GEN 1:1 Bongéjá, Hodáyá ásmán o zemin addh kortant.
GEN 1:2 Zemin bédróshom at o hecchi mán néstat. Taháriá johlánki sarpósh kortagat o Hodáay Ruh ápay sarborá némbál at.
GEN 1:3 Hodáyá gwasht: “Rozhnái bebit” o rozhnái but.
GEN 1:4 Hodáyá dist ke rozhnái sharr ent, gorhá rozhni cha taháriá jetá kort.
GEN 1:5 Hodáyá rozhnay nám “róch” kort o taháriay nám “shap”. Shap gwast o sohb but. É awali róch at.
GEN 1:6 Hodáyá gwasht: “Ápáni nyámá kobbahé bebit ke ápá cha ápá jetá bekant.”
GEN 1:7 Hodáyá kobbah addh kort o kobbahay chéray áp cha sarboray ápán jetá kortant. É kár but.
GEN 1:8 Hodáyá kobbahay nám “ásmán” kort. Shap gwast o sohb but. É domi róch at.
GEN 1:9 Hodáyá gwasht: “Ásmánay chéray áp yakk némagé bebant o hoshki paddar bebit” o anchosh but.
GEN 1:10 Hodáyá hoshkiay nám “zemin” kort o yakjáh butagén ápáni nám “daryá”. Hodáyá dist ke é kár sharr but.
GEN 1:11 Hodáyá gwasht: “Zemin sabzag beródénit; tohmdárén keshár o nibag dayókén drachk, ke har drachkay bará, áiay jenday tohm mán bebit, áyáni jenday tahray hesábá” o anchosh but.
GEN 1:12 Zeminá sabzag ródént; tohmdárén keshár o nibag dayókén drachk ke hamok drachkay bará wati tohm mán at, áyáni jenday tahray hesábá. Hodáyá dist ke é kár sharr but.
GEN 1:13 Shap gwast o sohb but. É sayomi róch at.
GEN 1:14 Hodáyá gwasht: “Ásmánay kobbahá rozhnáén chizz mán bebit ke róchá cha shapá jetá bekanant. É rozhnáén chizz mósom, róch o sáláni nesháni bebant.
GEN 1:15 É, kobbahá nur jórh bebant o zeminá rozhná bekanant” o anchosh but.
GEN 1:16 Hodáyá do mazanén nur addh kort, masterén nuri addh kort ke róchay sará hákemi bekant o kasterén nur shapay sará. Estári ham addh kortant.
GEN 1:17 Hodáyá é nur, ásmánay kobbahá ér kortant ke zeminá rozhn bedayant o
GEN 1:18 róch o shapay sará hákemi bekanant o rozhná cha taháriá jetá bekanant. Hodáyá dist ke é kár sharr but.
GEN 1:19 Shap gwast o sohb but. É cháromi róch at.
GEN 1:20 Hodáyá gwasht: “Áp cha sahdáráni ramán porr bebant o báli morg, zeminay sarborá, ásmánay kobbahá bál bekanant.”
GEN 1:21 Gorhá Hodáyá mazanén daryái sahdár o warh warhén dega sahdár addh kort ke é, wati tahray hesábá ram jórh butant o daryáesh porr kort. Hamé paymá warh warhén báli morgi addh kort, áyáni jenday tahray hesábá. Hodáyá dist ke é kár sharr but.
GEN 1:22 Hodáyá é sajjahén barkat dát o gwashtant: “Chokk o bar kanét. Gésh bayán bebét o daryáyán porr kanét. Báli morg ham zeminá sakk báz bebant.”
GEN 1:23 Shap gwast o sohb but. É panchomi róch at.
GEN 1:24 Hodáyá gwasht: “Zemin har paymén sahdár pédá bekant, áyáni jenday tahray hesábá; dalwatá beger tán lápkasshén jánwar o wakshién haywáná, har yakké wati tahray hesábá.” É kár but.
GEN 1:25 Hodáyá zeminay wakshién haywán áyáni jenday tahray hesábá, dalwat áyáni jenday tahray hesábá o zeminay sará lápkasshén jánwar áyáni jenday tahray hesábá jórh kortant. Hodáyá dist ke é kár sharr but.
GEN 1:26 Hodáyá gwasht: “Byá ensáná wati jenday dróshomá addha kanén, wati sheklá ke daryáay máhig, ásmánay morg, dalwat, sajjahén wakshién haywán o lápkasshén jánwaráni sará hákemi bekant.”
GEN 1:27 Hodáyá ensán wati sheklá addh kort, wati jenday Hodái sheklá addhi kort, mardén o janéni addh kortant.
GEN 1:28 Hodáyá á, barkat dát o gwashtant: “Chokk o bar kanét, báz bebét o zeminá porr kanét o zeminay sará hákemi bekanét. Daryáay máhig, ásmánay morg o zeminay sajjahén sorendaháni sará hákemi bekanét.”
GEN 1:29 Hodáyá gwasht: “Bechárét, man shomárá zeminay saray hamá sajjahén sabzagána dayán ke tohma kárant o hamá sajjahén drachkána dayán ke baránesh jenday tohm mán ent. É shomay warák ant.
GEN 1:30 Man zeminay sajjahén haywán, ásmánay sajjahén morg, sajjahén lápkasshén jánwar, bezán hamok sahdár ham pa waráká sabzag dátag.” É kár but.
GEN 1:31 Hodáyá wati sajjahén jórh kortagén chizz cháretant. Disti ke é kár sakk sharr but. Shap gwast o sohb but. É shashomi róch at.
GEN 2:1 É paymá ásmán o zemin o é sajjahén chizzáni jórh bayag sarjam but.
GEN 2:2 Haptomi róchá, Hodáyá hamá kár sarjam kortagatant ke dastá atanti. Wati sajjahén káráni halásiá rand, haptomi róchá árámi kort.
GEN 2:3 Gorhá Hodáyá haptomi róch barkat dát, gisshént o pákén róch námént, chéá ke Hodáyá hamé róchá cha é sajjahén hastiay jórh kanagay kárá árám kort.
GEN 2:4 É zemin o ásmánay kessah at ke jórh kanag butant. Á wahdá ke Hodáwandén Hodáyá zemin o ásmán jórh kortant,
GEN 2:5 zeminay sará hecch drachk o dár narostagat o dhagárán sabzag néstat. Chéá ke tán á wahdá Hodáwandén Hodáyá zeminay sará hawr nagwáréntagat o angat ensáné néstat ke zeminá kesht o kesháré bekant.
GEN 2:6 Bale cha zeminá ápay chammag botkant o sajjahén zeminay sarboresh séráp kort.
GEN 2:7 Hodáwandén Hodáyá cha zeminay háká mardomé jórh kort, áiay pónzá zenday sáhi damet o é mardom sahdáré but.
GEN 2:8 Hodáwandén Hodáyá ródarátká, Adaná bágé jórh kort o wati addh kortagén mardomi hamódá nádént.
GEN 2:9 Hodáwandén Hodáyá cha háká har warhén drachk ródént ke gendagá zébá o baresh waragá wassh atant. Zenday drachk o néki o badiay zánagay drachk bágay nyámá atant.
GEN 2:10 Pa bágay áp dayagá kawré hastat ke bonzehi Adaná at o cha ódá é kawr chár jáhá bahra but.
GEN 2:11 Awali kawray nám Pishón ent ke Hawilahay sajjahén sardhagárá ke sohr o teláhi mán, chahra wárt.
GEN 2:12 Á sardhagáray sohr, sharrén sohré o ódá kóhi bód o senge solaymán ham hast.
GEN 2:13 Domi kawray nám Géhun ent ke Kushay sajjahén sardhagárá chahra wárt.
GEN 2:14 Sayomi kawray nám Dejlah ent ke Áshuray ródarátki gwar o pahnátána tachit o cháromi kawr Parát ent.
GEN 2:15 Hodáwandén Hodáyá á mardom zort o Adanay bágá jahmenend kort ke bágá ábád bekant o bágay hayálá bedárit.
GEN 2:16 Hodáwandén Hodáyá mard parmán dát ke bágay har drachkay bará waray bwar,
GEN 2:17 bale néki o badiay zánagay drachkay bará mawar. Hamá róchá ke taw wárt, allamá meray.
GEN 2:18 Hodáwandén Hodáyá gwasht: “Pa mardá tahnái sharr naent. Man pa áiá, hamdarwarén hamráh o madat kanóké jórha kanán.”
GEN 2:19 Hodáwandén Hodáyá cha háká zeminay saray sajjahén wakshién haywán o ásmánay sajjahén morg jórh kortagatant. Nun á sajjahéni marday kerrá áwortant tán bechárit ke bárén mard áyán kojám námán tawára kant. Har náméá ke mardá á sahdár tawár kortant, hamá áyáni nám but.
GEN 2:20 Mardá sajjahén dalwat, ásmánay morg o zeminay wakshién haywán nám per bastant, bale mardá hamdarwarén hamráh o madat kanóké néstat.
GEN 2:21 Gorhá Hodáwandén Hodáyá mard gránén wábé sará dát. Mard ke wáb at gorhá Hodáyá áiay yakk pahlugé kasshet o háligén jáhi gón góshtá porr kort.
GEN 2:22 Hodáwandén Hodáyá cha mardá kasshetagén pahlug janéné kort o janéni marday kerrá áwort.
GEN 2:23 Gorhá mardá gwasht: “Nun é cha mani haddhán haddhé o cha mani góshtán góshté. É báyad ent janén gwashag bebit, chéá ke cha mardéná zurag butag.”
GEN 2:24 Paméshká mard wati pet o mátá yalaha kant o gón janá hawára bit, gorhá á doén, yakk jesm o jána bant.
GEN 2:25 Ádam o áiay jan, doén luch o jándar atant o áyán sharma nakort.
GEN 3:1 Már cha Hodáwandén Hodáay jórh kortagén á dega wakshién haywánán thagter o chálákter at. Áiá gón janéná gwasht: “É rást ent ke Hodáyá gwashtag bágay hecch drachkay bará mawarét?”
GEN 3:2 Janéná gwasht: “Má bágay drachkáni bar o samarán wárta kanén,
GEN 3:3 bale Hodáyá gwashtag ke hamá drachkay bará mawarét ke bágay nyámá ent. Áiá dast ham per makanét. Agan na, merét.”
GEN 3:4 Márá gwasht: “Shomá pakká namerét.
GEN 3:5 Bale Hodá zánt, hamá róchá ke shomá á drachkay bará warét, shomay chamm pacha bant, shomá Hodáay paymá bét o nék o badá zánét.”
GEN 3:6 Nun janéná cháret ke á drachkay bar gwashay pa waragá wassh o gendagá zébá ent o pa zántkár bayagá delwáh. Gorhá áiá cha drachkay barán zort o wárt o wati mardárá ham dáti, ke hamráh ati. Mardá ham wárt.
GEN 3:7 Nun doénáni chamm pach butant o zántesh ke má jándar én. Cha enjiray tákán pa wat póshákesh dótk.
GEN 3:8 Gwátá ke sar kort, áyán Hodáwandén Hodáay pádbramsh eshkot ke bágá gám janagá at. Mard o áiay janá, watá bágay drachkáni poshtá cha Hodáwandén Hodáyá chér dát.
GEN 3:9 Hodáwandén Hodáyá mard gwánk jat o gwasht: “Kojá ay?”
GEN 3:10 Áiá passaw dát: “Man bágá tai pádbramsh eshkot o maná torset chéá ke jándar atán, paméshká man watá chér dát.”
GEN 3:11 Hodáyá gwasht: “Kayá tará gwasht ke taw jándar ay? Taw hamá drachkay bar wártag ke man tará gwashtag mawari?”
GEN 3:12 Mardá gwasht: “Hamá janén ke taw maná dátag, hamáiá á drachkay bar maná dát o man wárt.”
GEN 3:13 Gorhá Hodáwandén Hodáyá gón janéná gwasht: “É che káré ke taw kort?” Janéná gwasht: “Márá maná rad dát o man wárt.”
GEN 3:14 Hodáwandén Hodáyá gón márá gwasht: “Taw ke é kár kortag, nun taw sajjahén dalwat o sajjahén wakshién haywánáni nyámá masterén nálati ay. Taw wati zenday sajjahén róchán pa lápkasshokái raway o tai warák hák o danza bit.
GEN 3:15 Man taig o janénay nyámá, tai nasl o janénay naslay nyámá dozhmeni pédá kanán. Eshiay nasl tai saragá jant o taw áiay páday punzá janay.”
GEN 3:16 Hodáyá gón janéná gwasht: “Man tai chellagiay dardán sakk báza kanán, taw gón dard chokk pédá kanay. Tai wáhag pa wati mardá bit o á, tai sará wájahia kant.”
GEN 3:17 Hodáyá gón Ádamá gwasht: “Taw wati janay habar gósh dásht o hamá drachkay bar wárt ke man tará hokm dátagat ke cha eshiá mawar, paméshká tai sawabá zemin nálati ent. Taw wati zenday sajjahén róchán pa sakki o sóri cha zeminá wati waráká kasshay.
GEN 3:18 Zemin pa taw konthag o dhangara kárit o taw zeminay sabzagána waray.
GEN 3:19 Gón hédén péshánigé wati naganá waray tán hamá wahdá ke háká pera tarray, chéá ke cha hameshiá zurag butagay. Taw háké ay o padá háká pera tarray.”
GEN 3:20 Ádamá wati janay nám Hawá kort, chéá ke á, sajjahén mardománi mát ent.
GEN 3:21 Hodáwandén Hodáyá, pa Ádam o áiay janá, cha póstá póshák jórh kort o gwará dátant.
GEN 3:22 Hodáwandén Hodáyá gwasht: “Nun ensán may payméné jórh butag o nék o badá zánt, chó mabit ke wati dastá shahár bedant o zenday drachkay bará bezurit o bwárt o tán abad zendag bebit.”
GEN 3:23 Gorhá Hodáwandén Hodáyá á cha Adanay bágá dar kort ke zeminay sará kesht o keshár bekant, hamá zemin ke cha áiay háká á jórh kanag butagat.
GEN 3:24 Ensánay gallénagá rand, pa zenday drachkay ráhay bandagá, Hodáyá Adanay bágay ródarátki némagá karrubi óshtáréntant o anchén ásgwárén zahmé ham éri kort ke har némagá chahria wárt.
GEN 4:1 Ádamá, gón wati jan Hawáyá wapt o wáb kort o Hawáay láp porr but o Káen pédá but. Hawáyá gwasht: “Cha Hodáwanday barkatá, maná mardénchokké butag.”
GEN 4:2 Randá Hawáyá Káenay brát, Hábil pédá kort. Hábilá shepánkia kort o Káená dehkáni.
GEN 4:3 Kammé wahdá o rand, Káená cha wati dhagáray bar o samarán pa Hodáwandá thékié áwort.
GEN 4:4 Hábilá ham cha wati ramagay pasáni awali chokkán lahtén kosht o áyáni pigi gósht zort o pa Hodáyá théki áwort. Hodáwandá Hábil o áiay théki pasond butant,
GEN 4:5 bale Káen o áiay théki áiá pasond nabutant. Káen sakk zahr gept o démi tahár but.
GEN 4:6 Hodáwandá gón Káená gwasht: “Chéá zahr ay? Chéá tai dém tahár ent?
GEN 4:7 Agan taw sharrén kár bekanay, tai hayálá kabul kanaga nabay? Bale agan taw sharrén kára nakanay, gonáh tai darwázagay poshtá óshtátag o tai randá kaptag. Taw báyad ent gonáhay sará báládast bebay.”
GEN 4:8 Káená gón wati brát Hábilá gwasht: “Byá dhagáray sará rawén.” Dhagárá ke shotant, Káená wati brát Hábilay sará orosh kort o koshti.
GEN 4:9 Gorhá Hodáwandá gón Káená gwasht: “Tai brát Hábil kojá ent?” Áiá gwasht: “Nazánán. Záná man wati brátay negahpán án?”
GEN 4:10 Hodáwandá gwasht: “Taw che káré kort? Tai brátay hón cha zeminá gón man peryát kanagá ent.
GEN 4:11 Nun taw nálatié ay. Cha é zeminá darpadar kanaga bay ke dapi pa tai brátay hónay ér baragá pach ent, hamá hón ke cha tai dastá réchag butag.
GEN 4:12 Wahdé zeminá kára kanay, zemin pa taw bara nayárit o taw, jaháná darpadar o béáráma bay.”
GEN 4:13 Káená gón Hodáwandá gwasht: “Mani sezá cha mani sagg o bardáshtá dhann ent,
GEN 4:14 maróchi taw maná cha é sarzeminá gallénay. Man cha tai bárgáhá gára bán. Jaháná darpadar o béáráma bán o harkas ke gón man dhikk bwárt, maná koshit.”
GEN 4:15 Hodáwandá gón áiá gwasht: “Chosha nabit. Harkas ke tará bekoshit, áiay sezá hapt saria bit.” Gorhá Hodáwandá Káenárá nesháné per kort tánke agan kasé gón áiá dhikk bwárt, makoshiti.
GEN 4:16 Káen cha Hodáwanday bárgáhá dar but o Adanay ródarátká, Nóday sardhagárá nesht.
GEN 4:17 Káená gón wati janá wapt o wáb kort o áiay janay láp porr but o cha áiá Hanuk námén chokké pédá but. Káen shahré addh kanagá at o shahray námi wati mardénchokkay námay sará Hanuk kort.
GEN 4:18 Cha Hanuká Irád pédá but, cha Irádá Mehuyáil, cha Mehuyáilá Metusháil o cha Metusailá Lamék.
GEN 4:19 Laméká do jan gept, awaliay nám Ádah at o domiay Zellah.
GEN 4:20 Cha Ádahá Yábál pédá but. Yábál, hamá mardománi pet at ke gedánnend atant o dalwatesha dásht.
GEN 4:21 Yábálay brátay nám Yubál at. Yubál, chang o nal janókáni pet at.
GEN 4:22 Cha Zellahá, Tubál-Káen pédá but ke brenj o ásenay warh warhén awzár o sámánáni addh kanók at. Tubal-Káenay goháray nám Nahmah at.
GEN 4:23 Laméká gón wati janán gwasht: “Oo Ádah o Zellah! Mani tawárá gósh dárét. Oo Lamékay janán! Mani gappán gósh dárét. Yakk mardéá maná thappig kort o man á kosht, warnáén mardé ke maná thappigi kortagat.
GEN 4:24 Agan Káenay bér hapt sari geraga bit, Lamékay bér haptád o hapt sari geraga bit.”
GEN 4:25 Ádamá padá gón wati janá wapt o wáb kort o áiay janá mardénchokké áwort. Janá chokkay nám Sayt kort. Gwashti: “Hodáyá maná Hábilay badalá dega chokké dátag, parchá ke Káená Hábil kosht.”
GEN 4:26 Saytá ham mardénchokké but o áiay námi Énósh kort. Hamé wahdá mardomán Hodáwanday námay tawár kanag bendát kort.
GEN 5:1 Ádamay nasl o padréchay ketábi kessah chosh ent: Hodáyá á róchá ke ensán jórh kort, wati sheklá jórhi kort.
GEN 5:2 Mardén o janéni jórh kortant. Hamá wahdá ke addhi kortant, barkati dátant o áyáni námi ensán kort.
GEN 5:3 Ádamá ke 130 sál but, wati paymén, wati sheklay mardénchokkéay pet but o áiay námi Sayt kort.
GEN 5:4 Saytay pédáeshá rand, Ádamá 800 sál omr kort o áiá dega mardénchokk o janénchokk ham but.
GEN 5:5 É hesábá Ádamá sarjamiá 930 sál omr kort o mort.
GEN 5:6 Saytá ke 105 sál but, cha áiá Énósh pédá but.
GEN 5:7 Énóshay pédáeshá rand, Saytá 807 sál omr kort o áiá dega mardénchokk o janénchokk ham but.
GEN 5:8 É hesábá Saytá sarjamiá 912 sál omr kort o mort.
GEN 5:9 Wahdé Énóshá 90 sál but, cha áiá Kenán pédá but.
GEN 5:10 Cha Kenánay pédáeshá rand, Énóshá 815 sál omr kort o áiá dega mardénchokk o janénchokk ham but.
GEN 5:11 Énóshá sarjamiá 905 sál omr kort o mort.
GEN 5:12 Kenáná ke 70 sál but, cha áiá Mahalalél pédá but
GEN 5:13 Mahalalélay pédáeshá rand, Kenáná 840 sál omr kort o áiá dega mardénchokk o janénchokk ham but.
GEN 5:14 Kenáná sarjamiá 910 sál omr kort o mort.
GEN 5:15 Wahdé Mahalalélá 65 sál but, cha áiá Yáred pédá but.
GEN 5:16 Yáreday pédáeshá rand, Mahalalélá 830 sál omr kort o áiá dega mardénchokk o janénchokk ham but.
GEN 5:17 Mahalalélá sarjamiá 895 sál omr kort o mort.
GEN 5:18 Wahdé Yáred 162 sál but, cha áiá Hanuk pédá but.
GEN 5:19 Hanukay pédáeshá rand, Yáred 800 sál omr kort o áiá dega mardénchokk o janénchokk ham but.
GEN 5:20 Yáred sarjamiá 962 sál omr kort o mort.
GEN 5:21 Wahdé Hanuká 65 sál but, cha áiá Metushálah pédá but.
GEN 5:22 Metushálahay pédáeshá rand, Hanuká 300 sál Hodáay ráhá gáma jat o áiá dega mardénchokk o janénchokk ham but.
GEN 5:23 Hanukay sarjamén omr 365 sál but.
GEN 5:24 Hanuká Hodáay ráhá gáma jat o randá kassá nadist, chéá ke Hodáyá Hanuk zendagá zort o bort.
GEN 5:25 Wahdé Metushálahá 187 sál but, cha áiá Lamék pédá but.
GEN 5:26 Lamékay pédáeshá rand, Metushálahá 782 sál omr kort o áiá dega mardénchokk o janénchokk ham but.
GEN 5:27 Metushálahá sarjamiá 969 sál omr kort o mort.
GEN 5:28 Wahdé Laméká 182 sál but, cha áiá mardénchokké pédá but.
GEN 5:29 Áiá wati chokk Nuh námént o gwasht: “É chokk márá cha may dastáni hamá gránén kár o zahmatán ásudaga kant ke cha Hodáay nálat kortagén zeminá chest butagant.”
GEN 5:30 Nuhay pédáeshá rand, Laméká 595 sál omr kort o áiá dega mardénchokk o janénchokk ham but.
GEN 5:31 Laméká sarjamiá 777 sál omr kort o mort.
GEN 5:32 Nuhay omr 500 sál but o randá cha áiá Sám o Hám o Yápet pédá butant.
GEN 6:1 Zeminay sará, mardom ke gésh bayán butant o janénchokkesha áwort,
GEN 6:2 Hodáay mardénchokkána dist ke jenekk sharrang o zébá ant. Gorhá pa wat jenekesh gechéna kort o zort.
GEN 6:3 Nun Hodáwandá gwasht: “Mani arwáh tán abad ensánay jesm o jáná namánit, chéá ke ensán merókén chizzé o cha yakk sad o bist sálá géshter omra nakant.”
GEN 6:4 Á róchán o rand ham zeminay sará Nepilim hastatant. Hodáay mardénchokk ke ensánáni jenekkáni kerrá shotant, é jenekkán chokka áwort. É chokk kwahnén zamánagay mazanmard o námdárén mardom atant.
GEN 6:5 Hodáwandá dist ke ensánay radkári zeminay sará sakk báz ant o sajjahén del o hayálesh modám gón badiá ent o bass.
GEN 6:6 Hodáwand pashómán but ke man donyáyá ensán chéá jórh kort. Hodáwanday del sakk padard but.
GEN 6:7 Gwashti: “Wati jórh kortagén ensáná cha zeminay sará gár o gomsára kanán. Mardomán, chárpádén haywánán, lápkasshén jánwarán o ásmánay báli morgán yakjáh gomsára kanán, chéá ke man cha esháni jórh kanagá padard án.”
GEN 6:8 Bale Hodáwand cha Nuhá razá at.
GEN 6:9 Nuhay kessah chosh ent: Nuh, wati dawr o bárigay mardománi nyámá pahrézkár o béaybén mardé at. Á Hodáay ráhá at.
GEN 6:10 Nuh, say mardénchokkay pet at: Sám o Hám o Yápet.
GEN 6:11 Nun Hodáay chammán zemin sell o cha sheddatá porr at.
GEN 6:12 Hodáyá dist ke zemin sell butag, chéá ke donyáay sajjahén mardomán badén ráhé geptagat.
GEN 6:13 Gorhá Hodáyá gón Nuhá gwasht: “Man sajjahén mardomán tabáha kanán, chéá ke hamesháni sawabá zemin cha sheddatá porr ent. Man, esháni jendá gón zeminá hór, gár o gomsára kanán.
GEN 6:14 Cha góparay dárá pa wat mazanén bójigé jórh kan. Bójig, tóká kóthi kóthi bebit. Bójigay dhanná o tóká gón dhámbará dón.
GEN 6:15 Bójigá anchó addh kan ke drájiá say sad dast bebit, práhiá panjáh dast o borziá si dast.
GEN 6:16 Bójigay sará band, bale borzádi némagay chapp o chágerdá yakk dasté pach bell. Bójigay kashá darwázagé per kan. Bójigá say tabak kan: chéri, nyámi o borzi tabak.
GEN 6:17 Man donyáyá anchén hár o tuppáné kárán ke ásmánay chéray sajjahén sahdára merant, har sahdár ke dama kasshit, bérána bit. Harché ke zeminay sará hast, sajjahéna merant.
GEN 6:18 Bale man gón taw wati ahd o paymáná bandán. Taw bójigá swára bay; taw o tai bachakk o tai lógi o tai neshár.
GEN 6:19 Cha sajjahén sahdárán yakk yakk jotké gón wat bójigá bar gón, naréné o mádagéné, ke wati hamráhiá zendagesh bedáray.
GEN 6:20 Cha har tahray báli morg, har tahray chárpádén haywán, zeminay saray har tahray lápkasshén jánwarán, yakk yakk jotké tai kerrá kayt tánke é sajjahénán zendag bedáray.
GEN 6:21 Har paymén warák o warden bezur gón. Ambáresh kan ke shomayg o haywánáni waragay kárá káyant.”
GEN 6:22 Gorhá Nuhá hamé paymá kort. Harché ke Hodáyá gwashtagat, Nuhá kort.
GEN 7:1 Hodáyá gón Nuhá gwasht: “Taw gón wati lógay sajjahén mardomán bójigay tahá beraw, chéá ke mana gendán ke é naslá pahrézkár taw ay.
GEN 7:2 Cha sajjahén helárén haywánán hapt jotk gón wat bar gón, narén o áiay mádagéná, cha sajjahén harámén jánwarán yakk yakk jotké, narén o áiay mádagéná,
GEN 7:3 o cha ásmáni morgán hapt jotk, narén o mádagén, ke sarjamén zeminay sará áyáni naslá zendag bedáray.
GEN 7:4 Hapt róchá rand, anchén hawré gwárénán ke tán chell róch o chell shapá gwárit o man wati jórh kortagén sajjahén sahdárán cha zeminá gár o gomsára kanán.”
GEN 7:5 Harché ke Hodáwandá gwashtagat, Nuhá hamá paymá kort.
GEN 7:6 É wahdá ke zeminay sará hár átk, Nuhay omr shash sad sál at.
GEN 7:7 Nuh o áiay jan o chokk o neshár bójigá potertant ke cha hár o tuppáná berakkant.
GEN 7:8 Cha helári o harámén haywán o morg o sajjahén lápkasshén jánwarán,
GEN 7:9 jotk jotká, naréné o mádagéné, Nuhay kerrá átk o bójigá potert, hamá paymá ke Hodáyá Nuh hokm dátagat.
GEN 7:10 Hapt róchá rand zeminay sará hár o tuppáné átk.
GEN 7:11 Nuhay omray shash sadomi sálay domi máhay habdahomi róchá, johlánkiáni sajjahén chammag botkant o ásmánay darig pach butant.
GEN 7:12 Chell róch o chell shapá zeminay sará hawrán gwart.
GEN 7:13 Hamé róchay jendá Nuh o áiay chokk Sám o Hám o Yápet o Nuhay jan o sayén neshár bójigá potertant.
GEN 7:14 Áyáni hamráhiá har paymén sahdár wati tahray hesábá gón at; har paymén dalwat wati tahray hesábá, har paymén lápkasshén jánwar wati tahray hesábá o har paymén morg wati tahray hesábá, har paymén bánzolién sahdár.
GEN 7:15 Har sahdár ke zenday sáhi mán at, jotké jotké Nuhay kerrá átk o bójigá potert.
GEN 7:16 Hamá paymá ke Hodáyá Nuh hokm dátagat, har sahdáray nar o mádag bójigá potertant. Nun Hodáwandá darwázag bast.
GEN 7:17 Tán chell róchá zemin hárá mallet o áp gésh bayán but o bójigi cha zeminá borz chest kort.
GEN 7:18 Zeminay sará áp anchó ke borzter bayán but, bójig ham ápay sarborá trappal but.
GEN 7:19 Áp zeminay sarborá sakk chest but o sajjahén ásmánay chéray drostigén borzén kóh zéráp butant.
GEN 7:20 Áp borzter rawán but o kóhi chér o andém kortant. Áp cha kóháni thollán kesás chár gwáz borzter shot.
GEN 7:21 Zeminay saray sajjahén sahdár bérán butant; morg o dalwat o wakshién haywán o hamá sajjahén sahdár ke zeminay sará romb o ramaga kanant o sajjahén ensán ham.
GEN 7:22 Hamá sajjahén sorendah ke hoshkén zeminá atant, hamá ke zenday sáhesh mán at, bérán butant.
GEN 7:23 Hodáyá zeminay saray sajjahén sahdár gár o gomsár kortant. Ensán o jánwar o lápkassh o ásmánay morg, sajjahén cha zeminá gár butant. Éwaká Nuh o hamá ke gón áiá bójigá gón atant, pasht kaptant.
GEN 7:24 Tán yakk sad o panjáh róchá zemin ápá mán póshetagat.
GEN 8:1 Hodáyá Nuh o hamá sajjahén wakshién haywán o dalwat yát kortant ke Nuhay hamráhiá bójigá atant. Hodáyá zeminay sará gwáté ráh dát o áp ér áyán but.
GEN 8:2 Johlánkiáni chammag o ásmánay darig band butagatant o cha ásmáná hawráni gwárag ham band butagat.
GEN 8:3 Áp kamm kammá cha zeminay sará kamm b ayán but. Yakk sad o panjáh róchá rand áp jahl shotagat.
GEN 8:4 Haptomi máhay habdahomi róchá bójig Árárátay kóháni sará óshtát.
GEN 8:5 Tán dahomi máhá áp angat kamm bayán at. Dahomi máhay awali róchá kóháni tholl záher butant.
GEN 8:6 Chell róchá rand, Nuhá hamá darig pach kort ke áiá bójigá per kortagat.
GEN 8:7 Gwarágé dhanná ráhi dát. Gwarágá tán hamá wahdá bál kort o gasht ke zeminay saray áp hoshk butant.
GEN 8:8 Padá kapóté ráhi dát tán bechárit ke áp cha zeminay sará kamm butag yá na.
GEN 8:9 Bale kapótá choshén jáhé nadist ke wati pádán ér bekant, chéá ke sajjahén zemin angat ápay chérá at. Gorhá kapót bójigá, Nuhay kerrá per tarret. Nuhá wati dast shahárt, kapóti gept o bójigá áwort.
GEN 8:10 Nuhá dega hapt róch wadár kort o padá kapóti cha bójigá ráh dát.
GEN 8:11 Wahdé kapót bégáhá áiay kerrá per tarret, zaytunay tázagén táké dapá ati. Nun Nuhá zánt ke cha zeminay sará áp kamm butag.
GEN 8:12 Nuhá dega hapt róch wadár kort o padá kapóti ráh dát. É bari kapót áiay kerrá per natarret.
GEN 8:13 Nuhay omray shash sad o yakomi sálay awali máhay awali róchá zeminay saray áp hoshk butagat. Nuhá bójigay sarpósh kasshet o disti ke zemin hoshk ent.
GEN 8:14 Domi máhay bist o haptomi róchá zemin sarjamá hoshk at.
GEN 8:15 Gorhá Hodáyá gón Nuhá gwasht:
GEN 8:16 “Cha bójigá dar á, gón wati jan o chokk o neshárán.
GEN 8:17 Hamá sajjahén sahdár ke tai hamráh ant, dhanná baresh gón, báli morg o jánwar o sajjahén lápkasshán, tánke zeminay sará romb o ramag bekanant, chokk o bar bekanant o géshá gésh bebant.”
GEN 8:18 Gorhá Nuh gón wati jan o chokk o neshárán dar átk.
GEN 8:19 Sajjahén jánwar o sajjahén lápkassh o sajjahén báli morg o zeminay saray sajjahén sorendah cha bójigá dar átkant, har yakké wati tahray hesábá.
GEN 8:20 Nun Nuhá pa Hodáwandá korbánjáhé addh kort o cha helárén haywán o helárén báli morgán lahténi zort o korbánjáhá sóchagi korbánigi kortant.
GEN 8:21 Esháni wasshén bó ke Hodáwanday kerrá sar but, wati delá gwashti: “Man cha ed o rand hechbar zeminá ensánay sawabá nálata nakanán, bell toré cha kasániá áiay delay wáhag bad ant. Cha ed o dém hechbar sajjahén sahdárán é paymá hórigá gár o gomsára nakanán ke annun kortagon.
GEN 8:22 Tán hamá wahdá ke zemin hastent kesht o keshár o rón o móshay wahd, sárti o garmi, garmág o zemestán o róch o shapa naóshtant.”
GEN 9:1 Hodáyá Nuh o áiay chokk barkat dát o gwashtant: “Chokk o bar kanét o gésh bebét o donyáyá porr kanét.
GEN 9:2 Zeminay sajjahén haywán, ásmánay sajjahén báli morg, sajjahén lápkassh o daryáay sajjahén máhig shomay tors o bimmay chérá bant. É sajjahén shomay dastá dayag butagant.
GEN 9:3 Har sorendah ke sáhi mán ent, shomay waráka bit o anchó ke man shomárá sabzag dátagant, nun har chizza dayán.
GEN 9:4 Bale á góshtá hechbar mawarét ke áiá zend, bezán hón mán ent.
GEN 9:5 Harkas ke shomay hóná beréchit o sáhá begipt, man cha áiá hesába gerán. Cha har haywáná hesába gerán o cha har ensáná. Cha hamá mardomá hesába gerán ke dega mardoméá koshit, chéá ke mardom brát ant.
GEN 9:6 Harkas ensánéay hóná beréchit, áiay hón ham ensánéay dastá réchaga bit, chéá ke Hodáyá ensán wati sheklá addh kortag.
GEN 9:7 Nun shomá, chokk o bar kanét o zeminay sará gésh bebét, zeminay sará sheng o tálán o géshá cha gésh bebét.”
GEN 9:8 Gorhá Hodáyá gón Nuh o áiay chokkán ke Nuhay hamráh atant, gwasht:
GEN 9:9 “Nun man gón shomá o gón shomay randi naslán ahd o paymáné kanán.
GEN 9:10 Gón har sahdárá ke shomay kerrá ent, báli morg, dalwat o wakshién haywán o har yakk chizzéá ke gón shomá cha bójigá dar átkag, gón zeminay hamok sahdárá ham é ahd o paymáná kanán.
GEN 9:11 Man gón shomá wati é ahd o paymáná kanán ke dega baré sajjahén sahdár cha hár o tuppánay ápá bérána nabant; dega hechbar choshén háré nayayt ke sajjahén zeminá wayrán bekant.”
GEN 9:12 Hodáyá gwasht: “É hamá ahd o paymánay nesháni ent ke man, wati o shomay o hamá sajjahén sahdáráni nyámá bandagá án ke gón shomá gón ant. É pa sajjahén áyókén naslán ahd o paymáné.
GEN 9:13 Man wati sanj, jambaráni tahá ér kortag o é, mani o zeminay nyámá butagén ahd o paymánay neshánia bit.
GEN 9:14 Harwahd ke man zeminay sarborá jambara kárán o sanj ham jambaráni tahá záhera bit,
GEN 9:15 gorhá wati é ahd o paymánay yátá kapán ke mani o shomay o har tahray sajjahén sahdáráni nyámá ent. Nun áp hechbar chó hára nakant ke sajjahén sahdárán tabáh bekant.
GEN 9:16 Harwahd ke sanj jambaráni tahá záhera bit, mania gendán o hamá abadmánén ahd o paymánay yátá kapán ke mane Hodá o zeminay har tahray sajjahén sahdáráni nyámá butag.”
GEN 9:17 Hodáyá gón Nuhá gwasht: “Esh ent hamá ahd o paymánay nesháni ke man, wati o zeminay sajjahén sahdáráni nyámá bastag.”
GEN 9:18 Nuhay chokk cha bójigá dar átkant, Sám o Hám o Yápet. Hám Kanhánay pet at.
GEN 9:19 É sayén Nuhay chokk atant o cha hameshán mardom sajjahén zeminay sará sheng o tálán butant.
GEN 9:20 Nuhá kesht o keshár bendát kort o anguri bágé addhi kort.
GEN 9:21 Hamé anguray sharábi wárt, malár but o gedánay tahá jándar but.
GEN 9:22 Kanhánay pet Hámá, wati pet jándará dist o wati doén brát ke dhanná atant, hál dátant.
GEN 9:23 Sám o Yápetá kabáhé zort, wati kópagáni sará ér kort o poshtokái shotant o wati petay jándariesh póshént. Áyáni dém ángor at o wati petay jándariesh nadist.
GEN 9:24 Wahdé Nuh cha sharábay malárá dar átk, zánti mani kasterén bachakká gón man ché kortag,
GEN 9:25 gwashti: “Kanháná nálat bát. Wati brátáni golámáni golám bát.”
GEN 9:26 Nuhá gwasht: “Hodáwandá satá bát, Sámay Hodáyá. Kanhán, Sámay golám bát.
GEN 9:27 Hodá zeminá pa Yápetá práhter kanát. Yápet, Sámay gedánáni tahá jahmenend bát o Kanhán, áiay golám bát.”
GEN 9:28 Cha hárá rand Nuhá dega say sad o panjáh sál omr kort.
GEN 9:29 Nuhá sarjamiá noh sad o panjáh sál omr kort o mort.
GEN 10:1 Nuhay chokk, Sám o Hám o Yápetay nasl o padréchay kessah chosh ent: Eshán cha tuppáná rand chokk o bar kort.
GEN 10:2 Gumer o Májuj o Madái o Yáwán o Tubál o Máshek o Tirás, Yápetay mardénchokk atant.
GEN 10:3 Ashkenáz o Ripat o Tugarmah, Gumeray mardénchokk atant.
GEN 10:4 Elishah o Tarshish o Kettimi mardom o Dódánimi mardom, Yáwánay mardénchokk atant.
GEN 10:5 Cha eshán tayábdapi mardom wati sardhagárán tálán butant, har yakké gón wati jenday zobáná, wati kabilaháni hesábá, wati kawmáni tahá.
GEN 10:6 Kush o Mesráim o Put o Kanhán, Hámay mardénchokk atant.
GEN 10:7 Sebá o Hawilah o Sebtáh o Rámah o Sabteká, Kushay mardénchokk atant. Sabá o Dédán, Rámahay mardénchokk atant.
GEN 10:8 Cha Kushá Namrud pédá but ke zeminay sará awali zórmandén jangól at.
GEN 10:9 Hodáwanday chammán Namrud, zrengén shekárié at, paméshká gwashaga bit: “É mard, Hodáwanday chammán Namruday paymén mazanén shekárié.”
GEN 10:10 Namruday bádsháhiay bendát cha Bábel, Erek, Akkád o Kalnehá but ke Shináray sardhagárá atant.
GEN 10:11 Á cha é sardhagárá Áshurá shot o ódá Naynawá, Rahubut-Ir, Kálah o
GEN 10:12 Risenay shahri addh kortant. Risen, Naynawá o Kálahay nyámá ent, Kálah mazanén shahré.
GEN 10:13 Cha Mesráimá, Ludi o Anami o Lehábi o Naptuhi mardom pédá butant o
GEN 10:14 Patrusi o Kapturi o Kasluhi mardom, ke cha Kasluhián, Pilesti pédá butant.
GEN 10:15 Kanhánay awali chokk Saydun at o padá Hitti o
GEN 10:16 Yabusi o Amuri o Gergáshi o
GEN 10:17 Héwi o Arki o Sini o
GEN 10:18 Arwádi o Semári o Hamáti mardom pédá butant. Randá Kanháni kabilah sheng o tálán butant.
GEN 10:19 Kanhánay hadd o simsar, cha Sayduná ke dém pa Gerárá raway tán Gazzahá at o agan dém pa Sodum, Gomurah, Admah o Sebwimá raway, tán Lasháhá at.
GEN 10:20 Hámay naslay kessah, áyáni kabilah o zobán o sardhagár o kawmay hesábá hamesh at.
GEN 10:21 Sám ke Yápetay masterén brát at, áiá ham mardénchokk but. Sám, Eberay sajjahén chokkáni bonpirok ent.
GEN 10:22 Sámay mardénchokk, Ilám o Áshur o Arpakshád o Lud o Arám atant.
GEN 10:23 Arámay mardénchokk, Uz o Hul o Giter o Másh atant.
GEN 10:24 Arpakshád, Shelahay pet at o Shelah, Eberay pet.
GEN 10:25 Eberá do mardénchokk but, yakkéay nám Péleg at, chéá ke hamé wahdá zemin bahr o báng but. Brátay námi Yoktán at.
GEN 10:26 Yoktán, Almudád o Shélep o Hazarmáwet o Yérah o
GEN 10:27 Hadurám o Uzál o Deklah o
GEN 10:28 Óbál o Abimáél o Sabá o
GEN 10:29 Ópir o Hawilah o Yubábay pet at. É sajjahén Yoktánay mardénchokk atant.
GEN 10:30 Á damagá ke é nendók atant, cha Mesháyá dém pa Sepárá at, ródarátkay kóhestagén molká.
GEN 10:31 Sámay chokkáni kessah, áyáni kabilah o zobán o sardhagár o kawmay hesábá hamesh at.
GEN 10:32 Nuhay mardénchokkáni kabilah, áyáni sar o bonay red o banday sará, áyáni kawmáni hesábá hamesh atant. Tuppáná rand cha hameshán sajjahén kawm zeminay sará sheng o tálán butant.
GEN 11:1 Sajjahén donyáay zobán yakkén at o labz yakkén atant.
GEN 11:2 Mardom ke cha ródarátká laddhetant, Shináray sardhagárá dashté distesh o hamódá jahmenend butant.
GEN 11:3 Gón yakdomiá gwashtesh: “Byá, heshta janén o sharriay sará pachénesh.” Áyán sengay jáhá hesht kára bast o gelay jáhá dhámbar.
GEN 11:4 Gwashtesh: “Byá pa wat shahré addha kanén, anchén borjé máni bebit ke sartholli ásmáná sar bebit, tánke pa wat námé ér bekanén ke sajjahén zeminay sará sheng o sháng mabén.”
GEN 11:5 Hodáwand ér átk tánke hamá shahr o borjá bechárit ke mardomi addh kanagá atant.
GEN 11:6 Hodáwandá gwasht: “Edá bechár, nun é yakkén ráj o kawm ant o sajjahénáni zobán yakk ent. Agan é káresh bendát kortag, cha ed o dém é harché kanag belóthant, pa eshán nabutenia nabit.
GEN 11:7 Byá, jahláda rawén o esháni zobáná garh o manja kanén ke é, yakdomiay habarán sarpad mabant.”
GEN 11:8 Hodáwandá, é mardom cha ódá sajjahén zeminay sará sheng o sháng kortant o eshán shahray addh kanagay kár band kort.
GEN 11:9 Paméshká á shahray nám Bábel but ke Hodáwandá ódá sajjahén donyáay yakkén zobán garh o manj kort. Áiá mardom cha ódá zortant o sajjahén zeminay sará sheng o sháng kortant.
GEN 11:10 Sámay nasl o padréchay kessah chosh ent: Tuppáná do sálá rand wahdé Sámay omr 100 sál at, cha áiá Arpakshád pédá but.
GEN 11:11 Arpaksháday pédáeshá rand, Sámá 500 sál omr kort o áiá dega mardénchokk o janénchokk ham but.
GEN 11:12 Arpaksháday omr 35 sál at ke cha áiá Shelah pédá but.
GEN 11:13 Shelahay pédáeshá rand, Arpakshádá 403 sál omr kort o áiá dega mardénchokk o janénchokk ham but.
GEN 11:14 Shelahay omr 30 sál at ke cha áiá Eber pédá but.
GEN 11:15 Eberay pédáeshá rand, Shelahá 403 sál omr kort o áiá dega mardénchokk o janénchokk ham but.
GEN 11:16 Eberay omr 34 sál at ke cha áiá Péleg pédá but.
GEN 11:17 Pélegay pédáeshá rand, Eberá 430 sál omr kort o áiá dega mardénchokk o janénchokk ham but.
GEN 11:18 Pélegay omr 30 sál at ke cha áiá Rahu pédá but.
GEN 11:19 Rahuay pédáeshá rand, Pélegá 209 sál omr kort o áiá dega mardénchokk o janénchokk ham but.
GEN 11:20 Rahuay omr 32 sál at ke cha áiá Serug pédá but.
GEN 11:21 Serugay pédáeshá rand, Rahuá 207 sál omr kort o áiá dega mardénchokk o janénchokk ham but.
GEN 11:22 Serugay omr 30 sál at ke cha áiá Náhór pédá but.
GEN 11:23 Náhóray pédáeshá rand, Serugá 200 sál omr kort o áiá dega mardénchokk o janénchokk ham but.
GEN 11:24 Náhóray omr 29 sál at ke cha áiá Térá pédá but.
GEN 11:25 Téráay pédáeshá rand, Náhórá 119 sál omr kort o áiá dega mardénchokk o janénchokk ham but.
GEN 11:26 Téráay omr 70 sál but o randá cha áiá Ebrám o Náhór o Hárán pédá butant.
GEN 11:27 Téráay nasl o padréchay kessah chosh ent: Cha Téráyá Ebrám o Náhór o Hárán pédá butant. Cha Háráná Lut pédá but.
GEN 11:28 Háránay pet, Térá angat zendag at o Hárán mán Kaldániáni shahr Urá mort, hamódá ke pédá butagat.
GEN 11:29 Ebrám o Náhór, doénán sur o sáng kort. Ebrámay lógiay nám Sárái at o Náhóray lógiay nám Melkah. Melkah, Háránay jenekk at o Hárán, Melkah o Yaskáhay pet.
GEN 11:30 Sárái santh at o chokki néstat.
GEN 11:31 Téráyá wati chokk Ebrám o nomásag Lut, ke Háránay chokk at o wati neshár, bezán Ebrámay jan Sárái zortant o cha Kaldániáni shahr Urá dar átk. É sajjahén dém pa Kanhánay sardhagárá ráh geptant, bale wahdé Háránay shahrá rasetant, hamódá neshtant.
GEN 11:32 Téráyá do sad o panch sál omr kort o Háráná mort.
GEN 12:1 Hodáwandá gón Ebrámá gwasht: “Wati molk, wati syád o wáres o wati petay lógá yalah day o cha edá hamá molká beraw ke man tará péshia dárán.
GEN 12:2 Man tará mazanén kawmé jórha kanán, tará barkata dayán o tai námá borza kanán o taw barkaté bay.
GEN 12:3 Hamá mardom ke tará barkata dayant, man áyán barkata dayán o hamá mardom ke tará nálata kanant, man áyán nálata kanán o zeminay sajjahén kawm tai sawabá barkata gerant.”
GEN 12:4 Gorhá hamá paymá ke Hodáwandá gón Ebrámá gwashtagat, Ebrám shot o Lut ham áiay hamráh but. Ebrám ke cha Háráná dar átk, omri haptád o panch sál at.
GEN 12:5 Ebrámá wati lógi Sárái o brázátk Lut hamráh kortant o dém pa Kanháná ráh gept. Hamá sajjahén mál ke áyán mocch kortagatant o hamá mardom ke Háráná áyáni dastá kaptagatant, áiá gón wat bortant gón. Kanhánay sardhagárá átk o rasetant.
GEN 12:6 Ebrám á molká tarr o táb kanán tán Murehay mazanén drachkay jágahá, Shekémá shot. Á wahdá, é molká Kanháni nendók atant,
GEN 12:7 Bale Hodáwand, Ebrámay démá záher but o gwashti: “Cha mani némagá é sardhagár tai nasl o padréchayg ent.” Gorhá Ebrámá ódá pa Hodáwandá, ke áiay démá záher butagat, korbánjáhé addh kort.
GEN 12:8 Cha ódá á, dém pa kóhestagá, Bayt-Élay ródarátki némagá shot o wati gedáni anchén jágahé mekk kort ke Bayt-Élay shahr áiay rónendi némagá o Ayáay shahr, ródarátki némagá at. Ódá pa Hodáwandá korbánjáhé addhi kort o Hodáwanday námi tawár kort.
GEN 12:9 Gorhá Ebrám cha ódá dar átk o dém pa Negébá rawán but.
GEN 12:10 Bale Kanháná dhokkál at o Ebrám, dém pa Mesrá jahlád ráh gept tánke pa wahdéá hamódá, darámadéay paymá bedárit, chéá ke sakkén dhokkálé at.
GEN 12:11 Wahdé Mesray nazzikká átk o raset, gón wati lógi Sáráiá gwashti: “Mana zánán ke taw zébáén janéné ay.
GEN 12:12 Mesri tará begendant, gwashant: ‘É, eshiay lógi ent,’ gorhá maná koshant bale tará zendagá kellant.
GEN 12:13 Begwash ke man eshiay gohár án, tánke pa taigi gón man sharr bebant o tai sawabá mani sáh berakkit.”
GEN 12:14 Ebrám ke Mesrá átk, Mesrián dist ke Sárái sakkén zébáén janéné.
GEN 12:15 Perawnay apsarán ke Sárái dist, Perawnay kerrá áiay sárháyagá laggetant o Sárái Perawnay kalátá barag but.
GEN 12:16 Perawn, Sáráiay háterá gón Ebrámá mehrabán but o Ebrám pas o gók o lág o mádyán o golám o móled o oshteráni wáhond but.
GEN 12:17 Bale Hodáwandá Ebrámay lógi, Sáráiay sawabá Perawn o áiay lógay sará mazanén wabá o warh warhén nádráhi dawr dát.
GEN 12:18 Perawná Ebrám lótháént o gwasht: “É che káré at ke taw gón man kort? Taw chéá maná hál nadát ke é tai lógi ent?
GEN 12:19 Chéá gwashtet: ‘É mani gohár ent,’ ke man pa jani zort? Bechár, é tai jan ent. Zuri o beraw.”
GEN 12:20 Perawná Ebrámay bárawá wati apsár hokm dátant o áyán Ebrám gón lógi o sajjahén mál o hastiá rahádag kort.
GEN 13:1 Ebrámá harché ke hastat, zortanti o gón wati lógiá cha Mesrá borzád ráh gept o Negébá shot. Lut ham gón áiá gón at.
GEN 13:2 Ebrám, mál o dalwat o teláh o nograhá báz hastómand at.
GEN 13:3 Á, cha Negébá laddhán o rawán tán Bayt-Élá raset, tán Bayt-Él o Ayáay shahráni nyámá, hamá jágahá ke pésará wati gedáni mekk kortagat,
GEN 13:4 hamá jágahá ke pésará korbánjáhé addhi kortagat. Ódá Ebrámá Hodáwanday nám tawár kort.
GEN 13:5 Lut ham ke Ebrámay hamsapar at, áiá pas o dalwat o gedán hastat.
GEN 13:6 Bale jágah pa Lut o Ebrámay yakjáh nendagá kamm at, chéá ke mál o dalwatesh báz at. Paméshká hór neshtesh nakort.
GEN 13:7 Ebrám o Lutay shepánk arhetant. Á zamánagá Kanháni o Perizzi ham é sardhagárá jahmenend atant.
GEN 13:8 Gorhá Ebrámá gón Lutá gwasht: “Má brát én. Mani o tai nyámá, yá mani o tai shepánkáni nyámá arh o korhé mabit.
GEN 13:9 Sajjahén molk tai démá ent. Cha man jetá bay. Agan taw chappén némagá raway, man rásténá rawán o agan taw rástén némagá raway, man chappéná rawán.”
GEN 13:10 Lutá chamm chest kortant, disti ke Ordonay sajjahén dasht, tán Sóhará séráp ent, Hodáwanday bágay dhawlá, Mesray sardhagáray dhawlá. É cha á wahdá pésar at ke Hodáwandá Sodum o Gomurahay shahr gár o bégwáh kortant.
GEN 13:11 Gorhá Lutá Ordonay sajjahén dasht pa wat gechén kort o dém pa ródarátká ráh gept o doén mard cha yakdomiá jetá butant.
GEN 13:12 Ebrám Kanhánay sardhagárá nesht o Lut hamá shahrán jahmenend but ke dashtá atant. Lutá wati gedán zort o Sodumay nazzikká mekk kortant.
GEN 13:13 Sodumay mardom badkár o Hodáwanday démá báz gonahkár atant.
GEN 13:14 Lut ke cha Ebrámá jetá but, Hodáwandá gón Ebrámá gwasht: “Cha wati hamé jágahá, chammán chest kan o shomál, jonub, ródarátk o rónenday némagá bechár,
GEN 13:15 é sajjahén molká ke taw gendagá ay, cha mani némagá é tán abad tai o tai nasl o padréchayg ent.
GEN 13:16 Tai nasl o padréchá zeminay danzáni paymá báza kanán, agan kasé danz o gobárán hesáb korta kant, gorhá tai nasl o padréchá ham hesáb korta kant.
GEN 13:17 Pád á, é molkay dráji o práhiá tarr o gard bekan, ke eshiá man tará dayán.”
GEN 13:18 Gorhá Ebrámá wati gedán chest kortant o Hebruná shot o Mamrehay mazanén drachkáni nazzikká jahmenend but. Ódá pa Hodáwandá korbánjáhé addhi kort.
GEN 14:1 Shináray bádsháh Amrápel o Elásaray bádsháh Aryuk o Ilámay bádsháh Kedorlámer o Góimay bádsháh Tidálay zamánagá,
GEN 14:2 é bádsháhán gón Sodumay bádsháh Bárah o Gomurahay bádsháh Bershá o Admahay bádsháh Shenáb o Sebwimay bádsháh Shémeber o Bélahay bádsháhá jang kort. Bélahay domi nám Sóhar ent.
GEN 14:3 Nun é goddhi panchén bádsháh, Seddimay daragá, bezán Wádzeray daragá yakjáh butant.
GEN 14:4 Eshán tán dwázdah sálá Kedorlámeray hezmat kort o sézdahomi sálá sarkeshiesh kort.
GEN 14:5 Chárdahomi sálá Kedorlámer gón hamráhén bádsháhán átk o mán Asterut-Karnaymá Repáhi mahluki prósh dát, Zuzi mahluki mán Hámá o Émi mahluki mán Sháweh-Keryátaymá prósh dátant.
GEN 14:6 Hórái mahluki, mán kóhestagén molká, Sahirá beger tán El-Páráná prósh dát. El-Párán gyábánay nazzikká ent.
GEN 14:7 Nun per tarretant o En-Meshpátá bezán Kádeshá átkant o Amálikiáni sajjahén molkesh gept. Hasásun-Tamárá neshtagén Amuriáni molkesh ham gept.
GEN 14:8 Gorhá Sodumay bádsháh, Gomurahay bádsháh, Admahay bádsháh, Sabuimay bádsháh o Bélahay, bezán Sóharay bádsháh, dhanná dar átkant o Seddimay daragá janagay tayáriesh kort o
GEN 14:9 gón Ilámay bádsháh Kedorlámer o Góimay bádsháh Tidál o Shináray bádsháh Amrápel o Elásaray bádsháh Aryuká jangesh kort, bezán chár bádsháh, panch bádsháhay helápá.
GEN 14:10 Seddimay darag cha dhámbaray kandhá porr at o wahdé Sodum o Gomurahay bádsháh tatkant, báz mardom é kandháni tahá kapt o é dega mardom dém pa kóhestagá tatkant.
GEN 14:11 Gorhá chárén bádsháhán Sodum o Gomurahay sajjahén mál o maddhi o tóshag zort o shotant.
GEN 14:12 Ebrámay brázátk Lut, Sodumá jahmenend at. Áesh ham gept o gón sajjahén mál o maddhiá gón wat bort.
GEN 14:13 Yakk mardomé tatk o Ebránién Ebrámay kerrá átk o é háli dát. É wahdá Ebrám, Amurién Mamrehay mazanén drachkáni nazzikká neshtagat. Amurién Mamreh, Eshkul o Áneray brát at. Esháni o Ebrámay nyámá ahd o paymáné hastat.
GEN 14:14 Wahdé Ebrámá eshkot ke mani brázátk gerag o barag butag, wati hamá say sad o hazhdahén dar áwortagén jangól, ke áiay lógá pédá butagatant, zortanti o tán Dánay shahrá dozhmenáni randá kapt.
GEN 14:15 Shapay wahdá áiá wati hamráh thóli thóliá bahr kortant o dozhmenay sará oroshi kort o próshi dátant o tán Hóbahá, ke Dameshkay shomálá ent, áyáni randá kapt.
GEN 14:16 Ebrámá sajjahén mál o maddhi pach geptant o wati brázátk Lut o áiay mál o hasti, janénádam o é dega mardom padá áwortant.
GEN 14:17 Wahdé Ebrám cha Kedorlámer o áiay hampattén bádsháháni prósh dayagá rand per tarragá at, Sodumay bádsháh tán Sháwehay daragá, ke bádsháhay darag ent, áiay péshwáziá átk.
GEN 14:18 Gorhá Salimay bádsháh Malkisediká, ke borzén arshay Hodáay dini péshwá at, nán o sharáb áwort.
GEN 14:19 Áiá Ebrám barkat dát o gwasht: “Ebrám! Tará cha borzén arshay Hodá, ásmán o zeminay addh kanókay némagá barkat berasát.
GEN 14:20 Borzén arshay Hodáyá satá o saná bát ke dozhmeni tai dastá dátant.” Gorhá Ebrámá, áiárá cha har chizzá dahyakk dát.
GEN 14:21 Sodumay bádsháhá gón Ebrámá gwasht: “Mani mardomán maná beday o mál o maddhián bezur, taig ant.”
GEN 14:22 Ebrámá gón Sodumay bádsháhá gwasht: “Man Hodáwanday démá, borzén arshay Hodá, ásmán o zeminay jórh kanókay démá dast chest kortag o sawgend wártag
GEN 14:23 harché ke taig ent, man cha áyán heccha nazurán, yakk bandikké yá swásbandé ham nazurán. Chosh mabit taw begwashay ke Ebrám man hastómand kortag.
GEN 14:24 Man hecch chizza nazurán abéd cha hamá warákán ke warnáyán wártagant o hamá mardománi bahrá ke mani hamráhiá átkagant, bezán Áner, Eshkul o Mamreh. Á wati bahrá bezurant.”
GEN 15:1 Cha é chizzán o rand, Hodáwanday habar elhám o shobénéay tahá pa Ebrámá átk: “Oo Ebrám! Mators, man tai espar án. Tai enám sakk mazan ent.”
GEN 15:2 Bale Ebrámá gwasht: “Oo Hodáwandén Hodá! Taw maná ché dayay? Maná wa chokk nést o mani lógay wáres Dameshki Elizar ent.”
GEN 15:3 Padá gwashti: “Taw maná chokk o poshpadé nadátag o bándá róch mani lógay hezmatkáré mani wáresa bit.”
GEN 15:4 Bale Hodáwanday habar Ebrámá sar but ke é hezmatkár tai wáresa nabit, tai jendá mardénchokké bit o hamá tai wáresa bit.
GEN 15:5 Hodáwandá Ebrám dhanná bort o gwasht: “Ásmáná bechár o estárán hesáb kan, agan hesábesh korta kanay. Tai nasl o padréch esháni paymá báza bit.”
GEN 15:6 Ebrámá Hodáwanday sará báwar kort o Hodáwandá Ebrámay é báwar, pa áiá páki o palgárié hesáb kort.
GEN 15:7 Nun Hodáwandá gón áiá gwasht: “Man hamá Hodáwand án ke tará cha Kaldániáni shahr, Urá daron kort o áwort ke é sardhagárá tará bedayán o taw eshiay wáhond bebay.”
GEN 15:8 Bale Ebrámá gwasht: “Oo Hodáwandén Hodá! Man chón bezánán ke eshiay wáhonda bán?”
GEN 15:9 Gorhá Hodáwandá gwasht: “Pa man say sáligén mádagén góké, say sáligén bozé, say sáligén gwarándhé, shántolé o kasánén kapóté byár.”
GEN 15:10 Ebrámá é sajjahén pa Hodáwandá áwort o do kappá kortant o har tal, domi talay démá ér kort, bale morgi kapp nakortant.
GEN 15:11 Dhundhwárén morg ke é jónáni sará neshtant, Ebrámá galléntant.
GEN 15:12 Wahdé róch ér nendagá at, Ebrám gránén wábéá gept o bazén o torsnákén taháriéá áiay sará mán shánt.
GEN 15:13 Gorhá Hodáwandá gwasht: “Deljam bay o bezán ke tai nasl o padréch anchén sardhagáréá darámadéáy paymá jahmenenda bit ke á molk áyáni naent. Tai óbádag ódá goláma bant o tán chár sad sálá zolm o zórákiay ámácha bant.
GEN 15:14 Bale man, á kawmá sezá dayán ke tai naslá goláma kant. Padá tai padréch gón mazanén mál o maddhiéá cha ódá dara kayt.
GEN 15:15 Bale taw wat pa émeni wati bonpirokáni kerrá raway o sharrén mazanén omréá rand kabr kanaga bay.
GEN 15:16 Tai padréch, cháromi naslá edá pera tarrit chéá ke Amuriáni badkári angat purah o sarjam nabutag.”
GEN 15:17 Róch ke ér nesht o taháriá mán shánt, ásdáné ke dutt dayán at gón rókén mashaléá záher but o cha taláni nyámá gwast.
GEN 15:18 Á róchá Hodáwandá gón Ebrámá ahd o paymáné kort o gwashti: “Cha mani némagá é sardhagár cha Mesray shépá beger tán Parátay mazanén kawrá tai nasl o padréchayg ent,
GEN 15:19 bezán Kani o Kanizzi o Kadmuni o
GEN 15:20 Hitti o Perizzi o Repáhi o
GEN 15:21 Amuri o Kanháni o Gergáshi o Yabusi mahlukay sarzemin.”
GEN 16:1 Ebrámay lógi Sáráiá chokka nabut. Sáráiá Mesri móledé hastat ke námi Hájer at.
GEN 16:2 Sáráiá gón Ebrámá gwasht: “Hodáwandá mani dém dáshtag o chokk áworta nakanán. Taw beraw o gón mani móledá bwaps ke balkén maná cha áiay némagá chokké bebit.” Ebrámá Sáráiay gapp zort.
GEN 16:3 Wahdé Ebrámá dah sál Kanháná gwázéntagat, áiay jan Sáráiá wati Mesri móled Hájer zort o Ebrámárá pa jani dát.
GEN 16:4 Ebrámá gón Hájerá wapt o wáb kort o Hájeray láp porr but. Wahdé Hájerá zánt ke mani láp porr ent, wati bánokay mán nayáragi bendát kort.
GEN 16:5 Gorhá Sáráiá gón Ebrámá gwasht: “É azáb o sheddat ke mani sará kaptag, eshiay zemmawár taw ay. Man wati móled tai bagalá dát o nun wahdé á zánt ke lápi porr ent, maná mána nayárit. Hodáwand mani o tai nyámá dádras bát.”
GEN 16:6 Bale Ebrámá gón Sáráiá gwasht: “Tai móled tai dastá ent, gón áiá hamá paymá bekan ke tai delá sharter ent.” Gorhá Sárái, Hájeray sará trond but o Hájer cha áiá tatk.
GEN 16:7 Hodáwanday préshtagá Hájer gyábáná, chammagéay kerrá dist. É hamá chammag ent ke Shuray ráhay sará ent.
GEN 16:8 Préshtagá gwasht: “Oo Hájer, Sáráiay móled! Taw cha kojá átkagay o kojá rawagá ay?” Hájerá gwasht: “Man cha wati bánok Sáráiá tachagá án.”
GEN 16:9 Gorhá Hodáwanday préshtagá gwasht: “Wati bánokay kerrá wátarr kan o watá hamáiay dastá day.”
GEN 16:10 Préshtagá chosh ham gwasht: “Hodáwanda gwashit ke man tai nasl o padréchá anchó báza kanán ke cha hesábá dhanna bant.”
GEN 16:11 Hodáwanday préshtagá padá gwasht: “Nun taw lápporr ay o mardénchokké káray. Chokkay námá Esmáél bekan chéá ke Hodáwandá tai peryát eshkotag.
GEN 16:12 É bachakk wakshién haré bit. É sajjahénáni dozhmena bit o sajjahén eshiay dozhmeniá kanant. É wati zendá gón wati sajjahén brátán pa jang o jérhaha gwázénit.”
GEN 16:13 Hodáwandá ke gón Hájerá habar kort, Hájerá Hodáwandárá é nám bast: “Taw hamá Hodá ay ke maná genday.” Chéá ke Hájerá gwasht: “Nun man hamá dist ke maná modáma gendit.”
GEN 16:14 Paméshká é chát, Behér-Lahái-Rui nám kapt. É chát, Kádesh o Béreday nyámá ent.
GEN 16:15 Gorhá Hájerá pa Ebrámá mardénchokké pédá kort o Ebrámá Hájeray áwortagén chokkay nám Esmáél kort.
GEN 16:16 Wahdé Hájer pa Esmáélá chellag but, Ebrámay omr hashtád o shash sál at.
GEN 17:1 Ebrámá ke nawad o noh sál but, Hodáwand áiay démá záher but o gwashti: “Man porwákén Hodá án, mani ráhá beraw o pa bémayári zend begwázén.
GEN 17:2 Man wati o tai nyámay ahd o paymáná pakká kanán ke tai chokk o nomásagán sakk báza kanán.”
GEN 17:3 Gorhá Ebrám dém pa chér kapt o Hodáyá gón áiá gwasht:
GEN 17:4 “Bechár, é gón taw mane Hodáay ahd o paymán ent ke taw bázén kawméay peta bay.
GEN 17:5 Cha ed o rand tai nám Ebráma nabit, tai nám Ebráhéma bit, chéá ke man tará bázén kawméay pet kortag.
GEN 17:6 Man tará sakk báz porsamara kanán o cha taw kawm o ráj jórha kanán o cha taw bádsháh wadia bant.
GEN 17:7 Man wati o tai nyámay ahd o paymáná abadmánén ahd o paymáné jórha kanán, gón taw o gón tai áyókén nasl o padréchá. Man tai Hodá án o cha taw rand tai poshpaday Hodá bán.
GEN 17:8 Man Kanhánay sajjahén sardhagárá, ke annun taw edá darámadé ay, tai o cha taw rand tai nasl o padréchay abadi melkata kanán o áyáni Hodá bán.”
GEN 17:9 Gorhá Hodáyá gón Ebráhémá gwasht: “Bale tawe Ebráhém báyad ent mani ahd o paymáná barjáh bedáray, tai jend o tai nasl o padréch, posht dar posht.
GEN 17:10 Mani ahd o paymán gón tai jendá o cha taw rand gón tai poshpadá esh ent o báyad ent shomá barjáhi bedárét: Shomay har mardén báyad ent borrok o sonnat kanag bebit.
GEN 17:11 Shomá watá sonnat bekanáénét. É hamá ahd o paymánay neshánia bit ke mani o shomay nyámá ent.
GEN 17:12 Áyókén nasl o padrécháni tahá, shomay nyámá hamok hasht róchigén mardénchokk báyad ent sonnat kanag bebit, tahná shomay jenday lógay chokk na, hamá zarharidén golámchokk ham ke shomay nasl o padréch naant o shomá cha dhanni mardomán pa bahá zortagant, á ham sonnat kanag bebant.
GEN 17:13 Toré shomay lógá pédá bebant yá ke shomá áyán pa bahá begerét, báyad ent sonnat kanag bebant. É paymá shomay jesm o jáná, mani ahd o paymán abadmána bit.
GEN 17:14 Har sonnat nakortagén mardén ke jesmi sonnat kanag nabutag, cha wati kawmá sendaga bit, chéá ke mani ahd o paymáni próshtag.”
GEN 17:15 Hodáyá gón Ebráhémá gwasht: “Bale wati lógi Sáráiá cha ed o rand Sárái tawár makan, áiay nám Sáraha bit.
GEN 17:16 Man barkatia dayán o tará cha áiá mardénchokké bit. Man Sárahá barkata dayán o á kawmáni máta bit, kawmáni bádsháh cha áiá pédá bant.”
GEN 17:17 Gorhá Ebráhém dém pa chér kapt o kandeti o wati delá gwashti: “Cha sad sáligén mardéá chokké pédá bit? Sárah nawad sálagiá chokké kárit?”
GEN 17:18 Ebráhémá gón Hodáyá gwasht: “Esmáél wati zendá tai bárgáhá begwázénát.”
GEN 17:19 Hodáyá gwasht: “Enna, tai jan Sárah chokké kárit o taw báyad ent chokkay námá Esák bekanay. Man wati ahd o paymáná gón Esáká barjáha dárán o cha áiá rand, é pa áiay nasl o padréchá abadmánén ahd o paymáné bit.
GEN 17:20 Esmáélay bárawá ham man tai habar gósh dásht: Man áiá allam barkata dayán, áiá porsamara kanán o áiay nasl o padréchá sakk báza kanán. Á dwázdah shahzádagay peta bit o cha áiá mazanén kawmé pédá kanán.
GEN 17:21 Bale wati ahd o paymáná gón Esáká barjáha dárán ke démi sálá hamé wahdá cha Sárahá pédá bit.”
GEN 17:22 Wahdé Hodáyá wati habar gón Ebráhémá halás kortant, cha áiay kerrá borzád shot.
GEN 17:23 Hamá róchá Ebráhémá wati chokk Esmáél, wati lógá pédá butagén sajjahén mardén o zarharidén golám, lógay sajjahén mardén zort o sonnat kanáéntant, hamá paymá ke Hodáyá gwashtagat.
GEN 17:24 Ebráhém wahdé sonnat kanag but, omri nawad o noh sál at.
GEN 17:25 Áiay chokk Esmáélá sézdah sál at.
GEN 17:26 Pet o chokk hamá yakkén róchá sonnat kanag butant.
GEN 17:27 Ebráhémay lógay sajjahén mardén, hamá ke áiay lógá pédá butagatant o hamá zarharidén golám ke áiá cha dhanni mardomán pa bahá zortagatant, gón áiá hórigá sonnat kanag butant.
GEN 18:1 Hodáwand Mamrehay mazanén drachkáni nazzikká Ebráhémay démá záher but. Némróchay thák at o Ebráhém wati gedánay dapá neshtagat.
GEN 18:2 Ebráhémá chamm chest kortant, disti ke say mard mani nazzikká óshtátag. Áiá ke distant, cha gedánay dapá pa eshtápi áyáni wasshátká shot, pa adab sari jahl kort o
GEN 18:3 gwashti: “Oo mani wájah! Maná ezzat beday, cha wati hezmatkárá sar magwaz o gón man bejall.
GEN 18:4 Bell bachakk pa shomay pádáni shódagá kammé ápa kárant, shomá drachkay chérá árám kanét.
GEN 18:5 Shomá ke wati hezmatkáray kerrá átkagét, bell pa shomá waraga kárán, áp o támé bekanét o randá démá berawét.” Gwashtesh: “Sharr, harché ke taw gwashay.”
GEN 18:6 Ebráhém eshtáp eshtápá Sárahay kerrá gedáná shot o gwashti: “Zutt kan, say kyás sharrén árt bezur, tarresh kan o nagan bepach.”
GEN 18:7 Ebráhémá wat dém pa góromá maydán kort, sharrén pazzórén gwaské dari chet o hezmatkáréá dáti. Hezmatkárá zutt addh kort.
GEN 18:8 Gorhá shir o shillánch o patkagén góshti zort o áyáni démá dátant. Á ke waragá atant, Ebráhém áyáni kerrá, drachkay chérá óshtát.
GEN 18:9 Áyán jost gept: “Tai lógi Sárah kojá ent?” Ebráhémá passaw dát: “Ódá gedánay tahá ent.”
GEN 18:10 Gorhá cha áyán yakkéá gwasht: “Áyókén sálá hamé wahdá allamá tai kerrá pera tarrán o tai lógi Sárahá mardénchokké gwarána bit.” Sárah áiay poshti némagá, gedánay dapá, gósh dáragá at.
GEN 18:11 Nun Ebráhém o Sárah pir o ájez atant o Sárahá janéni máhánaga nabut.
GEN 18:12 Gorhá Sárahá delá kandet o gwasht: “Man pir án o mani wájah ájez ent, nun maná che wasshi o lezzaté rasit?”
GEN 18:13 Gorhá Hodáwandá gón Ebráhémá gwasht: “Sárahá chéá kandet o gwasht: ‘É piránsariá, pa rásti maná chokké bit?’
GEN 18:14 Choshén káré hast ke pa Hodáwandá grán bebit? Gisshetagén wahdá, démi sálá tai kerrá pera tarrán o Sárahá mardénchokké bit.”
GEN 18:15 Sárahá torset, drógi bast o gwashti: “Man nakandet.” Bale Hodáwandá gwasht: “Pa rásti taw kandet.”
GEN 18:16 É sayén mard cha ódá pád átk o ráh geptant. Dém pa Sodumá cháretesh. Ebráhém ham shot gón ke áyán rahádag bekant.
GEN 18:17 Gorhá Hodáwandá gwasht: “Á kár ke maná kanagi ent, cha Ebráhémá chéri bedayán?
GEN 18:18 Ebráhém allamá mazan o zórmandén kawmé jórha bit o áiay sawabá zeminay sajjahén kawm barkata gerant.
GEN 18:19 Chéá ke man, Ebráhém dar chetag ke wati chokk o lógay mardomán hokm bedant ke cha áiá rand, pa pahrézkári o ensáp mane Hodáwanday ráhá rawán bebant tánke pa Ebráhémá hamá kárá bekanán ke gón áiá kawlon kortag.”
GEN 18:20 Gorhá Hodáwandá gwasht: “Sodum o Gomurahay helápá peryáté chest ent. Áyáni gonáh haminchok báz ant
GEN 18:21 ke man jahláda rawán o charán bárén áyáni kortagén kár hamá peryátay kaddá báz ant ke pa man sar butag? Agan chosh naent, wa man sahiga bán.”
GEN 18:22 Gorhá á mardán wati ráh táb dát o dém pa Sodumá shotant, bale Ebráhém angat Hodáwanday bárgáhá óshtók at.
GEN 18:23 Gorhá Ebráhém nazzikk átk o gwashti: “Taw pa rásti pahrézkárá ham gón badkárá rópay o baray?
GEN 18:24 Agan shahrá panjáh pahrézkárén mardom bebit, gorhá? Angat á shahrá rópay o baray? Hamá panjáhén pahrézkáráni háterá á shahrá nabakshay?
GEN 18:25 Cha tai dastá choshén káré mabát ke pahrézkárá gón badkárá hór bekoshay o pahrézkár o badkárá yakkén chammá becháray. Sajjahén jahánay dádras pa hakk o ensáp kára nakant?”
GEN 18:26 Hodáwandá gwasht: “Agan Sodumay shahrá panjáh pahrézkár begendán, áyáni háterá á sajjahén jágahá bakshán.”
GEN 18:27 Ebráhémá passaw dát o gwasht: “Man ke hák o poré án, man nun haminkas delér butagán ke gón Hodáwandá habara kanán,
GEN 18:28 bale agan cha panjáhén pahrézkárán panch kamm bebit, pa é panchén mardománi kamm bayagá sajjahén shahrá tabáha kanay?” Hodáwandá passaw dát: “Agan man chell o panch ham begendán, shahrá tabáha nakanán.”
GEN 18:29 Ebráhémá padá gón áiá gwasht: “Agan chell bebant?” Hodáwandá gwasht: “Hamé chellénáni háterá ham tabáhia nakanán.”
GEN 18:30 Gorhá gwashti: “Oo Hodáwand! Zahr magerátay, bale bell ke man habara kanán, agan tahná si bebant?” Hodáwandá passaw dát: “Agan si begendán ham shahrá tabáha nakanán.”
GEN 18:31 Ebráhémá gwasht: “Nun ke man del kortag o gón tawe Hodáwandá habar kanagá án, agan ódá tahná bist bebit?” Gwashti: “É bisténáni háterá ham shahrá tabáha nakanán.”
GEN 18:32 Ebráhémá gwasht: “Oo Hodáwand! Zahr magerátay, man angat gappé kanaga lóthán. Agan ódá tahná dah bebit, gorhá?” Passawi tarrént: “Á dahén mardománi háterá ham á shahrá tabáha nakanán.”
GEN 18:33 Wahdé Hodáwandá gón Ebráhémá habar halás kort, cha ódá shot o Ebráhém ham wati lógá per tarret.
GEN 19:1 Bégáhá, doén préshtag Sodumá sar butant. Lut shahray darwázagay dapá neshtagat. Wahdé préshtagi distant, pád átk o áyáni péshwáziá shot, pa adab sari jahl kort o
GEN 19:2 gwashti: “Oo mani wájahán! Wati kasteray lógá byáét o wati pádán beshódét. Shapá hamedá bejallét o bámgwáhá sar begerét.” Áyán gwasht: “Enna, má wati shapá shahray chárráhá gwázénén.”
GEN 19:3 Bale Lutá haminchok mennat kortant ke áyán ráh táb dát o Lutay lógá shotant gón. Lutá pa áyán shámé tayár kort, béhomirén nagani addh kort o áyán wárt.
GEN 19:4 Á angat nawaptagatant ke cha Sodumay har kondhá sajjahén mardén, pir o warná átkant o lógesh angerr kort.
GEN 19:5 Áyán Lut gwánk jat o gwasht: “Hamé bachakk ke enshapi tai lógá átkagant, kojá ant? May kerrá byáresh ke má gón áyán wapt o wába kanén.”
GEN 19:6 Lut dhanná dar átk o poshtá darwázagi band kort.
GEN 19:7 Gwashti: “Na, mani brátán! Man dasta bandán, é badén kárá makanét.
GEN 19:8 Bechárét, maná do janénchokk hast ke angat gón hecch mardéná wapt o wábesh nakortag. Man áyán shomay kerrá kárán, gón áyán harché shomay dela lóthit, bekanét. Bale é mardomán kár madárét ke mani lógá átkagant o mani mayár ant.”
GEN 19:9 Áyán gwasht: “Yakk kerr bay” o watmánwatá gwashtesh: “É mard darámadé at o may shahrá átkag. Nun may masteriá kanaga lóthit.” Padá gón Lutá gwashtesh: “Nun má tai jendá cha é bachakkán gantera kanén.” Lutesh télánk dayán kort o démá shotant ke darwázagá bepróshant.
GEN 19:10 Bale préshtagán dast dhanná shahárt, Lutesh lógay tahá kasshet o darwázagesh bast.
GEN 19:11 Préshtagán, darwázagay dapay mardománi, warná o pirénáni chamm tahár kortant ke darwázagá dar gétk makanant.
GEN 19:12 Nun á doénán gón Lutá gwasht: “Tará edá dega kasé hast, zámát, bacch, jenekk, yá dega syád o wáresé ke é shahrá ent? Agan hast, gorhá cha edá daresh kan
GEN 19:13 ke má é jágahá tabáha kanén. É shahray helápá anchén mazanén peryáté Hodáwandá sar butag ke márá pa é shahray tabáh kanagá rawáni dátag.”
GEN 19:14 Gorhá Lut shot o wati zámáti gwashtant, hamá ke gón áiay jenekkán sáng kanagi atant: “Eshtáp kanét o cha edá dar kapét ke Hodáwand é shahrá tabáha kant.” Bale áiay zámátán delá gwasht ke Lut maskará kanagá ent.
GEN 19:15 Bámgwáh ke but, préshtagán Lut hojj kort o gwasht: “Zutt kan wati jan o doén jenekkán cha edá bezur o beraw, agan na é shahr ke sezá dayaga bit, shomá ham rópag o baraga bét.”
GEN 19:16 Bale Lutá ke dér kort, á mardán, Lut o Lutay jan o doén jenekk dastá geptant o cha shahrá dhann bortant, chéá ke Hodáwandá áyáni sará rahm kortagat.
GEN 19:17 Wahdé áesh cha shahrá dhann bortant, cha préshtagán yakkéá gwasht: “Betach o poshtá chakk majan. Dashtá hecch jágah maósht. Dém pa kóhán betach, agan na rópag o baraga bay.”
GEN 19:18 Bale Lutá gwasht: “Enna wájahán! Rahm kanét.
GEN 19:19 Shomá mani sará, wati kasteray sará rahm kortag o gón mani zenday rakkénagá pésh dáshtag ke chinkadar mehrabán ét. Bale man dém pa kóhán tatka nakanán. Chó mabit ke é tabáhi maná mán berópit o man bemerán.
GEN 19:20 Bechár, mani nazzikká shahré hast ke dém pa áiá tatka kanán. Kasánén shahré, bell ke dém pa áiá betachán. É wa kasánén shahré, na? Gorhá mani jána rakkit.”
GEN 19:21 Préshtagá gwasht: “Sharr ent, tai é wáhagá puraha kanán o é shahray námá ke taw geragá ay, eshiá tabáha nakanán.
GEN 19:22 Bale zutt betach o beraw. Tánke taw ódá sara nabay, man hecch korta nakanán.” Paméshká é shahray námesh Sóhar kort.
GEN 19:23 Lut ke Sóhará raset, róchá nóki thekk kortagat.
GEN 19:24 Gorhá Hodáwandá Sodum o Gomurahay sará ás o gókort gwárént. É ás o gókort cha Hodáwanday némagá, cha ásmáná retkant.
GEN 19:25 É paymá, Hodáwandá á shahr o sajjahén dasht o shahráni sajjahén jahmenend o sabzag tabáh kortant.
GEN 19:26 Bale Lutay janá poshtá chakk jat o wáday boté but.
GEN 19:27 Ebráhém sohbá máhallah pád átk o hamá jágahá shot ke pésarigén randá Hodáwanday bárgáhá óshtátagat.
GEN 19:28 Sodum o Gomurahay némagá, jahlá, sajjahén dashtay némagá cháreti o disti ke cha zeminá bazén dutté chest ent, chó kurahay duttá.
GEN 19:29 Hodáyá ke dashtay shahr sar o chér kortant, Ebráhémay tránagá kapt. Hamá shahrán ke Lut jahmenend butagat, áyáni tabáh kanagay wahdá Hodáyá Lut cha ódá dar kort.
GEN 19:30 Lut gón wati doén jenekkán cha Sóhará laddhet o kóhestagá jahmenend but, chéá ke Sóhará nendagi torset. Lut gón doén jenekkán gáréay tahá nesht.
GEN 19:31 Yakk róché masterén jenekká gón kasteréná gwasht: “May pet pir ent o edá dega hecch mardéné nést ke gón má wapt o wábé bekant, anchó ke sajjahén donyáay dód ent.
GEN 19:32 Byá petá sharába wárénén o gón áiá wapt o wába kanén ke cha hamáiá wati nasl o padréchá démá bebarén.”
GEN 19:33 Á shapá wati petesh sharáb wárént o masterén jenekk shot o gón petá wapt o wábi kort. Lut na áiay wapsagá sahig but, na pád áyagá.
GEN 19:34 Domi róchá masterén jenekká gón kasteréná gwasht: “Dóshi man shot o gón petá waptán, byá enshapi padá sharábia dayén o taw beraw o gón áiá bwaps. Cha hamáiá wati nasl o padréchá démá barén.”
GEN 19:35 Gorhá pésarigén shapay paymá wati petesh sharáb wárént, kasterén jenekk pád átk o gón petá wapt o wábi kort. Lut na áiay wapsagá sahig but, na pád áyagá.
GEN 19:36 Lutay doén jenekk cha wati petá lápporr butant.
GEN 19:37 Masterén jenekká mardénchokké but o námi Muáb kort. Muáb, maróchigén Muábiáni pet ent.
GEN 19:38 Kasterén jenekká ham mardénchokké but o námi Ben-Ammi kort. Ben-Ammi maróchigén Ammuniáni pet ent.
GEN 20:1 Ebráhém cha ódá laddhet o Negébay damagá shot o Kádesh o Shuray nyámá jahmenend but. Tán chizzé wahdá Gerárá darámadéay paymá zendi gwázént.
GEN 20:2 Ebráhémá wati jan Sárahay bárawá gwasht: “Mani gohár ent.” Gorhá Geráray bádsháh, Abimaleká wati mardom rawán dátant o Sárahi wati kerrá bort.
GEN 20:3 Bale shapá Hodá Abimalekay wábá átk o gwashti: “Bechár, é janén ke taw bortag, taw eshiay sawabá meray. É sur kortagéné.”
GEN 20:4 Abimalek angat Sárahay nazzikká nashotagat, gwashti: “Oo mani Hodáwand! Bégonáhén kawmé tabáha kanay?
GEN 20:5 Ebráhémá wat gón man nagwasht: ‘É mani gohár ent’? O Sárahá wat nagwasht: ‘É mani brát ent’? Man é kár gón sápén del o pákén dasté kortag.”
GEN 20:6 Hodáyá gwasht: “Haw! Mana zánán ke taw é kár gón sápén delé kortag o man ham tará naesht ke mani gonahkár bebay, paméshká man tará é janénay dast janagá naesht.
GEN 20:7 Nun é marday janá beday. É mard nabié. Pa taw dwá kant o taw zendaga mánay. Bale agan é marday janá madayay, deljam bay ke tai jend o tai sajjahén mardom allamá merant.”
GEN 20:8 Abimalek sohbá máhallah pád átk, wati sajjahén hezmatkári lótháéntant o harché ke butagat, sajjahén háli dátant. Áyán sakk torset.
GEN 20:9 Gorhá Abimaleká Ebráhém lótháént o gwasht: “Taw chéá gón má chosh kort? Man tai kojám kár haráb kortagat ke taw mani jend o mani molk choshén mazanén gonáhé sará dátant? Taw gón man anchén káré kort ke kass gón kassá nakant.”
GEN 20:10 Abimaleká cha Ebráhémá jost kort: “Tai delá ché hastat ke choshet kort?”
GEN 20:11 Ebráhémá passaw dát: “Man wati delá gwasht edá hecch Hodátorsi nést o mani lógiay sawabá mardom maná koshant.
GEN 20:12 Sárah chónáhá wa mani gohár ent ke mani petay chokk ent, bell toré mani mátay chokk naent, bale randá má sur kort o á mani lógi but.
GEN 20:13 Wahdé Hodáyá maná cha mani petay lógá darpadar kort, man gón Sárahá gwasht: ‘Agan maná dósta dáray, har jágah ke rawén, begwash: “É mani brát ent.”’”
GEN 20:14 Gorhá Abimaleká pas o gók o golám o móled áwort o Ebráhémárá dát o áiay lógi Sárahi per tarrént.
GEN 20:15 Abimaleká gwasht: “Mani molk tai démá ent, har jáh ke tará dósta bit hamódá benend.”
GEN 20:16 Gón Sárahá gwashti: “Man tai brátá hazár nograha dayán. Tai sajjahén mardománi démá é malámá porra kanán ke taw hecch radié nakortag.”
GEN 20:17 Gorhá Ebráhémá Hodáay kerrá dwá kort o Hodáyá Abimalek, áiay lógi o áiay móled dráh kortant ke padá chokk áwort bekanant,
GEN 20:18 chéá ke Hodáwandá Ebráhémay jan Sárahay sawabá Abimalekay lógay sajjahén janén chokband kortagatant.
GEN 21:1 Hamá paymá ke Hodáwandá wat gwashtagat, Sárahay sará mehrabán but o pa Sárahá hamá kári kort ke wádahi kortagat.
GEN 21:2 Sárahay láp porr but o Ebráhémay piránsariá pa áiá mardénchokké áworti. Chokk hamá gisshetagén wahdá pédá but ke Hodáyá cha pésará Ebráhém hál dátagat.
GEN 21:3 Ebráhémá wati é chokkay nám, ke cha Sárahá pédá butagat, Esák kort.
GEN 21:4 Esákay omr ke hasht róch but, Ebráhémá sonnat kanáént, hamá paymá ke Hodáyá hokm dátagat.
GEN 21:5 É wahdá ke Esák pédá but, Ebráhémay omr sad sál at.
GEN 21:6 Sárahá gwasht: “Hodáyá maná ‘kandag’ dátag o harkas ke sahiga bit, gón mana kandit.”
GEN 21:7 Padá gwashti: “Kayá gón Ebráhémá gwashta kort ke Sárah chokk shira méchénit? Bale man pa áiá mardénchokké áwort, áiay piriay róchán.”
GEN 21:8 Chokk rodán but o cha shirá sestesh. É róchá ke Esákesh cha shirá sest, Ebráhémá mazanén dáwaté kort.
GEN 21:9 Bale Sárahá dist ke Ebráhémay hamá chokk ke cha Mesri Hájerá pédá butagat, maná kalág geragá ent.
GEN 21:10 Gorhá Sárahá gón Ebráhémá gwasht: “É móledá gón chokká gallén. É móleday chokk gón mani chokk Esáká hechbar hammirás buta nakant.”
GEN 21:11 É gappá Ebráhém sakk paréshán kort, chéá ke Esmáél ham áiay chokk at.
GEN 21:12 Bale Hodáyá gón Ebráhémá gwasht: “Pa bachakká o wati móledén zálá paréshán mabay. Harché Sárah tará gwashit, hamá warh bekan, chéá ke tai nasl o padréch cha Esáká zánaga bit.
GEN 21:13 Man móledén zálay chokká ham kawmé kanán chéá ke á ham tai nasl o padréch ent.”
GEN 21:14 Domi sohbá máhallah Ebráhémá tóshag o mashké áp zort o Hájerárá dát. Mashk o tóshagi Hájeray kópagá dátant o gón chokká dari kort. Hájer shot o Bérshébahay gyábáná sargardán but.
GEN 21:15 Mashkay áp ke halás butant, chokki dhólokéay boná ér kort,
GEN 21:16 wat dur shot o kesás tirkasshéay ráhá dém pa démá nesht. Delá gwashti: “Chokkay marká magendátán.” Chokkay dém pa démá ke neshtagat, kukkár kort o gréti.
GEN 21:17 Hodáyá chokkay tawár eshkot o Hodáay préshtagá cha ásmáná Hájer gwánk jat o gwasht: “Hájer! Tará ché butag? Mators. Chokk hamá jágahá ke ér ent, Hodáyá áiay tawár cha hamódá eshkotag.
GEN 21:18 Pád á, chokká chest kan, dastái ger ke man áiá mazanén kawmé kanán.”
GEN 21:19 Hodáyá Hájeray chamm pach kortant o Hájerá ápay cháté dist. Shot o mashki porr kort o chokki áp dát.
GEN 21:20 Chokk rodán but o Hodá gón áiá gón at. Chokká gyábáná zenda gwázént o tirkamánay janagá sakk balad but.
GEN 21:21 Esmáél, Páránay dashtá jahmenend but o mátá gón Mesri jenekkéá sur dát.
GEN 21:22 Hamé wahdá Abimalek o áiay lashkaray master Pikulá gón Ebráhémá gwasht: “Taw harché ke kanay, Hodá gón taw gón ent.
GEN 21:23 Nun edá gón man Hodáay sawgendá bwar ke maná yá mani chokkán yá mani óbádagán rada nadayay. Hamá paymá ke man gón taw mehrabán butagán, taw gón man o gón mani molká hamé paymá mehrabán bay, gón hamé molká ke taw darámadéay hesábá neshtagay.”
GEN 21:24 Ebráhémá gwasht: “Maná sawgend ent.”
GEN 21:25 Ebráhémá Abimalekay kerrá áiay hezmatkáráni shekáyat kort ke mani cháté poshtá kasshetagesh.
GEN 21:26 Abimaleká gwasht: “Mana nazánán é kár kayá kortag. Taw maná hál nadátag o tán maróchi man eshiay bárawá hecch naeshkotag.”
GEN 21:27 Gorhá Ebráhémá pas o gók zort o Abimalekárá dátant o doén mardán ahd o paymáné bast.
GEN 21:28 Ebráhémá hapt kasánén mésh cha ramagá jetá kort.
GEN 21:29 Abimaleká cha Ebráhémá jost kort: “Taw hapt kasánén mésh jetá kort, eshiay máná ché ent?”
GEN 21:30 Ebráhémá passaw dát: “É haptén méshán cha mani némagá bezur. É sháhedié bit ke é chát manig ent o man jatag.”
GEN 21:31 Gorhá á jágahay nám Bérshébah kanag but, chéá ke doén mardán ódá sawgendé wárt.
GEN 21:32 É paymá mán Bérshébahá ahd o paymáné bastesh. Randá Abimalek o áiay lashkaray master Pikulá Pilestiáni sardhagárá wátarr kort.
GEN 21:33 Ebráhémá Bérshébahá gazzay drachké kesht o ódá Hodáwand, abadmánén Hodáay námi tawár kort.
GEN 21:34 Tán mazanén wahdéá Ebráhémá Pilestiáni sardhagárá darámadéay hesábá zenda gwázént.
GEN 22:1 É chizzán o rand, Hodáyá Ebráhém chakkáset. Gón Ebráhémá gwashti: “Ebráhém!” Ebráhémá passaw dát: “Ji!”
GEN 22:2 Hodáyá gwasht: “Wati bacch, wati yakkén chokk, Esák ke tará dóst ent, bezuri o Muriáay damagá beraw. Hamá kóhá ke man tará pésha dárán, hamódá bar o sóchagi korbánigay hesábá nadri kan.”
GEN 22:3 Domi sohbá máhallah, Ebráhém pád átk o wati hari pálám kort. Wati do hezmatkár o Esáki zortant, pa sóchagi korbánigá dári prósht o dém pa hamá jágahá ráh gept ke Hodáyá gwashtagat.
GEN 22:4 Nun saparay sayomi róch at. Ebráhémá chamm chest kortant o cha durá á jágahi dist.
GEN 22:5 Gón wati hezmatkárán gwashti: “Shomá gón hará hamedá bejallét, man o chokk ódá rawén o Hodáyá parastesha kanén o káén.”
GEN 22:6 Ebráhémá sóchagi korbánigay dár zortant o wati chokk Esákay baddhá dátant, ás o kárchi wat zortant o doén ráh geptant.
GEN 22:7 Esáká gón wati pet Ebráhémá gwasht: “Mani pet!” Ebráhémá passaw dát: “Ji mani chokk!” Esáká gwasht: “Ás o dár wa esh ant, bale sóchagi korbánigay gwarándh kojá ent?”
GEN 22:8 Ebráhémá passaw dát: “Mani chokk! Sóchagi korbánigay gwarándhay kárá Hodá wat chár o gozára kant” o á doén rawán butant.
GEN 22:9 Wahdé hamá jágahá sar butant ke Hodáyá gwashtagat, Ebráhémá korbánjáhé addh kort, dári sar pa sar kortant o wati chokk Esáki bast o korbánjáhá, dáráni sará ér kort.
GEN 22:10 Ebráhémá dast shahárt o kárchi zort ke wati chokká helára kanán,
GEN 22:11 bale Hodáwanday préshtagá cha ásmáná Ebráhém tawár kort: “Ebráhém! Oo Ebráhém!” Ebráhémá passaw dát: “Ji!”
GEN 22:12 Préshtagá gwasht: “Wati dastá bedár o chokká hecch makan. Nun mana zánán ke taw Hodátorsé ay, chéá ke taw chakk o pad nabutay o wati bacch, wati yakkén chokk ham maná dát.”
GEN 22:13 Ebráhémá chamm chest kortant o poshtá cháret, disti ta gwarándhé ke kánthi dhangarán mán gisshetagant. Ebráhém shot, gwarándhi zort o wati chokkay jágahá sóchagi korbánig kort.
GEN 22:14 Ebráhémá á jágahay nám kort “Hodáwand chár o gozára kant” o tán maróchigá gwashaga bit ke: “Hodáwanday kóhay sará, chár o gozár kanaga bit.”
GEN 22:15 Hodáwanday préshtagá padá Ebráhém cha ásmáná gwánk jat.
GEN 22:16 Gwashti: “Hodáwanda gwashit: ‘Maná wati saray sawgend ent, taw ke wati bacchay, wati yakkén chokkay dayagá chakk o pad nabutay,
GEN 22:17 man ham pa rásti tará barkata dayán o tai nasl o padréchá anchó báza kanán ke ásmánay estár o tayábay rék ant. Tai poshpad wati dozhmenáni shahrána gerant o wati melkata kanant o
GEN 22:18 zeminay sajjahén kawm tai poshpaday sawabá barkata gerant, chéá ke taw mani habar zortag.’”
GEN 22:19 Gorhá Ebráhém wati hezmatkáráni kerrá per tarret o á, hórigá dém pa Bérshébahá ráh geptant. Ebráhém Bérshébahá jahmenend but.
GEN 22:20 Chizzé wahdá rand Ebráhémesh sahig kort ke Melkahá ham chokk áwortag, pa tai brát Náhórá chokki pédá kortag.
GEN 22:21 Áiay awali chokk Uz ent, Uzay brát Buz o Kemuil ant, Kemuil, Arámay pet ent.
GEN 22:22 É dega chokki Kesed o Hazó o Pildásh o Yadláp o Betwél ant.
GEN 22:23 Cha Betwélá Rebekká pédá but. Ebráhémay brát Náhóray é hashtén chokk cha Melkahá pédá butant.
GEN 22:24 Náhóray soriat ke námi Rahumah at, cha áiá Tebah o Gaham o Tahásh o Mákah pédá butant.
GEN 23:1 Sárahá yakk sad o bist o hapt sál omr kort. Áiay zenday sál o róch haminkas atant.
GEN 23:2 Sárah, Kanhánay sardhagárá, Keryah-Arbahá bérán but. Keryah-Arbahay domi nám Hebrun ent. Ebráhém shot ke porsá benendit o pa Sárahá begrét.
GEN 23:3 Padá cha láshay kerrá pád átk o gón Hittián gwashti:
GEN 23:4 “Man shomay nyámá darkawm o darámadé án. Maná pa kabrestánéá, zemini thokkoré bahá bedayét ke wati mordagá kabr kort bekanán.”
GEN 23:5 Hittián passaw dát:
GEN 23:6 “Oo mani wájah! May habarán gósh dár. Taw may nyámá porwákén shahzádagé ay. Wati mordagá may kabrestáná, gechéni jágahéá kabr kan. Cha má kass, tará cha tai mordagay kabr kanagá nadárit.”
GEN 23:7 Ebráhém pád átk o á sardhagáray mardom, bezán Hittiáni démá pa adab sari jahl kort.
GEN 23:8 Gón áyán gwashti: “Agan shomá rázig ét ke man wati mordagá kabr bekanán, gorhá mani habará gósh dárét o Sóharay chokk Eprunay kerrá mani sepáreshá bekanét,
GEN 23:9 ke wati gárá mani kerrá bahá bekant, hamá gár ke Makpélahá áiay dhagáray goddhi bahrá ent. Jágahay purahén kimmatá cha man begipt ke maná shomay molká kabrestáné bebit.”
GEN 23:10 Eprun Hitti hamódá mardománi nyámá neshtagat. Ebráhémay passawi anchosh dát ke áiay shahray darwázagay dapá átkagén sajjahén Hitti beshkonant:
GEN 23:11 “Enna, wájah! Kimmatay habará makan. Mani gappá gósh dár. Man á gár o dhagár doén tará dátagant. Mani é sajjahén mardománi démá, á dhagár taig ent. Wati mordagá ódá kabr kan.”
GEN 23:12 Ebráhémá padá á molkay mardománi démá sar jahl kort o
GEN 23:13 gón Epruná anchó gwashti ke mardom beshkonant: “Agan mani habarán gósha dáray, man dhagáray kimmatá dayán. Eshiay zarrán cha man bezur ke man wati mordagá ódá kabr kort bekanán.”
GEN 23:14 Epruná passaw dát:
GEN 23:15 “Mani wájah! Mani habará gósh dár. Dhagáray kimmat nograhay chár sad shekel ent. É manig o tai nyámá hecché naent. Wati mordagá kabr kan.”
GEN 23:16 Ebráhémá Eprunay habar zort o hamá kimmati tór kort ke Epruná gwashtagat o Hittián eshkotagat, bezán nograhay chár sad shekel, sawdagaráni gisshetagén sang o tóray hesábá.
GEN 23:17 Gorhá Eprunay dhagár ke Makpélahá, Mamrehay nazzikká at, sajjahén Hittiáni démá ke shahray darwázagá átkagatant, á dhagár o dhagáray tahay gár o sajjahén drachk, Ebráhémay melkat butant.
GEN 23:19 Nun Ebráhémá wati lógi Sárah, Makpélahay dhagáray gárá, Kanhánay sarzeminá kabr kort. É gár Mamrehay nazzikká ent o Mamreh Hebruná ent.
GEN 23:20 Hittián é dhagár gón gárá Ebráhémárá dát ke kabrestáné bekanti.
GEN 24:1 Nun Ebráhém pir o kamásh at. Hodáwandá Ebráhém har chizzá barkat dátagat.
GEN 24:2 Ebráhémay lógá kwahnén hezmatkáré hastat ke áiay sajjahén kár o báráni sarók at. Ebráhémá gón áiá gwasht: “Wati dastá mani zánay chérá ér kan.
GEN 24:3 Man tará Hodáwanday sawgendá dayán, ásmán o zeminay Hodáay sawgendá dayán, ke cha é Kanhánián, ke man esháni nyámá zend gwázenagá án, cha esháni jenekkán mani chokká jana nadayay.
GEN 24:4 Mani molká raway o mani chokk Esáká hamódá cha mani jenday syádán jané dayay.”
GEN 24:5 Hezmatkárá cha áiá jost kort: “Bale agan jenekk pa é molkay áyagá rázig mabit, gorhá tai chokká hamá molká per betarrénán ke taw cha ódá átkagay?”
GEN 24:6 Ebráhémá gwasht: “Hechbar mani chokká ódá per matarrén.
GEN 24:7 Hodáwand, ásmánay Hodá, hamá ke maná cha mani petay lóg o mani pédáeshay molká edá áworti, hamá Hodá ke gón man habari kort, kasam o sawgendi wárt o kawli kort ke ‘cha mani némagá é sardhagár tai nasl o padréchayg ent’, hamá Hodá wati préshtagá cha taw pésar ráha dant ke taw cha ódá pa mani chokká jané dar gétk bekanay.
GEN 24:8 Agan á jenekk gón taw áyagá rázig nabut, gorhá taw cha mani é sawgendá ázát ay. Bale mani chokká ódá per matarrén.”
GEN 24:9 Gorhá hezmatkárá dast wati wájah Ebráhémay zánay chérá ér kort o hamé sawgend wárt.
GEN 24:10 Hezmatkárá cha wati wájahay oshterán dah oshter zort o rahádag but. Cha wájahay némagá tahr tahrén gechéni théki áiá gón at. Pád átk o dém pa Arám-Nahraymá rawán but. Náhóray shahr hamódá at.
GEN 24:11 Cha shahrá dhann, chátéay kerrá oshteri jókéntant. Bégáhay wahd at o é wahdá janén pa ápay kasshagá átkant.
GEN 24:12 Áiá dwá kort o gwasht: “Oo Hodáwand! Mani wájahén Ebráhémay Hodá! Maróchi maná sóbén kan o mani wájahén Ebráhémay sará mehrabán bay.
GEN 24:13 Bechár, man é chammagay kerrá óshtátagán o shahray mardománi jenekk pa ápay kasshagá pédák ant.
GEN 24:14 Hamá jenekk ke agan man gwasht: ‘Wati kunzagá jahl kan, man ápa warán’ o áiá gwasht: ‘Byá bwar, man tai oshterán ham ápa dayán’ mana zánán ke hamé jenekk taw pa wati hezmatkárén Esáká gechén kortag. Man cha hamé gappá zánán ke taw pa mani wájahá mehrabán butagay.”
GEN 24:15 Áiá angat dwá halás nakortagat ke Rebekkáyá wati kunzag kópagá at o átk. Rebekká Betwélay jenekk at. Betwél Melkahay mardénchokk at o Melkah, Ebráhémay brát Náhóray jan at.
GEN 24:16 Jenekk sakkén sharrangé at. Janénchokké at o angat gón hecch mardéná nawaptagat. Rebekká dém pa chammagá jahlád ráh gept, kunzagi porr kort o padá borzád but.
GEN 24:17 Hezmatkár tacháná áiay kerrá shot o gwashti: “Maná cha wati kunzagá kammé áp beday.”
GEN 24:18 Rebekkáyá gwasht: “Bwar, mani wájah!” Zutt zuttá kunzagi gón doén dastán jahl kort o ápi dát.
GEN 24:19 Rebekkáyá hezmatkár áp dát, randá gwashti: “Man tai oshterán ham ápa dayán, tán hamá wahdá ke wat bass bekanant.”
GEN 24:20 Eshtáp eshtápiá kunzagi tagáray tahá hálig kort o dém pa chátá tachán but ke dega áp byárit. Pa áiay sajjahén oshterán ápi kasshet.
GEN 24:21 Mard bétawár at o Rebekkáyá cháragá at tán bezánt bárén Hodáwandá mani sapar sóbén kortag yá na.
GEN 24:22 Oshterán ke ápay warag bass kort, mardá sohray polóhé dar kort ke kesás shash gerám at o pa áiay dastán sohray do hattali ke har yakkéay wazan kesás sad o bist gerám at.
GEN 24:23 Josti kort: “Taw kai jenekk ay? Maná begwash, tai petay lógá jágah hast ke má wati shapá ódá begwázénén?”
GEN 24:24 Rebekkáyá gwasht: “Man Betwélay jenekk án. Betwél, Melkah o Náhóray chokk ent.”
GEN 24:25 Padá gwashti: “Márá káh o kadim ham báz hast o choshén jágah ham hast ke shomá shapá bedárét.”
GEN 24:26 Mardá wati sar jahl kort, Hodáwanday shogri gept o
GEN 24:27 gwashti: “Hodáwandá satá bát, mani wájah Ebráhémay Hodáyá ke gón mani wájahá wati mehr o wapádárii barjáh dáshtag o dém pa mani wájahay syádáni lógay é sapará mani rahshón butag.”
GEN 24:28 Jenekk tachán but o mátay lógay mardomi hál dátant.
GEN 24:29 Rebekkáyá bráté hastat ke námi Lábán at. Lábán tachán but o chammagay kerrá, hezmatkáray némagá shot.
GEN 24:30 Lábáná ke wati goháray pónzay polóh o dastay hattali distant o anchó ke goháray gappi eshkot ke á mardá gón áiá ché gwashtagat, dar átk o marday némagá shot. Disti ke mard chammagay sará oshteráni kerrá óshtátag.
GEN 24:31 Gwashti: “Oo Hodáwanday barkat dátagén! Byá, dhanná chéá óshtátagay? Man lóg tayár kortag o pa oshterán ham jágahon gisshéntag.”
GEN 24:32 Gorhá mard lógá shot. Oshteráni báresh ér gétkant o oshteresh káh o kadim kortant. Pa marday jend o hamráhán ápesh áwort ke wati pádán beshódant.
GEN 24:33 Nun waragesh áwort o démá dátant. Bale hezmatkárá gwasht: “Man tánke wati gappána najanán, heccha nawarán.” Lábáná gwasht: “Wati gappán bejan.”
GEN 24:34 Gwashti: “Man Ebráhémay hezmatkáré án.
GEN 24:35 Hodáwandá mani wájah sakk báz barkat dátag o wájah hastómand o amiré. Hodáwandá pas o gók, har o oshter, nograh o teláh, golám o móled dátag.
GEN 24:36 Mani wájahay lógi Sárahá piránsariá pa wájahá mardénchokké áwortag o mani wájahá wati sajjahén hasti hamáiárá dátag.
GEN 24:37 Mani wájahá maná sawgend dátag o gwashtag: ‘Mani chokká Kanháni jané maday, cha é molká ke annun man neshtagán.
GEN 24:38 Mani petay lógá o mani syádáni kerrá beraw o mani chokká cha hamáyán jané beday.’
GEN 24:39 Man cha wati wájahá jost kort ke agan jenekk gón man mayayt gón, gorhá?
GEN 24:40 Gwashti: ‘Hodáwand, ke man áiay ráh zortag, wati préshtagá gón taw ráha dant o tará tai sapará sóbéna kant tánke taw pa mani mardénchokká cha mani jenday mardomán o mani petkawmá jané dar gétk bekanay.
GEN 24:41 Agan taw mani syádáni kerrá beraway, cha sawgendá ázáta bay. Agan á wati jenekká madayant ham, taw cha mani sawgendá ázáta bay.’
GEN 24:42 Maróchi ke man é chammagay sará átkán, gwashton: ‘Oo Hodáwand! Mani wájah Ebráhémay Hodá! Agan tai razá ent, é sapará ke man átkagán eshiá sóbén kan.
GEN 24:43 Bechár, man é chammagay kerrá óshtátagán, agan jenekké ápá byayt o mani begwashán: “Maná cha wati kunzagá kammé áp beday” o
GEN 24:44 á maná begwashit: “Bwar, man pa tai oshterán ham ápa kasshán,” gorhá á jenekk hamá bebát ke taw pa mani wájahay chokká gechén kortag.’
GEN 24:45 Man angat delay tahá dwá nahalléntagat o Rebekkáyá wati kunzag kópagá at o átk. Rebekká dém pa chammagá jahlád ráh gept, shot o ápi kasshet. Man gón áiá gwasht: ‘Maná áp beday.’
GEN 24:46 Áiá pa eshtápi cha kópagá wati kunzag jahl kort o gwasht: ‘Bwar. Man tai oshterán ham ápa dayán.’ Gorhá man áp wárt o áiá mani oshter ham áp dátant.
GEN 24:47 Man cha áiá jost kort: ‘Taw kai jenekk ay?’ Áiá gwasht: ‘Betwélay jenekk án. Betwélay pet Náhór ent o mát Melkah.’ Gorhá man polóh pónzá dát o hattali dastá dátant o
GEN 24:48 wati saron jahl kort o Hodáwanday shogr gept. Man, Hodáwand wati wájah Ebráhémay Hodá satá kort ke maná rástén ráhi pésh dásht ke wati wájahay bacchay sángá gón wájahay brátay jenekká bekanáénán.
GEN 24:49 Nun, agan shomá gón mani wájahá mehrabán o wapádára bét, maná jwábé bedayét. Agan mehrabán o wapádára nabét ham begwashét tánke man bezánán ke rástá berawán yá chappá.”
GEN 24:50 Lábán o Betwélá passaw dát: “É kár cha Hodáwanday némagá butag. Márá eshiay bárawá na ‘haw’ kanagay ehtiáré hast o na ‘enna’ kanagay.
GEN 24:51 Esh ent Rebekká, zuri o beraw ke tai wájahay chokkay lógi bebit, hamá paymá ke Hodáwandá gwashtag.”
GEN 24:52 Ebráhémay hezmatkárá ke áyáni é habar eshkot, Hodáwanday bárgáhá pa adab sari jahl kort.
GEN 24:53 Gorhá hezmatkárá nograh o teláhay saht o zéwar o lahtén god áwort o Rebekkáyárá dát. Rebekkáay brát o máti ham gránkimmatén théki dátant.
GEN 24:54 Nun hezmatkár o hamráhán warag o charag wárt o shapá hamódá jalletant. Sohbá ke pád átkant, mardá gwasht: “Maná dém pa mani wájahá rahádag kanét.”
GEN 24:55 Bale Rebekkáay brát o mátá passaw dát: “Jenekká bell angat pa kammé wahdá, dahé róchá may kerrá ent, randá berawét.”
GEN 24:56 Hezmatkárá gwasht: “Nun ke Hodáwandá maná mani sapará sóbén kortag, maná madárét o rahádag kanét ke wati wájahay kerrá berawán.”
GEN 24:57 Áyán gwasht: “Sharr, byá jenekká tawára kanén o áiay jendá josta gerén.”
GEN 24:58 Gorhá Rebekkáesh tawár kort o jostesh gept: “Taw gón é mardá raway gón?” Áiá passaw dát: “Haw, rawán gón.”
GEN 24:59 Gorhá áyán wati gohár Rebekká, Rebekkáay shirmátén móled, Ebráhémay hezmatkár o áiay hamráh ráh dátant.
GEN 24:60 Áyán Rebekká barkat dát o gwashtesh: “May gohár! Taw hazáráni hazár bátay. Tai nasl o padréch wati badwáháni shahráni master bátant.”
GEN 24:61 Gorhá Rebekkáyá wati móled zortant o pád átk. Oshterán jammáz butant o á marday hamráhiá shotant. É paymá hezmatkárá Rebekká zort o wati ráhá shot.
GEN 24:62 Nun Esák cha Behér-Lahái-Ruiá per tarretag o átkagat o Negébá jahmenend butagat.
GEN 24:63 Bégáhéá, Esák dhagáray sará gardagá at o hayáláni tahá at. Chammi chest kortant o disti ke lahtén oshter pédák ent.
GEN 24:64 Rebekkáyá ham chamm ke chest kortant, Esáki dist. Cha wati oshterá ér kapt o
GEN 24:65 gón hezmatkárá gwashti: “É mard kay ent ke dhagáray sará tarráná dém pa má pédák ent?” Hezmatkárá gwasht: “É mani wájah ent.” Gorhá Rebekkáyá cháder zort o watárá mán póshet.
GEN 24:66 Nun hezmatkárá, harché ke butagat, Esák hál dát.
GEN 24:67 Esáká Rebekká zort o wati mátay, bezán Sárahay gedáná áwort o gón Rebekkáyá suri kort. Á, Esákay lógi but o Esáká sakk dóst at. Esák ke wati mátay marká gamig at, nun árám gept.
GEN 25:1 Ebráhémá dega jané geptagat ke námi Keturah at.
GEN 25:2 Ebráhémay chokk Zemrán o Yokshán o Médán o Midyán o Yashbák o Shawáh cha Keturahá pédá butant.
GEN 25:3 Cha Yoksháná Shébá o Didán pédá butant. Didánay óbádag Áshuri o Letushi o Layumi atant.
GEN 25:4 Midyánay mardénchokk, Epád o Éper o Hanuk o Abidah o Eldáh atant. É sajjahén Keturahay óbádag atant.
GEN 25:5 Ebráhémá wati sajjahén hasti Esákárá dát.
GEN 25:6 Hamá mardénchokk ke Ebráhémá cha soriatán butagatant, wati zendá áyáná thékii dát o cha wati chokk Esáká dur, ródarátki molká ráh dátant.
GEN 25:7 Ebráhémá sad o haptád o panch sál omr kort o
GEN 25:8 wati goddhi dami kasshet, sharrén mazanén omré korti o mort. Ebráhém piriá pa delémeni gón wati mortagén mahluká hawár but.
GEN 25:9 Áiay chokk Esák o Esmáélá wati pet Mamrehay nazzikká, Makpélahay gáray tahá kabr kort, hamá dhagárá ke Hitti Sóharay chokk Eprunay butagat o
GEN 25:10 Ebráhémá cha Hittián bahá zortagat. Ebráhém hamódá wati lógi Sárahay kerrá kabr kanag but.
GEN 25:11 Cha Ebráhémay marká rand Hodáyá áiay chokk Esák barkat dát. Esák Behér-Lahái-Ruiay nazzikká jahmenend but.
GEN 25:12 Ebráhémay chokk Esmáél, ke cha Sárahay Mesri móled Hájerá pédá butagat, áiay nasl o padréchay kessah chosh ent:
GEN 25:13 Esmáélay mardénchokkáni nám, omray hesábá pa red esh ant: Masterén chokk Nebáyut o é dega chokk, Kédar o Adbil o Mebsám o
GEN 25:14 Meshmá o Dumá o Massá o
GEN 25:15 Hadád o Témá o Yatur o Nápish o Kedmah atant.
GEN 25:16 Hankén o gedánáni hesábá, Esmáélay chokkáni nám hamesh atant, dwázdah sardár, wati kabilaháni red o banday sará.
GEN 25:17 Esmáélá yakk sad o si o hapt sál omr kort. Wati goddhi dami kasshet o mort o gón wati mortagén mahluká hawár but.
GEN 25:18 Áiay óbádag, Mesray simsará ke dém pa Áshurá raway, cha Hawilahá beger tán Shuray zeminá jahmenend butant. Á gón wati sajjahén brátán arhetagatant.
GEN 25:19 Ebráhémay chokk Esákay kessah chosh ent: Esákay pet Ebráhém at.
GEN 25:20 Esákay omr chell sál at wahdé gón Rebekkáyá suri kort. Rebekká, Betwél Aramáiay jenekk o Lábán Aramáiay gohár at. Betwél Paddán-Arámay mardomé at.
GEN 25:21 Esákay lógi santh o béawlád at o paméshká Esáká pa wati lógiá cha Hodáwandá dwá lóthet. Hodáwandá áiay dwá gósh dásht o Esákay lógi Rebekkáay láp porr but.
GEN 25:22 Doén chokk, mátay lápá gón yakdomiá kassh o chill kanagá atant. Rebekkáyá gwasht: “Gón man chéá chosh bayagá ent?” Shot o cha Hodáwandá josti kort.
GEN 25:23 Hodáwandá gwasht: “Do ráj tai lápá ent. Do kawm cha tai lápay tahá sedit. Yakk rájé cha domiá zórmandtera bit o masterén, kasterénay hezmatá kant.”
GEN 25:24 Chokmátiay máh o róch ke purah butant, Rebekkáyá járh áwort.
GEN 25:25 Awali chokk ke pédá but, sohragé at o áiay sajjahén badan chó mudi kabáhá at. Áiay námesh Issu kort.
GEN 25:26 Randá áiay brát pédá but o pédá bayagay wahdá Issuay páday punzi dáshtagat. É chokkay námesh Ákub kort. Wahdé Rebekkáyá é járh áwortant, Esáká shast sál at.
GEN 25:27 Chokk rost o mazan butant. Issu zabardastén shekárié but o dasht o gyábánán gardókén mardé at. Ákub árámtabén mardé at o géshter gedáná neshtagat.
GEN 25:28 Esáká Issu dóstter at ke shekáray góshtáni támi wassha but. Rebekkáyá Ákub dóstter at.
GEN 25:29 Yakk róché Ákub nároshtay grádagá at, Issu cha gyábáná átk, shodá chang at.
GEN 25:30 Gón Ákubá gwashti: “Cha é sohrén nároshtán toshé day golombán, cha é sohrénán, ke maná shodá kosht.” Paméshká Issuesh Edum ham gwasht.
GEN 25:31 Ákubá passaw dát: “Awalá wati pédáeshi hakká mani kerrá bahá kan.”
GEN 25:32 Issuá gwasht: “Maná shodá kosht, pédáeshi hakk mani che kárá kayt?”
GEN 25:33 Ákubá gwasht: “Pésará gón man sawgend bwar.” Gorhá áiá sawgend wárt o wati pédáeshi hakki Ákubay kerrá bahá kort.
GEN 25:34 Nun Ákubá lahtén nagan o dhálay nárosht Issuárá dát. Áiá wárt o randá pád átk o shot. É paymá Issuá wati pédáeshi hakk béezzat kort.
GEN 26:1 Chó but ke á sardhagárá dhokkálé kapt, abéd cha á pésari dhokkálá ke Ebráhémay wahdá butagat. Esák, Gerárá shot, Pilestiáni bádsháh Abimalekay kerrá.
GEN 26:2 Hodáwand, Esákay démá záher but o gwashti: “Mesrá maraw. Hamá sardhagárá benend ke man tará gwashán.
GEN 26:3 Annun hamé molká darámadéáy paymá benend. Man gón taw gón án o tará barkata dayán. É sajjahén zeminán tará o tai nasl o padréchárá dayán o gón tai pet Ebráhémá wártagén sawgendá barjama dárán.
GEN 26:4 Man tai nasl o padréchá ásmánay estáráni kesásá báza kanán o é sajjahén zeminán áyáná dayán o tai nasl o padréchay sawabá zeminay sajjahén kawm barkata gerant,
GEN 26:5 chéá ke Ebráhémá mani parmánbardári kort. Áiá mani habar zort, mani rahband o parmán o mani hokm o kánuni barjáh dáshtant.”
GEN 26:6 Gorhá Esák Gerárá nesht.
GEN 26:7 Wahdé óday mardénán cha Esáká áiay lógiay bárawá jost kort, cha torsá nagwashti ke mani lógi ent, gwashti: “Mani gohár ent.” Áiá delá hayál kortagat chó mabit ke eday mardén maná bekoshant o Rebekkáyá bebarant ke á sharrangé.
GEN 26:8 Esák tán mazanén moddatéá hamódá nesht. Yakk róché Pilestiáni bádsháh Abimaleká cha darigá dhann jahlá cháret, disti ke Esák gón wati jan Rebekkáyá dazjaniá ent.
GEN 26:9 Abimaleká Esák lótháént o gwasht: “Acha é tai jan ent! Taw chéá gwashtag ke ‘mani gohár ent’?” Esáká passaw dát: “Man wati delá gwasht ke áiay sawabá yakké mani jendá koshit.”
GEN 26:10 Abimaleká gwasht: “Taw chéá gón má chosh kort? Agan mani mardomé gón tai janá bwaptén, taw gonáhé may chakká dawr dátagat.”
GEN 26:11 Gorhá Abimaleká sajjahén mardom hokm dátant: “Harkas ke é mard o eshiay janá dastá ham per bekant, áiá allam markay sezá dayaga bit.”
GEN 26:12 Esáká á dhagáray sará kesht o keshár kort o á sálá dhagárá sad sari bar o samar dát, chéá ke Hodáwandá Esák barkat dát.
GEN 26:13 Esák sér o hazgár but o mál o hastii tán hamá haddá gésh bayán but ke á sakkén mazanén hastómandé jórh but.
GEN 26:14 Esáká ramag o górom o hezmatkár anchó báz at ke Pilesti hasaddig butant o
GEN 26:15 á sajjahén chátesh bár dát o háká porr kortant ke Esákay pet Ebráhémay hezmatkárán, Ebráhémay zamánagá jatagatant.
GEN 26:16 Nun Abimaleká gón Esáká gwasht: “Cha may kerrá beraw. Taw sakk zórmand ay o cha may haddá dar ay.”
GEN 26:17 Gorhá Esák cha ódá dar átk o Geráray daragá wati gedáni mekk kortant o nesht.
GEN 26:18 Esáká hamá chát dar roptant ke áiay pet Ebráhémay zamánagá kóchag butagatant o Pilestián, Ebráhémay marká rand bár dátagatant. Esáká é chát hamá nám per kortant ke áiay petá bastagatant.
GEN 26:19 Wahdé Esákay hezmatkárán á daragay tahá zemin kótk, tachókén ápay cháté daresh gétk,
GEN 26:20 bale Geráray shepánk gón Esákay shepánkán arhetant o gwashtesh: “É áp mayg ent.” Gorhá Esáká é chátay nám Esek kort, chéá ke Geráray mardom gón áiá arhetagatant.
GEN 26:21 Esákay hezmatkárán dega cháté jat, bale eshiay sará ham arhetant, gorhá áiá é chátay nám Setnah kort.
GEN 26:22 Esák cha ódá laddhet o shot. Dega cháté jati. Nun eshiay sará kassá arh o korh nakort. Esáká chátay nám Rahubut kort o gwashti: “Nun Hodáwandá márá práh o sháhegánén jágahé dátag o má hamé sardhagárá sér o ábáda bén.”
GEN 26:23 Esák cha ódá dém pa Bérshébahá shot.
GEN 26:24 Hamá shapá Hodáwand áiay démá záher but o gwashti: “Man tai pet Ebráhémay Hodá án. Mators, chéá ke man gón taw gón án. Man wati hezmatkár Ebráhémay sawabá tará barkata dayán o tai nasl o padréchá géshá gésha kanán.”
GEN 26:25 Esáká ódá korbánjáhé addh kort o Hodáwanday námi tawár kort. Wati gedáni hamódá mekk kort o áiay hezmatkárán hamódá cháté jat.
GEN 26:26 Abimalek cha Gerárá wati saláhkár Ahuzzah o wati pawjay sarlashkar Pikulay hamráhiá Esákay kerrá átk.
GEN 26:27 Esáká cha áyán jost kort: “Shomá gón man dozhmeni kort o maná cha wati kerrá gallént. Nun chéá mani kerrá átkagét?”
GEN 26:28 Áyán passaw tarrént: “Má sharriay sará distag ke Hodáwand gón taw gón ent, paméshká má gwasht ke báyad ent mayshomay nyámá kasam o sawgendé bebit. Byá ahd o paymáné bandén
GEN 26:29 ke taw márá ázára nadayay, anchó ke má tará ázár nadátag o gón taw sharr butagén o tará pa salámati o émeni cha wati kerrá rahádag kortag. Nun má gendén ke tará cha Hodáwanday némagá barkat rasetag.”
GEN 26:30 Gorhá Esáká pa áyán mehmánié kort o áyán wárt o noshet.
GEN 26:31 Domi sohbá máhallah pád átkant o Esák o Abimaleká gón yakdegará sawgend wárt. Esáká mardom rahádag kortant o á, cha Esákay kerrá pa salámati o émeni shotant.
GEN 26:32 Hamá róchá Esákay hezmatkár átkant o wati jatagén chátay bárawá hálesh dát. Gwashtesh: “Má áp dar gétkag.”
GEN 26:33 Esáká é chátay nám Shébah kort o tán róche maróchigá á shahrá Bérshébaha gwashant.
GEN 26:34 Wahdé Issuay omr chell sál but, gón Hitti kabilahay Behiri námén mardéay jenekk Yudit o Hitti Élónay jenekk Basématá suri kort.
GEN 26:35 Issuay é janán, Esák o Rebekkáay zendagi azáb kort.
GEN 27:1 Wahdé Esák pir but, chammi nezór butant o maymia nakort. Yakk róché wati masterén chokk, Issui lóthet o gwashti: “Oo mani chokk!” Áiá gwasht: “Ji.”
GEN 27:2 Esáká gwasht: “Bechár, man pir án o nazánán kojám róchá merán.
GEN 27:3 Paméshká wati seláhán, wati tirdán o kamáná bezur o gyábáná beraw o pa man shekáré bekan.
GEN 27:4 Washtámén waragé pa man tayár kan o byár ke bwarán o cha marká pésar tará barkat bedayán, anchén waragé ke maná dósta bit.”
GEN 27:5 Wahdé Esák gón wati chokk Issuá habará at, Rebekká áyáni habarán gósh dáragá at. Issu ke pa shekáray janag o áragá gyábáná shot,
GEN 27:6 Rebekkáyá gón wati chokk Ákubá gwasht: “Bechár, man eshkot ke tai petá gón tai brát Issuá gwasht:
GEN 27:7 ‘Pa man shekáré bekan o byár o washtámén waragé addh kan ke bwarán o cha marká pésar Hodáwanday bárgáhá tará barkat bedayán.’
GEN 27:8 Mani chokk! Nun mani habará sharr delgósh kan o hamé paym ke man tará gwashán, anchó bekan:
GEN 27:9 Beraw o cha ramagá pa man do sharrén shenekk byár ke man pa tai petá washtámén waragé addh kort bekanán, hamá paymá ke áiá dósta bit.
GEN 27:10 Padá bar o wati petá beday ke bwártesh o cha marká pésar tará barkat bedant.”
GEN 27:11 Ákubá gón wati mát Rebekkáyá gwasht: “Bale mani brát Issuay badaná báz poth per ent o mani ján sáp ent.
GEN 27:12 Agan mani pet maná dast per bekant, gorhá? Man áiay chammán prébkáré bán o barkatay badalá nálaté wati sará kárán.”
GEN 27:13 Mátá gwasht: “Mani chokk! Tai badalá nálat mani chakká kapát. Bass mani habará gósh dár, beraw o shenekkán byár.”
GEN 27:14 Gorhá Ákub shot, shenekki gept o wati mátay kerrá áwortant o mátá washtámén waragé hamá paymá addh kort ke Ákubay petá wassha but.
GEN 27:15 Rebekkáyá wati masterén chokk Issuay hamá sharrén god ke lógá áiay kerrá ér atant, zort o wati kasterén chokk Ákubay gwará dátant.
GEN 27:16 Ákubay gardenay bépohtén jágah o dasti gón shenekkáni póstá póshetant.
GEN 27:17 Nun addh kortagén washtámén warag o nagani wati chokk Ákubay dastá dátant.
GEN 27:18 Ákub wati petay kerrá shot o gwashti: “Mani pet!” Esáká gwasht: “Ji mani chokk! Taw kay ay?”
GEN 27:19 Ákubá gwasht: “Man Issu án, tai awali chokk. Man hamá paymá kort ke taw gwashtagat. Pád á, benend o cha mani shekárá chizzé bwar ke maná barkat dát bekanay.”
GEN 27:20 Esáká wati chokk jost kort: “Mani chokk! Chó zutt taw chón shekár dar gétk?” Passawi dát: “Hodáwandá, tai Hodáyá maná sóbén kort.”
GEN 27:21 Gorhá Esáká gón Ákubá gwasht: “Mani chokk! Nazzikter byá ke man tará dast per kort bekanán o bezánán ke pa rásti taw mani chokk Issu ay yá na.”
GEN 27:22 Ákub wati pet Esákay nazzikká shot, petá dast per kort o gwasht: “Tawár Ákubayg ent, bale dast Issuayg ant.”
GEN 27:23 Esáká Ákub pajjáh nayáwort, chéá ke nun Ákubay dastán Issuay dastáni paymá báz poth per at. Gorhá Esák Ákubay barkat dayagá lagget.
GEN 27:24 Esáká jost kort: “Pa rásti taw mani chokk Issu ay?” Áiá passaw dát: “Haw.”
GEN 27:25 Gorhá gwashti: “Mani chokk! Cha wati shekárá kammok byár ke bwarán o randá tará barkat bedayán.” Ákubá warag áwortant o áiá wárt. Sharábi ham áwort o Esáká wárt.
GEN 27:26 Nun petá gwasht: “Mani chokk! Edá byá o maná bechokk.”
GEN 27:27 Ákub áiay nazzikká shot o chokketi. Esáká ke áiay godáni bó lagget, Ákubi barkat dát o gwashti: “Bechár, mani chokkay bó chó hamá gyábánay washbóá ent ke Hodáwandá barkat dátag.
GEN 27:28 Hodá tará cha ásmánay nód o zeminay séri o hazgáriá béhesáb dán o tázagén sharáb bedayát.
GEN 27:29 Kawm tai hezmatá bekanátant o ráj tai démá kóndhán kapátant. Wati brátáni wájah bátay o tai mátay chokk tai démá kóndhán kapátant. Harkas tará nálata kant, wat nálati bát o harkas ke tará barkata dant, áiá barkat berasát.”
GEN 27:30 Esáká Ákubay barkat dayag halás kortagat o Ákub nóki cha wati pet Esákay kerrá shotagat ke áiay brát Issu cha shekárá átk.
GEN 27:31 Áiá ham washtámén waragé addh kort o pa wati petá áwort. Gwashti: “Mani pet! Pád á, benend o cha mani shekárá chizzé bwar ke maná barkat dát bekanay.”
GEN 27:32 Áiay pet Esáká gwasht: “Taw kay ay?” Áiá passaw dát: “Man tai chokk án, Issu án, tai awali chokk.”
GEN 27:33 Nun Esáká baláhén larzagé jáná kapt o gwashti: “Gorhá á kay at ke shekáré jat o pa man áworti o man tai áyagá damáné pésar wárt o áiárá barkat dát? O allam áiá barkata rasit.”
GEN 27:34 Wahdé Issuá wati petay habar eshkotant, baláhén peryáté jati. Gón wati petá gwashti: “Maná barkat day, mani pet! Maná ham barkat beday.”
GEN 27:35 Bale Esáká gwasht: “Tai brát pa makr o préb átk o tai barkati bort.”
GEN 27:36 Issuá gwasht: “Paméshká námi Ákub ent. É domi rand ent ke maná répénit. Pésará mani pédáeshi hakki wárt o nun mani barkati bort.” Padá josti kort: “Taw pa man hecch barkat pasht nagétkag?”
GEN 27:37 Esáká gwasht: “Man áiárá tai wájah kortag o áiay sajjahén syád áiay hezmatkár kortagant. Man áiárá gón dán o tázagén sharábá rezk o rózig bakshátag. Nun pa taw ché korta kanán, mani chokk?”
GEN 27:38 Issuá gón wati petá gwasht: “Mani pet! Tai kerrá barkat hamé yakkén at? Maná ham barkat beday, mani pet!” O Issuá zár zárá grét.
GEN 27:39 Áiay pet Esáká gwasht: “Tai hankén cha zeminay séri o hazgáriá bébahra bit o cha borzén ásmánay nódán ham.
GEN 27:40 Taw pa zahm wati rózigá dara géjay o wati brátay hezmatá kanay, bale wahdé bézára bay, wati brátay jogá cha wati gardená kasshay o chagala dayay.”
GEN 27:41 Cha hamá wahdá Issuá pa Ákubá kénag delá dásht, hamá barkatay sawabá ke petá áiárá dátagat. Delá gwashti: “Mani petay porsay róch nazzikk ant. Randá wati brát Ákubá koshán.”
GEN 27:42 Wahdé Rebekkáyá hál raset ke áiay masterén chokk Issuá ché gwashtag, wati kasterén chokk Ákubi lóthet o gwashti: “Tai brát Issuá del wassh kortag ke Ákubá koshán o wati bérá gerán.
GEN 27:43 Mani chokk! Nun mani habará beger. Zutt cha edá betach o Háráná, mani brát Lábánay kerrá beraw.
GEN 27:44 Chizzé wahdá hamáiay kerrá bedár tánke tai brát wati zahrán ér bebárt.
GEN 27:45 Tai brátay zahr ke éra káyant o á kárá béhayála kant ke taw gón áiá kortag, man pa taw kolawé ráha dayán. Gorhá cha ódá wátarr kan o byá. Chéá yakkén róchá man shomá doénán bebáhénán?”
GEN 27:46 Nun Rebekkáyá gón Esáká gwasht: “Man é Hitti janénáni sawabá cha zendagiá bézár án. Agan Ákubá cha é molkay jenekkán, cha é warhén Hitti jenekkán yakké sáng kort, gorhá man bemerátán.”
GEN 28:1 Esáká Ákub lótháént o barkat dát. Hokmi dát o gwashti: “Kanháni jenekké sáng makan.
GEN 28:2 Zutt Paddán-Arámá beraw, wati mátay pet Betwélay lógá. Hamódá, gón wati mátay brát Lábánay jenekkéá sur kan.
GEN 28:3 Porwákén Hodá tará barkat bedayát o porsamar kanát. Tará géshá gésh kanát o taw kawmáni rombé bátay.
GEN 28:4 Hodá tará o tai nasl o padréchá hamá barkatá bedayát ke Ebráhémárá dátagi, ke hamá sardhagáray wáhond bebay ke annun ódá darámadéay paymá zend gwázenagá ay, hamá sardhagár ke Hodáyá Ebráhémárá bakshátag.”
GEN 28:5 Gorhá Esáká Ákub ráh dát o Ákub Paddán-Arámá Betwél Aramáiay chokk Lábánay kerrá shot. Lábán, Issu o Ákubay mát Rebekkáay brát at.
GEN 28:6 Issu sahig but ke Esáká Ákub barkat dátag o Paddán-Arámá rahádag kortag ke hamódá jané begipt. Á é gappá ham sahig but ke barkat dayagay wahdá Esáká Ákub hokm dátag ke: “Kanháni jenekké sáng makan” o
GEN 28:7 Ákubá pet o mátay habar geptag o Paddán-Arámá shotag.
GEN 28:8 Nun Issu sarpad but ke Kanháni janén mani pet Esáká chinchok nádóst ant.
GEN 28:9 Paméshká Esmáélay kerrá shot o wati pésari janáni sará, Ebráhémay Esmáélén chokkay jenekki gept. Jenekkay nám Mahálat at o Nebáyutay gohár at.
GEN 28:10 Ákub cha Bérshébahá dar átk o dém pa Háráná shot.
GEN 28:11 Yakk jágahéá ke raset, shapá hamódá dáshti, chéá ke róch ér shotagat. Hamá jágahá sengé zort o saray chérái kort o tachk but.
GEN 28:12 Wábé disti ta padánké ke yakk saré zeminá enti o domi sar ásmáná o Hodáay préshtag sara kapant o éra kapant.
GEN 28:13 Hodáwand cha padánká borzter óshtátagat. Gwashti: “Man Hodáwand án, tai pet Ebráhémay Hodá o Esákay Hodá. É zeminay sará ke taw annun waptagay, man eshiá tará o tai nasl o padréchárá dayán.
GEN 28:14 Tai chokk o nomásag zeminay hákáni kesásá báza bant o shomá ródarátk o rónend o shomál o jonub, chárén némagán tálána bét. Zeminay sajjahén kawm tai o tai nasl o padréchay sawabá barkata gerant.
GEN 28:15 Bechár, man gón taw gón án o har kojá ke raway tai chár o gozárá kanán o tará padá hamé sardhagárá kárán. Tánke man gón taw wati kawl purah nakortag, tará yalaha nadayán.”
GEN 28:16 Ákub ke cha wábá pád átk, gón wat gwashti: “Béshakk Hodáwand hamé jágahá ent o man nazántag.”
GEN 28:17 Torset o gwashti: “É jágah delá ápa kant. É allamá Hodáay jenday lóg ent, arshay darwázag ent.”
GEN 28:18 Domi sohbá máhallah Ákub pád átk, wati saray chéray sengi zort o chédagé addhi kort o rógeni per rétk.
GEN 28:19 Á jágahay námi Bayt-Él kort. Chónáhá á shahray nám pésará Luz at.
GEN 28:20 Nun Ákubá kawlé kort, gwashti: “É sapará ke man rawagá án, agan Hodá gón man gón bebit o mani páspániá bekant, agan maná pa waragá nagan o póshagá pocch bedant,
GEN 28:21 ke pa salámati per betarrán o wati petay lógá berasán, gorhá Hodáwand mani Hodá bit.
GEN 28:22 É seng ke man pa chédag mekk kortag, Hodáay lóga bit. Harché ke tawe Hodá maná dayay, áiay dahyakká allamá tará dayán.”
GEN 29:1 Ákub ráh gept, shot o shot tánke ródarátki mardománi molká sar but.
GEN 29:2 Ódá disti ta dashtá cháté o say ramag chátay nazzikká waptag, chéá ke mardomán é ramag cha hamé chátá ápa dátant. Baláhén sengé chátay dapá at.
GEN 29:3 Wahdé sajjahén ramag ódá moccha butant, shepánkán á seng cha chátay dapá kenzént, pas ápa dátant o seng padá hamá jágahá, chátay dapá éra kort.
GEN 29:4 Ákubá gón áyán gwasht: “Brátán! Shomá kojig ét?” Passawesh dát: “Háránay mardom én.”
GEN 29:5 Ákubá jost kortant: “Shomá Náhóray chokk Lábáná pajjáha kárét?” Áyán gwasht: “Haw, zánéni.”
GEN 29:6 Ákubá jost kort: “Lábán dráh o salámat ent?” Áyán passaw dát: “Haw, dráh o salámat ent o esh ent áiay jenekk Ráhil gón pasán pédák ent.”
GEN 29:7 Ákubá gwasht: “Bechár, róch angat borz ent o ramagáni mocch bayagay wahd naent. Pasán áp bedayét o kahcharán barét.”
GEN 29:8 Passawesh dát: “Tánke sajjahén ramag mocch mabant o seng cha chátay dapá kenzénag mabit, má pasán áp dáta nakanén. Randá ápesha dayén.”
GEN 29:9 Ákub angat gón áyán habará at ke Ráhil gón wati petay pasán átk o raset. Ráhil wati petay pasáni shepánk at.
GEN 29:10 Wahdé Ákubá wati mátay brát Lábánay jenekk Ráhil o Lábánay pas distant, dém pa chátá shot, sengi cha chátay dapá kenzént o wati nákóay pasi áp dátant.
GEN 29:11 Ákubá Ráhil chokket o gón borzén tawáréá grewagi bendát kort.
GEN 29:12 Ráhili hál dát ke man tai petay syád án o Rebekkáay chokk án. Ráhil tacháná shot o wati peti hál dát.
GEN 29:13 Lábáná anchó ke wati gohárzátk Ákubay hál eshkot, tacháná átk, Ákubi gwarambáz kort, chokket o wati lógá borti. Ákubá sajjahén gapp gón Lábáná jatant o
GEN 29:14 Lábáná gón áiá gwasht: “Taw mani haddh o hón ay.” Ákub tán máhéá áiay kerrá jallet.
GEN 29:15 Gorhá Lábáná gón Ákubá gwasht: “Belli taw mani syád ay, bale pa man moptá kár makan. Maná wati mozzá begwash.”
GEN 29:16 Lábáná do janénchokk hastat. Masterénay nám Lyáh at o kasterénay nám Ráhil.
GEN 29:17 Lyáhay chamm béjalwah atant bale Ráhil sharrangé at o dhill o báládá jalwanák at.
GEN 29:18 Ákubá Ráhil dóst but, gwashti: “Agan maná wati kasterén jenekk Ráhilá bedayay, man pa taw hapt sálá kára kanán.”
GEN 29:19 Lábáná gwasht: “Sharter ent ke man Ráhilá dega mardéay badalá tará bedayán. Hamedá mani kerrá bedár.”
GEN 29:20 Gorhá Ákubá pa Ráhilaygi tán hapt sálá kár kort, bale Ráhili anchó dóst at ke Ákubay delá é haptén sál purah lahtén róch atant.
GEN 29:21 Nun Ákubá gón Lábáná gwasht: “Mani zálá maná beday. Mani haptén sál sarjam butagant o nun man gón áiá hór bayaga lóthán.”
GEN 29:22 Lábáná óday sajjahén mardom lóthetant o dáwaté kort.
GEN 29:23 Shap ke but, wati jenekk Lyáhi zort o Ákubay kerrá bort o Ákub gón áiá hór but.
GEN 29:24 Lábáná wati móled Zelpah wati jenekkárá dát ke áiay hezmatá bekant.
GEN 29:25 Sohb ke but, Ákubá dist ke way, é wa Lyáh ent. Gorhá gón Lábáná gwashti: “É chónén káré ke taw gón man kort? Man pa Ráhilá tai hezmat nakort? Taw chéá maná rad dát?”
GEN 29:26 Lábáná passaw dát: “May rasm é naent ke kasterén jenekká cha masteréná pésar sur bedayén.
GEN 29:27 É suray haptagá purah kan, kasteréná ham tará dayén, bale pa man dega hapt sálá kár kan.”
GEN 29:28 Ákubá anchosh kort o Lyáhay haptagi purah kort o Lábáná wati á dega jenekk, Ráhil gón Ákubá sur dát.
GEN 29:29 Lábáná wati móled Bellah wati jenekk Ráhilárá dát ke áiay hezmatá bekant.
GEN 29:30 Ákub gón Ráhilá ham hór but. Ráhili cha Lyáhá dóstter at. Ákubá dega hapt sál pa Lábáná hezmat kort.
GEN 29:31 Wahdé Hodáwandá dist ke Lyáh Ákubá nádóst ent, áiárá chokki dát, bale Ráhil santh o béawlád at.
GEN 29:32 Lyáh lápporr but o mardénchokké áworti o chokkay námi Ruben kort. Gwashti: “Hodáwandá mani bazzagi dist. Mani mard nun allamá maná dósta dárit.”
GEN 29:33 Lyáh padá lápporr but o wahdé mardénchokké áworti, gwashti: “Hodáwandá dist ke man nádósté án, paméshká maná é chokki ham dát.” Gorhá chokkay námi Shamun kort.
GEN 29:34 Á padá lápporr but o wahdé mardénchokké áworti, gwashti: “Nun, cha ed o dém mani mard maná dósta dárit ke man pa áiá say mardénchokk áwortag.” Paméshká é chokkay námesh Láwi kort.
GEN 29:35 Lyáh padá lápporr but o wahdé mardénchokké áworti, gwashti: “Nun man Hodáwandá názénán.” Gorhá chokkay námi Yahudá kort. Cha ed o rand chokkay áragi band but.
GEN 30:1 Wahdé Ráhilá dist ke man pa Ákubá hecch chokk nayáwortag, wati goháray sará hasaddig but. Gorhá gón Ákubá gwashti: “Maná chokk o awlád beday, agan na mana merán.”
GEN 30:2 Ákub áiay sará zahr gept o gwashti: “Záná man Hodá án ke tai démon dáshtag ke chokk mayáray?”
GEN 30:3 Ráhilá gwasht: “Esh ent mani móled Bellah. Gón eshiá wapt o wáb bekan ke pa man chokk byárit o áiay barkatá maná ham awlád bebit.”
GEN 30:4 Gorhá Ráhilá wati móled Bellah pa jani Ákubárá dát o Ákubá gón áiá wapt o wáb kort.
GEN 30:5 Bellah lápporr but o pa Ákubá mardénchokké áworti.
GEN 30:6 Gorhá Ráhilá gwasht: “Hodáyá mani dádrasi kortag. Mani peryáti gósh dáshtag o maná chokké dátagi.” Paméshká áiay námi Dán kort.
GEN 30:7 Ráhilay móled Bellah padá lápporr but o pa Ákubá dega mardénchokké áworti.
GEN 30:8 Gorhá Ráhilá gwasht: “Maná gón wati gohárá mazanén jang o jérhahé butag o man katthetag.” Paméshká é chokkay námi Naptáli kort.
GEN 30:9 Bale wahdé Lyáhá dist ke man chokk áworta nakanán, wati móled Zelpahi chest kort o pa jani Ákubárá dát.
GEN 30:10 Gorhá Lyáhay móled Zelpahá pa Ákubá mardénchokké áwort o
GEN 30:11 Lyáhá gwasht: “Chónén wasshén bahté!” Paméshká é chokkay námi Jád kort.
GEN 30:12 Lyáhay móled Zelpahá pa Ákubá dega mardénchokké áwort.
GEN 30:13 Gorhá Lyáhá gwasht: “Man sakk gal án. Janénán mani nám kortag ‘Galátun’.” Paméshká chokkay námi Ásher kort.
GEN 30:14 Gallahay rón o móshay wahdá Ruben shot o dhagáréá lahtén mehrkáhi dar gétk o pa wati mát Lyáhá áwort. Gorhá Ráhilá gón Lyáhá gwasht: “Cha wati chokkay mehrkáhán maná kammé beday.”
GEN 30:15 Bale Lyáhá gwasht: “Taw mani mard bortag, bass naent? Nun mani chokkay mehrkáhán ham pacha geray?” Ráhilá gwasht: “Sharr ent, tai chokkay mehrkáháni mozzá, enshapi Ákub gón taw bwapsit.”
GEN 30:16 Gorhá wahdé Ákub bégáhay wahdá cha dhagárá per tarret, Lyáh dhanná áiay démá dar átk o gón áiá gwashti: “Gón man bwaps ke man wati chokkay mehrkáháni badalá tará keréh kortag.” Gorhá á shapá Ákubá gón Lyáhá wapt o wáb kort.
GEN 30:17 Hodáyá Lyáhay peryát gósh dásht o Lyáh lápporr but o panchomi randá pa Ákubá mardénchokké áworti.
GEN 30:18 Gorhá Lyáhá gwasht: “Man wati móled wati mardárá dát o Hodáyá mani mozz dát.” Gorhá é chokkay námi Issákár kort.
GEN 30:19 Lyáh padá lápporr but o shashomi randá pa Ákubá mardénchokké áworti.
GEN 30:20 Gorhá Lyáhá gwasht: “Hodáyá maná kimmatién sawgáté bakshátag. Nun mani mard mani ezzatá kant ke man pa áiá shash mardénchokk áwortag.” Gorhá chokkay námi Zebulun kort.
GEN 30:21 Moddatéá rand Lyáhá janénchokké áwort o áiay námi Dinah kort.
GEN 30:22 Nun Hodá Ráhilay tránagá kapt, áiay némagá delgóshi gwar kort o chokké baksháti.
GEN 30:23 Ráhil lápporr but o mardénchokké áworti. Gwashti: “Hodáyá mani kamsharapi dur kortag.”
GEN 30:24 Paméshká chokkay námi Issop kort. Gwashti: “Hodáwand maná dega mardénchokké ham bedayát.”
GEN 30:25 Wahdé Ráhilá Issop áwort, Ákubá gón Lábáná gwasht: “Nun maná razá beday ke wati jenday dhéhá wátarra kanán.
GEN 30:26 Pa é jan o chokkánigi ke tai hezmaton kortag, eshán maná beday ke zuránesh o rawán. Taw wata zánay ke man pa taw chinchok kár kortag.”
GEN 30:27 Lábáná gwasht: “Maná ezzat beday. Dazbandia kanán hamedá bedár. Man pál jatag o maná é sarpadi rasetag ke Hodáwandá pa taigi maná barkat dátag.”
GEN 30:28 Padá gwashti: “Wati mozzá begwash, tará dayáni.”
GEN 30:29 Ákubá gwasht: “Taw zánay ke man che paymá pa taw kár kortag o tai mál o dalwat man chón sharr dáshtagant.
GEN 30:30 Cha mani áyagá pésar tará kammok hastat o nun sakk báz butagant. Har jáh ke man wati pád ér kortag, Hodáwandá tará hamódá barkat dátag. Bale man kadi pa wati jenday lógá káré bekanán?”
GEN 30:31 Lábáná jost kort: “Tará ché bedayán?” Ákubá passaw tarrént: “Maná hecch maday, bale agan é yakkén kárá pa man bekanay, gorhá man angat tai ramagay shepánki o páspániá kanán.
GEN 30:32 Bell maróchi tai sarjamén ramagáni nyámá gardán. Sajjahén thekk thekkén espétpas o syáhén gwarándh o sajjahén thekk thekkén syahpasán jetá kanán. É mani mozza bant.
GEN 30:33 Bándá róch agan hamé mozzá becháray ke taw maná dátag, mani rásti o tachki wat pa man gwáhia dant. Agan taw mani kerrá anchén syahpasé dar gétk ke thekk thekk mabit yá anchén gwarándhé ke rangi syáh mabit, bezán á dozzetagén málé.”
GEN 30:34 Lábáná gwasht: “Sharr ent. Anchosha kanén.”
GEN 30:35 Á róchi Lábáná sajjahén thekk o thagárén páchen, sarjamén thekk thekkén boz ke espétén neshánesh per at o sajjahén syáhén gwarándh jetá kort o wati mardénchokkáni dastá dát o
GEN 30:36 cha Ákubá say róchay ráhá dur bortant. É wahdá Ákub, Lábánay á dega pasán chárénagá at.
GEN 30:37 Bale Ákubá espédár, bádám o chenáláni nók borretagén sháharh zort o póst pátk o sháharháni tahay espéti dará kortant ke espétén tal záher bebant.
GEN 30:38 Padá pátkagén sháharhi zort o ápdánay tahá ér kortant ke dalwat ke ápá káyant, sháharhesh démá bebant. Wahray wahdá, dalwat ke ápá átkant,
GEN 30:39 sháharháni démá jopta butant. Paméshká thekk o thagárén chokkesha áwort.
GEN 30:40 Ákubá kasánén gwarag jetá kortant o é degaráni démi gón thagárén pas o syáhén pasán kort ke Lábánayg atant. É paymá wati dalwati jetá kortant o gón Lábánay dalwatán hóri nakortant.
GEN 30:41 Har wahdá ke zrengén mádagén dalwat wahra butant, Ákubá sháharh áyáni démay ápdánáni tahá éra kortant ke dalwat é sháharháni kerrá jopt bebant.
GEN 30:42 Bale hamá pas ke nezór atant, sháharhi áyáni démá éra nakortant. É paymá nezórén pas Lábánay némagá shotant o zrengén Ákubay némagá.
GEN 30:43 É dhawlá Ákub sakk sér o ábád but o baláhén ramagáni wáhond but. Golám o móled o oshter o hari ham báz but.
GEN 31:1 Ákubá eshkot ke Lábánay chokk gwashagá ant: “Ákubá may petay sajjahén mál o hasti poshtá kasshetag. Cha may petay málán watá chó sér o hazgári kortag.”
GEN 31:2 Ákub sarpad but ke Lábán maná pésari paymá nachárit.
GEN 31:3 Gorhá Hodáwandá gón Ákubá gwasht: “Wati pet o pirok o syádáni molká wátarr kan. Man gón taw gón án.”
GEN 31:4 Ákubá pa Ráhil o Lyáhá kolawé dém dát ke gyábáná, mani ramagay kahchará byáét.
GEN 31:5 Gón áyán gwashti: “Mana gendán ke shomay pet maná pésari paymá nachárit, bale mani petay Hodá gón man gón butag.
GEN 31:6 Shomá zánét ke man gón wati sajjahén wák o twáná pa shomay petá kár kortag,
GEN 31:7 bale angat shomay petá maná rad dátag o mani mozzi dah randá badal kortag, bale Hodáyá shomay pet naesht ke maná táwán bedant.
GEN 31:8 Wahdé Lábáná gwasht: ‘Thekk thekkén pas tai mozza bant,’ sajjahén ramagáni zank o bar thekk thekkéna butant. Wahdé áiá gwasht: ‘Thagár thagárén pas tai mozza bant,’ sajjahén ramagáni zank o bar thagár thagáréna butant.
GEN 31:9 É paymá Hodáyá shomay petay ramag pach gept o maná dátant.
GEN 31:10 Yakk randé, ramagay wahray mósomá man wábé dist ke man wati sar chest kort o dist ke hamá páchen ke ramagay bozána ráénant, thekk o thagárén ant.
GEN 31:11 Gorhá Hodáay préshtagá wábay tahá maná gwasht: ‘Ákub!’ Man gwasht: ‘Ji.’
GEN 31:12 Gwashti: ‘Sará chest kan o bechár, ramagay bozáni ráénókén sajjahén páchen thekk o thagárén ant. Man distag ke Lábáná gón taw ché kortag.
GEN 31:13 Man Bayt-Élay Hodá án, hamá jágahay Hodá án ke taw ódá chédagéárá rógen per mosht o gón man kawlé kort. Nun pád á, cha é sardhagárá dar á o wati pédáeshi molká wátarr kan.’
GEN 31:14 Ráhil o Lyáhá gwasht: ‘Márá wa nun petay lógá mirásé nést.
GEN 31:15 Á márá ham darámadéay hesábá chárit. Áiá márá bahá wa kortag, may baháay zarri ham wártagant.
GEN 31:16 Á sajjahén mál ke Hodáyá cha may petá pach gept, allamá mayg o may chokkánig ent. Gorhá hamá paymá bekan ke Hodáyá tará gwashtag.’”
GEN 31:17 Gorhá Ákub pád átk, wati jan o chokki oshterán jammáz kortant o
GEN 31:18 Paddán-Arámá wati katthetagén sajjahén mál o hastii zort o wati sajjahén ramagi sar dayán kort o dém pa Kanhánay molká wati pet Esákay némagá ráh gept.
GEN 31:19 Lábán pasáni chéná shotagat. Ráhilá wati petay lógay botén Hodá dozzetant.
GEN 31:20 Ákubá Lábán Aramái rad dát, háli nadát o cha Lábánay kerrá tatk.
GEN 31:21 Ákub gón wati sajjahén mál o hastiá tatk, cha Parátay kawrá gwast o wati démi gón Gelyáday kóhestagén damagá kort.
GEN 31:22 Sayomi róchá Lábáná hál raset ke Ákub tatkag.
GEN 31:23 Lábáná wati syád zortant o tán hapt róchá Ákubay randá kapt o Gelyáday kóhestagén damagá rasénti.
GEN 31:24 Hodá shapá Lábán Aramáiay wábá átk o gwashti: “Habardár! Ákubá hecch magwash, na sharr, na haráb.”
GEN 31:25 É wahdá ke Lábán gón Ákubá dochár kapt, Ákubá wati gedán Gelyáday kóhestagén damagá mekk kortagat o Lábán o syádán ham hamódá wati gedán mekk kortant.
GEN 31:26 Lábáná gón Ákubá gwasht: “Taw chéá chó kort? Taw maná rad dát o mani jenekk chó jangi bandigán bortant.
GEN 31:27 Taw chéá maná rad dát o chérokái tatkay? Chéá maná hálet nadát? Man shomárá pa shádehi gón sawt o kanjari o changay sázán rahádag kortagat.
GEN 31:28 Taw inchoká ham sabr nakort ke man wati nomásag o jenekkán bechokkán o roksat bekanán. Taw hórh o ahmakén káré kort.
GEN 31:29 Man tará ázár dáta kanán, bale dóshi tai petay Hodáyá gón man gwasht: ‘Habardár! Gón Ákubá hecch magwash, na sharr, na haráb.’
GEN 31:30 Taw paméshká shotay ke tará pa wati petay lógá sakk zahir kanagá at, bale taw mani Hodá chéá dozzetant?”
GEN 31:31 Ákubá passaw dát: “Maná torset ke taw wati jenekkán pacha geray,
GEN 31:32 bale agan taw wati Hodá kaséay kerrá dar gétkant, á koshaga bit. Mani sajjahén mál o hastiá bechár, agan eshán tai chizzé mán, mardománi démá maná péshi dár o bari.” Ákubá nazánt ke é botén Hodá Ráhilá dozzetagant.
GEN 31:33 Gorhá Lábáná Ákubay gedán o Lyáhay gedán o doén móledáni gedán patthetant, bale hechi nadist. Wahdé cha Lyáhay gedáná dar átk, Ráhilay gedáná potert,
GEN 31:34 bale Ráhilá botén Hodá zortag o wati oshteray lachá kortagatant o wat lachay sará neshtagat. Lábáná sajjahén gedán patthet, bale hecchi nadist.
GEN 31:35 Ráhilá gón wati petá gwasht: “Wájah! Zahr mager, man tai démá pád átka nakanán ke mani janéni máhánagáni wahd ent.” Lábáná patthet, bale botén hodái dast nakaptant.
GEN 31:36 Ákub zahr gept o Lábáni malámat kort. Gón Lábáná gwashti: “Mani mayár ché ent? Man che gonáh kortag ke taw zahrá zahr mani randá kaptagay?
GEN 31:37 Nun ke taw mani sajjahén chizz patthetagant, tará choshén chizzé dast kapt ke taig ent? Agan dast kaptag, mani o wati syád o mardománi démá éri kan. Belli hamá mani o tai paysalahá kanant.
GEN 31:38 Man bist sálá tai kerrá butagán. Tai yakk mésh o bozéá nagétkag. Man tai ramagay yakk gwarándhé nawártag.
GEN 31:39 Man hechbar dalwaté tai kerrá nayáwortag ke rastarán jatag o koshtag. Har táwáné ke butag, badal man cha wat porr kortag. Agan yakk chizzé róchá dozzag butag yá shapá, áiay kimmat taw cha man lóthetag.
GEN 31:40 É mani hál butag. Róchá maná garmá koshtag o shapá gwahrá. Mani chammáni wáb shotag.
GEN 31:41 Tai lógá bist sálá mani hál hamé butag. Man chárdah sál tai doén jenekkáni háterá pa taw kár kortag o shash sál tai ramagáni háterá. Angat taw dah randá mani mozz badal kortag.
GEN 31:42 Agan mani petay Hodá, Ebráhémay Hodá o Esákay Hodá gón man gón mabutén, allamá taw maná hórk o háligén dastán ráh dátagat, bale Hodáyá mani bazzagi o zahmat distag o dóshi tará neherr o hakkali dátag.”
GEN 31:43 Lábáná gwasht: “É jenekk mani jenekk ant, chokk mani chokk o ramag ham mani ramag ant. Harché ke gendagá ay, manig ent. Bale maróchi mani dast gón wati é jenekk o esháni pédá kortagén chokkána narasit.
GEN 31:44 Byá, man o taw gón yakdegará ahd o paymáné bandén. Belli é ahd mani o tai nyámá gwáh o sháheda bit.”
GEN 31:45 Gorhá Ákubá sengé zort o chédagé addh kort o
GEN 31:46 gón wati syádán gwashti: “Seng mocch kanét.” Áyán seng zort o kót kortant o hameshiay kerrá wargesh wárt.
GEN 31:47 Lábáná eshiay nám Jégar-Sahadutah kort o Ákubá Galid.
GEN 31:48 Lábáná gwasht: “Maróchi é sengkót manig o tai nyámá sháhedé.” Paméshká é Galid náménag but o
GEN 31:49 Lábáná eshiay nám Mespah ham kort ke gwashti: “Wahdé man wati ráhá rawán o taw watigá, Hodáwand maná o tará gendit.
GEN 31:50 Agan gón mani jenekkán sharr mabay o mani jenekkáni sará dega jan begeray, bell toré kass magendit, bale béhayál mabay ke Hodá maná o tará gendit.”
GEN 31:51 Lábáná gón Ákubá chó ham gwasht: “Esh ent sengkót o esh ent hamá chédag ke man watig o tai nyámá mekk kortag.
GEN 31:52 É sengkót sháhedé o é chédag ham sháhedé ke man pa tai ázár dayagá cha é sengkótá nagwazán o dém pa taw nayáyán o taw ham pa mani ázár dayagá cha é sengkót o chédagá nagwazay o dém pa mana nayáay.
GEN 31:53 Ebráhémay Hodá, Náhóray Hodá, áyáni petay Hodá mani o tai nyámá dádras bát.” Gorhá Ákubá wati pet Esákay Hodáay námá sawgend wárt.
GEN 31:54 Hamódá, kóhestagén damagá korbánigé korti o syád o wáresi waragéá dáwat dátant. Waragá rand shapá hamódá dáshtesh.
GEN 31:55 Domi sabáhá, máhallah Lábáná wati jenekk o nomásag chokket o barkat dátant. Padá dar átk o wati lógá per tarret.
GEN 32:1 Nun Ákub rahádag but o ráhá Hodáay préshtag gón áiá dochár kaptant.
GEN 32:2 Wahdé Ákubá préshtag distant, gwashti: “É Hodáay lashkaray ordgáh ent.” Paméshká á jágahay námi Mahanáem kort.
GEN 32:3 Cha wat o pésar kásedi Sahiray sardhagárá, Edumay damagá wati brát Issuay kerrá ráh dátant o
GEN 32:4 kásedi hokm dátant ke: “Mani wájahén Issuá begwashét ke tai kaster Ákuba gwashit ke tán é wahdi man Lábánay kerrá darámadéay paymá nendók butagán.
GEN 32:5 Maná gók o har o pas o golám o móled hast. Nun man é paygám paméshká pa wati wájah Issuá ráh dátag ke taw maná béezzat makanay.”
GEN 32:6 Kásedán ke wati sapar jat o padá Ákubay kerrá sar butant, gwashtesh: “Má tai brát Issuay kerrá shotén o nun á wat gón chár sad mardá tai gendoká pédák ent.”
GEN 32:7 Ákubá gón mazanén tors o larz o paréshánié wati hamráhén mardom do thóliá bahr kortant, ramag o górom o baggi ham do bahrá kortant.
GEN 32:8 Delá gwashti: “Agan Issu byayt o yakk rombéay sará orosh bekant, gorhá domi romb tatka kant.”
GEN 32:9 Gorhá Ákubá dwá kort: “Oo mani pet Ebráhémay Hodá! Mani pet Esákay Hodá! Oo hamá Hodáwand ke gón man gwashtet: ‘Molká wati syádáni kerrá wátarr kan ke man tará sabz o ábáda kanán!’
GEN 32:10 Mane Ákub inchok mehr o wapá nakarzán ke taw gón wati hezmatkárá kortag. Wahdé man cha Ordonay kawrá gwazagá atán, maná bas wati asá gón at, bale nun do ordgáhay wáhond án.
GEN 32:11 Maná cha mani brátay dastá berakkén. Maná cha Issuá rakkén ke maná cha áiá torsit. Á mayayt o mani o mani chokk o chokkáni mátáni sará orosh makant.
GEN 32:12 Bale taw gwashtag: ‘Man allamá tará sabz o ábáda kanán o tai padréchá daryáay rékáni paymá anchó báza kanán ke hesáb nabant.’”
GEN 32:13 Ákubá shapá hamódá dásht. Cha wati málán pa wati brát Issuá sawgáté gechéni kort:
GEN 32:14 do sad boz o bist páchen, do sad mésh o bist gwarándh,
GEN 32:15 si dháchi gón herrán, chell mádag o dah káiger, bist mádyán o dah lág.
GEN 32:16 Áiá é, galag galag kort o wati hezmatkáráni dastá dátant o gwashti: “Cha man pésar bét o galagán cha yakdomiá dur dur bedárét.”
GEN 32:17 Ákubá awali hezmatkár hokm dát o gwasht: “Mani brát Issu ke gón taw dochára kapit o josta kant: ‘Taw kai mardom ay? Kojá rawagá ay? É mál o dalwat ke tará gón ant, kaig ant?’
GEN 32:18 begwashi: ‘É tai kaster Ákubayg ant. É sawgát ant ke pa mani wájah Issuá ráhi dátagant o Ákubay jend poshtá pédák ent.’”
GEN 32:19 Áiá domi o sayomi o á dega sajjahén hezmatkár ke gón galagán rawagá atant, ham anchosh hokm dátant: “Wahdé shomá Issu dist, hamé habarán gón áiá bekanét.
GEN 32:20 Allamá begwashét: ‘Tai kaster Ákub may poshtá pédák ent.’” Delá gwashti: “Man é thékián cha wat o pésar ráha dayán o áiay delá narma kanán. Randá ke áiá gendán, balkén mani ezzatá bekant.”
GEN 32:21 Gorhá Ákubay sawgát cha áiay jendá pésar shotant o jendi shapá ordgáhá jallet.
GEN 32:22 Hamá shapá Ákub pád átk, wati doén jan, doén móled o yázdahén mardénchokki zortant o cha Yabukay kawray shóná gwast.
GEN 32:23 É sajjahéni cha kawrá gwázéntant. Wati sajjahén mál o maddhii ham gwázéntant.
GEN 32:24 Ákub éwak but. Yakk mardé átk o tán bámgwáhá gón áiá band merhet.
GEN 32:25 Wahdé band merhagá atant, mardá dist ke Ákubá zérdast korta nakanán, gorhá maguná moshté jati o Ákubay magun cha boná dar shot.
GEN 32:26 Gorhá mardá gón Ákubá gwasht: “Bell nun mana rawán ke bámgwáh ent.” Bale Ákubá gwasht: “Tánke maná barkata nadayay, tará rawagá naylán.”
GEN 32:27 Gorhá mardá gwasht: “Tai nám kay ent?” Ákubá passaw dát: “Ákub.”
GEN 32:28 Mardá gwasht: “Cha ed o rand taw Ákub gwashaga nabay, tai nám Esráila bit, chéá ke taw gón Hodáyá o gón mardomán merhetagay o sardast butagay.”
GEN 32:29 Gorhá Ákubá gwasht: “Mani dazbandi ent ke wati námá begwash.” Bale áiá gwasht: “Mani námay jostá chéá kanay?” Gorhá hamódá Ákubi barkat dát.
GEN 32:30 Paméshká Ákubá á jágahay nám Pani-Él kort. Gwashti: “Gón Hodáyá dém pa dém bután, bale angat mani ján rakket.”
GEN 32:31 Wahdé Ákub cha Pani-Élá gwazagá at, róchá thekk kort. Magunay sawabá Ákub lang janáná shot.
GEN 32:32 Páday bonay é zardillek ke dalwatay maguná per ent, paméshká Esráili tán róche maróchigá eshiá nawarant ke á mardá Ákub magunay hamé jágahá moshté jat ke é zardillek ent.
GEN 33:1 Nun Ákubá chamm chest kortant o disti ke Issu pédák ent o chár sad mardi hamráh ent. Gorhá Ákubá Lyáh o chokk yakk thólié kortant, Ráhil o chokk yakk thólié o doén móled gón chokkán yakk thólié.
GEN 33:2 Móled o móledáni chokki démá kortant, cha áyán o rand Lyáh o Lyáhay chokk o cha Lyáh o chokkán o rand, Ráhil o Issop posht poshtá.
GEN 33:3 Ákubay jend cha sajjahénán démá shot o hapt randá pa adab sari jahl kort tánke wati brátay nazzikká sar but.
GEN 33:4 Bale Issu pa wati brátay gendoká tachán but. Ákubi gwarambáz kort, dasti áiay gardená dawr dátant o chokketi. Doénán grét.
GEN 33:5 Wahdé Issuá wati chamm chest kortant o janén o chokki distant, gwashti: “É kay ant ke tará gón ant?” Ákubá gwasht: “É hamá chokk ant ke Hodáyá cha wati bakshendahiá tai kasterárá dátagant.”
GEN 33:6 Gorhá móled o chokk nazzikká átkant o saresh jahl kort.
GEN 33:7 Lyáh o chokk ham nazzikká átkant o saresh jahl kort. Godhsará Issop o Ráhil nazzikká átkant o saresh jahl kort.
GEN 33:8 Issuá jost kort: “É ramag o górom ke man dhikk dátant, esháni maksad ché ent?” Ákubá gwasht: “Maksad esh ent ke taw mani sará mehrabán bebay, mani wájah!”
GEN 33:9 Bale Issuá gwasht: “Mani brát! Maná chónáhá báz hast. Harché tará hast, gón wat bedáresh.”
GEN 33:10 Ákubá gwasht: “Enna, cha taw dazbandia kanán, agan mani ezzatá kanay, mani sawgátán bezur ke tai didár chó Hodáay didárá ent o taw maná pa mehrabáni kabul kortag.
GEN 33:11 Mani é thékiá bezur ke pa taw árag butag. Chéá ke Hodá pa man mehrabán butag o maná har chizzi dátag.” Ákubá mennat kort o Issuá mannet.
GEN 33:12 Gorhá Issuá gwasht: “Sar begerén o berawén. Man pésara bán.”
GEN 33:13 Bale Ákubá gwasht: “Mani wájah! Taw zánay chokk kasán o názork ant o pas o gók ham zátagant o shiri ant. Agan yakk róchéá ham eshán pa trondi barán bekanén, sajjahén dalwata merant.
GEN 33:14 Mani dazbandi ent ke mani wájah cha wati kasterá pésar berawt o man narm narmá ramag o góromán sar dayána kanán o chokkáni gámán áyána bán, tánke Sahiray sardhagárá wati wájahay kerrá sar bebán.”
GEN 33:15 Issuá gwasht: “Gorhá man wati lahtén mardom tai hamráha kanán.” Ákubá gwasht: “Chéá? Pa man hamé bass ent ke mani wájah pa man mehrabán ent.”
GEN 33:16 Gorhá Issu hamá róchá dém pa Sahirá per tarret,
GEN 33:17 bale Ákub Sokkutá shot, hamódá pa wat lóg o pa wati dalwatán gwáshi bast. Paméshká á jágahá Sokkuta gwashant.
GEN 33:18 Ákub ke cha Paddán-Arámá per tarragá at, Shekémay shahrá Kanhánay sardhagárá pa salámati sar but o shahray nazzikká ordi kort.
GEN 33:19 É dhagár ke ódá áiá wati gedán mekk kort, cha Hamóray chokkán pa sad thokkor nograhá bahái zort. Hamór, Shekémay pet at.
GEN 33:20 Ódá korbánjáhé addhi kort o áiay námi Él-Éluhi-Esráil kort.
GEN 34:1 Dinah, Ákubay hamá jenekk ke cha Lyáhá pédá butagat, óday jenekkáni gendoká dhanná dar átk.
GEN 34:2 Á molkay hákem Hamóray chokk Shekémá ke Dinah dist, Dinahi bort o pa zór gón áiá wapt o wábi kort. Hamór, Héwi thakkay mardomé at.
GEN 34:3 Shekémay del gón Ákubay jenekk Dinahá lagget o á, Dinahay mehrá gereptár but o gón Dinahá narm narmá habari kort.
GEN 34:4 Shekémá gón wati pet Hamórá gwasht: “Maná gón hamé jenekká sur day.”
GEN 34:5 Ákub sahig but ke Shekémá mani jenekk Dinah zená kortag, bale tán wati chokkáni áyagá hecchi nagwasht, chéá ke chokk gyábáná, ramagán chárénagá atant.
GEN 34:6 Shekémay pet, Hamór átk ke gón Ákubá habar bekant.
GEN 34:7 Anchó ke Ákubay chokk sahig butant, cha gyábáná per tarretant. Padard atant o zahrá porr atant ke Shekémá Ákubay jenekk zená kortag o Esráil bannám kortag. É kár mabutén.
GEN 34:8 Hamórá gón áyán habar kort o gwasht: “Mani chokk Shekémay del pa shomay jenekká band ent. Áiá pa Dinahá zámát kanét.
GEN 34:9 Gón má sángbandi bekanét. Wati jenekkán márá bedayét o maygán shomá bezurét.
GEN 34:10 May kerrá jahmenend bebét. É molk shomay watig ent, benendét, sawdágeri o bápár bekanét o melkatay wáhond bebét.”
GEN 34:11 Shekémá gón Dinahay pet o brátán gwasht: “Mani sará mehrabán bebét. Harché lóthét, shomárá dayán.
GEN 34:12 Bánóray hakmehrá begwashét o har málé ke lóthét, haminchok ke gwashét, man shomárá dayán. Bass é jenekká gón man sur bedayét.”
GEN 34:13 Ákubay chokkán gón Shekém o áiay pet Hamórá pa makkári habar kort, chéá ke Shekémá áyáni gohár Dinah zená kortagat.
GEN 34:14 Ákubay chokkán gón áyán gwasht: “Má é kárá korta nakanén. Gón sonnat nabutagén mardéá wati goháray sur dayag pa má roswáié.
GEN 34:15 May shart bass yakké. Shomay sajjahén mardén may paymá sonnat kanag bebant.
GEN 34:16 Gorhá má wati jenekkán shomárá dayén o shomay jenekkána zurén o shomay kerrá jahmenenda bén o gón shomá yakjáh, yakkén kawma bén.
GEN 34:17 Bale agan shomá sonnat kanagá razá mabét, má wati gohárá zurén o rawén.”
GEN 34:18 Áyáni habar Hamór o Hamóray chokk Shekémá dóst but.
GEN 34:19 Shekém wati petay lógay sharapmandterén mardom at. Hecch mahtal nabut ke Ákubay jenekki sakk dóst at.
GEN 34:20 Gorhá Hamór o áiay chokk Shekém wati shahray darwázagay dapá átkant o gón wati shahray mardénán habaresh kort. Gwashtesh:
GEN 34:21 “É sharrén mardom ant o gón má jang o jadala nalóthant. Shomá bellétesh ke molká nendant o bápára kanant. É molká pa eshán jágah báz ent. Má esháni jenekkána gerén o é maygán.
GEN 34:22 Bale pa may kerrá jahmenend bayag o gón má yakkén kawm bayagá, esháni yakkén shart esh ent ke may har mardén esháni paymá sonnat kanag bebit.
GEN 34:23 É dhawlá esháni dalwat o mál o jánwar mayg ham bant gón. Gorhá byáét esháni shartá mannén ke may kerrá jahmenend bebant.”
GEN 34:24 Shahray darwázagá átkagén sajjahén mardénán Hamór o áiay chokk Shekémay habar zort o shahray har mardén sonnat kanag but.
GEN 34:25 Say róch gwast. Angat áyán sonnatay dard per atant ke Ákubay do chokk, Dinahay brát Shamun o Láwiá wati zahm zortant o nádelgóshén shahray sará orosh kort o shahray sajjahén mardénesh koshtant.
GEN 34:26 Áyán Hamór o áiay chokk Shekém zahmay dapá dát o koshtant o Dinahesh cha Shekémay lógá zort o shotant.
GEN 34:27 Ákubay chokk mordagáni sará per retkant o hamá shahresh pol o pánch kort ke ódá áyáni gohár zená kanag butagat.
GEN 34:28 Áyán shahray mardománi ramag o górom o har o shahray tahá o shahrá dhann dhagáráni sará harché ke hastat, hull kort o bort.
GEN 34:29 Á mardománi sajjahén mál o hasti‌esh bortant, janén o chokkesh bandig kortant o lógáni sajjahén chizzesh áwár jatant.
GEN 34:30 Gorhá Ákubá gón Shamun o Láwiá gwasht: “Shomá maná azábé sará dát ke shomá maná é molkay mardom, bezán Kanháni o Perizziáni delá syahru kort. Má kammok én o agan é mardom wati zórá yakk bekanant o mani sará orosh bekanant, man o mani lógay mardom tabáha bén.”
GEN 34:31 Bale áyán gwasht: “Gorhá á may gohárá kahbagéay paymá kármarz bekant?”
GEN 35:1 Hodáyá gón Ákubá gwasht: “Pád á, Bayt-Élá beraw o hamódá benend. Ódá pa man korbánjáhé addh kan, pa hamá Hodáyá ke wahdé taw cha wati brát Issuá tachagá atay, tai démá záher but.”
GEN 35:2 Ákubá gón wati lógay mardom o á dega sajjahén hamráhán gwasht: “Hamá dhanni hodá ke shomay nyámá ant, cha wat daresh kanét, watá pák o palgár kanét o wati pocchán badal kanét o
GEN 35:3 byáét Bayt-Élá rawén. Ódá man pa hamá Hodáyá korbánjáhé addha kanán ke sakki o sóriáni róchán mani dwái gósh dáshtag o har jáh ke shotagán, gón man gón butag.”
GEN 35:4 Gorhá áyán har dhanni hodáé ke gón at o har cholombé ke góshán at, sajjahénesh Ákubárá dátant o Ákubá é zort o Shekémá, mazanén drachkay chérá kall kortant.
GEN 35:5 Nun á ráh geptant. Hodáay torsá áyáni chapp o chágerday sajjahén shahráni sará mán shánt o kass áyáni randá nakapt.
GEN 35:6 Ákub o áiay sajjahén hamráh Kanhánay sardhagárá Luzay shahrá, bezán Bayt-Élá sar butant.
GEN 35:7 Ákubá hamódá korbánjáhé addh kort o á jágahay námi Él-Bayt-Él kort, chéá ke wahdé á cha wati brátá tachagá at, Hodáyá hamedá áiay démá watá záher kort.
GEN 35:8 Rebekkáay shirmát Daburah bérán but o áesh cha Bayt-Élá dhann, mazanén drachkéay chérá kabr kort. Á jágahay nám Alun-Bákut kanag but.
GEN 35:9 Ákub ke cha Paddán-Arámá átk, Hodá padá áiay démá záher but o Ákubi barkat dát.
GEN 35:10 Gón áiá gwashti: “Tai nám Ákub ent, bale cha ed o rand taw Ákub gwashaga nabay. Tai nám Esráila bit.” Gorhá Ákubay námi Esráil kort.
GEN 35:11 Hodáyá gón Ákubá gwasht: “Man porwákén Hodá án. Chokk o bar kan o gésh bayán bay. Cha taw kawmé o kawmáni rombé pédá bit o bádsháh cha tai sréná pédá bant.
GEN 35:12 Hamá molk ke man Ebráhém o Esákárá dát, tará ham dayáni o cha taw o rand, tai nasl o padréchárá ham é molká dayán.”
GEN 35:13 Gorhá Hodáyá Ákub esht o cha hamá jágahá ke gón áiá habari kortagat, borzád shot.
GEN 35:14 Hamé jágahá ke Hodáyá gón áiá habar kortagat, Ákubá ódá sengay chédagé addh kort o sengay sará réchagi korbánigi rétk o rógeni ham per rétk.
GEN 35:15 É jágahá ke Hodáyá gón Ákubá habar kortagat, é jágahay nám Ákubá Bayt-Él kort.
GEN 35:16 Gorhá á cha Bayt-Élá dar átkant. Angat Eprátá sar nabutagatant ke Ráhilay chellagi dard bongéj butant. É sáhat pa áiá sakk grán at.
GEN 35:17 Wahdé á chellagiay gránén dardán at, janbógá gón áiá gwasht: “Mators. Tará dega mardénchokké bit.”
GEN 35:18 Wahdé Ráhilay markay sáhat átk o áiay arwáh bál kanagá at, wati chokkay námi Ben-Uni kort, bale petá chokkay nám Benyámin kort.
GEN 35:19 Ráhil mort o áesh Eprátay ráhá, bezán Bayt-Lahemay ráhá kabr kort.
GEN 35:20 Ákubá áiay kabray sará shakké mekk kort o hamé shakk tán róche maróchigá Ráhilay kabray nesháni ent.
GEN 35:21 Esráil padá ráh gept o wati gedáni Migdál-Édaray domi némagá mekk kort.
GEN 35:22 Esráil hamé damagá nendók at. Ruben shot o gón wati petay soriat, Bellahá wapt o wábi kort. Esráil sahig but. Ákubá dwázdah mardénchokk hastat:
GEN 35:23 cha Lyáhá Ruben, ke Ákubay awali chokk at o Shamun o Láwi o Yahudá o Issákár o Zebulun atant,
GEN 35:24 cha Ráhilá Issop o Benyámin,
GEN 35:25 Bellah ke Ráhilay móled at, cha áiá Dán o Naptáli,
GEN 35:26 Zelpah ke Lyáhay móled at, cha áiá Jád o Ásher. Ákubay hamá mardénchokk ke Paddán-Arámá pédá butant, hamesh atant.
GEN 35:27 Ákub wati pet Esákay kerrá Mamrehá, Keryah-Arbahay shahrá bezán Hebruná átk, hamódá ke Ebráhém o Esáká darámadáni paymá zend gwázéntagat.
GEN 35:28 Esáká yakk sad o hashtád sál omr kort,
GEN 35:29 Wati goddhi dami kasshet o gón wati mortagén mahluká hawár but. Esáká sharrén mazanén omré kort o pir but o mort. Áiay mardénchokkán, bezán Issu o Ákubá á zort o kabr kort.
GEN 36:1 Issu ke áiay domi nám Edum at, áiay nasl o padréchay kessah chosh ent:
GEN 36:2 Issuá do Kanháni jan gept, yakkéay nám Ádah at o yakkéay nám Ohulibámah. Ádah Ilun Hittiay jenekk at o Ohulibámah Anáay jenekk o Sebun Héwiay nomásag at.
GEN 36:3 Issuay sayomi janay nám Basémat at. Basémat Esmáélay jenekk o Nebáyutay gohár at.
GEN 36:4 Issuay chokk Elipáz cha Ádahá pédá but o Rawél cha Basématá.
GEN 36:5 Yahush o Yalám o Kórá cha Ohulibámahá pédá butant. Esh atant Issuay mardénchokk ke Kanhánay sardhagárá pédá butant.
GEN 36:6 Issuá wati jan o bacch o jenekk o lógay sajjahén mardom, wati mál o dalwat o jánwar o harché ke áiá Kanháná chetag o nazz áwortagat, gón wat zortant o cha wati brát Ákubá dur dega molkéá shot.
GEN 36:7 Áyáni mál o hasti sakk báz atant, paméshká hór neshtesh nakort, chéá ke zemin o kahchar pa áyáni ramag o góromán bassa nabut.
GEN 36:8 Gorhá Issu bezán Edum, Sahiray kóhestagá jahmenend but.
GEN 36:9 Sahiray kóhestagay Edumiáni bonpirok Issuay nasl o padréchay kessah chosh ent:
GEN 36:10 Issuay mardénchokkáni nám esh ant: Elipáz ke Issu o Ádahay chokk at, Rawél ke Issu o Basématay chokk at.
GEN 36:11 Elipázay mardénchokk Timán o Umár o Sepu o Gatám o Kenáz atant.
GEN 36:12 Issuay chokk Elipázá soriaté hastat ke námi Temnah at o Elipázay chokk Amálik cha hamáiá pédá but. Issuay jan Ádahay óbádag hamesh atant.
GEN 36:13 Rawélay mardénchokk Nahát o Zárah o Shammá o Mezzá atant. Issuay jan Basématay óbádag hamesh atant.
GEN 36:14 Issuay jan Ohulibámah, Anáay jenekk o Sebunay nomásag at. Yahush o Yahlám o Kórá Issuay hamá mardénchokk atant ke cha Ohulibámahá pédá butagatant.
GEN 36:15 Bani Issuay thakkáni sardár: É sardár, Issuay awali chokk Elipázay mardénchokk atant: Timán o Umár o Sepu o Kenáz o
GEN 36:16 Kórá o Gatám o Amálik. Edumay sardhagárá Elipázay thakkáni sardár hamesh atant. É Ádahay óbádag atant.
GEN 36:17 Issuay chokk Rawélay mardénchokk ke thakkáni sardár butant, esh ant: Nahát o Zárah o Shammá o Mezzá. É Edumay sardhagárá Rawélay thakkáni sardár atant o Issuay jan Basématay óbádag atant.
GEN 36:18 Issu o áiay jan Ohulibámahay mardénchokk ke sardár butant, esh ant: Yahush o Yahlám o Kórá. É hamá thakkáni sardár atant ke cha Issuay jan Ohulibámahá pédá butant. Ohulibámah, Anáay jenekk at.
GEN 36:19 É, Issuay, bezán Edumay mardénchokk atant ke har yakké wati thakkay sardár but.
GEN 36:20 Sahir Hóráiay mardénchokk ke á molká nendók atant, esh ant: Lután o Shubál o Sebun o Aná o
GEN 36:21 Dishun o Eser o Dishán. Sahiray é chokk Edumay sardhagárá Hórái thakkáni sardár atant.
GEN 36:22 Hóri o Hémám, Lutánay mardénchokk atant. Temnah, Lutánay gohár at.
GEN 36:23 Shubálay mardénchokk Alwán o Manahát o Ébál o Shepu o Ónám atant.
GEN 36:24 Sebunay mardénchokk Ayá o Aná atant. É hamá Aná ent ke wati pet Zebyánay haráni chárénagay wahdá gyábáná garmén chammagi dar gétkant.
GEN 36:25 Anáay mardénchokk Dishun at o janénchokk Ohulibámah.
GEN 36:26 Dishunay mardénchokk Hemdán o Eshbán o Etrán o Kerán atant.
GEN 36:27 Eseray mardénchokk Belhán o Záwán o Akán atant.
GEN 36:28 Dishánay mardénchokk Uz o Arán atant.
GEN 36:29 Hórái thakkáni sardár esh atant: Lután o Shubál o Sebun o Aná o
GEN 36:30 Dishun o Eser o Dishán. Sahiray sardhagárá Hórái thakkáni sardár yakk yakká hamesh atant.
GEN 36:31 É hamá bádsháh atant ke Edumay molká bádsháhi‌esh kort. Cha ed o pésar Esráiliáni sará bádsháhéá hákemi nakortagat.
GEN 36:32 Behuray mardénchokk Bélahá mán Edumá bádsháhi kort. Bélahay shahray nám Dinábah at.
GEN 36:33 Cha Bélahay marká rand, Zárahay mardénchokk Yubáb áiay jáhá bádsháhiá nesht. Yubáb Bosrahay mardomé at.
GEN 36:34 Yubábay marká rand Hóshám áiay jáhá bádsháh but. Hóshám Timániáni molkay mardomé at.
GEN 36:35 Hóshámay marká rand Bedáday mardénchokk Hadád, Hóshámay jáhá bádsháh but. É hamá Hadád at ke Muábay dashtá Midyánii jatant. Hadáday shahray nám Awit at.
GEN 36:36 Hadáday marká rand Samlah, Hadáday jáhá bádsháh but. Samlah Masrikahay mardomé at.
GEN 36:37 Samlahay marká rand Shául, Samlahay jáhá bádsháh but. Shául Rahubutay mardomé at. Rahubut Parátay kawray kerrá ent.
GEN 36:38 Sháulay marká rand Akburay mardénchokk Bahal-Hánán Sháulay jáhá bádsháh but.
GEN 36:39 Akburay chokk Bahal-Hánánay marká rand Hadád áiay jáhá bádsháh but. Hadáday shahray nám Páhu at o janay námi Mehtabel at. Mehtabel, Matreday jenekk at o Matred Mizáhabay jenekk.
GEN 36:40 É, Issuay thakkáni sardár atant. Áyáni nám, thakk o damagáni red o banday hesábá Temnah o Alwah o Atit o
GEN 36:41 Ohulibámah o Élah o Pinun o
GEN 36:42 Kenáz o Timán o Mebzár o
GEN 36:43 Magdél o Irám atant. É wati halk o métagáni hesábá Edumay thakkáni sardár atant, hamá molká ke áyáni wati melkat at. É, Edumiáni bonpirok Issuay padréch at.
GEN 37:1 Ákub hamá sardhagárá jahmenend but ke áiay petá ódá darámadéay paymá zend gwázéntagat, bezán Kanhánay molká.
GEN 37:2 Ákubay nasl o padréchay kessah chosh ent: Issop habdah sáli warnáé at o wati brátáni hamráhiá ramagia chárént, wati mátó Bellah o Zelpahay mardénchokkáni hamráhiá. Issopá wati brátáni radén káráni bárawá pet hála dát.
GEN 37:3 Esráilá Issop cha wati á dega sajjahén chokkán dóstter at, chéá ke Issop áiay piránsariay chokk at. Pa Issopá sakkén dhawldárén kabáhé addhi kanáént.
GEN 37:4 Wahdé brátán dist ke petá Issop cha má dóstter ent, cha Issopá napratesh kort o gón áiá modám zahrá zahr habaresha kort.
GEN 37:5 Issopá wábé dist o wahdé wati bráti hál dátant, áiay brátán cha Issopá géshter naprat kort.
GEN 37:6 Issopá gón áyán gwasht: “Gósh dárét! Man wati distagén wábá shomárá gwashán.
GEN 37:7 Má dhagáray sará gandom lóthok kanagá atén ke yakbará mani lóthok pád átk o óshtát. Hamé damáná shomay lóthok, mani lóthokay chapp o chágerdá mocch butant o áesh sojdah kort.”
GEN 37:8 Issopay brátán gwasht: “Taw may sará bádsháhi kanaga lóthay? Hakk o del may sará hákemia kanay?” Issopay brátán, áiay wáb o habaráni sawabá cha áiá géshter naprat kort.
GEN 37:9 Issopá dega wábé dist o wati bráti hál dátant. Gwashti: “Gósh dárét. Man dega wábé distag. É randi, róch o máh o yázdah estár maná sojdah kanagá at.”
GEN 37:10 Wahdé wati pet o bráti hál dátant, petá Issop hakkal kort o gwasht: “É chónén wábé taw distag? Man o tai mát o tai brát byáén o tará sojdah bekanén?”
GEN 37:11 Brát gón Issopá hasaddig atant, bale petay hayál modám gón Issopay wáb o habarán at.
GEN 37:12 Issopay brátán petay ramag pa chárénagá Shekémay nazzikká bortagat.
GEN 37:13 Esráilá gón Issopá gwasht: “Taw zánay ke tai brát ramagay chárénagá Shekémá shotagant. Watá gisshén o áyáni kerrá beraw.” Issopá gwasht: “Sharr ent.”
GEN 37:14 Esráilá gwasht: “Beraw o bechár tai brát o ramag dráh o salámat ant? Áyáni hálá ger o byá.” Gorhá Issopi cha Hebrunay daragá ráh dát. Lógesh hamódá at. Wahdé Issop Shekémá sar but,
GEN 37:15 gón yakk mardéá dochár kapt. Mardá dist ke Issop gyábáná sargardán ent, josti kort: “Taw ché shóház kanagá ay?”
GEN 37:16 Issopá gwasht: “Wati brátán. Taw zánay ramagá kojá chárénagá ant?”
GEN 37:17 Mardá passaw dát: “Cha edá shotagant. Man eshkot, á gwashagá atant: ‘Dótáná berawén.’” Gorhá Issop hamá némagá dém pa brátán shot. Dótáná dari gétkant.
GEN 37:18 Brátán Issop cha durá dist o áiay sar bayagá pésar pa áiay koshagá pandalé sázetesh.
GEN 37:19 Watmánwatá gwashtesh: “Bechárét, wábáni wájah pédák ent.
GEN 37:20 Byáét nun koshén o cha é chátán yakkéá dawria dayén, gwashén rastaréá wártag. Gorhá chárén ke cha áiay wábán ché dara kayt.”
GEN 37:21 Bale wahdé Rubená é habar eshkot, johdi kort ke Issopá cha áyáni dastá berakkénit. Gwashti: “Enna, Issopay sáhá nagerén.
GEN 37:22 Hón maréchét. Hamé gyábáná, é chátá dawria dayén, bale nakoshéni.” Rubená é habar paméshká gwasht ke Issopá berakkénit o gón wat bezurit o petay kerrá bebárt.
GEN 37:23 Wahdé Issop brátáni kerrá sar but, áiay gwaray kabáh, hamá dhawldárén kabáhesh dar kort o
GEN 37:24 Issopesh gept o chátá dawr dát. Chátá áp mán néstat, kórcháté at.
GEN 37:25 Brát nánay waragá neshtant. Chammesh ke chest kortant, distesh Esmáéliáni kárwáné cha Gelyádá pédák ent. Áyán wati oshterán sosorr o bám o washbó laddhetagat o Mesrá baragá atant.
GEN 37:26 Yahudáyá gón wati brátán gwasht: “Márá cha wati brátay koshag o áiay hónay chér dayagá che páedagé rasit?
GEN 37:27 Byáét, Issopá Esmáéliáni kerrá bahá kanén. Áiay jendá nakoshén. May brát ent. May wati haddh o hón ent.” Brátán mannet.
GEN 37:28 Wahdé Midyáni sawdáger nazzikká rasetant, brátán Issop cha chátá kasshet o bist nograhá Esmáéliáni kerrá bahá kort. Esmáélián Issop Mesrá bort.
GEN 37:29 Wahdé Ruben per tarret o chátay kerrá átk o Issopi ódá nadist, wati godi dertant.
GEN 37:30 Wati brátáni kerrá shot o gwashti: “Bachakk ódá naent. Nazánán ché bekanán.”
GEN 37:31 Gorhá pasé heláresh kort, Issopay kabáhesh zort o pasay hónán jat.
GEN 37:32 Nun Issopay dhawldárén kabáhesh petay kerrá bort o gwashtesh: “Má é chetag. Bechári, bárén tai chokkay kabáh naent?”
GEN 37:33 Ákubá kabáh pajjáh áwort, gwashti: “É mani chokkay kabáh ent. Chokk rastaréá wártag. Allamá Issop thokkor thokkor butag.”
GEN 37:34 Gorhá Ákubá wati god dertant o gónién god gwará kort o tán bázén róchéá wati chokkay porsá nesht.
GEN 37:35 Ákubay sajjahén bacch o jenekk pa áiay tasallá dayagá átkant, bale á tasallá nabut. Gwashti: “Man porsigá porsig mordagáni jaháná, wati chokkay kerrá jahláda rawán.” O pet modám pa Issopá gréwagá at.
GEN 37:36 O á némagá Midyánián Mesrá Issop Putipáray kerrá bahá kort. Putipár, Perawnay apsaré at. Negahpánáni master at.
GEN 38:1 Hamé wahdá Yahudáyá wati brát yalah dátant o shot o Hirá námén mardéay kerrá jahmenend but. Hirá Adollámié at.
GEN 38:2 Ódá áiá Shóhá námén mardéay jenekk dist. Shóhá Kanhánié at. Yahudáyáy Shóháay jenekk sáng kort. Gón áiá yakjáh but o
GEN 38:3 janénay láp porr but o mardénchokké áworti. Yahudáyá chokkay nám Hér kort.
GEN 38:4 Yahudáay jan padá lápporr but. Dega mardénchokké áworti o eshiay námi Ónán kort.
GEN 38:5 Padá dega mardénchokké áworti o eshiay námi Shélá kort. Shélá Kezébay shahrá pédá but.
GEN 38:6 Yahudáyá wati awali chokk Hér gón Támár námén jenekkéá sur dát,
GEN 38:7 bale Hodáwanday chammán Yahudáay awali chokk Hér badkáré at, paméshká Hodáwandá markay dapá dát.
GEN 38:8 Gorhá Yahudáyá gón Ónáná gwasht: “Wati brátay janózámá beger o gón áiá yakjáh bay. Wati bráti parzá purah kan o pa wati brátá padréché pédá kan,”
GEN 38:9 bale Ónáná zánt ke é mani jenday padrécha nabit, paméshká wahdé gón wati brátay janá yakjáha but, wati marzii dhanná rétkant ke pa brátá padréché pédá makant.
GEN 38:10 Áiay é kár Hodáwanday chammán radén káré at, paméshká Ónáni ham markay dapá dát.
GEN 38:11 Gorhá Yahudáyá gón wati neshár Támárá gwasht: “Tánke mani chokk Shélá kasán ent, wati petay lógá janózámi benend.” Áiá wati delá hayál kort: “Chosh mabit ke Shélá ham wati brátáni paymá bemerit.” Gorhá Támár shot o wati petay lógá nesht.
GEN 38:12 Mazanén moddatéá rand Yahudáay jan ke Shóháay jenekk at, mort. Wahdé Yahudá cha porsá pád átk, Temnahay shahrá wati paschénáni kerrá shot. Áiay sangat Hirá Adollámi áiay hamráh at.
GEN 38:13 Wahdé Támár sahig but ke mani nákó pa wati pasáni chéná dém pa Temnahá ráhá ent,
GEN 38:14 wati janózámi godi kasshetant, nekábé pósheti o Temnahay ráhay sará, Enáimay shahray darwázagay kerrá nesht, chéá ke áiá dist ke Shélá nun mazan butag, bale angat maná gón áiá suresh nadátag.
GEN 38:15 Yahudáyá ke Támár dist, delá gwashti é kahbagé chéá ke Támárá wati dém póshetagat.
GEN 38:16 Nazánti ke mani neshár ent. Hamódá, ráhay kashá Yahudá áiay kerrá shot o gwashti: “Gón man nayáay gón?” Támárá jost kort: “Gón man ke wapt o wába kanay, maná ché dayay?”
GEN 38:17 Yahudáyá passaw dát: “Cha wati ramagá pa taw shenekké ráha dayán.” Támárá gwasht: “Zamánat ché dayay ke taw shenekká ráha dayay?”
GEN 38:18 Yahudáyá gwasht: “Ché zamánat bedayán?” Támárá gwasht: “Wati mohr o mohray bandá o wati dastay asáyá.” Yahudáyá é chizz Támáray dastá dátant, gón áiá wapt o wábi kort o Támár lápporr but.
GEN 38:19 Támár ke lógá shot, wati nekábi kasshet o padá janózámi godi gwará kortant.
GEN 38:20 Yahudáyá gón wati Adollámi sangatá gwasht ke shenekká bar o zamánatay chizzán cha janénay kerrá pach ger o byár. Bale sangatá janén nadist.
GEN 38:21 Cha shahray mardomán josti kort: “Bothánahay hamá móled ke Enáimay ráhay sará neshtagat, kojá ent?” Áyán gwasht: “Edá bothánahay hecch móled nabutag.”
GEN 38:22 Gorhá Yahudáay sangat átk o gwashti: “Man á janén dar gétk nakort. Shahray mardomán ham gwasht ke edá bothánahay hecch móled nabutag.”
GEN 38:23 Yahudáyá gwasht: “Belli á chizzi gón ant. Chó mabit ke may jend bannám bebit. Bechár, man shenekk ráh dát, bale á janénay jend gár ent.”
GEN 38:24 Kesás say máhá rand Yahudáesh hál dát ke: “Tai neshár Támárá wati dém syáh kortag o nun lápi porr ent.” Yahudáyá gwasht: “Áiá dhanná dar kanét o bon dayét.”
GEN 38:25 Wahdé Támárá baragá atant, pa wati nákóá paygámé ráhi dát o gwashti: “É chizzáni wáhondá maná lápporr kortag. Bechár, bárén é mohr o mohray band o asáay wáhondá pajjáha káray?”
GEN 38:26 Yahudáyá é chizz pajjáh áwortant o gwashti: “Támár cha man bégonáhter ent ke man Támár gón wati chokk Shéláyá sur nadát.” Yahudáyá padá hechbar gón áiá wapt o wáb nakort.
GEN 38:27 Wahdé Támáray chellag bayagay wahd but, áiay lápay chokk járh atant.
GEN 38:28 Támár ke chellag bayagá at, cha jáhrán yakkéá wati dast cha áiay jáná dhann dar kort o janbógá sohrén bandikké áiay dastá bast o gwashti: “É chokk pésará átk.”
GEN 38:29 Bale wahdé é chokká wati dast padá tahá bort, bráti dar átk o janbógá gwasht: “Eh! Taw chón wati ráh pach kort.” Paméshká áiay námesh Páres kort.
GEN 38:30 Randá áiay brát ke dastá sohrén bandikké bastagat, pédá but o áiay námesh Zárah kort.
GEN 39:1 Nun, Esmáélián Issop Mesrá áwort. Ódá, Putipár námén Mesri mardéá Issop bahá gept. Putipár cha Perawnay apsarán yakké at. Negahpánáni master at.
GEN 39:2 Hodáwand gón Issopá gón at, paméshká Issop har kárá kámyáb at o wati Mesri wájahay lógá jahmenend at.
GEN 39:3 Wahdé Issopay wájahá dist ke Hodáwand gón Issopá gón ent o Issop har káré ke kant, Hodáwand áiá kámyába kant,
GEN 39:4 Issopay sará mehrabán but o Issopi wati hásén hezmatkár kort. Putipárá Issop wati lógay master kort o wati sajjahén mál o hastii hamáiay dastá dát.
GEN 39:5 Cha hamá wahdá ke áiá Issop wati lóg o sajjahén hastiay master kort, Hodáwandá pa Issopaygi Mesri Putipáray lóg barkat dát. Hodáwandá Putipáray sajjahén mál o hasti barkat dát, lógá ham o dhagáráni sará ham.
GEN 39:6 Gorhá Putipárá wati har chizz hamáiay dastá dát o wati waráká abéd gón dega hecchá kári néstat. Issop washkadd o brahdárén warnáé at.
GEN 39:7 Kammé wahdá rand wájahay lógiá chamm Issopá sakk dátant o gwashti: “Gón man bwaps.”
GEN 39:8 Bale Issopá namannet o gwashti: “Mani wájah cha man anchó deljam ent ke áiá gón é lógay hecchá kár nést o wati sajjahén mál o hastii mani dastá dátag.
GEN 39:9 É lógá kass cha man master naent. Tai jendá abéd hecch chizzi cha man dur nadáshtag, chéá ke taw áiay lógbánok ay. Gorhá man chón choshén radén káré bekanán o watá Hodáay chammán gonahkár bekanán?”
GEN 39:10 Wájahay janá har róch Issop mennata kort, bale Issopá namannet o nalótheti ke gón áiá wapt o wáb bekant. Áiay nazzikk o gwará bayagi ham wassha nabut.
GEN 39:11 Yakk róché ke Issop wati káráni kanagá lógá potert, lógá dega kass néstat.
GEN 39:12 Putipáray janá dast Issopay kabáhá sakk kortant. Gón Issopá gwashti: “Byá, gón man bwaps.” Bale Issop tacháná dar átk o kabáh janénay dastá mant.
GEN 39:13 Wahdé janéná dist ke Issopá wati kabáh mani dastá esht o cha lógá tatk,
GEN 39:14 wati lógay hezmatkári gwánk jatant o gwashti: “Bechárét, mani lógwájahá é Ebráni may lógá áwortag ke márá kalági bekant. É mani chakká kaptag ke gón man bwaps, bale man kukkár kort o
GEN 39:15 wahdé eshiá dist ke man kukkár kort, wati kabáhi mani kerrá esht o dar shot.”
GEN 39:16 Putipáray janá Issopay kabáh tán hamá wahdá wati kerrá ér kort ke Issopay wájah lógá átk,
GEN 39:17 gón áiá kessahi kort o gwashti: “É Ebráni golám ke taw may lógá áwortag, mani kerrá átk ke maná kalági bekant,
GEN 39:18 bale wahdé man kukkár kort, áiá wati kabáh mani kerrá yalah dát o dar shot.”
GEN 39:19 Wahdé Issopay wájahá wati lógiay habar eshkotant ke tai hezmatkárá gón man chosh kortag, sakk hezhm gept o
GEN 39:20 Issopi zort o hamá bandijáhá band kanáént ke ódá bádsháhay bandig band atant. Issop hamódá band kanag but,
GEN 39:21 bale Hodáwand gón áiá gón at o wati mehri pa Issopá gwárént o bandijáhay masteray deli pa Issopá narm kort.
GEN 39:22 Bandijáhay masterá Issop sajjahén bandigáni master kort o óday har kári Issopay dastá dát.
GEN 39:23 Bandijáhay masterá har kár o zemmahé ke Issopay dastá dát, deli jam at, chéá ke Hodáwand gón Issopá gón at o Issopá har káré ke kort, Hodáwandá á kámyába kort.
GEN 40:1 Kammé wahdá rand Mesray bádsháhay ápiá o nániá wati wájah, Mesray bádsháhay nezará radi kort.
GEN 40:2 Perawn doén kárdáráni sará, masterén ápi o masterén nániay sará zahr gept o
GEN 40:3 negahpánáni masteray lógá bandi kanáéntant, hamá bandijáhá ke Issop bandig at.
GEN 40:4 Negahpánáni masterá Issop hokm dát ke esháni hayálá bedár. Issopá anchosh kort. É mardom tán moddatéá bandijáhá mantant.
GEN 40:5 Mesray bádsháhay ápi o náni ke bandijáhá atant, yakk shapé doénán wáb dist o har yakkéay wábá jetáén mánáé hastat.
GEN 40:6 Wahdé Issop é dega sohbá áyáni kerrá átk, disti ke doén paréshán ant.
GEN 40:7 Perawnay hamé doén kárdár ke Issopay wájahay bandijáhá gón áiá yakjáh band atant, Issopá cha áyán jost kort: “Maróchi shomá paréshán ét, che gappé?”
GEN 40:8 Áyán passaw dát: “Má doénán wáb distag o kass nést ke mánáesh bekant.” Issopá gwasht: “Wábáni mánáay zánag wa Hodái káré. Wati wábán maná begwashét.”
GEN 40:9 Gorhá ápiáni masterá wati wáb gón Issopá gwasht: “Bechár, man wábé dist ke anguray drachké mani démá ent.
GEN 40:10 Drachká say thál per. Anchó ke drachká tej jat, burr o bar but o cha hóshán rasetagén angur dar átk.
GEN 40:11 Perawnay pyalah mani dastá at. Man angur sar chet o Perawnay pyálahay tahá pretkant o pyalah áiay dastá dát.”
GEN 40:12 Issopá gwasht: “Tai wábay máná esh ent: Say thálay máná say róch ent.
GEN 40:13 Say róchay tahá Perawn tai sará borza kant o tará pésarigén mansabá dant. Taw Perawnay pyálahá dastá dayay, anchó ke taw pésará kortag hamá wahdá ke áiay ápi butagay.
GEN 40:14 Wahdé tai kár sharra bant, mani yátá bekap. Mehrabáni bekan o mani hálá Perawná sar kan o maná cha é bandijáhá dar kanáén.
GEN 40:15 Man cha Ebrániáni molká dozzag o edá árag butagán o edá ham man choshén káré nakortag ke é syahchátá dawr dayag bebán.”
GEN 40:16 Wahdé nániáni masterá dist ke Issopá sharrén mánáé kort, gwashti: “Man wati wábá distag ke naganay say sapt mani sará ent o
GEN 40:17 sarbori saptá pa Perawná warh warhén patkagén warák mán, bale báli morg cha saptá eshán waragá ant.”
GEN 40:18 Issopá gwasht: “Tai wábay máná esh ent: Say saptay máná say róch ent.
GEN 40:19 Say róchay tahá Perawn tai sará ‘borza’ kant o tará drachkéá dranjit o báli morg tai góshtá warant.”
GEN 40:20 Sayomi róchá Perawnay sálgerah at. Áiá sajjahén hezmatkár dáwaté dátant. Wati hezmatkáráni démá masterén ápi o masterén nániay sari “borz” kortant.
GEN 40:21 Áiá masterén ápi padá hamá mansabá nádént ke Perawnay pyálah dastá dayók bebit.
GEN 40:22 Bale hamá paymá ke Issopá gwashtagat o masterén nániay wábi máná kortagat, Perawná masterén náni dratk.
GEN 40:23 Bale ápiáni masterá Issop shamosht o áiay tránagá nakapt.
GEN 41:1 Do sálá rand Perawná wábé dist ke Nillay kawray kerrá óshtátagán.
GEN 41:2 Hamé wahdá hapt dhawldár o pazzórén gók cha ápá dar átk o kásháni tahá charagá laggetant.
GEN 41:3 Cha eshán o rand dega hapt baddhawl o lágarén gók cha Nillá dar átk o kawray kashá, á dega gókáni kerrá óshtátant.
GEN 41:4 Baddhawl o lágarén gókán haptén dhawldár o pazzórén gók wártant. Perawn cha wábá ágah but.
GEN 41:5 Perawn padá wapt o dega wábé disti ke dánay hapt zandh o sharrén hóshag yakk tháléay sará rodagá ent.
GEN 41:6 Cha eshán o rand dega hapt hóshag záher but. É hóshag lágar atant o cha ródarátká kasshókén lewárá gimmoréntagatant.
GEN 41:7 Lágarén hóshagán haptén zandh o sharrén hóshag wártant. Perawn pád átk o zánti ke é wábé at.
GEN 41:8 Sohb ke but, Perawn paréshán at. Wati mardomi ráh dátant o Mesray sajjahén dáná o jádugeri lótháéntant. Perawná gón áyán wati wábáni kessah kort, bale kassá áiay wáb máná kort nakortant.
GEN 41:9 Gorhá masterén ápiá gón Perawná gwasht: “Man maróchi wati radiáni tránagá kaptagán.
GEN 41:10 Yakk randé tawe Perawn wati hezmatkáráni sará zahr geptay o maná o masterén náni zort o negahpánáni masteray bandijáhá band kanáént.
GEN 41:11 Yakk shapé má doénán wáb dist o har yakk wábéá wati mánáé hastat.
GEN 41:12 Ódá gón má Ebráni warnáé band at. Negahpánáni masteray hezmatkáré at. Má gón áiá wati wábay kessah kortant o áiá máná kort o dátant. Doénán wati wábáni máná raset.
GEN 41:13 Hamá paymá ke áiá may wáb máná kortagatant, hamá dhawlá but. Maná wati pésarigén mansab raset o náni dranjag but.”
GEN 41:14 Gorhá Perawná Issop lótháént o Issop hamá damáná cha syahchátá dar kanag o árag but. Issopá rissh sát o god matth kortant o Perawnay darbárá átk.
GEN 41:15 Perawná gón Issopá gwasht: “Man wábé distag o kass eshiá máná korta nakant, bale man tai bárawá eshkotag ke agan kasé gón taw wati wábay kessahá bekant, taw mánái korta kanay.”
GEN 41:16 Issopá gwasht: “É cha mani was o wáká dar ent, bale Hodá tawe Perawná hayrén passawé dáta kant.”
GEN 41:17 Gorhá Perawná gón Issopá gwasht: “Man wáb dist ke Nillay kawray kashá óshtátagán.
GEN 41:18 Hamé wahdá hapt pazzór o dhawldárén gók cha kawrá dar átk o kásháni tahá charagá laggetant.
GEN 41:19 Cha áyán o rand dega hapt gók dar átk ke nezór o baddhawl o lágar atant. Sajjahén Mesray molká man choshén baddhawlén gók hechbar nadistagat.
GEN 41:20 Lágar o baddhawlén gókán pésari haptén pazzórén gók wártant.
GEN 41:21 Bale áyáni waragá rand ham é gók angat pésari dhawlá anchó baddhawl atant ke nagwashay á gókesh wártagant. Man cha wábá ágah bután.
GEN 41:22 Padá ke wáb kaptán, gendán ke dánay hapt zandhén o sharrén hóshag yakk tháléay sará rodagá ent.
GEN 41:23 Cha áyán o rand, dega hapt hóshag rost. É hóshag nezór o lágar atant o cha ródarátká kasshókén lewárá gimmoréntagatant.
GEN 41:24 Lágarén hóshagán haptén sharrén hóshag wártant. Man gón jádugerán kessah kort, bale cha áyán kassá é wáb máná kort nakort.”
GEN 41:25 Gorhá Issopá gón Perawná gwasht: “Tawe Perawnay doén wáb yakk ant. Hamá kár ke Hodá démterá kanti, pa tawe Perawná paddari kortag.
GEN 41:26 Haptén sharrén gók hapt sál ant o dánay haptén sharrén hóshag ham hapt sál ant. Doén wáb yakk ant.
GEN 41:27 Hamá haptén lágar o baddhawlén gók ke cha áyán o rand dar átkant, hapt sál ant o hamé dhawlá haptén hórk o háligén hóshag ke cha ródarátká kasshókén lewárá gimmoréntagatant, hapt sálay dhokkál ant.
GEN 41:28 Man gón tawe Perawná gwasht, hamá kár ke Hodá démterá kanti, pa tawe Perawná paddari kortag.
GEN 41:29 Nun sajjahén Mesrá hapt sálá mazanén sarsabzi o peráwánié bit,
GEN 41:30 bale cha eshiá rand, hapt sálá dhokkála bit o é dhokkál Mesrá anchó tabáh o wayrána kant ke mardom molkay sajjahén sarsabzi o peráwániá shamóshant.
GEN 41:31 Molkay sarsabzi shamóshaga bit, chéá ke é dhokkál ke randá kayt, sakk grána bit.
GEN 41:32 É wáb paméshká tawe Perawnay sará do randá átkag ke Hodáyá pakkáiá paysalah kortag o Hodá é kárá hamé zuttána kant.
GEN 41:33 Nun tawe Perawn aglmand o dánáén mardé dar géj o Mesray molkay sajjahén kárán hamáiay dastá beday.
GEN 41:34 Tawe Perawn báyad ent molká anchén kármaster bedáray ke sarsabziay haptén sáláni wahdá kesháráni pancheká begerant.
GEN 41:35 É kármaster sarsarbziay áyókén sálán ward o warák mocch bekanant o Perawnay chérdastiá, shahrán pa waragá dán ambár bekanant.
GEN 41:36 É ward o warák pa molká ambár kanag bebant o hamá haptén sálán ke Mesrá dhokkála kapit, kármarz kanag bebant ke molk cha dhokkálá tabáh mabit.”
GEN 41:37 É habar, Perawn o Perawnay sajjahén apsaráni chammán sharrén habaré at.
GEN 41:38 Perawná gón wati hezmatkárán gwasht: “Dega choshén mardomé dara kapit ke é marday paymá Hodáay Ruh áiá mán bebit?”
GEN 41:39 Démi gón Issopá kort o gwashti: “Hodáyá é sajjahén chizz ke pa taw paddar kortagant, gorhá bezán tai paymén aglmand o dáná dega nést.
GEN 41:40 Man tará wati lógay mastera kanán o mani sajjahén mardom tai parmánay pábanda bant o tahná mane bádsháh cha taw mastera bán.”
GEN 41:41 Nun Perawná gón Issopá gwasht: “Bechár, taw cha mani némagá sajjahén Mesray molkay master ay.”
GEN 41:42 Perawná wati mohray mondrikk cha dastá kasshet o Issopay dastá dát, sharrén lilomay póshák o sohray háré gwarái dát.
GEN 41:43 Molkay náebay arrábahá swári kort. Mardomán jár jat ke Issopay démá kóndhán bekapét. Perawná Issop sajjahén Mesray master kort.
GEN 41:44 Perawná gón Issopá gwasht: “Man Perawn án. Bé tai razáyá sajjahén Mesray molká kass wati dast o pádé sorénta nakant.”
GEN 41:45 Perawná Issop Sopnát-Panéhá námént o gón Unay shahray dini péshwá Putipéráay jenekk Asenátá sur dát. Nun Issop sajjahén Mesrá gasht.
GEN 41:46 Wahdé Issopá Mesray bádsháh Perawnay hezmat bendát kort, omri si sál at. Issop cha Perawnay darbárá pad átk o sajjahén Mesrá gasht.
GEN 41:47 Sarsabziay haptén sálán zeminá mazanén bar o samaré dát.
GEN 41:48 Sarsabziay haptén sálán ke Mesray molká ward o warák báz at, Issopá shahráni ambár porr kortant. Har shahray kash o kerray dhagáráni bar o samari hamá shahrá ambár kort.
GEN 41:49 Issopá sakk báz dán ambár kort, daryáay rékáni kaddá. Dán anchó báz atant ke esháni hesáb kanagi band kort, chéá ke cha hesábá dhann atant.
GEN 41:50 Cha dhokkálay sálán o pésar Issopá do mardénchokk but. Esháni mát Asenát, Unay shahray dini péshwá Putipéráay jenekk at.
GEN 41:51 Issopá wati awali chokkay nám Manasi kort, gwashti: “Hodáyá maná cha sajjahén sakki o sórián o cha petay lógay sajjahén tránagán ázát kortag.”
GEN 41:52 Domi chokkay námi Epráém kort, gwashti: “Mani sakki o sóriáni molká, Hodáyá maná porsamar kortag.”
GEN 41:53 Gorhá hamá paymá ke Issopá gwashtagat, Mesray molkay sarsabziay haptén sál halás butant o dhokkálay haptén sál bongéj butant. Á dega sajjahén molkán dhokkál but, bale sarjamén Mesrá warák hastat.
GEN 41:55 Gorhá sajjahén Mesr ke shodig but, mardomán Perawnay kerrá pa waráká peryát kort. Perawná gón sajjahén Mesrián gwasht: “Issopay kerrá berawét o á harché ke gwashit, hamá dhawl bekanét.”
GEN 41:56 Sarjamén molk ke dhokkálá gept, Issopá ambáráni dap pach kort o Mesriáni kerrá dáni bahá kort ke sajjahén Mesrá mazanén dhokkálé kaptagat.
GEN 41:57 Sarjamén donyá pa dánay geragá Mesrá Issopay kerrá átk, chéá ke sajjahén donyáyá gránén dhokkálé kaptagat.
GEN 42:1 Wahdé Ákubá dist ke Mesrá dán hast, gón wati chokkán gwashti: “Chéá neshtag o yakdomiá cháragá ét?
GEN 42:2 Man eshkotag ke Mesrá dána rasit. Berawét o dán begerét ke zendag bemánén, shodá mamerén.”
GEN 42:3 Gorhá Issopay dah brát Mesrá dánay geragá shot.
GEN 42:4 Ákubá Issopay brát Benyámin gón á dega brátán dém nadát, gwashti chó mabit ke táwáné berasiti.
GEN 42:5 É paymá Esráilay chokk hamá mardománi rombá gón atant ke dánay geragá átkagatant, chéá ke Kanhánay molká dhokkál at.
GEN 42:6 Nun Issop molkay wáli at. É Issop at ke molkay sajjahén mardománi kerrá gandomi bahá kort. Gorhá Issopay brát átkant o áiay démá pa adab saresh jahl kort.
GEN 42:7 Wahdé Issopá wati brát distant, pajjáhi áwortant, bale áyáni démá záheri nakort. Gón áyán pa trondi habari kort o josti kort: “Shomá cha kojá átkagét?” Áyán passaw dát: “Cha Kanhánay molká, dánay zuragá átkagén.”
GEN 42:8 Issopá brát pajjáh áwortant, bale áyán Issop pajjáh nayáwort.
GEN 42:9 Issop wati wábáni tránagá kapt ke brátáni bárawá distagatanti. Issopá gón áyán gwasht: “Shomá jásus o chárig ét. Shomá edá átkagét ke bezánét may molkay kojám jágahá páspáni o hepázat nezórter ent.”
GEN 42:10 Áyán gwasht: “Enna, mani wájah! Tai kaster ward o warákay geragá átkagant.
GEN 42:11 Má sajjahén yakkén petay chokk én, rást o tachkén mardom én, tai pádáni chéray hák én, jásus o chárig naén.”
GEN 42:12 Issopá gwasht: “Enna! Shomá edá átkagét ke bezánét may molkay kojám jágahá páspáni o hepázat nezórter ent.”
GEN 42:13 Bale áyán gwasht: “Tai kaster yakkén petay chokk ant o may pet Kanháná jahmenend ent. Má dwázdah brát butagén. Kasterén brát annun petay kerrá ent. Á dega brát nun néstent.”
GEN 42:14 Issopá gwasht: “Anchó ke man shomárá gwasht, shomá jásus o chárig ét.
GEN 42:15 Shomárá é paymá chakkásén: Tánke shomay kasterén brát edá nayayt, maná Perawnay saray sawgend ent ke shomá cha é jágahá shota nakanét.
GEN 42:16 Cha wati brátán yakké ráh dayét, belli shomay brátá kárit. Shomá á dega brát hamedá bandijáhá mánét. Shomay habar chárag o chakkásaga bant ke bárén rásta gwashét yá na. Agan shomá rást nagwasht, maná Perawnay saray sawgend ent ke shomá jásus o chárig ét.”
GEN 42:17 Issopá tán say róchá sajjahén brát bandijáhá band kanáéntant.
GEN 42:18 Sayomi róchá gón áyán gwashti: “Hamá paymá ke man shomárá gwashán, hamá paym bekanét, gorhá zendaga mánét, parchá ke maná cha Hodáyá torsit.
GEN 42:19 Agan shomá rást o tachkén mardom ét, cha shomá brátán yakké bandijáhá benendit o á dega berawant o pa wati lógay gozhnagén mardomán dán bebarant,
GEN 42:20 bale wati kasterén brátá mani kerrá byárét ke shomay habar rást bebant o cha marká berakkét.” Áyán anchosh kort o
GEN 42:21 gón yakdegará gwashtesh: “Aslá márá brátay hakkán geptag. Má dist ke á chinchok paréshán at, pa wati jánay rakkénagá may kerrá dazbandi o peryáti kort, bale má áiay habar gósh nadáshtant, paméshká é mosibat may sará kaptag.”
GEN 42:22 Rubená gwasht: “Man wa shomárá gwasht ke hecchi makanét, bale shomá gósh nadásht. Nun márá áiay hónay hesáb dayagi ent.”
GEN 42:23 Brátán nazánt ke Issop may habarán sarpad bayagá ent, chéá ke Issop tarjomah kanókéay komakká gón áyán habará at.
GEN 42:24 Issopá wati dém ángor kort o gréti. Padá démi tarrént o gón áyán habari kort. Gorhá cha brátáni nyámá Shamuni gept o áyáni chammáni démá dast o pádi bandáéntant.
GEN 42:25 Nun Issopá hokm dát ke brátáni gónián cha dáná porr kanét, har yakkéay nograhán hamáiay jenday góniá mán kanét o saparay tóshagesh ham bedayét. É kár ke pa áyán kanag butant,
GEN 42:26 nun áyán wati dán harán laddhetant o cha ódá ráh geptant.
GEN 42:27 Ráhá shapá geptant o yakk jágahéá menzelesh kort. Wahdé cha áyán yakkéá wati góniay dap pach kort ke pa wati hará káh o kadimé bekasshit, disti ke mani nograh góniay dap dapá ér ant.
GEN 42:28 Gón wati brátán gwashti: “Mani nograhesh nazortagant, esh ant mani góniay tahá ant.” Torsé áyáni delá kapt. Démesh gón yakdegará kort o drahán o larzáná gwashtesh: “É che káré ke Hodáyá gón má kortag?”
GEN 42:29 Wahdé á wati pet Ákubay kerrá Kanhánay molká átkant, wati sajjahén kessah o sargwastesh áwortant. Gwashtesh:
GEN 42:30 “Hamá mard ke molkay master ent, áiá gón má pa trondi habar kort o gwashti: ‘Shomá é molká jásusi kanagá átkagét.’
GEN 42:31 Bale má gón áiá gwasht: ‘Má rást o tachkén mardom én, chárig o jásus naén.
GEN 42:32 Má yakkén petay chokk én. Dwázdah brát butagén. Yakk bráté nun néstent o kasterén brát annun Kanháná petay kerrá ent.’
GEN 42:33 Gorhá molkay masterá gwasht: ‘Man hamá wahdá zánán shomá rást o tachkén mardom ét ke shomá yakk bráté hamedá gón man bellét o á dega berawét o pa wati lógay gozhnagén mardomán dán bebarét o
GEN 42:34 wati kasterén brátá mani kerrá byárét. Gorhá mana zánán ke shomá chárig o jásus naét o tachk o rástén mardom ét. Randá man shomay brátá shomárá dayán o shomá é molká sawdágeri o bápár korta kanét.’”
GEN 42:35 Wahdé á wati gónián hálig kanagá atant, har yakkéay góniá áiay nograháni turag mán at. Wahdé áyán o áyáni petá nograhay turag distant, torsetesh.
GEN 42:36 Áyáni pet Ákubá gwasht: “Shomá maná béawlád kanagá ét. Issop ham néstent o Shamun ham. Nun shomá Benyáminá pach geraga lóthét. É sajjahén kahr mani sará kapagá ant.”
GEN 42:37 Rubená gón petá gwasht: “Agan man tai chokk padá pa taw nayáwort, mani doén chokkán bekosh. Benyáminá maná beday, man padá pa taw káráni.”
GEN 42:38 Bale Ákubá gwasht: “Mani chokk gón shomá nayayt gón. Áiay brát mortag o bass jendi pasht kaptag. Agan shomay é sapará táwáné berasiti, man cha gamána merán o mani pirén saray hón shomay gardená bit.”
GEN 43:1 Molk sakk dhokkál at o
GEN 43:2 wahdé áyán cha Mesrá áwortagén dán wárt o halás kortant, petá gwasht: “Padá berawét o pa má kammé ward o warák begerét.”
GEN 43:3 Bale Yahudáyá gón áiá gwasht: “Á mardá márá pa trondi habardár kort o gwasht: ‘Agan shomay brát gón shomá gón nabut, mani démá makapét.’
GEN 43:4 Agan taw may brátá gón má ráh bedayay, má rawén o pa taw ward o waráka gerén,
GEN 43:5 bale agan taw áiá gón makanay, má narawén. Chéá ke á mardá gwasht: ‘Agan shomay brát gón shomá gón nabut, mani démá makapét.’”
GEN 43:6 Esráilá jost kort: “Shomá chéá á mard hál dát ke márá dega bráté hast o é parésháni mani sará áwort?”
GEN 43:7 Passawesh dát: “Á mardá mayg o may hándánay bárawá har chizzay jost kort: ‘Shomay pet angat zendag ent? Shomárá dega brát ham hast?’ Má áiay jostáni passaw dátant. Má chón bezántén ke á gwashit: ‘Wati brátá edá byárét’?”
GEN 43:8 Gorhá Yahudáyá gón wati pet Esráilá gwasht: “Bachakká gón man hamráh kan. Má hamé damáná páda káén o rahádaga bén ke má o taw o may chokk zendag bemánén o mamerén.
GEN 43:9 Man wat áiay salámatiay zemmahá zurán. Áiá cha mani dastá belóth. Agan man tai chokk padá nayáwort o pa taw sar nakort, tán zendag án tai gonahkár án.
GEN 43:10 Agan má inchok mahtal mabuténén, tán é wahdi do randá shotag o átkagatén.”
GEN 43:11 Gorhá áyáni pet Esráilá gwasht: “Agan allami ent, gorhá chosh kanét ke cha molkay sharterén chizzán lahtén wati pélekán kanét o pa á mardá théki barét gón. Kammé bám, kammé bénag, sosorr o pestah o bádám o washbó barét gón.
GEN 43:12 Do sari nograh barét gón ke shomárá hamá nograh padá dayagi ant ke shomay góniáni dap dapá ér kanag butagatant. Balkén pa radi chó butag.
GEN 43:13 Wati brátá ham barét gón. Tachká á marday kerrá berawét.
GEN 43:14 Porwákén Hodá á mardá pa shomá rahmdel kanát ke shomay á dega brátá o Benyáminá gón shomá áyagá bellit. Bale agan man chokk báhéntant wa mani baht o nasib.”
GEN 43:15 Gorhá mardán théki o do sari nograh o Benyámin zort o ráh geptant. Mesrá ke rasetant, Issopay darbárá átk o óshtátant.
GEN 43:16 Wahdé Issopá dist ke Benyámin gón ent, wati lógay péshkári gwasht: “É mardomán mani lógá byár. Pas o kósh kan o waragé tayár kan ke é mardom sobáregá mani kerrá ant.”
GEN 43:17 Péshkárá hamá paym kort ke Issopá gwasht. Mardomi Issopay lógá áwortant.
GEN 43:18 Wahdé mardom Issopay lógá árag butant, tors o larz atant. Gwashtesh: “Márá hamá nograháni sawabá edá áwortagesh ke pésari randá may gónián mán kanag butagatant. Nun é mard may sará orosh kanag o márá zérdast kanaga lóthit ke may jendá golám bekant o harán ham bebárt.”
GEN 43:19 Gorhá á Issopay péshkáray kerrá shotant o lógay darwázagay dapá gón áiá habaresh kort.
GEN 43:20 Gwashtesh: “Wájah! Awali randá ke má edá pa warákay geragá átkén,
GEN 43:21 per tarragá má shapá yakk jágahéá dásht. Má wati bár ke bótkant, disten ke cha má harkasay nograh sarjamiá áiay jenday góniay dap dapá ér ant. Nun má é nograh padá áwortagant gón.
GEN 43:22 Má pa warákay geragá dega nograh ham áwortag gón. Nazánén bárén kayá é nograh padá may gónián mán kortagant.”
GEN 43:23 Péshkárá gwasht: “Parwáh nést. Matorsét. Shomayg o shomay petay Hodáyá é ganj gónián mán kortag. Shomay nograh maná rasetagant.” Nun Shamuni áyáni kerrá áwort.
GEN 43:24 Péshkárá á Issopay lógá bortant, ápi dátant ke wati pádán beshódant o pa áyáni harán káh o kadimay tayárii ham kort.
GEN 43:25 Tán Issopay áyagá, némróchay wahdá, áyán wati théki tayár kortant, chéá ke eshkotagatesh ke má sobáregá hamedá én.
GEN 43:26 Issop ke lógá átk, áyán wati áwortagén théki dátant o Issopay démá saresh pa adab jahl kort.
GEN 43:27 Issopá áyáni hál jost kort o gwashti: “Shomay pirén pet ke shomá áiay bárawá gón man habar kortagat, chón ent? Angat hast o salámat ent?”
GEN 43:28 Áyán passaw dát: “Tai hezmatkár, may pet angat hast o salámat ent.” Áyán Issopay démá pa adab sar jahl kort.
GEN 43:29 Issopá sar chest kort, chammi wati hakkigén brát Benyáminá kaptant. Josti kort: “É shomay hamá kasterén brát ent ke shomá nám geptagat?” Issopá gón Benyáminá gwasht: “Hodá pa taw mehrabán bát, mani chokk!”
GEN 43:30 Gón brátay gendagá Issopá wati del dásht nakort. Zutt zuttá pád átk o pa gréwagá jágahéay shóházá but. Gorhá wati jenday kóthiá shot o hamódá gréti.
GEN 43:31 Randá chammi shoshtant o dar átk. Deli dásht o gwashti: “Waragán byárét.”
GEN 43:32 Pa Issopá jetá parzónagé pachesh kort o pa áiay brátán jetá. Hamá Mesri ke ódá waragá atant, áyáni parzónag ham jetá at, chéá ke Mesrián gón Ebránián hór waraga nawárt. Áyáni nezzá é sakkén bazzhnákén káré at.
GEN 43:33 Brát, Issopay démá omray hesábá nádénag butagatant, master masteréná beger tán kaster kasteréná. Awali chokk wati pédáeshi hakkay hesábá o kasterén, wati kasteriay hesábá. Paméshká brát pa hayráni yakdomiá cháragá atant.
GEN 43:34 Wahdé cha Issopay parzónagá áyáni bahrá dayagá atant, Benyáminá cha á degarán panch sari géshter raset. Gón Issopá sharábesh wárt o wasshén wahdé gwázéntesh.
GEN 44:1 Nun Issopá wati lógay péshkár chó hokm dát: “Esháni gónián cha waráká porr kanét. Haminchok ke borta kanant, bedayétesh o har yakkéay nograhán áiay góniay dap dapá ér kanét.
GEN 44:2 Mani pyálahá, mani nograhén pyálahá kasterénay góniay dap dapá ér kanét o áiay dánáni nograhán ham.” Hamá dhawlá ke Issopá gwasht, péshkárá hamá dhawl kort.
GEN 44:3 Sohb ke but, áesh roksat kortant. Mardán har zortant o ráh geptant.
GEN 44:4 Angat cha shahrá dur nashotagatant ke Issopá gón péshkárá gwasht: “Zutt kan o randáesh kap. Wahdé raséntant, begwashesh: ‘Shomá nékiay badalá chéá badi kort?
GEN 44:5 É hamá pyalah naent ke mani wájah eshiay tahá sharába wárt? O pa pál janagá ham káramarzia kant? É badén káré ke shomá kortag.’”
GEN 44:6 Wahdé péshkár áyáni kerrá sar but, hamé habari kortant.
GEN 44:7 Bale áyán gwasht: “Wájah! Chéá choshén habara kanay? Tai kaster hechbar choshén káré korta nakanant.
GEN 44:8 Má wa hamá nograh ke wati góniáni dapá distant, áen ham cha Kanhánay molká padá áwortant. Má chón cha tai wájahay lógá nograh o teláha dozzén?
GEN 44:9 Wájah! Cha má harkasay kerrá dozziay mál dar átk, áiay sezá mark ent o má é degaráni sezá hamesh ent ke tai goláma bén.”
GEN 44:10 Péshkárá gwasht: “Sharr ent. Harché ke shomá gwashét, bale harkasay kerrá ke é dar kapt, á mani goláma bit o é dega bémayára bét.”
GEN 44:11 Har yakkéá eshtáp eshtápá wati góni zeminá ér kort o bótk o
GEN 44:12 péshkár patthagá lagget. Cha masteréná bongéji kort o kasteréná halás. Pyálah cha Benyáminay góniá dar kapt.
GEN 44:13 Brátán ke dist, wati godesh dertant. Padá wati báresh harán laddhetant o shahrá per tarretant.
GEN 44:14 Wahdé Yahudá o áiay brát átkant, Issop angat lógá at. Á Issopay pádán kaptant.
GEN 44:15 Issopá gón áyán gwasht: “É che káré shomá kortag? Shomá nazánét ke mani paymén mardomé pál jata kant o chizzán dar gétka kant?”
GEN 44:16 Yahudáyá gwasht: “Mani wájah! Má gón taw ché gwashta kanén? Ché begwashén? Che paymá wati bémayáriá pésh bedárén? Hodáyá tai kasteráni radén kár páshk kortag. Mani wájah! Nun má tai golám én. May jend ham o hamá mardom ham ke pyálah áiay kerrá dar kaptag.”
GEN 44:17 Bale Issopá gwasht: “Man hechbar choshén káré nakanán. Éwaká hamá mardom mani goláma bit ke pyalah áiay kerrá dar kaptag. Shomá á dega mardom pa salámati wati petay kerrá berawét.”
GEN 44:18 Gorhá Yahudá nazzikká átk o gwashti: “Oo mani wájah! Bell tai kaster gón tawe wájahá habaré kant. Wati kasteray sará zahr mager ke taw Perawnay barábar ay.
GEN 44:19 Mani wájah! Taw cha wati kasterán jost kort: ‘Shomárá pet yá brát hast?’
GEN 44:20 Má passaw dát: ‘Márá pirén peté hast o kasterén bráté ke petay piriay róchán pédá butag. Á brátay hakkigén brát mortag o cha wati mátá yakkén chokk ent ke mantag o pet áiá sakk dósta dárit.’
GEN 44:21 Gorhá taw gón wati kasterán gwasht: ‘Áiá mani kerrá byárét ke gón wati jenday chammán begendáni.’
GEN 44:22 Má gón tawe wájahá gwasht: ‘Bachakk wati petá yalah dáta nakant. Agan petá yalah bedant, petia merit.’
GEN 44:23 Bale taw gón wati kasterán gwasht: ‘Agan shomá wati brátá mayárét gón, mani démá makapét.’
GEN 44:24 Wahdé má mani petay kerrá, bezán tai hezmatkáray kerrá per tarretén, tai habaren gón áiá kortant, mani wájah!
GEN 44:25 Gorhá may petá gwasht: ‘Padá berawét o pa má kammé ward o warák begerét o byárét.’
GEN 44:26 Bale má gwasht: ‘Má padá shota nakanén. Hamá shartá rawén ke may kasterén brát gón má gón bebit. Má tán hamá wahdá á marday démá kapta nakanén ke may kasterén brát gón mabit.’
GEN 44:27 Mani petá, bezán tai hezmatkárá gón má gwasht: ‘Shomá zánét ke mani lógbánoká pa man do mardénchokk áwort.
GEN 44:28 Cha áyán yakkéá maná yalah dát o man gwasht: “Allamá rastaréá wártag.” Cha á wahdá tán annun wati chokkon nadistag.
GEN 44:29 Agan é chokká ham cha mana barét o eshiá táwáné berasit, man cha gamána merán o mani pirén saray hón shomay gardená bit.’
GEN 44:30 Agan chokk gón má gón mabit o man wati petay kerrá, bezán tai hezmatkáray kerrá per betarrán o mani pet begendit ke é gón naent, gorhá may pet, tai hezmatkára merit ke sáhi gón hameshiá bastag. O áiay pirén saray hón tai kasteráni gardená bit.
GEN 44:32 Petay kerrá tai kasterá é bachakkay salámatiay zemmah zortag. Man gón petá gwasht: ‘Mani pet! Agan man tai chokk padá pa taw nayáwort, tán zendag án tai gonahkár án.’
GEN 44:33 Gorhá, oo mani wájah! Bell ke é bachakkay badalá tai kaster edá bemánit o tai golámiá bekant o é bachakk gón wati brátán per betarrit.
GEN 44:34 Man chón wati petay kerrá bé eshiá shota kanán? Man á róchá magendátán ke petay sará choshén mosibaté byayt.”
GEN 45:1 Issopá óshtátagén mardománi démá del dásht nakort o kukkári kort: “Sajjahén mardomán cha mani démá barét.” Wahdé Issopá brát hál dátant ke man Issop án, áiay kerrá dega kass néstat.
GEN 45:2 Áiá anchén borzén tawáréá grét ke Mesrián eshkot o Perawnay lógay mardom ham sahig butant.
GEN 45:3 Issopá gón brátán gwasht: “Man Issop án. Mani pet angat hast o salámat ent?” Brát Issopay démá torsagá atant o hecch passawesh dát nakort.
GEN 45:4 Gorhá gón brátán gwashti: “Mani nazzikterá byáét.” Wahdé á nazzikká átkant, Issopá gwasht: “Man shomay brát Issop án. Man hamá mardom án ke shomá bahá kort o sari Mesrá kapt.
GEN 45:5 Bale nun paréshán mabét o watá mayárig makanét ke shomá chéá maná edá bahá kort. Hodáyá pa sáháni rakkénagá maná cha shomá pésar edá ráh dát.
GEN 45:6 Do sál ent ke molká dhokkál ent. Áyókén panch sálá ham hecch dhagáré na nangár kanag o keshaga bit o na ronag o moshag,
GEN 45:7 bale Hodáyá cha shomá pésar maná edá ráh dát ke shomárá zendag bedárit o sarjamiá berakkénit ke shomay nasl cha zeminá gár mabit.
GEN 45:8 Paméshká mani edá ráh dayók shomá naatét, Hodá at. Hodáyá maná pa Perawná peté, pa áiay sajjahén lógá masteré o pa sarjamén Mesray molká hákemé kort.
GEN 45:9 Nun zutt kanét o mani petay kerrá berawét. Gón áiá begwashét: ‘Tai chokk Issopa gwashit: “Hodáyá maná sajjahén Mesray wájah kortag. Mahtal mabay o mani kerrá byá.
GEN 45:10 Gón wati chokk o nomásag o ramag o górom o wati sajjahén mál o hastiá, Góshenay damagá jahmenend bay ke gón man nazzikk bebay.
GEN 45:11 Man tai har chizzay zemmah zortag ke é dhokkál tán panch sálá angata mánit. Chó mabit ke taw wár o bazzag bebay, tai jend o tai hándán o tai sajjahén mardom janjál bebant.”
GEN 45:12 Shomá wat gendagá ét o mani brát Benyámin ham gendagá ent ke é mani jend ent ke gón shomá habará ent.
GEN 45:13 É mazani o sharap ke maná edá Mesrá rasetag o hamá sajjahén chizz ke shomá distagant, berawét o mani petá hál bedayét o áiay jendá zutt byárét.’”
GEN 45:14 Gorhá Issopá wati brát Benyámin goláésh kort o gréti. Benyáminá ham Issop goláésh kort o gréti.
GEN 45:15 Issopá wati sajjahén brát ambáz kort o chokketant o gréti. Nun áiay brát gón áiá habará laggetant.
GEN 45:16 Wahdé Perawnay lógá é hál raset ke Issopay brát átkagant, Perawn o áiay hezmatkár gal butant.
GEN 45:17 Perawná gón Issopá gwasht: “Wati brátán begwash: ‘Chó kanét ke bárán wati ólákán beladdhét o Kanhánay molká berawét o
GEN 45:18 wati petá bezurét o laddh o lóg mani kerrá byáét. Man Mesray sharterén zeminá shomárá dayán o shomá zeminay sharterén bar o samarána warét.’
GEN 45:19 Pa taw hokm esh ent ke wati brátán begwash: ‘Chó kanét ke pa wat cha Mesrá aspgárhi bezurét gón, pa wati jan o chokkán. Wati petá bezurét o byáét.
GEN 45:20 Agan shomay chizzé pasht kapt, paréshán mabét, chéá ke sajjahén Mesray sharterén zemin shomayga bit.’”
GEN 45:21 Gorhá Esráilay chokkán anchosh kort. Hamá paymá ke Perawná hokm dátagat, Issopá wati brátáná aspgárhi o tóshag dát.
GEN 45:22 Áiá har yakkéárá jórhié god dát, bale Benyáminá say sad nograh o panch jórhi godi dát.
GEN 45:23 Pa wati petá é chizzi ráh dátant: dah lág ke cha Mesray sharterén chizzán laddhag butagat o dah mádyán ke pa petay sapará dán o warák o tóshag laddhag butagat.
GEN 45:24 Padá wati bráti rahádag kortant. Brát ke dar kapagá atant, gón áyán gwashti: “Ráhá arh o korh makanét.”
GEN 45:25 Gorhá á cha Mesrá dar átk o wati pet Ákubay kerrá Kanhánay molká átkant.
GEN 45:26 Gón wati petá gwashtesh: “Issop angat zendag ent. Eshiá bell, sajjahén Mesray hákem ent.” Ákub hoshk o hayrán but. Áyáni sará báwari nabut.
GEN 45:27 Bale wahdé áyán Issopay gwashtagén habar gón petá kortant o Ákubá hamá aspgárhi distant ke Issopá pa áiay áragá ráh dátagatant, arwáhi tázag but.
GEN 45:28 Esráilá gwasht: “Bass, nun maná báwar ent. Mani chokk Issop angat zendag ent. Cha ed o pésar ke bemerán, rawán ke Issopá begendán.”
GEN 46:1 Esráil gón wati sajjahén mál o hastiá ráh gept. Wahdé Bérshébahá átk o raset, pa wati pet Esákay Hodáyá korbánigi nadr kortant.
GEN 46:2 Hodáyá shapay elháméay tahá gón Esráilá habar kort. Gwashti: “Ákub! Oo Ákub!” Áiá passaw dát: “Ji!”
GEN 46:3 Hodáyá gwasht: “Man Hodá án, tai petay Hodá. Mesray rawagá mators ke man ódá cha taw mazanén kawmé addha kanán.
GEN 46:4 Man wat gón taw Mesrá káyán o allam tará padá kárán. O Issopay jend tará dast o chamma kant.”
GEN 46:5 Gorhá Ákub cha Bérshébahá dar kapt. Esráilay chokkán wati pet Ákub o kasánén chokk o wati janén hamá aspgárhián nádéntant ke Perawná pa Ákubay áragá ráh dátagatant.
GEN 46:6 Ákubá wati ramag o górom o hamá mál o maddhi ke Kanháná mocch kortagatant, zortant o gón wati sajjahén óbádagán Mesrá shot.
GEN 46:7 Ákubá wati bacch o jenekk o nomásag, bezán wati sajjahén óbádag Mesrá bortant gón.
GEN 46:8 Esráil, bezán Ákub ke gón wati óbádagán Mesrá shot, áiay mardénchokkáni nám esh ant: Ruben, Ákubay awali chokk at.
GEN 46:9 Rubenay mardénchokk Hanuk o Pallu o Hesrun o Karmi atant.
GEN 46:10 Shamunay mardénchokk Yamuél o Yámin o Uhad o Yákin o Sóhar o Shául atant. Sháulay mát Kanhánié at.
GEN 46:11 Láwiay mardénchokk Gershón o Kohát o Merári atant.
GEN 46:12 Yahudáay mardénchokk Ér o Ónán o Shélá o Páres o Zárah atant. Bale Ér o Ónán Kanháná mortagatant. Páresay mardénchokk Hesrun o Hámul atant.
GEN 46:13 Issákáray mardénchokk Tulá o Puá o Yáshub o Shemrun atant.
GEN 46:14 Zebulunay mardénchokk Sered o Ilun o Yahlél atant.
GEN 46:15 Ákub o Lyáhay mardénchokk hamesh atant ke Paddán-Arámay molká pédá butagatant. Ákub o Lyáhay jenekk Dinah ham hamódá pédá butagat. Ákubay é bacch o jenekk sarjamiá si o say atant.
GEN 46:16 Jáday mardénchokk Sepyun o Haggi o Shuni o Esbun o Eri o Aródi o Aréli atant.
GEN 46:17 Ásheray mardénchokk Yamná o Yashwá o Yashwi o Beryá atant o esháni gohár Serah at. Beryáay mardénchokk Heber o Malkiél atant.
GEN 46:18 Ákub o Zelpahay mardénchokk hamesh atant ke sarjamiá shánzdah atant. Zelpah hamá móled at ke Lábáná wati jenekk Lyáhárá dátagat.
GEN 46:19 Ákub o áiay jan Ráhilay mardénchokk Issop o Benyámin atant.
GEN 46:20 Issopay chokk Manasi o Epráém Mesray molká cha Asenátá pédá butant. Asenát Putipéráay jenekk at o Putipérá Unay shahray dini péshwá at.
GEN 46:21 Benyáminay mardénchokk Bélá o Báker o Ashbil o Girá o Nahmán o Éhi o Rosh o Moppim o Hoppim o Ard atant.
GEN 46:22 Ákub o Ráhilay mardénchokk sarjamiá chárdah atant.
GEN 46:23 Dánay mardénchokk Hushim at.
GEN 46:24 Naptáliay mardénchokk Yahsayl o Gani o Yáser o Shillem atant.
GEN 46:25 Ákub o Bellahay chokk hamesh atant. É sarjamiá hapt atant. Bellah hamá móled at ke Lábáná wati jenekk Ráhilárá dátagat.
GEN 46:26 É sajjahén mardom ke gón Ákubá Mesrá shotant o áiay jenday óbádag atant, abéd cha áiay neshárán shast o shash atant.
GEN 46:27 Issopay mardénchokk ke Mesrá pédá butagatant, do atant. Ákub ke Mesrá átkagat, áiay hándán sarjamiá haptád mardom at.
GEN 46:28 Ákubá cha wat o pésar Yahudá Issopay kerrá ráh dát ke Góshenay ráhá jost bekant. Gorhá Ákub gón wati mardomán Góshenay damagá sar but.
GEN 46:29 Issopá wati arrábah tayár kanáént o Góshená, wati pet Esráilay cháragá shot. Anchó ke Issop petay kerrá sar but, peti goláésh kort o tán dérá gréti.
GEN 46:30 Esráilá gón Issopá gwasht: “Nun man pa meragá tayár án, chéá ke gón wati jenday chammán diston ke taw zendag ay.”
GEN 46:31 Issopá gón wati brátán o gón wati petay lógay mardomán gwasht: “Mana rawán o Perawná hála dayán. Gwasháni ke mani brát o mani petay lógay mardom ke Kanhánay molká nendók butagant, nun mani kerrá átkagant.
GEN 46:32 Shepánk o máldár ant. Wati ramag o górom o sajjahén mál o hasti‌esh áwortag gón.
GEN 46:33 O padá Perawn ke shomárá lótháénit o cha shomá josta kant ke ‘shomay kár o rózgár ché ent?’
GEN 46:34 shomá begwashét ke ‘tai kaster cha kasániá shepánk o máldár butagant, wati pet o pirokáni paymá.’ Gorhá shomárá é ejázata rasit ke Góshenay damagá jahmenend bebét ke Mesriáni nezzá sajjahén shepánk bazznákén mardom ant.”
GEN 47:1 Issop shot o gón Perawná gwashti: “Mani pet o brát gón wati ramag o górom o sajjahén mál o hastiá cha Kanhánay molká átkagant o nun Góshenay damagá ant.”
GEN 47:2 Issopá panch brát zort o Perawnay démá pésh kort.
GEN 47:3 Perawná cha áiay brátán jost kort: “Shomay kár o rózgár ché ent?” Áyán passaw dát: “Tai kaster shepánk ant, wati pet o pirokáni paymá.”
GEN 47:4 Áyán gón Perawná chosh ham gwasht: “Má átkagén ke chizzé wahdá hamedá benendén, chéá ke Kanháná sakkén mazanén dhokkálé kaptag o pa tai kasteráni ramagán kahchar o charágáh nést. May dazbandi ent, wati kasterán razá beday ke Góshená jahmenend bebant.”
GEN 47:5 Perawná gón Issopá gwasht: “Nun ke tai pet o brát tai kerrá átkagant,
GEN 47:6 Mesray sardhagár tai démá ent. Wati pet o brátán molkay sharterén jágahá nádén. Belli Góshenay damagá nendant. Agan áyáni tahá budi o zrengén mardoma genday, mani mál o dalwatán hamáyáni dastá beday.”
GEN 47:7 Gorhá Issopá wati pet Ákub Perawnay kerrá áwort o pajjárént o Ákubá Perawn barkat dát.
GEN 47:8 Perawná cha Ákubá jost kort: “Tará chont sál ent?”
GEN 47:9 Ákubá passaw dát: “Mani zenday mosáperiá sad o si sál ent. Mani omr mazan naent o mani sál pa sakki o sóri gwastagant. Cha mani pet o pirokáni mosáperiay sálán kamter ant.”
GEN 47:10 Gorhá Ákubá Perawn barkat dát o cha Perawnay kerrá dar átk o shot.
GEN 47:11 Hamá paymá ke Perawná hokm dátagat, Issopá wati pet o brát Mesrá nádéntant o Mesray sharterén jágahá bezán Ramesésay damagá melkati dátant.
GEN 47:12 Issopá wati pet o brát o petay lógay sajjahén mardom láp dátant o haminchok chokkesh ke hastat haminchoki dátant.
GEN 47:13 Nun á sajjahén damagá pa waragá hecch néstat, chéá ke sakkén gránén dhokkálé kaptagat. Mesr o Kanhán doén, dhokkálá tabáh kortagatant.
GEN 47:14 Mardomán nograha dát o dán bahá gept. Issopá Mesr o Kanhánay sajjahén nograh moccha kort o Perawnay kalátá áwortant.
GEN 47:15 Wahdé Mesr o Kanhánay dráhén nograh halás butant, Mesray sajjahén mardom Issopay kerrá átkant o gwashtesh: “May nograh halás ant. Márá warák beday. Má tai chammáni démá bemerén?”
GEN 47:16 Issopá gón áyán gwasht: “Gorhá wati mál o dalwatán byárét. Shomay nograh ke halás butagant, shomay dalwatána zurán o badalá shomárá waráka dayán.”
GEN 47:17 Gorhá áyán wati mál o dalwat Issopay kerrá áwortant o Issopá áyáni asp o pas o gók o haráni badalá áyáná waráka dát. Á sálá, Issopá áyáni sajjahén mál o dalwat zortant o badalá áyáná warák dát.
GEN 47:18 Sál ke gwast, mardom domi sálá padá Issopay kerrá átkant o gwashtesh: “Má é gappá cha wati wájahá chér dáta nakanén ke may nograh ham halás ant o may mál o dalwat ham may wájahay butant. Nun may kerrá may jesm o ján o dhagárán abéd dega hecch pasht nakaptag ke tawe wájahay hezmatá pésh bekanén.
GEN 47:19 Má gón wati dhagárán tai chammáni démá gár o gomsár bebén? May jend o may dhagárán warákay badalá bezur. Má gón dhagárán Perawnay goláma bén. Márá dán beday ke zendag bemánén o mamerén o may dhagár ham wayrán mabant.”
GEN 47:20 Gorhá Issopá sajjahén Mesray dhagár pa Perawná bahá zortant. Mesray sajjahén mardomán wati dhagár bahá kortant, chéá ke sakkén gránén dhokkáléá geptagatant. Perawn áyáni dhagáráni wáhond but.
GEN 47:21 Mesray é kondhá beger tán á kondhá Issopá mardom laddhént o shahráni tahá jahmenend kortant.
GEN 47:22 Albat, dini péshwáyáni dhagári bahá nazortant. Cha Perawnay némagá áyán komakka raset o é komakk pa áyáni ward o waráká bass at. Paméshká wati dhagáresh bahá nakortant.
GEN 47:23 Issopá gón mardomán gwasht: “Nun ke man maróchi shomay jend o shomay dhagár pa Perawná bahá zortagant, tohm esh ant, zeminá bekeshét.
GEN 47:24 Wahdé rón o móshay mósoma kayt, dhagáray bar o samaray pancheká Perawná bedayét. Chár bahr wati kerrá bedárét ke shomárá pa keshagá tohm o pa wati jend o wati lógay mardom o chokkán warák bebit.”
GEN 47:25 Mardomán gón áiá gwasht: “Taw may zend rakként. Wájahay nezar pa má nék bát. Má Perawnay goláma bén.”
GEN 47:26 Gorhá Issopá pa Mesray molká é kánun jórh kort ke tán róche maróchigá hastent ke dhagáráni bar o samaray panchek Perawnayg ent. Perawn éwaká dini péshwáyáni zemináni wáhond nabut o bass.
GEN 47:27 Nun Esráili Mesray molká, Góshenay damagá jahmenend butant. Ódá áyán dhagár raset, bázén chokk o baré kortesh o sakk báz butant.
GEN 47:28 Ákubá Mesrá habdah sál gwázént o tán yakk sad o chell o hapt sálay omrá zendag at.
GEN 47:29 Wahdé Esráilay markay wahd nazzikk but, wati chokk Issopi lótháént o gwashti: “Mani sará mehrabánié bekan. Wati dastá mani zánay chérá ér kan o kawl beday ke gón man mehr o wapá kanay o maná Mesrá kabra nakanay.
GEN 47:30 Wahdé man sar ér kort o wati pet o pirokáni kerrá shotán, maná cha Mesrá bar o hamáyáni kerrá kabr kan.” Issopá gwasht: “Sharr ent. Anchosha kanán.”
GEN 47:31 Ákubá gwasht: “Sawgend bwar.” Issopá gón áiá sawgend wárt. Esráilá nepáday saruná pa adab sar jahl kort.
GEN 48:1 Kammé wahdá rand Issopá hál raset ke tai pet nádráh ent. Gorhá áiá wati doén mardénchokk Manasi o Epráém zortant o shot.
GEN 48:2 Wahdé Ákubesh hál dát ke tai chokk Issop tai cháragá átkag, Esráilá wati wák o twán yakjáh kort o nepáday sará nesht.
GEN 48:3 Gón Issopá gwashti: “Porwákén Hodá Kanhánay molká, Luzay shahrá mani démá záher but. Maná barkati dát o
GEN 48:4 gón man gwashti: ‘Man tará porsamara kanán o tai nasl o padréchá sakk báza kanán. Man tará kawmáni rombé jórha kanán o é sardhagárá cha taw o rand tai nasl o padréchárá dayán ke tán abad hamáyáni melkat bebit.’
GEN 48:5 Nun tai é doén mardénchokk maniga bant, hamé chokk ke cha mani edá, tai kerrá áyagá pésar Mesray molká pédá butagant. Epráém o Manasi maniga bant, anchó ke Ruben o Shamun manig ant.
GEN 48:6 Tai cha eshán o randteri chokk taiga bant, bale wati brát Epráém o Manasiay námay sará pajjáh áraga bant o hamé brátáni námay sará mirásesha rasit.
GEN 48:7 Wahdé man cha Paddáná per tarragá atán o Eprátay rasagá angat kammé ráh pasht kaptagat, ráhá, Kanhánay molká Ráhilay markay sók mani sará kapt. Man Ráhil hamódá Eprátay ráhá kabr kort.” Eprát Bayt-Lahem ent.
GEN 48:8 Wahdé Esráilá Issopay chokk distant, josti kort: “É kay ant?”
GEN 48:9 Issopá gwasht: “É mani chokk ant, Hodáyá hamedá maná dátagant.” Esráilá gwasht: “Mani kerrá byáresh ke barkatesh bedayán.”
GEN 48:10 Esráilay chamm cha piriá nezór atant o sharr maymia nakort. Paméshká Issopá wati chokk áiay nazzikká bortant o Ákubá, Epráém o Manasi chokket o goláésh kortant.
GEN 48:11 Esráilá gón Issopá gwasht: “Maná é omét nabutag ke padá tará gendán, bale Hodáyá tai chokk ham maná pésh dáshtant.”
GEN 48:12 Nun Issopá chokk cha Esráilay kotthá kenzéntant o sari pa adab jahl kort.
GEN 48:13 Issopá doén chokk zortant, Epráémi wati rástén némagá o Esráilay chappén némagá kort. Manasii wati chappén némagá o Esráilay rástén némagá kort. Wati petay nazzikká bortanti.
GEN 48:14 Bale Esráilá wati rástén dast chappén némagá shahár dát o chappén dast rástén némagá. Rástén dasti Epráémay sará ér kort, bell toré kaster at. Chappén dasti Manasiay sará ér kort, bell toré awali chokk at.
GEN 48:15 Ákubá Issop barkat dát o gwashti: “Hamá Hodá ke mani pet o pirok Ebráhém o Esáká áiay ráh zortag, hamá Hodá ke cha mani pédáeshá beger tán maróchi mani negahpán butag,
GEN 48:16 hamá préshtag ke maná cha har táwáná rakkéntagi, é chokkán barkat bedayát. É mani námay sará o mani pet o pirokay námay sará bezán Ebráhém o Esákay námá zánag bátant o zeminay sará sakk báz bátant.”
GEN 48:17 Wahdé Issopá dist ke mani petay rástén dast Epráémay sará ent, wasshi nabut. Petay dasti gept ke cha Epráémay sará duri bekant o Manasiay sará éri bekant.
GEN 48:18 Gón petá gwashti: “Mani pet! Chó makan. Mani awali chokk esh ent. Wati rástén dastá eshiay sará ér kan.”
GEN 48:19 Bale petá namannet, gwashti: “Mana zánán, mani chokk! Zánán. Cha masteréná ham kawmé addha bit o á ham mazanén mardomé bit, bale kasterén brát cha áiá masterén mardomé bit o kasterénay chokk o nomásag báz kawma bant.”
GEN 48:20 Gorhá á róchi Ákubá Issopay mardénchokk barkat dátant, gwashti: “Bani Esráil barkat dayagay wahdá tai námá gipt: ‘Hodá tará chó Epráém o Manasiá kanát.’” É dhawlá Ákubá Epráém cha Manasiá démáter kort.
GEN 48:21 Esráilá gón Issopá gwasht: “Man hamé zuttána merán, bale Hodá gón shomá góna bit o shomárá shomay pet o pirokáni molká pera tarrénit.
GEN 48:22 Nun man tará cha tai brátán géshtera dayán. Hamá kóhestagá tará dayán ke man wati zahm o tirkamánay sará cha Amurián geptag.”
GEN 49:1 Ákubá wati chokk gwánk jat o gwashtant: “Yakjáh bét, man shomárá gwashán ke áyókén róchán ché bit.
GEN 49:2 Yakjáh bét o gósh dárét, oo Ákubay chokkán! Wati pet Esráilay habarán gósh dárét.
GEN 49:3 Oo Ruben! Taw mani awali chokk ay, mani wák o twán ay, mani mardánagiay awali neshán ay, marháh o zóray shán ay.
GEN 49:4 Chó ápá bélagám ay, master nun taw namánay, ke wati petay nepádán, mani gandalán sar kaptay o palitet kortant.
GEN 49:5 Shamun o Láwi brát ant, zahmesh sheddati seláh ant.
GEN 49:6 Hechbar esháni majlesá manendátán, gón eshán hamdiwán mabátán, ke cha wati hezhmá mardomesh koshtagant o pa wati delwasshiá sándhesh lang kortagant.
GEN 49:7 Nálat bát esháni trondén hezhmá, esháni berahmén kahrá. Ákubay molká yakk yakkesha kanán, Esráilay molká sheng o sháng.
GEN 49:8 Oo Yahudá! Tai brát tará názénant, tai dast dozhmenáni gotthá sakka bit, tai petay chokk tai démá kóndhana kapant.
GEN 49:9 Yahudá shéri gollorhé. Oo mani chokk! Taw cha shekárán átkagay. Yahudá chó sherá srápa kant, chó mádagén shérá kamina kant. Kai majál ent ke pádi bekant?
GEN 49:10 Bádsháhi asá cha Yahudáay dastá narawt o hákemiay dazlatth cha áiay pádáni démá dura nabit tán hamá wahdá ke asligén wáhonda kayt o kawm áiay parmánbardára bant.
GEN 49:11 Á wati hará anguri drachkéá bandit o korragá gechéni sháharhéá, wati póshákán gón sharábá shódit, wati pocchán gón anguray hóná.
GEN 49:12 Áiay chamm cha sharábá sohrtera bant o dantán cha shirá espétter.
GEN 49:13 Zebulun tayábdapá jahmenenda bit, pa bójigán bandené bit o simsari tán Sayduná sara bit.
GEN 49:14 Issákár zórmandén haré ke doén tangáni nyámá tachk ent.
GEN 49:15 Gendit ke árámjáh sharr ent o zemin wassh, wati baddhá pa bárá éra dant o pa bigáriá tayára bit.
GEN 49:16 Dán Esráilay kabilahé bit o pa wati mardomán ensápa kárit.
GEN 49:17 Dán rahsará maré bit, keshkay kashá syahmáré, aspáni srombán dhanga jant ke swár poshtoká bekapit.
GEN 49:18 Oo Hodáwand! Wadárig án ke taw berakkénay.
GEN 49:19 Orosh kanók Jádá angerra kanant, bale Jád áyáni pádáni punzáni sará birha bárt.
GEN 49:20 Ásheray nagan charpa bit, mahluká sháhi waráka dant.
GEN 49:21 Naptáli ázát butagén áské o dhawldárén áskaloka kárit.
GEN 49:22 Issop porsamarén anguré, chammagay lambá baráwarén anguré. Sháharhi, diwálán sara kapant.
GEN 49:23 Tirkamán janókán pa zahrnáki áiay sará orosh kort o pa badwáhi tiresh jat.
