गुया ने अळतेन चु पोलुस काजे तींद्‌रे धड़े नेचु ली जाय्‌न तींद्‌रे अगळ उबु कर देदु। काहाकी यहुदी माणसे हेरु वाक काहा नीकाळ रया जी वात चु मालम करने हींडी रवलु।
ACT 23:1 पोलुस यहुदी माणसेन मट्‌ली बसक भीणी एक हेट्‌यु भाळीन कह्‌यु, “ए मारा भायस्‌यो! मे आज लग भगवान अगळ वारलु मने जीवाय जीवलु छे।”
ACT 23:2 पोलुसेन वात सामळीन हनान्‌यु मंदीरेन डाहला पुजारु हतलु तेर साते उबा हय रवला माणसे काजे हुकुम आपीन कह्‌यु, “पोलुसेन गाले थापड़ दे।”
ACT 23:3 तत्‌यार पोलुस तीनाक कह्‌यु, “ए चुने करीन पुताय करला भीतड़ा! तु मुसान कायदान अनसारे मारु कसु नीयाव करने बस रयु, बाकुन मुसान कायदा तुड़े घुण ‘पोलुस काजे थापड़ दे’ करीन दीसराक कय रयु। तुसेक ते भगवान देसे।”
ACT 23:4 जे साते उबा हय रवला माणसे पोलुस काजे कह्‌या, “तु भगवानेन मंदीरेन डाहला पुजारान असु वाक नीकाळीन जपाप काहा आप्‌यु?”
ACT 23:5 पोलुस कह्‌यु, “ए भायस्‌यो! मेसेक नी मालम हतलो, की जु भगवानेन मंदीरेन डाहलु पुजारु छे; काहाकी लिखलो छे की ‘जे माणसे पर राज करे, तीनुक खुटु बुल घुण कवता।’”
ACT 23:6 अळतेन जत्‌यार पोलुस काजे मालुम पड़्‌यो की आदा माणसे सदुकी माणसे छे ने आदा माणसे फरीसी माणसे छे। ती चु मट्‌ली बसक अगळ आयड़ीन कह्‌यु, “ए मारा ईस्‌रायेली भायस्‌यो! मे फरीसी वाळु छे ने फरीसी माणसेन पुर्‌यु छे। असी आस करो की मर्‌या-सर्‌याम सी पछु जीवतु हवणेन बारामां मारु नीयाव हवणे बाजी रयु।”
ACT 23:7 पोलुसेन जी वात सामळीन फरीसी माणसे ने सदुकी माणसेन वातेम लड़ाय हवणे लागी। ने बसक मां बीरजु पड़ गुयु।
ACT 23:8 काहाकी सदुकी माणसेन असो कवणु छे की मर्‌या-सर्‌याम सी पछा जीवतु हवण्‌यु नी हय, ने सरग वाळा भगवानेन अघली वात बताड़ने वाळु बी नी हय। ने काहना बी चुखली-आत्‌मा नी हय। बाकुन फरीसी कवणु छे की मर्‌या-सर्‌याम सी जीवतु हवण्‌यु छे, ने सरग वाळु भगवानेन अघली वात बताड़ने वाळु बी छे ने चुखली-आत्‌मा बी छे।
ACT 23:9 तत्‌यार चां बेसकु कचाटु हय रवलु। थुड़ाक यहुदी-धरम सीकाड़न्‌या मास्‌तर्‌या ने फरीसी माणसे उबा हय्‌न ज कवता जाय्‌न लड़ाय पड़्‌या, हामुक हीना माणुस मां काहनु बी खुट नी देखायतु। ने कदी कुय आत्‌मा नीते काहनु सरग वाळु काहवाळ्‌यु तीनाक कह्‌यु ती अळी काय?
ACT 23:10 जत्‌यार बेसकी लड़ाय हय, ती सीपायड़ान मुखी सुबेदार बीही गुयु काहाकी तीनाक असो लाग्‌यो कांखुर मायन माणसे मारीन पोलुस काजे टुकड़ा-टुकड़ा नी कर देय। अळतेन चु सीपायड़ान टुळाक हुकुम आपीन कह्‌यु, उतारीन हीनाक जबरान हीनाक तींद्‌रे ईचमां सी नीकाळ लावु, ने कीला मां ली जाती रहु।
ACT 23:11 तीनी राती मालीक पोलुस धड़े उबु हय्‌न कह्‌यु, “ए पोलुस, हिम्‌मत राख; काहाकी जसु तु यरुसलेम मां गवा देदलु छे, तसुत तुसेक रोम सहर मां जाय्‌न गवा देणु पड़से।”
ACT 23:12 जत्‌यार दाहड़ु नीकळतात यहुदी माणसे पोलुस काजे मारने करीन जाळसांदी बणाया। चे जी सगुन खादा की “जत्‌यार लगुन हामु पोलुस काजे मारीन नाखजे नी चां लग हामु खाणो बी नी खाजे, ने पाणी बी नी पीजे।”
ACT 23:13 ईनी जाळसांदी मां चाळीस सी बी अदु अदमी हतला।
ACT 23:14 चे मंदीरेन पुजारा ने पुडारी धड़े जाय्‌न तीनुक कह्‌या, “जत्‌यार लग हामु पोलुस काजे मारीन नाखजे नी चां लग हामु खाणो बी नी खाजे, ने पाणी बी नी पीजे।
ACT 23:15 तेरेमां हय तुहुं जाय्‌न सीपायड़ान मुखी सुबेदार काजे समजाड़ु की चु तुंद्‌रे धड़े ली आवे, काहाकी मे हेरा बारामां वारु पारखणे हींड रयु। ने हामु तीना पोलुस काजे पुगणेन पेहलुत मारने करीन तीयार रवसुन।”
ACT 23:16 बाकुन पोलुसेन बहणीसेन पुर्‌या काजे हीनी जाळसांदीन बारामां सामळ्‌यु, ती चु कीला मां जाय्‌न पोलुस काजे आखी वात देखाड़ देदु।
ACT 23:17 पोलुस सीपायड़ान मुखी सुबेदार मायन एक सुबेदार काजे बुलावीन तीनाक कह्‌यु “हीना पुर्‌या काजे डाहला सुबेदार धड़े ली जावु; जु डाहला सुबेदारेक काहींग कवणे हींडे।”
ACT 23:18 तेरेमां चु सुबेदार तीना पुर्‌या काजे डाहला सुबेदार धड़े ली जाय्‌न तीना डाहला सुबेदारेक कह्‌यु, “हातकड़ी लागाड़ी मेल्‌लु चु पोलुस मेसेक बुलावीन वीन्‌ती कर्‌यु की जु पुर्‌यु डाहला सुबेदार काजे काहींग कवणे हींडे; हीना काजे तेरे धड़े ली जां।”
ACT 23:19 डाहलु सुबेदार तीना पुर्‌यान हात धरीन तीनाक अलग ली जाय्‌न पुछ्‌यु, “तु मेसेक काय कवणे हींडे?”
ACT 23:20 चु पुर्‌यु कह्‌यु, “यहुदी माणसे एक्‌कु करीन जी जाळसांदी बणाय रया की आपणु डाहला सुबेदार काजे जाय्‌न असा वीन्‌ती करसुन की ‘तुहुं पोलुस काजे हामरे धड़े ली आव, काहाकी मे हीनाक वारु पारखणे हींडी रयु।’
ACT 23:21 बाकुन तु तींद्‌री वात घुण माने, काहाकी तींद्‌रेम चाळीस सी बी जादा अदमी पोलुस काजे मारने करीन तकाय रया। ने चे सगुन खादला छे की ‘जत्‌यार लगुन हामु पोलुस काजे मारी नी नाखजे नी चां लग हामु खाणो बी नी खाजे, ने पाणी बी नी पीजे।’ ने चे हींताळ तीयार छे, ने तारा वायदान वाट देख रया।”
ACT 23:22 तत्‌यार तीना पुर्‌यान वात सामळीन डाहलु सुबेदार तीना पुर्‌या काजे हुकुम आपीन मकल्‌यु “तु जी वात कुय काजे घुण कवे की तु जी वात मेसेक कह्‌लु छे।”
ACT 23:23 तत्‌यार सोव सीपायड़ान डाहलु सीपायड़ु तेरा दुय सीपायड़ाक बुलायन कह्‌यु, “केसर्‌या सहर मां जाणे करीन दुय सोव सीपायड़ा, ने सत्‌तर सीपायड़ा घुल्‌ला पर बसीन जाण्‌या, ने दुय सोव भाला वाळा सीपायड़ा तीयार हय जावु। ने रातेन नव बजे लग केसर्‌या जाणे करीन तीयार रवजु।
ACT 23:24 ने पोलुस काजे नीयाव करन्‌या फेलीक्‌स घुल्‌ला पर बठाड़ीन अलग ली जाणे करीन तेरे वाटे बी घुल्‌लु तीयार राख्‌जु।”
ACT 23:25 सुबेदारेन डाहलु सुबेदार चिट्‌ठी मां ज्‌य बी लिखीन दी मकल्‌यु:
ACT 23:26 “ए नीयाव करन्‌या फेलीक्‌स! वारलु छे की? मे कलद्‌यु लुस्‌यु छे।
ACT 23:27 हीना अदमी काजे यहुदी माणसे धर लेदला ने हीनाक मारने हींडी रवला; बाकुन जत्‌यार मेसेक मालुम पड़्‌यो की जु रोमी छे, मे सीपायड़ा भेळु जाय्‌न हीना काजे छुड़ाय लायु।
ACT 23:28 मे जाणतेलु की चे हेरे पर काहनु गुनु लागाड़ीन वाक नीकाळ रया; तेरेमां मे हीनाक तींद्‌री मट्‌ली बसक मां ली गुयु।
ACT 23:29 तत्‌यार मे जाण लेदु की जे तींद्‌रा कायदान सास्‌तुरेन बारामां लिखली वात काजे लीन वातेम जखड़ी पड़ रवला ने तेरे पर गुनु लागाड़ीन वाक नीकाळ रवला, बाकुन हेरेम असु गुनु नी हय, तेरेसी हीनाक जेल मां बुजणु नी पड़े ने नी मारनु पड़े।
ACT 23:30 जत्‌यार मेसेक बताड़्‌या की चे हीना माणुस काजे मारने हींडे ती मे तत्‌यारुत मे हीना काजे तारे धड़े मकली देदु। ने हेरे पर गुनु लागाड़न्‌या काजे हुकुम आप्‌यु की तुहुं जु बी गुनु हेरे पर नाख रया।”
ACT 23:31 अतरामा सीपायड़ा जसों कह्‌या तसोत कर्‌या, ने चे रातेम रात पोलुस काजे अन्‌तीपातरीस पुगाड़ देदा।
ACT 23:32 दीसरे दाहड़े चालीन जाण्‌या सीपायड़ा पछा यरुसलेम कीला मां आवती रया।
ACT 23:33 चे केसर्‌या पुगीन ची चिट्‌ठी नीयाव करन्‌या काजे आप देदा, ने पोलुस तेरे अगळ उबा कर्‌या।
ACT 23:34 चु नीयाव करन्‌यु चिट्‌ठी भणीन पोलुस काजे पुछ्‌यु, “तु काहना देस वाळु छे?” ने चु सीपायड़ु कह्‌यु, कीलक्‌या जीला वाळु छे,
ACT 23:35 ने चु जाण लेदु की जु कीलक्‌या वाळु छे ती चु कह्‌यु, “जत्‌यार तारे पर गुनु लागाड़न्‌या बी आवसे ती मे तारु नीयाव करीस।” ने चु सीपायड़ा काजे हुकुम आपीन कह्‌यु, “हीना काजे हेरोदेसेन कीला मां ली जाय्‌न पेहरु देवु।”
ACT 24:1 पांच दाहड़ा हय गुया ने पछेन मंदीरेन डाहलु पुजारु हनान्‌यु थुड़ाक पुडारी ने तेरतुल्‌लुस काजे पुठ्‌ये लीन केसर्‌या आयु। जु तेरतुल्‌लुस एक वकील हतलु। चे आखा नीयाव करन्‌या अगळ पोलुस पर गुनु लागाड़ीन तेरु वाक नीकाळ्‌या।
ACT 24:2 जत्‌यार तीनाक बुलाया ती तेरतुल्‌लुस तेरे पर गुनु लागाड़ीन कवणे लाग्‌यु, “ए मटला फेलीक्‌स मालीक! हामु ते तु छे करीन वारु सुकना जीवणे बाजी रया, तु नांबे सी देखीन चाले तेरेमां आपणो आखो देस वारु सुदरी गुयलो छे
ACT 24:3 ए आखा सी वारु फेलीक्‌स! हामु तारे साहरे सुदारली वातेक हामु मांजे ने तुसेक वारु कह्‌जे।
ACT 24:4 बाकुन तेरेमां की तुसेक अळी दुख नी देणे चाहतु चु तीनाक लीलघाय्‌न कह्‌यु, दया करीन तु हामरी दुय वात सामळी ले।
ACT 24:5 काहाकी हामु हीना माणुस काजे भड़कावण्‌यु छे। जु आखी कळीन यहुदी माणसे मां लड़ाय कराड़न्‌यु छे, ने आपसा काजे नासरी टुळान मुख्‌यु कह्‌वे।
ACT 24:6 जु यरुसलेम मंदीर काजे बी वीटाळनेन कुसीत करलु पर हामु हीना काजे धर पाड़्‌या। हामु मुसान कायदान अनसारे हेरु नीयाव करने हींडतेला।
ACT 24:7 बाकुन डाहलु सुबेदार लुस्‌यु आवीन हीनाक जबरान हामरा हातेम सी हापकी लेदु।
ACT 24:8 ने असु करीन गुनु लागाड़न्‌या काजे बी चु हुकुम आपीन कह्‌यु की तुहुं हीनी आखी वातेन बारामां जु गुनु हामु हेरे पर लागाड़ रया। तीनी वातेक तु आपसुत पारखी लेसी।”
ACT 24:9 जी वात सामळीन यहुदी माणसे बी हीनी वातेक हुकारीन कह्‌या, “हव, जी वात खरली छे।”
ACT 24:10 जत्‌यार नीयाव करन्‌यु पोलुस काजे बुलनेन ईसारु कर्‌यु ती पोलुस असु जपाप आप्‌यु, मे जाणो की तु बेसका साल सी हीनी जातीन माणसेन नीयाव कर रयु, तेरेमां मे खुस हय्‌न तारी वातेन जपाप आपो।
ACT 24:11 तुसेक ते ज मालुमुत छे की जत्‌यार मे यरुसलेम मां भगवानेन भक्‌ती-भजन करने आवलु, ती सीत हय लग बारे दाहड़ा बी नी हया।
ACT 24:12 ने चां कुय बी मेसेक मंदीर मां ने यहुदी माणसेन भक्‌तीन घर, मां ने सहर मां वातेम नाव-बद्‌दी ने माणसेक भेळा करीन भड़कावतेलु देख्‌या,
ACT 24:13 ने नीते जे तीनी वाते मां मारु वाक नीकाळीन गुनु लागाड़ रया, तीनी वातेक हय बी जे खरली ठेहराय नी सके।
ACT 24:14 बाकुन मे तारे अगळ जी वात मान लम की दीना पंथ काजे जे रद्‌दी-पंथ कह्‌वे। तीना पंथन साहरे मे तीना भगवानेन सेवा-भक्‌ती करो तीना भगवानेन वाट काजे आपणा डाहा-बुड़ा मान्‌ता आय रया, ने तेरी सेवा-भक्‌ती करता आय रया। ने जी वात मुसान साहरे लिखला सास्‌तुर मां ने भगवानेन अघली वात बताड़ने वाळा माणसेन किताप मां बी लिखली छे, तीनी आखी वात पर मे भुरसु करो।
ACT 24:15 ने जसा चे भगवान मां करे तसुत मे बी भगवान मां आसा करो की भगवान धरमी माणसे काजे ने पापी माणसे काजे मर्‌या-सर्‌याम सी जीवतु करीन बठु करसे।
ACT 24:16 तेरेमां मे बी भगवान ने माणसे अगळ मारा चुखला मन सी ज छाचली छे, चत करनेन कुसीस करो।
ACT 24:17 बेसका सालेन पछे मे मारा माणसे काजे दान आपणे, ने भेट चड़ावने आवलु।
ACT 24:18 ने चे मेसेक मंदीर मां जनवार्‌या मारीन बादा चड़ावतेलु ने भेट आपतेलु देख लेदला। मे जो काम चुखले मने दीसरा माणसेक बुलावीन गड़दी करे बीगुर करने बाजी रवलु। तीने टेमे मारे पुठ्‌ये आसीया वाळा बेसका यहुदी बी हतला; ने तीनुक जो काम वारु; लाग्‌यो।
ACT 24:19 दंगु कराड़न्‌या ते चे, आसीया जीला वाळा यहुदी माणसे हतला। कदी तीनुक मारा वीरुद मां काय कवणु हतलो, ती जे यहुदी जां अगळ आवीन मारे पर गुनु लागाड़ता। तेबी चे जां नी आया।
ACT 24:20 नीते जे माणसे जां छे हीनुत काजे कवणे दे की जत्‌यार मे मट्‌ली बसक मां हतलु, ती जे मारे मां काय गुनु देखला?
ACT 24:21 हीनी वात काजे छुड़ मे तींद्‌रे ईचमां उबु रवीन आयड़ीन कवलु की मर्‌या-सर्‌याम सी पछा जीवता हवणेन बारामां तारे अगळ आज मारु नीयाव हवणे बाजी रयु।
ACT 24:22 फेलीक्‌स तीनी वाटेन बारामां वारु वात जाणतेलु, चु ज कह्‌वीन तींद्‌री सुणवाय टाळ देदु, “जत्‌यार डाहलु सुबेदार लुस्‌यु आवसे, ती तुंद्‌री वात सामळीस ने तुंद्‌रु फेसलु करीस।”
ACT 24:23 ने सुबेदार काजे हुकुम आप्‌यु की तु पोलुसेन जेलेन वारु राखवाळी करजी, ने तेरा दुस्‌तीदार आवे ती तेरी सेवा-चाकरी करने घुण रुके।
ACT 24:24 थुड़ाक दाहड़ा मां अळतेन फेलीक्‌स हेरी घरवाळी द्‌रुसीला पुठ्‌ये चां आयु। फेलीक्‌सेन घरवाळी यहुदी जातीन हतली। फेलीक्‌सी पोलुस काजे बुलावीन तीना भुरसान बारामां ज मसी ईसु पर छे, तेरेसी सामळ्‌यु।
ACT 24:25 बाकुन जत्‌यार पोलुस नीयावेन बारामां, ने हेरा जीवेक मानाड़नेन बारामां, ने आवणे वाळा नीयावेन बारामां वात करतेला। ती फेलीक्‌स सामळीन बेसकु बीही गुयु ने पोलुस काजे कह्‌यु “हय तु जात रव, टेम जड़से ती तारी वात सामळने तुसेक अळी बुलावीस।”
ACT 24:26 हीनीत टेमे फेलीक्‌स जी आस कर रवलु की पोलुस मेसेक रुप्‌या आपसे। करीन चु पोलुस काजे अळी-अळीन तेरी वात सामळावणे करीन बुलाया करतेलु।
ACT 24:27 बाकुन जत्‌यार दुय साल हय गुया ती पुरकीयुस फेस्‌तुस, फेलीक्‌सेन जागा पर आयु; ने फेलीक्‌स यहुदी माणसे पर दया करनेन मरजी सी पोलुस काजे जेल मात रहणी देदु।
ACT 25:1 फेस्‌तुस चु तीन दाहड़ा हय गुया ने अळतेन केसर्‌या सी यरुसलेम मां पुग्‌यु।
ACT 25:2 तत्‌यार मंदीरेन डाहला पुजारी ने यहुदी माणसेन नेता आवीन पोलुस पर गुनु लागाड़ीन तेरु वाक नीकाळ्‌या।
ACT 25:3 ने चे माणसे फेस्‌तुस काजे दया मां हयन कह्‌या की तु पोलुस काजे यरुसलेम बुलाय ले। काहाकी चे वाट्‌येत पोलुस काजे मारनेन जाळसांदी बणाय रवला।
ACT 25:4 फेस्‌तुस जपाप आप्‌यु, “पोलुस केसर्‌या सहरेन जेलेम छे। ने सीपायड़ा तेरु पेहरु दीन राखवाळी कर रया। ने मे छाटुस पछु जायस।
ACT 25:5 पछेन कह्‌यु, तुहुं तुंद्‌रा मुख्‌या काजे मारे पुठ्‌ये केसर्‌या मकली देवु ने कदी चु माणुस काहींग गुनु कर्‌यु हसे, ती चे चां तेर पर गुनु लागाड़ीन वाक नीकाळे।”
ACT 25:6 फेस्‌तुस अळी तींद्‌रे ईचमां आठ-दस दाहड़ा रहणीदीन पछु केसर्‌या गुयु। ने तेरे पुठ्‌ये सात यहुदी हकदार्‌या बी गुया। दीसरे दाहड़े फेस्‌तुस नीयावेन गादी पर बसीन सीपायड़ाक हुकुम आप्‌यु की, “पोलुस काजे बुलाय लावु।”
ACT 25:7 जत्‌यार पोलुस आयु, ती यरुसलेम सी आवला यहुदी हकदार्‌या, तेरे चारेमेर उबा हय्‌न तेरे पर बेसका गुनु लागाड़ीन वाक नीकाळ्‌या। ने तीना गुनान पुरावु चे दी नी सक्‌या।
ACT 25:8 बाकुन पोलुस जपाप आप्‌यु, “मे यहुदी कायदान बी वाक नी नीकाळ्‌यु, ने मंदीरेन बी वाक नी नीकाळ्‌यु, ने मटला राजान बी वाक नी नीकाळ्‌यु। असु करीन मे काय बी गुनु नी कर्‌यु।”
ACT 25:9 बाकुन फेस्‌तुस यहुदी माणसे पर गीण-दया करने करीन पोलुस काजे कह्‌यु, “तु यरुसलेम जाणे तीयार छे काय, ने चां मारे अगळ ईनी वातेन बारामां तारो नीयाव करो?”
ACT 25:10 पोलुस कह्‌यु, मे केसरेन नीयावेन गादी अगळ उबु हय रयु, मारु नीयाव जात हवणु चाहजे। जसों तुसेक बी वारु रीती सी मालुम छे की मे यहुदी माणसेन वाक नी नीकाळ्‌यु।
ACT 25:11 कदी मे गुनाळु हय, ने मरनेन डंड जड़े असु गुनु कर्‌यु हय, ती मे मरने तीयार छे; बाकुन कदी तीनी वातेम जे मारे पर गुनु लागाड़ रया, ची वात खरली नी हय ती, कुय बी मेसेक तींद्‌रे सुपरुत नी कर सके। मे मटला राजा अगळ नीयाव धड़े उबु हवणेन वीन्‌ती करो।
ACT 25:12 तत्‌यार फेस्‌तुस बसकेन मंत्‌री धड़े वीच्‌यार नीकाळीन जपाप आप्‌यु, “तु मटला राजा अगळ नीयाव धड़े उबु हवणेन वीन्‌ती करलु छे, तु केसर धड़े जासी।”
ACT 25:13 थुड़ाक दाहड़ा हय गुया ने अळतेन धड़ेवाळा ईलाकान राजा अग्‌रीपा, तेरी बहणीस बेरनीस पुठ्‌ये यहुदा जीलान नवला राजा फेस्‌तुसेक वारु छे की? पुछणे ने आव-भाव करने करीन केसर्‌या आया।
ACT 25:14 चे बेसका दाहड़ा रय लेदा ने अळतेन फेस्‌तुस पोलुसेन बारामां राजा काजे ज कह्‌यु “एक माणुस छे, तीनाक फेलीक्‌स जेल मां छुड़ गुयु।
ACT 25:15 जत्‌यार मे यरुसलेम मां हतलु, ती मंदीरेन पुजारी ने यहुदी माणसेन पुडारी तेरे पर गुनु लागाड़्‌या; ने कह्‌या की हीनाक डंड आप।
ACT 25:16 बाकुन मे तीनुक जपाप आप्‌यु, रोमी माणसेन जी रीती नी हय की गुनु लागाड़न्‌याक ने गुनु करन्‌याक आंबा-सांबा उबा करीन तींद्‌री आंबी-सांबी सुणवाय करे बीगुर गुनु करन्‌या काजे डंड आप देय।
ACT 25:17 जत्‌यार चे जां भेळा हया, ती जादा वार नी लागाड़्‌यु, बाकुन दीसरे दाहड़े नीयावेन गादी पर बस गुयु, ने सीपायड़ाक कह्‌यु, ‘तीना माणसेक लावणेन हुकुम आप्‌यु।’
ACT 25:18 जत्‌यार गुनु लागाड़न्‌या उबा हय्‌न तेरे पर गुनु लागाड़्‌या, ती चे, मे समजी रवलु असु काहनु बी गुनु तेरे पर नी लागाड़्‌या।
ACT 25:19 बाकुन चे तींद्‌रा भुरसान धरमेन बारामां ने ईसु नावेन माणसेन बारामां चु मर गुयलु ने पोलुस तीना काजे जीवतु छे करीन बताड़लु, ने वातेन जखड़ी मां पड़ रवला।
ACT 25:20 मे चक्‌कर मां पड़ रवलु की ईनी वातेन पतु कसु लागड़ो? तेरेमां मे तीनाक पुछ्‌यु, काय तु यरुसलेम जासी काय, ईनी वातेन तारु नीयाव हवसे?
ACT 25:21 बाकुन पोलुस कह्‌यु, की ‘मे मटला राजा अगळ नीयाव उबु हवणेन वीन्‌ती करो।’ ती मे सीपायड़ाक हुकुम आप्‌यु की जत्‌यार लग मे ईनाक केसर धड़े नी मकलो, ती लग तुहुं जलम हेरी राखवाळी करु।”
ACT 25:22 तत्‌यार अग्‌रीपा, फेस्‌तुस काजे कह्‌यु, “मे बी तीना माणसेन वात सामळने हींडो।” ती फेस्‌तुस कह्‌यु, “तु काल हेरी वात सामळी लेजी।”
ACT 25:23 दीसरे दाहड़े राजु अग्‌रीपा ने तेरी बहणीस बेरनीस सी धुम-धाम सी हेरा सीपायड़ा सुबेदार्‌या भेळा ने सहरेन मटला माणसे बसक भेळे चां आय लाग्‌यु। तीने टेमे फेस्‌तुस सीपायड़ाक हुकुम आप्‌यु, “पोलुस काजे जां ली आवु।”
ACT 25:24 फेस्‌तुस कह्‌यु, “ए राजा अग्‌रीपा, ने आखा माणसे, जे जां आय र्‌या चे। तुहुं ईना माणसेक देख रया, तेरे बारामां आखा यहुदी माणसे यरुसलेम सहर मां ने जां बी आयड़ी-आयड़ीन मारे धड़े लीलघाय्‌न कह्‌या, ‘ईनाक मार नाखु। ईना काजे धरती पर जादा दाहड़ा जीवतेलु रहणु वारु नी हय।’
ACT 25:25 बाकुन मे पारखी लेदु की चु मरनेन डंड जड़े असु काहनु बी गुनु नी कर्‌यु; तेबी चु आपसुत असु वीन्‌ती कर्‌यु की ‘मे मटला राजा अगळ नीयाव वाटे उबु हवणु छे।’ ती मे ईनाक मटला राजा धड़े मकलेन तज्‌बु कर्‌यु।
ACT 25:26 बाकुन मे हेरे बारामां लिखीन दी मकेलने मारे धड़े काय बी पुरावु नी जड़्‌यु। अतरामा मे तीना काजे तारे अगळ ने खास करीन ए राजा अग्‌रीपा तारे अगळ लावलु छे। हेरेन करीन की लिखणे करीन काय ने काय पुरावु जड़े।
ACT 25:27 मारु वीच्‌यार छे की तीनाक माणसे गुनाळु समजीन धरीन हात कड़ी लागाड़ला छे, तेरे बारामां जु छाचलीन गुनाळु छे, असु करीन चिट्‌ठी लिखे बीगुर मटला राजा धड़े मकेलनु वारु नी हय।”
ACT 26:1 अग्‌रीपा राजु पोलुस काजे कह्‌यु, “तुसेक खुद तारे बारामां कह्‌णेन हक छे।” तत्‌यार पोलुस आपसुत बचणे करीन आपसे भीणी असु कह्‌णे बाजी गुयु।
ACT 26:2 ए राजा अग्‌रीपा, जतरी वातेन यहुदी माणसे मारे पर गुनु लागाड़े। तीनी वातेन आज तार अगळ जपाप आपणे मां मे वारु समजो।
ACT 26:3 खास करीन जी वात अतरी खरली छे, काहाकी तु यहुदी माणसेन आखी रीती-भाती ने तींद्‌री वात काजे जाणो। अतरामा चु लीलघाय्‌न कह्‌यु की तु गम खाय्‌न मारी वात सामळ।
ACT 26:4 मे नानलु हतलु ती सीत मारा भाय-बेटा मां ने यरुसलेम मां कसु जीव्‌यु, ची वात देस वाळा ने यरुसलेम वाळा आखा यहुदी जाणे।
ACT 26:5 कदी चे ईनी वातेन गवाय देणे हींडे ती गवाय दी सके, काहाकी मे हामरा धरमेन अनसारे एक हामरा काठला फरीसी माणसेन अनसारे जीवाय जीवलु छे।
ACT 26:6 भगवान हामरा डाहा-डाहा साते मर्‌या-सर्‌याम सी पछा जीवता करनेन जु वायदु करलु छे, ने चु वायदु भगवान पुरु करसे असु मे आस करो ने तीनात वायदान वाटे मारु नीयाव हवणे बाजी रयु।
ACT 26:7 हामरी बारे कळीन माणसे मर्‌या-सर्‌याम सी पछा जीन्‌दा हवणे जी आस कर रया, तीनीत आसे वाटे भगवानेन रात दाहड़ु सेवा-भक्‌ती कर रया। ए राजा। हीनुक मर्‌या-सर्‌याम सी पछा जीन्‌दा हवणेन आसेन बारामां यहुदी माणसे मारे पर गुनु लागाड़ रया।
ACT 26:8 जत्‌यार की भगवान मर्‌या-सर्‌या माणसे काजे जीन्‌दा करे। असी वात मे कहं ती तुहुं काजे ईनी वात पर भुरसु काहा नी आवतु?
ACT 26:9 मे बी समजतेलु की ईसु नासरी नावेन वीरुद मां मेसेक बेसको काय करनु चाहो।
ACT 26:10 ने मे यरुसलेम मां बी ईसुन माणसेन वीरुद कर्‌यु; ने मंदीरेन डाहला पुजारा जाय्‌न ईसुन माणसेक वेला पाड़नेन हक मांग लेदु ने बेसका ईसुन चुखला माणसेक जेल मां कुंड देदु। तत्‌यार दीसरा तींद्‌री वीरुद करीन तीनुक मारतेला ती मे बी तींद्‌री वातेक हुकारतेलु।
ACT 26:11 ने मे तीनु आखा काजे तींद्‌रा यहुदी माणसेन भक्‌तीन घर मां वेला पाड़तेलु ने तीनुक जुर करीन कह्‌वतेलु की तुहुं ईसुन वाक नीकाळु, नीते मार नाखीस। ने मे तींद्‌रे पर अतरु रीसवाय गुयु की दीसरा सहरेम रहण्‌या ईसुन माणसे काजे बी वेला पाड़ने बाजी गुयु।
ACT 26:12 ईसु पर भुरसु करन्‌या माणसेक मारनेन धुन मां मे मंदीरेन डाहला पुजारा धड़े हकेन चिट्‌ठी लीन मे दमीस्‌क जाणे बाजी रवलु।
ACT 26:13 ए राजा, मे दीसु माथेक दाहड़े, दाहड़ा सी बी जादा जुरे वीजाळो बी धपीन सरगे सी आवतेलो देख्‌यु, जो मेसेक ने मारा साती काजे घेर लेदलो।
ACT 26:14 हामु आखा भुयमां हीट पड़्‌या ती मेसेक ईब्‌रानी बुली मां एक बुल सामळायु, “ए सावुल ए सावुल तु मेसेक काहा वेला पाड़े? तारे वाटे कुरहाड़ पर लात देणु काठो छे।”
ACT 26:15 ने मे कह्‌यु, “मालीक! तु कुण छे?” मालीक कह्‌यु, “मे ईसु छे, तीनाक तु वेला पाड़े।
ACT 26:16 बाकुन हय तु उबु उठ जां; तारा पाय पर उबु हव; काहाकी मे तुसेक जसु देखलु च आखो माणसेक कवणे करीन मारु पावर्‌यु ने गवा बणावीन ठेहरावलु छे, ने अळी आवणे वाळी वात देखाड़ने करीन तुसेक देखाड़ीस।
ACT 26:17 मे तुसेक तारा माणसे सी ने नी-यहुदी माणसे सी बचाड़ीन राखीस, तींद्‌रे धड़े मे तुसेक तेरेमां मकलो।
ACT 26:18 तु हींद्‌रा जीवेन डुळा उघाड़जी। ने तीनुक जीवेन आंदारला मां सी जीवेन वीजाळा भीणी वाळजी। ने भुतड़ान हक मां सी छुड़ावीन भगवानेन हक मां लावजी; ने असा करीन चे पापेन माफी हात करीन ईसु पर भुरसु करन्‌या चुखला माणसे मां भेसकाय जासे।”
ACT 26:19 “ए राजा अग्‌रीपा! ती सी आज लग मे तीनी सरगेम सी आवली वातेक कदी नी टाळ्‌यु।
ACT 26:20 बाकुन मे पेहले दमीस्‌कुसेन, यरुसलेमेन, ने तत्‌यार यहुदी आखा देसेन रहणे वाळा ने नी-यहुदी माणसेक ज समजाड़तु रयु, की तुहुं पाप भीणी सी मन फेरवीन भगवान भीणी वळु ने भगवान काजे गमे तसों काम करु।”
ACT 26:21 ईनी वातेन वाटे यहुदी माणसे मेसे काजे मंदीर मां धर लेदा, ने मारीन नाख देणेन कुसीत कर्‌या।
ACT 26:22 बाकुन भगवानेन मदत सी आज लग मर्‌यु नी ने नानला मटला आखा अगळ गवा दम। ने तीनीत वातेक कहतु रयु जी वात भगवानेन अघली वात बताड़ने वाळा माणुस ने मुसु कहलु की हवणे वाळी छे।
ACT 26:23 की ईसु मसी काजे दुख झेलनु पड़से ने चु आखा मरला मां सी पेहेल जीवतु हय्‌न आपणा माणसेक ने नी-यहुदी माणसेक जीवनेन वीजाळान खुस-खबर सामळावसे।
ACT 26:24 जत्‌यार पोलुस हीनी रीती सी जपाप दी रवलु, ती फेस्‌तुस जुर सी आयड़ीन कह्‌यु, “पोलुस, तु संकाय गुयलु छे! ने तु जादा भणीन गांडु हय गुयु।”
ACT 26:25 बाकुन पोलुस कह्‌यु, “ए ओबरादार फेस्‌तुस! गांडु नी हय, बाकुन सय ने अक्‌कल वाळी वात कहं।
ACT 26:26 ने तीनी वातेक मे बीहे बीगुर राजा अगळ कहणे बाजी रयु, तीनी वातेक राजु जाणे। ने मेसेक भुरसु छे हीनी वात मां सी कुय वात सातायली नी हय, काहाकी ईसु साते जो काय हयो च कांखुर धरतीन खुणे-कुपरे नी हयो।
ACT 26:27 ए राजा अग्‌रीपा, तु भगवानेन अघली वात बताड़ने वाळा माणसेन कहली वात पर भुरसु करे काय? हव, मेसेक मालुम छे की तु भुरसु करे!”
ACT 26:28 हेरेसी अग्‌रीपा पोलुस काजे कह्‌यु, “तु कम समजणे सी मेसेक मसी बणावणे हींडे।”
ACT 26:29 पोलुस कह्‌यु, “मे भगवान सी दुवा करो की भले ईतरीक वात सामळावीन ने भले जादा वात सामळावीन, तु अतरुत नी बाकुन जतरा बी मारी वात सामळी रया, चे आखा मारेन तसा ईसु पर भुरसु करन्‌या बण जाणो चाहे। बस, तीनुक मारेन तसा हात कड़्‌या अतरा नी लागणु चाहजे।”
ACT 26:30 तत्‌यार राजा अग्‌रीपा ने राजा अग्‌रीपान बहणीस बेरनीस ने तेरे धड़े बस रवला आखा उबा हय गुया।
ACT 26:31 ने अलग जाय्‌न आपसात कहणे लाग्‌या, जु माणुस जेलेम जाय असु ने मरनेन डंड जड़े असु काहनु बी गुनु नी कर्‌यु।
ACT 26:32 अग्‌रीपा फेस्‌तुस काजे कह्‌यु, “कदी तु असु नी कवतु की ‘केसर राजा अगळ मारु नीयाव हवणु चाहजे’ ती जे तुसेक जेल मां सी बरी कर देदा।”
ACT 27:1 जत्‌यार ज पक्‌को हय गुयो की हामु ढंड्‌याम बसीन ईटली देसेम जाजे। ती चु ने पोलुस ने ईतराक दीसरा केदी काजे तीना सीपायड़ान टुळान हातेम कर देदु, तीना टुळान डाहलु सुबेदार जुलीयुस नावेन हतलु।
ACT 27:2 अतरामा हामु काजे आसीया ईलाकान दर्‌या धड़े जाणे वाळा एक, ढंड्‌याम बसीन हामु चाल पड़्‌या। ने मकीदुनीया ईलाकान थीसलुनीकीया सहर वाळु अरीस्‌तारकुस बी हामरे पुठ्‌ये हतलु।
ACT 27:3 दीसरे दाहड़े हामु सीदोन सहर मां पुग्‌या ने चां ढंड्‌यान ठेसण पर मटलो ढंड्‌यो हुबो राक देदा। सुबेदार जुलीयुस पोलुस पर दया कर्‌यु ने पोलुस काजे तेरा दुस्‌तीदारेन्‌चां भेळु हवणे करीन जाणे देदु। ने तेरा दुस्‌तीदारेक बी पोलुसेन सेवा-चाकरी करनेन छुट आप देदा।
ACT 27:4 चां सी आहळी हामरे सांबी आवतेली; करीन कुपरुस नावेन काळापाणी धड़े-धड़े तेरु आड़ लीन ढंड्‌यो चालाड़ीन ली जातला;
ACT 27:5 ने कीलक्‌या ने पंफुलीया ईलाका धड़े समुदर मायन जातला ने लुस्‌या ईलाकान मुरा नावेन सहर मां उतर्‌या।
ACT 27:6 चां एक सुबेदार काजे एक दीसरो मटलो ढंड्‌यो देखाव पड़्‌यो। च सीकेन्‌दर्‌या सहर सी आवीन ईटली ईलाका मां जाणे वाळो हतलो। हेरेसी चु हामुक तीना ढंड्‌या मां बठाड़ देदु।
ACT 27:7 जत्‌यार हामु बेसका दाहड़ा लग धीरा-धीरा चालीन वेला करता जाय्‌न कनीदुस सहर धड़े अगा पुग्‌या। काहाकी हवा हामु काजे अघो जाणे नी देदो; अतरामा हामु केरती नावेन काळापाणीन आड़ लीन सलमोन सहर धड़े पुग्‌या।
ACT 27:8 ने चां मायन बेसका एला करता जाय्‌न एक सहरेम पुग्‌या, तीना सहरेन नाव हतलो ढंड्‌या उबा करनेन वारु ठेसण। चां सी लसया सहर धड़ेत हतलो।
ACT 27:9 टेम बेसकी हय गुयली ने तीना ढंड्‌या काजे बी अगा ली जाणु बी परेसानी हतलो काहाकी तत्‌यार लग उपासेन दाहड़ा बी हय गुयला। तेरेसी पोलुस तीनु माणसे काजे ज कह्‌तु जाय्‌न चेताड़्‌यु।
ACT 27:10 “ए अबरेदार माणसे! मेसेक असो लागे की जां सी आपणु जासु, ती आपणे पर आफत आय पड़से ने बेसको नुकसाण झेलनु पड़से। ने मटलो ढंड्‌यो चालाड़न्‌या पर ने मटलो ढंड्‌यो बी टुट जासे। ने कांखुर मायन आपणुक मरनु बी पड़से।”
ACT 27:11 बाकुन सुबेदार पोलुसेन वातेक छुड़ीन मटलो ढंड्‌यो चालाड़न्‌या पर ने मटला ढंड्‌यान मालीकेन वात काजे बड़ीन मान्‌यु।
ACT 27:12 चां सींगेन दाहड़ा काटणे वाटे वारु नी हतलो तेरेमां बेसका माणसे वीच्‌यार करीन कह्‌या, “आपणुक जां सी जतरा छाटा जावाये ततरा छाटा जां सी जाती रवसुन, ने ईना देसेन काहनी बी रीती सी फीनीक्‌स सहर मां पुगीन चां सींग काटसुन ती बेसको वारु रवसे।” ज एक केरते टापुन एक ठेसण छे जो ढंड्‌यान ठेसणे भीणी जो दखण-बुडण ने धुराव-बुडण भीणी उगाड़ो छे।
ACT 27:13 जत्‌यार ईतरी-ईतरीक दखण सी आहळी आवणे बाजी गुय, ती चे ज समज्‌या, की जसा चे चाही रवला, तसों तीनुक जड़ गुयो, ती चे ढंड्‌यान-मांजरी पाणीम सी नीकाळ लेदा ने केरतीन काळापाणी भीणी चाल पड़्‌या।
ACT 27:14 बाकुन थुड़ीक वार मां काळापाणी भीणी सी एक मट्‌ली आंधी आवी, ची धुराव उगण कह्‌वाये।
ACT 27:15 जत्‌यार आंधी ढंड्‌ये आपटाय, ती ढंड्‌या काजे आंधी भीणी सांबो नी जावायो, ती हामु ढंड्‌या काजे आंधी तींखुर जाय, तींखुर जाणे देदा।
ACT 27:16 तत्‌यार हामु कोदा नावेन काळापाणीन आड़ मां धीरा-धीरा ढंड्‌या काजे उहवणी देदा, ने काठी मेहनत करीन दीसरा नानला ढंड्‌या काजे हात करीन तीनुक कब्‌जा मां करीन धीरा पाड़्‌या ने मटला ढंड्‌या मां मेल लेदा।
ACT 27:17 ढंड्‌या काजे नाड़े करीन बांद देदा, ने बीहाणे सी कहें की कांखुर मायन सुरतीसेन काळापाणी धड़े उतेळ्‌ळा पाणीन कादवड़ा मां मटलो ढंड्‌यो गाड़ाय जासे करीन मटला ढंड्‌यान पाल छुड़ देदा, ने मटला ढंड्‌या काजे उहवणी देदा।
ACT 27:18 जत्‌यार हामु आंधी ने झलक मटले ढंड्‌ये बेसकी आपटाय। ती दीसरे दाहड़े चे ढंड्‌याम सी समान नाखणे बाजी गुया।
ACT 27:19 ने तीसरे दाहड़े चे तींद्‌रे हाते सी ढंड्‌या मायन समान नाखी देदा।
ACT 27:20 जत्‌यार बेसका दाहड़ा लग, नीते दाहड़ु देखाव पड़्‌यु, ने नीते तारा देखाव पड़्‌या, ने बेसकी आंधी चालतीत रय, ने असी हालत हय गुय की हामु बचणेन आसुत छुड़ देदा।
ACT 27:21 जत्‌यार चे बेसका दाहड़ा लग काय नी खादा, तत्‌यार पोलुस तींद्‌रे ईचमां उबु हय्‌न कह्‌यु, ए माणसे, तुहुं काजे मारी वात मानीन केरती नावेन काळापाणी सी आवता ती नीते तुंद्‌री जी परेसानी आवती ने नी जी नुकसाण आवती।
ACT 27:22 बाकुन हय मे तुहुं काजे समजाड़ो की हिम्‌मत राखु, काहाकी तुंद्‌रे मायन कुय नी मरे, बाकुन ढंड्‌यान अतरोत खत्‌तम हवसे।
ACT 27:23 काहाकी तीना भगवान पुठ्‌ये मे जुड़ायलु छे, ने तेरी मे सेवा-चाकरी करो, तेरु एक सरग वाळु काहवाळ्‌यु आज राते मारे धड़े आवीन कह्‌यु,
ACT 27:24 ए पोलुस, बीहे मां! तुसेक केसर राजा अगळ उभो हवणु ने हवणु छे। ने देख, जे तारे पुठ्‌ये ढंड्‌या मां छे, तीनु आखा काजे भगवान तारा हातेम आप देदलु छे।
ACT 27:25 तेरेमां, ए माणसे, हिम्‌मत राखु; काहाकी मे भगवान पर जु भुरसु करो, जसों मार सी कह्‌यु, तसोन तसों हवसे।
ACT 27:26 बाकुन आपणु ढंड्‌यो काहनास काळापाणी धड़े कादवड़ा मां उतेळ्‌ळा जागा मां जाय्‌न गाड़ाय जासे।
ACT 27:27 जत्‌यार चोवदहवी रात हय, ती हामु अंदर्‌या नावेन समुदर मां भटकायता फीर रवला। ती आधीक रातेन धड़े-वड़े ढंड्‌यो चालाड़न्‌या काजे मालुम पड़्‌यो की हामु काहनास जागा धड़ेत जाय वागला छे।
ACT 27:28 ने चे दुयड़ो नाखीन समुदर मां उंडो देख्‌या ती मालुम पड़्‌यो की समुदरेन उंडाण वीस पुरसाव छे। ने अळी थुड़ाक धड़े गुया ती मालुम पड़्‌यो की समुदरेन उंडाण पंद्‌रे पुरसाव छे।
ACT 27:29 जत्‌यार दगड़ा वाळी जागा मां हामरो मटलो ढंड्‌यो अटकी जासे करीन चे बीही गुया ने चे मटला ढंड्‌यान पछला हीस्‌सा भीणी सी ढंड्‌यो उभो राखणे करीन च्‌यार मांजरी नाख्‌या, ने वीजाळो हवणेन वाट देख तेला।
ACT 27:30 बाकुन जत्‌यार ढंड्‌यो चालाड़न्‌या ढंड्‌याम सी ढासणे हींडी रवला, ती चे ढंड्‌यान अगला हीस्‌सा भीणी बी ढंड्‌यो उभो राखणे करीन मांजरी नाखणे हींडी रया असो बाहनो बणावीन दर्‌या मां बचणे करीन नानला ढंड्‌या बी समुदर मां उतार देदा।
ACT 27:31 ती पोलुस सुबेदार ने सीपायड़ा काजे कह्‌यु, “कदी जे मटलो ढंड्‌यो चालाड़न्‌या मटला ढंड्‌या मां नी रहे ती तुहुं बी नी बचु।”
ACT 27:32 ती सीपायड़ा दुयड़ा काटीन नानला ढंड्‌या काजे बचणे करीन मटला ढंड्‌याम सी समुदर मां उतार देदा।
ACT 27:33 जत्‌यार वीजाळो हवणे वाळो हतलो, तत्‌यार पोलुस आखा काजे जो कहीन समजाड़्‌यु की “बचणेन आस करीन वाट देखता-देखता चोवदे दाहड़ा हय गुया ने तुहुं भुकलात रया, ने ईतरोक बी खाणो नी खादा;
ACT 27:34 तेरेमां मे तुहुं काजे समजाड़ो की थुड़ोक खाय लेवु, तेरेसी तुहुं बची रवसु; काहाकी तुंद्‌रे मां सी कुयन बी मुणकान कान्‌यो बी नी उखळे।”
ACT 27:35 ने जो कयदीन पोलुस रुटु हातेम लेदु, ने आखा अगळ रुटा वाटे भगवान काजे तु बेसकु वारु छे कह्‌यु; ने रुटु भांजीन खाणे बाजी गुयु।
ACT 27:36 ती दीसरा आखा बी हिम्‌मत राखीन खाणो खाणे बाजी गुया।
ACT 27:37 हामु आखा मेळीन ढंड्‌या मां दुय सोव ने तीन वीसु ने सुवळे जणा हतला।
ACT 27:38 जत्‌यार चे खायलीन आफरी गुया ती ढंड्‌या काजे फवरो करने करीन ढंड्‌याम सी गहुं काजे समुदर मां नाखणे बाजी गुया।
ACT 27:39 जत्‌यार दाहड़ु उंग्‌यु ती चे तीनी जागा काजे उळख्‌या नी, बाकुन एक खयड़ु देख्‌या, ने चे वीच्‌यार कर्‌या की हय सके ती जात ढंड्‌या काजे उभो राख देजे।
ACT 27:40 तत्‌यार चे ढंड्‌यो उभो करने करीन ढंड्‌यान मांजरी काजे समुदर मां नाख देदा, ने डांडे बांद्‌ला नाड़ा काजे छुड़ देदा, ने वाहळो तींखुर सी आवतेलो तींखुर वाळी बरसादी ताणीन समुदर धड़े चाल पड़्‌या।
ACT 27:41 चे दुय समुदर भेसकायणेन जागा पर मटलो ढंड्‌यो उभो राख देदा, ने ढंड्‌यान अगलु हीस्‌सु उतेळ्‌ळा जागान कादवड़ा मां गाड़ाय गुयु, ने ढंड्‌यान पछलु हीस्‌सु समुदरेन झलके आफटाय-आफटाय्‌न भागणे बाजी गुयु।
ACT 27:42 तत्‌यार सीपायड़ा वीच्‌यार कर्‌या, की गुलाम माणसे काजे मार नाखता; कांखुर मायन असो नी हय जाय की जे तीरीन नीकळी जाय।
ACT 27:43 बाकुन सुबेदार पोलुस काजे बचाड़नेन करीन तींद्‌रा वीच्‌यार काजे पुरो करने सी रुक्‌यु, ने कह्‌यु की तीनाक तीरता आवड़ी जाय, चे पेहेल कुदीन धड़े जाती रवे।
ACT 27:44 ने तीनुक तीरता नी आवड़े चे ढंड्‌यान पाट्‌या पर बसीन जाती रहु। ने असा करीन आखा कुय धरती पर नीकळीन जाती रवे।
ACT 28:1 जत्‌यार हामु बचीन नीकळी जां, ती पतु चाल्‌यु की ईना काळापाणीक माल्‌टा कहवे।
ACT 28:2 चां वाळा माणसे हामरे पर गीण कर्‌या; काहाकी पाणी पड़नेन वजे सी सेळो लागतेलो; तेरेमां चे आकठो धपाड़ीन हामुक तापाड़्‌या, ने रहणेन आसरु आप्‌या।
ACT 28:3 जत्‌यार पोलुस लाकड़ा भेळा करीन आकठा मां मेल्‌यु, ती आकठान आच लागणे सी एक जहर वाळु घड़सु नीकळ्‌यु, ने पोलुसेन हातेम गुचवाय गुयु।
ACT 28:4 जत्‌यार चां वाळा माणसे घड़सा काजे पोलुसेन हात मां गुचवायलु देख्‌या, ती आपसा-आपसात कह्‌या, “छाचलीन जु माणुस हत्‌यारु छे, भले जु दरीया सी बच गुयु, तेबी नीयाव ईना काजे जीवणे नी देदु।”
ACT 28:5 तत्‌यार पोलुस आपसु हात झेंजड़ीन घड़सा काजे आकठा मां हेड़ पाड़्‌यु, ने पोलुसेन काय बी नुकसाण नी हयो।
ACT 28:6 बाकुन चे वाट देखता रया की पोलुसेन हात सुज जासे, नीते हयु हीट पड़से ने मर जासे, बाकुन जत्‌यार चे बेसकी वार लग देखता रया, हेरो काय बी नुकसाण नी हयो, ती चे तींद्‌रा मन मां दीसरुत वीच्‌यार आयु ने चे कह्‌या, “जु ते देवता छे।”
ACT 28:7 तीना जागान आड़े-धड़े एक टापु पुजारान पुबलीयुसेन खेते हतला, चु पुबलीयुस तीना माल्‌टा काळापाणीन नावेन खास हतलु; चु हामु काजे हेरे घर ली जाय्‌न तीन दाहड़ा लग मेजवानी कर्‌यु।
ACT 28:8 तीना पुबलीयुसेन बासेन सेरी आय रवलो, ने चु गुदड़ा मां पड़ी रवलु। अळतेन पोलुस घर मां तेरेन्‌चां जाय्‌न तेरे वाटे मालीक भगवान सी दुवा कर्‌यु, ने तेरे पर हात मेक्‌यु ने चु वारु हय गुयु।
ACT 28:9 जत्‌यार असो हयो ती तीना काळापाणीम रहण्‌या दीसरा मांदला माणसे बी आया; ने चां आवीन वारु हय गुया।
ACT 28:10 ने चे हामरी बेसकी आव-भाव कर्‌या, ने जत्‌यार हामु सीकेन्‌दर्‌या जाणे वाळाक ढंड्‌या मां बसीन जाणे हींडी रवला ती चे ज बी हामुक चाहतेलो, च ढंड्‌या मां मेल देदा।
ACT 28:11 तीन महना पछेन हामु सीकेन्‌दर्‌या वाळा ढंड्‌याम बसीन चाल पड़्‌या। जो ढंड्‌यो ईनात काळापाणीम हतलो ने तेरी सहलाणी टाक मेल्‌ली हतली।
ACT 28:12 हामु सुरकुसा नावेन काळापाणी मां गुया, ने चां तीन दाहड़ा रया।
ACT 28:13 चां सी हामु रेगीयुम मां गुया, ने दीसरे दाहड़े दखण सी वाहळी चाली, तत्‌यार दीसरे दाहड़े पुतीयुली मां गुया।
ACT 28:14 चां हामु काजे थुड़ाक ईसु पर भुरसु करन्‌या भायस भेळा हया, ने चे बेसका वीन्‌ती कर्‌या करीन, हामु तींद्‌रेन्‌चां सात दाहड़ा लग रया; ने असा करीन चां सी रोम सहर भीणी चाल पड़्‌या।
ACT 28:15 अळतेन चां वाळा ईसु पर भुरसु करन्‌या भायस काजे मालुम पड़्‌यो की हामु आवणे बाजी रया, ती चे हामुक भेळा हवणे करीन अप्‌पीयुस हाटेम लग ने तीन धरम साळान्‌चां लग आया, तीनु ईसु पर भुरसु करन्‌या भायस काजे देखीन पोलुस भगवान काजे तु बेसकु वारु छे कह्‌यु ने हिम्‌मत राख्‌यु।
ACT 28:16 जत्‌यार हामु रोम सहरेम पुग्‌या ती पोलुस काजे एक सीपायड़ा साते जु तेरी राखवाळी करतेलु, एखेलुत रहणेन हुकुम जड़ गुय।
ACT 28:17 तीन दाहड़ा पछेन पोलुस चां वाळा यहुदी माणसेन डाहला काजे बुलायु, ने जत्‌यार चे भेळा हय गुया ती चु तीनुक कह्‌यु, “ए भायस्‌यो, मे आपणा माणसेन ने आपणा डाह-डाहान वीरुद मां काय बी कह्‌यु, तेबी मेसेक यरुसलेम सी धराड़ीन रोमी सीपायड़ान हात मां आप देदा।
ACT 28:18 चे पुछी-पाछीन मेसेक छुड़ने हींडी रवला, काहाकी मे मरनेन डंड जड़े असु काहनु बी गुनु नी कर्‌यु।
ACT 28:19 बाकुन जत्‌यार यहुदी माणसे मारे वीरुद कहणे बाजी गुया, ती मेसेक केसर काजे वीन्‌ती करनु पड़्‌यो, जत नी मेसेक मारा माणसे पर गुनु लागाड़नु हतलु।
ACT 28:20 तेरेमां मे तुहुं काजे बुलायु की तुहुंक भेळु हवो ने वात करो; काहाकी ईस्‌रायेली माणसेन आस वाटे सीपायड़ा मेसेक धरीन मारे हाते ने पाये साकळ लागाड़ देदला छे।”
ACT 28:21 चे तीनाक कह्‌या, “नी हामु तारे बारामां यहुदी माणसे सी चिट्‌ठी हात कर्‌या, ने नी ते यहुदी भायस मायन कुय आवीन तारा बारामां कह्‌यु, ने नी ते गलत कह्‌या।
ACT 28:22 बाकुन तारु काय वीच्‌यार छे, चत हामु सामळने हींडी रया, काहाकी हामुक मालुम छे की आखे दुर ईना पंथन वीरुद मां माणसे कहणे बाजी रया।”
ACT 28:23 तत्‌यार चे एक दाहड़ु पाक्‌कु कर्‌या, ने अळतेन चु दाहड़ु आयु ती बेसका माणसे पोलुसेन्‌चां भेळा हया, ने पोलुस तीनु काजे ईसुन बारामां मुसान साहरे लिखला सास्‌तुरेम सी ने भगवानेन अघली वात बताड़ने वाळा सास्‌तुरेम सी संदारे सी सांतु लग समजाड़तु रयु, ए भगवानेन राजेन बारामां गवा देतु रयु।
ACT 28:24 ज सामळीन कुय तेरी वात मानीन ईसु पर भुरसु कर्‌या, बाकुन कुय तेरी वातेक मानीन ईसु पर भुरसु नी कर्‌या।
ACT 28:25 जत्‌यार चे एक मन्‌या हय्‌न तेरी वातेक नी मान्‌या, ती पोलुस तीनुक कह्‌यु, चुखली-आत्‌मा भगवानेन अघली वात बताड़ने वाळा यसायाह साहरे तुंद्‌रा डाहा-डाहाक ज कहलु हतलु, जाय्‌न ईनु माणसेक कय दे,
ACT 28:26 तुहुं सामळसु, ने सामळ्‌यात करसु, बाकुन तुहुंक ईतरोक बी नी समजाये; ने तुहुं देखसु, बाकुन तुहुंक पल्‌ले नी पड़े।
ACT 28:27 काहाकी जे तींद्‌रो मन काठो कर लेदला छे। ने तींद्‌रा कान्‌टा बेहरा हय गुयला छे। जे तींद्‌रा डुळा मीच लेदला छे। जे हेरेन करीन असा कर्‌या काहाकी हीनुक काय बी नी देखायणु चाहजे, ने हीनुक काय बी सामळायणु नी चाहजे, ने तींद्‌रा मनेम काय बी पल्‌ले नी पड़नु चाहजे, ने कदी मारे भीणी नी वळ्‌नु चाहजे, काहाकी मे तीनुक वारु कर दीस।
ACT 28:28 हेरेसी तुहुं ज जाण लेवु की भगवानेन जी छुटकारान खुस-खबर नी-यहुदी मां सामळावणे करीन मकली रयु, “चे धी‌यान सी ईनी खुस-खबर काजे सामळसे।”
ACT 28:29 पोलुस जी वात कय देदु, ने अळतेन यहुदी माणसे वातेम लड़ाय पड़्‌या ने चां सी जाती रया।
ACT 28:30 ने पोलुस रोम मां पुरा दुय साल लग भाड़ेन घर मां रयु।
ACT 28:31 ने जे तेरेन्‌चां आवतेला तीनु आखा काजे चु भेट्‌तु रयु ने वीनधाके ने वीन रुक-टुक मां भगवानेन राजेन परचार करतेलु ने अळी मालीक ईसु मसीन वात सीकाड़तु रयु।
ROM 1:1 पोलुस भीणी सी जु ईसु मसीन पावर्‌यु छे, ने नेवताळु हवणे करीन बुलावलु छे, ने भगवान तीना खुस-खबर वाटे नेवाड़लु छे।
ROM 1:2 तेरी चु पेहलुत सी आपणी भगवानेन अघी सी आवणे वाळी वात देखाड़न्‌यान साहरे चुखला सास्‌तुर मां, वायदु करलु हतलु।
ROM 1:3 गुयु हेरु पुर्‌या काजे आपणा मालीक ईसु मसीन बारामां आस लागाड़्‌यु; चु डीलेन भाव सी ते दावुदेन खानदानी सी पयदा हयु
ROM 1:4 ने चुखली-आत्‌मान भाव सी ईसु मरलाम सी जीवतु हवणेन वजे सी ताकुतेन साते भगवानेन पुर्‌यु ठेहरलु छे।
ROM 1:5 हेरे साहरे आपणु काजे बेसकी वारु दया ने नेवताळा बननेन मुखु जड़्‌यु हेरा नावेन वजे सी आखा नी-यहुदी माणसे भुरसु करीन हेरी माने,
ROM 1:6 तेरेमां तुहुं बी ईसु मसीन हवणे वाटे बुलावला छे।
ROM 1:7 तीनु आखान नाव जे रोम मां भगवानेन लाटेक्‌ला छे ने चुखला हवणे वाटे बुलावला छे: आपणु बास भगवान ने मालीक ईसु मसी भीणी सी तुहुं काजे गीण-दया ने सांती जड़ती रवे।
ROM 1:8 पेहेल मे तुहुं आखा वाटे ईसु मसीन साहरे आपणा भगवान काजे तु बेसकु वारु छे करीन कहुं, काहाकी तुंद्‌रा भुरसान वात आखा कळी मां हय रय
ROM 1:9 भगवान तेरी चाकरी मे आपणी आत्‌मा सी हेरा पुर्‌यान खुस-खबरेन बारामां करो, हयुत मारु गवा छे की मे तुहुं काजे काहनी रीत सी लगातार हेर करतु रव,
ROM 1:10 ने जलम असु वीन्‌ती करो की भगवानेन मरजी सी काहली-ने-काहली रीत सी मेसे आकरी मां तुंद्‌रे धड़े आवणे वारु मुखु जड़े।
ROM 1:11 काहाकी मे तुंद्‌रे सी भेळु हवणेन लालुच करो की मे तुहुं काजे कुय जीव-आत्‌मान वाटु आपो तेरे सी तुहुं काठा हय जावु;
ROM 1:12 अळतेन ज की जत्‌यार मे तुंद्‌रे ईचमां रवो, ती हामु तीना भुरसान साहरे ज हामरे मां, ने तुंद्‌रे मां छे एक दीसरा सी वात वीच्‌यार जड़े।
ROM 1:13 ए भायसे, मे नी चाहतु की तुहुं हेरे सी अणजाण्‌या रवु की मे काय कावा तुंद्‌रे धड़े आवणे चाह, की जसा मेसे नी-यहुदी नी जाणे तीनी जाती मां फळ जड़्‌यो, असात तुंद्‌रे मां बी जड़से, बाकुन हय लग रुकायलो छे।
ROM 1:14 मारे पर युनानी माणसेन ने नी-यहुदी, ने अक्‌कल वाळा ने डेड़-अकल्‌या माणसेन करजु छे।
ROM 1:15 अळतेन मे तुहुंक बी जे रोम मां रवु, खुस-खबर सामळवणे करीन काहाली बी टेम मां तीयार छे।
ROM 1:16 काहाकी मे खुस-खबर सी नी सरमांयो, हेरे सी की चु आखा जणा जे भुरसु करने वाळा वाटे, पेहेल ते यहुदी अळतेन नी-यहुदी वाटे, छुटकारान करीन भगवानेन ताकत छे।
ROM 1:17 काहाकी हेरे मां भगवानेन वारलु भुरसा सी ने भुरसा वाटे देखाये; जसों लिखलो छे, “भुरसा सी वारलु माणसे जीवता रवसे।”
ROM 1:18 भगवानेन रीस ते तीनु माणसे आखी नी भक्‌ती ने पाप पर चाले सरगे सी पड़से ज छाचाय्‌न वात काजे पाप करीन चीपदीन राखे।
ROM 1:19 हेरेसी की भगवानेन बारामां अक्‌कल हींद्‌रे मने मां देखायसे, काहाकी भगवान हींद्‌रे बारामां बताड़लु छे।
ROM 1:20 जत्‌यार सी कळी बणी हेरी नी-देखाय असली खास जलमेन ताकत ने भगवानेन गुण साप देखाये काहाकी हीनु चीजे सी पुरी रीती सी जाणी जाय सके जी भगवान बणावलु छे हेरेसी माणसे भीणी काय बाहनो नी हय।
ROM 1:21 हेरे वजे सी चे भगवान काजे जाणे तेबी चे भगवानेन जसी बड़ाय करनु चाहजे बाकुन तसी बड़ाय नी कर्‌या ने जसा भगवान काजे तु बेसकु वारु छे करीन कहंणु चाहजे तसा नी कह्‌या, बाकुन असलात वीच्‌यार करने बाजी गुया, जां लग की तींद्‌रा डेड़-अकल्‌या मन आंदारलो हय गुयो।
ROM 1:22 चे आपसा काजे अक्‌कल वाळा समजीन डेड़-अकल्‌या बण गुया,
ROM 1:23 ने जलम लग भगवानेन सेक-सींगार काजे माणसेन सीकु, ने चिरलान सीकु, ने चार पाया जनवार्‌यान सीकु, ने घीसड़ायन्‌या जनवार्‌यान सीकु समजीन तींद्‌री पुजा-पाट करने बाजी गुया।
ROM 1:24 हेरे वजे सी भगवान बी तीनुक हींद्‌रे मनेन हरेन अनसारे वीटळने करीन छुड़ देदु की चे एक दीसरान डीलेन अबरु नी करे।
ROM 1:25 काहाकी चे भगवानेन छाचाय काजे झुट साते भेसकी देदा, ने कळीन उपास ने चाकरी, ने पुजा-पाट सुरु कर देदा बाकुन कळ काजे घड़न्‌या भगवानेन भक्‌ती ने पुजा-पाट नी कर्‌या। भगवान जलम बेसका वारु छे! असोत हवतो रवे।
ROM 1:26 हेरेसी भगवान बी तीनु काजे गांडा हरेन हक मां रवणी देदु; जां लग की बायरा साते सवसार करने बाजी गुया।
ROM 1:27 ने अदमी बायरा साते सवसार करने रहणीदीन ने अदमी-अदमी साते सवसार करने ने कराड़ने ने चे चंगलाय ने सवसार करने हायाळ्‌ळा बण गुया। तीनुक बे सरम्‌या पापेन डंड, आपसा डील मां जीवतेला काजे भुकेतणु पड़्‌यो।
ROM 1:28 जत्‌यार चे भगवान काजे उळखणे नी हींडतेला, भगवान बी तीनु काजे हींद्‌रे भुंडले मनेन वजे सी रवणी देदु की चे जे कामे चे नी करनु चाहजे असला काम करने बाजी गुया।
ROM 1:29 चे आखी तरान वारलु काम नी करन्‌या ने पाप ने हाय-हाय ने कुहरायन वीच्‌यार सी भराय गुया, ने मनेन काट खुन ने झगड़ा, ने ठगणे वाळा भुंड्‌ला वीच्‌यार सी भराय गुया ने एक दीसरान चुगली करने बाजी गुया ने चे जलम दीसरान नुकसाण हवणु चाहजे करीन असात वीच्‌यार कर्‌या करे,
ROM 1:30 ने चे दीसरान असलात नाव-बद्‌दी करन्‌या, ने भगवान सी रीस करने वाळा, दीसरान अबरु लेण्‌या, ने मटाय कर्‌या, मट्‌ली-मट्‌ली आपरन्‌या, ने कुहरायन वात करने वाळा, आस्‌या-बास्‌यान हुकुम नी मान्‌या,
ROM 1:31 डेड़-अकल्‌या, धुकु देण्‌या, दया नी करन्‌या ने दया करने मां लुला बण गुया।
ROM 1:32 चे ते भगवानेन जी रीती जाणे की असला काम करने वाळा काजे मुतेन डंड जड़से, ने आपसात असलो काम करे ने ज असला कामे करे तीनु काजे तु बेसकु वारु करीन बी कह्‌या।
ROM 2:1 हेरेसी ए दीसरान वाक नीकाळन्‌या, तु काहनु बी हय, तुसेक जपाप नी देवाये; काहाकी तु तीनी वात मां दीसरान वाक नीकाळे तीनीत वात मां तारु बी वाक छे, तेरेमां की तु तीनीत वात मां वाक नीकाळे चेत गलत काम करे।
ROM 2:2 काहाकी आपणु काजे मालम छे की छाचला-छाचला गलत काम करने वाळा पर भगवान भीणी सी छाचला-छाचला टेम मां डंडेन हुकुम जड़से।
ROM 2:3 ए माणुस, तु ज असला-असला गलत कामे करने वाळान वाक नीकाळे ने आपसुत असला गलत काम करे; ती तु ज समजी र्‌यु काय की मे भगवानेन नीयावेन डंड सी बची जायस?
ROM 2:4 काय तु भगवानेन भलाय, ने तेरो सहणु, तेरी सेण काजे असलुत समजी र्‌यु काय? ने तुसेक जी वात नी समज मां आवती काय की तेरी मट्‌ली दया पाप भीणी सी मन फीरावणे करीन सीकाड़े?
ROM 2:5 बाकुन तु आपणा काठला ने कदी नी पसतावु करने वाळा मनेन वजे सी हेरे रीसेन दाहड़ा वाटे, तेरेमां भगवानेन छाचला नीयाव आवसे, तारे वाटे रीस कमाय र्‌यु।
ROM 2:6 चु एक-एक काजे तींद्‌रा कामेन अनसारे बदलु आपसे।
ROM 2:7 जे भगवान काजे वारु गमे असो काम काठु रवीन सेक-सींगार, ने आव-भाव, ने अमरेन जीवन काजे हेरसे, तीनु काजे चु जलमेन जीवन आपसे;
ROM 2:8 बाकुन जे झगड़ा वाळा छे ने छाचाय काजे नी माने बाकुन पाप जाणे हींद्‌रे पर रीस लागसे।
ROM 2:9 दुख ने गरा एकेक माणसेन जीव पर चे भुंडात काम करे तींद्‌रे पर आवसे, पेहेल यहुदी पर अळतेन नी-यहुदी पर;
ROM 2:10 बाकुन सेक-सींगार ने आव-भाव ने वारलु सांती एकेक काजे जड़से, जे वारु करसे, पेहेल यहुदी काजे अळतेन नी-यहुदी काजे।
ROM 2:11 काहाकी भगवान काहनान बी छीट राखीन कुयन नीयाव नी करे।
ROM 2:12 हेरेसी जीनु काजे मुसान साहरे लिखलु कायदु नी जड़्‌यु, पाप कर्‌या चे मुसान साहरे लिखला कायदा पाखुर सरी जासे; ने जीनु काजे मुसान कायदु जड़्‌यु ने पाप कर्‌या, तीनु काजे कायदान अनसारे डंड जड़से;
ROM 2:13 काहाकी भगवानेन चां मुसान साहरे लिखला कायदा काजे सामळने वाळा वारलु नी, बाकुन मुसान साहरे लिखला कायदा पर चालने वाळा वारलु ठेहरायसे।
ROM 2:14 अळतेन जत्‌यार नी-यहुदी तींद्‌रे धड़े मुसान साहरे लिखली सास्‌तुर नी हय, तेबी वारु मन सी मुसान साहरे लिखला सास्‌तुरेन वात पर चाले, ती कायदु हींद्‌रे धड़े नी रवे तेबी चे तींद्‌रे वाटे आपसान कायदु छे।
ROM 2:15 चे कामेन साहरे ने चां कायदा लिखला देखाड़े ने तींद्‌रो हीयो मन गवा देय, ने हींद्‌रा वीच्‌यार एक दीसरा पर गुनु लागाड़े, नीते हीनुक नी-गुनावाळा ठेहरावे;
ROM 2:16 जी खुस-खबर मे सामळावो तीनी खुस-खबरेन अनसारे ईसु मसीन साहरे भगवान तीने दाहड़े माणसेन सातायला वातेन नीयाव करसे।
ROM 2:17 कदी तु आपसा काजे यहुदी कहें, ने कायदा मां भुरसु करे, ने तु तारा भगवानेन बारामां मटाय करे,
ROM 2:18 ने भगवानेन मरजी काजे जाणे ने कायदान सीकाड़नेन वात काजे वारु-वारु वात काजे पाळे;
ROM 2:19 ने आपसा पर भुरसु करे की मे आंदळा काजे वाट देखाड़्‌यु, ने आंदारला मां भटकी रवला माणसे काजे वीजाळो आपलु छे,
ROM 2:20 ने डेड़-अकल्‌या काजे सीकाड़ने वाळु, ने पुर्‌या-पारी काजे सीकाड़न्‌यु छे; ने अकल, ने छाचाय सीकाड़नेन वात, जी कायदा मां छे, ची मेसे काजे जड़ली छे।
ROM 2:21 हेरेसी वीच्‌यार कर तु दीसरा काजे सीकाड़े, ती आपसा काजे नी सीकाड़े काय? तु जु चुरी नी करनु करीन परचार करु, ने आपसात चुरी करे?
ROM 2:22 तु ज कहें, “छीनाळो नी करनु” काय आपसु छीनाळो नी करतु काय? तु जु मुरत्‌या सी रीस करे, काय आपसुत मंदीरेन धन काजे नी लुटे काय?
ROM 2:23 तु जु मुसान कायदान बारामां मटाय ते करे, कायदा काजे तुड़ीन भगवानेन बदनामी काहा करे?
ROM 2:24 “काहाकी तुंद्‌रे वजे सी नी-यहुदी मां भगवानेन नावेन वाक वाळा हय रया।” जसों लिखलो बी छे।
ROM 2:25 कदी तु मुसान साहरे लिखला कायदा पर चाले ती ते फतरी काटाड़ने सी नफु हवसे, बाकुन कदी तु मुसान साहरे लिखला कायदा पर नी चाले, ती फतरी काटाणे सी काय बी नफु नी हवे।
ROM 2:26 हेरेसी कदी फतरी काटे पाखुर माणसे मुसान साहरे लिखला कायदान रीती काजे पाळे ती भले चु फतरी काटाड़्‌यु तेबी चु फतरी काटाड़न्‌या मां नी गीणाये काय?
ROM 2:27 ने चु माणुस डील मां फतरी नी काटाड़्‌यु ने मुसान साहरे लिखला कायदु पाळी र्‌यु, चु तुसे काजे गुनाळु ठेहरावसे भले तारे वाटे मुसान साहरे लिखला कायदा छे, काहाकी तु मुसान साहरे लिखला कायदा पर नी चालतु?
ROM 2:28 जे बाहार सी यहुदी छे, चे छाचलीन यहुदी नी हय ने डीलेन फतरी काटाड़े छाचलीन फतरी काटाड़न्‌यु नी हय।
ROM 2:29 बाकुन खास यहुदी हयुत छे जु मन मां यहुदी छे, ने फतरी काटाड़्‌लु हयुत छे जु मन मां ने जीव-आत्‌मा मां छे ने चु लिखली वातेन अनसारे फतरी काजे काटाड़लु बी नी हय, बाकुन असली ईज्‌जत माणसे काजे माणुस भीणी सी ईज्‌जत नी जड़े बाकुन भगवान भीणी सी ईज्‌जत जड़े।
ROM 3:1 अळतेन यहुदी बन्‌ने सी काय फायदु ने नीते फतरी काटणे सी काय नफु?
ROM 3:2 आखे आन्‌गे सी बेसकु फायदु पेहेल ते ज की भगवानेन बुल तीनु काजे सुपलु हतलु।
ROM 3:3 कदी हींद्‌रे मां भुरसु नी करे असला बी नीकळी जाय ती काय हय गुयो? काय हींद्‌रे भुरसा मां धुकु देणे सी भगवानेन छाचाय फालतु हय जासे काय?
ROM 3:4 कदी नी बाकुन भगवान छाचलु रवसे ने आखा माणसे लुच्‌चा रवसे, जसों लिखलो छे, “तेरी तु आपणी वात मां वारलु छे ने नीयाव करनेन टेम मां तु छाचलु छे।”
ROM 3:5 हेरेसी कदी आपणु जे भुंडो काम करजे चे भगवानेन धरम काजे पाक्‌को करे, ती आपणु काय कहंजे? काय ज की भगवान जु रीस करे नीयाव नी करन्‌यु छे काय? ज ते माणसेन रीत पर कय र्‌यु।
ROM 3:6 कदी नी नीते भगवान कसु कळीन नीयाव करसे?
ROM 3:7 कदी मारा झुटेन वजे सी भगवानेन छाचाय हेरे सेक-सींगार वाटे, जादा करीन उजेंतु हवे ती पेहेल काहा तु पापी छे करीन मारु नीयाव हवे?
ROM 3:8 “हामु काहा नाव-बद्‌दी नी करजे की भलाय नीकळे?” जसों हामरे पर जु वाक नीकाळी बी र्‌या, ने काहानाक कहें की हींद्‌रो जत कहंणु छे। बाकुन असलात गुनु लागाड़नु वारु छे?
ROM 3:9 ती पछेन काय हयो? काय आपणु हींद्‌रे सी वारलु छे? कदी नी; काहाकी आपणु यहुदी ने नी-यहुदी दुयु पर गुयु गुनु लागाड़ी देदला छे की चे आखा ने आखा पापेन हक मां छे।
ROM 3:10 जसों लिखलो छे: “कुय बी वारलु नी हय, एक बी नी हय।
ROM 3:11 कुय बी समजदार नी हय; कुय बी भगवान काजे हेरने वाळु नी हय।
ROM 3:12 आखा भटकी गुयला छे, आखान आखा बीगड़ी गुयला छे; कुय बी भलाय करने वाळु नी हय, एक बी नी हय।
ROM 3:13 तींद्‌रु गळु मसाणेन तसु छे, चे आपणा जीप्‌या सी झगड़ा करे, हींद्‌रा हुटड़ा मां घड़सान जहर भरलु छे।
ROM 3:14 हींद्‌रो मुंहडो रीस ने कड़वान सी भरायलो छे।
ROM 3:15 हींद्‌रा पाय माणसे काजे मारीन खुन करने उतवाळा रवे,
ROM 3:16 हींद्‌रे वाट मां नुकसाण ने दुख छे,
ROM 3:17 चे सांतीन वाट नी जाणे।
ROM 3:18 हींद्‌रा डुळा अगळ भगवान काजे देखीन बी नी बीहे।”
ROM 3:19 हामुक मालम छे की मुसान कायदु जु काय कहें तींद्‌रे सी कहें, जे मुसान कायदान हक मां छे; हेरेसी एकेक जणान मुंहडो बन्‌द हय जाणु चाहजे ने आखी कळी भगवानेन डंडेन वाटे रवे;
ROM 3:20 काहाकी मुसान कायदान काम सी कुय जीव बी हेरे अगळ वारलु नी गीणाये, हेरेसी की मुसान कायदान साहरे पापेन उळखान हवे।
ROM 3:21 बाकुन हय मुसान कायदा सी अलग भगवानेन चु वारलु उजेंतु हयु, की तेरी गवाय मुसान कायदु ने भगवानेन अघी सी आवणे वाळी वात देखाड़न्‌यान देय,
ROM 3:22 ने भगवानेन चु धरम ज्‌य ईसु मसी पर भुरसु करने सी आखा भुरसु करने वाळा वाटे छे। काहाकी काय बी छीट नी हय;
ROM 3:23 हेरेसी की आखान ने आखा पाप कर्‌या ने भगवानेन सेक-सींगार सी छेटे हय गुया,
ROM 3:24 बाकुन भगवानेन गीण-दया सी तीना छुटकारान साहरे ज ईसु मसी मां छे, फेरी मां वारलु ठेहरावलु छे।
ROM 3:25 ईसु मसी काजे भगवान लुही सी पापेन डंड भरन्‌यु बणाय देदु, ने ईसु पर भुरसु करने सीत आपणु काजे छुटकारु जड़े, जे माणसे पाप पेहेल करला ने भगवान तींद्‌रा पाप काजे सेण करतु र्‌यु ने तींद्‌रा चु ईसुन साहरे आपसान धरम उजेंतु कर्‌यु।
ROM 3:26 बाकुन ईनेत टेमे तेरु धरम उजेंतु हवे तेरेसी चु आपसुत वारलु गीणायसे, ने जे ईसु पर भुरसु करे तीनु काजे बी वारलु बणावसे।
ROM 3:27 ती मटाय करनु काहा र्‌यो? हेरी ते जागा नी हय। काहानी मुसान कायदान वजे सी? काय वारलु करने मुसान कायदा सी? नी बाकुन भुरसान कायदान वजे सी।
ROM 3:28 हेरेसी कुय माणुस मुसान कायदान कामेन अनसारे चालीन नी, बाकुन भुरसान साहरे धरमी बण सके।
ROM 3:29 काय भगवान यहुदीयान अतरुत छे काय? काय नी-यहुदीन नी हय? हव नी-यहुदीन बी छे।
ROM 3:30 काहाकी एकुत भगवान छे, जु फतरी काटाण्‌या काजे भुरसा सी ने नी फतरी काटण्‌या काजे बी भुरसान साहरे वारलु ठेहरावे।
ROM 3:31 ती काय आपणु मुसान साहरे लिखला कायदा काजे भुरसान साहरे फालतु ठेहरावजे? कदी नी बाकुन मुसान साहरे लिखला कायदा काजे जादा ताकतवाळु बणावे।
ROM 4:1 तेरेमां हामु अब्‌राहमेन बारामां काय कहंजे जु डीलेन अनसारे हामरु डाहालु हतलु तीनाक काय जड़्‌यो?
ROM 4:2 काहाकी कदी अब्‌राहमेन काम सी धरमी गीणायतु, ती तीनाक मटाय करनेन जागु रवतु, बाकुन भगवान अगळ तीनाक मटाय करनेन गाळु नी हय।
ROM 4:3 चुखलो सास्‌तुर काय कहें? ज्‌य की, “अब्‌राहम भगवान पर भुरसु कर्‌यु, ने जु भुरसु तेरे वाटे वारलु गीणायु।”
ROM 4:4 काम करने वाळान दाहड़की आपणु दान नी, बाकुन हक गीणाये।
ROM 4:5 बाकुन जु काम करनु रवणी दीन तीना भगवान पर भुरसु करे, चु पापी काजे वारलु गीणे, ती तेरु भुरसुत तेरे वाटे वारलु गीणायसे।
ROM 4:6 ईनी भाती दावुद हीना माणुस काजे वारु कह्‌वे, तीनाक भगवान काम करे पाखुर वारलु बणावे:
ROM 4:7 “वारु छे चु, तेरु पाप माफ हय गुयु, ने तेरा पाप ढाकाय गुया।
ROM 4:8 वारु छे चु माणुस तीनाक भगवान पापी नी कहें!”
ROM 4:9 ती ज्‌य वारु बुल, काय फतरी काटाड़न्‌या नीते फतरी नी काटाड़्‌या हींद्‌रे वाटे बी? हामु ज्‌य कहंजे, “अब्‌राहम हेरा भुरसान साहरे खरलु धरमी गीणायु।”
ROM 4:10 ती चु वारलु कसु गीणायु? फतरी काटाड़लु ती, की फतरी नी काटाड़्‌यु ती वारलु गीणायु; बाकुन चु ते फतरी काटे पाखुर वारलु गीणायलु।
ROM 4:11 ने अळतेन चु भुरसान साहरे धरमी गीणायलु छे ज्‌य देखणे करीन सहलाणी वाटे फतरी काटाड़्‌यु, पेहल चु फतरी काटे पाखुर भगवान पर भुरसु करलु हतलु। ने असु करीन चु अब्‌राहम तीनु आखान बास गीणाये;
ROM 4:12 ने असु करीन चु फतरी नी काटाड़े तींद्‌रु बास गीणायु, जे अब्‌राहमेन तसा भगवान पर भुरसु करीन जीवे, तसु अब्‌राहम बी फतरी काटाड़े पाखुर पेहेल भगवान पर भुरसु करतेलु।
ROM 4:13 काहाकी भगवान अब्‌राहम ने अब्‌राहमेन अवल्‌यात काजे वायदु करलु की चे कळीन हकदार्‌या बणसे। अब्‌राहम कायदाक मान्‌यु करीन भगवान असु वायदु नी कर्‌यु, बाकुन चु भुरसु कर्‌यु करीन भगवान हीनाक धरमी गीणायु।
ROM 4:14 काहाकी कदी मुसान कायदा पाळन्‌यात वायदान जागु हात मां करसे, ती ते भुरसु करने सी काय फायदु नी हय ने भगवानेन वायदु करली वात बी फालतु हय गुय।
ROM 4:15 मुसान कायदु ते भगवानेन रीस काजे उबजाड़े ने चां कायदु नी हय, चां कायदु तुड़नेन वात नी आवे।
ROM 4:16 भगवानेन वायदु भुरसान फळ छे ने ज असोत जड़े। तीने रीते तेरा बुले अब्‌राहमेन आखा वाटे ते चेत, ने जे नीयम काजे माने तींद्‌रे वाटे नी बाकुन तीनु आखा वाटे बी जे अब्‌राहमेन तसा भुरसु राखजे। चु हामरु आखान भगवान बास छे। तेरेमां ज पाक्‌को छे
ROM 4:17 जसों की लिखलो छे, “मे तुसे काजे बेसका माणसेन बास ठेरावलु छे।” भगवानेन नींगा मां अब्‌राहम हामरु बास छे। अब्‌राहम भगवान पर भुरसु कर्‌यु, जु भगवान मरला काजे जीवाड़े ने जे हय नी तीनु काजे बी घड़ीन उबजाड़े।
ROM 4:18 अब्‌राहम नीरासेन दाहड़ाम बी आस राखीन भुरसु कर्‌यु ने चु बेसकी जातीन माणसेन बास बण गुयु, जसों तीनाक कहंलो हतलो की तारा गीणाये नी अतरा माणसेन बास हवसी।
ROM 4:19 अब्‌राहम भुरसा मां पाक्‌कु बणीन रयु ने असु जाणतेलु तेबी की हेरो डील सोव सालेन हय गुयली छे ने सारान पुर्‌या नी हवतेला।
ROM 4:20 भगवानेन वायदा पर भुरसु बणायन राख्‌यु अतरुत नी भुरसा काजे काठु करतु जाय्‌न भगवानेन सेक-सींगार कर्‌यु।
ROM 4:21 तीनाक पाक्‌कु भुरसु हतलु की भगवान तीनी वातेन वायदु करलु छे, चु तीनाक पुरु करीन छुड़से।
ROM 4:22 हेरे वजे सी भगवान अब्‌राहम काजे खरलु धरमी।
ROM 4:23 ने गुयु बुल की भुरसुत तेरे वाटे धरम गीणायु, तेरे वाटे अतरुत नी
ROM 4:24 बाकुन आपणे वाटे बी लिखलो छे। आपणु बी भुरसा सी वारलु गीणायसुन। काहाकी आपणु तीना भगवान पर भुरसु करजे, जु मालीक ईसु काजे मरलाम सी जीवाड़लु छे।
ROM 4:25 हयुत ईसु आपणात पाप गुनान करता मरणे करीन धराय गुयु ने आपणुक वारलु बणावणे करीन मरलाम सी जीवतु हय्‌न बठु बी हय गुयु।
ROM 5:1 जत्‌यार आपणु भुरसा सी वारलु बण्‌या, ती आपणा मालीक ईसु मसीन वजे सी भगवान साते आपणु सांती मां हय गुयला छे,
ROM 5:2 ईसु मसी आपणे वाटे तीनी गीण-दयान बारनो उघाड़ देदलु छे जी आपणुक जड़ गुयलो छे, आपणु ईनी वात पर मटाय करजे की आपणुक भगवानेन सेक-सींगारेन आस पर मटाय करजे।
ROM 5:3 अतरोत नी, आपणु दुख पर बी खुस हवजे, काहाकी आपणु जाणजे की दुखुत आपणुक गम खाण्‌या बणावे,
ROM 5:4 ने दम धरीन खरा नीकळनु, ने खरा नीकळने, सी आस उबजे।
ROM 5:5 ने आस सी लाज नी आवे, काहाकी भगवान आपणुक चुखली-आत्‌मा आपलु छे ने हेरेत वाटे भगवान परम आपणा मन मां भरलु छे।
ROM 5:6 काहाकी जत्‌यार आपणु लुला हतला, तत्‌यार तीनेत टेमे ईसु मसी आपणे वाटे मर गुयलु।
ROM 5:7 कुय वारलु माणुस वाटे जीव आपणे तीयार हय जाय, तेबी काय जाणु कुय वारलु माणुस वाटे मरने तीयार हय जाय ती हय जाय।
ROM 5:8 बाकुन जत्‌यार आपणु पापीत हतला तत्‌यार ईसु मसी आपणे वाटे मर्‌यु, असु करीन भगवान आपसान परम उजेंती कर्‌यु।
ROM 5:9 तत्‌यार आपणु ईसुन लुहीन वजे सी वारलु गीणाया; ती आपणु छाचलीन मसीन वजे सी भगवानेन रीस सी बची जासुन।
ROM 5:10 काहाकी जत्‌यार आपणु वेरी हतला तत्‌यार ईसु आपसान मुतेन साहरे भगवान साते आपणु मेळ कराड़ देदु, ती हय ते आपणु मेळ भगवान साते हय गुयु। ती तेरा पुर्‌यान जीवन वाटे आपणुक छुटकारु नी जड़े काय? छुटकारु जड़से ने जड़से।
ROM 5:11 अतरोत नी, बाकुन हय ते आपणा ईसु मसीन साहरे भगवान साते आपणु मेळ हय गुयलु छे, अतरा मां आपणु हेरे साहरे भगवान पर भुरसु राखीन खुस छे।
ROM 5:12 तेरेमां एकुत अदमीन वजे सी कळी मां पाप आयु, ने पापेन वजे सी मुत आवी। ईनी वजे सी मुत आखा माणसे मां फेली गुय, काहाकी आखात पाप करला छे।
ROM 5:13 भगवान मुसा काजे कायदु नी आप्‌यु तेरेसी पेहेल सी पाप ईनी कळी मां हतलु बाकुन कायदु नी हतलु अतरे कायदान कसर मां पापेन हीसाब नी लेवायतेलु।
ROM 5:14 तेबी आदम सी मुसा लग मुत तीनु माणसे पर बी राज करती रय जे आदमेन तसा काहनाक हुकुम तुड़नेन साहरे पाप नी करला। आदम आवणे वाळा छुटकारु आपण्‌या ईसुन सहलाणी हतलु।
ROM 5:15 बाकुन जसों गुनान नेम छे असीत गीण-दया वाटु नी हय काहाकी जत्‌यार एक माणुसेन गुना सी बेसका माणसे मरे ती भगवानेन गीण-दया ने तेरो ज्‌य दान एक माणसेन मतलब ईसु मसीन गीण-दया सी हयो बेसका माणसे पर हयो ने वारु हयो
ROM 5:16 ने जु फुटक्‌यु वाटु एकुत माणसेन पाप गुनान मुतेन फळेन तसु नी हय काहाकी एकुत जणु पाप कर्‌यु ने पापेन डंडेन दाहड़ु टाकाय गुयु बाकुन बेसका पाप करने सी असु फुटक्‌यु वाटु पयदा हयु की बेसका माणसे धरमी बण जासे।
ROM 5:17 काहाकी कदी एकुत माणसेन पापेन वजे सी मुत राज करने झुम गुय ती जे माणसे गीण-दया ने धरमेन फुटक्‌यु वाटु बेसकु हात करे चे एकुत माणसेन मतलब ईसु मसीन साहरे छाचलीन जलमेन जीवाय मां राज करसे।
ROM 5:18 तेरेमां जसों एकुत जणान पापेन वजे सी आखा गुनाळा गीणाया तसोत एकुत जणान धरमेन कामेन वजे सी आखा काजे अमरकाय जीवन आपण्‌यु धरमेन वाटु जड़ गुयु।
ROM 5:19 काहाकी जसु एक माणुस हुकुम नी पाळ्‌ने सी आखा पापी बण गुया तसात एक माणसेन हुकुम पाळने सी आखा धरमी बण जासे।
ROM 5:20 ने मुसा साहरे लिखलु कायदु ईचमां आय गुयु ने माणसेम पाप जादात हवणे बाजी गुयु। बाकुन चां गुनु जादा हयु ती गीण-दया बी जादात वदती गुयु।
ROM 5:21 जसु पाप मुत लावतु जाय्‌न राज कर्‌यु तसोत आपणा मालीक ईसु मसीन साहरे गीण-दया बी जलमेन जीवन वाटे माणसेक वारलु ठहरावीन राज करती जाय।
ROM 6:1 आपणु काय कहजे? आपणु पाप करतात रवजे काय? की भगवानेन गीण-दया आपणे पर हवतीत जासे।
ROM 6:2 कदी नी हामु जे पाप वाटे मर गुयला छे ती पाप मां कसा जीवसुन?
ROM 6:3 काय तुहुं नी जाणु काय की ईसु मसीन ज बपतीस्‌मा आपणु आखा काजे जड़लो छे चो बपतीस्‌मा तेरे जाण देनेन बपतीस्‌मा छे।
ROM 6:4 अतरामा आपणु ईसुन मुतेन बपतीस्‌मा लीन ईसु साते तेरेमां गाड़ाय गुया की जसों ईसु मसी बासेन सेक-सींगारेन ताकत साते मरलाम सी जीवतु हय्‌न बठु हय गुयला छे। तसात आपणु बी एक नवली जीवन जीवजे।
ROM 6:5 काहाकी कदी आपणु हेरे मरनेन तसात हेरे साते एक हय गुयला छे, ती छाचलीन हीनाक मरलाम सी जीवतु हवणेन तसात एक हय जासुन।
ROM 6:6 आपणुक मालम छे की आपणी जुन्‌डलो जीवन ईसु साते कुरुस पर चड़ाय गुयलो हतलो काहाकी पाप सी भरायलो आपणो डील खत्‌तम हय जाय ने आपणु अगा वाटे पापेन गुलाम नी बणजे।
ROM 6:7 काहाकी जु मर गुयलु छे, चु पापेन गुलामी सी छुटीन धरमी बण गुयलु छे।
ROM 6:8 तेरेमां कदी आपणु ईसु मसी साते मर गुयला छे, ती आपणुक भुरसु छे तेरे साते नवली जीवन बी जीवसुन।
ROM 6:9 काहाकी आपणु जाणजे की ईसु मसी मरलाम सी जीवतु हवीन पछु कदी नी मरे। ने तेरे पर मुतेन हक नी चाले।
ROM 6:10 काहाकी चु मर गुयु ती पापेन करता एकुत कावा मर गुयु; बाकुन हय चु भगवान साते जीवणे करीन जीवतेलु छे।
ROM 6:11 असात तुहुं बी आपणा जीव काजे पाप वाटे मरला समजु बाकुन भगवान वाटे ईसु मसी मां जीवतेला समजु।
ROM 6:12 तेरेमां तुंद्‌रे मरला डीलेन उपर पापेन, राज नी चाले काहाकी तुहुं पापेन मरजी पर कदी नी चाल सकु।
ROM 6:13 ने तुहुं तुंद्‌रा डील काजे धरमेन काम नी करन्‌यान हत्‌यार बणावीन पाप काजे मां आपु, बाकुन आपणु काजे मर्‌या-सर्‌याम सी जीवता हय्‌न बठा हय गुया समजीन भगवानेन हातेम सुप देवु, ने आपणा डील काजे धरमेन काम करनेन हत्‌यार समजीन भगवान काजे सुप देवु।
ROM 6:14 तत्‌यार तुंद्‌रे पर पाप राज नी करे काहाकी तुहुं मुसान कायदान हक मां नी हय, बाकुन गीण-दया हक मां छे।
ROM 6:15 ती काय हय गुयो? आपणु अतरामा पाप करता रहणु चाहजे, की आपणु मुसान लिखला कायदान हक मां नी हय, बाकुन गीण-दया हक मां छे? नी कदी बी पाप नी करनु चाहजे।
ROM 6:16 तुहुंक जी वात मालम नी हय काय, की तेरी तुहुं हुकुम मान्‌ने करीन तेरा हातेम खुद काजे सुप देवु तुहुं तेरात गुलाम पावर्‌या बण जाय, भले पापेन हातेम आपीन पापेन गुलाम बणु, तेरो फळ मुत छे भले भगवानेन हुकुम मानीन तेरा हातेम सुप देवु, तेरो फळ अमरकाय धरम छे।
ROM 6:17 बाकुन भगवान काजे तु बेसकु वारु छे कहं की तुहुं पेहेल पापेन गुलाम हतला तुहुं आपणा मन सी हीनु सीकाड़नेन रीती काजे मान्‌या जी तुहुं काजे आपली हतली।
ROM 6:18 ने हय तुहुं पापेन गुलामी मां सी छुटीन धरमेन गुलाम बण गुयला छे।
ROM 6:19 तुंद्‌री डीलेन लुलायन वजे सी माणसेन रीत पर कहं। जसा तुहुं आपणे भाग काजे वीटळो धरने पापेन गुलाम करीन सुपलु हतलु, असात हय आपणे भाग काजे चुखला वाटे धरमेन गुलाम करीन सुप देवु।
ROM 6:20 जत्‌यार तुहुं पापेन गुलाम हतला, ती भगवानेन धरम भीणी सी तुहुं छुटला हतला।
ROM 6:21 तीनी वात सी तुहुं लाजवाय रया, ती पेहेल तुहुंक तीनी वात सी काय फायदु हवतेलु? काहाकी तेरो आकरी फळ ते मरनु छे।
ROM 6:22 बाकुन हय पाप सी छुटीन भगवानेन गुलाम पावर्‌या बणीन तुहुंक ज फळ जड़लो छे की तुहुं चुखला बणु, ने आकरी मां जलमेन जीवन हात करनु छे।
ROM 6:23 काहाकी पापेन दाहड़की ते मरनु छे, बाकुन भगवानेन दानेन वाटु आपणा मालीक ईसु मसी मां जलमेन जीवन छे।
ROM 7:1 ए भायसे, मे मुसान लिखला कायदा काजे जाणन्‌या काजे कहं, की जत्‌यार लगुन माणुस जीवतेलु रवे, तत्‌यार लगुन तेरे पर मुसान लिखला कायदान कब्‌जु रवे।
ROM 7:2 काहाकी ईयाव करली बायरी मुसान साहरे लिखला कायदान अनसारे धेणी जत्‌यार लगुन जीवतेलु रवे, तत्‌यार लगुन ईयावेन नेम मां बांदायली रवे। बाकुन जत्‌यार धेणी मर जाय ती ची आपणा धेणीन हक मां सी छुट जाय।
ROM 7:3 तेरेमां कदी चु अदमी जीवतेलु रवे ने अळी ची दीसरु अदमी कर लेय, ती छीनाळी कहंवायसे; बाकुन कदी तेरु धेणी मर जाय, ती ची ईयावेन कायदा सी छुट जाय, जां लग की ची कदी दीसरु अदमी बी कर लेय, तेबी छीनाळी नी कह्‌वाये।
ROM 7:4 असात ए मारा भायस्‌यो ने बहणीस्‌या, तुहुं बी ईसु मसीन डीलेन वाटे मुसान कायदान वाटे मरला तसा हय गुयला छे, ने भगवान वाटे फळ लावणे करीन तुहुं तीना दीसरान बण गुयला छे, चु मरलाम सी जीवतु हय्‌न बठु हय गुयलु छे।
ROM 7:5 काहाकी जत्‌यार आपणु डीलेन अनसारे जीवतेला ती पापेन हर कायदान वीरुद मां आपणा जीवे मां काम करतेली, ने आपणा डील पर कब्‌जु कर रवली। तेरेसी आपणु दाहड़ीन मुत भीणी जातला।
ROM 7:6 बाकुन तेरा कब्‌जा मां आपणु हतला, तेरे वाटे आपणु मर गुयला छे, हय आपणु पाप काजे उजेंती करन्‌या मुसान साहरे लिखला कायदा सी छुट गुया, जे मुसान कायदा ते जुन्‌डली रीत छे, आपणु ईनी जुन्‌डली रीतीन अनसारे नी, बाकुन चुखला आत्‌मान नवली रीतीन अनसारे भगवानेन सेवा करजे।
ROM 7:7 काय हेरो मतलब ज्‌य छे की कायदु पाप छे? कदी नी तेबी कायदान साहरेत पापेन पतु चाल्‌यु कदी कायदु नी कवतु लालुच घुण करे ती मे ज्‌य नी समजतु की लालुच काय छे।
ROM 7:8 बाकुन पाप मुखु देखीन कायदान हुकुमेन साहरे मारा जीवे मां आखी भातीन लालुच उबजाड़्‌यु काहाकी पेहले मुसान कायदा पाखुर पाप मरलु हतलु।
ROM 7:9 मे ते मुसान कायदु जड़ने सी पेहले जीवतेलु बाकुन जत्‌यार मुसान कायदान हुकुम आयु, ती पाप जीवतु हय गुयु, ने मे मर गुयु।
ROM 7:10 ने असु करीन जु कायदान हुकुम मारे धड़े जीवाय आपण्‌यु हतलु; हयुत कायदु हुकुम मारे धड़े मरनेन वजे बण गुय।
ROM 7:11 काहाकी पाप मुखु देखीन कायदान हुकुमेन साहरे मेसेक भंगलाड़ देदु ने हीना कायदान हुकुमेन साहरे मेसेक मार बी नाख्‌यु।
ROM 7:12 तेरेमां मुसान कायदु ते चुखलु छे, ने हुकुम बी चुखलु छे, वारु छे।
ROM 7:13 ती काय जु मुसान कायदु मारे वाटे वारु हतलु, चु मारे वाटे मरनेन वजे बण गुयु काय? कदी नी। बाकुन पाप तीना वारलु चीजेन साहरे मारे वाटे मुत काजे उबजाड़ने वाळु बण गुयु, तेरे सी पाप ते पापुत छे करीन जादास उजेंतु हय गुयु तेरेमां ईनु हुकुम सी पाप जादात पापी हय गुयु।
ROM 7:14 आपणुक मालम छे की मुसान कायदु ते जीव-आत्‌मा वाटे फायदु आपे असु छे बाकुन, ने डीलेन बणलु माणुस छे, जु पापेन गुलामी करने पापेन हातेम वेचायलु छे।
ROM 7:15 ने मारा डील मां मे ज करो, चत मेसेक मालम नी हय, काहाकी ज करनेन मारी हर छे, च मे नी करो, बाकुन तेरे सी मे छीट करो चत काम कर्‌या करो।
ROM 7:16 ने कदी मेसे ज नी गमे चत करो ती मे जी वात मान लम की मुसान कायदु बेसकु वारु छे।
ROM 7:17 ती असो गलत करन्‌यु मे नी हय, बाकुन पाप छे जु मारा डीलेम बस र्‌यु।
ROM 7:18 काहाकी मेसेक मालम छे की मारेम मतलब मारा डील मां काहनी बी वात वारु नी हय, वारलु करनेन मारी हर ते छे, बाकुन भलो काम मारे सी नी बणे।
ROM 7:19 काहाकी ज वारलु काम करनेन हर करे, च ते नी करु, बाकुन जी कुहराय मे नी करने हींडे, चीत कुहराय मे कर्‌या करो।
ROM 7:20 बाकुन कदी मे चत करो, ज करनेन मे हर नी करो, ती च करने वाळु मे नी हय, बाकुन पाप छे जु मार डील मां बस र्‌यु।
ROM 7:21 अतरा मां मे मारा डील मां जु मुसान साहरे लिखला कायदान देखु, की मे जी भलाय करनेन हर कर र्‌यु, ती कुहराय मार धड़े आवे।
ROM 7:22 काहाकी मे मारा जीव मां ते मुसान साहरे लिखला भगवानेन कायदा सी बेसकु खुस रवे।
ROM 7:23 बाकुन मेसेक मारा डील मां एक दीसरु भात्‌यु कायदु देखाव पड़ र्‌यु, जु मारी अकलेन कायदा साते लड़ाय करे, ने मेसेक पापेन कायदान कब्‌जा मां करने हींडे जु मारा डीलेम छे।
ROM 7:24 मे बेसकु दुखी माणुस छे! ईना मुतेन हक मां रवणेवाळा डील सी मेसेक कुण छुड़ावसे
ROM 7:25 मे आपणा मालीक ईसु मसीन साहरे मे भगवान काजे तु बेसकु वारु छे करीन कह्‌वो! असु करीन मे आपसुत ते अक्‌कल वाटे भगवानेन कायदाक पाळ, बाकुन डीलेन नीयमेन अनसारे पापेन कायदान सेवा कर र्‌यु।
ROM 8:1 हेरेसी हय जे ईसु मसी मां छे, तींद्‌रे पर गुनान डंडेन हुकुम नी हय। काहाकी चे डीलेन अनसारे नी बाकुन आत्‌मान अनसारे चाले।
ROM 8:2 काहाकी जीवनेन आत्‌मान कायदु ईसु मसी मां पाप भीणी सी ने मुतेन कायदा मां सी छुड़ाय देदलु छे।
ROM 8:3 काहाकी ज काम कायदु डीलेन वजे सी हय नी कर सक्‌यु, तीना काजे भगवान पुरो कर्‌यु, मतलब आपणा पुर्‌या काजे पापेन डीलेन तसु ने पापेन बादान सीका मां मकल्‌यु, डील मां पाप पर डंडेन हुकुम आप्‌यु।
ROM 8:4 हेरेसी मुसान साहरे लिखला कायदान रीती काजे आपणे मां सी जे डीलेन अनसारे नी बाकुन आत्‌मान अनसारे चाले, ची पुरी करसे।
ROM 8:5 काहाकी डीलेन अनसारे चालन्‌यु माणुस डीलेन वात पर मन लागाड़े; बाकुन चुखला आत्‌मान अनसारे जीवण्‌यु माणुस आत्‌मा वात पर मन लागाड़े।
ROM 8:6 डील पर मन लागाड़नु ते मुत छे, बाकुन आत्‌मा पर मन लागाड़नु जीवन ने सांती छे;
ROM 8:7 काहाकी डील पर मन लागाड़नु ते भगवान सी नाव-बद्‌दी राखणु छे, काहाकी नीते चु भगवानेन कायदान कब्‌जा मां छे ने नी हय सके;
ROM 8:8 ने जे माणसे डीलेन अनसारे जीवन जीवे, चे भगवान काजे खुस नी कर सके।
ROM 8:9 बाकुन जत्‌यार भगवानेन आत्‌मा तुंद्‌रे मां बसली छे, ती तुहुं डीलेन अनसारे चालु बाकुन आत्‌मान हक मां चालन्‌या बणु। कदी काहनाक मां मसीन आत्‌मा नी हय ती चु मसी मां नी हय।
ROM 8:10 कदी मसी तुंद्‌रे मां छे, ती डील पापेन वजे सी मरलो छे, बाकुन आत्‌मा धरमेन वजे सी जीवतेलु छे।
ROM 8:11 कदी हेरीत आत्‌मा ज ईसु काजे मरलाम सी जीवाड़्‌यु, तुंद्‌रे मां बसलु छे; ती जु मसी काजे मरला मां सी जीवाड़्‌यु, चु तुंद्‌रो मरन्‌या डील काजे बी आपणी आत्‌मान साहरे ज तुंद्‌रे मां बसलु छे, च जीवाड़से।
ROM 8:12 हेरेसी ए भायसे, आपणु डीलेन करजा वाळा नी हय की हामु डीलेन अनसारे जीवन नी जीवणु चाहजे,
ROM 8:13 काहाकी कदी तुहुं डीलेन अनसारे जीवन जीवसु ती मरी जासु, कदी आत्‌मा सी डीलेन हर काजे मारसु ती जीवतेला रवसु।
ROM 8:14 हेरेसी जतरा माणसे भगवान आत्‌मान साहरे चालसे, चे भगवानेन पुर्‌या छे।
ROM 8:15 काहाकी तुहुं काजे गुलामी कराड़ने वाळी आत्‌मा नी जड़ी की तुहुं अळी बीहणे बाजी जावु, बाकुन खुळे-लेणी आत्‌मा जड़ली छे, तेरी सी आपणु भगवान काजे ए बास, कह्‌वीन आयड़जे।
ROM 8:16 आत्‌मा आपसीत हामरी आत्‌मा साते गवाय देय, की आपणु भगवानेन अवल्‌यात छे;
ROM 8:17 ने कदी अवल्‌यात छे ती जागरीन हकदर्‌या बी छे, बाकुन भगवानेन जागरी ने मसी साते ने तेरी जागरीन हकदर्‌या छे, जत्‌यार आपणु मसी साते दुख झेलसुन ती तेरे साते सेक-सींगार मां हय्‌न जासु।
ROM 8:18 काहाकी मे समजो की ईनी टेमे दुख ने वेला आवणे वाळी टेमे हामरे पर उजेंता हवणे वाळा सेक-सींगार अगळ, फीका छे।
ROM 8:19 काहाकी जी कळी बेसकी मटी आस करीन भगवानेन पुर्‌यान उजेंता हवणेन वाट देख रय।
ROM 8:20 काहाकी कळी आपणी मरजी सी नी बाकुन गुलाम बणावणे वाळा भीणी सी, बेकार मां गुलाम ने ईनी आस सी करली छे।
ROM 8:21 की जी कळी बी आपसीत खत्‌तम कराड़ने वाळी गुलामी मां सी छुटकारु लीन, भगवानेन अवल्‌यातेन सेक-सींगारेन छुटकारु बी हात करसे।
ROM 8:22 काहाकी आपणु काजे मालम छे की आखी कळी हय लग कासे ने वेला करीन फपड़ी रय;
ROM 8:23 ने कळी अतरीत वेला करीन नी फपड़ी रय बाकुन आपणु बी वेला कर रया जीनु काजे आत्‌मान फळ जड़लो छे, जे आपसात कास र्‌या; ने खुळे लेदला पुर्‌या बन्‌नेन, मतलब आपणा डीलेन छुटकारान वाट देख र्‌या।
ROM 8:24 ईनी आसेन साहरे आपणु छुटकारु हवलु छे; बाकुन जीनी चीजेन आपणु आस करजे, ने ची चीज देखणे मां आवे ती ची आस नी रय, काहाकी जीनी चीज काजे कुय देखणे बाजी र्‌यो हय ती चु तीनी चीजेन आस काहा करसे?
ROM 8:25 बाकुन जीनी चीज काजे हामु नी देखजे, कदी हेरीत आस राखजे, ती दम धरीन वाट बी देखजे।
ROM 8:26 ईनी रीत सी आत्‌मा बी आपणी लुल्‌गाय मां सात देय; काहाकी आपणु काजे नी मालम की दुवा काहनी रीत सी करनु चाहजे, बाकुन आत्‌मा आपसीत उसकी-उसकीन, जी आपणी समज सी बाहर हय, हामरे वाटे भगवान सी लीलघाय करे;
ROM 8:27 ने आपणा मन काजे पारखणे वाळु जाणे की आत्‌मान मरजी काय छे; काहाकी चु चुखला माणसे वाटे भगवानेन मरजीन अनसारे लीलघाय करे।
ROM 8:28 आपणु काजे मालम छे की जे माणसे भगवान सी परम करे, तींद्‌रे वाटे आखी वात मेळीन भलाय काजे उबजाड़े; मतलब हींद्‌रे वाटे जे भगवानेन अनसारे बुलावला छे।
ROM 8:29 जीनुक भगवान पेहलुत सी नेवाड़ी की हीनुक पेहलुत सी आपणा पुर्‌यान रुप मां ठेरावे काहाकी बेसका भायस मां चु आखा सी मट्‌लु भायस बण सके।
ROM 8:30 अळतेन तीनु काजे भगवान पेहलुत सी ठेहरावलु छे, तीनु काजे बुलायु बी; ने तीनु काजे बुलायु, तीनु काजे वारलु ठेहरायु, तीनु काजे वारलु ठेरायु तीनु काजे सेक-सींगार बी आप्‌यु।
ROM 8:31 अळतेन आपणु एक वातेन बारामां काय कहंजे? कदी भगवान हामरे भीणी छे, ती हामरे वीरुद कुण रवसे?
ROM 8:32 तेरेसी भगवान आपणा खुदेन पुर्‌या काजे बी नी छुड़्‌यु, ने आपणे वाटे मरणे करीन आप देदु, ती तेरे साते आपणु काजे अळी आखो काय नी आपे?
ROM 8:33 भगवानेन नेवाड़ला पर गुनु कुण लागाड़से? भगवानुत हीनु काजे नी-गुनाळा ठेहरावसे!
ROM 8:34 पछेन कुण छे जु डंडेन हुकुम आपसे? मसी ईसु छे चु मर गुयु मतलब मरलाम सी जीवतु बी हय गुयु, ने भगवानेन जेवड़े आन्‌गे छे, ने हामरे वाटे दुवा बी करे।
ROM 8:35 कुण आपणु काजे मसीन परम सी आन्‌गे करसे? काय दुख, नीते वेला, नीते काड़की, नीते काळ; नीते उघाल्‌ला नीते आफत, नीते तलवार?
