﻿Zabur.
70.
Pa sázger o washáwázáni sálárá. Dáuday Zabur. Dazbandié. Oo Hodá! Zutt kan o maná berakkén. Oo Hodáwand! Pa mani madatá eshtáp kan. 
Á ke mani kóshay randá ant, sarjahl o sharmsár bátant, á ke mani barbádiá gala bant, pad bekenzát o roswá bátant. 
Á ke mani sará “hah, haha” kanant, cha pashaliá poshtoká kenzátant. 
Bale á ke tai shóházá ant, sajjahén tai dargáhá shádehi kanát o gal o bál bátant, á ke tai dátagén nejátesh dósta bit, modám begwashátant: “Hodáwand mazanshán ent.” 
Bale man setam distagén mohtájé án. Oo Hodá! Dém pa man eshtáp kan, taw mani rakkénók o madatkár ay. Oo Hodáwand! Dér makan. 