GEN 49:24 Bale Issopay kamán barjáh mant o báski mohr o mohkam atant, Ákubay zórmandén Hodáay dastay barkatá, Esráilay shepánkay barkatá, Esráilay taláray barkatá,
GEN 49:25 tai petay Hodáay barkatá, ke tará madata kant, porwákén Hodáay barkatá, ke tará barkata dant. Gón ásmánay barkatán, cha borzá, gón johlánkiay barkatán, cha jahlá o gón chokdán o gwaráni barkatán tará barkata dant.
GEN 49:26 Tai petay barkat cha abadi kóháni barkatán báláter ant, cha kwahnén jompáni nyámatán géshter ant. É sarjamá Issopay sará begwárátant, Issopay péshánigay sará ke wati brátáni shahzádag ent.
GEN 49:27 Benyámin derrók o warókén gorké, sohbán shekár éra bárt o bégáhán áwár bahra kant.”
GEN 49:28 É Esráilay dwázdahén kabilah atant o é hamá habar atant ke áyáni petá barkat dayagay wahdá gón áyán kortant. Har yakkéárá hamáiay hesábá barkati dát.
GEN 49:29 Nun Ákubá wati chokk chó sój dátant: “Man gón wati mortagén mardomán hawár bayagi án. Maná mani pet o pirokáni kerrá, hamá gárá kabr kanét ke Eprun Hittiay dhagárá ent,
GEN 49:30 hamá gárá ke Makpélahay dhagárá, Mamrehay nazzikká, Kanhánay molká ent o Ebráhémá cha Eprun Hittiá gón dhagárá hór bahá zort ke kabrestáné bekanti.
GEN 49:31 Ódá Ebráhém o áiay jan Sárah kabr kanag butagant, Esák o áiay jan Rebekká kabr kanag butagant o man Lyáh ham hamódá kabr kortag.
GEN 49:32 Dhagár o áiay tahay gár cha Hittián bahá zurag butagant.”
GEN 49:33 Wahdé Ákubá wati chokkáni sój dayag halás kort, nepáday sará wati pádi tachk kortant, goddhi dami kasshet o gón wati mortagén mardomán hawár but.
GEN 50:1 Issopá watárá petay sará dawr dát, gréti o peti chokket.
GEN 50:2 Gorhá hamá dáktar ke Issopay hezmatá atant, Issopá gón áyán gwasht ke mani pet Esráilá mómyái kanét o áyán Esráil mómyái kort.
GEN 50:3 É kárá chell róch jat ke inchok wahd pa mómyái kanagá allami at. Mesrián haptád róch pa áiá pors dásht.
GEN 50:4 Wahdé porsay róch halás butant, Issopá gón Perawnay lógay mardomán gwasht: “Agan mani ezzatá kanét, pa manigi gón Perawná habar kanét o begwashéti
GEN 50:5 ke mani petá maná sawgend dátag o gwashtag: ‘Man meragi án. Maná hamá kabrá kall kan ke man pa wat Kanhánay molká kótkag.’ Nun maná razá day ke rawán o wati petá kabra kanán o káyán.”
GEN 50:6 Perawná gwasht: “Beraw, wati petá hamá paymá kabr kan ke tará sawgendi dátag.”
GEN 50:7 Gorhá Issop wati petay kabr kanagá shot. Perawnay sajjahén hezmatkár ham áiay hamráh atant. Perawnay lógay masterén mardom o Mesray sajjahén kamásh shotant gón.
GEN 50:8 Issopay lógay sajjahén mardom, áiay petay lógay mardom o áiay brát ham gón atant. Éwaká chokk o ramag o górom Góshená mantant.
GEN 50:9 Arrábaswár o aspswár ham shotant gón. Sakkén mazanén rombé at.
GEN 50:10 Wahdé á Ordonay kawray nazzikká Atáday jóháná sar butant, kukkáresh kort o záresh jat. Issopá ódá hapt róchá pa wati petá pors dásht.
GEN 50:11 Wahdé óday nendókén Kanhánián Atáday jóháná dáshtagén é pors dist, gwashtesh: “Mesrián baláhén porsé dáshtag.” Paméshká á jágah ke Ordonay kawray nazzikká ent, á jágahay námesh Ábel-Mesráém kort.
GEN 50:12 Gorhá Ákubay chokkán hamá paym kort ke petá hokm dátagatant.
GEN 50:13 Ákubesh Kanhánay molká bort o hamá gárá kabr kort ke Makpélahay dhagárá, Mamrehay nazzikká at. Ebráhémá á gár gón dhagárá cha Eprun Hittiá bahá zortagat ke kabrestáné bekanti.
GEN 50:14 Cha petay kabr kanagá rand Issop gón wati brátán o gón sajjahén hamráhán ke áiay petay kabr kanagá átkagatant, Mesrá per tarret.
GEN 50:15 Wahdé Issopay brátán dist ke may pet mortag, gwashtesh: “Agan Issopá kénag delá ent, hamá sajjahén badiáni bérá gipt ke má gón áiá kortagant.”
GEN 50:16 Gorhá áyán pa Issopá kolawé ráh dát o gwashtesh: “Tai petá marká pésh é wasiat kortag:
GEN 50:17 ‘Issopá begwashét ke mani dazbandi ent ke wati brátáni mayár o gonáhán bebaksh ke gón taw badi‌esh kortag. Wati petay Hodáay bandaháni badián pahell kan.’” Wahdé áyáni paygám Issopá sar but, gréti.
GEN 50:18 Gorhá brát Issopay kerrá átkant o pádáni kaptant o gwashtesh: “Má tai golám én.”
GEN 50:19 Bale Issopá gwasht: “Matorsét. Man Hodá wa naán.
GEN 50:20 Shomay niyat mani táwán dayag at, bale Hodáay niyat nék at. Áiay niyat hamesh at ke bázén mardoméay sáh berakkit. É kár, hamesh ent annun bayagá ent.
GEN 50:21 Gorhá matorsét. Man shomay o shomay chokkáni zaluratán puraha kanán.” Bráti deljami dátant o gón áyán pa sharri habari kort.
GEN 50:22 Issop gón wati petay lógay sajjahén mardomán Mesrá nesht. Yakk sad o dah sál omri kort o
GEN 50:23 Epráémay chokkáni sayomi poshti dist. Manasiay nomásag, Mákiray chokk ham ke pédá butant, Issopay kotthá dayag butant.
GEN 50:24 Issopá gón wati brátán gwasht: “Man meragi án, bale deljam án ke Hodá pa shomay madatá kayt o shomárá cha é molká dém pa hamá molká bárt ke áiay bárawá gón Ebráhém o Esák o Ákubá sawgendi wártag.”
GEN 50:25 Issopá gón Esráilay chokkán gwasht: “Sawgend bwarét ke wahdé Hodá shomay madatá kayt, mani haddhán cha é jágahá barét gón.”
GEN 50:26 Issop yakk sad o dah sálay omrá mort, gorhá áesh mómyái kort o tábutéá wápént o Mesrá éresh kort.
EXO 1:1 Ákubay hamá mardénchokk ke har yakkéá wati lógay mardom zortant o gón Ákubá Mesrá shot gón, áyáni nám esh ant:
EXO 1:2 Ruben o Shamun o Láwi o Yahudá o
EXO 1:3 Issákár o Zebulun o Benyámin o
EXO 1:4 Dán o Naptáli o Jád o Ásher.
EXO 1:5 Ákubay chokk o nomásag sarjamiá haptád atant. Issop cha pésará Mesrá at.
EXO 1:6 Issop mort o sajjahén bráti ham mortant o áiay hamomrén sarjamén nasl ham mort.
EXO 1:7 Bale Bani Esráil porsamar at. Áyán chokk o bar kort, waddán but o sakk báz butant. Mesray molk cha Esráilián porr but.
EXO 1:8 Nun Mesray sará nókén Perawné bádsháhi tahtá nesht. É bádsháh Issopay bárawá sarpad naat.
EXO 1:9 Áiá gón wati mahluká gwasht: “Bechárét, Bani Esráilay mardom cha má báz géshter o zórmandter jórh butagant.
EXO 1:10 Báyad ent pa hóshmandi esháni démá bedárén, agan é géshter bebant o márá jangé begipt, é may dozhmenáni hamráha bant o gón má janga kanant o padá cha may molká tachant o rawant.”
EXO 1:11 Bádsháh o áiay mansabdárán, bigárgir esháni kármaster kortant ke esháni sará zóráki bekanant o gránén káresh bebandant. Bani Esráilián pa Perawná do shahr addh kort. Yakkéay nám Pitum at o yakkéay Ramesés. Doén ambári shahr atant.
EXO 1:12 Mesrián áyáni sará haminkas ke géshter zórákia kort, Esráili géshter bayán o sheng bayána butant. Gorhá Mesrián cha Esráilián torset.
EXO 1:13 Mesrián Esráili pa bérahmi kára bastant.
EXO 1:14 Hesht o batánahay addh kanagesha parmátant o dhagáráni sará har dábén gránén káresha geptant o áyáni zendagiesh azáb kort. Sajjahén káresh pa bérahmi parmátant.
EXO 1:15 Mesray bádsháhá gón Ebráni janbógán habar kort. Yakk janbógéay nám Shiprah at o domiay Puah.
EXO 1:16 Gón eshán gwashti: “Wahdé shomá Ebráni janénán chokmát kanét, chellagiay bashánahá bechárét, agan chokk bachakké, bekoshéti o agan jenekké, belléti.”
EXO 1:17 Bale janbógán cha Hodáyá torset o á dhawlá nakortesh ke Mesray bádsháhá gwashtagatant o mardénchokkesh nakoshtant.
EXO 1:18 Gorhá Mesray bádsháhá janbóg lótháéntant o gón áyán gwashti: “Shomá chéá chó kort o mardénchokk zendagá eshtant?”
EXO 1:19 Janbógán gón Perawná gwasht: “Ebráni janén Mesri janénáni paymá naant. Dhaddhén zál ant o cha janbogáni rasagá pésar chokká pédá kanant.”
EXO 1:20 Gorhá Hodá janbogáni sará mehrabán but. Esráilián chokk o bar kort o sakk báz butant.
EXO 1:21 Janbógán cha Hodáyá torset, paméshká Hodáyá áyáni lóg ábád kortant.
EXO 1:22 Gorhá Perawná wati sajjahén mardom hokm dát o gwashtant: “Har Ebráni mardénchokké ke pédá bit, áiá Nillay kawrá dawr bedayét, bale Ebráni jenekkán bellét.”
EXO 2:1 Láwi kabilahay mardé shot o Láwi jenekké sángi kort.
EXO 2:2 Janén lápporr but o mardénchokké áworti. Janéná dist ke chokk sharrangé, tán say máhá chéri dát.
EXO 2:3 Wahdé áiá chokk cha ed o géshter chér dát nakort, pa áiá cha kalam o káshá gwaptagén sapté zorti, sapti gir o dhámbar jat, chokki saptá kort o Nillay kawray lambá kásháni tahá éri kort.
EXO 2:4 Chokkay gohár kammé dur óshtát o cháragá lagget ke bárén chokk chóna bit.
EXO 2:5 Perawnay jenekk jánay shódagá Nillay kawrá átk. Móled Nillay kawray kerrá gardagá laggetant. Perawnay jenekká kásháni nyámá sapt dist o wati móledé ráhi dát ke saptá byár. Áiá áwort.
EXO 2:6 Perawnay jenekká sapt pach kort o nonnok dist. Nonnok gréwagá at. Perawnay jenekká áiay sará bazzag but. Gwashti: “É cha Ebrániáni chokkán ent.”
EXO 2:7 Gorhá nonnokay gohárá cha Perawnay jenekká jost kort: “Berawán o Ebráni janéné tawár bekanán ke nonnoká pa taw shir beméchénit?”
EXO 2:8 Perawnay jenekká gwasht: “Beraw.” Jenekk shot o nonnokay máti tawár kort.
EXO 2:9 Perawnay jenekká gón áiá gwasht: “É nonnoká gón wat bar o pa man méchén. Man tai mozzá dayán.” Janéná nonnok zort o méchént.
EXO 2:10 Chokk ke rost o kammé master but, mátá Perawnay jenekkay kerrá áwort. Perawnay jenekká chokk zort o wati chokk kort. Áiay námi Mussá kort, gwashti: “É man cha ápá kasshetag.”
EXO 2:11 Wahdé Mussá rost o mazan but, yakk róché wati mardománi kerrá shot o áyáni bigári o gránén kári distant. Mussáyá Mesrié dist ke Ebrániéá, bezán cha Mussáay jenday mardomán yakkéá janagá at.
EXO 2:12 Mussáyá wati chapp o chágerd cháret o disti ke kass nést. Gorhá Mesrii kosht o rékáni tahá kall kort.
EXO 2:13 Domi róchá padá dhanná shot o disti ke do Ebráni merhagá ent. Gón mayárigén mardomá gwashti: “Chéá wati hamkawmá janagá ay?”
EXO 2:14 Áiá passaw dát: “Kayá tará may sará hákem o dádras kortag? Záná taw lóthay maná ham bekoshay anchó ke Mesriet kosht?” Mussáyá torset o delá gwashti: “Pakkáyá habar páshk butag.”
EXO 2:15 Perawn é habará sahig but o Mussáay koshagay erádahi kort. Bale Mussá cha Perawnay kerrá tatk o Midyánay molká shot o chátéay kerrá nesht.
EXO 2:16 Midyánay dini péshwáyá hapt janénchokk hastat. É jenekk átk o ápay kasshag o tagáray porr kanagá laggetant ke petay ramagá áp bedayant.
EXO 2:17 Bale lahtén shepánk átk o jenekkesh galléntant. Mussá jenekkáni komakká pád átk o áyáni ramagi áp dát.
EXO 2:18 Jenekk ke wati pet Rawélay kerrá átkant, petá jost kortant: “Maróchi chéá chó zutt átkagét?”
EXO 2:19 Áyán gwasht: “Maróchi Mesriéá márá cha shepánkáni dastá rakként. Ápi ham kasshet o ramagi áp dát.”
EXO 2:20 Petá gón wati jenekkán gwasht: “Gorhá kojá ent? Shomá á mard chéá nayáwortag gón? Tawári kanét, belli kayt o nána wárt.”
EXO 2:21 Mussá marday kerrá jahmenend bayagá rázig but o mardá wati jenekk Sapurah gón Mussáyá sur dát.
EXO 2:22 Sapurahá mardénchokké áwort o Mussáyá áiay nám Gayrshám kort, gwashti: “Man darmolká darámadé án.”
EXO 2:23 Máh o sál gwastant o hamé nyámá Mesray bádsháh mort. Esráili cha wati golámiá nálag o peryátá atant. Áyáni é nálag o peryát borzád shot o Hodáyá sar butant.
EXO 2:24 Hodáyá áyáni nálag eshkotant o wati hamá ahd o paymánay tránagá kapt ke gón Ebráhém o Esák o Ákubá bastagati.
EXO 2:25 Hodáyá Esráili distant o áyáni sará bazzagi but.
EXO 3:1 Mussá wati nákó, Midyánay dini péshwá Yatrunay ramagá chárénagá at. Ramagi zort o gyábánay á dastá, Hórébá, bezán Hodáay kóhá shot.
EXO 3:2 Hodáwanday préshtag cha dhólokéay nyámá, ásay shamálahéay tahá áiay démá záher but. Mussáyá dist ke dhólok bon ent, bale sochag o por bayagá naent.
EXO 3:3 Mussáyá gwasht: “Rawán o é ajabén nedáragá charán ke bárén dhólok chéá sochag o por bayagá naent.”
EXO 3:4 Hodáwandá dist ke Mussá é nedáragay cháragá pédák ent. Hodáyá cha dhólokay tahá gwánk jat: “Mussá, oo Mussá!” Mussáyá passaw dát: “Ji!”
EXO 3:5 Hodáyá gwasht: “Nazzikter mayá. Wati swásán kassh ke é jágahá ke taw óshtátagay, é pákén jágahé.”
EXO 3:6 Hodáyá padá gwasht: “Man tai petay Hodá án, Ebráhémay Hodá, Esákay Hodá o Ákubay Hodá án.” Mussáyá Hodáay chárag torset o wati démi gept.
EXO 3:7 Hodáwandá gwasht: “Mani mahluk ke Mesrá ent, man áyáni bazzagi sharriá distag. Man distag ke wati bigárgiráni sawabá chón peryáta kanant. Áyáni dardán sharriá zánán.
EXO 3:8 Man ér átkagán ke áyán cha Mesriáni dastá berakkénán o cha é molká, sharrén o práh o sháhegánén molkéá bebarán, anchén molkéá ke ódá shir o bénagay jó tachagá ant, Kanháni o Hitti o Amuri o Perizzi o Héwi o Yabusiáni molká.
EXO 3:9 Bechár, Bani Esráiliáni peryát mani kerrá sar butag, man hamá zolm ham distagant ke Mesri áyáni sará kanantesh.
EXO 3:10 Beraw, man tará Perawnay kerrá ráha dayán, mani kawm Bani Esráilá bezur o cha Mesrá dar á.”
EXO 3:11 Bale Mussáyá gón Hodáyá gwasht: “Man kay án ke Perawnay kerrá berawán o Bani Esráilá bezurán o cha Mesrá dar byáyán?”
EXO 3:12 Hodáyá gwasht: “Man gón taw góna bán. Taw ke kawmá zuray o cha Mesrá dara káay, shomá hamé kóhá Hodáay parasteshá kanét. O é yakk neshánié bit ke tai ráh dayók man án.”
EXO 3:13 Mussáyá gón Hodáyá gwasht: “Agan man Bani Esráilay kerrá berawán o begwashán ke shomay bonpirokáni Hodáyá maná shomay kerrá ráh dátag o á cha man jost bekanant ke áiay nám kay ent, áyáni passawá ché begwashán?”
EXO 3:14 Hodáyá gwasht: “Man hamá án ke hastán. Gón Bani Esráilá begwash ke hamá ke nám enti ‘Man Hamá Án’, hamáiá maná shomay kerrá ráh dátag.”
EXO 3:15 Hodáyá gón Mussáyá é ham gwasht: “Gón Bani Esráilá begwash ke ‘Yahweh’, bezán shomay bonpirokáni Hodá, Ebráhémay Hodá, Esákay Hodá o Ákubay Hodáyá maná shomay kerrá ráh dátag. Tán abad mani nám hamesh ent o man nasláni nasl hamé námá yát kanaga bán.
EXO 3:16 Beraw Esráilay kamáshán yakjáh kan o gón áyán begwash ke Hodáwand, bezán shomay bonpirokáni Hodá, Ebráhém o Esák o Ákubay Hodá mani démá záher butag o gón man gwashtagi ke man cha nazzikká distag ke Mesrá gón shomá ché butag o
EXO 3:17 man kawla kanán ke shomárá cha é bazzagiá dara kanán ke Mesrá shomay sará átkag o shomárá Kanháni o Amuri o Perizzi o Héwi o Yabusiáni molká barán, hamá molká ke shir o bénagay jó tachagá ant.
EXO 3:18 Esráilay kamásh tai habarán gósha dárant. Shomá hórigá Mesray bádsháhay kerrá berawét o gón áiá begwashét ke Hodáwand, bezán Ebrániáni Hodá may démá záher butag. Nun márá razá beday ke má gyábáná say róchay ráhá rawén o pa wati Hodáwandén Hodáyá korbániga kanén.
EXO 3:19 Bale mana zánán ke tán zórmandén dasté Mesray bádsháhá majbur makant, á shomárá rawagá naylit.
EXO 3:20 Man wati dastá shahára dayán o Mesrá gón wati hamá sajjahén ajabbatén kárána janán ke manesh áyáni nyámá kanán. Gorhá Perawn shomárá ráwagá kellit.
EXO 3:21 Man Mesriáni delá pa é kawmá narma tarrénán o wahdé shomá rawét, cha Mesrá gón hórk o háligén dastána narawét.
EXO 3:22 Har janén cha wati hamsáhegén janén o cha áiay lógá nendókén janéná god o pocch o nograh o teláhay saht o zéwar belóthit o wati bacch o jenekkáni gwaráesh bedant. É paymá shomá Mesriáni mál o hastiá polét.”
EXO 4:1 Mussáyá passaw dát: “Agan mardom mani sará báwar makanant o mani habarán gósh madárant o begwashant: ‘Hodáwand tai démá záher nabutag,’ gorhá?”
EXO 4:2 Hodáwandá gwasht: “É chéé tai dastá ent?” Passawi dát: “Asáé.”
EXO 4:3 Gwashti: “Zeminá dawri day.” Mussáyá ke asá zeminá dawr dát, asá maré but o Mussá cha áiay kerrá tatk.
EXO 4:4 Hodáwandá gón Mussáyá gwasht: “Wati dastá shahár day o máray dombá beger.” Mussáyá wati dast shahár dát o gepti o már áiay dastá asáé but.
EXO 4:5 Hodáwandá gwasht: “É neshániá ke záhera kanay, gorhá Esráili báwara kanant ke mane Hodáwand bezán áyáni bonpirokáni Hodá, Ebráhémay Hodá, Esákay Hodá o Ákubay Hodá tai démá záher butag.”
EXO 4:6 Padá Hodáwandá gwasht: “Dastá wati kabáhay tahá kan.” Áiá dast kabáhay tahá kort. Dasti ke cha kabáhá dar kort, dast purah garrá geptagat o chó barpá espét at.
EXO 4:7 Hodáwandá gwasht: “Dastá padá kabáhay tahá kan.” Áiá dast padá kabáhay tahá kort. Dasti ke cha kabáhá dar kort, ta dast wassh butagat o dastay póst jánay é dega jágaháni póstay paymá at.
EXO 4:8 “Agan mardomán tai gapp báwar nabut o awali neshániesh delgósh nakort, domi neshániá báwara kanant.
EXO 4:9 Bale agan é doén neshániesh báwar nakortant o tai gappesh gósh nadásht, gorhá cha Nillá kammé áp bezur o hoshkén zeminay sará beréch. É ápán ke taw cha Nillá zuray, é áp hoshkén zeminay sará hóna bant.”
EXO 4:10 Mussáyá gón Hodáwandá gwasht: “Oo mani Hodáwand! Man habarzánté naán, na pésará butagán o na annun habarzánté án. É sáhatá ham ke taw gón wati kasterá habará ay, mani zobán o bayán konth ent.”
EXO 4:11 Hodáwandá gwasht: “Baniádamay dap kayá jórh kortag? Kay ensáná gong o karra kant? Kay ensáná champach o kóra kant? Mane Hodáwand naent?
EXO 4:12 Nun beraw, man tará sója dayán ke tará ché gwashagi ent. Dap taiga bit o gapp maniga bant.”
EXO 4:13 Mussáyá gwasht: “Oo mani Hodáwand! Degaré ráh day.”
EXO 4:14 Hodáwand Mussáay sará zahr gept o gwashti: “Hárun tai brát naent, Láwi kabilahay Hárun? Mana zánán ke habarzánté. Bechár, á annun tai gendoká pédák ent o cha tai gendagá deli wassha bit.
EXO 4:15 Taw gón áiá habara kanay o habarán áiay dapá dayay. Man shomárá sója dayán ke ché bekanét. Dap taig o áiayga bant o gapp maniga bant.
EXO 4:16 Tai badalá á gón mardomán habara kant. Á pa taw dapé bit o taw pa áiá hodáé bay.
EXO 4:17 Taw é asáyá dastá kan ke wati neshánián gón hameshiá pésh bedáray.”
EXO 4:18 Mussá padá wati nákó Yatrunay kerrá shot o gón áiá gwashti: “Maná razá day, Mesrá wati brátáni kerrá rawán o charán ke bárén zendag ant yá mortagant.” Yatruná gwasht: “Beraw pa salámati.”
EXO 4:19 Midyánay molká Hodáwandá gón Mussáyá gwasht: “Padá Mesrá beraw, chéá ke á sajjahén mardom ke tai koshagay randá atant, mortagant.”
EXO 4:20 Mussáyá wati jan o doén chokk zort o hará swár kortant o Mesrá wátarr but. Mussáyá “Hodáay asá” dastá kort.
EXO 4:21 Hodáwandá gón Mussáyá gwasht: “Wahdé padá Mesrá raway, bechár, hamá sajjahén mójezah ke man tai dastá dátagant, Perawnay démá á mójezahán bekan o pésh dár, bale man áiay delá senga kanán ke kawmá rawagá maylit.
EXO 4:22 Gón Perawná begwash: ‘Hodáwand chosha gwashit: Esráil mani mardénchokk ent, mani awali chokk ent.
EXO 4:23 Man tará gwasht ke mani chokká bell ke rawt o mani parasteshá kant. Bale taw namannet o rawagá naesht. Bechár, nun man tai chokká koshán, tai awali mardénchokká.’”
EXO 4:24 Chó but ke ráhá menzeléá Hodáwand gón Mussáyá dochár kapt o lótheti ke Mussáyá bekoshit.
EXO 4:25 Bale Mussáay jan Sapurahá tézén sengé zort o wati chokkay loppok borret o hamé pósti Mussáay pádán jat. Gwashti: “Taw pa man ‘hónay sálónké’ ay.”
EXO 4:26 Hodáwandá hamé wahdá Mussá yalah dát ke Sapurahá sonnatay sawabá Mussá “hónay sálónk” gwashtagat.
EXO 4:27 Hodáwandá gón Háruná gwasht: “Mussáay cháragá gyábáná beraw.” Hárun shot o Hodáay kóhá gón Mussáyá dochár kapt o Mussái chokket.
EXO 4:28 Mussáyá hamá sajjahén habar gón Háruná kortant ke Hodáwandá pa áyáni gwashagá Mussá ráh dátagat. Hamá sajjahén neshániáni háli ham dát ke Hodáwandá pa áyáni pésh dáragá Mussá hokm dátagat.
EXO 4:29 Gorhá Mussá o Hárun shotant o Esráiliáni sajjahén kamáshesh yakjáh kortant.
EXO 4:30 Háruná hamá sajjahén habar kortant ke Hodáwandá gón Mussáyá kortagatant o hamá neshánii mahlukay chammáni démá pésh dáshtant.
EXO 4:31 Mahluká báwar kort. Wahdé áyán eshkot ke Hodáwandá may némagá delgósh kortag o may bazzagii distag, pa adab saresh jahl kort o parastesh kanagá laggetant.
EXO 5:1 Randá Mussá o Hárun shotant o gón Perawná gwashtesh: “Yahweh, Esráilay Hodá chosha gwashit: ‘Mani mahluká bell ke gyábáná rawt o pa man jashné kant.’”
EXO 5:2 Bale Perawná gwasht: “Yahweh kay ent ke man áiay gappá gósh bedárán o Bani Esráilá rawagá bellán? Man Yahwehá nazánán o Bani Esráilá rawagá naylán.”
EXO 5:3 Áyán gwasht: “Ebrániáni Hodá may démá záher butag. Nun márá bell ke gyábáná say róchay ráhá rawén o pa wati Hodáwandén Hodáyá korbániga kanén. Chó mabit ke gón wabá yá zahmá may sará bekapit.”
EXO 5:4 Bale Mesray bádsháhá gwasht: “Mussá! Hárun! Shomá chéá mardomán kárá naylét? Berawét o wati bigáriá bekanét.”
EXO 5:5 Padá gwashti: “Bechár, annun é molká Esráili sakk báz ant bale shomá kárá naylétesh.”
EXO 5:6 Hamá róchá Perawná mardománi bigárgir o kármaster hokm dát o gwashtant:
EXO 5:7 “Pésará pa heshtay janagá shomá mardománá palár dátag, nun madayétesh. Belli wata rawant o palára chenant.
EXO 5:8 Bale cha áyán hesht hamá kesásá belóthét ke pésará jatagesh, hecch kamm makanét. É mardom jándozz o tambal ant, paméshká peryáta kanant: ‘Márá bell ke rawén o pa wati Hodáyá korbániga kanén.’
EXO 5:9 Áyán angat gránterén kár beparmáét ke wati kárá dazgatth bebant o drógén habaráni némagá delgósh makanant.”
EXO 5:10 Mardománi bigárgir o kármaster dhanná shotant o gón mardomán gwashtesh: “Perawn chosha gwashit: ‘Man shomárá palára nadayán.’
EXO 5:11 Shomá wat berawét o palár bechenét, har jágah ke dar gétka kanét. Bale cha shomay kárá toshé kamma nabit.”
EXO 5:12 Mardom sajjahén Mesray molká sheng butant ke pa heshtay janagá palár bechenant.
EXO 5:13 Bigárgirán kaddhan kort o gwashtant: “Wati hamok róchi gisshéntagén kárá hamá wahday paymá sarjam bekanét ke shomárá palár butag.”
EXO 5:14 Perawnay bigárgirán wati dáshtagén Esráili kármaster jat o jost kortant: “Shomay zikkén o maróchigén hesht chéá pésarigén kesásá naant?”
EXO 5:15 Esráili kármaster shotant o Perawnay kerrá peryátesh kort: “Taw chéá gón wati kasterán chó kanagá ay?
EXO 5:16 Tai kasterán palára nadayant o angat márá gwashant: ‘Hesht bejanét.’ Bechár, radi tai mardománig ent, latthán má waragá én.”
EXO 5:17 Perawná gwasht: “Shomá jándozz o tambal ét, behyá ét, paméshká gwashét: ‘Márá bell ke rawén o pa Hodáwandá korbániga kanén.’
EXO 5:18 Nun berawét o kár kanét. Shomárá palár dayaga nabit, bale hesht hamá kesásá bejanét.”
EXO 5:19 Esráili kármasterán zánt ke má janjáléá kaptagén ke márá gwashant shomay jatagén hesht cha har róchigén gisshéntagén kesásá kamter mabant.
EXO 5:20 Wahdé kármaster cha Perawnay kerrá dar átkant, gón Mussá o Háruná dhikkesh wárt. Mussá o Hárun áyáni wadárá atant.
EXO 5:21 Gón áyán gwashtesh: “Hodáwand shomárá may hakkáni jostá bekanát o wat ensáp bekanát. Shomá Perawn o áiay hezmatkáráni chammán márá syahru kanáéntag o pa may koshagá zahmé áyáni dastá dátag.”
EXO 5:22 Mussá padá Hodáwanday kerrá shot o gwashti: “Oo Hodáwand! Taw chéá é mahluk janjáléá dawr dát? Taw paméshká maná ráh dát?
EXO 5:23 Man Perawnay kerrá shotán ke tai námay sará gón áiá habar bekanán, bale cha á róchá o rand Perawná tai mahluk ganter janjál kortag o taw pa mahlukay rakkénagá hecch nakortag.”
EXO 6:1 Hodáwandá gón Mussáyá gwasht: “Nun taw genday ke man gón Perawná ché kanán. Perawn mani zórmandén dastá ke gendit, mahluká rawagá kellit. Haw, mani zórmandén dastá ke gendit, áyán cha wati molká gallénit.”
EXO 6:2 Hodáyá gón Mussáyá habar kort, gwashti: “Man Hodáwand án.
EXO 6:3 Man ke Ebráhém o Esák o Ákubay démá záher bután, man wati nám ‘Porwákén Hodá’ kort. Man á hál nadátant ke mani nám ‘Yahweh’ ent.
EXO 6:4 Man gón áyán ahd o paymán ham kort ke Kanhánay molká shomárá dayán, bezán hamá molká ke ódá á, darámaday paymá neshtagatant.
EXO 6:5 Man distag ke Mesrián Esráili golám kortagant o Esráili cha é golámiá nálagá ant. Man é nálag eshkotagant o wati ahd o paymánay yátá kaptagán.
EXO 6:6 Paméshká mani é paygámá Esráilián sar kan: ‘Man Hodáwand án. Man shomárá cha Mesriáni bigáriá kasshán o cha golámiá ázáta kanán. Dastá shahára dayán, Mesrián gránén sezá dayán o shomárá mókán.
EXO 6:7 Man shomárá zurán o wati kawma kanán o shomay Hodá bán. Gorhá shomá zánét ke man shomay Hodáwandén Hodá án, hamá ke shomárá cha Mesriáni bigáriá dari kortag.
EXO 6:8 Man shomárá hamá molká barán ke wati daston chest kort o sawgendon wárt ke Ebráhém o Esák o Ákubá dayáni. Man á molká shomárá dayán ke shomay jenday melkat bebit. Man Hodáwand án.’”
EXO 6:9 Mussáyá gón Esráilián é habar kortant, bale wati proshtagén arwáh o gránén zahmatáni sawabá Mussáay habaresh gósh nadásht.
EXO 6:10 Hodáwandá gón Mussáyá gwasht:
EXO 6:11 “Beraw o Mesray bádsháh Perawná begwash ke Esráilián cha wati molká rawagá bell.”
EXO 6:12 Bale Mussáyá gón Hodáwandá gwasht: “Mani habar Esráilián gósh nadáshtagant, gorhá Perawnesh chón gósha dárit? Man wa konthbayánén mardomé án.”
EXO 6:13 Hodáwandá gón Mussá o Háruná habar kort o hokm dátant ke gón Esráilián o gón Mesray bádsháh Perawná habar bekanét o Esráilián cha Mesray molká bekasshét.
EXO 6:14 Esráiliáni kabilaháni sar o master esh ant: Esráilay awali chokk Rubenay mardénchokk Hanuk o Pallu o Hesrun o Karmi atant. Rubenay thakk hamesh atant.
EXO 6:15 Shamunay mardénchokk Yamuél o Yámin o Uhad o Yákin o Sóhar o Shául atant. Sháulay mát Kanhánié at. Shamunay thakk hamesh atant.
EXO 6:16 Láwiay mardénchokkáni nám, áyáni pédáeshay red o banday hesábá esh ant: Gershón o Kohát o Merári. Láwiá 137 sál omr kort.
EXO 6:17 Gershónay mardénchokk Lebni o Shemmi atant, wati thakkáni hesábá.
EXO 6:18 Kohátay mardénchokk Amrám o Esár o Hebrun o Ozzél atant. Kohátá 133 sál omr kort.
EXO 6:19 Meráriay mardénchokk Mahli o Mushi atant. Láwiay thakk, áyáni pédáeshay red o banday hesábá hamesh atant.
EXO 6:20 Amrámá gón wati petay gohár Yukebédá sur kort o Hárun o Mussá cha Yukebédá pédá butant. Amrámá 137 sál omr kort.
EXO 6:21 Esáray mardénchokk Kórá o Nepeg o Zekri atant.
EXO 6:22 Ozzélay mardénchokk Misháél o Elsápán o Setri atant.
EXO 6:23 Háruná gón Elishebahá sur kort. Elishebah Aminádábay jenekk at o Nahshunay gohár. Hárunay mardénchokk Nádáb o Abihu o Elyázar o Itámár cha Elishebahá pédá butant.
EXO 6:24 Kóráay mardénchokk Assir o Elkáná o Abyásáp atant. Kóráiáni thakk hamesh atant.
EXO 6:25 Hárunay mardénchokk Elyázará gón Putihélay janénchokkéá sur kort o cha é jenekká Pinehás pédá but. Láwiáni sar o master hamesh atant, wati thakkáni hesábá.
EXO 6:26 Hamé Hárun o Mussá atant ke Hodáwandá gón áyán gwasht: “Esráilián cha Mesrá romb rombá bekasshét.”
EXO 6:27 É doénán, hamé Mussá o Háruná gón Mesray bádsháh Perawná habar kort ke Esráili cha Mesrá ázát kanag bebant.
EXO 6:28 Á róchá ke Hodáwandá Mesray molká gón Mussáyá habar kort,
EXO 6:29 choshi gwasht: “Man Hodáwand án, harché ke tará gwashán, Mesray bádsháh Perawná begwashesh.”
EXO 6:30 Bale Mussáyá gón Hodáwandá gwasht: “Man konthbayánén mardomé án, Perawn chón mani habarán gósha dárit?”
EXO 7:1 Gorhá Hodáwandá gón Mussáyá gwasht: “Bechár, man tará pa Perawná chó Hodáyá kortag o tai brát Hárun tai nabia bit.
EXO 7:2 Harché ke tará hokma kanán, hamá paym gwashán kan. Tai brát Hárun báyad ent gón Perawná begwashit ke Esráilián cha wati molká rawagá bell.
EXO 7:3 Bale man Perawnay delá senga kanán. Man Mesray molká bázén ajabbatén nesháni o mójezahé pésha dárán,
EXO 7:4 bale Perawn shomay habarán gósha nadárit. Man wati dastá Mesray helápá chesta kanán, Mesrián gránén sezá dayán o wati Esráili kawmá romb rombá cha Mesrá kasshán.
EXO 7:5 Wahdé wati dastá Mesray helápá chesta kanán o Bani Esráilá cha Mesriáni nyámá kasshán, nun Mesria zánant ke man Hodáwand án.”
EXO 7:6 Mussá o Háruná anchosh kort. Hamá paymá ke Hodáwandá hokm dátagatant, áyán hamá paymá kort.
EXO 7:7 É wahdá ke áyán gón Perawná habar kort, Mussáay omr hashtád sál at o Hárunay hashtád o say.
EXO 7:8 Hodáwandá gón Mussá o Háruná gwasht:
EXO 7:9 “Perawn ke shomárá gwashit: ‘Mójezahé pésh bedárét’ gorhá taw Háruná begwash: ‘Wati asáyá bezur o Perawnay démá zeminá dawri day.’ Asá maré bit.”
EXO 7:10 Mussá o Hárun Perawnay kerrá shotant o hamá paymá ke Hodáwandá hokm dátagatant, hamá paymá kortesh. Háruná wati asá Perawn o áiay hezmatkáráni démá zeminá dawr dát o asá maré but.
EXO 7:11 Gorhá Perawná dáná o sáher lótháéntant o é Mesri jádugerán gón wati jáduá hamé kár kort.
EXO 7:12 Cha áyán har yakkéá wati asá zeminá dawr dát o áyáni asá már butant. Hárunay asáyá áyáni asá wárt o ér bortant.
EXO 7:13 Bale anchó ke Hodáwandá gwashtagat, Perawnay del angat seng at o áyáni habari gósh nadáshtant.
EXO 7:14 Hodáwandá gón Mussáyá gwasht: “Perawnay del seng ent o mardomán rawagá naylit.
EXO 7:15 Sohbá ke Perawn ápay kerrá rawt, taw beraw o Nillay kawray lambá áiay ráhay sará bósht o már butagén asáyá dastá kan.
EXO 7:16 Gón Perawná begwash: ‘Hodáwandá, bezán Ebrániáni Hodáyá maná tai kerrá ráh dátag ke tará begwashán: “Mani mahluká bell ke gyábáná rawt o maná parastesha kant,” bale taw angat gósh dáragá naay.
EXO 7:17 Hodáwand chosha gwashit ke tawe Perawn cha é neshániá zánay ke man Hodáwand án: Bechár, é asá ke mane Mussáay dastá ent, man eshiá kawray ápá janán o áp hón jórha bant.
EXO 7:18 Kawray máhiga merant, kawr bóa kant o Mesri kawray ápá wárta nakanant.’”
EXO 7:19 Hodáwandá gón Mussáyá gwasht: “Háruná begwash: ‘Wati asáyá dastá kan o dastá Mesray ápáni sará shahár day, áyáni kawráni sará, áyáni jóáni sará, áyáni taláwagáni sará o áyáni sajjahén ápjalláni sará. Esháni tahay sajjahén áp hón jórha bant. Sajjahén Mesray molk hóná porra bit, ápdán ham cha hóná porra bant.’”
EXO 7:20 Mussá o Háruná hamá paymá kort ke Hodáwandá hokm dátagatant. Háruná Perawn o hezmatkáráni chammáni démá wati asá chest kort o kawray ápáni sará jat. Kawray sajjahén áp hón jórh butant.
EXO 7:21 Kawray máhig mortant, kawrá bó kort o Mesrián kawray áp wárt nakort. Sajjahén Mesray molká hón tachagá at.
EXO 7:22 Bale Mesri jádugerán ham gón wati jáduá hamé kár kort o hamá paymá ke Hodáwandá gwashtagat, Perawnay del seng at o Mussá o Hárunay habari gósh nadáshtant.
EXO 7:23 Perawná posht mán dát o wati kalátá shot o é gappi hecch mán nayáwort.
EXO 7:24 Sajjahén Mesrián pa waragi ápá kawray kash o kerrán kánig janag bendát kort, chéá ke kawray ápesh wárta nakort.
EXO 7:25 Cha á wahdá ke Hodáwandá Nillay kawray sará é kahr dawr dát, hapt róch gwast.
EXO 8:1 Nun Hodáwandá gón Mussáyá gwasht: “Perawnay kerrá beraw o gón áiá begwash: ‘Hodáwand chosha gwashit: “Mani mahluká bell ke rawt o maná parastesha kant.
EXO 8:2 Agan mani mahluká rawagá maylay, bechár, man tai sajjahén molkay sará pogolay kahré dawra dayán.
EXO 8:3 Nillay kawr cha pogolá porra bit. Pogol chesta bant o tai lógá káyant, tai wábjáhá poterant o tahtá sara kapant, tai hezmatkár o mardománi lógán ham káyant, tai tarun o árt tarr kanagay darpáni tahá dawra kanant.
EXO 8:4 Pogol tai jend o tai mardom o tai sajjahén hezmatkárán pera rechant.”’”
EXO 8:5 Hodáwandá padá gón Mussáyá gwasht: “Háruná begwash: ‘Wati asáyá dastá kan o dastá kawr o jó o taláwagáni sará shahár day o Mesray molká cha pogolá porr kan.’”
EXO 8:6 Háruná wati dast Mesray ápáni sará shahár dát, pogol dar átk o Mesray molká mán retkant.
EXO 8:7 Bale jádugerán ham gón wati jáduá anchosh kort o pogol cha ápán dar átk o Mesray molká sheng butant.
EXO 8:8 Perawná Mussá o Hárun lótháéntant o gwashti: “Hodáwanday kerrá dwá kanét ke pogolán cha man o mani mardomán dur bebárt. Man shomay mahluká rawagá kellán ke pa Hodáwandá korbánig bekant.”
EXO 8:9 Mussáyá gón Perawná gwasht: “Ji, hokm kan. Kadi pa taw o pa tai hezmatkár o mardomán dwá bekanán ke pogol cha taw o cha tai lógán gár o bégwáh bebant o tahná kawrá bejallant?”
EXO 8:10 Perawná gwasht: “Bándá.” Mussáyá gwasht: “Anchosha bit ke taw gwashay. Pogol cha taw o tai lógán, cha tai hezmatkár o mardomán dura bant o tahná kawrá jallant, tánke taw bezánay ke may Hodáwandén Hodáay matth nést.”
EXO 8:12 Mussá o Hárun cha Perawnay kerrá shotant. Mussáyá Hodáwanday kerrá peryát kort, hamá pogoláni bárawá ke Hodáwandá Perawnay chakká dawr dátagatant.
EXO 8:13 Hodáwandá Mussáay dwá gósh dásht o pogol, lóg o péshgáh o dhagárán mortant.
EXO 8:14 Pogolesh kót kótá mocch kanán kortant. Zemin bó gept.
EXO 8:15 Wahdé Perawná dist ke cha é kahrá ján chotthet, hamá paymá ke Hodáwandá gón Mussáyá gwashtagat, Perawná wati del seng kort o Mussá o Hárunay habari gósh nadáshtant.
EXO 8:16 Hodáwandá gón Mussáyá gwasht: “Háruná begwash: ‘Wati asáyá shahár day o zeminay hákán bejan ke sajjahén Mesrá passhag mán berechit.’”
EXO 8:17 Áyán anchosh kort. Háruná wati dast gón asáyá shahár dát o zeminay háki jatant. Sajjahén Mesrá, zeminay hák badal but o passhag butant o mardom o jánwarán per retkant.
EXO 8:18 Jádugerán gón wati jáduá was kort ke passhag byárant, bale áwortesh nakort. Passhag mardom o jánwarán per lecchetagatant.
EXO 8:19 Jádugerán gón Perawná gwasht: “É Hodái káré.” Bale hamá paymá ke Hodáwandá gwashtagat, Perawnay del seng at o Mussá o Hárunay habari gósh nadáshtant.
EXO 8:20 Hodáwandá gón Mussáyá gwasht: “Sohbá máhallah pád á o wahdé Perawn dém pa ápá rawt, áiay démá dar á o begwashi: ‘Hodáwand chosha gwashit: “Mani mahluká bell ke rawt o maná parastesha kant.
EXO 8:21 Chéá ke agan mani mahluká rawagá maylay, bechár, man tará o tai hezmatkár o tai mardomán o tai lógán makeskgranda kanán. Mesriáni lóg cha makeská porra bant o hamá zemin ham ke ódá áyáni lóg bastagant.
EXO 8:22 Bale á róchá man Góshenay damagá ke ódá mani mahluk neshtag, é kahrá nayárán. Ódá makeskgranda nabit. É paymá taw zánay ke é molká Hodáwand man án.
EXO 8:23 Man wati mahluk o tai mahlukay nyámá park o péra kanán o é nesháni bándá záhera bit.”’”
EXO 8:24 Hodáwandá anchosh kort. Makeskáni sehr Perawn o áiay hezmatkáráni lógán per retkant. Makeskán sajjahén Mesr tabáh kort.
EXO 8:25 Perawná Mussá o Hárun lótháént o gwashtant: “Berawét o pa wati Hodáyá korbánig bekanét, bale hamé molkay tahá.”
EXO 8:26 Bale Mussáyá gwasht: “Má chó korta nakanén. Chéá ke má pa wati Hodáwandén Hodáyá anchén korbániga kanén ke pa Mesrián bazhnák ant. Agan má Mesriáni chammáni démá anchén korbánig bekanén ke pa áyán bazhnák ant, márá sengsára nakanant?
EXO 8:27 Má báyad ent gyábáná say róchay ráhá berawén o pa wati Hodáwandén Hodáyá korbánig bekanén, hamá paymá ke Hodáyá márá gwashtag.”
EXO 8:28 Perawná gwasht: “Man shomárá rawagá kellán ke gyábáná pa wati Hodáwandén Hodáyá korbánig bekanét. Bale sakk dur marawét o pa man ham dwá kanét.”
EXO 8:29 Mussáyá gwasht: “Bechár, man cha tai kerrá dara káyán o Hodáwanday bárgáhá dwá kanán. Bándá makesk cha tawe Perawn o tai hezmatkár o mardomán dura káyant. Bale chó mabit ke tawe Perawn padá makr o préb bekanay o mardomán maylay ke berawant o pa Hodáwandá korbánig bekanant.”
EXO 8:30 Mussá cha Perawnay kerrá dar átk o Hodáwanday bárgáhá dwái kort o
EXO 8:31 Hodáwandá Mussáay dwá gósh dásht. Makeskán cha Perawn o áiay hezmatkár o mardománi kerrá bál kort. Yakk dánagé makesk ham pasht nakapt.
EXO 8:32 Bale é randi padá Perawná wati del seng kort o mardomi rawagá naeshtant.
EXO 9:1 Hodáwandá gón Mussáyá gwasht: “Perawnay kerrá beraw o gón áiá begwash: ‘Hodáwand, Ebrániáni Hodá chosha gwashit: “Mani mahluká bell ke rawt o maná parastesha kant.
EXO 9:2 Chéá ke agan áyán rawagá maylay o angat áyán bedáray,
EXO 9:3 Hodáwand dastá shahára dant o kahcharán, tai mál o dalwatáni sará sakkén gránén wabáé dawra dant, tai har o asp o oshter o pas o gókáni sará.
EXO 9:4 Bale Hodáwand Esráili o Mesriáni mál o dalwatáni nyámá park o péra kant o cha Esráiliáni mál o dalwatán yakké ham namerit.”’”
EXO 9:5 Hodáwandá yakk wahdé gisshént o gwashti: “Bándá é molká mane Hodáwand é kárá kanán.”
EXO 9:6 Domi róchá Hodáwandá é kár kort. Mesriáni sajjahén mál o dalwat mortant, bale cha Esráiliáni mál o dalwatán yakké ham namort.
EXO 9:7 Perawná pa pakká kanagá mardom ráh dát o sahig but ke cha Esráiliáni mál o dalwatán yakké ham namortag. Bale Perawnay del angat seng at o mahluki rawagá naesht.
EXO 9:8 Hodáwandá gón Mussá o Háruná gwasht: “Cha kurahéá chanké chanké por bezurét, o Mussá eshán Perawnay démá ásmánay némagá shánk bedant.
EXO 9:9 É por danza bant o sajjahén Mesray molkay sará mána shánant o sajjahén Mesrá ensán o jánwaráni jáná ábelahén résh o sóm pédá kanant.”
EXO 9:10 Mussá o Háruná cha kurahéá por zort o Perawnay démá óshtátant. Mussáyá por ásmánay némagá shánk dátant o é porán ensán o jánwaráni jáná ábelahén résh o sóm pédá kort.
EXO 9:11 Résháni sawabá jádugerán Mussáay démá óshtát nakort, chéá ke jáduger o sajjahén Mesriáni jáná sóm dar átkagat.
EXO 9:12 Bale Hodáwandá Perawnay del seng kort o hamá paymá ke Hodáwandá gón Mussáyá gwashtagat, Perawná áyáni habar gósh nadáshtant.
EXO 9:13 Hodáwandá gón Mussáyá gwasht: “Sohbá máhallah pád á, Perawnay démá dar á o begwashi: ‘Hodáwand, Ebrániáni Hodá chosha gwashit: “Mani mahluká bell ke rawt o maná parastesha kant.
EXO 9:14 Chéá ke é randi man wati sajjahén kahrán tai jend o tai hezmatkár o tai mardománi sará dawra dayán ke taw bezánay ke sajjahén donyáyá mani paymén nést.
EXO 9:15 Chéá ke agan man belóthetén, déri wati daston shahár dátagat o tai o tai mardománi sará kahré dawr dátagat o taw cha jaháná gár o gomsár butagatay.
EXO 9:16 Bale tará paméshká zendagá eshton ke wati zór o wáká tará pésh bedárán o sajjahén jaháná mani námay jár janag bebit.
EXO 9:17 Bale taw angat mani mahlukay dém dáshtag o rawagáesha naylay.
EXO 9:18 Bechár, bándá hamé wahdá man anchén trondén tróngalé gwárénán ke cha ed o pésh Mesrá hechbar nabutag, cha hamá wahdá beger ke Mesray bonpad ér kanag butag tán róche maróchigá.
EXO 9:19 Nun hokm day ke tai hamá mál o dalwat o é dega sajjahén chizz ke dhanná ant, áyán panáhén jágahé bebarant. Har mardom o dalwat ke dhanná but o panáh kanag nabut, é tróngal áiá laggant o á merit.”’”
EXO 9:20 Perawnay á hezmatkárán ke cha Hodáwanday habarán torset, hamá damáná wati golám o dalwatesh panáh kortant.
EXO 9:21 Bale hamáyán ke Hodáwanday habar mán nayáwortant, wati golám o dalwatesh dhanná eshtant.
EXO 9:22 Hodáwandá gón Mussáyá gwasht: “Wati dastá ásmánay némagá shahár day ke sajjahén Mesray molká tróngal begwárit, ensán o jánwar o Mesray dhagáráni har drachk o dáray sará.”
EXO 9:23 Mussáyá wati asá ásmánay némagá shahár dát o Hodáwandá grand o tróngal ráh dát o zeminá bir kapt. Hodáwandá Mesray molká tróngal gwárént.
EXO 9:24 Tróngalá gwart o tróngalay wahdá geróká pa damáné ham bass nakort. Anchó tróngal but ke Mesrá pésará hechbar nabutagat, cha hamá wahdá ke Mesr molké jórh butag.
EXO 9:25 Sajjahén Mesrá harché ke dhanná at, tróngalá jat o prósht, ensáná beger tán jánwará. Dhagáráni sajjahén keshár o drachki ham jat o próshtant.
EXO 9:26 Tahná Góshenay damagá tróngalá nagwart, hamódá ke Bani Esráil neshtagat.
EXO 9:27 Perawná Mussá o Hárun lótháént o gwashtant: “É bari man gonáh kortag. Hodáwand barhakk ent o man o mani mardom mayárbár én.
EXO 9:28 Hodáwanday kerrá dwá bekanét ke é baláhén grand o tróngalá márá kosht. Man shomárá rawagá kellán. Shomárá cha ed o géshter edá nadárán.”
EXO 9:29 Mussáyá gwasht: “Man anchó ke cha shahrá dara káyán, wati dastán Hodáwanday némagá chesta kanán. Granda óshtit o tróngalay gwárag banda bit ke taw bezánay ke donyá Hodáwandayg ent.
EXO 9:30 Bale mana zánán ke tará o tai hezmatkárán angat cha Hodáwandén Hodáyá natorsit.”
EXO 9:31 Kattán o jaway keshár tabáh butant, chéá ke jawá hóshag o kattáná poll jatagat.
EXO 9:32 Bale gandom o gallahay keshár tabáh nabutant ke esháni mósom randá kayt.
EXO 9:33 Mussá cha Perawnay kerrá shot o cha shahrá ke dar átk, dasti Hodáwanday némagá chest kortant. Grand o tróngal óshtátant o hawrá gwárag bass kort.
EXO 9:34 Wahdé Perawná dist ke hawr o tróngal o grand óshtátant, padá gonáhi bená kort. Perawn o áiay hezmatkárán wati del seng kort.
EXO 9:35 Perawnay del seng but. Esráilii rawagá naeshtant, hamá paymá ke Hodáwandá cha Mussáay zobáná gwashtagat.
EXO 10:1 Hodáwandá gón Mussáyá gwasht: “Perawnay kerrá beraw. Man Perawnay del o áiay hezmatkáráni del paméshká seng kortagant ke wati é neshánián áyáni démá záher bekanán o
EXO 10:2 shomá gón wati chokk o nomásagán kessah bekanét ke man chón Mesri layb dáshtant o áyáni nyámá wati nesháni záher kortant, tánke shomá bezánét ke man Hodáwand án.”
EXO 10:3 Mussá o Hárun Perawnay kerrá shotant o gwashtesh: “Hodáwand, Ebrániáni Hodá chosha gwashit: ‘Tán kadén gorunáka bay o mani démá óshtay o watá békebra nakanay? Mani mahluká bell ke rawt o maná parastesha kant.
EXO 10:4 Agan mani mahluká rawagá maylay, bechár, man bándá tai molká madagé mána réchán.
EXO 10:5 Madag sajjahén molká anchosha póshit ke kass zeminá dista nakant. Harché ke cha tróngalá pasht kaptag, madagesha wárt. Tai hamok drachk o dár ke zeminá rodit, áiá ham warant.
EXO 10:6 Madag tai o tai hezmatkár o sajjahén Mesriáni lógán anchó mána rechant ke shomay pet o pirokán nadistag, cha hamá wahdá beger ke á é zeminá butagant, tán é wahdá.’” Mussáyá posht mán dát o cha Perawnay kerrá shot.
EXO 10:7 Hezmatkárán gón Perawná gwasht: “Tán kadi é mard may gotthá lóp ent? Belli mardoma rawant o wati Hodáwandén Hodáay parasteshá kanant. Mesr tabáh ent, taw angat sarpada nabay?”
EXO 10:8 Mussá o Hárunesh padá Perawnay kerrá áwortant o Perawná gón áyán gwasht: “Berawét o wati Hodáwandén Hodáyá parastesh bekanét. Cha shomá kay kay rawt?”
EXO 10:9 Mussáyá gwasht: “Má gón wati warná o pirénána rawén. Gón wati mardénchokk o janénchokkán, gón wati pas o gókána rawén. Chéá ke márá pa Hodáwandá jashné geragi ent.”
EXO 10:10 Perawná gwasht: “Hodáwand allamá shomay posht o panáh butagat, agan man shomárá gón chokkán rawagá beshtén. Bechár, shomárá pakkáyá radén káré delá ent.
EXO 10:11 Enna, tahná shomá mardén berawét o Hodáwandá parastesh bekanét. Shomay lóth hamé butag.” Mussá o Hárunesh cha Perawnay kerrá galléntant.
EXO 10:12 Hodáwandá gón Mussáyá gwasht: “Wati dastá Mesray molkay sará shahár day ke madag Mesray sará orosh bekanant o molkay sajjahén drachk o dárán bwarant, harché ke cha tróngalá rakketag.”
EXO 10:13 Mussáyá wati asá Mesray molkay sará shahár dát. Cha Hodáwanday hokmá á sajjahén róchá o sajjahén shapá molká ródarátki gwátéá sar kort. Tán sohbá gwátá molk cha madagá porr kortagat.
EXO 10:14 Sajjahén Mesray molká madag kapt o sarjamén Mesrá mán retk. Madagay choshén sehr na pésará butag o na démterá bit.
EXO 10:15 Sarjamén zeminesh póshet o syáh syáh kort. Zeminay hamá sajjahén drachk o dár o drachkáni hamá sajjahén nibag ke cha tróngalá rakketagatant, madagán wártant. Sarjamén Mesrá hecch sabzén chizzé pasht nakapt, na drachké, na káhé.
EXO 10:16 Perawná damáná Mussá o Hárun gwánk jat o gwashtant: “Man shomay Hodáwandén Hodáay o shomay gonahkár án.
EXO 10:17 É yakkén randá mani gonáhá bebakshét o cha wati Hodáwandén Hodáyá dwá belóthét ke é malkamutá cha mani sará bethagalénit.”
EXO 10:18 Mussá cha Perawnay kerrá shot o cha Hodáwandá dwái lóthet.
EXO 10:19 Hodáwandá gwátay dém tarrént o sakkén trondén rónendi gwáté kort. Gwátá madag bort o Sohrzerá dawr dátant. Sajjahén Mesrá yakk dánagé madag ham pasht nakapt.
EXO 10:20 Bale Hodáwandá Perawnay del seng kort o áiá Esráili rawagá naeshtant.
EXO 10:21 Hodáwandá gón Mussáyá gwasht: “Wati dastá ásmánay némagá shahár day ke Mesray molká tahárié mán beshánit, anchén bazén tahárié ke chamm pa chammá gendag mabit.”
EXO 10:22 Mussáyá wati dast ásmánay némagá shahár dát o bazén taháriéá sajjahén Mesr tán say róchá mán póshet.
EXO 10:23 Tán say róchá kassá kass nadist o kass cha wati jágahá pád nayátk. Bale Esráiliáni sajjahén hankén rozhná atant.
EXO 10:24 Perawná Mussá lótháént o gwashti: “Berawét o Hodáwanday parasteshá bekanét. Bass shomay ramag o górom hamedá dáraga bant. Wati chokkán ham barét gón.”
EXO 10:25 Mussáyá gwasht: “Taw báyad ent márá helárig o sóchagi korbánigáni baragá ham bellay ke má pa wati Hodáwandén Hodáyá korbánigesh bekanén.
EXO 10:26 Báyad ent má wati mál o dalwatán ham bebarén gón. Yakk srombé ham pasht makapit, chéá ke má cha eshán lahtén pa wati Hodáwandén Hodáyá gechéna kanén o tánke má ódá sar mabén, nazánén kojámiá pa Hodáwandá korbánig bekanén.”
EXO 10:27 Hodáwandá Perawnay del seng kort o Perawn áyáni rawagá rázig nabut.
EXO 10:28 Perawná gón Mussáyá gwasht: “Thagal cha mani démá! Habardár. Dega baré mani démá nakapay. Mani démá kaptay, tai mark ent.”
EXO 10:29 Mussáyá gwasht: “Harché taw gwashay. Man dega baré tai démá nakapán.”
EXO 11:1 Hodáwandá gón Mussáyá gwasht: “Man Perawn o Mesray sará dega yakk kahré dawra dayán. Eshiá rand á shomárá cha edá rawagá kellit. Rawagay habará bell, shomárá sarjamiá cha edá gallénit.
EXO 11:2 Mahluká begwash ke harkas, har mardén o har janén wati hamsáhegay kerrá cha nograh o teláhá addh butagén sámán belóthit.”
EXO 11:3 Hodáwandá Mesriáni nezar pa wati mahluká nék kort. Mussáay jend ham Mesray molká Perawnay hezmatkár o mardománi chammán sakkén mazanén mardomé but.
EXO 11:4 Mussáyá gwasht: “Hodáwanda gwashit: ‘Man shapay némá dara káyán o sajjahén Mesrá gardán.
EXO 11:5 Bádsháhi tahtá neshtagén Perawnay awali chokká beger tán jenteray sará neshtagén móledéay awali chokká, Mesrá sajjahén awali mardenchokka merant. Sajjahén mál o dalwatáni awali narén chokk ham merant.
EXO 11:6 Sarjamén Mesrá anchén mazanén gréwag o zárié chesta bit ke na pésará butag o na démterá bit,
EXO 11:7 bale Bani Esráilay sará kochekké ham nawakkit, na mardoméay sará o na dalwatéay sará.’ Gorhá shomá zánét ke Hodáwand Esráil o Mesray nyámá park o péra kant.
EXO 11:8 Tai é sajjahén hezmatkár mane Mussáay kerrá káyant o kóndhána kapant o gwashant: ‘Dar á, tai jend gón hamá sajjahén mardomán ke tai randgir ant.’ Gorhá man cha é molká dara káyán o rawán.” Nun Mussá zahrá zahr cha Perawnay kerrá dar átk o shot.
EXO 11:9 Hodáwandá gón Mussáyá gwasht: “Perawn shomay habarán gósha nadárit. Paméshká Mesrá mane Hodáwanday mójezah géshtera bant.”
EXO 11:10 Mussá o Háruná Perawnay démá é sajjahén mójezah pésh dáshtant, bale Hodáwandá Perawnay del seng kort o Perawná Esráili cha wati molká rawagá naeshtant.
EXO 12:1 Hodáwandá Mesray molká gón Mussá o Háruná gwasht:
EXO 12:2 “É máh pa shomá bendáti máha bit, pa shomá sálay awali máha bit.
EXO 12:3 Esráilay sajjahén mahluká begwashét ke é máhay dahomi róchá har lóg o hándán pa wat pasé bezurit, har lóg yakk pasé.
EXO 12:4 Agan lógéay mardom anchó kamm bebant ke purahén pasé pa áyán báz bebit, gorhá á o áyáni nazzikterén hamsáheg hór bebant o yakk pasé bezurant. Mardomán hesáb kanét o bechárét ke yakk mardomé chinchoka wárt, o hamá andázahén pasé bezurét.
EXO 12:5 Shomay pas allamá béayb bebit, omrá yakk sálié bebit o naréné bebit. Gwarándhé zurét sharr o páchené zurét sharr.
EXO 12:6 Tán é máhay chárdahomi róchá bedáréti. Sajjahén Esráili mahluk magrebtahárá wati wati pasá helár bekant.
EXO 12:7 Mardom kammé hón bezurant o hamá lógá ke é góshtá warant, á lógay darwázagay chánthá, bezán darwázagay sarborá o kashán é hóná per bemoshant.
EXO 12:8 Á báyad ent hamá shapá góshtá ásá bepachant o gón béhomirén nagan o tahlén káhoká bwaranti.
EXO 12:9 É góshtá hámagá mawarét o ápgrádi ham makanét o mawaréti. Gón sarag o pádag o delig o lápigán ásá pachét o bwaréti.
EXO 12:10 Tán sohbá cha áiá hecch pasht makapit. Agan tán sohbá chizzé sar átk, ásá besóchéti.
EXO 12:11 Chó bwaréti: watá pa sapará tayár bekanét, swásán pádá kanét o asáyá dastá kanét o eshtáp eshtápá bwarét. É Hodáwanday Sargwaz ent.
EXO 12:12 Man hamé shapá Mesrá gardána bán o molkay sajjahén awali mardénchokkána janán. Ensánán beger tánke dalwatáni awali chokkána janán o Mesray sajjahén hodáyán sezá dayán. Man Hodáwand án.
EXO 12:13 Lógán per moshtagén é hón shomay neshánia bit ke edá shomá ét. Man é hónán ke gendán, cha shomá sara gwazán o wahdé Mesrá tabáhiay kahré dawra dayán, é kahr shomay sará nakapit.
EXO 12:14 É pa shomá yátgárén róché bebit. Shomá báyad ent é róchá Hodáwanday námá jashné bekanét. Nasláni nasl é jashná abadi parmánéay hesábá barjáh bedárét.
EXO 12:15 Hapt róchá béhomirén nagan bwarét. Harché homir ke shomay lógán hast, awali róchá dawresh bedayét. Chéá ke harkasá ke awali róchá beger tán haptomi róchá homiri chizzé wárt, á mardom cha Esráilay kawmá sendaga bit.
EXO 12:16 Awali róchá pákén diwáné bekanét o haptomi róchá ham. É doén róchán hecch kár makanét, bass pa waragá warák tayár kanét. Hamé yakkén kárá korta kanét.
EXO 12:17 Béhomirén Naganay Aidá barjáh bedárét, chéá ke hamé róchá man shomárá romb rombá cha Mesrá dar kort. Nasláni nasl é róchá abadi parmánéay hesábá barjáh bedárét.
EXO 12:18 Awali máhá, chárdahomi róchay bégáhá beger tán bist o yakkomi róchay bégáhá béhomirén nagan bwarét.
EXO 12:19 Tán hapt róchá shomay lógán homir mabit. Chéá ke harkasá ke homiri chizzé wárt, á mardom cha Esráilay mahluká sendaga bit, harkas bebit, darámadé yá molki mardomé.
EXO 12:20 Hecch homiri chizz mawarét. Wati sajjahén métagán béhomirén nagan bwarét.”
EXO 12:21 Mussáyá Esráilay sajjahén kamásh lótháéntant o gón áyán gwashti: “Berawét o pa wat, pa wati lógán pas bezurét. É pas Sargwazay korbánig ent, helári kanét.
EXO 12:22 Bandoké zupá bezurét, trashtay tahay hónáni bejanét o wati lógáni darwázagay chánthá, sarbor o doén kasháni dárán peri moshét, cha hamé hónán ke trashtay tahá ant. Tán sohbá cha shomá kass cha lógay darwázagá dhann dar mayayt.
EXO 12:23 Hodáwand pa Mesriáni janagá gardána bit, bale wahdé shomay chántháni saray hónána gendit, gorhá cha á darwázagá sara gwazit o tabáh kanóká shomay lógán poterag o shomay janagá naylit.
EXO 12:24 Shomá é rasmá tán abad barjáh bedárét, é pa shomá o shomay chokkán abadi parmáné.
EXO 12:25 Wahdé shomá hamá molká sara bét ke Hodáwand wati wádahay hesábá shomárá danti, ódá é rasmá barjáh bedárét.
EXO 12:26 Shomay chokk ke cha shomá josta kanant ke é chónén rasmé,
EXO 12:27 begwashét ke é pa Hodáwandá Sargwazay korbánigé, chéá ke Hodáwandá, Mesrá Esráiliáni lóg sargwaz kortant. Wahdé Hodáwandá Mesri jatant, may lógáni sará hayri kort.” Gorhá mardomán sar jahl kort o parasteshá laggetant.
EXO 12:28 Esráili shotant o hamá paymá ke Hodáwandá Mussá o Hárun hokm dátagatant, hamá paymá kortesh.
EXO 12:29 Hamá shapay némá Hodáwandá, Mesray molká sajjahén awali mardénchokk jatant. Sháhi tahtá neshtagén Perawnay awali chokká beger tán zendáná neshtagén bandigéay awali chokk, o mál o dalwatáni sajjahén awali narén chokk, sajjahén mortant.
EXO 12:30 Shapá Perawn o áiay sajjahén hezmatkár o sajjahén Mesri pád átkant. Mesrá mazanén gréwag o zárié chest at. Choshén lógé néstat ke ódá yakké namortagat.
EXO 12:31 Shapay shap Perawná Mussá o Hárun lótháéntant o gwashti: “Chest bét o cha mani molk o mardomán dur bét, shomay jend o sajjahén Esráili. Berawét o Hodáwandá parastesh kanét, hamá paymá ke shomá lóthetag.
EXO 12:32 Wati ramag o góromán ham barét gón, hamá paymá ke shomá wat gwashtag. Pa man ham barkat belóthét.”
EXO 12:33 Mesrián Esráili hojj kort o gwashtant ke shomá cha may molká zutt dar áét ke má sajjahéna merén.
EXO 12:34 Mardomán tarr kortagén béhomirén árt, cha gwát geragá pésar gón darpán zort o wati chaderán kort o baddhá jatant.
EXO 12:35 Esráilián hamá paymá kortagat ke Mussáyá gwashtagatant. Áyán Mesriáni kerrá god o cha nograh o teláhá addh butagén sámán lóthetagat.
EXO 12:36 Hodáwandá ham Mesriáni nezar pa Esráilián nék kortagat. Paméshká áyán harché lóthetagat, Mesrián dátagat. É paymá Mesriáni dawlatesh bort.
EXO 12:37 Esráili cha Ramesésá dém pa Sokkutá sar geptant. Janén o chokkán abéd, á kesás shash sad hazár payádagén mardén atant.
EXO 12:38 Hór o hawárén mardománi baláhén rombé ham gón áyán shot gón. Esráilián báz ramag o górom, sakk báz mál o dalwat gón at.
EXO 12:39 Hamá tarr kortagén árt ke cha Mesrá gón atantesh, cha áyán béhomirén kólokesh patk. Mardom cha Mesrá gallénag butagatant, paméshká chánag béhomir atant. Áyán natwánt mahtal bebant o pa wati tóshagá warák addh bekanant.
EXO 12:40 Esráilián chár sad o si sál Mesrá gwázéntagat.
EXO 12:41 É chár sad o sién sáláni godhsará, goddhi róchay jendá, Hodáwanday sajjahén mahluk romb rombá cha Mesrá dar átk.
EXO 12:42 É sajjahén shapá Hodáwandá áyáni negahpáni kort ke áyán cha Mesrá dar bekant, paméshká é shap pa Esráilián Hodáwanday námá shappásié o báyad ent sajjahén Esráili é shappásiá nasláni nasl barjáh bedárant.
EXO 12:43 Hodáwandá gón Mussá o Háruná gwasht: “Esh ent Sargwazay waragay parmán: hecch dhanni mardom eshiá mawárt,
EXO 12:44 zarharidén golám wártia kant bale cha sonnat bayagá rand.
EXO 12:45 Hamá mardom ke pa gwandhén moddatéá átkag o neshtag, á ham mawárt o hamá nawkar ham mawárt ke pa zarr shomay kerrá kárá ent.
EXO 12:46 Yakkén lógay tahá bebét o bwaréti. Cha Sargwazay góshtá toshé dhanná mabarét o pasay yakk haddhé ham mapróshét.
EXO 12:47 Sargwazay róchá Esráilay sajjahén mahluk aid bekant.
EXO 12:48 Agan shomay nyámá dhanni mardomé neshtag o Sargwazay róchá Hodáwanday námá aid kanaga lóthit, áiay lógay sajjahén mardén pésará sonnat kanag bebant. Gorhá á mardom bahr zorta kant o molki mardománi paymá bit. Bale hecch sonnat nakortagén mardén eshiá mawárt.
EXO 12:49 Eshiay kánun yakk ent, pa molki mardomán o pa hamá dhanni mardomán ke shomay nyámá neshtagant.”
EXO 12:50 Hamá paymá ke Hodáwandá Mussá o Hárun hokm dátagatant, sajjahén Esráilián hamá paymá kort.
EXO 12:51 Hamá róchay jendá Hodáwandá Esráili, romb rombá cha Mesrá dar kortant.
EXO 13:1 Hodáwandá gón Mussáyá gwasht:
EXO 13:2 “Sajjahén awali mardénchokkán gisshén o pa man wapk bekan. Esráilay sajjahén awali chokk manig ant, ensánáni chokk bebant yá dalwatáni.”
EXO 13:3 Mussáyá gón mardomán gwasht: “É róchá mashamóshét ke shomá hamé róchá cha Mesrá dar átkagét, cha hamá molká ke ódá golám butagét o Hodáwandá gón wati dastay zórá shomárá cha ódá dar kortag o áwortag. Homiri nagan mawarét.
EXO 13:4 Shomá maróchigén róchá, Abibay máhá cha edá dara kapét.
EXO 13:5 Wahdé Hodáwand shomárá Kanháni o Hitti o Amuri o Héwi o Yabusiáni molká bárt, hamá molká ke gón shomay pet o pirokán sawgendi wártag ke shomárá danti, hamá molká ke ódá shir o bénagay jó tachagá ant, ódá é rasmá hamé máhá barjáh bedárét.
EXO 13:6 Tán hapt róchá béhomirén nagan bwarét o haptomi róchá Hodáwanday námá aidé bekanét.
EXO 13:7 Tán hapt róchá béhomirén nagan bwarét. Shomay kerrá o shomay hadd o simsaráni tahá hecch homir dast makapit.
EXO 13:8 É aidá ke kanét, harkas gón wati chokká begwashit: ‘Cha Mesrá dar kapagay wahdá Hodáwandá pa man hamá kár ke kort, man hamá káray háterá é aidá kanán.’
EXO 13:9 Wati dastá nesháné o péshánigá yátgéjé per kan ke Hodáwanday Sharyat tai dapá bebit. Chéá ke Hodáwandá gón wati porzórén dastá tará cha Mesrá dar kort.
EXO 13:10 É parmáná sál pa sál barjáh bedár, eshiay gisshéntagén wahdá.
EXO 13:11 Wahdé Hodáwand shomárá Kanhániáni molká bárt o hamá paymá ke gón shomá o shomay bonpirokán sawgendi wártag, á molká shomárá dant,
EXO 13:12 ódá wati awali mardénchokkán gisshénét o pa Hodáwandá wapk kanét. Shomay mál o dalwatáni sajjahén awali narén chokk ham Hodáwanday bebant.
EXO 13:13 Haray awali korragay badalá gwarándhé bekosh o korragá bemók, bale agan namókayi, gorhá korragay gardená beprósh. Ensánáni sajjahén awali mardénchokkán allam bemók.
EXO 13:14 Agan bándá tai chokká cha taw jost kort: ‘É kárá chéá kanagá ay?’ taw begwash: ‘Hodáwandá gón wati dastay zórá márá cha Mesrá dar kort o áwort, cha hamá molká ke ódá má golám atén.
EXO 13:15 Wahdé Perawná zedd kort o márá rawagá naesht, Hodáwandá Mesray molká sajjahén awali chokk koshtant, cha ensánay awali mardénchokkán beger tán dalwatáni awali narén chokkán, sajjahéni koshtant. Paméshká man har dalwatay awali narén chokká pa Hodáwandá korbániga kanán o wati lógay sajjahén awali mardénchokkána mókán.’
EXO 13:16 É parmáná wati dastá nesháné o péshánigá thekké kan o per kan chéá ke Hodáwandá gón wati porzórén dastá tará cha Mesrá dar kort o áwort.”
EXO 13:17 Wahdé Perawná mahluk rawagá esht, Hodáyá á cha Pilestiáni molkay ráhá nabortant, bell toré á ráh gwandhter at, chéá ke Hodáyá gwasht: “Balkén jangé begiptesh o bebajjant o Mesrá per betarrant.”
EXO 13:18 Hodáyá mahluk cha gyábánay ráhá gardénán kort o dém pa Sohrzerá bort. Esráili ke cha Mesrá dar átkant, selahband atant.
EXO 13:19 Mussáyá Issopay haddh gón wat zortant gón, chéá ke Issopá Bani Esráil sawgend dátag o gwashtagat: “Béshakk Hodáwand shomay madatá kayt. Á wahdá mani haddhán allam cha edá gón wat bebarét gón.”
EXO 13:20 Á cha Sokkutá ráh geptant o Étámá, gyábánay goddhi sará ordesh kort.
EXO 13:21 Hodáwand róchay wahdá jambaray menokéay tahá áyáni démá rawán at ke ráhá pésh bedárit. Shapay wahdá ásay menokéay tahá áyáni démá rawán at ke áyán rozhn bedant o á shapá ham sapar kort bekanant o róchá ham.
EXO 13:22 Róchay wahdá jambaray menok o shapay wahdá ásay menok, doén cha mahlukay démá dura nabutant.
EXO 14:1 Hodáwandá gón Mussáyá gwasht:
EXO 14:2 “Esráilián begwash per tarrét o Megdol o daryáay darnyámá, Pi-Háherótay nazzikká ord kanét. Bahal-Sepunay démá, tayábdapá ord kanét.
EXO 14:3 Perawn wati delá gwashit: ‘Esráili gyábáná sargardán ant. Har némagá ke berawant ráhé dar gétka nakanant.’
EXO 14:4 Man, Perawnay delá senga kanán o á Esráiliáni randá kapit. Perawn o áiay sajjahén pawj mani shán o shawkatay sawabsáza bant. Gorhá Mesria zánant ke man Hodáwand án.” Esráilián hamódá ord kort ke Hodáwandá gwashtagat.
EXO 14:5 Perawn sahig but ke é mahluk tatkag. Esháni bárawá Perawn o áiay hezmatkáráni erádah badal but, gwashtesh: “Má chéá choshén káré kort? Esráili may hezmatá kanagá atant, má chéá rawagá eshtant?”
EXO 14:6 Perawná wati arrábah tayár kanáént o gón wati pawjá ráh gept.
EXO 14:7 Áiá shash sad gechéni arrábah o Mesray á dega arrábah ham zortant gón. Har yakkéá apsaré mán at.
EXO 14:8 Hodáwandá Mesray bádsháh Perawnay del seng kort o Perawn Esráiliáni randá kapt ke pa sarbolandi dar áyag o rawagá atant.
EXO 14:9 Mesri Esráiliáni randá kaptant. Perawnay sajjahén asp o arrábah o arrábaswár o payádagén lashkará Pi-Háherótay nazzikká, tayábdapá, Bahal-Sepunay démá Esráili raséntant, hamá jágahá ke Esráilián ord kortagat.
EXO 14:10 Wahdé Perawn áyáni nazzikká raset, Esráilián chamm chest kortant o Mesriesh distant ke áyáni randá kaptagatant. Esráilián sakk torset o Hodáwanday kerrá peryátesh kort.
EXO 14:11 Gón Mussáyá gwashtesh: “Záná Mesrá kabr néstat ke taw márá pa meragá é gyábáná áwortag? É che káré ke taw gón má kort? Taw chéá márá cha Mesrá dar kort?
EXO 14:12 Má Mesrá tará nagwasht: ‘Márá yalah kan o bell ke Mesriáni golámiá kanén?’ Cha é gyábáná meragá pa má Mesriáni golámi sharter at.”
EXO 14:13 Mussáyá gón mardomán gwasht: “Matorsét. Delá dhaddh kanét o bechárét ke maróchi Hodáwand shomárá chón nejáta dant, chéá ke é Mesrián ke shomá maróchi gendagá ét, padá eshán hechbara nagendét.
EXO 14:14 Hodáwand wat pa shomá janga kant, shomá bass árámá benendét.”
EXO 14:15 Hodáwandá gón Mussáyá gwasht: “Taw chéá mani kerrá peryát kanagá ay? Esráilián begwash démá rawán bebét.
EXO 14:16 Taw wati asáyá chest kan o dastá daryáay sará shahár day o daryáyá do bahr kan ke Esráili cha daryáay tahá, hoshkiay sará begwazant.
EXO 14:17 Man Mesriáni delán senga kanán ke Esráiliáni randá bekapant o Perawn o áiay sajjahén pawj o arrábah o arrábaswár mani shán o shawkatay sawabsáz bebant.
EXO 14:18 Wahdé Perawn o áiay arrábah o arrábaswáráni sawabá maná shán o shawkata rasit, gorhá Mesria zánant ke man Hodáwand án.”
EXO 14:19 Hodáay préshtag ke Esráili lashkaray démá rawán at, kenzet o áyáni poshtá shot. Jambaray menok ham cha áyáni démá kenzet o áyáni poshtá óshtát.
EXO 14:20 Jambaray menok Mesray lashkar o Esráilay lashkaray nyámá óshtát. Jambará yakk némagé tahár o domi némag rozhná kort. Sajjahén shapá lashkar yakdomiay nazzikká nayátkant.
EXO 14:21 Mussáyá wati dast daryáay sará shahár dát o cha Hodáwanday zórá sajjahén shapá cha ródarátká trondén gwátéá kasshet o daryá poshtá kenzént. Áp do bahr but o hoshki záher but.
EXO 14:22 Esráili daryáay tahá cha hamé hoshkiá rawán butant. Áp áyáni rást o chappén némagá chó diwálá óshtátagat.
EXO 14:23 Mesri gón Perawnay sajjahén asp o arrábah o arrábaswárán tán daryáay nyámá áyáni randá kaptant.
EXO 14:24 Shapay cháromi pásá Hodáwandá cha ás o jambaray menokay tahá Mesray pawj cháret o sarbatag o sargardán kort.
EXO 14:25 Hodáwandá áyáni arrabaháni parrag gatthéntant ke arrabaháni barag pa áyán grán bebit. Mesrián gwasht: “Byáét cha Esráiliána tachén ke Hodáwand pa áyánigi gón Mesrá jangá ent.”
EXO 14:26 Hodáwandá gón Mussáyá gwasht: “Wati dastá daryáay sará shahár day ke áp Mesri o áyáni arrábah o arrábaswáráni sará per beléthit.”
EXO 14:27 Mussáyá wati dast daryáay sará shahár dát o cha bámgwáhá pésar, hamá wahdá ke Mesri cha ápá tachagá atant, daryá wati jágahá átk. É paymá Hodáwandá Mesri daryáyá chagal dátant.
EXO 14:28 Wahdé Perawnay sajjahén pawjay arrábah o arrábaswár Esráiliáni randá kaptant o daryáyá mánesh dát, áp per tarret o ái bokkéntant. Cha áyán yakké ham sar nayátk.
EXO 14:29 Esráili daryáay tahá, cha hoshk butagén ráhá gwastant o áp áyáni rást o chappén némagá chó diwálá óshtátagat.
EXO 14:30 É paymá Hodáwandá á róchi Esráil cha Mesriáni dastá rakként o Esráilián dist ke Mesriáni jón o jasad tayábdapá kaptagant.
EXO 14:31 Wahdé Esráilián Hodáwanday zórmandén dast dist ke Mesriáni helápá chesti kortagat, cha Hodáwandá torsetesh o Hodáwanday jend o Hodáwanday hezmatkár Mussáay sará báwaresh kort.
EXO 15:1 Gorhá Mussá o Esráilián pa Hodáwandá é názénk jat: “Man Hodáwandá názénán, chéá ke Hodáwand pa shán o shawkat sóbén but. Áiá asp o aspswár daryáyá chagal dátant.
EXO 15:2 Hodáwand mani zór o wák o mani názénk ent. Hodáwand pa man nejáté but. Mani Hodá ent, mana názénáni. Mani petay Hodá ent o man áiá satá o saná kanán.
EXO 15:3 Hodáwand jang kanóké, námi Yahweh ent.
EXO 15:4 Perawnay arrábah o lashkari daryáyá chagal dátant, Perawnay sharterén apsar Sohrzerá bokketant.
EXO 15:5 Johlén ápán andém kortant, á chó sengá johlánkiá ér bokketant.
EXO 15:6 Oo Hodáwand! Tai rástén dast ajab zórmand at. Oo Hodáwand! Tai rástén dastá dozhmen shengént.
EXO 15:7 Taw cha wati mazanshániá dozhmen sarshakun kortant. Taw wati hezhm ráh dát o tai hezhmay ásá dozhmen chó palárá wártant.
EXO 15:8 Cha tai pónzay damá áp sar pa sar but, tachókén áp chó diwálá mohr óshtátant. Johlén áp daryáay gobbá badetant.
EXO 15:9 Dozhmená gwasht: ‘Man esháni randá kapán o rasénánesh, máláni áwárá bahra kanán o wati arwáhá sérápa kanán. Zahmá kasshán o mani dastesh tabáha kant.’
EXO 15:10 Bale taw hopp kort o daryáyá á póshetant. Á chó sropá johlén ápán ér bokketant.
EXO 15:11 Oo Hodáwand! Hodáyáni nyámá kay tai paymá ent? Kay tai paymá pákiá mazanshán ent? Tai porshánén kár satá karzant o taw hayrán kanókén kára kanay.
EXO 15:12 Taw wati rástén dast shahár dát o zeminá dozhmen ér bortant.
EXO 15:13 Taw pa mehr wati móketagén mahlukay rahbari kort o gón wati zór o wáká dém pa wati pákén bárgáhá áyáni rahshóni kort.
EXO 15:14 Kawma eshkonant o larzant. Bimmé Pilestiáay jahmenendáni delá kapit.
EXO 15:15 Edumay sardára torsant. Muábay zóráwaráni jáná drahagé kapit o Kanhánay sajjahén jahmenend deltrakka bant.
EXO 15:16 Bimm o dahshaté delá kapitesh. Cha tai báskay zórmandiá á seng o syáha bant, tán hamá wahdá ke tai mahluk begwazit, oo Hodáwand, tán hamá wahdá ke tai móketagén mahluk begwazit.
EXO 15:17 Oo Hodáwand, Taw wati mahluká molká káray o wati mirásay kóhay sará nádénay, hamá jágahá ke taw pa wati nendagá addh kortag, hamá pákén jágah ke tai dastán tayár kortag, oo Hodáwand!
EXO 15:18 Hodáwand abad tán abad hákemia kant.”
EXO 15:19 Wahdé Perawnay asp o arrábah o aspswárán daryáyá mán dát, Hodáwandá daryáay áp áyáni sará per gardént, bale Esráili daryáay tahá, cha hoshk butagén ráhá gwastant.
EXO 15:20 Paygambarén Maryam ke Hárunay gohár at, áiá kanjarié zort o pád átk. Sajjahén janén kanjari janán o nách kanáná pád átkant gón.
EXO 15:21 Maryamá pa áyán názénk jat: “Hodáwandá benázénét, chéá ke Hodáwand pa shán o shawkat sóbén but. Áiá asp o aspswár daryáyá chagal dátant.”
EXO 15:22 Gorhá Mussáyá Esráiliáni rahshóni kort. Á cha Sohrzeray tayábá pád átk o Shuray gyábáná shotant. Tán say róchá gyábáná saparesh kort bale hecch ápesh nadist.
EXO 15:23 Wahdé Márahá sar butant, Márahay ápesh wárt nakort ke sór at. Paméshká á jágahay nám Márah but.
EXO 15:24 Mahluká Mussáay sará norondhet o gwasht: “Ché bwarén?”
EXO 15:25 Mussáyá Hodáwanday kerrá peryát kort o Hodáwandá Mussá dári thokkoré pésh dásht. Mussáyá dár ápá dawr dát o áp shirken but. Ódá Hodáwandá pa mahluká hokm o parmáné gisshént o mahluki chakkáset.
EXO 15:26 Hodáwandá gwasht: “Agan taw pa delgósh wati Hodáwandén Hodáay tawárá gósh bedáray o hamá kárán bekanay ke áiay chammán sharr ant, agan áiay hokmán delgósh bekanay o áiay sajjahén parmánán bemannay, hecch choshén nádráhié tai sará nayárán ke man Mesriáni sará áwort, chéá ke mane Hodáwand tai dráh kanók án.”
EXO 15:27 Á Élimá átkant. Élimá ápay dwázdah chammag o haptád bon macch hastat. Ódá ápay kerrá ordesh kort.
EXO 16:1 Sajjahén Esráili mahluk cha Élimá rahádag but. Cha Mesrá dar kapagá rand, domi máhay pánzdahomi róchá Sinay gyábáná sar butant. Sin, Élim o Sináay nyámá ent.
EXO 16:2 Gyábáná, Esráilay sajjahén mahluk Mussá o Hárunay sará norondhagá lagget.
EXO 16:3 Esráilián gwasht: “Drégatá má Mesrá Hodáwanday dastá bemorténén. Ódá wa má góshtay dégáni kerrá neshtagatén o delay sérá nána wárt. Bale shomá márá é gyábáná áwort ke é sajjahén mahluká cha shodá bekoshét.”
EXO 16:4 Hodáwandá gón Mussáyá gwasht: “Bechár, man cha ásmáná pa shomá nagana gwárénán. Mahluk har róch dhanná dar byayt o wati hamá róchay kesásá nagan mocch bekant o bezurit. É paymá áyána chakkásán ke bárén mani Sharyatay ráhá rawant yá na.
EXO 16:5 Wati shashomi róchay naganán ke kárant o tayára kanant, báyad ent cha pésari har yakk róchéay naganán do sari bebant.”
EXO 16:6 Mussá o Háruná gón sajjahén Esráilián gwasht: “Maróchi bégáhá shomá zánét ke cha Mesrá shomay dar kanók Hodáwand at o
EXO 16:7 bándá sohbá shomá Hodáwanday shán o shawkatá gendét. Chéá ke shomá Hodáwanday sará norondhetag o áiá eshkotagant. Má ché én ke shomá may sará benorondhét?”
EXO 16:8 Mussáyá gwasht: “Hodáwand shomárá pa waragá bégáhá gósht o sohbá nagana dant, lápay sérá, chéá ke Hodáwandá shomay hamá norondhag eshkotagant ke shomá áiay sará kortagant. Má ché én? Shomá may sará norondhagá naét, Hodáwanday sará norondhagá ét.”
EXO 16:9 Mussáyá gón Háruná gwasht: “Sajjahén Esráili mahluká begwash: ‘Hodáwanday bárgáhá byáét. Chéá ke shomay norondhagi eshkotagant.’”
EXO 16:10 Chó but ke wahdé Hárun gón sajjahén Esráili mahluká habará at, áyán gyábánay némagá cháret o Hodáwanday shán o shawkatesh dist ke jambaray tahá záher at.
EXO 16:11 Hodáwandá gón Mussáyá gwasht:
EXO 16:12 “Man Esráiliáni norondhag eshkotagant. Áyán begwash: ‘Bégáhá gósht o sohbá nagana warét, lápay sérá. Gorhá shomá zánét ke man Hodáwand án, shomay Hodá.’”
EXO 16:13 Chó but ke bégáhá nekólén morg átkant o ordgáhesh sarpósh kort o sohbá nóday láé sajjahén ordgáhay chapp o chágerdá ér nesht.
EXO 16:14 Wahdé nóday lá gár but, zeminá názorkén kochalay paymén chizzé dará but, barpay pozzhokay paymén.
EXO 16:15 Wahdé Esráilián dist, gón yakdegará gwashtesh: “É chéé?” Chéá ke áyán nazánt é chéé. Mussáyá gwasht: “É hamá nagan ent ke Hodáwandá shomárá pa waragá dátag.
EXO 16:16 Hodáwanday dátagén hokm esh ent: ‘Haminchok ke warét, haminchok bezurét. Pa wati gedánay har mardoméá yakk oméréay kesásá bezurét.’”
EXO 16:17 Esráilián nagan zort, bale lahténá géshter zort o lahténá kamter.
EXO 16:18 Wahdé oméray hesábá kaylesh kortant, distesh ke á kasá ke gésh zortag, warák pa áiá géshén naant o á kasá ke kamm zortag, pa áiá kamm naant. Harkasá wati lápay kesásá zortagat.
EXO 16:19 Mussáyá gón áyán gwasht: “Kass tán sohbá cha é warákán hecch ér makant.”
EXO 16:20 Bale lahténá Mussáay habar gósh nadásht. Áyán cha é warákán chizzé tán sohbá wati kerrá ér kort, bale é warák kerm kapt o bó kanagá laggetant. Gorhá Mussá áyáni sará zahr gept.
EXO 16:21 Har sohb mardomán wati lápay kesásá zort, róch ke tronda but, pasht kaptagén kochal ápa butant.
EXO 16:22 Har shashomi róchá áyán do sari waráka zort, bezán pa har mardoméá do omér. Mahlukay sajjahén sarók Mussáay kerrá átkant o Mussáesh hál dát.
EXO 16:23 Mussáyá gón áyán gwasht: “Hodáwandá chó gwashtag: ‘Bándá Shabbatay róch ent, Hodáwanday gisshéntagén pákén róch ent, pa árám kanagá. Shomárá harché ke pachagi ent, maróchi bepachét o harché ke lahrh dayagi ent, maróchi lahrh dayét. Harché ke sara kayt, pa bándátigén róchá éresh kanét.’”
EXO 16:24 Hamá paymá ke Mussáyá gwashtagat, mardomán sar átkagén warák pa bándátigén róchá éra kortant. É warákán na bóa kort o na kerma kaptant.
EXO 16:25 Mussáyá gwasht: “Maróchi eshán bwarét chéá ke maróchigén róch pa Hodáwandá Shabbaté. Maróchi é warák zeminá ér áraga nabit.
EXO 16:26 Shash róchá mocch kanét o bezurét, bale haptomi róchá, bezán Shabbatay róchá hecch nést.”
EXO 16:27 Haptomi róchá lahtén mardom dar átk ke rawén o nagan moccha kanén, bale hecchesh nadist.
EXO 16:28 Hodáwandá gón Mussáyá gwasht: “Tán kadéná sará tába dayét o mani hokm o sar o sójána nazurét?
EXO 16:29 Bechárét, mane Hodáwandá shomárá Shabbatay róch bakshátag. Paméshká shashomi róchá shomárá do róchay naganá dayán. Haptomi róchá shomá har jágahá ét, hamódá bebét. Haptomi róchá kass cha wati jágahá dar mayayt.”
EXO 16:30 Gorhá mahluká haptomi róchá árám kort.
EXO 16:31 Esráilián é naganay nám “mann” kort. É gehnichay tohmay paymén atant, espétchak atant o támesh chó bénagi naganá at.
EXO 16:32 Mussáyá gwasht: “Hodáwanday hokm esh ent: ‘Yakk purahén oméré mann pa wati áyókén nasl o padréchán ér kanét, ke á hamá naganá begendant ke man gyábáná shomárá wárént, hamá wahdá ke man shomárá cha Mesrá dar kort o áwort.’”
EXO 16:33 Mussáyá gón Háruná gwasht: “Darpé bezur o yakk oméré manni mán kan o Hodáwanday bárgáhá éri kan ke pa shomay áyókén nasl o padréchán ér bebit.”
EXO 16:34 Hamá paymá ke Hodáwandá Mussá hokm dátagat, Háruná é darp sháhediay wánekáni démá ér kort ke paházag bebit.
EXO 16:35 Esráilián tán chell sálá manna wárt, bezán tán hamá wahdá ke ábádén molkéá sar butant. Tán hamá wahdá ke Kanhánay simsará rasetant, mannesha wárt.
EXO 16:36 Yakk oméré épahay dahyakk ent.
EXO 17:1 Hamá paymá ke Hodáwandá hokm dátagat, sajjahén Esráili mahluk cha Sinay gyábáná rahádag but o dárán o rawáná shot o Repidimá ordi kort, bale ódá áp néstat ke mardom bwarant.
EXO 17:2 Mardom gón Mussáyá arhetant, gwashtesh: “Márá áp beday ke bwarén.” Mussáyá gwasht: “Chéá gón man arhagá ét? Chéá Hodáwandá chakkásét?”
EXO 17:3 Bale mardom ódá tonnig atant, áyán Mussáay sará norondhet o gwasht: “Taw chéá márá cha Mesrá dar kort o áwort? Ke márá o may chokkán o mál o dalwatán cha tonná bekoshay?”
EXO 17:4 Mussáyá Hodáwanday kerrá peryát kort o gwasht: “É mahluká chón bekanán? É wa pa mani sengsár kanagá óshtátagant.”
EXO 17:5 Hodáwandá gón Mussáyá gwasht: “Esráilay lahtén kamásh hamráh kan o cha mahlukay démá gwazán kan. Hamá asá ke taw gón áiá Nillay kawr jat, áiá dastá kan o beraw.
EXO 17:6 Bechár, ódá Horébá tai démá man taláréay sará óshtán. Gón asáyá talárá bejan, pa mahluká waragi áp dara kayt.” Gorhá Mussáyá Esráilay kamásháni chammáni démá anchosh kort.
EXO 17:7 Áiá á jágahay nám Massah o Meribah kort, chéá ke ódá Esráili arhetant o Hodáwandesh ham chakkáset o gwashtesh: “Bárén Hodáwand gón má gón ent yá na?”
EXO 17:8 Amáliki átkant o Repidimá gón Esráilián jangesh kort.
EXO 17:9 Mussáyá gón Yusháyá gwasht: “Lahtén mard gechén kan o beraw, gón Amálikián jang kan. Bándá man Hodáay asáyá dastá kanán o jompay sará óshtán.”
EXO 17:10 Yusháyá hamá paymá kort ke Mussáyá gwashtagat o gón Amálikián jangi kort. Mussá o Hárun o Ahur jompá sar kaptant.
EXO 17:11 Har wahdá ke Mussáyá dast chesta kortant, Esráili báládasta butant o har wahdá ke wati dasti jahla kortant, Amáliki báládasta butant.
EXO 17:12 Mussáay dastán dam bort. Hárun o Ahurá sengé áwort o áiay chérá dát. Mussá sengay sará nesht. Áyán Mussáay dast gept o borz dáshtant, yakkéá rástén dast o domiá chappén dast. É paymá Mussáay dast tán rónenday wahdá jahl nakaptant o
EXO 17:13 Yusháyá Amáliki pawj pa zahm prósh dát.
EXO 17:14 Hodáwandá gón Mussáyá gwasht: “É kessahá ketábéá nebeshtah kan ke shamóshag mabit. É kessahá Yusháay kerrá byár. Chéá ke man Amálikay nám o nesháná cha jaháná sarjamiá gára kanán.”
EXO 17:15 Mussáyá korbánjáhé addh kort o áiay námi kort “Hodáwand mani bayrak ent”.
EXO 17:16 Gwashti: “Maná Hodáwanday bádsháhi tahtay sawgend ent ke Hodáwand nasláni nasl gón Amálikián janga kant.”
EXO 18:1 Midyánay dini péshwá Yatrun ke Mussáay janay pet at, hamá sajjahén káráni bárawá sahig but ke Hodáyá pa Mussá o áiay mahluk Esráilá kortagatant, bezán Hodáwandá chón Esráili cha Mesrá dar kort o áwortant.
EXO 18:2 Mussáyá wati jan Sapurah petay lógá ráh dátagat. Nun Yatruná Mussáay jan o áiay doén mardénchokk zortant o ráh gept. Yakk chokkéay nám Gayrshám at, chéá ke Mussáyá gwashtagat ke man darmolká darámadé án.
EXO 18:4 Domi chokkay nám Élizer at, chéá ke Mussáyá gwashtagat ke mani petay Hodá mani madatkár butag o maná cha Perawnay zahmá rakkéntagi.
EXO 18:5 Mussáay nákó Yatrun gón Mussáay jan o chokkán gyábáná, Hodáay kóhá shot, hamódá ke Mussáyá ord kortagat.
EXO 18:6 Yatruná pa Mussáyá paygám ráh dát: “Mane Yatrun tai nákó, tai jan o doén chokkáni hamráhiá tai kerrá pédák án.”
EXO 18:7 Mussá pa wati nákóay péshwáziá dar átk, pa adab sari jahl kort o nákói chokket. Yakdomiay hálporsiesh kort o gedáná potertant.
EXO 18:8 Hodáwandá Esráiliáni háterá gón Perawn o Mesrián harché ke kortagat, Mussáyá á sajjahén habar gón wati nákóá kortant. Ráhay sajjahén sakki o sóriáni bárawá ham habari kort o gwashti ke Hodáwandá chón márá rakkéntag.
EXO 18:9 Yatrun á sajjahén sharrén káráni sará gal but ke Hodáwandá pa Esráilián hamá wahdá kortagatant ke Esráilii cha Mesrián rakkéntant.
EXO 18:10 Yatruná gwasht: “Hodáwandá satá bát ke shomárá cha Perawn o Mesriáni dastá rakkéntagi o kawmi cha Mesriáni zolmá neját dátag.
EXO 18:11 Nun mana zánán ke Hodáwand cha á dega sajjahén Hodáyán master ent. Chéá ke wati mahluki cha gorunákén Mesriáni zolm o zórákián rakként.”
EXO 18:12 Mussáay nákó Yatruná pa Hodáyá sóchagi o dega korbánig pésh kort. Hárun o Esráilay sajjahén kamásh átkant ke Hodáay bárgáhá gón Mussáay nákóá nán bwarant.
EXO 18:13 Chó but ke domi róchá Mussá pa mahlukay dádrasiá nesht. Mardom sohbá tán bégáhá áiay chapp o chágerdá óshtátagatant.
EXO 18:14 Mussá pa mahluká harché ke kanagá at, nákóá dist. Gwashti: “É che káré ke taw pa mahluká kanagá ay? Tahná taw chéá neshtagay o dádrasi kanagá ay o é dega sajjahén mardom sohbá tán bégáhá tai chapp o chágerdá óshtátagant?”
EXO 18:15 Mussáyá gón wati nákóá gwasht: “É wástá ke mardom Hodáay razáay shóházá mani kerrá káyant.
EXO 18:16 Wahdé jérhahé bitesh, é mani kerrá káyant o man doén némagay mardománi paysalahá kanán o Hodáay parmán o sar o sójánesh sara kanán.”
EXO 18:17 Mussáay nákóá gwasht: “Taw sharrén káré kanagá naay.
EXO 18:18 Shomá dama barét, tai jend o é mahluk ke tai hamráh ent, shomá sajjahén dama barét. É kár pa taw sakk grán ent. Taw é kárá tahná korta nakanay.
EXO 18:19 Nun mani habará gósh dár, tará sójé dayán. Hodá gón taw gón bát. Taw Hodáay démá mahlukay nomáendah bay o esháni jerhahán Hodáay kerrá bebar.
EXO 18:20 Hodáay hokm o parmánán eshán sar kan o hamá ráhánesh pésh dár ke é berawant o hamá káránesh sój day ke é bekanant.
EXO 18:21 Cha sajjahén mahlukay nyámá budnákén mardom gechén kan, hamá ke Hodátors o porehtebár ant o cha nárawáén páedagá naprata kanant. Mahluká hazár hazár, sad sad, panjáh panjáh o dah dahá bahr kan o cha é mardomán har yakké, yakk thóliéay master kan.
EXO 18:22 É mardom modám mahlukay dádrasiá bekanant. Mazanén jerhahán tai kerrá byárant, bale kasánén jérhaháni dádrasiá wat bekanant. É paymá tai bár sobaktera bit o á tai hamkópaga bant.
EXO 18:23 Agan Hodá tará beparmáit o taw anchó bekanay, gorhá é bárá zorta kanay o sajjahén mardom pa salámati o émeni wati lógána rawant.”
EXO 18:24 Mussáyá wati nákóay habar gósh dáshtant o har káré ke nákóá gwashtagat, korti.
EXO 18:25 Cha sajjahén Esráilá budnákén mardomi gechén kort o mahlukay sar o master kortant ke hazár hazár, sad sad, panjáh panjáh o dah dah mardomay master bebant.
EXO 18:26 É mardomán modám mahlukay dádrasia kort. Gránén jérhahesh Mussáay kerrá áwortant, bale sajjahén kasánén jérhaháni sará wat dádrasiesha kort.
EXO 18:27 Nun Mussáyá wati nákó Yatrun ejázat kort o Yatrun wati molká per tarret.
EXO 19:1 Cha Mesrá dar kapagá rand, sayomi máhay awali róchá Esráili Sináay gyábáná sar butant.
EXO 19:2 Cha Repidimá ráh geptant o Sináay gyábáná, kóhay dámoná ordesh kort.
EXO 19:3 Mussá borzá Hodáay kerrá shot. Hodáwandá cha kóhá Mussá gwánk jat o gwasht: “Gón Ákubay chokk o nomásagán habar kan. Esráilián chó begwash:
EXO 19:4 ‘Shomá dist ke man gón Mesrián ché kort o che paymá shomárá wakábáni bánzolán nádént o wati kerrá áwort.
EXO 19:5 Nun agan shomá pa delgósh mani tawárá gósh bedárét o mani ahd o paymánay parmánbardáriá bekanét, sajjahén kawmáni tahá shomá mani hásén mál o matá bét. Bell toré sajjahén zemin manig ent,
EXO 19:6 bale shomá pa man dini péshwáyáni bádsháhié jórha bét o pák o dar chetagén kawmé bét. Hamé habarán gón Esráilián bekan.’”
EXO 19:7 Mussá átk o mahlukay kamáshi lótháéntant o hamá sajjahén habari áyáni démá pésh kortant ke Hodáwandá áiárá hokm dátagat.
EXO 19:8 Sajjahén mahluká hamtawáriá chó passaw dát: “Harché Hodáwandá gwashtag, má anchosha kanén.” Mussáyá mahlukay passaw Hodáwanday kerrá bort.
EXO 19:9 Hodáwandá gón Mussáyá gwasht: “Bechár, man bazén jambaréay tahá tai kerrá káyán ke wahdé man gón taw habara kanán, mahluk beshkont o modám tai sará báwar bekant.” Mussáyá mahlukay habar gón Hodáwandá gwashtant.
EXO 19:10 Hodáwandá gwasht: “Mahlukay kerrá beraw o maróchi o bándá pa man wapkesh kan ke mani gechéni o pákén mardom bebant. Áyán begwash ke wati god o pocchán beshódét o
EXO 19:11 pa sayomi róchá tayár bebét, chéá ke sayomi róchá mane Hodáwand sajjahén mahlukay chammáni démá Sináay kóhay sará éra káyán.
EXO 19:12 Kóhay chapp o chágerdá pa sajjahén mardomán hadd o simsar begisshén o begwash: ‘Habardár! Kóhá sar makapét. Kóhay lambán ham dast per makanét. Harkasá ke kóh dast jat, markay sezá dayaga bit.
EXO 19:13 Kóhay dast janóká dast majanét, seng yá tiri bejanét o bekoshéti. Mardomé bebit yá dalwaté, báyad ent zendag mamánit.’ Karnáay drájkasshén tawáré ke chesta bit, gorhá mardomán ejázat ent ke kóhá sar bekapant.”
EXO 19:14 Mussá cha kóhá ér kapt o mahlukay kerrá átk. Áiá mardom wapk kortant o mardomán wati god shoshtant.
EXO 19:15 Mussáyá gón mahluká gwasht: “Watá pa sayomi róchá tayár kanét. Janáni kerrá marawét.”
EXO 19:16 Chó but ke sayomi róchay sohbá grand o gerók but o kóhay sará bazén jambaré záher but o karnáay anchén trondén tawáré chest but ke ordgáhay sajjahén mardom cha torsá larzetant.
EXO 19:17 Mussáyá mardom pa Hodáay gendoká cha ordgáhá dhann bortant o mardom kóhay boná óshtátant.
EXO 19:18 Sináay kóh duttéá mán póshetagat, chéá ke Hodáwand áséay tahá kóhay sará ér átkagat o é ásay dutt chó kurahay duttá chest atant o sarjamén kóh sakk larzagá at.
EXO 19:19 Karnáay tawár ke borzter bayán but, Mussáyá habar kort o Hodáyá pa borztawári passaw dát.
EXO 19:20 Hodáwand cha ásmáná Sináay kóhay sará ér átk o Mussái kóhay thollá tawár kort. Mussá sar kapt.
EXO 19:21 Hodáwandá gón Mussáyá gwasht: “Ér kap o mardomán habardár kan ke pa Hodáwanday cháragá gisshéntagén hadd o simsará mapróshét. Agan na, cha shomá bázéné merit.
EXO 19:22 Dini péshwá ham, hamá ke Hodáwanday nazzikká áyagay ejázatesh hast, báyad ent watá pák o palgár bekanant ke Hodáwand áyán majant.”
EXO 19:23 Mussáyá gón Hodáwandá gwasht: “Mahluká Sináay kóhá sar kapagay ejázat nést, chéá ke taw wat márá habardár kortag o maná gwashtag ke kóhay chapp o chágerdá hadd o simsaré begisshén o kóhá pa Hodáwandá wapk kan.”
EXO 19:24 Hodáwandá gwasht: “Ér kap o Háruná bezur o sar kap, bale dini péshwá o mahluk pa Hodáwanday kerrá borzá áyagá, gisshéntagén hadd o simsarán mapróshant ke Hodáwand áyán majant.”
EXO 19:25 Mussá ér átk, mahlukay kerrá shot o é habari kortant.
EXO 20:1 Hodáyá é sajjahén habar gwashtant:
EXO 20:2 “Man tai Hodáwandén Hodá án, hamá ke tará cha Mesrá dar kort o áwort, cha hamá molká ke ódá golám atay.
EXO 20:3 Cha man abéd tará dega hecch hodá mabit.
EXO 20:4 Na borzén ásmánay chizzéay sheklá pa wat bot addh bekan, na zeminay saray chizzéay sheklá, na zeminay chéray ápáni tahay chizzéay sheklá. Pa wat hecch botén hodá addh makan.
EXO 20:5 Esháni démá sará jahl makan o sojdahesh makan. Chéá ke man tai Hodáwandén Hodá hasaddigén Hodáé án. Petáni radkáriáni sezáyá áyáni chokkána dayán. Á ke cha man naprata kanant, áyáni radkáriáni sezáyá áyáni sayomi o cháromi nasl o padréchá dayán.
EXO 20:6 Bale á mardom ke maná dósta dárant o mani parmánáni sará kára kanant, man tán hazárán naslá áyáni sará mehrabána bán.
EXO 20:7 Mopt o watsará wati Hodáwandén Hodáay námá mager. Harkas ke mopt o watsará Hodáwanday námá gipt, gonahkára bit.
EXO 20:8 Shabbatay róchá yát bedár o é róchá gechéni o pákén róché bezán.
EXO 20:9 Shash róchá kár kan o wati sajjahén kárán gisshén.
EXO 20:10 Bale haptomi róch tai Hodáwandén Hodáay Shabbatay róch ent. É róchá hecch kár makan, na taw, na tai bacch o jenekk, na tai golám o móled, na tai dalwat o na hamá dhanni mardom ke tai shahrá nendók ent.
EXO 20:11 Chéá ke Hodáwandá shash róchá ásmán, zemin, daryá o harché ke esháni tahá hast, addh kortant o haptomi róchá árámi kort, paméshká Hodáwandá Shabbatay róch barkat dátag o gechéni o pákén róché jórh kortag.
EXO 20:12 Wati pet o mátá ezzat beday ke hamá molká tai omr dráj bebit ke tai Hodáwandén Hodá tará danti.
EXO 20:13 Mardom makosh.
EXO 20:14 Zená makan.
EXO 20:15 Dozzi makan.
EXO 20:16 Wati hamsáhegay helápá drógén sháhedi maday.
EXO 20:17 Pa wati hamsáhegay lógá delmánag mabay. Pa áiay jan, golám, móled, gók, har yá dega chizzéá lálech makan.”
EXO 20:18 Wahdé sajjahén mardomán dist ke grand o gerók ent o karnáay tawár ent o duttéá kóh póshetag, cha torsá larzet o dur óshtátant.
EXO 20:19 Áyán gón Mussáyá gwasht: “Taw wat gón má habar kan o má tai habará gósha dárén, bale mayl ke Hodá gón má habar bekant. Agan Hodá gón má habar bekant, má merén.”
EXO 20:20 Mussáyá gón mahluká gwasht: “Matorsét, Hodá paméshká átkag ke shomárá bechakkásit o áiay tors shomay delán benendit o shomá gonáh makanét.”
EXO 20:21 Mahluk dur óshtát o Mussá dém pa hamá bazén taháriá shot ke Hodá ódá at.
EXO 20:22 Hodáwandá gón Mussáyá gwasht: “Esráilián begwash ke shomá wat dist ke man cha ásmáná gón shomá habar kort.
EXO 20:23 Cha man abéd shomárá dega hecch hodá mabit. Pa wat hecch botén hodá addh makanét. Na nograhén hodá addh kanét, na teláhén.
EXO 20:24 Pa man hákay korbánjáhé addh kan. Ódá cha wati pas o gókán sóchagi korbánig o hamdeliay korbánig pésh kan. Har jágah ke man tará wati námay yát kanagá parmáyán, hamódá tai kerrá káyán o tará barkata dayán.
EXO 20:25 Bale agan pa man sengay korbánjáhé addha kanay, cha tráshtagén sengán addhi makan. Chéá ke pa sengay tráshagá awzár o sámán kármarza kanay o sengán palita kanay.
EXO 20:26 Mani korbánjáhá padánk per makan ke sar kapagay wahdá bésetra bay.”
EXO 21:1 “É hamá kánun ant ke tará gón kawmá gwashagi ant:
EXO 21:2 Agan taw Ebráni golámé bahá zort, é golám tán shash sálá tai hezmatá bekant. Haptomi sálá pa wati ázátiá hecch zarr madant o berawt.
EXO 21:3 Agan tahná átkag tahná berawt, bale agan cha pésará sur kortagéné gorhá jan ham áiay hamráhiá berawt gón.
EXO 21:4 Agan wájahá jané dát o janéná bacch o jenekk pédá kort, jan o chokk wájahayga bant o golám tahná berawt.
EXO 21:5 Bale agan golám dape wat begwashit: ‘Maná wati wájah o wati jan o chokk dóst ant o ázát bayag o rawaga nalóthán,’
EXO 21:6 gorhá wájah áiá Hodáay bárgáhá bebárt. Golámá darwázag yá darwázagay chánthay dapá bebárt, drapshé bezurit o áiay góshá besombit o á golám tán zendag ent, wájahay hezmatá bekant.
EXO 21:7 Agan mardé wati jenekká móledéay hesábá bahá bekant, á jenekk mardénén golámáni paymá ázát kanag mabit.
EXO 21:8 Agan é jenekk wájahéá gechén kort o zort o randá wájahá pasond nabut, gorhá báyad ent bellit ke jenekká degaré bemókit. Wájahá é hakk nést ke áiá dhanni mardoméay kerrá bahá bekant, chéá ke áiá wat gón jenekká béwapái kortag.
EXO 21:9 Agan wájahá jenekk pa wati bacchá gechén kortag o zortag, gorhá jenekká hamá hakká bedant ke wati jenday jenekká danti.
EXO 21:10 Agan wájah dega jané begipt, wati awali janá cha warák, póshák o jani hakká zebahr makant.
EXO 21:11 Agan áiá é sayén chizzán madant, janén pa wati ázátiá hecch zarr madant o berawt.”
EXO 21:12 “Harkasá ke mardomé jat o kosht, áiay sezá mark ent.
EXO 21:13 Bale agan áiá pa názánti é kár kort o mane Hodáyá ham é káray dém nadásht, gorhá man jágahé gisshénán ke hónig betachit o hamódá berawt.
EXO 21:14 Bale agan kaséá pa zánt yakkéay sará orosh kort o koshti, áiá mani korbánjáhá ham panáh nést. Cha ódá ham dari kan o markay sezái beday.
EXO 21:15 Harkasá ke wati pet yá mát jat, áiay sezá mark ent.
EXO 21:16 Harkasá ke mardoméay dozzagá gerag but, á mardomi bahá kort yá wati kerrá dáshti, áiay sezá mark ent.
EXO 21:17 Harkasá ke wati pet yá mát nálat kort, áiay sezá mark ent.
EXO 21:18 Agan mardomán watmánwatá jang kort o hamé wahdá yakkéá domiárá sengé yá moshté jat o á mardom namort bale tahtay báhóth but o
EXO 21:19 randá pád átk o dazlatthay madatá dhanná gasht, gorhá janók dega sezá dayag mabit, bale zawál butagén wahday táwán o elájay harch o darchán porr bekant.
EXO 21:20 Agan kaséá wati golám yá móled latth jat o golám yá móled áiay dastá mort, gorhá janók sezá dayag bebit.
EXO 21:21 Bale agan golám yá móledá tán yakk o do róchá hecch nabut, gorhá janóká sezá pera nabit, chéá ke golám wati wájahay mál ent.
EXO 21:22 Agan mardénán jang o dáwá kort o hamé wahdá lápporrén janéné jatesh o janénay chokk eshkand but, bale dega masterén jáni táwáné naraseti, gorhá janók hamá dhandh o malámá porr bekant ke janénay marda lóthit o kázi begisshénant.
EXO 21:23 Bale agan janéná mazanén jáni táwáné raset, gorhá sáhay badal sáh ent,
EXO 21:24 chammay badal chamm, dantánay badal dantán, dastay badal dast, páday badal pád,
EXO 21:25 sóchkay badal sóchk, thappay badal thapp o zaymay badal zaym ent.
EXO 21:26 Agan kaséá wati golám yá móleday chammá shahmáté jat o áiay chamm kór but, gorhá chammay badalá golámá ázát bekant.
EXO 21:27 Agan wati móled yá golámay dantáni prósht, gorhá dantánay badalá golámá ázát bekant.
EXO 21:28 Agan gókéá mardén yá janéné kánth jat o kosht, gók sengsár kanag bebit o mardom áiay góshtá mawarant. Gókay wáhond sezá dayag mabit.
EXO 21:29 Bale agan á góká pésará ham kánth jatag o áiay wáhondesh hál dátag o hozzhár kortag, o wáhondá angat gók nabastag o á góká mardén yá janéné kosht, gók sengsár kanag bebit o wáhond markay sezá dayag bebit.
EXO 21:30 Bale agan cha gókay wáhondá malám lóthag but, gorhá pa wati zenday mókagá har malámé ke cha áiá lóthaga bit, bedant.
EXO 21:31 Agan góká kaséay bacch yá jenekké kánth jat, ódá ham kánun hamesh ent.
EXO 21:32 Agan góká golám yá móledé kánth jat, gorhá gókay wáhond golámay wájahá si shekel nograh bedant o gók sengsár kanag bebit.
EXO 21:33 Agan kaséá chátéay dapig dur kort yá agan kaséá cháté jat o áiay dapi nagept o gók yá haré chátá kapt,
EXO 21:34 chátay wáhond malámán porr bekant, mortagén dalwatá bezurit o dalwatay wáhondá zarrán bedant.
EXO 21:35 Agan kaséay góká hamsáhegéay gók jat o á gók mort, gókáni wáhond janókén góká bahá bekanant o zarrán ném bekanant, mortagén dalwatá ham ném bekanant.
EXO 21:36 Bale agan mardoma zánant ke á góká pésará ham kánth jatag o angat wáhondá gók nabastag, gorhá á wáhond gókay badalá góké bedant o mortagéná bezurit.”
EXO 22:1 “Agan kaséá góké yá pasé dozzet o helár kort yá bahái kort, gorhá gókay badalá panch gók o pasay badalá chár pas bedant.
EXO 22:2 Agan dozzéá lógé jat o hamé wahdá gerag but o haminkas latth o kotth kanag but ke mort, áiá hónbahá nést.
EXO 22:3 Bale agan é kár róchay dar áyagá rand but, gorhá hón, koshókay sará ent. Harkas ke dozzia kant, báyad ent malám porr bekant, bale agan pa malámay porr kanagá hecchi nést, gorhá jendi bahá kanag bebit o malám porr kanag bebant.
EXO 22:4 Bale agan dozzetagén mál, góké bebit yá haré yá pasé, áiay kerrá zendagá dar átk, gorhá do sari malám bedant.
EXO 22:5 Agan kaséá wati dalwat dhagár yá anguri bágéá cháréntant yá dega mardoméay dhagárá yalahi kortant, gorhá cha wati sharterén keshár yá anguri bágay sharterén bahrá malámá porr bekant.
EXO 22:6 Agan kaséá ásé rók kort o é ásá shamálah kasshet o dhangaráni tahá anchó sheng but ke kesháray grám yá dánay narotagén keshár yá dhagári sótkant, gorhá é ásay rók kanók purahén malámán porr bekant.
EXO 22:7 Agan kaséá zarr yá sámáné hamsáhegéay kerrá amánat kort o é amánat cha hamsáhegay lógá dozzag but, gorhá dozz do sari malám porr bekant, agan gerag but.
EXO 22:8 Bale agan gerag nabut, gorhá lógay wáhondá Hodáay bárgáhá bebarant ke zánag bebit ke áiá wati hamsáhegay mál dast jatag yá na.
EXO 22:9 Agan do mardom chizzéay sará arhet, góké bebit yá haré yá pasé yá cháderé yá dega gár butagén chizzé, gorhá é doénáni jérhah Hodáay bárgáhá barag bebit o harkas ke Hodáyá mayárbár kort, á, domiá do sari malám bedant.
EXO 22:10 Agan kaséá haré, góké, pasé yá dega dalwaté wati hamsáhegay amánat kort o á dalwat mort yá thappig but yá barag but o kassá nadist,
EXO 22:11 gorhá áyáni jérhah Hodáwanday sawgenday sará gisshénag bebit ke áiá amánat kortagén mál dast najatag. Dalwatay wáhond é sawgenday sará rázig bebit o sawgenday warók malám porr makant.
EXO 22:12 Bale agan dalwat cha áiay kerrá dozzag butag, gorhá á, dalwatay wáhondá malám bedant.
EXO 22:13 Agan dalwat rastaréá jatag o koshtag, gorhá á, pa sabut dalwatay jóná byárit o mortagén dalwatay malámá porr makant.
EXO 22:14 Agan kaséá cha hamsáhegéá dalwaté badal zort ke padá tará dayáni, o wáhond ódá nabut o á dalwat thappig but yá mort, gorhá badal zurók purahén malámá porr bekant.
EXO 22:15 Bale agan é kár wáhonday démá but, gorhá malám porr kanag mabit. Agan dalwat pa keréh zurag butag, gorhá keréhay jend bass ent.”
EXO 22:16 “Agan mardéá janénchokké rad dát o gón áiá wapt o wáb kort o agan é jenekk kassi deshtár naent, gorhá áiay hakmehrá bedant o begipti.
EXO 22:17 Bale agan jenekkay pet wati jenekkay dayagá hecch warhá rázig nabut, gorhá é mardén, jenekkéay hakmehray kesásá zarr bedant.
EXO 22:18 Jádugerén janéná zendagá mayl.
EXO 22:19 Harkasá ke gón haywánéá wapt o wáb kort, áiay sezá mark ent.
EXO 22:20 Harkasá ke cha Hodáwandá abéd pa dega hodáéá korbánig kort, gár o gomsár kanag bebit.
EXO 22:21 Gón darámadéá badi makan o ázári maday, chéá ke shomá wat Mesrá darámad butagét.
EXO 22:22 Cha janózám yá chórawéay majburiá nájáezén páedag chest makan.
EXO 22:23 Agan é kárá bekanay o á mani kerrá peryát bekanant, man allam áyani peryátán gósha dárán.
EXO 22:24 Mani hezhm chesta bit o shomárá pa zahma koshán, o shomay jan janózáma bant o chokk chóraw.
EXO 22:25 Agan mani mahlukay nézgáréá wámé dayay, gorhá wám dayókáni paymá makan o cha áiá byáj mager.
EXO 22:26 Agan taw wati hamsáhegay cháder pa zamánat wati kerrá ér kort, gorhá cha rónendá pésar peri tarrén.
EXO 22:27 Chéá ke balkén áiay póshák éwaká hamesh ent, gorhá ché per bedant o bwapsit? Agan mani kerrá peryát bekant, man gósha dárán, chéá ke man mehrabán án.
EXO 22:28 Kopr makan. Wati mahlukay saróká nálat makan.
EXO 22:29 Cha wati keshár o shiragán mani bahray dayagá dér makan. Wati awali mardénchokká maná beday.
EXO 22:30 Wati gók o pasáni awali narén chokká ham beday. Áyáni awali chokkán tán hapt róchá mátay kerrá bell o hashtomi róchá manáesh beday.
EXO 22:31 Shomá mani pák o dar chetagén kawm bebét. Á dalwat ke rastaréá jatag o koshtag, áiay góshtá mawarét, kochekkáni démá dawri dayét.”
EXO 23:1 “Drógén hál sheng makan. Gón badkárán hamkári makan o drógén sháhedi maday.
EXO 23:2 Gón géshterén mardomán gón makap o badén kár makan. Jérhahéay sará ke sháhedia dayay, ensápá lagatmál makan, bell toré géshterén mardom hamá némagá ant.
EXO 23:3 Jérhahéay tahá nézgárén mardoméay wástá ham ru o ryá makan.
EXO 23:4 Agan taw wati dozhmenay ham gárén gók yá har dist, allam wáhonday kerrá sari kan.
EXO 23:5 Agan taw dist ke tai badwáhéay har báray chérá chér tarretag, poshtá mán maday o maraw. Báray bójagá komakki kan.
EXO 23:6 Agan tai kawmay garib o nézgáréá wati arz o peryát áwort, áiá béensáp makan.
EXO 23:7 Cha drógén bohtámjaniá pahréz kan. Bégonáh o rást o barhakkén mardomá markay sezá maday. Chéá ke man náhakkén mardomá bégonáh hesába nakanán.
EXO 23:8 Roshwat mazur, chéá ke roshwat rozhnáén chammán kóra kant o rástgóay habará tába dant.
EXO 23:9 Darámadéáy sará zolm makan. Chéá ke taw zánay darámad bayag chón grán ent. Shomá wat ham Mesrá darámad atét.”
EXO 23:10 “Tán shash sálá wati dhagárá bekesh o beron,
EXO 23:11 bale haptomi sálá bell ke dhagár áráma kant. Kári madár, bell ke tai mahlukay garib o nézgára chenant o warant o sar átkagénán gyábánay jánwara warant. Wati anguray bág o zaytunay bágá ham anchosh kan.
EXO 23:12 Shash róchá kár kan o haptomi róchá árám kan ke tai gók o har dam bekanant o tai móleday chokk o tai lógá neshtagén darámaday arwáh tázadam bebit.
EXO 23:13 Mani é sajjahén habar ke man gón shomá kortant, eshán delgósh kanét. Á dega hodáyáni námá magerét. Cha shomay dapá áyáni nám ham dar mayayt.”
EXO 23:14 “Sálé say randá pa man aid bekan.
EXO 23:15 Béhomirén Naganay Aidá barjáh bedár. Hamá paymá ke man tará hokm dátag, hapt róchá béhomirén nagan bwar. É kárá Abibay máhá, hamá wahdá bekan ke man gisshéntag, chéá ke hamé máhá shomá cha Mesrá dar átkét. Kass gón háligén dastán mani bárgáhá mayayt.
EXO 23:16 Rón o Móshay Aidá gón wati hamá kesháráni awali bar o samarán jashn beger ke taw wati dhagárá keshtagant. Érahtay Aidá sálay goddhi róchán jashn beger, hamá wahdá ke wati dhagáray bar o samará moccha kanay.
EXO 23:17 Sajjahén mardén sálé say randá Hodáwandén Hodáay bárgáhá byáyant.
EXO 23:18 Korbánigay hóná ke mani démá pésha kanay, tará hecch homirdárén chizz gón mabit. Mani aiday korbánigay pig tán sabáhá pasht makapit.
EXO 23:19 Wati zeminay awali bar o samará wati Hodáwandén Hodáay lógá byár. Shenekkay góshtá mátay shiray tahá lahrh maday.
EXO 23:20 Bechár, nun man préshtagé ráh dayagá án. É cha taw pésara bit ke ráhá tai páspániá bekant o tará mani tayár kortagén jágahá bebárt o sar bekant.
EXO 23:21 Áiay ehterámá bekan o habaráni gósh dár. Áiay helápá pád mayá ke tai náparmániá nabakshit. Chéá ke mani nám áiay bátená ent.
EXO 23:22 Bale agan áiay tawárá sharriay sará gósh bedáray o harché ke mana gwashán, hamá paymá bekanay gorhá man tai dozhmenáni dozhmena bán o tai badwáháni badwáh.
EXO 23:23 Mani préshtag cha taw pésar rawána bit o tará Amuri o Hitti o Perizzi o Kanháni o Héwi o Yabusiáni molká bárt. Man eshán gár o gomsára kanán.
EXO 23:24 Esháni hodáyáni parastesh o hezmatá makan o esháni káráni randgiriá makan. Esháni botén hodáyán sarjamiá karój o hamá sengán thokkor thokkor kan ke eshán pa wati parasteshgáhay neshán kanagá mekk kortagant.
EXO 23:25 Man tai Hodáwandén Hodá án. Mani hezmatá bekan, man tai rezk o rózigá barkata dayán o nádráhiá cha tai jáná dura dárán.
EXO 23:26 Tai molká kass chokk eshkanda nakant o kass santh o béawláda nabit. Man shomay omrá barkata dayán.
EXO 23:27 Man wati bimmá cha taw pésar ráha dayán o taw har kawméá ke dapa kapay, á kawmá sarbatag o sargardána kanán o sajjahén dozhmenán cha tai démá táchénán.
EXO 23:28 Man wati kahrá cha taw pésar ráha dayán o Héwi o Kanháni o Hittián cha tai démá dura kanán.
EXO 23:29 Bale yakk sáléay tahá cha tai démá duresha nakanán. Chó mabit ke zemin wayrandán bebit o gyábánay jánwar cha taw géshter bebant.
EXO 23:30 É kawmán kamm kammá cha tai démá dura kanán tánke taw báz bayán bebay o é sardhagárá wati bekanay.
EXO 23:31 Cha Sohrzerá tán Pilestiáni zerá o cha gyábáná tán Parátay kawrá, tai simsarána gisshénán o é sardhagáray nendókán tai dastá dayán o taw áyán cha wati kerrá gallénay.
EXO 23:32 Gón eshán o esháni hodáyán ahd o paymán makan.
EXO 23:33 É mardom tai molká manendant. Chó mabit ke tará dém pa gonáhá bebarant o taw mani náparmán bebay. Agan taw esháni hodáyáni parastesh bendát kort, allamá dáméá kapay.”
EXO 24:1 Hodáyá gón Mussáyá gwasht: “Borzád, mane Hodáwanday bárgáhá byá. Taw o Hárun o Nádáb o Abihu o Esráilay haptád kamásh byáét o cha durá parastesh kanét.
EXO 24:2 Éwaká tawe Mussá mane Hodáwanday kerrá byá. Á dega mardom nazzikká mayáyant. Mahluk ham tai hamráhiá borzád mayayt gón.”
EXO 24:3 Mussá átk o Hodáwanday sajjahén habar o parmáni mardománá sar kortant. Sajjahén mahluká pa hamtawári gwasht: “Hodáwandá harché ke gwashtag, má anchosha kanén.”
EXO 24:4 Mussáyá Hodáwanday sajjahén habar nebeshtah kortant. Mussá sohbá máhallah pád átk, kóhay boná korbánjáhé addhi kort o pa Esráilay dwázdahén kabilahán dwázdah sengi mekk kort.
EXO 24:5 Bani Esráilay warnái ráh dátant, áyán káiger zort o pa Hodáwandá sóchagi korbánig o hamdeliay korbánigesh kort.
EXO 24:6 Mussáyá hónáni ném tagárán kort o á dega némi korbánjáhay sará dranzetant.
EXO 24:7 Ahd o paymánay ketábi zort o mardománi démá wánti. Áyán gwasht: “Harché ke Hodáyá gwashtag, má hamá paymá kanén o parmánbardára bén.”
EXO 24:8 Mussáyá hón zort, mahlukay sará dranzet o gwashti: “É sajjahén wántagén habar hamá ahd o paymánayg ant ke Hodáwandá gón shomá bastag o é hamé ahd o paymánay hón ant.”
EXO 24:9 Mussá o Hárun o Nádáb o Abihu o Esráilay haptádén kamásh borzá sar kaptant
EXO 24:10 o Esráilay Hodáesh dist. Hodáay pádáni chérá sabzén nilomay paymén parshé at ke chó ásmánay jendá sáp at.
EXO 24:11 Hodáyá Esráiliáni sarók táwán nadátant. Áyán Hodá dist o hamódá warag o charagesh wárt.
EXO 24:12 Hodáwandá gón Mussáyá gwasht: “Kóhá sar kap, mani kerrá byá o kammé hamedá bejall ke man tará wánekána dayán ke esháni sará man pa kawmay sar o sójá Sharyat o parmán nebeshtah kortagant.”
EXO 24:13 Mussá o áiay komakkár Yushá ráh geptant. Mussá Hodáay kóhá sar kapt.
EXO 24:14 Bale pésará gón Esráilay kamáshán gwashti: “Tánke má shomay kerrá wátarra nakanén, hamedá bejallét. Bechár, Hárun o Ahur shomay kerrá ant. Harkasá jérhahe but, hamesháni kerrá berawt.”
EXO 24:15 Mussá kóhá sar kapt o jambará kóh sarpósh kort.
EXO 24:16 Hodáwanday shán o shawkatá Sináay kóhay sará hankén kort o jambará kóh tán shash róchá sarpósh kort. Haptomi róchá Hodáwandá cha jambaray nyámá Mussá gwánk jat.
EXO 24:17 Esráiliáni chammán Hodáwanday shán o shawkatay dróshom pelekkókén ásay paymá at ke kóhay thollá jambur at.
EXO 24:18 Mussá kóhá sar kapt o jambaray tahá shot o tán chell shap o chell róchá hamódá jallet.
EXO 25:1 Hodáwandá gón Mussáyá gwasht:
EXO 25:2 “Gón Esráilián begwash ke pa man shogránah byárét. Cha hamá sajjahén mardomán shogránah bezurét ke delesha parmáit.
EXO 25:3 Cha mardomán é shogránahán begerét: teláh, nograh, brenj,
EXO 25:4 ásmáni o jamu o sohrén pazhm, sharrén lilom, bozay mud,
EXO 25:5 gwarándhay ratkagén sohrén póst, dega paymén mohrén póst, chegerday dár,
EXO 25:6 pa cherágán thél, pa per moshagi rógen o washbóén sóchokiá masálah o
EXO 25:7 pa épód o sénagpóshá senge solaymán o dega gránkimmatén seng.
EXO 25:8 Pa man pákén jágahé addh bekanant ke man áyáni nyámá jahmenend bebán.
EXO 25:9 Tambu o tambuay tahay sajjahén sámánán hamá paymá addh bekanant ke man tará pésha dárán.
EXO 25:10 Cha chegerday dárá pétié addh bekanant ke drájiá do o ném dast bebit, práhiá yakk o ném dast o borziá ham yakk o ném dast.
EXO 25:11 Pétiá cha dhanná o tahá gón zagrén teláhá sarpósh kan. Gerdágerd teláhén patthié peri kan.
EXO 25:12 Pa pétiá teláhay chár karhi addh kan o pétiay chárén pádagán lecchénesh, do karhi yakk némagéá o do á dega némagá.
EXO 25:13 Cha chegerday dárá do gwarbásk addh kan o gón teláhá sarpóshesh kan.
EXO 25:14 Pa pétiay chest kanagá gwarbáskán cha pétiay kashay karhián begwázén.
EXO 25:15 Gwarbásk pétiay karhián bebant o cha karhián dar kanag mabant.
EXO 25:16 Sháhediay wánekán ke man tará dayán, hamé pétiá mánesh kan.
EXO 25:17 Cha zagrén teláhá kapáraté addh kan o pétiá sarpósh kan. Drájiá do o ném dast bebit o práhiá yakk o ném dast.
EXO 25:18 Teláhay do karrubi addh kan, teláhá bezur o thapp o addhesh kan. É karrubián sarpóshay doén sarán addh kan,
EXO 25:19 yakk karrubié sarpóshay yakk saréá addh kan o á dega karrubiá domi sará. Sarpósh o doén saráni karrubián jetá jetá addh makan, é yakthokkor bebant.
EXO 25:20 Karrubiáni dém gón yakdomiá bebit o chammesh gón sarpóshá. Bánzolesh borzádiá pach bebant o sarpóshá sáhél bekanant.
EXO 25:21 Sarpóshá pétiay sará ér kan o hamá sháhediay wánekán ke man tará dayán, áyán pétiay tahá kan.
EXO 25:22 Man hamódá tai démá záhera bán o gón taw habara kanán, cha sarpóshay borzá, cha sháhediay pétiay saray doén karrubiáni nyámá Esráiliáni bárawá har parmáné ke hast, tará gwashánesh gón.
EXO 25:23 Cha chegerday dárá thébalé addh kan. Drájiá do dast bebit, práhiá yakk dast o borziá yakk o ném dast.
EXO 25:24 Gón zagrén teláhá sarpóshi kan o teláhay patthié addh kan o chárén némagán peri kan.
EXO 25:25 Thébalay sarbori tahtagá, chárén némagán teláhay patthié per kan o tahtagay chérá chárén némagán yakk panjagéay práhiay kaddén kábé per kan.
EXO 25:26 Pa thébalá teláhay chár karhi addh kan o karhián chárén kondhán, pádagán per kan.
EXO 25:27 É karhi báyad ent kábay nazzikká bebant chéá ke thébalay chest kanagay wahdá gwarbáskána dárant.
EXO 25:28 Thébalay chest kanagay gwarbáskán cha chegerday dárá addh kan o gón teláhá sarpóshesh kan.
EXO 25:29 É thébalay tál o tásán cha zagrén teláhá addh kan. Thébalay jag o hamá kásagán ham ke pa réchagi korbánigay ér réchagá kár bandaga bant, cha zagrén teláhá addh kan.
EXO 25:30 ‘Pákwandhén naganán’ modám hamé thébalay sará, mani démá ér kan.
EXO 25:31 Cha zagrén teláhá cherágdáné addh kan. Cherágdáná, bezán bon o bonsháh o pyálah o golbon o pollán thapp o addh kan, jetá jetá addhesh makan, é yakthokkor bebant.
EXO 25:32 Cha bonsháhay kashán shash sháharh dar byayt, say sháharh cha yakk kashéá o say sháharh cha á dega kashá.
EXO 25:33 Har sháharhá say pyálah per bebit, pyálaháni sarborá bádámay pollay warhén golbon o pollé per bebit. Cherágdánay har shashén sháharh hamé paymá bebant.
EXO 25:34 Cherágdánay bonsháhá chár pyálah per bebit, gón bádámay pollay warhén golbon o pollán.
EXO 25:35 Cha bonsháhá dar áyókén shashén sháharháni boná golbon bebit, yakk golboné awali doén sháharháni boná bebit, cha hamá jágahá kammé jahlter ke sháharh cha bonsháhá dara káyant, domi golbon domi doén sháharháni boná o sayomi golbon sayomi doén sháharháni boná bebit.
EXO 25:36 Golbon o sháharh o cherágdán yakthokkor bebant. É sajjahénán cha yakkén thappetagén zagrén teláhá addh kan.
EXO 25:37 Hapt cherág addh kan o cherágdáná peresh kan ke cherágdánay démay jágahá rozhná bekanant.
EXO 25:38 Cherágdánay sambálagay awzár o sámánán cha zagrén teláhá addh kan.
EXO 25:39 Pa cherágdán o eshiay sajjahén sámánáni addh kanagá yakk tálánté zagrén teláh kármarz kan.
EXO 25:40 Bechár, é sajjahén chizzán hamá paymá addh kan ke man tará kóhay sará pésh dásht.
EXO 26:1 Pa sháhediay tambuá dah pardah addh kan. É pardah cha hurtgwápen lilomá o cha ásmáni o jamu o sohrén pazhmá gwapag bebant. Honarmandén ezmkáré é pardahán karrubiay naksh per bekant.
EXO 26:2 Sajjahén pardah yakkén kadd o mápay bebant. Hamok pardah drájiá bist o hasht dast bebit o práhiá chár dast bebit.
EXO 26:3 Panch pardah bezur o gón yakdegará lecchén o á dega panchénán ham hamé paymá lecchén.
EXO 26:4 Awali reday goddhi pardahay lambá ásmánrangén lóp per kan o domi reday goddhi pardahay lambá ham anchosh kan.
EXO 26:5 Yakk pardahéá panjáh lóp per kan o domi reday pardahay lambá ham panjáh lóp per kan. Doénáni lóp dém pa dém bebant.
EXO 26:6 Teláhay panjáh karhi addh kan o pardahán gón yakdegará jórhén ke tambu yakk bebit.
EXO 26:7 Pa tambuay póshagá cha syahpasay mudá pardah addh kan. Yázdah pardah addh kan.
EXO 26:8 Yázdahén pardah yakkén kadd o mápay bebant. Hamok pardahay dráji si dast bebit o práhi chár dast.
EXO 26:9 Panch pardah yakk redéá gón yakdegará lecchén o á dega shashénán dega redéá. Domi reday shashomi pardahá tambuay démi némagá dotalá patá.
EXO 26:10 Awali reday goddhi pardahay lambá panjáh lóp per kan o domi reday goddhi pardahay lambá ham panjáh lóp per kan.
EXO 26:11 Brenjay panjáh karhi addh kan o lópán mánesh kan ke tambu bejorhit o yakk bebit.
EXO 26:12 Tambuay pardaháni pasht kaptagén bahr tambuay sará, poshti némagá lónján bebit.
EXO 26:13 Tambuay drájiá é pardah ke doén némagán cha tambuá yakk dast master ant, é bell doén némagán lónján ant o tambuá póshant.
EXO 26:14 Tambuay sarbori póshá cha gwarándhay anchén póstéá addh kan ke rajag o sohr kanag butag o eshiay sarborá dega paymén mohrén póstay póshé per kan.
EXO 26:15 Pa tambuá cha chegerday dárá mekk kanagi tahtag addh kan.
EXO 26:16 Har tahtag drájiá dah dast bebit o práhiá yakk o ném dast.
EXO 26:17 Hamok tahtagá do zobánok per kan o é zobánok dap mán dap bebant. Tambuay sajjahén tahtagán hamé paym kan.
EXO 26:18 Pa tambuay jonubi némagá bist tahtag addh kan.
EXO 26:19 Nograhay chell bonhesht addh kan ke tahtagáni chérá dayag bebant. Pa hamok tahtagá do bonhesht addh kan. Hamok zobánokay chérá yakk bonheshté dayag bebit.
EXO 26:20 Pa tambuay á dega némagá, bezán pa tambuay shomáli némagá ham bist tahtag addh kan.
EXO 26:21 Pa tahtagáni chérá nograhay chell bonhesht addh kan, bezán do bonhesht pa har tahtagá.
EXO 26:22 Pa tambuay poshti bahrá, bezán rónendi némagá shash tahtag addh kan o
EXO 26:23 pa poshti bahray kondhán do tahtag addh kan.
EXO 26:24 É doén kondhán, é tahtag cha jahlá gón yakdegará belecchant o borzá dap mán dap kanag o yakkén karhiay tahá mán kanag bebant. Doén kondhán anchó kan.
EXO 26:25 Hasht tahtag bebant o nograhay shánzdah bonhesht, hamok tahtagay chérá do bonhesht.
EXO 26:26 Cha chegerday dárá gwarbast addh kan. Panch gwarbast pa tambuay yakk némagéay tahtagán o
EXO 26:27 panch gwarbast pa á dega némagay tahtagán o panch gwarbast pa rónendi némagay tahtagán, bezán pa tambuay poshti bahray tahtagán.
EXO 26:28 Nyámi gwarbast cha é sar tán á dega sará, tahtagán sakk bebit, tahtagáni ném borziá.
EXO 26:29 Tahtagán gón teláhá sarpósh kan o pa gwarbastáni dáragá teláhay karhi addh kan. Gwarbastán ham gón teláhá sarpósh kan.
EXO 26:30 Tambuá hamá paymá mekk kan ke man kóhay sará tará pésh dásht.
EXO 26:31 Cha ásmáni o jamu o sohrén pazhmá o cha hurtgwápén lilomá pardahé addh kan o honarmandén ezmkáré eshiay sará karrubiay naksh addh bekant.
EXO 26:32 Pardahá gón teláhay karhián chár chegerdi menokay sará dranj. É menok gón teláhá sarpósh kanag bebant o nograhay chár bonheshtay sará mekk bebant.
EXO 26:33 Pardahá karhián mán kan o dranj o sháhediay pétiá pardahay poshtá ér kan. Pardah pákén jágahá cha pákterén jágahá jetá kant.
EXO 26:34 Kapáratay sarpóshá pákterén jágahá érén sháhediay pétiay sará day.
EXO 26:35 Thébalá cha pardahá dhann, shomáli némagá ér kan o cherágdáná thébalay dém pa démá, jonubi némagá ér kan.
EXO 26:36 Ásmáni o jamu o sohrén pazhm o hurtgwápén lilom bezur o pa tambuay dapá ranggwápén pardahé addh kan.
EXO 26:37 Pa é pardahá cha chegerdá panch menok addh kan o gón teláhá sarpóshesh kan. Esháni karhi teláhay bebant o pa eshán panch brenjén bonhesht ham addh kan.
EXO 27:1 Cha chegerday dárá korbánjáhé addh kan. Drájiá o práhiá panch panch dast bebit. Korbánjáh chárkondh bebit. Borziá say dast bebit.
EXO 27:2 Korbánjáhay chárén kondháni sará yakk o yakk kánthé addh kan. Kánthán o korbánjáhá jetá jetá addh makan, é yakthokkor bebant. Korbánjáhá gón brenjá sarpósh kan.
EXO 27:3 Korbánjáhay poráni dar kanagay tagári o bard o tás o chársháh o ásdán, sajjahén sámánáni cha brenjá addh kan.
EXO 27:4 Pa korbánjáhá jálié, bezán brenjay thathé addh kan o pa eshiay chárén kondhán cha brenjá chár karhi addh kan.
EXO 27:5 Jáliá korbánjáhay tóki lambáni chérá per kan o anchó éri kan ke korbánjáhay borziay némá sar bebit.
EXO 27:6 Cha chegerday dárá pa korbánjáhá gwarbásk addh kan o gón brenjá sarpóshesh kan.
EXO 27:7 Gwarbáskán cha karhián gwázén ke korbánjáhay chest kanagay wahdá korbánjáhay doén kashán bebant.
EXO 27:8 Korbánjáhá cha dáray tahtagá addh kan. Tóki bell ke hórk o hálig ent. Hamá paymá addhi kan ke man tará kóhay sará pésh dásht.
EXO 27:9 Pa sháhediay tambuá péshgáhé addh kan. Pa péshgáhay jonubi némagá cha hurtgwápén lilomá pardah addh kan ke sarjamiá yakk sad dast bebant.
EXO 27:10 Gón bist menok o bist brenjén bonheshtá addhesh kan. Menokáni band o karhi nograhay bebant.
EXO 27:11 Shomáli némag ham hamé paymá bebit. Pardah sarjamiá yakk sad dast bebant, gón bist menok o bist brenjén bonheshtá. Menokáni band o karhi nograhay bebant.
EXO 27:12 Péshgáhay rónendi némagay pardah sarjamiá panjáh dast bebant, gón dah menok o dah bonheshtá.
EXO 27:13 Péshgáhay ródarátki némagay pardah, hamá némag ke róch dara kayt, panjáh dast bebant.
EXO 27:14 Péshgáhay dapay yakk némagéay pardah sarjamiá pánzdah dast bebant, gón say menok o say bonheshtá,
EXO 27:15 o dapay á dega némagay pardah ham pánzdah dast bebant, gón say menok o say bonheshtá.
EXO 27:16 Pa péshgáhay dapá pardahé addh kan ke bist dast bebit, gón chár menok o chár bonheshtá. É pardah cha ásmáni o jamu o sohrén pazhm o cha hurtgwápén lilomá addh bebit o ranggwáp bebit.
EXO 27:17 Péshgáhay chapp o chágerday sajjahén menokáni band o karhi nograhay bebant o bonhesht brenjay.
EXO 27:18 Péshgáhay dráji yakk sad dast bebit, práhi panjáh dast o borzi panch dast bebit. Gón hurtgwápén lilomay pardah o brenjén bonheshtán addh kanag bebit.
EXO 27:19 Tambuay á dega sámán, pa tambuay har káréá ke kármarza bant, cha brenjá addh kanag bebant. Tambuay o péshgáhay sajjahén méh ham cha brenjá addh kanag bebant.
EXO 27:20 Taw Esráilián hokm day ke zaytun beprenchét o zagrén thél dar kanét o pa cherágán byárét ke cherág har wahdá rók bebant.
EXO 27:21 Sháhediay tambuay tahá, cha hamá pardahá dhann ke sháhediay pétiay démá ent, Hárun o áiay mardénchokk, bezán dini péshwá Hodáwanday bárgáhá shapá tán sohbá cherágán rók bedárant. É pa Esráiliáni áyókén nasl o padréchán abadmánén parmáné.
EXO 28:1 Wati brát Hárun o áiay mardénchokkán, bezán Nádáb o Abihu o Elyázar o Itámárá cha Esráiliáni nyámá wati kerrá byár ke dini péshwá bebant o mani hezmatá bekanant.
EXO 28:2 Pa wati brát Háruná pákén god tayár kan ke Háruná brahdár o shándár bekanant.
EXO 28:3 Hamá sajjahén honarmand ke man pa choshén kárán dánái bakshátagant, áyán begwash ke Hárunay póshákán tayár bekanét ke Hárunesh gwará bekant o pa dini péshwái o mani hezmatá wapk bebit.
EXO 28:4 Esh ant hamá póshák ke tayár kanagi ant: sénagpóshé, épódé, kabáhé, naksh nakshén jámagé, págé o lánkigé. Pa tai brát Hárun o áiay mardénchokkán é póshákán tayár bekanant ke Hárun o chokk dini péshwá bebant o mani hezmatá bekanant.
EXO 28:5 É póshákán cha teláhá o cha ásmáni o jamu o sohrén pazhmá o cha sharrén lilomá tayár bekanant.
EXO 28:6 Épódá gón teláhá o gón ásmáni o jamu o sohrén pazhmá o gón restagén sharrén lilomá tayár bekanant. É kárá honarmandén ezmkáré bekant.
EXO 28:7 Eshiay do srugá do sarkópag per kan ke épód bandag bebit.
EXO 28:8 Épóday band épóday paymá bebit, bezán gón teláhá o gón ásmáni o jamu o sohrén pazhmá o gón hurtgwápén lilomá tayár kanag bebit. É band o épód hór gwapag bebant, é yakthokkor bebant.
EXO 28:9 Do senge solaymán bezur o áyáni sará Esráilay mardénchokkáni námán ájen o naksh kan.
EXO 28:10 Áyáni pédá bayagay red o banday hesábá shash nám yakk sengéay sará o á dega shashén nám domi sengay sará bebant.
EXO 28:11 Hamá paymá ke ájenók mohré naksha chent, taw ham Esráilay chokkáni námán hamé doén sengáni sará ájen. Doén sengán do teláhay mohragjáhay tahá kan o
EXO 28:12 épóday doén sarkópagán peresh kan ke Esráilay chokkáni yátgéjiay seng ant. Hárun Hodáwanday bárgáhá pa yátgéjiá esháni námán wati doén kópagáni sará bekant.
EXO 28:13 Teláhay mohragjáh addh kan o
EXO 28:14 cha zagrén teláhá restagén sáday dhawlén do zamzilok addh kan o gón mohragjáhán lecchén.
EXO 28:15 Paysalahsáziay sénagpóshé addh kan. Eshiá épóday paymá addh kan, bezán cha teláhá o cha ásmáni o jamu o sohrén pazhmá o cha hurtgwápén lilomá addhi kan. É kárá honarmandén ezmkáré bekant.
EXO 28:16 É sénagpósh chárkondh bebit o dotal bebit. Dráji o práhiá yakk yakk bechillé bebit.
EXO 28:17 Eshiay sará chár redá gránkimmatén seng lecchén. Awali redá rubi, pokráj o bayrel,
EXO 28:18 domi redá pérózah, nilom o zomorrod,
EXO 28:19 sayomi redá shunzén ákut, akik o jamuén ákut,
EXO 28:20 cháromi redá teláhrangén ákut, senge solaymán o yashm. Eshán teláhén mohragjáhán benádén.
EXO 28:21 Seng, Esráilay chokkáni námáni hesábá bebant, dwázdah nám o dwázdah seng. Har yakkéay sará cha dwázdahén kabilahán yakkéay nám chó mohrá naksh bebit.
EXO 28:22 Pa sénagpóshá cha zagrén teláhá restagén sáday dhawlén zamzilok addh kan.
EXO 28:23 Pa sénagpóshá do teláhén karhi addh kan o sénagpóshay do srugá peresh kan.
EXO 28:24 Doén teláhén zamzilokáni yakk yakk saré bezur o sénagpóshay doén srugáni karhián mánesh kan.
EXO 28:25 Zamzilokáni domi sarán bezur o gón doén mohragjáhán lecchén, sarkópagáni démi némagá.
EXO 28:26 Cha teláhá do karhi addh kan o sénagpóshay á dega doén srugánesh per kan, hamá lambán ke démesh gón épódá ent.
EXO 28:27 Cha teláhá dega do karhi addh kan o épóday démá, sarkópagáni jahli némagá, épóday banday sarborá peresh kan, hamódá ke sarkópag gón épódá lecchetagant.
EXO 28:28 Sénagpóshay karhián gón ásmánrangén bandán épóday karhián anchó band ke sénagpósh épóday banday sarborá bebit o cha épódá masorit.
EXO 28:29 Hárun ke pákén jágahá rawt, Esráilay mardénchokkáni nám paysalahsáziay sénagpóshay sará pa yátgéji modám Hodáwanday bárgáhá áiá gón bebant.
EXO 28:30 Urim o Tumimá paysalahsáziay sénagpóshá mán kan ke wahdé Hárun Hodáwanday bárgáhá rawt, é áiay delay sará bebant. É dhawlá Hárun har wahdá Hodáwanday bárgáhá Esráilay paysalahsáziay awzárán wati delbandá bedárit.
EXO 28:31 Épóday kabáhá sarjamiá cha ásmánrangén godá addh kan.
EXO 28:32 Kabáhá gotthé per bebit. Gotthay chapp o chágerdá káláray paymén dazgwápén kenárié per bebit ke gotth maderit.
EXO 28:33 Ásmáni o jamu o sohrén pazhmay anár addh kan o kabáhay lambá, chapp o chágerdá peresh kan o esháni nyámá teláhén zháng per kan.
EXO 28:34 Kabáhay dámonay chapp o chágerdá zhángé o anáré, zhángé o anáré per kanán kan.
EXO 28:35 Hamá wahdá ke Hárun hezmat kanagá bit, é kabáhá gwará bekant. Wahdé Hodáwanday bárgáhá pákén jágahá rawt yá cha ódá dara kapit, zhángáni tawár eshkonag bebit o é habar zánag bebit ke Hárun zendag ent.
EXO 28:36 Cha zagrén teláhá patthié addh kan o é labzán chó mohray nakshá patthiay sará naksh kan: ‘Wapke Hodáwandi.’
EXO 28:37 Eshiá gón ásmánrangén bandéá, págay démi némagá band.
EXO 28:38 É Hárunay péshánigá bit o Esráili ke wapkén shogránaha dayant, shogránah harché ke bebant, agan é káray tahá radié but, zemmah Hárunay sará bit. É patthi har wahdá Hárunay péshánigá bit ke Hodáwand shogránahán kabul bekant.
EXO 28:39 Jámagá cha sharrén lilomá addh kan o nakshi per kan. Sharrén lilomay págé addh kan o ranggwápén lánkigé ham addh kan.
EXO 28:40 Pa Hárunay mardénchokkán anchén jámag o lánkig o koláh addh kan ke áyán brahdár o shándár bekanant.
EXO 28:41 É godán wati brát Hárun o áiay chokkáni gwará day. Hárun o chokkán rógen per mosh o gisshén o wapkesh kan o dini péshwáiay kárá hamáyáni dastá day.
EXO 28:42 Pa áyán cha lilomá chérpósh addh kan ke áyáni jándariá bepóshant. É cha sréná tán ránán bebant.
EXO 28:43 Wahdé Hárun o áiay chokk sháhediay tambuay tahá yá korbánjáhay nazzikká rawant, bezán pa hezmatá pákén jágahá káyant, é chérpóshán bepóshant. Chó mabit ke gonáhé wati sará beladdhant o bemerant. É pa Hárun o áiay nasl o padréchá abadmánén parmáné.
EXO 29:1 Pa Hárun o áiay mardénchokkáni wapk kanagá é kárán bekan ke á dini péshwá bebant o mani hezmatá bekanant: yakk káigeré o do gwarándh bezur, hecch aybesh mán mabit.
EXO 29:2 Cha sharrén gandomay ártá béhomirén nagan o béhomirén rógeni kólok o béhomirén tanakkén poráthah bepach.
EXO 29:3 Eshán saptéá kan o é saptá káiger o doén gwarándháni hamráhiá byár.
EXO 29:4 Hárun o áiay chokkán sháhediay tambuay dapá byár o áyáni jáná shód.
EXO 29:5 God o póshákán bezur o jámag o épóday kabáh o épód o sénagpóshá Hárunay gwará day. Épódá gón épóday bandá band.
EXO 29:6 Págá Hárunay sará day o teláhay patthiá, bezán pákén tájá págay sará band.
EXO 29:7 Per moshagi rógen bezur o Hárunay sará ér réch o peri mosh.
EXO 29:8 Hárunay chokkán byár o jámagesh gwará day o
EXO 29:9 koláhesh sará day. Hárun o áiay chokkáni sréná lánkig band. É abadmánén parmáné ke dini péshwái hamáyánig ent. É kárá Hárun o áiay chokkáni dastá day.
EXO 29:10 Káigerá tambuay démá byár o Hárun o áiay chokk káigerá dastá baddhá bejanant.
EXO 29:11 Káigerá Hodáwanday bárgáhá, tambuay dapá helár kan.
EXO 29:12 Cha káigeray hónán kammé bezur o gón wati lankoká korbánjáhay kánthán per mosh o sar átkagén hónán korbánjáhay boná réch.
EXO 29:13 Cháderpig o sarjagar o doén gotthag o gotthagáni pigán bezur o korbánjáhay sará sóch.
EXO 29:14 Bale káigeray gósht o póst o rótán cha ordgáhá dhann sóch. É gonáháni pahelliay korbánig ent.
EXO 29:15 Awali gwarándhá byár, Hárun o áiay chokk gwarándhá dastá baddhá bejanant o
EXO 29:16 taw gwarándhá helár kan o hónáni bezur o korbánjáhay sajjahén némagán dranz day.
EXO 29:17 Gwarándhá thokkor thokkor kan, delig o lápig o pádáni shód o gón sarag o á dega thokkorán yakjáh ér kan.
EXO 29:18 Sarjamén gwarándhá korbánjáhay sará sóch. É pa Hodáwandá sóchagi korbánigé bit, táhirbakshén washbóé o pa Hodáwandá ásjatén korbánigé.
EXO 29:19 Nun domi gwarándhá byár, Hárun o áiay chokk gwarándhá dastá baddhá bejanant o
EXO 29:20 taw gwarándhá helár kan o cha áiay hónán kammé bezur o Hárun o áiay chokkáni rástén góshay dorjáhá o áyáni rástén dast o rástén páday máti lankokán per mosh o sar átkagén hónán korbánjáhay sajjahén némagán dranz day.
EXO 29:21 Kammé per moshagi rógen o cha korbánjáhay sará kammé hón bezur o Hárun o áiay godáni sará o Hárunay chokk o áyáni godáni sará dranz day. Gorhá Hárun o áiay god o áiay chokk o chokkáni god wapke Hodáwandia bant.
EXO 29:22 É gwarándh ke péshwáay págbandiay rasmay gwarándh ent, eshiay pigán, bezán dombag o cháderpig o sarjagar o doén gotthagán gón pigán o rástén páday boná bezur o
EXO 29:23 cha Hodáwanday bárgáhay saptay béhomirén naganán yakk gerdén kóloké o yakk bazén o yakk tanakkén poráthahé bezur o
EXO 29:24 é sajjahénán Hárun o áiay chokkáni dastáni delá day o áyáni dastán Hodáwanday bárgáhá chest kan ke é chest kanagi korbánigé.
EXO 29:25 Nun é chizzán cha áyáni dastán bezur o korbánjáhay sará sóchagi korbánigay sará éresh kan o sóchesh. É Hodáwanday bárgáhá táhirbakshén washbóé o pa Hodáwandá ásjatén korbánigé.
EXO 29:26 Gorhá hamá gwarándh ke pa Hárunay péshwáiay págbandiay rasmá korbánig kanaga bit, áiay sénagá bezur o chest kanagi korbánigéay hesábá Hodáwanday bárgáhá chesti kan. É tai wandh ent.
EXO 29:27 Péshwáay págbandiay gwarándhay hamá sénagá o páday boná wapk kan ke chest kanagi korbánigay tahá atant. É Hárun o áiay chokkáni wandh ent.
EXO 29:28 É cha Esráiliáni némagá pa Hárun o áiay chokkán abadmánén shogránahé, cha hamá hamdeliay korbánigán ke Esráili pa Hodáwandá kanantesh.
EXO 29:29 Cha Háruná rand Hárunay pákén god áiay chokkániga bant ke á hamé godáni tahá rógen per moshag bebant o áyáni págbandiay rasm sarjam kanag bebit.
EXO 29:30 Hamá chokk ke Hárunay jágahá dini péshwá bit o tambuay tahá pákén jágahá rawt o hezmata kant, eshán tán hapt róchá gwará bekant.
EXO 29:31 Péshwáay págbandiay gwarándhá bezur o áiay góshtá pákén jágahéá lahrh day.
EXO 29:32 Hárun o áiay chokk tambuay dapá gwarándhay gósht o saptay tahay naganán bwarant.
EXO 29:33 Á é chizzán wat bwarant, chéá ke é chizz pa áyáni págbandi o wapkiay rasmá kapáraté ant. Dega kass eshán mawárt, chéá ke é pákén warák ant.
EXO 29:34 Agan cha péshwáay págbandiay korbánigay gósht yá naganán tán sabáhá chizzé pasht kapt, besóchesh. Eshán mawar chéá ke pákén warák ant.
EXO 29:35 Hamé paymá ke man tará hokm dátag, gón Hárun o áiay chokkán anchó bekan. Hapt róchá péshwáiay págbandiay rasmá sarjam kan.
EXO 29:36 Pa gonáhay korbánigá har róch káigeré bekosh, pa kapáratá. Kapárat beday o korbánjáhá pák o palgár kan. Korbánjáhá rógen per mosh ke pák o palgár bebit.
EXO 29:37 Hapt róchá kapárat beday o korbánjáhá pák o palgár kan. Nun korbánjáh cha páká pákera bit o har chizzé ke gón eshiá dhokk belaggit, páka bit.
EXO 29:38 É hamá chizz ant ke báyad ent taw eshán modám korbánjáhay sará pésh bekanay, har róch: do yakk sálagén gwarándh.
EXO 29:39 Yakké sohbá pésh kan o yakké magrebtahárá.
EXO 29:40 Yakk o ném sér sharrén árt gón yakk séré zaytunay zagrén thélá hawár kan o awali gwarándhay hamráhiá pésh kan. Yakk séré sharáb ham pésh kan ke réchagi korbánig ent.
EXO 29:41 Domi gwarándhá magrebtahárá pésh kan, sohbay dánay korbánigay paymá, o réchagi korbánigá ham pésh kan. É táhirbakshén washbóé o pa Hodáwandá ásjatén korbánigé.
EXO 29:42 É sóchagi korbánig nasl pa nasl modám sháhediay tambuay dapá Hodáwanday bárgáhá pésh kanag bebant. Man hamódá gón taw gendoka kanán o gón taw habara kanán.
EXO 29:43 Gón Esráili mahluká ham hamedá gendoka kanán o é jágah mani shán o shawkatay barkatá páka bit.
EXO 29:44 Man tambu o korbánjáhá pák o palgára kanán o pa wata gisshénán, Hárun o áiay chokkán ham pák o palgára kanán o pa wata gisshénán ke dini péshwá bebant o mani hezmatá bekanant.
EXO 29:45 Man Esráiliáni nyámá jahmenenda bán o áyáni Hodá bán.
EXO 29:46 Gorhá á zánant ke man áyáni Hodáwandén Hodá án, hamá Hodá ke áyáná cha Mesrá daron kort ke áyáni nyámá nendók bebán. Man áyáni Hodáwandén Hodá án.
EXO 30:1 Pa sóchokiay chér sóchagá korbánjáhé addh kan, cha chegerday dárá addhi kan.
EXO 30:2 Chárkondhi kan, drájiá yakk dast bebit, práhiá ham yakk dast o borziá do dast. Kánth o korbánjáh hór addh bebant, é yakthokkor bebant.
EXO 30:3 Korbánjáhay sará o sajjahén némagán o kánthán gón zagrén teláhá sarpósh kan o chapp o chágerdá teláhén patthié peri kan.
EXO 30:4 Pa korbánjáhá teláhay karhi addh kan o hamé patthiay chérá peresh kan. Korbánjáhay doén kashán do do karhi per kan ke korbánjáhay chest kanagay wahdá gwarbáskán bedárant.
EXO 30:5 Gwarbáskán cha chegerday dárá addh kan o gón teláhá sarpósh kan.
EXO 30:6 Korbánjáhá hamá pardahay démá ér kan ke sháhediay pétiay démá ent, bezán kapáratay sarpóshay démá ke sháhediay wánekáni sarborá ent, hamá jágahá ke man gón taw gendoka kanán.
EXO 30:7 Hárun har sohb ke cherágán chárit o delgósha kant, bósóchi korbánjáhay sará washbóén sóchoki chér besóchit.
EXO 30:8 Magrebtahárá ke Hárun cherágán róka kant, padá sóchoki chér besóchit. É Hodáwanday bárgáhá dáemi chér sóchagi korbánigé, nasláni nasl.
EXO 30:9 Eshiay sará dega paymén sóchoki o sóchagi korbánig yá dánay korbánig chér masóchét o eshiay sará réchagi korbánig maréchét.
EXO 30:10 Hárun sálé yakk randé eshiay kántháni sará mahlukay gonáháni kapáratá bekant. É kapárat cha gonáháni kapáratay hóná kanag bebit, sálé yakk randé, nasláni nasl. É pa Hodáwandá cha páká pákter ent.”
EXO 30:11 Hodáwandá gón Mussáyá gwasht:
EXO 30:12 “Wahdé pa mardomshomáriá Esráilián hesába kanay, harkasay nám ke nebisaga bit, pa wati zenday mókagá Hodáwandá kapárat bedant. Gorhá námnebisiay wahdá wabáé áyáni chakká nakapit.
EXO 30:13 Hamá mardom ke námesh nebisaga bant, ném shekel bedayant, pákén jágahay shekelay hesábá ke shekelé bist géráh ent. É ném shekel pa Hodáwandá shogránahé.
EXO 30:14 Harkas ke omri bist sál yá géshter ent, námi nebisag bebit o Hodáwanday shogránahá bedant.
EXO 30:15 Wahdé pa wati zenday mókagá Hodáwanday shogránahá dayét, hastómand cha ném shekelá géshter o nézgár kamter madayant.
EXO 30:16 Cha Esráilián kapáratay zarrán beger o sháhediay tambuay hezmati káráni sará harchesh kan. Hodáwanday bárgáhá é, pa Esráilián wati zenday mókagay kapáratay yátgéjé.”
EXO 30:17 Hodáwandá gón Mussáyá gwasht:
EXO 30:18 “Pa shosht o shódá brenjay trashté addh kan o pádagi ham brenjay bebit. Sháhediay tambu o korbánjáhay nyámá éri kan o ápi mán kan.
EXO 30:19 Hárun o áiay mardénchokk wati dast o pádán gón hamé ápán beshódant.
EXO 30:20 Har wahdá ke tambuay tahá káyant, watá beshódant ke mamerant, hamá wahdá ham watá beshódant ke korbánjáhay nazzikká káyant ke hezmat bekanant o pa Hodáwandá ásjatén korbánig chér besóchant.
EXO 30:21 Wati dast o pádán beshódant ke mamerant. É pa Hárun o áiay nasl o padréchá abadmánén parmáné, nasláni nasl.”
EXO 30:22 Hodáwandá gón Mussáyá gwasht:
EXO 30:23 “É sharterén washbóán bezur: panch sad shekel ápén morr, morráni némay kesásá bezán do sad o panjáh shekelay kesásá washbóén dárchini, do sad o panjáh shekel washbóén kándhél,
EXO 30:24 panch sad shekel káshyá, sajjahén pákén jágahay shekelay hesábá bebant, o chár sér zaytunay thél.
EXO 30:25 Eshán bezur o per moshagi pákén rógené addh kan, washbóén rógené. Eshán hamá paymá hawár kan ke atrsáz washbó addha kanant. É per moshagi pákén rógéna bit.
EXO 30:26 Tambu o sháhediay péti o
EXO 30:27 thébal o thébalay sajjahén sámán o cherágdán o cherágdánay sámán o bósóchi korbánjáh o
EXO 30:28 sóchagi korbánigáni korbánjáh o áiay sajjahénán sámán o trasht o trashtay pádagá rógen per mosh.
EXO 30:29 Eshán wapk kan ke cha páká pákter bebant. Har chizz ke gón eshán dhokk belaggit, páka bit.
EXO 30:30 Hárun o áiay chokkán rógen per mosh o wapkesh kan ke dini péshwá bebant o mani hezmatá bekanant.
EXO 30:31 Gón Esráilián begwash: ‘É mani per moshagi pákén rógen ent, pa shomá, nasláni nasl.
EXO 30:32 Eshiá harkasá per mamoshét o é sámánán é dhawlá hawár makanét o dega choshén rógen addh makanét. É pákén rógené, eshiay kadrá bekanét.
EXO 30:33 Harkasá eshiay paymén washbóé addh kort yá anchén mardoméá peri mosht ke dini péshwáé naent, cha wati mahluká sendaga bit.’”
EXO 30:34 Hodáwandá gón Mussáyá gwasht: “É chizzán bezur o hawár kan: drachki shirag, sadap, galbanum o zagrén konderk, sajjahénáni kacch o kesás yakk bebit.
EXO 30:35 Hamá paymá hawáresh kan o washbóén sóchokié addh kan ke atrsáz washbó addha kant. É sóchoki wádók o zagr o pák bebit.
EXO 30:36 Cha eshán lahtén bedrosh o árt kan o tambuá sháhediay pétiay démá, ér kan, hamódá ke man gón taw gendoka kanán. Eshiay kadrá bezánét ke cha páká pákter ent.
EXO 30:37 Pa wati jendá sóchoki é paymá addh makanét. Hodáwanday bárgáhá é pákén chizzé, eshiay kadrá bekanét.
EXO 30:38 Harkasá pa wati delwasshiá é paymén sóchokié addh kort, cha wati mahluká sendaga bit.”
EXO 31:1 Hodáwandá gón Mussáyá gwasht:
EXO 31:2 “Bechár, man cha Yahudáay kabilahá Uriay chokk, Ahuray nomásag Besalél gechén kortag o
EXO 31:3 cha Hodáay Ruhá porr kortag o agl o pahm o zánt o har kesmén dastay honar bakshátag
EXO 31:4 ke teláh o nograh o brenjay chizzáni sará naksh jórh bekant o
EXO 31:5 sengáni tráshag o nádénagay kárá bekant o dár beájent o har paymén ezmkári bekant.
EXO 31:6 Man cha Dánay kabilahá Ahimásakay chokk Ohulyáb ham gechén kortag ke Besalélá komakk bekant. Man sajjahén honarmand dánái bakshátagant ke hamá sajjahén chizzán addh bekanant ke man tará hokm dátag:
EXO 31:7 sháhediay tambu o sháhediay péti o pétiay saray sarpósh o tambuay é dega sajjahén sámánán,
EXO 31:8 bezán thébal o thébalay sámánán, cha zagrén teláhá addh butagén cherágdán o cherágdánay sajjahén sámánán, bósóchi korbánjáhá,
EXO 31:9 sóchagi korbánigay korbánjáh o áiay sajjahén sámánán, trasht o trashtay pádagá addh bekanant o
EXO 31:10 dazgwápén godán, bezán dini péshwá Hárunay pákén god o pa dini péshwáiá áiay chokkáni godán addh bekanant o
EXO 31:11 per moshagi rógen o pa pákén jágahá washbóén sóchoki ham addh bekanant. É sajjahén chizzán hamá paymá addh bekanant ke man tará hokm dátag.”
EXO 31:12 Hodáwandá gón Mussáyá gwasht:
EXO 31:13 “Esráilián begwash: ‘Mani Shabbatán allam barjáh bedárét. É pa shomay áyókén nasl o padréchán mani o shomay nyámay ahd o karáray neshánia bit tánke shomá bezánét ke man Hodáwand án, hamá ke shomárá gechéni kortag o shomárá pák o palgára kant.
EXO 31:14 Shabbatá barjáh bedárét chéá ke pa shomá gisshénag butag o pák o palgár ent. Harkasá eshiay béezzati kort, áiay sezá mark ent. Harkasá ke é róchá kár kort, cha wati mahluká sendaga bit.
EXO 31:15 Shash róchá kár kanét, bale haptomi róch Shabbat ent, árám kanagay róch ent. É róchá pa mane Hodáwandá wapk kanét. Harkasá Shabbatay róchá kár kort, áiay sezá mark ent.
EXO 31:16 Esráili Shabbatá barjáh bedárant, nasláni nasl chó abadmánén ahd o paymánéá barjáhi bedárant.
EXO 31:17 É tán abad mani o Esráilay nyámay ahd o karáray neshánia bit, chéá ke mane Hodáwandá shash róchá zemin o ásmán addh kortant o haptomi róchá árám kort o tázadam bután.’”
EXO 31:18 Wahdé Hodáwandá Sináay kóhay sará gón Mussáyá habar halás kort, sháhediay doén wáneki Mussáay dastá dátant, sengay do wánek atant ke esháni sará Hodáwandá dahén parmán daste wat nebeshtah kortagatant.
EXO 32:1 Wahdé mahluká dist ke Mussáyá cha kóhá ér kapagá sakk dér kort, Hárunay chapp o chágerdá mocch butant o gwashtesh: “Byá, pa má hodá addh kan ke ráhá cha má pésar bebant, chéá ke á mard, Mussá ke márá cha Mesrá dari kort o áworti, nazánén á chón but.”
EXO 32:2 Háruná gón áyán gwasht: “Wati jan o bacch o jenekkáni gósháni teláhén nálokán kasshét o mani kerrá byárét.”
EXO 32:3 Sajjahén mahluká teláhay nálok cha góshán kasshet o Hárunay kerrá áwortant.
EXO 32:4 Háruná áyáni dátagén teláh zort o áp kortant. Teláhi kálebéá kortant o botén gwaské addhi kort. Mardomán gwasht: “Oo Esráil! É tai hodá ent ke tará cha Mesrá dar kort o áworti.”
EXO 32:5 Háruná ke mardománi é hálat dist, gwaskay démá korbánjáhé addhi kort o jári jat: “Bándá Hodáwanday námá jashn ent.”
EXO 32:6 Domi róchá mahluk máhallah pád átk o sóchagi korbánigi chér sótk o hamdeliay korbánigi kort. Gorhá nesht o ward o nóshesh kort o pa layb o labáiá pád átkant.
EXO 32:7 Hodáwandá gón Mussáyá gwasht: “Ér kap, chéá ke é tai mahluk ke taw cha Mesrá dar kort o áwort, nun selkáriá laggetag.
EXO 32:8 Eshán mani sój dátagén ráh zutt yalah dátag. Pa wat botén gwaské addhesh kortag o sojdahesh kortag. Pa áiá korbánigesh kortag o gwashtagesh: ‘Oo Esráil! É tai Hodá ent ke tará cha Mesrá dar kort o áworti.’
EXO 32:9 Bechár, man é mahluk distag. É náparmán o watsarén kawmé.
EXO 32:10 Taw mani démá mán matarr. Bell mani hezhm eshána sóchit o pora kant. Man cha taw dega mazanén kawmé addha kanán.”
EXO 32:11 Bale Mussáyá wati Hodáwandén Hodáay kerrá peryát o zári kort o gwasht: “Oo Hodáwand! É mahluk ke taw gón mazanén wáké o zórmandén dasté cha Mesrá dar kort o áwort, nun eshán chéá tai hezhm besóchit?
EXO 32:12 Chéá Mesri begwashant: ‘É mardomi cha Mesrá pa badniyati dar kortant ke kóh o gyábánán bebárt o bekoshitesh o cha jaháná gáresh bekant’? Wati hezhmay ásá kosh. Wati erádahá badal kan o é baláhá wati mahlukay sará dawr maday.
EXO 32:13 Wati hezmatkár Ebráhém o Esák o Esráilá yát kan ke taw gón áyán wati jenday sawgend wárt o gwasht ke man shomay nasl o padréchá ásmánay estáráni paymá báza kanán o anchó ke man gón shomá wádah kortag, é sajjahén sardhagárá shomay nasl o padréchárá dayán o tán abad hamáyáni mirása bit.”
EXO 32:14 Hodáwandá erádah kortagat ke wati mahlukay sará baláhé dawra dayán, bale erádahi badal kort.
EXO 32:15 Mussá per tarret o cha kóhá ér kapt. Ér kapagay wahdá Mussáyá sháhediay doén wánek dastá atant. Wánekáni doén némagán nebeshtah per at, é dém o á dém nebeshtah atant.
EXO 32:16 Wánek Hodáay tráshtagén atant o nebeshtah Hodáay daznebesht atant ke áiá wánekáni sará ájetagatant.
EXO 32:17 Yusháyá mahlukay kukkáráni tawár eshkot o gón Mussáyá gwashti: “Ordgáhá jangéay tawár ent.”
EXO 32:18 Mussáyá gwasht: “É na sóbén bayagi kukkáré o na prósh waragi záré. Mani góshán é sawti tawáré.”
EXO 32:19 Wahdé Mussá ordgáhay nazzikká sar but, gwaski dist. É ham disti ke mardom náchá ant. Mussá sakk zahr gept o kóhay boná wati dastay wáneki zeminá dawr dát o thokkor thokkor kortant.
EXO 32:20 Hamá gwask ke mardomán addh kortagat, Mussáyá zort o bon dát. Nun chopt o hurt o árti kort o hurdagi ápá rétkant o ápi Esráiliáná wáréntant.
EXO 32:21 Mussáyá gón Háruná gwasht: “É mardomán chón tará parmát o taw choshén baláhén gonáhé esháni chakká áwort?”
EXO 32:22 Háruná gwasht: “Zahr mager, wájah! Taw wata zánay ke é mardom pa gonáhá delé dayant.
EXO 32:23 Eshán maná gwasht: ‘Pa má hodá addh kan ke ráhá cha má pésar bebant, chéá ke á mard, Mussá ke márá cha Mesrá dari kort o áworti, nazánén á chón but.’
EXO 32:24 Man gón áyán gwasht: ‘Harkasá ke teláhay saht o zéwar per, kasshét o byárétesh.’ Eshán wati teláh maná dátant. Man zort o ásá chagal dátant o é gwask cha ásá dar átk.”
EXO 32:25 Mussáyá dist ke mardom bémahár ant o Háruná esháni mahár yalah dátag. Nun é mardom dozhmenáni kalági jórh butagant.
EXO 32:26 Mussá ordgáhay dapá óshtát o gwashti: “Harkas ke Hodáwanday némagá ent, mani kerrá byayt.” Láwiay sajjahén chokk Mussáay kerrá mocch butant.
EXO 32:27 Mussáyá gwasht: “Hodáwand, Esráilay Hodá chosha gwashit: ‘Shomá sajjahén wati zahmán lánká bebandét o ordgáhá é sará tán á sará berawét o byáét o wati brát o dóst o nazzikén mardomán bekoshét.’”
EXO 32:28 Láwiay chokkán Mussáay habar zort. Á róchá kesás say hazár mardom koshag but.
EXO 32:29 Mussáyá gwasht: “Maróchi shomá pa Hodáwandá gechén kanag butagét, chéá ke shomá sajjahén wati chokk o brátáni helápá pád átkagét. Paméshká maróchi shomárá Hodáwanday barkat rasetag.”
EXO 32:30 Domi róchá Mussáyá gón mahluká gwasht: “Shomá mazanén gonáhé kortag. Bale man borzáda bán o Hodáwanday bárgáhá rawán. Balkén shomay gonáháni kapáratá dát bekanán.”
EXO 32:31 Mussá Hodáwanday bárgáhá per tarret o gón Hodáwandá gwashti: “Off ke é mardomán chónén mazanén gonáhé kortag. Pa wat teláhén hodáé addhesh kortag.
EXO 32:32 Nun agan buta kant esháni gonáhá bebaksh, bale agan nabakshay, gorhá mani námá cha hamá ketábá dar kan ke taw nebeshtah kortag.”
EXO 32:33 Hodáwandá gón Mussáyá gwasht: “Harkas ke mani gonahkár ent, man áiay námá cha wati ketábá dara kanán.
EXO 32:34 Nun beraw o mardomán dém pa hamá jágahá bar ke áiay bárawá man gón taw habar kortag. Mani préshtag cha taw pésara bit. Bale sezáay róchá man esháni gonáhay sezáyá dayán.”
EXO 32:35 Nun Hodáwandá paméshká wabáé mahlukay chakká dawr dát ke Háruná gwaské addh kortagat o mardomán parastesh kortagat.
EXO 33:1 Hodáwandá gón Mussáyá gwasht: “É jágahá yalah kan, taw o é mahluk ke taw cha Mesrá dar kortag o áwortag. Dém pa hamá molká beraw ke man gón Ebráhém o Esák o Ákubá sawgend wártag ke tai nasl o padréchárá dayáni.
EXO 33:2 Man préshtagé cha taw pésar ráha dayán o Kanháni o Amuri o Hitti o Perizzi o Héwi o Yabusiána gallénán.
EXO 33:3 Hamá molká beraw ke ódá shir o bénagay jó tachagá ant. Bale man gón taw hamráha nabán, chó mabit ke ráhá tará tabáh o barbád bekanán, chéá ke taw náparmán o watsarén kawmé ay.”
EXO 33:4 Mahluká ke é dardnákén habar eshkot, mótk o záriá lagget o kassá saht o zéwar per nakort,
EXO 33:5 chéá ke Hodáwandá gón Mussáyá gwashtagat: “Esráilián begwash: ‘Taw náparmán o watsarén kawmé ay. Man agan pa damánéá ham gón taw hamráh bebán, balkén tará tabáh o barbád bekanán. Nun wati saht o zéwarán kassh. Mana charán ke gón taw ché bekanán.’”
EXO 33:6 Esráilián Hórébay kóhá wati saht o zéwar kasshetant.
EXO 33:7 Mussáyá modám tambué zort o cha ordgáhá dur mekka kort. É tambuay námi gendokay tambu kort. Harkas ke Hodáwanday sar o sójáni lóthók at, cha ordgáhá dhann gendokay tambuá shot.
EXO 33:8 Har wahdá ke Mussá dara átk o dém pa tambuá ráha gept, sajjahén mahluk páda átk o harkas wati jenday gedánay dapá óshtát o tán hamá wahdá Mussáia cháret ke Mussá tambuá shot.
EXO 33:9 Wahdé Mussá tambuá shot, jambaray menok éra átk o tambuay dapá óshtát o Hodáwandá gón Mussáyá habara kort.
EXO 33:10 Wahdé mahluká dist ke jambaray menok tambuay dapá óshtátag, sajjahén mardom páda átk o wati gedánáni dapá óshtátant o Hodáwandesh parastesha kort.
EXO 33:11 Hodáwandá gón Mussáyá dém pa démá habara kort, sangatéay paymá. Randá Mussá ordgáhá shot, bale Yushá cha tambuá dara nakapt. Yushá Nunay chokk o Mussáay warnáén hezmatkár at.
EXO 33:12 Mussáyá gón Hodáwandá gwasht: “Bechár, taw maná gwashagá ay: ‘É mahlukay rahshóniá bekan’ bale taw maná hál dayagá naay ke mani hamráh kay ent. Taw maná gwashtag ke ‘man tawe Mussáyá pajjáha kárán, tará tai jenday námay sará pajjáha kárán o mane Hodáwanday chammán tai kadr o ezzat sakk báz ent.’
EXO 33:13 Nun agan tai chammán mani kadr o ezzat báz ent, gorhá wati ráhán pa man áshkár kan tánke man tará pajjáh byárán o hamá ezzat ke maná tai chammán hastent, áiá barjáh dásht bekanán. Bechár, é mahluk tai jenday kawm ent.”
EXO 33:14 Hodáwandá gwasht: “Man wat tai hamráha bán o tará árámi o ásudagia bakshán.”
EXO 33:15 Mussáyá gón Hodáwandá gwasht: “Agan taw wata nayáay gón, márá cha edá ráh maday.
EXO 33:16 Agan taw may hamráh mabay, chón zánaga bit ke tai chammán maná kadr o ezzat hast, maná o tai mahluká? Chéá ke hamé chizz ent ke maná o tai mahluká cha donyáay á dega sajjahén kawmán jetá kant.”
EXO 33:17 Hodáwandá gón Mussáyá gwasht: “É kár ke taw gwasht, mania kanán, chéá ke mani chammán tai kadr o ezzat sakk báz ent o tará tai jenday námay sará pajjáha kárán.”
EXO 33:18 Mussáyá gwasht: “Wati shán o shawkatá maná pésh dár.”
EXO 33:19 Hodáwandá gwasht: “Man wati sajjahén nékiá tará pésha dárán o tai démá wati nám Yahwehay járá janán. Harkasay sará ke maná rahmat gwárénagi ent, wati rahmatána gwárénán o harkasay sará ke maná rahm kanagi ent, rahma kanán.
EXO 33:20 Taw mani démá dista nakanay, chéá ke harkasá ke mani dém dist, zendaga namánit.
EXO 33:21 Bechár, mani nazzikká jágahé hast. Taw ódá taláréay sará bósht.
EXO 33:22 Hamá wahdá ke mani shán o shawkat cha tai démá gwazit, á wahdá tará taláray trakkéay tahá chéra dayán o wati dastá tán hamá wahdá tai sará éra kanán ke man begwazán.
EXO 33:23 Randá wati dastá dura kanán o taw mani poshtá genday, bale báyad ent mani dém gendag mabit.”
EXO 34:1 Hodáwandá gón Mussáyá gwasht: “Pésarigén wánekáni paymén do wánek betrásh o man áyáni sará hamá labzána nebisán ke pésarigénáni sará nebeshtah atant, hamá wánek ke taw próshtant.
EXO 34:2 Sabáhá watá gisshén. Sohbá Sináay kóhá sar kap o watá ódá kóhay thollá mani bárgáhá byár o sar kan.
EXO 34:3 Kass gón taw kóhá sar makapit o kóhay sará hecch jágah yakk mardomé ham gendag mabit. Ramag o górom ham kóhay démá macharant.”
EXO 34:4 Mussáyá pésari wánekáni paymén do wánek trásht o hamá paymá ke Hodáwandá hokm dátagat, sabáhá máhallah Sináay kóhá sar kapt. Doén wánek áiay dastá atant.
EXO 34:5 Hodáwand jambaray tahá but o ér átk o Mussáay kerrá óshtát o wati námay jári jat ke man Yahweh án.
EXO 34:6 Hodáwand jár janáná Mussáay démá gwast: “Hodáwand án, Hodáwand, rahmán o mehrabánén Hodá man án. Gazabay áragá déra kanán o cha mehr o wapáyá porr án.
EXO 34:7 Gón hazárán naslá wati mehrá barjáha dárán o radkári o sarkasshi o gonáhána bakshán bale radkáriá bé sezáyá gwazaga naylán. Pet o mátáni radkáriáni sezáyá chokk o nomásagána dayán, tán sayomi o cháromi naslá.”
EXO 34:8 Mussáyá hamá damáná sar jahl kort o parastesh kanagá lagget.
EXO 34:9 Gwashti: “Oo Hodáwand! Agan tai chammán maná kadr o ezzaté hast, gorhá tawe Hodáwand may hamráh bay. Bell toré é náparmán o watsarén kawmé, bale taw may radkári o gonáhán bebaksh o márá wati mirás kan.”
EXO 34:10 Hodáwandá gwasht: “Bechár, nun man ahd o paymáné kanán. Man tai sajjahén mardománi démá anchén ajabbatén kára kanán ke angat sajjahén donyáyá hecch kawmá nadistag o tai sajjahén mardoma gendant ke mane Hodáwanday kár chón bákamál ent, hamé kár ke man pa taw kanáni.
EXO 34:11 Tará maróchi har hokmé ke dayán, hamá paymá bekan. Man Amuri o Kanháni o Hitti o Perizzi o Héwi o Yabusián cha tai démá dura kanán.
EXO 34:12 Habardár! É molká ke rawagá ay, gón é molkay mardomán hecch paymén ahd o paymán maband, chó mabit ke dáméá bekapay.
EXO 34:13 Áyáni korbánjáhán karój, pa botparastiá mekk kortagén sengánesh prósh o áyáni bánokén hodá Ashirahay botán goddh o gár kan.
EXO 34:14 Dega hecch hodáay parasteshá makan, chéá ke mane Hodáwand ke mani nám Hasud ent, hasaddigén Hodáé án.
EXO 34:15 Habardár! Gón á molkay mardomán hecch paymén ahd o paymán maband. Wahdé á wati botén hodáyán sojdaha kanant o pa áyán korbániga kanant, shomárá ham dáwata dayant o shomá áyáni korbánigána warét o
EXO 34:16 wahdé shomá pa wati mardénchokkán áyáni janénchokkán gechéna kanét, á janénchokk wati botén hodáyán sojdaha kanant o shomay mardénchokkán ham wati hodáyáni sojdahá parmáyant.
EXO 34:17 Hecch botén hodá addh makan.
EXO 34:18 Béhomirén Naganay Aidá barjáh bedár. Hamá paymá ke man tará hokm dátag, tán hapt róchá béhomirén nagan bwar. É kárá Abibay máhá, hamá gisshéntagén wahdá bekan, chéá ke hamé máhá taw cha Mesrá dar átkay.
EXO 34:19 Har lápay awali chokk manig ent, tai sajjahén mál o dalwatáni awali narén chokk ham, gók bebant yá pas.
EXO 34:20 Haray awali korragay badalá gwarándhé bekosh o korragá bemók, bale agan namókayi, gorhá korragay gardená beprósh. Wati sajjahén awali mardénchokkán allam bemók. Kass mani démá gón hórkén dastán mayayt.
EXO 34:21 Shash róchá kár bekan, bale haptomi róchá árám kan. Nangár kanagay o rón o móshay mósomá ham hamé paymá bekan.
EXO 34:22 Haptagáni Aidá, bezán gandomay awali bar o samaray ronagay aidá barjáh bedár. Sálay godhsará Rón o Móshay Aidá ham barjáh bedár.
EXO 34:23 Tai sajjahén mardén, sálé say randá mane Hodáwandén Hodá, Esráilay Hodáay démá pésh bebant.
EXO 34:24 Man kawmán cha tai démá dura kanán o tai hadd o simsarán práh o sháhegána kanán. Taw ke sálé say randá wati Hodáwandén Hodáay cháragá káay, á wahdá kassa nayayt o tai molká nagipt.
EXO 34:25 Korbánigay hóná homiri chizzéay hamráhiá pésh makan. Sargwazay Aiday korbánigá tán sabáhá ér makan.
EXO 34:26 Wati zeminay awali bar o samará wati Hodáwandén Hodáay lógá byár. Shenekkay góshtá mátay shiray tahá lahrh maday.”
EXO 34:27 Nun Hodáwandá gón Mussáyá gwasht: “É habarán nebeshtah kan, chéá ke man hamé labz kár bastagant o gón taw o gón Esráilá ahd o paymáné kortag.”
EXO 34:28 Mussá tán chell shap o chell róchá hamódá Hodáwanday kerrá at, na nánia wárt o na áp. Wánekáni sará ahd o paymánay labzi nebeshtah kortant, dahén parmáni nebeshtah kortant.
EXO 34:29 Wahdé Mussáyá sháhediay doén wánek dastá atant o cha Sináay kóhá ér kapt, sahig naat ke gón Hodáwandá habar kanagay sawabá mani dém drapshagá ent.
EXO 34:30 Wahdé Hárun o sajjahén Esráilián Mussá dist, cha áiay démay drapshnákiá áiay nazzikká rawagesh torset.
EXO 34:31 Bale Mussáyá á gwánk jatant. Hárun o kawmay sajjahén sarók Mussáay kerrá per tarretant o Mussáyá gón áyán habar kort.
EXO 34:32 Nun sajjahén Esráili Mussáay nazzikká átkant o áiá hamá sajjahén parmán Esráiliáná sar kortant ke Hodáwandá Sináay kóhá áiárá dátagatant.
EXO 34:33 Har wahdá ke Mussáyá gón áyán habar kanag halása kort, démi gón nekábéá póshet.
EXO 34:34 Har wahdá ke Mussá Hodáwanday bárgáhá shot ke gón áiá habar bekant, nekábi dura kort o tán dar áyagay wahdá wati démi gón nekábá napóshet. Wahdé dara átk o Hodáwanday parmáni gón mardomána gwashtant,
EXO 34:35 Esráiliána dist ke Mussáay dém drapshagá ent. Gorhá Mussáyá padá gón nekábá wati déma póshet, tán hamá wahdá ke padá tahá shot ke gón Hodáwandá habar bekant.
EXO 35:1 Mussáyá Esráilay sajjahén mahluk mocch kort o gón áyán gwashti: “Esh ant hamá kár ke Hodáwandá shomárá esháni kanagay hokm dátag:
EXO 35:2 Shash róchá kár kanét, bale haptomi róch Shabbat ent, pa shomá pákén róché o árám kanagay róch ent. É róchá pa mane Hodáwandá wapk kanét. Harkasá Shabbatay róchá kár kort, áiay sezá mark ent.
EXO 35:3 Shabbatay róchá wati lóg o métagán ás rók makanét.”
EXO 35:4 Mussáyá gón sajjahén Esráili mahluká gwasht: “É hamá hokm ent ke Hodáwandá dátag:
EXO 35:5 Cha wati mál o hastiá pa Hodáwandá shogránah pésh bekanét. Shogránah hamá kas bedant ke delia parmáit. Pa Hodáwandá é chizzán byárit: teláh o nograh o brenj,
EXO 35:6 ásmáni o jamu o sohrén pazhm, sharrén lilom, bozay mud,
EXO 35:7 gwarándhay ratkagén sohrén póst, dega paymén mohrén póst, chegerday dár,
EXO 35:8 pa cherágán thél, pa per moshagi rógen o washbóén sóchokiá masálah o
EXO 35:9 pa épód o sénagpóshá senge solaymán o dega gránkimmatén seng.
EXO 35:10 Shomay sajjahén honarmand byáyant o é sajjahén chizzán addh bekanant ke Hodáwandá hokm dátag:
EXO 35:11 sháhediay tambuá gón tóki tambu o pósh o karhi o mekk kanagi tahtag o gwarbast o menok o bonheshtán,
EXO 35:12 pétiá gón gwarbásk o kapáratay sarpósh o pétiay démá lónjánén pardahá,
EXO 35:13 thébalá gón gwarbásk o sajjahén sámán o pákwandhén naganán,
EXO 35:14 pa rozhnáiá, cherágdáná gón cherág o thél o sajjahén sámánán,
EXO 35:15 bósóchi korbánjáhá gón gwarbásk o per moshagi rógen o washbóén sóchokián, sháhediay tambuay dapay pardahá,
EXO 35:16 sóchagi korbánigay korbánjáhá gón brenjén jáli o gwarbásk o sajjahén sámánán, brenjén trashtá gón pádagá,
EXO 35:17 péshgáhay pardahán gón tahtag o bonheshtán, péshgáhay dapay pardahá,
EXO 35:18 tambuay méh o péshgáhay méh o sádán,
EXO 35:19 dini péshwá ke pákén jágahá rawant o hezmata kanant, pa áyán dazgwápén god, pa dini péshwá Háruná pákén god o pa áiay mardénchokkán god ke dini péshwái kanagay wahdá gwaráesh bekanant.”
EXO 35:20 Gorhá Esráiliáni sajjahén mahluk cha Mussáay kerrá dar átk o
EXO 35:21 harkas ke delá parmát o arwáhá sekén dát, áiá pa sháhediay tambuay kárán, pa sajjahén hezmati kárán o pa pákén godán shogránaha áwort.
EXO 35:22 Janén o mardéna átkant. Harkas ke delá parmát, áiá thásin o nálok o mondrikk o hár, har tahrén saht o zéwara áwort. Har mardomá teláhay thékia áwort o pa Hodáwandá chest kanagi korbániga kortant.
EXO 35:23 Harkasay kerrá ke ásmáni o jamu o sohrén pazhm yá sharrén lilom, bozay mud, gwarándhay ratkagén sohrén póst yá dega mohkamén póst hastat, áworti.
EXO 35:24 Harkasá ke nograh o brenjay shogránahé dáta kort, pa Hodáwandá áworti o harkasay kerrá ke chegerday dár hastat, áworti ke pa tambuay yakk na yakk bahréá kár bedant.
EXO 35:25 Sajjahén honarmandén janénán jallakay kár dastá kort o é chizzesha gwapt o áwortant: ásmáni o jamu o sohrén pazhm o sharrén lilom.
EXO 35:26 Á sajjahén kárzántén janén ke delá parmátant, pasay mudesha zort o jallakay káresha kort.
EXO 35:27 Mahlukay sarókán pa épód o sénagpóshá senge solaymán o dega gránkimmatén senga áwort.
EXO 35:28 Pa cherágáni rók kanagá o pa per moshagi rógená o pa washbóén sóchokiáni addh kanagá masálah o thélesh ham áwort.
EXO 35:29 Esráilay har janén o mardéné ke delá parmát, áiá pa Hodáwandá hamá thékia áwort ke delá gwasht, pa é sarjamén kárá ke Hodáwandá Mussáay wasilahá hokm dátagat.
EXO 35:30 Mussáyá gón Esráilián gwasht: “Bechárét, Hodáwandá cha Yahudáay kabilahá Uriay mardénchokk, Ahuray nomásag Besalél gechén kortag o
EXO 35:31 cha Hodáay Ruhá porr kortag o agl o pahm o zánt o har kesmén dastay honar bakshátag.
EXO 35:32 Pa teláh o nograh o brenjay sámánáni sará nakshay sázagá,
EXO 35:33 pa sengay tráshag o nádénagá o pa dáray ájenag o dega har paymén ezmkáriá honari bakshátag.
EXO 35:34 Hodáwandá Besalél o Dánay kabilahay Ohulyábe Ahisámak sekkárénagay láheki ham dátagant.
EXO 35:35 Hodáwandá esháná pa har paymén kárá honar bakshátag, pa hamá sajjahén kárán ke ájenókesha kanant o ezmkáresh ásmáni o jamu o sohrén pazhm o sharrén lilomay sará gwapant o dóchant, bezán har káré ke baladén ezmkára kanant.”
EXO 36:1 “Besalél o Ohulyáb o sajjahén honarmand ke Hodáwandá pákén jágahay addh kanagay sajjahén káráni dánái o pahm bakshátagant, é kárá hamá paymá sarjam bekanant ke Hodáwandá hokm dátag.”
EXO 36:2 Besalél o Ohulyáb o sajjahén honarmand ke Hodáwandá dánái bakshátagatant, bezán harkas ke delá parmát ke byayt o kár bekant, Mussáyá á gwánk jat.
EXO 36:3 Mussáyá hamá sajjahén shogránah esháni dastá dátant ke Esráilián pa pákén jágahay addh kanagay kárá áwortagatant. Mahluk angat pa wasshi o razá har sohb pa é kárá shogránah áragá at.
EXO 36:4 Gorhá é sajjahén honarmand ke pákén jágahay addh kanagá goláésh atant, eshán wati kár yalah dát o Mussáay kerrá átkant o
EXO 36:5 gwashtesh: “Mahluk pa Hodáwanday hokm dátagén káray sarjam kanagá cha zaluratá gésh sámán áragá ent.”
EXO 36:6 Gorhá Mussáyá hokm dát o sajjahén ordgáhá jár janag but: “Pa pákén jágahay addh kanagá hech mardén yá janén cha ed o géshter shogránah mayárit.” É paymá mahluk cha géshterén sámánay áragá dárag but,
EXO 36:7 chéá ke pa é sajjahén kárá áyáni áwortagén sámán cha zaluratá gésh atant.
EXO 36:8 É honarmandán sháhediay tambuay dahén pardah addh kortant. É pardah cha hurtgwápén lilom o cha ásmáni o jamu o sohrén pazhmá gwapag butant. Honarmandén ezmkáréá é pardaháni sará karrubiay naksh jórh kort.
EXO 36:9 Sajjahén pardah yakkén kadd o mápá atant. Hamok pardah drájiá bist o hasht dast o práhiá chár dast at.
EXO 36:10 Panch pardahesh zort o gón yakdegará lecchént o á dega panchénesh ham hamé paymá lecchéntant.
EXO 36:11 Awali reday goddhi pardahay lambá ásmánrangén lópesh per kort o domi reday goddhi pardahay lambá ham lópesh per kort.
EXO 36:12 Yakk pardahéá panjáh lópesh per kort o domi reday pardahay lambá ham panjáh lópesh per kort. Doénáni lóp dém pa dém atant.
EXO 36:13 Teláhay panjáh karhi‌esh addh kort o pardahesh gón yakdegará jórhéntant o tambuesh yakk kort.
EXO 36:14 Pa tambuay póshagá cha syahpasay mudá pardahesh addh kort. Yázdah pardahesh addh kort.
EXO 36:15 Yázdahén pardah yakkén kadd o mápayg atant. Hamok pardahay dráji si dast at o práhi chár dast.
EXO 36:16 Panch pardahesh yakk redéá gón yakdegará lecchént o á dega shashén dega redéá.
EXO 36:17 Awali reday goddhi pardahay lambá panjáh lópesh per kort o domi reday goddhi pardahay lambá ham panjáh lópesh per kort.
EXO 36:18 Brenjay panjáh karhi‌esh addh kort ke tambuá belecchénant o yakk bekanant.
EXO 36:19 Tambuay sarbori póshesh cha gwarándhay anchén póstéá addh kort ke rajag o sohr kanag butagat o eshiay sarborá dega paymén mohrén póstay póshé peresh kort.
EXO 36:20 Pa tambuá cha chegerday dárá mekk kanagi tahtagesh addh kort.
EXO 36:21 Har tahtag drájiá dah dast at o práhiá yakk o ném dast.
EXO 36:22 Hamok tahtagá do zobánokesh per kort o é zobánokesh dap mán dap kortant. Tambuay sajjahén tahtagesh hamé paymá kortant.
EXO 36:23 Pa tambuay jonubi némagá bist tahtagesh addh kort o
EXO 36:24 nograhay chell bonheshtesh addh kort ke tahtagáni chérá dayag bebant. Pa hamok tahtagá do bonheshtesh addh kort, pa hamok zobánokay chérá yakk bonheshté addhesh kort.
EXO 36:25 Pa tambuay á dega némagá, bezán tambuay shomáli némagá ham bist tahtagesh addh kort.
EXO 36:26 Pa tahtagáni chérá nograhay chell bonheshtesh addh kort, bezán do bonhesht pa har tahtagá.
EXO 36:27 Pa tambuay poshti bahrá, bezán rónendi némagá shash tahtagesh addh kort o
EXO 36:28 pa poshti bahray kondhán do tahtagesh addh kort.
EXO 36:29 Doén kondhán, é tahtag cha jahlá gón yakdegará lecchetant o borzá dap mán dap kanag o yakkén karhiay tahá mán kanag butant. Doén kondhesh hamé paymá kortant.
EXO 36:30 Hasht tahtag butant o nograhay shánzdah bonhesht, pa hamok tahtagay chérá do bonhesht.
EXO 36:31 Cha chegerday dárá gwarbastesh addh kort. Panch gwarbast pa tambuay yakk némagéay tahtagán,
EXO 36:32 panch gwarbast pa á dega némagay tahtagán o panch gwarbast pa rónendi némagay, bezán pa tambuay poshti bahray tahtagán.
EXO 36:33 Nyámi gwarbastesh addh kort ke é sar tán á dega sará, tahtagán sakk bebit, tahtagáni ném borziá.
EXO 36:34 Tahtagesh gón teláhá sarpósh kortant o pa gwarbastáni dáragá teláhay karhi‌esh addh kort. Gwarbastesh ham gón teláhá sarpósh kortant.
EXO 36:35 Cha ásmáni o jamu o sohrén pazhmá o hurtgwápén lilomá pardahé addhesh kort o honarmandén ezmkáréá eshiay sará karrubiay naksh addh kortant.
EXO 36:36 Pa é pardahay dranjagá chár chegerdi menokesh addh kort o gón teláhá sarpóshesh kortant, teláhay karhi‌esh ham addh kort o pa menokán nograhay chár bonheshtesh addh kort.
EXO 36:37 Ásmáni o jamu o sohrén pazhm o hurtgwápén lilomesh zort o pa tambuay dapá ranggwápén pardahé addhesh kort.
EXO 36:38 Pa é pardahá panch menokesh gón karhián addh kort o menokáni sarok o bandesh gón teláhá sarpósh kortant o pa menokán brenjay panch bonheshtesh addh kort.
EXO 37:1 Besalélá cha chegerday dárá pétié addh kort ke drájiá do o ném dast at, práhiá yakk o ném dast o borziá ham yakk o ném dast.
EXO 37:2 Pétii cha dhanná o tahá gón zagrén teláhá sarpósh kort. Gerdágerd teláhay patthié peri kort.
EXO 37:3 Pa pétiá teláhay chár karhi‌i addh kort o pétiay chárén pádagáni lecchéntant, do karhi yakk némagéá o do á dega némagá.
EXO 37:4 Cha chegerday dárá do gwarbáski addh kort o gón teláhá sarpóshi kortant.
EXO 37:5 Pa pétiay chest kanagá gwarbáski cha pétiay kashay karhián gwázéntant.
EXO 37:6 Cha zagrén teláhá kapáraté addhi kort o pétii sarpósh kort. Drájiá do o ném dast at o práhiá yakk o ném dast.
EXO 37:7 Teláhay do karrubi‌i addh kort, teláhi zort o thappet o addhi kortant. É karrubi‌i sarpóshay doén sarán addh kortant,
EXO 37:8 yakk karrubié sarpóshay yakk saréá addhi kort o á dega karrubi domi sará. Sarpósh o doén saráni karrubi‌i jetá jetá addh nakortant, é yakthokkor atant.
EXO 37:9 Karrubi sarpóshay sarborá atant. Démesh gón yakdomiá at o chammesh gón sarpóshá. Bánzolesh borzádiá pach atant o sarpóshesh sáhél kortagat.
EXO 37:10 Cha chegerday dárá thébalé addhi kort. Drájiá do dast at, práhiá yakk dast o borziá yakk o ném dast.
EXO 37:11 Gón zagrén teláhá sarpóshi kort o teláhay patthié addhi kort o chárén némagán peri kort.
EXO 37:12 Thébalay sarbori tahtagá, chárén némagán teláhay patthié peri kort o tahtagay chérá, chárén némagán yakk panjagéay práhiay kaddén kábé peri kort.
EXO 37:13 Pa thébalá teláhay chár karhi‌i addh kort o karhi‌i thébalay chárén kondhán, pádagán per kortant.
EXO 37:14 É karhi paméshká kábay nazzikká atant ke thébalay chest kanagay wahdá gwarbáskán bedárant.
EXO 37:15 Thébalay chest kanagay gwarbáski cha chegerday dárá addh kort o gón teláhá sarpósh kortant.
EXO 37:16 Thébalay saray sámáni cha zagrén teláhá addh kortant, tál o tás o jag o hamá kásag ke pa réchagi korbánigay ér réchagá kár bandaga bant.
EXO 37:17 Cherágdáni cha zagrén teláhá addh kort. Cherágdán, cha boná beger tán sháharhán, eshiay jend o pyálah o golbon o polli thappet o addh kortant. Jetá jetá addhi nakortant, é yakthokkor atant.
EXO 37:18 Cha cherágdánay kashán shash sháharh dar átk, say sháharh cha cherágdánay yakk kashéá o say sháharh cha domi kashá.
EXO 37:19 Har sháharhá say pyálah per at, har pyálahá bádámay pollay warhén golbon o poll per at. Cherágdánay har shashén sháharh hamé paym atant.
EXO 37:20 Cherágdánay bonsháhá chár pyálah per at, gón bádámay pollay warhén golbon o pollán.
EXO 37:21 Yakk pyálahé awali doén sháharháni boná at, cha hamá jágahá kammé jahlter ke sháharh cha bonsháhá dar átkant, domi pyálah domi doén sháharháni boná o sayomi pyálah sayomi doén sháharháni boná at. Har shashén sháharháni chérá pyálah per at.
EXO 37:22 Golbon o sháharh o cherágdán yakthokkor atant. É sajjahéni cha yakkén thappetagén zagrén teláhá addh kortant.
EXO 37:23 Pa cherágdáná hapt cherági addh kort o cherágdánay sambálagay awzár o sámáni cha zagrén teláhá addh kortant.
EXO 37:24 Pa cherágdán o eshiay sajjahén sámánáni addh kanagá yakk tálánté zagrén teláhi kármarz kort.
EXO 37:25 Bósóchi korbánjáhi cha chegerday dárá addh kort. Chárkondh at. Drájiá yakk dast at, práhiá ham yakk dast o borziá do dast. Kánth o korbánjáhi hór addh kortant, yakthokkor atant.
EXO 37:26 Korbánjáhay sar o sajjahén némag o kánthi gón zagrén teláhá sarpósh kortant o chapp o chágerdá teláhay patthié peri kort.
EXO 37:27 Pa korbánjáhá teláhay do karhi‌i addh kort o hamé patthiay chérá peri kortant. Korbánjáhay doén kashán do do karhi‌i per kort ke chest kanagay wahdá gwarbáskán bedárant.
EXO 37:28 Gwarbáski cha chegerday dárá addh kortant o gón teláhá sarpósh kortant.
EXO 37:29 Per moshagi pákén rógen o asil o washbóén sóchokii addh kort, hamá paymá ke atrsáz washbó addha kanant.
EXO 38:1 Sóchagi korbánigáni korbánjáhi cha chegerday dárá addh kort. Drájiá panch dast at o práhiá ham panch dast. Korbánjáh chárkondh at. Borziá say dast at.
EXO 38:2 Korbánjáhay chárén kondháni sará yakk o yakk kánthé addhi kort. Kánth o korbánjáhi jetá jetá addh nakortant, é yakthokkor atant. Korbánjáhi gón brenjá sarpósh kort.
EXO 38:3 Korbánjáhay tagári o bard o tás o chársháh o ásdán, sajjahén sámáni cha brenjá addh kortant.
EXO 38:4 Pa korbánjáhá jálié, bezán brenjay thathé addhi kort o korbánjáhay lambáni patthiay chérá anchó éri kort ke korbánjáhay borziay némá sar but.
EXO 38:5 Pa brenjén jáliay chárén kondhán chár karhi‌i addh kort ke gwarbáskán bedárant.
EXO 38:6 Cha chegerday dárá gwarbáski addh kortant o gón brenjá sarpóshi kortant.
EXO 38:7 Gwarbáski cha karhián gwázéntant ke korbánjáhay chest kanagay wahdá korbánjáhay doén kashán bebant. Korbánjáhi cha dáray tahtagán addh kort o tóki hórk o hálig esht.
EXO 38:8 Brenjay trashti gón trashtay pádagá cha hamá janénáni ádénkán addh kort ke tambuay dapá hezmati kár kanagá atant.
EXO 38:9 Tambuay péshgáhi addh kort. Péshgáhay jonubi némagay hurtgwápén lilomay pardah drájiá yakk sad dast atant.
EXO 38:10 Gón bist menok o bist brenjén bonheshtá addhi kortant. Menokáni band o karhi nograhayg atant.
EXO 38:11 Shomáli némagay pardah ham drájiá yakk sad dast atant. Gón bist menok o bist brenjén bonheshtá addhi kortant. Menokáni band o karhi nograhayg atant.
EXO 38:12 Rónendi némagay pardah panjáh dast atant. Gón dah menok o dah bonheshtá addhi kortant. Menokáni band o karhi nograhayg atant.
EXO 38:13 Péshgáhay ródarátki némagay pardah, hamá némag ke róch dara kayt, panjáh dast atant.
EXO 38:14 Péshgáhay dapay yakk némagéay pardah pánzdah dast atant. Gón say menok o say bonheshtá addhi kortant.
EXO 38:15 Dapay á dega némagay pardah ham pánzdah dast atant. Gón say menok o say bonheshtá addhi kortant.
EXO 38:16 Péshgáhay chapp o chágerday sajjahén pardah hurtgwápén lilomayg atant.
EXO 38:17 Menokáni bonhesht brenjayg atant o band o karhi‌esh nograhayg atant. Menokáni sarok gón nograhá sarpósh atant. Péshgáhay sajjahén menokáni band nograhayg atant.
EXO 38:18 Péshgáhay dapay pardah ásmáni o jamu o sohrén pazhm o hurtgwápén lilomayg at o ranggwáp at. Pardahay dráji bist dast at o péshgáhay é dega pardaháni paymá, borzii panch dast at.
EXO 38:19 Pardahay chár menok o chár brenjén bonhesht atant. Menokáni band o karhi nograhayg atant o menokáni sarok gón nograhá sarpósh atant.
EXO 38:20 Tambuay o péshgáhay chapp o chágerday sajjahén méh brenjayg atant.
EXO 38:21 Tambuay, bezán sháhediay tambuay sámán hamesh atant ke Láwián Mussáay hokmay sará o dini péshwá Hárunay mardénchokk Itámáray sarókiá hesáb kort o nebeshtah kortant.
EXO 38:22 Harché ke Hodáwandá Mussá hokm dátagat, Besalélá addh kort. Besalél Yahudáay kabilahay mardomé at, Uriay chokk o Ahuray nomásag at.
EXO 38:23 Cha Dánay kabilahá Ahimásakay mardénchokk Ohulyáb é káray sarjam kanagá gón Besalélá gón at. Ohulyáb ájenók o baladén ezmkáré at o gón ásmáni o jamu o sohrén bandikk o hurtgwápén lilomá ranggwápiia kort.
EXO 38:24 Hamá chest kanagi korbánig, bezán hamá thékién teláh ke pa pákén jágahay addh kanagá kármarz butant, pákén jágahay shekelay hesábá, sarjamiá bist o noh tálánt o hapt sad o si shekel atant.
EXO 38:25 Mahlukay dátagén nograh ke hesáb kanag butant, pákén jágahay shekelay hesábá, yakk sad tálánt o hazár o hapt sad o haptád o panch shekel atant. É nograh cha hamá mardomán gerag butagatant ke mardomshomáriá hesáb kanag butagatant,
EXO 38:26 bezán cha har mardomá yakk bekáé. Yakk bekáé ném shekel ent, pákén jágahay shekelay hesábá. É nograh cha hamá mardomán gerag butagatant ke mardomshomáriá hesáb kanag butagatant, bezán cha bist sálag o cha bist sálá masterén mardénán. É mardén sarjamiá shash lakk o say hazár o panch sad o panjáh atant.
EXO 38:27 É yakk sad tálántén nograh pa pákén jágahay bonhesht o pardahay bonheshtáni addh kanagá kármarz butant, bezán sad tálánt pa sad bonheshtá, pa har bonheshtá yakk tálánté.
EXO 38:28 Hazár o hapt sad o haptád o panch shekeli pa menokáni karhi o menokáni sarokáni sarpósh o menokáni bandáni addh kanagá kármarz kort.
EXO 38:29 Hamá thékién brenj ke chest kanagi korbánig kanag butant, haptád tálánt o do hazár o chár sad shekel atant.
EXO 38:30 Sháhediay tambuay dapay bonhesht, brenjén korbánjáh o áiay brenjén jáli o korbánjáhay sajjahén sámán,
EXO 38:31 péshgáhay chapp o chágerday bonhesht, péshgáhay dapay bonhesht, tambuay sajjahén méh o péshgáhay chapp o chágerday sajjahén méh cha hamé brenján addh kanag butant.
EXO 39:1 Cha ásmáni o jamu o sohrén pazhmá dazgwápén godesh addh kort ke wahdé péshwá pa hezmat kanagá pákén jágahá rawt, gwaráesh bekant. Hamá paymá ke Hodáwandá Mussá hokm dátagat, pa péshwáén Háruná pákén godesh addh kort.
EXO 39:2 Épódesh cha teláhá o cha ásmáni o jamu o sohrén pazhm o hurtgwápén lilomá addh kort.
EXO 39:3 Áyán teláhay názorkén ták thappet o tayár kort. Tákesh dráj drájá borretant o bandikkesh addh kort ke gón ásmáni o jamu o sohrén pazhm o hurtgwápén lilomá hawáresh bekanant. É kár honarmandén ezmkáréá kort.
EXO 39:4 Do sarkópagesh addh kort o épóday doén srugán peresh kort ke épód mohr bandag bebit.
EXO 39:5 Épóday band épóday paymá at, bezán cha teláhá o cha ásmáni o jamu o sohrén pazhm o hurtgwápén lilomá tayár kanag butagat. É band o épód hór gwapag butant, é yakthokkor atant, anchó ke Hodáwandá Mussá hokm dátagat.
EXO 39:6 Senge solaymánesh teláhay mohragjáhán nádéntant o anchó ke mohrá ájenanat o naksha kanant, Esráilay mardénchokkáni námesh áyáni sará naksh kortant.
EXO 39:7 Gorhá é seng ke Esráilay chokkáni yátgéjiay seng atant, épóday sarkópagán peresh kortant, hamá paymá ke Hodáwandá Mussá hokm dátagat.
EXO 39:8 Sénagpóshé addhesh kort. Épóday paymá addhesh kort, bezán cha teláhá o cha ásmáni o jamu o sohrén pazhm o hurtgwápén lilomá addhesh kort. É kár honarmandén ezmkáréá kort.
EXO 39:9 É chárkondh o dotal at. Dráji o práhiá yakk yakk bechillé at.
EXO 39:10 Eshiay sará chár redá gránkimmatén sengesh lecchént, awali redá rubi, pokráj o bayrel,
EXO 39:11 domi redá pérózah, nilom o zomorrod,
EXO 39:12 sayomi redá shunzén ákut, akik o jamuén ákut,
EXO 39:13 cháromi redá teláhrangén ákut, senge solaymán o yashm. É sengesh teláhay mohragjáhán nádéntant.
EXO 39:14 Seng, Esráilay chokkáni námáni hesábá atant, dwázdah nám o dwázdah seng. Har yakkéay sará cha dwázdahén kabilahán yakkéay nám chó mohrá naksh at.
EXO 39:15 Pa sénagpóshá cha zagrén teláhá restagén sáday dhawlén zamzilokesh addh kort.
EXO 39:16 Teláhay do mohragjáh o teláhay do karhi‌esh addh kort o karhi‌esh sénagpóshay do srugá per kortant.
EXO 39:17 Teláhay doén zamzilokáni yakk yakk saré zortesh o sénagpóshay doén srugáni karhián mánesh kortant o
EXO 39:18 zamzilokáni domi saresh zort o gón doén mohragjáhán lecchéntant, épóday sarkópagáni démi némagá.
EXO 39:19 Cha teláhá do karhi‌esh addh kort o sénagpóshay á dega doén srugán peresh kortant, hamá lambán ke démesh gón épódá at.
EXO 39:20 Cha teláhá dega do karhi‌esh addh kort o épóday démá, sarkópagáni jahli némagá, épóday banday sarborá peresh kortant, hamódá ke sarkópag gón épódá lecchetagant.
EXO 39:21 Sénagpóshay karhi‌esh gón ásmánrangén bandán épóday karhián anchó bastant ke épóday banday sará bebant o sénagpósh cha épódá masorit, hamá paymá ke Hodáwandá Mussá hokm dátagat.
EXO 39:22 Épóday kabáhesh sarjamiá cha ásmánrangén godá gwapt o addh kort.
EXO 39:23 Kabáhá gotthé per at. Gotthay chapp o chágerdá mohrén káláray paymén dazgwápén lamb per at ke gotth maderit.
EXO 39:24 Ásmáni o jamu o sohrén pazhmay o hurtgwápén lilomay anáresh addh kort o kabáhay dámonay lambay chapp o chágerdá per kortant.
EXO 39:25 Zagrén teláhay zhángesh addh kort o kabáhay lambay chapp o chágerdá, anáráni nyámá peresh kortant.
EXO 39:26 Kabáhay dámonay chapp o chágerdá zhángé o anáré, zhángé o anáré per kanánesh kort, hamá paymá ke Hodáwandá Mussá hokm dátagat. Hezmatay wahdá Háruná é kabáh gwará kanagi at.
EXO 39:27 Pa Hárun o Hárunay mardénchokkán cha hurtgwápén lilomá jámagesh gwapt o addh kort.
EXO 39:28 Pág o koláh cha sharrén lilomá o chérpósh cha hurtgwápén lilomá addh kanag butant.
EXO 39:29 Cha hurtgwápén lilom o ásmáni o jamu o sohrén pazhmá ranggwápén lánkigé gwapt o addhesh kort, hamá paymá ke Hodáwandá Mussá hokm dátagat.
EXO 39:30 Cha zagrén teláhá patthié, bezán pákén tájé addhesh kort o é labzesh chó mohray nakshá patthiay sará naksh kortant: “Wapke Hodáwandi.”
EXO 39:31 Ásmánrangén bandé peresh kort ke patthi págay sará bóshtit, hamá paymá ke Hodáwandá Mussá hokm dátagat.
EXO 39:32 Tambuay, bezán sháhediay tambuay sajjahén kár sarjam butant. Esráilián sajjahén kár kortant. Hamá paymá ke Hodáwandá Mussá hokm dátagat, hamá paymá kortesh.
EXO 39:33 Sháhediay tambuesh Mussáay kerrá áwort, tambu o sajjahén sámán, bezán karhi, tahtag, gwarbast, menok, bonhesht,
EXO 39:34 cha gwarándhay ratkag o sohr butagén póstá jórh kortagén pósh, cha dega paymén mohrén póstá jórh kortagén pósh, sháhediay pétiay démá lónjánén pardah,
EXO 39:35 sháhediay péti o gwarbásk o kapáratay pósh,
EXO 39:36 thébal o sajjahén sámán o pákwandhén nagan,
EXO 39:37 cha zagrén teláhá addh butagén cherágdán o cherágdánay cherág o sajjahén sámán o pa cherágán thél,
EXO 39:38 teláhay korbánjáh, per moshagi rógen, washbóén sóchoki, tambuay dapay pardah,
EXO 39:39 brenjén korbánjáh o áiay brenjén jáli o gwarbásk o sajjahén sámán, trasht o pádag,
EXO 39:40 péshgáhay pardah o menok o bonhesht, péshgáhay dapay pardah o sád o méh, tambuay, bezán sháhediay tambuay káráni sajjahén sámán o
EXO 39:41 dazgwápén god ke pákén jágahá hezmat kanagay wahdá gwará kanaga bant, bezán dini péshwá Hárunay pákén god o Hárunay chokkáni péshwái god, sajjahénesh áwortant.
EXO 39:42 Esráilián é sajjahén kár sarjam kortant, hamá paymá ke Hodáwandá Mussá hokm dátagat.
EXO 39:43 Mussáyá sajjahén kár cháretant o disti ke áyán kár sarjam kortag. Hamá paymá ke Hodáwandá hokm dátagat, áyán hamá paymá kortagat. Nun Mussáyá á barkat dátant.
EXO 40:1 Hodáwandá gón Mussáyá gwasht:
EXO 40:2 “Awali máhay awali róchá tambuá, bezán sháhediay tambuá mekk kan.
EXO 40:3 Sháhediay pétiá tambuay tahá ér kan o pardahá pétiay démá lónján kan ke péti chér o andém bebit.
EXO 40:4 Thébalá tóká bar o sámánán thébalay sará pa red o band ér kan. Cherágdáná tóká bar o cherágáni per kan.
EXO 40:5 Bósóchiay teláhén korbánjáhá sháhediay pétiay dém pa démá ér kan o tambuay dapay pardahá per kan.
EXO 40:6 Sóchagi korbánigáni korbánjáhá tambuay démá, bezán sháhediay tambuay démá ér kan o
EXO 40:7 trashtá sháhediay tambu o korbánjáhay nyámá ér kan o ápi mán kan.
EXO 40:8 Tambuay chapp o chágerdá péshgáhay pardahán mekk kan o péshgáhay dapay pardahá per kan.
EXO 40:9 Per moshagi rógen bezur o tambu o tambuay tahay sajjahén sámánán per mosh o wapkesh kan ke pák bebant.
EXO 40:10 Sóchagi korbánigáni korbánjáhá o korbánjáhay sajjahén sámánán ham rógen per mosh o korbánjáhá wapk kan ke sakk pák bebit.
EXO 40:11 Trasht o trashtay pádagá ham rógen per mosh o wapkesh kan.
EXO 40:12 Hárun o Hárunay mardénchokkán sháhediay tambuay dapá byár o áyáni jáná beshód.
EXO 40:13 Pákén godán Hárunay gwará day, rógeni per mosh o wapki kan ke dini péshwá bebit o mani hezmatá bekant.
EXO 40:14 Hárunay chokkán byár o jámagánesh gwará day o
EXO 40:15 anchó ke taw áyáni pet rógen per moshtag, áyáni jendá ham rógen per mosh ke dini péshwá bebant o mani hezmatá bekanant. Gón rógen per moshagá áyán dini péshwáia rasit o é péshwái abadmána bit, nasláni nasl.”
EXO 40:16 Mussáyá sajjahén kár hamá paymá kortant ke Hodáwandá hokm dátagat.
EXO 40:17 Cha Mesrá dar áyagay domi sálay awali máhay awali róchá tambu mekk kanag but.
EXO 40:18 Mussáyá tambu mekk kort, bonheshti ér kortant, tahtagi jatant, gwarbasti mán tarréntant o menoki mekk kortant.
EXO 40:19 Mussáyá pardah sháhediay tambuay sará dátant o sarpóshi pardaháni sará pach kortant, hamá paymá ke Hodáwandá Mussá hokm dátagat.
EXO 40:20 Sháhediay doén wáneki zort o pétiá kortant, gwarbáski pétiá per kortant o kapáratay sarpóshi pétiay sará dát.
EXO 40:21 Pétii tambuay tóká bort o pardahi pétiay démá dratk o pétii chér o andém kort, hamá paymá ke Hodáwandá Mussá hokm dátagat.
EXO 40:22 Thébali sháhediay tambuay tahá, tambuay shomáli némagá, cha pardahá dhann ér kort
EXO 40:23 o nagani Hodáwanday bárgáhá thébalay sará ér kortant, hamá paymá ke Hodáwandá Mussá hokm dátagat.
EXO 40:24 Cherágdáni sháhediay tambuay tahá, thébalay dém pa démá, tambuay jonubi némagá ér kort o
EXO 40:25 hamódá Hodáwanday bárgáhá cherági cherágdáná per kortant, hamá paymá ke Hodáwandá Mussá hokm dátagat.
EXO 40:26 Teláhay bósóchi korbánjáhi sháhediay tambuay tahá, pardahay démá ér kort o
EXO 40:27 korbánjáhay sará washbóén sóchokii chér sótk, hamá paymá ke Hodáwandá Mussá hokm dátagat.
EXO 40:28 Tambuay dapay pardahi per kort.
EXO 40:29 Sóchagi korbánigay korbánjáhi zort o sháhediay tambuay démá ér kort o áiay sará sóchagi korbánig o dánay korbánigi pésh kort, hamá paymá ke Hodáwandá Mussá hokm dátagat.
EXO 40:30 Brenjén trashti sháhediay tambu o korbánjáhay nyámá ér kort o shódagi ápi mán kort.
EXO 40:31 Mussá, Hárun o Hárunay chokkán hamé áp zortant o wati dast o pád shoshtant.
EXO 40:32 Har wahdá ke sháhediay tambuá yá korbánjáhay nazzikká shotant, watá shoshtesh, hamá paymá ke Hodáwandá Mussá hokm dátagat.
EXO 40:33 Mussáyá tambu o korbánjáhay chapp o chágerdá péshgáhay pardah mekk kortant o péshgáhay dapay pardahi per kort. É paymá Mussáyá kár sarjam kort.
EXO 40:34 Jambará sháhediay tambu sarpósh kort o tambu cha Hodáwanday shán o shawkatá sarréch but.
EXO 40:35 Mussáyá sháhediay tambuay tahá shot nakort ke tambu jambará geptagat o cha Hodáwanday shán o shawkatá sarréch at.
EXO 40:36 Wati sajjahén saparán, Esráili hamá wahdá rahádaga butant ke jambar cha tambuay sará chesta but,
EXO 40:37 bale tánke jambar chesta nabut, á rahádaga nabutant. Tán jambaray chest bayagay róchá hamódá neshtant.
EXO 40:38 Sajjahén saparán, Esráiliána dist ke róchá Hodáwanday jambar tambuay sará ent o shapá jambaray tahá ásé rók ent.
PSA 1:1 Bahtáwar hamá ent ke badkáráni shawr o saláhay sará narawt, gonahkáráni rahsará naóshtit o rishkand kanókáni diwáná nanendit,
PSA 1:2 hamá ke wáhagi gón Hodáwanday tálimá ent o róch o shap áiay tálimay sará pekra kant.
PSA 1:3 Á hamá drachkay paymá ent ke rombókén jósaréay kerrá keshag butag o mósomay sará nibaga dant o táki nagimmorant, harché ham ke kant kámyába bit.
PSA 1:4 Bale badkár chosh naant, á hamá pog o paláráni paymá ant ke gwátesha rópit o bárt.
PSA 1:5 Gorhá bezán ke badkárán, pa dádrasiá óshtagay wák o twán nést o gonahkár pahrézkáráni diwáná hór buta nakanant.
PSA 1:6 Ke Hodáwand pahrézkáráni ráhay negahpán ent, bale badkáráni ráh tabáhi o bégwáhi ent.
PSA 2:1 Á dega kawm pa ché shóresha kanant o ráj chiá mopt o náhudagén pandala sázant?
PSA 2:2 Jahánay bádsháh tayára bant o hákem yakjáh mocch, Hodáwand o áiay Masihay helápá óshtant:
PSA 2:3 “Byáét tán áyáni sád o bandán beborrén o zamzilánesh besendén.”
PSA 2:4 Hodáwand ke ásmáná bádsháhia kant kandit o áyán maskará kant.
PSA 2:5 Á wahdá wati hezhmay tahá gón áyán habara kant, wati gazabay tahá áyána torsénit:
PSA 2:6 “Man wati bádsháh, wati pák o gechénién kóh, Sahyunay sará nendáréntag.”
PSA 2:7 Nun Hodáwanday hokmá darshána kanán ke maná gwashti: “Taw mani Bacch ay, maróchi man tará pédá kortag.
PSA 2:8 Cha man belóth tán kawmán tai mirás bekanán o zeminay chárén kondháni ráján tai sawgát.
PSA 2:9 Gón ásenén asáé áyán prósha dayay o kunzagáni paymá hurt hurtesha kanay.”
PSA 2:10 Paméshká, oo bádsháhán! Aglmand bebét. Anchosh oo jahánay hákemán! Adab bezurét.
PSA 2:11 Pa tors, Hodáwanday hezmatá bekanét o pa drahag pádáni kapét.
PSA 2:12 Chokká bechokkét chó mabit ke zahr begipt o shomá ráhay némá gár o bégwáh bebét, chiá ke á anágat bránza gipt. Bahtáwar hamá ant ke áiay mayár o báhótha bant.
PSA 3:1 Dáuday Zabur, hamá wahdá ke cha wati chokk Abshálumá jehagá at. Oo Hodáwand! Mani dozhmen chenkadar báz ant. Bázéné mani helápá pád áyagá ent.
PSA 3:2 Bázéné mani bárawá gwashagá ent: “Hodá eshiá narakkénit.” Ósht...
PSA 3:3 Bale taw oo Hodáwand! Wat mani chágerdá espar ay, Mani shán o shawkat ay, maná sarperáza kanay.
PSA 3:4 Hodáwandon gón borzén tawáré peryáta kort o áiá cha wati pák o gechénién kóhá maná passaw dát. Ósht...
PSA 3:5 Man ásudag waptán o pád átkán, chiá ke Hodáwand mani posht o panáh at.
PSA 3:6 Cha lakkáni lakká natorsán ke cha har némagá maná angerresh kortag.
PSA 3:7 Oo Hodáwand! Pád á. Oo mani Hodá! Maná berakkén. Taw ay ke mani dozhmenáni démá shahmáta janay o badkáráni dap o dantánána próshay.
PSA 3:8 Rakkénók Hodáwand ent, tai barkat tai kawmá berasát! Ósht...
PSA 4:1 Pa sázger o washáwázáni sálárá. Gón zehi o simmi sázán. Dáuday Zabur. Oo mani dádrasén Hodá! Passaw beday wahdé peryáta kanán. Sakki o sóriáni wahdá mani dast o bánzolet pach kortant. Maná mehr o rahmat baksh o dwáyánon gósh dár.
PSA 4:2 Oo mardomán! Tán kadéná mani ezzat kamsharap kanaga bit? Tán chontá náhudagiá dósta dárét o drógay padá gardét? Ósht...
PSA 4:3 Bezánét ke Hodáwandá Hodádóst pa wat zortag o jetá kortagant. Wahdé Hodáwandá tawára kanán, á eshkont.
PSA 4:4 Hezhmay tahá gonáh makanét. Éshiay badalá, wapsagay wahdá, wati delá é bárawá pegr kanét o árám gerét. Ósht...
PSA 4:5 Barhakkén korbánig peshkash kanét o Hodáwanday sará tawkal.
PSA 4:6 Bázéné gwashit: “Kay ent pa má néki bekant?” Oo Hodáwand! Wati démá pa má rozhnág kan.
PSA 4:7 Taw mani del cha shádániá sarréch kortag, cha áyáni hamá wahday shádániá géshter ke dán o gallah o tázagén sharábesh báz bebant.
PSA 4:8 Árámiá drája kasshán o wáb ham kapán, chiá ke tahná taw, oo Hodáwand, maná émeniay tahá nendénay.
PSA 5:1 Pa sázger o washáwázáni sálárá. Gón nali sázán. Dáuday Zabur. Oo Hodáwand! Mani gappán gósh bedár, mani nálagán delgósh kan.
PSA 5:2 Oo mani bádsháhén Hodá! Mani peryátá beshkon, chiá ke tai gwará dwá kanán.
PSA 5:3 Oo Hodáwand! Bámgwáhán taw mani tawárá eshkonay, bámgwáhán, gón dazbandi wati wáhagán pésha kanán o wadáriga bán.
PSA 5:4 Taw choshén Hodáé naay ke cha badiá delwassh bebay, badi gón taw jalleta nakant.
PSA 5:5 Porkebr o gorunák tai démá óshtáta nakant o cha sajjahén badkárán naprata kanay.
PSA 5:6 Drógbandán bégwáha kanay, Hodáwand cha hónig o préb‌kárán naprata kant.
PSA 5:7 Bale man cha tai mehrá tai lógá káyán o cha tai torsá tai parasteshgáhá kóndhána kapán.
PSA 5:8 Oo Hodáwand! Pa mani dozhmenáni sawabá, gón wati adl o ensápá maná rahshóni beday o wati ráhá pa man sáp o tachk bekan.
PSA 5:9 Chiá ke rásti áyáni zobáná nést o del o darunesh tabáhi ent o bass. Gotth o galuesh práhén kabré o wati zobáná pa cháplusi kára bandant.
PSA 5:10 Oo Hodá! Eshán mayárbár hesáb kan, bell ke wati shawráni tahá beboddhant. Áyáni bázén náparmániáni sawabá, cha wat duresh kan, chiá ke tai helápá shóreshesh kortag.
PSA 5:11 Bale á sajjahén ke tai báhóth o mayára bant, shádmáni bekanant, dáemá sáz o zémel bejanant. Áyán wati sáhegay chérá negahpáni bekan, tán harkas ke tai námay dóstdár ent gón tai námá shádán bebit.
PSA 5:12 Allamá, taw, oo Hodáwand, pahrézkárán barkata dayay o áyán gón wati mehr o rahmatá esparay paymá negahpána bay!
PSA 6:1 Pa sázger o washáwázáni sálárá. Gón zehi o simmi sázán. “Sheminitay” tarzay sará. Dáuday Zabur. Oo Hodáwand! Maná gón wati hezhmá hakkal maday o gón wati gazabá neherr.
PSA 6:2 Hodáwandá! Mani sará rahm kan chiá ke gimmortagán. Oo Hodáwand! Maná dráh bekan chiá ke jesm o jánon paréshán ent.
PSA 6:3 Arwáhon sakk békarár o jalájósh ent. Oo Hodáwand! Tán kadén? Tán kadén?
PSA 6:4 Hodáwandá! Wati démá gón man tarrén o mani sáhá berakkén, wati mehray sawabá maná neját beday.
PSA 6:5 Chiá ke mordag tará yát korta nakanant, kay ent ke cha mordagáni jaháná tai shográ begipt?
PSA 6:6 Cha nálagán dam bortagán, har shap gandalán cha gréwagá ménán o tahtá gón arsán tarra kanán.
PSA 6:7 Chammon cha bázén andóhán nezór butagant o cha bázén dozhmenán tahár.
PSA 6:8 Oo sajjahén badkárán! Cha man dur bét, chiá ke Hodáwandá mani gréwagáni tawár eshkotagant.
PSA 6:9 Hodáwandá mani peryát gósh dáshtagant, Hodáwand mani dwáyá mannit.
PSA 6:10 Mani sajjahén dozhmen sharmendag o sakk paréshána bant, á démá chahra dayant o pashal o sharmendaga bant.
PSA 7:1 Dáuday Shigáyun. Dáudá é Zabur Benyáminay kabilahay Kush námén mardoméay habaráni sawabá pa Hodáwandá darshán kortag. Oo Hodáwand, mani Hodá! Tai báhóth o mayára bán. Maná cha á sajjahénán ke mani randá kaptagant berakkén.
PSA 7:2 Agan na, á maná shéráni paymá derrant, chondh chondha kanant o maná rakkénóké nabit.
PSA 7:3 Oo Hodáwand, mani Hodá! Agan man choshén káré kortag o daston gonáhéá mén ent,
PSA 7:4 agan pa dóstéá badion kortag, yá ke dozhmené bémayárá poletag,
PSA 7:5 bell ke dozhmen mani padá byayt o áiay dast pa man berasit, mani zendá pádmál bekant o maná hákáni tahá bwápénit. Ósht...
PSA 7:6 Oo Hodáwand! Gón wati hezhmá jáh bejan o mani dozhmenáni gazabay démá pád á! Ágáh bay, oo mani Hodá! Taw ay ke dádrasiay járet jatag!
PSA 7:7 Bell ke kawmáni romb tai gwará yakjáh bant, cha borzá esháni sará hákemi bekan!
PSA 7:8 Bell ke Hodáwand pa kawmán shawr o hokm beborrit. Oo Hodáwand! Gón mani rásti o tachkiá, wati dadrasiá mani pahrézkáriáni sará bekan.
PSA 7:9 Oo ádelén Hodá ke del o darunána zánay! Badkáráni sherrián halás kan o pahrézkárán pa del mohr bedár.
PSA 7:10 Mani espar Hodá ent ke nékdelána rakkénit.
PSA 7:11 Hodá ádelén dadrasé, Hodáé ke har róch hezhma gipt.
PSA 7:12 Agan ensán pashómán mabit, wati zahmá téza kant o wati kamáná kasshit o tayára kant.
PSA 7:13 Áiá koshókén seláh tayár kortag o wati tirán ácheshéna kant.
PSA 7:14 Á mardomá bechár ke cha sherr o shórá ápos ent o cha petnahá lápporr, á dróga zayt.
PSA 7:15 Kallé kóchit o johla kant o hamá chátá kapit ke wat kótkagi.
PSA 7:16 Áiay petnah wati sará kapit o pasáti ham sará laggit.
PSA 7:17 Hodáwandá pa áiay adl o ensápá shogra gerán, borzén arshay Hodáwanday námá názénán.
PSA 8:1 Pa sázger o washáwázáni sálárá. “Gittitay” tarzay sará. Dáuday Zabur. Oo Hodáwand, may Hodáwand! Chenkadar porshawkat ent tai nám jahánay chárén kondhán. Taw wati shán o mazani ásmánáni sarborá sheng o tálán kortag.
PSA 8:2 Pa wat satá o saná, chokk o shirmechén nonnokáni dapá ham dátag ke tai dozhmenáni sawabá tará satá bekanant, tánke dozhmen o bérgirán chopp o bétawár bekanay.
PSA 8:3 Wahdé tai ásmánáni némagá chárán ke tai lankokáni ezm o honar ant máh o estáráni némagá, ke taw barjáh dáshtagant,
PSA 8:4 ensán chié ke taw áiay gamwár bebay o bani ádam kay ent ke áiay delgóshá bedáray?
PSA 8:5 Bale angat taw cha préshtagán bass kammoké kamter kort o mazani o ezzatay táj sará dát.
PSA 8:6 Wati dastay sajjahén káráni sará hákem kort o har chizz áiay pádáni chérá esht.
PSA 8:7 Sajjahén ramag o górrom gyábán o sahrái jánwar
PSA 8:8 ásmánay báli morg o daryáay máhig o har ché ke cha zeray ráhá gwazit.
PSA 8:9 Oo Hodáwand, may Hodáwand! Chenkadar porshawkat ent tai nám jahánay chárén kondhán.
PSA 9:1 Pa sázger o washáwázáni sálárá. “Mawt-labbénay” tarzay sará. Dáuday zabur. Tará, oo Hodáwand, cha delay johlánkián shogra gerán, tai sajjahén ajabén kárán darshána kanán.
PSA 9:2 Tai gwará gal o shádmánia kanán. Oo borzén arshay Hodá! Tai námá názénán.
PSA 9:3 Wahdé mani dozhmen pada kenzant, cha tai démá lakoshant o tabáh o haláka bant.
PSA 9:4 Chiá ke taw mani hakk o ensáp pa sharri dáshtag, wati tahtá neshtagay o pa ensáp dádrasi kortag.
PSA 9:5 Kawmet hakkal dátagant, badkár tabáh o barbád kortagant o áyáni nám abad tán abad gár o bégwáh kortag.
PSA 9:6 Dozhmen, dáemi wayránagáni tahá gár o gomsár butagant, áyáni shahráni risshag o wandhálet cha boná kasshetagant, tantaná áyáni yát ham gár o zawál butag.
PSA 9:7 Bale Hodáwand tán abad bádsháhia kant, áiá wati shawr o dádrasiay taht páydár kortag.
PSA 9:8 Á wat jaháná gón adlá dádrasia kant, kawmáni sará gón ensápá shawra borrit.
PSA 9:9 Hodáwand pa zolm distagénán, borzén kaláté kaláté borzén, mán sakkén sáhatán.
PSA 9:10 Á ke tai námá zánant tai sará tawkala kanant chiá ke taw, oo Hodáwand, wati hodónákén lóthók yalah nakortagant.
PSA 9:11 Hodáwandá, ke tahti Sahyuná ent, benázénét, kawmáni nyámá áiay kortagén kárán jár janét.
PSA 9:12 Chiá ke á ke hónáni bérgir ent, eshán yáta kant zolm distagénáni peryátána nashamóshit.
PSA 9:13 Oo Hodáwand! Mani sará rahm kan, hamá ázárán ke cha dozhmenáni dastá maná rasant bechár, taw ke cha markay darwázagán maná sarperáza kanay,
PSA 9:14 tánke tai sajjahén satá o tawsipán Sahyunay Jenekay darwázagáni démá barjáh dárán o shádmáni bekanán ke taw maná rakkéntag.
PSA 9:15 Kawm, wati hamá kótkagén kallá kaptagant, áyáni pád hamá dámá band geptag o passetagant ke watesh chér kortagat.
PSA 9:16 Hodáwandá watá gón wati adl o ensápá pajjáréntag, badkár cha wati kortagén kárán wat dámá kapant. Zegr... Ósht...
PSA 9:17 Badkár mordagáni jaháná pera tarrant, á sajjahén kawm ke Hodáyá shamóshant.
PSA 9:18 Bale hájatmand harwahd shamóshaga nabant o zolm distagénáni omét tán abad barbáda nabit.
PSA 9:19 Oo Hodáwand! Pád á o mayl ke ensán báládast bebit, bell ke tai dargáhá kawmáni shawr o hokm borrag bebit.
PSA 9:20 Oo Hodáwand! Torsesh jesm o jáná perrén tán kawm bezánant ke ensán ant o bass. Ósht...
PSA 10:1 Oo Hodáwand! Pa ché dur óshtátagay? Chiá watá sakkén sáhatán chéra dayay?
PSA 10:2 Badkár gón kebr nezórénán shekára kant, bell ke wati pandaláni dámá gereptár bebit.
PSA 10:3 Chiá ke badkárá wati delay wáhagáni sará pahr ent, lálech kanókán barkata dant o Hodáwandá bad o rada gwashit.
PSA 10:4 Badkár mán wati kebr o gorunákiá gwashit: “Hodá dar gétka nakant”, áiay sajjahén pegr o hayál esh ent ke “Hodáé nést”.
PSA 10:5 Wati ráhá modám kámyáb o sóbén ent, tai shawr o dádrasi cha áiay chammá dur ant, wati sajjahén dozhmenán rishkanda kant.
PSA 10:6 Wati delá gwashit: “Hechbar cha wati jáhá sorénag o jombénaga nabán nasláni nasl cha kazá o baláhán dura bán.”
PSA 10:7 Dap o zobáni cha nálat o préb o setamá porr ent, áiay zobánay chérá petnah o sherkáriá kodám bastag.
PSA 10:8 Métag o ábádiáni kaminá nendit, chér o panáhén jáhán bégonáhána koshit, chérokái béwasáni shekár kanagay shóházá ent.
PSA 10:9 Shéray paymá wati kaminá wadára kant, wadára kant o nezór o nátwánán wati panjagá kárit, panjagá kárit o dámá dawra dant.
PSA 10:10 Áiay shekár, lagatmál o zár o wára bant, áiay dastá gár o gomsára bant.
PSA 10:11 Wati delá gwashit: “Hodáyá shamoshtag démi póshéntag o hechbara nagendit.”
PSA 10:12 Oo Hodáwand! Pád á. Oo Hodá! Wati dastá shahár. Bazzagénán mashamósh.
PSA 10:13 Badkár pa ché Hodáyá bad o rada gwashit? Chiá wati delá gwashit: “Hodá dar gétka nakant”?
PSA 10:14 Bale albat taw genday. Sakki o sóriána genday, tán kár o ehtiárá wati dastá bedáray. Bazzag o béchárag watá tai sepordaga kanant, chórawáni madat kanók taw ay.
PSA 10:15 Sherr o badkáráni báská beprósh, áyáni sharáratay hesábá beger, hamá káráni hesábá ham ke áiá gwashtag: “Hodá dar gétka nakant”.
PSA 10:16 Hodáwand abad tán abad bádsháh ent, kawm cha áiay sardhagárá gár o gomsára bant.
PSA 10:17 Oo Hodáwand! Taw bazzagáni wáhagán gósha dáray, áyán delbaddhia dayay o habaránesh eshkonay.
PSA 10:18 Chóraw o setam distagénáni dadrasiá kanay tánke é hákién ensán dega baré tors o dehshat maperrénit.
PSA 11:1 Pa sázger o washáwázáni sálárá. Dáuday Zabur. Man Hodáwanday mayár o báhóth án, gorhá shomá maná che paymá gwashét: “Morgé bebay o wati kóhá bál kan.
PSA 11:2 Chiá ke haw, badkár kamáná kasshant o tiresh zehá dátag, ke mán tahárókiá nékdelán bejanant.
PSA 11:3 Agan bonred tabáh kanag bebant, gorhá pahrézkár ché korta kant?”
PSA 11:4 Hodáwand wati pákén parasteshgáhá ent, Hodáwanday taht ásmáná ent. Chammi gendagá ant, didagi ensánay chokkána ázmáit.
PSA 11:5 Hodáwand pahrézkár o badkárána chakkásit, áiay ruh cha hamáyán naprata kant ke sherr o sheddatesh dósta bit.
PSA 11:6 Badkáráni sará angar o gókorta gwárénit, áyáni jám o pyálahay bahr, sóchák o lewárén gwát ent.
PSA 11:7 Hodáwand ádel ent, áiá adl o ensáp dósta bit, nékdel áiay démá gendant.
PSA 12:1 Pa sázger o washáwázáni sálárá. “Sheminitay” tarzay sará. Dáuday Zabur. Oo Hodáwand! Berakkén, chiá ke hech Hodádósté pasht nakaptag o wapádár cha mardománi nyámá gár o bégwáh butagant.
PSA 12:2 Harkas gón hamsáhegá dróga bandit, cháplusén dapesh pa préb habara kanant.
PSA 12:3 Hodáwand har cháplusén dapá próshát o har bathák janókén zobáná borrát.
PSA 12:4 Gwashant: “Má gón wati zobáná kámyáb o sóbéna bén, may dap o lonth ham gón má ant, may wájah o master kay ent?”
PSA 12:5 Hodáwanda gwashit: “Cha nezórén mardománi lagatmáli o hájatmandáni nálagáni sawabá nun jáha janán. Man eshán hamá paymá émenia bakshán ke esháni armán ent.”
PSA 12:6 Hodáwanday habar asil o béayb ant, nograhay paymá ke cha kurahá dar átkag o hapt randá pák o sallah kanag butag.
PSA 12:7 Oo Hodáwand! Taw eshán negahpánia kanay, taw é dábén mardománi nyámá esháni posht o panáha bay.
PSA 12:8 Badkár har némagá tarr o tába kanant, á wahdi ke mardom palitiá ezzata dayant.
PSA 13:1 Pa sázger o washáwázáni sálárá. Dáuday Zabur. Oo Hodáwand! Tán kadén? Bárén maná tán abada shamóshay? Tán kadén wati démá cha man panáha kanay o póshénay?
PSA 13:2 Tán kadén mani pegr o andéshag maná ázár bedayant, har róch delon gamig? Tán kadén dozhmen mani sará báládast bebit?
PSA 13:3 Oo Hodáwand! Mani Hodá! Mani cháragá bekan o passaw day! Chammánon rozhná kan, agan na, markay wábá wapsán.
PSA 13:4 Chó mabit dozhmen begwashit: “Man áiay sará sóbén butagán”, badwáh shádán bebit ke mana larzán.
PSA 13:5 Bale tai mehray sará tawkala kanán, delon gal o bála bit ke taw maná rakkéntag.
PSA 13:6 Hodáwandá názénán, ke modám mani sará mehrabán butag.
PSA 14:1 Pa sázger o washáwázáni sálárá. Dáuday Zabur. Nádán wati delá gwashit: “Hodáé nést.” É palit ant o káresh sell o gandah, nékkáré nést.
PSA 14:2 Hodáwand cha ásmáná bani ádamá chárit tán begendit bárén dánáé hast ke Hodáay shóházá ent.
PSA 14:3 Sajjahénán wati ráh gár dátag, hórigá palit butagant, nékkáré nést, yakké ham nést.
PSA 14:4 Badkár hechbar sarpada nabant? É mani kawmá anchosha warant ke mardom nagana warant o Hodáwandá hech tawára nakanant.
PSA 14:5 Bale ódá wati torsay tahá boddhant, chiá ke Hodá gón pahrézkáráni nasl o padréchá ent.
PSA 14:6 Shomá setam distagénáni shawrbandián rishkanda kanét, bale Hodá esháni panáhgáh ent.
PSA 14:7 Kasé cha Sahyuná byáyát o Esráilá berakkénát. Wahdé Hodáwand washbahtiá pa wati kawmá pera tarrénit, Ákub gal o bála bit o Esráil shádehia kant.
PSA 15:1 Dáuday Zabur. Oo Hodáwand! Kay tai tambuá mehmán bebit? Kay tai pákén kóhá jahmenend bebit?
PSA 15:2 Hamá ke béayb gám bejant, adl o ensápá barjáh dárit o pa delsetki rásténá begwashit,
PSA 15:3 hamá ke gón wati zobáná kaséay báposhtá habaré magwashit, pa hamsáhegá badi makant o hamráhán ér majant,
PSA 15:4 hamá ke badkár áiay chammán hakir o béarzesh bebant, Hodátorsán ezzat o hormat bedant o wati labzay sará wapá bekant, toré zalar o zyán begendit,
PSA 15:5 hamá ke wati zarrá pa sutt madant o bégonáhéay helápá reshwat magipt, á ke eshán barjáha dárit hechbara nalarzit.
PSA 16:1 Dáuday shayr. Oo Hodá! Maná pa sharri bedár, ke tai mayár o báhóth butagán.
PSA 16:2 Gón Hodáwandá gwashton: “Taw ay mani Hodáwand, abéd cha taw pa man hech sharrié nést.”
PSA 16:3 Á pák o palgártagén ke zeminá ant, hamá sharapmand ant ke mani sajjahén shádmáni hamáyáni sawabá ent.
PSA 16:4 Á ke dega hodáéay randá tachant, áyáni gam o andóh sakk báza bit, áyáni hónén korbánigáni rasmán góna nabán o námánesh wati zobáná nayárán.
PSA 16:5 Oo Hodáwand! Taw mani gisshetagén bahrwandh o jám ay, taw mani bahrá sharriay sará dáray.
PSA 16:6 Mani hadd o simsar, deltabén jágahán gisshénag butagant, maná delkasshén mirásé dastá kaptag.
PSA 16:7 Man Hodáwandá názénán ke maná shawr o saláha dant, delon shappásán ham maná ráh sója dant.
PSA 16:8 Man modám Hodáwand wati dém pa démá distag, á mani rástén pahnátá ent, cha hamé sawabá mana nalarzán.
PSA 16:9 Paméshká, delon wassh o zobán shádán ent. Jesm o jánon mán ométay kalátá áráma gipt.
PSA 16:10 Chiá ke taw maná mordagáni jaháná yalaha nakanay o wati dóstdárá sarhag o pussagá naylay.
PSA 16:11 Taw maná zenday ráhá sója dayay o wati bárgáhá maná cha shádmániá sarrécha kanay. Tai rástén kashá, wasshi abadmán ent.
PSA 17:1 Dáuday dwá. Oo Hodáwand! Mani barhakkén peryátán beshkon o nálagánon gósh dár, dwáyánon beshkon, ke cha béryáén dap o lonthán dara káyant.
PSA 17:2 Cha tai bárgáhá maná dádrasi o ázáti sar bát, chammet rásténá begendátant.
PSA 17:3 Taw mani del ázmáesh kortag o shappásán mani cháragá átkagay, maná chakkásetaget o hech dar nagétkag, ahdon kortag ke dap gonáh makant.
PSA 17:4 Mardománi kár har ché ke bit, bale man cha tai lontháni gálá watá cha zálemáni ráhá dur dáshtag.
PSA 17:5 Mani pádáni pad tai ráhá naksh ant, pádon nalarzetagant.
PSA 17:6 Oo Hodá! Tará lóthán, chiá ke taw maná passawa dayay, gósh dár o habaránon beshkon.
PSA 17:7 Wati mehray ajabbatiá pésh bedár! Taw hamáyána rakkénay ke cha wati dozhmenán tai gwará mayár o báhótha bant.
PSA 17:8 Maná chó wati chammá besambál o wati bánzoláni sáhegá chér beday,
PSA 17:9 cha á badkárán ke maná gár o gomsára kanant o cha hamá jawrén dozhmenán ke maná angerresh kortag.
PSA 17:10 Á wati sengén delán mohra kanant o áyáni zobán porkebr o gorunákén habara kant.
PSA 17:11 Mani padesh geptagant o hamé annun maná angerresh kortag, chammesh pa man dótkag tán zeminá dawron bedayant.
PSA 17:12 Á shéréay paymá ant ke pa shekárá shodig ent, warnáén shéréay paymá ke kaminá neshtag,
PSA 17:13 Oo Hodáwand! Jáh jan, esháni démá dar á o zeminá bejanesh, gón wati zahmá maná cha badkárán berakkén.
PSA 17:14 Hodáwandá! Maná cha é paymén mardománi dastá ázát kan, cha é donyáay mardomán ke nasibesh tahná hamé donyá ent o bass, ke lápánesh cha wati hazánagá séra kanay, chokkesh báza bant o áyáni pasht kaptagén chizz pa chokkánesha rasit.
PSA 17:15 Bale man pa pahrézkári tai démá gendán, ágáh ke bán, cha tai gendagá séra bán.
PSA 18:1 Pa sázger o washáwázáni sálárá. Hodáwanday hezmatkár Dáuday Zabur. Dáudá é Zabur hamá wahdá pa Hodáwandá per bast ke Hodáwandá cha sajjahén dozhmenán o cha Sháulay dastá rakként. Dáudá chosh gwasht: Oo Hodáwand, oo mani zór o wák! Tará báz dósta dárán.
PSA 18:2 Hodáwand mani talár ent, mani kalát o mani rakkénók ent, mani Hodá mani talár ent o hamáiay poshtá báhóth o mayára bán. Á mani espar ent, mani zórákén rakkénók o mani sangar.
PSA 18:3 Hodáwandá ke satá o sanáay láhek ent tawára kanán o cha wati dozhmenána rakkán.
PSA 18:4 Markay sád o bandán maná patátagat o tabáhi o zawáliay hár o hirrópán maná torséntagat.
PSA 18:5 Mordagáni jahánay sád o bandán patátagatán o gón markay dámá, dém pa dém atán.
PSA 18:6 Wati paréshániáni tahá Hodáwandon tawár jat o komak lóthagay peryáton wati Hodáay gwará borz kort. Áiá cha wati parasteshgáhá mani tawár eshkot o mani komak lóthagay peryát áiay góshán raset.
PSA 18:7 Nun zemin chandhet o jomb o jóshá lagget, kóháni béh o bonyát ham larzetant, chiá ke á hezhm geptagat.
PSA 18:8 Cha áiay pónzá dutt dar átk o sóznákén ásé cha dapá, taptagén angar zobánok janagá atant.
PSA 18:9 Ásmáni ér áwort o jahl átk, syáhén jambar áiay pádáni chérá at.
PSA 18:10 Karrubiéay bánzoláni sará neshtagat o gwátay bánzoláni sará bál at.
PSA 18:11 Taháróki wati pósháki kort o jambaráni gobár o syáhén hawri wati chágerday kápár kortant.
PSA 18:12 Rozhn o drapshnáki cha áiá démá at o jambar chest bayagá atant, taptagén seng o ácheshén angar dara kaptant.
PSA 18:13 Hodáwandá cha ásmáná grandet o borzén arshay Hodáyá cha taptagén seng o ácheshén angarán wati tawár sar dát.
PSA 18:14 Áiá wati tir shántant o dozhmen sheng o sháng kortant, gróki dawr dát o sargardáni kortant.
PSA 18:15 Daryáay ápráh gendag butant o donyáay bonyát paddar, cha tai neherr o hakkalán cha tai pónzay trondén gwátá, oo Hodáwand!
PSA 18:16 Áiá cha borzádá dast shahárt o maná gepti, cha zyádahén ápá maná dar áworti o
PSA 18:17 cha zóráwarén dozhmená rakként, cha áyán ke napratesh mani sará próshtagat, chiá ke cha man zórákter atant.
PSA 18:18 Sakki o sóriáni róchá, mani démá dar átkant, bale Hodáwand mani posht o panáh at.
PSA 18:19 Áiá maná práh o émenén jágahé áwort o maná rakkénti, chiá ke cha man báz wassh o razá at.
PSA 18:20 Hodáwandá pa mani pahrézkáriá gón man néki kortag, mani dastáni pákiay mozz bakshátag,
PSA 18:21 chiá ke man Hodáwanday ráh yalah nadátag o cha Hodáyá dém pa badiá nashotagán.
PSA 18:22 Áiay parmán modám mani chammáni démá butagant o áiay hokm cha wat dur nadáshtagant.
PSA 18:23 Áiay démá tamán o béayb butagán o watá cha gonáhá dur dáshtag.
PSA 18:24 Hodáwandá mani pahrézkáriáni mozz dátag, áiá mani dastáni páki distag.
PSA 18:25 Taw gón wapádárán wapádár ay o gón tachkénán tachk.
PSA 18:26 Gón pákénán pák ay o gón repkkárán chálák.
PSA 18:27 Chiá ke taw békebrána rakkénay, bale porkebr o gorunákán chamjahla kanay.
PSA 18:28 Oo Hodáwandén Hodá! Taw ay ke mani cherágá rozhnága kanay. Hamá ent ke mani tahárókián róshena kant.
PSA 18:29 Gón tai madatá lashkaréay sará orosh o hamlaha barán o gón Hodáay komaká ent ke cha borzén diwálán koppa kanán.
PSA 18:30 Haw! Hodá, áiay ráh tamán o kámelén ráhé, Hodáay habar béayb ant, pa harkasá ke áiay gwará panáha zurit, esparé.
PSA 18:31 Hodáwandá abéd, kay Hodá ent o Hodáyá abéd, kay talár?
PSA 18:32 É Hodá ent ke maná zór o wáka dant o mani ráhá tamán o béayba kant.
PSA 18:33 Mani pádán áskáni paymá téza kant o maná borziáni óshtagá láhekia dant.
PSA 18:34 Mani dastán pa jangá ázmudaga kant, tán báskon brenjén kamáná beloppénit o chóth bekant.
PSA 18:35 Taw wati sóbén bayagay espará maná bakshay o rástén dastet mani posht o panáh ent, tai narmdeli o békebri maná mazania dant.
PSA 18:36 Taw mani pádáni chéray ráhá práha kanay tánke pádon malarzant.
PSA 18:37 Dozhmenáni randá kapán o mani dast pa áyána rasit, tán halák mabant, pera natarrán.
PSA 18:38 Anchosh zeminá janán ke pád áyagay móh o wákesh mabit, mani pádáni chérá kapant.
PSA 18:39 Taw pa jangá maná zór o wáka bakshay o dozhmenán mani pádáni chérá dawra dayay.
PSA 18:40 Mani pádán dozhmenáni gardenay sará éra kanay o man wati dozhmenán gár o gomsára kanán.
PSA 18:41 Pa komaká peryáta kanant bale rakkénóké nést, cha Hodáwandá komaka lóthant, bale passawa nadant.
PSA 18:42 Man áyán háka kanán o gwátá dayán, damk o kuchaháni gelay paymá chandhán.
PSA 18:43 Taw maná cha mardománi jang o chópána rakkénay o kawmáni sardára kanay, hamá mardom mani hezmatá kanant ke manesh pajjáha nayárán.
PSA 18:44 Tán mani tawárá eshkonant, parmána barant, darámad mani démá wati sará jahla kanant.
PSA 18:45 Á deltrakka bant, larzán o drahán cha wati kalátána tachant.
PSA 18:46 Hodáwand zendag ent. Pa mani talárén Hodáyá názénk. Mani rakkénókén Hodáyá shán o shawkat bát.
PSA 18:47 Hodá ent ke mani bérá gipt, kawm o ráján mani chérdastiá nádénit o
PSA 18:48 maná cha dozhmenána rakkénit. Haw! Taw mani dozhmenáni démá maná sarperáza kanay o cha zálemén mardomána chotthénay.
PSA 18:49 Oo Hodáwand! Paméshká tará kawmáni nyámá satá kanán o tai námá názénán.
PSA 18:50 Á wati bádsháhá mazanén sób o pérózia bakshit o wati rógen per moshtagéná mehra kant, bezán Dáud o áiay nasl o padréchá tán abad.
PSA 19:1 Pa sázger o washáwázáni sálárá. Dáuday Zabur. Ásmán Hodáwanday shán o mazaniá paddara kant, borzén arsh áiay dastay kárán.
PSA 19:2 É róch pa á róchá habar rawána kant o é shap pa á shapá zánt o hekmat darshána kant,
PSA 19:3 na habaré o na gálé, áyáni tawár eshkonaga nabit.
PSA 19:4 Padá ham áwázesh sarjamén zeminá sheng o tálána bit o habaresh tán jahánay goddhi marz o simsarána rasant. Pa róchá, Hodáyá ásmáná tambué bastag,
PSA 19:5 róch sálónkéay paymá cha wati kellahbandá dara kayt o chó ke pahlawáné shádán maydána kant.
PSA 19:6 Cha ásmánay yak gwaréá dara kayt o tán á dega gwará chahra wárt, hech chizzé cha áiay horm o garmiá chér naent.
PSA 19:7 Hodáwanday Sharyat tamán o béayb ent o jesm o jáná bóda kárit. Hodáwanday hokm porehtebár ant o kamzántán dáná o aglmand kant.
PSA 19:8 Hodáwanday rahband rást ant o delá shádána kanant. Hodáwanday parmán pák ant o chammán rozhnága kanant.