ROM 8:36 जसों खरला सास्‌तुर मां लिखलो छे, “तारे वाटे हामु दाहड़ीन मुतेन हात मां आपाय जाजे; हामु ते तीनु गाडरान तसा गीणाय जाजे।”
ROM 8:37 बाकुन ईनुक आखी वात मां हामु भगवानेन साहरे जु आपणे सी परम कर्‌यु, जीत सी बी अघु छेकीन छे।
ROM 8:38 काहाकी मे छाचलीन जाणी लेदु की नी मुत, नी जीवन, नी सरग वाळा काहवाळ्‌या, नी हकदार, नी हय्‌न टेम, नी आवणे वाळी टेम, नी ताकत, नी उचाय,
ROM 8:39 नी उंडाय, ने नी कुय अळी कळी आपणु काजे भगवानेन परम सी जे आपणा मालीक ईसु मसी मां छे, आन्‌गे नी कर सके।
ROM 9:1 मे ईसु मसी मां छाचलीन कह्‌वो, मे झुट नी मेल्‌तु ने मारो मन बी चुखली-आत्‌मा मां गवा देय
ROM 9:2 की मे बेसकु दुखी छे, ने मारो मन जलम दुखतोत रवे,
ROM 9:3 काहाकी मारी जां लग हर हतली की आपणा भायसे वाटे जे डीलेन अनसारे मारा भाय-बेटा छे, मे खुद मसी सी सराप वाळु हय जातु।
ROM 9:4 चे ईस्‌रायली छे, ने खुळे लेवायणेन हक ने सेक-सींगार ने वायदु ने कायदु ने बड़ाय ने आसेन वाट देखणु हींद्‌रोत छे।
ROM 9:5 डाहा-डाहा बी हींद्‌रात छे, ने मसी बी डीलेन भावना सी हींद्‌रेत मां सी पयदा हयु। चु आखान भगवान छे ने जलम बेसकु वारु छे, असोत हवे।
ROM 9:6 बाकुन ज नी की भगवानेन बुल टळ गुयो, हेरेसी ईस्‌रायली अवल्‌यात छे, चे आखा ईस्‌रायली नी हय;
ROM 9:7 ने नी अब्‌राहमेन कुळी मां पयदा हवणेन वजे सी आखा हेरी अवल्‌यात ठेहरे, बाकुन लिखलो छे “इसाक सीत तारी अवल्‌यात कहंवायसे।”
ROM 9:8 मतलब डीलेन अवल्‌यात भगवानेन अवल्‌यात नी, बाकुन वायदान अवल्‌यातेन खानदानी गीणाय जाय।
ROM 9:9 काहाकी वायदान बुल जत छे: “मे टाकली टेमेन अनसारे आवीस, ने तीनी टेमे सारान एक पुर्‌यु हवसे।”
ROM 9:10 ते अतरोत नी, बाकुन जत्‌यार रीबका एक सी मतलब आपणा बास इसाक सी भारीस हतली,
ROM 9:11 ते हय लग नीते ते पुर्‌या पयदा हतला, नीते चे काय भलो ने भुंडो कर्‌या हेरेसी की भगवानेन मरजी जी छे की हेरे नेवाड़ला अनसारे छे, वारु कामेन वजे सी नी बाकुन बुलावणेन वजे सी, बणी रवे।
ROM 9:12 चु कह्‌यु, “मट्‌लु पुर्‌यु नानला पुर्‌यान चाकरी करसे।”
ROM 9:13 जसों लिखलो छे, “मे याकुप सी परम कर्‌यु, बाकुन एसाव सी खुसी नी हयु।”
ROM 9:14 हेरेसी हामु काय कहंजे, काय भगवानेन चां भुंडो छे काय? नीयाव नी हवे काय? कदी नी सय मां नीयाव हवे।
ROM 9:15 काहाकी चु मुसा सी कहें, “मे तीना काहना पर बी दया करने लागो ती तेरे पर दया करीस, ने तीना काहना उपर वारु दया करने लागे ती तीना पर वारु दया करीस।”
ROM 9:16 अळतेन जी वात नी हर करने वाळान, नी दवड़ने वाळान बाकुन दया करने वाळा भगवानेन वात छे।
ROM 9:17 काहाकी चुखला सास्‌तुर मां लिखलो छे फीरोन सी कहंलो हतलो, “मे तुसे हेरे वाटे उबु करलु छे की तुसे मे मारी ताकत देखाड़ो, ने मारे नाव सी परचार आखी कळी पर हवे।”
ROM 9:18 हेरेसी भगवान तीना काजे हर करे हेरेत पर दया करे, ने तीना काजे चाहत करे तीनात काजे कयड़ावाळु कर देय।
ROM 9:19 तुहुं मारे सी कहंवसु, ती भगवान माणसे पर काहा गुनु लागाड़े? भगवान मरजीन वीरुद कुण कर सके?
ROM 9:20 ए माणुस, तु कुण छे जे भगवान काजे उल्‌टु फीरीन जपाप देय? घड़ायली चीज घड़न्‌या काजे ज कय सके काय, “तु मेसे काजे असु काहा घड़्‌यु?”
ROM 9:21 काय कुमाहरटा काजे धुळा पर हक नी हय एक धुळान गुळा मां सी एक ठाहरु ईज्‌जत करे असु बणावे, ने दीसरा धुळान गुळा सी ईज्‌जत नी करे असु बणावे?
ROM 9:22 की भगवान आपसुत रीस देखाड़े ने आपणी ताकत आवणेन मरजी सी रीसेन ठाहरा, ज खत्‌तम करने वाटे तीयार करलो हतलो, बेसकु दम धरीन सेण कर्‌यु;
ROM 9:23 ने दयान ठाहरा पर तीनु काजे भगवान सेक-सींगार वाटे भगवान पेहलुत सी तीयार कर्‌यु आपसान सेक-सींगारेन धन देखाड़नेन मरजी पुरी कर्‌यु?
ROM 9:24 मतलब हामु जीनुक भगवान नी सीरप यहुदी माणसे मां सी नी, बाकुन नी-यहुदी मां सी बी बुलायु।
ROM 9:25 जसों भगवान होसेन किताप मां सी कहें, “जे मारा माणसे नी हतला तीनु काजे, मे मारा माणसे कहीन ने जे लाटेक्‌ला। नी हतला तीनु काजे लाटेक्‌ला मां छे कहीन।
ROM 9:26 ने असो हवसे की तीना जागा मां तीनु काजे कहंलो हतलो की तुहुं मारा माणसे नी हय, तीनीत जागा पर चे जीवता भगवानेन अवल्‌यात कह्‌वायसे।”
ROM 9:27 यसायु ईस्‌रायली माणसेन बारामां आयड़ीन कहें, “चाहजे ईस्‌रायलेन अवल्‌यातेन गिन्‌ती समुदरेन रेतळा बराबर हवणु चाहजे, तेबी हींद्‌रे मां सी थुड़ाक बची जासे।”
ROM 9:28 काहाकी मालीक हेरो बुल कळी पर पुरो करसे धरमी सी छाटात चुखु करसे।
ROM 9:29 जसों यसायु पेहलुत सी कहंलु हतलु, “कदी टुळान मालीक आपणे वाटे काय खानदानी नी छुड़तु, ती आपणु सदोमेन तसा हय जाता, ने अमोरान सहलाणी रवता।”
ROM 9:30 ती आपणु काय कहंजे, ज की नी-यहुदी धरमेन हेर नी करतेला, तीना काजे धरम जड़ी गुयलो मतलब ईनी धरम काजे ज भुरसा सी छे;
ROM 9:31 बाकुन ईस्‌रायली, ज्‌य धरमेन मुसान साहरे लिखला कायदा काजे हेर तेला तीना कायदा लग नी पुग्‌या।
ROM 9:32 काय वाटे? हेरेसी चे भुरसा सी नी, बाकुन वारलु काम करने सी हेरी हेर करतेला। चे तीनाक ठुकरायला दगड़ा पर ठुकर खादा,
ROM 9:33 जसों लिखलो छे: “देखु, मे सीयोन मां एक दगड़ु, मेक र्‌यु ने जु ठुकर देवाड़े ने एक चापर्‌यु जु गुनु कराड़े, बाकुन चु जु हीना मां भुरसु करे। तीनाक कदी बी लाजवायणु नी पड़े।”
ROM 10:1 ए भायसे, मारा मनेन मरजी ने मे भगवान सी हींद्‌रे आखा वाटे दुवा करो की हीनुक छुटकारु जड़े।
ROM 10:2 काहाकी मे हींद्‌री गवाय दम की तीनु काजे भगवानेन धुन मां रवे, बाकुन अकलेन साते नी।
ROM 10:3 काहाकी चे भगवानेन धरमेन काम सी अणजाण्‌या हय्‌न, ने आपणो वारलु बणावणे करीन छाटात, भगवानेन वारलु हक मां नी हया।
ROM 10:4 मसी कायदा काजे सार देदु काहाकी जु कुय भुरसु करे भगवान वाटे धरम वाळु हवे।
ROM 10:5 काहाकी मुसु ज लिखलु छे की जु माणुस ईना धरम पर ज कायदा सी छे, चाले, चु हेरे वजे सी जीवतु रवसे।
ROM 10:6 बाकुन ज वारलु भुरसा सी छे, च असु कहें, “तु आपणा मन मां ज घुण कहें की सरग पर कुण चड़से?” मतलब मसी काजे उतारीन लावणे वाटे।
ROM 10:7 जां “पाताळ मां कुण उतरसे?” मतलब मसी काजे मरला मां सी जीवाड़ीन उपर लावणे वाटे।
ROM 10:8 बाकुन ज खरलो सास्‌तुर काय कहें? ज की “बुल तारे धड़े छे, तारा मुंहडा मां ने तारा मन मां छे” ज तीनात भुरसान बुल छे, ज्‌य आपणु परचार करजे,
ROM 10:9 की कदी तु तारा मुंहडा सी ईसु काजे मालीक जाणीन हुकारु भरे, ने आपणा मन सी भुरसु करे की भगवान ईसु काजे मरलाम सी जीवाड़्‌यु, ती तुसेक छाचलीन छुटकारु जड़से।
ROM 10:10 काहाकी धरम वाटे मन सी भुरसु करनु पड़े, ने छुटकारा वाटे मुंहडा सी हुकारु भरनु पड़े।
ROM 10:11 काहाकी चुखला सास्‌तुर मां ज कहंलो छे, “जे कुय तीना पर भुरसु करसे तीनु काजे कदी बी लाजवायणु नी पड़े।”
ROM 10:12 यहुदीया ने नी-यहुदी मां काय बी छीट नी हय, हेरेसी की चु आखान मालीक छे ने आपणे आखा नाव लेण्‌या वाटे दयाळु छे।
ROM 10:13 काहाकी, “जु कुय मालीकेन नाव लेसे, तीना काजे छुटकारु जड़से।”
ROM 10:14 पछेन तीना पर चे भुरसु नी कर्‌या, चे हेरो नाव कसा लेसे? ने तेर बारामां सामळ्‌या नी तीना पर कसा भुरसु करसे? ने परचार सामळावन्‌या पाखुर कसा सामळसे?
ROM 10:15 ने कदी मकली नी जाय, ती कसा परचार करसे? जसों लिखलो छे, “हींद्‌रा पाय बेसका वारु छे, जे वारलु वातेन खुस-खबर सामळावे।”
ROM 10:16 बाकुन आखा तीना खुस-खबर पर कान्‌टा नी लागाड़्‌या यसायु कहें, “ए मालीक कुण आपणा खबर पर भुरसु कर्‌या?”
ROM 10:17 अळतेन भुरसु सामळने सी ने सामळावनु मसीन बुल सी हवे।
ROM 10:18 बाकुन मे कहं चे नी सामळ्‌या? सामळ ते खरीन; काहाकी लिखलो छे, “हींद्‌री अवाज आखी कळी पर, ने हींद्‌रो बुल कळीन छेव लग पुग गुयो।”
ROM 10:19 अळी मे कहं काय, ईस्‌रायली नी जाणतेला काय? पेहलुत मुसु कहें, “मे हींद्‌रे साहरे जे जाती नी हय, तींद्‌रा मन मां रीस पयदा करीस; ने एक हेट्‌या माणसेन साहरे, मे तुहुं काजे रीस देवाड़ीस।”
ROM 10:20 अळतेन यसायु हिम्‌मत राखीन कहें, “जे मेसे नी हेर तेला, चे बी मेसे हेर लेदा; ने जे मेसे पुछतेला बी नी, हींद्‌रे पर मे उजेंतु हय गुयु।”
ROM 10:21 बाकुन ईस्‌रायलेन बारामां चु असु कहें, “मे आखु दाहड़ु मारु हात एक हुकुम नी मान्‌ने वाळा ने कीच-कीच करने वाळा माणसे भीणी फेलाय र्‌यु।”
ROM 11:1 हेरेसी मे कह्‌वो, काय भगवान हेरा माणसे काजे छुड़ देदु काय? कदी नी मे बी ते ईस्‌रायली छे; अब्‌राहमेन खानदानी ने बीन्‌यामीन कुळी मां सी छे।
ROM 11:2 भगवान हेरा तीनु माणसे काजे नी छुड़्‌यु, जीनु काजे हयु पेहलुत सी जाण्‌यु। काय तुहुं नी जाणता की चुखला सास्‌तुर मां एलीयान बारामां काय कह्‌वे, की ईस्‌रायलेन वीरुद मां भगवान सी लीलघाया करु?
ROM 11:3 “ए मालीक, चे तारा भगवानेन अघी सी आवणे वाळी वात देखान्‌या काजे मार नाख्‌या, ने तेरी वेदी काजे उदार देदा; ने मेत एखलुत रय र्‌यु, ने चे मारा जीव काजे बी मार नाखणे करीन हेर र्‌या।”
ROM 11:4 बाकुन भगवान सी एलीया काजे काय जपाप जड़्‌यो? “मे आपणे वाटे सात हजार अदमी काजे राखी र्‌यु, चे बाल देवता अगळ मांडा नी टेक्‌या।”
ROM 11:5 ईनीत रीती सी ईनी टेमे बी, गीण-दया सी नेवाड़ला माणसे रवला छे।
ROM 11:6 कदी जे गीण-दया सी हयु, ती पछेन वारलु काम सी नी; नीते दया पछेन दया नी रय।
ROM 11:7 हेरेसी सार काय नीकळ्‌यु? ज की ईस्‌रायली माणसे तेरी हेर मां हतला, च तीनु काजे नी जड़्‌यो; बाकुन नेवाड़ला काजे जड़्‌यो, ने रवला माणसे मन कयड़ावाळा हय गुया।
ROM 11:8 जसों लिखलो छे, “भगवान हीनु काजे आजुन दाहड़े लग बेसकी भारी नीदेन आत्‌मा मां नाख र्‌यु, ने असा डुळा आप्‌यु जे नी देखे ने असा कान्‌टा आप्‌यु जे नी सामळे।”
ROM 11:9 ने दावुद कहें, “हींद्‌रो खाणो हींद्‌रे वाटे जाळ ने फांद, ने ठुकर ने डंडेन वजे हय जाय।
ROM 11:10 हींद्‌रा डुळा पर आंदारो छाय जाणु चाहजे काहाकी नी देखणु चाहजे, ने तु जलम हींद्‌रा आस काजे वाकु वाळीन राख्‌जी।”
ROM 11:11 अळतेन मे कहं काय चे हेरेसी ठुकर खाय ती हीटी पड़्‌या? कदी नी बाकुन हींद्‌रे पापेन वजे सी नी-यहुदी काजे छुटकारु जड़्‌यो, की हीनु काजे जळन हवे।
ROM 11:12 हेरेसी कदी हींद्‌रु गुनु कळी वाटे धन ने तींद्‌री कमी नी-यहुदी वाटे धनेन वजे हवे, ती तींद्‌री भरपुर सी ते बेसको काय हय जासे।
ROM 11:13 मे तुहुंक नी-यहुदी सी जी वात कहं। जत्‌यार की मे नी-यहुदी वाटे नेवताळु छे, ती मे मारा चाकरीन कामेन बड़ाय करो,
ROM 11:14 ईनी आस सी की मे आपणा माणसे मां सी हुड़ पयदा कराड़ीन हींद्‌रे मां ईतराक जणान छुटकारु कराड़ सक।
ROM 11:15 काहाकी जत्‌यार हीनु काजे छुड़ देदु ती कळीन मेळ कराड़नेन टेम आवसे, ती काय तीनु काजे खुळे लेणु मरला मां सी जीवता हवणेन बराबर नी हवे काय?
ROM 11:16 जत्‌यार भेटेन पेहलु हीस्‌सु चुखलु छे, ती चु आखु गुंदलु पीठु बी चुखलु छे; ने जत्‌यार मुळ चुखली रवसे, ती डाळखा बी असात रवसे।
ROM 11:17 बाकुन कदी ईतराक डाळखा तुड़ीन आंग्‌ये कर देय, ने तु जंगली जेतुनेन झाड़कान हय्‌न हींद्‌रे मां कलम हय गुयु, ने जेतुनेन झाड़कान मुळेन चीकणाय मां साजु हयु,
ROM 11:18 ती डाळखा पर मटाय घुण करे; ने कदी तु मटाय करे, ती ज जाण ले की तु मुळ काजे नी बाकुन मुळ तुसे काजे बचाड़ी रयु।
ROM 11:19 पछेन तु कहंसी, “डाळखा हेरेसी तुड़ी देदला की मे कलम हय जाम।”
ROM 11:20 जी वात छाची छे, की चे ते भुरसु नी करनेन वजे सी तुड़ी देदला, बाकुन तु भुरसा पर बन्‌लु रव हेरेसी मटाय घुण करे, बाकुन बीहतु रवजी,
ROM 11:21 काहाकी जत्‌यार भगवान खास डाळखा काजे नी रहणी देदु ती चु तुसे काजे बी नी रहणी देय।
ROM 11:22 हेरेसी भगवानेन दया ने काठायन तीनी वात पर धी‌यान लागाड़ जे पड़ी गुया हीनु काजे काठायन, बाकुन तारे पर ते दया, कदी हेरे मां बणी रवसी ती नी ते तुसे काजे बी तुड़ी नाखसे।
ROM 11:23 चे बी नी भुरसा मां नी रवसे, ती ते कलम हय जासे; काहाकी भगवान ईनु काजे पछु कलम करसे।
ROM 11:24 काहाकी कदी तु ईना जंगली जेतुन सी, ज सभाव सी जंगली छे, काट नाख्‌या ने सभावेन वीरुद वारलु जेतुन मां कलम हय गुयु, जे खास डाळखा छे, आपणा जेतुन मां काहनी कलम हय जाय।
ROM 11:25 ए भायसे, काय असो नी हवे की तुहुं आपसा काजे अक्‌कल वाळा समजी लेवु; हेरेसी मे नी चाहतु की तुहुं ईनी वात सी अणजाण्‌या रवु की जत्‌यार लग नी-यहुदी माणसे पुरा नी भराये, तत्‌यार लग ईस्‌रायली माणसेन एक हीस्‌सु काठु रवसे।
ROM 11:26 ने ईनी रीत सी आखा ईस्‌रायल काजे छुटकारु जड़से। ने असो लिखलो छे, “छुड़ावने वाळु सीयोन सी आवसे, ने नी भक्‌ती करन्‌या काजे याकुप सी छेटा करसे;
ROM 11:27 ने तींद्‌रे साते जु मारु वायदु रवसे, जत्‌यार की मे तींद्‌रा पाप काजे छेटु कर दीस।”
ROM 11:28 खुस-खबरेन भाव सी ती तुंद्‌रे वाटे चे भगवानेन वेरी छे, बाकुन नेवाड़ला भाव सी चे बास डुकरान वजे सी लाटेक्‌ला छे।
ROM 11:29 काहाकी भगवानेन वाटु ने बुलावणु जलम एक तसों छे।
ROM 11:30 काहाकी जसा तुहुं पेहेल भगवानेन हुकुम नी मान्‌या, बाकुन हय तेरी हुकुम नी मान्‌ने सी तुंद्‌रे पर दया हवे हेरेसी हींद्‌रे पर बी दया हवे;
ROM 11:31 असात चे बी हय हुकुम नी मान्‌या, की तुंद्‌रे पर दया हवे हेरेसी हींद्‌रे पर बी दया हवे।
ROM 11:32 काहाकी भगवान आखा काजे हुकुम नी माननेन मन बणाय देदु, की चु तींद्‌रे पर बी दया कर सके।
ROM 11:33 भगवानेन दया, डीमाक ने अक्‌कल कतरा उंडो छे हेरो नीयावेन कतरी पुहुच छे हेरी वाट कतरी सातायली छे।
ROM 11:34 मालीकेन अक्‌कल काजे, कुण जाण्‌यो? नीते हेरु मंत्‌री कुण हयु?
ROM 11:35 नीते कुण भगवान काजे काय आपलु छे तेरु बद्‌लु तीना काजे आप देय?
ROM 11:36 काहाकी हेरेत भीणी सी, ने हेरेत साहरे, ने हेरेत वाटे आखो काय छे। हेरो सेक-सींगार जलम-जलम हवतो रवे। असोत हवे।
ROM 12:1 तेरेमां ए भायस्‌यो ने बहणीस्‌या, भगवानेन दया हेर कराड़ीन लीलघाय करे की तुहुं तुंद्‌रा डील काजे जीवता जीव भेळे, ने चुखलो, ने भगवान काजे गमे असो बादान सारकु भेट चड़ावु। जीत तुंद्‌री जीव-आत्‌मा मां भगवानेन सेवा-भक्‌ती छे।
ROM 12:2 तुहुं ईनी कळीन माणसेन तसा मां बणु; बाकुन तुहुंक नवली अक्‌कल जड़ गुय करीन आपसो वीच्‌यार ने वेहवार बदली लेवु, असो करसु ती तुहुं भगवानेन वारु, ने गमे तसी, ने पाक्‌की मरजी सय रीते पारखीन जाण जासु।
ROM 12:3 काहाकी मेसेक जड़ली गीण-दया ज तुंद्‌रे मांयन आखा काजे कहं की जसों आपसा काजे समजणु चाहजे तसात आपसा काजे समजु हेरे सी जादा मां समजु बाकुन हेरे वजे सी आपणी वीच्‌यार मां वारु जसु भगवान आखा काजे वाटु आप देदलु छे तेरेत अनसारे वारलु अकलेन अनुसार आपसा काजे समजु।
ROM 12:4 काहाकी जसों आपणा डील मां बेसका डील छे, ने आखा डीलेन एक तसों काम नी हय,
ROM 12:5 तसात आपणु बी बेसका हय्‌न बी ईसु मसी मां एकुत डील मां भेसकायन एक दीसरु डील छे।
ROM 12:6 ने आपणु काजे भगवानेन अगे सी जड़ली गीण-दया अनसारे आंग्‌ये-आंग्‌ये वाटु जड़लु छे अतरे तीना काजे आवणे वाळी वात कहंणेन वाटु जड़लु छे जु भुरसान मापे आवणे वाळी वात कहंणु चाहजे;
ROM 12:7 कदी सेवा चाकरी करनेन वाटु जड़लु हय ती तीनाक सेवा चाकरी करतु रहणु चाहजे, ने कदी काहनाक सीकाड़नेन वाटु जड़लु हय ती तीनाक सीकाड़तु रहणु चाहजे।
ROM 12:8 कदी काहाना काजे सीकाड़ानेन वाटु जड़लु हय चु सीकाड़तु रहणु चाहजे; ने तीनाक भेट आपणेन वाटु जड़लु हय, चु भेट आपणो चाहजे ने तीनाक अगवाय करनेन वाटु जड़लु हय चु खुस हय्‌न अगवाय करतु रहणु चाहजे तीनाक दया करनेन वाटु जड़लु हय चु खुसी सी दया करतु रहणु चाहजे।
ROM 12:9 तुंद्‌रु परम खरलु हवणु चाहजे कुहराय सी छीट राखु; ने भलाय मां लागी रवु।
ROM 12:10 भाय-भलाय परम सी एक दीसरा पर परम करु; एक दीसरान ईज्‌जत सी आव-भाव करने करीन आंबा-सांबा जावु।
ROM 12:11 काठली मेहनत करु आळसी मां बणु; जत्‌यार बी मालीक ईसुन सेवा करु तत्‌यार जीव-आत्‌मा मां खुसी सी सेवा करु।
ROM 12:12 आस मां खुस रवु; दुख मां काठु रवु; ने एक रंग्‌या दुवा करता रवु।
ROM 12:13 चुखला माणसे काजे ज काय चाहजे तीनु काजे च आपीन तींद्‌री मदत करु; तींद्‌री मेजवानी करता रवु।
ROM 12:14 जे तुहुं काजे वेला पाड़ने वाळा; तीनु काजे तुहुं संयबरकत आपु।
ROM 12:15 खुस हवण्‌या साते खुस हयु; ने रड़ने वाळा साते रड़ु।
ROM 12:16 तुहुं एक वीच्‌यार मां हय्‌न मेळीन रवु; मटाय मां करु बाकुन नीचळा माणसे सात संगात करु; आपणा नींगा मां अक्‌कल वाळा मां बणु।
ROM 12:17 कुहरायन बदला मां कुहराय मां करु। आखान नींगा मां ज वारु छे चत करनेन वीच्‌यार करु।
ROM 12:18 तत्‌रो बणे तत्‌रा आखा माणसे साते सांती मां रवु।
ROM 12:19 ए लाटेक्‌ला, तुहुं बद्‌लु घुण लेता बाकुन भगवानेन रीस काजे मुखु आप्‌जु; काहाकी खरली सास्‌तुर मां लिखलो छे, बद्‌लु लेणु मारो काम छे, मालीक कहें मेत बद्‌लु लीस।
ROM 12:20 बाकुन कदी तारु वेरी भुकलु हय ती तीनाक खावाड़ ने कदी पीसलु हय ती तीनाक पाणी पीयाड़; काहाकी असु करसी ती तु तेरा मुणका पर आकठान ईंगाळान ढीक लागाड़ीस।
ROM 12:21 कुहराय देखीन हिम्‌मत मां हारु बाकुन वारलु काम वाटे कुहराय जीत लेवु।
ROM 13:1 आखा माणसे काजे सरकारी आफसर्‌यान हक मां रहणु चाहजे, काहाकी सरकारेन हक भगवान भीणी सी छे; ने जे हक हय छे हीनुक भगवान नेवाड़लु छे।
ROM 13:2 हेरेसी जु कुय सरकारी हकेन वीरुद करे, जु भगवानेन कायदान वीरुद करे, ने जे भगवानेन हुकुमेन वीरुद करे, तीनु काजे डंड जड़से।
ROM 13:3 काहाकी हक करन्‌या वारलु कामे सी नी, बाकुन भुंडला कामे सी बीहणे वजे छे; हेरेसी कदी तुसे काजे हक करन्‌या नेता सी बीहे पाखुर रहणु हय, ती वारलु काम कर, ती हक करन्‌यु नेतु तुसे काजे बेसकु वारु कर्‌यु करीन कहंसे;
ROM 13:4 काहाकी राज करन्‌यु नेतु तारी भलाय वाटे भगवानेन चाकर्‌यु छे। बाकुन कदी तु कुहराय करे, ती बीहीन रवजी, काहाकी चु फालतु तलवार लीन उबु नी रवे; बाकुन चु भगवानेन चाकरी करन्‌यु छे काहाकी चु भगवानेन रीसेन अनसारे कुहर्‌या काजे डंड आपे।
ROM 13:5 हेरेसी हक मां रहणु भगवानेन रीसेन मार्‌यु अतरुत नी, बाकुन बीहीन बी हक मां रहणु चाहजे बाकुन आपणो मन बी हक मां रहणु चाहजे।
ROM 13:6 हेरसी फाळु बी आपु काहाकी भगवानेन चाकर्‌या छे ने चे जलम ईनात काम मां लागला रवे।
ROM 13:7 हेरेसी आखान हक काजे पुरो करे; तीना काजे फाळु आपणु चाहजे, तीना काजे फाळु आपु; तीना काजे वसोली चाहजे, तीना काजे वसोली आपु; तीना सी बीहणु चाहजे तेरे सी बीहु, तेरी ईज्‌जत करनु चाहजे, तेरी ईज्‌जत करु।
ROM 13:8 आंबा-सांबा परम करनु छुड़ीन दीसरी काहली बी वातेन करजा वाळा नी हवणु चाहजे; काहाकी जु दीसरा काजे परम करे, चु मुसान कायदा काजे पाळी लेदलु छे।
ROM 13:9 काहाकी ज्‌य की “छीनाळो घुण करे, खुन घुण करे, चुरी घुण करे, लालुच घुण करे।” ने काहनु बी हुकुम हय तीना हुकुमेन जु जीत साहरु छे, “आपणे साते वाळा काजे आपणेन तसा परम करु।”
ROM 13:10 परम धड़े वाळान काय बी कुहराय नी करे, हेरे सी परम करनु मुसान कायदा काजे पुरो करनु छे।
ROM 13:11 ने तुहुं टेम काजे उळखीन असात करु, तुहुं जाणु की नीद मां सी जागणेन टेम आय गुयली छे; काहाकी जीनी टेमे आपणु ईसु पर भुरसु करला, तीने टेमेन वीच्‌यार सी हय आपणु छुटकारु धड़ेत आय गुयलु छे।
ROM 13:12 रात बेसकी हय गुयली छे, दाहड़ु उंगणेत वाळु छे; हेरेसी आपणु आंदारलान काम छुड़ीन आपणु वीजाळान हत्‌यार धर लेता।
ROM 13:13 हेरेसी हामु असात वारु रीती सी रहणु चाहजे जसा दीसुन टेमे रवजे, बेसका जादा पाल्‌टी मां जाय्‌न पी खाय्‌न छाकी घुण जावु। लुच्‌चाय गुना छीनाळा मां घुण पड़ु।
ROM 13:14 बाकुन मालीक ईसु मसी काजे पुथल्‌यान तसु पेहरी लेजु ने डीलेन पाप पुरो करनेन वीच्‌यार नी करनु चाहजे।
ROM 14:1 जु भुरसा मां लुलु छे, तीना काजे सात संगात मां ली लेवु, बाकुन संक्‌यान वात पर कीच-कीच घुण करु।
ROM 14:2 काहाकी एक भुरसु करे, की आखो काय खाणु चाहजे बाकुन जु भुरसा मां लुलु छे चु सब्‌जी-भाजी अतरुत खाय।
ROM 14:3 खाणे वाळु नी खाणे वाळा काजे भुंडुत नी समजणु चाहजे, ने नी खाणे वाळु खाणे वाळा पर गुनु नी लागाड़नु चाहजे; काहाकी भगवान तीना काजे आवरी लेदलु छे।
ROM 14:4 तु कुण छे दीसरा पावर्‌या पर गुनु लागाड़े? तेरा भुरसा मां टेकलु रहणु टेकलु नी रहणु तेरो मालीक साते काम छे; ने मालीक तीना काजे भुरसा मां पाक्‌कु कर देसे, काहाकी मालीक तीना काजे भुरसा मां टेकलु राख्‌से।
ROM 14:5 काहनुक ते एक दाहड़ा काजे दीसरा दाहड़ा सी जादा वारु समजे, ने काहनुक ते आखा दाहड़ा काजे एक सारकु समजे। आखा आपसान मन मां ठान लेवु की काहनी वात ताले छे।
ROM 14:6 चु काहना दाहड़ा काजे वारु माने, चु मालीक वाटे माने। जु खाय, चु बी मालीक वाटे खाय, काहाकी चु भगवान काजे तु बेसकु वारु छे करीन कहें, जु नी खाय, चु मालीक वाटे नी खाय, ने भगवान काजे तु बेसकु वारु छे कहें।
ROM 14:7 काहाकी आपणे मां सी नीते कुय आपसान वाटे जीवे ने नी कुय आपसान वाटे मरे।
ROM 14:8 कदी आपणु जीवतेला रवजे, ती मालीकेन वाटे जीवता रवजे; ने कदी आपणु मर जाजे, ती मालीकेन वाटे मर जाजे; हेरेसी भले आपणु जीवता रवजे नीते मर जाजे, आपणु मालीकेन वाटे छे।
ROM 14:9 काहाकी मसी हेरेसी मर्‌यु ने मरला मां सी जीवतु हय्‌न बठु हय गुयु की चु मरला ने जीवतेला दुय जणान मालीक छे।
ROM 14:10 तु आपणा भायस पर गुनु काहा लागाड़े? नीते तु आपणा भायस काजे छीट काहा राखे? आपणु आखा ने आखा काजे भगवानेन नीयावेन अगळ उबा रवणु पड़से।
ROM 14:11 काहाकी लिखलो छे, “मालीक कहें, मारी जीवणेन आण आखा, माणसे मारे अगळ मांडा टेकसे, ने आखा माणसे भगवान काजे हुकार लेसे।”
ROM 14:12 हेरेसी आपणु आपणे मां सी आखा ने आखा भगवान काजे आपणु लेखु देणु पड़से।
ROM 14:13 हेरेसी हय सी हेरे पर गुनु मां लागाड़ु, बाकुन तुहुं ज ठाणी लेवु की कुय आपणा भायस अगळ अड़चन पयदा करीन ठुकर खाणेन वजे घुण बणु।
ROM 14:14 मे जाणो की मालीक ईसु मसीन साहरे पाक्‌की वात मालम हय गुयली छे की काहानी बी चीज वीटळ्‌ली नी हय, बाकुन जे कुय तीनी चीज काजे वीटळ्‌ली समजे तेरे वाटे ची चीज वीटळ्‌ली छे।
ROM 14:15 कदी तारु भायस खाणान वजे सी नीरास हवे, ती तु परम सी नी चाल र्‌यु; तेरे वाटे ईसु मसी मर गुयलु छे, तीना काजे तु खाणान वजे सी सारे मां।
ROM 14:16 हेरेसी तारी भलाय वाटे कुय बी तारु वाक नी नीकाळनु चाहजे।
ROM 14:17 काहाकी भगवानेन राज खाणे पीणेन नी हय, बाकुन धरमेन साहरे ने सांती ने ची खुसी छे ज्‌य चुखली-आत्‌मा सी हवे।
ROM 14:18 ने जु कुय ईनी रीत सी जीवे चु ईसु मसीन चाकरी करे ने असु करे, ती भगवान काजे गमे ने माणसे मां बी तेरु अबरु रय जाय।
ROM 14:19 हेरेसी आपणु हीनी वातेन हेर करनु चाहजे तेरसी सांती मां रवजे ने एक दीसरा काजे सुदार हवणु चाहजे।
ROM 14:20 खाणा सी भगवानेन काम मां बीगाड़े। आखो काय चुखो ते छे, बाकुन ज तीना माणसे वाटे भुंडो छे। ज खाणो दीसरा भायस काजे ठुकर खावाड़े।
ROM 14:21 भलो ते ईनी वात मां छे की सीकार घुण खाय ने अंगुरेन रस बी घुण पीये, ने काहनो बी असो काम घुण करे तीनी वात सी तारु भायस ठुकर खाय।
ROM 14:22 ईनी चीजेन बारामां जु बी तारु भुरसु छे, तीना भुरसा काजे भगवानेन ने तारे ईचमां रवणी दे। बेसकु वारु छे चु जु ईनी वात मां, आपसा काजे तालेत समजे, ने आपसा काजे गुनाळु नी ठेहरावे।
ROM 14:23 बाकुन जु कुय संका करीन खाय चु आपसात पर डंड लावे, काहाकी चु पाक्‌का भुरसा भेळु नी खाय; ने जु कुय पाक्‌का भुरसा भेळु नी खाय, चु पाप करे।
ROM 15:1 हेरेसी आपणु ताकतवाळा छे करीन तेरेसी आपणु काजे जे लुला माणसेन लुलाय मां मदत करनु चाहजे, ने आपसात काजे खुस नी करनु चाहजे।
ROM 15:2 आपणे मां सी जतरा बी जणा छे आपणे धड़े वाळा काजे हेरी भलाय वाटे खुसी करे की चु अगु बड़े।
ROM 15:3 काहाकी मसी बी आपसा काजे खुस नी कर्‌यु, बाकुन जसों लिखलो छे, “चे जसात तारी वाक नीकाळे तसात मारी वाक बी नीकाळी र्‌या।”
ROM 15:4 जतरी वाते पेहेलुत सी खरला सास्‌तुर मां लिखलो हतलो, च आपणु काजे सीकाड़ने वाटे लिखली हतली की आपणु दम धरीन ने चुखला सास्‌तुरेन सांतीन साहरे आस राखजे।
ROM 15:5 दम धरीन ने सांती आपण्‌यु भगवान तुहुं काजे जु वाटु आपे की मसी ईसुन अनसारे आपसा-आपसा मां एक वीच्‌यार मां हय्‌न रवु।
ROM 15:6 काहाकी तुहुं एक मन ने एक रेंग मां आपणा मालीक ईसु मसीन बास भगवानेन बड़ाय करु।
ROM 15:7 हेरेसी, जसु मसी भगवानेन सेक-सींगार वाटे तुहुं काजे हुकारलु छे, असात तुहुं बी एक दीसरा काजे हुकारी लेवु।
ROM 15:8 हेरेसी मे कहं की जु वायदु डाहा बुड़ा काजे आपलु हतलु तीनु काजे काठा करने वाटे मसी, भगवानेन छाचाय देखाड़ने वाटे, फतरी काटाण्‌या यहुदी माणसेन चाकरी करन्‌यु बण्‌यु,
ROM 15:9 ने नी-यहुदी बी दयान वजे सी भगवानेन बड़ाय करे; जसों लिखलो छे, “हेरेसी मे जाती-जाती मां तु बेसकु वारु छे करीन कहंवीस, ने तारे नावेन गीत गावीस।”
ROM 15:10 अळतेन कहलो छे, “ए जाती नी-यहुदी आखा माणसे, भगवानेन भेळा खुस रवु।”
ROM 15:11 ने पछेन, “ए जाती नी-यहुदी आखा माणसे, मालीकेन बड़ाय करु; ने राज राजेन आखा माणसे तीना काजे तु बेसकु वारु छे करीन कहुं।”
ROM 15:12 ने पछेन यसायु कहें, “यीसेन एक मुळ उजेंतु हवसे, ने नी-यहुदी जातीन माणसे मां राज करने वाटे उजेंतु हवसे, हेरे पर नी-यहुदी आस राख्‌से।”
ROM 15:13 भगवान जु आस काजे आपण्‌यु छे तुहुं काजे भुरसु करने मां आखी खुसी ने सांती मां भर देय की चुखली-आत्‌मान ताकत सी तुंद्‌री आस मटी हवती जाय।
ROM 15:14 ए मारा भायसे, मे खुद तुंद्‌रे बारामां जाणो की तुहुं बी आपसा भगवानेन भलाय ने भगवानेन अक्‌कल सी पुरा ने पुरा भरायला छे, ने एक दीसरा काजे सीकाड़ सकु।
ROM 15:15 तेबी मे कांखुर-कांखुर हेर कराड़ने वाटे तुहुं ज बेसका हिम्‌मत करीन लिख्‌या। ज ईनी गीण-दयान वजे सी हयो ज भगवान मेसे काजे आप्‌यु।
ROM 15:16 की नी-यहुदी वाटे मसी ईसुन चाकरी करन्‌यु हय्‌न भगवानेन खुस-खबरेन चाकरी पुजारान तसु करो, तेरसी नी-यहुदी भगवान अगळ गमे असी भेट बण जाय, ने चुखली-आत्‌मान सी भगवान वाटे पुरा ने पुरा चुखला बण जाय।
ROM 15:17 हेरेसी हीनी वातेन बारामां ज भगवान सी नातो राख्‌से, ने ईसु मसी मां बड़ाय कर सको।
ROM 15:18 काहाकी हीनी वात काजे छुड़ीन मेसेक अळी काहनीक वात कहंणेन बारामां हिम्‌मत नी हय, जु मसी नी-यहुदीन हकेन वाटे बुल, ने काम,
ROM 15:19 ने सहलाणी, ने छेल-भात्‌या कामेन ताकत, सी ने चुखली-आत्‌मान ताकत सी मारे साहरे कर्‌यु; जां लग की मे यरुसलेम सी लीन चारे मेर इल्‌लुरकुम लग मसीन खुस-खबर पुरो-पुरो परचार कर्‌यु।
ROM 15:20 बाकुन मारी हर जी छे की जां-जां मसीन नाव नी लेदा, चां-चां खुस-खबर सामळावो असो नी हवे की दीसरान नेहा पर घर बणावो।
ROM 15:21 बाकुन जसों लिखलो छे तसोत हवे, “जीनु काजे तेरो खुस-खबर नी पुग्‌यो, चेत देखसे ने जे नी सामळ्‌या चेत सामळसे।”
ROM 15:22 हेरेसी मे तुंद्‌रेन्‌चां अळी-अळीन आवणे नी हींड रवलु।
ROM 15:23 बाकुन हय ईनु देस मां मारे काम वाटे कुय जागा नी रवी, ने बेसका साल मां तुंद्‌रे धड़े आवणेन हर कर र्‌यु।
ROM 15:24 हेरेसी जत्‌यार ईस्‌पेन जायस ती तुंद्‌रेन्‌चां मांयन जायस, काहाकी मे जी आस कर र्‌यु की तीने टेमे मे तुहुं काजे मेळीस, ने मे तुहुं काजे मेळीन खुस हय जायस ने अळतेन तुहुं ईतराक अगास मेसे मेली आवजु।
ROM 15:25 बाकुन मे हय ते चुखला माणसेन चाकरी करने करीन यरुसलेम सहर मां जाणे बाजी र्‌यु।
ROM 15:26 काहाकी मकीदुनीया ने अखायान माणसे काजे ज वारु लाग्‌यो की यरुसलेम चुखला माणसे मां गरीब वाटे चंदु भेळु करीन आपे।
ROM 15:27 वारु ते लाग्‌यो बाकुन चे हींद्‌रा करजा वाळा बी छे, काहाकी नी-यहुदी ईसुन माणसे आत्‌मान काम मां यहुदी माणसे साते साजल्‌या बणी गुयलु छे, हेरेसी नी-यहुदी काजे बी यहुदी माणसे वाटे डीलेन वात मां हींद्‌री सेवा करनु चाहजे।
ROM 15:28 हेरेसी ज काम खत्‌तम करीन ने तीनु काजे भेळु करलु चंदु आपीन तुंद्‌रेन्‌चां मांयन ईस्‌पेन जायस।
ROM 15:29 ने मेसे काजे मालम छे जत्‌यार मे तुंद्‌रे भीणी आवीस, ती मसीन पुरी संयबरकत लीन आवीस।
ROM 15:30 ए भायसे, आपणा मालीक ईसु मसी काजे ने चुखला आत्‌मान परम काजे अटकळ कराड़ीन लीलघायो, की मारे वाटे भगवान धड़े दुवा करने मां मारे साते भेसकायन झींग पड़ीन दुवा करता रवु।
ROM 15:31 की मे यहुदी माणसे जे भुरसु नी करे तींद्‌रे सी बचीन रव, ने मारी चाकरी जी यरुसलेम वाळा माणसे वाटे छे, ची चुखला माणसे काजे गमणु चाहजे;
ROM 15:32 ने मे भगवानेन मरजी सी तुंद्‌रे ईचमां खुस हय आवीन तुंद्‌रे साते ईतरीक वार आराम करीस।
ROM 15:33 सांती आपण्‌यु भगवान तुंद्‌रे आखा साते रवे, असोत हवे।
ROM 16:1 मे तुंद्‌रे सी फीबे वाटे जी आपणी बहणीस ने कींख्‌रायान मंडळीन चाकरी करने वाळी छे, लीलघाय।
ROM 16:2 की तुहुं, जे चुखला माणसे छे, ने जसों तुहुंक करनु चाहजे तसात तुहुं मालीक ईसु मां हय्‌न तीनीन आव-भाव करु; ने जी वाते मां तीनी काजे तुंद्‌रे साहरे मदत चाहजे, तीनी वात मां तुहुं तेरी मदत करो, काहाकी की हीयी बी बेसका माणसेन भलाय करने वाळी छे। मारी बी करने वाळी छे।
ROM 16:3 परीस्‌का ने अक्‌वीला काजे ईसु मसी मां आवजी करीन कय र्‌यु, जे मारे साते खुस-खबरेन काम करन्‌या साजल्‌या छे।
ROM 16:4 हीये दुय माणसे मारु जीव बचाड़ने वाटे आपसान जीव बी खुवणे तीयार हय गुयला; हेरेसी मे हीनु काजे बेसका वारु छे कहं, ने नी-यहुदी ईसुन मंडळी मां वाळा बी हीनु काजे बेसका वारु छे करीन कहें।
ROM 16:5 हीनु मंडळीन माणसे काजे बी ने आवीस ने आवजी कहं जे हींद्‌रे घर मां छे। ने मारु बेसकु वारु लाटेक्‌ला इपेनीतुस काजे जु मसी मां आवीस ने आवजी कहं जु आसीया पेहेल भुरसु करलु छे।
ROM 16:6 मरीयम बी तुंद्‌रे वाटे, जी काठो काम करली छे, आवीस ने आवजी कहं।
ROM 16:7 अन्‌दुर्‌नीकुस ने युनीयास काजे बी आवीस ने आवजी कहं जे मारा भाय-बेटा छे, ने जे मारे साते जेल मां हतला ने नेवताळा मां नाव-सादीन छे, जे मार सी पेहेल ईसु मसी पर भुरसु करला छे, आवीस ने आवजी कह्‌वो।
ROM 16:8 अम्‌पलीयातुस काजे, जु मालीक मां मारु लाटेक्‌लु छे, आवीस ने आवजी कहं,
ROM 16:9 उरबानुस काजे, बी मे आवीस ने आवजी कहं, जु ईसु मसी मां हामरे साते काम करन्‌यु साजल्‌यु छे, ने मारा लाटेक्‌ला ईस्‌तखुस काजे बी आवीस ने आवजी कहं।
ROM 16:10 अपील्‌लेस काजे आवीस ने आवजी। कहं जु ईसु मसी मां खरलु छे, ने मे अरीस्‌तुसन घराणा काजे बी आवीस ने आवजी कहं।
ROM 16:11 मारा भाय-बेटा हेरोदीयोन काजे बी आवीस ने आवजी कहं। नरकीखुसेन घराणा काजे बी आवीस ने आवजी कहं, जे मालीक ईसु पर भुरसु करे।
ROM 16:12 तीरुफेना ने तीरुफेसा काजे बी आवीस ने आवजी कहं। जे मालीक ईसु मां काठो काम करे, ने लाटेक्‌ला पीर्‌सीस काजे, बी आवीस ने आवजी कहं। जु मालीक ईसु मां बेसको काठो काम करे।
ROM 16:13 मालीक ईसु मां नेवाड़ला रुफुस काजे ने तेरी आयस काजे, मे आवीस ने आवजी कहं।
ROM 16:14 असुनक्‌रीतुस काजे मे फीलगेन काजे ने हीरमेस काजे मे पुत्‌रुबास काजे ने हर्‌मास काजे मे तींद्‌रे साते रवण्‌या भायस काजे आवीस ने आवजी कहं।
ROM 16:15 फीलोलुगुस काजे मे युलीया काजे मे नेर्‌युस काजे मे तेरी बहणीस काजे, मे उलीम्‌पास काजे मे तेरी साते रवण्‌या आखा चुखला माणसे काजे आवीस ने आवजी कहं।
ROM 16:16 तुहुं सांबा आंबा-चुखला गुळा दीन वारलु छे करीन पुछु। ने आवीस ने आवजी करीन कहुं तुहुं आखा काजे ईसु मसी मां मंडळी माणसे भीणी सी आवीस ने आवजी कहं।
ROM 16:17 हय ए भायस्‌यो, मे तुंद्‌रे सी लीलघायो करो, की जे माणसे हीनी सीकाड़नेन वात सी आन्‌गे, जड़ली छे, बेरजु पाड़ने ने ठुकर खावड़नेन वजे बणे, हींद्‌रे सी नातो तुड़ लेवु ने हींद्‌रे सी छेटा रवु।
ROM 16:18 काहाकी असला माणसे आपणा मालीक ईसु मसीन सेवा भक्‌ती नी करे, बाकुन आपसान पेट वाटे सेवा भक्‌ती करे; ने सुवाळी-सुवाळी वात कहंवीन सुदला मन वाळा ने भुळा माणसे काजे ठगी लेय।
ROM 16:19 तुंद्‌री हुकुम मान्‌नेन वात आखे दुर पुग गुयली छे, हेरेसी मे तुंद्‌रे बारामां खुस छे, बाकुन मारी जी मरजी छे की तु भलाय करने करीन अक्‌कल वाळा बणी जावु ने कुहराय वाटे डेड़-अकल्‌या मां बणु।
ROM 16:20 सांती आपण्‌यु भगवान भुतड़ा काजे तुंद्‌रे पाय तळे छाटुस कुचरी देसे। आपणा मालीक ईसुन गीण-दया तुहुं काजे जड़ती रवणु चाहजे।
ROM 16:21 मारे साते काम करन्‌यु साजल्‌यु तीमुथीयुस, ने लुकीयुस जु मारु भाय-बेटु छे ने यासोन ने सोसीपत्‌रस तुहुं काजे आवीस ने आवजी कहं।
ROM 16:22 मारी चिट्‌ठी काजे लिखण्‌यु तीरतीयुस, मालीक ईसु मां तुहुं काजे आवीस ने आवजी कहं।
ROM 16:23 गयुस बी तुहुं काजे आवीस ने आवजी कहं जु मारी ने ईसुन माणसेन जे मंडळी मां बठण्‌यान मेजवानी करन्‌यु, छे ईरास्‌तुस तुहुं काजे आवीस ने आवजी कहं जु सहरेन देख-भाळ करन्‌यु, पयस्‌या टकान देख-भाळ राखण्‌यु पावर्‌यु छे ने भायस क्‌वारतुस बी तुहुं काजे आवीस ने आवजी कहं।
ROM 16:24 हामरा ईसु मसीन दया तुहुं आखा पर रवे। आमीन।
ROM 16:25 हय जु तुहुं काजे मारी खुस-खबरेन मतलब ईसु मसीन खुस-खबरेन परचारेन साहरे तुहुं काजे टणका कर सके, भगवानेन सातयलो वीजाळो जलम सातयली हतली,
ROM 16:26 बाकुन हय ज जलमेन भगवानेन हुकुम सी भगवानेन अघी सी आवणे वाळी वात देखान्‌यान साहरे लिखली चुखली सास्‌तुरेन साहरे आखा माणसे पर उजेंतु हय गुयलो छे ने असात करीन चे ईसु पर भुरसु करीन भगवानेन हुकुम मान्‌या बण गुया,
ROM 16:27 एकुत अक्‌कल वाळा भगवानेन ईसु मसीन साहरे जलम सेक-सींगार हवती रवे ने असोत हवतो रवे।
1CO 1:1 पोलुस भीणी सी जु भगवानेन मरजी सी ईसु मसीन नेवताळु हवणे वाटे बुलाय गुयलु छे, ने भायस सोस्‌थीनेस भीणी सी बुलाय गुयलु छे,
1CO 1:2 भगवानेन ईनी मंडळीन नाव जे कुरींथीस मां छे, मतलब हींद्‌रो नाव जे ईसु मसी मां चुखला करला, ने चुखला हवणे वाटे बुलाय गुयला छे; ने हीनु आखान बी जे आखी जागा हामरे ने आपणा मालीक ईसु मसीन नाव सी दुवा करजे।
1CO 1:3 आपणा भगवान बास ने मालीक ईसु मसीन गीण-दया ने सुक-सांती तुहुं आखा काजे जड़ती रहणु चाहजे।
1CO 1:4 भगवानेन गीण-दया तुहुं काजे ईसु मसीन साहरे जड़ली छे, हेरेसी मे तुंद्‌रे वाटे आपणा भगवान काजे जलम बेसकु वारु कह्‌या करो।
1CO 1:5 की हेरे मां हयन तुहुं आखी वात मां, मतलब आखा ने आखी अक्‌कल मां मालदार बणावलु छे
1CO 1:6 की मसीन गवाय तुंद्‌रे मां पाक्‌की नीकळी
1CO 1:7 जां लग की काहाला बी भगवानेन वाटा मां कमी नी हय, ने तुहुं हामरा मालीक ईसु मसीन देखायणेन वाट देखता रवु।
1CO 1:8 चु तुहुं काजे आकरी लग काठा बी करसे की तुहुं हामरा मालीक ईसु मसीन दाहड़ा मां नी-गुनाळा रवु
1CO 1:9 भगवान भुरसा वाळु छे, चु तुहुं काजे आपणा पुर्‌या ने हामरा मालीक ईसु मसीन साजेदारी मां बुलावलु छे।
1CO 1:10 ए मारा भाय, बहणस्‌या मे तुंद्‌रे सी हामरा मालीक ईसु मसीन नाव सी लीलघाये की तुहुं आखा एकुत वात कह्‌जु, ने तुंद्‌रे मां झगड़ा नी हवणु चाहजे, बाकुन एकुत मन ने एकुत हीया मां हयन मेळीन रवु।
1CO 1:11 काहाकी ए मारा भाय-बहणस्‌या, खलोयेन घरेन माणसे मेसे तुंद्‌रे बारामां बताड़ला छे की तुंद्‌रे मां झगड़ा हय र्‌या।
1CO 1:12 मारो कवणेन ज्‌य मतलब छे की तुंद्‌रे मां सी कुय ते आपसा काजे “पोलुसेन कह्‌वे” ने कुय अपुल्‌लोस कह्‌वे, कुय “केफान कह्‌वे” ती कुय-कुय “मसीन” कह्‌वे।
1CO 1:13 काय मसी आटाय गुयु? काय पोलुस तुंद्‌रे वाटे कुरुस पर चड़ायु गुयु काय? नीते तुहुं काजे पोलुसेन नाव सी बपतीस्‌मा जड़लो छे काय?
1CO 1:14 मे भगवान काजे तु बेसकु वारु छे करीन कह्‌वो की कीर्‌स्‌पुस ने गयुस काजे छुड़ीन मे तुंद्‌रे मां सी काहाला काजे बी बपतीस्‌मा नी आप्‌यु।
1CO 1:15 नीते असो नी हवे की कुय कह्‌वे की तुहुं काजे माणसे नाव पर बपतीस्‌मा जड़लो छे।
1CO 1:16 ने हव, मे स्‌तीफनासेन घरन्‌या काजे बी बपतीस्‌मा देदलु छे; ईनु काजे छुड़ीन मे नी जानतु की मे अळी काहालाक काजे बपतीस्‌मा देदु।
1CO 1:17 काहाकी मसी मेसे बपतीस्‌मा आपणे करीन नी, बाकुन खुस-खबर सामळणे करीन मकेल्‌लु छे, ने गुयो बी बुलेन अकलेन अनसारे नी, असो नी हवे की मसीन कुरुस फालतु रवे।
1CO 1:18 काहाकी कुरुस सी खत्‌तम हवणेवाळा वाटे बेकार छे, बाकुन हीयु छुटकारु जड़ने वाळा वाटे भगवानेन ताकत छे।
1CO 1:19 काहाकी लिखलो छे, “मे अक्‌कल वाळान अक्‌कल काजे खत्‌तम करीस, ने समज वाळान समज काजे बेकार कर दीस।”
1CO 1:20 काहा रया अक्‌कल वाळा? काहा रया यहुदी धरम सीकाड़न्‌या मास्‌तर्‌या? काहा रया ईनी कळीन माणसे वात मां जखड़ी पन्‌या? काय भगवान कळीन अक्‌कल काजे बेकार नी कर्‌यु?
1CO 1:21 काहाकी जत्‌यार भगवानेन अकलेन अनसारे कळीन अक्‌कल सी भगवान काजे नी जाण्‌या, ती भगवान काजे ज्‌य वारु लाग्‌यो की ईनी परचारेन डेड़-अकल्‌यान साहरे भुरसु करने वाळा काजे छुटकारु देय।
1CO 1:22 यहुदी माणसे ते सहलाणी चाहावे, ने युनानी माणसे अकलेन हेर मां रवे,
1CO 1:23 बाकुन हामु ते हीना कुरुस पर चड़ाय गुयला मसीन परचार करजे, जे यहुदीया वाटे ठुकरेन वजे बणे ने नी-यहुदी वाटे डेड़-अकल्‌या छे;
1CO 1:24 बाकुन जे बुलाय गुयला छे, काय यहुदी काय नी-यहुदी, हींद्‌रे साते मसी भगवानेन ताकत ने भगवानेन अक्‌कल छे।
1CO 1:25 काहाकी भगवानेन डेड़ अक्‌कल माणसेन अक्‌कल सी अक्‌कल वाळा छे, ने भगवान लुल्‌ला माणसेन जुर सी बेस ताकतवाळु छे।
1CO 1:26 ए भायसे ने भणस्‌या, आपणे बुलाये जाणेन ते सुचु की नी डीलेन अनसारे बेसका अकलवाळा, ने नी बेसका ताकत, ने नी बेसका नावसाद्‌या बुलाय गुया।
1CO 1:27 बाकुन भगवान कळीन डेड़-अकल्‌या काजे नेवाड़ लेदु की अकलवाळा काजे सरमाड़े, ने भगवान ईनी कळीन ताकतवाळा माणसेक लाजवाड़े करीन तीनु माणसेक नेवाड़ लेदु, तीनु काजे ईनी कळीन माणसे लुल्‌ला समजे।
1CO 1:28 ने भगवान कळीन लुल्‌ला माणसे काजे ने बेकार काजे, बाकुन जे छे बी नी हीनु काजे बी नेवाड़ लेदु की हीनुक जे छे, फालतु बणाय देय।
1CO 1:29 काहाकी कुय जीव भगवान अगळ मटाय नी करनु चाहजे।
1CO 1:30 बाकुन हेरेत भीणी सी तुहुं ईसु मसी मां छे, जे भगवान भीणी सी हामरे वाटे अक्‌कल ठेहरे, मतलब धरम, ने चुखला, ने छुटकारु;
1CO 1:31 काहाकी जसों लिखलो छे, असोत हवे, “जु मटाय करे चु मालीक मां मटाय करे।”
1CO 2:1 ए भायसे-भणस्‌या, जत्‌यार मे भगवानेन सातायली वात सामळीन तुंद्‌रे धड़े आयु, ती बुल नीते अकलेन मट्‌ली वात साते नी आयु।
1CO 2:2 काहाकी मे ज्‌य नक्‌खी कर लेदलु छे की तुंद्‌रे ईचमां ईसु मसी ने कुरुस पर चड़ाय गुयला मसी काजे छुड़ीन काहाली बी वात काजे नी जाणो।
1CO 2:3 मे लुलु ने बीही जाय्‌न, ने बेसकु कापतु जाय्‌न तुंद्‌रे साते रयु;
1CO 2:4 ने मारो बुल ने मारो परचार मे अकलेन पटावणे वाळी वात नी, बाकुन आत्‌मान ने ताकुतेन सबुत हतलु,
1CO 2:5 हेरेसी की तुंद्‌रु भुरसु माणसेन अक्‌कल पर नी, बाकुन भगवानेन ताकत पर आसरु रवणु चाहजे।
1CO 2:6 ती बी चुखला पाक्‌का माणसे मां हामु अकलेन वात सामळावजे, बाकुन हीनी कळीन ने हीनी कळीन खत्‌तम हवणे वाळा हकदारीन अक्‌कल काजे नी;
1CO 2:7 बाकुन हामु भगवानेन चु सातायलु अकल, काजे जे हाल लग उजेंती नी हवी तीनी अक्‌कल काजे उजेंती करजे तीनाक भगवान कळी बणावणे सी पेहलुत हामरा सेक-सींगार वाटे ठेरावलु।
1CO 2:8 तेरेसी हीनी कळीन हकदार्‌या मां सी कुय बी नी जाण्‌यो, काहाकी कदी चे जाणता बी ती बेसकु उजाळा मालीक काजे कुरुस पर नी चड़ावता।
1CO 2:9 बाकुन जसों लिखलो छे, “जी वात डुळा नी देख्‌या ने कान्‌टा नी सामळ्‌या, ने जी वात माणसेन मन मां नी चड़ी, चीत छे जु भगवान आपणा परम राखणेवाळा वाटे तीयार छे।”
1CO 2:10 बाकुन भगवान हीनुक आपणी आत्‌मान साहरे हामरे पर उजेंतु कर्‌यु, काहाकी आत्‌मा आखी वातो मां, बाकुन भगवानेन सातायली वात बी पारखे।
1CO 2:11 माणसे मां सी कुण काहाली माणसेन वात जाणे, सीरप माणसेन आत्‌मा जी हींद्‌रे मां छे; असुत भगवानेन वात बी कुय नी जाणे, सीरप भगवानेन आत्‌मा जाणे।
1CO 2:12 बाकुन हामु कळीन आत्‌मा नी, बाकुन ची आत्‌मा जड़ली छे जी भगवान भीणी सी छे की हामु हीनुत वात काजे जाणजे ज्‌य भगवान हामु काजे आपलु छे।
1CO 2:13 जीनु काजे हामु माणसेन अकलेन सीकाड़ली वातो मां नी, बाकुन आत्‌मान सीकाड़ली वातो मां, आत्‌मा मां भरायला वातो सी भेळा करी करीन समजाड़े।
1CO 2:14 बाकुन डीलेन माणुस भगवानेन आत्‌मान वात काजे हुकारु नी भरे काहाकी चे हेरे देखणे मां डेड़-अकल्‌या वात छे, ने नी चु हीनुक जाण सके काहाकी हींद्‌री पारख आत्‌मा मां भरायला रीत सी हवे।
1CO 2:15 आत्‌मा मां भरायला माणुस आखो काय पारखे, बाकुन आपसा काजे कुय बी नी पारख सके।
1CO 2:16 “काहाकी मालीकेन “मन मां कुण जाण्‌यो? की हीनाक सीकाड़े?” बाकुन हामरे मां मसीन मन छे।
1CO 3:1 ए भायसे ने भणस्‌या, मे तुंद्‌रे सी हीनी रीत सी वात नी कर सक्‌यु, जसों आत्‌मा मां भरायला माणसे सी, बाकुन जसों डीलेन माणसे सी, ने हींद्‌रे सी जे ईसु मसी मां पुर्‌या छे।
1CO 3:2 मे तुहुंक दुत पीवाड़्‌यु, अन नी खावाड़्‌यु; काहाकी तुहुं हीनाक नी खाय सकतेला; बाकुन हय लग बी नी खाय सकता,
1CO 3:3 काहाकी हय लग डीलेन छे। हेरेसी की जत्‌यार तुंद्‌रे मां रीस ने झगड़ा छे, ती काय तुहुं डीलेन नी हय। ने काय माणसेन रीत पर नी चालु?
1CO 3:4 काहाकी जत्‌यार एक कह्‌वे, “मे पोलुसेन छे,” ने दीसरु कह्‌वे, “मे अपुल्‌लोस छे,” ती काय तुहुं डीलेन माणुस नी हय?
1CO 3:5 अपुल्‌लोस कुण छे? ने पोलुस कुण छे? सीरप चाकरी करन्‌यु छे, जेरे साहरे तुहुं भुरसु कर्‌या, जसा आखा एकेक काजे मालीक आपलु छे।
1CO 3:6 मे लागाड़्‌यु, अपुल्‌लोस देख-भाळ कर्‌यु, बाकुन भगवान अदाड़्‌यु।
1CO 3:7 हेरेसी नी ते लागाड़ने वाळु कायबी नी हय ने नी अदाड़ने वाळु, बाकुन भगवान आखो काय छे जु अदाड़ने वाळु छे।
1CO 3:8 लागाड़ने वाळु ने अदाड़ने वाळा दुयु एकुत छे; बाकुन आखा एक अदमी आपणात मेहनेतेन अनसारे आपणीत दाहड़की जड़ली छे।
1CO 3:9 काहाकी हामु भगवानेन साजल्‌या छे। तुहुं भगवानेन खेत ने भगवानेन घर रवे।
1CO 3:10 भगवान हीना गीण-दयान अनसारे ज्‌य मेसे आपलो हतलो, मे अकलवाळु ने मीस्‌तरीन सारकु खुदीन नेवु नाखलु छे, बाकुन हीना पाया पर भीतड़ो ते दीसरात बांदे बाकुन आखा एक माणसे हुसीयार रवु की हेरे पर भीतड़ो कसों बांदणु चाहजे।
1CO 3:11 काहाकी हीना नेहा काजे छुड़ीन जी पड़ली छे, ने चु ईसु मसी छे, कुय दीसरु नेवु नी नाख सकतु।
1CO 3:12 कदी कुय हीना नेहा पर सनो नीते चांदी नीते बेसकु महंगु दगड़ु नीते लाकड़ो नीते खड़ नीते सुकलु चारान भीतड़ो बांदे,
1CO 3:13 ती आखा एक जणान काम उजेंतो हय जासे; काहाकी चु दाहड़ु हीनाक बताड़से, हेरेसी की आकठा साते उजेंतु हवणे ने चो आकठो आखा एक-एक जणान काम पारखसे की कसु छे।
1CO 3:14 जेरो काम हेरे पर बणीन रवसे, तीनाक ईनाम जड़से।
1CO 3:15 कदी काहानाक ने काम धपी जासे, ती चु दुख हाकलसे; बाकुन चु आपसुत धपते-धपते बची जासे।
1CO 3:16 काय तुहुं नी जाणता की तुहुं भगवानेन मंदीर छे, ने भगवानेन आत्‌मा तुंद्‌रे मां वसे?
1CO 3:17 कदी कुय भगवानेन मंदीर काजे खत्‌तम करसे, ती भगवान बी हीनाक खत्‌तम कर देसे; काहाकी भगवानेन मंदीर चुखलु छे, ने चे तुहुं छे।
1CO 3:18 कुय आपसात काजे धुकु नी देय। कदी तुंद्‌रे मां सी कुय हीनी कळी मां आपसा काजे अक्‌कल वाळु समजे, ती डेड़ अकल्‌यु बणे की चु भगवान अगळ अकलवाळु बण जाय।
1CO 3:19 काहाकी हीनी कळीन अक्‌कल भगवान धड़े डेड़-अकल्‌या छे, जसों चुखला सास्‌तुर मां लिखलो छे, “चु अकलवाळा काजे हींद्‌री हुसारी मां फसाड़ देय”
1CO 3:20 ने अळी, “मालीक अकलवाळान वीच्‌यार काजे जाणे की चे फालतु छे।”
1CO 3:21 हेरेसी माणसे पर कुय बी मटाय नी करे, काहाकी आखो काय तुंद्‌रोत छे:
1CO 3:22 काय पोलुस, काय अपुल्‌लोस, काय केफा, काय कळी, काय जीवन, काय मरनु, काय हयन घड़ी, काय आवणे वाळी वात, आखो तुंद्‌रोत छे,
1CO 3:23 ने तुहुं मसीन छे, ने मसी भगवानेन छे।
1CO 4:1 माणसे हामुक कम सी कम मसीन पावर्‌या ने भगवानेन सातायली वातेन हीसाब-किताप करन्‌यु समजे।
1CO 4:2 पछेन जां हीसाब-किताप करन्‌या मां ज्‌य वात देखी जाय की चु भुरसा वाळु हवे।
1CO 4:3 बाकुन मारे देखणे मां जी बेसकी नानली वात छे की तुहुं नीते माणसेन कुय नीयाव करन्‌यु मेसे पारखे, बाकुन मे खुद आपणे आप काजे नी पारखतु।
1CO 4:4 काहाकी मारो मन मेसे काजे काहाली बी वात मां गुनाळु नी ठेरावे, बाकुन हेरेसी मे नी-गुनाळु नी ठेरावतु, काहाकी मेसे पारखणे वाळु मालीक छे।
1CO 4:5 हेरेसी जत्‌यार लग मालीक नी आवे, टेम सी पेहल काहाली बी वातेन नीयाव मां करु; हयुत आंदारला मां डुकायली वात उजाळा मां देखाड़से, ने मनेन इरादा काजे उजेंतु करे तत्‌यार भगवान एक-एक काजे तु बेसकु वारु छे करीन कह्‌वे।
1CO 4:6 ए भायसे, मे हीनु वाते मां तुंद्‌रे वाटे आपणी ने अपुल्‌लोस खबर दाखलान रीत पर कर्‌यु, हेरेसी की तुहुं हामरे साहरे गुयो सीकु की लिखला सी अगा घुण हवु, ने एकुन एळु ने दीसरान वीरुद मां खुस घुण हवे।
1CO 4:7 काहाकी तारे मां ने दीसरा मां कुण संका कर सके? ने तारे धड़े काय छे जु तुसे दीसरा सी नी जड़्‌यो? ने जत्‌यार की तुसे दीसरा सी जड़्‌यो, ती असु मटाय काहा करे की मानु की नी जड़्‌यु?
1CO 4:8 तुहुं ते आफरी गुया, तुहुं पयस्‌या वाळा हय गुया, तुहुं हामरे पाखुर राज कर्‌या, बाकुन वारु हवतो की तुहुं राज करता की हामु बी तुंद्‌रे साते राज करता।
1CO 4:9 मारी समज मां भगवान हामु नेवताळा काजे आखान पछे हीनु माणसेन तसा ठेरायु, की तींद्‌री मरनेन हुकुम हय गुयो; हव काहाकी हामु कळीन ने सरग वाळा काहवाळ्‌यान ने माणसे वाटे एक तमासु बण गुया।
1CO 4:10 हामु मसी वाटे डेड़-अकल्‌या छे, बाकुन तुहुं ईसु मसी मां अकलवाळा छे; हामु लुल्‌ला छे, बाकुन तुहुं ताकत वाळा छे। तुहुं काजे माणसे आव-भाव करे, बाकुन हामु काजे कुय नी आव-भाव करे।
1CO 4:11 हामु हीनी टेम लग भुकला पीसला ने नांगरला छे, ने मार खाजे ने मार्‌या-मार्‌या फीरजे;
1CO 4:12 ने आपणात हात सी काम करीन मेहनत करजे। माणसे हामु काजे भुंडात कह्‌वे, हामु बरकत आपजे; ने चे एला-पाड़े, हामु सेण करजे।
1CO 4:13 चे नाव-बद्‌दी करे, हामु लीलघायजे हामु आज लग कळीन कुहड़ु ने आखी चीजेन खुरचणेन तसा ठेहर्‌या।
1CO 4:14 मे तुहुं काजे सरमाणने वाटे जी वात नी लिखतु, बाकुन आपणु लाटेक्‌लु पुर्‌यु जाणीन तुहुंक चेतीन रहु करीन लिख रयु।
1CO 4:15 काहाकी कदी मसी मां तुंद्‌रा सीकाड़ने वाळा दस हजार बी हवता, ती बी तुंद्‌रा बास बेसका नी हय; हेरेसी की ईसु मसी मां खुस-खबरेन साहरे मे तुंद्‌रु बास छे।
1CO 4:16 हेरेसी मे तुंद्‌रे सी लीलघाय्‌न कह्‌वो की तुहुं मारेन तसा चाल चालु।
1CO 4:17 हेरेसी मे तीमुथीयुस काजे जु मालीक मां मारु लाटेक्‌लु ने भुरसा मां काठु पुर्‌यु छे, तुंद्‌रे धड़े मकल्‌यु। चु तुहुं काजे ईसु मसी मां मारा वेहवारेन बारामां हेर कराड़से, जसों की मे आखी जागा आखी एक मंडळी मां परचार करो।
1CO 4:18 काहानाक ते असा फुगी गुया, की जाणु की मे तुंद्‌रे धड़े आवतु नी।
1CO 4:19 बाकुन मालीक चाह्‌यु ती मे तुंद्‌रे धड़े छाटु आवीस, ने हीनु फुगलान वात काजे नी, बाकुन हींद्‌री ताकत काजे जाणी लीस।
1CO 4:20 काहाकी भगवानेन राज वात मां नी बाकुन ताकत मां छे।
1CO 4:21 तुहुं काय चाहवु? काय मे लाकड़ी लीन तुंद्‌रे धड़े आवो, नीते परम ने नमरेन आत्‌मा साते आवो?
1CO 5:1 जां लग सामळने मां आवे की तुंद्‌रे मां छीनाळो हवे, बाकुन असो छीनाळो की ज्‌य नी-यहुदी मां बी नी हवे की एक माणुस आपणा बासेन बायरी काजे राखे।
1CO 5:2 ने तुहुं दुख ते नी करु, जेरेसी असा काम करने वाळा तुंद्‌रे ईचमां मां सी नीकळी जाय, बाकुन तुहुं मटाय करु।
1CO 5:3 मे ते डीलेन भाव सी छेटु हतलु, बाकुन आत्‌मान भाव सी तुंद्‌रे साते हयन मानु की जागे हुबु हवणेन टेम मां असा काम करने वाळान बारामां ज्‌य फेसलु आप देदु,
1CO 5:4 की जत्‌यार तुहुं ने मारी आत्‌मा, हामरा मालीक ईसुन ताकत साते भेळा हवु, ती असा माणसे हामरा मालीक ईसुन नाव सी,
1CO 5:5 डीलेन नासेन वाटे भुतड़ा काजे आप देय, काहाकी हेरी आत्‌मा मालीक ईसुन दाहड़ा मां छुटकारु जड़े।
1CO 5:6 तुंद्‌रो मटाय करनु वारु नी हय; काय तुहुं नी जाणु की ईतरोक खाण्‌यु-सुडु आखा गुंदला पीठा काजे आथुड़ कर देय।
1CO 5:7 जुन्‌डला आथुड़ काजे नीकाळीन आपणे खुद काजे चुखा करु की नवलु गुंदलु पीठु बणी जावु; काहाकी तुहुं आथुड़ वाळा नी हय। काहाकी हामरु बी तीहवार, जु मसी छे, बादान रुप मां चड़ गुयु।
1CO 5:8 हेरेसी आवु, हामु खुसी मां खुसी मनावजे, नीते जुन्‌डला आथुड़ सी ने नी कुहराय ने भुंड्‌ला आथुड़ सी, बाकुन सय ने छाचाय्‌न आथुड़ पाकुर बन्‌नला रुटा सी।
1CO 5:9 मे मारी चिट्‌ठी मां तुहुंक लिखलु छे की छीनाळ्‌यान संगत घुण करे।
1CO 5:10 ज्‌य नी की तुहुं सय मां हीनी कळीन छीनाळ्‌यान, नीते लालच्‌यान, नीते आंदारलो करने वाळान, नीते मुरती पुजणे वाळान संगत नी करनु चाहजे; काहाकी हीनी टेम मां ते तुहुं काजे कळी मां सी नीकळीन जाणु पड़तो।
1CO 5:11 बाकुन मारो कह्‌वणु ज्‌य छे की कदी कुय भायस कह्‌वाय, ने छीनाळ्‌यु, नीते लालच्‌यु, नीते मुरती पुजण्‌यु, नीते गाळी देण्‌यु, नीते दारु पीण्‌यु, नीते आंदारलो करने वाळु, ती तेरी संगत घुण करे; बाकुन असा माणुस साते रुटा बी घुण खाय।
1CO 5:12 काहाकी मेसे बाहार वाळान नीयाव करने सी काय काम? काय तुहुं माहें वाळान नीयाव नी करु?
1CO 5:13 बाकुन बाहार वाळान नीयाव भगवान करे। हेरेसी हीना पापी काजे आपणे ईचमां सी नीकाळ देवु।
1CO 6:1 काय तुंद्‌रे मां सी काहालाक काजे जी हिम्‌मत छे की जत्‌यार दीसरा साते लड़ाय हय जाय ती नीयाव वाटे नी-भुरसु करने वाळा धड़े जाय, ने चुखला माणसे धड़े नी जाय?
1CO 6:2 काय तुहुं नी जाणु की चुखला माणसे कळीन नीयाव करसे? हेरेसी जत्‌यार तुहुंक कळीन नीयाव करनु छे, ती काय तुहुं नानला सी नानला बी झगड़ा नी सरे काय?
1CO 6:3 काय तुहुं नी जाणता की हामु सरग वाळा काहवाळ्‌यान नीयाव करसुन ती ईनी कळी मां हवणे वाळु नानुस झगड़ु भांगता नी आवड़े काय?
1CO 6:4 कदी तुहुंक कळीन वात काजे नीयाव करसे नीते सारनु हय, ती काय हीनुत काजे बठाड़सु काय जे मंडळी मां काय बी नी समजी जाय?
1CO 6:5 मे तुहुंक लाजवाड़ने करीन जी वात कह्‌वो। काय छाचलीन तुंद्‌रे मां एक बी अकलवाळु नी जड़े, जु तुंद्‌रु भायस्‌यान झगड़ु भांगे असु नी हय काय?
1CO 6:6 तुंद्‌रे मां भायस-भायसेन ईचमां दावु हवे, ने चे बी नी भुरसु करन्‌यान अगळ।
1CO 6:7 बाकुन छाचलीन तुंद्‌रे मां मटुत वाक ते ज्‌य छे की आंबा-सांबा लड़ाय करु। बयमानी काजे काहानी सेण करता? आपणा दुख काजे काहानी सेण करता?
1CO 6:8 बाकुन तुहुं ते खुद बयमानी ने दुख पुगाड़ु, ने चे बी भायस्‌यो काजे।
1CO 6:9 भुंड्‌ला माणसे सरग राजेन हकदार्‌या नी रवे, जी वात तुहुंक मालुम नी हय काय? खुद काजे धुकु मां खावु नी। छीनाळ्‌या, नी मुरती पुजण्‌या, नी रंडी ने रंडीक राखण्‌या, नी लुच्‌चा नी अदमी साते गलत काम करन्‌या माणसे,
1CO 6:10 चुट्‌टा, हीजेरला, दारकुट्‌या, गाळी देण्‌या, धुकु देण्‌या माणसे सरग राजेन हकदार्‌या नी रवे।
1CO 6:11 ने तुंद्‌रे मां सी कतरा असात हतला, बाकुन तुहुं मालीक ईसु मसीन नाव सी ने आपणा भगवानेन आत्‌मा सी धुवायला छे, ने चुखला हया ने धरमी ठहर्‌या।
1CO 6:12 आखी चीजे मारे वाटे सय ते छे, बाकुन आखी चीजे फायदान नी हय; आखी चीजे मारे वाटे वारु ते छे, बाकुन मे काहली बी वातेन हक मां नी हवे।
1CO 6:13 खाणो पेट वाटे छे, ने पेट खाणा वाटे छे, बाकुन भगवान हीनी काजे ने हीना काजे दुयु काजे खत्‌तम करसे। बाकुन डील छीनाळा करने वाटे नी हय, बाकुन मालीक वाटे छे, ने मालीक डील वाटे छे।
1CO 6:14 भगवान आपणी ताकत सी मालीक काजे मरलाम सी जीवाड़्‌यु, ने हामुक बी जीवाड़्‌यु।
1CO 6:15 काय तुहुं नी समजता की तुंद्‌रु डील मसीन भाग छे? ती काय मे मसीन भाग लीन छीनाळान भाग बणावो? कदी नी।
1CO 6:16 काय तुहुं नी जानता की जे कुय माणुस छीनाळ्‌या सी संगत करे, चु हेरे साते एक जसु बणी जाय? काहाकी लिखलो छे, “चे दुयु एक डील हय जासे।”
1CO 6:17 ने जे मालीकेन संगत मां रवे, चु तेरे साते एक आत्‌मा हय जाय।
1CO 6:18 छीनाळा सी बचीन रवु। जतरा आंग्‌ये-आंग्‌ये माणसे पाप करे चे डीलेन सी बाहार करे, बाकुन छीनाळो करने वाळु आपणात डीलेन वीरुद पाप करे।
1CO 6:19 काय तुहुं नी जाणु की तुंद्‌रु डील चुखली-आत्‌मान मंदीर छे, जु तुंद्‌रे मां बसलु छे ने तुहुंक भगवान भीणी सी जड़लु छे; ने तुहुं आपणा नी हय?
1CO 6:20 काहाकी कीमत दीन मुल ली लेदला छे, हेरेसी आपणा डीलेन अनसारे भगवानेन सेक-सींगार करु।
1CO 7:1 हीनु वातेन बारामां ज्‌य तुहुं लिख्‌या, ज्‌य वारु छे, की अदमी बायरी काजे नी धरे।
1CO 7:2 बाकुन छीनाळान धाक सी आखा अदमीन बायरी हवणु चाहजे, ने आखी बायरीन अदमी रवणु चाहजे।
1CO 7:3 अदमी आपणी बायरीन हक पुरु करे; ने असोत बायरी बी आपणा अदमीन हक पुरु करे।
1CO 7:4 बायरी काजे आपणा डील पर हक नी बाकुन हेरा अदमीन हक छे; असात अदमी काजे बी आपणा डील पर हक नी, बाकुन बायरीन छे।
1CO 7:5 तुहुं एक दीसरा सी आंग्‌ये मां रहु; बाकुन सीरप थुड़ीक टेम लग दुय जणान राजी मरजी सी की दुवा वाटे छुट्‌टी जड़े, ने अळतेन एक साते रहु; असो नी हवे की तुहुं खुद नी हवणेन वजे सी भुतड़ु तुहुं काजे पारखे।
1CO 7:6 बाकुन मे गुयो कह्‌वो चो माननेन छे नी की हुकुम।
1CO 7:7 मे ज्‌य चाहो की जसु मे छे, असुत आखा माणसे हवे; बाकुन आखा एक काजे भगवान भीणी सी खासकरीन वाटु जड़ला छे काहालाक काजे काहलाक रीती सी, ने; काहालाक काजे काहालीक रीत सी जड़लो छे।
1CO 7:8 बाकुन मे नी-ईयाव करला ने रांडायलान बारामां कह्‌वो की हींद्‌रे वाटे असोत रह्‌वणु वारु छे, जसु मे छे।
1CO 7:9 बाकुन कदी चे खुद नी कर सके, ती ईयाव करे; काहाकी ईयाव करनु मन मां तरसायणे सी वारु छे।
1CO 7:10 तींद्‌रु ईयाव हय गुयु, हीनुक मे नी, बाकुन मालीक हुकुम आपे की बायरी आपणा अदमी सी छेटी नी रवणु चाहजे;
1CO 7:11 ने कदी छेटा बी हय जाय, ती अळी दीसरा सी ईयाव घुण करु; नीते आपणा अदमी सी अळी मेळी जावु ने नी अदमी आपणी बायरी काजे छुड़े।
1CO 7:12 दीसरा सी मालीक नी बाकुन मेत कय र्‌यु, कदी काहानाक भायसेन बायरी भुरसु नी राखे ने तेरे साते रह्‌वणे सी खुसी हवे, ती चु हीनीक नी छुड़े।
1CO 7:13 जीनी बायरीन अदमी भुरसु नी राखे, ने हेरे साते रवणे सी खुसी हवे; ची अदमी काजे नी छुड़नु चाहजे।
1CO 7:14 काहाकी असु अदमी जु भुरसु नी राखतु हय, चु बायरीन वजे सी चुखलु रवे; ने असी बायरी जी भुरसु नी राखे, अदमीन वजे सी चुखली रवसे; नी ते तुंद्‌रा पुर्‌या-पारी वीटेळ्‌ळा हवता, बाकुन हय चे चुखला छे।
1CO 7:15 बाकुन जु अदमी भुरसु नी राखे, कदी चु आंग्‌ये हवे ती आंग्‌ये हवणी दे, असी टेम मां कुय भायस नीते बहणीस गुलाम नी हय। भगवान हामुक सांती मां रवणे करीन बुलावलु छे।
1CO 7:16 काहाकी ए बायरी, तु काय जाणे की तु आपणा अदमीन छुटकारु कराड़ लेसी? ने ए अदमी, तु काय जाणे की तु आपणी बायरीन छुटकारु कराड़ लेसी?
1CO 7:17 जसु मालीक आखा एक जणा काजे आटलु छे, ने जसु भगवान आखा एक काजे बुलावलु छे, असात चे चाले। मे आखी मंडळी मां असुत ठेरावो।
1CO 7:18 जु चामड़ी काटलु बुलाय गुयलु छे, चु पछु चामड़ी वाळु मां बणे। चु चामड़ी नी काटलु बुलाय गुयलु छे, चु चामड़ी मां काटाड़े।
1CO 7:19 नी फतरी काटाड़न्‌यु काय छे ने नी फतरी काटाड़न्‌यु काय छे, बाकुन भगवानेन हुकुम काजे मान्‌नु आखो काय छे।
1CO 7:20 आखा एक जणा जीनी टेमे बुलाय गुयला छे, हेरेन मां रवे।
1CO 7:21 कदी तु पावर्‌यान टेम मां बुलाय गुयलु छे ती फीकुर मां करे; बाकुन कदी तु गुलामी मां सी छुटी जाय ती असुत काम करे।
1CO 7:22 काहाकी जु पावर्‌यान घड़ी मां मालीक मां बुलाय गुयलु छे, चु मालीकेन गुलाम मां सी छुड़ावलु छे। असात जु गुलाम मां सी छुड़ावणेन घड़ी मां बुलाय गुयलु छे, चु मसीन पावर्‌यु छे।
1CO 7:23 तुहुं कीमत दीन मुल ली लेदला छे; माणसेन पावर्‌या मां बणु।
1CO 7:24 ए भायस्‌यो ने बहणस्‌या, जे कुय जीनी घड़ी मां बुलाय गुयला छे, चु हेरेत मां भगवान साते रवे।
1CO 7:25 कुवारलीन बारामां मालीकेन कुय हुकुम मेसे नी जड़्‌यु, बाकुन भुरसा मां पाक्‌कु हवणे वाटे जसी दया मालीक मारे पर कर्‌यु, हेरेत अनसारे वात आपो।
1CO 7:26 हेरेसी मारी समज मां ज्‌य वारु छे की आज काल दुखेन वजे सी, माणुस जसु छे असुत रवे।
1CO 7:27 हेरेसी कदी तारी बायरी छे, ती छेटु हवणेन वीच्‌यार मां करे; ने कदी तारी बायरी नी हय, ती बायरीन हेर मां करे।
1CO 7:28 बाकुन कदी तु ईयाव बी करे, ती पाप नी हय; ने कदी कुवारली साते ईयाव हय जाय ती कुय पाप नी। बाकुन असला काजे डीलेन दुख हवसे, ने मे बचाड़ने चाहो।
1CO 7:29 ए भायसे, मे ज्‌य कह्‌वो की टेम कम कर देदलो छे, हेरेसी चाहजे की तींद्‌री बायरी रवे, चे असा हवे मानु की हींद्‌री बायरी नी हय;
1CO 7:30 ने रड़ने वाळा असा हवे, की मानु रड़े नी; ने खुसी करने वाळा असा हवे, की मानु खुसी नी करे; ने मुल लेणे वाळा असा हवे, की मानु हींद्‌रे धड़े काय नी हय।
1CO 7:31 ने हीनी कळी साते एहवार करने वाळा असो हवे, की कळीन ने ती हय जाय; काहाकी हीनी कळीन रीती ने एहवार बदलता जाय।
1CO 7:32 अळतेन मे ज्‌य चाहो की तुहुंक फीकुर नी हवे। नी ईयाव करलु अदमी मालीकेन वातेन फीकुर मां रवे की मालीक काजे कसु खुस राखे।
1CO 7:33 बाकुन ईयाव करलु माणुस कळीन वातेन फीकुर मां रवे की आपणी बायरी काजे काहाली रीत सी खुसी करे।
1CO 7:34 ईयाव करला ने कुवारली मां बी छीट छे; कुवारली मालीकेन फीकुर मां रवे की चु डील ने आत्‌मा दुयु मां चुखला रवे, बाकुन ईयाव करली कळीन फीकुर मां रवे की आपणा अदमी काजे कसी खुस राखे।
1CO 7:35 मे जी वात तुंद्‌रेत फायदान वाटे कह्‌वो, नी की तुहुंक फसाड़ने वाटे, बाकुन हेरेसी की जसु सुभु देय असो कर्‌यो जाय की, तुहुं एक मन हयन मालीकेन सेवा मां लागी रवु।
1CO 7:36 कदी कुय ज्‌य समजे की मे आपणी हेनी कुवारीन हक काजे मारी र्‌यु, ती जेरो जुवानी ढळी रय, ने जरुड़ी बी छे, ती जसों चाहे असात करे, तेरेमां पाप नी हय, चु हेरु ईयाव हवणी देय।
1CO 7:37 बाकुन जो मन मां नक्‌खी कर लेय, ने हीनाक जरुड़ी नी हय, बाकुन आपणी मरजी पर हक राखो, ने आपणा मन मां जी वात ठाणी ले की चु आपणी कुवारी पुरे काजे ईयाव नी हवणी देय, चु वारु करे।
1CO 7:38 हेरेसी जु आपणी कुवारीन ईयाव कर देय, चु वारु करे, ने जे ईयाव नी करे, चु अळी बी वारु करे।
1CO 7:39 जत्‌यार लग काहालीक बायरीन अदमी जीवतु रवे, तत्‌यार लग चु हेरेसी बांदायली छे; बाकुन कदी तेरे अदमी मर जाय, ती जेरेसी चाहे ईयाव कर सके बाकुन सीरप मालीक मां।
1CO 7:40 बाकुन जसी छे कदी असीत रवे, ती मारे वीच्‌यार मां अळी बी बेसकु वारु छे; ने मे समजो की भगवानेन आत्‌मा मारे मां बी छे।
1CO 8:1 हय मुरती अगळ बादा देदली चीजेन बारामां हामु जाणजे की हामु आखा काजे अक्‌कल छे। अक्‌कल मटाय काजे पयदा करे, बाकुन परम सी अगा बड़े।
1CO 8:2 कदी कुय समजे की मे काय जाणो, ती जसों जाननु चाहजे असो हय लग नी जाणता।
1CO 8:3 बाकुन कदी कुय भगवान सी परम करे ती भगवान तीनाक उळखे।
1CO 8:4 अळतेन मुरती लग बादा करली चीजेन खाणेन बारामां हामु जाणजे की मुरती कळी मां कुय चीज नी हय, ने एक काजे छुड़ीन ने कुय भगवान नी हय।
1CO 8:5 तेबी सरगे मां ने कळी मां बेसका भगवान कह्‌वाये जसों की बेसका भगवान ने बेसका मालीक छे।
1CO 8:6 तेबी हामरे वाटे ते एकुत भगवान छे; मतलब बास जेरे भीणी सी आखी चीजे छे, ने हामु हेरेत वाटे छे। ने एकुत मालीक छे, मतलब ईसु मसी जेरे साहरे आखी चीजे हवी, ने हामु बी हेरेत साहरे छे।
1CO 8:7 बाकुन आखा काजे गुयु अक्‌कल नी हय, बाकुन ईतराक ते हय लग मुरती काजे काय समजणेन वजे सी मुरतीन अगळ बादा चड़ावली चीज काजे काय समजीन खाय, ने हींद्‌रो मन लुलो हवणेन वजे सी वीटळी जाय।
1CO 8:8 खाणो हामुक भगवान धड़े नी पुगाड़े। कदी हामु नी खाजे ती आपणो काय नुकसाण नी हय, ने कदी खाय ती काय फायदु नी।
1CO 8:9 बाकुन हुस्‌यार असो नी हवे की तुंद्‌री जी गुलाम मां सी छुटणेन काय लुला वाटे ठुकरेन वजे हय जाय।
1CO 8:10 काहाकी कदी कुय तुसे अक्‌कल वाळा काजे मुरतीन मंदीर मां खाणो खात्‌ला देखे ने चु भुरसा मां लुलु माणुस हयती, काय हेरे जीव काजे मुरती अगळ बादा चड़ावली चीज खाणेन हिम्‌मत नी हय जाय?
1CO 8:11 हीनी रीत सी तारा अकलेन वजे सी चु भुरसा मां लुलु भायस जेरे वाटे मसी मर्‌यु, खत्‌तम हय जासे।
1CO 8:12 हीनी रीत सी भायस्‌यान वीरुद पाप करने सी ने हींद्‌रे लुलु मन काजे घाव पुगाड़ने सी, तुहुं मसीन वीरुद पाप करु।
1CO 8:13 हीनी वजे सी कदी खाणो, मारा भायस काजे ठुकर खावाड़े, ती मे कदी बी कसु बी सीकार नी खाम। असो नी हवे की मे आपणा भायस वाटे ठुकरेन वजे बणो।
1CO 9:1 काय मे गुलाम मां सी नी छुट्‌यु काय? काय मे नेवताळु नी हय? काय मे ईसु काजे जु आपणु मालीक छे, नी देख्‌या? काय तुहुं मालीक मां मारा भणावला नी?
1CO 9:2 कदी मे दीसरा वाटे नेवताळु नी हय, ती बी तुंद्‌रे वाटे ते छे; काहाकी तुहुं मालीक मां मारा नेवताळान कामेन छाप छे।
1CO 9:3 जे मेसे पारखे, हींद्‌रे वाटे ज्‌य मारु जपाप छे।
1CO 9:4 काय हामुक खाणे-पीणेन हक नी हय काय?
1CO 9:5 काय हामुक ज्‌य हक नी हय, की काहालीक मसी बहणीस साते ईयाव करीन हीनीक लीन फीरे, जसों दीसरा नेवताळा ने मालीकेन भायस ने केफा करे?
1CO 9:6 नीते सीरप मेसे ने बरनाबास काजे हक नी हय की कमाय करनु छुड़े?
1CO 9:7 कुण कदी आपणी कमाय मां सी खाय्‌न सीपायड़ान काम करे? कुण अंगुरेन वाड़ी लागाड़ीन हेरो फळ नी खातु हय? कुण गाडरान राखवाळी करीन हींद्‌रो दुत नी पीये?
1CO 9:8 काय मे जी वात माणसेन रीत पर बुलो?
1CO 9:9 काय मुसान लिखला सास्‌तुर मां बी ज्‌य नी कह्‌वे? काहाकी मुसान साहरे लिखला कायदा मां छे, “दावण गेरनेन टेम मां चालतेला बेलेन मुंहडो घुण बांदे।” काय भगवान बेलेन ने फीकुर करे?
1CO 9:10 नीते हेरेसी हामरे वाटे कह्‌वे। हव, हामरे वाटे लिखी गुयलो छे, काहाकी सय छे की जुपणे वाळु आस सी जुपे ने दावण गेरनेवाळा साजल्‌या हवणेन आस सी दावणी गेरेन वाळु हवणु चाहजे।
1CO 9:11 अळतेन जत्‌यार की हामु तुंद्‌रे वाटे आत्‌मा मां भरायला चीजे एर्‌या, ती काय जी मटी वात छे की तुंद्‌री डीलेन चीजेन फसल काटे।
1CO 9:12 जत्‌यार दीसरान तुंद्‌रे पर ज्‌य हक छे, ती काय हेरेसी अदुस नी हवे? बाकुन हामु ज्‌य हकेन काम मां नी लाया बाकुन आखो काय सेण करजे की हामरे साहरे मसीन खुस-खबर मां थुड़ीक रुकावट नी हवे।
1CO 9:13 काय तुहुं नी जाणु की जे मंदीर मां चाकरी करे, चे मंदीर मां सी खाय; ने जे वेदीन चाकरी करे, चे वेदी साते साजल्‌या हवे?
1CO 9:14 हीनीत रीत सी मालीक बी ठेरायु की जे माणसे खुस-खबर सामळावे, हींद्‌रो जीवणेन सादन खुस-खबर सी हवे।
1CO 9:15 बाकुन मे हींद्‌रेम सी कायबी वात काम मां नी लायु, ने मे जी वात हेरेसी नी लिख्‌यु की मारे वाटे असो करे, काहाकी हेरसी ते मारो मरनुत वारु छे की कुय मारी मटाय काजे फालतु नी ठेरावे।
1CO 9:16 कदी मे खुस-खबर सामळावो, ती मारे वाटे काय बी मटायन वात नी; काहाकी जो ते मारे वाटे जरुड़ी छे। कदी मे खुस-खबर नी सामळो, ती मारे पर हाय।
1CO 9:17 काहाकी कदी आपणी मरजी सी ज्‌य करो ती दाहड़की मेसे जड़ती, ने कदी आपणी मरजी सी नी करो ती बी हीसाब-किताप करन्‌यु मेसे सुपी देदला छे।
1CO 9:18 ती मारी काहली दाहड़की छे? ज्‌य की खुस-खबर सामळाणे मां मे मसीन खुस-खबर मुफत मां कर दम, जां लग की खुस-खबर मां जु मारु हक छे हीनाक बी मे पुरी रीत सी काम मां नी लावो।
1CO 9:19 काहाकी आखा सी आजाद हवणे पर बी मे आपणे आप काजे आखान गुलाम बणाय देदु की जादास माणसे काजे खेचीन लावो।
1CO 9:20 मे यहुदीया वाटे यहुदी बण्‌यु की यहुदीया काजे खेचीन लावो जे माणसे मुसान लिखला कायदान हक मां नी रवणे सी बी मुसान लिखला कायदान हक मां बण्‌यु की हीनुक जे मुसान कायदान हक मां छे, खेचीन लावो।
1CO 9:21 मुसान कायदाक नी जाणे हींद्‌रे वाटे मे जे भगवानेन कायदा सी दुर नी बाकुन मसीन कायदान हक मां छे मुसान साहरे लिखला कायदा नी माने हींद्‌रेन तसु बण्‌यु की मुसान कायदाक नी माने तीनु काजे खेची लावो।
1CO 9:22 मे लुला वाटे लुलान तसु बण्‌यु की लुला काजे खेची लावो। मे आखा माणसे वाटे आखो काय बण्‌यु काहाला ने काहाली रीत सी काय एकेन छुटकारु कराड़ो।
1CO 9:23 मे ज्‌य आखो काय खुस-खबर वाटे करो की दीसरा साते हेरु साजल्‌यु बणी जाम।
1CO 9:24 काय तुहुं नी जाणु की दवड़णे मां ते आखा दवड़े, बाकुन ईनाम एकुत लीन जाय? तुहुं असात दवड़ु ने की जीतु।
1CO 9:25 एक ताकतवाळु आखो काय खुद करे; चे ते एक खत्‌तम हवणे वाळा मुकुट काजे हात करने वाटे ज्‌य आखो करे बाकुन हामु ते हीना मुकुट करीन करजे जु जलम रवे।
1CO 9:26 हेरेसी मे हीनी रीत सी दवड़ो, बाकुन रवलो काम करने वाळु नी, मे बी हीनीत रीत सी धुमा सी लड़ायो, बाकुन हेरेन तसु नी जे वाहळा मां ठुक्‌ता जाय्‌न लड़ायो
1CO 9:27 बाकुन मे आपणा डील काजे धुमाटीन मारा हक मां लावो, असो नी हवे की दीसरा काजे परचार करीन मे खुद काहालीक रीत सी पापी ठेहरो।
1CO 10:1 ए भायसे, मे नी चाहतु की तुहुं हीनी वात सी अनजाण्‌या रवु की हामरा आखा डाहा बुड़ा वादळान नेचा हतला, ने आखा की आखा दरीयान ईचमां सी पार हयन गुया;
1CO 10:2 ने आखा वादळा मां ने दरीया मां, मुसान बपतीस्‌मा लेदा।
1CO 10:3 ने आखा एकुत आत्‌मा मां भरायला खाणो खादा;
1CO 10:4 ने आखा एकुत आत्‌मा मां भरायला पाणी पीदा, काहाकी चे तीना आत्‌मा मां भरायला झीरा सी पाणी पीदला जे तेरे साते चालतेली, ने चु झीरु मसी हतलु।
1CO 10:5 बाकुन भगवान हींद्‌रे मां सी बेसका माणसे सी खुस नी हयु, हेरेसी बयड़ा मां ढीक हय गुया।
1CO 10:6 जी वात हामरे वाटे एक दाखलु ठेर्‌यु, की जसा चे लालुच कर्‌या, असात आपणु बी भुंडली चीजेन लालुच मां करु;
1CO 10:7 ने नी तुहुं मुरती पुजण्‌या बणु, जसा की हींद्‌रे मां सी कतरा ते बणी गुया, जसों लिखलो छे, “माणसे खाणे पीणे बठ्‌या, ने खेलने कुदणे उठ्‌या।”
1CO 10:8 ने नी आपणु छीनाळो करजे, जसा हींद्‌रे मां सी कतरा कर्‌या; ने एकुत दाहड़ाम बीस ने तीन हजार माणसे मर गुया।
1CO 10:9 ने नी आपणु मालीक काजे पारखे, जसा हींद्‌रे मां सी कतरा, माणसे कर्‌या ने घड़सान साहरे खत्‌तम हय गुया।
1CO 10:10 ने नी तुहुं कुड़-कुड़ कर्‌या, जीनी रीत सी हींद्‌रे मां सी कतरा कुड़-कुड़ ने खत्‌तम करने वाळान साहरे खत्‌तम हय गुया।
1CO 10:11 बाकुन जी आखी वात, जी हींद्‌रे पर पड़ी दाखलान रीत पर हतली; ने चे हामरी चेतावणी वाटे जे कळीन आकरी टेम रवे लिखाय गुयली छे।
1CO 10:12 हेरेसी जु समजे, मे टणकु छे, चु चेतीन रवे की काय हीटी नी पड़े।
1CO 10:13 तुहुं काहाली असी पारख मां नी पड़्‌या, जे माणसेन सेण सी बाहार छे। ने भगवान भुरसा वाळु छे ने चु तुहुं काजे ताकत सी बाहार पारख मां नी पड़नी देय, बाकुन पारखणेन साते नीकास बी करसे की तुहुं सेण कर सकु।
1CO 10:14 एरे वजे सी, ए मारा लाटेक्‌ला, मुरतीन पुजा-पाट करने सी बची रवु।
1CO 10:15 मे अकलवाळा जाणीन तुंद्‌रे सी कह्‌वो; जो मे कह्‌वो, हीनाक तुहुं पारखु।
1CO 10:16 चु तु बेसकु वारुन कटवरु, जेरे पर हामु तु बेसकु वारु छे करीन कवजे; काय मसीन खुनेन साजेदारी नी हय? चु रुटु हामु तीनाक हामु तुड़जे, काय चु मसीन डीलेन साजेदारी नी हय?
1CO 10:17 हेरेसी की एकुत रुटु छे, ती हामु बी जे बेसका छे एकुत डील छे, काहाकी हामु आखा ईनात मां साजल्‌या हवजे।
1CO 10:18 जे डील भाव सी ईस्‌रायेली छे, हीनुक देखु; काय बादा चड़ावला खाणे वाळा वेदीन साजल्‌या नी हय।
1CO 10:19 अळतेन मे काय कह्‌वो? काय ज्‌य की मुरती पर चड़ाय गुयला बादा काय छे, नीते मुरती काय छे?
1CO 10:20 नी, बाकुन ज्‌य की नी-यहुदी जे बादा देय; चे भगवान वाटे नी बाकुन भुतड़ान आत्‌मा वाटे बादा देय ने मे नी चाहतु की तु भुतड़ान आत्‌मान साजल्‌या हवे।
1CO 10:21 तुहुं मालीकेन कटेरु ने भुतड़ान आत्‌मान कटेरा दुयु मां सी नी पी सकु। तुहुं मालीकेन भेसकायन ने भुतड़ान आत्‌मान भेसकायन दुयुन साजल्‌या नी हय सकु।
1CO 10:22 काय हामुक मालीक काजे रीस देवाड़ु? काय हामु हेरसी जुर वाळा छे?
1CO 10:23 “आखी चीजे मारे वाटे सय ते छे, बाकुन आखी फायदान नी हय,” आखी चीजे मारे वाटे सय ते छे, बाकुन आखी चीजे सी अगो बड़ाये नी।
1CO 10:24 कुय बी आपणीत भलाय काजे नी, बाकुन दीसरान भलाय काजे हेर बी करु।
1CO 10:25 ज्‌य काय हाटेम वेचाये, चो खावु ने मनेन वजे सी काय बी मां पुछु ने पारखु?
1CO 10:26 “काहाकी कळी ने हेरी भरपाय मालीकेन छे।”
1CO 10:27 कदी जे ईसु काजे नी जाणे असला मां सी कुय तुहुं काजे नेवता देय, ने तुहुं जाणे ने पारखणे चाहु, ती ज्‌य काय तुंद्‌रे अगळ मेक देय चोन खावु; ने मन वजेसी कुय मां पुछु।
1CO 10:28 बाकुन कदी कुय तुंद्‌रे सी कह्‌वे, “ज्‌य ते मुरती काजे बादा करली चीज छे,” ती तीना बताड़ने वाळान वजे सी ने मनेन वजेसी घुण खावु।
1CO 10:29 मारो मतलब तारु मन नी, बाकुन तीना दीसरान। भलो, मारु छुटकारु दीसरान वीच्‌यार सी काहा पारखी जाय?
1CO 10:30 कदी मे तु बेसकु वारु छे करीन साजल्‌यु हवो ती जेरे पर मे तु बेसकु वारु छे करीन कह्‌वो, ती हेरे वजे सी मारी वाक नीकाळे?
1CO 10:31 हेरेसी तुहुं चाहे खावु, चाहे पीयु, चाहे जो काय करु, आखो काय भगवानेन सेक-सींगार वाटे करु।
1CO 10:32 तुहुं नीते यहुदीया, नीते नी-यहुदी, ने नी भगवानेन मंडळी वाटे ठुकरेन वजे बणु।
1CO 10:33 जसु मे बी आखी वातो मां आखा काजे खुस राखो, ने आपणा नी बाकुन बेसकान फायदु हेरो की तीनुक छुटकारु जड़से।
1CO 11:1 तुहुं मारेन तसा चाल-चालो जसु मे मसीन तसु चाल-चालो।
1CO 11:2 ए भायसे, मे तुहुंक भुरसु देवाड़ो की आखी वातो मां तुहुं मेसे हेर करो; ने जे जुन्‌डली रीती मां तुहुंक सुपलु छे, हीनुक राखवाळी करु।
1CO 11:3 बाकुन मे चाहो की तुहुं ज्‌य जाण लेवु की एक अदमीन मुणको मसी छे, ने बायरीन मुणको अदमी छे, ने मसीन मुणको भगवान छे।
1CO 11:4 जु अदमी मुणको ढाकलु दुवा नीते भगवानेन अघी सी आवणे वाळी वात देखाड़े, चु आपणा मुणकान वाक नीकाळे।
1CO 11:5 बाकुन जी बायरी उगाल्‌ला मुणकान दुवा नीते भगवानेन अघी सी आवणे वाळी वात देखाड़े ची आपणा मुणकान वाक नीकाळे, काहाकी ची भुमळी हवणे बराबर छे।
1CO 11:6 कदी बायरी उंडणी नी पांगरे ती कान्‌या बी काटाड़ लेय; कदी बायरी वाटे कान्‌या काटान्‌यु नीते भुमळी करान्‌नु सरमेन वात छे, ती उंडणी पांगरे।
1CO 11:7 हव, अदमी काजे आपणा मुणका काजे ढाकणु वारु नी हय, काहाकी चु भगवानेन सीकु ने सेक-सींगार छे; बाकुन बायरी अदमीन सेक-सींगार छे।
1CO 11:8 काहाकी अदमी बायरी सी नी हयु, बाकुन बायरी अदमी सी हयी।
1CO 11:9 ने अदमी बायरी वाटे नी बणाय गुयु, बाकुन बायरी अदमी वाटे बणाय गुयलु छे।
1CO 11:10 हेरेसी सरग वाळा काहवाळ्‌यान वजे सी बायरी काजे सय छे की हकदार मां आपणा मुणका काजे ढाकणु वारु छे।
1CO 11:11 ती बी मालीक मां नी ते बायरी पाखुर अदमी, ने नी अदमी पाखुर बायरी छे।
1CO 11:12 काहाकी जसी बायरी अदमी सी छे, असुत अदमी बायरीन साहरे छे; बाकुन आखी चीजे भगवान सी छे।
1CO 11:13 तुहुं आपसात वीच्‌यार करु, काय बायरी काजे उघाल्‌ले मुणको लीन भगवान सी दुवा करु सुभा देय?
1CO 11:14 काय सभावेन रीत सी बी तुहुं नी जाणु की कदी अदमी लांबला कान्‌या राखे, ती हेरे वाटे लाजेन वात छे।
1CO 11:15 बाकुन कदी बायरी लांबला कान्‌या राखे ती हेरे वाटे सुभा देय, काहाकी कान्‌या हीनी काजे उडणी वाटे देदला छे।
1CO 11:16 बाकुन कदी कुय बी वातेम जखड़ी पड़ने हींडे, ती ज्‌य जाणी लेय की नी हामरी ने नी भगवानेन मंडळी असी रीती छे।
1CO 11:17 बाकुन ज्‌य हुकुम आपतु जाय्‌न, मे तुहुंक नी भुरसु देवाड़तु, हेरेसी की तुंद्‌रे भेळा हवणे सी भलाय नी, बाकुन नुकसाण हवे।
1CO 11:18 काहाकी पेहल ती मे ज्‌य सामळो, की जत्‌यार तुहुं मंडळी मां भेळा हवु ती तुंद्‌रे मां झगड़ा हवे, ने मे हेरे पर काय-काय भुरसु बी करो।
1CO 11:19 काहाकी कुहरायला बी तुंद्‌रे मां जरुड़ हवसे, हेरेसी की जे माणसे तुंद्‌रे मां खरला छे चे देखता हय जाय।
1CO 11:20 अळतेन तुहुं जे एक जागा मां भेळा हवु, ती ज्‌य मालीकेन खाणो खाणे वाटे नी हय।
1CO 11:21 काहाकी खाणेन टेम मां एक दीसरा सी पेहल आपणो खाणो खाय लेय, हीनी तरा कुय ते भुकलु रवे ने कुय छाकी जाय।
1CO 11:22 काय खाणे पीणे वाटे तुंद्‌रो घर नी हय? नीते भगवानेन मंडळी काजे कायनी जाणु, ने तींद्‌रे धड़े नी हय हीनुक सरमाणनु? मे तुंद्‌रे सी काय कह्‌वो? काय हीनी वात मां तुंद्‌री बड़ाय करो? नी मे बड़ाय नी करो।
1CO 11:23 काहाकी जी वात मेसेक मालीक सी जड़ी, ने मे तुहुंक बी बताड़ देदु। की मालीक ईसु तीनीन राते धरायणे वाळु हतलु, तीनीत राते रुटु धर्‌यु।
1CO 11:24 ने तु बेसकु वारु छे करीन रुटाक तुड़्‌या ने कह्‌यु, “जु मारु डील छे, जु तुंद्‌रे वाटे छे। मारे हेर करने वाटे चत कर्‌या करु।”
1CO 11:25 ने अळतेन ईसु हाते मां पीयालु धर्‌यु ने असु कह्‌यु, “जो पीयालो मारा लुहीन नवलु पीयालु छे। ने जत्‌यार बी तुहुं पीयालु पीयु, ती मेसेक हेर करने करीन मारेन तसात कर्‌या करजु।”
1CO 11:26 काहाकी जत्‌यार कदी तुहुं ज्‌य रुटु खावु ने हीना कटेरा मां सी पीयु, ती मालीकेन मुत काजे जत्‌यार लग चु नी आवे, तत्‌यार लग परचार करता रवु।
1CO 11:27 हेरेसी जे कुय गलत रीत सी मालीकेन रुटु खाय नीते हेरा कटवरा मां सी पीये, चु मालीकेन डीलेन ने लुहीन गुना वाळु रवसे।
1CO 11:28 हेरेसी माणुस आपणे आप काजे पारखी लेय, ने हीनी रीत सी हीना रुटा मां सी खाय ने हीना कटेरा मां सी पीये।
1CO 11:29 काहाकी जे खाय ने पीये घड़ी मालीकेन डील काजे नी उळखे, चु हीना खाण सी ने पीणे सी आपणे उपर डंड लावे।
1CO 11:30 हेरे वजे सी तुंद्‌रे मां बेसका माणसे लुला ने मांदा छे, ने थुड़ाक मरी बी गुया।
1CO 11:31 कदी हामु आपणे आप काजे पारखजे ती डंड नी जड़तो।
1CO 11:32 बाकुन मालीक हामुक डंड आपीन हामुक झीचकारतु रवसे, हेरेसी की हामु कळी साते गुनाळा नी ठेरजे।
1CO 11:33 हेरेसी, ए मारा भायसे, ने बहणस्‌या जत्‌यार तुहुं खाणे वाटे भेळा हवु ती एक दीसरा वाटे ठेर्‌या करु।
1CO 11:34 कदी कुय भुकलु हसे ती आपणा घर मां खाय लेय, जेरे सी तुंद्‌रो भेळो हवणे डंडेन वजे नी हवे। रवली वात काजे मे आवीन सय करीस।
1CO 12:1 ए भायसे, बहणस्‌या मे नी चाहतु की तुहुं आत्‌मा मां भरायला। भगवानेन वाटान बारामां अनजाण्‌या रवु।
1CO 12:2 तुहुं जाणु की जत्‌यार तुहुं नी-यहुदी हतला, ती बुबड़ी मुरतीन पछळ जसा कवला असा चालतेला। गलाती 4:8
1CO 12:3 हेरेसी मे तुहुंक चेतावणी आपो की जे कुय भगवानेन आत्‌मान अगवाय सी बुले, चु नी कह्‌वे की ईसु गरा वाळु छे; ने नी कुय चुखली-आत्‌मान पाखुर कुय कय सके की ईसु मालीक छे।
1CO 12:4 भगवानेन वाटा ते काय तरेन छे, बाकुन आत्‌मा एकुत छे;
1CO 12:5 ने चाकरी बी काय तरेन छे, बाकुन मालीक एकुत छे;
1CO 12:6 ताकतवाळा काम ते काय तरेन छे, बाकुन भगवान एकुत छे, जु आखा मां एक एकेन हिम्‌मत पयदा करे।
1CO 12:7 बाकुन आखान फायदु पुगाड़ने वाटे एक आत्‌मान वीजाळो आप देय।
1CO 12:8 काहाकी एक काजे आत्‌मान साहरे डीमाकेन वात आप देय, ने दीसरा काजे हीनीत आत्‌मान अनसारे अकलेन वात आप देय।
1CO 12:9 काहालाक काजे हीनीत आत्‌मा सी भुरसु छे, ने काहालाक काजे हीनीत एक आत्‌मा सी वारु करनेन भगवानेन वाटु आप देय।
1CO 12:10 पछेन काहानाक काजे ताकत काम करनेन जुरेन, ने काहानाक काजे भगवानेन अघी सी आवणे वाळी वात बताड़े, ने काहानाक काजे आत्‌मान पारख करने, ने काहानाक काजे काय तरेन बुली, ने काहालाक काजे बुलीन मतलब बताड़ने ताकत आप्‌यु।
1CO 12:11 बाकुन जे आखा ताकत वाळा काम चीत एक आत्‌मा कराड़े, ने तीनाक जो चाहजे चो वाटी देय।
1CO 12:12 काहाकी जीने तरा डील ते एक छे ने हेरा भाक बेसका छे, ने हीना एक डीलेन आखा भाक बेसका रवणे पर आखा मेळीन एकुत डील छे, हीनीत तरा मसी बी एकुत छे।
1CO 12:13 काहाकी हामु आखा काय यहुदी हवे काय नी-यहुदी, काय पावर्‌यु हवे काय आजाद, एकुत आत्‌मान साहरे एक डील हवणे वाटे बपतीस्‌मा लेदा, ने हामु आखा काजे एकुत आत्‌मा पीवाड़ देदली छे।
1CO 12:14 हेरसी की डील मां एकुत भाक नी बाकुन बेसका भाक छे।
1CO 12:15 कदी पाय कह्‌वे, “मे हात नी हय, हेरेसी डीलेन नी हय,” ती काय चु हेरे वजे सी डीलेन नी।
1CO 12:16 ने कदी कान्‌टा कह्‌वे, “मे डुळु नी हय, हेरेसी डील नी हय,” ती काय चु हेनी वजे सी डीलेन नी हय?
1CO 12:17 कदी आखो डील डुळात रवता ती सामळनु काहा रवतो? कदी आखो डील कान्‌टात रवता, ती सुंगणु काहा रवतो?
1CO 12:18 बाकुन छाचलीन भगवान भाक काजे आपणी मरजीन अनसारे एक करीन डील मां मेक्‌यु।
1CO 12:19 कदी चे आखा एकुत भाक रवता, ती डील काहा हवतो?
