﻿Zabur.
93.
Hodáwand bádsháhia kant áiá watá pa shán o shawkat árástag, Hodáwand porshawkat ent o zór o wáká selahband. Donyá mohr óshtátag o nalarzit. 
Tai bádsháhi taht cha azal barjam ent o taw cha azal hastay. 
Oo Hodáwand! Kawr chest butagant, kawrán wati tawár chest kortag, kawrán wati gorragáni tawár chest kortag. 
Hodáwand cha mazanén ápáni tawárán, cha daryáay chawláni proshagá mazanshánter ent, borzén arshá. 
Oo Hodáwand! Tai hokm modám barjáha mánant, tai bádsháhi pák o palgár ent, modám, tán abad. 