PSA 19:9 Hodáwanday tors pák ent o tán abad páydár. Hodáwanday parmán barhakk ant o sarjamiá adl,
PSA 19:10 cha teláhá delkashter, tantaná cha asilén zarr ham, cha shahdá shirkenter, tantaná cha bénagay kodámay har trampá washter.
PSA 19:11 Tai hezmatkárá cha áyán dháh o hoshdár rasit o gón áyáni dáragá mazanén mozzé.
PSA 19:12 Kay ent á ke wati radián bezánt o sarpad bebit? Maná cha wati nazántagén gonáhán pák o sallah kan.
PSA 19:13 Wati hezmatkárá cha gorunák o porkebrén kár o kerdán bedár, mayl ke mani sará báládast bebant. Hamá wahdá tamán o béayba bán o cha har mazanén gonáhá pák.
PSA 19:14 Oo Hodáwand! Mani dapay habar o delay pegr o hayál tai delá benendátant, taw ke mani talár o posht o panáh ay.
PSA 20:1 Pa sázger o washáwázáni sálárá. Dáuday Zabur. Hodáwand tará sakki o sóriáni róchá passaw bedayát, Ákubay Hodáay nám tará negahpán bát.
PSA 20:2 Cha wati pákén jágahá pa taw komak berasénát o cha Sahyuná tará madat kanát.
PSA 20:3 Tai sajjahén korbánigán wati yátá bedárát, tai sóchagi korbánigáni mannók bát. Ósht...
PSA 20:4 Tai delay wáhagán barjáh dárát o tai sajjahén shawrbandián kámyáb kanát.
PSA 20:5 Tai sób o péróziá gón shádmáni kukkár bekanén o wati bayraká tai námay sará borzád bechandhénén. Hodáwand tai sajjahén dazbandián purah o sarjam bekanát.
PSA 20:6 Nun zánton ke Hodáwand wati rógen per moshtagéná rakkénit o cha wati pákén ásmáná áiá passawa dant, gón wati rástén dastay rakkénókén wák o tágatá.
PSA 20:7 Lahtén wati asp o arrábaháni sará pahra kanant, bale má wati Hodáwandén Hodáay námay sará pahra kanén.
PSA 20:8 Á srénprósha bant o kapant, bale má páda káén o mohra óshtén.
PSA 20:9 Oo Hodáwand! Bádsháhá sób o pérózi beday. Tawár ke kanén, may passawá beday.
PSA 21:1 Pa sázger o washáwázáni sálárá. Dáuday Zabur. Oo Hodáwand! Bádsháh cha tai zórá shádmánia kant o cha tai rakkénagá ent ke inchok gal o bál ent.
PSA 21:2 Taw áiay delay morád bakshátagant o áiay lontháni wáhaget cha áiá dur nadáshtagant. Ósht...
PSA 21:3 Chiá ke gón bázén barkatáni dayagá pa áiay wasshátká dar átkagay o tájé cha asilén teláhá sará dátet.
PSA 21:4 Áiá cha taw zend lóthet o taw bakshát, rócháni dráji, abad tán abad.
PSA 21:5 Cha tai bakshátagén kámránián, áiay shán o marháh mazan ent, áiárá shawkat o mazani dátag.
PSA 21:6 Pa rásti abadmánén barkat bakshátag o wati bagalá gal o shadánet kortag.
PSA 21:7 Chiá ke bádsháh Hodáwanday sará tawkala kant o borzén arshay Hodáwanday mehrá nalarzit.
PSA 21:8 Tai dast, sajjahén dozhmenán dara géjit, tai rástén dast pa áyán ke cha taw naprata kanant rasit.
PSA 21:9 Á wahdi ke záhera bay áyán porácheshén tarunéay paymá kanay. Hodáwand wati hezhmay tahá áyán éra bárt o áiay áchesh áyána wárt.
PSA 21:10 Áyáni padréchá cha zeminá gár o bégwáha kanay, chokk o nabiragánesh cha mardománi nyámá.
PSA 21:11 Harchont ke tai helápá palitén shawrbandi bekanant o badén repk o pandal besázant bale sóbéna nabant,
PSA 21:12 chiá ke taw áyána táchénay, wahdé ke wati kamáná dém pa áyána tarrénay.
PSA 21:13 Oo Hodáwand! Gón wati zór o twáná anchosh maz‌anshán bátay. Tai wák o kodratá satá kanén o názénén.
PSA 22:1 Pa sázger o washáwázáni sálárá. Dáuday Zabur. “Sahargáhi áskay” tarzay sará. Oo mani Hodá, oo mani Hodá! Taw chiá maná tahná esht? Pa ché cha mani rakkénagá dur ay, cha mani áh o peryátán sakk jetá ay.
PSA 22:2 Oo mani Hodá! Sajjahén róchá peryáta kanán o taw passawé nadayay, sajjahén shapá ham, bale áráma nagerán.
PSA 22:3 Angat ham taw pák o palgár ay, Bani Esráil tará názénit ke taw pa bádsháhi neshtagay.
PSA 22:4 May petán tai sará tawkal kort, tai sará tawkalesh kort o taw rakkéntant.
PSA 22:5 Tai dargáhá peryátesh kort o rakketant, tai sará tawkalesh kort o pashal o sharmendag nabutant.
PSA 22:6 Záná, man ensáné naán, kermé án? Mardománi démá sobakk án o kawmay chammá béezzat.
PSA 22:7 Harkas ke maná gendit kalág o rishkand kant. Dapá chótha kanant, sará sorénant o gwashant:
PSA 22:8 “Angat wati óst o ométá pa Hodáyá band, bell á tará berakkénit, berakkénit agan tará dósta dárit.”
PSA 22:9 Bale taw maná cha mátay lápá dar áwort o mátay sénagá ásudagi dát.
PSA 22:10 Cha pédáeshá tai baddhá dawr dayag bután, cha mátay lápá mani Hodá butagay.
PSA 22:11 Cha man dur mabay, chiá ke sakki o sóri nazzik ent o kassé pa komaká nést.
PSA 22:12 Bázén narén gókéá mani chapp o chágerd geptag, Báshánay sardhagáray zóráwarén gókán maná angerr kortag,
PSA 22:13 wati práhén dapesh pa man parroptag, gorrók o derrókén shéráni paymá.
PSA 22:14 Chó ke ápá réchag o tálán butagán sajjahén haddhon cha bandán dar átkagant. Delon chó ke mómá áp ent o sénagá sóchit.
PSA 22:15 Zór o tágaton kunzagi chondhé ke hoshk butag o zobánon nokká lacchetag, maná markay háká wápéntaget.
PSA 22:16 Kochekán mani chapp o chágerd geptag, sherr o badkáráni rombá angerr án, mani dast o pádesh thong thong kortagant,
PSA 22:17 wati sajjahén haddhán shomár korta kanán. Áyán wati thélag pa man sakk kortagant,
PSA 22:18 mani pocchán wati nyámá bahra kanant o jámagay sará pála janant.
PSA 22:19 Bale taw, oo Hodáwand! Dur mabay. Oo mani zór o tawkal! Pa mani komaká eshtáp kan.
PSA 22:20 Mani arwáhá cha zahm o shamshirá berakkén o mani zendagiá cha kochekáni zolm o zórákiá.
PSA 22:21 Maná cha shér o mazáráni dapá neját beday, ke taw maná cha wahshién káigaráni kánthán rakkéntag.
PSA 22:22 Tai námá pa wati brátán jára janán o mocchiay nyámá tará názénán.
PSA 22:23 Shomá, oo Hodátorsán! Áiá benázénét. Oo Ákubay sajjahén chokk o óbádagán! Áiá ezzat o shán bedayét. Oo Esráilay padréchán! Áiay haybatá bechárét.
PSA 22:24 Chiá ke áiá cha setam distagénay bazzagiá posht nakortag o démi cha áiá natarréntag. Peryáti ke kortag áiá eshkotagant.
PSA 22:25 Mazanén diwáná mani satá o saná pa taw ent, wati kawlán hamáyáni démá sarjama kanán ke Hodátors ant.
PSA 22:26 Békebr o darbésh waráka warant o séra bant o á ke Hodáyá shóháza kanant áiá názénant. shomay del tán abad zendag bát.
PSA 22:27 Zeminay chárén kondh áiá yáta kanant o dém pa Hodáwandá pera tarrant, sajjahén kawmáni hándán o kothom áiay bárgáhá sará jahla kanant.
PSA 22:28 Chiá ke bádsháhi Hodáwandayg ent o hamá ent ke kawmáni sará hákemia kant.
PSA 22:29 Zeminay sajjahén zóráwar waráka warant o áiay démá kapant, hákién ensán kóndhána kapit, hamá ke watá, wat zendag dáshta nakant.
PSA 22:30 Áyókén nasl áiay hezmatá bant, démi padréch Hodáwanday bárawá sahig kanaga bant o
PSA 22:31 pa áyán ke angat wadi nabutagant áiay adl o ensápá jára janant. Gwashant: “Á hamá at ke é kári kort.”
PSA 23:1 Dáuday Zabur. Hodáwand mani shopánk ent, hech chizzay mohtája nabán.
PSA 23:2 Maná sarsabzén charágáhána wápénit o pa árámén ápán sara kant.
PSA 23:3 Mani arwáhá tázaga kant o pa wati námaygi pahrézkáriay ráhán maná démá bárt.
PSA 23:4 Agan cha markay tahárterén shép o daragán ham begwazán cha hech bimm o baláhá natorsán, chiá ke taw gón man gón ay, tai latth o asá maná tasallá bakshit.
PSA 23:5 Dozhmenáni chammáni démá parzónagé pa man pacha kanay, pa sharapa dayagá mani saragá théla janay o mani jámá modám porr kanán ay.
PSA 23:6 Allamá, mehr o néki zenday sajjahén róchán mani pad o randá ant o Hodáwanday kalátá jahmenenda bán, tán abad.
PSA 24:1 Dáuday Zabur. Zemin o áiay sajjahén hasti Hodáwandayg ant, jahán o sajjahén mahluk.
PSA 24:2 Chiá ke Hodáwandá áiay bonyát mán daryáyá nádént o ápáni sará óshtárént.
PSA 24:3 Kay cha Hodáwanday kóhá borzád shota kant? Kay áiay pákén jágahá óshtáta kant?
PSA 24:4 Hamá ke deli sáp o dasti pák ent, hamá ke wati arwáhá dém pa náhudagiá natarrénit o drógén sawgenda nawárt.
PSA 24:5 Á cha Hodáwandá barkata gipt o cha wati rakkénókén Hodáyá, adl o ensáp.
PSA 24:6 Hamé paymá ant, á mardom ke Ákubay Hodáay shóházá ant, hamá ke pa áiay démá hodónák ant. Ósht...
PSA 24:7 Oo darwázagán! Wati sará borz bedárét. Oo kwahnén dar o dapigán! Watá pa sháhegáni pach kanét, tánke mazani o shánay bádsháh begwazit.
PSA 24:8 Mazani o shánay é bádsháh kay ent? Porwák o zóráwarén Hodáwand, Hodáwand ke jangá delér ent.
PSA 24:9 Oo darwázagán! Wati sará borz bedárét! Oo kwahnén dar o dapigán! Watá pa sháhegáni pach kanét, tánke mazani o shánay bádsháh begwazit.
PSA 24:10 Mazani o shánay é bádsháh kay ent? Lashkaráni Hodáwand hamá ent mazani o shánay bádsháh. Ósht...
PSA 25:1 Dáuday Zabur. Oo Hodáwand! Man pa del o ján dém pa taw káyán.
PSA 25:2 Oo mani Hodá! Tai sará tawkala kanán, mayl ke pashal o sharmendag bebán o dozhmen mani sará báládast bebant.
PSA 25:3 Ji haw! Á ke tai sará óst o ométa kant hechbar sarjahla nabit. Á ke bé sawabá béwapáia kanant sarjahl o sharmendaga bant.
PSA 25:4 Oo Hodáwand! Ráhá maná pésh dár o wati keshká maná tálim day.
PSA 25:5 Dém pa wati rástiá maná rahshón bay o sabak beday, chiá ke taw mani rakkénókén Hodá ay o sajjahén róchá tai entezár o wadárá án.
PSA 25:6 Oo Hodáwand! Wati rahmat o mehrá yát kan, chiá ke á cha azalá hastant.
PSA 25:7 Mani warnáiay náparmáni o gonáhán yát makan, wati mehray kesásá maná yát kan ke taw nék ay, oo Hodáwand!
PSA 25:8 Hodáwand nék o rást ent, paméshká gonahkárán ráhá sója dant.
PSA 25:9 Békebr o darbéshén mardomán rástiay ráhá rahshónia dant, wati keshká áyán pésha dárit.
PSA 25:10 Hamá ke Hodáwanday ahd o paymánay sará óshtant, áiay sajjahén ráh pa áyán cha mehr o wapáyá sarréch ant.
PSA 25:11 Oo Hodáwand! Pa wati námaygi mani gonáh o mayárán bebaksh, chiá ke mazan ant.
PSA 25:12 Kay ent hamá ke pa del Hodátors bebit? Hodáwand áiá hamá rástén ráhá sója dant ke báyad ent gechéni bekant.
PSA 25:13 Á wati róchán pa séri o azgária gwázénit, áiay chokk o óbádag zeminay mirás baróka bant.
PSA 25:14 Hodáwand wati delay ráz o ramzán gón Hodátorsán darshána kant, wati ahd o paymáná pa áyán pajjárénit.
PSA 25:15 Mani chamm modám dém pa Hodáwandá ant, chiá ke hamá ent ke mani pádán cha dámá ázáta kant.
PSA 25:16 Wati démá gón man bekan o maná rahmat bebaksh, chiá ke man békas o setam distagéné án.
PSA 25:17 Mani delay sakki o sóri báz ant, maná cha paréshániá berakkén.
PSA 25:18 Mani ranj o sakkián bechár o sajjahén gonáhánon bebaksh.
PSA 25:19 Mani dozhmenán bechár ke chinchok báz ant o cha man chón pa kahr naprata kanant.
PSA 25:20 Mani zendá bepahréz o berakkén, mayl ke sharmendag bebán, chiá ke tai báhóth o mayár án.
PSA 25:21 Tachki o rásti mani negahpán bát, chiá ke mani omét taw ay.
PSA 25:22 Oo Hodá! Esráilá cha sajjahén sakki o sórián berakkén.
PSA 26:1 Dáuday Zabur. Oo Hodáwand! Gonáhay bohtámá cha mani sará bethagalén, chiá ke wati bémayáriay tahá gámon jatag o bé larzagé Hodáwanday sará tawkalon kortag.
PSA 26:2 Hodáwandá! Maná bechakkás o ázmáesh kan, mani del o hayálá cha chakkásá begwázén.
PSA 26:3 Chiá ke tai mehr modám mani chammáni démá ent o tai wapádáriay sáhegá gáma janán.
PSA 26:4 Na gón prébkárán hamdiwána bán o na dotal o dopóstén mardománi hamráh.
PSA 26:5 Cha badkáráni hamráhiá naprata kanán o gón radkárán hamdiwána nabán.
PSA 26:6 Oo Hodáwand! Wati dastán bégonáhiay tahá shódán o tai korbánjáhay sará chahra warán,
PSA 26:7 tán wati shogrgozáriay tawárá borz kanán o tai sajjahén ajabén káráni kessahá byárán.
PSA 26:8 Oo Hodáwand! Maná tai lóg sakk dóst ent, tai shán o shawkatay jágah.
PSA 26:9 Mani sáhá gonahkáráni hórigá mager o zendá gón hónigán,
PSA 26:10 ke gandahén pandalesh dastá ent o rástén dastesh cha reshwatá sarréch.
PSA 26:11 Bale man wati bémayáriay tahá gáma janán, maná berakkén o mani sará rahm kan.
PSA 26:12 Pádon tachk o sápén jágahé ér ent, mazanén diwánán Hodáwandá názénán.
PSA 27:1 Dáuday Zabur. Hodáwand mani rozhn o rakkénók ent, cha kayá betorsán? Hodáwand mani zenday kalát ent, cha kayá bimmé bebit?
PSA 27:2 Wahdé badkár hamlaha kanant ke mani jesm o jáná bederrant o ér bebarant, wahdé dozhmen o badwáh mani sará orosha kanant, á wat thagala warant o kapant.
PSA 27:3 Bell ke lashkaré mani chágerdá wati gedánán mekk bekant, angat mani dela nalarzit, agan jangé ham mani sará bekapit, angat deljam án.
PSA 27:4 Cha Hodáwandá yak chizzé lóthetagon o hameshiay pad o randá bán, ke wati zenday sajjahén róchán Hodáwanday lógá jahmenend bebán, tánke Hodáwanday zébáiá begendán o parasteshgáhá cha hamáiá rahshóni belóthán.
PSA 27:5 Chiá ke sakki o sóriáni róchá maná wati sáhegá dárit, wati tambuay tahá chéra dant o taláréay sará borzá óshtárénit.
PSA 27:6 Nun dozhmenáni angerrá sarperáza bán o gón shádmániáni kukkárá áiay tambuay tahá korbániga kanán, Hodáwandá pa sawt o sáza názénán.
PSA 27:7 Oo Hodáwand! Wahdé peryáta kanán mani tawárá beshkon, mani sará rahm kan o passaw beday.
PSA 27:8 Taw gwashtag: “Mani chehragay shóházá bebay.” Dela gwashit: “Hodáwandá! Tai chehragay shóházá án.”
PSA 27:9 Démá cha man chér maday, wati hezmatkárá gón hezhm per matarrén, taw ke mani madatkár butagay. Oo mani rakkénókén Hodá! Maná dawr maday o yalah makan.
PSA 27:10 Agan mát o pet ham maná yalah bekanant, Hodáwand wat maná zurit o dasta gipt.
PSA 27:11 Oo Hodáwand! Wati ráhá maná sój day, dozhmenáni sawabá maná rást o tachkén ráhá rahshón bay.
PSA 27:12 Pa dozhmenáni wáhagá maná yalah makan, chiá ke drógén sháhed mani helápá pád átkagant ke jang o chópay ásá damant.
PSA 27:13 Deljam án ke Hodáwanday nékiá zendagénáni zeminá gendán.
PSA 27:14 Hodáwanday wadárá bay, zórmand bay o delá dhaddh kan. Haw! Hodáwanday wadárá bay.
PSA 28:1 Dáuday Zabur. Oo Hodáwand, oo mani talár! Tará tawára kanán, cha man nádelgósh mabay. Agan taw bétawár bebay, hamáyáni paymá bán ke kall o kabrá kapant.
PSA 28:2 Mani peryát o záriay tawárá gósh dár, wahdé cha taw madata lóthán o wati dastán dém pa tai pákén bárgáhá borza kanán.
PSA 28:3 Maná badkáráni hamráhiá gerrán makan o makassh, hamá ke radén kára kanant o gón hamsáhegán cha sohl o saláhá habará ant, bale delesh cha sherr o shórá porr ent.
PSA 28:4 Kortagén káráni mozzáesh beday, hamsang gón áyáni badén kárán, dastay kortagénáni mozzáesh beday, áyáni káráni kaddá.
PSA 28:5 Paméshká ke Hodáwanday káráni parwáhá nakanant, áiay dazhonaray káráni háterá nadárant, á eshán tabáha kant o hechbar pa rost o rodómá naylit.
PSA 28:6 Hodáwandá satá bát, chiá ke mani peryát o záriay tawári eshkotag.
PSA 28:7 Hodáwand mani zór o espar ent, delon áiay sará tawkala kant o madaton rasetag. Del cha shádmániá sarréch ent o gón wati sawt o názénkán áiay shográ gerán.
PSA 28:8 Hodáwand wati mardománi zór o twán ent, pa rógen per moshtagéná rakkagay kaláté.
PSA 28:9 Wati mardomán berakkén o wati kawmá barkat beday, áyáni shopánk bay o tán abad wati kópagá bejallesh.
PSA 29:1 Dáuday Zabur. Oo ásmánián! Hodáwandá satá kanét, Hodáwanday shán o kodratá satá kanét.
PSA 29:2 Hodáwanday námay shán o shawkatá satá kanét, Hodáwandá mán áiay pák o palgárén drapshnákiá satá kanét.
PSA 29:3 Hodáwanday tawár ápáni sarborá ent, shán o shawkatay Hodá grandit, Hodáwand porzórén ápáni sarborá grandit.
PSA 29:4 Hodáwanday tawár zórmand ent, Hodáwanday tawár drapshnák ent.
PSA 29:5 Hodáwanday tawár gazzána próshit, Hodáwand Lobnánay gazzána próshit.
PSA 29:6 Á Lobnáná gwaskéay paymá jáha serrénit, Siryuná jalabén gókéay paymá.
PSA 29:7 Hodáwanday tawár grand o grókén áchesh rawána kant.
PSA 29:8 Hodáwanday tawár gyábáná larzénit, Hodáwand Kádeshay gyábáná larzénit.
PSA 29:9 Hodáwanday tawár áposén áskána géjénit o jangalá bé lamb o táka kant. Áiay parasteshgáhá sajjahén gwánka janant: “Shawkat o shán!”
PSA 29:10 Hodáwand hár o tuppánay sarborá, wati tahtay sará neshtag, Hodáwand tán abad wati bádsháhi tahtay sará neshtag.
PSA 29:11 Hodáwand wati kawmá wák o kodrat bebakshát, Hodáwand wati kawmá gón sohl o émeni barkat bedayát.
PSA 30:1 Dáuday Zabur. Pa mazanén parasteshgáhay wapká sawté. Oo Hodáwand! Tará shán o shawkata dayán, chiá ke taw maná cha johlánkián chest kort o naeshtet dozhmen mani sará shádehi bekanant.
PSA 30:2 Oo Hodáwand, mani Hodá! Tai gwará pa komaká peryáton kort o taw maná cha nájórhiá dráh kort,
PSA 30:3 mani arwáh cha mordagáni jaháná dar áwort o cha áyáni nyámá ke kall o kabr butant zendag kort.
PSA 30:4 Oo Hodáwanday dóstdárán! Pa Hodáwandá názénk bejanét, áiay pák o palgárén námay shográ begerét.
PSA 30:5 Chiá ke hezhmi damáné o mehr o rahmati omray drájiá. Bit ke sajjahén shapé pa gréwag begwazit, bale bámgwáhá shádehi wati chehragá záhera kant.
PSA 30:6 Man wati ásudagiay wahdá gwasht: “Hechbar larzénaga nabán.”
PSA 30:7 Oo Hodáwand! Taw maná cha wati mehr o rahmatá mohrén kóhéay paymá óshtáréntagat, bale wahdé wati démet cha man tarrént, torseton.
PSA 30:8 Oo Hodáwand! Tará tawáron jat, tai gwará zári o peryáton borz kort:
PSA 30:9 “Mani marká che sutté mán o kabray tahá mani ér rawagá chónén páedagé? Záná, hák tará satá dant? Jára jant ke taw wapádár ay?
PSA 30:10 Oo Hodáwand! Beshkon o mani sará mehrabán bay. Hodáwandá! Mani madat kanók bay.”
PSA 30:11 Taw mani mótk nách o sohbaté kort, sugi god o póshák dar kort o maná gón shádmániá póshént,
PSA 30:12 tánke mani arwáh tará satá bedant o bétawár mabit. Oo Hodáwand, mani Hodá! Tán abad tai shográ gerán.
PSA 31:1 Pa sázger o washáwázáni sálárá. Dáuday Zabur. Oo Hodáwand! Tai mayár o báhóth butagán, hechbar mayl ke sharmendag bebán, wati adl o ensápay tahá maná neját beday.
PSA 31:2 Wati delgóshá gón man bedár o maná zutt berakkén. Pa man panáhay taláré bay o pa mani rakkénagá mohrén kaláté.
PSA 31:3 Pa rásti mani talár o kalát ay, pa wati námaygi maná ráh sója dayay o rahshónia kanay.
PSA 31:4 Maná cha á dámá dar byár ke pa man chér o andém ent, chiá ke mani panáh taw ay.
PSA 31:5 Wati ruh o sáhá tai dastá dayán. Oo Hodáwand, oo wapádárén Hodá! Taw maná rakkénay.
PSA 31:6 Tará cha áyán naprat ent ke delgóshesh gón béarzeshén botán ent, bale man tai sará tawkala kanán, oo Hodáwand!
PSA 31:7 Tai mehrá gala bán o shádehia kanán, chiá ke taw mani syahróchi distagant o mani arwáhay sakkiáni némagá hayál gwar kortag.
PSA 31:8 Maná dozhmenáni dastá nadayay o mani pádán práh o sháygánén jágahé éra kanay.
PSA 31:9 Oo Hodáwand! Mani sará rahm kan chiá ke paréshán án, chammon cha gam o andóhán nezór butagant, jesm o arwáh ham.
PSA 31:10 Chiá ke zendon gamán wártag o omr nálagán, cha mani gonáhá, tágaté pa man pasht nakaptag o haddh o bandon pussán ant.
PSA 31:11 Dozhmenáni sawabá sobakk o kalági butagán, hás pa hamsáhegán, pajjárók cha man torsán ant o harkas maná kuchah o damkána gendit, tachit.
PSA 31:12 Mordagáni warhá cha yátá shotagán o proshtagén kunzagéay paymá butagán.
PSA 31:13 Chiá ke bázénéay bohtámán eshkonagá án, tors o dehshat cha har gwará, gón yakdegará pandala jórhénant o pa mani koshagá mandr o repka sázant.
PSA 31:14 Bale oo Hodáwand! Man tai sará tawkala kanán o gwashán ke “taw mani Hodá ay.”
PSA 31:15 Mani wahd o damán tai dastá ant, maná cha dozhmenán berakkén, cha hamáyán ke mani randá kaptagant.
PSA 31:16 Démá pa wati hezmatkárá drapshán kan, gón wati mehrá maná berakkén.
PSA 31:17 Hodáwandá! Mayl ke sharmendag bebán, chiá ke tará tawáron per jatag, bell ke sharur sarjahl o sharmendag bebant o mordagáni jaháná bétawár.
PSA 31:18 Drógbandén lonthesh chopp bátant, ke gón kebr o ér janag pahrézkáráni helápá pa gorunáki habara kanant.
PSA 31:19 Tai néki chenkadar báz ent, ke pa Hodátorsán ambáret kortag o bani ádamáni chammáni démá pa hamáyán purah o sarjam kortag ke tai báhótha bant.
PSA 31:20 Eshán wati bárgáhay panáhá cha mardománi pandalán chér o andéma dáray o wati sáhegá cha bohtám janókén zobánán dur.
PSA 31:21 Hodáwandá satá bát, chiá ke wati ajabén mehrá hamé wahdá pa man paddara kant ke man dawrah butagén shahréay paymá angerr án.
PSA 31:22 Man cha wati torsá gwasht: “Cha tai chammá sestag o dur kaptagán.” Angat taw mani peryát o záriá eshkonay, wahdé man pa madatá tará tawára kanán.
PSA 31:23 Oo Hodáwanday sajjahén dóstdárán! Áiá dóst bedárét, Hodáwand wati wapádáráni negahpániá kant, bale gorunákénán báz sezá dant.
PSA 31:24 Oo sajjahénán ke Hodáwanday wadárá ét! Porzór bebét o delá dhaddh kanét.
PSA 32:1 Dáuday shayri gwashtánk. Bahtáwar hamá ent ke Hodáwand cha áiay násharián sar gwastag o gonáhi bakshag butagant.
PSA 32:2 Bahtáwar hamá ent ke Hodáwand áiay gonáhá hechbar hesába nayárit o áiay arwáhá prébé mán nést.
PSA 32:3 Wahdé chopp o bétawár atán haddh o bandon pussán atant, cha sajjahén róchay zári o peryátán.
PSA 32:4 Chiá ke róch o shap tai dast mani sará sangin at, sajjahén tágaton hoshagá at, chó ke garmágay taptay chérá bebán. Ósht...
PSA 32:5 Gorhá wati gonáhon tai dargáhá mannet o wati náparmániánon chér nadát. Gwashton: “Wati gonáh o sarkashián Hodáwanday gwará mannán” o taw mani gonáhay mayárbári bakshet. Ósht...
PSA 32:6 Paméshká, tán wahd o móh ent, har Hodádóst tai gwará dwá bekant, wahdé hárén áp chesta bant, hech paymá pa áiá sar buta nakanant.
PSA 32:7 Taw mani chér bayagay jágah ay, cha sakki o tangián maná émena dáray o gón ázátiay sawt o zémelán gwarambáza kanay. Ósht...
PSA 32:8 Hodáwanda gwashit: “Tará hamá ráhá sója dayán ke báyad ent beraway, tará shawr o saláha dayán o tará chárána bán.
PSA 32:9 Násarpadén asp yá kacharay paymá mabay, ke tahná gón lagám o mahárá rám kanaga bit, agan na, tai nazziká nayayt.”
PSA 32:10 Badkáray ranj o azáb báz ant, bale Hodáwanday mehr hamáiay chapp o chágerdá gipt ke Hodáwanday sará tawkala kant.
PSA 32:11 Oo pahrézkárán! Hodáwanday bárgáhá shádehi kanét o shádán bebét. Oo sajjahén nékdelán! Shádehiay gwánká borz kanét.
PSA 33:1 Oo pahrézkárán! Hodáwanday bárgáhá pa shádehi kukkár kanét, nékdelán, Hodáwanday satá kanag zéba dant.
PSA 33:2 Hodáwandá gón chang benázénét, gón dahtárén changá pa áiá sáz bejanét.
PSA 33:3 Pa áiá, nókén sawté byárét, gón washpanjagi simmán belarzénét o pa shádehi gwánk janét.
PSA 33:4 Chiá ke Hodáay habar tachk o rást ent o áiay sajjahén kár gón wapádáriá.
PSA 33:5 Áiá adl o rásti dósta bit, zemin cha áiay mehrá porr ent.
PSA 33:6 Gón Hodáwanday gál o habará ásmán addh butagant o áyáni sajjahén lashkar, gón áiay dapay damá.
PSA 33:7 Daryáay ápán mocch o hákótha kant o johlián mán ambárá.
PSA 33:8 Sajjahén zemin cha Hodáwandá betorsit, jahánay sajjahén mardom áiá ezzat bedayant.
PSA 33:9 Chiá ke áiá gwasht o hamá chizz paym but, parmáni dát o barjáh dárag but.
PSA 33:10 Hodáwand, kawmáni shawrbandián pacha réchit o rájáni kársáziána karójit.
PSA 33:11 Bale Hodáwanday shawr o saláh abadmán ant, áiay delay shawrbandi pa sajjahén nasl o padréchán.
PSA 33:12 Bahtáwar hamá kawm ent ke Hodáwand áiay Hodá ent, hamá mardom ke áiá pa wati mirásá gechén kortagant.
PSA 33:13 Hodáwand cha ásmáná jahláda chárit o sajjahén bani ádamána gendit,
PSA 33:14 cha wati bádsháhi tahtá zeminay sajjahén jahmenendána chárit,
PSA 33:15 á ke é sajjahénáni deli jórh kortag o áyáni har kár o kerdá zánt.
PSA 33:16 Bádsháhá, wati lashkaray mazani nejáta nadant o sarmachárá, wati básk o panjagáni zór.
PSA 33:17 Pa sóbén bayagá, aspay sará omét bandag náhudag ent, toré zóráwar bebit bale rakkénta nakant.
PSA 33:18 Haw! Hodáwanday chamm gón hamáyán ent ke cha áiá torsant, gón hamáyán ke óst o ométesh áiay mehr ent,
PSA 33:19 tánke áyáni arwáhá cha marká berakkénit o mán dhokkálá zendagesh bedárit.
PSA 33:20 May arwáh Hodáwanday wadárá ent, hamá may komak o espar ent.
PSA 33:21 May del áiay bárgáhá shádmánia kant, chiá ke may tawkal hamáiay pákén námay sará ent.
PSA 33:22 Oo Hodáwand! Tai mehr may sará sáhél bát, hamá dábá ke ométen pa taw bastag.
PSA 34:1 Dáuday Zabur. Hamá wahdá ke áiá Abimelekay kerrá watá ganókáni paymá kort, cha ódá dar kanag but o wati ráhá shot. Dáemá Hodáwandá názénán áiay satá o saná modám mani dapá ent.
PSA 34:2 Mani arwáh Hodáwanday sará pahra kant, békebrén mardom beshkonant o shádehi bekanant.
PSA 34:3 Gón man hórigá Hodáwandá mazani bedayét, byáét ke hawáriá áiay námá názénén.
PSA 34:4 Hodáwandon shóház kort o maná passawi dát, cha mani sajjahén torsán maná ázáti kort.
PSA 34:5 Á ke chammesh gón áiá ent drapshán ant, áyáni dém hechbar sharmsára nabit.
PSA 34:6 É meskiná tawár per jat, Hodáwandá áiay tawár eshkot o cha sajjahén sakkián rakkénti.
PSA 34:7 Hodáwanday préshtag Hodátorsáni chapp o chágerdá pallé bandit o áyán nejáta dant.
PSA 34:8 Bechashét o bechárét ke Hodáwand nék ent, bahtáwar hamá ent ke áiay mayár o báhótha bit.
PSA 34:9 Oo Hodáwanday palgártagénán! Cha Hodáwandá betorsét, chiá ke Hodátorsán hech kammié nést.
PSA 34:10 Warnáén shér mohtáj o shodiga bant, bale Hodáwanday shóház kanókán cha nékiá hech kammié nést.
PSA 34:11 Oo chokkán! Byáét o cha man beshkonét, man shomárá sabaka dayán ke Hodáwandá chón bemannét.
PSA 34:12 Cha shomá kay pa zendá hodónák ent o wasshén rócháni gendagay lóthók?
PSA 34:13 Wati zobáná cha badiá dur bedár o lonthán cha drógá.
PSA 34:14 Cha badiá per tarr o néki kan, sohl o émeniay shóházá bebay o hameshiay randá bekap.
PSA 34:15 Hodáwanday chamm gón pahrézkárán ent o góshi ham pa áyáni peryátán pach.
PSA 34:16 Hodáwanday dém badkáráni helápá ent, tán áyáni yátá cha jaháná beborrit o gomsár bekant.
PSA 34:17 Wahdé pahrézkár peryáta kanant, Hodáwanda eshkont o áyán cha sajjahén sakkiána rakkénit.
PSA 34:18 Hodáwand gón proshtadelán nazzik ent o droshtaruhán rakkénit.
PSA 34:19 Pahrézkárá bázén sakki o sória rasit, bale Hodáwand áiá cha sajjahén sakkiána rakkénit.
PSA 34:20 Áiay sajjahén haddhán mohra dárit, cha áyán yakké ham próshaga nabit.
PSA 34:21 Badi badkárá koshit o hamá ke cha pahrézkárá naprata kant, mayárbára bit.
PSA 34:22 Hodáwand wati hezmatkáráni zendá rakkénit, harkas ke áiay báhótha bit, mayárbára nabit.
PSA 35:1 Dáuday Zabur. Oo Hodáwand! Gón hamáyán bemerh ke gón mana merhant o gón hamáyán jang kan ke gón man janga kanant.
PSA 35:2 Wati kasán o mazanén esparán bezur o mani madatá jáh bejan.
PSA 35:3 Pa áyán ke mani randá kaptagant wati nayzahá chest kan o áyáni ráhá band. Mani arwáhá begwash: “Tai rakkénók man án!”
PSA 35:4 Á ke mani zenday tabáhiay randá ant, roswá o sharmendag bátant. á ke pa mani táwáná pandala jórhénant, poshtá bekenzát o pashal bátant.
PSA 35:5 Chosh ke pog o palár gwátay démá, Hodáwanday préshtag áyán betáchénát.
PSA 35:6 Ráhesh tahárók o lakoshánk bát o Hodáwanday préshtag áyáni padá bekapát,
PSA 35:7 chiá ke mopt o náhakká pa man dámesh chér gétkag o pa mani arwáhá kallesh kótkag.
PSA 35:8 Anágat tabáhi‌esh chakká kapát o wati chér gétkagén dámá kapátant, kapát o gár o gomsár bátant.
PSA 35:9 Gorhá mani arwáh Hodáwanday bárgáhá shádehia kant o pa wati rakkagá lezzata bárt.
PSA 35:10 Á wahdá har band o bógon gwánka jant: “Oo Hodáwand! Tai matth kay ent? Taw nézgárá cha zóráwarteréná rakkénay o nezór o hájatmandá cha pol o pánch kanóká.”
PSA 35:11 Badwáh o bérahmén sháhed jáha janant o hamá mayárán maná laddhant ke cha áyán sahig naán.
PSA 35:12 Nékiay badalá gón man badia kanant o mani arwáh gamig o porsig ent.
PSA 35:13 Bale wahdé á nádráh atant, man sugi god o póshák gwará kort o jesm o ján gón róchag dáragá ranjént. Wahdé mani dwá bépassaw mantant
PSA 35:14 gréwán bután, hamá dábá ke pa dóst yá brátéá gamiga bant, sar jahl o mótk árán bután, hamá dábá ke pa mátá zára janant.
PSA 35:15 Bale wahdé thagalon wárt past o lagór gón mazanén shádehié mocch butant, mani helápá wahdé man sahig naatán, á maná derrán atant o bassesha nakort.
PSA 35:16 Chó Hodánábáwarán, áyán wati maskará gésh kanána kort o pa man dantánesha drosht.
PSA 35:17 Oo Hodáwand! Tán kadéna nenday o cháray? Mani arwáhá cha áyáni setamá berakkén, mani yakkén zendá cha shéráni dapá.
PSA 35:18 Gorhá mazanén diwáná tai shográ gerán, mardománi mazanén mocchiá tará satá kanán.
PSA 35:19 Mayl ke prébkárén dozhmen mani sará shádehi kanant, mayl hamá ke mopt o náhakká cha man bézár ant chammok o pónzok bekanant.
PSA 35:20 Chiá ke pa sohl o émeni habara nakanant, pa á mardomán ke molká árám o béják neshtagant pormakrén habar payma kanant.
PSA 35:21 Dapá pa man pacha réchant o gwashant: “Hah, hah, hah! Gón wati chammánen distag!”
PSA 35:22 Oo Hodáwand! Taw é distag, chopp o bétawár mabay. Hodáwandá! Cha man dur mabay.
PSA 35:23 Ágáh bay o pa mani dádrasiá jáh bejan. Oo mani Hodá, oo mani Hodáwand! Pa mani hakká.
PSA 35:24 Oo mani Hodáwandén Hodá! Pa wati adlaygi gonáhay bohtámá cha man thagalén, mayl á mani sará shádehi bekanant.
PSA 35:25 Mayl wati delá begwashant: “Hah, hah, hah! Pa wati armáná rasetén.” Mayl begwashant: “Lonkahé kort o éren bort.”
PSA 35:26 Harkas ke mani mosibatáni sará shádehia kant sharmendag o sarjahl bát, á ke watá cha man borztera kanant gón sharm o bésharapi póshénag bátant.
PSA 35:27 Á ke wáhagesh mani bémayári ent shádmán bátant o shádehiay gwánká borz kanátant, modám begwashátant: “Hodáwand mazan ent ke cha wati hezmatkáray salámatiá gala bit.”
PSA 35:28 Gorhá zobánon sajjahén róchá tai adlá gwánka jant, tai satá o sanáyá.
PSA 36:1 Pa sázger o washáwázáni sálárá. Hodáwanday hezmatkár Dáuday Zabur. Gonáh, badkárá mán áiay delay johlánkiá gwánka jant, áiay chammán Hodátorsi nést.
PSA 36:2 Chiá ke á wati jenday delá haminchok wati tawsipá kant, ke wati gonáhá nazánt o cha áiá naprat korta nakant.
PSA 36:3 Dapay habari badi o préb ent, cha aglmandi o nékkáriá dasti shoshtag.
PSA 36:4 Tantaná wati gandal o bestará pandala sázit, gonahkáriay ráhi geptag o badiá yalaha nakant.
PSA 36:5 Oo Hodáwand! Tai mehr arshá rasit o wapádári tán jambarán.
PSA 36:6 Tai adl o rásti borzterén kóháni dhawlá ent o ensáp, mazanén johlánkiáni. Oo Hodáwand! Taw ay ke ensán o haywánay rakkénók ay.
PSA 36:7 Oo Hodá! Tai mehr chenkadar porarzesh ent, bani ádam tai bánzoláni sáhegá panáha gipt.
PSA 36:8 Á cha tai bárgáhay sarréchén nyámatán séra bant o cha wati lezzatáni kawrá áyán sérápa kanay.
PSA 36:9 Chiá ke zendmánay sarchammag taw ay o cha tai nurá ent ke nura gendén.
PSA 36:10 Pa wati dóstdárán wati mehrá modám barjáh dár o adl o rástiá pa nékdelán.
PSA 36:11 Porkebráni pád mani sará ér mabát, badkáráni dast maná sargardán makanát.
PSA 36:12 Bechár badkár che paymá kaptagant, háká sarshakun o pád átka nakanant.
PSA 37:1 Dáuday Zabur. Badkáráni sawabá jósh majan o radkáráni sará hasadd makan.
PSA 37:2 Chiá ke é káhay paymá zutta gimmorant o sabzagáni paymá hoshka tarrant.
PSA 37:3 Hodáay sará tawkal kan o nékiay ráhá ger, wati molká jahmenend bay o wapádáriay randgir.
PSA 37:4 Cha Hodáwandá shádmán bay ke á tai delay morádá puraha kant.
PSA 37:5 Wati zendmánay ráhá Hodáwanday sepordag kan o áiay sará tawkal, ke kársáz hamá ent.
PSA 37:6 Á tai bémayáriá nuray paymá róshena kant o dádrasiá chó bámgwáhay rozhnáiá drapshán.
PSA 37:7 Hodáwanday bárgáhá árám bay o gón ópáré áiay wadárá. Áyáni sawabá jósh majan ke wati ráhá kámrán ant o áyáni sawabá ham ke palitén pandalán kára bandant.
PSA 37:8 Cha hezhmá dur bay o gazabá yalah kan. Jósh majan ke tará dém pa badkáriá bárt.
PSA 37:9 Chiá ke badkár goddhaga bant, bale á ke Hodáwanday wadárá ant molká mirása barant.
PSA 37:10 Kammoké wahdá rand badkára namánit, shomá áiá sakk báz shóháza kanét bale nagendéti.
PSA 37:11 Narmdel molká mirása barant o cha wasshén sohl o émeniá shádkámia kanant.
PSA 37:12 Badkár pahrézkáray helápá pandala sázit o pa áiá dantána droshit,
PSA 37:13 bale Hodáwand badkáray sará kandit, chiá ke zánt áiay rócha kayt.
PSA 37:14 Badkár wati zahmá cha nyámá dara kanant o kamáná kasshant, tán nezór o hájatmandán chér betarrénant o nékdelán tégáni dapá bedayant.
PSA 37:15 Bale áyáni zahm, wati jenday delá nendit o kamánesha proshant.
PSA 37:16 Pahrézkáray kammén hasti cha bázén badkáráni hastiá gehter ent.
PSA 37:17 Chiá ke badkáráni báskay zóra proshit, bale Hodáwand pahrézkáráni madat kanók ent.
PSA 37:18 Hodáwand bégonáháni rócháni negahpán ent o mirásesh namirána bit.
PSA 37:19 Baláh o mosibatáni wahdá bazzag o sharmendaga nabant o kahti o dhokkálay róchán sér o ábáda bant.
PSA 37:20 Bale badkár gára bant, Hodáwanday dozhmen charágáhay sabzagáni paymá gár. Haw! Zyána bant, duttay paymá zyán.
PSA 37:21 Badkár wáma kant o padá nadant, bale pahrézkár pa daspachia bakshit.
PSA 37:22 Allamá, áyán ke Hodáwand barkata dant molká mirása barant, bale áyán ke nálata kant, gár o bégwáha bant.
PSA 37:23 Hodáwand hamáiay gámán mohra kant ke Hodáwanday ráhá shádehia kant.
PSA 37:24 Toré bethagalit, zeminá nakapit, chiá ke Hodáwand áiay negahpán ent.
PSA 37:25 Warná atán o nun pir án, bale choshén pahrézkáré nadiston ke Hodáwandá yalah kortag yá ke chokki pa nánéá gadá butagant.
PSA 37:26 Modám daspach ent o pa ásáni wáma dant, chokki barkata kárant.
PSA 37:27 Cha badiá démá chahr day o néki kan, gorhá tán abad molká jahmenenda bay.
PSA 37:28 Chiá ke Hodáwandá adl dóst ent o wati dóstdárán yalaha nakant. Hodáwand tán abad pahrézkáráni posht o panáh ent, bale badkáráni nasl goddhaga bit.
PSA 37:29 Pahrézkár molká mirása barant o tán abad hamódá jahmenenda bant.
PSA 37:30 Pahrézkáray dap hekmat tálána kant o zobáni adl.
PSA 37:31 Hodáwanday Sharyat áiay delá ent o pádia nalakoshant.
PSA 37:32 Badkár, pa pahrézkárá kamina kant o áiay kóshay randá ent.
PSA 37:33 Bale Hodáwand áiá badkáray zóray tahá naperrénit o wahdé hakdiwáná baraga bit, pa mayárbáriá nayliti.
PSA 37:34 Hodáwanday wadárá bay o hamáiay ráhá bósht, ke tará pa molkay mirás baragá sarperáza kant, wata genday ke badkár chón goddhaga bant.
PSA 37:35 Badkár o bérahmén mardé diston ke sarsabzén drachkéay paymá wati jáhá shádáb at,
PSA 37:36 bale namant o zutt mort, harché shóházon kort, gendag nabut.
PSA 37:37 Béaybén mardá begend o nékdelá bechár, chiá ke sohl o émeniay shóház kanóká ákebaté hast,
PSA 37:38 bale sajjahén sarkash gár o gomsára bant, badkár goddhaga bant o áyán ákebaté nést.
PSA 37:39 Pahrézkáráni rakkénók Hodáwand ent o sakkiay wahdá áyáni kalát.
PSA 37:40 Hodáwand áyán madata dant o rakkénit, cha badkáráni dastá rakkénit o nejáta dant, chiá ke áiay mayár o báhóth ant.
PSA 38:1 Dáuday Zabur. Dazbandié. Oo Hodáwand! Maná gón wati hezhmá hakkal maday o gón wati gazabá neherr.
PSA 38:2 Chiá ke tai tirán mani ján soptag o tai dastay zór mani sará kaptag.
PSA 38:3 Cha tai gazabá mani jesm o jáná hech dráhié pasht nakaptag o cha gonáhá, mán haddhán ham salámatié.
PSA 38:4 Mani mayárbári cha sará sar gwastag, gránén báréay paymá cha tágatá gésh ent.
PSA 38:5 Cha mani ahmakiá thappon bó geptag o bazhnák ant.
PSA 38:6 Purah komp o dotal án, sajjahén róchá mátam kanáná gardán.
PSA 38:7 Sréná sóchnákén dardé tawrénagá ent o jesmá dráhié nést.
PSA 38:8 Man ájez án o droshag butagán, cha delay áshópá nálán.
PSA 38:9 Oo Hodáwand! Mani sajjahén armán tai démá ant, áhsard o ginsárton cha taw chér naant.
PSA 38:10 Delon mán sénagá kop koppá ent, wák o twánon dar shotag, chammáni rozhnái ham gár ent.
PSA 38:11 Dóst o hambalon thappáni sawabá cha man watá kerré dárant o nazzikén ham dur óshtátagant.
PSA 38:12 Á ke mani kóshay randá ant, dám chéra kanant, badwáh mani gomsár kanagay habará kanant o sajjahén róchá pandala sázant.
PSA 38:13 Bale man karréay paymá án ke naeshkont o gongéay paymá ke bétawár ent.
PSA 38:14 Pa rásti man anchén mardoméay dhawlá án ke naeshkont o dapá passawé nésti.
PSA 38:15 Oo Hodáwand! Pa taigi ent ke wadárá án. Oo Hodáwand, mani Hodá! É taw ay ke passawa dayay.
PSA 38:16 Chiá ke gwashton: “Wahdé pádona larzit, hamá mardomán mani sará shádehi kanagá mayl ke watá cha man mastera zánant.”
PSA 38:17 Chiá ke kapagi án o mani dard modám gón man gón ent.
PSA 38:18 Wati mayárbáriá mannán o cha wati gonáhá sakk padard án.
PSA 38:19 Sarzór o salámat ant, á ke mani dozhmen ant, bázéné bé sawabá cha man naprata kant.
PSA 38:20 Á ke nékiay badalá gón man badia kanant, mani dozhmen o bohtám janók ant, chiá ke man nékiay randá án.
PSA 38:21 Oo Hodáwand! Maná yalah makan. Oo mani Hodá! Cha man dur mabay.
PSA 38:22 Oo Hodáwand, mani rakkénók! Pa mani madatá eshtáp kan.
PSA 39:1 Pa sázger o washáwázáni sálárá. Pa Yedutuná. Dáuday Zabur. Gwashton ke “pahréza kanán tán gón wati zobáná gonáh makanán. Tán wahdé badkáré mani kerrá ent wati dapá lagáma kanán.”
PSA 39:2 Chopp o bétawár bután, tantaná sharrén habaré ham nakorton, bale dard o andóhon géshter butant.
PSA 39:3 Delon mán daruná jósh janagá ent. Wahdé géshter pegrona kort, ásá shamálaha kasshet, gorhá zobánon pach but.
PSA 39:4 “Oo Hodáwand! Mani ákebatá paddar kan, mani rócháni hesáb chi ent, bell tán bezánán ke chón zutta gwazant.
PSA 39:5 Taw mani zend bechilléay kaddá kortag, mani zendmánay sál, tai chammá hecch naant. Saddak án ke ensánay zend yak sáhé gésh naent.” Ósht...
PSA 39:6 Béshakk ensán chó sáhegéá chakkarit, béshakk ke á mopt o náhudagá tach o tága kant, mocch o ambára kant, bale nazánt ke kayá rasant.
PSA 39:7 “Bale nun oo Hodáwand! Man che chizzay wadárá án? Ométon tai sará ent.
PSA 39:8 Maná cha sajjahén náparmánián chotthén o ahmakáni kalági makan.
PSA 39:9 Bétawár án o dapá pacha nakanán, chiá ke é taw kortag.
PSA 39:10 Wati zarbatá cha mani sará dur kan, ke cha tai shahmátá tostag o kaptagán.
PSA 39:11 Taw pa hakkal ensáná cha gonáhá adaba dayay o áiay dósténán hamá paymá kanay ke raméz o waróka kant. Saddak án ke ensánay zend sáh o damé gésh naent. Ósht...
PSA 39:12 Oo Hodáwand! Mani dwáyá beshkon o pa komaká mani peryátay némagá delgósh kan, arsánon mashamósh o bétawár mabay. Chiá ke tai gwará mehmánéay paymá án, darámadé, wati pet o pirénáni dhawlá.
PSA 39:13 Wati gazabá cha man dur kan, tán cha jahánay yalah kanagá pésar padá gal bebán.”
PSA 40:1 Pa sázger o washáwázáni sálárá. Dáuday Zabur. Gón sabré pa Hodáwandá wadáron kort, démi gón man tarrént o mani peryáti eshkot.
PSA 40:2 Maná cha johlánkén kalléá dar áworti, cha gel o gandápá, mani pádi taláréay sará óshtárént o gámi mohr kortant.
PSA 40:3 Nókén sawté mani dapá dáti, may Hodáay satá o sanáay shayr. Bázéné gendit o mannit o Hodáwanday sará tawkala kant.
PSA 40:4 Bahtáwar hamá ent ke Hodáwanday sará tawkala kant o démá gón porkebrénána nakant, gón hamáyán ke drógén hodáyáni randgiriá gomráh ant.
PSA 40:5 Oo Hodáwand, oo mani Hodá! Taw pa má bázén ajabén kár o shawré kortag, hechkas tai matth buta nakant. Agan belóthán tai káráni bárawá jár bejanán o habar bekanán, haminchok báz ant ke cha hesábá dar ant.
PSA 40:6 Tará pa hayrát o korbánigá hájaté nést, bale mani góshet pach kortag, sóchagi korbánig o gonáháni korbániget nalóthetag.
PSA 40:7 Gorhá gwashton: “Man átkag o tayár án, mani bárawá ketábay tumárá nebisag butag.
PSA 40:8 Oo mani Hodá! Armánon tai lóth o wáhagay sarjam kanag ent, tai Sharyat mani delá ent.”
PSA 40:9 Rakkénag o nejátay wasshén hálon mazanén diwáná jár jatag. Oo Hodáwand! Hamá dhawlá ke taw zánay man wati dap lagám najatag.
PSA 40:10 Tai rakkénókén madaton wati delá chér nadátag, tai wapádári o nejátbakshiay bárawá habaron kortag o cha mazanén diwáná tai mehr o wapáon napóshéntag.
PSA 40:11 Oo Hodáwand! Maná cha wati rahmatá zebahr makan, tai mehr o wapá tán abad maná émen bedárát.
PSA 40:12 Chiá ke béhesábén sakkián maná angerr kortag, mayárbárián maná geptag o dista nakanán, cha mani saray mudán gésh ant, mani del kaptag.
PSA 40:13 Oo Hodáwand! Mehrabáni kan o maná berakkén. Hodáwandá! Zutt pa mani madatá byá.
PSA 40:14 Á sajjahén ke mani kóshay randá ant o mani marká lóthant sarjahl o sharmsár bátant, á ke mani syahróchiay padá ant poshtá berawát o roswá bátant.
PSA 40:15 Á ke mani sará “hah, haha” kanant wati sarjahliá hayrán o habakkah bátant.
PSA 40:16 Bale á ke tai shóházá ant sajjahén tai bárgáhá shádehi kanát o gal o bál bátant, á ke tai rakkénókén madatesh dóst ent, modám begwashátant: “Hodáwand maz‌an ent.”
PSA 40:17 Man garib o hájatmand án, Hodáwandá mani hayál gwar bát. Taw mani komak o rakkénók ay. Oo mani Hodá! Dér makan.
PSA 41:1 Pa sázger o washáwázáni sálárá. Dáuday Zabur. Bahtáwar hamá ent ke garib o bazzagáni hayálá ent, Hodáwand áiá baláh o mosibatáni róchá rakkénit.
PSA 41:2 Hodáwand áiay negahpániá kant o zendaga dárit, á, molkay tahá bahtáwara bit. Taw áiá dozhmenáni wáhagáni sará yalaha nakanay.
PSA 41:3 Hodáwand áiá nádráhiay wahdá zór o wáka dant, cha nájórhi o kamzórián áiá dráha kant.
PSA 41:4 Man gwasht: “Oo Hodáwand! Mani sará rahm kan, maná dráh kan ke tai gonahkár án.”
PSA 41:5 Dozhmen pa badwáhi mani bárawá gwashant: “Kadéna merit o námi gára bit?”
PSA 41:6 Wahdé cha áyán yakké mani didárá kayt dozobáni habara kant o delá badia ródénit, dhanná ke dara kapit, wati delay habará kant.
PSA 41:7 Sajjahén dozhmen mani helápá halwat o soksoka kanant o pa mani táwán dayagá pandala sázant.
PSA 41:8 Gwashant: “Sellén nádráhiéá geptag, cha waptagén jáhá hechbar pád átka nakant.”
PSA 41:9 Tantaná mani nazzikén dóst ke cha áiá deljam atán, hamá ke gón man hamkásag at, áiá ham maná dróhetag.
PSA 41:10 Bale taw, oo Hodáwand! Mani sará rahm kan, maná pád kan tán wati jostánesh bekanán.
PSA 41:11 Cha eshiá zánán ke cha man washnód ay, ke dozhmen mani sará báládast nabutagant.
PSA 41:12 Cha mani tachki o rástiá, taw mani posht o panáh butagay o modám wati bárgáhá jágaha dayay.
PSA 41:13 Hodáwandá satá bát, Esráilay Hodáyá, cha azal tán abad. Anchosh bát. Ámin.
PSA 42:1 Pa sázger o washáwázáni sálárá. Kórahay chokkáni shayri gwashtánk. Áskay paymá ke pa kawray ápán zahirwár ent, hamé paymá, oo mani Hodá, mani arwáh tai zahirán ent.
PSA 42:2 Mani arwáh pa Hodáyá tonnig ent, pa zend bakshókén Hodáyá, ke bárén kadi Hodáay bárgáhá rawán o áiay démá záhera bán?
PSA 42:3 Shap o róch warákon ars ent, Wahdé mardom modám maná gwashant: “Tai Hodá kojá ent?”
PSA 42:4 Wahdé wati delay dardán darshána kanán, hayálá kapán ke che paymá mazanén mocchiay hamráh atán, jashnay mazanén mocchiay o gón shádehiay kukkár o shogrgozáriay sawtán dém pa Hodáay lógá áyáni rahshón atán.
PSA 42:5 Oo mani arwáh! Chiá gimmortagay? Chiá mani del o daruná paréshán ay? Óst o omét Hodáay sará bekan, chiá ke nóksará hamáiá názénán, wati rakkénók o
PSA 42:6 wati Hodáyá. Mani daruná arwáh gimmortag paméshká tará cha Ordonay sardhagár o Hermónay kóhá yáta kanán, cha Misáray kóhá.
PSA 42:7 Tai mazanén ápsháráni grandá, johlánki, johlánkiá gwánka jant, tai sajjahén chawl o mawj, mani sará proshtagant.
PSA 42:8 Róchá, Hodáwand wati mehrá déma dant o shapá sawt o zémeli gón man ent, dwáé dém pa wati zend bakshókén Hodáyá.
PSA 42:9 Gón Hodáyá ke mani talár ent gwashán: “Chiá maná shamoshtaget? Chiá cha dozhmenay ázárá mótk byárán?”
PSA 42:10 Dozhmenáni shegánán, mani haddh hurt kortagant, chiá ke sajjahén róchá maná gwashant: “Tai Hodá kojá ent?”
PSA 42:11 Oo mani arwáh! Chiá gimmortagay? Chiá mani del o daruná paréshán ay? Óst o omét Hodáay sará bekan, chiá ke nóksará hamáiá názénán, wati rakkénók o wati Hodáyá.
PSA 43:1 Oo Hodá! Gonáhay bohtámá cha mani sará bethagalén, Hodánábáwarén kawméay démá, pa mani hakká jáh bejan o maná cha badkár o prébkáráni dastá berakkén,
PSA 43:2 chiá ke taw mani kalát ay. Taw parchá maná cha wat dur kortag? Chiá cha dozhmenay ázárá mótk byárán?
PSA 43:3 Wati rozhn o rástiá ráh day, tánke mani rahshón bebant o maná pákén kóhá o tai bárgáhá byárant.
PSA 43:4 Á wahdi Hodáay korbánjáhá rawán, dém pa Hodáyá ke mani wasshi o shádehi ent. Oo Hodá, mani Hodá! Tará gón changá názénán.
PSA 43:5 Oo mani arwáh! Chiá gimmortagay? Chiá mani del o daruná paréshán ay? Óst o omét Hodáay sará bekan, chiá ke nóksará hamáiá názénán, wati rakkénók o wati Hodá.
PSA 44:1 Pa sázger o washáwázáni sálárá. Kórahay chokkáni shayri gwashtánk. Oo Hodá! Má wati góshán eshkotag, may pet o pirénán gwashtag ke áyáni zamánagá chónén káret kortag, gwastagén dawr o bárigán.
PSA 44:2 Taw gón wati dastá kawm dar kortant, bale may pet o pirén sabz kortant. Kawmet droshtant o may pet o pirén sháhegáni bakshátant.
PSA 44:3 Na áyáni zahmáni zór at ke molkesh gept na ke básk o bázuán sóbén kortant. É tai rástén dast at, tai básk o chehragay rozhn, chiá ke áyáni sará mehrabán atay.
PSA 44:4 Oo Hodá! Taw mani bádsháh ay. Pa Ákubá péróziay hokmá borr.
PSA 44:5 Cha tai némagá ent ke dozhmenán pada kenzénén, cha tai námá ent ke orosh barókán lagatmála kanén.
PSA 44:6 Man wati kamánay sará tawkala nakanán o zahm maná sóbéna nakant.
PSA 44:7 É taw ay ke márá cha dozhmenán rakkéntag o badwáh sarjahl kortagant.
PSA 44:8 Oo Hodá! Má modám tai sará pahr kortag o tán abad tai námay shográ gerén. Ósht...
PSA 44:9 Bale nun taw márá dawr dátag o béezzat kortag, may lashkaray hamráha nabay.
PSA 44:10 Márá dozhmenáni démá pada kenzénay o badwáh márá áwára janant.
PSA 44:11 Márá korbánigén pasáni paymá pa koshagá eshtaget o kawmáni nyámá sheng o sháng kortag.
PSA 44:12 Taw wati kawm arzáná bahá kortag o cha áyáni baháyá sutté nabortag.
PSA 44:13 Márá hamsáhegáni rishkandi kortag o kerr o gwaray mardománi kalági.
PSA 44:14 Taw márá kawmáni nyámá thekk o neshán kortag, darkawm sará chandhénant o maskará kanant.
PSA 44:15 Sajjahén róchá gón sarjahliá dém pa dém án o sharmá mani dém póshetag,
PSA 44:16 cha bad o rad gwashókáni shegáná, cha dozhmen o bérgiray dastá.
PSA 44:17 É sajjahén may sará átkagant, bale angat má tará nashamoshtag o gón tai ahdá nárást nabutagén.
PSA 44:18 May del cha taw per natarretag o pád o gám cha tai ráhá dar nabutag.
PSA 44:19 Bale taw márá prósh dátag o gón wahshién haywánán yakjáh kortag, gón tahárterén tahárókiá póshéntag.
PSA 44:20 Agan má wati Hodáay nám beshamoshtén, yá dast pa bigánagén hodáéá borz kortén,
PSA 44:21 Hodáyá nazántagat? Chiá ke á cha delay ráz o asrárán sarpad ent.
PSA 44:22 Bale má tai sawabá sajjahén róchá gón marká dém pa dém én o korbánigén pasáni paymá hesáb áraga bén.
PSA 44:23 Oo Hodáwand! Ágáh bay. Pa ché wáb ay? Jáh jan o márá tán abad yalah makan.
PSA 44:24 Chiá wati démá chéra dayay o pa ché may bazzagi o lagatmáliá shamóshay?
PSA 44:25 Chiá ke má háká dém pa chér én o láp zeminá lacchetag.
PSA 44:26 Pád á o may madatá byá, wati mehray sawabá márá bemók o berakkén.
PSA 45:1 Pa sázger o washáwázáni sálárá. “Susanáni” tarzay sará. Kórahay chokkáni shayri gwashtánk. Eshki sawt. Delon cha zébáén gálán sarréch ent, shayré pa bádsháhá gwashán, zobán, zabardastén nebisókéay kalamay paymá ent.
PSA 45:2 Taw ádamiáni nyámá zébáterén ay o cha tai lonthán lál o gawhara gwárit, paméshká Hodáyá tará abadmánén barkaté dátag.
PSA 45:3 Oo tamardén bádsháh! Gón wati shán o shawkatá zahmá lánká band.
PSA 45:4 Gón hamá shawkatá péróziay aspá betáchén, pa rásti, békebri o ensápay dáragá, bell ke rástén dast tará bákamálén kár sój bedant.
PSA 45:5 Tai tir téz ant o bádsháhay dozhmenáni delá nendant, kawm tai pádáni chérá kapant.
PSA 45:6 Oo Hodá! Tai bádsháhi taht modámi o abadmán ent, tai bádsháhi asá, adl o ensápay asá ent.
PSA 45:7 Taw páki o rásti dóst dáshtag o cha badiá naprat kortag, paméshká Hodáyá, tai Hodáyá, tará géshter cha tai hamráhán shádehiay rógen per moshtag.
PSA 45:8 Sajjahén jámaget gón morr o aud o tójá moshtag o washbó butagant. Ájén kasráni tahá simmi sázáni zémel tará shádána kanant.
PSA 45:9 Bádsháháni jenek tai gránázén mehmán ant, tai rástén némagá, malakah gón Opiray teláháni singárá óshtátag.
PSA 45:10 Oo jenek! Beshkon o sharriá delgósh kan, wati kawm o peti lógá shamósh,
PSA 45:11 bell bádsháh tai zébáiay shaydá bebit, áiay démá pa adab bósht ke á tai wájah ent.
PSA 45:12 Suray shahray mardom gón wati thékiá kayt, shahray hastómandén mardom tai razá o washnódiay randá bant.
PSA 45:13 Sháhay jenek wati kasrá sakk zébdár ent, áiay póshák zargwáp ant.
PSA 45:14 Gón pordóchén jámagán bádsháhay kerrá baranti, neshtagén jenek, áiay dazgohár, áiay padá gón ant.
PSA 45:15 Pa shádehi dém dayaga bant o bádsháhi kalátá sara bant.
PSA 45:16 Tai pet o pirokáni jágahá, óbádageta nendant, áyán sajjahén molkay kamásh o mastera kanay.
PSA 45:17 Tai námay yátá nasláni nasl zendaga dárán, paméshká sajjahén kawm tará abad tán abada názénant.
PSA 46:1 Pa sázger o washáwázáni sálárá. Kórahay chokkáni Zabur. “Alámutay” tarzay sará. Sawté. Hodá may panáhgáh o zór o wák ent, madat kanóké ke sakkiáni wahdá tayár ent.
PSA 46:2 Paméshká natorsén, toré zemin bejombit o kóh daryáay delá bekapant.
PSA 46:3 Toré áiay áp grumbán o kap o gajj bebant o kóh cha áyáni grumbagá belarzant. Ósht...
PSA 46:4 Kawré hast ke jói Hodáay shahrá shádmána kanant, borzén arshay Hodáay pákén jágahá.
PSA 46:5 Hodá shahray nyámá ent o shahra nasorit, bámgwáhá Hodá madatia kant.
PSA 46:6 Kawm shóresha kanant o hokumat sarshakuna bant, á wati tawárá borza kant o zemin ápa bit.
PSA 46:7 Lashkaráni Hodáwand gón má gón ent, Ákubay Hodá may kalát ent. Ósht...
PSA 46:8 Byáét Hodáay kárán bechárét, begendét ke áiá zeminá chónén béráni áwortag.
PSA 46:9 Zeminay chárén kondhán jangán halása kant, kamáná próshit, nayzahá hurt hurta kant o arrábahán ás mána dárit.
PSA 46:10 “Watá bedárét o bezánét ke man, Hodá án, kawmáni sará hokmrán o jaháná hákem.”
PSA 46:11 Lashkaráni Hodáwand gón má gón ent, Ákubay Hodá may kalát ent. Ósht...
PSA 47:1 Pa sázger o washáwázáni sálárá. Kórahay chokkáni Zabur. Oo sajjahén kawmán! Cháp bejanét. Gón shádmániay borzén sawtán dém pa Hodáyá kukkár kanét.
PSA 47:2 Chiá ke borzén arshay Hodáwand bákamál ent, sajjahén jahánay mazanén bádsháh.
PSA 47:3 Kawmán may chérdasta kant, ráján may pádáni chérá.
PSA 47:4 May mirásá pa má gechéna kant, wati dóstén Ákubay pahrá. Ósht...
PSA 47:5 Hodá shádmániay kukkáráni nyámá borzád shotag, Hodáwand sornáay tawáray nyámá.
PSA 47:6 Gón wati názénkán Hodáyá satá kanét, názénk janét, benázénét, may bádsháhá benázénét.
PSA 47:7 Chiá ke Hodá sajjahén jahánay bádsháh ent, áiá gón shayré benázénét.
PSA 47:8 Hodá kawmáni sará bádsháhia kant, á wati pákén tahtá neshtag.
PSA 47:9 Kawmáni sarók o master mocch butagant, gón Ebráhémay Hodáay kawmá yakjáh, chiá ke jahánay sajjahén sardár, Hodáayg ant, á béhesáb maz‌anshán ent.
PSA 48:1 Kórahay chokkáni Zabur. Hodáwand mazan o satáay báz láhek ent, may Hodáay shahray tahá. Áiay pákén kóh,
PSA 48:2 Sahyunay kóh, zébá gón wati borziá, sajjahén jahánay shádehi, shomálay borzterén bolandi, mazanshánén bádsháhay shahr ent.
PSA 48:3 Hodá áiay borján ent, watá mohrén kaláté pajjáréntagi.
PSA 48:4 Bádsháh yakjáh butant o hóriá démá shotant,
PSA 48:5 bale anchosh ke shahresh dist, hayrán o habakkah mantant o torsáná jestant.
PSA 48:6 Larzagesh delá kapt, dardé trondén chó ke janénéay chellag o zanká.
PSA 48:7 Taw gón ródarátki gwátá Tarshishay bandenay bójig próshtant.
PSA 48:8 Hamá dábá ke eshkotag nun gón wati chammána gendén, lashkaráni Hodáwanday shahray tahá, may Hodáay shahrá ke Hodá tán abad pádária kant. Ósht...
PSA 48:9 Oo Hodáwand! Tai parasteshgáhay tahá may johlánkén pegr o hayál gón tai mehrá ent.
PSA 48:10 Oo Hodá! Tai námay paymá, tai satá zeminay chárén kondhán sara bit. tai rástén dast adl o rástiá porr ent.
PSA 48:11 Cha tai dadrasiá Yahudáay métag shádmán bátant o Sahyunay kóh shádán.
PSA 48:12 Sahyuná zyárat kanét, áiay chágerdá begardét o borján hesáb kanét,
PSA 48:13 áiay mohrén diwáláni némagá sharriá hayál gwar dayét o sajjahén kalátáni bechárét, tánke gón nókén naslá begwashét
PSA 48:14 ke Hodá hamesh ent, may Hodá, abad tán abad, hamá ent ke tán marká may rahshóna bit.
PSA 49:1 Pa sázger o washáwázáni sálárá, Kórahay chokkáni Zabur. Oo sajjahén kawmán! Beshkonét. Oo jahánay drostigén jahmenendán! Delgósh kanét.
PSA 49:2 Borz o jahlén mardom doén, azgár o nézgár, shomá sajjahén.
PSA 49:3 Mani dap, hekmat bayána kant, delay johlánkén pegr, pahm o zánta bakshit.
PSA 49:4 Góshá dém pa nemunah o batalé tarrénán, wati delay cháchay granchá gón changay sázá pacha kanán.
PSA 49:5 Baláh o sakkiáni róchán chiá betorsán, á wahdá ke rad dayókáni badi maná angerra kant?
PSA 49:6 Áyáni tawkal pa wati zarr o málá ent o wati mazanén hastiay sará pahra kanant.
PSA 49:7 Saddak án ke hechkas wati brátay zendá móketa nakant o áiay hónbaháyá Hodáyá dáta nakant.
PSA 49:8 Chiá ke zenday mókag sakk grán ent o hech kimmaté áiá porr korta nakant
PSA 49:9 tánke ensán namirán bemánit o hechbar kabrá magendit.
PSA 49:10 Chiá ke gendagá én, dáná ham merant o nádán o bésodd ham haláka bant o wati mál o hastiá pa degarána kellant.
PSA 49:11 Kabr áyáni abadmánén lóga bit, nasláni nasl, áyáni menendjáh, harchont ke kallagáná wati námesh per kort.
PSA 49:12 Ádami wati arzesh o hastómandiá namánit, chárpádáni paymá ent ke bérána bant.
PSA 49:13 Esh ent jáheláni ásar, hamáyáni ákebat ke wati habaráni mannók ant. Ósht...
PSA 49:14 Pasáni paymá dém pa mordagáni jaháná ráh dayaga bant, hamódá ke mark áyáni shopánka bit. Bámgwáhán, nékdel áyáni sará hokmránia kanant o áyáni jesm o ján kabrá pussit, dur cha borzén márhián.
PSA 49:15 Bale Hodáwand mani arwáhá cha mordagáni jaháná mókit o maná wati dastá zurit. Ósht...
PSA 49:16 Wahdé shomá gendét kasé hastómanda bit o lógay shawkati gésha bit, matorsét.
PSA 49:17 Chiá ke markay wahdá chizzé gón wata nabárt o shawkati gón áiá kabrá narawt.
PSA 49:18 Tán hastómand ent mardom áiá satá dayant. Harchont ke zendá watá bahtáwar zántagi,
PSA 49:19 bale wati pet o pirénáni hamráha bit, ke zenday rozhná hechbara nagendant.
PSA 49:20 Ádami wati arzesh o hastómandiay tahá nádán ent, chárpádáni paymá ent ke bérána bant.
PSA 50:1 Asápay Zabur. Hamá porwák, Hodáwandén Hodá habara kant o zeminá gwánka jant, cha ródarátká tán rónendá.
PSA 50:2 Hodá cha Sahyuná ke zébáiay kamál ent, wati nurá drapshána kant.
PSA 50:3 May Hodá kayt o bétawára nabit, ér barókén ásé démá enti o trondén gwát o lurhé chágerdá.
PSA 50:4 Borzén ásmánán ham gwánka jant o zeminá ham, tánke wati mardománi dadrasiá bekant.
PSA 50:5 “Hodádóstán mani gwará yakjáh kanét, hamá ke gón korbánig kanagá, gón man ahdesh bastag.”
PSA 50:6 Ásmán áiay adl o rástiá jára janant, chiá ke Hodá wat dádras ent. Ósht...
PSA 50:7 “Oo mani mardomán! Beshkonét ke habara kanán. Oo Esráil! Tai helápá gwáhia dayán. Man Hodá án, shomay Hodá.
PSA 50:8 Pa korbánigi naent ke tará hakkala dayán, tai sóchagi korbánig modám mani chammáni démá ant.
PSA 50:9 Na cha tai lógá gwaské zurán o na pasé cha tai gwáshá.
PSA 50:10 Chiá ke jangalay sajjahén haywán manig ant, hazárán kóháni dalwat.
PSA 50:11 Kóhestagáni sajjahén báli morgán jáha kárán o har ché ke zeminá gardit manig ent.
PSA 50:12 Agan shodig atán tará sahigon nakortagat, chiá ke jahán o harché áiá hast, manig ant.
PSA 50:13 Gókáni góshtá warán? Pasáni hóná nóshán?
PSA 50:14 Wati shogrgozáriay korbánigá Hodáyá pésh kan o wati kawlá gón borzén arshay Hodáyá purah kan.
PSA 50:15 Sakki o sóriáni róchá maná belóth, man tará nejáta dayán o taw maná shán o shawkata dayay.”
PSA 50:16 Bale Hodá gón badkárá chosha gwashit: “Tará che hakk ent ke mani Sharyatay rahbandáni habará bekanay yá mani ahd o paymánay bárawá chizzé begwashay?
PSA 50:17 Chiá ke cha adab o tálimá bézár ay o mani habará poshtá dawra dayay.
PSA 50:18 Dozzé ke genday, démet róshena bit o gón zenákárán hamráha bay.
PSA 50:19 Dapay lagámá pa badiá yalaha kanay o zobáná pa prébá.
PSA 50:20 Modám wati brátay helápá habara kanay, wati mátay chokkay sará bohtáma janay.
PSA 50:21 Taw é kár kortagant o man hecch nagwasht, hayálet kort ke man tai payméné án. Bale nun tará malámata kanán o tai mayár o gonáhán tai chammáni démá éra kanán.
PSA 50:22 Oo Hodá shamoshtagénán! É habará neshán kanét, agan na, shomárá chondh chondha kanán o kas shomárá rakkénta nakant.
PSA 50:23 Á kas ke shogrgozáriay korbánigá pésha kant hamá maná shán o shawkata dant, pa wat ráhé tayára kant o man áiá hamá nejátá pésha dárán ke cha mani némagá ent.”
PSA 51:1 Pa sázger o washáwázáni sálárá, Dáuday Zabur, wahdé Nátán Nabi, cha Dáud o Batshebahay wapt o wábá rand, áiay kerrá átk. Oo Hodá! Pa wati mehrá bechár o mani sará rahm kan! Cha wati békesásén rahmatán náparmániánon gár kan.
PSA 51:2 Pa sarjami maná cha mayárbárián beshód o cha gonáhánon pák kan!
PSA 51:3 Chiá ke wati náparmániána zánán o mani gonáh modám chammáni démá ent.
PSA 51:4 Man tai helápá, tahná tai helápá gonáh kortag o hamá káron kortag ke tai chammá bad ent. Paméshká, taw ke habara kanay barhakk ay o dádrasiay wahdá béayb ay.
PSA 51:5 Pa rásti man mayárbár pédá butagán o cha hamá wahdá ke mátay lápá kaptán, gonahkár.
PSA 51:6 Nun deljam án ke taw cha mani del o jabiná rástiay lóthók ay o chér o panáhén daruná maná hekmata bakshay.
PSA 51:7 Gón zupáay lambán pákon kan ke pákizaga bán, maná beshód ke cha barpá espéttera bán.
PSA 51:8 Bell ke shádehi o shádmániá beshkonán, bell á haddh ke taw droshtagant gal o bál bebant.
PSA 51:9 Cha mani gonáhán sar gwaz o sajjahén mayárbáriánon gár kan.
PSA 51:10 Oo Hodá! Mani daruná pákén delé bejórhén o mani del o jabiná padá mohrén ruhé byár.
PSA 51:11 Maná cha wati bárgáhá dur maperrén o wati Pákén Ruhá cha man pach mager.
PSA 51:12 Wati dátagén rakkénagay shádehiá padá beday o maná morádigén ruhé bebaksh.
PSA 51:13 Gorhá sarkashén mardomán tai ráhán tálima dayán o gonahkár tai kerrá wátarra kanant.
PSA 51:14 Oo Hodá! Oo mani rakkénókén Hodá! Maná cha hón o kóshay gonáhá berakkén o zobánon tai adl o rástiá názénit.
PSA 51:15 Hodáwandá! Mani lonthán pach kan, tánke mani dap tará satá bekant.
PSA 51:16 Tará pa korbánigá wáhagé nést, agan na, mana áwort, sóchagi korbánig tará washnóda nakant.
PSA 51:17 Hodáay delpasondén korbánig, proshtagén arwáh ent. Oo Hodá! Proshtag o tawbahkárén deléa taw jahla najanay.
PSA 51:18 Pa wati washnódiá bechár o gón Sahyuná mehrabán bay, Urshalimay diwálán padá addh kan.
PSA 51:19 Gorhá cha rást o ádelén korbánigán shádána bay, cha sóchagi korbánigá ke sarjamá sóchaga bit, tai korbánjáhá gwask pésh kanaga bant.
PSA 52:1 Pa sázger o washáwázáni sálárá, Dáuday shayri gwashtánk, á wahdá ke Edumi Duig, Sháulay kerrá shot o á sahig korti ke “Dáud, Ahimelekay lógá shotag.” Oo porzórén mard! Chiá badiay sará pahra kanay? Hodáay mehr dáemi ent.
PSA 52:2 Oo prébkár! Tai zobán, tabáhi o barbádiay pandalána sázit, almásén tégéay paymá.
PSA 52:3 Tará badi cha nékiá dóster ent o dróg cha rástiá. Ósht...
PSA 52:4 Oo prébkárén zobán! Har bérán kanókén habará dósta dáray.
PSA 52:5 Bale Hodá tará abadia próshit. Tará chakápit o cha tai gedáná gwajit o cha zendagénáni zeminá tai risshagá kasshit. Ósht...
PSA 52:6 Pahrézkára gendit o torsit, badkáray sará kandit o gwashit:
PSA 52:7 “Haw! Esh ent á kas ke Hodái wati kalát nakort. Tawkali wati bázén mál o dawlatay sará bast o wati barbád kanagá twáná but.”
PSA 52:8 Bale man zaytunay sabzén drachkéay paymá án, ke Hodáay lógá sabza bit. Mani tawkal Hodáay mehray sará ent abad tán abad.
PSA 52:9 Pa tai kortagén kárán modám tai shográ gerán o Hodádóstáni démá pa tai námá ométwár án, chiá ke tai nám nék ent.
PSA 53:1 Pa sázger o washáwázáni sálárá. “Mahallátay” tarzay sará. Dáuday shayri gwashtánk. Nádán wati delá gwashit: “Hodáé nést.” É palit ant o káresh bazhnák, nékkáré nést.
PSA 53:2 Hodá cha ásmáná bani ádamá chárit tán begendit bárén dánáé hast ke Hodáay shóházá ent.
PSA 53:3 Sajjahénán Hodáay ráh gár dátag, hórigá palit butagant, nékkáré nést, yakké ham nést.
PSA 53:4 Badkár hech sarpada nabant? É mani kawmá anchosha warant ke mardom nagana warant o Hodáyá hech tawára nakanant.
PSA 53:5 Ódá ke hech torsé nést é sakka torsant, chiá ke Hodá shomay angerr kanókáni haddhán sheng o shánga kant, taw eshán sharmendaga kanay, chiá ke Hodáyá á cha wat dawr dátagant.
PSA 53:6 Kasé cha Sahyuná byáyát o Esráilá berakkénát. Wahdé Hodá washbahtiá pa wati kawmá pera tarrénit, Ákub gal o bála bit o Esráil shádehia kant.
PSA 54:1 Pa sázger o washáwázáni sálárá. Gón simmi sázán. Dáuday shayri gwashtánk, hamá wahdá ke Zépay mardom Sháulay kerrá shot o gwashtesh: “Bárén, Dáud watá may nyámá chér dayagá naent?” Oo Hodá! Gón wati námá maná berakkén. gón wati zórá gonáhay bohtámá cha mani sará bethagalén.
PSA 54:2 Hodáyá! Mani dwáyá gósh kan o dapay habarán beshkon.
PSA 54:3 Chiá ke bigánag, mani démá pa dozhmeni pád átkagant o setamger mani kóshay padá ant, hamá ke Hodáyá wati chammáni démá nayárant. Ósht...
PSA 54:4 Bale haw! Hodá mani komak kanók ent, Hodáwand mani zenday dárók ent.
PSA 54:5 Mani dozhmenáni badi áyáni jenday chakká kapát, wati wapádáriay sawabá, áyán gár kan.
PSA 54:6 Oo Hodáwand! Wati delkasshén korbánigán tará pésha kanán o tai námay shográ gerán, chiá ke nék ent.
PSA 54:7 Parchá ke taw maná cha har sakki o sóriá rakkéntag, mani chamm dozhmenay prósh waragay sháhed butagant.
PSA 55:1 Pa sázger o washáwázáni sálárá. Gón simmi sázán. Dáuday shayri gwashtánk. Oo Hodá! Mani dwáyá beshkon o watá cha mani zári o peryátán chér maday.
PSA 55:2 Mani némagá delgósh kan o passaw day, wati nálag o zangán paréshán án.
PSA 55:3 Cha dozhmenáni tawár o cha badkáráni kukkárán bétágat o hayrán án. Chiá ke náhakká maná ranjénant o gón hezhmé mani dozhmeniá kanant.
PSA 55:4 Del mán sénagá azáb ent o markay torson sará kaptag o
PSA 55:5 bimm o dehshatá maná chér tarréntag.
PSA 55:6 Gwashán: “Dréchá kapóti bálon per butén, tánke bálon bekortén o árám begepténán,
PSA 55:7 Haw! Dém pa durén jágahána shotán o dasht o gyábánon wati hankéna kort. Ósht...
PSA 55:8 Pa eshtápia shotán o jáhé chéra bután, cha lurh o tuppánán dur.”
PSA 55:9 Hodáwandá! Áyáni zobáná anchosh betarrén ke yakdomiá sarpad mabant, chiá ke shahrá jang o chópa gendán.
PSA 55:10 Róch o shap shahray chágerdá diwáláni sará tarragá ant o shahr cha náensápi o petnahá porr ent,
PSA 55:11 cha harábi o bérániá sarréch ent o setam o repk, cha áiay bázárá dura nabit.
PSA 55:12 É dozhmené naent ke maná shegána jant, agan na, mana sagget, badwáh naent ke gón pahré mani démá óshtátag, agan na, cha áiá chéra bután.
PSA 55:13 Ji, taw ay mani matth, mani bráhondag o nazzikén dóst,
PSA 55:14 ke márá wasshén hamráhié hastat hamá wahdá ke gón mazanén mocchié Hodáay lógá gámena jat.
PSA 55:15 Mark áyáni chakká bekapát o zendahgórr bátant, chiá ke badi áyáni lóg o deláni tahá ent.
PSA 55:16 Bale man Hodáyá gwánka janán o Hodáwand maná rakkénit.
PSA 55:17 Bégáh o sabáh o némróchá zanga janán o peryáta kanán o á mani tawárá eshkont.
PSA 55:18 Mani jesm o jáná cha hamá jangá ke démá dar átkag pa dráhi o salámatia rakkénit, bell toré bázéné mani démá óshtátag.
PSA 55:19 Hodá ke cha azal wati bádsháhi tahtay sará neshtag, eshkont o sharmendagesha kant. Ósht... Chiá ke badala nabant o Hodátorsiesh nést.
PSA 55:20 Mani bráhondagá wati dast dóstáni helápá shahárt o wati kawli prósht.
PSA 55:21 Zobáni chó thélá charp at bale deli jangig, dapay habari cha rógená narmter, bale kasshetagén zahm atant.
PSA 55:22 Wati paréshánián pa Hodáyá bell, ke á tai dárók ent, á hechbar pahrézkárán kapagá naylit.
PSA 55:23 Bale taw, oo Hodá, badkárán johlterén kallá dawra dayay, hónwár o prébkárén mardom wati rócháni némá ham zendaga namánant, bale man tai sará tawkala kanán.
PSA 56:1 Pa sázger o washáwázáni sálárá. “Bétawár o durdastén kapótay” tarzay sará. Dáuday shayr, hamá wahdá ke Pilistián Dáud Gatay shahrá dazgir kort. Oo Hodá! Mani sará rahm kan, ke dozhmen sakk mani randá ant, sajjahén róchá, mani sará orosha kanant.
PSA 56:2 Sajjahén róchá, dozhmen maná lagatmála kanant, chiá ke bázéné pa kebr mani sará orosha kant.
PSA 56:3 Wahdé maná torsit tai sará tawkala kanán.
PSA 56:4 Hodáay sará, ke áiay habará satá kanán, Hodáay sará tawkala kanán o natorsán, hákién ensán maná ché korta kant?
PSA 56:5 Sajjahén róchá, mani habarán tába dayant o sajjahén honaresh pa mani ázár dayagá ent.
PSA 56:6 Pandala sázant o kamina kanant, mani gámána chárant o mani koshagay randá ant.
PSA 56:7 Gón é sajjahén badián rakketa kanant? Oo Hodá! Wati hezhmay tahá kawmán sarshakun kan.
PSA 56:8 Taw mani darpadariay hesábána dáray, mani arsán wati arsdáná bekan, é tai ketáb o daptarán nebeshtah naant?
PSA 56:9 Gorhá á wahdá ke tará gwánka janán dozhmen pada kenzant. Eshiá zánán ke Hodá gón man ent.
PSA 56:10 Hamá Hodá ke áiay habará satá kanán, haw, hamá Hodáwand ke áiay habará satá kanán,
PSA 56:11 Hamá Hodáay sará tawkala kanán o natorsán. Ensán maná ché korta kant?
PSA 56:12 Oo Hodá! Báyad ent gón taw wati kortagén kawlán purah bekanán, pa taw shogrgozáriay korbánigán pésha kanán.
PSA 56:13 Chiá ke taw, oo Hodá, maná cha marká rakkénay o mani pádán cha lakoshagá dáray, ke zenday rozhná tai bárgáhá gám bejanán.
PSA 57:1 Pa sázger o washáwázáni sálárá. “Barbád makanay” tarzay sará. Dáuday shayr, hamá wahdá ke Dáud cha Sháulá tatk o gáréá chér but. Mani sará rahm kan. Oo Hodá! Mani sará rahm kan, chiá ke mani arwáh tai mayár o báhóth ent. Tai bánzoláni sáhegá panáha zurán, tán hamá wahdá ke é baláh berawt o begwazit.
PSA 57:2 Borzén arshay Hodáay gwará peryáta kanán, hamá Hodá ke gonáhay bohtámá cha mana thagalénit.
PSA 57:3 Cha ásmáná wati komaká ráha dant, maná rakkénit o áyán ke maná lapáshant, pa hakkal adaba kant. Ósht... Hodá wati mehr o wapádáriá rawána kant.
PSA 57:4 Mani arwáh shéráni nyámá ent, ás bon dayókáni nyámá wapsán, hamá mardománi nyámá ke dantánesh tir o nayzah ant o zobánesh tézén zahm.
PSA 57:5 Oo Hodá! Ásmánáni sará bátay, tai shawkat sajjahén zeminá sheng bát.
PSA 57:6 Mani pádáni démá dámesh chér kort o arwáhon sarshakun but. Ráhay sará chátesh kótk, bale wat ódá shakun butant. Ósht...
PSA 57:7 Oo Hodá! Mani del mohr ent. Mani del mohr ent o sawt o sáza janán.
PSA 57:8 Oo mani arwáh! Ágáh bay. Oo chang o soródán! Ágáh bét. Man bámgwáhá cha wábá páda kanán.
PSA 57:9 Oo Hodáwand! Tará kawmáni nyámá satá kanán o pa taigi kabilaháni nyámá sawta janán.
PSA 57:10 Chiá ke tai mehr báz ent, tán arshá rasit o tai wapádári tán jambarán.
PSA 57:11 Oo Hodá! Ásmánáni sará bátay, tai shawkat sajjahén zeminá sheng bát.
PSA 58:1 Pa sázger o washáwázáni sálárá. “Barbád makanay” tarzay sará. Dáuday shayr. Oo hákemán! Shomay bétawári náensápi naent? Mardománi nyámá pa ensáp dádrasia kanét?
PSA 58:2 Enna, wati delá béadlia sázét o shomay dast zeminá petnah páda kanant.
PSA 58:3 Badkárán cha mátay lápá wati ráh gár dátag o cha pédáeshá gomráh o drógband ant.
PSA 58:4 Áyán zahré mán ent chosh ke máray zahrá, syahmáréay dhawlá ant ke góshi bastagant o
PSA 58:5 hech paymá wati démá pa márgeráni áwázá natarrénit, harchont ke ezm o honara kanant.
PSA 58:6 Oo Hodá! Esháni dantánán mán dapá prósh. Hodáwandá! É warnáén shéráni néshén dantánán cha boná dar kan.
PSA 58:7 Tachókén ápáni paymá gár bátant, wahdé kamána kasshant tiresh konth bátant o pad o nesháné maylátant,
PSA 58:8 halazunay paymá ke gón rawagá ápa bit o eshkand butagén chokkay paymá ke hechbar róchay rozhná nagendit.
PSA 58:9 Cha eshiá pésar ke shomay déz konthagáni ásá bemárant, tarr bebant yá hoshk, Hodáesh gár o gomsár kanát.
PSA 58:10 Pahrézkár, bérá ke gendit, shádehia kant, wati pádán mán badkáráni hóná shódit.
PSA 58:11 Mardoma gwashant: “Albat ke pa pahrézkárá mozzé hast, Hodáé hast ke zeminay sará dádrasia kant.”
PSA 59:1 Pa sázger o washáwázáni sálárá. “Barbád makanay” tarzay sará. Dáuday shayr, hamá wahdá ke Sháulá pa Dáuday kóshá, lahtén chárug áiay lógá rawán dát. Oo mani Hodá! Maná cha dozhmenán berakkén o cha áyán ke mani helápá jáha janant, mani negahpániá bekan.
PSA 59:2 Maná cha badkárán berakkén o cha hónigán neját beday.
PSA 59:3 Bechár ke che paymá pa mani kóshá kaminesh kortag. Oo Hodáwand! Zórákén mard mani helápá yakjáh butagant, maná hech gonáh o mayáré ham nést.
PSA 59:4 Man hech gonáh o mayáré nakortag, bale é angat mani sará orosh kanagá tayár ant. Pa mani komaká pád á o mani hálá bechár.
PSA 59:5 Oo Hodáwand, oo lashkaráni Hodá! Taw Esráilay Hodá ay, ágáh bay, sajjahén kawmán sezá beday o badkárén dróhókáni sará rahm makan. Ósht...
PSA 59:6 Shapá pera tarrant, kochekáni paymá gorrant o shahray chágerdá gardant.
PSA 59:7 Bechár ke cha dapá ché dara kanant, zahmesh dapá ent, gwashant: “Kass eshkonagá naent.”
PSA 59:8 Bale taw, oo Hodáwand, áyáni sará kanday, sajjahén kawmáni sará rishkanda kanay.
PSA 59:9 Oo mani wák o zór! Tai rahchár án, chiá ke taw mani kalát ay, oo Hodáwand!
PSA 59:10 Hodá pa man mehrabán ent o mani komaká kayt, dozhmenáni sará wati péróziá gendán.
PSA 59:11 Oo Hodáwand ke may espar ay! Áyán makosh, chosh mabit ke mani kawm beshamóshit. Gón wati zórákiá eshán sargardán kan o ér byár.
PSA 59:12 Pa wati dapay gonáh o lontháni habarán wati kebray tahá bandig bebant. Esháni nálat o drógbandiay sawabá,
PSA 59:13 eshán wati hezhmay tahá gár o gomsár kan, gár o gomsár kan ke hech pasht makapant, tán zánag bebit ke cha Ákubá beger tán zeminay har kondhá Hodá bádsháhia kant. Ósht...
PSA 59:14 Shapá pera tarrant, kochekáni paymá gorrant o shahray chágerdá gardant.
PSA 59:15 Warákay shóházá sar sar janána bant o agan sér mabant wába nakapant.
PSA 59:16 Bale man tai kodratay tawsipá sawt o sáza janán, sohbá tai mehray satáyá sawta janán o shádehia kanán, chiá ke taw mani borzén kalát ay o sakkiáni wahdá mani panáhgáh.
PSA 59:17 Oo mani wák o twán! Tará názénán. Hodá mani borzén kalát ent, mani Hodá ke gón man mehra kant.
PSA 60:1 Pa sázger o washáwázáni sálárá. “Susanay” tarzay sará. Gwáhié. Pa tálimá Dáuday shayr, hamá wahdá ke Dáudá gón Naharaymay Árámián o Sóbahay Árámián jang kort o hamá wahdá ke Yuáb per tarret o Wáday dashtá cha Edumián dwázdah hazár mardomi kosht. Oo Hodá! Taw márá yalah kortag o may sangar próshtagant, hezhmnák butagay, bale nun gón má wasshán bay.
PSA 60:2 Zeminet jombéntag o tal dátag, taláni beger ke larzagá ent.
PSA 60:3 Wati kawmet gránén jáwarán perréntag, márá madhósh kanókén sharábet wáréntag.
PSA 60:4 Bale angat bayraket pa Hodátorsán borzád kortag tánke yakjáh bebant o cha dozhmenay kamáná berakkant. Ósht...
PSA 60:5 Gón wati rástén dastá berakkén o passaw beday tán hamá ke tará dóst ant berakkant.
PSA 60:6 Hodáyá cha wati pákiá habar kort: “Shekémá gón shádehi bahra kanán o Sukkótay daragá kesása kanán.
PSA 60:7 Galyád manig ent o Manassi mani, Epráim mani jangi koláh ent, Yahudá bádsháhiay asá o
PSA 60:8 Muáb mani dasshódi trasht, Edumay sará wati swásá chagala dayán o Pilistiahay sará wati péróziay gwánká janán.”
PSA 60:9 Kay maná choshén shahréá kárit ke sangarband ent? Kay maná dém pa Edumá rahshóna bit?
PSA 60:10 Oo Hodá! Taw márá yalah dátag. Oo Hodá! Padá may lashkaráni hamráha nabay.
PSA 60:11 Dozhmenáni démá márá madat kan, chiá ke ensánay madat békár o náhudag ent.
PSA 60:12 Gón Hodáyá sóbéna bén, hamá ent ke may dozhmenán pádmála kant.
PSA 61:1 Pa sázger o washáwázáni sálárá. Gón simi sázán. Dáuday Zabur. Oo Hodá! Mani peryátá beshkon o mani dwáyá gósh dár.
PSA 61:2 Tará cha zeminay godhsará gwánka janán, wahdé delona drahit. Maná dém pa taláréá bar ke cha man borzter ent.
PSA 61:3 Chiá ke taw mani panáhgáh butagay o dozhmenáni démá mohrén borjé.
PSA 61:4 Bell ke tai tambuá tán abad bemánán o tai bánzoláni sáhegá panáh bezurán. Ósht...
PSA 61:5 Chiá ke taw, oo Hodá, mani dátagén kawl eshkotagant o wati námay torsetagénáni miráset maná bakshátag.
PSA 61:6 Bádsháhay omray róchán báz kan o áiay sálán, tán sajjahén naslán.
PSA 61:7 Hodáay bárgáhá tán abad sháhi tahtá benendát, wati mehr o wapádáriá áiay negahpán kan.
PSA 61:8 Nun tai námá modám názénán o wati kawlán har róch puraha kanán.
PSA 62:1 Pa sázger o washáwázáni sálárá. “Yedutunay” tarzay sará. Dáuday Zabur. Mani arwáh pa émeni tahná Hodáay rahchár ent, chiá ke mani rakkénag cha hamáiay némagá ent.
PSA 62:2 Mani talár o mani rakkénók tahná hamá ent, mani kalát ent, hechbara nalarzán.
PSA 62:3 Tán kadén mardéay sará orosha kanét tánke sarjamiá bekoshéti, chosh ke proshtagén diwál o kaptagén shank o pallé?
PSA 62:4 Albat pandala sázant ke áiá cha borzád sarshakun bekanant. Cha dróg bandagá lezzata barant, gón wati dapá barkata dayant, bale delay tahá nálata kanant. Ósht...
PSA 62:5 Oo mani arwáh! Pa émeni tahná Hodáay rahchár bay, chiá ke mani omét gón hamáiá ent.
PSA 62:6 Mani talár o mani rakkénók tahná hamá ent, mani kalát ent, mana nalarzán.
PSA 62:7 Mani neját o ezzat gón Hodáyá ent, hamá mani mohrén talár ent, mani panáhgáh ent.
PSA 62:8 Oo mardomán! Hodáay sará tawkal kanét o delay hálán hamáiay démá darshán kanét, Hodá may panáhgáh ent. Ósht...
PSA 62:9 Pa rásti ke ensán cha daméá géshter naent, bani ádam prébé, agan sháhémá tóresh bekanant hech naant. É sajjahén, yakjáh cha damé géshter naant.
PSA 62:10 Pa zolm o zórá tawkal makanét o pa dozziá omét mabandét, harchont ke shomay mál géshtera bit, pa áiá del mabandét.
PSA 62:11 Hodáyá yak habaré gwashtag o man do eshkotag, ke zór o kodrat Hodáayg ent o
PSA 62:12 mehr o rahm ham taig ent, oo Hodáwand! Taw harkasá áiay kortagén káráni hesábá, mozza dayay.
PSA 63:1 Dáuday Zabur, hamá wahdá ke Yahudáay gyábáná at. Oo Hodá! Mani Hodá taw ay, gón wati sajjahén del o jáná tai shóházá án, arwáhon tai tonnig ent o jesm o jánon tai hodónák, béáp o hoshkén zeminéá.
PSA 63:2 Tai pákén jágahá, maná tai shobén butag, tai shán o kodraton distag,
PSA 63:3 chiá ke tai mehr cha zendá sharter ent, mani lonth tará názénant.
PSA 63:4 Tán zendag án tará názénán o pa tai námá dastán borza kanán.
PSA 63:5 Arwáhon anchosh séra bit chó ke yakké wasshén waráké bwárt o dapon gón shádmánén lonthán tará názénit.
PSA 63:6 Wati bestaray tahá ham tará yáta kanán o shapáni pásán tai hayálá bán.
PSA 63:7 Tai bánzoláni sáhegá tará názénán, chiá ke taw mani madatkár ay.
PSA 63:8 Arwáhon gón taw bandók ent o rástén dastet mani posht o panáh.
PSA 63:9 Á ke mani koshagay pad o randá ant gár o gomsára bant o zeminay johlánkián éra rawant.
PSA 63:10 Zahmáni dapá tarrant o tólagáni waráka bant.
PSA 63:11 Bale bádsháh Hodáay dargáhá shádehia kant o harkas ke gón Hodáyá sawgenda wárt pahra kant, chiá ke drógbandáni dap chopp o bandaga bit.
PSA 64:1 Pa sázger o washáwázáni sálárá. Dáuday Zabur. Oo Hodá! Wahdé nálán o peryáta kanán, mani tawárá beshkon o zendá cha torsnákén dozhmenán berakkén.
PSA 64:2 Maná cha badkáráni pandalán chér day, cha radkáráni áshópá.
PSA 64:3 Chiá ke wati zobáná zahmáni paymá téza kanant o wati tahlén habarán tiray paymá kára bandant
PSA 64:4 tánke cha wati sangarán bémayárá neshánag bekanant. Anágat o bé torsá áiá tira janant.
PSA 64:5 Radén kárá yakdomiá delbaddhia dayant, habar ke kanant, maksadesh wati dámáni chér kanag ent. Gwashant: “Kayesha gendit?”
PSA 64:6 Náensápiá dalil o honara kanant o gwashant: “Má tamán o kamálén shawré kortag.” Pa rásti ke ensánay del o hayál zánaga nabant.
PSA 64:7 Bale Hodá áyán tira jant o anágat thappiga bant.
PSA 64:8 Á wati jenday zobánay sawabá thagala warant. Harkas ke begenditesh pa áyán sará chandhénit.
PSA 64:9 Sajjahén bani ádama torsant, Hodáay kárá jára janant o áiay kárá pa hósh o sára chárant.
PSA 64:10 Pahrézkár Hodáwanday dargáhá shádehi kanát o áiay dargáhá panáh bezurát. Sajjahén nékdel pahr bekanátant.
PSA 65:1 Pa sázger o washáwázáni sálárá. Dáuday Zabur. Sawté. Oo Hodá! Sahyuná satá o saná tai wadárá ent, gón taw may kawl puraha bant.
PSA 65:2 Oo taw ke dwáyána eshkonay! Sajjahén mardom dém pa taw káyant.
PSA 65:3 Á wahdá ke gonáh mani sará lombetant, taw márá bakshet.
PSA 65:4 Bahtáwar hamá ent ke tawi gechéna kanay o wati bárgáhá káray tánke hamódá jahmenend bebit. Cha tai dargáhay nékiá séráp bátén, cha tai parasteshgáhay pákiá.
PSA 65:5 Gón wati bákamálén kárán, márá pa adl o ensáp passawa dayay. Oo may rakkénókén Hodá! Zeminay chár kondh o durdastterén daryáyáni omét gón taw ent.
PSA 65:6 Taw ay ke gón wati zór o wáká kóhet jórhéntagant o watá gón kodratá selahbandet kortag,
PSA 65:7 daryáyáni gorraget árám kortant, mawjáni tawár o kawmáni áshóp.
PSA 65:8 Zeminay chár kondhá nendók cha tai neshánián hayrán ant, taw shagreb o magrebá parmáay ke shádmániay kukkárá bekanant.
PSA 65:9 Taw zeminay hayáldáriá kanay, áiá ápa dayay o ábáda kanay. Hodáay kawr sarréch ent taw mardomán gandoma bakshay chiá ke tai shawr hamé butag.
PSA 65:10 Taw zeminay palán ápa dayay o dhagárá hamdasta kanay, gón gwáragá narmia kanay o rost o rodómá barkata dayay.
PSA 65:11 Gón wati nékiá sálá tájé sará dayay, tai pádráh ham cha barkatá sarréch ant.
PSA 65:12 Gyábánáni charágáh ábáda bant o kóhán wati srén pa shádmáni bastagant.
PSA 65:13 Dhagárán watá gón ramagán póshéntag o daragán gón gandomá, shádmániay kukkárá borza kanant o sawta janant.
PSA 66:1 Pa sázger o washáwázáni sálárá. Sawté. Zaburé. Oo zeminay sajjahén mardomán! Pa Hodáyá shádehiay gwánká bejanét.
PSA 66:2 Áiay námay mazaniá názénét o áiay shán o shawkatá satá kanét.
PSA 66:3 Hodáyá begwashét: “Tai kár chenkadar bákamál ant. Tai wák o kodratay mazaniay sawabá dozhmen tai démá háká kapant.
PSA 66:4 Zeminay sajjahén mardom tará sojdaha kanant o tará názénant. Haw! Tai námá sárháyant.” Ósht...
PSA 66:5 Byáét o bechárét ke Hodáyá ché kortag, ajabén kár pa bani ádamá.
PSA 66:6 Daryái hoshk kort o Hodáay kawm ódá pád payádaká cha kawrá gwast, áiay bárgáhá shádmáni bekanén.
PSA 66:7 Á gón wati kodratá tán abad bádsháhia kant, chammi gón kawmán ent. Sarkesh áiay helápá pád mayáyant. Ósht...
PSA 66:8 Oo kawmán! May Hodáyá satá kanét, pa borztawári benázénéti.
PSA 66:9 May zendi rakkéntag o pádi cha thagalagá dáshtagant.
PSA 66:10 Oo Hodá! Chiá ke taw márá chakkásetag, taw márá nograhay paymá palgártag.
PSA 66:11 Taw márá dámá dawr dátag o may gardená mazanén báré eshtag.
PSA 66:12 Cha tai razáyá mardomán márá sarjamiá lagatmál kortag, cha áp o ásá gwastagén, bale márá sarsabzén jáhéá áwortaget.
PSA 66:13 Gón sóchagi korbánigán tai dargáhá káyán o gón taw wati kawlán puraha kanán,
PSA 66:14 hamá kawl ke lonthán wádah dátag o dapá gwashtagant sakki o sóriáni wahdá.
PSA 66:15 Pazzórén dalwatán sóchagi korbániga kanán, gón gwarándháni korbánigay duttán, pa taw pas o gók nadra kanán. Ósht...
PSA 66:16 Oo sajjahén Hodátorsán! Byáét o beshkonét, hamá chizzána gwashán ke pa man kortaganti.
PSA 66:17 Gón wati dapá áiay kerrá peryáton kortag, áiay satá o saná mani zobáná at.
PSA 66:18 Agan badié mani delá butén Hodáwandá mani habar gósh nadáshtagat.
PSA 66:19 Bale Hodáyá pa rásti eshkotag o mani dwáay tawári gósh dáshtag.
PSA 66:20 Hodáyá satá bát ke cha mani dwáyá nádelgósh nabutag o wati mehri cha man dur nadáshtag.
PSA 67:1 Pa sázger o washáwázáni sálárá. Pa simmi sázán. Zaburé. Sawté. Hodá may sará mehrabán bát, márá barkat bedayát o wati démá pa má drapshán kanát, ósht...,
PSA 67:2 tánke tai ráh jaháná zánag bebit o tai dátagén rakkénag sajjahén kawmáni nyámá.
PSA 67:3 Oo Hodá! Kawm tará satá kanátant, sajjahén kawm tará satá kanátant.
PSA 67:4 Kawm shádehi kanátant o shádmániay gwánká bejanátant, chiá ke taw kawmáni sará pa ensáp dádrasia kanay o jahánay kawmáni rahshóna bay. Ósht...
PSA 67:5 Oo Hodá! Kawm tará satá kanátant, sajjahén kawm tará satá kanátant.
PSA 67:6 Zeminá wati bar o samar dátag, Hodá, may Hodá, márá barkat bedayát.
PSA 67:7 Hodá márá barkat bedayát tánke zeminay chár kondh áiay mazaniá sharap bedayant.
PSA 68:1 Pa sázger o washáwázáni sálárá. Dáuday Zabur. Sawté. Hodá jáh bejanát o áiay dozhmen sheng o sháng bátant, á ke cha áiá naprata kanant cha áiay dargáhá betachátant.
PSA 68:2 Anchosh ke dutt bála kant eshán betáchén, anchosh ke móm ásay démá ápa bit, badkár Hodáay dargáhá gár o gomsár bátant.
PSA 68:3 Bale pahrézkár shádmán o Hodáay dargáhá gal o bál bátant o cha wasshiá shádehi kanátant.
PSA 68:4 Pa Hodáyá sawt bejanét o áiay námá názénét, pa áiá ke jambarán swár ent satá o sanáay tawárá borz kanét. Áiay nám Hodáwand ent, áiay bárgáhá shádehi kanét.
PSA 68:5 Hodá wati pákén bárgáhá chórhawáni pet ent o janózámáni dádras.
PSA 68:6 Hodá békasán pa lóg o jáha kant o bandigán, ázát o ábád, bale sarkesh, hoshkén zeminéá nendóka bant.
PSA 68:7 Oo Hodá! Á wahdá ke wati kawmay rahshón atay, á wahdá ke gyábáná mallán atay, ósht...,
PSA 68:8 zemin larzet o ásmánán hawr gwart, Hodáay bárgáhá, Sináay kóhay yakdánagén Hodáay, Hodáay bárgáhá, Esráilay Hodáay.
PSA 68:9 Oo Hodá! Taw bázén hawré gwárént o tai mirás ke hoshk o wayrán butagat, taw séráp kort.
PSA 68:10 Tai ramag ódá jahmenend but. Cha wati nékiá, oo Hodá, taw béwas rózi dátant.
PSA 68:11 Hodáwand wati habará jára jant, bashárat árókén janén, mazanén lashkaré ant.
PSA 68:12 Bádsháh gón wati lashkarána jehant o tachant, janén wati lógá áwárán bahra kanant.
PSA 68:13 Toré gwásh o áhorráni tahá wáb bebay kapódaráni bál nograhpósha bant o potthesh teláh‌rang.
PSA 68:14 Wahdé Porwákén Zórá bádsháh sheng o sháng kortant, barpá Salmunay kóhay sará gwart.
PSA 68:15 Oo mazankóh! Oo Báshánay kóh! Oo bázthollén kóh! Oo Báshánay kóh!
PSA 68:16 Oo bázthollén kóh! Pa ché hamá kóhá gón hasaddé cháragá ay ke Hodáyá pa wati lógjáhá gechén kortag, hamódá ke Hodáwand tán abad jahmenenda bit?
PSA 68:17 Hodáay arrábah hazáráni hazár o lakkáni lakk ant, Hodáwand cha Sináay kóhá wati pákén jágahá átkag.
PSA 68:18 Á wahdá ke arshá borz butay bázén bandigé zortet, cha mardomán thékiet zort, tantaná cha sarkashán ham, tánke taw, oo Hodáwandén Hodá, ódá jahmenend bebay.
PSA 68:19 Hodáwandá satá bát, may rakkénókén Hodáyá ke har róch may bárána saggit. Ósht...
PSA 68:20 May Hodá rakkénókén Hodá ent, cha marká rakkénag Hodáwanday dastá ent, tahná Hodáwanday.
PSA 68:21 Bale Hodá dozhmenáni sará próshit, hamáyáni pormudén saray gobbahá próshit ke wati gonáháni tahá gáma janant.
PSA 68:22 Hodáwandá gwashtag: “Áyán cha Básháná pera tarrénán, áyán cha daryáay johlánkián pera tarrénán,
PSA 68:23 tánke tai pád áyáni hóná lagatmál bekanant o tai kochekáni zobán ham wati bahrá cha dozhmenán begerant.”
PSA 68:24 Oo Hodá! Tai jashnay kárwán gendaga bit mani Hodá o mani bádsháhay kárwán mán pákén jágahá.
PSA 68:25 Démá sháer o poshtá sázger o nyámá jenek tamburag janagá ant.
PSA 68:26 Hodáyá mán mazanén diwánán benázénét. Oo Esráilay óbádagán! Hodáwandá benázénét.
PSA 68:27 Benyáminay kasánén kabilah hamódá ent, Yahudáay kamásh áyáni hákem ant, Zebulunay kamásh o Naptáliay kamásh, mazanén rombé ant.
PSA 68:28 Tai Hodáay parmán ent ke taw zóráwar bebay. Oo Hodá! Anchosh ke pésará kortaget, wati zór o wáká márá pésh bedár.
PSA 68:29 Pa tai parasteshgáhay háterá ke Urshalimá ent bádsháh pa taw thékia kárant.
PSA 68:30 Kalam o kásháni nyámay rastará hakkal day o kawmáni gwaskáni nyámá gókáni góromá. Rastar érdasta bit o nograha kárit. Jangdóstén kawmán sheng o sháng kan.
PSA 68:31 Kásed cha Mesrá káyant Habashah eshtápiá wati dastán dém pa Hodáyá borzáda kant.
PSA 68:32 Oo jahánay molkán! Pa Hodáyá sawt bejanét, Hodáwandá gón sawtá benázénét, ósht...,
PSA 68:33 hamáiá ke ásmánán shahswária kant, kwahnén ásmánán, hamáiá ke wati áwázá borza kant, trond o porwákén áwázá.
PSA 68:34 Hodáay kodratá jár bejanét, ke shán o shawkati Esráilay sará ent o kodrati, ásmánáni sará.
PSA 68:35 Oo Hodá! Taw wati pákén jágahá bákamál ay, Esráilay Hodá wati kawmá zór o wáka bakshit. Hodáyá satá o saná bát.
PSA 69:1 Pa sázger o washáwázáni sálárá. “Susanáni” tarzay sará. Dáuday Zabur. Oo Hodá! Maná berakkén ke áp tán mani gardená ent.
PSA 69:2 Johlánkén pujgelán mén butagán, jágahé ke páda naóshtit. Johlánkén ápáni tahá kaptagán o hár o lahrhán maná angerr kortag.
PSA 69:3 Cha bázén peryátán damon bortag, mani nokk hoshk ent o chamm wati Hodáay wadárá tahár butagant.
PSA 69:4 Á ke bésawab cha man naprata kanant cha mani saray mudán géshter ant. Bázéné mani gár kanagay randá ent dozhmen mani sará drógén bohtáma janant. Cha man lóthant hamá chizzán per betarrénán ke man nadozzetagant.
PSA 69:5 Oo Hodá! Taw zánay ke man ahmaki kortag, mani gonáh cha taw chér naant.
PSA 69:6 Oo Hodáwand, oo lashkaráni Hodáwand! Hamá ke tai wadárig ant mani sawabá sharmendag mabátant. Oo Esráilay Hodá! Hamá ke tai shóházá ant mani sawabá roswá mabátant.
PSA 69:7 Chiá ke pa taigi maná sobakka kanant o mani dém cha sharmá póshénag butag.
PSA 69:8 Brátáni chammá bigánag butagán o wati mátay chokkáni démá darámadé.
PSA 69:9 Á gayrat ke maná pa Hodáay lógá hastent, maná jánsócha kant o báhénit o tai rad o bad kanókáni rad o bad, mani sará kaptagant.
PSA 69:10 Á wahdá ke arson rétkag o róchagon dáshtag sobakk kanag butagán.
PSA 69:11 Á wahdá ke sugi god o póshákon gwará kortagant, esháni kerrá batalé butagán.
PSA 69:12 Shahray masteráni gwará nám o dap án o sharábiáni sawt.
PSA 69:13 Bale man, oo Hodáwand, tai rahmay wahdá, tai dargáhá dwá kanán. Oo Hodá! Cha wati bázén mehr o wapádáriá, gón deljamén rakkénagé passaw beday.
PSA 69:14 Maná cha pujgelán dar kan, tánke ér maboddhán. Cha naprat kanókáni panjagá maná berakkén o cha johlánkén ápán dar kan.
PSA 69:15 Mayl ke hár maná angerr kanant, yánke johlánki maná ér barant, yá mani sará kall wati dapá bebandit.
PSA 69:16 Oo Hodáwand! Mani passawá beday ke tai rahmat báz ant, wati rahmatáni kesás o hesábá, wati démá gón man betarrén.
PSA 69:17 Démá cha wati hezmatkárá mapóshén, pa mani madatá eshtáp kan ke sakk tang átkagán.
PSA 69:18 Nazzik byá o maná berakkén, dozhmenáni sawabá maná bemók.
PSA 69:19 Taw á sobakkián wata zánay ke mani sará ant o mani sharmsári o roswáián, mani sajjahén dozhmen tai démá ant.
PSA 69:20 Sobakki o béezzatián mani del próshtag o dar mantagán, rahmay wadárá atán o dastá nakapt, gamwáréay shóházá atán o naraset.
PSA 69:21 Warákay badalá, maná jawresh dát o wahdé tonnig bután tropshén sharábesh nóshént.
PSA 69:22 Parzónagesh dámé bát o sohl o émeniesh talké.
PSA 69:23 Chammesh tahár bát o magendátant o srénesh drahag o larzagá bát.
PSA 69:24 Wati hezhmá áyáni sará begwárén, gazabay ácheshá pa áyán berasén.
PSA 69:25 Lóg o jágahesh haráb o wayrán bát, áyáni gedánán hechkas jahmenend mabát.
PSA 69:26 Chiá ke hamáiá ázára rasénant ke taw jatag o hamáiay ranjáni habará kanant ke taw thappig kortag.
PSA 69:27 Mayár pa mayáresh beladdh, cha tai adlá bébahr bátant.
PSA 69:28 Cha zendagénáni daptará gár bátant, gón pahrézkárán yakjáh nebisag mabátant.
PSA 69:29 Bale nun man, setam distag o padard án. Oo Hodá! Tai neját maná émen bedárát.
PSA 69:30 Hodáay námá gón sawta názénán o gón bázén shogrgozáriá shán o shawkatia dayán.
PSA 69:31 É chizz Hodáyá cha gwaskéá géshter pasonda bit, cha mazankánth o mazansrombén gókéá.
PSA 69:32 Békebr o darbésh é chizzá ke begendant gal o shádána bant. Oo Hodáay shóház kanókán! Zendahdel bátét.
PSA 69:33 Hodáwand nyázmandáni dwáyán gósha dárit o wati bandigén mardomán bazzag o wára nakant.
PSA 69:34 Ásmán o zemin áiá benázénant, daryá o áiay tahay sajjahén sahdár.
PSA 69:35 Chiá ke Hodá Sahyuná nejáta dant o Yahudáay shahrán nóksará addha kant. Kawm ódá jahmenenda bit o molkay hakkén wáresa bit.
PSA 69:36 Molk áiay hezmatkáráni poshtpaday mirása bit o áiay námay dóst dárók ódá jahmenenda bant.
PSA 70:1 Pa sázger o washáwázáni sálárá. Dáuday Zabur. Dazbandié. Oo Hodá! Zutt kan o maná berakkén. Oo Hodáwand! Pa mani madatá eshtáp kan.
PSA 70:2 Á ke mani kóshay randá ant, sarjahl o sharmsár bátant, á ke mani barbádiá gala bant, pad bekenzát o roswá bátant.
PSA 70:3 Á ke mani sará “hah, haha” kanant, cha pashaliá poshtoká kenzátant.
PSA 70:4 Bale á ke tai shóházá ant, sajjahén tai dargáhá shádehi kanát o gal o bál bátant, á ke tai dátagén nejátesh dósta bit, modám begwashátant: “Hodáwand mazanshán ent.”
PSA 70:5 Bale man setam distagén mohtájé án. Oo Hodá! Dém pa man eshtáp kan, taw mani rakkénók o madatkár ay. Oo Hodáwand! Dér makan.
PSA 71:1 Oo Hodáwand! Man tai mayár o báhóth án, maná sharmsár makan.
PSA 71:2 Pa wati adlá maná berakkén o bechotthén, delgóshá gón man kan o maná berakkén.
PSA 71:3 Mani panáh dayagay talár bay, ke modám dém pa áiá byáyán. Taw pa mani rakkénagá hokm kortag, chiá ke mani talár o kalát taw ay.
PSA 71:4 Oo mani Hodá maná cha badkáráni dastá berakkén, cha setamger o bérahmáni panjagá.
PSA 71:5 Chiá ke taw, oo Hodáwand, mani omét ay o cha kasániá, oo Hodáwand, óst o ométon tai sará butag.
PSA 71:6 Cha pédáeshá mani komak kanók butagay, é taw butagay ke maná cha mátá pédá kortag, mani satá o sárháyagáni dém modám gón taw ent.
PSA 71:7 Pa bázénéá neshánié butagán, chiá ke taw mani mohrén panáhgáh ay.
PSA 71:8 Dapon cha tai tawsipá porr ent, cha tai shán o shawkatá sajjahén róchá.
PSA 71:9 Piriá maná cha watá dur makan, á wahdá ke twánona kotthit, yalahon makan.
PSA 71:10 Chiá ke dozhmen mani helápá habará ant, á ke mani koshagay randá ant hórigá pandala sázant.
PSA 71:11 Gwashant: “Hodáyá yalah kortag, berawén begeréni, kassia narakkénit.”
PSA 71:12 Oo Hodá! Cha man dur mabay. Oo mani Hodá! Mani madatá eshtáp kan.
PSA 71:13 Mani bohtám janók sharmsár o tabáh bátant o á ke mani ázáray padá ant pashal o sharmendag bátant.
PSA 71:14 Bale man modám tai komakay ométwár án o tará gésh o géshter satá kanán.
PSA 71:15 Tai ádelén káráni habará kanán, sajjahén róchá tai dátagén nejátay járá janán, harchont ke áyáni hesáb cha mani zánagá dhann ent.
PSA 71:16 Mana káyán o Hodáwanday porwákén káráni járá janán, tahná Hodáwanday, tai adlay járá janán, tahná tai.
PSA 71:17 Oo Hodá! Taw maná cha kasániá sój dátag, modám tai ajabén káráni járá janán.
PSA 71:18 Oo Hodá! Nun ke pir án o mud espét ant, maná yalah makan, tán nókén padréchay nyámá tai zóray járá bejanán o sajjahén áyókén naslán cha tai wák o twáná sahig bekanán.
PSA 71:19 Oo Hodá! Tai adl tán borzén arshá ent, taw ay ke mazanén káret kortag. Oo Hodá! Tai matth kay ent?
PSA 71:20 Harchont taw maná bázén sakki o sóri pésh dáshtag, bale padá mani zendá bódénay, Haw, nóksará maná cha zeminay johlánkiá borzáda káray.
PSA 71:21 Mani ezzatá borztera baray maná padá ásudaga kanay.
PSA 71:22 Man tará gón chang o soróda názénán, chiá ke taw wapádár ay, oo mani Hodá! Gón rabábay sázá tará názénán, oo Esráilay Pákén!
PSA 71:23 Mani lonth shádmániay kukkárá kanant, man tará názénán, ke taw maná móketag.
PSA 71:24 Sajjahén róchá tai ádelén káráni zegrá kanán chiá ke á ke mani ázár rasénagay lóthók atant, sarjahl o sharmsár butagant.
PSA 72:1 Solaymánay Zabur. Oo Hodá! Wati adlá bádsháhá bebaksh, wati ensápá bádsháhay chokká,
PSA 72:2 tánke á pa ensáp tai kawmay sará dádrasi bekant, setam distagénáni sará pa adl.
PSA 72:3 Kóh pa kawmá ábádi byárátant, jomp o tomp, pahrézkáriay samará.
PSA 72:4 Bádsháh kawmay setam distagénáni hakká bedayát, mohtájáni chokkán berakkénát o setamgerán tabáh kanát.
PSA 72:5 Nasláni nasl tai sharap o ezzatá bedárátant, tánke rócha drapshit, tánke máh nura dant.
PSA 72:6 Bádsháhay hákemi hamá hawráni paymá bát ke rotagén sabzagáni sará gwárant, hamá hawráni paymá ke zeminá sérápa kanant.
PSA 72:7 Áiay ahdá pahrézkár shádáb bátant, tán hamá wahdá ke máh nura dant ábádi bát.
PSA 72:8 Daryá tán daryá áiay bádsháhi barjáh bát o cha kawrá tán zeminay goddhi simsarán.
PSA 72:9 Áiay dargáhá gyábánay nendók sará jahl bekanátant, áiay dozhmen hák bechatthátant.
PSA 72:10 Tarshish o tayábgwaráni sardhagáray bádsháh hamáiá song o máliát bedayátant, Shébá o Sabáay bádsháh pa áiá théki byárátant.
PSA 72:11 Sajjahén bádsháh, áiay démá sará jahl bekanátant, sajjahén kawm áiay hezmatá bekanátant.
PSA 72:12 Chiá ke á hájatmandán hamá wahdá rakkénit ke peryáta kanant, setam distagénán o hamáyán ke madatkáré néstesh.
PSA 72:13 Nezór o hájatmandáni sará rahma kant o hájatmandáni zendá rakkénit.
PSA 72:14 Áyáni zendá cha zolm o sheddatá nejáta dant, áyáni hóná gránkimmata zánt.
PSA 72:15 Omri báz bát, Sabáay teláh áiay peshkash bátant. Mardom modám áiay dwágó bátant o sajjahén róchá pa áiá barkat belóthátant.
PSA 72:16 Gandom sajjahén molká anchosh báz bát ke jompáni sará chawl bejant o bar o samari anchosh báz bát ke Lobnáná ent. Shahrán mardom anchosh ábád bátant ke sabzag mán dhagárán.
PSA 72:17 Bádsháhay nám namirán bát, tán rócha drapshit nám o tawári bemánát. Sajjahén kawm cha áiá barkat begerátant o áiá mobárak begwashátant.
PSA 72:18 Hodáwandén Hodáyá satá bát, Esráilay Hodáyá, ajabén káráni kanók tahná hamá ent.
PSA 72:19 Áiay porshawkatén námá tán abad satá bát, áiay shán o shawkat sajjahén zeminá begerát. Anchosh bát. Ámin.
PSA 72:20 Dáude Yassiay dwá hamedá kotthant.
PSA 73:1 Asápay Zabur. Pa rásti Hodá pa Esráilá mehrabán ent, pa hamáyán ke delesh sáp ent.
PSA 73:2 Bale kammé mantagat bethagalán, nazzik at pád belakoshant.
PSA 73:3 Chiá ke pa porkebrán hasaddi bután, hamá wahdá ke man badkár ábádi o ásudagiá distant.
PSA 73:4 Chiá ke áyán tán marká dardé per nést o wassh o sérláp ant.
PSA 73:5 Á degaráni paymá ranj o zahmatá naant o mardomi baláháni tahá nakapant.
PSA 73:6 Paméshká kebr áyáni gwaray hár ent o hezhm o gazab áyáni póshák.
PSA 73:7 Chammesh cha pazzóriá dar átkagant o delay hayálánesh haddé nést.
PSA 73:8 Pa maskará o badwáhi habara kanant, pa kebr zolm o setamá wati zobáná kárant.
PSA 73:9 Dapá ásmánay helápá pacha kanant o zobánesh sajjahén zeminá gipt.
PSA 73:10 Paméshká kawm dém pa áyána rawt o pa galé hamáyáni dastay ápána wárt.
PSA 73:11 Gwashant: “Hodá che paymá zánt? Borzén arshay Hodáyá é dhawlén zántkári hast?”
PSA 73:12 Haw, badkár chosh ant, modám ásudag ant o mál o melkatesh démá rawán ent.
PSA 73:13 Pa rásti man wati del mopt o náhudagá pák dáshtag o dast mán bégonáhiá shoshtagant.
PSA 73:14 Har róch ázárán kaptagán o har sohbá hakkala warán.
PSA 73:15 Agan begwashténon: “É habarána kanán,” man tai chokkáni nasl dróhetagat.
PSA 73:16 Wahdé é sajjahén chizzáni zánagay johdon kort, pa man grán at,
PSA 73:17 tán hamá wahdá ke Hodáay pákén jágahá shotán. Nun é mardománi ákebaton dist.
PSA 73:18 Pa rásti áyán lakoshánkén jáhána perrénay, gár o gomsáriay chátá dawra dayay.
PSA 73:19 Anágat gár o zawála bant, cha torsá sarjamá bérána bant.
PSA 73:20 Wábéay dhawlá ant ke wahdé chamm pacha bant gára bit, á wahdá ke taw páda káay, oo Hodáwand, eshán wahméay paymá mána nayáray.
PSA 73:21 Á wahdá ke mani arwáh zahr o tahl at o del résh,
PSA 73:22 bépahm o nazántkár atán, tai dargáhá haywánéay paymá, cha pahm o póhá dhann.
PSA 73:23 Angat ham modám gón taw án, taw mani rástén dastá geray.
PSA 73:24 Gón wati sar o sóján maná rahshónia kanay o randá gón shán o shawkaté zuray.
PSA 73:25 Ásmáná, abéd cha taw maná kay hast?! Zeminá ham, abéd cha taw hech chizzé nalóthán.
PSA 73:26 Mani jesm o ján o del balkén zawál bebant, bale Hodá mani delay kalát ent, tán abad mani gisshetagén bahrwandh.
PSA 73:27 Pa rásti á ke cha taw dur ant gár o gomsára bant o hamáyán bérána kanay ke gón taw béwapá ant.
PSA 73:28 Bale pa man wasshi hamesh ent ke Hodáay nazziká bebán, Hodáwandon wati panáhgáh kortag, tán tai sajjahén kárán jár bejanán, oo Hodáwand!
PSA 74:1 Asápay shayri gwashtánk. Oo Hodá! Chiá márá tán abad yalah dátaget? Pa ché tai hezhmay ás pa tai charágáhay pasán rók ent?
PSA 74:2 Wati kawmay yátá bekap, ke taw cha dérén zamánagán pa bahá zortagatant, ke taw móketagant tán tai kawm o mirás bebant. Sahyunay kóhay hayálá bekap ke ódá jahmenend butagay.
PSA 74:3 Wati gámán dém pa wati hamé modámigén wayránagán betarrén, chiá ke dozhmená har chizz bérán kortag ke tai pákén jágahá butag.
PSA 74:4 Dozhmenán tai didárjáhay tahá gorret o wati bayrak pa neshániá mekk kortant.
PSA 74:5 Hamáyáni paymá atant ke wati taparán jangalay drachkáni sará borza barant.
PSA 74:6 Áyán, tai pákén jágahay sajjahén ájetagén dár gón wati tapar o téshagán prósht o hurt kortant.
PSA 74:7 Tai pákén jágahesh ás kasshet o hák o por kort, tai námay menendjáhesh palit kort.
PSA 74:8 Wati delá gwashtesh: “Áyán sarjamiá wati panjagay chérá kárén,” gorhá Hodáay sajjahén didárjáhesh é sardhagárá sótkant.
PSA 74:9 Nun hech neshánié nagendagá én, hech nabié pasht nakaptag o cha má kass ham nazánt ke tán kadén é paymá bit.
PSA 74:10 Oo Hodá! Tán kadén dozhmen tai sará bekandit? Dozhmen tán abad tai námá bad o rad bekant?
PSA 74:11 Chiá wati dastá poshtá dáray, wati rástén dastá? Dastá pach kan o pa áyán gári o tabáhié byár.
PSA 74:12 Bale Hodá cha dérén zamánagán mani bádsháh ent, ke zeminay sará nejátbakshén kára kant.
PSA 74:13 É taw atay ke daryáet gón wati zór o wáká do ném kort o daryáay baláháni saret ápáni nyámá próshtant,
PSA 74:14 Liwyátánay saret próshtant o gyábánay sahdáráni waráket kort.
PSA 74:15 Jó o sarchammag, taw rombént o rawán kortant, modámigén kawr, taw hoshk kortant.
PSA 74:16 Róch taig ent o shap ham tai máh o róch taw barjáh dáshtagant.
PSA 74:17 É taw atay ke zeminay hand o simsaret gisshéntant, garmág o zemestánay addh kanók taw ay.
PSA 74:18 Oo Hodáwand! Yátá bekap ke dozhmen che paymá maskará kanant o názántén mardom tai námá che paymá bad o rada gwashant.
PSA 74:19 Wati kapótá rastaráni warák makan o setam distagén kawmay zendá tán abad mashamósh.
PSA 74:20 Wati bastagén ahdá bedár, chiá ke é sardhagáray tahárén jágah cha zolm o zóray kodóh o kodámá porr ant.
PSA 74:21 Mayl ke pádmálén mardom gón roswái pad bekenzant, setam distag o hájatmand tai námá satá bekanátant.
PSA 74:22 Oo Hodá! Jáh jan o wati hakkay démpániá bekan, yátá bekap ke názánt sajjahén róchá che paymá tai sará kandant.
PSA 74:23 Wati dozhmenáni kukkárán mashamósh, dozhmenáni shóreshá ke modám borzád ent.
PSA 75:1 Pa sázger o washáwázáni sálárá. “Barbád makanay” tarzay sará. Asápay Zabur. Sawté. Oo Hodá! Tai shográ gerén, tai shográ gerén ke tai nám nazzik ent o mardom tai ajabén káráni habará kanant.
PSA 75:2 Taw gwashay: “Wati gisshéntagén wahdá pa ensáp dádrasia kanán.
PSA 75:3 Hamá wahdá ke zemin o áiay sajjahén nendóka larzant, é man án ke áiay pádagán mohra dárán. Ósht...
PSA 75:4 Gón porkebrán gwashán: ‘Pahr mabandét,’ o gón badkárán: ‘Wati kánthán borz makanét.
PSA 75:5 Wati kánthán enkadar borz makanét o pa kebr o gorunáki habar makanét.’”
PSA 75:6 Chiá ke sarperázi na cha ródarátká kayt, na cha rónendá o na cha gyábáná.
PSA 75:7 É Hodá ent ke dádrasia kant, yakkéá éra jant o yakkéá sarborza kant.
PSA 75:8 Chiá ke Hodáay dastá jámé, cha porjóshén sharáb o tahlagá porr ent. Sharábá réchit o zeminay sajjahén badkár áiá tán goddhi trampá warant.
PSA 75:9 Bale man modám Hodáay káráni habará kanán, Ákubay Hodáyá názénán.
PSA 75:10 “Sajjahén badkáráni kánthána próshán, bale pahrézkáráni kánth borz dáraga bant.”
PSA 76:1 Pa sázger o washáwázáni sálárá. Gón simmi sázán. Asápay zabur. Sawté. Yahudiahá Hodá zánag o pajjáh áraga bit, Esráilá áiay nám mazan ent.
PSA 76:2 Áiay tambu Shalimá ent o menendjáh, Sahyuná.
PSA 76:3 Ásgwárén tiri hamódá próshtant, zahm o espar ham, ke jangi seláh ant. Ósht...
PSA 76:4 Taw drapshán ay o shawkat o shánet, cha á kóhestagán zébáter ent ke shekárá porr ant.
PSA 76:5 Delér áwár janag butant, wati goddhi wábá ant, cha jangáwarán yakké ham namant ke dasté besorénit.
PSA 76:6 Oo Ákubay Hodá! Cha tai neherrán, áyáni arrábah o aspán sar pa markay wábá dát.
PSA 76:7 Taw bákamál ay, wahdé hezhma geray, kay tai démá óshtáta kant?
PSA 76:8 Taw cha ásmáná dádrasia kanay o wahdé taw, oo Hodá, pa dadrasiá jáha janay ke zeminay sajjahén setam distagénán neját bedayay, zemin cha torsá chopp o bétawára bit. Ósht...
PSA 76:10 Pa ensáná tai hezhm ham tai satáay sawaba bit o pasht kaptagén hezhmá taw wati lánká banday.
PSA 76:11 Gón wati Hodáwandén Hodáyá kawl bekanét o wati zobánay sará bóshtét, á sajjahén ke kerr o gwarán ant pa hamáiá théki byárant ke bákamál ent.
PSA 76:12 Á hákemáni gorurána próshit, zeminay bádsháh cha áiá torsant.
PSA 77:1 Pa sázger o washáwázáni sálárá. Pa Jedutuná. Asápay Zabur. Man Hodáyá tawára kanán o pa komaká hamáiá gwánka janán, mani peryát gón Hodáyá ent o á mani áwázá gósha dárit.
PSA 77:2 Sakki o sóriáni róchá Hodáwanday shóházá án, sajjahén shapá mani dast dráj ant o dama nabarán, mani arwáh árám geraga nalóthit.
PSA 77:3 Hodáyá yáta kanán o nálán, pegra kanán o delprósha bán. Ósht...
PSA 77:4 Taw mani chammán nazz bayagá naylay, paréshán án o habar korta nakanán.
PSA 77:5 Gwastagén wahdáni hayálá kapán, kwahnén ahd o bárigáni.
PSA 77:6 Shapán, wati sawtay hayálá kapán, delá báz pegriga bán o arwáhon josta kant:
PSA 77:7 “Hodáwand tán abad yalaha kant o padá hechbar mehrabána nabit?
PSA 77:8 Áiay mehr pa modámi halás butag o kawli pa sajjahén naslán zawál?
PSA 77:9 Hodáyá mehrabán bayag shamoshtag o wati rahmati hezhmay tahá band kortag?” Ósht...
PSA 77:10 Mana gwashán: “É shakk o sawál maná ranjénant. Nun hamá ahd o bárigáni hayálá kapán ke borzén arshay Hodáyá wati rástén dast shahártag.”
PSA 77:11 Oo Hodáwand! Tai kárán yáta kanán, tai ajabén kárán ke taw péshi zamánagán kortagant.
PSA 77:12 Tai kortagén sajjahén káráni bárawá pegra kanán o tai kerdáni hayálá bán.
PSA 77:13 Oo Hodá! Tai ráh pák ent. Kojám hodá may Hodáay paymá mazan buta kant?
PSA 77:14 Taw hamá Hodá ay ke ajabén kára kant. Taw wati zór o wák sajjahén kawmáni nyámá pésh dáshtag,
PSA 77:15 gón wati básk o kodratá wati kawm rakkéntag, Ákub o Issopay chokk. Ósht...
PSA 77:16 Ápán tará dist, oo Hodá! Ápán tará dist o larzetant, johlánki drahagá laggetant.
PSA 77:17 Jambarán ápa gwart o ásmánán grandet, tai grókay tir har némagá retkant.
PSA 77:18 Tai granday tawár danz o gwátáni tahá at, tai nurá jahán róshná kort, zemin larzet o jombet.
PSA 77:19 Tai ráh cha mazanén daryáyá gwast o tai keshk cha mazanén ápán, bale tai pádáni pad gendag nabutant.
PSA 77:20 Taw wati kawm Mussá o Hárunay dastá rahshóni kort, ramagéay paymá.
PSA 78:1 Asápay shayri gwashtánk. Oo mani kawm! Mani sóján gósh dár o delgóshá gón mani habarán kan.
PSA 78:2 Wati dapá pa batal pacha kanán o kwahnén chách o chistánán máná kanán,
PSA 78:3 hamá ke má eshkotag o zántagant, hamá ke may pirénán márá gwashtagant.
PSA 78:4 Eshán cha áyáni chokk o nomásagán chéra nadayén, gón áyókén naslá Hodáwanday porshawkatén káráni kessahá kárén, Hodáwanday zór o twánay kessahá kárén o áiay kortagén ajabén mójezaháni kessahá.
PSA 78:5 Áiá gwáhié pa Ákubá esht, Sharyati pa Esráilá áwort o may pet o piréni parmán dátant ke eshán wati chokk o nomásagán sarpad bekanét,
PSA 78:6 tán démi naslesh bezánant o hamá chokk ham ke angat pédá nabutagant, wati wahdá, gón wati chokk o nomásagán esháni kessahá bekanant,
PSA 78:7 tánke á ham Hodáay sará tawkal bekanant o Hodáay kárán mashamóshant o áiay hokmán bemannant.
PSA 78:8 Wati pet o pirénáni paymá mabant, sarkash o mánmayátk ke delesh gón Hodáyá nabast o arwáhesh gón Hodáyá wapádár naat.
PSA 78:9 Epráimi, harchont ke gón kamánán selahband atant, bale janagay róchá tatkant.
PSA 78:10 Áyán Hodáay ahd nadásht o wati delá shawresh kort ke “áiay Sharyatay sará zenda nagwázénén.”
PSA 78:11 Áiay kortagén káresh shamoshtant, hamá ajabén kár ke áyáná péshi dáshtagatant,
PSA 78:12 Hamá kár ke áyáni pet o pirénáni démá kortagatanti, Mesray molká, Zohánay gyábáná.
PSA 78:13 Áyáni démay daryái ném kort o ái gwázéntant, ápi, doén démán chó diwálá mekk kort.
PSA 78:14 Róchá, gón jambará rashónii dátant o shapá gón ásay rozhná.
PSA 78:15 Gyábáná, talári tal kortant o áyáná, johlén zeréay kesásá ápi dát.
PSA 78:16 Cha talárán chammagi bótkant o ápi chó kawrá rombént.
PSA 78:17 Bale áyán angat géshter gonáh kort o gyábáná borzén arshay Hodáay helápá shóreshesh kort.
PSA 78:18 Hodáesh pa zánt hamá warákáni sará chakkáset ke áyáni delá lóthet.
PSA 78:19 Hodáay helápá habaresh kort o gwashtesh: “Hodá é gyábáná parzónagé pach korta kant?
PSA 78:20 Talári wa jat o cha áiá áp rawán but o kawr sar rechán butant, bale wati mardomán nán ham dáta kant? Yá pa wati kawmá gósht ham tayár korta kant?”
PSA 78:21 Hodáyá ke eshkot, zahr gept, ásé pa Ákubá róki kort, hezhmi pa Esráilá chest but.
PSA 78:22 Chiá ke Hodáay sará imánesh néstat o báwaresh nabut ke Hodáesha rakkénit.
PSA 78:23 Ásmáni pa pach bayagá parmán dát o arshay darwázagi pach kortant.
PSA 78:24 Manni pa áyán chó hawrá gwart ke bwarant, ásmáni gandomi bakshátant.
PSA 78:25 Mardomán préshtagi warák wárt, pa áyán békesás waráki rawán dát.
PSA 78:26 Cha ásmáná ródarátki gwáti sar dát o gón wati zórá jonubi gwáti chest kort.
PSA 78:27 Danzáni paymá pa áyán góshti gwárént, daryáay rékáni kesásá, báli morg,
PSA 78:28 áyáni ordgáhá éri áwortant, áyáni gedánáni kerr o gwarán.
PSA 78:29 Wárt o séresh kort, pa har chizzá ke áyán hers at, dátanti.
PSA 78:30 Bale cha áyáni hersay purah bayagá pésar, ke warákesh angat dapá at,
PSA 78:31 Hodáay hezhm áyáni sará pád átk, áyáni zórmandterén mardomi koshtant o Esráilay warnái jokkéntant.
PSA 78:32 É sajjahén káresh distant o angat ham gonáhesha kort o áiay ajabén káráni sará báwaresha nakort.
PSA 78:33 Gorhá áyáni róchi pa náhudagi halás kortant o sál pa tors.
PSA 78:34 Hodáyá ke áyáni koshag bendát kort, nun áiay shóházá dar kaptant. Dém pa Hodáyá per tarretant o pa setk o del Hodáay shóházá butant.
PSA 78:35 Hayálá kaptant ke Hodá áyáni talár ent, hamá borzén arshay Hodá, áyáni posht o panáh.
PSA 78:36 Bale gón wati dapá, gón áiá charpzobániesha kort o gón zobáná drógesha bast.
PSA 78:37 Delesh gón áiá wapádár naat o áiay bastagén ahdesh nadásht.
PSA 78:38 Bale á angat mehrabán at o áyáni gonáhi bakshetant o sajjahéni nakoshtant. Rand pa randá wati hezhmia dásht o wati sajjahén gazabi darshána nakort.
PSA 78:39 Zánti ke é hákién ensán ant, rawókén gwáté ke padá pera natarrit.
PSA 78:40 Gyábáná chinchok randá cha Hodáyá sarkashiesh kort, ódá áesh gamig kort.
PSA 78:41 Rand pa randá Hodáesh chakkáset, Esráilay pákénesh ázár dát.
PSA 78:42 Áiay dastay zóresh yát nakort ke á róchá chón cha dozhmenáni dastá rakkéntanti,
PSA 78:43 hamá wahdá ke Mesrá wati neshánii paddar kortant o Zohánay gyábáná ajabén kári kort.
PSA 78:44 Áyáni kawri hóná badal kortant ke kassá cha wati jóán áp wárta nakort.
PSA 78:45 Makeskáni rombi áyáni nyámá ráh dátant ke makeskesh bwarant o pogoláni romb, ke barbádesh bekanant.
PSA 78:46 Áyáni keshári madagáná dátant o bar o samar kathagán wártant.
PSA 78:47 Áyáni anguri gón tróngalá zawál kortant o enjiráni drachk, gón hár o tuppánán.
PSA 78:48 Áyáni ramagi pa tróngal koshtant o dalwat, pa grand o grók.
PSA 78:49 Wati sóchókén kahr o gazabi áyáni sará rawán dát, kahr o gazab o azáb, gár o gomsár kanókén préshtagáni thólié áyáni sará.
PSA 78:50 Ráhi pa wati hezhmá rást o tachk kort, cha marká narakkéntanti, wabáyáni dapái dátant.
PSA 78:51 Mesray sajjahén awali chokki jatant, Mesray gedánnendáni mardánagiay awali bar o samar.
PSA 78:52 Bale wati mardomi ramagay paymá sar dát o bortant, pasáni dhawlá gyábánán rashónii kortant.
PSA 78:53 Ái pa émeni rahshóni kortant ke matorsant bale áyáni dozhmen daryáyá mán patátant.
PSA 78:54 Gorhá ái wati pákén zeminá sar kortant, hamá kóhestagén molká ke gón wati rástén dastá geptagati.
PSA 78:55 Áyáni démá kawmi cha ódá dar kortant, kawmáni zemini áyáni mirás kortant o Esráilay kabilahi gedánáni tahá jahmenend kortant.
PSA 78:56 Bale angat áyán borzén arshay Hodá chakkáset o áiay helápá sarkashiesha kort, áiay hokmesha namannet.
PSA 78:57 Wati pirénáni paymá rástén ráhesh yalaha dát o béwapá butant, chó sost o nábáwarén kamáná mantant.
PSA 78:58 Borzén jáhán bothánahesha bast o Hodáesh zahra baráént, botesha jórhént o Hodáesh hasaddiga kort.
PSA 78:59 Hodáyá ke dist, sakk hezhm gept o Esráili sarjamiá yalah kort.
PSA 78:60 Wati Shiluhay menendjáhi yalah kort, hamá tambu ke Hodá ódá mardománi nyámá jahmenend at.
PSA 78:61 Wati zór o wákay pétii bandig kanáént, wati shán o shawkatay neshánii dozhmenáni dastá dát.
PSA 78:62 Wati kawmi zahmáni dapá dát, wati mirásay sará sakk hezhmnák but.
PSA 78:63 Warnáén bachak, ásá wártant o jenek, pa suri názénkán sar nabutant.
PSA 78:64 Dini péshwá zahmáni dapá kaptant o janózámán gréta nakort.
PSA 78:65 Nun Hodáyá anchosh jáh jat ke yakké cha wábá bosta kant, chó ke jangólé cha sharábay béhóshiá jáh bejant.
PSA 78:66 Wati dozhmeni jat o poshtá kenzént o abadi roswáiéá dawr dátant.
PSA 78:67 Bale Issopay tambui nádóst kort o Epráimay kabilahi nazort,
PSA 78:68 Yahudáay kabilahi gechén kort, Sahyunay kóh, ke dóst ati.
PSA 78:69 Wati pákén jágahi, borzagáni paymá addh kort, zeminay paymá namirán, jórhi kort.
PSA 78:70 Wati hezmatkárén Dáudi gechén kort o cha pasáni gwáshá dari kort,
PSA 78:71 cha edá o rand, ái cha mésháni shopánkiá dar kort o wati kawm, Ákubay shopánki kort, wati mirás, Esráilay.
PSA 78:72 Dáudá gón sápén delé áyáni shopánki kort o gón honarmandén dasté áyáni rahshón but.
PSA 79:1 Asápay Zabur. Oo Hodá! Kawmán tai mirás geptag, tai pákén parasteshgáhesh palit kortag o Urshalim, wayrán.
PSA 79:2 Tai hezmatkáráni jónesh báli morgáni warák kortag o tai wapádáráni jánay gósht, rastaráni.
PSA 79:3 Esháni hónesh ápay paymá sajjahén Urshalimá rétkag, kass namant ke mordagán kabr bekant.
PSA 79:4 Hamsáhegáni démá roswá butagén o kash o kerray mardománi kalági.
PSA 79:5 Oo Hodáwand! Tán kadén zahra bay? Tán abad? Tán kadén tai hasadd ásay paymá róka bit?
PSA 79:6 Wati gazabá hamá kawmáni sará begwár ke tará pajjáha nayárant o hamá molkáni sará ke tai námá nagerant,
PSA 79:7 ke Ákubesh wártag o ér bortag o áiay molkesh wayrán kortag.
PSA 79:8 Gwastagén nasláni gonáhán may sará maladdh, tai rahmat zutt may sará byáyátant ke sakk wár o bazzag én.
PSA 79:9 Oo may rakkénókén Hodá! Márá madat kan, wati námay shán o shawkatay sawabá, pa wati námaygi márá berakkén o may gonáhán bebaksh.
PSA 79:10 Chiá darkawm begwashant: “Esháni Hodá kojá ent?” May chammáni démá kawm begendátant ke taw wati hezmatkáráni retkagén hónáni bérá geray.
PSA 79:11 Bandigáni áh o peryát pa taw sar bátant, gón wati báskay zórá hamáyán berakkén ke koshag bayagá ant.
PSA 79:12 Oo Hodáwand! Cha may hamsáhegán hamá sobakkiáni bérá hapt sari géshter beger ke tai sháná kortagantesh.
PSA 79:13 Gorhá má, tai kawm ke tai charágáhay pas én, tán abad tai shográ gerén, nasláni nasl tará satá kanén.
PSA 80:1 Pa sázger o washáwázáni sálárá, “Susanáni” tarzay sará. Gwáhié. Asápay Zabur. Oo Esráilay shopánk! Gósh dár, taw ke shopánkéay paymá Issopay ramagay rahshón ay. Oo Hodá! Taw ke karrubiáni nyámá bádsháhi tahtá neshtagay, wati nurá tálán kan.
PSA 80:2 Epráim, Benyámin o Manassiay démá, wati wák o tágatá borz kan o pa may rakkénagá byá.
PSA 80:3 Oo Hodá! Gón má wasshán bay wati démá gón má rozhná kan ke má berakkén.
PSA 80:4 Oo Hodáwand! Lashkaráni Hodá! Tán kadén hezhmay ásá wati kawmay dwáyáni sará gwárána bay?
PSA 80:5 Taw áyáná arsay nagan o arsáni sarréchén jám wárént.
PSA 80:6 Taw márá hamsáhegáni démá bannám kortag o dozhmen márá kalága bandant.
PSA 80:7 Oo lashkaráni Hodá! Gón má wasshán bay wati démá gón má rozhná kan ke má berakkén.
PSA 80:8 Taw anguray drachké cha Mesrá gwatk, taw kawm dhanná dar kortant o é drachk kesht.
PSA 80:9 Taw zemin pa áiá práh kort, gorhá risshagi jat o zemini porr kort.
PSA 80:10 Áiay sáhegá kóh póshetant o áiay sháharhán, rostagén gazz.
PSA 80:11 Sháharhi tán Myánzerá o tháli tán Parátay kawrá sar butant.
PSA 80:12 Gorhá taw chiá áiay pall prósht o dawr dát ke hamok rahgwaz áiay barán bechent?
PSA 80:13 Jangali hukk áiá éra barant o dashtay jánwaria warant o séra kanant.
PSA 80:14 Oo lashkaráni Hodá! May gwará per tarr, cha ásmáná delgósh kan o bechár, é anguray delgóshá bedár,
PSA 80:15 hamé anguray ke tai rástén dastá kesht, hamé chokkay ke taw pa wat ródént o zórmand kort.
PSA 80:16 Dozhmenán angur goddhet o ásá dawr dát, é gón tai hakkaléá gár o gomsár bátant.
PSA 80:17 Tai dast hamá marday sará bát ke tai rástén némagá ent, hamá ensánay chokkay sará ke taw pa wat ródént o zórmand kort.
PSA 80:18 Gorhá má wati démá cha taw natarrénén, márá zend bebaksh ke tai námá begerén.
PSA 80:19 Oo Hodáwand, lashkaráni Hodá! Gón má wasshán bay, wati démá gón má rozhná kan ke má berakkén.
PSA 81:1 Pa sázger o washáwázáni sálárá. “Gittitay” tarzay sará. Asápay Zabur. Hodáyá pa shádehi benázénét ke may zór o wák ent, pa Ákubay Hodáyá shádmániay kukkárá borz kanét.
PSA 81:2 Sáz o tamburagá bongéj kanét, washtawárén chang o soródán.
PSA 81:3 Máhay nóká, gwarándhay kánthay tawárá borz kanét, máhay chárdahá, may pákén aidá.
PSA 81:4 É pa Esráilá hokmé, rahbandé cha Ákubay Hodáay némagá.
PSA 81:5 Wahdé Mesray helápá dar átk kánuné pa Issopá eshti. Man eshkot, nááshnáén zobánéá gwasht:
PSA 81:6 “Báron cha áiay kópagá dur kort o dast cha gránén saptá ázát kortant.”
PSA 81:7 Taw sakkiáni sáhatán peryát kort o man tará rakként, man grandán andém atán o tará passaw dát, Meribáay ápáni kerrá tará chakkáseton. Ósht...
PSA 81:8 Oo mani kawm! Beshkon ke tará dháha dayán, Oo Esráil! Drégatá taw mani habar gósh bedáshtén.
PSA 81:9 Shomay nyámá darámadén hodáé mabát o bigánagén hodáéay démá sará jahl makanét.
PSA 81:10 Man Hodáwand án, tai Hodá ke tará cha Mesrá dar kort o áwort. Wati dapá sarjamá pach kan, ke man porria kanán.
PSA 81:11 “Bale kawmá mani habar gósh nadásht o Esráil mani parmánbardár nabut.
PSA 81:12 Gorhá man á yalah dátant ke wati sengén deláni randgiriá bekanant, wati jenday ráh o hayáláni.
PSA 81:13 Drégatá mani kawmá mani habar gósh bedáshtén o Esráil, mani ráhá beshotén.
PSA 81:14 Á wahdá man damáná áyáni dozhmen prósh dátagatant o mani dast áyáni dozhmenáni helápá chest butagat.
PSA 81:15 Hamá ke cha Hodáwandá naprata kanant, dotal o sarjahl butagatant, tán abad anchosh butagat.
PSA 81:16 Bale tará gehterén gandomay warákon dátagat o tará cha talárá dar kortagén bénagá séron kortagat.”
PSA 82:1 Asápay Zabur. Hodá, wati Hodái bárgáhá barjam ent, “hodáyáni” diwáná dádrasia kant.
PSA 82:2 Tán kadén pa náensápi shawra borrét? Tán kadén badkáráni badalá bét? Ósht...
PSA 82:3 Nezór o chórhawáni dadrasiá bekanét o garib o setam distagénáni hakká begerét.
PSA 82:4 Nézgár o hájatmandán berakkénét o cha badkáráni dastá ázát kanét.
PSA 82:5 É “hodá” heccha nazánant o sarpada nabant, taháriá sargardán ant o zeminay sajjahén bonyád larzagá ant.
PSA 82:6 Gwashton: “Shomá ‘hodá’ ét o shomá sajjahén, borzén arshay Hodáay chokk ét,
PSA 82:7 Bale mardománi paymá merét o shahzádagáni paymá sarshakuna bét.”
PSA 82:8 Oo Hodá! Jáh jan o zeminay dadrasiá bekan, ke sajjahén kawm tai mirás ant.
PSA 83:1 Asápay Zabur. Sawté. Oo Hodá! Bétawár mabay, hámósh mabay o hoshká manend, oo Hodá!
PSA 83:2 Bechár ke tai dozhmen che paymá gorrant o cha taw naprat kanókáni sar chón borz ent.
PSA 83:3 Tai kawmay helápá pa cháláki pandala sázant o tai gránkadrénáni helápá shawr o saláha kanant.
PSA 83:4 Gwashant: “Byáét gár o gomsáresha kanén ke kawmé mamánant o Esráilay nám pa yátéá ham pasht makapit.”
PSA 83:5 Pa hamdeli shawresh kortag o tai helápá ahdé bastagesh.
PSA 83:6 Edumi o Esmáili, Muábi o Hágári,
PSA 83:7 Gébáli, Ammuni o Amáliki, Pilisti o Suray nendók,
PSA 83:8 Áshuri ham gón áyán hamráh ant o pa Lutay chokkán báské butagant. Ósht...
PSA 83:9 Gón áyán hamá paymá bekan ke taw gón Midyáná kort, gón Siserá o Yábiná, Kishunay kawray kerrá,
PSA 83:10 ke Endórá tabáh butant o zeminay kad o samát butant.
PSA 83:11 Esháni sardárán Óréb o Zehébay paymá kan, shahzádagánesh Zebah o Zalmunnáay dhawlá,
PSA 83:12 ke gwashtagatesh: “Byáét Hodáay charágáhán pa zóra gerén.”
PSA 83:13 Oo mani Hodá! Eshán danzéay paymá bál day, chó ke paláré, gwátay démá.
PSA 83:14 Anchosh ke ás jangalá sóchit o kóhán mána dárit,
PSA 83:15 gón wati tuppánán randáesh kap o gón syahgwátán betorsénesh,
PSA 83:16 démáesh cha sharmá syáh kan tánke tai námay shóházá bebant, oo Hodáwand!
PSA 83:17 Sharmsár bát o abadi torséá kapátant, roswá bát o bemerátant.
PSA 83:18 Bell bezánant ke tai nám Hodáwand ent o tahná taw, oo borzén arshay Hodá, sajjahén zeminay sará hákemia kanay.
PSA 84:1 Pa sázger o washáwázáni sálárá. Kórahay chokkáni Zabur. “Gittitay” tarzay sará. Oo lashkaráni Hodá! Tai bárgáh chón dóstnák ent.
PSA 84:2 Mani arwáh pa Hodáwanday parasteshgáhay péshjáhán shaydá o hodók ent, mani del o ján pa zendagén Hodáyá pa shádehi kukkára kant.
PSA 84:3 Jengolá ham pa wat lógé dar gétk o pistáná pa wat kodóhé ke wati chureg o chippokán ódá beródénit, tai korbánjáhay nazziká, oo lashkaráni Hodáwand, mani bádsháh o mani Hodá!
PSA 84:4 Bahtáwar ant hamá ke tai bárgáhá jahmenend ant, á modám tará názénant. Ósht...
PSA 84:5 Chón bahtáwar ant hamá ke wák o zóresh cha tai némagá ent o delesh tai ráhán ent.
PSA 84:6 Á, wahdé cha arsáni daragá gwazant, daragá cha chammagá porra kanant o tákchandhay mósomay hawr ham áiá rahmata póshénit.
PSA 84:7 Cha mohrá mohrter bayána bant tán hamá wahdá ke Sahyuná Hodáay bárgáhá rasant.
PSA 84:8 Oo Hodáwand, lashkaráni Hodá! Mani dwáyá gósh dár, beshkon, oo Ákubay Hodá! Ósht...
PSA 84:9 May bádsháhá delgósh kan, oo Hodá! Wati rógen per moshtagéná delgósh kan.
PSA 84:10 Tai bárgáhay yak róché gehter ent cha dega jágahéay hazárán róchá, cha badkáráni tambuáni tahá árámén zendéay gwázenagá maná wati Hodáay dargáhay dapá óshtag dóstera bit,
PSA 84:11 ke Hodáwandén Hodá róch o esparé, Hodáwand rahmata bakshit o ezzata dant. Hamá ke zendá pa bémayária gwázénit, Hodáwand sharrén chizzán cha áiá dura nadárit.
PSA 84:12 Oo lashkaráni Hodáwand! Bahtáwar ent hamá ke tai sará tawkala kant.
PSA 85:1 Pa sázger o washáwázáni sálárá. Kórahay chokkáni Zabur. Oo Hodáwand! Taw wati sardhagárá rahmat gwart o Ákubay gwastagén washbahti padá per tarrént.
PSA 85:2 Taw wati kawmay mayárbári bakshetant o áyáni sajjahén gonáh póshetant. Ósht...
PSA 85:3 Taw wati sajjahén gazab poshtá dawr dát o wati hezhmay ás tóst.
PSA 85:4 Oo may rakkénókén Hodá! Gón má wasshán bay o wati gazabá cha má dur kan.
PSA 85:5 Tán abad gón má zahra bay? Wati hezhmá nasláni nasl drájkassha kanay?
PSA 85:6 Márá padá zenda nabakshay ke tai kawm tai bárgáhá shádehi bekant?
PSA 85:7 Oo Hodáwand! Wati mehrá márá pésh bedár o márá hamá rakkénagá bebaksh ke cha tai némagá ent.
PSA 85:8 Har chizz ke Hodáwandén Hodá gwashit, man gósha dárán, chiá ke pa wati kawmá émeniay kawlá dant, pa wati wapádárán, chó mabit ke á ahmakiay ráhá per betarrant.
PSA 85:9 Béshakk, á mardománi rakkénag nazzik ent ke cha Hodáyá torsant, tán may sardhagár cha áiay shán o shawkatá sarréch bebit.
PSA 85:10 Mehr o wapádári yakdegará dochára kapant, adl o émeni yakdomiá chokkant.
PSA 85:11 Wapádári cha zeminá rodit o adl cha ásmáná jahláda chárit.
PSA 85:12 Béshakk, Hodáwand nékén chizza bakshit o may zemin áiay bar o samará kárit.
PSA 85:13 Adl, áiay démá rawána bit o pa áiay gámán ráhé tayára kant.
PSA 86:1 Dáuday dwá. Oo Hodáwand! Wati delgóshá gón man kan o maná passaw day, ke garib o mohtájé án.
PSA 86:2 Mani zenday negahpániá bekan ke tai dóstdár án, wati hezmatkárá berakkén ke tai sará tawkala kant.
PSA 86:3 Oo Hodáwand! Mani sará rahm kan, ke sajjahén róchá tará tawára kanán.
PSA 86:4 Wati hezmatkáray delá shádmán kan, oo Hodáwand, ke man cha taw dwá lóthán.
PSA 86:5 Taw, oo Hodáwand, nék o bakshendah ay o pa áyán cha mehrá sarréch ay ke gón taw peryáta kanant.
PSA 86:6 Oo Hodáwand! Mani dwáyán gósh dár, mani peryát o zárián delgósh kan.
PSA 86:7 Sakkiáni róchá tará tawára kanán, ke taw passawa dayay.
PSA 86:8 Oo Hodáwand! Hodáyáni nyámá kass tai mattha nabit o tai kár bématth ant.
PSA 86:9 Oo Hodáwand! Tai jórh kortagén sajjahén kawma káyant o tará sojdaha kanant, tai námá shán o shawkata dayant,
PSA 86:10 ke taw mazan ay o ajabén kára kanay, Hodá tahná taw ay.
PSA 86:11 Wati ráhá maná sój day, oo Hodáwand, ke tai rástén ráhá berawán, mani delá sarjamá gón wat kan ke cha tai námá betorsán.
PSA 86:12 Gón tamánén delé tai shográ gerán, oo Hodáwand, mani Hodá! Tai námá tán abad shán o shawkata dayán
PSA 86:13 ke pa man tai mehr sakk mazan ent, taw maná cha johlánkián rakkéntag, cha mordagáni jaháná.
PSA 86:14 Oo Hodá! Gorunákén mardom mani helápá pád átkagant, zórákáni rombé mani koshagay johdá ent o tará hech mána nayárit.
PSA 86:15 Bale taw, oo Hodáwand, rahm kanók o mehrabánén Hodáé ay, hezhm geragá déra kanay o mehr o wapáyá sarréch ay.
PSA 86:16 Démá gón man tarrén o mani sará rahm kan, wati hezmatkárá zór o wák bebaksh o wati móleday chokká berakkén.
PSA 86:17 Maná wati rahmatáni neshánié beday, tán hamá ke gón man naprat kanant begendant o sharmendag bebant, chiá ke taw, oo Hodáwand, maná madat kortag o tasallá dátag.
PSA 87:1 Kórahay chokkáni Zabur. Sawté. Áiá, pákén kóhay sará shahré addh kort.
PSA 87:2 Hodáwandá Sahyunay darwázag dóster ant cha á dega hamá sajjahén jágahán ke Ákub jahmenend butag.
PSA 87:3 Oo Hodáay shahr! Tai bárawá porshánén habar kanaga bit. Ósht...
PSA 87:4 Mesr o Bábelá gón hamáyán hór hesába kárán ke maná zánant, Pilistiah o Surá ham, gón Kushá hawár. Esháni bárawá gwashaga bit: “É hamódá pédá butag”.
PSA 87:5 Sahyunay bárawá gwashaga bit: “É mardom o á mardom hamódá pédá butagant, borzén arshay Hodá wat Urshalimá pádára kant.”
PSA 87:6 Wahdé Hodáwand kawmáni námán nebeshtaha kant, nebisit: “É hamódá pédá butag.” Ósht...
PSA 87:7 Á ke sawta janant o á ke nácha kanant gwashant: “Mani sajjahén chammag cha taw bojant.”
PSA 88:1 Pa sázger o washáwázáni sálárá. Kórahay chokkáni Zabur. “Mahallat Léhanutay” tarzay sará. Hémán Ezráhiay shayri gwashtánk. Sawté. Oo Hodáwand! Oo mani rakkénókén Hodá! Shap o róch tai bárgáhá dwá o peryáta kanán.
PSA 88:2 Mani dwá tai dargáhá berasát, wati delgóshá gón mani peryátá kan.
PSA 88:3 Man janjálán kaptagán o mani zend pa marká sar butag.
PSA 88:4 Hamá mardománi paymá hesáb áraga bán ke johlén kandhá kaptagant, anchén mardoméay paymá ke nezór o nátwán ent.
PSA 88:5 Mordagáni nyámá yalah dayag butagán, chó mordagéá ke kabrá waptag, ke taw áyáni yátá naay o cha tai dastá jetá butagant.
PSA 88:6 Taw maná johlterén kandhá dawr dátag, tahárén johlánkiá.
PSA 88:7 Tai hezhm mani chakká kaptag, chawlán maná mán patátag. Ósht...
PSA 88:8 Taw mani hamdelén sangat cha man dur bortag o cha man bézár kortagant. Bandig án o dar átka nakanán.
PSA 88:9 Mani chamm cha andóhá tahár butagant. Oo Hodáwand! Har róch tará tawára kanán o dastán pa taw shahárán.
PSA 88:10 Wati ajabén kárán mordagán pésha dáray? Mordagáni arwáh páda káyant o tará satá kanant? Ósht...
PSA 88:11 Mordag, kabrá tai mehray járá janant? Mordagáni jaháná tai wapádáriay kessahána kárant?
PSA 88:12 Taháriá, tai ajabén kár zánaga bant o tai adl, shamóshkáriay molká?
PSA 88:13 Bale man gón taw madatay peryátá kanán, oo Hodáwand! Hamok sabáhá mani dwá tai bárgáhá rasant.
PSA 88:14 Oo Hodáwand! Chiá maná yalaha kanay o wati démá cha man chéra dayay?
PSA 88:15 Cha warnáiá sakkiáni ámách o markig butagán, tai torsá maná bazzag kortag o béwas án.
PSA 88:16 Tai hezhmá maná patátag o tai bimmá maná próshtag.
PSA 88:17 Sajjahén róchá ápay paymá maná chapp o chágerdá geptag o cha har némagá angerresh kortag.
PSA 88:18 Taw mani dóst o sangat cha man dur kortagant, tahná tahári ent ke mani hamráh ent.
PSA 89:1 Itán Ezráhiay shayri gwashtánk. Hodáwanday mehrá tán abada názénán cha wati zobáná, tai wapádáriay kessahá sajjahén naslán sara kanán.
PSA 89:2 Man gwasht ke “tai mehr abadmán ent o taw wati wapádári, ásmáná káhem kortag.”
PSA 89:3 Taw gwasht: “Man gón wati gechén kortagéná ahd o karáre bastag o gón wati hezmatkár Dáudá pa sawgend kawl kortag:
PSA 89:4 ‘Tai padréchá tán abad barjáha dárán o tai bádsháhi tahtá nasláni nasl.’” Ósht...
PSA 89:5 Oo Hodáwand! Ásmán tai ajabén kárán satá kant o tai wapádáriá ham, pákénáni diwáná.
PSA 89:6 Ásmánán, kay Hodáwanay matth buta kant? Choshén ásmáni hastié hast ke Hodáwanday paymá bebit?
PSA 89:7 Hodáay tors ásmáni hastiáni nyámá sakk mazan ent, á cha wati chapp o chágerday sajjahénán bákamálter ent.
PSA 89:8 Oo Hodáwand, lashkaráni Hodá! Kay tai matth o darwar ent? Taw zórák ay, oo Hodáwand, o tai wapádáriá tará chapp o chágerd kortag.
PSA 89:9 Taw mastén daryáyáni sará hokmránia kanay o wahdé chawlesh chesta bant, taw éresha káray.
PSA 89:10 Taw Raháb, láshéay paymá drosht o gón wati zórmandén báská wati dozhmen sheng o sháng kortant.
PSA 89:11 Ásmán taig ent o zemin ham, jahán o eshiay tahá harché ke hast, taw addh kortagant.
PSA 89:12 Shomál o jonub taw addh kortagant, Tábór o Hermónay kóh tai námá názénant.
PSA 89:13 Tai básk zórmand ent, tai dast zóráwar ent, tai rástén dast porwák o sóbén ent.
PSA 89:14 Adl o ensáp tai bádsháhiay bonyád ant, mehr o wapádári tai hamráhiá, démá gám janán ant.
PSA 89:15 Oo Hodáwand! Bahtáwar hamá ant ke shádmániay áwázá pajjáha kárant o tai bárgáhay nurá gáma janant.
PSA 89:16 Sajjahén róchá tai námay sará shádehia kanant o cha tai adlá sarboland ant.
PSA 89:17 Chiá ke taw áyáni shán o shawkat o áyáni wák o twán ay o cha wati mehrabániá may kánthá sarperáza kanay.
PSA 89:18 Béshakk, may bádsháh Hodáwandayg ent, may espar Esráilay pákénay.
PSA 89:19 Yak wahdé taw, shobéná gón wati wapádárán habar kort o gwasht: “Man jangólé madat kortag o cha kawmá gechéni warnáé ródéntag.
PSA 89:20 Man wati hezmatkár, Dáud shóház kortag o wati pákén, rógen per moshtag.
PSA 89:21 Mani dast gón áiá góna bit o mani báski zórmanda kant.
PSA 89:22 Dozhmen cha áiá bája nabárt o badkár áiay sará sarzóra nabit.
PSA 89:23 Dozhmenán áiay démá prósha dayán o harkas ke cha áiá naprata kant, prósháni.
PSA 89:24 Mani mehr o wapádári áiay hamráha bant o mani námá áiay kánth borzáda bit.
PSA 89:25 Áiay dastá tán daryáyá sara kanán, áiay rástén dastá tán kawrán.
PSA 89:26 Á maná gwánka jant o gwashit: ‘Taw mani Pet ay, mani Hodá o mani nejátay talár.’
PSA 89:27 Man ham áiá wati masterén chokka kanán, jahánay masterén bádsháh.
PSA 89:28 Wati mehrá tán abad áiay hamráha kanán o gón áiá wati ahd o karárá mohra dárán.
PSA 89:29 Tán abad áiay naslá barjáha dárán, áiay bádsháhiay tahtá ásmánay rócháni hesábá.
PSA 89:30 Agan áiay chokk mani Sharyatá yalah bekanant o mani parmánáni randgiriá makanant,
PSA 89:31 agan mani rahbandán bepróshant o mani hokmán mamannant,
PSA 89:32 áyáni gonáhán pa latth sezá dayán, náparmánián pa hayzarán,
PSA 89:33 bale áiay dóst dáragá bassa nakanán o gón áiá wati kortagén kawlá napróshán.
PSA 89:34 Wati ahd o paymáná napróshán o á habar ke cha mani dapá dar átkag, badalia nakanán.
PSA 89:35 Man yak baré mán wati pákiá sawgendé wártag o gón Dáudá dróga nabandán,
PSA 89:36 ke áiay nasl tán abad barjáha mánit o áiay taht mani dargáhá chó róchá abadi ent,
PSA 89:37 chó máhá tán abad barjáha mánit, ke jambaráni tahá tachk o rástén sháhedé.” Ósht...
PSA 89:38 Bale annun taw wati dém tarréntag o á yalah kortag, wati rógen per moshtagénay sará hezhm geptagay.
PSA 89:39 Taw gón wati hezmatkárá bastagén ahd o paymán pad tarréntag o áiay táj, zeminá dawr dátag.
PSA 89:40 Taw áiay sajjahén diwál karótkagant o áiay mohrén kalát próshtag.
PSA 89:41 Harkas ke cha ráhá gwazit, áiá pol o páncha kant o á wati hamsáhegáni kalági jórh butag.
PSA 89:42 Taw áiay dozhmenáni rástén dast borzád bortag o sajjahén badwáh shádmán kortagant.
PSA 89:43 Taw áiay zahm konth kortag o jangá madat nadátag.
PSA 89:44 Taw áiay shán bortag o taht hákán dawr dátag.
PSA 89:45 Taw áiay warnáiay róch kamm kortagant o sharmendagiay kabáhéá póshéntag. Ósht...
PSA 89:46 Tán kadén, oo Hodáwand! Watá tán abad chéra dayay? Tán kadén tai hezhm chó ásá róka mánit?
PSA 89:47 Hayálá bekap ke mani omray róch chón kamm ant, taw bani ádam nákárén chizzé jórh kortag.
PSA 89:48 Kojám ensán ent ke marka nagendit, kay cha kabray zórá rakketa kant? Ósht...
PSA 89:49 Oo Hodáwand! Tai á pésarigén mehr kojá ent ke taw gón Dáudá sawgend wárt o kawl kort.
PSA 89:50 Oo Hodáwand! Hayálá bekap ke tai hezmatkárá chón shegána janant, sajjahén kawmáni rishkandán wati delá dárán.
PSA 89:51 Oo Hodáwand! Tai dozhmenán mani sará rishkand kortag o hamok gámá tai rógen per moshtagénesh kalág bastag.
PSA 89:52 Hodáwandá tán abad satá bát. Anchosh bát. Ámin.
PSA 90:1 Hodáay hezmatkár Mussáay dwá. Oo Hodáwand! Nasláni nasl taw may menendjáh butagay.
PSA 90:2 Cha kóháni pédá bayag o zemin o jahánay addh kanagá pésar, cha azal tán abad, Hodá taw ay.
PSA 90:3 Ensáná padá hákay chérá baray o gwashay: “Oo ensánay chokk! Háká per tarr.”
PSA 90:4 Hazár sál pa taw chó gwastagén yak róchéá ent, chó shapi yak páséá.
PSA 90:5 Ensán wábé o chó háréá áiá rópána kanay. Sohbá chó káhá tázag ent,
PSA 90:6 sabáhá rodit o sabzit, bégáhá gimmorit o hoshka tarrit.
PSA 90:7 Cha tai hezhmá halása bén, cha tai gazabá paréshán.
PSA 90:8 Taw may mayár wati démá kortagant o chérén gonáh wati bárgáhay rozhnáiá.
PSA 90:9 May sajjahén zend tai hezhmay chérá gwazit o wati sálán pa nálagá halása kanén.
PSA 90:10 May omray róch haptád sál ant yá hashtád sál, agan sakk zreng bebén, bale sharterén róch ham zahmat o janjálá porr ant, sakk zutta gwazant o má bála kanén.
PSA 90:11 Kay tai hezhmay trondiá zánt? tai gazab delá torsa nádénit.
PSA 90:12 Gorhá márá é zántá beday ke may rócháni hesáb kamm ent, tán may del aglmand bebit.
PSA 90:13 Dém pa má per tarr, oo Hodáwand! Tán kadén chosha bit? Wati hezmatkáráni sará rahm kan.
PSA 90:14 Bámgwáhán, márá gón wati mehrá sér kan, tánke sajjahén omrá sawt bejanén o shádehi bekanén.
PSA 90:15 Haminchok róchá ke taw márá azáb dátag, haminchok róchá márá shádmán kan, haminchok sálá ke sakkián dochár butagén.
PSA 90:16 Tai kár tai hezmatkáráni démá paddar bátant o tai mazani pa áyáni óbádagán.
PSA 90:17 May Hodáwandén Hodáay mehrabáni pa má sar bát, may dastáni kárán barkat beday, haw, may dastáni kárán barkat beday.
PSA 91:1 Hamá ke borzén arshay Hodáay panáhgáhá neshtag, zórákay sáhegá áráma gipt.
PSA 91:2 Hodáwanday bárawá gwashán: “Hamá mani panáh o kalát ent, mani Hodá, ke hamáiay sará tawkala kanán.”
PSA 91:3 Deljam án ke hamá tará cha shekáriáni dámá rakkénit, cha koshókén wabáyán.
PSA 91:4 Á tará gón wati poth o bálán póshénit o áiay bánzoláni chérá panáha bay, áiay wapádári espar o diwálé.
PSA 91:5 Cha shapay bimmá natorsay, na cha á tirá ke róchá srapit,
PSA 91:6 na cha wabáyá ke taháriá gardit, na cha á hawpá ke némróchá béránia kárit.
PSA 91:7 Hazárán kas tai kerrá kapit, dahán hazár tai rástén némagá, bale é tabáhi tai nazziká átka nakanant.
PSA 91:8 Tahná gón wati chammáni shánk dayagá badkáráni sezáyána genday.
PSA 91:9 Agan Hodáyá wati panáh bekanay, borzén arshay Hodáyá wati menendjáh,
PSA 91:10 hech kazá tai sará sarzóra nabit o hech baláh tai gedánay nazziká nayayt.
PSA 91:11 Tai bárawá préshtagán hokma kant ke tai sajjahén ráhán, tai negahpániá bekanant.
PSA 91:12 Á tará wati dastáni delá dárant tán tai pád dhókéá malaggit.
PSA 91:13 Shér o máráni sará garday, rostagén shér o syahmáráni saragán pádmála kanay.
PSA 91:14 Hodáwanda gwashit: “Á ke maná dósta dárit áiá nejáta dayán o hamáiay posht o panáha bán ke mani námá zánt.
PSA 91:15 Á maná tawára kant o man passawia dayán, sakkián áiay hamráha bán, áiá nejáta dayán o ezzata bakshán.
PSA 91:16 Áiá cha drájén omré sérápa kanán o Hodái nejátá áiá pésha dárán.”
PSA 92:1 Pa Shabbatay róchá sawté. Zaburé. Hodáay satá kanag wassh ent o tai námay názénag, oo borzén arshay Hodá!
PSA 92:2 Bámgwáhán tai mehr o shapán tai wapádáriay járay janag,
PSA 92:3 gón dahtárén tamburag o changay zémelá wassh ent.
PSA 92:4 Chiá ke taw, oo Hodáwand, maná gón wati dastay kárán shádmán kortag, tai tawsipá shádmániay sawta janán.
PSA 92:5 Oo Hodáwand! Tai kár chón mazan ant o pegr chenkadar johlánk.
PSA 92:6 Ahmaka nazánt o nádán sarpada nabit.
PSA 92:7 Harchont ke badkár chó káhá berodant o radkár besabzant, bale tán abad tabáha bant.
PSA 92:8 Bale taw, oo Hodáwand, tán abad borzén arshay Hodá ay.
PSA 92:9 Tai dozhmen, oo Hodáwand, allam gár o gomsára bant o sajjahén badkár, sheng o sháng.
PSA 92:10 Bale taw mani kánth, wahshién gókay kánthay paymá borz dáshtag o maná sapáén rógen per moshtag.
PSA 92:11 Mani chammán dozhmenáni shekast distag o góshán badkáráni sarshakuniay habar eshkotag.
PSA 92:12 Pahrézkár macchay paymá sabzant o Lobnánay gazzáni paymá rodant.
PSA 92:13 Á Hodáwanday lógá keshag butagant o may Hodáay bárgáhá sabzant.
PSA 92:14 Piriá ham bar o samara dayant o pa é járay janagá tarr o tázag o sabza mánant ke Hodáwand rást o ádel ent, hamá mani talár ent o áiá hech náensápi o badi mán nést.
PSA 93:1 Hodáwand bádsháhia kant áiá watá pa shán o shawkat árástag, Hodáwand porshawkat ent o zór o wáká selahband. Donyá mohr óshtátag o nalarzit.
PSA 93:2 Tai bádsháhi taht cha azal barjam ent o taw cha azal hastay.
PSA 93:3 Oo Hodáwand! Kawr chest butagant, kawrán wati tawár chest kortag, kawrán wati gorragáni tawár chest kortag.
PSA 93:4 Hodáwand cha mazanén ápáni tawárán, cha daryáay chawláni proshagá mazanshánter ent, borzén arshá.
PSA 93:5 Oo Hodáwand! Tai hokm modám barjáha mánant, tai bádsháhi pák o palgár ent, modám, tán abad.
PSA 94:1 Oo bérgirén Hodá! Oo Hodáwand! Oo bérgirén Hodá! Wati shán o shawkatá záher kan.
PSA 94:2 Pád á, oo zeminay dádras! Porkebr o gorunákán sezá day.
PSA 94:3 Tán kadén, oo Hodáwand! Badkár tán kadén sarzór bebant?
PSA 94:4 É mardom gón kebré habara kanant, sajjahén badkár batháka janant.
PSA 94:5 Oo Hodáwand! Tai kawmá pádmála kanant o tai mirásá ázára dayant.
PSA 94:6 Janózám o darámadán koshant o chórhawán haláka kanant.
PSA 94:7 Gwashant: “Hodáwanda nagendit, Ákubay Hodá sarpada nabit”.
PSA 94:8 Sarpad bét, oo kawmay názántán! Oo jáhelán! Kadén ákela bét?
PSA 94:9 Á ke góshi addh kortag, naeshkont? O á ke chammi addh kortag, nagendit?
PSA 94:10 Á kas ke kawmán sezá dant, áyán adaba nakant? O á kas ke bani ádamá zánta bakshit, watá zánt o zánagi nést?
PSA 94:11 Hodáwand ensánay sajjahén pegrána zánt, á zánt ke náhudag o nákár ant.
PSA 94:12 Oo Hodáwand! Bahtáwar ent hamá ke taw áiá adaba kanay, hamá ke taw gón wati Sharyatá áiá tálima dayay.
PSA 94:13 Taw áiá cha sakkén róchána rakkénay, tán hamá wahdá ke pa badkárán kallé kóchag bebit.
PSA 94:14 Chiá ke Hodáwand wati kawmá yalaha nakant o wati mirásá dawra nadant.
PSA 94:15 Dádrasi padá pa ensápa bit, sajjahén nékdel ensápay randgiriá kanant.
PSA 94:16 Kay ent ke pa manigi badkáráni démá pád byayt? Kay ent ke pa manigi radkáráni démá bóshtit?
PSA 94:17 Agan Hodáwand mani komak mabutén, man zutt markay bétawariá bokketagatán.
PSA 94:18 Wahdé gwashton: “Mani pád thagalagá ent”, tai mehrá, oo Hodáwand, maná cha kapagá dásht.
PSA 94:19 Wahdé sargardána bán, tai dátagén delbaddhi maná shádmána kant.
PSA 94:20 Choshén béensápén hákemé gón taw yak o tepák buta kant ke gón wati hokm o kánunán náensápia kárit?
PSA 94:21 Áyáni thóli pahrézkáráni helápá hamdast o hamkára bant o bégonáhán markay sezá dayant.
PSA 94:22 Bale Hodáwand mani kalát ent, mani Hodá, mani talár, mani panáhgáh.
PSA 94:23 Hodá, áyáni gonáhán hamáyáni jenday sará pera tarrénit o áyán, áyáni jenday badén káráni tahá gár o gomsára kant. Haw, may Hodáwand áyán gár o tabáha kant.
PSA 95:1 Byáét Hodáwandá pa galé názénén, pa wati nejátay talárá pa shádehi kukkára kanén.
PSA 95:2 Byáét pa shogrgozári áiay bárgáhá rawén, pa shádehi kukkára kanén, sawta janén o áiá satá kanén,
PSA 95:3 ke Hodáwand mazanshánén Hodá ent, sajjahén “hodáyáni” masterén bádsháh.
PSA 95:4 Zeminay johli hamáiay dastá ant o kóháni borzi ham hamáiayg ant.
PSA 95:5 Daryá Hodáwandayg ent ke wat addhi kortag, hoshkén zemin ham hamáiay dastán jórh kortag.
PSA 95:6 Byáét, sará jahla kanén o sojdaha kanén, wati addh kanókén Hodáwanday bárgáhá kóndhána kapén,
PSA 95:7 ke hamá may Hodá ent o má, áiay charágáhay mardom, hamáiay dastay ramag én. Drégatá shomá maróchi áiay tawár beshkotén:
PSA 95:8 “Wati delán á paymá sarkash makanét ke kawmá Meribáyá kort, ke kawmá á róchi Massahay gyábáná kort.
PSA 95:9 Ódá shomay pirénán maná chakkáset o ázmáesh kort, bell ke mani kortagén káresh distagatant.
PSA 95:10 Tán chel sálá cha á naslá bézár atán, gwashton: ‘É anchén mardom ant ke delesh gomráh ant o mani ráhána nazánant,’
PSA 95:11 Gorhá man wati hezhmá sawgend wárt ke ‘é hechbar mani ásudagiá sara nabant.’”
PSA 96:1 Pa Hodáwandá nókén sawté bejanét. Oo sajjahén zemin! Hodáwandá benázén.
PSA 96:2 Hodáwandá benázénét, áiay námá satá kanét. Har róch hamá nejátay járá bejanét ke cha áiay némagá ent.
PSA 96:3 Kawmáni nyámá áiay shán o shawkatay járá bejanét, sajjahén kawmáni nyámá áiay ajabén káráni.
PSA 96:4 Ke Hodáwand mazan ent o satáyáni láhek, cha sajjahén “hodáyán” bákamálter ent.
PSA 96:5 Kawmáni sajjahén “hodá” náudagén bot ant, bale Hodáwandá ásmán jórh kortant.
PSA 96:6 Ezzat o shán hamáiay chapp o chágerdá ent o kodrat o zébái áiay pákén bárgáhá.
PSA 96:7 Oo kawmáni kabilahán! Hodáwandá benázénét, Hodáwanday shán o kodratá benázénét.
PSA 96:8 Hodáwanday námay mazaniá benázénét, korbánig byárét o áiay bárgáhá byáét.
PSA 96:9 Cha Hodáwanday pákiay zébáiá, áiay démá kóndhán bekapét. Oo sajjahén zemin! Áiay dargáhá belarz.
PSA 96:10 Sajjahén kawmáni nyámá begwashét: “Hodáwand bádsháh ent.” Jahán pa mohkami jórh kanag butag o nasorit, á, kawmáni dadrasiá pa ensápa kant.
PSA 96:11 Ásmán shádehi bekanát o zemin gal bát, daryá o harché ke daryáyá mán, pa borztawári áiá benázénátant.
PSA 96:12 Dhagár o harché ke dhagárá hast gal bátant, jangalay sajjahén drachk pa shádmáni áiá benázénátant.
PSA 96:13 Hodáwandá benázénátant, chiá ke á kayt, haw, pa zeminay dadrasiá kayt. Jahánay dadrasiá pa adl o ensápa kant o kawmáni dadrasiá wati rásti o tachkiay hesábá.
PSA 97:1 Hodáwand bádsháhia kant, zemin shádehi bekanát o sajjahén tayábi sardhagár gal bátant.
PSA 97:2 Jambar o tahári áiay chapp o chágerdá ant, adl o ensáp, áiay tahtay bonhesht o bonyád ant.
PSA 97:3 Ás áiay démá rawán ent o cha har némagá áiay dozhmenán éra bárt.
PSA 97:4 Áiay grók jaháná róshná kant, zemina gendit o larzit.
PSA 97:5 Hodáwanday démá kóh chó mómá ápa bant, sajjahén jahánay Hodáwanday démá.
PSA 97:6 Ásmán áiay adlay járá janant o sajjahén kawm áiay shán o shawkatá gendant.
PSA 97:7 Á sajjahén mardom sharmsára bant ke bot sojdaha kanant, hamá ke náhudagén botáni poshtá pahra bandant. Oo sajjahén “hodáyán”! Áiá sojdah kanét.
PSA 97:8 Sahyun eshkont o shádehia kant o Yahudiahay jenek gal ant cha tai dadrasiá, oo Hodáwand!
PSA 97:9 Chiá ke taw, oo borzén arshay Hodáwand, sajjahén zeminay sará mazanshán ay, taw sajjahén “hodáyáni” sará báládast ay.
PSA 97:10 Shomá ke Hodáwandá dósta dárét, cha badiá naprat kanét, chiá ke á Hodádóstáni zenday negahpán ent o áyán cha badkáráni dastá nejáta dant.
PSA 97:11 Nur pa pahrézkárán keshaga bit o shádehi pa nékdelán.
PSA 97:12 Oo pahrézkárán! Hodáwanday bárgáhá shádehi kanét o áiay pákén námá benázénét.
PSA 98:1 Zaburé. Pa Hodáwandá nókén sawté bejanét, ke ajabén kári kortag, áiay rástén dast o pákén báská sób o pérózi katthetag.
PSA 98:2 Hodáwandá hamá neját pésh dáshtag ke cha áiay némagá ent, wati adli kawmáni chammán paddar kortag.
PSA 98:3 Áiá pa Esráilay óbádagán wati mehr o wapa yátá áwortag, zeminay sajjahén goddhi hadd o simsarán, may Hodáay dátagén neját distag.
PSA 98:4 Oo sajjahén zemin! Pa Hodáwandá shádmániay kukkárá borz kan. Kukkár kanét, pa shádehi sawt bejanét, benázénét.
PSA 98:5 Pa Hodáwandá chang o sáz bejanét, gón sázá sawt bejanét.
PSA 98:6 Gón sorná o gwarándhay kánthá bádsháhén Hodáwanday bárgáhá, shádehiay kukkárá chest kanét.
PSA 98:7 Daryá o daryáay tahay sajjahén chizz grandátant, jahán o áiay sajjahén jahmenend.
PSA 98:8 Kawr cháp bejanátant o kóh pa shádmáni sawt,
PSA 98:9 Hodáwanday bárgáhá sawt bejanátant, ke á pa zeminay dadrasiá kayt. Á jaháná pa adl dádrasia kant o kawmán pa ensáp.
PSA 99:1 Hodáwand bádsháhia kant, kawm belarzátant, á, karrubiáni nyámá, wati bádsháhi tahtá neshtag, zemin belarzát.
PSA 99:2 Sahyuná, Hodáwand mazan ent, borzén arshay Hodá, sajjahén kawmáni sará hákem.
PSA 99:3 Tai mazan o bákamálén námá satá kanátant, Hodáwand pák ent.
PSA 99:4 Bádsháh zóráwar ent, adli dósta bit. Taw, oo Hodá, ensáp barjáh dáshtag, sajjahén Esráilá taw hamá kár kortag ke pa adl o ensáp ant.
PSA 99:5 May Hodáwandén Hodáyá shán o shawkat dayét o áiay pádáni padagay démá parastesh kanét, ke á pák ent.
PSA 99:6 Mussá o Hárun cha hamáiay dini péshwáyán atant o Samuil ham cha hamáyán at ke Hodáwanday námesh gept. Hodáwandesh tawár kort o áiá passaw dátant.
PSA 99:7 Cha jambaray sotuná gón áyán habari kort o áyán ham hamá hokm o Sharyat barjáh dásht ke dátagati.
PSA 99:8 Oo Hodáwand, may Hodá! Taw á passaw dátant, taw pa Esráilá pahell kanókén Hodáé atay, harchont ke áyáni gonáháni sezáet ham dát.
PSA 99:9 May Hodáwandén Hodáyá shán o shawkat bedayét, áiay pákén kóhay sará áiá parastesh kanét, ke Hodáwand, may Hodá pák ent.
PSA 100:1 Shogrgozáriay Zaburé. Oo sajjahén zemin! Pa Hodáwandá shádmániay gwánká bejan.
PSA 100:2 Hodáwandá pa shádehi parastesh kanét, gón shádmániay sawtán áiay bárgáhá byáét.
PSA 100:3 Bezánét ke Hodáwand, Hodá ent, hamáiá márá addh kortag o má hamáiayg én, má áiay kawm, áiay charágáhay ramag én.
PSA 100:4 Áiay darwázagán gón shogrgozári bepotrét o áiay bárgáhá gón satá o saná. Áiay shográ begerét o áiay námá besárháét,
PSA 100:5 ke Hodáwand nék ent o mehri abadmán, áiay wapádári nasláni nasl barjáha mánit.
PSA 101:1 Dáuday Zabur. Mehr o adlay sawtá janán, tará názénán, oo Hodáwand!
PSA 101:2 Bémayáriay ráhá rawán. Mani kerrá kadi káay? Gón delpahki wati lógá zenda gwázénán.
PSA 101:3 Wati chammán sell o bazzhnákén chizzáni cháragá naylán, cha náráhén kárán bézár án, maná gón choshén chizzán kár nést.
PSA 101:4 Gomráhdelén mardomán cha wat dura dárán, maná gón hecch badiéá kára nabit.
PSA 101:5 Gár o gomsára kanán hamáiá ke wati hamsáhegay báposhtá habara kant. Hech porkebrén chamm o gorunákén deléay ópárá nakanán.
PSA 101:6 Mani chamm zeminay sará wapádárén mardom shóháza kanant tánke gón man jahmenend bebant, hamá kas mani hezmatkár buta kant ke pa bémayária gardit.
PSA 101:7 Prébkárá mani lógá jágaha nabit o drógband mani hezmatá korta nakant.
PSA 101:8 Har sohbá molkay sajjahén badkárán tabáha kanán, radkárán cha Hodáwanday shahrá gár o gomsára kanán.
PSA 102:1 Setam distagén mardoméay dwá, hamá wahdá ke wat ájez ent o wati peryátá Hodáwanday bárgáhá sara kant. Oo Hodáwand! Mani dwáyá gósh dár, mani peryát tará sar bát.
PSA 102:2 Mani sakki o sóriay róchá wati démá cha man chér maday. Wati delgóshá gón man kan, wahdé tará tawára kanán, zutt passaw beday.
PSA 102:3 Chéá ke mani róch chó duttá gára bant o haddh chó rókén eshkará sochant.
PSA 102:4 Mani del chó mortagén káhá gimmortag o hoshk tarretag o cha ward o waráká kaptagán.
PSA 102:5 Cha bázén nálag o peryátá hoshkén haddh o pósté án.
PSA 102:6 Gyábáni bumméay paymá án, anchó ke bummé mán wayránagán.
PSA 102:7 Béwáb gandaláni tahá tachk án, anchó ke tahnáén morgé lógéay sará.
PSA 102:8 Dozhmen sajjahén róchá maná shegána janant, kalága bandant o nálata kanant.
PSA 102:9 Chéá ke nánay badalá pora warán o harché ke nóshán, arsá porr ant,
PSA 102:10 cha tai hezhm o gazabá, chéá ke taw maná chest kort o zeminá jat.
PSA 102:11 Mani róch, bégáhi sáhegéay paymá gára bant o man káhay dhawlá hoshk bayagá án.
PSA 102:12 Bale taw, oo Hodáwand, tán abad wati bádsháhi tahtá neshtagay o tai nám nasláni nasl barjáh ent.
PSA 102:13 Taw jáha janay o tará Sahyunay sará bazzaga bit, chéá ke Sahyunay sará rahm kanagay wahd átkag, á gisshetagén wahd rasetag.
PSA 102:14 Chéá ke tai hezmatkárán é shahray seng dóst ant o Sahyunay hákay sará ham bazzagesha bit.
PSA 102:15 Kawm cha Hodáwanday námá torsant o zeminay sajjahén bádsháh cha tai mazani o sháná.
PSA 102:16 Chéá ke Hodáwand Sahyuná nóksará addha kant o mán wati shán o shawkatá záhera bit.
PSA 102:17 Á bazzagáni dwáyán gósha dárit o cha áyáni peryátán nádelgósha nabit.
PSA 102:18 Bell ke é pa áyókén nasléá nebisag bebit o anchén kawmé ke angat addh nabutag, Hodáwandá satá o saná bekant.
PSA 102:19 Áiá cha wati pákén arshá jahlád cháretag, Hodáwandá cha ásmáná dém pa zeminá cháretag,
PSA 102:20 tánke bandigáni nálagán beshkont o hamáyán ázát bekant ke markay sezá dayag butagant,
PSA 102:21 ke Sahyuná Hodáwanday námá jár bejanant o Urshalimá áiay satáyá bekanant,
PSA 102:22 hamá wahdá ke kawm o bádsháhi pa Hodáwanday parasteshá yakjáh moccha bant.
PSA 102:23 Ráhay némá mani twáni prósht o mani róchi gwandh kortant.
PSA 102:24 Gorhá man gwasht: “Oo Hodáwand! Omray nyámá mani zendá pach mager, tai sál tán sajjahén naslán barjáh ant.
PSA 102:25 Zemin, taw cha azalá jórh kortag o ásmán tai dastáni kár ent.
PSA 102:26 É sajjahén gár o bégwáha bant bale taw mánay, é sajjahén chó pósháká kwahna bant, taw eshán chó pósháká badala kanay o é bérána bant,
PSA 102:27 bale taw mánay o tai sál halása nabant.
PSA 102:28 Tai hezmatkáráni chokk tai bárgáhá jahmenenda bant o áyáni poshpad tai dargáhá barjáha mánant.”
PSA 103:1 Dáuday Zabur. Oo mani arwáh! Hodáwandá benázén. Oo mani bátenay har chizz! Áiay pákén námá benázén.
PSA 103:2 Hodáwandá benázén, oo mani arwáh! Áiay hecch nékiá mashamósh,
PSA 103:3 hamá ke tai sajjahén gonáhána bakshit o tai drostigén nádráhián dráha kant.
PSA 103:4 Tará cha mordagáni jaháná rakkénit o mehr o rahmatay tájé tai sará dant.
PSA 103:5 Tará cha sharrén chizzán sérápa kant ke tai warnái wakábéay paymá nók o tázag bebit.
PSA 103:6 Hodáwand adl o ensápa kant o pa sajjahén setam distagénán dádrasi.
PSA 103:7 Áiá wati ráh pa Mussáyá záher kortant o wati kár pa Esráilay kawmá.
PSA 103:8 Hodáwand rahm kanók o mehrbán ent, hezhm geragá déra kant o mehrá sarréch ent.
PSA 103:9 Márá tán abad mayáriga nakant o na modám pa má gazaba gwárénit.
PSA 103:10 Márá may gonáháni hesábá nachárit, na ke márá may badiáni padmozzá dant.
PSA 103:11 Chéá ke haminkas ke ásmán cha zeminá borz ent, áiay mehr pa hamá mardomán ke Hodáay torsesh delá ent haminkas báz ent.
PSA 103:12 Haminkas ke mashrek cha magrebá dur ent, may gonáhi cha má haminkas dur kortagant.
PSA 103:13 Hamá dábá ke peté pa wati chokkán mehrabán ent, hamé paymá Hodáwand pa hamá mardomán mehrabán ent ke áiay torsesh delá ent.
PSA 103:14 Chéá ke may sareshtá sarpad ent, á zánt ke má hák én.
PSA 103:15 Haw, ensán chó káhá ent, chó dhagáray goléá srapit.
PSA 103:16 Wahdé gwáté áiay sará kasshit, gára bit o áiay jágah padá áiá pajjáha nayárit.
PSA 103:17 Bale Hodáwanday mehr, azal tán abad hamá mardománi hamráh ent ke áiay torsesh delá ent o áiay adl, esháni chokk o nomásagáni hamráh,
PSA 103:18 hamáyáni hamráh ke áiay rahbandáni randgiriá kanant o áiay hokmáni mannagá nashamóshant.
PSA 103:19 Hodáwandá wati bádsháhiay taht ásmánán barjáh dáshtag o áiay bádsháhi sajjahén hastiay sará hákemia kant.
PSA 103:20 Oo Hodáwanday préshtagán! Shomá, oo zóráwarán ke áiay habarán barjáha dárét o áiay parmánbardáriá kanét! Hodáwandá benázénét.
PSA 103:21 Oo Hodáwanday sajjahén lashkarán! Shomá, oo áiay hezmatkárán ke áiay wáhagay parmánbardáriá kanét! Hodáwandá benázénét.
PSA 103:22 Oo Hodáwanday sajjahén jórh kortagénán, har jágah ke áiay bádsháhi barjáh ent! Hodáwandá benázénét. Oo mani arwáh! Hodáwandá benázén.
PSA 104:1 Oo mani arwáh! Hodáwandá benázén. Oo Hodáwand, mani Hodá! Taw békesás mazan ay, taw gón ezzat o sháná póshetagay.
PSA 104:2 Nurá chó kabáhéá gwará kanay, ásmáná tambuéay paymá pacha kanay o
PSA 104:3 wati borzi lógáni menokán ápáni sará oshtárénay. Jambarán wati arrábah jórha kanay o gwátay bánzolán swár ay.
PSA 104:4 Gwátán wati káseda kanay o ásay bránzá wati hezmatkár.
PSA 104:5 Taw zemin áiay bonredáni sará ér kortag ke hechbar soreta nakant.
PSA 104:6 Taw zemin gón ápáni johlánkián póshéntag, kabáhéay dhawlá, áp kóháni sarborá óshtát.
PSA 104:7 Áp cha tai neherrán jestant, cha tai grandáni tawárá bálesh kort,
PSA 104:8 kóháni sará tatkant o dém pa daragán shotant, dém pa hamá jágahá ke taw pa áyán gisshéntagat.
PSA 104:9 Taw anchén hadd o simsaré gisshént ke áp cha ódá gwasta nakant o nun dega baré zeminá nagipt o napóshit.
PSA 104:10 Taw chammag parmátant ke daragán áp berombénant o kóháni nyámá tachán bebant.
PSA 104:11 Gyábánay hamok jánwará ápa dayant, wahshién har wati tonná próshant.
PSA 104:12 Báli morg chammagáni kashá kodóha bandant o drachkáni sháharháni nyámá sawta janant.
PSA 104:13 Taw cha wati borzi bán o bárgáhá kóhán ápa dayay o zemin cha tai káráni bar o samará séra bit.
PSA 104:14 Taw pa dalwatán káha ródénay o sabzag ke ensán kesht o keshár bekant o cha zeminá warák dar bekant,
PSA 104:15 sharáb ke mardomay delá shát bekant o rógen ke áyáni démá rozhná bekant o nán ke ensánay delá zórmand bekant.
PSA 104:16 Hodáwanday drachk séráp ant, Lobnánay gazz ke áiá keshtagant.
PSA 104:17 Morg hamódá kodóha bandant o kunj sanóbarén drachkáni sará jágaha kanant.
PSA 104:18 Borzén kóh wahshién bozánig ant o talár, rijgushkáni panáhgáh ant.
PSA 104:19 Taw máh pa wahdáni neshán kanagá addh kort o róch wati ér nendagay wahdá zánt.
PSA 104:20 Taháriá ke káray, shapa bit o jangalay sajjahén jánwar soragá laggant.
PSA 104:21 Shér pa wati shekárá gorrant o wati waráká cha Hodáyá lóthant.
PSA 104:22 Róch ke dara kayt, pera tarrant o wati hóndháni tahá áráma kanant.
PSA 104:23 Á wahdá mardom wati kárána rawant o tán bégáhá zahmata kasshant.
PSA 104:24 Oo Hodáwand! Tai kár chinkadar báz ant, taw, é sajjahén pa hekmat addh kortagant, zemin cha tai jórh kortagénán porr ent.
PSA 104:25 Daryá ent ke práh o sháegán ent o cha sahdárá sarréch, kasán o mazanéná.
PSA 104:26 Bójiga rawant o káyant o mazanén ápi jánwar ham, ke taw jórh kortagant ke ápay tahá gwázi bekanant.
PSA 104:27 Sajjahénáni chamm tará sakk ant, ke áyáni waráká pa wahd bedayay.
PSA 104:28 Taw ke dayayesh, áesh yakjáha kanant, taw ke wati dastá pacha kanay, é cha sharrén chizzán séra bant.
PSA 104:29 Taw ke wati démá chéra dayay, é paréshána bant o sarsara janant, esháni sáhá ke pacha geray merant o háká pera tarrant.
PSA 104:30 Wati ruhá ke déma dayay é addha bant. Zeminay sarborá nók o tázaga kanay.
PSA 104:31 Hodáwanday shán tán abad bemánát, Hodáwand cha wati kárán shádmán bát.
PSA 104:32 Hamá ke zeminá chárit, zemina larzit, kóhán ke dasta jant, dutta bant.
PSA 104:33 Man wati sajjahén zendá pa Hodáwandá sawta janán, tánke zendag án, wati Hodáyá názénán.
PSA 104:34 Mani pegr o hayál áiá pasond bátant ke man áiay bárgáhá shádmánia kanán.
PSA 104:35 Bale gonahkár cha zeminá gár o gomsár bátant o badkár pasht makapátant. Hodáwandá benázén, oo mani arwáh! Hodáwandá benázénét, Halléluyá.
PSA 105:1 Hodáwanday shográ begerét o hamáiay námá begerét, kawmán cha áiay kárán sahig kanét.
PSA 105:2 Áiá benázénét, áiá pa sawt benázénét, áiay sajjahén bákamálén káráni habará bekanét.
PSA 105:3 Áiay pákén námay sará pahr bekanét, Hodáwanday shóház kanókáni del shádmán bát.
PSA 105:4 Hodáwand o áiay zór o wákay lóthók bebét, modám áiay chehragay didáray shóházá bebét.
PSA 105:5 Áiay kortagén bákamálén kárán yát kanét, áiay mójezah o dátagén hokmán,
PSA 105:6 oo áiay hezmatkárén Ebráhémay nasl, oo Ákubay chokkán ke áiay gechén kortagén ét!
PSA 105:7 Á, Hodáwand may Hodá ent. Áiay dádrasi sajjahén jaháná rasant.
PSA 105:8 Á wati ahd o paymáná tán abad yáta kant, hamá labz ke áiá gón hazár naslá kort,
PSA 105:9 hamá ahd ke gón Ebráhémá korti o hamá sawgend ke gón Esáká wárti,
PSA 105:10 gón Ákubá karáré bast o pakkái kort, gón Esráilá, abadmánén ahdé.
PSA 105:11 “Kanhánay sardhagárá tará bakshán, ke shomay bahr o mirása bit.”
PSA 105:12 Á wahdá ke é kammok mardom atant, kammok atant o darámad,
PSA 105:13 é kawm o á kawmay nyámá darpadar atant, é molk o á molká gashtant.
PSA 105:14 Kassá áyáni sará zolm kanagi naesht, pa áyánigi, áiá bádsháh neherr dátant:
PSA 105:15 “Mani ‘rógen per moshtagénán’ dast per makanét o mani nabián noksán madayét.”
PSA 105:16 Zeminá dhokkáli ér áwort o áyáni nánay ambári próshtant.
PSA 105:17 Áyáni démá mardomé rawáni dát, Issop, ke goláméay hesábá bahá kanag but.
PSA 105:18 Áiay pádesh pa band o zamzil thappig kortant o ásenén tawké gotthá dátesh,
PSA 105:19 tán hamá wahdá ke áiay habar rást butant, Hodáay habará áiay rásti pakká kort.
PSA 105:20 Bádsháhá Issop lóthet o ázát kort, mardománi hákemá ázát kort.
PSA 105:21 Bádsháhá wati lógay master kort, wati sajjahén mál o melkatay hákem,
PSA 105:22 ke bádsháhay kárendahán wati tabá adab bekant o kamáshán dánáiay tálimá bedant.
PSA 105:23 Nun Esráil Mesrá átk, Ákub, Hámay sardhagárá pa darámadi jahmenend but.
PSA 105:24 Wati mahluki ábád o cha áyáni dozhmenán zóráwarter kortant.
PSA 105:25 Dozhmenáni deli gardént tán cha áiay kawmá naprat bekanant o áiay hezmatkáráni helápá pandal besázant.
PSA 105:26 Áiá wati hezmatkárén Mussá rawán dát o Hárun, ke wat gechéni kortagat.
PSA 105:27 Eshán mardománi nyámá Hodáay ajabbatén nesháni o áiay mójezah pésh dáshtant, Hámay sardhagárá.
PSA 105:28 Áiá tahári rawán dát o zemin tahár kort, áiay habaray náparmániesh nakortagat.
PSA 105:29 Áyáni ápi hón kort o máhigi koshtant.
PSA 105:30 Sardhagáresh cha pogolá porr but ke tán áyáni bádsháhi wábjáhán sar butant.
PSA 105:31 Áiá habar kort o makeskáni lashkar átkant o passhag áyáni sajjahén molká mán retk.
PSA 105:32 Hawray badalá tróngali gwárént, ás o bir, áyáni sajjahén sarzaminá.
PSA 105:33 Áyáni angur o enjiray drachki tabáh kortant o molkay drachki próshtant.
PSA 105:34 Hokmi kort o madag átkant, kathag, béhesábá.
PSA 105:35 Áyáni molkay sajjahén sabzagesh wártant o hákay sajjahén bar o samaresh ér bort.
PSA 105:36 Nun áyáni sajjahén awali chokki jatant áyáni mardánagiay awali bar o samar.
PSA 105:37 Wati mardomi zarr o sohrá bár kort o dhanná áwortant o cha áyáni kabilahán kassá thagal nawárt.
PSA 105:38 Mesr cha Bani Esráilay rawagá gal but, chéá ke áyáni torsá gár at.
PSA 105:39 Áiá jambaré sáhél kort o póshéntant, ásé róki kort ke shapá rozhnáiesh bedant.
PSA 105:40 Áyán lóthet o Hodáwandá baynkuén morg rawán dát o ái gón ásmáni naganá sér kortant.
PSA 105:41 Taláré tali dát o áp rawán but, gyábáná kawré tatk.
PSA 105:42 Chéá ke wati pákén kawli yát at ke gón wati hezmatkárén Ebráhémá kortagati.
PSA 105:43 Áiá wati kawm pa shádmáni dhanná áwort, wati gechén kortagén, gón shádehiay kukkárán.
PSA 105:44 Áyáná rájáni sardhagári dát o á, kawmáni kortagén mehnatáni málek butant,
PSA 105:45 ke áiay rahbandáni randgiriá bekanant o áiay Sharyatay hokmáni sará kár bekanant. Hodáwandá benázénét, Halléluyá.
PSA 106:1 Hodáwandá benázénét, Halléluyá. Hodáwanday shográ begerét ke nék ent o mehri abadmán.
PSA 106:2 Kay Hodáwanday porwákén káráni tawsip o áiay tamánén satá o sanáyá korta kant?
PSA 106:3 Bahtáwar ant hamá ke adlá barjáh dárant, hamá ke modám ensápay sará kára kanant.
PSA 106:4 Oo Hodáwand! Hamá wahdá ke wati mardománi sará rahma kanay, maná mashamósh. Mani kerrá byá o maná berakkén
PSA 106:5 ke tai gechén kortagénáni washbahtiá begendán, ke tai kawmay shádmániá hawár bebán o tai mahlukay hamráhiá pahr bekanán.
PSA 106:6 Má gonáh kortag, may petán ham, má radén ráhé zortag o badkári kortag.
PSA 106:7 Á wahdá ke may pet o pirok Mesrá atant, tai hayrán kanókén káráni némagá delgóshesh nakort o tai sajjahén mehrabániesh shamoshtant, daryáay kerrá sarkasshiesh kort, Sohrzeray kerrá.
PSA 106:8 Bale Hodáwandá pa wati námaygi rakkéntant, tánke wati zór o wáká záher bekant.
PSA 106:9 Áiá Sohrzer neherr dát o zer hoshk but, cha johlánkián anchosh gwázéntanti ke purah gyábáné.
PSA 106:10 Cha badwáháni dastá rakként o cha dozhmenáni dastá móketanti.
PSA 106:11 Ápá, áyáni dozhmen póshént, cha áyán yakké ham pasht nakapt.
PSA 106:12 Nun Hodáwanday labzay sará báwaresh kort o áiay satá o sanáesh kort.
PSA 106:13 Bale zutt béhayál butant ke áiá ché kortagat o pa áiay shawr o saláhá wadáresh nakort.
PSA 106:14 Gyábáná wati hawá o hawasáni randgir butant o hoshkáwagán Hodáesh chakkáset.
PSA 106:15 Gorhá harché ke lóthetesh, Hodáyá dátant, bale áyáni jáná warókén nádráhié ham dáti.
PSA 106:16 Ordgáhá, Mussáay sará hasaddesh kort o Hárunay sará ham, ke Hodáwanday palgártagén dini péshwá at.
PSA 106:17 Gorhá zeminá dap pach kort o Dátán éri bort o Abirámay thóli bári dát.
PSA 106:18 Áyáni thóliá ásé mán kapt o bránzán badkár sótkant.
PSA 106:19 Sináay kóhá gwaské jórhesh kort o ásá táptagén teláhén botesh parastesh kort.
PSA 106:20 Wati mazanshánén Hodáay badalá káhwárén jalabén gókéay botesh zort.
PSA 106:21 Wati rakkénókén Hodáesh shamosht, hamá ke Mesrá mazanén kári kortagat.
PSA 106:22 Hámay sardhagárá hayrán kanókén o Sohrzeray kerrá bákamálén kári kortagat.
PSA 106:23 Gorhá Hodáyá gwasht: “Gár o gomsáresha kanán.” Bale áiay gechén kortagén Mussá nyámá kapt o pa áyáni tabáh kanagá Hodáay gazabi dásht.
PSA 106:24 Á delkasshén molkay arzesh o kadresh nazánt, áiay kawlay sará báwaresh néstat.
PSA 106:25 Wati gedánáni tahá norondhetesh o Hodáwanday habaresh nazort.
PSA 106:26 Gorhá dasti chest kort o sawgendi wárt ke gyábáná tabáhesha kanán o
PSA 106:27 chokk o nomásagánesh darkawmáni nyámá gár o gomsára kanán o sajjahén molkán sheng o shángesha kanán.
PSA 106:28 Áyán watárá gón Bahal Péórá jog kort o pa mordagán kortagén korbánigesh wártant.
PSA 106:29 Gón wati badkárián Hodáwandesh zahr baráént, hawp o wabáé saráesh kapt.
PSA 106:30 Bale Pinihás nyámá óshtát o dwái kort o wabá dárag but.
PSA 106:31 É pa áiá páki o palgárié hesáb árag but nasláni nasl, tán abad.
PSA 106:32 Maribáay ápáni kerrá Hodáwandesh hezhm geráént o áyáni sawabá Mussá janjálá kapt,
PSA 106:33 chéá ke Mussáesh delsyáh kort o cha áiay dapá sobakkén habaré dar átk.
PSA 106:34 Kawmesh á paymá tabáh nakortant ke Hodáwandá parmán dátagatant.
PSA 106:35 Nun gón kawmán hór o tór but o hamáyáni rasm o dódesh zortant.
PSA 106:36 Hamáyáni botesh sojdaha kortant o é bot pa áyán dámé butant.
PSA 106:37 Wati bachakk o jenekkesh pa déhán korbániga kortant.
PSA 106:38 Bégonáhén hónesha rétk wati bachakk o jenekkáni hón, ke pa Kanhánay botán korbánigesha kortant o zemin cha esháni hóná áludag but.
PSA 106:39 Gón wati kárán watá nápák o gón wati kerdán watá syahkáresha kort.
PSA 106:40 Paméshká, Hodáwand wati kawmay sará zahr gept, deli cha wati mirásá bad but.
PSA 106:41 Darkawmáni dastá dátanti o badwáhán áyáni sará hákemi kort.
PSA 106:42 Dozhmenán áyáni sará zolm kort o wati chérdast kortant.
PSA 106:43 Hodáwandá báz bará ázát kortant bale wati shawr o hayáláni tahá sarkasshiesh kort o gonáháni tahá bokketant.
PSA 106:44 Bale wahdé ke áyáni peryáti eshkot, disti ke chón paréshán ant,
PSA 106:45 gón áyán wati ahd o karári yát kort o cha wati bázén mehrá, cha áyáni badián sar gwast.
PSA 106:46 Áyáni sajjahén bandig kanókáni delá pa áyán rahmi pédá kort.
PSA 106:47 Oo Hodáwand, may Hodá! Márá berakkén, márá cha darkawmáni nyámá chen o yakjáh kan ke tai pákén námay shográ begerén o pa tai satáyá pahr bekanén.
PSA 106:48 Hodáwandá satá o saná bát, Esráilay Hodáyá, abad tán abad. Sajjahén mardom begwashátant: “Anchosh bát. Ámin.” Hodáwandá benázénét, Halléluyá.
PSA 107:1 Hodáwanday shográ begerét ke nék ent o mehri abadmán.
PSA 107:2 Hodáwanday rakkéntagén habar bekanátant, hamá ke cha dozhmenáni dastá rakkéntaganti,
PSA 107:3 hamá ke cha bázén sardhagárán zortag o yakjáhi kortagant, cha shagreb o magreb, cha shomál o jonubá.
PSA 107:4 Lahtén, jangal o gyábánán sargardán but o pa choshén shahréá ráhé nadistesh ke jahmenend bebant.
PSA 107:5 Gozhnag o tonnig mantant, markig butant.
PSA 107:6 Nun sakkiáni tahá Hodáwanday gwará peryátesh kort o áiá cha sakkián rakkéntant.
PSA 107:7 Áiá cha tachkén ráhéá rahshóni kortant, dém pa shahréá ke ódá jahmenend bebant.
PSA 107:8 Hodáwanday shográ begerátant, áiay mehr o pa baniádamá áiay bákamálén káráni sawabá.
PSA 107:9 Hamá ent ke tonnigán sérápa kant o gozhnagán cha sharrén waráká sérláp.
PSA 107:10 Tahárterén tahárián neshtagatant, ásenén zamziláni bandig o azáb atant
PSA 107:11 ke Hodáay habaráni helápá sarkasshiesh kortagat o borzén arshay Hodáay sar o sójesh kalág bastagatant.
PSA 107:12 Gorhá zahmatkasshiay sará dát o áyáni goruri prósht, thagalesh wárt o madat kanókesh néstat.
PSA 107:13 Nun sakki o sóriáni tahá gón Hodáwandá peryátesh kort o áiá cha janjálán rakkéntant.
PSA 107:14 Cha tahárterén tahárián dari kortant o áyáni zamzili próshtant.
PSA 107:15 Hodáwanday shográ begerátant, áiay mehr o pa baniádamá áiay bákamálén káráni sawabá
PSA 107:16 ke brenjén darwázagi próshtant o ásenén bandi goddhetant.
PSA 107:17 Cha wati sarkasshiá ahmak butant o wati gonáháni sawabá sakki o sórián kaptant.
PSA 107:18 Warákesh gotthá éra nashot o markay darwázagá rasetant.
PSA 107:19 Nun sakki o sóriáni tahá gón Hodáwandá peryátesh kort o áiá cha janjálán rakkéntant.
PSA 107:20 Wati hokmi ráh dát o dráhi kortant o cha kall o kaddhá rakkéntanti.
PSA 107:21 Hodáwanday shográ begerátant, áiay mehr o pa baniádamá áiay bákamálén káráni sawabá.
PSA 107:22 Shogrgozáriay korbánig bekanátant o gón shádmániay sawtán áiay káráni kessahá byárátant.
PSA 107:23 Hamá ke gón bójigán daryáyá shotant, hamá ke ápáni sará sawdágeriesh kort,
PSA 107:24 Hodáwanday káresh distant, mán johlánkián áiay hayrán kanókén kár.
PSA 107:25 Áiá habar kort o tuppánén gwáté átk o daryáay chawli chest kortant.
PSA 107:26 Bójig borzád tán arshá shotant o jahlád tán johlánkián kaptant o cha janjálá áyáni arwáh áp but.
PSA 107:27 Sharábiáni paymá tattarag o thagal waragá laggetant o áyáni sajjahén ezm o honar gár but.
PSA 107:28 Nun sakki o sóriáni tahá gón Hodáwandá peryátesh kort o áiá cha janjálán rakkéntant.
PSA 107:29 Tuppáni érmósh kort o daryáay chawl neshtant.
PSA 107:30 Tuppán ke ér nesht, gal butant, dém pa hamá tayábá rashónii kortant ke wat rawagesh lóthet.
PSA 107:31 Hodáwanday shográ begerátant, áiay mehr o pa baniádamá áiay bákamálén káráni sawabá.
PSA 107:32 Mardománi mocchiá áiá satá bekanátant o kamásháni majlesá tawsip.
PSA 107:33 Á kawrán gyábána kant, tachókén chammagán, hoshkáwagén zemin o
PSA 107:34 kesht o keshári zeminán sorága kant, óday jahmenendáni badkáriay sawabá.
PSA 107:35 Gyábánán gwarma kant o hoshkén zeminán, tachókén chammag.
PSA 107:36 Shodigi áwort o hamódá jahmenend kortant o áyán shahré ábád kort o neshtant.
PSA 107:37 Áyán dhagár kesht o anguri bág ábád kort ke báz bar o samaresh dát.
PSA 107:38 Áiá barkat dátant o á sakk báz géshter butant, naeshti ke dalwatesh kamm bebant.
PSA 107:39 Nun á kamm tarrán o wár o zár butant, cha ázár o janjál o gamá.
PSA 107:40 Hamá ke sharapdárán bésharapa kant, ái zort o béráhén gyábánán darpadar kortant.
PSA 107:41 Bale hájatmandi cha sakkián dar kortant, áyáni kahóli ramagáni paymá báz kortant.
PSA 107:42 Nékdelesha gendant o shádmánia kanant o har badkár wati dapá banda kant.
PSA 107:43 Harkas ke dáná ent, é kárán bechárit o Hodáwanday pormehrén káráni sará sharriá pegr bekant.
PSA 108:1 Sawté. Dáuday Zabur. Mani del jam ent, oo Hodá! Cha delay johlánkiá sawta janán o tará názénán.
PSA 108:2 Oo soróz o changán! Ágah bét. Man bámgwáhárá ham cha wábá páda kanán.
PSA 108:3 Kawmáni nyámá tai shográ gerán, oo Hodáwand! Darkawmáni nyámá tará názénán,
PSA 108:4 ke tai mehr báz ent, cha ásmánán borzter, tai wapádári tán jambarán ent.
PSA 108:5 Oo Hodá! Ásmánáni sarborá tai mazansháni názénag bát o sajjahén zeminá tai shán o shawkat sar bát.
PSA 108:6 Gón wati rástén dastá berakkén o maná passaw beday tánke hamá mardom berakkant ke tará dóst ant.
PSA 108:7 Hodáyá cha wati pákiá habar kortag: “Sóbéna bán o Shekémá bahra kanán o Sukkótay daragá pa wat kadd o kesása kanán.
PSA 108:8 Galyád manig ent o Manassi manig, Epráim mani jangi koláh ent, Yahudá, bádsháhiay asá o
PSA 108:9 Muáb dasshódi trasht, Edumay sará wati swásá chagala dayán o Pilistiahay sará wati péróziay gwánká janán.”
PSA 108:10 Kay maná pasilbandén shahrá kárit? Kay tán Edumá mani rahshóna bit?
PSA 108:11 Oo Hodá! Taw hamá naay ke márá yalahet kortag? Nun gón may lashkarán hamráha nabay?
PSA 108:12 May dozhmenáni démá márá madat kan, ke ensánay komakk náhudag ent.
PSA 108:13 Hodá ke gón ent, sóbéna bén, hamá ent ke may dozhmenán pádmála kant.
PSA 109:1 Pa sázger o washalhánáni sálárá. Dáuday Zabur. Oo mani satáyáni Hodá! Hámósh mabay.
PSA 109:2 Chéá ke badkár o prébkárán mani helápá wati dap pach kortag, gón drógbandén zobánéá mani helápá gappesh jatag.
PSA 109:3 Maná gón napratién habarán chapp o chágerdesh kortag, bésawabá gón man pa jangá pád átkagant.
PSA 109:4 Mani mehray badalá maná bohtámesh jatag, bale man pa áyán nékén dwá kortag.
PSA 109:5 Mani nékiáni badalá gón man badia kanant o mehray badalá naprat.
PSA 109:6 Gwashant: “Badkárén mardoméá eshiay chakká dawr day, bell ke bohtám janóké eshiay rástén némagá óshtit.
PSA 109:7 Wahdé áiay dadrasiá kanant, mayárbár zánag bát o dwái gonáh hesáb bátant.
PSA 109:8 Róchi kammok bátant o áiay ogdah o zemmawári degaréá berasát.
PSA 109:9 Chokki chóraw bátant o jani janózám.
PSA 109:10 Chokki pendhók o darpadar bátant o cha wati proshtagén lógán dar kanag bátant.
PSA 109:11 Wámdári sajjahén mál o hastiá pach gerátant o darámad áiay johdáni bar o samará barátant.
PSA 109:12 Kass pa áiá mehrabán mabát o áiay chórawáni sará bazzag makanát.
PSA 109:13 Padréchi gár bátant o námesh pa démi naslán sar mabát.
PSA 109:14 Áiay pet o pirokáni gonáh Hodáwanday bárgáhá yát kanag bátant, mátay gonáhi hechbar shódag mabátant.
PSA 109:15 Gonáhesh modám Hodáwanday chammáni démá bátant, Hodáwand áyáni yátá cha zeminá gár kanát.
PSA 109:16 Chéá ke á hechbar pa kassá mehrabán nabut, nézgár o hájatmandi ázár dátant o delproshtagéni pa mark raséntant.
PSA 109:17 Nálat kanagi wassha but, áiay wati sará kapátant. Barkat dayagi wassha nabut, hechbar barkati marasát.
PSA 109:18 Nálat kanagi chó pósháká gwará at, ápay paymá áiay jáná ér nesht, rógenay paymá haddháni shot.
PSA 109:19 Nálat kabáhé bát o áiay jendá bepóshát o kamarbandéay paymá modám áiay sréná bandók bát.”
PSA 109:20 Cha Hodáwanday némagá mani bohtám janókáni mozz hamé bát, hamá ke mani helápá badén habara kanant.
PSA 109:21 Bale taw, oo Hodáwand, tahná taw pa wati námaygi mani sará mehrabán bay, cha wati mehray nékiá maná berakkén.
PSA 109:22 Chéá ke man nézgár o hájatmandé án o delon bátená thappig ent.
PSA 109:23 Man chó bégáhi sáhegéá gára bán, chó madagéá chandhaga bán.
PSA 109:24 Cha róchagá kóndhon drahagá ant, jesm o jánon ranjetag o lágar ent.
PSA 109:25 Bohtám janókáni kalági án, maná ke gendant, sará chandhénant.
PSA 109:26 Maná komakk kan, oo Hodáwand, mani Hodá! Pa wati mehraygi maná berakkén.
PSA 109:27 Bell bezánant ke é tai dast ent, ke é kár taw kortag, oo Hodáwand!
PSA 109:28 Á nálata kanant, bale taw barkat bedayátay. Hamlah ke kanant, sharmendag bátant, bale tai hezmatkár shádmáni bekanát.
PSA 109:29 Mani dozhmenán roswáiay jámag gwará dayag bát o sharmendagiay kabáhá póshénag bátant.
PSA 109:30 Man cha wati zobáná Hodáwanday sakk báz shográ gerán, bázén mardoméay démá áiá satá kanán.
PSA 109:31 Chéá ke hájatmanday rástén némagá óshtit tánke áiá cha dádrasáni hokmá berakkénit.
PSA 110:1 Dáuday Zabur. É Hodáwanday paygám ent pa mani Hodáwandá: “Mani rástén némagá benend tán hamá wahdá ke tai dozhmenán tai pádáni chéray padag o chárchóbahé bekanán.”
PSA 110:2 Hodáwand cha Sahyuná tai zóráwarén asáyá shahára dant o gwashit: “Wati dozhmenáni nyámá hákemi kan.”
PSA 110:3 Á róchá ke taw wati lashkará moccha kanay, tai mardom pa shawké góna bant. Gón pákiay shán o zébáiá tai warná tai gwará káyant, chó ke nód cha bámgwáhay bátená.
PSA 110:4 Hodáwandá sawgend wártag o pashómana nabit, ke: “Taw tán abad dini péshwáé ay, Malkisedikay hesábá.”
PSA 110:5 Hodáwand tai rástén dastá ent, wati gazabay róchá bádsháhána droshit.
PSA 110:6 Kawmán sezá dant, zeminá cha láshá porra kant o sajjahén zeminay hákemána droshit.
PSA 110:7 Ráhá, cha kawréá ápa wárt o sóbéna o sarbolanda bit.
PSA 111:1 Hodáwandá benázénét, Halléluyá. Cha delay johlánkiá Hodáwanday shográ gerán, nékdeláni diwáná, mocchiay nyámá.
PSA 111:2 Hodáwanday kár mazan ant, harkasay delá ke neshtagant, áyáni sará pa sharri pegra kanant.
PSA 111:3 Áiay kár shándár o porshawkat ant o áiay adl tán abad barjama mánit.
PSA 111:4 Áiá wati bákamálén kár yádgár kortagant, Hodáwand mehrabán o rahm kanók ent.
PSA 111:5 Á hamáyán waráka dant ke áiay torsesh delá ent, wati ahd o karárá tán abad yáta kant.
PSA 111:6 Wati káráni zóri wati kawmárá pésh dáshtag, darkawmáni mirási wati kawmárá dátagant.
PSA 111:7 Áiay dastáni kár rást o pa adl ant o sajjahén rahbandi porehtebár.
PSA 111:8 Abad tán abad mohr o mohkam ant, pa rásti o tachki kanag butagant.
PSA 111:9 Áiá wati kawm móketag, tán abad wati ahd o karári barjam dáshtag. Áiay nám pák o bákamál ent.
PSA 111:10 Hodáwanday tors dánáiay bendát ent. Hamá ke áiay rahbandáni randgiriá kanant, áyán sharrén zántkária rasit. Tán abad satá hamáiayg ent.
PSA 112:1 Hodáwandá benázénét, Halléluyá. Bahtáwar ent hamá ke Hodáwanday tors áiay delá ent, hamá ke áiay hokmi sakk báz dósta bant.
PSA 112:2 Áiay nasl o óbádag zeminay sará porzóra bant, barkat nékdeláni padréchá rasit.
PSA 112:3 Áiay lóg cha mál o melkatá porra bit o áiay pahrézkári tán abad barjama mánit.
PSA 112:4 Pa nékdelán mán tahárókiá ham rozhna drapshénit, á mehrabán, rahm kanók o ádel ent.
PSA 112:5 Bakshendah o wámdehén mardomay ásar sharra bit, hamá ke wati kárán pa ensápa kant.
PSA 112:6 Chéá ke á hechbar larzénaga nabit, pahrézkárén mardomé tán abad yát kanaga bit.
PSA 112:7 Á cha badén hálána natorsit, deli jam ent, tawkali Hodáwanday sará ent.
PSA 112:8 Áiay del mohr ent, natorsit, néth wati dozhmenáni shekastá gendit.
PSA 112:9 Gón garib o nézgárán béhesáb bakshendah ent, áiay pahrézkári tán abad barjam ent. Áiay kánth pa sháné borz kanaga bit.
PSA 112:10 Badkára gendit o hezhmnáka bit, cha zahrá dantána droshit o ápa bit, badkáray wáhag námoráda bant.
PSA 113:1 Hodáwandá benázénét, Halléluyá. Benázénét, oo Hodáwanday hezmatkárán! Hodáwanday námá benázénét.
PSA 113:2 Hodáwanday námá satá o saná bát, cha annuná tán abad.
PSA 113:3 Mashreká beger tán magrebá, Hodáwanday nám názénag bát.
PSA 113:4 Hodáwand sajjahén kawmáni sará porjalál ent o áiay shán o shawkat cha ásmánán borzter.
PSA 113:5 Kay may Hodáwandén Hodáay dhawlá ent? May Hodá borzád, wati bádsháhi tahtá neshtag.
PSA 113:6 Á jahla bit ke ásmán o zeminá bechárit.
PSA 113:7 Á nézgárá cha háká o hájatmandá cha poráni hákóthá chesta kant.
PSA 113:8 Shahzádagáni nyámá nádénitesh, wati kawmay shahzádagáni nyámá.
PSA 113:9 Santh o béawládén janéná washdel o chokkáni máta kant o áiay lógá ábád. Hodáwandá benázénét, Halléluyá.
PSA 114:1 Wahdé Esráil cha Mesrá dar átk, Ákubay hándán, cha darámadén zobánéay mardománi nyámá,
PSA 114:2 Yahudá Hodáay gechén kortagén o Esráil áiay bádsháhi but.
PSA 114:3 Daryáyá dist o tatk, Ordonay kawr, poshtá kenzet.
PSA 114:4 Kóh chó gwarándhá setth janán butant o jomp chó gwaragá.
PSA 114:5 Oo daryá! Ché but ke taw tatkay? Oo Ordon! Ché but ke taw poshtá kenzetay?
PSA 114:6 Oo kóhán! Ché but ke shomá chó gwarándhá setth jat, shomá chó gwaragá, oo jompán?
PSA 114:7 Belarz, oo zemin! Hodáwanday bárgáhá, Ákubay Hodáay bárgáhá.
PSA 114:8 Áiá talár gwarm kortant, cha ápá porr, mohrén seng ápay chammag.
PSA 115:1 Márá enna, oo Hodáwand! Márá enna, tai námá shán o shawkat berasát, tai mehr o wapádáriay sawabá.
PSA 115:2 Á dega kawm chéá begwashant: “Esháni Hodá kojá ent?”
PSA 115:3 May Hodá arshá ent, harché ke áiá wassha bit, hamá kárá kant.
PSA 115:4 Áyáni “hodá” nograh o teláh ant, ensánay dastay jórh kortagén bot.
PSA 115:5 Eshán dap per bale habar korta nakanant, chammesh per bale dista nakanant,
PSA 115:6 góshesh per bale eshkota nakanant, pónzesh per bale bó cheta nakanant,
PSA 115:7 dastesh per bale máreta nakanant, pádesh per bale ráh shota nakanant, na cha wati gotthá áwázé kassheta kanant.
PSA 115:8 Harkas ke eshán jórha kant, hamesháni paymá bit o hamá mardom ham ke esháni sará tawkala kant.
PSA 115:9 Oo Esráil! Hodáwanday sará tawkal kan, hamá shomay komakk o espar ent.
PSA 115:10 Oo Hárunay lóg! Hodáwanday sará tawkal kan, hamá shomay komakk o espar ent.
PSA 115:11 Oo Hodátorsán! Hodáwanday sará tawkal kanét, hamá shomay komakk o espar ent.
PSA 115:12 Hodáwandá márá yát kortag o márá barkata dant, Esráilay lógá barkata dant, Hárunay lógá barkata dant.
PSA 115:13 Hamáyán barkata dant ke Hodáwanday tors áyáni delá ent, mazanén o kasánénán, yakk paymá.
PSA 115:14 Hodáwand shomárá géshá cha géshter kanát, shomay jend o chokk, doénán.
PSA 115:15 Hodáwand shomárá barkat dayát, zemin o ásmánay addh kanók.
PSA 115:16 Borzén arsh Hodáwandayg ent o zemini baniádamárá dátag.
PSA 115:17 Mordag Hodáwandá nanázénant, na á mardom ke rawant o bétawára bant.
PSA 115:18 É má én ke Hodáwandá satá dayén, annun tán abad. Hodáwandá benázénét, Halléluyá.
PSA 116:1 Maná Hodáwand dóst ent ke mani tawári gósh dáshtag, mani peryát o záriay tawár o
PSA 116:2 wati delgóshi mani némagá tarrént. Tán zendag án, gwánkia janán.
PSA 116:3 Markay sádán patátagatán, kabray tors mani sará kaptagat gam o andóháni bandig atán.
PSA 116:4 Hodáwanday námon gept o gwashton: “Oo Hodáwand! Mani zendá berakkén.”
PSA 116:5 Hodáwand mehrabán o ádel ent, may Hodá, cha mehr o rahmá sarréch.
PSA 116:6 Hodáwand sádahdelén mardomána sambálit, man ke wár o zár atán, maná rakkénti.
PSA 116:7 Padá árám bay, oo mani arwáh, ke Hodáwand pa taw mehrabán butag.
PSA 116:8 Oo Hodáwand! Taw mani arwáh cha marká rakként, mani chamm cha arsán o pád cha lakoshagá
PSA 116:9 ke Hodáwanday bárgáhá gám bejanán zendagénáni zeminá.
PSA 116:10 Maná báwar at, hamá wahdá ham ke gwashton: “Sakk bazzag án.”
PSA 116:11 Paréshániáni tahá gwashton: “Harkas drógband ent.”
PSA 116:12 É sajjahén sharri ke Hodáwandá gón man kortagant, esháni badalá chón bedayán?
PSA 116:13 Nejátay pyálahá chesta kanán o Hodáwanday námá tawára kanán.
PSA 116:14 Gón Hodáwandá wati kawlán puraha kanán, áiay sajjahén kawmay démá.
PSA 116:15 Hodáay wapádáráni mark, Hodáwanday démá gránkadr ent.
PSA 116:16 Oo Hodáwand! Man tai hezmatkár án, haw, man tai hezmatkár án, tai móleday chokk, taw maná cha zamzilán ázát kortag.
PSA 116:17 Shogrgozáriay korbánigé tará pésha kanán o Hodáwanday námá gerán.
PSA 116:18 Gón Hodáwandá wati kawlán puraha kanán, áiay sajjahén kawmay démá,
PSA 116:19 Hodáwanday lógay péshgáhá, tai nyámá, oo Urshalim! Hodáwandá benázénét, Halléluyá.
PSA 117:1 Oo sajjahén kawmán! Hodáwandá benázénét. Oo sajjahén ráján! Áiá satá kanét,
PSA 117:2 ke Hodáwanday mehr pa má sakk báz ent o áiay wapádári abadmán. Hodáwandá benázénét, Halléluyá.
PSA 118:1 Hodáwanday shográ begerét ke nék ent o mehri abadmán.
PSA 118:2 Esráil begwashát: “Áiay mehr abadmán ent.”
PSA 118:3 Hárunay lóg begwashát: “Áiay mehr abadmán ent.”
PSA 118:4 Hodátors begwashátant: “Áiay mehr abadmán ent.”
PSA 118:5 Wati tangián gón Hodáwandá peryáton kort, áiá maná passaw dát o ázát kort.
PSA 118:6 Hodáwand gón man ent, mana natorsán. Ensán maná ché korta kant?
PSA 118:7 Hodáwand gón man ent, mani madat kanók, pa sarperázi dozhmenáni némagá charán.
PSA 118:8 Hodáay kerrá panáh zurag cha ensánay sará tawkal kanagá sharter ent.
PSA 118:9 Hodáay kerrá panáh zurag cha shahzádagáni sará tawkal kanagá sharter ent.
PSA 118:10 Sajjahén kawmán maná angerr kort, bale man Hodáwanday námá prósh dátant.
PSA 118:11 Maná cha har némagá chapp o chágerdesh kort, bale man Hodáwanday námá prósh dátant.
PSA 118:12 Chó bénagmakeská mani sará per retkant, bale chó konthagá, damáná sotkant o man Hodáwanday námá prósh dátant.
PSA 118:13 Maná sakká télánkesh dát ke bekapán, bale Hodáwandá maná komakk kort.
PSA 118:14 Hodáwand mani zór o mani sawt ent, hamá mani rakkénók ent.
PSA 118:15 Pahrézkáráni tambuáni tahá sóbén bayag o shádmániay kukkár ent: “Hodáwanday rástén dastá mazanén káré kortag.
PSA 118:16 Hodáwanday rástén dast chest butag, Hodáwanday rástén dastá mazanén káré kortag.”
PSA 118:17 Mana namerán, zendaga mánán o Hodáwanday kortagén káráni járá janán.
PSA 118:18 Hodáwandá maná sharr adab dát, bale markay dastá nadáti.
PSA 118:19 Adl o rástiay darwázagán pa man pach kan, ke bepoterán o Hodáwanday shográ begerán.
PSA 118:20 Esh ent Hodáwanday darwázag ke pák o pahrézkár cha edá tahá shota kanant.
PSA 118:21 Tai shográ gerán ke taw maná passaw dát, taw mani rakkénók ay.
PSA 118:22 Á seng ke bánbandén ostáyán pasond nakort o nazort, hamá seng bonhesht but.
PSA 118:23 É Hodáwanday kár ent o may chammán bákamál ent.
PSA 118:24 Esh ent hamá róch ke Hodáwandá áwortag, byá pa é róchá gal o shádehia kanén.
PSA 118:25 Oo Hodáwand! Márá berakkén. Oo Hodáwand! Márá sóbén kan.
PSA 118:26 Mobárak bát hamá ke Hodáwanday námá kayt. Cha Hodáwanday lógá shomárá barkata dayén.
PSA 118:27 Hodáwand, Hodá ent, wati nuri may sará drapshéntag. Aiday korbánigá gón korbánjáhay kánthán pa sád bebandét.
PSA 118:28 Taw mani Hodá ay, tai shográ gerán. Taw mani Hodá ay, tará názénán.
PSA 118:29 Hodáwanday shográ begerét ke nék ent o mehri abadmán.
PSA 119:1 Bahtáwar ant hamá ke ráhesh rást ant o HodáwandaySharyatay hesábá gardant.
PSA 119:2 Bahtáwar ant hamá ke Hodáwanday parmánána mannant o pa setk o del áiay shóházá ant,
PSA 119:3 hamá ke hecch náensápia nakanant o áiay ráhá rawant.
PSA 119:4 Taw wati rahband dátag‌ant ke pa sarjamiá áyáni randgiri kanag bebit.
PSA 119:5 Pa tai hokmáni barjáh dáragá mani ráh mohr o mohkam bátant.
PSA 119:6 Gorhá á wahdá ke tai sajjahén hokmáni némagá chárán, sharmsára nabán.
PSA 119:7 Gón tachkén deléa tai shográ gerán, wahdé tai ádelén parmánán dar barána bán.
PSA 119:8 Tai hokmáni randgiriá kanán maná pahk yalah makan.
PSA 119:9 Warnáén mardomé chón wati ráhá pák dáshta kant? Gón tai habaray randgiriá.
PSA 119:10 Tará pa setk o del shóháza kanán, maná mayl ke tai hokmáni ráhá yalah bekanán.
PSA 119:11 Man tai habar wati delá ambár kortagant ke tai helápá gonáh makanán.
PSA 119:12 Tará satá bát, oo Hodáwand! Wati hokmán maná sój day.
PSA 119:13 Man cha tai dapá dar átkagén sajjahén hokmán dape wata gwashán.
PSA 119:14 Cha tai parmánáni mannagá anchó shádána bán ke cha mazanén ganjéá.
PSA 119:15 Tai rahbandáni sará pegra kanán o tai ráhána charán.
PSA 119:16 Cha tai hokmán shádmána bán o tai habará nashamóshán.
PSA 119:17 Wati hezmatkáray sará mehrabán bay tánke zendag bemánán o tai habaray parmánbardáriá bekanán.
PSA 119:18 Mani chammán pach kan ke tai Sharyatay bákamálén chizzán begendán.
PSA 119:19 Man zeminá darámadé án, wati hokmán cha man chér maday.
PSA 119:20 Pa tai hokmán mani arwáh modám zahirán droshtag.
PSA 119:21 Taw gorunákén mardomán hakkala dayay, hamá nálat butagénán ke tai hokmáni ráhá yalaha kanant.
PSA 119:22 Sobakki o kamsharapiá cha man dur kan, chéá ke man tai parmánána mannán.
PSA 119:23 Harchont ke hákem hóra nendant o mani helápá pandala sázant, bale tai hezmatkár, tai hokmáni sará pegra kant.
PSA 119:24 Tai parmán mani shádmáni ant, pa man sój o saláh ant.
PSA 119:25 Man hákán waptagán, maná wati labzay hesábá zendag bedár.
PSA 119:26 Man tará wati ráháni hál dát o taw maná passaw dát. Nun maná wati hokmán sój day.
PSA 119:27 Maná, wati rahbandáni ráhá sarpad kan o man tai bákamálén káráni sará pegra kanán.
PSA 119:28 Mani arwáh cha andóhána nálit, maná wati habaray hesábá mohkam kan.
PSA 119:29 Maná cha prébay ráhán dur bedár, mani sará rahm kan o Sharyatá maná beday.
PSA 119:30 Man wapádáriay ráh dar chetag, wati del tai hokmáni mannók kortag.
PSA 119:31 Man gón tai parmánán bandóka bán, oo Hodáwand! Mayl ke sharmsár kanag bebán.
PSA 119:32 Tai hokmáni ráhá maydána kanán, ke taw mani delá dáná kanay.
PSA 119:33 Oo Hodáwand! Wati hokmáni ráhá maná sój day, ke tán áherá bedáránesh.
PSA 119:34 Maná agl o hósh beday ke man tai Sharyatay páband bebán o pa del o setk eshiay randgiriá bekanán.
PSA 119:35 Wati hokmáni ráhá mani rahshón bay, ke mani wasshi hamesháni tahá ent.
PSA 119:36 Mani delá dém pa wati parmánán betarrén, mani nap o suttáni katthagay badalá.
PSA 119:37 Mani chammán cha béarzeshén chizzán dur bedár, maná wati ráhán zendag bedár.
PSA 119:38 Gón wati hezmatkárá kortagén kawlá bedár hamá kawlá ke gón Hodátorsána kanay.
PSA 119:39 Hamá bénangiá dur kan ke maná cha áiá torsit, ke tai hokm nék ant.
PSA 119:40 Pa tai rahbandán hodónák án, cha wati adlá maná zendag bedár.
PSA 119:41 Tai mehr maná sar bát, oo Hodáwand, o hamá neját ham ke taw kawl kortag.
PSA 119:42 Gorhá man hamá mardomán passawa dayán ke maná kalága bandant, chéá ke man tai habaray sará tawkala kanán.
PSA 119:43 Rástén habará cha mani dapá pach mager, ke mani omét tai hokmáni sará ent.
PSA 119:44 Modám tai Sharyatay randgira bán, abad tán abad.
PSA 119:45 Pa ásudagia gardán, ke tai rahbandáni shóházá butagán.
PSA 119:46 Bádsháháni démá tai parmánáni habará kanán o pashal o sharmendaga nabán.
PSA 119:47 Cha tai hokmán shádmán án, ke maná dóst ant.
PSA 119:48 Man pa tai hokmáni zuragá wati dast shahár dátagant ke maná dóst ant o tai parmánáni sará pegra kanán.
PSA 119:49 Gón wati hezmatkárá kortagén kawlá yát kan, ke tai kawl mani omét ent.
PSA 119:50 Sakki o sórián mani tasallá hamesh ent, tai kawl maná zendaga dárit.
PSA 119:51 Gorunákén mardom maná dáemá kalága bandant, bale man tai Sharyatá yalaha nakanán.
PSA 119:52 Oo Hodáwand! Maná tai ahdi hokm yát ant o maná cha hameshán tasallá rasit.
PSA 119:53 Badkáráni sawabá hezhmnáka bán, hamáyáni sawabá ke tai Sharyatesh yalah dátag.
PSA 119:54 Tai hokm mani sawt butagant har jágah ke nendók butagán.
PSA 119:55 Oo Hodáwand! Shapán tai námá yáta kanán o tai Sharyatay ráhá bán.
PSA 119:56 Mani ráh hamé butag, tai rahbandáni randgiriá kanán.
PSA 119:57 Taw manig ay, oo Hodáwand! Man kawl kortag ke tai habaráni randgiriá kanán.
PSA 119:58 Pa del o setk tai chehragay shóházá butagán, mani sará hamá paymá mehrabán bay ke kawlet kortag.
PSA 119:59 Man wati ráh cháretagant o nun dém pa tai parmánán átkagán.
PSA 119:60 Tai hokmáni mannagá eshtápa kanán, déra nakanán.
PSA 119:61 Harchont ke badkáráni sádán maná patátag, bale tai Sharyatá nashamóshán.
PSA 119:62 Shapnémá páda káyán o tai shográ gerán pa tai ádelén hokmán.
PSA 119:63 Man hamá sajjahénáni sangat án ke tai tors áyáni delá ent, hamá mardománi ke tai rahbandáni randgiriá kanant.
PSA 119:64 Zemin cha tai mehrá porr ent, oo Hodáwand! Wati hokmán maná sój day.
PSA 119:65 Pa wati hezmatkárá mehrabán butagay, hamá paymá ke taw kawl kortagat, oo Hodáwand!
PSA 119:66 Maná zánt o sarpadi sój day ke man tai hokmáni sará tawkala kanán.
PSA 119:67 Bazzag bayagá pésar, cha rástén ráhá thagal warán atán, bale nun tai habaray randgir án.
PSA 119:68 Taw nék ay o nékia kanay, wati hokmán maná sój day.
PSA 119:69 Harchont ke gorunákén mardomán mani sará drógén bohtám jatag, bale man pa del o setk tai rahbandán barjáha dárán.
PSA 119:70 Esháni del seng o béehsás ant bale man cha tai Sharyatá shádmán án.
PSA 119:71 Sharr but ke sakki o sóriáni tahá kaptán ke tai hokmán dar bort bekanán.
PSA 119:72 Cha tai dapá dar átkagén Sharyat pa man cha hazárán teláh o nograhá sharter ent.
PSA 119:73 Maná tai dastán addh kort o shekl o dróshom dát, maná agl o hósh beday ke tai hokmán sarpad bebán.
PSA 119:74 Hodátors gón mani gendagá shádmán bátant, ke man wati omét gón tai habará bastag.
PSA 119:75 Oo Hodáwand! Mana zánán ke tai hokm pa adl ant o taw cha wati wapádáriá maná mosibatáni tahá dawr dátag.
PSA 119:76 Tai mehr mani tasallá bát, hamá paymá ke taw gón wati hezmatkárá kawl kortag.
PSA 119:77 Tai rahmat maná sar bátant tán zendag bemánán, ke tai Sharyat mani shádmáni ent.
PSA 119:78 Gorunákén mardom sarjahl o pashal bátant ke watsará mani báposhtá drógesh bastag, bale man tai rahbandáni sará pegra kanán.
PSA 119:79 Harkas ke cha taw torsit dém pa man byáyát, hamá mardom ke tai parmánán sarpada bant.
PSA 119:80 Tai hokmáni bárawá mani del bémayár bát tánke sharmendag mabán.
PSA 119:81 Mani arwáh pa hamá nejátá talwasit ke cha tai némagá ent, man wati óst o omét gón tai habará bastag.
PSA 119:82 Mani chamm tai kawlay shóházá kór butagant, gwashán: “Kadi maná tasallá dayay?”
PSA 119:83 Chó mashkéá án ke duttáni tahá hoshk butag, bale tai hokmon nashamoshtagant.
PSA 119:84 Tán kadén tai hezmatkár wadárá bebit? Kadi mani ázár dayókán sezá dayay?
PSA 119:85 Gorunákén mardom pa man kalla kóchant, tai Sharyatay helápá.
PSA 119:86 Tai sajjahén parmán porehtebár ant, maná komakk kan ke mardom maná mopt o náhakká ázára dayant.
PSA 119:87 Maná cha zeminay sará gár o gomsár kanagi atant, bale man tai rahband yalah nadátant.
PSA 119:88 Wati mehray hesábá maná zendag bedár o cha tai dapá dar átkagén hokmáni randgiriá kanán.
PSA 119:89 Oo Hodáwand! Tai habar abadmán ent, ásmáná mohr óshtátag.
PSA 119:90 Tai wapádári nasláni nasl barjam ent, taw zemin addh kort o é barjáha mánit.
PSA 119:91 Tai hokm tán róche maróchigá barjáh ant chéá ke sajjahén chizz tai hezmatá kanant.
PSA 119:92 Agan tai Sharyat mani shádmáni mabutén, man mosibatáni tahá gár o gomsár butagatán.
PSA 119:93 Hechbar tai rahbandána nashamóshán, ke taw cha hamesháni wasilahá maná zendag dáshtag.
PSA 119:94 Maná berakkén ke taig án tai rahbandáni shóházá butagán.
PSA 119:95 Badkár mani tabáhiay wadárá ant, bale man tai parmánáni némagá charán.
PSA 119:96 Har kamálá haddé hast, bale tai hokmán haddé nést.
PSA 119:97 Tai Sharyat maná chón dóst ent, sajjahén róchá hameshiay pegrá án.
PSA 119:98 Tai hokm maná cha mani dozhmenán dánátera kanant, ke modám gón man gón ant.
PSA 119:99 Maná cha wati tálim dayókán géshter zánt hast chéá ke tai parmánáni pegrá án.
PSA 119:100 Cha kamáshán zántkárter butagán ke tai rahbandáni randgiriá kanán.
PSA 119:101 Man wati pád cha har radén ráhá dur dáshtagant ke tai habará dásht bekanán.
PSA 119:102 Cha tai hokmán wati démon natarréntag ke taw wat maná tálim dátag.
PSA 119:103 Tai habar chónén shirkenén támé kanant, mani dapá cha bénagá shirkenter ant.
PSA 119:104 Cha tai rahbandán maná zánt o sarpadia rasit, paméshká maná cha har radén ráhá naprat ent.
PSA 119:105 Tai habar pa mani pádán cherágé o pa mani ráhá rozhné.
PSA 119:106 Man sawgendé wártag o é sawgenday sará óshtátagán ke tai ádelén hokmáni randgiriá kanán.
PSA 119:107 Oo Hodáwand! Man sakk azáb saggetag, anchosh ke kawlet kortag, maná zendag bedár.
PSA 119:108 Oo Hodáwand! Man pa wáhagé tará satá kanán, mani é korbánigá kabul kan o maná wati hokmán sój day.
PSA 119:109 Harchont ke modám markay panjagá án, bale tai Sharyatá béhayála nakanán.
PSA 119:110 Badkárán pa man dámé chér gétkag, bale man cha tai rahbandán nathagaletagán.
PSA 119:111 Tai parmán modám mani mirás ant, mani delay shádmáni ant.
PSA 119:112 Man wati del pa tai hokmáni mannagá tarréntag, modám, tán godhsará.
PSA 119:113 Cha doruén mardomán naprata kanán o tai Sharyatá dósta dárán.
PSA 119:114 Taw mani panáh o espar ay, man wati óst o omét gón tai habará bastag.
PSA 119:115 Cha man dur bebét, oo badkárán, ke man wati Hodáay hokmáni randgiriá bekanán.
PSA 119:116 Wati labzay hesábá maná mohkam bedár o man zendaga mánán, mayl ke mani omét beproshit.
PSA 119:117 Maná mohr bedár ke berakkán, modám tai hokmáni zegrá kanán.
PSA 119:118 Hamá mardomán yalaha kanay ke cha tai hokmáni ráhá dura bant, ke áyáni prébkáriá ásaré nést.
PSA 119:119 Taw zeminay saray sajjahén radkár chó gand o gasarhá dawr dátagant, paméshká maná tai parmán dósta bant.
PSA 119:120 Mani jánay gósht cha tai torsá larzit o maná cha tai rahbandána torsit.
PSA 119:121 Man adl o ensáp kortag, maná setamgeráni dastá yalah makan.
PSA 119:122 Wati hezmatkáray salámati o washháliay zemánatá beday, mayl ke gorunák mani sará zolm bekanant.
PSA 119:123 Mani chamm pa hamá rakkénagá wadárig ant ke cha tai némagá ent, tai ádelén kawlay purah bayagay entezárá án.
PSA 119:124 Wati hezmatkárá wati mehray hesábá bechár o wati hokmán maná sój day.
PSA 119:125 Man tai hezmatkár án, maná sarpadi beday ke tai parmánán bezánán.
PSA 119:126 Oo Hodáwand! Wahd átkag ke taw káré bekanay, chéá ke tai Sharyatá próshant.
PSA 119:127 Maná tai hokm cha teláhá dóstter ant, cha asligén teláhá géshter.
PSA 119:128 Tai sajjahén rahbandáni rástiá mannán, paméshká maná cha har radén ráhá naprat ent.
PSA 119:129 Tai parmán bákamál ant, paméshká áyána mannán.
PSA 119:130 Tai habaray bayán kanag rozhna bakshit o násarpadán sarpadia dant.
PSA 119:131 Man wati dapá pacha kanán, tonnig án o pa tai hokmán zahirig.
PSA 119:132 Démá gón man tarrén o mani sará rahm kan, anchosh ke taw modám gón wati námay dóst dárókána kanay.
PSA 119:133 Wati habaray hesábá mani gámáni rahshón bay, gonáhá mayl ke mani sará hákemi bekant.
PSA 119:134 Maná cha ensánay zolmá bemók ke tai rahbandáni randgiriá kort bekanán.
PSA 119:135 Wati démá wati hezmatkáray sará drapshén o wati hokmán maná sój day.
PSA 119:136 Cha mani chammán arsay kawra tachant ke tai Sharyatay randgiri kanaga nabit.
PSA 119:137 Oo Hodáwand! Taw ádel ay o tai hokm barhakk ant.
PSA 119:138 Á parmán ke taw dátagant pa adl ant, sarjamiá porehtebár.
PSA 119:139 Mani gayratá maná jánsóch kortag chéá ke mani dozhmenán tai habar shamoshtag.
PSA 119:140 Tai habar pák o palgár ant o tai hezmatkárá dóst ant.
PSA 119:141 Harchont ke man kamarzesh o hakiré án, bale angat tai rahbandána nashamóshán.
PSA 119:142 Tai adl dáemi o tai Sharyat rást ent.
PSA 119:143 Sakki o sóri mani sará átkagant bale tai hokm mani shádmáni ant.
PSA 119:144 Tai parmán tán abad pa adl ant, maná sarpadi beday ke zendag bemánán.
PSA 119:145 Oo Hodáwand! Pa del o setk tawára kanán, passaw beday o man tai hokmáni randgiriá kanán.
PSA 119:146 Gón taw peryáta kanán: “Maná berakkén” o man tai parmánána mannán.
PSA 119:147 Cha bámgwáhá pésar páda káyán o peryáta kanán, man wati óst o omét gón tai habará bastag.
PSA 119:148 Mani chamm shapay sajjahén pásán pach ant ke tai habaray sará pegr kort bekanán.
PSA 119:149 Oo Hodáwand! Mani tawárá wati mehray hesábá gósh dár, wati hokmáni hesábá maná zendag bedár.
PSA 119:150 Hamá ke badkáriáni randgir ant, nazzikká rasetagant, á cha tai Sharyatá dur ant.
PSA 119:151 Oo Hodáwand! Taw nazzikk ay o tai sajjahén hokm rást ant.
PSA 119:152 Man sakk dér ent zántag, taw wati parmán barjam dáshtagant ke abadi bebant.
PSA 119:153 Mani sakki o sórián bechár o mani sará rahm kan ke tai Sharyaton nashamoshtag.
PSA 119:154 Mani hakkay démpániá bekan o mani posht bay, wati kawlay hesábá maná zendag bedár.
PSA 119:155 Rakkag cha badkárán dur ent ke á tai hokmáni shóházá naant.
PSA 119:156 Tai rahmat sakk báz ant, oo Hodáwand! Wati Sharyatay hesábá maná zendag bedár.
PSA 119:157 Mani ázár dayók o dozhmen báz ant, bale man cha tai parmánán wati dém natarréntag.
PSA 119:158 Béwapáyáni némagá charán o maná cha eshán naprata bit, ke tai rahbandáni randgiriá nakanant.
PSA 119:159 Bechár tai rahband maná chón dóst ant, wati mehray hesábá maná zendag bedár, oo Hodáwand!
PSA 119:160 Tai sajjahén habar rást ant o tai sajjahén ádelén hokm abadmán.
PSA 119:161 Hákem maná mopt o náhakk ázára dayant, bale mani del tai habaráni sará larzit.
PSA 119:162 Man tai habaray sará shádehia kanán hamá mardomay paymá ke poletagén málé berasiti.
PSA 119:163 Cha repk o prébá naprata kanán, tai Sharyatá dósta dárán.
PSA 119:164 Róché hapt bar tará názénán, pa tai ádelén hokmán.
PSA 119:165 Hamá ke tai Sharyatá dósta dárant, sakk émen ant o áyán hecch chizz thagalénta nakant.
PSA 119:166 Oo Hodáwand! Pa hamá nejátá wadárig án ke cha tai némagá ent o tai hokmáni randgiriá kanán.
PSA 119:167 Tai parmánáni randgiriá kanán ke maná sakk dóst ant.
PSA 119:168 Tai rahband o parmánána dárán ke taw mani sajjahén ráhána zánay.
PSA 119:169 Oo Hodáwand! Mani peryát tará sar bát, wati labzay hesábá maná agl o hósh beday.
PSA 119:170 Mani nálag tará sar bát, wati kawlay hesábá maná berakkén.
PSA 119:171 Mani lonth tai satáyá sarréch bátant ke taw maná wati hokmán sója dayay.
PSA 119:172 Mani dap tai habará benázénát, ke tai sajjahén rahband pa adl ant.
PSA 119:173 Tai dast pa mani komakk kanagá tayár bát ke man tai rahband gechén kortagant.
PSA 119:174 Oo Hodáwand! Pa hamá nejátá talwasagá án ke cha tai némagá ent o tai Sharyat mani shádmáni ent.
PSA 119:175 Maná zendag bedár ke tará benázénán o tai hokm maná madat kanátant.
PSA 119:176 Chó gárén paséá darpadar butagán. Wati hezmatkárá shóház kan ke man tai hokm nashamoshtagant.
PSA 120:1 Dém pa Urshalimá borzád rawagay sawté. Wati sakki o sóriáni wahdá man gón Hodáwandá peryát kort o áiá maná passaw dát.
PSA 120:2 “Oo Hodáwand! Maná cha drógbandén lonth o prébkárén dapán berakkén.”
PSA 120:3 Oo prébkárén dap! Hodáwand tará ché bedant o ched o gésh gón taw ché bekant?
PSA 120:4 Tará gón jangóláni tézén tir o gón rókén eshkarán sezá dant.
PSA 120:5 Apsóz pa man ke Méshékay molká neshtagán, ke man Kédaray gedánán jahmenend án.
PSA 120:6 Man gón choshén mardomán zend gwázenagá dam bortag ke cha sohl o émeniá naprata kanant.
PSA 120:7 Sohl o émeni pasondén mardomé án bale har wahdá ke habaré kanán, é jangá páda káyant.
PSA 121:1 Dém pa Urshalimá borzád rawagay sawté. Chammán dém pa kóhá chesta kanán maná komakk cha kojá rasit?
PSA 121:2 Maná komakk cha Hodáwandá rasit, hamá ke ásmán o zemini addh kortagant.
PSA 121:3 Á naylit ke tai pád belakoshit, á ke tai negahpániá kant wába nakapit.
PSA 121:4 Haw, á ke Esráilay negahpán ent nawapsit o wába nakapit.
PSA 121:5 Hodáwand wat tai negahpán ent, Hodáwand tai rástén némagá sáheg ent.
PSA 121:6 Róch, tará róchá ázára nadant o na máh, shapá.
PSA 121:7 Hodáwand tará cha har badiá dura dárit, tai zenday negahpán ent,
PSA 121:8 Hodáwand tai har rawag o áyagay negahpán ent annun o tán abad.
PSA 122:1 Dém pa Urshalimá borzád rawagay sawté. Dáuday Zabur. Áyán ke gwasht: “Hodáwanday lógá berawén” man shádán bután.
PSA 122:2 Chón wassh! May pád cha tai darwázagán potertag o óshtátagant, oo Urshalim!
PSA 122:3 Urshalim anchosh bandag butag ke shahr cha har némagá gón wat chó tagerdéá gwaptag.
PSA 122:4 Hamódá ke kabilaha rawant, Hodáwanday kabilah ke Hodáwanday námá benázénant hamá ahd o karáray hesábá ke Esráilá dayag butag.
PSA 122:5 Ódá dádrasiay taht barjáh dárag butagant Dáuday kahól o hándánay taht.
PSA 122:6 Pa Urshalimay émeniá dwá kanét, harkas ke tará, ó Urshalim, dósta dárit, ásudag bát.
PSA 122:7 Tai shahray diwáláni tahá sohl o émeni bát o tai kalátán ásudagi.
PSA 122:8 Wati brát o sangatáni háterá gwashán: “Tará sohl o émeni sar bát.”