1CO 12:20 बाकुन हय भाक ते बेसका छे, बाकुन डील एकुत छे।
1CO 12:21 डुळा हात सी नी कय सके, “मेसे तारी जरुवत नी हय” ने नी मुणको पाय सी कय सके, “मेसे तुंद्‌री जरुवत नी हय।”
1CO 12:22 बाकुन डीलेन चे भाक जेत दीसरा सी लुला लागे, बेसको जरुवत छे;
1CO 12:23 ने डील जीनु भाके काजे हामु आव-भाव लायेक नी समजे हीनु काजे हामु जादास आव-भाव देजे; ने हामरे‍ सुभे नी देय असला भाक अळी बी बेसका सुभु देय असा हय जाय,
1CO 12:24 अळतेन बी आपणो सुभे असा भाके काजे हेरी जरुवत नी बाकुन भगवान डील काजे असु बणाय देदु की तीना भाक काजे आव-भाव मां कमी हतली हीना काजे अळी बी बेसका आव-भाव जड़्‌यो।
1CO 12:25 काहाकी डील मां बेरजु नी पड़नु, चाहजे बाकुन भाक एक दीसरान बराबर फीकुर करे।
1CO 12:26 हेरेसी कदी एक भाक काजे दुख जड़े, ती आखा भाक हेरेसी ते जड़े; ने कदी एक भाकन बड़ाय हवे, ती हेरे साते आखा भाक खुसी मनावे।
1CO 12:27 असात तुहुं आखा मेळीन मसीन डील छे, ने आंग्‌ये-आंग्‌ये हेरा भाक छे;
1CO 12:28 ने भगवान मंडळी मां आंग्‌ये-आंग्‌ये माणसे ठेरावला छे; पेहलु नेवताळु, दीसरु भगवानेन अघी सी आवणे वाळी वात देखाड़न्‌यु, तीसरु मास्‌तर, अळतेन ताकुतेन काम करने वाळु, अळतेन वारु करने वाळा, ने भलाय करने वाळा, ने देख-भाळ करने वाळा, ने काय तरेन बुली बुलने वाळा।
1CO 12:29 काय आखा नेवताळा छे? काय आखा भगवानेन अघी सी आवणे वाळी वात देखान्‌या छे? काय आखा परचार करन्‌या छे? काय आखा ताकुतेन काम करने वाळा छे?
1CO 12:30 काय आखा काजे वारु करनेन भगवानेन वाटु जड़लु छे? काय आखा काय तरान बुली बुले?
1CO 12:31 काय आखा बुल बदलेन काम करे काय? तुहुं मटा सी मटा भगवानेन वाटु धुन मां रवु, बाकुन मे तुहुंक अळी बी आखा सी वारु वाट देखाड़े।
1CO 13:1 कदी मे माणसेन ने सरग वाळा काहवाळ्‌यान बुले बुलो ने परम नी राखो, ती मे ठण-ठणावती पीतळ, ने झणझणो करती झांझ छे।
1CO 13:2 ने कदी मे भगवानेन अघी सी आवणे वाळी वात देखाड़ सको, ने आखा सातायली वातेन ने आखा तरान अक्‌कल काजे समजो, ने मेसे जां लग पुरु भुरसु हवे की मे बयड़ा काजे छेटु करदम, बाकुन परम नी राखो, ती मे काय बी नी हय।
1CO 13:3 कदी मे आपणो पुरो धन तींद्‌रे झुणी कायनी हय तीनु काजे खावड़ दम, नीते आपणो डील धपाड़ने वाटे आप दम, ने परम नी राखो, ती मेसे काय बी फायदु नी हय।
1CO 13:4 परम दमधरे, ने कीर्‌पाळु छे; परम डाहवाय नी करे; परम आपणी बड़ाय नी करे, ने मटकाळु नी हय,
1CO 13:5 चु गलत रीत सी नी चाले, चु आपणी भलाय नी चाहावे, झुंझलावे नी, बुरो नी माने।
1CO 13:6 पाप सी खुसी नी हवे, बाकुन छाचाय सी खुसी हवे।
1CO 13:7 चु आखी वात सेण कर लेय, आखी वातेन भुरसु करे, आखी वातेन आस राखे, आखी वात मां दमधरे।
1CO 13:8 परम कदी टळे नी; भगवानेन अघी सी आवणे वाळी वात हवसे, ती खत्‌तम हय जासे; बुली हसे, ती जाती रवसे; अक्‌कल हसे, ची सर जासे
1CO 13:9 काहाकी हामरु अक्‌कल आधीत छे, ने हामरी भगवानेन अघी सी आवणे वाळी वात आधी छे;
1CO 13:10 बाकुन जत्‌यार माहान चुखलु आवसे, ती अदेरु सर जासे।
1CO 13:11 जत्‌यार मे पुर्‌यु हतलु, ती मे पुर्‌यान तसु बुलतेलु, ने पुर्‌यान तसु वीच्‌यार हतलो, पुर्‌यान तसों मन हतलो, पुर्‌यान तसी समज हतली; बाकुन जत्‌यार मटु हय गुयु ती पुर्‌यान तसी वात छुड़ देदु।
1CO 13:12 हय हामुक आरस्‌या मां धुंदळान तसों देखाये, बाकुन हेनी टेमे आंबा-सांबा देखसुन; हीनी टेमे मारु अक्‌कल अदेरु छे, बाकुन हीनी टेमे असु पुरी रीत सी उळखीस, जसु मे उळखाय गुयलु छे।
1CO 13:13 बाकुन हय भुरसु, आस, परम जे तीनु जलमेन छे, बाकुन हींद्‌रे मां आखा सी मटु परम छे।
1CO 14:1 परमेन हेर करु, ने आत्‌मा मां भरायलान वाटान झींग मां रवु, खास करीन ज्‌य की भगवानेन अघी सी आवणे वाळी वात देखाड़न्‌यु देखाड़ु।
1CO 14:2 काहाकी जे दीसरी बुली मां वात करे चु माणसे सी नी बाकुन भगवान सी वात करे; हेरेसी की हेरी वात कुय नी समजे, काहाकी चु सातायली वात आत्‌मा मां हयन बुले।
1CO 14:3 बाकुन जे भगवानेन अघी सी आवणे वाळी वात देखाड़े, चु माणसे सी अदु हवणे ने परचार ने सांतीन वात कह्‌वे।
1CO 14:4 जु दीसरी बुली मां वात करे, चु आपणोत अदुस बरकत हात करे; बाकुन जु भगवानेन अघी सी आवणे वाळी वात कह्‌वे, चु मंडळीन भलो करसे।
1CO 14:5 मे चाहो की तुहुं आखाक दीसरी बुली मां वात करो; बाकुन हेरे सी अदुस ज चाहो की भगवानेन अघी सी आवणे वाळी वात कहं, काहाकी कदी दीसरी बुली बुलने वाळी मंडळी अदुस हवणे वाटे बुली बदली नी करे, ती भगवानेन आवणे वाळी वात कह्‌णे वाळाक तेरे सी बड़ीन छे।
1CO 14:6 हेरेसी ए भायस्‌यो, कदी मे तुंद्‌रे धड़े आवीन दीसरी बुली मां वात करो, ने वीजाळो नेते अक्‌कल नेते भगवानेन आवणे वाळी वात नीते परचारेन वात तींद्‌रे सी नी कहं, ती मार सी तुहुंक काय फायदु हवसे?
1CO 14:7 तसोत कदी तेरे मां जीव नी तीनी चीज बी तींद्‌री आवाज नीकळे, जसा पावळी नीते फेप्‌या, कदी हींद्‌रे रेंग मां नी समजाये ती जे फुके नीते आजाड़्‌या, चु कसों उळखाय जासे?
1CO 14:8 ने कदी फेप्‌यान आवाज चुखी नी नीकळे, ती कुण लड़ाय वाटे तीयार हवसे?
1CO 14:9 असात तुहुं बी कदी जीप सी चुखी-चुखी वात नी कहुं, ती जे काय कहें चो कसों समजायसे? तुहुं ते हवा सी वात करने वाळा ठेरावसे।
1CO 14:10 कळी मां कतरी बी तरान बुली काहानी हवे, बाकुन हींद्‌रे मां सी कुय बी बीना मतलबेन नी हवे।
1CO 14:11 हेरेसी कदी मे काहालीक बुलीन मतलब नी समजे, ती बुलेन वाळान नींगा मां दीसरा देसेन रवसे ने बुलेन वाळा मारी नींगा मां दीसरा देसेन ठेरसे।
1CO 14:12 हेरेसी तुहुं बी जत्‌यार आत्‌मा मां भरायला भगवानेन वाटुेन धुन मां छे ती असा कुसीस करु की तुंद्‌रे भगवानेन वाटुेन अदु हवणे सी मंडळी अदु हवे।
1CO 14:13 हेरे वजे सी जे दीसरी बुली बुले, चु दुवा करे की हेरा बुली बदलनेन वाटु बी जड़णु चाहजे।
1CO 14:14 हेरेसी कदी मे दीसरी बुली मां दुवा करो, ती मारी आत्‌मा दुवा करे बाकुन मारु डीमाक काम नी देय।
1CO 14:15 अळतेन काय करनु चाहजे? मे आत्‌मा सी बी दुवा करो, ने डीमाक सी बी दुवा करो; मे आत्‌मा सी बी गावीस, ने डीमाक सी बी गावीस।
1CO 14:16 नी ते कदी तु आत्‌मा सी तु बेसकु वारु छे करीन कह्‌वीस, ती अळतेन डेड़-अकल्‌या तुसे तु बेसकु वारु छे कवसी ती असोत हवतो रवे करीन कसु कवसे? काहाकी चु तेबी जाणे की तु काय कह्‌वे?
1CO 14:17 तु ते वारु रीती सी तु बेसकु वारु छे करीन कह्‌वे, बाकुन दीसरु अगु नी अदे।
1CO 14:18 मे आपणा भगवान काजे तु बेसकु वारु छे करीन कह्‌वे, की मे तुहुं आखा सी जादास दीसरी बुली मां बुलो।
1CO 14:19 बाकुन मंडळी मां दीसरी बुली मां दस हजार वात कह्‌वणे सी ज्‌य मेसे अळी बी वारु मालुम पड़े, की दीसरा काजे सीकाड़न्‌ने वाटे डीमाक सी पांच वात कह्‌वे।
1CO 14:20 ए भायसे, तुहुं समज मां पुर्‌या मां बणु; कुहराय मां ते पुर्‌या रवु, बाकुन समज मां हुस्‌यार बणु।
1CO 14:21 चुखला सास्‌तुर मां असो लिखलो छे, की मालीक कह्‌वे, “मे कुय नी जाणे असली बुली बुलने वाळान साहरे, ने दीसरान मुंहडान साहरे, ईनु माणसे सी वात करीस ती बी चे मारी नी सामळे।”
1CO 14:22 हेरेसी दीसरी बुली ईसु पर भुरसु करन्‌या वाटे नी, बाकुन नी भुरसु करन्‌या वाटे सहलाणी छे; ने भगवानेन अघी सी आवणे वाळी वात ईसु पर नी भुरसु करन्‌या वाटे नी, बाकुन ईसु पर भुरसु करन्‌यान सहलाणी छे।
1CO 14:23 अळतेन कदी मंडळी एक जागा भेळी हवे, ने आखान आखा दीसरी बुली बुले, ने छेटे वाळा नीते ईसु पर नी भुरसु करन्‌या माणसे माहें जाय ती काय चे तुहुं काजे गांडा करीन नी कह्‌वे?
1CO 14:24 बाकुन कदी आखा भगवानेन अघी सी आवणे वाळी वात देखाड़न्‌यु कह्‌वणे लागे, ने कुय ईसु पर नी भुरसु करे नीते छेटे वाळा माणसे माहें आय जाय, ती आखा हीनाक आखा गुनाळु ठेराय देसे ने पारखी लेसे;
1CO 14:25 ने हींद्‌रे मनेन सातायली वात देखाय जासे ने तत्‌यार चु मुंहडान भुरसे पड़ीन भगवान काजे आंधसे ने मान लेसे की छाचलीन भगवान तुंद्‌रे ईचमां छे।
1CO 14:26 हेरेसी ए भायसे, काय करनु चाहजे। जत्‌यार तुहुं भेळा हवु, एक जणान मन मां गावता नीते परचार नीते दीसरी बुली नीते उजाळो नीते दीसरी बुलीन मतलब बताड़नु रवे। आखा काय आत्‌माम अदुस भरायला हवणु चाहजे।
1CO 14:27 कदी दीसरी बुली मां वात करनु हय ती दुय नीते बेसका हवे ती तीन जणा वारी-वारी सी बुले, ने एक माणुस बुली बदल्‌या करे।
1CO 14:28 बाकुन कदी बुली बदली करने वाळु नी हवे, ती दीसरी बुली बुलने वाळा मंडळी मां हुगा रवे, ने आपणा मन सी ने भगवान सी वाते करे।
1CO 14:29 भगवानेन अघी सी आवणे वाळी वात देखान्‌या मां सी दुय नीते तीन जणा बुले, ने बचला माणसे तींद्‌रा बुल काजे पारखे।
1CO 14:30 बाकुन कदी बसला दीसरा मायन काहनाक पर जु बठलु छे, काय भगवानेन उपर सी आपला वीजाळो हवे ती पेहलु हुगु रय जाय।
1CO 14:31 काहाकी तुहुं आखा एक-एक करीन भगवानेन अघी सी आवणे वाळी वात देखाड़न्‌यु देखाड़ सको, काहाकी आखा सीके ने आखाक सांती जड़े।
1CO 14:32 ने भगवानेन अघी सी आवणे वाळी वात देखान्‌यान आत्‌मा भगवानेन अघी सी आवणे वाळी वात देखान्‌यान हक मां छे।
1CO 14:33 काहाकी भगवान खडळ-वडळ करन्‌यु नी हय, बाकुन भगवान सांतीन भगवान छे जसों चुखला माणसेन आखी मंडळी मां छे।
1CO 14:34 बायरा काजे मंडळी मां हुगा रहणु चाहजे, काहाकी हीनुक वात करनेन हुकुम नी हय, बाकुन हक मां रवणेन हुकुम छे, जसों मुसान कायदा मां लिखलो बी छे।
1CO 14:35 कदी चे काय सीकणे चाहाये, ती घर मां आपणा-आपणा अदमी सी पुछे, काहाकी बायरी काजे मंडळी मां वात करनु लाजुणेन वात छे।
1CO 14:36 काय भगवानेन बुल तुंद्‌रे मां सी नीकळ्‌यो काय? नीते सीरप तुंद्‌रेत लग पुगलो छे?
1CO 14:37 कदी कुय माणुस आपणे आप काजे भगवानेन अघी सी आवणे वाळी वात देखाड़न्‌यु नीते आत्‌मा भरायला जणु समजे, ती जाण लेय की जी वात मे तुहुंक लिखो, चो मालीकेन हुकुम छे।
1CO 14:38 बाकुन कदी कुय जी वात नी माने, ती हीनाक बी नी माने।
1CO 14:39 अळतेन ए भायसे, भगवानेन अघी सी आवणे वाळी वात देखान्‌यान धुन मां रवु ने दीसरी बुली सी नी करीन मां कह्‌वु;
1CO 14:40 बाकुन जो आखो काम वारु ने सय सी करनु चाहजे।
1CO 15:1 ए भायसे ने भणस्‌या, हय मे तुहुंक पेहलुत खुस-खबर बताड़ो जे पेहल सी सामळी लेदला छे, तीनाक तुहुं हुकारी बी लेदला ने जेरे मां तुहुं काठा बी छे।
1CO 15:2 हेरेत साहरे तुंद्‌रु छुटकारु बी हयु, कदी हीना खुस-खबर काजे जु मे सामळलु हेर राखु, नीते तुंद्‌रु भुरसु करनु फालतु हवसे।
1CO 15:3 हेरे वजे सी मे आखा सी पेहल तुहुंक चीत वात पुगाड़ देदु, जी मेसेक मालुम हतली की चुखला सास्‌तुरेन बुलेन अनसारे ईसु मसी आपणे पापे वाटे मर गुयु।
1CO 15:4 ने गाड़ाय गुयु, ने चुखला सास्‌तुरेन अनसारे तीन दाहड़ाम मरलाम सी जीवतु बी हय गुयु,
1CO 15:5 ने केफा काजे तत्‌यार बारे काजे देखाव पड़्‌यु।
1CO 15:6 अळतेन चु पांच सोव सी अदुस भायसे काजे भेळा हतला देखाव पड़्‌यु, तींद्‌रे मां सी बेसका हय लग जीवतेला छे, बाकुन थुड़ाक सुय गुया।
1CO 15:7 अळतेन चु याकुप काजे देखाव पड़्‌यु तत्‌यार आखा नेवताळा काजे देखाव पड़्‌यु।
1CO 15:8 आखान पछे मेसे काजे बी देखाव पड़्‌यु, जे मानु अधेरला दाहड़ान पयदा हवलु।
1CO 15:9 काहाकी मे नेवताळा मां सी आखा सी नानलु छे, बाकुन नेवताळा कह्‌वायणेन लायक बी नी हय, काहाकी मे भगवानेन मंडळी काजे बेसकु ठुक्‌यु मार्‌यु।
1CO 15:10 बाकुन मे जो काय बी छे, भगवानेन गीण-दया सी छे हेरु गीण-दया मार पर हयु चु फालतु नी जाय; बाकुन मे हीनु आखा सी बड़ीन मेहनत बी कर्‌यु, ती बी गुयो मारे भीणी सी नी हयो बाकुन भगवानेन गीण-दया सी गुयो मार पर हतलो।
1CO 15:11 हेरेसी चाहे मे छे, चाहे चे रवे हामु गुयो परचार करजे ने हेरे पर तुहुं भुरसु बी कर्‌या।
1CO 15:12 हेरेसी जत्‌यार की मसीन ज्‌य परचार करे की ईसु मरलाम सी जीवतु हय गुयु, ती तुंद्‌रे मायन बेसका माणसे काहा कहें, की मरलाम सी पछा जीवता हवे नी?
1CO 15:13 कदी मरलाम सी जीवता नी हवे, ती मसी बी नी जीवतु हय सके;
1CO 15:14 ने कदी मसी मरलाम सी जीवतु नी हयु, ती हामरो परचार करनु बी फालतु छे, ने तुंद्‌रो ईसु पर भुरसु करनु बी फालतु छे।
1CO 15:15 बाकुन हामु भगवानेन बारामां लुच्‌चाय मेकण्‌या ठेर्‌या काहाकी हामु भगवानेन बारामां जी गवाय देदला; की हीयु मसी काजे जीवाड़ देदलु, अळतेन नी जीवतु हवतु कदी मरलाम सी जीवतु नी हवतु।
1CO 15:16 ने कदी मरलाम सी जीवता नी हवता, ती मसी बी नी जीवतु हवतु;
1CO 15:17 ने कदी मसी मरलाम सी जीवतु नी हवतु, ती तुंद्‌रो भुरसु करनु फालतु छे, ने तुहुं हय लग आपणा पाप मां भरायला छे।
1CO 15:18 बाकुन जे ईसु मसी मां सुय गुया, चे बी खत्‌तम हय गुया।
1CO 15:19 कदी हामु सीरप ईना जीवन मां ईसु मसी मां सी आस राखजे ती हामु आखा माणसे सी जादास दुख झेल्‌जे।
1CO 15:20 बाकुन छाचलीन मसी मरलाम सी जीवतु हय गुयु ने जे सुय गुया तींद्‌रे मां चु पेहलुत फळ हयु
1CO 15:21 काहाकी जत्‌यार माणसेण साहरे मरनु आयो, ती माणसेन साहरे मरलाम सी पछा जीवता हया
1CO 15:22 ने जसों आदम मां आखा मरे, ती असात मसी मां बी आखा जीवता हय गुया,
1CO 15:23 बाकुन एकेक जणु आपणी-आपणी वारी मां सी, पेहलु फळ मसी, पछेन मसीन आवणे पर हेरा माणसे जीवाड़ी जासे।
1CO 15:24 हेरे पछेन खत्‌तम हवसे। हीने टेमे चु आखी हकदारी, ने आखा हक, ताकत खत्‌तम करीन राज काजे भगवान बासेन हातेम सुप देसे।
1CO 15:25 काहाकी जत्‌यार लग चु आपणा दुस्‌मन काजे आपणा पाय तळे नी लावे, तत्‌यार लग हेरो राज करनु जरुड़ी छे।
1CO 15:26 आखा सी आकरीम दुस्‌मन चु खत्‌तम कर देसे, च मरलु छे।
1CO 15:27 काहाकी “भगवान हेरे पाय तळे कर लेदु” बाकुन जत्‌यार चु कवे की आखो काय हेरे हक मां कर लेदलो छे उजेंतो छे, ज आखो काय हेरा हक मां कर देदु, आपसुत आन्‌गे रयु।
1CO 15:28 ने जत्‌यार आखो काय हेरा हक मां हय जासे ती आपसु बी हेरा हक मां हय जासे ज आखो काय हेरा हक मां कर देदु काहाकी आखा मां भगवानुत आखो काय छे।
1CO 15:29 नीते जे माणसे मरला वाटे बपतीस्‌मा लेय चे काय करसे? कदी मरलाम सी जीवता नी हय ती पछेन काहा हींद्‌रे वाटे बपतीस्‌मा लेदु?
1CO 15:30 ने हामु बी काहा आखी टेमे तकलीप मां पड़ता रवजे?
1CO 15:31 ए भायसे ने भणस्‌या, मेसे हीनी मटायन सगुन तसों जे हामरा ईसु मसी मां ने मालीक मे तुंद्‌रे बारामां कव की मे दाहड़ीन मरो।
1CO 15:32 कदी मे माणसेन रीत पर ईफीसुस मां झाड़का ढुरे सी लड़ाय करतु ती मेसेक काय फायदु हवतु? कदी मरलाम सी जीवता नी हवता, “ती आवु, खाजे ने पीजे काहाकी काल ते मरी जासुन।”
1CO 15:33 धुकु मां खावु, “भुंडीत संगात वारलु चाल-चलन काजे बीगाड़ देय।”
1CO 15:34 धरम वाटे जागी जावु ने पाप मां करु; काहाकी काय माणसे असात छे जे भगवान काजे नी जाणे। मे तुहुं काजे सरमाड़ने करीन ज कव।
1CO 15:35 हय कुय ज कवसे, “मरलाम सी जीवता काहनी रीत सी हय जाय, ने काहला डील साते आवे?”
1CO 15:36 ए डेड़-अकल्‌या ज काय तु एरे, जत्‌यार लग च नी मरे जीवतो नी हवे
1CO 15:37 ने ज तु एरे, च डील नी हय ज पयदा हवणे वाळु छे, बाकुन सीरप वारलु दाणा छे, चाहे गहुंन रवे चाहे काहलाक अळी अनाजेन हवे
1CO 15:38 बाकुन भगवान आपणी मरजीन अनसारे हीनाक डील आपे, ने एकेक बीज काजे खास करीन डील आपे।
1CO 15:39 आखो डील एक तसों नी हय; माणसेन डील आन्‌गे छे, ने ढुरेन डील आन्‌गे छे; ने चिरलान डील आन्‌गे छे; ने माछान डील आन्‌गे छे।
1CO 15:40 सरगेन डील छे ने कळी सी पयदा हवणु वाळु डील बी छे। बाकुन सरगेन डीलेन सेक-सींगार आन्‌गे छे, ने कळी मां वाळु आन्‌गे छे।
1CO 15:41 दाहड़ान उजाळो आन्‌गे छे, चांदेन उजाळो आन्‌गे छे, तारान उजाळो आन्‌गे छे, काहाकी एक तारा सी दीसरा तारा मां वीजाळो फरक छे।
1CO 15:42 मरलाम सी जीवतो हवणेन बी असोत छे। डील खत्‌तम हवणेन रीत मां एराय जाय ने कदी खत्‌तम नी हवणे वाळा सीका मां जीवतो हय जाय।
1CO 15:43 चु आव-भाव नी हवे ने एराय जाय, ने तेरे साते जीवतु हय जाय; लुला साते एराय जाय, ताकत वाळा साते मरलाम सी जीवता हय जाय
1CO 15:44 माणसेन जीवणु मरनु धड़ काजे धरती मां एराय जाय, ने आत्‌मा मां भरायला डील मरलाम सी जीवतो हय जाय; असो की धरती पर वाळा डील छे ती आत्‌मा मां भरायला डील बी छे।
1CO 15:45 असोत लिखलो बी छे, की “पेहलो माणुस, मतलब आदम जीवतेलु जीव बण्‌यु” आकरी आदम, जीवेक आपण्‌यु आत्‌मा बण्‌यु।
1CO 15:46 बाकुन पेहेल आत्‌मा मां भरायला नी हतलु, बाकुन धरती पर वाळा डीलेन सीकु हतलु, हेरे पछेन आत्‌मा मां भरायला हया
1CO 15:47 पेहलो माणुस कळी सी मतलब धुळान हतलो; दीसरो माणुस सरगेन छे।
1CO 15:48 जसु चु धुळान हतलु, असात चे बी छे, जे धुळान छे; ने जसु चु सरगेन छे, असात चे बी छे जे सरगेन छे।
1CO 15:49 ने जसा हामु हेरे सीका काजे बदल्‌या जो धुळान हतलो असात हीना सरगेन सीका काजे बी बदलसुन।
1CO 15:50 ए भायसे ने भणस्‌या, मे गुयो कह्‌वो की सीकार ने लुही भगवानेन राजेन हकदारी नी हय सके, ने नीते धरती पर वाळा सरन्‌या डील, हकदार्‌यु हय सके।
1CO 15:51 सामळु, मे तुंद्‌रे सी सातायली वात कय सके, हामु आखा नी मरजे, बाकुन आखा बदली जासुन,
1CO 15:52 ने जे पापण्‌या पटकारता वार मां, आकरी फेप्‌यो फुक्‌से ती हवसे। काहाकी फेप्‌यो फुक्‌से ने मरलाम सी जीवता जलमेन तसा उठाय जासे, ने हामु बदली जासुन।
1CO 15:53 काहाकी जरुड़ी छे की ज्‌य खत्‌तमेन हवणेन डील कदी नी खत्‌तम हवणेन काजे पेहरी लेसे, ने ज्‌य मरलो डील जलमेन डील काजे पेहरी लेसे।
1CO 15:54 ने जत्‌यार ज्‌य खत्‌तम हवणेन कदी नी खत्‌तम हवणेन काजे पेहरी लेसे, ने ज्‌य मरलो जलम काजे पेहरी लेय, ने तत्‌यार चो बुल जो लिखलो छे पुरो हय जासे: “ज्‌य ने मरण काजे गीळ गुयो।”
1CO 15:55 “ए मरनु, तारी ज्‌य काहा रय? ए मरनु, तारु टच काहा रयु?”
1CO 15:56 मरनेन घाव पाप छे, ने पापेन ताकत कायदु छे।
1CO 15:57 बाकुन भगवान काजे तु बेसकु वारु छे करीन कह्‌वो जो हामरे मालीक ईसु मसीन साहरे हामुक जीत जड़े।
1CO 15:58 हेरेसी ए मारा लाटेक्‌ला भायसे, काठा ने टणका रवु, ने मालीकेन काम मां जलम बड़ता जावु, काहाकी ज्‌य जाणु की तुंद्‌री महनोत मालीक मां फालतु नी हय।
1CO 16:1 हय हीना चंदान बारामां जे चुखला माणसे वाटे करलो छे, जसु हुकुम मे गलातीयान मंडळी काजे आपलु, असात तुहुं बी आपो
1CO 16:2 हाप्‌तान पेहले दाहड़े तुंद्‌रे मां सी एक-एक जणा आपणी धके तेरे अनसारे थुड़ाक आपणे धड़े मेकी रवजु की मारे आवणे पर चंदु नी करनु पड़े।
1CO 16:3 ने जत्‌यार मे आवीस, ती तीनाक तुहुं चाहु हीनुक मे चिट्‌ठी आपीन मकली दीस की तुंद्‌रो दान यरुसलेम मां पुगाड़ देसे।
1CO 16:4 कदी मारो बी जाणु जरुड़ी हयो ती चे मारे साते जासे।
1CO 16:5 मे मकीदुनीया हयन तुंद्‌रे धड़े आवीस, काहाकी मेसे मकीदुनीया हयन जाणुत छे।
1CO 16:6 बाकुन अनुमान छे की तुंद्‌रेन चांहान रय जाय ने सरदीन रीतु तुंद्‌रेन चांहान नीकळो, तत्‌यार जीनु भीणी मारो जाणु हेरसी हेरे भीणी तुहुं मेसे पुगाड़ देजु।
1CO 16:7 काहाकी मे हय वाट मां तुंद्‌रे सी मेळने नी चाहतु; बाकुन मेसे आस छे की कळी मालीक चाहे ती थुड़ीक टेमी लग तुंद्‌रे साते रवीस।
1CO 16:8 बाकुन मे पेन्‌तेकुस्‌तेन लग ईफीसुस मां रवीस,
1CO 16:9 काहाकी मारे वाटे चां एक मटु ने काम मां आवणे वाळो बारनो उघल्‌लो छे ने वीरुदी बेसका छे।
1CO 16:10 कदी तीमुथीयुस आय जाय, ती देखजु की चु तुंद्‌रेन्‌चां चु नी बीहे रवसे; काहाकी चु मारेन तसु मालीकेन काम करे।
1CO 16:11 हेरेसी कुय हीनाक गलत घुण जाणु, बाकुन हीनाक सांती सी ईनी धड़े पुगाड़ देजु, की मारे धड़े आय जाय काहाकी मे हेरी वाट देख र्‌यु की चु भायसे साते आवे।
1CO 16:12 भायस अपुल्‌लोस सी मे बेसकु लीलघायु ने कह्‌यु की तुंद्‌रे धड़े भायसे साते जाय; बाकुन हीयु हीनी टेमे जाणेन काय बी मरजी नी कर्‌यु, बाकुन जत्‌यार मुखु जड़से तत्‌यार आय जासे।
1CO 16:13 जागता रवु, भुरसु मां काठा रवु, हिम्‌मत राख्‌जु, ताकत वाळा बणु।
1CO 16:14 जो काय करु चो परम सी करु।
1CO 16:15 ए भायसे, तुहुं स्‌तीफनासेन घराणा काजे जाणु की चे अखायान पेहलो फळ छे, ने चुखला माणसेन चाकरी वाटे तीयार रवे असु लीलघायो।
1CO 16:16 हेरेसी मे तुंद्‌रे सी लीलघायु करो की असात हक मां रवु, बाकुन एक-एक जणान जे हीना काम मां मेहनत ने साजल्‌या छे।
1CO 16:17 मे स्‌तीफनास ने फुरतुनास ने अखयकुसेन आवणे सी बेसकु खुसी हय र्‌यु, काहाकी जे तुंद्‌री कमी काजे पुरा कर्‌या।
1CO 16:18 चे मारी ने तुंद्‌री आत्‌मा काजे सांती आप देदा, हेरेसी असा काजे मानु।
1CO 16:19 आसीयान मंडळी भीणी सी तुहुं काजे आवजु ने आवीस कह्‌वो; अक्‌वीला ने परीस्‌कीला ने हींद्‌रे घरेन मंडळी काजे बी तुहुंक मालीक मां बेसका-बेसका कावा आवजु ने आवीस कह्‌वो
1CO 16:20 आखा भायसे काजे तुहुंक आवजु ने आवीस। चुखला गुळा दीन आंबा-सांबा आवजु ने आवीस कह्‌वो।
1CO 16:21 मे पोलुस काजे आपणे हात काजे लिखलो छे, आवजु ने आवीस।
1CO 16:22 कदी कुय मालीक सी परम नी राखे ती चु सराप वाळु छे। ए हामरा मालीक आव।
1CO 16:23 मालीक ईसुन गीण-दया तुंद्‌रे पर हवती रवे।
1CO 16:24 मारु परम ईसु मसी मां तुंद्‌रे आखा साते रवतु रवे।
2CO 1:1 ए कुरींथीस सहर मां रहण्‌या भगवानेन मंडळीन माणसे, मे पोलुस, ईसु मसी पर भुरसु करन्‌या भाय भेटा तीमुथीयुस भेळे जी चिट्‌ठी तुहुंक लिखो। भगवान आपसी मरजीन अनसारे, मेसेक नेवाड़ीन ईसु मसीन नेवताळु बणावलु छे। जी चिट्‌ठी अखाया जीला मां आखे दुर रहण्‌या भगवानेन आखा चुखला माणसे वाटे बी लिखलु छे, जे ईसु मसी काजे माने।
2CO 1:2 आपणा भगवान बासेन ने मालीक ईसु मसीन गीण-दया ने सुक सांती तुहुं आखा काजे जड़ती रहणु चाहजे।
2CO 1:3 आपणा मालीक ईसु मसीन भगवान, ने बासेन तु बेसकु वारु छे करीन कहो, जु दयान बास, ने आखी भातीन मां सांतीन भगवान छे।
2CO 1:4 चु हामरे आखी आफोत मां सांती आपे, काहाकी हामु हीनी सांतीन वजे सी जु भगवान हामुक आपे, हीनुक बी सांती आप सके, काहाकी जे आखी आफोत मां पड़ र्‌या।
2CO 1:5 काहाकी जसा मसीन दुखे मां हामु जादास साजल्‌या हवजे, असात हामु सांती मां बी मसीन साहरे जादास साजल्‌या रवजे।
2CO 1:6 कदी हामु दुख झेलजे, ती जी तींद्‌री सांती ने छुटकारा वाटे छे, ने कदी सांती जड़े, जे तुंद्‌री सांती वाटे छे; जेरे ताकत सी तुहुं सेण करता जाय्‌न हीनु दुखे काजे सेण कर लेय, जीनुक हामु बी सेण करजे।
2CO 1:7 ने हामरी आस तुंद्‌रे बारामां काठी छे, काहाकी हामु जाणजे, की तुहुं जसा हामरा दुखे मां साजल्‌या छे असात सांती मां बी साजल्‌या छे।
2CO 1:8 ए भायसे, हामु नी चाहता की तुहुं हामरे पर आवला हीना दुख सी अनजाण्‌या रवु। ज्‌य आसीया जीलाम हामरे उपर बेसकी आफोत आय पल्‌ली, ने ची वेला सेण नी हवे हामरी ताकत सी बाहार हतली अतरी जबर हतली की हामु जीवन सी बी मरने-मरने हय गुयला।
2CO 1:9 बाकुन हामु हामरा मन मां समजी लेदला, छे की हामरे पर मुतेन डंड जड़ीत गुय। की हामु आपणे पर भुरसु नी राखजे, बाकुन भगवान पर भुरसु राखजे। जु मरलाम सी जीवाड़े।
2CO 1:10 हव जुत भगवान हामुक मुतेम सी बचाड़्‌यु, ने अगु बी मुतेम सी बचाड़से, ने हामरी जी आस छे की चु अगु बी बचाड़तु रवसे।
2CO 1:11 तुहुं बी मेळीन दुवान साहरे हामरी मदत करसु, की जु भगवानेन वाटु बेसका माणसेन साहरे हामुक जड़लो छे, हेरे वजे बेसका माणसे हामरे भीणी सी तु बेसकु वारु छे कवे।
2CO 1:12 काहाकी हामु आपणा मन हीनी गवाय पर मटाय करजे, की कळी मां ने खास करीन तुंद्‌रे ईचमां हामरु एहवार भगवान वाटे असो चुखलो ने छाचाय साते हतलु, जे डीलेन अक्‌कल सी नी, बाकुन भगवानेन गीण-दया साते हतला।
2CO 1:13 हामु तुहुंक काय नी लिखजे, सीरप ज तुहुं भणु ने मानु बी, ने मेसे आस छे, की आकरी लग बी मान्‌ता रवसु।
2CO 1:14 जसा तुंद्‌रे मां सी कतरा मानी लेदला छे, की हामु तुंद्‌रे मटायन वजे छे; असात तुहुं बी मालीक ईसुन दाहड़े हामरे वाटे मटायन वजे ठेरसु।
2CO 1:15 ने हीना भुरसा सी मे चाहतेलु की पेहेल तुंद्‌रे धड़े आवो, की तुहुंक दुय कावा संयबरकत जड़नु चाहजे।
2CO 1:16 ने तुंद्‌रेन्‌चां मायन मकीदुनीया हय्‌न जायस, ने अळतेन पछु मकीदुनीया सी हय्‌न तुंद्‌रेन्‌चां आवीस ने तुहुं मेसेक यहुदीया जीला भीणी थुड़ीक वार लग पुगाड़ देजु।
2CO 1:17 हेरेसी मे जी मरजी करलु हतलु ती काय मे हींडणे फीरने वाळु देखाड़्‌यु काय? नीते ज करने चाह काय डीलेन अनसारे करने चाह, की मे वात मां “हव, हव” बी कहं; ने “नी, नी” बी कहं?
2CO 1:18 भगवान भुरसा वाळु गवा छे, की हामरे हीना बुल मां ज तुंद्‌रे सी कह्‌यु “हव” ने “नी” दुयु नी जड़े।
2CO 1:19 काहाकी भगवानेन पुर्‌यु ईसु मसी जेरो हामरे साहरे मतलब मारे ने सीलवानुस ने तीमुथीयुसेन साहरे तुंद्‌रे ईचमां मे परचार हयु; तेरेमां “हव” ने “नी” दुयु नी हतला; बाकुन, हेरे मां “हव” की “हव” हवे।
2CO 1:20 काहाकी भगवानेन वायदा छे, चे आखा हेरेमां “हव” हय्‌न साते छे हेरे सी हेरे साहरे असोत बी हवतो रवे बी हवे, की हामरे साहरे भगवानेन सेक-सींगार हवे।
2CO 1:21 ने ज हामु तुंद्‌रे साते मसी मां काठा करे, ने जु हामुक नेवाड़्‌लु छे चु भगवान छे
2CO 1:22 चु हामरे पर छाप बी कर देदु, ने बचाड़ने मां आत्‌मा काजे हामरे मनेम आप्‌यु।
2CO 1:23 मे भगवान काजे आपणी आत्‌मा सी गवा करीन कहं, की मे हय लग कुरींथीस मां हेरेसी नी आयु, की मेसे तुंद्‌रे पर दया आवतेली
2CO 1:24 ज नी, की हामु भुरसान बारामां तुंद्‌रे पर राज करीन हक जमाड़ने हींडजे; बाकुन तुंद्‌रे खुसी मां साजेदारी छे काहाकी तुहुं भुरसात मां पाक्‌का छे।
2CO 2:1 हेरेसी मे मारा मन मां नक्‌खी कर लेदलु छे की, मे तुहुंक लड़ीन वेला पाड़ने करीन अळी पछु तुंद्‌रेन्‌चां हय नी आवो।
2CO 2:2 काहाकी कदी मे तुहुंक नीरास करो, ती मेसेक खुसी आपणे वाळु कुण रवसे, सीरप चु तीनाक मे नीरास कर्‌यु।
2CO 2:3 ने मे जी वात तुहुं काजे हेरेसी लिख र्‌यु, की काही असो नी हवे, की मारा आवणे पर हींद्‌रे सी मेसे खुसी जड़नु चाहजे, मे हींद्‌रे सी नीरास हय जाम; काहाकी मेसे आखा काजे हीनी वातेन भुरसु छे, की जु मारी खुसी छे, ची तुंद्‌रे आखा मां बी छे।
2CO 2:4 मटी आफोत, ने मनेन थकान सी मे बेसकु आसळा पाड़ी पाड़ीन तुहुंक लिखलो हतलो हेरेसी नी, की तुहुं नीरास हवु, बाकुन हेरेसी की तुहुं हीना मटला परम काजे जाणी लेवु, ज मेसे तुंद्‌रे सी छे।
2CO 2:5 ने जु बी पाप करीन मेसेक वेला पाड़लु छे, चु मेसेक अतरात वेला नी पाड़्‌यु, बाकुन एक कहींयाम तुहुं आखाक वेला पाल्‌ला छे। तेबी हय मे ईनी वात काजे लीन तुहुंक जादा वेला पाड़ने नी हय र्‌या।
2CO 2:6 काहाकी पाप करला काजे तुंद्‌रे मायन बेसका जणा मेळीन डंड आप्‌या। अतरोत घणो। हय ते चु सुदरी गुयु।
2CO 2:7 हेरेसी ज्‌य वारु छे की हेरा गुना काजे माफ करु; ने सांती आपु, असा नी हवे की असा माणसे बेसका नीरास मां डुबी जाय।
2CO 2:8 हेरे वजे सी मे तुंद्‌रे सी लीलघायो, की हीना काजे आपणा परमेन सबुत आप देवु।
2CO 2:9 काहाकी मे हेरेसी बी लिखलु, की तुहुंक पारखी लम की तुहुं मारी आखी वाते काजे मान्‌ने वाटे तीयार हवु, की नी।
2CO 2:10 जेरो तुहुं काय माफ करता रवु हीनाक मे बी माफ करीस, काहाकी मे बी जो काय माफ कर्‌यु, कदी कर्‌या ती, तुंद्‌रे वजे सी मसीन जागा मां हयन माफ कर्‌या।
2CO 2:11 की भुतड़ान दावु हामरे पर नी चाले, काहाकी हामु हेरी सुच सी अनजाण्‌या नी हय।
2CO 2:12 जत्‌यार मे ईसु मसीन खुस-खबर सामळावणे करीन तरोआस मां आयु, ने मालीक मारे वाटे एक बारनो उगाड़ देदु।
2CO 2:13 ती मारा मन मां सांती नी जड़े, हेरेसी की मे आपणा भायस तीतुस काजे नी हेर्‌यु; हेरेसी हींद्‌रे सी आवजु ने आवसी करीन मे मकीदुनीया जीला मां जात र्‌यु।
2CO 2:14 बाकुन भगवान काजे तु बेसकु वारु छे करीन कह्‌वो, जु मसी मां जलम हामुक जीतेन खुसी मां लीन फीरे, ने आपणे अकलेन खुसबु हामरे साहरे आखी दुर फेलावे।
2CO 2:15 काहाकी हामु भगवान धड़े छुटकारु जड़ने वाळा, ने खत्‌तम हवणे वाळा, दुयु वाटे मसीन खुसबु छे।
2CO 2:16 कतरा वाटे ते मरनेन वजे मरनेन गन्‌द, ने कतरा वाटे जीवनेन वजे खुसबु, वारु ईनी वातेन लायक कुण छे?
2CO 2:17 काहाकी हामु हीनु बेसकान तसा नी, जे भगवानेन बुल मां भेसकु करे; बाकुन मनेन छाचाय सी, ने भगवान भीणी सी भगवान काजे मारे साते छे करीन जाणीन ईसु मसी मां बुलो।
2CO 3:1 काय हामु अळी पछा आपणी मटाय करने लागजे काय? नीते हामु काजे दीसरा माणसेन तसा दुवा कर्‌या की चिट्‌ठीया तुंद्‌रे धड़े लावणु नीते तुंद्‌रे सी लेणु छे?
2CO 3:2 हामरी चिट्‌ठी तुहुंत छे, जी हामरे मन मां लिखली छे, ने हीनी चिट्‌ठी काजे आखा माणसे उळखे ने भणे।
2CO 3:3 ज देखाय, की तुहुं ईसु मसीन चिट्‌ठी छे, तीनाक हामु चाकर्‌यान तसा लिखजे; ने जे लिखणेन सांय सी नी, बाकुन जीवतेला भगवानेन आत्‌मा सी दगड़ान पट्‌या पर नी, बाकुन मनेन मास पट्‌या पर लिखली छे।
2CO 3:4 हामु मसीन साहरे भगवान पर असात भुरसु राखजे।
2CO 3:5 ज नी, की हामु आपणे आप सी ईना लायक छे, की आपणे भीणी सी काहालीक वात काजे सुची समजी सकजे; बाकुन हामरी काबील भगवान भीणी सी छे।
2CO 3:6 चु हामु काजे नवला लिखला वायदान चाकर्‌या हवणे वाटे बी कर्‌या, बुलेन चाकर्‌या नी बाकुन आत्‌मान; काहाकी बुल मारे, बाकुन आत्‌मा जीवाड़े।
2CO 3:7 कदी मरनेन वायदु जेरा आक्‌सर दगड़ा पर खुदी देदला, जां लग झजळन्‌या ताकत सी भरायला, मुसान मुंहडा परुन उजाळान वजे जो कम बी हवतो, जातलो ईस्‌रायेल हेरा मुंहडा पर नींगा नी कर सकतेला।
2CO 3:8 ती आत्‌मान वायदा अळी बी झजळन्‌या ताकत सी भरायला काहानी हवे?
2CO 3:9 काहाकी जत्‌यार गुनाळु ठेरावणे वाळु वायदु ताकत सी भरायला हतली, ती धरमी ठेरावणे वाळु वायदु ने बी झजळन्‌या ताकत सी भरायला काहा नी हवे?
2CO 3:10 ने जे झजळन्‌या सी भरायला हतलु, चु बी हीना उजाळान वजे जे हेरेसी बड़ीन वीजाळो हतला, काय बी झजळन्‌या सी भरायला नी ठेहर्‌या।
2CO 3:11 काहाकी जत्‌यार चु जे कम हवतो जातलो, ती हयु जु काठु रवसे, ने अळी बी झजळन्‌या काहानी रवे?
2CO 3:12 हेरेसी असी आस राखीन हामु हिम्‌मतेन साते बुलजे।
2CO 3:13 ने मुसान तसा नी, जेरे आपणा मुंहडा पर पड़दु नाखतेला काहाकी ईस्‌रायली हीनी कम हवणे वाळा उजाळान आकरी काजे नी देखे।
2CO 3:14 बाकुन चे डेड़-अकल्‌या हय गुया, काहाकी आज लग जुन्‌डला कायदान नेम भणते टेम हींद्‌रे मन पर चु पड़दु पड़ी रवलु; बाकुन चु ईसु मसी मां उठी जाय।
2CO 3:15 आज लग जत्‌यार कदी मुसान किताप भणजे, ती हींद्‌रे मन पर पड़दु पड़ी रहे।
2CO 3:16 बाकुन जत्‌यार कदी हींद्‌रा मन मालीक भीणी सी फीरसे, तत्‌यार चु पड़दु उठी जासे।
2CO 3:17 मालीक ते आत्‌मा छे, “जांहा मालीक” छे चां छुटकारु छे।
2CO 3:18 बाकुन जत्‌यार हामु आत्‌मान उगाड़्‌ला सीका सी मालीकेन उजाळो एरेन तसों देखाव पड़े, जसों आरस्‌या मां, ते मालीकेन साहरे जी आत्‌मा छे, हामु तीनीत सेक-सींगार सी भरायला सीका मां थुड़ा-थुड़ा करीन बदलता जाय रया।
2CO 4:1 हेरेसी जत्‌यार हामरे पर असी दया हवी, की हामु जी चाकरी जड़ी, ती हामुक हिम्‌मत नी हारजे।
2CO 4:2 बाकुन हामुक सरम आवे असला सातायला काम काजे छुड़ देदा, ने नी चतराय सी चालजे, ने नी भगवानेन बुल मां भेसकु करजे, बाकुन छाचाय काजे उजेंतो करीन, भगवान अगळ हरेक माणसेन मन मां आपणी भलाय देखाड़जे।
2CO 4:3 बाकुन कदी हामरे खुस-खबर पर पड़दु पड़लु छे, ती जी खत्‌तम हवणे वाळा वाटे पड़ला छे।
2CO 4:4 ने तीनु पर जे भुरसु नी करे हींद्‌रे वाटे, तींद्‌री अक्‌कल काजे ईनी कळीन देव आंदळा कर देदला छे, काहाकी मसी जु भगवानेन तसु सीकु छे, हेरे झजळन्‌या खुस-खबरेन उजाळो हींद्‌रे पर नी भबळे।
2CO 4:5 काहाकी हामु आपणे आप काजे नी, बाकुन मसी ईसु काजे परचार करजे, की चु मालीक छे; ने आपणा बारामां असो कहें, की हामु ईसुन वजे सी तुंद्‌रा पावर्‌या छे।
2CO 4:6 हेरेसी की, भगवानुत छे, जु कह्‌यु, “आंदारलान सी वीजाळो, भबळे ने चु हामरे मन मां भबळे की भगवानेन सेक-सींगारेन उळखाण वीजाळो ईसु मसीन सीका सी भबळे।”
2CO 4:7 बाकुन हामरे धड़े चो धन धुळान ठाहरा मां मेकलो छे, की जी कदी नी खत्‌तम हवणे वाळी ताकत हामरे भीणी सी नी, बाकुन भगवान भीणी सी ठेरे।
2CO 4:8 हामरे चारे मेर सी दुख ते भुकतजे, बाकुन पीड़ा मां नी पड़जे; घांगवायला ते छे, बाकुन नीरास नी हवजे।
2CO 4:9 माणसे एला ते पाड़े बाकुन भगवान हामुक नी छुड़े, माणसे हामुक पाड़े, बाकुन खत्‌तम नी करे।
2CO 4:10 हामु ईसुन मरण काजे आपणा डील मां हर घड़ी लीन फीरजे; की ईसुन जीवन बी हामरा डील मां उजेंतो हवे।
2CO 4:11 काहाकी हामु जीवते जीव जलम ईसुन वजे सी मुतेन हात मां सुपायजे, की ईसुन जीवन बी हामरे मरला डील मां उजेंतो हवे।
2CO 4:12 हेरेसी मुत ते हामरे पर ताकत लावे ने जीवन तुंद्‌रे पर।
2CO 4:13 हेरेसी की हामरे मां चीत भुरसान आत्‌मा छे, “जेरे बारामां लिखलो छे, मे भुरसु कर्‌यु।” हेरेसी कह्‌यु अळतेन हामु बी भुरसु करजे, तेरेसी बुलजे।
2CO 4:14 काहाकी हामु जाणजे, की जु मालीक ईसु काजे मरलाम सी जीवाड़े, चु हामुक बी ईसु मां साजल्‌यु जाणीन जीवाड़ेसे, ने तुंद्‌रे साते आपणे अगळ उबा करसे।
2CO 4:15 काहाकी आखी चीजे तुंद्‌रे वाटे छे, काहाकी गीण-दयान साहरे अदुस हयन भगवानेन सेक-सींगार वाटे तु बेसकु वारु छे करीन बी बड़ावे।
2CO 4:16 हेरेसी हामु हिम्‌मत नी, हारजे कदी हामरा बाहरलो माणसेन सीकु खत्‌तम हय जासे तेबी हामरो माहींन माणसेन सीकु दाहड़ीन-दाहड़ीन नवलु हवतु जाय।
2CO 4:17 काहाकी हामरु थुड़ाक दाहड़ान हळकु दुख हामरे वाटे बेसका खास ने जलमेन सेक-सींगार देवाड़े।
2CO 4:18 ने हामु ते देखली चीज काजे नी बाकुन नी देखाय असली चीज काजे देखता रवजे काहाकी देखली चीज, थुड़ाक दाहड़ान छे, बाकुन नी देखली चीज जलम बणीन रवसे।
2CO 5:1 काहाकी हामु जाणजे की जत्‌यार हामरो धरती परुन तसलो घर उदार देसे, ती हामुक भगवान भीणी सी सरगे पर एक असु बंगलु जड़से, जो हाते सी बन्‌नलो घर नी बाकुन जलम लग बन्‌नलो रवसे।
2CO 5:2 हेरेमां ते हामु तरसजे ने मटी लालुच राखजे; की आपणा सरगेन घर काजे पेहेरी लेजे।
2CO 5:3 की हीना काजे पेहरने सी हामु नांगरला नी जड़े।
2CO 5:4 ने हामु हीना तम्‌बु मां रवता जाय्‌न बुज सी दबला कवता रवजे काहाकी हामु उतारने नी, बाकुन अळी पेहरने चाहजे, काहाकी चु जो मरणहार छे जीवन मां डुब जाय।
2CO 5:5 जु हामुक हीनीत वात वाटे तीयार करला छे, ने चु भगवान छे, चु आपणुक सांय लीन जीव-आत्‌मा आप देदु,
2CO 5:6 अळतेन हामु जलम हिम्‌मत धरीन रवजे ने ज्‌य जाणजे; की जत्‌यार लग हामु डील मां रवजे, तत्‌यार लग मालीक सी छेटा छे।
2CO 5:7 काहाकी हामु सीका काजे देखीन नी, बाकुन भुरसा सी चालजे।
2CO 5:8 हेरेसी हामु हिम्‌मत राखीन रवजे, ने डील सी छेटा हयन मालीक साते रवणु अळी बी वारु समजे।
2CO 5:9 हेरे वजे सी हामरे मनेन खुसी जी छे, की चाहे साते रवे, चाहे छेटा-छेटा रवे बाकुन हामु हीनाक बी जादा वारु गमे।
2CO 5:10 काहाकी जरुड़ी छे, की हामु आखान हामु मसीन नीयाव बास अगळ खुली जाय, की आखा एक अदमी आपणे-आपणे वारु भुंडा कामेन बदलु जु हीयु डीलेन साहरे करला छे जड़े।
2CO 5:11 हेरेसी मालीकेन धाक मानीन हामु माणसे काजे समजाड़जे बाकुन भगवान पर हामरु हाल उजेंतु छे; ने मारी आस जी छे, की तुंद्‌रो मन पर बी उजेंतो हय गुयला छे।
2CO 5:12 हामु तेबी आपणी बड़ाय तुंद्‌रे अगळ नी करजे बाकुन हामु आपणे बारामां तुहुंक मटाय करनेन मुखु देजे, की तुहुं हीनुक जपाप आप सकु, जे मन पर नी, बाकुन मे कसुक करीन देखाड़ने वाळी वात पर सी मटाय करजे।
2CO 5:13 कदी हामु बेहुस छे, ती भगवान वाटे; ने कदी समजी गुयला छे, ती तुंद्‌रे वाटे छे।
2CO 5:14 काहाकी मसीन परम हामुक लाचार कर देय; हेरेसी की हामु ज्‌य समज्‌जे, की जत्‌यार एक आखा वाटे मर गुयु ती आखा मर गुया।
2CO 5:15 ने चु हीनी वजे सी आखा वाटे मर्‌यु, की जे जीवतेला छे, चे अगा जाय्‌न आपणे वाटे नी जीवे बाकुन हेरे वाटे जे हींद्‌रे वाटे मर्‌या ने पछा मरलाम सी जीवता हय गुया।
2CO 5:16 अळतेन हय सी हामु काहालाक काजे बी डीलेन अनसारे नी समजणु, चाहजे कदी हामु मसी काजे बी डीलेन अनसारे जाणु हतलो, तेबी हय सी हीनाक असा नी जाणजे।
2CO 5:17 हेरेसी कदी कुय ईसु मसी मां छे ती चु नवलु बन्‌नलु छे; जुन्‌डली वात जाती रय; देखु, आखी वात नवली हय गुय।
2CO 5:18 चे आखी वात भगवान भीणी सी छे तीनाक मसीन साहरे आपणे साते हामरो हेळ-मेळ कर लेदा ने हेळ-मेळ कराड़नेन चाकरी हामुक सुप देदु।
2CO 5:19 मतलब भगवान ईसु मसी मां हयन आपणे साते कळीन हेळ-मेळ कर देदा, ने हींद्‌रे पापेन गुनु हींद्‌रे पर नी लागाड़्‌या ने हीयु हेळ-मेळेन बुल हामुक सुप देदु।
2CO 5:20 हेरेसी हामु मसीन आवजी पर काम करन्‌या छे; मानु भगवान हामरे साहरे समजाड़ी र्‌यु: हामु मसी भीणी सी लीलघायजे की भगवान साते हेळ-मेळ कर लेदा।
2CO 5:21 जे पाप सी अनजाण्‌या हतला, हीनुत काजे हयु हामरे वाटे पाप ठेहरायु, की हामु हींद्‌रे मां सी हयन भगवानेन धरमी बणी जाजे।
2CO 6:1 हामु जे भगवानेन साजल्‌या हयन ज्‌य बी समजाड़जे, की भगवानेन गीण-दया जे तुंद्‌रे पर हया, फालतु नी जाणे देजे।
2CO 6:2 काहाकी चु ते कह्‌वे, “आपणी खुसीन टेम मे तारी सामळीस, ने छुटकारान दाहड़ु मे तारी, मदत कर्‌यु।” देखु; हय खुस हवणेन टेम छे; देखु, हय छुटकारान दाहड़ु छे।
2CO 6:3 हामु काहाली बी वात मां ठुकर खाणेन काय बी जागु नी देजे, काहाकी हामरी चाकरी पर कुय गुनु नी आयु।
2CO 6:4 बाकुन आखी वात सी भगवानेन चाकर्‌यान तसा आपणे वारलु गुणे काजे उजेंता करजे मटा गमे सी दुखे सी, गरीबी सी, पीड़ा, सी।
2CO 6:5 सपाटान मार खाणे सी, जेल मां बुजायणे हवणे सी माणसेन कचाटा सी काठी मेहनत सी जागला रवणे सी उपास करने सी।
2CO 6:6 चुखला सी, अक्‌कल सी, गम धरने सी, दया वाळा सी, चुखली-आत्‌मा ने छाचला परम सी।
2CO 6:7 छाचला रय्‌न ईसुन खरला बुले सी, भगवानेन ताकत सी; धरमेन हत्‌यार सी, जे जेवड़े ने डाखर्‌ये हात मां छे,
2CO 6:8 हामरी ईज्‌जत करे तेबी, ने ईज्‌जत नी करे तेबी, हामरी नाव-बद्‌दी करे, तेबी, हामु नाव साद्‌या हवजे तेबी भगवानेन सेवा करने तीयार छे। भले हामु दीसराक ठगण्‌या तसा लाग्‌जे तेबी छाचाय काजे उजेंता करजे।
2CO 6:9 हामु ईसुन नेवताळा छे जी वात जे नी समजे तींद्‌रे अगळ हामु अनजाण्‌यान तसा छे; तेबी जे हामुक समजे तींद्‌रे अगळ हामु नाव सादीन छे; माणसे हामुक मारीन नाखणे हय र्‌या, बाकुन तेबी देखु हय लग जीवता छे; हामु दीसरा माणसेन साहरे डंड भुक्‌ती र्‌या बाकुन तेबी हामु नी मरजे।
2CO 6:10 दुख करने वाळान तसा छे, बाकुन जलम खुसी करे, गरीबी तसा छे, बाकुन बेसका काजे पयस्‌या वाळा बणाय देय, असा छे जसा हामरे धड़े काय नी तेबी आखो काय राखजे।
2CO 6:11 ए कुरींथीयो, हामु खुलाम खुल्‌ला वात कर्‌या, हामरो मन तुंद्‌रे भीणी उगाड़्‌लो छे।
2CO 6:12 तुंद्‌रे वाटे हामरा मन मां काय खेचा ताण नी हय, बाकुन तुंद्‌रेत मन मां खेचा ताण छे।
2CO 6:13 बाकुन आपणा पुर्‌या जाणीन तुंद्‌रे सी कहो, की तुहुं बी हेरे बदला मां आपणा मन काजे उगाड़ देवु।
2CO 6:14 भुरसु नी करे, हींद्‌रे साते तुंद्‌रो जुड़ो नी लागे। हेरेसी हींद्‌रे भेळा मां साजल्‌या बणु, काहाकी धरम ने पाप मेळ खाय काय? नीते उजाळो ने आंदारलान काय मेळ?
2CO 6:15 ईसु मसी भुतड़ा साते दुस्‌ती करे काय? नीते भुरसु करन्‌या ने नी भुरसु करन्‌या सी काय नातो?
2CO 6:16 ने मुरत्‌या साते भगवानेन मंदीरेन काय नातो? काहाकी हामु ते जीवतेला भगवानेन मंदीर छे; जसु भगवान कह्‌यु मे हींद्‌रे मां बसीस ने हींद्‌रे मां चालीस फीरीस; ने मे हींद्‌रु भगवान हवीस, ने चे मारा माणसे रवसे।
2CO 6:17 हेरेसी मालीक कवे, हींद्‌रे ईचमां सी नीकळु ने आंग्‌ये रहु; ने वीटाळ देय असली, चीज काजे मां धरु, ती मे तुहुंक अगु करीस।
2CO 6:18 ने मे तुंद्‌रु बास रवीस, ने तुहुं मारा पुर्‌या ने पुरे रवसु, जी आखा सी ताकतवाळु मालीक भगवानेन बुल छे।
2CO 7:1 अळतेन ए लाटेक्‌लु भायसे जत्‌यार की जु वायदु हामुक जड़लु छे, ती आवु, हामु आपणे आप काजे डील ने आत्‌मान आखा पापे सी चुखला करे, ने भगवान काजे बीहता जाय्‌न चुखला काजे पुरो करु।
2CO 7:2 हामुक आपणा मन मां जागा आपु; हामु ते तुंद्‌रे मायन काहालान बी हामु बयमानी नी कर्‌या ने काहालाक काजे बीगाड़्‌या, नी काहनाक काजे नी ठग्‌या
2CO 7:3 ने तुहुं गुना वाळा ठेराड़ने वाटे ज नी कवतु काहाकी मे पेहेल सी कय देदलु छे, की तुहुं हामरे मन मां असा बसी गुया की हामु तुंद्‌रे साते मरणे जीवणे वाटे बी तीयार छे।
2CO 7:4 मे तुंद्‌रे सी बेसकु हिम्‌मतेन साते कय र्‌यु, मेसे तुंद्‌रे पर मटुत घमट छे; मे सांती भराय गुयु; आपणा आखा दुख मां सी ने मे बेसकु कायनी खुस छे।
2CO 7:5 काहाकी जत्‌यार हामु मकीदुनीया मां आया, तत्‌यार बी हामरा डील काजे आराम नी जड़्‌यो, बाकुन हामुक चारे मेर सी दुख जड़तेला; बाहार झगड़ा हतला, माहें बीहणे वाळी वात हतली।
2CO 7:6 तेबी हीनु काजे सांती आपणे वाळु भगवान तीतुसेन आवणे सी हामु काजे सांती आप्‌यु।
2CO 7:7 ने हेरे आवणे सी अतरुत नी, बाकुन हीनी सांती सी बी, जे हेरो तुंद्‌रे भीणी सी जड़ली हतली; हयु तुंद्‌री लालच सी, ने तुंद्‌रो दुख ने मारे वाटे तुंद्‌री धुन काजे खबर हामुक सामळावे, जेरे सी मेसेक अळी बी खुसी हवे।
2CO 7:8 काहाकी कदी मे आपणी चिट्‌ठी सी तुहुंक दुखी कर्‌यु, बाकुन हेरसी पसतावु नी करतु जसों की पेहेल पसतावु हतलु काहाकी मे देखो की हीनी चिट्‌ठी सी तुहुं काजे दुख ते हयु। बाकुन च थुड़ीक वार वाटे हतलो।
2CO 7:9 हय ने खुसी हयु बाकुन हेरेसी नी की तुहुं काजे आफोत आय बाकुन हेरेसी की तुहुं हीना आफोतेन वजे सी मन फीराया, काहाकी तुंद्‌रो आफोत भगवानेन मरजीन अनसारे हतलो, ती हामरे भीणी सी तुहुंक काहनी वात मां नुकसाण नी हवे
2CO 7:10 काहाकी भगवान भक्‌तीन आफोत असा पसतावु पयदा करे; की जेरो सबुत छुटकारु छे। ने अळतेन हीनाक पसतावु नी हवे! बाकुन कळीन डीलेन दुख मुत काजे पयदा करे।
2CO 7:11 अळतेन देखु, ईनी वात सी की तुहुं भगवानेन भक्‌तीन आफोत हया; तुंद्‌रे मां कतरो खुसीन, जपाप, ए रीस, बीहणु, ने लालच, ने धुन ने डंड आपणेन वीच्‌यार पयदा हवे? तुहुं आखी भाती सी ज चुखो करीन देखाड़्‌या, की तुहुं हीनी वात मां नी-गुना वाळा छे।
2CO 7:12 जी चिट्‌ठी जु पाप कर्‌यु तेरे वाटे नी लिख्‌यु ने जु बयमानी कर्‌यु तेरे वाटे बी नी लिख्‌यु, बाकुन तुंद्‌रे वाटे एरेन करीन लिख्‌यु की तुंद्‌री खुसी जी हामरे वाटे छे, ची हवस भगवान अगळ उजेंती हय जाय।
2CO 7:13 हेरेसी हामुक सांती जड़े। हामरी सांती साते तीतुसेन खुसीन वजे सी अळी बी खुसी हवे, काहाकी हेरा जीव तुहुं आखान वजे सी खुसी मां गद-गद हय गुया!
2CO 7:14 काहाकी कदी मे हेरे अगळ तुंद्‌रे बारामां काय मटाय देखाड़्‌यु, ती लाजवाये नी, बाकुन जसा हामु तुंद्‌रे सी आखी वात छाचली कय देदला, असात हामरी मटाय देखाय तीतुस अगळ बी छाचली नीकळी।
2CO 7:15 जत्‌यार हेरो तुहुं आखान हुकुम मान्‌या हवणेन हेर आवे, की कसा तुहुं बीहता जाय्‌न ने घाबरायता जाय्‌न ने भेट कर्‌या; ती हेरा परम अळी बी बड़तो जाय।
2CO 7:16 मे खुसी मां छे, काहाकी मेसेक तुंद्‌रे भीणी सी वात मां पुरु भुरसु छे।
2CO 8:1 हय ए भायसे, हामु तुहुंक भगवानेन हीना गीण-दयान खबर आपजे, जे मकीदुनीयान मंडळी पर हयो।
2CO 8:2 की दुखेन मट्‌ली पारख मां हींद्‌रे मटला खुसी ने मटी गरीबी मां हींद्‌रे खुला मन सी बेसकी अदी गुय।
2CO 8:3 हींद्‌रे बारामां मारी जी गवाय छे, की हीनुक आपणी ताकत भरीन बाकुन ताकत सी बी बाहार मन सी आप देदा।
2CO 8:4 ने हीना दान मां ने चुखला माणसेन चाकरी मां साजल्‌या हवणेन गीण-दयान बारामां हामरे सी पछात-पछात बेसका लीलघाया।
2CO 8:5 ने जसा हामु ने आस करला हतला, असात नी, बाकुन चे मालीक काजे, अळतेन भगवानेन मरजी सी हामु काजे बी आपणे आप काजे आप देदा।
2CO 8:6 हेरेसी हामु तीतुस काजे समजाड़्‌या, की जसों हयु पेहल सुरु करलु हतलु, असात तुंद्‌रे ईचमां हीनी दानेन काम काजे पुरो बी करला।
2CO 8:7 हेरेसी जसा तुहुं आखी वात मां मतलब भुरसु, बुल, अक्‌कल ने आखी भातीन खुसी मां, ने हीना परम मां, जे हामरे सी राखे, अदता जावु, असात हीना दानेन काम मां बी अदता जावु।
2CO 8:8 मे हुकुमेन रीत पर ते नी, बाकुन दीसरान खुसी सी तुंद्‌रे परमेन छाचाय काजे पारखणे वाटे कहो।
2CO 8:9 तुहुं हामरा मालीक ईसु मसीन गीण-दया काजे जाणु, की चु पयस्‌या वाळु हयन बी तुंद्‌रे वाटे खाली हय गुयु काहाकी हेरे खाली हय जाणे सी तुहुं पयस्‌या वाळा हय जावु।
2CO 8:10 ने हीनी वात मां मारु वीच्‌यार जु छे। ज्‌य तुंद्‌रे वाटे वारलु छे जे एक साल सी नी ते सीरप हीना काम काजे करनेत मां, बाकुन हीनी वातेन चाहावणे मां बी पेहल हतला।
2CO 8:11 हेरेसी हय ज्‌य काम पुरो करु; की जसी मरजी करने मां तुहुं तीयार हतला, असात आपणी-आपणी कमायन अनसारे पुरा बी करु।
2CO 8:12 काहाकी कदी मनेन तीयारी हय जाय ती दान हेरे अनसारे अगा बी हवे जे हेरे धड़े छे असो नी की हेरे अनसारे जो तेरे धड़े नी हय।
2CO 8:13 ज्‌य नी की दीसरा काजे सांती ने तुहुं काजे दुख जड़े।
2CO 8:14 बाकुन बराबरेन वीच्‌यार सी ईनी टेमे तुंद्‌री बड़ती ने तुंद्‌री कमी मां काम आवे, काहाकी तुंद्‌री अदती बी ने तुंद्‌री कमी मां काम आवे, की बराबर हय जाय।
2CO 8:15 जसों लिखलो छे, “जु बेसका भेळा कर्‌यु हेरा काम अदुस नी नीकळ्‌या ने जे थुड़ाक भेळा कर्‌यु तेरो कम नी नीकळ्‌यो।”
2CO 8:16 भगवान काजे तु बेसकु वारु छे करीन कह्‌वो, जु तुंद्‌रे वाटे जीत खुसी तीतुसेन मन मां भर देदु।
2CO 8:17 की हयु हामरो समजाड़नु मान लेदु ने बेसकु खुसी हयन चु आपणी मरजी सी तुंद्‌रे धड़े गुयु।
2CO 8:18 हामु हेरे धड़े हीना भायस काजे बी मकेल्‌ला जेरो नाव खुस-खबरेन बारामां आखी मंडळी मां फेलाय देदा;
2CO 8:19 ने अतरात नी, बाकुन चु मंडळीन साहरे ठेराया बी गुया की हीना दानेन काम वाटे हामरे भेळा जाय हामु जी चाकरी हेरेसी करजे, की मालीकेन सेक-सींगार ने हामरे मनेन तीयारी देखाव पड़ जाय।
2CO 8:20 हामु हीनी वात मां चेतीन रवु, की हीनी खुला मन सी कामेन बारामां तींद्‌री चाकरी हामु करजे, कुय बी हामरे पर गुना नी लागाड़नु चाहजे।
2CO 8:21 काहाकी जी वात मालीक धड़े अतरोत नी, बाकुन माणसेन धड़े बी वारु छे हामु हींद्‌री फीकुर करजे।
2CO 8:22 हामु हेरे भेळा आपणा भायस काजे बी मकेल्‌ला छे, तीना काजे हामु अळी अळीन पारख्‌या, बेसकी वात मां खुसी हवला देख्‌या; बाकुन हय तुंद्‌रे पर हेरु मट्‌लु भुरसु छे, हीनी वजे सी चु अळी बी जादास खुसी छे।
2CO 8:23 कदी कुय तीतुसेन बारामां पुछे, ती चु मारु साती, ने तुंद्‌रे वाटे मारु साजल्‌यु छे। ने कदी हामरा भायसेन बारामां पुछे ती चे मंडळीन नेवताळा ने मसीन सेक-सींगार छे।
2CO 8:24 अळतेन आपणा परम ने हामरु चु मटाय जे तुंद्‌रे बारामां छे मंडळी अगळ पुरो करीन हीनुक देखाड़े।
2CO 9:1 हय तीनी चाकरीन बारामां जे चुखला माणसे वाटे कर र्‌या, मेसे तुहुं काजे लिखणु जरुड़ी नी हय।
2CO 9:2 काहाकी मे तुंद्‌रे मनेन तीयारी काजे जाणो, जेरे वजे सी मे तुंद्‌रे बारामां मकीदुनीयाम रवण्‌यान अगळ मटाय देखाड़ो, की अखायान माणसे एक साल सी तीयार हवला छे, ने तुंद्‌री खुसी बेसका काजे उभार्‌या बी।
2CO 9:3 बाकुन मे भायसे काजे हेरेसी मकेल्‌लु छे, की हामु जे मटाय तुंद्‌रे बारामां देखाड़जे, चु ईनी वात मां फालतु नी ठेहरे; बाकुन जसों की मे कहं; असात तुहुं बी तीयार रहु
2CO 9:4 असो नी हवे, की कदी कुय मकीदुनीया वाळा मारे धड़े आया, ने तुहुं तीयार नी रवु, की हय सके की हीना भुरसान वजे सी हामु ज नी कवता की तुहुंक सरमायु!
2CO 9:5 हेरेसी मे भायसे सी जी लीलघायान करनु जरुड़ी समजी गुयु की जे पेहेल सी तुंद्‌रे धड़े आया, ने तुंद्‌रा खुल्‌ला मन सी फळ तींद्‌रे बारामां पेहलुत सी बुल आपला हतला, तीयार करीन राखु, की ज दबाव सी नी बाकुन खुले मनेन फळेन तसा तीयार रवु।
2CO 9:6 बाकुन वात जी छे, जे ईतरोक वेरे चु ईतरोक काटे बी, ने जे बेसको वेरे, चु बेसको काटसे।
2CO 9:7 आखा माणुस जसों मन मां ठाणी लेय असोत दान करे; नी कुड़-कुड़ सी, ने नी दबाव सी, काहाकी भगवान खुसी सी आपणे वाळा सी परम राखे।
2CO 9:8 भगवान आखी भातीन गीण-दया सी बेसकु बड़ीन आप सके जेरे सी आखी वात मां ने आखी टेमे, आखो काय, जो तुहुंक जरुड़ी रवे, तुंद्‌रे धड़े रवे, आखो वारु काम वाटे तुंद्‌रे धड़े हवे।
2CO 9:9 जसों लिखलो छे, “हयु आरवी देदु, ने खाली काजे दान आप्‌यु, हेरो धरम जलम बणीन रवसे।”
2CO 9:10 अळतेन जे एरने वाळा काजे बीज, ने खाणे वाटे रुटा आपे, चु तुहुंक बीज आपसे ने हीनाक फळ वाळु करसे; ने तुंद्‌रे धरमेन फळे काजे बड़ावसे।
2CO 9:11 तुहुं आखी वात मां आखी भातीन खुला वाटे जे हामरे साहरे भगवान काजे तु बेसकु वारु छे करीन कह्‌वाड़े, पयस्‌या वाळा हय जावु।
2CO 9:12 काहाकी हीनी चाकरीन पुरो करने सी, चुखला माणसेन मांगे अतरी पुरी नी हवसे, बाकुन माणसे भीणी सी भगवानेन बी बेसकु वारु छे करीन कहवाय्‌से।
2CO 9:13 काहाकी हीनी चाकरी काजे सबुत काजे माने चे भगवानेन सेक-सींगार देखाड़े करे, की तुहुं मसीन खुस-खबर काजे मानीन हेरे हक मां रवे, ने हींद्‌री, ने आखी मदत करने मां उदार देखाड़ता रवे।
2CO 9:14 ने चे तुंद्‌रे वाटे दुवा करे, ने हेरेसी की तुंद्‌रे पर भगवानेन मट्‌ली गीण-दया सी, तुंद्‌री लालच करती रवे।
2CO 9:15 भगवानेन तीना दानेन वाटे जे समज सी बाहार छे, तु बेसकु वारु छे।
2CO 10:1 मे चु पोलुस जे तुंद्‌रे अगळ लीलघाये, बाकुन आसा पछळ तुंद्‌री अळी हिम्‌मत करो; तुहुं काजे मसीन नरम, ने लाड़-परम सी समजाड़ो,
2CO 10:2 मे जी लीलघाया करो, की तुंद्‌रे अगळ मेसे ताकत वाळु हय्‌न हिम्‌मत करनु नी पड़े; जसु मे काय माणसे पर जे हामु काजे डीलेन अनसारे चालने वाळा समजे, हिम्‌मत देखाड़ने वीच्‌यार करो।
2CO 10:3 ज्‌य सय छे की कदी हामु डील मां चालजे ने फीरजे, तेबी डीलेन अनसारे नी लड़ायजे।
2CO 10:4 काहाकी हामरी लड़ाय हत्‌यार कळीन तसी नी, बाकुन गड़ काजे उदार नाखणे वाटे भगवानेन साहरे ताकत वाळा छे।
2CO 10:5 हेरेसी हामु मनेन उपजाव काजे, ने हरीक एक उचली वात काजे, जी भगवानेन उवखाणेन वीरुद मां उठे, आंग्‌ये-आंग्‌ये करजे; ने मसीन हरीक एक हुकुम मान्‌या बणाय देय।
2CO 10:6 ने तीयार रवे की जत्‌यार तुंद्‌रा हुकुम पाळनेन दाहड़ा पुरा हय जाय, ती हरीक भातीन हुकुम नी मान्‌या काजे डंड आपे।
2CO 10:7 तुहुं ईनीत वात काजे देखु, जे डुळा अगळ छे, ती काहालाक काजे आपणे पर जु भुरसु छे, की मे मसीन छे, ती चु ज बी जाणी लेय, चु मसीन छे, असात हामु बी छे।
2CO 10:8 काहाकी कदी मे हीना हकेन बारामां अळी बी मटाय देखाड़ो, जे मालीक तुंद्‌रे बीगाड़ने वाटे नी बाकुन बणावणे वाटे हामुक आपलो छे, ती सरमाये नी।
2CO 10:9 ज्‌य मे हेरेसी कवो, की चिट्‌ठीन साहरे तुहुंक बीहाड़ने वाळा नी ठेरे।
2CO 10:10 काहाकी चे कवे, “हेरी चिट्‌ठीया ते बेसका ताकत वाळा ने हिम्‌मत देखाड़न्‌या छे; बाकुन जत्‌यार देखे, ती कहें की चु डीलेन लुलु ने कहणे मां हळकु जाणी पड़े।”
2CO 10:11 जु असु कहें, चु ज समज राखे, की जसा आसा पछळ चिट्‌ठीया मां हामरा बुल छे, असात तुंद्‌रे अगळ हामरे काम बी हवसे।
2CO 10:12 काहाकी हामु जी हिम्‌मत नी की हामु आपणे आप काजे हींद्‌रे मां सी असा काय साते गीणे, नीते तीनुक आपणु काजे भेळा करे, जे आपणी बड़ाय आपसु करे, ने आपणे आप काजे आंबा-सांबा नापीन तुलीन एक दीसरा सी भेळा करीन डेड़-अकल्‌या ठेरजे।
2CO 10:13 हामु ते काकड़ सी बाहार मटाय कदी नी करे, बाकुन हीना काकड़ लग जे भगवान हामरे वाटे ठेराय देदला छे, ने हेरे मां तुहुं बी आय गुयला छे। ने हेरे अनसारे मटाय बी करसुन।
2CO 10:14 काहाकी हामु आपणा काकड़ सी बाहार आपणे आप काजे बड़ावु नी चाहतु, जसा की तुंद्‌रे लग नी पुगणेन दसा मां हवे, बाकुन मसीन खुस-खबर सामळावता जाय्‌न तुंद्‌रे धड़े लग आय गुयला छे।
2CO 10:15 हामु काकड़ सी बाहार दीसरान मेहनत पर मटाय नी करजे; बाकुन हामुक आस छे, की जसु-जसु तुंद्‌रु भुरसु बड़तु जासे असात-असात हामु बी आपणा-आपणा काकड़ेन अनसारे तुंद्‌रे वजे सी अळी बी बड़ता जासुन।
2CO 10:16 काहाकी हामु तुंद्‌रा काकड़ सी अगा बड़ीन खुस-खबर सामळ्‌या, ने ज्‌य नी, की हामु दीसरान काकड़ेन माहें बणावला काम पर मटाय करजे।
2CO 10:17 बाकुन जो मटाय करे, चु मालीक पर मटाय करे
2CO 10:18 काहाकी जो आपणी बड़ाय करे, चु नी, बाकुन जेरी बड़ाय मालीक करे, हयुत अगु हवसे।
2CO 11:1 कदी तुहुं मारी थुड़ीक डेड़ अक्‌कल सेण कर लेता ती काय वारु रवतो; हव, मारी सेण बी कर लेवु।
2CO 11:2 काहाकी मे तुंद्‌रे बारामां भगवानेन धुन लागाड़ रवो हेरेसी की मे एक अदमी सी तुंद्‌री वात लागाड़लु छे, की तुहुं चुखली कुवारली पुरेन तसा मसी काजे सुप दम।
2CO 11:3 बाकुन मे बीहु की जसु घड़सु आपणी चालाकी सी हव्‌वा काजे बेहकाड़्‌यु, असात तुंद्‌रे मन मां सुदा ने चुखला पण सी जे मसीन साती हवणु चाहजे काय खत्‌तम नी हय जाय।
2CO 11:4 कदी कुय तुंद्‌रे धड़े आवीन, काहालाक दीसरा ईसुन परचार करे, जेरो परचार हामु नी कर्‌या नीते कुय अळी आत्‌मा तुहुंक जड़ी; जे पेहल नी जड़लो हतलो; नीते अळी कुय खुस-खबर सामळी तीनाक तुहुं पेहल नी मानतेला, ती तुहुं हीनाक सेण करनु वारु रवतो।
2CO 11:5 मे ते समजो, की मे काहाली वात मां मटा सी मटा नेवताळा सी कम नी हय।
2CO 11:6 कदी तुहुंक असो लागे की मारे वाटे तींद्‌रेन तसों वारु बुलनेन हुसारी नी हय, तेबी अक्‌कल मां नी; बाकुन हामु हीनाक आखी वातेन तरा सी तुंद्‌रे वाटे देखाव पाड़ देय।
2CO 11:7 काय हेरेमां मे काय पाप कर्‌यु; की मे तुहुंक भगवानेन खुस-खबर पयस्‌या लेय पाखुर सामळावो; ने आपणे आप काजे नेचु कर्‌यु, की तुहुं उचा हय जावु?
2CO 11:8 मे दीसरी मंडळी काजे लुट्‌यु मतलब मे हींद्‌री दाहड़की लेदु, काहाकी तुंद्‌री चाकरी करो।
2CO 11:9 ने जत्‌यार मे तुंद्‌रे साते हतलु, ने मेसे कमी हवी, ती मे काहाला पर बी भार नी नाख्‌यु, काहाकी भायसे, मकीदुनीया सी आवीन मारी कमी काजे पुरा कर्‌या; ने मे हरीक वात मां आपणे आप काजे तुंद्‌रे पर भार बन्‌ने सी रुक्‌यु, ने रुकीन रवीस।
2CO 11:10 कदी मसीन छाचाय मारे मां छे, ती अखाया नावेन देस मां कुय मेसे हीनी मटाय सी नी रुकसे।
2CO 11:11 असो काहा? काय असु करीन की मे तुंद्‌रे सी परम नी राखो? भगवान ज जाणे की मे परम राखो।
2CO 11:12 बाकुन जो मे करो, चोन करतु रवीस; की जे माणसे दावु हेरे, हीनुक मे दावु नी जड़ने दम, काहाकी जीनी वात मां चे मटाय करजे हेरे मां जे हामरेन तसा ठेरे।
2CO 11:13 काहाकी असा माणसे लुच्‌चा नेवताळा छे, ने धुका सी काम करने वाळा छे, ने मसीन नेवताळान सीकु धरणे वाळा छे।
2CO 11:14 जी काय उसकारनेन वात नी काहाकी भुतड़ु आपसु बी बेसकु जबर वीजाळो सरग वाळा काहवाळ्‌यान सीकु धरे।
2CO 11:15 हेरेसी कदी हेरा पावर्‌या बी धरमेन चाकर्‌यान सीकु धरे, ती कुय मटी वात नी हय, बाकुन हींद्‌रो आकरी हींद्‌रे कामेन अनसारे हवसे।
2CO 11:16 मे अळी कवो, की मेसे डेड़-अकल्‌या नी समजे; नीते डेड़ अकल्‌यु समजीन मारी वात सेण कर लेवु, काहाकी थुड़ीक मे बी मटाय कर सको।
2CO 11:17 ईनी गांडान तसों मटाय मां जो काय मे कहो चो मालीकेन हुकुमेन अनसारे नी बाकुन मानु डेड़ अक्‌कल सी कवो।
2CO 11:18 जत्‌यार की बेसका माणसेन डीलेन अनसारे मटाय करजे, ती मे बी मटाय करीस।
2CO 11:19 तुहुं ते समजदार हयन खुसी सी डेड़-अकल्‌यान सेण कर लेवु।
2CO 11:20 काहाकी जत्‌यार तुहुंक कुय पावर्‌यु बणाय लेय, नीते खाय जाय, नीते फसाण देय, नीते आपणे आप काजे मट्‌लु बणावे। नीते तुंद्‌रे मुंहडा पर थापड़ देय, ती तुहुं सेण कर लेवु।
2CO 11:21 हामु तुंद्‌रे साते तींद्‌रेन तसा वेहवार नी कर्‌या ने, कमजुर बण्‌या करीन सरमायणु चाहजे काय? कदी नी। बाकुन चे माणसे ते मटाय करने मां हिम्‌मत कर र्‌या; हेरसी मे बी मटाय करने मां हिम्‌मत करो, भले मारी मटाय करने गांडाय लागे।
2CO 11:22 काय चे ईब्‌रानी छे? मे बी छे; काय चे ईस्‌रायली छे? मे बी छे काय चे अब्‌राहमेन खानदानी छे? मे बी छे।
2CO 11:23 काय चेत मसीन चाकर्‌यु छे? मे गांडान तसु कवे मे बी छे मे हींद्‌रे सी बड़ीन छे जादास मेहनत करने मां; अळीन अळी जेल मां; सड़ापान मार खाणे मां; अळी-अळी मरतु बचणे मां।
2CO 11:24 पांच कावा मे यहुदीयान हात सी उंचालीस-उंचालीस सड़ापा खादु।
2CO 11:25 तीन कावा मेसे सुट्‌ये करीन देदा; एक कावा मेसे दगड़ाट्‌या; तीन कावा ढंड्‌या तींद्‌रे पर मेसे चड़ावला हतला, टुटी गुयु; एक रात ने एक दाहड़ु मे समुदर मां काट्‌यु।
2CO 11:26 मे अळी-अळी चालने मां; नदीन खतरा मां; चुट्‌टान खतरा मां; आपणे जातीवाळान खतरा मां; नी-यहुदीयान खतरा मां; जंगलेन खतरा मां; समुदरेन खतरा मां; लुच्‌चा भायसेन ईचमां खतरा मां रवु;
2CO 11:27 मेहनत ने थकान मां; अळी-अळी जागतु रवणे मां; भुक-पीस मां; अळी-अळीन उपास करने मां; सेळा मां; उघाड़ु रहणे मां।
2CO 11:28 दीसरी वात काजे छुड़ीन जेरो नाप मे नी करतु आखी मंडळीन फीकुर दाहड़ीन मेसे दड़पे।
2CO 11:29 कुणीन लुल्‌गाय सी मे लुलु नी हवो, कुणीन पाप मां पड़ने सी मारु जीव नी दुखे।
2CO 11:30 कदी मटाय करनु जरुड़ी छे, ती मे आपणी लुल्‌गायपन वात पर मटाय करो।
2CO 11:31 मालीक ईसुन भगवानेन ने बास जु जलम बेसको वारु छे, जाणो, की मे लुच्‌चाय नी मेलो।
2CO 11:32 दमीस्‌क मां अरीतास राजा भीणी सी जे हकदार्‌या हतला, हयु मेसे धरने करीन दमीस्‌क वाळा सहर पर राखवाळ्‌यु बठाड़ी रवला।
2CO 11:33 ने मेसे चारली मां बठाड़ीन खीड़की मां सी भीतड़ा पर सी उतार देदा, ने हेरे हात सी बची गुयु।
2CO 12:1 तेबी मटाय करनु मारे वाटे वारु नी, तेबी करनु पड़े; बाकुन मे मालीकेन आपला सपना ने वीजाळान वात वीच्‌यार करीस।
2CO 12:2 मे ईसु मसी मां एक माणुस काजे जाणो, चवदा साल हया की नी जाणे डील समोत नी जाणे डील पाखुर, भगवान जाणे, की असु माणुस तीसरा सरग लग उठाय गुयलु छे।
2CO 12:3 मे असा माणुस काजे जाणो जु नी जाणे डील समोत नी जाणे डील पाखुर, भगवानुत जाणे
2CO 12:4 की सरग लुक पर उठाय ली गुयु, ने असी वात सामळ्‌या जी कवणेन नी हय; ने जींद्‌रा मुंहडा पर लावणु माणुस काजे सय नी हय।
2CO 12:5 असा माणुस पर ते मे मटाय करीस, बाकुन आपणे पर आपणी लुल्‌गाय काजे छुड़ीन, आपणे बारामां मटाय नी करो।
2CO 12:6 काहाकी कदी मे मटाय करने चाहो बी ती डेड़ अकल्‌यु नी हवो, काहाकी छाचलीन कह्‌वो; ती बी हुबु हय जाम, असो नी हवे की असो नी हवे की असा कुय मेसे देखला छे, नीते मारे सी सामळे, मेसे हेरसी बड़ीन समजे।
2CO 12:7 हेरेसी की मे वीजाळान अदती सी फुगी नी जाम, मारा डील मां काटु भाक गुयु मतलब भुतड़ान एक काहवाळ्‌यु की मारे घुधावे काहाकी मे फुगी नी जाम।
2CO 12:8 हेरे बारामां मे मालीक सी तीन कावा लीलघायु, की मारे सी गुयो छेटो हय जाय।
2CO 12:9 ने चु मार सी कह्‌यु, “मारा गीण-दया तारे वाटे बेसकी छे।” काहाकी मारी ताकत लुल्‌गाय मां पुरी हवे। हेरेसी मे मटी खुसी सी आपणी लुल्‌गाय पर मटाय करीस, की मसीन ताकत मारे पर साहळु करती रवे।
2CO 12:10 हेरे वजे सी मे मसी वाटे, ने लुलाय, मां ने कुहराय मां, ने गरीबी मां, ने झगड़ा मां, ने गरा मां, खुसी छे; काहाकी जत्‌यार मे लुलु हतलु, तेबी ताकत वाळु हवो।
2CO 12:11 मे डेड़ अकल्‌यु ते बण्‌यु, बाकुन तुहुंत मेसे गुयो करने वाटे लाचार कर्‌या। तुहुं ते मारी बड़ाय करनु चाहजे, काहाकी कदी मे काय बी नी, ती बी हींद्‌रे मां सी मटा सी मटा नेवताळा सी काहली बी वात मां कम नी हय।
2CO 12:12 नेवताळान आसार बी तुंद्‌रे ईचमां आखी भातीन सेण समोत सहलाणी, ने मटा-मटा काम असा कामेन ताकुतेन काम देखाड़ला छे।
2CO 12:13 तुहुं काहली वात मां दीसरी मंडळी मां सी थुड़ाक हतला, हींद्‌रे मां अतरोत की मे तुंद्‌रे पर आपणु भार नी नाखे जी मारे सी भुल हय गुय तीती कुहराय काजे मेसे माफ करु।
2CO 12:14 देखु, मे तीसरी कावा तुंद्‌रे धड़े आवणे तीयार छे, ने मे तुंद्‌रु पर भार नी राखो; काहाकी मे तुंद्‌रो धन नी, बाकुन तुहुंत काजे चाहो। काहाकी पुर्‌या काजे आयस्‌या बास्‌या वाटे धन भेळो नी करनु चाहजे, बाकुन आयस्‌या बास्‌या काजे पुर्‌या वाटे धन भेळो करनु चाहजे।
2CO 12:15 मे तुंद्‌री आत्‌मा वाटे बेसकी खुसी सी खरचु हय जायस, बाकुन आपसात बी खरचु हय जासे काय जतरा बड़ीन मे तुंद्‌रे सी परम राखो, अतरा कम हयन तुंद्‌रे सी परम राखसु?
2CO 12:16 असा हय सके, की मे तुंद्‌रे पर बुज नी नाखो, बाकुन चतराय सी तुहुंक धुकु दीन फसाड़ लेदु।
2CO 12:17 बाकुन, जीनुक मे तुंद्‌रे धड़े मकल्‌यु, काय हींद्‌रे मां सी काहालाकेन साहरे मे जुर करीन तुंद्‌रे सी काय ली देदा?
2CO 12:18 मे तीतुस काजे लीलघाय्‌न ने समजाड़ीन हेरे साते हीना भाय काजे मकल्‌या, ती काय तीतुस जुर करीन तुंद्‌रे सी काय लेदु? काय हामु एक आत्‌मान चाल मां नी चालजे? काय एकुत वाट पर नी चालजे?
2CO 12:19 तुहुं हय लग समजी र्‌या हसे की हामु तुंद्‌रे अगळ जपाप दी रया, हामु ते भगवान काजे आय रवलु जाणीन ईसु मसी मां बुलजे, ने ए लाटेक्‌ला, आखी वात तुंद्‌रे वाटे अदुस हवणे करीन कवजे।
2CO 12:20 काहाकी मेसे धाक छे, काय असो नी हवे, की मे आवीन जसु चाहो, असु तुहुंक नी जड़ो; ने मेसे बी जसा नी चाहजे असात जड़ो, ने तुहुं तुंद्‌रे मां झगड़ा हय र्‌या, जळन कर र्‌या, रीसवाय र्‌या, आपसान ने भलो हवणेन वीच्‌यार कर्‌या, दीसरान वाक नीकाळ र्‌या, चुगली कर र्‌या, मटाय कर र्‌या, ने बीरजु पाड़ी र्‌या।
2CO 12:21 ने कांखुर मायन असो नी हवे की जत्‌यार मे पछु आवीस, ने मारु भगवान मारी नाव-बद्‌दी करे ने मेसे बेसका वाटे अळी दुख करनु पड़े, जे पेहल पाप करला हतला, ने भुंड्‌ला काम, ने छीनाळो, ने लुच्‌चाय सी, जो चे कर्‌या, मन नी फीराया।
2CO 13:1 हय तीसरी कावा मे तुंद्‌रे धड़े आवो, “दुय नीते तीन गवान मुंहडा सी हरीक एक वात ठेहरावसे।”
2CO 13:2 जसु मे जत्‌यार दीसरी कावा तुंद्‌रे साते हतलु, असुत हय छेटा रवते जाय हीनु माणसे सी जे पेहल पाप कर्‌या, ने दीसरा आखा माणसे सी हय पेहल सी कय दम, की कदी मे अळी आवीस, ती नी छुड़ो,
2CO 13:3 काहाकी तुहुं ते हेरो सबुत चाहु, की मसी मारे मां बुले, जे तुंद्‌रे वाटे लुला नी; बाकुन तुंद्‌रे मां ताकत छे।
2CO 13:4 चु लुलान वजे कुरुस पर चड़ाय ते गुयु, तेबी भगवानेन ताकत सी जीवतेलु छे, हामु बी हेरेमां लुलु छे; बाकुन भगवानेन ताकत सी जे तुंद्‌रे वाटे छे, हेरे साते।
2CO 13:5 आपणे आप काजे पारखु, की भुरसा मां छे की नी; आपणे आप काजे पारखु, काय तुहुं आपणे बारामां ज्‌य नी जाणे, की ईसु मसी तुंद्‌रे मां छे। नीते तुहुं पारख मां पापी नीकळे।
2CO 13:6 बाकुन मारी आस छे, की तुहुं जाणी लेसु, की हामु पापी नी हय।
2CO 13:7 हामु आपणा भगवान सी जी दुवा करजे, की तुहुं काय बी कुहराय नी करु; हेरेसी नी, की हामु खरला देखाव पड़े, बाकुन हेरेसी की तुहुं भलाय करु, चाहे हामु पापी रवजे।
2CO 13:8 काहाकी हामु छाचाय्‌न वीरुद मां काय बी नी कर सकजे, बाकुन सय वाटे कर सकजे।
2CO 13:9 जत्‌यार हामु लुला छे, ने तुहुं जुर वाळा छे, ती हामु खुसी हवजे, ने जी दुवा बी करजे, की तुहुं सय हय जावु।
2CO 13:10 एरे वजे सी मे तुंद्‌रे आसा पछळ जी वात लिखो, की तुंद्‌रे अगळ उबु हयन मेसे हीना हकेन अनसारे तीनाक मालीक बीगाड़ने वाटे नी बाकुन बणावणे वाटे मेसे आपलु छे, काठा एहवार सी मेसे काय करनु नी पड़े।
2CO 13:11 अळतेन ए भायसे, खुसी मां रवु; सय बणी जावु; हिम्‌मत राखु; एकुत मन रवु; मेळीन रवु, ने परम ने सांतीन दातान भगवान तुंद्‌रे साते रवसे।
2CO 13:12 एक दीसरा काजे चुखला गुळु दीन आवजु ने आवीस कवो।
2CO 13:13 मालीक ईसु मसीन दया, ने भगवानेन परम आखा चुखली-आत्‌मान साजेदारी बणीन रवे।
2CO 13:14 मालीक ईसु मसीन गीण-दया ने भगवानेन परम ने चुखली-आत्‌मान साजी तुहुं आखा साते हवती रवे।
GAL 1:1 पोलुसेन, जी चिट्‌ठी नीते माणसे भीणी सी, ने नी माणसे सी, बाकुन ईसु मसीन ने भगवान बास भीणी सी छे, जु तीनाक मर्‌या-सर्‌याम सी जीवाड़्‌यु, चु नेवताळु छे।
GAL 1:2 ने आखा भायस भीणी सी जे मार साथी छे; गलातीन मंडळ्‌यान नाव।
GAL 1:3 मे तुंद्‌रे सी असी आस करो की आपणा भगवान बास अगु सी, ने तीना मालीक ईसु मसीन अगु सी, तुहुं काजे गीण-दया ने सुक सांती जड़ती रहणु चाहजे।
GAL 1:4 जु ईसु, आपणा भगवान बासेन मरजीन अनसारे, आपसा जीव काजे आपणा पापेन बादा छुटणे करीन आपी देदु, ने चु असु करीन आपसा काजे आपी देदु की आपणु हय ईनी कळी मां रय र्‌या, ईनीत पापी कळीम सी आपणुक छुड़ाय लेय।
GAL 1:5 ने तेरी सेक-सींगार सदा हवती रहे। आमीन।
GAL 1:6 मे चकराय गुयु की जु तुहुंक ईसु मसीन गीण-दया सी बुलावलु चां सी अतरा छाटा पछा वळीन दीसरी भातीन खुस-खबर भीणी वळने लाग गुया।
GAL 1:7 बाकुन दीसरी खुस-खबर हय्‌त नी, बाकुन वात जी छे की बेसका असा छे, चे तुहुंक घाबराड़ी देय, ने ईसु मसीन खुस-खबर काजे बीगाड़ने हींडे।
GAL 1:8 बाकुन ईसुन जी खुस-खबर, हामु तुहुं काजे सामळावला छे, तीनी खुस-खबर काजे छुड़ीन, काहनु बी तुहुं काजे दीसरीत खुस-खबर सामळावे, तीना पर जलम की गरा आय पड़नु चाहे, भले चे, हामु हय ते ने, भगवानेन सरग वाळा काहवाळ्‌या हय ते।
GAL 1:9 जसा हामु तुहुंक पेहलुत कय देदला, तसुत मे हय अळी कहो की, कदी तीनी खुस-खबर काजे छुड़ीन कुय बी, दीसरीत खुस-खबर सामळावे, ती तेरे पर गरा आय पड़नु चाहजे।
GAL 1:10 हय मे माणसेक मानाड़ने करीन हेर कर र्‌यु की भगवानेक काय? मे माणसेक खुस करनेन हेर कर र्‌यु? कदी मे आज लग माणसेत काजे, खुस करनेन हेर करतु, ती ईसु मसीन पावर्‌यु नी रवतु।
GAL 1:11 ए भायस ने बहणस्‌या, मे तुहुंक बताड़ी दम की जी खुस-खबर मे सामळावलु छे, ची खुस-खबर माणसे सी नी हय।
GAL 1:12 काहाकी जी खुस-खबर मेसेक काहना माणसे सी नी जड़ी। ने काहनु बी दीसरु ईनी खुस-खबरेन बारामां मेसेक नी सीकाड़्‌यु। बाकुन ईसु मसी मेसेक देखाव पड़्‌यु, ने सुदु सट मारे पर ईनी खबर काजे उजेंतु करलु छे।
GAL 1:13 तुहुं मारा वेहवारेन ने वीच्‌यारेन बारामां सामळी रया, की मे ते पेहले यहुदी धरमेन बेसकु पाळनी पाळतेलु, की ईसु वाळान मंडळी काजे, ने भगवानेन मंडळी काजे वेला पाड़तेलु, ने तीनी मंडळी काजे ठायकी मारीन सारने हींडतेलु।
GAL 1:14 मे ते मार पाळीन बेसका यहुदी माणसे सी बी पेहेल सीत यहुदी धरमेन नीयम पाळतेलु, काहाकी जी धरमेन रीती मेसेक डाहा-डाहा सी जड़ली, ने ईनी रीतीक पाळने मां बी मे बेसकु हवस्‌यु हतलु।
GAL 1:15 बाकुन भगवान मेसेक मारी आयसीन कुखेम सीत मेसेक नेवाड़ लेदलु, ने आपसी गीण-दयान अनसारे मार पर भुरसु करने ने आपसी सेवा करने बुलायु।
GAL 1:16 जत्‌यार मरजी हय की मेसेक ने आपणा पुर्‌याक उजेंतु करे की मे आड़जात्‌या मां तेरो खुस-खबर सामळावो, ती नीते मे डील ने लुही सी पुछ्‌यु;
GAL 1:17 ने नीते यरुसलेम मां तींद्‌रे धड़े गुयु जु मारे सी पेहल नेवताळु हतलु, बाकुन तत्‌यारुत अरब देस मां जाती र्‌यु। ने अळी चां सी दमीस्‌क सहर मां पछु आवती र्‌यु।
GAL 1:18 तीन साल हय गुया ने अळतेन मे ईसुन नेवताळा केफा काजे भेळु हवणे करीन यहुदीया जीलान यरुसलेम सहर मां गुयु, ने तींद्‌रेन्‌चां पंद्‌रे दाहड़ा रयु।
GAL 1:19 ने मालीक ईसुन संगा भायस याकुप काजे भेळु हयु, ईनुक छुड़ीन दीसरा काहना बी ईसुन नेवताळा काजे नी भेळु हयु।
GAL 1:20 जी वात मे तुहुंक लिखणे बाजी र्‌यु, ची वात मे भगवान काजे मारेन्‌चां हजुर जाणीन लिखणे बाजी र्‌यु, ने मे झुट नी मेल्‌तु।
GAL 1:21 अळतेन मे सीरीया ने कीलक्‌या ईलाका मां बेसके लांबे जात र्‌यु।
GAL 1:22 ने यहुदीया जीला मां रहण्‌या जे माणसे मसीन मां छे, चे मेसेक हय लग नी देख्‌या।
GAL 1:23 बाकुन तीनु मंडळ्‌यान माणसे मारे बारामां जी वात सामळ्‌या करतेला, की पेहले जु माणुस हामुक वेला पाड़तेलु, ने हामुक भुरसाम सी छुड़ावणे हींडतेलु ने ईना पंथन भुरसा काजे ठायकुत सारने हींडतेलु, चु हय ईसु पर भुरसु करनेन बारामां खुस-खबर सामळावणे बाजी रयु।
GAL 1:24 ने असा करीन यहुदीया जीला मां रहण्‌या ईसुन मंडळ्‌यान माणसे मारा बारामां सामळीन भगवानेन बड़ाय करतेला।
GAL 2:1 दस ने चार साल हय गुया, ने अळतेन मे अळी यरुसलेम मां गुयु। तत्‌यार बरनाबास बी मारे पुठ्‌ये हतलु, ने मे तीतुस काजे बी पुठ्‌ये ली गुयलु।
GAL 2:2 भगवान मेसे काजे यरुसलेम जाणे करीन चुखो झण कह्‌लु, ने मे चां गुयलु। ने मे चां आड़जात्‌या माणसे काजे जी खुस-खबर सामळावो, तीनी खुस-खबरेन वात मे चां वाळी ईसुन मंडळीन मुख्‌याक बी समजाड़ीन कह्‌यु; बाकुन मंडळीवाळा दीसरा माणसे अगळ उजेंतु नी कह्‌यु, कांखुर मायन मारी खुस-खबर बमदीन परचार करनेन पेहली ने हय्‌न मेहनत, झुटी सीकापण सी फालतु नी हवणु चाहजे, करीन मे जी वात मंडळीन आखा मुख्‌या काजे कय देदु।
GAL 2:3 बाकुन तीतुस काजे बी जु मारे साते हतलु, ने जु युनानी आड़जात्‌यु हतलु। तेरेमां तीनाक पेहेरवोटन अघली चामड़ी काट करीन नी कह्‌यु।
GAL 2:4 असो तीनु लुच्‌चा भायसेन वजे सी हयो जे चुरी सी भराय गुयला, की तीना छुटला हवणे करीन जो मसी ईसु मां हामुक जड़ी, समज लीन हामुक सेवा करने वाळा बणावे।
GAL 2:5 एक कावु बी तींद्‌रे हक मां हामु नी हया, काहाकी खुस-खबरेन छाचलो तुंद्‌रेम बन्‌लो रहे।
GAL 2:6 भगवान ते काहनान मुंहडो देखीन तेरे अगु वळन्‌यु नी हय, ने ईनी वातेन मारी फीकुर नी हय की माणसे मार सी यरुसलेम वाळी ईसुन मंडळीन तीनु मुख्‌यान अदु ईज्‌जत करता आय र्‌या, ने तीनुक अदु मटा समजे, बाकुन तेबी जी खुस-खबर तु सामळावे तेर साते थुड़ीक दीसरी वात भेसकीन सामळावणु चाहजे करीन चे मुख्‌या माणसे मेसेक नी कह्‌या।
GAL 2:7 बाकुन तेरो उल्‌टो जत्‌यार चे देख्‌या, की फतरी काटण्‌या माणसे वाटे खुस-खबरेन काम पतरस काजे सुपायलो तसोत, नी फतरी काटण्‌या माणसे वाटे मेसेक खुस-खबर सामळावणे करीन सुपलो छे।
GAL 2:8 काहाकी जु पतरस सी फतरी काटण्‌या करतेलु मां नेवताळान काम मटुत असर पड़े तसु कराड़्‌यु, ने हयुत मार सी बी आड़जात्‌या मां मटु असर सात मां काम कराड़्‌यु।
GAL 2:9 ने मुख्‌यान डाहला मुख्‌या याकुप, केफा ने युहन्‌‌‌नु मारे पर भगवानेन गीण-दयान सी हवला तीना सेवान काम काजे खाम्‌बा मान लेदा, ने चे मेसेक ने बरनाबास काजे आपसा साजल्‌या समजीन सात संगात मां ली लेदा। ने चे असी बुली देदा की तुहुं नी-यहुदी मां खुस-खबर सामळावता रवजु, ने हामु फतरी काटड़न्‌या यहुदी माणसे मां सामळावता रवजु।
GAL 2:10 चे हामुक अतरोत कहींन अगवाय कर्‌या की तुहुं गरीब माणसेन हेर करीन तींद्‌री मदत करु। ने असला कामेक करने करीन मे पेहलुत तीयार हतलु।
GAL 2:11 बाकुन जत्‌यार केफा अन्‌ताकीया मां आयु, ती मेसेक तीनाक उजेंतु लड़नु पड़्‌यो, काहाकी चु वारु काम करनु छुड़ देदलु।
GAL 2:12 अन्‌ताकीया मां थुड़ाक दाहड़ा लग ईसुक मान्‌या आड़जात्‌या माणसे भेळु बसीन खाया करतेलु, बाकुन एक दाहड़ु यरुसलेम सी थुड़ाक यहुदी माणसे डाहला मुख्‌या याकुपेन नाव लीन आय लाग्‌या। तत्‌यार चु तींद्‌री सामळीन असु वीच्‌यार करीन बीही गुयु की बाहरला फतरी काटाड़न्‌या यहुदी माणसे हय काय करसे? ने चु ईसुक मान्‌या आड़जात्‌या माणसेन सात संगात छुड़ीन एक धड़े हय गुयु।
GAL 2:13 ने ज देखीन ईसुक मान्‌या चां वाळा यहुदी माणसे पतरसेन तसा ढंगड़ा करने बाजी गुया ने बरनाबास बी।
GAL 2:14 बाकुन मे ज देख्‌यु की केफा ने दीसरा, खुस-खबरेन छाचली वात पर हय नी चालता, ती मे आखा अगळ पतरस काजे उजेंतु लड़ीन कह्‌यु, “तु यहुदी माणुस हय्‌न बी, यहुदी माणसेन नीयम तुड़ीन आड़जात्‌या माणसे भेळु खात्‌लु, ती हय तु आड़जात्‌या काजे यहुदी माणसेन तसा जीवु करीन कसु जुर कर सके?”
GAL 2:15 “आपणु ते पयदावारी सीत यहुदी माणसे छे,” ने आड़जात्‌या माणसे मायन नी हय, तीनुक दीसरा यहुदी माणसे पापी कह्‌वे।
GAL 2:16 तेबी आपणु जाण लेदा की मुसा सी लिखला नीयम पाळनेन वजे सी कुय बी माणुस धरमी नी बणे, बाकुन ईसु मसी पर भुरसु करने सी माणसे पापेन कब्‌जाम सी छुटीन भगवानेन नींगा मां धरमी बण जाय। ने आपणु बी पाप सी छुटकारु हात करने करीन मुसा सी लिखला नीयम काजे पाळने छुड़ीन ईसु मसी पर भुरसु कर्‌या। खरला कायदा पाळने सी कुय काजे पाप सी छुटकारु नी जड़े।
GAL 2:17 आपणु ते ईसु मसी मां भुरसु करने सी धरमी गीणायणेन हेर कर र्‌या, बाकुन थुड़ाक माणसे आपणुक देखीन असु वीच्‌यार करे की जे ते मुसान नीयम कायदाक पाळनु छुड़ देदा ने चे पापी छे; असो हय ती ईसु मसी आपणुक पाप करान्‌यु गुनाळु चाकर्‌यु गीणाये काय? कदी नी।
GAL 2:18 कदी मे ईनी वातेक छुड़ देदु तीनी वातेक हय अळी पछु पाळने बाजी जाम, असो हय ती ते मे आपसात काजे मे गुनाळु छे करीन गवा दी रयु। बाकुन मे ईनी वातेम गुनाळु नी हय।
GAL 2:19 मे ते मुसा सी लिखला नीयम अनसारे नीयम वाटे मर गुयु, काहाकी भगवान वाटे जीवो ने समजो की मे भगवान भेळु जीवो करीन ईसु मसी पुठ्‌ये आपसा काजे कुरुस पर चड़ाय देदलु छे, ने मर गुयलु छे।
GAL 2:20 ने हय मे जीवतेलु नी हय बाकुन ईसु मसी मारेम जीवतेलु छे। ने मे हय बी डीलेम जीवतेलु रय रयु, बाकुन मे भगवानेन बेटास ईसु पर भुरसु करने सी जीवतेलु रय रयु, जु मेसेक परम कर्‌यु, ने मारे वाटे आपसा जीव काजे कुरुस पर चड़ाय देदु।
GAL 2:21 कदी मुसान लिखला नीयम पाळने सी धरमी बण जाता ती ईसु मसीन मरनु फालतु हय जातो; करीन मे मारे पर हवली भगवानेन ईनी गीण-दया काजे कदी बी फालतु हवणी नी दम।
GAL 3:1 ए गलाती वाळा, तुंद्‌री अक्‌कल नी आवती काय? तुहुंक कुण मोहवी लेदो? तुहुं काजे ते हामु खुल्‌लाम कय देदला, की ईसु मसी काजे कुरुस पर चड़ावीन कसा खीळा ठुकला हतला।
GAL 3:2 मे तुंद्‌रे सी एक वात जाणने हींडी र्‌यु, की तुहुं भगवानेन जीव-आत्‌मा काजे मुसान लिखला नीयम पाळीन हात करला, की ईसुन खुस-खबर पर भुरसु करीन हात करला?
GAL 3:3 तुहुं अतरा डेड़-अकल्‌या हय गुया काय? की तुहुं ज जीवन भगवानेन जीव-आत्‌मा सी सुरु कर्‌या, तीनी जीवन काजे डीलेन मरजी सी पुरी करने हींड र्‌या काय?
GAL 3:4 तुहुं अतरो जादा दुख फालतुत झेल्‌या काय? मारु भुरसु छे की तुहुं फालतु दुख नी झेल्‌या।
GAL 3:5 तुहुं मुसान नीयम काजे भुरसा सी पाळ र्‌या करीन भगवान तुहुंक आपसु चुखलु जीव-आत्‌मा आपीन तुंद्‌रे मां ताकुतेन मटा काम कर र्‌यु।
GAL 3:6 आखा यहुदी माणसेन डाहलु बास अब्‌राहमेन बारामां वीच्‌यार करु, तेरे बारामां असो लिखलो छे; अब्‌राहम ते भगवान पर भुरसु कर्‌यु, ने भगवान तीना भुरसाक देखीन तीनाक धरमी गीण्‌यु।
GAL 3:7 जी वात हेर राखु की जे भगवान पर भुरसु करे, तीनात हीसाबे अब्‌राहमेन खरली अवल्‌यात छे।
GAL 3:8 चुखला सास्‌तुरेन अनसारे पेहेल सीत अब्‌राहम काजे खुस-खबर सामळाय देदु की तारे सी आखी जातीन माणसे संयबरकत हात करसे। ने आपणुक बी जी वात समज मां आवे की भगवान आड़जात्‌या माणसे काजे भुरसु करने सी धरमी गीणीन तीनुक छुटकारु आपसे ईनी खुस-खबरेन वातेन बारामां, अब्‌राहम काजे भगवान पेहलुत सी देखाड़ देदलु।
GAL 3:9 ने चे भगवान पर भुरसु करे, चेत भगवान पर भुरसु करन्‌या अब्‌राहम पुठ्‌ये छुटकारान संयबरकत हात करे।
GAL 3:10 मुसान नीयम मां असो बी लिखलो छे, जु काहनुक ईना नीयमेन किताप मां लिखली वात काजे पुरो की पुरो नी पाळे तेरे पर गरा छे। ने जे नीयम कायदा पाळीन धरमी बणनेन हर करे, चे आखा गरात मां छे।
GAL 3:11 मुसान नीयम मां असो बी लिखलो छे, “माणुस भुरसु राखीन धरमी बणीन जलम जीवतेलु रवसे।” ने जी वात छाची छे, की मुसान नीयम पाळने सी भगवान अगळ कुय बी धरमी नी बणे।
GAL 3:12 मुसान नीयम मां असो लिखलो छे, “जु ईनी लिखली आखी वात काजे पाळे, चु की चु जी आखी वात पाळनेन वजे सी जलम जीवतेलु रवसे।” बाकुन असु आखा नीयम पाळन्‌यु एक बी माणुस नी हय। ने जी वात छाची छे की नीयम, भगवानेन खुस-खबर पर भुरसु करनेन वात पर टेकायली नी हय।
GAL 3:13 मुसान नीयम मां असो बी लिखलो छे, “तीनाक बी लाकड़ा पर टांगीन मार देय, चु गरा वाळु छे।” ईने रीते ईसु काजे बी माणसे लाकड़ान कुरुस पर खीळा ठुकीन टांग देदा ने तीनाक मार नाख्‌या। मुसान नीयम पुरा की पुरा नी पाळने सी जी गरा आपणे पर आवे, छाचीन तीनी गरा काजे ईसु मसी आपसा पर झेलीन, गरा वाळु बण गुयु, ने तीनी गराम सी आपणुक छुड़ाय लेदु।
GAL 3:14 असु ईसु काहा गरा वाळु बण गुयु। अब्‌राहम काजे जी संयबरकत भगवान आपलु, ची संयबरकत मसी ईसु सी आखा आड़जात्‌या बी जड़नु चाहजे ने मसी ईसु पर भुरसु करने सी, आपणुक बी भगवान सी वायदु करलु चुखलु जीव-आत्‌मा जड़नु चाहजे, असु वीच्‌यार करीन ईसु आपणी गरा झेल्‌यु।
GAL 3:15 ए भायस्‌यो ने बहणस्‌या, मे तीनुक समजाड़ने करीन माणसे जीवनेन एक दाखलु देखाड़ु। कदी दुय माणसेन ईचमां वायदु हय जाय ती अळतेन चे बुली कुय बी टाळ नी सके, ने तेरेमां नी बड़े ने नी घटे। भगवान अब्‌राहम साते जी बुली कर्‌यु ची बी असीत छे।
GAL 3:16 भगवानेन बुली करला वायदु ते अब्‌राहम ने तेरी अवल्‌यात मायन एकुत जणा भीणी हवली छे। भगवान असु नी कह्‌यु की “आखी अवल्‌यात काजे,” बाकुन तेरी अवल्‌यात मायन एकुत जणा काजे असु वायदु करलु छे, ने चु अवल्‌यात ईसु मसी छे।
GAL 3:17 ईनी वात पर वीच्‌यार करु, भगवान अब्‌राहम साते वायदु कर्‌यु ने चार सोव तीस साल हय गुया ने अळतेन भगवान मुसान लिखला नीयम आपलु। मारो कह्‌णेन मतलब छे की जी बुली भगवान अब्‌राहम साते पेहेल करलु, तीनी बुली काजे अळतेन मुसा सी लिखला नीयम फालतु नी कर सके।
GAL 3:18 काहाकी संयबरकतेन हक मुसा सी लिखला नीयम पर टेकलु रवतु, ती बुली करलु वायदु काय कामको नी रवतो, बाकुन हसो नी हवे, भगवान ते अब्‌राहम पर गीण करीन संयबरकतेन हक वायदा सी पेहलुत आपी देदु।
GAL 3:19 असो हय ती मुसान नीयम काय कामको? भगवान अब्‌राहम साते बुली करीन वायदु करलु ती चु अळतेन नीयम काहा आप्‌यु? हया नीयम ते, वायदु करला एकुत अवल्‌यात ईसु काजे आवता लग, माणसेक तींद्‌रा पापेन बारामां समजाड़ने करीन आपला हतला। ने जे नीयम ते, भगवान थुड़ाक सरग काहवाळ्‌या सी माणसे वाटे मुसाक मेळ कराड़न्‌यु बणावीन तेरा हात मां आपला हतला।
GAL 3:20 मेळ कराड़न्‌यु ते एकुत नी रहे, बाकुन भगवान एकुत छे।
GAL 3:21 असो हय ती मुसा सी लिखला नीयम भगवानेन करला वायदान वीरुद मां छे काय? कदी नी, कदी भगवान मुसान नीयम पाळनेन अनसारे खरलो जीवन आपी देदु, ती ते छाचलीन, धरमी बणनेन मतलब मुसान नीयम पाळनेन अनसारेत रवतो।
GAL 3:22 बाकुन चुखला सास्‌तुर मां असो देखाड़े की नीयम आखा माणसेक केदड़ान तसा पापेन कब्‌जा मां कर देदा। ने भगवानेन वायदान नेहु, ईसु मसी पर भुरसु करनेन छे, ने जे ईसु पर भुरसु करे, तीनुत काजे भगवानेन नीयमेन अनसारे छुटकारान संयबरकत जड़े।
GAL 3:23 तेबी ईसुन आवणेन पेहेल ने ईसु पर भुरसु करनेन पेहेल, आपणु काजे भुरसान वाट देखाव पड़ता लग, मुसान नीयम सी आपणी गुवाळी हवतेली।
GAL 3:24 आपणु ईसु पर भुरसु करीन धरमी बन्‌नु चाहे करीन आपणुक ईसु मसी धड़े लावणे करीन, मुसान नीयम पुर्‌या राखवाळ्‌यान तसा आपणी राखवाळी करतेला।
GAL 3:25 बाकुन हय ते भुरसान वाट देखाव पड़ गुई, ती हय आपणु पुर्‌या राखवाळ्‌यान कब्‌जा मां नी हय।
GAL 3:26 तुहुं बी आखा ने आखा मसी ईसु पर भुरसु करने वाटे, भगवानेन बेटास बण गुयला छे, भले यहुदी हय, ते ने भले नी-यहुदी आड़जात्‌या हय।
GAL 3:27 ने ईसु मसी मां एक हवणे करीन, तुहुं आखा ने आखा बपतीस्‌मा लीन, ईसु मसी काजे नवला पुथल्‌यान तसा पेहेर लेदला छे।
GAL 3:28 तुहुं हय एक घरन्‌या बण गुयला छे, ने हय तुंद्‌रेम काय बी छीट नी रय, भले तुहुं यहुदी माणसे हय नीते युनानी माणसे हय नीते आड़जात्‌या हय, भले गुलाम पावर्‌यु हय नीते मालीक हय, भले अदमी नीते बायर हय, तुहुं आखा ईसु मसी मां एक हय गुयला छे।
GAL 3:29 असा करीन हय तुहुं ईसु मसीन माणसे छे, ने तुहुं बी अब्‌राहमेन अवल्‌यात ने वायदान अनसारे हकदार्‌या बी छे।
GAL 4:1 मान लेवु की एक मालदारेन एकुत पुर्‌यु हय, ने चु तेरा आखा धनेन हकदार्‌यु हय। तेरा बंगला मां पुर्‌या राखवाळ्‌या ने पावर्‌या ने गुलाम पावर्‌या बी हय। तेबी जत्‌यार लग चु हकदार्‌यु पुर्‌यु हुस्‌यार नी हवे, चां लग आखी चीजेन मालीक हय्‌न बी चु आपसा घरेन गुलाम पावर्‌या सी मटु नी हय।
GAL 4:2 तीना पुर्‌याक ते बासेन टाकली टेम लग, पुर्‌या राखवाळ्‌यान ने सामाळन्‌या पावर्‌यान कब्‌जाम रहणु पड़े, ने तीनाक आपसी मरजीन अनसारे नी जीवाये।
GAL 4:3 ईसु मसी पर भुरसु करनेन पेहेले आपणु बी, ईना पुर्‌यान तसा रवता। आपणु ईनी कळीन रीती-भातीन ने नीयमेन कब्‌जाम रवीन गुलामी करतेला।
GAL 4:4 बाकुन जत्‌यार भगवान बासेन टाकली टेम पुरी हय गुय, ती चु आपसा बेटा ईसु काजे ईनी धरती पर मकल्‌यु। चु एक बायर सी पयदा हयु, ने मुसा सी लिखला नीयमेन कब्‌जाम मां रवीन चे आखा नीयम फालतु जाय्‌न जीयु,
GAL 4:5 तेरे सी चु ईसु, मुसा सी लिखला नीयमेन कब्‌जा मां रहणे वाळा आपणु आखा काजे छुड़ावे, ने आपणु काजे भगवानेन खुळे लेदला बेटा-बेटी बणावे।
GAL 4:6 हय हामु ने तुहुं आखा भगवानेन बेटा-बेटी बण गुयला छे, ने भगवान आपणा मन मां आपसा बेटासेन चुखली-आत्‌मा काजे मकेल्‌लु छे, जु चुखलु जीव-आत्‌मा आपणे भेळु भेसकायन भगवान काजे असु आयड़ीन बुलावे, “ए अब्‌बा, ए बास।”
GAL 4:7 हय तुहुं नीयमेन गुलाम पावर्‌या नी हय, बाकुन भगवानेन बेटा-बेटी छे, ने हय तुहुं भगवानेन मरजी सी वारीस बण गुयला छे।
GAL 4:8 पेहेल ते तुहुं भगवानेक नी उळख्‌या ने तेरु गुलाम हतला जु छाचलीन भगवान नी हय,
GAL 4:9 बाकुन हय ते तुहुं खरला भगवान काजे उळखी लेदा, नीते असा कहणु चाहजे, की भगवान तुहुं काजे आपसान उळखाण कराड़्‌यु, ने हय तुहुं ईनी कळीन लुल्‌ली ने रीकामी रीती-भातीन ने नीयम भीणी काहा जाय र्‌या। तुहुं अळी ईनी सुरु वाळी वातेन गुलाम मां काहा हवणे हींडी र्‌या?
GAL 4:10 ने आपसाक धरमी बणावणेन हर करीन, तुहुं खास दाहड़ान पाळनी ने खास महनान, ने खास तीहवारेन, ने खास सालेन पाळनी काहा पाळने बाजी गुया।
GAL 4:11 तुंद्‌रे बारामां मे बीही र्‌यु, कांखुर मायन असो ते नी हय जाय, की जी मेहनत मे तुंद्‌रे वाटे करलु छे, ची फालतु हय जाय।
GAL 4:12 ए भायस्‌यो, मे तुंद्‌रे सी लीलघाय्‌न कहो, तुहुं मारेन तसा हय जावु, काहाकी मे बी तुंद्‌रेन तसु हय गुयु, तुहुं मारो काय बी नी बीगाड़्‌या।
GAL 4:13 बाकुन तुहुं जाणु की पेहेलुत मे डीलेन कमजुरीन वजे सी तुहुंक खुस-खबर सामळायु।
GAL 4:14 ने मारा डीलेन लुल्‌गाय वाटे तुहुंक एला करनु ते पड़्‌यो, तेबी तुहुं मेसेक हेटु समजीन फालतु नी जाण्‌या। बाकुन तुहुं मेसेक सरग काहवाळ्‌यु जु भगवानेन समजीन, एर सी बी जादा मेसेक ईसु मसी समजीन, मारी आव-भाव कर्‌या।
GAL 4:15 ती ची तुंद्‌री खुसी कां गुई? मे तुंद्‌रु गवा छे, की तुंद्‌रु अतरु परम हतलु, की कदी मारे वाटे डुळा नीकाळीन आपणु पड़तो तेबी तुहुं डुळा लग नीकाळीन आप देदा।
GAL 4:16 मे छाचली वात कय देदु करीन तुंद्‌रु दुस्‌मन बण गुयु काय?
GAL 4:17 मे जाणो की थुड़ाक माणसे ईनु दाहड़ाम तुहुंक दुस्‌तीदार बणावणेन हर कर र्‌या, बाकुन भला वीच्‌यार करीन दुस्‌तीदार बणावणे नी हींडता, तुहुं हींद्‌रीत हर करनु चाहजे करीन जे माणसे झुटी सीकापण आपीन तुहुं काजे मार सी आंग्‌ये कर र्‌या।
GAL 4:18 भली वाते वाटे हर करनु, घणो वारु छे, ने च मे ईतरीक वार नी बाकुन जलम भली वाते वाटे हर करनु चाहजे।
GAL 4:19 ए मारा पुर्‌या-पारी, हय लग तुहुं नानलात छे काय? मे तुंद्‌रे वाटे तीनी फवरी हवणेवाळी बायरीन तसु दुख सेण कर रयु, ने जत्‌यार लग तुहुं ईसु मसी मां पुरा पाक्‌का नी हवे, ती लग मारो मन दुख्‌या करे।
GAL 4:20 नांबे रवीन तुहुंक कसु समजाड़ो, ज मेसेक समज मां नी आवतो। मारी हर ते जी छे, की मे तुंद्‌रेन्‌चां आवीन आंबु-सांबु धीरु रय्‌न वात करो, बाकुन हय ते लिखणुत पड़ रह्‌यो।
GAL 4:21 तुंद्‌रे मायन थुड़ाक मुसान नीयमेन कब्‌जा मां ते रहणेन हर ते कर रया तीनु काजे मे एक वात पुछो, तुहुं मुसा सी लिखली नीयम मां जी वात नी सामळ्‌या काय?
GAL 4:22 अब्‌राहमेन दुय पुर्‌या हतला, एक पुर्‌यु ते आपसी लाडी सारा सी पयदा हयु, ने दीसरु पुर्‌यु ते गुलाम पावरनी हाजीरा सी पयदा हयु।
GAL 4:23 जु पुर्‌यु गुलाम पावरनी सी हयु, चु डीलेन मनेन अनसारे पयदा हयु। ने इसाक जु अब्‌राहमेन लाडी सी पयदा हयु, चु ते भगवानेन वायदान अनसारे पयदा हयु।
GAL 4:24 ईनी वाते मां दाखलु छे, जे बायरा मानु की दुय वायदा छे, एक ते सीनाय उचु बयड़ान, तेरेमां सी गुलाम्‌यात पयदा हवे; ने ची हाजीरा छे।
GAL 4:25 ने हाजीरा मानु अरबेन सीनाय उचु बयड़ु छे, ने हय्‌न यरुसलेम तेरेन तसों छे, काहाकी हयी आपसा पुर्‌या समोत गुलाम मां छे।
GAL 4:26 बाकुन उपरनी यरुसलेम सहर बांदायली नी हय, ने ची आपणी माय छे।
GAL 4:27 काहाकी लिखलो छे, ए आंझी, तु भारीस हय्‌न फवरी नी हवे, तेबी खुस हय जां, फवरी हवणे करीन, तारा दुखेन पीड़ा नी हवती, तेबी आयड़ी आयड़ीन खुसीन गीत गांव, काहाकी छुड़ली बायरीन अवल्‌यात सी जादा हवसे, तेरु धेणी छे।
GAL 4:28 ए भायस्‌यो ने बहणस्‌या, आपणु इसाकेन तसा वायदान अवल्‌यात छे।
GAL 4:29 जसु डीलेन मनेन अनसारे पयदा हवण्‌यु इसमायेल तीने टेमे, भगवानेन जीव-आत्‌मान जुरेन अनसारे पयदा हवण्‌या इसाक काजे एला पाड़तेलु, तसोत हय बी हवे।
GAL 4:30 बाकुन वीच्‌यार करु, चुखला सास्‌तुर मां काय कहें? “गुलाम पावरनीन पुर्‌या काजे, खास बायरीन पुर्‌या भेळतु नी रहे ने गुलाम पावरनीक ने तेरा पुर्‌या काजे बाहर नीकाळ देवु।”
GAL 4:31 ए भायस्‌यो ने बहणस्‌या, आपणु तीनी गुलाम पावरनीन अवल्‌यात नी हय, बाकुन तीनी खास बायरीन अवल्‌यात छे, जी गुलाम नी हवती, ने मुसान नीयमेन गुलामी मां सी आपणुक छुटकारु जड़लु छे।
GAL 5:1 ईसु मसी आपणु काजे नीयमेन कब्‌जाम सी छुड़ावलु छे, ने हय तुहुं छुटकारु हात करलान तसा जीवु, ने अळी पछा नीयमेन जुड़ा मां जुपाय्‌न गुलामी मां करु।
GAL 5:2 सामळु मे पोलुस तुहुं काजे खुल्‌लाम कहं की तुहुं आपसा पेहेरवटेन अगली चामड़ी काटाड़सु, ती तुहुं काजे ईसु मसीन मोत सी काय बी फायदु नी हय।
GAL 5:3 मे तुहुंक अळी चेताय्‌न कहं, जतरा बी धरमी गीणायणे करीन पेहेरवटेन अगली चामड़ी काटाड़े तीनुक मुसान नीयम मां सी आखात नीयम बीगुर नी पाळाये।
GAL 5:4 तुहुं नीयम सी धरमी ठहराय्‌णे चाही र्‌या, मसी सी अलग ने गीण-दया सी छेटा हय गुया।
GAL 5:5 काहाकी आत्‌मान वजे हामु भुरसा सी, आसा करीन धरमीन काम करनेन वाट देख्‌जे।
GAL 5:6 मसी ईसु मां नीते फतरी काटणु बी नीते अघली चामड़ी नी काटाड़्‌ला कामका छे, बाकुन भुरसु अतरुत, जु परमेन वजे जुर दी सके।
GAL 5:7 तुहुं ते ईसु मसी पर भुरसु करीन बेसका वारु जीवणे बाजी रवला। हय छाचली काजे मानीन जीवणे मां कुण रूकावट बण रह्‌यो?
GAL 5:8 जु भगवान तुहुं काजे बुलावलु छे, चु ते तुहुं काजे असु नी सीकाड़्‌यु।
GAL 5:9 ईतरोक खटाणो आखा कुसण्‌ला पीठा काजे खटाणो बणाय देय। झुटी सीकापण बी असोत छे।
GAL 5:10 तेबी तुंद्‌रे बारामां मेसेक मालीक ईसु पर भुरसु छे, की तुंद्‌रु दीसरु वीच्‌यार नी रवसे, बाकुन जे तुहुं काजे भुरसा सी छेटा करनेन कर रया, भले चो कुय बी हय, तीनाक भगवान डंड आपसे की आपसे।
GAL 5:11 ए भायस ने बहणस्‌या, कदी मे हय लग पेहेरवटेन अगली चामड़ी काटाड़नेन परचार कर रयु हय, ती फतरी काटड़न्‌या मेसेक काहा एला पाड़े? कदी मे असु अगली चामड़ी काटाड़नेन परचार करतु, ती कुरुस पर टांगायला ईसुन खुस-खबरेन कुय बी रुकावट नी करतु।
GAL 5:12 तुहुं काजे जे एला पाड़ रया, चे पेहेरवटेन अगली चामड़ी काटाड़नेन अतरी हर कर रया, ती चे आपसान ने पेहेरवट काटाड़ लेता ती वारलु रवतो।
GAL 5:13 भायस ने बहणस्‌या, तुहुं जाणु की भगवान तुहुंक नीयमेन गुलाम रहे बीगुर छुटला रहणे करीन बुलावलु छे, बाकुन आपसा डीलेन हर पुरी करता जाय्‌न पाप करने करीन छुटला नी छुड़्‌यु। ने परम सी एक दीसरान सेवा करु।
GAL 5:14 काहाकी मुसान नीयमेन सास्‌तुर मां बी असोत लिखलो छे “तु आपसा धड़ेवाळाक आपसान तसु परम कर।” तुहुं एरेत अनसारे आखा पर परम करु, ती ईना परम सीत आखा नीयम पुरा हय जासे।
GAL 5:15 बाकुन तुहुं ते हय जंगली जनवार्‌यान तसा आंबा-सांबा चावणे ने नुकसाण करने बाजी र्‌या, असा करता रवसु, ती तुंद्‌रु मेळ सर जासे। ने चेतीन रहु।
GAL 5:16 बाकुन मे कहो, आत्‌मान अनसारे चालु ती तुहुं डीलेन मरजी काहनी रीती सी पुरी नी करसु।
GAL 5:17 काहाकी डील आत्‌मान वीरुद मां नी हय ने आत्‌मा डीलेन वीरुद मां नी हवणेन मरजी करे, ने जे एक दीसरान वीरुद मां नी हय, असो काहा छे की जो तुहुं करने हींडे, चो कराये नी।
GAL 5:18 ने कदी तुहुं आत्‌मान कह्‌याम चालता हय ती नीयम मां नी रया।
GAL 5:19 हय डीलेन कामे ते उजेंता छे, मतलब छीनाळो करनु, भुंडा कामे, ने लुच्‌चायन काम करनु,
GAL 5:20 दगड़ा पुजणु, बड़वाय करनु, झगड़ु करनु, जखड़ी पड़नु, कुहराय्‌णु, रीस करनु, आपसान वाटे भलो हवणेन वीच्‌यार करनु, टुळाम सी अलग हवणु, ने कुहराय करनु,
GAL 5:21 दीसरान चीजेन हाय करनु, दारुड़्‌यु बणनु, छाकी पड़नु ने छीनाळा मां मुजा लेणु ने असला बेसका गलत काम छे, ईनु गलत कामेन बारामां जसु पेहेल बी मे कय देदलु, मे हय बी कय दम की असा-असा कामे कर्‌या करे, चे भगवानेन राज मां भरायणेन हकदार्‌या कदी नी बणे।
GAL 5:22 बाकुन भगवान जीव-आत्‌मा आपसा कह्‌याम जीवण्‌यान जीवन मां आपसा फळेन जे गुणे उजेंतु करे; परम करनु, खुस रहणु, सांती सी हेळी-मेळीन रहणु, गम खाणु, दीसरान भलाय करनु, भुरसाम रहणु,
GAL 5:23 दीसरा साते भुळा बणीन रहणु, ने आपसाक कब्‌जाम राखणु, असला वारला कामेन काहना बी कायदान वीरुद नी करे।
GAL 5:24 जे ईसु मसीन छे, चे आपसा डीलेन पापेन हाय ने हर काजे कुरुस पर चड़ावीन खीळा ठुक देदला छे।
GAL 5:25 आपणुक भगवानेन जीव-आत्‌मा सी असली नवली जीवन जड़ली छे, ती छाचलीन भगवानेन जीव-आत्‌मान अनसारे जीवणु बी चाहजे।
GAL 5:26 ने आंबा-सांबा जखड़ी पड़ता जाय्‌न कुहराये मटाय घुण करु।
GAL 6:1 ए भायस्‌या ने बहणस्‌या, कदी तुहुं, तुंद्‌रे मायन काहनाक काजे पाप करता देख लेवु, ती तुहुं भगवानेन जीव-आत्‌मान कह्‌याम जीवण्‌या छे, तुहुं सुवाळा बणीन तीनाक समजाड़ु ने ईसुत सात संगात मां पछा लावु, ती तुहुं आपसान बी चुकसी कर, कांखुर मायन असो नी जाय की तुहुं पापेन पारख मां पड़ जावु।
GAL 6:2 असु करीन तुहुं एक दीसरान काहनु बी बुजु हाकलीन सात देवु, ने ईने रीते तुहुं ईसु मसीन परमेन नीयम पुरो करे।
GAL 6:3 काहाकी काहनुक काय बी नी हय तेबी आपसा काजे दीसरा सी मटु समजे, ने ईनी रीते दीसरान भार नी हाकले, चु आपसा काजे धुकु देय।
GAL 6:4 बाकुन हर एक आपणात काम काजे जांच लेय, ने तत्‌यार दीसरान बारामां नी बाकुन आपणात बारामां तीनाक घमट करनेन टेम रवसे।
GAL 6:5 काहाकी हर एक माणुस आपसान ने बुज हाकलसे।
GAL 6:6 जु काहनुक तुहुंक भगवानेन बुले सीकाड़े, तीना काजे तुहुं तुंद्‌री आखी वारलु चीजेम साजु करु।
GAL 6:7 आपसा काजे धुकु मां देवु, भगवानेन ठट्‌टा नी उडाड़े, काहाकी माणुस ज वेरे चत काट्‌से।
GAL 6:8 जु डीलेन हर काजे खुस करीन जीवसे, तीनाक डीलेन हरेन अनसारे डंड जड़से, ने जु भगवानेन जीव-आत्‌मा काजे खुस करीन जीवसे तेरा जीवन मां भगवानेन जीव-आत्‌मान फळ मतलब तेरो गुण देखाव पड़से ने चु सदान जीवन काजे हात करसे।
GAL 6:9 आपणु काजे भलाय करता-करता हिम्‌मत नी हारनु चाहजे, आपणु जाणजे की भलाय करता जाय्‌न वारु टणका रवसु, ती आपणुक टेम आवसे ती मालीक भीणी सी ईनाम बी जड़से की जड़से।
GAL 6:10 ने मुखु जड़तात आखान वारु करनु चाहजे, खास करीन जे ईसु पर भुरसु करे, तींद्‌री भलाय ते करनुत चाहजे।
GAL 6:11 देखु, मे कसुक तुहुं काजे आपसान हाते करीन मोटा-मोटा आकड़ा मां लिखलु छे।
GAL 6:12 जे माणसे डीलेन दीखावु चाहे चेत तुंद्‌री फतरी काटाड़ने वाटे दबाव बणावे, सीरप हेरेसी की चे मसीन कुरुसेन वजे सी सताय नी जाय।
GAL 6:13 जे आपसात पेहेरवटेन अघली चामड़ी काटाड़ला ते खरा, बाकुन जे बी मुसान नीयम पुरु नी पाळतेला, तेबी चे दीसरा यहुदी माणसे अगळ हामु हींद्‌रा पेहेरवटेन अघली चामड़ी काटाड़्‌या करीन तुंद्‌रे पर मटाय करने करीन तुंद्‌री पेहेरवटेन अघली चामड़ी काटाड़्‌ने हींडी र्‌या।
GAL 6:14 मे ते असली वातेन फीकुर नी करो, मारी हर जी छे की मे आपणा मालीक ईसु मसीन कुरुस पर अतरुत मटाय करो। ने मारी नींगा मां ईनी कळी काजे कुरुस पर चड़ावीन खीळा ठुकला छे, ने ईनी कळीन माणसेन नींगा मां मे कुरुस पर चड़ावीन खीळा ठुकाड़लु छे।
GAL 6:15 काहाकी हय फतरी काटणु बी कामको नी हय, बाकुन खास कामकी वात जी छे, की आपणु काजे पुरा की पुरा ईसुन तसा नवला बणता जाणु चाहजे।
GAL 6:16 जतरा बी ईना नीयम मां चाले, चे की चे भगवानेन खास ईस्‌रायली माणसे छे, तीनु आखा काजे भगवान सुक-सांती ने दया आप्‌या करे, असु मे भगवान सी दुवा करो।
GAL 6:17 अगा कुय मेसे काजे दमणु नी चाहजे, काहाकी मे ईसुन घाव काजे आपणा डील मां लीन फीरो।
GAL 6:18 ए भायस ने बहणस्‌या, आपणा मालीक ईसु मसीन गीण-दया तुंद्‌री जीव-आत्‌मा साते रया करे असु मे भगवान सी मांग करो, आमीन।
EPH 1:1 मे पोलुस भगवानेन मरजीन अनसारे ईसु मसीन नेवताळु छे। मे जी चिट्‌ठी ईसु मसी पर भुरसु करन्‌या, भगवानेन चुखला माणसे काजे लिखो, जे ईफीसुस सहर मां रहे।
EPH 1:2 तुहुं काजे आपणा भगवान बास सी ने मालीक ईसु मसी सी गीण-दया ने सुक-सांती जड़ती रहे।
EPH 1:3 आपणा मालीक ईसु मसीन भगवानेन ने बासेन बड़ाय हवे, काहाकी हयु हामुक मसी मां सरग वाळा जागा मां आखी भातीन संयबरकत देदु।
EPH 1:4 ची संयबरकत काय छे? ची जी छे हयु हामुक कळी घड़ायणे सी पेहलुत ईसु मसी मां नेवाड़ लेदु, काहाकी हामु तेरे धड़े परम मां चुखला ने नी-गुना वाळा रवजे।
EPH 1:5 ने भगवान आपणु काजे ईसु मसी सी तेरा खुळे लेदला पुर्‌या-पारी बणावणे करीन पेहेल सीत नक्‌खी करलु। ने जीत भगवानेन मरजी हतली, ने तीनी वातेम चु बेसकु खुस हतलु।
EPH 1:6 ने तेरेत अनसारे चु आपसा लाटेक्‌ला पुर्‌या ईसुन साहरे आपणे पर गीण-दया देखाड़लु छे, काहाकी आपणु भगवानेन ईनी गीण-दया सी जलम तेरी सेक-सींगारेन बड़ाय करता रवजे।
EPH 1:7 हामुक तेरा लुही सी छुटकारु मतलब पापेन माफी, तेरा गीण-दयान धन सी जड़्‌यो।
EPH 1:8 तीनुक चु बेसकी आखी वातेन ने समजेन अक्‌कल आप्‌यु।
EPH 1:9 हव भगवान आपसी मरजीन सातायली युजना, आपसी अकलेन ने समजेन अनसारे हामु काजे बताड़्‌यु, ने चु पेहेल सीत ईनी युजनान वात काजे आपसा मन मां नक्‌खी कर लेदलु।
EPH 1:10 भगवानेन जी युजना हतली की नक्‌खी करली टेम आवसे ती आखा घड़न्‌याक भेळा करीन ईसु मसीन हक मां कर दीस भले ची सरगेम हय, तीनी धरती पर हय तीनी नवली कळजुग बणावीस।
EPH 1:11 भगवान ते आखो काय आपसी मरजीन अनसारेत करतेलु। चु आपसी मरजीन अनसारे पेहेल सीत आपणु काजे आपसा वाटे मारु वाटु करीन ईसु मां नेवाड़ लेदु।
EPH 1:12 काहाकी हामु जे तुंद्‌रे सी पेहेल ईसु मसी भीणी आस कर रवला, हामु भगवान बासेन सेक-सींगारेन गुण गावायणेन उत्‌तर बण जाय।
EPH 1:13 तुहुं बी ईसुन बारामां छाचली बुले सामळ्‌या, जी तुंद्‌रा छुटकारान खुस-खबर छे, ने ईनी खुस-खबरेन वात पर तुहुं भुरसु बी कर्‌या। तत्‌यार भगवान आपसा वायदान अनसारे तुंद्‌रा जीवेम बी आपसा चुखली-आत्‌मा काजे बठाड़ीन तुंद्‌रे पर आपसा जीव-आत्‌मान छाप लागाड़लु छे।
EPH 1:14 भगवान आपणे वाटे पेहेल सीत जु चुखलु जीव-आत्‌मा आप देदु, जु साय्‌न तसु छे। ने जी वात पाक्‌की छे की भगवान आपणुक जे तीनाक मान्‌या छे, पुरु की पुरु छुटकारु देसे ने तत्‌यार भगवान जु हक आपणुक आपणेन वायदु करलु छे, चु हक आपणुक जड़से ने जड़से। असु करीन आखा आपणुक भगवान बासेन सेक-सींगार ने गुणे गावणेन उत्‌तर बण जासुन।
EPH 1:15 ने जत्‌यार मे मालीक ईसु पर तुंद्‌रा भुरसान बारामां, ने ईसु पर भुरसु करन्‌या भगवानेन आखा चुखला माणसे पर तुंद्‌रा परमेन बारामां सामळ्‌यु ती मे बेसकु खुस हयु।
EPH 1:16 ने ती सी मे बी जत्‌यार भगवान सी दुवा करने करीन बठ्‌या करो, तत्‌यार मे तुहुंक हेर करतु जाय्‌न, तुहुंक भगवान अगळ बेसका वारु कवतु आय र्‌यु।
EPH 1:17 ने आपणा मालीक ईसु मसीन भगवान सी दुवा कर्‌या करो की चु भगवान तुहुं काजे, ईसुक वारु जाणने करीन अक्‌कल ने समजेन आत्‌मा आपे करीन, जु भगवान बास बेसकु मटु सेकवाळु छे।
EPH 1:18 मे जी बी दुवा करो की तीनी आस वाटे भगवान तुहुंक बुलावलु छे, तीनी आस काजे तुहुं मन मां वारु जाण लेवु। ने ज बी पाक्‌का जाण लेणु चाहजे, की भगवानेन नेवाड़्‌ला माणसेक, चुखला माणसेम सी जड़न्‌या हकेन सेक धन बेसकु छे।
EPH 1:19 मे जी बी दुवा करो की, तुहुं ज बी जाण लेवु की, जे ईसु पर भुरसु करे तींद्‌रे मां काम करने वाळान भगवानेन ताकत, रुकाये नी असी बेसकी मटी छे।
EPH 1:20 ने ईनी ताकत सी भगवान ईसु मसी काजे मर्‌या-सर्‌याम सी जीवतु करीन बठु कर देदु ने तीना काजे सरगेन राजगादी पर आपसे जेवड़्‌ये आंग्‌ये बठाड़ लेदु।
EPH 1:21 ने तीना ईसु काजे आखी भातीन राज-करन्‌या, पर ने हक-जमाड़न्‌या पर मुख्‌या ने ताकत पर, ने आखा मनार्‌या पर ने तीनु आखा पर तीनुक माणसे नेवतीन पुजे ने जे आखा रया खया पर हक आप देदु। ने ईनी कळी मां बी, ने आवणेवाळी नवली कळी मां बी ईसु बराबर कुय नी रहे।
EPH 1:22 ने भगवान आखी कळ काजे ईसुन पांय तळे मेल देदु, एक कह्‌याम भगवान ईसु पर भुरसु करन्‌या मंडळीन फायदा वाटे ईसु काजे आखान मुखी बणायु। ने ईसुन हक ते मंडळीन बी हक छे। ईसु आपसी मंडळीन, मुणकान तसु मुखी छे।
EPH 1:23 ने जी मंडळी ईसुन डील छे, ईना ईसु मां भगवानेन आखा गुणे वसला छे, ने भगवानेन आखा मां आखा गुणे भरे।
EPH 2:1 एक टेम हतली जत्‌यार तुहुं माणसे हीनु अपराद ने पापे वाटे आत्‌मान रुप मां मरला हतला।
EPH 2:2 पेहले तुहुं ईनी कळीन दीसरा माणसेन तसा गलत जीवन जीवतेला, ने चु भुतड़ु सीकाड़तेलु तीनी वात काजे मानीन जीवतेला, जु वाहळा मां रहण्‌या कुहर्‌या भुतड़ान मुखीन छे। हय जुत भुतड़ु भगवानेन हुकुम नी माने तीनु माणसे पर हक जमाड़ीन राज कर रयु।
EPH 2:3 आपणु बी पेहले भगवानेन हुकुम नी माने तींद्‌रेन तसा डीलेन ने मनेन भुंड्‌ली हेर करीन जीवतेला। ने दीसरा माणसेन चाल-चालनेन तसात आपणु भगवानेक रीस लाग्‌यो तसा जीया, ने हामरे पर भगवानेन डंड आवण्‌यो हतलो।
EPH 2:4 बाकुन भगवान हयु बेसकु दयाळु छे, आपसा बेसका परम सी आपणु काजे परम कर्‌यु।
EPH 2:5 आपणु पेहले पापेत मां मरला हतला, बाकुन भगवान आपणु काजे ईसु मसी भेळ जीवेम जीव वाळीन जीवता कर्‌यु; भगवानेन गीण-दया सीत आपणुक पापेन डंडेम सी छुटकारु जड़लु छे,
EPH 2:6 ने भगवान आपणु काजे ईसु मसी मां तेर भेळु जीवाड़्‌यु ने सरगेन राजगादी पर ईसु पुठ्‌ये बठाड़ देदु।
EPH 2:7 भगवान आपसी गीण-दया आवणेवाळी कळ वाटे जलमेन भलाय आखाक देखाड़ने करीन आपणु काजे परम करे, सरगेन राजगादी पर ईसु मसी पुठ्‌ये बठणेन हक आपे।
EPH 2:8 काहाकी ईसु पर भुरसु करने सी तेरी गीण-दया सी पापेन डंड सी आपणुक छुटकारु जड़लु छे। आपणु, जु छुटकारु आपणे जुरे हात नी कर्‌या, बाकुन जु छुटकारु भगवान भीणी सी फुकट मांत आपलु दान छे।
EPH 2:9 ने कुय बी माणुस मटाय नी करनु चाहजे, करीन जु छुटकारु आपणा भला कामे सी नी जड़्‌यु।
EPH 2:10 काहाकी आपणु ते भगवान सीत ईसु मसी मां एक नवला सीका मां घड़ायला छे; ने चु, आपणु काजे तीना भला कामे काजे करता जाय्‌न जीवणे करीन घड़्‌लु छे, तीनु भला कामे काजे चु पेहले सीत पाक्‌की करलु छे।
EPH 2:11 ने तुहुं जे पयदावारीत सी नी-यहुदी छे, ईनी वातेक हेर करु, जे यहुदी माणसे डील मां पेहेरवटेन अगली फतरी काटाड़ रया, चे तुहुं काजे नी फतरी काटा नी-यहुदी कय्‌न छीट राखतेला।
EPH 2:12 तीनी टेमे तुहुं ईसु मसी सी छेटे हतला, ने ईस्‌रायेली जातीन माणसे मां भेसकायला नी हतला, ने भगवानेन बुली करला वायदान साजल्‌या नी हतला। हेरेसी ईनी कळी मां भगवान बीगुर ने आस करे बीगुर जीवन जीवतेला।
EPH 2:13 आस करीन तुहुं मसी ईसु सी ने हामरे, सी बेसका छेटे हतला, बाकुन हय ईसु मसीन लुही सी ईसु मां मेळीन तुहुं भगवान साते ने हामरे साते आय लागला छे।
EPH 2:14 काहाकी हयुत हामरु मेळ कराड़न्‌यु छे, जु दुयु यहुदी ने नी-यहुदी काजे एक कर देदु, ने अलग करने वाळा भीतड़ा काजे जो ईचमां हतलो तीना काजे उदारी देदु।
EPH 2:15 ने आपणा डील सी दुसमनी मतलब तीना यहुदी नीयम तेरी हुकुम नीयमेन रीती मां हतली, तीनीक मीटाड़ी देदु काहाकी दुयुम सी आपणे मां एक नवली जाती बणायन मेळ कराड़ देय।
EPH 2:16 छाचलीन ईसु दुय टुळान लड़ाय काजे कुरुस पर दुसमनी सार देदु ने असुत यहुदी माणसे काजे ने नी-यहुदी माणसे काजे एक डील बणायन भगवान सी मीलाड़ देदु।
EPH 2:17 ने चु आय्‌न तुहुं काजे जे छेटे हतला, ने तीनु काजे जे साते हतला, दुय टुळा काजे भगवान सी मेळ कराड़नेन खुस-खबर सामळायु।
EPH 2:18 असु करीन की आपणु दुय टुळा, यहुदी ने नी-यहुदी माणसे ईसु मां भुरसु करीन भगवानेन आपला आपसा चुखला-जीव-आत्‌मान मदत सी भगवान बासेन्‌चां पुग जाजे।
EPH 2:19 ने हय तुहुं पेहलेन तसा दीसरा ने अन्‌जाण्‌या नी हय, बाकुन भगवानेन चुखला माणसे पुठ्‌ये भेसकायन उळखाय्‌ता हय्‌न आखी वातेम साजल्‌या बण गुया। ने खरान हय तुहुं भगवानेन घराणाम मां भेसकाय गुयला छे।
EPH 2:20 ने ईसुन नेवताळा ने भगवानेन अघली वात बताड़ने वाळा माणसे ईना घराणा वाटे घरेन नेहान पाया साय छे, ने ईसु मसीत ईना नेहान खुणान दगड़ा साय छे।
EPH 2:21 ने तेरेमां आखो काय एकतु हय्‌न मालीक मां एक चुखलु मंदीर बणतु जाय।
EPH 2:22 तेरेमां तुहुं बी आत्‌मा सी भगवानेन रहणेन घर हवणे करीन भेळात बणता जाय।
EPH 3:1 हेरे वजे सी मे पोलुस जे तुहुं नी-यहुदीया वाटे मसी ईसुन बांदायलु छे।
EPH 3:2 तुहुं छाचलीन सामळी रया, की तुंद्‌री भलाय करतात, भगवान गीण-दया भेळ ज कामे मेसेक सुप देदलु।
EPH 3:3 भगवान आपसी युजनान सातायली वात काजे डुळा अगळ देखाड़ीन मारे पर उजन्‌तु करलु छे, तीनी वातेन बारामां मे तुंद्‌रे वाटे पेहलेत उपर लिख देदलु छे।
EPH 3:4 जी वात भणीन तुहुंक मालम पड़ जासे, की मे पोलुस खरान ईसु मसीन बारामां सातायली युजनान काजे जाणो।
EPH 3:5 जी सातायली युजना गुया जमाना मां जे माणसे जीवतेला, तींद्‌रे पर उजेंती नी हवली हतली, जसो हय भगवान आपसा जीव-आत्‌मा सी आपसा नेवाड़्‌ला चुखला नेवताळा पर, ने भगवानेन अघली वात बताड़ने वाळा माणसे पर उजेंती करलु छे।
EPH 3:6 ची सातायली युजना जी छे, की ईसु मसीन खुस-खबर पर भुरसु करने सी हय ईसु मसी मां नी-यहुदी वाळा माणसे बी, यहुदी माणसे साते भगवानेन वायदु करला एकुत वाटान साजल्‌या ने हकदार्‌या छे, ने एकुत डीलेन भाग छे।
EPH 3:7 मे ते भगवान मेसेक गीण-दया सी तेरी खुस-खबर सामळावणे करीन तेरु चाकर्‌यु बण्‌यु। जी ताकुतेन साहरे काम मारे मां काम कर रय, ची ताकत मारी नी हय, बाकुन भगवानेन ताकत छे।
EPH 3:8 भले, मे भगवानेन चुखला माणसे मां आखा सी नानु छे, बाकुन तेबी ईसु मसीन खुस-खबर नी-यहुदी माणसे मां सामळावणे करीन भगवान मारे पर गीण-दया करलु छे, ने ईसु मसीन खुस-खबर गीणाये नी अतरी बेसकी बरकतेन खजानो छे।
EPH 3:9 ईनी खुस-खबरेन सातायली युजना काजे आखा अगळ उजेंती करने करीन भगवान मेसेक नेवाड़्‌लु छे, जी युजना आखी चीज घड़न्‌या भगवान मां सुरु सीत सातायली हतली।
EPH 3:10 तेरेमां हय ईसुन मंडळी सी भगवानेन आखी भातीन अकल, सरग वाळा जागा मां राज करन्‌या मुख्‌याक ने हकवाळा पर उजेंती हय रय।
EPH 3:11 भगवान आखा घड़त्‌या काजे घड़नेन सुरु सीत जी जलेमकी युजना बणावलु हतलु, तीनीत युजना काजे भगवान आपणा मालीक ईसु मसी मां पुरी करलु छे।
EPH 3:12 ने ईना ईसु मसी पर पुरु-पुरु भुरसु करीन आपणु बीहे पाखुर, ने हिम्‌मत करीन हक सी भगवान बासेन्‌चां जाय सकजे।
EPH 3:13 ने मे तुंद्‌रे सी लीलघाय्‌न कह्‌वो की तुंद्‌रेत वाटे दुख झेल र्‌यु करीन तुहुं हळका मां हवु; छाचलीन जु दुख मे तुंद्‌रे वाटे झेल र्‌यु, ईना दुखे वाटे, तुहुं हय अबरुदार बण गुयला छे।
EPH 3:14 ती मे तीना भगवान बासे अगळ मांडा टेकीन लीलघायु।
EPH 3:15 जु सरग वाळान ने धरती वाळा आखा काजे आपसात घराणा मां भेळा हवणे करीन बुलावे।
EPH 3:16 मे भगवान बास सी लीलघाय्‌न कहं की चु तुंद्‌रा जीवेम असु हवणी देय, की तुहुं तेरा सेक वाळान ताकत सी मतलब तेरा जीव-आत्‌मान ताकत सी, आपसा जीव मां ताकत हात करता जावु, ने काठा हवता जावु।
EPH 3:17 ने ईसु पर भुरसु करने सी, ईसु मसी तुंद्‌रा मन मां रय सके, ने तुहुं तेरा परम मां उंडा जड़ मुळे नाखीन अदु, ने परम मांत नेहु नाखीन काठा रहु करीन।
EPH 3:18 ने आखा चुखला माणसे भेळा ज समज्‌णेन ताकत हात करे, काहाकी मसीन परम चवड़ो, नांबो, उंचो ने उंडो छे।
EPH 3:19 ईसु मसीन ज परम आपणी समज सी बी बाहर छे, मे भगवान सी बी लीलघाय्‌न कहं की, चु तुहुंक ईना परम मां पुरुत घुळाय्‌णेन ताकत आपे करीन, ने असा करीन की तुंद्‌री जीवेम भगवानेन आखा गुणे पुरात उजेंता हय जाय।
EPH 3:20 आपणु भगवान ते बेसकु जबर ताकत वाळु छे, ने आपणु जतरी बी दुवा करजे, ने जतरु बी वीच्‌यार करजे तेरे सी बी बेसका आपणा जीवे मां चु काम कर सके।
EPH 3:21 मे ईना भगवानेन बड़ाय करो; ने ईसु मसीन साहरे, ने तेरी मंडळीन साहरे पीड़ीडीट, भगवानेन सेक-सींगारेन जलम बड़ाय हवती रहे। आमीन।
EPH 4:1 मे ते मालीक ईसु वाटे जेल मां कुंडाय रयु; ने तुहुं काजे ते, भगवान आपसा पुर्‌या-पारी बणावणे करीन बुलावलु छे, हेरेसी मे ईना जेल मां रय्‌न तुंद्‌रे धड़े लीलघाया करो की, तुहुं ईनात बुलावान साहरे जीवु
EPH 4:2 तुहुं आखी मटाय छुड़ु, दीसरा माणसे साते डाहवाय मां करु, ने परम मां गम खाता जाय्‌न ने परम सी एक दीसरा सी दयाळा, नीचळा बणीन वेहवार सेहण कर लेवु।
EPH 4:3 भगवान आपणुक मेळ कराड़्‌यु, ने आपसान चुखली-आत्‌मा सी एकुत मंडळी वाळा बणाय देदु, ती अगा बी एक मन्‌या हय्‌न भेळा रवजु।
EPH 4:4 ईसुन एकुत डील छे, जी तेरी मंडळी छे, ने भगवानेन चुखलु जीव-आत्‌मा एकुत छे, तसात आपणु एकुत आस वाटे बुलाय छांड्‌या।
EPH 4:5 एकुत मालीक छे, एकुत भुरसु, ने एकुत बपतीस्‌मा छे,
EPH 4:6 आपणु एकुत भगवान छे, जु आखा पर राज करन्‌यु आखान बास छे। चु आपणु आखा मां काम करन्‌यु छे, ने आपणु आखा सी काम करन्‌यु छे।
EPH 4:7 बाकुन जसु ईसु मसीन आपणी गीण-दया सी नक्‌खी कर्‌यु, तसुत चु आखा काजे आंग्‌ये वाटु आपलु छे।
EPH 4:8 जसु खरला सास्‌तुर मां लिखलो छे, चु जीत हात करीन उपर गुयु; चु वेरी माणसे काजे बांदीन पुठ्‌ये ली गुयु; ने आपसा माणसे काजे वाटु वाट देदु।
EPH 4:9 चु उपर गुयु तेरो मतलब छे की चु धरतीन उंडला जागा मां बी उतरीन गुयलु।
EPH 4:10 ने जु नेचली धरती मां उतरीन गुयु, चु की चु आखा सरगे सी उपर जात रयु, असु करीन चु आखान मालीक बण जाय।
EPH 4:11 ने ईसु उपर सरग मां चहड़ीन मंडळी वाटे जे आटा आप देदु, काहनास काजे नेवताळु, ने काहनास काजे भगवानेन अघली वात बताड़ने वाळा माणसे, ने काहनास काजे खुस-खबर सामळावन्‌या बणायु, ने काहनास काजे राखवाळी करन्‌या ने सीकापण आपण्‌या बणावीन मंडळी काजे आप देदु।
EPH 4:12 चुखला माणसे काजे सेवा करनेन तीयारी करने करीन ने चुखली मंडळीन ईसु मसीन डीलेन तसी ची वारु अधणु चाहजे करीन, ईसु मसी जे वाटा मंडळी काजे आप्‌यु।
EPH 4:13 असु करीन आपणु आखा की आखा काजे, भगवानेन बेटा ईसुन अक्‌कल मां, ने तेरे पर भुरसा मां, एक माणुस बणीन पुरा की पुरा पाक्‌कात बण जासु, जसु ईसु मसी पुरु की पुरु पाक्‌कु छे, जीत भगवानेन युजना छे।
EPH 4:14 असा करसु ती आपणु अगा नानला पुर्‌या नी रवजे, ठगण्‌या माणसेन ठग वीद्‌या सी ठगायजे नी, ने गलत सीकाड़ने सी, अथा ने अथा नी भटकायजे;
EPH 4:15 बाकुन परम सी छाचली वात देखाड़ता जाय्‌न ईसु मसीन तसा, आखी वाते मां अदता जासु, जु मंडळीन मुणको छे।
EPH 4:16 ने ज मुणको आखा डीलेक चालाड़ने ने ज डील आखा नस्‌टा सी, ने हाटका सी जुड़ायलो रहे, ने डीलेन आखा हीस्‌सा आपणा-आपणा काम करता जाय ने आखो डील अधीन आपसोत पुसाये। तसा मंडळीन माणसे एक दीसराक परम करता जाय्‌न आपसु-आपसु काम करे ने असु करीन मंडळी बी अधीन पुसाये।
EPH 4:17 ने मे तुहुं काजे मालीक ईसु नावे चेताय दम की हय सी नी-यहुदी माणसेन तसा पछा चाल मां धरु, जे भगवान काजे नी जाणे ने फालतुत वात काजे लीन चाले;
EPH 4:18 काहाकी तींद्‌रे अकलेन डुळा आंदळा हय गुयला छे, चे आपसे मनेक काठो कर लेदा, ने चे बी नी-यहुदी वाळा हय गुयला छे, ने भगवानेन जीवन सी छेटा हय गुयला छे।
EPH 4:19 ने चे बे सरम्‌या हय्‌न छीनाळा मां मन लागाड़ीन मुजा ली र्‌या, ने आखी भातीन भुंडला काम कर्‌या करे।
EPH 4:20 बाकुन तुहुं काजे ईसु मसीन बारामां असी सीकापण नी जड़्‌यो।
EPH 4:21 छाचलीन तुहुं ईसुन बारामां सामळ्‌या तत्‌यार तीनी छाचाय सी सीकापण काजे सीकला छे; जी ईसुन जीवेम उजेंती हय।
EPH 4:22 ती तुहुं काजे तुंद्‌री जुन्‌ली चाल-चलण ने जुन्‌ली टेव छुड़ देणु चाहजे, काहाकी चो जीवन ते भटकाड़ने वाळा भुंड्‌ला वीच्‌यारे सी बीगड़ती जाय रय।
EPH 4:23 तुंद्‌रा मनेन वीच्‌यार नवला करने करीन, आत्‌मा काजे तुंद्‌रे मां काम करनी देवु।
EPH 4:24 ने एक नवला जीवनेन टेव धरु, जी भगवानेन सीके घड़ायली छे, ने छाचलीन धरमी ने चुखली छे।
EPH 4:25 आपणु एक दीसरान डील छे, ने तुहुं झुट मेलनु छुड़ देवु, ने एक दीसराक छाचली वात कहुं।
EPH 4:26 कदी तुहुं रीसवाय जावु, ती पाप घुण करु, दाहड़ु बुडणेन पेहले आपसी रीस सेळवी लेजु;
EPH 4:27 ने भुतड़ा काजे मुखु घुण आपता।
EPH 4:28 तुंद्‌रे मायन काहनुक चुरी करता हय, ती चु चुरी करनु छुड़ देणु चाहजे, ने ईमानदारी सी वारलु काम करीन कमाय्‌णु चाहजे; ने असो काम करसे ती तेरे भीणी बी कसराय्‌ला माणसे वाटे देणे करीन बी रवसे।
EPH 4:29 तुंद्‌रा मुंहडाम सी फालतु वात नी नीकळनु चाहजे, बाकुन तीनी टेमे वारलु काम मां अधे तसली सुवाळी वात नीकळनु चाहजे, तेरेसी सामळने वाळा पर बी गीण-दया हवे।
EPH 4:30 ने भगवानेन जीव-आत्‌मा काजे दुखी मां करु, ईना चुखली-आत्‌मा सी तुंद्‌रे पर छुटकारान छाप छे।
EPH 4:31 तुहुं जीवनेन आखी कड़वान, रीस, जखड़ी पड़नु, दीसरान नाव-बद्‌दी करनु, ने आखी भातीन कुहराय, तुहुं ईनुक ईचमां सी छेटे कर देवु।
EPH 4:32 बाकुन एक दीसरा पर गीण करु, ने परम करु, जसु भगवानेन, ईसु मसी वाटे, तुहुं काजे माफ कर देदलु छे, तसात तुहुं बी एक दीसरा काजे बी माफ कर देवु।
EPH 5:1 तुहुं ते भगवानेन लाटेक्‌ला पुर्‌या-पारी छे, ने भगवानेन चाल धरु,
EPH 5:2 ईसु मसी आपणे सी परम करलु छे, आपणे वाटे आपसा काजे भगवान अगळ वारु गमे असो गंदायण्‌या भेटेन तसु बादान रुप मां चड़ावलु छे। ईसुन तसात तुहुं बी दीसरा सी परम करता जाय्‌न जीवु।
EPH 5:3 भगवानेन चुखला माणसे काजे तालेत रहणु चाहजे, ने तुंद्‌रे ईचमां छीनाळ्‌या, चंगला ने हायाळ्‌ळा नी हवणु चाहजे। ईनी वातेन बारामां दीसरा माणसेक वाक काटणेन मुखु आपतात घुण।
EPH 5:4 भुंडी वातेक ने चंगली वातेक लीन हासी मजाक घुण करता। असली वातेन मुंहडाम सी भाप लग नी नीकाळनु चाहजे। असली वात करनु सुभा नी देय, बाकुन भगवान काजे बेसकु वारु कह्‌या करनुत सुप देय।
EPH 5:5 काहाकी तुहुं ते जी वात वारु जाणी र्‌या की काहनु बी छीनाळ्‌यु, नीते भुंडलु माणुस नीते चंगलु नीते हायळु हय, ती चु मुरती पुजण्‌या बराबर छे, ने चु ईसु मसीन ने भगवानेन राजेन हकदार्‌यु नी बणे।
EPH 5:6 जसो गमे तसों करु करीन सीकाड़न्‌यान फालतु वातेन वाये लागीन धुकु घुण खाता, असला हुकुम नी मान्‌या माणसे पर भगवान रीसवाये, ने तींद्‌रे पर भगवानेन डंड आवण्‌यु छे।
EPH 5:7 ने असला माणसेन सात संगात मां करु।
EPH 5:8 काहाकी तुहुं ते पेहेले आंदारला मां हतला, बाकुन हय मालीक ईसु मां वीजाळा मां छे, तेरेमां वीजाळान पुर्‌यान तसा चालु।
EPH 5:9 काहाकी वीजाळान फळ आखी भातीन भलाय, ने धरमेन काम, ने खरली छे,
EPH 5:10 तुहुं जी वात पारखीन देखु की मालीक काजे काहनी वात गमे।
EPH 5:11 आंदारलान नी फळ लावणे वाळान कामे मां साजेल्‌या मां बणु, बाकुन तीनु काजे छुड़ देवु।
EPH 5:12 काहाकी तींद्‌रा सातायला कामेन वाते बी लाजवायणेन वात छे।
EPH 5:13 वीजाळो तींद्‌रा आखा गलत कामेक उजेंता करे ने चे आपसी गलती समजीन मान लेय, ने बदलीन आपसात वीजाळो बण जाय, ने दीसराक बी वीजाळो आपे।
EPH 5:14 ने आपणु बी असा हवता आय रया, ए सुवणे वाळा जाग जावु, ने मर्‌या-सर्‌याम सी जीवता हय जावु, ती मसी ईसुन वीजाळो तुंद्‌रे पर भबळसे।
EPH 5:15 ने आपसा उठणु बसणु पुरु की पुरु धी‌यान राखु। नी अकल्‌यान तसा नी, बाकुन अक्‌कल वाळा बणीन जीवु,
EPH 5:16 ने आपणु ते खुल्‌ला दाहड़ा मां जीवी रया। ने जत्‌यार बी मुखु जड़ जाय, मुखा काजे महंग्‌लु समजीन भगवानेन वारलु काम करता रवजु।
EPH 5:17 ने तुहुं तुंद्‌रा जीव मां मालीक भगवानेन मरजी काजे समजु, ने तेरेत अनसारे काम करु, बाकुन नी अक्‌कल वाळा मां बणु।
EPH 5:18 अंगुरेन रस पीन छाकता घुण, काहाकी एरे सी पापी वीच्‌यार उब्‌जे; बाकुन चुखली-आत्‌मा काजे तुंद्‌रा जीवेम पुरात भरायन काम करनी देवु।
EPH 5:19 ने भगवान मालीकेन अबरा मां हेळी मेळीन भगवानेन वातरा कवता जाय्‌न भगवानेन गीते, गाय्‌णो, ने भजन गाया करु, आखे तीना मालीकेन अबरा मां मन मां गावता गुंगणाय्‌ता रहु।
EPH 5:20 ने हामरा मालीक ईसु मसीक नावलीन आखे टेमे, आखी वात वाटे बास भगवान काजे बेसकु वारु, कवता रहु।
EPH 5:21 ने तुहुं ईसु मसी सी बीही र्‌या, करीन आपसा काजे एक दीसरान हक मां कर देवु।
EPH 5:22 ए, लाड्‌या, जसा तुहुं आपसा काजे मालीक ईसुन हाते मां सुप रया, तसात तुहुं आपसा काजे आपणा-आपणा धेणीन हातेम सुप देवु।
EPH 5:23 काहाकी लाडु आपसी लाडीन मुणको छे जसु मसी मंडळ्‌यान मुणको छे, मतलब मुखी छे। चु आपसी मंडळीन ने आपसा डीलेन छुटकारु करन्‌यु बी छे। तेबी चु मंडळी पर जबरान हक नी जमाड़े।
EPH 5:24 बाकुन मंडळी काजे ईसु मसीन हक मां रहणुत छे। तसात ए लाड्‌या तुहुं आखी वाते मां आपणा-आपणा धेणीन हक मां रहु।
EPH 5:25 ए, घरवाळा, तसात, तुहुं जाणु की ईसु मसी आपसी मंडळी काजे अतरा जादा परम कर्‌यु की चु आपसी मंडळी वाटे आपसु जीव लग आप देदु, तसात तुहुं आपणी-आपणी घरवाळी काजे परम करु।
EPH 5:26 की हीनाक बुलेन साहरे पाणी सी उंगळायान चुखु झण करीन चुखलु बणावे।
EPH 5:27 हय चु आपसी मंडळी काजे एक नवली लाडीन तसी सींगार करीन ने घाटाळी बणावीन आपसा अगळ उबी करने करीन चु असु कर्‌यु। जसु नवली लाडी काय बी दाग नी रहे, ने चामड़ो चीमाय्‌लो नी रहे, ने असली काहनी बी दीसरी कसर नी रहे, तसीत ईसुन मंडळी बी नी-गुना वाळी ने चुखली रवसे।
EPH 5:28 तसोत जत वारु छे की अदमी आपणी-आपणी लाडी सी आपसा डीलेन तसु परम राखे। जु आपसी लाडी सी परम राखणु चाहजे, मतलब चु आपसा सी बी परम राखे।
EPH 5:29 काहाकी काहनु बी कदी आपसा डील सी दुसमनी नी राखे, बाकुन तीनाक पाळे पुसे, जसु मसी ईसु बी मंडळीन साते करे।
EPH 5:30 काहाकी हामु तेरा डीलेन भाग छे।
EPH 5:31 “खरला सास्‌तुर मां ज बी लिखलो छे; माणुस आपसा आस्‌या बास्‌या काजे छुड़ीन आपसी लाडी साते भेसकायन रवसे, ने चे दुय जणा एक डील कह्‌वासे।”
EPH 5:32 जी वात बेसकी मटी छे, ने पेहेल सातायली हतली, बाकुन हय मे उजेंतु देखाड़ो, जी वात ते ईसु मसीन ने तेरी मंडळीन मेळान सहलाणी छे।
EPH 5:33 बाकुन जी वात तुहुं लाडा लाडीन मेळ काजे आपसान चुखोझण देखाड़े। ने तुंद्‌रे मायन हरेक जणु आपसी लाडी काजे आपसान तसा परम करनु चाहजे, ने हरेक जणी आपसा लाडान कह्‌याम चालीन ईज्‌जत करनु चाहजे।
EPH 6:1 ए पुर्‌या-पारी, मालीक ईसु पर भुरसु करता जाय्‌न आस्‌या बास्‌यान हुकुम मानु, काहाकी ज तालेत छे।
EPH 6:2 “ने भगवानेन बुल बी असा कहें” तारा बाबान ने तारी आयसीन ईज्‌जत करीन अबरु राख्‌जी जी पेहली हुकुम छे, तेर भेळे वायदु बी छे।
EPH 6:3 “असु करसी ती तारो भलो हवसे, ने तु धरती पर बेसका दाहड़ा लग जीवतेलु रवसी।”
EPH 6:4 ए आस्‌या बास्‌या तुहुं आपणा-आपणा पुर्‌या-पारी काजे मालीक भगवानेन सीकाड़ने सी वारु टेवाड़ता जाय्‌न, तीनुक पाळु पुसु। बाकुन सुदारनेन टेमे तीनुक फालतु घुण कीचवाड़ता।
EPH 6:5 ए गुलाम पावर्‌या, जसा तुहुं ईसु मसीन हुकुम मन मां मानु, तसात जे धरती पर वाळा तुंद्‌रा मालीक छे, तींद्‌रे सी बी बीहता ने कापता जाय्‌न गमते रवते तींद्‌रु हुकुम मानु।
EPH 6:6 काहनाक माणसेक खुस करने वाळान तसा देखाड़ने वाटे करीन सेवा चाकरी करनेन ढंगड़ा मां करु, बाकुन ईसु मसीन गुलाम पावर्‌यान तसा खरले मने भगवानेन ईनी मरजीन अनसारे हर घड़ी तींद्‌री सेवा करु।
EPH 6:7 ने माणसेन सेवा चाकरी कर र्‌या, असा समजीन सेवा चाकरी मां करु, बाकुन मालीक ईसु मसीन सेवा चाकरी कर र्‌या, समजीन वारला मन सी तींद्‌री सेवा चाकरी करु।
EPH 6:8 हेर करु की वारलु काम करन्‌याक ईनाम आपण्‌यु भगवान मालीक छे, भले चु काम करन्‌यु गुलाम पावर्‌यु हय, भले चु आजाद, मालीक हय।
EPH 6:9 ए गुलाम पावर्‌यान मालीक्‌या, ईनेत रीते तुहुं बी तुंद्‌रा गुलाम पावर्‌या साते भुळा रहु। कुय काजे बीहाड़ु मां, काहाकी तुहुं काजे मालम छे, की तींद्‌रु ने तुंद्‌रु दुयुन एकुत मालीक भगवान सरग मां छे। हीसाब लेणेन घड़ी, चु ते काहनाक बी छाटीन, नानला मटान नेवाड़ु नी करे।
EPH 6:10 हेरेसी मालीक ईसु मां तेरी ताकत सी तुहुं बी ताकतवाळा बणु।
EPH 6:11 ठगण्‌या भुतड़ान कदर सी बचणे ने तेरे साते गड़दीने करीन भगवानेन आखा हत्‌यार काजे हात कर लेवु, जे सीपायड़ान आखा हत्‌यारेन तसा छे।
EPH 6:12 काहाकी आपणी लड़ाय डील ने लुही साते नी हय, बाकुन तीनु राज करन्‌या ने हक जमाड़न्‌या साते छे, जे भुतड़ान जमेन मेळा छे, जे वाहळाम रवीन ईनी आंदारली कळीन माणसेक पाप कराड़्‌ने करीन पटाड़ीन राज करे।
EPH 6:13 ने काठला दाहड़ा मां बी काठा रवीन, आखी वातेम जीत हात करीन टेकला रहणे करीन भगवानेन आखा हत्‌यार पुठ्‌ये ली लेवु।
EPH 6:14 काहाकी छाचली सी आपणी कमर बांदीन, ने धरमेन कामेन टुपु पेहरीन,
EPH 6:15 ने पाय मां हेळ-मेळ कराड़नेन खुस-खबरेन तीयारीन खासड़ा पेहेरीन,
EPH 6:16 ने ईनु आखा साते भुरसान ढाळ लीन काठ रहु, काहाकी तुहुं तीना वेरीन आखा धपतेला बीलखा काजे उल्‌वी देवु।
EPH 6:17 ने छुटकारान टुपु, ने आत्‌मान तलवार, ज भगवानेन बुल छे, ली लेवु।
EPH 6:18 ने चुखली-आत्‌मान अगवाय सी हर घड़ी ने आखी भात्‌ये भगवान सी लीलघाय्‌ता ने दुवा करता रहु, ने भगवानेन आखा चुखला माणसे वाटे बी जागला रवीन एक मन्‌या हय्‌न लीलघाय्‌ता ने दुवा करता रहु।
EPH 6:19 ने मारे वाटे बी की मेसेक बुलनेन घड़ी असा वारु बुले देणु चाहजे, की मे हिम्‌मतेन साते खुस-खबरेन मतलब काजे बताड़ सको,
EPH 6:20 जसु मे साकळ सी फांदायलु राजान राजु छे, ने असु बी की मे तीनी वात मां जसो मेसेक चाहजे, तसु हिम्‌मत सी बुलो।
EPH 6:21 तुखीकुस, जु लाटेक्‌लु भायस ने मालीक ईसु मां भुरसा लायक सेवक छे, हयु तुहुंक बताड़से की तुहुं बी मारी हाल जाणु की मे कसु रव।
EPH 6:22 तीनाक मे तुंद्‌रे धड़े असु करीन मकल्‌यु, की तुहुं हामरा हाल काजे जाणु, ने हयु तुंद्‌रा मन मां सांती देय।
EPH 6:23 ए भायस्‌यो ने बहणस्‌या, मे भगवान सी लीलघाय्‌न असु कहो, की भगवान बास सी ने मालीक ईसु मसी सी तुहुं आखा काजे सुक-सांती जड़ती रहे, ने तुहुं भुरसा मां ने एक दीसरान परम मां बड़ता जावु।
EPH 6:24 ने जे आपणा मालीक ईसु मसी काजे अमर परम करे, तीनु आखा काजे भगवानेन गीण-दया जलम जड़ती रहे।
PHI 1:1 जी चिट्‌ठी ईसु मसीन गुलाम पावर्‌यु पोलुस ने तीमुथीयुस लिखला छे। जी चिट्‌ठी फीलीपी सहर मां रहण्‌या, ने ईसु मसी काजे मान्‌या भगवानेन आखा चुखला माणसेक, मंडळीन मुख्‌या ने मंडळीन खास पावर्‌या काजे लिख रया।
PHI 1:2 आपणा भगवान बासेन ने मालीक ईसु मसीन गीण-दया ने सुक-सांती तुहुं आखा काजे जड़ती रहणु चाहजे।
PHI 1:3 मे जत्‌यार बी तुहुंक हेर करो, तत्‌यार तुंद्‌रा बारामां आपणा भगवान काजे बेसकु वारु कह्‌वो;
PHI 1:4 ने जत्‌यार बी मे दुवा करो, ती खुस हय्‌न जलम तुंद्‌रे आखा वाटे दुवा करो।
PHI 1:5 काहाकी तुहुं पेहले दाहड़े सी लागाड़ीन आज लग खुस-खबर सामळावणे करीन तुहुं मारी सात देदा।
PHI 1:6 ने मेसेक ईनी वात पर पाक्‌कु भुरसु छे की, जु भगवान तुंद्‌रे ईचमां वारलु काम सुरु करलु छे, हयुत तीना कामेक ईसु मसीक पछु आवता लग पुरो करसे।
PHI 1:7 तुंद्‌रे बारामां असोत वीच्‌यार करनु मारे वाटे वारु छे, काहाकी पेहले बी ने हय बी मे जेल मां छे, तेबी आखा अगळ खुस-खबरेन छाचाय काजे गवा-पुरावाक लीन सामळावणेन काम मां तुहुं आखा मारा साजल्‌या बणता आय रया। ज काम मेसेक भगवानेन गीण-दया सी जड़लो छे। ने तुहुं मारा मन मां वसी गुयला छे।
PHI 1:8 भगवान ईनी वातेन गवा छे की, मे ईसु मसीन परम सी तुहुं आखाक भेळु हवणे करीन तुंद्‌री बेसकी हेर करो।
PHI 1:9 मे तुंद्‌रे वाटे भगवान धड़े असी दुवा करो की, तुंद्‌रु परम, छाचली अक्‌कल ने समज सी अदु-अदुस बड़तु जाय;
PHI 1:10 ने तुहुं भलाय ने कुहराय्‌न फरक पाड़ीन आखाम सी वारु वात जाणीन, तीनीक मान लेवु; काहाकी ईसु मसीक पछा आवणे लग पुरा-पुरा खरला ने नी-गुनाळा बणीन रहु।
PHI 1:11 ने ईसु मसीन साहरे जड़न्‌या वारलु गुण काजे आपसा जीवो मां वारु उतारीन तीनु गुणेक कामे लावु, तेरेसी भगवानेन नावेन बड़ाय हवती जाय ने तेरात गुण गावायता रवे।
PHI 1:12 ए मारा भायस बहणस्‌या, तुहुंक ज मालुम हवणु चाहजे की, जो काय मारे साते हयो, तेरेसी ईसुन खुस-खबरेन खबर, आड़े-धड़े बी पुग गुय।
PHI 1:13 जां लग की, कीला मां केसर राजान राजा ने तेरी राखवाळी करन्‌या सीपायड़ाक ने दीसरा आखा माणसेक बी ज मालुम हय गुयो, की हयु पोलुस, ईसु मसीन परचार कर र्‌यु करीन, तीनाक जेलेम कुंड देदा।
PHI 1:14 ने मे जेलेम कुंडाय रयु करीन, बेसका माणसे ईसुक मान्‌या ईसु मां हिम्‌मत करीन, अळी बी अदुस भगवानेन बुले बे फीकर्‌या हय्‌न, बीहे बीगुर सामळावणे बाजी गुया।
PHI 1:15 काहनाक ते कुहराये ने टठाये ईसु मसीन परचार करे, बाकुन काहनाक ते वारलु वीच्‌यार लीन ईसु मसीन परचार करे।
PHI 1:16 जे माणसे ते परम सी परचार करे, काहाकी चे जाणे की भगवानेन खुस-खबरेन राखवाळी करने करीन पोलुस काजे राख रया।
PHI 1:17 बाकुन काहनाक दीसरा माणसे ते, वारलु वीच्‌यार नी, बाकुन पोलुस काजे जेल मां अदुस वेला हवणु चाहजे करीन कुहराये ईसुन परचार करे।
PHI 1:18 बाकुन हेरेसी काय फरक नी पड़े। वारलु वात ते जी छे की, भले कुहराये, भले छाचाये, ईसु मसीन परचार ते हय र्‌यो ने माणसे ईसुन खुस-खबर सामळावणे बाजी र्‌या तेरेसी मे खुस छे; ने खुस बी रय्‌स।
PHI 1:19 काहाकी मेसेक मालुम छे की, तुंद्‌री दुवान साहरे, ने ईसु मसीन जीव-आत्‌मान मदत सी, मारु छुटकारु हवसे।
PHI 1:20 ने मारा मन मां जी मरजी ने आस छे, की मे काहनी बी वातेम नी लाजवायो; बाकुन मेसेक पाक्‌कु भुरसु छे की, मारी जीवाय सी ईसु मसी काजे ईज्‌जत जड़ने बाजी रय, असीत अघी बी जड़से, भले मे जीवतेलु रहो, नी ते मर जाम।
PHI 1:21 काहाकी मे ईसु मसी वाटे मरने बी ने जीवणे बी तीयार छे; मार वाटे जीवतु रहणु ते ईसु मसी छे, ने मरनु फायदु छे।
PHI 1:22 बाकुन मार वाटे ते, डीलो मां जीवतेलु रहणु, खुस-खबर सामळावणेन काम वाटे नफु लावणी वात छे; बाकुन मे काहनी वातेक नेवाड़ो, जीवणु की मरनु? मेसेक समज मां नी आवतो।
PHI 1:23 मे ईनी दुय वातेन ईचमां पड़ रयु काय करो ने काय नी? मारी हेर ते जी छे की मे मर जाम, ने जाय्‌न ईसु मसी पुठ्‌ये रव, काहाकी ज ते छाचली बेसको वारु छे।
PHI 1:24 बाकुन तुंद्‌रेन तसों मेसेक डीलो मां जीवलु रहणु, मरने सी बी अदु जरुड़ी छे।
PHI 1:25 ने मेसेक पाक्‌कु भुरसु छे की, मे जीवतु रय्‌स, ने तुहुं आखा पुठ्‌ये रय्‌स, ती तुहुं आखा भुरसा मां पक्‌का हवता जासु ने ईसु मां खुस रवसु।
PHI 1:26 असु करीन मे तुंद्‌रेन्‌चां पछु आय्‌न रय्‌स ती, जी बड़ाय तुहुं मारा बारामां कर रया, ची बड़ाय अळी अदुस ईसु मसी मां अदी जासे।
PHI 1:27 हय बस अतरोत करु की, तुंद्‌रु वेहवार ईसु मसीन खुस-खबर कह्‌वे तसोत रवे, तेरेसी भले मे आय्‌न तुहुंक देखो, ने नी ते नी आवाये, तेबी मे तुंद्‌रे बारामां असोत सामळो की, तुहुं आखा एक जसा बणीन टीकला रय रया, ने काहनी बी वातेन, वीरुद करन्‌या सी नी बीहता ने खुस-खबरेन भुरसान राखवाळी करने करीन एक मन्‌या, भेळा हय्‌न काठी मेहनत कर रया।
PHI 1:28 असा करसुन ती, वीरुद करन्‌या तुंद्‌री जी हिम्‌मत देख्‌से, ने तींद्‌रे धड़े जी हिम्‌मत ते तींद्‌रो बरबाद हवणेन चुखु-झण पुरावु छे। ने जीत हिम्‌मत तुंद्‌रे धड़े तुंद्‌रा छुटकारान चुखु झण पुरावु बी छे, ने तुंद्‌रे सी भगवानेन जीत मरजी छे।
PHI 1:29 काहाकी तुहुंक भगवानेन गीण-दयान वाटु हेरेन करीन जड़लु छे की, तुहुं ईसु मसी पर भुरसु करु; ने भुरसा सी तेरे वाटे ने तेरी खुस-खबर वाटे दुख झेलीन वेला करनेन बी खास हक देदलु छे।
PHI 1:30 ने दुख झेलने मां तुहुं एखला नी हय; पेहले तुहुं मेसेक बी खुस-खबर वाटे असु दुख झेलतु देख रया, ने हय बी असा सामळु, की मे खुस-खबर वाटे वेला कर रयु।
PHI 2:1 ईसु मसी काजे मानीन तुंद्‌रे धड़े हिम्‌मत, ने तेरा परमेन सांती, ने भगवानेन जीव-आत्‌मान सात-संगात, ने तुंद्‌रा मन मां दया छे,
PHI 2:2 ती मारी खुसी पुरी करने करीन एक मने, ने एकुत परम सी, ने एकुत वीच्‌यार मां रहु, ने अलग-अलग नी बाकुन हेळी-मेळीन परम सी रहु।
PHI 2:3 दीसरा माणसे मारी बड़ाय करनु चाहजे करीन, ने टठाये, काय बी काम, मां करु, बाकुन नीचळा हय्‌न आपसा सी दीसरा काजे अदुस वारु समजु।
PHI 2:4 तुंद्‌रे मायन एकेक जणु आपसीत फीकुर अतरी नी, बाकुन दीसरान भलायन फीकुर बी करु।
PHI 2:5 जसु ईसु मसीन वीच्‌यार ने वेहवार हतलु, तसुत वीच्‌यार ने वेहवार तुंद्‌रु बी रहणु चाहजे।
PHI 2:6 चु ईसु, भगवान हय्‌न बी, भगवान बराबर हवणेन हक काजे छुड़ देदु।
PHI 2:7 ने आपसा काजे अतरु नानु ने हेटु कर देदु, की माणसेन अवतार लीन माणसेन तसु बण गुयु, ने तींद्‌रे अगळ पावर्‌यान तसु बण गुयु।
PHI 2:8 ने चु खुद काजे अतरु नानु ने हेटु समजीन अतरु जबर नीचळु बण गुयु, की भगवान बासेन हुकुम मानीन मोत, ने चु बी कुरुसेन काठली मोत काजे बी सेण कर लेदु।
PHI 2:9 तेरेसी भगवान बी तीनाक अतरु मटु बणाय देदु, ने तीनाक च नाव आप्‌यु ज आखा नाव सी बेसको वारु ने उपर छे।
PHI 2:10 काहाकी जे सरगे मां ने धरती पर ने धरतीन नेचा छे; चे आखा ईसुन नाव सामळीन, तेरे अगळ मांडा टेके।
PHI 2:11 ने भगवान बासेन सेक-सींगार वाटे आखा माणसे असा कय्‌न मान लेय की, “ईसु मसीत आखान मालीक छे।”
PHI 2:12 तेरेमां मारा लाटेक्‌ला, जसा तुहुं जलम भगवानेन हुकुम मान्‌ता आय रया, तसात हय बी मारी हजुरी मां अतरात नी बाकुन मारी बीना हजुरी मां बी अळी अदुस बीहता ने कापता जाय्‌न भगवानेन हुकुम मान्‌ता जावु ने असा करीन आपसा छुटकारा काजे आपसा काम मां पुरो-पुरो उजेंतु हवणे देवु।
PHI 2:13 काहाकी हयु भगवानुत छे, जु खुद आपसी वारलु मरजी साहरे ईनाक कामेक पुरो करने तुंद्‌री हेर ने काम करने बाजी र्‌यु।
PHI 2:14 आखो काम बीना कुड़-कुड़ ने बीना वाते-वातेम जखड़ी पड़े बीगुर करु।
PHI 2:15 काहाकी तुहुं नी-गुना वाळा ने बयमान ने पाप मां चालने वाळा माणसे अगळ बी भगवानेन चुखला पुर्‌या-पारी बणीन रहु, ने तींद्‌रे ईचमां तुहुं भगवानेन जीवतेला बुले लीन दुनीया मां भबळता तारान तसा देखायु।
PHI 2:16 काहाकी ईसु मसीन आवणेन दाहड़े मां घमंड कर सकीस, ने ते असो नी हय जाय की मारो दवड़नु ने मारी मेहनत करनु फालतु हय जाय।
PHI 2:17 ने ईसु पर भुरसु करीन तुहुं जी सेवा कर रया, ची सेवा भगवान अगळ चड़ावली बादान तसी छे; कदी मेसेक तीनी सेवान बादा पर, तुंद्‌रे वाटे मारो लुही बी उवहाड़नु पड़े, तेबी मे खुस छे, ने तुहुं आखा साते बी खुस छे।
PHI 2:18 तसात तुहुं बी मारेन तसा खुसी मां रहु, ने मारे पुठ्‌ये खुसी मनावु।
PHI 2:19 मालीक ईसुन मरजी हय ती, मे मामार मारा सात-देण्‌या तीमुथी काजे तुंद्‌रेन्‌चां खबर्‌यु मकली दीस। जत्‌यार चु पछु आवसे, ने मे तुंद्‌रे बारामां सामळीन खुस हय्‌स, ने मेसेक सांती जड़से।
PHI 2:20 काहाकी मारे साते हेरेन तसु दीसरु काहनु माणुस नी हय, जु चुखला मने तुंद्‌री भलायन फीकुर करतु हय।
PHI 2:21 काहाकी दीसरा आपसी भलायन फीकुर कर रया, ईसु मसीन भलायन फीकुर नी करता।
PHI 2:22 तुहुंक असो मालुम छे की, तीमुथीयु खुस-खबर सामळावणे मां काठी मेहनत करीन मारी असी सात देदु, जसु एक पुर्‌यु आपसा बासेक काठी मेहनत करीन सात देय।
PHI 2:23 हेरेसी मे आस करो, की जसों मेसेक मारे बारामां पतु चाल जासे की, मारो काय हवणे वाळो छे, ती मे हीनाक तुंद्‌रेन्‌चां मकली दीस।
PHI 2:24 मालीक ईसु मां मारु पाक्‌कु भुरसु छे की, तुहुंक भेळु हवणे करीन मे बी मामार आयस।
PHI 2:25 बाकुन हय एप्‌रादीत्‌या काजे तुंद्‌रेन्‌चां पछु मकेलनुत पड़ रयो, जु मारु भाय बराबर छे, ने खुस-खबरेन काम मां सीपायड़ान तसु काठु जीव करन्‌यु मारु साजल्‌यु छे, ने तुहुंत तीनाक मारी सेवा चाकरी करने करीन तीनाक मारेन्‌चां मकेल्‌ला।
PHI 2:26 काहाकी चु ईसुन सेवा करतु-करतु मांदु पड़ गुयु, ने अळी तीनाक जो बी पतु चाल्‌यु की तुहुं बी तेरी मांदवाड़ेन बारामां सामळी लेदा। जो जाणीन चु तुहुंक भेळु हवणे करीन बेसकु हेर करीन घाबराय रयु। तेरेसी मे तीनाक तुंद्‌रेन्‌चां मकलो।
PHI 2:27 छाचली मां चु मांदलु ते हतलु ने मरनेत वाळु हतलु। बाकुन भगवान तेरे पर दया कर्‌यु। मारे पर दुख पर दुख नी पड़े करीन तेरे पर अतरुत नी बाकुन मारे पर बी दया कर्‌यु।
PHI 2:28 तेरेमां एप्‌रादीत्‌या काजे मकलने करीन मे बी तीयार हय गुयु। काहाकी तुहुं तीनाक अळी देखीन खुस हय जावु, ने मारी फीकुर बी कम हय जाय।
PHI 2:29 ने तुहुं तीनाक मालीक ईसुन नावे बेसका खुस हय्‌न भेळा हवजु, ने आव-भाव करजु। ने असला माणसेन अदुस ईज्‌जत कर्‌या करजु।
PHI 2:30 काहाकी चु ईसु मसीन काम करतु जाय्‌न आपसा जीव काजे हेतळी पर लीन मरनेत वाळु हतलु। ने तीना काम मां चु आपसु जीव आपणे बी तीयार हय गुयु। छेटा रवीन मारे पुठ्‌ये तुहुं काजे ज काम नी बण्‌यो, च काम चु पुरो कर देदु।
PHI 3:1 ती मारा भायस ने बहणस्‌या भगवानेन पुर्‌या-पारी बण गुया, करीन मालीक ईसु मसी मां खुस रहु। गलत सीकाड़न्‌यान बारामां जी वात अळी-अळीन लिखणे सी मेसेक दुख नी लागतो काहाकी हेरे मां तुंद्‌रीत राखवाळी ने भलो छे।
PHI 3:2 कुतरान तसा कुहर्‌या माणसे सी, ने भुंडो काम करने वाळा सी चेतीन रहु। ने तीनु फतरी काटाड़्‌ने वाळा माणसे सी चेतीन रहु।
PHI 3:3 काहाकी फतरी-काटण्‌या ते आपणुत छे। जे भगवानेन चुखली-आत्‌मान साहरे भगवानेन भक्‌ती करने करीन, ने ईसु मसी पर अतरीत मटाय करजे, ने आपणा डीलेन उपरनी रीती भाती पर भुरसु नी करजे।
PHI 3:4 मे ते डील पर भुरसु कर सको, कदी काहनाक डील पर भुरसु करनेन वीच्‌यार हय, ती मे हेरे सी बी जादा डीलो पर भुरसु कर सको।
PHI 3:5 काहाकी आठवे दाहड़े मारा पेरवोटोन अगली फतरी काट्‌या। मे ईस्‌रायेली माणसेन अवल्‌यात छे, ने मारा आड़ा-बुड़ा आखान आखा ईब्‌रानी जातीन छे। मे बीन्‌यामीन कुळी मायन छे, ने कायदा पाळनेन हीसाबे मे फरीसी माणसेन टुळीन हतलु, ने असुत कायदा पाळतेलु।
PHI 3:6 हिम्‌मतेन हीसाबे मे ईसुन मंडळीक वेला पाड़न्‌यु हतलु, ने कायदा पाळीन जड़न्‌या धरमेन हीसाब, मे माणसेन नींगा मां नी-गुनाळु हतलु।
PHI 3:7 बाकुन जी-जी वात पेहले मारु फायदु करती तीनी-तीनी वातेक, ईसु मसीन अनसारे नुकसाण देणे समजी लेदु।
PHI 3:8 अतरोत नी बाकुन, ईसु मसी काजे; मारु मालीक छे करीन जाणनो आखाम सी वारुत समजीन, मे आखी दीसरी वातेक हेटी ने नेची समजी लेदु। तेरे सी मे आखी चीजेन नुकसाण झेल्‌यु। ईसु मसी काजे हात करने करीन, मे तीनी चीजेन नुकसाण झेल्‌यु, तीनी आखी चीजेक कचरु समजो;
PHI 3:9 ने मे ईसु मसी साते एक हीयु बणीन रहो। ने कायदा पाळने सी जड़ने वाळा धरम भेळ मे नी रहो। बाकुन तीना धरम भेळ, ईसु मसी साते एक हीयु बणीन रहो, जु ईसु मसी पर भुरसु करने सी मेसेक जड़े। जु धरम नीस्‌तु ईसु पर भुरसु करने सीत भगवान वगे सी जड़े।
PHI 3:10 तेरेसी मे ईसु मसीक ने तेरु पछु जीवतु करनी ताकत काजे जाणीन, ने तेरे साते दुख ने मोत मां एक हय्‌न
PHI 3:11 मे बी काहींग करीन मरलाम सी पछु जीवतु हवणेन हात कर सको।
PHI 3:12 ज नी हय की मे पछु जीवतो हवणु हात कर लेदु, नी ते पुरु-पुरु पाक्‌कु हय जु, बाकुन पछो जीवतो हवणु हात करने करीन अगु-अगु जाणे बाजी र्‌यु। ईनात ठीयान साहरे ईसु मसी मेसेक नेवाड़लु हतलु।
PHI 3:13 ए भायस्‌यो ने बहणस्‌या, मारु जु वीच्‌यार नी हय की मे पछु जीवतो हवणु हात कर लेदु, बाकुन जो एक काम करो, की जी वात पछळ रय गुय तीनी वातेक ईसरीन अगु-अगु जाय र्‌यु
PHI 3:14 पछु जीवतु हवणेन ठीया भीणी दवड़ीन जाणे बाजी रयु, की चो ईनाम हात करो, तीना ईनाम वाटे भगवान, मेसेक ईसु मसी मां उपर सरगे मां पछु बुलावलु छे।
PHI 3:15 आपणे मां जतरा बी आपसाक पुरा-पुरा पाक्‌का समजे, तीनुक मारेन तसुत वीच्‌यार करनु चाहजे ने कदी ईनी वात मां वीरुद हये, ती भगवान ईनी वातेक बी तींद्‌रे अगळ उजेंती कर देसे।
PHI 3:16 हेरेसी भगवानेन कह्‌याम चालता जाय्‌न जां लग आपणु पुग गुयला छे, तेरेत अनसारे वेहवार करीन जीवणु चाहजे।
PHI 3:17 ए भायस्‌यो ने बहणस्‌या, तुहुं आखा जणा मारेन तसा जीवु, ने तीनुक धी‌यान लागाड़ीन उळखी लेवु, जे ईनेत हीसाबे जीवे जसा तुहुं हामुक जीवतेला देख रया।
PHI 3:18 काहाकी मे तुहुंक पेहले बेसका कावा कय देदलु, ने हय बी रड़तु जाय्‌न कय र्‌यु की, तुंद्‌रे ईचमां थुड़ाक असा बी छे, जे आपसा गलत वेहवार ने जीवाय्‌न साहरे ईसु मसीन वेरी बण रया, जु तींद्‌रा पाप धड़े पेहले कुरुस पर मरलु।
PHI 3:19 चे ते आपसी लाजवाय्‌न वात पर मटाय करे। तींद्‌रु भगवान ते पेटुत छे, ने ईनी कळीन चीज पर मन लागाड़्‌या करे; ने चे आकरी मां बरबाद हय जासे।
PHI 3:20 बाकुन आपणो असली घर ते सरगे मां छे। चां सी आपणुक छुड़ावणे वाळु मालीक ईसु मसी आवणे वाळु छे। ने आपणु हेर करीन तेरी वाट देख र्‌या।
PHI 3:21 चु तेरा चुखली-आत्‌मान ताकतेन साहरे कळीन आखी चीजेक आपसा कब्‌जा मां करन्‌यु छे, ने चु तीनाक चुखली-आत्‌मान साहरे, आपणा कमजुर डीलेन सीकाक बदलीन, आपणा सेक-सींगार भर्‌या डीलेन सीका मां बदली देसे।
PHI 4:1 ए मारा लाटेक्‌ला भायस्‌यो ने बहणस्‌या, मारु जीव तुंद्‌री हेर कर रयु, ने तुहुंक देखणे करीन कलपी र्‌यु। तुहुं मारी खुसी ने ईज्‌जत आपणी पागड़ी साय छे; ने जसु मे तुहुंक सीकाड़लु तसात तुहुं मालीक ईसु मां टणका रहु।
PHI 4:2 मे युवोदी ने सुंतुकी दुयु बायरा काजे समजाड़तु जाय्‌न कह्‌वो की, तुहुं वातेम लड़ाय बीगुर मालीक मां एक मन्‌या रहु।
PHI 4:3 ने मारा छाचला सात देण्‌या भाय, मे तुसेक बी लीलघाय्‌न कहो की ईनु बायरान मदत कर, जे मार साते ने केलमेनस्‌या भाय साते ने मारा दीसरा सात देण्‌या साते, खुस-खबर सामळावणे मां, वेला करीन काठी मेहनत कर्‌या। हीनु आखान नाव अमर जीवाय्‌न किताप मां लिखलो छे।
PHI 4:4 मालीक ईसु मां जलम लग खुस रहु। मे अळी कहो की खुस रहु।
PHI 4:5 तुहुं आखा माणसे अगळ भुळा-भाळा बणु। काहाकी मालीक ईसुन पछो आवणु धड़ेत छे।
PHI 4:6 काहनी बी वातेन फीकुर मां करु, बाकुन हरेक वातेम भगवान काजे, बेसकु वारु कवता जाय्‌न दुवा ने लीलघाय्‌न भगवान अगळ आवु।
PHI 4:7 तत्‌यार भगवानेन सांती, जी हामरी आखी समज सी बाहर छे, ची तुंद्‌रा मन ने, वीच्‌यार काजे ईसु मसी मां राखवाळी करसे।
PHI 4:8 तेरेमां मे कहो की भायस ने बहणस्‌या, भगवानेन नींगा मां, ने माणसेन नींगा मां, जो काय छाचलो छे, ने जो काय ईज्‌जतेन लायक छे, ने जो काय वारलु छे, ने जो काय चुखलो छे, ने जो काय मनेक भावे तसों छे। ने जो काय बड़ायन लायक छे, ने जे काय वारलु गुणे छे, ईनुत वाते पर मन लागाड़्‌या करु।
PHI 4:9 ने जी वात तुहुं मार सी सीक्‌या। ने मान्‌या, ने सामळ्‌या, ने मारेम देख्‌या, तीनुत वात पर तुहुं बी चालता रवजु, तत्‌यार भगवान, जु सांतीन झोर छे।
PHI 4:10 मे मालीक ईसु मां बेसकु खुस छे, काहाकी थुड़ाक दाहड़ा हय गुया ने अळी तुहुं मारी फीकुर अळी कर्‌या, ने छाचली मां पेहले बी तुहुं मारी फीकुर करला बाकुन, तीनी फीकुर काजे देखाड़नेन मुखु तुहुंक नी जड़्‌यु।
PHI 4:11 मार धड़े काय नी हय, असु सुचीन मे असु नी कवतु, काहाकी जसु बी मे रहो, तेरेत मां खुस रहणु सीक्‌लु छे।
PHI 4:12 कमुत हय ती कसों रहणु? ने बेसको हय ती कसों रहणु? ने गरीब बणीन जीवणु ने मालदार बणीन जीवणु, भुकलु ने आफरीन रहणु, आखी वात ने आखी हालत मां खुस रहणु, जो आखो मे सीक लेदु।
PHI 4:13 जु मेसेक ताकत आपे, तेरी मदत सी मे आखो-काय कर सको।
PHI 4:14 कसा बी तुहुं मारी कड़की मां मारी सात दीन मारो भलो कर्‌या।
PHI 4:15 ए फीलीपी‌ मंडळी वाळा जसा की तुहुं खुदुत काजे मालम छे, की जत्‌यार खुस-खबर सामळावणे करीन मे तुंद्‌रेन्‌चां आय्‌न तुंद्‌रा मकीदुनीया जीलाम सी नीकळीन दीसरे जागे गुयलु, तीनु सुरु वाळा दाहड़ाम तुहुंक छुड़ीन दीसरी काहनी बी ईसुन मंडळी, लेण-देण मां मारी सात नी देदा।
PHI 4:16 तुंद्‌रा मकीदुनीया जीलाम सी नीकळनेन पेहले बी, जत्‌यार मे थीसलुनीकी सहर मां हतलु, तत्‌यार बी तुहुं मारी मदत करने करीन, ईनीत रीते दुयेक कावा मार वाटे दान करला पयस्‌या भेळा करीन दी मकल्‌या।
PHI 4:17 जी वात नी हय, की मे तुंद्‌रा दान करला पयस्‌यान मरजी राखु; बाकुन मारी मरजी जी छे की, तुहुं पयस्‌या दान करता आय रया करीन, भगवान तुहुंक बरकत आपी आपीन तुंद्‌रु नफु अदुस बड़ावतु जाय।
PHI 4:18 हय मेसेक जो चाहजे चो आखो मार धड़े छे, ने अदु बी छे; तुहुं एप्‌रादीत्‌यान हाते जे दान करला पयस्‌या दी मकल्‌या, तीनु दान करला पयस्‌या काजे लीन मे बेसकु खुस हय गुयु ने आफरी गुयु। चे दान करला पयस्‌या ते तीनी सुहरी-सुहरी ने सवादी-सवादी गंदायणी बादा साय छे, जी बादा भगवान काजे चाहजे ने माने असी छे।
PHI 4:19 ने मारु भगवान बी धन मां सी जी सेक-सींगार भेळी मसी ईसु मां छे, चां सी तुहुंक जो काय चाहजे चो आखो देसे।
PHI 4:20 आपणा भगवान बासेन सेक-सींगार जलम पीड़ीडीट हवती रहणु चाहजे! आमीन।
PHI 4:21 जे ईसु मसी मां छे तीनु आखा चुखला माणसेक, मे ने जे भायस मार साते छे, चे वारु छे की करीन पुछ रया, ने आवजु बी कय र्‌या।
PHI 4:22 जां रहणे वाळा भगवानेन आखा चुखला माणसे ने खास करीन राजान-राजा केसर्‌यान घर मां रय्‌न तेरा काम करन्‌या बी तुहुंक वारु छे की करीन पुछ र्‌या ने आवजु कय र्‌या।
PHI 4:23 ने आपणा मालीक ईसु मसीन गीण-दया तुंद्‌री आत्‌मा पुठ्‌ये रहणु चाहजे।
COL 1:1 मे पोलुस भगवानेन मरजीन अनसारे ईसु मसीन नेवताळु छे। जी चिट्‌ठी मे पोलुस ने तीमुथीयुस लिखला छे; ने जु तीमुथीयुस ईसु पर भुरसु करनेन साहरे आपणु भाय छे,
COL 1:2 जी चिट्‌ठी कुलुस्‌या सहर मां रहण्‌या, भगवानेन चुखला माणसे वाटे लिखली छे, जे ईसु मसी पर भुरसु करे। आपणा भगवान बास भीणी सी तुहुं काजे गीण-दया ने सुक-सांती जड़ती रहणु चाहजे।
COL 1:3 हामु तुंद्‌रे वाटे भगवान धड़े दुवा करजे ती, आपणा मालीक ईसु मसीन बास भगवान काजे बेसकु वारु कह्‌या करजे।
COL 1:4 काहाकी ईसु मसी पर तुंद्‌रा भुरसान बारामां ने भगवानेन आखा चुखला माणसे पर तुंद्‌रा परमेन बारामां हामु सामळी रया।
COL 1:5 जत्‌यार तुहुं खुस-खबरेन खरला बुल सामळ्‌या ती सीत भगवानेन बरकतेन बारामां बी, सामळता आय रया, तीनी बरकत काजे भगवान तुहुंक आपणे करीन सरगेम जापताये मेल रयु। ईनी वातेन तुहुं पाक्‌की आस कर रया; हेरेसी तुंद्‌रु भुरसु ने परम नाव साद्‌यु हय रयु।
COL 1:6 जी खुस-खबर आखी कळी मां पुगती जाय, ने हेरे साहरे माणसेन जीवाय बदलीन फळ लावती जाय, ने अदतीत जाय; ने तीने दाहड़े तुहुं ईनी खुस-खबर काजे सामळ्‌या, ने भगवानेन गीण-दया काजे छाचलीन उळख्‌या, ती सीत खुस-खबर तुंद्‌रे मां बी तसीत काम करती जाय।
COL 1:7 ईसुन खुस-खबरेन सीकापण तुहुं काजे हामरा लाटेक्‌ला भाय ईपर्‌फास धड़े सी जड़ली छे, जु हामरु साती गुलाम पावर्‌यु हतलु, ने हामरे धड़े सी ईसु मसीन ईमानदार पावर्‌यु बणीन आय रयु।
COL 1:8 जु ईपरास्‌यु हामुक तुंद्‌रा परमेन बारामां खबर कर्‌यु, जु परम भगवानेन जीव-आत्‌मा तुहुं काजे दीसराक परम करने करीन आपलु छे।
COL 1:9 हेरेसी तीने दाहड़े सी हामु ज सामळ्‌या, हामु बी तुंद्‌रे वाटे भगवान धड़े लीलघाय्‌न असी दुवा करनु नी छुड़्‌या; एरेन करीन की तुहुं आखा चुखली-आत्‌मान अकलेन ने समजेन साहरे तुंद्‌रे वाटे भगवानेन मरजी काजे पुरा-पुरा जाण लेवु।
COL 1:10 काहाकी तुंद्‌रु वेहवार मालीक ईसु काजे गमे असु रहणु चाहजे, तेरे सी मालीक ईसु आखे भात्‌ये खुस हये, ने तुहुं आखा भला कामे करता रहु, ने भगवानेन उळखाण मां बड़ता जावु।
COL 1:11 ने तुहुं भगवानेन सेक-सींगारेन ताकतेन अनसारे आखी भातीन ताकत सी ताकतवाळा हवता जावु, जां लग की खुसी भेळ आखी वातेम गम खाता जाय्‌न सेण कर सकु।
COL 1:12 ने भगवान बास काजे बेसकु वारु कवता रहु, ने भगवान बास आपसा नेवाड़ला चुखला माणसेक तीना वीजाळा राज मां आटु आपणे करीन मेल रयु। ने चु तीना आटान साजल्‌यु बणने करीन तुहुंक बी हक आप देदलु छे।
COL 1:13 जु भगवान आपणुक भुतड़ान आंदारला राज मां सी छुड़ायन आपसा लाटेक्‌ला पुर्‌यान राज मां ली आवलु छे।
COL 1:14 ने ईना पुर्‌यान साहरे आपणुक आपणा पापेन माफी जड़ली छे, आपणुक छुटकारु जड़लु छे।
COL 1:15 जु ईसु मसी बीन देख्‌या भगवानेन खरलु सीकु छे, हय जु ईसु कळ घड़ायणेन पेहलेन हतलु, ने आखा घड़ायण्‌यान मालीक छे।
COL 1:16 काहाकी तेरेत साहरे भगवान आखी चीजेक घड़्‌यु। सरगे वाळी चीज बी, धरती पर छे ची चीज बी देखणी चीज बी, ने, बीन देखणी चीज बी, ने राजगादी, राजान हक बी, सरगे वाळा खबर लावण्‌यान हक बी, राज करन्‌यान हक बी, ने पुडार्‌यान हक बी ज आखो तेरेत साहरे ने तेरेत वाटे घड़ायलो छे।
COL 1:17 ने जुत ईसु आखी चीजेक घड़ायणेन पेहलेन हतलु, ने आखी चीज तेरेत साहरे टेकीन चाल रय।
COL 1:18 ने जु ईसु आपसा डीलेन मतलब आपसी मंडळीन मुणको छे, ज सुरु बी छे हव जुत मर्‌या-सर्‌याम सी जीवता हय्‌न बठा हवण्‌या मायन पेहलु छे; हेरेसी जुत आखी वातेन मुख्‌यु छे।
COL 1:19 काहाकी भगवान बास आपसा आखा गुण भेळ ईसु मसीत मां पुरु-पुरु वसणेन नक्‌खी कर्‌यु।
COL 1:20 ने ईसुन जो लुही कुरुस पर उह्‌यो, तीना खुनेन साहरे मेळ करीन, आखी चीजेक ईसुन साहरे आपसा साते मेळ कर ले, भले ची चीज धरती परुन हय चाहे सरगे परुन हय। आपसा साते मेळ कर लेय।
COL 1:21 पेहले तुहुं आपसा कुहराय्‌न कामेन, ने वीच्‌यारेन साहरे भगवान सी छेटा हतला, ने तेरा वेरी हतला।
COL 1:22 बाकुन भगवान तुहुं काजे चुखला ने नी-गुनाळा, हव चुखोझण बणायन आपसा अगळ हजुर करने करीन नक्‌खी कर्‌यु तेरेत अनसारे ईसु मसी ईनी कळीम माणुस बणीन आयु, ने आपसा डीलेन मोत झेल्‌यु ने ईनात ईसुन साहरे हय भगवान तुहुं काजे आपसा साते मेळ कर लेदु छे।
COL 1:23 ईसुन खुस-खबरेन परचार सरगेन नेचो आखी धरती पर हय रयो। जी खुस-खबर सामळीन तुहुं ईसु पर भुरसु कर्‌या। तेरे सी तुहुं खुस-खबरेन आस काजे घुण छुड़ु, बाकुन भुरसान पाया पर टेक्‌ला रवजु। असा करसु ती तुहुं भगवान अगळ चुखो झण हजुर हवसु। ईनी खुस-खबरेन बमदीन परचार करने करीन मे पोलुस तेरु पावर्‌यु बन्‌लु छे।
COL 1:24 जे दुख मां हय तुंद्‌रे वाटे झेल रयु, तीनु दुखेन साहरे मे ते खुस छे। आपसा डीलेन मतलब आपसी मंडळी वाटे बेसकी वेला कर्‌यु; आपणुक बी तेरी आवजी पर तेरेन तसा दुख झेलीन तेरा दुखेन साजल्‌या बणनु छे। अतरे मे ते ईनी वातेन अनसारे ईसुन आवजी पर तीनु दुखेन कसर मारा डील मां दुख झेलीन पुरी करने बाजी रयु।
COL 1:25 भगवान मेसेक आपसी मंडळीन पावर्‌यु बणावलु छे, ने आपसा बुल तुहुं नी-यहुदी माणसे वाटे पुरो-पुरो उजेंतो करनेन काम मारा मुणका पर मेल देदलु छे।
COL 1:26 भगवानेन खुस-खबरेन जी सातायली युजना बेसकी टेमे ने, बेसकी पीड़ी लग सातायली रय, बाकुन हय तेरा चुखला माणसे पर उजेंती हय गुय।
COL 1:27 ने भगवानेन हय आपसी सातायली युजना काजे बेसकी वारु रीते उजेंतु करलु छे, की आपणु जे तेरा नेवाड़ला चुखला माणसे छे, ईनी युजनान सेक-सींगार देखीन चकरायजे खास करीन, तुंद्‌रे तसा नी-यहुदी आड़जात्‌या माणसे मां ईसु मसी बसलु छे, ने आपसी जीव-आत्‌मान साहरे घणो वारु काम करने बाजी रयु भगवानेन जी युजना बेसकी सेकवाळी ने कामकी छे, ज देखीन आपणु चकराय जाजे। जी वात तीनी आवणे वाळी आपणी आसान संय बी छे की एक दाहड़ु आपणु आखा ईसु मसी पुठ्‌ये सेक-सींगार भर्‌या सरगेम रवसु।
COL 1:28 तेरु खुस-खबर अतरे एक-एक माणसे काजे ईसु मसी मां पाक्‌का करीन भगवान अगळ हजुर करने करीन, हामु आखी अक्‌कल भेळा आखा माणसेक चेतावता जाय्‌न ने सीकाड़ता जाय्‌न, ईना ईसु मसीन परचार करजे।
COL 1:29 हेरेन करीन मे ईसुन ताकुतेन साहरे जुरभर्‌यु हय्‌न आखो डील ने मन लगाड़ीन सीकाड़ने बाजी रयु।
COL 2:1 तुहुंक ज समजणु चाहजे की मे तुंद्‌रे वाटे ने लोदीकीया सहर वाळी ईसुन मंडळी वाटे ने तीनु दीसरा आखा वाटे बी जे मेसेक हय लग नी देख्‌या, मे बेसकी काठी मेहनत करने बाजी रयु।
COL 2:2 मे एरेन करीन बेसकु काठो काम करने बाजी रयु, की तुहुं आखा परम मां एक मन्‌या हय जावु, ने भगवानेन सातायली युजनान मतलब ईसु मसीन बारामां पुरी-पुरी अक्‌कल ने समज मां एक मन्‌या हय्‌न हिम्‌मत वाळा बण जावु।
COL 2:3 काहाकी ईना ईसु मसी मां आखी अकलेन ने समजेन खजानो सातायलो छे।
COL 2:4 ज मे हेरेसी कहो की, काहनुक माणुस तुहुं काजे कदरे-कदरे पटाड़ीन धुकु नी देणु चाहजे।
COL 2:5 भले मे तुंद्‌रे सी छेटे छे, तेबी मे मारा मनोम तुहुंक हेर कर्‌या करो, करीन मे तुहुंक हेर करो, ने हय तुहुं ईसु मसी पर भुरसु करीन टेक्‌ला रय रया ने एक जसा नवली जीवाय्‌न पाळनी पाळ रया; ज जाणीन मे बी बेसकु खुस छे।
COL 2:6 जसा तुहुं ईसु काजे आपसु छुड़ावणे वाळु मसी ने मालीक मानीन भुरसु कर लेदला छे, तसात भुरसु करता जाय्‌न तेरीत कह्‌याम चालता रहु।
COL 2:7 ने तेरेत मां जड़्‌या उंडा करता जावु, ने तेरेत मां वदता जावु; ने जसों तुहुंक सीकाड़लो छे, तसात भुरसा मां पाक्‌का हवता जावु, ने भगवान काजे अळी-अळीन बेसकु वारु कवता रहु।
COL 2:8 कांखुर मायन काहनुक जाणी बुजीन कहवायण्‌यु ईनी कळीम वाळी अकलेन साहरे, ने फालतु ने पारकी वातेन अनसारे धुकु दीन तुहुंक पटाड़ी नी लेय। तेरेसी तुहुं चेतीन रहु; काहाकी जी वात ईसु मसीन अनसारे नी हय, बाकुन आड़ा-बुड़ान रीकामी रीती-भाती छे, तेरे पछळ कळ घड़ायणेन भक्‌तीन बारामां भुतड़ान जमेन साहरे बणावला मनघड़्‌या छे।
COL 2:9 काहाकी ईसु मसी मां भगवानेन आखा गुण पुरा-पुरा वसला छे, ने आपणु तेरो डील मतलब तेरी मंडळी छे, ने आपणु तेरी सीकापणेन साहरे, तेरे साते जुड़ायला रहणेन साहरे पुरा-पुरा पाक्‌का हय गुयला छे। अतरे आपणुक काहनी बी वातेन कसर नी हय।
COL 2:10 आपणु ईसु, ते कळी भीणी आखा राज करन्‌या पर, ने हकदार्‌या पर राज करन्‌यु मालीक छे।
COL 2:11 ईसु मसी मां तुंद्‌री फतरी बी काटायली छे! मे माणसेन हात करीन पेहरवोटन अगली फतरी काटाड़नेन वातेन बारामां नी कहतु! ईसु मसीत भगवानेन मटा कामेन ताकुतेन साहरे, तुंद्‌री फतरी मतलब तुंद्‌री पाप करने वाळी डीलेन हेर काजे डीलेम सी उतारीन नाख देदलु, ने तुंद्‌रा पापेन जुन्‌ली जीवाय मर गुयली।
COL 2:12 तुहुं ईसु पर भुरसु करीन बपतीस्‌मान रीत लेदला छे, ने बपतीस्‌मा ईनी वातेन सहलाणी छे, छाचलीन तुंद्‌रा पापेन जुन्‌ली जीवाय ईसु पुठ्‌ये बपतीस्‌मा मां गाड़ाय गुय ने ईसु काजे मर्‌या-सर्‌याम सी जीवता करनेन भगवानेन ताकत पर भुरसु करनेन साहरे, तुहुं ईसु मसी पुठ्‌ये पछा जीवता हय्‌न बठा हय गुयला छे।
COL 2:13 तुहुं पेहले तुंद्‌रा पाप मां मरला हतला, ने तुहुंक तुंद्‌री पाप करन्‌यान डीलेन हेर डीलेम सी उतारीन नी नाखायी। हय भगवान तुहुं काजे बी तीना ईसु पुठ्‌ये मर्‌या-सर्‌याम सी जीवतु कर देदु।
COL 2:14 ने आपणु आखा नेम तुड़ीन बेसका गुना करला हतला, चे करजान तसा हतला। आपणा गुना गुनान करजान किताप मां लिखला हतला। जी किताप आपणे वीरुद मां हय्‌न आपणी वात काटतेलु, बाकुन तीनु आखा पापेन साहरे भगवान आपणुक माफी आप देदु; खरीन चु आपणु आपणा करजान किताप काजे ईसु पुठ्‌ये कुरुस पर खीळा ठुकीन खत्‌तम कर देदु।
COL 2:15 असा करीन भगवान आपणा जीव-आत्‌मा पर हक जमाड़ीन राज करन्‌या भुतड़ा काजे जीत लेदु, ने तीनुक आखा अगळ गुलाम पावर्‌यान तसा पछळ-पछळ चालाड़्‌यु। कांखुर मायन काहनुक धुकु दीन तुहुंक पटाड़ी नी लेय, तेरेसी चेतीन रहु।
COL 2:16 हेरेसी खाणे-पीणेन चीजेन पाळनीन बारामां नीते तीहवारेन पाळनीन बारामां भले ची पाळनी नवला चांदेन तीहवारेन बारामां हय नीते आरामेन दाहड़ान पाळनीन बारामां हय, काहनुक तुहुंक पुछे की तुहुं ज काहा नी पाळता ती तुहुं तींद्‌री घुण सामळु।
COL 2:17 काहाकी जी आखी पाळनी ते आवणे वाळा ईना ईसु मसीन सहलाणी अतरीत हतली, बाकुन ज ईसु मसीत खरलु छे।
COL 2:18 हव जु काहनुक माणुस ते आपसा मनेम भुंडला वीच्‌यारे मां, देखली चीजे पर फालतु मटाय करतु रहे। अतरे कदी चु तुहुंक सरग वाळा खबर लावण्‌यान पुजा कराड़ने हींडे, नी ते आपसाक जबरान वेला पाड़नेन वातेक मानाड़ने हींडे, ती तेरे वाये घुण लागु। तुहुं तेरे वाये लागसु ती तुंद्‌रा सरग वाळान ईनाम खुय देसु।
COL 2:19 जु ईसु मसीत आपणो मुणको छे, ईना साते तेरो डील मतलब हेरी जुड़ायली छे ईनात साहरे आखो डील हाटकान साहरे जुड़ायन ने मास सी ने नस सी पुसाये, ने भगवानेन मरजीन अनसारे वदतो जाय। कदी कानुक मुणका साते जुड़ायलु नी हय, ने चु कहणे बाजी जाय की। मे ते सरगेन बारामां बेसका जागता सपना देखलु छे। ती तीना सी चेतीन रहु।
COL 2:20 तुंद्‌री जुन्‌ली जीवाय ते ईसु मसी भेळीत मर गुयली छे, ती तुहुं ईनी कळीन माणसेन तसा काहा जी रया? असो लागे की तुहुं ईनी पापी कळीन छे, ने ईनी कळीन पाळनी पाळ रया।
COL 2:21 ईनी कळीन पाळनी असी छे; ज घुण धरु पलो घुण खावु, ने ईनी चीजेक हात घुण लागाड़ु।
COL 2:22 कळीन जी आखी चीज काम लावते-लावते कळीत मां सर जासे। ती ईनी कळीन माणसेन वाये लागीन तींद्‌रे साहरे बणावली पाळनी ने रीती भाती काहा पाळु।
COL 2:23 दीसरा माणसेक जी पाळनी अक्‌कल वाळी ने बेसकी भक्‌ती वाळी लागे; काहाकी ईनी पाळनी मां बेसकी भक्‌तीन रीती छे; ने आपसा डीलेक जबरान वेला पाड़नेन रीती छे, ने आपसी जीवाय्‌न हेर काजे जबरान रुकणेन रीती छे। बाकुन छाचली मां डीलेन ईनी पापी हेर काजे रुकणे मां ईनी रीती सी काय फायदु नी हये।
COL 3:1 तुहुं ईसु मसी भेळा जीवता हवला छे, जु हय सरगे मां भगवानेन जेवड़्‌ये आंगे बठी र्‌यु ने चां वाळी उपरवाळी वात, हेर करीन हेरता रहु।
COL 3:2 तुहुं धरती पर वाळी वात पर मन घुण लागाड़ु बाकुन भगवानेन्‌चां वाळी उपरनी वात पर मन लागाड़ु।
COL 3:3 तुंद्‌री जुन्‌ली जीवाय ते मरीन सर गुयली छे, ने तुंद्‌री नवली जीवाय ईसु मसी पुठ्‌ये भगवान मालीक मां सातायली छे।
COL 3:4 जत्‌यार ईसु मसी जु हामरी जीवाय छे उजेंतु हवसे तत्‌यार तुहुं बी ईसु साते सेक-सींगार भेळ उजेंतो हवसे।
COL 3:5 हेरेसी तुहुं धरती पर आपसी जीवाय मां, ईनु पापेक अळी पछा घुण आवणे देवु; छीनाळो, चंगलु वीच्‌यार, भुंडली हेर, कुहर्‌यु वीच्‌यार, ने हाय करनु। भगवानेन नींगा मां देवधाणी पुजणे सीगी आवे असु पाप छे, तसोन हाय करनु बी सीगी आवे असु पाप छे। हेरेसी काहने बी भात्‌ये हायाळ्‌ळा घुण बणु।
COL 3:6 असली वातेन साहरे हुकुम नी मान्‌या माणसे पर भगवान रीसवाये, ने तींद्‌रे पर भगवानेन डंड आवण्‌यु छे।
COL 3:7 ने तुहुं बी पेहले असली वातेन अनसारेत जीवतेला।
COL 3:8 बाकुन हय, तुहुं तुंद्‌रे ईचमां सी जी आखी वात बी छेटी कर देवु; जसों रीसवायणु, खचरायणु, खर करनु, दीसरान नाव-बद्‌दी करनु, ने लड़नु देणु।
COL 3:9 ने एक दीसरा काजे लुच्‌चाय करनु बी छुड़ देवु। हेर करु की तुहुं जुन्‌ली पापेन जीवाय काजे तेरा भंडात काम भेळ आपसा डील पर सी हेड़ीन नाख देदला छे;
COL 3:10 ने तुहुं नवली जीवाय हात कर लेदला छे; जी जीवाय पुरी अक्‌कल हात करती जाय्‌न आपसा घड़न्‌यान सीका मां उपर-चापर नवली बणती जाय रय।
COL 3:11 ईनी नवली जीवाय मां आपणु आखा एक जसा बण गुयला छे; हव फतरी काटण्‌या ने, वीन फतरी काटण्‌या ने, यहुदी जातीन माणसे ने, युनानी जातीन माणसे ने, आड़जात्‌या ने, सहर मां ने बयड़ाम रहण्‌या ने, गुलामी करन्‌या ने, जे गुलामी नी करे चे ने आखा ईसु मसी मां एक हय गुयला छे, हाय हींद्‌रेम काय बी छीट नी रय। बाकुन ज आखो काय ईसुत छे, ने जु आपसा आखा माणसेम बसलु छे।
COL 3:12 हेरेसी भगवान तुहुंक आपसा चुखला ने लाटेक्‌ला असामी बणावणे करीन नेवाड़ लेदलु छे। अतरे तुहुं गीणाका दयाळा, नीचळा, सेळुजीव राखण्‌या ने गम खाण्‌या बणु।
COL 3:13 तुंद्‌रे ईचमां काहनी बी वातेन लड़ाय हय जाय, ती एक दीसरान वात काजे वेठ लेजु, ने एक दीसराक माफ कर देजु; जसु मालीक ईसु आपणु गुनु माफ कर्‌यु तसात तुहुं बी दीसराक माफी आपु।
COL 3:14 ने जी आखी वात मानीन आंबा-सांबा दयाळु वेहवार करु, काहाकी परम आखाम एक्‌कु लावीन आखाक पुरा-पुरा पाक्‌का करे।
COL 3:15 तुहुं आखा एकुत डीलेन भाग छे, ज ईसुन डील छे; ने एक दीसरा पुठ्‌ये हेळी-मेळीन सांती मां जीवणे करीन भगवान तुहुंक बुलावलु छे। ने ईसुन सी जड़नी सुक-सांतीन साहरे तुंद्‌रा मनेन वीच्‌यार काजे कब्‌जाम राखीन भेळा रहु। ने तुहुं भगवान काजे बेसकु वारु छे कह्‌ता रहु।
COL 3:16 ईसुन आखा सीकाड़ला काजे तुंद्‌रा मन मां ने जीवाय मां पुरी-पुरी बसणे देवु। तुहुं वारु समज राखीन एक दीसरा काजे सीकाड़ु ने चेतावु, ने भगवानेन नींगा मां हेळी-मेळीन आखे हीये भगवानेन वातरा कहता जाय्‌न भगवानेन गीते, गावु ने भजन गाया करु।
COL 3:17 ज काय बी तुहुं करु, भले बुलने मां नी ते दीसरा काम मां च आखो काय मालीक ईसु मसीन नावलीन करु, हव तेरे वगे हय्‌न भगवान बाबान गुणे गावता जाय्‌न च आखो काम करु।
COL 3:18 ओ बायर, तुहुं आपसा काजे आपसा-आपसा घरवाळाक सुपरुत करीन जीवु, जसों मालीक ईसुक मान्‌या धड़े तालेत छे।
COL 3:19 ए अदमी, तुहुं आपणी-आपणी बायर काजे परम करता रहु, ने तींद्‌रे साते काठो वेहवार घुण करु।
COL 3:20 ए पुर्‌या-पारी आखी वातेम आपणा-आपणा आसी बासेन हुकुम मानु, काहाकी असा करसु ती भगवान मालीक खुस हवसे।
COL 3:21 ए आसी बास तुहुं आपणा-आपणा पुर्‌या-पारी काजे फालतु घुण कीचवाड़जु; नी ते तींद्‌रो मन ढास जासे।
COL 3:22 ए पावर्‌या, जे धरती पर वाळा तुंद्‌रा मालीक छे, आखी वात मां तींद्‌रु बी हुकुम मान्‌ता रवजु। आपणा-आपणा मालीक काजे देखाड़ने करीन अतरात सेवा चाकरी करनेन ढंगड़ा घुण करजु; बाकुन भगवानेन सीक मानीन तींद्‌री वात मान्‌ता रवजु।
COL 3:23 माणसेन सेवा चाकरी कर रया; असो समजीन आपसा-आपसा मालीकेन सेवा चाकरी घुण करु; बाकुन मालीक ईसुन सेवा चाकरी कर रया समजीन तींद्‌री सेवा चाकरी करजु, असो करीन ज काय बी करे च, खरलो मने, पुरु जीव ने डील लागाड़ीन करजु।
COL 3:24 हेर करु तुहुं मालीक ईसु मसीन सेवा कर रया करीन तुहुं काजे मालीक ईसु वगे सी वायदु करला हकेन हीसाबे ईनाम जड़से।
COL 3:25 जु काहनुक आपणा-आपणा मालीकेन कुहराय करे, तीना काजे तेरीत कुहराय नड़से; तीने टेमे नीयाव करन्‌यु काहनुक अगु नी आवे।
COL 4:1 ए मालक्‌या सरगे मां तुंद्‌रु बी एक मालीक छे, असो समजीन तुहुं आपणा-आपणा गुलाम पावर्‌या साते वारु नीयाव ने वेहवार करु।
COL 4:2 पहरु देण्‌यान तसा चेतीन रहु ने भगवान धड़े दुवा करु, ने भगवान काजे बेसकु वारु कहता जाय्‌न मन लागाड़ीन वीन्‌ती कर्‌या करु।
COL 4:3 मे ते हय ईसु मसीन बारामां भगवानेन सातायली युजना उजेंती कर देदु करीन मेसेक जेल मां कुंड मेल्‌यु; तेबी मेसेक ईसुन ज काम करनु छे; अतरे हामरे वाटे बी भगवान धड़े वीन्‌ती करता रहु, की भगवान हामुक ईनी सातायली वातेन खुस-खबर दीसराक बी सामळावणे करीन अळी बी मुखु आपे।
COL 4:4 भगवान वाटे वीन्‌ती करु की मे भगवानेन ईनी सातायली वात काजे जसी मेसेक उजेंती करनु चाहजे तसीत चुखी झण उजेंती करो।
COL 4:5 तुहुं बी खुस-खबर सामळावणेन मुखु हेरता रहु; ईसु काजे माने तींद्‌रे साते अक्‌कल सी वेहवार करु; जत्‌यार बी मुखु जड़ जाय ती, मुखा काजे महंग्‌लु समजीन तीनुक खुस-खबर सामळु।
COL 4:6 ने तींद्‌रे धड़े तुंद्‌री वात जलम गीण-दया वाळी ने सुवाळी रहणु चाहजे, ने तुहुं काजे वारु रीते आखाक जपाप देदा आवड़ी जाणु चाहजे।
COL 4:7 मे तुखीकुस काजे तुंद्‌रेन्‌चां मकली रयु जु, मालीक ईसु मां मारु लाटेक्‌लु भाय ने साती गुलाम पावर्‌यु छे, ने ईसुन ईमानदार पावर्‌यु छे।
COL 4:8 मे हीनाक हेरेन करीन मकली रयु की तुहुं, हेरे साहरे हामरे बारामां जाण लेवु, ने जु तुंद्‌रा हीया मन काजे हिम्‌मत आपे।
COL 4:9 ने मे हेरे पुठ्‌ये उनेसीमुस काजे बी मकली रयु, हयु ईसु मसी मां हामरु लाटेक्‌लु ने ईमानदार भाय छे, ने जु तुंद्‌रे मायन एक जणु छे; ने हया तुहुं काजे जां वाळी आखी वात कय देसे।
COL 4:10 अरीस्‌तारकुस ते मार पुठ्‌ये जेल मां कुंडायलु छे। मरकुस ते बरनाबासेन सगु भाय छे; तेरे बारामां तुहुं काजे ज हुकुम जड़लो हतलो की हयु जत्‌यार बी तुंद्‌रेन्‌चां आवे ती हेरु वारु आव-भाव करजु।
COL 4:11 ने ईसु काजे बी जु युस्‌तुस कहवाये, जे तुहुं काजे वारलु छे की करीन पुछ रया, ने यहुदी माणसे मायन जे अतरात भगवानेन राजेन वाटे मार साते काम करन्‌या साजल्‌या छे; ने जे मेसेक सांती आपण्‌या छे।
COL 4:12 ईपर्‌फास बी तुहुं काजे वारलु छे की करीन पुछ रयु। हयु तुंद्‌रेत मायन एक जणु छे, ने ईसु मसीन गुलाम पावर्‌यु बण रयु। हयु ते तुंद्‌रे वाटे जलम भगवान धड़े जीव ने डील लागाड़ीन दुवा कर्‌या करे, हयु हेरेन करीन की तुहुं आखी वातेम भगवानेन मरजी पुरी करता जाय्‌न पुरा-पुरा पाक्‌का हय जावु।
COL 4:13 मे ईनी वातेन गवा छे की, हयु तुंद्‌रे वाटे ने लोदीकीया सहर ने हीयारापुलीस सहर मां रहणे वाळा ईसुन माणसे वाटे बेसको काठो काम करो।
COL 4:14 परमवाळु डाक्‌टर लुकु तुहुं काजे आवीस ने आवजु कय रयु ने देमास बी आवीस ने आवजु कय रयु।
COL 4:15 लोदीकीया सहरेन ईसुन माणसे काजे ने नुमफास काजे ने तेरा घर मां बसणे वाळी मंडळी ने माणसे काजे बी मारे अगळ हय्‌न वारलु छे करीन कय देजु।
COL 4:16 ने जत्‌यार जी चिट्‌ठी तुंद्‌रेन्‌चां भण लेवु, ती लोदीकीया सहरे मां रहण्‌या ईसुन मंडळी काजे बी जी चिट्‌ठी भणाय देजु, ने जी चिट्‌ठी मे लोदीकीया वाळी मंडळीन नावे मकेल्‌लु जी चिट्‌ठी तुंद्‌रेन्‌चां आवे ती तुहुं बी भणजु।
COL 4:17 ने अरखीप्‌पुस काजे कह्‌जु की ज सेवान काम मालीक ईसु तुसे काजे आपलु छे, तीना कामेक समळीन पुरो कर लेजु।
COL 4:18 मे पोलुस खुद आपसे हाते करीन तुहुं काजे वारलु छे करीन लिख रयु। मेसेक ते जेल मां कुंड मेल्‌यो; मेसेक घुण ईसेरु। तुंद्‌रे पर गीण-दया हवती रहणु चाहजे! असु मे भगवान धड़े वीन्‌ती करो; आमीन।
1TH 1:1 पोलुस ने सीलवानुस तीमुथीयुस, भीणी सी थीसलुनीकीया सहर मां रहणे वाळी ईसुन मंडळीन माणसेक लिख रयु, तुहुं जे भगवान बास मां ने मालीक ईसु मसी मां भुरसु करीन रवे। तुहुं आखा काजे भगवानेन गीण-दया ने सुक-सांती तुंद्‌रे पुठ्‌ये रवे।
1TH 1:2 हामु तुहुं आखा वाटे जलम भगवान काजे बेसकु वारु कवता रवजे। ने हामरी दुवा मां हामु तुंद्‌री हेर करता रवजे।
1TH 1:3 तुहुं ते भगवान बास पर भुरसु करीन वारलु काम कर र्‌या, ने परम सी काठो काम कर रया, ने आपणु मालीक ईसु मसी आपणुक वाचाड़ने करीन सरगे सी पछु आवसे करीन तुहुं आस कर रया, ने ईनी आसेन गम खाय्‌न वाट देख रया। ईनी वातेक आपणा भगवान बास अगळ अळी अळीन हेर करीन हामु तुंद्‌रे वाटे भगवान काजे बेसकु वारु कह्‌या करजे।
1TH 1:4 भगवानेन परमवाळा मारा भायस्‌यो ने बहणस्‌या हामु जाणजे की तुहुं तेरा नेवाड़ला छे।
1TH 1:5 काहाकी हामु जी खुस-खबर तुहुं काजे सामळावला, तीनी खुस-खबर मां बुले अतरात नी हतला, बाकुन हामरा बुल भेळा, भगवानेन चुखली-आत्‌मान ताकत बी उजेंती हवली। तुंद्‌रे वाटे, हामु तुंद्‌रे ईचमां कसा जीया, जी वात तुहुं देख लेदा; हामरे सी सामळावली खुस-खबर पर तुंद्‌रु पाक्‌कु भुरसु हय गुयु।
1TH 1:6 ने माणसे तुहुंक बेसका वेला पाड़्‌या; तेबी भगवानेन चुखली-आत्‌मा सी जड़ली खुसी भेळा, तुहुं हामरा ने मालीक ईसुन चाल धरन्‌या बण गुयला।
1TH 1:7 ने तेरेमां मकीदुनीया जीलाम ने अखाया जीलाम रहण्‌या, ईसुक मान्‌या आखा माणसेन चाल धरने करीन एक वारलु दाखलु बण गुया।
1TH 1:8 काहाकी तुंद्‌रेन्‌चां सी अतरात नी मकीदुनीया ने अखाया मां मालीकेन बुल सामळाया, बाकुन तुंद्‌रु भुरसु जु भगवान पर छे, ची वात आखे दुर जाती रय, की हामुक कहणेन जरुवत बी नी पड़ी।
1TH 1:9 काहाकी चे आफरतात हामरा बारामां बताड़े, की तुहुं कसा मुरती पुजा छुड़ीन भगवान भीणी फीर्‌या, काहाकी जीवला ने छाचला भगवानेन सेवा करे,
1TH 1:10 ने तेरा पुर्‌यान सरग सी आवणेन वाट देखता रहु तीनाक चु मर्‌या-सर्‌या मां सी जीवतु कर्‌यु, मतलब ईसु, जु हामुक आवणे वाळी गरा सी बचाड़े।
1TH 2:1 ए भायस्‌यो ने बहणस्‌या हामरो तुंद्‌रेन्‌चां आवणु फालतु नी हय, जी वात ते तुहुं काजे मालुम छे।
1TH 2:2 तुहुं जाणु की फीलीपी सहर मां ईसुन खुस-खबर सामळावणे गुयला, ती माणसे खुस-खबरेन बेसका वीरुद कर्‌या, ने हामुक बेसका वेला पाड़्‌या, तेबी हामु भगवानेन भुरसे, बीहे बीगुर तुंद्‌रेन्‌चां आया, ने तुहुं काजे ईसुन खुस-खबर सामळाया। जी वात बी तुहुं काजे मालुम छे।
1TH 2:3 काहाकी हिम्‌मत सी तुहुंक सीकाड़नु ने नी भरम सी छे ने नी वीटेळ्‌ळा सी छे, ने नी धुका सी छे।
1TH 2:4 बाकुन जसु भगवान हामुक कामका समजीन खुस-खबर सुपलु, हामु तसात बताड़जे; ने हामु माणसे काजे खुस करनेन कुसीस नी करजे बाकुन हामु ते तीना भगवान काजे खुस करजे चु हामरा मनेन वात काजे पारखे।
1TH 2:5 हामु तुंद्‌रे धड़े सी फायदु लेणे करीन, तुहुं बेसका वारु छे कय्‌न तुंद्‌रेन्‌चां कदी नी आया। ने हाय करीन हामु कदी ढंगड़ा नी कर्‌या। जी वात बी तुहुं जाण रया ने भगवान बी ईनी वातेन गवा छे।
1TH 2:6 हामु काजे माणसे भीणी सी ईज्‌जत नी चाहती, हव तुंद्‌रे भीणी सी बी, नी ने दीसरा भीणी सी बी ईज्‌जत नी चाहती।
1TH 2:7 हामु ते ईसु मसीन नेवताळा छे असा कय्‌न तुंद्‌रे पर हक जमाड़ सकजे; बाकुन तेबी हामु तुंद्‌रे साते असु दया कर्‌यु, जसी माय आपसा पुर्‌या काजे दुत पीयाड़ीन पाळे पुसे।
1TH 2:8 हामु तुंद्‌री बेसकी हेर करीन परम कर्‌या। तुहुं हामरे वाटे लाटेक्‌ला छे; तेरेमां हामु तुहुं काजे भगवानेन खुस-खबर सामळावणे अतरात नी, बाकुन हामरु जीव आपणे बी तीयार हय गुयला।
1TH 2:9 ए भायस्‌यो ने बहणस्‌या, तुहुंक हामरी काठी मेहनत ने हरबड़ हेर हसे। तीनु दाहड़ाम, तुंद्‌रे पर बुजु नी आवणु चाहजे, करीन हामु रात-दाहड़ु मेहनत करीन कमाय बी कर्‌या, ने खरचु करीन तुहुं काजे भगवानेन खुस-खबर सामळाया।
1TH 2:10 तुहुं गवा छे, ने भगवान बी गवा छे, की तुहुं भुरसु करने वाळान ईचमां हामरु वेहवार कसु चुखलु ने धरमेन ने नी-गुनाळु रयु।
1TH 2:11 जसु बास तेरा पुर्‌या साते वेहवार करे, तसात हामु बी तुंद्‌रे साते वेहवार करला।
1TH 2:12 जसात हामु तुहुंक भात-भात्‌ये समजाड़ीन सीकाड़ता रया; हामु कह्‌या भगवान तुहुंक हेरा राज मां, ने राजेन सेक-सींगार मां, साजल्‌या बणने करीन तुहुंक बुलावलु छे; तेरेमां तुहुं भगवानेक गमे तसों जीवन जीवु।
1TH 2:13 ने तेरेमां हामु भगवानेक वारु छे करीन जलम कवता रवजे, काहाकी हामरे सी जत्‌यार तुहुं भगवानेन खरला बुले समजीन आवर्‌या ने छाचलीन हयु वचन भगवानेन छे, ने तुहुं जे भुरसु कर्‌या, तुंद्‌रा जे बुले बेसको काम करे। अतरामा ईनी वातेन करता हामु भगवान काजे बेसकु वारु कह्‌या करजे।
1TH 2:14 मेसेक यहुदीया जीलान, भगवानेन मंडळीन माणसे हेर आय रय। चे यहुदी माणसेम सी ईसु मसी पर भुरसु कर्‌या। तत्‌यार यहुदी दीसरा माणसे तीनुक वेला पाड़्‌या, तेबी चे ची वेला ने दुख वेठी लेदा। तींद्‌रेन तसात, जत्‌यार तुंद्‌रा माणसे तुहुंक वेला पाड़्‌या, तत्‌यार तुहुं बी ची वेला ने दुख वेठी लेदा। तेरेमां ए भायस्‌यो ने बहणस्‌या, तुहुं यहुदी ईसु वाळान चाल धरन्‌या बण गुयला छे।
1TH 2:15 चे मालीक ईसु काजे ने भगवानेन अघली वात बताड़ने वाळा माणसे काजे बी मार नाख्‌या ने हामुक तळ्‌या, ने भगवान तींद्‌रे सी खुस नी हय, ने चे आखा माणसे पर रुक लागाड़े,
1TH 2:16 ने चे नी-यहुदीया सी तींद्‌रा छुटकारा वाटे वाते करने सी हामुक रुके, काहाकी जलम आपणा पापेन गुळा भरता रहे; बाकुन तीनु पर भगवानेन रीसेन गरा आय्‌त पड़ली छे।
1TH 2:17 ए भायस्‌यो ने बहणस्‌या हामु थुड़ीक वार लग तुंद्‌रे सी छेटे हय गुयला, मन मां छेटे नी हया, बाकुन डील मां छेटे हय गुयला। तेरेमां हामु तुंद्‌रा मुंहडा देखणे करीन बेसका हेर कर रवला।
1TH 2:18 तेरेमां हामु तुंद्‌रेन्‌चां पछा आवणे कर रवला, खास करीन मे पोलुस, एक कावा नी बाकुन दुयेक कावा आवणे करलु, बाकुन भुतड़ु रुक लेदलु।
1TH 2:19 आपणु मालीक ईसु पछु आवसे तीने टेमे, तेरे धड़े सी हामुक ईनाम जड़नेन आस, ने खुसी ने ईज्‌जत आपणी पागड़ी कुण रवसे? तीने टेमे, तेरे अगळ हामुक मटाय करनेन उत्‌तर तुहुंत बणसु; नी की?