PSA 122:9 Wati Hodáwandén Hodáay lógay háterá tai ábád bayagay lóthók án.
PSA 123:1 dém pa Urshalimá borzád rawagay sawté. Wati chammán dém pa taw chesta kanán, taw ke arshá, wati bádsháhi tahtay sará neshtagay.
PSA 123:2 Anchó ke goláméay chamm wati wájahay dastá sakk ant o móledéay chamm wati bánoká may chamm Hodáwandén Hodáyá sakk ant ke may sará rahm bekant.
PSA 123:3 May sará rahm kan, oo Hodáwand! Rahm kan may sará, ke má sakk báz béezzati saggetag,
PSA 123:4 Ásudagén mardománi rishkand o porkebráni kalág márá pa sarjamiá rasetag.
PSA 124:1 Dém pa Urshalimá borzád rawagay sawté. Dáuday Zabur. “Agan Hodáwand gón má gón mabutén,” Esráil begwashát:
PSA 124:2 “Agan Hodáwand gón má gón mabutén á wahdá ke mardomán may sará orosh o hamlah kort,
PSA 124:3 áyán márá zendagá ér bortagat wahdé hezhmesh may sará chest at.
PSA 124:4 Á wahdá ápán márá ér bortagat, hár o tuppáná márá mán roptagat,
PSA 124:5 mastén ápán márá rópán kortagat.”
PSA 124:6 Hodáwandá satá bát ke naeshti má esháni dantánáni shekár bebén.
PSA 124:7 May zendi anchó rakként ke báli morgé cha shekáriay dámá, dám dert o má rakketén.
PSA 124:8 Hodáwanday nám may madat ent, ásmán o zeminay jórh kanókay nám.
PSA 125:1 Dém pa Urshalimá borzád rawagay sawté. Á ke Hodáwanday sará tawkala kanant Sahyunay kóhay paymá ant ke sorénaga nabit o tán abad barjáh mánit.
PSA 125:2 Anchosh ke kóhán, Urshalim chapp o chágerd kortag, Hodáwandá wati kawmay chapp o chágerd geptag, annun o tán abad.
PSA 125:3 Badkárén bádsháhéay asá pahrézkáráni mirásay sará hokmrána nabit ke pahrézkár wati dastá pa badkári sell makanant.
PSA 125:4 Oo Hodáwand! Pa nékdelán néki kan pa hamáyán ke delesh rást o tachk ant.
PSA 125:5 Bale hamá mardom ke chapp o chóthén ráhána rawant, Hodáwand áyán gón badkárán yakjáha gallénit. Esráil émen o salámat bát.
PSA 126:1 Dém pa Urshalimá borzád rawagay sawté. Wahdé Hodáwandá Sahyunay washbahti per tarrént o áwort má purah wáb gendagá atén.
PSA 126:2 May dap cha kandagá porr at, zobán cha shádehiay sawtá. Á wahdá kawmáni nyámá gwashag but: “Hodáwandá pa eshán mazanén kár kortag.”
PSA 126:3 Haw, Hodáwandá pa má mazanén kár kort, má gal atén.
PSA 126:4 Oo Hodáwand! May washbahtiá padá byár, anchó ke kawr Négéway gyábáná ábádia kárit.
PSA 126:5 Hamá ke ars récháná kesht o keshára kanant, pa shádehi kukkár kanáná ronant.
PSA 126:6 Hamá ke gréwáná dara kapit o tohmán pa keshagá bárt, pa shádehi kukkár kanáná wátarra kant o wati lóthokána kárit.
PSA 127:1 Dém pa Urshalimá borzád rawagay sawté. Solaymánay Zabur. Agan Hodáwand lógá mabandit, bánbandáni zahmat békár ent. Agan Hodáwand, shahray negahpániá makant, nehgahpánáni negahpáni békár ent.
PSA 127:2 Tai, sohbá máhallah pád áyag o shapá tán dérá ágah bayag békár ent. Zahmata kasshay ke tará pa waragá nán berasit, á ke Hodáyá dóst ant, agan wáb bebant ham Hodá é chizzán áyáná dant.
PSA 127:3 Chokk cha Hodáwanday némagá mirás ant o padréch cha hamáiay némagá mozz.
PSA 127:4 Warnáiá áwortagén mardénchokk anchosh ant ke jangóléay dastá tir.
PSA 127:5 Bahtáwar hamá mard ent ke tirdáni cha chokká porr ent. Wahdé choshén mardomé shahray darwázagá gón dozhmená dém pa déma bit hechbar pashal o sharmendaga nabit.
PSA 128:1 Dém pa Urshalimá borzád rawagay sawté. Bahtáwar hamá ent ke Hodáwanday torsi delá ent o áiay parmánbardáriá gáma jant.
PSA 128:2 Taw wati zahmatay bar o samará waray o bahtáwar o washhála bay.
PSA 128:3 Tai jan tai lógay tahá chó bar áwarén angurá bit, tai chokk tai parzónagay chapp o chágerdá chó zaytunay nahálá bant.
PSA 128:4 Haw, hamá mardom ke Hodáwanday tors áiay delá ent hamé dhawlá bahtáwara bit.
PSA 128:5 Hodáwand cha Sahyuná tará barkat bedayát, Urshalimay ábádiá begendátay, wati zenday sajjahén róchán.
PSA 128:6 Wati chokkáni chokkán begendátay, Esráil émen o salámat bát.
PSA 129:1 Dém pa Urshalimá borzád rawagay sawté. “Áyán maná cha warnáiá sakk báz ázár dátag,” Esráil begwashát:
PSA 129:2 “Maná cha warnáiá sakk báz ázáresh dátag bale maná chérdastesh kort nakortag.
PSA 129:3 Nangár kanókán mani srén nangár kortag o pal dráj kortagant.
PSA 129:4 Bale Hodáwand ádel ent, badkáráni zamzili sestant o maná ázáti kort.”
PSA 129:5 Hamá ke cha Sahyuná naprata kanant, sharmsár bát o poshtá bekenzátant.
PSA 129:6 Chó bánáni saray káhá bátant ke cha rodagá pésar hoshka bit,
PSA 129:7 ke ronókay panjagay porré nabit, chenókay bagalá porra nakant.
PSA 129:8 Rahgwazé ham pa áyán nékdwai makanát o magwashát: “Hodáwand shomárá barkat bedayát, má Hodáwanday námá shomárá barkata dayén.”
PSA 130:1 Dém pa Urshalimá borzád rawagay sawté. Man cha johlánkián tará tawára kanán, oo Hodáwand!
PSA 130:2 Hodáwand! Mani tawárá gósh dár, mani peryát o zárián delgósh kanátay.
PSA 130:3 Oo Hodáwand! Agan taw gonáhán hesáb bekanay, gorhá kay pashta kapit, oo Hodáwand?
PSA 130:4 Bale taw bakshendah ay tánke tai tors may delá bebit.
PSA 130:5 Man pa Hodáwandá wadára kanán, mani sajjahén del o ján wadára kant o mani omét gón Hodáay habará ent.
PSA 130:6 Pa Hodáwandá wadára kanán cha hamá negahpánán géshter ke sohbay wadárá ant, haw, cha hamá negahpánán géshter ke sohbay wadárá ant.
PSA 130:7 Oo Esráil! Ométá pa Hodáwandá bedár, ke mehr gón Hodáyá ent o kámelén rakkénag hamáiay dastá ent.
PSA 130:8 Á wat Esráilá mókit cha áyáni sajjahén gonáhán.
PSA 131:1 Dém pa Urshalimá borzád rawagay sawté. Dáuday zabur. Oo Hodáwand! Mani del gorunák naent o na ke mani chamm porkebr ant. Gón mazanén kárán delgósha nabán o na gón á kárán ke mani delá bákamál ant.
PSA 131:2 Man watá chopp o árám kortag cha shirá sestagén nonnokéay paymá ke mátay kotthá ent. Haw, mani arwáh cha shirá sestagén nonnokéay paymá árám geptag.
PSA 131:3 Oo Esráil! Ométá pa Hodáwandá bedár, annun o tán abad.
PSA 132:1 Dém pa Urshalimá borzád rawagay sawté. Oo Hodáwand! Dáudá yát kan o áiay sakki o sórián.
PSA 132:2 Gón Hodáwandá sawgendé wárti o gón Ákubay zórmandén Hodáyá kawli kort o gwashti:
PSA 132:3 “Tánke pa wati Hodáwand, pa Ákubay zorákén Hodáyá lógé addh makanán, wati jenday lógá narawán, watá árám kanagá naylán, chammán nazza nayárán, mecháchán dhokkagá naylán.”
PSA 132:6 Bechár, má Eprátahay shahrá ahd o karáray pétiay zegr eshkot o Jáháray sardhagárá dar gétk.
PSA 132:7 “Byáét áiay lógá rawén o áiay pádáni padagay démá sojdaha kanén o gwashén:
PSA 132:8 ‘Hodáwand! Jáh jan o wati ásudagiay jágahá byá gón wati zóray ahd o karáray pétiá.
PSA 132:9 Tai dini péshwáyán pahrézkáriay póshák gwará bát o tai wapádárén hezmatkár shádehiay kukkár bekanátant.”’
PSA 132:10 Pa wati hezmatkár Dáudá bechár o wati “rógen per moshtagéná” dawr maday.
PSA 132:11 Hodáwandá gón Dáudá sawgendé wárt, kawlé korti o cha wati zobáná nabajjit, ke: “Man cha tai óbádagán yakké tai bádsháhi tahtá nádénán.
PSA 132:12 Agan tai chokk, mani ahd o karáray sará bóshtant o mani hamá rahbandáni randgiriá bekanant ke manesh sója dayán, gorhá tai óbádag, tai bádsháhi tahtá nendant, tán abad.”
PSA 132:13 Chéá ke Hodáwandá Sahyun dar chetag o pa wati menendjáhá dósti butag, gwashtagi:
PSA 132:14 “É mani árámjáh ent, tán abad. Man hamedá wati bádsháhi tahtá nendán chéá ke dóstona bit.
PSA 132:15 Man eshiá barkata dayán o ábáda kanán, eshiay garibán lápséra kanán.
PSA 132:16 Man eshiay dini péshwáyán rakkagay pósháká gwará dayán o eshiay wapádárén mardom pa shádehi kukkára kanant.
PSA 132:17 Man edá pa Dáudá kánthé ródénán o pa wati “rógen per moshtagéná” cherágé róka kanán.
PSA 132:18 Eshiay dozhmenán, sharmsáriay pósháká gwará dayán o eshiay sar gón drapshókén tájéá borza bit.”
PSA 133:1 Dém pa Urshalimá borzád rawagay sawté. Dáuday Zabur. Chón wassh o delkassh ent ke Hodáay mardom pa tepáki hór benendant.
PSA 133:2 Purah gránbaháén thélé ke sará charp kortag o risshán ér rechán ent, Hárunay risshán o jahlád tán kabáhay jigá.
PSA 133:3 Chó ke Hermónay nódán ke Sahyunay kóháni sará shanzant. Chéá ke ódá Hodáwandá wati barkatay parmán dátag, zend, tán abad.
PSA 134:1 Dém pa Urshalimá borzád rawagay sawté. Ji haw, Hodáwandá benázénét, oo Hodáwanday sajjahén hezmatkárán ke shapán Hodáwanday lógá áiay hezmatá kanagá ét!
PSA 134:2 Dastán pákén jágahay némagá chest kanét o Hodáwandá benázénét.
PSA 134:3 Hodáwand cha Sahyuná shomárá barkat bedayát, hamá ke zemin o ásmánay addh kanók ent.
PSA 135:1 Hodáwandá benázénét, Halléluyá. Hodáwanday námá benázénét, oo Hodáwanday hezmatkárán, Hodáwandá benázénét,
PSA 135:2 shomá sajjahén ke Hodáwanday lógá hezmata kanét, may Hodáay lógay péshgáhá.
PSA 135:3 Hodáwandá benázénét chéá ke Hodáwand nék ent, pa sawt áiay námá benázénét ke delkassh ent.
PSA 135:4 Chéá ke Hodáwandá Ákub pa wat gechén kortag, Esráil, ke pa áiá ganjé bebit.
PSA 135:5 Mana zánán ke Hodáwand mazan ent, ke may Hodáwand cha sajjahén hodáyán master ent.
PSA 135:6 Harché ke Hodáwand ásmánán o zeminá, daryáyán o daryáyáni sajjahén johlánkián kanag belóthit, kant.
PSA 135:7 Cha zeminay goddhi hadd o simsarán jambarán chesta kant, gerókán gón hawrán rawána dant o cha wati ambárán gwátá dhanná kárit.
PSA 135:8 Hamáiá Mesray awali chokk jatant, mardománi ham o dalwatáni ham.
PSA 135:9 Oo Mesr! Tai nyámá wati nesháni o mójezahi rawán dátant, Perawn o áiay sajjahén hezmatkáráni helápá.
PSA 135:10 Bázén kawmé jati o áyáni porwákén bádsháhi koshtant,
PSA 135:11 Amuriáni bádsháh Sihón, Báshánay bádsháh Óg o Kanhánay sajjahén bádsháh o
PSA 135:12 áyáni sardhagári mirásé kortant mirasé pa wati mahluká, pa Esráilá.
PSA 135:13 Oo Hodáwand! Tai nám tán abada mánit o taw nasláni nasl yát kanaga bay, oo Hodáwand!
PSA 135:14 Chéá ke Hodáwand wati mahlukay dadrasiá kant o pa wati hezmatkárán rahma kant.
PSA 135:15 Kawmáni “hodá” teláh o nograh ant, ensánay dastay jórh kortagén bot.
PSA 135:16 Dapesh per bale habar korta nakanant, chammesh per bale dista nakanant,
PSA 135:17 góshesh per bale eshkota nakanant o dapá sáhesh mán nést.
PSA 135:18 Harkas ke eshán jórha kant, hamesháni paymá bit o harkas ke esháni sará tawkala kant ham anchosha bit.
PSA 135:19 Oo Esráilián! Hodáwandá benázénét. Oo Hárunay lóg! Hodáwandá benázénét.
PSA 135:20 Oo Léwiay lóg! Hodáwandá benázénét. Oo Hodátorsán! Hodáwandá benázénét.
PSA 135:21 Cha Sahyuná Hodáwandá benázénét, hamá ke Urshalimá jahmenend ent. Hodáwandá benázénét, Halléluyá.
PSA 136:1 Hodáwanday shográ begerét ke á nék ent o mehri abadmán.
PSA 136:2 Hodáyáni Hodáay shográ begerét ke mehri abadmán ent.
PSA 136:3 Hodáwandáni Hodáwanday shográ begerét ke mehri abadmán ent.
PSA 136:4 Hamá yakkénay shográ begerét ke mazanén mójezaha kant, mehri abadmán ent.
PSA 136:5 Hamá ke cha wati dánáiá ásmáni addh kortagant, mehri abadmán ent.
PSA 136:6 Hamá ke zemini ápáni sará chér gétkag, mehri abadmán ent.
PSA 136:7 Hamá ke mazanén nuri addh kortagant, mehri abadmán ent.
PSA 136:8 Róchi addh kort ke róchá hákemi bekant, mehri abadmán ent.
PSA 136:9 Máh o estári sázetant ke shapá hákemi bekanant, mehri abadmán ent.
PSA 136:10 Hamá ke Mesray awali chokki jatant, mehri abadmán ent o
PSA 136:11 Esráili cha áyáni nyámá dar kort, mehri abadmán ent.
PSA 136:12 Gón porzórén básk o shahártagén dasté, mehri abadmán ent.
PSA 136:13 Hamá ke Sohrzeri do kapp kort, mehri abadmán ent,
PSA 136:14 o Esráili cha eshiay tahá gwázént, mehri abadmán ent,
PSA 136:15 bale Perawni gón lashkará Sohrzerá bokként, mehri abadmán ent.
PSA 136:16 Hamá ke gyábáná wati mahluki rahshóni dát, mehri abadmán ent.
PSA 136:17 Hamá ke mazanén bádsháhi jatant, mehri abadmán ent.
PSA 136:18 Zóráwarén bádsháhi koshtant, mehri abadmán ent.
PSA 136:19 Amuriáni bádsháh Sihóni jat, mehri abadmán ent.
PSA 136:20 Báshánay bádsháh Ógi kosht, mehri abadmán ent.
PSA 136:21 Esháni zemini mirásé kortant, mehri abadmán ent,
PSA 136:22 mirásé pa wati hezmatkárén Esráilá, mehri abadmán ent.
PSA 136:23 Hamá ke márá may kamsharapián yáti kort, mehri abadmán ent.
PSA 136:24 Márá cha dozhmenán ázáti kort, mehri abadmán ent.
PSA 136:25 Hamá ke sajjahén sahdárán róziga dant, mehri abadmán ent.
PSA 136:26 Borzén arshay Hodáay shográ begerét ke mehri abadmán ent.
PSA 137:1 Bábelay kawráni kashá, má nesht o grét, wahdé má Sahyun yát kort.
PSA 137:2 Má drachkáni sará wati soróz o chang dratkant,
PSA 137:3 ke may bandig kanókán márá gwasht: “Sawt bejanét,” ke may ázár dayókán cha má shádehiay sawt lóthet. Gwashtesh: “Pa má cha Sahyunay sawtán yakké bejanét.”
PSA 137:4 Má ke darándhéh én, Hodáwanday sawtán chón jata kanén?
PSA 137:5 Oo Urshalim! Agan man tará shamosht, mani rástén dast wati honará beshamóshát.
PSA 137:6 Mani zobán nokká belecchát agan tará yát makanán o agan Urshalimá wati masterén shádehi sarpad mabán.
PSA 137:7 Oo Hodáwand! Yátá bedár ke Urshalimay kapagay róchá Edumián ché kort. “Próshéti” áyán gwasht, “cha boná próshéti.”
PSA 137:8 Oo Bábelay jenekk! Taw zutt dém pa tabáhiá raway, bahtáwar hamá ent ke tará sezá dant, hamá chizzáni sezáyá ke taw gón má kortagant.
PSA 137:9 Bahtáwar hamá ent ke tai chokkána zurit o taláráni sará jant.
PSA 138:1 Dáuday zabur. Oo Hodáwand! Cha delay johlánkiá tai shográ gerán, hodáyáni bárgáhá tará pa sawta názénán.
PSA 138:2 Dém pa tai pákén parasteshgáhá kóndhána kapán o tai námá názénán pa tai mehr o wapádáriá ke taw wati nám o wati mohrén ahd o karár cha sajjahén chizán géshter mazani bakshátag.
PSA 138:3 Har wahdá ke tará gwánkon jatag taw maná passaw dátag, mani del mazan kortag o maná zór o wák bakshátag.
PSA 138:4 Hodáwand! Jahánay sajjahén bádsháh tai shográ begerátant, hamá wahdá ke tai habará eshkonant.
PSA 138:5 Tai káráni satáyá sawt bejanátant, ke Hodáwanday shán mazan ent.
PSA 138:6 Harchont ke Hodáwand mazanshán ent, bale békebrán pa rahma chárit o gorunákán cha durá pajjáha kárit.
PSA 138:7 Harchont ke sakki o sóriáni tahá gardán, bale taw maná zendaga dáray. Taw mani dozhmenáni hezhmay helápá wati dastá shaháray o gón wati rástén dastá maná rakkénay.
PSA 138:8 Hodáwand maná rakkénit. Hodáwand! Tai mehr abadmán ent, wati dastáni kárán band makan.
PSA 139:1 Pa sázger o washalhánáni sálárá. Dáuday Zabur. Oo Hodáwand! Taw maná chakkásetag o zánay.
PSA 139:2 Taw zánay ke man kadi nendán o kadi páda káyán, cha durá mani pegr o hayálána zánay.
PSA 139:3 Taw maná tarr o gard kanagá ham genday o tachk bayag o árám kanagá ham, mani har kárá zánay.
PSA 139:4 Habaré ke cha mani zobáná dara kayt, taw cha pésará zánayi, oo Hodáwand!
PSA 139:5 Taw cha poshtá o démá maná chapp o chágerd kortag o wati dast mani sará ér moshtag.
PSA 139:6 Choshén zánt pa man sakk báz ajab ent cha mani sarpadiá békesás báláter.
PSA 139:7 Cha tai arwáhá démá tarrént o kojá shota kanán? Cha tai bárgáhá tatk o kojá shota kanán?
PSA 139:8 Agan ásmánán berawán, taw hamódá ay o agan mordagáni jaháná wati nepádá pach bekanán, taw hamódá ay.
PSA 139:9 Agan bámgwáháni bánzolán bál bekanán, agan daryáay durterén kerréá benendán,
PSA 139:10 ódá ham tai dast mani rahshóniá kant o tai rástén dast maná mohra dárit.
PSA 139:11 Agan begwashán: “Béshakk tahári maná chéra dant o rozhnái mani chapp o chágerdá shapé jórha bit,”
PSA 139:12 tahári ham pa taw tahára nabit, shap, chó róchá drapshit, ke tahári ham pa taw chó rozhnáiá ent.
PSA 139:13 Béshakk mani del o darun taw addh kortag taw maná mátay lápá gwaptag.
PSA 139:14 Tai shográ gerán ke man chó wassh o zébá jórh butagán, tai kár hayrán kanók ant, man eshiá sharra zánán.
PSA 139:15 Mani haddh cha taw chér naatant wahdé chér o andémén jágahá addh bayagá atán, wahdé zeminay johlánkián man gwapag o yakjáh kanag bayagá atán.
PSA 139:16 Tai chammán mani násarjamén ján dist, mani zenday sajjahén róch tai ketábá nebeshtah kanag butant, cha hamá wahdá pésar ke cha é róchán yakké ham nayátkagat.
PSA 139:17 Oo Hodá! Tai hayál pa man chón bébahá ant, eshán hesáb nést.
PSA 139:18 Agan hesáb kanagesh belóthán, cha rékáni dánagán géshter ant. Wahdé ágaha bán, angat gón taw án.
PSA 139:19 Taw badkár bekoshténant, oo Hodá! Cha man dur bét, oo hónwárán!
PSA 139:20 É pa badén maksadé tai námá gerant, tai helápá kopra kanant.
PSA 139:21 Oo Hodáwand! Man cha áyán sakk bézár án ke cha taw naprata kanant o cha áyán watá dura dárán ke tai helápá jáha janant.
PSA 139:22 Ji haw! Man gón áyán sakk naprata kanán, á mani dozhmen jórh butagant.
PSA 139:23 Oo Hodá! Maná bechakkás o mani delá bezán, maná bechakkás o mani paréshánián delgósh kan.
PSA 139:24 Agan cha mani káréá delranj ay maná péshi dár o karnigén ráhá maná rahshón bay.
PSA 140:1 Pa sázger o washalhánáni sálárá. Dáuday Zabur. Hodáwand! Maná cha badkárán pahréz o cha hezhmnákán berakkén,
PSA 140:2 cha hamáyán ke wati delá badén pandala sázant o har róch jangé páda kanant.
PSA 140:3 Wati zobáná chó márá téza kanant o garrmáray zahresh lontháni chérá ent. Ósht...
PSA 140:4 Hodáwand! Maná cha badkáráni dastá dur bedár o cha hezhmnákán berakkén ke pa mani pádán dám sázagá ant.
PSA 140:5 Gorunákán pa man dám chér gétkag, dámi chammag. Mani ráhá talkesh chér kortag. Ósht...
PSA 140:6 Gón Hodáwandá gwashán: “Taw mani Hodá ay.” Mani peryát o záriá gósh dár, oo Hodáwand!
PSA 140:7 Oo Hodáwand, mani mohkamén Hodáwand o rakkénók! Jangay róchá taw mani saray negahpáni kort.
PSA 140:8 Hodáwand! Badkáráni armánán purah makan, wahdé orosha kanant áyáni pandalán sóbén bayagá mayl. Ósht...
PSA 140:9 Áyán ke maná angerr kortag, áyáni lontháni badi, áyáni jenday sará bekápát.
PSA 140:10 Rókén eshkaresh sará berechát, ásá dawr dayag bátant o pujgelén kaddhán boddhátant o hechbar dar átk makanátant.
PSA 140:11 Pléndh may sardhagárá ábád mabátant, hezhmnákáni sará baláhé kapát.
PSA 140:12 Mana zánán ke Hodáwand pa bazzagán dadrasi o pa hájatmandán adl o ensápa kant.
PSA 140:13 Pahrézkár zalur tai námay shográ gerant o nékdel tai bárgáhá jahmenenda bant.
PSA 141:1 Dáuday Zabur Oo Hodáwand! Tará tawára kanán, zutt pa man byá. Wahdé tará tawára kanán, mani tawárá gósh dár.
PSA 141:2 Mani dwá tai bárgáhá chó sóchokiá kabul bát o mani chest butagén dast, bégáhay korbánigay paymá.
PSA 141:3 Hodáwand! Pa mani dapá negahpáné bedár o mani lontháni darwázagay dapá páspáni bekan.
PSA 141:4 Mani delá mayl ke dém pa badkáriá berawt o man badkáráni hamráhiá sellén kárán gón bebán, maná áyáni washtámén chizzáni waragá mayl.
PSA 141:5 Bell maná pahrézkáré shahmát bejant, é rahmé, bell maná hakkal bedant, é pa mani sará rógené, man cha eshiá enkára nakanán, angat mani dwá, badkáráni káráni helápá bit.
PSA 141:6 Esháni hákem, cha talárán jahlád dawr dayaga bant, gorhá zánant ke mani habar sharr o rást ant.
PSA 141:7 Gwashant: “Anchosh ke yakké zeminá nangára kant o derrit, may haddh, mordagáni jahánay dapá sheng o sháng butagant.”
PSA 141:8 Bale mani chamm tará sakk ant, Hodáwand, oo Hodáwand! Tai mayára bán, maná markay dastá maday.
PSA 141:9 Maná cha hamá dámá berakkén ke badkárán chér gétkag, cha áyáni talká.
PSA 141:10 Badkár wat, wati dámán kapátant o man pa salámati begwazátán.
PSA 142:1 Dáuday shayri gwashtánk, hamá wahdá ke gáray tahá at. Dwáé. Hodáay bárgáhá zár o peryáta kanán o cha Hodáwandá rahma lóthán.
PSA 142:2 Wati gelagán hamáiay bárgáhá kanán o wati sakki o sórián hamáiá gwashán.
PSA 142:3 Arwáh ke mani bátená béwára bit, taw ay ke mani ráhay rahshón ay. Hamá ráhá ke mana rawán pa man dámé chéresh gétkag.
PSA 142:4 Mani rástén némagá bechár, kass nést ke mani hayálá bebit. Maná panáh nést o kass mani zenday pegrá naent.
PSA 142:5 Oo Hodáwand! Tai bárgáhá peryáta kanán o gwashán: “taw mani panáhjáh ay o zendagénáni zeminá mani bahr.”
PSA 142:6 Mani peryátá gósh dár ke man mazanén sakki o sórián kaptagán. Maná cha á mardomán berakkén ke mani randá kaptagant, chéá ke cha man zórákter ant.
PSA 142:7 Maná cha kaydá dar kan ke tai námá benázénán. Gorhá pahrézkár mani chapp o chágerdá moccha bant ke taw pa man nékia kanay.
PSA 143:1 Dáuday Zabur. Oo Hodáwand! Mani dwáyá gósh dár mani peryát o záriá beshkon, pa wati wapádári o adlaygi maná passaw beday.
PSA 143:2 Wati hezmatkárá mayárig makan ke tai bárgáhá kass bémayár naent.
PSA 143:3 Dozhmen mani randá kaptag, áiá maná zeminá dawr dátag, maná taháriá jahmenendi kortag kwahnén mordagáni paymá.
PSA 143:4 Arwáh mani daruná nezór ent o delon mán bátená hayrán.
PSA 143:5 Kwahnén zamánagán yáta kanán tai sajjahén káráni sará pegra kanán, tai dastáni kortagén káráni hayálá kapán.
PSA 143:6 Wati dastán tai némagá shahárán, man pa taw tonnig án, chó hoshkén dhagáréá. Ósht...
PSA 143:7 Hodáwand! Maná zutt passaw day, mani ruhá dam bortag, wati démá cha man chér maday, ke hamáyáni paymá bán ke kall o kabrá kapant.
PSA 143:8 Bámgwáhán tai mehray habará beshkonátán, ke man tai sará tawkal kortag, sój day ke kojám ráhá berawán, ke man wati zend tai dastá dátag.
PSA 143:9 Oo Hodáwand! Maná cha dozhmenán berakkén, man tai kerrá chéra bán.
PSA 143:10 Maná tálim beday ke tai razáay sará kár bekanán, chéá ke taw mani Hodá ay, tai nékén Ruh tachkén ráhá mani rahshón bát.
PSA 143:11 Oo Hodáwand! Pa wati námaygi maná zendag bedár, pa wati adlaygi, maná cha sakki o sórián dar kan.
PSA 143:12 Wati mehray tahá mani dozhmenán tabáh kan, mani badwáhán gár o bégwáh kan, ke man tai hezmatkár án.
PSA 144:1 Dáuday Zabur. Hodáwandá satá bát, mani talárá, ke mani dastán pa jangá dara kárit o mani lankokán pa merhagá.
PSA 144:2 Hamá mani mehr kanókén Hodá o kalát ent, mani sangar ent o mani rakkénók, mani espar, ke áiay mayára bán, ke mani kawmá mani chérdasta kant.
PSA 144:3 Hodáwand! Ensán chié ke taw áiá mán byáray, bani ádám chié ke taw áiay hayálá bedáray?
PSA 144:4 Ensánay zend chó damkasshéá ent o róchi chó gwazókén sáhegéá.
PSA 144:5 Hodáwand! Ásmáná derr o jahlád byá, kóhán dast jan ke cha eshán dutt dar byayt.
PSA 144:6 Wati gerókán sheng kan ke dozhmen sheng o sháng bebant, wati tirán shán o sargardánesh kan.
PSA 144:7 Dastá cha borzád shahár, maná ázát kan o berakkén cha bázén ápán, cha darámadáni dastán,
PSA 144:8 ke dapesh cha drógá porr ant o rástén dastesh cha prébá.
PSA 144:9 Man pa taw nókén sawté janán, oo Hodá! Dahtárén soróz o changay sará pa taw sáza janán,
PSA 144:10 pa hamáiá ke bádsháhán sóbéna kant o wati hezmatkárén Dáudá rakkénit, cha koshókén zahmá.
PSA 144:11 Maná berakkén o cha darámadáni dastá ázát kan, ke dapesh cha drógá porr ant o rástén dastesh cha prébá.
PSA 144:12 Gorhá may bachakk, warnáiá chó rostagén drachká bant o may jenekk chó washtráshtagén menoká ke pa kalátán tráshag butagant.
PSA 144:13 May ambár, cha har paymén bar o samará porra bant o may ramag hazáráni hesábá gésha bant, dahán hazáráni hesábá, may dhagárán.
PSA 144:14 May áposén gók báz báz chokka kárant o dozhmen may diwálán próshta nakanant, kass bandiga nabit o may bázárán nálag o peryáta namacchit.
PSA 144:15 Bahtáwar hamá mardom ant ke hamé dhawlá bant, bahtáwar hamá ant ke Hodáwand áyáni Hodá ent.
PSA 145:1 Satá o saná. Dáuday Zabur. Tai shán o shawkatá názénán, oo mani Hodá! Oo bádsháh! Tai námá satá kanán, abad tán abad.
PSA 145:2 Tará har rócha názénán o tai námá satá kanán, abad tán abad.
PSA 145:3 Hodáwand mazan ent o satáay báz láhek, kass áiay mazaniá kadd o kesás korta nakant.
PSA 145:4 Naslé pa domi naslá tai káráni satáyá kant o tai mazanén káráni kessahána kárit.
PSA 145:5 Man tai mazanén shán o shawkatay sará pegra kanán, tai bákamálén káráni sará.
PSA 145:6 Tai bákamálén káráni zóráwari hamok zobánay sará ent o man tai mazanén káráni járá janán.
PSA 145:7 Tai mazanén sharriáni kessahána kárant o tai adlay sawtá janant.
PSA 145:8 Hodáwand mehrabán o rahm kanók ent, hezhm geragá déra kant o mehri báz ent.
PSA 145:9 Hodáwand gón sajjahénán nék ent o wati sajjahén addh kortagénáni sará rahma kant.
PSA 145:10 Oo Hodáwand! Tai dastay hamok kár tai shográ gipt, tai wapádár tará názénant.
PSA 145:11 Tai bádsháhiay shán o shawkatay habará kanant o tai zóray mesálána dayant,
PSA 145:12 tánke sajjahén baniádam tai zóráwarén kárán jár bejanant, tai bádsháhiay shán o shawkatá.
PSA 145:13 Tai bádsháhi abadi bádsháhié o tai hákemi nasláni nasl barjáha mánit.
PSA 145:14 Harkas ke kapit, Hodáwand áiá dárit o harkas ke lagatmál ent, Hodáwand áiá chesta kant.
PSA 145:15 Sajjahénáni chamm pa taw sakk ant o taw áyáni rózigá pa wahda bakshay.
PSA 145:16 Taw wati dastá pacha kanay o har zendagénay wáhagán puraha kanay.
PSA 145:17 Hodáwand wati hamok ráhá ádel ent, wati sajjahén kárán wapádár.
PSA 145:18 Harkas ke Hodáwandá tawára kant, Hodáwand áiay nazzikká ent, harkas ke pa del o setk áiá tawára kant.
PSA 145:19 Harkasá ke Hodáay tors delá ent, Hodá áiay wáhagán puraha kant o áiay peryátán gósha dárit o rakkéniti.
PSA 145:20 Hodáwand wati sajjahén dóst dárókáni negahpán ent o sajjahén badkárán tabáha kant.
PSA 145:21 Mani dap Hodáwandá názénit, sajjahén sahdár áiay pákén námá satá bedayátant, abad tán abad.
PSA 146:1 Hodáwandá benázénét, Halléluyá. Oo mani arwáh! Hodáwandá benázén.
PSA 146:2 Tán zendag án Hodáwandá satá kanán tánke hastán wati Hodáyá názénán.
PSA 146:3 Shahzádagáni sará tawkal makanét, mardománi sará, ke rakkénta nakanant.
PSA 146:4 Arwáhesh ke dara kayt, zeminá pera tarrant o hamá róchá áyáni sajjahén shawr o hayál gár o zawála bant.
PSA 146:5 Bahtáwar hamá ent Ákubay Hodá áiay komakk ent, hamá ke ométi wati Hodáwandén Hodáay sará ent,
PSA 146:6 hamáiay sará ke zemin o ásmánay jórh kanók ent o daryá o har ché ke daryáyá hast, hamáiay sará ke tán abad wapádár ent,
PSA 146:7 zolm distagénáni dadrasiá kant o shodigán waráka dant. Hodáwand bandigán ázáta kant,
PSA 146:8 Hodáwand kóráni chammán pacha kant, Hodáwand hamáyán chesta kant ke lagatmál ant, Hodáwand pahrézkárán dósta dárit,
PSA 146:9 Hodáwand darámadáni negahpániá kant o chóraw o janózámáni hayálá dárit, bale badkáráni ráhá chapp o chótha kant.
PSA 146:10 Hodáwand tán abad bádsháhia kant, tai Hodá, oo Sahyun, nasláni nasl. Hodáwandá benázénét, Halléluyá.
PSA 147:1 Hodáwandá benázénét, Halléluyá, may Hodáay názénag chón wassh ent o áiay satá kanag delkassh.
PSA 147:2 Hodáwand Urshalimá cha nóksará addha kant o Esráilay darándhéhán yakjáha kant.
PSA 147:3 Proshtadelán dráha kant o thappánesha bandit.
PSA 147:4 Estárán hesába kant o har yakkéá pa nám tawára kant.
PSA 147:5 May Hodáwand mazan ent, zóri békesás, áiay zánt o zánagá kadd o kesás nést.
PSA 147:6 Hodáwand békebrán komaka kant, bale badkárán zeminá dawra dant.
PSA 147:7 Hodáwandá gón shogrgozári benázénét, pa may Hodáyá soróz o chang bejanét.
PSA 147:8 Á, ásmáná gón jambara póshénit o zeminá hawra bakshit o kóháni sará sabzaga ródénit.
PSA 147:9 Á, haywánán waráka dant o gwarágán ham, wahdé peryáta kanant.
PSA 147:10 Á, aspáni zórá gala nabit o na ke jangóláni pádán.
PSA 147:11 Hodáwand hamáyáni sará wassha bit ke cha áiá torsant o sajjahén óst o ométesh gón áiay mehrá ent.
PSA 147:12 Oo Urshalim! Hodáwandá satá kan, Oo Sahyun! Hodáwandá benázén.
PSA 147:13 Hamá tai darwázagáni karhián mohra dárit o tai diwáláni tahá, tai chokkán barkata dant.
PSA 147:14 Tai marz o simsarán émena kant o tará cha gehterén gandomá sérlápa kant.
PSA 147:15 Wati hokmá zeminá ráha dant o áiay habar téziá shenga bit.
PSA 147:16 Barpá chó pazhmá shenga kant o nódá poray paymá shánka dant.
PSA 147:17 Tróngalá nánay hurdagáni paymá éra dant, kay áiay barpén sártiay démá óshtáta kant?
PSA 147:18 Wati habará ráha dant o har chizz ápa bit, wati gwátá déma dant o ápa rombant o tachant.
PSA 147:19 Wati habará pa Ákubá áshkára kant o wati hokm o parmáná pa Esráilá.
PSA 147:20 É kári pa dega hecch kawméá nakort o é dega kawm áiay rahbandána nazánant. Hodáwandá benázénét, Halléluyá.
PSA 148:1 Hodáwandá benázénét, Halléluyá. Cha ásmánán Hodáwandá benázénét, borzén jágahán áiá satá kanét.
PSA 148:2 Oo áiay sajjahén préshtagán! Áiá satá kanét. Oo áiay sajjahén ásmáni lashkarán! Áiá satá kanét.
PSA 148:3 Oo máh! Oo róch! Áiá satá kanét. Oo sajjahén drapshnákén estárán! Áiá satá kanét.
PSA 148:4 Oo borzén arsh! Áiá satá kan. Oo ásmánay sarboray ápán! Áiá satá kanét.
PSA 148:5 É sajjahén, Hodáwanday námá satá bekanátant, chéá ke cha hamáiay hokmá jórh butagant.
PSA 148:6 Hamáiá é sajjahén, abad tán abad barjáh dáshtagant o anchén hokmé dáti ke hechbar dawr dayag o nákár kanaga nabit.
PSA 148:7 Hodáwandá cha zeminá satá kanét, shomá oo sajjahén daryái sahdárán o zeray sajjahén johlánkián,
PSA 148:8 oo gerók o tróngal, barp o jambarán, oo tupánén gwátán ke hamáiay hokmá barjáha dárét,
PSA 148:9 oo kóh o sajjahén jompán, oo nibagi drachk o sajjahén gazzán,
PSA 148:10 oo rastar o sajjahén dalwatán, oo kasánén jánwar o báli morgán,
PSA 148:11 oo zeminay bádsháh o sajjahén kawmán, oo zeminay shahzádag o sajjahén hákemán,
PSA 148:12 oo warnáén mardén o janénán, oo pirénán, gón chokkán yakjáh!
PSA 148:13 É sajjahén, Hodáwanday námá satá bekanátant, chéá ke tahná hamáiay nám mazanshán ent, hamáiay shán o shawkat cha zemin o ásmáná borzádter ent.
PSA 148:14 Áiá kánthé pa wati kawmá borz kortag, áiay sajjahén wapádárén hezmatkáráni satá, Esráilay satá, kawmé ke gón áiay delá nazzikk ent. Hodáwandá benázénét, Halléluyá.
PSA 149:1 Hodáwandá benázénét, Halléluyá. Pa Hodáwandá nókén sawté bejanét o áiá, áiay wapádáráni mocchiá benázénét.
PSA 149:2 Esráil pa wati addh kanóká shádehi bekanát, Sahyunay chokk pa wati bádsháhá gal bátant.
PSA 149:3 Gón nách áiay námá satá bedayát o áiá gón zháng o chang benázénátant.
PSA 149:4 Chéá ke Hodáwand cha wati kawmá washnód ent, á békebrán sóbmandiay tájá bakshit.
PSA 149:5 Áiay wapádár gón é pahrá shádehi bekanát o wati gandaláni tahá shádehiay sawt bejanátant.
PSA 149:6 Hodáwanday satá o sanáesh dapá bát o dodapén zahmesh dastá
PSA 149:7 ke cha ráján bér begerant o kawmán sezá bedayant,
PSA 149:8 bádsháhánesh pa zamzil bebandant o sardáránesh pa ásenén pádband,
PSA 149:9 tánke hamá dadrasiá barjáh bekanant ke esháni helápá nebeshtah kanag butag, é, áiay sajjahén wapádáráni shán ent. Hodáwandá benázénét, Halléluyá.
PSA 150:1 Hodáwandá benázénét, Halléluyá. Hodáyá áiay pákén arshá satá kanét, áiay zór o wákay ásmánán.
PSA 150:2 Pa áiay porwákén kárán áiá satá kanét, pa áiay kámelén mazaniá áiá satá kanét.
PSA 150:3 Áiá gón sornáay tawárá satá kanét, gón soróz o changán satái kanét.
PSA 150:4 Áiá gón zháng o nách satá kanét, gón simmi sázán o nalá satái kanét.
PSA 150:5 Áiá gón dhohlán satá kanét, gón borztawárén dhohlán.
PSA 150:6 Har chizzá ke sáh mán, Hodáwandá satá bekanát. Hodáwandá benázénét, Halléluyá.
DAN 1:1 Yahudáay bádsháh Yehóyákimay dawray sayomi sálá, Bábelay bádsháh Nebukadnezar átk o Urshalimi angerr kort.
DAN 1:2 Cha Hodáwanday razáyá Yahudáay bádsháh, Yehóyákimi prósh dát. Bádsháhay jend o Hodáay lógay lahtén darpi gón wat Bábelay sardhagárá, wati hodáay lógá áwort o darpi wati hodáay lógay hazánagá ér kortant.
DAN 1:3 Padá bádsháhá wati darbáray kármaster, Ashpenaz hokm dát ke cha Esráili chokkán lahtén anchén byár ke cha bádsháhi nasl o sharapmandén hándánán bebant,
DAN 1:4 anchén warná ke hecch paymén badani aybesh mán mabit o rangá dhawldár bebant, har dhawlén hekmatá balad bayagay láhek, zántkár o zut‌pahm bebant o bádsháhay bárgáhá óshtagá bekarzant. Padá é warnáyán Bábelay Aramái zobán o labzánká bwánén.
DAN 1:5 Bádsháhá esháni har róchigén warák o sharáb cha wati jenday warák o sharábá gechén kort o hokmi dát ke tán say sálá eshán sharr bwánénét o zántkár kanét o padá mani hezmatá bóshtárénét.
DAN 1:6 Esháni nyámá cha Yahudáyá áwortagén Dányál, Hanániá, Misháél o Azaryá hawár atant.
DAN 1:7 Darbáray kármasterá áyáná nókén nám per kort. Dányálay námi Beltesházar, Hanániáay Shadrak, Misháélay Mishak o Azaryáay Abednegó kort.
DAN 1:8 Dányálá erádáh kort ke man watá gón sháhi warák o sharábán palita nakanán. Gorhá áiá gón darbáray kármasterá dazbandi kort ke agan taw razá dayay, man é warákána nawarán o watá palita nakanán.
DAN 1:9 Nun Hodáyá kármasteray delá pa Dányálá mehr o hamdardi pédá kort,
DAN 1:10 bale kármasterá angat gón Dányálá gwasht: “Maná cha wati wájahén bádsháhá torsit. Áiá wat pa shomá warák o sharáb gechén kortag. Agan á begendit ke shomá cha wati é dega hamsarókén warnáyán nezórter ét, gorhá? É paymá, shomá bádsháhay dastá mani sará borráénét.”
DAN 1:11 Kármaster Ashpenázá pa Dányál, Hanániá, Misháél o Azaryáyá yakk apsaré dáshtagat. Dányálá gón hamé apsará gwasht:
DAN 1:12 “Mehrabáni bekan o márá tán dah róchá bechakkás o bechár, bell ke márá pa waragá tahná sabzi o pa nóshagá tahná áp dayag bebit.
DAN 1:13 Padá márá gón hamá warnáyán dém pa dém bekan o bechár ke sháhi warákán waragá ant. Agan má nezórter butén, randá gón má hamá paymá bekan ke tai dela gwashit.”
DAN 1:14 Gorhá apsará áyáni habar mannet o tán dah róchá á chakkásetant.
DAN 1:15 Dahén rócháni halásiá distesh ke á, cha é dega warnáyán jándráhter o pazzórter ant ke sháhi warákesh wártagat.
DAN 1:16 Gorhá apsará sháhi warák o sharáb, cha áyáni waráká dar kortant o áyáná sabzia dát.
DAN 1:17 É chárén warná, Hodáyá labzánk o hekmatay har paymén zánt o honar dayán kortant. Dányál har warhén elhám o shobén o wábáni mánáyá ham balad at.
DAN 1:18 Gorhá bádsháh Nebukadnezaray gisshéntagén sayén sál ke sarjam butant, darbáray kármasterá é sajjahén warná áwort o bádsháhay bárgáhá pésh kortant.
DAN 1:19 Wahdé bádsháhá gón áyán gapp o trán kort, disti ke dega kas Dányál, Hanániá, Misháél o Azaryáay paymá naent. Gorhá é chárén bádsháhay jenday hezmatá dárag butant.
DAN 1:20 Bádsháhá harché ke jost kortant, disti ke é mardom har paymén hekmat o sarpadiá cha molkay sajjahén jáduger o sáherán dah sari sharter ant.
DAN 1:21 Dányál, tán Kurosh bádsháhay dawray awali sálá hamódá mant.
DAN 2:1 Nebukadnezará wati bádsháhi dawray domi sálá wáb dist. Áiay arwáh bétáhir but o á wába nakapt.
DAN 2:2 Gorhá bádsháhá jáduger, sáher, jennband o nojumiáni lótháénagay hokm dát ke áiay wábán máná bekanant. Á, átk o bádsháhay démá óshtátant.
DAN 2:3 Bádsháhá gón áyán gwasht: “Man wábé distag o mani arwáh pa é wábay mánáay zánagá bétáhir ent.”
DAN 2:4 Gorhá nojumián gón bádsháhá Aramái zobáná gwasht: “Oo bádsháh! Modám zendag bátay. Márá wábá begwash. Má pa taw mánáia kanén.”
DAN 2:5 Bádsháhá gón nojumián gwasht: “Mani gapp yakké. Agan shomá mani wábá magwashét o máná makanét, shomá thokkor thokkor kanaga bét o shomay lóg tabáh kanag o hákóth jórh kanaga bant.
DAN 2:6 Bale agan shomá wábá begwashét o máná bekanét, shomárá cha mani némagá théki o tohpah, mozz o mazanén sharap o ezzaté rasit. Paméshká maná mani wáb o wábay mánáyá begwashét.”
DAN 2:7 Áyán yakk randé padá gwasht: “Ji bádsháh! Márá wábá begwash, má mánáia kanén.”
DAN 2:8 Bádsháhá gwasht: “Man saddak án ke shomá pa wahdzawáliá é habarán kanagá ét. Shomá gendagá ét ke mani hokm yakk o thekk ent
DAN 2:9 ke agan shomá maná wábá magwashét, pa shomá sezá yakkén ent. Shomá watmánwatá shawr kortag ke mani démá chapp o chóthén habar bekanét o dróg bebandét tán hamá wahdá ke wahd o jáwar badal bebant. Paméshká shomá wat maná wábá begwashét, gorhá nun mana zánán ke shomá mánái ham korta kanét.”
DAN 2:10 Nojumián, bádsháhay passawá gwasht: “Oo bádsháh! Donyáyá hecch choshén mardomé nést ke é kárá kort bekant. Hecch bádsháhá, harchont ke mazan o zóráwar bebit, hechbar cha hecch jáduger, sáher o nojumiá choshén parmáeshé nakortag.
DAN 2:11 É kárá ke tawe bádsháh lóthagá ay, sakk grán ent. Cha hodáyán abéd, é habará kass bádsháhá gwashta nakant, o hodá wa ensánáni nyámá naneshtagant.”
DAN 2:12 Gón é habaráni eshkonagá bádsháh cha zahrá sakk hezhm gept o hokmi dát ke Bábelay sajjahén dánáén mardom gár o gomsár kanag bebant.
DAN 2:13 Gorhá parmáné dayag but ke dáná koshag bebant. Dányál o áiay sangatáni shóházá ham dar kaptant ke bekoshantesh.
DAN 2:14 Nun Dányálá gón jalládáni sarmaster, Áryuká ke Bábelay dánáyáni koshagá dar kaptagat, pa hekmat o dánái habar kort.
DAN 2:15 Dányálá cha bádsháhay dáshtagén sarmaster, Áryuká jost kort: “Bádsháhá chéá choshén trondén parmáné dátag?” Áryuká, Dányál hál dát ke ché butag.
DAN 2:16 Nun Dányál shot o gón bádsháhá dazbandi‌i kort ke maná kammé wahd beday, man tawe bádsháhay wábá gwashán o máná kanán.
DAN 2:17 Dányál, lógá shot o wati sangat, Hanániá, Misháél o Azaryái hál dátant.
DAN 2:18 Gwashti: “Cha ásmáni Hodáyá rahm belóthét o dwá kanét ke é ráz pa má paddar bebit tánke máshomá o Bábelay é dega dáná koshag mabén.”
DAN 2:19 Gorhá hamá shapá é ráz pa Dányálá, shobénéá paddar kanag but. Nun Dányálá ásmáni Hodáay satá kort.
DAN 2:20 Gwashti: “Hodáay námá abad tán abad satá o saná bát, chéá ke hekmat o zór hamáiayg ant.
DAN 2:21 Hamá ent ke wahd o mósomán badala kant, hamá ent ke bádsháhán dura kant yá tahtá nádénit, hamá ent ke dánáyán hekmata dant o sarpadénán zánta bakshit,
DAN 2:22 hamá ent ke chér o andémén rázán paddara kant, hamá ent ke zánt taháriá ché hast o rozhnái hamáiay hamráh ent.
DAN 2:23 Oo mani pet o pirokáni Hodá! Man tai shográ gerán o tai tawsipá kanán, chéá ke taw maná zór o hekmat dátag. Annun ham é taw ay ke pa man hamá chizzet záher kortag ke má cha taw lóthetag, chéá ke taw nun bádsháhay jérhah pa má paddar kortag.”
DAN 2:24 Randá Dányál, Áryukay kerrá shot, hamáiay kerrá ke bádsháhá Bábelay dánáyáni koshagay hokm dátagat. Gón áiá gwashti: “Bábelay dánáyán makosh. Maná bádsháhay kerrá bar. Man áiay wábá máná kanán.”
DAN 2:25 Gorhá Áryuká zutt zuttá Dányál, bádsháhay kerrá bort o gwashti: “Man cha Yahudáay darándhéhán mardé dar gétkag ke tawe bádsháhay wábá máná korta kant.”
DAN 2:26 Bádsháhá gón Dányálá ke domi námi Beltesházar at, gwasht: “Taw mani distagén wábá o áiay mánáyá maná gwashta kanay?”
DAN 2:27 Dányálá gón bádsháhá gwasht: “Hamá rázá ke tawe bádsháh áiay jostá ay, hecch dáná, sáher, jáduger o estárzánté pa taw paddar korta nakant,
DAN 2:28 bale ásmáná Hodáé hast ke rázán paddara kant o hamáiá pa tawe bádsháh Nebukadnezará záher kortag ke áyókén róchán ché bit. É tai wáb ent o hamá shobén ant ke wahdé taw wati nepáday sará tachk atay, tai saray tahá chakarragá atant.
DAN 2:29 Oo bádsháh! Nepáday sará tai hayál áyókén wahday némagá shotant ke bárén ché bayagi ent. Hamá ke rázán paddara kant, tará péshi dásht ke áyókén wahdá ché bit.
DAN 2:30 Bale é ráz pa man é sawabá paddar kanag nabutag ke man cha é dega mardomán dánáter án. Paméshká paddar kanag butag, ke man tai wábá pa tawe bádsháhá máná bekanán tánke taw wati delay hayálán sarpad bebay.
DAN 2:31 Oo bádsháh! Taw cháragá atay o baláhén boté distet. É mazanén o sakkén drapshnákén boté at ke tai démá mekk at o gendagá torsnák at.
DAN 2:32 É botay sar, cha pahkén teláhá addh butagat. Delband o báski cha nograhá, láp o ráni brenjayg atant,
DAN 2:33 dhilleng ásen, pádáni ném ásen o ném patkagén gelayg atant.
DAN 2:34 Taw angat cháragá atay o sengé sendag but, mardomi dastéá nasest. Seng átk o botay ásen o gelén pádán lagget o próshtanti.
DAN 2:35 Padá ásen, patkagén gel, brenj, nograh o teláh, sarjamá yakjáh hurt butant, anchosh ke garmágán jóhánay pog o palár hurta bant, o gwátá ropt o bortant tán áyáni hecch nesháné pasht nakapt. Bale hamá seng ke botá lagget, baláhén kóhé jórh but o sajjahén zemini gept.
DAN 2:36 Wáb esh at. Nun má eshiá tawe bádsháhay démá máná kanén.
DAN 2:37 Oo bádsháh! Taw bádsháháni bádsháh ay. Hamá ay ke ásmáni Hodáyá tará bádsháhi, kodrat, zór o wák o shán o shawkat dátag o
DAN 2:38 har jágah ke ensán, jangali jánwar o báli morg zendag ant, Hodáyá tará é sajjahénáni sará hokmrán kortag. Teláhén sar, taw ay.
DAN 2:39 Cha tará pad, dega bádsháhié kayt ke cha taigá kamzórtera bit. Padá sayomi, brenjén bádsháhié kayt ke sajjahén zeminay sará hokmránia kant.
DAN 2:40 Padá cháromi bádsháhié kayt ke chó ásená mohr o mohkama bit, chéá ke ásen sajjahén chizzána próshit o sheng o shánga kant. Anchosh ke ásen sajjahén chizzána próshit, é bádsháhi ham, é sajjahén molkána próshit o thokkor thokkora kant.
DAN 2:41 É pád o pádáni lankok ke némá patkagén gel o némá ásenayg atant o taw distant, é bahr o bángén bádsháhié bit, bale eshiay tahá ásenay mohri mána bit, chéá ke taw ásen gón patkagén gelá hawár dist.
DAN 2:42 Chosh ke pádáni lankok, némá ásen o némá patkagén gelayg atant, é bádsháhiay bahré mohkam o bahré nezóra bit.
DAN 2:43 Hamá dhawlá ke taw ásen gón patkagén gelá hawár dist, kawm o nasl hawár wa bant bale gón yakdomiá nalecchant, anchosh ke ásen gón gelá nalecchit.
DAN 2:44 Á bádsháháni wahdá, ásmáni Hodá dega bádsháhié addha kant ke hechbar tabáha nabit o dega kawméay dastá ham dayaga nabit. É bádsháhi, á dega sajjahén bádsháhiána próshit o halása kant, bale wat tán abad barjama mánit.
DAN 2:45 Anchosh ke taw dist, seng cha kóhéá sendag but, mardomi dastéá nasest, o ásen, brenj, gel, nograh o teláhi hurt kortant. Oo bádsháh! Mazanén Hodáyá pa taw paddar kortag ke démterá ché bit. Paméshká wáb rást ent o eshiay máná ham pakká ent.”
DAN 2:46 Bádsháh Nebukadnezar dém pa chér kapt o Dányáli sojdah kort o hokmi dát ke Dányálay démá hayráté bekanét o sóchoki chérsóch bekanét.
DAN 2:47 Bádsháhá gón Dányálá gwasht: “Béshak tai Hodá, hodáyáni Hodá ent o bádsháháni Hodáwand ent o rázáni paddar kanók, chéá ke taw é ráz paddar kort kortag.”
DAN 2:48 Padá bádsháhá Dányál masterén ogdahé o bázén tohpah o thékié dát, Bábelay damagay hokmránii sarjamá hamáiay dastá dát o Bábelay sajjahén dánáyáni sarmasteri kort.
DAN 2:49 Nun Dányálá gón bádsháhá dazbandi kort o bádsháhá Shadrak, Mishak o Abednegó Bábelay damagay káráni master kortant. Dányál wat bádsháhay darbárá nesht.
DAN 3:1 Bádsháh Nebukadnezará si gazz borz o say gazz práhén teláhén boté addh kanáént o Bábelay damagá, Durahay dashtá mekk kanáént.
DAN 3:2 Áiá wáli, hákem, sardár, saláhkár, hazánagay kelitdár, kázi, monsep o damagay é dega sajjahén mansabdár lóthetant ke byáét o é botay démdaráiay rasmán bahr bezurét ke bádsháh Nebukadnezará mekk kanáéntag.
DAN 3:3 Nun wáli, hákem, sardár, saláhkár, hazánagay kelitdár, kázi, monsep o damagay é dega sajjahén mansabdár ke bádsháh Nebukadnezará wati mekk kanáéntagén botay démdaráiay rasmáni tahá bahr zuragá lótháéntagatant, átk o mocch butant o Nebukadnezaray mekk kanáéntagén botay démá óshtátant.
DAN 3:4 Gorhá jár janóká gón borzén áwázéá jár jat: “Oo kawm o ráján o har zobánay mardomán! É pa shomá hokmé:
DAN 3:5 Hamá damáná ke shomá karná, nal, chang, soróz, tamburag, dhohl o é dega sajjahén sáz o zémeláni tawárá eshkonét, allam bádsháh Nebukadnezaray mekk kanáéntagén teláhén botay démá bekapét o sojdahi bekanét.
DAN 3:6 Harkas ke dém pa chéra nakapit o sojdaha nakant, hamá damáná rókén kurahá dawr dayaga bit.”
DAN 3:7 Paméshká hamá damáná ke áyán karná, nal, chang, soróz, tamburag o é dega sajjahén sáz o zémeláni tawár eshkot, har kawm o ráj o har zobánay mardom, bádsháh Nebukadnezaray mekk kanáéntagén teláhén botay démá kaptant o sojdahesh kort.
DAN 3:8 Hamá wahdá, lahtén Bábeli mardom démá átk o Yahudiáni shekáyatesh kort.
DAN 3:9 Áyán gón bádsháh Nebukadnezará gwasht: “O bádsháh! Modám zendag bátay.
DAN 3:10 Tawe bádsháhá hokm dátag: ‘Hamá damáná ke sajjahén mardom karná, nal, chang, soróz, tamburag, dhohl o é dega sajjahén sáz o zémeláni tawárá eshkonant, teláhén botay démá bekapant o sojdah bekanant o
DAN 3:11 harkas ke dém pa chéra nakapit o sojdaha nakant, rókén kurahay tahá dawr dayaga bit.’
DAN 3:12 Bale oo bádsháh! Lahtén Yahudi hast: Shadrak, Mishak o Abednegó, hamá ke taw Bábelay damagay sarkári káráni ogdah dátagant, áyán tai hokm namannetag. É mardom na tai hodáyáni hezmatá kanant o na tai mekk kanáéntagén teláhén botá sojdaha kanant.”
DAN 3:13 Nun Nebukadnezar sakk hezhm gept o hokmi dát ke Shadrak, Mishak o Abednegóá byárét. Gorhá é mardom bádsháhay démá árag butant.
DAN 3:14 Nebukadnezará gón áyán gwasht: “Oo Shadrak, Mishak o Abednegó! É rást ent ke shomá mani hodáyáni hezmatá nakanét o mani mekk kanáéntagén teláhén bot sojdah nakortag?
DAN 3:15 É randá, agan shomá karná, nal, chang, soróz, tamburag, dhohl o é dega sajjahén sáz o zémeláni tawár eshkot o mani addh kortagén botay démá kapag o sojdah kanagá tayár ét wa sharr, bale agan shomá sojdah nakort gorhá hamá damáná rókén kurahay tahá dawr dayaga bét. Á wahdá bárén kojám hodá shomárá cha mani dastá rakkénit?”
DAN 3:16 Shadrak, Mishak o Abednegóá bádsháhay passawá gwasht: “Oo bádsháh Nebukadnezar! Márá é bárawá hecch passaw dayagay zalurat naent.
DAN 3:17 Agan má ásá dawr dayag bebén, hamá Hodá ke má áiay hezmatá kanén, márá cha rókén kurahay ásá rakkénta kant o hamá márá cha tawe bádsháhay dastá ham rakkénit.
DAN 3:18 Bale oo bádsháh! Agan chosh mabit ham, taw báyad ent bezánay ke tai hodáyáni hezmatá nakanén o tai mekk kanáéntagén teláhén botá sojdaha nakanén.”
DAN 3:19 Gorhá Nebukadnezar, Shadrak, Mishak o Abednegóay sará sakk hezhm gept. Áiay démay rang cha zahrá bar gasht o hokmi dát ke kurahay ásá hapt sari gésh kanét.
DAN 3:20 Wati pawjay lahtén zórmandén sepáhigi hokm dát ke Shadrak, Mishak o Abednegóá bebandét o rókén kurahá dawr dayét.
DAN 3:21 Nun é mardom gón gwaray kabáh, shalwár, pág o é dega sajjahén póshákán bandag but o rókén kurahá dawr dayag butant.
DAN 3:22 Bádsháhay hokm haminchok trond at o kurah haminkas jambur ke ásay bránzán hamá mardom koshtant ke áyán Shadrak, Mishak o Abednegó borzád bortagatant ke kurahá dawresh bedayant.
DAN 3:23 É sayén mohr bastagén mard Shadrak, Mishak o Abednegó rókén kurahá kaptant.
DAN 3:24 Anágat, bádsháh Nebukadnezará pa hayráni setth kort o cha wati saláhkárán josti kort: “Má say mardom nabast o ásá dawr nadát?” Áyán passaw dát: “Bale, oo bádsháh!”
DAN 3:25 Áiá darráént: “Bechárét, man ásay tahá chár mardom gardagá gendagá án. Dast o pádesh pach ant o salámat ant. Cháromi purah Hodái chokké.”
DAN 3:26 Nebukadnezar rókén kurahay darwázagay nazzikká shot o kukkári kort: “Oo Shadrak! Oo Mishak! Oo Abednegó! Oo borzén arshay Hodáay hezmatkárán! Byáét dhanná, edá byáét.” Gorhá Shadrak, Mishak o Abednegó cha ásá dar átkant.
DAN 3:27 Wáli, hákem, sardár o bádsháhay saláhkár mocch butant o distesh ke ásá é mardománi badan inchoká ham nageptagat, na áyáni saray mudé pilloshtagat o na áyáni godáni rang badal butagat. Ásay bóá ham kanagá naatant.
DAN 3:28 Nebukadnezará gwasht: “Shadrak, Mishak o Abednegóay Hodáyá satá o saná bát ke áiá wati préshtagé dém dátag o wati hezmatkár rakkéntagant. Eshán wati Hodáay sará báwar o bésah at o mani hokmesh namannet. Cha wati zendá sar gwastant, bale wati jenday Hodáyá abéd, dega hodáay hezmat o sojdahá razá nabutant.
DAN 3:29 Paméshká man hokma dayán ke harkas bebit, cha har kawm, ráj o zobáná ke Shadrak, Mishak o Abednegóay Hodáay bárawá harábén habaré bekant, á thokkor thokkor kanaga bit o áiay lóg barbád kanag o hákóthé jórh kanaga bit. Chéá ke dega hecch hodáé nést ke chosh rakként bekant.”
DAN 3:30 Padá bádsháhá Shadrak, Mishak o Abednegó, Bábelay damagá masterén ogdah dátant.
DAN 4:1 Cha bádsháh Nebukadnezaray némagá, pa é jaháná neshtagén sajjahén kawm o ráj o har zobánay mardomán. Shomá géshá gésh émen bátét.
DAN 4:2 Hamá nesháni ke borzén arshay Hodáyá maná pésh dáshtagant o hamá mójezah ke pa man kortaganti, wassha bán ke shomárá begwashánesh.
DAN 4:3 Áiay nesháni zabardast ant o mójezah, porzór. Áiay bádsháhi tán abad hastent o hokmránii nasláni nasl barjáh.
DAN 4:4 Mane Nebukadnezar wati lógá ásudag, wati kalátá wassh o ábád atán.
DAN 4:5 Man wábé dist o torséá maná mán patát. Gandaláni sará, mani hayál o shobénán maná torsént.
DAN 4:6 Gorhá man hokm dát ke Bábelay sajjahén dáná árag bebant tánke mani wábá máná bekanant.
DAN 4:7 Wahdé jáduger, sáher, nojumi o estárzánt átkant, man gón áyán wati wáb gwasht bale áyán mani wáb máná kort nakort.
DAN 4:8 Bale godhsará Dányál ke áiay nám, mani hodáay námay hesábá Beltesházar ent, mani kerrá átk. Áiá pákén hodáyáni ruh mán ent. Man gón áiá wati wáb gwasht:
DAN 4:9 “Oo Beltesházar, nojumiáni master! Mana zánán ke tará pákén hodáyáni ruh mán ent o hecch rázay zánag pa taw grán naent. É mani wáb ent ke man distag, nun pa man mánái kan.
DAN 4:10 Man gandaláni sará, é shobén distant: Man cháragá atán ta gendán, zeminay nyámá drachké o drachk sakk borz ent.
DAN 4:11 Drachk rodán o master bayán ent. Eshiay borzi tán ásmáná sar ent o cha zeminay goddhi hadd o simsarán záher ent.
DAN 4:12 Táki dhawldár ant, bar o samará bár ent o pa sajjahénán waráki per ent. Pa zeminay jánwarán sáhegé o ásmánay morg eshiay sháharháni sará kodóha bandant o nendant. Har sahdár cha eshiá waráka wárt.
DAN 4:13 Wahdé gandalán waptagatán, shobénáni tahá diston, ta mani démá pákén mardomé, bezán kásedé, cha ásmáná jahlád pédák ent.
DAN 4:14 Áiá gón borzén tawáréá gwasht: ‘Drachká goddh o sháharháni borr o tákáni send o baráni sheng o sháng kan. Bell ke jánwar cha eshiay sáhegá dara káyant o tachant o morg cha eshiay sháharhán bála kanant.
DAN 4:15 Bale drachkay bondhá bell ke gón wandhál o risshagán bemánit tánke gón ásen o brenjén patthiéá patáyag bebit o dashtay sabzagáni tahá pasht bekapit. Belli cha ásmánay nódá tarra bit o bell ke jangali jánwaráni nyámá dashtay sabzagáni sará zendaga bit.
DAN 4:16 Bell ke eshiay del cha mardomi deléá badal kanag bebit o eshiá jánwari delé dayag bebit o bell ke tán hapt zamánagá anchosh bemánit.
DAN 4:17 É hokmay jár kásedán jatag, pákénán eshiay hokm dátag, tánke zendagén mardom bezánant ke borzén arshay Hodá ensáni bádsháhiáni sará hokmrán ent o é bádsháhián hamá mardomá dant ke Hodáay jenda lóthit. Tantaná kamzátén mardomán ham é bádsháhiáni sará hákema kant.’
DAN 4:18 É hamá wáb ent ke mane bádsháh Nebukadnezará distag. Oo Beltesházar! Nun taw eshiá máná kan, parchá ke mani bádsháhiay hecch dáná eshiá máná korta nakant, bale taw kortia kanay chéá ke tará pákén hodáyáni ruh mán ent.”
DAN 4:19 Gorhá Dányál, ke domi námi Beltesházar at, pa damánéá hayrán but, hayálán paréshán kort. Bádsháhá gwasht: “Beltesházar! Wáb o wábay mánáyá mayl ke tará paréshán bekant.” Beltesházará gwasht: “Mani wájah! Drégatá é wáb tai dozhmenáni bárawá butén o eshiay máná ham pa tai badwáhán.
DAN 4:20 É drachk ke taw distag, hamé ke rost o zórmand but, borziá ásmáná sar but o cha zeminay sajjahén hadd o simsarán záher at,
DAN 4:21 táki dhawldár atant o bari békesás o pa sajjahénán waráki per at o áiay sáhegá jangali jánwara neshtant o sháharháni sará báli morgáni kodóh atant,
DAN 4:22 é drachk taw ay, oo bádsháh! Chéá ke taw mazan o porwák ay o tai mazani rostag o ásmáná sar ent o tai bádsháhi tán zeminay goddhi hadd o simsarán rasetag.
DAN 4:23 Tawe bádsháhá kásedé dist, pákéné, cha ásmáná ér áyag o gwashagá at: ‘Drachká goddh o barbád kan, bale drachkay bondhá bell ke gón wandhál o risshagán bemánit tánke gón ásen o brenjén patthiéá patáyag bebit o dashtay sabzagáni tahá pasht bekapit. Belli cha ásmánay nódá tarra bit, o bell ke jangali jánwaráni nyámá zendaga bit. Bell tán hapt zamánagá anchosha mánit.’
DAN 4:24 Oo bádsháh! É tai wábay máná ent o é borzén arshay Hodáay hokm ent ke pa mani wájahén bádsháhá átkag.
DAN 4:25 Taw cha ensánán gallénaga bay o jangali jánwaráni darnyámá jahmenenda bay. Tai ward o warák pas o gókáni dhawlá káh o buccha bant o taw cha ásmánay nódán tarra bay. Tán hapt zamánagá taw anchosha bay, tán hamá wahdá ke taw pajjáh byáray ke borzén arshay Hodá ensáni bádsháhiáni sará hokmrán ent o hamá mardomá dantesh ke wata lóthit.
DAN 4:26 Hamé hokmay máná, ke drachkay bondh gón wandhál o risshagán pasht géjag bebit, esh ent ke wahdé taw pajjáha káray ke asli bádsháh arshá neshtag, tai bádsháhi padá tará dayaga bit.
DAN 4:27 Oo bádsháh! Paméshká mani é sój balkén pa taw sharrén sójé bebit: nékén kár bekan ke cha wati gonáhán dur bebay o bazzagáni sará rahm kan ke cha wati radkárián berakkay. Balkén tai ábádi barjáh bemánit.”
DAN 4:28 É sajjahén chizz gón bádsháh Nebukadnezará butant.
DAN 4:29 Dwázdah máhá rand, á Bábelay sháhi kalátay sará gám janagá at.
DAN 4:30 Bádsháhá gwasht: “É hamá mazanén Bábel naent ke man gón wati zabardastén zórá addh kort ke mani pormarháhén shán o shawkatá záher bekant o mani sháhi kalát bebit?”
DAN 4:31 Angat habar bádsháhay dapá at ke cha ásmáná tawáré átk, gwashagá at: “Oo bádsháh Nebukadnezar! Tará gwashag bayagá ent ke tai bádsháhi cha taw pach gerag butag.
DAN 4:32 Taw cha ensánán gallénaga bay o jangali jánwaráni darnyámá jahmenenda bay. Tai ward o warák pas o gókáni dhawlá káh o buccha bant. Tán hapt zamánagá taw anchosha bay tán hamá wahdá ke taw pajjáh byáray o bezánay ke borzén arshay Hodá ensáni bádsháhiáni sará hokmrán ent o hamá mardomá dantesh ke wata lóthit.”
DAN 4:33 Hamá damáná gón Nebukadnezará anchosh but ke gwashag butagat. Á cha ensánán gallénag but, pas o gókáni dhawlá káh o bucchia wárt, áiay jesm cha ásmánay nódá tarra but, tánke áiay mud wakábay potháni warhá rostant o nákoni morgay panjagáni dhawlá butant.
DAN 4:34 “Bale á rócháni halásiá, mane Nebukadnezará wati chamm ásmánay némagá chest kortant o mani hósh átk. Nun man borzén arshay Hodáay satá o saná kort, hamá Hodá ke tán abada mánit, man shán o ezzat dát. Chéá ke áiay hokmráni abadmánén hokmránié o áiay bádsháhi tán nasláni nasl barjáha mánit.
DAN 4:35 Jahánay sajjahén mahluk áiay démá hecch naant. Á, gón ásmáni lashkará wati delay tabá kára kant o gón zeminay saray nendókán ham. Choshén kasé nést ke áiay dastá bedárit o begwashit ke ‘taw ché kanagá ay?’
DAN 4:36 Hamá damáná mani hósh átk o mani bádsháhiay shawkatay háterá mani shán o mazani padá pa man átk. Mani saláhkár o mir o mehterán maná dar gétk o mani bádsháhi taht padá maná dayag but o mani ezzat cha pésarigén ezzatá báz géshter but.
DAN 4:37 Nun mane Nebukadnezar ásmánáni bádsháhá satá kanán, sárháyán o sharapa dayán chéá ke áiay sajjahén kár rást ant o áiay ráh pa ensáp. Á, gorunákáni gardená jahl korta kant.”
DAN 5:1 Bádsháh Belsházará baláhén dáwaté dát. Wati hazár mir o mehteri mehmán kort o esháni démá sharábi wárt.
DAN 5:2 Wahdé Belsházará sharábay tám chasht, hokmi dát ke hamá teláh o nograhén darp árag bebant ke áiay pirok Nebukadnezará cha Urshalimaymazanén parasteshgáhá, cha Hodáay lógá áwortagatant tánke bádsháh, áiay mir o mehter, áiay jan o soriat esháni tahá benóshant.
DAN 5:3 Gorhá hamá teláhén darpesh áwortant ke cha Urshalimá, cha Hodáay parasteshgáhá áwár janag butagatant. Bádsháh, áiay mir o mehterán, áiay janán o soriatán esháni tahá sharáb wárt.
DAN 5:4 Áyán sharáb wárt o teláh, nograh, brenj, ásen, dár o sengén hodáyáni satá kort.
DAN 5:5 Anágahá mardomi dastéay lankok záher butant o cherágdánay domi némagá, sháhi kalátay diwálay dónay sará nebeshtah kanagá laggetant. Bádsháhá nebeshtah kanókén dastay posht dist.
DAN 5:6 Nun bádsháhay dém zard tarret o áiá anchén torsé delá kapt ke srénay band o bógi shol butant o kóndhi anchó larzetant ke gón yakdomiá laggetant.
DAN 5:7 Bádsháhá kukkár kort o hokm dát ke sáher, nojumi o estárzántán byárét. Gón Bábelay dánáyán gwashti: “Hamá kas ke é nebeshtahá bwánit o máná bekant, á jamurangén god o teláhén háré gwará dayaga bit o bádsháhiay sayomi hokmrán kanaga bit.”
DAN 5:8 Gorhá bádsháhay sajjahén dánáén mardom átkant, bale kassá nebeshtah wánt o pa bádsháhá máná kort nakort.
DAN 5:9 Nun bádsháh Belsházar géshter paréshán but. Áiay dém géshter zard tarret. Áiay mir o mehter hayrán butant.
DAN 5:10 Shahbánoká wahdé bádsháh o áiay hásén mardománi tawár eshkot, diwánjáhá átk o gón bádsháhá gwashti: “Oo bádsháh! Modám zendag bátay. Watá paréshán makan o wati démá zard matarrén.
DAN 5:11 Tai bádsháhiá mardé hast ke áiá pákén hodáyáni ruh mán ent o tai pirokay dawrá gendag butag ke áiá báteni rozhnái, sarpadi o hekmat o hodáyáni dhawlén dánáié gón. Tai bádsháhén pirok, Nebukadnezará é mard jáduger, sáher, nojumi o estárzántáni master kortagat,
DAN 5:12 chéá ke é Dányál, ke bádsháhá áiay nám Beltesházar kortag, eshiá ajabén ruhé, zánt o sarpadié hastat. Á wáb o chácháni máná kanag o gránén jérhaháni gisshénagá sakk balad at. Dányálá lótháén, hamá tará eshiay mánáyá gwashta kant.”
DAN 5:13 Gorhá Dányál, bádsháhay démá árag but. Bádsháhá gón Dányálá gwasht: “Taw hamá Dányál ay ke cha Yahudáay darándhéhán ent, hamá ke mani bádsháhén piroká cha Yahudáyá áwortagant?
DAN 5:14 Man annun sahig butagán ke tará hodáyáni ruhé mán ent o tará báteni rozhnái, sarpadi o ajabén hekmaté hast.
DAN 5:15 Mani démá annun dáná o sáher árag butagant ke é nebeshtahá bwánant o pa man máná bekanant, bale áyán máná kort nakort.
DAN 5:16 Bale man tai bárawá eshkotag ke taw máná korta kanay o jérhaháni gissh o giwárá balad ay. Agan taw é nebeshtahá wánt o máná kort bekanay, tará jamurangén god o teláhén háré gwará dayaga bit o taw bádsháhiay sayomi hokmrán kanaga bay.”
DAN 5:17 Gorhá Dányálá gón bádsháhá gwasht: “Wati théki o tohpahán wati kerrá kan o dádán pa dega kaséá ér kan. Man é nebeshtahá chónahá wánán o pa tawe bádsháhá máná kanán.
DAN 5:18 Oo bádsháh! Borzén arshay Hodáyá, Nebukadnezar bezán tai pirok, bádsháhi, mazani, shán o sharap dátagat.
DAN 5:19 Hamá mazaniay sawabá ke Hodáyá dátagat, sajjahén kawm o ráj o har zobánay mardom cha torsá tai pirokay démá larzetant. Kasé ke áiá koshaga lóthet, koshti o kasé ke áiá koshaga nalóthet, nakoshti. Kasé ke áiá mazani dayaga lóthet, mazaniia dát o kasé ke áiá kamsharap kanaga lóthet, kamsharapia kort.
DAN 5:20 Bale wahdé áiay del porkebr o arwáh cha gorunákiá porr but, cha bádsháhi tahtá ér géjag o shán o shawkati pach gerag but.
DAN 5:21 Á, cha ensánáni darnyámá gallénag but o áiay del jánwari delé jór kanag but. Jangali haráni nyámá jahmenend but, pas o gókáni dhawlá káh o bucch wárénaga but o cha ásmánay nódán áiay badan tarr kanaga but, tán hamá wahdá ke zánti ke borzén arshay Hodá ensáni bádsháhiáni sará hokmrán ent o hamá mardomá esháni sará hokmrána kant ke wata lóthit.
DAN 5:22 Bale oo Belsházar, Nebukadnezaray nomásag! É sajjahén chizzet zántant o angat ham gorunákiet cha wati delá dar nakort.
DAN 5:23 Taw watárá ásmáni Hodáwanday démá borz zánt o léket o hokmet kort ke Hodáay lógay darp tai démá árag bebant. Taw o tai mir o mehterán, tai janán o soriatán é darpáni tahá sharáb wárt o taw nograh, teláh, brenj, ásen, dár o sengén hodá satá kortant ke na gendant, na eshkonant o na sarpada bant. Bale taw hamá Hodá shán o shawkat nadát ke tai sáh o tai sajjahén ráh áiay dastá ant.
DAN 5:24 Paméshká é dast, cha hamá Hodáay némagá dém dayag butag o é labz nebeshtah kanag butagant.
DAN 5:25 Nebeshtah esh ent: ‘Mené, mené, tekel, pársin.’
DAN 5:26 É labzáni máná esh ant: ‘Mené’ bezán Hodáyá tai bádsháhiay róch hesáb kortag o halás kortagant.
DAN 5:27 ‘Tekel’ bezán taw sháhémá wazn kanag butagay o é habar zánag butag ke taw sobakk ay.
DAN 5:28 ‘Peres’ bezán tai bádsháhi bahr kanag o Mád o Pársán dayag butag.”
DAN 5:29 Gorhá Belsházará hokm dát o Dányálesh jamurangén god o teláhén háré gwará dát o Dányál, bádsháhiay sayomi hokmrán jórh kanag but.
DAN 5:30 Hamá shapay shap Bábeliáni bádsháh, Belsházar koshag but.
DAN 5:31 Gorhá bádsháhi Mádén Dáryushá raset. É wahdá Dáryushay omr kesás shast o do sál at.
DAN 6:1 Dáryushá delá shawr kort ke wati bádsháhiá yakk sad o bist wáli bedárit ke áiay bádsháhiay sajjahén káráni zemmawár bebant o
DAN 6:2 é wáliáni sará say sarwazir dárag bebit. Dányál cha é sayénán yakké at. Wáliáná, hamé sarwaziráni démá hesáb dayagi at tánke bádsháhá táwáné marasit.
DAN 6:3 Dányál, wati ajabén ruhay sawabá, zutt cha é sarwazir o wálián démá dar átk. Cha Dányálay láhekiá, bádsháhá hayál kort ke sajjahén molkay zemmawárián hamáiá bedant.
DAN 6:4 Gorhá é dega sarwazir o wáli Dányálay hokumati káráni tahá radi shóház kanagá laggetant, bale áyán pa Dányálay ér janag o mayárig kanagá hecch nimmóné dast nakapt. Á, wapádáré at, cha wati kárán nádelgósh naat o na ke selkárié korti.
DAN 6:5 Nun é mardomán gwasht: “Márá é mard, Dányálay helápá dega hecch nimmóné dasta nakapit, abéd cha anchén gappéá ke áiay Hodáay Sharyatay bárawá bebit.”
DAN 6:6 Gorhá é sarwazir o wáli yakjáh but o bádsháhay kerrá átkant o gwashtesh: “Bádsháh Dáryush! Modám zendag bátay.
DAN 6:7 Oo bádsháh! Tai sajjahén sarwazir, hákem, wáli, saláhkár o sardárán watmánwatá shawr kortag ke taw yakk sháhi hokmé bedayay ke harkas tán áyókén si róchá tará abéd, dega hodá yá dega mardoméay kerrá dwá belóthit, shéráni gárá dawr dayaga bit.
DAN 6:8 Oo bádsháh! Nun hokm beday o é parmáná dashatt kan tánke badal but makant. É dhawlá é hokm, Mád o Pársay kánuné jórha bit ke badal kanaga nabit.”
DAN 6:9 Gorhá bádsháh Dáryushá parmán dashatt kort.
DAN 6:10 Nun wahdé Dányál sahig but ke choshén parmáné dashatt kanag butag, wati lógay hamá borzi kóthiá shot ke darigi dém pa Urshalimá pacha butant o anchó ke modám kortagati, róché say randá kóndhána kapt, dwáia kort o wati Hodáay shogria gept.
DAN 6:11 Gorhá é mard mocch but o átkant o distesh ke Dányál wati Hodáay kerrá dwá o peryát kanagá ent.
DAN 6:12 Bádsháhay kerrá shotant o sháhi parmánay bárawá habaresh kort o gwashtesh: “Oo bádsháh! Taw parmáné dashatt nakortag ke harkas tán si róchá tará abéd dega hodáéay yá ke dega mardoméay kerrá dwá belóthit, shéráni gárá dawr dayaga bit?” Bádsháhá passaw dát: “Haw, é rást ent. Mád o Pársay kánunay hesábá é badal buta nakant.”
DAN 6:13 Nun áyán gón bádsháhá gwasht: “Dányál ke cha Yahudáay darándhéhán yakké, tai jend o tai dashatt kortagén parmáni hecch delgósh nakortag, oo bádsháh! Róché say randá angat wati Hodáay kerrá dwá lóthagá ent.”
DAN 6:14 Bádsháhá ke é habar eshkot, sakk paréshán but. Erádahi kort ke Dányálá rakkénán o tán bégáhá hamé johdá at ke chón áiá berakkénit.
DAN 6:15 Gorhá é mard padá yakjáh but o bádsháhay kerrá átkant o gwashtesh: “Bechár, oo bádsháh! Mád o Pársay kánun ent ke bádsháhay dashatt kortagén hecch hokm o parmán badal buta nakant.”
DAN 6:16 Gorhá bádsháhá hokm dát o Dányál árag o shéráni gárá dawr dayag but. Bádsháhá gón Dányálá gwasht: “Tai hamá Hodá wat tará berakkénát ke taw modám áiay hezmatá kanay.”
DAN 6:17 Padá sengé árag o gáray dapá ér kanag but. Bádsháhá gón wati jenday o wati mir o mehteráni mondrikkán gáray dap mohr jat tánke Dányálay jáwar badal but makant.
DAN 6:18 Padá bádsháh wati kalátá shot. Sajjahén shapá waráki nawárt o wáb nakapt. Áiay bárgáhá hecch paymén shátkámi kanag nabut.
DAN 6:19 Sohbá máhallah, anchó ke róchá thekk kort, bádsháh pád átk o zutt zuttá shéráni gáray némagá shot.
DAN 6:20 Wahdé gáray nazzikká raset, gón dardnákén tawáréá kukkári kort o gón Dányálá gwashti: “Oo Dányál! Oo zendagén Hodáay hezmatkár! Bárén tará tai hamá Hodáyá cha shérán rakként kort ke taw modám áiay hezmatá kanay?”
DAN 6:21 Gorhá Dányálá passaw dát: “Oo bádsháh! Modám zendag bátay.
DAN 6:22 Mani Hodáyá wati préshtagé ráh dát ke shéráni dapi bast. Shérán maná hecch táwán nadát. Oo bádsháh! Haminchok ke man Hodáay démá bégonáh án haminchok tai démá ham man hecch radén káré nakortag.”
DAN 6:23 Nun bádsháh sakk gal but o hokmi dát ke Dányál cha gárá dar kanag bebit. Gorhá Dányál cha gárá dar kanag but. Thappé ham peri néstat chéá ke áiá wati Hodáay sará tawkal kortagat.
DAN 6:24 Nun bádsháhá hokm dát o hamá mardom árag butant ke Dányálay helápá pandalesh sázetagat. Á gón jan o chokkán shéráni gárá dawr dayag butant. Angat gáray johlánkiá sar nabutagatant ke shérán geptant o áyáni sajjahén haddh próshtant.
DAN 6:25 Padá bádsháh Dáryushá pa sajjahén kawm, ráj o har zobánay mardomán ke téwagén sarzeminá jahmenend atant, nebeshtah kort: “Shomá géshá géshter émen bátét.
DAN 6:26 Man jára janán ke mani bádsháhiay har kondhay mardom, cha Dányálay Hodáay torsá belarzant o hamáiá sharap bedayant. Chéá ke hamá zendagén Hodá ent o modáma mánit. Áiay bádsháhi hechbar tabáh o barbáda nabit o áiay hokmráni hechbar halása nabit.
DAN 6:27 Hamá nejáta dant o rakkénit, ásmán o zeminay sará ajabbatén nesháni o mójezah pésha dárit. Hamáiá Dányál cha shéráni dapá rakkéntag.”
DAN 6:28 Nun é mard Dányálá, Dáryush o Pársén Kuroshay bádsháhi dawrá démrawi kort.
DAN 7:1 Bábelay bádsháh Belsházaray dawray awali sálá Dányálá wábé dist, wahdé wati nepáday sará tachk at, shobén o elhám áiay saray tahá chakarragá atant. Áiá wati wábay hásén habar nebeshtah kortant.
DAN 7:2 Dányálá gwasht: “Man shapá elhám o shobén gendagá atán o man dist ke ásmánay chárén gwátán mazanén daryá mast kort.
DAN 7:3 Padá chár baláhén jánwar cha daryáyá dar átk. Har yakkéay dróshom cha é degarán jetá at.
DAN 7:4 Awali, shéray dhawléné at o wakábi bánzoli per at. Man chamm sakk kortag o tán hamá wahdá cháragá atán ke eshiay bánzol gwajag butant o jendi cha zeminá chest kanag o mardoméay warhá do páday sará óshtárénag but o eshiá ensáni delé dayag but.
DAN 7:5 Padá dega jánwaré záher but, é domi, mammay dhawléné at o kash waptagat o say pahlugi dantánáni nyámá dapá at. Eshiárá gwashag but: ‘Pád á, watá cha góshtá sérláp kan.’
DAN 7:6 Eshiá rand, man angat cháragá atán o diston dega yakké, polangay dhawléné at o eshiay poshtá chár morgi bánzol per at. É jánwará chár sarag per at o hákemi ehtiáré eshiá dayag but.
DAN 7:7 Eshiá pad, man angat shapay elhám o shobénán gendagá atán o cháromi jánwaron dist. É torsnák, haybatnák o sakk zórmand at. Eshiá drájén ásenén dantán per at. Wati shekári prósht o ér bort o saráróki pádáni chérá lapáshtant. Cha á pésarigén sajjahén jánwarán jetá at o dah kánthi per at.
DAN 7:8 Man eshiay kántháni bárawá jérhagá atán, diston esháni nyámá dega kasánén kánthé dar átk o cha jánwaray awali kánthán say kánth eshiay démá cha boná gwajag but. Man dist ke é kánthá mardomi chammay paymén chamm per at o dapé per ati ke bathák janagá at.
DAN 7:9 Man angat cháragá atán ke bádsháhi taht árag o ér kanag butant o hamá ke cha zamánagán hastent, átk o nesht. Áiay póshák chó barpá o saray mud, pazhmay dhawlá espét atant. Áiay taht, ásay bránzé at o tahtay chahr warókén pádag, rókén ás atant.
DAN 7:10 Ásay kawré tachagá at o cha áiay bárgáhá dar áyagá at. Hazáráni hazár áiay hezmatá at o lakkáni lakk áiay démá óshtátagat. Diwán pa dádrasiá nesht o ketáb pach butant.
DAN 7:11 Hamá bathákán ke kánthesh janagá at, man áyáni sawabá angat é nedáragá cháragá atán. Tán hamá wahdá cháragá atán ke jánwar koshag but o áiay jón zawál kanag o rókén ásá dawr dayag but.
DAN 7:12 É dega jánwaráni hákemi pach gerag butagatant bale áyáni zendá lahtén róch gésh kanag but.
DAN 7:13 Man shapay elhámán cháragá atán ta diston, gón ásmáni jambarán ensáni chokkéay dhawléné áyagá at o hamáiay némagá pédák at ke cha zamánagán hastent o áiay démá árag o pésh kanag but.
DAN 7:14 Hákemi, shán o bádsháhi hameshiá dayag but ke sajjahén kawm o ráj o har zobánay mardom eshiay hezmatá bekanant. Eshiay hokmráni abadmánén hokmránié ke hechbar halása nabit o eshiay bádsháhi hechbar zawála nabit.
DAN 7:15 Mane Dányálay arwáh paréshán at. Mani del o damágay shobén o elhámán maná torsént.
DAN 7:16 Man cha hamáyán yakkéay kerrá shotán ke ódá óshtátagatant o joston kort ke é sajjahén chizzáni asli máná ché ent? Gorhá áiá gón man habar kort o maná esháni mánái sarpad kort.
DAN 7:17 ‘É chárén baláhén jánwar, donyáay chár bádsháh ant ke chesta bant.
DAN 7:18 Bale bádsháhi, borzén arshay Hodáay pákén mardomán dayaga bit o abad tán abad hamáyáni melkata bit.
DAN 7:19 Padá man cháromi jánwaray pakkáén máná zánag lóthet, hamá ke gón wati ásenén dantán o brenjén panjagán cha é dega sajjahénán jetá o sakk báz torsnákter at, hamá ke wati shekári prósht o ér bort o pasht kaptagéni pádáni chérá lapáshtant.
DAN 7:20 Man áiay saray dahén kántháni máná ham zánag lóthet o é dega kánthay máná ham ke randá rost o áiay démá cha áyán say kánth kapt, bezán hamá ke chamm o dapi per at o bathák janagá at o gendagá cha é degarán master at.
DAN 7:21 Man angat cháragá atán o á kánth gón pákén mardomán jangá at o áyán chérdast kanagá at,
DAN 7:22 tánke hamá átk ke cha zamánagán hastent o borzén arshay Hodáay pákénáni hakká dádrasii kort o hamá wahd raset ke é pákénán bádsháhi wati melkat kort.’
DAN 7:23 Gorhá áiá gwasht: ‘Cháromi jánwar, zeminay sará cháromi bádsháhié bit ke chó é dega sajjahén bádsháhiána nabit. É, sajjahén jaháná lagatmála kant, próshit o éria bárt.
DAN 7:24 Dahén kántháni máná esh ent ke cha é bádsháhiá dah bádsháh chesta bit o dega yakké cha eshán o rand chesta bit o é, pésarigénáni dhawléné nabit o say bádsháh prósha dant.
DAN 7:25 É, borzén arshay Hodáay helápá habara kant o áiay pákén mardomán ázára dant. Eshiay erádaha bit ke kánun o wahdán badal bekant o Hodáay pákén mardom pa wahdéá eshiay dastá dayaga bant, bezán tán wahdéá, wahdán o ném wahdá.
DAN 7:26 Bale diwán pa dádrasiá nendit. Áiay hákemi pach geraga bit o tán abad sarjamiá tabáh o barbád kanaga bit.
DAN 7:27 Padá bádsháhi, hákemi o ásmánay chéray sajjahén bádsháhiáni shawkat o mazani, borzén arshay Hodáay pákén mardomán dayaga bit. Hodáay bádsháhi abadi bádsháhié bit o sajjahén bádsháhi o molk, Hodáay hezmat o parmánbardáriá kanant.’
DAN 7:28 Habar hamedá halás but. Mane Dányál cha wati hayálán sakk paréshán bután o mani dém zard tarret. Bale man é gapp gón wat dásht.”
DAN 8:1 Bádsháh Belsházaray dawray sayomi sálá mane Dányálá dega elhámé but, cha áiá o rand ke maná pésará butagat.
DAN 8:2 Man wati elhámá dist ke Shushay kalátá án ke Ilámay damagá ent. Elhámá diston ke Uláyay kawray kashá án.
DAN 8:3 Padá man sar chest kort o cháret ta dokánthén gwarándhé kawray démá óshtátag. Kánthi dráj ant, bale yakké cha domiá drájter ent o drájterén kánth randterá rost.
DAN 8:4 Man dist ke é gwarándh rónendi, góricháni o zerbári némagá kánth janán ent o hecch jánwar áiay démá óshtáta nakant o kassá é twán nést ke cha áiay zórá yakkéá rakként bekant. Áiá har chizz wati delay tabá kort o maz‌anshán but.
DAN 8:5 Man ke sharriá pegr kort gorhá diston ta yakk páchené cha rónendi némagá pédák ent ke purah sajjahén zemini geptag bale pádi zeminá nalaggagá ant o chammáni nyámá ajabén kánthé per enti.
DAN 8:6 Á hamá gwarándhay kerrá átk ke do kánthi per at, hamá ke man kawray démá óshtagá distagat. Páchen áiay sará hezhm geptagat o gón sarjamén zórá áiay sará kapt.
DAN 8:7 Man dist ke á, dém pa gwarándhá pédák ent. Sakk hezhm geptag. Páchená gwarándh jat o doén kánthi próshtant. Gwarándhá áiay démá hecch zór mán néstat. Zeminay sará dawri dát o pádmáli kort. Kass néstat ke gwarándhá cha áiay zórá berakkénit.
DAN 8:8 Padá páchen sakk zóráwar but bale anchó ke wati zóráwariay borzádián sar but, mazanén kánthi prosht o áiay jágahá chár dega ajabén kánth rost ke démesh ásmánay chárén gwátáni némagá at.
DAN 8:9 Cha é kánthán yakkéay sará kasánén kánthé rost ke jonubi, ródarátki o zébáén molkay némagá rodán o sakk mazan bayán but.
DAN 8:10 É ásmáni lashkaray némagá rost o lashkaray bahré o lahtén estári zeminá dawr dát o pádmál kort.
DAN 8:11 Eshiá watárá lashkaray sáláray dhawlá mazan kort. Har róchigén korbánigi band kanáéntant o mazanén parasteshgáhi kamsharap kort.
DAN 8:12 Eshiay sarkasshiay sawabá ásmáni lashkar o har róchigén korbánig eshiay dastá dayag butant. Rástii zeminá dawr dát o har chizzi ke kort, kámyáb but.
DAN 8:13 Nun man eshkot pákéné habará ent. Dega pákénéá cha áiá jost kort: “É elhám, bezán har róchigén korbánig, tabahkárén sarkasshi, Hodáay pákén lógay chérdasti o lashkaray pádmál bayagay elhám o shobén tán kadéná barjáha mánit?”
DAN 8:14 Áiá passaw dát: “Tán do hazár o say sad sohb o bégáhá, randá parasteshgáh padá pák o barjáh kanaga bit.”
DAN 8:15 Wahdé mane Dányál shobéná cháragá atán, man sarpad bayagay johd kort ta diston ke mani démá chizzé óshtátag ke purah ensánéay dhawlá ent.
DAN 8:16 Man cha Uláyay kawray nyámá ensáni tawáré eshkot, gwánki jat o gwashti: “Oo Jebráil! É mardá shobénay mánáyá sarpad kan.”
DAN 8:17 Gorhá á mani nazzikká hamódá átk ke man óshtátagatán. Maná torsé jáná kapt o dém pa chér kaptán. Áiá maná gwasht: “Sarpad bay, oo ensánay chokk! Shobén halásiay wahday bárawá ent.”
DAN 8:18 Hamá wahdá ke á gón man habará at man dém pa chér wapt o sakk wáb kaptán. Áiá maná dast per kort o óshtárént.
DAN 8:19 Gwashti: “Bechár, man tará sarpada kanán ke gazabay goddhi wahdá ché bit. Harché ke taw distag halásiay gisshéntagén wahday bárawá ent.
DAN 8:20 Dokánthén gwarándh ke taw dist, Mád o Pársay bádsháháni nesháni ent.
DAN 8:21 Páchen, Yunánay bádsháhay nesháni ent o hamá baláhén kánth ke áiay chammáni nyámá at, awali bádsháh ent.
DAN 8:22 Hamá chárén kánthán ke proshtagén kánthay jágah gept, á chár bádsháhiay nesháni ant ke cha eshiay kawmá chesta bant bale eshiay dhawlén zór o wákesh góna nabit.
DAN 8:23 Áyáni dawray goddhi zamánagá, wahdé sarkasshi cha géshá géshtera bit, haybatnák o petnahsázén bádsháhé kayt.
DAN 8:24 É, sakk zórmanda bit bale cha wati jenday wáká na. Sakkén baláhén tabáhia kárit o harché ke kant, kámyába bit. É, zóráwar o pákén mardomán tabáha kant.
DAN 8:25 Pa hóshmandi pandala sázit o kámyába bit. Wati delá watá mazan sarpada bit. Bázéné sahig ham nabit o émeniá neshtagén jágahá tabáhesha kant. É, shahzádagáni shahzádagay helápá ham páda kayt bale jendi bé ensáni dastéá tabáh kanaga bit.
DAN 8:26 Sohb o bégáháni hamé shobén ke tará gwashag but, rást ent. Bale é shobéná rázé bekan chéá ke é hamá áyókén wahday rócháni bárawá ent ke angat sakk dur ant.”
DAN 8:27 Gorhá mane Dányálá, sakk dam bortagat o tán chizzé róchá nádráh bután. Randá padá pád átkán o bádsháhay kárán dazgatth bután bale maná shobéná hayrán kortagat o cha sarpadiay haddá dar at.
DAN 9:1 Dáryushe Hasháyársháhay dawray awali sálá, hamá ke zátá Mádé at o Bábeliáni molkay bádsháh but,
DAN 9:2 hamáiay dawray awali sálá mane Dányál, Pákén Ketábáni tahá sáláni hamá hesábá sharriá cháragá atán ke Hodáwandá wati labzay tahá gón Eremyá nabiá gwashtagat. Man dist ke Urshalimay tabáhi tán haptád sálá mánit.
DAN 9:3 Gorhá man wati dém Hodáwandén Hodáay némagá tarrént, dwá o peryát kort, róchag dásht, gónién god gwará kort o watá por per rétk.
DAN 9:4 Man wati Hodáwandén Hodáay kerrá dwá kort, gonáh mannetant o gwasht: “Oo Hodáwand! Oo mazan o bákamálén Hodá! Taw hamá Hodá ay ke wati ahd o karárá puraha kanay o gón hamáyán mehra kanay ke tará dósta dárant o tai parmánána mannant.
DAN 9:5 Má gonáh kortag, radén kár kortag, badkár o yági butagén o cha tai parmán o kánunán wati dém tarréntag.
DAN 9:6 Má tai hezmatkárén nabiáni habar ham gósh nadáshtag, hamá ke gón tai námá gón may bádsháhán, may rahbarán o may pet o pirénán o molkay sajjahén mardomán habaresh kortag.
DAN 9:7 Adl tai jendayg ent, oo Hodáwand! Bale má maróchán pashal o sarjahl én. Yahudáay mardom, Urshalimay jahmenend o sajjahén Esráil anchosh ent, hamá ke nazzikk o gwarán ant o hamá ke dur ant. É, taw sajjahén molkán galléntagant ke gón taw béwapáiesh kortag.
DAN 9:8 Oo Hodáwand! Má cha sharmendagiá sarjahl én, may bádsháh, shahzádag o may pet o pirén, chéá ke má tai gonahkár én.
DAN 9:9 Rahmat o pahelli gón may Hodáwandén Hodáyá ent bell toré má cha áiá yági butagén.
DAN 9:10 Má na wati Hodáwandén Hodáay parmánbardári kortag o na hamá Sharyatay hesábá gám jatag ke cha wati hezmatkárén nabiáni zobáná márá raséntagi.
DAN 9:11 Sajjahén Esráilá tai Sharyatay náparmáni kortag, démesh tarréntag o tai parmánbardári‌esh nakortag. Paméshká hamá nálat ke Hodáyá wati hezmatkárén Mussáay Sharyatay tahá wati námay sawgend wártag o ahd kortag, nun may sará kaptag chéá ke má Hodáay gonahkár butagén.
DAN 9:12 É dhawlá, taw wati hamá habar purah o sarjam kortagant ke taw may o may hokmránáni helápá kortagant. Taw may sará mazanén tabáhi áwortag. Chéá ke sajjahén ásmánay chérá hechbar choshén chizzé nabutag ke gón Urshalimá but.
DAN 9:13 Mussáay Sharyatá nebeshtagén sajjahén tabáhi may sará átkag, bale má angat wati Hodáwandén Hodáay rahm nalóthet o cha wati gonáhán per natarretén o tai rástiay némagá delgósh nakort.
DAN 9:14 Hamá mosibat ke Hodáwandá wati hayálá dáshtagat, nun may sará dawri dát chéá ke may Hodáwandén Hodá wati sajjahén kárán ádel ent bale angat má áiay gapp gósh nadáshtag.
DAN 9:15 Oo may Hodáwandén Hodá! É taw ay ke gón wati porzórén dastá wati kawm cha Mesrá dhanná áwort o pa wat anchén námé dar áwort ke tán maróchi hastent. Nun má gonáh kortag o radkár butagén.
DAN 9:16 Oo Hodáwand! Pa wati sajjahén adl o ensápá bechár o wati hezhm o gazabá cha wati shahr Urshalimá, cha wati pákén kóhá bethagalén. May gonáh o may pirénáni radkáriáni sawabá, sajjahén hamsáhegén kawm Urshalimá o tai kawmá kalága bandant.
DAN 9:17 Oo may Hodá! Nun wati hezmatkáray dwá o peryátá gósh dár. Pa watigi bechár o wati wayránén parasteshgáhay némagá wati démá rozhná kan, oo Hodáwand!
DAN 9:18 Oo mani Hodá! Wati delgóshá gón má kan o gósh dár, chammán shánk day o may o é shahray tabáhiá bechár ke é shahr cha tai námá pajjáh áraga bit. Chéá ke má wati pahrézkáriay sawabá cha taw dazbandia nakanén, tai mazanén rahmatay sawabá dazbandia kanén.
DAN 9:19 Oo Hodáwand! Gósh dár. Oo Hodáwand! Pahell kan. Oo Hodáwand! Delgósh kan o komakk kan. Oo mani Hodá! Pa watigi bechár, dér makan chéá ke tai shahr o kawm gón tai námá tawár kanaga bant.”
DAN 9:20 Nun wahdé man habar o dwá kanagá atán o wati jenday o wati Esráili kawmay gonáhán mannagá atán o pa Hodáay pákén kóhá, gón wati Hodáwandén Hodáyá peryát kanagá atán,
DAN 9:21 wahdé man angat dwá kanagá atán, Jebráil, hamá kas ke man wati pésarigén shobénay tahá distagat, bégáhá, korbánig kanagay wahdá bál kanán téziá mani kerrá átk.
DAN 9:22 Áiá maná sój dát o gwashti: “Oo Dányál! Man nun átkagán ke tará zánt o sarpadi bedayán.
DAN 9:23 Tai dwáyáni bongéjá passawé átkagat o man átkagán ke tará hál bedayán chéá ke taw Hodáyá sakk dóst ay. Gorhá passawá sharriá delgósh kan o shobéná sarpad bay.
DAN 9:24 Pa tai kawm o tai pákén shahrá haptád haptag gisshénag butag ke sarkasshi bekotthit, gonáh halás bebant, korbánig kanag o gonáháni táwán porr kanag bebit, abadi adl barjam bebit, shobén o paygambari mohr janag bebant o cha sajjahénán pákterén jágah rógen per moshag bebit.
DAN 9:25 Taw bezán o sarpad bay ke cha é hokmay áyagay wahdá ke Urshalim padá barjáh o addh kanag bebit, tán ‘rógen per moshtagén’ shahzádagay áyagá, hapt haptag o shast o do haptaga gwazit. Urshalim, padá gón ápráhá o damk o gallián addh kanaga bit, bale paréshániáni zamánagá.
DAN 9:26 Randá, shast o do haptagá pad, hamá ‘rógen per moshtagén’ koshaga bit o áiay kerrá hecch pashta nakapit. Áyókén hokmránay mardom shahr o mazanén parasteshgáhá tabáha kanant, bale áiay jenday tabáhi chó háréá kayt. Jang tán godhsará barjáha mánit o tabáhiáni shawr borrag butag.
DAN 9:27 Yakké kayt o gón bázénéá tán haptagéá mohkamén ahdé kant, bale haptagay nyámá korbánig o hayrátán banda kant. Paliti o bazzhnákiay bánzolay sará bérán kanóké kayt, tán wahdé ke hamá ákebat ke pa áiá gisshénag butag, áiay sará kapit.”
DAN 10:1 Pársay bádsháh Kuroshay dawray sayomi sálá Dányálá, ke Beltesházaray námá ham zánaga but, elhám raset. Elhámay paygám rást at o baláhén jangéay bárawá at. É paygámay máná áiá shobénéay tahá raset.
DAN 10:2 Á róchán, mane Dányál tán purahén say haptagá porsig atán.
DAN 10:3 Man hecch wasshén waráka nawárt. Gósht o sharáb dap pera nakort, rógen pera namosht tánke é sayén haptag gwastant.
DAN 10:4 Awali máhay bist o cháromi róchá wahdé man mazanén kawr, Dejlahay lambá atán,
DAN 10:5 man wati chamm chest kortant, ta dist mardé lilomén godi gwará o lánká cha Upázi teláhá addh kortagén kamarbandé bastagi.
DAN 10:6 Áiay badan purah teláhrangén ákuté at o démi chó geróká shahm dayagá at. Chammi gwashay rókén mashal atant. Dast o pádi moshtagén brenjay dhawlá drapshagá atant o tawári chó mardománi mazanén rombéay tawárá at.
DAN 10:7 Tahná mane Dányálá é shobén dist, mani hamráhán nadist, bale baláhén torsé áyáni jáná kapt o pa wati chér dayagá tatkant.
DAN 10:8 Gorhá man tahná bután o é mazanén shobéná cháragá atán, mani wák o twán halás but, mani démay rang zard tarret o mani tahá hecch wák o twáné pasht nakapt.
DAN 10:9 Nun man áiay tawár eshkot o anchó ke man é tawár eshkot, dém pa chér wapt o sakk wáb kaptán.
DAN 10:10 Padá dastéá maná dast jat, chesti kort o maná larzókén dast o kóndháni sará óshtárénti.
DAN 10:11 Maná gwashti: “Oo Dányál! Oo sharapmandén mard! Harché ke gwashán, mani habará sarpad bay. Pád á, chéá ke man nun pa taw dém dayag butagán.” Wahdé áiá é habar kortant, man larzáná pád átkán.
DAN 10:12 Padá mardá maná gwasht: “Mators, Dányál! Hamá awali róchá ke taw wati del pa sarpad bayag o wati Hodáay dargáhá békebr bayagá dátag, tai dwá gósh dárag butag o man tai habaráni sawabá átkagán.
DAN 10:13 Bale Pársay bádsháhiay shahzádagá tán bist o yakk róchá mani dém dásht. Bale randá Mikáil ke cha masterén préshtagán yakké, mani komakká átk chéá ke man ódá Pársay bádsháháni kerrá gatthetagatán.
DAN 10:14 Nun man tai sarpad kanagá átkagán ke gón tai kawmá démterá ché bit, chéá ke shobén áyókén wahday bárawá ent.”
DAN 10:15 Wahdé á gón man é habarán kanagá at, man wati sar jahl kort o hecch gwasht nakort.
DAN 10:16 Purah ensánay dhawlénéá mani lonth dast per kortant. Gorhá man wati dap pach kort o gón hamáiá ke mani démá óshtátagat, habar kanagá laggetán. Gwashton: “Oo mani wájah! É shobéná maná sakk padard kortag o hecch zór o wákon nést.
DAN 10:17 Man, tai hezmatkár, chón gón taw habar korta kanán, mani wájah? Mani wák o twán shotag o pa zóré dam kasshagá án.”
DAN 10:18 Hamá ke ensánéay dhawlá at, maná padá dasti jat o zórmandi kort.
DAN 10:19 Gwashti: “Mators, sharapmandén mard! Émen bátay. Dhaddh bay. Mohkam bay.” Anchó ke á gón man habar kanagá at, man dhadhter bután o gwasht: “Mani wájah! Gón man habar kan, chéá ke taw maná zór bakshátag.”
DAN 10:20 Gorhá gwashti: “Taw zánay man chéá tai kerrá átkagán? Man zutt pera tarrán ke gón Pársay shahzádagá jang bekanán o wahdé mana rawán, Yunánay shahzádaga kayt.
DAN 10:21 Bale awalá tará gwashán ke rástiay ketábá ché nebeshtah ent. Shomay shahzádag Mikáilá abéd, dega kass nést ke esháni démá maná zórmand bekant.
DAN 11:1 Mádén Dáryushay dawray awali sálá man pa Mikáilay zórmand kanag o negahpániá áiay kerrá óshtátán.
DAN 11:2 Nun man tará rástén habará gwashán. Bechár, Pársá dega say bádsháh páda kayt, padá cháromi bádsháhé kayt ke cha é dega sajjahénán géshter máldár o hastómanda bit. Anchó ke á wati mál o hastiay sawabá zórmanda bit, á, sajjahén mardomán pa Yunánay bádsháhiay dozhmeniá páda kant.
DAN 11:3 Randá zórmandén bádsháhé chesta bit. Á, gón mazanén zór o wáké hokmránia kant o harché ke delia lóthit, kant.
DAN 11:4 Bale pád áyagá rand, áiay bádsháhi próshag o dém pa ásmánay chárén gwátán bahr kanaga bit, bale na áiay nasl o padréchá rasit o na á pésari zóri mána bit ke áiay wati jendá butag. Áiay bádsháhi cha boná gwajag o degarán dayaga bit.
DAN 11:5 Padá jonubay bádsháh zórmanda bit, bale áiay yakk sáláré cha áiay jendá ham zórmandtera bit o gón mazanén wákéá shomálá molké addha kant o wati molká hokmránia kant.
DAN 11:6 Lahtén sálá pad, ahd o karáre bandant. Jonubay bádsháhay jenekk shomálay bádsháhay kerrá pa ahd o karár bandagá rawt. Bale jenekkay zór o kodrat pashta nakapit o shomálay bádsháhay zór ham namánit. Á róchán, bádsháhay jenekk gón wati hamráhán, wati petá o komakkárá hawár dróhag o dozhmenáni dastá dayaga bit.
DAN 11:7 Cha jenekkay hándáná kasé páda kayt o jonubay bádsháhay jágahá gipt. Á, shomálay bádsháhay pawjay sará orosha kant o áiay kalátá poterit. Áyáni helápá janga kant o sóbéna bit.
DAN 11:8 Á, esháni botén hodá, cha ásá dar áwortagén bot o teláh o nograhay gránbaháén darpán áwára jant o gón wat Mesrá bárt. Démterá pa lahtén sálá á, shomálay bádsháhay kárá kára nadárit.
DAN 11:9 Nun shomálay bádsháh jonubay bádsháhay molkay sará orosha kant bale padá wati molká wátarra bit.
DAN 11:10 Áiay bachakkén chokk jangay chen o lánchá kanant o baláhén pawjé yakjáha kanant, é pawj démá kenzána kant ke chó tuppánén háréá sara rechit o jangá tán dozhmenay kalátá démá bárt.
DAN 11:11 Jonubay bádsháh hezhma gipt, shomálay bádsháhay démá dara kayt o gón áiá janga kant. Nun shomálay bádsháh baláhén pawjé yakjáha kant, bale é pawj, jonubay bádsháhay dastá prósha wárt.
DAN 11:12 Cha é pawjay prósh dayagá rand, jonubay bádsháh gorunáka bit o hazárán mardoma koshit bale angat báládasta nabit,
DAN 11:13 chéá ke shomálay bádsháh nun cha pésará masterén pawjé yakjáha kant o lahtén sálá pad, gón wati masterén pawj o bázén jangi sámánán wátarra kant.
DAN 11:14 Á zamánagá, bázéné jonubay bádsháhay dozhmeniá páda kayt. Tai jenday kawmay sheddatién mardom é shobénay purah o sarjam kanagá páda káyant bale prósha warant.
DAN 11:15 Padá shomálay bádsháha kayt, kalátbandén shahréay chapp o chágerdá sangara bandit o shahrá gipt. Jonubi pawj béwasa bit. Tantaná áyáni sharterén pawj ham esháni démá óshtáta nakanant.
DAN 11:16 Shomálay bádsháh orosha kant o hamá paymá kant ke wati delia lóthit. Kass áiay démá óshtáta nakant. Á zébáén molká óshtit o cha áiay dastá tabáhia bit.
DAN 11:17 Nun á erádaha kant ke gón wati sajjahén bádsháhiay zórá byayt o gón jonubay bádsháhá ahd o karár bebandit. Wati jenekké ham gón áiá árósa dant ke jonubay bádsháhiá bepróshit bale áiay é hayál sóbéna nabit o é kár démá narawt.
DAN 11:18 Nun shomálay bádsháh wati delgóshá gón tayábdapána kant o bázén zeminé gipt. Bale sáláré áiay gorunáki o béparwáhiá halása kant o áiay gorunákiá pa áiay jendá pera tarrénit.
DAN 11:19 Gorhá á, démá gón wati jenday molkay kalátána kant bale lakoshit o kapit o padá hecch jágah gendaga nabit.
DAN 11:20 Padá áiay jágahá dega yakké kayt o song o máliátgiré rawána dant tánke wati molkay shán o shawkatá barjam bedárit, bale lahtén róchá rand é bádsháh, bé jang o sheddatéá, wat barbáda bit.
DAN 11:21 Eshiay jágahá anchén bazzhnákén mardomé kayt ke áiá hecch paymén bádsháhi sharap dayag nabutagat. É pa árámia kayt o pa repk o pandalé bádsháhiá gipt.
DAN 11:22 Eshiay démá baláhén pawjé rópag o prósh dayaga bit o gón é pawjá yakjáh ahd o karáray shahzádagé ham tabáha bit.
DAN 11:23 Cha hamá wahdá ke gón eshiá ahd o karáre bandaga bit, é chérokái wati paymá kára kant. Mardomi báza nabant, bale báládasta bit.
DAN 11:24 Pa árámi molkay sérterén bahrána poterit o anchén kára kant ke eshiay hapt poshtá nakortag. É wati hamráháni nyámá poletagén mál o áwár o dawlat bahra kant. Tán kasánén wahdéá pa kalátáni geragá pandala sázit.
DAN 11:25 Mazanén o sakkén porzórén pawjé zurit o pa jonubay bádsháhay prósh dayagá wati zór o tawkalá shórénit. Jonubay bádsháh ham baláhén o porzórén pawjé zurit o janga kant bale óshtáta nakant ke áiay helápá pandal sázaga bant.
DAN 11:26 Hamá ke cha bádsháhá lápa gerant o warant, hamá áiay barbád kanagay johdá kanant. Áiay pawj prósha wárt o jangá bázéné koshaga bit.
DAN 11:27 Doén bádsháh, pa badniyati yakkén parzónaga nendant o gón yakdomiá dróga bandant bale kámyába nabant chéá ke halási, gisshetagén wahdá kayt.
DAN 11:28 Shomálay bádsháh gón mazanén mál o dawlatéá wati molká pera tarrit bale deli pákén ahd o karáray helápá bit. É wati kárá kant o molká wátarra bit.
DAN 11:29 Gisshetagén wahdá, padá dém pa jonubá dara kapit, bale é goddhi randá péshigén warhá nabit,
DAN 11:30 chéá ke Kittimay lánch áiay dozhmeniá káyant. Paméshká á delprósha bit o wátarra kant o pákén ahd o karáray dozhmeniá hezhma gipt. Pera tarrit o pa hamáyán mehrabána bit ke pákén ahd o karárá namannant.
DAN 11:31 Áiay pawj jáha jant, mazanén parasteshgáhá, hamá mohrén kalátá palita kant, har róchigén korbánigán banda kant o ‘palit o bérán kanókén bazzhnáká’ hamódá éra kant.
DAN 11:32 Pa cháplusi hamá mardomán sell o palita kant ke ahd o karáray helápá káresh kortag, bale hamá mardom ke wati Hodáyá sharriá pajjáha kárant, áiay démá mohra óshtant.
DAN 11:33 Hamá ke dáná ant, bázénéá sar o sója dayant, bell toré pa kasánén moddatéá é mardom gón zahmá koshaga bant, pa ás sóchaga bant, bandig o lotth o pol kanaga bant.
DAN 11:34 Wahdé kapant, kammén komakesha rasit o bázéné pa badniyati áyáni hamráha bit.
DAN 11:35 Cha dánáyán ham lahténa lakoshit tánke é dhawlá é mardom tán halásiay wahdá pák o palgár o béayb kanag bebant chéá ke é wahd, wati gisshetagén zamánagá kayt.
DAN 11:36 Padá bádsháh wati delay tabá kára kant o watá cha sajjahén hodáyán borzter o pormarhátera gendit o hodáyáni Hodáay helápá anchén habara kant ke mardom hayrána bant. Tán hamá wahdá kámyába mánit ke gazabay wahd sarjam nabutag. Hamá chizz ke bayagi ant, allama bant.
DAN 11:37 Á, pa wati petáni hodáyán hecch parwáha nadárit o janénáni wáhagay parwáhá ham nakant. Pa é dega hodáyán ham parwáha nadárit, chéá ke á, watá cha é sajjahénán borztera kant.
DAN 11:38 Esháni badalá kalátáni hodáyá ezzata dant, anchén hodáé ke áiay pet o pirokán hechbar nazántag. Á, eshiá gón teláh, nograh o gránbaháén seng o kimmatién chizzán sharapa dant.
DAN 11:39 Darámadén hodáéay komakká mohr o mohkamén kalát fi eáni sará orosha kant. Hamá ke áiá mannant, áyán mazanén sharapa dant o bázén mardoméay sará hokmránesh jórha kant o zeminá áyáni nyámá pa théki bahra kant.
DAN 11:40 Padá halásiay wahdá, jonubay bádsháh áiay sará orosha kant o shomálay bádsháh jonubay bádsháhay sará tuppánéay dhawlá gón arrábah, asptách o bázén lánchéá mána rechit. Bázén molkéay sará orosha kant o cha ódá chó tuppánéá gwazit.
DAN 11:41 Á, zébáén molkay sará ham orosha kant o bázén molké prósha wárt bale Edum, Muáb o Ammunay masterén mardom cha áiay dastá rakkant.
DAN 11:42 Padá á wati dastá pa é dega molkáni geragá drája kant o Mesr ham narakkit.
DAN 11:43 Mesray sohr o nograhay hazánag o sajjahén gránbaháén chizzán wati dastay chérá kárit. Libiái o Kushi áiay pádáni chérá bant.
DAN 11:44 Bale cha ródarátk o shomálá áyókén hál, áiá torsénant, sakk hezhma gipt o pa bázénéay barbád o gár kanagá dara kayt.
DAN 11:45 Á wati bádsháhi tambuán daryáyáni darnyámá, zébáén pákén kóhay lambá jant o é paymá wati goddhi ásará sara bit o kass pa áiay komakká nayayt.
DAN 12:1 Á wahdá Mikáil, hamá mazanén shahzádag ke tai mardománi negahpániá kant, jáha jant. Anchén paréshániay wahdé bit ke kawmáni bongéjá beger tán á zamánagá hechbar nabutag. Bale á wahdá tai hamá sajjahén mardom ke áyáni nám ketábá nebeshtah ent, rakkénaga bant o
DAN 12:2 bázéné ke zeminay hákáni tahá wáb ent, jáha jant, lahtén pa abadmánén zendá o lahtén pa pashali o abadmánén kamsharapiá.
DAN 12:3 Hamá ke dáná ant, chó ásmánay kobbahay rozhnáiá drapshant o hamá ke bázénéá pahrézkáriay némagá kárant, abad tán abad chó estárán rozhná bant.
DAN 12:4 Bale taw, oo Dányál, é habarán rázé bedár o ketábá tán halásiay wahday áyagá mohr bejan. Bázéné edá o ódá rawt o zánag cha géshá géshtera bit.”
DAN 12:5 Padá mane Dányálá cháret o dist ke dega do kas ant, yakké kawray é dastá óshtátag o domi kawray á dastá.
DAN 12:6 Yakkéá gón hamé lilompóshén mardá ke kawray ápay sarborá at, gwasht: “É ajabbatén kár chinchok wahdá sarjama bant?”
DAN 12:7 Gorhá man hamá lilompóshén marday tawár eshkot ke kawray ápay sarborá at. Áiá wati rástén o chappén dast ásmánay némagá chest kortant o hamáiay sawgendi wárt ke tán abad zendag ent. Gwashti: “Wahdéá, wahdán o ném wahdá o rand sarjama bit, hamá wahdá ke Hodáay pákén mardománi zór o wáka proshit. Nun é sajjahén chizz purah o sarjama bant.”
DAN 12:8 Man eshkot bale sarpad nabután, gorhá gwashton: “Oo mani wájah! É sajjahén chizzáni ásar ché bit?”
DAN 12:9 Áiá passaw dát: “Wati ráhá beraw, Dányál! Chéá ke é habar tán halásiay wahdá ráz ant o mohr janag butagant.
DAN 12:10 Bázéné watá sáp o bépólenga kant o palgáraga bit, bale á ke badkár ant wati badkáriá démá barant. Hecch badkár sarpada nabit bale dáná sarpada bant.
DAN 12:11 Cha hamá wahdá ke har róchigén korbánig band kanag o ‘palit o bérán kanókén bazzhnák’ mekk kanaga bit, yakk hazár o do sad o nawad rócha bit.
DAN 12:12 Bahtáwar hamá ent ke wadára kant o tán yakk hazár o say sad o si o panch róchá rasit.
DAN 12:13 Bale taw wati ráhá beraw tán halásiay wahd byayt. Taw áráma kanay o padá, halásiay wahdá pa wati ásar o ákebatá jáha janay.”
MAT 1:1 Issá Masih, Dáud o Ebráhémay chokk ent. Áiay béh o bonyád é dhawlá ent:
MAT 1:2 Ebráhémay chokk Esák at, Esákay chokk Ákub, Ákubay chokk Yahudá o áiay brát atant.
MAT 1:3 Yahudáay chokk Páres o Zárah atant o áyáni mátay nám Támár at. Páresay chokk Hesrun, Hesrunay chokk Aram,
MAT 1:4 Aramay chokk Aminádáb, Aminádábay chokk Nahshun, Nahshunay chokk Salmun,
MAT 1:5 Salmunay chokk Buáz ke mátay námi Raháb at, Buázay chokk Óbayd, ke mátay námi Rut at, Óbayday chokk Yassi,
MAT 1:6 Yassiay chokk bádsháh Dáud. Dáuday chokk Solaymán, ke máti pésará Uriáay lógi butagat,
MAT 1:7 Solaymánay chokk Rehóbám, Rehóbámay chokk Abiá, Abiáay chokk Ásá,
MAT 1:8 Ásáay chokk Yehushápát, Yehushápátay chokk Yurám, Yurámay chokk Ozziá,
MAT 1:9 Ozziáay chokk Yutám, Yutámay chokk Áház, Áházay chokk Hezekiá,
MAT 1:10 Hezekiáay chokk Manasi, Manasiay chokk Ámun, Ámunay chokk Yusiá,
MAT 1:11 Yusiáay chokk Yakóniá o áiay sajjahén brát. Hamé wahdá Yahudi darándhéh kanag o Bábelá barag butant.
MAT 1:12 Bábelá darándhéh bayagá rand é mardom pédá butant: Yakóniáay chokk Shyáltél, Shyáltélay chokk Zerubábel,
MAT 1:13 Zerubábelay chokk Abihud, Abihuday chokk Elyákim, Elyákimay chokk Ázur,
MAT 1:14 Ázuray chokk Saduk, Sadukay chokk Ákim, Ákimay chokk Elihud,
MAT 1:15 Elihuday chokk Eliázar, Eliázaray chokk Mattán, Mattánay chokk Ákub,
MAT 1:16 Ákubay chokk Issop, Maryamay mard. Cha Maryamá Issá pédá but ke Masihay námá zánaga bit.
MAT 1:17 É dhawlá, cha Ebráhémá beger tán Dáudá chárdah posht o cha Dáudá beger tán Yahudiáni darándhéh bayag o Bábelá rawagá dega chárdah posht o cha darándhéhiá beger tán Issá Masihá ham chárdah posht ant.
MAT 1:18 Issá Masihay pédáesh é dhawlá at: Issáay mát Maryamay habarsendi gón Issopá butagat, bale cha áyáni sur o árósá pésar, zánag but ke Maryam cha Hodáay Pákén Ruhay barkatá lápporr ent.
MAT 1:19 Maryamay deshtár Issop rást o pahrézkárén mardomé at, nalótheti ke Maryamá bannám bekant, paméshká wati delá gwashti ke chérokái é sángá próshán.
MAT 1:20 É bárawá angat pegr kanagá at ke Hodáwanday préshtagé áiay wábá átk o gwashti: “Issop, oo Dáud bádsháhay chokk! Maryamay zuragá mators, chéá ke áiá é lápporri cha Pákén Ruhá rasetag.
MAT 1:21 Maryam chellaga bit o mardénchokké kárit. Chokkay námá Issá bekan, chéá ke á wati kawmá cha áyáni gonáhána rakkénit.”
MAT 1:22 É sajjahén kár butant o é dhawlá hamá habar rást o sarjam butant ke Hodáwandá cha nabiay zobáná gwashtagant:
MAT 1:23 Neshtagén jenekkéay láp porra bit. Á chellaga bit o mardénchokké kárit o chokkay námá Emánuila kanant, ke eshiay máná “Hodá gón má” ent.
MAT 1:24 Wahdé Issop cha wábá pád átk, hamá dhawlá ke Hodáwanday préshtagá hokm dátagat, wati jani zort,
MAT 1:25 bale tán á wahdá ke chokk pédá nabutagat, gón áiá wapt o wábi nakort o chokkay námi Issá kort.
MAT 2:1 Bádsháh Hirudisay ahd o zamánagá, wahdé Issá Yahudiahay damagay shahr Bayt-Lahemá pédá butagat, gorhá cha ródarátká lahtén estárzánt Urshalimay shahrá átk.
MAT 2:2 Jostesh gept: “Hamá nonnok ke pa Yahudiáni bádsháhiá pédá butag, kojá ent? Má áiay estár dar áyagá distag o pa áiay sojdah kanagá átkagén.”
MAT 2:3 Cha é habaray eshkonagá Hirudis bádsháh sakk paréshán but o Urshalimay sajjahén mardom ham paréshán butant.
MAT 2:4 Hirudisá kawmay sajjahén dini péshwá o Sharyatay zánóger lótháént o jost geptant ke Masihay pédáesh kojá bit?
MAT 2:5 Áyán passaw dát: “Yahudiahay shahr Bayt-Lahemá, chéá ke nabiay ketábá nebeshtah ent:
MAT 2:6 ‘Oo Yahudáay shahr Bayt-Lahem! Taw Yahudáay hákemáni nyámákasterén naay, chéá ke cha taw hákemé pédá bit o á mani kawm Bani Esráilay shepánkiá kant.’”
MAT 2:7 Gorhá Hirudisá estárzánt chérokái lótháéntant o á estáray dar áyagay pakkáén wahdi jost kort.
MAT 2:8 Randá áiá estárzánt Bayt-Lahemá ráh dátant o gwashti: “Berawét o é chokkay bárawá sharr jost o pors bekanét. Wahdé shomá dar gétk, maná sahig bekanét ke man ham berawán o áiá shojdah bekanán.”
MAT 2:9 Bádsháhay habaráni eshkonagá rand, estárzánt ráh geptant. Hamá estár ke áyán dar áyagá distagat, áyáni démá pésh kapán at o hamá jágahay sarborá óshtát ke nonnok ódá at.
MAT 2:10 Gón estáray gendagá, á galá bál butant.
MAT 2:11 Hamá lógá shotant o chokk o áiay mát Maryamesh distant. Kóndhán kaptant o chokkesh sojdah kort, kimati chizzáni dhabbahesh pach kortant o sohr o konderk o morresh pa nonnoká sawgát kort.
MAT 2:12 Randá, Hodáyá wábá á hozzhár kortant ke Hirudisay kerrá per matarrant. Gorhá cha dega ráhé wati molká shotant.
MAT 2:13 Estárzántáni per tarragá rand, Hodáwanday préshtagé Issopay wábá átk o gwashti: “Pád á, chokk o chokkay mátá bezur o Mesrá betach. Tán man tará nagwashán hamódá bedár, chéá ke Hirudisá erádah kortag ke chokká dar begéjit o bekoshit.”
MAT 2:14 Gorhá Issop pád átk, chokk o chokkay máti zortant o hamá shapá dém pa Mesrá shot.
MAT 2:15 Tán Hirudisay marká hamódá mantant o é dhawlá hamá habar rást o sarjam but ke Hodáwandá cha nabiay zobáná gwastagat: Man wati bacch cha Mesrá lótháént o áwort.
MAT 2:16 Wahdé Hirudis sarpad but ke estárzántán maná rad dátag, sakk zahr gept. Parmáni dát: “Bayt-Lahem o kerr o gwaray sarjamén damagay sajjahén do sálig o kasterén mardénchokk koshag bebant.” Chokkáni é omray hesáb áiá estárzántáni gappáni bonyádá jat.
MAT 2:17 É dhawlá Eremyá Nabiay kortagén é habar rást o sarjam but:
MAT 2:18 Cha Rámahay shahrá kukkáré góshán kapt, mótko zárié mazanén, Ráhilá pa wati chokkán grét, nalótheti ke kasé áiá tasallá bedant, chéá ke chokk namantagatant.
MAT 2:19 Hirudisay marká rand, Mesrá Hodáwanday préshtagé Issopay wábá átk.
MAT 2:20 Préshtagá gwasht: “Pád á, chokk o chokkay mátá bezur o wati molk Esráilá per betarr, chéá ke hamá mardom ke chokkay koshagay randá atant, mortagant.”
MAT 2:21 Gorhá Issop pád átk o chokk o chokkay máti zortant o padá Esráilay molká átk.
MAT 2:22 Bale wahdé sahig but ke Hirudisay jáhá áiay chokk Arkeláus Yahudiahay bádsháh ent, gorhá óday rawagi torset. Wahdé wábéay tahá Issop habardár kanag but, padá Jalilay damagá shot.
MAT 2:23 Ódá, Náserah námén shahreá jahmenend but o é dhawlá nabiáni habar rást o sarjam but ke á chokk Náseri gwashaga bit.
MAT 3:1 Á róchán, pákshódi dayókén Yahyá átk o Yahudiahay gyábáná jári perrént:
MAT 3:2 “Tawbah bekanét, chéá ke ásmáni bádsháhi átkag o sar butag.”
MAT 3:3 Yahyá hamá ent ke Eshayá nabi áiay bárawá gwashit: Gyábáná kasé gwánka jant: “Hodáwanday ráhá tayár bekanét, Hodáwanday keshkán rást o tachk bekanét.”
MAT 3:4 Yahyáyá cha oshteray mudán gwaptagén póshák gwará at o póstén kamarbandé lánká at. Áiay ward o warák madag o gyábáni bénag at.
MAT 3:5 Urshalimay nendók, Yahudiahay sarjamén damagay mardom o Ordonay kawray kerr o gwaray sajjahén jahmenend áiay kerrá shotant.
MAT 3:6 Wati gonáhesh mannetant o Yahyáyá Ordonay kawrá á pákshódi dátant.
MAT 3:7 Wahdé Yahyáyá dist ke bázén Parisi o Sadukié pákshódi geragá mani kerrá áyagá ent, gón áyán gwashti: “Oo syahmárzádagán! Kayá shomárá gwashtag ke cha áyókén kahr o gazabá tatka kanét?
MAT 3:8 Anchén kár bekanét ke cha áyán záher bebit ke shomá tawbah kortag.
MAT 3:9 Cha wati delá é hayálá dar bekanét ke Ebráhém may pet ent. Man shomárá gwashán ke Hodá cha é sengán ham pa Ebráhémá chokk o awlád pédá korta kant.
MAT 3:10 Nun tapar tayár ent ke drachkán cha boná begoddhit o har drachké ke sharrén bara nayárit, goddhag o ásá dawr dayaga bit.
MAT 3:11 Man pa shomay gonáháni pashómániá, shomárá gón ápá pákshódia dayán, bale hamá ke cha man o randa kayt, cha man zórmandter ent o man áiay kawsháni chest kanagay láhek ham naán. Á shomárá gón Pákén Ruh o ásá pákshódia dant.
MAT 3:12 Áiá hanshóné dastá ent o jóháná sapá kant. Dánán ambárá éra kant o pog o palárán anchén áséá sóchit ke hechbara namerit.”
MAT 3:13 Gorhá Issá cha Jalilay damagá dar átk o Ordonay kawrá shot ke Yahyá áiá pákshódi bedant.
MAT 3:14 Bale Yahyáyá johd kort ke áiá pa é kárá maylit. Gwashti: “Báyad ent man cha taw pákshódi begerán, bale taw pákshódi geragá mani gwará káay?”
MAT 3:15 Issáyá gwasht: “Annun bell ke anchosh bebit, é paymá Hodáay wáhag o razáyá sarjama kanén.” Gorhá áiá mannet o Issái pákshódi dát.
MAT 3:16 Wahdé Issáyá pákshódi gept o cha ápá dar átk, anágat ásmánay dap pach but o Hodáay Pákén Ruhi dist ke kapótéay shekl o dróshomá ér átk o mani sará nesht.
MAT 3:17 Cha ásmáná tawáré átk: “É mani dóstigén Bacch ent o man cha eshiá sakk wassh o razá án.”
MAT 4:1 Randá Pákén Ruhá Issá gyábáná bort ke Shaytán áiá bechakkásit.
MAT 4:2 Chell shap o chell róch róchag dáragá rand Issá gozhnag but.
MAT 4:3 Gorhá Shaytán pa áiay ázmáesh kanagá átk o gwashti: “Agan taw Hodáay Chokk ay, é sengán begwash nagan bebant.”
MAT 4:4 Issáyá passaw dát: “Pákén Ketábá nebisag butag: ‘Mardom tahná pa nán zendaga nabit, cha Hodáay zobánay sajjahén habaráni mannagá zendaga bit.’”
MAT 4:5 Padá Shaytáná Issá pákén shahr Urshalimá bort o mazanén parasteshgáhay diwálay borzterén jágahá óshtárént o
MAT 4:6 gwashti: “Agan taw Hodáay Chokk ay, gorhá watá cha edá jahlá dawr beday, chéá ke nebisag butag: Hodá tai bárawá wati préshtagán hokma kant o á tará wati dastáni delá dárant ke tai pád dhókéá malaggit.”
MAT 4:7 Issáyá gwasht: “Haw, bale chosh ham nebisag butag: Wati Hodáwandén Hodáyá ázmáesh makan.”
MAT 4:8 Padá Shaytáná Issá sakkén borzén kóhéay sará bort o cha ódá donyáay sajjahén bádsháhi o áyáni shán o shawkati pésh dáshtant o
MAT 4:9 gwashti: “Agan taw mani démá kóndhán bekapay o maná sojdah bekanay, man é sajjahénán tará dayán.”
MAT 4:10 Issáyá gwasht: “Oo Shaytán! Cha mani démá gom bay! Pákén Ketábá nebisag butag: Wati Hodáwandén Hodáay parasteshá bekan o tahná hamáiay hezmatá bekan.”
MAT 4:11 Gorhá Shaytáná Issá yalah dát o shot. Nun préshtag átkant o Issáay hezmatesh kort.
MAT 4:12 Wahdé Issá sahig but ke Yahyá dazgir kanag butag, gorhá Jalilá shot.
MAT 4:13 Náserahay shahri yalah dát o Kaparnáhumay shahrá jahmenend but. Kaparnáhum, Jalilay Mazangwarmay kerrá, Zebulun o Naptáliay kabilaháni damagá ent.
MAT 4:14 É dhawlá Eshayá nabiay kortagén é habar rást o sarjam but:
MAT 4:15 Zebulun o Naptáliay damagá, gwarmay kashay mazanráhay sará, Ordonay kawray á dastá, Jalilay hamá hand o damagá ke darkawm jahmenend ant,
MAT 4:16 hamá mardom ke taháriá neshtagant, áyán mazanén rozhné dist o hamá molká ke ódá mark sáhélent, óday jahmenendáni sará rozhné tálán but.
MAT 4:17 Cha hamá wahdá Issáyá é járay janag bongéj kort. Gwashti: “Cha wati gonáhán pashómán bebét o tawbah bekanét, chéá ke ásmáni bádsháhi átkag o sar butag.”
MAT 4:18 Wahdé Issá Jalilay Mazangwarmay lambá tarragá at, do bráti dist, Shamun ke domi námi Petros at o áiay brát Andriás. Áyáni kár máhigiri at o á wahdá pa máhigiriá wati dám o máhórán gwarmá dawr dayagá atant.
MAT 4:19 Issáyá gón áyán gwasht: “Byáét, mani randgiriá bekanét o man shomárá anchosha kanán ke máhig geragay badalá, mardománi delán shekára kanét.”
MAT 4:20 Áyán hamá damáná wati dám yalah dátant o áiay hamráh butant.
MAT 4:21 Wahdé kammé démá shot, dega do bráti dist, Zebdiay chokk Ákub o Yuhanná ke bójigá gón wati pet Zebdiá neshtagatant o wati máhórán sráchag o sharr kanagá atant. Issáyá doén gwánk jatant.
MAT 4:22 Áyán ham hamá damáná wati pet gón bójigá yalah dát o áiay hamráh butant.
MAT 4:23 Issáyá sajjahén Jalilá tarr o garda kort. Áiá kanisaháni tahá mardom tálima dátant, Hodáay bádsháhiay mestága rasént o mardom cha har paymén nájórhi o nádráhián dráha kortant.
MAT 4:24 Sajjahén Suriahá áiay nám o tawár sheng but o mardomán jenni o mariay nádráh o lang o mondh o hamá sajjahén nájórh ke warh warhén nádráhi o dard o dóráni tahá atant, Issáay kerrá áwortant o áiá dráha kortant.
MAT 4:25 Jalil o Dekápulis o Urshalim o Yahudiah o Ordonay kawray á dastay hand o damagáni bázén mardomé átk o Issáay hamráh but.
MAT 5:1 Wahdé Issáyá mardománi mocchi dist, kóhéay sará sar kapt o nesht. Áiay morid áiay kerrá átkant.
MAT 5:2 Gorhá é dhawlá áyáni tálim dayagá lagget:
MAT 5:3 “Bahtáwar ant hamá ke wati ruhay garibiá sarpad ant, chéá ke ásmáni bádsháhi hamáyánig ent.
MAT 5:4 Bahtáwar ant hamá ke gamig ant, chéá ke áyán tasallá rasit.
MAT 5:5 Bahtáwar ant hamá ke narmdel ant, chéá ke zeminay mirásdár hamá bant.
MAT 5:6 Bahtáwar ant hamá ke pa hakk o ensápá shodig o tonnig ant, chéá ke á séra bant.
MAT 5:7 Bahtáwar ant hamá ke pa degarán rahma kanant, chéá ke áyáni sará rahm kanaga bit.
MAT 5:8 Bahtáwar ant hamá ke delesh pák ent, chéá ke á Hodáyá gendant.
MAT 5:9 Bahtáwar ant hamá ke sohl o émenia kárant, chéá ke á Hodáay chokk gwashaga bant.
MAT 5:10 Bahtáwar ant hamá ke hakk o ensápay ráhá ázár dayaga bant, chéá ke ásmáni bádsháhi hamáyánig ent.
MAT 5:11 Bahtáwar ét shomá ke mani sawabá mardom shomárá béezzat kanant o ázára dayant o shomay bárawá dróga bandant o badén gappa janant.
MAT 5:12 Gal bebét o shátkámi bekanét, chéá ke ásmáná shomay mozz báz ent. Pésarigén nabiesh hamé paymá ázár dátagant.
MAT 5:13 Shomá jahánay wád ét, bale agan wáday tám berawt, gorhá chón padá wádók kanaga bit? Dega hecch kárá nayayt, abéd cha eshiá ke dawr dayag bebit o mardomi lagatmál bekanant.
MAT 5:14 Shomá jahánay nur o rozhn ét, shahré ke kóhéay sará ent, chér o andém buta nakant.
MAT 5:15 Hechkas rókén cherágá kásagay chérá éra nakant, cherágdánay sará éria kant tánke áiay rozhn lógay sajjahén mardomán berasit.
MAT 5:16 Hamé dhawlá shomay nur mardománi nyámá tálán bebit tánke á shomay nékén kárán begendant o shomay ásmáni Petay satáyá bekanant.
MAT 5:17 Gomán makanét ke man pa Sharyat o nabiáni habaráni dur kanag o nákár kanagá átkagán. Man pa áyáni nákár kanagá nayátkagán, pa áyáni sarjam kanagá átkagán.
MAT 5:18 Shomárá rásténa gwashán, ásmán o zeminay tabáh bayagá pésar, Sharyatay yakk áb o thekké ham gára nabit tán hamá wahdá ke Sharyatay har chizz sarjam mabit.
MAT 5:19 Paméshká agan kasé cha Sharyatay parmánán gwandhteréné ham mán mayárit o degarán hamé tálimá bedant, ásmáni bádsháhiá kasterén zánaga bit. Bale kasé ke é parmánáni sará amala kant o degarán ham hamé tálimá dant, ásmáni bádsháhiá mazan zánaga bit.
MAT 5:20 Gorhá shomárá gwashán, agan shomay pahrézkári cha Parisi o Sharyatay zánógeráni pahrézkáriá géshter mabit, hechbar ásmáni bádsháhiá shota nakanét.
MAT 5:21 Shomá eshkotag ke gón péshigén mardomán gwashag butag: Hón makan. Harkas hóna kant, hakdiwáná mayárbár kanaga bit.
MAT 5:22 Bale man shomárá gwashán, harkas ke wati brátay sará zahr ent, á ham hakdiwáná mayárbár kanaga bit. Kasé ke wati brátá bad o rada kant, mazanén hakdiwáná mayárbár kanaga bit o kasé ke wati brátá ‘hódh’ o ‘ahmaka’ gwashit, dózahay ásay sezáwára bit.
MAT 5:23 Paméshká agan korbánjáhá, korbánig kanagay wahdá yátá kaptay ke tai brátá gón taw gelagé hast,
MAT 5:24 wati korbánigá hamódá korbánjáhá bell o beraw pésará wati brátá wasshán bekan, randá byá korbánig bekan.
MAT 5:25 Agan kaséá gón taw arh o dáwáé hast o tará hakdiwáná bárt, gorhá ráhá gón áiá wati arhá begisshén o sohl bekan. Chó mabit ke á tará káziay kerrá bebárt o kázi tará apsaray dastá bedant o taw zendáná dawr dayag bebay.
MAT 5:26 Tará rásténa gwashán, tán zarráni goddhi pai o paysahá porra nakanay, cha ódá ázáta nabay.
MAT 5:27 Shomá eshkotag ke gwashag butag: Zená makan.
MAT 5:28 Bale man shomárá gwashán, agan kasé janénéá pa badén chammé bechárit, bezán wati delá gón hamá janéná zenái kort.
MAT 5:29 Paméshká agan tai rástén chamm tará dém pa gonáhá bárt, áiá kassh o dawr beday, chéá ke cha sarjamén jánay dózahá kapagá pa taw sharter hamesh ent ke tai jesmay yakk ázáé cha taw jetá bebit.
MAT 5:30 Hamé dhawlá, agan tai rástén dast tará dém pa gonáhá bárt, áiá borr o dawr day, chéá ke cha sarjamén jánay dózahá rawagá pa taw sharter hamesh ent ke tai jesmay yakk ázáé cha taw jetá bebit.
MAT 5:31 Gwashag butag: Harkas ke wati janá cha lógá dara kant, báyad áiá taláknámahé bedant.
MAT 5:32 Bale man shomárá gwashán, agan janénéá zená nakortag o mard angat ham áiay sawn o talákán bedant, bezán janéná zenákáriay némagá télánk dayagá ent o agan kasé gón talák dátagén janénéá sur o sáng bekant, gorhá bezán gón áiá zená kant.
MAT 5:33 Shomá é ham eshkotag ke gón péshigén mardomán gwashag butag: Wati sawgendá maprósh, o Hodáwanday námay sará wártagén sawgendán purah bekan.
MAT 5:34 Bale man shomárá gwashán, hechbar sawgend mawarét, na arshay, chéá ke Hodáay taht ent,
MAT 5:35 na zeminay, chéá ke Hodáay pádáni chéray korsi ent, na Urshalimay chéá ke ‘Mazanén Bádsháhay’ shahr ent.
MAT 5:36 Wati saray sawgendá ham mawar, chéá ke taw wati mudáni yakk thálé ham espét yá syáh korta nakanay.
MAT 5:37 Paméshká ódá ke shomárá ‘haw’ gwashagi ent, begwashét ‘haw’ o ódá ke ‘enna’ gwashagi ent, begwashét ‘enna’. Cha ed o géshter gwashag Shaytánay kár ent.
MAT 5:38 Shomá eshkotag ke gwashag butag: Chammay badal chamm o dantánay badal dantán.
MAT 5:39 Bale man shomárá gwashán, radkárén mardomay démá maóshtét. Agan kasé tai rástén gobbá shahmáté jant, domi gobbá ham áiay némagá betarrén.
MAT 5:40 Agan kasé pa tai jámagay kasshagá tará hakdiwáná bárt, wati kabáhá ham áiá beday.
MAT 5:41 Agan kasé tará pa zór o bigári hazár gámay pand janaga parmáit, do hazár gám áiay hamráhiá beraw.
MAT 5:42 Kasé ke cha taw lóthit, áiá beday o agan yakkéá wámé lóthet, dayagá chakk o pad mabay.
MAT 5:43 Shomá eshkotag ke gwashag butag: Wati hamsáhegá dóst bedár o gón wati dozhmená naprat bekan.
MAT 5:44 Bale man shomárá gwashán, wati dozhmenán dóst bedárét o pa hamáyán ke shomárá ázára dayant, nékén dwá belóthét,
MAT 5:45 tánke shomá wati ásmáni Petay chokk bebét, chéá ke á wati róchá pa nék o bad doénána drapshénit o wati hawrá pa pahrézkár o radkár doénána gwárénit.
MAT 5:46 Agan shomá tahná hamá mardomán dóst bedárét ke shomárá dósta dárant, shomárá cha Hodáay némagá hecch mozzé narasit. Songi o máliátgir ham wati dóst dárókán dósta dárant.
MAT 5:47 Agan shomá tahná wati brátán salám o drót begwashét, gorhá shomá cha é degarán sharter naét. Hodánáparmánén mardom ham wati brátán salám o drót gwashant.
MAT 5:48 Paméshká shomá báyad kámel bebét, anchosh ke shomay ásmáni Pet kámel ent.
MAT 6:1 Habardár! Wati nékén kárán mardománi chamdidá makanét. Agan pa é maksadá nékén kár bekanét ke mardom begendant, shomárá cha ásmáni Petay némagá hecch mozzé narasit.
MAT 6:2 Wahdé taw chizzé hayráta kanay, gorhá dhohl majan. Doru o dopóstén mardom kanisah o bázárán é dhawlá kanant tánke mardom áyán satá bekanant. Shomárá rásténa gwashán, áyán wati mozz raset.
MAT 6:3 Wahdé hayráté cha rástén dastá dayay, chappén dast sahig mabit,
MAT 6:4 tánke tai dátagén hayrát chér o sarpósh bebit. Gorhá tai ásmáni Pet ke chérén kárána gendit, tai mozzá dant.
MAT 6:5 Wahdé dwá kanét, doru o dopóstén mardománi dhawlá makanét, chéá ke áyán kanisaháni tahá o shahray chárráháni sará óshtag o dwá kanag dósta bit, tánke mardom áyán begendant. Shomárá rásténa gwashán, áyán wati mozz raset.
MAT 6:6 Harwahdá ke dwá kanay, lógay andarén jáhéá beraw, lógá band kan o cha wati ásmáni Petá ke cha chammán chér o andém ent, dwá belóth. Gorhá tai Pet ke chérénána gendit, tai mozzá dant.
MAT 6:7 Wahdé dwá kanét, darkawmén mardománi dhawlá mopt o náhudagén habarán takrár makanét. Darkawm hayála kanant ke cha géshén takrárá áyáni dwá gósh dáraga bit.
MAT 6:8 Áyáni paymá mabét, chéá ke shomay ásmáni Pet cha shomay lóthagá pésar wata zánt ke shomárá kojám chizzáni hájat ent.
MAT 6:9 Shomá chó dwá belóthét: ‘Oo may Pet, ke arshá ay! Tai pákén nám sharapdár bát.
MAT 6:10 Tai bádsháhi byáyát. Tai erádah o wáhag zeminay sará ham hamá dhawlá purah o sarjam bát ke ásmáná puraha bit.
MAT 6:11 May maróchigén rezk o rózigá maróchi márá beday.
MAT 6:12 May radián bebaksh, anchosh ke má hamá sajjahén mardom bakshetagant ke gón má badiesh kortag.
MAT 6:13 Márá ázmáesh o chakkásá dawr maday o cha sherr o Shaytáná berakkén.’
MAT 6:14 Chéá ke agan shomá mardománi radkárián bebakshét, gorhá shomay ásmáni Pet shomárá ham bakshit,
MAT 6:15 bale agan shomá mardománi radkárián mabakshét, gorhá shomay ásmáni Pet ham shomay radkáriána nabakshit.
MAT 6:16 Wahdé shomá róchaga bét, doru o dopóstén mardománi dhawlá watá molur o gamig makanét. Á wati démá chótha kanant ke mardom begendant ke á róchag ant. Shomárá rásténa gwashán, áyán wati mozz raset.
MAT 6:17 Wahdé taw róchaga bay, wati sará thél bejan o démá beshód,
MAT 6:18 tánke mardom mazánant ke taw róchag ay, tahná tai ásmáni Pet ke cha chammán chér o andém ent, hamá bezánt. Á wahdi tai ásmáni Pet ke chérén kárána gendit, tai mozzá dant.
MAT 6:19 É donyáyá pa wat mál o maddhi ambár makanét, ke edá warók o ramézesha warant yá zanga gerant yá dozza poterant o barantesh.
MAT 6:20 Pa wat ásmáná mál o maddhi ambár bekanét ke ódá na warók o ramézesha warant, na zanga gerant o na dozza poterant o barantesh.
MAT 6:21 Parchá ke hamódá ke tai mál ent, tai del ham hamódá bit.
MAT 6:22 Chamm badanay cherág ant. Agan tai chamm sharr ant, tai sajjahén badan rozhná bit.
MAT 6:23 Bale agan tai chamm haráb ant, tai sajjahén badan tahára bit. Nun agan tai bátenay rozhn wat tahárié bebit, gorhá á tahári sakkén mazanén tahárié bit.
MAT 6:24 Hechkas do wájahay golámiá korta nakant, yá gón eshiá naprata kant o áiá dósta dárit, yá gón eshiá wapádára bit o áiá mána nayárit. Chó buta nakant ke shomá Hodáay golámiá ham bekanét o zarray golámiá ham.
MAT 6:25 Paméshká shomárá gwashán, pa wati zendá paréshán mabét ke ché bwarén yá ché benóshén, na pa wati badaná ke ché bepóshén. Zend cha waráká o badan cha pósháká démáter ent.
MAT 6:26 Ásmánay démá báli morgán bechárét, na keshant o na ronant o na ambára kanant, bale angat shomay ásmáni Pet áyán rezk o róziga dant. Shomay arzesh cha áyán báz géshter ent.
MAT 6:27 Hechkas pa pegr o parésháni wati zenday róchán damáné ham gésh korta nakant.
MAT 6:28 Gorhá pa pocch o pósháká chéá paréshán ét? Gyábánay gol o polláni némagá delgósh kanét ke chóna rodant. Na zahmaté kasshant o na résant o gwapant,
MAT 6:29 bale shomárá gwashán ke Solaymáná gón wati mazanén shán o shawkatá é polláni dhawlén póshák gwará nabutag.
MAT 6:30 Oo kambáwarán! Wahdé Hodá gyábánay káhán ke maróchi hastant o bándá taruná sóchaga bant, chó brahdára kant, gorhá shomárá allamá sharterén pósháka dant.
MAT 6:31 Paméshká paréshán mabét o magwashét ke ché bwarén yá ché benóshén yá ché bepóshén.
MAT 6:32 Hodánábáwarén mardom é sajjahén chizzáni randá tachant, bale shomay ásmáni Peta zánt ke shomárá é chizz pakár ant.
MAT 6:33 Cha drostán pésar, Hodáay bádsháhi o áiay dátagén páki o palgáriay shóházá bebét, gorhá é sajjahén chizz ham shomárá dayaga bant.
MAT 6:34 Pa bándátigén róchá gam makanét, chéá ke bándátigén róch wati gamá wata kant. Pa maróchigá, maróchigén janjál bass ant.
MAT 7:1 Aybgiri makanét o kassá ér majanét, tánke shomá ér janag mabét.
MAT 7:2 Hamá hesábá ke shomá degarán éra janét, hamé paymá shomá ham ér janaga bét o gón har kayl o paymánahéá ke shomá dayét, gón hamá kaylá shomárá dayaga bit.
MAT 7:3 Chéá wati brátay chammay bucchoká genday, bale wati chammay bondhá nagenday?
MAT 7:4 Tai chammá ke bondhé mán, chón wati brátá gwashta kanay: ‘Bell ke tai chammay bucchoká dara kanán’?
MAT 7:5 Oo doru o dopóstén shatalkár! Pésará wati chammay bondhá dar kan, randá sharriá genday o wati brátay chammay bucchoká kassheta kanay.
MAT 7:6 Pákén chizzán kochekkán madayét o wati morwáredán hukkáni démá dawr madayét, chó mabit ke áyán lagatmál bekanant o per betarrant o shomay jendá derr o drásh bekanant.
MAT 7:7 Belóthét, shomárá dayaga bit. Shóház bekanét, shomárá rasit. Darwázagá bethokkét, pa shomá pach kanaga bit.
MAT 7:8 Chéá ke harkas belóthit, áiá dayaga bit. Harkas shóház bekant, áiá rasit. Harkas darwázagá bethokkit, pa áiá pach kanaga bit.
MAT 7:9 Shomay nyámá choshén mardomé nést ke agan áiay chokk nagan belóthit, dhóké bedanti,
MAT 7:10 yá agan máhig belóthit, máré bedanti.
MAT 7:11 Nun agan shomá ke radkár ét, angat ham wati chokkán sharrén chizzáni dayagá zánét, gorhá shomay ásmáni Pet hamáyán angat géshtér sharrén chizza dant ke cha áiá lóthant.
MAT 7:12 Paméshká, harwahdá gón degarán hamá dhawlá bekanét ke shomá lóthét ke á gón shomá bekanant. Sharyat o nabiáni asligén habar hamesh ent.
MAT 7:13 Cha tankén darwázagá begwazét, chéá ke práhén darwázag o práhén ráh tabáhiay némagá bárt o bázéné hamá ráhá rawt.
MAT 7:14 Bale tank ent á darwázag o tank ent á ráh ke zenday némagá bárt o kammok mardom hamé ráhá dara géjit.
MAT 7:15 Cha drógén paygambarán hozzhár bebét. Á, méshi póst gwará kanant o shomay kerrá káyant bale bátená derrók o warókén gork ant.
MAT 7:16 Shomá cha áyáni kár o kerdán áyán pajjáha kárét. Cha dhangarán angur o cha dhóloká enjir chenaga nabit.
MAT 7:17 Hamé paymá, har sharrén drachk sharrén bar o samara kárit o harábén drachk harábén bar o samara kárit.
MAT 7:18 Sharrén drachk, harábén bar áworta nakant o harábén drachk sharrén bar áworta nakant.
MAT 7:19 Har drachké ke sharrén bara nayárit, goddhag o sóchaga bit.
MAT 7:20 Hamé paymá, shomá drógén paygambarán cha áyáni kár o kerdán pajjáha kárét.
MAT 7:21 Hamá ke maná ‘Hodáwand, Hodáwanda’ gwashant, pa á sajjahénán ásmáni bádsháhiay darwázag pacha nabit, tahná hamá shota kant ke mani ásmáni Petay wáhag o razáay sará amala kant.
MAT 7:22 Wahdé á rócha kayt, bázéné maná gwashit: ‘Hodáwand, oo Hodáwand! Má tai námay sará Hodái bashárat sar kortagant, tai námay sará jenn kasshetag o tai námay sará bázén mójezahé pésh dáshtag.’
MAT 7:23 Gorhá man áyán tachká gwashán: ‘Oo radkárán! Man hechbar shomárá pajjáh nayáwortag, cha mani démá dur bebét.’
MAT 7:24 Paméshká, harkas ke mani é habarána eshkont o esháni sará amala kant, hamá dánáén mardomay paymá ent ke wati lógi mohrén kóhéay sará bast.
MAT 7:25 Hawr but, hár o héróp átk, trondén gwátán kasshet o lógá laggetant, bale lóg nakapt, chéá ke áiay bonred kóhay sará ér kanag butagat.
MAT 7:26 Bale harkas ke mani é habarán eshkont o esháni sará amala nakant, hamá nádánén mardomay dhawlá ent ke wati lógi rékáni sará bast.
MAT 7:27 Hawr but, hár o héróp átk, trondén gwátán kasshet o lógá laggetant o lóg kapt o pahk tabáh but.”
MAT 7:28 Wahdé Issáyá é habar halás kortant, mocch butagén mardom cha áiay tálimán hayrán butant,
MAT 7:29 chéá ke áiá Sharyatay zánógeráni paymá tálim nadát, gón wák o ehtiáré tálim dát.
MAT 8:1 Wahdé Issá cha kóhá ér kapt, mardománi mazanén rombé áiay randá gón kapt.
MAT 8:2 Yakk mardé ke áiá garray nádráhi at Issáay kerrá átk, áiay pádán kapt o gwashti: “Oo wájah! Agan taw belóthay, maná dráh o palgár korta kanay.”
MAT 8:3 Issáyá dast shahárt, dasti per mosht o gwashti: “Mana lóthán. Dráh o palgár bay!” Hamá damáná mard cha garrá dráh but.
MAT 8:4 Gorhá Issáyá gón áiá gwasht: “Bechár, hechkasá hál maday, bale beraw, watá dini péshwáyá pésh bedár o hamá korbánigá bekan ke Mussáay Sharyatá nebisag butag, tánke pa mardomán sháhedié bebit.”
MAT 8:5 Wahdé Issá Kaparnáhumay shahrá raset, pawji apsaré áiay kerrá átk, dazbandi kort o
MAT 8:6 gwashti: “Oo wájah! Mani hezmatkárén bachakk lang o mondh ent o lógá kaptag, sakk dard o dór ent.”
MAT 8:7 Issáyá gwasht: “Sharr, mana káyán o áiá dráha kanán.”
MAT 8:8 Pawji apsará darráént: “Oo wájah! Mana nakarzán ke taw mani lógá byáay. Taw tahná hokm bekan, mani hezmatkár dráha bit.
MAT 8:9 Chéá ke man ham wati masteráni hokmay chérá án o mani dastay chérá ham sepáhig hast. Agan kaséá hokm bekanán ‘beraw,’ á rawt o agan kaséá begwashán ‘byá,’ á kayt. Agan wati hezmatkárá begwashán ‘pelán kárá bekan,’ á kanti.”
MAT 8:10 Wahdé Issáyá é habar eshkot, hayrán but o gón wati hamráhán gwashti: “Shomárá rásténa gwashán ke Esráiliáni tahá ham man choshén mohrén imán nadistag.
MAT 8:11 Bezánét ke cha ródarátk o rónendá bázén mardomé kayt o gón Ebráhém o Esák o Ákubá ásmáni bádsháhiay mehmániá yakkén parzónagay sará nendit,
MAT 8:12 bale é bádsháhiay chokk o óbádag dhanná taháriá dawr dayaga bant. Ódá gréwag o peryát o zária bit.”
MAT 8:13 Gorhá Issáyá gón pawji apsará gwasht: “Beraw, anchosh ke tai báwar ent, gón taw hamá dhawlá bit.” Áiay hezmatkár hamá damáná dráh but.
MAT 8:14 Wahdé Issá Petrosay lógá shot, disti ke Petrosay wassig tapig ent o kaptag.
MAT 8:15 Issáyá wati dast áiay dastay sará per mosht. Áiay tap sest, á pád átk o Issáay hezmat kanagá lagget.
MAT 8:16 Magrebtahárá mardomán bázén jenni ganóké Issáay kerrá áwort, áiá gón wati yakk habaréá jenn kasshetant o sajjahén nádráh wassh o dráh kortant.
MAT 8:17 É dhawlá Eshayá nabiay kortagén é habar rást o sarjam but: Áiá may nezóri dur kortant o nádráhi bortant.
MAT 8:18 Wahdé Issáyá wati chapp o chágerdá mardománi mocchi dist, parmán dát o gwashti: “Byáét, gwarmay á dastá rawén.”
MAT 8:19 Sharyatay zánógeré áiay kerrá átk o gwashti: “Oo ostád! Har jáh ke taw raway, man tai randgiriá kanán.”
MAT 8:20 Issáyá gwasht: “Róbáhán hóndh hast o báli morgán kodóh, bale Ensánay Chokká pa saray ér kanagá hecch jágah nést.”
MAT 8:21 Dega yakk moridéá gwasht: “Oo wájah! Maná ejázat beday ke pésará berawán o wati petá kabr o kapan bekanán.”
MAT 8:22 Issáyá gwasht: “Byá, mani randgiriá bekan, bell ke mordag wati mordagán wat kabr o kapana kanant.”
MAT 8:23 Issá bójigá swár but, morid ham swár butant.
MAT 8:24 Anágat trondén tuppáné átk o chawl o mawján bójig mán ropt, bale Issá wáb at.
MAT 8:25 Morid áiay kerrá átkant, cha wábá pád kort o gwashtesh: “Oo Hodáwand! Márá berakkén ke meragá én.”
MAT 8:26 Gón áyán gwashti: “Oo kambáwarán! Shomárá chéá torsit?” Nun pád átk, gwát o ápi hakkal dátant o tuppán pahk érmósh but.
MAT 8:27 Morid hayrán butant o gwashtesh: “É chónén mardomé ke gwát o áp ham eshiay hokmá mannant.”
MAT 8:28 Wahdé Issá mazangwarmay á dastá, Gadáriáni molká raset, do mardom cha kabrestáná dar átk o gón áiá dochár kaptant. Áyán jenn per at o á haminchok wakshi o torsnák atant ke kassá cha á ráhá gwasta nakort.
MAT 8:29 Áyán kukkár kort o gwasht: “Oo Hodáay Chokk! Tará gón má che kár ent? Cha wahdá pésar, pa may azáb dayagá átkagay?”
MAT 8:30 Cha áyán kammé dur, hukkáni ramagé charagá at.
MAT 8:31 Palitén ruhán cha Issáyá dazbandi kort o gwasht: “Agan taw márá cha é mardomán dara kanay, gorhá márá é ramagay hukkáni jesmá ráh beday.”
MAT 8:32 Issáyá gwasht: “Bepoterét!” Gorhá á dar átk o hukkáni jesmá potertant o hukkáni sajjahén ramag cha kóhdémá jahlagá tachán but o gwarmá kapt o mort.
MAT 8:33 Hukkáni chárénók tacháná shahrá shotant o é sajjahén hál o jenni ganókáni sargwastesh raséntant.
MAT 8:34 Nun shahray sajjahén mardom Issáay cháragá átkant o gón áiá dazbandiesh kort ke cha may molká dar á o beraw.
MAT 9:1 Issá bójigéá swár but o mazangwarmi gwázént o wati jenday shahrá átk.
MAT 9:2 Hamé wahdá, lahtén mardomá lang o mondhén mardé ke tahtéay sará waptagat, Issáay kerrá áwort. Wahdé Issáyá áyáni imán dist, gón langá gwashti: “Oo mani chokk! Delá mazan kan, tai gonáh bakshag butant.”
MAT 9:3 Bale Sharyatay lahtén zánógerá wati delá gwasht: “É mard kopr kanagá ent.”
MAT 9:4 Issáyá áyáni delay habar zánt o gwashti: “Shomá chéá wati delá badén hayála kárét?
MAT 9:5 Kojám habaray gwashag ásánter ent: ‘Tai gonáh bakshag butagant,’ yá: ‘Pád á, betarr’?
MAT 9:6 Bale man é habar kort tánke shomá bezánét ke Ensánay Chokká é donyáyá gonáháni bakshagay wák o ehtiár hast.” Padá gón á langá gwashti: “Pád á, wati tahtá bezur o lógá beraw.”
MAT 9:7 Gorhá mard pád átk o lógá shot.
MAT 9:8 Wahdé mardomán é kár dist, torsetesh o Hodáay satáesh kort ke mardománá choshén wák o ehtiári dátag.
MAT 9:9 Issá ke démterá shot, Mattá námén mardé disti ke song o máliátay kárgesá neshtagat. Gón áiá gwashti: “Byá, mani randgiriá bekan!” Mattá pád átk o áiay hamráh but.
MAT 9:10 Wahdé Issá Mattáay lógá parzónagay sará neshtagat o warák waragá at, bázén songi o máliátgir o gonahkáré ham átk o gón Issá o áiay moridán yakjáh nánesh wárt.
MAT 9:11 Wahdé Parisián dist gón Issáay moridán gwashtesh: “Chéá shomay ostád gón songi o gonahkárán waráka wárt?”
MAT 9:12 Issáyá eshkot o gwashti: “Dráh o salámatén mardomán tabib pakár naent, nádráhán tabib pakár ent.
MAT 9:13 Bale berawét o é habaray mánáyá dar begéjét: Maná hayrát o korbánig pasond naent, mehr o rahm pasond ent. Man pahrézkáráni gwánk janagá nayátkagán, gonahkáráni gwánk janagá átkagán.”
MAT 9:14 Randá, Yahyáay morid Issáay kerrá átkant o jostesh kort: “Má o Parisi róchaga bén, bale tai morid chéá róchaga nabant?”
MAT 9:15 Issáyá passaw dát: “Sálónk ke neshtag, sur o árósay mehmán gamiga nabant o porsa nadárant. Bale anchén wahdé kayt ke sálónk cha áyán jetá kanaga bit, hamá wahdá róchaga bant.
MAT 9:16 Hechkas nókén goday thokkoré nazurit o kwahnén pashká paccha najant, chéá ke nókén goday pacch nazza kayt o kwahnén pashká gantera derrit.
MAT 9:17 Hamé dhawlá, kwahnén mashkáni tahá nókén sharáb mána nakanant, agan chosh bekanant mashka derant o sharába rechant o mashk ham barbáda bant. Nókén sharábá nókén mashkán mána kanant ke sharáb o mashk, har doén bemánant.”
MAT 9:18 Issá angat gón áyán habará at ke kanisahay masteré átk o Issáay pádán kapt o gwashti: “Mani jenekk hamé annun mortag, bale byá wati dastá áiay sará per mosh, á padá zendaga bit.”
MAT 9:19 Issá pád átk o gón wati moridán áiay hamráh but.
MAT 9:20 Hamódá janéné hastat ke dwázdah sál at áiay hón pach at. Á cha poshti némagá átk o Issáay kabáhay lambi dast jat.
MAT 9:21 Wati delá gwashagá at: “Agan Issáay kabáhá ham dast per bekanán, dráha bán.”
MAT 9:22 Issáyá chakk tarrént o janéni dist. Gwashti: “Oo mani jenekk! Delá mazan kan, tai imáná tará dráh kort.” Hamá damáná janén dráh but.
MAT 9:23 Wahdé Issá kanisahay masteray lógá raset, disti ke nal janók nal janag o mótk áragá ant o rombé mardom gréwag o záriá ent.
MAT 9:24 Gwashti: “Dar áét, jenekk namortag, wáb ent.” Áyán Issáay sará kandet.
MAT 9:25 Mardomesh cha lógá dar kortant, Issá tahá shot, jenekkay dasti gept o jenekk pád átk.
MAT 9:26 É hál sajjahén damagá sheng o tálán but.
MAT 9:27 Wahdé Issá cha ódá ráh gept, ráhá do kór gwánk janán áiay randá kapt o gwashtesh: “Oo Dáud bádsháhay chokk! May sará rahm kan.”
MAT 9:28 Issá lógéá shot o doén kór áiay kerrá átkant. Issáyá gón áyán gwasht: “Shomárá báwar ent ke man é kárá korta kanán?” Áyán jwáb dát: “Haw, oo Hodáwand!”
MAT 9:29 Gorhá Issáyá wati dast áyáni chammáni sará per mosht o gwashti: “Hamá dhawlá ke shomá báwar kortag, gón shomá hamá dhawlá bit.”
MAT 9:30 O áyáni chamm rozhná butant. Issáyá kaddhan kort o gwashtant ke gón hechkasá é bárawá habar makanét.
MAT 9:31 Bale á shotant o Issáay námesh sajjahén damagá sheng o tálán kort.
MAT 9:32 Wahdé á rawagá atant, gongé ke jenné per ati, Issáay kerrá áwortesh.
MAT 9:33 Anchosh ke Issáyá jenn kasshet, gong habar kanagá lagget. Sajjahén mardom hayrán butant o gwashtesh: “Choshén kár Esráilá hechbar nabutag.”
MAT 9:34 Bale Parisián gwasht: “É gón jennáni sardáray sarókiá jennána kasshit.”
MAT 9:35 Issá sajjahén shahr o métagána shot o kanisaháni tahá mardomi tálima dátant, Hodáay bádsháhiay mestágay jária jat o mardománi har paymén nájórhi o nádráhii dráha kortant.
MAT 9:36 Issáyá ke mardománi mocchi distant, áyáni sará bazzagi but, chéá ke á béshepánkén pasáni dhawlá paréshán o béwas atant.
MAT 9:37 Gorhá gón wati moridán gwashti: “Keshár báz ent o ronók kamm ant.
MAT 9:38 Paméshká gón kesháray wáhondá dazbandi bekanét ke pa wati keshárá ronók dém bedant.”
MAT 10:1 Issáyá dwázdahén morid lótháéntant o jennáni kasshag o har dhawlén nájórhi o nádráhiáni dráh kanagay wák o ehtiári dátant.
MAT 10:2 É dwázdahén kásedáni nám esh ant: awali Shamun at ke Petros ham gwashaga bit, padá Shamunay brát Andriás, Zebdiay chokk Ákub, Ákubay brát Yuhanná,
MAT 10:3 Pilipos, Bartulumá, Tumá, máliátgirén Mattá, Halpiay chokk Ákub, Taddá,
MAT 10:4 sarmachárén Shamun o Yahudá Eskaryuti ke randá Issái dróhet o dozhmenáni dastá dát.
MAT 10:5 Issáyá é dwázdahén kásed gón é hokmá rawán dátant: “Darkawmáni gwará marawét o á shahrán ke Sámeri jahmenend ant, ódá ham marawét.
MAT 10:6 Bani Esráiliáni kerrá berawét ke gárén mésháni dhawlá ant.
MAT 10:7 Har jáh ke rawét, é mestágay járá bejanét ke ásmáni bádsháhi átkag o sar butag.
MAT 10:8 Nádráhán dráh bekanét, mordagán zendag bekanét, garray nádráhán dráh o palgár bekanét o jennán bekassét. Shomárá moptá rasetag, moptá bedayét.
MAT 10:9 Wati lánkbandáni tahá sohr o nograh o ród mán makanét.
MAT 10:10 Pa wati sapará lót o turag mazurét gón, gwaray jámag o páday chawatthán abéd, dega hecch mazurét gón, asá ham, chéá ke kár kanók wati rózigay hakdár ent.
MAT 10:11 Wahdé shahr o métagéá rawét, láhekén mardomé shóház bekanét o tán roksata nabét, hamáiay kerrá bedárét.
MAT 10:12 Lógéá ke rawét, lógay mardomán salám bedayét o pa á lógá émeni belóthét.
MAT 10:13 Agan á lógay mardoma karzant, shomay nékdwáiay barkatá áyán émenia rasit o agan na, é émeni shomay jendá rasit.
MAT 10:14 Agan kasé shomárá wasshátka nakant yá shomay habarán gósha nadárit, cha á lógá yá shahrá dar áét o dar áyagay wahdá wati pádáni danz o hákán hamódá bechandhét.
MAT 10:15 Shomárá rásténa gwashán, jost o porsay róchá, á shahray sezá cha Sodum o Gomurahay sezáyá gantera bit.
MAT 10:16 Bechár, man shomárá rawána dayán, bale shomá anchosha bét ke gorkáni nyámá pasa bant. Paméshká máray paymá hozzhár o kapódaray paymá béázár bebét.
MAT 10:17 Cha mardomán hozzhár bét ke shomárá geráénant o hakdiwánána barant o wati kanisaháni tahá shomárá shallák o hayzarána janant.
MAT 10:18 Mani sawabá shomá hákem o bádsháháni démá pésh kanaga bét ke áyáni o darkawmáni démá sháhedi bedayét.
MAT 10:19 Wahdé shomá ódá baraga bét, paréshán mabét ke ‘Ché begwashén?’ yá ‘Chón passaw bedayén?’ chéá ódá shomárá harché ke gwashagi ent, hamá wahdá shomay delá dayaga bit.
MAT 10:20 Parchá ke habar kanók shomá nabét, shomay ásmáni Petay Ruh cha shomay zobáná habara kant.
MAT 10:21 Brát wati brátá dróhit o kóshárénit o pet wati chokká. Chokk wati pet o mátáni helápá páda káyant o áyána kóshárénant.
MAT 10:22 Sajjahén mardom mani námay sawabá cha shomá naprata kanant. Bale hamá ke tán áherá sakkiána saggit, á rakkit.
MAT 10:23 Wahdé shomárá yakk shahréá ázára dayant, betachét o dega shahréá berawét. Shomárá rásténa gwashán, cha ed o pésar ke shomá Esráilay sajjahén shahrán sar bebét, Ensánay Chokka kayt o rasit.
MAT 10:24 Na shágerd cha wati ostádá mastera bit o na golám cha wati wájahá.
MAT 10:25 Pa shágerdá haminchok bass ent ke wati ostáday paymá bebit o pa golámá haminchok bass ent ke wati wájahay paymá bebit. Lógay hodábondesh ke Belzabul gwashtag, gorhá lógay é dega mardomán allamá ganterén nám pera bandant.
MAT 10:26 Cha é mardomán matorsét, chéá ke hecch choshén chérén chizzé nést ke záher mabit o hecch choshén rázé nést ke zánag mabit.
MAT 10:27 Hamá habarán ke man gón shomá shapay taháriá gwashán, shomá á habarán róchay rozhnáiá begwashét, hamá habar ke shomay góshán halwat kanaga bant, lógáni sará sar kapét o á habaráni járá bejanét.
MAT 10:28 Á ke badaná koshta kanant bale arwáhá koshta nakanant, cha áyán matorsét. Cha hamáiá betorsét ke arwáhá ham o badaná ham dózahá dawr dát o tabáh korta kant.
MAT 10:29 Do jengol pa yakk paysahéá bahá bit, bale angat cha áyán yakké ham bé shomay ásmáni Petay razáyá zeminá nakapit.
MAT 10:30 Hodáyá shomay saray mudáni hesáb ham gón ent.
MAT 10:31 Paméshká matorsét, shomay arzesh cha sajjahén jengolán géshter ent.
MAT 10:32 Harkas ke mardománi démá mani gwáhiá dant, man ham wati ásmáni Petay démá áiay gwáhiá dayán o
MAT 10:33 harkas ke mardománi démá mani gwáhiá nadant, man ham wati ásmáni Petay démá áiay gwáhiá nadayán.
MAT 10:34 Gomán makanét ke man átkagán ke donyáyá sohl o émeni byárán. Sohl o émeniay áragá nayátkagán, jangay áragá átkagán.
MAT 10:35 Chéá ke man átkagán ke chokk petay helápá bóshtit, jenekk mátay helápá o neshár wassigay helápá,
MAT 10:36 bezán harkasay dozhmen áiay lógay mardoma bant.
MAT 10:37 Kasé ke wati petá yá mátá cha man géshter dósta dárit, á mani láhek o kasé ke wati bachakká yá jenekká cha man géshter dósta dárit, á ham mani láhek naent.
MAT 10:38 Kasé ke wati salibá baddhá nakant o mani randá nayayt, á ham mani láhek naent.
MAT 10:39 Harkas ke wati sáhay rakkénagay johdá kant, gária dant o harkas ke mani háterá wati sáhá nadra kant, rakkéniti.
MAT 10:40 Harkas ke shomárá wasshátka kant o sharapa dant, maná sharapa dant o hamá ke maná sharapa dant, áiá ham sharapa dant ke maná ráhi dátag.
MAT 10:41 Harkas ke paygambaréá paméshká wasshátka kant o sharapa dant ke Hodáay ráh dátagéné, áiá paygambaréay mozza rasit. Hamé dhawlá, harkas ke pahrézkárén mardoméá pa áiay pahrézkáriá sharapa dant, áiá ham pahrézkárén mardoméay mozza rasit.
MAT 10:42 Harkas ke cha é kasánén moridán yakkéá paméshká tásé sardén áp ham bedant ke mani morid ent, man shomárá rásténa gwashán ke áiá wati mozza rasit.”
MAT 11:1 Wati dwázdahén moridáni sar o sój kanagá rand, Issá cha ódá dar átk o pa tálim dayag o wáz kanagá Jalilay shahrán shot.
MAT 11:2 Pákshódi dayókén Yahyá zendánay tahá Issá Masihay káráni bárawá ke sahig but wati moridi ráh dátant
MAT 11:3 ke che Issáyá jost bekanét: “Taw hamá ay ke áyagi at, yá má degaréay ométá benendén?”
MAT 11:4 Issáyá passaw dátant: “Harché ke shomá eshkonét o gendét, berawét o Yahyáyá hál bedayét:
MAT 11:5 Kóráni chamm rozhná bayagá ant, lang tarragá ant, garray nádráh dráh bayagá ant, karr eshkonagá ant, mordag zendag bayagá ant o garibán wasshén mestág sar bayagá ent.
MAT 11:6 Bahtáwar hamá ent ke mani sawabá thagal mawárt o malakoshit.”
MAT 11:7 Wahdé Yahyáay kásed dar kapt o shotant, Issá gón mardomán Yahyáay bárawá gapp o tráná lagget: “Shomá chónén chizzéay cháragá gyábáná shotét? Kalam o káshéay cháragá ke gón gwátay kasshagá é dém o á déma bit?
MAT 11:8 Agan na, gorhá chónén chizzéay cháragá shotét? Anchén mardéay cháragá ke narm o názorkén pósháki gwará at? Á mardom ke názorkén póshák gwará kanant, sháhi kalátán neshtagant.
MAT 11:9 Gorhá ódá shomá chónén chizzéay cháragá shotét? Paygambaréay cháragá? Haw, shomárá gwashán anchénéay cháragá ke cha paygambarán ham master ent.
MAT 11:10 Á hamá ent ke áiay bárawá nebisag butag: Bechár, man wati kásedá cha taw pésar ráha dayán ke tai ráhá tachk o hamwára kant.
MAT 11:11 Shomárá rásténa gwashán ke hecch mátá pákshódi dayókén Yahyáay warhén bématthén chokké nayáwortag. Bale ásmáni bádsháhiá, hamá ke cha sajjahénán kaster ent, á cha Yahyáyá ham master ent.
MAT 11:12 Cha pákshódi dayókén Yahyáay wahdá beger tán annun, ásmáni bádsháhiay sará zolm o zóráki bayagá ent o zórák eshiay sará hamlaha kanant o geranti.
MAT 11:13 Tán Yahyáay áyagá sajjahén nabián o Tawrátá wati péshgói kortagant.
MAT 11:14 Agan shomá pa mannagá tayár ét, bezánét ke Yahyá hamá Elyás nabi ent ke áyagi at.
MAT 11:15 Harkasá gósh per, beshkont.
MAT 11:16 Pa é zamánagay mardomán kai mesálá bedayán? É hamá chokkáni paymá ant ke bázárá neshtagant o á dega chokkán gwánka janant o gwashant:
MAT 11:17 ‘Má pa shomá nal jat, bale shomá nách nakort, má mótk áwort, bale shomá pors nadásht.’
MAT 11:18 Yahyá átkag, na wárt o na nóshit, gwashant: ‘Jenné per enti.’
MAT 11:19 Ensánay Chokk átkag, wárt o nóshit, gwashant: ‘Lápi o sharábié, máliátgir o gonahkáráni sangat ent.’ Bale dánáiay rásti cha kár o kerdá záhera bit.”
MAT 11:20 Gorhá Issá hamá shahrán mayárig kanagá lagget ke wati géshterén mójezahi hamódá pésh dáshtagatant, chéá ke óday mardomán tawbah nakortagat.
MAT 11:21 “Bazhn o apsóz pa shomá, oo Korázinay mardomán! Bazhn o apsóz pa shomá, oo Bayt-Saydáay mardomán! Hamá mójezah ke man shomárá pésh dáshtagant, agan Sur o Saydunay shahrán pésh bedáshténant, gorhá óday mardomán hamá damáná wati gonáháni pashómániay póshák gwará kortagat o poráni sará neshtagatant.
MAT 11:22 Shomárá gwashán, jost o porsay róchá, á shahray sezá cha Sur o Saydunay sezáyá gantera bit.
MAT 11:23 Oo Kaparnáhumay mardomán! Shomá hechbar chest kanag o ásmáná baraga nabét. Shomá mordagáni jaháná sarshakuna bét. Chéá ke hamá mójezah ke man shomárá pésh dáshtagant, agan Sodumay shahrá pésh bedáshténant, á shahr tán róche maróchigá mantagat.
MAT 11:24 Shomárá gwashán, jost o porsay róchá, shomay sezá cha Sodumay sezáyá gantera bit.”
MAT 11:25 Nun Issáyá gwasht: “Oo mani Pet, ásmán o zeminay Hodábond! Tai satáyá kanán ke taw é habar cha dáná o aglmandán chér dátant o pa sádagén mardomán záher kortant.
MAT 11:26 Haw mani Pet! Taw cha wati razáyá chó kort.
MAT 11:27 Sajjahén chizz Petá mani dastá dátagant. Tahná Pet ent ke Chokká zánt. Hamé dhawlá, tahná Chokk o hamá mardom Petá zánant ke Chokk belóthit Petá pa áyán záher bekant.
MAT 11:28 Oo sajjahén zahmatkasshán! Shomá ke dam bortag o gránén báráni chérá ét, dém pa man byáét ke man shomárá árámi o ásudagia bakshán.
MAT 11:29 Mani jogá baddhá kanét, cha man dar bebarét, chéá ke man narmdel o békebr án. Gorhá shomay delá árámi o ásudagia rasit.
MAT 11:30 Chéá ke mani jog grán naent o mani bár sobakk ent.”
MAT 12:1 Yakk randé Shabbatay róchá Issá cha gandomay keshárán gwazagá at. Áiay morid gozhnag atant o kesháray hóshagán sendag o waragá laggetant.
MAT 12:2 Parisián ke dist gón Issáyá gwashtesh: “Bechár! Tai morid anchén kára kanant ke Shabbatay róchá rawá naent.”
MAT 12:3 Gwashti: “Záná, shomá nawántag, wahdé Dáud o áiay hamráh gozhnag butant, Dáudá ché kort?
MAT 12:4 Hodáay Pákén Lógá shot o pákwandhén nagani wártant ke áyáni warag na pa áiá rawá at o na pa áiay hamráhán, tahná pa dini péshwáyán rawá at.
MAT 12:5 Yá shomá Sharyatá é nawántag ke mazanén parasteshgáhay tahá, dini péshwá Shabbatay béhormatiá kanant bale angat bémayár hesába bant?
MAT 12:6 Man shomárá gwashán ke edá cha mazanén parasteshgáhá ham masteréné hastent.
MAT 12:7 Agan shomá é habaray máná bezántén: Maná hayrát o korbánig pasond naent, mehr o rahm pasond ent, gorhá shomá á mardom mayárig nakortagatant ke bémayár ant.
MAT 12:8 Chéá ke Ensánay Chokk Shabbatay róchay málek ent.”
MAT 12:9 Issá cha ódá dar átk o kanisahá shot.
MAT 12:10 Ódá mardé hastat ke dasti hoshk o mondh at. Lahténá pa bohtám janagay nimóná cha Issáyá jost kort: “Shabbatay róchá kaséay dráh kanag rawá ent yá na?”
MAT 12:11 Gón áyán gwashti: “Agan cha shomá kaséá yakk méshé hast o mésh Shabbatay róchá kandhéá bekapit, gorhá nagipt o daria nakant?
MAT 12:12 Ensánay arzesh cha méshá sakk báz géshter ent. Paméshká Shabbatay róchá néki kanag rawá ent.”
MAT 12:13 Nun gón á mardá gwashti: “Dastá shahár day.” Áiá dast shahár dát o domi dastay dhawlá wassh o dráh but.
MAT 12:14 Bale Parisi dar átkant o pa Issáay kóshárénagá shawr o saláhesh kort.
MAT 12:15 Wahdé Issáyá áyáni delay é habar zánt, cha ódá dar kapt. Mazanén rombé áiay hamráh but o áiá sajjahén nádráh dráh kortant.
MAT 12:16 Kaddhan kort o gwashtanti: “Gón kassá magwashét ke man kay án.”
MAT 12:17 É dhawlá Eshayá nabiay kortagén é habar rást o sarjam but:
MAT 12:18 É mani hezmatkár ent ke man gechén kortag, man eshiá dósta dárán o mani del cha eshiá sakk wassh o razá ent. Wati Ruhá eshiay sará éra géján o é pa darkawmán adl o ensápay járá jant.
MAT 12:19 Na arh o korha kant o na ják o kukkár o na kasé damk o bázárán eshiay tawárá eshkont,
MAT 12:20 na ke némproshtagén kalam o káshé próshit o na mermeránkén cherágé koshit o godhsará adl o ensápá sóbéno péróza kant.
MAT 12:21 Darkawm eshiay námay sará ósto ométa bandant.
MAT 12:22 Nun mardomán kór o gongén mardomé ke jenné per ati Issáay gwará áwort. Issáyá dráh kort o á habar kanag o gendagá lagget.
MAT 12:23 Sajjahén mardom pa hayráni gwashagá laggetant: “Chó bit ke é Dáud bádsháhay chokk ent?”
MAT 12:24 Bale wahdé Parisián é habar eshkot, gwashtesh: “É gón jennáni sardár Belzabulay zórá jennána kasshit.”
MAT 12:25 Issáyá áyáni é hayál zánt o gón áyán gwashti: “Har molkéá ke nátepáki bebit, á molk wayrána bit o har shahré yá lógéá ke nátepáki bebit, á barjáha namánit.
MAT 12:26 Agan Shaytán wat, watá bekasshit, bezán gón wat nátepák ent. Gorhá áiay bádsháhi chón barjáha mánit?
MAT 12:27 Agan man gón Belzabulay zórá jennán bekasshán, gorhá shomay morid gón kai zórá jennána kasshant? É paymá, shomay moridáni jend shomay kázia bant.
MAT 12:28 Bale agan man gón Hodáay Ruhay zórá jennána kasshán, bezánét ke Hodáay bádsháhi shomay nyámá rasetag.
MAT 12:29 Yá chón buta kant ke kasé zóráwarén mardoméay lógá bepoterit o áiay mál o azbábán bebárt, agan á zóráwarén mardomá pésará magipt o mabandit? Randá áiay lógá pol o pánch korta kant.
MAT 12:30 Harkas ke mani hamráh naent, á mani heláp ent. Harkas ke mocch o yakjáh kanagá gón man gón naent, á sheng o shánga kant.
MAT 12:31 Paméshká shomárá gwashán ke mardománi har gonáh o kopr bakshaga bit, bale Pákén Ruhay bárawá kopr kanag bakshaga nabit.
MAT 12:32 Harkas ke Ensánay Chokkay helápá habaré bekant, pahell kanaga bit, bale harkas ke Pákén Ruhay helápá habaré bekant, na é donyáyá pahell kanaga bit o na áyókén donyáyá.
MAT 12:33 Agan sharrén bar o samara lóthét, báyad ent drachk sharréné bebit, harábén drachk harábén bar o samara dant. Har drachk cha bará zánaga bit.
MAT 12:34 Oo syahmárzádagán! Shomá ke wat sell o haráb ét, chón sharrén habar korta kanét? Chéá ke harché ke delá bit, cha dapá hamá dara kayt.
MAT 12:35 Sharrén mardom cha sharrén ganj o hazánagá sharrén chizz dara kant o sellén mardom cha sellén hazánagá, sellén chizz dara kant.
MAT 12:36 Shomárá gwashán ke jost o porsay róchá mardomán wati har mopt o náhudagén habaray hesáb dayagi ent.
MAT 12:37 Chéá ke tai habar ant ke tará bémayára kanant o tai habar ant ke tará mayárbára kanant.”
MAT 12:38 Gorhá lahtén Parisi o Sharyatay zánógerá gón áiá gwasht: “Oo ostád! Má cha taw neshánié gendaga lóthén.”
MAT 12:39 Issáyá áyáni passawá gwasht: “Badkár o zenahkárén nasl o padréch neshánia lóthit, bale Yunos nabiay neshániá abéd, dega hecch neshánié áyán dayaga nabit.
MAT 12:40 Anchosh ke Yunos tán say shap o say róchá thuhén máhigay lápá at, hamé paymá Ensánay Chokk tán say shap o say róchá zeminay lápá bit.
MAT 12:41 Jost o porsay róchá, Naynawáay mardom gón é zamánagay mardomán hórigá páda káyant o eshán mayáriga kanant, chéá ke Naynawáay mardomán Yunosay járay sará tawbah kort. Bale nun cha Yunosá masteréné edá átkag.
MAT 12:42 Jost o porsay róchá, Sabáay shahbánok gón é zamánagay mardomán hórigá páda kayt o eshán mayáriga kant, chéá ke Sabáay shahbánok cha donyáay á dastá átk ke Solaymán bádsháhay dánáiá begendit. Bale nun cha Solaymáná masteréné edá átkag.
MAT 12:43 Wahdé jenné cha mardoméay jáná dara kayt, gorhá gyábáná rawt ke pa wati árámi o ásudagiá jáhé shóház bekant, bale áiá choshén jáha narasit.
MAT 12:44 Gorhá gwashit: ‘Cha hamá lógá ke dar átkagán, padá hamódá rawán.’ Wahdé pera tarrit o gendit ke á lóg hórk o hálig ent, roptag o sapá ent,
MAT 12:45 gorhá rawt o cha wat ganterén dega hapt jenn wati hamráha kant o kayt. Á poterant o hamódá hankéna kanant. É dhawlá á mardomay ásar o ákebat cha pésarigén hálatá ham gantera bit. É badkárén naslay hál ham anchosha bit.”
MAT 12:46 Issá angat gón mardomán habará at ke áiay mát o brát átkant o dhanná óshtátant. Áyán lóthet ke gón Issáyá habar bekanant.
MAT 12:47 Gorhá yakkéá Issá hál dát ke tai mát o brát dhanná óshtátagant o gón taw habar kanaga lóthant.
MAT 12:48 Issáyá passaw dát: “Mani mát kay ent o mani brát kay ant?”
MAT 12:49 Padá wati moridáni némagá dasti shahár dát o gwashti: “Esh ant mani mát o brát.
MAT 12:50 Harkas ke mani ásmáni Petay wáhag o razáay sará amala kant, mani mát o gohár o brát hamá ent.”
MAT 13:1 Hamá róchá, Issá cha lógá dar átk o mazangwarmay kerrá shot o nesht.
MAT 13:2 Mardománi anchén mazanén rombé átk o áiay kerrá mocch but ke á bójigéá swár but o nesht. Sajjahén mardom gwarmay lambá óshtátagatant.
MAT 13:3 Gorhá áiá mardománá gón darwar o mesálán bázén dars o sabakké dát. Gwashti: “Dehkáné tohmay chandhagá shot.
MAT 13:4 Tohmáni chandhagay wahdá kammé tohm ráhay sará retk, báli morg átkant o chet o wártantesh.
MAT 13:5 Kammé tohm dhal o dhókáni tahá retk ke ódá hák kamm at. Zutt rostant, chéá ke hák tanakk at.
MAT 13:6 Bale cha róchay trondén garmiá gimmort o hoshk butant, chéá ke áyáni risshag o wandhál johl nashotagatant.
MAT 13:7 Kammé tohm cherekk o dhangaráni tahá ham retk, cherekk rostant o tohmesh rodagá naeshtant.
MAT 13:8 É dega tohm sharrén zeminá retkant, rostant o hóshag o baresh dát, jáhé sad sari, jáhé shast sari o jáhé si sari.
MAT 13:9 Harkasá gósh per, beshkont.”
MAT 13:10 Morid áiay kerrá átkant o jostesh kort: “Taw chéá gón mardomán pa darwar o mesál habara kanay?”
MAT 13:11 Áyáni passawá gwashti: “Parchá ke Hodáyá é zánt shomárá dátag ke ásmáni bádsháhiay rázán sarpad bebét, bale áyáná nadátagi.
MAT 13:12 Hamáiá ke chizzé hast, áiá géshter dayaga bit, tánke áiá báz bebit, bale kaséá ke nést, hamá ke hastenti ham, pach geraga bit.
MAT 13:13 Man paméshká pa darwar o mesál gón áyán habara kanán ke á chárant bale nagendant, góshesh pach ant bale naeshkonant o sarpad ham nabant.
MAT 13:14 Eshayá nabiay péshgói é mardománi bárawá rást o sarjam bayagá ent ke gwashit: Shomá eshkonét, bale sarpada nabét, chárét, bale nagendét.
MAT 13:15 Chéá ke é kawmay del seng tarretag, góshesh grán ant, wati chammesh bastagant. Agan esháni chammán bedistén o góshán beshkotén, agan esháni delá bezántén o sarpad buténant o dém pa man byátkénant, man dráh kortagatant.
MAT 13:16 Bale bahtáwar ant shomay chamm ke gendant o shomay gósh ke eshkonant.
MAT 13:17 Shomárá rásténa gwashán, bázén paygambar o pahrézkáréá lóthetag ke harché shomá gendagá ét, má ham bedistén bale nadistesh o harché shomá eshkonagá ét, má ham beshkotén bale naeshkotesh.
MAT 13:18 Nun dehkánay mesálay mánáyá gósh bedárét.
MAT 13:19 Wahdé kasé Hodáay bádsháhiay habará eshkont bale sarpada nabit, gorhá Shaytána kayt o harché ke áiay delá keshag butag, áyán dara kant o bárt. Esh at ráhay sará retkagén tohmáni mesálay máná.
MAT 13:20 Á tohm ke dhal o dhókáni tahá retkant, hamá mardomay mesál ent ke Hodáay habará eshkont o hamá damáná pa gal o shádeha mannit,
MAT 13:21 bale é sawabá ke risshag o wandháli najatag, Hodáay habar áiay delá tán dérá namánit. Wahdé Hodáay habaray sawabá sakki o sóriána kapit yá ázáré rasiti, hamá damáná cha ráhá thagalit o kapit.
MAT 13:22 Á tohm ke cherekk o dhangaráni tahá retkant, hamá mardomay mesál ent ke Hodáay habará eshkont, bale donyái parésháni o mál o zarray delkasshi o préb áiá rada dayant o naylant ke Hodáay habar besabzit o bar o samar bedant.
MAT 13:23 Bale á tohm ke sharrén zeminá retkant, hamá mardomay mesál ent ke Hodáay habará gósha dárit o sarpada bit o bar o samara dant, bázéné sad sari, bázéné shast sari o bázéné si sari.”
MAT 13:24 Issáyá áyáná dega mesálé dát. Gwashti: “Ásmáni bádsháhi, hamá mardomay paymá ent ke wati dhagárá sharrén tohmi keshtagat,
MAT 13:25 bale wahdé mardom wáb atant, dozhmené átk o gandománi tahá zahrichkay tohmi rétk o shot.
MAT 13:26 Wahdé gandom rostant o hóshagesh áwort, zahrichk ham rost o mazan butant.
MAT 13:27 Nun nawkar átkant o gón wati wájahá gwashtesh: ‘Oo wájah! Taw wati dhagárá sharrén tohm nakeshtagat? Gorhá é zahrichk cha kojá átkant?’
MAT 13:28 Gwashti: ‘Dozhmenéá é kár kortag.’ Nawkarán jost kort: ‘Taw lóthay ke má berawén o áyán begwajén?’
MAT 13:29 Passawi dát: ‘Na, chó mabit ke zahrichkáni gwajagay wahdá shomá gandomán ham begwajét.
MAT 13:30 Tán ronagay wahdá belli hórigá rodant, ronagay wahdá gón ronókána gwashán: “Pésará zahrichkán begwajét o pa sóchagá grámband bekanét, randá gandomán byárét o mani ambárá ér kanét.”’”
MAT 13:31 Issáyá áyáná dega mesálé dát. Gwashti: “Ásmáni bádsháhi, thélkáhay tohmay dhawlá ent ke kaséá zort o wati dhagárá kesht.
MAT 13:32 Chónáhá áiay tohm cha é dega tohmán kaster ent, bale wahdé rodit, cha é dega sabzagán borzter, drachkéay kaddá bit o báli morg áiay ták o tháláni sará kodóha bandant.”
MAT 13:33 Issáyá áyáná dega yakk mesálé dát. Gwashti: “Ásmáni bádsháhi hamá homiray paymá ent ke janénéá zort o gón bázén ártéá hawár kort o kamm kammá sajjahén árt gwát gept.”
MAT 13:34 Issáyá gón mardománi mocchiá é sajjahén habar gón darwar o mesálán kortant, bé mesálá gón áyán hecchi nagwasht.
MAT 13:35 É dhawlá nabiay kortagén é habar rást o sarjam but: “Man gón darwar o mesálán wati dapá pacha kanán o anchén habara kanán ke cha donyáay pédáeshá beger tán annun chér o andém butagant.”
MAT 13:36 Nun Issáyá mardom roksat kortant o lógay tahá shot. Ódá morid áiay gwará átkant o gwashtesh: “Márá dhagáray zahrichkay mesálay mánáyá sarpad kan.”
MAT 13:37 Gwashti: “Hamá ke sharrén tohma keshit, Ensánay Chokk ent.
MAT 13:38 Dhagár donyá ent. Sharrén tohm ásmáni bádsháhiay chokk ant o zahrichkay tohm Shaytánay chokk ant.
MAT 13:39 Hamá dozhmen ke zahrichkay tohmi dhagárá rétkant, Shaytán ent. Kesháray rónay wahd áheratay róch ent o kesháray ronók préshtag ant.
MAT 13:40 Anchosh ke zahrichk mocch kanag o ásá sóchaga bant, áheratay róchá ham hamé dhawlá bit.
MAT 13:41 Ensánay Chokk wati préshtagán ráha dant tánke sajjahén radkárán o hamáyán ke degarán dém pa gonáhá barant, yakjáh bekanant o cha áiay bádsháhiá dar bekanant.
MAT 13:42 Áyán ásay kurahá dawra dayant ke ódá gréwag o peryát o zária bit.
MAT 13:43 Á wahdá pahrézkár wati Petay bádsháhiá róchay paymá drapshant. Harkasá gósh per, beshkont.”
MAT 13:44 “Ásmáni bádsháhi ganjéay paymá ent ke dhagáréá chér dayag butagat. Wahdé kaséá dar gétk, gal but o padá chéri dát o shot o harché ke áiá hastat, bahái kortant o hamá dhagári pa bahá zort.
MAT 13:45 Hamé dhawlá, ásmáni bádsháhi sawdágeréay paymá ent ke dhawldárén morwáredáni shóházá at.
MAT 13:46 Wahdé áiá gránkimatén morwáredé dast kapt, shot o harché ke áiá hastat bahái kortant o hamá morwáredi gept.
MAT 13:47 Hamé dhawlá ásmáni bádsháhi hamá dám o máhóréay dhawlá ent ke gwarmá dawresh dát o dámá har paymén máhig gept.
MAT 13:48 Wahdé dám cha máhigá porr but, cha gwarmá daresh kort. Padá neshtant o sharrén máhigesh dar chetant o saptán kortant o harábénesh dawr dátant.
MAT 13:49 Áheratay róchá ham anchosha bit. Préshtaga káyant o badkárán cha pahrézkárán jetá kanant.
MAT 13:50 Badkárán ásay kurahá dawra dayant ke ódá gréwag o peryát o zária bit.
MAT 13:51 Shomá é sajjahén habarán sarpad butét?” Áyán passaw dát: “Ji haw.”
MAT 13:52 Gón áyán gwashti: “Paméshká Sharyatay har zánóger ke ásmáni bádsháhiay moridé bit, hamá lógwáhonday dhawlá ent ke cha wati ganj o hazánagá har paymén nók o kwahnén chizza kasshit o kárit.”
MAT 13:53 Wahdé Issáyá é mesál halás kortant, cha ódá dar kapt.
MAT 13:54 Wati jenday shahrá átk o óday kanisahá mardomán tálim dayagá lagget. Mardomán pa hayráni gwasht: “Eshiá é dánái o mójezah kanagay wák o twán cha kojá rasetag?”
MAT 13:55 É hamá dártráshay chokk naent? Eshiay mát Maryam ent o brát Ákub o Issop o Shamun o Yahudá ant.
MAT 13:56 Eshiay sajjahén gohár hamedá may kerrá jahmenend ant. Gorhá é sajjahén chizzi cha kojá áwortagant?
MAT 13:57 Mardom Issáay sará nawassh butant. Issáyá gwasht: “Nabiá har jágah ezzata rasit, bale wati métag o lógá ezzatia narasit.”
MAT 13:58 Gorhá áyáni bébáwariay sawabá ódá bázén mójezahé péshi nadásht.
MAT 14:1 Hamé róchán Jalilay hákem Hirudisá Issáay nám o tawár eshkot.
MAT 14:2 Gorhá gón wati hezmatkárán gwashti ke é hamá pákshódi dayókén Yahyá ent ke cha mordagán zendag butag, paméshká choshén ajekkái kár o mójezaha kant.
MAT 14:3 Gapp esh ent ke Hirudisá, wati jan Hirudiahay sawabá ke pésará áiay brát Piliposay jan at, Yahyá geptag o zendáná band kortagat.
MAT 14:4 Chéá ke Yahyáyá gón Hirudisá báz bará gwashtagat ke Hirudiahay gerag pa taw rawá naent.
MAT 14:5 Hirudisá lóthet ke Yahyáyá bekoshit, bale cha mardomána torseti, chéá ke mardománi báwar esh at ke Yahyá paygambaré.
MAT 14:6 Wahdé Hirudisay sálgerah but, Hirudiahay jenekká mehmánáni démá nách o sohbat kort. Hirudis cha é nách o sohbatá sakk wassh but,
MAT 14:7 sawgendi wárt o gón jenekká labzi kort: “Harché lóthay belóth, tará dayán.”
MAT 14:8 Jenekká gón mátá shawr o saláh kort o gwasht: “Pákshódi dayókén Yahyáay sará tabakkéay tahá bekan o hamedá byár o maná beday.”
MAT 14:9 Hirudis sakk paréshán but bale wati sawgend o mehmánáni sawabá hokmi dát ke jenekkay é wáhagá purah kanag bebit.
MAT 14:10 É dhawlá, zendáná Yahyáay sari borráént.
MAT 14:11 Áiay saresh tabakkéay tahá kort o jenekkárá dátesh o áiá wati mátay kerrá bort.
MAT 14:12 Yahyáay morid átkant o áiay jónesh bort o kabr o kapan kort. Randá shotant o Issáesh hál dát.
MAT 14:13 É habaray eshkonagá rand, Issá gón moridán bójigéá swár but o dur o gestáén jáhéá shot ke tahná bebant. Wahdé mardom sahig butant, cha shahrán payádaká áiay randá ráh geptant.
MAT 14:14 Issá ke cha bójigá ér kapt o mardománi mazanén mocchii dist, áyáni sará bazzagi but o áyáni nádráhén mardomi dráh kortant.
MAT 14:15 Nun béwahd at. Morid áiay kerrá átkant o gwashtesh: “É, dur o gestáén jágahé o nun béwahd ent. Mardomán ráh day ke métag o bázárána rawant o pa wat ward o waráké bahá gerant.”
MAT 14:16 Bale Issáyá gwasht: “Zalurat naent ke berawant, shomá wat áyán warák bedayét.”
MAT 14:17 Gwashtesh: “Edá may kerrá panch nagan o do máhigá abéd, dega hecch nést.”
MAT 14:18 Gwashti: “Mani kerrá byárétesh.”
MAT 14:19 Mardomi hokm dátant ke káháni sará benedét. Nun panchén nagan o doén máhigi zortant, ásmánay némagá cháreti o Hodáay shogri gept, nagani chondh chondh kort o moridáni dastá dátant. Moridán nagan mardománi sará bahr kortant.
MAT 14:20 Sajjahénán sérá wárt. Cha sar átkagén chondhán dwázdah saptesh porr kort.
MAT 14:21 Abéd cha janén o chokkán, kesás panch hazár mardéná nán wárt.
MAT 14:22 Issáyá hamá damáná morid parmán dát o gwashtant: “Man é mardomán roksata kanán. Tán á wahdá shomá bójigá swár bét o cha man pésar gwarmay á dastá berawét.”
MAT 14:23 Mardománi roksat kanagá rand, tahná but o pa dwá kanagá kóhá sar kapt. Nun béwahd at o á tahná at.
MAT 14:24 É wahdi, bójig cha hoshkiá dur shotagat o trond o tézén gwát o mastén mawj o chawlán geptagat.
MAT 14:25 Shapay cháromi pásá, Issá ápay sará gám janán but o dém pa moridán átk.
MAT 14:26 Wahdé moridán dist ke Issá ápay sará gám janán ent, deltrakk butant. Cha torsá kukkáresh kort o gwashtesh: “Jenné!”
MAT 14:27 Bale Issáyá damáná gwasht: “Delá dhaddh kanét. Matorsét, é man án.”
MAT 14:28 Petrosá gwasht: “Oo Hodáwand! Agan é taw ay, gorhá maná hokm beday ke man ham ápay sará tai kerrá byáyán.”
MAT 14:29 Issáyá gwasht: “Byá!” Gorhá Petros cha bójigá ér átk o ápay sará Issáay némagá rawagá lagget.
MAT 14:30 Bale cha gwátay trondiá torseti o bokkagá lagget. Kukkári kort: “Oo Hodáwand! Maná berakkén.”
MAT 14:31 Hamá damáná Issáyá dast shahár dát, á gept o gwashti: “Oo kambáwar! Taw chéá shakk kort?”
MAT 14:32 Wahde bójigá sar kaptant, gwát kapt o árám but.
MAT 14:33 Hamá ke bójigá atant, Issáesh satá o saná kanáná gwasht: “Béshakk taw Hodáay Chokk ay.”
MAT 14:34 Gwarmesh gwázént o Genisáretay métagá shotant.
MAT 14:35 Óday mardomán Issá pajjáh áwort, kash o gwaray sajjahén hand o damagay mardomesh hál dátant o sajjahén nádráhesh áiay kerrá áwortant.
MAT 14:36 Dazbandiesh kort: “Márá bell ke bass tai kabáhay lambá dasta janén.” Haminchok mardomá ke dast jat, wassh o dráh butant.
MAT 15:1 Nun cha Urshalimá átkagén lahtén Parisi o Sharyatay zánóger Issáay kerrá átk o gwashtesh:
MAT 15:2 “Tai morid chéá may pet o piroki rasmá próshant o waragá pésar dasta nashódant?”
MAT 15:3 Áyáni passawá gwashti: “Shomá chéá pa wati rasmay dáragá Hodáay hokmá próshét?
MAT 15:4 Hodáyá gwashtag: Wati pet o mátá ezzat beday o harkasá ke wati pet yá mát nálat kort, áiay sezá mark ent.
MAT 15:5 Bale shomá gwashét: ‘Agan kasé wati petá yá mátá begwashit: “Hamá komakk ke man báyad ent shomárá bedátén, á man Hodáay ráhá korbán kortag,”
MAT 15:6 nun ejázat naent ke á wati pet o mátá komakk bedant.’ Shomá pa wati rasmay dáragá Hodáay habará halás o nákára kanét.
MAT 15:7 Oo doru o dopóstén mardomán! Eshayá nabiá shomay bárawá sharr gwashtag:
MAT 15:8 É mardom dapá maná ezzata dayant, bale delesh cha man sakk dur ent.
MAT 15:9 É moptá maná parastesha kanant o mardománi ráh o rahbandáni tálimá anchosha dayant ke gwashay Hodáay hokm ant.”
MAT 15:10 Issáyá mardom wati kerrá lótháént o gwashtant: “Gósh bedárét o sarpad bebét.
MAT 15:11 Chizzé ke dapá rawt, mardomá nápáka nakant, bale hamá chizz ke cha dapá dara kayt, mardomá nápáka kant.”
MAT 15:12 Nun morid áiay kerrá átkant o gwashtesh: “Taw zánay ke tai é habarán Parisi tawréntagant?”
MAT 15:13 Issáyá passaw dát: “Har nehálé ke mani ásmáni Petá nakeshtag, gwajaga bit.
MAT 15:14 Shomá áyán bellét. Á, kóráni kórén rahshón ant, wahdé yakk kóré domi kóray rahshóna bit, doén kandhá kapant.”
MAT 15:15 Petrosá gwasht: “É mesálay mánáyá márá sarpad kan.”
MAT 15:16 Issáyá gwasht: “Shomá angat ham inchok násarpad ét?
MAT 15:17 Nazánét harché ke dapá rawt, lápá mána bit o padá cha rótán dara kayt.
MAT 15:18 Bale harché ke cha dapá dara kayt, cha delá chesta bit o hamé chizz ensáná sell o nápáka kant.
MAT 15:19 Chéá ke badén pegr o hayál, hón o kósh, zená, bénangi, dozzi, drógén sháhedi o kopr cha delá chesta bant.
MAT 15:20 Hamé chizz ant ke mardomá nápáka kanant, gón nashoshtagén dastán warák warag mardomá nápáka nakant.”
MAT 15:21 Issáyá á jágah yalah dát o Sur o Saydunay damagá shot.
MAT 15:22 Kanháni janéné ke hamóday mardomé at, átk o kukkári kort: “Oo Hodáwand, oo Dáud bádsháhay chokk! Mani sará rahm kan. Mani jenekká jenné per o jenekk sakk azáb ent.”
MAT 15:23 Bale Issáyá hecch nagwasht. Morid Issáay kerrá átkant o dazbandiesh kort: “Eshiá roksat kan, kukkár kanáná may randá kaptag.”
MAT 15:24 Issáyá darráént: “Man bass pa Bani Esráilay gárén méshán ráh dayag butagán.”
MAT 15:25 Gorhá janén áiay pádán kapt o gwashti: “Oo Hodáwand! Maná komakk kan.”
MAT 15:26 Gwashti: “Chokkáni naganay pach gerag o kochekkáni démá dawr dayag sharr naent.”
MAT 15:27 Janéná gwasht: “Haw, oo Hodáwand! Bale kochekk ham naganay hamá chondhána warant ke cha áyáni wáhondáni parzónagána kapant.”
MAT 15:28 Gorhá Issáyá áiay passawá gwasht: “Oo bánok! Tai imán mohr o mohkam ent, hamá dhawl bit ke taw lóthay.” Hamá damáná áiay jenekk dráh but.
MAT 15:29 Issáyá á jágah esht o shot, cha Jalilay Mazangwarmay lambá gwast o yakk kóhéay sará sar kapt o nesht.
MAT 15:30 Bázén mardomé áiay kerrá átk. Lang, kór, mondh, gong o dega har paymén násalámatén mardomesh Issáay kerrá áwortant o áiá dráh kortant.
MAT 15:31 Wahdé Esráilián dist ke gong habar kanagá ant, mondh dráh bayagá ant, lang tarragá ant o kór gendagá ant, gorhá hayrán butant o wati Hodá satá o sanáesh kort.
MAT 15:32 Issáyá wati morid lótháént o gwashtant: “Maná é mardománi sará bazzaga bit, say róch ent ke mani kerrá ant o pa waragá hecchesh nést. Mana nalóthán ke eshán gón shodigén lápé roksat bekanán. Chó mabit ke ráhá betosant o bekapant.”
MAT 15:33 Moridán darráént: “É gyábáná má inchok nán cha kojá byárén ke é mardom sér bekanant?”
MAT 15:34 Gorhá Issáyá cha moridán jost kort: “Shomárá chont nagan gón?” Gwashtesh: “Hapt nagan o lahtén kasánén máhig.”
MAT 15:35 Áiá gón mardomán gwasht: “Zeminay sará benendét.”
MAT 15:36 Haptén nagan o máhigi zortant, Hodáay shogri gept, nagan o máhigi chondh chondh kort o moridáná dátant o moridán mardománá dátant.
MAT 15:37 Sajjahénán sérá wárt o cha sar átkagén chondhán moridán hapt lach porr kort.
MAT 15:38 Janén o chokkán abéd, chár hazár mardéná warák wárt.
MAT 15:39 Mardománi mocchiay roksat kanagá rand, Issá bójigá nesht o Magadanay damagá shot.
MAT 16:1 Parisi o Saduki Issáay kerrá pa áiay chakkásagá átkant o gwashtesh: “Márá ásmáni neshánié pésh dár.”
MAT 16:2 Issáyá passaw dát: “Rózarday wahdá shomá gwashét: ‘Hawá wassha bit ke ásmán sohr ent.’
MAT 16:3 Sabáhá gwashét: ‘Maróchi tuppána bit ke ásmán sohr ent o jambarán bastag.’ Shomá ásmánay rang o dróshomay andázah janagá zánét, bale dawr o zamánagáni neshániáni andázah janagá nazánét.
MAT 16:4 Badkár o zenákárén nasl o padréch neshánia lóthit, bale Yunos nabiay neshániá abéd, dega hecch neshánié áyán dayaga nabit.” Randá Issáyá á yalah dátant o shot.
MAT 16:5 Morid mazangwarmay á dastá shotant bale shamoshtagatesh ke nagan bezurant gón.
MAT 16:6 Issáyá gón áyán gwasht: “Habardár! Cha Parisi o Sadukiáni homirá pahréz bekanét.”
MAT 16:7 Gorhá á watmánwat habará laggetant. Gwashtesh: “Paméshká chosha gwashit ke má gón wat nagan nayáwortag.”
MAT 16:8 Issáyá zánt ke ché gwashagá ant, paméshká gwashti: “Oo kambáwarán! Chéá watmánwatá gwashagá ét ke márá nagan gón nést?
MAT 16:9 Angat hecch sarpad naét? Shomá á panchén nagan shamoshtagant ke panch hazár mardomá sérá wárt o shomá cha sar átkagénán chinchok sapt porr kort?
MAT 16:10 Yá hamá haptén nagan ke chár hazár mardomá wárt o sér kort o shomá cha sar átkagénán chinchok lach porr kort?
MAT 16:11 Gorhá chón sarpada nabét ke man gón shomá naganay habará naán? Cha Parisi o Sadukiáni homirá pahréz bekanét.”
MAT 16:12 Gorhá morid sarpad butant ke á gwashagá naent cha naganay homirá pahréz bekanét, gwashagá ent cha Parisi o Sadukiáni tálimá watá dur bedárét.
MAT 16:13 Wahdé Issá Kaysariah Pilipiay damagá átk, cha wati moridán josti kort: “Mardom Ensánay Chokkay bárawá ché gwashant, man kay án?”
MAT 16:14 Áyán passaw dát: “Lahténa gwashit ke taw pákshódi dayókén Yahyá ay, lahténa gwashit Elyás nabi ay, dega lahténa gwashit Eremyá nabi ay yá cha á dega nabián yakké ay.”
MAT 16:15 Gorhá josti kort: “Shomá wat mani bárawá ché gwashét, man kay án?”
MAT 16:16 Shamun-Petrosá passaw dát: “Taw Masih ay, namiránén Hodáay Chokk ay.”
MAT 16:17 Issáyá darráént: “Oo Shamun, oo Yunáay chokk! Taw bahtáwaré ay, chéá ke é habar ensánéá pa taw záher nakortag, mani Pet ke ásmáná ent, áiá záher kortag.
MAT 16:18 Tará gwashán ke taw Petros ay o é mohrén kóhay sará man wati kelisáay bonyádá éra kanán ke markay zór áiay sará báládasta nabit.
MAT 16:19 Man ásmáni bádsháhiay kelitán tará dayán. Harché ke taw zeminay sará makana kanay, ásmáná ham makan kanaga bit, harché ke taw zeminay sará rawá kanay, ásmáná ham rawá kanaga bit.”
MAT 16:20 Padá áiá wati morid parmán dátant: “Gón hechkasá magwashét ke man Masih án.”
MAT 16:21 Cha hamá wahdá o rand Issá gón wati moridán tachká habar kanagá lagget. Gwashti: “Man báyad ent Urshalimá berawán, cha kawmay kamásh o mazanén dini péshwá o Sharyatay zánógeráni dastá bázén sakki o sórié besaggán o koshag bebán o sayomi róchá zendag bebán.”
MAT 16:22 Petrosá á yakk kerré bort o hakkal kanagá lagget: “Oo Hodáwand! Hodá chosh makanát. Gón taw hechbar é paymá mabát.”
MAT 16:23 Issáyá chakk tarrént o gón Petrosá gwashti: “Oo Shaytán! Cha mani démá dur bay. Taw mani ráhá bandagá ay, tai hayál Hodái hayálé naent, ensáni hayálé.”
MAT 16:24 Nun Issáyá gón wati moridán gwasht: “Agan kasé lóthit mani randgiriá bekant, báyad ent wati delay sajjahén lóth o wáhagán bekoshit o wati jenday salibá baddhá bekant o mani randgiriá bekant.
MAT 16:25 Chéá ke harkas ke wati sáhay rakkénagay johdá kant, gária dant o harkas ke mani háterá wati sáhá nadra kant, rakkéniti.
MAT 16:26 Agan yakkéá sajjahén donyá berasit bale wati sáhá gár bedant, gorhá áiá che páedaga rasit? Mardom wati sáhay badalá chónén kimaté dáta kant?
MAT 16:27 Ensánay Chokk gón wati Petay mazanén shán o marháhá préshtagáni hamráhiá ke kayt, gorhá harkasá áiay kortagén káráni mozzá dant.
MAT 16:28 Shomárá rásténa gwashán, edá lahtén mardom óshtátag ke tánke á Ensánay Chokká magendant ke wati bádsháhiay tahá záher ent, é namerant.”
MAT 17:1 Shash róchá rand, Issáyá Petros o Ákub o áiay brát Yuhanná hamráh kortant o borzén kóhéay sará bortant ke ódá dega kass mabit.
MAT 17:2 Ódá áyáni démá Issáay rang o dróshom badal but. Áiay dém chó róchá drapshnák o póshák chó nurá espét butant.
MAT 17:3 Hamé wahdá áyáni démá Mussá o Elyás záher butant o gón Issáyá habar kanagá laggetant.
MAT 17:4 Petrosá gón Issáyá gwasht: “Oo Hodáwand! May edá bayag sakk sharr ent, agan tai razá bebit, man hamedá say sáheg o kápára bandán, yakké pa taw, yakké pa Mussáyá o yakké pa Elyásá.”
MAT 17:5 Á hamé habarán at ke drapshnákén jambaré áyáni sará sáhél but. Cha jambará tawáré átk: “É mani dóstigén Bacch ent, cha eshiá man sakk wassh o razá án, eshiay habarán gósh bedárét.”
MAT 17:6 Moridán ke é tawár eshkot, deltrakk butant o dém pa chér kaptant.
MAT 17:7 Issá ayáni kerrá átk, dasti per kortant o gwashti: “Pád áét, matorsét!”
MAT 17:8 Wahdé áyán chamm chest kortant, abéd cha Issáyá dega kassesh nadist.
MAT 17:9 Cha kóhá ér kapagay wahdá Issáyá á hokm dátant: “Tán hamá wahdá ke Ensánay Chokká cha mordagán jáh najatag, wati é distagén chizzáni bárawá hechkasá hál madayét.”
MAT 17:10 Moridán jost kort: “Gorhá Sharyatay zánóger chéá gwashant ke Masihay áyagá pésar, báyad ent Elyás nabi byayt?”
MAT 17:11 Passawi dát: “Béshakk, Elyása kayt o sajjahén kárán gwam o géga kant.
MAT 17:12 Bale man shomárá gwashán, Elyás wa átk, bale áyán pajjáh nayáwort o harché ke áyáni delá lóthet, gón áiá kortesh. Hamé paymá Ensánay Chokká ham cha áyáni dastá sakki o sóri saggagi ent.”
MAT 17:13 Nun moridán zánt ke á pákshódi dayókén Yahyáay bárawá habará ent.
MAT 17:14 Wahdé Issá o sayén morid mardománi mocchiay kerrá átkant, mardé Issáay gwará átk, kóndhán kapt o gwashti:
MAT 17:15 “Oo wájah! Mani chokkay sará bazzag kan, áiá mariay nádráhi gón ent o sakk azábi kortag, báz bará ásá kapit o báz bará ápá.
MAT 17:16 Man tai moridáni kerrá áwort, bale áyán dráh kort nakort.”
MAT 17:17 Issáyá gwasht: “Oo bébáwar o gomráhén nasl o padréch! Man tán kadéná gón shomá bemánán? Tán chinchok wahdá shomárá besaggán? Chokká edá mani kerrá byárét.”
MAT 17:18 Issáyá jenn hakkal dát, jenn dar átk o bachakk hamá damáná dráh but.
MAT 17:19 Randá morid ehwatá Issáay gwará átkant o cha áiá jostesh kort: “Má chéá á jenn kasshet nakort?”
MAT 17:20 Issáyá passaw dát: “Shomay imánay nezóriay sawabá. Shomárá rásténa gwashán, agan shomay imán arzonéay kesásá ham bebit, shomá gón é kóhá gwashta kanét ke cha edá bekenz o ódá beraw o kóha kenzit. Hecch chizz pa shomá nabutenia nabit.
MAT 17:21 Bale é dhawlén jenn, abéd cha dwá kanag o róchag dáragá dega warhá kasshaga nabant.”
MAT 17:22 Wahdé morid Jalilá yakjáh butant, Issáyá gón áyán gwasht: “Ensánay Chokk dróhaga bit o anchén mardománi dastá dayaga bit
MAT 17:23 ke áiá koshant, bale sayomi róchá á zendaga bit o jáha jant.” Cha é habarán morid sakk gamig butant.
MAT 17:24 Wahdé Issá o áiay morid Kaparnáhumá átk o rasetant, gorhá mazanén parasteshgáhay songi o máliátgir Petrosay kerrá átkant o jostesh kort: “Shomay ostád mazanén parasteshgáhay songá nadant?”
MAT 17:25 Passawi dát: “Haw, dant.” Wahdé Petros lógá átk, Issáyá cha áiay gapp janagá pésar hamé jost kort: “Oo Shamun! Donyáay bádsháh cha kayá song o máliáta gerant? Cha wati chokkán yá cha degarán?”
MAT 17:26 Passawi dát: “Cha degarán.” Issáyá gwasht: “Gorhá chokkán dayaga nalóthit.
MAT 17:27 Bale nun é kárá bekan ke á delá mayárant. Mazangwarmá beraw o nahigé ápá dawr day, hamá máhig ke pésará nahigá jant, áiay dapá pach kan, yakk chárkaldári zarré genday, hameshiá bezur o mani o wati songá porr kan.”
MAT 18:1 Hamá wahdá morid Issáay kerrá átkant o jostesh kort: “Ásmáni bádsháhiá cha sajjahénán masterén mardom kay ent?”
MAT 18:2 Issáyá kasánén chokké tawár kort, áyáni nyámá óshtárént o
MAT 18:3 gwashti: “Shomárá rásténa gwashán, agan shomá watá cha tahá badal makanét o kasánén chokkáni paymá mabét, hechbar ásmáni bádsháhiá pád ér korta nakanét.
MAT 18:4 Paméshká harkas ke watá é chokkay dhawlá béshán o békebr bekant, ásmáni bádsháhiá hamá cha sajjahénán mastera bit.
MAT 18:5 Harkas ke mani námá é dhawlén kasánén chokké wasshátka kant o sharapa dant, maná sharapa dant.
MAT 18:6 É gwandhó ke mani sará báwara kanant, harkas ke cha eshán yakkéá ham dém pa gonáhá bebárt, sharter hamesh ent ke jenteri táé gomráh kanókay gotthá bebandant o daryáay johlánkián chagali bedayant.
MAT 18:7 Bazhn o apsóz pa é donyáyá ke gomráhiáni sawabsáz ent. Gomráh kanóken chizz mardomay zendá allamá káyant, bale bazhn o apsóz pa hamáiá ke gomráhiay sawabsáza bit.
MAT 18:8 Agan tai dast yá pád tará dém pa gonáhá bebárt, áiá borr o dawr day, chéá ke gón doén dast o pádán dózahay dáemi ásá kapagay badalá, pa taw sharter ent ke lang o mondh bebay o abadmánén zenday wáhond bebay.
MAT 18:9 O agan tai chamm tará dém pa gonáhá bebárt, áiá dar kan o dawr day, chéá ke gón doén chammán dózahay ásá kapagay badalá, pa taw sharter ent ke gón yakk chamméá abadmánén zenday wáhond bebay.
MAT 18:10 Habardár! Cha é gwandhóán yakkéá ham kamarzesh mazánét o jahl majanét. Man shomárá gwashán ke ásmáná esháni préshtag modám mani ásmáni Petay bárgáhá óshtók ant o Petay démá gendant.
MAT 18:11 Ensánay Chokk pa gárénáni rakkénagá átkag.
MAT 18:12 Shomá ché gwashét? Agan kaséá sad mésh hast o cha áyán yakké gár bebit, gorhá nawad o nohén méshán kóhá yalaha nakant o gárén méshay shóházá narawt?
MAT 18:13 Shomárá rásténa gwashán, agan eshiá dar begéjit, cha á nawad o nohén méshán ke gár nabutagant, pa eshiá géshter gala bit.
MAT 18:14 Hamé paymá, shomay ásmáni Pet razá nabit ke cha é gwandóán yakké ham gár bebit.
MAT 18:15 Agan tai brát gón taw badié bekant, beraw o do pa doá sarpadi kan, agan tai habari gósh dásht, gorhá bezán tará wati brát dobar rasetag.
MAT 18:16 Bale agan tai habari gósh nadásht, gorhá yakk o do kas hamráh bekan, tánke har habaray rásti, gón do yá say mardomay sháhediá sábet kanag bebit.
MAT 18:17 Agan áyáni habari gósh nadásht, gorhá kelisáyá hál beday. Agan kelisáay habari ham gósh nadásht, gorhá áiá nábáwaré hesáb kan.
MAT 18:18 Shomárá rásténa gwashán, harché ke shomá zeminay sará makana kanét, ásmáná ham makan kanaga bit o harché ke shomá zeminay sará rawá kanét, ásmáná ham rawá kanaga bit.
MAT 18:19 Man shomárá é gappá ham gwashán, agan zeminay sará cha shomá do kas ham pa hamdeli o tepáki chizzé belóthit, cha mani ásmáni Petay némagá áyána rasit.
MAT 18:20 Chéá ke har jáh do yá say kas ham mani námay sará hór bebit, man gón áyán góna bán.”
MAT 18:21 Hamé wahdá Petros Issáay kerrá átk o josti kort: “Oo Hodáwand! Agan mani brát gón man badi bekant, gorhá tán chont randá man áiá pahell bekanán? Tán hapt randá?”
MAT 18:22 Issáyá passaw dát: “Man tará gwashán, hapt randá na. Haptád o hapt randá bebakshi.
MAT 18:23 Ásmáni bádsháhi hamá bádsháhay dhawlá ent ke cha wati golámán hesáb geragi lóthet.
MAT 18:24 Wahdé hesáb geragá lagget, yakk mardé áiay démá áwortesh ke lakkáni lakk dinárá wámdár at,
MAT 18:25 bale áiá wám dát nakortant. Paméshká wájahá hokm dát ke áiay jend o jan o chokk o dega harché ke áiá hast, bahá kanag bebant o wám adá kanag bebant.
MAT 18:26 Golám áiay pádán kapt o mennat o zárii kort o gwashti: ‘Maná móh beday, tai sajjahén wámána dayán.’
MAT 18:27 Wájahá golámay sará bazzag but, cha á wámán sar gwast o áiay jendi ham ázát kort.
MAT 18:28 Bale wahdé á golám dhanná dar átk, wati hamkárén golámi dist ke sad dinárá áiay wámdár at, dasti gotthá sakk dátant o gwashti: ‘Mani wámán beday.’
MAT 18:29 Wámdárén hamkár áiay pádán kapt o mennat o zárii kort o gwashti: ‘Maná móh beday, tai wámána dayán.’
MAT 18:30 Bale áiá namannet o zendáná bandi kanáént ke tánke wámána nadant, yalah dayag mabit.
MAT 18:31 É dega golám ke sahig butant, sakk delranj butant o sajjahén hál o habaresh pa wati wájahá sar kortant.
MAT 18:32 Gorhá wájahá á golám lótháént o gwashti: ‘Oo radkárén golám! Man tai wám tará paméshká bakshetant ke taw gón man báz mennat o zári kort.
MAT 18:33 Anchosh ke maná tai sará bazzag but, tará ham báyad ent wati hamkárén golámay sará bazzag butén.’
MAT 18:34 Wájah zahr gept o á golámi band kanáént ke tánke sarjamén wámána nadant, ázár dayag bebit.
MAT 18:35 Nun agan shomá wati brátá pa del mabakshét, mani ásmáni Pet ham gón shomá hamé dhawlá kant.”
MAT 19:1 Wahdé Issáyá é habar halás kortant, Jalilay damagi yalah dát o dém pa Yahudiahay hamá hand o damagá shot ke Ordonay kawray domi dastá ent.
MAT 19:2 Mardománi mazanén rombé áiay randá gón kapt o Issáyá ódá áyáni nádráhén mardom dráh kortant.
MAT 19:3 Lahtén Parisi Issáay chakkásagá áiay kerrá átk o jostesh kort: “Pa mardá rawá ent ke har paymén sawabéá wati janay talák o sawnán bedant?”
MAT 19:4 Passawi tarrént: “Shomá nawántag ke Hodáyá jahánay jórh kanagay wahdá ensán addh kortag, mardén o janén o
MAT 19:5 gwashtagi: Paméshká mard wati pet o mátá yalaha kant o gón wati janá hór o yakjáha bit. Mard o jan, yakk jesm o jána bant.
MAT 19:6 É paymá, nun á do naant, yakk jesm o ján ant. Paméshká, á ke Hodáyá yakk kortagant, ensán áyán jetá makant.”
MAT 19:7 Jostesh kort: “Gorhá Mussáyá parchá parmán dátag ke mard wati janá taláknámahé bedant o nun cha lógá dari bekant?”
MAT 19:8 Issáyá passaw dát: “Shomay sengdeliay sawabá Mussáyá shomárá janénáni sawn dayagay ejázat dátag, cha bongéjá é dhawl nabutag.
MAT 19:9 Shomárá gwashán: Harkas cha zenákáriá abéd, dega sawabéá wati janénay sawn o talákán bedant o gón dega janénéá sur o sáng bekant, bezán zená kanagá ent.”
MAT 19:10 Moridán gwasht: “Agan mardén o janénay nyámá hál o jáwar esh ent, gorhá sur nakanag sharter ent.”
MAT 19:11 Gwashti: “É tálimá harkas zorta nakant, hamá kas zorta kant ke áiá é wák o twán bakshag butag.
MAT 19:12 Lahtén sur korta nakant chéá ke cha pédáeshá anchosh ant, lahtén mardomán gwahtag kortag o lahtén pa ásmáni bádsháhiá cha sur o sángá sara gwazit. Harkas ke é habará sarpada bit, bemanniti.”
MAT 19:13 Randá kasánén chokkesh Issáay kerrá áwortant ke wati dastá áyáni sará per bemoshit o pa áyán nékdwái bekant, bale moridán neherr o hakkal dátant.
MAT 19:14 Issáyá gwasht: “Chokkán bellét mani kerrá káyant, esháni démá madárét, chéá ke ásmáni bádsháhi anchénánig ent.”
MAT 19:15 Issáyá áyáni sará dast per mosht o randá cha ódá ráh gept.
MAT 19:16 Hamé wahdá mardé Issáay kerrá átk o josti kort: “Oo ostád! Man kojám nékiá bekanán ke abadmánén zenday wáhond bebán?”
MAT 19:17 Issáyá gwasht: “Taw chéá nékiay bárawá cha man josta kanay? ‘Nékén’ tahná yakké o á Hodáay jend ent. Agan taw abadmánén zenda lóthay, gorhá Hodáay parmánáni sará amal kan.”
MAT 19:18 Josti kort: “Kojám parmánáni sará?” Issáyá gwasht: “Hón makan, zená makan, dozzi makan, drógén sháhedi maday,
MAT 19:19 wati pet o mátá ezzat beday, wati hamsáhegá wati jenday paymá dóst bedár.”
MAT 19:20 Warnáyá gón Issáyá gwasht: “É sajjahén parmánáni sará man amal kortag. Dega kojám kár pasht kaptag?”
MAT 19:21 Issáyá passaw dát: “Agan lóthay kámel bebay, beraw wati sajjahén mál o hastiá bahá kan o zarrán garib o nézgárán beday. É paymá tará ásmáni ganjé rasit. Nun byá o mani randgiriá bekan.”
MAT 19:22 Warnáyá ke é habar eshkot, gamig but o shot, chéá ke sér o hazgárén mardé at.
MAT 19:23 Issáyá gón moridán gwasht: “Shomárá rásténa gwashán, pa sér o hazgárén mardomán ásmáni bádsháhiá páday ér kanag sakk grán ent.
MAT 19:24 Haw, shomárá gwashán, suchenay domká oshteray gwazag wa báz grán ent, bale pa hazgárén mardoméá Hodáay bádsháhiá páday ér kanag angat gránter ent.”
MAT 19:25 É habaray eshkonagá, morid sakk hayrán butant o watmánwatá gwashtesh: “Gorhá kay rakketa kant?”
MAT 19:26 Issáyá áyáni némagá cháret o gwasht: “É kár ensánay dastá nabit, bale Hodáay dastá har chizza bit.”
MAT 19:27 Gorhá Petrosá gwasht: “Má wati har chizz yalah dátag o tai randgiriá kanagá én, márá ché rasit?”
MAT 19:28 Issáyá gón áyán gwasht: “Shomárá rásténa gwashán, hamá nókén donyáyá wahdé Ensánay Chokk wati shán o shawkatay tahtay sará nendit, shomá ke mani hamráh ét, dwázdah tahtay sará nendét o Bani Esráilay dwázdahén kabilaháni kazáwatá kanét.
MAT 19:29 Harkasá ke pa mani námaygi lóg yá brát yá gohár yá pet yá mát yá chokk yá dhagár yalah dátagant, áiá sad sari géshtera rasit o abadmánén zenday wáhonda bit.
MAT 19:30 Bale bázéné ke awali ent, áheria bit o bázéné ke áheri ent, awalia bit.
MAT 20:1 Ásmáni bádsháhi, bágéay hamá wáhonday paymá ent ke sabáhá máhallah dar kapt ke mozzur dar begéjit o wati anguri bágá pa kár kanagá dém bedant.
MAT 20:2 Áiá mozz róché yakk dináré gisshént o mozzur bágá rawán dátant.
MAT 20:3 Kesás say sáhatá rand dar átk o disti ke dega lahtén mardom bázárá bé kár o rózgárá óshtátag.
MAT 20:4 Gwashti: ‘Shomá ham berawét, mani bágá kár kanét. Harché ke shomay hakka bit, shomárá dayán.’
MAT 20:5 Gorhá á shotant. Némróchay wahdá o dém pa bégáhá padá dhanná dar átk o anchoshi kort.
MAT 20:6 Rózarday nazzikká ham dar átk o disti ke dega lahtén mardom óshtátag, cha áyán josti kort: ‘Shomá chéá sajjahén róchá bé kárá óshtátagét?’
MAT 20:7 Gwashtesh: ‘Márá hechkasá kár nadátag.’ Bágay wáhondá gwasht: ‘Shomá ham berawét, mani bágá kár kanét.’
MAT 20:8 Róch ke ér nesht, bágay wáhondá gón kárendaháni masterá gwasht: ‘Mozzurán lótháén o áyáni mozzá beday, cha randigán bendát kan o awaligán beraw.’
MAT 20:9 Hamáyán ke rózarday nazzikká kár shoru kortagat, har yakkéá yakk dináré raset.
MAT 20:10 Padá hamáyáni bárig átk ke pésará káresh shoru kortagat. Áyán gwasht balkén márá géshtera rasit, bale áyán ham yakk yakk dináré raset.
MAT 20:11 Wati mozzesh zort o bágay wáhonday sará norondhagá laggetant, gwashtesh:
MAT 20:12 ‘Rand randi mozzurán bass yakk sáhaté kár kortag o má sajjahén róchá garmay sará kár kortag, bale taw mayg o áyáni mozz barábar kortant.’
MAT 20:13 Bágay wáhondá gón yakkéá gwasht: ‘Sangat! Man gón taw náhakki nakortag. Mani o tai karár yakk dináréay naat?
MAT 20:14 Paméshká haminchok ke tai hakk ent, bezur o beraw. Man wati master wat án ke harché tará dayán, haminchok rand randigá ham bedayán.
MAT 20:15 Záná, maná é hakk nést ke gón wati chizzán hamá dhawl bekanán ke mana lóthán? Yá taw mani daspachiay sará hasadda kanay?’
MAT 20:16 É dhawlá áheri awalia bant o awali áheria bant.”
MAT 20:17 Wahdé Issá dém pa Urshalimá rawagá at, áiá dwázdahén kásed yakk kerré bortant o gón áyán gwashti:
MAT 20:18 “Bechár, má Urshalimá rawén, ódá Ensánay Chokká gerant o mazanén dini péshwá o Sharyatay zánógeráni dastá dayant. Áiá markay sezá dayant o
MAT 20:19 darkawmén mardománi dastá dayanti. Darkawm áiá kalága zurant, gón shallák o hayzarán mána bandant o salibay sará dranjanti. Bale sayomi róchá, á padá zendaga bit o jáha jant.”
MAT 20:20 Hamé wahdá Zebdiay chokkáni mát gon wati chokkán Issáay kerrá átk, áiay pádán kapt o gwashti: “Man cha taw chizzé lóthán.”
MAT 20:21 Issáyá gwasht: “Ché lóthay?” Gwashti: “Labz kan ke tai bádsháhiá mani doén chokk tai kerrá nendant, yakké tai rástén kashá o domi chappén kashá.”
MAT 20:22 Issáyá passaw dát: “Shomá nazánét ché lóthagá ét. Á pyálah ke maná nóshagi ent, shomá nóshetia kanét?” Gwashtesh: “Ji haw, má nóshetia kanén.”
MAT 20:23 Issáyá gwasht: “Shomárá mani pyálah nóshagi ent, bale é mani dastá naent ke kay mani rástén o kay chappén kashá benendit. É jágah hamáyánig ant ke mani Petá pa áyán gisshéntagant.”
MAT 20:24 Wahdé á dega dahén moridán é habar eshkot, doén brátáni sará zahr geptant.
MAT 20:25 Gorhá Issáyá sajjahén morid lótháénant o gon áyán gwashti: “Shomá zánét ke darkawmáni hákem mardománi sará wájahia kanant o master wati zórá chérdastén mardománi sará kára bandant.
MAT 20:26 Bale shomá chosh makanét. Cha shomá harkas ke mazania lóthit, báyad ent sajjahénáni hezmatkár bebit o
MAT 20:27 cha shomá harkas ke masteria lóthit, shomay kaster o hezmatkár bebit.
MAT 20:28 Hamé dhawlá, Ensánay Chokk nayátkag ke mardom áiay hezmatá bekanant, átkag ke mardománi hezmatá bekant o gón wati sáhay dayagá, bázénéá berakkénit.”
MAT 20:29 Wahdé Issá o morid cha Ariháay shahrá dar áyagá atant, mazanén rombé Issáay hamráh but.
MAT 20:30 Áyáni ráhay sará neshtagén do kórá eshkot ke Issá gwazagá ent, kukkáresh kort o gwashtesh: “Oo Hodáwand, oo Dáud bádsháhay chokk! May sará rahm kan.”
MAT 20:31 Mardomán á hakkal dátant o gwashtesh: “Bétawár bét,” bale áyán ganter kukkár kort o gwashtesh: “Oo Hodáwand, oo Dáud bádsháhay chokk! May sará rahm kan.”
MAT 20:32 Issá óshtát, tawári kortant o gwashti: “Shomá cha man ché lóthét? Pa shomá ché bekanán?”
MAT 20:33 Áyán passaw dát: “Oo Hodáwand! May chammán rozhná kan.”
MAT 20:34 Issáyá bazzag but, dasti áyáni chammán per mosht o hamá damáná áyáni chamm rozhná butant o á Issáay hamráh butant.
MAT 21:1 Wahdé Issá o áiay morid Urshalimay nazzikká rasetant o Zaytunay Kóhá Bayt-Pájiay métagá átkant, Issáyá do morid rawán dát o
MAT 21:2 gwashtanti: “Démi métagá berawét, anchosh ke ódá rasét, haré gendét ke bastag o korragi ham gón ent, áyán bójét o pa man byárét.
MAT 21:3 Agan kaséá gón shomá chizzé gwasht, begwashét ke wájahá pakár ant o damáná ráhesha dant.”
MAT 21:4 É dhawlá nabiay kortagén é habar rást o sarjam but:
MAT 21:5 “Gón Sahyunay Jenekká begwashét: ‘Tai bádsháh pa taw pédák ent, béshán o békebré, korragéá, bezán kasánén haréá swár ent.’”
MAT 21:6 Gorhá morid shotant o hamá paymá ke Issáyá gwashtagat, hamá dhawlá kortesh.
MAT 21:7 Áyán har o korrag áwortant, wati shál o kabáhesh haráni poshtá ér kortant o Issá swár but.
MAT 21:8 Bázénéá wati shál o kabáh ráhay sará chérgéján kortant, dega bázén mardoméá maccháni pissh o tak borret o ráhay sará ér kort.
MAT 21:9 Rombá, Issáay démay o poshtay mardom, kukkár kanáná gwashagá atant: “Hushiáná, oo Dáud bádsháhay chokk! Mobárak ent hamá ke Hodáwanday námá kayt, Hushiáná, borzén arshá.”
MAT 21:10 Wahdé Issá Urshalimá raset, gorhá shór o sháré macchet. Sajjahén shahr jostá at: “É kay ent?”
MAT 21:11 Mocchiay mardomán gwasht: “É hamá nabi Issá ent. Jalilay shahr Náserahay mardomé.”
MAT 21:12 Issá mazanén parasteshgáhá shot o cha ódá sawdáger o geráki gallént o dar kortant. Sarrápáni thébal o kapót bahá kanókáni korsii chappi kortant.
MAT 21:13 Gwashti: “Hodáay Ketábá nebeshtah ent: Mani lóg dwá kanagay jágah gwashaga bit, bale shomá dhongáni panáhgáhé kortag.”
MAT 21:14 Mazanén parasteshgáhá, bázén kór o langé Issáay kerrá átk o áiá dráh kortant.
MAT 21:15 Wahdé mazanén dini péshwá o Sharyatay zánógerán Issáay mójezah o ajekkái kár distant o é ham distesh ke parasteshgáhá chokk pa kukkár “Hushiáná, oo Dáud bádsháhay chokk” gwashagá ant, zahr geptant o
MAT 21:16 cha Issáyá jostesh kort: “Eshkonagá ay é chokk ché gwashagá ant?” Gwashti: “Haw! Bale shomá hechbar nawántag ke: ‘Taw wati satá o saná chokk o shirmechén nonnokáni dapá ham dátag ke tará satá bekanant’?”
MAT 21:17 Nun Issáyá á yalah kortant o cha shahrá dar átk o Bayt-Anyáay métagá shot o hamódá wati shapi róch kort.
MAT 21:18 Wahdé Issá sabáhá máhallah per tarrag o shahray némagá rawagá at, gozhnag but.
MAT 21:19 Ráhay sará enjiray drachké disti, áiay nazzikká shot bale abéd cha táká dega hecchi nadist. Gorhá gwashti: “Padá hechbar burr o bar makanátay.” Drachk hamá damáná hoshk but.
MAT 21:20 Moridán ke dist, hayrán butant. Jostesh kort: “É drachk damáná chón hoshk but?”
MAT 21:21 Issáyá passaw dát: “Shomárá rásténa gwashán, agan shomárá imán bebit o delá shakk mayárét, gorhá hamá dhawlá ke gón enjiray drachká but, shomá ham anchosh o angat géshter korta kanét. Agan shomá é kóhá begwashét ke watá cha edá chest kan o daryáyá dawr beday, gorhá hamé dhawlá bit.
MAT 21:22 Agan shomárá báwar bebit, harché ke wati dwáyáni tahá lóthét, shomárá dayaga bit.”
MAT 21:23 Hamá wahdá ke Issá mazanén parasteshgáhá shot o tálim dayagá lagget, mazanén dini péshwá o kawmay kamásh áiay kerrá átkant o jostesh kort: “Taw gón kojám hakk o ehtiárá é kárána kanay? Kayá tará é ehtiár dátag?”
MAT 21:24 Issáyá áyáni passawá gwasht: “Maná ham cha shomá josté hast, agan mani jostay passawá bedayét, gorhá man shomárá gwashán ke gón kojám hakk o ehtiárá é kárána kanán.
MAT 21:25 Yahyáyá cha kojá pákshódi dayagay ehtiár rasetagat, cha ásmáná yá cha ensánay némagá?” Áyán watmánwatá shawr o saláh kort o gwashtesh: “Agan begwashén cha ásmáná, gorhá márá gwashit: ‘Parchá shomá áiay sará báwar nakort?’
MAT 21:26 Agan begwashén cha ensánay némagá, gorhá cha mardomán betorsén, chéá ke sajjahén mardománi delá Yahyá nabié.”
MAT 21:27 Paméshká passawesh dát: “Má nazánén.” Issáyá gwasht: “Gorhá man ham shomárá nagwashán ke gón kojám hakk o ehtiárá é kárána kanán.”
MAT 21:28 “Nun shomá ché gwashét? Mardé hastat, áiay do bacch atant. Wati masterén chokkay kerrá shot o gwashti: ‘Oo mani chokk! Maróchi beraw o mani anguri bágá kár kan.’
MAT 21:29 Jwábi dát: ‘Mana narawán,’ bale randá pashómán but o shot.
MAT 21:30 Gorhá domi chokkay kerrá shot o hamé dhawlá gwashti. Áiá jwáb dát: ‘Sharr, mani wájah! Mana rawán,’ bale nashot.
MAT 21:31 Cha é doénán kojám chokká wati petay habar zort?” Áyán passaw dát: “Awaliá.” Issáyá gón áyán gwasht: “Shomárá rásténa gwashán, songi o máliátgir o badkárén janén cha shomá pésar Hodáay bádsháhiá rawant.
MAT 21:32 Chéá ke Yahyá pahrézkáriay ráhá shomay kerrá átk, bale shomá áiay sará báwar nakort. Songi o badkárén janénán áiay sará báwar kort o shomá é chizz gón wati chammán dist, bale angat shomá tawbah nakort o áiay sará báwar nakort.
MAT 21:33 Dega yakk mesálé gósh dárét: Zemindáréá anguri bágé addh kort o áiay chapp o chágerdá pallé basti. Pa anguráni shiragay geragá kallé jati o pa negahpániá borjé ham basti. Padá bági pa konandakári lahtén bágpánay dastá dát o wat saparéá shot.
MAT 21:34 Wahdé anguray mósom but, pa wati bahray geragá, hezmatkári bágpánáni kerrá ráh dátant.
MAT 21:35 Bale bágpánán áiay hezmatkár geptant, kasé latth o kotthesh kort, kasé jat o koshtesh o kasé sengsáresh kort.
MAT 21:36 Padá cha pésarigénán géshter hezmatkári ráh dát, bale bágpánán gón eshán ham hamé dhawlá kort.
MAT 21:37 Godhsará wati chokki ráh dát. Gwashti mani chokkay ezzatá kanant.
MAT 21:38 Bale wahdé bágpánán áiay chokk dist, watmánwatá gwashtesh: ‘Mirásdár hamesh ent, byáét eshiá koshén o eshiay mirásá barén.’
MAT 21:39 Gorhá gept o cha bágá dhann bort o koshtesh.
MAT 21:40 Nun wahdé bágay wáhonda kayt, gón é bágpánán ché kant?”
MAT 21:41 Áyán passaw dát: “É badkárén bágpánán gár o gomsára kant o bágá anchén bágpánáni dastá dant ke áiay bahrá pa wahda dayant.”
MAT 21:42 Issáyá cha áyán jost kort: “Shomá Hodáay Pákén Ketábán hechbar nawántag: Á seng ke bánbandánnápasond kort o nazort hamá seng bonheshtbut. É Hodáwanday kár ent o may chammán porkamál ent.”
MAT 21:43 “Paméshká shomárá gwashán ke Hodáay bádsháhi, cha shomá pach geraga bit o anchén kawméá dayaga bit ke áiay bar o samará kárit.
MAT 21:44 Harkas ke é sengay sará kapit, thokkor thokkora bit o seng ke kaséay sará kapit, áiá hurta kant.”
MAT 21:45 Wahdé mazanén dini péshwá o Parisián Issáay mesál eshkotant, sarpad butant ke may bárawá habará ent.
MAT 21:46 Lóthetesh Issáyá dazgir bekanant, bale cha mardomána torsetesh, chéá ke mardománi delá Issá nabié at.
MAT 22:1 Issáyá padá gón mardomán pa darwar o mesál habar kort o gwashti:
MAT 22:2 “Ásmáni bádsháhi, hamá bádsháhay paymá ent ke pa wati chokkay árósá mehmánié korti.
MAT 22:3 Áiá wati golám lóthetagén mehmánáni randá ráh dátant, bale mehmánáni delá naat ke byáyant.
MAT 22:4 Gorhá áiá dega lahtén golám ráh dát o hokmi dát ke gón hamá lóthetagén mardomán begwashét: ‘Man warag tayár kortagant, káiger o pábondi gwask koshtag o har chizz tayár ent. Árósay mehmániá byáét.’
MAT 22:5 Bale mehmánán hecch parwáh nadásht o shotant, yakké wati dhagáray némagá o yakké dém pa wati sawdágeriá.
MAT 22:6 Á degarán áiay golám gept o béezzat kort o koshtant.
MAT 22:7 Bádsháh sakk zahr gept o wati sepáhigi ráh dátant. Áyán hónig koshtant o áyáni shahr sótk.
MAT 22:8 Nun bádsháhá gón wati golámán gwasht: ‘Árósay mehmáni tayár ent, bale hamá ke lóthag butagatant, áyagay láhek naatant.
MAT 22:9 Paméshká berawét, ráh o rahsarán harkasá ke gendét, áyán mehmániá byárét.’
MAT 22:10 Bádsháhay golám shotant o sharr o gandag, harkasesh ke dist, sajjahénesh yakjáh kort o áwortant o árósay diwánjáh cha mehmáná porr but.
MAT 22:11 Wahdé bádsháh mehmánáni cháragá átk, yakk anchén mardé disti ke diwáni pósháki gwará naat.
MAT 22:12 Bádsháhá cha áiá jost kort: ‘Sangat! Bé diwáni pósháká, taw chón tóká potertagay?’ Áiá hecch passaw dát nakort.
MAT 22:13 Gorhá bádsháhá gón wati hezmatkárán gwasht: ‘Eshiay dast o pádán bebandét o dhanná taháriá dawri bedayét.’ Ódá gréwag o peryát o zária bit.
MAT 22:14 Chéá ke lóthetagén báz ant, bale gechén kortagén kamm ant.”
MAT 22:15 Hamé wahdá Parisi shotant o shawresh kort ke Issáyá cha áiay jenday habarán mána gisshénén o dámá dawra dayén.
MAT 22:16 Wati lahtén shágerdesh Hirudiáni hamráhiá áiay kerrá rawán dát ke begwashant: “Oo ostád! Má zánén ke taw tachk o rástén mardomé ay o Hodáay ráhay sójá pa rástia dayay o hechkasay némagá nageray, chéá ke sajjahénán yakk hesábá cháray.
MAT 22:17 Márá begwash, tai hayálá Rumay bádsháh Kaysará song o máliát dayag rawá ent yá na?”
MAT 22:18 Issáyá áyáni badén niyat zánt o gwashti: “Oo doru o dopóstén mardomán! Maná chéá chakkásagá ét?
MAT 22:19 Cha hamá zarrán yakké maná pésh bedárét ke pa máliátá dayantesh.” Áyán yakk dináré áwort.
MAT 22:20 Issáyá jost kort: “É nám o naksh kaig ant?”
MAT 22:21 Gwashtesh: “Kaysaray.” Nun Issáyá darráént: “Gorhá Kaysaraygá Kaysará bedayét o Hodáaygá Hodáyá.”
MAT 22:22 É habaráni eshkonagá á hayrán butant o Issáesh esht o shotant.
MAT 22:23 Hamá róchá, lahtén Saduki Issáay kerrá átk. Sadukia namannant ke mordag padá zendaga bant. Jostesh kort:
MAT 22:24 “Oo ostád! Mussáyá gwashtag: ‘Agan kasé bé awládá bemerit, gorhá báyad ent áiay brát gón áiay janózámá sur bekant tánke pa wati brátá chokk o awládé pédá bekant.’
MAT 22:25 May kerrá hapt brát hastat. Awali brátá sur kort, bé awládá mort o wati jani pa á dega brátá esht.
MAT 22:26 Padá gón domi o sayomi tán haptomiá anchosh but.
MAT 22:27 Sajjahénán o rand á janén ham mort.
MAT 22:28 Nun áheratay róchá é janén cha haptén brátán kojám yakkayga bit? Chéá ke sajjahén brátáni jan butag.”
MAT 22:29 Issáyá passaw dát: “Shomá rad wártag, chéá ke na cha Pákén Ketábán chizzé sarkecha warét o na Hodáay wák o zórá sarpada bét.
MAT 22:30 Áheratay róchá mardom na sura kanant o na sur dayaga bant, ásmáni préshtagáni dhawlá bant.
MAT 22:31 Záná, shomá mordagáni zendag bayagay bárawá hamá habar nawántag ke Hodáyá shomárá gwashtag:
MAT 22:32 ‘Man án, Ebráhémay Hodá o Esákay Hodá o Ákubay Hodá’? Bezán á, mordagáni Hodá naent, zendagénáni Hodá ent.”
MAT 22:33 Mardom cha Issáay tálimáni eshkonagá hayrán o habakkah butant.
MAT 22:34 Wahdé Parisi sahig butant ke Issáyá chón Sadukiáni dap bastag, gorhá yakjáh but o átkant.
MAT 22:35 Cha áyán yakké, Sharyatay kázié at. Áiá pa Issáay chakkásagá jost kort:
MAT 22:36 “Oo ostád! Sharyatay masterén parmán kojám ent?”
MAT 22:37 Issáyá passaw dát: “Wati Hodáwandén Hodáyá cha delay johlánkiá o gón sajjahén ján o sáh o gón sajjahén pahm o pegrá dóst bedár.
MAT 22:38 Masterén o awali parmán hamesh ent.
MAT 22:39 Domi parmán ham, hameshiay dhawlá ent: Wati hamsáhegá wati jenday paymá dóst bedár.
MAT 22:40 Hamé doén parmán, Mussáay sajjahén Sharyat o nabiáni parmánáni bonyád ant.”
MAT 22:41 Hamé wahdá ke Parisi yakjáh but o átkant, Issáyá cha áyán jost kort:
MAT 22:42 “Masihay bárawá shomá ché gwashét? Á kai chokk ent?” Áyán passaw dát: “Dáud bádsháhay chokk ent.”
MAT 22:43 Gwashti: “Gorhá chéá Dáud cha Pákén Ruhay elhámá Masihá wati Hodáwanda zánt, wahdé gwashit:
MAT 22:44 Hodáwandá gón mani Hodáwandá gwasht: ‘Mani rástén kashá tán hamá wahdá benend ke man tai dozhmenán tai pádáni chérá dawra dayán.’
MAT 22:45 Nun agan Dáud Masihá wati Hodáwanda gwashit, gorhá Masih chón áiay chokk buta kant?”
MAT 22:46 Hechkasá áiay habaráni passaw dát nakort o cha á róchá o rand kassá del nakort ke cha áiá dega josté bekant.
MAT 23:1 Nun Issáyá gón mocchiay mardomán o wati moridán é habar kortant, gwashti:
MAT 23:2 “Sharyatay zánóger o Parisi, Mussáay korsiá neshtagant.
MAT 23:3 Paméshká harché ke shomárá gwashant, áyáni goptárá bezurét o anchó bekanét, bale áyáni kerdárá mazurét, parchá ke á gappa janant, bale kára nakanant.
MAT 23:4 Gránén bára bandant o mardománi kópagá laddhant, bale wat pa á báráni chest kanagá lankoké ham nasorénant.
MAT 23:5 Harché ke kanant, pa mardománi pésh dáragá kanant. Wati táitán mazan o cháderay lambáni bandikkán drája kanant.
MAT 23:6 Dáwatáni sharterén jágah o kanisaháni awali redesh dósta bit.
MAT 23:7 Bázáráni tarr o garday wahdá lóthant ke mardom áyán salám bedayant o ‘ostád’ tawár bekanant.
MAT 23:8 Bale mardomán maylét ke shomárá ‘ostád’ begwashant, chéá ke shomay ostád bass yakké o shomá sajjahén yakdomiay brát ét.
MAT 23:9 Shomá é donyáyá hechkasá ‘pet’ tawár makanét, chéá ke shomay Pet bass yakké, hamá ke arshá ent.
MAT 23:10 Mardomán maylét ke shomárá ‘tálim dayók’ begwashant, chéá ke shomay tálim dayók bass yakké o á Masih ent.
MAT 23:11 Hamá ke shomay nyámá cha sajjahénán master ent, á degaráni hezmatkár bebit.
MAT 23:12 Chéá ke harkas watá mazana kant, kamsharapa bit o harkas watá jahl o érdasta mannit, washnám o sharapdára bit.
MAT 23:13 Bale bazhn o apsóz pa shomá, oo Sharyatay zánógerán o Parisián! Oo doru o dopóstén mardomán! Shomá ásmáni bádsháhiay darwázagá pa mardomán banda kanét, na wat tahá rawét o na degarán rawagá kellét.
MAT 23:14 Bazhn o apsóz pa shomá, oo Sharyatay zánógerán o Parisián! Oo shatalkárán! Shomá janózámán rada dayét o polét o pa pésh dáragá wati dwáyán drájkassha kanét. Shomárá ganterén sezá rasit.
MAT 23:15 Bazhn o apsóz pa shomá, oo Sharyatay zánógerán o Parisián! Oo shatalkárán! Shomá pa yakk mardoméay Yahudi kanagá, daryá o hoshkiá sapara kanét, bale wahdé kasé shomay ráhá zurit, áiá cha wati jendá do sari géshter dózahia kanét.
MAT 23:16 Oo kórén rahshónán! Bazhn o apsóz pa shomá ke mardomán sója dayét ke agan kasé mazanén parasteshgáhay sawgendá bwárt parwáh nést, bale agan yakké parasteshgáhay teláháni sawgendá bwárt, gorhá báyad ent wati sawgendá purah bekant.
MAT 23:17 Oo nádánán! Oo kórán! Kojám chizzay darjah borzter ent, teláháni yá hamá parasteshgáhay ke teláhán pák o palgára kant?
MAT 23:18 Shomá chosh ham gwashét ke agan kasé korbánjáhay sawgendá bwárt parwáh nést, bale agan kasé korbánjáhay korbánigay sawgendá bwárt, gorhá báyad ent wati sawgendá purah bekant.
MAT 23:19 Oo kórán! Kojám chizzay darjah borzter ent, korbánigay yá hamá korbánjáhay ke korbánigá pák o palgára kant?
MAT 23:20 Paméshká kasé ke korbánjáhay sawgendá wárt, bezán korbánjáh o korbánig kortagén sajjahén chizzáni sawgendá wárt.
MAT 23:21 Harkas ke mazanén parasteshgáhay sawgendá wárt, bezán parasteshgáh o áiay jahmenenday sawgendá wárt.
MAT 23:22 Harkas ke arshay sawgendá wárt, Hodáay taht o á tahtay sará nendókay sawgendá wárt.
MAT 23:23 Bazhn o apsóz pa shomá, oo Sharyatay zánógerán o Parisián! Oo shatalkárán! Shomá purchénk o gwátag o zirragay dahyakká kasshét o Hodáay námá dayét bale cha Sharyatay masterén hokmá, bezán ensáp o rahmdeli o wapádáriá nádelgósh ét. Drégatá, shomá é kár bekorténant o á ham yalah madáténant.
MAT 23:24 Oo kórén rahshónán! Shomá passhagá kamaká géchét o dara kanét, bale oshterá éra barét.
MAT 23:25 Bazhn o apsóz pa shomá, oo Sharyatay zánógerán o Parisián! Oo shatalkárán! Shomá wati pyálah o kásagáni dhanni némagá sáp o sallaha kanét bale áyáni tah o tók sell ent. Shomay del o darun cha lálech o tamáh o bépahréziá sarréch ent.
MAT 23:26 Oo kórén Parisi! Pésará wati pyálahay tóká sapá kan ke dhanni némagi ham sapá bebit.
MAT 23:27 Bazhn o apsóz pa shomá, oo Sharyatay zánógerán o Parisián! Oo shatalkárán! Shomá espétén gach jatagén kabráni paymá ét ke sarzáherá dhawldár ant, bale tóká cha mordagáni haddh o har paymén gand o gasarhá porr ant.
MAT 23:28 Hamé dhawlá shomá ham sarzáherá mardománi chammán pahrézkárén mardom ét bale shomay del cha shatalkári o náshariá sarréch ent.
MAT 23:29 Bazhn o apsóz pa shomá, oo Sharyatay zánógerán o Parisián! Oo shatalkárán! Shomá nabiáni kabrána bandét o pahrézkáráni kabrána sambahénét.
MAT 23:30 Chosh ham gwashét ke agan má wati pet o pirokáni zamánagá buténén, paygambaráni koshagá áyáni hamráh nabutagatén.