1TH 2:20 हामरी बड़ाय ने खुसी तुहुंत छे।
1TH 3:1 काहाकी जत्‌यार हामरे सी नी रह्‌वायो, ती हामु वीच्‌यार कर्‌या की एथेंस सहर मां रय जाजे,
1TH 3:2 ने हामु तीमुथीयुस काजे, जु मसीन खुस-खबर मां मदत करने वाळु हामरु भाय ने भगवानेन सेवक छे, असा करीन मकल्‌या की चु तुहुंक मजबुत करे ने तुंद्‌रो भुरसान बारामां तुहुंक समजाड़े,
1TH 3:3 काहाकी कुय दुख तकलीप वजे सी कमजुर नी हवे, काहाकी तुहुं आपसाक जाणु की हामु हींद्‌रेत वाटे नक्‌खी करलो छे।
1TH 3:4 काहाकी पेहलुत, जत्‌यार हामु तुंद्‌रेन्‌चां हतला ती तुहुंक कह्‌या करतेला की हामुक दुख तकलीप हाकलनु पड़से, ने असोत हवलो छे, जसा की तुहुं जाणु बी।
1TH 3:5 हेरे वजे सी जत्‌यार मारे सी नी रह्‌वायो, ती तुंद्‌रा भुरसान हाल जाणने करीन मकल्‌या, की कांखुर असो नी हय जाय की पारखणे वाळु तुंद्‌री पारख कर्‌यु, ने हामरी मेहनत फालतुत हय जाय।
1TH 3:6 बाकुन हय्‌स ते तीमुथीयुस तुंद्‌रेन्‌चां सी पछु आवीन तुंद्‌रे बारामां हामुक असु सामळायु, थीसलुनीकी मंडळीन माणसे वारु ईसु पर भुरसु कर र्‌या, ने चे परमेन खुस-खबर सामळाया ने ईनी वातेक बी सामळाया की तुहुं जलम परम सी हेर करे। ने जसा आपणु तीनुक देखणेन हेर कर्‌या, तसात चे बे आपणु काजे देखणेन बेसका हेर करे।
1TH 3:7 तेरेसी ए भायस ने बहणस्‌या, हामु हामरा आखा दुख ने तकलीप मां तुंद्‌रा भुरसा सी तुंद्‌रे बारामां सांती जड़ी।
1TH 3:8 काहाकी हय कदी तुहुं मालीक मां काठा रहु ती हामु जीवला छे।
1TH 3:9 तुंद्‌रा बारामां सामळीन, तुंद्‌रे सी जी खुसी जड़ रय, तीनी खुसी सी हामु भगवान काजे कसा कहीन बेसकु वारु कवजे, जी वात हामुक समज मां नी आवती।
1TH 3:10 तुहुंक भेळा हवणे करीन ने तुंद्‌रा भुरसा सी सीकणे मां जी बी कसर छे, ची कसर पुरी करने करीन हामु रात दाहड़ु भगवान सी दुवा कर्‌या करजे।
1TH 3:11 हामरी हेर असी छे, तुंद्‌रेन्‌चां आवणे करीन भगवान बास ने मालीक ईसु मसी, तुंद्‌रेन्‌चां आवणे करीन अगवाय करे!
1TH 3:12 ने मालीक असु करे की जसा हामु तुंद्‌रे सी परम कर्‌या तसात तुंद्‌रा परम बी तुंद्‌रे मां ने आखा माणसे साते अधे, ने बड़तो जाय,
1TH 3:13 काहाकी हयु तुंद्‌रा मन काजे काठो करे, काहाकी जत्‌यार हामरु मालीक ईसु आपसा आखा चुखला माणसे भेळु आवे, ती चे हामरा भगवान बास अगळ चुखला ने छाचला बणावे।
1TH 4:1 ए भायस्‌यो ने बहणस्‌या, भगवानेन मरजीन अनसारे कसों जीवणु छे, ने तीनाक कसों खुस करनु छे; ईनी वातेन सीकणु तुहुं हामरे धड़े सी सीक लेदा, ने ईनी सीकणेन अनसारे तुहुं जीवता आय रया। हय हामु मालीक ईसुन नावे तुंद्‌रे धड़े लीलघाय करीन तुहुंक ज समजाड़जे, भगवानेक खुस करता जाय्‌न जीवणे मां तुहुं अगा बड़ता जावु।
1TH 4:2 काहाकी तुहुं जाणु की हामु मालीक ईसु भीणी सी तुहुंक काहनी-काहनी हुकुम बताड़्‌या।
1TH 4:3 तुहुं चुखला रहणु चाहजे; जीत भगवानेन मरजी छे; मतलब छीनाळा सी छेटे रहु।
1TH 4:4 ने तुंद्‌रे मां सी हर एक जणु चुखलु ने ईज्‌जत करीन आपणी लाडी साते रहणे जाणे।
1TH 4:5 छीनाळाय ने चंगली हेर सी छेटे रवजु। भगवान काजे नी जाणे, असला नी-यहुदीया माणसेत असी हेर करे।
1TH 4:6 की हीनी वात मां कुय बी आपसान भाय काजे नी ठगे ने अळी नी तेरे पर दावु लागाड़े, काहाकी मालीक असली आखी वातेन हीसाब लेण्‌यु छे। जी वात हामु पेहेल बी कहीन तुहुं काजे चेतावला।
1TH 4:7 काहाकी भगवान आपणु काजे वीटाळने करीन नी बुलायु, बाकुन तेरी नींगाम चुखला रहणे करीन बुलावलु छे।
1TH 4:8 हेरे वजे सी जु कुय हीनाक नानु जाणे तीना माणुस काजे नी बाकुन भगवान काजे नानु जाणे चु तेरी चुखली-आत्‌मा तुसेक आपे।
1TH 4:9 मंडळीन भाय-बहणस्‌यान परमेन बारामां तुहुं काजे लिखणु जरुड़ी नी हय, काहाकी तुहुं काजे आंबा-सांबा परम करनेन वात भगवान सी सीकला छे।
1TH 4:10 ने आखा मकीदुनीया जीलान आखा मंडळीन आखा भाय-बहण्‌स्‌या काजे परम कर रया। तेबी अतरोत घुण कहुं। ए भायस्‌यो ने बहणस्‌या, हामु तुहुं काजे समजाड़जे की तुहुं आंबा-सांबा बी जादा परम करता जावु।
1TH 4:11 ने जसा हामु तुहुं काजे पेहेल हुकुम आपीन कहला तसात हय बी कवजे की दीसरान काम-धंदा मां अड़चन मां नाखु। आपसोत काम करता रवु, ने खुदेन हातेन कमाय सी खावु।
1TH 4:12 तत्‌यार तुहुंक कसरायला माणसेन तसा दीसरान भुरसे रहणु नी पड़े, ने मंडळीन बाहरना माणसे बी तुंद्‌री जीवाय देखीन तुहुंक वारु कवसे।
1TH 4:13 ए भायस ने बहणस्‌या, हामु नी चाहता की तुहुं तींद्‌रा बारामां जे सुय गुयला चे तींद्‌रा बारामां अंजाण्‌या रहु, असो नी हवे की तुहुं दीसरान तसा रड़ु ने कलप्‌या करु, तीनुक काय बी आस नी रवे।
1TH 4:14 कदी हामु भुरसु करजे की ईसु मर गुयलु, ने पछु जीवतु बी हय गुयु अतरामा जे ईसु पर भुरसु करीन मर गुया, भगवान तीनुक बी पछा जीवता करीन ईसु पुठ्‌ये ली जासे।
1TH 4:15 काहाकी हामु मालीकेन बुलेन अनसारे ज कह्‌जे जत्‌यार ईसु कळीम पछु आवसे, तत्‌यार ईसु पर भुरसु करन्‌या मरला भाय-बहणस्‌या जीवता हय्‌न ईसुक भेटणे पेहेल जासे। अळतेन आपणु जे जीवतेला छे, ने ईसुक आवता लग जीवतेला रवसु, तींद्‌रे पछळ ईसुक भेळा हवणे जासु।
1TH 4:16 काहाकी तीने दाहड़े, पेहेल मालीक ईसु खुद सरगे सी उतेरतु जाय्‌न कुर्‌रु दीन बुलावसे। तीने टेमे एक मटला सरग वाळा खबर लावण्‌यान अवाज सामळायसे। एक सरग वाळु खबर लावण्‌यु, भगवान अगे सी फेप्‌या वाजाड़से। तत्‌यार जे ईसु मसी पर भुरसु करता जाय्‌न मर गुया, चे पछा जीवता हवसे।
1TH 4:17 तत्‌यार आपणु बी जे जीवतेला रवसु, ने बचला रवसु, ईसुक भेळा हवणे करीन वादळा मां हाकलायन जासु। ईसुक मान्‌या आपणु आखा, सरगेम ईसु साते भेळा हवसु, ने असा करीन चां आपणु जलम मालीक ईसु पुठ्‌ये रवसुन।
1TH 4:18 हेरे वजे सी तुहुं जी वात कहीन एक दीसरा काजे हिम्‌मत आप्‌या करु।
1TH 5:1 ए भायस्‌यो ने बहणस्‌या, हेरे बारामां लिखणेन जरुवत नी हय की टेमेन ने दाहड़ान बारामां तुंद्‌रे वाटे काहींग लिखजे।
1TH 5:2 काहाकी तुहुं आपसा वारु जाणु की जसु राते चुट्‌टु आवे, तसुत मालीकेन दाहड़ु बी आवणे वाळु छे।
1TH 5:3 जत्‌यार माणसे कवता हसे, “सांती मां छे ने काय डर नी हय,” ती तींद्‌रे पर उचकाणुन नास हवणेन दुख आय पड़से, जसों भार पाये बायर पर पीड़ा दुख ने चे काहनी बी रीती सी नी बचे।
1TH 5:4 बाकुन ए भायस ने बहणस्‌या, तुहुं आंदारला मां नी हय, की चु दाहड़ु तुंद्‌रे पर चुट्‌टान तसु आय पड़े।
1TH 5:5 काहाकी तुहुं आखा वीजाळान अवल्‌यात ने दाहड़ान अवल्‌यात छे, हामु नीते रातेन छे, ने नी आंदारलान छे।
1TH 5:6 तेरेमां हामु दीसरान तसा सुवता नी रवजे, पर जागता ने समळीन रवजे।
1TH 5:7 काहाकी जे सुवे चे रातेत सुवे, ने जे दारु पीन छाके चे रात मात छाके।
1TH 5:8 आपणु ते दीसुन छे, तेरेमां भुरसान ने परमेन झीलम पेहरीन, ने छुटकारु हात करनेन आस काजे टुपान तसा पेहरीन, समळीन रहणु चाहजे।
1TH 5:9 काहाकी भगवान आपणु काजे डंड आपणे करीन नी नेवाड़्‌यु, बाकुन आपणा मालीक ईसु मसीन पापेन डंडेम सी छुटकारु जड़े करीन नेवाड़लु छे।
1TH 5:10 ईसु हामरे वाटे हेरे वजे सी मर्‌यु की हामु चाहे जागता रवजे चाहे सुवता रवजे, आखा मेळीन तेरेत साते जीवजे।
1TH 5:11 तेरेमां तुहुं एक दीसरान हिम्‌मत बड़ावता रहु, ने एक दीसराक चुखली-आत्‌मा मां टणका करता रहु, जसा तुहुं करता आय रया।
1TH 5:12 ए भायस्‌यो, हामु तुहुं काजे लीलघाय्‌न कय र्‌या की, जे तुंद्‌रे वाटे काठी मेहनत करने बाजी रया, ने मालीक ईसु मां तुंद्‌री अगवाय करे, ने जे तुहुं काजे सीकाड़े, तींद्‌री सामळीन तींद्‌री ईज्‌जत करु।
1TH 5:13 ने तींद्‌रा काम वाटे, तुहुं परम सी तींद्‌रु वारु आव-भाव करु; ने हेळी-मेळीन रहु।
1TH 5:14 ए भायस्‌यो, हामु तुंद्‌रे सी जी लीलघाय कवजे की गलत चाल रया, तीनु काजे तुहुं लड़ीन समजाड़ु, ने बीहेतेला काजे हिम्‌मत आपु, ने लुल्‌ला काजे संभाळु, ने आखान वेहवार काजे वेठता जाय्‌न गम खावु।
1TH 5:15 चेतीन रहु! कुय करु दीसरान कुहराय्‌न बदले कुहराय मां करु; बाकुन तुहुं जलम एक दीसरान ने मंडळीन बाहरनान बी भलो कर्‌या करजु।
1TH 5:16 जलम खुस रवजु।
1TH 5:17 भगवान धड़े अळी-अळीन दुवा कर्‌या करजु,
1TH 5:18 हर वात मां, भगवान काजे बेसकु वारु कवता रहु। काहाकी ईसु मसी मां तुंद्‌रे धड़े भगवानेन बी जीत मरजी छे।
1TH 5:19 भगवानेन चुखली-आत्‌मान अगवाय काजे घुण रुकता।
1TH 5:20 खास करीन, भगवानेन अघी सी आवणे वाळी वात बताड़न्‌या माणसे वाटे कहली वातेक फालतु घुण समजु।
1TH 5:21 आखी वात काजे पारखीन देखणु चाहजे: जी वारु छे, तीनी वातेक मानीन जीवु।
1TH 5:22 आखी भातीन नाव-बद्‌दी सी छेटा रहु।
1TH 5:23 सांतीन भगवान आपसुत तुहुंक पुरी रीती सी चुखु करे, ने तुंद्‌री जीव-आत्‌मा ने मन ने डील हामरा मालीक ईसु मसीन आवणे लग पुरु-पुरु ने नी-गुनाळा बणीन रवे।
1TH 5:24 तुंद्‌रु बुलावणे वाळु खरलु छे, ने चु असुत करसे।
1TH 5:25 ए भायस्‌यो, हामरे वाटे दुवा करु।
1TH 5:26 आखा भायस ने बहणस्‌या काजे ईसुन चुखलु गुळु दीन वारला छे की पुछ्‌जु।
1TH 5:27 मे मालीक ईसुन हक सी तुहुं काजे कह्‌वो, जी चिट्‌ठी आखा भायस्‌यो काजे भणीन सामळावजु।
1TH 5:28 आपणा मालीक ईसु मसीन गीण-दया तुंद्‌रे पुठ्‌ये बणीन रहे।
2TH 1:1 ए थीसलुनीकी सहर मां रवण्‌या ईसुन मंडळीन माणसे, मे पोलुस, जी चिट्‌ठी, सीलवानुस ने तीमुथीयुस भेळु, तुहुं आखाक लिख र्‌यु, तुहुं ते आपणा भगवान बासेन ने मालीक ईसु मसीन भुरसे रय रया:
2TH 1:2 तुहुं आखा काजे आपणा भगवान बासेन ने मालीक ईसु मसीन गीण-दया ने सुक-सांती जड़ती रहणु चाहजे।
2TH 1:3 ए भायस्‌यो ने बहणस्‌या, ईसु पर तुंद्‌रु भुरसु बड़तुत जाय रयु, ने तुंद्‌रे मां परम बी बड़तुत जाय रयु, तेरेमां हामु, तुंद्‌रे वाटे आखे टेमे भगवान काजे बेसकु वारु कहणु चाहजे।
2TH 1:4 तुहुं काजे माणसे, अळी-अळीन वेला पाड़ रया, तेबी ईनु आखा वेला ने दुख काजे तुहुं झेल रया, ने असा करीन तुंद्‌री गम खाणेन ताकत ने तुंद्‌रु भुरसु उजेंतु हय रयु, तेरेमां हामु जागे-जागे भगवानेन मंडळी मां तुंद्‌रे बारामां मटाय करजे।
2TH 1:5 जु भगवानेन छाचला नीयावेन दाहड़ाम धरमीन पुरावु छे, तीने दाहड़े चु आखा माणसेन नीयाव करसे। तुहुं ते हय भगवानेन राजेन वाटे दुख झेल रया, तेरेमां नीयावेन दाहड़े, भगवान तुहुंक असु कवसे तुहुं मारा राज मां भराये असा छे।
2TH 1:6 काहाकी भगवान डंड आपसे की आपसे काहाकी तेरी नींगा मां असो करनु नीयावेन हीसाबे संय छे।
2TH 1:7 बाकुन तुहुं जे हय वेला करने बाजी र्‌या, तुहुं काजे ने हामु काजे नीयावेन दाहड़े वेलान बदला मां सुक आपणे बी तेरी नींगाम नीयावेन हीसाबे ताले छे। तीने दाहड़े, मालीक ईसु आपसा ताकत सी भरला सरग काहवाळ्‌या पुठ्‌ये, सरग सी धपतेला आकठा भेळु उजेंतु उतरसे।
2TH 1:8 ने जे भगवानेक नी जाणे ने हामरा मालीक ईसुन खुस-खबरेक नी माने तींद्‌रे सी बद्‌लु लेसे।
2TH 1:9 चे मालीक अगळ सी ने तेरी ताकुतेन सेक-सींगार सी छेटा हय्‌न जलम डंड हात करसे।
2TH 1:10 असो तीने दाहड़े हवसे, जत्‌यार चु, भगवान सी ठहरावले दाहड़े, सरग सी पछु आवसे। तत्‌यार आपणु जे तेरा चुखला माणसे छे, आपणे वाटे ईसु ज करलु तेरे बदले ईसुन बड़ाय करसु, ने ईसुक मान्‌या आपणु आखा तेरु सेक-सींगार देखीन देखतात रय्‌न तेरी बड़ाय करसु। तीनु भुरसु करन्‌या मां तुहुं बी रवसु, काहाकी तुहुं ईसुन तीनी गवाय पर भुरसु कर्‌या, तीनी गवाय काजे हामु देखाड़ला।
2TH 1:11 ने हामु तुंद्‌रे वाटे भगवान सी जलम असी दुवा करजे की ए हामरा भगवान, तु ईनु काजे जो चुखलो जीवन जीवणे करीन बुलावलु छे, असो जीवन जीवणे करीन जुर आप। ने जे ईसुन भुरसे ज काम करने बाजी र्‌या, तीनु कामेक तु पुरो कर, ने भलाय करनेन जी मरजी छे ची आखी तारी ताकत सी पुरी करनी दे।
2TH 1:12 असा करीन आपणा भगवानेन ने मालीक ईसु मसीन गीण-दया सी तुहुं असा करसु ती, तुंद्‌रे अनसारे आपणा मालीक ईसु मसीन नावेन बड़ाय हवसे। ने तेरे साहरे तुंद्‌री बी बड़ाय हवसे।
2TH 2:1 ए भायस्‌यो ने बहणस्‌या, हय हामु आपणा मालीक ईसु मसीन पछु आवणेन बारामां, ने तीने टेमे आपणुक, तेरे अगळ भेळा हवणेन बारामां असा लीलघाय्‌न कवजे;
2TH 2:2 मालीक ईसुन चु दाहड़ु आय गुयु करीन कुय बी तुहुंक कवसे, तत्‌यार तुहुं घाबरायजु घुण, नी ते तीनी वात पर तत्‌यारुत भुरसु करीन खडळ-वडळ घुण हय जावु, भले चु कहण्‌यु असु दावु करसे की जी वात ते चुखलु जीव-आत्‌मा मेसेक कहलु, नी ते पोल्‌लु ईसुन पावर्‌यु असु कय र्‌यु, नी ते चिट्‌ठी मां असोत लिखलो छे, तेबी तींद्‌री घुण सामळता।
2TH 2:3 कसा बी काहनाक ने वात मां आय्‌न ठगायजु घुण, काहाकी जत्‌यार लग भगवानेन वीरुद नी करे, ने तींद्‌रु डाहलु जु पापेम पुसायलु माणुस उजेंतु नी हवे, तेरो नास हवणे वाळोत छे, ती लग ईसुन आवणेन दाहड़ु नी आवे।
2TH 2:4 पापेम पुसायलु चु माणुस भगवानेन वेरी बणसे ने चु मटाय करीन देवता कहवायण्‌या आखा सी ने पुजायणी आखी देवधाणी सी मेत मटु छे करीन हक जमाड़से। ने मेत भगवान छे असु दावु करीन भगवानेन मंदीर मां बसीन राज करने बाजी जासे।
2TH 2:5 जत्‌यार मे तुंद्‌रे पुठ्‌ये हतलु, तत्‌यार मे तुहुं काजे जीत वात कह्‌या करतेलु ची वात तुहुंक हेर नी हय काय?
2TH 2:6 ने तुहुंक ते, जी वात मालुमुत छे की, पापेम पुसायला तीना माणसेक हय कुणीन जुर रुक र्‌यु; ने टाकले टेमे चु उजेंतु हवसे।
2TH 2:7 मे जी वात असु करीन कय र्‌यु, काहाकी भुतड़ान गरबड़ी करनी सातायली ताकत हय बी काम करने बाजी रय। बाकुन हय जु रुकणे बाजी र्‌यु, चु रुकणे वाळु टाकले टेमे छेटु हवणे लग, पापेम पुसायला माणुस काजे उजेंतु हवणे सी रुकी रवसे।
2TH 2:8 जत्‌यार लग रुकणे वाळु छेटु हय जासे, ती नेम नी मान्‌यु पापेम पुसायलु चु माणुस उजेंतु हवसे। बाकुन जत्‌यार मालीक ईसु आपसे दाहड़े, आपसान सेक-सींगार भेळु उजेंतु हवसे, तीने टेमे चु तीना काजे आपसे फुकेत मार नाखसे ने तत्‌यारुत चु गरबड़ी करन्‌यु सर जासे।
2TH 2:9 तीना गरबड़ी करन्‌या, भुतड़ान कामे लीन आवसे, जसु भुतड़ु लुच्‌चु छे, चु बी लुच्‌चु रवसे ने आखी भातीन ताकत सी भरायलु रवसे ने कदी देख्‌या नी, तीनु कामेन सहलाणी देखाड़से,
2TH 2:10 ने नास हवणे वाळा वाटे जे धरमेन काम नी करे चे आखी भातीन धुकान साते आवसे, काहाकी चे छाचली वात सी परम नी कर्‌या तेरेसी तींद्‌रु छुटकारु हवे।
2TH 2:11 तेरेमां भगवान तींद्‌रे मां एक भटकाय देणेवाळी ताकत मकलसे काहाकी चे झुटी वात पर भुरसु करे।
2TH 2:12 काहाकी जतरा माणसे छाचली वात पर भुरसु नी करे, ने जे धरमेन काम नी हय तीनु कामे सी खुस हवे, तीनु आखा काजे डंड जड़े।
2TH 2:13 ए भायस ने बहणस्‌या, तुहुं मालीक ईसुन लाटेक्‌ला छे। भगवानेन जीव-आत्‌मा सी चुखला बणीन, ने ईसुन खुस-खबरेन छाचली वात पर भुरसु करीन छुटकारु हात करनु चाहजे, करीन भगवान तुहुं काजे सुरु सीत नेवाड़ लेदु, ने हामु भगवान सी तुंद्‌रे वाटे हर घड़ी बेसका वारु कह्‌जे।
2TH 2:14 ने हेरेन करीन हामु तुहुं काजे छुटकारान बारामां सीकाड़जे, ने तेरे सी भगवान तुहुं काजे बुलायु हेरेसी की, तुहुं बी हामरा मालीक ईसु मसीन सेक-सींगार, पुथल्‌यान तसु पेहेर लेवु।
2TH 2:15 तेरेमां हामरा भायस ने बहणस्‌या, टणका रहु; जी-जी वात हामु तुंद्‌रेन्‌चां रय्‌न सीकाड़ला ने अळी चिट्‌ठीन अनसारे सीकाड़ला, तीनीत पाळनी पर टेकला रहु।
2TH 2:16 हामरु मालीक ईसु मसी तुत, ने हामरु बास भगवान, जु हामरे सी परम राख्‌यु ने गीण-दया सी जलमकी सांती ने मट्‌ली वारु आस आप्‌यु।
2TH 2:17 तुंद्‌रा मन मां सांती देय ने तुहुं हरेक वारु काम ने बुले मां टणका करे।
2TH 3:1 आकरी मां, हामरा भायस ने बहणस्‌या, हामरे वाटे दुवा कर्‌या करजु की मालीकेन बुले असा मामार वाटाये ने सेक-सींगार काजे हात कर लेय, जसों तुंद्‌रे मां हयो,
2TH 3:2 दुवा करता रवु की आपणु भटकायला माणसे ने भुंडात माणसे सी छेटे रवु काहाकी आखा माणसेन मालीक पर भुरसु नी रवे।
2TH 3:3 बाकुन मालीक ते भुरसा मां पाक्‌कु छे, चु तुंद्‌री ताकत काजे बड़ावसे ने तुहुं काजे तीना वेरी सी बचाड़ीन राख्‌से।
2TH 3:4 हामुक मालीक मां रय्‌न तुंद्‌रे पर भुरसु छे, की जी-जी हुकुम तुहुंक देजे, तीनुक तुहुं मानु, ने मान्‌ता बी रवसु।
2TH 3:5 भगवानेन परम ने मसीन गम भीणी मालीक तुंद्‌रा मन काजे मनवी लेणु चाहजे।
2TH 3:6 हामरा भायस ने बहणस्‌या, हामु तुहुंक आपणा मालीक ईसु मसीन नाव सी हुकुम देजे की, तुहुं तीनु भायस्‌योन चाल मां धरु, जे उजगाये हींडी फीरीन जीवे। जी सीकापण तुहुंक हामरे धड़े सी जड़ली छे, तीनी सीकाड़ली वातेन अनसारे ते, चे जीवे।
2TH 3:7 काहाकी तुहुं आपसात जाणु, की काहनी ढंग सी हामरेन तसी चाल-चालनु चाहजे, काहाकी हामु तुंद्‌रे ईचमां उजगाय नी कर्‌या।
2TH 3:8 ने काहनाक ने रुटु फुकट मां नी खादा; बाकुन काठलो काम ने मेहनत सी रात दाहड़ु काम धंदु करतेला, काहाकी तुंद्‌रे मायन काहनाक पर बुजु नी आवे।
2TH 3:9 असो नी, की हामुक हक नी हय; बाकुन हेरेसी की हामु तुंद्‌रे वाटे दाखलु ठेरजे, ने तुहुं हामरेन तसी चाल चालु।
2TH 3:10 ने जत्‌यार हामु तुंद्‌रेन्‌चां हतला, तत्‌यार बी जी हुकुम तुहुंक देदला, की कदी काहनुक काम करने नी हींडे, ती खाणु बी नी चाहजे।
2TH 3:11 हामु सामळजे, की कतरा माणसे तुंद्‌रे ईचमां उंजगाय्‌न चाल चाले, ने काय काम नी करे, बाकुन दीसरा काजे खुटी कर्‌या करे।
2TH 3:12 असला काजे हामु मालीक ईसु मसी मां हुकुम देजे ने समजाड़जे, की हुगा-हुगा काम करीन खाया करु।
2TH 3:13 ने तुहुं ए भायस्‌यो ने बहणस्‌या, भलो करने मां हिम्‌मत मां छुड़ु।
2TH 3:14 कदी काहनुक हामरी ईनी चिट्‌ठीन वात काजे नी माने, ती तीना माणसेन बारामां मंडळी मां खबर करजु, ने तेरी सात संगात मां घुण रहु, ने तत्‌यार हयु ज देखीन लाजवाय जासे।
2TH 3:15 तेबी तीना काजे तुहुं आपसान वेरी समजीन, वेहवार घुण करु; बाकुन भायस समजीन समजाड़ देवु।
2TH 3:16 मालीक ईसु जु सुक-सांतीन झीर छे, हयु खुद, तुहुं आखा पुठ्‌ये रवीन तुहुं काजे आखी भातीन सुक-सांती आप्‌या करनु चाहजे।
2TH 3:17 मे पोलुस, मारे हाते सी तुहुं काजे आवीस ने आवजी कहींन लिखी र्‌यु; मारा आखा चिट्‌ठीया मां मे असुत लिखो ने मारी लिखणेन जीत सहलाणी छे।
2TH 3:18 आपणा मालीक ईसु मसीन गीण-दया तुंद्‌रे आखा पुठ्‌ये रया करे।
1TI 1:1 पोलुस भीणी सी जु आपणुक छुड़ावणे वाळु भगवान ने हामरी आसेन साहरु मसी ईसुन हुकुम सी ईसु मसीन नेवतावाळु छे।
1TI 1:2 तीमुथीन नाव जु भुरसा मां मारु छाचलु पुर्‌यु छे: बास भगवान ने हामरु मालीक ईसु मसीन दया ने गीण-दया ने सुक सांती तुसेक जड़ती रहणु चाहजे।
1TI 1:3 जसु मे मकीदुनीया जीला मां जाणेन टेमे तुसेक समजाड़लु, की ईफीसुस सहर मां रवीन थुड़ाक माणसे काजे हुकुम आप की तुहुं भाती-भातीन झुटी वात मां सीकाड़ु।
1TI 1:4 ने तीनु मनघड़्‌या काहाण्‌यान बारामां, ने गीणाये नी असला खानदानीन बारामां सीकाड़ी-सीकाड़ीन माणसेक खुटी मां करु। असली मनघड़ाय वात ते भगवानेन चुखला माणसेक, भुरसान साहरे भगवानेन कह्‌याम जीवणे नी सीकाड़े, बाकुन लड़ाय कराड़े; झुटी वात सीकाड़न्‌याक रुकणेन बारामां, जु हुकुम मे तुसेक आपलु, चु हुकुम पुरु करजी।
1TI 1:5 हुकुमेन सार जु छे की चुखला मन ने वारलु समज ने खरला भुरसा सी परम उबजणु।
1TI 1:6 झुटी वात सीकाड़न्‌या थुड़ाक माणसे ते हीना वारलु गुनाक छुड़ीन भटकी गुया ने फालतु वात मां जखड़ी पड़ने बाजी गुया।
1TI 1:7 ने चे मटला भगवानेन नीयमेन मास्‌तर्‌या ते बन्‌ने ते हींडे पर जी वात कवे चे जी वात हिम्‌मत सी कवे तीनी वातेक चे आपसात नी समजे।
1TI 1:8 पर आपणु जाणजे की कदी कुय मुसान लिखलु कायदु ते वारलु छे बाकुन जसु भगवान गवा तेरेत अनसारे तीनु कायदाक समजीन सीकाड़ने सीत चे नफावाळा छे।
1TI 1:9 ज जाणीन की भगवान जे कायदा मुसा वाटे आपलु चे धरमी माणसेक डंड आपणु करीन नी पर कायदान बीगुर जीवण्‌या पापी माणसेक तींद्‌रा पापेन बारामां ने डंडेन बारामां समजाड़ने करीन आपलु जे माणसे भगवानेन भक्‌ती नी करे, जे आस्‌या-बासेन ने डाहलान वात नी माने, माणसेन ईज्‌जत नी करे; जे कुहराय ने पाप करे जे आयस ने बासेक लग मार नाखे,
1TI 1:10 जे छीनाळो करे, जे अदमी। अदमी साते सोवसार करे, ने जे बायरा, बायरा साते सोवसार करे, जे माणसेक कब्‌जाम करीन दीसराक वेचे, जे सगुन खाणेन टेमे लुच्‌चाय मेले, तीनु आखा वाटे तींद्‌रा पापेन बारामां ने डंडेन बारामां समजाड़ने करीन ठेहरावलु छे।
1TI 1:11 जुत आखा सी वारु भगवानेन सेक-सींगार तीना खुस-खबरेन अनसारे छे च मेसेक आपलु छे।
1TI 1:12 मे आपणा मालीक मसी ईसुन चु मेसेक ताकत आपलु छे, वारु छे कह्‌वो की चु मेसेक ईमानदार समजीन आपसान सेवान काम वाटे नेवाड़ लेदलु छे।
1TI 1:13 मे ते पेहेल ईसु पर भुरसु करन्‌यान नाव-बद्‌दी करतेलु तीनुक वेला पाड़तेलु ने तींद्‌रे पर दया नी कर तेलु तेबी मार पर ईसु दया कर्‌यु काहाकी मे पेहेल ईसु पर भुरसु नी करतेलु ने तीने टेमे बीना समजे जे काम करलु छे।
1TI 1:14 ने आपणु भगवान मालीक मार पर बेसकु गीण-दया देखाड़्‌यु ने मारा हीया मन मां भुरसु ने परम ईसु मसीन साहरे भर देदलु छे।
1TI 1:15 जी वात संय छे ने आखी भातीन भुरसु करे असी छे की मसी ईसु पापी माणसेक छुड़ावणे करीन ईनी कळी मां आवलु छे, ने मे असु मानो की तीनु आखा सी मटु पापी मे छे।
1TI 1:16 बाकुन मारे पर तेरेमां दया हवी की आखा सी मटु पापी मेत छे तेबी ईसु मारा आखा पाप झेलतु जाय्‌न मेसेक माफ कर्‌यु की जे पापी माणसे अमर जीवाय हात करने करीन ईसु मसी पर भुरसु करसे तींद्‌रे वाटे मे ईसु पछळ चालनेन एक सहलाणी ने जपाप बण जाम।
1TI 1:17 ने असु करीन एकुत खरला भगवानेन ईज्‌जत ने बड़ाय पीड़ीडीट जलम हवती रवे जु नी देख्‌यु अमरकाय, ने जलमेन राजु छे! आमीन।
1TI 1:18 ए पुर्‌या तीमुथीयुस भगवानेन अघी सी आवणे वाळी वात बताड़न्‌या माणसे जे बुल तारा बारामां पेहेल सीत तुसेक कवला मे तुसेक जु हुकुम आपो की तु तींद्‌रे अनसारे वारलु लड़ाय काजे लड़तु रव,
1TI 1:19 ने भुरसान वात पर ने समजदार रवीन जी लड़ायन काम पुरो कर तीनाक छेटे करने वाटे कतरा जणा भुरसा सी छेटे हय गुया।
1TI 1:20 हींद्‌रे मां सी हुमन्‌युस ने सीकन्‌दर छे तीनुक मे भुतड़ाक आप देदलु छे की चे भगवानेन नाव-बद्‌दी करनु नी सीके।
1TI 2:1 अतरे ए तीमुथी, मे जी वात कहीन पेहली अगवाय करो, जत्‌यार बी ईसुक मान्‌या, भगवानेन भक्‌ती करने करीन भेळा हया, तीने टेमे आपसान करता अतरात नी, बाकुन आखा माणसेन करता भगवान धड़े रवण्‌या, वीन्‌ती ने दुवा करनु चाहजे, ने आखान करता भगवान काजे बेसकु वारु कहणु चाहजे।
1TI 2:2 राजा ने सरकारी आफसर वाटे बी भगवान धड़े दुवा करनु चाहजे तेरेमां की आपणु भक्‌तीन जीवाय ने ईज्‌जत भेळा सांती मां मेळीन रवणेन मुखु जड़से।
1TI 2:3 जु भगवान आपणु काजे पापेम सी छुड़ावे तीना काजे बी जी वात वारु लागे।
1TI 2:4 भगवानेन मरजी जी छे की आखा माणसेन भलो हवणु चाहजे ने चे छाचाय काजे वारु रीते जाण लेणु चाहजे।
1TI 2:5 काहाकी भगवान एकुत छे, ने भगवानेन ने माणसेन ईचमां बी मेळ करावण्‌यु बी एकुत छे, ने जु मेळ कराड़न्‌यु ते, ईसु मसी छे, जु माणसेक बचावणे करीन माणुस बणीन आवलु।
1TI 2:6 ईसु आपसा काजे आखा माणसेन पापेम सी छुड़ावने करीन आपसा काजे भगवान अगळ बादान तसु चड़ाय देदु ने हेरी गवाय सय टेम पर देदलु।
1TI 2:7 ने भगवान मेसेक हीनी छाचाय्‌न बारामां हय ईसुन गवा देणे करीन ईसुन नेवताळु ने परचार करन्‌यु बणावलु छे खास करीन आड़जात्‌या नी-यहुदी माणसेक ईनी छाचाय्‌न अनसारे भुरसु करनेन बारामां सीकाड़न्‌यु बणावलु छे। तेबी थुड़ाक माणसे मेसेक ईसुन नेवताळु नी मान्‌ता। बाकुन मे जी वात कहलु छे ची वात सय छे।
1TI 2:8 तेरेमां मे चाहो की जागे-जागे ईसुन आखी मां बीना झगड़ा मां चुखला हात काजे उचा करीन दुवा करता रहणु चाहजे।
1TI 2:9 असात बायरा बी समळीन रहणु चाहजे, ने जचे असा पुथल्‌या पेहरीन जीवणु चाहजे ने कान्‌या भाती-भातीन नी गुथणु चाहजे ने सनान गावणो, नीते मोती नी पेहरनु चाहजे, ने बेसका मंहगला पुथल्‌या नी पेहरनु चाहजे,
1TI 2:10 बाकुन भला काम सी काहाकी भगवान भक्‌ती करने वाळा बायरा काजे ज सय छे।
1TI 2:11 बायरा काजे मां सीकाड़न्‌या काजे हुगा रय्‌न पुरो मन लागाड़ीन सीकणु चाहजे।
1TI 2:12 मे कहो की बायरा नी अदमी काजे सीकाड़नु चाहजे ने नी अदमी पर हक जमाड़नु चाहजे बाकुन हुगा हय रवणु चाहजे।
1TI 2:13 काहाकी भगवान आदम अदमी काजे पेहेल घड़्‌यु ने पछेन हव्‌वा बायर काजे घड़्‌यु।
1TI 2:14 ने आदम अदमी नी ठगायु, बाकुन हव्‌वा बायर भुतड़ान आहे लागीन ठगाय गुय, ने भगवानेन हुकुम काजे पेहेल तुड़ी।
1TI 2:15 तेबी बायरी पुर्‌या-पारीक पयदा करी ने तीनुक वारु भुरसा मां परम मां ने चुखा काम मां सीकाड़ती जाय्‌न भगवानेन काम मां साजेली बणसे ने चे छुटकारु हात करसे।
1TI 3:1 जी वात संय छे की जु बी नी पुडारी बणन्‌ने हेर करे ती चु भलो काम करनेन हेर करे।
1TI 3:2 डाहलु असली जीवाय जीवण्‌यु हवणु चाहजे तेरी जीवाय मां काय बी वाक नी हय पुडारी एकुत लाडीवाळु हवणु चाहजे ने तेरी लाडी तेरे पर नी अदराय करे असी जीवाय जीवण्‌यु हवणु चाहजे; दसो पेट असो करन्‌यु नी बाकुन आपसान जीव काजे कब्‌जाम राखीन दीसरा साते वारु वेहवार राखण्‌यु हवणु चाहजे चु असु माणुस हवणु चाहजे तेरी दीसरा ईज्‌जत करता हय ने चु आपसान घर आवण्‌यान आव-भाव करीन तींद्‌री खातरी करने वाळु हवणु चाहजे, ने वाळाक खरली वात हुनर सी सीकाड़ने वाळु हवणु चाहजे।
1TI 3:3 नी पुडारी दारु पीणेवाळु ते नी लड़ाय करने वाळु नी हवणु बाकुन चु भुळु रहणु चाहजे, ने नी लड़ाय ने नी धनेन लालच्‌यु हवणु चाहजे।
1TI 3:4 चु आपसान घरनाक अतरुत वारु अगवाय करन्‌यु, ने तेरा पुर्‌या-पारी जलम तेरु अबरु राखता हय, ने आखी वातेम तेरु हुकुम मानीन तेरा कब्‌जाम रहता हय।
1TI 3:5 कदी तीनाक आपसा घरन्‌यान वारु अगवाय ने राखवाळी करता नी आवड़े, ती चु भगवानेन मंडळीन आखा माणसेन राखवाळी कसु करसे?
1TI 3:6 पछेन ज की ईसु पर भुरसु करला नवला चेलाक, नी ते चु असु कय्‌न मटाय करने बाजी जासे की, मे मामार पुडारी बण गुयु; ने असु करीन चु भुतड़ान तसु मटाय करीन नीयावेन डंड हात कर लेसे। असो नी हवणु चाहजे।
1TI 3:7 ने बाहार वाळा माणसे बी तेरी वाक नी-नीकाळनु चाहजे, असो नी हवे की भुतड़ु तीनाक तेरा गुनान फांदेम फांद लेसे।
1TI 3:8 असात पावर्‌या बी वीनगुनाळी जीवाय जीवीन नावसाद्‌या हवणु चाहजे। चे दारुड़्‌या नी हवणु चाहजे, ने काहने बी भात्‌ये हायाळ्‌ळा नी हवणु चाहजे।
1TI 3:9 बाकुन भुरसु करीन सातायली वात काजे चु चुखा मन करीन राखणु।
1TI 3:10 खास पावर्‌यु बणावणे सी पेहेल पारखीन देखणु चाहजे तत्‌यार कदी नी-गुनावाळा नीकळे ती पावर्‌यान काम करनु चाहजे।
1TI 3:11 असात बायरा बी चुरी-चुगली करने वाळा नी हवणु चाहजे, बाकुन आखी वात सामळीन, ने वात मां भुरसु करे असा हवणु चाहजे।
1TI 3:12 पावर्‌यु एकुत लाडी वाळु हवणु चाहजे ने आपसान पुर्‌या-पारीन ने आपसान आखा घरन्‌यान वारु रीते अगवाय करन्‌या ने राखवाळी करन्‌या हवणु चाहजे।
1TI 3:13 काहाकी जु पावर्‌यान काम वारु रीते सी कर सके, चु तेरे वाटे वारलु नाव वाळा ने तीना भुरसा मां जु मसी ईसु पर जु तींद्‌रु भुरसु छे, तीना भुरसान बारामां दीसराक कह्‌णे मां बी तीनुक अळी जादा हिम्‌मत जड़ जासे।
1TI 3:14 मे तारे धड़े छाटुस आवणेन आस राख रयु। पर बी जी वात तुसेक तेरेमां लिखो की
1TI 3:15 कदी मेसेक आवणे मां वार लाग जाय, ती तु जाण ले की भगवानेन घरना मां जु जीवतेलु भगवानेन मंडळी छे, ने चु छाचीन खुटु ने नेवु छे कसों वेहवार करनु चाहजे।
1TI 3:16 तीनी छाचाय पर टेकीन आपणु भगवानेन भक्‌ती कर रया ची छाचाय पेहेल सातायली हतली बाकुन भगवान हय तीनी छाचाय काजे उजेंतु करलु छे हेरेम काय बी सक नी हय जी छाचाय बेसकी उंडी छे ने असी छे: ईसु मसी डील मां उजेंतु हयु, चुखली-आत्‌मा मां धरमी बण्‌यु, चु सरग वाळा खबर लावण्‌या काजे देखाव पड़्‌यु। आड़जात्‌या नी-यहुदी माणसे मां तेरु परचार हयु, ईनी कळी मां माणसे तेरे पर भुरसु कर्‌या, ने चु सेक-सींगार भेळु सरगे मां हाकलाय गुयु।
1TI 4:1 बाकुन भगवानेन चुखली-आत्‌मा चुखी झण असी कह्‌वे की, आवणे वाळा थुड़ाक दाहड़ा मां लुच्‌चा माणसे, चे भुतड़ान जमेन वाये लागीन मंडळीन माणसेक ढंगड़ा करीन भुतड़ान जमेन भोंगलाड़नी वात सीकणे बाजी जासे, तीनु सीकाड़न्‌यान वात सामळीन थुड़ाक माणसे तींद्‌रे वाये लाग जासे, ने ईसु पर सी भुरसु छुड़ीन भटकी जासे।
1TI 4:2 ज तीनु लुच्‌चा माणसेन घमंडीन वजे सी हवसे जसों चामड़ो तात्‌ले लुहड़े डामणे सी बेहरो फट हय जाय।
1TI 4:3 चे ईयाव करने सी रुकसे ने खाणो-खाणेन थुड़ीक चीजे सी छेटा रवणेन हुकुम आपसे तीनुक भगवान हेरेसी बणावलु की भगवान पर भुरसु करन्‌या ने छाचाय काजे उळखणे वाळा हीनाक तु बेसकु वारु करीन कय्‌न खाणो खासे।
1TI 4:4 काहाकी भगवानेन बणावली आखी एकेक चीज वारु छे ने कुय चीज बेकार नी हय बाकुन ज की तु बेसकु वारु करीन कय्‌न खाणु चाहजे।
1TI 4:5 काहाकी भगवानेन वायदु करला बुलेन अनसारे दुवा करने सी आखो काय चुखो हय जाय।
1TI 4:6 कदी तु भायस्‌यो ने बहणस्‌या काजे हीनी वातेन हेर कराड़तु रवजी, ती ईसु मसीन वारलु पावर्‌यु बणसी, ने भुरसु ने तीनी वारलु सीकाड़ली वात सी च तु मान्‌तु आय रयु तारी चुखली-आत्‌मा मां वारु पुसायतु आय रयु।
1TI 4:7 बाकुन वीटेळ्‌ळा ने डाहली बायरीन आस दाखला सी छेटे रहु, ने भगवानेन भक्‌ती करनेन वात पर मन लागाड़्‌या कर।
1TI 4:8 एक दाखलान साहरे मे तुसेक जी वात समजाड़ो, डीलेक मेहनत करीन सीकाड़ने सी थुड़ुक नफु जड़े। बाकुन भगवानेक गमे असी जीवाय जीवणे करीन आपसाक सीकाड़ने सीत आखे भात्‌ये नफु हवे। असो करने सी, धरती पर वाळी जीवाय मां बी, ने सरगेम आवणे वाळी अमरकायान जीवाय मां बी नफु जड़से। भगवान असुत वायदु करलु छे; अतरे भगवानेक गमे असी जीवाय जीवणे करीन आपसाक सीकाड़तु रव।
1TI 4:9 जी वात संय छे, ने तुहुं आखी भातीन वातेक मानीन जीवजु।
1TI 4:10 काहाकी हामु मेहनत ने कुसीस हेरे वाटे करजे की हामरी आस हीना जीवतेला भगवान पर छे जु आखा माणसेन ने खास करीन भुरसु करन्‌यान छुटकारु छे।
1TI 4:11 तु ईनी आखी वातेन हुकुम आप ने सीकाड़तु रव।
1TI 4:12 काहनाक तु जुवान्‌यु छे करीन तुसेक हेटु नी समजणु चाहजे। बाकुन बुल ने वेहवार ने परम, ने भुरसु ने चुखली जीवाय जीवणे मां बी दाखलु बण जां।
1TI 4:13 जत्‌यार लग मे नी आवो; तत्‌यार लग नी माणसे काजे खरली सास्‌तुर भणीन सामळावतु रव, ने तेरेत अनसारे तीनुक समजाड़तु रव, ने सीकाड़तु रव।
1TI 4:14 जत्‌यार मुख्‌या भेळा हय्‌न तारे पर हात मेकला ती जड़ला, भगवान सी दुवा करला, तीने टेमे भगवानेन अघी सी आवणे वाळी वात बताड़न्‌या माणुस, भगवान पुठ्‌ये हय्‌न तारे बारामां वात कह्‌लु; तीने टेमे भगवान जु खास वाटु तुसेक आपलु तीना वाटाक रीकामु घुण रहणी देय।
1TI 4:15 हीनी वात काजे हेर करतु रव ने हेरेत मां तारो मन लागाड़तु रव, तत्‌यार ते तारी चुखली-आत्‌मा ताकत ने सेवान हर ने हुनर आखा अगळ उजेंती हय जासे।
1TI 4:16 तु भगवानेन कह्‌याम जापताये जीवजी ने जापताये सीकाड़जी असुत कर्‌या करजी तत्‌यार ते तु बी छुटकारु हात करसी ने तारी सामळने वाळा बी छुटकारु हात करसे।
1TI 5:1 काहना बी डाहला माणसे काजे लड़जी घुण, बाकुन तीनाक बास जाणीन समजाड़ देजी, ने जुवान काजे भायस जाणीन समजाड़ देजी।
1TI 5:2 ने डाहली बायरा काजे आयस जाणीन समजाड़ देजी; ने जुवान बायरा काजे चुखला वीच्‌यार सी बहणीस जाणीन समजाड़ देजी।
1TI 5:3 छाचलीन रांडायला बायरान छे तींद्‌री ईज्‌जत करजु।
1TI 5:4 कदी काहना रांडायला बायरान पुर्‌या-पारी नीते पुर्‌यान पुर्‌या हय ती चे पेहल आपसात घराणा मां रांडायलान सेवा चाकरी करीन आपसी भक्‌तीन उळखाण देणु चाहजे। काहाकी आपणा आस्‌या-बास्‌या नानला हतला ती चे परम सी आपणी सेवा चाकरी कर्‌या तीनी सेवा चाकरी काजे पछी वाळनु चाहजे, ती भगवान काजे बी गमे।
1TI 5:5 तीनी रांडायली बायरीन कांखुर बी आसरु नी हय, ने भगवानेन आस करीन जीवे, ने रात-दाहड़ु भगवान धड़े लीलघाय ने दुवा करनेम झींग पड़ली रवे।
1TI 5:6 बाकुन जी रांडायली बायर वार सुके जीवीन बेसकी मुजा करे ची जीवतेली हय्‌न बी मरला मुजुक छे।
1TI 5:7 ईनी वातेन बी हुकुम आप्‌या कर की तेरेमां की चे दीसरान वाक नीकाळे।
1TI 5:8 बाकुन कदी काहनुस आपसान भायस ने आपसान घरन्‌यान फीकुर करीन मदत नी करे, ती चु भुरसा मां सी छेटु हय गुयु ने चु भुरसु नी करे, तींद्‌रे सी बी जादा भुंडुत हय गुयलु छे।
1TI 5:9 तीनी रांडायली बायरीन नाव लिखाय जासे ची सांठ साल सी कम साल वाळी नी रवे, ने एकुत लाडु करली हय।
1TI 5:10 ने भलो काम मन लागाड़ीन करने मां बी, ने ची पुर्‌या-पारी काजे पाळी-पुसी हय, ने अनजाण्‌या माणसेन बी सेवा चाकरी करली हय, ने चुखला माणसे सी पाय धुवली हय, ने दुखी माणसेन मदत करली हय, ने असा भाती-भातीन काम मां मन लागाड़ी हय।
1TI 5:11 बाकुन जुवान रांडायला बायरान नाव घुण लिखे, काहाकी जत्‌यार चे ईसु मसीन कुहराय करीन आराम मां पड़ जाय ती ईयाव करने हींडे।
1TI 5:12 ने असी करीन ची पेहली बुली काजे तुड़ीन गुनाळी हय जासे।
1TI 5:13 ने असला जुवान रांडायला बायरा दीसरान घर जाय-जाय्‌न उजग्‌या टेवाय जासे ने उजग्‌या नी बाकुन कारा बी ने चीत वात कही-कहीन फालतु दीसरा काजे खुटी करसे। ने असा करीन चे आधला रुटा पर दाळ झेलन्‌या बण जासे।
1TI 5:14 तेरेमां मे ज चाहो की जुवान रांडायला बायरा ईयाव करे ने पुर्‌या वाळा बणीन घर बार समाळे, ने काहनाक वीरुद करने वाळा माणसे काजे मुखु जड़से तीनुक असु मुखु नी जड़नु चाहजे।
1TI 5:15 काहाकी थुड़ाक रांडायला बायरा असा करता जाय्‌न भगवानेन वात सी छेटे हय्‌न भुतड़ान वात मान्‌या बण गुयला छे।
1TI 5:16 कदी काहना भुरसु करन्‌यान रांडायला बायरा हय ती चे तींद्‌रा घरन्‌या तीनी रांडायली बायरी काजे च चाहे आपणु चाहजे मंडळी पर जादा बुझ नी पड़े तेरेमां की चे तींद्‌री मदत कर सके चे छाचलीन रांडायला बायरा छे।
1TI 5:17 तु माणसेक असु सीकाड़जी जे पुडारी ईसुन नी माणसेक वारु अगवाय करन्‌या ने राखवाळी करन्‌या छे, तीनु पुडार्‌यान दुय गुणा ईज्‌जत करजी।
1TI 5:18 काहाकी खरला सास्‌तुर मां बी लिखलो छे की, “अन मसणे करीन खळाम, जुपला बेलेन मुंहडे मसको मां बांदु,” काहाकी “दाहड़क्‌या काजे दाहड़कीन हक छे।”
1TI 5:19 कुय बी गुनावाळु, तारे अगळ नी काहना पुडारीन वाक नीकाळे ती, दुय-तीन गवान गवाय सामळे बीगुर वाक नीकाळन्‌यान घुण सामळे।
1TI 5:20 असु करीन पाप करता रवे, तीनुक आखा माणसे अगळ लड़जी, ती दीसरा बी पाप नी करनु चाहजे करीन बीहसे।
1TI 5:21 भगवान ने मसी ईसु ने अळी तेरा नेवाड़ला सरगदुत अगळ तीनुक हजुर जाणीन मे तुसेक चेताव, की मन लागाड़ीन ईनी वात काजे मान्‌या कर, ने काहनास काम काजे काट छाट मां करे।
1TI 5:22 काहनाक वारु पंतारजी ने खरला नीकळे तीत तींद्‌रे पर हात मेलीन तींद्‌रे मुणके काम मेलजी। नीते तींद्‌रा पापेन साजल्‌या बणनेन गुनु तारे पर पड़से आखी हालत मां आपसा काजे चुखलु बणायन राख।
1TI 5:23 आवणे वाळा दाहड़ा मां पाणी अतरुत घुण पीये, बाकुन पछुत-पछुत मांदु हवणेन वजे सी तु ईतरु-ईतरुक अंगुरेन रस बी पीया करजी।
1TI 5:24 थुड़ाक माणसेन पाप मां उजेंता हय जाय ने नीयाव करने वाटे पेहलुत जाती रवे, बाकुन थुड़ाक माणसे पछळ सी आवे।
1TI 5:25 थुड़ाक माणसे दीसरान देखायता भला काम करे; अतरामा जी वात आखा अगळ उजेंती करे; तेबी तींद्‌रा भला काम जलम सातायला नी रवे; बाकुन एक दाहड़ु उजेंता हय जासे।
1TI 6:1 ईसु पर भुरसु करन्‌या मायन जतरा बी माणसे, दीसरा माणसेन गुलाम बणीन रय र्‌या ने जुड़ान नेचा छे, तीनुक असु सीकाड़ जी की, तुहुं आपणा-आपणा मालीकेन वारु ईज्‌जत करजु, नीते दीसरा माणसे ईसुन सीकाड़ली वात काजे काटणे बाजी जासे, ने भगवानेन नाव-बद्‌दी हवसे।
1TI 6:2 तींद्‌रु मालीक भुरसु करने वाळु छे, तीनाक चे भाय हवणेन वजे सी नानलु नी जाणे ने तेरी अळी बी सेवा-चाकरी करनु, काहाकी हेरेसी फायदु लेणे वाळा भुरसा वाळा ने परमवाळा छे। हीनी वातेक सीकाड़तु ने समजाड़तु रवजी।
1TI 6:3 थुड़ाक माणसे आपणी वात काजे नी मान्‌ता। बाकुन जतरी बी वात मे तुसेक सीकाड़ने करीन कय रयु, ची आखी वात आपणा मालीक ईसु मसीन वातेन अनसारे छे, ने माणसे मां खरली भक्‌तीन अनसारे पाक्‌की सीकापण छे।
1TI 6:4 जु काहनुक जी पाक्‌की सीकापण छुड़ीन लुच्‌चाय वात सीकाड़े, ती चु मटाय करन्‌यु बण गुयु। तीनाक ते खरी भक्‌तीन बारामां काय बी मालुम नी हय; तेबी चु लड़ाय करने बाजी जाय, जां लग की फालतु वात मां लड़ाय पड़े। असो लड़ाय करने सी कुहराय ने बीरजु, ने नाव-बद्‌दी, ने भुंडी-भुंडी संक्‌या,
1TI 6:5 ने तीनु माणसे मां फालतु झगड़ु उब्‌जे, तींद्‌री अक्‌कल बीगड़ी गुय, ने चे छाचाय सी छेटे हय गुया, ने चे ज समजे की ईसुन भक्‌ती करनु, पयस्‌या कमायणु वारलु धंदु छे।
1TI 6:6 अतरे आपणुक जी वीच्‌यार राखणु चाहजे की आपणे धड़े ज धन छे, तत्‌रात धनेम नीसरा रवीन ईसुन भक्‌ती करनुत खरली कमाय छे।
1TI 6:7 आपणु ते ईनी कळी मां काय बी लीन नी आया, ने मरसु ती, ईनी कळीम सी काय बी नी ली जाजे।
1TI 6:8 कदी आपणे धड़े खाणेन ने पेहरनेन पुथल्‌या हय, ती ईनी चीज मां नीसरा रवणु चाहजे।
1TI 6:9 बाकुन जे मालदार हवणे चाहजे, चे भुतड़ान फांदेम ने भाती-भातीन पारख मां पड़ जाय ने चे असी बेसकी हाय करने बाजी जाय तीनी हाय सी फायदु नी हवे, बाकुन उल्‌टो नुकसाण हवे ज आखो तीनु माणसेक नड़से ने सार देसे; जसों दर्‌या मां पड़न्‌या माणसे काजे दर्‌यान भंवरु मुयड़ीन सार देय।
1TI 6:10 काहाकी पयस्‌यान लालच आखी भातीन कुहराय्‌न जड़-मुळ छे, बेसका जणा धनेक हात करनेन हेर करता-करता ईसु पर वाळा भुरसाम सी भटकी गुया ने आपसात भाती-भातीन गरा मां पड़ गुया।
1TI 6:11 बाकुन ए तीमुथी, तु ते भगवानेन माणुस छे, तु ईनी वात सी छेटु रवजी; ने तु धरमेन वातेन, भुरसाम, ने गम खाणेन वातेन, भक्‌ती, ने परम, ने नरमायन हीनी आखी वातेक पाळतु रव।
1TI 6:12 भुरसान वारलु लड़ाय लड़; ने तीनी अमर जीवाय काजे हात कर ले, तेरे वाटे तु बुलावलु छे ने बेसका माणसे अगळ गवा भरलु छे।
1TI 6:13 आखा काजे जीवाय आपण्‌यु ते भगवान छे, ने आखा काजे जीवतु राखे, ने मसी ईसु गवा देदु चु पुंतीयुस पीलातुस अगळ आपसान छाचाय्‌न गवा देदु। तेरेमां भगवान अगळ ने ईसु मसी अगळ तुसेक जु हुकुम आपो की।
1TI 6:14 की तु आपणा मालीक ईसु मसी काजे पछु उजेंतु आवता लग नी-गुनावाळा ने चुखलु रय्‌न हुकुम मान्‌तु रव।
1TI 6:15 तीनाक चु संय टेम पर देखाड़से ने चु आखा सी वारु ने मटु छे, ने एकुत राज करन्‌यु छे, चु राजान राजा ने मालीकेन मालीक छे।
1TI 6:16 ने चु अतरुत अमर छे, ने चु ईसु मसी जां कुय नी जाय सके तीना वीजाळा मां रवे अळी नी तीनाक कुय माणुस नी देख्‌यो। तीनात काजे जलम ईज्‌जत जड़ती रवसे ने तेरोत राज जलम रवसे। आमीन।
1TI 6:17 ईनी दुनीया मालदार काजे हुकुम आप की चे ईनी दुनीयान मामार सरन्‌या धनेन भुरसे मटाय नी करनु चाहजे बाकुन भगवानेन भुरसे जीवणु चाहजे, चु आपणुक खुसी मां सुकेन जीये जीवणे करीन ज चाहजे च आखो नीचळे मने आपतु रवे।
1TI 6:18 चे भलाय करता रवणु चाहजे ने चे भला काम मां मालदार बणे ने दीसरान सात देणे मां तीयार रवणु चाहजे ने वारु मने धरम करन्‌या बन्‌नु चाहजे।
1TI 6:19 ने चे असला भला काम मां मालदार बणसे ती भगवानेन नींगाम सरगेन धन भेळा करला मालदार गीणायसे एक दाहड़ु तीनुक बी तींद्‌री खरली जीवाय मां जलम जीवणे करीन सरगे जाणु छे, चां भगवान तींद्‌रे वाटे घर बांद रयु। भगवान तींद्‌रा हीनु भला कामेक तींद्‌रे वाटे घर बांदणे साय्‌न तसु गीणसे।
1TI 6:20 ए तीमुथीयुस जी वात मे तुसेक कहलु छे, तीनी वातेक एक खजानान तसु राखवाळी कर। तीनी अक्‌कल काजे अक्‌कल कवणु भुल छे, ची छाचलीन भक्‌तीन वीरुद करन्‌या, लुच्‌चाय सीकाड़न्‌या छे। अतरामा तीनी अकलेन वात लीन फालतुत वीरुद करने ने जखड़ी पड़ने तारेन चां काहनास बी आवे ती तींद्‌रे सी छेटु रव।
1TI 6:21 छाचलीन तींद्‌री झुटी सीकापण मानीन थुड़ाक माणसे ईसु पर सी भुरसु छुड़ देदला छे। तुंद्‌रे पर भगवानेन गीण-दया हवती रवे।
2TI 1:1 मे पोलुस, भगवानेन मरजी सी ईसु मसीन नेवताळु छे। ईसु मसीन साहरे माणसेक अमर जीवाय आपणेन भगवान वायदु करलु छे, ईनी खबरेन मे नेवताळु छे।
2TI 1:2 ए तीमुथीयुस, मे पोलुस जी चिट्‌ठी तुसे काजे लिखो। तु ते मार वाटे लाटेक्‌ला मुजुक छे। आपणा भगवान बासेन ने आपणा मालीक ईसु मसीन दया, ने गीण-दया ने, सुक-सांती तुसेक जड़ती रहणु चाहजे।
2TI 1:3 ए तीमुथी, तुसेक मे रय रय्‌न हेर करो ने रात दाहड़ु भगवान सी तार वाटे दुवा करो; ने तार वाटे ते मे भगवान काजे बेसकु वारु कहतु बी रव। आपणा डाहा-डाहा बी ईना भगवानेन सेवा कर्‌या, तेरी मे चुखला मन सी सेवा करो
2TI 1:4 मेसेक मालुम छे की मेसेक छुड़ीन तुसेक जाणु पड़्‌यो करीन तु बेसकु दुखी छे। तत्‌यार ते तु बेसकु रड़्‌यु। तारो रड़नु हेर करतु-करतु मारु जीव बी दुखे। तुसेक भेळु हवणे करीन बेसकु हेर करो; तुसेक भेळु हय्‌स ती मे खुस हय जायस।
2TI 1:5 तु ईसु पर छाचलीन भुरसु करे, ईना भुरसान वातेक मे हेर करो। जुत छाचलु भुरसु तारी आयसीन आयस लोइस मां हतली। ने जुत छाचलु भुरसु तारी आयस युनीके मां बी हतलु छाचलीन, हय जुत छाचलु भुरसु तारे मां बी छे।
2TI 1:6 हेरेसी मे तुसेक हेर कराड़तु जाय्‌न कह्‌वो; मे तार पर हात मेलीन वीन्‌ती कर्‌यु, तीने टेमे जु वाटु भगवान तुसेक आपलु छे, तीना वाटा काजे वारु रीते कामे लावतु रव।
2TI 1:7 ईनी वातेक घुण इसरु; भगवान आपणु काजे डरेन जीव-आत्‌मा ते नी आप्‌यु, बाकुन ताकुतेन, ने परम करनेन ने आपसा जीवेक मानाड़नेन जीव-आत्‌मा आप्‌लु छे।
2TI 1:8 हेरेसी आपणा मालीक ईसुन गवा देणे वाटे, तु घुण लाजवायु, ने मे पोलुस ईसु वाटे जेलेम कुंडाय रयु करीन बी मां लाजवाये; बाकुन भगवान आपे तीना जुर सी ईसुन खुस-खबर सामळावणेन काम वाटे दुख झेलने मां मारु साजल्‌यु बण।
2TI 1:9 भगवान आपणु छुटकारु आपलु छे, ने आपणुक चुखली जीवाय जीवणे करीन बुलावलु छे। आपणु काहना बी भला कामे कर्‌या करीन ते नी, बाकुन आपसी मरजीन अनसारे आपसी गीण-दयान साहरे चु आपणुक बचाड़न्‌यु ने बुलायु। आपणे पर ईसु मसीन साहरे गीण-दया देखाड़नेन युजना, कळ घड़ायणेन पेहले सीत भगवान बणावलु। एक कह्‌याम आपणुक जी गीण-दया कळ घड़ायणेन पेहले सीत जड़ली।
2TI 1:10 ने हय भगवान छुड़ावणे वाळा ईसु मसी काजे धरती पर मकलीन आपसी जी गीण-दया उजेंतु कर देदु, ने आपसुन खुस-खबरेन परचारेन साहरे जीवाय्‌न वाट, हय अमर जीवाय्‌न वाट उजेंतु कर देदलु छे।
2TI 1:11 भगवान मेसेक ईसुन जी खुस-खबर आखेदुर सामळावणे करीन, ईसुन नेवताळु ने परचार करन्‌यु, ने सीकाड़न्‌यु बणावलु छे,
2TI 1:12 करीन मे हय ईना जेल मां ईना दुखो काजे झेलने बाजी र्‌यु। बाकुन तेबी मे नी लाजवायो काहाकी मे तीना पर भुरसु करो, तीनाक जाणो; मे ते मारा जीवेक तेरे भुरसे मेल रयु; मेसेक पाक्‌को मालुम छे, की चु भगवान, ईसुक पछु आवता लग मारा जीवेन राखवाळी करसे, जसा माणसे खजानान राखवाळी करे।
2TI 1:13 ईसु मसी पर भुरसु करनेन बारामां ने तेरे साहरे जड़न्‌या परम भेळ जीवणेन बारामां छाचली सीकापण तुसे काजे मारे साहरे जड़ली छे। जी सीकापण तार वाटे एक दाखलान तसी छे। हेरेसी ईनी सीकापण काजे ईनेत रीते चतराये पाळ्‌या कर।
2TI 1:14 जु चुखलु जीव-आत्‌मा आपणेम रवे तीना चुखला जीव-आत्‌मान मदतेन साहरे, तुसेक सुपली ईनी सीकापण काजे वारलु खजानो समजीन हेरी राखवाळी कर।
2TI 1:15 तुसेक मालुम छे की आसीया जीलाम सी आवला ईसुक मान्‌या आखा मारी सात छुड़ देदा; ने फुगल्‌यु ने हीरमन्‌यु लग जात रया।
2TI 1:16 असु करीन चु बेसका कावा मेसेक हिम्‌मत आपणे आवलु; मे पोलुस जेलेम साकळ्‌ये करीन बांदाय रयु करीन चु कदी नी लाजवायु। हेरेसी मालीक भगवान धड़े मारी वीन्‌ती जी छे। की चु उनेसीफीर्‌यान ने तेरा घराणा पर आपसी दया करे।
2TI 1:17 बाकुन उनेसीफीर्‌यु ते दीसरा आसीया देसवाळान तसु नी हय जत्‌यार चु रोम सहर मां आयु, ती चु मेसेक भेटणे करीन काळजी करीन हेर्‌यु, ने भेट्‌यु।
2TI 1:18 ईफीसुस सहर मां बी, चाकरीन काम उनेसीलीर्‌यु करलु छे, तीना चाकरीन कामेक तु बी वारुत जाणे। हय, मालीक भगवान नीयावेन दाहड़े तेरे पर बेसकु दया करनु चाहजे।
2TI 2:1 हेरेसी ए मार बेटा तीमुथी, ईसु मसीन साहरे जड़ली भगवानेन गीण-दया सी तु जीवेम वारु काठु हय जां।
2TI 2:2 ने तु मार धड़े सी जी-जी वात बेसका गवा देण्‌या अगळ सामळीन सीक्‌लु, ची-ची वात ईमानदार माणसेन सुपरुत कर देजी, जे दीसरा माणसेक सीकाड़ने मां हुनर वाळा छे।
2TI 2:3 जसु एक वारलु सीपायड़ु आपसा देसे वाटे दुख झेले तसुत, तु बी ईसु मसी वाटे दुख झेलने मां मारु साजल्‌यु बण।
2TI 2:4 काहनु बी माणुस जत्‌यार सीपायड़ान नोकरी करने जाय, ती चु आपसा भरती करन्‌या मालीक काजे खुस करनेन झींग मां रवे ने चु ईनी कुळीन दीसरा कामे मां झींग नी पाड़े तसुत, तु बी आपणा मालीक ईसुक खुस करने करीन तेरा सुपला कामेक झींग पाड़ीन करता रहु।
2TI 2:5 जु काहनुक ईनाम जीतणे करीन खेल मां हुड़े पड़े, ती कायदान अनुसार हुड़े नी पड़े, ती चु जीत जाय तेबी तीनाक ईनामेन पागड़ी नी जड़े।
2TI 2:6 कमारला किरसाण काजे मेरेन पेहला फळेन वाटु जड़नु चाहजे। कमारला किरसाण काजे वारलु फळ हात करने करीन भगवानेन आस कर।
2TI 2:7 जी-जी वात मे दाखलान साहरे हय कह्‌यु, तीनी आखी वात पर वीच्‌यार कर, ने मालीक भगवान तुसेक आखी वातो मां समज आपसे।
2TI 2:8 मे जी खुस-खबर सामळावो, ची खुस-खबर तीना ईसुन छे, जु दावुद राजान कुळी मां पयदा हयु, ने मर्‌या-सर्‌याम सी पछु जीवतु हय्‌न बठु हय गुयु। ईना ईसुक बराबर हेर करता रहु जु छुड़ावन्‌यु मसी छे।
2TI 2:9 ईनी खुस-खबर वाटे मे दुख झेलो। जां लग की, एक गुनु करन्‌यान तसु जेलेम साकळ सी बांदाय रयु। बाकुन भगवानेन बुल बांदायलु नी हय। तेरी खुस-खबरेन परचार ते हवतो रवे।
2TI 2:10 मे ते भगवानेन नेवाड़ला माणसे वाटे जो आखो दुख झेल लम। जे आज लग ईसुन खुस-खबर नी सामळ्‌या; एरेन करीन की चे ईसु मसी पर भुरसु करीन छुटकारु हात करे, ने सरगेम जलम सेक-सींगार हात करे।
2TI 2:11 जी वात छाचली छे की; आपणु ते भुरसु करीन पाप साते ईसु पुठ्‌ये मर गुयला छे, तत्‌यार ते तीना भुरसान साहरे ईसु पुठ्‌ये जीवसु बी;
2TI 2:12 कदी आपणु ईसु वाटे हय गम खाय्‌न दुख झेलसु, ती सरगेम तेरे पुठ्‌ये राज बी करसु; कदी आपणु कह्‌सु हामु ईसुक जाणजेत नी, ती चु बी कवसे, मे तुहुंक जाणोत नी।
2TI 2:13 बाकुन कदी आपणु ईसु वाटे भुरसु करे असा रहणु मां कमजुर हय जाजे, तेबी चु भुरसु करे असात रवसे; काहाकी चु आपसु वेहवार बदली नी सके।
2TI 2:14 तीनुक तु नेवाड़ीन सीकाड़न्‌या बणाव, तीनुक जी आखी वात हेर करावतु रवजी। ने भगवान काजे गवा बणायन तीनुक जुरदीन कवजी, की फालतु वातेम लड़ाय घुण करजु काहाकी असा लड़ाय पड़ने सी काय बी नफु नी हये, बाकुन सामळने वाळा बीगड़ी जासे।
2TI 2:15 भगवानेन छाचला बुल काजे वारु रीते कामे लावणे मां ने भगवानेक चाहजे असो काम करने मां काळजी कर; तत्‌यार ते तु भगवानेन एक वारलु पावर्‌यु कहवायसी, ने तुसेक सरमायणु नी पड़े।
2TI 2:16 ईनी कळीन माणसेन भुंडली ने फालतु वातेम सी छेटु रव, काहाकी फालतु वात करन्‌या माणसे भगवानेन भक्‌तीन वाटेम सी अदुस छेटे हवता जासे।
2TI 2:17 ने जसु एक सड़लु घाव वदतु जाय, तसीत तींद्‌री झुटी सीकापण बी माणसेम फेलायन वदती जासे, ने सामळन्‌याक खत्‌तम कर देसे। हुमन्‌यु ने फेलत्‌यु असलात छे, जे झुटी सीकापण काजे मंडळीम आखेदुर फेलाय रया।
2TI 2:18 जे दुय जणा भगवानेन छाचाय सी छेटा हय गुया, तींद्‌रो कवणु छे की आपणु जत्‌यार ईसु पर भुरसु कर्‌या, तत्‌यारुत आपसा जीवेम मर्‌या-सर्‌याम सी जीवतो हय्‌न बठो हवणु हात कर लेदला, ती हय आपणेम पछो जीवतो हवणेन काय बी वात नी बची; ने नवला डीलेम, मर्‌या-सर्‌याम सी पछो जीवतो हय्‌न बठो हवणेन वातुत नी हय असा कय्‌न हुमन्‌यु ने फेलत्‌यु, थुड़ाक माणसेक ईसुन भुरसा सी छेटा करने हींड रया, ने आपणा भुरसान पायुत उळखीन नाखणे हींड रया।
2TI 2:19 भले काय बी हय रयो हय, बाकुन भगवानेन वातेन पायु पाक्‌कु जमलु छे, ने चु पायु काहना सी नी उळखाये। तीना पाया पर चुखला सास्‌तुरेन दुय वात एक सीलठप्‌पा मुजुक लिखली छे, “भगवान मालीक आपसा खरला चेला काजे वारु उळखे।” ने “जु काहनुक कह्‌वे की ‘मे मालीक ईसु पर भुरसु करो’ तीना काजे कुहराय सी छेटे रहणु चाहजे।”
2TI 2:20 लकपती माणसेन घर मां सना चांदीन ठाहरा, अतरात नी रवे, बाकुन लाकड़ान ने धुळान ठाहरा बी रवे। काहना ठाहरा, मालीकेन खास काम आवे असा ईज्‌जदार छे, ने काहना ठाहरा, मालीकेन खास काम नी आवे, हेरेसी चे ईज्‌जदार नी हय।
2TI 2:21 कदी जु काहनुक कुहराय सी छेटु रय्‌न चुखु हय जाय, चु मालीक वाटे काम लावणे करीन तीयार करला ईज्‌जदार ठाहरान तसु छे। तीनाक भगवान मालीक, आखा भला काम वाटे वापरसे।
2TI 2:22 जुवानी मां जी भाती-भातीन भुंडली हेर आवे, तीनी हेर सी तु छेटु रव, ने जे चुखला मन सी मालीक भगवानेन नाव लेय, तींद्‌रे भेळतु, ईसुन भुरसान वातेन, ने धरमेन वातेन, ने परम सी रवणेन वातेन, ने सुकुने जीये मीळीन रहणेन वातेन पछळ, ने ईनी आखी वातेक काळजी करीन पाळतु रव।
2TI 2:23 बाकुन मे अळी कह्‌वो रीकामी ने गांडवायली वातेन लड़ाय सी छेटा रहु असली वात करने सी लड़ाय झगड़ु हवे। हेरेसी जी वात घुण इसेरजु।
2TI 2:24 मालीक भगवानेन गुलाम पावर्‌या काजे झगड़ु नी करनु चाहजे, बाकुन गम खातु जाय्‌न आखा साते दयाळु वेहवार राखणु चाहजे ने सीकाड़ने मां हुनर वाळु हवणु चाहजे।
2TI 2:25 चु वीरुद करन्‌या माणसे काजे नीचळु बणीन असो हेर करीन समजाड़न्‌यु हवणु चाहजे, की भगवान तींद्‌रा मन काजे पाप भीणी सी फेरवीन आपसे भीणी फेरवी लेसे, ने चे बी छाचाय काजे जाण लेसे।
2TI 2:26 ने तत्‌यार तींद्‌री सान आय लागसे ने चे भुतड़ान फांदेम सी छुट जासे, ने भगवानेन मरजीन अनसारे जीवणे बाजी जासे।
2TI 3:1 जी वात वारु हेर राख्‌जु की आकरी दाहड़ा मां काठली टेम आवसे।
2TI 3:2 काहाकी तीने टेमे माणसेन पाप बेसकु बड़ जासे। तत्‌यार माणसे, पयस्‌यान हायाळ्‌ळा, ने आपसान भलो हवणे चाहजे असी हेर करन्‌या, ने सोवकारला बणीन मटाय करन्‌या, ने भगवानेन नाव-बद्‌दी करन्‌या ने आस्‌या ने बासेन हुकुम नी मान्‌या बण जासे। तीनु माणसेन हीया मन मां भक्‌तीन वीच्‌यार ने भलाय करन्‌याक वारु कर्‌यु कवणेन वीच्‌यार नी रवे;
2TI 3:3 ने परमेन वीच्‌यार, ने माफ करनेन वीच्‌यार बी नी रवे। चुरी-चुगली करन्‌या, जसों पटे तसों करन्‌या, बीन दयाळा, जो बी भलो छे, तेरी वीरुद करन्‌या,
2TI 3:4 धुकु देण्‌या अनड़ाय करन्‌या ने आपसुन बड़ाय करन्‌या बण जासे। ने चे भगवानेक पुजण्‌या नी बाकुन मजा लेणेन हेर करन्‌या बण जासे।
2TI 3:5 भगवानेन भक्‌ती करनेन ढंगड़ा ते करसे, बाकुन भगवानेन भक्‌ती करने सी जी ताकत जड़े, तीनी ताकत कदी हात नी करे। असला माणसे सी छेटा रवजु।
2TI 3:6 हींद्‌रे मां असा बी छे, जे दीसरान घर मां मनेन भराय जाय, ने भुळा बायरा काजे पटाड़ लेय, जे बायरा पेहले सीत आखी वातेम बेसका हायाळ्‌ळा छे, ने पापेन बुझ सी डाबायला छे।
2TI 3:7 चे बायरा नवली-नवली वात सीकणे करीन नवला-नवला सीकाड़न्‌यान सामळे ते खरा, बाकुन तेबी तीनुक भगवानेन खुस-खबरेन छाचाय्‌न उळखाण कदी नी हये।
2TI 3:8 जसा येन्‌नेस ने यंब्‌रेस नावेन डाकणा बड़वा मुसान वीरुद करला, तसात जे सीकाड़न्‌या बी छाचाय्‌न वीरुद करे, ईनु माणसेन अक्‌कल बीगड़ी गुय, जे भुरसु करन्‌या ढंगड़ा करे, बाकुन हींद्‌रु भुरसु फालतु छे।
2TI 3:9 बाकुन जादा वार लग चे दीसराक धुकु नी दी सके। जसी येन्‌नेसेन ने योमब्‌रेसेन धुकु देण्‌या भुत वीद्‌या फालतु हय्‌न आखा अगळ उजेंती हय गुयली, तसीत ईनु सीकाड़न्‌यान धुकु देणेन सीकापण बी फालतु हय्‌न आखा अगळ उजेंती हय जासे।
2TI 3:10 बाकुन तु ते मारी सीकापण वारु जाणे। मारु वेहवार कसु छे, मारा जीवनेन ठीकाणो काय छे, मे कतरु भुरसु करो, मारु परम कसलु छे, ईसु धड़े दुख झेलने मां मे कतरु गम खादु, ने कतरीक धीरपाय राखो; जो आखो तु देख रयु ने वारु जाण रयु।
2TI 3:11 हव, अन्‌ताकीया सहर मां ने ईकुनीयुम सहर मां, ने लुसत्‌रा सहर मां, माणसे मेसेक कसा वेला पाड़्‌या, ने मे काय-काय दुख झेल्‌यु, ज बी तु देखीत रयु ने वारु जाण रयु। बाकुन भगवान मालीक मेसेक तीनु आखा दुखेम सी छुड़ाय लेदु।
2TI 3:12 हय, जतरा बी ईसु मसी पर भुरसु करता जाय्‌न ईसुन भक्‌ती करीन जीवणे हींडे, तीनु आखाक दुख झेलनु पड़से।
2TI 3:13 बाकुन कुहर्‌या माणसे, ने ठगण्‌या माणसे दीसराक धुकु देदा जासे, ने धुकु खाता जासे, ने अगास बीगड़ता जासे।
2TI 3:14 बाकुन तु तींद्‌री वातो पर जी तु सीक्‌लु छे, ने भुरसु करलु छे, ज जाणीन काठु बणीन रवजी की तु तीनुक काहना माणुस सी सीक्‌लु छे,
2TI 3:15 तु नानलु हतलु ती सीत चुखला सास्‌तुरेन वात काजे सीक्‌तु आय रयु, ने सास्‌तुरेन वात काजे मान्‌तु आय रयु। हेरेसी तु जाणे की जी सीकापण चुखली छे, चुखला सास्‌तुरेन वात तुसे काजे तीना छुटकारान अक्‌कल आपी, जु छुटकारु ईसु मसी पर भुरसु करने सी जड़े।
2TI 3:16 आखी चुखली सास्‌तुर भगवानेन अगवाय सीत तेरा लिखंद्‌रा माणसेन साहरे लिखलो छे, ने ज चुखली सास्‌तुर माणसेक सीकाड़ने करीन, ने समजाड़ने करीन, ने सुदारने करीन, ने धरमेन वात टेवाड़ने करीन बेसकी काम की छे।
2TI 3:17 हेरेन करीन की भगवानेन भक्‌ती करन्‌यु चुखलो सास्‌तुर हुनर सी वारु कामे लावीन, आखा भला कामे करने करीन तीयार हय जावु।
2TI 4:1 ईसु मसी, मरलान ने जीवतेलान नीयाव करने करीन ने राज करने करीन उजेंतु पछु आवणेवाळु छे। हेरेसी मे भगवान काजे ईना ईसु मसी काजे गवा बणायन तुसेक हुकुम आपो।
2TI 4:2 खुस-खबरेन परचार तु करतु रव; ने टेमे ने बे टेमे बी खुस-खबरेन परचार करने करीन तीयार रव। छाचली सीकापण काजे वारु कामे लावीन ने गम खातु जाय्‌न, गलत काम करे तीनुक लड़ीन समजाड़, ने गलत वातेन वीरुद करीन जाळवीन रहणे सीकाड़, ने वारु काम करन्‌यान हिम्‌मत दे।
2TI 4:3 काहाकी हीनु दाहड़ाम खुस-खबरेन परचार वारु रीते करनु चाहजे, काहाकी असी टेम बी आवसे तीने टेमे माणसे छाचली वात नी सामळे, ने जुर करसे; ने जे तींद्‌री कुहेरली हेरेक लड़ीन सीकाड़से चेत सीकाड़न्‌या तीनुक गमसे, ने असला सीकाड़न्‌या काजे चे आपसे धड़े भेळा कर लेसे।
2TI 4:4 ने तीनुक छाचली वात सामळने नी लागे, बाकुन मन घड़ाय काहनी काजे मन लागाड़ीन सामळसे।
2TI 4:5 भले काय बी हय जाय, तेबी तु आखी वातेम आपसा काजे जाळवीन राख्‌जी। ने खुस-खबर सामळावणेन कामेक दुख झेलतु जाय्‌न कर्‌या करजी ने तुसेक सुपलो जो चाकरीन काम पुरो करजी।
2TI 4:6 जसु भगवानेन चेलु आखी बादा चहड़ायलीन, आखी बादा पर अंगुरेन रस छीट देय, तसुत मे मारी आखी जीवाय, मालीक ईसु वाटे जीवीन मरने वाळु छे।
2TI 4:7 जसु दवड़नेन खेल मां एक दवड़न्‌यु आपसी दवड़ पुरी करे तसुत मे तेरा सुपला कामेक पुरु करलु छे; हव, मे ईसुन भुरसान वारु रीते पाळनी पाळ्‌ळु छे।
2TI 4:8 मारु मालीक भगवान धरम सीत नीयाव करन्‌यु छे। हय, चु भगवान ईनाम मां मेसेक आपणे करीन धरमेन पागड़ी तीयार करीन मेल रयु। ईनी पागड़ी काजे मारु मालीक ईसु नीयावेन दाहड़े मेसेक आपसे चु असली पागड़ी मेसेक अतरुत नी आपे, बाकुन तीनु आखा काजे बी आपसे जे वारु कहें, ने जे ईसु पछळ आवीन उजेंतु हवसे करीन, हेर करीन वाट देख रया।
2TI 4:9 ए तीमुथी, मारेन्‌चां मामार आवणेन काळजी कर।
2TI 4:10 काहाकी ईनी कळीन वातेक परम करीन देमास, मेसेक ने चाकरीन काम छुड़ीन थीसलुनीकी मां जात रयु, ने चाकरीन काम वाटे कोरेस्‌केंयु गलाती देसेम जात रयु, ने तीतुस दलमात्‌या जीलाम जात रयु।
2TI 4:11 मारा सात देण्‌या मायन, लुकु अतरुत मारे भेळ्‌तु छे, मरकुसेन्‌चां जां ने तु आवे तत्‌यार तीनुक बी लेतु आवजी; काहाकी हयु ईसुन काम मां मार वाटे बेसकु कामकु छे।
2TI 4:12 तुखीकुस काजे मे ईफीसुस सहर मां मकली रयु।
2TI 4:13 जु कुट मे तरोआस सहर मां कारपुसेन घर मां भुली आयु, चु कुट तु ली आवजी। ने मारी किताप बी ने खास करीन चामड़ान कागदा बी ली आवजी, तींद्‌रेम खास वात लिखली छे।
2TI 4:14 लुहायड़ु सीकन्‌दर मारे पर बेसकु कुहराय करलु छे। हेरेसी हयु दसु कर्‌यु तसुत मालीक भगवान हीनाक डंड आपसे।
2TI 4:15 आपणु जी-जी वात सीकाड़ता आय रया, तीनी-तीनी वातेन हयु बेसकु वीरुद कर्‌यु, हेरेसी ए तीमुथी, तु जाळवीन रवजी ने हीना सी छेटु रवजी।
2TI 4:16 पेहली कावा जत्‌यार कुरुट मां मेसेक मारी गवा देणु पड़्‌यो, तत्‌यार दीसरु कुय बी मारी सात नी देदु, बाकुन आखान आखा मेसेक छुड़दीन जात रया। तेबी भगवान धड़े मारी जी वीन्‌ती छे की ए भगवान हींद्‌रु गुनु माफ कर दे!