MAT 23:31 É dhawlá shomá wati bárawá wat sháhedia dayét ke má hamáyáni nasl o óbádag én ke paygambaresh koshtagant.
MAT 23:32 Gorhá hamá kárá sarjam bekanét ke shomay pet o pirokán bongéj kortag.
MAT 23:33 Oo márán! Oo syahmárzádagán! Shomá chón cha dózahay sezáyá rakketa kanét?
MAT 23:34 Gorhá bechár, man paygambar o zántkár o Sharyatay zánóger shomay kerrá ráha dayán, bale shomá cha áyán lahténá koshét o saliba kasshét, dega lahténá wati kanisahán shallák o hayzarána janét o shahr pa shahr áyáni randá kapét.
MAT 23:35 Gorhá cha pahrézkárén Hábilá beger tán Barakyáay chokk Zakaryáyá ke shomá mazanén parasteshgáh o korbánjáhay nyámá kosht, é sajjahén pahrézkáráni hón ke donyáyá réchag butag, shomay gardená bit.
MAT 23:36 Shomárá rásténa gwashán, é sajjahénáni kóshay sezá hamé zamánagay mardomána rasit.
MAT 23:37 Urshalim, oo Urshalim! Taw paygambarána koshay o hamáyán sengsára kanay ke Hodá pa taw ráha dant. Báz randá man lóthetag ke tai chokkán wati kerrá yakjáh bekanán, anchosh ke nekénkén morgé chureg o chippokán wati bál o bánzoláni chérá moccha kant, bale shomá nalóthet.
MAT 23:38 Nun bechár shomay lóg wayráná shomay jenday dastá dayaga bit.
MAT 23:39 Shomárá gwashán, dega baré maná nagendét tán á wahdá ke wat begwashét: ‘Mobárak ent hamá ke Hodáwanday námá kayt.’”
MAT 24:1 Wahdé Issá cha mazanén parasteshgáhá dar áyag o rawagá at, morid átkant ke áiay delgóshá parasteshgáhay némagá betarrénant.
MAT 24:2 Issáyá gón áyán gwasht: “É sajjahén chizzán gendagá ét? Shomárá rásténa gwashán, yakk sengé ham domi sengay sará namánit, sajjahén próshag o karójaga bant.”
MAT 24:3 Hamá wahdá ke Issá Zaytunay Kóhay sará neshtagat, áiay morid ehwatá átkant o jostesh kort: “Márá begwash, é prosht o prósh kadéna bit o tai áyag o donyáay halásiay nesháni ché ent?”
MAT 24:4 Issáyá passaw dátant: “Bechárét ke hechkas shomárá gomráh makant.
MAT 24:5 Chéá ke bázéné mani námá kayt o gwashit: ‘Man hamá Masih án’ o bázénéá gomráha kant.
MAT 24:6 Shomá jangáni tawárá eshkonét o jangáni hál somárá sara bit, bale delá tors mayárét. É chizz allamá bant, bale angat halásiay wahd nayátkag.
MAT 24:7 Yakk kawmé dega kawméay helápá o yakk molké dega molkéay helápá páda kayt. Báz jágah kahta kapit o zeminchandha bit.
MAT 24:8 Bale é sajjahén tahná chellagiay dardáni bendát ent.
MAT 24:9 Á wahdá shomárá gerant o ázára dayant o koshant. Donyáay sajjahén kawm mani námay sawabá cha shomá naprata kanant.
MAT 24:10 Gorhá bázéné poshtá kenzit o cha ráhá thagalit. Bázéné yakdegará dróhit o cha yakdomiá naprata kant.
MAT 24:11 Bázén drógén paygambaré jáha jant o bázénéá gomráha kant.
MAT 24:12 Cha bérahbandiay gésh bayagá bázéné sardmehra bit.
MAT 24:13 Bale hamá ke tán áherá bardáshta kant, á rakkit.
MAT 24:14 Sajjahén donyáyá Hodáay bádsháhiay mestágay jár janaga bit ke pa sajjahén kawmán sháhedié bebit. Eshiá rand donyá halása bit.
MAT 24:15 Wahdé shomá á ‘palit o bérán kanókén bazzhenáká’ gendét ke pákén jágahá óshtátag, hamá ke Dányál nabiá áiay bárawá habar kortag,” – wánók sarpad bebit –
MAT 24:16 “gorhá hamá ke Yahudiahá ant dém pa kóhán betachant.
MAT 24:17 Harkas ke lógay sará ent, pa chizzéay zuragá lógá ér mayayt.
MAT 24:18 Hamá ke dhagáray sará ent, pa wati kabáhay zuragá per matarrit.
MAT 24:19 Á róchán, lápporrén janén o hamá ke chokka méchénant sakk bazzaga bant.
MAT 24:20 Dwá bekanét ke shomay tachag zemestáná yá Shabbatay róchá mabit.
MAT 24:21 Chéá ke á róchán anchén mosibaté kayt ke cha jahánay jórh bayagá tán é wahdá nayátkag o hechbara nayayt.
MAT 24:22 Agan á sakkiáni róch kamter kanag mabuténant, hechkas narakketagat, bale gechén kortagénáni háterá á róch kamter kanaga bant.
MAT 24:23 Á wahdá, agan kasé shomárá begwashit: ‘Bechár, Masih edá ent’ yá ‘Bechár, ódá ent,’ báwar makanét.
MAT 24:24 Chéá ke drógén masih o drógén nabi jáha janant o mazanén nesháni o ajekkái kár pésha dárant. Wati sajjahén zórá janant ke gechén kortagénán ham gomráh bekanant, agan áyáni dastá but.
MAT 24:25 Bechár, man cha pésará shomárá hál dayagá án.
MAT 24:26 Gorhá agan mardom shomárá begwashant: ‘Bechár, gyábáná ent,’ ódá marawét, yá ke begwashant: ‘Lógay tah o tóki kóthián ent,’ báwar makanét.
MAT 24:27 Chéá ke Ensánay Chokk anchén gerókéay paymá kayt ke cha ródarátká beger tán rónendá shahma kant o gendaga bit.
MAT 24:28 Har jáh ke jóné bit, ódá dhundhwárén morg moccha bant.
MAT 24:29 Á rócháni mosibatán o rand, anágat róch tahára bit, máha nadrapshit, estár cha ásmáná kapant o ásmáni zór o wák larzénaga bant.
MAT 24:30 Hamé wahdá Ensánay Chokkay nesháni ásmáná záhera bit o donyáay sajjahén kawma gendant ke Ensánay Chokk gón mazanén wák o twán o shán o shawkaté jambaráni sará ent o kayt. Nun gréwant o mótka kárant.
MAT 24:31 Gón karnáay borzén tawárá wati préshtagán ráha dant ke áiay gechén kortagén mardomán cha donyá chárén némagán, bezán cha zeminay har kondhá tán ásmánay goddhi marz o simsarán, mocch o yakjáh bekanant.
MAT 24:32 Nun cha enjiray drachká dars o sabakk begerét. Anchosh ke áiay thál narma bant o táka trokkant, shomá zánét ke garmág nazzikk ent.
MAT 24:33 Hamé dhawlá, wahdé shomá é sajjahén chizzána gendét, zánét ke mani áyagay wahd nazzikk ent, darwázagay dapá ent.
MAT 24:34 Shomárá rásténa gwashán, tánke é sajjahén chizz mabant, é nasl o padréch halása nabit.
MAT 24:35 Ásmán o zemin gára bant, bale mani habar hechbar gára nabant.
MAT 24:36 Hechkasa nazánt ke á róch o á sáhat kadéna kayt, na ásmánay préshtaga zánant o na Chokka zánt, tahná Peta zánt.
MAT 24:37 Hamá dhawlá ke Nuhay zamánagá butag, Ensánay Chokkay áyagay róch ham anchosha bit.
MAT 24:38 Chéá ke tuppáná pésar, mardomána wárt o nóshet o sáng o sura kort o é kárán tán hamá róchá dazgatth atant ke Nuh bójigá swár but.
MAT 24:39 Tánke tuppán nayatk o mardomi nabortant, kassá nazánt ke ché bit. Ensánay Chokkay áyagay wahdá ham hamé dhawlá bit.
MAT 24:40 Á wahdá, do mardén dhagáray sará bit, yakké baraga bit o yakké pasht géjaga bit.
MAT 24:41 Do janén jenteray sará dánay droshagá bit, yakké baraga bit o yakké pasht géjaga bit.
MAT 24:42 Paméshká hozzhár bét, chéá ke shomá nazánét ke shomay Hodáwand kojám róchá kayt.
MAT 24:43 Shomá sharra zánét, agan lógay hodábondá bezántén ke dozz shapay kojám wahd o pásá kayt, gorhá ágah butagat o dozzi wati lógay janagá naeshtagat.
MAT 24:44 Paméshká shomá tayár bebét, chéá ke Ensánay Chokk anchén wahdéá kayt ke shomá áiay entezár o wadárá nabét.
MAT 24:45 Kay ent hamá amánatdár o dánáén hezmatkár ke wájah áiá wati é dega sajjahén hezmatkáráni master bekant tánke áyán pa wahd ward o warák bedant.
MAT 24:46 Bahtáwar ent hamá hezmatkár ke wahdé wájaha kayt, áiá hamá káráni sará begendit.
MAT 24:47 Shomárá rásténa gwashán, wájah hamá hezmatkárá wati sajjahén mál o hastiay kármastera kant.
MAT 24:48 Bale agan hezmatkár harábéné bebit o wati delá begwashit ke mani wájah áyagá déra kant o
MAT 24:49 wati hamkáráni latth o kotth kanagá bendát bekant o gón sharábián ward o nóshá bebit,
MAT 24:50 áiay wájah anchén róch o sáhatéá kayt o rasit ke á nazánt o wadárá nabit.
MAT 24:51 Gorhá wájah áiá sharriay sará latth o kottha kant o doru o dopóstén mardománi kerrá dawra dant. Ódá gréwag o peryát o zária bit.
MAT 25:1 Á wahdá ásmáni bádsháhi, hamá dahén neshtagén jenekkáni paymá bit ke wati cherágesh zortant o sálónkay péshwáziá dar átkant.
MAT 25:2 Cha áyán panch jenekk nádán at o panch dáná.
MAT 25:3 Nádánén jenekkán wati cherág zortant bale géshén thélesh nazort gón.
MAT 25:4 Dánáén jenekkán cherágán o abéd, théldánáni tahá ham thél zort gón.
MAT 25:5 Sálónká áyagá dér kort, gorhá á sajjahén kóchandhagá laggetant o wáb kaptant.
MAT 25:6 Shapay némá kukkár macchet: ‘Bechárét sálónk pédák ent. Áiay démá dar áét.’
MAT 25:7 Gorhá á sajjahén jenekk ágah butant o wati cherágáni sharr kanagá laggetant.
MAT 25:8 Nádánén jenekkán gón dánáén jenekkán gwasht: ‘Cha wati thélán kammoké márá bedayét, may cherág meragi ant.’
MAT 25:9 Dánáén jenekkán passaw dát: ‘Na, balkén pa máshomá sajjahénán bass mabant, shomá berawét cha dokkánán thél bezurét.’
MAT 25:10 Bale wahdé á thélay geragá shotagatant, sálónk átk o raset. Hamá jenekk ke tayár atant, sálónkay hamráhiá suray dáwatá shotant o darwázag band but.
MAT 25:11 Randá é dega jenekk ham átkant o gwashtesh: ‘Wájah, oo wájah! Darwázagá pa má pach kan.’
MAT 25:12 Bale sálónká passaw tarrént: ‘Shomárá rásténa gwashán, man shomárá nazánán.’
MAT 25:13 Paméshká hozzhár bét chéá ke shomá na á róchá zánét o na á sáhatá.
MAT 25:14 Hamé dhawlá ásmáni bádsháhi hamá marday paymá ent ke saparéá shot. Hezmatkári lótháéntant o wati mál o maddhii hamáyáni dastá dátant.
MAT 25:15 Áiá har hezmatkáray bud o twánay kesásá áiárá zarr dát, yakkéárá panch tálánt, domiárá do tálánt o sayomiárá yakk tálánté dáti o wati sapará shot.
MAT 25:16 Hamá hezmatkárá ke panch tálánt rasetagat, mahtal nabut o zarri kár o bárá jatant o dega panch tálánti katthet.
MAT 25:17 Hamé paymá, hamáiá ke do tálánt rasetagat, dega do tálánti katthet.
MAT 25:18 Bale hamáiá ke yakk tálánté rasetagat, á shot o zeminá kallé jati o wájahay zarri chér dátant.
MAT 25:19 Bázén wahdéá rand hezmatkáráni wájah átk o cha áyán hesábi lóthet.
MAT 25:20 Hamáiá ke panch tálánt rasetagat, dega panch tálánti áwort o gwashti: ‘Oo wájah! Taw maná panch tálánt dátagat, bechár, man dega panch tálánt katthetag.’
MAT 25:21 Wájahá gwasht: ‘Shábásh, oo sharr o wapádárén hezmatkár! Taw gón kammoká tachk o rást butagay, nun man tai zemmahá báz chizza dayán, byá mani shátkámiá gón bay.’
MAT 25:22 Hamá ke do tálánti rasetagat ham átk o gwashti: ‘Oo wájah! Taw maná do tálánt dátagat, bechár, man dega do tálánt katthetag.’
MAT 25:23 Áiay wájahá gwasht: ‘Shábásh, oo sharr o wapádárén hezmatkár! Taw gón kammoká tachk o rást butagay, man tai zemmahá báz chizza dayán, byá mani shátkámiá gón bay.’
MAT 25:24 Randá hamá hezmatkár átk ke áiá yakk tálánté rasetagat, gwashti: ‘Oo wájah! Man zántag ke taw trondén mardé ay, hamá ke taw nakeshtagant, áyána ronay o cha hamódá moccha kanay o baray ke taw tohmi dánagé nachandhetag.
MAT 25:25 Paméshká cha torsá man shotán o tai dátagén tálánt zeminá kall kort, esh ent tai zarr.’
MAT 25:26 Áiay wájahá passaw dát: ‘Oo sell o jándozzén hezmatkár! Wahdé taw zánt ke man nakeshtagéna ronán o cha hamódá moccha kanán o barán ke man tohmi dánagé nachandhetag,
MAT 25:27 gorhá báyad ent taw mani dátagén zarr tájeráni kerrá ér bekorténant tánke cha sapará per tarragá rand, man wati zarr o zarráni sutt bezorténant.
MAT 25:28 Paméshká tálántá cha eshiá pach gerét o hamáiá bedayét ke áiay kerrá dah tálánt hast.
MAT 25:29 Chéá ke harkasá ke hast, áiá géshter dayaga bit ke málámál bebit, bale harkasá ke nést, harché ke hasti ham cha áiá pach geraga bit.
MAT 25:30 É békárén hezmatkárá dhanná taháriá dawr bedayét. Ódá gréwag o peryát o zária bit.’
MAT 25:31 Wahdé Ensánay Chokk gón wati shán o marháhá préshtagáni hamráhiá kayt, gorhá wati porshawkatén tahtay sará nendit.
MAT 25:32 Sajjahén kawmáni mardom árag o bádsháhay démá yakjáh kanaga bant o á, áyán anchosha gisshénit o do bahra kant ke shepánk wati méshán cha bozán jetá kant.
MAT 25:33 Méshán wati rástén némagá kant o bozán chappén némagá.
MAT 25:34 Gorhá bádsháh gón áyán ke rástén némagá ant, gwashit: ‘Oo bahtáwarán ke shomárá cha mani Petá barkat rasetag! É bádsháhi ke cha donyáay bendátá pa shomá tayár kanag butag, byáét o eshiá wati mirás bekanét.
MAT 25:35 Chéá ke man shodig atán o shomá maná warag dát, tonnig atán o shomá maná áp dát, darpadar atán o shomá maná jágah dát,
MAT 25:36 jándar atán o shomá maná póshák gwará dát, nádráh atán o shomá mani hayáldári kort, bandig atán o shomá mani cháragá átkét.’
MAT 25:37 Gorhá nékkár cha bádsháhá josta kanant: ‘Oo wájah! Má kadi distag ke taw shodig ay o má tará warag dátag, taw tonnig ay o má tará áp dátag?
MAT 25:38 Má kadi tará darpadar distag o jágah dátag yá jándará distag o póshák gwará dátag?
MAT 25:39 Má kadi distag ke taw nádráh ay yá bandig ay o tai cháragá átkagén?’
MAT 25:40 Bádsháh passawa dant: ‘Shomárá rásténa gwashán, harché ke shomá pa mani yakk kaster kasterén brátéá kortag, bezán pa man ham kortag.’
MAT 25:41 Randá gón hamáyán ke chappén némagá ant, gwashit: ‘Oo nálatián! Gom bét cha mani démá o hamá jamburén ásay némagá berawét ke hechbara namerit o pa Shaytán o áiay hamráhán rók kanag butag.
MAT 25:42 Chéá ke man shodig atán o shomá maná warag nadát, tonnig atán o shomá maná áp nadát,
MAT 25:43 darpadar atán o shomá maná jágah nadát, jándar atán o shomá maná póshák gwará nadát, nádráh o bandig atán o shomá mani hayáldári nakort.’
MAT 25:44 Gorhá á ham josta kanant: ‘Oo wájah! Má kadi tará shodig yá tonnig yá darpadar yá jándar yá nádráh yá bandig distag o tai hezmat nakortag?’
MAT 25:45 Gorhá bádsháh áyán é dhawlá passawa dant: ‘Shomárá rásténa gwashán, harché ke shomá pa mani hecch kasterénéá nakortag, bezán pa man ham nakortag.’
MAT 25:46 Paméshká é mardom dém pa abadmánén sezáyá rawant, bale nékkárén mardomán abadmánén zenda rasit.”
MAT 26:1 Wahdé Issáyá é habar halás kortant, gón wati moridán gwashti:
MAT 26:2 “Shomá zánét ke do róchá rand Sargwazay Aid ent o Ensánay Chokk pa salib kasshagá geráénaga bit.”
MAT 26:3 Hamé wahdá, mazanén dini péshwá o kawmay kamáshán, masterén dini péshwá Kayápáay kalátá diwán kort o
MAT 26:4 shawresh kort ke Issáyá chón pa repk o honar begerén o bekoshén.
MAT 26:5 Bale gwashtesh: “Aiday róchán na, chó mabit ke mardom áshóp bekanant.”
MAT 26:6 Wahdé Issá Bayt-Anyáyá Shamun Garriay lógá at,
MAT 26:7 janéné gón albástaray atrdánéá ke sakkén gránbaháén atri mán at, Issáay gwará átk. Wahdé Issá parzónagay sará neshtagat, hamódá Issáay sari atr per rétk.
MAT 26:8 Moridán ke dist, zahrá porr butant. Watmánwatá gwashtesh: “Eshiá chéá é atr zawál kort?
MAT 26:9 Agan bahá kanag butén, mazanén zarré rasetagat o é zarr garib o nézgáráni kárá átkagatant.”
MAT 26:10 Issáyá zánt ke morid zahr geptagant, gwashti: “Chéá shomá é janéná paréshán kanagá ét? Eshiá gón man nékié kortag.
MAT 26:11 Garib o nézgár modám shomay kerrá hast, bale man harwahd gón shomá gón naán.
MAT 26:12 É janéná mani sará atr per rétk ke cha pésará maná pa kabr kanagá tayár bekant.
MAT 26:13 Shomárá rásténa gwashán, sajjahén donyáyá, har kondhé ke é wasshén mestágay jár janaga bit, hamé janén yát kanaga bit o eshiay káray kessah áraga bit.”
MAT 26:14 Randá cha dwázdahén kásedán yakké ke námi Yahudá Eskaryuti at, mazanén dini péshwáyáni kerrá shot o
MAT 26:15 gwashti: “Agan man Issáyá shomay dastá bedayán, shomá maná ché dayét?” Áyán si nograhén korsh hesáb kort o dát.
MAT 26:16 Cha hamá wahdá o rand, Yahudá sharrén móhéay shóházá at ke Issáyá áyáni dastá bedant.
MAT 26:17 Béhomirén Naganay Aiday awali róchá, morid Issáay kerrá átkant o cha áiá jostesh kort: “Ché gwashay, pa taw Sargwazay Aiday shámay tayáriá kojá bekanén?”
MAT 26:18 Áiá passaw dát: “Shahrá berawét o pelán mardomá begwashét ke ostáda gwashit, mani wahd nazzikk ent, man gón wati moridán Sargwazay shámá tai lógá kanán.”
MAT 26:19 Gorhá anchó ke Issáyá gwashtagat, moridán hamá paymá kort o Sargwazay shámesh tayár kort.
MAT 26:20 Shap ke but, Issá gón wati dwázdahén kásedán parzónagay sará neshtagat.
MAT 26:21 Waragay wahdá gwashti: “Shomárá rásténa gwashán, cha shomá yakké maná dróhit o dozhmenáni dastá dant.”
MAT 26:22 Morid sakk paréshán butant. Har yakké cha áiá jost kanagá lagget: “Oo Hodáwand! Man wa naán, na?”
MAT 26:23 Áiá passaw tarrént: “Áiá ke annun mani hórigá kásagá dast bort, hamá maná dróhit.”
MAT 26:24 Hamá dhawlá ke nebisag butag, Ensánay Chokk cha é donyáyá rawagi ent, bale bazhn o apsóz pa hamá mardomá ke Ensánay Chokká dróhit. Pa áiá sharter at ke hechbar pédá mabutén.
MAT 26:25 Gorhá Yahudáyá, hamá ke Issái dróhagi at, gwasht: “Oo ostád! Man wa naán, na?” Issáyá passaw dát: “Taw wat gwashagá ay.”
MAT 26:26 Wahdé shám kanagá atant, Issáyá nagané zort, Hodáay shogri gept, nagani chondh chondh kort o moridáná dát. Gwashti: “Bezurét o bwarét, é mani badan ent.”
MAT 26:27 Padá pyálahé zorti, Hodáay shogri gept, moridáná dát o gwashti: “Shomá sajjahén cha eshiá benóshét.
MAT 26:28 É mani hón ent, ahd o paymánay hón ke pa bázénéay gonáháni shódagá réchaga bit.
MAT 26:29 Man shomárá gwashán, nun dega baré anguray ápá nawarán, hamá róchá padá waráni ke wati Petay bádsháhiá, gón shomá hóra bán.”
MAT 26:30 Padá hamdesh jat o dém pa Zaytunay Kóhá shotant.
MAT 26:31 Gorhá Issáyá gón moridán gwasht: “Shomá sajjahén hamé shapay jendá thagala warét o maná yalaha dayét, chéá ke nebisag butag: Man shepánká janán o ramagay pas sheng o shánga bant.
MAT 26:32 Bale dobar zendag bayagá rand, cha shomá pésar Jalilá rawán.”
MAT 26:33 Gorhá Petrosá darráént: “Agan sajjahén thagal bwarant o tará yalah bedayant, man hechbar thagala nawarán.”
MAT 26:34 Issáyá gwasht: “Tará rásténa gwashán, hamé shapay jendá cha korósay bángá pésar mani pajjáh áragá say randá enkára kanay.”
MAT 26:35 Bale Petrosá gwasht: “Agan gón taw mani sar ham berawt, tai pajjáh áragá hechbar enkára nakanán.” É dega sajjahén moridán ham anchosh gwasht.
MAT 26:36 Randá Issá gón wati moridán Jetsimáni námén jágahéá shot o gón áyán gwashti: “Hamedá benendét, man ódá rawán o dwá kanán.”
MAT 26:37 Áiá Petros o Zebdiay doén chokk hamráh kortant. Paréshán o bétáhir at.
MAT 26:38 Gón áyán gwashti: “Mani del sakk paréshán ent o andóhán maná markig kortag, shomá hamedá bedárét, mawapsét o mani hamráhiá ágah o hozzhár bét.”
MAT 26:39 Padá kammé démterá shot, dém pa chér kapt o dwái kort: “Oo mani Pet! Agan buta kant, sakkiáni é pyálahá cha man dur kan, bale mani wáhagay sará na, hamá paymá ke tai razá ent.”
MAT 26:40 Padá per tarret o wati moridáni kerrá átk. Disti ke á wáb ant. Gón Petrosá gwashti: “Nabut ke shomá yakk sáhaté ham gón man ágah bemánét?
MAT 26:41 Hozzhár bét o dwá kanét ke ázmáesh o chakkásá makapét. Ruh tayár ent, bale jesm nezór ent.”
MAT 26:42 Domi bará shot o é dwái kort: “Oo mani Pet! Agan é pyálah bé nóshagá cha man dur kanaga nabit, gorhá harché ke tai razá ent, hamá dhawlá bebit.”
MAT 26:43 Wahdé per tarret, disti ke padá wáb ant o chammesh pacha nabant.
MAT 26:44 Eshtanti o sayomi randá padá pa dwá kanagá shot o hamá dwái kort.
MAT 26:45 Gorhá moridáni kerrá per tarret o gwashti: “Angat waptagét o árám kanagá ét? Nun á wahd o sáhat nazzikk ent ke Ensánay Chokk dróhag o gonahkáráni dastá dayaga bit.
MAT 26:46 Pád áét ke rawén! Á ke maná dróhit, pédák ent.”
MAT 26:47 Issá angat habará at ke cha dwázdahén kásedán yakké, bezán Yahudá átk o raset. Áiá mazanén rombé hamráh at ke zahm o latthesh gón at. É romb cha mazanén dini péshwá o kawmay kamásháni némagá ráh dayag butagat.
MAT 26:48 Issáay dróhóká áyáná é nesháni dátagat: “Hamáiá ke mana chokkán, Issá hamá ent. Áiá dazgir kanét.”
MAT 26:49 Gorhá Yahudá tachká Issáay kerrá átk o gwashti: “Oo ostád! Salám o drót!” Randá Issái chokket.
MAT 26:50 Issáyá gwasht, “Oo sangat! Pa hamá kárá ke átkagay, bekani.” Gorhá démá átkant, Issáesh gept o dazgir kort.
MAT 26:51 Hamá damáná cha Issáay hamráhán yakkéá wati zahm kasshet o masterén dini péshwáay nawkaray gósh sest.
MAT 26:52 Issáyá gón áiá gwasht: “Wati zahmá jotká kan. Harkas ke zahma kasshit, gón zahmá koshaga bit.
MAT 26:53 Záná, taw nazánay agan cha wati Petá belóthán, á pa mani komakká hamé damáná dwázdah lashkará géshter préshtag ráha dant?
MAT 26:54 Bale gorhá Pákén Ketábáni nebeshtagén hamá habar ke báyad ent rást o sarjam bebant, chón rásta bant?”
MAT 26:55 Padá Issáyá dém gón mocchiá kort o gwashti: “Záná man dozz o dhongé án ke shomá gón zahm o latthán pa mani geragá átkagét? Man har róch mazanén parasteshgáhá neshtag o mardom tálim dátagant o shomá maná nageptag.
MAT 26:56 Bale é paymá paméshká but ke nabiáni ketábáni péshgói rást o sarjam bebant.” Gorhá sajjahén moridán á yalah dát o jestant.
MAT 26:57 Issáay dazgir kanókán, Issá zort o masterén dini péshwá Kayápáay kerrá bort ke ódá Sharyatay zánóger o kawmay kamásh mocch atant.
MAT 26:58 Petros ham dur durá, tán masterén dini péshwáay lógay péshgáhá Issáay randá rawán at. Tahá potert o sepáhigáni kerrá nesht tánke bezánt ke ché bit.
MAT 26:59 Mazanén dini péshwá o Sarókáni Diwánay sajjahén básk pa Issáay markay sezá dayagá drógén sháhediay shóházá atant.
MAT 26:60 Chónáhá bázén drógén sháhedé pa gwáhi dayagá pád átk, bale hecch pakkáén sháhedié dast nakapt. Godhsará do mardom démá dar átk o
MAT 26:61 gwashtesh: “É mardá gwashtag ke mana twánán Hodáay parasteshgáhá bepróshán o say róchay tahá padá bebandáni.”
MAT 26:62 Gorhá masterén dini péshwá pád átk o cha Issáyá josti kort: “Tai kerrá hecch passaw nést? É tai helápá chónén sháhedi dayagá ant?”
MAT 26:63 Bale Issáyá passaw nadát. Masterén dini péshwáyá gón áiá gwasht: “Man tará namiránén Hodáay sawgendá dayán, márá begwash, bárén taw hamá Masih ay, Hodáay Chokk ay?”
MAT 26:64 Issáyá darráént: “Taw wat gwashagá ay. Bale man shomárá gwashán, démterá gendét ke Ensánay Chokk zórmandén Hodáay rástén kashá neshtag o é ham gendét ke ásmánay jambaráni sará ent o kayt.”
MAT 26:65 Gorhá masterén dini péshwáyá wati kabáh dert o gwasht: “É kopr kanagá ent, angat ham márá sháhed pakár ent? Shomá annun é kopr eshkot.
MAT 26:66 Nun shomay shawr o saláh ché ent?” Áyán passaw dát: “Eshiay sezá mark ent.”
MAT 26:67 Padá áyán Issáay dap o démá tokk jat o lahténá mosht o shahmát ham jat.
MAT 26:68 Gwashtesh: “Oo Masih! Wati gaybi zántá kár band o márá begwash, tará kayá jat?”
MAT 26:69 Petros dhanná péshgáhá neshtagat ke móledé áiay kerrá átk o gwashti: “Taw ham Jalili Issáay hamráh butagay.”
MAT 26:70 Bale áiá sajjahénáni démá enkár kort o gwasht: “Mana nazánán taw ché gwashagá ay.”
MAT 26:71 Wahdé dém pa mazanén darwázagá rawagá at, dega móledéá dist o gón hamá mardomán ke ódá atant, gwashti: “É mard Issá Náseriay hamráh butag.”
MAT 26:72 Petrosá domi randá enkár kort o sawgend wárt o gwashti: “Man é mardá nazánán.”
MAT 26:73 Damánéá rand, ódá óshtátagén mardom Petrosay kerrá átkant o gwashtesh: “Allamá taw cha hamáyán ay, cha tai gálwárá anchosh jáha kayt.”
MAT 26:74 Petrosá sawgend wárt o gwasht: “Hodá maná nálat bekanát agan dróg bebandán. Man é mardá nazánán.” Hamá damáná korósá báng dát.
MAT 26:75 Gorhá Petros yátá kapt ke Issáyá gwashtagat: “Korósay bángá pésar, taw say randá mani pajjáh áragá enkára kanay.” Nun dhanná dar átk o zár zárá gréti.
MAT 27:1 Sabáhá máhallah, sajjahén mazanén dini péshwá o kawmay kamáshán shawr yakk kort ke Issáyá koshén.
MAT 27:2 Issáesh bast, kasshán kort o Rumi wáli Pilátusay dastá dát.
MAT 27:3 Wahdé Issáay geráénók Yahudáyá dist ke pa Issáyá markay sezáesh bast, pashómán but o sién nograhén korshi bort o mazanén dini péshwá o kawmay kamásháná per tarréntant.
MAT 27:4 Gwashti: “Mayárig án ke man bégonáhén mardomé dróhet.” Bale áyán passaw dát: “Márá che kár ent? Taw bezán o tai kár.”
MAT 27:5 Gorhá Yahudáyá hamá zarr mazanén parasteshgáhá chagal dátant o shot o watá dratk o koshti.
MAT 27:6 Mazanén dini péshwáyán zarr zortant o gwashtesh: “É palitén zarr ant, parasteshgáhay hazánagá esháni ér kanag rawá naent.”
MAT 27:7 Paméshká shawr o saláhá rand, cha á zarrán kuzagaray dhagáresh bahá zort ke pa darámadán kabrestáné bekananti.
MAT 27:8 Tán róche maróchi á dhagáray nám “hónay dhagár” ent.
MAT 27:9 É paymá Eremyá nabiay kortagén é habar rást o sarjam but: Man sién nograhén korsh zortant. Bani Esráilay chokkán á marday kimat haminchok bastagat.
MAT 27:10 Man cha é zarrán kuzagaray dhagár bahá zort, anchosh ke Hodáwandá maná parmán dátagat.
MAT 27:11 Nun Issá wáliay démá óshtárénag but o wáliá cha áiá jost kort: “Taw Yahudiáni bádsháh ay?” Issáyá passaw dát: “Taw wat gwashagá ay.”
MAT 27:12 Mazanén dini péshwá o kawmay kamásh Issáyá bohtám janagá atant, bale áiá hecch passaw nadát.
MAT 27:13 Pilátusá gwasht: “Taw naeshkonagá ay ke é mardom tai helápá chinchok sháhedi dayagá ant?”
MAT 27:14 Bale Issáyá áyáni yakk bohtáméay passaw ham nadát o wáli sakk hayrán but.
MAT 27:15 Wáliá har sál aiday wahdá, cha Yahudi bandigán yakké, hamá ke mardomán lóthetagat, ázáta kort.
MAT 27:16 Á wahdá yakk bandigé zendáná at ke námi Issá Barabbás at o pa wati badén kárán námkapt at.
MAT 27:17 Wahdé mardom mocch butant, Pilátusá cha áyán jost kort: “Shomá ché gwashét, man kayá ázát bekanán, Issá Barabbásá yá é Issáyá ke Masih ham gwashanti?”
MAT 27:18 Pilátusá zánt ke áyán Issá Masih pa hasadd mani dastá dátag, paméshká é josti kort.
MAT 27:19 Wahdé Pilátus hakdiwáná neshtagat, áiay janá é kolaw ráh dát: “Gón é bégonáh o nékén mardá hecch makan, chéá ke man dóshi eshiay bárawá wábé distag o hamá ent paréshán án.”
MAT 27:20 Bale mazanén dini péshwá o kawmay kamáshán mocch butagén mardom mannéntant ke Barabbásay ázáti o Issáay marká belóthét.
MAT 27:21 Wáliá jost kort: “Ché lóthét, cha é doénán kojámiá pa shomá ázát bekanán?” Áyán gwasht: “Barabbásá.”
MAT 27:22 Pilátusá cha áyán jost kort: “Gorhá gón Issáyá ke Masih ham gwashanti, ché bekanán?” Áyán pa hamtawári gwasht: “Salibi kassh!”
MAT 27:23 Pilátusá jost kort: “Chéá bárén? Mayári ché ent?” Bale áyán géshter kukkár kort o gwashtesh: “Salibi kassh!”
MAT 27:24 Wahdé Pilátusá dist ke hecch káré korta nakant o mardom shóresh kanagá ant, gorhá áiá áp zort, mocchiay démá wati dast shoshtant o gwashti: “Man cha é marday hóná bémayár án, shomá bezánét o shomay kár.”
MAT 27:25 Sajjahén mardomán gwasht: “Eshiay hón mayg o may chokkáni gardená ent.”
MAT 27:26 Gorhá Pilátusá pa áyánigi Barabbás ázát kort o Issá shallák o hayzarán janáént o dáti ke salib kasshag bebit.
MAT 27:27 Wáliay sepáhigán Issá wáliay kalátá bort o sajjahén lashkaresh áiay chapp o chágerdá mocch kort.
MAT 27:28 Áyán Issáay gwaray god kasshetant o sohrchakén kabáhé gwará dát,
MAT 27:29 cha dhangar o konthagán tájé addhesh kort o áiay sará dát, latthé rástén dastá dátesh o pa kalág o rishkand áiay démá kóndhán kaptant o gwashtesh: “Salám o drót, oo Yahudiáni bádsháh!”
MAT 27:30 Áiay sará tokkesh jat o hamá latthesh zort o áiay sará jat.
MAT 27:31 Wahdé kalág bandagesh halás kort, gwaray kabáhesh kasshet o áiay jenday godesh padá gwará dátant. Randá dém pa salib kasshagá bortesh.
MAT 27:32 Wahdé rawagá laggetant, Shamun námén mardé distesh ke Keriniay shahray mardomé at. Sepáhigán á pa bigár gept ke Issáay salibá baddhá bekant.
MAT 27:33 Wahdé “Joljotá” bezán hamá “Kámpól” námén jágahá rasetant
MAT 27:34 ódá Issáesh zahrag mán kortagén sharáb dát, bale áiá chashagá rand nawártant.
MAT 27:35 Salib kasshagá rand, pa láthari o korakasshi áiay pocch o póshákesh watmánwatá bahr kortant.
MAT 27:36 Randá hamódá neshtant o áiay negahpániesh kort.
MAT 27:37 Issáay sarborá, mayárnámagé dratkesh ke áiay sará nebeshtagat: “É Issá ent, Yahudiáni bádsháh.”
MAT 27:38 Issáay hamráhiá do dhongesh ham salib kasshet, yakké rástén o domi chappén kashá.
MAT 27:39 Hamá mardom ke cha ódá gwazagá atant, áiárá dozmánesh dát o wati saresh chandhéntant.
MAT 27:40 Gwashtesh: “Taw ke gwashtag ke man mazanén parasteshgáhá karóján o say róchay tahá padá bandáni, nun wati jendá rakkén. Agan taw Hodáay Chokk ay, cha salibá ér á.”
MAT 27:41 Hamé dhawlá mazanén dini péshwá o Sharyatay zánóger o kawmay kamásh ham áiá kalág bandagá atant. Gwashagá atant:
MAT 27:42 “Á dega mardomi rakkéntant, bale watá rakkénta nakant. É wa Esráilay bádsháh ent, agan nun cha salibá ér bekapit, má áiay sará báwara kanén.
MAT 27:43 Hodáay sará óst o ométi bastag. Agan Hodá áiá rakkénaga lóthit, nun berakkéniti, chéá ke gwashtagati: ‘Man Hodáay Chokk án.’”
MAT 27:44 Hamé paymá Issáay hamráhiá salib kasshetagén dhong ham áiá bad o rad gwashagá atant.
MAT 27:45 Némróchá beger tán bégáhay sayá, sajjahén molká taháriá mán shánt.
MAT 27:46 Bégáhay sáhat sayá, Issáyá kukkár kort: “Eli, Eli, lemá sabaktani?” Bezán: Oo mani Hodá, oo mani Hodá! Taw chéá maná yalah dát?
MAT 27:47 Wahdé ódá óshtátagén lahtén mardomá eshkot, gwashtesh: “Elyásá tawár kanagá ent.”
MAT 27:48 Cha áyán yakké tacháná shot, espanjé zorti o tropshén sharábá missénti, dáréay sará bast o pa chussagá Issáay némagá shahárti.
MAT 27:49 Bale é dega mardomán gwasht: “Sabr kan, chárén bárén Elyás eshiay rakkénagá kayt yá na?”
MAT 27:50 Issáyá domi bará peryáté jat o sáhi dát.
MAT 27:51 Hamá wahdá mazanén parasteshgáhay pardah sará beger tán boná dert o do ném but, zemin larzet o kóh tal geptant,
MAT 27:52 kabráni dap pach but o bázén pák o pahrézkárén mardomé ke mortagat, padá zendag but.
MAT 27:53 Issáay zendag bayag o jáh janagá rand, á cha wati kabrán dar átkant, Pákén Shahrá, bezán Urshalimá shotant o bázénéá distant.
MAT 27:54 Hamá pawji apsar o áiay hamráhén sepáhig ke Issáay páneg atant, wahdé zeminchandh o é dega chizzesh distant, deltrakk butant o gwashtesh: “Béshakk é mard Hodáay Chokk at.”
MAT 27:55 Bázén janéné ke cha Jalilá Issáay hamráh at o áiay hayáldáriesh kortagat, dur óshtátag o cháragá atant.
MAT 27:56 Esháni tahá yakké Maryam Magdalini at, yakké Ákub o Issopay mát Maryam at o yakké Zebdiay chokkáni mát at.
MAT 27:57 Shap ke but, Arimátiáay shahray Issop námén sér o hazgárén mardé átk ke Issáay moridé at.
MAT 27:58 Pilátusay kerrá shot o Issáay jónay baragay ejázati lóthet. Pilátusá parmán dát ke jóná áiá bedayét.
MAT 27:59 Issopá jón zort o sapáén lilomén godéá patát o
MAT 27:60 hamá nókén kabray tahá ér kort ke kóhéay tahá pa wat jatagati. Mazanén dhóké léthi dát o kabray dapá dáti o shot.
MAT 27:61 Maryam Magdalini o á dega Maryam hamódá neshtagatant o démesh gón kabrá at.
MAT 27:62 Domi róchá, bezán Shambehá, mazanén dini péshwá o Parisi yakjáh but o Pilátusay kerrá shotant.
MAT 27:63 Gwashtesh: “Wájah! Márá yát ent ke é drógbandá wati zendá gwashtagat ke say róchá rand man padá zendaga bán o jáha janán.
MAT 27:64 Paméshká parmán beday ke tán say róchá kabray sará negahpáni kanag bebit, chó mabit ke áiay morid byáyant o jóná bedozzant o gón mardomán begwashant ke á cha mordagán padá zendag butag o é goddhi repk o honar cha pésarigéná ganter bebit.”
MAT 27:65 Pilátusá darráént: “Lahtén sepáhig bezurét, berawét o hamá paymá ke gón shomá buta kant, kabray negahpániá bekanét.”
MAT 27:66 Gorhá shotant o kabray dapay mazanén dhókesh mohr jat o mómband kort o sepáhigesh páneg kortant.
MAT 28:1 Shabbatay róchá rand, bezán Yakshambehay gwarbámá Maryam Magdalini o á dega Maryam kabray cháragá shotant.
MAT 28:2 Yakk anágat mazanén zeminchandhé átk, chéá ke Hodáwanday préshtagé cha ásmáná ér átk, kabray sará shot, dhóki léthént o dhókay sará nesht.
MAT 28:3 Áiay rang o surat gerókay paymá drapshagá at o god o pósháki barpay dhawlá espét atant.
MAT 28:4 Negahpánén sepáhig cha bimmá larzagá laggetant o chó mordagá butant.
MAT 28:5 Préshtagá gón janénán gwasht: “Matorsét! Mana zánán shomá Issáay shóházá ét ke salib kasshag butag.
MAT 28:6 Á edá naent, anchosh ke wat gwashtagati zendag butag o jáhi jatag. Byáét hamá jágahá bechárét ke ódá ér at.
MAT 28:7 Mahtal mabét, berawét o áiay moridán sahig kanét ke á cha mordagán zendag butag o cha shomá pésar Jalilá rawt. Hamódá shomá áiá gendét. Nun man shomárá hál dát.”
MAT 28:8 Gorhá janén cha kabray sará tacháná shotant ke moridán é hálá sar bekanant. Janén torsagá atant bale gal atant ham.
MAT 28:9 Issá anágat gón janénán dochár kapt o gwashti: “Salám o drót!” Á nazzikká átkant, Issáay pádesh geptant o satá o sanáesh kort.
MAT 28:10 Issáyá gón áyán gwasht: “Matorsét! Berawét o mani brátán begwashét ke Jalilá berawét, hamódá shomá maná gendét.”
MAT 28:11 Hamá wahdá ke janén rawagá atant, lahtén negahpánén sepáhig dém pa shahrá shot ke dini péshwáyán é sarjamén hálán bedayant.
MAT 28:12 Dini péshwáyán kawmay kamásháni gend o nend o shawr o saláhá rand, sepáhigáná mazanén zarré dát.
MAT 28:13 Gón sepáhigán gwashtesh: “Mardomán begwashét ke shapá má wáb butagén, áiay morid átkagant o jónesh dozzetag o bortag.
MAT 28:14 Agan wáli é hálá sahig but, má áiá sarpada kanén. Shomá bégam bebét.”
MAT 28:15 Sepáhigán zarr zortant o anchosh ke sój dayag butagatant, hamá paymá kortesh. É kessah tán róche maróchi Yahudiáni nyámá sheng o tálán ent.
MAT 28:16 Gorhá yázdahén kásed Jalilay hamá kóhay sará shotant ke Issáyá gwashtagat.
MAT 28:17 Wahdé Issáesh dist, satá o sanáesh kort, bale lahtén angat shakk at.
MAT 28:18 Issá áyáni kerrá átk o gwashti: “Ásmán o zeminay sajjahén wák o ehtiár maná dayag butag.
MAT 28:19 Paméshká, berawét o sajjahén kawmán mani morid bekanét, Pet o Chokk o Pákén Ruhay námá pákshódi bedayét o
MAT 28:20 áyán hamá tálimá bedayét ke mani sajjahén parmánáni sará amal bekanant. Deljam bebét, man tán donyáay halásiá modám gón shomá gón án.”
MAR 1:1 Issá Masih, Hodáay Chokkay wasshén mestágay bongéj.
MAR 1:2 Anchosh ke Eshayá Nabiay Ketábá nebeshtah ent: Bechár, man wati kásedá cha taw pésar ráha dayán ke tai ráhá tachk o hamwára kant.
MAR 1:3 Gyábáná kasé gwánka jant: “Hodáwanday ráhá tayár bekanét, Hodáwanday keshkán rást o tachk bekanét.”
MAR 1:4 Pákshódi dayókén Yahyá gyábáná átk o gwánki jat: “Tawbah bekanét o pákshódi bekanét ke shomay gonáh bakshag bebant.”
MAR 1:5 Cha Yahudiahay damagay sajjahén métag o kallagán o cha Urshalimay shahrá mardom áiay kerrá átkant, wati gonáháni pashómániesh záhera kort o Yahyáyá Ordonay kawrá á pákshódia dátant.
MAR 1:6 Yahyáyá cha oshteray mudán gwaptagén póshák gwará at o póstén kamarbandé lánká bastagati. Áiá, madag o gyábáni bénaga wárt.
MAR 1:7 Yahyáyá jára jat o gwasht: “Cha man o rand, mardé kayt ke cha man zórmandter ent o man é káray láhek ham naán ke sréná dotal bekanán o áiay kawshbandán bebóján.
MAR 1:8 Man shomárá gón ápá pákshódia dayán, bale á shomárá gón Hodáay Pákén Ruhá pákshódia dant.”
MAR 1:9 Á róchán, Issá cha Jalilay damagay shahr Náserahá átk o Ordonay kawrá Yahyáyá á pákshódi dát.
MAR 1:10 Anchosh ke Issá cha ápá dar áyagá at, disti ke ásmánay dap pach but o Pákén Ruh kapótéay dróshomá ér átk o mani sará nesht.
MAR 1:11 Cha ásmáná é tawár átk: “Taw mani dóstigén Bacch ay o man cha taw sakk wassh o razá án.”
MAR 1:12 Hamá wahdá Pákén Ruhá Issá gyábáná rawán dát.
MAR 1:13 Issá, tán chell róchá gyábáná mant o Shaytáná á chakkáset. Issá ódá jangali jánwaráni nyámá at o préshtagán áiay hayáldária kort.
MAR 1:14 Yahyáay dazgir bayagá rand, Issá Jalilá shot o Hodáay wasshén mestágay jári jat o
MAR 1:15 gwashti: “Wahd átkag o rasetag. Hodáay bádsháhi átkag o sar butag. Cha wati gonáhán pashomán bebét o tawbah bekanét o Hodáay wasshén mestágay sará imán byárét.”
MAR 1:16 Issá, Jalilay Mazangwarmay lambá rawagá at ke do máhigiri dist, Shamun o áiay brát Andriás ke pa máhigiriá wati dám o máhórán gwarmá dawr dayagá atant.
MAR 1:17 Issáyá gón áyán gwasht: “Byáét, mani randgiriá bekanét. Man shomárá anchosha kanán ke máhig geragay badalá, mardománi delán shekára kanét.”
MAR 1:18 Áyán hamá damáná wati dám yalah dátant o áiay hamráh butant.
MAR 1:19 Issá ke kammé démá shot Zebdiay chokk Ákub o áiay brát Yuhannái distant ke bójigá neshtagatant o wati máhórán sráchag o sharr kanagá atant.
MAR 1:20 Anchosh ke Issáyá á distant, gwánki jatant. Áyán wati pet Zebdi gón kárendahán bójigá yalah dát o Issáay hamráh butant.
MAR 1:21 Issá o áiay morid Kaparnáhumay shahrá shotant. Shabbatay róchá Issá kanisahá shot o mardomi tálim dátant.
MAR 1:22 Mardom cha áiay dars o tálimán hayrán o habakkah atant, chéá ke áiá Sharyatay zánógeráni paymá tálim nadát, gón wák o ehtiáré tálimi dát.
MAR 1:23 Hamé wahdá, kanisahay tahá mardéá kukkár kort. É mardá jenné per at. Gwashti:
MAR 1:24 “Oo Issá Náseri! Tará gón má che kár ent? Átkagay ke márá gár o bégwáh bekanay? Mana zánán taw kay ay, taw Hodáay gechén kortagén hamá Pákén ay.”
MAR 1:25 Issáyá jenn hakkal dát o gwasht: “Chopp kan o é mardá yalah day.”
MAR 1:26 Jenná á mard sakk zhámbalént o kukkár kanáná cha áiá dar átk.
MAR 1:27 Sajjahén mardomán pa hayráni watmánwatá gwasht: “É chónén habaré? Nókén tálimé. É mard pa wák o ehtiáré jennán ham hokma dant o jenn eshiay habará gerant.”
MAR 1:28 Dér nagwast ke Jalilay sajjahén kerr o gwarán, Issáyá nám dar áwort.
MAR 1:29 Issá, wahdé cha kanisahá dar kapt, Ákub o Yuhannáay hamráhiá Shamun o Andriásay lógá shot.
MAR 1:30 Ódá, Shamunay wassig tapig at o nepáday sará waptagat. Anchosh ke Issá áyáni lógá potert, nádráhay hálesh dát.
MAR 1:31 Issá nazzikká shot, áiay dasti gept o pádi kort. Tapá yalah dát. Á pád átk o áyáni hezmat kanagá lagget.
MAR 1:32 Magrebtahárá mardomán wati sajjahén nádráh o jenni ganók Issáay kerrá áwortant.
MAR 1:33 Shahray sajjahén mardom, lógay dapá mocch butant.
MAR 1:34 Issáyá bázéné ke dhawl dhawlén nádráhián geptagatant, dráh kort o bázén jenné kassheti, bale áiá jenn pa habará naeshtant, chéá ke jennána zánt ke á kay ent.
MAR 1:35 Sabáhá máhallah ke angat tahár at, Issá pád átk, cha lógá dar kapt, gestá o panáhén jágahéá shot o dwái kort.
MAR 1:36 Shamun o áiay sangat Issáay shóházá dar kaptant.
MAR 1:37 Wahdé Issáesh dist, gón áiá gwashtesh: “Sajjahén mardom tará shóház kanagá ant.”
MAR 1:38 Issáyá gwasht: “Byáét dega jágahéá rawén, kerr o gwaray métag o bázárán tánke man ódá ham wasshén mestágay járá bejanán, chéá ke man pa hamé kárá átkagán.”
MAR 1:39 Gorhá, sajjahén Jalilá tarr o tábi kort, kanisaháni tahá wasshén mestágay jári jat o jenniáni jenni ham kasshetant.
MAR 1:40 Yakk mardéá garr at. Issáay kerrá átk, kóndhán kapt, dazbandi kort o gwashti: “Agan taw belóthay, maná dráh o palgár korta kanay.”
MAR 1:41 Issáyá áiay sará bazzag but, dasti shahárt o á marday badani dast per mosht o gwashti: “Mana lóthán. Dráh o palgár bay!”
MAR 1:42 Hamá damáná á mard cha garrá dráh but.
MAR 1:43 Roksat kanagay wahdá, Issáyá kaddhan kort o gwasht:
MAR 1:44 “Bechár, hechkasá cha é habar o hálá sahig makan, bale beraw, watá dini péshwáyá pésh bedár o pa wati páki o palgáriá hamá korbánigá hayrát kan ke Mussáay Sharyatá nebisag butag, tánke pa áyán sháhedié bebit.”
MAR 1:45 Bale á mard ke cha ódá dar átk, habará lagget o wati kessahi sheng o tálána kort. É sawabá, nun Issáyá natwánt hecch shahrá watá záher bekant, dhanná dur o gestáén jágahána dáshti, bale angat mardom cha har némagá áiay kerrá átkant.
MAR 2:1 Lahtén róchá o rand, Issá padá Kaparnáhumá átk o é habar sheng o tálán but ke Issá lógá ent.
MAR 2:2 Gorhá, haminkadar mardom átk o mocch but ke lóg porr but, lógay dapá ham hecch jágah néstat. Issáyá áyáni kerrá Hodáay habaray wáz kort.
MAR 2:3 Hamé damáná, chár mardomá yakk lang o mondhén mardé áiay kerrá áwort,
MAR 2:4 bale cha mardománi bázén mocchiá, langén mardesh Issáay nazzikká áwort nakort. Paméshká, lógay saray hamá jágahesh thong kort ke Issá jahlá at o langesh gón nepádá ér dát.
MAR 2:5 Issáyá ke áyáni imán dist, gón langá gwashti: “Oo mani chokk! Tai gonáh bakshag butant.”
MAR 2:6 Bale Sharyatay lahtén zánóger ke ódá neshtagat, wati delá gwashtesh:
MAR 2:7 “É chéá chosha gwashit? Kopr kanagá ent. Abéd cha Hodáay jendá, dega kass gonáhán baksheta nakant.”
MAR 2:8 Issáyá hamá damáná zánt ke é mardom wati delá ché gwashagá ant, gwashti: “Shomá chéá wati delá choshén hayála kárét.
MAR 2:9 Gón é langén mardá kojám habaray kanag ásánter ent: ‘Tai gonáh bakshag butant’ yá: ‘Pád á, wati nepádán bezur o beraw’?
MAR 2:10 Bale man é habar kort tánke shomá bezánét ke Ensánay Chokká é donyáyá gonáháni bakshagay wák o ehtiár hast.” Padá gón langá gwashti:
MAR 2:11 “Tará gwashán, pád á, wati nepádá bezur o lógá beraw.”
MAR 2:12 Harkasá dist ke hamá damáná mard pád átk, wati nepádi zort o dar átk. Sajjahén mardom hayrán butant, Hodáay satá o sanáesh kort o gwashtesh: “Má choshén kár hechbar nadistag.”
MAR 2:13 Issá padá gwarmay lambá shot. Mardománi mazanén rombé Issáay kerrá átk o áiá tálim dátant.
MAR 2:14 Anchó ke Issá ráhá rawagá at, Halpiay chokk Láwii dist ke song o máliátay kárgesá neshtagat. Gón áiá gwashti: “Byá, mani randgiriá bekan.” Á pád átk o Issáay hamráh but.
MAR 2:15 Randá Issáyá Láwiay lógá warag wárt. Dega bázén songi o máliátgir o gonahkárén mardoméá ham gón Issá o áiay moridán yakjáh nán wárt, chéá ke esháni tahá bázéné Issáay randgir at.
MAR 2:16 Wahdé Sharyatay Parisi zánógerán dist ke Issá gón songi o gonahkárán warag waragá ent, gón Issáay moridán gwashtesh: “É Issá chéá gón songi o gonahkárán waraga wárt?”
MAR 2:17 Issáyá ke eshkot, gwashti: “Dráh o salámatén mardomán tabib pakár naent, nádráhán tabib pakár ent. Man pahrézkáráni gwánk janagá nayátkagán, gonahkáráni gwánk janagá átkagán.”
MAR 2:18 Yahyáay morid o Parisi róchag atant. Gorhá mardom Issáay kerrá átkant o jostesh kort: “Yahyá o Parisiáni morid chéá róchaga bant, bale tai morid róchaga nabant?”
MAR 2:19 Issáyá gwasht: “Tánke sálónk gón suray mehmánán yakjáh ent, mehmán róchag buta kanant? Na, tánke sálónk gón ent, á róchaga nabant.
MAR 2:20 Bale wahdé kayt ke sálónk cha áyán jetá kanaga bit. Gorhá hamá wahdá róchaga bant.
MAR 2:21 Hechkas nókén goday thokkoré nazurit o kwahnén pashká paccha najant, chéá ke nókén goday pacch nazza kayt o kwahnén pashká gantera derrit.
MAR 2:22 Hechkas nókén sharábá kwahnén mashkán mána nakant, chéá ke nókén sharáb mashkána trákénit. Sharáb o mashk har do zawála bant. Nókén sharábá nókén mashkán mána kanant.”
MAR 2:23 Shabbatéay róchá, Issá cha gandomay keshárán gwazagá at. Morid ke cha keshárán gwazán atant, hóshagay sendagá laggetant.
MAR 2:24 Parisián gón Issáyá gwasht: “Bechár, tai morid chéá choshén káré kanant ke Shabbatay róchá rawá naent?”
MAR 2:25 Issáyá gwasht: “Shomá hechbar nawántag ke wahdé Dáud o áiay hamráh gozhnag atant o waragesh néstat, Dáudá ché kort?
MAR 2:26 Masterén dini péshwá Ábyátáray zamánagá, Dáud Hodáay Pákén Lógá shot o hamá pákwandhén nagani wártant ke dini péshwáyán abéd dega hechkasá áyáni waragay hakk néstat. Hamáyáná ham dáti ke áiay hamráh atant.”
MAR 2:27 Padá, Issáyá gón Parisián gwasht: “Hodáyá Shabbatay róch pa mardomán pédá kortag, mardom pa Shabbatay róchá pédá nakortagant.
MAR 2:28 Paméshká, Ensánay Chokk Shabbatay róchay ham málek ent.”
MAR 3:1 Dega randé, Issá kanisahá shot. Mardé hamódá at ke dasti hoshk o mondh at.
MAR 3:2 Mardománi chamm Issáyá sakk atant ke agan Issá Shabbatay róchá é mardá dráh bekant, gorhá má áiay sará bohtámá jata kanén.
MAR 3:3 Issáyá gón mondhén mardá gwasht: “Byá, démá bósht.”
MAR 3:4 Nun gón mardomán gwashti: “Shabbatay róchá, néki kanag rawá ent yá badi kanag? Zenday rakkénag yá zenday gerag?” Mardom bétawár atant.
MAR 3:5 Issáyá pa zahr cháretant, chéá ke cha áyáni sengdeliá sakk padard at. Gón á mardá gwashti: “Dastá shahár day!” Áiá dast shahár dát o dasti wassh o dráh but.
MAR 3:6 Gorhá Parisi damáná dhanná dar átkant o gón Hirudián pa Issáay koshagá pandalay sázagesh bendát kort.
MAR 3:7 Issá gón wati moridán cha mardomán dur, gwarmay lambá shot. Cha Jalilá mazanén rombé mardom áiay randá rawán but.
MAR 3:8 Cha Yahudiah, Urshalim, Edumiah o Ordonay kawray á dastá o cha Sur o Saydunay chapp o chágerdá ham bázén mardomé áiay kerrá mocch but. Chéá ke áyán eshkotagat ke Issá ché kanagá ent.
MAR 3:9 Mocchi mérhiay sawabá Issáyá gón moridán gwasht: “Bójigé tayár kanét ke cha mardománi mocchiá dur bebén.”
MAR 3:10 Áiá bázén mardomé dráh kortagat, paméshká nádráhén mardom télánk dayán o démá kenzán atant ke má Issáyá dast bejanén.
MAR 3:11 Jenni nádráhán har wahdá ke Issá dist, áiay pádána kaptant, kukkáresha kort o gwashtesh: “Taw Hodáay Chokk ay.”
MAR 3:12 Issáyá kaddhana kortant ke kassá hál madayét.
MAR 3:13 Randá, Issá kóhay sará sar kapt o hamá mardom ke áiá lóthet ke byáyant, tawári kortant o á Issáay kerrá átkant.
MAR 3:14 Issáyá dwázdah kas gechén kort o wati kásed náméntant ke gón áiá hamráh bebant o áyán pa wasshén mestágay járay janagá rawán bedant.
MAR 3:15 Jenn kasshagay ehtiári ham dátant.
MAR 3:16 É dwázdahén kásedáni nám esh ant: Shamun ke Issáyá áiay domi nám, “Petros” kort,
MAR 3:17 Zebdiay chokk Ákub o Ákubay brát Yuhanná ke Issáyá áyáni nám “Bu Ánergés” kort, bezán granday chokk,
MAR 3:18 Andriás, Pilipos, Bartulumá, Mattá, Tumá, Halpiay chokk Ákub, Taddá, sarmachárén Shamun o
MAR 3:19 Yahudá Eskaryuti ke randá Issái dróhet o dozhmenáni dastá dát.
MAR 3:20 Randá, Issá lógéá shot. Haminchok mardom padá átk o mocch but ke Issá o moridán nán waragay móh ham nabut.
MAR 3:21 Issáay syád o wáres ke sahig butant, áiay randá átkant, chéá ke lahténá gwashtagat ke Issá sare wat naent.
MAR 3:22 Cha Urshalimá átkagén Sharyatay zánógerán gwashtagat ke Issáyá jenn per o gón jennáni sardár Belzabulay zórá jennána kasshit.
MAR 3:23 Issáyá é mardom lótháéntant, mesálé dát o gwashti: “Shaytán chón Shaytáná kasshet kant?
MAR 3:24 Agan molkéá nátepáki bebit, á molk barjáha namánit o
MAR 3:25 agan lógéá nátepáki bebit, á lóg barjáh namánit.
MAR 3:26 Hamé dhawlá, agan Shaytán wati jenday helápá pád byayt o gón wat nátepák bebit, óshtáta nakant, halása bit.
MAR 3:27 Zóráwarén mardoméay lógá hechkas potert o pol o pánch korta nakant, tán wahdé ke á zóráwarén mardomá magipt o mabandit. Randá áiay lógá pol o pánch korta kant.
MAR 3:28 Shomárá rásténa gwashán, mardománi sajjahén gonáh o kopr bakshaga bant,
MAR 3:29 bale hamá ke Pákén Ruhay bárawá kopra kant, hechbar baskhaga nabit o abadi gonahkára mánit.”
MAR 3:30 Issáyá paméshká é habar kort ke á gwashagá atant: “Issáyá jenné per ent.”
MAR 3:31 Issáay mát o brát átkant o dhanná óshtátant, mardomé démesh dát ke Issáyá tawár kan.
MAR 3:32 Issáay chapp o chágerdá báz mardom neshtagat, Issáesh hál dát: “Tai mát o brát dhanná óshtátagant o tará lóthagá ant.”
MAR 3:33 Issáyá áyáni passawá jost kort: “Mani mát o brát kay ant?”
MAR 3:34 Padá Issáyá gerdágerd neshtagén mardománi némagá cháret o gwashti: “Mani mát o brát esh ant!
MAR 3:35 Hamá mardom ke Hodáay wáhag o razáay sará amala kant, mani mát o gohár o brát hamá ent.”
MAR 4:1 Issáyá mazangwarmay kerrá padá mardománi tálim dayag bendát kort. Áiay chapp o chágerdá haminchok mardom mocch but ke á bójigéá swár but o nesht. Bójig ápá at o sajjahén mardom gwarmay lambá óshtátagatant.
MAR 4:2 Gorhá Issáyá mardom gón darwar o mesálán báz tálim dátant. Gwashti:
MAR 4:3 “Gósh dárét. Dehkáné tohmay chandhagá shot.
MAR 4:4 Tohmáni chandhagay wahdá kammé tohm ráhay sará retk, báli morg átkant o chet o wártantesh.
MAR 4:5 Kammé tohm dhal o dhókáni tahá retk ke ódá hák kamm at. Zutt rostant, chéá ke hák tanakk at.
MAR 4:6 Bale cha róchay trondén garmiá gimmort o hoshk butant, chéá ke áyáni risshag o wandhál, johl nashotagatant.
MAR 4:7 Kammé tohm cherekk o dhangaráni tahá retk, cherekkán rodagá naeshtant o é tohm bar o samará sar nabutant.
MAR 4:8 É dega tohm sharrén zeminá retkant. É rost o mazan butant o jáhé si sari, jáhé shast sari o jáhé sad sari hóshag o baresh dát.”
MAR 4:9 Padá gwashti: “Harkasá pa eshkonagá gósh per, beshkont.”
MAR 4:10 Wahdé mardom shotant o Issá gón dwázdahén kásed o é dega hamráhán pasht kapt, áyán cha Issáyá jost kort ke é mesáláni máná ché ent.
MAR 4:11 Issáyá passaw dát: “Hodáay bádsháhiay ráz shomárá bakshag butag, bale á ke mani ráhay randgiriá nakanant, é chizz pa áyán hoshkén darwar o mesál ant,
MAR 4:12 tánke: Á bechárant bale magendant, beshkonant bale sarpad mabant. Agan sarpad buténant, dém pa man átkagatant o bakshag butagatant.”
MAR 4:13 Padá gwashti: “Agan shomá é mesálá sarpada nabét, gorhá á dega mesálán chón sarpada bét?
MAR 4:14 Dehkán hamá ent ke Hodáay habará keshit.
MAR 4:15 Lahtén mardom ráhay sará retkagén tohmay dhawlá ent. Hodáay habar ke ódá keshaga bit, hamá damáná Shaytána kayt o keshtagén habará cha esháni delá dara kant o bárt.
MAR 4:16 Á tohm ke dhal o dhókáni tahá retkant, hamá mardománi mesál ent ke Hodáay habará gósha dárant o hamá damáná pa gal o shádeha mannanti,
MAR 4:17 bale pa é sawabá ke risshag o wandhálesh najatag, Hodáay habar áyáni delá tán dérá namánit. Wahdé Hodáay habaray sawabá sakki o sóriána kapant yá ázáré rasitesh, hamá damáná cha ráhá thagalant o kapant.
MAR 4:18 Á tohm ke cherekk o dhangaráni tahá retkant, hamá mardom ant ke Hodáay habará gósha dárant
MAR 4:19 bale donyái parésháni o mál o zarray delkasshi o préb o á dega chizzáni lóth o wáhag áyán rada dayant o naylant ke Hodáay habar besabzit o bar o samar bedant.
MAR 4:20 Bale á tohm ke sharrén zeminá retkant, hamá mardom ant ke Hodáay habará eshkonant o mannant, bar o samara dayant, lahtén si sari, lahtén shast sari o lahtén sad sari.”
MAR 4:21 Issáyá mesál dayáná gwasht: “Kay rókén cherágá kárit o kásagay yá tahtay chérá chéra dant? Cherágá cherágdánay sará éra nakanant?
MAR 4:22 Hecch choshén chérén chizzé nést ke záher mabit o hecch choshén rázé nést ke áshkár mabit.
MAR 4:23 Harkasá pa eshkonagá gósh per, beshkont.”
MAR 4:24 Padá gwashti: “Delgósh kanét ke shomá ché eshkonét. Gón har kayl o paymánahéá ke dayét, gón hamá kaylá shomárá dayaga bit o shomárá angat géshtera rasit.
MAR 4:25 Kaséá ke chizzé hast, áiá géshter dayaga bit o kaséá ke nést, cha áiá hamá ham pach geraga bit ke hastenti.”
MAR 4:26 Issáyá gwasht: “Hodáay bádsháhi, anchosh ent ke mardomé dhagárá tohm bekeshit.
MAR 4:27 É mardom shap o rócha wapsit o páda kayt o tohm anchosha rodit o sabza bit ke keshók wata nazánt chón rost.
MAR 4:28 Dhagár watáwat keshtagén tohmá pa bar o samara rasénit, pésará ták, padá hóshag o randá hóshagay tahá dán mána bit.
MAR 4:29 Wahdé keshára rasit, á dásá chéra dant o ronti, chéá ke rón o móshay wahd átkag.”
MAR 4:30 Padá Issáyá gwasht: “Má ché begwashén ke Hodáay bádsháhi ché chizzéay dhawlá ent? Chónén darwaré byárén o chónén mesálé pésh bekanén?
MAR 4:31 Hodáay bádsháhi, thélkáhay tohmay dhawlá ent. É donyáyá, tohmáni tahá kaster kasterén ent,
MAR 4:32 bale wahdé zeminá keshaga bit, rodit o cha á dega sabzagán borztera bit o sháh o lambi anchó mazana bant ke báli morg áyáni sáhegá kodóha bandant.”
MAR 4:33 Issáyá Hodáay habar é paymén bázén darwar o mesáléay tahá gón áyán darshána kortant ke á sarpad but bekanant.
MAR 4:34 Darwar o mesálán abéd hecch habaria nakort, bale wahdé gón wati moridán tahná but, sajjahén mesáli pa áyán máná kortant.
MAR 4:35 Hamá róchá, bégáh ke but, Issáyá gón moridán gwasht: “Byáét, gwarmay á dastá rawén.”
MAR 4:36 Áyán mardom roksat kortant, bójigá swár butant o Issáesh zort o shotant. Dega lahtén bójig ham áyáni hamráh at.
MAR 4:37 Dér nagwast ke mazanén syahgwátéá sar kort o mastén chawl o mawján bójig cha ápá porr kort.
MAR 4:38 Issáyá, sarjáhé saray chérá at o bójigay poshti némagá wáb at. Moridán cha wábá pád kort o gwashtesh: “Oo ostád! Má meragá én o taw hecch may hayálá naay?”
MAR 4:39 Issá pád átk, gwáti hakkal dát o gón gwarmá gwashti: “Érmósh bay! Bass kan!” Gwát kapt o chawl o mawj árám geptant.
MAR 4:40 Padá gón wati moridán gwashti: “Shomá chéá torsagá ét? Angat báwara nakanét?”
MAR 4:41 Moridán sakk torset o watmánwatá gwashtesh: “É chónén mardomé ke gwát o áp ham eshiay hokmá mannant?”
MAR 5:1 Issá gón wati moridán Jalilay Mazangwarmay á dastá, Gerásiáni molká raset.
MAR 5:2 Wahdé Issá cha bójigá ér átk, hamá damáná mardé cha kabrestáná dar átk o gón Issáyá dochár kapt. Mardá jenné per at.
MAR 5:3 É mard kabrestáná jahmenend at o haminchok zóri mán at ke nun hechkasá áiay dast o pád gón zamzilán ham basta nakortant.
MAR 5:4 Mardomán báz randá bastagat, bale áiá zamzil próshtagatant o hechkasá áiay ger o dáray zór o twán néstat.
MAR 5:5 Shap o róch kabrestán o kóhán at, kukkár o chihália jat o watá gón dhók o sengán thappigia kort.
MAR 5:6 Anchó ke áiá Issá cha durá dist, tacháná átk o Issáay pádán kapt,
MAR 5:7 kukkár kort o gwashti: “Issá, oo borzén arshay Hodáay Chokk! Tará gón man che kár ent? Tará Hodáay sawgend ent, maná azáb maday.”
MAR 5:8 É habari paméshká kort ke Issáyá gwashtagat: “Oo palitén ruh! É mardá yalah day.”
MAR 5:9 Issáyá cha áiá jost kort: “Tai nám kay ent?” Áiá passaw dát: “Mani nám ‘Lashkar’ ent, ke má báz én.”
MAR 5:10 Issáay kerrá báz peryáti kort: “Márá cha é molká dar makan.”
MAR 5:11 Hamódá, kóhdémá hukkáni mazanén ramagé charagá at.
MAR 5:12 Jennán peryát kort: “Márá é hukkáni jesmá ráh beday.”
MAR 5:13 Issáyá ejázat dátant. Gorhá, jenn cha mardá dar átk o hukkáni jesmá potertant. Ramagá kesás do hazár hukk atant ke cha kóhdémá jahlagá tachán butant o gwarmá kapt o mortant.
MAR 5:14 Hukkáni chárénók tacháná shotant o shahr o métagesh hál dátant. Wahdé mardomán eshkot, átkant ke chamme wat begendant ke ché butag.
MAR 5:15 Wahdé Issáay gwará átkant, distesh ke hamá mard ke pésará jennáni lashkará ganók kortagat, pocch o pósháki gwará o hósh o sár ent o neshtag. Nun torsesh delá kapt.
MAR 5:16 Chamdistén sháhedán kessah kort ke jenni ganók chón sár butag o hukkáni kessahesh ham áwort.
MAR 5:17 Gorhá mardomán gón Issáyá dazbandi kort ke may molká yalah day.
MAR 5:18 Wahdé Issá bójigá swár bayagá at, hamá mard ke pésará jennán geptagat, átk o dazbandii kort ke maná bar gón.
MAR 5:19 Bale Issáyá ejázat nadát o gwashti: “Lógá beraw o wati mardomán hál day ke Hodáwandá pa taw chónén káré kortag o tai sará chón rahmi kortag.”
MAR 5:20 Gorhá, á mard shot o Dekápulisay molkay mardomi hál dátant ke Issáyá pa man chónén káré kortag. Sajjahén mahluk hayrán but.
MAR 5:21 Issá ke padá bójigá swár but o gwarmay á dastá shot. Gwarmay lambá, mardománi mazanén rombé áiay chapp o chágerdá mocch but.
MAR 5:22 Yáerus námén mardé ke kanisahay master at, hamódá átk o gón Issáay gendagá, áiay pádán kapt.
MAR 5:23 Áiá gón Issáyá báz randá dazbandi kort: “Mani jenekk markig ent. Byá o wati dastá áiay sará per mosh ke dráh bebit o zendag bemánit.”
MAR 5:24 Issá áiay hamráh but o shot. Mardománi mazanén rombé Issáay chapp o chágerdá mocch but o shot gón.
MAR 5:25 É rombá janéné gón at. Dwázdah sál at ke áiay hón pach at.
MAR 5:26 Bázén dáktaréá shotagat, bale elájay badalá dardi gésh butagatant o sajjahén zarr o máli ham báhéntagatant. Dráh bayagay badalá ganter bayán at.
MAR 5:27 Issáay bárawá eshkotagati o nun mardománi mocchiay tahá cha poshti némagá átk o Issáay kabáhi dast jat.
MAR 5:28 Deljam at ke agan Issáay pocchán ham dast per bekanán, dráha bán.
MAR 5:29 Anchó ke Issáay kabáhi dast jat, áiay hón band but o cha wati jesmay hálatá zánti ke man dráh bután.
MAR 5:30 Issáyá hamá damáná zánt ke cha man zóré dar átk. Póshtá, mocchiay némagá chakki tarrént o josti kort: “Kayá mani pocch dast jatant?”
MAR 5:31 Moridán gwasht: “Taw gendagá ay, mardomán tará chón angerr kortag. Angat jostá ay ke kayá mani pocch dast jatagant?”
MAR 5:32 Issá angat chárén némagán cháragá at ke é kár kayá kort.
MAR 5:33 Janéná zánt ke gón man ché but, pa tors o larz átk o Issáay pádán kapt o sajjahén habari pa rásti kortant.
MAR 5:34 Issáyá gwasht: “Mani jenekk! Tai imáná tará dráh kort. Beraw pa salámati. Cha wati nájórhiá dráh bay.”
MAR 5:35 Issá angat habará at ke cha Yáerusay lógá mardomé átk o háli dát: “Tai jenekk mortag. Nun ostádá chéá delsyáha kanay?”
MAR 5:36 Issáyá áiay habar eshkot, gón kanisahay masterá gwashti: “Mators, bass báwar kan.”
MAR 5:37 Issáyá, Petros o Ákub o Ákubay brát Yuhannáyá abéd dega kass wati hamráh bayagá naesht.
MAR 5:38 Wahdé kanisahay masteray lógá átkant, Issáyá dist ke kukkár o wáhi ent, mardom gréwag o mótk áragá ant.
MAR 5:39 Tahá ke átk, gwashti: “Chéá gréwag o kukkárá ét? Chokk namortag, wáb ent.”
MAR 5:40 Áyán Issáay sará kandet, bale Issáyá sajjahén mardom dar kortant o jenekkay pet o mát o wati hamráhén moridi zortant o hamá báná shot ke jenekk ódá ér at.
MAR 5:41 Issáyá jenekkay dast gept o gwashti: “Talitá! Kom.” Bezán: Jenekkok! Pád á.
MAR 5:42 Jenekk ke omri dwázdah sál at, hamá damáná pád átk o tarragá lagget. Á mardom ke gón atant, sakk hayrán o habakkah butant.
MAR 5:43 Issáyá kaddhan kortant ke kassá hál madayét o padá gwashti ke jenekká warák bedayét.
MAR 6:1 Issá cha ódá dar átk o wati jenday shahrá átk. Morid ham gón atant.
MAR 6:2 Shabbatay róchá kanisahá mardománi tálim dayagi bendát kort. Gón áiay habaráni eshkonagá bázéné hayrán o habakkah but. Gwashtesh: “Eshiá é habar cha kojá áwortagant o é dánái kayá dátag? Eshiay dastá choshén mójezah che paymá bayagá ant?
MAR 6:3 É hamá dártrásh naent? É Maryamay bacch o Ákub o Yushá o Yahudá o Shamunay brát ent. Gohári ham hamedá may shahrá jahmenend ant.” Mardom Issáay sará nawassh butant.
MAR 6:4 Issáyá gón áyán gwasht: “Nabiá, abéd cha wati jenday shahr o jenday lógá o wati syád o wáresáni kerrá, dega har jágah ezzat hast.”
MAR 6:5 Issáyá ódá dega mójezahé pésh dásht nakort, bass lahtén nádráhay sará dasti per mosht o dráhi kortant.
MAR 6:6 Issá, cha é mardománi bébáwariá hayrán at. Gorhá, Issá métag pa métaga tarret o mardomi tálima dátant.
MAR 6:7 Dwázdahén kásedi lótháéntant, do doá bahri kort o rawáni dátant. Jennay kasshagay wák o ehtiári ham dátant o
MAR 6:8 gwashti: “É sapará wati asáyá abéd dega hecch mazurét gón. Shomárá nán o tóshag o lót o turag hecch gón mabit. Zarr ham mazurét gón.
MAR 6:9 Wati chawatthán pádá kanét o gwaray jámagá abéd, dega jámag mazurét gón.
MAR 6:10 Harkasay lógá ke rawét, tán cha shahrá dara nayáét hamódá bejallét.
MAR 6:11 Har jáh ke mardom shomárá wasshátka nakanant o shomay habarán gósha nadárant, cha ódá dar áét o dar áyagay wahdá wati pádáni danz o hákán hamódá bechandhét tánke áyáni helápá sháhedié bebit ke áyán hesáb dayagi ent.”
MAR 6:12 Gorhá, morid shotant o járesh jat ke cha wati gonáhán pashómán bebét o tawbah bekanét.
MAR 6:13 Áyán bázén jenné kasshet o bázén nádráhé thél per mosht o dráh kort.
MAR 6:14 É hál Hirudis bádsháhá sar butant, chéá ke Issá nun námdár butagat. Lahténá gwasht é hamá pákshódi dayókén Yahyá ent ke cha mordagán zendag butag, paméshká choshén ajekkái kár o mójezaha kant.
MAR 6:15 Lahténá gwasht: “Elyás nabi ent ke padá átkag.” Dega lahténá gwasht: “Gwastagén paygambaráni dhawlén paygambaré.”
MAR 6:16 Gón é habaráni eshkonagá Hirudisá gwasht: “É Yahyá ent. Man eshiay sar borret, bale é padá zendag butag.”
MAR 6:17 Hirudisá pa wati jan Hirudiahay wassh kanagá, Yahyáay gerag o bandig kanagay hokm dátagat. Hirudiá pésará Hirudisay brát Piliposay jan at o nun Hirudisá gón áiá sur kortagat.
MAR 6:18 Yahyáyá é habaray sará Hirudis mayárig kortagat o gwashtagat ke Sharyatay hesábá gón wati zendagén brátay janá sáng o sur kanag rawá naent.
MAR 6:19 Paméshká Hirudiah Yahyáay sará sakk zahr at o lótheti ke Yahyáyá bekóshárénit, bale dastia naraset,
MAR 6:20 chéá ke Hirudisá cha Yahyáyá torset. Áiá zánt ke Yahyá pahrézkár o pákén mardomé o naeshti ke kasé áiá bekoshit. Wahdé Yahyáay habaria eshkotant, hayrán o paréshána but, bale angat Yahyáay habaráni gósh dárag áiá dósta but.
MAR 6:21 Wahdé Hirudisá pa wati sálgerahá mazanén jashné gept o wati wazir o gazir o pawji apsar o Jalilay mir o masteri dáwat dátant, Hirudiahá móhé raset.
MAR 6:22 Hirudiahay jenekk majlesá átk, nách o sohbati kort o Hirudis o áiay mehmánáni deli wassh kort. Hirudis bádsháhá gón jenekká gwasht: “Harché tai dela lóthit begwash, man tará dayán.”
MAR 6:23 Sawgendi wárt o gwashti: “Harché lóthay, belóth, toré mani bádsháhiay némá.”
MAR 6:24 Jenekk dar átk, wati mátay kerrá shot o josti kort: “Ché belóthán?” Mátá gwasht: “Pákshódi dayókén Yahyáay sará belóth.”
MAR 6:25 Gorhá jenekk zutt zuttá per tarret, bádsháhay kerrá átk o gwashti: “Man pákshódi dayókén Yahyáay sará tabakkéay tahá lóthán, hamé annun.”
MAR 6:26 Hirudis bádsháh sakk paréshán but, bale pa wati sawgenday dárag o mehmánáni ezzatá nalótheti ke jenekkay dazbandiá dast posht bejant.
MAR 6:27 Paméshká jalládi hokm dát: “Annun beraw zendáná o Yahyáay sará borr o byár.” Jallád zendáná shot, Yahyáay sari borret o
MAR 6:28 tabakkéay tahá kort o áwort o jenekkárá dáti. Jenekká sar bort o wati mátárá dát.
MAR 6:29 Wahdé Yahyáay morid sahig butant, átkant o áiay jónesh bort o kabr o kapan kort.
MAR 6:30 Issáay kásed, Issáay kerrá átkant o wati sajjahén kortagén káráni o dátagén tálimay hálesh dát.
MAR 6:31 Issáyá gwasht: “Byá, gestáén jágahéá rawén ke tahná bebén o shomá kammé árám bekanét.” Chéá ke é wahdá mardománi raw o á anchó báz at ke Issá o moridán waragay móh ham naraset.
MAR 6:32 Gorhá bójigéá swár but o gestáén jágahéá shotant ke tahná bebant.
MAR 6:33 Rawagay wahdá, bázén mardoméá dist o pajjáh áwortant. Mardom cha sajjahén shahrán tacháná dém pa hamá jágahá shotant o cha Issá o moridán pésar ódá sar butant.
MAR 6:34 Issá ke cha bójigá ér kapt o mardománi mazanén mocchii dist, áyáni sará bazzagi but, chéá ke mardom béshepánkén pasáni dhawlá atant. Gorhá Issáyá bázén tálimé dátant.
MAR 6:35 Bégáhá morid Issáay kerrá átkant o gwashtesh: “Nun béwahd ent o é gestáén jágahé.
MAR 6:36 Mardomán begwash, bell ke kerr o gwaráni métag o bázárána rawant o pa wat ward o waráka gerant.”
MAR 6:37 Bale Issáyá gwasht: “Shomá wat áyán warák bedayét.” Moridán jost kort: “Gorhá má berawén o do sad dináray nagan begerén o eshán bedayén ke warant?”
MAR 6:38 Issáyá gwasht: “Berawét bechárét, bárén shomárá chont nagan gón?” Áyán cháret o átkant, gwashtesh: “May kerrá panch nagan o do máhig hast.”
MAR 6:39 Issáyá hokm dátánt ke mardomán thóli thóliá káh o sabzagay sará nádénét.
MAR 6:40 Mardom sad sad o panjáh panjáhay thóliá neshtant.
MAR 6:41 Issáyá panchén nagan o doén máhig dastá kortant, ásmánay némagá cháret o Hodáay shogri gept, nagani chondh chondh kort o moridáni dastá dátant ke mardománi sará bahresh kanét. Doén máhigi ham sajjahénáni sará bahr kortant.
MAR 6:42 Sajjahénán sérá wárt.
MAR 6:43 Cha sar átkagén nagan o máhigán dwázdah saptesh porr kort.
MAR 6:44 Nán warókén mardománi tahá panch hazár mardén atant.
MAR 6:45 Issáyá hamá damáná morid parmán dát o gwashtant: “Man é mardomán roksata kanán. Shomá tán á wahdá bójigá swár bét o cha man pésar mazangwarmay á dastá, Bayt-Saydáay shahrá berawét.”
MAR 6:46 Mardománi roksat kanagá rand, Issá pa dwá kanagá kóhay sará sar kapt.
MAR 6:47 Shap ke but, morid bójigay tahá gwarmay nyámá atant o Issá hoshkiá tahná at.
MAR 6:48 Disti ke morid gón trondén gwátéá dém pa dém ant o pa zahmat o hillaté hólig janagá ant. Gorhá shapay cháromi pásá, Issá ápay sará gám janán, dém pa áyán átk o lótheti ke cha áyáni kashá begwazit.
MAR 6:49 Wahdé moridán dist ke Issá ápay sará gám janán ent, delá gwashtesh: “Jenné!” Kukkáresh kort,
MAR 6:50 chéá ke sajjahénán dist o sakk torsetesh. Bale Issáyá damáná gwasht: “Delá dhaddh kanét, matorsét, é man án.”
MAR 6:51 Padá bójigá sar kapt o gón moridán hawár but. Gwát ham kapt o árám but. Morid hayrán o habakkah butant,
MAR 6:52 chéá ke angat naganay mójezahá sarpad nabutagatant, delesh seng at.
MAR 6:53 Issá o moridán mazangwarm gwázént o á dastá Genisáretay shahrá rasetant o bójigesh nangar kort.
MAR 6:54 Anchó ke cha bójigá ér kaptant, mardomán Issá pajjáh áwort.
MAR 6:55 Nun sajjahén damagá tatkant, wati nádráhesh tahtáni sará kortant o har jáh ke áyána eshkot Issá ódá ent, nádráhesh hamódá bortant.
MAR 6:56 Issá har métag o shahr o kallagéá ke shot, mardomán wati nádráh shahr o bázáráni chárráháni sará áwortant o dazbandiesha kort ke bell bimár kamm cha kamm tai kabáhay lambá dasta janant. Harkasá ke dasta jat, wassh o dráha but.
MAR 7:1 Cha Urshalimá átkagén Parisi o Sharyatay lahtén zánóger Issáay kerrá mocch butant.
MAR 7:2 Distesh ke Issáay lahtén morid gón sellén, bezán gón nashoshtagén dastán warák waragá ent.
MAR 7:3 Bale Parisi o sajjahén Yahudi, tánke wati pet o piroki rasmay redá dast mashódant, waráka nawarant.
MAR 7:4 Wahdé cha bázárá káyant, tán shosht o shód makanant, heccha nawarant o dega bázén hamé dhawlén dód o rasmesh hast chó ke tán pyálah o ápdán o lóhigán mashódant, kármarzesha nakanant.
MAR 7:5 Nun Parisi o Sharyatay zánógerán cha Issáyá jost kort: “Tai morid chéá pet o piroki rasmá namannant o gón sell o nápákén dastán waráka warant?”
MAR 7:6 Issáyá gwasht: “Oo doru o dopóstén mardomán! Eshayá nabiá shomay bárawá sharr nebeshtag: É mardom dapá maná ezzata dayant, bale delesh cha man sakk dur ent.
MAR 7:7 É moptá maná parastesha kanant o mardománi ráh o rahbandáni tálimá anchosha dayant ke gwashay Hodáay hokm ant.
MAR 7:8 Shomá Hodáay hokm yalah dátag o mardománi rasm zortag.”
MAR 7:9 Randá gwashti: “Shomá pa wati rasmáni dáragá Hodáay hokmáni yalah dayagay sharrén ráhé dar gétkag.
MAR 7:10 Mussáyá gwashtag: Wati pet o mátá ezzat beday. Harkasá ke wati pet yá mát nálat kort, áiay sezá mark ent.
MAR 7:11 Bale shomá sója dayét ke agan yakké wati pet yá mátá begwashit: ‘Pahell kan, á komakk ke man báyad ent tará bedátén, á man Hodáay ráhá korbán kortag,’
MAR 7:12 gorhá shomá áiá cha pet o mátay komakk kanagá manah o makana kanét.
MAR 7:13 Shomá wati rasmán barjáha dárét o é paymá Hodáay habará halás o nákára kanét. Dega ham bázén hamé dhawlén kára kanét.”
MAR 7:14 Issáyá mocch butagén mardom padá wati kerrá tawár kortant, gwashti: “Shomá drost mani habarán gósh bedárét o sarpad bebét.
MAR 7:15 Chizzé ke mardomay lápá rawt áiá sell o nápáka nakant, bale chizzé ke cha áiay delá dara kayt, áiá nápáka kant.
MAR 7:16 Harkasá pa eshkonagá gósh per, beshkont.”
MAR 7:17 Wahdé mardomi yalah dátant o lógá átk, moridán gwasht: “Márá é mesálay maksadá sarpad kan.”
MAR 7:18 Issáyá gwasht: “Shomá haminkadar násarpad ét? Nazánét ke hecch warákay warag mardomá sell o nápáka nakant?
MAR 7:19 Chéá ke warák delá narawt, lápá rawt o cha rótán dara kayt.” Gón é habará áiá gisshént ke sajjahén waragi chizz helár o pák ant.
MAR 7:20 Áiá wati habar démá bort o gwasht: “Á chizz ke mardomá sell o nápáka kant, cha áiay del o daruná dara kayt,
MAR 7:21 chó ke badén pegr o hayál, bénangi, dozzi, hón o kósh, zená,
MAR 7:22 lálech o tamáh, badwáhi, makkári, waylánki, hasadd, kopr, takabbor o béagli.
MAR 7:23 É sajjahén badi, cha mardomay del o daruná dara káyant o mardomá nápáka kanant.”
MAR 7:24 Issá cha ódá dar átk o Suray damagá shot. Ódá lógéá shot o nalótheti ke kasé áiay áyagá sahig bebit, bale é háli chér dát nakort.
MAR 7:25 Janéné ke áiay jenekkoká jenné per at, wahdé Issáay áyagay háli eshkot, hamá damáná átk o áiay pádán kapt.
MAR 7:26 É janén Yunánié at o Suriahay damag Pinikiahá pédá butagat. Áiá cha Issáyá dazbandi kort ke mani jenekkay jenná kassh.
MAR 7:27 Issáyá gwasht: “Awalá báyad ent chokk warag bwarant o sér bekanant, chéá ke chokkáni naganay pach gerag o kochekkáni démá dawr dayag sharr naent.”
MAR 7:28 Janéná gwasht: “Ji haw, Hodáwand! Bale parzónagay kerray kochekk ham chokkáni naganáni chondhána warant.”
MAR 7:29 Issáyá gwasht: “Taw sharrén passawé dát, beraw, tai jenekkay jenn dar átkag.”
MAR 7:30 Wahdé janén lógá per tarret, disti ke jenekk tahtay sará waptag o jenná yalah dátag.
MAR 7:31 Issá, cha Suray damagá per tarret, Sayduni gwázént o Jalilay Mazangwarm o Dekápulisay damagá átk o raset.
MAR 7:32 Mardomán karrén mardé ke áiá sharriay sará gapp jat ham nakort, Issáay kerrá áwort o dazbandiesh kort ke taw wati dastá eshiay sará per mosh.
MAR 7:33 Issáyá á mard cha mardománi mocchiá yakk kerré bort o lankoki áiay góshán mán kortant. Randá wati dasti tokk jat o áiay zobáná peri mosht.
MAR 7:34 Ásmánay némagá cháreti, áh o ginsárté kasshet o gwashti: “Effatah!” (Bezán “pach bay!”)
MAR 7:35 Hamá damáná, marday gósh pach butant, zobáni ham pach but o pa sharri habar kanagá lagget.
MAR 7:36 Issáyá, mardom kaddhan kortant ke gón kassá é bárawá hecch magwashét, bale haminchok ke áiá pa habar nakanagá kaddhan kort, mardomán haminkadar géshter habar tálán kort.
MAR 7:37 Mardom sakk hayrán o habakkah atant o gón yakdomiá gwashtesh: “Chónén sharrén kára kant. Karráni góshán pacha kant o gongán zobána bakshit.”
MAR 8:1 Hamá róchán, yakk baré padá Issáay gwará mardománi mazanén rombé yakjáh but. Áyán ward o warák néstat. Paméshká, áiá wati morid lótháént o gwashtant:
MAR 8:2 “Maná é mardománi sará bazzaga bit. Nun say róch ent ke mani gwará ant o pa waragá hecchesh nést.
MAR 8:3 Agan eshán gón shodigén lápé roksat bekanán, ráhá tosant o kapant, chéá ke lahtén cha durén jágahán átkag.”
MAR 8:4 Moridán áiay passawá gwasht: “É gyábáná pa inchok mardomay sér kanagá, nán cha kojá byárén?”
MAR 8:5 Josti kort: “Shomárá chont nagan gón?” Gwashtesh: “Hapt.”
MAR 8:6 Áiá gón mardomán gwasht: “Zeminay sará benendét.” Haptén nagani zortant, Hodáay shogri gept, chondh chondhi kort o moridáná dátant ke mardománi démá éresh bekanant. Moridán anchosh kort.
MAR 8:7 Áyáni kerrá lahtén hordén máhig ham hastat. Issáyá máhigáni sará ham Hodáay shogr gept o gón moridán gwashti: “Mardománi démá éresh kanét.”
MAR 8:8 Sajjahénán sérá wárt o randá cha sar átkagén chondhán, moridán hapt lach porr kort.
MAR 8:9 Á mardom chár hazáray kesásá atant. Randá áiá mardom roksat kortant o
MAR 8:10 hamá damáná gón wati moridán bójigá swár but o Dalmánutahay damagá shot.
MAR 8:11 Parisi Issáay kerrá átkant o pa áiay chakkásagá jost o porsesh bendát kort. Gwashtesh: “Márá ásmáni neshánié pésh dár ke tai sará imán byárén.”
MAR 8:12 Issáyá cha delá áhé kasshet o gwasht: “É zamánagay mardom chéá neshánia lóthant? Shomárá rásténa gwashán ke é zamánagay mardomán hecch neshánié dayaga nabit.”
MAR 8:13 Gorhá Issáyá á eshtant, padá bójigá swár but o gwarmay á dastá shot.
MAR 8:14 Moridán shamoshtagat ke gón wat nagan bezurant. Bójigá gón áyán bass yakk nagané hastat.
MAR 8:15 Issáyá hokm dátant: “Hozzhár bét! Cha Parisiáni homirá o cha Hirudis bádsháhay homirá pahréz bekanét.”
MAR 8:16 Á watmánwatá habará laggetant: “Wájah paméshká chosha gwashit ke má gón wat nagan nayáwortag.”
MAR 8:17 Issáyá zánt o gwashti: “Chéá jérhagá ét ke gón má nagan nést? Angata nazánét o sarpad naét? Shomay del anchó seng ant?
MAR 8:18 Shomárá chamm per, gorhá parchá nagendét? Shomárá gósh per, gorhá parchá naeshkonét? Shomá shamoshtag
MAR 8:19 ke man che paymá panch nagan chondh chondh kort o panch hazár mardomá sérá wárt o shomá cha sar átkagén chondhán chinchok sapt porr kort?” Moridán passaw dát: “Dwázdah.”
MAR 8:20 “O wahdé man hapt nagan chondh chondh kort o chár hazár mardomá wárt, shomá cha sar átkagén chondhán chinchok lach porr kort?” Áyán passaw dát: “Hapt.”
MAR 8:21 Issáyá gwasht: “Gorhá angat mani habarán sarpada nabét?”
MAR 8:22 Wahdé Issá gón wati moridán Bayt-Saydáyá sar but, kórén mardé áiay kerrá áwortesh o dazbandiesh kort ke “Wati dastá eshiay sará per mosh.”
MAR 8:23 Issáyá kóray dast gept, cha métagá dhann bort o áiay chammi tokk jatant. Randá wati dasti áiay chammáni sará ér kortant o josti gept: “Taw chizzé genday?”
MAR 8:24 Á mardá sar chest kort o gwasht: “Mardomána gendán, gwashay drachk ant ke gardagá ant.”
MAR 8:25 Issáyá padá wati dast áiay chammáni sará ér kortant, é randi áiay chamm sarjamá dráh butant o sajjahén chizzi sharriay sará distant.
MAR 8:26 Nun Issáyá gwasht: “Tachká wati lógá beraw o métagá hecch tarr o gard makan.”
MAR 8:27 Issá gón wati moridán dém pa Kaysariah Pilipiay kallagán shot. Ráhá, cha wati moridán josti kort: “Mani bárawá mardom ché gwashant, man kay án?”
MAR 8:28 Áyán passaw dát: “Lahténa gwashit ke taw pákshódi dayókén Yahyá ay, lahténa gwashit taw Elyás nabi ay. Dega lahténa gwashit cha á dega nabián yakké ay.”
MAR 8:29 Gorhá josti kort: “Shomá wat mani bárawá ché gwashét, man kay án?” Petrosá passaw dát: “Taw Masih ay.”
MAR 8:30 Bale áiá kaddhan kortant: “É habará páshk makanét ke man Masih án.”
MAR 8:31 Randá, Issá moridán tálim dayagá lagget. Gwashti: “Ensánay Chokk báyad ent bázén sakki o sórié besaggit. Kawmay kamásh o mazanén dini péshwá o Sharyatay zánóger allamá áiá namannant o kóshárénant o say róchá rand á padá zendaga bit.”
MAR 8:32 Wahdé Issáyá tachká tachk é habar kortant, Petrosá á yakk kerré bort o pa trondi gwashagá lagget: “Oo wájah! É gappá makan.”
MAR 8:33 Bale Issáyá chakk tarrént, moridáni némagá cháret o Petrosi hakkal dát o gwashti: “Oo Shaytán! Cha mani démá dur bay. Tai hayál Hodái hayálé naent, ensáni hayálé.”
MAR 8:34 Issáyá, sajjahén mahluk o morid lótháéntant. Gwashti: “Agan kasé lóthit mani randgiriá bekant, báyad ent wati delay sajjahén lóth o wáhagán bekoshit o wati jenday salibá baddhá bekant o mani ráhá byayt.
MAR 8:35 Chéá ke harkas ke wati sáhay rakkénagay johdá kant, gária dant o harkas ke mani o wasshén mestágay háterá wati sáhá nadra kant, rakkéniti.
MAR 8:36 Agan yakkéá sajjahén donyá berasit bale wati sáhá gár bedant, gorhá áiá che páedaga rasit?
MAR 8:37 Mardom wati sáhay badalá chónén kimaté dáta kant?
MAR 8:38 Agan kasé é béwapá o radkárén ahd o zamánagá cha man o mani habarán sharmendag bebit, gorhá Ensánay Chokk ham, wahdé Hodáay pákén préshtagáni hamráhiá gón Petay shán o marháhá padá kayt, cha áiá sharmendaga bit.”
MAR 9:1 Issáyá gón áyán gwasht: “Man shomárá rásténa gwashán, lahtén mardom ke edá óshtátag, tánke magendant ke Hodáay bádsháhi gón wák o kodrat átkag, é namerant.”
MAR 9:2 Shash róchá rand, Issáyá Petros o Ákub o Yuhanná wati hamráh kort o borzén kóhéay sará bortant ke ódá tahná bebant. Áyáni démá, Issáay rang o dróshom badal but o
MAR 9:3 áiay póshák anchó espét butant ke jahánay hecch godshódé godán é dhawlá espét korta nakant.
MAR 9:4 Hamé wahdá Elyás o Mussá záher butant o gón Issáyá habará laggetant.
MAR 9:5 Gorhá Petrosá gón Issáyá gwasht: “Ostád! May edá bayag sakk sharr ent, bell ke má say sáheg o kápára bandén, yakké pa taw, yakké pa Mussáyá o yakké pa Elyásá.”
MAR 9:6 Petrosá nazánt ché begwashit, chéá ke á sakk torsagá atant.
MAR 9:7 Bale hamá damáná jambaré áyáni sará sáhél but. Cha jambará tawáré átk: “É mani dóstigén Bacch ent, eshiay habarán gósh bedárét!”
MAR 9:8 Anágat, moridán chapp o chágerdá cháret, bale abéd cha Issáyá dega hechkasesh nadist.
MAR 9:9 Cha kóhá ér kapagay wahdá, Issáyá hokm dátant: “Tán hamá wahdá ke Ensánay Chokká cha mordagán jáh najatag, hechkasá hál madayét ke shomá ché distag.”
MAR 9:10 Áyán harché ke distagat wati delá dásht o watmánwatá habaresha kort ke cha mordagán jáh janagay máná ché ent?
MAR 9:11 Gorhá cha Issáyá jostesh kort: “Sharyatay zánóger chéá gwashant ke cha Masihay áyagá pésar, báyad ent Elyás nabi byayt?”
MAR 9:12 Issáyá passaw dát: “Sharyatay zánógeráni é habar rást ent ke Elyás nabi pésará kayt o har chizzá padá barjáha kant. Bale parchá nebisag butag ke Ensánay Chokk báyad ent báz sakki o sóri besaggit o béezzat kanag bebit?
MAR 9:13 Elyás nabiay bárawá shomárá gwashán ke á hakk o del átk o anchosh ke áiay bárawá nebisag butag, har paymá ke mardománi delá lóthet, gón áiá hamá dhawlesh kort.”
MAR 9:14 Wahdé Issá o sayén morid per tarret o é dega moridáni kerrá átkant, mardománi mazanén rombé distesh. Lahtén Sharyatay zánóger ham hamódá at o gón moridán dapjáká atant.
MAR 9:15 Anchó ke sajjahén rombá Issá dist, á hayrán butant o tacháná áiay némagá átkant o wasshátkesh kort.
MAR 9:16 Áiá jost kort: “Shomá gón eshán che chizzay bárawá dapják kanagá ét?”
MAR 9:17 Cha rombá, mardéá passaw dát: “Ostád! Man wati chokk tai gwará áwortag. Á habar korta nakant, chéá ke jennéá geptag o gong kortag.
MAR 9:18 Wahdé jenn áiá gipt, zeminá dawria dant. Chokk gajj o kapa bit, dantána droshit o konth o hoshka bit. Man gón tai moridán gwasht ke eshiay jenná bekasshét, bale áyán kasshet nakort.”
MAR 9:19 Issáyá gwasht: “Oo bébáwarén nasl o padréch! Man tán kadéná gón shomá bemánán, tán kadéná shomárá besaggán? Chokká mani kerrá byárét!”
MAR 9:20 Gorhá bachakkesh áwort o wahdé jennay chamm pa Issáyá kaptant, hamá damáná bachakki zhámbalént. Bachakk zeminá kapt o péch o tábi wárt o gajj o kap but.
MAR 9:21 Issáyá cha áiay petá jost kort: “Chont wahd ent ke é dhawlá ent?” Petá passaw dát: “Cha kasániá.
MAR 9:22 Báz randá, jenn áiá pa koshagá ás o ápá dawra dant. Agan tai dastá buta kant, may sará bazzag kan o márá madat kan.”
MAR 9:23 Issáyá gwasht: “É che gappé? Agan mani dastá buta kant? Á ke báwara kant, pa áiá har chizz buta kant.”
MAR 9:24 Bachakkay petá hamá damáná kukkár kort o gwasht: “Maná báwar ent, mani nábáwariá eláj kan.”
MAR 9:25 Wahdé Issáyá dist ke mardománi rombé tacháná pédák ent, jenni hakkal dát o gwashti: “Oo karr o lellén jenn! Man tará hokma dayán ke é bachakká yalah day o padá hechbar eshiay badaná mapoter.”
MAR 9:26 Gorhá jenná krinzhagé jat o bachakki sakk zhámbalént o yalah dát. Bachakk chó mordagá but o bázénéá gwasht: “É mort.”
MAR 9:27 Bale Issáyá áiay dast gept o pádi kort o bachakk óshtát.
MAR 9:28 Issá lógéá shot o moridán ehwatá cha áiá jost kort: “Má chéá é bachakkay jenn kasshet nakort?”
MAR 9:29 Áiá passaw dát: “É dhawlén jenn bé dwá kanagá kasshaga nabant.”
MAR 9:30 Issá o áiay moridán á jágah yalah dát o Jalilesh gwázént, bale Issáyá nalóthet kasé bezánt ke á kojá ent,
MAR 9:31 chéá ke wati moridáni tálim dayagá dazgatth at. Gwashti: “Ensánay Chokk dróhaga bit o anchén mardománi dastá dayaga bit ke koshanti, bale say róchá rand, padá zendaga bit o jáha jant.”
MAR 9:32 Bale morid áiay é habará sarpad nabutant o cha áiá jost kanagesh ham torset.
MAR 9:33 Padá á Kaparnáhumá átkant. Lógá ke átk, Issáyá cha moridán jost kort: “Shomá ráhá ché gwashagá atét?”
MAR 9:34 Áyán hecch nagwasht chéá ke ráhá gón yakdomiá dapjáká atant ke may tahá masterén mardom kay ent.
MAR 9:35 Gorhá Issá nesht, dwázdahén kásedi tawár kortant o gwashti: “Á kas ke masteria lóthit, báyad ent watá cha sajjahénán kaster bekant o sajjahénáni hezmatkár bebit.”
MAR 9:36 Gorhá, kasánén chokké áyáni nyámá óshtárénti, goláésh kort o gwashti:
MAR 9:37 “Harkas ke pa mani námá é dhawlén kasánén chokké wasshátka kant o sharapa dant, maná sharapa dant o harkas ke maná sharapa dant, bezán áiá ham sharapa dant ke maná ráhi dátag.”
MAR 9:38 Yuhannáyá gón Issáyá gwasht: “Ostád! Má yakk mardé dist ke tai námay sará mardománi jennán kasshagá at, bale má gwasht chó makan, chéá ke á cha má naat.”
MAR 9:39 Issáyá gwasht: “Na, chó makanét, chéá ke harkas mani námay sará yakk damáné mójezahé kant, dega damáné maná bad gwashta nakant o
MAR 9:40 á ke may heláp naent, may némagá ent.
MAR 9:41 Agan kasé é námay sawabá shomárá tásé áp bedant ke shomá Masihayg ét, man shomárá rásténa gwashán ke áiá wati mozza rasit.
MAR 9:42 É gwandhó ke mani sará báwara kanant, harkas ke cha eshán yakkéá ham dém pa gonáhá bebárt, sharter hamesh ent ke jenteri táé gomráh kanókay gotthá bebandant o daryáyá chagali bedayant.
MAR 9:43 Agan tai dasté tará dém pa gonáhá bárt, áiá goddh. Chéá ke gón doén dastán dózahay abadi ásá kapagay badalá, sharter hamesh ent ke gón yakk dasté, abadmánén zenday wáhond bebay.
MAR 9:44 
MAR 9:45 Agan tai pádé tará dém pa gonáhá bárt, áiá goddh. Chéá ke gón doén pádán dózahá kapagay badalá, sharter hamesh ent ke gón yakk pádé abadmánén zenday wáhond bebay.
MAR 9:46 
MAR 9:47 Agan tai chammé tará dém pa gonáhá bárt, áiá kassh. Chéá ke gón doén chammán dózahá kapagay badalá, sharter hamesh ent ke gón yakk chammé Hodáay bádsháhiá beraway.
MAR 9:48 Dózahá jónwárén kerm hechbara namerant o ás hechbar koshaga nabit.
MAR 9:49 Ás harkasá palgárit, hamá paymá ke wád korbánigá pák o palgára kant.
MAR 9:50 Wád sharr ent, bale agan áiay tám gár bebit, shomá chón áiá padá támdára kanét? Shomá ham watá wádók o támdár bekanét o gón yakdegará pa sohl o émeni zend begwázénét.”
MAR 10:1 Issá cha ódá dar átk o Yahudiahay damagá o Ordonay kawray á dastá shot. Edá ham mardom romb rombá átk o áiay kerrá mocch butant. Anchó ke áiay ádat at, padá mardománi tálim dayagá dazgatth but.
MAR 10:2 Lahtén Parisi átk o pa áiay chakkásagá jostesh kort: “Bárén, rawá ent ke mard wati janay talák o sawnán bedant?”
MAR 10:3 Issáyá passaw dát: “Mussáyá shomárá ché hokm dátag?”
MAR 10:4 Áyán passaw dát: “Mussáyá razá dátag ke mard pa wati janá taláknámahé nebeshtah bekant o cha lógá dari bekant.”
MAR 10:5 Issáyá gwasht: “Mussáyá shomay sengdeliay sawabá pa shomá é hokm nebeshtah kortag.
MAR 10:6 Bale jahánay jórh kanagay wahdá, Hodáyá ensán addh kortag, mardén o janén.
MAR 10:7 Paméshká mard wati pet o mátáyalaha kant o gón wati janá hór o yakjáha bit.
MAR 10:8 Mard o jan, yakk jesm o jána bant, é paymá, nun á do naant, yakk jesm o ján ant.
MAR 10:9 Paméshká, á ke Hodáyá yakk kortagant, ensán áyán jetá makant.”
MAR 10:10 Á ke lógéá shotant, moridán cha áiá é bárawá jost kort.
MAR 10:11 Issáyá áyáni passawá gwasht: “Kasé ke wati janay sawn o talákán bedant o gón dega janénéá sur o sáng bekant, wati awali janay helápá zená kanagá ent.
MAR 10:12 Hamé dhawlá, agan janéné cha wati mardá sawn begipt o gón dega mardéá sur bekant, á ham zená kanagá ent.”
MAR 10:13 Yakk róché mardomán wati kasánén chokk Issáay kerrá áwortant ke wati dastá áyáni sará per bemoshit, bale moridán neherr o hakkal dátant.
MAR 10:14 Issáyá ke dist zahr gept o gón moridán gwashti: “Chokkán bellét mani kerrá káyant, áyáni démá madárét, chéá ke Hodáay bádsháhi anchén mardománig ent.
MAR 10:15 Shomárá rásténa gwashán, harkas ke Hodáay bádsháhiá hamá paymá mamannit ke kasánén chokkia mannant, á hechbar Hodáay bádsháhiá sara nabit.”
MAR 10:16 Randá Issáyá chokk goláésh kort o dast sará per mosht o barkat dátant.
MAR 10:17 Wahdé Issá ráh gept, mardé tacháná átk, kóndhán kapt o josti kort: “Oo nékén ostád! Man ché bekanán ke abadmánén zenday wáhond bebán?”
MAR 10:18 Issáyá gwasht: “Taw maná ‘nékén’ parchá gwashay? Abéd cha Hodáyá, kass nék naent.
MAR 10:19 Hodáay hokmán wa taw zánay: Hón makan, zená makan, dozzi makan, drógén sháhedi maday, degaray málá mawar, wati pet o mátá ezzat beday.”
MAR 10:20 Mardá passaw dát: “Oo ostád! Man cha kasániá é sajjahén hokmáni sará amal kortag.”
MAR 10:21 Gorhá Issáyá pa mehré áiay némagá cháret o gwashti: “Tará angat yakk káré kanagi ent, beraw wati sajjahén mál o hastiá bahá kan o zarrán garib o nézgárén mardománi sará bahr kan. É paymá tará ásmáni ganjé rasit. Nun byá o mani randgiriá bekan.”
MAR 10:22 Cha é habará á marday del prosht, gamig but o shot chéá ke sér o hazgárén mardé at.
MAR 10:23 Issáyá chárén némagán cháret o gón wati moridán gwashti: “Pa sér o hazgárén mardomán Hodáay bádsháhiá páday ér kanag sakk grán ent.”
MAR 10:24 Áiay morid cha é habarán hayrán o habakkah butant. Issáyá padá gwasht: “Chokkán! Hodáay bádsháhiá páday ér kanag sakk grán ent.
MAR 10:25 Cha suchenay domká oshteray gwazag wa báz grán ent, bale pa hazgárén mardoméá Hodáay bádsháhiá páday ér kanag angat gránter ent.”
MAR 10:26 Morid, géshter hayrán butant o gón yakdomiá gwashtesh: “Gorhá kay rakketa kant?”
MAR 10:27 Issáyá padá á cháretant o gwashti: “Ensánay dastá nabit, bale pa Hodáyá chosh naent, chéá ke Hodáay dastá har chizza bit.”
MAR 10:28 Gorhá Petrosá gwasht: “Má har chizz yalah dátag o tai randgiriá kanagá én.”
MAR 10:29 Issáyá passaw dát: “Shomárá rásténa gwashán, agan kaséá pa man o wasshén mestágá wati lóg yá brát yá gohár yá mát yá pet yá chokk yá dhagár yalah dátag o mani randgirii kortag,
MAR 10:30 Hodá áiá sad sari géshtera dant. Hamé jaháná, sakki o sóriáni hamráhiá, lóg o brát o gohár o mát o chokk o dhagár áiá rasit o á dega jaháná ham abadmánén zenday wáhonda bit.
MAR 10:31 Bale bázéné ke awali ent, áheria bit o bázéné ke áheri ent, awalia bit.”
MAR 10:32 Issá pésar o morid áiay randá, Urshalimay némagá rawagá atant. Morid, hayrán o habakkah atant o á dega hamráháni delá tors o bimmé wadi butagat. Issáyá wati dwázdahén kásed padá yakk kerréá bortant o gwashti ke gón man ché bayagi ent.
MAR 10:33 “Bechárét, nun má Urshalimá rawagá én. Ódá Ensánay Chokk mazanén dini péshwá o Sharyatay zánógeráni dastá dayaga bit. Áiá markay sezá dayant o darkawmén mardománi dastá dayanti.
MAR 10:34 Darkawmén mardom áiá kalága gerant, áiay dap o démá tokka janant, shallák o hayzaránia janant o koshanti, bale say róchá rand á padá jáha jant.”
MAR 10:35 Zebdiay chokk Ákub o Yuhanná, Issáay kerrá átkant o gwashtesh: “Oo ostád! Márá wáhagé hast, purahi bekan.”
MAR 10:36 Issáyá gwasht: “Ché lóthét? Man pa shomá ché bekanán?”
MAR 10:37 Gwashtesh: “Wahdé tai bádsháhia kayt, wati porshawkatén diwáná, bell ke cha má yakké tai rástén kashá o domi chappén kashá nendit.”
MAR 10:38 Issáyá gwasht: “Shomá nazánét ché lóthagá ét. Á pyálah ke maná nóshagi ent, shomá nóshetia kanét? O á pákshódi ke maná kanagi ent, shomá kortia kanét?”
MAR 10:39 Passawesh dát: “Ji haw, má korta kanén.” Issáyá gwasht: “É pyálahá ke mana nóshán, shomárá ham nóshagi ent o é pákshódiá ke mana kanán, shomárá ham kanagi ent,
MAR 10:40 bale é cha mani wáká dar ent ke kay mani rástén o kay chappén kashá benendit. É jágah hamáyánig ant ke pa áyán gisshénag butagant.”
MAR 10:41 Wahdé á dega dahén kasedán é habar eshkot, Ákub o Yuhannáay sará zahr geptant.
MAR 10:42 Gorhá Issáyá dwázdahén kásed lótháént o gwashtant: “Shomá zánét, á ke darkawmáni hákem zánaga bant, mardománi sará hákemia kanant o kawmáni master, chérdastáni sará wati ehtiárá kára bandant.
MAR 10:43 Bale shomá chosh makanét, cha shomá harkas ke mazania lóthit, báyad ent shomay hezmatkár bebit o
MAR 10:44 cha shomá harkas ke masteria lóthit, sajjahénáni kaster bebit.
MAR 10:45 Hamé dhawlá, Ensánay Chokk pa é maksadá nayátkag ke mardom áiay hezmatá bekanant, pa é maksadá átkag ke mardománi hezmatá bekant o gón wati sáhay dayagá bázéné bemókit.”
MAR 10:46 Randá Ariháay shahrá átkant. Issá wati morid o mardománi mazanén rombéay hamráhiá cha Ariháyá dar kapagá at. Ráhay kashá Bártimáus námén kórén pendhóké neshtagat ke Timáusay chokk at.
MAR 10:47 Wahdé Bártimáus sahig but ke é Issá Náseri ent, kukkári kort o gwashti: “Issá, oo Dáud bádsháhay Chokk! Mani sará rahm kan.”
MAR 10:48 Bázénéá hakkal kort o gwasht: “Bass kan!” Bale áiá géshter kukkár kort: “Oo Dáud bádsháhay Chokk! Mani sará rahm kan.”
MAR 10:49 Issá óshtát o gwashti: “Tawári kanét.” Mardomán tawár kort o gwashtesh: “Delá dhaddh kan! Pád á, byá ke tará lóthagá ent.”
MAR 10:50 Bártimáusá wati kabáh kerré dawr dát, koppi kort o pád átk o Issáay gwará shot.
MAR 10:51 Issáyá jost kort: “Ché lóthay? Man pa taw ché bekanán?” Gwashti: “Oo ostád! Mani chammán rozhná kan.”
MAR 10:52 Issáyá gwasht: “Beraw, tai imáná tará dráh kort.” Kór hamá damáná biná but o Issáay hamráh but.
MAR 11:1 Wahdé Urshalimay nazzikká, Zaytunay Kóhá Bayt-Páji o Bayt-Anyáay métagán rasetant, gorhá Issáyá do morid rawán dát o
MAR 11:2 gwashti: “Démi métagá berawét. Anchó ke ódá rasét, hari korragé gendét ke bastag. Á korragá angat hechkas swár nabutag. Áiá bójét o edá byárét.
MAR 11:3 Agan kaséá jost kort ke shomá ché kanagá ét, begwashét ke wájahá é korrag pakár ent o damáná peria tarrénit.”
MAR 11:4 Gorhá doén morid shotant o distesh ke korragé dhanná, damká darwázagay dapá bastag. Bótkesh.
MAR 11:5 Cha ódá óshtátagén mardomán lahténá jost kort: “Shomá ché kanagá ét? Chéá é korragá bójét?”
MAR 11:6 Anchosh ke Issáyá sój dátagatant, áyán hamá paymá gwasht. Gorhá baragá eshtesh.
MAR 11:7 Moridán korrag Issáay kerrá áwort o wati shál o kabáhesh haray poshtá ér kortant o Issá swár but.
MAR 11:8 Bázénéá Issáay ráhay sará wati shál o kabáh chérgéján kortant. Dega bázénéá cha dhagárán maccháni pissh o tak borret o ráhay sará ér kort.
MAR 11:9 Rombá, Issáay démay o poshtay mardom, kukkár kanáná gwashagá atant: “Hushiáná, mobárak ent hamá ke Hodáwanday námá kayt!
MAR 11:10 Mobárak bát may bonpirok Dáuday padá áyókén bádsháhi. Hushiáná, borzén arshá!”
MAR 11:11 Gorhá Issá Urshalimá átk o mazanén parasteshgáhá shot. Ódá, áiá kash o gwaray har chizz cháret. Bale béwahd at, paméshká gón wati dwázdahén kásedán Bayt-Anyáyá shot.
MAR 11:12 Domi róchá, wahdé Issá o áiay morid cha Bayt-Anyáyá dar kaptant, ráhá Issá gozhnag but.
MAR 11:13 Cha durá enjiray drachké disti ke táki per at. Drachkay nazzikká shot ke begendit bárén bar ent yá na. Bale wahdé raset, abéd cha táká dega hecchi nadist, chéá ke enjiray baray mósom naat.
MAR 11:14 Gorhá gón drachká gwashti: “Cha ed o rand, hechkas cha taw baré mawarát.” É habar moridán eshkot.
MAR 11:15 Anchó ke Urshalimá sar butant, Issá mazanén parasteshgáhá shot o cha ódá sawdáger o geráki gallént o dar kortant. Sarrápáni thébal o kapót bahá kanókáni korsii chappi kortant.
MAR 11:16 Mazanén parasteshgáhá, tájeri málay barag o áragá ham naeshtant.
MAR 11:17 Mardomi tálim dátant o gwashti: “Hodáay Ketábá nebeshtah ent: Mani lóg sajjahén kawmáni dwá kanagay jágah gwashaga bit, bale shomá dhongáni panáhgáhé kortag.”
MAR 11:18 Wahdé Sharyatay zánóger o mazanén dini péshwáyán é habar eshkot, pa áiay koshagá ráhéay dar géjagá laggetant. Bale torsetesh, chéá ke sajjahén mardom cha Issáay tálimán hayrán o habakkah atant.
MAR 11:19 Bégáh ke but, Issá o áiay morid cha shahrá dar kaptant.
MAR 11:20 Domi sohbá, ráhá hamá enjiray drachkesh dist ke nun cha boná hoshk butagat.
MAR 11:21 Petros, Issáay habaray yátá kapt o gwashti: “Oo ostád! Bechár, é drachk ke taw baddwá kort, gimmortag.”
MAR 11:22 Issáyá gwasht: “Hodáay sará báwar kanét.
MAR 11:23 Shomárá rásténa gwashán, agan kaséá imán bebit o gón é kóhá begwashit ke watá cha edá chest kan o daryáyá dawr day o wati gwashtagén habaray sará delá shakk mabit o báwar bekant, anchosha bit.
MAR 11:24 Paméshká shomárá gwashán, harché ke wati dwáyáni tahá lóthét, báwar kanét ke shomárá rasetag o shomárá dayaga bit.
MAR 11:25 Har wahdá ke pa dwáyá óshtét, agan shomárá gón yakkéá gelagé hast, wati dwáay tahá áiá bebakshét, tánke shomay ásmáni Pet ham shomay radkárián bebakshit.
MAR 11:26 Bale agan shomá mabakshét, shomay ásmáni Pet ham shomay radkáriána nabakshit.”
MAR 11:27 Issá o áiay morid, padá Urshalimá átkant. Wahdé Issá mazanén parasteshgáhá gám janagá at, mazanén dini péshwá, Sharyatay zánóger o kawmay kamásh áiay kerrá átkant.
MAR 11:28 Jostesh kort: “Taw gón kojám hakk o ehtiárá é kárána kanay? Kayá tará é káráni kanagay ehtiár dátag?”
MAR 11:29 Issáyá gwasht: “Maná ham cha shomá josté hast. Mani passawá bedayét gorhá man shomárá gwashán ke gón kojám hakk o ehtiárá é kárána kanán.
MAR 11:30 Yahyáyá pákshódi dayagay ehtiár cha ásmáná rasetagat yá cha ensánay némagá? Passaw bedayét!”
MAR 11:31 Áyán watmánwatá shawr o saláh kort o gwashtesh: “Agan begwashén cha ásmáná, gorhá gwashit: ‘Shomá chéá áiay sará imán nayáwort?’
MAR 11:32 Agan begwashén cha ensánay némagá...” Padá wati habaresh band kort chéá ke áyán cha mardomána torset parchá ke mardománi delá Yahyá pa rásti nabié at.
MAR 11:33 Paméshká passawesh dát: “Má nazánén.” Issáyá gwasht: “Gorhá man ham shomárá nagwashán ke gón kojám hakk o ehtiárá é kárána kanán.”
MAR 12:1 Issáyá, randá pa darwar o mesál wati habar gón áyán bongéj kort o gwashti: “Mardéá anguri bágé addh kort. Áiay chapp o chágerdá pallé basti, pa anguráni shiragay geragá kallé jati o pa negahpániá borjé ham basti. Randá bági pa konandakári lahtén bágpánay dastá dát o wat saparéá shot.
MAR 12:2 Wahdé anguray mósom but, áiá hezmatkáré bágpánáni kerrá ráh dát ke cha bágay angurán mani bahrá byár,
MAR 12:3 bale bágpánán é hezmatkár gept o latth o kotth kort o gón hórk o háligén dastán ráh dát.
MAR 12:4 Gorhá hodábondá dega hezmatkáré dém dát. Áyán, é ham béezzat kort o sar prósht.
MAR 12:5 Padá dega hezmatkáré rawáni dát o bágpánán é jat o kosht. Hamé dhawlá, áiá dega bázén hezmatkáré ráh dát, bale bágpánán lahtén latth o kotth kort o lahtén kosht.
MAR 12:6 Nun pa ráh dayagá áiay kerrá yakk kasé pasht kaptagat, áiay dóstigén mardénchokk. Godhsará, wati hamé chokki rawán dát. Gwashti mani chokkay ezzatá kanant.
MAR 12:7 Bale bágpánán watmánwatá gwasht: ‘Bágay mirásdár hamesh ent. Byáét eshiá koshén o bág may mirása bit.’
MAR 12:8 Gorhá gept o koshtesh o jónesh cha bágá dhann dawr dát.”
MAR 12:9 Issáyá jost kort: “Nun shomay hayálá bágay hodábond ché kant? Á kayt, bágpánána koshit o bágá dega bágpánáni dastá dant.
MAR 12:10 Záná, shomá Pákén Ketábay é habar nawántag ke gwashit: Á seng ke bánbandánnápasond kort o nazort hamá seng bonheshtbut.
MAR 12:11 É Hodáwanday kár ent o may chammán porkamál ent.”
MAR 12:12 Nun áyán lóthet ke Issáyá dazgir bekanant, chéá ke zántesh Issáyá é mesál may bárawá dátag, bale cha mardomán torsetesh. Gorhá Issáesh esht o shotant.
MAR 12:13 Randá, áyán lahtén Parisi o Hirudi Issáay kerrá rawán dát ke cha áiay jenday habarán áiá mán begisshénant.
MAR 12:14 Nun átkant o jostesh kort: “Oo ostád! Má zánén ke taw tachk o rástén mardomé ay o hechkasay némagá nageray, chéá ke sajjahénán yakk hesábá cháray o Hodáay ráhay sójá pa rástia dayay. Bárén, Rumay bádsháh Kaysará, song o máliát dayag rawá ent yá na? Áiá máliát bedayén yá madayén?”
MAR 12:15 Issáyá áyáni é dotal o dopósti zánt o gwashti: “Chéá maná chakkásagá ét? Dináré byárét ke becháráni.”
MAR 12:16 Áyán dináré áwort. Josti kort: “Eshiay sará kai naksh o nám per ent?” Áyán passaw dát: “Kaysaray.”
MAR 12:17 Nun Issáyá gwasht: “Gorhá Kaysaraygá Kaysará bedayét o Hodáaygá Hodáyá.” Cha é passawá, á hayrán o habakkah mantant.
MAR 12:18 Randá lahtén Saduki Issáay kerrá átk. Sadukia namannant ke mordag padá zendaga bant. Jostesh kort: “Oo ostád! Mussáyá pa má nebeshtag: Agan kaséay sur kortagén bráté bé awládá bemerit o janózámi zendag bebit, gorhá áiay brát báyad ent gón á janózámá sur bekant tánke chokk o awládé pa wati brátá pédá bekant.
MAR 12:20 Hapt brát atant. Awali brátá jané gept o bé awládá mort,
MAR 12:21 gorhá domi brátá gón á janózámá sur kort, bale á ham bé awládá mort. Sayomi brát ham, hamé dhawlá.
MAR 12:22 Haptén brátán, kassá chokk nabut. Sajjahénán o rand á janén ham mort.
MAR 12:23 Nun áheratay róchá é janén kojám brátayga bit? Chéá ke haptén brátáni jan butag.”
MAR 12:24 Issáyá gwasht: “Shomá gomráh naét? Shomá na cha Pákén Ketábán chizzé sarkecha warét o na Hodáay wák o zórá sarpada bét.
MAR 12:25 Mordag ke jáha janant, na sura kanant o na sur dayaga bant, ásmáni préshtagáni dhawlá bant.
MAR 12:26 Mordagáni zendag bayag o jáh janagay bárawá, záná shomá Mussáay ketábá bon geptagén dhólokay kessah nawántag ke Hodáyá gón Mussáyá chón habar kort? ‘Man án, Ebráhémay Hodá o Esákay Hodá o Ákubay Hodá.’
MAR 12:27 Bezán á, mordagáni Hodá naent, zendagénáni Hodá ent. Shomá sakk rad wártag.”
MAR 12:28 Cha Sharyatay zánógerán yakké áyáni é habarán gósh dáragá at. Áiá dist ke Issá sharr passaw dayagá ent, nazzikká átk o josti kort: “Sharyatay masterén parmán kojám ent?”
MAR 12:29 Issáyá passaw dát: “Sharyatay masterén parmán esh ent: ‘Oo Esráil! Gósh dár: May Hodáwandén Hodá yakké.
MAR 12:30 Wati Hodáwandén Hodáyá cha delay johlánkiá o gón sajjahén ján o sáh o gón sajjahén pahm o pegr o gón sajjahén was o wáká dóst bedár.’
MAR 12:31 Domi parmán esh ent: ‘Wati hamsáhegá wati jenday paymá dóst bedár.’ Cha é doénán, dega masterén parmán nést.”
MAR 12:32 Gorhá, Sharyatay zánógerá gwasht: “Oo ostád! Taw sakk sharr gwasht, pa rásti ke Hodá yakké o abéd cha áiá Hodáé nést.
MAR 12:33 Hodáyá cha delay johlánkiá o gón sajjahén pahm o pegr o sarjamén was o wáká dóst dárag o hamsáhegá wati jenday paymá dóst dárag cha sajjahén hayrát o sóchagi korbánigán sharter ent.”
MAR 12:34 Wahdé Issáyá dist ke áiá dánáén passawé dát, gwashti: “Taw cha Hodáay bádsháhiá dur naay.” Cha ed o rand, hechkasá del nakort ke cha Issáyá josté bekant.
MAR 12:35 Wahdé Issá mazanén parasteshgáhá tálim dayagá at, josti kort: “Sharyatay zánóger che paymá gwashant ke Masih Dáud bádsháhay chokk ent?
MAR 12:36 Dáudá wat cha Pákén Ruhay elhámá gwashtag: Hodáwandá gón mani Hodáwandá gwasht mani rástén kashá tán hamá wahdá benend ke man tai dozhmenán tai pádáni chérá dawra dayán.
MAR 12:37 Agan Dáuday jend Masihá wati Hodáwanda gwashit, gorhá á chón Dáuday chokk buta kant?” Mazanén mocchián pa wasshi Issáay habar gósha dáshtant.
MAR 12:38 Issáyá wati tálimáni tahá gwasht: “Cha Sharyatay zánógerán hozzhár bét ke áyán drájén kabáhay gwará kanag dósta bit o bázáráni tarr o garday wahdá cha mardománi salám o drótay lóthók ant.
MAR 12:39 Kanisaháni awali red o dáwatáni sharterén jágahesh dósta bit.
MAR 12:40 Janózámán rada dayant o polant o pa pésh dáragá wati dwáyán drájkassha kanant. Eshán ganterén sezá rasit.”
MAR 12:41 Issá mazanén parasteshgáhay shogránaháni pétiay dém pa démá neshtagat o hamá mardomán cháragá at ke é pétiá zarresh mána kort. Bázén zardáréá báz zarr dát.
MAR 12:42 Garibén janózámé átk o do paysahi pétiá mán kort, ke hecchay kárá nayátkant.
MAR 12:43 Gorhá Issáyá morid wati kerrá lótháént o gwashtant: “Shomárá rásténa gwashán, é béwasén janózámá cha á sajjahénán géshter zarr pétiá mán kort.
MAR 12:44 Chéá ke á degarán cha wati géshén málá chizzoké dát, bale é janózámá gón wati nézgári o garibiá harché ke áiá hastat dáti, bezán wati sajjahén rózig o gozarán.”
MAR 13:1 Wahdé Issá cha mazanén parasteshgáhá dar áyagá at, cha moridán yakkéá gwasht: “Oo ostád! Bechár, chónén shawkén seng o dhok ant o chónén dhawldárén parasteshgáhé.”
MAR 13:2 Issáyá gwasht: “É dhawldárén parasteshgáhá genday? Eshiay yakk sengé ham domi sengay sará namánit, sajjahén próshag o dawr dayaga bant.”
MAR 13:3 Wahdé Issá mazanén parasteshgáhay dém pa démá Zaytunay Kóhay sará neshtagat, Petros o Ákub o Yuhanná o Andriás áiay kerrá átkant o ehwatá jostesh kort:
MAR 13:4 “Márá begwash, bárén é prosht o prósh kadéna bit o eshiay nazzikk bayagay nesháni ché ent?”
MAR 13:5 Issáyá habar bendát kort: “Hozzhár bét, kasé shomárá gomráh makant.
MAR 13:6 Bázéné mani námá kayt o gwashit: ‘Man hamá án’ o bázénéá gomráha kant.
MAR 13:7 Wahdé shomá jangáni tawárá eshkonét o jangáni hál somárá sara bit, delá tors mayárét. Allam é dhawlá bit, bale gón é neshániáni záher bayagá halásiay wahd nayayt.
MAR 13:8 Yakk kawmé dega kawméay helápá o yakk molké dega molkéay helápá páda kayt. Bázén jágahéá zeminchandha bit o kahta kapit. É tahná chellagiay dardáni bendát ent.
MAR 13:9 Hozzhár bét! Shomárá hakdiwánáni démá pésha kanant, kanisaháni tahá janant o pa manigi, hákem o bádsháháni démá óshtárénant. Gorhá shomárá sharrén móhé rasit ke pa man gwáhi bedayét.
MAR 13:10 Bale pésará báyad ent wasshén mestágay jár sajjahén kawmáni kerrá janag bebit.
MAR 13:11 Harwahd ke shomárá gerant o hakdiwánána barant, cha péshá paréshán mabét ke má ché begwashén. Á wahdá, har chizzé ke shomárá sój dayaga bit, hamá habará bekanét. Chéá ke gwashók shomá naét, Pákén Ruh ent.
MAR 13:12 Brát wati brátá dróhit o kóshárénit o pet wati chokká. Chokk wati pet o mátáni helápá páda káyant o áyána kóshárénant.
MAR 13:13 Harkas mani námay sawabá cha shomá naprata kant, bale hamá ke tán áherá bardáshta kant, á rakkit.
MAR 13:14 Wahdé shomá á ‘palit o bérán kanókén bazzhenáká’ hamá jágahá gendét ke áiay jágah naent,” – wánók sarpad bebit – “hamá ke Yahudiahá ant dém pa kóhán betachant.
MAR 13:15 Á ke lógay sará ent, pa chizzéay zuragá ér makapit o lógay tahá marawt o
MAR 13:16 á ke dhagáray sará ent, wati kabáhay zuragá lógá marawt.
MAR 13:17 Á róchán, lápporrén janén o hamá ke chokka méchénant sakk bazzaga bant.
MAR 13:18 Dwá kanét ke é chizz zemestáná mabit.
MAR 13:19 Chéá ke á róchán anchén mosibaté kayt ke cha bendátá, cha hamá róchá ke Hodáyá jahán addh kortag tán é wahdá, áiay mesál nayátkag o hechbara nayayt.
MAR 13:20 Agan Hodáwandá á sakkiáni róch kamter makorténant, hecch mardomé narakketagat. Bale áiá wati gechén kortagénáni háterá á róch kamter kortagant.
MAR 13:21 Á wahdá agan kasé shomárá begwashit: ‘Bechár, Masih esh ent’ yá ‘bechár, á ent,’ báwar makanét.
MAR 13:22 Chéá ke drógén masih o drógén nabi jáha janant o ajabbatén nesháni o mójezah pésha dárant. Wati sajjahén zórá janant ke Hodáay gechén kortagénán ham gomráh bekanant.
MAR 13:23 Hozzhár bét, man shomárá cha pésará é sajjahén chizzán hál dayagá án.
MAR 13:24 Á róchán, cha é mosibatán o rand, róch tahára bit, máha nadrapshit,
MAR 13:25 estár ham cha ásmáná kapant o ásmánay zór o wák larzénaga bant.
MAR 13:26 Á wahdá, mardom Ensánay Chokká gendant ke gón mazanén wák o twán o shán o shawkaté jambaráni tahá ent o kayt.
MAR 13:27 Gorhá préshtagán ráha dant o cha chárén némagán, bezán cha zeminay har kondhá tán ásmánay goddhi marz o simsarán, wati gechén kortagén mardomán yakjáha kant.
MAR 13:28 Nun cha enjiray drachká dars o sabakk begerét. Anchosh ke áiay thál narma bant o táka trokkant, shomá zánét ke garmág nazzikk ent.
MAR 13:29 Hamé dhawlá, wahdé shomá é chizzána gendét, wata zánét ke mani áyagay wahd nazzikk ent, darwázagay dapá ent.
MAR 13:30 Shomárá rásténa gwashán, tán é sajjahén jáwar mayáyant, é nasl o padréch halása nabit.
MAR 13:31 Ásmán o zemin gára bant, bale mani habar hechbar gára nabant.
MAR 13:32 Hechkasa nazánt ke á róch o á sáhat kadéna rasit, na ásmánay préshtaga zánant o na Chokka zánt, bass Peta zánt.
MAR 13:33 Hozzhár bét! Hayálá gwar kanét chéá ke nazánét á wahd o damán kadéna kayt.
MAR 13:34 Mani per tarrag hamé dhawlá ent ke mardé saparéá berawt, roksat kanagay wahdá har hezmatkáray kár o zemmawáriá begisshénit o darwázagpáná hokm bedant: ‘Hozzhár bay!’
MAR 13:35 Gorhá hozzhár bét chéá ke shomá nazánét ke lógay hodábond shapay kojám pásá kayt; sarshapá, shapay némá, korósbángá yá bámgwáhá? Paméshká hozzhár bét.
MAR 13:36 Chó mabit ke hodábond anágat byayt o begendit ke shomá wáb ét.
MAR 13:37 Anchosh ke man shomárá gwashán, gón drostána gwashán: ‘Hozzhár bét!’”
MAR 14:1 Sargwaz o Béhomirén Naganay Aidá do róch pasht kaptagat. Mazanén dini péshwá o Sharyatay zánóger ráh o daré shóház kanagá atant ke gón repk o honar Issáyá begerant o bekoshant.
MAR 14:2 Bale gwashtesh: “Aiday róchán na, chó mabit ke mardom áshóp bekanant.”
MAR 14:3 Issá, Bayt-Anyáyá Shamun Garriay lógá mehmán at. Hamódá, yakk janéné gón albástaray atrdánéá Issáay gwará átk. Atrdáná Hendi sombolay zagr o gránbaháén atr mán at. Áiá atrdán prósht o atr Issáay sará per rétkant.
MAR 14:4 Ódá neshtagén lahtén mardom zahrá porr but o gwashtesh: “É atri chéá zawál kort?
MAR 14:5 É atr, say sad dinárá gésh bahá butagat. Baháesh kortén o zarresh garib o nézgáráná bedáténant.” Paméshká á nun janéná mayárig kanagá atant.
MAR 14:6 Bale Issáyá gwasht: “Belléti, kári madárét. Shomá parchá eshiá paréshán kanagá ét? É janéná gón man nékié kortag.
MAR 14:7 Garib o nézgár modám shomay kerrá ant o shomá harwahd ke belóthét, gón áyán néki korta kanét, bale man harwahd gón shomá gón naán.
MAR 14:8 Harché ke é janénay dastá butagat korti. Maná atri per rétk ke cha pésará maná pa kabr kanagá tayár bekant.
MAR 14:9 Shomárá rásténa gwashán, sajjahén donyáyá, har jáh ke wasshén mestágay jár janaga bit, é janén o eshiay kár ham yát kanaga bant.”
MAR 14:10 Yahudá Eskaryuti ke cha Issáay dwázdahén kásedán yakké at, mazanén dini péshwáyáni kerrá shot ke Issáyá áyáni dastá bedant.
MAR 14:11 Péshwá cha Yahudáay habaray eshkonagá gal butant o labzesh kort ke tará zarra dayén. Nun Yahudá sharrén móhéay shóházá at ke Issáyá áyáni dastá bedant.
MAR 14:12 Béhomirén Naganay Aiday awali róchá ke Sargwazay gwarándhay korbánig kanagay róch at, moridán cha Issáyá jost kort: “Sargwazay Aiday shámá kojá kanay? Taw ché gwashay, kojá shámay tayáriá bekanén?”
MAR 14:13 Gorhá, Issáyá cha moridán do kas dém dát o gwashti: “Shahrá berawét. Ódá mardé gendét ke ápi kunzagé gón enti, áiay poshtá rawán bét.
MAR 14:14 Hamá lógá ke á rawt, shomá ham berawét o lógay wáhondá begwashét: ‘Ostád jostá ent ke mehmánhánah kojá ent ke man gón wati moridán Sargwazay shámá hamódá bekanán?’
MAR 14:15 Á mard shomárá wati lógay borzi tabakká mazanén báné pésha dárit ke ódá har chizz hast o barábar ent, pa má shámay tayáriá hamódá bekanét.”
MAR 14:16 Morid dar átk o shahrá shotant. Ódá, áyán har chizz hamá paymá dist ke Issáyá gwashtagat o Sargwazay shámesh tayár kort.
MAR 14:17 Shap ke but, Issá gón dwázdahén kásedán hamódá átk.
MAR 14:18 Wahdé parzónagay sará neshtag o shám kanagá atant, Issáyá gwasht: “Shomárá rásténa gwashán, cha shomá yakké ke annun gón man warák waragá ent, maná dróhit o dozhmenáni dastá dant.”
MAR 14:19 Á paréshán butant o yakk yakká jostesh kort: “Man wa naán, na?”
MAR 14:20 Issáyá passaw dát: “Cha shomá dwázdahénán yakké, hamá ke gón man yakkén kásagá nagan per janagá ent.
MAR 14:21 Chéá ke hamá dhawlá ke nebisag butag, Ensánay Chokk cha é donyáyá rawagi ent, bale bazhn o apsóz pa hamáiá ke Ensánay Chokká dróhit. Pa áiá sharter at ke hechbar pédá mabutén.”
MAR 14:22 Wahdé shám kanagá atant, Issáyá nagané zort, Hodáay shogri gept, nagani chondh chondh kort o moridáná dát. Gwashti: “Bezurét! É mani badan ent.”
MAR 14:23 Padá pyálahé zorti, Hodáay shogri gept, moridáná dáti o sajjahénán cha hamé pyálahá nóshet.
MAR 14:24 Nun gwashti: “É mani hón ent, ahd o paymánay hón ke pa bázénéá réchaga bit.
MAR 14:25 Shomárá rásténa gwashán, nun dega baré anguray ápá nawarán, hamá róchá ke Hodáay bádsháhia kayt, waráni.”
MAR 14:26 Hamday janagá rand dém pa Zaytunay Kóhá shotant.
MAR 14:27 Issáyá gón moridán gwasht: “Shomá sajjahén thagala warét o maná yalaha dayét. Chéá ke nebisag butag: Man shepánká janán o pas sheng o shánga bant.
MAR 14:28 Bale dobar zendag bayagá rand, cha shomá pésar Jalilá rawán.”
MAR 14:29 Petrosá darráént: “Agan sajjahén thagal bwarant o tará yalah bedayant, man hechbar thagala nawarán.”
MAR 14:30 Issáyá gwasht: “Tará rásténa gwashán, hamé maróchi, haw enshapi, taw cha korósay domi bángá pésar, mani pajjáh áragá say randá enkára kanay.”
MAR 14:31 Petrosá pa deljami gwasht: “Tai pajjáh áragá hechbar enkára nakanán, bell toré tai hamráhiá mani sáh ham berawt.” É dega sajjahén moridán ham anchó gwasht.
MAR 14:32 Issá o áiay morid, Jetsimáni námén jágahéá shotant. Gón áyán gwashti: “Hamedá benendét, mana rawán o dwá kanán.”
MAR 14:33 Áiá Petros o Ákub o Yuhanná hamráh kortant. Á sakk paréshán o bétáhir at.
MAR 14:34 Gón áyán gwashti: “Mani del sakk paréshán ent o andóhán maná markig kortag, shomá hamedá bedárét, mawapsét o hozzhár bét.”
MAR 14:35 Cha ódá kammé démterá shot, dém pa chér kapt o dwá kanagá lagget ke agan buta kant, é sáhat cha mani sará bethagalit.
MAR 14:36 Gwashti: “Abbá, oo mani Pet! Tai dastá har chizz buta kant. Sakkiáni é pyálahá cha man dur kan, bale mani wáhagay sará na, hamá paymá ke tai razá ent.”
MAR 14:37 Issá ke per tarret, disti ke morid wáb ant. Gorhá gón Shamun-Petrosá gwashti: “Shamun! Wáb ay? Pa yakk sáhatéá ham taw ágah but nakort?
MAR 14:38 Hozzhár bét o dwá kanét ke ázmáesh o chakkásá makapét. Ruh tayár ent, bale jesm nezór ent.”
MAR 14:39 Yakk baré padá shot o hamá dwái kort.
MAR 14:40 Wahdé per tarret, disti morid padá wáb ant o chammesh pacha nabant. Áyán nazánt ke áiá ché passaw bedayant.
MAR 14:41 Sayomi randá ke moridáni kerrá átk, gwashti: “Angat waptag o wáb ét? Bass ent! Á wahd o sáhat rasetag. Becháret, nun Ensánay Chokk dróhag o gonahkáráni dastá dayaga bit.
MAR 14:42 Pád áét ke rawén! Á ke maná dróhit, pédák ent.”
MAR 14:43 Issá angat habará at ke cha dwázdahén kásedán yakké, bezán Yahudá átk o raset. Rombé mardomi hamráh at. Mardomán zahm o latth gón at. É mardom cha mazanén dini péshwá o Sharyatay zánóger o kawmay kamásháni némagá ráh dayag butagatant o
MAR 14:44 Issáay dróhók Yahudáyá é nesháni dátagat: “Hamáiá ke mana chokkán, Issá hamá ent. Áiá dazgir kanét, mohr bedárét o bebarét.”
MAR 14:45 Gorhá, Yahudá tachká tachk Issáay kerrá átk o gwashti: “Oo ostád!” Nun Issái chokket.
MAR 14:46 Yahudáay hamráhán Issá gept o dazgir kort.
MAR 14:47 Cha Issáay hamráhán yakkéá wati zahm kasshet o masterén dini péshwáay nawkaray sará hamlahi kort o áiay góshi sest.
MAR 14:48 Issáyá gón rombay mardomán gwasht: “Záná man dozz o dhongé án ke shomá zahm o latth zortag o mani geragá átkagét?
MAR 14:49 Man har róch, shomay démá mazanén parasteshgáhá tálim dátag o shomá maná nageptag. Bale Pákén Ketábay habar báyad ent rást o sarjam bebant.”
MAR 14:50 Sajjahén moridán Issá yalah dát o tatkant.
MAR 14:51 Warnáé ke bass lilomén jámagé gwará ati, Issáay randá kapt. Áesh ham gept.
MAR 14:52 Bale dazgir kanagay wahdá jámag dar lakosht o warná jándará tatk.
MAR 14:53 Issáay dazgir kanókán Issá masterén dini péshwáay kerrá bort. É dega mazanén dini péshwá, kawmay kamásh o Sharyatay zánóger hamódá mocch atant.
MAR 14:54 Petros ham dur durá Issáay randá rawán at, masterén dini péshwáay lógay péshgáhá potert o sepáhigáni kerrá nesht o ásá watá tápagá lagget.
MAR 14:55 Mazanén dini péshwá o Sarókáni Diwánay sajjahén básk Issáay helápá sháhediay shóházá atant ke Issáyá markay sezá bedayant, bale hecchesh dast nakapt.
MAR 14:56 Bázénéá drógén sháhedi dát, bale áyáni habar gón yakdomiá yakk o hamdap naatant.
MAR 14:57 Dega lahtén pa drógén sháhedi dayagá pád átk o gwashtesh:
MAR 14:58 “É mardá may démá gwasht o má eshkot: ‘Man ensáni dastay addh kortagén é mazanén parasteshgáhá karóján o padá say róchay tahá yakké bandán ke ensáni dastay addh kortagéné nabit.’”
MAR 14:59 Bale é sháhedáni habar ham yakk dhawlá naatant.
MAR 14:60 Masterén dini péshwá pád átk o sajjahénáni démá cha Issáyá josti kort: “Genday é mardom tai helápá chónén sháhedi dayagá ant? Esháni passawá heccha nagwashay?”
MAR 14:61 Bale Issá bétawár at o hecch passawi nadát. Masterén dini péshwáyá padá cha áiá jost kort: “Taw hamá Masih ay, mazanshánén Hodáay Chokk ay?”
MAR 14:62 Issáyá passaw dát: “Man hamá án o shomá yakk róché gendét ke Ensánay Chokk, zórmandén Hodáay rástén kashá neshtag o é ham gendét ke gón ásmánay jambarána kayt.”
MAR 14:63 Nun masterén dini péshwáyá wati gwaray pocch dertant o gwasht: “Márá angat dega sháhedé pakár ent?
MAR 14:64 Shomá wat eshiay kopr eshkot. Nun shomay shawr o saláh ché ent?” Sajjahénán darráént: “Eshiay sezá mark ent.”
MAR 14:65 Cha áyán lahténá Issáay dap o démá tokk jat, áiay chammesh bastant, mosht o shahmátesh jat o gwashtesh: “Wati gaybi zántá kár band!” Padá sepáhigán á gept o jat.
MAR 14:66 Petros jahlá péshgáhá at ke masterén dini péshwáay móledé átk.
MAR 14:67 Wahdé Petrosi dist ke ásay démá watá tápagá ent, rók róká cháret o gwashti: “Taw ham hamé Issá Náseriay hamráh butagay!”
MAR 14:68 Bale Petrosá enkár kort, gwashti: “Mana nazánán o hecch sarpada nabán taw ché gwashagá ay.” Gón é habará, dém pa darwázagá rahádag but. Hamé damáná korósá báng dát.
MAR 14:69 Á móledá yakk baré padá Petros dist o gón óshtátagén mardomán gwashti: “É mard cha hamáyán ent!”
MAR 14:70 Bale Petrosá padá enkár kort. Kammé randterá, ódá óshtátagén mardomán padá gón Petrosá gwasht: “Pakká taw cha hamáyán ay, chéá ke taw ham Jalilié ay.”
MAR 14:71 Bale Petrosá sawgend wárt o gwasht: “Hodá maná nálat bekanát agan dróg bebandán. É marday bárawá ke shomá habará ét, mania nazánán.”
MAR 14:72 Hamé damáná korósá padá báng dát. Nun Petros Issáay hamá habaray yátá kapt ke gwashtagati: “Cha korósay domi bángá pésar, taw say randá mani pajjáh áragá enkára kanay.” Nun donyá áiay chammán tahár but o zár zárá gréti.
MAR 15:1 Sabáhá máhallah mazanén dini péshwá o kawmay kamásh o Sharyatay zánóger o Sarókáni Diwánay sajjahén báskán wati shawr yakk kort. Issáesh bast o bort o Pilátusay dastá dát.
MAR 15:2 Pilátusá cha áiá jost kort: “Taw Yahudiáni bádsháh ay?” Issáyá passaw dát: “Taw wat gwashagá ay.”
MAR 15:3 Mazanén dini péshwá áiay sará bázén bohtámé janagá atant.
MAR 15:4 Pilátusá padá jost kort: “Parchá passawa nadayay? Bechár, tai sará chinchok bohtám janagá ant.”
MAR 15:5 Issáyá hecch passaw nadát. Pilátus hayrán at.
MAR 15:6 Pilátusá har sál aiday wahdá cha Yahudi bandigán yakké, hamá ke mardomán lóthetagat, ázáta kort.
MAR 15:7 Bandigáni tahá Barabbás námén mardé hastat. Gón hamá yágián gerag butagat ke shóreshay wahdá kosht o kóshesh kortagat.
MAR 15:8 Mardom Pilátusay kerrá átkant o dazbandiesh kort ke anchó ke taw har wahdá kortag, é randi ham hamá paymá bekan.
MAR 15:9 Pilátusá jost kort: “Shomá lóthét ke Yahudiáni bádsháhá pa shomá ázát bekanán?”
MAR 15:10 Áiá zánt ke dini péshwáyán pa hasadd Issá áiay dastá dátag. Paméshká choshi gwasht.
MAR 15:11 Bale mazanén dini péshwáyán mardom shóréntant ke cha Pilátusá, Issáay badalá Barabbásay ázátiá belóthét.
MAR 15:12 Pilátusá padá jost kort: “Gorhá é mardá ke shomá Yahudiáni bádsháha gwashét, eshiá chón bekanán?”
MAR 15:13 Mardomán kukkár kort: “Salibi kassh!”
MAR 15:14 Pilátusá jost kort: “Chéá bárén? Mayári ché ent?” Bale áyán géshter kukkár kort: “Salibi kassh!”
MAR 15:15 Gorhá Pilátusá Barabbás ázát kort o Issá shallák o hayzarán janáént o dáti ke salib kasshag bebit, chéá ke áiá lóthet ke mardom cha man razá bebant.
MAR 15:16 Sepáhigán Issá wáliay kalátay péshgáhá bort o sajjahén lashkaresh lótháént o mocch kort.
MAR 15:17 Áyán jamurangén kabáhé Issáay gwará dát o cha dhangar o konthagán tájé addh kort o áiay sará dát.
MAR 15:18 Salámesha dát o gwashtesh: “Salám o drót, oo Yahudiáni bádsháh!”
MAR 15:19 Sará latth o jendá tokkesha jat o sojdahesha kort.
MAR 15:20 Wahdé kalág bandagesh bass kort, gwaray jamurangén kabáhesh kasshet o áiay jenday godesh padá gwará dátant. Randá, pa salib kasshagá bortesh.
MAR 15:21 Keriniay shahray Shamun námén mardé, ke Sekandar o Ruposay pet at, cha dhagárán pédák at. Sepáhigán pa bigári gept o Issáay salibesh Shamunay baddhá dát.
MAR 15:22 Issáesh hamá jágahá áwort ke námi “Joljotá” ent bezán “Kámpólay Jágah”.
MAR 15:23 Morr mán kortagén sharábesh dát bale Issáyá nawártant.
MAR 15:24 Gorhá salibesh kasshet o pa láthari o korakasshi pocchesh watmánwatá bahr kortant ke bárén kayá ché rasit.
MAR 15:25 Sohbay noh at ke Issáesh salib kasshet.
MAR 15:26 Mayárnámagéay sará áiay mayár é paymá nebeshtagat: “Yahudiáni bádsháh.”
MAR 15:27 Issáay hamráhiá do dhongesh ham salib kasshet, yakké áiay rástén kashá o domi chappéná.
MAR 15:28 É dhawlá, Pákén Ketábay hamá péshgói rást o sarjam but ke gwashit: Á mán gonahkárán hesáb kanag but.
MAR 15:29 Rahgwazán dozhmán dát, wati saresh chandhént o gwashtesh: “Hán bárén! Taw gwasht ke man mazanén parasteshgáhá karóján o say róchá padá addhia kanán,
MAR 15:30 nun watá berakkén o cha salibá ér á.”
MAR 15:31 Hamé paymá mazanén dini péshwá o Sharyatay zánóger watmánwatá Issáay bárawá pa kalág o rishkand gwashagá atant: “Á dega mardomi rakkéntant, bale watá rakkénta nakant.
MAR 15:32 Esráilay bádsháh Masih nun cha salibá ér bekapit ke má begendén o báwar bekanén.” Á doén ke gón Issáyá salib kasshag butant, á ham Issáyá bad o rad gwashagá atant.
MAR 15:33 Némróchá sajjahén molká taháriá mán shánt o é taháriá tán bégáhay sáhat sayá dásht.
MAR 15:34 Sáhat sayá, Issáyá kukkár kort: “Elui, Elui, lemá sabaktani?” Bezán: Oo mani Hodá, oo mani Hodá! Taw chéá maná yalah dát?
MAR 15:35 Ódá nazzikká óshtátagén lahtén mardomá ke eshkot, gwashtesh: “Bechárét, Elyásá tawár kanagá ent.”
MAR 15:36 Cha áyán yakké tacháná shot, espanjé zort o tropshén sharábá missénti. Espanji dáréay sará bast o pa chussagá Issáay némagá shahárt o gwashti: “Sabr kanét, chárén bárén Elyás eshiay jahlá ér kanagá kayt yá na?”
MAR 15:37 Gorhá, Issáyá peryáté jat o sáhi dát.
MAR 15:38 Hamé wahdá mazanén parasteshgáhay pardah sará beger tán boná dert o do ném but.
MAR 15:39 Hamá pawji apsar ke Issáay dém pa démá óshtátagat, wahdé disti ke Issáyá chón sáh dát, gwashti: “Béshakk é mard Hodáay Chokk at.”
MAR 15:40 Lahtén janén dur óshtátag o cháragá at. Maryam Magdalini, kasterén Ákub o Yusháay mát Maryam o Sálumah ham gón atant.
MAR 15:41 Wahdé Issá Jalilá at, é janén áiay hamráh atant o áiay hayáldáriesha kort. Abéd cha eshán dega bázén janéné ham hamódá at ke áiay hamráhiá Urshalimá átkagatant.
MAR 15:42 Jomahay róch at o mardom Shabbatay tayáriá kanagá atant. Shap ke but
MAR 15:43 Issop námén mardé ke Arimátiáay shahray nendók o Sarókáni Diwánay sharapmandén báské at o wat ham Hodáay bádsháhiay wadárig at, Pilátusay kerrá shot o pa natorsi dazbandii kort ke Issáay jóná maná beday.
MAR 15:44 Pilátus hayrán but ke Issá damáná mortag. Pawji apsari lótháént o josti kort ke bárén Issáyá sáh dátag yá na?
MAR 15:45 Pawji apsaray sajjahén hál o habaráni eshkonagá rand, Pilatusá Issáay jón Issopárá dát.
MAR 15:46 Issopá lilomén godé bahá zort, Issáay jóni cha salibá ér gétk o hamé goday tahá patát o kabréay tahá éri kort ke kóhéay tahá janag butagat. Padá dhóké léthi dát o kabray dapá dáti.
MAR 15:47 Maryam Magdalini o Yusháay mát Maryam, har doénán dist ke Issáesh kojá kall kort.
MAR 16:1 Shabbatay róch ke gwast, Maryam Magdalini, Ákubay mát Maryam o Sálumah shotant o washbóesh gept ke Issáay jóná pera moshén.
MAR 16:2 Yakshambehay bámgwáhá dém pa Issáay kabrá shotant.
MAR 16:3 Watmánwat habar kanagá atant ke kabray dapay dhóká kay pa má léthénit o dura kant?
MAR 16:4 Bale wahdé chammesh chest kortant, distesh ke dhók léthénag butag. Dhók sakk mazan at.
MAR 16:5 Kabrá ke potertant, distesh ke rástén némagá warnáé neshtag o espétén kabáhé gwará enti. Hoshk o hayrán butant.
MAR 16:6 Warnáyá gwasht: “Matorsét, shomá Issá Náseriay shóházá ét ke salib kasshag butag. Á zendag butag o jáhi jatag. Nun edá naent. Bechárét, é hamá jágah ent ke edá áiay jón ér at.
MAR 16:7 Nun shomá berawét, Petros o á dega moridán hál bedayét ke Issá cha shomá pésar Jalilá rawt o sara bit. Anchó ke wat shomárá gwashtagati, hamódá áiá gendét.”
MAR 16:8 Janén sarbatag o larzán cha kabrá dar átk o jestant. Cha torsá gón kassá é bárawá habaresh nakort.
MAR 16:9 Yakshambehay sabáhá máhallah, jáh janagá rand Issá cha sajjahénán pésar Maryam Magdaliniay démá záher but. É hamá Maryam ent ke Issáyá áiay hapt jenn kasshetagat.
MAR 16:10 Maryam shot o hamá mardomi hál dátant ke Issáay hamráh butagatant o nun mótk árag o gréwagá atant.
MAR 16:11 Bale wahdé áyán é habar eshkot ke Issá zendag butag o Maryamá distag, báwaresh nabut.
MAR 16:12 Randá, Issá dega shekl o dróshoméá do moriday démá záher but. É morid dém pa métagéá rawagá atant.
MAR 16:13 Morid per tarretant o é dega moridesh hál dátant, bale moridán esháni habar ham báwar nakort.
MAR 16:14 Randá Issá wati yázdahén kásedáni démá hamá wahdá átk o záher but ke á warák waragá atant. Issáyá kásed áyáni nábáwari o sengdeliay sará malámat kortant, chéá ke hamá mardománi habaresh báwar nakortagat ke áyán Issá cha jáh janagá rand distagat.
MAR 16:15 Gón áyán gwashti: “Donyáay sajjahén kawmáni kerrá berawét o wasshén mestágá sar kanét.
MAR 16:16 Harkas ke imána kárit o pákshódia kant, á rakkit. Bale kasé ke imána nayárit, mayáriga bit.
MAR 16:17 Báwarmandán é nesháni góna bant: mani námay sará mardománi jennána kasshant, nókén zobánán habara kanant,
MAR 16:18 márán pa dasta gerant o agan zahr ham bwarant, áyán hecch parwáha nabit. Nádráhán dast pera moshant o á wassh o dráha bant.”
MAR 16:19 Anchó ke Hodáwandén Issáyá gón kásedán wati habar halás kort, ásmáná barag but o Hodáay rástén kashá nesht.
MAR 16:20 Issáay morid, pa áiay mestágay sheng o tálán kanagá, har jáha shotant o Hodáwand ham áyáni hamráh at. Hodáwandá gón bázén mójezah o ajabbatén neshánián, wati habaráni barhakki sábeta kort.
LUK 1:1 Bázén mardoméá johd kortag ke hamá wákyah ke may nyámá butagant, esháni kessah yakjáh bekant,
LUK 1:2 anchó ke Enjilay awali hezmatkárán gón wati chammán distagant o randá pa má sar kortagant.
LUK 1:3 Gorhá, oo sharapdárén Tyópilos! Man ham sharriá patth o pól kortag o paysalah kortag ke eshán pa taw pa red o band nebeshtah bekanán,
LUK 1:4 tánke taw pakkáiá bezánay ke tai geptagén tálim rást ant.
LUK 1:5 Yahudiahay damagay bádsháh Hirudisay zamánagá Zakaryá námén dini péshwáé hastat ke cha Abiáay dini péshwáyáni thóliá at. Áiay jan ham cha Hárunay nasl o padréchá at o námi Elizábet at.
LUK 1:6 Á doén Hodáay chammán pahrézkár atant o Hodáwanday sajjahén hokm o rahbandáni sará pa bémayári zendesha gwázént.
LUK 1:7 Bale chokkesh néstat, chéá ke Elizábet santh at o doénáni omr ham mazan at.
LUK 1:8 Yakk randé ke Zakaryáay thóliay hezmatkáriay bárig at o á, Hodáay bárgáhá dini péshwái kanagá at,
LUK 1:9 gón dini péshwáiay rasmáni randgiriá, Zakaryá láthari o korakasshiay sará gechén kanag but ke Hodáwanday mazanén parasteshgáhá berawt o sóchoki dutt bedant.
LUK 1:10 Wahdé Zakaryá sóchoki dutt dayagá at, é dega sajjahén mardom dhanná dwá kanagá atant.
LUK 1:11 Anágat Hodáwanday préshtagé Zakaryáay démá záher but. Préshtag bósóchi korbánjáhay rástén némagá óshtátagat.
LUK 1:12 Gón préshtagay gendagá Zakaryá bah mant o áiay delá torsé kapt.
LUK 1:13 Bale préshtagá gón áiá gwasht: “Oo Zakaryá! Mators. Tai dwá mannag but, tai jan Elizábet mardénchokkéay sará chellaga bit o báyad ent taw áiay námá Yahyá bekanay.
LUK 1:14 Á pa taw shádeh o wasshia kárit o cha áiay butená bázéné ham shádána bit,
LUK 1:15 chéá ke á, Hodáwanday chammán mazanén mardomé bit. Báyad ent sharáb o dega hanósh o bésár kanókén chizz manóshit. Á, mátay lápá ham cha Hodáay Pákén Ruhá porra bit.
LUK 1:16 Bázén Bani Esráiliéay delá dém pa áyáni Hodáwandén Hodáyá tarrénit.
LUK 1:17 Á gón Elyás nabiay ruh o kodratá cha Hodáwandá pésara kayt, tánke petáni delán chokkáni némagá betarrénit o namannókán pahrézkáráni hekmatay némagá chahr bedant o é paymá pa Hodáwandá kawmé tayár bekant.”
LUK 1:18 Zakaryáyá cha préshtagá jost kort: “Man chón bezánán ke é gapp rást ent? Man pir án o mani jan ham mazanomr ent.”
LUK 1:19 Préshtagá passaw dát: “Man Jebráil án o Hodáay bárgáhá óshtók án. Annun rawán dayag butagán ke gón taw habar bekanán o tará é mestágá bedayán.
LUK 1:20 Bechár, tán hamá róchá ke é kár nabutag taw gonga bay o habar korta nakanay, chéá ke taw mani é habar ke pa wahd rást o sarjama bant, báwar nakortant.”
LUK 1:21 Hamé wahdá, mardom dhanná Zakaryáay entezár o wadárá atant. Hayrán atant ke á chéá mazanén parasteshgáhá inkadar mahtal butag.
LUK 1:22 Wahdé Zakaryá dhanná dar átk, áiá gón mardomán habar kort nakort. Gorhá zántesh ke áiá parasteshgáhá elhám o shobénagé distag, chéá ke áiá gón mardomán esháraha kort, natwánti habar bekant.
LUK 1:23 Zakaryá cha hezmatkáriay halásiá rand wati lógá per tarret.
LUK 1:24 Chizzé wahdá rand, áiay jan Elizábetay láp porr but o tán panch máhá démgir but o cha lógá dara nakapt.
LUK 1:25 Áiá gón wat gwasht: “É kár Hodáwandá pa man kortag. É róchán áiay nezar pa man nék butag o mardománi chammán é béezzatii cha man dur kortag.”
LUK 1:26 Shashomi máhá Hodáyá wati préshtag Jebráil Jalilay damagay Náserah námén shahréá, Maryam námén neshtagén jenekkéay kerrá ráh dát ke áiay habarsendi gón Issop námén mardéá butagat. Issop, cha Dáuday nasl o padréchá at.
LUK 1:28 Préshtag Maryamay kerrá átk o gwashti: “Salámati pa taw. Taw Hodáay rahmatáni sáhegá ay o Hodáwand gón taw gón ent.”
LUK 1:29 Cha é habaray eshkonagá Maryam báz paréshán but o delá gwashti: “É dhawlén hál o hawál kanagay máná ché ent?”
LUK 1:30 Préshtagá gwasht: “Oo Maryam! Mators, chéá ke Hodáay rahmatán tai sará sáhél kortag.
LUK 1:31 Nun taw lápporra bay, tará mardénchokké bit o taw báyad ent áiay námá Issá bekanay.
LUK 1:32 Á, mazanén mardomé bit o borzén arshay Hodáay Chokk zánaga bit o Hodáwandén Hodá, áiay pet o piroki bádsháhiá, bezán Dáuday tahtá áiá bakshit.
LUK 1:33 Á, Ákubay padréchay sará modám bádsháhia kant o áiay bádsháhi hechbara nakotthit.”
LUK 1:34 Maryamá cha préshtagá jost kort: “É chón buta kant, man wa janénchokké án o hecch mardéné mani kerrá nayátkag?”
LUK 1:35 Préshtagá passaw dát: “Pákén Ruh tai sará éra kayt o borzén arshay Hodáay zór o kodrat tai sará sáhéla bit. Paméshká é pákén chokk Hodáay Chokk zánaga bit.
LUK 1:36 Elizábet ham ke tai syád ent, piránsariá pa mardénchokkéá ométwár ent. Hamá ke santhesh gwashtag, nun shash máh ent ke lápi porr ent.
LUK 1:37 Chéá ke pa Hodáyá hecch káré nabuteni naent.”
LUK 1:38 Maryamá gwasht: “Man Hodáwanday móled án, hamé dhawlá ke taw gwashtag, anchosh bát.” Randá préshtag cha áiay kerrá shot.
LUK 1:39 Hamá róchán Maryam eshtáp eshtápá ráh gept o Yahudiahay kóhestáni hand o damagay shahréá shot.
LUK 1:40 Ódá Zakaryáay lógá shot o Elizábeti hál o hawál kort.
LUK 1:41 Anchosh ke Elizábetá Maryamay salám eshkot, nonnoká áiay lápá serr bast o Elizábet cha Pákén Ruhá porr but.
LUK 1:42 Gón borzén tawáréá gwashti: “Taw janénáni nyámá bahtáwar ay o bahtáwar ent hamá chokk ke tai lápá ent.
LUK 1:43 Man kay án ke mani Hodáwanday mát mani gendagá byayt?
LUK 1:44 Wahdé tai tayárjórhiay tawár mani góshán kapt, chokká cha galá lápay tahá serr bast.
LUK 1:45 Bahtáwar ay taw chéá ke báwaret kortag ke Hodáwand hamá kárána kant ke gón taw gwashtaganti.”
LUK 1:46 Maryamá gwasht: “Mani sáh Hodáwandá satá o saná kant.
LUK 1:47 Mani arwáh galá bál ent ke Hodá mani rakkénók ent.
LUK 1:48 Chéá ke wati móleday nezórii cháretag. Cha ed o rand, sajjahén nasl o padréch maná bahtáwara gwashant.
LUK 1:49 Chéá ke zórmandén Hodáyá pa man mazanén kár kortag, áiay nám pák ent.
LUK 1:50 Áiay rahm pa hamáyán posht dar poshta mánit ke áiay torsesh delá hastent.
LUK 1:51 Áiá gón wati porzórén báská mazanén kár kortag o hamá ke wati delá bázén pahresh bastag, áiá sheng o sháng kortagant.
LUK 1:52 Áiá hákem cha áyáni tahtán sarshakun kortagant o békebr o darbésh, sarboland.
LUK 1:53 Gozhnag gón wasshén chizzán sérláp kortagant o séréni dast hórk o hálig ráh dátagant.
LUK 1:54 Áiá wati rahm nashamoshtag o wati hezmatkárén Esráili kawmi madat kortag,
LUK 1:55 bezán Ebráhém o áiay chokk o óbádag, hamá paymá ke gón may pet o pirokán labzi kortagat.”
LUK 1:56 Maryam say máhay kesásá Elizábetay lógá mant o randá wati lógá per tarret.
LUK 1:57 Wahdé Elizábetay máh o róch sarjam butant, áiá mardénchokké but.
LUK 1:58 Áiay chellagiay hál ke hamsáheg o syádán sar but o eshkotesh ke Hodáwandá áiay sará mazanén rahmé kortag, gorhá gón áiay wasshiá hór o sharikdár butant.
LUK 1:59 Wahdé nonnoká hasht róch but, pa áiay sonnat kanagá átkant. Áyán lóthet ke nonnokay námá petay námay sará Zakaryá bekanant,
LUK 1:60 bale nonnokay mátá gwasht: “Na, áiay nám Yahyá bebit.”
LUK 1:61 Mardomán gwasht: “Tai kothom o hándáná é námén mardom kass nabutag.”
LUK 1:62 Gorhá áyán chokkay pet Zakaryá pa eshárah jost kort ke taw wati chokká chónén námé banday?
LUK 1:63 Zakaryáyá nebisagi dártahtagé lóthet o áiay sará nebeshti: “Chokkay nám Yahyá ent.” Gorhá sajjahén mardom hayrán butant.
LUK 1:64 Hamá damáná Zakaryáay gongén zobán pach but o habará lagget o Hodáay satá o sanái bendát kort.
LUK 1:65 Sajjahén hamsáhegán tors delá kapt o sarjamén Yahudiahay kóhestagá mardom é sajjahén chizzáni bárawá habará laggetant.
LUK 1:66 Harkasá ke é hál eshkot, dáemá eshiay hayálá at o gwashti: “É chokk chónén mardomé bit?” Chéá ke Hodáwanday zór o wák áiay hamráh at.
LUK 1:67 Gorhá, Yahyáay pet Zakaryá cha Pákén Ruhá porr but o péshgói kort o gwashti:
LUK 1:68 “Esráilay Hodáwandén Hodáyá satá o saná bát, chéá ke pa wati kawmay madat kanagá átkag o kawmi rakkéntag.
LUK 1:69 Áiá cha wati hezmatkárén Dáuday lóg o hándáná, pa má zórmandén rakkénóké dém dátag,
LUK 1:70 anchosh ke bázén wahdéá pésar, cha wati pákén nabiáni zobáná kawli dátag.
LUK 1:71 Áiá márá cha may dozhmenáni dastá rakkéntag, hamá ke cha má naprata kanant, márá cha á sajjahénán rakkéntagi,
LUK 1:72 may pet o pirokáni sará rahmi kortag o wati pákén ahd o karáray yát o tránagi dáshtag.
LUK 1:73 Gón may pet Ebráhémá sawgendi wártagat,
LUK 1:74 ke márá cha dozhmenáni dastá berakkénit, tánke bé tors o bimmá áiay hezmatá bekanén o
LUK 1:75 áiay bárgáhá wati sarjamén zendá pa páki o rásti begwázénén.
LUK 1:76 Oo mani chokk! Taw borzén arshay Hodáay nabi gwashaga bay, chéá ke taw cha Hodáwanday áyagá pésar, áiay ráhán tachk o hamwára kanay,
LUK 1:77 tánke áiay kawmá sarpad bekanay ke áyáni gonáh bakshaga bant o áyán nejátay zánta rasit.
LUK 1:78 Chéá ke cha may Hodáay mehr o rahmatán cha borzén arshá róch pa má thekka kant,
LUK 1:79 tánke hamáyán rozhnái bebakshit ke tahárókiá o markay sáhegá neshtagant o márá dém pa sohl o émeniay ráhá bebárt.”
LUK 1:80 Á chokk rodán o Pákén Ruhay barkatá zórmand bayán at. Esráiliáni nyámá záher bayagá pésar gyábánána mant.
LUK 2:1 Hamá róchán, Rumay bádsháh Kaysar Águstusá hokm dát ke sarjamén molká mardomshomári bebit.
LUK 2:2 É awali mardomshomári at o á wahdá Kwirinius Suriahay wáli at.
LUK 2:3 Harkas pa wati námay nebeshtah kanáénagá wati pet o piroki shahrá shot.
LUK 2:4 Issop ham cha Jalilay shahr Náserahá dar kapt o Yahudiahay shahr Bayt-Lahemá shot, hamá shahr ke bázén wahdé pésar ódá Dáud bádsháh pédá butagat. Issop béhá cha Dáuday padréchá at, paméshká pa wati námay nebeshtah kanáénagá ódá shot.
LUK 2:5 Issopá, wati deshtár Maryam ham gón at ke á pa chokkéá ométwár at.
LUK 2:6 Hamé wahdá ke á Bayt-Lahemá atant, Maryamay chellag bayagay máh o róch sarjam butant o
LUK 2:7 mardénchokkéay sará chellag but ke áiay awali chokk at. Maryamá wati nonnok godéá patát o kadimdánéay tahá wápént, chéá ke pa áyán mehmánjáhá jágah néstat.
LUK 2:8 Hamá hand o damagá lahtén shepánk hastat ke shapá gyábáná wati ramagesh negahpánia kort.
LUK 2:9 Hodáwanday préshtagé áyáni démá záher but o chárén némagán Hodáwanday shán o shawkatay rozhnái drapshagá lagget. Áyán sakk torset.
LUK 2:10 Bale préshtagá gwasht: “Matorsét, maná pa shomá mestágé gón ent ke pa sajjahén kawmá mazanén shádmánié kárit.
LUK 2:11 Dáuday shahrá maróchi pa shomá rakkénóké pédá butag ke Hodáwandén Masih ent.
LUK 2:12 Eshiay pajjáh áragay nesháni esh ent ke shomá kadimdánéay tahá godéá patátagén nonnoké gendét.”
LUK 2:13 Anágat ásmáni préshtagáni lashkaré Hodáyá názénáná á préshtagay kerrá átk. Gwashtesh:
LUK 2:14 “Shán o shawkat borzén arshay Hodáyá bát o zeminay sará sohl o émeni hamá mardomán berasát ke Hodá cha áyán wassh o razá ent.”
LUK 2:15 Wahdé préshtagán á esht o ásmáná shotant, shepánkán watmánwatá gwasht: “Byáét Bayt-Lahemá rawén o hamé kár ke butag o Hodáwandá márá hál dátag, áiá wata chárén.”
LUK 2:16 Gorhá pa eshtápi shotant o Maryam o Issopesh dar gétkant o nonnokesh kadimdánay tahá dist.
LUK 2:17 Nonnokay gendagá rand, shepánkán é chokkay bárawá harché ke cha préshtagán eshkotagat, mardom sahig kortant.
LUK 2:18 Á sajjahénán ke shepánkáni habar eshkot, hayrán o habakkah mantant.
LUK 2:19 Bale Maryamá é sajjahén habar wati delá dáshtant o esháni sará báz pegr o hayália kort.
LUK 2:20 Shepánkán harché ke eshkotag o distagat, pa áyán Hodáyá sepat o saná kanán per tarretant, chéá ke é sajjahén hamá dhawlá atant ke gón áyán gwashag butagat.
LUK 2:21 Hashtomi róchá, wahdé nonnokay sonnat kanagay wahd átk, áiay námesh Issá kort, hamá nám ke mátay lápá kapagá pésar préshtagá per kortagat.
LUK 2:22 Wahdé mát o chokkay chellagshódiay wahd halás but, Mussáay Sharyatay randgiriá Issop o Maryamá Issá Urshalimay mazanén parasteshgáhá áwort ke áiá Hodáwanday bárgáhá pésh bekanant,
LUK 2:23 anchosh ke Hodáwanday Sharyata gwashit: Awali har mardénchokk báyad ent pa Hodáwandá nadrigé hesáb kanag bebit.
LUK 2:24 Pa korbánig kanagá ham átkant tánke hamá dhawlá ke Hodáwanday Sharyatá gwashtag, “jotké shántol yá do kasánén kapót” hayrát bekanant.
LUK 2:25 Á róchán Urshalimay shahrá Shamun námén mardé hastat ke pahrézkár o hodádósté at o Esráiliáni rakkénókay rahchár at o Pákén Ruh gón áiá gón at.
LUK 2:26 Pákén Ruhá bashárat dátagat, tán wahdé ke taw Hodáwanday Masihá magenday, nameray.
LUK 2:27 Á gón Pákén Ruhay rahshóniá mazanén parasteshgáhá átk. Nun wahdé Issáay pet o mátá pa Sharyatay rasmay sarjam kanagá nonnokén Issá tahá áwort,
LUK 2:28 Shamuná Issá zort, dastáni delá dásht, Hodá saná o satá kort o gwashti:
LUK 2:29 “Oo zórmandén Hodáwand! Anchosh ke taw wat labz dátag, nun wati kasterá cha é jaháná pa émeni chest kan o wati gwará bebar,
LUK 2:30 chéá ke man gón wati chammán é neját distag ke cha tai némagá ent o
LUK 2:31 taw sajjahén kawmáni démá záher kort.
LUK 2:32 Á pa dega kawmán elhámi rozhné o pa tai Esráili kawmá pahr o sháné.”
LUK 2:33 Wahdé Issáay pet o mátá áiay bárawá Shamunay é habar eshkotant, hayrán butant.
LUK 2:34 Shamuná pa áyán nékdwái kort o gón chokkay mát Maryamá gwashti: “Hodáyá é chokk ráh dátag ke pa bázén Esráiliéá gári o bégwáhiay sawabsáz bebit o pa bázénéá nejátay sawabsáz. É chokk neshánié bit, bale eshiay helápá gappa bit.
LUK 2:35 Hamé paymá bázénéay delay ráz páshka bant. Oo Maryam! Taw baláhén andóhé genday ke zahmay dhawlá tai delá kappa kant.”
LUK 2:36 Hamódá Ásheray kabilahay yakk janéné hastat ke nabié at. Áiay nám Hannah at o áiay Petay nám Panwél at. Hannah sakk pir at. Surá rand tán hapt sálá áiay lógwájah zendag at,
LUK 2:37 bale randá Hannah janózám but. Nun áiay omr hashtád o chár sál at o áiá cha mazanén parasteshgáhá dhann pád éra nakort. Shap o róch Hodáay saná o satáia kort o wati wahdi pa dwá o róchaga gwázéntant.
LUK 2:38 Hamé wahdá átk, Hodáay shogri gept o gón hamá sajjahén mardomán ke Urshalimay nejátay rahchár atant, é chokkay bárawá habari kort.
LUK 2:39 Wahdé Issáay pet o mátá Hodáwanday Sharyatay sajjahén ráh o rahband purah kortant, gorhá per tarret o Jalilá, wati shahr Náserahá átkant.
LUK 2:40 Chokk rost o mazan but. Cha dánái o hekmatá sarréch at o Hodáay rahmati gón at.
LUK 2:41 Issáay pet o mát har sál Sargwazay Aidá Urshalimá shotant.
LUK 2:42 Wahdé Issáyá dwázdah sál but, é sálá ham shotant, anchó ke rasm at.
LUK 2:43 Aiday róch ke halás butant, per tarragay wahdá Issáyá Urshalimá dásht, bale mát o peti sahig nabutant.
LUK 2:44 Awali róchá áyán gwasht balkén gón kárwáná gón ent, paméshká yakk róchéay menzelá démá shotant. Randá áiay shóházá dar kaptant o cha wati syád o pajjárókán áiay jostesh gept.
LUK 2:45 Bale Issáesh ke nadist, per tarretant o áiay shóházá Urshalimá shotant.
LUK 2:46 Sayomi róchá, áyán Issá mazanén parasteshgáhá dar gétk ke ódá Sharyatay zánógeráni nyámá neshtagat o áyáni habarán gósh dáragá at o cha áyán jost o pors kanagá at.
LUK 2:47 Sajjahén eshkonók cha áiay sarpadi o passawán hayrán atant.
LUK 2:48 Wahdé Issop o Maryamá á dist, hayrán butant. Mátá gón áiá gwasht: “Oo mani chokk! Taw chéá gón má chosh kort? Man o tai pet paréshán butagén o má tará har jágah shóház kortag.”
LUK 2:49 Issáyá passaw dát: “Shomá chéá maná shóház kortag? Záná, shomá nazántag ke man báyad ent wati Petay kerrá bebán?”
LUK 2:50 Bale á Issáay é habarán sarpad nabutant.
LUK 2:51 Issá gón áyán padá Náserahá shot o áyáni parmánbardár at. Áiay mátá é sajjahén gapp wati delá dáshtant.
LUK 2:52 Issá rodán o cha hekmatá sarréch bayán at o Hodá o mardománi delá jágah kanán at.
LUK 3:1 Rumay bádsháh, Tiberius Kaysaray bádsháhiay pánzdahomi sál at. Hamá róchán Pontius Pilátus Yahudiahay wáli at o Hirudis Jalilay hákem at. Hirudisay brát Pilipos Eturiahay o Tráhunitisay hákem at o Lisániás Ábiliniay hákem at.
LUK 3:2 Hanná o Kayápá á wahday masterén dini péshwá atant. Hamá róchán Hodáay kolaw gyábáná Zakaryáay bacch Yahyáay sará átk.
LUK 3:3 Yahyá Ordonay kawray kerr o gwaray har jágahá shot o Hodáay kolawi pa mardomán sara kort o gwashti: “Tawbah bekanét o pákshódi bekanét ke shomay gonáh bakshag bebant.”
LUK 3:4 Anchó ke Eshayá Nabiay Ketábá nebeshtah ent: Gyábáná, kasé gwánka jant: “Hodáwanday ráhá tayár bekanét, Hodáwanday keshkán rást o tachk bekanét.
LUK 3:5 Sajjahén daragporr kanaga bant o sajjahén kóh o jomp jahl áraga bant. Chapp o chóthén ráh tachk kanaga bant o sajjahén sarkap o érkap hamwár o hamlasun kanaga bant.
LUK 3:6 Jahánay sajjahén mardom Hodáay dátagén nejátá gendant.”
LUK 3:7 Wahdé mardom pa pákshódi kanagá dar átkant, Yahyáyá gón áyán gwasht: “Oo syahmárzádagán! Kayá shomárá habardár kortag o gwashtag ke cha áyókén kahr o gazabá tatka kanét?
LUK 3:8 Anchén kár bekanét ke cha áyán záher bebit ke shomá tawbah kortag. Wati delá é hayálá ham mayárét ke Ebráhém may pet ent. Man shomárá gwashán ke Hodá cha é sengán ham pa Ebráhémá chokk o awlád pédá korta kant.
LUK 3:9 Nun tapar tayár ent ke drachkán cha boná begoddhit o har drachké ke sharrén bara nayárit, goddhag o ásá dawr dayaga bit.”
LUK 3:10 Mardomán jost kort: “Gorhá má ché bekanén?”
LUK 3:11 Áiá passaw dát: “Agan kaséá do jámag hast, yakkéá hamá kasá bedant ke áiá nést o agan kaséay kerrá ward o warák hast, áyán ham bahr bekant.”
LUK 3:12 Songi o máliátgir ham pa pákshódiá Yahyáay kerrá átkant. Jostesh kort: “Oo ostád! Má ché bekanén?”
LUK 3:13 Áiá gwasht: “Cha gisshéntagén máliátá géshter magerét.”
LUK 3:14 Sepáhigán ham cha áiá jost gept: “Má ché bekanén?” Passawi dát: “Pa zór cha kaséá zarr magerét o kaséay sará drógén tohmat majanét. Wati mozzay sará gozarán bekanét.”
LUK 3:15 Mardom Hodáay wádah dátagén rakkénókay entezár o wadárá atant, paméshká hayálesha kort ke balkén Yahyá hamá Masih ent.
LUK 3:16 Bale Yahyáyá á sajjahénáni passawá gwasht: “Man shomárá tahná gón ápá pákshódia dayán, bale yakk anchén kasé áyagi ent ke á cha man zórmandter ent o man áiay kawshbandáni bójagay láhek ham naán. Á shomárá gón Pákén Ruh o ásá pákshódia dant.
LUK 3:17 Áiá cha pog o palárán dánay jetá kanag o gisshénagá, hanshóné dastá ent. Wati jóháná moshit o dánán ambárá éra kant, bale pog o palárán anchosha sóchit ke ásesh hechbara namerit.”
LUK 3:18 Yahyáyá, mardom dega bázén sar o sója kortant o wasshén mestágay jára jat.
LUK 3:19 Bale wahdé Yahyáyá Jalilay hákem Hirudis wati brátay pésarigén jan Hirudiaháay sawabá o Hirudisay dega sajjahén radkáriáni sawabá malámat kort,
LUK 3:20 Hirudisá dega gandagén káré ham kort, bezán Yahyái gept o bandig kanáént.
LUK 3:21 Sajjahénán ke pákshódi kort, Issáyá ham pákshódi kort. Wahdé Issá dwá kanagá at, hamá wahdá ásmánay dap pach but o
LUK 3:22 Pákén Ruh kapótéay dróshomá áiay sará ér átk. Cha ásmáná tawáré átk: “Taw mani dóstigén Bacch ay, man cha taw sakk wassh o razá án.”
LUK 3:23 Issáay omr kamm o gésh si sál at ke mardománi nyámá wati kári bongéj kort. Mardománi hayál at ke Issá Issopay chokk ent. Issop Háliay chokk ent o cha Háliá rand:
LUK 3:24 Mattát, Mattáte Láwi, Láwie Malki, Malkie Yanná, Yannáe Issop,
LUK 3:25 Issope Mattátiá, Mattátiáe Ámus, Ámuse Náhum, Náhume Hasli, Haslie Najjáy,
LUK 3:26 Najjáye Mahat, Mahate Mattátiá, Mattátiáe Shemi, Shemie Yósék, Yóséke Yódá,
LUK 3:27 Yódáe Yuhanán, Yuhanáne Risá, Risáe Zerubábel, Zerubábele Shyáltél, Shyáltéle Niri,
LUK 3:28 Nirie Malki, Malkie Addi, Addie Kusám, Kusáme Elmadám, Elmadáme Ér,
LUK 3:29 Ére Yushá, Yusháe Elyázar, Elyázare Yurim, Yurime Mattát, Mattáte Láwi,
LUK 3:30 Láwie Shamun, Shamune Yahudá, Yahudáe Issop, Issope Yónám, Yónáme Elyákim,
LUK 3:31 Elyákime Maliá, Maliáe Menná, Mennáe Mattátá, Mattátáe Nátán, Nátáne Dáud,
LUK 3:32 Dáude Yassi, Yassie Óbayd, Óbayde Buáz, Buáze Salmun, Salmune Nahshun,
LUK 3:33 Nahshune Aminádáb, Aminádábe Admin, Admine Arni, Arnie Hesrun, Hesrune Páres, Párese Yahudá,
LUK 3:34 Yahudáe Ákub, Ákube Esák, Esáke Ebráhém, Ebráhéme Térá, Téráe Náhór,
LUK 3:35 Náhóre Soruj, Soruje Rau, Raue Pálaj, Pálaje Ábér, Ábére Shálah,
LUK 3:36 Shálahe Kaynán, Kaynáne Arpakshád, Arpaksháde Sám, Sáme Nuh, Nuhe Lamék,
LUK 3:37 Laméke Metushálah, Metushálahe Hanuk, Hanuke Yáred, Yárede Mahalálél, Mahaláléle Kenán,
LUK 3:38 Kenáne Énósh, Énóshe Sayt, Sayte Ádam, o Ádam cha Hodáay némagá ent.
LUK 4:1 Issá, Pákén Ruhá sarréch cha Ordonay kawrá per tarret. Pákén Ruh dém ap gyábáná áiay rahshón but.
LUK 4:2 Ódá Shaytáná Issá tán chell róchá chakkáset. Á róchán áiá hecch waráké nawárt. Wahdé á róch halás butant, gozhnag but.
LUK 4:3 Shaytáná gwasht: “Agan taw Hodáay Chokk ay, gorhá é sengá begwash nagané bebit.”
LUK 4:4 Issáyá passaw dát: “Pákén Ketábá nebisag butag: Mardom tahná pa nán zendaga nabit.”
LUK 4:5 Gorhá Shaytáná á, borzén jágahéá bort o pa yakk damáné donyáay sajjahén bádsháhi pésh dáshtant o
LUK 4:6 gwashti: “Man esháni sajjahén wák o ehtiár o shán o shawkatá tará dayán, chéá ke é maná dayag butagant o man harkasá belóthán, dayánesh.
LUK 4:7 Gorhá agan taw maná sojdah bekanay, é sajjahén taiga bant.”
LUK 4:8 Issáyá passaw dát: “Pákén Ketábá nebisag butag: wati Hodáwandén Hodáay parasteshá bekan o tahná hamáiay hezmatá bekan.”
LUK 4:9 Gorhá Shaytáná Issá Urshalimá bort, mazanén parasteshgáhay borzterén jágahá óshtárént o gwashti: “Agan taw Hodáay Chokk ay gorhá watá cha edá jahlá dawr beday.
LUK 4:10 Chéá ke nebisag butag: Hodá pa tai negahpániá wati préshtagán hokma kant o
LUK 4:11 á tará wati dastáni delá dárant ke tai pád dhókéá malaggit.”
LUK 4:12 Issáyá passaw dát: “Pákén Ketáb chosh ham gwashit: Wati Hodáwandén Hodáyá ázmáesh makan.”
LUK 4:13 Shaytáná, wahdé wati sajjahén chakkás halás kortant, Issái pa dega sharterén wahd o móhéá esht o shot.
LUK 4:14 Gorhá Issá gón Pákén Ruhay zór o wáká Jalilá per tarret. Áiay nám o tawár sajjahén damagá sheng but.
LUK 4:15 Issáyá áyáni kanisaháni tahá tálima dát o sajjahén mardomán á satá kort o sárhát.
LUK 4:16 Gorhá Issá Náserahá shot, hamódá ke rostag o mazan butagat. Shabbatay róchá wati hél o ádatay padá kanisahá átk. Ódá pa wánagá óshtát.
LUK 4:17 Eshayá Nabiay Ketábesh áiay dastá dát. Anchosh ke áiá tumár pach kort, hamá bahri dar gétk ke ódá nebeshtah at:
LUK 4:18 “Hodáwanday Ruh gón man gón ent, parchá ke áiá maná rógen per moshtag ke garib o nézgárán wasshén mestágé bedayán, maná démi dátag ke bandigán ázátiay basháratá bedayán o pa kórán bináiay mestágá berasénán, zolm ámáchánberakkénán o
LUK 4:19 Hodáwanday rahmatay sálay basháratá bedayán.”
LUK 4:20 Padá Issáyá tumár pétk, kanisahay hezmatkáray dastá dát o nesht. Kanisahay sajjahén mardom áiay némagá cháragá atant.
LUK 4:21 Issáyá gón áyán gwasht: “Maróchi gón shomay gósh dáragá, Pákén Ketábay é nebeshtahay rásti pakká o sarjam but.”
LUK 4:22 Harkasá pa áiá sharrén gwáhié dát o sajjahén mardom cha áiay delkasshén habarán hayrán o habakkah mantant. Gwashtesh: “É hamé Issopay chokk naent?”
LUK 4:23 Issáyá gón áyán gwasht: “Man deljam án shomá é batalá pa mana kárét ke agan taw tabibé ay, gorhá pésará watá dráh bekan. Shomá maná gwashét ke hamá mójezah ke má eshkotag taw Kaparnáhumá kortagant, áyán edá wati shahr o hankéná ham bekan.”
LUK 4:24 Wati habari démá bort o gwashti: “Shomárá rásténa gwashán, hecch nabi wati shahr o hankéná mannaga nabit.
LUK 4:25 Deljam bebét ke Elyás nabiay zamánagá, wahdé tán say sál o némá ásmánay dap band but o sajjahén molká mazanén dhokkálé kapt, Esráilá bázén janózámé hastat.
LUK 4:26 Bale Elyás cha áyán yakkéay kerrá ham ráh dayag nabut, tahná Saydunay damagá Sáreptahay shahrá yakk janózáméay kerrá rawán dayag but.
LUK 4:27 Hamé paymá Elishá nabiay zamánagá Esráilá bázéné garray nádráhiá geptagat, bale yakké ham dráh nabut. Tahná Nómán rakket ke Suriahay mardomé at.”
LUK 4:28 Cha é habaráni eshkonagá, kanisahá neshtagén mardom zahr geptant.
LUK 4:29 Pád átkant o Issáesh télánk dayán cha shahrá dar kort o hamá kóhay sará bort ke ódá shahr ábád at, tánke cha kóhay kalánthagá jahlá dawri bedayant.
LUK 4:30 Bale Issá cha mardománi tahá gwast o wati ráhi gept o shot.
LUK 4:31 Randá, Issá Kaparnáhumá shot ke Jalilay damagay shahré o Shabbatay róchá mardomi tálim dátant.
LUK 4:32 Issáay tálimáni gósh dárók cha áiay habaráni eshkonagá hayrán butant, chéá ke áiá gón wák o ehtiár gapp o trána kort.
LUK 4:33 Kanisahay tahá yakk mardéá ke áiá palitén ruhé, bezán jenné per at, kukkár kanáná gwasht:
LUK 4:34 “Oo Issá Náseri! Tará may kárá che kár ent? Átkagay ke márá gár o bégwáh bekanay? Mana zánán taw kay ay, taw Hodáay gechén kortagén hamá Pákén ay.”
LUK 4:35 Issáyá jenn hakkal dát o gwashti: “Wati dapá bedár o é mardá yalah day!” Jenná mardománi démá á mard zeminá dawr dát o anchosh dar átk ke á mardá hecch noksáné naraset.
LUK 4:36 Cha é kárá sajjahén mardom hayrán butant o watmánwatá gwashtesh: “É chónén habaré? Gón wák o ehtiáré jennán hokma dant o á ham mardomán yalaha kanant.”
LUK 4:37 Gorhá kerr o gwaray sajjahén jágahán Issáay nám o tawár sheng but.
LUK 4:38 Issá cha kanisahá dar kapt o Shamunay lógá shot. Shamunay wassig trondén tapéá geptagat. Shamunay lógay mardomán pa áiay dráh kanagá gón Issáyá dazbandi kort.
LUK 4:39 Issá shot, áiay kashá óshtát o tapi hakkal dát. Áiay tap sest. Á, damáná pád átk o áyáni hezmat kanagá lagget.
LUK 4:40 Rónenday wahdá, mardomán har dhawlén nádráh Issáay kerrá áwort o áiá nádráháni sará dast per mosht o dráh kortant.
LUK 4:41 Jenn cha bázén mardoméá dar átkant o kukkár kanáná gwashtesh: “Taw Hodáay Chokk ay.” Bale Issáyá hakkal dát o gappá naeshtant, chéá ke áyána zánt ke á, Masih ent.
LUK 4:42 Wahdé róch but, Issá gestá o panáhén jágahéá shot. Mardom áiay shóházá atant o wahdé áyán Issá dist, gwashtesh: “Gón má bejall o márá yalah maday.”
LUK 4:43 Issáyá gwasht: “Maná Hodáay bádsháhiay mestág á dega shahrán ham rasénagi ent, chéá ke Hodáyá maná pa hamé kárá ráh dátag.”
LUK 4:44 Gorhá Yahudiahay kanisahán wasshén mestágay jár janagay kári démá bort.
LUK 5:1 Yakk róché Issá Genisáretay Mazangwarmay lambá óshtátagat o bázén mardomé Hodáay habaráni gósh dáragá áiay chapp o chágerdá mocch at.
LUK 5:2 Áiá gwarmay kerrá do bójig dist. Máhigir cha bójigán ér kaptagatant o wati dám o máhórán shódagá atant.
LUK 5:3 Issá cha hamá bójigán yakkéá ke Shamunayg at, swár but. Gón Shamuná gwashti: “Bójigá cha hoshkiá kammé dur bebar.” Randá nesht o cha bójigá mardománi tálim dayagá lagget.
LUK 5:4 Wahdé habari halás kort, gón Shamuná gwashti: “Bójigá gwarmay johlánkián bebar o shomá wati dámán pa máhigay geragá ápá dawr bedayét.”
LUK 5:5 Shamuná gwasht: “Wájah! Dóshi má sajjahén shap delsyáhi kasshetag o márá hecch máhig dast nakaptag, bale nun ke taw gwashay, man dámán ápá dawra dayán.”
LUK 5:6 Áyán dám ápá dawr dátant o haminchok máhigesh gept ke dám deragi butant.
LUK 5:7 Paméshká, domi bójigay hamkáresh pa komakká eshárah kortant. Á átkant o doén bójig cha máhigá haminkadar porr butant ke gwarmá boddhagi butant.
LUK 5:8 Wahdé Shamun-Petrosá é kár dist, Issáay pádán kapt o gwashti: “Oo Hodáwand! Maná yalah day o beraw, chéá ke man gonahkáré án.”
LUK 5:9 Inchok máhigay geragá, Shamun-Petros o áiay sajjahén hamkár hayrán butant.
LUK 5:10 Hamé dhawlá Zebdiay doén chokk Ákub o Yuhanná ke Shamunay sharikdár atant, á ham hayrán butant. Issáyá gón Shamuná gwasht: “Mators! Cha ed o rand máhigay badalá taw mardománi delán shekára kanay.”
LUK 5:11 Padá áyán wati bójig hoshkiá áwortant o wati sajjahén kár o bár yalah dátant o Issáay hamráh butant.
LUK 5:12 Dega róché Issá yakk shahréá at. Ódá mardé sará tán pádá garray nádráhiá geptagat. Wahdé Issái dist, dém pa chér kapt o dazbandii kort: “Oo wájah! Agan taw belóthay, maná dráh o palgár korta kanay.”
LUK 5:13 Issáyá wati dast shahárt, dasti per mosht o gwashti: “Mana lóthán. Dráh o palgár bay!” Hamá damáná mard cha garrá dráh but.
LUK 5:14 Issáyá hokm dát o kaddhan kort: “É habará gón hechkasá magwash, bale beraw, watá dini péshwáyá pésh bedár o pa wati páki o palgáriá hamá korbánigá hayrát bekan ke Mussáay Sharyatá hokm dátag tánke pa áyán sháhedié bebit.”
LUK 5:15 Bale Issáay nám o tawár angat ham har jáh sheng o tálána but o bázén mardomé pa áiay habaráni gósh dárag o wati nájórhiáni dráh kanáénagá átk o áiay kerrá moccha but.
LUK 5:16 Pa dwá kanagá Issá géshter gyábánána shot.
LUK 5:17 Yakk róché Issá tálim dayagá at. Lahtén Parisi o Sharyatay ostád ham hamódá neshtagat. Á cha Jalilay o Yahudiahay sajjahén métagán o cha Urshalimá átkagatant. Pa nádráháni dráh kanagá Hodáwanday zór o twán gón Issáyá gón at.
LUK 5:18 Hamá wahdá lahtén mardomá lang o mondhén mardé tahtéay sará áwort. Áyán báz johd kort ke áiá Issáay démá byárant,
LUK 5:19 bale cha mardománi báziá, lógay tóká áwortesh nakort. Paméshká, langén mardesh zort, lógay sará sar kaptant, lógay saresh thong kort o áesh gón tahtá Issáay démá ér dát.
LUK 5:20 Wahdé Issáyá áyáni imán dist, gwashti: “Oo mani dóst! Tai gonáh bakshag butant.”
LUK 5:21 Cha Issáay é habará, Parisi o Sharyatay é dega zánóger ke ódá neshtagatant, pegr kanagá laggetant: “É kay ent ke kopra kant? Hodáay jendá abéd dega kass gonáhán baksheta nakant.”
LUK 5:22 Bale Issáyá áyáni delay habar zánt o gwashti: “Shomá chéá wati delá choshén hayála kárét?
LUK 5:23 Kojám habaray gwashag ásánter ent: ‘Tai gonáh bakshag butagant,’ yá: ‘Pád á, betarr’?
LUK 5:24 Bale man é habar kort tánke shomá bezánét ke Ensánay Chokká é donyáyá gonáháni bakshagay wák o ehtiár hast.” Padá gón á langá gwashti: “Tará gwashán, pád á, wati tahtá bezur o lógá beraw.”
LUK 5:25 Hamá damáná, mard sajjahénáni démá pád átk, wati tahti zort o Hodáyá sepat o satá kanáná lógá shot.
LUK 5:26 Sajjahén hayrán o habakkah butant, Hodáesh satá kort o sárhát o pa torsé gwashtesh: “Maróchi má hayrán kanókén kár distag.”
LUK 5:27 Randá, Issá dhanná dar átk o Láwi námén songi o máliátgiré disti ke wati kárgesá neshtagat. Issáyá gwasht: “Byá, mani randgiriá bekan.”
LUK 5:28 Láwi pád átk o sajjahén chizzi yalah dátant o áiay hamráh but.
LUK 5:29 Gorhá Láwiá wati lógá Issáay sharapá pormarháhén mehmánié kort. É mehmániá bázén máliátgir o lahtén dega mardom ham gón at.
LUK 5:30 Parisi o áyáni Sharyatay zánógerán gón Issáay moridán gelag kort o gwasht: “Shomá chéá gón songi o gonahkárán yakkén wánay sará warét o nóshét?”
LUK 5:31 Issáyá gwasht: “Dráh o salámatén mardomán tabib pakár naent, nádráhán tabib pakár ent.
LUK 5:32 Man pahrézkáráni gwánk janagá nayátkagán, gonahkáráni gwánk janagá átkagán ke á tawbah bekanant.”
LUK 5:33 Cha Issáyá jostesh kort: “Yahyáay morid géshter róchaga bant o dwá kanant. Parisiáni morid ham anchosha kanant, bale tai morid modáma warant o nóshant.”
LUK 5:34 Issáyá gwasht: “Tán wahdé ke sálónk gón suray mehmánán gón ent, á pa róchagay dáragá hojj kanaga bant?
LUK 5:35 Bale wahdé kayt ke sálónk cha áyán jetá kanaga bit, gorhá á róchaga bant.”
LUK 5:36 Issáyá é mesál ham dát: “Hechkas cha nókén pashkéá thokkoré naborrit o kwahnén pashká paccha najant. Agan á chosh bekant, gorhá bezán nókén pashki dertag o kwahnén pashk ham gón nókén pacchá dhawldára nabit.
LUK 5:37 Hamé dhawlá, hechkas nókén sharábá kwahnén mashkán mána nakant, chéá ke nókén sharáb mashká trákénit. Sharába rechant o mashk ham barbáda bant.
LUK 5:38 Nókén sharáb báyad ent nókén mashká mán kanag bebit.
LUK 5:39 Kasé ke kwahnén sharábay waragá héldár ent, nókén sharába nawárt. Áiay delá kwahnén sharáb támdárter ent.”
LUK 6:1 Yakk baré Shabbatay róchá, Issá cha gandomay keshárán gwazagá at. Áiay morid gandomay hóshagán sendag o gón wati dastán moshag o waragá atant.
LUK 6:2 Gorhá cha Parisián lahténá gwasht: “Chéá anchén kára kanét ke Shabbatay róchá rawá naent?”
LUK 6:3 Issáyá passaw dát: “Záná, shomá nawántag, wahdé Dáud o áiay hamráh gozhnag butant, gorhá Dáudá ché kort?
LUK 6:4 Á, Hodáay Pákén Lógá shot, hamá pákwandhén nagani zort o wártant ke áyáni warag tahná pa dini péshwáyán rawá at. Wati hamráháná ham dáti.”
LUK 6:5 Padá Issáyá gón áyán gwasht: “Ensánay Chokk Shabbatay róchay málek ent.”
LUK 6:6 Dega Shabbatay róché, Issá kanisahá shot o mardománi tálim dayagá goláésh but. Ódá yakk mardé at ke rástén dasti hoshk o mondh at.
LUK 6:7 Sharyatay zánóger o Parisi Issáyá cháragá atant o yakk nimónéay shóházá atant ke agan é marday dastá Shabbatay róchá dráh bekant, gorhá má áiay sará Shabbatay róchá kár kanagay bohtámá jata kanén.
LUK 6:8 Issáyá áyáni delay hál o habar zánt o gón hamá mardá ke dasti hoshk at, gwashti: “Pád á bósht, mardom tará begendant!” Á mard pád átk o óshtát.
LUK 6:9 Gorhá Issáyá cha mardomán jost kort: “Maná begwashét ke Shabbatay róchá néki kanag rawá ent yá badi kanag? Ensánay zenday rakkénag rawá ent yá tabáh kanag?”
LUK 6:10 Gorhá sajjahénáni némagá cháret o gón á mardá gwashti: “Dastá shahár day!” Áiá anchosh kort o dasti wassh o dráh but.
LUK 6:11 Sharyatay zánóger o Parisi sakk zahr geptant o watmánwatá shawr o saláhesh kort ke gón Issáyá ché bekanén.
LUK 6:12 Hamá róchán Issá pa dwá kanagá kóhá shot o sajjahén shapá Hodáay bárgáhá dwái kort.
LUK 6:13 Wahdé róch but, áiá morid wati kerrá lótháéntant o cha áyán dwázdah kas gechén kort o wati kásed náméntant.
LUK 6:14 Áyáni nám esh ant: Shamun ke Issáyá áiay nám “Petros” kort, Andriás ke Shamunay brát at, Ákub, Yuhanná, Pilipos, Bartulumá,
LUK 6:15 Mattá, Tumá, Halpiay chokk Ákub, Shamun ke áiay lakab “sarmachár” at,
LUK 6:16 Ákubay chokk Yahudá o Yahudá Eskaryuti ke randá Issái dróhet o dozhmenáni dastá dát.
LUK 6:17 Issá gón moridán cha kóhá ér kapt o hamwárén jágahéá óshtát. Cha áiay moridán bázéné ódá at. Cha sarjamén Yahudiahá, cha Urshalimá o cha Sur o Saydunay tayábgwará mardománi mazanén rombé ham átk o mocch but.
LUK 6:18 É mardom átkant ke áiay habarán gósh bedárant o paméshká ham ke nádráhiesh dráh bebant. Hamá ke jennán nádráh kortagatant, á ham dráh butant.
LUK 6:19 Sajjahén mardomán lóthet ke Issáyá dast bejanant, chéá ke cha áiá anchén zór o twáné dar áyagá at ke sajjahéni dráha kortant.
LUK 6:20 Issáyá wati moridáni némagá cháret o gwasht: “Bahtáwar ét shomá ke garib ét, chéá ke Hodáay bádsháhi shomayg ent.
LUK 6:21 Bahtáwar ét shomá ke annun shodig ét, chéá ke séra bét. Bahtáwar ét shomá ke annun gréwán ét, chéá ke kandána bét.
LUK 6:22 Bahtáwar ét shomá, wahdé mardom pa Ensánay Chokkaygi cha shomá naprata kanant o shomárá cha watá sendant o béezzat kanant o shomay námá pa badia gerant.
LUK 6:23 Á róchá shátkámi bekanét o galá bál bebét, chéá ke ásmáná shomay mozz báz ent. Áyáni pet o pirokán ham gón nabián hamé dhawlá kortag.
LUK 6:24 Bale bazhn o apsóz pa shomá ke sér o hazgár ét, chéá ke shomárá ásudagi rasetag.
LUK 6:25 Bazhn o apsóz pa shomá ke annun sérláp ét, chéá ke shodiga bét. Bazhn o apsóz pa shomá ke annun kandán ét, chéá ke porsig o gréwána bét.
LUK 6:26 Bazhn o apsóz pa shomá, wahdé sajjahén mardom shomárá satá dayant o sárháyant, chéá ke áyáni pet o pirokán ham gón drógén nabián hamé dhawlá kortag.
LUK 6:27 Oo mani gósh dárókán! Shomárá gwashán ke wati dozhmenán dóst bedárét o gón áyán ke cha shomá naprata kanant, néki bekanét.
LUK 6:28 Hamá ke shomárá baddwáia kanant, pa áyán barkat belóthét o hamá ke shomárá béezzata kanat, pa áyán nékén dwá belóthét.
LUK 6:29 Agan kasé tai yakk gobbéá shahmáté jant, wati domi gobbá ham áiay némagá betarrén o agan kasé tai kabáhá pacha gipt, belli tai jámagá ham bárt.
LUK 6:30 Agan kasé cha taw chizzé lóthit, bedayi, agan kasé tai chizzé bárt, padá malóthi.
LUK 6:31 Gón degarán hamá dhawlá bekanét ke shomá lóthét ke á gón shomá bekanant.
LUK 6:32 Agan shomá tahná hamáyán dóst bedárét ke shomárá dósta dárant, gorhá shomárá che páedaga rasit? Gonahkár ham wati dóst dárókán dósta dárant.
LUK 6:33 Agan shomá gón hamáyán néki bekanét ke gón shomá nékia kanant, gorhá shomárá che páedaga rasit? Gonahkár ham anchosha kanant.
LUK 6:34 Agan shomá tahná hamáyán wám bedayét ke ométa kasshét zortagén wámán dáta kanant, gorhá shomárá che páedaga rasit? Gonahkár ham gonahkárán pa hamé ométá wáma dayant ke padá sarjamiá begerantesh.
LUK 6:35 Bale shomá wati dozhmenán dóst bedárét, gón áyán néki bekanét o bé ométá wámesh bedayét. É dhawlá shomárá cha Hodáay némagá mazanén mozzé rasit o shomá borzén arshay Hodáay chokka bét, chéá ke á gón náshogr o badkárén mardomán ham mehrabán ent.
LUK 6:36 Hamá dhawlá ke shomay ásmáni Pet rahmdel ent, shomá ham rahmdel bebét.
LUK 6:37 Aybgiri makanét o kassá ér majanét ke shomá ér janag mabét. Kassá mayárig makanét ke mayárig kanag mabét. Degarán pahell kanét o bebakshét tánke pahell kanag o bakshag bebét.
LUK 6:38 Bedayét ke shomárá dayag bebit. Mazanén kayl o paymánahé porr kanaga bit, dapádap kanaga bit, mán chenaga bit, sarréch kanaga bit o shomay kotthá réchaga bit, chéá ke gón har kayléá bedayét, gón hamá kaylá shomárá dayaga bit.”
LUK 6:39 É mesáli ham pa áyán áwort: “Kóré che paymá dega kóréay rahshóniá korta kant? Har doén kandhá nakapant?
LUK 6:40 Shágerd cha wati ostádá mastera nabit, bale hamá ke tálimá kámela bit, wati ostáday dhawlá bit.
LUK 6:41 Chéá wati brátay chammay bucchoká genday, bale wati chammay bondhá nagenday?
LUK 6:42 Wahdé taw wati chammay bondhá nagenday, chón wati brátá gwashta kanay: ‘Mani brát! Byá tai chammay bucchoká dara kanán’? Oo doru o dopóstén mardom! Pésará wati chammay bondhá dar kan, randá tai chamm pacha bant o wati brátay chammay bucchoká kassheta kanay.
LUK 6:43 Hecch sharrén drachk harábén bar o samara nayárit o na harábén drachk sharrén bar o samara kárit.
LUK 6:44 Har drachk, cha wati bará zánaga bit. Na cha dhangarán enjir chenaga bit o na cha dhóloká angur.
LUK 6:45 Sharrén mardom wati delay hazánagay ér kortagén nékián cha wati dap o zobáná dara kant o sellén mardom wati delay ambáray ér kortagén gandagián cha wati dap o zobáná réchit. Chéá ke harché ke delá bit, cha dapá hamá habar dara kayt.
LUK 6:46 Wahdé shomá mani habaráni sará amala nakanét, gorhá chéá maná ‘Hodáwand, Hodáwanda’ gwashét?
LUK 6:47 Á kas ke mani kerrá kayt o mani habarán gósha dárit o áyáni sará amala kant, man shomárá pésha dárán ke á kai paymá ent.
LUK 6:48 Á hamá bánbanday dhawlá ent ke pa lógay bandagá charii johl borret o bonredi mohrén kóhéay sará ér kort. Wahdé hár o héróp átk, hárá gón lógá dhikk wárt bale lógi sorént nakort, chéá ke mohr o mohkam bandag butagat.
LUK 6:49 Bale kasé ke mani habarán gósha dárit o áyáni sará amala nakant, hamá mardomay paymá ent ke lógi bé bonredá bast. Wahdé hár o héróp átk, hárá gón lógá dhikk wárt, lóg kapt o pahk tabáh but.”
LUK 7:1 Wahdé Issáyá gón mardomán wati habar halás kortant, Kaparnáhumá shot.
LUK 7:2 Ódá, yakk pawji apsaréá hezmatkáré hastat ke apsará áiay báz kadra kort. Á hezmatkár nádráh at o markig at.
LUK 7:3 Wahdé apsar Issáay bárawá sahig but, áiá Yahudiáni lahtén kamásh Issáay kerrá ráh dát tánke cha áiá dazbandi bekanant ke byayt o áiay hezmatkárá dráh bekant.
LUK 7:4 Kamásh Issáay kerrá átkant, sakk báz mennatesh kort o gwashtesh: “É pawji apsara karzit ke taw pa áiá é kárá bekanay.
LUK 7:5 Chéá ke may kawmá dósta dárit o may kanisah hameshiá bastag.”
LUK 7:6 Issá áyáni hamráh but o shot. Wahdé lógay nazzikká rasetant, pawji apsará wati lahtén dóst kásed kort o pa Issáyá kolawi rawán dát: “Oo Hodáwand! Watá zahmatwár makan. Mana nakarzán ke taw mani lógá byáay o
LUK 7:7 mani delá man é láhek ham naán ke tai kerrá byáyán. Taw tahná hokm bekan, mani hezmatkár dráha bit.
LUK 7:8 Chéá ke man ham wati masteráni ehtiáray chérá án o mani dastay chérá ham sepáhig hast. Agan kaséá hokm begwashán ‘beraw,’ á rawt o agan kaséá begwashán ‘byá,’ á kayt. Agan wati hezmatkárá begwashán ‘pelán kárá bekan,’ á kanti.”
LUK 7:9 Wahdé Issáyá é habar eshkot, hayrán but, démi gón hamá mocchiá kort ke áiay randá gón at o gwashti: “Shomárá gwashán, man choshén mohrén imán Esráiliáni tahá ham nadistag.”
LUK 7:10 Wahdé pawji apsaray kásed per tarret o lógá átkant, distesh ke hezmatkár wassh o dráh ent.
LUK 7:11 Dér nagwast ke Issá gón wati morid o dega bázén mardománi hamráhiá, Náin námén shahréá shot.
LUK 7:12 Wahdé shahray darwázagay nazzikká raset, disti ke mardom yakk mordagé cha shahrá dhann baragá ant ke wati janózámén mátay yakkén chokk at. Shahray bázén mardomé janózámay hamráh.
LUK 7:13 Wahdé Hodáwandén Issáyá á janózám dist, áiay sará sakk bazzagi but o gwashti: “Magréw.”
LUK 7:14 Nazzik átk o janázahi dast per kort, mordagay kópag dayók óshtátant. Issáyá mordag gwánk jat: “Oo warná! Man tará gwashán, pád á.”
LUK 7:15 Mordag pád átk o nesht o habará lagget. Issáyá á warná mátárá dát.
LUK 7:16 Sajjahénáni delá torsé nesht o Hodáyá sepat o saná kanáná gwashtesh: “May kerrá yakk mazanén nabié átkag” o “Hodá wati kawmay komakk kanagá átkag.”
LUK 7:17 Issáay hál sajjahén Yahudiah o kerr o gwaray damagán sheng but.
LUK 7:18 Pákshódi dayókén Yahyáay moridán Yahyá cha Issáay é sajjahén kárán sahig kort. Gorhá Yahyáyá cha wati moridán do kas lótháént o
LUK 7:19 pa jost kanagá Hodáwandén Issáay kerrá dém dátant ke bárén taw hamá ay ke áyagi at, yá má degaréay ométá benendén?
LUK 7:20 Á doén Issáay kerrá átkant o gwashtesh: “Márá pákshódi dayókén Yahyáyá pa é habaray jostá ráh dátag ke bárén taw hamá ay ke áyagi at, yá pa degaréá rahchár bebén?”
LUK 7:21 Hamá wahdá Issá bázén nájórh o nádráhé dráh kanagá at, jenniáni jennán kasshagá at o bázén kóréay chammán rozhná kanagá at.
LUK 7:22 Issáyá passaw dátant: “Harché ke shomá distag o eshkotag, berawét Yahyáyá sahig kanét ke kór gendagá ant, lang tarragá ant, garray nádráh dráh bayagá ant, karr eshkonagá ant, mordag zendag bayagá ant o garibán wasshén mestág sar bayagá ent.
LUK 7:23 Bahtáwar hamá ent ke mani sawabá thagal mawárt.”
LUK 7:24 Wahdé Yahyáay kásed dar kapt o shotant, Issá gón mardomán Yahyáay bárawá gapp o trán kanagá lagget: “Shomá chónén chizzéay cháragá gyábáná shotét? Kalam o káshéay cháragá ke gón gwátay kasshagá é dém o á déma bit?
LUK 7:25 Agan na, gorhá chónén chizzéay cháragá shotét? Anchén mardéay cháragá shotét ke narm o názorkén pósháki gwará at? Á mardom ke brahdárén póshák gwará kanant o hastómandáni dhawlá zenda gwázénant, kalátán neshtagant.
LUK 7:26 Gorhá ódá shomá chónén chizzéay cháragá shotét? Paygambaréay cháragá? Haw, shomárá gwashán anchénéay cháragá ke cha paygambarán ham master ent.
LUK 7:27 Á hamá ent ke áiay bárawá nebeshtah kanag butag: Bechár, man wati kásedá cha taw pésar ráha dayán ke tai ráhá tachk o hamwára kant.
LUK 7:28 Man shomárá gwashán ke hecch mátá choshén chokk nayáwortag ke cha pákshódi dayókén Yahyáyá master bebit. Bale Hodáay bádsháhiá, hamá ke cha sajjahénán kaster ent, á cha Yahyáyá ham master ent.”
LUK 7:29 Wahdé Yahyáyá Hodáay paygám áwort, bázén mardoméá ke áyáni tahá songi o máliátgir ham gón atant Yahyáay dastá pákshódi kort o é paymá mannet ke Hodá barhakk ent.
LUK 7:30 Bale Parisi o Sharyatay kázián Yahyáay dastá pákshódi nagept o Hodáay erádahesh pa wat nazort.
LUK 7:31 “Pa é zamánagay mardomán kai meslálá bedayán? Á kai paymá ant?
LUK 7:32 Á, hamá chokkáni paymá ant ke bázárá neshtagant o yakdomiá gwashagá ant: ‘Má pa shomá nal jat, bale shomá nách nakort, má mótk jat, bale shomá nagrét.’
LUK 7:33 Pákshódi dayókén Yahyá átkág, na náni wárt o na sharábi nóshet o shomá gwashét: ‘Jenné per enti,’
LUK 7:34 bale Ensánay Chokk átkag, wárt o nóshit o shomá gwashét: ‘Lápi o sharábié, máliátgir o gonahkáráni sangat ent.’
LUK 7:35 Bale dánáiay rástiá hamá záhera kanant ke áiay randgir o mannóger ant.”
LUK 7:36 Cha Parisián yakkéá gón Issáyá gwasht ke taw náná gón man ay. Issá áiay lógá shot o pa waragá parzónagay sará nesht.
LUK 7:37 Á shahrá gonahkárén janéné hastat. Wahdé á sahig but ke Issá é Parisiay mehmán ent, albástaray atrdánéay atri zortant o átk.
LUK 7:38 Issáay poshtá, áiay pádáni nazzikká gréwáná óshtát. Gón wati arsán Issáay pádi tarr kortant, gón wati mudán hoshki kortant o chokketant o atri per moshtant.
LUK 7:39 Wahdé á Parisiá ke Issá mehmán kortagat é dist, wati delá gwashti: “Agan é mard paygambaré butén, allamá zántagati é janén ke áiá dast per kanagá ent, kay ent o chónén gonahkáré.”
LUK 7:40 Issáyá gwasht: “Oo Shamun! Maná gón taw yakk habaré hast.” Áiá gwasht: “Ji ostád, begwash!”
LUK 7:41 Issáyá gwasht: “Mardéá do wámdár hastat, yakké panch sad dinár o domi panjáh dinárá wámdár at,
LUK 7:42 bale á doénán pa wámáni dayagá hecch néstat, paméshká wám dayóká áyáni wám bakshetant. Nun cha á doénán kojámiá wám dayók géshter dósta bit?”
LUK 7:43 Shamuná passaw dát: “Mani hayálá, hamá ke áiay wám géshter atant.” Issáyá passaw dát: “Taw sharr gwasht.”
LUK 7:44 Gorhá Issáyá janénay némagá chakk tarrént o gón Shamuná gwashti: “É janéná genday? Man tai lógá átkán, taw maná pádáni shódagá trampé áp nadát, bale é janéná mani pád gón wati arsán tarr kort o gón mudán hoshk kortant.
LUK 7:45 Taw maná nachokket, bale é janén cha mani rasagá tán é wahdi yappaymá mani pádán chokkagá ent.
LUK 7:46 Taw mani sará rógen per namosht, bale áiá mani pádán atr per mosht.
LUK 7:47 Paméshká tará gwashán ke é janénay bázén dóstiay sawab esh ent ke eshiay bázén gonáhé bakshag but, bale á ke dóstii kamter ent, hamá ent ke bakshetagén gonáhi kamter ant.”
LUK 7:48 Gorhá gón janéná gwashti: “Tai gonáh bakshag butant.”
LUK 7:49 Bale é dega mehmán gón yakdegará gwashagá laggetant: “É kay ent ke mardománi gonáhán ham bakshit?”
LUK 7:50 Nun Issáyá gón á janéná gwasht: “Tai imáná tará rakként, pa wasshi o salámati beraw.”
LUK 8:1 Randá, Issá shahr pa shahr o métag pa métaga tarret o pa mardomán Hodáay bádsháhiay mestágay jária jat. Áiay dwázdahén kásed hamráh atant.
LUK 8:2 Lahtén janén ham ke Issáyá áyáni jenn kasshetagatant o cha nádráhián dráh kortagatant, gón áyán gón atant. Cha áyán yakké Maryam at, ke Magdaliniesha gwasht o Issáyá cha áiá hapt jenn kasshetagat.
LUK 8:3 Dega yakké Yuánah at ke áiay lógwájah Huzá, Hirudis bádsháhay kalátay kárendaháni master at. Yakké Susanah at o dega báz janén atant ke cha wati zarr o málán Issá o áiay moridán komakk kanagá atant.
LUK 8:4 Cha har shahrá mardom Issáay kerrá pédák atant. Wahdé bázén mardomé átk o mocch but, Issáyá pa darwar o mesál gón áyán gwasht:
LUK 8:5 “Dehkáné wati tohmáni chandhagá shot. Tohmáni chandhagay wahdá kammé tohm ráhay sará retk ke pálapásh butant o báli morgán chet o wártant.
LUK 8:6 Kammé tohm dhal o dhókáni tahá retk. Á rostant bale zutt gimmort o hoshk butant, chéá ke zeminá namb néstat.
LUK 8:7 Kammé tohm cherekk o dhangaráni tahá retk, hórigá rostant bale cherekkán tohm rodagá naeshtant.
LUK 8:8 É dega tohm sharrén zeminá retkant o sharr rost o mazan butant o sad sari hóshag o baresh dát.” É mesálay gwashagá rand Issáyá pa borztawári gwasht: “Harkasá pa eshkonagá gósh per, beshkont.”
LUK 8:9 Issáay moridán cha áiá é mesálay máná jost kort.
LUK 8:10 Áiá passaw dát: “Hodáyá é zánt shomárá dátag ke ásmáni bádsháhiay rázán sarpad bebét, bale pa á dega mardomán hoshkén darwar o mesál ant, tánke: ‘á bechárant, bale magendant beshkonant, bale sarpad mabant.’
LUK 8:11 É mesálay máná esh ent: Tohm Hodáay habar ant.
LUK 8:12 Ráhay sará retkagén tohmáni máná hamá mardom ant ke Hodáay habarán eshkonant, bale Shaytána kayt o cha áyáni delá Hodáay habarán dara kant ke chó mabit á báwar bekanant o berakkant.
LUK 8:13 Dhal o dhókén zeminay retkagén tohmáni máná hamá mardom ant ke Hodáay habarána eshkonant o pa gal o wasshia mannant, bale Hodáay habar áyáni delá risshag o wandhála najanant. Kammé wahdá wati imánay sará óshtant, bale ázmáesh o chakkásay wahdá poshtá kenzant.
LUK 8:14 Cherekk o dhangaráni tahá retkagén tohmáni máná hamá mardom ant ke Hodáay habarán eshkonant, bale zenday janjál o zarr o mál o aysh o nóshán mána gisshant o bar o samara nayárant.
LUK 8:15 Bale sharrén zeminá retkagén tohmáni máná hamá mardom ant ke Hodáay habarán gósha dárant o pa setk o del o pákén niyaté áyáni sará amala kanat o pa sabr bar o samara kárant.
LUK 8:16 Kasé ke cherágá róka kant, darpéay chérá chéria nadant yá tahtéay chérá éria nakant. Rókén cherágá cherágdáná éra kanant, tánke harkas ke lógá kayt áiay rozhná begendit.
LUK 8:17 Chéá ke hecch choshén chérén chizzé nést ke záher mabit o hecch choshén rázé nést ke zánag o áshkár kanag mabit.
LUK 8:18 Paméshká shomá hozzhár bét o bezánét ke che paymá eshkonét. Kaséá ke chizzé hast, áiá géshter dayaga bit o kaséá ke nést, bale gomána kant ke hasti, cha áiá hamá ham pach geraga bit.”
LUK 8:19 Padá Issáay mát o brát áiay gendagá átkant, bale cha mardománi bázén mocchiá áiay nazzikká átkesh nakort.
LUK 8:20 Issáesh hál dát ke “Tai mát o brát pa tai gendagá dhanná óshtátagant.”
LUK 8:21 Issáyá darráént: “Mani mát o brát hamá ant ke Hodáay habarán gósha dárant o áyáni sará amala kanant.”
LUK 8:22 Yakk róché Issáyá gón moridán gwasht: “Byáét gwarmay á dastá rawén.” Bójigá swár butant o ráh geptant.
LUK 8:23 Wahdé bójig rawagá at, Issá wáb kapt. Anágat syahgwátéá sar kort o tuppán but o bójig cha ápá porr bayagi at. Áyáni zend hataray tahá at.
LUK 8:24 Morid Issáay gwará shotant, cha wábá pád kort o gwashtesh: “Wájah, oo wájah! Má meragá én.” Á, cha wábá pád átk o tuppán o mastén daryái hakkal dátant. Gwát kapt o tuppán érmósh but.
LUK 8:25 Áiá gón wati moridán gwasht: “Shomay imán kojá shot?” Moridán cha é ajabén kárá torset o bah mantant o cha yakdomiá jostesh gept: “É chónén mardomé ke gwátá o ápá hokma dant o á ham áiay hokmá mannant.”
LUK 8:26 Gorhá Gerásiáni molká rasetant ke Jalilay damagay dém pa démá, mazangwarmay á dastá ent.
LUK 8:27 Wahdé Issá cha bójigá ér kapt o hoshkiá átk, cha shahray mardomán yakké ke jennán geptagat, gón áiá dochár kapt. Cha bázén wahdéá áiá pocch gwará nakortagat o lógéá naneshtagat, kabrestáná kaptagat.
LUK 8:28 Wahdé áiá Issá dist, kukkáré jati, áiay pádán kapt o gón borztawári gwashti: “Issá, oo borzén arshay Hodáay Chokk! Tará gón man che kár ent? Cha taw dazbandia kanán ke maná azáb maday.”
LUK 8:29 Áiá paméshká chosh gwasht ke Issáyá jenn hokm dátagat ke é mardá yalah beday. É mard pésará ham báz randá jenná geptagat, mardomán áiay dast o pád pa zamzil mohr bastagatant o ger o dár kortagat, bale mardá zamzil próshtagatant o jenná mard kasshán kortagat o gyábáná bortagat.
LUK 8:30 Issáyá cha áiá jost kort: “Tai nám kay ent?” Áiá passaw dát: “Mani nám lashkar ent,” chéá ke bázén jenné áiay badaná potertagat.
LUK 8:31 Jennán Issá mennat kort: “Márá johlén tahtarunay chátá rawagay hokmá maday.”
LUK 8:32 Hamódá kóhdémá hukkáni mazanén ramagé charagá at. Jennán Issáyá mennat kort: “Márá bell ke é hukkáni jesmá poterén.” Issáyá ejázat dátant.
LUK 8:33 Jennán á mard yalah dát o hukkáni jesmá potertant o hukkáni ramag cha kóhdémá jahlagá tachán but o gwarmá kapt o mort.
LUK 8:34 Gón é káray gendagá hukkáni chárénók tacháná shotant o shahr o métagesh hál dátant.
LUK 8:35 Mardom shotant ke gón wati chammán begendant. Issáay kerrá átkant o hamá mardesh dist ke jennán yalah kortagat. Á Issáay pádáni démá neshtagat, pocch o pósháki gwará at o hósh o sár at. Nun mardománi delá tors kapt.
LUK 8:36 Á ke wat chamdistén sháhed atant, á dega mardomesh hál dátant ke é jenni chónoká dráh butag.
LUK 8:37 Gerásiáni molkay sajjahén mardomán gón Issáyá dazbandi kort ke cha may molká dar á o beraw, chéá ke áyán sakk torset. Paméshká Issá bójigá swár but o shot.
LUK 8:38 Hamá mardá ke Issáyá áiay jenn kasshetagatant, gón Issáyá dazbandi kort ke maná bar gón. Bale Issáyá á mard per tarrént o gwashti:
LUK 8:39 “Lógá beraw o wati mardomán hál day ke Hodáyá gón taw chónén káré kortag.” Á mard shot o sarjamén shahrá jári jat ke Issáyá gón man ché kortag.
LUK 8:40 Wahdé Issá per tarret, rombé mardomá wasshátk kort, chéá ke sajjahén áiay rahchár atant.
LUK 8:41 Hamá wahdá Yáerus námén mardé ke kanisahay master at, Issáay kerrá átk, áiay pádán kapt o mennati kort ke mani lógá byá.
LUK 8:42 Chéá ke áiay yakkén jenekk ke omri dwázdah sálay kesásá at, markig at. Wahdé Issá áiay lógay némagá rawagá at, mardománi mocchi áiay chakká kapán at.
LUK 8:43 Hamódá yakk janéné hastat ke dwázdah sál at áiay hón pach at. Hechkasá ham á dráh kort nakortagat.
LUK 8:44 Hamá janén Issáay poshti némagá átk o áiay kabáhay lambi dast jat o hamá damáná hóni band but.
LUK 8:45 Gorhá Issáyá gwasht: “Kayá maná dast jat?” Wahdé hechkasá namannet, Petrosá gwasht: “Wájah! Mardomán tará angerr kortag o tai chakká kapán ant.”
LUK 8:46 Bale Issáyá padá gwasht: “Allamá kaséá maná dast per kort, man máret ke wák o twáné cha man dar átk.”
LUK 8:47 Wahdé janéná zánt ke é habar chér dayaga nabit, larzáná átk o Issáay pádán kapt. Áiá sajjahénáni démá gwasht ke man chéá Issá dast jatag o chón hamá damáná cha wati nádráhiá wassh butagan.
LUK 8:48 Issáyá gwasht: “Oo mani jenekk! Tai imáná tará dráh kort, pa wasshi o salámati beraw.”
LUK 8:49 Issá angat habará at ke cha kanisahay masteray lógá mardomé átk o Yáerusi hál dát ke tai jenekk mortag o nun ostádá géshter delsyáh makan.
LUK 8:50 Issáyá é habar eshkot o gón Yáerusá gwashti: “Mators, bass báwar kan, tai jenekk dráha bit.”
LUK 8:51 Wahdé Issá Yáerusay lógá raset, áiá Petros, Yuhanná, Ákub o hamá jenekkay pet o mátá abéd, dega hechkas hamráhiay ejázat nadát.
LUK 8:52 Sajjahén mardom gréwag o mótk áragá atant. Bale áiá gwasht: “Magréwét. Á namortag, wáb ent.”
LUK 8:53 Áyán Issáay sará kandet, chéá ke zántesh ke jenekk mortag.
LUK 8:54 Issáyá jenekkay dast gept o gón borzén tawáré gwashti: “Oo mani chokk! Pád á.”
LUK 8:55 Jenekkay sáh per tarret o á hamá damáná pád átk. Issáyá hokm dát: “Chokká warag bedayét.”
LUK 8:56 Chokkay mát o pet hayrán o habakkah mantant, bale Issáyá kaddhan kortant ke é habará gón hechkasá makanét.
LUK 9:1 Issáyá dwázdahén kásed lótháéntant, áyáná sajjahén jennáni kasshag o nájórhiáni dráh kanagay wák o ehtiári dát o
LUK 9:2 pa Hodáay bádsháhiay jár janag o nádráháni drah kanagá ráhi dátant.
LUK 9:3 Gwashti: “Pa wati sapará hecch chizz mazurét gón, na asáé, na lót o turagé, na nán o tóshag, na zarr o na géshén jámagé.
LUK 9:4 Wahdé lógéá rawét, tán shahray yalah dayagá hamá lógá bemánét.
LUK 9:5 Agan mardom shomárá wasshátka nakanant, cha áyáni shahrá dar áét o dar áyagay wahdá wati pádáni danz o hákán hamódá bechandhét tánke áyáni helápá sháhedi bebit ke shomá Hodáay kolaw pa áyán sar kortag.”
LUK 9:6 Gorhá Issáay morid dar kapt o métag pa métag har jáh, wasshén mestágesh pa mardomána rasént o nádráhén mardomesh dráha kortant.
LUK 9:7 Wahdé Jalilay hákem Hirudis é sajjahén habar o hálán sahig but, paréshán o takánsar but, chéá ke lahtén mardom Issáay bárawá gwashagá at ke Yahyá ent ke padá cha mordagán zendag butag.
LUK 9:8 Dega lahtén gwashagá at ke Elyás nabi záher butag, o dega lahtén gwashagá at ke cha péshi zamánagay paygambarán yakké ke padá zendag butag.
LUK 9:9 Gorhá Hirudisá gwasht: “Yahyáay sar wa man borretag, nun é kay ent ke áiay bárawá man é dhawlén hál eshkonagá án?” Á pa Issáay gendagá hodónák at.
LUK 9:10 Wahdé Issáay kásed cha wati sapará per tarret o átkant, wati kortagén káráni hálesh Issáyá sar kort. Gorhá Issáyá á gón wat hamráh kortant o Bayt-Saydá námén shahréá shot tánke á cha mardomán dur o gestá bebant.
LUK 9:11 Bale wahdé mardom sahig butant, áiay hamráh butant. Issáyá á wasshátk kortant, Hodáay bádsháhiay bárawá sar o sój dátant o nádráhén mardomi ham wassh o dráh kortant.
LUK 9:12 Rónenday wahdá dwázdahén kásed átkant o gwashtesh: “Nun é mardomán ráh day ke é kash o gwaray métag o bázárán berawant o pa wat warag o wapsagay band o bast bekanant, chéá ke má edá gyábánéá én.”
LUK 9:13 Bale Issáyá gwasht: “Shomá wat eshán warák bedayét.” Áyán passaw dát: “May kerrá panch nagan o do máhigá abéd dega hecch nést. Taw ché gwashay, má berawén o pa é sajjahén mardomán warák begerén?”
LUK 9:14 Cha á mardomán kesás panch hazár mardén atant. Issáyá gón moridán gwasht: “Mardomán panjáh panjáhay thóliá benádénét.”
LUK 9:15 Moridán anchosh kort o sajjahén nádéntant.
LUK 9:16 Issáyá panchén nagan o doén máhig zortant o ásmánay némagá cháret, Hodáay shogri gept o padá nagan o máhigi chondh chondh kort o moridáni dastá dátant ke mardománi sará bahresh kanét.
LUK 9:17 Sajjahénán sérá wárt o angat cha sar átkagén chondhán dwázdah sapt porr but.
LUK 9:18 Yakk róché Issá tahnáiá dwá kanagá at o bass morid gón áiá gón atant. Cha moridán josti kort: “Mardom mani bárawá ché gwashant, man kay án?”
LUK 9:19 Áyán passaw dát: “Lahténa gwashit taw pákshódi dayókén Yahyá ay o lahténa gwashit taw Elyás nabi ay. Dega lahténa gwashit ke taw cha pésarigén zamánagay á dega nabián yakké ay o padá zendag butagay.”
LUK 9:20 Áiá jost kort: “Shomá wat mani bárawá ché gwashét, man kay án?” Petrosá passaw dát: “Taw Hodáay ráh dátagén hamá Masih ay.”
LUK 9:21 Bale Issáyá á hokm dátant ke “É habará gón hechkasá magwashét.”
LUK 9:22 Gwashti: “Ensánay Chokk báyad ent bázén sakki o sórié besaggit. Kawmay kamásh, mazanén dini péshwá o Sharyatay zánóger allamá áiá namannant o kóshárénant o sayomi róchá á padá zendaga bit.”
LUK 9:23 Issáyá sajjahén mardom gwashtant: “Agan kasé lóthit mani randgiriá bekant, wati delay lóth o wáhagán bekoshit o har róch wati jenday salibá baddhá bekant o mani randgiriá bekant.
LUK 9:24 Chéá ke harkas ke wati sáhay rakkénagay johdá kant, gária dant o harkas ke mani háterá wati sáhá nadra kant, rakkéniti.
LUK 9:25 Agan yakkéá sajjahén donyá berasit bale wati sáhá gár bedant, gorhá áiá che páedaga rasit?
LUK 9:26 Agan kasé cha man o mani habarán sharmendag bebit, gorhá Ensánay Chokk ham á wahdi ke gón watig o ásmáni Petayg o pákén préshtagáni shán o shawkatá é jaháná padá kayt, cha áiá sharmendaga bit.
LUK 9:27 Bale man shomárá rásténa gwashán, edá lahtén mardom óshtátag ke tánke Hodáay bádsháhiá magendant, é namerant.”
LUK 9:28 Cha é habarán kesás hasht róchá rand Issáyá Petros o Yuhanná o Ákub hamráh kortant o pa dwáyá kóhéay sará shot.
LUK 9:29 Wahdé Issá dwá kanagá at, áiay démay rang badal but o posháki sakk espét but o drapshagá laggetant.
LUK 9:30 Yakk anágat do mardom záher but o gón Issáyá habar kanagá laggetant. Yakké Mussá at o domi Elyás.
LUK 9:31 Á doén gón shán o shawkaté záher butant o Issáay markay bárawá habaresh kort ke allamá Urshalimá bayagi at.
LUK 9:32 Petros o áiay hamráh Yuhanná o Ákub kóchandhagá atant, bale wahdé sharriay sará ágah butant, Issáay shán o shawkatesh dist o gón áiá doén oshtátagén mardomesh ham distant.
LUK 9:33 Wahdé á doén Issáyá roksat kanag o rawagá atant, Petrosá gwasht: “Wájah! May edá bayag sakk sharr ent, bell ke má say sáheg o kápára bandén, yakké pa taw, yakké pa Mussáyá o yakké pa Elyásá.” Petrosá wat nazánt ke ché gwashagá ent.
LUK 9:34 Petros angat habará at ke jambaré átk o áyáni sará sáhél but. Wahdé jambar áyáni sará sáhél but, moridán torset.
LUK 9:35 Cha jambará tawáré átk: “É mani Bacch ent ke man gechén kortag, eshiay habarán gósh bedárét.”
LUK 9:36 Tawáray eshkonagá rand moridán Issá éwaká dist. Áyán é sargwast wati delá dásht o á wahdá wati distagénesh gón hechkasá nagwasht.
LUK 9:37 Domi róchá wahdé Issá o sayén morid cha kóhá ér átkant, mardománi mazanén mocchié átk o gón Issáyá dochár kapt.
LUK 9:38 Cha mocchiay nyámá mardéá kukkár kort o gwasht: “Oo ostád! Gón taw dazbandia kanán, mani bachakká bechár, mani yakkén chokk ent.
LUK 9:39 Jenné anágat mani chokká gipt o zhámbalénit o hamá damáná chokk ják o kukkára kant o gajj o kapa bit. Áiá sakk kamm yalaha dant o áiá némjána kant.
LUK 9:40 Man gón tai moridán dazbandi kort ke é jenná bekasshét, bale áyán kasshet nakort.”
LUK 9:41 Issáyá gwasht: “Oo bébáwar o gomráhén nasl o padréch! Man tán kadéná gón shomá bemánán o shomárá besaggán? Chokká edá byár.”
LUK 9:42 Wahdé chokk pédák at, jenná zhámbalént o dhagárá jat. Issáyá jenn hakkal dát, chokk dráh kort o petay dastá dát.
LUK 9:43 Sajjahén mardomán Hodáay shán dist o hayrán o habakkah butant. Wahdé sajjahén mardom cha Issáay mójezahán hayrán atant, áiá gón wati moridán gwasht:
LUK 9:44 “Mani é habarán pa sharri delgósh kanét, Ensánay Chokk mardománi dastá dayaga bit.”
LUK 9:45 Bale morid áiay é habará sarpad nabutant, chéá ke pa áyán ramz o rázé at. Cha Issáyá jost kanagesh ham torset.
LUK 9:46 Issáay morid watmánwatá é gappay sará dapjáká laggetant ke may tahá masterén mardom kay ent?
LUK 9:47 Issáyá áyáni delay habar zánt o yakk kasánén chokké wati kashá óshtárént o
LUK 9:48 gón moridán gwashti: “Harkas ke pa mani námá é kasánén chokká wasshátka kant o sharapa dant, bezán á maná sharapa dant. Harkas ke maná sharapa dant, áiá ham sharapa dant ke maná ráhi dátag, chéá ke shomay master hamá ent ke watá cha sajjahénán kastera zánt.”
LUK 9:49 Yuhannáyá gón Issáyá gwasht: “Wájah! Má yakk mardé dist ke tai námay sará mardománi jennán kasshagá at, bale má naesht, chéá ke á cha má naat.”
LUK 9:50 Issáyá gwasht: “Na, é kárá makanét, chéá ke agan kasé shomay heláp naent shomay némagá ent.”
LUK 9:51 Wahdé Issáay chest bayag o ásmáná rawagay wahd nazzikk but, gón deljamén shawré dém pa Urshalimá ráh gept.
LUK 9:52 Bale cha wat pésar lahtén kásedi ráh dát. Á shotant o Sámeriáni métagéá rasetant tánke cha áiay áyagá pésar pa áiá tayári bekanant.
LUK 9:53 Bale óday mardomán Issá wasshátk nakort chéá ke á Urshalimá rawagá at.
LUK 9:54 Wahdé Issáay morid Ákub o Yuhanná cha é hálá sahig butant, gwashtesh: “Oo Hodáwand! Taw razá dayay má cha Hodáyá belóthén ke cha ásmáná ásé ráh bedant o eshán hák o por bekant?”
LUK 9:55 Bale Issáyá chakk tarrént o hakkal dátant.
LUK 9:56 Randá gón wati moridán, dega métagéá shot.
LUK 9:57 Issá o áiay morid ráhá rawagá atant. Mardéá gwasht: “Har jáh ke taw raway, man tai randgiriá kanán.”
LUK 9:58 Issáyá gwasht: “Róbáhán hóndh hast o báli morgán kodóh, bale Ensánay Chokká pa saray ér kanagá hecch jágah nést.”
LUK 9:59 Issáyá gón dega mardéá gwasht: “Byá, mani randgiriá bekan.” Bale áiá passaw dát: “Oo wájah! Maná ejázat beday ke pésará berawán o wati petá kabr o kapan bekanán.”
LUK 9:60 Issáyá gwasht: “Bell ke mordag wati mordagán wat kabr o kapana kanant, taw beraw o Hodáay bádsháhiay wasshén mestágá pa mardomán sar kan.”
LUK 9:61 Degaréá gwasht: “Oo wájah! Man tai randgiriá kanán, bale maná bell ke pésará wati lógay mardomán roksat bekanán.”
LUK 9:62 Issáyá áiay passawá gwasht: “Á kas ke nangár kanagay wahdá poshtá chárit, Hodáay bádsháhiay hezmatkáriay láhek naent.”
LUK 10:1 Eshiá rand Hodáwandén Issáyá dega haptád morid gechén kort o hamá shahr o métagán ke rawagi at, cha wat pésar, do doá ráhi dátant o
LUK 10:2 gón áyán gwashti: “Keshár báz ent bale ronók kamm, paméshká gón kesháray wáhondá dazbandi bekanét ke pa wati keshárán ronók dém bedant.
LUK 10:3 Berawét, man shomárá rawána dayán, bale shomá anchosha bét ke gorkáni nyámá gwarag.
LUK 10:4 Wati sát o sapará gón wat na zarturag o lót o pélek bezurét o na chawatth. Ráhá, gón kassá tayárjórhi makanét.
LUK 10:5 Har lógéá ke rawét awalá begwashét: ‘É lógay mardom émen bátant’.
LUK 10:6 Cha á lógay mardomán agan kasé émeniay lóthók ent, shomay nékdwáiay barkatá áiá émenia rasit o agan na, é émeni shomay jendá rasit.
LUK 10:7 Hamá yakkén lógá bedárét o lóg pa lóg marawét. Harché ke shomárá pa waragá dátesh, bwarét o benóshét, chéá ke kár kanók wati rózigay hakdár ent.
LUK 10:8 Har shahréá ke rawét o á shahray mardom shomárá wasshátka kanant, gorhá harché ke pa waragá kárant, bwarét.
LUK 10:9 Á shahray nádráhán dráh kanét o mardomán begwashét ke Hodáay bádsháhi shomay kerrá átkag o sar butag.
LUK 10:10 Bale agan shahréá shotét ke á shahray mardomán shomárá wasshátk nakort, gorhá cha ódá dar áét o hamá shahray rahsarán harkasá ke gendét, áiá begwashét:
LUK 10:11 ‘Shomay shahray hamá danz ke may pádán per butagant, máesh hamedá chandhén, tánke é danz shomay helápá sháhedi bedayant. Bale bezánét ke Hodáay bádsháhi átkag o sar butag.’
LUK 10:12 Shomárá gwashán, jost o porsay róchá, á shahray sezá cha Sodumay sezáyá gantera bit.
LUK 10:13 Bazhn o apsóz pa shomá, oo Korázinay mardomán! Bazhn o apsóz pa shomá, oo Bayt-Saydáay mardomán! Hamá mójezah ke man shomárá pésh dáshtagant, agan Sur o Saydunay shahrán pésh bedáshténant, gorhá óday mardomán hamá damáná wati gonáháni pashómániay póshák gwará kortagat o poráni sará neshtagatant.
LUK 10:14 Jost o porsay róchá, shomay sezá cha Sur o Saydunay sezáyá gantera bit.
LUK 10:15 Oo Kaparnáhumay mardomán! Shomá chest kanag o ásmáná baraga bét? Hechbar! Mordagáni jaháná sarshakuna bét.
LUK 10:16 Agan kasé shomay habarán gósh bedárit, á mani habarán ham gósha dárit. Harkas shomárá namannit, á maná ham namannit o hamá ke maná namannit, áiá ham namannit ke maná ráhi dátag.”
LUK 10:17 Issáay haptádén morid pa galé per tarretant o gwashtesh: “Oo Hodáwand! Tai námay barkatá jenn ham may hokmá mannant.”
LUK 10:18 Issáyá darráént: “Man Shaytán dist ke gerókéay dhawlá cha ásmáná kapt.
LUK 10:19 Man shomárá hamá ehtiár dátag ke már o zummán o dozhmenay sajjahén wák o kodratá lagatmál bekanét. Hecch chizz shomárá táwán dáta nakant.
LUK 10:20 Bale pa eshiá gal mabét ke jenn shomay hokmána mannant, pa eshiá gal bebét ke shomay nám ásmáná nebisag butag.”
LUK 10:21 Hamá damáná Issá Pákén Ruhay barkatá gal but o gwashti: “Oo mani Pet, ásmán o zeminay Hodábond! Tará satá kanán o sárháyán ke taw é habar cha dáná o aglmandán chér dátant o pa sádagén mardomán záher kortant. Haw mani Pet! Taw cha wati razáyá chó kort.
LUK 10:22 Sajjahén chizz Petá mani dastá dátagant. Kass nazánt ke Chokk kay ent, tahná Peta zánt. Hamé dhawlá, tahná Chokka zánt ke Pet kay ent o á mardom ham zánant ke Chokk belóthit Petá pa áyán záher bekant.”
LUK 10:23 Padá Issáyá dém gón moridán kort o ehwatá gwashtanti: “Bahtáwar ant hamá chamm ke harché shomá distag, á ham begendant.
LUK 10:24 Man shomárá gwashán, bázén paygambar o bádsháhéá lóthetag ke harché shomá gendagá ét má ham bedistén, bale nadistesh o harché shomá eshkonagá ét má ham beshkotén bale naeshkotesh.”
LUK 10:25 Nun cha Sharyatay kázián yakké pa Issáay chakkásagá pád átk. Josti kort: “Oo ostád! Man chón bekanán ke abadmánén zenday wáhond bebán?”
LUK 10:26 Issáyá passaw dát: “Sharyatá ché nebeshtah ent, cha áiay wánagá taw ché sarpada bay?”
LUK 10:27 Áiá passaw dát: “Wati Hodáwandén Hodáyá cha delay johlánkiá o gón sajjahén ján o sáh o gón sajjahén was o wák o gón sajjahén pahm o pegrá dóst bedáro wati hamsáhegá wati jenday paymá dóst bedár.”
LUK 10:28 Issáyá gwasht: “Taw sharr gwasht, hamé dhawlá bekan, tará abadmánén zenda rasit.”
LUK 10:29 Sharyatay zánógerá pa é niyatá ke pésh bedárit man sharrén josté kortag, cha Issáyá josti kort: “Gorhá mani hamsáheg kay ent?”
LUK 10:30 Issáyá áiay passawá gwasht: “Yahudi mardé cha Urshalimá dém pa Ariháay shahrá rawagá at ke dhongán gept. Áiay gwaray pocchesh kasshetant, áiay jendesh jat o némján kort o shotant.
LUK 10:31 Bé gat o gománá cha hamé ráhá yakk dini péshwáé gwazagá at, wahdé é mardi dist, wati ráhi táb dát o gwast.
LUK 10:32 Hamé dhawlá, mazanén parasteshgáhay hezmatkáré hamingor átk. Wahdé á mardi dist, ráhay domi némagi gept o shot.
LUK 10:33 Bale randterá Sámeri kawmay yakk mardé cha ódá gwazán hamé jágahá raset. Wahdé á mardi dist, áiay sará bazzagi but.
LUK 10:34 Áiay kerrá átk o thappi thél o sharáb jat o bastant, wati óláká swári kort, yakk kárwánsaráéá áwort o áiay hayáldárii kort.
LUK 10:35 Domi róchá kárwánsaráay hodábondi do dinár dát o gwashti: ‘É marday hayáldáriá bekan, agan cha é zarrán géshter pakár but, per tarragay wahdá tará dayán.’”
LUK 10:36 Gorhá Issáyá cha hamá Sharyatay zánógerá jost kort: “Taw ché gwashay, cha á sayénán kojám yakk hamá marday hamsáheg at ke dhongán geptagat?”
LUK 10:37 Áiá passaw dát: “Hamá ke áiay sará bazzagi but.” Issáyá gwasht: “Beraw, taw ham anchosh bekan.”
LUK 10:38 Issá o áiay morid ke ráhá atant, átk o métagéá rasetant. Ódá Martá námén janénéá Issá wati lógá mehmán kort.
LUK 10:39 Martáyá Maryam námén goháré hastat ke pa Hodáwandén Issáay habaráni gósh dáragá áiay pádáni démá nesht.
LUK 10:40 Bale Martá ke mehmániay káráni chen o lánchá dazgatth at, Issáay kerrá átk o gwashti: “Oo Hodáwand! Tará é habaray parwáh nést ke mani gohárá maná tahná yalah dátag o sajjahén kár mani sará ant? Begwashi maná komakk bekant.”
LUK 10:41 Bale Hodáwandén Issáyá passaw dát: “Martá, oo Martá! Taw bázén kár o báráni sará watá negrán o paréshána kanay,
LUK 10:42 bale tahná yakk chizzé pakár ent. Hamá ke sharter ent Maryamá pa wat gechén kortag o cha áiá pach geraga nabit.”
LUK 11:1 Yakk baré Issá jágahé dwá kanagá at. Wahdé dwái halás kort, cha áiay moridán yakkéá gwasht: “Oo Hodáwand! Anchosh ke Yahyáyá wati morid dwá kanag sój dátagant, hamé paymá taw ham márá dwá kanag sój beday.”
LUK 11:2 Issáyá gwasht: “Harwahd ke dwá kanét, chó begwashét: ‘Oo Pet! Tai pákén nám sharapdár bát. Tai bádsháhi byáyát.
LUK 11:3 May har róchigén rezk o rózigá har róch márá beday.
LUK 11:4 May radián bebaksh, anchosh ke má hamá sajjahén mardom bakshetagant ke gón má badiesh kortag. Márá ázmáesh o chakkásá dawr maday.’”
LUK 11:5 Padá Issáyá gwasht: “Agan cha shomá yakké shapay némá wati sangatay lógá berawt o begwashit: ‘Oo dóst! Maná say nagan pa badal beday
LUK 11:6 ke mani dósté sapará butag o mani kerrá mán tarretag o maná hecch nést ke áiay démá bedayán,’
LUK 11:7 o á cha wati lógá jwáb bedant o begwashit: ‘Maná delsyáh makan, nun lógay dap band ent o man gón chokkán waptagán. Annun pád átka nakanán ke tará chizzé bedayán.’
LUK 11:8 Shomárá gwashán, é mard agan pa dósti pád mayayt o áiá chizzé madant, bale bannámiay torsá páda kayt o harché ke áiá pakár ent, danti.
LUK 11:9 Nun shomárá gwashán: Belóthét, shomárá dayaga bit. Shóház bekanét, shomárá rasit. Darwázagá bethokkét, pa shomá pach kanaga bit.
LUK 11:10 Chéá ke harkas belóthit, áiá dayaga bit. Harkas shóház bekant, áiá rasit. Harkas darwázagá bethokkit, pa áiá pach kanaga bit.
LUK 11:11 Shomay nyámá choshén peté hast ke agan áiay chokk máhig belóthit, máré bedanti?
LUK 11:12 Yá agan hayké belóthit, zummé bedanti?
LUK 11:13 Nun agan shomá ke radkár ét, angat ham wati chokkán sharrén chizzáni dayagá zánét, gorhá may ásmáni Pet chinkadar shartera zánt ke Pákén Ruhá hamáyán bedant ke cha áiá lóthant.”
LUK 11:14 Yakk baré Issá yakkéay jenná kasshagá at ke á mardi gong kortagat. Wahdé jenn dar átk, gongén mard habará lagget o sajjahén mardom hayrán butant.
LUK 11:15 Bale lahténá gwasht: “Issá gón jennáni sardár Belzabulay zórá jennána kasshit.”
LUK 11:16 Dega lahténá pa Issáay chakkásagá cha áiá ásmáni neshánié lóthet.
LUK 11:17 Bale Issáyá áyáni hayál zántant o gwashti: “Har molkéá ke nátepáki bebit, á molk wayrána bit o har lógéá ke nátepáki bebit, á lóg barbáda bit.
LUK 11:18 Agan Shaytán gón wat nátepák bebit, gorhá áiay bádsháhi chón barjáha mánit? Shomá gwashét ke man gón jennáni sardár Belzabulay zórá jennána kasshán.
LUK 11:19 Nun agan man gón Belzabulay zórá jennán bekasshán, gorhá shomay morid gón kai zórá jennána kasshant? É paymá, shomay moridáni jend shomay kázia bant.
LUK 11:20 Bale agan man gón Hodáay zórá jennána kasshán, bezánét ke Hodáay bádsháhi shomay nyámá rasetag.
LUK 11:21 Agan yakk zóráwarén mardomé selahband bebit o wati lógay negahpániá bekant, gorhá áiay mál o azbáb barjáha mánant.
LUK 11:22 Bale wahdé zórmandterén mardomé áiay lógay sará hamlah bekant o áiay sará báládast bebit, hamá seláhán ke á mard cha áyán deljam at, cha áiá pacha gipt o áiay mál o azbábán bahr o bánga kant.
LUK 11:23 Kasé ke mani hamráh naent, á mani heláp ent, kasé ke mocch o yakjáh kanagá gón man gón naent, á sheng o shánga kant.
LUK 11:24 Wahdé jenné cha mardoméay jáná dara kayt, gorhá béápén jágahána tarrit ke pa wati árám o ásudagiá jáhé shóház bekant, bale choshén jágahé narasiti. Gorhá gwashit: ‘Cha hamá lógá ke dar átkagán, padá hamódá rawán.’
LUK 11:25 Wahdé pera tarrit o gendit ke á lóg roptag o barábar ent,
LUK 11:26 gorhá rawt o cha wat ganterén dega hapt jenn hamráha kant o kayt. Á poterant o hamódá hankéna kanant. É dhawlá á mardomay ásar o ákebat cha pésarigén hálatá ham gantera bit.”
LUK 11:27 Hamé wahdá ke Issá é habarán kanagá at, cha mardománi nyámá yakk janénéá gwánk jat: “Bahtáwar hamá mát ent ke cha áiay lápá taw pédá butagay o tará shiri méchéntag.”
LUK 11:28 Issáyá áiay passawá darráént: “Bale hamá bahtáwarter ant ke Hodáay habarán gósha dárant o áyáni sará amala kanant.”
LUK 11:29 Wahdé mardománi mocchi géshter bayán at, Issáyá gwasht: “É zamánagay mardom badkár mardom ant. Ajabbatén neshánia lóthant, bale áyán Yunos nabiay neshániá abéd, dega hecch neshánié dayaga nabit.
LUK 11:30 Anchosh ke pa Naynawáay mardomán Yunos neshánié at, hamé paymá Ensánay Chokk ham pa é zamánagay mardomán neshánié bit.
LUK 11:31 Jost o porsay róchá Sabáay shahbánok gón é zamánagay mardomán hórigá páda kayt o eshán mayáriga kant, chéá ke Sabáay shahbánok cha donyáay á dastá átk ke Solaymán bádsháhay dánáiá begendit. Bale nun cha Solaymáná masteréné edá átkag.
LUK 11:32 Jost o porsay róchá Naynawáay mardom gón é zamánagay mardomán hórigá páda káyant o eshán mayáriga kanant, chéá ke Naynawáay mardomán Yunosay járay sará tawbah kort. Bale nun cha Yunosá masteréné edá átkag.
LUK 11:33 Hechkas cherágá pa chér dayagá róka nakant o na áiá kásagay chérá éra kant. Áiá cherágdánay sará éra kant, tánke harkas ke lógá kayt, áiay rozhn begendit.
LUK 11:34 Tai chamm tai badanay cherág ant. Wahdé tai chamm sharr ant, tai sajjahén badan rozhná bit, bale agan tai chamm haráb ant, gorhá tai badan ham tahára bit.
LUK 11:35 Hozzhár bay, é nur ke tai tahá hastent, taháriay tahá badal mabit.
LUK 11:36 Agan tai sajjahén badan rozhná bebit o áiay hecch bahré tahár mabit, gorhá sarjamiá drapshnáka bit, anchosh ke cherágay shahm tará rozhná kant.”
LUK 11:37 Wahdé Issáyá habar halás kortant, yakk Parisiéá á wati lógá mehmán kort. Issá áiay lógá shot o pa warákay waragá parzónagay sará nesht.
LUK 11:38 Bale wahdé Parisiá dist ke Issáyá cha waragá pésar wati dast nashoshtant, hayrán mant.
LUK 11:39 Gorhá Hodáwandén Issáyá dém gón áiá kort o gwashti: “Shomá Parisi pyálah o kásagáni dhanni némagá sáp o sallaha kanét, bale shomay del o darun cha lálech o tamáh o badiá sarréch ent.
LUK 11:40 Oo násarpadán! Áiá ke shomay dhanni némag, bezán badan addh kortag, shomay del o darun ham hamáiá jórh kortag.
LUK 11:41 Gorhá wati del o daruná hayrát bedayét tánke sajjahén chizz pa shomá sáp o sallah bebant.
LUK 11:42 Oo Parisián! Bazhn o apsóz pa shomá ke purchénk o sadáp o é dega káhokáni sará dahyakka dayét, bale cha ensáp o Hodáay mehrá nádelgósh ét. Drégatá shomá é kár bekorténant o á ham yalah madáténant.
LUK 11:43 Oo Parisián! Bazhn o apsóz pa shomá ke kanisaháni sharterén jágahán o bázárán mardománi salám o drótán dósta dárét.
LUK 11:44 Bazhn ent, shomá hamá kabráni paymá ét ke áyáni sará seng o shakk nést o gendaga nabant o mardom pa názánti áyána lapáshant o gwazant.”
LUK 11:45 É habaráni sará Sharyatay káziéá gwasht: “Oo ostád! Taw gón wati é habarán márá ham béezzat kanagá ay.”
LUK 11:46 Issáyá gwasht: “Oo Sharyatay kázián! Pa shomá ham bazhn o apsóz ent. Shomá mardománi chakká gránén bára laddhét ke cha áyáni zórá gésh ent, bale shomá wat pa áyáni komakká lankoké ham nasorénét.
LUK 11:47 Bazhn o apsóz pa shomá! Hamá nabiáni kabrána bandét ke shomay pet o pirokán koshtagant.
LUK 11:48 É paymá shomá wat gwáhi dayét ke may pet o pirokán sharrén kár kortag. Áyán nabi koshtagant o shomá nabiáni kabrána bandét.
LUK 11:49 Paméshká Hodáyá cha wati hekmatá gwashtag: Man pa áyán paygambar o kásed ráha dayán, bale á lahténá koshant o lahténá ázára dayant.
LUK 11:50 Paméshká cha donyáay bongéjá hamá sajjahén paygambar ke mardomán koshtagant, áyáni hón é zamánagay mardománi gardená ent,
LUK 11:51 bezán Hábilay hóná beger tán Zakaryáay hóná ke korbánjáh o mazanén parasteshgáhay nyámá réchag but. Haw! Shomárá gwashán ke é zamánagay mardom á sajjahén hónáni daynkár ant.
LUK 11:52 Oo Sharyatay kázián! Bazhn ent ke shomá zántay hazánagay kelit zort o bort, wat tahá nayátkét o áyáni dém ham dásht ke tahá rawagesh lóthet.”
LUK 11:53 Wahdé Issá cha ódá dar átk, Parisi o Sharyatay zánóger gón zahrnáki áiay démá óshtátant o bázén josté kanagá laggetant, tánke Issáyá cha áiay jenday habarán mán begisshénant o dámá dawr bedayant.
LUK 12:1 Hamé wahdá hazárán mardom mocch but. Harkas domiá lagat kanán at. Issáyá sajjahénán pésar gón moridán wati habar bongéj kort o gwashti: “Cha Parisiáni homirá ke ryákári o dotal o dopóstiay homir ent, watá dur bedárét,
LUK 12:2 chéá ke hecch choshén chérén chizzé nést ke záher mabit o hecch choshén rázé nést ke zánag mabit.
LUK 12:3 Paméshká, har habaré ke shomá shapay taháriá kortag, róchay rozhnáiá eshkonaga bit o har habaré ke shomá lógay tah o tóki kóthiáni tahá pa halwat kortag, mardom lógáni sará sara kapant o á habaray járá janant.
LUK 12:4 Oo mani dóstán! Shomárá gwashán ke cha hamáyán matorsét ke shomay badaná koshta kanant bale cha eshiá géshter hecch korta nakanant.
LUK 12:5 Man shomárá gwashán ke cha kayá betorsét. Cha hamáiá betorsét ke koshagá rand dózahá dawr dayagay wáki o ehtiári hast. Haw! Man shomárá gwashán ke cha hamáiá betorsét.
LUK 12:6 Panch jengol pa do paysahá bahá bit. Bale Hodá cha é jengolán yakkéá ham béhayála nabit.
LUK 12:7 Hodáyá shomay saray mudáni hesáb ham gón ent. Gorhá matorsét chéá ke shomay arzesh cha sajjahén jengolán géshter ent.
LUK 12:8 Man shomárá gwashán ke harkas ke mardománi démá mani gwáhiá dant, Ensánay Chokk Hodáay préshtagáni démá áiay gwáhiá dant o
LUK 12:9 harkas ke mardománi démá mani gwáhiá nadant, man Hodáay préshtagáni démá áiay gwáhiá nadayán.
LUK 12:10 Hamé dhawlá, agan kasé Ensánay Chokkay helápá habaré bekant pahell kanaga bit, bale harkas ke Pákén Ruhay bárawá kopr bekant, á bakshaga nabit.
LUK 12:11 Wahdé mardom shomárá gerant o kanisahána barant o hákem o hokumatáni démá pésha kanant, paréshán mabét ke pa wati démpániá ché begwashén,
LUK 12:12 chéá ke Pákén Ruh shomárá hamá wahdá wat sója dant ke ché begwashét.”
LUK 12:13 Cha mardománi mocchiá, yakkéá gón áiá gwasht: “Oo ostád! Mani brátá begwash ke cha petay mirásá mani bahrá begisshénit o bedant.”
LUK 12:14 Issáyá passaw dát: “Oo mard! Kassá maná shomay kázi o dáwar nakortag.”
LUK 12:15 Padá gón mardomán gwashti: “Hozzhár bét! Watá cha har dhawlén tamáh o lálechá dur bedárét, chéá ke mál o dawlatay zyádahi ensánay zenday maksad o morád naent.”
LUK 12:16 Mesálé dát o gwashti: “Sérén zemindáré hastat ke áiá cha wati dhagárán bázén kesháré raset.
LUK 12:17 Nun wati delá gwashti: ‘Ché bekanán? Maná pa esháni ambár kanagá jágah nést.’
LUK 12:18 Padá gwashti: ‘Nun zánán ché bekanán. Wati ambárána karóján o esháni jágahá masterén ambára bandán o wati sajjahén dán o chizzán hamódá ambára kanán.
LUK 12:19 Padá gón wata gwashán: “Taw pa báz sálá mazanén málé mocch kortag. Nun ásudag bay, wassh bwar o benósh o gal bay!”’
LUK 12:20 Bale Hodáyá gwasht: ‘Oo nádán! Hamé shapay jendá cha taw geraga bit, gorhá tai é mocch kortagén mál o melkat kaiga bant?’
LUK 12:21 Esh ent hamá mardomay ásar o ákebat ke pa wat mál ambára kant bale Hodáay gwará hastómand naent.”
LUK 12:22 Issáyá gón moridán gwasht: “Paméshká shomárá gwashán ke pa wati zendá paréshán mabét ke ché bwarén, na pa wati badaná ke ché bepóshén.
LUK 12:23 Chéá ke zend cha waráká o badan cha pósháká géshtera karzit.
LUK 12:24 Gwarágán bechárét, na keshant o na ronant o na bán o ambáresh hast. Bale angat Hodá áyán róziga dant. Shomay arzesh cha morgán báz géshter ent.
LUK 12:25 Hechkas pa pegr o parésháni wati zenday róchán damáné ham gésh korta nakant.
LUK 12:26 Agan shomá inchokén kasánén káré korta nakanét, gorhá chéá zenday dega chizzáni bárawá watá paréshána kanét?
LUK 12:27 Oo kambáwarán! Gol o polláni némagá delgósh kanét ke chón rost o rodóma kanant. Na zahmaté kasshant o na résant o gwapant, bale man shomárá gwashán ke Solaymáná gón wati mazanén shán o shawkatá é polláni dhawlén póshák gwará nabutag.
LUK 12:28 Wahdé Hodá gyábánay káhán ke maróchi hastant o bándá taruná sóchaga bant, chó brahdára kant, gorhá shomárá che paymá sharterén pósháka nadant?
LUK 12:29 Paméshká wati sarjamén delgóshá ward o nóshay némagá makanét o é chizzáni barawá paréshán mabét.
LUK 12:30 Donyáay hodánábáwarén mardom é sajjahén chizzáni randá tachant, bale shomay ásmáni Peta zánt ke shomárá é chizz pakár ant.
LUK 12:31 Hodáay bádsháhiay shóházá bebét, é sajjahén wat shomárá dayaga bant.
LUK 12:32 Oo mani kasánokén rombay mardomán! Matorsét, chéá ke shomay ásmáni Petay razá o wáhag hamesh ent ke bádsháhiá shomárá bedant.
LUK 12:33 Wati mál o melkatá bahá kanét o nézgáráni sará bahr kanét. Pa wat anchén zarturag addh bekanét ke hechbar kwahna nabant, ásmáná anchén ganjé ambár bekanét ke na halása bit, na dozzéi áiay nazzikká kayt o na warók o ramézia warant.
LUK 12:34 Parchá ke hamódá ke shomay mál ent, shomay del ham hamódá bit.
LUK 12:35 Lánká bebandét o wati cherágá rók bedárét.
LUK 12:36 Hamá hezmatkáráni paymá bebét ke wati wájahay rahchár ant ke kadén cha sur o árósay shádehán pera tarrit o anchosh ke kayt o darwázagá thokkit, á darwázagá pa áiá pacha kanant.
LUK 12:37 Bahtáwar ant hamá hezmatkár ke áyáni wájaha kayt o gendit ke ágah o hozzhár ant. Man shomárá rásténa gwashán, áyáni wájahay jend pa áyáni hezmatá lánka bandit, áyána nádénit o warag démá dant.
LUK 12:38 Bahtáwar ant hamá hezmatkár ke agan áyáni wájah shapay domi yá sayomi pásá ham byayt, gendit ke ágah ant.
LUK 12:39 Shomá sharra zánét, agan lógay hodábondá bezántén dozz kojám wahdá kayt, gorhá áiá hechbar dozz wati lógay janagá naeshtagat.
LUK 12:40 Hamé paymá tayár bebét, chéá ke Ensánay Chokk anchén wahdéá kayt ke shomá áiay entezár o wadárá nabét.”
LUK 12:41 Petrosá gwasht: “Oo Hodáwand! É mesál taw pa má áwort yá pa sajjahénán?”
LUK 12:42 Hodáwandén Issáyá gwasht: “Amánatdár o dánáén kármaster hamá ent ke wájah áiá wati é dega sajjahén hezmatkáráni master bekant tánke áyán pa wahd ward o warák bedant.
LUK 12:43 Bahtáwar ent hamá hezmatkár ke wahdé wájaha kayt, áiá hamá káráni sará gendit.
LUK 12:44 Shomárá rásténa gwashán, wájah hamá hezmatkárá wati sajjahén mál o hastiay kármastera kant.
LUK 12:45 Bale agan hamá kármaster wati delá begwashit: ‘Angat mani wájahay áyagá báz wahd hast’ o paméshká wati hamkárén golám o móledán latth o kotth bekant, ward o nóshá dazgatth bebit o malár o hanósh bebit.
LUK 12:46 Áiay wájah anchén róch o sáhatéá kayt o rasit ke á nazánt o wadárá naent. Gorhá wájah áiá sharriay sará latth o kottha kant o nábáwaráni nyámá dawra dant.
LUK 12:47 Á hezmatkár ke wati wájahay wáhag o razáyá zánt, bale angat áiay wáhagay sará amal kanagá watá tayára nakant, sakk lattha wárt.
LUK 12:48 Bale hamá ke pa názánti anchén radé jant ke latth o kotthay sezáwár bebit, kamter lattha wárt. Chéá ke cha masterén mansabdárá géshter jost o porsa bit o kaséá ke géshter zemmawári dayag butag, cha áiá géshter hesáb geraga bit.
LUK 12:49 Man átkagán ke donyáyá ásé rók bekanán. Drégatá é wahdi á ás rók butén.
LUK 12:50 Bale cha áiá pésar, maná pákshódié zalurat ent, ke tánke é kár sarjam nabutag sakk paréshán o bétáhir án.
LUK 12:51 Shomá gomána kanét man átkagán ke donyáyá sohl o émeni byárán? Na, shomárá gwashán ke man sest o séday áragá átkagán.
LUK 12:52 Cha é damáná o rand, yakk lógéay panchén mardománi nyámá nátepákia kapit, say doay helápá o do sayay helápá bit.
LUK 12:53 Pet chokkay helápa bit o chokk petay, mát jenekkay helápa bit o jenekk mátay, wassig nesháray helápa bit o neshár wassigay.”
LUK 12:54 Gorhá Issáyá gón mardomán gwasht: “Wahdé shomá gendét ke rónenday némagá jambaréá bastag, hamá damáná gwashét ke sakk hawra gwárit o hawr ham bit.
LUK 12:55 Wahdé cha jonubá gwáta kasshit, gwashét ke maróchi garm o lewára bit o hamé dhawlá ham bit.
LUK 12:56 Oo doru o dopóstén mardomán! Wahdé shomá zemin o ásmánay neshánián máná korta kanét, gorhá chón annugén zamánagay neshánián máná korta nakanét?
LUK 12:57 Shomá parchá wat paysalaha nakanét ke kojám chizz rást ent?
LUK 12:58 Wahdé gón wati daynkárá hakdiwáná raway, johd kan ráhá gón áiá sohl o saláh bekanay. Chó mabit ke tará káziay kerrá bebárt o á tará sepáhigay dastá bedant o sepáhig tará zendáná bebárt o band bekant.
LUK 12:59 Tará gwashán, tán wahdé ke taw zarráni goddhi pai o paysahá porr makanay, cha ódá ázáta nabay.”
LUK 13:1 Hamá wahdá lahténá gón Issáyá á Jalili mardománi bárawá habar o hál kort ke Pilátusá koshtagatant o áyáni hón gón áyáni korbánigén dalwatáni hóná hór o hawár kortagat.
LUK 13:2 Issáyá áyáni passawá gwasht: “Shomá gomána kanét ke á Jalili ke chó bazzag butant, cha á degarán gonahkárter atant?
LUK 13:3 Man shomárá gwashán na, chosh naent, bale agan tawbah makanét, shomá ham hamáyáni dhawlá gár o gomsára bét.
LUK 13:4 Gomána kanét ke hamá hazhdahén mardom ke Shilwáhay borj áyáni sará kapt o mortant, cha Urshalimay á dega sajjahén mardomán radkárter atant?
LUK 13:5 Man shomárá gwashán na, shomá ham agan tawbah makanét, hamáyáni dhawlá gár o gomsára bét.”
LUK 13:6 Padá Issáyá áyáná é mesál dát: “Mardéá wati anguri bágá enjiray drachké keshtagat. Yakk róché, enjiray baráni cháragá bágá shot, bale bari nadistant.
LUK 13:7 Gorhá gón wati bágpáná gwashti: ‘Say sál ent ke man é enjiray baráni cháragá káyán bale heccha nagendán. Begoddhi ke hoshká jágahé geptagi.’
LUK 13:8 Bale bágpáná passaw dát: ‘Wájah! Dega yakk sálé belli, man eshiay boná kóchán o kalóndhán o samátia dayán.
LUK 13:9 Démay sálá agan bari dát sharr, agan nadáti gorhá begoddhi.’”
LUK 13:10 Shabbatay róchéá Issá yakk kanisahéá mardomán tálim dayagá at.
LUK 13:11 Janéné hamódá at ke hazhdah sál at jennéá nádráh kortagat. Janén komp at o hecch dhawlá natwánti wati sréná tachk bekant.
LUK 13:12 Wahdé Issáay chamm áiá kaptant, tawári kort o gwashti: “Oo bánok! Taw cha wati nájórhiá dráh butay.”
LUK 13:13 Issáyá wati dast áiay sará ér kort o hamá damáná janénay srén tachk but o Hodáay sepat o sanáyá lagget.
LUK 13:14 Bale kanisahay master nárazá but chéá ke Issáyá Shabbatay róchá mardomé drah kortagat. Gón mardomán gwashti: “Shomárá pa wati kárán shash róch hast o hamá róchán pa wati drahbakshiá byáét, na ke Shabbatay róchá.”
LUK 13:15 Hodáwandén Issáyá áiay passawá darráént: “Oo doru o dopóstén mardomán! Cha shomá hechkas Shabbatay róchá wati gók o harán cha banjáhána nabójit o dhanná pa áp dayagá nabárt?
LUK 13:16 Gorhá é janén ke Ebráhémay nasl o padréch ent o porrén hazhdah sál ent ke Shaytáná wati bandig kortag, chéá Shabbatay róchá cha é azábá ázát kanag mabit?”
LUK 13:17 Wahdé Issáyá chosh gwasht, áiay sajjahén badwáh sharmendag butant. Bale é dega sajjahén mardom cha Issáay é mójezah o ajabbatén kárán gal butant.
LUK 13:18 Gorhá Issáyá gwasht: “Hodáay bádsháhi kojám chizzay paymá ent? Pa áiá chónén mesálé bedayán?
LUK 13:19 Hodáay bádsháhi thélkáhay tohmay paymá ent ke mardéá zort o wati bágá kesht. Á tohm rost o drachkéay kaddá but o báli morgán áiay ták o tháláni sará kodóh bast.”
LUK 13:20 Padá gwashti: “Man pa Hodáay bádsháhiá chónén mesálé bedayán?
LUK 13:21 Hodáay bádsháhi hamá homiray paymá ent ke janénéá zort o gón bázén ártéá hawár kort o kamm kammá sajjahén árt gwát gept.”
LUK 13:22 Issá shahr pa shahr o métag pa métag mardomán tálim dayán at o dém pa Urshalimá rawán at.
LUK 13:23 Yakkéá jost kort: “Oo wájah! Hamá mardomán ke nejáta rasit, á kammok ant?”
LUK 13:24 Áiá passaw dát: “Johd kanét ke cha tankén darwázagá begwazét, chéá ke man shomárá gwashán, bázéné cha hamé darwázagá gwazagay johdá kant, bale gwasta nakant.
LUK 13:25 Wahdé kayt ke lógay hodábond páda kayt o lógay darwázagá banda kant, gorhá shomá lógay dapá óshtét o harchont darwázagá thokkét o tawára kanét: ‘Oo wájah! Darwázagá pa má pach kan!’, bale á passawa dant ke ‘man shomárá pajjáha nayárán o nazánán cha kojá átkagét.’
LUK 13:26 Shomá gwashét: ‘Má gón taw yakjáh wártag o nóshetag o taw may damk o bázárán tálim dátag.’
LUK 13:27 Bale á passawa dant: ‘Man shomárá pajjáha nayárán o nazánán cha kojá átkagét? Oo radkárán! Cha mani démá dur bét.’
LUK 13:28 Ódá gréwag o peryát o zária bit, chéá ke shomá Ebráhém o Esák o Ákub o sajjahén paygambarán Hodáay bádsháhiá gendét, bale wat cha Hodáay bádsháhiá dhann dawr dayaga bét.
LUK 13:29 É dega mardom cha ródarátk o rónend o cha shamál o jonubay chárén némagána káyant o Hodáay bádsháhiay parzónagay sará nendant.
LUK 13:30 Bechár, hamá ke áheri ant, awalia bant o hamá ke awali ant, áheria bant.”
LUK 13:31 Hamá wahdá lahtén Parisi Issáay gwará átk o gwashtesh: “Nun taw é jágahá yalah kan o dega jáhéá beraw, chéá ke Hirudis tai koshagay randá ent.”
LUK 13:32 Issáyá darráént: “Berawét á róbáhá begwashét ke maróchi o bándá jennána kasshán o mardomán dráha kanán o sayomi róchá, wati kárá sarjama kanán.
LUK 13:33 Bale maróchi, bándá o póshi allamá wati é sapará démá barán, chéá ke hecch paygambaray kósh cha Urshalimá dhanna nabit.
LUK 13:34 Urshalim, oo Urshalim! Taw paygambarána koshay o hamá ke Hodáyá tai kerrá ráh dátagant, áyán sengsára kanay. Báz randá man lóthetag ke tai chokkán wati kerrá mocch o yakjáh bekanán, chó ke nekénkén morgé chureg o chippokán wati bál o bánzoláni chérá moccha kant, bale shomá nalóthet.
LUK 13:35 Nun shomay lóg pa shomá yalah dayaga bit. Shomárá gwashán, shomá dega baré maná nagendét tán á wahdá ke wat begwashét: ‘Mobárak ent hamá ke Hodáwanday námá kayt!’”
LUK 14:1 Chó but ke Shabbatay róchéá Issá pa warákay waragá Parisi sarókéay lógá shot. Óday mardom pa delgósh áiá cháragá atant ke bárén ché kant?
LUK 14:2 Áiay dém pa démá mardé at ke cha jalandaray nádráhiá badani gwát geptagat.
LUK 14:3 Issáyá cha Sharyatay kázi o Parisián jost gept: “Shabbatay róchá nádráháni dráh kanag rawá ent yá na?”
LUK 14:4 Bale á bétawár butant. Gorhá Issáyá á marday dast gept, mardi dráh kort o roksat kort.
LUK 14:5 Gorhá Issáyá dém gón áyán tarrént o gwashti: “Cha shomá kay ent ke áiay chokk yá gók Shabbatay róchá chátá bekapit o áiá hamá damáná cha chátá dar makant?”
LUK 14:6 Bale áyán hecch passaw dát nakort.
LUK 14:7 Wahdé Issáyá dist ke mehmán che paymá diwánjáhay sharterén jágahán gechén kanagá ant, gorhá é mesáli dát o gwashti:
LUK 14:8 “Wahdé taw pa sur o áróséá lóthaga bay, diwánay sharterén jágahán manend, balkén cha taw masterén mardomé ham lóthag butag.
LUK 14:9 Gorhá á mehmándár ke shomárá doénáná lóthetagi, tará gwashit: ‘Wati jáhá áiá beday.’ Gorhá taw pashal o sharmendaga bay o majburiá jahlterén jágaha nenday.
LUK 14:10 Wahdé kasé tará mehmána kant, jahlterén jágahá benend, tánke mehmándár wat byayt o begwashit: ‘Oo mani dóst! Byá, sharterén jágahéá benend.’ Á wahdá taw á dega mehmánáni chammán sharapdára bay.
LUK 14:11 Chéá ke harkas watá mazana kant, kamsharapa bit o harkas watá jahl o érdasta mannit, washnám o sharapdára bit.”
LUK 14:12 Gorhá Issáyá gón mehmándárá gwasht: “Wahdé taw pa sobáreg yá shámá mehmánia kanay, wati sangat, brát o syád yá hastómandén hamsáhegán malóth. Chó mabit ke á ham tará mehmán bekanant o taw wati mehmániay badalá begeray.
LUK 14:13 Wahdé mehmánia kanay, nézgár o mondh o lang o kórán belóth.
LUK 14:14 Gorhá bahtáwara bay, chéá ke áyáni kerrá chizzé nést ke tará badalá bedayant o taw wati mozzá pahrézkáráni zendag bayag o jáh janagay róchá geray.”
LUK 14:15 Cha óday mehmánán yakkéá gón é habaray eshkonagá gwasht: “Bahtáwar ent hamá ke Hodáay bádsháhiay mehmániá waraga wárt.”
LUK 14:16 Issáyá gwasht: “Mardéá baláhén mehmánié kort o bázén mardomé lótháént.
LUK 14:17 Mehmániay róchá gón wati golámá gwashti: ‘Beraw mani mehmánán begwash ke byáét, nun har chizz tayár ent.’
LUK 14:18 Bale cha á sajjahénán har yakkéá nimóné kort o nayátk. Yakkéá gwasht: ‘Man yakk dhagáré bahá zortag o báyad ent áiay cháragá berawán, paméshká maná bebaksh.’
LUK 14:19 Degaréá gwasht: ‘Man panch jotk káiger zortag o pa áyáni chárag o chakkásagá rawagá án, paméshká pahellia lóthán.’
LUK 14:20 Dega yakkéá gwasht: ‘Man nóki sur kortag, paméshká átka nakanán.’
LUK 14:21 Golám átk o wati wájahi cha é hálán sahig kort. Wájah é habaráni eshkonagá sakk zahr gept o hokmi dát: ‘Damáná beraw, cha shahray tank o damkán sajjahén nézgár o mondh o kór o langán byár.’
LUK 14:22 Randá golám átk o gwashti: ‘Wájah! Harché ke taw maná hokm dát man hamá dhawlá kort, bale angat jágah hastent.’
LUK 14:23 Gorhá wájahá wati golám hokm dát: ‘Shahrá dhann ráh o rahsarán beraw, mardom shóház kan o áyán majbur kan o byár tánke mani lóg cha mardomá porr bebit.’
LUK 14:24 Shomárá rásta gwashán ke cha awali lóthetagén mardomán yakké ham mani mehmániay warákána nachashit.”
LUK 14:25 Mazanén rombé Issáyá hamráhiá rawagá at. Áiá dém tarrént o gón áyán gwashti:
LUK 14:26 “Á ke lóthit mani morid bebit, agan cha wati pet o mát, jan o chokk, brát o gohárán o cha wati jenday sáhá ham sar magwazit, mani morid buta nakant.
LUK 14:27 Kasé ke wati salibá baddhá nakant o mani randá nayayt, á ham mani morid buta nakant.
LUK 14:28 Agan cha shomá kasé lóthit ke borjé bebandit, gorhá borjay bandagá pésar á nendit o borjay harch o darchay hesábá jant o chárit ke bárén maná é kárá sarjam korta kanán yá na.
LUK 14:29 Chéá ke agan é borjay bonredá ér bekant o násarjamá belliti, sajjahén mardom ke gendant, áiá kalág o rishkanda kanant o
LUK 14:30 gwashant: ‘É mardá káré bendát kort bale natwánti sarjami bekant.’
LUK 14:31 Yá agan bádsháhé erádaha kant ke gón dega bádsháhéá janga kanán, gorhá jangá pésar á nendit o andázaha jant ke bárén man gón dah hazáray pawjá á bádsháhay bist hazári lashkaray démá óshtáta kanán yá na.
LUK 14:32 O agan begendit ke áiay démá dáshta nakanán, gorhá dozhmenay lashkar ke angat dur ent, á wati kásedán rawána dant ke sohl o saláhay shartán bezánt.
LUK 14:33 Hamé paymá cha shomá harkas, tán wahdé ke cha wati har chizzá dast makasshit, mani morid buta nakant.
LUK 14:34 Wád sharr ent, bale agan wáday tám berawt, gorhá chón padá támdár kanaga bit?
LUK 14:35 Na zeminay kárá kayt o na samát buta kant, mardom áiá dawra dayant. Harkasá pa eshkonagá gósh per, beshkont.”
LUK 15:1 Nun sajjahén songi o máliátgir o gonahkárén mardom Issáay gwará átkant ke áiay habarán beshkonant.
LUK 15:2 Bale Parisi o Sharyatay zánógerán norondhet o gwasht: “Gón gonahkárán é marday ru pach ent o gón áyán hór waraga wárt.”
LUK 15:3 Gorhá Issáyá pa áyán é mesál dát o gwasht:
LUK 15:4 “Cha shomá agan kaséá sad mésh hast o cha áyán yakké gár bebit, gorhá allamá nawad o nohén méshán charágáhá yalaha kant o hamá gárén méshay shóházá rawt. Tánke daria nagéjit, árámá nanendit.
LUK 15:5 Wahdé gárén méshá dara géjit, pa galé wati kópagá kanti,
LUK 15:6 lógá rawt, dóst o hamsáhegána lótháénit o gwashit: ‘Mani galá shádán bét ke man wati gárén mésh dar gétkag.’
LUK 15:7 Man shomárá gwashán, hamé dhawlá pa yakk gonahkáréá ke tawbaha kant, ásmáná baláhén shádehé bit, bale pa nawad o noh pahrézkárá ke áyán tawbah pakár naent choshén shádeha nabit.
LUK 15:8 Yá ke agan janénéá dah kaldár bebit o cha á dahén kaldárán yakké gár bebit, gorhá allamá pa wati gárén kaldáray shóházá cherágé róka kant o sarjamén lógá patthit. Tánke daria nagéjit, árámá nanendit.
LUK 15:9 Wahdé kaldárá dara géjit, dazgohár o hamsáhegána lótháénit o gwashit: ‘Mani galá shádán bét ke man wati gárén kaldár dar gétkag.’
LUK 15:10 Hamé paymá man shomárá gwashán, agan yakk gonahkáré ham cha wati gonáhán tawbah bekant, Hodáay préshtag shádeha kanant.”
LUK 15:11 Padá Issáyá gwasht: “Mardéá do mardénchokk hastat.
LUK 15:12 Kasteréná yakk róché gón petá gwasht: ‘Oo mani pet! Cha tai mál o melkatá harché ke mani bahr o wandhá kapit, maná annun beday.’ Gorhá petá wati mál o melkat doén chokkáni sará bahr kortant.
LUK 15:13 Lahtén róchá o rand kasterén chokká wati sajjahén mál o hasti yakjáh kortant, zortanti o durén molkéá shot o wati máli pa aysh o nósh gár kortant.
LUK 15:14 Wahdé har chizzi gár kortagat, á molká sakk dhokkál kapt o á tangdast but.
LUK 15:15 Hamá molká yakk mardoméay kerrá shot o dazbandii kort ke maná kárá bedár. Gorhá áiá wati dhagáráni sará hukkáni chárénók kort.
LUK 15:16 Ódá haminchok gozhnag but ke áiay delá lóthet hamá kósagán bwárán o wati lápá sér bekanán ke hukkáni warák ant, bale kassá pa waragá hecch nadát.
LUK 15:17 Wahdé hóshi kort, gón wat gwashti: ‘Mani petay bázén nawkaréá lápay sérá waráka rasit o man edá shodá mark án.
LUK 15:18 Nun páda káyán o wati petay kerrá rawán o áiá gwashán: Oo mani pet! Man Hodáay gonahkár án o tai ham.
LUK 15:19 Nun nakarzán ke tai chokk gwashag bebán. Maná wati nawkaráni dhawlá yakk nawkaré bekan.’
LUK 15:20 Gorhá pád átk o dém pa petay lógá rahádag but. Petá ke cha durá dist, chokkay sará bazzagi but o tacháná shot o gwarambázi kort o chokketi.
LUK 15:21 Chokká gwasht: ‘Oo mani pet! Man Hodáay gonahkár án o tai ham. Nun nakarzán ke tai chokk gwashag bebán.’
LUK 15:22 Bale petá gón wati golámán gwasht: ‘Eshtáp kanét, pa áiá sharterén kabáhá byárét o gwarái bedayét. Challah o mondrikki dastá o kawshi pádá bedayét.
LUK 15:23 Pábondi gwaská byárét o bekoshét tánke wasshén waráké bwarén o shátkámi bekanén.
LUK 15:24 Chéá ke mani é chokk mortagat bale nun padá zendag butag, gár at o nun dar átkag.’ É dhawlá á shátkámi kanagá laggetant.
LUK 15:25 Bale masterén chokk dhagáráni sará at. Wahdé lógay nazzikká raset o sáz o zémel o nách o sohbatay tawári eshkot,
LUK 15:26 cha nawkarán yakké lótháént o josti kort: ‘Edá ché bayagá ent?’
LUK 15:27 Nawkará passaw dát: ‘Tai brát átkag o nun ke á pa wasshi o salámati rasetag, tai petá pábondi gwask koshtag.’
LUK 15:28 Gorhá masterén brát sakk zahr gept o nalótheti ke tahá byayt. Bale pet dhanná dar átk o áiay wasshán kanagá lagget.
LUK 15:29 Chokká petay dazbandiay passawá gwasht: ‘Bechár, man inchok sálá tai kerrá goláméay dhawlá kár kortag o hechbar cha tai hokmá dar nabutagán, bale taw maná yakk shenekké ham nadátag ke gón wati sangatán shádeh bekanán.
LUK 15:30 Bale tai é chokká tai mál gón kahbagán gár kort o taw pa áiá pábondi gwask koshtag.’
LUK 15:31 Petá gwasht: ‘Oo mani chokk! Taw harwahdá mani kerrá ay o harché ke maná hast á sajjahén taig ant,
LUK 15:32 bale annun márá shátkámi kanaga lóthit ke tai é brát mortagat o nun zendag ent, gár o bégwáh at o nun dar átkag.’”
LUK 16:1 Issáyá gón wati moridán gwasht: “Sér o hazgárén mardéá hesábdáré hastat. Wahdé mardomán shekáyat kort ke hesábdár tai mál o hastiá zawál kanagá ent,
LUK 16:2 gorhá á lótháént o gwashti: ‘É chónén habar ant ke tai bárawá eshkonagá án? Beraw wati sarjamén hesáb o ketábán begisshén o byár o maná beday. Cha ed o rand taw mani hesábdár naay.’
LUK 16:3 Hesábdárá delá gwasht: ‘Nun chón bekanán ke mani kárwáhond maná cha kárá kasshagá ent? Dehkánkári man korta nakanán, pendhag ham maná lajja kant.
LUK 16:4 Bale haw! Nun mana zánán ke ché bekanán. Báyad ent anchén káré bekanán ke wahdé cha kárá kasshaga bán, mardom maná wati lógán jágah bedayant.’
LUK 16:5 Áiá kárwáhonday wámdár yakk yakká wati kerrá lótháéntant. Cha awali wámdárá josti gept: ‘Tará mani kárwáhonday chinchok wám per ent?’
LUK 16:6 Passawi dát: ‘Maná yakk sad kayl zaytunay thél wám per ent.’ Hesábdárá gwasht: ‘Beger, esh ent tai wámáni kabz, zutt benend o panjáh kayl nebeshtah kan.’
LUK 16:7 Nun cha domi wámdárá josti kort: ‘Tará chinchok wám per ent?’ Gwashti: ‘Yakk sad kayl gandom.’ Hesábdárá gwasht: ‘É tai wámáni kabz ent. Beger, hashtád kayl nebeshtah kan.’
LUK 16:8 Kárwáhondá wati béimán o dozzén hesábdáray tawsip paméshká kort ke áiá é kár pa hozzhári kortagat. Chéá ke donyádáriá donyái chokk cha Hodáay bádsháhiay chokkán hozzhárter ant.
LUK 16:9 Shomárá gwashán ke donyái málá pa sharrén dóstáni shóház kanagá kár bebandét, tánke wahdé é mála hallit, shomárá abadmánén jaháná jágahé berasit.
LUK 16:10 Á ke kasánén káráni sará tachk o rásta bit, mazanénáni sará ham rásta bit o á ke kasánén káráni sará rásta nabit, mazanénáni sará ham rásta nabit.
LUK 16:11 Nun agan shomá donyái málay sará rást o tachk mabét, gorhá kay shomay sará báwara kant o barhakkén mál o hastiá shomay dastá dant?
LUK 16:12 Agan shomá gón degaráni málá rást o tachk mabét, kay shomay jenday málá shomay dastá dant?
LUK 16:13 Hecch golámé do wájahay golámiá korta nakant, yá gón eshiá naprata kant o áiá dósta dárit, yá gón eshiá wapádára bit o áiá mána nayárit. Chó buta nakant ke shomá Hodáay golámiá ham bekanét o zarray golámiá ham.”
LUK 16:14 Parisi ke wat zarparast atant, gón é habaráni eshkonagá Issáesh kalág gept o rishkand kort.
LUK 16:15 Issáyá gwasht: “Shomá hamá ét ke mardománi démá watá tachk o pahrézkár pésha dárét, bale Hodá shomay delay hálána zánt. Hamá chizz ke mardománi gwará báz kimati ent, Hodá cha á chizzá naprata kant.
LUK 16:16 Tawrát o nabiáni bárig tán Yahyáay wahdá at. Cha hamá wahdá o rand Hodáay bádsháhiay mestágay jár janag bayaga ent o harkas zóra jant ke tahá berawt.
LUK 16:17 Bale bezánét ke ásmán o zeminay tabáh bayag cha Sharyatay yakk thekk o neshánéay kapagá ásánter ent.
LUK 16:18 Harkas ke wati janay sawn o talákán bedant o gón dega janénéá sur o sáng bekant, zená kanagá ent o harkas ke gón talák dátagén janénéá sur bekant, á ham zená kant.
LUK 16:19 Yakk sér o hazgárén mardéá modám gránkimatén pocch o pósháka póshet o wati róchi pa aysh o nósha gwázéntant.
LUK 16:20 Ilázar námén garibén mardé ke badani sará tán pádá résh at, hamáiay lógay dapá áwortag o dawresh dátagat.
LUK 16:21 Áiay armán at ke cha hazgárén marday parzónagá kaptagén chondán wati lápá sér bekant. Kochekk ham átkant o áiay résh o násuresha chatthetant.
LUK 16:22 Wahdé á garib mort, préshtagán á zort o Ebráhémay kerrá bort. Hazgárén mard ham mort o mardomán kabr o kapan kort.
LUK 16:23 Hazgárén mard mordagáni jaháná azáb at. Áiá ke sar chest kort cha durá chammi Ebráhémá kaptant ke Ilázar áiay kashá at.
LUK 16:24 Gwánki jat: ‘Ebráhém, oo mani pet! Mani sará rahm kan, Ilázará mani kerrá dém beday ke wati lankoká ápá bejant o mani nokká tarr bekant ke man ásá sochagá án.’
LUK 16:25 Bale Ebráhémá darráént: ‘Oo mani bacch! Yát kan ke taw wati zendá sharrén chizzáni wájah butagay o Ilázará wati róch pa bazzagi gwázéntagant. Bale á nun edá ásudag ent o taw azáb ay.
LUK 16:26 Eshiá abéd, shomayg o may nyámá yakk anchén johlén daragé borrag butag ke na may némagay mardom shomay gwará shota kanant o na shomay némagay mardom may kerrá átka kanant.’
LUK 16:27 Padá hazgárén mardá gón Ebráhémá gwasht: ‘Oo mani pet! Gorhá cha taw dazbandia kanán ke Ilázará mani petay lógá rawán day,
LUK 16:28 chéá ke maná panch brát hast o mani wáhag ent ke Ilázar áyán hozzhár o habardár bekant. Chó mabit ke á ham é porazábén jágahá byáyant.’
LUK 16:29 Bale Ebráhémá gwasht: ‘Áyáni kerrá Mussáay Tawrát o Nabiáni Ketáb hastant. Áyáni habarán gósh bedárant.’
LUK 16:30 Á mardá gwasht: ‘Na, oo mani pet Ebráhém! Cha mordagán agan kasé áyáni kerrá berawt, allamá á tawbaha kanant.’
LUK 16:31 Ebráhémá gwasht: ‘Agan á Mussáay Tawrát o Nabiáni Ketábáni habarán gósha nadárant, gorhá cha mordagán agan kasé zendag bebit o áyáni kerrá berawt, áiay habarán ham nazurant.’”
LUK 17:1 Issáyá gón wati moridán gwasht: “Gomráh kanóken chizz mardomay zendá allamá káyant, bale bazhn o apsóz pa hamáiá ke degarán gomráha kant.
LUK 17:2 Cha é gwandhóán yakkéá ham dém pa gonáhá baragay badalá, sharter hamesh ent ke gomráh kanókay gotthá jenteri táé bebandant o daryáyá chagali bedayant.
LUK 17:3 Cha wati kár o kerdán hozzhár bét. Agan tai brát gonáhé kant, áiá hakkal kan o agan pashómán but, bebakshi.
LUK 17:4 Toré róché hapt randá gonáh bekant o hapt randá tai gwará byayt o begwashit ke man pashómán án, bebakshi.”
LUK 17:5 Kásedán gón Hodáwandá gwasht: “May imáná gésh kan.”
LUK 17:6 Gwashti: “Agan shomay imán arzonéay kesásá ham bebit, shomá tuday é drachká hokm dáta kanét ke watá cha boná begwaj o beraw zeray tahá berod o besabz. Gorhá drachk shomay hokmá mannit.
LUK 17:7 Cha shomá á kas kay ent ke áiay hezmatkár dhagárá nangára kant yá ramagá chárénit o kayt o wájah áiá begwashit: ‘Zutt byá, benend o warag bwar’?
LUK 17:8 Gón áiá allamá gwashit: ‘Pésará pa man warag addh kan, tán man nawártag, taw mani hezmatá bósht, wahdé man halás kort gorhá taw bwar.’
LUK 17:9 Wájah wati hezmatkáray shogr o mennatá gipt ke taw mani hokm mannetag? Na, hechbar.
LUK 17:10 Hamé paymá shomá ham á sajjahén hokmán ke shomárá dayag butagant, sarjam bekanét o begwashét ke má tai hezmatkár bayagay láhek ham naén, tahná wati parz purah kortagant.”
LUK 17:11 Issá dém pa Urshalimá rawagá at o cha Sámerah o Jalilay simsará gwazagá at.
LUK 17:12 Wahdé métagéá átk o raset, dah mardom ke áyán garray nádráhi at, gón áiá dochár kaptant. Dur óshtátant o
LUK 17:13 pa borztawári gwashtesh: “Oo wájah Issá! May sará rahm kan.”
LUK 17:14 Issáyá ke distant, gwashti: “Berawét, watá dini péshwáyán pésh bedárét.” Á sar geptant o ráhá dráh butant.
LUK 17:15 Cha áyán yakkéá wahdé dist ke nun dráh án, pa borztawári Hodáyá satá kanáná per tarret o átk,
LUK 17:16 Issáay pádán kapt o shogri gept. Á nádráh Sámerié at.
LUK 17:17 Issáyá jost kort: “Záná, har dahén cha garrá dráh nabutant? Á dega nohén kojá ant?
LUK 17:18 É yakkén darkawmá abéd, dega kas pa Hodáay sepat o sanáyá per natarret?”
LUK 17:19 Gorhá Issáyá gón á mardá gwasht: “Pád á, beraw ke tai imáná tará dráh kortag.”
LUK 17:20 Yakk róché lahtén Parisiá cha Issáyá jost kort: “Hodáay bádsháhi kadéna kayt?” Issáyá gwasht: “Hodáay bádsháhi chamzáherá gendaga nabit.
LUK 17:21 Kass gwashta nakant ke Hodáay bádsháhi edá ent yá ódá. Chéá ke Hodáay bádsháhi, shomay delá ent.”
LUK 17:22 Padá gón wati moridán gwashti: “Yakk wahdé kayt ke shomá pa Ensánay Chokkay rócháni yakk róchéay gendagá armána kanét, bale á róchá nagendét.
LUK 17:23 Mardom shomárá gwashant ke ‘edá ent’ yá ‘ódá ent,’ bale shomá marawét o áyáni randá makapét.
LUK 17:24 Anchó ke geróka jant o ásmánay é sar tán á sará rozhná kant, Ensánay Chokk ham wati áyagay róchá anchosh záhera bit.
LUK 17:25 Bale awalá báyad ent bázén sakki o sórié besaggit o é zamánagay mardom áiá mamannant.
LUK 17:26 Hamá dhawlá ke Nuhay zamánagá butag, Ensánay Chokkay zamánagá ham anchosha bit.
LUK 17:27 Á róchán mardom ward o nóshá atant, sáng o surá atant o é kárán tán hamá róchá dazgatth atant ke Nuh bójigá swár but. Padá tuppán átk o sajjahén mardomi gár o bégwáh kortant.
LUK 17:28 Lutay zamánagá ham anchó but, mardom warag o charag o badal o bándát o kesht o keshár o lóg o jágahay bandagá goláésh atant,
LUK 17:29 bale hamá róchá ke Lut cha Sodumay shahrá dar átk, Hodáyá cha ásmáná ás o rókén gókort gwárént o Sodumay sajjahén mardom gár o bégwáh kortant.
LUK 17:30 Ensánay Chokkay áyag o záher bayagay róchá ham anchosha bit.
LUK 17:31 Á róchá, agan kasé wati lógay sará bebit o áiay ord o poténk lógá ér bebant, pa áyáni zuragá jahlá ér makapit. Hamé dhawlá, agan kasé wati dhagáráni sará kesht o keshárá bebit, á ham padá lógá per matarrit.
LUK 17:32 Lutay janay kessahá mashamóshét.
LUK 17:33 Harkas ke wati sáhay rakkénagay randá bit, gária dant o harkas ke wati sáhá nadra kant, rakkéniti.
LUK 17:34 Shomárá gwashán ke á wahdá do mardom yakkén taht o nepáday sará waptag, yakké baraga bit o domi pasht géjaga bit.
LUK 17:35 Do janén jenteray sará hórigá dánay droshagá bit, yakké baraga bit o domi pasht géjaga bit.
LUK 17:36 Do mardén dhagáráni sará bit, yakké baraga bit o domi pasht géjaga bit.”
LUK 17:37 Jostesh kort: “Oo Hodáwand! Kojá chosha bit?” Passawi dát: “Har jáh ke jóné bit, ódá dhundhwárén morg moccha bant.”
LUK 18:1 Issáyá pa moridán mesálé áwort ke á báyad ent harwahdá dwá bekanant o hechbar delprósh mabant.
LUK 18:2 Gwashti: “Shahréá yakk kázié hastat ke áiá na cha Hodáyá torset o na mardománi parwáhia kort.
LUK 18:3 Hamá shahrá janózámé ham hastat ke harwahdá káziay kerrá átk o gwashti ke mani hakká cha daynkárá beger o beday.
LUK 18:4 Tán lahtén wahdá káziá janózámay peryátay némagá hecch delgósh nakort, bale randá delá hayáli kort ke bell toré maná na Hodáay tors ent o na mardománi parwáh,
LUK 18:5 bale é janózám maná delsyáh kanagá ent. Paméshká gehter ent ke eshiay hakká begerán o bedayán. Chó mabit ke gón wati har róchigén rawag o áyagá maná géshter delsyáh bekant.”
LUK 18:6 Gorhá Hodáwandén Issáyá gwasht: “Bechárét é náhakkén kázi ché gwashit?
LUK 18:7 Nun bárén Hodá gón wati gechén kortagénán ke shap o róch áiay kerrá pa wati hakká peryáta kanant, hakka nakant? Pa áyáni hakrasiá déra kant?
LUK 18:8 Shomárá gwashán ke áyáni hakká zutta dant. Bale á wahdi ke Ensánay Chokka kayt, bárén zeminay sará imáné pashta kapit ke begenditi?”
LUK 18:9 Issáyá hamá mardománi bárawá mesálé áwort ke watá nék o pahrézkára gwashant o é dega mardomán éra janant.
LUK 18:10 “Do mardom pa dwá kanagá mazanén parasteshgáhá shot. Yakké Parisié at o domi máliátgiré.
LUK 18:11 Parisi óshtát o wati jenday bárawá dwái kort o gwashti: ‘Oo Hodá! Tai mennatwár án ke man é dega mardománi dhawlá dozz o radkár o zenákáré naán o na é máliátgiray dhawlá án.
LUK 18:12 Man haptagé do róch róchaga bán o wati sajjahén málay dahyakká dayán.’
LUK 18:13 Bale máliátgir dur óshtátagat o ásmáni cháret ham nakort. Dasti wati sénagá jat o peryát kanáná gwashti: ‘Oo Hodá! Mani sará rahm kan ke gonahkáré án.’
LUK 18:14 Nun man shomárá gwashán: Hamá máliátgir bégonáh o bémayár but o lógá shot bale Parisi na, chéá ke harkas watá mazana kant, kamsharapa bit o harkas watá jahl o érdasta mannit, washnám o sharapdára bit.”
LUK 18:15 Mardomán wati nonnokén chokk ham Issáay gwará áwortant ke dastesh sará per bemoshit. Wahdé moridán dist, mardomesh hakkal dátant.
LUK 18:16 Bale Issáyá chokk wati kerrá lótháéntant o gwashti: “Chokkán bellét ke mani kerrá byáyant, áyáni démá madárét, chéá ke Hodáay bádsháhi anchén mardománig ent.
LUK 18:17 Shomárá rásténa gwashán, harkas ke Hodáay bádsháhiá hamá paymá mamannit ke kasánén chokkia mannant, hechbar ódá pád ér korta nakant.”
LUK 18:18 Sardárzádagéá cha Issáyá jost kort: “Oo nékén ostád! Man chón bekanán ke abadmánén zenday wáhond bebán?”
LUK 18:19 Issáyá gwasht: “Taw chéá maná ‘nékéna’ gwashay? Abéd cha Hodáyá kass nék naent.
LUK 18:20 Taw Hodáay hokmána zánay: ‘Zená makan, hón makan, dozzi makan, drógén sháhedi maday, wati pet o mátá ezzat beday.’”
LUK 18:21 Áiá gwasht: “Man cha kasániá é sajjahén hokmáni sará amal kortag.”
LUK 18:22 Wahdé Issáyá áiay passaw eshkot, gwashti: “Tará angat yakk káré kanagi ent, wati sajjahén mál o hastiá bahá kan o zarrán garib o nézgárén mardománi sará bahr kan. É paymá tará ásmáni ganjé rasit. Nun byá o mani randgiriá bekan.”
LUK 18:23 Wahdé á mardá é passaw eshkot, báz gamig but chéá ke báz sér o hazgár at.
LUK 18:24 Issáyá á cháret o gwasht: “Pa hazgárén mardomán Hodáay bádsháhiá páday ér kanag sakk grán ent.
LUK 18:25 Haw! Cha suchenay domká oshteray gwazag wa báz grán ent, bale pa hazgárén mardoméá Hodáay bádsháhiá páday ér kanag angat gránter ent.”
LUK 18:26 Hamá ke é habará eshkonagá atant, jostesh kort: “Gorhá kay rakketa kant?”
LUK 18:27 Issáyá passaw dát: “Hamá kár ke ensánay dastá nabit, Hodáay dastá bit.”
LUK 18:28 Petrosá gwasht: “Má wati har chizz yalah dátag o tai randgiriá kanagá én.”
LUK 18:29 Issáyá gwasht: “Shomárá rásténa gwashán, harkasá ke pa Hodáay bádsháhiá wati lóg o jágah yá jan o chokk yá brát o gohár yá mát o pet yalah dátagant,
LUK 18:30 hamé jaháná é chizzáni badalá áiá báz géshtera rasit o á dega jaháná abadmánén zenday wáhonda bit.”
LUK 18:31 Padá Issáyá wati dwázdahén kásed yakk kerré bortant o gwashti: “Nun má Urshalimá rawagá én, har chizz ke nabián Ensánay Chokkay bárawá nebeshtag, purah o sarjama bit.
LUK 18:32 Áiá darkawmén mardománi dastá dayant o hamá darkawm kalágia gerant, béezzatia kanant o dap o démá tokkia janant,
LUK 18:33 shallák o hayzaránia janant o koshanti. Bale sayomi róchá á padá zendaga bit.”
LUK 18:34 Áiay morid cha é habarán yakkéá ham sarpad nabutant. Issáay é habaráni máná cha áyáni zántá dhann at o sarkechesh nawárt ke Issá ché gwashagá ent.
LUK 18:35 Wahdé Issá Ariháay shahray nazzikká raset, kóré disti ke ráhay sará neshtag o pendhagá at.
LUK 18:36 Wahdé kórá gwazókén mocchiay tawár eshkot, josti kort: “Ché bayagá ent?”
LUK 18:37 Hálesh dát: “Issá Náseri gwazagá ent.”
LUK 18:38 Gorhá áiá kukkár kort: “Issá, oo Dáud bádsháhay chokk! Mani sará rahm kan.”
LUK 18:39 Á ke cha sajjahénán pésar o péshgám atant, kóresh hakkal kort o gwashtesh: “Bass kan!” Bale áiá géshter kukkár kort: “Oo Dáud bádsháhay chokk! Mani sará rahm kan.”
LUK 18:40 Issá óshtát o hokmi dát: “Á mardá byárét.” Wahdé kór nazzikká átk, Issáyá jost kort:
LUK 18:41 “Taw ché gwashay, man pa taw ché bekanán?” Áiá passaw dát: “Oo Hodáwand! Mani chammán rozhná kan.”
LUK 18:42 Issáyá gwasht: “Biná bay! Tai imáná tará dráh kort.”
LUK 18:43 Hamá damáná kóray chamm pach butant o Hodáyá satá o saná kanáná Issáay hamráh but. Sajjahén mardomán ke dist, áyán ham Hodáay satá o saná kort.
LUK 19:1 Issá Ariháyá átk o cha shahray nyámá gwazagá at.
LUK 19:2 Ódá Zakká námén sér o hazgárén mardé hastat ke máliátgiráni master at.
LUK 19:3 Áiá lóthet ke bechárán Issá chónéné, bale mardománi mocchi mérhi at o áiay jend pathakké at. Paméshká disti nakort.
LUK 19:4 Gorhá tacháná démterá shot o mazanén drachkéay sará sar kapt ke áiá begendit, chéá ke Issá cha hamé ráhá gwazagá at.
LUK 19:5 Wahdé Issá hamá jágahá raset, borzá cháret o gwashti: “Oo Zakká! Zutt jahlá ér kap ke maróchi man tai mehmán án.”
LUK 19:6 Á damáná ér átk o Issái pa gal o wasshi wati lógá bort.
LUK 19:7 Mardomán ke dist, sajjahén norondhagá laggetant o gwashtesh: “Issá gonahkárén mardéay lógá mehmán butag.”
LUK 19:8 Bale Zakká pád átk o óshtát o gón Hodáwandén Issáyá gwashti: “Oo Hodáwand! Wati sajjahén mál o hastiay némá garibána dayán o agan man kaséay mál náhakká bortag, badalá chár sari géshteria dayán.”
LUK 19:9 Issáyá gón áiá gwasht: “Maróchi é lógá neját sar butag, chéá ke é mard ham cha Ebráhémay nasl o padréchá ent.
LUK 19:10 Haw! Ensánay Chokk pa gárénáni shóház kanag o rakkénagá átkag.”
LUK 19:11 Hamá wahdá ke mardom Issáay habarán gósh dáragá atant, Issáyá wati habari tahá mesálé ham dát, chéá ke á Urshalimay nazzikká rasetagat o mardománi gomán esh at ke Hodáay bádsháhi damáná gendaga bit.
LUK 19:12 Gwashti: “Sardárzádagé durén molkéá shot ke bádsháhiá wati dastá byárit o wátarr bekant.
LUK 19:13 Gorhá dah hezmatkári wati kerrá lótháént o har yakkéárá yakk yakk ashrapié dát o gwashtanti: ‘Tánke man wati sapará janán o wátarra bán, shomá gón é zarrán sawdágeri bekanét.’
LUK 19:14 Bale hamá molkay mardomán cha áiá naprata kort. Áiay rawagá rand kásedesh ráh dát ke má nalóthén é mard may sará bádsháhi bekant.
LUK 19:15 Bale áiá bádsháhi raset o wati molká per tarret o átk. Gorhá hokmi dát hamá dahén hezmatkárán ke zarri dátagatant, byárant tánke bezánt áyán cha sawdágeria chinchok rasetag.
LUK 19:16 Awali hezmatkár átk o gwashti: ‘Oo wájah! Tai yakkén ashrapi man dah ashrapi kortag.’
LUK 19:17 Bádsháhá gwasht: ‘Shábásh, oo sharrén golám! Nun paméshká ke taw gón kammén bonmálá tachk o rást butagay, man tará wati molkay dah shahray hákema kanán.’
LUK 19:18 Domi átk o gwashti: ‘Oo wájah! Tai yakkén ashrapi man panch ashrapi kortag.’
LUK 19:19 Bádsháhá gwasht: ‘Man tará wati molkay panch shahray hákema kanán.’
LUK 19:20 Dega hezmatkáré átk o gwashti: ‘Oo wájah! Esh ent tai ashrapi ke man dazmáléá bastag o ér kortag,
LUK 19:21 chéá ke maná cha taw torsetag. Taw trondén mardé ay, hamá chizz ke taw jam nakortagant, áyán chesta kanay o baray o hamá ke taw nakeshtagant, áyána ronay.’
LUK 19:22 Bádsháhá gwasht: ‘Oo habisén golám! Man tará cha tai jenday habarán mayárbára kanán. Taw zánt ke man trondén mardé án, hamá chizzán watiga kanán ke man jam nakortagant o hamáyán ronán ke man nakeshtagant,
LUK 19:23 gorhá taw chéá mani zarr tájeráni kerrá ér nakort ke per tarragá rand maná wati zarr gón sutt berasetén.’
LUK 19:24 Gorhá bádsháhá gón óshtátagén mardomán gwasht: ‘Ashrapiá cha eshiá pach gerét o hamáiá bedayét ke áiay kerrá dah ashrapi ant.’
LUK 19:25 Áyán gwasht: ‘Wájah! Áiay kerrá wa dah ashrapi hast.’
LUK 19:26 Bádsháhá gwasht: ‘Shomárá gwashán, harkasá ke chizzé hast, áiá géshter dayaga bit, bale harkasá ke nést, harché ke hasti ham pach geraga bit.
LUK 19:27 Bale hamá ke mani dozhmen ant o nalóthant ke man áyáni bádsháh bebán, áyán mani kerrá byárét o mani démá bekoshét.’”
LUK 19:28 Cha é habarán o rand, Issá pésar but o dém pa Urshalimá shot. Mardom áiay hamráh atant.
LUK 19:29 Wahdé Zaytun námén kóhá Bayt-Páji o Bayt-Anyáay métagáni nazzikká raset, wati do moridi pésará dém dát o
LUK 19:30 gwashtanti: “Démi métagá berawét o anchosh ke shomá ódá rasét, hari korragé gendét ke bastag o taningah kasé áiá swár nabutag. Áiá bójét o edá byárét.
LUK 19:31 Agan kaséá jost kort ke shomá chéá eshiá bójagá ét, begwashét ke wájahá pakár ent.”
LUK 19:32 Hamá ke dém dayag butant, á shotant o anchó ke Issáyá gwashtagat, hamá paymá distesh.
LUK 19:33 Anchó ke korragá bójagá atant, korragay hodábondán cha áyán jost kort: “Shomá chéá é korragá bójagá ét?”
LUK 19:34 Moridán passaw dát: “Wájahá pakár ent.”
LUK 19:35 Moridán korrag Issáay kerrá áwort, wati shál o kabáhesh korragay poshtá ér kortant o Issáesh swár kort.
LUK 19:36 Wahdé Issá démá rawán at, mardomán wati shál o kabáh ráhay sará chérgéján kortant.
LUK 19:37 Wahdé Issá Zaytunay Kóhay érkapay nazzikká raset, áiay moridáni mocchiá pa é sajjahén mójezahán ke áyán distagatant, pa gal o shádeh o gón borzén tawáré Hodá satá kort o gwasht:
LUK 19:38 “Mobárak ent hamá bádsháh ke Hodáwanday námá kayt! Ásmáná sohl o émeni, borzén arshá shán o shawkat.”
LUK 19:39 Cha mardománi nyámá, lahtén Parisiá gón Issáyá gwasht: “Oo ostád! Wati moridán hakkal kan.”
LUK 19:40 Issáyá darráént: “Man shomárá gwashán, agan é bétawár bebant, seng o dhók kukkára kanant.”
LUK 19:41 Wahdé Issá Urshalimá nazzikk but o shahri dist, gréti o
LUK 19:42 gwashti: “Drégatá taw maróchi bezántén ke kojám chizz pa taw sohl o émenia kárit. Bale bazhn o apsóz ke nun cha tai chammá chér o andém ent.
LUK 19:43 Pa taw anchén rócha káyant ke dozhmen tai chapp o chágerdá sangara bandant o tará chárén némagán angerra kanant o tai chágerdá tanka tarrénant.
LUK 19:44 Tará o tai chokkán ke tai panáhá ant, gón hákán hawára kanant o sengé sengay sará ham pashta nagéjant, chéá ke taw wati Hodáay áyagay wahd o sáhat pajjáh nayáwort.”
LUK 19:45 Eshiá rand Issá mazanén parasteshgáhá shot o sawdágerán dar kanagá lagget.
LUK 19:46 Gwashti: “Hodáay Ketábá nebeshtah ent: Mani lóg dwá kanagay jágaha bit, bale shomá dhongáni panáhgáhé kortag.”
LUK 19:47 Áiá har róch mazanén parasteshgáhá tálima dát. Mazanén dini péshwá, Sharyatay zánóger o kawmay kamásh áiay koshagay johdá atant,
LUK 19:48 bale pa wati é maksadá hecch ráhé dar gétkesh nakort, chéá ke áiay har habar sajjahén mardománi delá neshtagat.
LUK 20:1 Yakk róché ke Issá mazanén parasteshgáhá mardomán tálim dayagá at o wasshén mestágay járá janagá at, mazanén dini péshwá o Sharyatay zánóger gón kawmay kamáshán áiay kerrá átkant o
LUK 20:2 gwashtesh: “Márá begwash ke taw gón kojám hakk o ehtiárá é kárána kanay? É kay ent ke tará é ehtiári dátag?”
LUK 20:3 Issáyá passaw dát: “Maná ham cha shomá yakk josté hast. Maná begwashét,
LUK 20:4 Yahyáyá pákshódi dayagay ehtiár cha ásmáná rasetagat yá cha ensánay némagá?”
LUK 20:5 Áyán watmánwatá shawr o saláh kort o gwashtesh: “Agan begwashén cha ásmáná, gwashit: ‘Shomá pa ché imán nayáwort?’
LUK 20:6 Oo agan begwashén cha ensánay némagá, gorhá sajjahén mardom márá sengsára kanant, chéá ke áyán yakin ent ke Yahyá nabié butag.”
LUK 20:7 Paméshká passawesh dát: “Má nazánén cha kojá at.”
LUK 20:8 Issáyá gwasht: “Gorhá man ham shomárá nagwashán ke gón kojám hakk o ehtiárá é kárána kanán.”
LUK 20:9 Randá Issáyá pa mardomán é mesál dát: “Mardéá anguri bágé addh kort o pa konandakári lahtén bágpánay dastá dát o wat drájén saparéá shot.
LUK 20:10 Wahdé anguray mósom but, bágay hodábondá pa wati bahray geragá hezmatkáré bágpánáni kerrá ráh dát, bale bágpánán á hezmatkár latth o kotth kort o gón hórk o háligén dastán per tarrént.
LUK 20:11 Padá bágay hodábondá dega hezmatkáré dém dát, bale bágpánán á ham jat o béezzat kort o gón hórk o háligén dastán per tarrént.
LUK 20:12 Gorhá sayomi randá, dega hezmatkáré ráhi dát, bale áyán á ham jat o thappig kort o gallént.
LUK 20:13 Nun bágay hodábondá wati delá pegr kort ke chón bekanán? É randi wati dóstigén chokká ráha dayán, balkén áiay ezzatá bekanant.
LUK 20:14 Bale wahdé bágpánán áiay chokk dist, watmánwatá shawr kort o gwashtesh: ‘Bágay mirásdár o poshpad hamesh ent, eshiá koshén ke bág may mirás bebit.’
LUK 20:15 Gorhá cha bágá dar kort o koshtesh. Nun bágay hodábond gón é bágpánán ché kant?
LUK 20:16 Á kayt, é bágpánána koshit o bágá dega bágpánáni dastá dant.” Wahdé mardomán Issáay é habar eshkot, gwashtesh: “Chosh mabát!”
LUK 20:17 Issáyá á rók róká cháretant o gwashti: “Gorhá á nebeshtahay máná ché ent ke gwashit: ‘Hamá seng ke bánbandán nápasond kort o nazort, hamá seng bonheshtbut.’
LUK 20:18 Harkas ke á sengay sará kapit, á kas thokkor thokkora bit o seng ke kaséay sará kapit, áiá hurta kant.”
LUK 20:19 Sharyatay zánóger o mazanén dini péshwáyán zánt ke Issáyá é mesál may bárawá dátag. Paméshká, shawresh kort ke hamé damáná Issáyá gerén, bale cha mardomán torsetesh.
LUK 20:20 Gorhá Issáay sará butant, wati chárig o jásusesh rawán dátant. Chárigán watá tachk o rástén mardom pésh dásht ke Issáyá cha áiay jenday habarán mán begisshénant o Rumay wáliay dastá bedayant.
LUK 20:21 Áyán jost kort: “Oo ostád! Má zánén taw harché gwashay, har tálimé ke dayay, á sajjahén rást ant o hechkasay némagá nageray o Hodáay ráhay sójá pa rástia dayay.
LUK 20:22 Nun márá begwash, Rumay bádsháh Kaysará song o máliát dayag rawá ent yá na?”
LUK 20:23 Bale Issáyá áyáni é makkári zánt o gwashti:
LUK 20:24 “Maná yakk dináré pésh bedárét, eshiay sará kai nám o naksh per ent?” Áyán passaw dát: “Kaysaray.”
LUK 20:25 Issáyá gwasht: “Gorhá Kaysaraygá Kaysará bedayét o Hodáaygá Hodáyá.”
LUK 20:26 É dhawlá, áyán mardománi démá Issá cha áiay jenday habarán dámá dawr dát nakort o cha áiay passawán bah mant o bétawár butant.
LUK 20:27 Randá lahtén Saduki Issáay kerrá átk. Sadukia namannant ke mordag padá zendaga bant.
LUK 20:28 Jostesh kort: “Oo ostád! Mussáyá pa má nebeshtag: Agan kaséay sur kortagén bráté bé awládá bemerit o janózámi zendag bebit, gorhá áiay brát báyad ent gón á janózámá sur bekant tánke chokk o awládé pa wati brátá pédá bekant.
LUK 20:29 Hapt brát atant, awali brátá jané gept, chokki nabut o mort.
LUK 20:30 Domi brátá o
LUK 20:31 padá sayomi brátá gón á janéná sur kort. Hamé paymá haptén brátán gón hamá janéná sur kort o bé awládá cha donyáyá shotant.
LUK 20:32 Sajjahénán o rand á janén ham mort.
LUK 20:33 Nun áheratay róchá, é janén kojám brátayga bit? Chéá ke haptén brátáni jan butag.”
LUK 20:34 Issáyá passaw dát: “Mardom é jaháná sáng o sura kanant,
LUK 20:35 bale hamá mardom ke abadmánén zendá karzant o dobar zendag bayagay láhek ant, á na sura kanant o na sur dayaga bant.
LUK 20:36 Á hechbar padá namerant, préshtagáni dhawlá bant. Hodáay chokk ant, chéá ke abadmánén zenday chokk ant.
LUK 20:37 Bale mordagáni zendag bayagay habaray rásti Mussáyá bon geptagén dhólokay sargwastá pésh dáshtag. Ódá Mussá Hodáwandá Ebráhémay Hodá o Esákay Hodá o Ákubay Hodá gwashit.
LUK 20:38 Á mordagáni Hodá naent, zendagénáni Hodá ent, chéá ke áiay gwará sajjahén zendag ant.”
LUK 20:39 Cha Sharyatay zánógerán lahténá gwasht: “Oo ostád! Taw sharr gwasht.”
LUK 20:40 Cha ed o rand kassá del nakort ke cha áiá josté bekant.
LUK 20:41 Issáyá gón Sharyatay zánógerán gwasht: “Chéá gwashant ke Masih, Dáud bádsháhay chokk ent?
LUK 20:42 Chéá ke Dáud wat Zaburay ketábá gwashit: Hodáwandá gón mani Hodáwandá gwasht mani rástén kashá tán hamá wahdá benend
LUK 20:43 ke man tai dozhmenán tai pádáni chérá dawra dayán.
LUK 20:44 Nun agan Dáud Masihá wati Hodáwanda gwashit, gorhá Masih chón áiay chokk buta kant?”
LUK 20:45 Hamá wahdá ke sajjahén mardom gósh dáragá atant, Issáyá gón moridán gwasht:
LUK 20:46 “Cha Sharyatay zánógerán hozzhár bét ke áyán drájén jámag o kabáh gwará kanag dósta bit o bázáráni tarr o gardá cha mardomán wasshátk o drahbáta lóthant. Kanisaháni awali red o dáwatáni sharterén jágahesh dósta bit.
LUK 20:47 Janózámán rada dayant o polant o pa pésh dáragá wati dwáyán drájkassha kanant. Eshán ganterén sezá rasit.”
LUK 21:1 Issáyá sar borz kort o disti ke lahtén sér o hazgár wati shogránahán mazanén parasteshgáhay pétiá mán kanagá ent.
LUK 21:2 Áiá nézgárén janózámé ham dist ke pétiay tahá do paysahi dawr dát.
LUK 21:3 Gorhá Issáyá gwasht: “Shomárá rásténa gwashán, é béwasén janózámá cha sajjahénán géshter dát.
LUK 21:4 Chéá ke á degarán cha wati bázén málá shogránah dát, bale é janózámá, gón wati garibiá, harché ke áiá pa wati gozaráná hastat, dáti.”
LUK 21:5 Lahtén mardom mazanén parasteshgáhay bárawá gwashagá at ke é gón chónén dhawldárén seng o hayrát kortagén chizzán singárag butag. Issáyá gwasht:
LUK 21:6 “É chizzán ke shomá maróchi gendagá ét, róché kayt ke sajjahén próshag o dawr dayaga bant. Yakk sengé ham domi sengay sará namánit.”
LUK 21:7 Jostesh gept: “Oo ostád! Bárén, é chizz kadéna bant o esháni nazzikk bayagay nesháni ché ent?”
LUK 21:8 Issáyá gwasht: “Hozzhár bét, kasé shomárá gomráh makant. Chéá ke bázéné mani námá kayt o gwashit: ‘Man hamá án’ o ‘Wahd átkag o nazzikk ent,’ bale shomá áyáni randá makapét.
LUK 21:9 Wahdé shomá jang o áshópay hálána eshkonét, delá tors mayárét. Chéá ke awalá báyad ent é chizz bebant, bale halásiay wahd hamá damáná nayayt o narasit.”
LUK 21:10 Padá gón áyán gwashti: “Yakk kawmé dega kawméay helápá o yakk molké dega molkéay helápá páda kayt.
LUK 21:11 Mazanén zeminchandha bant o báz jágah dhokkál o wabá kapit. Cha ásmáná torsnákén nedárag o ajabbatén nesháni záhera bant.
LUK 21:12 Bale cha é sajjahénán o pésar, shomárá gerant o ázára dayant, kanisah o zendánána barant o bandiga kanant. Mani námay sawabá shomárá bádsháh o hákemáni démá barant o pésha kanant.
LUK 21:13 Gorhá shomárá pa gwáhi dayagá sharrén móhé rasit.
LUK 21:14 Wati delá erádah kanét ke pa wati démpániá cha wahdá pésar paréshán mabét.
LUK 21:15 Chéá ke man shomárá anchén zobán o zánté dayán ke hecch dozhmené shomay habaráni démá óshtáta nakant o natwánt áyán rad sabet bekant.
LUK 21:16 Shomay mát o pet o brát o syád o dóst ham shomárá geráénant o lahténá kóshárénant.
LUK 21:17 Sajjahén mardom mani námay sawabá cha shomá naprata kanant,
LUK 21:18 bale shomárá heccha nabit.
LUK 21:19 Agan shomá bardáshta kanét, wati sáhá rakkénét.
LUK 21:20 Wahdé shomá gendét ke lashkarán Urshalim angerr kortag, gorhá bezánét ke eshiay wayrániay wahd nazzikk ent.
LUK 21:21 Á wahdá hamá ke Yahudiahá ant, kóhán betachant. Á ke Urshalimá ant, dhanná dar bekapant o á ke cha shahrá dhann ant shahrá marawant.
LUK 21:22 Chéá ke á wahd sezáay wahda bit o sajjahén nebeshtánkáni habar purah o sarjama bant.
LUK 21:23 Á róchán, lápporrén janén o hamá ke chokka méchénant sakk bazzaga bant, chéá ke molkay sará mazanén mosibaté kayt o é kawmay sará kahr o gazaba kapit.
LUK 21:24 Mardom zahmay dapára bant o bázéné bandig bit o sajjahén donyáyá darándhéh kanaga bit. Darkawm Urshalimá tán á wahdá lagatmála kanant ke darkawmáni dawr o bárig halása bant.
LUK 21:25 Cha róch o máh o estárán nesháni záhera bant o donyáay sajjahén kawm cha daryáay chawl o mawjáni trondén tawárá hayrán o paréshána bant.
LUK 21:26 Mardom donyáay sará áyókén mosibatáni torsá béhósha bant, chéá ke ásmánay zór o wák larzénaga bant.
LUK 21:27 Á wahdá Ensánay Chokká gendant, ke gón mazanén wák o twán o shán o shawkaté jambaréay tahá ent o kayt.
LUK 21:28 Wahdé é jáwara káyant o rasant, gorhá tachká tachk bóshtét o wati sará borz kanét ke shomay nejátay wahd nazzikk ent.”
LUK 21:29 Issáyá áyáná é mesál ham dát: “Enjir o é dega drachkán bechárét,
LUK 21:30 anchosh ke tákesh jat, shomá wata zánét ke nun garmág nazzikk ent.
LUK 21:31 Hamé paymá, wahdé é chizzána gendét, shomá wata zánét ke Hodáay bádsháhi nazzikk ent.
LUK 21:32 Shomárá rásténa gwashán, tán é sajjahén jáwar mayáyant, é nasl o padréch halása nabit.
LUK 21:33 Ásmán o zemin gára bant, bale mani habar hechbar gára nabant.
LUK 21:34 Hozzhár bét, chó mabit ke shomay del cha neshah o malár o zenday pegr o paréshánián chér betarrit o á róch anágat shomay gotthá lóp bebit.
LUK 21:35 Chéá ke á róch donyáay sajjahén mardománi sará kayt.
LUK 21:36 Paméshká harwahd hozzhár bét o dwá bekanét, tánke cha sajjahén áyókén mosibatán berakkét o Ensánay Chokkay bárgáhá óshtát bekanét.”
LUK 21:37 Issáyá har róch, mazanén parasteshgáhá sabakk o tálima dát. Har shap shahrá dhann Zaytun námén kóhéay sará shot o wati shapia gwázént.
LUK 21:38 Har sabáhá máhallah sajjahén mardom pa áiay habaráni gósh dáragá mazanén parasteshgáhá átkant.
LUK 22:1 Béhomirén Naganay Aid, hamá ke Sargwazay Aid ham gwashaga bit, nazzikk at.
LUK 22:2 Mazanén dini péshwá o Sharyatay zánóger pa Issáay koshagá ráh o daré shóház kanagá atant, bale cha mardomána torsetesh.
LUK 22:3 Shaytán Yahudáay, bezán Yahudá Eskaryutiay delá potert. Yahudá cha Issáay dwázdahén kásedán yakké at.
LUK 22:4 Á, mazanén dini péshwá o mazanén parasteshgáhay negahpánén sepáhigáni masteráni kerrá shot o gón áyán shawr o saláhi kort ke che paymá Issáyá áyáni dastá bedant.
LUK 22:5 Á gal butant o shawresh kort ke áiá chizzé zarr bedayant.
LUK 22:6 Yahudáyá mannet o nun sharrén móhéay shóházá at ke cha mocchiay chammán dur Issáyá áyáni dastá bedant.
LUK 22:7 Gorhá Béhomirén Naganay Aiday hamá róch átk ke pa Sargwazay Aiday shámá gwarándh korbániga kanant.
LUK 22:8 Issáyá Petros o Yuhanná dém dátant o gwashti: “Berawét Sargwazay Aiday shámay tayáriá bekanét ke hórigá benendén o bwaréni.”
LUK 22:9 Áyán jost kort: “Taw ché lóthay, má é tayáriá kojá bekanén?”
LUK 22:10 Passawi dát: “Shomá shahrá ke rasét, mardé gendét ke ápi kunzagé gón enti, áiay randá bét o hamá lógá berawét ke á rawt.
LUK 22:11 Lógay wáhondá begwashét: ‘Ostád jostá ent ke mehmánhánah kojá ent tánke man gón wati moridán Sargwazay shámá hamódá bekanán?’
LUK 22:12 Á mard, shomárá wati lógay borzi tabakká mazanén báné pésha dárit ke ódá har chizz hast. Shámay tayáriá hamódá bekanét.”
LUK 22:13 Á shotant o har chizzesh hamá paymá dist ke Issáyá gwashtagat. Sargwazay shámesh hamódá tayár kort.
LUK 22:14 Hamá sáhat ke raset, Issá gón kásedán parzónagay sará nesht.
LUK 22:15 Gón áyán gwashti: “Maná báz armán butag ke sakki o sóriay saggagá pésar é Sargwazay shámá gón shomá hórigá bwarán.
LUK 22:16 Shomárá gwashán, tán Hodáay bádsháhi barjáh kanag mabit, dega baré é shámá nawarán.”
LUK 22:17 Gorhá pyálahé chesti kort, Hodáay shogri gept o gwashti: “Eshiá bezurét o watmánwátá bahr kanét.
LUK 22:18 Shomárá gwashán ke cha ed o rand tán Hodáay bádsháhi mayayt, man anguray ápá nawarán.”
LUK 22:19 Nagani ham zort, Hodáay shogri gept, nagani chondh chondh kort o kásedáná dáti. Gwashti: “É mani badan ent ke pa shomá korbánig kanaga bit, é kárá pa mani yádgáriá bekanét.”
LUK 22:20 Hamé dhawlá, cha waragá rand pyálahé zort o gwashti: “É pyálah mani hón ent, nókén ahd o paymánay hón ke pa shomá réchaga bit.
LUK 22:21 Bale hamá ke maná dróhit, áiay dast gón mani dastá yakkén parzónagá ent.
LUK 22:22 Chéá ke hamá dhawlá ke péshá shawr borrag butag, Ensánay Chokka rawt, bale bazhn o apsóz pa hamá mardomá ke áiá dróhit.”
LUK 22:23 Gorhá kásed yakdomiá jost kanagá laggetant: “Bárén, cha má kay choshén káré kant?”
LUK 22:24 Kásedáni nyámá arh o korh pád átk ke may tahá kay masterén mardom zánag bebit?
LUK 22:25 Issáyá gón áyán gwasht: “Darkawmáni bádsháh wati mardománi sará wájahia kanant o áyáni hákemáni maksad o morád esh ent ke mardom áyán hayr o barkat dayók bezánant.
LUK 22:26 Bale shomá chó makanét, bellét ke shomay masterén, kasterénay dhawlá bebit o shomay hákem, hezmatkáray dhawlá.
LUK 22:27 Bárén kay master ent? Hamá ke neshtag o waragá ent yá hamá ke hezmat kanagá ent? Hamá ke neshtag o waragá ent. Bale man shomay nyámá hezmatkáréay dhawlá án.
LUK 22:28 Shomá hamá ét ke mani ázmáesh o chakkásán gón man hamráh o hamkópag butagét.
LUK 22:29 Hamá dhawlá ke Petá maná bádsháhi bakshetag, man ham shomárá baksháni
LUK 22:30 tánke mani bádsháhiay tahá cha mani parzónagá bwarét, benóshét, tahtáni sará benendét o Bani Esráilay dwázdahén kabilaháni kazáwatá bekanét.
LUK 22:31 Shamun, oo Shamun! Shaytáná ejázat lóthet ke shomárá gandomay dhawlá kamak bekant o begéchit.
LUK 22:32 Bale man pa taw dwá kortag ke tai imán zawál mabit. Gorhá wahdé taw padá mani némagá átkay, wati brátáni delá dhaddh kan.”
LUK 22:33 Bale Petrosá passaw tarrént: “Oo Hodáwand! Man gón taw hórigá pa kayd o band o marká ham tayár án.”
LUK 22:34 Issáyá gwasht: “Oo Petros! Man tará gwashán ke maróchi taw cha korósay bángá pésar mani pajjáh áragá say randá enkára kanay.”
LUK 22:35 Randá cha áyán josti kort: “Bárén hamá wahdá ke man shomárá bé zarturag o pélek o bé chawatthá dém dát, shomá pa chizzéá gatth butét?” Áyán passaw dát: “Na, pa hecch chizzá.”
LUK 22:36 Gorhá gwashti: “Bale nun cha shomá agan kaséay kerrá zarturag o pélek hast, gón wat bezurit o áiay kerrá ke zahm nést, wati kabáhá bahá bekant o zahmé bahá begipt,
LUK 22:37 chéá ke é nebeshtah mani bárawá báyad ent rást o sarjam bebit ke gwashit: Á cha gonahkárán yakké hesáb kanag but. Haw! Á chizz ke mani bárawá nebisag butag, nun sarjam bayagi ent.”
LUK 22:38 Kásedán gwasht: “Oo Hodáwand! Bechár, márá do zahm gón ent.” Gwashti: “Bass ant.”
LUK 22:39 Randá Issá dar átk o anchosh ke áiay hél o ádat at, dém pa Zaytunay Kóhá shot. Morid ham áiay randá butant.
LUK 22:40 Ódá ke sar but, gwashti: “Dwá kanét ke ázmáesh o chakkásá makapét.”
LUK 22:41 Padá chagaléay ráhá cha moridán dur but, kóndháni sará nesht o chosh dwái kort:
LUK 22:42 “Oo mani Pet! Agan tai razá ent gorhá sakkiáni é pyálahá cha man dur kan, bale mani wáhagay sará na, hamá paymá ke tai razá ent.”
LUK 22:43 Cha ásmáná préshtagé záher but o Issáay deli dhaddh kort.
LUK 22:44 Á gránén ranjéá dochár at, paméshká géshter dwái kort o áiay héd hónay trampáni dhawlá zeminay sará petthetant.
LUK 22:45 Cha dwáyá ke pád átk, moridáni némagá per tarret, disti ke gamán zhand o pand kortagant o nun wáb ant.
LUK 22:46 Gwashti: “Parchá waptagét? Pád áét o dwá kanét ke chakkásá makapét.”
LUK 22:47 Issá angat habará at ke rombé mardom átk o raset. Cha Issáay dwázdahén kásedán yakké, bezán Yahudá áyáni rahshón at. Á, Issáay nazzikká átk ke bechokkiti.
LUK 22:48 Issáyá gwasht: “Oo Yahudá! Taw gón chokkagé Ensánay Chokká dozhmenáni dastá dayay?”
LUK 22:49 Wahdé Issáay hamráhán dist ke ché bayagá ent, jostesh kort: “Oo Hodáwand! Wati zahmán bekasshén?”
LUK 22:50 Cha moridán yakkéá wati zahm kasshet o masterén dini péshwáay nawkaray rástén góshi sest.
LUK 22:51 Bale Issáyá gwasht: “Bass kanét!” Áiay góshá dasti per mosht o dráhi kort.
LUK 22:52 Padá Issáyá gón mazanén dini péshwá o mazanén parasteshgáhay negahpánén sepáhigáni master o kawmay kamáshán ke pa áiay dazgir kanagá átkagatant, gwasht: “Záná, man dozz o dhongé án ke shomá gón zahm o latthán mani dazgir kanagá átkagét?
LUK 22:53 Man har róch mazanén parasteshgáhá gón shomá yakjáh butagán, ódá shomá maná dast najatag. Bale haw! Nun wahd shomayg ent o taháróki hákem ent.”
LUK 22:54 Gorhá Issáesh dazgir kort o masterén dini péshwáay lógá bort. Petros dur durá áyáni poshtá gón at.
LUK 22:55 Lógay péshgáhá ásé rókesh kortagat o ásay chágerdá neshtagatant. Petros ham gón áyán nesht.
LUK 22:56 Móledéá ásay rozhnáiá Petros dist, rók róká cháret o gwashti: “É mard ham Issáay hamráh butag.”
LUK 22:57 Bale Petrosá namannet o gwashti: “Oo janén! Man áiá nazánán.”
LUK 22:58 Kammokéá rand degaréá Petros dist o gwashti: “Taw ham cha hamáyán ay.” Petrosá darráént: “Oo mard! Man cha áyán naán.”
LUK 22:59 Kesás sáhatéá rand dega yakkéá Petrosay némagá cháret o pa deljami gwasht: “É mard allamá Issáay hamráh butag, chéá ke é ham Jalilié.”
LUK 22:60 Petrosá darráént: “Oo mard! Man sarpada nabán taw ché gwashagá ay.” Petrosá habar dapá at ke korósá báng dát.
LUK 22:61 Hodáwandén Issáyá chakk tarrént o Petrosay némagá cháret. Gorhá Petros Hodáwanday habaray yátá kapt ke gwashtagati: “Taw maróchi korósay bángá pésar say randá mani pajjáh áragá enkára kanay.”
LUK 22:62 Nun dhanná dar átk o zár zárá gréti.
LUK 22:63 Hamá sepáhigán ke Issá dáshtagat, áiay kalág bandag o janagesh bongéj kort.
LUK 22:64 Issáay chammesh bastant o gwashtesh: “Wati gaybi zántá kár band o begwash ke tará kayá jat?”
LUK 22:65 Dega bázén bad o radé ham kortesh.
LUK 22:66 Wahdé róch but, kawmay kamásháni diwán bezán mazanén dini péshwá o Sharyatay zánóger yakjáh butant o Issáesh áyáni diwáná bort.
LUK 22:67 Jostesh kort: “Agan taw Masih ay gorhá márá pakkáiá begwash.” Issáyá passaw dát: “Agan man begwashán ham, shomá báwara nakanét.
LUK 22:68 O agan josté bekanán, shomá passawa nadayét.
LUK 22:69 Bale cha annugá rand Ensánay Chokk porwákén Hodáay rástén kashá nendit.”
LUK 22:70 Á wahdá sajjahénán gwasht: “Gorhá taw Hodáay Chokk ay?” Passawi dát: “Shomá wat gwashagá ét ke man hamá án.”
LUK 22:71 Áyán gwasht: “Nun dega chónén sháhedié lóthén? Má wat cha áiay jenday dapá é habar eshkot.”
LUK 23:1 Randá diwánay sajjahén mardom pád átkant o Issáesh Pilátusay démá bort o
LUK 23:2 áiay sará bohtám janagesh bendát kort. Gwashtesh: “Má distag ke é mard may kawmá gomráha kant, Rumay Kaysaray song o máliát dayagá manah o makana kant o gwashit: ‘Man Masih án, bádsháhé án.’”
LUK 23:3 Pilátusá jost kort: “Taw Yahudiáni bádsháh ay?” Issáyá passaw dát: “Taw wat gwashagá ay.”
LUK 23:4 Pilátusá gón mazanén dini péshwáyán o gón mardománi mocchiá gwasht: “Man pa é mardá hecch mayára nagendán.”
LUK 23:5 Bale mardom wati habaray sará óshtátant o gwashtesh: “É mard gón wati tálimán Yahudiahay sajjahén damagay mardomána shórénit. Cha Jalilá bongéji kortag o annun edá rasetag.”
LUK 23:6 Pilátusá ke eshkot, lótheti bezánt ke bárén á Jalilié yá na.
LUK 23:7 Wahdé sahig but ke Issá Jalilié, gorhá Jalilay hákem Hirudisay némagá ráhi dát, chéá ke Hirudis á wahdá Urshalimá at.
LUK 23:8 Hirudisá Issá ke dist, sakk gal but, chéá ke dér at ke áiay gendagay wáhagdár at. Áiá Issáay kortagén káráni bárawá eshkotagat o ométwár at ke ajabbatén neshánié begendán.
LUK 23:9 Gorhá cha Issáyá bázén jost o porsé korti, bale Issáyá hecch passaw nadát.
LUK 23:10 Mazanén dini péshwá o Sharyatay zánóger ke hamódá óshtátagatant, Issáay sará bázén bohtámé janagá atant.
LUK 23:11 Hirudisá ham gón wati sepáhigán Issá béezzat kort o kalág gept. Dhawldárén kabáhé gwará dátesh o padá Pilátusay kerrá rawánesh dát.
LUK 23:12 Cha hamá róchá Hirudis o Pilátus sangat butant, pésará dozhmen atant.
LUK 23:13 Pilátusá mazanén dini péshwá o Yahudiáni sarók o mahluk lótháéntant o
LUK 23:14 gwashti: “Shomá é mard mani gwará áwortag o bohtám jatag ke mardomán gomráha kant, bale cha á jostán ke man shomay démá kortagant, áiay sará shomay jatagén bohtámán man hecch rástié nadist.
LUK 23:15 Hirudisá ham mayáré nadistag, paméshká padá may gwará ráhi dátag. É mardá choshén káré nakortag ke sezái mark bebit.
LUK 23:16 Gorhá man eshiá shallák o hayzarána janán o yalaha kanán.”
LUK 23:17 
LUK 23:18 Bale sajjahén mardomán kukkár kort o gwasht: “Issáyá bekosh! Barabbásá ázát kan o márá beday!”
LUK 23:19 Barabbás Urshalimay shahrá áshóp o hónay bohtámá bandig kanag butagat.
LUK 23:20 Pilátus Issáay yalah dayagá delmánag at, paméshká gón mardomán padá habari kort.
LUK 23:21 Bale mardom sakk kukkár kanagá atant, gwashtesh: “Salibi kassh! Salibi kassh!”
LUK 23:22 Pilátusá sayomi randá cha áyán jost kort: “Chéá bárén? É mardá che badén káré kortag? Man hecch bonyádé nagendán ke eshiay kóshay hokmá bedayán, paméshká shallák o hayzaránia janán o yalahia kanán.”
LUK 23:23 Bale mardom kukkárá atant o wati habaray sará óshtátagatant. Gwashtesh: “Salibi kassh!” O áyáni kukkárán kár kort.
LUK 23:24 Pilátusá áyáni wáhagay sará hokm dát.
LUK 23:25 É dhawlá áiá hamá mard ke áshóp o hónay bohtámá bandig at o mardomán lóthet ke yalah dayag bebit, ázát kort o mardománi wáhagay sará Issá sepáhigáni dastá dát.
LUK 23:26 Wahdé Issáyá baragá atant, Shamun námén mardé distesh ke Keriniay shahray mardomé at o dém pa Urshalimá pédák at. Sepáhigán á mard gept, salib áiay baddhá dát o hojjesh kort ke Issáay randá berawt.
LUK 23:27 Issáay randá bázén mardomé rawagá at o gón áyán rombé janén ham gón at ke pa Issáyá gréwag o záriá atant.
LUK 23:28 Issáyá chakk jat o gón áyán gwasht: “Oo Urshalimay jenekkán! Pa man magréwét, pa wat o pa wati chokkán begréwét,
LUK 23:29 parchá ke anchén wahdé kayt ke gwashant: ‘Bahtáwar ant á janén ke santh o bérand ant, hamá janén ke chokkesh nabutag o cha wati sénagán chokkesh naméchéntag.’
LUK 23:30 Hamá wahdá mardom kóhán tawára kanant ke may sará bekapét o jompána gwashant ke márá chér betarrénét.
LUK 23:31 Agan gón sabzén drachká chosha kanant, gorhá gón hoshkéná ché ché nakanant?”
LUK 23:32 Áyán do radkár áwort ke gón Issáyá hór koshagi atant.
LUK 23:33 Wahdé hamá “Kámpól” námén jágahá rasetant, Issáesh salib kasshet. Áiay rástén kashá yakk radkáré salibesh kasshet o chappén kashá domi radkár.
LUK 23:34 Issáyá gwasht: “Oo Pet! Áyán pahell kan, chéá ke nazánant ché kanagá ant.” Gorhá sepáhigán pa láthari o korakasshi Issáay pocch o póshák watmánwatá bahr kortant.
LUK 23:35 Mardom pa sayl o nedáragá óshtátagatant o sarók pa kalág o rishkand gwashagá atant: “Eshiá á dega rakkéntant, bale agan Masih, bezán Hodáay hamá gechén kortagén ent, gorhá watá berakkénit.”
LUK 23:36 Sepáhig ham áiay nazzikká shotant o kalágesh gept, tropshén sharábesh cháshént o gwashtesh:
LUK 23:37 “Agan taw Yahudiáni bádsháh ay, gorhá watá berakkén.”
LUK 23:38 Issáay sarborá mayárnámagé dratkagatesh ke ódá nebeshtah at: “É Yahudiáni bádsháh ent.”
LUK 23:39 Cha doén radkárán ke salib kasshag butagatant, yakkéá Issá kalág zort o gwasht: “Taw Masih naay? Gorhá, byá watá o márá berakkén!”
LUK 23:40 Bale domi radkárá á hakkal kort o gwasht: “Záná tará Hodáay tors nést? Tai sezá ham hamesh ent.
LUK 23:41 Má é sezáyá karzén ke may kortagén káráni ásar ent. Bale é mardá hecch radén káré nakortag.”
LUK 23:42 Gorhá gwashti: “Oo Issá! Wahdé taw wati bádsháhiá sar butay, mani hayálá ham bekap.”
LUK 23:43 Issáyá passaw dát: “Tará rásténa gwashán ke taw maróchi mani hamráhiá baheshtá raway.”
LUK 23:44 Némróchay wahdá sajjahén molká taháriá mán shánt o é taháriá tán bégáhá dásht,
LUK 23:45 chéá ke róchay rozhn shotagat. Mazanén parasteshgáhay pardah cha nyámá dert o do ném but.
LUK 23:46 Issáyá kukkár kort o gwasht: “Oo Pet! Man wati arwáhá tai dastá dayán.” Gón hamé habará, sáhi dát.
LUK 23:47 Pawjiáni apsaréá é nedárag ke dist, Hodái satá kort o gwasht: “Béshakk é bégonáhé at.”
LUK 23:48 Á dega sajjahén mardom ke pa saylá átkagatant, gón é nedáragay gendagá sar o sénagá janáná wati lógán per tarretant.
LUK 23:49 Issáay sajjahén pajjárók o hamá janén ke cha Jalilá áiay hamráhiá átkagatant, dur óshtátag o cháragá atant.
LUK 23:50 Hamódá Issop námén mardé ham gón at ke tachkén o pahrézkárén mardé at. Sarókáni Diwánay báské at,
LUK 23:51 bale pa Issáay mayárig kanagá gón áyáni shawr o kárán razámand naat. Yahudiáni shahr Arimátiáay mardomé at o Hodáay bádsháhiay rahchár o wadárig at.
LUK 23:52 Pilátusay kerrá shot o Issáay jónay baragay ejázati lóthet.
LUK 23:53 Issáay jóni cha salibay sará ér gétk, lilomén godéay tahá patáti o sengén kóhéay tahá jatagén kabréay tóká éri kort ke pésará ódá hechkas kabr kanag nabutagat.
LUK 23:54 Á róch tayáriay róch at o Shabbat bongéj bayagi at.
LUK 23:55 Hamá janén ke cha Jalilá Issáay hamráhiá átkagatant, Issopay randá rawán butant o hamá kabresh dist. Áyán é ham dist ke Issáay jón che paymá kabrá ér kanag but.
LUK 23:56 Randá wati lógán shotant o washbóesh tayár kort. Shabbatay róchá anchó ke Sharyatay parmán ent, áyán árám kort.
LUK 24:1 Haptagay awali róchá róchay thekk kanagá pésar, janénán wati addh kortagén washbó, zortant o kabray sará shotant,
LUK 24:2 bale distesh hamá dhók ke kabray dapá at, cha wati jágahá léthetag.
LUK 24:3 Wahdé tahá shotant, Hodáwandén Issáay jónesh nadist.
LUK 24:4 Á angat hayrán atant o nazántesh ché bekanén ke anágat do mard gón sakkén drapshókén póshákán áyáni kashá átk o óshtát.
LUK 24:5 Janén cha torsá dém pa chér kaptant, bale á doénán gwasht: “Shomá chéá á zendagéná mordagáni nyámá shóháza kanét?
LUK 24:6 Á, edá naent, áiá jáh jatag. Yát kanét, á wahdi ke angat gón shomá Jalilá at, ché gwashti.
LUK 24:7 Shomárá nagwashti ke ‘Ensánay Chokk báyad ent gonahkáráni dastá dayag bebit, báyad ent salib kasshag bebit o sayomi róchá padá zendag bebit o jáh bejant’?”
LUK 24:8 Gorhá á janén Issáay é habaray yátá kaptant.
LUK 24:9 Cha kabray sará ke per tarretant, sarjamén hál o habaresh gón yázdahén kásed o á degar sajjahénán gwashtant.
LUK 24:10 Áyán ke é habar pa kásedán raséntant, Maryam Magdalini, Yuánah, Ákubay mát Maryam o áyáni á dega hamráhén janén atant.
LUK 24:11 Kásedáni hayálá janénáni habar bé sar o bon atant. Paméshká báwaresh nakortant.
LUK 24:12 Bale angat Petros pád átk o tacháná kabray némagá shot, jahl but o cháreti, bale cha lilomén godán o abéd, dega hecchi nadist. Hayrán at ke ché butag o poshti mán dát o shot.
LUK 24:13 Hamá róchá cha áyán do morid dém pa Emáus námén métagéá rawagá at. Emáus cha Urshalimá kesás yázdah kilumitar dur at.
LUK 24:14 Á gón yakdegará hamá sajjahén habar o háláni bárawá gappá atant ke Urshalimá butagatant.
LUK 24:15 Hamé wahdá ke é chizzáni sará gapp o tráná atant, Issáay jend átk o áyáni hamráh but.
LUK 24:16 Bale pajjáhesh nayáwort, chéá ke áyáni chammáni démá pardahé óshtátagat.
LUK 24:17 Issáyá jost kort: “Shomá ráhá watmánwatá chónén gapp o trán kanagá ét?” Á óshtátant, gendagá gamig atant.
LUK 24:18 Gorhá cha áyán yakkéá ke námi Kliupás at, passaw dát: “Urshalimá darámadén mardom yakkén taw ay? Taw sahig naay ke é róchán ódá ché ché butag?”
LUK 24:19 Josti kort: “Ché butag?” Gwashtesh: “Hamá wákyah ke gón Issá Náseriá butag. Á paygambaré at o áiay kár o habarán Hodáay bárgáh o mardománi gwará bázén zór o kodraté mán at.
LUK 24:20 Bale may mazanén dini péshwá o kawmay sarókán darkawmáni dastá dát ke áiay kóshay hokmá bedayant o randá áyán salib kasshet.
LUK 24:21 Márá omét at ke Esráilay rakkénók hamesh ent. Nun gapp esh ent ke é habarán say róch gwastag.
LUK 24:22 Eshiá abéd, cha may hamráhén janénán lahténá ham márá hayrán kortag. Á maróchi sohbá máhallah kabray sará shotagant,
LUK 24:23 bale áiay jónesh nadistag. Gorhá átkant o márá hálesh dát ke má elhám o shobénagay tahá préshtag distagant ke gwashtagesh: ‘Issá zendag ent.’
LUK 24:24 Cha may mardomán ham lahtén kabray sará shotag o áyán ham anchosh ke janénán gwashtag, hamá dhawlá distag, bale áyán wájahay jend nadistag.”
LUK 24:25 Issáyá gón áyán gwasht: “Oo násarpadán! Pa nabiáni har habaray báwar kanagá shomay del kór ent.
LUK 24:26 Allami at ke Masih é sakki o sórián besaggit o pada wati shán o shawkatá sar bebit.”
LUK 24:27 Padá Issáyá, cha Mussáyá beger tán sajjahén nabián, harché ke áiay bárawá ketábán nebeshtah kanag butagat, á sarpad kortant.
LUK 24:28 Wahdé hamá métagay nazzikká átkant ke ódá rawagi atant, Issáyá anchó pésh dásht ke bezán maná durter rawagi ent.
LUK 24:29 Áyán mennat kort: “Shapá gón má bejall chéá ke róch shotag o shap démá ent.” Gorhá Issá ham tahá shot ke gón áyán bejallit.
LUK 24:30 Hamá wahdá ke Issá gón áyán pa waragá nesht, nagani zort, Hodáay shogri gept, nagani chondh chondh kort o áyáná dát.
LUK 24:31 Nun áyáni chamm pach butant o Issáesh pajjáh áwort bale hamá damáná Issá cha áyáni démá gár but.
LUK 24:32 Gorhá cha yakdomiá jostesh kort: “Ráhá wahdé á gón má trán kanagá at o márá Pákén Ketábáni habarán sarpad kanagá at, may del janag o drikk drikk kanagá naat?”
LUK 24:33 Hamá damáná á pád átk o Urshalimá per tarretant. Ódá áyán yázdahén kásed o á dega morid yakjáh distant,
LUK 24:34 ke gwashagá atant: “É rást ent ke Hodáwandá jáh jatag o pa Shamuná záher butag!”
LUK 24:35 Gorhá é doénán wati ráhay sargwast gón áyán áwort ke má Issá che paymá naganay chondh chondh kanagay wahdá pajjáh áwortag.
LUK 24:36 Á angat hamé habarán atant ke Issá wat átk o áyáni nyámá óshtát o gwashti: “Salám o drót pa shomá!”
LUK 24:37 Áyán torset o hayrán o habakkah butant o hayálesh kort ke balkén ruhé gendagá én.
LUK 24:38 Bale Issáyá gwasht: “Parchá shomá inchok paréshán ét o chéá shomay delá shakk pád átkag?
LUK 24:39 Mani dast o pádán bechárét, é mani jend ent. Maná dast bejanét o bechárét, arwáhá haddh o gósht pera nabit, bale shomá gendagá ét ke maná haddh o gósht per.”
LUK 24:40 É habaray gwashagá rand wati dast o pádi pésh dáshtant.
LUK 24:41 Morid cha galá hayrán o habakkah butant o báwaresh nabut. Gorhá josti kort: “Edá gón shomá pa waragá chizzé hast?”
LUK 24:42 Chondhé patkagén máhigesh dát,
LUK 24:43 Issáyá zort o áyáni démá wárt.
LUK 24:44 Padá gwashti: “É mani hamá habar ant ke man gón shomá hamá wahdá kortagant ke angat gón shomá gón butagán. Mani bárawá har habaré ke Mussáay Sharyatá o Nabiáni Ketábán o Zaburá nebeshtah ent, á báyad ent hamá dhawlá rást o sarjam bebit.”
LUK 24:45 Padá áyáni deli rozhná kort ke Pákén Ketábán sarpad bebant.
LUK 24:46 Gwashti: “Nebeshtah kanag butag ke Masih sakki o sória saggit, sáha dant o sayomi róchá cha mordagán jáha jant o
LUK 24:47 áiay námay barkatá tawbah o gonáháni pahelli pa sajjahén kawmán jár janaga bit. É kár cha Urshalimá bendáta bit.
LUK 24:48 Shomá é chizzáni sháhed ét.
LUK 24:49 Man wati Petay wádah dátagén Pákén Ruhá shomay sará rawána dayán. Nun shomá tán hamá wahdá shahrá bemánét ke cha borzá shomárá wák o kodrata rasit.”
LUK 24:50 Padá Issáyá morid tán Bayt-Anyáay nazzikká bortant, wati dasti borz kortant o pa áyán nékdwáii lóthet.
LUK 24:51 Hamá wahdá ke pa áyán nékdwái lóthagá at, cha áyán jetá but o ásmáná barag but.
LUK 24:52 Moridán Issá satá o saná kort o gón bázén gal o wasshié Urshalimá per tarretant.
LUK 24:53 Modám mazanén parasteshgáhá mantant o Hodáay satá o sanáesha kort.
JOH 1:1 Cha azalá, Gál hastat. Gál gón Hodáyá gón at o Gál, Hodáay jend at.
JOH 1:2 Cha azalá, Gál gón Hodáyá at.
JOH 1:3 Hodáyá sajjahén chizz cha Gálay wasilahá jórh kortant o cha é jórh butagénán, bé Gálá hecch chizzé jórh nabut.
JOH 1:4 Zenday sarchammag Gál at o zend mardománi nur at.
JOH 1:5 Nur tahárókiá drapshit o taháróki hechbar nuray sará báládast nabutag.
JOH 1:6 Yahyá námén mardé hastat. Hodáyá ráh dátagat.
JOH 1:7 Á átk ke sháhed bebit o pa hamé nurá gwáhi bedant, tánke sajjahén mardom cha áiay gwáhiá imán byárant.
JOH 1:8 Á wat hamá nur naat bale átk ke pa nurá gwáhi bedant.
JOH 1:9 Hamá rástén nur ke pa sajjahén mardomán rozhnáia kárit, nun jaháná pédák at.
JOH 1:10 Á jaháná at o Hodáyá jahán cha hamáiay wasilahá jórh kortagat, bale jaháná á pajjáh nayáwort.
JOH 1:11 Á wati mahlukay nyámá átk o mahluká á namannet.
JOH 1:12 Bale hamá mardomán ke mannet o áiay námay sará imán áwort, áiá á mardom hakk o ehtiár dátant ke Hodáay chokk bebant.
JOH 1:13 Á, na cha hóná pédá butant o na cha jesmi wáhag o ensáni lóthán, á cha Hodáyá pédá butant.
JOH 1:14 Gál ensán but o may nyámá jágahi kort. Má áiay shán o shawkat dist, hamá shán o shawkat ke Petay yakkén Chokkayg ent, hamá Chokk ke cha rahmat o rástiá sarréch ent.
JOH 1:15 Yahyá áiay bárawá gwáhia dant, kukkára kant o gwashit: “Esh ent hamá kas ke áiay bárawá man gwashtag ke cha man o randa kayt. Á cha man master o démáter ent, chéá ke cha man pésar hast butag.”
JOH 1:16 Má sajjahénán cha áiay pormehrén rahmatay sawgátá modám barkat geptag.
JOH 1:17 É rást ent ke Sharyat cha Mussáay wasilahá bakshag butag, bale rahmat o rásti cha Issá Masihay wasilahá átk.
JOH 1:18 Kassá hechbar Hodá nadistag, bale hamá yakdánagén Chokk ke Petay bagalá ent, hamáiá Hodá pajjáréntag.
JOH 1:19 Wahdé Urshalimay shahray Yahudián wati lahtén dini péshwá o Láwi kabilahay mardom Yahyáay kerrá rawán dát ke jost begerant: “Taw kay ay?” Áiá enkár nakort, tachk o pa rásti gwáhi dát o gwashti: “Man Masih naán.”
JOH 1:21 Áyán jost kort: “Taw Elyás ay?” Gwashti: “Na.” Gwashtesh: “Gorhá taw hamá wádah dátagén Nabi ay?” Gwashti: “Na.”
JOH 1:22 Jostesh kort: “Taw kay ay? Má báyad ent pa wati rawán dayókán passawé bebarén. Wati bárawá ché gwashay?”
JOH 1:23 Áiá cha Eshayá nabiay kawlá gwasht: “Man hamáiay tawár án ke gyábáná kukkára kant o gwashit, pa Hodáwandá ráhá tachk o hamwár kanét.”
JOH 1:24 Cha é rawán dátagén kásedán lahtén Parisi atant.
JOH 1:25 Jostesh kort: “Agan taw na Masih ay o na Elyás ay o na hamá nabi, gorhá parchá pákshódia dayay?”
JOH 1:26 Yahyáyá áyáni passawá gwasht: “Man gón ápá pákshódia dayán, bale yakké shomay nyámá pád átkag ke shomá áiá nazánét.
JOH 1:27 Á cha man o randa kayt o man áiay kawshbandáni bójagay láhek ham naán.”
JOH 1:28 É kár Ordonay kawray á dastá, Bayt-Anyáyá but, hamá jágahá ke Yahyáyá mardom pákshódia dátant.
JOH 1:29 Domi róchá, wahdé Yahyáyá dist ke Issá dém pa man pédák ent, gwashti: “Bechárét! Esh ent Hodáay hamá Gwarándh ke jahánay gonáhána shódit o dura kant.
JOH 1:30 Esh ent hamá kas ke eshiay bárawá man gwashtag ke cha man o randa kayt bale cha man master o démáter ent, chéá ke cha man pésará hast butag.
JOH 1:31 Man wat pajjáh nayáwort, bale paméshká átkán o gón ápá mardomán pákshódi dayagá án ke é mardom pa Bani Esráiliáni záher kanag bebit.”
JOH 1:32 Nun Yahyáyá wati gwáhi é paymá dát: “Man Hodáay Pákén Ruh dist ke kapótéay dróshomá cha ásmáná ér átk o áiay sará nesht.
JOH 1:33 Man á nazánt, bale hamá ke maná rawáni dát ke gón ápá pákshódi bedayán, hamáiá maná gwashtagat ke wahdé taw dist ke Pákén Ruh kaséay sará ér átk o nesht, bezán á hamá kas ent ke gón Pákén Ruhá pákshódia dant.
JOH 1:34 Man é chizz distag o gwáhia dayán ke á Hodáay Chokk ent.”
JOH 1:35 É dega róchá, Yahyá padá gón wati do moridá óshtátagat.
JOH 1:36 Wahdé Yahyáyá Issá dist ke cha ódá gwazagá ent, gwashti: “Esh ent Hodáay Gwarándh.”
JOH 1:37 Doén moridán é habar eshkot o Issáay randá rawán butant.
JOH 1:38 Issáyá chakk tarrént o har doéni distant ke mani randá kaptagant. Josti kort: “Shomá ché lóthét?” Gwashtesh: “Rabbi! (Bezán: Oo ostád!) Taw kojá neshtagay?”
JOH 1:39 Gwashti: “Byáét o bechárét.” Gorhá doén gón Issáyá átkant o distesh ke kojá neshtag o á róchesh gón áiá gwázént. Bégáhay wahd at.
JOH 1:40 É doén mardom ke Yahyáay habaráni eshkonagá rand Issáay randá kapt o shotant, cha eshán yakké Shamun-Petrosay brát Andriás at.
JOH 1:41 Áiá awali káré ke kort, esh at ke wati brát Shamunay kerrá shot o gwashti: “Má Masih dar gétkag.”
JOH 1:42 Randá Shamuni Issáay kerrá bort. Issáyá Shamun cháret o gwashti: “Taw Shamun ay, Yuhannáay chokk. Bale nun tai nám Képá bit.” Képáay máná Petros ent.
JOH 1:43 É dega róchá, wahdé Issáyá erádah kort ke Jalilay damagá rawán, Piliposi dar gétk o gwashti: “Bya, mani randgiriá bekan.”
JOH 1:44 Pilipos ham, Andriás o Petrosay dhawlá, Bayt-Saydáay shahray mardomé at.
JOH 1:45 Pilipos Natnáilay kerrá shot o gwashti: “Má hamá kas dar gétkag ke Mussáyá Tawrátay tahá áiay bárawá nebeshtah kortag o á dega nabián ham áiay bárawá nebeshtah kortag. Á, Issá Náseri ent, Issopay chokk.”
JOH 1:46 Natnáilá gwasht: “Cha Náserahay shahrá ham sharrén chizzé dar kapta kant?” Piliposá gwasht: “Byá o bechár!”
JOH 1:47 Wahdé Issáyá Natnáil dist ke á dém pa man pédák ent, gwashti: “É tachkén Bani Esráilié o eshiay delá hecch paymén makkári mán nést.”
JOH 1:48 Natnáilá jost kort: “Taw maná chóna zánay?” Issáyá áiay passawá gwasht: “Cha hamá wahdá pésar ke Piliposá tará tawár kort, man tará hamá wahdá dist ke enjiray drachkay chérá atay.”
JOH 1:49 Natnáilá gwasht: “Oo ostád! Taw Hodáay Chokk ay, taw Esráilay bádsháh ay.”
JOH 1:50 Issáyá gwasht: “Taw paméshká imán áwort ke man gwasht ke tará enjiray drachkay chérá distagon. Bale cha é chizzán masteréna genday.”
JOH 1:51 Issáyá gwasht: “Shomárá rásténa gwashán, démterá shomá gendét ke ásmán pacha bit o Hodáay préshtag cha Ensánay Chokkay ráhá sara kapant o éra kapant.”
JOH 2:1 Sayomi róchá, Jalilá, Káná námén métagéá, sur o árósé hastat o Issáay mát hamódá at.
JOH 2:2 Issá o áiay moridesh ham lóthetagatant.
JOH 2:3 Wahdé sharáb halletant, Issáay mátá gón áiá gwasht: “Eshán dega sharáb nést.”
JOH 2:4 Gwashti: “Oo bánok! Maná o tará gón eshiá che kár? Mani wahd angat nayátkag.”
JOH 2:5 Mátá gón kárendahán gwasht: “Harché ke shomárá gwashit, hamá kárá bekanét.”
JOH 2:6 Ódá shash sengén kunzag ér at ke har yakkéá hashtád tán sad o bist litar ápa dásht o Yahudiáni shosht o shódi rasmán kármarza butant.
JOH 2:7 Issáyá gón kárendahán gwasht: “Kunzagán cha ápá porr kanét.” Gorhá kunzagesh cha ápá porr kortant.
JOH 2:8 Issáyá gwasht: “Nun kammoké bekasshét o pa diwánay kamáshá bebarét.” Áyán anchosh kort.
JOH 2:9 É áp ke sharáb butagatant, diwánay kamáshá chashtant. Nazánti ke cha kojá árag butagant, bale hamá kárendahán ke áp kasshetagatant, áyána zánt. Nun diwánay kamáshá, sálónk tawár jat o
JOH 2:10 gwashti: “Harkas mehmánán sharterén sharábá pésará dant. Wahdé á mast o malára bant, randá adná o arzánteréná kárit. Bale taw sharterén sharáb nóki áwortag.”
JOH 2:11 É mójezah o ajabbatén nesháni ke Issáyá Jalilay métag Kánáyá pésh dásht, áiay awali mójezah at. Áiá gón hamé mójezahá wati shán o shawkat záher kort o moridán áiay sará imán áwort.
JOH 2:12 Randá Issá gón wati mát o brát o moridán Kaparnáhumay shahrá shot. Lahtén róchá hamódá dáshtesh.
JOH 2:13 Yahudiáni Pesah, bezán Sargwazay Aid, nazzikk at. Paméshká, Issá Urshalimá shot.
JOH 2:14 Disti ke mazanén parasteshgáhá mardom gók o pas o kapótay bahá kanagá goláésh ant o sarráp ham neshtagant.
JOH 2:15 Gorhá cha sádá hayzaráné jórhi kort o sajjahén sawdáger o pas o góki cha parasteshgáhá galléntant o sarrápáni zarr o sekkahi ham rétkant o thébali chappi kortant.
JOH 2:16 Gón kapót bahá kanókán gwashti: “É chizzán cha edá dar kanét. Mani ásmáni Petay lógá bázáré makanét.”
JOH 2:17 Nun morid yátá kaptant ke Hodáay Pákén Ketábá nebeshtah ent: Á jósh o gayrat ke maná pa Hodáay lógá hastent, maná sóchit o pora kant.
JOH 2:18 Gorhá Yahudián gwasht: “Taw gón chónén mójezah o ajabbatén neshánié sábeta kanay ke tará é káráni ejázat hastent?”
JOH 2:19 Issáyá gwasht: “É mazanén parasteshgáhá bepróshét, man say róchá padá chestia kanán.”
JOH 2:20 Yahudián gwasht: “É mazanén parasteshgáh, chell o shash sálá jórh kanag butag, taw chón eshiá say róchá chesta kanay?”
JOH 2:21 Bale á parasteshgáh ke Issá áiay bárawá habar kanagá at, áiay jenday badan at.
JOH 2:22 Issáay merag o jáh janagá rand, morid yátá kaptant ke áiá wat é habar kortagat. Nun áyán Hodáay Pákén Ketáb o Issáay habaráni sará imán áwort.
JOH 2:23 Á róchán, Issá Sargwazay Aidá Urshalimá at. Bázén mardoméá ke Issáay ajabbatén nesháni distant, áiay námay sará imánesh áwort.
JOH 2:24 Bale Issáyá áyáni imánay sará báwar nakort, chéá ke áiá sajjahénáni del o daruna zánt.
JOH 2:25 Áiá ensánay bárawá hechkasay gwáhiay zalurat naat, chéá ke á, ensánay delay har hálá sahig at.
JOH 3:1 Nikudimus námén Parisié ke cha Yahudiáni Sarókáni Diwánay báskán yakké at,
JOH 3:2 yakk shapé Issáay kerrá átk o gón áiá gwashti: “Oo ostád! Má zánén ke taw ostádé ay o cha Hodáay némagá átkagay, chéá ke tán Hodá gón kaséá gón mabit, á é dhawlén mójezah o ajabbatén nesháni pésh dáshta nakant ke taw pésh dáragá ay.”
JOH 3:3 Issáyá áiay passawá gwasht: “Tará rásténa gwashán, tán kasé dobar pédá mabit, Hodáay bádsháhiá dista nakant.”
JOH 3:4 Nikudimusá gwasht: “Chón buta kant ke rostagén mardomé padá cha mátá pédá bebit? Buta kant ke á, mátay lápá berawt o padá pédá bebit?”
JOH 3:5 Issáyá passaw dát: “Tará rásténa gwashán, tánke kasé cha áp o Ruhá pédá mabit, Hodáay bádsháhiá pád ér korta nakant.
JOH 3:6 Á chizz ke cha jesmá pédá bit, jesm ent o á chizz ke cha Ruhá pédá bit, ruh ent.
JOH 3:7 É gappá hayrán mabay wahdé tará gwashán ke pa shomá sajjahénán allami ent ke dobar pédá bebét.
JOH 3:8 Gwát har jáh ke belóthit, kasshit. Taw áiay tawárá eshkonay bale nazánay cha kojá kayt o kojá rawt. Á kas ke cha Ruhá pédá bit, á ham anchosh ent.”
JOH 3:9 Nikudimusá gwasht: “É chón buta kant?”
JOH 3:10 Issáyá gwasht: “Taw wat Esráiliáni ostádé ay, é chizzá nazánay?
JOH 3:11 Tará rásténa gwashán, má hamá chizzáni habará kanén ke áyáni bárawá zánén o hamá chizz ke má distagant, hamáyáni sháhediá dayén. Bale shomá may sháhediá namannét.
JOH 3:12 Wahdé man zemini chizzáni bárawá habara kanán, shomá báwara nakanét. Agan ásmáni chizzáni bárawá habar bekanán, gorhá che paymá báwara kanét?
JOH 3:13 Hechkas ásmáná borzád nashotag, abéd cha hamá kasá ke cha ásmáná ér átkag, bezán Ensánay Chokká.
JOH 3:14 Hamá dhawlá ke Mussáyá, gyábáná már cha zeminá chest kort, hamé dhawlá Ensánay Chokk lázom chest kanaga bit,
JOH 3:15 tánke harkas ke áiay sará imána kárit, abadmánén zenday wáhond bebit.”
JOH 3:16 Chéá ke Hodáyá jahánay mardom haminchok dóst dáshtant ke wati yakk o yakdánagén Chokki nadr kort tánke harkas ke Hodáay Chokkay sará imána kárit, gár o zyán mabit o tán abad zendag bemánit.
JOH 3:17 Hodáyá wati Chokk pa jahánay mardománi mayárig kanagá jaháná rawán nadát, paméshká rawáni dát ke cha áiay wasilahá jaháná berakkénit.
JOH 3:18 Harkas ke Chokkay sará imána kárit, mayáriga nabit, bale harkas ke imána nayárit, cha pésará mayárig ent, chéá ke Hodáay yakdánagén Chokkay námay sará imáni nayáwortag.
JOH 3:19 Hodáay dádrasi esh ent: Nur o rozhn jaháná átk, bale rozhnay badalá mardomán taháróki dóst dásht, parchá ke áyáni kár sell atant.
JOH 3:20 Chéá ke á mardom ke sellén káráni ráhá zurit, cha rozhnáiá naprata kant o watá cha rozhná dura dárit ke áiay kár o kerd záher mabant.
JOH 3:21 Bale á ke rástiay ráhá zurit, dém pa rozhnáiá kayt tánke záher bebit ke áiay kár Hodái butagant.
JOH 3:22 É chizzán o rand, Issá gón wati moridán Yahudiahay damagay métag o kallagán shot o gón áyán hamódá dáshti o pákshódiia dát.
JOH 3:23 Yahyá ham Sálemay nazzikká, Aynuná, mardomán pákshódi dayagá at. Ódá áp báz at o mardom pa pákshódiá átkant.
JOH 3:24 É wahdán Yahyá angat zendáná bandig kanag nabutagat.
JOH 3:25 Pákizagiay sará, Yahyáay morid o yakk Yahudiéay nyámá dapjáké but.
JOH 3:26 Gorhá Yahyáay morid Yahyáay kerrá átkant o gwashtesh: “Oo ostád! Hamá mard ke Ordonay kawray á dastá gón taw gón at o taw áiay bárawá gwáhi dát, bechár, á pákshódi dayagá ent o sajjahén mardom hamáiay kerrá rawagá ant.”
JOH 3:27 Yahyáyá áyáni passawá gwasht: “Tánke Hodá madant, ensáná heccha narasit.
JOH 3:28 Shomá wat sháhed ét, man gwasht ke man Masih naán, bale cha áiá pésar rawán dayag butagán.
JOH 3:29 Bánóray hodábond, sálónk ent. Anchó ke sálónkay dóst óshtátag o sálónkay tawárá eshkont o gal o shádána bit, maná hamé dhawlén kámelén shádmánié rasetag.
JOH 3:30 Á báyad ent démáter bebit o man padáter bebán.”
JOH 3:31 Á kas ke cha borzá kayt, cha sajjahénán master ent o á ke cha é hákién donyáyá ent, zemini mardomé o donyái chizzáni bárawá habara kant. Bale á ke cha ásmáná kayt cha sajjahénán master ent.
JOH 3:32 Har chizzé ke distag o eshkotagi, áyáni bárawá gwáhia dant, bale kass áiay gwáhiá namannit.
JOH 3:33 Harkasá ke mannetag, gwáhii dátag ke Hodá rásti ent.
JOH 3:34 Á kas ke cha Hodáay némagá rawán dayag butag, Hodáay habarána kant, chéá ke Hodá wati Ruhá áiárá béhesába bakshit.
JOH 3:35 Pet Chokká dósta dárit o sajjahén chizzi hamáiay dastá dátagant.
JOH 3:36 Á kas ke Chokkay sará imána kárit, abadmánén zenday wáhonda bit, bale á ke Chokká namannit, zenday wáhonda nabit o Hodáay kahr o gazab áiay sará kapit.
JOH 4:1 Wahdé Issáyá zánt ke Parisián eshkotag ke man cha Yahyáyá géshter morid dar géjagá án o áyán pákshódi dayagá án,
JOH 4:2 cha Yahudiahá dém pa Jalilá wátarri kort. Chónáhá, Issáyá wat mardom pákshódia nadátant, é kár moridána kort.
JOH 4:4 Bale zalurat at ke cha Sámerahá begwazit.
JOH 4:5 Á, Sámerahá shahréá raset ke námi Suhár at o hamá dhagáray nazzikká at ke Ákubá wati chokk Issopárá dátagat.
JOH 4:6 Ákubay chát hamódá at. Issá sapará butagat o dami bortagat. Hamé chátay kerrá nesht. Némróchay wahd at.
JOH 4:7 Sámeri janéné ápay kasshagá átk. Issáyá gón áiá gwasht: “Maná pa waragá kammé áp beday.”
JOH 4:8 Áiay morid warákay geragá shahrá shotagatant.
JOH 4:9 Sámeri janéná gwasht: “Taw wa Yahudié ay o man Sámeri janéné án, taw chón cha man ápa lóthay?” Janéná paméshká chosh gwasht ke Yahudi gón Sámerián salám o dwá nakanant.
JOH 4:10 Issáyá áiay passawá gwasht: “Agan taw bezántén ke Hodáay dád o bakshesh chéé o é kay ent ke cha taw ápa lóthit, gorhá allamá taw gón áiá dazbandi kortagat ke maná áp beday o áiá tará zendáp dátagat.”
JOH 4:11 Janéná gwasht: “Oo wájah! Tará pa ápay kasshagá dhól nést o é chát johl ent, cha kojá zendápa káray?
JOH 4:12 Záná, taw cha may pirok Ákubá master ay, hamá ke é cháti márá dátag o áiay jendá o chokkán o mál o dalwatán cha é chátá áp wártag?”
JOH 4:13 Issáyá passaw tarrént: “Harkas ke é ápá bwárt, padá tonniga bit,
JOH 4:14 bale harkas ke mani dátagén ápá bwárt, hechbar tonniga nabit. Chéá ke á ápá ke mana dayán, agan kasé bwárti, cha áiay daruná ápay chammagé bojit ke abadmánén zenda bakshit.”
JOH 4:15 Janéná gwasht: “Oo wájah! Hamá ápá maná beday ke dega baré tonnig mabán o pa ápay kasshagá edá mayáyán.”
JOH 4:16 Issáyá gwasht: “Beraw wati lógwájahá tawár kan o hamedá byá.”
JOH 4:17 Janéná áiay passawá gwasht: “Maná mard nést.” Issáyá gwasht: “Rásta gwashay ke tará mard nést,
JOH 4:18 chéá ke tará panch mard butag o é mard ke annun gón taw zendagia kant, tai mard naent. Taw rásta gwashay.”
JOH 4:19 Janéná darráént: “Oo wájah! Man chó gendán ke taw nabié ay.
JOH 4:20 May pet o pirokán hamé kóhay sará ebádat kortag, bale shomá Yahudia gwashét ke báyad ent Urshalimá ebádat kanag bebit.”
JOH 4:21 Issáyá gwasht: “Bánok! Báwar kan, wahdé kayt ke shomá Hodáén Petá na é kóhay sará parastesha kanét o na Urshalimá.
JOH 4:22 Shomá Sámeri hamáiá parastesha kanét ke nazánéti, bale má hamáiá parastesha kanén ke zánéni, chéá ke neját cha Yahudiána kayt.
JOH 4:23 Yakk wahdé kayt o á wahd annun bongéj butag ke rást o barhakkén parastesh kanók Hodáén Petá gón Ruh o rásti parastesha kanant, chéá ke Pet hamé dhawlén mardománi lóthók ent ke áiay parasteshá bekanant.
JOH 4:24 Hodá Ruh ent o harkas ke áiá parastesha kant, allamá gón Ruh o rásti parastesh bekant.”
JOH 4:25 Janéná gwasht: “Mana zánán ke Masiha kayt o har wahdé ke á kayt, márá har chizzá sarpada kant.”
JOH 4:26 Issáyá gwasht: “Man ke gón taw habará án, man hamá án.”
JOH 4:27 Hamé wahdá Issáay morid padá átkant. Wahdé distesh ke Issá gón janénéá habará ent, hayrán butant. Bale kassá jost nakort ke cha eshiá ché lóthay yá parchá gón eshiá habará ay.
JOH 4:28 Nun janéná wati kunzag zeminá ér kort, shahrá shot o gón mardomán gwashti:
JOH 4:29 “Mardé hast, man harché kortag, áiá maná gwashtant. Byáét becháréti, bárén Masih naent?”
JOH 4:30 Gorhá mardom cha shahrá dar kapt o dém pa Issáyá átkant.
JOH 4:31 É nyámá moridán gón Issáyá dazbandi kort o gwasht: “Oo ostád! Chizzé bwar.”
JOH 4:32 Bale áiá gwasht: “Maná waráké hast ke shomá áiay bárawá nazánét.”
JOH 4:33 Moridán watmánwatá gwasht: “Bárén, kaséá pa áiá warák áwortag?”
JOH 4:34 Issáyá gwasht: “Mani warák esh ent ke wati dém dayókay wáhagá purah bekanán o áiay kárán sarjam bekanán.
JOH 4:35 Shomá nagwashét ke pa rón o móshá angat chár máh pasht kaptag? Bale man shomárá gwashán ke chammán chest kanét o keshárán bechárét ke annun pa róná rasetag o tayár ant.
JOH 4:36 Ronók wati mozzá gipt o pa abadmánén zendá bar o samaré moccha kant tánke keshók o ronók hórigá gal o shádán bebant.
JOH 4:37 Edá é habar rást ent ke yakké keshit o degaré róna kant.
JOH 4:38 Man shomárá rawán dát ke hamá bar o samaráni wáhond bebét ke shomá pa áyán hecch zahmaté ham nakasshetag. Degarán zahmat kasshetag o shomá cha áyáni kárá nap o sutt geptag.”
JOH 4:39 Cha á shahray Sámerián bázénéá paméshká Issáay sará imán áwort ke á janéná gwáhi dátag o gwashtagat: “Har chizzé ke man kortag, áiá maná gwashtant.”
JOH 4:40 Gorhá Sámeri Issáay kerrá átkant o dazbandiesh kort ke may kerrá bedár. Issáyá tán do róchá hamódá dásht o
JOH 4:41 bázénéá áiay habar gósh dáshtant o imánesh áwort.
JOH 4:42 Gón á janéná gwashtesh: “Nun má éwaká tai habaráni sawabá báwar kanagá naén, má wat ham é marday habar eshkotagant o deljam én ke é pa rásti jahánay rakkénók ent.”
JOH 4:43 Do róchá rand, Issá cha ódá dar kapt o Jalilá shot.
JOH 4:44 Issáyá wat gwashtagat ke hecch nabiá wati jenday shahr o hankéná ezzata nabit.
JOH 4:45 Bale wahdé Jalilá raset, Jalilián wasshátk kort, chéá ke aiday róchán á Urshalimá butagatant o ódá áiay kortagén káresh distagatant.
JOH 4:46 Issá padá Jalilay métag Kánáyá shot, hamódá ke ápi sharáb kortagatant. Sháhi mansabdáré hastat ke bachakki Kaparnáhumay shahrá nádráh at.
JOH 4:47 Wahdé á sahig but ke Issá cha Yahudiahá Jalilá átkag, áiay kerrá átk o dazbandii kort ke Kaparnáhumá byá o mani nádráhén chokká berakkén ke markig ent.
JOH 4:48 Issáyá gwasht: “Shomá tán mójezah o ajabbatén neshánia nagendét, hecch paymá imána nayárét.”
JOH 4:49 Mansabdárá gwasht: “Oo wájah! Chokkay meragá pésar byá.”
JOH 4:50 Issáyá gwasht: “Beraw, tai chokk namerit.” Á mardá Issáay habar báwar kort o wati lógá shot.
JOH 4:51 Angat lógá narasetagat ke nawkarán ráhay némá dist o hál dát: “Tai chokk dráh but.”
JOH 4:52 Áiá jost kort: “Che wahdá gehter butag?” Áyán gwasht: “Zi némróchay yakká tapá yalah dátag.”
JOH 4:53 Petá zánt é hamá wahd at ke Issáyá gwashtagat ke tai chokk namerit. Gorhá áiá wat gón lógay sajjahén mardomán Issáay sará imán áwort.
JOH 4:54 É Issáay domi ajabbatén nesháni at o hamá wahdá korti ke cha Yahudiahá Jalilá átkagat.
JOH 5:1 Chizzé wahdá rand, Yahudiáni yakk aidé at o Issá Urshalimá shot.
JOH 5:2 Urshalimá, darwázagéay nazzikká ke áiá Pasay Darwázaga gwashant, hawzé hastent ke áiay chapp o chágerdá panch aywán ant. Aramái zobáná é hawzá Bayt-Hasdá gwashant.
JOH 5:3 Ódá bázén ájez o nádráhé waptagat ke kór o lang o mondh atant.
JOH 5:5 Ódá mardé hastat ke áiay nájórhiá si o hasht sál at.
JOH 5:6 Wahdé Issáyá dist ke á mard ódá kaptag o zánti ke kwahnén nádráhé, gwashti: “Taw lóthay wassh o dráh bebay?”
JOH 5:7 Á nádráhá gwasht: “Oo wájah! Wahdé ápa rombit o rawána bit, kasé nést ke maná hawzá dawr bedant. Tán man watá berasénán, degaré pésará ápá mána dant.”
JOH 5:8 Issáyá gwasht: “Pád á, wati nepádá bezur o beraw.”
JOH 5:9 Á mard damáná dráh but, wati nepádi zort o ráh gept. É róch Shabbatay róch at.
JOH 5:10 Paméshká Yahudián gón dráh butagén mardá gwasht: “Maróchi Shabbatay róch ent, tará wati nepádáni chest kanagay hakk nést.”
JOH 5:11 Gwashti: “Á mardá ke maná dráh kort, gwashti: ‘Wati nepádán bezur o beraw.’”
JOH 5:12 Jostesh kort: “Á mard kay ent ke tará gwashtagi ke wati nepádán bezur o beraw?”
JOH 5:13 Bale dráh butagén mardá nazánt ke á kay at. Chéá ke ódá mardom mocch atant o Issá mocchiay tahá shotagat.
JOH 5:14 Randá Issáyá é mard mazanén parasteshgáhá dist, gwashti: “Bechár, nun ke taw dráh butagay, cha ed o dém gonáh makan. Chó mabit ke ganterén baláhé tai sará bekapit.”
JOH 5:15 Nun mard shot o gón Yahudián gwashti: “Áiá ke maná dráh o salámat kort, á Issá at.”
JOH 5:16 Yahudián Issáay ázár dayag bendát kort, chéá ke áiá Shabbatay róchá choshén kára kortant.
JOH 5:17 Bale Issáyá gón áyán gwasht: “Mani Pet angat kárá ent, man ham kára kanán.”
JOH 5:18 Cha é habarán, Yahudián pa áiay koshagá géshter tach o tága kort. Chéá ke Shabbatay hokmay próshagá abéd, áiá Hodá ham wati jenday Pet gwasht o é dhawlá, watá gón Hodáyá barábari kort.
JOH 5:19 Gorhá Issáyá gwasht: “Shomárá rásténa gwashán, Chokk watsará hecch káré korta nakant, Petay kárána gendit o áyáni randgiriá kant. Har káré ke Peta kant, Chokk ham hamá kárá kant.
JOH 5:20 Chéá ke Pet Chokká dósta dárit o harché ke wata kant, Chokká ham sója dant. Chokká dega masterén kár ham sója dant tánke shomá hayrán o habakkah bebét.
JOH 5:21 Hamá paymá ke Pet mordagán zendaga kant o áyán zenda bakshit, Chokk ham harkasá ke belóthit zendaga kant.
JOH 5:22 Pet hechkaséay sará shawr o hokmé naborrit, áiá wati dádrasiay sajjahén ehtiár Chokkay dastá dátagant,
JOH 5:23 tánke sajjahén mardom hamá dhawlá ke Petá ezzata dayant, Chokká ham ezzat bedayant. Kasé ke Chokká ezzata nadant, Petá ham ezzata nadant, chéá ke Chokkay dém dayók Pet ent.
JOH 5:24 Shomárá rásténa gwashán, harkas ke mani habará beshkont o mani dém dayókay sará imán byárit, abadmánén zenday wáhonda bit o hechbar mayárig kanaga nabit, bezán á cha marká gwastag o zendá sar butag.
JOH 5:25 Báwar kanét, yakk wahdé kayt o é wahd annun bongéj butag ke mordag Hodáay Chokkay tawárá eshkonant o harkas ke beshkont padá zendaga bit.
JOH 5:26 Chéá ke hamá dhawlá ke Pet zendmánay sarchammag ent, Chokká ham é wák o twáni dátag ke zendmánay sarchammag bebit.
JOH 5:27 Petá dádrasiay ehtiár ham Chokkay dastá dátag, chéá ke á Ensánay Chokk ent.
JOH 5:28 Cha eshiá hayrán o habakkah mabét, chéá ke yakk wahdé kayt ke sajjahén mordag áiay tawárá eshkonant o cha wati kabrán dara káyant. Nékkár dém pa abadmánén zendá rawant o badkár dém pa mayárig bayagá.
JOH 5:30 Man watsará káré korta nakanán, har chizzé ke man eshkotag, hamáiay bonyádá dádrasia kanán o mani dádrasi barhakk ent, parchá ke man wati delay wáhagáni sarjam kanagay pad o randá naán, wati dém dayókay wáhagáni sarjam kanagay pad o randá án.
JOH 5:31 Agan man wati bárawá wat gwáhi bedayán, mani gwáhiá ehtebár o arzeshé nabit.
JOH 5:32 Bale degaré hastent ke mani bárawá gwáhia dant o mana zánán ke mani bárawá áiay gwáhi rást ent.
JOH 5:33 Shomá wati kásed Yahyáay kerrá rawán dátant o mani bárawá áiay dátagén gwáhi ham rást at.
JOH 5:34 Man mardománi gwáhiá namannán, pa shomay rakkénagá é habarána gwashán.
JOH 5:35 Yahyá rókén cherágé at o rozhni tálána kort o shomá erádah kort ke pa kammén wahdéá áiay nuray tahá gal bebét.
JOH 5:36 Bale maná cha Yahyáyá masterén sháhed hast. Hamé kár ke Petá mani dastá dátagant ke sarjamesh bekanán o man sarjamesha kanán, hamé kár mani sháhed ant ke maná Petá rawán dátag.
JOH 5:37 Hamá Petá ke maná rawán dátag, áiá wat mani bárawá sháhedi dátag. Shomá hechbar áiay tawár naeshkotag o á nadistag o
JOH 5:38 áiay habar shomay delá nanendit, chéá ke shomá áiay rawán dátagénay sará imána nayárét.
JOH 5:39 Shomá Pákén Ketábán patth o póla kanét o wánét, chéá ke shomay hayálá esháni tahá shomárá abadmánén zenda rasit. Hamé Pákén Ketáb mani bárawá gwáhia dayant,
JOH 5:40 bale shomá nalóthét mani kerrá byáét o shomárá é zend berasit.
JOH 5:41 Man mardománi dátagén satá o ezzatá nazurán.
JOH 5:42 Shomárá jáha kárán o zánán ke Hodáay mehr shomay delá néstent.
JOH 5:43 Man wati Petay námay sará átkagán o shomá maná namannét, bale agan kasé wati jenday námá byayt, áiá mannét.
JOH 5:44 Shomá cha yakdegará mazani o ezzata zurét, bale á ezzat ke cha Hodáay némagá kayt, áiay shóházá naét. Gorhá chón imán áworta kanét?
JOH 5:45 Gomán makanét ke man Petay démá shomárá mayáriga kanán. É Mussá ent ke shomárá mayáriga kant, hamá Mussá ke shomá áiay sará omét bastag.
JOH 5:46 Agan shomárá Mussáay sará imán butén, shomárá mani sará ham imán butagat, chéá ke áiá mani bárawá nebeshtag.
JOH 5:47 Bale shomá ke áiay nebeshtah kortagénán báwara nakanét, mani habarán chón báwara kanét?”
JOH 6:1 Randá, Issá Jalilay Mazangwarm bezán Teberiahay Mazangwarmay á dastá shot.
JOH 6:2 Mardománi mazanén rombé áiay randá kapt, chéá ke áyán é mójezah o ajabbatén nesháni distagatant ke Issá nádráhán dráha kant.
JOH 6:3 Gorhá Issá kóhéay sará sar kapt o gón wati moridán hamódá nesht.
JOH 6:4 Yahudiáni Sargwazay Aid nazzikk at.
JOH 6:5 Wahdé Issáyá chamm chest kortant o dist ke mardománi mocchié dém pa áiá pédák ent, gón Piliposá gwashti: “Nán cha kojá bezurén ke é mardom warák bwarant?”
JOH 6:6 Issáyá é habar pa áiay ázmáesh kanag o chakkásagá gwasht, chéá ke wat zánti maná ché kanagi ent.
JOH 6:7 Piliposá gwasht: “Do sad dináray nán ham bassa nabit, toré harkas kammok kammok bwárt.”
JOH 6:8 Cha áiay moridán yakké ke námi Andriás at o Shamun-Petrosay brát at, gwashti:
JOH 6:9 “Bachakké hamedá ent ke panch jawén nagan o do máhigi gón, bale pa inchok mardomá ché bant?”
JOH 6:10 Issáyá gwasht: “Mardomán benádénét.” Á jágahá bázén káh o sabzagé rostagat. Mardom hamódá neshtant. Cha áyán kesás panch hazár mardén atant.
JOH 6:11 Issáyá nagan zortant, Hodáay shogri gept o neshtagén mardománi sará bahri kortant, máhig ham anchosh. Harkasá haminchok ke lóthet, dáti.
JOH 6:12 Wahdé sajjahénán sér kort, gón moridán gwashti: “Sar átkagén thokkorán bechenet o yakjáh kanét ke zawál mabant.”
JOH 6:13 Gorhá thokkoresh chet o yakjáh kortant. Á panchén jawén nagan ke mardomán wártagatant, cha áyáni sar átkagén thokkorán dwázdah sapt porr but.
JOH 6:14 Mardomán ke Issáay é mójezah o ajabbatén nesháni dist, gwashtesh: “Pa rásti, é hamá wádah dátagén Nabi ent ke jaháná áyagi at.”
JOH 6:15 Issáyá zánt ke mardom maná pa zór barag o bádsháh kanaga lóthant, paméshká padá cha mardomán dur but o tahná kóhá shot.
JOH 6:16 Bégáhá morid dém pa gwarmá shotant.
JOH 6:17 Bójigéá neshtant o gwarmay á dastá, dém pa Kaparnáhumá ráh geptant. Nun tahár butagat o Issá angat áyáni kerrá nayátkagat.
JOH 6:18 Trondén gwáté kasshagá at o chawl o mawj chest butant.
JOH 6:19 Wahdé kesás panch tán shash kilumitar hólig janáná démá shotant, Issáesh dist ke ápay sará gám janán, dém pa bójigá pédák ent. Torsetesh.
JOH 6:20 Bale Issáyá gwasht: “Matorsét, é man án.”
JOH 6:21 Anchó ke moridán lóthet áiá bójigá swár bekanant, bójig menzelá sar but.
JOH 6:22 É dega róchá, hamá mardom ke gwarmay á dastá mantagatant sarpad butant ke cha hamá bójigá abéd ke morid swár butagatant, dega bójig ódá nabutag. Issá á bójigá swár nabutagat o morid bé áiá shotagatant.
JOH 6:23 Randá, dega lahtén bójig cha Teberiahá hamá jágahá átk o raset ke ódá Hodáwandén Issáyá Hodáay shogr geptagat o mardomán nán wártagat.
JOH 6:24 Wahdé mardomán dist ke na Issá ódá ent o na áiay morid, Issáay shóházá bójigán swár butant o dém pa Kaparnáhumá shotant.
JOH 6:25 Wahdé Issáesh gwarmay á dastá dist, gwashtesh: “Ostád! Taw kadi edá átkagay?”
JOH 6:26 Issáyá áyáni passawá gwasht: “Shomárá rásténa gwashán, é háterá maná shóház nakanagá ét ke shomá mani mójezah o ajabbatén nesháni distagant, paméshká maná shóház kanagá ét ke shomá nán wárt o sér kort.
JOH 6:27 Bale pa é zawál bayókén waráká johd makanét, pa hamá waráká johd bekanét ke abadmánén zenda bakshit, pa hamá waráká ke Ensánay Chokk shomárá danti. Chéá ke Hodáén Petá áiay sará wati razámandiay mohr jatag.”
JOH 6:28 Gorhá jostesh kort: “Má chón hamá kárán bekanén ke Hodáesh cha má lóthit?”
JOH 6:29 Issáyá passaw dát: “Á kárá ke Hodá cha shomá lóthit, á kár esh ent: Hamá kasay sará imán byárét ke Hodáyá ráh dátag.”
JOH 6:30 Áyán gwasht: “Taw chónén ajabbatén nesháni pésha dáray ke má begendén o tai sará imán byárén? Ché kanay?
JOH 6:31 May pet o pirokán gyábáná mann wárt, anchosh ke Pákén Ketába gwashit: ‘Áiá cha ásmáná nagan rawán dát ke bwarant.’”
JOH 6:32 Gorhá Issáyá gwasht: “Shomárá rásténa gwashán, é Mussá naat ke shomárá cha ásmáná ér átkagén nagania dát. É mani Pet ent ke cha ásmáná asligén náná shomárá bakshit.
JOH 6:33 Chéá ke Hodáay nán hamá ent ke cha ásmáná éra kayt o jaháná zenda dant.”
JOH 6:34 Nun gón áiá gwashtesh: “Oo wájah! É náná modám márá beday.”
JOH 6:35 Issáyá gwasht: “Zenday nán man án. Harkas ke mani kerrá kayt, hechbar shodiga nabit. Harkas ke mani sará báwara kant, hechbar tonniga nabit.
JOH 6:36 Bale hamá dhawlá ke gwashton, shomá maná distag o angat báwara nakanét.
JOH 6:37 Á sajjahénán ke Pet maná dant, á mani kerrá káyant. Harkas ke mani kerrá kayt, man áiá hechbar cha wat dura nakanán.
JOH 6:38 Man pa wati jenday wáhagáni sarjam kanagá cha ásmáná ér nayátkagán, átkagán ke wati dém dayókay wáhagán sarjam bekanán.
JOH 6:39 Mani dém dayókay wáhag ent ke hamá mardom ke áiá maná dátagant, cha áyán yakké ham cha mani dastá marawt o áheratay róchá áyán padá zendag bekanán.
JOH 6:40 Chéá ke mani Petay wáhag hamesh ent ke harkas ke Chokkay némagá delgósha kant o áiay sará imána kárit, abadmánén zenday wáhond bebit o man á mardomá áheratay róchá zendaga kanán.”
JOH 6:41 Gorhá Yahudián áiay sará irád gerag o norondhag bendát kort, chéá ke áiá gwashtagat: “Man hamá nán án ke cha ásmáná ér átkag.”
JOH 6:42 Áyán gwasht: “É mard Issopay chokk Issá naent? Má wa eshiay pet o mátá zánén. Gorhá chóna gwashit ke man cha ásmáná ér átkagán?”
JOH 6:43 Issáyá áyáni passawá gwasht: “Watmánwatá irád gerag o norondhagá band kanét.
JOH 6:44 Kass tán hamá wahdá mani kerrá átka nakant ke Pet, bezán mani dém dayók áiá mani némagá mayárit. Harkas ke kayt, man áiá áheratay róchá zendaga kanán.
JOH 6:45 Nabiáni Ketábán nebisag butag: ‘Sajjahén cha Hodáyá tálima gerant.’ Harkas ke Petay habarán beshkont o cha áiá tálim begipt, mani kerrá kayt.
JOH 6:46 Kassá Pet nadistag abéd cha hamáiá ke cha Hodáay kerrá átkag. Tahná hamáiá Pet distag.
JOH 6:47 Shomárá rásténa gwashán, á ke imána kárit abadmánén zenday wáhonda bit.
JOH 6:48 Zenday nán man án.
JOH 6:49 Shomay pet o pirokán gyábáná mann wárt, bale angat mortant.
JOH 6:50 Cha ásmáná ér átkagén nán esh ent, shomay démá ent. Harkas ke eshiá bwárt, namerit.
JOH 6:51 Man hamá zend bakshókén nán án ke cha ásmáná ér átkag. Harkas ke é náná bwárt, tán abad zendaga mánit. É náná ke mana dayán, mani jenday badan ent ke pa jahánay mardománi zendá nadria kanán.”
JOH 6:52 Nun Yahudián pa jérhah o dapják watmánwatá gwasht: “É mard chón wati badaná dant ke má bwaréni?”
JOH 6:53 Issáyá gwasht: “Shomárá rásténa gwashán, agan shomá Ensánay Chokkay badaná mawarét o áiay hóná manóshét, abadmánén zendá sara nabét.
JOH 6:54 Harkas ke mani badaná bwárt o mani hóná benóshit, abadmánén zenday wáhonda bit o áheratay róchá man áiá zendaga kanán.
JOH 6:55 Chéá ke mani badan asligén warák o mani hón asligén nósháp ent.
JOH 6:56 Harkas ke mani badaná bwárt o mani hóná benóshit, á mani del o daruná mánit o man áiay del o daruná.
JOH 6:57 Anchó ke namiránén Petá maná rawán dát o man áiay barkatá zendag án, hamé paymá harkas ke mani badaná bwárt, mani barkatá zendaga mánit.
JOH 6:58 É nán ke cha ásmáná ér átkag, á naganay paymá naent ke shomay pet o pirokán wárt o angat mortant, chéá ke harkas ke é náná bwárt, tán abad zendaga mánit.”
JOH 6:59 Issáyá é chizz hamá wahdá gwashtant ke Kaparnáhumay kanisahá tálim dayagá at.
JOH 6:60 É habaráni eshkonagá rand áiay bázén moridéá gwasht: “É gránén habaré, eshiá kay manneta kant?”
JOH 6:61 Wahdé Issáyá dist ke morid é habaray sará norondhagá ant, gwashti: “Shomárá é habara tawrénit?
JOH 6:62 Agan Ensánay Chokká begendét ke wati pésarigén jágahá borzáda rawt, gorhá ché kanét?
JOH 6:63 Ruh ent ke zenda dant, haddh o góshtá páedagé nést. É habar ke man gón shomá kortant, Ruh o zend ant.
JOH 6:64 Bale cha shomá lahténá imán nést.” Chéá ke á mardom ke imánesh néstat, Issáyá cha bendátá pajjáh áwortant o zánti ke kay maná dróhit o dozhmenáni dastá dant.
JOH 6:65 Gorhá gwashti: “Paméshká man gwasht ke kass mani kerrá átka nakant, tán wahdé ke mani Pet áiá imán mabakshit.”
JOH 6:66 Cha ed o rand, bázén moridéá Issá yalah dát o nun áiay hamráh nabutant.
JOH 6:67 Gorhá Issáyá cha wati dwázdahén kásedán jost kort: “Bárén, shomá ham maná yalah dayaga lóthét?”
JOH 6:68 Shamun-Petrosá passaw dát: “Oo Hodáwand! Kai kerrá berawén? Abadmánén zenday gál o habar tai kerrá ant o
JOH 6:69 márá báwar ent o zánén ke taw hamá Pákén ay ke Hodáyá dar chetag.”
JOH 6:70 Issáyá gwasht: “Man shomárá gechén kort, dwázdahénon gechén kortant, bale padá ham cha shomá yakké eblisé.”
JOH 6:71 Áiay maksad Shamun Eskaryutiay chokk Yahudá at. Bell toré á cha dwázdahénán yakké at, bale áiá randá Issá dróhet o dozhmenáni dastá dát.
JOH 7:1 Randá, Issáyá Jalilá tarr o tába kort. Yahudi áiay kóshay randá atant, paméshká nalótheti Yahudiahá bemánit.
JOH 7:2 Anchosh ke Yahudiáni Kápáráni Aid nazzikk but,
JOH 7:3 Issáay brátán gón áiá gwasht: “É jáhá yalah kan o Yahudiahá beraw tánke tai morid hamá kárán begendant ke taw kanay.
JOH 7:4 Kasé ke námdária lóthit, chérokái kára nakant. Taw ke é kárána kanay, bell ke sajjahén donyá tará begendit.”
JOH 7:5 Chéá ke brátán ham áiay sará imán néstat.
JOH 7:6 Issáyá gón áyán gwasht: “Mani wahd angat nayátkag, bale pa shomá har wahd sharr ent.
JOH 7:7 Donyá cha shomá naprat korta nakant bale cha man naprata kant, chéá ke man donyáay mardománi bárawá gwáhia dayán ke áyáni kár sell ant.
JOH 7:8 Shomá é aidá berawét, man é aidá nayáyán, chéá ke mani wahd angat narasetag.”
JOH 7:9 Issáyá é habar gón áyán gwasht o Jalilá dáshti.
JOH 7:10 Issáay brát ke aidá Urshalimá shotant, randá áiay jend ham hamódá shot, bale mardománi chamdidá nashot, chérokái shot.
JOH 7:11 Aiday róchán, Yahudi áiay shóházá atant o jost o porsesha kort ke á kojá ent?
JOH 7:12 Áiay bárawá mardománi nyámá bázén gappé chérokái tarragá at. Lahtén gwashagá at: “Á sharrén mardé.” Dega lahtén gwashagá at: “Mardomán gomráha kant.”
JOH 7:13 Bale cha Yahudiáni torsá, kassá mardománi démá áiay bárawá heccha nagwasht.
JOH 7:14 Aiday nyámi róchán, Issá mazanén parasteshgáhá shot o mardománi tálim dayagá goláésh but.
JOH 7:15 Yahudián pa hayráni gwasht: “É mardá nawántag, inchok zántkári cha kojá áwortagi?”
JOH 7:16 Issáyá áyáni passawá gwasht: “Mani tálim mani naant, mani dém dayókayg ant.
JOH 7:17 Harkas ke Hodáay wáhagán sarjam kanag belóthit, zánt ke mani tálim Hodáayg ant yá man cha wat habara kanán.
JOH 7:18 Harkas ke cha wat habara kant, pa wati mazaniay pésh dáragá habara kant. Bale á kas ke wati dém dayókay shán o shawkatay lóthóka bit, tachkén mardomé o áiay hecch chizz nárást naent.
JOH 7:19 Mussáyá shomárá Sharyat nadátag? Angat cha shomá hechkas Sharyatá dáragá naent. Parchá maná koshaga lóthét?”
JOH 7:20 Mardomán gwasht: “Tará jenné per ent, kay tará koshit?”
JOH 7:21 Issáyá áyáni passawá gwasht: “Man tahná yakk káré kortag o shomá sajjahén chó hayrán o habakkah ét.
JOH 7:22 Mussáyá sonnat kanagay rasm shomárá dát, paméshká shomá Shabbatay róchá wati mardénchokkán sonnata kanét. Albat é rasm cha Mussáyá bendát nabutag, cha kawmay pet o pirokán bendát butag.
JOH 7:23 Nun agan pa Mussáay Sharyatay napróshagá shomá Shabbatay róchá mardénchokkán sonnata kanét, chéá mani sará zahr geptagét ke man Shabbatay róchá yakk mardomé sarjamá dráh kortag?
JOH 7:24 Záherá machárét o paysalah makanét, wati shawr o hokmán pa ensáp beborrét.”
JOH 7:25 Gorhá Urshalimay lahtén mardom gwashagá lagget: “É hamá naent ke eshiay koshagay randá ant?
JOH 7:26 Bechárét, mardománi démá habar kanagá ent o kass eshiá heccha nagwashit. Balkén rájay sarók é natijahá rasetagant ke é hamá wádah dátagén Masih ent?
JOH 7:27 Má zánén ke é mard cha kojám hand o damagá ent, bale wahdé Masiha kayt, hechkasa nazánt ke cha kojá kayt.”
JOH 7:28 Paméshká, wahdé Issá mazanén parasteshgáhá mardomán tálim dayagá at, gón borzén tawáréá gwashti: “Shomá maná pajjáha kárét o zánét ke cha kojá átkagán, bale man cha wati némagá nayátkagán, mani dém dayók hamá rástén Hodá ent o shomá áiá nazánét.
JOH 7:29 Man áiá zánán, chéá ke cha áiay kerrá átkagán o hamáiá maná ráh dátag.”
JOH 7:30 Hamé wahdá áyán lóthet ke Issáyá dazgir bekanant, bale hechkasá áiay némagá dast nashahárt, parchá ke áiay wahd angat narasetagat.
JOH 7:31 Cha mocchiay mardomán bázénéá áiay sará imán ham áwort o gwasht: “Wahdé Masiha kayt, cha é mardá géshter mójezah o ajabbatén nesháni pésha dárit?”
JOH 7:32 É gapp o habar ke mardomán chérokái Issáay bárawá kortant, Parisián eshkotant. Gorhá Parisi o mazanén dini péshwáyán pa Issáay dazgir kanagá, parasteshgáhay sepáhig rawán dátant.
JOH 7:33 Issáyá gwasht: “Man pa kammokén wahdéá shomay kerrá án o randá wati dém dayókay kerrá rawán.
JOH 7:34 Shomá mani shóházá gardét, bale maná dar gétka nakanét o á jáhá ke mana rawán, shomá átka nakanét.”
JOH 7:35 Gorhá Yahudián gón yakdegará gwasht: “Kojá rawt ke má áiá dar gétka nakanén? Bárén may hamá mardománi kerrá rawt ke Yunániáni nyámá sheng o sháng ant o ódá Yunánián ham tálima dant?
JOH 7:36 É habar ke áiá gwasht: ‘Shomá mani shóházá gardét, bale maná dar gétka nakanét’ o ‘á jáhá ke mana rawán, shomá átka nakanét,’ áiay é habaray maksad ché ent?”
JOH 7:37 Aiday áheri o masterén róchá, Issá óshtát o pa borztawári gwashti: “Agan kasé tonnig ent, mani kerrá byayt o áp bwárt.
JOH 7:38 Hamá dhawlá ke Hodáay Pákén Ketába gwashit, harkas ke mani sará báwara kant, zendápay kawr cha áiay del o daruná rombant o tachant.”
JOH 7:39 É habar áiá Pákén Ruhay bárawá gwasht, hamá Pákén Ruh ke áiay báwarmandán rasagi at. Issáyá angat shán o shawkat narasetagat, paméshká angat áyán Pákén Ruh dayag nabutagat.
JOH 7:40 Gón é habaráni eshkonagá, lahtén mardom gwashagá lagget: “Pa rásti é mard hamá wádah dátagén Nabi ent.”
JOH 7:41 Dega lahténá gwasht: “É Masih ent.” Bázénéá chosh ham gwasht: “Masih cha Jalilá kayt?
JOH 7:42 Pákén Ketába nagwashit ke Masih cha Dáuday nasl o padréchá bit o cha áiay shahr Bayt-Lahemá kayt?”
JOH 7:43 É paymá Issáay bárawá mardománi nyámá nátepákié kapt.
JOH 7:44 Lahténá lóthet ke áiá dazgir bekanant, bale hechkasá áiay némagá dast nashahárt.
JOH 7:45 Randá, parasteshgáhay sepáhig, Parisi o mazanén dini péshwáyáni kerrá per tarretant. Áyán cha sepáhigán jost kort: “Shomá chéá Issá nayáwortag?”
JOH 7:46 Sepáhigán gwasht: “Tán é wahdi hechkasá é marday dhawlá habar nakortag.”
JOH 7:47 Parisián gwasht: “Shomá ham gomráh butagét?
JOH 7:48 Cha kawmay sarók o Parisián yakkéá áiay sará báwar kortag?
JOH 7:49 Bale mardománi hamá romb ke Sharyatay bárawá heccha nazánt, nálatié.”
JOH 7:50 Nikudimus ke wat cha Parisián yakké at o pésará Issáay kerrá átkagat, gwashti:
JOH 7:51 “Bárén, may Sharyat márá ejázata dant ke kaséay habaráni gósh dárag o káráni zánagá pésar, áiá mayárbár bekanén?”
JOH 7:52 Áiay passawá gwashtesh: “Taw ham cha Jalilay mardomán ay? Wat patth o pól kan o bechár, hecch nabié cha Jalilá chesta nabit.”
JOH 8:0 Randá, harkas wati lógá shot,
JOH 8:1 bale Issá Zaytunay Kóhá shot.
JOH 8:2 Sabáhá máhallah Issá padá mazanén parasteshgáhá átk. Sajjahén mardom áiay chapp o chágerdá mocch butant. Issá nesht o áyáni tálim dayagá lagget.
JOH 8:3 Hamé wahdá Sharyatay zánóger o Parisián janéné áwort ke zenáay wahdá gerag butagat. Janénesh mardománi démá óshtárént.
JOH 8:4 Gón Issáyá gwashtesh: “Oo ostád! É janén zenáay sará gerag butag.
JOH 8:5 Sharyatay tahá, Mussáyá márá hokm dátag ke é paymén janén allamá sengsár kanag bebant. Bale taw ché gwashay?”
JOH 8:6 Áyán é habar paméshká kort ke Issáyá dámá dawr bedayant o Issá anchén habaré bekant ke mayárbár bebit, bale Issá jahl but o gón lankoká zeminay sará chizzé nebisagá lagget.
JOH 8:7 Áyán ke bár bár jost kort, Issáyá sar chest kort o gwashti: “Awali sengá hamá bejant ke wat hecch gonáhi nakortag.”
JOH 8:8 Padá sari jahl kort o zeminay sará chizzé nebeshti.
JOH 8:9 Gón é habaray eshkonagá, awalá kamásh yakk yakká dar átk o shotant o randá é dega mardom. Nun bass Issá o hamá óshtátagén janén pasht kaptant.
JOH 8:10 Issáyá sar chest kort o gón janéná gwashti: “Oo bánok! Mardom kojá shotant? Pa tai mayárbár kanagá yakké ham pasht nakapt?”
JOH 8:11 Janéná gwasht: “Na wájah! Kass pasht nakapt.” Issáyá gwasht: “Man ham tará mayárbára nakanán, beraw bale dega baré gonáh makan.”
JOH 8:12 Issáyá padá gón mardomán habar kort, gwashti: “Jahánay nur o rozhn man án. Kasé ke mani randgiriá kant, áiay ráh hechbar tahára nabit o á zenday rozhnáiay wáhonda bit.”
JOH 8:13 Parisián gón áiá gwasht: “Taw wati bárawá wat sháhedia dayay, paméshká tai sháhediá ehtebáré nést.”
JOH 8:14 Issáyá gwasht: “Bell toré man pa wati jendá wat sháhedi bedayán bale mani sháhediá ehtebár hast, chéá ke mana zánán cha kojá átkagán o kojá rawán, bale shomá nazánét man cha kojá átkagán o kojá rawán.
JOH 8:15 Shomá gón ensáni chammé chárét o dádrasia kanét, bale man hechkasay bárawá shawr o hokma naborrán.
JOH 8:16 Agan shawr o hokmé beborrán ham, mani dádrasi barhakk ent, chéá ke é káray tahá man tahná naán, hamá Pet ke maná ráhi dátag gón man hór ent.
JOH 8:17 Shomay Sharyatá nebisag butag ke do mardomay sháhediá ehtebár hast.
JOH 8:18 Yakké man án ke pa wati jendá sháhedia dayán o domi sháhed hamá Pet ent ke maná ráhi dátag.”
JOH 8:19 Áyán gwasht: “Tai pet kojá ent?” Issáyá passaw dát: “Shomá na maná zánét o na mani Petá. Agan shomá maná bezántén, shomá mani Pet ham zántagat.”
JOH 8:20 Issáyá é habar hamá wahdá kortant ke mazanén parasteshgáhá, hayráti zarráni pétiay nazzikká tálim dayagá at. Kassá pa áiay dazgir kanagá dast nashahárt, chéá ke angat áiay wahd narasetagat.
JOH 8:21 Issáyá yakk baré padá gón áyán gwasht: “Mana rawán o shomá mani shóházá gardét, bale wati gonáháni tahá merét o á jáhá ke mana rawán, shomá átka nakanét.”
JOH 8:22 Yahudi watmánwatá gwashagá laggetant: “Balkén watá koshaga lóthit ke gwashagá ent: ‘Á jáhá ke mana rawán shomá átka nakanét.’”
JOH 8:23 Issáyá gón áyán gwasht: “Shomá cha é jahli jaháná ét o man cha borzi jaháná. Shomá cha é donyáyá ét o man cha é donyáyá naán.
JOH 8:24 Man paméshká shomárá gwasht ke wati gonáháni tahá merét. Agan shomá báwar makanét ke man hamá án, shomá wati gonáháni tahá merét.”
JOH 8:25 Áyán jost kort: “Taw kay ay?” Issáyá passaw dát: “Man hamá án ke man cha bendátá shomárá gwasht.
JOH 8:26 Maná bázén habaré hast ke shomay bárawá begwashán o shomárá mayárbár bekanán, bale mani dém dayók hamá rástén ent o man har chizzé ke cha áiá eshkotag, gón jaháná gwashánesh.”
JOH 8:27 Áyán nazánt ke Petay bárawá habar kanagá ent.
JOH 8:28 Paméshká Issáyá gwasht: “Wahdé shomá Ensánay Chokk cha zeminá chest kort, gorhá zánét ke man mamá án o watsará káré nakanán. Hamá dhawlá ke Petá sój dátag, hamá dhawlá habara kanán.
JOH 8:29 Mani dém dayók gón man gón ent, áiá maná tahná o éwak nakortag, chéá ke man modám hamá kárána kanán ke áiá gal o shádána kanant.”
JOH 8:30 Cha é habaráni eshkonagá, bázénéá Issáay sará imán áwort.
JOH 8:31 Randá, Issáyá gón hamá Yahudián gwasht ke áiay sará imánesh áwortagat: “Agan mani habaráni sará bóshtét, pa del mani morid ét.
JOH 8:32 Hamá wahdi rástiá zánét o rásti shomárá ázáta kant.”
JOH 8:33 Áyán gwasht: “Má Ebráhémay awlád én o hechbar kaséay golám nabutagén. Gorhá taw chóna gwashay ke ‘shomá ázáta bét’?”
JOH 8:34 Issáyá gwasht: “Shomárá rásténa gwashán, harkas ke gonáha kant, gonáhay golám ent o
JOH 8:35 golám dáemá wájahay lógá namánit, bale chokk dáemá mánit.
JOH 8:36 Gorhá, agan Chokk shomárá ázát bekant, pa rásti ázáta bét.
JOH 8:37 Mana zánán ke shomá Ebráhémay awlád ét, bale mani habarán shomay delá jágah nést, paméshká mani koshagay randá ét.
JOH 8:38 Man hamá chizzáni bárawá habara kanán ke wati Petay bárgáhá distagant o shomá hamá chizzáni sará amala kanét ke shomá cha wati petá eshkotagant.”
JOH 8:39 Áyán darráént: “May pet Ebráhém ent.” Issáyá gwasht: “Agan shomá Ebráhémay chokk buténét, shomá hamá kár kortagatant ke Ebráhémá kortag.
JOH 8:40 Bale nun shomá mani koshagay randá ét, anchén mardoméay koshagay randá ét ke rástén habari cha Hodáyá eshkotag o shomárá sar kortagant. Ebráhémá hechbar choshén káré nakortagat.
JOH 8:41 Shomá wati petay kárána kanét.” Áyán gwasht: “Má kihorr naén, márá peté hast, á ham Hodáay jend ent.”
JOH 8:42 Issáyá gwasht: “Agan Hodá shomay pet butén, shomá maná dóst dáshtagat, chéá ke man cha hamáiay némagá átkagán o nun edá án. Man watsará nayátkagán, hamáiá maná dém dátag.
JOH 8:43 Chéá mani habarán sarpada nabét? Chéá ke shomárá mani habaráni gósh dáragay twán nést.
JOH 8:44 Shomá wati pet, bezán Eblisay chokk ét o hamáiay morád o wáhagáni sará amal kanaga lóthét. Á cha bendátá hónigé o cha rástiá dur ent, chéá ke áiá hecch rásti mán nést. Wahdé dróga bandit, wati jenday delay habará kant, chéá ke drógbandé o drógáni pet ent.
JOH 8:45 Bale shomá mani sará paméshká báwara nakanét ke man rástén habará kanán.
JOH 8:46 Agan man gonáhé kortag, cha shomá kasé byayt o sábet bekant. Bale agan man rástén habará kanán, parchá báwara nakanét?
JOH 8:47 Á ke Hodái mardomé, Hodáay habará gósha dárit. Shomá Hodáay habará gósha nadárét, chéá ke Hodái mardom naét.”
JOH 8:48 Yahudián áiay passawá darráént: “Má nagwasht ke taw Sámerié ay o tará jenné per ent?”
JOH 8:49 Issáyá gwasht: “Maná jenn per nést. Man wati Petá báz ezzata dayán, bale shomá maná béezzata kanét.
JOH 8:50 Man pa wat shán o shawkata nalóthán, degaré hast ke maná shán o shawkata dant o wat dádrasia kant.
JOH 8:51 Shomárá rásténa gwashán, agan kasé mani habará begipt, hechbara namerit.”
JOH 8:52 Yahudián gón áiá gwasht: “Nun má pakká zánén ke tará jenné per. Ebráhém o sajjahén nabi mortant, bale taw gwashay: ‘Harkas ke mani habará bezurit, hechbara namerit.’
JOH 8:53 Záná, taw cha may pet Ebráhémá master ay? Á mort o nabi ham mortant. Záná, tai delá taw kay ay?”
JOH 8:54 Issáyá passaw dát: “Agan man wati jendá shán o shawkat bedayán, é sháná arzeshé nést. É mani Pet ent ke maná shán o shawkata dant, hamá ke shomá áiá wati Hodá gwashét.
JOH 8:55 Shomá áiá nazánét, bale man áiá zánán. Agan man begwashtén ke áiá nazánán, shomay dhawlá drógband butagatán, bale man áiá zánán o áiay habará zurán.
JOH 8:56 Shomay pet Ebráhém, pa hamé ométá shádán at ke mani róchá gendit. Áiá dist o gal but.”
JOH 8:57 Yahudián gwasht: “Tará angat panjáh sál ham nabit, taw bezán Ebráhém distag?”
JOH 8:58 Issáyá gwasht: “Shomárá rásténa gwashán, man hamá án ke cha Ebráhémá pésar butagán o hastán.”
JOH 8:59 Áyán pa Issáay janagá seng o dhók chet, bale Issá cha mardománi chammán chér o andém but, cha mazanén parasteshgáhá dar átk o shot.
JOH 9:1 Wahdé Issá ráhéá rawagá at, pédáeshi kóré disti.
JOH 9:2 Moridán cha áiá jost kort: “Oo ostád! É mard chéá cha pédáeshá kór ent? Wat gonahkár ent yá eshiay pet o mát?”
JOH 9:3 Issáyá passaw dát: “Na eshiay jend gonahkár ent, na pet o mát. Paméshká é dhawlá but ke Hodáay kár cha eshiá záher bebit.
JOH 9:4 Tánke róch ent, báyad ent má mani dém dayókay kárán sarjam bekanén, shap ke bit gorhá kass kár korta nakant.
JOH 9:5 Man, tánke jaháná án, jahánay rozhn án.”
JOH 9:6 É habará o rand, zeminá tokki jat o cha lebzá geli addh kort, kóray chammán peri mosht o
JOH 9:7 gwashti: “Beraw, wati chammán Shilwáhay hawzá beshód.” (Shilwáhay máná “dém dátagén” ent.) Gorhá á shot, chammi shoshtant, biná but o átk.
JOH 9:8 Randá, hamsáheg o é dega mardom ke á mardesh cha pendhógeriay róchán pajjáha áwort, gwashagá laggetant: “É hamá naent ke neshtagat o pendhagá at?”
JOH 9:9 Lahténá gwasht: “Hamá ent.” Dega lahténá gwasht: “Enna, áiay hamrang ent.” Á wat gwashagá at: “Man hamá mardom án.”
JOH 9:10 Jostesh kort: “Gorhá tai chamm chón rozhná butant?”
JOH 9:11 Gwashti: “Hamá mard ke námi Issá ent, áiá gel tarr kort, mani chammán per mosht o gwashti ke Shilwáhay hawzá beraw o chammán beshód. Man shotán o chamm shoshtant o nun gendagá án.”
JOH 9:12 Gwashtesh: “Á mard kojá ent?” Gwashti: “Mana nazánán.”
JOH 9:13 Hamá mard ke pésará kór at, Parisiáni kerrá bortesh.
JOH 9:14 Shabbatay róch at ke Issáyá gel addh kortagat o áiay chamm rozhná kortagatant.
JOH 9:15 Nun Parisián ham cha áiá jost kort: “Taw chón biná butay?” Mardá gwasht: “Áiá mani chamm gel per moshtant, man shoshtant o nun gendagá án.”
JOH 9:16 Lahtén Parisiá gwasht: “É mard cha Hodáay némagá nayátkag, parchá ke Shabbatay rahbanday sará amala nakant.” Dega lahténá gwasht: “Gonahkárén mardomé chón é dhawlén mójezah pésh dáshta kant?” Áyán gón yakdegará tepák nakort.
JOH 9:17 Cha hamá mardá ke pésará kór at padá jostesh kort: “Tai jend é mardomay bárawá ché gwashit? É tai chamm atant ke áiá rozhná kortant.” Gwashti: “Nabié.”
JOH 9:18 Tánke marday pet o mátesh nalótháéntant, Yahudián báwar nabut ke é mard kór butag o nun gendagá ent.
JOH 9:19 Cha pet o mátá jostesh kort: “É mard shomay chokk ent, hamé ke shomá gwashét pédáeshi kóré butag? Gorhá nun chóna gendit?”
JOH 9:20 Pet o mátá gwasht: “Má zánén ke may chokk ent o cha pédáeshá kóré butag.
JOH 9:21 Bale nazánén nun chóna gendit o eshiay chamm kayá rozhná kortagant. Cha eshiay jendá jost begerét, rostag o mazan ent, wati habará wata kant.”
JOH 9:22 Áiay pet o mátá cha Yahudián torset, paméshká é dhawlá passawesh dát. Yahudián cha pésará shawr kortagat ke harkas báwar bekant o begwashit ke Issá, Masih ent, áiá cha kanisahá dara kanén.
JOH 9:23 Paméshká á marday pet o mátá gwasht ke cha áiay jendá jost begerét, á wat rostag o mazan ent.
JOH 9:24 Á mard ke pésará kór at, domi randá padá lótháént o gwashtesh: “Hodáay sawgendá bwar ke taw rásta gwashay, má zánén ke é mard gonahkáré.”
JOH 9:25 Gwashti: “É mard gonahkáré yá na, mana nazánán, bale yakk chizzé zánán, man kór butagán o nun gendagá án.”
JOH 9:26 Jostesh kort: “Gón taw ché korti? Chón tai chammi rozhná kortant?”
JOH 9:27 Passawi dát: “Man pésará gón shomá gwasht, shomá gósh nadásht, parchá lóthét padá beshkonét? Záná, shomá ham lóthét áiay morid bebét?”
JOH 9:28 Gorhá á biná butagén mardesh bad o rad kort o gwashtesh: “Taw wat áiay morid ay, má Mussáay morid én.
JOH 9:29 Má zánén ke Hodáyá gón Mussáyá habar kortag, bale nazánén ke é mard kay ent o cha kojá átkag.”
JOH 9:30 Mardá gwasht: “É ajabén habaré. Áiá mani chamm rozhná kortagant o shomá nazánét ke cha kojá átkag.
JOH 9:31 Máshomá zánén ke Hodá gonahkáráni dwáyá gósha nadárit, hamáiay dwáyá gósha dárit ke hodátorsé o Hodáay wáhagáni sará amala kant.
JOH 9:32 Cha azalá kassá hechbar naeshkotag ke yakkéá pédáeshi kóré biná kortag.
JOH 9:33 Agan é mard cha Hodáay némagá mayátkén, natwánti hecch choshén káré bekant.”
JOH 9:34 Gwashtesh: “Taw wat sará tán pádán gonáhay chokk ay o márá tálima dayay?” Gorhá á mardesh gallént.
JOH 9:35 Wahdé Issáyá eshkot ke biná butagén mardesh galléntag, á mardi dar gétk o gwashti: “Tará Ensánay Chokkay sará imán hast?”
JOH 9:36 Mardá gwasht: “Oo wájah! Ensánay Chokk kay ent? Kai sará imán byárán?”
JOH 9:37 Issáyá gwasht: “Taw á distag. Hamesh ent ke gón taw habar kanagá ent.”
JOH 9:38 Gwashti: “Oo Hodáwand! Imánon áwort” o Issáay pádán kapt.
JOH 9:39 Gorhá Issáyá gwasht: “Man pa dádrasi kanagá é donyáyá átkagán, tánke kór biná bebant o biná kór.”
JOH 9:40 Cha Parisián lahtén áiay kerrá óshtátagat. É gappesh eshkot o gwashtesh: “Záná má kór én?”
JOH 9:41 Issáyá gwasht: “Agan kór buténét shomárá gonáh o mayáré per néstat, bale paméshká shomay mayárbária mánit ke gwashét: ‘Má biná én.’”
JOH 10:1 “Shomárá rásténa gwashán, agan kasé cha pasáni gwáshay dapá mapoterit o cha dega némagé sar bekapit, bezán dozz o rahzané.
JOH 10:2 Bale á kas ke cha gwáshay dapá poterit, pasáni shepánk ent.
JOH 10:3 Darwázagpán, gwáshay dapá pa áiá pacha kant o pas shepánkay tawáray némagá delgósha bant. Á wati jenday pasán pa nám tawára jant o áyán dhanná bárt.
JOH 10:4 Wati sajjahén pasáni dhanná baragá rand, wat pésara bit o pas áiay randá góna bant, chéá ke áiay tawárá pajjáha kárant.
JOH 10:5 Pas darámadéay randá nakapant, cha áiá tachant, chéá ke darámaday tawárá pajjáha nayárant.”
JOH 10:6 Issáyá é mesál áwort, bale mardom sarpad nabutant ke á ché gwashagá ent.
JOH 10:7 Gorhá padá gwashti: “Shomárá rásténa gwashán, man pasáni gwáshay dap o darwázag án.
JOH 10:8 Á sajjahén ke cha man o pésar átkant dozz o rahzan atant o pasán áyáni tawár gósh nadásht.
JOH 10:9 Darwázag man án, harkas ke cha mani ráhá begwazit, rakkit. Tahá kayt yá dhanná rawt, charágáhéá sara bit.
JOH 10:10 Dozza kayt ke dozzi bekant, bekoshit o tabáh bekant. Man átkagán ke mardomán zendé berasit, alkáp o sháegánén zendé.
JOH 10:11 Nékén shepánk man án. Nékén shepánk wati sáhá pa pasán nadra kant.
JOH 10:12 Bale kasé ke pa mozz kára kant, pasáni wáhond naent. Wahdé gendit ke gork dém pa pasán pédák ent, áyán yalaha kant o tachit. Gorhá gork pasáni sará hamlaha kant o áyán sheng o shánga kant.
JOH 10:13 Mozzurén shepánka tachit, chéá ke á pa mozz kára kant, pasáni hayáldáriá nakant.
JOH 10:14 Nékén shepánk man án, man wati pasána zánán o á ham maná zánant,
JOH 10:15 hamá dhawlá ke Pet maná zánt o man Petá zánán. Man wati sáhá pa pasán nadra kanán.
JOH 10:16 Maná dega pas ham hast ke cha é ramagá naant. Báyad ent áyán ham byárán. Á mani tawárá delgósha kanant. Nun ramag yakké bit o shepánk yakké bit.
JOH 10:17 Pet maná dósta dárit, chéá ke man wati sáhá nadra kanán ke padá wati zenday wáhond bebán.
JOH 10:18 Kass mani sáhá cha man pach gepta nakant, man gón wati jenday wáhagá wati sáhá nadra kanán. Maná wati sáhay dayagay ehtiár hastent o padá áiay dastá áragay ehtiár ham hastent. É kár Petá maná parmátag.”
JOH 10:19 É habaráni sará padá Yahudiáni nyámá nátepáki kapt.
JOH 10:20 Bázénéá gwasht: “Áiá jenné per, ganóké, chéá áiay habarán gósha dárét?”
JOH 10:21 Á degarán gwasht: “Kaséá ke jenné per bebit, é dhawlén habar korta nakant. Jenn kórán biná korta kant?”
JOH 10:22 Nun Urshalimá, Mazanén Parasteshgáhay Shosht o Shód o Wapkay Aid but. Zemestán at.
JOH 10:23 Issáyá mazanén parasteshgáhá, Solaymánay aywáná kadam janagá at.
JOH 10:24 Yahudi áiay chapp o chágerdá mocch butant, gwashtesh: “Tán kadéná márá é dhawlá shakkay tahá dáray? Agan taw Masih ay, rást o pakká begwash.”
JOH 10:25 Issáyá gwasht: “Man wa shomárá gwashtag, bale shomá báwara nakanét. Á kárán ke man cha Petay némagá kanagá án, wat pa man gwáhia dayant.
JOH 10:26 Bale shomá báwara nakanét chéá ke mani pas naét.
JOH 10:27 Mani pas mani tawárá gósha dárant, man áyán jáha kárán o á mani randgiriá kanant.
JOH 10:28 Man áyán abadmánén zenda bakshán o á hechbara namerant. Kass áyán cha man pach gepta nakant.
JOH 10:29 Mani Petá ke é pas maná dátagant, cha sajjahénán master ent o hechkas eshán cha mani Petay dastá pach gepta nakant.
JOH 10:30 Man o Pet yakk én.”
JOH 10:31 Yahudián yakk baré padá seng o dhók chet ke áiá sengsár bekanant.
JOH 10:32 Issáyá gón áyán gwasht: “Man cha Petay némagá bázén nékén káré kortag o shomárá pésh dáshtag. Pa kojám kárá maná sengsára kanét?”
JOH 10:33 Yahudián darráént: “Pa nékén káréá tará sengsára nakanén, pa tai koprán é kárá kanén. Taw baniádamé ay, bale gwashay ke man Hodá án.”
JOH 10:34 Issáyá gwasht: “Shomay Sharyatá é paymá nebisag nabutag: Mane Hodá gwashán ke shomá hodá ét?
JOH 10:35 Agan á mardom ke Hodáay habar áyáni kerrá sar butag, ‘hodá’ gwashag butagant o má zánén ke Hodáay Pákén Ketáb hechbara nakapit o nákára nabit,
JOH 10:36 gorhá shomá hamá mardomay sará chón kopray bohtámá janét ke Petá á gechén kortag o é jaháná rawán dátag? Á ham tahná pa é habará ke man gwashtag: ‘Hodáay Chokk án.’
JOH 10:37 Agan man wati Petay kárán makanán, mani sará imán mayárét.
JOH 10:38 Bale agan Petay kárána kanán, toré mani sará imána nayárét, mani káráni sará imán byárét, tánke shomá sarpad bebét o bezánét ke Pet mani del o daruná ent o man Petay del o daruná án.”
JOH 10:39 Gorhá áyán padá lóthet ke Issáyá dazgir bekanant, bale Issá cha áyáni dazrasá dur but.
JOH 10:40 Randá Issá cha Ordonay kawrá gwast o hamá jágahá shot o dáshti ke pésará Yahyáyá ódá pákshódi dátagat.
JOH 10:41 Bázén mardomé áiay kerrá átk. Watmánwatá gwashagá atant: “Yahyáyá hecch mójezah o ajabbatén nesháni pésh nadásht, bale é marday bárawá har chizzé ke gwashtagi, rást ent.”
JOH 10:42 Ódá bázén mardoméá Issáay sará imán áwort.
JOH 11:1 Ilázar námén mardé nájórh at. Á, Maryam o áiay gohár Martáay métag Bayt-Anyáay mardomé at.
JOH 11:2 Maryam hamá at ke Hodáwandén Issáay pádi atr per moshtant o gón wati mudán hoshki kortant. Annun áiay brát Ilázar nájórh at.
JOH 11:3 Ilázaray gohárán pa Issáyá kolaw dém dát: “Oo Hodáwand! Tai dóstén mardom nádráh ent.”
JOH 11:4 Wahdé Issáyá é habar eshkot, gwashti: “É nádráhi áiá nakoshit, pa Hodáay shán o shawkatá neshánié bit, tánke cha eshiá Hodáay Chokkay shán o shawkat záher bebit.”
JOH 11:5 Issáyá Martá o áiay gohár o Ilázar dósta dáshtant.
JOH 11:6 Wahdé Issá Ilázaray nájórhiá sahig but, dega do róchá hamá jáhá mahtal but ke dáshtagati o
JOH 11:7 randá gón moridán gwashti: “Byáét padá Yahudiahá rawén.”
JOH 11:8 Moridán gwasht: “Oo ostád! Annun Yahudi tai sengsár kanagay sará atant. Padá hamódá rawaga lóthay?”
JOH 11:9 Issáyá passaw dát: “Róchay rozhnái dwázdah sáhat naent? Kasé ke róchá ráha rawt, thagala nawárt chéá ke jahánay rozhná gendit.
JOH 11:10 Bale agan mardomé shapá ráh berawt, thagala wárt chéá ke áiá hecch nur nést.”
JOH 11:11 É habarán o rand Issáyá gwasht: “May dóstén Ilázar waptag, bale mana rawán o áiá páda kanán.”
JOH 11:12 Moridán gwasht: “Oo Hodáwand! Agan wáb kaptag, allamá dráha bit.”
JOH 11:13 Issáyá áiay markay bárawá habar kort, bale áyán hayál kort ke Ilázar anchó waptag o wáb ent.
JOH 11:14 Padá Issáyá tachká gwashtant: “Ilázar mortag.
JOH 11:15 Bale sharr ent ke man ódá nabutagán. Nun man pa shomaygi gal án ke shomá imán áworta kanét. Byáét, áiay gwará rawén.”
JOH 11:16 Tumá ke áiay domi nám Didimus at, gón á dega moridán gwashti: “Byáét, má ham rawén ke gón Issáyá hór bemerén.”
JOH 11:17 Wahdé Issá átk o raset, sahig but ke chár róch ent Ilázar kabr kanag butag.
JOH 11:18 Bayt-Anyá tán Urshalimá, kesás say kilumitar ent.
JOH 11:19 Bázén Yahudié, Martá o Maryamay kerrá pa áyáni brátay porsá átkagat.
JOH 11:20 Wahdé Martá sahig but ke Issá pédák ent, áiay péshwáziá shot, bale Maryam lógá nesht.
JOH 11:21 Martáyá gón Issáyá gwasht: “Oo Hodáwand! Agan taw edá buténay, mani brát namortagat.
JOH 11:22 Bale mana zánán ke har chizzé ke taw cha Hodáyá belóthay, annun ham tará dant.”
JOH 11:23 Issáyá gwasht: “Tai brát padá zendaga bit.”
JOH 11:24 Martáyá gwasht: “Mana zánán ke áheratay róchá zendaga bit, hamá róchá ke mordag jáha janant.”
JOH 11:25 Issáyá gwasht: “Zenday sarchammag man án o é man án ke mordagán dobar zendaga kanán. Agan kasé mani sará imán byárit, toré bemerit ham padá zendaga bit.
JOH 11:26 Harkas ke zendag ent o mani sará imána kárit, hechbara namerit. É habará báwara kanay?”
JOH 11:27 Martáyá gwasht: “Haw, Hodáwand! Maná báwar ent ke taw Masih ay, taw Hodáay hamá Chokk ay ke é jaháná áyagi at.”
JOH 11:28 É habaray kanagá o rand Martá shot, wati gohár Maryami tawár kort o pa halwat gwashti: “Ostád átkag o tará lóthit.”
JOH 11:29 Wahdé Maryamá eshkot, hamá damáná pád átk o Issáay kerrá shot.
JOH 11:30 Issá angat métagá napotertagat, hamódá at ke Martá áiay péshwáziá shotagat.
JOH 11:31 Hamá Yahudi ke lógá Maryamay kerrá atant o áiá tasallá dayagá atant, wahdé distesh ke Maryam pa eshtápi pád átk o cha lógá dar átk, áiay randá kaptant. Watmánwat gwashtesh: “Balkén pa gréwagá kabray sará rawt.”
JOH 11:32 Bale Maryam hamódá shot o sar but ke Issá ódá at. Wahdé Issái dist, áiay pádán kapt o gwashti: “Oo Hodáwand! Agan taw edá buténay, mani brát namortagat.”
JOH 11:33 Issáyá ke Maryam o áiay hamráhén Yahudi gréwagá distant, sakk nagég o padard but.
JOH 11:34 Gwashti: “Shomá Ilázar kojá kabr kortag?” Gwashtesh: “Oo Hodáwand! Byá o bechár.”
JOH 11:35 Issáyá grét.
JOH 11:36 Yahudián gwasht: “Bechárét, chinkadar dósti dáshtag.”
JOH 11:37 Cha áyán lahténá gwasht: “É mardá ke kóray chamm rozhná kortant, Ilázari cha marká rakként nakort?”
JOH 11:38 Issá padá sakk nagég but o Ilázaray kabray sará shot. Kabr gáré at o dhóké dapá ér ati.
JOH 11:39 Issáyá gwasht: “Dhóká dur kanét.” Mortagén Ilázaray gohár Martáyá gwasht: “Oo Hodáwand! Áiay marká chár róch gwastag o bóa kant.”
JOH 11:40 Issáyá passaw dát: “Man tará nagwasht ke agan tará imán bebit, Hodáay shán o shawkatá genday?”
JOH 11:41 Gorhá dhókesh dur kort. Issáyá ásmánay némagá cháret o gwashti: “Oo Pet! Tai shográ gerán ke taw mani habar gósh dásht.
JOH 11:42 Man zánt ke taw modám mani habará gósha dáray, bale man é habar hamá mardománi háterá gwasht ke edá óshtátagant, tánke báwar bekanant ke taw maná rawán dátag.”
JOH 11:43 Cha é habarán o rand, Issáyá gón borzén tawáré gwánk jat: “Ilázar! Dar á.”
JOH 11:44 Hamá mordag ke dast o pádi kapaná patátagatant o démi dazmáléá póshetagat, dhanná dar átk. Issáyá gwasht: “Pachi kanét, belléti ke rawt.”
JOH 11:45 Bázén Yahudié ke Maryamay kerrá átkagat, wahdé Issáay é káresh dist, áiay sará imánesh áwort.
JOH 11:46 Bale cha eshán lahtén Parisiáni kerrá shot o Issáay kortagén káray hálesh bort o sar kort.
JOH 11:47 Parisi o mazanén dini péshwáyán, Sarókáni Diwánay básk lótháéntant o gwashtesh: “Má ché kanagá én? É mard bázén mójezah o ajabbatén neshánié pésh dáragá ent.
JOH 11:48 Agan eshiá hamé dhawlá yalah bedayén, sajjahén mardom eshiay sará imána kárant o Rumia káyant o may mazanén parasteshgáh o kawmá cha may dastá pacha gerant.”
JOH 11:49 Cha áyán yakké ke námi Kayápá at, á sálay masterén dini péshwá at. Áiá gwasht: “Shomá heccha nazánét.
JOH 11:50 Nazánét ke pa shomá sharter hamesh ent ke sarjamén kawmay tabáhiay badalá, yakk mardomé kawmay jáhá bemerit?”
JOH 11:51 É habar Kayápáyá watsará najat. Á hamá sálay masterén dini péshwá at, paméská áiá péshgói kort ke Issá kawmay jáhá merit.
JOH 11:52 Tahná á kawmay jáhá namerit, Hodáay sajjahén sheng o shángén chokkáni jáhá merit tánke áyán yakjáh o yakráh bekant.
JOH 11:53 Cha á róchá o rand, Issáay koshagay pandalesh sázet.
JOH 11:54 Cha ed o rand Issáyá Yahudiáni nyámá tarr o garda nakort. Gyábánay nazzikká Epráém námén shahréá shot o gón wati moridán hamódá dáshti.
JOH 11:55 Yahudiáni Sargwazay Aid nazzikk at o bázén mardomé cha molkay sajjahén hand o damagán Urshalimá átkagat ke cha aidá pésar pákizagiay rasmán purah bekanant.
JOH 11:56 Á Issáyá patthagá atant, mazanén parasteshgáhá óshtátagatant o yakdegará jost kanagá atant: “Shomá ché gwashét? Bárén, é aidá nayayt?”
JOH 11:57 Bale Parisi o mazanén dini péshwáyán hokm dátagat: “Harkas ke zánt Issá kojá ent, márá hál bedant.” Áyáni delá at ke Issáyá dazgir bekanant.
JOH 12:1 Cha Sargwazay Aidá shash róch pésar Issá Bayt-Anyáyá shot ke Ilázaray lóg hamódá at, hamá Ilázar ke Issáyá cha mordagán zendag kortagat.
JOH 12:2 Áyán pa Issáyá shámé jórh kort. Martá mehmánán áp o tám kanagá at. Cha parzónagay saray neshtagén mardomán yakké Ilázar at.
JOH 12:3 Nun Maryamá ném tásay kesásá Hendi sombolay zagr o gránbaháén atr áwort, Issáay pádáni sará per rétk o gón wati mudán Issáay pádi hoshk kortant. Lógay sajjahén kondhán atray wasshén bó tálán but.
JOH 12:4 Yahudá Eskaryuti cha Issáay moridán yakké at o hamé mard at ke randterá Issái dróhet o dozhmenáni dastá dát. Áiá gwasht:
JOH 12:5 “Parchá é atr pa say sad dinárá bahá kanag nabut o zarr garib o nézgárán dayag nabutant?”
JOH 12:6 Áiá é habar pa bazzagén mardománi gamwáriá nagwasht, paméshká gwashti ke dozzé at. Kelitdár áiay jend at o modám cha zarturagá chizzé pa watia zort.
JOH 12:7 Issáyá gwasht: “Maryamay kárá kár madár, áiá é atr pa mani kabr kanagay tayáriá ér kortagatant.
JOH 12:8 Garib o nézgár modám shomay kerrá ant, bale man harwahd shomay kerrá naán.”
JOH 12:9 Bázén Yahudié sahig but ke Issá hamedá ent. Mazanén rombé átk o mocch but. Tahná Issáay sawabá nayátkant, Ilázaray cháragá ham átkant ke Issáyá zendag kortagat.
JOH 12:10 Paméshká mazanén dini péshwáyán Ilázaray koshagay shawr ham kort,
JOH 12:11 chéá ke áiay sawabá bázén Yahudié áyáni randgiriá yalah dayag o Issáay sará imán áragá at.
JOH 12:12 É dega róchá, hamá mazanén romb ke pa aidá átkagat, wahdé eshkotesh ke Issá Urshalimay ráhá ent,
JOH 12:13 maccháni pissh o takesh zortant o pa Issáay péshwáziá dar átkant. Kukkáresha kort: “Hushiáná, mobárak ent hamáiá ke Hodáwanday námá kayt. Esráilay bádsháhá mobárak bát.”
JOH 12:14 Issáyá hari korragé dar gétk o swár but, anchosh ke Hodáay Pákén Ketába gwashit:
JOH 12:15 “Oo Sahyunay jenekk! Mators. Tai bádsháh hari korragéá swár ent o pédák ent.”
JOH 12:16 Awalá é chizzáni máná pa moridán pakká naat, bale randá ke Issáay shán o shawkat záher but, morid yátá kaptant ke é chizz áiay bárawá nebisag butagant o mardomán ham gón áiá hamá paymá kortag.
JOH 12:17 Wahdé Issáyá Ilázar tawár jat o cha kabrá zendagá dar kort, bázéné hamódá at. Áyán é chizzáni bárawá sháhedia dát.
JOH 12:18 Á mazanén romb paméshká Issáay péshwáziá átk ke eshkotagatesh ke Issáyá é mójezah o ajabbatén nesháni pésh dáshtag.
JOH 12:19 Gorhá Parisián gón yakdegará gwasht: “Bechárét, máshomá hecch kort kanagá naén, sajjahén donyá eshiay ráhá ent.”
JOH 12:20 Hamá mardom ke aidá pa parasteshá Urshalimá átkagatant, áyáni tahá lahtén Yunáni ham mán at.
JOH 12:21 É Yunáni Piliposay kerrá átkant. Pilipos Jalilay shahr Bayt-Saydáay mardomé at. Gón áiá gwashtesh: “Wájah! Má lóthén Issáyá begendén.”
JOH 12:22 Pilipos shot o é habari gón Andriásá kort. Á doén shotant o Issáesh hál dát.
JOH 12:23 Issáyá áyáni passawá gwasht: “Á wahd átkag ke Ensánay Chokkay shán o shawkat záher kanag bebit.
JOH 12:24 Shomárá rásténa gwashán, agan gandomay dánag hákay chérá marawt o mamerit, hechbar cha yakk dánagéá géshtera nabit, bale agan bemerit, bázén dánagé pédá kant.
JOH 12:25 Harkasá ke wati zend dóst ent, gária dant o harkas ke é jaháná cha wati zendá sara gwazit, á wati zendá rakkénit o abadmána kant.
JOH 12:26 Agan kasé lóthit mani hezmatá bekant, gorha á lázom mani randgiriá bekant o har jáh ke mana bán, mani hezmatkár hamódá gón man góna bit. Agan kasé mani hezmatá kant, mani Pet áiá sharapdára kant.
JOH 12:27 Annun mani del paréshán ent, man ché begwashán? Bárén begwashán: ‘Oo mani Pet! Maná cha é damán o sáhatá berakkén’? Na, habar esh ent ke mani áyagay morád o maksad hamé damán o sáhat butag.
JOH 12:28 Oo Pet! Wati námay shán o shawkatá záher kan.” Padá tawáré cha ásmáná átk ke gwashti: “Man wati námay shán o shawkat záher kortag o angat ham záheria kanán.”
JOH 12:29 Mardománi hamá romb ke ódá óshtátagat, gón é tawáray eshkonagá gwashtesh: “É granday tawár at.” Dega lahténá gwasht: “Préshtagéá gón eshiá habar kort.”
JOH 12:30 Issáyá gwasht: “É tawár mani háterá nayátk, shomay háterá átk.
JOH 12:31 Nun é jahánay dádrasiay wahd ent o jahánay sardár Shaytán dhanná dar kanaga bit.
JOH 12:32 Wahdé man cha zeminá chest kanaga bán, sajjahén mardomán wati némagá kasshán.”
JOH 12:33 Gón é habará Issáyá péshgói kort ke man chóna merán.
JOH 12:34 Mardomán darráént: “Sharyat márá gwashit ke Masih tán abada mánit. Gorhá taw chóna gwashay ke Ensánay Chokk chest kanaga bit? Ensánay Chokk kay ent?”
JOH 12:35 Issáyá gwasht: “Tahná yakk gwandhén wahdéá rozhnái gón shomá gón ent. Tán wahdé ke rozhnái gón shomá gón ent, gám janáná démá berawét. Chó mabit ke tahári shomay sará báládast bebit. Kasé ke taháriá gáma jant, nazánt kojá rawt.
JOH 12:36 Tánke rozhn gón shomá gón ent, rozhnay sará imán byárét ke rozhnay chokk bebét.” Issáyá é habar kortant o cha áyáni kerrá shot o chér o andém but.
JOH 12:37 Issáyá áyáni démá bázén mójezah o ajabbatén neshánié pésh dáshtagat, bale angat áiay sará imánesh nayáwort.
JOH 12:38 Eshayá nabiay habar hamé paymá rást o sarjam but ke áiá gwashtagat: “Oo Hodáwand! May kolaw kayá báwar kortag o Hodáwanday wák o kodratpa kayá záher butag?”
JOH 12:39 Gorhá áyán báwar kort nakort, chéá ke Eshayáyá dega jágahé ham gwashtagat:
JOH 12:40 “Áyáni chammi kór o deli seng kortagant ke gón chammán magendant, gón delán sarpad mabant o dém pa man mayáyant. Agan mani kerrá byátkénant, man dráh kortagatant.”
JOH 12:41 Eshayáyá Issáay shán o shawkat dist, paméshká áiay bárawá é habari kort.
JOH 12:42 Angat ham Yahudiáni bázén sarókéá áiay sará imán áwort. Bale cha hamé torsá ke Parisi áyán cha kanisahá dar makanant, námesha nagept.
JOH 12:43 Chéá ke áyán ensánay dátagén ezzat o satá cha Hodáay dátagén ezzat o satáyá dóstter at.
JOH 12:44 Padá Issáyá gón borzén tawáréá gwasht: “Harkas ke mani sará imána kárit, tahná mani sará na, mani dém dayókay sará ham imána kárit.
JOH 12:45 Harkas ke maná gendit, mani dém dayóká ham gendit.
JOH 12:46 Rozhn man án o é jaháná paméshká átkagán ke harkas ke mani sará imán byárit tahárókiá mamánit.
JOH 12:47 Bale agan kasé mani habarán beshkont o áyáni sará amal makant, angat ham man áiá mayárbára nakanán. Chéá ke man pa jahánay mayárig kanagá nayátkagán, pa jahánay rakkénagá átkagán.
JOH 12:48 Albat pa hamá mardomá ke maná namannit o mani habarána nazurit, dádrasé hast ke áiá mayárig bekant. Hamá habar ke man kortagant, áheratay róchá áiá mayáriga kanant.
JOH 12:49 Chéá ke man watsará habar nakortag, hamá Petá ke maná rawán dátag, áiá hokm dátag ke ché begwashán o chón habar bekanán.
JOH 12:50 Mana zánán ke áiay hokm o parmán abadmánén zend ent. É habarán ke mana kanán, hamá habar ant ke Petá maná gwashtagant.”
JOH 13:1 Sargwazay Aidá yakk o do róch pasht kaptagat. Issáyá zánt ke hamá sáhat o damán átkag ke man é jaháná yalah bedayán o Petay kerrá berawán. Áiá wati mardom é jaháná dóst dáshtagatant o tán wati omray áheri damáná pa del dóstia dáshtant.
JOH 13:2 Shámay wahd at o Shaytáná cha pésará Shamun Eskaryutiay chokk Yahudáay del parmátagat ke Issáyá bedróhit o dozhmenáni dastá bedant.
JOH 13:3 Issáyá zánt ke Petá sajjahén chizz mani dastá dátagant o man cha Hodáay némagá átkagán o hamáiay kerrá rawán.
JOH 13:4 Issá cha waragay sará pád átk, wati kabáhi kasshet o lánkigé sréná basti.
JOH 13:5 Nun trashté zorti o ápi mán kort o moridáni pádáni shódag o gón hamá lánkigá hoshk kanagi bendát kort ke sréná bastagati.
JOH 13:6 Wahdé Shamun-Petrosay bárig átk, áiá gwasht: “Oo Hodáwand! Taw mani pádána shóday?”
JOH 13:7 Issáyá passaw tarrént: “Annun taw nazánay man ché kanagá án, randá sarpada bay.”
JOH 13:8 Petrosá gwasht: “Man hechbara naylán ke taw mani pádán beshóday.” Issáyá gwasht: “Agan tará mashódán, tará cha man hecch wandh o bahré narasit.”
JOH 13:9 Shamun-Petrosá gwasht: “Oo Hodáwand! Agan é gapp ent, gorhá tahná mani pádán na, mani sar o dastán ham beshód.”
JOH 13:10 Issáyá gwasht: “Á ke shódag butag, áiá abéd cha pádán dega hecch jágahay shódag pakár naent. Á sarjamá pák o sáp ent. Shomá pák ét, bale sajjahén na.”
JOH 13:11 Issáyá zánt ke kay maná dróhit, paméshká gwashti ke shomay nyámá nápákén ham hast.
JOH 13:12 Sajjahénáni pádáni shódagá rand, wati kabáhi gwará kort o parzónagay sará padá nesht o gwashti: “Shomá zánét ke man pa shomá ché kort?
JOH 13:13 Shomá maná ostád o Hodáwanday námá tawára kanét, rásta gwashét, man hamá án.
JOH 13:14 Agan man shomay Hodáwand o ostád án o shomay pádon shoshtant, shomárá ham yakdegaray pád shódagi ant.
JOH 13:15 Man pa shomá mesálé ér kort tánke hamá dhawlá ke man gón shomá kort, shomá ham hamá dhawlá bekanét.
JOH 13:16 Shomárá rásténa gwashán, hecch golám cha wati wájahá o hecch kásed cha wati dém dayóká master naent.
JOH 13:17 Nun ke shomá é habará zánét, bahtáwar ét agan anchosh bekanét.
JOH 13:18 É habarán ke mana kanán shomay sajjahénáni bárawá naant. Á mardom ke man gechén kortagant, áyána zánán. Bale Pákén Ketábay é habar rást o sarjam bayagi ent ke gwashit: Hamá kas ke gón man yakjáh waragi wártag, hamá mani helápá pád átkag.
JOH 13:19 Annun cha é kárá pésar shomárá gwashán ke wahdé chosha bit, gorhá bezánét ke man hamá án.
JOH 13:20 Shomárá rásténa gwashán, harkas ke mani ráh dátagéná wasshátka kant o sharapa dant, bezán maná sharapa dant. O harkas ke maná wasshátka kant o sharapa dant, áiá ham sharapa dant ke maná ráhi dátag.”
JOH 13:21 Wahdé Issáyá é habar kort, cha del o daruná sakk padard but o pa deljami gwashti: “Man shomárá rásténa gwashán, cha shomá yakké maná dróhit.”
JOH 13:22 Moridán yakdomiay némagá cháret, hayrán atant ke Issá kai bárawá gappá ent.
JOH 13:23 Cha moridán yakké, hamá ke Issáyá báz dóst at, Issáay kerrá neshtagat.
JOH 13:24 Shamun-Petrosá hamá morid eshárah kort ke wájahá jost kan bárén kai bárawá gappá ent?
JOH 13:25 Á morid nazzikkter kenzet o cha Issáyá josti kort: “Oo Hodáwand! Á kay ent?”
JOH 13:26 Issáyá passaw dát: “Á hamá ent ke man chondhé nagan kásagá pera janán o dayáni.” Gorhá nagani per jat o Shamun Eskaryutiay chokk, Yahudáyárá dáti.
JOH 13:27 Anchosh ke Yahudáyá lonkah dastá kort, Shaytán áiay póstá potert. Nun Issáyá gón áiá gwasht: “Zutt kan! Har káré ke tará kanagi ent, bekani.”
JOH 13:28 Bale cha parzónagay saray neshtagén mardomán kassá nazánt ke gón é habará áiay morád ché ent.
JOH 13:29 Zarr Yahudáay kerrá ér atant, paméshká lahténá gomán kort ke balkén Issá áiá gwashagá ent ke beraw o harché pa aidá pakár ent beger, yá garib o nézgárán chizzé beday.
JOH 13:30 Anchosh ke Yahudáyá naganay chondh zort, dhanná dar kapt. Shap at.
JOH 13:31 Yahudá ke dar kapt, Issáyá gwasht: “Nun Ensánay Chokkay shán o shawkat záher butag. Cha Ensánay Chokká Hodáay shán o shawkat ham záher butag.
JOH 13:32 Agan cha Ensánay Chokká Hodáay shán o shawkat záher butag, Hodá ham Ensánay Chokkay shán o shawkatá záhera kant o hamé zuttán záheria kant.
JOH 13:33 Oo mani dordánagén chokkán! Angat tán gwandhén wahdéá man gón shomá gón án. Randá shomá mani shóházá gardét. Hamá dhawlá ke man gón Yahudián gwasht, gón shomá ham gwashán: Á jáhá ke mana rawán, shomá átka nakanét.
JOH 13:34 Shomárá nókén hokmé dayán: Yakdegará dóst bedárét. Anchó ke man shomárá dóst dáshtag, shomá ham yakdegará dóst bedárét.
JOH 13:35 Agan yakdegará dóst bedárét, gorhá harkasa zánt ke shomá mani morid ét.”
JOH 13:36 Shamun-Petrosá gwasht: “Oo Hodáwand! Kojá raway?” Issáyá passaw dát: “Anchén jáhé rawán ke taw annun gón man átka nakanay. Bale randterá káay.”
JOH 13:37 Petrosá gwasht: “Oo Hodáwand! Annun parchá gón taw átka nakanán? Man wati sáhá pa taw nadra kanán.”
JOH 13:38 Issáyá gwasht: “Taw pa man wati sáhay nadr kanagá tayár ay? Tará rásténa gwashán, cha korósay bángá pésar, say randá mani pajjáh áragá enkára kanay.
JOH 14:1 Shomay del paréshán mabit. Hodáay sará imán byárét o mani sará ham imán byárét.
JOH 14:2 Mani Petay lógá bázén báné hast. Agan na, man shomárá gwashtagat ke rawán tánke pa shomá jágahé tayár bekanán.
JOH 14:3 Bale angat man pa shomay jágahay tayár kanagá rawán o padá káyán o shomárá gón wata barán, tánke hamódá ke man án, shomá ham hamódá bebét.
JOH 14:4 Ódá ke mana rawán, shomá á jágahay ráhá zánét.”
JOH 14:5 Tumáyá gwasht: “Oo Hodáwand! Má nazánén ke taw kojá raway, gorhá ráhá chón zánta kanén?”
JOH 14:6 Issáyá gwasht: “Ráh man án, rásti man án o zend bakshók ham man án. Kass Petay kerrá sar buta nakant, agan mani ráhá marawt.
JOH 14:7 Nun ke shomá maná zántag, mani Petá ham zánét, bezán cha ed o rand shomá áiá zánét o shomá á distag.”
JOH 14:8 Piliposá gwasht: “Oo Hodáwand! Petá márá pésh bedár, pa má hamé bass ent.”
JOH 14:9 Issáyá gwasht: “Oo Pilipos! Inchok wahd ent ke man gón shomá gón án o taw angat maná nazánay? Harkasá ke maná distag, mani Peti ham distag. Gorhá taw chóna gwashay ke Petá márá pésh bedár?
JOH 14:10 Báwara nakanay ke man Petay del o daruná án o Pet mani del o daruná? É habarán ke gón shomá gwashán mani naant, hamá Petayg ant ke mani del o daruná ent. Hamá ent ke é kárána kant.
JOH 14:11 Mani é habará bemannét ke man Petay del o daruná án o Pet manigá. Yá kamm cha kamm hamá káráni sawabá imán byárét ke man kortag o shomá distagant.
JOH 14:12 Man shomárá rásténa gwashán, harkas ke mani sará imána kárit, harché ke mana kanán á ham korta kant. Masterén kár ham korta kant, chéá ke man Petay kerrá rawán o
JOH 14:13 harché ke shomá mani námay sará lóthét, á wáhagá sarjama kanán, tánke Chokk Petay shán o shawkatá záher bekant.
JOH 14:14 Harché ke shomá mani námay sará belóthét, man shomay wáhagá sarjama kanán.
JOH 14:15 Agan shomá maná dósta dárét, gorhá mani hokmána mannét.
JOH 14:16 Man wat cha Petá lóthán o á shomárá dega posht o panáhé dant ke modám gón shomá bemánit,
JOH 14:17 bezán rástiay hamá Ruh ke jahán áiay mannagá tayár naent, chéá ke nagenditi o pajjáhia nayárit. Bale shomá áiá pajjáha kárét, chéá ke shomay kerrá mánit o shomay del o daruná bit.
JOH 14:18 Shomárá yatim o chórawa nakanán, shomay kerrá pera tarrán.
JOH 14:19 Kammén wahdéá rand, jahán dega randé maná nagendit, bale shomá maná gendét. Man zendag án, paméshká shomá ham zendaga mánét.
JOH 14:20 Á róchá shomá zánét ke man Petay del o daruná án o shomá mani del o daruná ét o man shomaygá.
JOH 14:21 Á kasá ke mani hokm gón ant o esháni sará amala kant, hamá kas maná dósta dárit. Á ke maná dósta dárit, mani Pet ham áiá dósta dárit o man ham áiá dósta dárán o watá pa áiá záhera kanán.”
JOH 14:22 Yahudá Eskaryutiá na, domi Yahudáyá jost kort: “Oo Hodáwand! Chéá watá pa má záhera kanay bale pa jaháná záhera nakanay?”
JOH 14:23 Issáyá passaw tarrént: “Á kas ke maná dósta dárit, hamá habaráni sará amala kant ke man gwashtagant. Mani Pet áiá dósta dárit o man o Peta káén o áiay kerrá lóg o jágaha kanén.
JOH 14:24 Á kas ke maná dósta nadárit, mani habaráni sará amala nakant. É habarán ke shomá cha mana eshkonét mani naant, hamá Petayg ant ke maná ráhi dátag.
JOH 14:25 Man é habarán hamé wahdá kanán ke angat shomay kerrá án.
JOH 14:26 Bale shomay posht o panáh hamá Pákén Ruh ent ke Pet áiá mani námay sará déma dant. Pákén Ruh sajjahén chizzán shomárá sója dant o hamá sajjahén habar ke man gón shomá kortagant, shomárá áyáni yátá perrénit.
JOH 14:27 Man shomárá émeni o ásudagia dayán. Wati émeni o ásudagiá shomárá dayán. Jaháná é wák o twán nést ke hamá émeniá shomárá bedant ke mania dayán. Matorsét o wati delá paréshán makanét.
JOH 14:28 Shomá eshkot, man gwasht ke rawán bale padá shomay kerrá pera tarrán. Agan shomá maná dóst bedáshtén, cha é habará gal butagatét ke man Petay kerrá rawán, chéá ke Pet cha man master ent.
JOH 14:29 Man hamé habar cha é káray bayagá pésar kort ke wahdé chosha bit, imán byárét.
JOH 14:30 Cha ed o rand, gón shomá báz habara nakanán, chéá ke é jahánay sardár Shaytána kayt. Áiá mani sará hecch wák o ehtiár nést.
JOH 14:31 Man bass hamá kárána kanán ke Petá maná parmátagant, tánke jahán bezánt ke man Petá dósta dárán. Pád áét, cha edá rawén.
JOH 15:1 Man anguray asligén drachk án o mani Pet bágpán ent.
JOH 15:2 Mani har thálé ke bara nayárit, Pet áiá goddhit o har thálé ke bara kárit, áiá tráshit o palgárit ke géshter bar o samar byárit.
JOH 15:3 Mani habaráni barkatá shomá cha pésará pák ét, hamá habar ke man gón shomá kortagant.
JOH 15:4 Shomá mani del o daruná bemánét o man shomay del o daruná mánán. Agan thálé gón drachká hór mabit, bar áworta nakant. Hamé paymá shomá ham agan gón man hór mabét, bar áworta nakanét.
JOH 15:5 Man anguray drachk án o shomá thál ét. Harkas ke mani del o daruná mánit o man áiaygá, á bázén bar o samaré kárit, chéá ke shomá cha man jetá hecch káré korta nakanét.
JOH 15:6 Agan kasé mani del o daruná mamánit, sestagén tháléay dhawlá dawr dayaga bit o hoshka tarrit. Mardom hoshkén thálán moccha kanant o ásá dawra dayant o sóchant.
JOH 15:7 Agan shomá mani del o daruná bemánét o mani habar shomay delá bemánant, harché ke lóthét belóthét, shomárá rasit.
JOH 15:8 Mani Petay shán o shawkat gón hamé chizzá záhera bit ke shomá bázén bar o samaré kárét o mani morida bét.
JOH 15:9 Hamá paymá ke Petá maná dóst dáshtag, man ham shomárá hamá paymá dóst dáshtag. Mani mehráni sáhegá bemánét.
JOH 15:10 Agan mani hokmáni sará amal bekanét, mani mehráni sáhegá mánét, anchosh ke man wati Petay hokmáni sará amal kortag o áiay mehráni sáhegá neshtagán.
JOH 15:11 Man é habar gón shomá paméshká kortant ke mani shádmáni shomay del o daruná benendit o shomay shádmáni kámel o sarjam bebit.
JOH 15:12 Mani hokm esh ent ke shomá yakdegará dóst bedárét, hamá dhawlá ke man shomárá dóst dáshtag.
JOH 15:13 Masterén mehr hamesh ent ke mardom wati sáhá pa dóstán nadr bekant.
JOH 15:14 Agan shomá mani hokmáni sará amal bekanét, mani dóst ét.
JOH 15:15 Cha ed o rand shomárá golám o bandaha nagwashán, chéá ke goláma nazánt wájah ché kant. Man shomárá wati dóst gwashtag chéá ke harché ke man cha Petá eshkotag, shomárá gwashtagon.
JOH 15:16 Shomá maná gechén nakortag, man shomárá gechén kortag o dém dátag ke shomá berawét o bar o samar byárét, abadmánén bar o samar. Gorhá harché ke mani námay sará cha Petá belóthét, shomárá dant.
JOH 15:17 Mani hokm pa shomá hamesh ent: Yakdegará dóst bedárét.
JOH 15:18 Agan donyá cha shomá naprata kant, bezánét ke pésará cha man naprati kortag.
JOH 15:19 Agan shomá é donyái mardom buténét, donyáyá shomárá watigáni dhawlá dóst dáshtagat. Bale shomá donyái mardom naét o man shomárá cha é donyáyá dar chetag, paméshká donyá cha shomá naprata kant.
JOH 15:20 Cha é habará béhayál mabét ke man gón shomá gwashtag: ‘Golám cha wájahá mastera nabit.’ Agan áyán maná ázár dátag, shomárá ham ázára dayant. Agan mani habaresh zortag, shomay habará ham zurant.
JOH 15:21 Pa mani námaygi gón shomá é dhawlá kanant, chéá ke mani dém dayóká nazánant.
JOH 15:22 Agan man mayátkénán o gón áyán habar makortén, á bémayár atant. Bale nun áyán pa wati gonáhán hecch ozr o nimóné nést.
JOH 15:23 Harkas ke cha man naprata kant, cha mani Petá ham naprata kant.
JOH 15:24 Agan áyáni démá man á kár makorténant ke dega kassá nakortagant, bémayár atant. Bale nun wa áyán é kár distagant o angat cha man ham naprata kanant o cha mani Petá ham.
JOH 15:25 Áyáni Sharyatá nebeshtah ent: ‘Moptá cha man napratesh kort.’ É dhawlá é habar rást o sarjam but.
JOH 15:26 Bale wahdé shomay posht o panáha kayt, bezán rástiay Pákén Ruh ke áiay sarchammag Pet ent o man áiá cha Petay némagá déma dayán, á mani bárawá sháhedia dant.
JOH 15:27 Shomá ham mani sháheda bét, chéá ke cha bendátá gón man gón butagét.
JOH 16:1 Man é chizz gón shomá gwashtant ke shomá mathagalét o rad mawarét.
JOH 16:2 Shomárá cha kanisahán dara kanant. Choshén wahdé ham kayt ke shomay koshók gomána kanant ke gón shomay koshagá Hodáay hezmatá kanagá ant.
JOH 16:3 Á é kárána kanant, chéá ke na Petá zánant o na maná.
JOH 16:4 Man é habar gón shomá paméshká kortant ke wahdé chosha bit, gorhá shomá hayálá bekapét ke man shomárá ché gwashtag. Man é habar awalá gón shomá nakortant, chéá ke man wat gón shomá gón atán.
JOH 16:5 Nun man wati dém dayókay kerrá rawán o cha shomá hechkas josta nakant ke kojá raway?
JOH 16:6 Shomay del cha gamá porr but, chéá ke man é habar shomárá gwashtant.
JOH 16:7 Bale shomárá rásténa gwashán ke mani rawag pa shomá sharter ent. Chéá ke agan marawán, shomay posht o panáh pa shomá nayayt, bale agan berawán, áiá pa shomá déma dayán.
JOH 16:8 Wahdé á kayt, gonáh o pahrézkári o dádrasiay bárawá donyáay mardomán sahiga kant o áyáni mayárbáriá záhera kant.
JOH 16:9 Gonáhá záhera kant, chéá ke mardom mani sará imána nayárant;
JOH 16:10 ensáni pahrézkáriay nezóriá záhera kant, chéá ke man Petay kerrá rawán o shomá dega baré maná nagendét;
JOH 16:11 Hodáay dádrasiá ham záhera kant, chéá ke é jahánay sardár Shaytán mayárig kanag butag.
JOH 16:12 Maná gón shomá bázén habaré kanagi ent, bale shomárá é wahdi áyáni eshkonagay wák o twán nést.
JOH 16:13 Wahdé á kayt, bezán rástiay Ruh, shomárá dém pa sarjamén rástiá rahshónia kant, parchá ke á watsará heccha nagwashit, tahná hamá chizzána gwashit ke eshkontesh o shomárá démay háláni bárawá sarpada kant.
JOH 16:14 Á mani shán o shawkatá záhera kant, chéá ke harché ke shomárá sarpada kant, cha manesha zurit.
JOH 16:15 Harché ke mani Petá hast, manig ent. Paméshká gwashton ke Pákén Ruh cha mana zurit o shomárá sarpada kant.
JOH 16:16 Kammén wahdéá rand shomá maná nagendét, bale padá kammoké randterá maná gendét.”
JOH 16:17 Gorhá cha moridán lahténá gón yakdegará gwasht: “Parchá gwashit: ‘Kammén wahdéá rand maná nagendét, bale padá kammoké randterá maná gendét,’ yá é habar ke á gwashit: ‘Petay kerrá rawán,’ áiay maksad ché ent?”
JOH 16:18 Á watmánwat gwashagá atant: “Á ke gwashit ‘kammén wahd,’ cha eshiá áiay morád ché ent? Má nazánén ke á ché gwashit?”
JOH 16:19 Issáyá zánt ke é bárawá á cha man jost kanaga lóthant. Gorhá gwashti: “Shomá mani hamé habaray bárawá gón yakdomiá jost o porsá ét ke man shomárá gwasht kammén wahdéá rand shomá maná nagendét, bale padá kammoké randterá maná gendét?
JOH 16:20 Shomárá rásténa gwashán, shomá arsa réchét o porsiga bét, bale jahán gala bit. Shomá gamiga bét, bale shomay é gam shádmániay tahá badala bit.
JOH 16:21 Janéné wati chellagiay wahdá darda kasshit, bale anchó ke nonnok pédá bit, wati dardána shamóshit, chéá ke hamé gappá gal ent ke nókén ensáné donyáyá átkag.
JOH 16:22 Shomá ham nun hamé dhawlá gamig ét, bale man shomárá padá gendán o á wahdi shomá gala bét o shomay wasshiá hechkas pach gepta nakant.
JOH 16:23 Á róchá shomá cha man hecch chizzay jostá nakanét. Man shomárá rásténa gwashán, shomá mani námay sará harché ke cha Petá belóthét, shomárá dant.
JOH 16:24 Tán é wahdi shomá hecch chizz mani námay sará nalóthetag, belóthét tánke shomárá berasit o shomay shádmáni sarjam bebit.
JOH 16:25 Man pa namunah o mesál gón shomá é habar kortagant, bale yakk wahdé kayt ke dega baré pa namunah o mesál habara nakanán, gón shomá tachká tachk Petay bárawá habara kanán.
JOH 16:26 Á róchá, shomá mani námay sará lóthét o mana nagwashán ke man pa shomá cha Petá lóthán.
JOH 16:27 Pet wat shomárá dósta dárit, chéá ke shomá maná dóst dáshtag o mannetag ke man cha Hodáay némagá átkagán.
JOH 16:28 Man cha Petay kerrá dar átkag o é jaháná átkagán. Nun é jaháná yalaha kanán o Petay gwará rawán.”
JOH 16:29 Moridán gón áiá gwasht: “Nun taw bé namunah o mesál, tachká tachk habar kanagá ay.
JOH 16:30 Nun má deljam én ke taw sajjahén chizzána zánay o hecch zalurat naent ke kasé cha taw josté bekant. Paméshká márá yakin ent ke taw cha Hodáay némagá átkagay.”
JOH 16:31 Issáyá passaw dát: “Nun shomárá yakin ent.
JOH 16:32 Bechárét, yakk wahdé kayt o á wahd annun bongéj butag ke shomá sajjahén sheng o shánga bét o harkas wati ráhá rawt. Maná tahná yalaha dayét, bale angat tahná nabán, chéá ke mani Pet gón man gón ent.
JOH 16:33 Man é chizz shomárá gwashtant ke mani barkatá shomárá émeni o ásudagi berasit. Jaháná shomárá dard o ranja rasit, bale delá dhaddh kanét, chéá ke man jahánay sará báládast butagán.”
JOH 17:1 Cha é habarán o rand, Issáyá dém pa ásmáná cháret o gwasht: “Oo Pet! Á wahd o sáhat átkag. Wati Chokkay shán o shawkatá záher kan ke Chokk tai shán o shawkatá záher bekant.
JOH 17:2 Taw sajjahén mardománi ehtiár wati Chokkay dastá dátag, tánke Chokk hamá mardomán abadmánén zend bedant ke taw áiárá dátagant.
JOH 17:3 Oo yakk o barhakkén Hodá! Abadmánén zend hamesh ent ke é mardom tará bezánant o tai rawán dátagén Issá Masihá pajjáh byárant.
JOH 17:4 Á kár ke taw maná dátagat ke sarjami bekanán, man sarjam kort o é dhawlá pa jaháná tai shán o shawkaton záher kort.
JOH 17:5 Oo Pet! Nun wati bárgáhá mani shán o shawkatá záher kan, hamá shán o shawkat ke maná cha jahánay jórh bayagá pésar ham tai kerrá butag.
JOH 17:6 Man tai nám pa hamáyán pajjárént ke taw cha jaháná gechén kortag o maná dátagant. É mardom tai butagant o taw maná dátagant. Eshán tai habar zortag.
JOH 17:7 Nun eshán zántag ke har chizz ke taw maná dátag, pa rásti cha tai némagá ent.
JOH 17:8 Chéá ke á habar ke taw maná gwashtagant, man esháná sar kortagant o eshán ham mannetagant. Nun eshán pa del zántag ke man cha tai némagá átkagán o báwaresh kortag ke taw maná rawán dátag.
JOH 17:9 Man pa eshán dwá kanán, pa sajjahén jaháná dwá nakanán. Man pa hamá mardomán dwá kanán ke taw maná dátagant, chéá ke taig ant.
JOH 17:10 Hamá ke manig ant, á sajjahén taig ant o hamá ke taig ant, á sajjahén manig ant o mani shán o shawkat cha áyán záher butag.
JOH 17:11 Man cha ed o rand jaháná namánán. É mardom angat jaháná mánant o man tai kerrá káyán. Oo pákén Pet! Gón wati hamá námay zórá ke taw maná dátag, esháni negahpániá bekan ke é yakk bebant, hamá paymá ke man o taw yakk én.
JOH 17:12 Tán hamá wahdá ke man gón eshán gón butagán, hamá námay zórá ke taw maná dátag, esháni negahpánion kortag. Cha eshán yakké ham tabáh nabut, abéd cha hamá yakkéná ke wat tabáhiay hakdár at, tánke Pákén Ketábay habar rást o sarjam bebant.
JOH 17:13 Nun man tai gwará káyán. Jahánay yalah dayagá pésar, é chizzána gwashán tánke esháni del cha mani shádmániá sarréch bebit.
JOH 17:14 Man tai habar esháná sar kort. Anchosh ke man donyái mardomé naán, é ham donyái mardom naant, paméshká donyá cha eshán naprata kant.
JOH 17:15 É dwáyá nakanán ke eshán cha donyáyá bebar, dwá kanán ke eshán cha sherr o Shaytáná dur bedár.
JOH 17:16 Hamá dhawlá ke man donyái mardomé naán, é ham naant.
JOH 17:17 Eshán gón rástiá pák o palgár kan, tai habar rásti ent.
JOH 17:18 Hamá dhawlá ke taw maná jaháná rawán dát, man ham é mardom jaháná rawán dátant.
JOH 17:19 Nun pa hameshánigi watá gón páki o palgári tai sepordaha kanán, tánke é ham gón rástiá palgár o Hodáay sepordah bebant.
JOH 17:20 Man tahná pa eshán dwá nakanán, pa hamá mardomán ham dwá kanán ke esháni habará báwara kanant o mani sará imána kárant
JOH 17:21 ke á sajjahén yakk bebant. Oo Pet! Hamá dhawlá ke taw mani del o daruná ay o man taigá, á ham may del o daruná bebant, tánke jahán báwar bekant ke taw maná rawán dátag.
JOH 17:22 Hamá shán o shawkat ke taw maná dátag, man áyáná dátag tánke á yakk bebant, hamá dhawlá ke man o taw yakk én,
JOH 17:23 man áyáni del o daruná bemánán o taw manigá o á sarjamá yakk bebant, tánke jahán bezánt ke taw maná rawán dátag o anchó ke taw maná dóst dáshtag, á ham taw hamé paym dóst dáshtagant.
JOH 17:24 Oo Pet! Mana lóthán ke hamá mardom ke taw maná dátagant, hamódá gón man yakjáh bebant ke man án tánke hamá shawkatá begendant ke taw maná dátag, chéá ke cha jahánay jórh bayagá pésar ham taw maná dóst dáshtag.
JOH 17:25 Oo ádelén Pet! Harchont ke jaháná tará nazántag, man tará zántag. Nun á ham zánant ke taw maná rawán dátag.
JOH 17:26 Man tai nám pa áyán pajjárént o angat ham pajjárénáni, tánke hamá mehr ke tará pa man hastent, áyáni del o daruná bebit o man ham áyáni del o daruná bebán.”
JOH 18:1 Issáyá é habar kortant o nun gón wati moridán Kedrunay daragay á dastá shot. Ódá bágé hastat, Issá o áiay morid hamódá shotant.
JOH 18:2 Issáay dróhók Yahudáyá á jágaha zánt, chéá ke Issá o áiay morid géshter hamódá yakjáha butant.
JOH 18:3 Gorhá Yahudáyá, Rumi pawji o Parisi o mazanén dini péshwáyáni dém dátagén lahtén sepáhig zort o hamá bágá bortant. Áyán cherág o mashal o seláh gón at.
JOH 18:4 Issáyá zánt gón man ché bayagi ent, démá shot o josti kort: “Shomá kai shóházá ét?”
JOH 18:5 Passawesh dát: “Issá Náseriay.” Gwashti: “Man Án!” Issáay dróhók Yahudá ham hamódá óshtátagat.
JOH 18:6 Wahdé Issáyá gwasht: “Man Án,” á mardom poshtá kenzet o zeminá kaptant.
JOH 18:7 Padá gwashti: “Kai shóházá ét?” Áyán gwasht: “Issá Náseriay.”
JOH 18:8 Issáyá darráént: “Man wa shomárá gwasht ke man án. Agan mani shóházá ét, eshán bellét ke rawant.”
JOH 18:9 Issáyá chó gwasht ke áiay pésarigén habar rást o sarjam bebit: “Á ke taw maná dátagatant, cha áyán kass gár o bégwáh nabut.”
JOH 18:10 Shamun-Petrosá zahmé gón at. Hamé wahdá, wati zahmi kasshet, zrábé jat o masterén dini péshwáay nawkaray rástén góshi borret. Nawkaray nám Malkás at.
JOH 18:11 Issáyá gón Petrosá gwasht: “Wati zahmá jotká kan! Man á pyálahá nósh makanán ke Petá maná dátag?”
JOH 18:12 Gorhá Rumi pawji o áyáni sarmaster o Yahudi sepáhigán, Issá dazgir kort o bast.
JOH 18:13 Issáesh pésará Hannáay kerrá bort. Hanná Kayápáay janay pet at o á sálá Kayápá masterén dini péshwá at.
JOH 18:14 É hamá Kayápá at ke Yahudiáná é sóji dátagat ke kawmay jáhá yakk mardoméay merag sharter ent.
JOH 18:15 Shamun-Petros o dega moridé Issáay padá rawán but o shotant. Á dega moridá gón masterén dini péshwáyá pajjáróki hastat, paméshká gón Issáyá masterén dini péshwáay lógay péshgáhá potert.
JOH 18:16 Bale Petros dhanná darwázagay nazzikká óshtát. Gorhá á morid ke gón masterén dini péshwáyá pajjárók at, dhanná dar átk, gón darwázagpánén móledá chizzé gwashti o Petrosi tóká bort.
JOH 18:17 Darwázagpánén móledá gón Petrosá gwasht: “Záná, taw cha é marday moridán naay?” Áiá gwasht: “Na, naán!”
JOH 18:18 Hezmatkár o sepáhigán ásé rók kortagat, chéá ke shap sard at. Ásay kerrá óshtátagatant o watá tápagá atant. Petros ham áyáni kerrá óshtátagat o watá tápagá at.
JOH 18:19 Hamé dargatá masterén dini péshwáyá cha Issáyá, áiay moridáni bárawá o tálimay bárawá jost o pors kort.
JOH 18:20 Issáyá passaw dát: “Man sajjahén donyáay démá wati habar kortagant. Modám kanisahán o mazanén parasteshgáhá tálimon dátag, hamódá ke sajjahén Yahudi moccha bant. Man chérokái hecch habaré nakortag.
JOH 18:21 Gorhá chéá cha man josta geray? Cha hamáyán jost beger ke mani habaresh eshkotagant. Á zánant ke man ché gwashtag.”
JOH 18:22 Wahdé Issáyá é habar kortant, hamódá óshtátagén sepáhigéá Issáay démá shahmáté jat o gwashti: “Masterén dini péshwáyá é dhawlá passawa dayay?”
JOH 18:23 Issáyá darráént: “Agan man radén habaré kort, maná mayárig bekan. Bale agan man rást gwasht, chéá maná janay?”
JOH 18:24 Gorhá Hannáyá Issá masterén dini péshwá Kayápáay kerrá dém dát. Issáay dast angat bastagatant.
JOH 18:25 Shamun-Petros hamódá óshtátagat o watá tápagá at. Jostesh kort: “Záná, taw cha áiay moridán yakké naay?” Áiá namannet o gwashti: “Na, naán.”
JOH 18:26 Cha masterén dini péshwáay hezmatkárán yakké hamá marday syád at ke Petrosá áiay gósh borretagat. Gón Petrosá gwashti: “Man wa tará gón áiá hamá bágá dist. Taw hamá naay?”
JOH 18:27 Petrosá padá namannet. Hamá damáná korósá báng dát.
JOH 18:28 Issáesh cha Kayápáay kerrá Rumay wáliay kalátá bort. É wahdá sohb máhallah at o Yahudi wáliay kalátá nashotant ke nápák mabant o Sargwazay Aiday waragá wárt bekanant.
JOH 18:29 Gorhá Pilátus dhanná dar átk o cha áyán josti kort: “É marday sará shomay bohtám ché ent?”
JOH 18:30 Áyán passaw dát: “Agan radkáré mabutén, má tai dastá nadátagat.”
JOH 18:31 Pilátusá gwasht: “Eshiá bebarét o wati Sharyatay hesábá pa eshiá shawr o hokmé beborrét.” Yahudián gwasht: “Márá é ejázat nést ke kaséá markay sezá bedayén.”
JOH 18:32 É dhawlá but tánke Issáay hamá habar rást o sarjam bebit ke wati markay warh o paymay bárawá kortagati.
JOH 18:33 Nun Pilátus wati kalátá shot o Issái hamódá lótháént o gwashti: “Haw! Taw Yahudiáni bádsháh ay?”
JOH 18:34 Issáyá gwasht: “É tai jenday habar ant yá degarán mani bárawá tará é dhawlá gwashtag?”
JOH 18:35 Pilátusá gwasht: “Záná, man Yahudié án? Tai wati kawm o mazanén dini péshwáyán tará mani dastá dátag. Taw ché kortag?”
JOH 18:36 Issáyá gwasht: “Mani bádsháhi donyái bádsháhié naent. Agan mani bádsháhi donyái bádsháhié butén, mani hezmatkárán jang kortagat ke man Yahudiáni dastá makapán. Bale mani bádsháhi donyái bádsháhié naent.”
JOH 18:37 Pilátusá gwasht: “Gorhá taw bádsháhé ay?” Issáyá gwasht: “Taw wat maná bádsháhé gwashagá ay. Man pédá butag o donyáyá átkagán ke pa rástiá gwáhi bedayán. Harkasá ke rásti dósta bit, mani habarán gósha dárit.”
JOH 18:38 Pilátusá darráént: “Rásti ché ent?” É habaray kanagá rand Pilátus padá Yahudiáni kerrá shot o gwashti: “Man hecch choshén bonyádé nagendán ke é mardá mayárbár bekanán.
JOH 18:39 Bale shomárá rasmé hast ke man Sargwazay Aiday róchá yakk bandigé pa shomá ázát bekanán. Shomá lóthét ke man Yahudiáni bádsháhá pa shomá ázát bekanán?”
JOH 18:40 Áyán kukkár kort o passaw dát: “Na, áiá nalóthén! Barabbásá ázát kan!” Barabbás yágié at.
JOH 19:1 Randá Pilátusá Issá zort o shallák o hayzarán janáént.
JOH 19:2 Pawjián cha dhangar o konthagán tájé jórh kort o Issáay sará dát, jamurangén kabáhé ham gwará dátesh.
JOH 19:3 Issáay kerrá shot o átkant o gwashtesh: “Salám o drót, oo Yahudiáni bádsháh!” Shahmátesh ham jat.
JOH 19:4 Pilátus padá Yahudiáni kerrá dhanná dar átk o gwashti: “Bechárét, eshiá shomay kerrá dhanná kárán tánke shomá bezánét ke man pa eshiay mayárig kanagá hecch bonyádé nagendán.”
JOH 19:5 Issáyá konthagén táj sará at o jamurangén kabáh gwará at o dhanná dar átk. Pilátusá gón Yahudián gwasht: “Bechárét, é mard hamedá ent!”
JOH 19:6 Wahdé mazanén dini péshwáyán o áyáni sepáhigán dist, kukkáresh kort: “Salibi kassh! Salibi kassh!” Pilátusá gwasht: “Shomá wat eshiá bezurét o salib bekasshét. Man pa eshiay mayárig kanagá hecch bonyádé nagendán.”
JOH 19:7 Yahudián gwasht: “Márá Sharyaté hastent ke áiay redá, é mard allamá koshag bebit, chéá ke gwashtagi: ‘Man Hodáay Chokk án.’”
JOH 19:8 Wahdé Pilátusá é habar eshkot, ganter torseti.
JOH 19:9 Pilátus padá wati kalátá shot o ódá cha Issáyá josti kort: “Taw cha kojá átkagay?” Issáyá passaw nadát.
JOH 19:10 Pilátusá gwasht: “Gón man habara nakanay? Taw nazánay ke tai ázát kanag o salib kasshagay ehtiár mani dastá ent?”
JOH 19:11 Issáyá passaw dát: “Agan Hodáyá tará é ehtiár madátén, mani sará tará hecch wák o ehtiáré néstat. Paméshká hamá ke maná tai dastá dáti géshter mayárbár ent.”
JOH 19:12 Cha ed o rand, Pilátusá johda kort ke áiá ázát bekant, bale Yahudián kukkára kort: “Agan taw é mardá ázát bekanay, Kaysaray dóst naay. Harkas watá bádsháh sarpad bebit, Kaysaray dozhmen ent.”
JOH 19:13 Wahdé Pilátusá é habar eshkot, Issái dhanná áwort o wat yakk jáhé pa dádrasiá nesht ke áiá “Sengparsha” gwashant o Aramái zobáná “Jabbátá” bit.
JOH 19:14 Sargwazay Aiday tayáriay róchá, némróchay wahdá, Pilátusá gón Yahudián gwasht: “Bechárét, esh ent shomay bádsháh!”
JOH 19:15 Bale áyán kukkár kort: “Gár o gomsári kan! Gár o gomsári kan! Salibi kassh!” Pilátusá gwasht: “Shomay bádsháhá salib bekasshán?” Mazanén dini péshwáyán gwasht: “Cha Kaysará abéd, márá dega bádsháhé nést.”
JOH 19:16 Áherá, Pilátusá Issá pawjiáni dastá dát ke salib kasshag bebit. Gorhá áyán Issá bort.
JOH 19:17 Issáyá salibesh baddhá dát o “Kámpól” námén jágahéá bortesh. É jágah Aramái zobáná “Joljotá” gwashaga bit.
JOH 19:18 Hamódá salibesh kasshet. Gón áiá dega do mardomesh ham salib kasshet, yakké é kashá o yakké á kashá. Issá, á doénáni nyámá at.
JOH 19:19 Pilátusay hokmá, mayárnámagé nebeshtahesh kort o salibay sará dratkesh. Nebeshtah é dhawlá at: “Issá Náseri - Yahudiáni bádsháh.”
JOH 19:20 Cha Yahudián bázénéá é mayárnámag wánt, chéá ke Issáay salib kasshagay jágah cha shahrá dur naat o mayárnámag Ebráni o Látini o Yunáni zobánán nebisag butagat.
JOH 19:21 Gorhá Yahudiáni mazanén dini péshwáyán gón Pilátusá gwasht: “‘Yahudiáni bádsháh’ nebeshtah makan, nebeshtah kan ke é mardá gwashtag man Yahudiáni bádsháh án.”
JOH 19:22 Pilátusá gwasht: “Á chizz ke man nebeshtah kortag, badala nabit.”
JOH 19:23 Salib kasshagay wahdá, pawjián Issáay pocch zortant, chár bahrá bahr kortant, pa har pawjiéá yakk bahré. Bale Issáay jámag mant ke hecch cháki per naat, sará tán pádá yakgwáp at.
JOH 19:24 Gorhá áyán watmánwatá gwasht: “Byáét, eshiá naderrén, eshiay sará korakasshia kanén, chárén bárén kayá rasit?” Hamá dhawlá ke Hodáay Pákén Ketába gwashit, hamá dhawlá but: “Mani pocchesh watmánwat bahr kortant o jámagay sará korakasshiesh kort.” Pawjián hamé kár kort.
JOH 19:25 Salibay nazzikká Issáay mát o mátay gohár o Kliupásay jan Maryam o Maryam Magdalini óshtátagatant.
JOH 19:26 Wahdé Issáyá wati mát dist ke hamá dóstigén moriday kerrá óshtátag, gón mátá gwashti: “Oo bánok! É tai chokk ent.”
JOH 19:27 Randá gón wati moridá gwashti: “É tai mát ent.” Á moridá cha hamá wahdá Maryam bort o wati lógá dásht.
JOH 19:28 Nun Issáyá dist ke sajjahén chizz sarjam butagant. Gorhá Pákén Ketábay habaray rást o sarjam bayagay háterá gwashti: “Tonnig án.”
JOH 19:29 Cha tropshén sharábá porrén kunzagé ódá ér at. Áyán espanjé zort o sharábén kort, zupáay tháléay sará bast o Issáay lonthán per mosht.
JOH 19:30 Wahdé Issáyá sharáb dap jat, gwashti: “Kár halás but!” Randá sari jahl kort o sáhi dát.
JOH 19:31 Á róch, Shabbatay tayáriay róch at. Yahudián nalóthet ke salib kasshetagénáni jón o jasad Shabbatay róchá salibay sará lónján bebant, chéá ke é hásén Shabbaté at. Paméshká cha Pilátusá dazbandiesh kort ke á sayénáni pádán prósh o cha salibáni sará éresh géj.
JOH 19:32 Gorhá pawji démá átkant o hamá doénáni pádesh próshtant ke gón Issáyá salib kasshag butagatant, pésará yakkéay o padá domiay.
JOH 19:33 Issáay kerrá ke átkant, distesh ke áiá sáh dátag. Paméshká áiay pádesh napróshtant.
JOH 19:34 Bale cha pawjián yakkéá, nayzahé Issáay kash o pahnátá jat o hamá damáná cha áiay jóná hón o áp dar átk.
JOH 19:35 Hamá kasá ke chamme wat é chizz distagant, sháhedia dant tánke shomá imán byárét. Áiay sháhedi rást ent. Á zánt ke man rásta gwashán.
JOH 19:36 É kár hamá dhawlá but tánke Pákén Ketábay é habar rást o sarjam bebit ke gwashit: “Áiay hecch haddh próshaga nabit.”
JOH 19:37 Pákén Ketáb dega yakk jágahé ham gwashit: “Á hamáiá chárant ke áiay jánesh thong thong kortag.”
JOH 19:38 Randá, Issop námén mardé ke Arimátiáay shahray nendók at, Pilátusay kerrá shot o Issáay jóni lóthet. Á Issáay moridé at bale chérokái, chéá ke cha Yahudiána torseti. Pilátusá ejázat dát o áiá jón bort.
JOH 19:39 Nikudimus, hamá ke pésará shapé Issáay gendagá shotagat, átk o gón wat lahtén hór o hawárén morr o aud o karzarwáhi áwort ke si kiluay kesásá atant.
JOH 19:40 Nun áyán Issáay jón zort o Yahudiáni kabr o kapanay rasmáni redá, gón á washbóán lilomén patthián patát.
JOH 19:41 Hamá jágahay nazzikká ke Issá salib kasshag but, bágé hastat ke ódá nókén kabré jatagatesh o angat kass áiay tahá kabr kanag nabutagat.
JOH 19:42 Yahudiáni tayáriay róch at o kabr nazzikká at, paméshká Issáay jónesh hamódá kabr kort.
JOH 20:1 Haptagay awali róchá, bezán Yakshambehay sabáhá máhallah ke angat tahár at, Maryam Magdalini kabray sará shot o disti ke hamá dhók ke kabray dapá at, cha kabrá dur kanag butag.
JOH 20:2 Á pa maydán, Shamun-Petros o Issáay hamá domi moriday kerrá átk ke Issáyá báz dóst at. Gwashti: “Hodáwandesh cha kabrá bortag, bale nazánén kojá éresh kortag.”
JOH 20:3 Gorhá Petros o á dega morid ráh geptant o dém pa kabrá shotant.
JOH 20:4 Har doénán maydán kort, bale á dega morid cha Petrosá gwast o cha áiá pésar kabray sará raset.
JOH 20:5 Á wat kabray tahá nashot, bale saroki kasshet o disti ke lilomén patthi ér ant.
JOH 20:6 Áiá rand, Shamun-Petros átk o raset o kabray tahá shot. Áiá ham dist ke patthi hamódá ant.
JOH 20:7 Hamá dazmáli ham dist ke Issáay sará bastagat, bale dazmál patthiáni kerrá naat, pétkagat o kammé durter yakk kerréá ér at.
JOH 20:8 Randá, á morid ke pésará kabray sará rasetagat, kabray tahá shot. É chizzi distant o báwari kort.
JOH 20:9 Chéá ke tán á wahdi Pákén Ketábay é habará sarpad nabutagatant ke pa Issáyá allami ent ke cha mordagán jáh bejant.
JOH 20:10 Randá á morid wati lógán per tarretant.
JOH 20:11 Maryam cha kabrá dhann óshtátagat o gréwagá at. Hamé wahdá ke gréwagá at, sari jahl kort o kabray tahá cháreti.
JOH 20:12 Hamódá ke Issáay jón ér butagat, do espétpóshén préshtagi dist. Yakké saruná neshtagat o á dega páduná.
JOH 20:13 Áyán gwasht: “Oo bánok! Taw chéá gréwagá ay?” Passawi dát: “Mani Hodáwandesh bortag o nazánán kojá éresh kortag.”
JOH 20:14 Wahdé é gappi jat, chakki tarrént o Issái dist ke hamódá óshtátagat, bale pajjáhi nayáwort.
JOH 20:15 Issáyá gón áiá gwasht: “Oo bánok! Chéá gréwagá ay? Kai padá garday?” Maryamá hayál kort balkén bágpán ent. Gwashti: “Oo wájah! Agan taw bortag, maná begwash kojá éret kortag ke man berawán o áiá dast begerán.”
JOH 20:16 Issáyá gwasht: “Oo Maryam!” Maryamá chakk tarrént o Aramái zobáná gwashti: “Rabbuni!” (Bezán: Oo mani ostád!)
JOH 20:17 Issáyá gwasht: “Maná dast majan, chéá ke angat Petay kerrá borzád nashotagán, bale mani brátáni kerrá beraw o áyán begwash ke nun man dém pa wati Petá o shomay Petá, wati Hodáyá o shomay Hodáyá borzáda rawán.”
JOH 20:18 Nun Maryam Magdalini moridáni kerrá shot o háli dátant: “Man Hodáwand dist.” Padá hamá gappi jatant ke Issáyá gón áiá jatagatant.
JOH 20:19 Hamá Yakshambehay shapá, wahdé morid cha Yahudiáni torsá lógéay tahá mocch atant o lógay darwázag kobl atant, Issá átk o áyáni nyámá óshtát o gwashti: “Émeni o salámati pa shomá.”
JOH 20:20 É habaray gwashagá rand, wati dast o pahnáti áyáná pésh dáshtant. Wahdé moridán Hodáwand dist, sakk gal butant.
JOH 20:21 Issáyá padá gwasht: “Émeni o salámati pa shomá. Hamá dhawlá ke Petá maná ráh dátag, man shomárá ráha dayán.”
JOH 20:22 Cha é habará rand, Issáyá morid dam jatant o gwashti: “Pákén Ruhá bezurét o wati delá jágah bedayét!
JOH 20:23 Agan kaséay gonáhán bebakshét, bakshaga bant o agan mabakshét, bakshaga nabant.”
JOH 20:24 Cha dwázdahén kásedán yakké, bezán Tumá ke áiay domi nám Didimus at, Issáay áyagay wahdá ódá naat.
JOH 20:25 Á dega moridán gwasht: “Má Hodáwand distag.” Bale áiá gwasht: “Man tánke áiay dastáni sará méháni thappán magendán, tánke wati lankoká méháni thappán o wati dastá áiay kash o pahnátay thappay sará ér makanán, báwara nakanán.”
JOH 20:26 Hasht róchá rand, wahdé morid padá hamá lógá yakjáh butant, Tumá ham gón at. Lógay darwázag kobl atant, bale angat ham Issá átk o áyáni nyámá óshtát o gwashti: “Émeni o salámati pa shomá.”
JOH 20:27 Nun gón Tumáyá gwashti: “Wati lankoká edá byár, mani dastán bechár, wati dastá mani kash o pahnátay thappay sará ér kan o cha ed o rand shakk makan, báwar kan.”
JOH 20:28 Tumáyá gwasht: “Oo mani Hodáwand, oo mani Hodá!”
JOH 20:29 Issáyá gwasht: “Taw paméshká báwar kort ke maná distet. Bale bahtáwar hamá ant ke maná nagendant o báwara kanant.”
JOH 20:30 Issáyá wati moridáni démá, dega bázén mójezah o ajabbatén nesháni pésh dáshtag ke é Ketábá nebisag nabutagant.
JOH 20:31 Bale é chizz nebisag butagant tánke shomá báwar bekanét ke Issá, Masih ent o Hodáay Chokk ent. É háterá ham nebisag butagant ke shomá cha imánay ráhá, áiay námay barkatá abamánén zenday wáhond bebét.
JOH 21:1 É chizzán o rand, Teberiahay Mazangwarmay lambá, padá Issáyá watá moridáni démá záher kort. Áiay záher bayag é dhawlá at:
JOH 21:2 Shamun-Petros o Tumá ke áiay domi nám Didimus at o Natnáil ke cha Jalilay métag Kánáyá at o Zebdiay chokk o dega do morid yakjáh atant.
JOH 21:3 Shamun-Petrosá gón áyán gwasht: “Man máhigiriá rawán.” Áyán gwasht: “Má ham káén gón.” Gorhá dar átkant o bójigá swár butant, bale á shapá hecchesh nagept.
JOH 21:4 Sabáh ke but, Issá gwarmay lambá óshtátagat, bale moridán pajjáh nayáwort.
JOH 21:5 Issáyá gón áyán gwasht: “Chokkán! Shomárá máhig gón nést?” Áyán passaw dát: “Na.”
JOH 21:6 Gwashti: “Dámá bójigay rástén némagá dawr dayét, ódá máhig dara kayt.” Áyán anchosh kort o haminkadar máhigesh gept ke dámesh dém pa bójigá kasshet nakort.
JOH 21:7 Gorhá hamá morid ke Issáyá báz dóst at, áiá gón Petrosá gwasht: “É Hodáwand ent!” Shamun-Petros jándar at. Wahdé é habari eshkot, wati kabáhi gwará kort o ápá dawri kort.
JOH 21:8 Á dega morid bójigá swár, hoshkiay némagá átkant o cha máhigá porrén dámesh kasshán kort, chéá ke cha hoshkiá sad gámá durter naatant.
JOH 21:9 Wahdé hoshkiá rasetant, cha bójigá ér átkant. Rókén eshkaresh dist o eshkaráni sará máhig ér at. Nagan ham hastat.
JOH 21:10 Issáyá gón áyán gwasht: “Cha hamé máhigán kammoké byárét ke annun shomá geptagant.”
JOH 21:11 Shamun-Petros bójigá shot o dámi dém pa hoshkiá kasshet. Dám cha máhigá porr at, yakk sad o panjáh o say mazanén máhigi mán at, bale máhigán dám nadertagat.
JOH 21:12 Issáyá gwasht: “Byáét náshtá kanét!” Cha moridán yakkéá ham jorat nakort ke cha Issáyá jost begipt: “Taw kay ay?” Áyán zánt ke é Hodáwand ent.
JOH 21:13 Gorhá Issá átk, nagani zort o áyáná dáti, hamé dhawlá máhigi ham bahr kortant.
JOH 21:14 Cha wati jáh janagá pad, é sayomi rand at ke Issá moridáni démá záher but.
JOH 21:15 Náshtáyá rand, Issáyá gón Shamun-Petrosá gwasht: “Oo Shamun, Yuhannáay chokk! Inchok ke é maná dósta dárant, taw maná géshter dósta dáray?” Petrosá gwasht: “Ji haw, oo Hodáwand! Taw zánay ke man tará dósta dárán.” Issáyá gwasht: “Gorhá mani gwaragán bechárén.”
JOH 21:16 Domi randá gwashti: “Oo Shamun, Yuhannáay chokk! Bárén, maná dósta dáray?” Petrosá gwasht: “Ji haw, oo Hodáwand! Taw zánay ke taw maná dóst ay.” Issáyá gwasht: “Gorhá mani pasáni delgóshá bedár.”
JOH 21:17 Sayomi bará gwashti: “Oo Shamun, Yuhannáay chokk! Bárén, maná dósta dáray?” Issáyá ke sayomi bará jost kort ke maná dósta dáray, Petros gamig but. Gwashti: “Oo Hodáwand! Taw har chizza zánay, taw zánay ke man tará dósta dárán.” Issáyá gwasht: “Gorhá mani pasán bechárén.
JOH 21:18 Tará rásténa gwashán, wahdé taw warná atay, taw srén bastagat o har jáh ke lóthet, shotay. Bale wahdé pira bay, dastán pacha kanay o degaré tai sréná bandit o tará anchén jáhé bárt ke ódá rawaga nalóthay.”
JOH 21:19 Gón é habarán, Issáyá Petrosay markay némagá eshárah kort, ke Petros chóna merit o Hodáay shán o shawkatá záhera kant. Padá gwashti: “Mani randgiriá bekan.”
JOH 21:20 Petrosá chapp o chágerd cháret o disti ke hamá morid ke Issáyá báz dóst ent cha poshtá pédák ent, hamá ke shámay wahdá Issáay nazzikkterá kenzetagat o cha áiá josti kortagat: “Oo Hodáwand! Kay tará dróhit o dozhmenáni dastá dant?”
JOH 21:21 Wahdé Petrosay chamm pa á moridá kaptant, cha Issáyá josti kort: “Oo Hodáwand! Eshiay ásar o ákebat ché bit?”
JOH 21:22 Issáyá gwasht: “Agan mani razá hamé bebit ke é tán mani áyagay wahdá zendag bemánit, tai che káré harába bit? Taw mani randgiriá bekan.”
JOH 21:23 Gorhá moridáni nyámá é habar sheng but ke á morid hechbara namerit. Bale Issáyá nagwashtagat ke á namerit, tahná gwashtagati: “Agan mani razá hamé bebit ke é tán mani áyagay wahdá zendag bemánit, tai che káré harába bit?”
JOH 21:24 É hamá morid ent ke é chizzi nebeshtah kortagant o esháni rásti o pakkáiay sháhediá dant. Má zánén ke eshiay sháhedi rást ent.
JOH 21:25 Albat, Issáyá dega bázén káré kort. Agan yakk yakká nebisag buténant, mani hayálá sajjahén donyáyá pa á ketábán jágah nabutagat.
ACT 1:1 Oo wájah Tiupilos! Wati awali ketábay tahá, Issáay káráni bongéjá beger
ACT 1:2 tán hamá róchá ke dém pa ásmáná barag but, har káré ke áiá kortagat o har tálimé ke áiá dátagat, man tará sahig kort. Issáyá pa wati kásediá, lahtén mardom pésará gechén kortagat o cha Hodáay Pákén Ruhay némagá hokmi dátagatant o gwashtagatanti ke áyáni kár ché ant.
ACT 1:3 Markay sakkiay saggagá rand, wati kásedáni démá záhera but o gón bázén gwáhián paddaria kort ke cha mordagáni nyámá zendag butag o jáhi jatag. Áiá, tán chell róchá watá kásedáni démá záhera kort o gón áyán Hodáay bádsháhiay bárawá habaria kort.
ACT 1:4 Yakk randé ke gón áyán hórigá neshtag o warák waragá at, hokmi dátant: “Cha Urshalimay shahrá dhann marawét, Petay wádah dátagén Pákén Ruhay wadár o entezárá bebét ke shomá áiay bárawá pésará ham cha man eshkotag.
ACT 1:5 Yahyáyá mardom gón ápá pákshódi dátagant, bale Petay wádah esh ent ke lahtén róchá o rand shomá cha Hodáay Pákén Ruhá pákshódi dayaga bét.”
ACT 1:6 Wahdé morid Issáay kerrá mocch butant, cha áiá jostesh kort: “Oo Hodáwand! Bárén á wahd hamesh ent ke taw bádsháhiá padá pa Esráilá pera tarrénay?”
ACT 1:7 Passawi dát: “Á wahd o zamánag ke Petay dastá ant o áiá wat gisshéntagant, shomárá pa áyáni zánagá káré nést.
ACT 1:8 Bale wahdé Pákén Ruh shomay delána nendit, shomárá was o wáka rasit o Urshalimay shahrá, Yahudiah o Sámerahay damagán, tán sarjamén donyáay goddhi marz o simsarán ham, pa man sháhedia dayét o mani wasshén mestágá rasénét.”
ACT 1:9 Cha é habaráni gwashagá rand, áyán dist ke Issá ásmáná barag but o jambaréá á cha moridáni démá chér o andém kort.
ACT 1:10 Wahdé Issá dém pa ásmáná rawagá at, moridáni chamm ásmánay némagá sakk atant, anágat distesh do espétpóshén mard áyáni kerrá óshtátag.
ACT 1:11 Áyán gwasht: “Oo Jalili wájahán! Shomá chéá edá óshtátag o ásmánay némagá cháragá ét? Issá cha shomay nyámá chest kanag o ásmáná barag butag, bale anchosh ke shomá rawagá distag, hamé dhawlá yakk róché padá cha ásmáná pera tarrit o kayt.”
ACT 1:12 Gorhá Issáay morid, cha Zaytunay kóhá per tarret o Urshalimá átkant. É kóh, cha Urshalimá yakk Shabbati róchéay duriá ent.
ACT 1:13 Wahdé shahrá rasetant, hamá borzádi báná shotant ke pésará hamódá butagatant. É mocchiay mardománi nám esh atant: Petros, Yuhanná, Ákub, Andriás, Pilipos, Tumá, Bartulumá, Mattá, Halpiay chokk Ákub, sarmachárén Shamun o Ákubay chokk Yahudá.
ACT 1:14 Gón áyán Issáay brát, áiay mát Maryam o dega lahtén janén ham gón at. Á sajjahén hamdel o hamsetk o har wahdá gón zegr o dwáyá delgósh o dazgatth atant.
ACT 1:15 Hamá róchán yakk róché, Petros Issáay báwarmandáni nyámá, ke kesás yakk sad o bist mardom atant, pád átk o
ACT 1:16 gwashti: “Oo brátán! Hodáay Pákén Ketábay tahá, harché ke Pákén Ruhá Issáay dazgir kanókáni rahshón, Yahudáay bárawá cha Dáuday zobáná péshgói kortagat, allamá purah o sarjam bayagi at.
ACT 1:17 Yahudá cha may romb o thóliá at o é hezmatkáriá sharikdár at.”
ACT 1:18 Áiá cha wati gandagén káray mozzay zarrán dhagáré pa bahá gept o hamódá dém pa chér kapt o lápi trakket o róti dar átkant.
ACT 1:19 Urshalimay sajjahén mardomán é hál eshkot o áyán, é dhagáray nám wati zobáná “Hakeldámá” bezán “Hónay dhagár” per bast.
ACT 1:20 Petrosá habar kanáná gwasht: “Zaburay ketábá nebeshtah ent: ‘áiay lóg o jágah haráb o wayrán bát, ódá hechkas jahmenendmabát.’ o ‘áiay ogdah o zemmawári degaréá berasát.’
ACT 1:21 Paméshká báyad ent anchén mardomé gechén kanag bebit ke Hodáwandén Issáay áyag o rawagay sajjahén wahdá gón má gón butag, bezán cha Yahyáay dastá Issáay pákshódiá beger, tán hamá róchá ke á cha may nyámá chest kanag but. Á báyad ent gón má hórigá, Issáay jáh janagay gwáhiá bedant.”
ACT 1:23 Gorhá do kasay námesh pésh kort, yakké Issop Barsábá at ke Yustus ham gwashtesh o á dega Mattiás at.
ACT 1:24 Randá, é dhawlá dwá kort o gwashtesh: “Oo Hodáwand! Taw harkasay delay hálá zánay, nun wat pa má paddar kan ke cha é doénán kojámiet gechén kortag
ACT 1:25 tán é hásén kásediay zemmawáriá wati kópagán bezurit, hamá hezmat ke Yahudáyá yalah dát o hamódá shot ke áiay béhi jágah at.”
ACT 1:26 Gorhá, á doénáni sará pál jatesh o Mattiásay nám dar átk. É dhawlá, á gón hamá rombay yázdahén hásén kásedán hór kanag but.
ACT 2:1 Wahdé Pentikástayróch átk, sajjahén yakjáh mocch atant.
ACT 2:2 Anágat cha ásmáná yakk anchén tawáré átk ke gwashay trondén gwáté at o hamá lóg ke á ódá neshtagatant gwátá mán patát.
ACT 2:3 Áyán bázén áspaymén shahm o shamálah dist ke zobánok dayán har yakkéay sará ér neshtant.
ACT 2:4 Á sajjahén, cha Hodáay Ruhá porr butant o anchosh ke Pákén Ruh áyán wák o twán bakshagá at, dhanni zobánán habar kanagá laggetant.
ACT 2:5 Á róchán, ásmánay chérá har molk o har kawmay Hodádóstén Yahudi, Urshalimá jahmenend atant.
ACT 2:6 Wahdé é tawár chest but, bázén mardomé yakjáh mocch but o hayrán o habakkah mant, chéá ke harkas cha moridáni dapá wati jenday zobáná eshkonagá at.
ACT 2:7 Gorhá, pa bah mánagi o hayráni gwashtesh: “Bárén, é ke habar kanagá ant Jalili naant?
ACT 2:8 Gorhá che paymá má sajjahén, cha áyáni dapá wati máti zobáná eshkonagá én!?
ACT 2:9 Má, cha Párs, Mád o Ilám, cha Baynolnahrayn, Yahudiah, Kápádukiah, Pontus o Ásiáyá,
ACT 2:10 cha Prijiah, Pampiliah o Mesrá én, cha Libiáay hamá hand o damagán ke Keriniay nazzikká ant o anchosh cha Rumá átkagén mardom én,
ACT 2:11 Yahudi o darkawmén Yahudi butagén mardom, Kriti o Arab ham. Má sajjahén eshkonagá én ke may zobáná, Hodáay mazanén kárán darshána kanant.”
ACT 2:12 Gorhá pa hayráni cha yakdomiá jostesh kort: “É kár o habaráni máná ché ent?”
ACT 2:13 Bale lahtén pa malandh o maskará gwashagá at: “Sharábá mast o malár kortagant.”
ACT 2:14 Á wahdi, Petros gón á dega yázdahénán pád átk o pa borztawári gón áyán gwashti: “Oo Yahudián o Urshalimay jahmenendán! Sarpad bebét o mani habarán delgósh kanét.
ACT 2:15 É mardom, á dhawlá ke shomá hayála kanét, mast naant. Angat sáhat sabáhay noh ent.
ACT 2:16 É hamá hál o habar ent ke Yuil nabiá é dhawlá péshgói kortag.
ACT 2:17 ‘Hodá gwashit: “Goddhi róchán sajjahén mardomán cha wati Ruhá sarrécha kanán. Shomay jenekk o bachakk paygambaria kanant, shomay warná elháma gerant o pirén, wába gendant.
ACT 2:18 Á róchán, wati golám o móledán cha wati Ruhá sarrécha kanán o á ham paygambaria kanant.
ACT 2:19 Borzád mán ásmáná mójezah o ajekkáio jahlád mán zeminá ajabbatén nesháni pésha dárán, hón o ás o mojén dutt.
ACT 2:20 Cha Hodáwanday porshawkatén róchay rasagá pésar, róch tahárdém o máh hónchaka bit.
ACT 2:21 Á róchá, harkas Hodáwanday námá begipt, rakkit.”’
ACT 2:22 Oo Esráilián! Delgósh kanét. Anchosh ke shomá wata zánét, Hodáyá shomay nyámá mójezah o ajekkái o ajabbatén nesháni cha Issá Náseriay némagá záher o paddar kort o é dhawlá pa áiá gwáhi dáti.
ACT 2:23 É mard gón Hodáay péshzánti o gisshéntagén shawrá shomay dastá dayag but o shomá gón bédináni komakká salibay sará dratk o kosht.
ACT 2:24 Bale Hodáyá cha mordagán zendag kort o cha markay ranj o azábá rakként, chéá ke nabuteni at mark áiá wati panjagáni tahá bedárit,
ACT 2:25 hamá dábá ke Dáudá áiay bárawá péshgói kortag o gwashtag: ‘Man modám Hodáwand wati dém pa démá distag, á mani rástén pahnátá ent, cha hamé sawabá mana nalarzán o nathagalán.
ACT 2:26 Paméshká, delon wassh o zobán shádán ent. Jesm o jánon mán ométay kalátá áráma gipt,
ACT 2:27 chéá ke taw maná mordagáni jaháná yalaha nakanay o wati hamá Pákéná sarhag o pussagá naylay.
ACT 2:28 Taw maná zenday ráh sój dátagant o wati pahnátá maná cha shádmániá sarrécha kanay.’
ACT 2:29 Oo brátán! Man pa deljami shomárá gwashán ke may bonpirok Dáud mort, kabr o kapan but o áiay kabr tán maróchi may gwará hastent.
ACT 2:30 Bale á paygambaré at o zántagati Hodáyá sawgend wártag o kawl kortag ke cha áiay naslá yakkéá, áiay bádsháhiay tahtay sará nádénit.
ACT 2:31 Dáudá cha péshá, áyókén róch distagatant o Masihay jáh janagay bárawá gwashtagati ke á na mordagáni jaháná yalah kanaga bit o na áiay jóna sarhit o pussit.
ACT 2:32 Hodáyá Issá Masih zendag kort o má sajjahén, é rástiay sháhed én.
ACT 2:33 Á, Hodáay rástén némagá borzád barag but. Cha Petá, wádah dátagén Pákén Ruh áiá raset o hamá dhawlá ke shomá gendag o eshkonagá ét, nun Pákén Ruhi békesás bakshetag.
ACT 2:34 Chéá ke Dáud wat ásmáná borzád nashot, bale gwashtagi: ‘Hodáwandá gón mani Hodáwandágwasht, “mani rástén némagá benend
ACT 2:35 tán hamá wahdá ke tai dozhmenán tai pádáni chéray padag o chárchóbahé bekanán.”’
ACT 2:36 Paméshká, Esráilay sajjahén kawm allam bezánt, hamá Issá ke shomá salib kasshet, Hodáyá Hodáwand o Masih kortag.”
ACT 2:37 Wahdé mardomán é habar eshkotant, báz del padard butant o gón Petros o á dega kásedán gwashtesh: “Oo brátán! Má chón bekanén?”
ACT 2:38 Petrosá gón áyán gwasht: “Cha wati gonáhán pashómán bebét o tawbah bekanét o cha shomá harkas Issá Masihay námá pákshódi bekant, tánke Hodá shomay gonáhán bebakshit. Á wahdá shomárá Hodáay Pákén Ruh, tohpah o thékia rasit.
ACT 2:39 Hodáwanday é labz o kawl éwak o tahná pa shomá naent, pa shomay chokk o óbádag o á dega durén hand o damagáni hamá mardomán ent ham, ke may Hodáwandén Hodá áyán wati kerrá tawára kant.”
ACT 2:40 Petrosá, á, pant o sój dayáná kaddhan kort o gwashtant: “Watá cha é gomráhén nasl o padréchá berakkénét.”
ACT 2:41 Gorhá, hamáyán ke áiay kolaw o paygám zort, pákshódi ham kort o á róchá, kesás say hazár mardom gón báwarmandán hór but.