2TI 4:17 बाकुन मालीक भगवान ते मार अगु अळी मारी मदत कर्‌यु, ने एक कह्‌याम मेसेक नाहरेन डाचाम सी छुड़वी लेदु। चु हेरेन करीन मारी मदत कर्‌यु की मारे साहरे भगवानेन खुस-खबरेन परचार पुरु-पुरु हवे। ने नी-यहुदी माणसे बी खुस-खबर जाण लेय।
2TI 4:18 ने जु मालीक भगवान मेसेक आखी भातीन कुहराय सी बचाड़से, ने मेसेक छुटकारु आपीन सरगेन राज मां पुगाड़ देसे। तीना मालीकेन जलम बड़ाय हवती रहणु चाहजे, आमीन।
2TI 4:19 परीस्‌कीला बायर ने तेरा घरवाळा अक्‌वीला, काजे ने उनेसीफीर्‌यान घराणा काजे मार भीणी सी वारु छे की करीन पुछजी।
2TI 4:20 ईरास्‌तुस कुरींथीस सहर मां रय गुयला छे, ने तरुफीमुस काजे मीलेतुस सहर मां मांदलुत रहणीदीन मेसेक आवणु पड़्‌यो।
2TI 4:21 सींगेन दाहड़ा आवणेन पेहले काळजी करीन आवजी। युबुलुस, ने पुंदेस्‌यु, ने लीनुस्‌यु ने कुलुद्‌या बायर, ने ईसुक मान्‌या जां वाळा आखा भायस तुसेक वारु छे की? करीन पुछ रया ने आवीस ने आवजी कय रया।
2TI 4:22 मालीक भगवान तारी जीव-आत्‌मा पुठ्‌ये रया करे, ने तुहुं आखा काजे मालीकेन गीण-दया जड़ती रहणु चाहजे करीन असी वीन्‌ती मे भगवान धड़े करो।
TIT 1:1 पोलुस भीणी सी, जु भगवानेन पावर्‌यु ने ईसु मसीन नेवतावाळु छे, भगवानेन नेवाड़ला माणसे भुरसा काजे बड़ावणे करीन खरली वात बड़ावणे वाटे तीना काजे मकेलु छे,
TIT 1:2 तीनी अमर जीवनेन आसा पर, भगवान चु वायदु पेहलुन करलु छे, भगवान लुच्‌चाय मेलन्‌यु नी हय,
TIT 1:3 बाकुन संय टेम पर आपसा बुलेक तीना परचार सी उजेंतु करलु, जु हामरा मरण सी छुटकारु करने वाळु भगवानेन हुकुमेन अनसारे मेसेक सुप देदलु।
TIT 1:4 तीतुसेन नावेन जु भुरसा भेळु वीच्‌यार सी मारु खरलु पुर्‌यु छे। भगवान बास ने हामरु मरण सी छुटकारु करने वाळु मसी ईसु भीणी सी तुसेक गीण-दया ने सुक-सांती जड़ती रवे।
TIT 1:5 मे असु करीन तुसे केरते मां मेलदीन आवती रवलु, की तु बचली वाते काजे सुदारे, ने मारी हुकुमेन अनसारे गांव-गांव मां नी डाहला बणावे।
TIT 1:6 जे नी-गुनावाळु ने एकुत बायरीन घरवाळु हय, तींद्‌रा पुर्‌या बी भुरसु करन्‌या हय, ने तींद्‌रे पर लुच्‌चाय ने तींद्‌रे मां नी मान्‌ने वाळा छे, करीन गुनु नी हय।
TIT 1:7 काहाकी मंडळीन मुख्‌या काजे भगवानेन पावर्‌यु नाते नी-गुनावाळु रवणु चाहे; नी हुकुम मान्‌ने वाळु, नी रीस वाळु, नी पीने वाळु, नी लड़ाय करने वाळु, ने नी चुरी करीन खाने वाळु हवणु चाहजे।
TIT 1:8 बाकुन आव-भाव सी मेजवानी करने वाळु, भलाय करने वाळु, हुस्‌यार, छाचलु, चुखलु ने नीयम पर चालने वाळु हवणु चाहजे;
TIT 1:9 ने भुरसु राखणे लायक बुले पर काठा बणीन रहु; जे धरमेन सीकापणेन अनसारे छे, काहाकी खरली सीक सी दीसरा काजे सीकाड़ सके, ने फालतु वात पर बक-बक करने वाळान मुंहडा बी बंद कर सकजे।
TIT 1:10 ज तेरेमां जरुड़ी छे काहाकी बेसका माणसे खुद पर गम नी राखे ने फालतु वात बणायन दीसरा माणसे काजे बी भटकाड़े। मे खास करीन यहुदी माणसे काजे जी वात कय र्‌यु।
TIT 1:11 हींद्‌रो मुंहडो बंद करनु चाहे। जे माणसे फालतु कमाय वाटे जी वात फालतु छे, तीनी लुच्‌ची वात सी सीकाड़ीन घर की घर बीगाड़ देय।
TIT 1:12 तीनुत मां सी एक जणु चु तींद्‌रुत अघली वात बताड़ने वाळु छे, चु कह्‌लु छे, “केरती माणसे जलम लुच्‌चा, उजग्‌ला जनवार्‌या ने आपसात ने पेट भरता रहे।”
TIT 1:13 जी गवा छाचली छे, तेरेमां तीनाक वारुस लड़ीन चेताव की चे भुरसा मां पाक्‌का हय जाय।
TIT 1:14 ने यहुदीन माणसेन काहानीया ने तीनु माणसेन हुकुम पर मन नी लागाड़े, जे छाचली वाट सी भटकी जाय।
TIT 1:15 चुखला माणसे वाटे आखी चीज चुखली छे, बाकुन भुंडात ने नी भुरसु करने वाळा वाटे काय बी चुखलो नी हय नीते तींद्‌रु डीमाक ने अक्‌कल दुयु चुखलो नी हय।
TIT 1:16 चे कहें की हामु भगवान काजे जाणजे बाकुन तींद्‌रा काम सी तीनाक मना करे; काहाकी चे भुंडात काम ने नी हुकुम मान्‌ने वाळा छे, ने काहना भला काम करे असा नी हय।
TIT 2:1 बाकुन तु असी वात कर रयु जु खरली अक्‌कल सीकाड़ने लायक छे।
TIT 2:2 ने डाहला माणसे सांती ने समजदार ने खुद काजे हक मां बणायन राखे, ने तींद्‌रु भुरसु ने परम ने सेण करने मां पाक्‌का रहु।
TIT 2:3 हेरेत वजे सी डाहला बायरान चाल-चालन चुखला बायरान तसा रवे; चे गुनु लागाड़ने ने नस्‌यु करनेन गुलाम नी रहे, बाकुन वारलु वात सीकाड़ने वाळी बणे।
TIT 2:4 काहाकी ची जुवान बायरी काजे सीकाड़ती रवे की आपसा घर वाळाक ने पुर्‌या सी परम राखे;
TIT 2:5 ने अक्‌कल वाळा, चुखली, डाहला माणसेन वात माने, घरेन कारबार करने वाळी, भुळी ने आपणा-आपणा घर वाळान हक मां रहणे वाळी हवणु, काहाकी भगवानेन बुलेन नाव-बद्‌दी नी हवे।
TIT 2:6 असोत जुवान अदमी काजे बी समजाड़्‌या कर की, चे हुस्‌यार बणु।
TIT 2:7 आखी वात मां आपणे आप काजे वारलु कामेन दाखलु बणाव; तारे सीकाड़ने सी चतराय, चे सीकणु चाहजे
TIT 2:8 ने असी खरली वात करु, की तीनी वात सी तुसे कुय भुंडुत नी कय सके काहाकी तु नी बाकुन उल्‌टा चे लाजवाये काहाकी तींद्‌रे धड़े तुसेक भुंडुत कहणेन काय नी रवसे।
TIT 2:9 पावर्‌या काजे समजाड़ की आपणा-आपणा मालीकेन हक मां रहे, ने आखी वात मां तीनुक खुस राखे, ने तींद्‌रे मुंहडे लागण्‌या मां बणु।
TIT 2:10 चुरी चालाकी नी करे, बाकुन आखी भाती सी पुरु भुरसु करने वाळा नीकळे, काहाकी चे आखी वाते मां हामरा मरण सी छुटकारु करने वाळु भगवानेन सीकाड़न्‌यान सुभा बड़ाय देय।
TIT 2:11 काहाकी भगवानेन गीण-दया उजेंती हवे, जु आखा माणसे मां अमर छुटकारु देखाव पड़ गुयलु छे।
TIT 2:12 ने हामुक लड़ीन सीकाड़े, की हामु भक्‌ती नी करने वाळा ने दुनीयान चीज सी मन फेरवीन ईनी कळी मां हुस्‌यार ने धरमेन कामे सी ने भक्‌ती सी जीवन जीवजे;
TIT 2:13 ने तीना वारु आसेन नीते आपणा मटला भगवान ने मरण सी छुटकारु करने वाळु ईसु मसीन सेक-सींगार उजेंतु हवणेन वाट देखता रहे।
TIT 2:14 जु खुद काजे हामरे वाटे दी देदलु छे, काहाकी हामुक आखा भातीन जे धरमेन काम नी हय तींद्‌रे सी छुड़ाय लेय, ने चुखा करीन आपणे वाटे एक असी जाती बणाय लेय जे भला काम करनेन हवस देय।
TIT 2:15 आखे हकेन साते जी वात कव ने समजाड़ ने सीकाड़तु रव। काहनुक तुसेक नानु नी जान्‌नु चाहजे।
TIT 3:1 ईसु पर भुरसु करन्‌या काजे तु असा हेर कराड़, की राज करन्‌या नेतान ने आखी भातीन मुख्‌या माणसेन हक मां रहु, ने तींद्‌रु हुकुम मानु, ने आखा वारलु काम करने वाटे तीयार रहु।
TIT 3:2 कुयन बी नाव-बद्‌दी घुण करजु, ने लड़ाय मां करु; बाकुन आखा हेळी-मेळीन रहु, ने आखा माणसे साते नीचळा बणीन वेहवार करु।
TIT 3:3 काहाकी आपणु बी पेहले, डेड़-अकल्‌या हतला। ने हुकुम नी मानने वाळा हतला, ने गलत वात मां पड़ला हतला। छीनाळा मां ने पापेन गुलाम हतला ने असली आखी कुहरली वात करन्‌या हतला जां लग की माणसे आपणे सी कुहराय करतेला ने आपणु बी एक दीसरा सी रीस करतेला ने हामु बुरफाय ने कुहराय मां जीवतेला।
TIT 3:4 बाकुन जत्‌यार हामरु छुटकारु आपणे वाळु भगवाननेन भलाय, ने माणसे पर तेरु परम उजेंतु हयु, ने आपणु तेरे पर भुरसु कर्‌या।
TIT 3:5 ती चु आपणु छुटकारु कर्‌यु; ने ज धरमेन कामेन वजे सी नी, जो हामु आपसात कर्‌या, बाकुन आपणी दयान अनसारे नवला जनमेन उंघळने सी, ने चुखली-आत्‌मा सी हामुक नवला बणावणेन वजे सी हयो।
TIT 3:6 तीनाक हयु आपणु छुटकारु देणेवाळु ईसु मसी सी आपणे पर अदु सी अदु चुखली-आत्‌मा रेचव्‌यु,
TIT 3:7 भगवान तेरेमां आपणुक तेरी दया सी हामु धरमी ठहरीन अमर जीवनेन आसेन अनसारे वारीस बण्‌या।
TIT 3:8 जी वात संय छे ने मे चाहो की तु हीनी वातेन बारामां पुरा मन सी कहलु काहाकी जे भगवान पर भुरसु कर्‌या, चे भला काम मां लागला रवे, असला भला काम माणसे वाटे बेसको वारु छे। ने ईसुन भुरसाम लावणे मां नफावाळा छे।
TIT 3:9 बाकुन डेड़-अकल्‌या बणीन वात मां वात देण्‌या, ने बाप दादा, ने मन मां रीस राखीन रुकावट, ने तीना झगड़ा सी, जो नीयमेन बारामां छे, तेरेसी बचीन रहु; काहाकी चे काय बी फळ लावण्‌या नी हय ने फालतु छे।
TIT 3:10 काहनाक ढंगड़ा करने वाळा काजे एक दुय कावा समजाड़ीन तेरेसी अलग हय जाणु।
TIT 3:11 काहाकी तुहुं जाणु की असा करीन जे माणसे भटकी गुयला छे ने आपणे आप काजे गुनाळु ठहरावीन पाप करता रवे।
TIT 3:12 जत्‌यार मे तारे धड़े अरतीमास नेते तुखीकुस काजे मकलो, ती मारे धड़े नीकुपुलीस आवणेन कुसीत करजी, काहाकी मे चांहान सींगेन दाहड़ा काटणेन पाक्‌कु वीच्‌यार करलु छे।
TIT 3:13 जेनास नावेन वकील ने अपुल्‌लोस तारेन चां आवणे वाळा छे, चां सी बी अगास जाण्‌या छे, तीनु काजे ज बी चाहजे तेरी पुर्‌ती करीन तु तीनुक छाटुस मकली देजी।
TIT 3:14 तु अतरुत नी आपणा मंडळ्‌यान आखा माणसे जी वात सीकणु चाहजे माणसे ते चारे मेर बेसका कसरायला छे, हेरे सी मंडळीन माणसे काजे तु असु सीकाड़जु की, तुहुं बेसका कसरायला माणसे वाटे भला काम करने मां लागला रवु। असा करसु ती तुंद्‌री जीवाय बेसकी काम की रवसे।
TIT 3:15 जतरा बी साती मारे पुठ्‌ये छे, चे आखा तुसेक वारलु छे की? पुछ रया ने आवजी कय रया। मेसेक मालुम छे की, करेत वाळा बेसका ईसुन चेला हामु काजे भुरसा मां साजेल्‌या समजीन परम करे। तीनुक बी मार वाटीन वारलु छे की? करीन पुछ लेजी ने आवजु कय देजी। तुहुं आखा काजे भगवान गीण-दया जड़ती रहणु चाहजे।
PHM 1:1 पोलुस भीणी सी जु मसी ईसु मां जेल मां छे, ने भाय तीमुथीयुस भीणी सी, हामरु लाटेक्‌लु साती मदत करने वाळु फीलेमोन,
PHM 1:2 ने बहणीस अपफीया, ने हामरु साती सीपायड़ा अरखीप्‌पुस ने फीलेमोनेन घरेन भेळी हवणे वाळी मंडळी काजे:
PHM 1:3 आपणा भगवान बास ने मालीक ईसु मसी भीणी सी गीण-दया ने सुक-सांती आखा काजे जड़ती रहे।
PHM 1:4 मे जलम भगवान काजे वारु छे करीन कहं, ने मारी दुवा मां तुसे हेर करो।
PHM 1:5 काहाकी मे तारा तीना परम ने भुरसान वात सामळीन, जु मालीक ईसु पर ने आखा चुखला माणसेन साते छे।
PHM 1:6 मे दुवा करो की, भुरसा मां तारु हीस्‌सु लेणेन आखी मदतेन समज वाटे असर हवे, जे मसी मां हामरे धड़े छे।
PHM 1:7 ए भायस, मेसे तारा परम सी बेसकी खुसी ने सुक-सांती जड़ी, काहाकी तारे सी चुखला माणसेन मन खुसी सी भर गुयला छे।
PHM 1:8 तेरेमां मसी मां मटीत हिम्‌मत छे, काहाकी जी वात वारु छे, ची हुकुम तुसे आपो।
PHM 1:9 तेबी मे डाहलु पोलुस जु हय मसी ईसुन नाव सी जेल मां छे, ने ज अळी बी भलायन वात छे की परम सी लीलघाय करु।
PHM 1:10 मे आपणु पुर्‌यु उनेसीमुस वाटे जु मारे सी मारी बांदण मां पयदा हवलु छे, तारे सी लीलघायो।
PHM 1:11 हयु ते पेहले तारे काय कामकु नी हतलु, बाकुन हय तारे ने मारे दुयुन बेसकु कामकु छे।
PHM 1:12 तीनात काजे मतलब जु मारा काळजांन कटकु छे, मे तीना काजे तारे धड़े मकली देदलु छे।
PHM 1:13 तीनाक मे मारेत धड़े मेकणे हींडी रवलु, काहाकी तार भीणी सी ईना बांदण मां खुस-खबरेन वजे सी छे, ने मारी सेवा कर सके।
PHM 1:14 बाकुन मे तारी मरजी पाखुर काय बी नी करने हींडतेलु की तारी जी दया जबरान मां नी बाकुन खुसी सी रहे।
PHM 1:15 काहाकी कुण जाण्‌यो की हयु तारे सी ईतराक दाहड़ा लगुन असु करीन छेटे हय गुयलु, जत्‌यार चु तारेन चां पछु आवे, ती जलम तारे पुठ्‌ये रवे।
PHM 1:16 पावर्‌यान तसु नी हय, बाकुन पावर्‌या सी बी अदुस, मतलब भाय बराबर रहे, जु मारु खास लाटेक्‌लु साते ते छे, बाकुन हय डीलेम ने मालीक मां बी, तारु बी खास साती बणे।
PHM 1:17 कदी तु मेसेक हीना काम मां तारु साजेल्‌यु समजे, ती मारु आव-भाव करे, तसुत हीना उनेसीमुसेन आव-भाव करीन हीना आवरी ले।
PHM 1:18 ने कदी चु तारा वीरुद काय बी गुनु करलु हय, नीते चु तारु करजा वाळु हय ती चे पयस्‌या मां छुट जायस।
PHM 1:19 मे पोलुस मारा हात सी लिखो, की मेत भर दीस, ने ईनाक कहणेन काय बी जरुड़ी नी हय, की मारु करजु जु तार पर छे चु तुत छे।
PHM 1:20 ए भाय, जी खुसी मेसेक मालीक तार भीणी सी जड़े, मसी मां उनेसीमुसेन काजे माफी आपीन मारा जीवेक खुस कर देदु।
PHM 1:21 मेसेक पाक्‌कु भुरसु छे की मे ज काय तुसेक कहलु, तेरे सी जादा तु हेरु आव-भाव करसी।
PHM 1:22 ने ज बी, की मारे वाटे रुकणेन जागु तीयार राख, मेसे आस छे, की तुंद्‌री दुवा सी मेसे तुंद्‌रेन्‌चां आवाय जासे।
PHM 1:23 ईपर्‌फास जु मसी ईसु मां मार भेळु जेल मां छे, तीना काजे बी वारु छे की करीन पुछी रयु, आवजी करीन कय रयु।
PHM 1:24 ने मरकुस ने अरीस्‌तारकुस ने देमास ने लुकु जे मारा काम करने वाळा साती छे, हींद्‌रे भीणी सी बी तुसेक वारु छे की करीन कहें।
PHM 1:25 तुहुं आखा पर मालीक ईसु मसीन गीण-दया तुंद्‌री आत्‌मा साते बणीन रवे। आमीन।
HEB 1:1 पेहला युग मां भगवान, टेमे-टेमे ने ईतरीक-ईतरीक करीन, वारु रीते, आपसा बेसका भगवानेन अघली वात बताड़न्‌या माणसेन अनसारे आपणा डाहा-डाहा साते वात करलु।
HEB 1:2 बाकुन हय कळीन ईनु आकरी दाहड़ा मां भगवान आपसा पुर्‌यान साहरे आपणे साते वात कर रयु। चु ईना पुर्‌यान साहरे आखी कळजुग घड़्‌यु, ने ईना काजे आपसी आखी कळजुगेन हकदार्‌यु बी बणायु।
HEB 1:3 जु पुर्‌यु ते भगवानेन खरलु सीकु छे। चु आपसान ताकतवाळा बुलेन साहरे आखी चीजेक सामळे। ने चु हेरा खुन सी आपणा पापे काजे धुय देदु, ने सरगे जाय्‌न आखाम ताकतवाळा बास भगवानेन जेवड़्‌ये आंग्‌ये बठ गुयु।
HEB 1:4 असु करीन भगवान तीनाक आपसी जागा आपीन सरग वाळा काहवाळ्‌या सी बेसकु मटु बणाय देदु। ने तीनाक तींद्‌रा नाव सी बी मटो नाव आप देदु।
HEB 1:5 काहाकी भगवान काहना बी सरग वाळा काहवाळ्‌या काजे, कदी असु नी कह्‌यु, “तु मारु पुर्‌यु छे, ने हय सी मे, तारुत बास बण गुयलु छे।” ने काहनाक सरग वाळा काहवाळ्‌या काजे असु बी कह्‌यु, “मेत तेरु बास बणीस; ने चु मारु पुर्‌यु बणसे।”
HEB 1:6 ने जत्‌यार भगवान आपसा पेहला खुळ्‌या काजे ईनी कळी मां लावलु, ती तीनु, सरग वाळा काहवाळ्‌या काजे कह्‌यु, “ए मारा आखा सरग वाळा काहवाळ्‌या, तुहुं आखा हेरी भक्‌ती करु।”
HEB 1:7 ने भगवानेन सरग वाळा काहवाळ्‌यान बारामां असो लिखलो छे, जु आपसा आखा सरग वाळा काहवाळ्‌या काजे वाहळो बणावे, ने आपसा चाकर्‌या काजे आकठान लवळा बणावे।
HEB 1:8 बाकुन भगवान आपसा पुर्‌यान बारामां कहवे: “ए भगवान, तारी राजगादी जलम लग टेकली रवसे! तारा राजेन डंड नीयावेन डंड छे।”
HEB 1:9 तु नीयाव सी परम कर्‌यु, ने कुहराय सी रीस करे। तेरेसी भगवान, तुसेक तारा साते वाळा सी जादा खुसीन तेल चुपड़ीन नेवाड़ लेदलु छे।
HEB 1:10 ने भगवानेन पुर्‌या काजे काहनुक कह्‌लु, चो खरला सास्‌तुर मां असो लिखलो छे, “ए मालीक, तुत सुरु मां, धरतीक घड़्‌यु, ने सरग बी तारेत हाते घड़ायलो छे।”
HEB 1:11 चे ते खत्‌तम हय जासे, बाकुन तु ते, तसुत रवसी; आखी कळजुग पुथल्‌यान तसी जुन्‌ली हय जासे;
HEB 1:12 जसा माणसे जुन्‌ला पुथल्‌याक नाख दीन नवला पुथल्‌या पेहरे, तसु तु जुन्‌ली कळजुग बणावसी। बाकुन तु ते, तसुत छे, कदी नी बदले, ने तु जलम जीवतेलु रवसी।
HEB 1:13 भगवान, आपसा सरगदुत मायन कुय काजे बी असु कदी नी कह्‌यु: “जत्‌यार लग मे, तारा वेरीक, तारा पाय मेलनेन पयड़ी नी बणाय दम; तत्‌यार लग, तु मारे जेवड़ये आंग्‌ये बठ।”
HEB 1:14 वीच्‌यार करु! आखा सरग वाळा खबर-लावण्‌या ते, भगवानेन सेवा करन्‌या जीव-आत्‌मा अतरात छे। भगवान तीनुक छुटकारु हात करने वाळान सेवा-चाकरी करने करीन मकले।
HEB 2:1 तेरेमां आपणु काजे अळी वदु मन लागाड़ीन ईसुन बारामां सामेळ्‌ळी आखी वात पर पुरो मन लागाड़नु चाहजे, नीते कांखुर मायन आपणु छाचाय सी छेटा हय्‌न भटकी जासुन।
HEB 2:2 सरग वाळा काहवाळ्‌यान साहरे कह्‌वली खबर अतरे जुरे हतली, की तीनी वात काजे काटीन जु काहनुक तीनी वातेक नी पाळतेलु, तीना काजे डंड जड़तेलु।
HEB 2:3 वीच्‌यार करु! कदी आपणु ईसु मसीन साहरे जड़ला अतरा मटा छुटकारान नीकारु कर देसु, ती आपणु कसा काय बचसु? ईना छुटकारान बारामां आखान पेहले मालीक ईसु कह्‌लु, ने अळी जे सामळ्‌या चे हेरु पुरावु देदा।
HEB 2:4 ने भगवान बी आपसी मरजीन अनसारे गवा देण्‌या काजे चुखला जीव-आत्‌मान वाटु आपीन, तींद्‌रे साहरे सहलाणी, ने चकराड़े असा वारु काम, ने भाती-भातीन ताकतवाळा काम देखाड़ीन आपसी गवाय देतु रयु।
HEB 2:5 आवणे वाळी कळी काजे, तेरे बारामां आपणु वात करने बाजी रया, तीनी नवली कळजुग काजे भगवान, आपसा सरग वाळा चाकर्‌यान कब्‌जा मां करने करीन नक्‌खी नी कर्‌यु।
HEB 2:6 हेरे बारामां चुखला सास्‌तुर मां काहनेस जागे काहनुक असी गवा देदु, “माणुस कुण कहवाये ने तीनाक तु हेर करे? ने माणसेन पुर्‌यु कुण छे, तेरी तु फीकुर करे?
HEB 2:7 भगवानेन सरग वाळा चाकर्‌या सी थुड़ुक नानु छे। तु तेरा मुणका पर हकेन ने ईज्‌जतेन पागड़ी बांदीन, राजान आव-भाव करे, तसोत तेरो आव-भाव करलु छे।
HEB 2:8 तु तारे अनसारे घड़ायली आखी चीजेक तेरा हक मां कर देदु।” आखो काय माणसेन हक मां कर देदु, तेरो मतलब जो छे की भगवान, असी काहनी बी चीज तेरा हक मां करे पाखुर नी छुड़्‌यु, बाकुन आपणु काजे हय लग आखो काय माणसेन हक मां देखाव नी पड़े।
HEB 2:9 बाकुन हामु ज देखजे की सरगदुत सी नानु बणावलु छे, काहाकी भगवान आखो काय घड़लु छे, ने तेरे वाटे आखो काय घड़ायलो छे। करीन तीनाक जत वारु लागे की तेरु पुर्‌यु ईसु मसी, जु छुटकारु आपण्‌यु छे, चु माणुस बणीन ईनी कळी मां आवे ने भगवानेन दया सी बेसका पुर्‌या काजे सेक-सींगार मां लावणे करीन कुरुस पर मरनेन दुख झेले।
HEB 2:10 असु करीन भगवान, ईसु मसी काजे ईतरीक वार लग सरग वाळा काहवाळ्‌या सी नानुस बणाय देदु, ने चु ईसु, भगवानेन गीण-दया सी आखा माणसे वाटे मुतेन दुख झेल्‌लु। ने असु करीन भगवान तीना काजे सेक-सींगारेन ने ईज्‌जतेन पागड़ी पेहराय देदु।
HEB 2:11 काहाकी चुखु करन्‌यु ईसु, ने चुखा हवण्‌या आपणु एकुत कळीम सी छे। ने ईनी कळीन मुखी भगवान बास छे। हेरेसी ईसु आपणु भायस कहवायणे नी लाजवाये।
HEB 2:12 हेरेसी ईसु भगवानेक कह्‌यु; “ए भगवान, मारा भायस्‌यो मां, हव मारा जाती भाय मां मे तारा नाव काजे सामळाया करीस, हव तुसेक मान्‌या माणसेन टुळा मां तारीत बड़ाय कर्‌या करीस।”
HEB 2:13 ने ईसु अळी कह्‌यु, “मे भगवान मालीक पर भुरसु करीस।” ने ईसु, अळी कह्‌यु, “मे अतरुत नी, बाकुन जे पुर्‌या-पारी भगवान मालीक मेसेक आपलु, चे बी मारे भेळता छे।”
HEB 2:14 जसा भगवानेन पुर्‌या-पारी मास ने लुही मां भेसकाय रया, ती ईसु आपसुत बी तींद्‌रेन तसु हींद्‌रु साजल्‌यु बण गुयु, काहाकी मुतेन साहरे हीनाक मुत पर ताकत जड़ली मतलब भुतड़ा काजे रीकामु कर देदु।
HEB 2:15 ने जतरा मुतेन डर सी जीवन भर गुलामी मां फसला छे, हीनुक छुड़ाय ले।
HEB 2:16 आपणु जाणजे की, ईसु, भगवानेन सरग वाळा चाकर्‌या काजे नी समाळे, बाकुन अब्‌राहमेन अवल्‌यात काजे समाळे।
HEB 2:17 हेरेसी असो हवणु हतलो की, ईसु आखी वातो मां आपसा मनख्‌या भायसेन तसु बणे; पापेन बादा छुटीन पापी माणसेक भगवान धड़े मेळ कराड़े ने असो करीन भगवान वगे सी एक दयाळु ने ईमानदार डाहलु मुखी पुजारु बणे।
HEB 2:18 काहाकी जत्‌यार पारख मां रय्‌न बी दुख झेले; ती चु तींद्‌री मदत कर सके तींद्‌री पारख हवे।
HEB 3:1 अळतेन आपणु ईसु काजे भगवानेन वगे सी मकेल्‌लु नेवताळु ने मुखी पुजारु करीन मानजे ने हुकारजे। ए मारा भाय बहणस्‌या, भगवान तुहुंक सरगेन हकदार्‌या बणने करीन बुलावलु छे; ने तुहुं बी भगवानेन चुखला माणसे बण गुयला छे। हेरेसी ईना ईसु पर तुहुं पुरो मन लागाड़ु।
HEB 3:2 आपणु जाणजे की, जसु भगवानेन अघली वात बताड़न्‌यु मुसु भगवानेन घरना आखा माणसेन नफा वाटे, भगवान अगळ ईमानवाळु रय्‌न काम कर्‌यु, तसुत ईसु बी जु भगवान तीनाक नेवाड़लु, तेरे वाटे ईमानवाळु रय्‌न आपणेन करता काम करने बाजी रयु।
HEB 3:3 काहाकी ईसु मुसा सी अतरु बड़ीन सेक-सींगार लायक समजी गुयु की जतरु घर बणावणे वाळु घर सी बड़ीन ईज्‌जत राखे।
HEB 3:4 काहाकी हरेक घर काजे बणावणे वाळु रवे, बाकुन चु आखो काय बणायु चु भगवानुत छे
HEB 3:5 मुसु ते भगवानेन आखा घरना चाकर्‌यान तसु भुरसु करे असु रयु, की जीनी वात काजे समजाड़ने वाळु हतलु तीनी वातेन गवाय आप्‌यु।
HEB 3:6 बाकुन ईसु मसी ते भगवानेन पुर्‌यान रुप मां भगवानेन घरनान हकदार्‌यु छे, ने कदी आपणु हिम्‌मत राखीन भगवानेन साहरे आपली आस पर टेकला रवसु, ती आपणुत भगवानेन घरना माणसे छे।
HEB 3:7 तेरेमां चुखली जीव-आत्‌मा कह्‌वे, “कदी आज तुहुं भगवानेन बुल सामळु,
HEB 3:8 ती आपणा मन काजे काठो मां करु। जसा तुंद्‌रा डाहा-डाहा उजाड़्‌या बयड़ा मां करला।
HEB 3:9 तीनी टेमे तुंद्‌रा डाहा-डाहा मेसेक पारेखला, ने चे चाळीस साल लग मारा वारु कामेक देखला।
HEB 3:10 हेरेसी मे रीसवायन तीनी पीड़ीन माणसेन बारामां असु कह्‌लु, जे ते मारी वाट काजे उळखीन बी, मारे वाट्‌ये नी चाल्‌या, ‘ईनु माणसेन भटकायण्‌यो मन छे।’
HEB 3:11 तत्‌यार मे मारी रीस मां आय्‌न सगुन खाय्‌न कह्‌यु, ‘छाचलीन चे मारा आरामेन जागा मां नी भराय सके।’”
HEB 3:12 ए भायस्‌यो ने बहणस्‌या, तुहुं चेतीन रवु, नीते तुंद्‌रो मन कुहर्‌यो ने भुरसु नी करने वाळो हय जासे, ने तुहुं जीवतेला भगवान सी छेटा हय जासु।
HEB 3:13 बाकुन तुहुं, जत्‌यार लग आजुन दाहड़ु छे, तत्‌यार लग एक दीसराक हिम्‌मत आपीन समजाड़ता रहु, नीते कांखुर तुंद्‌रे मायन काहनुक पाप मां पड़ीन डेड़ अकल्‌यु बण जासे।
HEB 3:14 काहाकी हामु ईसु मसीन हकेन हीस्‌सु लेसु। ती हामु आपणा पेहला भुरसा पर जलम लग बणीन टेकला रवसु।
HEB 3:15 जसों लिखलो छे; “कदी आज तुहुं भगवानेन बुल सामळु, ती आपणा मन काजे काठो मां करु, जसा तुंद्‌रा डाहा-डाहा उजाड़्‌या बयड़ा मां आपसान मन काठो करला।”
HEB 3:16 भगवानेन बुल सामळीन बी भगवानेन वीरुद करीन काहना माणसे तीना काजे रीसवाड़्‌या? हेर राख्‌जु की, तीनु माणसे काजे भगवान मुसान साहरे, मीसरे देस मां सी छुड़ायन लावलु चेत माणसे भगवानेन वीरुद करीन तीनाक रीसवाड़ला। हेरेसी तुहुं ईनी वात काजे कमजुर घुण समजु
HEB 3:17 ने भगवान चाळीस साल लग कुणी पर रीसवायलु? चु तीनु माणसे पर अतरुत रीसवायलु, जे माणसे पाप करला, तींद्‌रे पर भगवानेन डंड आयु, ने चे मरीन उजाड़्‌या बयड़ा मां पड़ी रया।
HEB 3:18 ने भगवान कुणीन सगुन खाय्‌न असु कह्‌लु की, जे मारा आरामेन जागा मां नी भराय सके? भगवान तींद्‌रेत बारामां असु कह्‌लु, जे तेरु हुकुम नी मान्‌या।
HEB 3:19 हेरेसी आपणु ज देखजे की, जे भगवान पर भुरसु नी कर्‌या, चेत आरामेन जागा मां नी भराया सके।
HEB 4:1 हेरेसी भगवानेन साहरे आरामेन जागा मां भरायणेन वायदु हय बी पुरु नी हयु, अतरे चेतीन रहु। नीते तीना आरामेन जागा मां भरायणु रय जासु।
HEB 4:2 काहाकी हामुक तींद्‌रेन तसा खुस-खबर सामळावलो हतलो। बाकुन चे तीनी खुस-खबर काजे सामळीन भुरसु नी कर्‌या, हेरेसी तीनुक सामळ्‌ळा बुले सी काय बी नफु नी हयु; काहाकी आरामेन जागाम भरायणेन जीत खुस-खबर आपणुक बी सामळावलो छे।
HEB 4:3 बाकुन हामु भुरसु कर्‌या, हेरेसी आपणु काजे तीना आरामेन जागा मां भरायणेन मुखु जड़ गुयलु छे, “बाकुन जे भुरसु नी कर्‌या तींद्‌रे बारामां चु असु कह्‌वलु: मे कीचवायन जी सगुन खादु, की चे मारा आरामेन जागा मां भराय नी सके!” हेरेसी आपणुक ज मालुम पड़े की भगवान ते कळी घड़ायली ती सीत ईना आरामेन बारामां कह्‌यु।
HEB 4:4 काहाकी सातवा दाहड़ान बारामां ज कह्‌यु की “भगवान आपसो आखो काम पुरो करीन सातवे दाहड़े आराम कर्‌यु।”
HEB 4:5 ने उपर वाळा दाखला मां आपणु असा भणजे, “चे मारा आरामेन जागा मां नी भराय सके।”
HEB 4:6 तीनु माणसेक पेहले आरामेन जागान खुस-खबर सामळावलो, चे हुकुम नी मान्‌या करीन तीना आरामेन जागा मां नी भराय सक्‌या।
HEB 4:7 हेरेसी बेसका दाहड़ा हय गुया, ने अळी भगवान दावुदेन अनसारे असु कह्‌लु की, आज तुहुंक भगवानेन बुल सामळनेन अळी मुखु जड़ रयु, हेरेसी तुंद्‌रेन तसा तुहुं आपणी छाती काठी मां करु।
HEB 4:8 यहोसु कदी ईस्‌रायेली माणसेक आरामेन जागा मां पुगाड़ देतु, ती भगवान पछला दाहड़ाम दीसरा आरामेन दाहड़ान वात नी करतु।
HEB 4:9 अतरे आपणु ज जाणजे की, भगवानेन असामी धड़े आरामेन जागा मां भरायणेन दाहड़ु हय बी टाकायलुत रय रयु।
HEB 4:10 जु तीना आरामेन जागा मां भराये, चु आपसो काम पुरो करीन तीना आरामेन जागा मां भराये, जसु भगवान बी हेरा काम काजे पुरो करीन आराम कर्‌यु।
HEB 4:11 ईस्‌रायेली माणसे हुकुम नी मान्‌ने सी सर गुया, तसा आपणुक नी हवणु चाहजे। नी ते आपणु आरामेन जागाम भरायणे रय जासु। हेरेसी आपणु काजे बी तीना आरामेन जागा मां जुर सी भरायणु चाहजे।
HEB 4:12 काहाकी भगवानेन बुले जीवतेला, ने ताकतवाळा, ने काहनी बी पाणी पावली दुय धारी तलवार सी बी अदु धारवाळा चर-चर छे। चे बुले हामरा जीवन उंडारा मां उतरी जाय, ने जीव-आत्‌मा मां भराय जाय, ने हाटकान गाठो मां भराय जाय, ने हाटकान गीर मां बी भराय जाय; ने माणसेन मनेम वाळी वात काजे ने वीच्‌यार काजे पारखी लेय।
HEB 4:13 ने भगवानेन साहरे घड़ायली ईनी कळी मां काहनी बी चीज भगवान सी सातायली नी हय, तेरे अगळ आखी चीज उगाड़ली छे। ईना भगवान अगळ आपणुक लेखु देणु पड़से।
HEB 4:14 हेरेसी आपणु एक डाहलु मुखी पुजारु छे, मतलब भगवानेन पुर्‌यु ईसु, सरगे काजे वेणकीन गुयलु छे, अतरे ए भायस्‌यो ने बहणस्‌या! आवु, आपणु तीना भुरसा पर वारु टेकला रवजे।
HEB 4:15 आपणु मुखी पुजारु ईसु ते आपणी लुलखाय मां आपणे साते दुखी हये। चु ते आपणेन तसु पापेन साहरे पारखायलु ते खरु, बाकुन तेबी चु गुनाळु नी नीकळ्‌यु।
HEB 4:16 हेरेसी आवु, आपणु भुरसा भेळा गीण-दयान राजगादी अगळ जाजे, काहाकी आपणे पर गीण-दया हवे, ने गीण-दया जड़े, ने तीनी गीण-दयान साहरे आपणु काजे मदत जड़े।
HEB 5:1 हामु जाणजे की, भगवान एकेक मुखी पुजारा काजे हारुन्‌या पुजारान घराणाम सी नेवाड़े ने भगवानेन ने माणसेन ईचमां रय्‌न माणसे वाटे भगवानेन सेवा करने करीन तीनाक कामे लागाड़े। चु भगवान अगळ अळी-अळीन माणसेन पापेन माफी वाटे भगवान अगळ भाती-भातीन बादा चड़ावे।
HEB 5:2 ने चु डाहलु पुजारु आपसुत लुल्‌गाय सी घेरवायलु रवे, हेरेसी चु डेड़-अकल्‌या ने भुल्‌या भटक्‌या माणसे साते नीचळु वेहवार कर सके।
HEB 5:3 हेरेसी तीनाक ते आपसान पापेन माफी वाटे जनवार्‌या मारीन पापेन माफी वाटे बादा चड़ावणु पड़े।
HEB 5:4 मुखी पुजारु बणनेन वाटु ईज्‌जतेन वात छे, बाकुन कुय बी जु वाटु आपणे आप नी लेय; बाकुन भगवानुत एकेक जणा काजे डाहलु पुजारु बणावणे करीन नेवाड़े। जसु भगवान आपसुत, हारुन्‌या काजे मुखी पुजारु बणावणे वाटे नेवाड़्‌यु।
HEB 5:5 हेरेसी ईसु मसी बी आपसा मन सी डाहलु मुखी पुजारु बणीन ईज्‌जत हात नी कर्‌यु, बाकुन भगवानुत तीना काजे पुजारु बणायु, ने तीनाक कह्‌यु, “तु मारु पुर्‌यु छे, ने मे आज सी तारु बास बण गुयलु छे।”
HEB 5:6 हेरेसी दीसरे जागे बी कहलो छे, “तु मलीकीसीदेक्‌यान तसु, जलम भगवानेन पुजारु बणीन रवसी।”
HEB 5:7 ईसु मसी ईनी धरती पर डील मां रवणेन टेमे, आयड़ी-आयड़ीन ने रड़ी-रड़ीन ने आसा पाड़ी-पाड़ीन, मरने सी बचाड़न्‌या भगवान धड़े लीलघाय ने दुवा करतेलु। ने चु आपसा काजे भगवानेन मरजी पुरी करने करीन तेरा हातेम सुपीन, आपसी खरली भक्‌ती देखाड़्‌यु। हेरेसी भगवान तेरी दुवा सामळी लेदु।
HEB 5:8 चु भगवानेन पुर्‌यु हतलु, तेबी चु दुख झेल्‌यु ने दुख झेलीन हुकुम मान्‌ने सीक्‌यु।
HEB 5:9 ने चु हुकुम मानीन पाक्‌कु हय गुयु, असु करीन ईसु मसी हुकुम मान्‌ने वाळा वाटे जलमेन छुटकारान वजे बण गुयु।
HEB 5:10 ने भगवान तीना काजे मलीकीसीदेक्‌यान तसु मुखी पुजारान वाटु आप्‌यु।
HEB 5:11 हेरे बारामां मेसेक बेसकी वात कह्‌णु छे। बाकुन ची वात समजणु काठो छे, काहाकी तुंद्‌रा कान्‌टा बेहरा हय गुया।
HEB 5:12 हय लग ते, तुहुं सीकाड़न्‌या बण जाणु हतलो, बाकुन आज लग ते, तुहुं काजे भगवानेन बुलेन सुरु वाळी वातुत, अळी सीकाड़नु पड़ रयो। असो लागे की आज लग तुहुं काजे नानला पुर्‌यान तसों दुत चाहजे, बाकुन खाणु नी चाहतो।
HEB 5:13 जो आज लग दुत पीया करे, च हाल पुर्‌योत छे, ने तीनाक धरमेन वचनेन बारामां कम समज मां आवे।
HEB 5:14 बाकुन वारलु खाणो ते तीनु मटला माणसे वाटे छे, चे तींद्‌रा जीवन मां वारलु भुंडा काजे उळखणे सीक गुया।
HEB 6:1 हेरेसी आवु आपणु ईसु मसीन सुरु वाळी सीकापण काजे पाळता जाय्‌न अळी अगा पुरा-पुरा पाक्‌का हवता जाजे, ने मरला काम सी मन फीरवीन भगवान पर भुरसु करजे,
HEB 6:2 ने अळी-अळीन बपतीस्‌मा लेणेन सीकापण लेणु, ने अळी-अळीन हात मेलीन वीन्‌ती करनेन सीकापण लेणु, अळी-अळीन मर्‌या-सर्‌याम सी जीवता हवणेन सीकापण लेणु, ने अळी अळीन आकरी नीयाव हवणेन ने अमर जीवनेन बारामां सीकापण लेणु।
HEB 6:3 ने कदी भगवान चाहे ती हामु चत करजे।
HEB 6:4 काहाकी जे एक कावा भगवानेन वीजाळो हात कर लेदा, ने सरगेन वाटु हात कर लेदा, ने चुखला जीव-आत्‌मान वाटु हात कर लेदा।
HEB 6:5 ने भगवानेन वारलु बुल हात कर लेदा, ने आवणे वाळी नवली कळीन ताकतेन बारामां जाण लेदा।
HEB 6:6 कदी चेत भुरसा सी छेटा हय्‌न भटकी जाय, ती तीनुक पाप भीणी सी मन फेरवीन भगवान भीणी वाळनु ने पछा भुरसा मां लावणु, बेसको काठो छे। काहाकी भगवानेन पुर्‌यु ईसु काजे आपसा वाटे एक कावा अळी कुरुस पर चड़ावे, ने तेरे पर उजेंतु गुनु लागाड़े।
HEB 6:7 एक खेतेन दाखलान साहरे तुहुं जी वात अळी वारु जाण सक्‌सु। धुळु ते वरसातेन पाणी काजे अळी-अळीन चुसे, ने जे किरसाण हळ जुपीन तीना खेतेक सेडे ने वेरे तींद्‌रे वाटे च मेर लावे, असु करीन चो खेत किरसाण्‌या वाटे भगवानेन वगे सी संयबरकत लावे।
HEB 6:8 बाकुन कदी ची जागा पाणी काजे अळी-अळीन चुसे ने किरसाण्‌या तीना खेतेम वारु काम करे, तेबी चो खेत तींद्‌रे वाटे काटासळ्‌या झाड़का ने गखर्‌या उंगाड़े, ती चो खेत किरसाण्‌या वाटे रीकामो ने गरा वाळो छे, ने आकरी कावा तीना खेतेक चे धपाड़ देसे तसुत ईसुन भुरसु छुड़न्‌या माणसे काजे भगवान नरक आकठा मां डंड आपसे।
HEB 6:9 ए लाटेक्‌ला, हामरे उपर लिखली वात सामळीन भणीन भळ जीव करसे; तेबी हामु तुंद्‌रे वाटे वारलु आस कर रया। हामुक पाक्‌कु भुरसु छे की, भगवान तुहुंक छुटकारा पुठ्‌ये आवणी आखी, संयबरकत आपसे।
HEB 6:10 काहाकी भगवान बयमान नी हय। तुहुं ते भगवानेन नावे, भगवानेन चुखला माणसेन मदत करीन परम देखाड़्‌या। ने हय बी परम करने बाजी रया। भगवान ते तुंद्‌रा ईनु कामेक ने दीसरा वारलु काम काजे कदी नी भुले।
HEB 6:11 तेरसी हामरी जी हर छे की, तुंद्‌रे मायन एकेक जणु मरता लग असुत काठी मेहनत करनु चाहजे। ती तुहुं छाचलीन तेरी आस कर रया च तुहुं काजे जड़ जासे।
HEB 6:12 हामरी जी मरजी छे की, तुहुं उजग्‌या घुण टेवायु। बाकुन तुहुं तीनु माणसेन तसा चालु, जे भगवान पर भुरसु करीन ने गम खाय्‌न ची आखी बरकत हात करने वाळा छे, ची बरकत आपणेन वायदु भगवान करलु छे।
HEB 6:13 जत्‌यार भगवान अब्‌राहम धड़े वायदु करलु तत्‌यार भगवान काजे सगुन खाणे वाटे तेरे सी मटु कुय नी जड़्‌यु। चु आपसुत सगुन खाय्‌न असु वायदु कर्‌यु।
HEB 6:14 भगवान कह्‌यु, “मे छाचलीन तुसेक संयबरकत आपीस, ने तुसेक बेसकी अवल्‌यात आपीस।”
HEB 6:15 ने अब्‌राहम बेसकु गम खादु ने अळतेन भगवानेन वायदु आपसान जीवन मां पुरु हवतेलु देख्‌यु।
HEB 6:16 माणसे ते आपसा सी मटान नावलीन सगुन खाया करतेला, तींद्‌रे मां सगुनेन साहरे वात पाक्‌की हवे, ने काहनी बी लड़ाय सर जाय।
HEB 6:17 जु वायदु भगवान करलु, तीना वायदाक चु कदी नी बदले। अळतेन भगवान जु वायदु पाक्‌कु करने करीन अब्‌राहम साते सगुन बी खादु हेरेन करीन की अब्‌राहम मर जाय ने अळतेन बी अब्‌राहमेन अवल्‌यात, जे भगवानेन वायदान हकदार्‌या छे, चे बी ईना वायदा पर पाक्‌कु भुरसु करे।
HEB 6:18 हेरेसी जां आखी दुय वात छे, भगवानेन वायदु ने भगवानेन अनसारे खादली सगुन जे दुयु कदी नी बदले। भगवान लुच्‌चाय करन्‌यु नी हय। हेरेन करीन की आपणु जे भगवानेन अनसारे आवला छे, ने जी आस चु आपणुक वायदान साहरे आपलु छे, आपणु तीना वायदा पर पाक्‌कु भुरसु करजे।
HEB 6:19 जी आस हामरा जीव वाटे ढंड्‌यान पाक्‌का ने टेकीन रवण्‌या हेकड़ान तसी छे, ने जी आस आपणु काजे पड़दा पछळ सरगेन मंदीरेम रहण्‌या भगवानेन्‌चां लग पुगाड़ देसे।
HEB 6:20 ईना मंदीर मां ईसु मलीकीसीदक्‌यान तसु जलम लग मुखी पुजारु बणीन आपणे वाटे मेळ करान्‌यु बणीन भराय गुयु।
HEB 7:1 जु मलीकीसीदक्‌या सालेमन सहरेन राजा हतलु, ने जु आखाम ताकतवाळा भगवानेन पुजारु हतलु, जलम लग पुजारु बणीन रवसे। जत्‌यार अब्‌राहम राजा काजे मारीन पछु आवती रवे, ती मलीकीसीदक तीनाक भेळु हय्‌न संयबरकत आप्‌यु।
HEB 7:2 ईनात मलीकीसीदक्‌या काजे अब्‌राहम आखी चीजेन दसवु वाटु आप्‌यु, ने मलीकीसीदक्‌या नावेन पेहलो मतलब छे, “धरमेन राजा।” हेरेसी ईना नावेन दुसरो मतलब छे “सालेमन राजु” नीते “सांती आपण्‌यु राजु।”
HEB 7:3 मलीकीसीदक्‌यान नीते आयस ने नीते बास ने नीते खानदानी हय, तेरा जीवनेन नीते सुरुवात हय ने नी आकरी हय; बाकुन भगवानेन एक खुळ्‌या पुर्‌यान तसुत भगवानेन नींगाम जलम पुजारु बन्‌लु रयु।
HEB 7:4 हय जाराक वीच्‌यार ते करु! जु मलीकीसीदक्‌यु कतरु मटु हतलु, चु बेसकु मटु हतलु, हेरेसी तीना काजे आपणा डाहा-डाहान डाहलु बास अब्‌राहम लग जो लुटीन लावलु, तीनी चीजे मायन महंग्‌ली चीजेन लग दसवु हीस्‌सु दान कर्‌यु।
HEB 7:5 भगवान जे हुकुम कायदा मुसा काजे आपलु, तीनु कायदान अनसारे लेव्‌या कुळीन माणसे काजे जु हक जड़लु की चे आपसा भाय-बेटा धड़े दसवु वाटु लेणु चाहजे, भले चे अब्‌राहमेन कुळी मां पयदा हया हय।
HEB 7:6 बाकुन मलीकीसीदक्‌या ते लेव्‌या कुळीन बी नी हतलु, तेबी लेव्‌या कुळीन पुजारान डाहलु बास अब्‌राहम मलीकीसीदक्‌या काजे दसवु हीस्‌सु आप्‌यु। ने चु दसवु हीस्‌सु लीन अब्‌राहम काजे संयबरकत आप्‌यु, भले अब्‌राहम साते भगवान पेहलेन वायदु करलु।
HEB 7:7 ईनी वातेम काय बी संका नी हय की, संयबरकत आपण्‌यु, चु संयबरकत देण्‌या सी मटु रवे।
HEB 7:8 लेव्‌या कुळीन माणसे जे दसवु हीस्‌सु लेय, चे ते एक ने एक दाहड़ु मरन्‌यात छे। बाकुन तीना मलीकीसीदक्‌यान बारामां जां तेरी गवा दी छांडी, चु ते जलम लग जीवतेलु रवे।
HEB 7:9 जां आपणु जो बी कय सकजे की लेव्‌यु जु दसवु वाटु लेण्‌या छे, चु लगुन जां तेरी अब्‌राहमेन साहरे दसवु वाटु आप्‌यु।
HEB 7:10 काहाकी तीनी टेमे जत्‌यार मलीकीसीदक्‌यु अब्‌राहम काजे भेळु हवलु, तत्‌यार लेव्‌यु पयदा बी नी हयु ने पेहलेन अब्‌राहमेन डीलेम रय्‌न मलीकीसीदक्‌या काजे भेळु हवलु।
HEB 7:11 ईनु लेवी कुळीन साहरेत, माणसे काजे भगवानेन साहरे आपला कायदा जड़ला। कदी भगवान लेव्‌या कुळीन माणसे काजे पुजारान वाटु आपीन तींद्‌रे अनसारे आपणुक पुरा-पुरा पाक्‌का बणाय देतु, ती आपणुक दीसरु पुजारु मलीकीसीदक्‌या रीतीन अनसारे जलम लग पुजारान वाटु हात करीन, ने हारुनेन रीती नी कवाये।
HEB 7:12 काहाकी जत्‌यार मलीकीसीदक्‌यान अनसारे पुजारान कामेन वाटु बदले, ती कायदा बी बदलनुत चाहजे।
HEB 7:13 काहाकी तीना मलीकीसीदक्‌यान बारामां वात कह्‌ली छे, चु दीसरी कुळीन छे, ने तीनी कुळीन आज लग काहनु चुखली वेदी पर भगवानेन सेवा नी कर्‌यु।
HEB 7:14 ईनी वात सी जी वात पाक्‌की हय की मालीक ईसु यहुदीयान कुळी मां पयदा हय्‌न आयु, बाकुन मुसु ईनी यहुदीया कुळीम सी एक पुजारु आवसे असु नी कह्‌यु।
HEB 7:15 ने मे जो कह्‌यु ची वात वारु चुखीझण उजेंती हय गुय, की मलीकीसीदक्‌यान तसु एक अळी पुजारु पयदा हय गुयु।
HEB 7:16 भगवान ईना दीसरा पुजारा काजे मुसान साहरे लिखला नेम कायदान अनसारे नी, बाकुन खत्‌तम नी हवे तीना जीवनेन ताकुतेन अनसारे पुजारु बणायु।
HEB 7:17 काहाकी तेरे बारामां भगवान जी गवाय देदु की “तु मलीकीसीदक्‌यान तसु जलम लग पुजारु बणीन रवसी।”
HEB 7:18 ने तेर अनसारे कुय बी पाक्‌कु धरमी नी बणे। जे ते, लुल्‌ला ने फालतु छे। हेरेसी चे कायदा सर गुया।
HEB 7:19 हेरेसी भगवान आपणु काजे एक असी बेसकु वारु आस आप्‌यु, तेरे साहरे आपणु भगवानेन्‌चां पुग सकजे।
HEB 7:20 भगवान पेहले सगुन खाये पाखुर दीसराक पुजारा बणायन कामे लागाड़तेलु। बाकुन ईसु मसी काजे सगुन खायलीन मुखी पुजारु बणायु।
HEB 7:21 ईसु काजे पुजारु बणावणेन टेमे भगवान, सगुन खायलीन हेरे बारामां असु कह्‌यु, “तु जलम लग मुख्‌यु पुजारु रवसी। हव असु कय्‌न भगवान मालीक सगुन खादलु; ने चु आपसु वीच्‌यार नी बदले।”
HEB 7:22 ईनी सगुनेन साहरे आपणु काजे जो मालुम पड़े की ईसु मसी भगवानेन ने माणसेन ईचमां एक वारलु ने पाक्‌का वायदान जामनी देण्‌यु बण गुयु।
HEB 7:23 तीना पुजारा काजे मुत झेलनेन दाहड़ा लग जीवणे नी देदली, हेरेसी तीने टेमे बेसका जणा काजे पुजारा बन्‌नु पड़तेलो।
HEB 7:24 बाकुन जु ईसु मसी जलम लग जीवतेलु रवे; तेरेमां तेरु पुजारान वाटु, थुड़ाक दाहड़ान नी रवे बाकुन जलम लग रवसे।
HEB 7:25 हेरे वजे सी जु पुजारु माणसे वाटे वीन्‌ती करने करीन जलम लग जीवतेलु छे। अळतेन जे बी माणसे ईना पुजारान साहरे भगवानेन्‌चां आवे, तीनु माणसेक जु पुजारु पुरु-पुरु छुटकारु आप सके।
HEB 7:26 जु डाहलु मुखी पुजारु चुखलु, ने खरलु, ने नी-गुनाळु हतलु, ने पापी माणसेन तसु नी हतलु, ने सरगे सी बी उचु हाकलायलु हतलु। ने असलुत डाहलु मुखी पुजारु आपणु काजे चाहजे।
HEB 7:27 ने जु पुजारु आपसा डीलेन बादा चहड़ावीन एकुत कावा मां पापेन माफीन काम पुरो कर देदलु। हेरेसी ईना पुजाराक दाहड़ीन दीसरा डाहला पुजारान तसों आपसा पापेन माफी वाटे ने दीसरान पापेन माफी वाटे जनवार्‌या मारीन बादा नी चड़ावणु पड़े।
HEB 7:28 मुसान कायदु ते, लुल्‌ला माणसे काजे डाहला पुजारान काम सुपे; बाकुन भगवान सगुन खाय्‌न जु वायदु कर्‌यु, चु वायदु तीना पुर्‌या काजे पुजारान काम सुपे, जु जलमसीत पुरु-पुरु पाक्‌कु बण गुयु हय।
HEB 8:1 हामु जी वात कर र्‌या ची जी छे की आपणे वाटे एक बेसकु मटु पुजारु छे, जु सरग मां आखान ताकतवाळा भगवानेन राजगादी पर भगवानेन जेवड़े आन्‌गे बठ रयु।
HEB 8:2 ने छाचला तम्‌बुन चुखला जागान चाकर्‌यु बण गुयु, जां भगवानेन छाचली भक्‌ती हवे। ईना तम्‌बु काजे काहनु बी माणुस उबु नी कर्‌यु, बाकुन मालीक भगवानुत उबु करलु छे।
HEB 8:3 काहनु बी डाहलु मुखी पुजारु भेट ने जनवार्‌या मारीन बादा चहड़ावणे करीन नेवाड़लु रवे। तेरेमां ईना डाहला पुजारा धड़े बी काहींग चहड़ावणे वाटे हवणु चाहजे।
HEB 8:4 कदी चु धरती पर रवतु, ती कदी चु पुजारु नी बणतु, काहाकी जी मुसान कायदान अनसारे, ईनी धरती पर बादा चड़ावण्‌या पुजारा ते छेत।
HEB 8:5 कदी चु एक असा भक्‌ती करनेन जागा भक्‌ती करे चो छाचलीन सरग मां हवणी पुजा-पाटेन सहलाणी छे। जत्‌यार मुसु तम्‌बु बणावणे हींडतेलु, ती तीनाक भगवान जो कय्‌न चीतायु की “देख, मे बयड़ा पर तम्‌बुन जी सहलाणी देखाड़लु छे, तेरेत अनसारे तु तम्‌बु बणावजी।”
HEB 8:6 बाकुन जो सेवान काम ईसु काजे जड़्‌यो, चो तींद्‌रा सेवान काम सी जादा वारु छे। काहाकी चु तीना नवला कायदान मेळ करावण्‌यु, चु नवलु कायदु, जुन्‌ला कायदा सी वारु छे, ने वारु सी वारु, वायदान अनसारे बांदली छे।
HEB 8:7 कदी पेहली जुन्‌ला कायदाम कसर नी हतली, ती दीसरी नवलु कायदान जरुवत नी पड़तो।
HEB 8:8 बाकुन भगवान काजे जुन्‌ली बुली पाळन्‌या माणसे मां कसर देखाव पड़ी, हेरेसी चु कह्‌यु; “सामळु! भगवान मालीक जुर सी कह्‌यु, ची टेम आवसे, तीने टेमे मे ईस्‌रायेली ने यहुदी माणसे साते, एक नवली बुली करीस।
HEB 8:9 भगवान मालीक अळी कह्‌यु, ‘जी बुली तीनी बुलीन तसी नी हय, जी बुली मे ईस्‌रायेली माणसेन आड़ा-बुड़ा साते तीने टेमे करलु, तीने टेमे मे तीनु काजे मीसरे देसो मां सी हात धरीन नीकाळीन लावलु। तेबी चे मारी बुली मां ईमानदार नी रया। हेरेसी मे आडु भाळ लेदु।’
HEB 8:10 अळी भगवान मालीक कह्‌यु: ‘मे जी बुली आवणेवाळा दाहड़ा मां ईस्‌रायेली माणसे साते करीस, ची जी छे की, मे मारा कायदा काजे तींद्‌रा मनो मां मेल दीस, ने मे तीनु कायदा काजे तींद्‌रा छाती मन मां लिख दीस, ने मे तींद्‌रु भगवान कहवायीस, ने चेत मारा माणसे कहवायसे।’
HEB 8:11 ने तत्‌यार काहनाक बी, आपसा सातेवाळा काजे, ने भाय-बहणस्‌या असो सीकाड़नु नी पड़े की, ‘तु मालीक भगवान काजे उळखी ले।’ काहाकी नानला मटा आखा मेसेक उळख्‌से।
HEB 8:12 काहाकी मे तींद्‌रा पापेन माफी आप दीस, ने तींद्‌रा पापेक कदी हेर नी करो।”
HEB 8:13 भगवान ईनी बुली काजे चु नवली कह्‌यु, हेरेसी जो मालुम पड़े की, पेहली बुली काजे चु जुन्‌ली ठेहराय देदु, जो जुन्‌लो हय जाय, चो जीरने बाजी जाय, चो सरने वाळो छे। हेरेसी पेहली बुली काजे सरनुत छे।
HEB 9:1 भगवानेन जुन्‌ली बुली मां बी भगवानेन पुजा-पाट करनेन रीतीन नेम हतला, ने तीनी पुजा-पाट वाटे ईनी धरती पर खास जागा बी हतली, चां एक तम्‌बु तान्‌लु हतलु।
HEB 9:2 तीना तम्‌बुन दुय खुणा हतला, ने खुणा काजे अलग करन्‌यु पड़दु बी हतलु। ने तीना तम्‌बुन पेहला खंगरा मां भीत हतली, ने टेबल हतली, ने टेबल पर भेट चहड़ावला रुटा हतला। ने ईना खुणा काजे चुखलु जागु कवतेला।
HEB 9:3 पड़दा पछळ वाळु दीसरा पड़दा पछळ चु तम्‌बु हतलु चुखलु जागु कहवायतेलु।
HEB 9:4 तीनी जागा मां सनान पेटी धुप देणी वेदी हतली। ने चां सनान झाळ चहड़ावली पेटी बी हतली। जो बुलीन पेटी कहवायतेली। तीनी पेटी मां भगवानेन बुलीन डायरी हतली, चे दगड़ान बन्‌ला हतला, तीनी पेटी मां हारुनेन लाकड़ी बी हतली, तीनी लाकड़ी पर एक कावा कोवेळ्‌ळा डीरा बी फुटी आवला। ने तीनी पेटी मां एक सनान कवड्‌यु बी हतलु, ने तीना कवड्‌या मां सरगे सी भगवानेन साहरे आपलो मन्‌ना नावेन खाणो भरीन मेल्‌लो हतलो।
HEB 9:5 ने तीनी पेटीन ढाकणान नाव गीण-दयान राजगादी हतलो। ने पेटी पर भगवानेन सेक-सींगारेन सहलाणीन वेस मां करुब नावेन पाखड़ावाळा दुय सरग वाळा खबर लावण्‌यान मुरत्‌या जुड़ायला हतला, जे पसतावान पाखड़ा फेलायन तीनी गीण-दयान राजगादी पर छावायन साहळु करतेला। बाकुन हय आखा बीडारान बारामां बताड़नेन टेम नी हय।
HEB 9:6 जु असु आखु तज्‌बु हतलु, ने अळी भगवानेन पुजारा पेहला, तम्‌बा मां दाहड़ीत भरायन, भगवानेन पुजा-पाटेन रीत कर्‌या करतेला।
HEB 9:7 बाकुन माहीं वाळा कमरा मां मुखी पुजारु अतरुत सालेम एकुत कावा जनवार्‌यान लुही लीन जातलु। ने चु आपसा ने दीसरान भुल्‌या-चुक्‌या गुनान माफी वाटे चां आखो भगवान अगळ ईना लुहीन बादा चहड़ावतेलु।
HEB 9:8 ईनी वातेन साहरे चुखली जीव-आत्‌मा जो देखाड़े की जत्‌यार लग पेहलु तम्‌बु उबु छे, ती लग चुखला जागाम भरायणेन वाट उजेंती नी हये।
HEB 9:9 जु तम्‌बु आजुन टेम वाटे एक सहलाणी छे; तीना तम्‌बु मां असी भेट ने बादान जनवार्‌या चहड़ावतेला। तेरेमां भक्‌ती करने वाळान मन चुखो नी हय सके।
HEB 9:10 हेरेसी जे ते खाणे-पीणे ने भाती-भातीन तीहवारेन रीतीन डीलेन नेम छे, ने भाती-भाती धुवणेन रीती करनु। जे नेम, नवला कायदा जड़ता लग ठेहरावला छे।
HEB 9:11 बाकुन हय ईसु मसी ते भगवानेन मुखी पुजारु बणीन आवलु। चु अळी जादा वारु ने पुरा-पुरा पाक्‌का तम्‌बु मायन भगवानेन्‌चां पुग गुयलु छे। जु तम्‌बु ईनी कळीन चीजे करीन माणसेन हाते बणावलो नी हतलो।
HEB 9:12 ईसु मसी तीना सरग वाळा तम्‌बु मां बुकड़ान ने केवड़्‌यान लुही लीन नी भरायु, बाकुन एकुत कावा आपसा लुहीन जलम लग भेट आपीन, चुखली जागाम भराय गुयु। असु करीन चु आपणे वाटे भगवान धड़े जलम लग छुटकारु हात, करीन आपणु काजे आप देदु।
HEB 9:13 जुन्‌डला कायदान अनसारे, बुकड़ा ने बेलेन लुही ने धपला केवड़ान रखड़ु मुयळ्‌या माणसे पर नाखणे सी ने लुही छाटणे सी डीलेन मुयळो छेटे हय जाय,
HEB 9:14 ती ते तेरे सी बी जादा, ने पुरो पाक्‌को ईसु मसीन लुही छे। ईसु मसी ईना आपसा लुही काजे भगवानेन जलमेन जीव-आत्‌मान साहरे एक पाक्‌की बादान रुप मां भगवान अगळ आपणे वाटे नी-गुनाळा हय्‌न भेट कर देदु। हेरेसी आपणु काजे जीवतेला भगवानेन सेवा भक्‌ती कराड़ने करीन ईसु मसीन लुही आपणा मन काजे तीनु कुहर्‌या काम सी छुड़ावसे, ने आपणुक चुखा करसे। जे कुहर्‌या कामे आपणु काजे मुत भीणी ली जाय।
HEB 9:15 हय सामळु, भगवान पेहले वायदु करलु, तीने टेमे बी माणसे पाप कर्‌या, तीनुक पापेम सी छुड़ावणे करीन ईसु मसी कुरुस पर मरीन आपसु जीव आप देदु। ने चु ईसु मसी एक नवला वायदान मेळ कराड़न्‌यु बण गुयु हेरेन करीन की चु तीनु काजे बुलावलु छे, चे अमर जीवनेन वारीस हात करे।
HEB 9:16 जत्‌यार जागा नाव पर करनेन वायदान पावती तीयार हये, ती जागा नाव पर करन्‌यान मुतन बारामां गवा बी हवणु चाहजे।
HEB 9:17 काहाकी असी जागा वायदान पावती, जागा आपण्‌यु मरे तीत पाक्‌की हवी, ने जत्‌यार लग जागा नावे करन्‌यु जीवतेलु रवे, ती लग जागान पावती नी बणे।
HEB 9:18 हेरेसी जुन्‌डला वायदान पावती बी जनवार्‌या काजे मारीन भगवान अगळ लुही चहड़ावे तीत तीयार हवतेली।
HEB 9:19 तीना जमाना मां जत्‌यार मुसा, कायदान आखा हुकुम माणसे काजे सामळाय देदु, ती चु केवड़ान ने बुकड़ान लुही ठाहराम झेलीन पाणीम भेसकी देदु, ने रातला गाडरान कान्‌या ने जुफा झाड़कान डाळखे करीन चामड़ान बणला कायदान किताप पर ने आखा माणसे पर छाट देदु।
HEB 9:20 ने कह्‌यु, “ज तीना वायदान लुही छे, तीना वायदा काजे पुरो करीन पाळनेन हुकुम भगवान तुहुं काजे आपलु छे।”
HEB 9:21 असु करीन मुसु तम्‌बु ने पुजा-पाटेन आखी चीज पर लुही छाट्‌यु।
HEB 9:22 छाचलीन, कायदान अनसारे आखी चीज लुही सी चुखी हवे; ने लुही उहवाड़े पाखुर पापेन माफी नी जड़े।
HEB 9:23 हेरेसी ज जरुड़ी छे की ईनी धरती पर जी चीज सरगेन चीजेन सहलाणीन रुप मां छे, तीनी चीज काजे जनवार्‌यान लुही सी चुखी करनु चाहजे, बाकुन सरगेन चीज काजे ते जनवार्‌यान लुही सी बी जादा वारु लुही सी चुखी करनु चाहजे।
HEB 9:24 काहाकी ईसु मसी तीना हाते करीन बांदला चुखला जागा मां नी भरायु, बाकुन आपणे वाटे हय सरगे मां भगवान अगळ हजुर हवणे करीन, सरगेत मां भराय गुयु। हात सी बणावलु चुखलु जागु ते छाचला चुखला जागान सहलाणी अतरुत छे।
HEB 9:25 डाहलु मुखी पुजारु हर साल दीसरा जनवार्‌यान लुही लीन चुखला जागा मां भरायतेलु। बाकुन ईसु तीना मुखी पुजारान तसु अळी अळीन आपसा डीलेन बादा चहड़ावणे करीन चुखला जागा मां नी भरायु।
HEB 9:26 ईसु अळी-अळीन आपसा डीलेन बादा चहड़ावणे करीन चुखला जागा मां भरायतु, ती तीनाक अळी-अळीन दुख झेलनु पड़तो; बाकुन चु ईनी कळीन आकरी दाहड़ा मां आपसा डीलेन बादा चहड़ावीन आपणा पाप छेटा करने करीन एकुत कावा माणुस बणीन आयु ने उजेंतु हयु।
HEB 9:27 जसों माणसे काजे एकुत कावा मरनु ने अळतेन तेरु नीयाव हवणु जरुड़ी छे,
HEB 9:28 तसुत मसी बी बेसका माणसेन पाप काजे हाकली लेणे वाटे एक कावा बादा चहड़ी गुयु; ने माणसे हेरी वाट देख र्‌या हींद्‌रा छुटकारा वाटे दीसरी कावा पाप नी हाकले तेबी देखायसे।
HEB 10:1 मुसान साहरे आपला नेम कायदा आवणेवाळी भलायन साहळु अतरुत छे। भलाय ते खरान आवणे वाळी हतली। ईना नेम कायदान साहरे ते सालो डीट एक सारकी बादा वाटे जनवार्‌या मारीन चहड़ाया करे। तेबी बादान जनवार्‌या चहड़ावणे सी तीनु भक्‌ती करन्‌या काजे पुरा-पुरा चुखा करीन पाक्‌का नी बणाय सके।
HEB 10:2 कदी नेम-कायदु तीनु काजे पुरा-पुरा चुखा करीन पाक्‌का बणाय देतु, ती ते, जनवार्‌या मारीन बादा चहड़ावणु खत्‌तम हय जातो; काहाकी तत्‌यार ते, भक्‌ती करन्‌या जलम लग चुखा हय जाता ने तींद्‌रा मनेन सान तीनुक तींद्‌रा पापेन बारामां गुनु नी लागाड़ती।
HEB 10:3 बाकुन चो सालो डीट तींद्‌रा पापेक हेर कराड़ीन पापी ठेहरावे।
HEB 10:4 बाकुन हसो नी हवे; बेलेन ने बुकड़ान लुही पाप काजे छेटा नी करे।
HEB 10:5 हेरेसी ईसु मसी कळीम आवणेन टेमे भगवान काजे असु कह्‌यु, तु माणसे धड़े तींद्‌रा पापेन बादा छुटणे करीन बादान चहड़ावु ने भेट नी मांग्‌यु, बाकुन तु माणसे वाटे तींद्‌रा पापेन बादा छुटणे करीन बादान करता मारे धड़े एक डील तीयार करलु छे।
HEB 10:6 तु बाळीन होम करली बादा सी बी तु खुस नी हयु, ने पापेन माफी हात करनेन बादा सी बी खुस नी हयु।
HEB 10:7 तत्‌यार मे भगवान काजे अळी कह्‌यु, “ए भगवान! मे आय गुयलु छे, जसों तारी डायरी मां मारा बारामां लिखलो छे, तसुत मे तारी मरजी पुरी करने तीयार छे।”
HEB 10:8 ईसु मसी पेहले भगवान काजे असु कह्‌लु की, “तुसेक भाती-भातीन बादा जसी पापेन बादा ने बाळीन होम करली बादा नी चाही, ने तीनु बादा सी तु खुस बी, नी हयु” भले ची आखी बादा मुसान कायदान अनसारेत चहड़ावता आय रवला।
HEB 10:9 अळी ईसु मसी भगवान काजे असो बी कह्‌यु, “ए भगवान, मे तारी मरजी पुरी करने तीयार छे, ने मे हय जां छे।” असु करीन भगवान पापेन बादा छुटणेन पेहला कायदा, छेटे करदीन, नवलु कायदु उबु करे।
HEB 10:10 ने भगवानेन मरजीन अनसारे ईसु मसीन डीलेन एकुत कावा बादा चहड़ावणे सीत आपणु चुखा हय गुयला छे।
HEB 10:11 हरेक पुजारा मंदीर मां उबा रय्‌न दाहड़ीत भगवानेन सेवान रीती भाती करे, ने भाती-भातीन जनवार्‌यान बादा एक सारका अळी अळीन चड़ाया करे, जी बादा पाप काजे कदी छेटे नी कर सके।
HEB 10:12 बाकुन जु ईसु मसी ते पापेन माफी काजे एकुत कावा आपसा डीलेन जलमेन बादा चहड़ावीन भगवानेन जेवड़्‌ये आंग्‌ये जाय्‌न बस गुयु।
HEB 10:13 ने तीने टेमे सी चां रय्‌न जी वाट देख रयु की तारा वेरी तारा पायेन पयड़ी बण जाणु चाहजे।
HEB 10:14 काहाकी ईसु मसी एकुत कावा आपसा डीलेन जलमेन बादा चहड़ावीन आखा काजे चुखा कर देदु, ने जलमकात पाक्‌का कर देदु।
HEB 10:15 भगवानेन चुखली जीव-आत्‌मा बी नवली बुलीन साहरे आपणुक जड़नी बरकतेन गवा छे, सास्‌तुर लिखण्‌याम रय्‌न चु असु देखाड़े,
HEB 10:16 भगवान, मालीक असु कह्‌यु, की जे दाहड़ा पुरा हय जासे ने अळी मे तींद्‌रे साते जी बुली करीस, मे मारा कायदा काजे तींद्‌रा मनो मां मेल दीस, ने मे तीनु कायदा काजे तींद्‌रा मन मां लिख दीस।
HEB 10:17 ने चु अळी कह्‌यु, “मे तींद्‌रा पाप काजे, ने गुना काजे कदी हेर नी करो।”
HEB 10:18 हय आखा काजे ईसुन बादा साहरे पापेन माफी जड़ जाय, ती अळी पापेन माफी वाटे बादा चहड़ावणु जरुड़ी नी हय।
HEB 10:19 ए भायस्‌यो ने बहणस्‌या, ने जत्‌यार तीना ईसुन लुहीन साहरे आपणे वाटे एक नवली ने जीवतेली वाट तीयार करलु छे, चो आपणे वाटे चुखला जागा मां ली जाणे करीन उघड़ी गुयो, हेरेसी आपणु काजे सरगेन नवली ने जीवतेली वाटे मायन चुखला जागाम भरायणेन हिम्‌मत आय गुयली छे।
HEB 10:20 ने ईसुन डील एक पड़दा सांय छे। ईसु आपणे वाटे कुरुस पर दुख झेलीन, आपसा डीलेन बादा चड़ायु, ने आपसो लुही उहवाड़्‌यु,
HEB 10:21 ने हय ईसु आपणे वाटे भगवानेन घराणान हकदार्‌यु मुखी पुजारु छे।
HEB 10:22 ईसु आपसो लुही आपणे गुनु लागाड़न्‌या मनो पर छाटीन आपणुक चुखा करलु छे। ने आपणु सहलाणीन तार पर चुखले मने बपतीस्‌मान रीत लीन आपणा डीलेक धुवी बी लेदु। हेरेसी चालु, आपणु पाक्‌कु भुरसु करीन खरले मने भगवानेन्‌चां जाजे।
HEB 10:23 वायदु करन्‌यु भगवान ते, ईमानदार छे, हेरेसी आपणु जी आस कर रया, तीनी आस काजे छुड़नु नी हय, बाकुन आस करीन जुड़ायला रह्‌वणु छे।
HEB 10:24 ने एक दीसराक परम करने करीन ने एक दीसरान भलो करने करीन एक दीसराक हिम्‌मत देवाड़ु।
HEB 10:25 काहना-काहना ईसु पर भुरसु करीन बी, ईसुन मंडळीन मां जाणु छुड़ देदला छे। तुहुं असला माणसेन चाल मां धरु। बाकुन एक दीसराक समजाड़ीन सांती आपता रहु। ने जसा-जसा ईसुन आवणेन दाहड़ा धड़े आवता जाय, तसा तुहुं अळी-अळीन भेळा हय्‌न भगवानेन वात सीकता रहु, ने भगवानेन सेवा भक्‌ती करता रहु।
HEB 10:26 काहाकी खरली वातेन उळखाण हात करनेन पछे कदी हामु जाणी बुजीन पाप करता रवसुन, ती पापे वाटे अळी कुय बादा चड़ावणु नी रय।
HEB 10:27 हव, हसो हय ती ते, असला माणसेक हय बीहाड़े असा नीयावेन दाहड़ान वाट देखणु ने उलाह्‌ये नी असली आकठीन वाट देखणु अतरोत रय रयो, जी आकठी भगवानेन वीरुद करन्‌या काजे खाय जासे।
HEB 10:28 जत्‌यार काहनुक मुसान कायदाक नी मान र्‌यु हय ती, दुय नीते तीन जणान गवाय पर, पाखुर दया करे मार देय,
HEB 10:29 ती सुची लेवु की चु कतरु अळी बी भारी डंडेन लायक ठेरसे, जु भगवानेन पुर्‌या काजे पाये सी लातायन कुचर्‌यु ने वायदान लुही काजे, जेरे साहरे चु चुखलु ठेराय गुयलु वीटेळ्‌ळु समजी गुयु ने गीण-दयान आत्‌मा काजे अपमान कर्‌यु।
HEB 10:30 डंड आपण्‌यु भगवान जो कह्‌यु, “बदलु लेणु मारो काम छे, मे बदलु लीस।” ने चु अळी ज बी कह्‌यु, “मालीक भगवान आपसा माणसेन नीयाव करसे।” ईना भगवान काजे आपणु जाणजे बी।
HEB 10:31 जीवतेला भगवानेन हाते डंड भुगतणु ते बेसकु बीहाड़े असो छे।
HEB 10:32 तुहुं तीनु पेहला दाहड़ाक हेर करु, तीनी टेम मां तुहुं खुस-खबरेन वीजाळो देखीन मान लेदला, ने बेसका दुख मां ने भुरसा मां टीकला रया।
HEB 10:33 तीनी टेमे माणसे, तुंद्‌रे मायन काहनुक आखा अगळ वात नीकाळ्‌यु ने वेला पाड़्‌या ने तुहुं तींद्‌री मान लेदा, ने तुंद्‌रे मायन काहनाक तीनु माणसे साते हतला सांती आपणे, तीनुक दीसरा माणसे वेला पाड़्‌या।
HEB 10:34 तुहुं ईसु पर भुरसु करन्‌या तीनु माणसे पर दया कर्‌या, तीनु काजे जेलेम कुंड देदला, ने वीरुद करन्‌या माणसे तुंद्‌रो माल धन हापकीन ली जाती रया, तेबी तुहुं खुस हतला; काहाकी तुहुं वीच्‌यार करतेला की भगवान हामरे वाटे ईनी धरती पर माल धन सी बी वारलु ने जलम टीकणेवाळो अमर जीवनेन माल धन सरगेम मेल रयु।
HEB 10:35 हेरेसी तुहुं हिम्‌मत घुण हारु। काहाकी तेरो काम बेसको मटो छे।
HEB 10:36 तुहुं गम खाय्‌न भगवानेन मरजी पुरी करसु, ती भगवान, तुहुंक जो आपणेन वायदु करलु छे, चो आपसे ने आपसे।
HEB 10:37 काहाकी चु आवणे वाळु छे, “चु थुड़ीक टेम मां आवसे, ने चु वार नी लागाड़े।
HEB 10:38 मारो वारु काम करने वाळा माणसे, भुरसा सी जीवन जीवसे, ने जु कुय पछु हवसे तेरे सी मे खुस नी रव।”
HEB 10:39 बाकुन हामु ते भुरसु छुड़ीन पछा सरेकण्‌या मायन नी हय, बाकुन हामु तीनु मायन छे, जे भगवानेन भुरसा पर टेकला रय्‌न आपसा जीव-आत्‌मा काजे बचाड़े।
HEB 11:1 ती भुरसु काय छे? भुरसु जु छे की जो आपणु नी देख्‌या, ने तेरी आस आपणु कर रया, चत छे, ने भगवान चो आपणुक आपसे ने आपसे। असो मनेम पाक्‌को ठाणी लेणुत भुरसु छे।
HEB 11:2 काहाकी आपणा डाहा-बुड़ा भगवान पर पाक्‌कु भुरसु करला करीन भगवान तींद्‌रे बारामां वारु बताड़्‌यु।
HEB 11:3 भुरसान साहरेत आपणु ज जाणजे की भगवानेन बुलेन साहरे आखी कळजुग घड़ायली छे। ने ज काय देखाये ने मालुम पड़े च आखो देखाये ने मालुम पड़े असली चीजेम सी घड़ायो।
HEB 11:4 भुरसु करीन आदमेन नानलु पुर्‌यु हाबील, आपसा मटला भायस केन्‌या सी वारु भेट चहड़ायु; ने भगवान तेरी बादा मानी लेदु। असु करीन चु हाबील भुरसान साहरेत भगवान वगे सी वारु गीणायु। हेरेसी चु मरीन बी हय लग आपणुक भगवान पर भुरसान बारामां सीकाड़तु रयु।
HEB 11:5 भगवान पर भुरसु कर्‌यु करीन हनोक मरे पाखुर डील भेळु सरगे मां हाकलाय गुयु; ने चु अळी पछु काहनाक बी देखाव नी पड़्‌यु, काहाकी भगवान तीनाक हाकलीन ली जाती रवलु। हेरेसी जी वात चुखीझण छे की, भगवान तीनाक हाकलीन ली जाणेन पेहलेत, तेरे बारामां असी गवा देदु की, हयु मेसेक गमे असो काम करे।
HEB 11:6 भगवान पर भुरसु करे बीगुर कुय बी भगवान काजे खुस करनु काठो छे। जु भगवानेन्‌चां जाणेन हेर करे तीना काजे भुरसु करनु चाहजे की भगवान छे, ने चु तीनु आखा माणसेन भलो करे, ने आपणा हेरने वाळा काजे फळ आपे।
HEB 11:7 भगवान पर भुरसु करीन नुह आवणेवाळी मुसळ धार पाणीन गरान बारामां भगवान धड़े सी खबर सामळीन आपसा घराणा काजे बचाड़ने करीन चकराय्‌न ढंड्‌यो बणायु। असलु मुसळ धार पाणी धरती पर कदी नी पड़्‌यु। तेबी हय लग देखणेम नी आयो तेरे बारामां भगवान कह्‌ली वात पर भुरसु कर्‌यु। नुहान भुरसु देखीन भगवान तीनाक धरमी गीण्‌यु, ने असु करीन चु खरला धरमेन हकदार्‌यु बण गुयु। बाकुन कळीन दीसरा माणसे ढंड्‌याम भरायन मरीन सर गुया, असु करीन नुह आखी कळीन माणसे काजे गुनाळु ठेहराय देदु।
HEB 11:8 जत्‌यार भगवान अब्‌राहम काजे अनजाण्‌या देस भीणी जाणे करीन बुलायु; ती चु, भगवान पर भुरसु करीन तेरु हुकुम मानीन तीना अनजाण्‌या देस भीणी चाल पड़्‌यु, जो देस तीनाक हक मां जड़ने वाळो हतलो, तीनाक जो नी मालुम हतलो की, चु कां जाणे बाजी रयु, तेबी चु भुरसु करीन चाल पड़्‌यु।
HEB 11:9 वायदु करला देसो मां पुग्‌यु, तत्‌यार बी चु तीना वायदान देसो मां जबरान हक जमाड़्‌यु, ने परदेसी माणसे मां वसी गुयु, ने एकुत वायदान हकदार्‌या आपसा पुर्‌या इसाक पुठ्‌ये ने इसाकेन पुर्‌या याकुप पुठ्‌ये खपड़ी बणायन रहणे बाजी गुयु। भगवान पर भुरसु करीन अब्‌राहम असु करलु।
HEB 11:10 चु ते तीना सरगेम वसला सहरेन वाट देख रवलु, ने तीना सहरेन पायु नाखीन घड़न्‌यु ने तीना सहरेक बणावणे वाळु भगवानुत छे।
HEB 11:11 भगवान पर भुरसु करीन अब्‌राहमेन लाडी सारा बायरी डाहवारा मां बी भारपायेन ताकत हात करी; काहाकी ची असी मान लेदली की मे तुसेक पुर्‌यु आपीस करीन वायदु करन्‌यु भगवान छाचलु छे।
HEB 11:12 असो करीन मरला साय एकुत माणसेन साहरे सरगेन तारान तसी ने दर्‌या धड़ेन रेतळा तसी गीणाये नी असी अवल्‌यात हय गुय।
HEB 11:13 भुरसु करीन टेकला रय्‌न मर गुया। भगवान तीनुक ईनी कळी मां, जो-जो देख्‌यो ने बीन देख्‌यो आपणेन वायदा करलु, चो पुरो तीनुक नी आप्‌यु। चे मरनेन पेहले छेटेत रय्‌न भुरसु करीन चो देखीन खुस हय गुया, ने मान लेदा की, हामु ईनी कळी मां परदेसी ने वाटे चाला मुसाफीर्‌या छे; तेबी भगवान आपसा वायदा एक दाहड़े नीते दीसरे पुरा करसे ने करसे। असु करीन चे मरनेन पेहले छेटेत रय्‌न भुरसान डुळे भगवानेन वायदा पुरा हवतेला देख्‌या।
HEB 11:14 जे असी वात कह्‌वे, चे आपसी जीवाय साहरे ज चुखोझण देखाड़े की चे परदेसी देसेम रय्‌न आपसान देस काजे हेरने बाजी रया।
HEB 11:15 ने तीना देसेन वात सुचता ती, तीना देसेक हेर करीन पछा जाणेन वीच्‌यार करता, ती तीनुक तीना देसेम पछा जाणेन मुखु हतलु।
HEB 11:16 बाकुन चे तीना देसेम जाणेन वीच्‌यारुत नी कर्‌या। चे ते एक आखाम वारु देसेन, मतलब सरगेन देसेन हेरु पड़ रवला। हेरेसी भगवान, तीनु माणसेन भगवान कहवायणे नी लाजवाये; चु ते तींद्‌रे वाटे एक सहर बणावलु छे।
HEB 11:17 भगवान पर भुरसु करीन अब्‌राहम्‌यु पारखायणेन टेमे भगवानेन वायदा काजे छाचली मान लेदु, ने चु भगवानेन हुकुम मानीन इसाक काजे भगवान अगळ मारीन बादा चहड़ावणे तीयार हय गुयु।
HEB 11:18 हव तीना काजे भगवान असु कह्‌लु “इसाकेन साहरे तारी अवल्‌यात बड़से।” तीना इसाक काजे चु भगवान अगळ मारीन चहड़ावणे करीन तीयार हय गुयु।
HEB 11:19 काहाकी चु अब्‌राहम, भगवान पर असु पाक्‌कु भुरसु कर्‌यु की, भगवान मरला काजे बी मर्‌या-सर्‌याम सी जीवता करीन बठा कर सके ने एक कह्‌याम अब्‌राहम आपसा पुर्‌या इसाक काजे मर्‌या-सर्‌याम सी जीवतु हवलुत पछु हात कर लेदु।
HEB 11:20 भगवान पर भुरसु करीन इसाक, मरनेन पेहले आपसा पुर्‌या याकुप ने एसाव काजे आवणेवाळा दाहड़ा वाटे संयबरकत आप्‌यु।
HEB 11:21 भगवान पर भुरसु करीन याकुप मरने वेळाय युसुफेन दुयु पुर्‌या काजे एकेक करीन संयबरकत आप्‌यु, ने लाकड़ीन टेका लीन बी भगवानेन भक्‌ती कर्‌यु।
HEB 11:22 भगवान पर भुरसु करीन युसुफ मरने वेळाय हुकुम आपीन असु कह्‌यु की, आपणा ईस्‌रायेली माणसे मीसरे देसेम सी छुटकारु हात करीन कनान देसेम जाती रवसे। बाकुन मे ते, मीसरे देसेम सी छुटकारु हात करे पाखुर मर जायस, हेरेसी तुहुं मारा हाटका लीन जाती रवजु।
HEB 11:23 जत्‌यार मुसु पयदा हवलु, तीन दाहड़ाम मीसर देसेन राजु असु हुकुम नीकाळ्‌यु की, ईस्‌रायेली जाती मां पयदा हवण्‌या आखा पुर्‌याक मार नाखु। मुसु बेसकु वारु हतलु, ने तेरा आयस बास समजी गुया की, जु एक खास पुर्‌यु छे हेरेसी मुसान आयस बास भगवान पर भुरसु करीन मीसर देसेन राजा सी बीहे बीगुर मुसा काजे तीन महना लग साताड़ी-साताड़ीन मटु कर्‌या।
HEB 11:24 भगवान पर भुरसु करीन, मुसु हुस्‌यार हय्‌न जु कय देदु की मे फीरोन राजान पुरेन पुर्‌यु नी हय।
HEB 11:25 मुसा काजे पाप मां थुड़ाक दाहड़ा लग मुजा लेणे सी भगवानेन माणसे पुठ्‌ये वेला करनु वारु लाग्‌यो।
HEB 11:26 मुसु ते भगवान धड़े जलमेन वाटान ईनाम हात करनेन वाट देख रवलु। हेरेसी तीनाक ते, मीसर देसेन धनेन मुजा लेणे सी भगवानेन मसीन नाव-बद्‌दी हवणु वारु लागे।
HEB 11:27 मुसु ते वीन देख्‌या भगवान काजे देख्‌यु नी, बाकुन तेबी भुरसान साहरे देख रयु समजीन भगवानेन भुरसा पर टेक्‌लु रयु। हेरेसी भगवान पर भुरसु करीन मुसु राजान रीस काजे देखीन बी नी बीहु, ने मीसरे देस काजे छुड़दीन जाती रयु।
HEB 11:28 आखाम पेहले वाळा पासका तीहवारेन दाहड़ाक हेर करु, जत्‌यार माणसेन जीव लेणे आवण्‌यु सरग वाळु चाकर्‌यु, मीसर देसेम वाळा आखा माणसेन पेहले खुळ्‌या पुर्‌या काजे मारने हींडतेलु। तीने टेमे मुसु भगवान पर भुरसु करीन ईस्‌रायेली माणसेक जु हुकुम आप्‌यु, “तुहुं गाडरान पीला काजे मारीन तेरो लुही आपणा-आपणा घरेन बारकस पर चुपड़ी देवु, ती सरग वाळु तुंद्‌रु जीव नी लेय।”
HEB 11:29 भगवान पर भुरसु करीन मुसान अगवाय मां ईस्‌रायेली माणसे, जसा सुकली जागाक वेणकीन जाय, तसात रातला दर्‌या काजे वेणकीन जाती रया। ने जत्‌यार मीसरे देसेन सीपायड़ा बी ईस्‌रायेली माणसेन तसा दर्‌या वेणकणे गुया, ती चे डुबीन मर गुया।
HEB 11:30 भगवान पर भुरसु करीन ईस्‌रायेली जातीन माणसे, यरीहो सहरेन चारेमेर वाळा जाड्‌ला भीतड़ान सात दाहड़ा फेरा लागाड़्‌या, ने च सहरेन चारेमेर वाळो जाड्‌लो भीतड़ो उदरी गुयो।
HEB 11:31 यरीहो सहरेन राहाब, पेहल रंडी हतली, बाकुन अळी ची यहुदी माणसेन खरला भगवान पर भुरसु करी। ने थुड़ाक यहुदी माणसे राहाबी रहतेली तीना देसेम भेदु लेणे करीन आया, तत्‌यार ची भगवानेन भुरसे तीनु माणसेक आपसा घर मां आव-भाव करीन सात दीन साताड़ देदी। अळतेन ची आपसा सहरेन दीसरा माणसे भेळती नी सरी, जे भगवान पर भुरसु नी करतेला।
HEB 11:32 हय मे अळी अगु नी देखाड़तु। काहाकी मारे धड़े भगवान पर भुरसु करन्‌यान भुरसान बारामां एकेक करीन देखाड़नेन टेम नी हय। नीते मे गीद्‌यान, ने बाराकान, ने सीमसन, ने यीफत्‌यान, ने दावुदेन, ने समुएल ने भगवानेन अघली वात बताड़ने वाळा माणसेन भुरसान बारामां कय देतु।
HEB 11:33 चे भुरसु करीन बेसका ईलाकान राजा काजे जीत लेदा; ने वारु काम कर्‌या; भगवान तीनी चीजेक आपणेन वायदु करलु, तीनी चीजेक हात कर लेदा; ने नाहरेन मुंहडो बंद कर देदा;
HEB 11:34 भगवान पर भुरसु करीन आकठो उलवी देदा; तलवारेन धार सी बच गुया; लुल्‌गाय मां बी ताकतवाळा बण गुया; लड़ाय मां बी तेज नीकळ्‌या; वेरी माणसेन सीपायड़ा काजे रावण्‌या-तीवण्‌या कर देदा।
HEB 11:35 भगवान पर भुरसु करीन बायरा आपसा मरला सातेवाळा काजे जीवतेला हात कर लेदा; काहाकी भगवान तीनु काजे पछा जीवता कर देदलु। ने काहना ते भगवान पर भुरसु करीन दुख ने मुत सी छुटकारु हात करने नी हींड्‌या; चे हेरेसी असा करला काहाकी चे अमरेन जीवन वाटे, मर्‌या-सर्‌याम सी जीवता हवणेन आस कर रवला।
HEB 11:36 काय कतरा हासी उड़ाया; ने तीनुक सपाटा देदा; ने तींद्‌रे हात ने पाय मां कड़्‌या पेहरायन बांद देदा ने तीनुक जेलेम कुंड देदा।
HEB 11:37 काहनाक काजे दगड़ाया; ने जीवतेलात, लाकड़ा चीरनी आरी करीन चीरीन दुय टुकड़ा कर देदा; तीनु काजे पारख्‌या; असा करीन भगवान पर भुरसु करन्‌या गरीब हय्‌न, वेला करता जाय्‌न हीड़ा-पीड़ा झेलता जाय्‌न, गाडरान ने बुकड़ान खालड़ा पेहरी-पेहरीन अथान-अथा डंडवायता फीर्‌या।
HEB 11:38 ने चे बयड़ा मां, ने जंगल मां, ने ढाटान खंगरा मां, ने धरतीन खुबारामां अथान-अथा ढासता ने डंडवायता फीर्‌या। काहाकी ईनी कळी मां जे भगवान पर भुरसु नी करे, तींद्‌रे पुठ्‌ये रह्‌वणु, ईनु भुरसु करन्‌या वाटे बेसको काठो हतलो।
HEB 11:39 ने चे भगवान पर भुरसु कर्‌या, करीन भगवान तीनुक बेसकु वारु कय्‌न तींद्‌रे बारामां गवा देदु, तेबी भगवान तीनु काजे जो आपणेन वायदु करलु, च आज लग नी आप्‌यु।
HEB 11:40 काहाकी भगवान तीनु काजे आपणे पेहलुत सी पुरा-पुरा पाक्‌का करनेन एक खास युजना बणावलु।
HEB 12:1 जत्‌यार भुरसान गवा पुरावा अतरी जबर आपणु काजे घेरी रया, ती चालु, आपणु भगवानेन वाट्‌ये रुकण्‌या आखी चीज काजे हेड़ीन छेटे कर देदा, ने गुचवाण मां नाखण्‌या पाप काजे छुड़ देदा ने तीनी दवड़ मां आपणु काजे अगा दवड़नु छे, तीनी दवड़ मां गम खाय्‌न अगा दवड़जे।
HEB 12:2 ईसु ते आपणा भुरसान पायु छे, ने पाक्‌कु करन्‌यु छे; हेरेसी तेरे भीणी एक हेट्‌या भाळीन जी भुरसान दवड़ दवड़जे। ने आपसा अगळ मेल्‌ली खुसी हात करने करीन लाजवाये पाखुर कुरुसेन दुख झेल्‌यु; ने दुख झेलीन भगवानेन राजगादी पर जेवड़्‌ये आंग्‌ये बस गुयु।
HEB 12:3 हेरेसी ईना ईसु पर वीच्‌यार करु! ने तुंद्‌रु जीव फीकुर करीन हिम्‌मत नी हारनु चाहजे करीन चु पापी माणसेन वीरुद काजे वेठ लेदु।
HEB 12:4 बाकुन पाप साते लड़ाय करीन तुहुं काजे आज लग आपसो लुही उहवाड़नु नी पड़्‌यो।
HEB 12:5 तुहुं धरम सास्‌तुरेन जी सीकापण घुण ईसेरजु, तेरेमां तुहुंक बेटा करीन बुलाड़लु छे? “ए मारा बेटा! मालीक तुसे काजे सुदारने करीन डंड आपे, तीनी वातेक कमजुर घुण समजे, ने जत्‌यार चु तुसेक झीचकारे, ती हिम्‌मत हारीन हीयाव घुण छुड़े।
HEB 12:6 काहाकी भगवान तीनाक परम करे, तीनाक डंड बी आपे, जसु तीना पुर्‌याक चु बेसकु जबर परम करे, तसु तीना पुर्‌याक डंड बी आपे।”
HEB 12:7 तुंद्‌रे पर दुख आवे ती ज समजीन सेण कर लेजु की भगवान बास सुदारने करीन हामुक डंड आप रयु। काहाकी भगवान तुहुंक आपसा पुर्‌या समजीन तुंद्‌रे साते असु वेहवार करे। वीच्‌यार करु! असु काहनु बास हसे, चु आपसा पुर्‌याक सुदारने करीन डंड नी आप्‌यु हय?
HEB 12:8 कदी भगवान आपसा दीसरा पुर्‌याक सुदारने करीन डंड नी आपे, ती तुहुं बासेन खास पुर्‌यु नी हय, बाकुन दीसरान पुर्‌या कहवायसु।
HEB 12:9 आपणा धरती पर वाळा बासे आपणुक सुदारने करीन डंड आपतेला, तेबी आपणु तींद्‌री ईज्‌जत करतेला, ती वीच्‌यार करु! धरती पर वाळा बासेन ईज्‌जत करे, तेरे सी बी जादा आपणा जीव-आत्‌मान बासेन, ईज्‌जत नी करनु चाहजे काय? हेरेन करीन की तीना जीव-आत्‌मान बासेन हक मां रय्‌न आपणुक अमर जीवन जड़े।
HEB 12:10 ईनी कळीन बास ते दसो समज आवतेलो, तसु ईनी कळीम वाळी आपणा-आपणा जीवन काजे सुदारने करीन डंड आप्‌या करतेलु, बाकुन भगवान ते, आपणी जलमेन भलाय वाटे आपणुक डंड आपे। हेरेन करीन की आपणु तेरा चुखला साजल्‌या बण जाजे।
HEB 12:11 आपणुक सुदारने करीन डंड जड़े, तत्‌यार आपणुक वारु नी लागे, ने बेसको काठो लागे। बाकुन तेबी जे सुदारनेन डंड झेली-झेलीन पाक्‌का हय गुयला छे, तीनुक पेहली कावा चुखला धरमेन सांती आपण्‌यो फळ जड़से।
HEB 12:12 हेरेसी अळगा हात, ने कमजुर मांडा काजे काठा कर लेजु;
HEB 12:13 ने आपणा पाय वाटे सुदी वाट बणायन अगा जाता जावु, तेरे सी जे भुरसा मां लंगड़ा छे, चे डंडवाये नी, बाकुन वारका हय जासे।
HEB 12:14 हेरेसी आखा साते वारु रहु, ने चुखला रवणेन टेव पाड़ु। चुखला हये बीगुर काहनु बी भगवान काजे नी देख सके।
HEB 12:15 कुय बी भगवानेन गीण-दया सी आंग्‌ये नी रहणु चाहजे; हेरेन करीन चेतीन रहु। तुंद्‌री जीवाय मां काहना बी कड़वला ने नुकसाण करे असला झाड़कान तसी, कुहराय नी बड़नु चाहजे, जी आखा माणसे काजे बीगाड़ देय।
HEB 12:16 तुंद्‌रे मां कुय बी छीनाळ्‌यु नी हवणु चाहजे, ने एसावेन तसु भगवान पर भुरसु नी करन्‌यु, असु नी हवणु चाहजे, जु एकुत कावा खाणो खाणे वाटे आपसुत पेहलु हक वेच देदु।
HEB 12:17 तुहुं काजे मालम छे की चु अळी आपसा बास धड़े संयबरकत मांगणे करीन बेसकु हेर कर्‌यु, बाकुन ची संयबरकत तीनाक नी जड़ी। भले चु रड़ी-रड़ीन आपसा बास धड़े मेसेक संयबरकत आप दे कय्‌न वीन्‌ती कर्‌यु, तेबी तीना काजे संयबरकत आपणे करीन आपसा बासेन मन नी पीगळ्‌यो।
HEB 12:18 तुहुं असा बयड़ा साते नी आया, चु बयड़ु हाते करीन छीमाय जाय, ने जु आकठा मां हुड़ु-हुड़ु धपे, ने तेरे चारेमेर काळ्‌ळा आदळान बळाह्‌वा रवे, ने तेरे चारेमेर आंदारो ने आंधी रवे,
HEB 12:19 ने जां फेप्‌यान अवाज रवे, ने जां बुलन्‌यान असु आकरी बुल रवे तीना बुलेक सामळन्‌या ईस्‌रायेली माणसे भगवान धड़े असी वीन्‌ती करने बाजी गुया की ए भगवान, हय अळी हामरे साते असी आकरी वात मां करे।
HEB 12:20 काहाकी भगवान असु हुकुम आपलु, की “कदी काहनो जनवार्‌या बी बयड़ा काजे टुचलसे ती, तीनाक दगड़ाटीन मार नाखु।”
HEB 12:21 चां अतरो बेसकु बीहाड़े असो देखायतेलो की मुसु कह्‌णे बाजी गुयु, “मे बेसकु बीही गुयु, मारेम कापणी भराय गुय।”
HEB 12:22 बाकुन तुहुं सीयोन बयड़ान्‌चां, आय रया जु बयड़ु जीवतेला भगवानेन सरग वाळा यरुसलेम सहर मां छे। ने चां लाखु करुड़ु सरग वाळा काहवाळ्‌या छे, चे खुसी मनावे
HEB 12:23 ने भगवान पर भुरसु करीन पेहेल मरन्‌या, मनार्‌यान बठक मां, ने ईसुन माणसेन्‌चां तींद्‌रा नावे सरगे मां लिखला छे, ने आखान नीयाव करन्‌या भगवानेन्‌चां, ने चुखोझण हय्‌न पाक्‌का हवण्‌या धरमीन जीव-आत्‌मान्‌चां आवला छे।
HEB 12:24 ने तुहुं मेळ कराड़न्‌या ईसुन्‌चां आवला छे, जु भगवानेन ने माणसेन ईचमां वायदु करीन मेळ कराड़े। ने ईसुन छीतेड़ला लुहीन्‌चां आवला छे, चो लुही हाबीलेन लुही सी जादा वारु कह्‌वे।
HEB 12:25 तुहुं चेतीन रहु। बुलने वाळा भगवानेन बुली काजे सामळीन, मन बेहरा मां बणु। जे धरती पर बुलने वाळान बुली सामळीन बी मन बेहरा हय गुयला, कदी चे नी बच्‌या, ती आपणु सरग वाळान बुली सामळीन बी मन बेहरा हय जासु, ती कसा काय बचसु, जु आपणु काजे कय्‌न चेतावु करे।
HEB 12:26 तीनी टेमे धरती पर बुलने वाळान बुली, धरती काजे हालाड़ी देदली; बाकुन चु हय ज बमदीन कह्‌यु की “एक कावा अळी, मे धरती काजे अतरुत नी; बाकुन सरगे काजे बी हालाड़ी दीस।”
HEB 12:27 एक कावा अळी ईना बुल सी जु ईसारु जड़े की ईनी कळीन तीनी चीज काजे हालाड़से, ची चीज सर जासे, ने तीनी चीज काजे नी हालाड़े ची जलम लग टेकली रवसे।
HEB 12:28 आपणु काजे ज राज जड़लो छे, च कदी नी हाले, हेरेसी आपणु भगवान काजे तु बेसकु वारु छे कह्‌तात रवजे, ने तेरी मरजीन अनसारेत भक्‌ती ने भुरसु करीन तेरी सेवा चाकरी करजे।
HEB 12:29 काहाकी आपणु भगवान ते, धपीन भसम करन्‌यो आकठो छे।
HEB 13:1 तुहुं ईसु मसी मां भाय-बहणस्‌या छे, हेरेसी एक दीसरा सी परम करता रहु।
HEB 13:2 जे माणसे तुंद्‌रे घर आवे, तींद्‌री मेजवानी करनु घुण भुलु; काहाकी थुड़ाक जणा अंजाण्‌या माणसेन मेजवानी कर्‌या, ने अळी तीनुक मालम पड़्‌यो की, हामु ते जाणे बीगुर भगवानेन सरग वाळा चाकर्‌यान मेजवानी कर देदला।
HEB 13:3 हामु बी जेल मां छे, असो समजीन ईसु पर भुरसु करन्‌या केदड़ान मदत करने घुण ईसेरजु। ने हामरो डील बी दुख झेलन्‌योत छे समजीन ईसु पर भुरसु करन्‌या काजे, दीसरा माणसे वेला पाड़े, ती तींद्‌री मदत करने घुण ईसेरजु।
HEB 13:4 भगवान, छीनाळ्‌यान ने दीसरान बायरीक धरन्‌यान नीयाव करसे, ने डंड आपसे। हेरेसी आखा माणसे मां ईयाव ईज्‌जत सी हवणु चाहजे। ने दुयु माणसे काजे एक दीसरा पर भुरसु करे असु जीवन, जीवणु चाहजे।
HEB 13:5 धनेन हाय मां करु, ने जो काय तुंद्‌रे धड़े छे तेरेत मां नीसरा रहु; काहाकी भगवान आपसुत कह्‌लु छे, “मे तुसेक कदी नी छुड़ो, ने कदी नी ईसरो।”
HEB 13:6 हेरेसी हामु बे फीकर्‌या हय्‌न भगवान पर भुरसु करीन कह्‌जे, “मालीक भगवान मारे अगु छे, मे नी बीहयो। माणसे मारो काय बीगाड़ लेसे?”
HEB 13:7 जे तुहुं काजे भगवानेन खुस-खबर सामळायन तुंद्‌री अगवाय कर रया, तीनु काजे तुहुं हेर राखु; ने चे कसा भुरसान जीवन बेसकी वारु जीवीन पुरी कर्‌या; तसात तुहुं बी भगवान पर भुरसु करीन जीवु।
HEB 13:8 ईसु मसी वीतला टेम मां बी एक सारकु हतलु, ने आज बी तसुत छे, पीड़ीडीट जलम लग एक सारकु रवसे।
HEB 13:9 भाती-भातीन नवली सीकापण सामळीन मां बीखरायु; खाणे पीणेन पाळनी पाळनेन भुरसे मां रहु, काहाकी असो करने वाळान काय बी नफु नी हयु। तुंद्‌रो मन पाक्‌को करीन जीव-आत्‌मा मां बड़ने करीन, तुहुंक भगवानेन दया चाहजे।
HEB 13:10 हामु ईसु पर भुरसु करन्‌या धड़े एक असी चुखली वेदी छे, तेरेमां सी खाणेन हक, तम्‌बु मां पुजा-पाट करन्‌याक नी हय।
HEB 13:11 जुन्‌ली बुलीन अनसारे मुखी पुजारु, सालोम एक कावा जनवार्‌या काजे मारीन, तींद्‌रो लुही तम्‌बुन चुखला जागा मां ली जाय्‌न, पापेन बादा करीन वेदी पर चड़ावे; तीनु जनवार्‌यान डील काजे तम्‌बा सी आंग्‌ये ली जाय्‌न धपाड़ देसे।
HEB 13:12 आपणुक असला पुजारा बणावणे करीन ईसु बी आपसे लुह्‌ये करीन आपणु काजे चुखा करने करीन यरुसलेम सहरेन बारना सी बाहर दुख झेल्‌यु।
HEB 13:13 हेरेसी चालु, आपणु ईसुन नाव-बद्‌दी आपणे पर बी ली लेजे, ने जुन्‌ली रीती-भातीन डेराक छुड़ीन ईसुन्‌चां जाजे।
HEB 13:14 ईनी कळी मां आपणे वाटे जलम लग रह्‌वणे वाटे सहर नी हय, बाकुन आपणु एक आवणेवाळा सहरेन वाट देख रया।
HEB 13:15 हेरेसी आपणु भगवान काजे ईसुन साहरे बड़ायन बादा चहड़ाया करजे। मतलब आपणु आपणे मुंहडे करीन तेरा नावेक तेरा गुणे गाया करजे।
HEB 13:16 ने भलाय करनु, ने दया देखाड़नु आपणुक नी ईसेरनु चाहजे; काहाकी भगवान काजे ते असलीत बादा सी खुसी हवे।
HEB 13:17 मंडळीन पुडार्‌या, तुंद्‌रा जीव वाटे रात दाहड़ु फीकुर करीन जागली करीन दुवा करता रवे, ने अगवाय करे। तीनुक ते तुंद्‌रो जीव सुदारनेन जो काम भगवान सुपलु तेरु हीसाब किताप भगवान काजे आपणु पड़से। हेरेसी तींद्‌री मानु; ने तींद्‌रे अनुसार चालु, ने तीनु काजे ज काम खुसी सी करने देवु, दुखी हय्‌न नी काहाकी दुखी हय्‌न जो काम करसे ती, तुंद्‌रा जीव काजे काय बी नफु नी हये।
HEB 13:18 हामरे वाटे भगवान धड़े दुवा करता रहु। हामुक पाक्‌कु भुरसु छे की, हामरो मन चुखलु छे; ने हामु आखी वातेम वारु काम करनेन हेर करजे।
HEB 13:19 तुहुं सी लीलघाय करीन कहो की, तुहुं मारे वाटे भगवान सी दुवा करु की मे मामार तुंद्‌रेन्‌चां आय सको।
HEB 13:20 सांती आपण्‌यु भगवान, मालीक ईसु मसी काजे आपसा जलमेन वायदु करला लुहीन गुणेन साहरे मर्‌या-सर्‌याम सी जीवतु करीन बठु कर देदलु छे। जु ईसुत आपसा माणसेन राखवाळी करन्‌यु छे। तेरा माणसे गाडरा साय छे।
HEB 13:21 जुत सांती आपण्‌यु भगवान तुहुं काजे आखी भली वात मां बड़ाया करे। तेरे सी तुहुं भगवानेन मरजी पुरी करु, ने ज काय भगवान काजे चाहजे च काम करु। भगवान आपणा जीव मां जो आखो काम ईसु मसीन साहरेत पुरो करे। ने ईना ईसुन बड़ाय जलम पीड़ीडीट हवती रहणु चाहजे। आमीन।
HEB 13:22 ए भायस्‌यो ने बहणस्‌या, मे तुंद्‌रे धड़े लीलघाया करो की तुहुं मारी ईनी सांती आपणी वात काजे मान लेवु। काहाकी मे तुहुंक जाराक वात मानने करीन लिखलु छे।
HEB 13:23 मे तुहुंक जी खबर सामळावणु छे की आपणु भायस तीमुथीयुस जेलेम सी छुट गुयलु छे। कदी चु मामार आवसे, ती मे तेरे पुठ्‌ये तुहुं काजे भेळु हवणे आवीस।
HEB 13:24 आपणा आखा अगवाय करन्‌या काजे ने चुखला माणसे काजे वारलु छे की पुछु? ईटली देस वाळा तुहुं काजे बी वारलु छे की? करीन पुछ रया।
HEB 13:25 तुहुं आखा काजे भगवानेन गीण-दया जड़ती रह्‌वणु चाहजे। आमीन।
JAM 1:1 भगवान ने मालीक ईसु मसीन पावर्‌यु याकुप भीणी सी तीनु बारे चेला काजे जी रावण्‌या-तीवण्‌या हय्‌न रवे: तीनु काजे वारु छे की कह्‌वे।
JAM 1:2 ए मारा भायस्‌यो ने बहणस्‌या, ईसु पर भुरसु करनेन साहरे, तुंद्‌रे, पर कदी भाती-भातीन वेला ने पारख आया करे; तत्‌यार ईनी वात काजे तुहुं खुसीन वात समजु।
JAM 1:3 काहाकी तुहुं जाणु की तुंद्‌रु भुरसु जत्‌यार ईनी पारख मां जीत जाय, तीत हामु काजे गम खाणेन ताकत जड़े।
JAM 1:4 असा करीन तुहुं गम खाणेन ताकत काजे तुंद्‌री जीवाय मां पुरो-पुरो वदणे देवु; तेरेसी तुहुं भुरसा मां पुरा-पुरा पाक्‌का हय जावु, ने तुंद्‌री जीवाय मां काहनी बी वारलु वातेन कसर नी रवणु चाहजे।
JAM 1:5 कदी तुंद्‌रे मायन काहनाक धड़े, भगवानेन मरजीन अनसारे जीवणे करीन कम अक्‌कल हय, ती भगवान धड़े दुवा करीन अक्‌कल मांगु। भगवान ते आखा काजे मटले मने आपण्‌यु छे; आपणु मांग्‌या करीन चु आपणुक नी लड़े। चु तुहुंक अक्‌कल आपसे ने आपसे।
JAM 1:6 बाकुन तुहुं संक्‌या करे पाखुर भुरसु करीन अक्‌कल मांगजु, काहाकी संक्‌या करतु जाय्‌न वीन्‌ती करन्‌यु ते दर्‌याम आवणी झलकेन तसु छे, जी वाहळाम अथीन-अथी उछळ्‌या करे।
JAM 1:7 असो माणसे काजे कदी बी जी आस नी करनु चाहजे की, भगवान मालीक भीणी सी मेसेक काहींग जड़से।
JAM 1:8 भगवान पर संक्‌या करन्‌यु माणुस ते दुय मन वाळु रवे, ने आपसान जीवाय मां आखी वातेम टेक्‌लु नी रवे।
JAM 1:9 जत्‌यार भगवान तीना भाय ने बहणस्‌या गरीबी मां सी उपर उठाड़े ती हीनुक खुसी हवणु चाहजे।
JAM 1:10 ने भगवान तीना काहालाक भाय ने बहणस्‌या काजे लकपती मां सी गरीबी मां लावे जत्‌यार बी हीनाक खुसी हवणु चाहजे काहाकी लकपती जंगली चारान फुलेन तसों सरी जासे।
JAM 1:11 दाहड़ु उगतेत बेसको सेक लागे, ने चारान फुल झड़ जाय, ने बेसको वारु देखाय असो रवे चो सर जाय; तसुत अमीर माणुस बी, आपसा वाटे कमायणेन हाय-हरबड़ करतु-करतु मरीन धुळा मां भेसकाय जासे।
JAM 1:12 वारु छे चु माणुस जु पारख मां काठु रहे, काहाकी चु खरु बणीन जीवनेन पागड़ी जड़से जु वायदु मालीक आपसा सी परम करने वाळा सी करलु छे।
JAM 1:13 जत्‌यार बी काहनाक ने पारख आवे, ती चु असु कय्‌न भगवानेक वात नी काटणु चाहजे, काहाकी भगवान भुंडी वातेन नी ते पारख कर सके ने नी चु काहनान ने पारख खुद करे।
JAM 1:14 बाकुन काहना बी माणसे आपसीत हाय्‌न साहरे हापकाये ने फांदायन पारख मां पड़ जाय।
JAM 1:15 बाकुन जीत हाय माणसेन जीवाय मां बड़ जाय, ने माणसे पाप करने बाजी जाय। ने अळतेन पसतावु करे वीगुर चे असला पाप कर्‌या करे, ती आकरी टेमे, चे भगवानेन जीवाय सी छेटा हय्‌न जलमकात मर जासे।
JAM 1:16 ए मारा लाटेक्‌ला भायस्‌यो ने बहणस्‌या! आपसा काजे धुकु घुण देवु।
JAM 1:17 काहाकी उपर सीत, आपणुक वारलु चीज ने वारला वाटा आपे, तींद्‌रेम काय बी कसर नी रवे। ने आखो वीजाळान बास सीत जड़े, तेरेमां काय बी बदली नी हय सके, ने नी अदलु-बदलु करने सी तीना पर साहळु पाड़े।
JAM 1:18 हव, भगवान आपसीत मरजीन अनसारे, आपसान छाचाय्‌न छाचला बुल पर भुरसु कराड़ीन, आपणुक नवलो जीवाय आप्‌यु। भगवान एरेन करीन नवलो जीवाय आप्‌यु, की भगवानेन हाते बणावला आखा माणसे मायन, आपणु, भगवान वाटे पेहला फळ रवजे।
JAM 1:19 ए मारा लाटेक्‌ला भायस्‌यो ने बहणस्‌या! जी वात हेर राखु! की, एकेक माणुस भगवानेन बुल मन लागाड़ीन सामळनु चाहजे, ने बुले ती वीच्‌यार करे पाखुर मामार नी बुलनु चाहजे, ने मामार नी रीसायणु चाहजे।
JAM 1:20 काहाकी काहना बी माणसेन रीस, भगवानेन धरमेन काम नी कर सके।
JAM 1:21 आखी भुंडी वेहवार ने कुहराय काजे छेटी कर देवु। ने तुहुं ज भगवानेन छाचला बुल सामळ्‌या, तीना बुले काजे आपसान जीवाय मां नीचळा हय्‌न आवरी लेवु; काहाकी ज छाचलो बुल तुंद्‌रा जीव-आत्‌मा काजे छुटकारु आप सके।
JAM 1:22 हेरेसी भगवानेन बुले, सामळने वाळा अतरात नी, बाकुन तीनु बुलेन अनसारे जीवण्‌या बी बणु। कदी तुहुं भगवानेन बुल सामळीन तेरेत अनसारे नी जीवे, ती तुहुं आपसात काजे धुकु दी र्‌या।
JAM 1:23 जु भगवानेन बुल ते सामळे, बाकुन भगवानेन बुलेन अनसारे नी जीवे; चु तीना माणसे साय छे, जु आपसो मुंहडो आरस्‌या मां देखे,
JAM 1:24 काहाकी चु आपसा काजे आरस्‌याम देखीन जाती रहे ने मामार ईसरी जाय की आपसु कसु हतलु।
JAM 1:25 बाकुन जु माणुस जसों छुड़ावन्‌या चुखला सास्‌तुर कहें तसु धी‌यान करतु रहे, तेरा काम मां संयबरकत आवसे काहाकी चु सामळीन ईसरे नी बाकुन तसुत काम बी करे।
JAM 1:26 कदी काहनुक माणुस आपसा काजे मे भगवानेन भक्‌ती करन्‌यु छे असु मान लेय, ने आपसान जीप काजे आपसा बस मां नी राखे, ती चु आपसात काजे धुकु देय, हेरेसी तेरी भक्‌ती करनु वारु नी हय।
JAM 1:27 भगवानेन छाचलु भगत, पुराह्‌यला ने रांडायलान दुखो मां, तींद्‌री मदत करसे। अतरोत नी बाकुन चु तींद्‌री मदत करनेन टेमे बी, आपसा काजे ईनी कळीन पाप-धंदा सी छेटु राख्‌से। आपणा भगवान बासेन नींगा मां चुखलो ने नी-गुनावाळी भक्‌ती जीत छे।
JAM 2:1 ए मारा लाटेक्‌ला भायस्‌यो ने बहणस्‌या! आपणु मालीक ईसु मसी सेक-सींगार भर्‌यु छे, तेरे पर भुरसु करनेन साहरे आपणु आखा एक छे, हेरेसी काहनान बी वगे वळीन, नानला मटाक नेवाड़नु नी चाहजे।
JAM 2:2 मान लेवु, कदी एक माणुस सनान मुंदी ने वारु-वारु पुथल्‌या पेहरीन ईसुन भक्‌तीन घर मां आवे, ने एक गरीब तेरे धड़े काय बी नी हय, चु बी मुयेळ वाळा, कुचळायला पुथल्‌या पेहरीन आवे;
JAM 2:3 ने तुहुं तीना वारु-वारु पुथल्‌या पेहरीन आवण्‌यान मुंहडो देखीन कहुं की तु जां वारलु जागे बस ने तीना गरीब काजे कहुं की हय उबु रव, नीते मारा पायेन्‌चां बस,
JAM 2:4 असु वेहवार करीन तुहुं ते एक जणान आव-भाव करीन नानला मटान छीट राख रया, असलु वीच्‌यार भुंडुत छे जी वात तुहुंक मालुम नी हय काय? असु वीच्‌यार करीन, तुहुं मंडळीन माणसे गरीब ने मालदारेन नेवाड़ु पाड़ र्‌या।
JAM 2:5 ए मारा लाटेक्‌ला भायस्‌यो ने बहणस्‌या। सामळु। भगवान ईनी कळीन गरीब माणसे काजे भुरसा मां मालदार बणावे ने भगवानेन राजेन हकदार्‌या बणावणे करीन नेवाड़लु छे। जे भगवान काजे परम करे, तीनुक चु आपसा राजेन हकदार्‌या बणावणे करीन पेहलुत वायदु करलु हतलु।
JAM 2:6 बाकुन तुहुं ते छीट राखीन ईनु गरीब माणसेन हासी उड़ाया। तुहुंक कुरुट-कचेरी मां घीसड़ी-घीसड़ीन ली जाण्‌या कुण छे? जे मालदार माणसेत छे, जे तुहुंक वेला पाड़ र्‌या।
JAM 2:7 तुहुं तीना ईसुक भगवान मानीन, भक्‌ती कर र्‌या, तीना ईसुन नाव-बद्‌दी करन्‌या असला मालदार माणसेत छे।
JAM 2:8 मुसान नेम मां असो लिखलो छे, तु तार साते वाळाक तारेन तसुत परम कर। जु नेम कायदु आखाम मटु छे करीन आपणु राजा ईसु सीकाड़लु छे। कदी तुहुं जु नेम कायदु पाळु ती तुहुं वारलुत कर र्‌या।
JAM 2:9 बाकुन कदी तुहुं गरीबेन नेवाड़ु करीन मालदार्‌याक अतरोत परम कर रया, ती तुहुं पाप कर रया, हेरेसी तुहुं भगवानेन कायदान अनसारे कायदु तुहुंक गुनाळु ठेहरावे।
JAM 2:10 जु काहनुक भगवानेन आखा कायदाक पाळे, ने कदी एक कायदु बी पाळनेम चुक जाय, ती चु आखा कायदा पाळनेन नेम चुक गुयु कह्‌वाये।
JAM 2:11 काहाकी असो बी कहलो छे की छीनाळो घुण करजु, चु जु हुकुम बी आप्‌लु छे की खुन घुण करजु। काहाकी तुहुं छीनाळो ते नी कर्‌या बाकुन खुन अतरोत कर्‌या, तेबी तुहुं भगवानेन कायदान अनसारे गुनाळा रवसु।
JAM 2:12 तुहुं तीनु माणसे साय बुल कह्‌वु, ने काम बी करु, तींद्‌रो नीयाव हीना कायदान अनसारे हवसे।
JAM 2:13 जु दयाळु नी हय, हेरे वाटे भगवानेन नीयाव बी दया पाखुर हवसे; काहाकी दया नीयाव पर बड़ीन रवे।
JAM 2:14 ए भायस ने बहणस्‌या! कदी काहनुक, कह्‌वे की मे ईसु पर भुरसु करो। बाकुन चु भुरसान अनसारे भलायन काम नी करे, ती असु भुरसु करने सी काय बी फायदु नी हवे असु भुरसु करन्‌या माणसेक, भगवान छुटकारु नी आपे।
JAM 2:15 मान लेवु की काहना भायस नीते बहणीस धड़े पेहरने वाटे पुथल्‌या नी हय, ने दाहड़ीन खाणे वाटे खाणो बी नी हय;
JAM 2:16 ने कदी तुंद्‌रे मायन काहनुक तीनीक नीते तीनाक कह्‌वे, खुस हय्‌न जात रव, “ने वारु हुपवाळा पुथल्‌या पेहरजी ने पेट भरीन खाणो खाजी।” बाकुन चु कहण्‌यु तीनुक डीलो वाटे ज चाहजे च नी आपे, ती तेरा कवला बुले, तेरा ने सामळ‌न्‌यान काय बी फायदु नी करे।
JAM 2:17 असु भुरसु बी भलायन कामे बीगुर मरलु छे।
JAM 2:18 कदी काहनुक मेसेक असु पुछे की “भगवान पर तारु भुरसु छे काय?” ती मे तीनाक असु कयस “हव, मे ते भलायन कामेन साहरे भुरसान पुरावु दी रयु। मे ते तुसेक, मारु भुरसु मारी उठ-बस मां भगवानेन नावे करला भलायन कामेन साहरे देखाड़ीस।” बाकुन मे तीनाक ज बी पुछीस, “भगवानेन नावे भलायन काम करे बीगुर, तु कसु काय कय सके की, मे भगवान पर भुरसु करो।”
JAM 2:19 ए माणसे एकुत भगवान छे, असु तारु भुरसु छे काय? हसे रे! बाकुन भुतड़ान आत्‌मा बी एकुत भगवान छे। करीन भुरसु करे, ने थर-थर कापे। असलु भुरसु काय कामकु?