ACT 2:42 Áyán, pa kásedáni dars o sabakká, pa sharikdárén zendá, pa nánay bahr kanag o pa dwáyá, watá nadr kort.
ACT 2:43 Sajjahénáni delá bimm o torsé nesht o cha kásedán mójezah o ajabbatén nesháni záher o paddara but.
ACT 2:44 Sajjahén báwarmand, gón yakdegará hór o sajjahén mál o hastiá sharikdár atant.
ACT 2:45 Áyán wati mál o melkat bahá o nadra kort o harkasay garaz o zaluratáni sará, sajjahénáni nyámá bahra kortant.
ACT 2:46 Á, har róch gón hamdeli, mazanén parasteshgáhá moccha butant o wati lógán ham pa wasshi o delsetki nánesh bahra kort o hórigá warákesha wárt.
ACT 2:47 Hodáesh satá o saná kort o sajjahén mahluká á dóst atant. Hodáwand ham róch pa róch rakkéntagén mardomán géshá cha géshter kanán at.
ACT 3:1 Yakk róché, nohomi sáhatay zegr o dwáay wahdá, Petros o Yuhanná mazanén parasteshgáhá rawagá atant.
ACT 3:2 Hamá wahdá, lahtén mardom yakk pédáeshi langéá áragá at. Mardomán é lang har róch, mazanén parasteshgáhay “Zébá” námén darwázagay dapá wápént tán cha parasteshgáhay rawókén mardomán pendhagé begipt.
ACT 3:3 Wahdé áiá Petros o Yuhanná parasteshgáhay rawagá distant, cha áyán pendhagi lóthet.
ACT 3:4 Petros o Yuhannáyá wati chamm áiárá sakk dátant. Petrosá gwasht: “May némagá bechár.”
ACT 3:5 Langén marday chamm pa é ométá sakk atant ke chizzé dayanti.
ACT 3:6 Gorhá Petrosá gwasht: “Maná zarr o sohr nést bale harché ke maná hast, tará dayán. Issá Masih Náseriay námá, pád á, ráh ger.”
ACT 3:7 Nun áiay rástén dasti gept o óshtárénti. Hamá damáná áiay pád o pádáni mocch, tayár o zórmand butant.
ACT 3:8 Jáh serret o wati pádáni sará óshtát, ráh gept o traddán o kopp kanán o Hodáyá sepat o saná kanáná, gón áyán parasteshgáhá shot.
ACT 3:9 Sajjahén mardomán á dist ke Hodáyá sepat o saná kanáná, wati pádáni sará rawagá ent.
ACT 3:10 Zántesh é hamá ent ke pésará, parasteshgáhay “Zébá” námén darwázagay dapá pa pendhagá neshtagat. Nun cha é kárá ke gón áiá butagat mardom hayrán o habakkah mantant.
ACT 3:11 Á mard cha Petros o Yuhannáyá hecch jetá nabut. Nun sajjahén mardom Solaymánay péshgáhá, gón hayráni tachán dém pa áyán átkant.
ACT 3:12 Petrosá ke chosh dist, gón áyán gwashti: “Oo Esráilián! Cha é kárá, pa ché inkadar hayrán o habakkah mantagét? Chéá chammó pa má sakk ant? Gwashay záná, má gón wati jenday twán o pahrézkáriá é mard dráh o tayár kortag.
ACT 3:13 Ebráhém, Esák o Ákubay Hodá, bezán may pet o pirokáni Hodáyá, wati hezmatkárén Issá shán o shawkat dát, hamá ke shomá geráént o kóshárént o Pilátusay démá á namannet, harchont ke Pilátusá áiay ázát kanagay shawr kortagat.
ACT 3:14 Bale shomá á ‘Pák o Nékén’ namannet o áiay jáhá pa yakk hónigéá ázáti lóthet.
ACT 3:15 Shomá zendmánay sarchammag kosht, bale Hodáyá á cha mordagáni nyámá zendag kort o jáh janáént o má eshiay sháhed én.
ACT 3:16 É mardá gendagá ét o zánét. Cha Issáay námay saray báwarmandiá, áiá wák o twán rasetag. Haw! Issáay nám o áiay sará báwarmandiá, é mard shomay démá sarjamá dráh kortag.
ACT 3:17 Nun, oo brátán! Mana zánán ke shomayg o shomay kamásháni kár o kerd, cha názántiá at.
ACT 3:18 Bale Hodáyá harché ke cha sajjahén nabiáni zobáná péshgói kortagat é dhawlá purah o sarjam kort. Á péshgói esh ent ke áiay Masih, ranja kasshit.
ACT 3:19 Nun cha wati gonáhán pashómán bebét o tawbah bekanét o dém pa Hodáyá wátarr bekanét tánke shomay gonáh o mayár shódag bebant,
ACT 3:20 cha Hodáwanday némagá shomárá gég o ásudagén wahd o róch berasit o Hodá, Masih bezán Issáyá, ke pa shomá gechén kanag butag, rawán bekant.
ACT 3:21 Á báyad ent ásmáná bemánit tán hamá wahdá ke har chizz nóksará wati jáhá per betarrit, hamá dhawlá ke Hodáyá cha kwahnén zamánagán pákén nabiáni zobáná gwashtag.
ACT 3:22 Mussáyá gwashtag: ‘Shomay Hodáwandén Hodá, cha shomay brátáni nyámá pa shomá mani dhawlén paygambaré gechéna kant, báyad ent shomá áiay sajjahén habarán bemannét.
ACT 3:23 Kasé ke é paygambaray habaráni sará delgósh makant, cha kawmá sendag o dar kanaga bit.’
ACT 3:24 Cha Samwélá o rand, sajjahén nabián é rócháni bárawá péshgói kortag.
ACT 3:25 Shomá nabiáni poshpad o hamá ahd o kawlay mirásdár ét ke Hodáyá gón shomay pet o pirokán kortagat, wahdé gón Ebráhémá gwashti: ‘Zeminay sajjahén kawm o kabilah cha tai nasl o poshpadá barkata gerant.’
ACT 3:26 Hodáyá wati hezmatkár gechén kort o pésará shomay gwará rawán dát tán shomárá barkat bedant o har yakkéá cha áiay haráb o gandagén ráhá per betarrénit.”
ACT 4:1 Petros o Yuhanná angat gón mardomán habar kanagá atant ke dini péshwá, mazanén parasteshgáhay negahpánén sepáhigáni master o Saduki ódá átk o rasetant.
ACT 4:2 Á, cha é habará sakk nárazá atant ke kásedán mardom dars o sabakka dát o járesha jat ke cha Issáay nám o ráhá mordag padá zendaga bant.
ACT 4:3 Petros o Yuhannáesh geptant, béwahd o bégáh at, paméshká tán é dega róchá bandigesh kortant.
ACT 4:4 Bale bázéné ke áyáni kolaw o paygámesh eshkotagat báwarmand but o cha áyán kesás panch hazár mardén atant.
ACT 4:5 É dega róchá, Yahudiáni master, kamásh o Sharyatay zánógerUrshalimá mocch butant.
ACT 4:6 Gón áyán masterén dini péshwá Hanná o áiay hamráhiá Kayápá, Yuhanná, Eskandar o masterén dini péshwáay sajjahén kothom o hándán gón atant.
ACT 4:7 Áyán Petros o Yuhanná óshtárént o jost geptant: “Shomá gón kojám zór o wáká yá gón kai námá é kár kortag?”
ACT 4:8 Gorhá Petros cha Hodáay Pákén Ruhá sarréch but o gwashti: “Oo kawmay sarók o kamáshán!
ACT 4:9 Agan maróchi é sawabá cha má jost o pors bayagá ent ke má pa lang o mondhén mardéá néki kortag o josta kanét ke á chón dráh butag,
ACT 4:10 gorhá shomá sajjahén o Esráilay drostigén kawm bezánét, é mard ke dráh o tayár shomay démá óshtátag, cha Issá Masih Náseriay námay barkatá dráh butag. Shomá Issá salib kasshet o kosht, bale Hodáyá cha mordagáni nyámá zendag kort.
ACT 4:11 Issá hamá seng ent ke shomá, bánbandén ostáyán,pasond nakort o chagal dát, bale á seng, bonheshtbut.
ACT 4:12 Cha áiá abéd dega rakkénóké nést, chéá ke ásmánay chérá, Issáay námá abéd, mardomán dega námé dayag nabutag ke gón áiá má rakket bekanén.”
ACT 4:13 Áyán ke Petros o Yuhannáay deléri o bahádorri dist o zántesh ke á náwánendah o ámién mardom ant, hayrán butant. Randá pajjáhesh áwortant, ke á Issáay hamráh butagant.
ACT 4:14 Bale pa é sawabá ke á dráh butagén mard áyáni kerrá óshtátagat, chizzé gwashtesh nakort.
ACT 4:15 Paméshká áesh cha hakdiwáná dhann rawagay hokm dát o wat pa shawr o saláhá neshtant.
ACT 4:16 Watmánwatá gwashtesh: “Gón é mardomán ché bekanén? Chéá ke Urshalimay sajjahén jahmenenda zánant esháni dastá yakk anchén mójezahé záher butag ke namannaga nabit.
ACT 4:17 Bale chosh ham mabit ke é habar mardománi nyámá géshter sheng o tálán bebit. Báyad ent áyán betorsénén ke dega baré pa Issáay námá gón hechkasá habar makanant.”
ACT 4:18 Petros o Yuhannáesh padá lóthet o hokm dátant ke hechbar Issáay námá chizzé magwashant o dars o sabakk madayant.
ACT 4:19 Áyán passaw dát: “Wat shawr bekanét, shomay habaray zurag sharter ent yá Hodáay?
ACT 4:20 Bale má cha wati distagén o eshkotagénáni paddar o darshán kanagá watá dáshta nakanén.”
ACT 4:21 Gorhá cha géshterén torsénag o pádtráp. dayagá rand, áesh yalah dátant. Pa áyáni sezá dayagá sharrén ráhé nadistesh, chéá ke gón é ajabbatén káray gendagá sajjahén mardomán Hodá satá kort o sárhát.
ACT 4:22 Á mard ke gón é mójezahá dráh butagat, omri chell sálá gésh at.
ACT 4:23 Ázát bayagá rand, Petros o Yuhanná wati hamráháni kerrá shotant o áesh cha mazanén dini péshwá o kawmay kamásháni gwashtagén habarán sahig kortant.
ACT 4:24 Áyán ke eshkot, yakdel o hamtawár Hodáay bárgáhá dwá kort o gwashtesh: “Oo zórmandén Hodáwand, ásmán o zemin o daryáay addh kanók o har chizzé ke áyáni tahá ent!
ACT 4:25 Taw wat gón Pákén Ruhay elhámá cha may bonpirok, wati hezmatkárén Dáuday zobáná gwasht: ‘Á dega kawm pa ché shóresha kanant o ráj chéá mopt o náhudagén pandala sázant?
ACT 4:26 Jahánay bádsháh tayára bant o hákem yakjáh mocch, Hodáwand o áiay Masihay helápá óshtant.’
ACT 4:27 Pa rásti, hamé shahrá Hirudis, Pontius Pilátus, á dega darkawmén mardom o Bani Esráilay sajjahén kawm o kabilah hamdast butant o tai pákén hezmatkár Issáay helápá pád átkant, hamá Issá ke taw gón rógen per moshagá pa bádsháhiá gechén kortagat.
ACT 4:28 Áyán gón wati é kárá, tai wák o wáhag ke taw cha péshá gisshéntagat, purah o sarjam kort.
ACT 4:29 Oo Hodáwand! Nun esháni pádtrápáni némagá bechár o wati hezmatkárán komakk bekan tánke tai habarán pa mazanén bahádorri o natorsi darshán bekanant.
ACT 4:30 Wati pákén hezmatkár Issáay námá, pa drahbakshi o mójezah o ajabbatén neshániáni paddar kanagá, wati dastá shahár day.”
ACT 4:31 Cha áyáni dwáyá rand, á jágah ke ódá mocch atant larzet, sajjahén cha Pákén Ruhá sarréch butant o Hodáay habaresh pa deléri darshán kort.
ACT 4:32 Sajjahén báwarmand yakdel o yakján atant, hechkasá wati mál o hasti tahná watiga nazánt o sajjahén chizzán sharikdár atant.
ACT 4:33 Kásedán gón mazanén wák o tágaté pa Hodáwandén Issáay jáh janagá gwáhia dát o gón á sajjahénán Hodáay mazanén rahmat gón at.
ACT 4:34 Cha áyán hechkas mohtáj naat, chéá ke harkasá lóg yá dhagáré hastat baháia kort o
ACT 4:35 zarri kásedáni démá éra kortant. Áyán é zarr pa sajjahénán, harkasay garaz o zaluratáni sará bahra kortant.
ACT 4:36 Issop námén mardéá ham dhagáré hastat, bahái kort, zarri áwort o kásedáná dátant. Á Kebresié at o cha Láwiáni kabilahá at. Kásedán áiay nám Bárnábá kortagat, bezán “delbaddhiay chokk”.
ACT 5:1 Hannániá námén mardéá o áiay Sapirah námén janá ham wati dhagáré bahá kort.
ACT 5:2 Hannániáyá gón janay sahigiá zarráni yakk bahré pa wat dásht o á dega, kásedáni démá ér kortant.
ACT 5:3 Petrosá gwasht: “Oo Hannániá! Chéá Shaytán tai delá chó potert ke gón Hodáay Pákén Ruhá dróget bast o cha melkay zarrán bahré pa wat ér kort?
ACT 5:4 Záná, dhagár cha baháyá pésar tai jendayg naat? Cha baháyá rand, zarr tai dastá naatant? Pa ché wati delá shawret kort ke chosh bekanay? Taw gón mardomán na, gón Hodáyá dróg bast.”
ACT 5:5 Wahdé Hannániáyá é habar eshkotant, zeminá kapt o sáhi dát. Harkasá ke é habar eshkot, áiay delá baláhén torsé nesht.
ACT 5:6 Gorhá warná démá átkant, jónay kapan kanagá rand, dhanná bort o kabresh kort.
ACT 5:7 Kamm o gésh say sáhatá rand, áiay jan ke cha é sargwastá sahig naat, átk o raset.
ACT 5:8 Petrosá cha áiá jost kort: “Maná begwash, shomá dhagár ke bahá kort, eshiay kimmat hamesh at?” Sapirahá passaw dát: “Haw, kimmati hamesh at.”
ACT 5:9 Petrosá gwasht: “Chéá pa Hodáwanday Ruhay chakkásagá gón yakdegará hamdast butét? Bechár, hamáyán ke tai mard kabr kort annun darwázagay dapá ant o tará ham dhanná barant.”
ACT 5:10 Janén, hamá damáná Petrosay pádáni démá kapt o sáhi dát. Wahdé warná átkant, distesh ke á ham mortag. Dhanná bortesh o marday kerrá kabresh kort.
ACT 5:11 Cha é habaráni eshkonagá, sajjahén báwarmand o á dega mardománi nyámá mazanén tors o bimmé kapt.
ACT 5:12 Cha kásedáni dastá, mardománi nyámá bázén ajabbatén nesháni o ajekkái záher o paddara but. Sajjahén báwarmand, gón hamdeli o hamsetki Solaymánay péshgáhá moccha butant.
ACT 5:13 Báwarmand, mardománi gwará báz ezzatmand atant, bale cha á degarán kaséá é del o joryat néstat ke gón áyán hór bebit.
ACT 5:14 Angat, Hodáwanday sará báwarmandén janén o mardén, róch pa róch gésh bayán atant o gón áyán hawára butant.
ACT 5:15 Tantaná mardomán wati nádráh, taht o nepádáni sará wápént o rahsarána áwortant, tán Petros cha ráhá ke gwazit, toré áiay sáheg ham pa lahténá bekapit.
ACT 5:16 Urshalimay kerr o gwaray shahráni mardom ham romb rombá átkant, nádráh o cha palitén ruhán ranj distagén mardomesha áwortant o sajjahén dráha butant.
ACT 5:17 Masterén dini péshwá o áiay sajjahén hamráh ke Sadukiáni thóliay básk atant, pa hasadd o konnat pád átkant.
ACT 5:18 Kásedesh gept o bandijáhá jél kortant.
ACT 5:19 Bale shapá yakk wahdé, Hodáwandaypréshtagéá bandijáhay darwázag pach kortant o á cha jélá dar áwortant o gwashti:
ACT 5:20 “Berawét mazanén parasteshgáhá bóshtét o é nókén zenday sarjamén kolaw o paygámá mardomán berasénét.”
ACT 5:21 Gorhá, hamá dábá ke áyáná gwashag butagat, bámgwáhá parasteshgáhá shotant o mardománi sabakk dayagá laggetant. Wahdé masterén dini péshwá o áiay hamráh átkant, sarókáni diwánay básk o Esráilay sajjahén kamáshesh lóthetant o dega lahtén mardomesh rawán dát tán kásedán cha jélá byárant.
ACT 5:22 Bale áyáni rah dátagén mardom bandijáhá ke shotant, kásedesh nadistant. Per tarret o hálesh dátant ke
ACT 5:23 “bandijáhay darwázag mohr bastagatant, negahpán ham darwázagáni démá óshtátagatant, bale má darwázag ke pach kortant, jélá hechkas nadist.”
ACT 5:24 Gón é habaray eshkonagá, parasteshgáhay negahpánén sepáhigáni sarók o mazanén dini péshwá sakk hayrán o pegrig butant ke bárén é káray ásar o ákebat nun ché bit.
ACT 5:25 Hamá wahdá yakké átk o háli dátant: “Bechárét, á ke shomá bandig kortagatant, parasteshgáhá mardomán dars o sabakk dayagá ant.”
ACT 5:26 Gorhá parasteshgáhay negahpánáni sarók gón wati sepáhigán shot o kásedesh gept o áwortant, bale pa zór na, chéá ke torsetesh “chó mabit mardom márá sengsár bekanant.”
ACT 5:27 Kásedesh áwort o sarókáni diwánay démá óshtáréntant. Nun masterén dini péshwáyá cha áyán jost gept:
ACT 5:28 “Má hokm nakortagat dega baré pa é námá mardomán dars o sabakk madayét? Bale shomá Urshalimay sarjamén shahr gón wati tálimán porr kortag. Lóthét á marday hóná may gardená beladdhét?”
ACT 5:29 Petros o á dega kásedán passaw dát: “Báyad ent cha ensánán géshter, Hodáay mannók bebén.”
ACT 5:30 Issá, ke shomá salib kasshet o kosht, may pet o pirokáni Hodáyá padá zendag kort,
ACT 5:31 wati rástén némagá nádént o sarók o rakkénók kort, tánke Esráilay kawmá tawbah o gonáháni pahelliay móh berasit.
ACT 5:32 Má é habaráni sháhed én. Pákén Ruh, ke Hodáyá wati báwarmandáná bakshetag ham é habaráni gwáhiá dant.
ACT 5:33 Gón é habaráni eshkonagá, diwánay básk anchosh zahr geptant ke pa áyáni koshagá pád átkant.
ACT 5:34 Bale Gámályál námén Parisié ke Sharyatay ostád o sarókáni diwánay básk o sajjahén mardománi chammán sharapdárén mardé at, diwáná pád átk o hokmi kort: “É mardán yakk damáné dhanná bebarét.”
ACT 5:35 Gorhá gwashti: “Oo Esráilián! Hozzhár bét ke shomárá gón é mardomán ché kanagi ent.
ACT 5:36 Kammé wahdá pésar ham Tiudás námén mardéá jáh jat o watá mazanmardé zánti, chár sadé mardom áiay hamráh but. Bale á koshag but o áiay hamráh sest o séd butant o hecch nabut.
ACT 5:37 Cha áiá rand, Yahudá námén Jalili mardéá, mardomshomáriay róchán jáh jat, áshóp kort o lahtén mardomi gón wat tarrént, bale á ham koshag but o hamráhi sheng o sháng butant.
ACT 5:38 Annugén jáwaráni bárawá, mani shawr gón shomá hamesh ent ke cha é mardomán dast bekasshét o eshán yalah bedayét. Chéá ke agan esháni é kár o maksad cha ensánáni némagá ent, béshakk pa sara narasit.
ACT 5:39 Bale agan cha Hodáay némagá ent, shomá eshán dáshta nakanét. Gorhá bezánét ke á wahdá shomay jang gón Hodáyá bit.” Áiay habaresh mannet,
ACT 5:40 kásedesh lóthet o áwortant, latth o kotth kanáént o makan kortant ke pa Issáay námá dega baré habar makanant. Nun yalahesh dátant.
ACT 5:41 Kásed, gal o shádehi kanán, cha diwánay démá dar kaptant, chéá ke áyán é láheki rasetagat pa Issáay námá béezzati begendant.
ACT 5:42 Áyán mazanén parasteshgáh o lógáni tahá, cha é mestágay tálán kanagá ke Issá hamá Masih ent, hechbar dasta nakasshet.
ACT 6:1 Hamá róchán ke morid géshá cha géshter bayán atant, Yunáni Yahudi cha Ebráni Yahudián gelagdár atant ke har róchigén ward o warákay bahr kanagá, áyáni janózámán chizzé narasit.
ACT 6:2 Dwázdahén kásedán, sajjahén morid lóthetant o gwashtesh: “É habar sharr naent ke má ward o warákay wandh o bahr kanagay káráni sawabá, cha Hodáay Pákén Habaray hezmatkáriá nádelgósh bebén.
ACT 6:3 Paméshká, oo brátán! Cha wat hapt anchén néknámén mardom gechén bekanét ke cha Pákén Ruh o Hodái zánt o zánagá sarréch bebant tán é zemmah o dhobbahá hamáyáni kópagá beladdhén o
ACT 6:4 wat pa dwá o Hodáay Pákén Habaray hezmatkáriá dazgatth bebén.”
ACT 6:5 É shawr, sajjahénán dóst but o é mardomesh gechén kortant: Estipán ke cha imán o Pákén Ruhá porr at, Pilipos, Prukuros, Nikánur, Timun, Párminás o Antákiahay Yahudi butagén báwarmand Nikulás.
ACT 6:6 É mardomesh kásedáni démá áwort o pésh kortant. Kásedán pa áyán dwá kort o dast baddhá jatant.
ACT 6:7 É dhawlá Hodáay Pákén Habar mardománi nyámá tálán but o Urshalimá morid sakk zutt géshá cha géshter bayána butant. Bázén dini péshwáé ham é báwaray mannóger but.
ACT 6:8 Estipán cha Hodáay rahmat o zórá porr at o áiá mardománi nyámá mazanén mójezah o ajabbatén nesháni démá áwort,
ACT 6:9 bale cha Yahudiáni yakk kanisahéá ke námi “Ázát Butagén Golámáni Kanisah” at, lahtén mardom cha áiá nárazá at. Á cha Kerini o Eskandariahay shahr o Kilikiah o Ásiáay damagán atant o gón Estipáná dapjáká laggetant.
ACT 6:10 Bale Estipán gón anchén Ruh o zántéá habar kanagá at ke áiay démá óshtátesh nakort.
ACT 6:11 Gorhá lahtén mardomesh rad dát tán begwashant: “Má eshkotag Estipáná Mussá o Hodáay bárawá kopr kortag.”
ACT 6:12 Áyán, mardom o kawmay kamásh o Sharyatay zánóger shóréntant o Estipánesh gept o kasshakán, sarókáni diwáná pésh kort.
ACT 6:13 Drógén gwáh o sháhedesh áwort, áyán sháhedi dát o gwasht: “É mard Hodáay pákén lóg o Sharyatay helápá, cha bad o náráhén habar kanagá hechbar dasta nakasshit.
ACT 6:14 Má wat eshkot, gwashti: ‘Issá Náseri é jágahá karójit o á rasm o rawáján badala kant ke Mussáyá pa má eshtagant.’”
ACT 6:15 Diwánay sajjahén nendókán chamm pa Estipáná sakk dátagatant o distesh áiay dém, préshtagéay démay dhawlá ent.
ACT 7:1 Masterén dini péshwáyá cha Estipáná jost kort: “Bárén, é tohmat rást ant?”
ACT 7:2 Estipáná passaw dát: “Oo pet o brátán! Delgósh kanét: Porshawkatén Hodá, hamá wahdá may bonpirok Ebráhémay démá záher but ke á angat Baynolnahrayná at o Háráná jahmenend nabutagat.
ACT 7:3 Gón áiá gwashti: ‘Wati sardhagár o ráj o kawmá bell o hamá molká beraw ke man tará péshia dárán.’
ACT 7:4 Áiá Kaldániáni molk yalah dát o Háráná shot. Cha petay marká o rand, Hodáyá á cha ódá hamé molká áwort ke annun shomá neshtagét.
ACT 7:5 Edá, Hodáyá áiárá hecch mirás o melkat nadát, yakk bechillé zemini ham nadát, bale labzi kort ke áiay nasl o padréch é sardhagáray hodábonda bit. Hodáyá é habar hamá wahdá kort ke Ebráhémá angat chokk néstat.
ACT 7:6 Gón áiá chosh gwashti: ‘Tai chokk o óbádag anchén molkéá ke áyáni watig naent, darámad o bégánaga bant o tán chár sad sálá, degaráni chérdastiá golám o béezzat kanaga bant.’
ACT 7:7 Chosh ham gwashti: ‘Hamá kawm ke áyán wati golám o chérdasta kant, man áyán sezá dayán. Padá cha á molká dara káyant o hamé jágahá maná parastesha kanant.’
ACT 7:8 Hodáyá gón Ebráhémá ahd o karáré bast ke áiay nesháni mardénchokkáni sonnat kanag ent. Paméshká, wahdé Ebráhémá Esákén chokk but, hashtomi róchá sonnati kort. Hamé dhawlá Esáká wati chokk Ákub o Ákubá wati dwázdahén chokk, ke may kawmay kabilaháni bonpirok ant, sonnat kortant.
ACT 7:9 Ákubay chokk, gón wati brátén Issopá pa hasadd o konnat kaptant. Brátán Issop goláméay dhawlá bahá kort o Mesrá barag but, bale Hodá Issopay hamráh at o
ACT 7:10 cha sajjahén sakki o sórián rakkénti. Hodáyá á, haminchok láheki o zánt o zánag dát ke Mesray bádsháh, Perawnay mehr o ehtebári pa wat katthet o Perawná á wati sarjamén molk o melkatay kármaster kort.
ACT 7:11 Randá sajjahén Mesr o Kanháná dhokkálé kapt ke cha áiá mardomán mazanén sakki o sóri raset o may pet o pirénán hecch ward o waráké nabut.
ACT 7:12 Wahdé Ákubá zánt ke Mesrá dán o gandoma rasit, may pet o piroki awali bará pa ward o warákay gerag o áragá hamódá ráh dátant.
ACT 7:13 Á, domi randá ham Mesrá shotant o é randá Issopá watá gón wati brátán paddar o pajjárók kort. Perawn ham Issopay kawm o kothomay bárawá sahig but.
ACT 7:14 Gorhá Issopá pa wati pet Ákubá kolaw ráh dát ke á gón wati sarjamén kahól o hándáná ke haptád o panch mardom atant, beladdhit o Mesrá byayt.
ACT 7:15 É dhawlá, Ákub Mesrá shot o hamódá á o may pet o pirok bérán butant.
ACT 7:16 Áyáni jón cha ódá árag o Shekémay shahrá, hamá kabrá kall kanag butant ke Ebráhémá cha Hámóray chokkán pa chizzé zarrá bahá geptagat.
ACT 7:17 Wahdé gón Ebráhémá, Hodáay dátagén kawlay sarjam bayagay wahd nazzikk but, Mesrá may mardom báz géshter butant.
ACT 7:18 Á wahdá, Mesray bádsháh degaré but o Issopay bárawá hecchi nazánt.
ACT 7:19 Áiá may kawm rad dát o répént, may pirénáni sará báz zolm o zóráki perrént o hojj kortant ke wati nonnokén chokkán, cha lógán dhanná dawr bedayant ke bemerant.
ACT 7:20 Hamé wahdá, Mussá pédá but. Á báz sharrang o dhawldárén chokké at. Tán say máhá wati pet o mátay lógá rost o rodómi kort.
ACT 7:21 Wahdé dhanná éresh kort, Mesray bádsháh Perawnay jenekká zort o wati jenday chokkay dhawlá ródént o mazan kort.
ACT 7:22 Mussáyá Mesriáni sajjahén zánt o zántkári dar bort o pa kerdár o goptárá twánmandén mardé but.
ACT 7:23 Chell sáli ke but, é pegr o hayálá kapt ke gón wati Bani Esráili brátán gendok bekant.
ACT 7:24 Wahdé disti cha áyán yakkéay sará, Mesrié zóráki kanagá ent, Esráiliay démpánii kort o béray geragá, á Mesrii jat o kosht.
ACT 7:25 Mussáyá wati delá anchosh hayál kort ke áiay Esráili brát balkén sarpad bebant ke pa áyáni rakkénagá, Hodá áiá kár bandagá ent, bale Esráili sarpad nabutant.
ACT 7:26 É dega róchá anágat, áiá do Esráili watmánwatá merh o jangá dist. Mussá pa áyáni gisshénag o tepák kanagá démá kenzet o gwashti: ‘Oo mardán! Shomá watbrát ét, chéá yakdegará táwánbára kanét?!’
ACT 7:27 Bale hamá ke wati hammolkiay sará zóráki kanagá at, Mussái yakk némagé télánk dát o gwashti: ‘Tará kayá may sará hákem o kázi kortag?
ACT 7:28 Bárén, hamá dhawlá ke taw zi á Mesri kosht, mani koshagá ham lákártaget?’
ACT 7:29 Gón é habaray eshkonagá, Mussá cha á molká dar átk o Midyánay sardhagárá darándhéh but. Hamódá áiá do mardénchokk but.
ACT 7:30 Chell sálá rand, Sináay kóhay gyábáná, préshtagé bon geptagén dhólokéay ásay shahmáni tahá pa Mussáyá paddar but.
ACT 7:31 Cha é nedáragay gendagá, Mussá hayrán o habakkah mant. Wahdé pa eshiay géshter cháragá nazzikter shot, Hodáwanday tawári é dhawlá eshkot:
ACT 7:32 ‘Man tai pet o pirok Ebráhém, Esák o Ákubay Hodá án.’ Mussá cha torsá larzagá lagget o áiá tahm o joryat nakort á némagá bechárit.
ACT 7:33 Hodáwandá gwasht: ‘Wati swásán dar kan, é jágah ke taw óshtátagay, pákén jágahé.
ACT 7:34 Man Mesray sardhagárá wati mardománi sakki o sóri distagant, áyáni peryát o zári eshkotagant, pa áyáni rakkénag o ázát kanagá ér átkagán. Byá, nun man tará padá Mesrá rawána dayán.’
ACT 7:35 Esráilián Mussá namannetagat o gwashtagatesh: ‘Tará kayá may sará hákem o kázi kortag?’ Nun Hodáyá hamá Mussá bon geptagén dhólokay boná préshtagé pésh dásht. É dhawlá, áyáni hákem o rakkénók kort o Mesrá ráhi dát.
ACT 7:36 Hamá at ke cha Mesrá Esráiliáni dar áyagay rahshón but. Hamáiá, Mesr o Sohrzeray tayábá o tán chell sálá gyábánán mójezah o ajabbatén nesháni pésha dásht.
ACT 7:37 Hamé Mussá at ke gón Bani Esráilián gwashti: ‘Hodá cha shomay brátáni nyámá pa shomá, mani dhawlén paygambaré gechéna kant.’
ACT 7:38 É hamá Mussá at ke gón préshtagá hór, may pet o pirokáni mocchiá gyábáná gón at. Préshtagá Sináay kóhay sará gón áiá trán kort o Mussáyá hamódá Hodáay zend bakshókén habar geptant tán áyán pa má sar bekant.
ACT 7:39 Bale may pet o pirok, pa Mussáay mannagá razá naatant. Cha áiá poshtesh kort o namannet o delesh pa Mesrá bast.
ACT 7:40 Áyán, gón Háruná gwasht: ‘Pa má anchén hodá besách ke may rahbariá bekanant. É Mussá, ke márá cha Mesrá dar áyagay ráhi pésh dáshtag, áiá ché butag, má nazánén.’
ACT 7:41 Áyán gwaskpaymén yakk boté jórh kort o pa wati jórh kortagén botay sharapá, korbánig o shádehi o shádkámi kort.
ACT 7:42 Bale Hodáyá wati dém cha áyán tarrént o yalah dátant, bell ke nun máh o róch o estárán parastesh bekanant, hamá dhawlá ke Nabiáni Ketábán nebeshtah ent: ‘Oo Esráilián! Shomá tán chell sálá mán gyábánán pa man hayrát o korbánig kortagat?
ACT 7:43 Na! Shomá “Molukay tambu” o wati hodá “Ripánay estár” baddhá bastagant, hamá bot ke shomá pa parasteshá addh kortagatant. Paméshká man shomárá cha Bábelay sardhagárá hamá dastá, jaláwatan o darándhéha kanán.’
ACT 7:44 Gyábáná ‘Sháhediay tambu’ may pet o pirokán gón at o hamá paymá addh kanag butagat ke Hodáyá Mussá sój dátagat, bezán hamá nemunahay dhawlá ke áiá distagat.
ACT 7:45 É hamá tambu at ke may pirénán cha wati bonpirokán rasetagat o Yusháay kamáshi o sarókiá, may pet o pirokán gón wat hamá wahdá áwort ke é molkesh gept o Hodáyá á dega kawm áyáni chammáni démá galléntant o tán Dáuday wahdá, á tambu hamé molká at.
ACT 7:46 Dáudá, Hodáay wasshén wáhag o rahmat gón at o lótheti pa Ákubay Hodáyá jágah o hankéné addh bekant,
ACT 7:47 bale é Solaymán at ke pa Hodáyá lógé addhi kort.
ACT 7:48 Albat, borzén arshay Hodá baniádamay addh kortagén lógán jágaha nakant, anchosh ke nabiá gwashtag:
ACT 7:49 ‘Hodáwanda gwashit: “Ásmán mani taht ent o zemin mani pádáni chéray padag, shomá pa man che paymén lógé addh korta kanét yá ke mani árámjáh kojá bit?
ACT 7:50 É sajjahén mani wati dastay addh kortagén naant”’
ACT 7:51 Oo sarkassh o mánmayátkén mardomán! Shomay del o gósh sonnat kanag nabutagant. Wati pet o pirénáni dhawlá, shomá ham modám Hodáay Pákén Ruhay helápá óshtét.
ACT 7:52 Kojám paygambar shomay pet o pirénán ázár nadátag? Shomay pet o pirénán tantaná hamá paygambar ham koshtant ke áyán á ‘Pák o Nékénay’ áyagay péshgói kortagat. Nun shomá áiay jenday dróhók o hónig ét.
ACT 7:53 Shomá hamá ét ke préshtagán pa shomá Sharyat áwort, bale hechbar namannet o Sharyatay sará káró nakort.”
ACT 7:54 Gón Estipánay habaráni eshkonagá, á sakk zahr geptant o pa áiá dantán gadróshagá laggetant.
ACT 7:55 Bale Estipáná, ke cha Hodáay Pákén Ruhá sarréch at, ásmánay némagá cháret, gón Hodáay shán o shawkatay gendagá, Issái dist ke Hodáay rástén némagá óshtátag.
ACT 7:56 Gwashti: “Ásmáná pach gendagá án o Ensánay Chokk, Hodáay rástén némagá óshtátag.”
ACT 7:57 Áyán gón é habaráni eshkonagá, wati gósh band kortant o kukkáresh kort. Randá, sajjahén hamshawr butant o Estipánay sará hamlah o oroshesh bort.
ACT 7:58 Kasshán kanán, cha shahrá dhann, dar kort o sengsár kanagesh bendát kort. Hamá mardomán ke áiay sará drógén sháhedi dátagat, wati shál o kabáh cha gwará dar kort o Shául námén mardéay kerrá ér kortant.
ACT 7:59 Hamá wahdá ke Estipáná sengsár kanagá atant, Estipán dwá kanáná gwashagá at: “Oo Hodáwandén Issá! Pa mani nadrigén sáhay zuragá razámand bátay.”
ACT 7:60 Randá, Estipán kóndhán kapt o pa borztawári gwashti: “Oo Hodáwand! Eshán pa é gonáhá mayárbár makan.” Gón hamé habaráni gwashagá, sáhi dát.
ACT 8:1 Shául cha Estipánay kóshá rázig at. Á róchá, Urshalimaykelisáay sará sakkén ázáré bongéj but. Abéd cha kásedán, á dega sajjahén báwarmand, Yahudiah o Sámerahay chapp o chágerdá sheng o sháng butant.
ACT 8:2 Lahtén Hodádóstén mardomá, Estipán kabr kort o pa áiá mazanén sug o porsé dásht.
ACT 8:3 Bale Sháulá, kelisáay barbád kanag bendát kort. Lóg pa lóga shot, mardén o janén cha lógán dara kort, kasshán kanána bort o jéla kanáéntant.
ACT 8:4 Hamá báwarmand ke sheng o sháng butagatant, har jáh ke saresha kapt, Issáay wasshén mestágesha rasént.
ACT 8:5 Pilipos Sámerahay yakk shahréá shot o ódá Masihay kolaway jári jat.
ACT 8:6 Wahdé mardománi mocchián Piliposay habar eshkotant o áiay kortagén ajabbatén neshániesh distant, pa áiay habaráni gósh dáragá, géshter delgóshesh kort.
ACT 8:7 Bázénéá ke jenn per at, áyáni jenn gón kukkár o chihálán dar átkant, bázén lang o mondh ham dráh o wassh butant.
ACT 8:8 Paméshká á shahray mardomán báz gal o shádehi kort.
ACT 8:9 Hamé shahrá, Shamun námén mardé sehr o jádugeri kanagá at o Sámerahay mardomi hayrán o ajekkah kortagatant. Áiá batháka jat o gwasht: “Man mazanén mardé án.”
ACT 8:10 Kasán o mazan, harkasá áiay habar gósha dáshtant o gwashtesh: “É mard Hodáay was o wák ent o ‘Mazanzór’ gwashaga bit.”
ACT 8:11 Mardom paméshká áiay mannóger atant ke báz wahd at cha wati sehr o chambandoki kárán, mardomi hayrán kortagatant.
ACT 8:12 Nun wahdé mardomán Piliposay sará báwar kort, ke á, Hodáay bádsháhiay wasshén mestág o Issá Masihay námá jár janagá at, gorhá mardén o janénán, pákshódia kort.
ACT 8:13 Shamunay jend ham báwarmand but o pákshódii kort o har jágah Piliposay hamráha but. Cha distagén ajabbatén nesháni o mójezahán hayrán o habakkaha mant.
ACT 8:14 Wahdé Urshalimá, kásedán hál raset ke SámeriánHodáay habar mannetagant, gorhá áyán Petros o Yuhanná hamódá ráh dátant.
ACT 8:15 Wahdé átk o rasetant, pa Sámerián dwáesh kort ke Pákén Ruh áyáni delán bepoterit,
ACT 8:16 chéá ke Pákén Ruh taningah cha áyán hechkaséay sará ér nayátkagat. Á pa Hodáwandén Issáay námá pákshódi dayag butagatant o bass.
ACT 8:17 Petros o Yuhannáyá wati dast áyáni baddhá jat o Pákén Ruh áyán raset.
ACT 8:18 Wahdé Shamuná dist kásed ke dast baddhá janant Pákén Ruh dayaga bit, áiá pa Petros o Yuhannáyá zarr áwort o
ACT 8:19 gwashti: “Maná ham é was o wáká bedayét tán harkasá ke dast baddhá janán Pákén Ruh áiá ham berasit.”
ACT 8:20 Petrosá passaw dát: “Tai zarr gón tai hamráhiá gár o gomsár bátant. Chéá ke taw hayál kortag Hodáay dádá pa bahá gepta kanay.
ACT 8:21 Tará é hezmatkáriá hecch bahr o wandhé nést, chéá ke tai del gón Hodáyá tachk o rást naent.
ACT 8:22 Cha wati é badkáriá tawbah kan o cha Hodáwandá dwá belóth, balkén Hodá tai delay é sellén hayálá bebakshit.
ACT 8:23 Man gendagá án, tai del cha zahrápá porr ent o sherr o sheddatay golám o bandig ay.”
ACT 8:24 Shamuná passaw dát: “Shomá cha Hodáwandá pa man dwá belóthét, tán hamá chizz ke shomá gwashtant, yakké ham mani sará makapit.”
ACT 8:25 Petros o Yuhanná, Hodáwanday habaráni sháhedi dayag o sheng kanagá rand, per tarret o Urshalimá shotant. Per tarragay wahdá, ráhá, bázén Sámeri dhéh o kallagán ham wasshén mestágesh tálán kort.
ACT 8:26 Hodáwandaypréshtagéá gón Piliposá gwasht: “Pád á, jonubay némagá gyábánay hamá ráhá beger o beraw ke cha Urshalimá dém pa Gazzahá rawt.”
ACT 8:27 Á pád átk o ráh gept. Ráhá, gwahtagén mardé disti ke Habashahay molká, “Malakah Kandákahay” kelitdár at. É mard Urshalimá pa zegr o dwáyá shotagat o
ACT 8:28 nun wati arrábahay tahá neshtagat o dém pa wati molká per tarrán, Eshayá nabiay Pákén Ketábá wánagá at.
ACT 8:29 Hodáay Pákén Ruhá gón Piliposá gwasht: “Áiay nazzikká beraw o arrábahá hamráh bay.”
ACT 8:30 Pilipos tachán áiay nazzikká shot. Eshkoti ke á mard Eshayá nabiay Pákén Ketábá wánagá ent. Piliposá jost gept: “É ketábá ke wánagá ay, eshiá sarpad ham bay?”
ACT 8:31 Áiá passaw dát: “Na, tán kasé maná sarpad makant, man chón sarpada bán?” Randá Piliposi lóthet o gón wat nendárént.
ACT 8:32 Á mard, Eshayá nabiay Pákén Ketábay hamá bahrá wánagá at ke é dhawlá gwashit: “Paséay dhawlá ke áiá pa kóshá barant, áesh pa koshagá bort, anchosh ke gwarándh, pazhm chenókay démá bétawára bit, hamé dhawlá cha áiay dapá ham tawáré dar nayátk.
ACT 8:33 Áiay béezzat kanag, náráhén káré at. Áiay nasl o padréchay bárawá kay habar korta kant? Chéá ke áiay zend zeminay sará halás kanag butag.”
ACT 8:34 Habashi kelitdárá cha Piliposá jost kort: “Maná begwash, bárén é nabi kai bárawá habar kanagá ent? Wati bárawá yá dega kaséay?”
ACT 8:35 Gorhá Piliposá cha Hodáay Pákén Ketábay hamé habarán wati gapp o trán bongéj kort o Issá Masihay wasshén mestági pa áiá rasént.
ACT 8:36 Á, ráhá rawán, yakk anchén jágahéá rasetant ke ódá ápsaré hastat, kelitdárá gwasht: “Bechár, edá áp hastent, parwáh nést man hamedá pákshódi bekanán?”
ACT 8:37 Piliposá passaw dát: “Agan taw pa del o setk báwarmand butagay, pákshódi korta kanay.” Áiá darráént: “Man báwara kanán ke Issá Masih Hodáay Chokk ent.”
ACT 8:38 Habashi kelitdárá hamódá arrábahay dáragay hokm kort, doénán ápá mán dát o Piliposá á pákshódi dát.
ACT 8:39 Wahdé cha ápá dar kaptant, anágat Hodáwanday Ruhá, Pilipos chest kort o bort, Habashi kelitdárá padá Pilipos nadist, bale pa gal o shádehi wati ráhi gept.
ACT 8:40 Pilipos Ashduday shahrá gendag but, cha ódá tán Kaysariahá shot o ráhá sajjahén shahrán Issáay wasshén mestági sheng kort.
ACT 9:1 Shául, angat Hodáwanday moridán pádtráp dayán, áyáni kosht o kóshay chen o lánchá at. Á, masterén dini péshwáay kerrá shot o
ACT 9:2 cha áiá lótheti pa Dameshkay shahray kanisaháni sarókán kágadé benebisit ke Sháulá é ehtiár bebit, agan áiá ódá “É Ráhay” har mannógeré dist, mardéné bebit yá janéné, bandig bekant o Urshalimá byárit.
ACT 9:3 Wati sát o sapará, wahdé Dameshkay shahray nazzikká raset, anágat áiay chapp o chágerdá cha ásmáná rozhné drapshet.
ACT 9:4 Shául zeminá kapt o tawáré eshkoti: “Shául, oo Shául! Taw chéá maná ázára dayay?”
ACT 9:5 Sháulá jost kort: “Oo wájah! Taw kay ay?” Passawi dát: “Man Issá án, hamá ke taw áiá ázára dayay.
ACT 9:6 Nun pád á o shahrá beraw. Hamódá gwashant tará che kár kanagi ent.”
ACT 9:7 Sháulay hamráh bétawár o mámánag butant. Áyán é tawár eshkot bale hechkasesh nadist.
ACT 9:8 Shául cha zeminá pád átk, bale wahdé chammi pach kortant hechi maym nakort. Hamráhán dastá gept o Dameshká sar kort.
ACT 9:9 Tán say róchá kór but, na ápi wárt o na warák.
ACT 9:10 Dameshkay shahrá, Hannániá námén moridé jahmenend at. Shobén o elháméá, Hodáwand pa áiá záher but o gwashti: “Oo Hannániá!” Áiá jwáb tarrént: “Ji, mani wájah!”
ACT 9:11 Hodáwandá gwasht: “Pád á, hamá damk o kuchahá beraw ke áiá ‘Tachkén damka’ gwashant. Ódá Yahudáay lógá beraw o Shául Tarsusiá shóház kan, ke á dwá kanagá ent.
ACT 9:12 Sháulá wati shobéná distag ke Hannániá námén mardé kayt, áiá dast pera moshit ke padá begendit.”
ACT 9:13 Hannániáyá passaw dát: “Oo Hodáwand! Man cha bázénéá eshkotag ke Urshalimá, Sháulá tai báwarmand báz ázár dátagant.
ACT 9:14 Edá ham gón mazanén dini péshwáyáni ehtiárá átkag ke sajjahén hamá mardomán begipt o bandig bekant ke tai námá gerant.”
ACT 9:15 Bale Hodáwandá gón Hannániáyá gwasht: “Beraw, man pa wati hezmatkáriá, á gechén kortag ke darkawm o áyáni bádsháh o Esráiliáni gwará berawt o pa mani námá gwáhi bedant.
ACT 9:16 Man áiá sahiga kanán ke pa mani námá áiá chinchok ázár saggagi ent.”
ACT 9:17 Hannániá shot o hamá lógá raset, Sháuli dast per mosht o gwashti: “Oo mani brátén Shául! Hamá Hodáwand bezán Issá, ke ráhá pa taw záher but, maná ráhi dátag ke taw padá begenday o cha Hodáay Pákén Ruhá porr bebay.”
ACT 9:18 Hamá damáná, cha áiay chammán kochalpaymén chizzé kapt o áiay chammáni rozhn padá átk. Gorhá á pád átk o pákshódii kort.
ACT 9:19 Ward o waráki wárt, zreng o zórmand but. Lahtén róchá Dameshkay moridáni kerrá dáshti.
ACT 9:20 Shául, hamódá Yahudiáni kanisahá shot o jária jat ke Issá Hodáay Chokk ent.
ACT 9:21 Harkasá ke áiay habara eshkot, hayrána but o jostia gept: “É hamá mard naent ke Urshalimá Issáay nám gerókáni gár o gomsár kanagay randá at? Edá ham paméshká nayátkag ke Issáay mannógerán begipt o mazanén dini péshwáyáni kerrá bebárt?”
ACT 9:22 Bale Shául róch pa róch zórmandtera but o gón mohrén dalilán péshia dásht ke Issá, Masih ent o é dhawlá áiá Dameshkay Yahudi sarbatag o bépassaw kortant.
ACT 9:23 Bázén róchán o rand, Yahudián áiay koshagay shawr kort,
ACT 9:24 bale Shául cha áyáni pandalá sahig but. Gorhá, áyán shap o róch shahray darwázagáni negahpániá kort tán begerant o bekoshanti.
ACT 9:25 Bale áiay shágerdán lachéá kort o shapá cha shahray diwálá, jahlá ér dát.
ACT 9:26 Wahdé Shául Urshalimá raset gón moridán hór bayagay johdi kort, bale sajjahénán cha áiá torset. Áyán báwar nabut ke Shául pa rásti moridé butag.
ACT 9:27 Bale Bárnábáyá wati hamráh kort o kásedáni kerrá bort, á sahig kortant ke che paymá Sháulá Dameshkay ráhá Hodáwand distag o Hodáwandá gón áiá gapp o trán kortag. Bárnábáyá é hál ham dát ke Sháulá Dameshkay shahrá che paymá gón deléri pa Issáay námá wáz kortag.
ACT 9:28 Randá, Shául Urshalimá gón kásedán har kárá hór but o pa natorsi Hodáwanday námá wázia kort.
ACT 9:29 Gón Yunáni Yahudiáni ham gapp o trána kort. Bale á, Sháulay koshagay randá atant.
ACT 9:30 Wahdé báwarmandén brát cha é pandalá sahig butant, Sháulesh Kaysariahá bort o cha ódá dém pa Tarsusá ráh dát.
ACT 9:31 Gorhá Yahudiah o Jalil o Sámerahay sajjahén damagán, kelisá émen o ásudag but o rost o rodóm kanán at. Báwarmandán, pa Hodátorsi zenda gwázént o gón Pákén Ruhay delbaddhiá róch pa róch géshtera butant.
ACT 9:32 Petros sát o sapar kanán at o Loddahay shahray nendókén Hodáay palgártagén mardománi gwará átk.
ACT 9:33 Ódá áiá Iniás námén mardé dist ke lang o mondh at o hasht sál at ke tahtay báhóth at.
ACT 9:34 Petrosá gón áiá gwasht: “Oo Iniás! Issá Masih tará dráha kant, pád á, wati gandalán péch.” Hamá damáná Iniás pád átk o óshtát.
ACT 9:35 Wahdé Loddah o Shárunay mardomán Iniás dist, á ham dém pa Hodáwandá átkant.
ACT 9:36 Yápáay shahrá, moridé hastat ke námi Tabitá at (Yunáni zobáná “Dorkás” gwashaga bit, bezán “ásk”). Á báz nékkárén janéné at o har wahdá nézgárén mardomi komakk o madat kortagatant.
ACT 9:37 Hamé róchán nájórh but o mort. Áiay jónesh shosht o lógay borzádi báná ér kort.
ACT 9:38 Yápáay shahr cha Loddahá nazzikk at. Wahdé Yápáay nendókén morid sahig butant ke Petros Loddahay shahrá ent, áyán do mardom ráh dát o mennatgiriesh kort ke Petros zutt áyáni kerrá byayt.
ACT 9:39 Petros áyáni hamráh but. Wahdé ódá raset, lógay borzádi báná bortesh. Ódá sajjahén janózám áiay chapp o chágerdá mocch butant o gréwán hamá pocch o jámagesh pésh dáshtant ke Dorkásá wati zendá dótkagatant.
ACT 9:40 Petrosá á sajjahén cha báná dar kortant, kóndhán kapt o dwái kort. Randá démi jónay némagá tarrént o gwashti: “Oo Tabitá! Pád á.” Áiá wati chamm pach kortant, Petrosay némagá cháreti o nesht.
ACT 9:41 Petrosá áiay dast gept o óshtárént, báwarmand o janózámi tawár kortant o Tabitái zendaká áyáni dastá dát.
ACT 9:42 É hál, sajjahén Yápáay shahrá sheng but o bázén mardoméá Hodáwanday sará báwar kort.
ACT 9:43 Petros tán lahtén wahdá hamódá Yápáay shahrá gón Shamun námén póst rajókéá nesht.
ACT 10:1 Kaysariahay shahrá, Kornilius námén mardé hastat, ke Rumi pawjá, “Itáliái lashkaray” sad mardomay master at.
ACT 10:2 Áiay jend o sajjahén kahóli pahrézkár o Hodátors atant. Áiá nézgárén mardom pa daspachi komakka kortant o modám Hodáay bárgáhá zegr o dwá kanagá at.
ACT 10:3 Yakk róché némróchá rand, kesás sáhat sayá, Hodáay préshtagé pa shobén o elhámi dist ke nazzikk átk o gwashti: “Oo Kornilius!”
ACT 10:4 Korniliusá gón torsé préshtagay némagá chamm sakk dátant o gwashti: “Ji wájah! Ché gwashay?” Préshtagá passaw dát: “Tai dwá o hayrát yátmánén sawgáté ke Hodáay bárgáhá rasetag.
ACT 10:5 Nun wati mardomán Yápáay shahrá rawán kan o yakk mardéá, ke námi Shamun ent o Petros ham gwashanti, belóth o byár.
ACT 10:6 Á, póst rajókén Shamunay mehmán ent ke lógi tayábay nazzikká ent.”
ACT 10:7 Wahdé préshtagá wati habar kortant o shot, Korniliusá wati do kárdár o yakk pahrézkárén sepáhigé ke áiay hezmatá at, lóthetant,
ACT 10:8 gón áyán é sajjahén kessahi kort o dém pa Yápáyá rawán dátant.
ACT 10:9 Domi róchá, wahdé har say ráhá atant o Yápáay nazzikká rasetant, hamá wahdá némróchá Petros pa dwá kanagá lógay sará sar kapt.
ACT 10:10 Shodig but o áiay delá warák lóthet. Wahdé waragán tayár kanagá atant, Petrosá shobénag but o gón elhámé disti
ACT 10:11 ke ásmánay dap pach butag o mazanén parzónagpaymén chizzé cha har chárén lambán zeminay némagá ér áyagá ent.
ACT 10:12 É parzónag cha har paymén chárpádén haywán, már o gój o báli morgá porr at.
ACT 10:13 Petrosá tawáré eshkot ke gwashti: “Oo Petros! Pád á, bekosh o bwar.”
ACT 10:14 Bale Petrosá passaw tarrént: “Na, oo Hodáwand! Man hechbar nápák o palitén warag nawártag.”
ACT 10:15 Domi randá padá tawár átk o gwashti: “Hamá chizz ke Hodáyá pák zántagant, taw áyán sell o nápák mazán.”
ACT 10:16 Say randá hamé dhawlá but o padá parzónag zutt ásmáná barag but.
ACT 10:17 Petros hayrán at ke bárén é elhámay máná o maksad ché ent? Hamé wahdá, Korniliusay ráh dátagén mardomán Shamunay lóg shóház kortagat o átkag o lógay darwázagay dapá rasetagatant.
ACT 10:18 Áyán gwánk jat o jost kort: “Edá Shamun námén mehmáné hast ke Petros ham gwashanti?”
ACT 10:19 Petros taningah wati distagén elhámay bárawá pegr kanagá at ke Hodáay Ruhá gón áiá gwasht: “Bechár, say mardom átkag o tai jostá ant.
ACT 10:20 Pád á, jahlá ér kap o pa deljami áyáni hamráhiá beraw, chéá ke á, man rawán dátagant.”
ACT 10:21 Petros ér kapt o gón áyán gwashti: “Á ke shomá áiay jostá ét, man án. Shomá chéá átkagét?”
ACT 10:22 Áyán passaw dát: “Má pawji apsar Korniliusay kásed én. Á pahrézkár o Hodátorsén mardomé o sajjahén Yahudi áiay washnámi o bóhériay mannóger ant. Hodáay yakk pákén préshtagéá gón áiá gwashtag ke pa tai habaráni gósh dáragá tará wati lógá belóthit.”
ACT 10:23 Petrosá á mardom lógá áwort o mehmán kortant. Domi róchá, áyáni hamráh but o shot. Cha Yápáyá lahtén watbrátén báwarmand ham gón áyán gón kapt o shotant.
ACT 10:24 É dega róchá, Petros o áiay hamráh Kaysariahá rasetant. Kornilius áyáni rahchár o wadárig at o wati lahtén syád o nazzikkén sangati ham lóthetagat.
ACT 10:25 Wahdé Petros áiay lógá átk o raset, Korniliusá wasshátk kort o sojdah kanán áiay pádán kapt.
ACT 10:26 Petrosá óshtárént o gwashti: “Pád á, man ham tai dhawlá ensáné án.”
ACT 10:27 Gón áiá habar kanán, Petros lógá shot. Disti ke bázén mardomé mocch butagat.
ACT 10:28 Gón áyán gwashti: “Shomá zánét ke pa Yahudián, gón darkawmán hór o yakjáh bayag rawá naent o áyáni lógán ham narawant. Bale Hodáwandá maná pésh dásht ke hechkaséá nápák o palit mazánán o malékán.
ACT 10:29 Paméshká wahdé taw maná lóthet, man bé chakk o pad átkán. Nun begwash taw maná chéá lóthetag?”
ACT 10:30 Korniliusá passaw dát: “Chár rócha bit ke hamé wahdá sáhat sayá, wati lógá zegr o dwá kanagá atán, anágat yakk mardé ke drapshnákén pósháki gwará at, mani démá átk o
ACT 10:31 gwashti: ‘Kornilius! Tai dwá o hayrát yátmánén sawgáté ke Hodáay bárgáhá yát kanaga bit.
ACT 10:32 Nun wati mardomán dém pa Yápáyá rawán kan o hamá Shamuná belóth o byár ke Petros ham gwashanti. Á, póst rajókén Shamunay mehmán ent ke lógi tayábay nazzikká ent.’
ACT 10:33 Man hamá damáná pa tai lóthagá wati kásed ráh dátant, tai mennat sar o chammán ke taw átkay. Nun má sajjahén Hodáay diwáná hór neshtag o wadárig én tán Hodáwanday á sajjahén habarán beshkonén ke tará pa may gwashagá hokmi dátag.”
ACT 10:34 Petrosá trán kort o gwasht: “Man nun pa deljami sarpad butagán ke Hodá pa kasséá ru o ryá nakant.
ACT 10:35 Kasé ke áiay delá Hodátorsi bebit o pa tachki o rásti kár bekant, Hodáay bárgáh pa áiá pach ent, toré cha har kawméá bebit.
ACT 10:36 Shomá zánét ke Hodáyá pa Bani Esráilián wati kolaw ráh dát o cha Issá Masihay ráhá, ke sajjahénáni Hodáwand ent, sohl o émeniay mestág dát.
ACT 10:37 Chosh ham zánét é kár chónaká cha Yahyáay jár jatagén pákshódiá rand, Jalilá bongéj but o sajjahén Yahudiahá rawáj gept.
ACT 10:38 É kár hamesh at ke Hodáyá gón wati Pákén Ruh o zórá, Issá Náseriay sará rógen per mosht. É dhawlá á, har jáh ke shot, gón wati nékén kárán, á sajjahén mardom ke Shaytánay bandig atant dráhia kortant, chéá ke Hodá gón áiá gón at.
ACT 10:39 Má, é sajjahén káráni sháhed én ke áiá Urshalimay shahrá o Yahudiahay damagá kortant. Bale salibesh kasshet o koshtesh.
ACT 10:40 Hodáyá sayomi róchá, á zendag o záher kort,
ACT 10:41 bale pa sajjahén mardomán na, pa hamá sháhedán ke áiá wat cha péshá gechén kortagatant, bezán pa má ke Issáay jáh janagá rand, gón áiá hór wárt o nóshet.
ACT 10:42 Áiá hokm kort ke má é mestágá pa mardomán jár bejanén o gwáhi bedayén ke á Hodáay gechén kortagén ent tán zendag o mordagáni kázi bebit.
ACT 10:43 Sajjahén paygambar, Issáay bárawá gwáhia dayant, harkas áiay sará imán byárit, gonáhi áiay námá bakshaga bant.”
ACT 10:44 Petros angat habará at, Pákén Ruh, hamá mardománi sará ér átk ke áiay habarán gósh dáragá atant.
ACT 10:45 Petrosay hamráhiá átkagén báwarmandén Yahudi hayrán butant ke Hodáay Pákén Ruh, pa darkawmán ham tohpah o théki dayag but.
ACT 10:46 Chéá ke Yahudián eshkot á, dega zobánán habar kanagá ant o Hodáay sepat o sanáyá ant. Gorhá Petrosá gwasht:
ACT 10:47 “Nun ke é mardomán may dhawlá Pákén Ruh rasetag, kasé hast ke eshán cha ápay pákshódiá makan bekant?”
ACT 10:48 Gorhá hokmi kort ke Issá Masihay námá pákshódi dayag bebant. Randá áyán, cha Petrosá dazbandi kort tán lahtén róchá áyáni gwará bejallit.
ACT 11:1 Sajjahén Yahudiahá, kásed o báwarmandén brátán eshkot ke darkawmén mardomán ham Hodáay habar mannetag.
ACT 11:2 Wahdé Petros per tarret o Urshalimá átk, Yahudián áiay sará é iráz gept ke
ACT 11:3 “taw sonnat nakortagén darkawmáni gwará shotagay o gón áyán yakkén parzónagay sará warag wártag.”
ACT 11:4 Gorhá Petrosá sajjahén sargwast hamá dábá ke butagat pa red o band, bayán kort o gwashti:
ACT 11:5 “Man Yápáay shahrá dwá kanagá atán, maná shobénag but o gón elhámé diston ke cha ásmáná mazanén parzónagpaymén chizzé cha har chárén lambán ér áyáná dém pa man pédák ent.
ACT 11:6 Wahdé man pa delgóshi áiay némagá cháret, diston ke eshiay sará chárpádén dalwat, wakshién haywán, már o gój o báli morg ant.
ACT 11:7 Man tawáré eshkot ke gwashti: ‘Oo Petros! Pád á, bekosh o bwar.’
ACT 11:8 Bale passaw dáton: ‘Na, oo Hodáwand! Nápák o palitén warag hechbar mani dapá nashotag.’
ACT 11:9 Domi randá cha ásmáná tawáré átk o gwashti: ‘Hamá chizz ke Hodáyá pák zántagant, taw áyán sell o nápák mazán.’
ACT 11:10 Say randá hamé dhawlá but o padá á sajjahén chizz ásmáná barag butant.
ACT 11:11 Hamá wahdá, say mardom ke cha Kaysariahá pa man ráh dayag butagat, hamá lógay dapá rasetagatant ke má mehmán atén.
ACT 11:12 Hodáay Ruhá maná gwasht ke man pa deljami gón áyán berawán. É shashén brát ham mani hamráhiá átkant. Má sajjahén Korniliusay lógá shotén.
ACT 11:13 Áiá márá hál dát ke che paymá préshtagé wati lógá distagi. Préshtagá gwashtag: ‘Wati mardomán Yápáyá rawán kan o Shamuná belóth o byár ke Petros ham gwashanti.
ACT 11:14 Áiá pa taw anchén mestágé gón ent, ke cha é mestágá taw o tai sajjahén kahól pahell kanag o rakkénaga bét.’
ACT 11:15 Wahdé man wati trán bongéj kort, Pákén Ruh áyáni sará ér átk, anchosh ke may sará awali bará ér átkagat.
ACT 11:16 Á wahdá man Hodáwanday hamá habaráni hayál o tránagá kaptán ke gwashtagati: ‘Yahyáyá mardom gón ápá pákshódi dátagant, bale shomá cha Hodáay Pákén Ruhá pákshódi dayaga bét.’
ACT 11:17 Paméshká, agan hamá dád o bakshesh ke cha Hodáwandén Issá Masihay saray báwarmandiá márá dayag butagat, Hodáyá áyáná ham dátag, gorhá man kay atán ke Hodáay káráni démá bóshtáténán.”
ACT 11:18 É habaráni eshkonagá rand, á bétawár butant, Hodáesh satá o saná kort o gwashtesh: “Rást ent ke Hodáyá darkawm ham, pashómániay móh dátagant ke cha wati gonáhán tawbah bekanant o abadmánén zendá berasant.”
ACT 11:19 Hamá báwarmand ke cha Estipánay wahd o bárigay ázárán, sheng o sháng butagatant sát o sapar kanán, Pinikiah, Kebres o Antákiahay sardhagárán rasetant, Hodáay habaránimestágá tahná gón Yahudián gwashagá atant.
ACT 11:20 Bale cha áyán lahténá, ke Kebres o Keriniay mardom atant, Antákiahá átk o é wasshén mestágesh Hodáwandén Issáay bárawá pa Yunánián ham sar kort.
ACT 11:21 Hodáwanday dast gón áyán gón at, paméshká bázéné báwarmand but o cha wati kár o ráhán, dém pa Hodáwandá átk.
ACT 11:22 Urshalimaykelisáyá, é hál raset o áyán Bárnábá Antákiahá rawán dát.
ACT 11:23 Wahdé á ódá raset o Hodáay rahmati dist, gal but o mardomi delbaddhi dátant ke pa del Hodáwanday wapádár o mannók bebant.
ACT 11:24 Bárnábá sharrén mardé at o cha imán o Pákén Ruhá sarréch at. É dábá, dega bázén mardomé Hodáwanday ráhá hawár but.
ACT 11:25 Bárnábá, Sháulay shóházá Tarsusá shot.
ACT 11:26 Wahdé Sháuli dar gétk, gón wat Antákiahá borti. Ódá é doén, tán sáléá gón kelisáay báwarmandán hór butant o bázén mardomé dars o sabakkesha dát. É Antákiahay shahr at ke awali randá morid, “Masihi” gwashag butant.
ACT 11:27 Hamá róchán, lahtén nabi cha Urshalimá Antákiahá átk.
ACT 11:28 Cha áyán yakkéá, ke námi Ágábus at, cha Hodáay Ruhay elhámá pád átk, péshgói kort o gwashti: “Rumay sarjamén molká mazanén dhokkálé kapit.” É dhokkál, Kaysar Klawdiusay bádsháhiay dawr o bárigá but.
ACT 11:29 Gorhá moridán shawr kort harkas wati was o twáná, pa Yahudiahay nendókén báwarmandén brátáni komakká, chizzé ráh bedant.
ACT 11:30 Áyán hamé dhawlá kort o é théki, Bárnábá o Sháulá pa kelisáay kamáshán rasént.
ACT 12:1 Hamé róchán, bádsháh Hirudisá pa kelisáay ázár rasénagá, lahtén mardomay gerag o band kanag bongéj kort.
ACT 12:2 Áiá Yuhannáay brát Ákub gept o zahmkósh kort.
ACT 12:3 Wahdé disti ke Yahudi cha é kárá wassh ant, gorhá Petrosi ham dazgir kort. É kár, Béhomirén Naganay Aiday róchán but.
ACT 12:4 Dazgir kanagá rand, áiá Petros jél kort. Chár chár sepáhigay chár thóli, bárig bárigá áiay sará páspáni kanagá at. Hirudisay delá at ke Sargwazay Aidá rand, áiá kawmay démá kárit o pésha kant.
ACT 12:5 Petros angat jélá bandig at o kelisá gón bázén delsetkié pa áiá Hodáay bárgáhá dwá kanagá at.
ACT 12:6 Cha á róchá ke Hirudisá Petros hakdiwáná baragi o mayárig kanagi at yakk shapé pésar, á gón do zamzilá bastagat o do sepáhigay nyámá waptagat. Jélay darwázagay dapá ham negahpánén sepáhig óshtátagatant.
ACT 12:7 Yakk anágat cha Hodáwanday némagá préshtagé átk o á kóthi rozhnág but. Préshtagá Petrosay kash o pahnát dast jat, cha wábá ágah kort o gwashti: “Hayyá, pád á.” Zamzil cha Petrosay dastán botk o kaptant.
ACT 12:8 Préshtagá gwasht: “Lánká band o swásán pádá kan.” Áiá anchosh kort. Préshtagá padá gwasht: “Wati kabáhá gwará kan o mani randá bay.”
ACT 12:9 Petrosá préshtagay rand gept o dhanná dar átk, bale sari per nabut ke pa rásti anchosh bayagá ent, hayáli kort balkén shobéné.
ACT 12:10 Á doén cha awali o domi negahpániá gwastant o hamá mazanén áseni darwázagay dapá rasetant ke shahray némagá at. Darwázag watsará pach but o á dhanná dar átkant. Cha yakk damkéá o rand, préshtagá á yalah dát.
ACT 12:11 Wahdé Petrosá hósh kort, gwashti: “Nun man pa dela zánán ke Hodáwandá wati préshtag ráh dátag o maná cha Hirudisay dastá o cha hamá bad o baláhán rakkéntag ke Yahudi áyáni wadárig o rahchár atant.”
ACT 12:12 Cha é sarpadiá rand, Petros Maryamay lógá shot. Maryam hamá Yuhannáay mát at ke Markásay námá ham zánaga bit. Ódá bázén mardomé pa dwá kanagá mocch at.
ACT 12:13 Petrosá lógay darwázag thokket, Ródá námén móledé pa darwázagay pach kanagá dar átk.
ACT 12:14 Áiá Petrosay tawár pajjáh áwort o cha galá, bé darwázagay pach kanagá, tacháná lógá per tarret o háli dátant: “Petros dhanná óshtátag.”
ACT 12:15 Áyán gón Ródáyá gwasht: “Taw ganók butagay.” Bale á wati gappay sará óshtátagat o gwashagá at ke “Á pa del Petros ent.” Gorhá áyán gwasht: “Zalur áiay préshtag ent.”
ACT 12:16 Petros darwázagá thokkagá at. Áyán darwázag pach kort o gón Petrosay gendagá, hayrán o habakkah mantant.
ACT 12:17 Petrosá gón dastay eshárahá bétawár kortant o hál dátant ke Hodáwandá á, cha jélá chón ázát kortag. Gón áyán gwashti: “Ákub o é dega brátán cha é hálá sahig bekanét.” Randá cha ódá dar átk o dega jágahéá shot.
ACT 12:18 Sabáhay sará, sepáhigáni nyámá shór o walwalahé mán kapt ke bárén, Petrosá ché but?
ACT 12:19 Hirudisá shóház kanáént, bale wahdé Petros dastá nakapt, cha sepáhigán jost o pors kanagá rand, áyáni koshagay hokmi dát. Gorhá Hirudisá Yahudiah yalah dát o Kaysariahá shot o hamódá mant.
ACT 12:20 Hirudis gón Sur o Saydunay mardomán zahr o nárazá at, bale óday lahtén kamáshá pa áiay diwánjáhay rawagá ejázat lóthet. Bádsháhay, Blástus námén dast o dapi hezmatkáresh gón wat hamshawr kort o cha Hirudisá sohl o saláh kanagay mennatwár butant. Chéá ke áyáni sardhagáray ward o warák, cha Hirudis bádsháhay molkay némagá átk.
ACT 12:21 Gorhá pa áyáni gend o nendá yakk róché gisshénag but. Á róchá, Hirudis gón sháhi póshákán, bádsháhi tahtay sará nesht o mardománi démá tráni kort.
ACT 12:22 Wahdé áiay habar halás butant, mardomán kukkár kanáná gwasht: “É ensáni tawáré naent, Hodái tawáré.”
ACT 12:23 Hamá damáná, Hodáwandaypréshtagéá á jat, chéá ke áiá Hodá satá nakortagat. Jesmi kerm gept o mort.
ACT 12:24 Hodáay habar o kolaw róch pa róch gésh bayán o démá rawán at.
ACT 12:25 Wahdé Bárnábá o Sháulá gón komakk o thékiáni rasénagá wati kár sarjam kort, cha Urshalimay sapará per tarret o átkant o Yuhannáesh ke Markás ham gwashaga but, gón wat áwort.
ACT 13:1 Antákiahay kelisáyá, lahtén nabi o ostád hastat: Bárnábá, Shamun ke “Syáhal” ham gwashaga but, Lukius ke Keriniay báshendahé at, Manáhin ke hákem Hirudisay darbárá, áiay kasániay sangat at o Shául.
ACT 13:2 Wahdé róchag atant o Hodáwandá saná o satá kanagá atant, Pákén Ruhá gón áyán gwasht: “Bárnábá o Sháulá pa mani hamá káráni sarjam kanagá gechén bekanét ke man pa áyán gisshéntagant.”
ACT 13:3 Cha róchag o dwáyá rand, á doénesh dast baddhá jat o ráh dátant.
ACT 13:4 É dábá, Bárnábá o Shául ke cha Pákén Ruhay némagá ráh dayag butagatant, dém pa Selukiáyá jahlád butant. Cha ódá bójigá nesht o Kebresá shotant.
ACT 13:5 Wahdé Sálámisay shahrá rasetant, Yahudiáni kanisahánHodáay habaresh jár jat. Yuhannáesh pa komakká hamráh at.
ACT 13:6 Áyán sajjahén jazirahá tarr o tába kort tánke Pápusá rasetant. Ódá, yakk drógén Yahudi paygambar o jádugeré distesh ke námi Báryashu at.
ACT 13:7 Áiá, watá gón wáli Sergius Pulosá hamgranch kortagat. Wáli, zántkárén mardé at. Áiá, pa Hodáay Habaray eshkonagá, Bárnábá o Shául lóthetant.
ACT 13:8 Bale á jáduger, ke Yunáni zobáná áiay nám “Elimás” ent, Bárnábá o Sháulay démá óshtát o johdi kort ke wáli, Issá Masihay sará báwar makant.
ACT 13:9 Sháulá ke Pulos ham gwashaga bit, cha Pákén Ruhá sarréch, Elimásay némagá chamm sakk dátant o gwashti:
ACT 13:10 “Oo Shaytánay chokk! Taw ke cha makr o mandrá sarréch ay o har rástiay dozhmen ay, taw hechbar Hodáwanday rástén ráhay chapp o chóth kanagay kárá yalaha nakanay?
ACT 13:11 Bechár, annun Hodáwand tará gipt, kóra bay o tán wahdéá, róchay rozhnáiá dista nakanay.” Hamá damáná, áiay chammán moj o tahárókiá mán shánt. Dazmósh kanán shóházá lagget ke kasé áiay dastá begipt o ráhá sój bedant.
ACT 13:12 Wahdé wáliá é dist, cha Hodáwanday tálimay zórá hayrán mant o báwarmand but.
ACT 13:13 Randá, Pulos o áiay hamkár, cha Pápusay shahrá bójigá swár but o Pampiliahay damagá, Pergahay shahrá átkant. Cha ódá Yuhannáyá á yalah dátant o Urshalimá per tarret.
ACT 13:14 Bale Bárnábá o Pulos, cha Pergahay shahrá démá rawán, Pisidiahay damagá, Antákiahay shahrá sar butant. Shabbatay róchá, Yahudiáni kanisahá shotant.
ACT 13:15 Tawrát o Nabiáni Ketábáni wánagá rand, kanisahay masterán gón áyán gwasht: “Oo brátán! Agan pa mardománi delbaddhiá gón shomá kolawé hast, darshán bekanét.”
ACT 13:16 Pulos pád átk, óshtát o gón dastay eshárahá gwashti: “Oo Esráilián o darkawmén Hodátorsán! Mani habarán delgósh kanét.
ACT 13:17 É kawmay Hodá, Esráilay Hodáyá may pet o pirok gechén kort o Mesrá jahmenendiay wahd o zamánagá sarperáz kortant o gón wati zór o wáká cha Mesrá dar áyagay rahshóni dátant.
ACT 13:18 Chell sálay kesásá mán barr o gyábáná, áyáni kár o kerdi saggetant.
ACT 13:19 Áiá Kanhánay molká hapt kawm prósh dát o áyáni sardhagár wati kawmay mirás o melkat kort.
ACT 13:20 É sajjahén sargwast, kesás chár sad o panjáh sálá butant. Cha áiá rand, tán Samwél nabiay zamánagá, Hodáyá pa áyán kázia dásht.
ACT 13:21 Padá áyán bádsháhé lóthet, gorhá Hodáyá cha Benyáminay kabilahá, Kisay chokk Shául, tán chell sálá áyáni bádsháh kort.
ACT 13:22 Randá Hodáyá á, cha bádsháhiay tahtá ér gétk o Dáud áyáni bádsháh kort. Hodáyá pa áiá gwáhi dát ke ‘mani del cha Yassiay chokk Dáudá rázig ent o á mani har wáhagá sarjama kant.’
ACT 13:23 Cha hamá Dáuday nasl o padréchá, pa Esráilay kawmá wati kawl dátagén rakkénók, bezán Issái ráh dát.
ACT 13:24 Cha Issáay áyagá pésar, pákshódókén Yahyáyá sarjamén Esráilay kawmay démá jár jat ke á cha wati gonáhán tawbah bekanant o pákshódi bekanant.
ACT 13:25 Wahdé Yahyáay hezmatkáriay wahd halás bayagi at, áiá jost kort: ‘Shomay hayálá man kay án? Man, á naán ke shomá hayála kanét. Á cha man o randa kayt o man áiay kawshbandáni bójagay láhek ham naán.’
ACT 13:26 Oo brátán, oo Ebráhémay nasl o padréch o darkawmén Hodátorsán! É rakkénagay kolaw o paygám, pa máshomá rawán dayag butag.
ACT 13:27 Urshalimay mardom o áyáni hákemán, Issá pajjáh nayáwort, bale gón áiay mayárig kanagá, áyán nabiáni hamá habar purah o sarjam kortant ke har Shabbatay róchá wánaga bant.
ACT 13:28 Harchont áyán pa Issáay koshagá hecch sawab o dalilé nadist, bale cha Pilátusá lóthetesh ke áiá bekóshárénit.
ACT 13:29 Áiay bárawá harché nebisag butagat, áyán sarjam kortant o cha salibay dárá ér gétk o kabresh kort.
ACT 13:30 Bale Hodáyá cha mordagán zendag kort o
ACT 13:31 hamá mardom ke cha Jalilá áiay hamráhiá Urshalimá átkagatant, tán bázén róchéá áesh dist. Nun á, kawmay démá pa Issáyá gwáhia dayant.
ACT 13:32 Annun má pa shomá hamé mestágá dayagá én, á kawl ke Hodáyá gón may pet o pirokán kortagat,
ACT 13:33 gón Issáay zendag kanagá, pa má ke áyáni chokk o óbádag én, sarjam o purahi kort, anchosh ke Zaburay domi bahrá nebisag butag: ‘Taw mani Bacch ay, maróchi man tará pédá kortag.’
ACT 13:34 Hodáyá gón é habarán ham kawl dátag ke Issáyá cha mordagán zendaga kant o jóni hechbara napussit: ‘Hamá pák o deljamén kawl o wádaháni barkatá shomárá bakshán ke gón Dáudá labzon kortagat.’
ACT 13:35 Paméshká, dega jágahé ham átkag: ‘Taw wati hamá Pákéná sarhag o pussagá naylay.’
ACT 13:36 Wahdé Dáudá wati wahd o bárigá, Hodáay wáhag sarjam kortant, mort o wati pet o pirokáni dhawlá kabr but o áiay jón ham pusset.
ACT 13:37 Bale á kas ke Hodáyá cha mordagán zendag kort, áiay jón napusset.
ACT 13:38 Oo brátán! Bezánét, cha Issáay némagá gonáháni pahelliay jár pa shomá janaga bit.
ACT 13:39 Mussáay Sharyatá shomárá cha gonáhán rakként nakort. Bale nun harkas ke Issá Masihay sará báwara kant áiay sajjahén gonáh pahell kanaga bant.
ACT 13:40 Hozzhár bét, chosh mabit ke nabiáni habar shomay sará sarjam bebant:
ACT 13:41 ‘Oo malandh o maskará kanókán! Bechárét, hayrán o habakkah bebét, gár o zawál bebét, chéá ke man shomay dawr o bárigá anchén káré kanagá án ke toré shomárá begwashant ham, shomá hechbar báwara nakanét.’”
ACT 13:42 Wahdé Pulos o Bárnábá cha kanisahá dar áyag o rawagá atant, mardomán cha áyán lóthet ke démi Shabbatay róchá padá hamé sarháláni sará géshter habar bekanant.
ACT 13:43 Mocchiay pád áyagá rand, bázén Yahudi o darkawmén Yahudi butagén Hodátorsén mardom, Pulos o Bárnábáay hamráh butant. Pulos o Bárnábáyá á delbaddhi dát o gwashtant ke Hodáay mehr o rahmatáni sáhegá bemánant.
ACT 13:44 É dega Shabbatá, kamm o gésh shahray sajjahén mardom pa Hodáwanday habar o kolaway gósh dáragá mocch butant.
ACT 13:45 Wahdé Yahudián mardománi bázén mocchi dist, cha kast o konnatá zahr geptant, Pulosesh béezzat kort o áiay habaráni démá óshtátant.
ACT 13:46 Á wahdá, Pulos o Bárnábáyá gón deléri áyáni passawá gwasht: “Márá cha sajjahénán pésar, Hodáay habar gón shomá gwashagi at, bale shomá Hodáay habará namannét o watá abadmánén zenday láheka nazánét, nun má darkawmáni gwará rawén.
ACT 13:47 Hodáwandá márá hamé hokm dátag ke: ‘Man tará darkawmáni nur o rozhn kortag, ke taw rakkénag o nejátá, tán donyáay goddhi marz o simsarán berasénay.’”
ACT 13:48 Wahdé darkawmán é habar eshkotant, báz gal o shádán butant o Hodáwanday habaresh sharap dátant o haminchok mardomá imán áwort ke Hodáyá pa namiránén zendá gechén kortagat.
ACT 13:49 É dhawlá, Hodáwanday habar á sajjahén damagá sheng o tálán but.
ACT 13:50 Bale Yahudián, sharapdár o Hodátorsén janén o shahray námdárén mardén, Pulos o Bárnábáay ázár dayag o badwáhiá shóréntant o áesh cha á damagá dar kanáéntant.
ACT 13:51 Pulos o Bárnábáyá wati pádáni danz hamódá chandhetant o Ekoniahay shahrá shotant.
ACT 13:52 Morid gal o shádán, cha Pákén Ruhá sarréch atant.
ACT 14:1 Pulos o Bárnábá wati hél o ádatay padá, Ekoniahay shahrá ham Yahudiáni kanisahá shotant. Ódá áyán anchén dábéá habar kort ke bázén Yahudi o Yunáni báwarmand butant.
ACT 14:2 Bale hamá Yahudi ke báwar kanagá tayár naatant, á dega darkawmén mardomesh shóréntant, áyáni pegresh Pulos o Bárnábáay helápá tarrént o zahrréch kortant.
ACT 14:3 Pulos o Bárnábáyá tán bázén wahdé hamódá dásht o pa natorsi Hodáwanday bárawá sháhediesha dát. Hodáwandá á, pa mójezah o ajabbatén nesháni pésh dáragá wák o twána dátant o é dhawlá paddaria kort ke áiay mehr o rahmatay kolaw o paygám rást ent.
ACT 14:4 Shahray mardománi nyámá jérhah o nátepákiá sar kasshet. Bahré Yahudiáni némagá but o á dega bahr gón Issáay kásedán hamráh but.
ACT 14:5 Yahudi o darkawm hór butant o gón wati hákemáni hamráhiá, kásedáni ázár dayag o sengsár kanagay shawresh kort.
ACT 14:6 Kásed sahig butant o cha ódá jest o Likáuniahay damagay shahr, Lestrah o Derbeh o é dega kerr o gwaráni halk o hankénán shotant.
ACT 14:7 Hamódá Issáay wasshén mestágesh tálán kort.
ACT 14:8 Lestrahá, yakk mardé hastat ke pédáeshi langé at o hechbar gámi jat nakortagat.
ACT 14:9 Á Pulosay habarán eshkonagá at, Pulosá tachkátachk áiay némagá cháret o zánti ke áiá pa drahbakshiá imán o báwar hast.
ACT 14:10 Gorhá Pulosá pa borztawári gwasht: “Pád á, wati pádáni sará bósht.” Á mard jáh serret o rawagá lagget.
ACT 14:11 Wahdé mardomán Pulosay é kár dist, Likáuniahay gálwárá gwashtesh: “É hodá ant ke baniádamay shekl o dróshomá pa má ér átkagant.”
ACT 14:12 Áyán, Bárnábá “Zeus” námént o Pulos “Hermes”, chéá ke masterén habar kanók Pulos at.
ACT 14:13 Zeusay parasteshgáh shahray dhanná at. Parasteshgáhay masterá, pa Pulos o Bárnábáyá káigerén gók o poll o shósheng shahray darwázagá áwortant. Parasteshgáhay master o mardománi romb hamé shawrá atant ke pa áyán korbánig bekanant.
ACT 14:14 Wahdé kásed, bezán Pulos o Bárnábá cha áyáni é wáhagá sahig butant, wati pocch o póshákán derrán o chák dayáná, gón kukkáré mardománi mocchiay nyámá átkant.
ACT 14:15 Gwashtesh: “Oo mardomán! Shomá ché kanagá ét? Má shomay dhawlén baniádam én o bass. Átkagén shomárá é mestágá bedayén ke é haráb o náhudagén kárán yalah bekanét o barhakk o namiránén Hodáay keshká begerét. Áiá ásmán, zemin, daryá o harché ke áyáni tahá hastent, addh kortagant.
ACT 14:16 Pésarigén zamánagá, Hodáyá sajjahén kawm mókal dátagant ke wati ráhá wat gechén bekanant.
ACT 14:17 Angat ham áiá watá cha gwáhi dayagá dur nadáshtag. Pa wati mehray darshán kanagá, cha ásmáná hawra gwárénit o porbarén keshárán pa mósoma ródénit, shomárá pa alkápi ward o waráka dant o shomay delán cha wasshián sarrécha kant.”
ACT 14:18 Gón é habarán, kásedán pa hillaté mardom cha hayrát o korbánig kanagá dáshtant.
ACT 14:19 Bale lahtén róchá o rand, bázén Yahudi cha Antákiah o Ekoniahá átk o shahray mardomesh wati némagá tarréntant. Pulosesh sengsár kort o gón é hayálá ke mortag, kasshán kanán cha shahrá dhann dawr dát,
ACT 14:20 bale wahdé morid Pulosay chapp o chágerdá átk o mocch butant, á pád átk o shahrá per tarret. Domi róchá, Bárnábáay hamráhiá, Derbehay shahrá shot.
ACT 14:21 Mán Derbehay shahrá ham, Issáay wasshén mestágesh tálán kort o bázén mardomé moridesh kort. Padá Lestrah, Ekoniah o Antákiahá per tarretant.
ACT 14:22 Moridesh sar o sój kort o delbaddhi dátant ke wati báwará mohr bedárant. Gwashtesh: “Má, gón bázén sakki o sóriáni saggagá Hodáay bádsháhiá shota kanén.”
ACT 14:23 Áyán pa har kelisáyá kamásh gechén kort o gón róchag o dwáyá, á kamáshesh hamá Hodáwanday báhóth kortant, ke áiay sará báwaresh kortagat.
ACT 14:24 Cha Pisidiahay damagá gwazán but o Pampiliahá átkant.
ACT 14:25 Padá Pergahá, Hodáay mestágesh rasént o dém pa Attáliahay shahrá jahlád butant.
ACT 14:26 Cha Attáliahá, bójigá swár but o Antákiahá per tarretant. Cha hamódá pa hamá kár o mohimmá Hodáay mehr o rahmatáni sepordah kanag butagatant, ke nun áyán sarjam kortagat.
ACT 14:27 Wahdé Pulos o Bárnábá Antákiahá rasetant, áyán kelisáay mardom mocch o yakjáh kortant. Har káré ke Hodáyá cha áyáni dastá kanáéntagat, gón áyán gwashtesh o hálesh dát ke Hodáyá pa darkawmán ham imán o báwarmandiay darwázag pach kortag.
ACT 14:28 Pulos o Bárnábá tán dérá gón Antákiahay moridán mantant.
ACT 15:1 Cha Yahudiahá lahtén mardom Antákiahá átk o brátesh tálim dátant o gwashtesh: “Tán wahdé shomá Mussáay Sharyatay randgiriá sonnat o borrok makanét, rakketa nakanét.”
ACT 15:2 Pulos o Bárnábáyá, é sarhálay sará gón áyán dapják kort o sakk nátepák butant. Gorhá shawresh kort ke Pulos o Bárnábá gón dega lahténá, Urshalimá berawant o gón kásed o kamáshán é jérhahay bárawá habar bekanant.
ACT 15:3 Kelisáyá áyáni ráh dayagay chen o lánch kort o áyán cha Pinikiah o Sámerahay ráhá gwazán, har jáh é wasshén hál dát ke bázén darkawmán ham che paymá Hodáay ráh zortag. Cha é hálay eshkonagá, sajjahén brát báz wassh o shádán butant.
ACT 15:4 Wahdé Urshalimá átk o rasetant, kelisá o kásed o kamáshán wasshátk kortant. Har káré ke Hodáyá cha áyáni dastá kanáéntagat, hálesh dátant,
ACT 15:5 bale lahtén báwarmand ke péshá Parisiáni rombá butagatant, pád átkant o gwashtesh: “Hamá sajjahén darkawm ke imánesh áwortag, báyad sonnat o borrok kanag bebant o hokm dayag bebit ke Mussáay Sharyatay randgiriá bekanant.”
ACT 15:6 Gorhá kásed o kamáshán pa é habaray gisshénagá diwán kort.
ACT 15:7 Bázén habar o hálá rand, Petros pád átk o gón áyán gwashti: “Oo brátán! Shomá sharra zánét ke báz wahdá pésar, Hodáyá cha shomay nyámá maná gechén kort ke darkawm cha mani zobáná Issáay wasshén mestágá beshkonant o báwar bekanant.
ACT 15:8 Hamá Hodá ke harkasay delay hálá zánt, darkawmi ham Pákén Ruh bakshet o pa wat zortant, anchosh ke Pákén Ruhi márá bakshetagat.
ACT 15:9 Hodáyá mayg o áyáni nyámá hecch park o péré naesht, wahdé á báwarmand butant, Hodáyá áyáni del ham pák o palgár kort.
ACT 15:10 Nun shomá chéá moridáni gardená gránén jogé bandét o Hodáyá chakkásét? É bárá, na má zorta kanén o na may pirénán zort kortag.
ACT 15:11 Enna! Márá báwar ent, anchosh ke má gón Hodáwandén Issáay mehr o rahmatay tohpahá rakkén, hamé dhawlá á ham rakkant.”
ACT 15:12 Petrosay habaráni eshkonagá rand, sarjamén mocchi bétawár but o Bárnábá o Pulosay gapp o tránesh gósh dáshtant, ke Hodáyá cha áyáni dastá, darkawmáni nyámá chónén mójezah o ajekkái pésh dáshtag.
ACT 15:13 Wahdé áyán wati gapp o trán halás kort, Ákubá darráént: “Oo brátán! Mani habarán delgósh kanét.
ACT 15:14 Shamun Petrosá gwasht ke Hodáyá che paymá awali bará darkawmáni némagá pa mehr hayál gwar kort ke cha áyán ham pa wati námá kawmé gechén bekant.
ACT 15:15 É gón nabiáni habarán yakk o hamdap ent, anchosh ke nebisag butag:
ACT 15:16 ‘Á Hodáwand ke é sajjahén kárán yakjáh sarjama kant chosha gwashit: “Cha eshiá rand, man padá káyán o Dáuday kaptagén tambuánók o mekka kanán. Man áiay wayránén jáhán padá jórhénán o rásta kanán, tánke á dega kawm dém pa Hodáwandá byáyant, bezán á sajjahén darkawm ke mani nám áyáni delá neshtag.”
ACT 15:18 É habar cha dérigén zamánagán zánag butag.’
ACT 15:19 Paméshká mani hayálá, má á darkawmáni ráhá janjál addh makanén ke Hodáay ráhesh zortag,
ACT 15:20 pa áyán benebisén: cha hamá korbánigán ke gón botáni námay geragá nápák butagant, cha zená o bénangiá, cha mordárén dalwatáni góshtá, anchosh ham cha hónay waragá pahréz bekanant.
ACT 15:21 Chéá ke cha kwahnén zamánagán, har shahrá Mussáay Sharyatay jár perrénókén mardom butagant ke har Shabbatay róchá mardomesh kanisaháni tahá wánéntagant.”
ACT 15:22 Gorhá gón sarjamén kelisáyá hórigá, kásed o kamáshán shawr kort ke cha wati nyámá lahtén mardom gechén bekanant o Pulos o Bárnábáay hamráhiá Antákiahá rawán bedayant. Áyán cha wati némagá Yahudá ke Barsábá gwashag butagat o Silás, gechén kortant ke brátáni nyámá, é doén sarókén mardom atant.
ACT 15:23 Áyáni dastá kágadé dátesh ke é dhawlá at: “Má, kásed o kelisáay kamáshén mardom o shomay brát, shomárá, bezán Antákiah, Suriah o Kilikiahay darkawménbáwarmandén brátán drót o drahbáta dayén.
ACT 15:24 Má eshkotag ke bé may parmáná cha may nyámá lahtén báwarmand hamángor átkag o gón wati habarán shomárá deltaparkah o paréshánesh kortag.
ACT 15:25 Paméshká má pa hamdeli shawr kort ke cha wat lahtén mardom gechén bekanén o gón wati dóstén Pulos o Bárnábáay hamráhiá, pa shomá ráh bedayén,
ACT 15:26 hamá doén brátáni hamráhiá ke pa may Hodáwandén Issá Masihay námá wati sáhay nadr kanagá chakk o pad nabutagant.
ACT 15:27 May é doén kásed Yahudá o Silás, hamá habarán ke má pa shomá nebeshtagant, sarzobáni ham gwashant.
ACT 15:28 Pákén Ruh o má, hamé sharter zántag ke lahtén bonyáti gappán o abéd, gránén báré shomay kópagán maladdhén.
ACT 15:29 Shomá cha botáni námá korbánig kortagén góshtá, cha hónay waragá, cha mordárén dalwatáni góshtá o cha zená o bénangiá pahréz bekanét. Cha é kárán watá dur dárag, pa shomá báz sharr ent. Wassh o salámat bátét.”
ACT 15:30 Randá, é gechén kortagén brát Antákiahá dém dayag butant. Ódá shot o kelisáay sajjahén mardomesh yakjáh kortant o kágadesh pa áyán rasént.
ACT 15:31 Áyán é kágad wánt o cha eshiay deljami o delbaddhi dayókén kolawá báz wassh butant.
ACT 15:32 Yahudá o Silás ke wat ham nabi atant, óday brátesh gón bázén habarán delbaddhi dát o áyáni báwaresh mohrter kort.
ACT 15:33 Chizzé wahdá ódá mantant o randá, brátán á pa wasshi o salámati roksat kortant o cha hamódá ke dém dayag butagatant, hamá jáhá per tarretant.
ACT 15:34 
ACT 15:35 Pulos o Bárnábá, Antákiahá mahtal butant o gón dega bázén mardomán hór but o Hodáwanday habaresh tálim dayán o sheng kanána kort.
ACT 15:36 Lahtén róchá o rand, Pulosá gón Bárnábáyá gwasht: “Sajjahén hamá shahrán ke má Hodáwanday habar raséntag, byá padá hamódá berawén o brátán bechárén ke bárén á chón ant.”
ACT 15:37 Bárnábáay wáhag at, Yuhannáyá ke Markás ham gwashag butagat, hamráh bekant,
ACT 15:38 bale Pulos áiay hamráh kanagá razá naat chéá ke áiá, Pampiliahay damagá á yalah dátagatant o é káray tahá áyáni hamráh nabutagat.
ACT 15:39 É dhawlá, Pulos o Bárnábá watmánwatá tepák nabut, nathahetant o cha yakdomiá jetá butant. Bárnábá, Markásay hamráhiá, bójigéá swár but o Kebresá shot.
ACT 15:40 Bale Pulosá, Silás gechén kort o brátán á, Hodáwanday mehr o rahmatáni báhóth kortant. Nun Pulos ráh gept.
ACT 15:41 Kelisáyán mohr o zórmand kanán, cha Suriah o Kilikiahay damagán tarr o táb kanáná shot.
ACT 16:1 Padá Pulos, Derbeh o Lestrahay shahrán átk o raset. Lestrahá, Timutáus námén moridé hastat ke áiay mát báwarmandén Yahudi o pet Yunánié at.
ACT 16:2 Lestrah o Ekoniahay brátáni nyámá Timutáus báz néknámén mardé at.
ACT 16:3 Pulosay wáhag at ke Timutáusá wati sát o sapará hamráh bekant, paméshká cha rawagá pésar, pa Yahudiáni háterá sonnati kanáént, chéá ke á hand o damagáni sajjahén mardomán zántagat ke Timutáusay pet Yunánié.
ACT 16:4 Shahr pa shahr tarrán butant o cha Urshalimaykásed o kamásháni gisshéntagén ráh o rahbandán, brátesh pa mannagá sahig o sarpada kortant.
ACT 16:5 É dhawlá, kelisáyáni báwarmand róch pa róch géshtera butant o báwaresh ham mohrtera but.
ACT 16:6 Pulos o áiay hamráh cha Prijiah o Galátiahay damagán gwastant, chéá ke Pákén Ruhá á, Ásiáay damagá Hodáay habaray rasénag o sheng kanagá makan kortant.
ACT 16:7 Wahdé Misiahay simsarán rasetant, Bitiniahay némagá rawagay johdesh kort bale Issáay Ruhá pa óday rawagá naeshtant.
ACT 16:8 Gorhá cha Misiahá gwazán but o Truásay bandená átkant.
ACT 16:9 Hamódá shapá Pulosá yakk Makduni mardé pa shobén dist ke óshtátagat o mennat kanán at ke “Daryáyá begwázén, Makduniahá byá o márá komakk kan.”
ACT 16:10 Cha é shobéná rand, má pa Makduniahay rasagá eshtáp kort, chéá ke cha é shobéná deljam butén, Hodáay razá hamesh ent ke má berawén o wasshén mestágá óday mardománi nyámá sheng o tálán bekanén.
ACT 16:11 Má cha Truásá bójigá swár but o dém pa Sámutrákiay jazirahá shotén. Domi róchá cha ódá Nyápulisay bandená átk o rasetén.
ACT 16:12 Cha ódá Pilipiá shotén, ke Makduniahay á bahray mazanén shahré o Rumiáni menendjáh ent o tán chizzé róchá hamódá mahtal butén.
ACT 16:13 Shabbatay róchá, cha shahray darwázagá dar kapt o kawray lambá shotén. May hayál at balkén ódá Yahudiáni zegr o dwáay jágahé bebit. Hamódá neshtén o gón lahtén janéná ke pa zegr o dwáyá átkagatant, habará goláésh butén.
ACT 16:14 Janénáni nyámá, Lidiah námén Hodátorsén janéné ham gón at ke Tyátirahay shahray mardomé at o jamurangén gránkimmatén god bahá kanóké at. Á Pulosay habarán gósh dáragá at ke Hodáwandá áiay delay chamm pach kortant o áiá Pulosay habar mannetant.
ACT 16:15 Lidiahá gón wati lógay sajjahén mardomán pákshódi kort. Pákshódiá rand, áiá dazbandi kort o gwasht: “Agan shomá maná Hodáwandén Issáay hakkén mannógeré zánét, gorhá byáét mani lógá bedárét.” Lidiahá gón wati bázén gwashagá márá mannént.
ACT 16:16 Yakk róché má zegr o dwáay jágahá rawagá atén, móledé distén. Móledá jenné per at ke cha áiay zórá gaybguia kort o cha eshiá pa wati hodábondán bázén zarr o mália katthet.
ACT 16:17 Á, Pulos o may randá átk o pa kukkár gwashagá at ke “É mardom, borzén arshay Hodáay hezmatkár ant o shomárá rakkénagay yakk ráhé sója dayant.”
ACT 16:18 Áiá tán báz róchá anchosh gwashán kort. Godhsará, Pulos delrésh o bézár but, chakki tarrént o gón jenná gwashti: “Man tará pa Issá Masihay námá hokma dayán ke cha eshiá dar kap.” Hamá damáná jenn cha áiá dar átk.
ACT 16:19 Wahdé móleday hodábondán dist ke áyáni nap o katthay omét halás but, gorhá áyán Pulos o Silás gept, kasshán kort o bázárá, shahray masteráni kerrá bortant.
ACT 16:20 Káziáni démá pésh kortant o gwashtesh: “É mardom Yahudi ant o may shahrá jérhah o pléndhi kanagá ant.
ACT 16:21 Má Rumi én o é márá anchén dód o rabédag tálim dayagá ant ke áyáni mannag o kár bandag pa má rawá naent.”
ACT 16:22 É dega mardom ham gón but o Pulos o Silasay démá óshtátant. Shahray masterán parmán dátant ke Pulos o Silasay pocchán bekasshant o áyán latth bejanant.
ACT 16:23 Cha bázén latth o kotthá rand, bandijáhá bort o bandesh kortant. Bandijáhay negahpánesh parmán dát ke áyáni negahpániá sharr delgósh bekant.
ACT 16:24 Hamé hokmay sará, bandijáhay negahpáná bandijáhay tók tóki kóthiá bortant o áyáni pád konthband kortant.
ACT 16:25 Shapnémá, Pulos o Silás jélay tahá dwá kanán, Hodáyá satá kanagá atant. É dega bandig gósh dáragá atant.
ACT 16:26 Anágat, mazanén zeminchandhé but ke bandijáhay bonred, sorag o jombagá lagget. Hamá damáná, sajjahén darwázag pach butant o jéliáni zamzil botkant.
ACT 16:27 Jélay negahpán, cha wábá pach larzet o ágah but, disti ke bandijáhay sajjahén darwázag pach ant, gománi kort ke kaydi tatkag o shotagant. Nun pa watkoshiá zahmi kasshet.
ACT 16:28 Bale Pulosá tawár kort o gwasht: “Watá táwán maday, má sajjahén wati jágahá én.”
ACT 16:29 Jélay negahpáná cherágé lóthet o tacháná bandijáhay tóká shot o gón drahagá Pulos o Silásay pádán kapt.
ACT 16:30 Á cha jélá dar kortant o gwashti: “Oo wájahán! Man pa wati rakkagá ché bekanán?”
ACT 16:31 Áyán passaw dát: “Hodáwandén Issáay sará imán byár gorhá taw o tai lógay sajjahén mardoma rakkét.”
ACT 16:32 Áyán Hodáwandén Issáay wasshén kolaw pa áiá o áiay lógay sajjahén mardomán rasént.
ACT 16:33 Shapay wahdá, Pulos o Silási gón wat bortant o áyáni thappi shoshtant. Á o áiay lógay mardomán hamá damáná pákshódi kort.
ACT 16:34 Randá áiá wati lógá bort o warag dátant, áiay jend o áiay lógay sajjahén mardom, cha áiay Hodábáwariá gal o shádán butant.
ACT 16:35 Domi róchá, kázián wati kárdár jélay negahpánay gwará ráh dátant ke “É mardomán yalah beday.”
ACT 16:36 Jélay negahpáná Pulos hál dát o gwasht: “Maná cha káziáni némagá parmán rasetag ke shomárá yalah bedayán. Paméshká shomá pa wasshi o salámati berawét.”
ACT 16:37 Pulosá passaw dát: “Má Rumi báshendah én, bale é shahray masterán, márá bé hokmay borragá shahray mardománi démá janáéntag o jél kortag. Nun, á chérokái márá cha jélá kasshaga lóthant. Chosha nabit, báyad ent páde wat hamedá byáyant o márá dar bekanant.”
ACT 16:38 Kárdárán, é passaw pa kázián rasént. Wahdé sahig butant ke á doén Rumi báshendah ant, torsetesh.
ACT 16:39 Nun wat áyáni kerrá átkant o cha áyán pahelliesh lóthet o mennatwár butant ke cha é shahrá berawant.
ACT 16:40 Cha bandijáhá dar áyagá rand, Pulos o Silás Lidiahay lógá shotant o gón báwarmandán gend o nendesh kort, delbaddhiesh dátant ke wati imánay sará mohr o káhem bóshtant o padá cha Pilipiay shahrá dar kapt o shotant.
ACT 17:1 Pulos o Silás, cha Ampipulis o Apuluniahay shahrán gwastant o Tesálunikiá átkant, Yahudián ódá kanisahé hastat.
ACT 17:2 Pulos wati hél o ádatay sará kanisahá shot o tán say Shabbatay róchá cha Pákén Ketábán gón áyán gapp o tráni kort.
ACT 17:3 Áiá gón bázén bayán o mohrén dalilán paddar kort ke Masih báyad ent sakki o sóri besaggit, bemerit o padá cha mordagán jáh bejant. Gwashagá at: “É Issá ke áiay bárawá man shomárá sahig kanagá án, é hamá Masih ent.”
ACT 17:4 Cha Yahudián lahtén, anchosh ham cha á Hodátorsén Yunánián o dega mazanén rombé cha námdárén janénán, é habar pa del mannetant o Pulos o Silásay hamráh butant.
ACT 17:5 Bale Yahudián gón Pulos o Silásá hasadd kort. Cha bázárá lahtén lát o lóparén mardom mocch kort, rombé jórhént o shahray tahá shóreshesh kort. Áyán, Pulos o Silasay shóház o mardománi mocchiay démá áragá, Yásunay lógay sará orosh bort.
ACT 17:6 Bale wahdé nadistantesh, Yásun o dega lahtén báwarmandén brátesh gept o gerrán kanán shahray masteráni jergahá pésh kortant. Á pa kukkár gwashagá atant: “É mardomán, donyá pa sar zortag o nun edá átkagant.
ACT 17:7 Yásuná ham wati lógá bortagant. Rumay Kaysaray náparmániá kanant o gwashant dega bádsháhé hast ke námi Issá ent.”
ACT 17:8 Cha é habaráni eshkonagá, mardom o shahray masterán torset o deltaparkah butant.
ACT 17:9 Cha Yásun o áiay hamráhán zamánatesh gept o yalahesh dátant.
ACT 17:10 Anchosh ke shap but, brátán Pulos o Silás Biriahay shahrá ráh dátant. Óday rasagá, Yahudiáni kanisahá shotant.
ACT 17:11 É shahray Yahudi cha Tesálunikiay shahray Yahudián wáhagdárter atant. Áyán, pa hobb o hodók Hodáay habar mannet o har róch Pákén Ketábesha wántant o patth o pólesha kort tán bezánant bárén Pulosay habar rást ant yá na?
ACT 17:12 Cha áyán bázénéá báwar kort o dega bázén námdárén Yunáni mardén o janéné ham báwarmand but.
ACT 17:13 Wahdé Tesálunikiay Yahudi sahig butant ke Pulos Biriahay shahrá Hodáay habará sheng o tálán kanagá ent, hamódá shotant, mardomesh shórént o shahrá áshópesh pád kort.
ACT 17:14 Gorhá, brátán eshtápi Pulos tayábá bort o rasént, bale Silás o Timutáusá Biriahá dásht.
ACT 17:15 Pulosay hamráhén roksat kanók, gón áiá tán Átenay shahrá átkant. Cha Pulosá é parmánesh gept ke Silás o Timutáus watá zutt áiay kerrá berasénant, nun per tarretant.
ACT 17:16 Wahdé Pulos, Átenay shahrá pa Silás o Timutáusay áyagá wadárig o rahchár at, áiá dist ke shahr cha botán porr ent. Báz gamig o delranj but.
ACT 17:17 Paméshká kanisahá shot o gón Yahudi o darkawmén Hodátorsén mardomán gend o nendia kort. Bázáray chárráhay sará ham gón rahgwazén mardomán har róch gapp o tránia kort.
ACT 17:18 Ódá, lahtén Epikuri o Estuiki pilsup gón áiá dapa kapt. Cha áyán, lahténá gwasht: “É puttár ché gwashagá ent?” Dega lahténá gwasht: “Gwashaygá, bégánagén hodáyáni járá perrénagá ent.” Áyán, paméshká é habar kort ke Pulos, Issá o mordagáni jáh janagay wasshén mestágá tálán kanagá at.
ACT 17:19 Áyán Pulos, “Ariupágusá” bort o gwashtesh: “Buta kant má bezánén é nókén tálim ke taw dayay, ché ent?
ACT 17:20 Tai habar may góshán ajab ant o má esháni mánáyá zánaga lóthén.”
ACT 17:21 Átenay molki o darmolki sajjahén mardomán, abéd cha é kárá dega káré néstat ke benendant o nókén hál o jáwaráni bárawá gapp o trán bekanant o beshkonant.
ACT 17:22 Nun Pulos, Ariupágusay diwánjáhá óshtát o tráni kort: “Oo Átenay jahmenendán! Man gendagá án ke shomá báz dindóstén mardom ét.
ACT 17:23 Wahdé shahray sayl o sawádá dar kaptán, bázén bot o korbánjáhon distant, áyáni tahá yakk anchén korbánjáhé ham diston ke ódá nebeshtagat: ‘Pa hamá Hodáyá ke zánag nabutag.’ Hamá Hodá ke shomá áiá angata nazánét bale áiá parastesha kanét, man hamá Hodáay bárawá gón shomá trána kanán.
ACT 17:24 Á Hodá hamá ent ke é donyá o eshiay tahay sajjahén chizzi addh kortagant. Á wat, zemin o ásmánay Hodáwand ent, paméshká áiá mardománi dastay jórh kortagén parasteshgáhán jágaha nabit.
ACT 17:25 Á pa Ensánay hecch chizzá wázmand naent o hechkas pa áiá hezmaté korta nakant, chéá ke á wat harkasá zend o sáha bakshit o ensánay é dega lóth o garazán ham sarjama kant.
ACT 17:26 Áiá donyáay sajjahén mardom cha yakkéá pédá kortag o sajjahén kawm o kothom donyáay chárén kondhán tálán kortagant. Áyáni dawr o bárig o hand o jágaháni marz o simsari ham, pésará gisshéntagant,
ACT 17:27 tán mardom Hodáyá shóház bekanant o balkén áiá dar begéjant, bale rásti esh ent ke á cha má hechkasá dur naent.
ACT 17:28 ‘Chéá ke may zend, jonzag o harkat o hasti cha hamáiá ent.’ Anchosh ke cha shomay jenday sháerán lahténá gwashtag: ‘Má ham áiay poshpad én.’
ACT 17:29 Agan má Hodáay poshpad én, gorhá nabáyad ent má Hodáyá gón sohr, nograh o sengá addh kortagén botán hamdarwar bekanén ke mardomán gón wati hayál o honará jórhéntagant.
ACT 17:30 Hodá, cha ensánay pésarigén zamánagáni é názántiá sar gwastag, bale nun á har jágah harkasá parmán dayagá ent ke tawbah bekant.
ACT 17:31 Chéá ke áiá yakk róché gisshéntag ke á róchá donyáay sajjahén mardománi kortagén kárán gón ensáp dádrasi o dáwaria kant o pa é maksadá yakké gechéni kortag. Hodáyá á paméshká cha mordagán zendag kort ke pa harkasá é habaray rásti pakká bebit.”
ACT 17:32 Wahdé áyán Pulosay é habar eshkot ke Hodá mordagán padá zendaga kant, lahténá áiay sará malandh o maskará kort, bale dega lahténá gwasht: “É bárawá dega baré márá géshter sarpad kan.”
ACT 17:33 Gorhá Pulos, cha diwáná dar átk.
ACT 17:34 Lahtén mardomá áiay habar mannet o Issáay sará báwarmand but. Cha báwar kanókán yakké, Ariupágusay diwánay báské at ke áiay nám Diunisius at o yakk janéné ke námi Dámáris at o gón áyán dega lahtén ham gón at.
ACT 18:1 Randá, Pulos cha Átenay shahrá dar átk o Korentay shahrá shot.
ACT 18:2 Ódá gón Akwilá námén yakk Yahudiéá dochár kapt ke Pontusay damagá pédá butagat o gón wati janén Priskiláyá cha Itáliáay molká Korentay shahrá nóki átkagat. Chéá ke Rumay Kaysar Klawdiusá parmán dátagat ke sajjahén Yahudi cha Rumay shahrá dar bekapant. Pulos áyáni lógá shot.
ACT 18:3 Akwilá o Priskilá ham Pulosay dhawlá gedándóch atant. Paméshká Pulos hamáyáni kerrá mant o gón áyán hamkár but.
ACT 18:4 Har Shabbatay róchá, Pulosá kanisahá gón Yahudi o Yunánián gapp o trána kort o áyáni báwarmand kanagay johdá at.
ACT 18:5 Wahdé Silás o Timutáus cha Makduniahá átk o gón Pulosá hór butant, á Hodáay habaráni sheng o tálán kanagá dazgatth o goláésh at. Áiá pa Yahudián paddara kort o gwasht: “Issá hamá Masih ent.”
ACT 18:6 Wahdé Yahudián Pulosay habar namannetant o áesh bad o rad gwasht, Pulosá wati gwaray kabáh dar kort o á shahray danz áyáni démá chandhetant o gwashti: “Man wati kár kortag. Nun shomay hón shomay wati gardená ent o man bémayár án. Cha ed o rand, Hodáay habará darkawmáni nyámá sheng o tálána kanán.”
ACT 18:7 Gorhá, cha áyáni kanisahá dar átk o Titius Yustus námén Hodátorsén mardéay lógá shot. Áiay lóg, kanisahay kashá at.
ACT 18:8 Kanisahay masteray nám, Krispus at. Áiá gón wati lógay sajjahén mardomán, Hodáwandén Issáay sará báwar kort. Korentay shahray dega bázén mardom ham gón Pulosay habaráni eshkonagá, báwarmand butant o pákshódiesh kort.
ACT 18:9 Yakk shapé, Hodáwandén Issá, Pulosay shobéná átk o gwashti: “Mators, mani mestágá sheng o tálán kanán kan. Bétawár mabay.
ACT 18:10 Hechkas tará dasta najant o táwán dáta nakant chéá ke man tai posht o panáh án. É shahrá mani báwarmand báz ant.”
ACT 18:11 Gorhá, tán yakk sál o shash máhá hamódá dáshti o mardomi Hodáay habar sója dátant.
ACT 18:12 Á wahdá ke Galliu Akáyahay damagay wáli at, Yahudi mocch butant o Pulosay sará orosh o hamlahesh bort, gept o hakdiwánay démá péshesh kort.
ACT 18:13 Gwashtesh: “É mard, cha Mussáay Sharyatay ráhá dhann, mardomán Hodáay parastesh kanagá hojja kant.”
ACT 18:14 Wahdé Pulosá habar kanagi at, Galliuá dém gón Yahudián kort o gwashti: “Oo Yahudián! Agan é mardá mayáré yá mazanén radén káré bekortén, man shomay habar gósh dáshtagat.
ACT 18:15 Bale shomay jérhah, labz o nám o shomay Yahudi Sharyatay bárawá ent, paméshká shomá bezánét o shomay kár. Man é káráni tahá pád mána nakanán.”
ACT 18:16 Áiá mardom cha hakdiwáná dhanná dar kortant.
ACT 18:17 Gorhá, áyán kanisahay nókén master Sustines gept o hakdiwánay démá latth o kotth kort. Bale Galliuá eshiay sará hecch delgósh nadát.
ACT 18:18 Pulosá Korentay shahrá angat bázén róché gwázént o randá bráti roksat kortant, bójigá nesht o Suriahá ráhi but. Priskilá o Akwilá áiay hamráh atant. Cha Kenkriahay bandená bójigay swár bayagá pésar, áiá wati mud chet o gwandh kortant, chéá á kawl ke áiá pa Hodáay námá kortagat, nun wahdi gwastagat.
ACT 18:19 Wahdé Epésosay bandená rasetant, Pulosá wati hamráh Priskilá o Akwilá yalah dátant o wat kanisahá shot o gón Yahudián gapp o tráni kort.
ACT 18:20 Áyán dazbandi kort géshterén wahdé bejallit, bale Pulosá namannet.
ACT 18:21 Cha áyán roksati gept o gwashti: “Agan Hodáay razá bebit, dega baré shomay kerrá káyán.” Gorhá bójigéá nesht o cha Epésosá dar átk.
ACT 18:22 Mán Kaysariahá ér átk o Urshalimá shot o cha óday kelisáay gend o nendá rand, padá Antákiahá shot.
ACT 18:23 Pulos Antákiahá kammé wahdá mahtal but o padá cha ódá dar átk o Galátiah o Prijiahá tarr o táb kanán, gón moridán gend o nendia kort o áyáni setk o báwari mohr o rédag kanána kort.
ACT 18:24 Hamá wahdá Apulos námén yakk Yahudié Epésosay shahrá átk ke Eskandariahá pédá butagat, wánendah o habarzánté at o Pákén Ketábán sharr balad at.
ACT 18:25 Áiá Hodáwanday ráhay bárawá tálim geptagat o mardomán gón hobb o hodónáki, sharriay sará Issáay bárawá habar kanag o tálim dayagá at, bale áiay zánt, Yahyáay pákshódiay bárawá at o bass.
ACT 18:26 Áiá pa deléri kanisahá wati habaráni darshán bongéj kort. Wahdé Priskilá o Akwiláyá áiay habar eshkotant, wati lógá bortesh o Hodáay ráhesh sharriay sará sój dát.
ACT 18:27 Apulosá ke Akáyahay rawagay shawr kort, gorhá Epésosay shahray brátán delbaddhi dát o pa óday moridánesh nebesht ke áiá pa delgarmi wasshátk bekanant. Wahdé Apulos ódá raset, óday hamá mardomi báz komakk kortant ke cha Hodáay rahmat o barkatá imánesh áwortagat,
ACT 18:28 chéá ke áiá sajjahénáni démá gón Yahudián gapp o trána kort o áyáni báwari gón mohrén dalilána prósht. É dhawlá, cha Pákén Ketábáni nebeshtánkán péshia dásht ke Issá, hamá Masih ent.
ACT 19:1 Hamá zamánagá ke Apulos Korentá at, Pulos ham cha molkay nyámi hand o damagán gwazán, Epésosay shahrá átk o raset. Ódá lahtén moridi dist.
ACT 19:2 Cha áyán josti gept: “Wahdé shomá Issá Masihay sará báwar kort, Pákén Ruh shomárá raset?” Passawesh dát: “Na, má é ham naeshkotag ke Pákén Ruh hastent.”
ACT 19:3 Gwashti: “Gorhá shomá chónén pákshódié kortag?” Passaw dátesh: “Yahyáay pákshódi.”
ACT 19:4 Gwashti: “Yahyáay pákshódi, gonáháni pashómániay pákshódi at. Yahyáyá wat gón mardomán gwashtagat: ‘Hamá kasé ke cha man o randa kayt, bezán Issá, shomá hamáiay sará báwar kanét.’”
ACT 19:5 Cha é habaray eshkonagá rand, áyán Hodáwandén Issáay námá pákshódi kort.
ACT 19:6 Pulosá wati dast áyáni baddhá jat o Pákén Ruh áyáni delá potert, nun á nókén zobánán habar kanagá laggetant o paygambariesha kort.
ACT 19:7 Á, kesás dwázdah mardom atant.
ACT 19:8 Pulos tán say máhá kanisahá shot o átk o bé tors o bimmá Hodáay bádsháhiay bárawá gón mohrén dalilán habar o tránia kort.
ACT 19:9 Bale cha áyán lahtén sarkassh o yági but o áiay habaresh nazort o mardománi démá “É Ráhesh” bad o rada gwasht. Paméshká Pulosá watá cha áyán yakk kerrá dásht. Moridi zortant o har róch mán Tiránus námén mardéay tálárá gapp o tráná at.
ACT 19:10 Tán do sálá hamé kári kort o é dhawlá pa Ásiáay damagay sajjahén mardomán, Yahudi o Yunánián ham, Hodáwanday habar rasénag but.
ACT 19:11 Hodáyá cha Pulosay dastá ajabén mójezah pésha dásht.
ACT 19:12 Har dazmál o godé ke áiá belaggetén o pa nádráhánesh per bemoshtén, á wassh o dráha butant o jennán, ganók yalaha kortant.
ACT 19:13 Yahudi sáheráni yakk thóliéá shahr pa shahr tarr o garda kort. Pa chakkásá, jenniáni sará Hodáwandén Issáay námesha gept o gwashtesh: “Man shomárá hamá Issáay námá hokma dayán, ke Pulos áiay bárawá gwájáragá ent.”
ACT 19:14 Yahudiáni yakk mazanén dini péshwáé ke námi Eskiwá at, áiay hapt bachakkán é kára kort.
ACT 19:15 Palitén ruhá á passaw dátant o gwashti: “Issáyá mana zánán, Pulosá ham pajjáha kárán, bale shomá kay ét?”
ACT 19:16 Hamé mardá ke jenn per at, koppi kort o áyáni chakká kapt. Sarzór but o á jándará o thappi, cha á lógá tatkant.
ACT 19:17 Cha é hálay eshkonagá, Epésosay shahray sajjahén mardomán, Yahudi o Yunáni doénán, báz torset o Hodáwandén Issáay námesh satá o saná kort.
ACT 19:18 Bázéné ke báwarmand but, mardománi démá wati pésarigén sellén káresh mannetant.
ACT 19:19 Lahténá ke pésará jádugeri kortagat, wati jádugeri ketáb o daptar áwort o mardománi démá sótkant. Wahdé sótkagén ketábáni kimmatay hesábesh kasshet, zánag but ke panjáh hazár derhamay ketáb butagatant.
ACT 19:20 É dhawlá, Hodáwanday habar gón géshterén zór o wáké sheng o tálána but.
ACT 19:21 Cha é káráni sarjamiá rand, Pulosá wati delá shawr kort Makduniah o Akáyahay damagán gwazán, Urshalimá berawt. Gwashti: “Cha óday rawagá rand, maná allam, Rumay shahr ham gendagi ent.”
ACT 19:22 Áiá cha wati komakkárán do mardom, Timutáus o Erastus Makduniahá rawán kortant o wat kammé wahd géshter Ásiáay damagá mahtal but.
ACT 19:23 Hamá wahdá Epésosay shahrá “É Ráhay” bárawá mazanén shóreshé chest but.
ACT 19:24 Shóresh é dhawlá but ke Epésosay shahrá Dimitrius námén zargaré hastat ke áiá Ártemisay zyáratjáhay nograhén dottoka jórhént o bahá kort. Cha é kárá, shahray honarmandán bázén zarr o málé katthet.
ACT 19:25 Áiá, shahray sajjahén honarmand o é péshahay mardom lóthet o mocch kortant. Gón áyán gwashti: “Oo wájahán! Anchosh ke shomá zánét, é kár may hastómandiay sarchammag ent.
ACT 19:26 Bale shomá wat eshkotag o distag, é mardá, Pulosá, na tahná Epésosay, kamm o gésh sajjahén Ásiáay damagay bázén mardomé gomráh kortag o gwashit ke may dastáni addh kortagén Hodá, pa hecch dábá Hodá naant.
ACT 19:27 Nun tors tahná é naent ke pa mardomán may kár kamsharapa bit, tors esh ent ke may mazanén Hodá Ártemisay zyáratjáhay mazani gára bit o á, ke Ásiáay damag o sajjahén donyá áiá parastesha kant, wati shán o shawkatá báhénit.”
ACT 19:28 Wahdé mocchiay mardomán é habar eshkotant, sakk zahr geptant o pa kukkár gwashtesh: “Epésosay hodá, Ártemis mazan ent.”
ACT 19:29 É paymá sajjahén shahrá shóresh chest but. Mardománi mocchi, kukkár kanán shahray maydánjáhá shot. Áyán Pulosay do hamráh ke áyáni nám Gáyus o Aristarkás at o Makduniahay mardom atant, gept, kasshakán kort o gón wat bortant.
ACT 19:30 Pulosá mocchiay tahá rawag lóthet bale áiay shágerdán naesht.
ACT 19:31 Tantaná Ásiáay damagay lahtén masterá ham, ke Pulosay dóst atant, pa áiá kolaw ráh dát o dazbandi kort ke shahray maydánjáhá marawt.
ACT 19:32 Ódá báz shór o árhahór at, harkasá yakk chizzé gwasht. Bázénéá é habar ham nazánt ke á chéá edá átkag o mocch butagant.
ACT 19:33 Yahudián, Eskandar námén mardé démá kort o cha mocchiá harkasá áiárá hokmé dát. Dasti shahár dát ke chopp o bétawár bebant, tán mardománi démá gón wati habarán Yahudiáni démpániá bekant.
ACT 19:34 Bale wahdé mocchiay mardomán zánt ke á Yahudié, gorhá padá hamgotth o hamtawár butant o tán kesás do sáhatá ják o kukkáresh kort o gwashtesh: “Epésosay hodá, Ártemis mazan ent.”
ACT 19:35 Gorhá, shahray monshiá mocchi árám kort o gwashti: “Oo Epésosay mardomán! Sajjahén donyáay mardoma zánant ke Epésosay shahr, mazanén hodá Ártemisay zyáratjáhay negahpán ent, ke áiay naksh cha ásmáná ér átkag.
ACT 19:36 Nun ke harkas é habará mannit, shomá árám bebét o pa eshtápi hecch káré makanét.
ACT 19:37 É doén mardom ke shomá geptag o edá áwortagant, eshán na cha zyáratjáhá chizzé poletag o na may bánokén hodáesh bésharap kortag.
ACT 19:38 Agan Dimitrius o áiay honarmandán gón kaséá jérhahé hast, hakdiwánay darwázag pach ent o wáli ham har wahdá hastent, berawant o wati jérhahá pésh bekanant.
ACT 19:39 Agan dega habaré hast, báyad áiá shahray sarkári diwáná byárant tánke gisshénag bebit.
ACT 19:40 Cha maróchigén sargwastá, tors esh ent may sará shóreshgariay bohtámá bejanant. Agan chosh bebit, márá pa maróchigén shóreshá hecch passawé nést.”
ACT 19:41 Áiá é habar kortant o mocchii prósht.
ACT 20:1 Epésosay shahray shóreshay halásiá rand, Pulosá á shahray morid lóthet o delbaddhi dátant, gorhá cha áyán roksati gept o dém pa Makduniahá ráh kapt.
ACT 20:2 Cha á hand o damagán ke gwast, gón wati habarán, báwarmandi bázén delbaddhié dátant. Randá átk o Yunáná raset.
ACT 20:3 Ódá tán say máhá mahtal but. Gón bójigéá Suriahay rawagá pésar, Yahudián pa áiá pandalé sázet, paméshká cha Makduniahay ráhá per tarragay shawri kort.
ACT 20:4 Áiay hamráh esh atant: Pirrusay chokk Supáterus ke Biriahay mardomé at, Aristarkás o Sekundus ke Tesálunikiay mardom atant, Gáyus ke Derbehay mardomé at, Timutáus, Tikikus o Trupimus ke Ásiáay damagay mardom atant.
ACT 20:5 Á cha má pésh kaptant o Truásay shahrá shotant. Hamódá pa may áyagá rahchár butant.
ACT 20:6 Béhomirén Naganay Aidá rand, má cha Pilipiay shahrá bójigéá swár butén o panch róchá rand, Truásá áyáni kerrá átkén o tán hapt róchá hamódá dáshtén.
ACT 20:7 Haptagay awali róchá, pa nánay chondh chondh kanagá hórigá neshtagatén o Pulosá gón báwarmandán trán kort. Domi sabáhá á rawagi at, paméshká tán shapnémá habari kort.
ACT 20:8 Hamá borzádi báná ke neshtagatén, bázén cherágé rók at.
ACT 20:9 Pulosay habaráni wahdá, Yutukus námén warnáé darigay dapá neshtagat. Wábénag but, kóchandhagá lagget o wáb kapt. Cha lógay sayomi tabaká jahlád kapt o mort. Mardomán áiay jón chest kort.
ACT 20:10 Pulos ér átk, áiay némagá jahl but, goláéshi kort o gwashti: “Matorsét, sáhi mán ent.”
ACT 20:11 Gorhá borzád shot, náni chondh chondh kort o wárt, randá gón áyán wati gapp o tráni tán gwarbámá démá bort o padá cha ódá dar kapt o shot.
ACT 20:12 Á warnáesh, zendag o dráh áiay lógá bort o áyán mazanén tasallá o delbaddhié raset.
ACT 20:13 Má bójigá swár butén o cha Pulosá pésar, Ásusay shahrá shotén ke cha ódá áiá gón wat bezurén. Pulosay wáhag esh at ke Truásá beger tán Ásusá hoshkiá sapar bekant.
ACT 20:14 Wahdé Ásusay shahrá gón áiá dochár kaptén, gorhá bójigá swáren kort o Mitiliniay shahrá átkén.
ACT 20:15 Cha ódá domi róchá Kiusay jazirahay démá átk o rasetén. Sayomi róchá, Sámusay banden o cháromi róchá Militusay shahrá átkén.
ACT 20:16 Pulosay shawr at, Epésosay shahrá hecch maóshtit, tánke Ásiáay damagá báz mahtal mabit. Áiá eshtáp at ke agan buta kant Pentikástay Aiday róchá Urshalimá bebit.
ACT 20:17 Pulosá cha Militusay shahrá, pa Epésosay kelisáay kamáshán kolaw ráh dát o á wati kerrá lóthetant.
ACT 20:18 Kamásh ke átkant, gón áyán gwashti: “Shomá wata zánét cha hamá awali róchá ke man Ásiáay damagá pád ér kortag, che paymá wati zend gón shomá gwázéntag.
ACT 20:19 Man ars réchán o pa békebri o darbéshi Hodáwanday hezmatkári kortag o Yahudiáni pandaláni sawabá bázén sakki o sóri saggetag.
ACT 20:20 Wata zánét, shomay nap o suttá harché ke mani dastá bayagi butag man kortag o Hodáay kolaw pa shomá, mocchiáni tahá o lóg pa lóg áwortag o sar kortag.
ACT 20:21 Man Yahudi o Yunáni, doén pant o sój dátagant ke cha wati radén kárán tawbah bekanant, Hodáay ráhá begerant o may Hodáwandén Issáay sará imán byárant.
ACT 20:22 Annun gón Pákén Ruhay rahshóniá Urshalimá rawán. Nazánán ódá gón man ché bayagi ent.
ACT 20:23 Bale eshiá zánán ke Pákén Ruh maná har shahrá péshgói kanag o gwáhi dayagá ent, kayd o band o sakki o sóri mani wadár o entezárá ant.
ACT 20:24 Maná pa wati sáh o zendá parwáh nést, mani yakkén wáhag esh ent ke wati dawr o bárigá pa sar berasénán o Hodáwandén Issáay dátagén kárá sarjam bekanán, bezán Hodáay mehr o rahmataymestágá berasénán.
ACT 20:25 Nuna zánán, man ke Hodáay bádsháhiay wasshén mestág pa shomá áwortag o raséntag, cha shomá hechkas padá maná nagendit.
ACT 20:26 Paméshká maróchi shomárá pa rásti o deljamia gwashán ke shomay hechkasay hón mani gardená naent.
ACT 20:27 Chéá ke man pa shomá Hodáay sajjahén wáhagáni rasénagá hechbar chakk o pad nabutagán.
ACT 20:28 Shomá wati jend o wati ramagay sajjahén báwarmandáni hayáldáriá bekanét ke Pákén Ruhá shomárá áyáni negahpán kortag. Hodáay kelisáay shepánki o negahpániá bekanét, hamá kelisá ke Hodáwandén Issáyá gón wati hóná pa bahá geptag.
ACT 20:29 Mana zánán cha mani rawagá rand, derrókén gork shomay nyámá káyant o ramagay sará rahma nakanant.
ACT 20:30 Tantaná shomay wati nyámá ham anchén mardom páda káyant ke rástén habarán prosht o prósha kanant tánke moridán wati némagá bekasshant.
ACT 20:31 Paméshká hozzhár bét o yát bekanét ke tán say sálá, man shap o róch pa shomá grétag o shomárá dháh dátag.
ACT 20:32 Nun shomárá Hodá o áiay pormehr o rahmatén habaráni sepordaha kanán ke á habar shomárá mohr dáshta kanant tán hór gón sajjahén Hodáay palgártagénán mirás bebarét.
ACT 20:33 Maná cha kaséá hecch chizzéay tamáh o lálech nabutag, na sohr o tangaway, na nograh o zarray o na god o póshákay.
ACT 20:34 Shomá wata zánét ke man gón wati é dastán kár kortag, watig o wati hamkáráni zalurat o garaz wat sarjam kortagant.
ACT 20:35 Man shomárá darwar o nemunah pésh kortag ke shomá ham mani dhawlá wati dastán kár bebandét o kár bekanét o wár o bazzagán komakk bedayét. Shomá cha Hodáwandén Issáay é habarán bétránag mabét o mashamóshét ke áiá gwasht: ‘Cha zuragá, dayag bahtáwarter ent.’”
ACT 20:36 Cha é habaráni halásiá rand, Pulos kóndhán kapt o gón sajjahénán hór dwái kort.
ACT 20:37 Sajjahénán Pulos goláésh kort, chokket o báz grétesh.
ACT 20:38 Á géshter pa eshiá gamig atant ke Pulosá gwashtagat: “Shomá padá maná nagendét.” Gorhá tán bójigá raséntesh.
ACT 21:1 Wahdé má cha áyán jetá butén, bójigá swár but o tachkátachk dém pa Kásay jazirahá átkén. Domi róchá Rudesay jazirahá rasetén o cha ódá Pátáráay shahrá shotén.
ACT 21:2 Ódá márá yakk bójigé dast kapt ke Pinikiahá rawagi at. Má hamé bójigá swár but o ráh geptén.
ACT 21:3 Wahdé bójig daryáyá rawán at, cha durá Kebresay jazirah, chappén pahnátá gendag but, cha ódá gwazán, Suriahá, Suray bandená raset o cha bójigá ér kaptén, chéá ke ódá bójigá bár ér géjagi at.
ACT 21:4 Má óday morid shóház kortant o tán hapt róchá áyáni kerrá jalletén. Áyán, cha Pákén Ruhay némagá gón Pulosá gwasht ke Urshalimá marawt.
ACT 21:5 Bale wahdé ódá may jallagay róch halás butant, má padá wati sapar bendát kort. Sajjahén báwarmand gón wati jan o chokkán may hamráhiá cha shahrá dhann, tayábdapá átkant. Ódá má sajjahén kóndhán kaptén o dwáen kort.
ACT 21:6 Cha yakdomiá roksat bayagá rand, má bójigá swár butén o á wati lógán per tarretant.
ACT 21:7 Cha Suray bandená sapar kanán Potulemaisay shahrá átk o cha bójigá ér kaptén. Ódá ham má gón báwarmandán gendok kort o yakk róché áyáni gwará dáshtén.
ACT 21:8 É dega róchá cha ódá dar átk o Kaysariahay shahrá rasetén. Ódá má mestág dayókén Piliposay lógá dásht ke cha hamá hapténán yakké at.
ACT 21:9 Áiá chár neshtagén janénchokk hastat ke paygambariay sawgátesh cha Hodáay némagá rasetagat.
ACT 21:10 Á lahtén róchá ke má ódá atén, Ágábus námén nabié cha Yahudiahá átkagat.
ACT 21:11 May gendoká átk, Pulosay lánkbandi zort, wati dast o pádi bastant o gwashti: “Pákén Ruha gwashit: ‘Urshalimay Yahudi é lánkbanday hodábondá gerant o hamé paymá ke man watá bastag, hamé paymá áiay dast o pádána bandant o darkawmáni dastá dayant.’”
ACT 21:12 Áiay habaráni eshkonagá rand, má o á shahray mardomán gón Pulosá dazbandi o mennatgiria kort ke Urshalimá marawt.
ACT 21:13 Bale Pulosá gwasht: “Chéá shomá gréwét o mani delá próshét? Man band bayagá bell, Urshalimá, pa Hodáwandén Issáay námaygi wati zenday nadr kanagá ham tayár án.”
ACT 21:14 Wahdé má Pulos mannént nakort, gorhá gwashtén: “Harché ke Hodáwanday razá ent, hamá dhawlá bebit” o bétawár butén.
ACT 21:15 Cha á róchán o rand, má wati ord o bonag bast o dém pa Urshalimá ráh geptén.
ACT 21:16 Cha Kaysariahay shahrá lahtén morid may hamráh but, áyán márá pa dárag o mehmán bayagá Manásun námén báwarmandéay lógá bort. Á cha Issáay awali mannógerán at o béhá Kebresié at.
ACT 21:17 Wahdé Urshalimá rasetén, brátán márá gón wáhagé wasshátk kort.
ACT 21:18 Domi róchá, Pulosay hamráhiá Issáay brát Ákubay gend o nendá shotén. Kelisáay sajjahén kamásh hamódá atant.
ACT 21:19 Tayárjórhiá rand, Pulosá pa sarjamiá gwasht ke Hodáyá cha áiay hezmatán pa darkawmán ché kortag.
ACT 21:20 Wahdé áyán é hál eshkotant, Hodáay shogresh gept. Nun gón Pulosá gwashtesh: “Oo brát! Taw sahig ay ke hazárán Yahudi Issáay sará báwarmand butag o sajjahén Mussáay Sharyatay sará pa del o setk páband ant.
ACT 21:21 Bale lahténá tai bárawá gón áyán gwashtag ke taw á sajjahén Yahudi ke darkawmáni nyámá neshtagant sója dayay ke Mussáay Sharyatá yalah bedayant o wati chokkán sonnat makanáénant o may é dega dód o rabédagáni sará kár makanant.
ACT 21:22 Nun shawr ché ent? Má ché bekanén? Allamá cha tai eday áyagá sahiga bant.
ACT 21:23 Paméshká anchosh ke má gwashén, hamá dhawlá bekan. May kerrá chár mardom hast ke áyán gón Hodáyá kawlé kortag.
ACT 21:24 Taw hamáyáni hamráhiá beraw o gón áyáni pák o palgáriay rasmán hór bebay. Áyáni korbánigay dalwatáni kimmatá ham taw porr kan, tánke á wati sarán besáyant. É dhawlá harkasa zánt ke tai bárawá áyáni eshkotagén habar dróg butagant o taw wati zendá Sharyatay sará gwázénagá ay.
ACT 21:25 Bale má hamá darkawmén báwarmandáni sará nebeshtag ke may hokm áyáni bárawá ché ent. Cha botáni námá korbánig kortagén góshtá, cha hónay waragá, cha mordárén dalwatáni góshtá o cha zená o bénangiá pahréz bekanant.”
ACT 21:26 Pulosá á chárén mardom zortant o é dega róchá gón áyán hórigá, pák o palgáriay rasmi sarjam kort. Padá mazanén parasteshgáhá shot tán palgáriay rócháni sarjam bayagay járá bejant, ke hamá róchá cha áyán har yakkéay korbánig ham hayrát kanaga bit.
ACT 21:27 Áyáni palgáriay haptén róch sarjam bayagi atant ke Ásiáay damagay lahtén Yahudiá Pulos mazanén parasteshgáhá dist. Mardomesh shóréntant, Pulosesh gept o
ACT 21:28 kukkáresh kort: “Oo Esráilián! Byáét márá komakk bekanét. É mard, Pulos hamá ent ke har jágah gón harkasá, may kawm o Mussáay Sharyat o Hodáay é Pákén Lógay helápá tálima dant. Annun ham darkawmén Yunáni mardomi mazanén parasteshgáhá áwortag o Hodáay Pákén Lógi palit kortag.”
ACT 21:29 Áyán é habar paméshká kort ke pésará Pulosesh gón Trupimusá, ke Epésosay shahray nendóké at, Urshalimay bázárá distagat. Gománesh kortagat ke Pulosá, Trupimus mazanén parasteshgáhá áwortag.
ACT 21:30 Sajjahén shahrá shóreshé chest but, sajjahén mardom cha har némagá tacháná átk o mocch butant. Pulosesh gept o cha mazanén parasteshgáhá dhanná dar kort o hamá damáná parasteshgáhay darwázagesh band kortant.
ACT 21:31 Pulosesh koshagi kortagat ke Rumi lashkaray masterá hál raset sajjahén Urshalimá shóreshé kaptag.
ACT 21:32 Áiá hamá damáná watá, sepáhig o apsaráni hamráhiá pa mardomán rasént. Wahdé mardomán lashkaray master o sepáhig distant, Pulosay latth o kotthesh bass kort.
ACT 21:33 Lashkaray master Pulosay kerrá átk, dazgiri kort o parmáni dát gón do zamzilá bebandanti. Cha mardomán josti gept ke “É kay ent o mayári ché ent?”
ACT 21:34 Mardom báz kukkár kanagá atant, harkasá áiay bárawá chizzé gwasht, paméshká lashkaray master cha rástén jáwará sarpad nabut o hokmi kort ke Pulosá kalátá bebarant.
ACT 21:35 Wahdé Pulos kalátay padánkán raset, cha mahlukay zahr o hezhmá sepáhig áiay baddh kanagá náchár butant,
ACT 21:36 chéá ke mahluk áiay randá kukkár kanán, gwashán at: “Eshiá bekosh.”
ACT 21:37 Hamá wahdá ke sepáhig Pulosá kalátá baragá atant, áiá gón Rumi lashkaray masterá gwasht: “Maná mókala dayay gón taw habaré bekanán?” Lashkaray masterá jost kort: “Záná, taw Yunáni zobáná balad ay?
ACT 21:38 Acha, taw hamá Mesri naay ke nóki shóreshi kortagat o chár hazár yágién mardomi gón wat gyábáná bortagat.”
ACT 21:39 Pulosá darráént: “Enna, man Yahudié án o Kilikiahay damagay námién shahr Tarsusay mardomé án. Maná bell ke gón é mardománi mocchiá kammé habar bekanán.”
ACT 21:40 Lashkaray masterá mannet, Pulos átk o kalátay padánkáni sará óshtát o gón dastay sorénagá mardomi bétawár kortant. Wahdé mardom bé trekk o tawár butant, gorhá Pulosá gón áyán Ebráni zobáná habar kort o gwashti:
ACT 22:1 “Oo pet o brátán! Maná é hakká bedayét ke shomay démá wati démpániá bekanán.”
ACT 22:2 Wahdé mardomán dist ke á Ebráni zobáná gón áyán habar kanagá ent, géshter bétawár butant. Áiá gwasht:
ACT 22:3 “Man Yahudié án o mani pédáeshay jágah, Kilikiahay damagá, Tarsusay shahr ent, bale mani rost o rodóm hamedá Urshalimá butag. Gámálial mani ostád butag o may pet o pirokáni sarjamén Sharyat man cha hamáiá dar bortag. Pa Hodá o áiay razáyá báz wáhagdár o hodónák butagán, anchosh ke maróchi shomá hodónák ét.
ACT 22:4 Man ‘É Ráhay’ mannóger ázár dátag o koshagi ham kortagant, mardén wa mardén ant, janén ham geptag o bandi kanáéntagant.
ACT 22:5 Masterén dini péshwá o sajjahén kamásháni diwán mani bárawá gwáhi dáta kant. Áyán pa Dameshkay Yahudi brátán maná kágad dátagat tán ódá berawán, óday báwarmandán begerán o pa sezá dayagá Urshalimá byárán.
ACT 22:6 Ráhá, wahdé Dameshkay shahray nazzikká rasetagatán, némróchay wahdá anágat cha ásmáná mani chapp o chágerdá trondén rozhné drapshet.
ACT 22:7 Zeminá kaptán o tawáré eshkoton ke maná gwashti: ‘Shául, Oo Shául! Taw chéá maná ázára dayay?’
ACT 22:8 Man jost kort: ‘Oo wájah! Taw kay ay?’ Passawi dát: ‘Man Issá Náseri án, hamá ke taw áiá ázára dayay.’
ACT 22:9 Mani hamráhán rozhn dist, bale hamá ke gón man habar kanagá at, áiay tawáresh naeshkot.
ACT 22:10 Joston kort: ‘Oo Hodáwand! Man ché bekanán?’ Hodáwandá maná passaw dát: ‘Pád á, Dameshkay shahrá beraw, hamá sajjahén kár ke tará kanagi ant, ódá tará gwashaga bant.’
ACT 22:11 Hamráhán maná dastá gept o Dameshkay shahrá bort, chéá ke cha hamá trondén rozhnay gendagá mani chammáni rozhnái shotagat.
ACT 22:12 Ódá Hannániá námén yakk mardé at ke Hodádóst o Sharyatay páband at o sajjahén jahmenendén Yahudiáni nyámá washnámén mardé at.
ACT 22:13 Mani kerrá átk o óshtát o gwashti: ‘Oo mani brát Shául! Tai chammáni rozhnái per betarrát o maym bekanátay.’ Hamá damáná mani chamm padá rozhná butant o man á dist.
ACT 22:14 Gorhá Hannániáyá gón man gwasht: ‘May pet o pirokáni Hodáyá tará gechén kortag tán áiay razáyá bezánay, áiay “Pák o Nékéná” begenday o áiay tawárá cha áiay jenday dapá beshkonay.
ACT 22:15 Báyad ent pa sajjahénán wati eshkotagén o distagénáni gwáhiá bedayay.
ACT 22:16 Nun chéá mahtal ay? Pád á, Issáay námá beger, pákshódi bekan ke cha wati gonáh o mayárán pák o palgár bebay.’
ACT 22:17 Randá wahdé Urshalimá átkán, yakk róché pa dwáyá mazanén parasteshgáhá shotán, dwáay wahdá maná shobén o elhámé raset.
ACT 22:18 Issá Masihon dist ke maná gwashti: ‘Zutt kan. Cha Urshalimá dar kap, chéá ke eday mardom mani bárawá tai gwáhiá namannant.’
ACT 22:19 Man gwasht: ‘Oo Hodáwand! Á wa zánant ke man har jágah, kanisahán shotagán o tai báwarmand jatag o jél kanáéntagant.
ACT 22:20 É habará ham zánant ke wahdé tai shahid Estipánay hón réchag but, man hamódá óshtátagatán o pa áiay koshagá rázig atán o áiay hónigáni god o poccháni negahpán atán.’
ACT 22:21 Padá Hodáwandén Issáyá maná gwasht: ‘Beraw, chéá ke man tará durén hand o damagán darkawmáni kerrá ráha dayán.’”
ACT 22:22 Mardom tán haminchoká Pulosay habarán gósh dáragá atant, bale é habari ke kort nun kukkár kort o gwashtesh: “É mard koshag o gár kanag bebit ke zenda nakarzit.”
ACT 22:23 Áyán kukkár kort, wati gwaray kabáh o jámagesh kasshetant o hákshániesh kort.
ACT 22:24 Rumi lashkaray masterá parmán dát ke Pulosá kalátá bebarant o shallák bejanant o cha áiá jost o pors bekanant tán zánag bebit mardom chéá áiay sará kukkár kanagá ant.
ACT 22:25 Wahdé Pulosesh pa shallák janagá bast, áiá hamódá cha óshtátagén apsará jost kort: “Man Rumi báshendahé án. Kánuná, é rawá ent ke shomá bé hokmay borragá Rumi báshendahéá shallák bejanét?”
ACT 22:26 Wahdé apsará é habar eshkot, lashkaray masteray kerrá átk o gwashti: “Oo wájah! Taw ché kanagá ay? É mard Rumi báshendahé.”
ACT 22:27 Lashkaray master, Pulosay kerrá shot o josti kort: “Begwash, pa rásti taw Rumi báshendahé ay?” Pulosá passaw dát: “Haw, man Rumi báshendahé án.”
ACT 22:28 Masterá gwasht: “Man pa Rumi báshendah bayagá bázén zarré dátag.” Pulosá darráént: “Man cha pédáeshá Rumi báshendahé án.”
ACT 22:29 Á sepáhig ke cha Pulosá jost o pors kanagá atant, hamá damáná cha áiá poshtá kenzetant. Wahdé lashkaray master sarpad but ke Pulos Rumi báshendahé o áiá band kanáéntag, wat ham torseti.
ACT 22:30 Lótheti sharr bezánt Yahudi Pulosay sará chónén bohtámé janant, paméshká domi róchá Pulosi cha bandijáhá dar kort o parmáni dát Yahudiáni mazanén dini péshwá o sarókáni diwánay sajjahén básk diwáná benendant. Gorhá Pulosi áwort o áyáni démá pésh kort.
ACT 23:1 Pulosá sarókáni diwáná nendókén báskáni némagá tachkátachk cháret o gwasht: “Oo brátán! Man tán maróchigén róchá wati zend gón pák o palgárén jabin o wejdáné pa Hodáay razáyá gwázéntag.”
ACT 23:2 É habará o rand, masterén dini péshwá Hannániáyá Pulosay pahnátá óshtátagén mardom parmán dátant ke áiay dapá shahmát bejanant.
ACT 23:3 Gorhá Pulosá gwasht: “Hodá tará jant, oo espéti per moshtagén diwál! Taw Sharyatay rahbandáni randgiriá mani mayár o bémayáriay gisshénagá edá ay, bale é káray badalá gón mani shahmát janáénagá Sharyatay rahbandán próshagá ay.”
ACT 23:4 Pulosay kashá óshtátagén mardomán gón áiá gwasht: “Tará lajja nakant Hodáay náméntagén dini péshwáyá béezzata kanay?”
ACT 23:5 Pulosá passaw dát o gwasht: “Oo brátán! Man nazántag ke é, Hodáay náméntagén masterén dini péshwá ent. Chéá ke nebeshtah ent ‘wati kawmay péshwáyá bad o rad magwashét.’”
ACT 23:6 Pulos sahig at ke sarókáni diwánay lahtén básk, Saduki o lahtén Parisi ant, paméshká áiá pa borztawári darráént: “Oo brátán! Man Parisié án o mani pet o pirok ham Parisi butagant, maróchi é hakdiwánay démá paméshká óshtárénag butagán ke mani báwar o omét ent ke Hodá mordagán padá zendaga kant.”
ACT 23:7 Anchosh ke áiá é habar kort, sarókáni diwánay Parisi o Saduki báskáni nyámá jérhahé pád átk o diwán do bahr but.
ACT 23:8 Sadukiáni báwar esh ent ke mordag padá zendaga nabant o na préshtag hast o na ruh, bale Parisi é sajjahénána mannant.
ACT 23:9 Báz ják o jik but o Parisiáni Sharyatay lahtén zánógerá pa namannag gwasht: “Má pa é mardá hecch mayáré nagendén, balkén yakk ruh yá préshtagéá gón eshiá habar kortag.”
ACT 23:10 Wahdé áyáni nyámá arh o janjál géshter but, lashkaray masterá torset, chó mabit Pulosá bejanant o chondh chondh bekanant, paméshká sepáhigi parmán dátant ke jahlád berawant, Pulosá cha áyáni nyámá pa zór dar bekanant o kalátá bebarant.
ACT 23:11 Hamá shapá Hodáwandén Issá Pulosay démá átk o óshtát. Gwashti: “Oo Pulos! Delá mazan kan, anchosh ke taw Urshalimay shahrá pa mani mestágá sháhedi dátag, hamé dhawlá Rumay shahrá ham tará sháhedi dayagi ent.”
ACT 23:12 Domi sabáhá, lahtén Yahudiá pandalé jórhént o watmánwatá sawgendesh wárt ke tán Pulosá makoshant, na ápa warant o na warag.
ACT 23:13 Pléndh o petnah sáchókén mardom cha chelá géshter atant.
ACT 23:14 Mazanén dini péshwá o kawmay kamásháni kerrá shotant o gwashtesh: “Má pa del sawgend wártag ke tán Pulosá makoshén heccha nawarén.
ACT 23:15 Paméshká shomá gón sarókáni diwáná hórigá, lashkaray masterá begwashét ke á Pulosá shomay kerrá byárit. Gón lashkaray masterá shomay nimmón é bebit ke shomá Pulosay bárawá géshter zánag o jost o pors kanaga lóthét. Má tayár én, rasagá pésar, ráhá áiá koshén.”
ACT 23:16 Bale Pulosay gohárzátk ke cha é pandalá sahig but, kalátá shot o Pulosi sahig kort.
ACT 23:17 Pulosá yakk Rumi pawji apsaré lóthet o gwashti: “É warnáyá wati masteray kerrá bar ke eshiá chizzé gwashagi ent.”
ACT 23:18 Áiá warná wati masteray kerrá bort o gwashti: “Maná kaydién Pulosá lóthetag o gwashtag ke é warnáyá tai kerrá byárán, chéá ke eshiá gón taw chizzé gwashagi ent.”
ACT 23:19 Lashkaray masterá warnáay dast gept o yakk kerré bort o jost kort: “Tará gón man chónén habaré hast?”
ACT 23:20 Áiá gwasht: “Lahtén Yahudiá shawr kortag ke tará begwashant bándá Pulosá diwánay démá pésh bekanay, pa é shawrá áyáni nimmón esh ent ke á Pulosay bárawá géshter jost o pors kanaga lóthant,
ACT 23:21 Bale taw áyáni é habaray mannagá tayár mabay, chéá ke cha áyán chell mardomá gésh, ráhá Pulosay sará orosh kanag o áiay koshagá tayár ent. Áyán sawgend wártag ke tán Pulosá makoshant, na ápa warant o na warag. Á tayár neshtagant o wadárig ant ke taw áyáni wáhagá bemannay.”
ACT 23:22 Lashkaray masterá warná roksat kort o gwasht: “Hechkas sahig mabit ke taw maná é hál dátag.”
ACT 23:23 Gorhá lashkaray masterá do apsar lóthet o gwashtant: “Do sad payádagén sepáhig, haptád aspswár o do sad nayzahbandén sepáhig tayár bekanét ke enshapi, sáhat nohá Kaysariahá berawant,
ACT 23:24 pa swáriá, Pulosá asp ham bedayét tán áiá pa wasshi o salámati, wáli Piliksay kerrá berasénant.”
ACT 23:25 Lashkaray masterá, Rumi wáliay námá yakk kágadé ham é dhawlá nebesht:
ACT 23:26 “Cha Klawdius Lisiásay némagá pa sharapdárén wáli Piliksay námá: Salám o drót!
ACT 23:27 É mard, Yahudián geptagat o áiá koshagi atant. Bale wahdé man sahig bután ke á Rumi báshendahé, gorhá gón sepáhigán shotán o man cha áyáni dastá rakként.
ACT 23:28 Man lóthet bezánán ke é marday sará chónén bohtámé janant, paméshká áyáni sarókáni diwánay démá pésh kort.
ACT 23:29 Sahig bután ke áiá wati Sharyatay jérhaháni sará mayárig kanagá ant o áiá hecch choshén káré nakortag ke kayd o band, yá markay sezáwár bebit.
ACT 23:30 Wahdé maná hál raset ke pa áiay koshagá pandalé sázag butag, hamá damáná tai gwará ráhon dát. Man, hamá mardom ke áiay sará bohtáma janant, parmán dátagant ke gón áiá wati arhá tai démá pésh bekanant.”
ACT 23:31 Gorhá sepáhigán, parmánay sará, hamá shapá Pulos cha Urshalimá zort o Antipátrisay shahrá rasént.
ACT 23:32 Domi róchá, aspswárén sepáhigesh Pulosay hamráhiá rawán dátant o wat kalátá per tarretant.
ACT 23:33 Kaysariahay rasagá, áyán kágad á damagay wáli Piliksá dát o Pulosesh áiay démá pésh kort.
ACT 23:34 Kágaday wánagá rand, wáliá cha Pulosá jost kort: “Taw kojám damagay mardomé ay?” Passawi dát: “Man Kilikiahay damagay mardomé án.”
ACT 23:35 Gorhá gón Pulosá gwashti: “Wahdé tai sará bohtám janókén mardoma káyant, man tai o áyáni habarán wat gósha dárán.” Gorhá áiá sepáhig hokm kortant ke Pulosá hamá kalátá bebarant ke Hirudis bádsháhá bastag o hamódá áiay negahpániá bekanant.
ACT 24:1 Panch róchá rand, Yahudiáni masterén dini péshwá Hannániá gón kawmay lahtén kamásh o Tertulos námén wakiléá Kaysariahá shot, tán Pulosay sará wati bastagén bohtámá wáliay démá pésh bekanant.
ACT 24:2 Wahdé Pulos árag but, Tertulosá wáliay démá Pulosay sará bohtám é dhawlá pésh kort: “Marháhdárén wáli Piliks! Shomá é sardhagárá émenén dawr o bárigé áwortag o cha wati durchári o kárzántiá, pa eday mardomán gehbudi kár kanáéntag.
ACT 24:3 Paméshká má har jáh o har kojá tai báz mennatwár én.
ACT 24:4 Man géshén habar kanag o tará delsyáh kanaga nalóthán, bale pa kasteri gón taw dazbandia kanán ke may yakk o do habará gósh dár o márá wati mennatwár bekan.
ACT 24:5 Gapp esh ent ke é mard, Pulos, mazanén pléndh o petnahsázé o sarjamén donyáay Yahudiána shórénit. Náseri námén yakk náráhén thóliéay saróké.
ACT 24:6 Cha eshán o abéd, mazanén parasteshgáhay béhormati kanagay chen o lánchi ham kortagat ke má gept.
ACT 24:7 Lótheten áiá wati Sharyatay sará mayárig bekanén, bale lashkaray master Lisiásá, pa zór cha may dastá pach gept o bort. Paméshká má, áiay beddh o bohtám janók, tai kerrá ráh dayag butagén.
ACT 24:8 Nun taw wat áiá jost o pors bekan, hamá beddh o bohtám ke má áiay sará jatagant, áyáni rástiá sahig bebay.”
ACT 24:9 Yahudi ham gón áiá hamtawár butant o gwashtesh: “Harché ke Tertulosá gwashtag, hamé paymá ent.”
ACT 24:10 Nun wáli Piliksá Pulosay némagá eshárah kort ke á wati habarán bekant. Pulosá gwasht: “Mana zánán báz sál ent ke taw may Yahudi kawmay dádrasiá kanagá ay, paméshká pa deljami wati bémayáriay paddar kanagá gón taw habara kanán.
ACT 24:11 Agan taw jost bekanay gorhá zánay ke dwázdah róchá géshter nagwastag ke man pa parastesh kanagá Urshalimá shotagán.
ACT 24:12 Mazanén parasteshgáhá, maná hechkasá gón yakkéá pa jérhah o dapjáká nadistag, shahr o kanisahán ham mardom nashóréntagant.
ACT 24:13 É beddh o bohtámán ke annun mani sará janant, tai démá áyáni rástiá paddar korta nakanant.
ACT 24:14 Bale tai démá é habará mannán ke ‘É Ráhay’ randgir o mannók án ke mardom áiá náráhén dini thólié gwashant. Wati pet o pirokáni Hodáyá parastesha kanán o harché ke Tawrát o Nabiáni Ketábán nebeshtah ent, man áyáni báwarmand án.
ACT 24:15 Man ham, hamáyáni dhawlá, cha Hodáyá ométwár án o deljam án ke sajjahén mordag, nékén o badén, padá zendaga bant.
ACT 24:16 Paméshká, modám johda kanán ke gón Hodá o sajjahén mardomán mani jabin o wejdán pák o palgár bebit.
ACT 24:17 Nun lahtén sálán o rand, per tarret o Urshalimá átkán, tán hamá hayrátán ke maná pa komakk kanagá gón atant wati kawmá berasénán o korbánig ham bekanán.
ACT 24:18 Watá pák o palgár kortagat ke áyán maná mazanén parasteshgáhá dist, na mardománi mocchi o mérhié hastat o na ham áshóp o balwáé.
ACT 24:19 Bale Ásiáay damagay lahtén Yahudi hamódá at, agan áyán gón man jérhahé hastat, á tai kerrá byátkénant o maná mayárigesh bekortén.
ACT 24:20 Cha é mardomán jost kan, wahdé man Yahudiáni sarókáni diwánay démá pésh kanag bután, áyán pa man che mayáré rást o paddar kort,
ACT 24:21 abéd cha é yakkén habará ke man ódá jár jat o gwasht: ‘Man paméshká é hakdiwánay démá óshtárénag butagán ke gwashtagaton: “Hodá mordagán padá zendaga kant.”’”
ACT 24:22 É habaráni eshkonagá rand, Piliksá, ke “É Ráhay” bárawá zántkár at, hakdiwánay dádrasi démá nabort o gwashti: “Wahdé lashkaray master Lisiása kayt, hamá wahdá é arh gisshénaga bit.”
ACT 24:23 Gorhá, yakk pawji apsaré parmáni kort Pulosá angat bedárant, bale áiá géshter ásudagi bedayant o áiay dóst o sangatán ham cha áiay gendok o hezmatkáriá makan makanant.
ACT 24:24 Lahtén róchá rand, Piliks wati Yahudién zál Drusiláay hamráhiá átk o Pulosi ham lóthet o áwort. Gón Pulosá gwashti: “Issá Masihay saray báwarmandiay bárawá cha taw géshter eshkonaga lóthán.”
ACT 24:25 Bale wahdé Pulosá hakk o ensáp, pahrézkári o jost o porsay áyókén róchay bárawá habar kort, gorhá Piliksá torset o gwashti: “Annun taw beraw, wahdé dazgatth nabután, tará padá lóthán.”
ACT 24:26 Á ométwár at balkén Pulos áiá chizzoké zarr lálecha dant, paméshká báz randá lóthet o áworti o gón áiá gapp o tránia kort.
ACT 24:27 Do sál hamé dábá gwast o Piliksay jágahá, Purkius Pestus wáli but. Piliksá pa Yahudiáni razá kanagá, Pulos bandijáhá dásht.
ACT 25:1 Wáli Pestus, é damagay rasagá say róchá rand, cha Kaysariahá dém pa Urshalimá shot.
ACT 25:2 Ódá, mazanén dini péshwá o Yahudiáni sarókán áiay démá Pulosay sará bohtám jat o
ACT 25:3 dazbandiesh kort ke áyán wati mennatwár bekant o Pulosá Urshalimá ráh bedant. Shawresh kortagat ke Pulosay áyagay wahdá, ráhá áiay sará orosh bekanant o bekoshanti.
ACT 25:4 Pestusá passaw dát: “Pulos Kaysariahá bandig ent, maná wat pa hamé zuttán hamódá rawagi ent.
ACT 25:5 Cha shomá lahtén master o kamásh mani hamráhiá hamódá byayt, agan áiá mayár o gonáhé kortag gorhá hamódá áiay sará bohtám bejanét.”
ACT 25:6 Hasht tán dah róchá gón áyán nendagá rand, Pestus Kaysariahá per tarret. Domi róchá áiá hakdiwán kort o hokmi dát ke Pulosá byárant.
ACT 25:7 Wahdé Pulosesh áwort, cha Urshalimá átkagén Yahudi áiay chapp o chágerdá mocch butant o áiay sará bázén bohtámesh jat, bale áyán cha á bohtámán yakké ham, rást paddar kort nakort.
ACT 25:8 Pulosá pa wati bémayáriay paddar kanagá darráént: “Man pa Yahudi Sharyat o mazanén parasteshgáh o pa Rumay Kaysará, hecch dhawlén rad o nárahbandén káré nakortag.”
ACT 25:9 Bale Pestusá lóthet Yahudián wati mennatwár bekant, paméshká cha Pulosá josti kort: “Taw Urshalimay rawagá razá ay, ke man hamódá hakdiwán bekanán o é arhá begisshénán?”
ACT 25:10 Pulosá gwasht: “Man Rumay Kaysaray hakdiwánay démá óshtátagán. Mani dádrasi báyad hamedá bebit. Anchosh ke taw wat sharra zánay man pa Yahudián hecch mayár o gonáhé nakortag.
ACT 25:11 Agan man anchén mayáré bekortén ke markay sezáyá hakdár buténán, gorhá markay sezáay saggagá ham tayár butagatán, bale agan mani sará Yahudiáni é bohtám rást naant, hechkas maná pa koshagá áyáni dastá dáta nakant. Maná Kaysaray hakdiwáná bebarét.”
ACT 25:12 Pestusá gón wati saláhkárán shawr kort o randá gwashti: “Taw Kaysaray hakdiwáná péshi lóthetag, hamódá pésh kanaga bay.”
ACT 25:13 Kammé róchán o rand, bádsháh Agripás wati gohár Bernikiay hamráhiá, pa Pestusay mobárakiá Kaysariahá átk o
ACT 25:14 tán bázén róchéá hamódá mant. Pestusá bádsháhay démá Pulosay bárawá trán kort o gwasht: “Mani kerrá bandigé hastent ke wáli Piliksá eshtag.
ACT 25:15 Wahdé Urshalimá shotagatán, Yahudiáni mazanén dini péshwá o kamáshán áiay sará bohtám jat o maná gwashtesh ke mayárigi bekanán.
ACT 25:16 Man gwashtant: ‘Rumiáni rahband esh ent, tán wahdé kaséá bohtám janókáni démá wati démpániay móh dayag mabit, á sezá dayaga nabit.’
ACT 25:17 Wahdé áiay bohtám janók edá átkant, man áyáni é arhay gisshénagá dér nakort, domi róchá hakdiwáná neshtán o parmán dát ke Pulos pésh kanag bebit.
ACT 25:18 Wahdé bohtám janók pa habar kanagá pád átkant, áyáni bohtám chosh naatant ke man gomán kortagat.
ACT 25:19 É marday sará áyáni bohtám wati jenday dini habar o Issá námén mortagén mardéay bárawá atant ke Pulosa gwashit á zendag ent.
ACT 25:20 Man sarbatag o hayrán atán ke é arhá che paymá begisshénán? Paméshká cha Pulosá joston kort ke ‘Urshalimay rawagá razá ay, tánke é arh hamóday hakdiwáná gisshénag bebit?’
ACT 25:21 Bale Pulosá lóthet hamedá bemánit o Kaysar wat áiay arhá begisshénit. Paméshká man parmán dát, tán wahdé áiá Kaysaray darbárá ráh madayán, hamedá dárag bebit.”
ACT 25:22 Agripásá gwasht: “Man wat é marday habarán gósh dáraga lóthán.” Pestusá gwasht: “Bándá taw áiay habarána eshkonay.”
ACT 25:23 Domi róchá, Agripás o áiay gohár Berniki, gón mazanén shán o sharapéá, shahray pawji mansabdár o lahtén námdárén sarókáni hamráhiá, wáliay diwánjáhá átkant. Pestusá, Pulosay pésh kanagay parmán dát o Pulos diwánay démá árag but.
ACT 25:24 Pestusá gwasht: “Oo bádsháh Agripás o diwánay nendókén mardomán! É mardá ke shomá gendagá ét, Urshalim o Kaysariahay shahráni sajjahén Yahudián eshiay sará bázén bohtámé jatag o gón man kukkár kanán dazbandiesh kortag ke eshiá bekóshárénán.
ACT 25:25 Mani zánagá, eshiá choshén mazanén mayár o gonáhé nakortag ke koshag bebit, bale wahdé eshiá lóthet ke Kaysaray hakdiwáná pésh kanag bebit, gorhá man shawr kort Rumay shahrá ráhi bedayán.
ACT 25:26 Nun mani dastá eshiay bárawá pakkáén chizzé nést ke pa Kaysará benebisán. Paméshká, man Pulos pa shomá sajjahénán o géshter pa taw, oo bádsháh Agripás, pésh kortag tán jost o porsá rand, chizzé pa nebisagá dar begéján.
ACT 25:27 Chéá ke é bésar o bonén káré, man yakk bandigéá dém bedayán bale á bohtámán ke áiay sará janag butagant, manebisán.”
ACT 26:1 Bádsháh Agripásá gón Pulosá gwasht: “Tará wati démpániay móh o mókal ent.” Pulosá dast borz kort o pa wati bémayáriay paddar kanagá habará lagget o gwashti:
ACT 26:2 “Oo sharapdárén bádsháh Agripás! Man bahtáwaré án ke maróchi tai démá pésh kanag butagán tán cha Yahudiáni sajjahén bohtámán wati démpániá bekanán.
ACT 26:3 Mana zánán ke taw Yahudiáni sajjahén dód o rabédag o áyáni jerhahán sharra zánay. Paméshká gón taw peryát o dazbandia kanán, mani habaráni sará gón sharrén sabr o ópáré delgósh gwar bekanay.
ACT 26:4 Sajjahén Yahudi sharra zánant ke mani zend che paymá butag o mani kasáni o warnái wati mardománi gwará o randá Urshalimá chón gwastag.
ACT 26:5 Báz wahd ent ke maná zánant o agan belóthant, é gwáhiá dáta kanant ke man Parisié butag o áyáni pábandterén dini rombá gón butagán.
ACT 26:6 Nun, paméshká hakdiwáná árag butagán ke Hodáay hamá labz o kawlay sarjam bayagá deljam o saddak án ke áiá gón may pet o pirokán kortag.
ACT 26:7 Pa hamé labz o kawlay sarjam bayagay ométá, may Yahudiáni dwázdahén kabilah shap o róch pa delsetki Hodáyá parastesha kanant. Oo marháhdárén bádsháh! Yahudi paméshká mani sará bohtám janagá ant ke man pa hamé kawlay sarjam bayagá saddak án.
ACT 26:8 Oo gósh dárókán! Chéá é habará manneta nakanét ke Hodá mordagán padá zendaga kant?
ACT 26:9 Yakk wahdé man ham báwar kortagat ke Issá Masihay námay namannag o áiay morid o mannógeráni ázár dayag, sharrén káré.
ACT 26:10 Urshalimá, hamé kárá kanagá atán. Gón mazanén dini péshwáyáni ehtiárá, cha Hodáay palgártagénán bázéné, bandi kortag o modám áyáni kóshárénagá hamshawr butagán.
ACT 26:11 Báz randá sajjahén kanisaháni tahá, man á pa kopr kanagá hojj kortagant. Maná badwáhi o kénagá anchosh ganók kortagat ke pa áyáni ázár rasénagá, dhanni shahrán ham shotagatán.
ACT 26:12 Yakk baré gón mazanén dini péshwáyáni sarjamén wák o ehtiárá, Dameshká ráhi atán.
ACT 26:13 Oo sharapdárén bádsháh! Némróchá hamé ráhá, anágat ásmáná cha róchá rozhnáterén shahmé diston. Hamá rozhn manig o mani hamráháni chárén némagán drapshet.
ACT 26:14 Má sajjahén zeminá kaptén, tawáré eshkoton ke Ebráni zobáná maná gwashagá at: ‘Shául, oo Shául! Taw chéá maná ázára dayay? Taw hamá káigerén gókay paymá ay ke shatay tusk o tézén sojjá lagata jant o watá táwána dant.’
ACT 26:15 Man jost kort: ‘Oo wájah! Taw kay ay?’ Hodáwandá passaw dát: ‘Man Issá án, hamá ke taw áiá ázára dayay.
ACT 26:16 Nun pád á, wati pádáni sará bósht, man paméshká pa taw paddar butagán ke tará wati sháhed o hezmatkár gechén bekanán, tán harché ke cha man distaget o démterá genday, pa áyán gwáhi bedayay.
ACT 26:17 Tará cha tai jenday kawmá o cha darkawmán, ke áyáni kerrá tará rawána dayán, rakkénán.
ACT 26:18 Tará paméshká áyáni kerrá ráha dayán, tán chammánesh pach bekanay. Á cha taháriá rozhnáiay némagá byáyant o cha Shaytánay porzórén dastá dém pa Hodáay ráhá betarrant, tán gonáhesh pahell kanag bebant o gón hamá mardomán sharikdár bebant ke cha mani saray báwarmandiá pák o palgár butagant.’
ACT 26:19 Oo bádsháh Agripás! Man cha á ásmáni shobénay mannagá sar táb nadát.
ACT 26:20 Pésará Dameshkay shahray mardománi nyámá, randá Urshalim o Yahudiahay sajjahén hand o damagáni mardománi kerrá o goddhá darkawmáni gwará ham shotán o é kolaw rasént ke cha wati gonáhán tawbah bekanant o Hodáay ráhá per betarrant o cha wati kárán paddar bekanant ke Hodáay ráhesh geptag.
ACT 26:21 Paméshká Yahudián maná mazanén parasteshgáhá gept o koshagay johdesh kort.
ACT 26:22 Bale Hodáyá maná tán maróchigá komakk kortag o nun edá óshtátagán o mazan o kasán, sajjahénáni démá gwáhia dayán. É habarán ke man kanagá án, cha Mussá o é dega nabiáni péshgóián dhann naant,
ACT 26:23 ke Masih báyad ent sakki o sóri besaggit, bemerit o cha sajjahénán pésar, cha mordagán zendag bebit, jáh bejant o pa wati kawm o darkawmán nur o rozhnay mestágay járá bejant.”
ACT 26:24 Hamedá, Pestusá pa borztawári Pulosay habaray tahá dawr kort o gwashti: “Oo Pulos! Taw bésár ay, tai géshén zánt o zánagá tará ganók kortag.”
ACT 26:25 Pulosá darráént: “Sharapdárén wáli Pestus! Man bésár naán, é chizz ke mana gwashán rást o hóshmandén habar ant.
ACT 26:26 Bádsháh Agripás wat é chizzáni bárawá sharra zánt o man pa deléri é habarán kanagá án, chéá ke deljam án, á cha é sargwastán sahig ent, é sajjahén yakk gwandhén kallag o kerréá wa nabutagant.
ACT 26:27 Marháhdárén bádsháh Agripás! Tará nabiáni sará báwar ent? Haw! Mana zánán ke tará báwar ent.”
ACT 26:28 Gorhá Agripásá gón Pulosá gwasht: “Tai hayálá, maná gón wati habarán chosh zutt Masihiáni ráhá áworta kanay?”
ACT 26:29 Pulosá passaw dát: “Zutt yá dér, bale man cha Hodáyá hameshiá lóthán ke éwaká taw na, harkas ke maróchi mani habarán gósh dáragá ent, mani dhawlá báwarmand bebit, bale pádi zamzilán mabant.”
ACT 26:30 Randá bádsháh o gón áiá wáli, Berniki o neshtagén mardom pád átkant.
ACT 26:31 Wahdé dar áyagá atant, watmánwat gwashagá atant ke “É mardá choshén mazanén mayáré nakortag ke jél kanag yá koshag bebit.”
ACT 26:32 Bádsháh Agripásá gón Pestusá gwasht: “Agan é mardá Kaysaray hakdiwáná péshi malóthetén, annun ázát kanag butagat.”
ACT 27:1 Wahdé karár but má gón bójigá Itáliáyá berawén, gorhá Pulosesh gón dega lahtén bandigá, Julyus námén apsaréay dastá dát, ke cha Kaysaray lashkará at.
ACT 27:2 Má bójigéá swár but o ráh kaptén ke á cha Adrámitinay bandená átkagat o Ásiáay damagay é dega bandenán rawagi at. Tesálunikiay shahray Aristarkás námén Makdunié ham, é bójigá gón at.
ACT 27:3 Domi róchá, may bójigá Saydunay bandená nangar dawr dát. Apsar Julyus gón Pulosá mehrabán at o eshti ke Pulos berawt gón wati dóstán gendok bekant o áiay zaluratán purah bekanant.
ACT 27:4 Cha ódá padá ráh geptén bale gwát may démá at, paméshká má Kebresay jazirahay kash gept o érgwátá démá rawán butén.
ACT 27:5 Cha Kilikiah o Pampiliahay zerkerrán gwazán, Likiahay damagá, Mirahay shahrá átkén.
ACT 27:6 Ódá may pawji apsará dega bójigé dar gétk ke cha Mesray shahr Eskandariahá átkagat o Itáliáyá rawagá at. Áiá márá hamé bójigá swár kort.
ACT 27:7 Má tán bázén róchán madán madán démá shotén o pa hillaté Knidusay bandenay nazzikká átk o rasetén. Nun gwát may démá at, paméshká cha Kritay érgwátén pahnátá Salmunahay kerrá gwazán, démá shotén o
ACT 27:8 pa sakki o sórié “Zébá” námén bandenéá sar butén ke Lásiahay shahray nazzikká ent.
ACT 27:9 Bázén wahdé zawál butagat, tantaná Róchagay Aid ham gwastagat o daryáay sapar báz torsnák butagat, paméshká Pulosá á dháh dát o hozzhár kortant,
ACT 27:10 gwashti: “Oo wájahán! Man anchosha gendán ke sakkén bimnák o táwánbárén saparé may démá ent, na tahná pa bójig o bójigay bár o bonagá, pa may zendá ham.”
ACT 27:11 Bale pawji apsará Pulosay habaráni sará delgósh dayagay badalá, bójigay hodábond o náhodáay habar zortant.
ACT 27:12 Zemestáná á banden pa dáragá sharr naat, paméshká géshterénáni shawr hamesh at ke bójig cha ódá dar bekapit o agan buta kant, á Piniksay bandená watá berasénant o zemestáná ódá begwázénant. Piniksay banden, Kritay yakk bandené ke démi cha shomál o jonubá magrebay némagá ent.
ACT 27:13 Wahdé sobakkén zerbári gwát wassh wasshá kasshagá lagget, gománesh kort ke nun áyáni delay morád puraha bit. Gorhá bójigay nangaresh chest kort o Kritay jazirahay pahnátá gerán, tayábay nazzikká rawán butant.
ACT 27:14 Bale dér nagwast ke tuppánén gwátéá cha Kritá sar kort, ke áiá góricháni ródarátkay gwáta gwashant.
ACT 27:15 Bójig gón tuppáná dochár kapt o gwátay démi dásht nakort, paméshká má watá gwátay sepordah kort o chawl o mawján márá démá bort.
ACT 27:16 Má gwandhén Kawdá námén jazirahéay érgwátá, pa sakki bójigay kathi dastá áwort.
ACT 27:17 Kathiay sar géjagá rand, gón tayl o sádán bójigesh chapp o chágerdá mohrband kort ke maproshit. Torsetesh chosh mabit ke bójig, Sirtisay bazén rékáni tahá mén berawt, paméshká bójigay ácháresh ér gétk o bótk, nun gwát bójigá démá baragá at.
ACT 27:18 Bójig cha gwátay trondi o daryáay chawl o mawjáni mastiá chest o ér bayagá at, paméshká domi róchá, bójigay bár o bonagáni chagal dayagá laggetant.
ACT 27:19 Sayomi róchá, bójigay bázén kárgéj o sámánesh ham daste wat daryáyá dawr dátant.
ACT 27:20 Wahdé tán bázén róchán na róch gendaga but o na estár o tuppánén gwát ham kasshagá at, gorhá má pa wati zenday rakkagá hecch omét nakasshet.
ACT 27:21 Tán báz róchá waragesh ham nawártagat. Gorhá, Pulos áyáni démá óshtát o gwashti: “Oo mardán! Agan shomá mani habar bezortén o cha Kritá dar mayátkénét, may sará inchok sakki o sóri nakaptagat o inchok táwán ham narasetagat.
ACT 27:22 Bale nun gón shomá dazbandia kanán wati delá dhaddh kanét, bójiga boddhit bale shomay jendá heccha nabit.
ACT 27:23 É habará, man paméshká zánán ke dóshi cha hamá Hodáay némagá ke man áiayg án o áiay hezmatkár án, préshtagé átk, mani kashá óshtát o
ACT 27:24 gwashti: ‘Oo Pulos! Mators, taw báyad Kaysaray darbárá pésh kanag bebay, mán bójigá tai hamráh ham Hodáyá rakkéntagant.’
ACT 27:25 Oo brátán! Delá dhaddh kanét chéá ke maná Hodáay sará setk ent o deljam án, préshtagá harché maná gwashtag, allamá hamá dhawlá bit.
ACT 27:26 Bale may bójig yakk jazirahéá ména rawt.”
ACT 27:27 Chárdahomi shapá, may bójig angat Ádriátikay Zerá jombán o chest o ér bayán at. Shapnémá, jánshóán gomán kort ke tayábgwar nazzikk ent.
ACT 27:28 Gorhá ápay johliesh sódet o kesás kort ke bist gwáz at, wahdé bójig kammé démterá shot padá ápesh sódet o zántesh ke zeray johli pánzdah gwáz ent.
ACT 27:29 Torsetesh, chosh mabit ke bójig ápá gón kóhéá dhikk bwárt. Paméshká bójigay poshti némagá chár nangaresh daryáyá dawr dát o dwáesh kort ke zutter róch bebit.
ACT 27:30 Jánshó cha bójigá ér kapag o jehagá delmánag atant, paméshká áyán kathiay sád pach kortant o daryáyá ér gétk. Áyáni nimmón esh at ke cha démi némagá ham nangar ápá ér begéjant.
ACT 27:31 Pulosá gón pawji apsar o sepáhigán gwasht: “Agan jánshóán bójig yalah dát o jestant, gorhá shomá rakketa nakanét.”
ACT 27:32 Paméshká sepáhigán sád borretant o kathi daryáyá yalah dát.
ACT 27:33 Wahdé gwarbám nazzikk but, Pulosá sajjahén delbaddhi dát o gwashtant: “Shomá tán chárdah róchá wadár kortag ke bárén ché bit o ward o warákó dast ham najatag.
ACT 27:34 Paméshká man gón shomá dazbandia kanán chizzé bwarét tán zendag bemánét, cha shomá hechkasay saray mudáni thálé ham zyána nabit.”
ACT 27:35 Pulosá nán zortant, sajjahénáni démá Hodáay shogr gept o padá nán tronset o warag bongéj kort.
ACT 27:36 Cha eshiá sajjahénáni del dhaddh but o á ham waragá laggetant.
ACT 27:37 Bójigay tahá má do sad o haptád o shash mardom atén.
ACT 27:38 Wahdé waragesh wárt o sér kort, gallahén dánesh daryáyá dawr dátant tán bójig sobakter bebit.
ACT 27:39 Róch ke dar átk, tayábesh dist bale nazántesh kojám sardhagárá ant. Talagén hóré distesh ke tayábi rék at, shawresh kort, agan bebit bójigá hamé hórá sara géjant.
ACT 27:40 Nangaresh bótk o daryáyá yalah kortant. Bójigay sokkánesh ke gón sádán bastagat pach kort o bójigay démi némagay áchár borz kort, tánke tayábá sar bebant,
ACT 27:41 bale áp é jágahá talag at, paméshká bójigay démi némag rékáni tompéá mén shot o poshti némag cha mastén chawláni zórá proshagá lagget.
ACT 27:42 Sepáhigán kaydiáni koshagay shawr kort tán chó mabit ke cha áyán kasé ózhnág bekant o betachit,
ACT 27:43 bale pawji apsará pa Pulosay zenday rakkénagá sepáhig cha é kárá makan kortant o parmán dát ke agan kasé ózhnág korta kant, daryáyá kopp bekant o tayábá berawt,
ACT 27:44 é dega mardom, lahtén tahtagén dáráni komakká o lahtén bójigay é dega thokkoráni sará watá hoshkiá berasénant. É dhawlá sajjahén mardom pa wasshi o salámati tayábá ér kaptant.
ACT 28:1 Wahdé má sajjahén pa wasshi o salámati hoshkiá ér kaptén gorhá zántén ke á jazirahay nám Málthá ent.
ACT 28:2 Óday mardomán gón má bédarwarén mehrabánia kort, hawr gwáragá at o sakk sárt at, áyán mazanén ásé rók kort o márá wasshátk kanáná gwasht: “Watá betápét o garm bekanét.”
ACT 28:3 Pulosá lahtén lansh o dár chet o mocch kort o anchosh ke ásay tahá dawr dayagá at, cha ásay garmiá yakk garrmáré dar átk o áiay dastá mangal but.
ACT 28:4 Mardomán wahdé Pulosay dastá patátagén már dist, watmánwatá gwashtesh: “Allamá é mard hónigé ke cha daryáyá rakketag bale nun ensápay hodá áiá zendagá naylit.”
ACT 28:5 Bale Pulosá wati dast chandhet, már ásá kapt o Pulosá hecch nabut.
ACT 28:6 Mardom cháragá atant ke allamá áiay jesm o ján gwáta gipt yá kapit o merit. Tán dérá wadáresh kort bale wahdé distesh áiá choshén hecch chizzé nabut, gorhá áyáni hayál badal but o gwashtesh: “É cha hodáyán yakké.”
ACT 28:7 Jazirahay sardár Publiusay melkat o jáydád nazzikk atant, sardár may kerrá átk o márá wati lógá borti o tán say róchá mehmáni kort.
ACT 28:8 Hamá róchán sardáray pet tapig at o láprechéá geptagat. Pulos áiay kerrá shot, dasti baddhá jat o gón wati dwáyá dráhi kort.
ACT 28:9 Randá á jazirahay é dega nájórhén mardom Pulosay kerrá átkant o dráh butant.
ACT 28:10 Áyán har paymá márá báz sharap dát o randá, rawagay wahdá pa sát o sapará harché tóshag ke márá pakár at dátesh.
ACT 28:11 Máltháay jazirahá say máhá jallagá rand, cha Eskandariahay shahrá átkagén bójigéá swár butén. Bójigay démi némagá daryáay járhén botáni neshán per at.
ACT 28:12 Wahdé bójig Sirákusay bandená raset, gorhá tán say róchá hamódá mahtal butén.
ACT 28:13 Má cha ódá ráh gept o Régiumay bandená átk o rasetén. Domi róchá zerbári gwátéá sar kort, sayomi róchá Putiuliay bandená rasetén.
ACT 28:14 Ódá má wati lahtén báwarmandén brát dist o áyán lóthet tán haptagéá áyáni kerrá bedárén. Cha ódá Rumay shahrá rasetén.
ACT 28:15 Wahdé óday báwarmandén brátán eshkotagat ke má pédák én, gorhá tán “Ápiusay Bázárá” o “Say Mosáperjáh” námén métagéá may péshwáziá átkant. Pulosá ke distant, áiá delbaddhié raset o Hodáay shogri gept.
ACT 28:16 Rumay shahray rasagá, Pulosá é mókal dayag but ke jetáén lógéay tahá, tahná gón yakk negahpánén sepáhigéá benendit.
ACT 28:17 Say róchá rand, Pulosá Rumay shahray Yahudiáni kamásh wati kerrá lóthetant. Wahdé átk o yakjáh butant, gón áyán gwashti: “Oo mani brátán! Harchont man pa wati kawm o pet o piroki dód o rabédagán hecch dhawlén radén káré nakortag, bale angat lahtén mardomá maná Urshalimá geráéntag o Rumiáni dastá dátag.
ACT 28:18 Rumián bázén patth o pólá rand, pa man hecch choshén mayáré nadist ke koshag bebán, paméshká lóthetesh maná yalah bedayant.
ACT 28:19 Bale Yahudián áyáni é shawr namannet, nun man náchár bután ke cha Kaysará pa wat ensáp belóthán, angat ham wati kawmay zangá najanán o maná cha áyán gelagé nést.
ACT 28:20 Paméshká shomárá wati kerrá lóthetag tán shomárá begendán o gapp o trán bekanén. Man pa ‘Esráilay armáná’ gón é zamzil o sánkalán bandig án.”
ACT 28:21 Gwashtesh: “Tai bárawá cha Yahudiahá pa má hecch kolaw o kágadé nayátkag o cha may brátán ke edá átkagant, na kaséá tai bárawá gón má hál o hawál kortag, na kaséá bad o radén habaré gwashtag.”
ACT 28:22 Bale má tai pegr o hayálán cha tai jenday dapá gósh dáraga lóthén. Parchá ke má zánén shomay Issái thóliay bárawá har jágah mardom bad gwashagá ant.
ACT 28:23 Áyán gón Pulosá pa gend o nendá yakk róché gisshént o á róchá, cha pésará géshter mardom Pulosay lógá átk o mocch but. Gorhá Pulosá sabáhá beger tán bégáhá gón áyán Hodáay bádsháhiay bárawá trán kort o gwáhi dát. Áiá cha Mussáay Sharyat o gwastagén Nabiáni Ketábáni gwáhi o dalilán é johd kort ke Issáay mannógeriá áyáni delán benádénit.
ACT 28:24 Áiay habaráni gósh dáragá rand lahtén báwarmand but bale dega lahténá báwar nakort.
ACT 28:25 Á watmánwat nátepák but o cha ódá shotant, bale áyáni rawagá pésar, Pulosá wati goddhi habar kort: “Pákén Ruhá cha Eshayá nabiay zobáná gón shomay pet o pirénán chón wassh o rást gwashtag:
ACT 28:26 ‘É kawmay gwará beraw o begwash: “gón góshána eshkonét, bale sarkecha nawarét, gón chammána chárét, bale nagendét,”
ACT 28:27 chéá ke é kawm sengdel butag, góshesh grán ant, áyán wati chamm bastagant chó mabit áyáni chamm begendant, áyáni gósh beshkonant, áyáni del bezánant o sarpad bebant o mani némagá per betarrant ke man áyán dráh bekanán.’
ACT 28:28 Paméshká man shomárá sahig o sarpada kanán ke cha Hodáay némagá rakkénagay é jár darkawmáni kerrá baraga bit, á gósha dárant.”
ACT 28:29 Wahdé Pulosá é habar gwasht, Yahudi pád átk o shotant o watmánwatá pa trondi dapjákesh kort.
ACT 28:30 Pulos tán do sálá wati jenday keréh kortagén lógéá jahmenend but o harkas pa gendoká byátkén áiá wasshátka kort.
ACT 28:31 Pa natorsi Hodáay bádsháhiay jária jat o Hodáwandén Issá Masihay bárawá mardomi tálima dátant o hechkaséá á, makana nakort.
ROM 1:1 Cha Issá Masihay hezmatkár Pulosay némagá, mane Pulos ke pa kásediá gwánk janag o pa Hodáay wasshén mestágá gechén kanag butagán,
ROM 1:2 hamá wasshén mestág ke Hodáyá pésará wati nabiáni wasilahá, Pákén Ketábáni tahá eshiay wádah kortagat.
ROM 1:3 É mestág áiay Chokk bezán may Hodáwandén Issá Masihay bárawá ent ke jesmi hesábá Dáuday poshpad ent. Wahdé cha mordagán jáhi jat, pák o palgár kanókén Ruhay barkatá Hodáay zórmandén Chokk zánag o jár janag but.
ROM 1:5 Márá cha Masihay wasilahá é rahmat o kásediay kár rasetag ke pa hamáiay námaygi, sajjahén darkawmáni tahá anchén parmánbardárié byárén ke cha imáná kayt.
ROM 1:6 Áyáni tahá shomá ham gón ét, shomá ke gwánk janag butagét ke Issá Masihay bebét.
ROM 1:7 Pa Rumay hamá sajjahén mardomán ke Hodáyá dóst ant o áiay gwánk jatagén o palgártagén ant. Cha may Hodáén Pet o Hodáwandén Issá Masihay némagá shomárá rahmat o émeni sar bát.
ROM 1:8 Har chizzá pésar, man Issá Masihay barkatá pa shomá sajjahénán wati Hodáay shográ gerán, chéá ke shomay imánay hál sajjahén donyáyá sheng butag.
ROM 1:9 Hamá Hodá ke man pa ján o del, gón áiay Chokkay wasshén mestágay sar kanagá áiay hezmatá kanán, á wat sháhed ent ke man wati dwáyáni tahá modám shomárá yáta kanán.
ROM 1:10 Mani dwá ent ke godhsará, gón Hodáay razáyá shomay kerrá rasagá kámyáb bebán,
ROM 1:11 chéá ke pa shomay didárá morádig án, tánke shomárá cha Pákén Ruhay némagá nyámaté bedayán ke shomárá mohr o mohkam bekant,
ROM 1:12 bezán ke máshomárá cha yakdomiay imáná delbaddhi berasit, cha mani o shomay imáná.
ROM 1:13 Oo brátán! Mana lóthán shomá bezánét ke man báz randá erádah kortag ke shomay kerrá byáyán bale yakk na yakk moshkeléá maná dáshtag. Mani wáhag at ke maná cha shomá ham bar o samaré berasit, hamá paymá ke maná cha á dega darkawmán rasetag.
ROM 1:14 Man shahri o jangaliáni, dáná o nádánáni wámdár án.
ROM 1:15 Paméshká, mani del báza lóthit shomay kerrá ham ke Rumá nendók ét, wasshén mestágay járá bejanán.
ROM 1:16 Parchá ke cha wasshén mestágá pashal o sharmendag naán, é Hodáay zór o twán ent ke har imána áróká nejáta dant, awalá Yahudi o randá darkawmán.
ROM 1:17 Chéá ke wasshén mestágay tahá Hodáay rástáwari o ádeli záhera bit, hamá rástáwari ke awalá tán áherá cha imáná rasit, anchosh ke nebisag butag: “Hamá ke imánay barkatá rástáwar o bémayárent, hamá zendaga mánit.”
ROM 1:18 Hodáay kahr o gazab cha ásmáná záhera bit o mardománi sajjahén hodánáparmáni o badkáriáni sará kapit, chéá ke mardom gón wati radkárián rástiá lagatmála kanant.
ROM 1:19 Parchá ke á chizz ke Hodáay bárawá zánaga bant, pa áyán záher ant. Hodáyá á chizz pa áyán záher kortagant.
ROM 1:20 Cha donyáay jórh kanagá beger tán annun Hodáay chér o andémén jawhar, bezán áiay abadmánén zór o Hodái tab o saresht cha áiay jórh kortagén chizzán gendag o zánaga bit. Nun mardomán nimóné nést.
ROM 1:21 Harchont ke áyán Hodá zánt, bale áiárá Hodái ezzatesha nadát o áiay shogresha nagept. Eshiay badalá, wati náhudagén pegr o hayáláni tahá gár butant o áyáni násarpadén del taháriá mán póshet.
ROM 1:22 Harchont ke watá dánáesha gwasht, bale áyáni hódhi o ahmaki róch pa róch gésha but.
ROM 1:23 Namiránén Hodáay shán o shawkatesh gón hamá botán sawdá kort ke hákién ensán o báli morg o chárpád o lápkassháni rang o dróshomá atant.
ROM 1:24 Paméshká Hodáyá mardom áyáni delay sell o badén wáhagáni tahá yalah kortant ke watmánwatá gón nápákiá wati jesmán béhormat bekanant.
ROM 1:25 Áyán Hodáay rásti gón drógá sawdá kort o addh kanókay badalá, addh kortagénáni parastesh o hezmata kort, hamá addh kanók ke tán abad satá o saná karzit. Ámin.
ROM 1:26 Paméshká Hodáyá ham áyáni sharmnákén hawá o hawasáni tahá á yalah kortant. Áyáni janénán wati aslén ráh o rahband yalah dát o náráhén nazzikkiay némagá shotant.
ROM 1:27 Hamé paymá, mardénán gón wati janénán ráh o rahbandén nazzikki yalah dát o watmánwatá hawá o hawasáni ásá kaptant, mardénán gón mardénán sharmnákén kára kort o é gomráhiay allamén sezá áyáni jendá raset.
ROM 1:28 Anchosh ke áyán Hodáay pajjáh árag arzesh nadát, hamé paymá Hodáyá bénangén pegr o hayáláni tahá yalah kortant tánke náráhén káráni tahá bekapant.
ROM 1:29 Á cha har paymén badkári, gandagi, tamáh o badniyatiá sarréch butagant. Cha hasadd, hón o kósh, arh o korh, makkári o badwáhiá porr, mardománi báposhtá habar kanók,
ROM 1:30 bohtám janók, cha Hodáyá naprat kanók, béadab, gorunák, batháki, badiay sázók, pet o mátay náparmán,
ROM 1:31 násarpad, béwapá, bémehr o bérahm ant.
ROM 1:32 Harchont ke á cha Hodáay barhakkén hokmá sahig ant ke choshén káráni kanók markay hakdár ant, bale angat na tahná á wat hamé kárána kanant, choshén káráni tahá degaráni ham poshta bant.
ROM 2:1 Paméshká taw harkas bebay, wahdé degaráni kazáwatá kanay o áyán éra janay, tará pa é kárá hecch ozr o nimóné nést. Chéá ke gón degaréay kazáwat kanag o ér janagá, wati jenday kazáwatá kanay. Parchá ke taw wat ham hamá kárána kanay.
ROM 2:2 Á mardom ke é paymén kára kanant, má zánén ke áyáni bárawá Hodáay kazáwat barhakk ent.
ROM 2:3 Taw harkas bebay, degarán éra janay o wat hamá kárána kanay, tai hayálá cha Hodáay kazáwatá rakkay?
ROM 2:4 Yá ke áiay mehrabáni o sabr o ópáray ganjá béarzesha zánay o sarpada nabay ke Hodáay mehrabániay maksad hamesh ent ke tará dém pa tawbah kanagá bebárt?
ROM 2:5 Bale taw gón wati nápashómán o sengén delá, pa kahr o gazabay róchá pa wat kahr o gazab ambára kanay, hamá róchá ke Hodáay barhakkén kazáwat záhera bit.
ROM 2:6 Hodá harkasay mozzá áiay kortagén káráni hesábá dant.
ROM 2:7 Hamá ke gón sabr o ópár, nékén káráni sará mohr óshtátagant o shawkat o ezzat o namirániay lóthók ant, Hodá áyán abadmánén zenda bakshit.
ROM 2:8 Bale hamá mardománi sará wati kahr o gazabá gwárénit ke watwáh ant o hakk o rástiay badalá badkáriay randgir ant.
ROM 2:9 Harkas ke badén kára kant, ranj o azábáni tahá kapit, pésará Yahudi o randá darkawm.
ROM 2:10 Bale harkas ke nékia kant, shawkat o ezzat o émeniay wáhonda bit, pésará Yahudi o randá darkawm.
ROM 2:11 Chéá ke Hodá némagdária nakant.
ROM 2:12 Áyán ke Sharyat nazántag o gonáh kortag, tabáha bant bale Sharyatay hesábá na, o áyán ke Sharyat zántag o gonáh kortag, áyáni kazáwat Sharyatay hesábá bit.
ROM 2:13 Chéá ke tahná cha Sharyatay rahbandáni eshkonagá, kass Hodáay chammán rástáwar o bémayára nabit. Hamá kas rástáwara bit ke Sharyatay rahbandáni sará amala kant.
ROM 2:14 Wahdé darkawm ke Sharyat pa áyán narasetag bale cha wati tab o sareshtá anchén kára kanant ke Sharyatay rahbandáni hesábá ant, á pa wat, wat Sharyat ant, bell ke Sharyatesh nést.
ROM 2:15 Gón wati é kárán pésha dárant ke Sharyatay rahband áyáni delá naksh ant. Áyáni zamir pa eshiá gwáhia dant o áyáni pegr o hayál baré áyán mayárbára kanant o baré bémayára kanant.
ROM 2:16 É gapp hamá róchá záhera bit ke Hodá cha Issá Masihay wasilahá, mardománi chér o andémén pegráni kazáwatá kant, anchosh ke mani wasshén mestága gwashit.
ROM 2:17 Bale agan taw watá Yahudié zánay o Sharyatay sará óst o ométa banday o gón Hodáyá wati nazzikkiay sará pahra banday,
ROM 2:18 agan cha Sharyatá tálim geragay sawabá Hodáay wáhagá zánay o sharteréná pajjáha káray,
ROM 2:19 agan taw deljam ay ke kóráni rahshón ay o pa áyán nuré ay ke taháriá ant,
ROM 2:20 agan hamá Sharyatay sawabá ke zánt o rástiay jawhar ent nádánáni sar o sój kanók o chokkáni dars o sabakk dayók ay,
ROM 2:21 agan degarán tálima dayay, gorhá chéá wati jendá tálima nadayay? Taw ke dozziay helápá wáza kanay, wat parchá dozzia kanay?
ROM 2:22 Taw ke zenáyá manah o makana kanay, wat parchá zená kanay? Taw ke cha botán naprata kanay, wat parchá botáni parasteshgáhána polay o watá séra kanay?
ROM 2:23 Taw ke Sharyatay sará pahra banday, parchá Sharyatá próshay o Hodáyá béezzata kanay?
ROM 2:24 Anchoch ke nebeshtah ent: “Shomay sawabá darkawm Hodáay námá béezzata kanant.”
ROM 2:25 Sonnat o borroká hamá wahdá arzesh hast ke Sharyatá barjáh bedáray, bale agan Sharyatá bepróshay gorhá bezán sonnat kanag nabutagay.
ROM 2:26 Agan kasé sonnat kanag nabutag bale Sharyatay rahbandán purah o sarjama kant, gorhá bezán ke sonnat butagén hesába bit.
ROM 2:27 Á ke jesmi sonnat kanag nabutag bale Sharyatay páband ent, tará mayáriga kant, parchá ke tará nebeshtagén Sharyat o sonnat kanagay rasm hast, bale taw angat Sharyatá próshay.
ROM 2:28 Chéá ke Yahudi á naent ke záherá Yahudi ent o rástén sonnat bayag záheri o jesmi chizzé naent.
ROM 2:29 Yahudi hamá ent ke pa del Yahudi ent o rástén sonnat delay tahá bit, cha Hodáay Ruhá bit, cha nebeshtah kortagén labzá nabit. Choshén mardomá cha ensáná satá narasit, cha Hodáyá rasit.
ROM 3:1 Gorhá Yahudi bayagay páedag ché ent o sonnat bayagay arzesh ché ent?
ROM 3:2 Har paymá ke becháray báz ent. Awali gapp esh ent ke Hodáyá wati habar Yahudiáni sepordah kortagant.
ROM 3:3 Bale agan cha áyán lahtén wapádár nabut, gorhá ché bit? Áyáni béwapái Hodáay wapádáriá halás o nákára kant?
ROM 3:4 Hechbar! Bell toré har ensán dróga bandit, bale Hodá harwahd rástgó ent! Anchosh ke nebisag butag: “Paméshká, taw ke habara kanay, barhakk ay o kazáwat ke kanay, péróz ay.”
ROM 3:5 Bale agan may badkári Hodáay rástáwari o ádeliá záhera kant, gorhá ché begwashén? Hamé begwashén ke Hodá náensáp ent ke áiay kahr o gazab may sará kapit? (Nun man ensánáni paymá habar kanagá án.)
ROM 3:6 Hechbar! Agan habar esh ent, gorhá Hodá chón donyáay kazáwatá kant?
ROM 3:7 Balkén kasé begwashit: “Agan gón mani drógá Hodáay rásti géshter záhera bit o áiay shán o shawkat borztera bit, gorhá chéá angat mani sará gonahkáriay mayár laddhaga bit?”
ROM 3:8 Chéá magwashén: “Byáét badia kanén ke néki pédá bebit”? Anchosh ke lahtén mardom márá bohtáma jant o gwashit ke má é paymá gwashagá én. Áyáni mayárbár kanag jáez ent.
ROM 3:9 Gorhá ché begwashén? May, bezán Yahudiáni hál cha á degarán gehter ent? Na, hecch paymá gehter naent! Chéá ke má é habar pésará kortag ke sajjahén mardom, Yahudi o darkawm, gonáhay bandig ant.
ROM 3:10 Anchosh ke nebeshtah ent: “Kass rástáwar naent, hechkas.
ROM 3:11 Kass sarpada nabit, hechkas Hodáay shóházá naent.
ROM 3:12 Sajjahénán cha ráhá táb kortag, hórigá sell butagant, nékkáré nést, yakké ham nést.
ROM 3:13 Áyáni gotth o galu sarpachén kabr ant o wati zobáná pa cháplusi kára bandant, cha áyáni lonthán syahmáray zahra petthit o
ROM 3:14 dapesh cha baddwái o jawr o kocchalá sarréch ant,
ROM 3:15 kadamesh pa hónay réchagá téz ant,
ROM 3:16 har jáh ke rawant, tabáhi o bazzagia kárant,
ROM 3:17 sohl o émeniay ráhá nazánant o
ROM 3:18 áyáni deláhodátorsi nést.”
ROM 3:19 Nun má zánén, Sharyat har ché ke gwashit, gón hamá mardomána gwashit ke Sharyatay sáhegá ant, tánke sajjahén mardománi dap band bebit o sarjamén donyá Hodáay bárgáhá mayárbár bebit.
ROM 3:20 Parchá ke hechkas cha Sharyatay randgiriá Hodáay démá rástáwar o bémayár hesába nabit. Sharyat bass mardomá sarpada kant ke gonáh chéé.
ROM 3:21 Bale nun bé Sharyatay dáragá, Hodáay bakshátagén rástáwari o bémayári záher butag o Sharyat o nabián é rástáwariay gwáhi dátag.
ROM 3:22 Issá Masihay sará báwarmandi, é rástáwariay baksheshá pa sajjahén báwarmandána rasénit. Hodá hecch park o péra nakant,
ROM 3:23 parchá ke sajjahénán gonáh kortag o cha Hodáay shán o shawkatá zebahr ant,
ROM 3:24 bale gón Hodáay rahmatay nyámatá o hamá mókagá ke cha Issá Masihay barkatá rasit, rástáwar o bémayár hesába bant.
ROM 3:25 Hodáyá Issá é donyáyá dém dát tánke áiay hón hamá kapárat bebit ke cha imánay ráhá gonáhána shódit. É kári pa wati rástáwari o ádeliay pésh dáragá kort, parchá ke gón wati Hodái sabr o ópárá mardománá pésarigén gonáháni sezái nadátagat.
ROM 3:26 Hodáyá chosh kort ke maróchigén wahdá pésh bedárit ke rástáwar o ádel ent o gón wati rástáwariá hamá kasá rástáwar o bémayára kant ke Issáay sará imána kárit.
ROM 3:27 Gorhá che chizzay sará pahr bebandén? Pa pahr bandagá jágahé nést. Kojám kánunay bonyádá eshiá bezánén? Nékén kár o kerday kánunay bonyádá? Na, imánay kánunay bonyádá.
ROM 3:28 Chéá ke má zánén ke ensán cha báwarmandiá rástáwar hesába bit, cha Sharyatay káráni kanagá na.
ROM 3:29 Hodá éwaká Yahudiánig ent? Darkawmáni naent? Béshakk á darkawmáni ham Hodá ent,
ROM 3:30 parchá ke Hodá yakké o sonnat kortagén o sonnat nakortagénán cha yakkén imánay ráhá rástáwara kant.
ROM 3:31 Gorhá gón imánay ráhay zuragá má Sharyatá halás o nákára kanén? Hechbar! Má Sharyatá barjáha dárén.
ROM 4:1 Gorhá ché begwashén? Ebráhém ke jesmi hesábá may bonpirok ent, áiá ché dar gétk?
ROM 4:2 Agan Ebráhém cha wati kár o kerdá rástáwar o bémayár hesáb butén, áiá chizzé hastat ke áiay sará pahr bebandit, bale Hodáay chammán chosh naent.
ROM 4:3 Pákén Ketáb ché gwashit? Ebráhémá Hodáay sará báwar kort o hamé báwar pa áiá rástáwari hesáb but.
ROM 4:4 Nun kasé ke kára kant, áiay mozz dád o baksheshé hesába nabit, áiay hakk ent.
ROM 4:5 Bale á ke nékén káráni sará óst o ométa nakant, hamá Hodáay sará óst o ométa kant ke radkár o náparmánán rástáwara kant, áiay imán pa áiá rástáwari hesába bit.
ROM 4:6 Hamé paymá Dáud ham hamá mardomay bahtáwariay kessahá kárit ke Hodá áiay kár o kerdá nachárit o áiá pák o palgár hesába kant. Dáuda gwashit:
ROM 4:7 “Bahtáwar ant hamá ke áyáni násharibakshag o gonáh shódag butagant.
ROM 4:8 Bahtáwar ent hamá ke Hodáwand áiay gonáhá hechbar hesábá nayárit.”
ROM 4:9 Záná, bahtáwari tahná pa hamáyán ent ke sonnat kanag butagant? Yá pa áyán ent ham ke sonnat kanag nabutagant? Má gwashén ke Ebráhémay imán pa áiá rástáwari hesáb but.
ROM 4:10 Chónén hál o jáwaréá chosh but? Sonnat bayagá pésar yá sonnat bayagá rand? Pakká ent ke sonnat bayagá pésar rástáwar hesáb but, randá na.
ROM 4:11 Bale sonnat bayagay nesháni áiá raset tánke áiay rástáwariay sará mohré bebit, hamá rástáwari ke sonnat bayagá pésar cha imánay ráhá hastati. Gorhá Ebráhém hamá sajjahén mardománi peta bit ke bé sonnat bayagá imána kárant o é dhawlá rástáwar o bémayár hesába bant.
ROM 4:12 Hamé paymá, Ebráhém áyáni ham peta bit ke na tahná sonnat kanag butagant, imánay ráhá ham gám janagá ant, hamá ráhá ke may pet Ebráhémá cha sonnat bayagá pésar gáma jat.
ROM 4:13 Ebráhém o áiay nasl o padréchá jahánay mirásdár bayagay wádah cha Sharyatay ráhá naraset, cha hamá rástáwariay ráhá raset ke cha imáná kayt.
ROM 4:14 Parchá ke agan Sharyatay randgir mirásdár buténant, imán béarzesh o wádah bémáná at,
ROM 4:15 chéá ke Sharyat kahr o gazaba kárit. Bale ódá ke Sharyat néstent, próshag ham nabit.
ROM 4:16 Paméshká, wádah cha imánay ráhá puraha bit, tánke wádahay bonyád rahmat bebit o áiay purah bayagay zamánat Ebráhémay sajjahén nasl o padréchá dayag bebit. É wádah tahná pa Sharyatay randgirána nabit, pa áyán ham bit ke Ebráhémay imáná sharikdár ant, parchá ke Ebráhém may sajjahénáni pet ent.
ROM 4:17 Anchosh ke nebisag butag: “Man tará bázén kawméay pet kortag.” Gorhá, Hodáay chammán Ebráhém may pet ent, hamá Ebráhém ke Hodáay sará báwari hastat ke Hodá mordagán zendaga kant o hamá chizz ke néstant, áyán gwánka jant o hasta kant.
ROM 4:18 Wahdé hecch omété néstat, Ebráhémá gón ométwári báwar kort ke bázén kawméay peta bán. Anchosh ke Hodáyá gón Ebráhémá gwashtagat: “Tai nasl o padréch estáráni kesásá báza bant.”
ROM 4:19 Ebráhémá wati bésáhén badan cháret ke áiá kesás sad sál at, o Sárahay santhi o béchokkii ham dist, bale angat áiay imán nezór nabut.
ROM 4:20 Hodáay wádahay sará Ebráhém nábáwar nabut o shakki nakort, á wati imánay sará mohr óshtát o Hodáay satá o sanái kort.
ROM 4:21 Deljam at ke Hodáyá é wák o twán hast ke wati wádahá purah bekant.
ROM 4:22 Paméshká cha Hodáay némagá“rástáwar hesáb but”.
ROM 4:23 Pákén Ketábay é labz ke “hesáb but” tahná pa Ebráhémá nebisag nabutag,
ROM 4:24 pa má ham nebisag butag. Má ham cha Hodáay némagá rástáwar hesába bén, má ke Hodáay sará báwara kanén ke áiá may Hodáwandén Issá cha mordagán zendag kort.
ROM 4:25 Issá pa may náparmánián, markay dastá dayag but o pa may rástáwar bayagá, cha mordagán zendag kanag but.
ROM 5:1 Nun ke imánay sawabá rástáwar o bémayár hesáb butagén, cha may Hodáwandén Issá Masihay ráhá mayg o Hodáay nyámá sohl o wassháni árag butag.
ROM 5:2 Cha Issá Masihay ráhá, é rahmatay darwázag pa má pach kanag butag o nun imánay sawabá rahmatáni sáhegá óshtátagén. Wati é ométay sará pahr ham bandén ke Hodáay shán o shawkatá bahramand én.
ROM 5:3 Tahná eshiay sará na, wati sakkiáni sará ham pahra bandén, chéá ke zánén sakki o sóri sabr o ópára kárant,
ROM 5:4 o sabr o ópár kerdárá mohr o mohkama kant o mohrén kerdár omét wadia kant,
ROM 5:5 o omét márá delprósh bayagá naylit, chéá ke Hodáyá wati mehr may delá mán kanag, cha hamá Pákén Ruhay barkatá ke márá bakshag butag.
ROM 5:6 Á wahdá ke má angat béwas atén, pa wahd Masihá wati sáh pa má dát, pa radkár o Hodánáparmánán.
ROM 5:7 Chó sakk kamma bit ke kasé pa parhézkárén mardoméá cha wati sáhá sar begwazit, balkén yakké del o jorat bekant ke wati sáhá pa nékén mardoméá bedant.
ROM 5:8 Bale Hodá may sará wati mehrá chosh záhera kant ke hamá wahdá Masih pa maygi mort ke má angat gonahkár atén.
ROM 5:9 Paméshká, nun ke cha Masihay hónay barkatá rástáwar hesáb butagén, má sakk báz deljamter én ke áiay wasilahá cha Hodáay kahr o gazabá rakkén.
ROM 5:10 Agan á wahdi ke angat Hodáay dozhmen aten, cha áiay chokkay markay barkatá gón áiá wasshán kanag butén, gorhá nun ke wasshán kanag butagén, sakk deljamter én ke áiay zenday barkatá má rakkén.
ROM 5:11 Bale tahná inchok na, má wati Hodáwandén Issá Masihay barkatá Hodáay sará pahr ham bandén, ke nun Masihá márá gón Hodáyá wasshán kanáéntag.
ROM 5:12 Gorhá hamá paymá ke gonáh yakk kaséay sawabá donyáyá átk o mark cha gonáhá pédá but, hamé paymá mark sajjahén mardománi nyámá sheng o tálán but, chéá ke sajjahénán gonah kortag.
ROM 5:13 Sharyatá pésar gonáh donyáya hastat, bale agan Sharyat mabit, gonáh ham hesáb nabit.
ROM 5:14 Angat ham, cha Ádamá beger tán Mussáyá marká bádsháhi kort, hamáyáni sará ham ke áyáni gonáh Ádamay náparmániay dhawléné naat. Ádam hamá kasay mesál at ke démterá áyagi at.
ROM 5:15 Bale rahmat náparmániay paymá naent. Agan yakk kaséay náparmániay sawabá sajjahén ensán mortant, Hodáay rahmat o bakshesh ke sajjahén ensánán sar but, báz master ent, hamé bakshesh ke cha yakkén ensánay, bezán Issá Masihay rahmatá raset.
ROM 5:16 É bakshesh hamá yakkén ensánay, bezán Ádamay gonáhay ásaray paymá naent, chéá ke kazáwat cha yakk náparmániéá átk o kazáwatá mayárbári áwort, bale bakshesh bázén náparmánián o rand átk o baksheshá rástáwari o bémayári áwort.
ROM 5:17 Agan yakkéay náparmániay sawabá cha hamá yakkénay wasilahá marká bádsháhi kort, gorhá á mardom ke ganjén rahmat o rástáwariay baksheshay wáhonda bant, cha é yakkénay, bezán Issá Masihay barkatá, wati zendá allamá bádsháhia kanant.
ROM 5:18 Gorhá hamá paymá ke cha yakk ensánéay náparmániá sajjahén mardom mayárbár kanag butant, cha yakk ensánéay nékén kárá sajjahén mardom rástáwar o bémayár kanaga bant o zenday wáhonda bant.
ROM 5:19 Hamá paymá ke cha yakkéay náparmániá sajjahén mardom gonahkár butant, cha yakkéay parmanbardáriá bázéné rástáwar kanaga bit.
ROM 5:20 Sharyat átk ke náparmáni géshter záher bebit, bale jáhé ke gonáh gésh but, rahmat angat géshter but,
ROM 5:21 tánke anchó ke gonáhá bádsháhi kort o markay sawabsáz but, rahmat bádsháhi bekant o rástáwari byárit o cha may Hodáwandén Isa Mashiay barkatá abadmánén zenday sawabsáz bebit.
ROM 6:1 Gorhá ché begwashén? Gón gonáhá démá berawén ke rahmat gésh bebit?
ROM 6:2 Hechbar! Má ke cha gonáhá wati band sestag, angat gonáháni tahá chón zend gwázénta kanén?
ROM 6:3 Záná shomá nazánét ke wahdé má sajjahén pákshódi dayag butén o gón Issá Masihá paywast butén, gorhá bezán gón áiay marká paywast butén?
ROM 6:4 Paméshká, má pákshódiay wahdá mortén o gón áiá kabr kanag butén, tánke hamá paymá ke Masih, Hodáén Petay shán o shawkatay barkatá cha mordagán zendag kanag but, hamé dhawlá má ham nókén zendé begwázénén.
ROM 6:5 Agan má áiay paymén markéá gón áiá paywast butagén, gorhá allam áiay paymén jáh janagéá ham gón áiá paywasta bén.
ROM 6:6 Má zánén ke may kwahnén zend gón áiá salibay sará dranjag but tánke hamá badan nést o nábud bebit ke gonáhay golám ent o má cha ed o rand gonáhay golámiá makanén.
ROM 6:7 Parchá ke á kas ke mortag cha gonáhá ázát butag.
ROM 6:8 Nun agan má gón Masihá mortagén, márá yakin ent ke gón áiá zend ham gwázénén.
ROM 6:9 Má zánén, Masih ke cha mordagán zendag kanag butag, nun hechbara namerit o mark cha ed o rand áiay sará sarzóra nabit.
ROM 6:10 Á gón wati marká, yakkén randá pa modámi, pa gonáhay prósh dayagá mort o wati annugén zendá, pa Hodáyá zendag ent.
ROM 6:11 Hamé dhawlá, shomá ham watá pa gonáh kanagá mordag bezánét o cha Issá Masihay barkatá watá pa Hodáyá zendag bezánét.
ROM 6:12 Gorhá gonáhá wati hákién badaná bádsháhi kanagá maylét tánke shomá jesmay sellén wáhagáni golám mabét.
ROM 6:13 Wati badanay ázáyán gonáhay dastá madayét tánke badkáriay awzár mabant. Shomá cha marká dém pa zendá árag butagét, nun watá Hodáay báhóth bekanét o wati badanay ázáyán ham Hodáay dastá bedayét tánke rástkáriay awzár bebant.
ROM 6:14 Báyad ent gonáh shomay sará hákemi makant, parchá ke shomá Sharyatay sáhegá naét, rahmatay sáhegá ét.
ROM 6:15 Gorhá ché? Má gonáh kanán bebén ke Sharyatay sáhegá naén o rahmatay sáhegá én? Hechbar!
ROM 6:16 Wahdé shomá parmánbardárén golámáni paymá watá yakkéay dastá dayét, gorhá hamáiay goláma bét ke áiay parmánbardáriá kanét. É habará nazánét? Yá gonáhay goláma bét ke dém pa marká bárt yá parmánbardáriay “golám” ke dém pa rástáwari o bémayáriá bárt.
ROM 6:17 Bale Hodáay shogr ent, harchont ke pésará gonáhay golám atét, nun shomá pa del hamá tahray tálimay parmánbardári kortag ke shomárá dayag butag.
ROM 6:18 Shomá cha gonáhá ázát kanag butagét o nun rástáwariay “golám” ét.
ROM 6:19 Shomay tahá ensáni nezóri hast, paméshká man é habarán gón ensáni mesáléá kanán. Hamá paymá ke shomá pésará wati badanay ázá pa nápáki o róch pa róch géshter bayókén radkáriáni golámiá pésha kort, nun áyán pa rástáwariay “golámiá” pésh bekanét ke ásar o ákebati páki o palgári ent.
ROM 6:20 Wahdé shomá gonáhay golám atét, cha rástáwari o bémayáriay pábandiá ázát atét.
ROM 6:21 Gorhá shomárá cha á kárán ke nun cha áyán sharmendag ét, che páedag raset? Á káráni ásar mark ent.
ROM 6:22 Bale nun ke cha gonáhá ázát butagét o Hodáay páband ét, hamá páedag ke shomárá rasit, páki o palgári ent o áiay ásar abadmánén zend ent.
ROM 6:23 Parchá ke gonáhay mozz mark ent, bale cha may Hodáwandén Issá Masihay barkatá Hodáay dád o bakshesh abadmánén zend ent.
ROM 7:1 Oo brátán! Nazánét ke Sharyat tán hamá wahdá ensánay sará hákemia kant ke ensán zendag ent? Man gón hamáyán habará án ke Sharyatá zánant.
ROM 7:2 Pa mesál, Sharyatay rahbandá janén tán hamá wahdá wati marday páband ent ke áiay mard zendag ent. Bale agan mard mort, gorhá jan cha sur o sángay bandá ázát ent.
ROM 7:3 Tán wahdé ke áiay mard zendag ent, agan á dega mardé begipt, zenákár gwashaga bit. Bale agan áiay mard bemerit, jan cha é bandá ázát ent o agan jan dega mardé begipt, zenákár gwashaga nabit.
ROM 7:4 Oo mani brátán! Hamé paymá cha Masihay jesmi marká cha Sharyatá shomay band sest o Sharyatay hesábá shomá mortét ke degaréay bebét, hamáiay bebét ke cha mordagán zendag kanag but. É paymá, má pa Hodáyá bar o samar áworta kanén.
ROM 7:5 Wahdé may mahár gonahkárén tab o sareshtay dastá at, may ázáyáni tahá hamá porgonáhén hawá o hawasán kára kort ke cha Sharyatay zánagá chest butagatant ke má anchén kár bekanén ke áyáni bar o samar mark ent.
ROM 7:6 Bale hamá chizzá ke márá páband kortagat, nun áiay hesábá má mortagén o cha Sharyatay bandá ázát butagén tánke cha Pákén Ruhay nókén ráhá Hodáay hezmatá bekanén, cha Sharyatay nebeshtaháni kwahnén ráhá na.
ROM 7:7 Gorhá ché begwashén? Sharyat gonáh ent? Hechbar! Bale agan Sharyat mabutén, mana nazántagat ke gonáh chéé. Agan Sharyatá magwashtén “tamáh makan”, mana nazánt tamáh o lálech chéé.
ROM 7:8 Bale gonáhá cha hamá parmáná páedag zort o mani delá har paymén tamáhi pédá kort. Chéá ke agan Sharyat mabit, gonáh mortag.
ROM 7:9 Yakk wahdé man bé Sharyatá zenda gwázént, bale anchosh ke Sharyatay parmán átk, gonáh zendag but o man mortán.
ROM 7:10 Gorhá zánag but ke hamá parmáná ke báyad ent zend byáwortén, pa man marki áwort.
ROM 7:11 Gonáhá cha é parmáná páedag zort, maná rad dát o cha hamé parmáná koshti.
ROM 7:12 Bale angat Sharyat pák ent, Hodáay parmán pák o barhakk o sharr ent.
ROM 7:13 Gorhá á chizz ke sharr ent, mani markay sawab but? Hechbar! Gonáhá á sharrén chizz kár bast o maná dém pa marká bort tánke zánag bebit ke gonáh gonáh ent o hamá parmánay wasilahá gonáhay bekesásén gandagi záher bebit.
ROM 7:14 Má zánén ke Sharyatay sarchammag Hodáay Pákén Ruh ent, bale man jesmi mardomé án ke goláméay paymá gonáhay kerrá bahá butagán.
ROM 7:15 Wati jenday kár o kerdán sarpada nabán. Á kárán ke kanaga lóthán, nakanánesh, bale hamá kárána kanán ke cha áyán naprata kanán.
ROM 7:16 Agan hamá kárána kanán ke kanagesha nalóthán, gorhá mannán ke Sharyat sharr ent.
ROM 7:17 Nun cha ed o rand á sellén káráni kanók man naán, hamá gonáh ent ke mani tab o sareshtá ent.
ROM 7:18 Mana zánán ke maná, bezán mani gonahkárén tab o sareshtá hecch nékié mán nést. Maná nékén kár kanagay wáhag hast, bale kortesha nakanán.
ROM 7:19 Á nékén kárán ke kanaga lóthán, nakanánesh, bale hamá badén kárána kanán ke kanagesha nalóthán.
ROM 7:20 Agan man hamá kárána kanán ke kanagesha nalóthán, gorhá cha ed o rand á káráni kanók man naán, hamá gonáh ent ke mani tab o sareshtá ent.
ROM 7:21 Paméshká man wati tahá é kánuná gendán ke wahdé néki kanaga lóthán, nékiay jágahá badi mani tahá neshtag.
ROM 7:22 Wati del o daruná, cha Hodáay Sharyatá shádán án,
ROM 7:23 bale dega kánuné wati tab o sareshtá gendán ke gón mani aglay kánuná jangá ent o maná hamá gonáhay kánunay bandiga kant ke mani ázáyáni tahá kárá ent.
ROM 7:24 Oh ke man chónén syahbahtén mardomé án. Kay maná cha é markigén jesmá rakkénit?
ROM 7:25 Hodáay shográ gerán ke cha may Hodáwandén Issá Masihay barkatá rakkán. Gorhá bezán man wati aglá Hodáay Sharyatay golám án, bale wati tab o sareshtá gonáhay kánunay golám án.
ROM 8:1 Nun pa hamá mardomán hecch mayárbárié nést ke Issá Masihayg ant.
ROM 8:2 Chéá ke cha Issá Masihay barkatá, zend bakshókén Ruhay kánuná tará cha gonáh o markay kánuná ázát kortag.
ROM 8:3 Hamá kár ke Sharyatá kort nakortagat, parchá ke gonahkárén tab o sareshtay sawabá nezór butagat, á kár Hodáyá wat kort. Á kári hamá wahdá kort ke wati jenday Chokki gonahkárén ensánéay shekl o dróshomá rawán dát tánke pa may gonáhán korbánig bebit. É paymá ensánay tab o sareshtay gonáhi sezá dát,
ROM 8:4 tánke Sharyatay rahband may zendá sarjamiá purah bebit, má ke gonahkárén tab o sareshtay ráhá nazurén, Pákén Ruhay ráhá zurén.
ROM 8:5 Á ke gonahkárén tab o sareshtay ráhá zurant, hamá chizzáni hayálá bant ke áyáni tab o sareshta lóthit, bale á ke Pákén Ruhay ráhá zurant, hamá chizzáni hayálá bant ke Pákén Ruhesha lóthit.
ROM 8:6 Hamá pegr o hayál ke áiay mahár gonahkárén tab o sareshtay dastá ent, áiay ásar mark ent, bale hamá pegr o hayál ke áiay mahár Pákén Ruhay dastá ent, áiay ásar zendmán o émeni ent.
ROM 8:7 Hamá pegr o hayál ke mahári gonahkárén tab o sareshtay dastá ent, Hodáay dozhmen ent. Á watá Hodáay Sharyatay dastá nadant, chó kort ham nakant.
ROM 8:8 Á mardom ke gonahkárén tab o sareshtay dastá ant, Hodáyá wassh o razá korta nakanant.
ROM 8:9 Bale shomá gonahkárén tab o sareshtay dastá naét, Pákén Ruhay dastá ét, parchá ke Hodáay Ruh shomay delá neshtag. Agan kaséá Masihay Ruh gón mabit, á Masihay naent,
ROM 8:10 bale agan Masih shomay delá ent, gorhá badan gonáhay sawabá merit, bale rástáwariay sawabá Pákén Ruh shomárá zenda bakshit.
ROM 8:11 Agan hamáiay Ruh shomay delá ent ke Issá Masihi cha mordagán zendag kort, gorhá áiá ke Masih cha mordagán zendag kort, shomay zawál bayókén badaná ham cha wati hamá Ruhay barkatá zenda bakshit ke shomay delá neshtag.
ROM 8:12 Gorhá oo brátán! Má wámdár én, bale gonahkárén tab o sareshtay wámdár naén ke áiay hesábá zend begwázénén.
ROM 8:13 Chéá ke agan shomá gonahkárén tab o sareshtay ráhá begerét, merét, bale agan gón Pákén Ruhay zórá wati tab o sareshtay gonáh o badkárián bekoshét, zendaga mánét.
ROM 8:14 Á sajjahén mardom Hodáay chokk ant ke Hodáay Ruh áyáni rahshón ent.
ROM 8:15 Shomárá golámi ruhé narasetag ke padá betorsét, Hodáyá shomárá zortag o wati chokk kortag o áiay Ruh shomárá rasetag. Hamé Ruhay barkatá má kukkára kanén “Abbá, oo Pet!”
ROM 8:16 Pákén Ruhay jend gón may arwáhá hór gwáhia dant ke má Hodáay chokk én.
ROM 8:17 Nun agan má Hodáay chokk én, gorhá mirás ham barén, cha Hodáyá mirása barén o hamá mirás ke Masihá rasit, má hamá mirásá sharikdár én. Albat shart esh ent ke má áiay sakki o sórián sharikdár bebén. É dhawlá áiay shán o shawkatá ham sharikdára bén.
ROM 8:18 Mani nezzá, é zamánagay sakki o sóri, hamá shán o shawkatay démá hecch naant ke pa má záher bayagi ent.
ROM 8:19 Chéá ke sajjahén jahán pa bésabri wadárá ent ke Hodá wati chokkáni shán o shawkatá záher bekant.
ROM 8:20 Sajjahén jahán náhudagiay dastá dayag butag. É cha jahánay jenday wáhag o razáyá nabut, cha hamáiay wáhag o razáyá but ke jaháni náhudagiay chérá chér tarrént, bale gón é ométá
ROM 8:21 ke jahánay jend cha tabáhi o barbádiay golámiá ázáta bit o Hodáay chokkáni porshawkatén ázátiay sharikdára bit.
ROM 8:22 Má zánén ke sajjahén jahán angat cha chellagiay dardán nárag o áh kasshagá ent.
ROM 8:23 Tahná jahán náragá naent, má ham ke márá Pákén Ruhay awali bar o samar rasetag, wati daruná náragá én o pa bésabri wadárá én ke márá Hodáay zortagén chokk bayagay sarjamén hakk berasant o may badan mókag o ázát kanag bebit.
ROM 8:24 Má gón hamé ométá rakkénag butagén, bale omété ke sarjam butag, nun omét gwashaga nabit. Chón buta kant ke mardom hamá chizzay ométá bebit ke hastenti?
ROM 8:25 Agan hamá chizzay ométwár bebén ke angat márá nést, gorhá pa sabr o ópár áiay wadárá nendén.
ROM 8:26 Hamé paymá Pákén Ruh may nezóriáni tahá márá komakka kant, chéá ke má nazánén chón o pa kojám chizzán dwá bekanén, bale Pákén Ruhay jend gón anchén nálagán may wakiliá kant ke bayán kanaga nabant.
ROM 8:27 Á ke may delá patthit, Pákén Ruhay pegr o hayálána zánt, chéá ke Pákén Ruh gón Hodáay wáhag o razáyá palgártagénáni wakilia kant.
ROM 8:28 Má zánén, Hodá sajjahén chizzán pa wati dóst dárókáni sharriá kára bandit, hamá ke Hodáay erádahay hesábá gwánk janag butagant.
ROM 8:29 Hodáyá á cha pésará zántant o cha pésará dar chetant ham ke á, áiay Chokkay rang o dróshomá bebant, tánke á Chokk bázén brátáni tahá awali bebit.
ROM 8:30 Á ke Hodáyá cha pésará dar chetant, gwánki ham jatant, á ke Hodáyá gwánk jatant, rástáwara o bémayári ham kortant o á ke Hodáyá rástáwar kortant, shán o shawkati ham dátant.
ROM 8:31 É chizzáni bárawá ché begwashén? Agan Hodá gón má gón ent, kay may dozhmen buta kant?
ROM 8:32 Áiá ke wati Chokkay parwáh ham nadásht o pa má sajjahénán cha áiá sar gwast, gón Chokká hawár, á dega sajjahén chizzán chón márá nadant?
ROM 8:33 Hodáay gechén kortagénán kay bohtám jata kant? É Hodá ent ke rástáwar o bémayára kant.
ROM 8:34 Hodáay gechén kortagénán kay mayárbár kort kant? Issá Masih hamá ent ke mort o cha mordagán zendag ham but, hamá Issá ke Hodáay rástén kashá ent o may wakilia kant.
ROM 8:35 Kay márá cha Issá Masihay mehrá jetá korta kant? Sakki o sóri yá taklipi yá ázár yá dhokkál yá dertapocchi yá hatar yá zahm?
ROM 8:36 Anchosh ke nebisag butag: Tai sawabá sajjahén róchá má gón marká dém pa dém én o hamá pasán hesába bén ke helár kanaga bant.
ROM 8:37 Enna, márá é sajjahén chizzáni tahá cha hamáiay barkatá mazanén kámyábié rasit ke gón má mehri kortag.
ROM 8:38 Man deljam án ke na mark, na zend, na préshtag, na hokmrán, na annugén o na áyókén chizz, na wák o zór,
ROM 8:39 na borzi, na jahli o na sajjahén jahánay dega chizzé márá cha Hodáay hamá mehrá jetá korta kant ke cha may Hodáwandén Issá Masihá márá rasit.
ROM 9:1 Masih sháhed ent ke man rásta gwashán o dróga nabandán, mani zamir Pákén Ruhá barkatá é habaray sháhediá dant ke
ROM 9:2 maná sóznákén andóh o modámién dardé delá ent.
ROM 9:3 Drégatá wati brátáni háterá, hamá ke jesmi hesábá mani hamkawm ant, áyáni háterá man nálat kanag buténán o cha Masihá besesténán.
ROM 9:4 Á, Esráili ant o Hodáyá zortag o wati chokk kortagant. Shán o shawkat, ahd o paymán, Sharyat, ebádatay ráh o rahband o Hodáay labz o karár hamáyánig ant.
ROM 9:5 Bonpirok hamáyánig ant o Masih ham jesmi hesábá cha hamáyáni naslá ent, Masih ke sajjahénáni Hodá ent. Áiá modám satá o saná bát. Ámin.
ROM 9:6 Chosh naent ke Hodáay habar béasar o nákár butag. Chéá ke sajjahén Bani Esráili hakk o delá Esráili naant.
ROM 9:7 Ebráhémay har chokk o nomásag imánay hesábá áiay nasl o padréch naent. Bezán ke “tai nasl o padréch cha Esáká hesáb bit.”
ROM 9:8 É chizz pésha dárit ke har jesmi chokk Hodáay chokk hesába nabit, wádah dátagén chokk Ebráhémay nasl o padréch hesába bant.
ROM 9:9 Parchá ke wádah o karár chosh at: “Áyókén sálá hamé wahdá man pera tarrán o Sárahá mardénchokké gwarána bit.”
ROM 9:10 Tahná é naat, Rebekkáay járhén chokkáni pet hamá yakkén at, bezán may bonpirok Esák.
ROM 9:11 Bale cha eshiá pésar ke chokk pédá bebant o nékén yá badén kár bekanant, gón Rebekkáyá gwashag but ke “masterén kasterénay hezmatá kant.” É dhawlá Hodá wat gechéna kant o gón é kárá wati erádahá barjáh dárit. Ensánay kár o kerdá nachárit, wat ensáná gwánka jant.
ROM 9:13 Anchosh ke nebisag butag: “Ákub maná dóst at o Issu nádóst.”
ROM 9:14 Gorhá ché begwashén? Hodá náensáp ent? Hechbar!
ROM 9:15 Chéá ke gón Mussáyá gwashit: “Harkasay sará ke maná rahm kanagi ent, rahma kanán o gón harkasá ke maná hamdardi kanagi ent, hamdardia kanán.”
ROM 9:16 Bezán, é ensánay wáhag o wasay sará nabit, rahm kanag Hodáay dastá ent.
ROM 9:17 Parchá ke Pákén Ketábá Hodá gón Perawná gwashit: “Man tará paméshká mazani dátag ke wati zór o wákátará pésh bedárán o sajjahén jaháná mani námay jár janag bebit.”
ROM 9:18 Gorhá bezán, Hodá harkasay sará ke belóthit rahma kant o harkasay delá ke belóthit senga kant.
ROM 9:19 Taw cha man josta kanay: “Gorhá Hodá chéá angat márá mayárbára kant? Áiay erádahay démá kay óshtáta kant?”
ROM 9:20 Bale, oo ensán! Taw kay ay ke gón Hodáyá hamjwábia kanay? É sharrén habaré naent ke addh kortagéné wati addh kanóká begwashit: “Taw chéá maná é paymá addh kortag.”
ROM 9:21 Záná, kuzagará é hakk nést ke cha gelay yakkén chánagá yakk darpé pa hasén káréá o degaré pa ancháén káréá addh bekant?
ROM 9:22 Gorhá ché? Harchont ke Hodáyá wati kahr o gazab pésh dárag o wati wák o kodrat záher kanaga lóthet, bale angat gón mazanén sabr o ópáré hamá mardománi bardáshtia kort ke kahr o gazabay chérá atant o pa gár o gomsár bayagá tayár atant.
ROM 9:23 Gorhá ché? Balkén áiá chosh kort tánke wati ganjén shán o shawkatá hamá mardomán pésh bedárit ke áyáni sará rahma kant, hamá mardom ke Hodáyá pésará pa wati shán o shawkatá tayár kortagatant.
ROM 9:24 Má ham Hodáay gwánk jatagén én, tahná Yahudi na, darkawm ham.
ROM 9:25 Anchosh ke Hushá Nabiay Ketábá Hodá gwashit: “Hamá ke mani kawm naat, man áiá wati kawma kanán, hamá ke mani dordánag naat man áiá wati dordánaga kanán.”
ROM 9:26 Anchosh ham: “Hamá molká ke gón áyán gwashag but: ‘Shomá mani kawm naét,’ ódá á, namiránén Hodáay chokk gwashaga bant.”
ROM 9:27 Bale Esráilay bárawá Eshayá nabi jára jant o gwashit: “Bell toré Bani Esráilay chokk daryáay rékáni kesásá báz bebant, bale cha áyán tahná kasánén pasht kaptagén bahré rakkit.
ROM 9:28 Chéá ke Hodáwand zeminay sará wati sezáyá pa tézi o mohkamia kárit.”
ROM 9:29 Hamá paymá ke Eshayá nabiá pésará gwashtag: “Agan lashkaráni Hodáwandá pa má nasl o padréch maeshtén, gorhá má Sodumay mardománi paymá butagatén, Gomurahay mardománi paymá.”
ROM 9:30 Nun ché begwashén? Hamá darkawm ke rástáwari o bémayáriay shóházá naatant, rástáwariesh raset, hamá rástáwari ke cha imáná kayt.
ROM 9:31 Bale Esráili ke cha Sharyatay ráhá rástáwariay shoházá atant, cha Sharyatay ráhá pa rástáwariá sar nabutant.
ROM 9:32 Parchá sar nabutant? Paméshká ke áyáni é shoház bonyád imán naat, kár o kerd at. Áyán mán gisshénókén sengay sará thagal wárt.
ROM 9:33 Anchosh ke nebeshtah ent: “Man Sahyuná sengé éra kanán ke mardomána thagalénit, dhóké ke áyán dawra dant, harkas ke áiay sará imána kárit sharmendaga nabit.”
ROM 10:1 Oo brátán! Mani delay wáhag o dwá gón Hodáyá pa Esráilián hamesh ent ke áyán neját berasit.
ROM 10:2 Man pa áyán gwáhi dáta kanán ke áyán pa Hodáyá jósh o gayrat hast, bale áyáni é jósh o gayrat cha sharrén zánt o zánagéá naent.
ROM 10:3 Á hamá rástáwariá sarpad nabutant ke cha Hodáay némagá ent o wati jenday rástáwariay barjáh kanagay johdá atant, paméshká watá Hodáay dátagén rástáwariay dastá nadátesh.
ROM 10:4 Masih, Sharyatay sarjami o kámeli ent. Nun harkas ke imána kárit, rástáwar o bémayár hesába bit.
ROM 10:5 Hamá rástáwari ke cha Sharyatá kayt, áiay bárawá Mussá chosh nebeshtaha kant: “Harkas ke é hokmáni sará amala kant, gón esháni barjáh dáragá zendaga mánit.”
ROM 10:6 Bale á rástáwari ke cha imáná kayt, é dhawlá gwashit: “Wati delá magwashét ‘kay ásmáná rawt?’”, bezán ke Masihá jahlá byárit,
ROM 10:7 “yá ‘kay johlén kabrá éra kapit?’”, bezán ke Masihá cha mordagáni jaháná borzá byárit.
ROM 10:8 É dhawlá gwashit: “Gáltai nazzikká ent, tai dapá o tai delá ent”, bezán imánay hamá Gál ke má áiay járá janén.
ROM 10:9 Agan dape wat bemannay ke Issá Hodáwand ent o wati delay tahá báwar bekanay ke Hodáyá á cha mordagán zendag kortag, gorhá rakkay.
ROM 10:10 Chéá ke ensán delay tahá imána kárit o rástáwar hesába bit, dape wat ham mannit o é paymá áiá nejáta rasit.
ROM 10:11 Pákén Ketába gwashit: “Harkas ke áiay sará imána kárit, hechbar sharmendaga nabit.”
ROM 10:12 É bárawá Yahudi o darkawmay nyámá park o péré nést. Chéá ke hamé yakkén Hodáwand, sajjahénáni Hodáwand ent o pa hamá drostigén mardomán ke áiá tawára kanant, békesás saki o bakshók ent.
ROM 10:13 Chéá ke “harkas ke Hodáwanday námá gipt o áiá tawára kant, á rakkit.”
ROM 10:14 Nun mardom chón yakkéá tawár bekanant ke áiay sará imánesh nayáwortag? O chón yakkéay sará imán byárant ke áiay bárawá chizzé naeshkotagesh? O chón beshkonant agan kasé áyáni kerrá é járá majant?
ROM 10:15 O jár janók chón jár bejanant agan rawán dayag nabutagant? Anchosh ke nebeshtah ent: “Á mardománi pád o kadam nék ant ke wasshén mestágay járá janant.”
ROM 10:16 Bale bázénéá é wasshén mestág namannet, chéá ke Eshayá nabia gwashit: “Oo Hodáwand! May paygámay sará kayá báwar kort?”
ROM 10:17 Gorhá imán cha eshkonagá kayt o eshkonag cha Masihay paygámay járá.
ROM 10:18 Bale nun josta kanán: “Áyán naeshkotag?” Allam eshkotagesh, parchá ke: “Jár janókáni tawár sajjahén donyáyá shotag o áyáni habar jahánay goddhi marz o simsarán sar butagant.”
ROM 10:19 Yakk baré padá josta kanán: “Esráil sarpad nabutag?” Awalá, Hodá cha Mussáay zobáná gwashit: “Man hamá mardománi wasilahá shomay hasaddá páda kanán ke kawmé naant; násarpadén kawméay wasilahá shomay hezhmá páda kanán.”
ROM 10:20 Gorhá Hodá cha Eshayá nabiay zobáná pa deléri gwashit: “Maná hamáyán dar gétk ke mani shóházá naatant, man watá pa hamáyán záher kort ke mani jost o porsá naatant.”
ROM 10:21 Bale Esráilay bárawá gwashit: “Sajjahén róchá man wati dast, náparmán o jáhelén kawméay némagá pa wassháni shahár dátag.”
ROM 11:1 Nun man josta kanán, Hodáyá wati kawm nazortag o dawr dátag? Hechbar! Chéá ke man wat ham Esráilié án, Ebráhémay nasl o padréch án o cha Benyáminay kabilahá.
ROM 11:2 Hodáyá wati kawm ke cha pésará zántag, dawr nadátag. Shomá nazánét ke Pákén Ketáb Elyás Nabiay bárawá ché gwashit? Á che paymá Esráilay helápá Hodáay kerrá dazbandia kant?
ROM 11:3 Elyás Nabia gwashit: “Oo Hodáwand! Eshán tai nabi koshtagant o tai korbánjáh karótkagant.Pasht kaptagén tahná man án o mani koshagay randá ant.”
ROM 11:4 Bale Hodáay passaw pa áiá ché at? “Man pa wat hapt hazár mardom dáshtag ke Bahalaydémá kóndhán nakaptagant.”
ROM 11:5 Hamé paymá, maróchi ham lahtén choshén pasht kaptag ke Hodáay rahmatay barkatá gechén kanag butagant.
ROM 11:6 Agan gechén bayag rahmatay barkatá ent, gorhá bezán cha kár o kerdá naent, agan cha kár o kerdá butén, gorhá bezán rahmat, rahmat nabutagat.
ROM 11:7 Gorhá ché? Á chizz ke Esráil áiay shóházá at, naraseti, gechén kortagénán raset, bale á degaráni del seng butant.
ROM 11:8 Anchosh ke nebeshtah ent: “Hodáyá á gránwáb kortagant, anchén chammi dátagant ke magendant o anchén góshi dátagant ke maeshkonant, tán maróchigén róchá.”
ROM 11:9 Dáudá ham gwashtag: “Áyáni parzónagdám o talké bát, pa áyán mán gisshénókén sengé o sezáé bát,
ROM 11:10 chammesh tahár bátant tánke magendant o srénesh modám komp bát.”
ROM 11:11 Gorhá man josta kanán, áyán thagal wártag ke bekapant o padá pád átk makanant? Hechbar! Áyáni náparmániay sawabá darkawmán neját rasetag tánke Esráiliáni hasadd pád byayt.
ROM 11:12 Agan Esráiliáni náparmáni pa donyáyá barkat but o áyáni táwán pa darkawmán ganjé, gorhá áyáni sarjamiá imán árag o gón bayag chónén mazanén barkaté kárit.
ROM 11:13 Oo darkawmán! Man gón shomá habará án. Nun ke mani kásedi gón darkawmán ent, wati hezmatá porarzesha zánán,
ROM 11:14 pa é ométá ke wati jenday mardomán hasaddig bekanán o é paymá cha áyán lahténá berakkénán.
ROM 11:15 Chéá ke, agan áyáni nazurag jahánay sohl o wassháni ent, gorhá áyáni zurag cha mordagán zendag bayagay paymén káré bit.
ROM 11:16 Agan ártay hamá awali chánag ke Hodáay bahr ent, pák ent, gorhá bezán sarjamén tarr kortagén árt pák ent o agan bondhál pák ent, thál o sháharh ham pák ant.
ROM 11:17 Agan drachkay lahtén thál próshag butag o taw ke jangali zaytunay thálé ay, á dega tháláni nyámá gón drachká paywand janag butagay o nun zaytunay bondhálay shiragá sharikdár ay,
ROM 11:18 á dega tháláni sará pahr maband. Agan chosha kanay, mashamósh ke taw bondhál nadáshtag, é bondhál ent ke tará dáshtagi.
ROM 11:19 Nun balkén begwashay: “Á thál próshag butant tánke man paywand janag bebán.”
ROM 11:20 Rást ent. Á thál paméshká próshag butant ke imánesh néstat, bale taw cha imánay zórá mohr óshtátagay. Gorunák mabay o betors.
ROM 11:21 Chéá ke agan Hodáyá drachkay asligén tháláni sará bazzag nabut, tai sará ham bazzagia nabit.
ROM 11:22 Nun Hodáay mehrabániá o áiay trondiá bechár. Trondi pa hamáyán ent ke gonáhá kaptagant o mehrabáni pa taw ent, agan áiay mehráni sáhegá bemánay. Agan na, taw ham próshaga bay.
ROM 11:23 Á ham, agan wati nábáwariay sará mamánant, paywand janaga bant, chéá ke Hodáyá padá áyáni paywand janagay wák o twán hast.
ROM 11:24 Taw cha hamá zaytunay drachká próshag butagay ke wati zátá jangali ent o wati zátay helápá gón keshtagén zaytunay drachká paywand janag butagay. Gorhá allamá hamá ke é zaytunay asligén thál ant, pa arzáni gón wati jenday drachká padá paywand janaga bant.
ROM 11:25 Oo brátán! Chó mabit ke watá dáná sarpad bebét. Paméshká mana lóthán é rázá bezánét ke Esráilay yakk bahréay sará sengdeli átkag o é sengdeli tán hamá wahdá mánit ke darkawm sarjamiá góna nabant.
ROM 11:26 É paymá, nun sajjahén Esráila rakkit, hamá dhawlá ke nebeshtah ent: “Rakkénókcha Sahyuná kayt o Ákubay nasl o padréchay hodánáparmániá dura kant.”
ROM 11:27 “Wahdé mane Hodá áyáni gonáhán dura kanán gón áyán hamé ahd o paymáná bandán.”
ROM 11:28 Esráilián wasshén mestágay sará báwar nakortag o pa shomaygi Hodáay dozhmen ant, bale Hodáyá á gechén kortagant o wati bonpirokáni sawabá Hodáyá dóst ant.
ROM 11:29 Chéá ke Hodá wati dátagén nyámatán pacha nagipt o wati gechéná badala nakant.
ROM 11:30 Hamá paymá ke yakk wahdé shomá Hodáay náparmán atét, bale nun cha Esráiliáni náparmániá Hodáyá shomay sará rahm kort,
ROM 11:31 nun á náparmán butagant tánke hamé rahm ke shomay sará kanag butag, áyáni sará ham kanag bebit.
ROM 11:32 Chéá ke Hodáyá sajjahén mardom náparmániay golám kortagant tánke sajjahénáni sará rahm bekant.
ROM 11:33 Wáh! Hodáay ganj o hekmat o zánt chinchok békesás ent. Áiay paysalah cha zántá dar ant o ráhi cha o zánagá hamá dém!
ROM 11:34 “Kayá Hodáwanday pegr zántag o kay áiay sar o sój dayók butag?”
ROM 11:35 “Kayá áiárá chizzé dátag ke Hodá áiay badalá bedant?”
ROM 11:36 Chéá ke har chizz cha hamáiay némagá ent o hamáiay wasilahá ent o pa hamáiá ent. Tán abad shán o shawkat áiá sar bát. Ámin.
ROM 12:1 Oo brátán! Mani dazbandi gón shomá esh ent ke Hodáay rahmá bechárét o wati badaná chó zendagén korbánigéá pésh bekanét ke pák o palgár ent o Hodáyá pasond ent. É shomay hakkigén ebádat ent.
ROM 12:2 Gón é donyáyá hamrang o hamdróshom mabét, wati pegr o pahmá nók bekanét o watá badal kanét tánke shomá é zántá sar bebét ke Hodáay razá ché ent, kojám chizz sharr o kámel ent o Hodáyá pasond ent.
ROM 12:3 Gón hamé rahmatán ke maná bakshag butagant, shomárá har yakkéá gwashán ke watá cha wati kadd o kesásá borzter sarpad mabét. Haminchok imánay andázahá ke Hodáyá shomay sará bahr kortag, hamá imánay hesábá watá hamá kesás sarpad bebét ke hakk o delá hastét.
ROM 12:4 Anchó ke may yakkén badaná bázén ázáé hast o sajjahén ázáyáni kár yakk naent,
ROM 12:5 hamé paymá má ke báz én, Masihay barkatá yakkén badan én o cha má har yakké anchén ázáé ke gón á degarán hamgranch ent.
ROM 12:6 É rahmatáni barkatá ke márá dayag butagant, má Pákén Ruhay tahr tahrén nyámatáni wáhond én. Agan kaséá Hodái bashárat sar kanagay nyámat rasetag, áiá é nyámat wati imánay kaddá kár bebandit;
ROM 12:7 agan é nyámat hezmat kanag ent, hezmat bekant; agan tálim dayag ent, tálim bedant;
ROM 12:8 agan delbaddhi dayag ent, delbaddhi bedant; agan degaráni madat kanag ent, gón daspachi madat bekant; agan péshwái o saróki ent, gón delgóshdári saróki bekant; agan rahm kanag ent, gón wasshén delé rahm bekant.
ROM 12:9 Shomay mehr báyad ent pa del bebit. Shomá cha badiá naprat bekanét o gón nékiá hamgranch bebét.
ROM 12:10 Gón bráti mehré, yakdegará dóst bedárét, pa sharap o ezzat dayagá cha yakdomiá démáter bebét.
ROM 12:11 Sharrén kárá sosti makanét. Gón Pákén Ruhay zórá wati kárá pa hobb o wáhag bekanét. Hodáwanday ebádat o hezmatá bekanét.
ROM 12:12 Wati ométay sará gal bebét, sakkiáni tahá sabr o ópár bekanét o wati dwáyán modám barjáh bedárét.
ROM 12:13 Hodáay palgártagénáni hájatáni purah kanagá gón bebét o mehmándóst bebét.
ROM 12:14 Agan kasé shomárá ázára dant, pa áiá barkat belóthét, barkat belóthét o nálat makanét.
ROM 12:15 Agan kasé shádeha kant gón áiá shádeh bekanét o agan kasé grét gón áiá begréwét.
ROM 12:16 Gón yakdomiá pa hamdeli zend begwázénét. Pahr o shán makanét, kamterénáni hamráh bayagá lajj makanét. Watá báz dáná sarpad mabét.
ROM 12:17 Gón kassá badiay badalá badi makanét. Hamá káráni randá bebét ke harkasay chammán sharr ant.
ROM 12:18 Haminchok ke shomay dastá bit, gón harkasá pa sohl o émeni zend begwázénét.
ROM 12:19 Oo dordánagén dóstán! Bér magerét, kahr o gazabá pa Hodáyá bellét. Chéá ke nebeshtah ent: “Hodáwanda gwashit: ‘Béray gerag mani kár ent, sezá dayók man án.’”
ROM 12:20 Bér geragay badalá: “Agan tai dozhmen shodigent, waráki beday, agan tonnig ent, ápi beday, taw ché chosha kanay, áiay sará rókén jal o eshkar pera réchay.”
ROM 12:21 Mayl ke badi tai sará sardast bebit, gón nékiay zórá badiá érdast bekan.
ROM 13:1 Harkas watá hokumatay chérdast bemannit, parchá ke cha Hodáay nádéntagéná abéd hecch hokumat nést o har hokumaté ke hast, Hodáyá nádéntag.
ROM 13:2 Paméshká, harkas ke cha hokumatá sarkasshia kant, bezán Hodáay nádéntagénay helápá páda kayt o hamá ke chosha kanant, wati sará mayárbária kárant.
ROM 13:3 Á ke sharrén kára kant, áiá cha hokumatá natorsit, bale á ke badén kárá kant, áiá torsit. Agan lóthay ke cha hokumatay torsá ázát bebay, gorhá sharrén kár bekan o hokumat tai satáyá kant.
ROM 13:4 Pa tai sharriá, hokumat Hodáay hezmatkár ent, bale agan badia kanay, cha áiá betors, chéá ke zahm moptá áiay dastá naent. Á Hodáay hezmatkár ent, hamáyáni sezá dayók ent ke badén kára kananat.
ROM 13:5 Gorhá, báyad ent hokumatay chérdast bebay, tahná cha sezáay torsá na, cha wati zamirá ham.
ROM 13:6 Hamé sawabá shomá song o máliát ham dayét, parchá ke hákem Hodáay hezmatkár ant o modám hokumati kárán dazgatth ant.
ROM 13:7 Harkasá áiay hakká bedayét. Agan shomárá song per, songá bedayét, agan máliát per, máliátá bedayét. Agan kasé ezzata karzit, áiay ezzatá bekanét o agan kasé sharap karzit, áiá sharap bedayét.
ROM 13:8 Hechkasay wám shomárá per mabit, shomá gón yakdegará tahná mehray wámdár bebét, chéá ke harkas ke domiá dósta dárit, bezán Sharyati barjáh dáshtag.
ROM 13:9 Parchá ke “zená makan”, “hón makan”, “dozzi makan”, “lálech makan” o á dega hokm gón é habará gwandh geraga bant: “Wati hamsáhegá wati jenday paymá dóst bedár.”
ROM 13:10 Hamá ke mehra kant gón hamsáhegá badia nakant. Paméshká mehr kanag Sharyatay sarjamiá dárag ent.
ROM 13:11 Wahdá pajjáh byárét o anchosh bekanét. Nun á sáhat átkag ke báyad ent shomá cha wábá pád byáét, chéá ke nun may rakkag cha á wahdá nazzikkter ent ke má awalá báwarmand butén.
ROM 13:12 Shap, dém pa halásiá ent o róch nazzikk ent. Nun byáét taháriay kár o kerdán yalaha kanén o rozhnay seláhána bandén.
ROM 13:13 Byáét ezzatmandén zendé gwázénén, hamá zend ke róchay rozhnáiá gwázénaga bit. Wati zendá pa ayyáshi, sharábnóshi, bénangi, béhayái, arh o korh o hasadd magwázénén.
ROM 13:14 É káráni badalá, Hodáwandén Issá Masihá chó pósháká gwará bekanét o wati gonahkárén tab o sareshtay wáhagáni sarjam kanagay randá mabét.
ROM 14:1 Nezórén báwarmandá wasshátk bekanét o bezurét o nagisshetagén habaráni sará gón áiá jérhah makanét.
ROM 14:2 Yakkéay imán áiá har chizzay waragá kellit, bale domi ke imáni nezór ent, tahná sabzia wárt.
ROM 14:3 Á ke har chizza wárt, hamá mardomá kamter sarpad mabit ke har chizza nawárt o á ke warákay sará pahréza kant, hamáiay kazáwatá makant ke har waráka wárt, chéá ke Hodáyá á kabul kortag.
ROM 14:4 Taw kay ay ke degaréay hezmatkáray kazáwata kanay o áiá éra janay? Á, yá wati jenday wájahay kerrá washnáma bit yá bannám. Bale bezán ke washnáma bit, chéá ke Hodáwandá é wák o twán hast ke áiá washnám bekant.
ROM 14:5 Kasé yakk róchéá cha dega róchéá páktera zánt o degaréay delá sajjahén róch yakk ant. Harkas wati delay hayáláni sará deljam bebit.
ROM 14:6 Á kas ke yakk róchéá hásén róché sarpada bit, pa Hodáwandaygi chosha kant. O á kas ke wárt, pa Hodáwandaygia wárt, parchá ke Hodáay shográ gipt. O á kas ke cha waragá pahréza kant, pa Hodáwandaygi chosha kant o Hodáay shográ gipt.
ROM 14:7 Cha má hechkas pa watigi zendag naent o kass pa watigia namerit.
ROM 14:8 Agan zendag én pa Hodáwandá zendag én o agan merén pa Hodáwandá merén. Gorhá zendag én yá merén, Hodáwandayg én.
ROM 14:9 Masih paméshká mort o padá zendag but ke mordagáni ham Hodáwand bebit o zendagénáni ham.
ROM 14:10 Nun taw chéá wati brátay kazáwatá kanay? Parchá áiá cha wat kamter sarpada bay? Chéá ke jost o porsay róchá má sajjahén Hodáay bárgáhá óshtén.
ROM 14:11 Anchosh ke nebisag butag: “Hodáwanda gwashit: ‘Maná wati zenday sawgend ent, har mardom mani démá kóndhána kapit, har yakké dape wat mane Hodáyá mannit.’”
ROM 14:12 Gorhá cha má har yakkéá Hodáay démá wati hesáb dayagi ent.
ROM 14:13 Byáét cha ed o rand yakdomiá éra najanén. Eshiay badalá, shomá mohkamén erádah bekanét ke á dega brátáni ráhá mán gisshénókén seng éra nakanén o ráhá banda nakanén.
ROM 14:14 Man ke Hodáwandén Issáay randgiré án, mana zánán o maná yakin ent ke hecch warákay jend harám o nápák naent, bale agan kasé chizzéá pa wat nápák bezánt, pa áiá nápák ent.
ROM 14:15 Agan taw waráké bwaray o cha eshiá tai brát delranj bebit, gorhá bezán cha ed o rand taw mehray ráhá rawagá naay. Gón wati waragá á mardomá tabáh makan ke Masih pa áiá mortag.
ROM 14:16 Gorhá mardom mókah madayét ke hamá chizzáni bárawá badén habar bekanant ke shomay delá sharr ant.
ROM 14:17 Chéá ke Hodáay bádsháhi pa warag o nóshag naent, pa rástáwari o émeni o shádeh ent ke cha Pákén Ruhá rasit.
ROM 14:18 Harkas ke hamé paymá Masihay hezmatá kant, Hodáyá wassh o razá kant o mardom ham cha áiá razá bant.
ROM 14:19 Gorhá byáét modám hamá káráni kanagay randá bebén ke dém pa sohl o árámi o yakdomiay rost o rodómá barant.
ROM 14:20 Pa warákéá Hodáay kárá haráb makan. Bell toré sajjahén warák helár o pák ant, bale hamá warákay warag haráb ent ke degaréay thagal waragay sawabsáza bit.
ROM 14:21 Sharter ent ke taw cha gósht, sharáb yá dega har chizzá pahréz bekanay ke tai brátay thagal waragay sawabsáza bit.
ROM 14:22 É chizzáni sará wati yakiná watig o Hodáay nyámá bedár, taw bezánay o Hodá bezánt. Bahtáwar ent hamá á chizzáni sará watá mayárbára nakant ke áiay delá sharr ant.
ROM 14:23 Bale á ke warákéay sará shakk ent, agan bwárt mayárbár ent, chéá ke gón imáná nawártagi. Harché ke cha imáná mabit, gonáh ent.
ROM 15:1 Má ke imáná zórmand én, báyad ent nezórén báwarmandáni kamzórián bardásht bekanén o bass wati jenday wasshiáni randá mabén.
ROM 15:2 Cha má har yakké wati hamsáhegá wassh o razá bekant, tánke áiay rost o rodóm bebit.
ROM 15:3 Chéá ke Masih ham wati jenday wasshiáni padá naat, anchosh ke nebeshtah ent: “Tai bad o rad kanókáni bad o rad mani sará kaptagant.”
ROM 15:4 Har chizz ke pésará nebisag butag, pa may tálimá nebisag butag, tánke cha hamá sabr o delbaddhiá ke Pákén Ketáb márá dayant márá omét berasit.
ROM 15:5 Sabr o delbaddhiay Hodá shomárá anchén zendé bebakshát ke Issá Masihay paymá gón yakdomiá hamdel bebét,
ROM 15:6 tánke shomá pa hamdeli o hamtawári Hodá, bezán may Hodáwandén Issá Masihay Petá satá o saná bekanét.
ROM 15:7 Nun pa Hodáay shán o shawkatá, shomá yakdomiá hamá paymá wasshátk bekanét o bezurét ke Masihá shomárá zortag.
ROM 15:8 Shomárá gwashán ke pa Hodáay rástiay pésh dáragá, Masih Yahudiáni hezmatkár but ke hamá kawl o wádahán purah o sarjam bekant ke bonpirokán dayag butagatant o
ROM 15:9 é paymá darkawm Hodáyá pa áiay rahmá satá o saná bekanant. Anchosh ke nebisag butag: “Paméshká tará kawmáni kerrá satá kanán o tai námá názénán.”
ROM 15:10 É ham gwashag butag: “Oo darkawmán! Gón áiay kawmá hór shádeh kanét.”
ROM 15:11 Démterá: “Oo sajjahén darkawmán! Hodáwandá benázénét. Sajjahén ráj áiá satá o saná bekanant.”
ROM 15:12 Eshayá nabi ham gwashit: “Yassiay risshaga rodit, hamá ke páda kayt o darkawmáni sará bádsháhia kant, áiay sará darkawm ométa bandant.”
ROM 15:13 Ométay Hodá ke shomá áiay sará báwar kortag, shomay delá cha har paymén wasshi o émeniá sarréch kanát, tánke gón Pákén Ruhay zórá shomay del cha ométá sarréch bebit.
ROM 15:14 Oo mani brátán! Man deljam án ke shomá wat cha sharri o nékiá sarréch ét, har paymén zántá kámel ét o pa yakdomiay tálim dayagá twáná ét.
ROM 15:15 Bale man shomay sará lahtén chizzay bárawá pa deléri nebeshtah kortag ke padá á chizzán shomay yátá byárán. É hamá rahmat ent ke Hodáyá mani sará kortag,
ROM 15:16 ke man pa darkawmán Issá Masihay hezmatkáré bebán o Hodáay wasshén mestágay rasénagay hezmatá chó péshwáéá bekanán. É káray maksad esh ent ke darkawm cha Pákén Ruhay barkatá anchén palgártagén hayráté bebant ke Hodáay bárgáhá kabul bebit.
ROM 15:17 Gorhá man pa Issá Masihaygi, pa Hodáyá wati kortagén hezmatáni sará pahra bandán.
ROM 15:18 Maná bass hamá káráni bárawá habar kanagay del o jorat hastent ke Masihá cha mani dastá, bezán cha mani habar o kárán kortagant tánke darkawm Hodáay parmánbardáriá bekanant.
ROM 15:19 Áiá é kár cha nesháni o mójezaháni wák o kodratá, gón Pákén Ruhay zórá kortagant. Gorhá cha Urshalimá beger tán Ilirikumay damagá, man sajjahén ráhá tarr o gard kortag o Masihay wasshén mestág pa sarjami jár jatag.
ROM 15:20 Mani wáhag armán hamé butag ke mestágay járá hamá jágahán bejanán ke ódá Masihay nám kassá pésará nageptag o degaráni ér kortagén bonredáni sará chizzé addh makanán.
ROM 15:21 Bale hamá dábá ke nebeshtah ent: “Hamáyán ke áiay hál narasetag, á gendant o hamáyán ke áiay bárawá naeshkotag, á sarpada bant.”