JAM 2:20 ए डेड़-अकल्‌या माणसे कदी तु ईसु पर भुरसु अतरुत करे, ने भुरसु करनेन साहरे देखाव पड़न्‌या भलायन काम नी करे ती तारु भुरसु फालतु छे, ईनी वातेन हुकारु भरने करीन तुसेक पुरावु चाहजे काय?
JAM 2:21 जत्‌यार आपणु बास अब्‌राहम आपसा पुर्‌याक इसाक काजे वेदी पर चड़ायु, ती काय चु काम सी धरमी नी बण्‌यु काय?
JAM 2:22 अब्‌राहमेन ते भगवान पर अतरु जबर भुरसु हतलु, की चु भगवान ज काय बी कह्‌यु, तीनाक करने करीन तीयार हतलु। हेरेसी जे भलायन काम अबराहाम्‌यु कर्‌यु, तेरेसी आपणे अगळ जी वात उजेंती हय जाय की अब्‌राहमेन भुरसान काय बी कसर नी रय।
JAM 2:23 चुखला सास्‌तुर मां असो लिखलो छे, अब्‌राहम ते भगवान पर भुरसु कर्‌यु, हेरेसी भगवान तीना भुरसान साहरे तीनाक धरमी बणायु। सास्‌तुरेन ज बुल अब्‌राहमेन जीवन मां पुरो हय गुयो। अतरोत नी बाकुन, चु भगवानेन दुस्‌तीदार कवायणे बाजी गुयु।
JAM 2:24 हेरेसी अब्‌राहमेन जीवनेन साहरे आपणे अगळ जी वात उजेंती हय जाय की भगवान पर माणसेन पाक्‌कु भुरसु फालतु नी रवे; चु भुरसु तींद्‌रे जीवन मां भलायन कामेन साहरे देखाव पड़से ने असला माणसेत काजे भगवान धरमी समजु।
JAM 2:25 तसोत राहाब बायरीन जात रंडी, जत्‌यार हयी आपसा खबर देण्‌या काजे आपसा घर राखी ने दीसरे वाट्‌ये सी मकली, ती काय ची काम सी धरमी नी बणी?
JAM 2:26 मे असु काहा कय रयु? मेसेक पाक्‌को मालुम छे की, जु भगवान पर भुरसु करे, बाकुन भुरसान अनसारे तेरी जीवाय मां भलायन काम देखाव नी पड़े, ती तेरु भुरसु मरलु‌ छे। असलु भुरसु एक मरला माणसेन तसु छे, जु दम नी लेय। तेरो डील ते छे; बाकुन जीव नी हय।
JAM 3:1 ए मारा भायस्‌यो ने बहणस्‌या, तुंद्‌रे मां सी बेसका सीकापण आपण्‌या मां बणु, काहाकी जाणु की हामु सीकापण आपण्‌या अळी बी गुना वाळा बणसु।
JAM 3:2 आपणु आखा भगवानेन बुलेन अनसारे जीवणे मां बेसका कावा चुक जाजे। हेरेसी तुंद्‌रे मां जे चे, भगवानेन बुल सीकाड़न्‌या नी बणनु चाहजे। कदी काहनुक आपसी जीप काजे कब्‌जाम राखीन, सामळ्‌ये असा बुले बुल्‌या करे, चु माणुस पुरु-पुरु पाक्‌कु छे, ने चु आपसा आखा डीलेक बी कब्‌जा मां राख सके।
JAM 3:3 जत्‌यार आपणु दाखलान हीसाबे वीच्‌यार करु; घुल्‌लाक कब्‌जाम करने करीन तेरा मुंहडा मां लगाम पेहरावणु पड़े। तीत, घुल्‌लु बदे ने आपणु तीनाक, जां ली जाणु हय चां ली जाय सकजे।
JAM 3:4 ने देखु जाराक वीच्‌यार करु! दर्‌याम चालन्‌यो ढंड्‌यो बी बेसको मटो छे। दर्‌याम बेसके जुरे चालनी आंधी मां चो ढंड्‌यो अथोन-अथो फीर जाय। तेबी एक नानलास हेंडलेन साहरे ढंड्‌यो चालाड़न्‌यु आंधी मां बी ढंड्‌या काजे, जां ली जाणु चाहजे चांहान ली जात रवे।
JAM 3:5 तसीत जीप बी आपणा डीलेन एक नानोस अंग छे, तेबी मटी-मटी वात करने मां पछी नी पड़े। बाकुन ईनी जीप वाटे बेसकी मटी नुकसाण झेलनु पड़े। हय आकठान तीणग्‌यान बारामां वीच्‌यार करु! ईना तीणग्‌यान साहरे बयड़ा मां आकठो लाग जाय, ने हुड़ु-हुड़ु बयड़ु धप जाय ती कतरो नुकसाण हय जाय।
JAM 3:6 तसी जीप बी आपणा डीलेन एक आकठो छे; जी आकठान तीणग्‌यान तसी छे, आपणुक जतर-कतर नी बुलनु चाहजे, नी ते आपणा हीया मनेम कुहराय काजे उजेंतो करे। जे बुले, आपणा आखा वीच्‌यार काजे ने काम काजे बी वीटाळ देय। जसों आकठीन आच आखी चीजेक धपाड़ीन सार देय, ने नरक कुंडेन आकठा सी धपती रवे।
JAM 3:7 ईनी कळीन भाती-भातीन जंगली जनवार्‌या काजे ने पाणीम चालन्‌या-फीरन्‌या जीव जनवार्‌या काजे, ने भाती-भातीन चिरला काजे ने धरती पर घीसड़ायन चालन्‌या भाती-भातीन जनवार्‌या काजे माणसे बदाड़ सके, ने बेसका जनवार्‌या काजे बदाड़ बी लेदला छे।
JAM 3:8 बाकुन माणसेन जीप ते लपळ्‌ळी छे, हेरेसी काहनु बी माणुस आपसान जुर, सी आपसी जीप काजे बदाड़ नी सके। कुहराय काजे उबजाड़े। छाचलीन जीप, जीव ली लेय, असला जहर साय छे।
JAM 3:9 ईनी जीप सीत आपणु मालीक भगवान बासेन बड़ाय करजे, ने ईनी जीपुत ती भगवानेन रुप मां घड़ायला माणसे काजे सराप देजे।
JAM 3:10 असु करीन एकुत मुंहडा सी आपणु सराप बी देजे ने भगवानेक बेसकु वारु कह्‌जे। असो हवणु वारु छे काय? ए मारा भायस्‌यो ने बहणस्‌या! असा घुण कह्‌वु।
JAM 3:11 एकुत झीरेम सी गुळो ने खारलो पाणी नीकळी सके काय? कहुं ते खरा!
JAM 3:12 ए मारा भायस्‌यो ने बहणस्‌या! अंजीरेन झाड़का पर जेतुनेन झाड़कान फळ लागे काय? ने अंगुरेन रेला मां अंजीरेन फळ लागे काय? तसात खारला पाणीन झीरेम सी गुळो पाणी नी नीकळे।
JAM 3:13 तुंद्‌रे मायन असु कुण छे, चु आपसा काजे अकलवाळु ने जानकार समजे? जु असु हय, चु आपसी छाचली अकलेन साहरे पुरावु देणु चाहजे। ने ईनी छाचली अक्‌कल काजे दीसरा साते नीचळाय्‌न वेहवारेन ने कामेन साहरे उजेंती करनु चाहजे।
JAM 3:14 बाकुन कदी तुहुं आपसा-आपसा मनेम घमंड राखीन कुहराय ने दीसरा सी मटा बणने हींडे, ती तुंद्‌रो ज मटाय करनु झुट छे। तुहुं ते आपसा बारामां जो काय छाचाय्‌न वीरुद मां झुट मेक रया की हामु जानकार अकलवाळा छे। हेरेसी तुहुं मटाय करनु ने झुट मेकणु छुड़ देवु।
JAM 3:15 असली मटाय करनेन अक्‌कल उपर सरगे सी नी आवे, बाकुन ईनी कळीन माणसे धड़े छे। असली अक्‌कल नी आपे; बाकुन भुतड़ा धड़े सी आवे। असलु अक्‌कल वाळु डीलेन अतरुत फीकुर करे, बाकुन आपसान जीव-आत्‌मान फीकुर नी करे।
JAM 3:16 जां आखा माणसे एक दीसरा पर कुहराये, ने दीसरा सी मटा बणनेन हेर करे, चां आखी भातीन कुहरला कामे ने लड़ाय हवे।
JAM 3:17 बाकुन जी अक्‌कल भगवान उपर सी आपे, ची अक्‌कल खास चुखली छे। असला अकलवाळा माणसे, दीसरा साते भेळा रवे, ने सुवाळा रवे, ने दीसरान वात बी मान्‌ने तीयार रवे। चे बेसका दयाळा छे, ने दीसरान भलाय करता रवे। चे ते ढंगड़ा नी करे, ने काहनान छीट राखीन काहनान वगे नी वळे।
JAM 3:18 मेळ कराड़ने वाळा जे अकलवाळा माणसे दीसरा साते हेळी-मीळीन रवे, चे दीसराक बी मीलाड़ देय, ने असा करीन चे आखा मेळीन धरमेन काम करीन जीवणे बाजी जाय। जे वारलु वेरे, चे वारलुत काटे।
JAM 4:1 हय तुंद्‌रे ईचमां लड़ाय-झगड़ा कां सी आय गुया? तुहुंक जी वात मालुम नी हय काय तुंद्‌रा डीलेम ने मनेम मजा लेण्‌या छीनाळ्‌या वीच्‌यारे, भगवानेक चाहजे असली वातेन वीरुद मां लड़ाय रया। तीनु वीच्‌यारेन साहरे तुंद्‌रे ईचमां लड़ाय-झगड़ा हय र्‌या।
JAM 4:2 तुहुं हाय ते कर र्‌या, बाकुन ची हाय पुरी नी हवे, हेरेसी तुहुं दीसरान खुन करने हींड रया। ने तुहुं दीसरा पर कुहराये, बाकुन तुहुंक काय नी जड़े हेरेसी तुहुं लड़ाय-झगड़ु कर रया। तुहुंक ज जड़नु चाहजे, च नी जड़तो काहाकी तुहुं भगवान धड़े च नी मांग्‌ता
JAM 4:3 तुहुं मांगु ने जड़े नी, हेरेसी की भुंडला वीच्‌यार सी मांगु, काहाकी आपणे पाप-धंदाम मुजा लेणे मां उजाड़ देवु।
JAM 4:4 सामळु हय तुहुं, तीनी छीनाळी बायर साय छे, जी आपसा घरवाळाक छुड़ीन दीसरा पुठ्‌ये छीनाळो करे। तुहुं ते छाचला भगवान काजे छुड़ीन ईनी कळीन चीजेन हेर कर रया। तुहुंक जी वात मालुम नी हय काय? की ईनी कळीन कुहरायला माणसेन तसा कुहराय करीन तींद्‌रे साते दुस्‌ती करनु भगवान साते खार करनु छे। हेरेसी जु काहनुक जाणी बुजीन ईनी कळीम दुस्‌तीदार बणने हींडे, चु भगवानेन वेरी बण जाय।
JAM 4:5 चुखला सास्‌तुर मां सी आपणुक जी सीक जड़ली छे, की भगवान जत्‌यार माणसेक बणायु, तत्‌यार आपणा जीवो ने डीलो पुठ्‌ये रहणे करीन जीव-आत्‌मा काजे बी बठाड़्‌यु। हेरेसी चु आपणा जीव-आत्‌मान बारामां जी फीकुर करे, की आपणु जीव-आत्‌मा तेरे वाटे पुरो जीवणु चाहजे। चुखला सास्‌तुरेन ज बुल भुंडला वीच्‌यार सी। असा तुहुं समजी र्‌या काय?
JAM 4:6 चु भगवान ते आपणे पर बेसका दया देखाड़े। हेरेसी सास्‌तुर मां ज बी लिखलो छे की “भगवान मटाय करन्‌यान वीरुद करे, बाकुन नीचळा माणसे पर दया करे।”
JAM 4:7 हेरेसी तुहुं भगवानेन हक मां हय जावु, ने भुतड़ान वातेन वीरुद करता जाय्‌न भुतड़ा साते गड़दी जावु, ती चु तुंद्‌रेन्‌चां सी ढास जासे।
JAM 4:8 भगवानेन्‌चां आवु, ती भगवान बी तुंद्‌रेन्‌चां आवसे। ए पापी माणसे। पाप करनु छुड़ देवु, ने तुंद्‌रा संका काजे छुड़ु, ने चुखला वीच्‌यार राखु।
JAM 4:9 दुखी हवु ने कलप्‌या करु, ने रड़ु। तुंद्‌री हासी दुख मां ने तुंद्‌री खुसी नुरपाणी मां बदली जासे।
JAM 4:10 हेरेसी तुहुं मालीक अगळ नीचळा बण जावु; ती मालीक तुहुंक नानला सी मटा बणावसे।
JAM 4:11 ए भायस्‌यो ने बहणस्‌या! तुहुं एक दीसरान नाव-बद्‌दी मां करु। भगवान आपसा कायदाम असु हुकुम आपलु छे की, तुहुं आपसा सातेवाळाक परम करु। हेरेसी कदी तुहुं, ईसु पर भुरसु करन्‌या आपसा भायस्‌योन नाव-बद्‌दी कर रया, ने तेरे पर गुनु लागाड़ रया हय, ती तुहुं भगवानेन कायदान नाव-बद्‌दी कर रया, ने तेरे पर गुनु लागाड़ रया। ने कदी तुहुं भगवानेन कायदा पर गुनु नाख रया, ती तुहुं ते भगवानेन कायदान अनसारे चालने वाळा नी, बाकुन तेरे पर नीयाव करने वाळा बण रया।
JAM 4:12 कायदु बणावीन आपणे वाळु ते भगवान छे; कायदान अनसारे नीयाव करन्‌यु बी हयुत छे। हेरेसी माणसेन नीयाव करीन तीनाक नीयाव करने वाळु, नी ते तीनाक बचाड़नेन हक बी तेरे धड़े छे। बाकुन तु कुण छे, जु आपसा सातेवाळा पर गुनु लागाड़ रयु?
JAM 4:13 तुहुं ते ज कय रया, की आज नीते वाहणे हामु काहनाक दीसरा सहर मां जाय्‌न, “एक साल लग काम करसु ने वेपार करीन नफु कमायसु। बाकुन मारी वात मन लागाड़ीन सामळु ते खरा।”
JAM 4:14 तुहुं ज नी जाणु की वाहणे काय हवसे। तुंद्‌री जीवाय्‌न काय ठीकाणो नी हय। तुंद्‌री जीवाय ते कुळ्‌ळा साय छे, जी थुड़ीक वार देखाव पड़े ने अंछाप हय जाय।
JAM 4:15 हेरेसी तुहुंक असो कहंणु चाहजे की कदी भगवान मालीकेन मरजी हसे, ती वाहणे बी जीवतेलो रवसु ने ज काम नी ते पलो काम करसु।
JAM 4:16 बाकुन तुहुं ते हय बी असा कह्‌ता जाय्‌न मटाय कर रया की हामु जु वीच्‌यार कर्‌या तसोन-तसों करसु। असी मटाय भगवानेन नींगा मां भुंडी छे।
JAM 4:17 हेरेसी काहनुक भलाय करनु जाणीन बी भलाय नी करे, ती चु पाप कर रयु।
JAM 5:1 ए अमीर माणसे! मारेन्‌चां आवीन मारी वात सामळु। जत्‌यार भगवान तुंद्‌रु नीयाव करसे, तत्‌यार तुहुंक बेसका वेला करनु पड़से। तुंद्‌रे वाटे ज वारु रवसे, की तुहुं हय तीनी गरान बारामां वीच्‌यार करीन रड़ु ने कलपु।
JAM 5:2 तुहुं आपसा वाटे घणो माल धन जापताये मेल रया। बाकुन हय देखु, तुंद्‌रा पयस्‌या टका जीर गुयला छे; ने तुंद्‌रा वारलु-महंगला पुथल्‌या पर वेधु लाग गुयली छे।
JAM 5:3 देखु ते खरा, तुंद्‌रा सनो चांदी पर बी कीटी लाग गुयली छे। जत्‌यार भगवान तुंद्‌रु नीयाव करसे, ती हयी कीटी तुंद्‌रा गुनान जी गवा देसे की तुहुं बेसका हायाळ्‌ळा छे। जसी आकठी माणसेक खाय जाय, तसुत भगवान तुहुंक डंड आपसे। तुहुं ते खत्‌तम हवणी ईनी कळीन आकरी दाहड़ा मां बी धन भेळो करीन धीग लागाड़ रया।
JAM 5:4 दाहड़क्‌या तुंद्‌रा खेतेन मेर काट्‌या, ने तुहुं तीनुक दाहड़की नी आप्‌या। ची दाहड़की तुंद्‌रा गुनान बारामां जुर सी आयड़ी रय, सामळु ते खरा चे दाहड़क्‌या बी रड़ने कलपणे बाजी रया। ने ताकत वाळु मालीक भगवान तींद्‌रो रड़नु सामळी लेदलु छे।
JAM 5:5 तुहुं धरती पर वारु सुक सी जीवीन बेसका मुजा कर लेदला छे; ने तुहुं खस्‌सी कराड़ला बुकड़ान तसा मातालीस हय रया।
JAM 5:6 जे धरमी तुंद्‌री मानीन सांबु बुल लग नी कह्‌या, तुहुं तीनु धरमी काजे गुनाळा छे, कय्‌न मार नाख्‌या।
JAM 5:7 हेरेसी ए भायस्‌यो ने बहणस्‌या! मालीक ईसुक पछा आवणे लग दम धरीन रवजु। किरसाण काजे देखीन सीकु, चु ते खेतेम वारु पाकाड़ने करीन दम धरीन रवे, हव चु पेहलु ने आकरी पाणी आवणेन वाट देखता रवे।
JAM 5:8 मालीक ईसुन पछु आवणेन दाहड़ा धड़ेस आय रया। हेरेसी तुहुं बी दम धरीन रवजु ने हदस मां छुड़ु।
JAM 5:9 ए भायस्‌यो ने बहणस्‌या, आखान नीयाव करन्‌यु भगवान ते धड़ेस आय रयु। हेरेसी एक दीसरान चुरी-चुगली मां करु। तुहुं चुरी-चुगली नी करु ती तुंद्‌रे पर बी भगवान गुनु नी लागाड़े।
JAM 5:10 ए भायस्‌यो ने बहणस्‌या! तुहुं जाणु की भगवानेन अघली वात बताड़ने वाळा माणसे भगवानेन खबर पुगाड़्‌या, करीन दीसरा माणसे तीनुक बेसका वेला पाड़्‌या, तेबी चे दुख झेल्‌या ने गम खादा तुहुं बी तीनुक हेर राखीन, दुख ने वेला मां बी गम खाय्‌न दम धरीन रवजु।
JAM 5:11 आपणु कह्‌जे की जे दुखेम बी गम खाता रहणु, चे बरकतवाळा छे, तुहुं आयुबेन बारामां सामळ्‌या नी काय? तीनाक ते बेसको दुख झेलनु पड़्‌यो, तेबी चु कतरु वारु गम खाय्‌न दम धरीन रयु। आपणु जाणजे की भगवान मालीक आकरी टेमे तीनाक संयबरकत आप्‌यु, ने तीनाक एक अंजाण्‌यु माणुस बणाय देदु। चु आपणु भगवान मालीक ते बेसकु दयाळु छे।
JAM 5:12 ए भायस्‌यो ने बहणस्‌या, हय मे एक खास वात बताड़ो, सगुन घुण खाजु, नीते सरगेन, नीते धरतीन, नीते काहनीक चीजेन। ज काम तुहुंक नी बणे, तीना कामेक मे कर लीस करीन घुण कह्‌जु। ज काम तुहुंक बण जाय, तीना कामेक मे कर लीस कह्‌जु। ज काम तुहुंक नी बणे, तीना कामेक मेसेक ज नी कराये करीन कह्‌जु। असा कह्‌ता रवसु, ती भगवान तुंद्‌रे पर गुनु नी लागाड़े।
JAM 5:13 कदी तुंद्‌रे मां कुय वेला कर रयु हय, ती चु भगवान धड़े दुवा करनु चाहजे; ने कदी काहनुक सुकनु हय, ती गीत गावीन भगवानेन गुण गावु।
JAM 5:14 कदी काहनुक मांदु पड़ रयु हय, ती तीनाक असो कह्‌वणु चाहजे, की मार वाटे दुवा करने करीन मंडळीन मुख्‌या काजे बुलाय लावु, ने चे आवीन मालीक ईसुन नावे तीना मांदलान तेल चुपड़ीन दुवा करसे,
JAM 5:15 ने भुरसा भेळी करली दुवान साहरे मांदलु वारु हय जासे, ने मालीक ईसु तीना मांदला काजे वारु कर देसे, ने चु खाट्‌ली मां सी उठी आवसे। ने चु कदी पाप कर्‌यु हय, ती तीनाक माफी बी जड़ जासे।
JAM 5:16 हेरेसी तुहुं एक दीसरा अगळ आपणा-आपणा पापेक मान लेवु, ने एक दीसरा वाटे दुवा करु, तेरेसी तुहुं डील ने जीव-आत्‌मा मां वारका हय जावु। छाचलीन धरमी माणसेन दुवा ताकतवाळी ने कामकी रवे।
JAM 5:17 एलीयान बी ते आपणेन तसु सुक-दुख झेलन्‌यु माणुस हतलु। तेबी चु भगवान धड़े मन लागाड़ीन दुवा कर्‌यु, की पाणी नी आवणु चाहजे। ने साड़े तीन साल लग धरती पर पाणी नी पड़्‌यु।
JAM 5:18 अळतेन चु एलीया भगवान धड़े दुवा कर्‌यु, की पाणी आवणु चाहजे ने सरगे सी पाणी पड़्‌यु, ती धरती पर मेर पाकी।
JAM 5:19 ए मारा भायस्‌यो ने बहणस्‌या, कदी काहनुक भगवानेन छाचले वाट्‌ये सी छेटु हय जाय, तत्‌यार तीनाक छाचले वाट्‌ये अळी पछु लावणे करीन तेरी मदत करु।
JAM 5:20 ती चु असु जान लेणु चाहजे की जु काहनुक काहनाक भटकला पापी काजे पछु ली आवसे, चु जीव-आत्‌मा काजे जलम लग मुत मां सी बचाड़ लेसे। हेरेसी जी वात पाक्‌का जाणीन पापेम खुवायलाक पछु लावणेन काम हासी-खुसी सी करु।
1PE 1:1 पतरस भीणी सी जु ईसु मसीन नेवताळु छे, हीनु परदेसेन नाव, जे पुन्‌तुस गलातीया, कप्‌पुदुक्‌या, आसीया, ने बीतुनीया, मां आखे रावण्‌या-तीवण्‌या रवे,
1PE 1:2 ने भगवान बासेन आवणे वाळी वातेन अकलेन अनसारे, आत्‌मान चुखला करनेन साहरे हुकुम मान्‌ने ने ईसु मसीन लुही छीटणे करीन नेवाड़्‌लु छे। तुहुंक गीण-दया ने सुक-सांती बेसकी जड़ती रवे।
1PE 1:3 हामरा मालीक ईसु मसीन भगवान ने बासेन बड़ाय हवे, जु ईसु मसी मरलाम सी जीवतु हवणे सी आपसान मटी दया सी हामुक जीवतेली आस वाटे नवली जीवाय आप्‌यु।
1PE 1:4 मतलब कदी खत्‌तम नी हवणे वाळी ने; ने जलम रहणेन भाग वाटे जी तुंद्‌रे वाटे सरगे मां मेकली छे।
1PE 1:5 ज्‌य तारे वाटे छे ज्‌य भुरसान साहरे भगवानेन ताकत सी हीना छुटकारा वाटे समाळीन मेकी जाय, ज्‌य आकरी टेम मां देखायणे वाटे तीयार छे।
1PE 1:6 हेरे वजे सी तुहुं खुसी हवु, मानु जरुड़ी छे की हय काय दाहड़ा लग काय तरान दुख झेलनु पड़ र्‌यो;
1PE 1:7 ने जी हेरेसी छे की तुंद्‌रु पारख हवलु भुरसु, जे आकठा सी तय हवलो खत्‌तम हवण्‌या सना सी बी काही अदुस बेसको जरुड़ी छे, ईसु मसी देखता हवणे पर बड़ाय ने सेक-सींगार ने ईज्‌जतेन वजे बणे।
1PE 1:8 तुहुं ईसु काजे कदी नी देख्‌या, तेबी तुहुं हेरसी परम राखु। तुहुं हय बी हीनाक नी देखु तेबी हेरे पर भुरसु करु। ने भुरसु करीन असा खुसी हवु ने मुरखायु ज्‌य बीयान सी बाहार ने सेक-सींगार सी भरला छे;
1PE 1:9 ने आपणा भुरसान दाहड़ीन फळ मतलब आत्‌मान छुटकारु जड़े।
1PE 1:10 हीना छुटकारान बारामां हीनु भगवानेन अघी सी आवणे वाळी वात देखान्‌यु कवण्‌या बेसका हेरी भाळने ने पारख कर्‌या जे हीना गीण-दयान बारामां जे तुंद्‌रे पर हवणु हतलो भगवानेन अघी सी आवणे वाळी वात देखान्‌यु करली हतली।
1PE 1:11 चे ईनी वात काजे हेर्‌या की मसीन आत्‌मा जो हींद्‌रे मां हतली ने पेहल सी मसीन दुखेन ने हेरे पछेन हवणेवाळी सेक-सींगारेन गवाय आपली हतली चु कुण छे ने कसली घड़ी भीणी ईसारु करतेलु।
1PE 1:12 हींद्‌रे पर ज्‌य देखाड़ी गीला छे की चे आपणी नी बाकुन तुंद्‌री चाकरी वाटे ची वात कह्‌या करतेला, तींद्‌रो खबर हय तुहुं हींद्‌रे साहरे जड़लो जीनुक चुखली-आत्‌मान साहरे, जे सरग सी मकल्‌या गीला तुहुं खुस-खबर सामळ्‌या; ने ईनी वात काजे सरग वाळा काहवाळ्‌या बी धी‌यान सी देखणेन लालच राखतेला।
1PE 1:13 हेरेसी तुहुं आपणे मनेन ताकत काजे काम करने वाटे तीयार करे ने खुद समळीन रय्‌न तीनी गीण-दया पर पुरी आसा मेकु, जी ईसु मसीन उजेंतो हवणेन टेमे तुहुंक जड़ने वाळो छे।
1PE 1:14 हुकुम मान्‌या पुर्‌यान तसा आपणी डेड़ अकलेन जुन्‌डली भुंडली लालुच करने वाळान तसा मां बणु।
1PE 1:15 बाकुन जसा तुंद्‌रो बुलावणे वाळु चुखलु छे, असात तुहुं बी आपणा आखा चाल-चलन मां चुखला बणु।
1PE 1:16 काहाकी लिखलो छे, चुखला बणु। काहाकी मे चुखलु छे।
1PE 1:17 ने जत्‌यार की तुहुं ए बास कवीन हीनाक दुवा करो, जे काट छाट पाखुर आखा एक कामेन अनसारे नीयाव करे, ती आपणे परदेसी हवणेन घड़ी धाक सी बीतावु।
1PE 1:18 काहाकी तुहुं जाणु की तुंद्‌रा पापी चाल-चालन जो बास डुकरान टेम सी फालतु चाल छे, हेरसी तुंद्‌रु छुटकारु चांदी-सना मतलब खत्‌तम हवणे वाळी चीजेन साहरे नी हयो;
1PE 1:19 बाकुन ईसु मसीन चुखला ने नी-गुनाळु लुहीन साहरे तुहुंक छुड़ायु। चु ईसु मसी तीना चुखला गाडरान तसु छे तीना गाडरा काजे पुजारा मंदीरेम पापेन माफी वाटे मारीन चहड़ावतेला।
1PE 1:20 कळी घड़ायणेन पेहलुत भगवानेन साहरे नेवाड़ी गुयलु, बाकुन हय तुंद्‌रे वाटे आकरी दाहड़ा मां, उजेंतु करलु छे।
1PE 1:21 हेरे साहरे तुहुं हीना भगवान पर भुरसु करजे जु हीनाक मरलाम सी जीवाड़्‌यु ने सेक-सींगार आप्‌यु की तुंद्‌रु भुरसु ने आस भगवान पर हवे।
1PE 1:22 तुहुं भगवानेन हुकुम मानीन खुस-खबर छाचाय काजे मानी रया, ने असा करीन तुहुं आपसान जीव काजे चुखु कर र्‌या करीन, ईसु पर भुरसु करन्‌या भाय-बहणस्‌या वाटे, तुंद्‌रा मन मां चुखला परम वाटे जागु छे। हेरेसी हय तुहुं खरले मने वारु मन लागाड़ीन एक-दीसराक परम करता रवणु चाहजे।
1PE 1:23 काहाकी तुहुंक जी नवली जीवाय जड़ली छे, ची ईतराक दाहड़ा वाटे नी हय तुहुं काजे जी नवली जीवाय खत्‌तम हवण्‌या बीजेन तसों नी हय बाकुन अमर जीवन मतलब भगवानेन जीवतेला ने जलम रवणेवाळा बुलेन साहरे हवलु छे।
1PE 1:24 काहाकी आखी कळीन माणसे खड़ेन तसा छे, “ने तींद्‌री सुभा खड़ेन फुलेन तसी छे। खड़ चीमाय जाय, ने फुल सड़ी जाय,
1PE 1:25 बाकुन मालीकेन बुल जलम पीड़ीडीट काठो रवसे।” ने जुत खुस-खबरेन बुल छे तुहुंक सामळ्‌या गीलो हतलो।
1PE 2:1 हेरेसी आखी भातीन काट-छाट ने झुट ने ढंगड़ा ने डाहवाय ने नाव-बद्‌दी काजे छेटा करीन,
1PE 2:2 नवलो पयदा हवला पुर्‌यान तसा वारु जीव-आत्‌मान दुतेन लालच करु काहाकी हेरे साहरे छुटकारु जड़ने वाळा वाटे अदता जावु।
1PE 2:3 काहाकी तुहुं मालीकेन दयान सवाद चाखी लेदला छे।
1PE 2:4 हय तुहुं ईसु धड़े आवला छे, जु जीवतेलु दगड़ु छे, तीनाक माणसे फालतु छे करीन छुड़ देदा बाकुन भगवान वाटे बेसको जरुड़ी ने नेवाड़लु छे।
1PE 2:5 तुहुं बी आपसात जीवतेला दगड़ान तसा जीव-आत्‌मान घर बणावता जावु, तेरसी पुजारान चुखला समाज बणीन असा जीव-आत्‌मान बादा चड़ावु जो ईसु मसीन साहरे भगवान काजे गमे।
1PE 2:6 हेर वजे सी चुखला सास्‌तुर मां बी आवलो छे; देखु मे सीयोन बयड़ा मां खुड़ान सीरेन नेवाड़ला ने बेसकु जरुड़ी दगड़ु मेको; ने जे कुय हेरे पर भुरसु करसे, चु काहानी बी रीत सी नाव-बद्‌दी नी हवे।
1PE 2:7 अळतेन तुंद्‌रे वाटे जे भुरसु करु चु ते बेसको जरुड़ी छे, बाकुन जे भुरसु नी करे हींद्‌रे वाटे, तीना दगड़ा काजे मीस्‌तर्‌या फालतु ठेरावला हतला। बाकुन हयुत खुणान खास दगड़ु हतलु।
1PE 2:8 ने, “ठुकोर लागणेन दगड़ु ने ठुकर खाणेन चापर्‌या बण गुया।” काहाकी चे ते बुल काजे नी मानीन ठुकर खाय, ने ज्‌य डंड हींद्‌रे वाटे भगवानेन साहरे ठेरावलु छे।
1PE 2:9 बाकुन तुहुं नेवाड़ला खानदानी छे, ने राज पाट वाळा पुजारा ने चुखला माणसेन टुळु छे, ने भगवानेन वारलु माणसे छे, हेरेसी की भगवान तुहुं काजे आंदारला मां सी बेसका मटा वीजाळा मां बुलावलु छे हेरा गुण देखाड़ु।
1PE 2:10 तुहुं पेहल ते काय बी नी हतला बाकुन हय भगवानेन माणसे छे तुंद्‌रे पर दया नी हवली हतली बाकुन हय तुंद्‌रे पर दया हवी।
1PE 2:11 ए लाटेक्‌ला भायसे मे तुंद्‌रे सी लीलघायो की तुहुं आपणे आप काजे दीसरे देस सी आवलु ने आवणे जाणे वाळु जाणीन हीनु कळीन डीलेन भुंडली लालच सी जे आत्‌मा सी लड़ाय करे बची रवु।
1PE 2:12 आड़जात्‌या मां तुंद्‌रो चाल-चलन वारु हवणु चाहजे; काहाकी जीनु-जीनु वात मां चे तुहुंक पापी जाणीन नाव-बद्‌दी करु चे तुंद्‌रो वारु काम काजे देखीन हयुत वजे सी, भगवानेन आवणे दाहड़े चे सेक-सींगार करे।
1PE 2:13 मालीक ईसु वाटे ठहरावला हरेक हक-जमाड़न्‌या आखा हकदार्‌यान हक मां रहु भले चु कळीन आखा देस पर राज-करन्‌यु मुख्‌यु राजु काहनी हय,
1PE 2:14 भले चु एकेक राजवाड़ानम नीते एकेक जीलाम राज करन्‌यु हय। भगवान कुहर्‌याक डंड आपणे ने भलाय करन्‌याक वारु कर्‌या कहणे करीन तीनु राज करन्‌याक ठेरावलु छे।
1PE 2:15 काहाकी भगवानेन जी मरजी छे की तुहुं वारु काम करनेन साहरे डेड़-अकल्‌या माणसेन मुंहडा काजे बंद करु जे बे फालतु वात करता रवे।
1PE 2:16 जी वात छाचली छे की, तुहुं ईसुन लारे छुटला माणसे बण गुयला छे करीन हीना हक काजे नाव-बद्‌दी करन्‌या मां बणु, बाकुन आपसा काजे भगवानेन गुलाम पावर्‌यु जाणीन पापेम सी छुटला रवीन जीवु।
1PE 2:17 आखान ईज्‌जत करु, भायस्‌यो सी परम राखु भगवान सी बीहु, राजान आव-भाव करु।
1PE 2:18 ए पावर्‌या आखी तरान ईज्‌जत साते आपणा मालीकेन हक मां रहु नी सीरप हींद्‌रे जे वारुत ने नीचळा बाकुन भुंडा छे हींद्‌री बी ईज्‌जत करु।
1PE 2:19 काहाकी कदी कुय भगवानेन वीच्‌यार करीन नी-नीयाव सी दुख हाकलीन पीड़ाक सेण करे ती चु वारु बड़ाय लायक छे।
1PE 2:20 काहाकी कदी तुहुं गुनु करीन सपाटा खादा ने दम धरीन रया तेरेमां काय बड़ायन वाते छे? बाकुन कदी वारु काम करीन दुख हाकलीन ने दम धरीन रवु ती जी भगवानेन बड़ाय लायक छे।
1PE 2:21 ने तुहुं हेरे वाटे बुलाय बी गुयला छे काहाकी मसी बी तुंद्‌रे वाटे दुख हाकलीन तुहुं एक नमुनु आप देदलु छे की तुहुं बी तेरेन तसा चाल सकु।
1PE 2:22 नीते ईसु पाप कर्‌यु ने नी हेरे मुंहडा सी धुकान काय वात कर्‌यु।
1PE 2:23 चु गाल सामळीन गाल नी देदु ने दुख हाकलीन काहना काजे बी धमकी नी देदु बाकुन आपणे आप काजे धरमी नीयाव करन्‌या भगवानेन हात मां सुपलु हतलु।
1PE 2:24 मसी आपसुत हामरा पाप काजे आपणा डील पर लीन कुरुस पर चड़ गुयु तीनाक पापे वाटे मारीन धरम वाटे जीवन जीवतु हेरे मार खाणे सी तुहुं वारु हय गुया।
1PE 2:25 बाकुन हय गुवाळ्‌या ने आत्‌मान राखवाळी करने वाळा धड़ेत आया।
1PE 3:1 ए बायरा आपणा-आपणा अदमीन हक मां रवु, जेरेसी की कदी हींद्‌रे मां सी कुय भगवानेन बुलेन हुकुम नी मानने वाळु हय ती बी तुहुं काय बी नी कहुं तेबी चे आपणी-आपणी बायरीन सभावेन साहरे भुरसा मां आय जासे।
1PE 3:2 काहाकी चे तुंद्‌री चुखली ने वारलु आव-भाव काजे देखता रवे।
1PE 3:3 तुंद्‌रो बेसको जीर्‌ये देखायणु मुणका वाटे नी हवणु चाहजे मतलब कान्‌या गुथणु ने सनान रकम नीते भाती-भातीन पुथल्‌या पेहरनु।
1PE 3:4 बाकुन तुंद्‌रो डुकायलो ने सातायलो माणुस नरम ने मनेन नीचळान कदी नी खत्‌तम हवणु चाहजे तसों बेसके जुरे देखायणु साप-सुतरो रवे काहाकी भगवानेन नींगा मां हेरी कीमत मटी छे।
1PE 3:5 पेहली टेम मां चुखला बायरा बी ज भगवान पर आस राख तेला आपणे आप काजे ईनी रीत सी सवारे ने आपणा-आपणा अदमीन हक रवतेली।
1PE 3:6 जसी सारा अब्‌राहमेन हुकुम मान तेली ने हीनाक मालीक कवतेली अळतेन तुहुं बी कदी भलाय करु ने काहनीक तरा धाक सी बीहु नी ती हेरी पुरे बणसु।
1PE 3:7 असात ए अदमी तुहुं अक्‌कल सी बायरा साते सवसार करु ने बायरी काजे लुली जाणीन हेरु आव-भाव करु ज समजीन की हामु दुयु जीवनेन दयान वाटाम हक मां छे जेरेसी तुंद्‌री दुवा रुकी नी जाय।
1PE 3:8 अळतेन आखान आखा एक मन ने दयाळा ने भायस-भायस सी परम राखणेवाळा ने गीण-दयाळा ने नरम बणु।
1PE 3:9 कुहरायन बदले कुहराय मां करु ने गाळीन बदले गाळी मां देवु बाकुन हेरे उल्‌टा बरकत आपु काहाकी तुहुं संयबरकत हकदार हवणे वाटे बुलाय गुयला छे
1PE 3:10 काहाकी कुय, जीवनेन मरजी राखे, ने वारलु दाहड़ा देखणु चाहजे, चु आपणी जीप काजे कुहराय सी, ने आपणा हुटड़ा काजे धुकान वात करने सी रुकी रवलु।
1PE 3:11 कुहरायन सात छुड़ देवु ने भलाय करु ने चु तीनी सांती काजे हेरे, ने हेरीत कुसीस मां रवे।
1PE 3:12 काहाकी मालीकेन डुळा धरमी माणसे पर लागला रवे, ने हेरा कान्‌टा हींद्‌री लीलघाय भीणी लागला रवे बाकुन मालीक कुहराय करने वाळा नी फीरे।
1PE 3:13 कदी तुहुं भलाय करनेन धुन मां रहु ती तुंद्‌री कुहराय करने वाळा पछेन कुण छे?
1PE 3:14 कदी तुहुं धरमेन वजे सी दुख बी हाकलु ती बरकतवाळा छे बाकुन माणसेन बीहायने सी मां बीहु ने मां घाबरावु।
1PE 3:15 बाकुन मसी काजे मालीक जाणी आपणा-आपणा मन मां चुखला समजु जु कुय तुंद्‌रे सी तुंद्‌री आसेन बारामां काय पुछे हीनाक जपाप आपणे वाटे जलम तीयार रवु बाकुन नरम ने धाकेन साते रवु।
1PE 3:16 बाकुन नरम ने ईज्‌जत साते मन काजे बी चुखो राखु हेरेसी सी की जीनु वातेन बारामां तुंद्‌री नाव-बद्‌दी हवे हींद्‌रे बारामां चे ईसु मसी मां तुंद्‌रे वारलु चाल चलनेन नाव-बद्‌दी करे चे लाजवाये।
1PE 3:17 काहाकी कदी भगवानेन जी मरजी हवे की तुहुं भलाय करनेन वजे सी दुख हाकले ती ज कुहराय करनेन वजे सी दुख हाकलने सी वारु छे।
1PE 3:18 हेरेसी की मसी बी मतलब नी-धरम वाळा वाटे ईसु धरमी पापेन वजे सी एक कावा दुख हाकल्‌यु काहाकी हामु भगवान धड़े पुग्‌या च डीलेन भाव सी ते मार देदा बाकुन आत्‌मान भाव सी जीवाड़ी गुयु।
1PE 3:19 आत्‌मान मां जाय्‌न बुजायली आत्‌मा काजे परचार कर्‌यु।
1PE 3:20 चे हीनु माणसेन आत्‌मा हतली जीनुक भगवानेन हुकुम काजे पाळन नी कर्‌या, जत्‌यार चु नुहान दाहड़ा मां भगवान दम धरीन वाट देख रवलु ने ढंड्‌यो बन्‌ने बाजी रह्‌लो, तीनाम बठीन थुड़ाक माणसे मतलब आठ माणसे पाणीन साहरे बचाड़ी गुया।
1PE 3:21 ईनात पाणी काजे दाखलु बी मतलब बपतीस्‌मा ईसु मसी जीवतु हवणेन साहरे हय तुहुंक बचाड़ने। हेरेसी डीलेन मुयळ काजे छेटे करीन मतलब नी हय, बाकुन वारलु डीमाक सी भगवानेन हक मां हय जाणेन मतलब छे।
1PE 3:22 चु सरग पर जाय्‌न भगवानेन जेवड़े आन्‌गे बठी गुयु ने सरगेन वाळा काहवाळ्‌या ने हकदार्‌या ने ताकत हेरे हक मां करला छे।
1PE 4:1 जत्‌यार की मसी डील मां हयन दुख हाकल्‌यु ती तुहुं बी हेना मनसा काजे हत्‌यारेन तसों धर लेवु, काहाकी जु डील मां दुख हाकल्‌या, चु पाप सी छुट गुयु,
1PE 4:2 काहाकी आवणे वाळी घड़ी मां आपणा बचला डीलेन जीवन माणसेन लालुचेन अनसारे नी बाकुन भगवानेन मरजीन अनसारे जीवन जीवु।
1PE 4:3 काहाकी नी-यहुदी मरजीन अनसारे काम करने, ने लुच्‌चायन भुंडली हर, दारकुट्‌या, भुंडलो काम, पीणेवाळा, ने बेकार मुरती पुजण्‌या मां जां लग हामु पेहल सी टेम जावाड़ देदा, चोन बेसको हयो।
1PE 4:4 हय चे सुसवारे, की तुहुं असा भारी लुच्‌चाय मां हींद्‌रो साते नी देवु, ने हेरेसी चे भुंडो वारु कवे।
1PE 4:5 हीनुक जे हय जीवतेला छे ने मरीन सर गुया आपणा कामेन लेखु-जुखु हीना मसी काजे देणु पड़से जु हींद्‌रो नीयाव करने वाळु छे।
1PE 4:6 काहाकी मरला काजे बी खुस-खबर हेरेसी सामळाय गुयो, की डील मां ते माणसेन अनसारे हींद्‌रो नीयाव हवे, बाकुन आत्‌मा मां चे भगवानेन अनसारे जीवता रवे।
1PE 4:7 आखी वातेन खात्‌मो तत्‌यारुत हवणे वाळो छे; हेरेसी जानकार हयन दुवा वाटे समळीन रवु।
1PE 4:8 आखाम ती आखा सी वारु वात जी छे की एक दीसरा सी जादा परम राखु; काहाकी परम काय पाप काजे ढाक देय।
1PE 4:9 कुड़-कुड़ करे पाखुर एक दीसरान मेजवानीन-खातरी करु।
1PE 4:10 तीनाक जु वाटु जड़लो छे, चु हीनाक भगवानेन खास गीण-दयान वारु देख-रेख राखणेवाळान तसा एक दीसरान चाकरी मां लागाड़ु।
1PE 4:11 कदी कुय कह्‌वे, ती असु कह्‌वे मानु भगवानेन बुल छे; कदी कुय चाकरी करे, ती हीनी ताकत सी करे जु भगवान आपे; जेरो आखी वात मां ईसु मसीन साहरे, भगवानेन सेक-सींगार उजेंती हवे। सेक-सींगार ने ताकत जलम पीड़ीडीट हेरोत छे। असोत हवतो रवे।
1PE 4:12 ए लाटेक्‌ला, भायस ने बहणस्‌या ज्‌य दुखेन रुप मां आकठो तुहुंक पारखणे करीन तुंद्‌रे मां आवसे, हेरसी ज्‌य समजीन मां सुसवारु की कुय जसी-वसी वात तुंद्‌रे पर वीत रय।
1PE 4:13 बाकुन जत्‌यार तुहुं मसीन दुख मां साजल्‌या हवे, ती खुसी मानावु, जेरेसी हेरी सेक-सींगार उजेंती हवते टेमे बी तुहुं खुसी ने धव हवु।
1PE 4:14 अळतेन कदी मसीन नाव वाटे तुंद्‌री नाव-बद्‌दी करी जाय, ती बरकतवाळा छे; काहाकी सेक-सींगारेन आत्‌मा, जो भगवानेन आत्‌मा छे, तुंद्‌रे मां छावायली रहे।
1PE 4:15 तुंद्‌रे मां सी कुय माणुस हत्‌या करन्‌यु नीते चुट्‌टु, नीते पापी हवणे, नीते दीसरा काम मां हात नाखेन वजे सी दुख नी हाकलनु चाहजे।
1PE 4:16 बाकुन कदी मसी मां हवणेन वजे दुख जड़े, ती सरमायु मां, बाकुन हीनी वात वाटे भगवानेन नावेन सेक-सींगार करु।
1PE 4:17 काहाकी ची घड़ी आय गुयलु छे, की पेहल भगवानेन माणसेन नीयाव हवसे, ने जत्‌यार की नीयाव सुरु हामरे सी हवे ती हींद्‌रो आकरी कसों हवसे जो भगवानेन खुस-खबर काजे नी माने?
1PE 4:18 ने कदी धरमी माणुस काजे काठाय सी छुटकारु जड़से, “ती नी-भक्‌ती करने वाळा, ने पापी माणसेन काय हवसे?”
1PE 4:19 हेरेसी जी भगवानेन मरजीन अनसारे दुख हाकले, चे भलाय करता जाय्‌न आपणा-आपणा जीव काजे भुरसान लायक कळ घड़न्‌यान हात मां सुप देय।
1PE 5:1 तुंद्‌रे मां जे मंडळीन डाहला छे, तीनु काजे मे समजाड़ीन जो कह्‌वो की, मे बी हींद्‌रेन तसु एक डाहलु छे, ने ईसु मसी जो दुख झेल्‌यु तीना दुखेन गवा छे, ने आवणे वाळा दाहड़ा मां उजेंता हवण्‌या ईसुन सेक-सींगार मां साजल्‌यु बी छे।
1PE 5:2 तीनी ईसुन मंडळीन माणसेक भगवान तुंद्‌रे सुपरुत कर्‌यु, तीनु माणसेन तुहुं वारु गुवाळी करु, जसा गुवाळ्‌या आपसा गाडरान राखवाळी करे। ने ज्‌य काम जबरान सी नी बाकुन भगवानेन मरजीन अनसारे वारु रीते करु। पयस्‌यान हायाळ्‌ळा बणी नी, बाकुन वारु खरला मन सी आपणा टुळान राखवाळी करु।
1PE 5:3 ने तीनु माणसे काजे भगवान तुंद्‌रा हातेम सुप देदलु, तीनु माणसे पर तुहुं जु करीन हक मां करु बाकुन भगवानेन गाडरा साय एक दाखलु बणीन जीवु।
1PE 5:4 ने असा करसु ती मट्‌लु गुवाळ्‌यु ईसु मसी उजेंतु हवसे, तत्‌यार तुहुं काजे सेक-सींगारेन पागड़ी आपसे, ची पागड़ी कदी चीमाये नी।
1PE 5:5 हीनी रीते, ए जुवान्‌या तुहुं बी पेहला माणसेन हक मां रवु। असा करीन आखान आखा, पुडार्‌या, जुवान्‌या, ने दीसरा बी, नीचळा हयन एक दीसरान सेवा चाकरी करने करीन तीयार रहु; काहाकी खरला सास्‌तुर मां लिखलो छे, “भगवान मटाय करन्‌यान वीरुद करतु रवे, बाकुन नीचळा माणसे पर गीण-दया करतु रवे।”
1PE 5:6 हेरेसी तुहुं भगवानेन ताकतवाळा हाते तळे नीचळा रवु, हेरेसी चु तुहुंक सय टेम आवणे पर नानला ती मटा बणाय देसे।
1PE 5:7 आपणी आखी फीकुरेन बुज भगवान पर मेक देवु। काहाकी चु तुंद्‌री फीकुर करे।
1PE 5:8 तुंद्‌रु वेरी भुतड़ु दाहड़ेन वाळा नाहरेन तसु, तुहुंक फाड़ीन खाणे करीन हेर रयु; हेरेसी तुहुं जागली करता रवु।
1PE 5:9 ईसु पर भुरसु करन्‌या तुंद्‌रा भाय-बहणस्‌या, जे आखी कळी मां पुगला छे, चे बी तुंद्‌रेन तसा दुख झेल रया, जी वात हेर करीन भुरसा मां काठा रहु ने तीना भुतड़ान बराबरी करु।
1PE 5:10 हय भगवान जु आखा गीण-दयान झोर छे, तीनाक तुहुं ईसु मसी मां आपणी जलमेन सेक-सींगार वाटे बुलावला छे, तुहुंक थुड़ीक वार लग दुख झेलनेन पछे आपसुत तुहुंक पाक्‌कु ने काठु ने ताकत वाळु करसे।
1PE 5:11 तेरोत ताकतवाळो राज जलम टेकलो रवे। आमीन।
1PE 5:12 मे सीलवानुसेन हाते, तीनाक मे ईमानदार भायस छे करीन समजो, ईतरुक चिट्‌ठी मां लिखीन तुहुंक समजाड़लु छे, ने जी गवाय देदलु छे की भगवान छाचलु गीण-दया जुत छे, हेरेमां काठा रवु।
1PE 5:13 जो बेबीलोन मां तुंद्‌रे अगळ नेवाड़ला माणसे छे, चु ने मसी मां मारु पुर्‌यु मरकुस बी तुहुंक आवजु ने आवीस कह्‌वे।
1PE 5:14 परम सी गुळा दीन एक दीसरा काजे आवजु ने आवीस कह्‌वु। तुहुं आखा काजे जे ईसु मसी मां छे सांती जड़ती रवे।
2PE 1:1 सीमोन पतरस भीणी सी, जु ईसु मसीन पावर्‌यु ने नेवताळु छे, मे जी चिट्‌ठी तुहुं आखा काजे लिख रयु, तीनुक हामु नेवताळान तसुत ईसु पर भुरसु करने सी महंग्‌लु वाटु जड़लु छे। आपणु भगवान ने ईसु मसी जु बचाड़न्‌यु छे, चु आपसा धरमेन अनसारे चु वाटु आपणुक आपलु छे।
2PE 1:2 तुहुंक आपणा भगवान ने मालीक ईसु मसीन उवखाणेन साहरे गीण-दया ने सुक-सांती तुंद्‌रे मां बेसकी जादा जड़ती रवे।
2PE 1:3 काहाकी सरगेन ताकत ने आखो काय जो जीवन ने भक्‌ती सी लागाव राखे, हामुक हेरीत उवखाणेन साहरे आपला छे, भगवान हेरीत सेक-सींगार ने वारलु कामेन अनसारे बुलाय गुयला छे।
2PE 1:4 तींद्‌रे साहरे हयु हामुक बेसको जरुड़ी ने बेसकु मटु वायदु आपलु छे। काहाकी हींद्‌रे साहरे तुहुं हीनी सड़नु सी छुटीन जे कळी मां भुंडी लालुच सी हवे, सरगेन साजल्‌या बणी जावु।
2PE 1:5 हेरे वजे सी तुहुं आखी भातीन कुसीस करीन, आपणा भुरसा पर वारलु कामे, ने वारलु काम पर समज,
2PE 1:6 ने समज पर खुद पर भुरसु, भुरसा पर दमधरीन, ने दमधरीन पर भक्‌ती।
2PE 1:7 ने खरली भक्‌ती भेळा भाय-बहण्‌स्‌यान, नातो अदाड़ु ने तेरे भेळा भाय-बहण्‌यान मां परम अदाड़ता जावु।
2PE 1:8 काहाकी कदी जी वात तुंद्‌रे मां हीनी टेम मां रवे, ने अदतीत जाय, ती तुहुं हामरा मालीक ईसु मसीन उळखाण मां बेकार ने रवलो नी हवणी देय।
2PE 1:9 काहाकी जेरेमां जी वात नी, हय चु आंधळु छे, ने धुंधळो देखे, ने आपणा पछला पाप सी चुखो हवणे भुली गुयु।
2PE 1:10 हीनी वजे सी ए भायसे आपणे बुलाय जाणेन, ने नेवाड़ लेदा जाणेन पुरावु करनेन भली भाती कुसीस करता जावु, काहाकी कदी असा करसु, ती कदी बी वाटे सी नी भुलवायु।
2PE 1:11 बाकुन हीनी रीत सी तुहुं हामरा मालीक ने छुटकारु आपण्‌या ईसु मसीन जलमेन राज मां वारु ईज्‌जतेन साते जाती रवसु।
2PE 1:12 हेरेसी कदी तुहुं जी वात जाणु काय, ने जो छाचलो बुल तुहुंक जड़लो छे, हेरेमां बणी रवसु, तेबी मे तुहुंक ईनी वातेन हेर देवाड़ने करीन जलम तीयार रवीस।
2PE 1:13 मे जो आपणे वाटे सय समजो, की जत्‌यार लग मे ईना पड़ावा मां छे, तत्‌यार लग तुहुंक हेर देवाड़ी-देवाड़ीन अगा बड़ावतु रवीस।
2PE 1:14 काहाकी मे गुयो जाणु, की मारा पड़ावा काजे उदारनेन टेम छाटात आवणे वाळा छे, जसा की हामरा मालीक ईसु मसी, मेसे काजे उजेंतु कर्‌यु।
2PE 1:15 हेरेसी मे असा तावणी करीस, की दुनीयाक छुड़ीन जाणेन पछे बी तुहुं ईनु आखा वात काजे जलम हेर करसे।
2PE 1:16 काहाकी जत्‌यार हामु तुहुंक आपणे मालीक ईसु मसीन ताकत काजे, ने आवणे वाळा दाहड़ान खबर आपलु, ती चु चालाकी सी बणावली दाखलान साहरु नी लेदा बाकुन हामु आपसात हेरे सेक काजे देखला हतला।
2PE 1:17 काहाकी हीयु भगवान बास सी ईज्‌जत, ने सेक-सींगार हात करे ने हीना सरगेन सेक-सींगार सी जी अवाज आवी, “जु मारु लाटेक्‌लु पुर्‌यु छे, जेरेसी मे खुस छे।”
2PE 1:18 तत्‌यार हामु हेरे साते चुखला बयड़ा पर हतला ने सरग सी जी अवाज आवतेली सामळाय।
2PE 1:19 हामरे धड़े जे भगवानेन अघी सी आवणे वाळी वात देखान्‌यान बुल छे, चु ईनु हालोत सी काठा ठेहर्‌या तुहुं जो वारु करु जे ज्‌य सामळीन हीना पर हेर करु, की चु एक दिवु छे जे आंदारलान जागा मां हीनी टेम लग उजाळो देतो रवसे जत्‌यार लग की दाहड़ान वीजाळो नी छुड़े ने वीजाळ्‌यु तारु तुंद्‌रे मन मां नी चमकी पड़े।
2PE 1:20 बाकुन आखा सी पेहल गुयो जाणी लेवु की चुखला सास्‌तुरेन कुय बी आवणे वाळी वात भगवानेन अघी सी आवणे वाळी वात देखान्‌या बी खुद आपणे वीच्‌यार सी नी कह्‌वे।
2PE 1:21 काहाकी कुय बी भगवानेन अघी सी आवणे वाळी वात देखाड़ने वाळा बी आपणी मरजी सी कदी नी कह्‌वे बाकुन भक्‌त जणा चुखली-आत्‌मान साहरे उभरीन जाय्‌न भगवानेन भीणी सी बुल तेला।
2PE 2:1 जीनी तरह हीनु माणसे भगवानेन अघी सी आवणे वाळी वात देखान्‌या मां बी लुच्‌चा हतला तसात तुंद्‌रे मां बी लुच्‌चा सीकाड़न्‌या हवसे, जे खत्‌तम करने वाळा ढंगेन सुरुवात डुकाय डुकायन करसे, ने हीना मालीक जीनुक हीयु मुल ली लेदलु छे हेरु नीकारु करसे, ने आपणे आप काजे छाटुस खत्‌तम कर लेसे।
2PE 2:2 बेसका हींद्‌रेन तसा लुच्‌चाय करसे, जेरे वजे सी छाचाय्‌न वाटेन वाक नीकाळे।
2PE 2:3 चे लालच वाटे वात बणायन तुहुंक आपणा फायदान वजे बणावसे, ने जे डंडेन हुकुम हींद्‌रे पर पेहल सी हय गुयलु छे, हेरे आवणे मां काय बी वार नी हय, ने हींद्‌रो नास वाट देख र्‌यो।
2PE 2:4 काहाकी जत्‌यार भगवान हीनु सरग वाळा काहवाळ्‌या काजे जे पाप करनु नी छुड़्‌या, बाकुन नरक मां मकलीन आंदारला डहरा मां नाख देदा, काहाकी नीयावेन दाहड़ा लग बंद रवसे।
2PE 2:5 ने पेहला वारान कळीन आखा माणसे काजे मुसळ धार्‌यु-पाणी पाड़ीन सारी नाख्‌यु, तीने टेमे नुह धरमेन परचार कर्‌या करतेलु, नुहेन घरन्‌या सुद्‌ये ढंड्‌या मां नाखीन बचाड़ लेदु, चे आखा मेळीन आठ जणा हतला।
2PE 2:6 ने सदोम ने अमोरान सहर काजे नासेन असु डंड देदु, की हीनुक खत्‌तम करीन रखड़ा मां मेळाय देदु काहाकी चे आवणे वाळा भक्‌ती नी करने वाळा माणसेन सीकापण वाटे एक दाखलु बणु।
2PE 2:7 ने धरमी लुत काजे जे नी-धरम वाळान वीटेळ्‌ळान चाल-चलन सी बेसका दुखी, हतला ने छुटकारु आप्‌यु ने बचाड़्‌यु।
2PE 2:8 काहाकी चु धरमी हींद्‌रे ईचमां रवतेलु, ने हींद्‌रे नी-धरमेन काम काजे देखी देखीन, ने सामळी सामळीन, दाहड़ीन आपणा छाचला मन काजे दुखाड़तेलु।
2PE 2:9 ती मालीक आपसा भगत काजे पारख मां सी बचाड़ लेजी ने पापी काजे नीयावेन दाहड़े लग डंडेन दसा मां राखणे बी जाणे।
2PE 2:10 खास करीन हीनुक जे वीटळा लालुचेन पछळ डीलेन अनसारे चाले, ने सरकार काजे बेकार जाणे। चे चामटा, ने नीसवड़ा छे, ने मटला राज करन्‌या काजे वारु-भुंडो कवणे सी नी बीहीये,
2PE 2:11 तेबी सरग वाळा काहवाळ्‌या जे ताकत ने ताकत मां हींद्‌रे सी मटा छे, मालीकेन अगळ हीनुक वारु भुंडा कय्‌न गुनु नी लागाड़े।
2PE 2:12 बाकुन जे झुट सीकाड़न्‌या तीनु जनवार्‌यान तसा छे, तींद्‌री अक्‌कल नी हय, ने आखी टेमे आपसा डीलेन हेरेन अनसारेत जीवे, ने धरीन ली जाणे वाटे, ने मरने वाटे पयदा हवला छे। जे माणसे जी वात नी जाणे, चीत वात लीन दीसरान नाव-बद्‌दी करे, बाकुन जे खर करन्‌या माणसे, जनवार्‌यान तसात आपसान खेतेम करन्‌या पापेन साहरे मरीन सर जासे।
2PE 2:13 दीसरान बदनामी करनेन बदले हींद्‌रोत भुंडो हवसे; हीनुक दाहड़ु मांजणीक मुजा मस्‌ती करनु वारु लागे; चे बदनावी ने गुना छे। जत्‌यार चे तुंद्‌रे साते खाय ने पीये, ती आपणे भीणी सी परम खाणो करीन मुजा मस्‌ती करे।
2PE 2:14 हींद्‌रा डुळा मां छीनाळो बसलो छे, ने चे पाप करे पाखुर हुबा नी रय सके; चे उतवाळ्‌या मनवाळा काजे फुसलायन लेय; हींद्‌रा मन काजे लालच करनेन आदत हय गुयली छे, चे सराप सी पुर्‌या छे।
2PE 2:15 चे सुदली वाट काजे छुड़ीन भटकी गुयला छे, ने बवोरेन पुर्‌या बीलामेन वाट पर हय गुयलु छे, तीनाक नी-धरमेन काम करनेन दाहड़की काजे वारु समजी गुयु।
2PE 2:16 बाकुन हेरे गुनान बारामां फठकार बी पड़ी, जां लग की एक गुंगी गदड़ीक बी माणसेन तसी वात करी हीना भगवानेन अघी सी आवणे वाळी वात देखान्‌या काजे हेरे गांडाय सी रुक्‌यु।
2PE 2:17 चे माणसे सुकला कुवान, ने आंधान उडाल्‌ला वादळा छे; हींद्‌रे वाटे जलमेन आंदारलो ठेराय गीलो छे।
2PE 2:18 चे बेकार कुहरायन वात करी करीन लुच्‌चायन कामेन साहरे हीनु माणसे काजे डीलेन लालच मां फसाड़ी लेय जे भुल मां सी हय नीकळी र्‌या।
2PE 2:19 जे झुट सीकाड़न्‌या असु छुटकारु आपणेन वायदु करे, तीना छुटकारा मां आखा नेम सी छुटीन, जसों पटे तसों जीवणेन छुट छे बाकुन चे ते खत्‌तम करन्‌या पापेन गुलाम छे ने आपसात छुटकारु हात करला नी हय, काहाकी माणुस तेरा कब्‌जाम हय जाय, तेरुत गुलाम बण जाय।
2PE 2:20 जत्‌यार चे मालीक ने छुटकारु आपण्‌या ईसु मसीन उवखाणेन साहरे कळीन नानलीत तरान वीटळने सी बचीन नीकळे, ने अळी हींद्‌रे मां फसीन हारी जाय, ती हींद्‌री पछली दसा पेहली सी बी भुंडीत हय जासे।
2PE 2:21 काहाकी धरमेन वाट काजे नी जाणुत हींद्‌रे वाटे वारु हवतो, की हीनुक जाणीन हीनी चुखली हुकुम सी फीरी जाणु जो हीनुक सुप गुयलो हतलो।
2PE 2:22 तींद्‌रे पर चत वीत्‌यो जसा खरला कवाड़ा मां लिखलो छे: “कुतरो आपसान उखेळ्‌ळो चाट लेय” ने एक उंगळावली सुहेरनी पछी धुळा मां लुळायणे जात रवे।
2PE 3:1 ए मारा लाटेक्‌ला, हय मे तुहुंक जी दीसरी पत्‌री लिखो, ने दुयु मां हेर देवाड़ीन तुहुंक चुखला मन काजे अदाड़नु, चाहो
2PE 3:2 की तुहुं हीनु वात काजे, जे चुखला भगवानेन अघी सी आवणे वाळी वात देखान्‌यान पेहल सी कय देदला, ने मालीक, ने छुटकारु आपण्‌या हीना हुकुम काजे हेर करु, जे तुंद्‌रे नेवताळान साहरे आपी गुयली हतली।
2PE 3:3 पेहल गुयो जाणी लेवु, की आकरी दाहड़ा मां हासी उड़ावणे वाळा आवसे, जे आपणी लालुचेन अनसारे चालसे।
2PE 3:4 ने कवसे, “हीनाक आवणेन वायदु काहा गुय? काहाकी जत्‌यार सी डाहा बुड़ा सुय गुयला छे, आखा काय असात छे, जसों कळीन सुरु सी हतलो?”
2PE 3:5 चे ते जाणी बुजीन ज्‌य वीसरी गुया, की भगवानेन बुलेन साहरे सरग काय दाहड़ा सी पेहल सी हतलो, छे ने धरती बी पाणी मां सी बणी ने पाणी मां टेकली छे।
2PE 3:6 ज्‌य हीनु हासी उडाड़न्‌यान वजे सी हीनी टेम मां कळी पाणी मां डुबीन सरी गुय।
2PE 3:7 बाकुन हयन टेमेन सरग ने धरती हया बुलेन साहरे हेरेसी मेकी गुयली छे, की धपाड़ी जाय, ने जे पापी माणसेन नीयाव ने खत्‌तम हवणेन दाहड़ा लग असुत राखी रवसे।
2PE 3:8 ए मारा लाटेक्‌ला, जी वात तुंद्‌रे सी सातायली नी रवे, की मालीकेन चां एक दाहड़ु हजार साल बराबर छे, ने हजार साल एक दाहड़ा बराबर छे।
2PE 3:9 मालीक आपणा वायदान बारामां वार नी करे, जसी वार थुड़ाक माणसे समजे; बाकुन तुंद्‌रे बारामां दम धरी रयु, ने नी चाहे की कुय खत्‌तम हवे; बाकुन गुयो की आखा काजे मन फीरावणेन मुखु जड़े।
2PE 3:10 बाकुन मालीकेन दाहड़ु चुट्‌टान तसु आय जासे, हीनु दाहड़े सरग हुहेड़तो गाजतो अंछाप हय जासे, ने सरगेन चीज तातु हयन पीगळी जासे, ने धरती ने हेरे पर आखो काम धपी जासे।
2PE 3:11 जसों की जो आखी चीजे, हीनी रीत सी खत्‌तम हवणे वाळी छे, ती तुहुं चुखली चाल चलन ने भक्‌ती मां कसा माणसे हवणु चाहजे,
2PE 3:12 ने भगवान हीना दाहड़ान वाट काहाली रीत सी देखणु चाहजे ने हेरो छाटु आवणे वाटे कसा कुसीस करनु चाहजे, जेरे वजे सी सरग आकठा सी पीगळी जासे, ने सरगेन चीज बेसको तातो हयन गळी जासे।
2PE 3:13 बाकुन हेरी वायदान अनसारे हामु एक नवलु सरग ने नवली धरतीन आस देखजे जां आखा धरमी रवसे।
2PE 3:14 हेरेसी, ए लाटेक्‌ला, जत्‌यार की तुहुं हीनु वातेन आस देखजे, ती कुसीस करु की तुहुं सांती सी हेरे अगळ नी-दाग ने नी-गुनाळु ठेहरसु।
2PE 3:15 ने हामरे मालीक दम धरी र्‌यु ती छुटकारु समजे, जसा हामरा लाटेक्‌ला भायस पोलुस बी हीना अकलेन अनसारे जे हीनाक जड़लो, तुहुंक लिखलु छे।
2PE 3:16 असात हीयु आपणी आखी पत्‌री मां बी हीना वातेन पंचाती करली छे, जेरेमां काय वात असी छे तींद्‌रो समजणु काठो छे, ने कम-सीकला ने नी-भन्‌नला माणसे बीगाड़ देय जसा की चे दीसरी चुखला सास्‌तुरेन चिट्‌ठीन दत थता मतलब नीकाळता रवे जेरेसी चे खुद आपणात नास कर लेय।
2PE 3:17 हेरेसी ए लाटेक्‌ला, तुहुं माणसे पेहल सी हीनु वात काजे जाणीन चेतीन रवजु, काहाकी नी-धरम वाळान भरम मां फसीन आपणी ताकत काजे कय्‌न हात सी खुय मां देय।
2PE 3:18 बाकुन हामरा मालीक, ने छुटकारु आपण्‌या ईसु मसीन गीण-दया ने उळखाण, मां अथा जावु, सेक-सींगार हय बी हवे, ने जलम पीड़ीडीट हवती रवे! आमीन।
1JO 1:1 कळ घड़ायणे सुरु नी हयो, ने पेहलुत सी, बुल नावेन एक जणु हतलु। चु ते भगवान बास साते सरगेम हतलु, ने अळतेन माणसेन अवतार लीन हामरे ईचमां उजेंतु हयु। ने ज्‌य जीवनेन झर बी छे; हेरेसी हामु तीनाक जीवनेन बुल बी कह्‌जे। हामु जे तेरा नेवताळा छे, तीनाक ते देख लेदला छे, ने तेरा बुले सामळी लेदला छे, जे बुले आखा काजे अमर जीवन आपे। ईनी अमर जीवनेन वाट ते तेरे साहरे देखाव पड़ी; हामु ते धी‌यान लागाड़ीन तेरा जीवन काजे पंतार लेदला छे, ने हामरे हाते करीन तीनाक छीमी बी लेदला छे।
1JO 1:2 ने हय हामु तेरीत गवाय देजे, तीनाक हामु डुळे देख्‌ला छे। ने तेरे साहरे जड़ली जलमेन जीवनेन परचार बी करजे। जु बचाड़न्‌यु ईसु मसीत छे।
1JO 1:3 हव, हामु ईना ईसुक देखला, ने सामेळला छे, तेरीत खुस-खबर हामु तुहुंक देखाड़जे। हामु ते बासेन, ने तेरा बेटा ईसु मसीन साजल्‌या रवजे। जी वात हामु एरेन करीन तुहुंक देखाड़जे की तुहुं बी हामरे पुठ्‌ये रवीन तींद्‌री साजल्‌या बण जावु।
1JO 1:4 ने हामु जी वात तेरेमां तुहुंक लिख रया, की तुंद्‌रे बारामां हामरी खुसी छे, ची खुसी पुरी हय जाय।
1JO 1:5 ने हामु ईसु मसी सी जी खुस-खबर सामळ्‌या, ने चीत खबर तुहुंक बी सामळावजे, चो ज्‌य छे; की भगवान वीजाळो छे, ने तेरेमां काय बी आंदारलो नी हय।
1JO 1:6 कदी आपणे मायन काहनाक कह्‌वे की हामु ते भगवानेन साजल्‌या छे, ने असु दावु करीन बी आंदारला सारकी कुहराय, ने पाप मां जीवे, ती चे झुटा छे, ने चे छाचाय पर चालन्‌या नी हय।
1JO 1:7 बाकुन जसु भगवान बास वीजाळा मां रवे, तसात आपणुक बी वीजाळा मां जीवणु चाहजे मतलब भगवान बासेन तसी चुखली ने खरली जीवाय जीवणु चाहजे। असा आपणु जीवसु, ती एक दीसरान साजल्‌या बणीन रय सक्‌सु। काहाकी आपणुक आखा पापेम सी चुखा करीन आपणुक चुखला भगवानेन सात-संगात मां भेसकणे करीन भगवान बासेन पुर्‌यु ईसु मसीन लुही कामको छे।
1JO 1:8 थुड़ाक माणसे कदी असा कह्‌वीन सीकाड़े, की आपणे मां पाप करनेन हर लग नी हय, ने कदी आपणु बी तींद्‌रेन तसात कहणे बाजी जाजे, ती आपणु आपसात काजे धुकु दी र्‌या, ने आपणे मां छाचाय नी हय।
1JO 1:9 कदी हामु आपणा-आपणा पाप काजे मान लेजे, ती भगवान बी हामरा पाप काजे माफ करने, ने हामुक आखा भुंडा काम सी चुखा करने मां भुरसा वाळु ने धरमी छे।
1JO 1:10 थुड़ाक माणसे असा कय्‌न सीकाड़े, की हामु काय पाप नी कर्‌या, कदी आपणु बी तींद्‌रेन तसात कहणे बाजी जाजे, ती आपणु आपसात काजे धुकु दी र्‌या, ने आपणे मां छाचाय नी हय। ने हेरो बुल आपणा मन मां नी हय।
1JO 2:1 ए मारा लाटेक्‌ला पुर्‌या-पारी, तुहुं पाप घुण करु, हेरेन करीन मे जी आखी वात लिखणे बाजी रयु; बाकुन कांखुर मायन भुल सी कुय पाप कर देय, ती बास अगळ आपणे अगु हय्‌न आपणुक माफी आपाड़न्‌यु धरमी ईसु मसी छे।
1JO 2:2 ने हयुत ईसु मसी आपणा पाप काजे माफ कर्‌यु; ने आपणा पापेन बादा अतरुत नी, बाकुन आखी कळीन माणसेन पाप काजे माफ कर्‌यु।
1JO 2:3 आपणु, ईसु मसी काजे जाण्‌या की नी जाण्‌या, ईनी वातेन पुरावु काय छे? कदी आपणु, तेरा हुकुम काजे मानीन जीवसुन, ती ईनी वातेन पुरावु हय जासे, की आपणु, ईसु मसीक छाचलीन जाण लेदा।
1JO 2:4 जु कुय असु कह्‌वे की, “मे भगवान काजे जाणो।” बाकुन तेबी तारा हुकुम काजे मानीन नी जीवे, चु झुटु छे; ने तेरेमां छाचाय नी हय।
1JO 2:5 बाकुन जु कुय तारा बुल काजे मानीन जीवे, छाचलीन चु भगवानेन परम मां पुरुन-पुरु घुळाय गुयलु छे। तेरेसी आपणुक गुयो मालुम पड़े, की चु छाचलीन ईसु मसी साते जुड़ायलु छे।
1JO 2:6 जु कुय गुयो कह्‌वे, की मे ते ईसु मसी साते जुड़ायलु रव, ती तीना कवण्‌याक ते तसीत जीवाय जीवणु चाहजे, जसी जीवाय ईसु ईनी धरती पर जीवतेलु।
1JO 2:7 ए मारा लाटेक्‌ला साथी, मे तुहुं काजे काय बी नवलु हुकुम नी लिखतु, बाकुन चु जुन्‌लु हुकुम जु सुरु मां तुहुंक जड़लु छे; चो जुन्‌लो हुकुम जु बुल छे, तीनाक तुहुं सामेळला छे।
1JO 2:8 ती बी मे तुहुंक नवलु हुकुम लिखणे बाजी रयु। ने ज्‌य ते ईसु मां ने तुंद्‌रे मां छाचाला कवायसे; काहाकी आंदारलो छेटे हवतो जाय र्‌यो ने खरलो वीजाळो हय झजळणे बाजी रयो।
1JO 2:9 बाकुन जु कुय जुरदीन ज्‌य कह्‌वे की मे ते वीजाळाम रय-रवीन चुखु हय गुयु, बाकुन ईसुक मान्‌या भायस भीणी खर करे, चु हय लग पापेन आंदारलात मां जी रयु।
1JO 2:10 जु कुय, ईसुक मान्‌या भायस काजे परम करतु हय, चु छाचलीन वीजाळा मां रवे, ने चु कुय भीणी बी पापेन उत्‌तर नी बणे।
1JO 2:11 बाकुन जु कुय, ईसुक मान्‌या भायस भीणी खर करे, चु आंदारलात मां छे, ने आंदारलात मां जीवे। ने चु ज्‌य नी जाणे की मे कां जाणे बाजी रयु, काहाकी पापेन आंदारलो तेरा जीव-आत्‌मान डुळा काजे आंधळो कर देदो।
1JO 2:12 ए पुर्‌या-पारी, मे तुहुं काजे तेरेमां लिखणे बाजी रयु, की ईसुन नाव सी तुंद्‌रा पाप माफ हय गुया।
1JO 2:13 ए आखा बासे, मे तुहुं काजे गुयो लिखणे बाजी रयु की जु ईसु कळ नी घड़ायी, ने पेहलेन छे, तीनाक तुहुं जुत छे, करीन वारु जाण रया। ए जुवान्‌या, मे तुहुंक गुयो लिखणे बाजी रयु की तुहुं ते वेरी भुतड़ा साते लड़ाय करीन तीनाक जीक लेदला छे। ए भगवानेन पुर्‌या, मे तुहुंक अळी गुयो लिखणे बाजी रयु की तुहुं ते सरग वाळा बासेक जाण लेदला छे।
1JO 2:14 ए बासे, मे तुहुंक तेरेमां लिखणे बाजी रयु, की जो सुरु सी छे तुहुं हीनाक जाणी गुया। ए जुवान्‌या, मे तुहुं काजे तेरेमां लिखणे बाजी रयु, की ताकत वाळा हय जावु, ने भगवानेन बुल तुंद्‌रे मां बणीन रवे, ने तुहुं हीना भुतड़ा सी जीती गुया।
1JO 2:15 तुहुं नीते कळी सी ने नी कळीन चीजो सी परम राखु कदी कुय कळी सी परम राखे, ती तेरेमां बासेन परम नी हय।
1JO 2:16 काहाकी ज्‌य काय कळी मां छे, मतलब डीलेन लालच, ने डुळान लालच ने जीवणेन चीजेन मटाय, चु बास भीणी सी नी हय, बाकुन कळीत भीणी सी छे।
1JO 2:17 कळी ने हेरी लालच दुयु सर जासे, बाकुन जे भगवानेन मरजी पर चालसे, चु जलम बणीन रवसे।
1JO 2:18 ए मारा लाटेक्‌ला पुर्‌या-पारी, जी आकरी टेम छे, ने जसा तुहुं सामेळला छे, की मसीन वीरुदी आवणे वाळा छे, हेरे अनसारे हय बी बेसका मसीन वीरुदी उठसे; हेरसी हामु जाणजे, की जी आकरी टेम छे।
1JO 2:19 चे नीकळ्‌या ते हामरे मां सी, बाकुन हामरे मां सी नी हतला; काहाकी कदी चे हामरे मां सी रवता, ती हामरे साते रवता, बाकुन नीकळी हेरसी गुया काहाकी ज्‌य उजेंतो हवे की चे आखा हामरे मां सी नी हय।
1JO 2:20 ने तुहुं काजे भगवानेन चुखली-आत्‌मा आपली छे, तेरेमां तुहुं आखा छाचाय जाणु।
1JO 2:21 मे तुहुंक हेरसी नी लिख्‌यु, की तुहुं छाचाय काजे नी जाणु, बाकुन हेरसी, की तुहुं हीनाक जाणु, ने हेरसी की कुय झुट छाचाय भीणी सी नी हय।
1JO 2:22 लुच्‌चु कुण छे? चु, जु ईसु मसीन हवणेन नीकारु करे; ने मसीन वीरुदी हयुत छे, जु बासेन ने पुर्‌याक नीकारु करे।
1JO 2:23 जु कुय पुर्‌याक नीकारु हेरे धड़े बास बी नी हय जु पुर्‌या काजे मानी लेय, हेरे धड़े बास बी छे।
1JO 2:24 ज्‌य काय तुहुं सुरु सी सामेळला छे हयुत तुंद्‌रे मां बणीन रवसे; ज्‌य तुहुं सुरु सी सामळ्‌या, कदी चु तुंद्‌रे मां बणीन रवे, ती तुहुं बी पुर्‌या मां, ने बास मां बणीन रवसु।
1JO 2:25 ने तेरेसी हयु हामरे सी वायदु कर्‌यु चु जलम जीवसे।
1JO 2:26 मे जी बात तुहुंक हींद्‌रे बारामां लिख्‌यु, जे तुहुंक भुलवाड़े करीन नी।
1JO 2:27 ने तुंद्‌रे वाटे मसी हेरी चुखली-आत्‌मा आप देदु, ज्‌य हेरे भीणी सी करलो छे, ने तुंद्‌रे मां बणीन रवे; ने तुहुंक हेरो मतलब नी हय, की कुय तुहुंक सीकाड़े, बाकुन जसों हयु हेरी आत्‌मा आप देदु ज्‌य हेरे भीणी सी करलो छे तुहुंक आखी वात सीकाड़े, ने ज्‌य छाचो छे, ने झुटो नी हय ने जसु चु तुहुंक सीकाड़्‌यु असात तुहुं हेरे मां बणीन रवु।
1JO 2:28 अळतेन ए भगवानेन पुर्‌या, हेरेमां बणीन रवु, की जत्‌यार चु उजेंतु हवे, ती हामुक हिम्‌मत हवे, ने हामु हेरे आवणे पर हेरे अगळ सरमायजे नी।
1JO 2:29 कदी तुहुं जाणु, की ईसु भगवान धरमी छे, ती ज्‌य बी जाणु, की जु कुय धरमीन काम करे, चु भगवानेन पुर्‌या-पारी बण गुया।
1JO 3:1 देखु, बास हामरे सी कसु परम कर्‌यु, की हामु भगवानेन अवल्‌यात कवाया, ने हामु छे बी; हेरे वजे सी कळीन माणसे हामुक नी जाणता, काहाकी कळीन माणसे भगवान काजे बी नी जाणे।
1JO 3:2 ए लाटेक्‌ला साथी, हय हामु भगवानेन अवल्‌यात छे, ने हय लग उजेंतो नी हयो, की हामु काय नी हवसुन! अतरो जाणजे, की जत्‌यार ईसु मसी उजेंतु हवसे ती हामु बी हेरेन तसा रवसुन, काहाकी हामु हेरेन असुत देखसुन जसु चु छे।
1JO 3:3 ने जे कुय हेरे पर जी आस राखे, चु आपणे आप काजे बी असुत चुखु करे, जसु मसी चुखलु छे।
1JO 3:4 जु कुय पाप करे, चु मुसान साहरे लिखला कायदान वीरुद करे; ने पाप ते कायदान वीरुद मां छे।
1JO 3:5 ने तुहुं जाणु, की ईसु मसी हेरसी उजेंतु हयु, की पाप काजे सार देय; ने हेरेमां काय पाप नी हय।
1JO 3:6 जु कुय मसी मां बणीन रवसे, चु पाप नी करे; जु कुय पाप करे, चु नी ते हीनाक देख्‌यु, ने नी हीनाक जाण्‌यु।
1JO 3:7 लाटेक्‌ला पुर्‌या, काहालाकेन भुलवाड़ मां घुण आवु; जु धरमीन काम करे, हयुत हेरेन तसु धरमी छे।
1JO 3:8 जु कुय पाप करे, चु भुतड़ा भीणी सी छे, काहाकी भुतड़ु सुरु सी पाप करतु आवलु छे। भगवानेन पुर्‌यु हेरसी उजेंतु हयु की भुतड़ान काम काजे खत्‌तम कर देय।
1JO 3:9 जु कुय भगवान सी पयदा हयु चु पाप नी करे; काहाकी भगवानेन बीज हेरेमां बणीन रवे; ने चु पाप करी नी सके, काहाकी चु भगवान सी पयदा हयु।
1JO 3:10 हेरसी भगवानेन अवल्‌यात, ने भुतड़ान अवल्‌यात जाणी जाय; जे कुय धरमीन काम नी करे, चु भगवान सी नी, ने नी चु जु आपणा भायस सी परम नी राखे।
1JO 3:11 काहाकी जु खबर तुहुं सुरु सी सामळ्‌या, चो ज्‌य छे, की हामु एक दीसरा सी परम राखजे।
1JO 3:12 ने केनेन तसा मां बणु, जु हीना भुतड़ा सी हतलु, ने चु आपणा भायसेक मार नाखलु। ने हीनाक कसु मारलु? हेरसी की हेरा काम भुंडा हतला, ने हेरु भायसेन काम धरमी हतलो।
1JO 3:13 ए भायस्‌यो, कदी कळीन माणसे तुंद्‌रे सी कुहराय करे ती चकरायु घुण।
1JO 3:14 हामु जाणजे, की हामु मरलाम सी जीवता हयन जीवन मां पुग्‌या; काहाकी हामु भायसे सी परम राखजे जु परम नी राखे, चु मरलान तसु रवे।
1JO 3:15 जु कुय आपणा भायस सी कुहराय राखे, चु हत्‌यारु छे; ने तुहुं जाणु, की काहालाक हत्‌यारा मां जलमेन जीवन नी रवे।
1JO 3:16 हामु परम हेरेसी जाण्‌या, की मसी आपणे वाटे आपसान जीव आप देदु; ने हामुक बी भायस्‌यो वाटे जीव आपणु चाहजे।
1JO 3:17 बाकुन तीना काहानाक धड़े कळीन धन रवे ने चु आपणा भायस काजे जरुवत मां देखीन हेरे पर तरस नी खाणे चाहे, ती हेरेमां भगवानेन परम कसु बणीन रय सके?
1JO 3:18 ए मारा लाटेक्‌ला पुर्‌या, हामु बुल ने जीप सी नी, बाकुन काम ने छाचाय्‌न साहरे बी परम करनु चाहजे।
1JO 3:19 हेरसी हामु जाणसुन, की हामु छाचला छे; ने जीनी बात मां हामरो मन हामुक गुनु आपसे, हेरे बारामां हामु हेरे अगळ आपणा मन मां हिम्‌मत दी सकजे।
1JO 3:20 ने कदी गलत करजे ती हामुक रुके, काहाकी भगवान हामरे मन सी मटु छे; ने आखो काय जाणे।
1JO 3:21 ए लाटेक्‌ला, कदी हामरो मन हामुक गुनु नी लागाड़े ती हामु भगवान अगळ हामुक हिम्‌मत बणीन रवे।
1JO 3:22 ने ज्‌य काय हामु मांगजे, चो हामुक हेरसी जड़्‌यो; काहाकी हामु हेरा हुकुम काजे माने; ने ज्‌य हीनाक भावे चत करजे।
1JO 3:23 ने हेरु हुकुम ज्‌य छे की हामु हेरा पुर्‌या ईसु मसीन नाव पर भुरसु करजे ने जसु हयु हामुक हुकुम आप्‌यु हेरे अनसारे एक दीसरा सी परम राखे।
1JO 3:24 ने जु भगवानेन हुकुम काजे माने, चु हेरेमां, ने भगवान हींद्‌रे मां बणीन रवे। ने हेरसी, मतलब हयु चुखली-आत्‌मा सी जु हयु हामुक आपलु छे, हामु जाणजे, की चु हामरे मां बणीन रवसे।
1JO 4:1 ए लाटेक्‌ला साथी, आखी भातीन आत्‌मान भुरसु मां करु, बाकुन आत्‌मा काजे पारखु, की चे भगवान भीणी सी छे की नी हय; काहाकी बेसका लुच्‌चा अघी सी आवणे वाळी बात देखाड़न्‌या ईनी कळी मां नीकळीन आय गुयला छे।
1JO 4:2 भगवानेन आत्‌मा काजे तुहुं हीनी रीत सी उळखी लेसु, की जी कुय आत्‌मा मान लेय, की ईसु मसी माणसेन पुर्‌यु बणीन धरती पर आवलु छे, चु भगवान भीणी सी छे।
1JO 4:3 ने जी कुय आत्‌मा ईसु काजे नी माने, ची भगवान भीणी सी नी हय; जी मसीन वीरुदी आत्‌मा छे; जेरी बात वीच्‌यार तुहुं सामळी लेदला छे, की चु आवणे वाळु छे ने हय बी जागा मां छे।
1JO 4:4 ए लाटेक्‌ला पुर्‌या, तुहुं भगवानेन छे ने हीनु आत्‌मा काजे जीती गुयला छे; काहाकी जु तुंद्‌रे मां छे, चु कळी पर मटु छे।
1JO 4:5 झुटी वात सीकाड़न्‌या, जे माणसे ईनी कळी मायन छे, ने अळी जे भगवानेन वीरुद करन्‌या ईनी कळीन वीच्‌यारेन तसा वात करे ने सीकाड़े। ने ईनी कळीन वीच्‌यारेम रहण्‌या माणसे हींद्‌री झुटी वाट सामळीन माने।
1JO 4:6 बाकुन हामु ते भगवानेन नेवताळा छे। हेरेसी जतरा बी भगवान काजे जाणे, चे हामरी वात सामळी लेसे; ने मान लेसे, ने जे भगवान काजे बी नी जाणे तीनुक हामरी वात उळखाये बी नी ने मानाये बी नी। हीनी रीती सी आपणु भगवानेन चुखला जीव-आत्‌मा काजे ने माणसेक भंगलाड़ने वाळी आत्‌मा काजे पारखीन उळखी लेसु।
1JO 4:7 ए लाटेक्‌ला साथी, आपणु एक दीसरा सी परम राखु; काहाकी परम भगवान सी छे ने जु कुय परम करे, चु भगवान सी पयदा हयु, ने भगवान काजे जाणु।
1JO 4:8 जु परम नी राखे चु भगवान काजे नी जाणे, काहाकी भगवान परम छे।
1JO 4:9 भगवान हामरे पर असु परम राख्‌यु, चु हेरेसी उजेंतो हयो की भगवान आपणा एक खुळ्‌या पुर्‌या काजे जागा मां मकेल्‌लु छे की हामु हेरे साहरे जीवाय जीवसु।
1JO 4:10 भगवानेन परमेन बदले, आपणु बी भगवान काजे परम करजे बाकुन तेबी परम करनेन खरलु दाखलु आपणु जु परम नी हय, खरलु परम असु उजेंतु हयु की भगवान आपसा पुर्‌या काजे आपणा पापेन माफी वाटे मरीन बादा छुटणे करीन ईनी कळीम मकली देदु।
1JO 4:11 ए मारा लाटेक्‌ला साथी, जत्‌यार भगवान हामरे सी असु परम कर्‌यु, ती हामुक बी एक दीसरा सी परम करनु चाहजे।
1JO 4:12 भगवान काजे कदी कुय नी देख्‌या, कदी हामु एक दीसरा सी परम राखसुन, ती भगवान हामरे मां बणीन रवे; ने हेरु परम हामरे मां पुरु हवे।
1JO 4:13 हव भगवान आपसा चुखला जीव-आत्‌मा काजे आपणा जीवेम वसणे करीन मकली देदु, ने भगवानेन जु चुखलु जीव-आत्‌मा, आपणेम रय्‌न आपणा परमेक पाक्‌कु करनेन काम करने बाजी रयु। ईना कामेन साहरे आपणुक ईनी वातेन सबुत जड़े की, भगवान आपणे मां रवे, ने आपणु भगवान मां रवजे।
1JO 4:14 ने हामु देखी बी लेदा ने गवाय देजे की बास पुर्‌या काजे कळीन छुटकारु करने करीन मकल्‌यु।
1JO 4:15 जु कुय ज्‌य मानी लेय, की ईसु भगवानेन पुर्‌यु छे भगवान हेरेमां बणीन रवे, ने चु भगवान मां।
1JO 4:16 ने ज्‌य परम भगवान हामरे सी राखे; हीनाक हामु जाणी गुया, ने हामुक हेरे पर भुरसु छे। भगवान परम छे; जे परम मां बणीन रवे चु भगवान मां बणीन रवे; ने भगवान हेरेमां बणीन रवे।
1JO 4:17 हेरसी परम हामरे मां पुरो हयो, की हामु नीयावेन दाहड़े हिम्‌मत राखजे; काहाकी जसु चु छे, असोत कळी मां बी छे। ने मसीन जीवनेन तसु छे।
1JO 4:18 परम मां डर नी हय, बाकुन पुरु हवलु परम धाक काजे छेटु कर देय, काहाकी बीहणेन नातो डंड सी हवे, ने जु बीही जाय, चु परम मां पुरु नी हवे।
1JO 4:19 हामु हेरसी परम करजे, काहाकी पेहल भगवान हामरे सी परम कर्‌यु।
1JO 4:20 कदी कुय कवे, “मे भगवान सी परम राखो,” ने आपणे भायस सी कुहराय राख; ती चु लुच्‌चु छे; काहाकी जु आपणे सी, तीनाक चु देख्‌यु, चु परम नी राखे, ती चु भगवान सी बी तीनाक हयु नी देख्‌यु, परम नी राख सके।
1JO 4:21 ने हेरसी हामुक ज्‌य हुकुम जड़्‌यु, की जु कुय आपणा भगवान सी परम राखे, चु आपणा भायस सी बी परम राखे।
1JO 5:1 जु कुय भुरसु करे की ईसुत मसी छे, चु भगवान अवल्‌यात बण जाय ने जु कुय पयदा करने वाळा सी परम राखे, चु हेरसी बी परम राखे, जु हेरसी पयदा हयु।
1JO 5:2 जत्‌यार हामु भगवान सी परम राखजे, ने हेरा हुकुम काजे मांजे, ती हेरसी हामु ज्‌य जाणी लेजे, की हामु भगवानेन अवल्‌यात सी परम राखजे।
1JO 5:3 काहाकी भगवानेन परम ज्‌य छे, की हामु हेरा हुकुम काजे मानजे; ने हेरा हुकुम भारो नी लागे।
1JO 5:4 काहाकी ज्‌य काय भगवान सी पयदा हयो, चो कळी सी जीत हात कर लेदा, ने ची जीत तीनाक कळी पर जीत हात हवे ज्‌य हामरु भुरसु छे।
1JO 5:5 कळी पर जीत हात करने वाळो कुण छे? सीरप चु तेरु भुरसु छे, की ईसु, भगवानेन पुर्‌यु छे।
1JO 5:6 ज्‌य हयुत छे, जु पाणी ने लुहीन साहरे आवलु हतलु; मतलब ईसु मसी चु नी सीरप पाणीन साहरे, बाकुन पाणी ने लुही दुयुन साहरे आवलु हतलु। ने जी आत्‌मा छे ज्‌य गवाय देय, काहाकी आत्‌मा छाचली छे।
1JO 5:7 ने असा करीन गवाय देणेवाळा तीन छे।
1JO 5:8 आत्‌मा, पाणी ने लुही; ने तीनु एकुत वात पर मुजगी छे।
1JO 5:9 जत्‌यार हामु माणसेन गवाय मानी लेजे, ती भगवानेन गवाय ते हेरसी अदीन छे; ने भगवानेन गवाय जी छे, की हयु आपणा पुर्‌यान बारामां गवाय देजे।
1JO 5:10 चु भगवानेन पुर्‌या पर भुरसु करे, चु आपणेत मां गवाय काजे मान लेदलु छे; बाकुन चु भगवान पर भुरसु नी कर्‌यु, हयु तीनाक झुटु बणायु; काहाकी हयु तीना गवाय देण्‌या पर भुरसु नी कर्‌यु, जु भगवान आपणा पुर्‌यान बारामां आपलु छे।
1JO 5:11 ने ची गवाय जी छे, की भगवान हामुक जलमेन जीवाय आपलु छे, ने ज्‌य जीवाय हेरा पुर्‌या मां छे।
1JO 5:12 तेरे धड़े पुर्‌यु छे, तेरे धड़े जीवन छे; ने जेरे धड़े भगवानेन पुर्‌यु नी हय, हेरे धड़े जीवन बी नी हय।
1JO 5:13 मे तुहुंक, जे भगवानेन पुर्‌यान नाव पर भुरसु करो, हेरसी लिख्‌यु की तुहुं जाणु की जलमेन जीवन तुंद्‌रु छे।
1JO 5:14 ने हामरु हीना भगवान पर हिम्‌मत छे की कदी हामु हेरी मरजीन अनसारे काय बी मांगजे, ती चु हामरी सामळे।
1JO 5:15 ने जत्‌यार हामु जाणजे, की ज्‌य काय बी हामु मांगजे चु हामरी सामळे, ती ज्‌य बी जाणजे, की ज्‌य काय हामु हेरसी मांगजे, च जड़लो छे।
1JO 5:16 कदी कुय आपणा भायस ने बहण्‌स्‌या काजे असु पाप करतेलु देखे, तेरो फळ मरनु नी हवे, ती लीलघाये, ने भगवान हीनाक हींद्‌रे वाटे, जु असु पाप कर्‌यु जेरो फळ मरनु नी हवे, जीवन आपसे। पाप असु बी हवे तेरो फळ मरनु हवे हेरे बारामां मे लीलघायणे वाटे नी कवो।
1JO 5:17 आखी भातीन भुंडा काम ते पाप छे, बाकुन असु पाप बी रवे, जु पाप जीव-आत्‌मान मुत भीणी नी ली जाय। असला पापेन माफी वाटे दुवा करनु भगवानेन मरजी छे।
1JO 5:18 हामु जाणजे, की जु कुय भगवान सी पयदा हयु, चु पाप नी करे; बाकुन जु भगवान सी पयदा हयु, हीनाक चु बचाड़ीन राखे, ने चु भुतड़ु हीनाक धरी नी सके।
1JO 5:19 हामु जाणजे, की हामु भगवान सी छे, ने आखी कळी हीना भुतड़ान हक मां पड़ रय।
1JO 5:20 ने ज्‌य बी जाणजे, की भगवानेन पुर्‌यु आय गुयु ने हयु हामुक अक्‌कल आपलु छे, की हामु हीना छाचला काजे उळखजे, ने हामु हेरेमां ज्‌य छाचलीन छे, मतलब हेरा पुर्‌या ईसु मसी मां रवजे। छाचलु भगवान ने जलमेन जीवन हयुत छे।
1JO 5:21 ए पुर्‌या, आपणे आप काजे मुरत्‌या सी बचाड़ु।
2JO 1:1 ओ ईसुन मंडळी, तुसे काजे भगवान नेवाड़लु छे। मे डाहा-बुड़ा, जी चिट्‌ठी तुसे काजे ने तारा माणसे काजे लिखो। मे तुंद्‌रे सी छाचला मन सी परम करो।
2JO 1:2 भगवानेन जी छाचाय जलम हामरे साते रवसे, ने हय जी छाचाय हामरे साते रवसे:
2JO 1:3 आपणु, जे भगवानेन छाचाय्‌न अनसारे परम करीन, जीवणे बाजी रया, आपणु काजे भगवान बास अगु सी, ने भगवान बासेन पुर्‌यु ईसु मसी अगु सी, बेसकी वारु गीण-दया, ने सुक-सांती जड़ती रवसे।
2JO 1:4 मे ज्‌य देखीन बेसकु खुस हयु की चां वाळा मंडळी मायन थुड़ाक माणसे बासेन हुकुमेन अनसारे, तेरी छाचाय पर चाल र्‌या।
2JO 1:5 हय वो लाटेक्‌ली ईसुन मंडळी, मे तारे सी लीलघाय्‌न कह्‌वो, की मे तुसे काजे काय नवलु हुकुम नी पतु, बाकुन हयुत हुकुम आपो, जु आपणु काजे सुरु सी जड़लु छे, की तुहुं एक दीसरा सी परम कर्‌या करजु।
2JO 1:6 परमेन मतलब ज्‌य छे की आपणु भगवान काजे छाचलीन परम करजे। तेरेसी मे तुहुं काजे अळी कहो तुहुं आखा एक दीसरा सी परम करता जाय्‌न जीवजु। जु हुकुम तुहुंक पेहल सी जड़लु छे।
2JO 1:7 कळी मां असा बेसका माणसे भटकाड़ने वाळा छे, चे असा नी माने की ईसु मसी माणसेन पुर्‌यु बणीन आयु; भटकाड़णे वाळा ने मसीन वीरुद करन्‌या जेत छे।
2JO 1:8 तुहुं चेतीन रहु, नीते कांखुर मायन तुहुं काठी मेहनतेन ईनाम खुय देसु, बाकुन मारी मरजी जी छे की तुहुं पुरात-पुरा ईनाम हात करनु चाहजे।
2JO 1:9 जु कुय बेसके छेटे जाती रवे ने मसीन सीकाड़नेन अनसारे नी जीवे, बाकुन सीकाड़ने सी छेटा हयन अगा जात रवे, तेरे साते भगवान नी रवे, बाकुन जु मसीन सीकाड़नेन अनसारे जीवे, तेरे साते भगवान बास ने तेरु पुर्‌यु ईसु, दुयु रवसे।
2JO 1:10 कदी कुय तुंद्‌रे घर आवीन ईना सीकाड़ने काजे छुड़ीन दीसरी रीत सी सीकाड़े, ती तुहुं, तीनाक ईसु पर भुरसु करन्‌यु समजीन आव-भाव घुण करु, ने तीनाक वारलु छे की? करीन बी घुण पुछु।
2JO 1:11 काहाकी जु माणुस तीना काजे वारलु छे की? करीन पुछे, चु तेरा पाप मां बी साजल्‌यु हवे।
2JO 1:12 मेसेक तुंद्‌रे वाटे बेसको लिखणु छे, बाकुन मे जी वात कागदा पर सांय करीन नी लिखो। मे पाक्‌की आस करो की मे तुंद्‌रेन्‌चां आवीस ती उजेंतु वात करीस, तेरे सी आपणी खुसी पुरी हय जासे।
2JO 1:13 ईसु पर भुरसु करने वाळी नेवाड़ली बहणीस तुहुं काजे तुहुं वारलु छे की? करीन पुछ रय ने आवीस ने आवजी कय र्‌या।
3JO 1:1 ए मारा लाटेक्‌ला गयुस, मे युहन्‌‌‌नु पुडारी, जी चिट्‌ठी तुसे काजे लिखो, ने मे छाचलीन तुसेक परम करो।
3JO 1:2 ए मारा लाटेक्‌ला दुस्‌तीदार, मे तार धड़े जी दुवा करो की, जसु, तु जीव-आत्‌मा मां बड़ रयु, तसुत आखी वात मां बड़ ने वारु रव।
3JO 1:3 जत्‌यार हामरा सात देण्‌या भायस तुंद्‌रेन्‌चां सी पछा आवीन तुंद्‌रा बारामां असी छाचली गवाय देदला छे, “तारा चेला ते छाचाय्‌न वाटे वारु चाल रया” तत्‌यार मे बेसकु खुस हयु। ने चे मेसेक ज बी बताड़्‌या की तुहुं छाचली वाट पर कसा चाल रया।
3JO 1:4 मार वाटे ते मारा पुर्‌या-पारीन बारामां गवाय सामळने सी अळी मट्‌ली खुसी नी हय, की मे सामळो, की मारा पुर्‌या-पारी छाचाय्‌न वाट पर चाले।
3JO 1:5 ए मारा लाटेक्‌ला दुस्‌तीदार, तु आपणा भाय बेटान भलाय वाटे ज काय कर सके चो, तु भुरसा भेळ कर रयु, भले चे ईसुन सेवा भक्‌ती करन्‌या भाय बेटा, तारे वाटे अंजाण्‌या छे।
3JO 1:6 ने चे भाय बेटा, जां वाळी मंडळी मां पछा आवीन तारा परमेन बारामां गवा देदला छे। जसु तु, ईनु माणसेक परम सी पेहले आव-भाव करलु, तसुत हय बी अळी ईनुक भगवानेक लागे असो आव-भाव करीन खुसी-खुसी वारु मकल्‌या करजी, ती वारलु रवसे।
3JO 1:7 काहाकी चे ईसु मसी पर भुरसु नी करे तींद्‌रे धड़े, चे काय बी लेय बीगुर, मालीक ईसु मसीन नावेत नीकळ्‌ळा छे।
3JO 1:8 तेरेमां आपणु आखा काजे बी असला माणसेन फीकुर करीन मदत करनु चाहजे। काहाकी आपणु असा करसु, ती छाचाय वाटे काम करन्‌यान साजल्‌या बण जासु।
3JO 1:9 मे, ईनी वातेन खबर करीन तुंद्‌रे सातेवाळी, ईसुन मंडळी वाटे एक चिट्‌ठी लिखलु। बाकुन तीनी चिट्‌ठी वाळु दीयुतीरफ्‌यु हामरी वात सामळने नी हींडे; चु ते आखा सी मटु बणने हींडे, ने ईसु काजे हामरी वातेन खबर नी पुगाड़्‌यु।
3JO 1:10 तेरेमां मे जत्‌यार आवीस, ती तेरा करला कामेन बारामां मे तीनाक हेर कराड़ीस, हयु हामरी नाव-बद्‌दी करसे, ने हेरेम बी चु खुस नी रवे; ने जे हामरी भायसेन आव-भाव करने हींडे, तीनुक बी चु मना करे! ने तीनुक भगवानेम सी नीकाळ देय।
3JO 1:11 ए मारा लाटेक्‌ला दुस्‌तीदार, असी कुहराय करन्‌यान तसु, तु कुहराय घुण करजी बाकुन भलाय करन्‌यान चाल धर, काहाकी जु माणुस भलाय करे, चु माणुस भगवानेन अगे सी छे। बाकुन जु कुहराय करे, चु माणुस भगवानेक नी देख्‌यु।
3JO 1:12 हाय देमेतर्‌यान बारामां सामळु, जु जां सी तारेन चां आवणे वाळु छे। देमेतीरीयुसेन बारामां आखा वारलु गवाय देदला छे। ने तेरी जीवाय ते, पुरी-पुरी छाचली सीकापण छे, ने हामु बी देमेतीरीयुस वारलु गवा देजे। ने तु जाणे की, हामु जी गवाय दी रया ची गवाय छाची छे। हेरेसी देमेतीरीयुसेन बी वारु आव-भाव करजी।
3JO 1:13 मार धड़े तार बारामां लिखणे वाटे ते बेसकी वात छे, बाकुन मे, ईनी वातेक हय अगु कागदा पर सांय ने पेन वाटे लिखणे नी हींडतु।
3JO 1:14 बाकुन मे छाटुस आवीन तुसेक भेळु हवणेन आस कर रयु। ने जत्‌यार मे तारेन चां आवीन तुसेक भेळु हय्‌स, तत्‌यार आपणु आंबा-सांबा वात करसु।
3JO 1:15 भगवानेन अगे सी तुहुंक सुक सांती जड़ती रहणु चाहजे, ने जां वाळा दुस्‌तीदार्‌या तुहुंक वारलु छे की? करीन पुछ रया। अतरे हामरे वाटीन चां वाळा आखा दुस्‌तीदार्‌यान नाव धरी-धरीन वारलु छे की? करीन पुछ लेजी।
JUD 1:1 यहुदा भीणी सी जु ईसु मसीन पावर्‌यु ने याकुपेन भायस छे, जे भगवानेन साहरे बुलावला छे, ने भगवान बासेन लाटेक्‌ला पुर्‌या-पारी छे, ने ईसु मसी धड़े समळीन रवे।
JUD 1:2 दया ने सुक-सांती ने परम तुहुं काजे बेसकी जड़्‌या करे।
JUD 1:3 ए मारा लाटेक्‌ला, दुस्‌तीदार्‌या जत्‌यार मे तुहुं काजे तीना छुटकारान बारामां लिखणे करीन बेसकी काठी मेहनत कर रयु, तीना छुटकारान आपणु आखा साजल्‌या छे। तीने टेमे मेसेक जो समजाड़नु वारु लाग्‌यो की तुहुं तीना भुरसा वाटे पुरा-पुरा काठी मेहनत करु, जु भुरसु चुखला माणसे काजे एकुत कावा सुपलु हतलु।
JUD 1:4 काहाकी बेसका असा माणसे कळ्‌येन आपणेम आवीन भेसकाय गुयला छे, तींद्‌रा डंडेन बारामां अगला बारामां पेहले सीत लिखलो हतलो जे नी भगत छे, ने आपणा भगवानेन गीण-दया काजे छीनाळा मां बदली देय ने आपणा एकुत मालीक ने आखान मुखी ईसु मसीन नीकारु करे।
JUD 1:5 बाकुन तुहुं आखी वात एक कावा जाणी लेदला छे, तेबी मे तुहुं काजे जी वात हेर कराड़ने हींडो की मालीक एक कुळीन माणसे काजे मीसर देस सी छुड़ावीन लायु। बाकुन अळी भुरसु नी कर्‌या करीन मारीन सार देदु।
JUD 1:6 ने जे सरग वाळा काहवाळ्‌या आपसा ठीया काजे छुड़ देदा ने, आपसा जागा काजे छुड़ देदा भगवान तीनुक, बी नीयावेन दाहड़ा वाटे तीना आंदारला मां बांदीन मेल रयु, ज जलम लग रवसे।
JUD 1:7 सदोम ने गमोरा ने तीनु सहर धड़े वाळा सहरे सरग वाळा काहवाळ्‌यान तसात छीनाळ्‌या बण गुया ने पारका डीलेन हेर करने बाजी गुया ने आकठान जलमेन अमरकायान डंड भुक्‌तीन आपणे-आपणे वाटे एक दाखलु बण गुया।
JUD 1:8 असोत जे सपनो देखण्‌या बी आपसा-आपसा डीलेक वीटाळे, ने भगवानेन हक काजे नीकारु ने उचा जागा पर बठण्‌या काजे वारु-भुंडा कहें।
JUD 1:9 बाकुन जत्‌यार सरग वाळा काहवाळ्‌यान मुखी मीकायेल, भुतड़ा साते मुसान धड़ेन, बारामां वातेम जखड़ी पड़ रयु, तत्‌यार तीना भुतड़ान नाव-बद्‌दी करीन तेरी वात काटनेन हिम्‌मत नी कर्‌यु, बाकुन तीनाक ज कह्‌यु, “मालीक तुसेक लड़े।”
JUD 1:10 बाकुन जे माणसे ते तीनी वातेक जाणे लग नी, तीनी वातेन बारामां भलो-भुंडो कह्‌वीन वात काटे, ने तीनी वातेक डेड़-अकल्‌या जनवार्‌यान तसा सुरु सीत जाणे, तीनी वातेम आपसा काजे सारने बाजी रया।
JUD 1:11 तींद्‌रे वाटे बेसकी दुखेन वात छे काहाकी चे केनेन तसा वेहवार कर्‌या, ने दाहड़की वाटे बीलामेन तसा बीगड़ी गुया, ने कोरह जातीन माणसेन तसा मुसान वीरुद करीन सर गुयला छे।
JUD 1:12 जे तुंद्‌री परमेन पंगत मां बठीन खाय पीये, जे दर्‌या मां सातायला ढाटा सांय छे, जे बे फीकर्‌या हय्‌न आपसोत पेट भरने करीन तुंद्‌रा गुवाळ्‌या बण रया। जे ठारला वादळान तसा छे, तीनु काजे आहळी उडाड़ीन ली जाय। जे फालतु झाड़कान तसा छे, जे सड़ी जाय। जे दुय कावा मर गुयला छे, ने जड़ सुदेत उखळी गुयला छे।
JUD 1:13 जे दर्‌या समुदरेन झलकेन तसा छे, जे आपसी लाजेन झलके झलकाये। तींद्‌रे वाटे जलम आंदारलो मेल छांड्‌यो।
JUD 1:14 हनोक बी जु आदमेन सातवी पीड़ी मां पयदा हवलु, चु बी हींद्‌रा डंडेन बारामां, पेहले सीत भगवानेन अघली असी वात कह्‌लु, “देखु भगवान मालीक आपसा हजारु चुखला माणसे साते आयु।
JUD 1:15 आखान नीयाव करने आवणे बाजी रयु, ने चे माणसे ज बी भुंडो काम करला छे, ने भगवानेन वीरुद मां भुंडु बुल कह्‌ला छे, तीनुक डंड आपे।”
JUD 1:16 जे माणसे लागाड़ु ने वात काडण्‌या छे। चे आपसान मरजी पर चालने वाळा छे, ने आपसान बारामां मटायन वात करे। ने आपसा नफान करतात दीसरान बड़ाय कर्‌या करे।
JUD 1:17 बाकुन ए लाटेक्‌ला दुस्‌तीदार्‌या, तुहुं, तीनु बुलेक हेर राख्‌जु, जी वात आपणा मालीक ईसु मसीन नेवताळा पेहले सीत कहला हतला।
JUD 1:18 चे तुहुंक कह्‌या करतेला की पेहला दाहड़ा मां भगवानेन वातेन हासी उडाड़से, ने भगवानेन भक्‌तीन वीरुद मां हेर करीन जीवसे।
JUD 1:19 चे जे माणसे छे, जे भगवानेन माणसे मां बीरजु पाड़ देय, जे मनेन मरजी पुरी करे, तींद्‌रेम जीव-आत्‌मा नी हय।
JUD 1:20 बाकुन ए लाटेक्‌ला, तुहुं आपसा चुखला भुरसा मां अदता जावु, ने चुखली-आत्‌मा मां दुवा करता रहु।
JUD 1:21 भगवानेन परम मां रहु; ने अमर जीवन वाटे आपणा मालीक ईसु मसीन दयान वाट देखता रहु।
JUD 1:22 ईसुन मंडळीम जे भुरसा मां पाक्‌का नी हय, तींद्‌रे पर दया करु।
JUD 1:23 झुटी सीकापण मानीन जे भंगलायन खरली वाटे सी छेटा हयन नरक आकठा मां पड़ला दीसरा माणसे काजे अगा जाय्‌न नीकाळु, ने पाप मां पड़ला बेसका जणा पर बीहता जाय्‌न दया करु; बाकुन तींद्‌रा पुथल्‌या सी बी कुहराय करु, जे पुथल्‌या तींद्‌रा पापी डील सी भुंडा हय गुयला छे।
JUD 1:24 जु तुहुं काजे पापेम पड़ने सी बचाड़ सके, ने आपसा पुरा-पुरा सेक-सींगार अगळ खुस करीन, ने नी-गुनाळा बणावीन उबु कर सके;
JUD 1:25 तीना एकुत आपणा छुड़ावणे वाळा भगवानेन सेक-सींगार, ने मटाय, ने ताकत, ने हक आपणा मालीक ईसु मसीन साहरे कळ नी घड़ायी ने पेहले सीत देखाव पड़तु आय रयु, तसुत हय बी देखाव पड़्‌या करे, ने पीड़ीडीट जलम देखाव पड़तु रवणु चाहजे। आमीन।
REV 1:1 ईसु मसीन उजेंता बुले, च तीनाक भगवान असु करीन देदु की आपसा चाकर्‌याक चे वात, तीनुक मामार हवणु की हवणु छे, देखाड़े; ने हयु आपसा सरग काहवाळ्‌या काजे मकलीन आपसा चाकर्‌या युहन्‌नाक बताड़्‌यु,
REV 1:2 जु भगवानेन बुल ने ईसु मसीन गवाय मतलब जो काय हयु देखलु तेरी गवाय देदु।
REV 1:3 चे वारु छे ची ईनी हवणे वाळी अघली वातेन बुल काजे भणे, ने जे सामळे ने हेरेम लिखली वातेक माने; काहाकी टेम धड़ेत छे।
REV 1:4 युहन्‌ना भीणी सी आसीया देसेन सांतु मंडळ्‌यान नावे: तेरे भीणी सी जु छे, ने जु हतलु ने जु आवणे वाळु छे: ने तीनु सातु आत्‌मा भीणी सी जु तेरा बठणेन गादीन अगळ छे।
REV 1:5 ने ईसु मसी भीणी सी जु भुरसा लायक गवाय ने मरला मां सी जीव उठणे वाळा मां पेहलु पुर्‌यु ने धरतीन बेसका राजान मालीक छे, तुहुंक गीण-दया ने सांती जड़ती रहे। हयु हामरे सी परम राखे, ने हयु आपसा लुही सी हामुक पापेम सी छुड़ायु,
REV 1:6 ने हामुक एक राज ने आपणा बास भगवान वाटे पुजारु बी बणाय देदु; तेरोत सेक-सींगार ने ताकुतेन काम जलम हवतो रहणु चाहजे आमीन।
REV 1:7 देखु ज लिखलो छे की, हयु वादळा भेळुत आवणे वाळु छे, ने हरेक ने डुळा तीनाक देखसे, मतलब जे तीनाक वेला पाड़ीन मारला चे बी देखसे, ने धरतीन आखा माणसे तेरे वजे सी छाती ठुकसे। हव। आमीन।
REV 1:8 मालीक भगवान, जु छे ने जु हतलु ने जु आवणेवाळु छे, जु आखाम सी ताकतवाळु छे, चु असु कह्‌वे, “मेत अल्‌फा ने ओमेगा छे।”
REV 1:9 मे युहन्‌ना, जु तुंद्‌रु भाय ने ईसुन दुख ने राज्‌य ने दम धरने मां तुंद्‌रे भेळु भेसकायलु छे, भगवानेन बुले ने ईसुन गवायन वजे सी पतमुस नावेन टापा मां हतलु।
REV 1:10 मे मालीकेन दाहड़े आत्‌माम आय गुयु, ने आपणे पछळ फेप्‌यान तसा मटात बुले असो कवता सामळ्‌यु,
REV 1:11 “ज काय तु देखे तीनाक किताप मां लिखीन सांतु मंडळ्‌याक पुगाड़ दे, मतलब ईफीसुस, ने समुरना, ने पीरगमुन, ने थुवातीरा, ने सरदीस, ने फीलदीलफीया, ने लोदीकीया काजे।”
REV 1:12 तत्‌यार मे तीनाक, जु मारे सी बुलतेलु, देखणे वाटे मारो मुंहडो फेरव्‌यु; ने पछु वळीन मे सनान सात दिवा देख्‌यु,
REV 1:13 ने तीनु दिवान ईचमां माणसेन पुर्‌यान तसु एक माणुस काजे देख्‌यु, जु पाये लगुन पुथल्‌या पेहरलु, ने छाती पर सनान फेटु बांद्‌लो हतलो।
REV 1:14 तेरे मुणको ने कान्‌या धवळा जसा बरफेन तसों उजेळ्‌ळो हतलो, ने तेरा डुळा आकठान ईंगाळान तसा हतला।
REV 1:15 तेरा पांय वारलु पीतळेन तसा हतला जसा मानु की भाटी मां हळो-हळो तातो करलो हय, ने तेरा बुले बेसका पाणीन आवाजेन तसा हतला।
REV 1:16 चु आपसा जेवड़्‌या हात मां सात तारा ली रवलु, ने तेरा मुंहडाम सी पाजावली दुयधारी छर-छर तलवार नीकळने बाजी रवली। ने तेरा मुंहडाम सी माथे दाहड़े भीबळन्‌या दाहड़ान तसों बेसके जुरे भीबळी रह्‌लो।
REV 1:17 जत्‌यार मे तीनाक देख्‌यु, ती मे तेरा पाये पर मरलान तसु हीट पड़्‌यु। ने चु मारे उपर आपसु जेवड़्‌यु हात मेकीन कह्‌यु, तु बीहे मां; मे पेहलु ने आकरी ने जीवतेलु छे;
REV 1:18 मे मर गुयलु, ने हय देख मे मर्‌या-सर्‌याम सी बठु हय्‌न जलम पीड़ीडीट जीवतु छे; ने मोतन कुची ने पाताळेन कुची मारेत धड़े छे।
REV 1:19 तेरेमां जी वात तु देखलु छे ने जी वात हय रय ने जी वात हेरे पछळ हवणे वाळी छे, तीनु आखी काजे लिख ले।
REV 1:20 मतलब तीनु सांतु तारान सातायली वात जीनुक तु मारे जेवड़्‌ये हात मां देख्‌यु, ने तीनु सात सनान दिवान सातायली वात: चे सात तारा सांतु मंडळ्‌यान सरग काहवाळ्‌या छे, ने चे सात दिवा सात मंडळ्‌या छे।
REV 2:1 तु ईफीसुस सहरेन मंडळीन माणसे वाटे तींद्‌रा चाकर्‌या काजे असो लिखीन दी मकल: जु सात तारा आपसा जेवड़्‌या हात मां धर रयु, ने सनान सात दिवान ईचमां फीरी र्‌यु, मे तुहुंक असो कह्‌वो।
REV 2:2 मे तारा काम काजे, ने तुंद्‌री मेहनत काजे, ने तुंद्‌री गम खाणेन ताकत काजे वारु जाणो; की तुहुं तीनु कुहर्‌या माणसेक देख नी सके, ने जे आपसात काजे ईसुन नेवताळु कह्‌वे, ने तुहुंक पारखी लेदा, ने जाण लेदा की, चे ईसुन नेवताळा नी हय, बाकुन लुच्‌चा छे।
REV 2:3 तुहुं बेसका गम खावु, तुहुं मार नाव सी वेला करी-करीन हारी नी पड़्‌यु।
REV 2:4 बाकुन तेबी, मेसेक तुंद्‌रा वीरुद मां जो कह्‌णु छे की, तुहुं पेहलेन तसु परम छुड़ देदा।
REV 2:5 तेरेमां वीतला दाहड़ाक हेर करु, ने तुहुं कां सी पड़ला, ने मन फेरवीन भगवान भीणी वळु, ने पेहलेन तसा परम सी काम करु; ने कदी तुहुं भगवान भीणी नी वळु, ती मे तुंद्‌रेन्‌चां आय्‌न तुंद्‌रा दिवा काजे तुंद्‌रेन्‌चां सी छेटे कर दीस।
REV 2:6 बाकुन हव, तारेम जी वात ते छे, की तु नीकुलईया पंथवाळान काम तुसेक नी पटे, ने चे मेसेक बी नी पटे।
REV 2:7 जेरा कान्‌टा हय, चु सामळी लेय की चुखली-आत्‌मा मंडळ्‌या सी काय कहें! जु जीती जाय, मे तीनाक पला जीवनेन झाड़का मां सी जु भगवानेन सरगेन बगीचा मां छे, फळ खाणेन दीस।
REV 2:8 “समुरनान मंडळ्‌यान सरग काहवाळ्‌या काजे ज लिख: “जु पेहलु ने आकरी छे; जु मर गुयलु ने हय जीवतु हय गुयु, हयु असो कहें।”
REV 2:9 मे तारा दुख ने गरीबी काजे जाणो; ने जे माणसे आपसा काजे यहुदी कहें ने हय नी, बाकुन भुतड़ान दुवान घर छे, तींद्‌री बदनामी काजे बी जाणो।
REV 2:10 जे दुख तुसे झेलनु पड़से, तीनु सी मां बीहे काहाकी, भुतड़ु तुंद्‌रे मायन काहनाक काजे जेल मां नाखणेत वाळा छे काहाकी, तुहुं पारखाय जावु; ने तुहुं दस दाहड़ा लग दुख हाकलनु पड़से। जीव देणे लग भुरसा लायक रव; ती मे तुसेक जीवनेन मुड़ दीस।
REV 2:11 तेरा कान्‌टा छे, हयु सामळी लेय की आत्‌मा मंडळ्‌या सी काय कहें, जे जीत जाय, “तीनुक दीसरी मरण सी काय बी नुकसाण नी हवे।”
REV 2:12 पीरगमुनेन मंडळ्‌यान सरग काहवाळ्‌या काजे असु लिख की: “तेरे धड़े पाजावली दुयधारी तलवार छे।”
REV 2:13 ने मे असो बी ते जाणो की तु वां रहे जां भुतड़ान बठणेन राजगादी छे, ने मारे नाव सी टीकीन रहे; ने मार पर भुरसु करने सी तीनु दाहड़ाम बी पछु नी पड़्‌यु, तेरेमां मारु भुरसाम रहण्‌यु अंतीपास, तुंद्‌रेन्‌चां तीना जागा पर माराय गुयु जां भुतड़ु रहे।
REV 2:14 बाकुन मे तार वळु नी हवतु ने ईतरीक वात कहणु छे, काहाकी तारेन चां काहनाक ते असा छे, जे बीलामेन सीकापण काजे माने, जु बालाक काजे ईस्‌रायलेन माणसे अगळ पाप करने करीन पटव्‌या, की जे दगड़ा पर चड़ावली चीज खाय, ने छीनाळो काम करे।
REV 2:15 तसोत तारेन चां काहनाक असा छे, जे नीकुलईन सीकापण काजे माने।
REV 2:16 तेरेमां मन फेरव, नी ते मे तारे धड़े मामारुत आवीन, मारी लुहड़ान तलवार सी तींद्‌रे भीणी लड़ीस।
REV 2:17 तेरा कान्‌टा छे, हयु सामळी लेय की चुखली-आत्‌मा मंडळ्‌या सी काय कहें; जे जीत जाय, “तीनाक मे सातायला मन्‌ना मां सी दीस; ने तीना दगड़ा पर एक नाव लिखलो रवसे, जो तीनाक जड़ने वाळा पाखुर ने कुय नी जाणसे।”
REV 2:18 थुवातीरान मंडळ्‌यान सरग काहवाळ्‌या काजे असो लिख, भगवानेन पुर्‌यु तेरा डुळा आकठान ईंगाळान तसा, ने तेरा पांय वारलु पीतळेन तसों छे, हयु असु कहें:
REV 2:19 मे तारा कामे, ने परम, ने भुरसा, ने सेवा, ने गम काजे जाणो, ने ज बी की तारा पछला काम पेहला काम सी बड़ीन छे।
REV 2:20 बाकुन मे तारे वळु नी हवतु ने असो कहणु छे, की तु तीनी बायर इजेबेल मां रहणी देय, ची आपसी काजे भगवानेन अघली वात बताड़ने वाळी कहें, ने मारी सेवा करन्‌या काजे छीनाळो करने, ने दगड़ा अगळ चड़ावली चीज खाणु करीन भुले पाड़े।
REV 2:21 मे तीनाक मन फेरवणेन टेम आप्‌यु, बाकुन हयी आपसीन छीनाळा काम करने सी मन नी फेरवणे नी हींडती।
REV 2:22 देख, मे तीनीक रुगेन खाट्‌ली मां नाखो; ने जे तेरे साते छीनाळो करी र्‌या ने कदी चे बी हीनीन तसा काम सी मन नी फेरवसे ती तीनुक मटला दुख मां नाखीस।
REV 2:23 मे तींद्‌रा पुर्‌या काजे मार नाखीस; ने तत्‌यार आखा मंडळ्‌या जाणी लेसे की मन ने मरजी काजे पारखणे वाळु मेत छे, ने मे तुंद्‌रे मायन हरेक ने तेरा कामेन अनसारे बदलु दीस।
REV 2:24 बाकुन तुहुं थुवातीरान बाकी माणसे सी, जतरा ईना सीकापण काजे नी माने, ने तीनु वातेक जीनुक भुतड़ान उंडली वात कहें, तीनुक नी जाणे, तीनुक असो कहं, की मे तुंद्‌रे पर अळी भार नी नाखो।
REV 2:25 बाकुन हव, जो तुंद्‌रे धड़े छे तीनाक मारे आवणे लग धरी राख।
REV 2:26 जे जीते, ने मारा कामेन अनसारे आकरी लग करे, मे तीनाक जाती-जातीन माणसे पर हक दीस।
REV 2:27 ने हयु लुहड़ान राड़ेन हक लीन तीनु पर राज करसे, जसु कुमाहरेन धुळान डुचरा भुकरा हय जाय: मे बी असुत हक मारा बास भगवान सी जड़ली छे।
REV 2:28 ने मे बी तीनाक वीजाळ्‌यु तारु आपीस।
REV 2:29 जेरा कान्‌टा छे, हयु सामळी लेय की आत्‌मा मंडळ्‌या सी काय कहें।
REV 3:1 सरदीसेन मंडळ्‌यान सरग काहवाळ्‌या काजे, जेरे धड़े भगवानेन सात आत्‌मा ने सात तारा छे, असु कहें की मे तारा कामे काजे जाणो, की तु जीवलु ते कहवाये, बाकुन ए मरला!
REV 3:2 जागतु हय जां, ने तीनु चीजेक जी बाकी रवली छे, ने जे सरनेत वाळी छे, तीनुक काठा कर; काहाकी मे तारा काहना बी काम काजे भगवान धड़े पुरो की पुरो नी देख्‌यु।
REV 3:3 तेरेमां हेर कर, की तु काहनी बी रीती सी सीक लेदलु ने सामळ्‌ळु हतलु, ने तेरेमां बणीन रव, ने मन फेरव; ने कदी तु जागतु नी रवसी ती मे चुट्‌टान तसु आय जायस ने तु कदी नी जाण सक्‌सी, की मे काहनी टेम पर तार पर आय पड़ीस।
REV 3:4 बाकुन अतरी संय वात छे की, सरदीस मां तारेन चां काहनाक असा माणसे छे, जे आपसा पुथल्‌या काजे चुखला राख्‌या, चे धवळा पुथल्‌या पेहरीन मारे साते फीरसे, काहाकी चे हेरे लायक छे।
REV 3:5 जे जीत जाय, तीनाक हेरेन तसोत धवळा पुथल्‌या पेहरावसे, ने मे तेरो नाव जीवनेन किताप मां सी काहनी बी रीती सी नी काटो, बाकुन तेरो नाव मारु बास भगवान ने तेरा सरग काहवाळ्‌या अगळ मान लीस।
REV 3:6 तेरा कान्‌टा हय, हयु सामळी लेय की आत्‌मा मंडळ्‌या सी काय कहें।
REV 3:7 फीलदीलफीयान मंडळ्‌यान सरग काहवाळ्‌याक काजे असु लिख: “जुत चुखलु ने छाचलु छे, ने जुत दावुदेन कुची राखे, तीना खुल्‌ला काजे कुय बी बंद नी कर सके ने बंद करला काजे कुय बी खुल नी सके, हयु असु कहें,
REV 3:8 मे तारा काम काजे जाणो। देख, मे तारे अगळ एक बारनो उगाड़ी र्‌यु, तीनाक कुय बी बन्‌द नी कर सके; तारी ताकत ईतरीक सी ते छे, तेबी मारा बुलेन पाळन कर्‌यु, ने मारा नावेन नीकारु नी कर्‌यु।”
REV 3:9 देख, मे भुतड़ान तीनी मंडळी काजे तार बस मां कर दीस जे यहुदी बणीन रहे, बाकुन हय नी, ने झुट बुले मे असु करीस, की चे आवीन तारे पाय मां आंदसे, ने ज जाण लेसे, की मे तारे सी परम राखो।
REV 3:10 तु मारा गमेन बुले काजे धरीन उबु रयु, तेरेमां मे बी तुसेक आफतेन टेम सी बचाड़ीस, जे धरती पर रहणे वाळान पारखणे वाटे आखी दुनीया पर आवणेवाळी छे।
REV 3:11 मे मामारुस आवणेवाळु छे; जो काय तारे धड़े छे तीनाक धरी राख, काहाकी तारा जीतला ईनाम काजे कुय बी हापकी नी सके।
REV 3:12 जे जीत जाय, तीनाक मे मारा भगवानेन घर मां एक खाम्‌बु बणावीस, ने हयु पछु कदी बाहर नी नीकळसे; ने मारा भगवानेन नाव, ने भगवानेन सहर मतलब नवला यरुसलेमेन नाव, ज मारा भगवानेन धड़े सी सरग पर सी उतरनेवाळु छे ने मारो नवलो नाव तीना पर लिखीस।
REV 3:13 तेरेमां तेरा कान्‌टा हय, हयु सामळी लेय की आत्‌मा मंडळ्‌या सी काय कहें।
REV 3:14 लोदीकीयान मंडळीन काहवाळ्‌या काजे असो लिख: “जु आमीन, ने भुरसा वाळा, ने छाचला गवा छे, ने भगवानेन घड़नेन खास वजे छे, हयु असु कहें।
REV 3:15 मे तारा कामे काजे जाणो की तु नी ते सेळ्‌ळु छे ने नी तातु; भलो रवतो की तु सेळ्‌ळु नीते तातु रवतु।
REV 3:16 असु करीन तु फळ्‌कु छे, ने नी सेळ्‌ळु छे ने नी तातु, मे तुसे मारा मुंहडाम सी उंगेळने पर छे।
REV 3:17 तु असु कहें, की मे मातलु हय गुयु, ने मेसेक काय चीजेन कमी नीही, ने असु नी जाणतु, की तु नी भाग वाळु ने फालतु ने गरीब ने आंधळु, ने नांगरलु छे।
REV 3:18 तेरेमां मे तुसे सला दम, की आकठा मां तावलो सनो मार सी मुल ले, काहाकी मातलु हय जाय; ने धवळा पुथल्‌या ली ले की पेहरीन तुसे आपसा नांगरला सी लाजे नी पड़े; ने आपसा डुळा मां लागाड़ने करीन सुरमु ले काहाकी तु देखणे लाग जाय।
REV 3:19 मे जीनु-जीनु सी परम राखो, तीनु आखा काजे लड़ो ने ठुको, तेरेमां तीयार हय जां, ने पाप सी मन फेरव।
REV 3:20 देख, मे बारना मां उबु रय्‌न खटो-खटो कराड़ो; कदी काहनुक मारो बुली सामळीन बारनो खुलसे, ती मे तेरे धड़े माहीं आय्‌न तेरे भेळु खाणो खाय्‌स, ने चु मारे साते खासे।
REV 3:21 जु जीत जाय, मे तीनाक मारे साते मारे राजगादी पर बठाड़ीस, जसु मे बी जीती गुयु ने मारा बास भगवान भेळु तेरे राजगादी पर बठ गुयु।
REV 3:22 “तेरेमां तेरा कान्‌टा छे चे सामळी लेय की आत्‌मा मंडळ्‌या सी काय कहें।”
REV 4:1 ईनी वातेन वात मे नींगा कर्‌यु, ती असो देख की सरग मां एक बारनो खुल्‌लो छे। ने तीनाक मे पेहेल फेप्‌यान तसों अवाज मां आपणे साते वात करतेला सामळ्‌यु, हयुत कहें, “जां उपर आय जां, ने मे असी वात तुसे देखाड़ीस, तीनुक जी वात पुरी हवणुत छे।”
REV 4:2 तत्‌यारुत मे आत्‌मा मां आय गुयु; ने काय देखो की एक राजगादी सरग मां मेकलो छे, ने तीनी राजगादी पर काहनुक बठ्‌लु छे।
REV 4:3 ने जु तीनी राजगादी पर बठ्‌लु छे, हयु यसब (नीळ्‌ळा रंगेन) ने माणीक्‌य (रातला रंगेन) नावेन दगड़ान तसों भबळने बाजी रह्‌लो, ने ती राजगादीन चारे-मेर मरकत नावेन दगड़ा (नीळ्‌ळु रंगेन) तसों एक भाती-भातीन रंगेन बाम देखाये।
REV 4:4 तीनी राजगादीन चारे-मेर वीस ने चार राजगादी छे; ने हीनु राजगादी पर वीस ने चार मुख्‌या धवळा पुथल्‌या पेहरीन बठी र्‌यु, ने तींद्‌रे मुणका पर सनान मुड़ छे।
REV 4:5 तीनु राजगादी मां सी वीजळी चमके ने गाजुण गाजे, ने राजगादी अगळ आकठान सात दिवा धपी र्‌या, चे भगवानेन सात आत्‌मा छे,
REV 4:6 ने तीनी राजगादीन अगळ मानु वारु आर-पार देखाये तसों, आरस्‌यान जसों दरीयों छे, ने राजगादीन ईचमां ने राजगादीन चारे-मेर चार जनवार्‌या छे, तींद्‌रे अगळ-पछळ डुळात-डुळा छे।
REV 4:7 पेहलो जनवार्‌या नाहरेन तसों छे, ने दीसरो जनवार्‌या केवड़्‌यान तसों छे, तीसरो जनवार्‌यान मुंहडो माणसेन तसों चे, ने चोवथां जनवार्‌या उडतेला घुवड़ान तसों छे।
REV 4:8 ने चारु जनवार्‌यान छव-छव पाखड़ा छे, ने चारे-मेर ने माहीं डुळात-डुळा छे; ने चे रात दाहड़ु आराम लग नी लेय ने असा कवता रहे, “चुखलु, चुखलु, चुखलु मालीक भगवान, आखाम सी ताकतवाळु, जु हतलु, ने जु छे, ने जु आवणे वाळु छे।”
REV 4:9 ने जत्‌यार जनवार्‌या तेरी जु राजगादी पर बठ्‌लु छे, ने जु जलम जीवतु छे, सेक-सींगार ने आव-भाव ने बड़ाय कर र्‌या।
REV 4:10 तत्‌यार वीस ने चार डाहा-बुड़ा राजगादी पर बठणे वाळान अगळ हीट पड़्‌या, ने तीनाक जु जलम जीवतु छे आंध्‌या; ने आपणा-आपणा मुड़ राजगादीन अगळ असा कवता जाय्‌न नाख देदा,
REV 4:11 “ए हामरा मालीक, ने भगवान, तुत सेक-सींगार, ने आव-भाव, ने ताकुतेन लायक छे; काहाकी तुत आखी चीजे घड़्‌यु, ने तारीत मरजी सी, चे हजुरी मां हतला ने घड़ायली।”
REV 5:1 ने जु राजगादी पर बठलु हतलु, मे तेरे जेवड़्‌ये हात मां एक किताप देख्‌यु, तेरेमां माहीं ने बाहर लिखलो हतलो, ने सात सील लागाड़ीन बन्‌द करलो हतलो।
REV 5:2 अळतेन मे एक ताकतवाळु सरग काहवाळ्‌या काजे देख्‌यु जुर सी आयड़ीन असु परचार करतेलु “ईनी किताप काजे खुलने ने तेरी सील तुड़ने लायक कुण छे?”
REV 5:3 बाकुन ने नी सरग मां, नी धरती पर, नी धरतीन नेचु काहनुक तीनी किताप काजे खुलने नीते तीनी पर नींगा नाखणेन लायक नीकळ्‌या
REV 5:4 तत्‌यार मे उसकी-उसकीन रड़ने बाजी गुयु, काहाकी तीनी किताप काजे खुलने, नीते तीनी पर नींगा करने लायक कुय नी जड़्‌यो।
REV 5:5 तत्‌यार तीनु डाहा-बुड़ा मायन एक जणु मारे सी कह्‌यु, “मां रड़े; देख, यहुदान कुळीन पलु नाहर, जु दावुदेन अवल्‌यात छे, तीनी किताप काजे खुलने ने तेरी सातु सील तुड़ने करीन जीत जड़ी।”
REV 5:6 तत्‌यार मे तीनी राजगादी ने चारु जनवार्‌या ने तीनु डाहा-बुड़ान ईचमां, एक गाडरान पीलो उबो हय रवलो देख्‌यु; तेरा सात सींगड़ा ने सात डुळा हतला; जे भगवानेन सातु आत्‌मा छे, जी आखी धरती पर मकेली छे।
REV 5:7 हयु आवीन तेरे जेवड़े हात सी जु राजगादी पर बठ्‌लु हतलु, चु किताप ली लेदु,
REV 5:8 जत्‌यार हयु किताप ली लेदु, ती चे चारु जनवार्‌यान चोवीस डाहा-बुड़ा तीना गाडरा अगळ हीट पड़्‌या; ने आखान हात मां झुणगु ने ईत्‌तर सी भरलो सनान कटवरा हतला, चे ते चुखला माणसेन दुवा छे।
REV 5:9 ने चे ज नवलो गीत गावणे लाग्‌या, “तु ईनी किताप काजे लेणे, ने तेरी सील तुड़ने लायक छे; काहाकी तु माराय्‌न, आपसा लुही सी हरेक कुळ, ने बुली, ने माणसे, ने जाती मां सी भगवान वाटे माणसे काजे मुल लेदु।
REV 5:10 ने तीनुक आपणा भगवान वाटे एक राज्‌य ने पुजारु बणायु; ने चे धरती पर राज करे।”
REV 5:11 जत्‌यार मे देख्‌यु, ती तीनी राजगादी ने तीनु जनवार्‌या ने तीनु डाहा-बुड़ान चारे-मेर बेसका सरग काहवाळ्‌यान बुल सामळ्‌यु, तींद्‌री गिन्‌ती लाखु ने कुरुड़ुन हतली।
REV 5:12 ने चे जुर सी कवतेला, “माराय्‌लु गाडरुत ताकतवाळु, ने धन, ने आखो सीकणो, ने ताकत, ने आव-भाव, ने सेक-सींगार, ने बड़ायन लायक छे।”
REV 5:13 अळतेन मे सरग मां, ने धरती पर, ने धरतीन नेचु, ने दरीयान आखी बणावली चीज, ने आखो काय जो तेरेमां छे, असो कवता सामळी, “जु राजगादी पर बठलु छे, तेरी, ने गाडरान बड़ाय, ने आव-भाव, ने सेक-सींगार, ने राज्‌य, जलम रहे।”
REV 5:14 चारु जनवार्‌या आमीन कह्‌या ने वीस ने चार डाहा-बुड़ा भगवान अगळ ने गाडरान पीला अगळ उबडु पड़ीन तींद्‌री भक्‌ती कर्‌या।
REV 6:1 तत्‌यार मे देख्‌यु की गाडरान पीलो चो तीनु सात सील मां सी एक काजे खुल्‌यु, ने तीनु चारु जनवार्‌या मां सी एक गाजणेन तसी अवाज सामळ्‌यु, “आव।”
REV 6:2 मे नींगा नाख्‌यु, ने एक धवळु घुल्‌लु छे, ने तेरे उपर एक जणु धंदली ली र्‌यु। ने तीनाक एक मुड़ देदलो छे, ने हयु जीती रवलु ने अळी बी जीत हात करने करीन नीकळी पड़्‌यु।
REV 6:3 जत्‌यार हयु दुसरी सील खुल्‌यु, ती मे दीसरा जनवार्‌या काजे असो कवतेला सामळ्‌यु, “आव।”
REV 6:4 तत्‌यार अळी एक घुल्‌लु नीकळ्‌यु, जु रातला रंगेन हतलु; तेरो बठी रवलु तीना काजे असो हक देदलो की धरती पर सी सांतीक हाकली ले, काहाकी माणसे एक दीसरान हत्‌या करे; ने तीनाक एक मट्‌ली तलवार देदु।
REV 6:5 जत्‌यार हयु तीसरी सील तुड़्‌यु, ती मे तीसरा जनवार्‌या काजे असु कवता सामळ्‌यु, “आव।” ने मे नींगा कर्‌यु, ने एक काळ्‌ळु घुल्‌लु छे; ने घुल्‌ला पर बठी रहलान हात मां एक ताकड़ी छे।
REV 6:6 ने तीनु चारु जनवार्‌यान ईचमां सी एक असु कहतेला सामळ्‌यु, “एक दाहड़ान-दाहाड़कीन एकुत कीलु गहुं, ने एक दाहड़ान-दाहाड़कीन तीनुत कीलु जळ-गहुं जड़से, बाकुन तेल ने अंगुरेन रस बीगाड़ु घुण।”
REV 6:7 ने जत्‌यार हयु चोवथु सील तुड़्‌यु, ती मे चोवथां जनवार्‌यान बेसके जुरे आव कवतेलान सामळ्‌यु, “आव।”
REV 6:8 मे नींगा कर्‌यु, ने एक पेळ्‌ळु घुल्‌लु छे; ने तीना घुल्‌ला पर बठी रहलान नाव मरनु सरनु छे; ने पाताळ तेरे पछळ-पछळ छे ने तीनाक धरतीन चार मां सी एक हीस्‌सा पर हक देदलो छे, की तलवार, ने काळ, ने मांदवाड़, ने धरतीन जंगली जनवार्‌या माणसेक मार नाख्‌या।
REV 6:9 जत्‌यार हयु पांचवी सील तुड़्‌यु, ती चुखला चड़ावान जागान नेचु तेरा बेस आत्‌मा काजे देख्‌यु, जे भगवानेन बुले दीसराक सामळावणेन वजे सी, ने ईसुन गवा पुरावा देय करीन तीनुक मार नाखला।
REV 6:10 ने चे जुर सी आयड़ीन कह्‌यु, “ए मालीक, ए चुखला, ने छाचला; तु कां लग नीयाव नी करसी? ने धरतीन रहणे वाळा सी हामरा लुहीन पलटु कां लग नी लेसी?”
REV 6:11 ने तींद्‌रे मायन एक-एक जणा काजे धवेळो पुथल्‌यो देदलो छे, ने तीनुक कह्‌यो, की अळी ईतरीक वार लग आराम करु, जत्‌यार लग की तुंद्‌रु सगु सेवक ने भाय जे तुंद्‌रेन तसा मारायणे वाळा छे, तींद्‌री बी गिन्‌ती पुरी नी हय जाय।
REV 6:12 जत्‌यार हयु छटवी सील तुड़्‌यु, ती मे देख्‌यु धरती बेसके जुर सी हाकलाय; ने दाहड़ु काळ्‌ळा चादरान तसु काळ्‌ळु, ने आखु चांद लुहीन तसु हय गुयु।
REV 6:13 ने सरगेन तारा धरती पर असा पड़्‌या जसी आंधी सी हालीन अंजीर नावेन झाड़का मां सी काचला फळ झड़े।
REV 6:14 सरग असो सरकी गुयो, जसों पान्‌टो एलेट्‌णे सी सरकी जाय; ने हरेक बयड़ा, ने काळ पाणी, आपणा-आपणा जागा सी टळ गुया।
REV 6:15 धरतीन राजा, ने मुख्‌या, ने सीपायड़ा डाहला, ने मातला, ने ताकतवाळा माणसे, ने हरेक सेवक, ने हरेक छुटला, बयड़ान दरे ने चापर्‌या मां जाय्‌न डुकाया;
REV 6:16 ने बयड़ा, ने चापर्‌या सी कहणे लाग्‌या, “हामरे पर पड़ जावु; ने हामुक तेरा मुंहडा सी जु राजगादी पर बठ्‌लु छे ने गाडरान पीलान रीस सी हामु काजे बचाड़ लेवु;
REV 6:17 काहाकी तींद्‌रा रीसेन दुखेन दाहड़ा आय गुयलो छे, हय कुण उबु हय सक्‌से?”
REV 7:1 तेरे पछेन मे धरतीन चारु खुणा पर चार सरग वाळा काहवाळ्‌याक उभला देख्‌यु, चे धरतीन चारु वाहळा काजे धरीन राख र्‌या काहाकी धरती, नीते दरीया, नीते काहनाक झाड़का पर, वाहळ नी चाले।
REV 7:2 तत्‌यार मे एक अळी सरग वाळा काहवाळ्‌याक जीवला भगवानेन सील लीन उगवणु सी उपर आवते देख्‌यु; हयु तीनु चारु सरग वाळा काहवाळ्‌या सी तीनुक धरती ने दरीयान नुकसाण करनेन हक देदलु हतलु, जुर सी आयड़ीन कह्‌यु,
REV 7:3 “जत्‌यार लग हामु आपणा भगवानेन सेवक्‌यान नींडाळे पर सील नी लागाड़ देय, तत्‌यार लग धरती ने दरीया ने झाड़कान नुकसाण घुण करे।”
REV 7:4 ने जीनु पर सील हतली, मे तींद्‌री गिन्‌ती सामळ्‌यु, की ईस्‌रायेलेन पुर्‌यान आखा कुळ मां सी एक लाख चाळीस ने चार हजार पर मुहर लागली हतली,
REV 7:5 यहुदान कुळ मां सी बारे हजार पर सील लागली हतली, रुबेनेन कुळ मां सी बारे हजार पर, गादेन कुळ मां सी बारे हजार पर,
REV 7:6 आसेरेन कुळ मां सी बारे हजार पर, नप्‌तालीन कुळ मां सी बारे हजार पर; मनस्‌सेन कुळ मां सी बारे हजार पर,
REV 7:7 सीमोनेन कुळ मां सी बारे हजार पर, लेवीन कुळ मां सी बारे हजार पर, ईस्‌साकारेन कुळ मां सी बारे हजार पर,
REV 7:8 जबुलुनेन कुळ मां सी बारे हजार पर, युसुफेन कुळ मां सी बारे हजार पर, बीन्‌यामीनेन कुळ मां सी बारे हजार पर सील देदली हतली।
REV 7:9 तेरे पछेन मे नींगा कर्‌यु, ने हरेक जाती, ने कुळ, ने माणसे ने बुली मां सी एक असी मटी गड़दी, जीनीक कुय गीण नी सकतेलो धवळा पुथल्‌या पेहेरलु ने आपसा हात मां खजुरेन डाळ्‌या लीन राजगादी अगळ ने गाडरान पीला अगळ उबी छे;
REV 7:10 ने जुर सी आयड़ीन कहें, “छुटकारा वाटे आपणा भगवानेन, जु राजगादी पर बठलु छे, ने गाडरान जय-जय हवे।”
REV 7:11 ने आखा सरग वाळा काहवाळ्‌या, तीनी राजगादी ने डाहा-बुड़ा ने चारु जनवार्‌यान चारे मेर उबला छे, तत्‌यार चे राजगादी अगळ मुंहडान भुरसे पड़्‌या, ने भगवान काजे आंधीन कह्‌या,
REV 7:12 “आमीन, हामरा भगवानेन बड़ाय, सेक-सींगार, अकल, वारु कह्‌णु, ने आव-भाव, ने ताकत ने ताकत जलम बणीन रहे।”
REV 7:13 ईनु आड़ा-बुड़ा मां सी एक मारे सी कह्‌यु, “चे धवळा पुथल्‌या पेहेरलु कुण छे, ने कां सी आवलु छे?”
REV 7:14 मे तेरे सी कह्‌यु, ए मालीक, तुत जाणे, जे तीना मट्‌ली गरा सी नीकळीन आवला छे, जे आपणा-आपणा पुथल्‌या गाडरान पीलान लुही मां धुवीन धवळा करला छे।
REV 7:15 तेरेमां चे भगवानेन राजगादी अगळ छे, ने तीना मंदीर मां रात दाहड़ु तेरी सेवा करे; ने जु राजगादी पर बठलु छे, हयु तींद्‌रे उपर आपसान तम्‌बु ताणसे।
REV 7:16 “चे पछा भुकला ने तीसला नी हवसे; ने नी तीनु पर तप, नी काय तांत्‌लो पड़से।
REV 7:17 काहाकी गाडरान पीलो जु राजगादीन ईचमां छे, तींद्‌री राखवाळी करसे; ने तीनुक जीवन सारका उंहता पाणी धड़े लीजाया करसे, ने भगवान तींद्‌रा डुळाम सी आखा आसा नुछ देसे।”
REV 8:1 जत्‌यार हयु सातवी सील खुली, ती सरग मां आधु घंटु लग हुगात रय गुयला।
REV 8:2 ने मे तीनु सातु सरग वाळा काहवाळ्‌या काजे जु भगवान अगळ हुबा रवे, देख्‌यु, ने तीनुक सात फेप्‌या आपला हतला।
REV 8:3 तत्‌यार एक अळी सरग वाळु काहवाळ्‌यु सनान धुपदेण्‌यो वाटको लीन आयु, ने चड़ावान जागा धड़े हुबु रय र्‌यु; ने तीनाक बेसका धुप देदलो छे काहाकी आखा चुखला माणसेन दुवा भेळ सनान तीना चड़ावान जागा पर, जु राजगादीन अगळ छे चड़ावे।
REV 8:4 ने तीना धुपेन कुळ्‌ळु चुखला माणसेन दुवा साते सरग वाळा काहवाळ्‌यान हात सी भगवान भीणी पुगी गुयो।
REV 8:5 तत्‌यार सरग वाळा काहवाळ्‌या धुपदेण्‌यो वाटको वेदीन्‌चां लीन आयु ,ने तीना वेदीन्‌चां ली जाय्‌न तीना आटका मां आकठो भर्‌यु, ने धरती पर नाख देदु, ने ईजळी ककड़ने बाजी गुय, ने गाजुण ने धरती हालने बाजी गुय।
REV 8:6 ने चे सातु सरग वाळा काहवाळ्‌या तींद्‌रे धड़े सात फेप्‌या हतला, वाजाड़ने करीन तीयार हया।
REV 8:7 ने जत्‌यार पेहलु सरग वाळु काहवाळ्‌यु फेप्‌यो वाजाड़्‌यु, ने गारे लुही ने आकठो मां भेसकायन धरती पर नाख देदु; ने तीन मां सी एक हीस्‌सान धरती धपी गुई, ने तीन मां सी एक हीस्‌सान झाड़का धपी गुया, ने आखु नीळ्‌ळु चारु बी धपी गुयु।
REV 8:8 ने जत्‌यार दीसरु सरग वाळु काहवाळ्‌यु फेप्‌यो वजाड़्‌यु, ती असो लाग्‌यो की मटला बयड़ान तसो एक धपतेला एक मटला बयड़ाक दरीया मां नाख्‌यु; ने दरीया बी तीन हीस्‌सा मां सी एक हीस्‌सु लुही बण गुयु।
REV 8:9 ने दरीयान तीन मां सी एक हीस्‌सान घड़्‌ली चीज, जी जीवली हतली मर गुई, ने तीन मां एक हीस्‌सान पाणीम चालन्‌या ढंड्‌यो नास हय गुया।
REV 8:10 तीसरु सरग वाळु काहवाळ्‌यु फेप्‌यो फुक्‌यु, ने एक मट्‌लु तारु जु मसाल तारान तसों धपतेलो, सरग सी टुट्‌यो, ने नदीन तीन मां सी एक हीस्‌सा पर, ने उंहता पाणी झीरे पर आय पड़्‌यु।
REV 8:11 तीना तारान नाव धतुरो छे, ने तीन मां सी एक हीस्‌सा पाणी धतुरान तसों कड़वोझण हय गुयो, ने बेसका माणसे तीना कड़वा पाणीक पीन मर गुया।
REV 8:12 चोवथु सरग वाळु काहवाळ्‌यु फेप्‌यो फुक्‌यु, ने दाहड़ान, चांदेन ने तारान, तीन हीस्‌सा मायन एकेक हीस्‌सा पर गरा आवी, अतरो बी की दीसुन तीन हीस्‌सा मायन एक हीस्‌सा पर बी आंदारो हय गुयो ने राती बी तीन घड़ी मायन एक घड़ी पर चांद ने तारा नी भबळ्‌या।
REV 8:13 जत्‌यार मे अळी देख्‌यु, ती सरगेन ईचमां एक घुवड़ा काजे उड़तेला ने उचा अवाज सी असु कवता सामळ्‌यु, “ने तीनु सरग वाळा काहवाळ्‌यान फेप्‌यान अवाजेन वजे तींद्‌रो फुकणु हाल बाकी छे, धरती पर रहणे वाळा पर हाय, हाय, हाय!”
REV 9:1 जत्‌यार पांचवु सरग वाळु काहवाळ्‌यु फेप्‌यो फुक्‌यु, ती मे सरग सी धरती पर एक तारु नेचु पड़तेलु देख्‌यु, ने तीनाक उंडला कुंडेन कुची देदली हतली।
REV 9:2 हयु उंडला कुंड काजे खुल्‌यु, ने कुंड मां सी मट्‌ली भट्‌टीन तसों कुळु उठ्‌यु, ने कुंडेन कुळा सी दाहड़ु ने वाहळी पर आंदारो छावाय गुयो।
REV 9:3 तीना कुळा मां सी धरती पर टिड्‌डा नीकळ्‌या, ने तीनुक धरतीन ईछान तसा ताकत आपली छे।
REV 9:4 तीनुक कह्‌लो छे की नी धरतीन चाराक, नी काहनीक मेरेक, ने नी काहनाक झाड़काक नुकसाण करे, बाकुन तीनु माणसेन अतरात नुकसाण करजु जींद्‌रे नींडाळा पर भगवानेन सील नी हय।
REV 9:5 ने तीनु माणसेक मार नाखणेन ती नी, बाकुन पांच महना लग माणसेक दुख देणेन हक आपलो हतलो; ने तींद्‌रु दुख असु हतलु, जसु ईछु चावणे सी माणसेन दुखे।
REV 9:6 तीनु दाहड़ा मां माणसे मुत हेरसे, ने मुत नी जड़से, ने मरने चाहसे, ने मुत तींद्‌रे सी ढास्‌से।
REV 9:7 चे टिड्‌डा घुल्‌लान तसा लड़ाय करने करीन तीयार हया, ने तींद्‌रा मुणका पर मानु सनान मुड़ हतली; ने तींद्‌रा मुंहडा माणसेन तसा हतला।
REV 9:8 तींद्‌रा कान्‌या बायरीन कान्‌यान तसा, ने दात नाहरेन दात जसा हतला।
REV 9:9 चे लुहड़ान तसों लुहड़ान झीलम पेहरला हतला, ने तींद्‌रा पाखड़ान अवाज असो हतलो जसा घुड़ागाड्‌या ने घुल्‌ला दवड़े।
REV 9:10 तींद्‌री छेम्‌टी ईछान तसी हतली, ने तेरेमां आवळ हतली, ने तीनुक पांच महना लग माणसे काजे नुकसाण करनेन जी ताकत जड़ली हतली, ची तींद्‌री छेम्‌टी मां हतली।
REV 9:11 उंडला कुंडेन सरग वाळु काहवाळ्‌यु तीनु पर राजु हतलु, तेरो नाव ईब्‌रानी मां अबद्‌योन, ने युनानी मां अपुल्‌लयोन छे।
REV 9:12 पेहली गरा वीत गुयली छे, हय हेरे बात दुय गरा अळी आवणे वाळी छे।
REV 9:13 जत्‌यार छटवु सरग वाळु काहवाळ्‌यु फेप्‌यो फुक्‌यु ती जु सनान चड़ावान जागु भगवान अगळ छे तींद्‌रा सींगड़ा मां सी मे असु अवाज सामळ्‌यु,
REV 9:14 मानु कुय छटवु सरग वाळा काहवाळ्‌या सी, तेरे धड़े फेप्‌यो हतलो कह्‌णे बाजी र्‌यु, “तीनु चारु सरग वाळा काहवाळ्‌या काजे मट्‌ली नदी फरात धड़े बांदायला छे, खुल दे।”
REV 9:15 ने चे चारु सरग वाळा काहवाळ्‌याक छुड़ी देदा जे तीनी घड़ी, ने दाहड़ु, ने महना, ने साल भर वाटे माणसेन तीन हीस्‌सा मायन एक हीस्‌सा काजे मार नाखणे करीन तीयार करला हतला।
REV 9:16 तींद्‌री सीपायड़ान सवारीन गिन्‌ती वीस कुरुड़ हतली; मे तींद्‌री गिन्‌ती सामळ्‌यु।
REV 9:17 ने मेसेक चे घुल्‌ला ने घुल्‌ला पर बठी रवला देखाव पड़्‌या, तींद्‌री छाती पर लुहड़ान झीलम्‌या आकठान तसा रातला, नीलमणीन तसा नीळ्‌ळा, ने गन्‌धकेने तसा पेळ्‌ळा हतला, तीनु घुल्‌लान मुणका नाहरेन तसा हतला: ने तींद्‌रा मुंहडा सी आकठो, कुळु, ने गन्‌धक नीकळतेलो।
REV 9:18 ईनु तीनु रुग्‌टान; मतलब आकठो, कुळु, गन्‌धक सी, जो तींद्‌रा मुंहडा सी नीकळतेलो, माणसेन तीन हीस्‌सा मायन एक हीस्‌सु माराय गुया।
REV 9:19 काहाकी तीनु घुल्‌लान ताकत तींद्‌रा मुंहडा, ने तींद्‌रा छेम्‌टा मां छे; काहाकी तींद्‌रा छेम्‌टा घड़सान तसा हतला, ने तीनु छेम्‌टान मुणका बी हतला, ने तींद्‌रे सीत चे नुकसाण करे।
REV 9:20 रवला माणसे जे तीनु हाड़ाम सी नी मर्‌या, आपसा हातेन कामे सी मन नी फेरव्‌या, काहाकी भुतड़ान आत्‌मान, ने सनो, चांदी, पीतळ, दगड़ु, ने धुळान मुरतीन पुजा नी करे, जे नी देखे, नी सामळे, ने नी चाल सके।
REV 9:21 ने जे खुन, ने जादु टुणा, ने छीनाळो, ने चुरी, चे करला हतला, तींद्‌रे सी मन नी फेरव्‌या।
REV 10:1 तत्‌यार मे एक अळी ताकत भर्‌यु सरग वाळा काहवाळ्‌याक वादळा सी छावायलु सरग सी उतेरतेलो देख्‌यु; ने तेरा मुणका पर धंदलीन तसों बम हतलु, ने तेरो मुंहडो दाहड़ान तसों ने तेरा पांय आकठान खाम्‌बान तसा हतला;
REV 10:2 ने तेरा हात मां एक नानली सी खुल्‌ली किताप हतली। हयु आपसु जेवड़्‌यु पांय दरीया पर, ने डाखर्‌यु धरती पर मेक्‌यु;
REV 10:3 ने असला मटा अवाज मां आयड़्‌यु, जसु नाहर डकारे; ने जत्‌यार हयु आयड़्‌यु ती डकारनेन सात अवाज सामळाय।
REV 10:4 जत्‌यार सातु गाजणेन अवाज सामळी लेदला, ती मे लिखणेत वाळु हतलु, ने मेसे सरग सी असी अवाज सामळाय, “जी वात गाजणेन तीनु सात अवाज सी सामळ्‌यु, तीनुक ढाकी राख, ने मां लिखे।”
REV 10:5 तीना सरग वाळा काहवाळ्‌या काजे मे दरीया ने धरती पर उबु रवलु देख्‌यु; हयु आपसु जेवड़्‌यु हात सरग भीणी हाकल्‌यु
REV 10:6 ने तेरी सगुन खाय्‌न जु जलम जीवलु छे, ने जु सरग काजे ने जो काय तेरेमां छे, ने धरती काजे ने जो काय तेरे पर छे, ने दरीया काजे ने जो काय तेरेमां छे, घड़ायलो छे तेरीत सगुन खाय्‌न कह्‌यु की “हय अळी वार नी लागसे।”
REV 10:7 बाकुन सातवों सरग वाळा काहवाळ्‌या काजे अवाज देणेन दाहड़ा मां, जत्‌यार हयु फेप्‌यो फुकणे पर रवसे, ती भगवानेन चो सातायलो पुरो हय जासे, तेरो खुस-खबर हयु आपसा सेवक अघली वात बताड़ने वाळाक देदलु।
REV 10:8 तत्‌यार अवाज करने वाळाक मे सरग सी बुलतेला सामळ्‌यु, हयु अळी मारे साते वात करने लाग्‌यु, “जां, जु सरग वाळु काहवाळ्‌यु दरीया ने धरती पर उबलु छे, तेरा हाते मायन खुल्‌ली किताप ली ले।”
REV 10:9 ने मे सरग वाळा काहवाळ्‌या धड़े जाय्‌न कह्‌यु, “जी नानली किताप मेसे आप।” ने चु मेसेक कह्‌यु, “ले, ईनीक खाय ले। जी तारो पेट कड़वो ते करसे, बाकुन तारा मुंहडा मां मुहाळेन तसों गुळो लागसे।”
REV 10:10 तेरेमां मे ची नानली किताप तीना सरग वाळा काहवाळ्‌यान हाते सी लीन खाय गुयु। ची मारे मुंहडा मां मुहाळेन तसों गुळो ते लाग्‌यो, बाकुन जत्‌यार मे तीनाक खाय गुयु, ती मारो पेट कड़वो हय गुयो।
REV 10:11 तत्‌यार मारे सी असो कह्‌यो, “तुसे बेसका माणसे, जाती, बुली, ने राजान बारामां अळी अगली हवणे वाळी वात बताड़नु पड़से।”
REV 11:1 तत्‌यार मेसेक मापणे करीन एक सुटी देदु, ने काहनुक कह्‌यु, “उठ, भगवानेन मंदीर ने चड़ावान जागु, ने तींद्‌रेम भक्‌ती करने वाळाक नाप ले।
REV 11:2 बाकुन मंदीरेन बाहरलो आंगणो छुड़ दे; तीनाक मां नापे काहाकी चे दीसरी जाती काजे देदलो छे, ने चे चुखला सहर काजे बय्‌यालीस महना लग रंदळसे।
REV 11:3 ने मे मारा दुय गवा काजे जु हक दीस की गंटाट्‌या पांगरला एक हजार दुय सोव सांठ दाहड़ा लग भगवानेन खबर फेलाया करे।”
REV 11:4 जे चेत जेतुनेन दुय झाड़का ने दुय दिवा छे, जे धरतीन मालीक अगळ उबा रहे।
REV 11:5 ने कदी काहनुक तीनुक नुकसाण करने चाहसे, ती तींद्‌रे मुंहडा सी आकठो नीकळीन तींद्‌रा वेरी काजे नास करे, ने कदी काहनुक तीनुक नुकसाण करनु चाहसे, ती छाचली ईनीत रीती सी माराय जासे।
REV 11:6 तीनुक हक छे, की सरग काजे बंद करे, काहाकी तीनुक भगवानेन खबर फेलावणेन दाहड़ाम पाणी नी पड़े, ने तीनुक आखा पाणी पर बी हक छे, की तीना पाणीक लुही बणावे, ने जत्‌यार चाहे तत्‌यार धरती पर आखी भातीन गरा लावे।
REV 11:7 जत्‌यार चे आपसी गवाय दी देसे, ती चु जनवार्‌या जु उंडला कुंड मां सी नीकळसे, तींद्‌रे सी लड़ीन तीनुक जीतसे ने तीनुक मार नाखसे।
REV 11:8 ने तींद्‌रा धड़ तीना मटला सहरेन गळ्‌या मां पड़ला रवसे, जु आत्‌मान रीती सी सदोम ने मीसर कहवाये, जां तींद्‌रु मालीक बी कुरुस पर चड़ावलु हतलु।
REV 11:9 ने आखा माणसे, कुळी, बुली, ने जाती मां सी माणसे तींद्‌रा धड़ काजे साड़ी तीन दाहड़ा लग देखता रवसे, ने तींद्‌रा धड़ काजे गाड़नी नी देसे।
REV 11:10 ने धरती मां रहणे वाळा तींद्‌रे मरने सी खुस हवसे, ने एक दीसरा काजे नेवता मकलसे, काहाकी जे दुय अघली वात बताड़ने वाळा धरती मां रहणे वाळा काजे दमला छे।
REV 11:11 बाकुन साड़ी तीन दाहड़ान पछेन भगवान सी आवलु जीवनेन दम तेरेमां आय गुयु; ने चे आपसा पायेन भुरसे उबा हय गुया, ने तीनु देखणेवाळा पर मटलो बीहाणो भराय गुयो।
REV 11:12 ने तीनुक सरग सी एक मट्‌ली अवाज सामळाय, “जां उपर आवु!” असो सामळतात चे वादळा पर सवार हय्‌न आपसान वेरी काजे देखता-देखता सरग पर चहड़ी गुया।
REV 11:13 ने तीनीत घड़ी धरती बेसकी हालने लागी, ने सहरेन दस हीस्‌सा मायन एक हीस्‌सु उदरी गुयु; ने धरती हालने सी सात हजार माणसे मर गुया ने रवला सीयारी ली लेदा, ने सरगेन भगवानेन सेक-सींगार कर्‌या।
REV 11:14 सामळु दीसरी गरा वीत गुय; तत्‌यार, तीसरी गरा मामारुत आवणेवाळी छे।
REV 11:15 जत्‌यार सातवु सरग वाळु काहवाळ्‌यु फेप्‌यो फुक्‌यु, ती सरग मां हेरे बारामां जुर-जुर आयड़ीन अवाज मां कहणे लाग्‌या, “दुनीयान राज हामरा मालीकेन ने तेरा मसीन हय गुयो ने हयु जलम राज करसे।”
REV 11:16 ने वीस ने चार मुख्‌या डाहला जे भगवान अगळ आपसा-आपसा राजगादी पर बठला हतला, मुंहडान भुरसे पड़ीन भगवान काजे आंधीन,
REV 11:17 असा कहणे लाग्‌या, “ए आखाम सी ताकतवाळा मालीक भगवान, जु छे ने जु हतलु, हामु बेसकु वारु छे करीन कवजे की, तु आपसान मट्‌ली ताकत काजे काम मां लावीन राज करलु छे।
REV 11:18 नी-यहुदी रीस कर्‌या, ने तेरी रीस आय पड़्‌यु ने पली टेम आय गुयली छे, की मरला सरलान नीयाव हवे, ने तारु सेवक भगवानेन अघली वात बताड़ने वाळा, ने चुखला माणसे काजे, ने तीनु नानला मटान जे तारा नाव सी बीहे, बदलु देसे। ने धरतीन बीगाड़ने वाळा नास हवसे!”
REV 11:19 ने भगवानेन जु मंदीर सरग मां छे, उघाड़ी देदा, ने मंदीर मां भगवानेन बुलेन पेटी देखाय, वीजळ्‌या, अवाज, गाजण ने धरती हाली, ने बेसकु पाणी पड़्‌यु।
REV 12:1 तत्‌यार सरग पर एक मट्‌ली सहलाणी देखाय देदी, मतलब एक बायर ची दाहड़ु पेहरली हतली, ने चांद तेरे पांय तळे हतलु, ने तेरे मुणका पर बारे तारान मुड़ हतलु;
REV 12:2 ने ची भार पाये हय, ने आयड़तेली; काहाकी तेरे फवरी हवणेन दुख लागलु हतलु; ने ची फवरी हवणेन दुख मां हतली।
REV 12:3 एक अळी सहलाणी सरग मां देखाय देदी, एक मट्‌लु रातलु अजगर हतलु, तेरा सात मुणका ने दस सींगड़ा हतला, ने तेरा मुणका पर सात राज मुड़ हतलु।
REV 12:4 ने तेरी छेम्‌टी सरग सी तारान तीन हीस्‌सा काजे खेचीन धरती पर नाख देदु, ने चु अजगर तीनी बायरीन अगळ पुर्‌यो हतलो, चां हुबु हतलु, काहाकी जत्‌यार तेरो पुर्‌यो हवे ती तेरा पुर्‌या काजे घीटी जाय।
REV 12:5 ने ची पुर्‌याक पयदा करी जो लुहड़ान राजेन हक वाटे हयो, आखा जाती पर राज करनेत पर हतलु, ने तेरो पुर्‌यो भगवान धड़े, ने तेरा राजगादी धड़े हाकलीन मकली देदो।
REV 12:6 ने ची बायर पला जंगल मां ढासी गुई, जांहा भगवान भीणी सी तेरे वाटे एक जागु तीयार करलु हतलु की चां हयु एक हजार दुय सोव सांठ दाहड़ा लग पाळे।
REV 12:7 तत्‌यार सरग पर लड़ाय हय, मीकायेल ने तेरे सरग वाळा काहवाळ्‌या अजगर सी लड़ाय करने नीकळ्‌या; ने अजगर ने तेरा काहवाळ्‌या तेरे सी लड़ाया,
REV 12:8 बाकुन जीतायो नी, ने सरग मां तींद्‌रे वाटे अळी जागु नी रयु।
REV 12:9 ने चु मट्‌लु अजगर मतलब हयुत पुराणु घड़सु, जु भुतड़ु कहवाये, ने आखा दुनीया काजे भटकाड़ने वालु छे, धरती पर नाख देदा; ने तेरा सरग वाळा काहवाळ्‌या तेरे पुठ्‌येत उराटी देदा।
REV 12:10 तत्‌यार मे सरग सी असी अवाज आवतेली सामळ्‌यु, हय हामरा भगवानेन छुटकारु, ताकत, राज, ने तेरा मसीन हक उजेंतु हवलु छे; काहाकी हामरा भायस्‌ये पर गुनु लागाड़न्‌यु, जु रात दाहड़ु आपणा भगवान अगळ तीनु पर गुनु लागाड़्‌या करतेलु, उराटी देदा।
REV 12:11 ने चे गाडरान पीलान लुहीन वजे, ने तींद्‌री गवायन बुलेन वजे, तीना सी जीत्‌या, काहाकी चे आपसा जीव सी परमवाळु नी समज्‌या, जां लग की मरण बी सेण कर लेदा।
REV 12:12 “ईना वजे, ए आखा सरग, ने तींद्‌रेम रहणे वाळा खुस हवु; ए धरती, ने दरीया, तुंद्‌रे पर हाय! काहाकी भुतड़ु बेसकी रीसेन साते तुंद्‌रे धड़े उतरी आयु; काहाकी जाणे की तेरु थुड़ीक टेम अळी रवली छे।”
REV 12:13 जत्‌यार अजगर देख्‌यु, की मेसेक धरती पर उराटी देदा, ती तीनी बायर काजे जी पुर्‌याक पयदा करली, तीनीक दम्‌यु।
REV 12:14 बाकुन तीनी बायर काजे घुवड़ान दुय पाखड़ा देदला छे, की घड़सा अगळ सी उडीन जंगल मां पला जागा पर जाती रहे, जांहा ची एक टेम, ने बेसका टेमे, ने आधी टेम लग पाळाय जाय।
REV 12:15 ने घड़सु तीनी बायरी पछळ आपसा मुंहडा सी नदी तसों पाणी उहुवाड़्‌यु की तीनीक ईनी नदी सी उहाड़ी दम।
REV 12:16 बाकुन धरती तीनी बायरीन मदत करी, ने आपसीन मुंहडो फाड़ीन तीनी नदी काजे जु अजगर आपसे मुंहडे सी उहाड़लु, पी गुय।
REV 12:17 तत्‌यार अजगर काजे बायरी पर रीस आय, ने तेरी बचली अवल्‌यात सी जे भगवानेन हुकुम काजे माने, ने ईसुन गवाय देणे करीन काठा छे, लड़ाय करने करीन गुयु।
REV 12:18 ने चु दरीयान रेतळा पर जाय्‌न हुबु हय गुयु।
REV 13:1 मे एक जनवार्‌या काजे दरीया मां सी नीकळतेलो देख्‌यु, तेरा दस सींगड़ा ने सात मुणका हतला। तेरा सींगड़ा पर दस राज मुड़, ने तेरे मुणका पर भगवानेन नाव-बद्‌दीन नाव लिखला हतला।
REV 13:2 तीना जनवार्‌या काजे मे देख्‌यु, चो चीतान तसों हतलो; ने तेरा पांय रीछड़ान तसा, ने मुंहडो नाहरेन तसों हतलो। ने चु अजगर आपसी ताकत, ने आपसी राजगादी, ने मट्‌लु हक, तीनाक दी देदु।
REV 13:3 मे तेरा मुणका मां सी एक पर असु घाव लागलु देख्‌यु, मानु चु मरनेत वाळु छे; तत्‌यार तेरु जीव लेणे वाळु घाव वारु हय गुयु, ने आखी धरतीन माणसे तीना जनवार्‌यान पछळ-पछळ घाबराय्‌तात चाल्‌या।
REV 13:4 चे अजगरेन पुजा कर्‌या, काहाकी हयु जनवार्‌या काजे आपसु हक दी देदलु, ने असा करीन जनवार्‌यान पुजा कर्‌या की, “ईना जनवार्‌यान तसु कुण छे? कुण हेरे सी लड़ सके?”
REV 13:5 मटला बुल बुलने ने वाक नीकाळे करीन तीनाक एक मुंहडो आपलो छे, ने तीनाक चाळीस ने दुय महना लग काम करनेन हक आपलु छे।
REV 13:6 ने चु भगवानेन बदनाम करने करीन मुंहडो खुल्‌यु, की तेरो नाव ने तेरु रहणेन जागु तम्‌बु मतलब सरगेन रहणे वाळान नाव-बद्‌दी करे।
REV 13:7 तीनाक जु हक देदु, की चुखला माणसे सी लड़े, ने तींद्‌रे सी जीती जाय, ने तीनाक एक कुळ, माणसे, बुली, ने जाती पर हक देदलु छे।
REV 13:8 धरतीन चे आखा रहणे वाळा तींद्‌रा नाव तीना गाडरान पीलान जीवनेन किताप मां लिखायो नी, जो कळी घड़ायणेन टेमे सी मारायलो छे, तीना जनवार्‌यान पुजा करसुन।
REV 13:9 तेरा कान्‌टा छे चे सामळे।
REV 13:10 तीनाक जेल मां पड़नु छे, चु जेल मां पड़से, जु तलवार सी मारसे, छाचलीन छे की हयु तलवार सी मारायसे। चुखला माणसेन गम ने भुरसु एरे मां छे।
REV 13:11 तत्‌यार मे एक अळी जनवार्‌या काजे धरती मां सी नीकळतेलो देख्‌यु, तेरा गाडरान पीलान तसा दुय सींगड़ा हतला; ने हयु अजगरेन तसु बुलतेलु।
REV 13:12 जु तीना पेहला जनवार्‌यान आखा हक तेरे अगळ काम मां लावतेलु, ने धरती ने तेरा रहणे वाळा सी तीना पेहला जनवार्‌यान, तेरु जीव लेणे वाळु घाव वारु हय गुयलु, पुजा कराड़तेलु।
REV 13:13 हयु मटा-मटा सहलाणी देखाड़तेलु, जां लग की माणसे अगळ सरग सी धरती पर आकठो पाड़तेलु।
REV 13:14 तीनु सहलाणीन वजे सी जीनुक तीनु जनवार्‌यान अगळ देखाड़नेन हक तीनाक देदलु हतलु; हयु धरतीन रहणे वाळाक ईनी भाते भटकाड़तेलु, की धरतीन रहणे वाळा सी कवतेलु की तीना जनवार्‌याक तलवार लागली, हयु जीवी गुयु, तेरी मुरती बणावु।
REV 13:15 ने तीनाक तीना जनवार्‌यान मुरती मां जीव नाखणेन हक देदलु हतलु, की जनवार्‌यान मुरती बुलने लागे; ने जतरा माणसे तीना जनवार्‌यान मुरतीन पुजा नी करे, तीनुक माराड़ नाखे।
REV 13:16 ने हयु नानला-मटा, पयस्‌या वाळान-गरीब, छुटला-गुलाम आखान जेवड़्‌ये हाते नीते तींद्‌रा नींडाळे पर एक-एक छाप लागाड़ देदु,
REV 13:17 की तीनाक छुड़ीन तीना पर छाप मतलब तीना जनवार्‌यान नाव, नीते तेरा नावेन आकड़ु रवे, ने दीसरा कुय लेणु देणु नी कर सके।
REV 13:18 अक्‌कल हेरेत मां छे; तेरी अक्‌कल छे, हयु ईना जनवार्‌यान आकड़ा जुड़ ले, काहाकी हयु माणसेन आकड़ु छे, ने तेरा आकड़ा छव सोव सांठ ने छव छे।
REV 14:1 तत्‌यार मे देख्‌यु, ने देखु, हयो गाडरान पीलो सीयोन नावेन उंचा बयड़ा पर उबा हय रवला देख्‌यु, ने तेरे साते एक लाख चाळीस ने चार हजार माणसे छे, तींद्‌रा नींडाळे पर तेरो ने तेरे बासेन नाव लिखलो छे।
REV 14:2 ने सरग सी मेसेक एक अवाज सामळाय, चो पाणीन मटा सुसवणेन ने मटा गाजणेन तसों अवाज हतलो, ने जी अवाज मे सामळ्‌यु चो असो हतलो, मानु काहनाक झुणगा वाजाड़नेवाळा झुणगा वाजाड़ र्‌या।
REV 14:3 ने राजगादीन अगळ ने चारु जीव ने डाहला मुख्‌यान अगळ मानु, एक नवलो गीत गावतेला, ने तीनु एक लाख चाळीस ने चार हजार माणसेक छुड़ीन, जे धरती पर सी छुड़ावला हतला, कुय बी तीना गीत काजे सीक नी सकतेलो।
REV 14:4 जे चे छे, जे बायरा साते वीटळ्‌या नी, बाकुन कुवारला छे; जे चेत छे, की जां कांखुर गाडरान पीलो जाय, चे तेरे पछळ हय ले; जे ते भगवान ने गाडरा वाटे पेहलो फळ हवणे करीन माणसे मां सी छुड़ावला छे।
REV 14:5 ने तींद्‌रा मुंहडा सी कदी झुट नी नीकळतेलो, चे नी-गुना वाळा छे।
REV 14:6 तत्‌यार मे एक अळी सरग वाळा काहवाळ्‌या काजे सरगेन ईचमां उडतेलो देख्‌यु तीना धड़े धरती पर रहणे वाळान हरेक जाती, कुळ, बुली, ने माणसेक सामळावणे करीन अमरेन खुस-खबर हतली।
REV 14:7 ने हयु मटा अवाज सी कह्‌यु, “भगवान सी बीहु, ने तेरु सेक-सींगार करु, काहाकी तेरु नीयाव करनेन टेम आय गुई; ने तेरी बड़ाय करु, जु सरग ने धरती ने दरीया ने पाणीन झीरे बणायु।”
REV 14:8 तत्‌यार तेरे पछेन एक अळी दीसरु सरग वाळु काहवाळ्‌यु असु कवतु आयु, “हीट पड़्‌यो, चु मट्‌लु बाबेल हीट पड़्‌यु जी आपसी छीनाळान पागलेन तसी दारु आखी जाती काजे पावाड़्‌या।”
REV 14:9 तेर पछळ एक अळी तीसरु सरग वाळु काहवाळ्‌यु मटी अवाज सी असु कवतु आयु, “जु काहनुक तीना जनवार्‌यान ने जीनी मुरतीन पुजा करे, ने आपसे नींडाळे नीते आपसे हाते पर तेरी छाप लेय,
REV 14:10 ती हयु भगवानेन रीसेन पीयालु चो पाखुर पाणी मीलाड़े, ने तेरा रीसेन दारु मां नाखली छे, पीसे ने चुखला सरग वाळा काहवाळ्‌या अगळ ने गाडरान पीला अगळ आकठो ने धपतेला गन्‌धकेन पीड़ा मां पड़से।
REV 14:11 ने तींद्‌री पीड़ान कुळु जलम उठतु रवसे, ने जु तीना जनवार्‌या ने तेरी मुरतीन पुजा करे, ने जे तेरे नावेन छाप लेय, तीनुक रात दाहड़ु चेन नी पड़से।”
REV 14:12 चुखला माणसेन गम हेरेमां छे, जे भगवानेन हुकुम काजे माने, ने ईसु पर भुरसु राखे।
REV 14:13 अळी मे सरग सी असु अवाज सामळ्‌यु, “लिख: मरने वाळा मालीक मां मरे, चे हय सी वारु छे।” आत्‌मा कहें, “हव, काहाकी चे आपसा मेहनत सी सांतीक हेरसे, ने तींद्‌रा काम तींद्‌रे साते हय लेय।”
REV 14:14 मे नींगा कर्‌यु, ने देखु, एक धवेळो वादळो छे, ने तीना वादळा पर माणसेन पुर्‌यान तसु काहनुक बठलु छे, ने तेरे मुणका पर सनान मुड़ ने हाते मां पांजावलु दातळु छे।
REV 14:15 तत्‌यार एक अळी सरग वाळु काहवाळ्‌यु मंदीर मां सी नीकळीन, तीनाक जु वादळा पर बठलु हतलु, जुर सी आयड़ीन कह्‌यु, “तारु दातळु लीन काटणी चालु कर, काहाकी काटणीन टेम आय गुई, ने धरतीन फसल पाकी गुई।”
REV 14:16 तेरेमां जु वादळा पर बठलु हतलु, चु धरती पर तेरु दातळु फेरव्‌यु, ने धरतीन काटणी चालु कर्‌यु।
REV 14:17 तत्‌यार एक अळी सरग वाळु काहवाळ्‌यु तीना मंदीर मां सी नीकळ्‌यु, जु सरग मां छे, ने तेरे धड़े बी पांजावलु दातळु हतलु।
REV 14:18 तत्‌यार एक अळी सरग वाळु काहवाळ्‌यु, तीनाक आकठा पर हक हतलु, चड़ावान जागा मां सी नीकळ्‌यु, ने तेरे धड़े पांजावलु दातळु हतलु, तीनाक उचा अवाज सी कह्‌यु, “तारु पांजावलु दातळु लागाड़ीन धरतीन अंगुरेन गुछ्‌छा काट ले; काहाकी तेरा अंगुर पाक गुयला छे।”
REV 14:19 तत्‌यार हयु सरग वाळु काहवाळ्‌यु धरती पर तेरु दातळु लागाड़्‌यु, ने धरतीन अंगुरेन फळ काटीन, तेरा भगवानेन रीसेन मटला रसेनकुंडा मां नाख देदु।
REV 14:20 ने गांवेन बाहर तीना रसेनकुंडा मां अंगुर रंदळाय गुया, ने रसेनकुंडा मां सी अतरो लुही नीकळ्‌यो की घुल्‌लान रासे लग पुग्‌यो, ने तीन सोव कीलु मीटर लग उही गुयो।
REV 15:1 तत्‌यार मे सरग सी एक अळी मटलो ने तेरेन तसों सहलाणी देख्‌यु, मतलब सात सरग वाळा काहवाळ्‌या तींद्‌रे धड़े सातु आकरी गरा हतली, काहाकी तीनी गरान हवणेन पछे भगवानेन रीस आकरी छे।
REV 15:2 ने मे आकठाम भेसकायलो कांचेन तसों एक दरीयों देख्‌यु, ने जे माणसे तीना जनवार्‌या सी ने तीनी धुळान मुरती सी, ने तेरे नावेन आकड़ा सी जीतला, तीनुक तीना आरस्‌यान तसों दरीया धड़े भगवानेन झुणगा काजे लीन हुबु रवलु देख्‌यु।
REV 15:3 ने चे भगवानेन सेवक मुसान गीत, ने गाडरान पीलान गीत गाय गाय्‌न कवतेला, “ए आखाम सी ताकत भर्‌या, मालीक भगवान, तारा काम मटला ने तेरेन तसों दीसरो नी हय, ए जाती-जातीन राजा, तारी चाल वारलु ने संय छे।”
REV 15:4 “ए मालीक, कुण तारे सी नी बीहसे? ने तारे नावेन सेक-सींगार नी करसे? काहाकी तु अतरुत चुखलु छे, ने आखी जाती आवीन तारे, अगळ आवीन बड़ाय करसे, काहाकी तारा नीयावेन काम उजेंतो हय गुयलो छे।”
REV 15:5 हेरे पछे मे देख्‌यु, की सरग मां वायदान तम्‌बान मंदीर उघाड़्‌या,
REV 15:6 ने चे सातु सरग वाळा काहवाळ्‌या तींद्‌रे धड़े सातु गरा हतली, चुखा उजल्‌ळा ने चमकण्‌या पुथल्‌या पेहरला ने छाती पर सनान पट्‌टा बांदला मंदीर सी नीकळ्‌या।
REV 15:7 तत्‌यार तीनु चारु जनवार्‌या मां सी एक तीनु सात सरग वाळा काहवाळ्‌यान भगवानेन, जु जलम जीवतु छे, रीस सी भरला सात सनान कटवरा आप्‌यु।
REV 15:8 ने भगवानेन सेक कुळा सी सींगार, ने तेरी ताकुतेन वजे सी मंदीर कुळा सी भराय गुयु, ने जत्‌यार लग तीनु सातु सरग वाळा काहवाळ्‌यान सातु गरा सरी नी, तत्‌यार लग काहनु बी मंदीर मां जाय नी सक्‌यो।
REV 16:1 तत्‌यार मे मंदीर मां काहनाक काजे उचा अवाज सी तीनु सातु सरग वाळा काहवाळ्‌या सी असो कवता सामळ्‌यु, “जावु, भगवानेन रीसेन सातु कटवरा धरती पर अंधलाय देवु।”
REV 16:2 तेरेमां पेहलु सरग वाळु काहवाळ्‌यु जाय्‌न आपसान कटवरु धरती पर अंधलाय देदु। ने तीनु माणसेन जीनु पर जनवार्‌यान छाप हतली, ने जे तेरी मुरतीन पुजा करतेला, एक भातीन बुरो ने दुख देण्‌यु फुड़ु नीकळ्‌यु।
REV 16:3 दीसरु सरग वाळु काहवाळ्‌यु आपसान कटवरु दरीया पर अंधलाय देदु ने चो मरलान लुहीन तसों बण गुयो, ने दरीया मायन हरेक जीव मर गुया।
REV 16:4 तीसरु सरग वाळु काहवाळ्‌यु आपसान कटवरु नदी, ने पाणीन झीर्‌या पर अंधलाय देदु, ने चे लुही बण गुया।
REV 16:5 ने मे पाणीन सरग वाळा काहवाळ्‌या काजे असो कवते सामळ्‌यु, “ए चुखला, जु छे, ने जु हतलु, तु नीयाव करन्‌यु छे ने तु नीयाव कर्‌यु।
REV 16:6 काहाकी चे चुखला माणसे, ने भगवानेन अघी सी आवणे वाळी वात बताड़न्‌यान लुही उहुवाड़ला, ने तु तीनुक लुही पायु, काहाकी चे हेरेत लायक छे।”
REV 16:7 ने मे चड़ावान जागा सी असु अवाज सामळ्‌यु, “हव, ए आखाम सी ताकत भर्‌या मालीक भगवान, तारा नीयाव वारु ने संय छे।”
REV 16:8 चोवथु सरग वाळु काहवाळ्‌यु आपसान कटवरु दाहड़ा पर अंधलाय देदु, ने तीनाक माणसे काजे आकठा सी झुलसणेन हक देदु।
REV 16:9 माणुस मट्‌ली सेक सी झुलसी गुया, ने भगवानेन नावेन तीनाक ईनु गरा पर हक छे, नाव-बद्‌दी कर्‌या ने चे मन नी फेरव्‌या ने नी सेक-सींगार कर्‌या।
REV 16:10 पांचवु सरग वाळु काहवाळ्‌यु आपसान कटवरु तीना जनवार्‌यान राजगादी पर अंधलाय देदु ने तेरा राज पर आंदारलो छावाय गुयो; ने माणसे पीड़ान मारे आपणी-आपणी जीप चावणे लाग्‌या,
REV 16:11 ने आपसान पीड़ा ने फुड़ान वजे सरगेन भगवानेन नाव-बद्‌दी कर्‌यु; बाकुन आपसा-आपसा कामे सी मन नी फेरव्‌या।
REV 16:12 छटवु सरग वाळु काहवाळ्‌यु आपसा कटवरु मट्‌ली नदी फरात पर अंधलाय देदु ने तेरो पाणी सुक गुयो की उगण भीणीन रवण्‌या राजा वाटे वाट तीयार हय जाय।
REV 16:13 ने मे तीना अजगरेन मुंहडा सी, ने तीना जनवार्‌यान मुंहडा सी ने तीना लुच्‌चा भगवानेन अघी सी आवणे वाळी वात बताड़न्‌यान मुंहडा सी तीन भुंडीत आत्‌मान डेडरान रुप मां नीकळतेलो देख्‌यु।
REV 16:14 चे सहलाणी देखाड़नेवाळी भुतड़ान आत्‌मा छे, जी आखी दुनीयान राजा धड़े नीकळीन असी करीन जाय, की तीनुक आखाम सी ताकत भर्‌या भगवानेन तीना मटला दाहड़े लड़ाय वाटे भेळु करे।
REV 16:15 “देख, मे चुट्‌टान तसु आवो; वारु हयु छे, जु जागतु रहे, ने आपसा पुथल्‌या वारु राखे की उघाड़ु नी फीरे, ने माणसे तीनाक उघाड़लु नी देखे।”
REV 16:16 ने चे राजा काजे तीना जागा पर भेळु कर्‌यु, जो ईब्‌रानी बुली मां हर-मगीदोन कहवाये।
REV 16:17 ने सांतवु सरग वाळु काहवाळ्‌यु आपसान कटवरु हवा पर अंधलाय देदु, मंदीरेन राजगादी सी असो अवाज हयो, “हय्‌त गुयलो छे।”
REV 16:18 तत्‌यार वीजळ्‌या, ने अवाज, ने गाजणो हयो, ने बेसकी धरती हाली, की जत्‌यार सी माणुस धरती पर घड़ायो, तत्‌यार सी असी धरती हालनेन कदी नी हवलो।
REV 16:19 तेरेसी तीनु मटला सहरेन तीन टुकड़ा हय गुया, ने जाती-जातीन सहर उदरी पड़्‌या, ने मटला बाबेलेन हेर भगवान काजे हय, की हयु आपसा रीसेन जुरेन दारु तीनाक पावे।
REV 16:20 ने हर एक काळापाणीन टापा आपसा जागा सी टळ गुया, ने मटला बयड़ा काजे पतु नी लाग्‌यु।
REV 16:21 ने सरग सी माणसे पर बेसका मटा गारे पड़्‌या, ने काहाकी जी गरा बेसकी भारी हतली, माणसे गारेन वजे सी भगवानेन नाव-बद्‌दी कर्‌या।
REV 17:1 जीनु सातु सरग वाळा काहवाळ्‌या धड़े चे सात कटवरा हतला, तींद्‌रे मां सी एक आवीन मारे सी असो कह्‌यु, “उरु आव, मे तुसेक तीनी मट्‌ली नाव-बद्‌दी हवली छीनाळो करने वाळीन डंड देखाड़ो, ची बेसका पाणी मां बसी रय।
REV 17:2 तेरे साते धरतीन बेसका राजा छीनाळो कर्‌या, ने धरतीन रहणे वाळा छीनाळो करने सी दारुन नस्‌या वाळा हय गुयला।”
REV 17:3 तत्‌यार हयु मेसेक चुखली-आत्‌मा मां जंगल भीणी ली गुयु, ने मे रातला रंगेन जनवार्‌या पर चो नाव-बद्‌दीन नाव सी भरलो हतलो ने तेरा सात मुणका ने दस सींगड़ा हतला, एक बायर काजे बठी रवली देख्‌यु।
REV 17:4 जी बायर जामण्‌या, ने रातला रंगेन पुथल्‌या पेहरली हतली, ने सनो ने महंग्‌ला दगड़ान ने मत्‌‌तीन गळसुन पेहरली हतली, ने तेरा हाते मां एक सनान कटवरु हतलु चु भुंडला कामेन चीजे सी ने तेरा छीनाळान भुंडला चीजे सी भरलो हतलो।
REV 17:5 ने तेरे नींडाळे पर असो नाव लिखलो हतलो, “सातायली वात मटला बाबेल धरतीन छीनाळो करने वाळी ने भुंडला चीजेन माय।”
REV 17:6 ने मे तीनी बायर काजे चुखला माणसेन लुही ने ईसुन गवान लुही पीणे सी छाकली देख्‌यु। ने तीनीक देखीन मे घाबराय गुयु।
REV 17:7 चु सरग वाळु काहवाळ्‌यु मारे सी कह्‌यु, “तु काहा घाबराय गुयु?” मे ईनी बायर, ने तीना जनवार्‌याक, तीना पर ची सवार छे, ने तेरा सात मुणका ने दस सींगड़ा छे, तुसेक सातायली वात बताड़ो।
REV 17:8 तीना जनवार्‌या काजे तु देख्‌यु, जु पेहले ते हतलु, बाकुन हय नी हय, ने उंडला कुंडाम सी नीकळीन नास मां पड़से, ने धरतीन रहणे वाळा तींद्‌रा नाव कळीन घड़ायणेन टेमे सी जीवनेन किताप मां लिखायलो नी हय, ईना जनवार्‌यान हाल देखीन की पेहले हतलु, ने हय नी हय; ने अळी पछु आय जासे, घाबराय जासे।
REV 17:9 “हीनी वातेन मतलब समजणे करीन वारू अक्‌कल चाहजे। ने तेरे धड़े अक्‌कल छे, जाणी लेणु चाहजे रंडी बायर ते बाबुलेन साहरे सहलाणी छे। जे सात मुणका तीनु सहरेन सात बयड़ान सहलाणी छे, तींद्‌रे पर जी रंडी बस रय। ने सात मुणका, सात राजान बी सहलाणी छे।”
REV 17:10 ने चे सात राजा बी छे, पांच ते हयत गुया, ने एक हय छे; ने एक हय लग आयु नी, ने जत्‌यार आवसे ती ईतरीक टेम लग तेरो रुकणु बी जरुड़ी छे।
REV 17:11 जु जनवार्‌या पेहल हतलु, ने हय नी हय, चु आपसु आठवु छे; ने तीनु सात मां सी एक छे, ने चु नास मां पड़से।
REV 17:12 जे दस सींगड़ा तु देख्‌यु चे दस राजा छे; जीनुक हय लग राज नी जड़्‌यो; बाकुन तीना जनवार्‌या साते घड़ी भर वाटे राजान तसा हक जड़से।
REV 17:13 जे आखा एक मन्‌या हवसे, ने चे आपसा-आपसा ताकत ने हक तीना जनवार्‌या काजे देसे।
REV 17:14 जे गाडरा सी लड़ायसे, ने तीनु सी जीत जड़से; काहाकी चु मालीकेन मालीक, ने राजान राजु छे, ने जे बुलावला, नेवाड़ला ने भुरसा वाळा छे, तेरे साते छे, तीनुक बी जीत जड़से।
REV 17:15 तत्‌यार हयु मारे सी कह्‌यु, ज पाणी तु देखे, तीना पर छीनाळो करने वाळी बठली छे, चे माणसे, टुळु, जाती, ने बुली छे।
REV 17:16 ने ज दस सींगड़ा तु देखे, चे ने जनवार्‌या तीनी छीनाळो करने वाळी सी नफरत करसे, ने तीनीक तेरो कुय नी ने नांगरली कर देसे; ने तेरो मास खाय जासे, ने तीनीक आकठा मां धपाड़ देसे।
REV 17:17 काहाकी भगवान तींद्‌रे मन मां असो नाखसे की चे तींद्‌री मनेन मरजी पुरी करे; ने जत्‌यार लग भगवानेन बुले पुरा नी हय जाय, तत्‌यार लग एक मन्‌या हयन आपणो-आपणो राज जनवार्‌या काजे दी देय।
REV 17:18 “ने ची बायर, तीनीक तु देख्‌यु चो मटलो सहर छे, ज धरतीन बेसका राजा पर राज करे।”
REV 18:1 हेरे पछेन एक सरग वाळा काहवाळ्‌या काजे सरग सी उतरतेलु देख्‌यु, तीनाक मट्‌लु हक जड़लु हतलु; ने धरती तेरा मटा सेक सी चमक उठी।
REV 18:2 चु उंची अवाज सी आयड़ीन कह्‌यु, “हीट पड़्‌यु, मट्‌लु बाबेल हीट पड़्‌यु! ने भुतड़ान आत्‌मान आसरु, ने हरेक भुंडीत आत्‌मान आसरु, ने हरेक भुंडी ने भुंडली चिरलीन आसरु हय गुयु।
REV 18:3 काहाकी तेरा छीनाळान कामे सी अदुस दारुन वजे सी आखी जातीन हीट पड़ला छे, ने धरतीन बेसका राजा तेरे साते छीनाळान काम कर्‌या; ने धरतीन वेपारी तेरा वारु-वारु चीज करीन बेसकी जादा लालुचेन वजे सी पयस्‌या वाळा बन्‌नला छे।”
REV 18:4 तत्‌यार मे सरग सी एक अळी अवाज सामळ्‌यु, ए मारा माणसे, हेरेम सी नीकळी आवु की तुहुं तेरा पापेन हीस्‌सा मां नी रवु, ने तेरी गरा मां सी काहनीक, तुंद्‌रे पर आय नी पड़े;
REV 18:5 काहाकी तेरा पापेन ढीक सरग लग फुगी गुयो, ने तेरा नी धरमेन काम भगवान काजे हेर आय गुयलो छे।
REV 18:6 जसों चु तुहुंक देदलु छे, तसोत तीनाक देवु, ने तेरा कामेन अनसारे तीनाक दुय गुणा बदलु देवु, तीना कटवरा मां चु भरलु तीनात मां तेरे वाटे दुय गुणा भर देवु।
REV 18:7 जतरी हयी आपसीन बड़ाय करी ने मन चाहे तसी करी; ततरी तीनीक पीड़ा, ने दुख देवु; काहाकी ची आपसे मन मां कहें, मे राणी बण गुई, रांडायली नी हय; ने दुख मां कदी नी पड़ो।
REV 18:8 काहाकी एकुत दाहड़ा मां तीनी पर गरा आय पड़से, मतलब मुत, ने दुख, ने काळ; ने ची आकठा मां धपाड़ी देवाय जासे, काहाकी तेरु नीयाव करन्‌यु मालीक भगवान ताकतवाळु छे।
REV 18:9 ने धरतीन राजा जे तेरे साते छीनाळो, ने मनेन मरजी कर्‌या, जत्‌यार तेरो धपणेन कुळु देखसे, ती तेरे वाटे रड़से, ने छाती ठुकसे।
REV 18:10 ने तेरी पीड़ान बीय्‌हाणान मारे चे बेसके नांबेत हुबा हय्‌न कवसे, “ए मटला सहर, बाबेल! ए काठला सहर, हाय! हाय! ईतरीत वार मां तुसेक डंड जड़ गुयु।”
REV 18:11 ने धरतीन वेपारी तेरे वाटे रड़से ने दुखी हवसे, काहाकी हय कुय बी तींद्‌रा माल मुल नी लेसे
REV 18:12 मतलब सनो, चांदी, महंग्‌ला दगड़ा, मुत्‌या, चमकण्‌यो सणेन जामण्‌या पुथल्‌या, रेसम्‌या, रातला रंगेन पुथल्‌या, आखा भातेन वारला गंदायण्‌या लाकड़ा, महंगला लाकड़ा, पीतळ, लुहड़ान ने घड़ी घड़ीन बणावला आखा भाती-भातेन ठाहरा,
REV 18:13 ने मसालान पुपड़ा ने गंदायण्‌या मसाला, गंदायण्‌या धुप, ईत्‌तर, लुभान, दारु, तेल, मयदु, गहुं, गावड़ी-बेल, गाडरा-बुकड़ा, घुल्‌ला, घुड़ागाड्‌या, ने पावर्‌या, ने माणसेन जीवे।
REV 18:14 हय तारे मन काजे भावणे वाळा फळ तारे धड़े सी छेटा हवता जाय; ने सवादली ने झोळ-झोळ करनी चीज तारे सी छेटी हवली छे, ने चे अळी कदी नी जड़से।
REV 18:15 ईनु चीजेन वेपारी जे तेरेसी मातला बण गुयला, तेरी पीड़ान धाकेन मारे छेटा हुबा हवसे, ने रड़ता ने दुखी हवीन कवसे,
REV 18:16 “हाय! हाय! ज मटलो सहर जु चमकण्‌यो सणेन पुथल्‌या, जामण्‌या ने रातला रंगेन पुथल्‌या पेहरलु हतलु, ने सनो, महंगला दगड़ा, ने मुत्‌या सी सींगेर्‌लु हतलु;
REV 18:17 घड़ीत भर मां तेरो असो भारी धन नास हय गुयो।” ने हरेक मटला-मटला ढंड्‌या चालाड़न्‌या ने मुख्‌या, ने ढंड्‌याम बठीन फीरन्‌या, ने जतरा दरीया मां काम करीन कमाये, आखा छेटे हुबा हय र्‌या,
REV 18:18 ने तेरे धपणेन कुळु देखीन आयड़ीन कवसे, काहनो सहर ईना मटला सहरेन तसों छे!
REV 18:19 ने आपणा-आपणा मुणका पर धुळु नाखसे, ने रड़ता जाय्‌न ने दुखी हवता जाय्‌न, “आयड़ी आयड़ीन कवसे, हाय! हाय! ज मटलो सहर जेरा माल धन सी दरीयान आखा मटला ढंड्‌या वाळा मातला बण गुयला, घड़ी भर मां उजड़ी गुयो।”
REV 18:20 ए सरग, ने ए चुखला माणसे, ने नेवताळा, ने भगवानेन अघी सी आवणे वाळी वात बताड़ने वाळा, तीनु पर खुसी करु, काहाकी भगवान नीयाव करीन तींद्‌रे सी पलटु लेदलु छे।
REV 18:21 तत्‌यार एक ताकतवाळु सरग वाळु काहवाळ्‌यु, मट्‌ली चक्‌खीन पाटेन तसलु दगड़ु हाकल्‌यु, ने असु कय्‌न दरीया मां उराट देदु, “मटला सहर बाबेल असुत मटला ताकत सी हीटी पाड़से, ने अळी कदी तेरो पतु नी जड़से।
REV 18:22 झुणगा वाजाड़ने वाळा, गावण्‌या, पावळी वाजाड़नेवाळा, ने फेप्‌यो फुकणेवाळान अवाज अळी कदी तुसे सामळाय नी देसे, ने काहनाक धंदान काहनु कारीगर बी कदी तारेम नी जड़से; ने घट्‌टीन चालनेन अवाज अळी कदी तारेम सामळाय नी देसे;
REV 18:23 ने दिवान वीजाळो अळी कदी तारेम नी चमकसे ने दुल्‌लान ने लाडीन अवाज अळी कदी तारेम सामळाय नी देसे; काहाकी तारा वेपारी धरतीन मुख्‌या हतला, ने तारा जादु टुणा सी आखा जाती भटकी गुयला।”
REV 18:24 ने भगवानेन अघी सी आवणे वाळी वात बताड़न्‌या ने चुखला माणसे, ने धरती पर आखा मरलान लुही तेरेमां जड़्‌यो।
REV 19:1 तेरे पछेन सरग सी मट्‌ली गड़दी काजे उची अवाज सी असो कवतो सामळ्‌यु, “भगवानेन बड़ाय हवे! छुटकारु, ने सेक-सींगार, ने ताकत हामरा भगवानेत ने छे।
REV 19:2 काहाकी तेरा नीयाव संय ने वारु छे, तेरेमां की हयु तीनी मट्‌ली रंडीन जी आपसा छीनाळा सी धरती काजे भुंडी कर देदली, नीयाव कर्‌यु, ने तीनी सी आपसा पावर्‌यान लुहीन पलटु लेदलु छे।”
REV 19:3 अळी दीसरी कावा चे कह्‌या, “बड़ाय! तेरे धपणेन कुळु जलम जातु रवसे।”
REV 19:4 ने वीस ने चारु डाहला मुख्‌या ने चारु जीव जनवार्‌या पड़ीन भगवानेन बड़ाय कर्‌या; जु राजगादी पर बठलु हतलु, ने कह्‌यु, “आमीन! हाल्‌लेलुया!”
REV 19:5 ने राजगादी मां सी एक बुल सामळाय, “ए आपणा भगवान सी आखा बीहणेवाळा पावर्‌या, काय नानला, काय मटला; तुहुं आखा तेरी बड़ाय करु।”
REV 19:6 तत्‌यार मे मटला टुळान तसी ने बेसको पाणीन जसी अवाज, ने गाजणेन जसों मटलो अवाज सामळ्‌यु “बड़ाय करु! तेरेमां की मालीक आपणु भगवान, आखाम सी ताकत भर्‌यु राज करे।
REV 19:7 आवु, हामु धव हय्‌न खुस हवजे, ने तेरी बड़ाय करजे, काहाकी गाडरान ईयाव आय गुयलु छे, ने तेरी लाडी आपसा काजे तीयार कर लेदली छे।
REV 19:8 तीनीक चुखलो ने चमकण्‌यो सणेन पुथल्‌यो पेहरने करीन हक आप्‌यु।” काहाकी तीनु खास पुथल्‌यान मतलब चुखला माणसेन धरमेन काम छे।
REV 19:9 तत्‌यार सरग वाळु काहवाळ्‌यु मारे सी कह्‌यु, “की वारु चे छे, जे गाडरान ईयावेन पंगत मां बुलावला छे।” अळी हयु मारे सी कह्‌यु, “जे बुले भगवानेन छाचला बुले छे।”
REV 19:10 तत्‌यार मे तीनाक आंधणे करीन तेरे पाये पर पड़्‌यु। हयु मारे सी कह्‌यु, “असु मां करे, तारु ने तारा भायस्‌येन सगु पावर्‌यु छे, जे ईसुन गवाय देणे मां काठा छे। भगवान काजे आंध।” काहाकी ईसुन गवाय भगवानेन अघी सी आवणे वाळी वात देखाड़नेन आत्‌मा छे।
REV 19:11 तत्‌यार मे सरग काजे खुली रवलो देख्‌यु, ने देखो की एक धवळु घुल्‌लु छे; ने तीना पर एक सवारी छे, जु भुरसा वाळा, ने छाचलु कहवाये; ने चु धरमेन साते नीयाव ने लड़ाय करे।
REV 19:12 तेरा डुळा आकठान आंच छे, ने तेरे मुणका पर बेसका राज मुड़े छे। ने तेरो एक नाव तीना पर लिखलो छे, ज तीनाक छुड़ीन अळी कुय नी जाणे।
REV 19:13 चु लुही मां डुबाड़ला पुथल्‌या पेहरलु छे, ने तेरो नाव भगवानेन बुल छे।
REV 19:14 ने सरगेन सीपायड़ा धवळा घुल्‌ला पर बठी रवला ने चुखला ने धवळा चमकण्‌यो सणेन पुथल्‌यो पेहेरीन तेरे पछळ-पछळ आवणे बाजी र्‌या।
REV 19:15 जाती-जाती काजे मारने करीन तेरे मुंहडा सी एक पाजावली तलवार नीकळे, ने लुहड़ान डेंगु लीन तीनु पर राज करसे ने हयु आखाम सी ताकत सी भरलु भगवानेन रीस सी कुंड मां अंगुरेन रस रंदळसे।
REV 19:16 ने तेरा पुथल्‌या ने सातळ्‌या पर असो नाव लिखलो छे: “राजान राजा ने मालक्‌यान मालीक।”
REV 19:17 ने मे एक सरग वाळा काहवाळ्‌या काजे दाहड़ा पर हुबु हय रवलु देख्‌यु, ने हयु मट्‌ली अवाज सी आयड़ीन उपर सरग मां सी उडणेवाळा आखा चिरला सी कह्‌यु, “आवु, भगवानेन मट्‌ली पंगत वाटे भेळा हय जावु,
REV 19:18 तेरेसी तुहुं राजान मास, ने सीपायड़ान मुख्‌यान मास, ने ताकतवाळान माणसेन मास, ने घुल्‌लान ने घुल्‌ला पर बठण्‌या माणसेन मास, ने काय छुटला, काय बांदायला, काय पावर्‌या, काय नानला, काय मटला, आखा माणसेन मास खाणे आवु।”
REV 19:19 तत्‌यार मे तीना पेहला जनवार्‌या काजे ने धरतीन राजा काजे देख्‌यु। ने तींद्‌रे पुठ्‌ये तींद्‌रा सीपायड़ान मेळा बी हतला चे आखा, धवळ्‌ळा घुल्‌ला पर बठी रवलु, तीना भगवानेन पावर्‌या साते, ने तेरा सीपायड़ान मेळा साते लड़ाय करने भेळा हय रवला।
REV 19:20 ने हयु जनवार्‌या ने तेरे भेळु चु लुच्‌चु अघी सी आवणे वाळी वात बताड़न्‌यु धराय गुयु, जु तेरे अगळ असा सहलाणी देखाड़ला, तीनु सी हयु तीनुक भटकाड़्‌यु, जीनु पर तीना जनवार्‌यान छाप हतली, ने जे तेरे मुरतीन पुजा करतेला। जे दुयु जीवता जीवतात तीना आकठान कुंडा मां, जो गंधक सी जलम धपे, चां नाख्‌या।
REV 19:21 ने रवला माणसे तीना घुल्‌लान सवारीक तलवार सी, जी तेरे मुंहडा सी नीकळतेली, मार नाख्‌या; ने आखा चिरला तींद्‌रा मास सी आफरी गुया।
REV 20:1 ने मे एक सरग वाळा काहवाळ्‌याक सरग सी उतेरतेलो देख्‌यु; तेरे हाते मां उंडला कुंडेन कुची, ने एक मट्‌ली साकळ हतली।
REV 20:2 ने हयु तीना अजगर, मतलब पुराणु घड़साक, जु भुतड़ु छे; धरीन हजार साल लग बांद देदा,
REV 20:3 ने तीनाक उंडला कुंड मां नाखीन बंद कर देदा ने तीना पर सील लागाड़ देदा, की हयु हजार साल पुरा हवता लग जाती-जातीन माणसेक अळी नी भटकाड़े। तेरे पछेन जरुड़ी छे की थुड़ीक वार वाटे अळी छुड़ाय जासे।
REV 20:4 तत्‌यार मे राजगाद्‌या देख्‌यु, ने तीनु पर माणसे बठ गुया, ने तीनुक नीयाव करनेन हक देदु। ने तींद्‌री आत्‌मा काजे बी देख्‌यु, तींद्‌रा मुणका ईसुन गवाय देणे ने भगवानेन बुलेन परचार करने वजे सी काटाय्‌ला, ने जे नी हीना जनवार्‌यान, ने नी हेरी मुरतीन पुजा करला, ने नी हेरी छाप आपणा मुणका ने हात पर लेदला चे जीवता हय्‌न मसी साते हजार साल लग राज करता रवे।
REV 20:5 जत्‌यार लग चे हजार साल पुरा नी हवे तत्‌यार लग बाकी मरला नी जीव हवे। ज ते पेहलो मर्‌या-सर्‌याम सी जीवता हवणेन छे।
REV 20:6 वारु ने चुखलु हयु छे, जु ईना पेहला मर्‌या-सर्‌याम सी जीवता हवणे मां साजल्‌या छे, असला पर दीसरी मुतेन काय बी हक नी हय, बाकुन चे भगवान ने मसीन पुजारा बणसे, ने तेरे साते हजार साल लग राज करसे।
REV 20:7 जत्‌यार हजार साल पुरा हय गुया ती भुतड़ु काजे जेल सी छुड़ी देसे।
REV 20:8 ने चु तीनु जाती काजे जे धरतीन चारु भीणी रवसे, मतलब गोग ने मागोन काजे तींद्‌री गिन्‌ती दरीयान रेतेन बराबर हवसे, भटकाड़ीन लड़ाय वाटे भेळा करने करीन नीकळसे।
REV 20:9 ने चे आखी धरती पर जासे ने चुखला माणसेन तम्‌बु ने वारलु परमवाळा सहर काजे घेरवी लेसे ने आकठो सरग सी उतरीन तीनुक उजाड़ देसे।
REV 20:10 तींद्‌रु भटकाड़ने वाळु भुतड़ु आकठो ने गंधकेन तीना कुंडा मां, तेरेमां चो जनवार्‌या ने लुच्‌चु अघी सी आवणे वाळी वात बताड़न्‌यु बी रवसे, चां नाख देसे; ने चे रात दाहड़ु जलम पीड़ा मां तड़पता रवसे।
REV 20:11 तत्‌यार मे एक मट्‌ली धवळी राजगादी ने तीनाक जु तीना पर बठलु हतलु, देखु, तेरे अगळ सी धरती ने सरग ढासी गुई, ने तींद्‌रे वाटे जागु नी जड़्‌यु।
REV 20:12 ने मे नानला मटला आखा मरला काजे राजगादीन अगळ हुबा देख्‌यु, ने किताप खुळ्‌यु, ने तत्‌यार एक अळी किताप खुळ्‌यु, मतलब जीवनेन किताप, ने जसों तीनु किताप मां लिखलो हतलो, तींद्‌रा कामेन अनसारे मरलान नीयाव हयो।
REV 20:13 ने दरीया तीनु मरलाक जे तेरेमां हतला आपी देदी, ने मरण ने पाताळ बी, जे तेरेमां हतला; ने तेरेमां सी हरेकेन कामेन अनसारे तींद्‌रु नीयाव हयो।
REV 20:14 ने मरण ने पाताळ बी आकठान कुंडा मां नाख देदा। जी आकठान कुंडो ते दीसरी मरण छे।
REV 20:15 ने काहनाक ने नाव जीवनेन किताप मां लिखलो नी जड़्‌यो, तीनाक आकठान कुंडा मां नाख देदा।
REV 21:1 तत्‌यार मे नवली सरग ने नवली धरती काजे देख्‌यु, काहाकी पेहली सरग ने पेहली धरती जाती रहतेली, ने दरीया बी नी रवी।
REV 21:2 अळी मे चुखला सहर नवला यरुसलेम काजे सरग सी भगवानेन धड़े सी उतरतेला देख्‌यु, ने हयु तीनी लाडीन तसी हतलु, जी आपसा अदमी वाटे सींगारु करली छे।
REV 21:3 अळी मे राजगादी काहनाक मां सी काहनाक काजे उची अवाज सी असो कवता सामळ्‌यु, देखु, भगवानेन माणसेन ईचमां छे; हयु तींद्‌रे साते डेरा करसे, ने चे तेरा माणसे बणसे, ने भगवान आपसु तींद्‌रे साते रवसे; ने तींद्‌रु भगवान रवसे।
REV 21:4 ने हयु तींद्‌रा डुळा सी आखा आसा नुछी देसे, ने तेरे पछेन मरण नी रवसे, ने नी दुख, नी आयड़्‌नु, नी पीड़ा रवसे; पेहली वाते जाती रय।
REV 21:5 ने ज राजगादी पर बठलु हतलु, हयु कह्‌यु, “मे आखो काय नवलो कर दम।” अळी हयु कह्‌यु, “लिख ले, काहाकी चे बुले भुरसा वाळा ने छाचला छे।”
REV 21:6 अळी हयु मारे सी कह्‌यु, “जी वाते पुरी हय गुयली छे। मे अल्‌फा ने ओमेगा, पेहलु ने आकरी छे। मे तीसला काजे जीवनेन पाणीन उंहता मां सी फुकट मां पावीस।
REV 21:7 जु जीते, हयुत तीनु चीजेन वारीस बणसे; ने तेरु भगवान रवीस, ने हयु मारु पुर्‌यु रवसे।
REV 21:8 बाकुन नी कामका, नी भुरसा वाळा, रीस करन्‌या, ने हत्‌यारा, ने छीनाळा, ने बड़वाय करन्‌या, मुरती पुजा करन्‌या, ने आखा लुच्‌चायन भागी हवण्‌या तीना कुंडेम जड़से, जाहां आकठो ने गंधक सी धपती रहे, जी दीसरी मरण छे।”
REV 21:9 तत्‌यार जीनु सात सरग वाळा काहवाळ्‌या धड़े सात आकरी गरा सी भरला सात कटवरा हतला, तेरेमां सी एक मारे धड़े आयु, ने मारे साते वात करीन कह्‌यु, “उरु आव, मे तुसेक चे माणसे देखाड़ीस, जे गाडरा साते जलम रवसे, चे तेरे साते नवली लाडीन तसा छे।”
REV 21:10 ने हयु मेसे आत्‌मा मां, एक मटला ने उचला बयड़ा पर ली गुयु, ने चुखला सहर यरुसलेम काजे सरग सी भगवान धड़े उतेरता देखाड़्‌यु।
REV 21:11 चो सहर भगवानेन सेक-सींगार सी चमकतेलो; ने तेरो वीजाळो यसब नावेन महंगला दगड़ा तसों चुखोझण चमकतेलो।
REV 21:12 ने तेरी दिवाल मटी उची हतली, ने तेरा बारे फाटक ने फाटके पर बारे सरग वाळा काहवाळ्‌या हतला; ने तीनु फाटके पर ईस्‌रायेलीन बारे कुळीन नाव लिखला हतला।
REV 21:13 उगण फीरीन तीन फाटक, अखण भीणी फीरीन तीन फाटक, दखण फीरीन तीन फाटक, ने बुडण फीरीन तीन फाटक हतला।
REV 21:14 ने सहरेन दिवालेन बारे नेहान दगड़ा हतला, ने तीनु पर गाडरान बारे नेवताळान बारे नाव लिखला हतला।
REV 21:15 जु मारे साते वात करी रवलु, तेरे धड़े सहर ने तेरा फाटके ने तेरी दिवाल काजे नापणे करीन एक सनान फीट हतली।
REV 21:16 हयो सहर चारखुट बन्‌नलो हतलो ने चो नाबो, चोवड़ो बराबर हतलो, ने हयु तीना फीट सी सहर काजे नाप्‌यु, ती साड़े सात सोव कुसेन नीकळ्‌यो: चो नाबो, ने चवड़ो, ने उंचो बराबर हतलो।
REV 21:17 ने हयु तेरी दिवाल काजे माणसेन, मतलब सरग वाळा काहवाळ्‌यान नाप सी नाप्‌यु, ती एक सोव चाळीस ने चार हात नीकळ्‌यो।
REV 21:18 तेरी दिवाल यसबेन नावेन महंगला दगड़ान बन्‌नली हतली, ने सहर असो चुखला सनान हतलो, ज चुखला आरस्‌यान तसों रवे।
REV 21:19 तीना सहरेन नेहा हर भातेन जरुड़ी दगड़ा सी सवारली हतली, पेहलु नेहु यसबेन, दीसरी नीलमणीन, तीसरी लालड़ीन, चोवथी मरकतेन,
REV 21:20 पांचवी गोमेदकेन, छटवी माणीक्‌येन, सातवी पीतमणीन, आठवी पेरोजेन, नव्‌वी पखराजेन, दसवी लहसनीयेन, ग्‌यारवी धुमरकान्‌तेन, बारवो याकुतेन हतली।
REV 21:21 ने बारे फाटक, बारे मुत्‌यान हतला; एक-एक फाटक, एक-एक मुतीन बन्‌नलो हतलो। ने सहरेन सयड़क चुखला आरस्‌यान तसों चुखो सनान हतलो।
REV 21:22 मे तेरेमां काहनु बी मंदीर नी देख्‌यु, काहाकी आखाम सी ताकत वाळु मालीक भगवान, ने गाडरो तेरो मंदीर छे।
REV 21:23 ने तीना सहरेम दाहड़ु ने चांदेन वीजाळान जरुवत नी हय, काहाकी भगवानेन सेक सी तेरेमां वीजाळो हय र्‌यो, ने गाडरो तेरो दिवु छे।
REV 21:24 जाती-जातीन माणसे तेरा उजाळा मां चालसे फीरसे, ने धरतीन राजा आपणा-आपणा सेकेन समान तेरेमां लावसे।
REV 21:25 तेरा फाटक दीसु कदी बंद नी हवसे, ने रात चां नी हवसे।
REV 21:26 ने माणसे जाती-जातीन सेक ने धनेन समान तेरेमां लावसे।
REV 21:27 ने तेरेमां कुय बी वीटेळ्‌ळी चीज नीते सरमेन काम करने वाळा, नीते झुट सी धुकु देणेवाळा, काहनी रीती सी माहें नी भरायसे; बाकुन चे माणसे अतरात तींद्‌रा नाव गाडरान जीवनेन किताप मां लिखला छे।
REV 22:1 तत्‌यार हयु मारे बील्‌लोरेन तसी चमकतेली, जीवनेन पाणीन नदी देखाड़्‌यु, जी भगवान ने गाडरान राजगादी सी नीकळीन,
REV 22:2 तीना सहरेन सड़केन ईचमां उहतेली। नदीन ईनी धड़े ने पली धड़े जीवनेन झाड़को हतलो; तेरेमां बारे भातेन फळ लागतेला, ने चे हर महने फळतेला; ने तीना झाड़कान पान्‌टा सी जाती-जातीन माणसे वारु हवतेला।
REV 22:3 तत्‌यार सराप नी हवसे, ने भगवान ने गाडरान राजगादी तीना सहर मां रवसे, ने तेरा पावर्‌या तेरी चाकरी करसे।
REV 22:4 चे तेरो मुंहडो देखसे, ने तेरो नाव तींद्‌रा नींडाळा पर लिखलो रवसे।
REV 22:5 ने रात नी पड़से, ने तीनुक दिवान ने दाहड़ान वीजाळान जरुवत नी पड़से, काहाकी मालीक भगवान तीनुक वीजाळो देसे, ने चे जलम राज करसे।
REV 22:6 तत्‌यार हयु मारे सी कह्‌यु, “जी वाते भुरसा वाळा ने छाचली छे। ने मालीक, जु भगवानेन अघी सी आवणे वाळी वात बताड़न्‌यान आत्‌मान भगवान छे, आपसा सरग वाळा काहवाळ्‌या काजे असु करीन मकेल्‌लु की आपसा पावर्‌या काजे जी वाते, तीनुक मामार पुरो हवणु जरुड़ी छे देखाड़े।”
REV 22:7 “ने सामळु, मे मामार आवणेवाळु छे; वारु छे हया, जे ईनी कितापेन हवणे वाळी वात माने।”
REV 22:8 मे हयुत युहन्‌‌‌नु छे, जु जी वात सामळे, ने देखतेलु। ने जत्‌यार मे सामळ्‌यु ने देख्‌यु, ती जु सरग वाळु काहवाळ्‌यु मेसेक जी वात देखाड़तेलु, मे तेरे पाये पड़ीन आंधणे करीन हीट पड़्‌यु।
REV 22:9 बाकुन मेसेक कह्‌यु, “देख, असु मां करे; काहाकी मे तारु ने तारा भाय अघी सी आवणे वाळी वात बताड़न्‌या ने ईनी कितापेन वातेक मान्‌नेवाळान सगु पावर्‌यु छे, भगवानेन ने बड़ाय कर।”
REV 22:10 अळी हयु, मारे सी कह्‌यु, “ईनी कितापेन हवणे वाळीन वातेक बंद मां करे; काहाकी ईनी वातेक हवणेन टेम धड़ेत छे।
REV 22:11 जु बी कुहराय करे, हयु कुहरायत करतु रहे; ने जु सरमेन काम करे, चु सरमेन कामुत करतु रहे; ने जु धरमी छे, हयु धरमी बणीन रहे; ने जु चुखलु छे, चु चुखलु बणीन रहे।”
REV 22:12 देख, मे मामार आवणेवाळु छे; ने हर एक कामेन अनसारे बदलु देणेन फळ मारे धड़े छे।
REV 22:13 “मे अल्‌फा ने ओमेगा, पेहलु ने आकरी, सुरुवात ने खत्‌तम छे।”
REV 22:14 वारु चे छे, जे आपसा पुथल्‌या धुय लेय, काहाकी तीनुक जीवनेन झाड़कान धड़े आवणेन हक जड़से, ने चे फाटके मायन हय्‌न सहर मां भरायसे।
REV 22:15 बाकुन कुतरा, बड़वाय करन्‌या, छीनाळा, हत्‌यारा, मुरती पुजा करन्‌या, हर एक झुट काजे परम करने वाळा ने झुट पर चालनेवाळा बाहर रवसे।
REV 22:16 “मे ईसु मारा सरग वाळा काहवाळ्‌या काजे असु करीन मकल्‌यु, की तुंद्‌रे अगळ मंडळ्‌यान बारामां ईनु वातेन गवाय देय। मे दावुदेन जड़ ने अवल्‌‌यात, ने वीजाळान चमक्‌तु तारु छे।”
REV 22:17 ने आत्‌मा, ने लाडी दुयु कहें, “आव!” ने सामळनेवाळु बी कहें, “आव!” ने जु तीसलु हय, हयु आवे ने जु काहनुक चाहे चु जीवनेन पाणी फुकट मां लेय।
REV 22:18 मे युहन्‌‌‌नु हर एक काजे, जु ईनी कितापेन हवणे वाळीन वाते सामळे, गवाय दम; कदी काहनुक माणुस ईनु वाते मां काहींग बड़ावे ती भगवान तीनु गरा काजे ज ईनी किताप मां लिखलो छे, तीनु पर बड़ावसे।
REV 22:19 ने कदी काहनुक ईनी हवणे वाळीन कितापेन वाते मां सी नीकाळसे, ती भगवान तीना जीवनेन झाड़को ने चुखलो सहर मां सी, तेरी खुलीन वात ईनी किताप मां छे, तेरु भाग नीकाळ देसे।
REV 22:20 जु ईनी वातेन गवाय देय, हयु असो कहें, “हव, मे मामार आवणेवाळु छे।” आमीन। ए मालीक ईसु आव!
REV 22:21 मालीक ईसुन गीण-दया चुखला माणसे साते रहे। आमीन।