ROM 15:22 Paméshká báz randá mani dém dárag butag ke shomay kerrá átk makanán.
ROM 15:23 Bale nun pa man é hand o damagán kár kanagá jágahé pasht nakaptag o bázén sáléá mani wáhag ham butag ke shomay kerrá byáyán.
ROM 15:24 Paméshká mani delá ent ke wahdé man dém pa Espániáyá rawán, shomárá begendán, gón shomá wasshén gend o nendé bekanán o randá shomá maná pa démteray sapará madat bekanét.
ROM 15:25 Bale nun Urshalimá, palgártagénáni hezmat kanagá rawagá án.
ROM 15:26 Chéá ke Makduniah o Akáyahay báwarmandán shawr kort ke pa Urshalimay garib o nézgárén palgártagénán máli komakké ráha dayén.
ROM 15:27 É áyáni wati jenday shawr at. Á pa rásti Yahudiáni wámdár ant, chéá ke wahdé darkawm Yahudiáni ruhi barkatán sharikdár butagant, á wámdár ant ke gón wati máli hastiá Yahudián komakk bekanant.
ROM 15:28 Wahdé man é kár sarjam kort o deljam bután ke é komakk pa áyán sar butag, dém pa Espániáyá rawagay wahdá shomárá gendóka kanán o gwazán.
ROM 15:29 Mana zánán ke wahdé shomay kerrá byáyán, gón Masihay sarjamén barkatána káyán.
ROM 15:30 Oo brátán! May Hodáwandén Issá Masihay námá o Pákén Ruhay mehray sawabá cha shomá dazbandia kanán ke Hodáay bárgáhá pa man dwá bekanét o é paymá mani johdán gón bebét.
ROM 15:31 Dwá kanét ke cha Yahudiahay Hodánáparmánáni dastá berakkán o palgártagén mardom hamá máli komakká pa galé bezurant ke man Urshalimá rasénáni,
ROM 15:32 tánke gón Hodáay wáhag o razáyá pa shádeh shomay kerrá byáyán o gón shomay didárá maná nókén wák o twáné berasit.
ROM 15:33 Sohl o émeniay Hodá gón shomá sajjahénán gón bát. Ámin.
ROM 16:1 Man shomay kerrá mayshomay gohár Pibiay sepáreshá kanán, ke Kenkriahay shahray kelisáay hezmatkáré,
ROM 16:2 tánke pa Hodáwandaygi, hamá paymá ke palgártagénáni arzesh ent, áiá bezurét o wasshátk bekanét o har komakké ke cha shomá lóthit, pa áiá bekanét, chéá ke áiá bázén mardoméay madatá kortag o mani jenday ham.
ROM 16:3 Priskilah o Akwiláyá salám sar kanét, ke Issá Masihay hezmatá mani hamkár ant.
ROM 16:4 Áyán pa mani rakkénagá wati zend hataray tahá dawr dát. Tahná man na, darkawmáni sajjahén kelisá ham áyáni mennatá gerant.
ROM 16:5 Hamé paymá, hamá kelisáay mardomán ham salám berasénét ke Priskilah o Akwiláay lógá pa ebádatá yakjáha bant. Mani dordánagén dóst Epaynétusá salám sar kanét. Á, Ásiáay damagay awali Masihi báwarmand ent.
ROM 16:6 Maryamá ke pa shomaygi bázén zahmaté kasshetag, salám sar kanét.
ROM 16:7 Mani syád Andrunikás o Yuniah ke mani hamráhiá bandig atant, áyán ham salám sar kanét. Cha man o pésar Masihay sará imánesh áwortag o kásed áyán sharriá zánant.
ROM 16:8 Ampliátusá salám sar kanét. Á pa Hodáwandaygi maná sakk dóst ent.
ROM 16:9 Urbánusá ke Masihay hezmatá may hamkár ent, o mani dóstigén sangat Estákisá salám sar kanét.
ROM 16:10 Apelisá ke Issá Masihay kár o hezmatá modám óshtátag, o hamé paymá Aristubulosay lógay mardomán salám kanét.
ROM 16:11 Mani syád Hirudiuná salám sar kanét, Nárkisusay lógay hamá mardomán ke Hodáwanday sará báwarmand ant, salám berasénét.
ROM 16:12 Bánokén Tripiná o Tripusáyá ke pa Hodáwandá bázén káré kortagesh o anchosh dóstigén Persisá ke Hodáwanday ráhá báz hezmati kortag, salám sar kanét.
ROM 16:13 Ruposá ke cha Hodáwanday némagá gechén kanag butag o áiay mátá ke pa man ham mátay paymá ent, salám sar kanét.
ROM 16:14 Asinkritus, Pligun, Hermes, Pátrubás, Hermás o á dega brátán ke gón áyán yakjáh ant, salám berasénét.
ROM 16:15 Anchosh, Pilulugos, Yuliah, Nirias o áiay gohár o Ulimpás o sajjahén palgártagénán salám sar kanét ke gón áyán yakjáh ant.
ROM 16:16 Gón pákén chokkagán yakdomiá salám sar kanét. Masihay sajjahén kelisáyani mardom pa shomá salám déma dayant.
ROM 16:17 Oo brátán! Cha shomá dazbandia kanán, cha hamáyán hozzár bebét ke nátepáki dawra dayant o shomay dar bortagén tálimáni helápá, shomárá cha imanay ráhá dara kanant. Cha choshén mardomán watá dur bedárét.
ROM 16:18 Chéá ke é paymén mardom may Hodáwandén Masihay hezmatá nakanant, á wati lápay golám ant o gón wati narm o charpén zobáná sádagén mardomán rada dayant.
ROM 16:19 Shomay parmánbardáriay nám o tawár sajjahénáni nyámá sheng butag o man cha shomá wassh án, bale lóthán ke shomá nékiá pajjáh byarét o watá cha badiá dur bedárét.
ROM 16:20 Sohl o émeniay Hodá hamé zuttán Shaytáná shomay pádáni chérá hurt o árta kant. May Hodáwandén Issá Masihay rahmat gón shomá gón bát.
ROM 16:21 Mani hamkár Timutáus shomárá salám kanagá ent. Mani syád Lukius, Yásun o Susipáterus ham pa shomá salám déma dayant.
ROM 16:22 Mane Tertius, é kágaday káteb, cha Hodáwanday némagá shomárá salám kanagá án.
ROM 16:23 Gáyus ke mani o kelisáay sajjahén mardománi mehmándáriá kanagá ent, shomárá salám kanagá ent. É shahray hazánagay kelitdár Erástus o may brát Kwártus shomárá saláma kanant.
ROM 16:24 May Hodáwandén Issá Masihay rahmat gón shomá sajjahénán gón bát. Ámin.
ROM 16:25 Nun Hodáyá satá o saná bát, ke cha mani é wasshén mestág o Issá Masihay kolaway járay barkatá, shomay imáná morh o mohkam korta kant. É mestágay ráz karnáni karn chér at,
ROM 16:26 bale anchosh ke nabián péshgói kortagat, nun gón namiránén Hodáay hokm o parmáná páshk butag, tánke sajjahén darkawm imán byáránt o Hodáay parmánbardár bebant.
ROM 16:27 Cha Issá Mashiay barkatá, yakkén dánáén Hodáay shán o shawkat tán abad barjáh bát. Ámin.
1CO 1:1 Cha Pulosay némagá, mane Pulos ke Hodáay razáay sará gwánk janag butagán ke Issá Masihay kásedé bebán, o cha may brát Sustinesay némagá,
1CO 1:2 pa Hodáay kelisáyá ke Korentay shahrá ent, bezán pa hamáyán ke Issá Masihay barkatá pák o palgár kanag butagant o gwánk janag butagant ke áiay palgártagén mardom bebant, hamá sajjahén mardománi hamráhiá ke har jágah may Hodáwandén Issá Masihay námá gerant ke áyáni ham Hodáwand ent o may ham.
1CO 1:3 Cha may Hodáén Pet o Hodáwandén Issá Masihay némagá shomárá rahmat o émeni sar bát.
1CO 1:4 Man modám pa shomá wati Hodáay shográ gerán ke Issá Masihay barkatá áiay rahmat shomárá bakshag butagant.
1CO 1:5 Shomá Masihay barkatá har hesábá hastómand ét, har gapp o har paymén zántá.
1CO 1:6 Cha eshiá zánaga bit ke Masihay bárawá may sháhedi rást ent.
1CO 1:7 Paméshká nun ke shomá pa hodónáki may Hodáwandén Issá Masihay záher bayagay rahchár ét, shomárá hecch paymén ruhi nyámatay kammi nést.
1CO 1:8 Hodá wat shomárá tán áherá mohr o mohkama dárit tánke may Hodáwandén Issá Masihay róchá shomá béayb bebét.
1CO 1:9 Hodá wati kawlay sará óshtátag, hamá Hodá ke shomárá gwánki jatag ke shomay zend gón áiay Chokká, bezán gón may Hodáwandén Issá Masihá sharikdár bebit.
1CO 1:10 Oo brátán! Nun may Hodáwandén Issá Masihay námá cha shomá dazbandia kanán ke shomay gapp yakk bebant tánke báwarmandáni nyámá nátepáki makapit o shomay pegr o maksad yakk bebit.
1CO 1:11 Mani brátán! Gapp esh ent ke Kalwiay lógay mardomán shomay bárawá maná hál dátag ke shomay nyámá arh o korh hast.
1CO 1:12 Bezán, cha shomá yakké gwashit: “Man Pulosayg án”, degaré gwashit: “Man Apulosayg án”, dega yakké gwashit: “Man Képáayg án” o degaré gwashit: “Man Masihayg án”.
1CO 1:13 Masih záná bahr kanag butag? Záná é Pulos at ke pa shomaygi salibá dranjag but? Yá ke shomá Pulosay námá pákshódi dayag butét?
1CO 1:14 Hodáay shográ gerán ke Krispus o Gayusá abéd man cha shomá dega kass pákshódi nadátag
1CO 1:15 ke kass gwasht makant ke man Pulosay námá pákshódi dayag butagán.
1CO 1:16 Haw, man Estipánásay lógay mardom ham pákshódi dátagant, bale nazánán man dega kasé pákshódi dátag yá na.
1CO 1:17 Chéá ke Masihá maná pa pákshódi dayagá ráh nadátag, maná ráhi dátag ke wasshén mestágay járá bejanán, bale man é kárá pa habarzánti o dánáia nakanán ke Masihay salibay zór gár mabit.
1CO 1:18 Hamá mardom ke gári o gomsáriay ráhá ant, salibay kolaw áyáni hayálá ahmakié, bale má ke nejátay ráhá én, é kolaw pa má Hodáay zór o twán ent.
1CO 1:19 Chéá ke nebeshtah ent: “Man dánáyáni dánáia nést o nábuda kanán o aglmandáni aglá halás o nákára kanán.”
1CO 1:20 Kojám dáná? Sharyatay kojám zánóger? É donyáay kojám habarzánt? Hodáyá wa záher kortag ke é donyáay dánái nádánié.
1CO 1:21 Hodáyá cha wati dánáiá dist ke mardom gón wati dánáiá maná pajjáha nayárant, gorhá paysalahi kort ke hamá mardom ke imána kárant, áyán hamé jár jatagén paygámay “ahmakiay” barkatá nejáta dayán.
1CO 1:22 Yahudi ásmáni neshánia lóthant, Yunáni dánáiay shóházá ant,
1CO 1:23 bale má Masihay járá janén, hamá Masih ke salib kasshag but, hamá Masih ke pa Yahudián mán gisshénókén sengé o pa darkawmán ahmakié,
1CO 1:24 bale pa gwánk jatagén mardomán, toré Yahudi bebant yá Yunáni, Masih Hodáay zór o Hodáay dánái ent.
1CO 1:25 Chéá ke Hodáay “nádáni” cha ensánay dánáiá dánáter ent o Hodáay “nezóri” cha ensánay zórá zórmandter ent.
1CO 1:26 Brátán! Watá bechárét, á wahdi ke Hodáyá shomárá gwánk jat, shomá ché atét? Ensáni hesábá becháray cha shomá bázéné dáná naat, bázéné zórmand naat, bázéné sardárzádag naat.
1CO 1:27 Bale Hodáyá pa dánáyáni sharmendag kanagá donyáay nádáni gechén kortant o pa zórmandáni sharmendag kanagá donyáay nezórii gechén kortant.
1CO 1:28 Hodáyá hamá chizz gechén kortant ke donyáay chammán hakir o béarzesh ant, néstén chizzi gechén kortant ke hastén chizzán nést o nákár bekant,
1CO 1:29 ke kass áiay démá pahr bast makant.
1CO 1:30 Shomá Hodáay barkatá Issá Masihayg ét, hamá Masih ke pa má Hodáay dánái jórh but, hamá Masih ke may rástáwari o páki o palgári jórh but o márá móketi.
1CO 1:31 Gorhá anchó ke nebeshtah ent: “Harkas ke pahra bandit, Hodáwanday sará pahr bebandit.”
1CO 2:1 Brátán! Wahdé man shomay kerrá átkán o pa shomá Hodáay ráz o ramzay járon jat, gón habarzánti o dánái nayátkán.
1CO 2:2 Chéá ke wahdé shomay kerrá atán, man paysalah kortagat ke Issá Masihá abéd gón dega hecch chizzá delgósh mabán, hamá Masih ke salib kasshag but.
1CO 2:3 Man gón nezóri o mazanén tors o larzé shomay kerrá átkán.
1CO 2:4 Mani habar o mani jatagén járay tahá choshén dánáié mán néstat ke shomárá bemannénit. Pákén Ruhay wák o zór at ke záher but
1CO 2:5 tánke shomay imán ensáni aglay bonyádá mabit, Hodáay wák o zóray bonyádá bebit.
1CO 2:6 Nun, má hamá mardomani kerrá dánáiay habará kanén ke imánesh rostag o pohtah ent, bale é na donyái dánáié o na donyáay nést o nábud bayókén hákemáni dánái.
1CO 2:7 Má Hodáay dánáiay járá janén, hamá dánái ke rázé at o chér o andém at o Hodáyá cha azalá pa may shán o shawkatá gisshéntagat.
1CO 2:8 Bale cha donyáay hákemán kass é dánáiá sarpad nabut, chéá ke agan sarpad buténant, mazanshánén Hodáwandesh salib nakasshetagat.
1CO 2:9 Anchó ke nebeshtah ent: “Hecch chammá nadistagant, hecch góshá naeshkotagant, hechkasay gománá ham nayátkagant, hamá chizz ke Hodáyá pa wati dóst dárókán tayár kortagant.”
1CO 2:10 Bale é chizz Hodáyá wati Pákén Ruhay wasilahá pa má záher kortant, chéá ke Pákén Ruh sajjahén chizzán patth o póla kant o dara géjit, Hodáay rázáni johlánkián ham.
1CO 2:11 Hechkas ensánay delaygána nazánt, abéd cha mardomay wati ruhá ke áiay jenday badaná ent. Hamé paymá Hodáaygán Hodáay jenday Ruhá abéd kassa nazánt.
1CO 2:12 É Ruh ke márá rasetag, donyái ruhé naent, Hodáay Pákén Ruh ent. Márá paméshká dayag butag ke má hamá chizzán bezánén ke Hodáyá márá bakshátagant.
1CO 2:13 Má hamé gappána janén, bale á labzán kára nabandén ke ensáni aglá márá sój dátagant, hamá labzán kára bandén ke Pákén Ruhá márá sój dátagant. É dhawlá ruhi chizzán gón Pákén Ruhay labzán bayána kanén.
1CO 2:14 Hamá mardom ke Pákén Ruh áiay delá naent, Hodáay Ruhay habarána namannit, chéá ke áiay delá é ahmakié. Á é habarán sarpada nabit, chéá ke é habar tahná cha Pákén Ruhay barkatá pahmaga bant.
1CO 2:15 Ruhi mardom sajjahén chizzáni kazáwatá kant, bale áiay jenday kazáwatá kass korta nakant. Chéá ke:
1CO 2:16 “Kay Hodáwanday pegrá zánt ke Hodáwandá sój dát bekant?” Bale márá Masihay pegr gón ent.
1CO 3:1 Brátán! Man gón shomá á paymá gapp jat nakort ke yakké gón ruhi mardomán gappa jant, anchosh habaron kort ke yakké gón jesmi mardomán habara kant, gwashay Masihi imáná shomá nonnok ét.
1CO 3:2 Man shomárá shir dát, trondén warákon nadát, chéá ke shomá trondén warák wárta nakort o angat ham wárta nakanét.
1CO 3:3 Shomá angat jesmi mardom ét. Shomárá ke hasadd mán o arh o korha kanét, gorhá shomá jesmi mardom ét o donyái kár kanagá ét.
1CO 3:4 Chéá ke wahdé yakké gwashit: “Man Pulosayg án” o yakké gwashit: “Man Apulosayg án” gorhá shomá jesmi mardom ét o bass.
1CO 3:5 Apulos chéé? Pulos chéé? É hezmatkár ant ke shomá hamesháni wasilahá imán áwortag o eshán hamá kár kortag ke Hodáwandá gwashtagant.
1CO 3:6 Man kesht, Apulosá áp dát, bale Hodáyá ródént.
1CO 3:7 Gorhá keshók o áp dayók, har do hecch naant, asl Hodá ent ke ródénók ent.
1CO 3:8 Keshók o áp dayók doénáni maksad yakkén ent o har yakkéá wati kár o zahmatay mozza rasit.
1CO 3:9 Chéá ke má Hodáay hamkár én o shomá Hodáay dhagár ét, Hodáay lóg ét.
1CO 3:10 Hamá rahmat ke Hodáyá maná bakshátag, hamáiay barkatá man chó zabrén bánbandéá bonred ér kort o degaré diwálá bandagá ent, bale har bánband báyad ent wati kárá pa delgósh bekant.
1CO 3:11 Bonred Issá Masih ent o é bonred ér kanag butag. Kass dega bonredé ér korta nakant.
1CO 3:12 Nun agan kasé é bonreday sará cha teláh o nograh o gránkimatén sengán lógé bandit yá cha dár o pog o palárá,
1CO 3:13 áiay kár záhera bit. Chéá ke hamá róch ke gón ásá kayt, é kárá záhera kant. Ás wat harkasay kárá chakkásit ke chón ent.
1CO 3:14 Hamá mardom ke áiay bastagén lóga nasochit, á mardomá wati mozza rasit.
1CO 3:15 Agan lóg sotk o por but, bandóká mozzé narasit. Jendia rakkit, bale chó hamá mardomá bit ke ásá kaptag o dar átkag.
1CO 3:16 Nazánét ke shomá Hodáay lóg ét o Hodáay Ruh shomay tahá jahmenend ent?
1CO 3:17 Harkas ke Hodáay lógá tabáh bekant, Hodá áiay jendá tabáha kant, chéá ke Hodáay lóg pák ent o é lóg shomá ét.
1CO 3:18 Kass watá rad madant. Agan cha shomá kasé watá donyáay hesábá dáná sarpada bit, á bezánt ke pa dáná bayagá allami ent ke pésará nádán bebit.
1CO 3:19 Chéá ke Hodáay chammán donyái dánái nádánié. Anchó ke nebeshtah ent: “Á, dánáyán cha áyáni jenday repk o honarán gipt.”
1CO 3:20 É ham nebeshtah ent: “Hodáwanda zánt ke dánáyáni hayál náhudago nákár ant.”
1CO 3:21 Gorhá kass mardománi sará pahr mabandit, chéá ke sajjahén chizz pa shomá ant,
1CO 3:22 toré Pulos bebit yá Apulos yá Képá yá jahán yá zend yá mark yá annugén wahd yá áyókén wahd, sajjahén pa shomá ant o
1CO 3:23 shomá pa Masihá ét o Masih pa Hodáyá.
1CO 4:1 Gorhá mardom márá Masihay hezmatkár o Hodáay rázáni bayán kanagay zemmawár sarpad bebant.
1CO 4:2 Hamá ke káréay zemmawár ant, áyáni tahá hamé chizz cháraga bit ke á wapádár ant yá na.
1CO 4:3 Man é gappay hecch parwáhá nadárán ke shomá yá ensáni hakdiwáné chón mani kazáwatá kant. Man wat ham wati kazáwatá nakanán.
1CO 4:4 Mani del maná malámata nakant, bale eshiay máná é naent ke man bémayár án. É Hodáwand ent ke mani kazáwatá kant.
1CO 4:5 Paméshká cha wahdá pésar hecch kazáwat makanét. Tán hamá wahdá sabr kanét ke Hodáwanda kayt. Harché ke annun taháriá chér o andém ent, Hodáwand áyán cha wati nurá áshkára kant o deláni niyatán záhera kant. Randá har yakkéá cha Hodáay némagá satá rasit.
1CO 4:6 Oo brátán! Man pa shomaygi watig o Apulosay nám gept o é habar kortant ke cha may mesálá é habaray mánáyá bezánét: “Cha nebeshtagéná démter marawét” tánke cha shomá kass yakkéay sará pahr mabandit o domiá ér majant.
1CO 4:7 Kayá tará cha é degarán báláter kortag? Tai kerrá choshén chizzé hast ke Hodáay dátagén naent? O agan Hodáyá dátag, gorhá chéá pahra banday ke gwashaygá tai jendayg ent?
1CO 4:8 Shomay kerrá wa chónáhá har chizz hast, cha pésará hastómand ét. Shomá bé má bádsháhi kanagá ét. Drégatén bádsháh buténét ke shomay barkatá má ham bádsháhi bekortén.
1CO 4:9 Má ke kásed én, mani hayálá Hodáyá márá reday áherá óshtáréntag ke mardom márá bechárant o bekandant. Má hamá bandigáni paymá én ke áyáni koshagay paysalah butag o jahánay démá kalági én, préshtagáni démá ham o ensánáni démá ham.
1CO 4:10 Má pa Masihaygi “ahmak” én o shomá Masihay “dánáén báwarmand” ét. Má nezór én o shomá zórmand. Shomá ezzatmand ét o má béezzat.
1CO 4:11 Tán é damáná má shodig o tonnig én, márá pa gwará kanagá pocch nést, má latth o lagatáni chérá én o dar pa dar én.
1CO 4:12 Wati dastán kára bandén o zahmata kasshén. Mardom ke márá nálata kanant, má áyán nékdwáia kanén. Márá ke ázára dayant, má saggén o bardáshta kanén.
1CO 4:13 Mardom márá bohtáma janant o má pa mehrabáni passawa dayén. Má taningah gwashay donyáay gand o gasarh én, jahánay lansh o patár én.
1CO 4:14 Man é gappán pa shomay sharmendag kanagá nebisagá naán, shomárá wati dóstigén chokkáni dhawlá habardár kanaga lóthán.
1CO 4:15 Masihi zendá toré shomárá hazárán sarparast bebit, bale shomay pet báza nabant. Issá Masihay barkatá, wasshén mestágay sawabá shomay imáni pet man án.
1CO 4:16 Gorhá cha shomá dazbandia kanán ke mani randgiriá bekanét o
1CO 4:17 paméshká man Timutáus shomay kerrá ráh dát. Timutáus mani dóstigén chokk ent o Hodáwanday ráhá wapádárén mardomé. Timutáus shomárá hála dant ke man Masihay ráhá chónén rahbandáni sará zend gwázenagá án, hamá rahband ke man har jágah o har kelisáyá áyáni tálimá dayán.
1CO 4:18 Cha shomá lahtén mardom gorunák ent, áyáni hayálá balkén man shomay kerrá nayáyán.
1CO 4:19 Bale agan Hodáwanday razá bebit, man zutt shomay kerrá káyán o charán é gorunák ché gwashant o kojám zórá janant.
1CO 4:20 Chéá ke Hodáay bádsháhi pa habar naent, pa zór o twán ent.
1CO 4:21 Kojámiá lóthét? Gón latthá shomay kerrá byáyán yá pa mehr o gón narmén delé?
1CO 5:1 Man choshén gapp ham eshkotag ke shomay nyámá bénangi hast, anchén bénangi ke botparastáni nyámá ham nést. Yakké gón wati mátóá wapt o wáb kanagá ent o
1CO 5:2 shomá angat pahr o shána kanét. Shomá báyad ent apsózig buténét o hamá mardom cha wati kerrá begalléntén ke é kári kortag.
1CO 5:3 Bell toré man jesmi hesábá shomay kerrá naán, bale ruhi hesábá gón shomá gón án o man cha pésará é mardomay kazáwat anchó kortag ke gwashay shomay kerrá án.
1CO 5:4 Wahdé may Hodáwandén Issáay námá moccha bét o man ruhi hesábá gón shomá góna bán o may Hodáwandén Issáay zór o wák ham góna bit,
1CO 5:5 é mardá cha kelisáyá dar kanét o yakkerr bekanét ke eshiay gonahkárén tab o saresht nést o nábud bebit o Hodáwanday róchá eshiay arwáhá neját berasit.
1CO 5:6 Shomárá pahr o shána nabráhit. Shomá nazánét ke kammé homir ham sajjahén tarr kortagén ártá gwáta dant?
1CO 5:7 Gorhá wati kwahnén homirá dar kanét ke nókén, béhomirén chánag bebét. Shomá cha gonáhay homirá pák ét, chéá ke may Sargwazay gwarándh, bezán Masih korbánig but.
1CO 5:8 Gorhá byáét aida kanén bale gón kwahnén homirá na, gón badwáhi o radkáriay homirá na, gón nékniyati o rástiay béhomirén naganá aida kanén.
1CO 5:9 Man wati pésarigén kágaday tahá pa shomá nebeshtah kort ke gón bénangén mardomán manendét o pád mayáét.
1CO 5:10 Man é donyáay bénang o lálechi o tamahkár o prébkár o botparastáni gappá naatán. Agan man áyáni gappá buténán, gorhá báyad ent shomá cha é donyáyá dar bekapténét.
1CO 5:11 Bale nun pa shomá nebeshtah kanagá án ke kasé ke watá báwarmandén bráté gwashit bale bénang o lálechi o botparast o selzobán o sharábi o prébkáré, gón áiá manendét o pád mayáét o gón áiá yakjáh warag ham mawarét.
1CO 5:12 Maná che kár ent ke dhannigáni kazáwatá bekanán? Kelisáay mardománi kazáwat kanag shomay kár ent.
1CO 5:13 Dhannigáni kazáwatá Hodá wata kant. “Radkárá cha wati kerrá begallénét.”
1CO 6:1 É sakkén badén habaré ke wahdé cha shomá yakkéá gón dega báwarmandéá jérhahé bit, á wati arzi o shekáyatá palgártagénáni badalá hodánáparmánáni kerrá bárt.
1CO 6:2 Shomá wa zánét, róché kayt ke Hodáay palgártagén mardom donyáay mardománi kazáwatá kanant. Shomárá ke donyáay kazáwat kanagi ent, gorhá shomárá chón é láheki nést ke kasánén jérhaháni kazáwatá bekanét?
1CO 6:3 Shomá nazánét, róché kayt ke má préshtagáni kazáwatá ham kanén? Gorhá báyad ent é donyái jérhah pa má hecch mabant.
1CO 6:4 Agan shomárá choshén donyái jérhah hast, gorhá parchá hamá dhanni mardomán kázia kanét ke áyán kelisáay tahá ezzat nést?
1CO 6:5 É habará paméshká kanagá án ke shomá sharmendag bebét. Shomay nyámá allam yakk choshén dánáé wa dara kayt ke báwarmandáni jerhahán begisshénit,
1CO 6:6 bale angat yakk báwarmandé domi báwarmanday helápá wati shekáyatá hakdiwáná, hodánáparmánáni kerrá bárt.
1CO 6:7 Aslá é arzi o shekáyat záhera kanant ke shomá prósh wártag. Eshiay badalá shomá beshtén ke gón shomá náensápi bebit. Shomá beshtén ke shomárá bepolant.
1CO 6:8 Shomá wat náensápia kanét, á ham gón wati jenday brátán, o áyána polét ham.
1CO 6:9 Záná shomá nazánét ke badkárán Hodáay bádsháhiá mirása narasit? Rad makapét. Na bénangán Hodáay bádsháhiá mirása rasit, na botparastán, na zenákárán, na bagáyán, na lawátkárán,
1CO 6:10 na dozzán, na tamahkárán, na sharábián, na selzobánán o na prébkárán.
1CO 6:11 O cha shomá lahtén anchosh at, bale shomá Hodáwandén Issá Masihay námá gón may Hodáay Pákén Ruhá shódag o pák o palgár o rástáwar o bémayár kanag butét.
1CO 6:12 Taw gwashay: “Man harché ke kanán, rawá ent,” bale harché sharr naent. Haw, “man harché ke kanán, rawá ent” bale man hecch chizzá wati sará báládast bayaga naylán.
1CO 6:13 Taw gwashay: “Warag pa lápá ent o láp pa waragá.” Rást ent, bale róché kayt ke Hodá é doénán tabáha kant. Bale badan pa bénangiá naent, Hodáwandayg ent o Hodáwandá may badanay gam per ent.
1CO 6:14 Hodáyá cha wati zór o kodratá Hodáwandén Issá Masih cha mordagán zendag kort o márá ham zendaga kant.
1CO 6:15 Shomá zánét ke shomay badan Masihay ázá ant. Gorhá man Masihay ázáyán bezurán o kahbagéay ázá bekanán? Hechbar!
1CO 6:16 Shomá zánét ke kasé ke gón kahbagéá yakjáha bit, doén yakk jesm o jána bant. Chéá ke gwashag butag: “Á doén yakk jesm o jána bant.”
1CO 6:17 Bale kasé ke gón Hodáwandá yakka bit, áiay ruh o Hodáwanday Ruh yakké bant.
1CO 6:18 Watá cha bénangiá dur bedárét. Ensán dega har gonáhé ke kant, á cha ensánay badaná dhann ent, bale bénang gón wati jenday badaná gonáha kant.
1CO 6:19 Záná, shomá nazánét ke shomay badan Pákén Ruhay lóg ent, hamá Ruh ke shomay badaná ent o shomárá cha Hodáay némagá rasetag? Shomá wati jenday naét,
1CO 6:20 Shomá pa kimaté zurag butagét. Paméshká wati badaná pa Hodáay shán o shawkatá kár bebandét.
1CO 7:1 Hamá gapp ke shomá nebeshtah kortagant, nun hamáyáni bárawá habara kanán: “Pa mardéná sharter ent ke janénéay nazzikká marawt,”
1CO 7:2 bale cha bénangiá sharter ent ke har mardéná watá jané bebit o har janéná watá mardé.
1CO 7:3 Mard báyad ent wati janay o jan wati marday hakká adá bekant.
1CO 7:4 Jan wati badanay master wat naent, master mard ent o mard ham wati badanay master wat naent, master jan ent.
1CO 7:5 Wati zenday hamráhá wati kerray áyagá madár, bass pa kasánén wahdéá, pa wasshi o razá cha yakdomiá dur buta kanét ke shomay delgósh gón dwáyá bebit. Dwáyá rand padá yakdomiay kerrá berawét, chó mabit ke delá dásht makanét o Shaytán shomárá rad bedant.
1CO 7:6 É gapp ke man jat, parmáné naent, cha yakdomiá dur bayagay ejázaté.
1CO 7:7 Drégatén sajjahén mardom mani paymá buténant, bale Hodáyá har mardomárá dega dega káréay bud o láheki dátag. Yakk mardoméá yakk káréay láhekii dátag o dega mardoméá dega káréay.
1CO 7:8 Gón sur nakortagénán o janózámána gwashán, pa shomá sharr ent ke sur o árós makanét o anchó bebét ke man án.
1CO 7:9 Bale agan kasé watá dáshta nakant, gorhá cha hawasay ásá sochagá sharter ent ke sur bekant.
1CO 7:10 Pa sur kortagénán hokm esh ent, mani hokm naent, Hodáwanday hokm ent, ke jan cha wati mardá jetá mabit.
1CO 7:11 Bale agan jetá bebit, gorhá yá dobar sur makant yá gón wati hamá mardá wasshán bebit. Mard wati janay sawn o talákán madant.
1CO 7:12 Gón á degarána gwashán, o é mani gapp ent, Hodáwanday naent, ke agan báwarmandén brátéay jan báwarmandé naent o janén gón mardá nendaga lóthit, gorhá mard wati janá yalah madant.
1CO 7:13 Agan janénéay mard báwarmandé naent o mard gón janá nendaga lóthit, gorhá jan ham wati mardá yalah madant.
1CO 7:14 Chéá ke á mard ke báwarmandé naent, wati janay barkatá pák o palgár ent o á jan ke báwarmandé naent, wati marday barkatá pák o palgár ent. Agan chó mabutén, shomay chokk nápák atant. Bale shomay chokk pák ant.
1CO 7:15 Á mardom ke báwarmandé naent, agan á wati zenday hamráhá yalaha kant, bell yalahia kant. Choshén jáwarán báwarmandén janén yá mardén páband naent. Hodáyá márá gwánk jatag ke pa sohl o émeni zend begwázénén.
1CO 7:16 Oo janén! Taw chóna zánay ke wati mardá rakkénta nakanay? Oo mardén! Taw chóna zánay ke wati janá rakkénta nakanay?
1CO 7:17 Bass har mardom wati zendá hamá paymá begwázénit ke Hodáwandá gisshéntag o Hodáyá á mardom pa hamá zendá gwánk jatag. Pa sajjahén kelisáyán mani rahband hamesh ent.
1CO 7:18 Á mardom ke cha imán áragá pésar sonnat kanag butag, á wati sonnatá ber magardénit o á mardom ke imán áragá pésar sonnat kanag nabutag, á sonnat kanag mabit.
1CO 7:19 Gapp é naent ke kay sonnat kanag butag o kay nabutag, gapp esh ent ke kay Hodáay parmánbardáriá kant.
1CO 7:20 Har mardom hamá hálatá bemánit ke imán áragay wahdá butag.
1CO 7:21 Wahdé Hodáyá tará gwánk jat, agan á wahdá taw golámé atay, é gappá paréshán mabay, bale agan wati ázátiá gepta kanay, gorhá begeri.
1CO 7:22 Chéá ke agan Hodáwanday sará imán árók golámé, á Hodáwanday barkatá ázát ent o agan imán árók ázáténé, á Masihay golám ent.
1CO 7:23 Shomá pa gránén kimatéá zurag butagét, ensánáni golám mabét.
1CO 7:24 Oo brátán! Cha shomá harkas Hodáay démá hamá paymá bemánit ke gwánk janagay wahdá butag.
1CO 7:25 Neshtagén jenekkáni bárawá maná cha Hodáwanday némagá hecch hokm gón nést, bale man wati habará kanán, chéá ke Hodáyá wati rahmatáni barkatá maná báehtebárén mardomé jórh kortag.
1CO 7:26 Annugén gránén wahdá ke gendán, mani hayálá sharter hamesh ent ke mardom wati jáwaray badal kanagay johdá makant.
1CO 7:27 Agan tará jan hast, sawn o talákay randá mabay. Agan tará jan nést, janay randá mabay.
1CO 7:28 Bale agan taw sura kanay, gonáhé naent o agan neshtagén jenekké sura kant ham gonahkár naent. Bale mardomé ke sura kant, áiay zenday janjál báza bant o mani wáhag ent ke shomá é janjálán makapét.
1CO 7:29 Oo brátán! Mani gapp esh ent ke wahd kamm ent. Cha ed o rand sur kortagén wati zendá anchó begwázénant ke gwashay janesh nést,
1CO 7:30 gréwók wati zendá anchó begwázénant ke gwashay grewagi habaré nést, shádánén mardom wati zendá anchó begwázénant ke gwashay shátkámiay habaré nést o hamá ke chizzé bahá gerant, anchó sarpad bebant ke é chizz manig naent o
1CO 7:31 hamá ke donyái kárán dazgatth ant, wati zendá anchó begwázénant ke é chizz zendagiay maksad naant, chéá ke donyáay annugén rang o dróshoma rawt o gára bit.
1CO 7:32 Mani wáhag ent ke shomá cha janjálán berakkét. Sur nakortagén mardéná Hodáwanday káráni gam per ent, ke chón Hodáwandá razá bekant.
1CO 7:33 Sur kortagén mardéná donyái káráni gam per ent, ke chón wati janá razá bekant o
1CO 7:34 delgóshi yakjáh naent. Sur nakortagén janéná yá neshtagén jenekká Hodáwanday káráni gam per ent o watá sarjamiá Hodáwanday dastá dayaga lóthit. Sur kortagén janéná donyái káráni gam per ent, ke chón wati mardá razá bekant.
1CO 7:35 Man pa shomay jenday páedagá é habarána kanán, shomárá páband kanaga nalóthán. Mani maksad esh ent ke shomá pa sharri zend begwázénét o shomay delgósh sarjamiá gón Hodáwandá bebit.
1CO 7:36 Agan mardé hayála kant ke gón sur nakanagá gón wati deshtárá sharr kanagá naent o watá dáshta nakant o sur kanaga lóthit, á báyad wati delay gappá begipt. É gonáhé naent, belli sura kanant.
1CO 7:37 Bale agan mardéá wati delá erádah kortag o hecch zóri per nést o wati erádahay sará óshtátag ke gón wati deshtárá sur makant, á ham sharr kanagá ent.
1CO 7:38 Gorhá hamá ke sura kant, sharrén káré kanagá ent, bale á ke sura nakant, angat sharterén káré kanagá ent.
1CO 7:39 Janén tán hamá wahdá marday páband ent ke mard zendag ent. Agan mard bérán but, janén ázát ent ke gón harkasá ke belóthit sur bekant. Bale áiay nókén mard báyad ent Hodáwanday ráhá bebit.
1CO 7:40 Albat mani delá é janén sur makant, pa áiay jendá sharter ent. É habarán ke man kanagá án, mani hayálá Hodáay Ruh mani rahshóniá kanagá ent.
1CO 8:1 Nun man hamá warákáni bárawá habara kanán ke pa botán korbánig kanag butagant. Má zánén, anchó ke é bárawá shomá ham gwashét: “Márá sajjahénán elm o zánt hast.” Bale zánt kebr o gorura kárit o mehr rost o rodóma dant.
1CO 8:2 Agan mardomé wati delá zántkáré, gorhá bezán angat á paymá nazánt ke báyad ent bezánt.
1CO 8:3 Bale á mardom ke Hodáyá dósta dárit, Hodá áiá zánt.
1CO 8:4 Gorhá nun hamá warákáni waragay bárawá habara kanán ke pa botán korbánig kanag butagant. Má zánén, anchó ke shomá ham gwashét: “É jaháná botán hecch máná nést” o “abéd cha yakkén Hodáyá dega hodá nést.”
1CO 8:5 Harchont ke ásmáná ham o zeminá ham é paymén chizz hast ke mardom áyán hodá sarpada bant, o choshén chizz báz ent ke hodá o hodáwand gwashaga bant,
1CO 8:6 bale pa má Hodá yakké, bezán hamá Pet ent ke sajjahén chizzi jórh kortagant o má pa hamáiá zendag én o Hodáwand ham yakké, bezán Issá Masih ke sajjahén chizz hamáiay wasilahá jórh butagant o má ham.
1CO 8:7 Bale harkasá é zánt nést. Lahtén mardom tán é wahdi wati botparastiay zamánagay hayálá ent. Wahdé choshén mardom korbánig kortagén góshta warant, áyáni delá é pa botén hodáyán korbánig ant. É mardománi zamir názork ent, paméshká nápáka bit.
1CO 8:8 Bale warák márá gón Hodáyá nazzikka nakant. Agan má mawarén, gantera nabén o bwarén, shartera nabén.
1CO 8:9 Bale bechárét ke shomay é ehtiár o ázáti pa nezórén mardomán mán gisshénókén sengé mabit.
1CO 8:10 Chéá ke agan mardoméay zamir názork bebit o á begendit ke tai dhawlén zántkárén mardomé botáni parasteshgáhá neshtag o warák waragá ent, á ham pa botán korbánig butagén warákáni waragá del o jorata kant.
1CO 8:11 Gorhá é nezórén brát tai zántay sawabá tabáha bit, hamé brát ke eshiay háterá Masih mort.
1CO 8:12 Wahdé shomá é paymá wati brátáni gonahkára bét o áyáni názorkén zamirá thappiga kanét, shomá Masihay gonahkára bét.
1CO 8:13 Nun agan mani warák mani brátá gomráha kant, gorhá man hechbar góshta nawarán ke mani sawabá bráté gomráh mabit.
1CO 9:1 Záná man ázát naán? Kásedé naán? May Hodáwandén Issá, man nadistag? Shomá hamá káray bar o samar naét ke man pa Hodáwandá kortag?
1CO 9:2 Agan degaráni hayálá man kásedé naán, pa shomá pakkáiá kásedé án. Chéá ke shomá wat Hodáwanday ráhá mani kásediay mohr o neshán ét.
1CO 9:3 Hamá ke mani kazáwatá kanant, pa áyán mani jwáb esh ent:
1CO 9:4 Záná márá warag o nóshagay hakk nést?
1CO 9:5 Képá o á dega kásed o Hodáwanday brátán wati jan hamráh ant, gorhá márá báwarmandén janay hamráh kanagay hakk nést?
1CO 9:6 Záná éwaká mani o Bárnábáay sará é hojj ent ke pa wati gozaráná kár bekanén?
1CO 9:7 Kojám sepáhig wati jenday harchay sará kára kant? Kay anguri bágé ábáda kant, bale cha bar o samarán wati bahra nawárt? Kay shepánkiá kant, bale cha shirán wati bahrá nazurit?
1CO 9:8 Man é gappán ensáni aglay bonyádá janagá án? Sharyat anchosha nagwashit?
1CO 9:9 Chéá ke Mussáay Sharyatá nebeshtah ent: “Jóhánaymoshagay wahdá káigeraydapá maband.” Záná Hodáyá bass gókáni gam per ent?
1CO 9:10 Enna, pakkáiá may bárawá gwashagá ent. Haw, é pa má nebisag butag, chéá ke nangár kanók yá jóhánay moshók báyad ent é ométá bedárit ke bahré rasiti.
1CO 9:11 Má ke pa shomá ruhi kesháré keshtag, nun agan cha shomay donyái keshárán pa wat chizzé beronén, eshiay harábi ché ent?
1CO 9:12 Agan é degarán cha shomá hakbahr hast, gorhá may hakbahr wa géshter ent. Bale má wati é hakk kár nabast. Má har chizza saggén chéá ke Masihay wasshén mestágay démá dáraga nalóthén.
1CO 9:13 Shomá nazánét ke parasteshgáhay hezmatkár wati rózigá cha parasteshgáhá gerant? Korbánjáhay hezmatkárán ham cha hamá korbánigán bahré rasit ke korbánjáhá pésh kanaga bant.
1CO 9:14 Hamé paymá Hodáwandá ham hokm dátag, á mardom ke wasshén mestágay jár janagay kárá kanant, wati rózigá cha wasshén mestágay ráhá begerant.
1CO 9:15 Bale man cha é hakkán yakké ham kár nabastag o é gappán ham é ométá nebeshtah kanagá naán ke pa man chizzé kanag bebit. Mana merán bale kassá é hakká nadayán ke maná cha é pahrá zebahr bekant.
1CO 9:16 Man ke wasshén mestágay járá janán, pahra nabandán. Pa man allami ent ke wasshén mestágay járá bekanán. Bazhn o apsóz pa man agan é kárá makanán.
1CO 9:17 Chéá ke agan man é kár gón wati jenday razáyá bekortén, maná mozz rasetagat, bale agan é kár mani sará parz ent, gorhá bezán é zemmawárié ke maná dayag butag.
1CO 9:18 Gorhá mani mozz ché ent? Esh ent ke bé mozzá wasshén mestágay járá janán o wati hamá hakk o ehtiárá sarjamiá kára nabandán ke wasshén mestágay tahá maná hastent.
1CO 9:19 Bell toré ázát án o hechkasay bandig naán, bale angat man watá sajjahénáni golám kortag ke géshter mardom dém pa báwarmandiá byárán.
1CO 9:20 Yahudiáni kerrá man watá Yahudié kort ke Yahudián dém pa báwarmandiá byárán. Sharyatiáni kerrá man watá sharyatié kort ke sharyatián dém pa báwarmandiá byárán, hálánke man wat Sharyatay páband naán.
1CO 9:21 Bésharyatáni kerrá man watá bésharyaté kort ke bésharyatán dém pa báwarmandiá byárán, hálánke man wat cha Hodáay Sharyatá dhann naán o Masihay Sharyatay páband án.
1CO 9:22 Nezórénáni kerrá man watá nezóréné kort ke nezórénán dém pa báwarmandiá byárán. Man sajjahén mardománi kerrá shotagán o harkasay kerrá watá hamáiay paymá kortag ke warhé na warhé lahténá berakkénán.
1CO 9:23 Man é sajjahén kárán wasshén mestágay háterá kanán ke mestágay barkatán sharikdár bebán.
1CO 9:24 Shomá zánét ke tachagi laybá sajjahén layb kanóka tachant, bale éwaká yakké enámá bárt. Gorhá anchó betachét ke enámá bebarét.
1CO 9:25 Harkas ke laybá bahra zurit, báyad ent sharr tamrin bekant o dáshti bebit. Layb kanók pa adároki tájéay katthagá é kárá kanant, bale má pa dáemi tájéay katthagá.
1CO 9:26 Gorhá man bé maksadá natachán o gwátá moshta najanán.
1CO 9:27 Man wati jesmá ázára dayán ke mani páband bebit. Chó mabit ke man degaráni kerrá wasshén mestágay járá bejanán bale wat é laybá besochán.
1CO 10:1 Oo brátán! Mana lóthán shomá bezánét ke may pet o pirokáni sará jambar sáhél at o á sajjahénán daryáyá mán dát o gwastant.
1CO 10:2 Áyán jambar o daryáyá pákshódi kort o Mussáay randgir butant.
1CO 10:3 Sajjahénán yakkén ruhi warák wárt o
1CO 10:4 yakkén ruhi áp nóshet. Chéá ke áyán cha hamá ruhi kóhá áp wárt ke áyáni hamráh at o á kóh Masih at.
1CO 10:5 Bale áyáni nyámá géshterén mardom anchén atant ke Hodá cha áyán razá naat. É mardom gyábáná mortant o kabrestáné ham nasibesh nabut.
1CO 10:6 Nun é chizz butant ke má ebrat begerén o áyáni paymá makanén o badkáriay wáhagá madárén.
1CO 10:7 Botparast ham mabét. Cha áyán lahtén botparast but, anchó ke nebisag butag: Á pa ward o nóshá neshtant o pa layb o labáiá pád átkant.
1CO 10:8 Bénangi ham makanén. Cha áyán lahténá bénangi kort o hamé bénangiáni sawabá yakkén róchá cha áyán bist o say hazár mardom mort.
1CO 10:9 Masihá ham machakkásén. Cha áyán lahténá chakkáset o márán koshtant.
1CO 10:10 Manorondhét ham. Cha áyán lahténá norondhet o tabáh kanóká tabáh kortant.
1CO 10:11 É chizz ke gón áyán butant, ebrat ant o paméshká nebisag butant ke má, bezán áheri zamánagáni mardom ebrat begerén.
1CO 10:12 Agan kasé wati manná mohr óshtátag, wati hayálá bedárit ke makapit.
1CO 10:13 Shomá choshén chakkáséá nakaptagét ke cha ensánay sagg o bardáshtá dhann bebit. Hodá wati kawlay sará óshtátag o naylit ke shomá cha wati bardáshtá géshén chakkáséá bekapét. Agan chakkáséá kapét, Hodá pa shomá ráh o daré pacha kant ke shomá sagget bekanét.
1CO 10:14 Gorhá oo mani dordánagén dóstán! Watá cha botparastiá dur bedárét.
1CO 10:15 Man gón aglmandén mardomán gappá án, mani é habarán wat bechárét o bechakkásét.
1CO 10:16 Barkatay é pyálah ke má pa eshiá shogrgozária kanén, záná hamé gappay nesháni naent ke má Masihay hónay barkatán bahramand én? O hamé nagan ke má chondh chondhia kanén, záná hamé gappay nesháni naent ke má Masihay badanay barkatán bahramand én?
1CO 10:17 Nagan yakké o má báz én, bale yakk badané én, chéá ke má yakkén naganá bahra kanén o warén.
1CO 10:18 Pédáeshi Esráilián bechárét. Korbánjáhá korbánigáni waragay wahdá yakjáh naant?
1CO 10:19 Mani gappay maksad esh ent ke na pa botán korbánig kortagén warákán arzeshé hast o na botáni jendá.
1CO 10:20 Botparast é korbánigán pa palitén ruhána kanant, pa Hodáyá nakanant. Mana nalóthán ke shomá gón palitén ruhán sharikdár bebét.
1CO 10:21 Chó buta nakant ke shomá cha Hodáwanday pyálahá ham benóshét o cha palitén ruháni pyálahá ham. Chó buta nakant ke shomárá Hodáwanday parzónagá ham bahré berasit o palitén ruháni parzónagá ham.
1CO 10:22 Má Hodáwanday hasaddá pád kanaga lóthén? Má cha Hodáwandá zórmandter én?
1CO 10:23 Shomá gwashét ke har chizz jáez ent, bale mana gwashán ke har chizz páedagmand naent. Har chizz jáez ent bale har chizz rost o rodóma nadant.
1CO 10:24 Báyad ent kassá tahná wati gam per mabit, degaráni gami ham per bebit.
1CO 10:25 Har paymén gósht ke kasábay dokkáná rasit, bwaréti o wati zamirá malámat makanét,
1CO 10:26 chéá ke “zemin o zeminay sajjahén chizz Hodáwandayg ant.”
1CO 10:27 Agan anchén mardomé ke báwarmandé naent o shomárá wati lógá dáwata dant o shomay dela lóthit ke berawét, gorhá harché shomay démá dant, bwarét o wati zamirá malámat makanét.
1CO 10:28 Bale agan kaséá shomárá gwasht ke é pa botán korbánig kortagén góshté, gorhá mawaréti, hamá hál dayókay háterá o zamiray háterá.
1CO 10:29 Mani maksad tai zamir naent, hamá mardomay zamir ent. Balkén begwashay: “Degaréay zamir chéá mani ázátiay paysalahá bekant?
1CO 10:30 Agan man gón shogrgozári chizzé warán, gorhá pa é shogr geptagén chizzá chéá malámat kanag bebán?”
1CO 10:31 Bale bezánét, harché ke warét o nóshét yá harché ke kanét, pa Hodáay shán o shawkatá bekanéti.
1CO 10:32 Na Yahudián gonáhéay tahá dawr bedayét, na darkawmán o na Hodáay kelisáyá,
1CO 10:33 anchó ke man johda kanán ke har káray tahá harkasá razá bekanán. Chéá ke man wati jenday páedagá nachárán, sajjahénáni páedagá charán ke áyán neját berasit.
1CO 11:1 Mani randgiriá bekanét, hamá paymá ke man Masihay randgiriá kanán.
1CO 11:2 Man pa é gappá shomay satáyá kanán ke modám maná yáta kanét o hamá rasm o rawáján hamá paymá dáragá ét ke man pa shomá sar kortagant.
1CO 11:3 Bale mana lóthán shomá bezánét ke har mardénay sar Masih ent o har janénay sar mardén ent o Masihay sar Hodá ent.
1CO 11:4 Har mardén ke dwá kanag yá Hodái basháratéay sar kanagay wahdá pa mudáni chér dayagá chizzé sará kant, á wati sará béezzat kanagá ent.
1CO 11:5 Bale har janén ke dwá kanag yá Hodái basháratéay sar kanagay wahdá sarigá sará nakant, á wati sará béezzat kanagá ent. Áiay é kár anchosh ent ke bezán wati sari sátag.
1CO 11:6 Agan janéné sarigá sará nakant, gorhá wati mudán bechent o sakk kasán bekant. Agan wati mudáni chenag yá saray sáyag pa áiá aybé, gorhá sarigá sará bekant.
1CO 11:7 Mardén báyad ent wati sará mapóshit, chéá ke mardén Hodáay dróshom o shán ent. Bale janén mardénay shán ent.
1CO 11:8 Chéá ke mardén cha janéná jórh nabutag, janén cha mardéná jórh butag o
1CO 11:9 mardén pa janéná jórh nabutag, janén pa mardéná jórh butag.
1CO 11:10 Hamé sawabá janén ehtiáray neshánié sará bekant, préshtagáni háterá.
1CO 11:11 Bale angat ham, Hodáwanday ráhá na janéná bé mardéná bit, na mardéná bé janéná.
1CO 11:12 Anchó ke janén cha mardéná jórh but, padá mardén ham cha janéná pédá bit. Bale sajjahén chizz cha Hodáay némagá ant.
1CO 11:13 Shomá wat bechárét o paysalah bekanét, janéná zéba dant ke Hodáay kerrá sardará dwá bekant?
1CO 11:14 Donyá wa shomárá sója dant ke agan mardén drájén mud bedárit, áiá zéba nadant,
1CO 11:15 bale agan janén drájén mud bedárit, é janénay zinat ent. Chéá ke janéná mud pa setrá dayag butag.
1CO 11:16 Bale agan kasé é gappá mamannit o arhi bekant, gorhá mana gwashán ke may dód hamesh ent o Hodáay kelisáyáni ham.
1CO 11:17 Bale é sar o sójá ke mana kanán, eshiá pa shomá satá o saná mán nést, chéá ke shomay báwarmandi mocchi o diwán páedagay badalá, shomárá táwána dayant.
1CO 11:18 Awali habar esh ent ke man eshkotag ke wahdé shomá pa parasteshá moccha bét, shomá nátepák ét o tán haddéá maná é habar báwar ent.
1CO 11:19 Albat, báyad ent shomay nyámá nátepáki bebit tánke chakkásetagén o rástén mardom zánag bebant.
1CO 11:20 Wahdé yakjáha bét, é Hodáwanday shám naent ke shomá waréti,
1CO 11:21 chéá ke waragay wahdá cha shomá kass domigay wadárá nakant o wati shámá wárt. Yakké gozhnaga mánit o dega yakké sharábá mast o malára bit.
1CO 11:22 Shomárá záná lóg nést ke ódá bwarét o benóshét? Yá shomá Hodáay kelisáyá mána nayárét o garib o nézgárán béezzata kanét? Shomárá ché begwashán? Pa é kárá shomay satáyá bekanán? Enna, shomay satáyá nakanán.
1CO 11:23 É habar maná cha Hodáwandá rasetag o man pa shomá sar kortag: Hamá shapá ke Hodáwandén Issá dróhag but, nagané zorti,
1CO 11:24 Hodáay shogri gept, nagani chondh chondh kort o gwashti: “É mani badan ent ke pa shomá korbániga bit. É kárá pa mani yádgáriá bekanét.”
1CO 11:25 Hamé paymá shámá rand áiá pyálah zort o gwashti: “É pyálah nókén ahd o paymán ent o mani hón é ahd o paymánay zamánat ent. Har wahdá ke é pyálahá nóshét, pa mani yádgáriá benóshét.”
1CO 11:26 Chéá ke har wahdá ke shomá é naganá warét o é pyálahá nóshét, shomá Hodáwanday markay járá janét, tán hamá wahdá ke á wat byayt.
1CO 11:27 Gorhá agan kasé Hodáwanday nagan o pyálahá shehm o rahdárén warhéá mawárt, á Hodáwanday badan o áiay hónay gonahkára bit.
1CO 11:28 Harkas báyad ent watá bechakkásit o randá naganá bwárt o pyálahá benóshit.
1CO 11:29 Chéá ke agan kasé Hodáwanday badaná mán mayárit o naganá bwárt o pyálahá benóshit, bezán á wati sezáyá warag o nóshagá ent.
1CO 11:30 Paméshká cha shomá bázéné nezór o nádráh ent o bázéné mortag ham.
1CO 11:31 Bale agan má watá chár o tappás bekanén, márá é sezá narasit.
1CO 11:32 Wahdé Hodáwand may kazáwatá kant, márá adaba dant tánke donyáay hamráhiá mayárbár mabén.
1CO 11:33 Gorhá oo mani brátán! Wahdé pa waragá yakjáha bét, yakdegaray wadárá bekanét.
1CO 11:34 Agan kasé gozhnag ent, wati lógá warag bwárt tánke shomay mocch bayag pa shomá sezáé mayárit. Man ke káyán, shomárá géshter sar o sója kanán.
1CO 12:1 Oo brátán! Mana nalóthán ke shomá cha Pákén Ruhay dátagén nyámatán sahig mabét.
1CO 12:2 Shomá zánét á wahdi ke shomá báwarmand naatét, gomráh kanag o dém pa gongén botán baraga butét.
1CO 12:3 Mana lóthán shomá bezánét, á kas ke cha Pákén Ruhay némagá gappá ent, Issáyá nálata nakant o á kas ke cha Pákén Ruhay némagá gappá naent, gwashta nakant ke Issá Hodáwand ent.
1CO 12:4 Nun báz paymén nyámat hast, bale Pákén Ruh yakké.
1CO 12:5 Báz paymén hezmat hast, bale Hodáwand yakké.
1CO 12:6 Báz paymén kár hast, bale Hodá yakké, hamá Hodá ke sajjahénáni del o daruná é sajjahén kárána kant.
1CO 12:7 Gorhá Pákén Ruhay nyámat har yakkéá dayaga bit ke sajjahénán páedag berasit.
1CO 12:8 É Pákén Ruh ent ke yakkéá hekmatay habaray láhekiá dant o hamé Pákén Ruh degaréá zántay habaray láhekiá.
1CO 12:9 Hamé yakkén Ruh yakkéá imána dant o degaréá drahbakshiay nyámatán.
1CO 12:10 Yakkéá mójezaháni nyámatá dant o degaréá Hodái bashárat sar kanagay nyámatá o yakkéá arwáháni pajjáh áragay. Yakkéá Pákén Ruhay dátagén warh warhén zobánán habar kanagay nyámatá dant o degaréá zobánáni máná kanagay nyámatá.
1CO 12:11 É sajjahén nyámatán hamá yakkén Pákén Ruh bahra kant o hamá ent ke paysalaha kant kayá kojám nyámatá bedant.
1CO 12:12 Anchó ke badan yakké o áiay ázá báz ant o sajjahén ázá hóra bant o yakk badané addha kanant, Masih ham anchosh ent.
1CO 12:13 Chéá ke má, toré pésará Yahudi atén yá darkawm, golám atén yá ázát, má sajjahén gón yakkén Ruhá pákshódi dayag butén tánke yakk badan bebén. Márá sajjahénán pa nóshagá yakkén Ruh dayag but.
1CO 12:14 Bezán badan yakk ázáé naent, cha báz ázáyá addh butag.
1CO 12:15 Agan pád begwashit: “Man wa dasté naán, paméshká badanay bahré naán,” eshiay máná é naent ke á badanay bahré naent.
1CO 12:16 O agan gósh begwashit: “Man wa chammé naán, paméshká badanay bahré naán,” eshiay máná é naent ke á badanay bahré naent.
1CO 12:17 Agan sajjahén badan chammé butén, gorhá mardomá chón eshkotagat? O agan sajjahén badan góshé butén, gorhá mardomá chón bó chetagat?
1CO 12:18 Nun Hodáyá badanay sajjahén ázá, har yakké hamá jágahá ér kortag ke Hodáay wati razá ent.
1CO 12:19 Agan é sajjahén ázá yakk ázáé butén, gorhá eshiay nám chón badan butagat?
1CO 12:20 Nun, ázá báz ant bale badan yakké.
1CO 12:21 Chamm gón dastá gwashta nakant ke maná tai hájat nést. Sar ham gón pádán gwashta nakant ke maná shomay hájat nést.
1CO 12:22 Bale badanay hamá ázá ke gendagá nezórter ant, á báz allami ant.
1CO 12:23 Badanay hamá ázá ke may hayálá áyáni námay gerag béezzatié, má áyán gón géshterén ezzatá setra kanén o chérén ázáyán géshter sharapa dayén.
1CO 12:24 Bale záherén ázá choshén delgóshdária nalóthant. Hodáyá badanay ázá anchó yakjáh kortagant ke kamarzeshén ázá géshter sharap dayag bebant
1CO 12:25 ke badanay tahá nátepáki mabit o ázáyán barábariá yakdomiay gam per bebit.
1CO 12:26 Agan yakk ázáéá dardé per bebit, sajjahén ázá padard bant o agan yakk ázáéá ezzat dayag bebit, sajjahén ázá gón áiá hór gala bant.
1CO 12:27 Nun shomá Masihay badan ét o har yakké áiay ázáé.
1CO 12:28 Hodáyá pa wati kelisáyá é mardom gisshéntant: Awali kásed ant, domi nabi o sayomi ostád ant. Cha eshán o rand hamá mardom ant ke áyáná mójezah kanag, dráh kanag, komakk dayag, rahshóni kanag o Pákén Ruhay dátagén warh warhén zobánán habar kanagay nyámat rasetag.
1CO 12:29 Sajjahén mardom kásed wa naant, sajjahén mardom nabi naant, sajjahén ostád naant, sajjahén mójezah kanók naant,
1CO 12:30 sajjahénán drahbakhshiay nyámat narasetag, sajjahén Pákén Ruhay dátagén warh warhén zobánán habara nakanant, sajjahén mardom é habarán máná korta nakanant.
1CO 12:31 Shomá báyad ent pa masterén nyámatán sakk hodónák bebét. Nun man shomárá sharterén ráhá pésha dárán.
1CO 13:1 Agan man ensán o préshtagáni zobánán habar bekanán bale maná mehr mabit, gorhá man hoshkén dhohl o thimboké án ke góshán karra kant o bass.
1CO 13:2 Agan maná Hodái bashárat sar kanagay nyámat berasit o sajjahén rázán bezánán o sajjahén zántá dar bebarán o mani imán anchó bebit ke kóhán kenzént bekanán, bale maná mehr mabit, gorhá bezán hecché naán.
1CO 13:3 Agan wati sajjahén mál o hastiá hayrát bekanán, wati jendá besóchán o korbán bekanán bale maná mehr mabit, gorhá bezán maná hecch páedaga narasit.
1CO 13:4 Mehr cha sabrá porr ent, mehr mehrabán ent, mehr hasadda nakant, mehr pahra nabandit o goruri nést,
1CO 13:5 béadab naent, watwáh naent, zahra nagipt o badiáni hesábá nadárit.
1CO 13:6 Náensápi mehrá shádána nakant, rásti mehrá shádána kant.
1CO 13:7 Mehr modám bardáshta kant, modám báwara kant, modám poromét ent o har hálatá mohra óshtit.
1CO 13:8 Hodái bashárat halása bant, Pákén Ruhay dátagén zobán halása bant, zánt halása bit, bale mehr hechbar halása nabit.
1CO 13:9 Chéá ke may zánt násarjam ent o má Hodái basháratán sarjamiá sar korta nakanén,
1CO 13:10 bale wahdé kámelia kayt, násarjami halása bit.
1CO 13:11 Man ke chokké atán, man chokkáni paymá habara kort, mani pegr o hayál ham chokkig atant o mani agl o hósh ham, bale nun ke rostag o mazan butagán, man chokki kár o habar yalah dátagant.
1CO 13:12 Annun má sharriá gendagá naén, gwashay anchén ádénké may démá ent ke sáp pésha nadárit, bale yakk wahdé kayt ke har chizz sharriá gendaga bit, dém pa démá. Annun mani zánt násarjam ent, bale yakk wahdé kayt ke man har chizzá sarjamiá zánán, anchó ke Hodá mani bárawá har chizza zánt.
1CO 13:13 Gorhá é sayén chizza mánant: imán o omét o mehr, bale mehr cha drostán master ent.
1CO 14:1 Mehrá wati zendagiay maksad bekanét o pa Pákén Ruhay dátagén nyámatán hodónák bebét, háss pa Hodái bashárat sar kanagay nyámatá.
1CO 14:2 Chéá ke hamá kas ke Pákén Ruhay dátagén zobánéá habara kant, á gón mardomán habará naent, gón Hodáyá habará ent. Mardom wa áiay habarán sarpada nabant. É mardom Pákén Ruhay barkatá ráz o ramzi habara kant.
1CO 14:3 Bale hamá kas ke Hodái bashárat sara kant, á gón mardomán habará ent o pa áyáni rost o rodóm o delbaddhi o táhirá habara kant.
1CO 14:4 Kasé ke Pákén Ruhay dátagén zobánéá habara kant, á watá rost o rodóma dant, bale kasé ke Hodái bashárat sara kant, á kelisáyá rost o rodóma dant.
1CO 14:5 Nun mana lóthán ke cha shomá harkas Pákén Ruhay dátagén zobánán habar bekant, bale géshter é chizzá lóthán ke shomá Hodái bashárat sar bekanét. Parchá ke agan Pákén Ruhay dátagén zobánán habar kanók pa kelisáay rost o rodómá wati habarán máná makant, gorhá Hodái bashárat sar kanók cha é mardomá démáter ent.
1CO 14:6 Brátán! Nun agan man shomay kerrá byáyán o Pákén Ruhay dátagén zobánán habar bekanán, bale elhám o shobénagé yá zánté yá Hodái basháraté yá tálimé mayárán, man shomárá che páedaga dayán?
1CO 14:7 Hamé paymá, hamá sáz chó ke nal yá chang ke sáhesh mán nést, bale tawára kasshant, agan áyáni sor pa red o band mabant, mardom chóna zánant ke kojám tarzá janagá ant?
1CO 14:8 Agan karná nagisshetagén tawáré bekasshit, kay pa jangá tayára bit?
1CO 14:9 Hamé paymá, agan shomá nagisshetagén habara kanét, mardom sarpada nabant ke shomá ché gwashagá ét. Gorhá shomay habarán gwáta bárt.
1CO 14:10 Donyáyá warh warhén zobán hast o hecch zobán bémáná naent.
1CO 14:11 Agan man kaséay gappáni mánáyá mazánán, man pa áiá darámadé án o á pa man darámadé.
1CO 14:12 Shomay hál ham hamesh ent. Shomá ke pa Pákén Ruhay dátagén nyámatán hodónák ét, hamá nyámatáni sarréch bayagay lóthók bebét ke kelisáyá rost o rodóma dayant.
1CO 14:13 Paméshká hamá mardom ke Pákén Ruhay dátagén zobánéá habara kant, dwá bekant ke wati habarán máná kort bekant.
1CO 14:14 Chéá ke agan man Pákén Ruhay dátagén zobánéá dwá bekanán, mani arwáh dwá kant, bale mani agl é dwáyá gón naent.
1CO 14:15 Gorhá ché bekanán? Mana lóthán ke mani arwáh ham dwá bekant o mani agl ham, mani arwáh ham názénk bejant o mani agl ham.
1CO 14:16 Agan taw gón wati arwáhá Hodáyá názénay, gorhá hamá kas ke é chizzá nazánt, tai shogrgozáriay sará chón ámin bekant? Á wa nazánt ke taw ché gwashagá ay.
1CO 14:17 Taw albat sharriay sará shogrgozária kanay, bale tai shogr gerag á dega mardomá rost o rodóma nadant.
1CO 14:18 Hodáay shográ gerán ke Pákén Ruhay dátagén zobánán man cha shomá sajjahénán géshter habara kanán.
1CO 14:19 Bale kelisáay tahá Pákén Ruhay dátagén zobánéá hazárán labzay badalá, panch anchén labz gwashaga lóthán ke mardom sarpad bebant o man áyán tálim dát bekanán.
1CO 14:20 Oo brátán! Shomay pegr o hayál chokki mabant, selkáriá chokkáni dhawlá nábalad bebét, bale pegr kanagá rostagén mardománi paymá bebét.
1CO 14:21 Sharyatá nebeshtah ent: “Hodáwanda gwashit ke cha darzobánáni dapá, cha darámadáni lonthán gón é kawmá habara kanán bale é angat mani habarán gósha nadárant.”
1CO 14:22 Gorhá Pákén Ruhay dátagén zobán pa báwarmandán neshánié naant, pa nábáwarán neshánié ant, bale Hodái bashárat sar kanagay nyámat pa báwarmandán ent, pa nábáwarán naent.
1CO 14:23 Agan kelisáay sajjahén mardom yakjáh bebant o harkas Pákén Ruhay dátagén zobánán gappá bebit o nazántkáré yá nábáwaré byayt, á gwashit shomá ganók ét.
1CO 14:24 Bale agan sajjahén mardom Hodái bashárat sar kanagá bebant o nábáwaré yá nazántkáré tahá byayt, gorhá sajjahén áiay kazáwatá kanant o á ham mannit.
1CO 14:25 Nun ke áiay delay habar záhera bant, dém pa chéra kapit, Hodáay parasteshá kant o gwashit ke béshakk Hodá hamesh ent, shomay hamráh ent.
1CO 14:26 Oo brátán! Gorhá ché kanag bebit? Wahdé shomá moccha bét, yakkéá názénké hast, yakkéá tálim yá elhám o shobénagé yá Pákén Ruhay dátagén zobáné yá zobánay máná kanagé, é sajjahén pa kelisáay rost o rodómá kár bandag bebant.
1CO 14:27 Agan kasé Pákén Ruhay dátagén zobánéá habara kant, do yá géshá gésh say mardom báyad ent bárig bárigá habar bekant o yakké máná bekant.
1CO 14:28 Bale agan ódá máná kanóké mabit, gorhá habar kanók báyad ent kelisáay tahá hámósh bebit o delay tahá gón Hodáyá habar bekant.
1CO 14:29 Báyad ent cha nabián do yá say mardom habar bekant o á dega mardom esháni habarán chár o chakkás bekanant.
1CO 14:30 Agan dega neshtagén mardoméay sará elhámé átk, awali mardom báyad ent habará bass bekant.
1CO 14:31 Shomá sajjahén yakk yakká Hodái bashárat sar korta kanét tánke sajjahén tálim begerant o áyán delbaddhi berasit.
1CO 14:32 Nabiáni arwáh báyad ent nabiáni jenday páband bebit.
1CO 14:33 Chéá ke Hodá bénazmiay Hodá naent, árámi o émeniay Hodá ent, anchó ke palgártagénáni sajjahén kelisáyána bayagá ent.
1CO 14:34 Janén báyad ent kelisáyán hámósh bebant, parchá ke habar kanagay ejázatesh nést. Anchó ke Sharyatá nebeshtah ent, parmánbardár bebant.
1CO 14:35 Agan josté hastesh, lógá cha wati mardán jost bekanant, chéá ke kelisáay diwánán habar kanag pa janénán sharr naent.
1CO 14:36 Záná, Hodáay habaray sarchammag shomá ét, yá Hodáay habar bass shomárá sar butag?
1CO 14:37 Agan kasé watá nabié yá Pákén Ruhay dega nyámatéay wáhond sarpada bit, gorhá bezánt ke harché ke man pa shomá nebeshtah kanagá án, Hodáwanday parmán ent.
1CO 14:38 Harkas ke é habarán máná nayárit, áiay jend mán áraga nabit.
1CO 14:39 Gorhá oo mani brátán! Pa Hodái bashárat sar kanagá hodónák bebét, bale Pákén Ruhay dátagén zobánán habar kanagá manah makanét.
1CO 14:40 Báyad ent har chizz pa sharri o red o banday sará bebit.
1CO 15:1 Nun oo brátán! Mana lóthán shomay delgóshá hamá wasshén mestágay némagá gwar bekanán ke man pa shomá sar kortag, hamá wasshén mestág ke shomá mannetag o áiay sará mohr óshtátagét.
1CO 15:2 Agan é mestágay sará mohr bóshtét ke man pa shomá sar kortag, eshiay barkatá shomárá nejáta rasit, agan na, gorhá shomá hoshká imán áwortag.
1CO 15:3 Cha drostán masterén hál ke maná sar butagat, man pa shomá sar kort. Anchó ke Pákén Ketábán péshgói kortagat, Masih pa may gonáhán mort o
1CO 15:4 kabr kanag but o sayomi róchá padá zendag but, anchó ke Pákén Ketábán péshgói kortagat.
1CO 15:5 Pésará Képáay démá záher but o randá dwázdahén kásedáni démá o
1CO 15:6 randá yakkén wahdá cha panch sadá gésh báwarmanday démá záher but. Cha é báwarmandán géshterén bahr angat zendag ent o lahtén cha é donyáyá shotag.
1CO 15:7 Padá Ákubay démá záher but o randá sajjahén kásedáni démá.
1CO 15:8 Cha sajjahénán o rand mani démá ham záher but, hálánke man chó hamá nonnoká án ke pa wahd pédá nabutag.
1CO 15:9 Kásedáni tahá kamterén man án. Man káseday námá ham nakarzán, chéá ke man Hodáay kelisá ázár dátag.
1CO 15:10 Bale Hodáay rahmatán maná é mardom jórh kort. Mani sará áiay rahmat zawál nabutagant, chéá ke man cha á dega sajjahénán géshter kár kortag, bale é kár man wat nakortagant, maná Hodáay rahmat gón butag.
1CO 15:11 Man butagán yá á dega, parka nakant, má drostán hamé yakkén jár jatag o hamé járay sará shomá imán áwortag.
1CO 15:12 Nun agan é jár janaga bit ke Masih cha mordagán zendag butag, gorhá cha shomá lahtén chón gwashta kant ke mordag padá zendaga nabant?
1CO 15:13 Agan mordag padá zendaga nabant, gorhá Masih ham padá zendag kanag nabutag.
1CO 15:14 O agan Masih padá zendag kanag nabutag, gorhá na may jár janagá páedagé hast o na shomay imáná.
1CO 15:15 Cha ed o ganterén habar esh ent ke gorhá Hodáay bárawá may sháhedi drógé, chéá ke má Hodáay bárawá hamé sháhedi dátag ke áiá mortagén Masih padá zendag kortag. Gorhá bezán Hodáyá Masih padá zendag nakortag, agan mordag padá zendaga nabant.
1CO 15:16 Chéá ke agan mordag padá zendaga nabant, gorhá Masih ham padá zendag kanag nabutag o
1CO 15:17 agan Masih padá zendag kanag nabutag, shomay imáná páedag nést o shomá angat wati gonáháni tahá ét.
1CO 15:18 Gorhá Masihay hamá báwarmand ke cha é donyáyá shotagant, gár o zyán butagant.
1CO 15:19 Agan Masihay sará may omét tahná pa hamé zendá ent, gorhá má cha sajjahén ensánán bazzagter én.
1CO 15:20 Bale rástén gapp esh ent ke Masih cha mordagán padá zendag kanag but o hamá ke cha é donyáyá shotagant, áyáni tahá awali bar o samar ent ke zendag kanag butag.
1CO 15:21 Anchó ke mark yakk mardoméay sawabá átk, mordagáni zendag bayag ham yakk mardoméay sawabá kayt.
1CO 15:22 Anchó ke Ádamay sawabá sajjahéna merant, Masihay barkatá sajjahén zendag kanaga bant.
1CO 15:23 Bale har yakké wati bárigá: awali bar o samar Masih ent o randá Masihay mardom ant ke Masihay áyagay wahdá zendag kanaga bant.
1CO 15:24 Randá áherata bit o Masih sajjahén hokumat o wák o ehtiárán nést o nábuda kant o bádsháhiá Hodáén Petay dastá dant.
1CO 15:25 Chéá ke Masih báyad ent tán hamá wahdá bádsháhi bekant ke sajjahén dozhmenán wati pádáni chérá dawr bedant.
1CO 15:26 Á dozhmen ke áherá nést o nábud kanaga bit, mark ent.
1CO 15:27 Chéá ke Hodáyá sajjahén chizz Masihay pádáni chérá ér kortant. Bale wahdé gwashaga bit ke sajjahén chizz áiay pádáni chérá ér kanag butagant, záher ent ke é chizzáni tahá hamáiay jend gón naent ke sajjahén chizzi Masihay pádáni chérá ér kortagant.
1CO 15:28 Wahdé sajjahén chizz Chokkay pádáni chérá bant, gorhá Chokkay jend hamáiay dastay chérá bit ke sajjahén chizzi Chokkay pádáni chérá ér kortagant ke Hodá har chizzay master bebit.
1CO 15:29 Nun á mardom ke pa mordagán pákshódia kanant, á chéá chó kanant? Agan mordag hechbar jáha najanant, gorhá parchá mardom pa mordagán pákshódia kanant?
1CO 15:30 Má chéá har wahdá watá hataray tahá dawra dayén?
1CO 15:31 Oo brátán! Hamá pahr ke may Hodáwandén Issá Masihay barkatá maná shomay sará hastent, maná hamá pahray sawgend ent ke man har róch gón marká dém pa dém án.
1CO 15:32 Agan Epésosay shahrá man gón rastarán bass pa ensáni maksadéá jang kortag, gorhá maná che páedag rasetag? Agan mordag jáha najanant, gorhá: Byáét warén o nóshén, ke bándá merén.
1CO 15:33 Rad makapét. “Badén hamráh sharrén hél o ádatán harába kanant.”
1CO 15:34 Sharriá hósh o sár kanét o gonáh makanét, chéá ke cha shomá lahtén mardom Hodáyá mána nayárit. É habará kanán ke shomá sharmendag bebét.
1CO 15:35 Gorhá balkén yakké jost bekant ke mordag chón jáha janant o gón chónén badanéá káyant?
1CO 15:36 Oo nádán! Tai keshtagén tánke mamerit, padá zendaga nabit.
1CO 15:37 Keshagay wahdá á badaná nakeshay ke randá rodit, éwaká tohmé keshay, gandom bebit yá dega chizzé.
1CO 15:38 Bale Hodáyá hamá paymá ke erádah kortag, áiá hamá badaná dant, har tohmá áiay jenday badaná dant.
1CO 15:39 Sajjahén badan yakk paymá naant. Ensánay badan dega dhawléné, dalwatáni dega dhawlén ant, báli morgáni dega o máhigáni badan dega dhawlén ant.
1CO 15:40 Ásmáni badan ham hast o zemini ham, bale ásmáni badanáni shán o shawkat degaré o zeminiáni degaré.
1CO 15:41 Róchay wati shán o shawkaté, máhay wati o estáráni wati. Shán o shawkatay hesábá har estár ham cha domiá parka kant.
1CO 15:42 Mordagáni padá jáh janag ham anchosh ent. Badan mirániay hálatá keshaga bit, namirániay hálatá jáha jant.
1CO 15:43 Kamsharapiay hálatá keshaga bit, shán o shawkatay hálatá jáha jant. Nezóriay hálatá keshaga bit, zórmandiay hálatá jáha jant.
1CO 15:44 Jesmi badan keshaga bit, ruhi badan jáha jant. Agan jesmi badan hast, gorhá ruhi badan ham hast.
1CO 15:45 É paymá ham nebisag butag: “Awali ensán, bezán Ádam sahdáré at” o áheri Ádam, zend bakshókén ruhé.
1CO 15:46 Bale pésará ruhi badan nayátk, pésará jesmi badan átk o randá ruhi.
1CO 15:47 Awali ensán cha zeminay háká átk o domi cha ásmáná.
1CO 15:48 Á mardom ke zemini ant, zemini ensánay paymá ant o á ke ásmáni ant, ásmáni ensánay paymá ant.
1CO 15:49 Anchó ke márá hamá zemini ensánay shekl o dróshom gón butag, márá hamá ásmáni ensánay shekl o dróshom ham góna bit.
1CO 15:50 Oo brátán! Mani gapp esh ent ke hón o gósht Hodáay bádsháhiay mirásdár buta nakant o á chizz ke mirán ent, namirániay mirásdára nabit.
1CO 15:51 Gósh dárét, man shomárá rázé dayán. Cha má lahténa namerit, bale má sajjahén badala bén,
1CO 15:52 yakkén damáná, damánokéay tahá, goddhi karná ke damaga bit, má badala bén. Anchó ke karnáay tawár chesta bit, mordag jáha janant o namirána bant o má badala bén,
1CO 15:53 chéá ke halás bayókén jesm báyad ent abadmániay pósháká bepóshit o miránén badan namirániay pósháká.
1CO 15:54 Wahdé halás bayókén jesm abadmániay pósháká póshit o miránén badan namirániay pósháká, gorhá é nebeshtah kortagén habar rásta bit: “Mark ér barag but o zend péróz o sóbén but.”
1CO 15:55 “Oo mark! Tai sób o pérózi kojá ent? Oo mark! Tai dhangkojá ent?”
1CO 15:56 Markay dhang gonáh ent o gonáhay zór Sharyat ent.
1CO 15:57 Bale Hodáay shográ gerén ke Hodáwandén Issá Masihay barkatá márá péróz o sóbéna kant.
1CO 15:58 Gorhá, oo mani dóstigén brátán, mohr bóshtét, hecch chizz shomárá sorént makant. Hamá kár ke Hodáwandá pa shomá gisshéntagant, modám pa hobb o wáhagé hamá kárán goláésh bebét, chéá ke shomá zánét Hodáwanday ráhá shomay kár o zahmat bépáedaga nabant.
1CO 16:1 Nun hamá chandahay bárawá ke shomá pa Yahudiahay palgártagénána kanét, é kárá hamá paymá bekanét ke man gón Galátiahay kelisáyán gwashtag.
1CO 16:2 Har haptagay awali róchá cha shomá harkas, barábar gón wati katth o kamáiá kammé zarr begisshénit o ér bekant. Chó mabit ke wahdé mana káyán, shomá nun chandah kanag bendát bekanét.
1CO 16:3 Man ke káyán, hamá mardomán ke shomá gechéna kanét, áyán kágada dayán o Urshalimá ráwánesha kanán ke shomay dátagén chandahá sar bekanant.
1CO 16:4 Agan mani rawag sharr ent, á mani hamráha bant.
1CO 16:5 Man ke cha Makduniahá gwastán, shomay kerrá káyán. Maná wa chónáhá cha Makduniahá gwazagi ent.
1CO 16:6 Balkén chizzé wahdá shomay kerrá bedárán yá balkén zemestáná shomay kerrá begwázénán, tánke mani sapará, har jáh ke berawán, shomá maná komakk kort bekanét.
1CO 16:7 Annun, ráhe rawáji shomárá gendok kanaga nalóthán. Maná omét ent ke tán chizzé moddatá shomay kerrá bejallán, agan Hodáwanday razá but.
1CO 16:8 Bale tán Pentikástay wahdá hamedá Epésosá án,
1CO 16:9 chéá ke pa mazanén hezmatéá práhén darwázagé pa man pach butag o bázén mardomé mani heláp ent ham.
1CO 16:10 Agan Timutáus átk, hayál bekanét ke shomay kerrá bé torsá nesht bekant, chéá ke á ham mani paymá Hodáwanday hezmatá goláésh ent.
1CO 16:11 Kass áiá kamsharap makant. Pa salámati o wasshi rahi bedayét ke mani kerrá byayt, chéá ke man rahchár án ke á gón brátán byayt.
1CO 16:12 Nun brátén Apulosay bárawá chizzé gwashán. Man báz gwasht ke brátáni hamráhiá Korentá beraw, bale hecch tayár naat ke annun shomay kerrá byayt. Har wahdá móhi berasit, kayt.
1CO 16:13 Hozzhár bét. Wati imánay sará mohr bóshtét. Delá mazan kanét o dhaddh bebét.
1CO 16:14 Harché ke kanét, pa mehr bekanét.
1CO 16:15 Shomá zánét ke Estipánásay lógay mardom Akáyahay damagay awali mardom atant ke imánesh áwort. É pa palgártagénáni hezmatá modám óshtátagant. Gón shomá dazbandia kanán, oo brátán,
1CO 16:16 ke choshén mardománi parmánbardáriá bekanét, bezán harkas ke é kár o zahmatá gón ent, áiay parmánbardáriá bekanét.
1CO 16:17 Man gal án ke Estipánás o Portunátus o Akáikás mani kerrá átkagant o shomay hálikén jágahesh porr kortag.
1CO 16:18 Eshán mani arwáh ham tázag kortag o shomay ham. Choshén mardománi kadrá bezánét.
1CO 16:19 Ásiáay damagay kelisá shomárá salám kanagá ant. Akwilá o Priskilah o hamá báwarmand ke pa parasteshá áyáni lógá yakjáha bant, shomárá sakk báz salám kanagá ant.
1CO 16:20 Sajjahén brát shomárá salám kanagá ant. Gón pákén chokkagán yakdegará salám bedayét.
1CO 16:21 Nun mane Pulos pa shomá é salámán daste wat nebeshtah kanagá án.
1CO 16:22 Harkas ke Hodáwandá dósta nadárit, áiá nálat bát. Oo may Hodáwand! Byá.
1CO 16:23 Hodáwandén Issáay rahmat gón shomá gón bát.
1CO 16:24 Issá Masihay barkatá mani mehr shomárá sajjahénán sar bát.
2CO 1:1 Cha Pulosay némagá, mane Pulos ke cha Hodáay razáyá Issá Masihay kásedé án, o cha may brát Timutáusay némagá, pa Hodáay hamá kelisáyá ke Korentay shahrá ent o pa sarjamén Akáyahay damagay sajjahén palgártagénán.
2CO 1:2 Cha may Hodáén Pet o Hodáwandén Issá Masihay némagá shomárá rahmat o émeni sar bát.
2CO 1:3 Hodáyá, bezán may Hodáwandén Issá Masihay Petá satá o saná bát ke rahmdelén Peté o har paymén delbaddhiay Hodá ent.
2CO 1:4 Har wahdá ke má sakki o sóriáni tahá bén, Hodá márá delbaddhia dant tánke má hamá mardomán delbaddhi dát bekanén ke sakki o sóriáni tahá ant, gón hamé delbaddhiá ke Hodáyá márá dátag.
2CO 1:5 Chéá ke Masihay háterá má haminchok géshter sakki o sória saggén, haminchok geshter márá Masihay barkatá delbaddhi ham rasit.
2CO 1:6 Agan má sakki o sóriáni ámách én, é pa shomay delbaddhi o nejátá ent o agan márá delbaddhia rasit, é ham pa shomay delbaddhiá ent tánke hamé sakkián ke má saggagá én, shomá ham sagget bekanét.
2CO 1:7 Má pa shomá mohkamén óst o omété dárén o zánén ke hamá paymá ke shomá may sakki o sórián sharikdár ét, may delbaddhiá ham sharikdára bét.
2CO 1:8 Oo brátán! Má nalóthén ke shomá hamá sakki o sóriáni hálá sahig mabét ke má Ásiáay damagá saggetagant. Anchén mosibaté may sará kaptagat ke cha may bardáshtá dhann at o má zenday omét ham yalah dátagat,
2CO 1:9 má gwasht ke nun márá markay sezá rasetag. Paméshká é paymá but ke cha wati jendá may omét halás bebit o tawkalá Hodáay sará bekanén ke mordagán zendaga kant.
2CO 1:10 Áiá márá cha markay dapá rakként o angata rakkénit. Má ométa kasshén ke démterá ham márá rakkénit,
2CO 1:11 chéá ke shomá pa má dwá kanagá ét o é pa má komakké. Á wahdá bázéné pa maygi Hodáay shográ gipt, pa hamá nyámatá ke bázén mardoméay dwáyáni barkatá márá rasetag.
2CO 1:12 Nun may pahr esh ent o may zamir sháhedia dant ke é donyáyá má wati zend gón Hodáay dátagén pákdeli o nékniyatiá gwázéntag, háss gón shomá. Má é kár gón donyái dánáié nakortag, gón Hodáay rahmatán kortag.
2CO 1:13 Má pa shomá choshén chizzé nebeshtaha nakanén ke shomá wánti makanét yá sarpad but makanét. Maná omét ent ke
2CO 1:14 hamá paymá ke shomá tán haddéá sarpad butagét, godhsará sharriá sarpada bét ke shomá may sará pahr basta kanét, anchó ke má Hodáwandén Issáay áyagay róchá shomay sará pahra bandén.
2CO 1:15 Man é gappá deljam atán, paméshká man lóthet pésará shomay gendagá byáyán ke shomárá do randá páedag berasit.
2CO 1:16 Mani delá at ke Makduniahay sapará shomay kerrá mán betarrán o cha Makduniahá wátarriay wahdá ham, tánke shomá maná pa Yahudiahay sapará madat bekanét.
2CO 1:17 Man ke é erádahá kanagá atán, bázén pegréá rand wati paysalahon kort. Man donyái warh o paymá paysalaha nakanán o yakkén damáná “haw, haw” o “enna, enna” nakanán.
2CO 1:18 Hodáay sawgend ent ke may gapp pa shomá “haw” o “enna” naent.
2CO 1:19 Chéá ke Hodáay Chokk, Issá Masih ke man o Silwánus o Timutáusá shomay kerrá áiay jár jat, “haw” o “enna” naent, áiay paygám modám “haw” ent.
2CO 1:20 Hodáyá har wádahé ke kortag, Issá Masihay barkatá “haw” ant, paméshká Masihay barkatá má pa Hodáay shán o shawkatá “ámin” ham gwashén.
2CO 1:21 Nun é Hodá ent ke Masihay ráhá márá gón shomá hórigá mohr o mohkama kant. Áiá márá rógen per mosht o
2CO 1:22 márá wati mohri jat o zamánatay hesábá Pákén Ruhi may delá nádént.
2CO 1:23 Hodá sháhed ent, man nalóthet ke shomárá hakkal o neherr bedayán o paméshká Korentá nayátkán.
2CO 1:24 Má shomay imánay sará wájahi kanaga nalóthén, pa shomay shádmániá gón shomá hór kár kanaga lóthén, chéá ke shomá imánay barkatá mohr óshtátagét.
2CO 2:1 Gorhá man erádah kortagat ke padá shomay kerrá mayáyán o shomárá gón wati hakkal o neherrán gamig makanán.
2CO 2:2 Chéá ke agan man shomárá gamig bekanán, gorhá pa mani shádmán kanagá kay pashta kapit? Hamá mardom ke man gamig kortagant?
2CO 2:3 Man paméshká kágadé nebeshtah kort ke wahdé káyán, hamá mardom maná gamig makanant ke áyáni kár mani shádmán kanag ent. Man shomay bárawá deljam án ke mani shádmáni shomay sajjahénáni shádmáni ent.
2CO 2:4 Man pa shomá gón mazanén paréshánié, dardén delé o arsigén chammé nebeshtah kort. Man nalóthet shomárá gamig bekanán, man lóthet shomá bezánét ke shomárá chinchok dósta dárán.
2CO 2:5 Bale agan kasé gamay sawabsáz butag, áiá tahná maná gamig nakortag, géshén magwashán, tán haddéá shomá sajjahéni gamig kortagant.
2CO 2:6 É sezá ke géshterén mardomán áiárá dátag, pa choshén mardoméá bass ent.
2CO 2:7 Nun sharter esh ent ke shomá áiá bebakshét o tasallá bedayét, chó mabit ke zyádahén gam áiá chér betarrénant.
2CO 2:8 Gorhá gón shomá dazbandia kanán ke pa áiá wati mehrá darshán bekanét.
2CO 2:9 Pa shomá nebeshtah kanagay dega sawabé esh at ham ke shomárá bechakkásán o bezánán ke bárén har hesábá parmánbardár ét yá na.
2CO 2:10 Shomá ke yakkéá bakshét, man ham áiá bakshán. Harché ke man bakshetag, agan anchén habaré butag ke bakshagi pakár butag, man Masihay bárgáhá shomay háterá bakshetag,
2CO 2:11 tánke Shaytán márá rad madant, chéá ke má Shaytánay repk o honarána zánén.
2CO 2:12 Wahdé man Masihay wasshén mestágay járay janagá Truásay shahrá sar bután, diston ke Hodáwandá pa man daré pach kortag,
2CO 2:13 bale mani del békarár at, chéá ke mani brát Titus angat ódá nayátkagat. Gorhá man mardom roksat kortant o dém pa Makduniahá shotán.
2CO 2:14 Bale Hodáay shogr ent ke áiá márá Masihay pérózi o sóbmandiay nomáeshay rombá hawár kortag o modám démá bárt o har jágah Masihay bárawá may zántay wasshén bóá cha má tálána kant.
2CO 2:15 Chéá ke Hodáay kerrá má pa hamá mardomán ham Masihay wasshén bó én ke áyán nejáta rasit o pa hamáyán ham ke gár o gomsára bant.
2CO 2:16 Pa yakkéá má markay bó én o marka kárén o pa degaréá zenday bó én o zenda kárén. Bale é kárá kay korta kant?
2CO 2:17 Bázén mardomé pa wati páedagá Hodáay habaray sawdáyá jant, bale má cha áyán naén. Hodá sháhed ent ke má Masihay barkatá pa nékniyati habara kanén, má cha hamá mardomán én ke Hodáyá dém dátagant.
2CO 3:1 Má yakk randé padá watsatáiá shoru kanagá én? Yá lahtén mardomay paymá márá shomay démá sepáreshnámah pésh kanagay zalurat ent, yá márá cha shomá sepáreshnámahay gerag pakár ent?
2CO 3:2 Shomá wat may kágad ét o may delá nebeshtah ét, har yakké eshiá wánit o zánt.
2CO 3:3 Záher ent ke shomá Masihay kágad ét, may hezmatáni bar o samar ét, gón mas o syáhiá nebeshtah nabutagét, gón namiránén Hodáay Ruhá nebeshtah butagét, sengay wánekáni sará nebeshtah nabutagét, ensáni delay wánekáni sará nebeshtah butagét.
2CO 3:4 Masihay barkatá má Hodáay bárgáhá é gappá deljam én.
2CO 3:5 Gapp é naent ke má wat láhek én ke cha wati némagá choshén habaré bekanén. May láheki cha Hodáay némagá ent,
2CO 3:6 hamáiá márá nókén ahdnámagay hezmatkár bayagay láheki dátag. Bale é ahdnámag gón áb o labzá nebeshtah nabutag, Pákén Ruhá naksh kortag, chéá ke ába koshit, bale Ruh zendaga kant.
2CO 3:7 Nun agan hamá hezmat ke áiay ásar mark at o sengáni sará gón áb o labzán nebeshtah at, anchén shán o shawkaté gón ati ke Esráilián Mussáay dém tán dérá cháret nakort, hálánke á shán o shawkat kamm tarrán at,
2CO 3:8 gorhá Pákén Ruhay hezmatay shán wa sakk báz géshter ent.
2CO 3:9 Hamá hezmat ke mayárbária kárit, agan áiá shán o shawkat hastat, gorhá hamá hezmat ke rástáwari o bémayária kárit, áiay shán o shawkat wa sakk báz géshter ent.
2CO 3:10 Á chizz ke shán o shawkatá sarréch at, nun hecch shawkati mán nést, agan gón hamá chizzá dém pa démi bekanay ke áiay shawkat békesás ent.
2CO 3:11 Nun hamá chizz ke halás bayagi at, agan áiá shán o shawkat mán at, gorhá á chizz ke mánit, áiay shán wa sakk báz géshtera bit.
2CO 3:12 Nun ke márá é omét hastent, may del sakk dhaddh ent,
2CO 3:13 má Mussáay paymá naén. Áiá wati dém gón nekábéá póshet tánke Esráili é halás bayókén shán o shawkatay tamáshahá machárant.
2CO 3:14 Bale áyáni agl kór but, chéá ke tán maróchigá kwahnén ahdnámagay wánagay wahdá hamá nekáb angat per ent. Nekáb dur kanag nabutag, hamá wahdá dura kanaga bit ke taw Masihay sará imán byáray.
2CO 3:15 Tán maróchigá ham wahdé Mussáay Sharyat wánaga bit, nekáb áyáni delay sará ent.
2CO 3:16 Bale wahdé kasé démá tarrénit o Hodáwanday némagá kayt, é nekáb dur kanaga bit.
2CO 3:17 Hodáwand Ruh ent o har jágah ke Hodáwanday Ruh ent, ázáti hamódá ent.
2CO 3:18 Gorhá má ke gón bénekábén démá chó ádénkéá Hodáwanday shán o shawkatá záhera kanén, róch pa róch má hamáiay rang o dróshomá gerén o may shán o shawkat géshtera bit. É shán o shawkat cha Hodáwanday némagá kayt, Hodáwand ke Ruh ent.
2CO 4:1 Gorhá má delprósha nabén, chéá ke Hodáyá may sará rahm kortag o márá é hezmatay zemmawárii dátag.
2CO 4:2 Má watárá cha chérén o sharmnákén kárán dur dáshtag. Má na makkária kanén o na Hodáay paygámá badala kanén. Hodá sháhed ent ke má rástiá hecch chéra nadayén o watá sajjahénáni zamiray démá pésha kanén ke may gwáhiá bedayant.
2CO 4:3 O agan may wasshén mestág chér o andém ent ham, gorhá pa hamáyán andém ent ke gár o gomsára bant.
2CO 4:4 Hamá mardom ke Hodáay sará imána nayárant, é jahánay soltáná, bezán Shaytáná áyáni agl kór kortag, tánke wasshén mestágay rozhná dist makanant, hamá rozhn ke Masihay shán o shawkatá záhera kant, Masih ke Hodáay rang o dróshom ent.
2CO 4:5 Chéá ke má wati jenday járá najanén, má jára janén ke Issá Masih Hodáwand ent o má pa Issáaygi shomay hezmatkár én.
2CO 4:6 Hamá Hodá ke gwashti: “Cha taháriá rozhnái bebit”, hamá Hodáyá may delay tahá wati rozhn drapshént tánke má cha Issá Masihay démay nurá Hodáay shán o shawkatá pajjáh byárén.
2CO 4:7 Bale é nur ganjé o gelay darpéá bezán may badaná ent tánke zánag bebit ke é békesásén zór may naent, Hodáayg ent.
2CO 4:8 Má cha har némagá sakki o sóriáni ámách én, bale naproshtagén. Hayrán én, bale náomét naén.
2CO 4:9 Mardom márá ázára dayant, bale Hodá márá yalaha nakant. Márá boná dawra dayant, bale má hákán hawára nabén.
2CO 4:10 Gorhá, márá modám Issáay mark badaná ent o gardagá én, tánke may badaná Issáay zend ham záher bebit.
2CO 4:11 Chéá ke má ke zendag én, modám pa Issáaygi markay dastá dayag bayagá én tánke cha may hákién badaná Issáay zend záher bebit.
2CO 4:12 Gorhá má gón marká dém pa dém én, bale shomá zenday ambázán ét.
2CO 4:13 Nebeshtah ent: “Maná báwar at, paméshká man habar kort.” May imán ham hamé paymá ent, gorhá márá ham báwar ent o paméshká habara kanén.
2CO 4:14 Má zánén, hamáiá ke Hodáwandén Issá padá zendag kort, á márá ham gón Issáyá zendaga kant o shomay hamráhiá márá wati bárgáhá bárt.
2CO 4:15 É sajjahén chizz pa shomay páedagá ant tánke hamá rahmat ke géshá gésh sheng bayagá ent, áiay wasilahá shogrgozári géshá gésh bebit o Hodáyá shán o shawkat berasit.
2CO 4:16 Paméshká má delprósha nabén. Bell toré may záher kwahn tarrán ent, bale may báten har róch nók bayán ent.
2CO 4:17 Chéá ke may annugén kasánén o damánoki sakki o sóri pa má anchén abadmánén shán o shawkaté pédá kanant ke cha har chizzá báláter o porarzeshter ent.
2CO 4:18 Chéá ke may chamm záherén chizzán sakk naant, hamá chizzán sakk ant ke gendaga nabant. Chéá ke á chizz ke záher ant, damánoki ant o á ke gendaga nabant, abadmán ant.
2CO 5:1 Wahdé may zemini gedán tabáha bit, bezán may jesm o ján gón háká hawára bit, má zánén ke márá cha Hodáay némagá lógé hast ke ensáni dastéá nabastag, bezán may ásmáni o abadi badan.
2CO 5:2 Má nálén o pa é gappá zahirwár én ke wati é zemini gedáná gón ásmáni lógá badal bekanén, anchó ke póshák badal kanaga bit.
2CO 5:3 Wahdé má ásmáni pósháká gwará kanén, jándara nabén.
2CO 5:4 Chéá ke tán wahdé ke má é gedáná én, hamé gránén báray chérá nárén o áha kasshén ke jándar mabén. Má lóthén ke géshter setr bebén, tánke harché ke abadi naent, zend áiá ér bebárt.
2CO 5:5 Hamáiá ke márá pa é maksadá tayár kortag Hodá ent o pa zamánat wati Pákén Ruhi márá dátag.
2CO 5:6 Gorhá má dáemá deljam én o zánén ke tánke má wati zemini badaná én, cha Hodáwandá dur én.
2CO 5:7 May zenday bonyád imán ent, záheri chizz naant.
2CO 5:8 Má deljam én o márá washtera bit ke cha badaná dur bebén o Hodáwanday kerrá bebén.
2CO 5:9 Má wati badaná bebén yá cha badaná dhann, may maksad hamesh ent ke Hodáwandá razá bekanén.
2CO 5:10 Chéá ke má sajjahén báyad ent Masihay hakdiwáná pésh bebén, tánke harkasá wati zendá kortagén káráni mozz berasit, sharrén kár bebant yá harábén.
2CO 5:11 Má ke hodátorsiay mánáyá zánén, kóshesta kanén ke é dega mardomán ham sarpad bekanén. Hodá márá sharriá zánt o maná omét ent ke shomay zamir ham márá sharriá zánt.
2CO 5:12 Má shomay kerrá watsatáia nakanén, bale má shomárá mókaha dayén ke may sará pahr bebandét tánke betwánét hamá mardománi passawá bedayét ke delay niyatay badalá zaheri chizzáni sará pahra bandant.
2CO 5:13 Agan má ganók én, gorhá Hodáay háterá ganók én o agan sár én, gorhá pa shomá sár én.
2CO 5:14 Masih márá dósta dárit o má é mehray páband én, chéá ke má zánén, yakké ke sajjahénáni háterá mort, bezán sajjahén mortant.
2CO 5:15 Á pa sajjahénán mort tánke hamá ke zendag ant, cha ed o rand pa wat zend magwázénant, pa hamáiá zend begwázénant ke pa áyán mort o padá zendag but.
2CO 5:16 Gorhá cha ed o rand má hechkasá donyái hesábá nachárén. Má yakk zamánagé Masih donyái hesábá cháret, bale nun chosha nakanén.
2CO 5:17 Paméshká harkas ke Masihay ráhá ent, á nókén mardomé. Áiay kwahnén zend halás butag o nókén zendi shoru butag.
2CO 5:18 É sarjamiá cha Hodáay némagá bit. Áiá Masihay wasilahá márá gón wat wasshán kort o márá sohl o wasshániay hezmatkárii parmát,
2CO 5:19 bezán Hodá Masihay bátená at o donyái gón wat wasshán kort. Áiá mardománi gonáh áyáni jenday sará naladdhetant o sohl o wasshániay paygámay sheng kanagay kári márá dát.
2CO 5:20 Gorhá má Masihay nomáendah én, gwashay Hodá cha may wasilahá wati arz o mennatá shomárá sar kanagá ent. Má cha Masihay némagá gón shomá dazbandia kanén: gón Hodáyá wasshán bebét.
2CO 5:21 Hamá ke bégonáhé at, Hodáyá pa maygi gonáh áiay sará dátant, tánke áiay barkatá má Hodáay bárgáhá rástáwar o bémayár bebén.
2CO 6:1 Má Hodáay hamkáráni hesábá gón shomá dazbandia kanén ke Hodáay rahmat ke shomárá rasetag, áiá zawál makanét.
2CO 6:2 Chéá ke Hodá gwashit: “Man rahmatay wahdá tai habar gósh dásht o nejátay róchá tai madat kort.” Tará gwashán, nun Hodáay rahmatay wahd ent, nun nejátay róch ent.
2CO 6:3 Má hechkasay pádáni démá mán gisshénókén seng dawra nadayén tánke may kár o hezmatay bárawá kasé badén gappé majant.
2CO 6:4 Má cha wati har kárá pésha dárén ke Hodáay hezmatkár én: gón mazanén sagg o bardáshtá, ázár o sakki o sóri o janjáláni tahá,
2CO 6:5 latth o kotth o zendán o shóresháni tahá, hédréchi o shappási o gozhnay tahá,
2CO 6:6 gón páki, gón sarpadi, gón sabr o ópár, gón mehrabáni, gón Pákén Ruhá ke may delá ent, gón rástén mehrá,
2CO 6:7 gón rástiay habaray bayán kanagá, gón Hodáay zórá, gón rástáwariay seláhán ke may rástén o chappén dastá ant,
2CO 6:8 ezzat o béezzati o bannámi o washnámiay tahá. Mardom márá rad dayóka gwashant, bale má rástiay sará óshtátagén.
2CO 6:9 Má námdár én bale kass márá mána nayárit. Chó mordagá én bale esh ent, zendag én. Latth o kotth bayagá én, bale koshag nabutagén.
2CO 6:10 Gamáni tahá én, bale modám shádán én. Garib o nézgár én, bale bázéné sér o ábáda kanén. Márá hecch nést bale har chizzay wáhond én.
2CO 6:11 Oo Korentián! Má gón shomá tachká gapp jatag o wati del pa shomá práh kortag.
2CO 6:12 May del pa shomá práh ent, bale shomay del pa má práh naent.
2CO 6:13 Shomá mani chokk ét, gón má hamá paymá bekanét ke má gón shomá kanagá én, shomá ham wati delá práh bekanét.
2CO 6:14 Gón nábáwarán yakkén jogay chérá mabét. Rástáwari o badkári hamráha nabant o rozhnái gón taháriá hamráhdária nakant.
2CO 6:15 Masih o Shaytánay nyámá hecch hamshawri nést. Báwarmandá gón nábáwará hecch sharikdári nést.
2CO 6:16 Hodáay lóg o bot yakjáha nabant. Chéá ke má namiránén Hodáay lóg én, anchó ke Hodáyá gwashtag: “Man áyáni nyámá jahmenenda bán o áyáni hamráha bán. Man áyáni Hodá bán o á mani kawma bant.”
2CO 6:17 Paméshká Hodáwanda gwashit: “Cha esháni nyámá dar áét o jetá bebét o nápákén chizzán dast majanét, gorhá man shomárá dasta gerán” o
2CO 6:18 “man shomay Peta bán o shomá mani bacch o jenekka bét,” zórmandén Hodáwanda gwashit.
2CO 7:1 Oo mani dordánagén dóstán! Nun ke gón má é kawl o wádah kanag butagant, byáét watá cha har choshén chizzéá páka kanén ke jesm o ruhá nápáka kant o pa hodátorsi dém pa kámelén páki o palgáriá rawén.
2CO 7:2 Márá wati delá jágah bedayét. Má gón hechkasá radén káré nakortag, má hechkas gomráh nakortag, má cha hechkasá nájáezén páedag chest nakortag.
2CO 7:3 Man pa shomay malámat kanagá chó gwashagá naán, man pésará ham gwashtag ke shomá may delá anchó jágah kortag ke may zend o mark gón shomá bandók ent.
2CO 7:4 Shomay bárawá man sakk deljam án. Man shomay námá pa mazanén pahré gerán. Mani del dhaddh ent, may sajjahén sakki o sóriáni tahá ham man galá bál án.
2CO 7:5 Má ke Makduniahá sar butén, ódá ham márá árámá naeshtesh o har némagá ázáresh dát. Dhanná jang o jérhah at o tahá tors.
2CO 7:6 Bale Hodá delpróshán tasallá dant. Hodáyá Titus may kerrá sar kort o márá tasallá dát.
2CO 7:7 Titusay áyagay tasallá yakk némagé o hamá tasallá yakk némagé ke shomá áiárá dátagat. Áiá márá hál dát ke shomárá pa man zahira kant, sakk paréshán ét o shomárá mani gam per ent. Nun man galá bál bután.
2CO 7:8 Mani kágadá shomárá gamig kort, bale man pashómán naán. Pésará ke diston mani kágadá shomárá gamig kortag, pashómán bután, albat shomay é gamá tán dérá nadásht,
2CO 7:9 bale nun man gal án, pa é habará na ke man shomárá gamig kort, paméshká gal án ke é gamá shomárá dém pa tawbahá bort. Shomay gam Hodáay razá at o shomárá cha may némagá hecch paymén táwáné naraset.
2CO 7:10 Hodái gam o andóh dém pa tawbahá bárt o tawbah dém pa nejátá bárt o choshén andóh hecch paymén pashómánié nayárit. Bale donyái gam o andóh marka kárit.
2CO 7:11 Bechárét, é Hodái gamá shomay bátená ché ché pédá kortag: hobb o wáhag, wati bémayáriay sábet kanagay johd, zahr gerag, tors, zahir, jósh o gayrat, ensápdósti. Shomá har paymá sábet kortag ke é káray tahá shomárá gonáh nést.
2CO 7:12 Bell toré á kágad man pa shomá nebeshtah kort, bale hamá mardomay sawabá nakort ke radén kári kortag, na ke áiay sawabá ke gón áiá radén kár butag. Man paméshká nebeshtah kort ke hamá hobb o wáhag ke shomárá pa má hastent, Hodáay bárgáhá shomá wat áiá begendét.
2CO 7:13 Cha eshiá márá delbaddhi rasetag. May delbaddhi wati jáhá, wahdé má dist ke Titus chó gal ent, may wasshi angat géshter but. Chéá ke shomá sajjahénán áiay arwáh tázag kortag.
2CO 7:14 Man áiay kerrá shomay sará pahr bastagat o shomá mani sar jahl nakort. Harché ke má gón shomá gwashtagat, rást at o hamé paymá Titusay kerrá shomay sará may pahr bandag ham rást at.
2CO 7:15 Wahdé Titus yátá kapit ke shomá chón parmánbardár atét o shomá chón pa mazanén ezzat o ehterámé á wasshátk kort, pa shomá áiay mehr géshtera bit.
2CO 7:16 Man gal án ke shomay bárawá har hesábá deljam án.
2CO 8:1 Nun oo brátán, má shomárá hamá rahmatáni bárawá hál dayaga lóthén ke Hodáyá Makduniahay kelisáyáni sará gwáréntagant.
2CO 8:2 Gránterén chakkás o ázmáesháni tahá, bell toré sakk tangdast butagant, bale áyáni del cha shádmániá sarréch butag o áyáni ganjén daspachi záher butag.
2CO 8:3 Man sháhed án ke áyán pa wasshi o razá wati gonjáeshá dátag o cha gonjáeshá gésh ham.
2CO 8:4 Cha má sakk báz dazbandiesh kort ke márá palgártagénáni é chandahá gón bayagay ezzatá bedayét.
2CO 8:5 Má cha áyán inchok komakkay omét ke dáshtagat, áyán angat géshter dát. Awalá watárá Hodáwanday dastá dátesh o gón Hodáay razáyá watárá may dastá ham dátesh.
2CO 8:6 Gorhá má Titus parmát ke taw é nékén kár ke Korentiáni kerrá bongéj kortag, eshiá sarjam ham bekan.
2CO 8:7 Gorhá anchó ke shomá sajjahén chizzán démá ét, imáná, gapp o bayáná, zántá, kámelén johdá o wati hamá mehrá démá ét ke má shomay tahá pédá kortag, nun má lóthén ke shomá é nékén kárá ham démá bebét.
2CO 8:8 Man shomárá hokm nadayagá án, man bass lóthán ke shomay mehrá gón degaráni johdá dém pa dém bekanán o shomay mehray rástiá bechakkásán.
2CO 8:9 Chéá ke shomá may Hodáwandén Issá Masihay rahmatána zánét. Hálánke á har chizzay málek at, bale shomay háterá watá garib o nézgári kort ke gón áiay nézgáriá shomárá Hodái ganj berasit.
2CO 8:10 É káray bárawá pa shomá mani sar o sój esh ent: pári shomá awali atét, tahná chandah kanagay jendá na, é káray erádahá ham awali atét.
2CO 8:11 Nun wati bendát kortagén kárá wati gonjáeshay hesábá sarjam bekanét, tánke é káray sarjami shomay hobb o wáhagá sábet bekant.
2CO 8:12 Chéá ke chandah hamá wahdá zurag buta kant ke dayók pa hobb o wáhagé bedant o áiay gonjáeshá ham bebit, cha áiay gonjáeshá dhann mabit.
2CO 8:13 Má nalóthén ke shomá janjál bebét o degaré ásudag bebit. Má lóthén ke barábari bebit.
2CO 8:14 É wahdi shomay ganjén mál o hasti áyáni zaluratán puraha kant, tánke agan yakk róché shomay dast tang but, áyáni mál o hasti shomay zaluratán purah bekant. É dhawlá barábari barjáh dáraga bit,
2CO 8:15 anchó ke nebeshtah ent: “Á kasá ke báz zortag, pa áiá gésh naant o á kasá ke kammok zortag, pa áiá kamm naant.”
2CO 8:16 Hodáay shogr ent ke áiá Titusay delá pa shomá hamá hobb o wáhag pédá kortag ke maná pa shomá hastent.
2CO 8:17 Chéá ke tahná may dazbandiay sará na, Titus pa hobb o wáhagé, cha wati wasshiá shomay kerrá pédák ent.
2CO 8:18 Má áiay hamráhiá hamá brátá ham ráh dayagá én ke sajjahén kelisá áiay ezzatá kanant, chéá ke á, wasshén mestágá sheng kanagá ent.
2CO 8:19 Eshiá abéd, á cha kelisáyáni némagá gechén kanag butag ke chandahay rasénagay é hezmatá may hamsapar bebit ke má é kárá pa Hodáwanday shán o shawkatá o gón hobb o wáhagé kanagá én.
2CO 8:20 Má nalóthén ke é ganjén chandahay entezámay bábatá kasé márá bohtámé bejant.
2CO 8:21 Márá é gam per ent ke kojám kár sharr ent, tahná Hodáwanday démá na, mardománi démá ham.
2CO 8:22 Esháni hamráhiá má wati dega bráté ham ráh dayagá én. É brátá har warhá pésh dáshtag ke pa má chinchok hobb o wáhagi hast o nun áiay hobb o wáhag géshter ent, chéá ke shomay bárawá deljam ent.
2CO 8:23 Titusay bárawá begwashán ke hamé hezmatá ke man pa shomá kanagá án, á mani hamkár ent o wati á brátáni bárawá begwashán ke kelisáyáni kásed ant o Masihay shán o shawkat ant.
2CO 8:24 Gorhá é mardománi démá wati mehrá sábet bekanét o kélisáyán pésh bedárét ke shomay sará may pahr bébonyád naent.
2CO 9:1 Hamá kár ke pa palgártagénán bayagá ent, zalurat naent ke man áiay bárawá pa shomá nebeshtah bekanán.
2CO 9:2 Chéá ke pa komakk kanagá shomay hobb o wáhagá zánán o pa é gappá sará man Makduniahay báwarmandáni kerrá shomay sará pahr bastag. Man áyáni kerrá gwashtag ke shomá, bezán Akáyahay báwarmand, párigén ent pa chandahay dayagá tayár ét. Shomay hodónákiá bázénéay hobb pád kort.
2CO 9:3 É brátán paméshká ráh dayagá án ke sábet bebit ke má é bárawá shomay sará watsará pahr nabastag o paméshká ham ke shomá tayár bebét, anchó ke man gwashtag ke shomá tayár ét.
2CO 9:4 Chó mabit ke Makduni mani hamráhiá byáyant o begendant ke shomá tayár naét. Gorhá may sar jahla bit o shomay ganter, chéá ke shomay bárawá má deljam butagén.
2CO 9:5 Gorhá man cháret ke lázom ent gón brátán dazbandi bekanán o pésará shomay kerrá ráhesh bedayán ke hamá ganjén chandahay tayáriá bekanant ke shomá kawl kortag, tánke é kár daspachén sawgátéay hesábá sarjam bebit, pa nádelkasshi dátagén baksheshéay hesábá na.
2CO 9:6 Gapp esh ent ke harkas ke kamma keshit, kamma ront o harkas ke báza keshit, báza ront.
2CO 9:7 Harkas haminchok bedant ke delia gwashit, pa nádelkasshi o majburi na, chéá ke Hodá hamá kasá dósta dárit ke cha wati wasshi o razáyá dant.
2CO 9:8 Hodá wati sajjahén rahmatán shomay sará gwárénta kant, tánke shomay kerrá modám zaluratay har chizz bebit o shomá har nékén kárá démá bebét,
2CO 9:9 anchó ke nékkáréay bárawá nebeshtah ent: “Áiá rétkag, gón daspachi nézgáráná dátagi, áiay nékdeli abadmán ent.”
2CO 9:10 Nun Hodá ke dehkáná pa keshagá tohm o pa waragá nagana dant, shomay gonjáeshá gésha kant o shomárá nékdeliay sharrén mozzé dant.
2CO 9:11 Shomay kerrá hecch chizzay kammia nabit tánke shomá har wahdá pa daspachi dát bekanét o wahdé má é chandahá rasénén, shomay é daspachiay sawabá Hodáay shogr gerag bebit.
2CO 9:12 É hezmatá ke shomá kanagá ét, é tahná palgártagénáni zaluratán puraha nakant, bázén mardoméay delá cha Hodáay shográ sarréch ham kant.
2CO 9:13 Shomay é kár o hezmatay sawabá mardom Hodáay satá o sanáyá kanant, chéá ke pa áyán o pa dega harkasá shomay daspachi sháhedié ke shomá Masihay wasshén mestágay parmánbardár ét.
2CO 9:14 Á pa mazanén hobb o wáhagé pa shomá dwá kanant parchá ke Hodáyá wati ganjén rahmat shomay sará gwáréntagant.
2CO 9:15 Hodáay shogr ent pa áiay sawgátá ke cha tawsipá dhann ent.
2CO 10:1 Mani bárawá gwashaga bit ke shomay démá “narm” o shomay báposhtá “trond” án, mane Pulosay jend Masihay békebri o narmiay barkatá shomárá mennata kanán o
2CO 10:2 dazbandia kanán ke wahdé shomay kerrá káyán, á paymá ke man gón lahtén mardomá trond bayagay erádah kortag, maná majbur makanét ke inkas trond bebán. É hamá mardom ant ke may bárawá gwashant ke é mardom donyái zendé gwázenagá ant.
2CO 10:3 Chéá ke bell toré má é donyáyá én, bale donyái warh o paymá janga nakanén.
2CO 10:4 May jangi seláh donyái seláh naant. May seláhán Hodái zóré mán ke dozhmenay kalátán bekarójant o bepróshant.
2CO 10:5 Har gorunáki ke hodázántiay démá óshtit, má áiá karójén o dawra dayén. Har sarkasshén pegr o hayálá bandiga kanén tánke é pegr Masihay parmánbardár bebant.
2CO 10:6 Wahdé shomá sharriá parmánbardár bét, gorhá má tayára bén ke har náparmániay sezáyá bedayén.
2CO 10:7 Shomá záheri chizzána chárét. Agan kasé deljam ent ke Masihayg ent, wati delá padá hayál bekant ke má ham hamáiay paymá Masihayg én.
2CO 10:8 Hodáwandá pa shomay rost o rodómá márá wák o ehtiár dátag, pa shomay gár o tabáh kanagá na, o agan man é wák o ehtiáray sará kammé géshén pahré bebandán, angat ham sharmendaga nabán.
2CO 10:9 Mana nalóthán ke shomá chó hayál bekanét ke mani kágadáni maksad shomay torsénag ent,
2CO 10:10 chéá ke lahténa gwashit: “Áiay kágad wazandár o zórmand ant, bale áiay jendá ke genday, nezór ent o gappi béarzesh ant.”
2CO 10:11 Choshén mardom báyad ent bezánant ke má yakkén paymá én, o é chizz durá cha may kágadán záher ent o dém pa démá cha may kár o kerdán.
2CO 10:12 Márá é hemmat nést ke watá gón hamá mardomán yakk bekanén yá watá gón hamáyán dém pa dém bekanén ke watsatáia kanant. É mardom watá gón yakdomiá dém pa dém o kesása kanant. É nádánié.
2CO 10:13 Má géshén pahra nabandén, bass tán hamá haddá pahra bandén ke Hodáyá pa má gisshéntag, o shomá ham may pahray hadday tahá ét.
2CO 10:14 Má géshén pahra nabandén, agan shomay kerrá mayátkénén, gorhá may pahr géshéné butagat. Bale má awali mardom atén ke Masihay wasshén mestág tán shomay kerrá ham sar kort.
2CO 10:15 Degaráni káráni sará géshén pahr ham nabandén, bale ométa kasshén haminchok ke shomay imán rost o rodóma kant, shomay nyámá may káráni patth o perh master bebit,
2CO 10:16 tánke cha shomay hadd o simsarán hamá dém wasshén mestágay járá jat bekanén. Má nalóthén hamá káray sará pahr bebandén ke degaréay hand o damagá pésará kanag butag.
2CO 10:17 Harkas ke pahra bandit, Hodáwanday sará pahr bebandit.
2CO 10:18 Chéá ke á kas ke wati satáyá wata kant, á kabula nabit, hamá mardom kabula bit ke Hodáwand áiay satáyá kant.
2CO 11:1 Omét ent ke shomá mani nádániá kammé bardáshta kanét. Shomá chónáhá bardásht kanagá ét.
2CO 11:2 Man pa shomá anchó hasaddig án ke Hodá hasaddig ent. Man shomárá yakk mardéay námgept kortag, bezán Masihay tánke shomárá chó pákdámonén neshtagén jenekkéá Masihay bárgáhá pésh bekanán.
2CO 11:3 Bale mani tors esh ent, anchó ke már átk o pa makkári Hawái gomráh kort, shomay del á paymá gomráh mabit o pa Masihá shomay pákdámoni o wapádári zawál mabit.
2CO 11:4 Chéá ke agan kasé shomay kerrá byayt o hamá Issáyá abéd ke má áiay jár jatag, dega Issáéay járá bejant, shomá pa ásáni eshiá mannét. Yá hamá Ruh ke shomárá rasetag, áiá abéd shomárá dega ruhé bedant, shomá mannét. Yá hamá wasshén mestág ke shomá mannetag, áiá abéd shomárá dega wasshén mestágé bedant, eshiá ham mannét.
2CO 11:5 Bale mani hayálá man cha é “thuhén kásedán” kamter naán.
2CO 11:6 Man balkén habarzánté n aán, bale bézánté ham naán. Má é chizz har paymá shomay démá sarjamiá sábet kortag.
2CO 11:7 Záná, mani gonáh hamesh at ke man Hodáay wasshén mestág bé mozzá shomárá sar kort o é paymá watárá jahl jat tánke shomá borz bebét?
2CO 11:8 Man á dega kelisá “poletant”, bezán man cha áyán zarr gept ke shomay hezmatá bekanán.
2CO 11:9 Wahdé shomay kerrá atán o chizzéá gatth bután, hechkasay sará bár nabután, chéá ke cha Makduniahá átkagén brátán mani zalurat purah kortant. Man was kortag o angata kanán ke shomay sará báré mabán.
2CO 11:10 Anchó ke Masihay rásti mani delay tahá mohkam ent, hamé paymá é habar ham mohkam ent ke Akáyahay damagá kas maná gwashta nakant ke é pahrá maband.
2CO 11:11 Chéá? Parchá ke man shomárá dósta nadárán? Hodá zánt ke man shomárá dósta dárán.
2CO 11:12 É kárá ke annun kanagá án, eshiá démterá ham kanán, tánke hamá mardom ke móhéay shóházá ant ke pahr bebandant o begwashant má gón Pulos o áiay hamráhán barábar én, áyán é móh marasit.
2CO 11:13 Choshén mardom drógén kásed o prébkárén mozzur ant ke Masihay kásediay póstá gwará kanant.
2CO 11:14 É hayráni gappé naent, chéá ke Shaytánay jend ham nuránién préshtagéay póstá gwará kant.
2CO 11:15 Gorhá é hayráni gappé naent ke áiay hezmatkár ham rástáwariay hezmatkáráni póstá gwará bekanant. Eshán wati kár o kerdáni hesábá sezá rasit.
2CO 11:16 Padá gwashán ke kass maná ahmaké sarpad mabit. Bale agan shomá maná ahmaké sarpada bét, gorhá maná bardásht bekanét, tánke kammé pahr bebandán.
2CO 11:17 Gorhá é pahr ke eshiay sará man deljam án, é Hodáwandi habaré naent, ahmaki habaré.
2CO 11:18 Bázén mardomé donyái mardománi paymá pahr bandagá ent, bell ke man ham pahra bandán.
2CO 11:19 Shomá aglá sarréch ét, paméshká pa galé ahmakáni bardáshtá kanét.
2CO 11:20 Rástén habar esh ent ke wahdé kasé shomárá goláma kant yá shomay mál o hastiá polit yá cha shomá páedag chesta kant yá watá mazana kant yá shomárá shahmáta jant, shomá bardáshta kanét.
2CO 11:21 Maná é gappay janag lajja kant ke má pa é káráni kanagá sakk nezór én. Man ahmakéay hesábá gappá án ke agan choshén chizzé hast ke kasé áiay sará pahr bast bekant, gorhá man ham á chizzay sará pahra bandán.
2CO 11:22 É drógén kásed Ebráni ant? Man ham Ebránié án. Esráili ant? Man ham Esráilié án. Ebráhémay nasl o padréch ant? Man ham Ebráhémay nasl o padréch án.
2CO 11:23 É mardom Masihay hezmatkár ant? Nun ganóki gappé janagá án, man masterén hezmatkáré án. Man géshter kár kortag, géshter zendáná neshtagán, géshter latth wártag o báz randá gón marká dém pa dém butagán.
2CO 11:24 Yahudián maná panch randá shallák o hayzarán jatag, har randá cha chell shalláká bass yakké kamm.
2CO 11:25 Man say randá latth janag butagán, yakk baré sengsár kanag butagán, say randá mani bójig proshtag o shapé o róché man daryáyá gwázéntag.
2CO 11:26 Man bázén saparé jatag o gón warh warhén hatarán dém pa dém butagán: kawráni hatar, dhong o rahzanáni hatar, hamkawmáni hatar, darkawmáni hatar, shahray hatar, gyábánay hatar, daryáay hatar o drógén brátáni hatar.
2CO 11:27 Man sakk báz kár kortag o zahmat kasshetag, báz randá béwábi saggetag, shod o tonn distag o báz randá waragay móh narasetag, gwahr o sardi pa jándari gwázéntagant.
2CO 11:28 Eshán abéd, har róch sajjahén kelisáyáni gam mani sará ent.
2CO 11:29 Harkasay nezóri maná nezóra kant. Harkas ke cha Hodáyá wati démá tába dant, man tahá sochán.
2CO 11:30 Agan pahr bandagi ent, gorhá man wati nezóriáni sará pahra bandán.
2CO 11:31 Hodá, bezán Hodáwandén Issáay Peta zánt ke man dróg bandagá naán, hamá Hodá ke tán abad satá o saná karzit.
2CO 11:32 Wahdé man Dameshká atán, Arétás bádsháhay wáliá shahray darwázagán sepáhig nádént ke maná dazgir bekanant.
2CO 11:33 Maná mardomán lachéay tahá kort o cha shahray diwálay darigéá jahlá ér dát o cha áiay dastá rakketán.
2CO 12:1 Man báyad ent pahr bebandán, bell toré cha eshiá páedagé narasit. Nun man cha Hodáwanday némagá rasetagén elhám o shobénagáni habará kanán.
2CO 12:2 Man yakk Masihi báwarmandé zánán ke chárdah sál pésar sayomi ásmáná barag butag, bárén gón jesmá yá bé jesmá, nazánán, Hodá zánt.
2CO 12:3 Man é gappá ham zánán ke é mard, gón jesmá yá bé jesmá, nazánán, Hodá zánt,
2CO 12:4 baheshtá barag butag o anchén gapp eshkotag ke ensán áyán gwashta nakant, anchén gapp ke ensáná áyáni kanagay ejázat nést.
2CO 12:5 Man choshén mardoméay sará pahra bandán, wati sará na, bass wati nezóriáni sará pahra bandán.
2CO 12:6 Pahr bandag belóthán ham, ahmaké nabán, chéá ke rásténá gwashán. Bale pahréza kanán, tánke hechkas cha é kárán ke man kanagá án o cha é gappán ke man janagá án maná master makant,
2CO 12:7 bell toré maná é hayrán kanókén elhám o shobénag rasetagant. Paméshká mani badaná konthagé mán ke man gwát magerán, bezán Shaytánay kásedé mani sar o bahtán kaptag ke maná azáb bekant tánke man gorunák mabán.
2CO 12:8 Say randá man Hodáwanday kerrá peryát kortag ke eshiá cha man dur kan.
2CO 12:9 Bale Hodáwandá maná gwasht: “Tará mani rahmat wat bass ant, chéá ke mani zóray kámeli nezóriay tahá ent.” Gorhá man pa bázén galé wati nezóriáni sará pahra bandán tánke Masihay zór o wák mani hamráh bebit.
2CO 12:10 Paméshká Masihay háterá wati nezóriáni tahá gal án, bad o rad o sakki o ázár o moshkeláni tahá gal án. Chéá ke wahdé nezóra bán, gorhá zórmanda bán.
2CO 12:11 Man watárá ahmaké jórh kortag, bale maná shomá majbur kortag. Báyad ent shomá mani sepáresh bekortén, chéá ke man cha é “thuhén kásedán” kamter naán, bell toré hecché naán.
2CO 12:12 Man gón sabr o ópáré rástén kásedéay sajjahén nesháni shomay démá záher kortagant, bezán ásmáni nesháni o hayrán kanókén kár o mójezah.
2CO 12:13 Shomá cha é dega kelisáyán che paymá kamter ét? Paméshká ke man hechbar shomay sará báré nabutagán? Mani é “náensápiá” pahell kanét.
2CO 12:14 Nun man tayár án ke sayomi randá shomay gendagá byáyán o shomay sará báré nabán. Shomay mál o hastiá nalóthán, shomay jendá lóthán. Chónáhá ham, chokkáni zemmawári naent ke pa pet o mátán bechenant o ér bekanant, pet o mátáni zemmawári ent ke pa chokkán bechenant o ér bekanant.
2CO 12:15 Harché ke maná hast, man pa galé shomay sará harcha kanán, wati sáhá ham pa shomá nadra kanán, bale shomá maná paméshká kamter dósta dárét ke man shomárá sakk báz dósta dárán?
2CO 12:16 É gappá bemannét ke man shomay sará báré nabutagán. Angat shomá gwashét ke man makkárén mardomé án o man shomárá pa honar geptag.
2CO 12:17 Záná, man anchén mardomé shomay kerrá ráh dátag ke shomárá poletagi?
2CO 12:18 Man gón Titusá gwashtag ke shomay kerrá byayt o may brát ham man gón áiá ráh dát. Titusá wa shomárá napoletag, yá poletagi? Mani o Titusay ráh o rawesh yakk naat? Má yakráh naatén?
2CO 12:19 Balkén shomá tán é wahdi é hayálá butagét ke má shomay démá watá washnám kanaga lóthén. Na, má Masihay barkatá Hodáay bárgáhá habará butagén. Oo dordánagén dóstán! Má harché ke kanagá én, pa shomay rost o rodómá kanagá én.
2CO 12:20 Mani tors esh ent ke wahdé shomay kerrá káyán, begendán ke shomá á mardom naét ke mana lóthán o shomá begendét ke man á mardom naán ke shomá lóthét. Man shomay kerrá arh o korh, hasadd, zahr o hezhm, watwáhi, bohtámjani, báposhtá habar kanag, gorunáki o bénazmi gendaga nalóthán.
2CO 12:21 Chó mabit ke wahdé man káyán, Hodá maná shomay démá sharmendag bekant o man bázénéay sawabá gamig bebán ke áyán yakk wahdé gonáh kortag, nápáki o bénangi kortag o hawá o hawasáni golám butagant o angat tawbahesh nakortag.
2CO 13:1 É sayomi rand ent ke shomay gendagá pédák án. Har habaray rásti gón do yá say mardomay sháhediá sábet kanag bebit.
2CO 13:2 Man pésará ham shomárá habardár kort, domi randá ke shomay kerrá átkán, o nun ham ke shomay kerrá naán, padá gwashán ke wahdé mana káyán, á mardomán ke gonáh kortag, na áyáni sará rahma kanán o na é dega sajjahénáni sará.
2CO 13:3 Shomá sabuta lóthét ke é Masih ent ke cha mani zobáná habara kant. Masih shomay démá nezór naent, shomay tahá zórmand ent.
2CO 13:4 Rásté ke Masih nezóriá salib kasshag but, bale nun cha Hodáay zór o wáká zendag ent. Hamé paymá má ham Masihay nezóriá sharikdár én, bale pa shomaygi cha Hodáay zórá gón áiá zendaga bén.
2CO 13:5 Watá bechakkásét ke bárén shomárá imán hast yá na. Watá bechakkásét. Nazánét ke Issá Masih shomay bátená ent? Agan nazánét, gorhá shomá é chakkásá kámyáb nabutagét.
2CO 13:6 Bale má kámyáb butagén. Ométa kanán ke shomá é habará zánét.
2CO 13:7 Má cha Hodáyá dwá lóthén ke shomá radén káré makanét, pa é maksadá na ke mardom begendant ke má chakkásá kámyáb butagén, pa é maksadá ke shomay kár o kerd sharr bebant, bell toré zaherá má kámyáb mabén.
2CO 13:8 Chéá ke má rástiay helápá óshtáta nakanén, bass pa rástiá óshtén.
2CO 13:9 Má toré nezór bebén ham, agan shomá zórmanda bét, má gala bén. May dwá ent ke shomá kámel bebét.
2CO 13:10 É habarán paméshká anchén wahdéá nebeshtah kanagá án ke man shomay kerrá naán ke wahdé káyán, majbur mabán wati wák o ehtiárá pa trondi kár bebandán, hamá wák o ehtiár ke Hodáwandá maná pa shomay rost o rodómá dátag, pa shomay gár o tabáh kanagá na.
2CO 13:11 Oo brátán! Goddhi habar esh ent ke shádmán bebét. Pa kámeliá johd bekanét. Yakdomiá delbaddhi bedayét. Hamdel bebét. Pa émeni zend begwázénét. Mehr o émeniay Hodá gón shomá góna bit.
2CO 13:12 Yakdegará gón pákén chokkagéá salám bedayét.
2CO 13:13 Eday sajjahén palgártagén mardom shomárá salám kanagá ant.
2CO 13:14 Hodáwandén Issá Masihay rahmat o Hodáay mehr o Pákén Ruhay hamráhdári shomárá sajjahénán gón bát!
GAL 1:1 Cha Pulosay némagá, mane Pulos ke kásedé án o mani kásedi cha ensánáni némagá yá cha hásén mardoméay némagá naent, cha Issá Masih o Hodáén Petay némagá ent, hamá Hodá ke Issá Masihi cha mordagán zendag kort.
GAL 1:2 É sajjahén brát ke gón man yakjáh ant, é kágad cha áyáni némagá ent ham. Pa Galátiahay kelisáyán.
GAL 1:3 Cha may Hodáén Pet o Hodáwandén Issá Masihay némagá shomárá rahmat o émeni sar bát.
GAL 1:4 Issá Masihá watá pa may gonáháni dur kanagá nadr kort ke may Hodáén Petay wáhagay barkatá márá cha annugén harábén zamánagá berakkénit.
GAL 1:5 Hodáay shán o shawkat abad tán abad barjáh bát. Anchosh bát. Ámin.
GAL 1:6 Man hayrán án ke shomá pa dega “wasshén mestágéá” chón zutt hamá Hodáyá yalah kanagá ét ke shomárá tawári kortag ke Masihayrahmatáni chérá zend begwázénét.
GAL 1:7 Albat dega wasshén mestág nést, bale lahtén mardom hast ke shomárá mán gisshénagá ant o Masihay wasshén mestágá badal kanaga lóthant.
GAL 1:8 Tantaná agan má yá cha ásmáná átkagén préshtagé é wasshén mestágay badalá ke má shomay kerrá jár jatag, dega mestágéay járá bejant, áiá nálat bát.
GAL 1:9 Anchó ke má pésará gwashtag, nun man padá gwashán, agan kasé shomay kerrá hamá wasshén mestágay badalá ke shomárá pésará rasetag, dega mestágéay járá bejant, áiá nálat bát.
GAL 1:10 Annun man mardománi washnódiá lóthagá án yá Hodáay? Man mardománi wassh kanagay johdá naán. Agan man angat mardománi wassh kanagay johdá buténán, Masihay hezmatkáré naatán.
GAL 1:11 Oo brátán! Shomárá gwashán, hamá wasshén mestág ke man shomay kerrá jár jatag, ensánay sázetagéné naent.
GAL 1:12 Chéá ke é mestág maná cha ensánéay némagá narasetag o na ke kaséá maná dars dátag, é maná cha Issá Masihay nemagá elháméá rasetag.
GAL 1:13 Shomá mani pésarigén zenday bárawá eshkotag ke man Yahudiáni dinay hesábá gwázéntag. Man Hodáay kelisá sakk báz ázár dátag o johdon kortag ke kelisáyá tabáh bekanán.
GAL 1:14 Cha wati bázén hamkawmén hamsarókéá géshter Yahudi dinay páband butagán o wati pet o piroki dódáni barjam dáragá sakk porjósh butagán.
GAL 1:15 Bale Hodáyá ke maná cha mátay lápá gechén kortagat, cha wati rahmatay barkatá maná tawár jat o paysalahi kort
GAL 1:16 ke wati Chokká pa man záher bekant tánke man darkawmán áiay Chokkay mestágá sar bekanán. Á wahdi man eshtáp eshtápá cha kassá sar o sój nagept o
GAL 1:17 dém pa Urshalimá pa hamá mardománi gendagá nashotán ke cha man pésar pa kásediá gechén kanag butagatant. Arabestáná shotán o randá Dameshká wátarr bután.
GAL 1:18 Say sál gwast o nun Urshalimá Képáay didárá shotán o bass pánzdah róchá gón áiá dáshton.
GAL 1:19 Man ódá á dega kásed nadistant, man bass Hodáwanday brát Ákub dist.
GAL 1:20 Bechárét, harché ke pa shomá nebeshtah kanagá án, Hodá sháhed ent ke dróg naant.
GAL 1:21 Randá Suriah o Kilikiahay damagán shotán.
GAL 1:22 Masihay hamá báwarmand ke Yahudiahay kelisáyá ant, mani jendesh nadistagat,
GAL 1:23 bass eshkotagatesh ke may ázár dayók nun wat hamá imánay járá janagá ent ke yakk wahdé áiay tabáh kanagay randá butag.
GAL 1:24 Gorhá é mardomán mani sawabá Hodáay satá o saná kort.
GAL 2:1 Gorhá chárdah sálá rand man Bárnábáay hamráhiá padá Urshalimá shotán, man Titus ham gón wat bort gón.
GAL 2:2 Elháméay sawabá shotán o wasshén mestág áyáni démá bayánon kort, hamá mestág ke man pa darkawmán jár janagá án. Hamá mardom ke kelisáay sarók zánaga butant, man gón áyán jetá gend o nend kort, tánke bezánán ke bépáedagén tach o tágé kanagá nabutagán o naán.
GAL 2:3 Titus ham ke mani hamráh at, bell toré Yunánié at, bale pa sonnatá majbur kanag nabut.
GAL 2:4 Sonnat kanagay habar paméshká chest but ke lahtén drógén “brát” may nyámá potertagat ke may jásusiá bekanant o hamá ázátiá ke márá cha Issá Masihay barkatá hastent, sarpad bebant tánke márá golám bekanant.
GAL 2:5 Bale má pa damánéá ham áyáni démá sar jahl nakort tánke wasshén mestágay rásti pa shomá bemánit.
GAL 2:6 Á ke kelisáay tahá sarók zánaga butant, áyán mani tálimáni tahá hecch chizz gésh nakort. Chónáhá ham mani kerrá é gappá hecch arzesh néstat ke á chinchok námdár ant, chéá ke Hodá ru o ryá nakant.
GAL 2:7 Mani tálimáni tahá chizzé gésh kanagay badalá, á sarpad butant ke sonnat nakortagénáni kerrá wasshén mestágay jár janagay zemmah maná dayag butag, anchosh ke sonnat kortagénáni kerrá é járay janagay zemmah Petrosá dayag butag.
GAL 2:8 Hamá Hodá ke Petrosá wák o twán dayagá at ke pa sonnat kortagénán áiay kásed bebit, hamá Hodá maná ham wák o twán dayagá at ke pa sonnat nakortagénán áiay kásed bebán.
GAL 2:9 Ákub o Képá o Yuhanná ke kelisáay menok zánaga butant, wahdé sarpad butant ke maná rahmatay é sawgát rasetag, wati rástén dastesh mani o Bárnábáay némagá pa hamkáriá shahárt ke má darkawmáni kerrá berawén o á, sonnat kortagénáni kerrá berawant.
GAL 2:10 Áyán cha má bass haminchok lóthet ke nézgárán béhayál makanén o man wat ham cha pésará pa hobb o wáhagé hamé kárá kanagá atán.
GAL 2:11 Wahdé Képá Antákiahá átk, man paméshká áiay jenday démá, áiay helápá pád átkán ke á mayárig at.
GAL 2:12 Gapp esh ent ke cha Ákubay némagá lahtén mardomay áyagá pésar, Képáyá gón darkawménbáwarmandán waráka wárt, bale wahdé é mardom átkant, áiá watá cha darkawmán dur dásht o áyáni nazzikká nayátk, chéá ke cha sonnat kanagay mannókán torseti.
GAL 2:13 Képáay é dotal o dopóstiá é dega Yahudi báwarmand hamráh butant. Á degarán bell, Bárnábá ham áyáni dotal o dopóstiá gón kapt o gomráh but.
GAL 2:14 Bale wahdé man dist ke é mardom wasshén mestágay rástén ráhá rawagá naant, sajjahénáni démá gón Képáyá gwashton: “Taw wat Yahudié ay o angat wati zendá Yahudiáni dhawlá nagwázénay, darkawmáni dhawlá gwázénay, gorhá darkawmán parchá hojja kanay ke Yahudiáni dhawlá zend begwázénant?”
GAL 2:15 Má pédáeshi Yahudi én o cha “gonahkárén darkawmán” naén,
GAL 2:16 bale angat má zánén ke mardom Sharyatay randgiriay sawabá pák o palgára nabit, Issá Masihay sará báwar kanagay sawabá pák o palgára bit. Má Issá Masihay sará báwar kortag tánke Masihay sará báwaray sawabá pák o palgár bebén, Sharyatay randgiriay sawabá na, chéá ke Sharyatay randgiriay sawabá kass pák o palgára nabit.
GAL 2:17 Bale hamá wahdá ke má Masihay barkatá pák o palgár bayaga lóthén, agan zánag but ke má wat ham gonahkár én, gorhá? Masih gonáhay hezmatá ent? Na, hechbar na.
GAL 2:18 Nun agan man hamá chizzán padá bebandán ke man wat karótkagant, gorhá sábet kanagá án ke Sharyatay próshóké án.
GAL 2:19 Chéá ke wahdé man zánt ke Sharyatá dáshta nakanán, man Sharyatay chammán mortán ke pa Hodáyá zendag bebán.
GAL 2:20 Man Masihay hamráhiá salib kasshag bután. Nun é mardom ke zendag ent, é man naán, Masih ent ke mani tahá zendag ent. É jesmi zendagi ke maná hastent, maná Hodáay Chokkay sará báwar kanagay sawabá hastent ke hamáiá maná dóst dáshtag o wati jendi pa man nadr kortag.
GAL 2:21 Man Hodáay rahmatán pádmála nakanán, chéá ke agan páki o palgári Sharyatay randgiriay sawabá berasetén, gorhá Masihay marká hecch máná nabutagat.
GAL 3:1 Oo béaglén Galátián! Kayá shomárá sehr kortag? Issá Masihay salib kasshagay kessah gón shomá anchó pakkáiá bayán kanag but ke har chizz purah shomay chammáni démá záher but.
GAL 3:2 Man cha shomá bass yakk chizzé zánaga lóthán, shomárá Pákén RuhSharyatay randgiriay sawabá rasetag yá wasshén mestágay eshkonag o báwar kanagay sawabá?
GAL 3:3 Haminchok béagl ét? Shomá wati sapar, Pákén Ruhay barkatá bendát kortag. Nun gón ensáni johdá menzelá sar bayaga lóthét?
GAL 3:4 Shomá inchok sakki o sóri mopt o náhudagá kasshetag? Maná báwara nakant.
GAL 3:5 Hamá ke shomárá Pákén Ruha bakshit o mójezah pésha dárit, é kárán paméshká kant ke Sharyatay randgiriá kanagá ét? Yá paméshká ke shomá wasshén mestágá gósh dárag o báwar kanagá ét?
GAL 3:6 Ebráhémá bechárét, áiá Hodáay sará báwar kort o áiay é báwar pa áiá páki o palgárié hesáb but.
GAL 3:7 Paméshká deljam bebét, Ebráhémay asligén chokk hamá ant ke imána kárant.
GAL 3:8 Pákén Ketábá péshgói kort ke Hodá chón darkawmán imánay sawabá pák o palgára kant. Hodáyá Ebráhémay kerrá wasshén mestágay jár pésará jat, gwashti: “Donyáay sajjahén kawm tai sawabá barkata gerant.”
GAL 3:9 Gorhá hamá ke imánay ráhá zurant gón Ebráhémá hawár barkata gerant, hamá Ebráhém ke imánay ráhi zortag.
GAL 3:10 Á ke Sharyati káráni sará tawkala kanant, áyáni sará nálat ent. Chéá ke Pákén Ketábá nebeshtah ent: “Harkas ke dáemá Sharyatay Ketábay sajjahén nebeshtaháni páband naent o áyáni sará kára nakant, á nálatié.”
GAL 3:11 Nun é habar záher ent ke cha Sharyatay randgiriá kass Hodáay bárgáhá pák o palgára nabit, chéá ke Pákén Ketába gwashit: “Hamá ke imánay barkatá pák o palgár ent, hamá zendaga mánit.”
GAL 3:12 Bale Sharyatay bonyád imán naent, anchó ke nebeshtah ent: “Hamá ke Sharyatay sará kára kant, hamé káráni wasilahá zendaga mánit.”
GAL 3:13 Hamá nálat ke may sará at Masihá wati sará zort o é dhawlá márá cha Sharyatay nálatá móketi, chéá ke nebeshtah ent: “Harkas ke dáray sará dranjag but, nálatié.”
GAL 3:14 Masihá márá móket ke cha áiay wasilahá Ebráhémay barkat darkawmán sar bebit o cha imánay ráhá márá hamá Pákén Ruh berasit ke Hodáyá kawl kortag.
GAL 3:15 Brátán! Man cha har róchigén zendagiá mesálé dayán. Ensáni ahd o karáré ham ke gisshénaga bit, randá na kasé áiá nákár korta kant o na áiay tahá chizzé gésh korta kant.
GAL 3:16 Nun kawl gón Ebráhémá o gón Ebráhémay chokká kanag butant. Pákén Ketába nagwashit ke “gón tai chokkán”, bezán gón bázénéá. Pákén Ketába gwashit: “Gón tai Chokká”, bezán gón yakkéá o é Masih ent.
GAL 3:17 Mani habaray maksad esh ent ke Sharyat ke chár sad o si sálá pad átk, á ahd o paymáná nákára nakant ke Hodáyá cha pésará gisshéntag o é paymá Hodáay kawlá ham nákára nakant.
GAL 3:18 Agan mirás Sharyatay bonyádá ent, gorhá bezán kawlay bonyádá naent, bale Hodáyá cha wati rahmatá é mirás Ebráhémárá kawlay bonyádá dátag.
GAL 3:19 Gorhá Sharyat chéá dayag butag? Sharyat ensánay náparmániáni sawabá dayag butag. Préshtagán áwort o myánjigerén mardoméay, bezán Mussáay dastá dát o tán hamá wahdá kárámad at ke hamá Chokk, bezán Masih byayt ke áiay áyagay kawl dayag butagat.
GAL 3:20 Nun myánjiger do némagay nyámá bit, bale Hodá yakké o áiá myánjigeray hájat naent.
GAL 3:21 Gorhá Sharyat Hodáay kawláni helápá ent? Hechbar chosh naent, chéá ke agan anchén Sharyaté dayag butén ke abadmánén zendi dát bekortén, gorhá páki o palgári allam Sharyatay bonyádá butagat.
GAL 3:22 Bale Pákén Ketába gwashit ke har ensán gonáhay bandig ent. Bass Issá Masihay sará báwar kanagay sawabá wádah hamá mardomán dayaga bit ke Masihay sará imána kárant.
GAL 3:23 Bale imánay é ráhay pach bayagá o pésar má Sharyatay bandig atén, bezán tán imánay záher bayagá zendáni atén.
GAL 3:24 Gorhá, Sharyat may sarparast butag ke márá tán Masihá sar bekant, tánke má imánay sawabá pák o palgár hesáb bebén.
GAL 3:25 Imán ke átkag, nun má sarparastéay dastay chérá naén.
GAL 3:26 Shomá sajjahén Issá Masihay sará imánay barkatá Hodáay chokk ét,
GAL 3:27 chéá ke shomá sajjahén Masihay námá pákshódi dayag butagét o Masihayg ét o nun á shomay setr ent ke shomá póshetag.
GAL 3:28 Hodáay kerrá park o pér nést ke shomá Yahudi ét yá darkawm, golám ét yá ázát, mardén ét yá janén, chéá ke shomá sajjahén Issá Masihay barkatá yakk ét.
GAL 3:29 Agan shomá Masihayg ét, gorhá shomá Ebráhémay padréch ét o kawlay hesábá gón Ebráhémá hawár Hodáay mirásá bahramand ét.
GAL 4:1 Mani habaray maksad esh ent ke tán hamá wahdá ke mirásdár nábáleg ent, mirásdár o goláméay nyámá parké nést, bell toré mirásdár har chizzay málek ent.
GAL 4:2 Bale tán hamá wahdá ke petá pa áiá paysalah kortag, á kapil o sarparastáni dastay chérá ent.
GAL 4:3 Gorhá má ham, tánke nábáleg atén, é donyáay ráh o rahbandáni golám atén.
GAL 4:4 Bale wahd ke átk, Hodáyá wati Chokk dém dát. Chokk ensáné but o cha pédáeshá Sharyatay rahbandáni chérá at,
GAL 4:5 tánke hamáyán bemókit ke Sharyatay chérá ant o Hodá márá bezurit o wati chokk bekant.
GAL 4:6 Hodáyá wati Chokkay Ruh paméshká may delán jágah dátag ke má Hodáay chokk én. Ruh kukkárá ent: “Abbá! Oo mani Pet!”
GAL 4:7 Paméshká taw nun golámé naay, taw chokké ay. Nun ke Hodáay chokk ay, gorhá Hodáyá tará wati mirásdár kortag.
GAL 4:8 Pésará, hamá wahdá ke shomá Hodá nazántag, hamá chizzáni golám butagét ke á wati zátá hodá naant.
GAL 4:9 Bale nun ke shomá Hodáyá zánét, yá rástterén gapp esh ent ke Hodá shomárá zánt, gorhá chón nezór o békárén ráh o rahbandáni némagá pera tarrét? Yakk randé padá hamesháni golám bayaga lóthét?
GAL 4:10 Shomá róch o máh o mósom o sáláni rasmána dárét.
GAL 4:11 Maná pa shomá torsit, ke balkén man shomay sará mopt o náhudagén johdé kortag.
GAL 4:12 Brátán! Gón shomá dazbandia kanán, mani paymá bebét, chéá ke man cha Sharyatá ázát kanag butagán o nun shomay paymá án. Shomá pésará wa pa man hecch badi nakortag.
GAL 4:13 Shomá zánét ke awali randá ke man shomay kerrá wasshén mestágay jár jat, mani áyagay sawab nádráhié at.
GAL 4:14 Bell toré mani jesmi hálat pa shomá chakkásé at, bale shomá maná béarzesh nazánt o dawr nadát. Angat shomá maná anchó dast gept, gwashay man Hodáay préshtagé atán, gwashay Issá Masihay jend atán.
GAL 4:15 Shomay á shádmáni nun kojá shotag? Chéá ke man gwáhi dáta kanán ke agan shomay wasá butén, shomá wati chamm ham kasshetag o maná dátagatant.
GAL 4:16 Gorhá nun man shomay dozhmen jórh butagán ke gón shomá rástén habará kanán?
GAL 4:17 É mardom pa porjóshi shomay randá kaptagant, bale esháni niyat sharr naent. É mardom shomárá cha má sendaga lóthant ke shomá pa eshán porjósh bebét.
GAL 4:18 É sharrén gappé ke shomá modám porjósh bebét, tahná á wahdá na ke man shomay kerrá án, bale pa sharrén chizzéá porjósh bebét.
GAL 4:19 Mani chokkán! Man padá pa shomá chellagi dardán án, tán hamá wahdá ke pakká záher bebit ke Masih shomay del o daruná neshtag.
GAL 4:20 Drégatá man annun shomay kerrá buténán o man betwántén gón shomá pa narmtawári habar bekortén, chéá ke hayrán án shomárá chón bekanán.
GAL 4:21 Maná begwashét, shomá ke Sharyatay páband bayaga lóthét, nazánét ke Sharyat ché gwashit?
GAL 4:22 Chéá ke Pákén Ketábá nebeshtah ent ke Ebráhémá do mardénchokk hastat, yakké cha móledén janá o yakké cha ázáténá.
GAL 4:23 Hamá chokk ke áiá cha móledén janá but, cha ensáni wáhagá pédá but, bale é dega chokk ke cha ázátén janá pédá but, Hodáay kawlay barkatá pédá but.
GAL 4:24 É gapp mesál ant, chéá ke é doén janén do ahd o paymánay namunah ant. Yakk ahd o paymáné cha Sináay kóhá kayt o golámén chokk pédá kant. É Hájer ent.
GAL 4:25 Mesálay habará, Hájer Sináay kóh ent, hamá kóh ke Arabestáná ent o annugén Urshalimay dhawlá ent, chéá ke áiay jend o áiay chokk golámén zendé gwázenagá ant,
GAL 4:26 bale á Urshalim ke borzá ent, ázát ent o may mát ent.
GAL 4:27 Chéá ke nebisag butag: “Shátkámi kan, oo santhén janén, taw ke hecch chokk áworta nakanay! Pa shádmáni kukkár kan, taw ke chellagi dard nakasshetag! Chéá ke yalah dátagén janénay chokk cha hamáiay chokkán géshter ant ke mardi hast.”
GAL 4:28 Oo brátán! Shomá, Esákay dhawlá kawlay chokk ét.
GAL 4:29 Á wahdá, hamá chokk ke cha ensáni wáhagá pédá butagat, hamá chokká ázár dayagá at ke cha Hodáay Ruhay zór o barkatá pédá butagat o tán róche maróchigá ham hamé paym bayagá ent.
GAL 4:30 Bale Pákén Ketáb ché gwashit? “Móledén jan o áiay chokká gallén, chéá ke móledén janay chokk gón ázátén janay chokká hechbar hammirása nabit.”
GAL 4:31 Gorhá, brátán! Má móledén janay chokk na én, ázátén janay chokk én.
GAL 5:1 Masihá márá ázát kort ke má ázát bebén. Gorhá mohr bóshtét, watárá padá golámiay jogay chérá rawagá maylét.
GAL 5:2 Gósh dárét! Mane Pulos shomárá gwashán ke agan shomá wati sonnat kanag esht, gorhá shomárá cha Masihay némagá hecch paymén páedagé narasit.
GAL 5:3 Á mardom ke wati sonnat kanaga kellit, man pa deljami gón áiá gwashán ke pa taw allam ent ke sajjahén Sharyatá bedáray.
GAL 5:4 Shomá ke gón Sharyatay dáragá Hodáay chammán watá pák o palgára zánét, bezán shomá cha Masihá sendag butagét. Shomá cha Hodáay rahmatán dur butagét.
GAL 5:5 Bale imánay sawabá, má cha Pákén Ruhay barkatá hamá páki o palgáriay wadárá én ke márá áiay omét hast.
GAL 5:6 Chéá ke Issá Masihay ráhá sonnat bayag o nabayagay máná yakk ent, tahná hamá imáná máná hast ke cha mehray ráhá watá záhera kant.
GAL 5:7 Shomá sharr démá rawán atét. Kayá shomárá cha rástiay parmánbardáriá dásht?
GAL 5:8 Shomay gwánk janóká, bezán Hodáyá wa shomárá nadásht.
GAL 5:9 Toshoké homir sajjahén ártá homiréna kant.
GAL 5:10 Maná Hodáwanday sará setk ent o deljam án ke shomay delá dega hayála nayayt. Á mardom ke shomárá mán gisshénagá ent, á wati malámá porra kant, harkas ke bebit.
GAL 5:11 Oo brátán! Man wa nun sonnat kanagay wázá kanagá naán o paméshká ázár dayag bayagá án. Agan man sonnat kanagay wáz bekortén, gorhá cha salibay paygámá kassá bad nabortagat.
GAL 5:12 Hamá ke shomárá janjála kanant, watá gwahtag kanátant.
GAL 5:13 Oo brátán! Shomá gwánk janag butagét ke ázát bebét, bale chó mabit ke é ázáti pa shomay gonahkárén tab o sareshtá móhé bebit. Eshiay badalá pa mehr yakdomiay hezmatá bekanét.
GAL 5:14 Chéá ke sajjahén Sharyatay majg hamé yakkén hokm ent: “Wati hamsáhegá wati jenday paymá dóst bedár.”
GAL 5:15 Shomá yakdomiá chillénag o waragá ét, bechárét, yakdomiay dastá tabáh mabét.
GAL 5:16 Nun mana gwashán, gón Pákén Ruhá hamgám bebét. É paymá shomá gonahkárén tab o sareshtay lóth o wáhagáni randá nakapét.
GAL 5:17 Chéá ke gonahkárén tab o sareshtay wáhag Pákén Ruhay heláp ant o Pákén Ruhay wáhag gonahkárén tab o sareshtay heláp ant. É gón yakdomiá jangá ant o paméshká shomá á kárána nakanét ke kanagesha lóthét.
GAL 5:18 Bale agan Pákén Ruh shomay rahshóniá bekant, gorhá shomá Sharyatay páband naét.
GAL 5:19 Gonahkárén tab o sareshtay kár záher ant: syahkári, nápáki, waylánki,
GAL 5:20 botparasti, sehr o jádugeri, naprat, jang o jadal, hasadd, hezhm, watwáhi, sest o séd, goróhbandi,
GAL 5:21 kénag, mast o malári, ayyáshi o hamé paymén chizz. Anchó ke man pésará shomárá habardár kortag, annun padá habardára kanán, harkas ke é paymén kára kant, áiá Hodáay bádsháhiá hecch mirása narasit.
GAL 5:22 Bale Pákén Ruhay bar o samar esh ant: mehr, shádeh, émeni, sabr o ópár, mehrabáni, sharri, wapádári,
GAL 5:23 narmtabi o dásht. Choshén chizzáni helápá hecch Sharyat o kánun nést.
GAL 5:24 Hamá ke Issá Masihayg ant, áyán wati gonahkárén tab o saresht gón áiay hawas o sellén wáhagán yakjáh salib kasshetag.
GAL 5:25 Nun ke má Pákén Ruhay redá zenda gwázénén, gorhá gón Pákén Ruhá hamgám bebén.
GAL 5:26 Má báyad ent watgalá o watpasond mabén, yakdomiá sókaló madárén o gón yakdomiá hasadd madárén.
GAL 6:1 Brátán! Agan shomá sahig butét ke kasé gonáhay tahá kaptag, shomá ke Pákén Ruhay hesábá zenda gwázénét, áiá pa narmi padá rástén ráhá byárét. Bale wati delgóshá bedárét ke wat chakkáséá makapét.
GAL 6:2 Sakkiay wahdá yakdomiay komakká bóshtét. É dhawlá shomá Masihay kánunay parmánbardáriá kanét.
GAL 6:3 Agan kasé watá mazana lékit bale hecché naent, á watá rad dayagá ent.
GAL 6:4 Harkas wati jenday kárán bechárit. Gorhá áiay pahr kanagay sawab, áiay wati jenday kára bant, gón degaréay kárán dém pa démesha nakant.
GAL 6:5 Chéá ke harkas wati jenday káráni zemmawár ent.
GAL 6:6 Hamá mardomá ke ostád Hodáay habará sója dant, báyad ent á har sharrén chizzá gón wati ostádá bahr bekant.
GAL 6:7 Rad makapét. Hodá kalág bandag buta nakant, chéá ke mardom hamá chizzá ke keshit, hamáiá ronit.
GAL 6:8 Hamá mardom ke wati jenday gonahkárén tab o sareshtay redá keshit, cha gonahkárén tab o sareshtá tabáhia ronit. Bale hamá ke Pákén Ruhay redá keshit, Pákén Ruhay barkatá abadmánén zenda ronit.
GAL 6:9 Sharrén káray kanagá dam mabarén, chéá ke agan hemmatá dawr madayén, pa wahda ronén.
GAL 6:10 Gorhá tán hamá wahdá ke márá móh hast, byáét gón sajjahénán sharria kanén o hás gón hamáyán ke báwarmand ant.
GAL 6:11 Nun ke man pa shomá gón wati jenday dastá nebeshtah kanagá án, bechárét ke gón chónén mazan mazanén harpán nebeshtah kanagá án.
GAL 6:12 Hamá ke mardomán gón jesmi kárán wassh kanagay johdá ant, shomárá pa sonnat o borroká majbur kanagá ant. É mardom tahná paméshká chosh kanagá ant ke watá cha hamá ázárán berakkénant ke Masihaysalibay sawabá rasant.
GAL 6:13 Hamá mardom ke sonnat butagant ham, á wat Sharyatay pábandiá korta nakanant, bale angat lóthant ke shomá sonnat kanag bebét ke á shomay sonnat kanagay sará pahr bebandant o wati tawsipá bekanant.
GAL 6:14 Man hechbar pahr mabandátán, abéd cha may Hodáwandén Issá Masihay salibay sará, ke hamé salibay sawabá donyá pa man mortag o man pa donyáyá.
GAL 6:15 Chéá ke sonnat bayag o nabayagay máná yakk ent. Tahná é chizzá máná hast ke taw nókén mardomé bebay.
GAL 6:16 Émeni o rahm pa hamáyán ke é rahbanday sará zenda gwázénant, bezán pa Hodáay mahluká.
GAL 6:17 Cha ed o rand kass pa man janjál addh makant, chéá ke hamá ázár ke man pa Issáaygi kasshetagant, áyáni neshán angat mani badaná per ant.
GAL 6:18 Brátán! May Hodáwandén Issá Masihay rahmat gón shomá gón bát. Anchosh bát. Ámin.
EPH 1:1 Cha Pulosay némagá, mane Pulos ke cha Hodáay razáyá Issá Masihay kásedé án, pa hamá palgártagénán ke Epésosay shahrá ant o Issá Masihay wapádár ant.
EPH 1:2 Cha may Hodáén Pet o Hodáwandén Issá Masihay némagá shomárá rahmat o émeni sar bát.
EPH 1:3 Hodáyá, bezán may Hodáwandén Issá Masihay Petá satá o saná bát ke áiá Masihay barkatá márá nadistagén jahánay har paymén ruhi barkat bakshátagant.
EPH 1:4 Wati mehray sawabá, Hodáyá cha jahánay jórh bayagá pésar Masihay barkatá márá gechén kort ke Hodáay chammán pák o béayb bebén.
EPH 1:5 Áiá cha pésará erádah kortagat ke Issá Masihay barkatá márá bezurit o wati chokk bekant. É áiay wati jenday razá o wáhag at.
EPH 1:6 Gorhá má Hodáay porshawkatén rahmatá názénén, hamá rahmat ke wati dóstigén Chokkay barkatá márá békesás bakshátagi.
EPH 1:7 Hodáyá wati Chokkay hónay wasilahá márá móket o cha wati ganjén rahmatán may gonáhi bakshetant o
EPH 1:8 márá békesás hekmat o dánáii bakshát.
EPH 1:9 Hodáyá cha wati jenday razá o wáhagá wati erádahay ráz pa má záher kort, hamá erádah ke gón Masihay áyagá purah o sarjam bayagi at.
EPH 1:10 Áiay erádah ent ke wahdé har kár sarjama bit, man ásmán o zeminay har chizzá pa wahd yakkén hákemay, bezán Masihay parmánay chérá kárán.
EPH 1:11 Hodáyá márá Masihay barkatá gechén kortag. Hodáyá é káray erádah cha pésará kortagat o wati har erádahá puraha kant.
EPH 1:12 Má Yahudi awali mardom atén ke Masihay sará óst o omét bast tánke Hodáay shán o shawkat názénag bebit.
EPH 1:13 Wahdé shomá darkawmán rástén paygám, bezán wati nejátay wasshén mestág eshkot, shomá ham Masihay sará imán áwort o áiay barkatá shomárá wádah dátagén Pákén Ruhay mohr janag but.
EPH 1:14 Má ke Hodáay mál o melkat én, tán may sarjamén mókagá Pákén Ruh é gappay zámen ent ke Hodá may mirásá márá dant tánke Hodáay shán o shawkat názénag bebit.
EPH 1:15 Paméshká, cha hamá wahdá ke man Hodáwandén Issáay sará shomay imán o pa sajjahén palgártagénán shomay mehray bárawá eshkotag,
EPH 1:16 man shomay bárawá Hodáay shogray gerag yalah nadátag. Wati dwáyáni tahá shomay námá gerán o
EPH 1:17 cha Hodáyá, ke may Hodáwandén Issá Masihay porshawkatén Pet ent, dwá lóthán ke shomárá ruhi dánái o binái bebakshit tánke áiay bárawá shomay zánt géshter bebit.
EPH 1:18 Dwá lóthán ke shomay delay chamm rozhná bebant, tánke hamá ométá begendét ke Hodáyá shomárá pa áiá gwánk jatag, bezán palgártagénáni nyámá Hodáay porshawkatén mirásay ganjá begendét o
EPH 1:19 Hodáay hamá békesás mazanén zór o kodratá ham sarpad bebét ke márá, bezán báwarmandán rasagá ent. É hamá mazanén zór ent ke
EPH 1:20 Hodáyá kár bast o Masihi cha mordagán zendag kort o nadistagén jaháná wati rástén kashá nádénti.
EPH 1:21 Masih cha sajjahén hákem o ehtiárdár o zórmand o báládast o har námé ke geraga bit, cha áyán báláter ent, tahná annugén zamánagay na, cha áyókén zamánagay hákemán ham báláter ent.
EPH 1:22 Hodáyá har chizz Masihay pádáni chérá ér kort o kelisáay háterá sajjahén chizzáni sar o masteri kort.
EPH 1:23 Kelisá Masihay badan ent o cha Masihay wajudá sarréch ent, hamá Masih ke har jágah hastent o har chizzá cha wati wajudá sarrécha kant.
EPH 2:1 Shomá wati náparmáni o gonáháni sawabá mortagatét.
EPH 2:2 Á wahdi shomá donyáay ráh o rahband zortant o hamá sellén hákemay randgiri kort ke áiay bádsháhi chamzáherá gendaga nabit, hamá ruhay randgir atét ke nun náparmánén mardománi delá neshtag.
EPH 2:3 Aslá má sajjahén báwarmand yakk wahdé gón hamé mardomán hawár atén o wati gonahkárén tab o saresht razá kort o hamé sareshtay lóth o wáhag o hayáláni randgir atén. Á degaráni paymá, má ham wati tab o sareshtay hesábá kahr o gazabay hakdár atén.
EPH 2:4 Bale Hodá ke cha rahmá sarréch ent, gón má báz mehra kant o hamé mehray sawabá
EPH 2:5 gón Masihay zendag kanagá áiá márá ham zendag kort, hálánke má wati náparmániáni sawabá mortagatén. Hodáay rahmatáni barkatá shomárá neját rasetag.
EPH 2:6 Issá Masihay barkatá Hodáyá márá gón Masihá padá zendag kort o nadistagén jaháná áiay kashá nádént
EPH 2:7 tánke wati rahmatay béhesábén ganján tán abad záher bekant, hamá mehrabániay wasilahá ke Issá Masihay barkatá gón má kortagi.
EPH 2:8 Chéá ke rahmatay barkatá, cha imánay ráhá shomárá neját rasetag. É neját shomá nayáwortag, é Hodáay sawgáté.
EPH 2:9 É neját káráni sawabá naent, tánke kass wati sará pahr bast makant.
EPH 2:10 Chéá ke márá Hodáyá jórh kortag, Issá Masihay barkatá márá pédá kortagi ke nékén kár bekanén, bezán hamá kár ke Hodáyá cha péshá gisshéntagant ke má bekanénesh.
EPH 2:11 Gorhá mashamóshét ke shomá pédáeshi darkawm ét o Yahudi ke watá “sonnat kortagéna” gwashant, áyán yakk wahdé shomárá “sonnat nakortagéna” gwasht, hálánke sonnat jesmi chizzé o ensánay dastay káré.
EPH 2:12 Mashamóshét ke á wahdi shomá cha Masihá jetá atét o Esráili kawmá hawár naatét o shomá cha Hodáay kawl kortagén ahd o paymáná dar atét. Shomárá omété néstat o é donyáyá bé Hodáyá zendag atét.
EPH 2:13 Bale shomá ke yakk wahdé cha Hodáyá dur atét, nun Issá Masih o áiay hónay barkatá nazzikk árag butagét,
EPH 2:14 chéá ke may sohl o émeni Issá Masih ent, hamá Masih ke Yahudi o darkawm, doéni yakk kortant o esháni nyámay diwál, bezán napratay diwáli prósht.
EPH 2:15 Gón wati sáhay nadr kanagá Sharyat o áiay parmán o kánuni halás kortant tánke Yahudi o darkawmán yakk bekant o nókén ensáné jórh bekant o sohl o émeni byárit.
EPH 2:16 Masihá é doén yakdel o yakján kortant o esháni dozhmenii halás kort o cha salibay ráhá gón Hodáyá ham wassháni kortant.
EPH 2:17 Á átk o pa shomá darkawmán ham ke cha Hodáyá dur atét, o pa má Yahudián ham ke nazzikk atén, sohl o émeniay jári jat.
EPH 2:18 Chéá ke cha áiay ráhá má doén hamá yakkén Pákén Ruhay barkatá Hodáén Petay bárgáhá shota kanén.
EPH 2:19 Gorhá cha ed o rand shomá darámad o bégánag naét, Hodáay kawmay hamwatan ét o Hodáay lógay mardom ét.
EPH 2:20 Shomá lógé ét, kásed o nabi shomay bonred ant o Issá Masih bonhesht ent.
EPH 2:21 Masihay barkatá lógay sajjahén bahr gón yakdegará paywast ant o lóg master bayán ent ke Hodáwanday barkatá pákén parasteshgáhé bebit.
EPH 2:22 Shomá ham hamáiay barkatá gón yakdegará paywast ét ke anchén lógé bebét ke Hodáay Pákén Ruh ódá benendit.
EPH 3:1 Mane Pulos Issá Masihay hezmatkáré án o pa shomá darkawmán zendáná bandig án.
EPH 3:2 Shomá allamá hamá kár o zemmawáriay bárawá eshkotag ke maná dayag butag. Zemmawári hamesh ent ke Hodáay rahmatá pa shomá sar bekanán.
EPH 3:3 É rahmat rázé at ke elháméay tahá pa man áshkár kanag but, anchó ke man é bárawá kammé nebeshtah kortag.
EPH 3:4 Wahdé shomá eshiá wánét, gorhá zánta kanét ke man hamá rázá tán che haddá sarpad án ke Masihay bárawá ent.
EPH 3:5 É ráz pa pésarigén nasláni mardomán é paymá áshkár kanag nabutagat ke nun Pákén Ruhá pa Hodáay gechén kortagén kásed o nabián áshkár kortag.
EPH 3:6 É ráz esh ent ke wasshén mestágay barkatá darkawm Hodáay kawmay mirásá sharikdár ant, yakkén badanay ázá ant o Issá Masihay barkatá Hodáay dátagén kawl o wádahay tahá gón Hodáay kawmá sharikdár ant.
EPH 3:7 Hodáyá wati zór o kodrat kár bast o wati ganjén rahmatáni barkatá maná é wasshén mestágay hezmatkár bayagay sharapi bakshát.
EPH 3:8 Bell toré man Hodáay sajjahén palgártagénáni páday chéray hák ham naán, bale angat é sharap maná dayag but ke darkawmán é wasshén hálá sar bekanán ke Masihay barkatá békesásén ganjé pa áyán ér ent o
EPH 3:9 pa sajjahénán hamá rázá áshkár bekanán ke har chizzay addh kanókén Hodáyá cha azalá chér o andém dáshtag.
EPH 3:10 Hodáay maksad esh at ke kelisáyá kár bebandit o nadistagén jahánay hákem o wákdáráná wati dánáiay bázén rang o dróshomán pésh bedárit.
EPH 3:11 Hodáay erádah cha azalá hamesh at o may Hodáwandén Issá Masihay wasilahá wati erádahi sarjam kort.
EPH 3:12 Masihay barkatá o Masihay sará imánay sawabá má pa deléri o deljami Hodáay bárgáhá shota kanén.
EPH 3:13 Paméshká cha shomá dazbandia kanán ke é sakki o sórián ke man pa shomá saggagá án, esháni sawabá wati hemmatá dawr madayét ke é pa shomá pahr o shán ant.
EPH 3:14 Paméshká man Hodáén Petay bárgáhá kóndhána kapán,
EPH 3:15 hamá Hodá ke ásmán o zeminay har kawm o kabilahi pédá kortag.
EPH 3:16 Mani dwá ent ke Hodá cha wati shán o shawkatay ganján o wati Pákén Ruhay zórá shomay bátená mohkam bekant o
EPH 3:17 imánay barkatá Masih shomay delá jágah bekant. Man dwá kanán ke shomay bonyád mehr bebit o shomay risshag o wandhál mehrá sakk bebant
EPH 3:18 ke shomá sajjahén palgártagénáni hamráhiá Masihay mehray práhi o dráji o bolandi o johlánkiá pa sharri sarpad but bekanét,
EPH 3:19 bezán hamé mehrá sarpad bebét ke cha zántá hamá dém ent o é paymá cha Hodáay sarjamén kámeliá sarréch bebét.
EPH 3:20 Hodáay shán o shawkat dáemá barjáh bát, hamá Hodá ke áiay zór o wák may bátená twán dayagá ent o cha may lóth o cha may hayálán sakk báz géshter korta kant. Issá Masihay sawabá, báwarmandáni nyámá Hodáay shán o shawkat barjáh bát, nasláni nasl o abad tán abad. Ámin.
EPH 4:1 Gorhá man ke Hodáwanday háterá bandig án, gón shomá dazbandia kanán anchén zendé begwázénét ke Hodáwand rázig bebit, chéá ke shomárá pa hamé maksadá tawári kortag.
EPH 4:2 Sakk békebr o narmdel bebét, shomárá sabr o ópár bebit o pa mehr yakdomiay bardáshtá bekanét.
EPH 4:3 Johd bekanét ke pa émeni o hamdeli Pákén Ruhay dátagén tepákiá barjáh bedárét.
EPH 4:4 Badan yakké, Pákén Ruh yakké o omét ham yakké, o Hodáyá shomárá paméshká tawár kortag ke hamé yakkén ométá sharikdár bebét.
EPH 4:5 Hodáwand yakké, imán yakké, pákshódi yakké o
EPH 4:6 Hodá ham yakké o sajjahénáni Pet ent, cha sajjahénán báláter ent o sajjahén chizz cha hamáiay wasilahá kárá ant. Á sajjahénáni bátená ent.
EPH 4:7 Bale márá har yakkéá haminchok nyámat bakshag butag ke Masihá cha wati ganjén rahmatán pa má gisshéntag.
EPH 4:8 Paméshká gwashag butag: “Wahdé á borzá shot, bandigi gón wat bortant gón o mardomi ham théki dátant.”
EPH 4:9 É habaray máná ché ent ke “á borzá shot”? Máná esh ent ke á pésará zeminay johlánkián jahlá ér átk.
EPH 4:10 Á ke jahlá ér átk, hamá ent ke cha sajjahén ásmánán borzter shot tánke sarjamén jaháná cha wati wajudá porr bekant.
EPH 4:11 Á hamá ent ke lahtén mardomi kásed jórh kort o lahtén nabi o lahtén wasshén mestágay jár janók o lahténi shepánk o tálim dayók jórh kort
EPH 4:12 tánke Hodáay palgártagénán pa hezmatkáriá tayár bekant. É hezmatkáriay maksad esh ent ke Masihay badan, bezán kelisá rost o rodóm bekant,
EPH 4:13 tán hamá wahdá ke má sajjahén báwarmand imánay hamdeliá sar bebén o Hodáay Chokká sharriá bezánén, báleg o pohtah bebén o Masihay kaddá kámel bebén.
EPH 4:14 Gorhá nun má gwandhén chokk mabén ke chawl o mawj márá démá o poshtá bebarant o byárant. Har tálimay gwát márá yakk némagé mabárt o makkárén mardom gón wati chálbázián márá gomráh makanant.
EPH 4:15 Pa mehré rástiay sará óshtag márá ródénit o har hesábá kámela kant o é dhawlá má Masihay paymá bén, hamá Masih ke may sar ent.
EPH 4:16 Hamáiay wasilahá badanay sajjahén bahr band o bógáni sará jorhant o gón yakdegará paywasta bant. Har ázá ke wati kárá kant, badan pa mehra rost o rodóma kant o watá mohr o mohkama kant.
EPH 4:17 Gorhá man é gappá gwashán o cha Hodáwanday némagá shomárá kaddhana kanán ke cha ed o rand darkawmáni paymá zend magwázénét ke náhudagén pegr o hayáláni tahá ant.
EPH 4:18 Aglesh kór ent o sengdeliay sawabá názántiay tahá kaptagant o é názántiay sawabá cha Hodáay dátagén zendá bégánag ant.
EPH 4:19 Esháni lajj shotag. Hawá o hawasáni tahá kaptagant, har paymén palitén kára kanant o hecch bassa nakanat.
EPH 4:20 Bale shomá naeshkotag ke Masih choshén tálim bedant.
EPH 4:21 Wahdé shomá Masihay bárawá eshkotag, áiay barkatá shomárá hamá rástiay tálim rasetag ke áiay bonyád Issá Masih ent.
EPH 4:22 Shomay pésarigén zenday bárawá shomárá tálim dayag butag ke wati hamá kwahnén zendá yalah bekanét ke gomráh kanókén wáhagi sell o haráb kanagá ant o
EPH 4:23 wati pegr o hayáláni warh o paymán nók bekanét o
EPH 4:24 nókén zendá ambáz bekanét. É nókén zend cha rástén pahrézkári o páki o palgáriá sázag butag ke Hodáay shekl o dróshomá bebit.
EPH 4:25 Gorhá dróg bandagá yalah bekanét o cha shomá harkas gón wati hamsáhegá rástén habará bekant, chéá ke má drost yakkén jánay ázá én.
EPH 4:26 Hezhmay tahá choshén káré makanét ke gonáhá bekapét. Shomay zahr o hezhm róchay ér nendagá pésar ér byayt.
EPH 4:27 Shaytáná móh madayét.
EPH 4:28 Harkasá ke pésará dozzi kortag, nun bass bekant, báyad ent mozzuri bekant o gón wati dastán sharrén kár bekant ke hájatmandéay komakká kort bekant.
EPH 4:29 Hecch sellén habaré cha shomay dapá dar mayayt. Hamá habarán bekanét ke eshkonókán páedaga dayant o áyáni zaluratáni hesábá pa rost o rodómá áyán komakka kanant.
EPH 4:30 Hodáay Pákén Ruhá padard makanét ke shomá pa mókagay róchá gón hamé Ruhá mohr janag butagét.
EPH 4:31 Har dhawlén tahli, hezhm, zahr, dapják o bohtámjani o dega har paymén badiá cha wat besendét o dawr dayét.
EPH 4:32 Gón yakdegará mehrabán o yakdomiay gamwár bebét. Yakdegará pahell bekanét, anchó ke Masihay barkatá Hodáyá shomárá pahell kortag.
EPH 5:1 Gorhá shomá ke Hodáay dóstigén chokk ét, Hodáay randgiriá bekanét o
EPH 5:2 zendá pa mehr begwázénét, hamá paymá ke Masihá gón má mehr kort o watárá pa maygi washbóén shogránah o korbánigay paymá Hodáay démá nadri kort.
EPH 5:3 Bénangi o har paymén nápáki o lálech o tamáhay námá ham magerét, chéá ke é chizz Hodáay palgártagénán zéba nadayant.
EPH 5:4 Cha shomay dapá bénangén kessah o sobakkén gapp o bépardagén maskaráé dar mayayt ke é paymén habar shomárá zéba nadayant. Modám shogrgozári bekanét.
EPH 5:5 É gappá deljam bebét ke na bénangá Masih o Hodáay bádsháhiá mirása rasit, na nápáká o na tamahkárá ke botparasté.
EPH 5:6 Chó mabit ke kasé shomárá gón náhudagén habarán rad bedant, chéá ke anchén káráni sawabá náparmánén mardománi sará Hodáay kahr o gazaba kapit.
EPH 5:7 Gorhá gón é paymén mardomán gón makapét.
EPH 5:8 Yakk wahdé shomay del tahár at, bale nun Hodáwanday barkatá rozhná ent. Gorhá shomay zend pésh bedárit ke shomá rozhnay chokk ét,
EPH 5:9 chéá ke rozhnay bar o samar har paymén néki o pahrézkári o rásti ent.
EPH 5:10 Bezánét ke kojám kár Hodáwandá wassh o razá kant.
EPH 5:11 Taháriay bépáedagén kárán gón makapét, choshén kárán páshk o paddar bekanét.
EPH 5:12 Hamá kárán ke náparmánén mardom chérokáia kanant, á káráni námay gerag ham ayb ent.
EPH 5:13 Bale rozhn har chizzay sará ke kapit, áiá záhera kant.
EPH 5:14 Chéá ke har chizz ke záhera kanaga bit, rozhná kanaga bit. Paméshká gwashant: “Oo wábén mardom! Pád á cha mordagán jáh jan, nun Masih tai sará drapshit.”
EPH 5:15 Gorhá sharr bechárét ke shomá wati zendá chón gwázenagá ét. Nádán mabét, dáná bebét.
EPH 5:16 Wati wahdá zawál makanét ke zamánag haráb ent.
EPH 5:17 Gorhá nádán mabét, bezánét ke Hodáwanday wáhag o razá ché ent.
EPH 5:18 Sharábá mast o malár mabét ke eshiay ásar béhayái ent, sharábay badalá cha Pákén Ruhá sarréch bebét o
EPH 5:19 watmánwatá Zabur o hamd o Ruhi názénk bejanét. Cha delay johlánkiá sáz o sawt bejanét o Hodáwandá benázénét.
EPH 5:20 May Hodáwandén Issá Masihay námay sará modám pa har chizzá Hodáén Petay shográ begerét.
EPH 5:21 Masihay ezzat dayagay háterá yakdomiay parmánbardáriá bekanét.
EPH 5:22 Oo janénán! Cha shomá harkas wati marday parmánbardáriá hamá paymá bekant ke Hodáwanday parmánbardáriá kant.
EPH 5:23 Chéá ke mard wati janay sar ent, anchó ke Masih kelisáay sar ent. Kelisá Masihay badan ent o Masih é badanay rakkénók ent.
EPH 5:24 Gorhá hamá paymá ke kelisá Masihay parmánbardáriá kant, jan ham báyad ent har káray tahá wati marday parmánbardáriá bekant.
EPH 5:25 Oo mardénán! Cha shomá harkas gón wati janá mehr bekant, hamá paymá ke Masihá gón kelisáyá mehr kort o wati sáhi pa áiá nadr kort
EPH 5:26 ke Hodáay habaray barkatá kelisáyá gón ápá beshódit o pák o palgár bekant o
EPH 5:27 pa wat porshawkatén kelisáé bekanti ke hecch póleng o krechk o é paymén chizzé peri mabit o pák o béayb bebit.
EPH 5:28 Hamé paymá mard báyad ent gón wati janá anchó mehr bekant ke gón wati jendá kant. Á ke gón wati janá mehra kant, gón wati jendá mehra kant.
EPH 5:29 Kass cha wati jenday badaná hechbar naprata nakant, wati jesmá sáthit o sambálit, anchó ke Masih kelisáyá sambálit.
EPH 5:30 Chéá ke má áiay badanay ázá én.
EPH 5:31 “Paméshká mard wati pet o mátá yalaha kant o gón janá hawára bit, gorhá á doén, yakk jesm o jána bant.”
EPH 5:32 É gapp mazanén rázé, bale man é wahdi Masih o kelisáay habará án.
EPH 5:33 Gorhá cha shomá harkas báyad ent gón wati janá anchó mehr bekant ke gón wati jendá mehra kant o jan báyad ent wati marday ezzatá bekant.
EPH 6:1 Oo chokkán! Shomá ke Hodáwandayg ét, wati pet o mátay parmánbardáriá bekanét, ke barhakkén kár hamesh ent.
EPH 6:2 “Wati pet o mátá ezzat beday” hamá awali parmán ent ke kawlé hamráh enti:
EPH 6:3 “ke tai zend sharr bebit o donyáyá drájén omré begwázénay.”
EPH 6:4 Oo petán! Wati chokkáni sará manorondhét o áyán zahr mabaráénét. Áyán Hodáwanday dátagén rahband o sar o sójáni sará beródénét.
EPH 6:5 Oo golámán! Pa del o setk o pa hodátorsi wati donyái wájaháni parmánbardáriá anchó bekanét ke gwashay Masihay parmánbardáriá kanagá ét,
EPH 6:6 tahná á wahdá na ke shomárá cháragá ant, tahná pa mardománi razá kanagá na. Shomá ke Masihay hezmatkár ét, wati wájaháni parmánbardáriá bekanét o pa del Hodáay razáyá purah o sarjam bekanét.
EPH 6:7 Áyáni hezmatá anchó pa del o setk bekanét ke gwashay shomá mardománi hezmatá kanagá naét, Hodáwanday hezmatá kanagá ét.
EPH 6:8 Chéá ke shomá zánét ke Hodáwand har mardomá áiay sharrén káráni mozzá dant, golámé bebit yá ázátén mardomé.
EPH 6:9 Oo wájahán! Wati golámáni hayálá bedárét o áyán matorsénét. Mashamóshét ke shomay doénáni wájah yakk ent, hamá ke ásmáná ent o park o péra nakant.
EPH 6:10 Goddhi habar esh ent ke shomá Hodáwand o áiay zóray barkatá mohr o mohkam bebét.
EPH 6:11 Hodáay dátagén sajjahén jangi sámánán bezurét ke Shaytánay repk o honaráni démá óshtát bekanét.
EPH 6:12 Chéá ke may jang ensánáni helápá naent, é tahárén donyáay hákem o wákdár o zóráni helápá ent, nadistagén jahánay palitén ruháni helápá ent.
EPH 6:13 Gorhá Hodáay dátagén sajjahén jangi sámánán bezurét tánke hamá róchá ke badi shomay démá páda kayt, tán jangay halásiá shomá áiay démá mohr óshtát bekanét o wati jágahá dásht bekanét.
EPH 6:14 Gorhá mohr bóshtét, rástiay kamarbandá wati sréná bebandét o rástáwariay sénagpóshá gwará bekanét o
EPH 6:15 émeniay wasshén mestágá chó kawshá pádá kanét o tayár bebét.
EPH 6:16 É sajjahénáni hamráhiá imánay espará dastá kanét ke Shaytánay sajjahén ásgwárén tiráni démá dásht bekanét.
EPH 6:17 Nejátay jangi koláhá sará kanét o Pákén Ruhay zahmá dastá kanét. É zahm Hodáay habar ent.
EPH 6:18 Gón Pákén Ruhay rahshóniá dwá kanét, har wahdá har paymén dwá o dazbandi kanét. Hozzhár bebét o modám pa sajjahén palgártagénán dwá kanét.
EPH 6:19 Pa man ham dwá kanét ke har wahdá ke man habara kanán, maná hamá gál berasant ke gwashagi ant o man gón deléri wasshén mestágay rázá záher kort bekanán,
EPH 6:20 chéá ke man hamé mestágay kásed án o paméshká maná zamzilán bastagesh. Dwá kanét ke pa deléri é mestágay járá hamá paymá jat bekanán ke maná janagi ent.
EPH 6:21 Dóstigén brát Tikikás ke Hodáwanday ráhá wapádárén hezmatkáré, gón shomá sajjahén habarána kant ke shomá ham mani hálá sahig bebét o bezánét ke man ché kanagá án.
EPH 6:22 Man paméshká áiá shomay kerrá ráh dayagá án ke shomárá may hálá sar bekant o shomárá delbaddhi bedant.
EPH 6:23 Cha Hodáén Pet o Hodáwandén Issá Masihay némagá, émeni o mehr o imán brátán sar bát.
EPH 6:24 Rahmat o abadmánén zend hamá sajjahénán sar bát ke may Hodáwandén Issá Masihá dósta dárant.
PHI 1:1 Cha Issá Masihay hezmatkár Pulos o Timutáusay némagá, pa Issá Masihay hamá sajjahén palgártagén mardomán ke Pilipiá ant, gón kelisáay sarparast o hezmatkárán hawár.
PHI 1:2 Shomárá cha may Hodáén Pet o Hodáwandén Issá Masihay némagá rahmat o émeni sar bát.
PHI 1:3 Man har wahdá ke shomárá yáta kanán, wati Hodáay shográ gerán.
PHI 1:4 Wati har dwáay tahá, modám gón shádmániá pa shomá sajjahénán dwá kanán,
PHI 1:5 parchá ke cha awali róchá beger tán é wahdá shomá wasshén mestágay sheng kanagá gón ét.
PHI 1:6 É gappá ham deljam án ke Hodáyá hamá sharrén kár ke shomay del o daruná bongéj kortag, tán hamá wahdá barjáhia dárit ke sarjam bebit, tán hamá róchá ke Issá Masiha kayt.
PHI 1:7 É rást ent ke man báyad ent shomá sajjahénáni bárawá anchosh pegr bekanán ke pegr kanagá án, chéá ke shomá mani delá ét. Toré man zamzilán bebán yá wasshén mestágay démpáni o sábet kanagá, shomá sajjahén Hodáay rahmatán gón man sharikdár ét.
PHI 1:8 Hodá sháhed ent ke man shomá sajjahénán anchó dósta dárán ke Issá Masih shomárá dósta dárit o maná pa shomá sakk zahira kant.
PHI 1:9 Mani dwá ent ke shomay mehr géshá gésh bebit o gón kámelén sarpadi o johlén zántéá hamráh bebit,
PHI 1:10 tánke shomá sarpad bebét ke kojám chizz sharter ent o tán Masihay áyagay róchá pák o béayb bemánét o
PHI 1:11 cha pahrézkáriay hamá bar o samará porr bebét ke cha Issá Masihay barkatá kayt, pa Hodáay shán o shawkat o satáyá.
PHI 1:12 Oo brátán! Nun man shomárá hál dayaga lóthán ke gón man harché ke butag, é chizzán wasshén mestágay sheng o tálán kanagá komakk kortag.
PHI 1:13 Kalátay sajjahén negahpán o é dega mardom sahig butant ke man pa Masihaygi bandig kanag butagán.
PHI 1:14 Mani bandig bayagay sawabá, géshterén báwarmandán ham cha Hodáwanday némagá hemmat o delbaddhi rasetag o bé tors o larzá Hodáay paygámay járá janant.
PHI 1:15 É rást ent ke lahtén cha zedd o hasaddá Masihay paygámá jár janagá ent, bale dega lahtén é kárá pa del o setk kanagá ent.
PHI 1:16 Hamá mardom ke pa mehr é kárá kanagá ant, zánant ke man pa wasshén mestágay démpániá edá árag butagán.
PHI 1:17 Hamá mardom ke pa watwáhi o watgarazi Masihay paygámá jára janant, niyatesh sáp naent o hayála kanant ke gón wati é kárá, bandijáhá mani ázárán gésh korta kanant.
PHI 1:18 Gorhá ché? Toré pa badniyati Masihay járá bejanant yá pa del o setk, bale har warhá Masihay jár wa janag bayagá ent o man cha é kárá shádán án. Haw, modám shádmánia kanán
PHI 1:19 parchá ke mana zánán ke é chizz mani rakkagay ráhá pacha kanant, chéá ke shomá pa man dwá kanét o Issá Masihay Ruh maná komakka kant.
PHI 1:20 Man gón mazanén deljamié ométa kanán ke hecch paymá pashal o sharmendag kanag mabán o nun ham modámigén dhawlá delér bebán o mani jesm o jánay tahá Masihá shán o shawkat berasit, toré zendag bemánán yá bemerán.
PHI 1:21 Pa man, zenday máná pa Masihá zendag bayag ent o mark wa katth o páedagé.
PHI 1:22 Bale agan man é donyáyá zendag bemánán, géshter bar o samar dáta kanán. Nazánán kojámiá gechén bekanán.
PHI 1:23 Man dodel án, mani armán ent ke berawán o gón Masihá yakjáh bebán, chéá ke é sakk báz gehter ent,
PHI 1:24 bale pa shomaygi sharter esh ent ke zendag bemánán.
PHI 1:25 Nun ke man é habará deljam án, zánán ke zendaga mánán o shomá sajjahénáni hamráha bán ke shomá wati imáná démrawi bekanét o shádmán bebét.
PHI 1:26 É paymá wahdé man padá shomay kerrá káyán, gorhá shomá mani áyagay sawabá Issá Masihá géshter satá o saná korta kanét.
PHI 1:27 Toré harché bebit, wati zendá anchosh begwázénét ke Masihay wasshén mestágá bekarzét. Gorhá agan man shomay cháragá byáyán yá cha shomá dur bebán, bass sahig bebán ke shomá yakdel o yakján ét o mohr óshtátagét o pa wati báwará, bezán pa wasshén mestágá pa hamdeli johd kanagá ét o
PHI 1:28 hecch paymá cha dozhmen o badwáhána natorsét. É pa áyán neshánié ke barbáda bant o shomá rakkét ke shomay rakkag cha Hodáay némagá ent.
PHI 1:29 Nun é sharap shomárá cha Masihay némagá rasetag ke shomá Masihay sará na tahná báwarmand bebét, pa áiá sakki o sóri ham besaggét,
PHI 1:30 chéá ke shomá ham anchén johdé kanagá ét ke man kortag o shomá distag o nun eshkonagá ét ke man angat kanagá án.
PHI 2:1 Nun agan shomárá gón Masihá hór bayagay sawabá delbaddhia rasit, agan shomárá cha áiay mehrá ásudagia rasit, agan shomárá cha Pákén Ruhá hamdelia rasit o agan shomárá hamdardi o rahm hast,
PHI 2:2 gorhá tepák bebét, bégarazén mehréay wáhond bebét, arwáhá yakk bebét, hampegr bebét o é paymá mani shádmániá sarjam o kámel bekanét.
PHI 2:3 Hecch káré pa watwáhi o watpasondi makanét. Pa békebri o darbéshi degarán cha wat borzter sarpad bebét.
PHI 2:4 Harkas wati nap o suttáni badalá, degaráni nap o suttáni hayálá bedárit.
PHI 2:5 Shomay hayál kanagay warh o paym hamá bebit ke Issá Masihay butag.
PHI 2:6 Á, Hodáay zátay dróshomá at, bale gón Hodáyá é hamdróshomi, áiá pa wat katth o páedagé hesáb nakort o
PHI 2:7 wati shán o shawkati yalah dát o goláméay dróshomi zort o ensánéay sheklá pédá but.
PHI 2:8 Jendi ke ensánay sheklá at, watá békebr o darbeshi kort o tán marká parmánbardár at, tán salibay saray marká ham.
PHI 2:9 Paméshká Hodáyá á, sarperáz kort o anchén námé áiárá dát ke cha har námá borzter ent,
PHI 2:10 ke harkas Issáay námá kóndhán bekapit, ásmáná ham, zeminay sará ham o zeminay chérá ham,
PHI 2:11 o har zobán bemannit o begwashit: “Issá Masih Hodáwand ent” ke Hodáén Petá shán o shawkat berasit.
PHI 2:12 Paméshká mani dordánagán! Anchosh ke shomá modám parmánbardár butagét, na tahná á wahdá ke man shomay kerrá atán, annun ham ke man ódá naán, angat géshter parmánbardár ét. Gorhá pa tors o larz wati nejátay rost o rodómay johdá bekanét.
PHI 2:13 Chéá ke é Hodá ent ke shomay deláni tahá kár kanagá ent ke shomay erádahán o shomay kárán pa wati nékén maksadá sarjam bekant.
PHI 2:14 Harché ke kanét, bé norondhag o bé dapjáká bekanéti
PHI 2:15 ke shomá pák o béayb bemánét. Chóth o kajráhén padréchéay nyámá Hodáay bémayárén chokk bebét o “Zenday Gálá” mohr bedárét o chó estárá jaháná bedrapshét. Á wahdá, Mashiay áyagay róchá pahr basta kanán ke man moptén tach o tágé o béásarén johdé nakortag.
PHI 2:17 Bale hamá hezmat o korbánig ke shomay báwaray bar o samar ant, agan áyáni sará mani hón ham réchagi korbánigéay paymá réchag bebit, man gala bán o gón shomá sajjahénán shádkámia kanán.
PHI 2:18 Gorhá shomá ham hamé dhawlá gón man gal bebét o shádehi bekanét.
PHI 2:19 Bale man Hodáwand Issáay ométá Timutáusá zutt pa shomá rawána dayán ke maná ham gón shomay hálay rasagá delbaddhi berasit.
PHI 2:20 Chéá ke maná dega choshén hamdelén mardomé nést ke pa del o setk shomay hayálá bebit.
PHI 2:21 É dega sajjahénán Issá Masihay kár eshtag o wati jenday nap o suttáni randá kaptagant.
PHI 2:22 Bale shomá wata zánét ke Timutáusá láheki pésh dáshtag. Á pa wasshén mestágay sheng kanagá gón man anchosh hamkópag butag ke chokké gón petá.
PHI 2:23 Paméshká, anchosh ke man sahiga bán ke mani hál ché bit, maná omét ent ke áiá zutt dém dáta kanán.
PHI 2:24 Man deljam án ke Hodáwand ráhé pacha kant o mani jend ham zutta kayt.
PHI 2:25 Bale mana gwashán zaluri ent ke man Epapróditusá padá shomay kerrá dém bedayán ke á, mani brát o hamkár o hamkopagén johdkár o shomay kásed ent ke shomá pa mani zaluratáni purah kanagá dém dátag.
PHI 2:26 Chéá ke á, pa shomá sajjahénáni didárá hodónák ent. Paréshán ent ke shomá áiay nádráhiay hálá sahig butagét.
PHI 2:27 É rást ent ke nádráh at, markig at, bale Hodáyá áiay sará rahm kort. Tahná áiay sará na, mani sará ham rahmi kort ke maná gamay chakká gamé marasit.
PHI 2:28 Paméshká man áiay wátarr dém dayagá sakk hodónák án ke wahdé shomá padá gendéti, gal bebét o mani parésháni kamter bebit.
PHI 2:29 Gorhá pa Hodáwandaygi áiá pa galé wasshátk bekanét o áiay dhawlén mardomán ezzat bedayét.
PHI 2:30 Chéá ke á pa Masihay kárá meragi butag. Wati sáhay parwáhi nadásht tánke shomay hamá hezmatáni kammiá purah bekant ke shomá pa man kort nakortagant.
PHI 3:1 Nun, oo mani brátán! Shádmáni bekanét ke shomá Hodáwandayg ét. Pa man é habaráni padá nebeshtah kanag hecch grán naent o é habar pa shomá émenia kárant.
PHI 3:2 Cha kochekkán hozzhár bebét. Cha badkárán hozzhár bebét. Cha góshtborrán hozzhár bebét.
PHI 3:3 Chéá ke sonnat butagén má én. É má én ke Hodáyá cha áiay Pákén Ruhay barkatá parastesha kanén. Pa má pahr o sháné ke gón Issá Masihá hawár én o márá cha wati jesmá, bezán cha donyái chizzán omété nést,
PHI 3:4 bell toré mani jendá jesmay sará óst o omét kanagay sawab hast. Agan dega kaséá jesmay sará óst o omét kanagay sawab hast, gorhá maná wa géshter.
PHI 3:5 Man pédá bayagay hashtomi róchá sonnat kanag butagán. Pédáeshi Esráilié án. Cha Benyáminay kabilahá án. Cha hapt poshtá Ebránié án. Agan Sharyatay gapp ent, Parisié án.
PHI 3:6 Agan dini jósh o gayratay gapp ent, man kelisá ázár dátag o agan Sharyatay hesábá pahrézkáriay gapp ent, béayb butagán.
PHI 3:7 Bale har chizz ke pa man katth o páedagé at, nun pa Masihaygi man á chizzá táwáné sarpada bán.
PHI 3:8 Tahná é chizz na, wati Hodáwandén Issá Masihay pajjáh áragay ganjay démá, man har chizzá táwáné sarpada bán, chéá ke man pa hamáiaygi é sajjahén yalah dátant. Man eshán bass gand o gasarh sarpada bán ke mani katth tahná Masih bebit o
PHI 3:9 gón hamáiá hawár bebán. Maná á pahrézkári mabát ke cha Sharyatay ráhá rasit, hamá páki o palgári maná berasát ke cha Masihay sará báwar kanagá rasit, hamá palgári ke cha Hodáyá rasit, cha imánay ráhá.
PHI 3:10 Man Masihá zánaga lóthán, áiay jáh janagay zór o wáká zánaga lóthán o áiay sakki o sórián sharikdár bayaga lóthán. Áiay marká hamáiay jenday hamdarwar bayaga lóthán
PHI 3:11 ke warhé na warhéá man ham mordagáni jáh janagá sharikdár bebán.
PHI 3:12 Mana nagwashán ke man é chizz dastá áwortag o nun sarjam o kámelén mardomé án, bale johda kanán ke maná hamá chizz dast bekapit ke pa áiá Issá Masihá maná dast geptag.
PHI 3:13 Oo brátán! Mana nagwashán ke angat á chizzon dastá áwortag, man bass yakk chizzé kanán, gwastagénán béhayála kanán o pa démaygán johda kanán.
PHI 3:14 Man dém pa menzelá tachán án tánke hamá enám o dádá bekatthán ke pa áiá Hodáyá maná Issá Masihay barkatá dém pa arshá tawár kortag.
PHI 3:15 Gorhá báyad ent máshomá sajjahén ke rostag o báleg én, anchosh hayál bekanén. Agan shomá dega hayálé bekanét, padá ham Hodá rásténá pa shomá záhera kant.
PHI 3:16 Bale byáét hamá chizzán mohr bedárén ke máshomá tán é wahdi dastá áwortagant.
PHI 3:17 Brátán! Pa hamdeli mani warhá zend begwázénét o anchó ke may randgiriá kanét, hamá mardománi ráhá ham berawét ke may ráhá rawant,
PHI 3:18 chéá ke hamá paymá ke man shomárá báz randá gwashtag o annun gón arsigén chammé gwashán, bázéné Masihaysalibay dozhmeniá kant.
PHI 3:19 Esháni ásar tabáhi ent. Esháni hodá wati jenday láp ent o bénangi esháni pahr o shán ent. Ésháni hayál gón donyái chizzán ent.
PHI 3:20 Bale má ásmánay báshendah én o pa hobb o hodónáki, rakkénókén Hodáwand Issá Masihay entezár o wadárá én ke cha hamódá kayt.
PHI 3:21 Gón hamá zór o wáká ke har chizzá wati dastá áworta kant, gón hamá zórá may é hákién badaná mattha kant o wati porshawkatén badanay dhawlá kant.
PHI 4:1 Paméshká, Hodáwanday ráhá mohr bóshtét. Mani dordánagén brátán! Man pa shomay didárá hodónák án. Mani dordánagán! Shomá mani shádmáni o táj ét.
PHI 4:2 Man gón Yudiah o Sentiki doénán dazbandia kanán ke Hodáwanday ráhá hamdel o tepák bebant.
PHI 4:3 Oo mani wapádárén hamráh! Man cha taw dazbandia kanán ke hamá janénáni komakká bekan ke pa wasshén mestágay sheng kanagá mani hamkópagiá gón Klémentus o mani é dega hamkárán johdesh kortag ke námesh “Zenday Ketábá” nebeshtah ent.
PHI 4:4 Modám shádmáni kanét ke shomá Hodáwandayg ét. Man padá gwashán, shádmáni kanét.
PHI 4:5 Bell sajjahén mardom shomay narmdeliá begendant. Hodáwanday áyagay wahd nazzikk ent.
PHI 4:6 Pa hecch chizzá paréshán mabét, bass har hálat o jáwará, gón dwá o dazbandi o shogrgozáriá wati arzá pa Hodáyá sar kanét.
PHI 4:7 Nun gorhá hamá émeni ke cha Hodáyá rasit o cha sajjahén zánt o sarpadiá báláter ent, hamá émeni Issá Masihay barkatá shomay del o hayáláni páspána bit.
PHI 4:8 Brátán! Nun godhsará mana gwashán ke harché ke rást ent, harché ke sharapdár ent, harché ke sharr ent, harché ke pák ent, harché ke dóstnák ent, harché ke satá karzit, harché ke nék ent o tawsip kanaga bit, hamá chizzáni bárawá pegr bekanét.
PHI 4:9 Harché ke shomá cha man dar bortag o shomárá rasetag, harché ke shomá cha man eshkotag o distag, hamá warh bekanét. É dhawlá émeni bakshókén Hodá shomay hamráha bit.
PHI 4:10 Man Hodáwanday námá sakk báz shádmánia kanán ke nun godhsará shomá padá mani hayáldári bendát kortag. Haw, shomá pésará ham mani hayál dáshtag, bale shomárá móh narasetag.
PHI 4:11 Chosh naent ke man pa chizzéay néstiá é habará kanán, chéá ke man har dhawlén wahdá razá o rázig bayagay warh o paym dar gétkag.
PHI 4:12 Mana zánán ke tangdastiá chón gozarán kanagi ent o é ham zánán ke hastómandiá zend chón gwázénagi ent. Man har warhén jáwarán zend gwázénagay ráz dar gétkag, sérláp bebán yá shodláp, maná har chizz bebit yá hecch chizz mabit.
PHI 4:13 Man Masihay barkatá harché korta kanán, chéá ke hamá maná zór o twána dant.
PHI 4:14 Bale shomá sharrén káré kortag ke mani dard o gamán sharikdár butagét.
PHI 4:15 Oo Pilipián! Shomá sharr sarpad ét ke wasshén mestágay sheng kanagay bongéjá, man ke Makduniah yalah kort, cha shomá abéd hecch kelisáyá maná pa day o gerá komakk nakort.
PHI 4:16 Wahdé Tesálunikiá atán ham yakk o do randá shomá pa mani zaluratán komakk dém dát.
PHI 4:17 Man thékiay wáhagdár naán, bale pa shomá hamá “suttay” wáhagdár án ke shomay hesábay tahá gésh kanaga bit.
PHI 4:18 Maná har chizz rasetag o sakk báz rasetag. Gón Epápróditusá harché ke shomá dém dátag, maná rasetagant o nun maná har chizz hast. Shomay é théki washbóén shogránah o delpasondén korbánigé ke Hodáyá washnóda kant.
PHI 4:19 Mani Hodá shomay har zaluratá wati jenday porshawkatén mál o hastiay hesábá o Issá Masihay barkatá puraha kant.
PHI 4:20 May Hodáén Petá abad tán abad shán o shawkat berasát. Anchosh bát. Ámin.
PHI 4:21 Issá Masihay sajjahén palgártagénán salám sar kanét. Hamé brát ke mani hamráh ant, shomárá drahbáta gwashant.
PHI 4:22 Sajjahén palgártagén brát o gohár shomárá saláma kanant, háss Kaysaray lógay mardom.
PHI 4:23 Hodáwandén Issá Masihay rahmat gón shomay arwáhá gón bát. Anchosh bát. Ámin.
COL 1:1 Cha Pulosay némagá, mane Pulos ke cha Hodáay razáyá Issá Masihay kásedé án o cha may brát Timutáusay némagá,
COL 1:2 pa hamá palgártagén o wapádárén brátán ke Kulosiay shahrá neshtagant o Masihay ráhá ant. Cha may Hodáén Petay némagá shomárá rahmat o émeni sar bát.
COL 1:3 Wahdé má pa shomá dwá kanén, modám Hodáay, bezán wati Hodáwandén Issá Masihay Petay shográ gerén,
COL 1:4 chéá ke márá é hál sar butag ke Issá Masihay sará shomay imán mohkam ent o shomá sajjahén palgártagénán dósta dárét.
COL 1:5 É imán o mehray bonyád hamá omét ent ke ásmáná pa shomá ér ent o shomá cha pésará eshiay bárawá mán rástén paygámá, bezán mán hamá wasshén mestágá eshkotag
COL 1:6 ke shomárá sar butag. É wasshén mestág bar o samar dayagá ent o sajjahén donyáyá démá rawán ent o cha hamá róchá ke shomá é paygám eshkotag o Hodáay rahmatá sharriay sará sarpad butagét, shomay kerrá ham bar o samar dayagá ent.
COL 1:7 Shomárá é wasshén mestág may dóstigén hamkár Epáprásá sar kort. Masihay é wapádárén hezmatkár cha may némagá pa shomá dém dayag but o
COL 1:8 áiá márá hál dát ke Pákén Ruhay barkatá shomay mehr báz ent.
COL 1:9 Paméshká cha hamá róchá ke márá shomay hál sar butag, harwahd pa shomá dwá kanagá én o Hodáay bárgáhá arz o peryátá én ke shomárá cha é zántá sarréch bekant ke áiay wáhag o razá ché ent, bezán shomárá cha ruhi hekmat o dánáiá sarréch bekant,
COL 1:10 tánke shomá anchén zendé begwázénét ke Hodáwandá pasond bebit o shomá Hodáwandá har paymá wassh o razá kort bekanét, bezán modám har nékén kárá porsamar bebét o shomay hodázánti róch pa róch géshter bebit.
COL 1:11 Má é dwáyá kanén tánke shomá áiay porshawkatén zór o wákay barkatá zórmand bebét o shomay sagg o bardásht mazan bebit o pa galé sabr o ópár bekanét.
COL 1:12 Hodáén Petay shográ begerét ke shomárá é láhekii dátag ke nuray jaháná cha palgártagénáni mirásá shomárá wati bahr berasit.
COL 1:13 Áiá márá cha taháriay jaháná neját datag o wati dóstigén Chokkay bádsháhiá áwortag.
COL 1:14 Má hamé Chokkay barkatá mókag butagén o may gonáh bakshag butagant.
COL 1:15 Masih nadistagén Hodáay záherén dróshom ent, áiay awali Chokk ent o cha sajjahén chizzán pésar hast butag.
COL 1:16 Chéá ke sajjahén chizz cha hamáiay wasilahá addh butagant, ásmáná bebant yá zeminá, záherén chizz bebant yá chér o andémén, bádsháhi taht bebant yá ryásat yá hákem yá wákdár, sajjahén chizz cha hamáiay wasilahá o pa hamáiá addh butagant.
COL 1:17 Á cha har chizzá pésar ent o sajjahén chizz hamáiay barkatá watmánwatá paywast ant.
COL 1:18 Masih kelisáay, bezán wati badanay sar ent. Bongéj hamá ent o awali mardom ke cha mordagán zendag butag hamá ent tánke har chizzá áiay darjah awali bebit.
COL 1:19 Chéá ke Hodáay razá hamesh at ke wati sajjahén kámeliá Issáay badaná jágah bedant o
COL 1:20 cha áiay wasilahá har chizzá, zeminá bebit yá ásmáná, gón wat wasshán bekant o áiay hamá hónay wasilahá ke salibay sará retk, har chizzá sohl o émeniay tahá byárit.
COL 1:21 Yakk wahdé shomá cha Hodáyá dur atét o wati pegr o hayáláni sawabá Hodáay dozhmen atét o shomay sellén kár é dozhmeniá pésh dáragá atant.
COL 1:22 Bale nun Hodáyá gón shomá Masihay jesmi markay wasilahá sohl o saláh kortag ke wati chammán shomárá pák o palgár o béayb bekant,
COL 1:23 agan shomá wati imánay sará mohr o mohkam bóshtét o hamá ométá yalah madayét ke wasshén mestágá mán ent. É hamá wasshén mestág ent ke shomárá sar butag o sajjahén donyáyá eshiay jár janag butag o mane Pulos hameshiay hezmatkáré jórh butagán.
COL 1:24 Nun man pa hamá azábán gal án ke pa shomáesh saggagá án. Man pa kelisáyá, bezán Masihay badanay háterá, hamá azábán wati jesmay sará saggagá án ke Masihá saggetagant.
COL 1:25 Kelisáay hezmatkár bayagay kár o zemmawári maná Hodáyá dátag ke Hodáay habará sarjamiá pa shomá sar bekanán,
COL 1:26 bezán hamá habar ke rázé butag o nasláni nasl, tán bázén wahd o zamánagéá chér dayag butag, bale nun pa Hodáay palgártagénán áshkár kanag butag.
COL 1:27 Hodáyá lóthet ke palgártagén mardom bezánant ke darkawm é rázay porshawkatén ganjay mirásá sharikdár ant. É ganj Masih ent ke shomay arwáh o jabiná ent o shomárá hamé ométá dant ke Hodáay shán o shawkatá sharikdár ét.
COL 1:28 Má hamé Masihay járá janén o gón kámelén hekmaté harkasá sar o sója kanén o tálima dayén, chéá ke má lóthén ke harkasá Masihay ráhá kámel bekanén o Hodáay démá pésh bekanén.
COL 1:29 Paméshká man sakk johdá án o mani johday bonyád Masihay dátagén hamá zór o wák ent ke mani bátená zórmandén twáné dant.
COL 2:1 Mana lóthán shomá bezánét ke man pa shomá chinchok johdá án, pa shomá o pa Lawdikiáay báwarmandán o pa hamáyán ke maná dém pa démá nadistagesh.
COL 2:2 Mani maksad esh ent ke shomárá delbaddhi berasit o pa mehr tepák bebét tánke kámelén deljami o ganjén zántay wáhond bebét o Hodáay rázá, bezán Masihá bezánét,
COL 2:3 hamá Masih ke hekmat o dánáiay sajjahén ganj áiay arwáh o jabiná ér ent.
COL 2:4 Man paméshká chosha gwashán ke yakké gón wati charpén gappán shomárá rad madant.
COL 2:5 Bell toré man cha shomá dur án, bale mani del gón shomá ent o wahdé gendán ke shomá chó shehm o rahdár ét o Masihay sará shomay imán chó mohr ent, gala bán.
COL 2:6 Gorhá anchó ke shomá Issá Masih wati Hodáwand mannetag, shomay zend ham modám hamé chizzá záher bekant.
COL 2:7 Shomay bonyád Masih bebit o shomay risshag o wandhál hamáiá sakk bebant. Wati imáná hamá paymá mohr o mohkam bekanét ke shomárá tálim dayag butag o shogrgozáriá sarréch bebét.
COL 2:8 Bechárét kasé gón palsapah o besarén prébá shomárá wati dámá maperrénit ke esháni bonyád Masih naent, é ensáni rasm o rawáj o donyái ráh o rahband ant.
COL 2:9 Chéá ke Hodáay sajjahén kámeliá jesmi suratá Issáay badanay tahá jágah kortag o
COL 2:10 Masihay barkatá shomárá har chizz hast, hamá Masih ke har zór o wákay sará sardast ent.
COL 2:11 Shomá ke Masihay sará imán áwort, sonnat kanag ham butét, bale é jesmi sonnaté naat o ensáni dastéá nakort. É sonnat shomay gonahkárén tab o sareshtay borrag o dawr dayag at ke Masihá kort.
COL 2:12 Hamá wahdá ke shomá pákshódi kort, gón Masihá kabr kanag butét o shomá ke Hodáay hamá wák o kodratay sará imán áwort ke Masihi cha mordagán zendag kort, gón Masihá zendag kanag ham butét.
COL 2:13 Pésará shomá wati gonáháni tahá mortagatét, chéá ke shomay gonahkárén tab o saresht borrag o dawr dayag nabutagat, bale Hodáyá shomárá gón Masihá zendag kort. May sajjahén gonáhi bakshetant o
COL 2:14 wámáni hamá daptar ke márá mayárbár kanagá at, Hodáyá á daptar salibá méh jat o wám halás kortant.
COL 2:15 Wahdé Masihá salibay sará ján dát, nadistagén jahánay hákem o wákdáráni sará báládast but, áyáni seláhi pach geptant o mahlukay démá roswái kortant.
COL 2:16 Gorhá kassá é hakká madayét ke warag o nóshagi chizzáni sará, yá nókay jashn yá Shabbat yá aidéay sará shomárá mayárig bekant.
COL 2:17 É rahband áyókén chizzáni násarjamén shekl butagant, bale asl Masih ent.
COL 2:18 Hamá mardomán ke préshtagáni parastesh o drógén békebri dósta bit, áyán maylét ke shomárá cha shomay enámá zebahr bekanant. É mardom wati elhám o shobénagáni bárawá sakk báz habara kanant o ensáni hayáláni gwátá porr ant.
COL 2:19 É mardom cha sará, bezán cha Masihá sestagant, hamá sar ke sarjamén jánay band o bóg o ragána jorhénit o yakka kant o hamá paymá ródénit ke Hodá lóthit.
COL 2:20 Shomá ke gón Masihá mortagét o cha é donyáay ráh o rahbandán ázát ét, gorhá chéá anchó zenda gwázénét ke gwashay angat é donyáay rahbandáni páband ét?
COL 2:21 “É chizzá kár madár. Á chizzá machash. É chizzá dast majan.”
COL 2:22 É sajjahén rahband ensáni parmán o tálimáni pédá kortagén ant o hamá chizzáni bárawá ant ke kármarz kanaga bant o halása bant.
COL 2:23 Záherá é rahbandáni bonyád dánái ent. É rahband ebádat o békebri o badanay ázár dayagay gappá kanant, bale drost békár ant o pa hawá o hawasáni ger o dárá hecch kára nadayant.
COL 3:1 Gorhá shomá ke gón Masihá zendag kanag butagét, wati del o hayálá gón ásmáni chizzán bekanét, hamódá ke Masih Hodáay rástén kashá neshtag.
COL 3:2 Hayálá gón donyáyá makanét, gón arshá bekanét.
COL 3:3 Shomá mortagét o shomay asligén zend Hodáay bárgáhá Masihay kerrá ér ent.
COL 3:4 Wahdé shomay zenday sarchammag, bezán Masih záhera bit, áiay hamráhiá shomá ham pa sháné záhera bét.
COL 3:5 Gorhá wati sajjahén donyái wáhagán bekoshét, chó ke bénangi, nápáki, hawá o hawas, badén wáhag o tamáh o lálech ke botparastié.
COL 3:6 Hamé káráni sawabá náparmánén mardománi sará Hodáay kahr o gazaba kapit.
COL 3:7 Shomá ham yakk wahdé, bezán wati hodánáparmánén zendá hamé kár kortagant.
COL 3:8 Bale nun é sajjahén chizzán, bezán zahr gerag, hezhm o badwáhiá yalah bedayét, bohtám majanét o sellén habar dapá mayárét.
COL 3:9 Gón yakdegará dróg mabandét, chéá ke shomá wati kwahnén zend o kwahnén ádat yalah dátagant o
COL 3:10 nókén zendé zortag. Hodáay bárawá ke shomay zánt géshtera bit, é zend badal bayána bit o wati jórh kanókay shekl o dróshomá zurit.
COL 3:11 Nun darkawm yá Yahudi, sonnat butagén yá nabutagén, wakshi, Sakái, golám yá ázát, choshén habarán hecch máná nést. Masih har chizz ent o may sajjahénáni delá ent.
COL 3:12 Gorhá shomá ke Hodáay gechén kortagén o palgártagén mardom ét o Hodá shomárá dósta dárit, pa rahmdeli o mehrabáni o békebri o narmdeli o sabr o ópár zend begwázénét.
COL 3:13 Yakdegaray bardáshtá bekanét o agan yakkéá cha domiá gelagé hast, áiá pahell bekant. Anchosh ke Masihá shomárá pahell kortag, shomá ham anchosh pahell bekanét.
COL 3:14 É káráni hamráhiá, yakdegará dóst ham bedárét, chéá ke mehr cha é sajjahénán báláter ent o sajjahén báwarmandán yakdela kant o mohrén reshtahéá bandit.
COL 3:15 Masihay dátagén émeni shomay delá hákemi bekant, chéá ke shomá yakkén jánay ázá ét o Hodáyá shomárá gechén kortag ke pa sohl o émeni zend begwázénét. Shogrgozári ham bekanét.
COL 3:16 Shomay báten cha Masihay tálimá sarréch bebit. Yakdomiá gón kámelén dánáiá tálim o delbaddhi bedayét. Zaburi sawt bejanét, hamd o saná bekanét, ruhi názénk bejanét o wati delá Hodáay shográ begerét.
COL 3:17 Har kár o har gappé ke kanét, Hodáwandén Issáay námay hayálá bedárét o hamáiay wasilahá Hodáén Petay shográ begerét.
COL 3:18 Oo janénán! Cha shomá harkas wati marday parmánbardáriá bekant ke é kár Hodáwanday mardomán zéba dant.
COL 3:19 Oo mardénán! Cha shomá harkas wati janá dóst bedárit o gón áiá trond mabit.
COL 3:20 Oo chokkán! Wati mát o petáni har gappá begerét ke é kár Hodáwandá razá kant.
COL 3:21 Oo petán! Wati chokkán zahr mabárénét ke delprósha bant.
COL 3:22 Oo golámán! Har kárá wati donyái wájaháni parmánbardáriá bekanét, tahná á wahdá na ke á shomárá cháragá ant, tahná pa mardománi razá kanagá na, pa del o setk o pa hodátorsi áyáni parmánbardáriá bekanét.
COL 3:23 Har káré ke kanét, pa del o setk bekanét, bezán shomá pa mardomán kanagá naét, pa Hodáwandá kanagá ét,
COL 3:24 chéá ke zánét shomárá cha Hodáwanday némagá mirásé rasit, hamé shomay mozz ent. Shomá Hodáwandén Masihay hezmatá kanagá ét.
COL 3:25 Harkas ke radén káré kant, áiá sezá rasit, pa kassá némagdária nabit.
COL 4:1 Oo wájahán! Gón wati golámán hakk o ensáp bekanét o bezánét ke shomárá ham ásmáná wájahé hast.
COL 4:2 Modám pa hozzhári o shogrgozári dwá bekanét.
COL 4:3 Pa má ham dwá kanét, ke Hodá pa má daré pach bekant o má Masihay rázay, bezán wasshén mestágay járá jat bekanén ke man pa hameshiá zamzilán bastagán.
COL 4:4 Dwá kanét ke é járá hamá paymá jat bekanán ke maná janagi ent.
COL 4:5 Hamá ke báwarmand naant, gón áyán pa dánái nend o pád á bekanét o har móhé ke shomárá rasit, áiá pa sharri kár bebandét.
COL 4:6 Modám sharr o mehrabánén habar bekanét. Shomay habar támdár bebant o bezánét ke har yakkéay passaw chón dayagi ent.
COL 4:7 Mani dóstigén brát o hamkár Tikikás ke Hodáwanday ráhá wapádárén hezmatkáré, shomárá mani sajjahén hálána dant.
COL 4:8 Áiá paméshká shomay kerrá ráh dayagá án ke shomárá may hálá sar bekant o shomárá delbaddhi bedant.
COL 4:9 Á gón Ónesimusá pédák ent. Ónesimus may wapádár o dóstigén bráté o shomay jenday mardom ent. É mardom shomárá eday sajjahén hálána dayant.
COL 4:10 Aristarkás ke gón man yakjáh bandig ent, shomárá salám kanagá ent. Bárnábáay nákózátk Markás ham shomárá salám kanagá ent. Markásay bárawá shomárá gwashag butag ke agan shomay kerrá átk, wasshátki bekanét.
COL 4:11 Issá, ke áiá Yustus ham gwashant, á ham shomárá salám kanagá ent. Pa Hodáay bádsháhiá, mani hamkáráni tahá Yahudi tahná hamesh ant o eshán maná tasallá dátag.
COL 4:12 Epáprás ke cha shomá yakké o Issá Masihay hezmatkáré, shomárá salám kanagá ent. Modám cha delay johlániká pa shomá dwá kant, ke shomá Hodáay sajjahén lóth o wáhagáni sará mohr bóshtét o báleg o pohtah bebét o shomay yakin kámel bebit.
COL 4:13 Man áiay bárawá gwáhia dayán ke á pa shomá o pa Lawdikiá o Hayrápulisay báwarmandán sakk báz johd kanagá ent.
COL 4:14 Dóstigén dáktar Luká shomárá salám kanagá ent o Démás ham.
COL 4:15 Mani salámán hamá brátán sar bekanét ke Lawdikiáyá ant. Nimpahá salám bekanét o hamá báwarmandán ham ke áiay lógá yakjáha bant.
COL 4:16 Wahdé é kágad pa shomá wánag but, bechárét ke Lawdikiáay kelisáyá ham wánag bebit o hamá kágad ke man pa Lawdikiáay kelisáyá dém dátag, áiá shomá ham bwánét.
COL 4:17 Arkipusá begwashét: “Bechár, hamá hezmat ke áiay zemmah Hodáwandá tará dátag, áiá pa sharri sarjam kan.”
COL 4:18 Nun, mane Pulos wati salámán daste wat nebisagá án. Mani zamziláni hayálá bebét. Hodáay rahmat gón shomá gón bát.
1TH 1:1 Cha Pulos o Silwánus o Timutáusay némagá, pa Tesálunikiáni kelisáyá ke Hodáén Pet o Hodáwandén Issá Masihayg ent. Rahmat o émeni shomárá sar bát.
1TH 1:2 Má har wahdá wati dwáyáni tahá shomay námá gerén o modám pa shomá sajjahénán Hodáay shográ gerén.
1TH 1:3 Má wati Hodáén Petay démá modám shomay báwarmandi kárán o pormehrén zahmatán o sagg o bardáshtá yáta kanén ke áyáni sarchammag hamá omét ent ke shomárá may Hodáwandén Issá Masihay sará hastent.
1TH 1:4 Oo brátán! Oo Hodáay dóstigén mardomán! Má zánén ke shomá Hodáay gechén kortagén ét,
1TH 1:5 chéá ke may wasshén mestág hoshkén gappé naat ke shomárá sar but, zór o wák o Pákén Ruhi ham gón at o mohkamén setké ham mán ati. Shomá zánét ke má gón shomá chón atén o má pa shomá ché kort.
1TH 1:6 Shomá mayg o Hodáwanday randgir jórh butét, chéá ke gránén sakki o sóriáni tahá shomá may habar pa galé zort, gón anchén shádmánié ke cha Pákén Ruhá rasit.
1TH 1:7 É káray sawabá shomá pa Makduniah o Akáyahay sajjahén báwarmandán mesálé jórh butét.
1TH 1:8 Chéá ke Hodáwanday habaray tawár cha shomá sheng but, tahná Makduniah o Akáyahá na, Hodáay sará shomay báwar har jágah zánag but. Paméshká zalurat naent ke má eshiay bárawá chizzé begwashén.
1TH 1:9 Chéá ke shomá márá chón wasshátk kort, mardom wat é kessahá kanant, o é gappá ham kanant ke shomá chón botparasti yalah dát o dém pa Hodáyá átkét ke namirán o rástén Hodáay parastesh o hezmatá bekanét o
1TH 1:10 áiay Chokkay wadárá bebét, hamá ke cha ásmáná kayt, hamá ke Hodáyá cha mordagán zendag kort, bezán Issá ke márá cha áyókén gazabá rakkénit.
1TH 2:1 Oo brátán! Shomá wata zánét ke shomay kerrá, may áyag bépáedag naat.
1TH 2:2 Anchó ke shomá zánét, má shomay kerrá áyagá pésar Pilipiay shahrá chón azáb o béezzat kanag butén, bale má cha wati Hodáay komakká tahm o jorat kort o inchok dozhmeniay tahá ham má Hodáay wasshén mestág pa shomá sar kort.
1TH 2:3 É dazbandiá ke má kanén, eshiá radi yá badniyati mán nést o má shomárá rad dayag ham nalóthén,
1TH 2:4 Wasshén mestágay járá paméshká janagá én ke Hodáyá márá chakkásetag o distagi ke má é káray láhek én. Má mardománi wassh kanagay johdá naén, Hodáay wassh kanagay johdá én, hamá Hodá ke may delána chakkásit.
1TH 2:5 Shomá zánét ke má hechbar cháplusi nakortag o na márá chérén tamáh o láleché butag. Hodá sháhed ent.
1TH 2:6 Cha mardomán tawsipay lóthók ham nabutagén, na cha shomá o na cha degarán, bell toré Masihaykásediay námá má wati ehtiár pésh dásht kortagat.
1TH 2:7 Bale má chó nakort o gón shomá anchó mehrabán atén ke máté gón wati chokkána bit.
1TH 2:8 Má pa shomá sakk wáhagdár atén o pa galé gón shomá tahná Hodáay wasshén mestág bahr nakort, wati jenday zendagi ham bahr kort, chéá ke shomá márá sakk dóst atét.
1TH 2:9 Brátán! Shomárá may johd o zahmat allam yát ant. Wahdé má shomay kerrá Hodáay wasshén mestágay járá janagá atén, má shap o róch kár ham kort tánke cha shomá kaséay sará báré mabén.
1TH 2:10 Shomá sháhed ét o Hodá ham sháhed ent ke má báwarmandáni nyámá, bezán shomay nyámá chónén pahrézkár o pák o béaybén zendé gwázént.
1TH 2:11 Shomá zánét ke má gón shomá har yakkéá anchosh atén ke mehrabánén peté gón wati jenday chokkána bit.
1TH 2:12 Má shomárá delbaddhi o deljami dát o dazbandi kort ke anchén zendé begwázénét ke Hodáay láhek bebit, hamá Hodá ke shomárá tawára kant ke dém pa mani bádsháhi o shán o shawkatá byáét.
1TH 2:13 Má modám Hodáay shográ gerén ke wahdé Hodáay habar shomárá sar but, hamá habar ke shomá cha má eshkot, shomá mannet ke ensáni habaré naent, Hodái habaré o anchosh ent ham. É Hodáay habar ent ke shomay bezán báwarmandáni delán asar kanagá ent.
1TH 2:14 Oo brátán! Shomá Hodáén Pet o Issá Masihay hamá kelisáyáni paymá kort ke Yahudiahá ant. Chéá ke shomárá shomay jenday mardomán hamá paymá ázár dát ke Yahudián á kelisá ázár dátant,
1TH 2:15 hamá Yahudián ke Hodáwandén Issá o paygambar koshtant o márá ham ázár dát. Á, Hodáyá nárazá kanant o harkasay dozhmen ant.
1TH 2:16 Á mardoma naylant ke má gón darkawmán wasshén mestágay bárawá habar bekanén, hamá mestág ke darkawmána rakkénit. É paymá á modám wati gonáhán tán goddhi haddá rasénant o godhsará Hodáay kahr áyáni sará kapit.
1TH 2:17 Brátán! Má ke pa kammén wahdéá cha shomá jetá butén, bell ke dém pa dém naatén bale del wa hawár atant, delborrén zahirán márá har paymén johd parmát ke padá gón shomá dém pa dém bebén.
1TH 2:18 Mane Pulosá báz randá johd kort o má lóthet ke shomay gwará byáén, bale Shaytáná may ráh o dar band kortant.
1TH 2:19 Chéá ke may omét o may shádmáni shomá ét. Shomá may hamá táj ét ke má áiay sará pahra bandén, wati Hodáwandén Issáay bárgáhá, hamá wahdá ke Hodáwanda kayt.
1TH 2:20 Haw, shomá may shán ét o shomá may shádmáni ét.
1TH 3:1 Paméshká wahdé má géshter sagget nakort, má shawr kort ke man o Silwánus Átenay shahrá dárén o
1TH 3:2 may brát Timutáus ke Hodáay ráhá Masihay wasshén mestágay sheng kanagay kárá may hamkár ent, áiá déma dayén ke shomay imáná mohrter bekant o shomárá delbaddhi bedant
1TH 3:3 tánke hechkas é sakki o sóriáni tahá malarzit. Chéá ke shomá wata zánét ke sakki o sóri allam may ráhá káyant.
1TH 3:4 Wahdé shomay kerrá atén, má shomárá cha pésará gwasht ke máshomá ázár dayaga bén o anchosh but, shomá sharriá zánét.
1TH 3:5 Paméshká, wahdé man géshter sagget nakort, pa shomay imánay hálay geragá yakké démon dát. Maná torset ke balkén chakkásókén Shaytáná warhé na warhéá shomárá chakkásá dawr dátag o may johd mopt o náhudag butag.
1TH 3:6 Bale Timutáus nóki cha shomay kerrá wátarr butag o may kerrá átkag o shomay báwar o mehray bárawá wasshén hálé gón enti. Márá gwashti ke shomá modám márá pa sharri yáta kanét o shomárá pa may didárá zahira kant, anchosh ke márá pa shomá zahira kant.
1TH 3:7 Eshiay sawabá, oo brátán, márá wati sajjahén janjál o ázáráni tahá shomay bárawá deljami raset, shomay imánay sawabá.
1TH 3:8 Nun má árámá neshta kanén ke shomá Hodáwanday ráhá mohr óshtátagét.
1TH 3:9 Má pa shomá Hodáay haminchok shográ begerén ham kamm ent, chéá ke má shomay sawabá Hodáay bárgáhá sakk gal én.
1TH 3:10 Má shap o róch cha delay johlánkiá dwá kanén ke shomárá padá begendén o har chizzé ke shomay imánay tahá kamm ent, áiá sarjam bekanén.
1TH 3:11 Nun may Hodáén Petay jend o may Hodáwandén Issá may ráhá pach kanát ke má shomay kerrá byáén.
1TH 3:12 Hodáwand shomay mehrá pa yakdomiá o pa sajjahénán gésh kanát. Shomay del cha mehrá sarréch bát, hamá paymá ke pa shomá may del cha mehrá sarréch ent.
1TH 3:13 Hodáwand shomay delá mohr o mohkam kanát ke wahdé may Hodáwandén Issá gón wati sajjahén palgártagénána kayt, shomá may Hodáén Petay bárgáhá béayb o pák o palgár bebét.
1TH 4:1 Brátán! Dega gappé esh ent, má shomárá sój dátag ke wati zendá chón begwázénét ke Hodá cha shomá wassh o razá bebit o shomá anchosh kanagá ét ham. Nun Hodáwandén Issáay námá gón shomá dazbandia kanén o gwashén ke é chizzá róch pa róch géshter bekanét.
1TH 4:2 Chéá ke shomá zánét ke má cha Hodáwandén Issáay némagá shomárá chónén parmán dátag.
1TH 4:3 Hodáay razá esh ent ke shomá pák o palgár bebét o watá cha hawas o syahkáriá dur bedárét.
1TH 4:4 Báyad ent cha shomá har yakké gón páki o palgári o pa ezzat wati jesmay lagámay dáragá bezánt.
1TH 4:5 Darkawmáni dhawlá mabét ke Hodáyá nazánant o hawá o hawasáni golám ant.
1TH 4:6 Kass pa wati hawasá brátay ezzatá dast majant o cha áiá páedag chest makant, chéá ke Hodáwand har gandagén káray sezáyá dant, anchó ke má pésará shomárá hozzhár kortag o gwashtag.
1TH 4:7 Hodáyá márá pa nápákiá gwánk najatag, pa páki o palgáriá gwánki jatag.
1TH 4:8 Paméshká harkas ke é sójá nazurit, á ensánéay náparmániá kanagá naent, Hodáay náparmániá kanagá ent, hamá Hodá ke shomárá wati Pákén Ruhá dant.
1TH 4:9 Márá pa shomá bráti mehray bárawá nebeshtah kanagay zalurat naent, chéá ke shomá wat cha Hodáay tálimán dar bortag ke chón yakdomiá dóst bedárét.
1TH 4:10 Shomá wa gón Makduniahay sajjahén brátán mehr kanagá ét. Bale oo brátán! Má gón shomá dazbandia kanén ke wati mehrá róch pa róch géshter bekanét.
1TH 4:11 Wati sajjahén wasá bekanét ke pa hámóshi zend begwázénét o degaray kárá kár madárét. Wat kár o rózgár bekanét, anchó ke má shomárá hokm dátag.
1TH 4:12 É paymá shomá darámadáni démá ezzatmandén zendé gwázénta kanét o hechkasay chamdára nabét.
1TH 4:13 Brátán! Má lóthén ke shomá markay wábá waptagénáni bárawá sarpad bebét o á mardománi dhawlá porsig mabét ke hecch ométesh nést.
1TH 4:14 Agan márá báwar ent ke Issá mort o padá zendag but, gorhá márá é ham báwar ent ke Issáay hamá báwarmand ke markay wábá waptagant, Hodá áyán Issáay hamráhiá padá kárit.
1TH 4:15 Má Hodáwanday jenday habaráni bonyádá shomárá gwashagá én, má ke annun zendag én o tán Hodáwanday áyagá zendaga mánén, hecch paymá cha waptagénán pésara narawén.
1TH 4:16 Chéá ke Hodáwand wat préshtagáni sardáray tawár o Hodáay karnáay tawáray hamráhiá, hokm dayáná cha arshá éra kayt. Gorhá, awalá Masihay hamá báwarmand zendaga bant ke mortagant o
1TH 4:17 padá má ke angat zendag én o hamedá én, chest kanag o gón áyán hawár jambaráni tahá ásmáná baraga bén ke Hodáwandá didár bekanén. É paymá, modám gón Hodáwandá yakjáha bén.
1TH 4:18 Paméshká yakdomiá gón é habarán delbaddhi bedayét.
1TH 5:1 Oo brátán! Zalurat naent ke má wahd o rócháni bárawá pa shomá nebeshtah bekanén.
1TH 5:2 Chéá ke shomá sharriá zánét ke Hodáwanday róch chó shapi dozzéá kayt.
1TH 5:3 Hamá wahdá ke mardoma gwashant “amn o amán ent”, áyáni sará anágat tabáhié kayt, anchó ke lápporrén janénéay chellagi dard anágat káyant, o á tatka nakanant.
1TH 5:4 Bale, oo brátán! Shomá taháriá naét ke á róch chó dozzéá byayt o shomárá jáh beserrénit.
1TH 5:5 Chéá ke shomá drost rozhnay chokk ét, róchay chokk ét. Má shapay chokk naén, taháriay chokk naén.
1TH 5:6 Gorhá byáét máshomá é degaráni dhawlá nakanén o wába nakapén, ágaha mánén o hozzhára bén.
1TH 5:7 Chéá ke hamá ke wapsant, shapá wapsant o hamá ke sharába warant, shapá sharába warant o bésára bant.
1TH 5:8 Bale má ke róchay chokk én, má hozzhár bebén, imán o mehrá chó sénagpóshá bebandén o nejátay ométá chó jangi koláhá sará bekanén.
1TH 5:9 Chéá ke Hodáyá márá pa gazabay saggagá gechén nakortag, márá gechéni kortag ke wati Hodáwandén Issá Masihay barkatá berakkén.
1TH 5:10 Á pa má mort ke má, toré zendag bebén yá marká wáb, gón áiá zendag bemánén.
1TH 5:11 Paméshká yakdomiá delbaddhi bedayét o wati imánay rost o rodómá yakdegará komakk bekanét, anchó ke shomá annun kanagá ét.
1TH 5:12 Oo brátán! Nun má cha shomá dazbandia kanén, hamá mardomán ezzat bedayét ke shomay nyámá zahmat kasshagá ant o Hodáwanday ráhá shomay master ant o shomárá sar o sój kanagá ant.
1TH 5:13 Áyáni káray sawabá áyán báz ezzat bedayét o dóst bedárét. Gón yakdomiá pa émeni zend begwázénét.
1TH 5:14 Brátán! Má cha shomá dazbandia kanén, hamá ke tambal o jándozz ant, áyán sarpad bekanét, hamá ke delprósh ant, áyán delbaddhi bedayét, hamá ke nezór ant, áyán komakk bekanét o sajjahénáni bardáshtá bekanét.
1TH 5:15 Hayálá bedárét ke kass badiay badalá badi makant. Badi makanét o modám pa yakdegará o pa harkasá sharriay randá bebét.
1TH 5:16 Modám gal o shádán bebét.
1TH 5:17 Har wahdá dwá bekanét.
1TH 5:18 Har paymén jáwaráni tahá Hodáay shográ begerét, chéá ke pa shomá Hodáay razá hamesh ent, shomá ke Issá Masihayg ét.
1TH 5:19 Pákén Ruhay ásá makoshét.
1TH 5:20 Péshgóián kamsharap makanét,
1TH 5:21 bale har chizzá bechakkásét o hamá ke sharr ent, hamáiá wati kerrá bedárét.
1TH 5:22 Cha har dhawlén badiá dur bebét.
1TH 5:23 Hodáay jend, émeniay Hodá shomárá sarjamiá pák o palgár bekanát. Tán may Hodáwandén Issá Masihay wátarr bayagá shomay arwáh o sáh o badan sarjamiá béayb bemánátant.
1TH 5:24 Hamá Hodá ke shomárá tawára kant, wati kawlay sará óshtátag o é kárá kant.
1TH 5:25 Brátán! Pa má dwá kanét.
1TH 5:26 Sajjahén brátán pa pákdeli bechokkét o salám sar kanét.
1TH 5:27 Man shomárá Hodáwanday námá hokma dayán ke é kágad pa sajjahén brátán wánag bebit.
1TH 5:28 May Hodáwandén Issá Masihay rahmat gón shomá gón bát.
2TH 1:1 Cha Pulos o Silwánus o Timutáusay némagá, pa Tesálunikiáni kelisáyá, ke may Hodáén Pet o Hodáwandén Issá Masihayg ent.
2TH 1:2 Cha may Hodáén Petay o Hodáwandén Issá Masihay némagá rahmat o émeni shomárá sar bát.
2TH 1:3 Oo brátán! Hakkén gapp esh ent ke má báyad ent modám pa shomá Hodáay shográ begerén, chéá ke shomay imán róch pa róch rodán ent o pa yakdomiá shomay sajjahénáni mehr ham gésh bayán ent.
2TH 1:4 Paméshká má Hodáay é dega kelisáyánibáwarmandáni kerrá pa shomay sagg o bardásht o imáná, shomay sará pahra bandén ke har paymén ázár o janjáláni tahá ét o angat mohr óshtátagét.
2TH 1:5 É drost sábeta kanant ke Hodáay dádrasi barhakk ent o shomá hakdára bét ke Hodáay mahluk hesáb bebét, ke pa eshiá ázár saggagá ét.
2TH 1:6 Hodá ádel ent, á mardom ke pa shomá janjála sázant, Hodá wat áyáni zendá janjál pédá kant o
2TH 1:7 shomá ke janjáláni ámách ét, shomárá áráma dant o márá ham. É kár hamá wahdá bit ke Hodáwandén Issá gón wati zórmandén préshtagán cha ásmáná gón jamburén áséá watá záhera kant o
2TH 1:8 hamáyán sezá dant ke Hodáyá pajjáha nayárant o may Hodáwandén Issáay wasshén mestágay parmánbardáriá nakanant.
2TH 1:9 Esháni sezá esha bit ke abadi tabáhié esháni chakká kapit o hamá róchá cha Hodáwanday bárgáhá o cha áiay zóray shán o shawkatá zebahra bant
2TH 1:10 ke Hodáwand wati palgártagénáni kerrá kayt o wati shán o shawkatá záhera kant o sajjahén báwarmand áiá gendant o é pa áyán ajab o hayrán kanókén nedáragé bit. Shomá ham góna bét chéá ke shomá hamá sháhedi báwar kort ke má shomárá dát.
2TH 1:11 Paméshká má modám pa shomá dwá kanén ke shomay zendagi anchosh bebit ke Hodáay gwánká bekarzit. Hodá gón wati zór o wáká shomay nékén erádahán purah kanát o har káré ke shomay imán shomárá parmáit, áiá sarjam kanát.
2TH 1:12 Má é dwáyá kanén tánke may Hodáay o Hodáwandén Issá Masihay rahmatay barkatá, shomay del o daruná may Hodáwandén Issáay námay shán o shawkat záher bebit o Masih shomárá ezzat bedant.
2TH 2:1 Oo brátán! Nun, may Hodáwandén Issá Masihay áyag o áiay kerrá may mocch bayagay bárawá, má cha shomá dazbandia kanén ke
2TH 2:2 agan mani námay sará anchén gappé shomárá sar but ke gwashit Hodáwanday róch átkag o rasetag, toré péshgóié bebit yá hál o hawálé yá kágadé, bezánét ke drógé, damáná larzán mabét o delá dawr madayét.
2TH 2:3 Chó mabit kasé warhé na warhé shomárá rad bedant, Hodáwanday róch tán hamá wahdá nayayt ke mardom cha Hodáwandá sarkassh mabant o bérahbandén mard, bezán “tabáhiay chokk” páshk mabit.
2TH 2:4 Á Hodáay helápá oshtit o watá cha hamá sajjahén chizzán bálátera kant ke Hodáay námesh per ent yá parastesh kanaga bant. Godhsará wat Hodáay parasteshgáhá nendit o jára jant ke Hodá man án.
2TH 2:5 Shomárá yát naent ke wahdé shomay kerrá atán, man shomárá é hál dátant?
2TH 2:6 Shomá zánét ke hamá bérahbandén mardá annun kojám chizz dáragá ent o nayliti ke cha wati wahdá pésar záher bebit.
2TH 2:7 Chéá ke bérahbandiay chérén zór o wák wati kárá cha pésará kanagá ent, bale hamá ke bérahbandiay démá dáragá ent, tánke jendi dur kanaga nabit, bérahbandiay démá dárit.
2TH 2:8 Wahdé á dur kanag but, nun bérahbandén mard záhera bit, bale Hodáwandén Issá pa shán o shawkaté kayt o áiá tabáha kant, gón wati dapay hoppéá áiá nést o nábuda kant.
2TH 2:9 Bérahbandén marday áyag Shaytánay káráni bahré. Á gón har paymén zór o drógén nesháni o mójezahána kayt o
2TH 2:10 gón tahr tahrén badián hamá mardomán rada dant ke gári o gomráhiay ráhesh zortag. É mardom gár o gomsára bant, chéá ke eshán rásti dóst nadáshtag o nazortag ke berakkant.
2TH 2:11 Paméshká Hodá pa eshán zórmandén prébé déma dant ke drógá báwar bekanant o
2TH 2:12 é dhawlá hamá sajjahén mardom mayárbár kanaga bant ke rásti‌esh báwar nakortag o badiay tahá shádmán butagant.
2TH 2:13 Oo brátán! Oo Hodáwanday dóstigén mardomán! Má báyad ent pa shomá modám Hodáay shográ begerén, chéá ke Hodáyá shomárá cha bendátá gechén kortag ke shomá Pákén Ruhay pák o palgár kanókén káray barkatá o rástiay sará wati imánay barkatá berakkét.
2TH 2:14 Pa é kárá, Hodáyá shomárá may wasshén mestágay barkatá tawár kortag ke shomá may Hodáwandén Issá Masihay shán o shawkatá bahramand bebét.
2TH 2:15 Gorhá, brátán, mohkam bóshtét o hamá tálim ke má shomárá dátagant, áyán mohr bedárét, zobáni habar bebant yá may nebeshtagén kágad.
2TH 2:16 May Hodáwandén Issá Masihay jend o may Hodáén Pet ke márá dósta dárit o wati rahmatay barkatá márá abadi delbaddhi o sharrén ométi dátag,
2TH 2:17 shomay delá dhaddh kanát o shomárá pa har sharrén kerdár o goptárá zórmand kanát.
2TH 3:1 Nun gorhá, brátán! Pa má dwá kanét ke Hodáwanday kolaw o paygám téziá sheng o tálán bebit o mardom é paygámay ezzatá bekanant, anchosh ke shomá kortag.
2TH 3:2 Dwá kanét ke má cha badkár o radkárén mardomán berakkén, chéá ke har mardom báwarmand naent.
2TH 3:3 Bale Hodáwand wati kawlay sará óshtátag o shomárá mohr o mohkama kant o cha sherr o Shaytáná dura dárit.
2TH 3:4 Shomay bárawá má Hodáwanday barkatá deljam én ke shomá hamá chizzán kanagá ét o démterá ham kanét ke má shomárá áyáni hokmá dayén.
2TH 3:5 Hodáwand shomay delá Hodáay mehr o Masihay sagg o bardáshtay némagá betarrénát.
2TH 3:6 Brátán! Má shomárá wati Hodáwandén Issá Masihay námá hokma dayén, har bráté ke tambal o jándozz ent o may kortagén sar o sójáni hesábá zend gwázenagá naent, watá cha áiá dur bedárét.
2TH 3:7 Chéá ke shomá wata zánét, má pa shomá mesálé butagén ke may randgiriá bekanét. Má ke shomay kerrá atén, má tambali o jándozzi nakort,
2TH 3:8 má kaséay nán moptá nawárt, má shap o róch kára kort, mehnat o mozzuria kort ke cha shomá kassi sará báré mabén.
2TH 3:9 Má é sawabá kár nakortag ke hecch paymén komakkay hakdár nabutagén, má é sawabá kár kortag ke pa shomá mesálé bebén o shomá may randgiriá bekanét.
2TH 3:10 Chéá ke wahdé má shomay kerrá atén, má shomárá é hokm dát, á kas ke kár kanaga nalóthit, mawárt ham.
2TH 3:11 Nun má eshkotag ke shomay nyámá lahtén hast ke tambal o jándozzén zendé gwázenagá ant. Wat hecch kárá naant, bale harkasay kárá kár entesh.
2TH 3:12 Má Hodáwandén Issá Masihay námá choshén mardomán hokma dayén o habardára kanén ke pa shehm o rahdári kár bekanét o wati rózigá dar géjét.
2TH 3:13 Oo brátán! Shomá cha sharrén kárá dam mabarét.
2TH 3:14 Bale agan kasé é habarán mamannit ke má é kágadá nebeshtah kortagant, wati chammán cha áiá dur makanét bale gón áiá manendét o pád mayáét, belli sharmendaga bit.
2TH 3:15 Bale áiá dozhmenay hesábá machárét, pa bráti sarpadi bekanét ke wati radiá bezánt.
2TH 3:16 Émeniay Hodáwand wat, shomárá har wahdá o har paymá émen kanát. Hodáwand shomay sajjahénáni hamráh bát.
2TH 3:17 Mane Pulos é salámán daste wat nebeshtah kanagá án o é chizz mani sajjahén kágadáni nesháni ent. Man hamé paymá nebeshtaha kanán.
2TH 3:18 May Hodáwandén Issá Masihay rahmat gón shomá sajjahénán gón bát.
1TI 1:1 Cha Pulosay némagá, mane Pulos ke cha may rakkénókén Hodá o may omét Issá Masihay hokmá, Issá Masihay kásedé án,
1TI 1:2 pa Timutáusá, ke imánay hesábá mani hakkigén chokk ent. Cha Hodáén Pet o may Hodáwandén Issá Masihay némagá tará rahmat o rahm o émeni sar bát.
1TI 1:3 Hamá wahdá ke Makduniahá rawagá atán, man gón taw dazbandi kort o annun ham gwashán ke Epésosay shahrá bedár o lahtén mardom ke drógén tálim dayagá ent, áyán hokm beday ke wati é kárá band bekanant o
1TI 1:4 watgarhén kessah o halás nabayókén sar o bonáni némagá ham delgósh makanant. É chizz Hodáay káray démá baragay badalá arh o korh addha kanant, chéá ke Hodáay kár cha imánay ráhá démá rawt.
1TI 1:5 É hokmay maksad mehr ent ke cha sapáén del o pákén zamir o delsetkén imánéá pédá bit.
1TI 1:6 Lahtén ostádá é chizz yalah kortagant o gomráh butagant o bémánáén gappáni tahá mán gisshetagant.
1TI 1:7 É mardom Sharyatay zánóger bayaga lóthant bale nazánant ke ché gwashagá ant o hamá chizzáni bárawá ke pa deljami habara kanant, á chizzáni jendá ham sarpada naant.
1TI 1:8 Má zánén ke Sharyat sharr ent, bale agan yakké pa sharri kári bebandit.
1TI 1:9 Má é ham zánén ke Sharyat pa pahrézkárán jórh kanag nabutag, pa Sharyatay próshókán, pa sarkasshán, pa hodánáparmán o gonahkárán, pa nápák o bédinán, pa hamáyán ke wati pet o mátána koshant, pa hónigán,
1TI 1:10 pa syahkárán, pa lawátkárán, pa golámáni tájerán, pa drógband o drógén sawgend warókán o pa é dega hamá mardomán jórh kanag butag ke rástén tálimay heláp ant,
1TI 1:11 hamá tálim ke áiay sarchammag mazanshánén Hodáay porshawkatén wasshén mestág ent ke mani dastá dayag butag.
1TI 1:12 May Hodáwandén Issá Masih ke maná zór o wáki dátag, man áiay shográ gerán ke áiá maná wapádár zánt o pa wati hezmatkáriá dásht.
1TI 1:13 Har chont ke pésará kopr kanók, ázár dayók o sheddatién mardomé atán, bale Hodáwandá mani sará rahm kort, chéá ke man cha wati nábáwariá zánagá naatán ke ché kanagá án.
1TI 1:14 Haw, may Hodáwanday rahmatán mani sará békesás gwart. Maná cha hamá imán o mehrá sarréchi kort ke cha Issá Masihay némagá rasant.
1TI 1:15 É gapp rást ent o sarjamiá mannaga karzit ke Issá Masih pa gonahkáráni rakkénagá donyáyá átk o esháni tahá ganterén man án.
1TI 1:16 Bale mani sará paméshká rahm kanag but ke Issá Masihá lóthet gón man wati békesásén sabr o ópárá záher bekant, man ke cha sajjahénán ganter án, o é paymá man pa hamá mardomán mesálé bebán ke áiay sará imána kárant o abadmánén zendéay wáhonda bant.
1TI 1:17 Abadmánén bádsháh, bezán hamá yakkén Hodá ke namirán ent o cha chammán chér o andém ent, áiay ezzat o shawkat abad tán abad barjáh bát. Anchosh bát. Ámin.
1TI 1:18 Timutáus, mani chokk! Man tará é hokmá, hamá péshgóiáni bonyádá dayán ke yakk randé tai bárawá kanag butagant tánke taw áyáni tránagá bekapay o é nékén johdá kort bekanay o
1TI 1:19 wati imán o pákén zamirá barjáh dásht bekanay. Lahtén mardomá wati zamiray tawár gósh nadáshtag o wati imánesh zawál kortag.
1TI 1:20 Cha eshán yakké Himenáus ent o yakké Sekandar ke man cha kelisáyá kasshetag o yakkerr kortagant ke ebrat begerant o kopr makanant.
1TI 2:1 Gorhá cha har chizzá pésar mani dazbandi esh ent ke pa sajjahén mardomán arz o peryát, dwá, myánjigeri o shogrgozári bekanét,
1TI 2:2 pa bádsháhán o pa sajjahén ehtiárdárán ham dwá bekanét tánke má pa sarjamén Hodádósti o páki, émen o hámóshén zendé gwázént bekanén.
1TI 2:3 Hamé kár sharr ant o may neját dayókén Hodáyá dósta bant,
1TI 2:4 hamá Hodá ke pa sajjahén mardomán nejátay wáhagdár ent o lóthit ke har mardom rástiá pajjáh byárit o bemannit.
1TI 2:5 Chéá ke Hodá yakké. Hodá o ensánay nyámá myánjiger ham yakké o á Issá Masih ent ke wat ham ensáné.
1TI 2:6 Áiá pa sajjahén mardománi mókagá watá nadr kort. É gappay sháhedi wati wahdá dayag but.
1TI 2:7 Man pa é maksadá gechén kanag butagán ke jár janók o kásedé bebán o darkawmán imán o rástiay tálimá bedayán. Man rást gwashagá án, dróg nabandagá án.
1TI 2:8 Mana lóthán ke mardén zahr gerag o ják o jérhahán yalah bedayant o har jágah pák o palgárén dastán borz bekanant o dwá belóthant.
1TI 2:9 Cha janénán ham lóthán ke shehm o rahdár bebant o monásebén póshák gwará bekanant. Watá gón warh warhá gwaptagén mudán o teláh o morwáred o gránbaháén pocch o póshákán masambahénant.
1TI 2:10 Esháni badalá, watá gón anchén sharrén kár o kerdán besambahénant ke hamá janénán zéba dayant ke watá Hodádósta gwashant.
1TI 2:11 Janén báyad ent pa hámóshi o parmánbardári tálim begerant.
1TI 2:12 Man janénéá ejázata nadayán ke mardénéá tálim bedant yá mardénéay sará báládast bebit. Janén báyad ent pa hámóshi gósh bedárit.
1TI 2:13 Chéá ke pésará Ádam jórh but o randá Hawá.
1TI 2:14 O é Ádam naat ke rad dayag but, áiay janén at ke rad dayag but o náparmán but.
1TI 2:15 Bale janén, Chokkay pédá kanagay barkatá rakkit, agan janén imán o mehr o pákiay ráhá pa sangini démá rawán bebant.
1TI 3:1 É gapp rást ent ke á kas ke kelisáay kamáshé bayaga lóthit, á pa sharrén káréá wáhagdár ent.
1TI 3:2 Báyad ent kelisáay kamásh anchéné bebit ke áiá mardománi malámat per mabit. Gón wati janá wapádár bebit, grán o sanginén mardomé bebit o watá dásht bekant, marháhdár o mehmánnawáz bebit o sharriá tálim dát bekant,
1TI 3:3 sharábié mabit, sheddatién mardomé mabit, narmtabé bebit, jangólé mabit, zardósté mabit.
1TI 3:4 Á báyad ent wati lógay mardománi rahshóniá sharriay sará bekant o pa ezzat wati chokkán anchó beródénit ke á parmánbardár bebant.
1TI 3:5 Kasé ke wati jenday lógay mardománi rahshóniá sharriay sará kort makant, Hodáay kelisáay hayáldáriá chón korta kant?
1TI 3:6 Kelisáay sarparast báyad ent nókbáwaré mabit, chó mabit ke gorunák bebit o hamá paymá mayárbár bebit ke Shaytán but.
1TI 3:7 Á báyad ent nábáwaráni kerrá ham washnám bebit ke shegánig mabit o Shaytánay dámá makapit.
1TI 3:8 Hamé paymá báyad ent kelisáay hezmatkár ham ezzatmandén mardom bebant, tachk o rást bebant, sharábi mabant o pa zarr o málá lálech o tamáh makanant.
1TI 3:9 Á báyad ent gón pákén zamiré imánay ráz o ramzáni sará wati báwará mohr bedárant.
1TI 3:10 Pésará báyad ent áyáni kár chárag bebant. Agan áyáni helápá hecch dast nakapt, gorhá pa hezmatkáriá zurag bebant.
1TI 3:11 Hamé paymá áyáni jan ham ezzatmand bebant, mardománi báposhtá habar makanant, grán o sangin bebant o har hesábá imándár bebant.
1TI 3:12 Hezmatkár ham gón wati janá wapádár bebit o wati lógay mardománi rahshóniá sharriay sará bekant.
1TI 3:13 Á ke sharriá hezmata kanant, áyán mazanén ezzaté bit o pa deléri gwashta kanant ke má Issá Masihay báwarmand én.
1TI 3:14 Bell toré maná é omét hastent ke zutt tai kerrá byáyán, bale angat é sar o sóján pa taw nebeshtah kanagá án ke
1TI 3:15 agan man dér kort, taw bezánay ke Hodáay lógay mardom báyad gón yakdomiá che paymá pésh byáyant, hamá ke namiránén Hodáay kelisáay mardom ant o rástiay menok o bonyád ant.
1TI 3:16 Béshakk Hodádóstiá mazanén rázé mán: Á, ensánéay shekl o dróshomá záher but, Pákén Ruhá áiay rásti sábet kort, préshtagán á dist, kawmáni nyámá áiay jár janag but, donyáay tahá áiay sará imánesh áwort, á, porshawkatén arshá barag but.
1TI 4:1 Pákén Ruh tachká tachka gwashit ke áheri zamánagán lahtén mardom imáná yalaha kant o rad dayókén ruháni randá kapit o hamá tálimáni némagá rawt ke palitén ruhesha dayant.
1TI 4:2 É tálim cha drógbandáni dotal o dopóstiá pédá bant. É drógbandáni zamir gón taptagén ásenéá dág dayag o koshag butag.
1TI 4:3 É drógband, mardomán cha sur o árósá manah o makana kanant o lahtén warákay nawaragay hokmá dayant, hamá warák ke Hodáyá jórh kortagant ke báwarmand, bezán rástiay zánókesh pa shogrgozári bwarant.
1TI 4:4 Hodáay jórh kortagén har chizz sharr ent o chizzé ke yakkéá rasit, báyad ent pa shogrgozári bezuriti o dawri madant,
1TI 4:5 chéá ke gón Hodáay habará o gón báwarmanday dwáyá pák o palgár kanag butag.
1TI 4:6 Agan taw hamé chizzán báwarmandán sój bedayay, gorhá bezán Issá Masihay sharrén hezmatkáré ay o imánay rástiáni tahá o sharrén tálimay tahá rostagay, hamá tálim ke taw cha pésará áiay randgiriá kanagá ay.
1TI 4:7 Watá cha watgarhén o bé sar o pádén kessahán ke gón Hodáyá hecch sar o káresh nést, dur bedár. Gón eshán sar o chér bayagay badalá watá Hodátorsiay tamriná beday.
1TI 4:8 Chéá ke jesmi tamrin bépáedag naent, bale Hodátorsiay páedag har hesábá báz ent ke pa annugén zendá ham Hodáay kawl o karári gón ant o pa áyókén zendá ham.
1TI 4:9 É gapp rást ent o karzit ke sarjamiá mannag bebit.
1TI 4:10 Paméshká má wati wasá kár o johda kanén, chéá ke má wati omét namiránén Hodáay sará bastag. Sajjahén mardománi rakkénók hamá ent, hás hamáyáni rakkénók ent ke imána kárant.
1TI 4:11 É habaráni hokm o tálimá beday.
1TI 4:12 Tai kasánomriay sawabá kass tará kamarzesh sarpad mabit o tai goptár o kerdár o mehr o imán o páki pa báwarmandán mesálé bebant.
1TI 4:13 Tán mani áyagá watá gón é kárán dazgatth kan: pa mardomán Pákén Ketábá borztawáriá bwán o áyán delbaddhi o tálim beday.
1TI 4:14 Cha wati hamá ruhánién nyámatá nádelgósh mabay ke tará hamá wahdá raset ke kamásháni rombá tai sará dast ér mosht o yakkéá tará gón Pákén Ruhay elhámá é nyámatay hál dát.
1TI 4:15 Pa hobb o hodónáki é kárán bekan o watá sarjamá pa eshán wapk kan ke harkas tai démrawiá begendit.
1TI 4:16 Wati zend o tálim dayagay némagá sharriay sará delgósh bekan o démá baránesh kan. Agan é kárán bekanay, watá ham rakkénay o wati gósh dárókán ham.
1TI 5:1 Gón kamáshén mardénéá pa trondi habar makan. Áiá anchosh nasiat bekan ke wati petá kanay, kasterén mardénán chó wati brátá,
1TI 5:2 masterén janénán chó wati mátá o kasterén janénán chó wati gohárá nasiat bekan, gón kámelén pákniyatiá.
1TI 5:3 Hamá janózám ke hakk o del hájatmand ant, áyáni hayálá bedár.
1TI 5:4 Bale agan janózáméá chokk yá nomásag hast, gorhá chokk o nomásag wati Hodátorsiá awalá wati lógay tahá pésh bedárant o wati lógay hayálá bedárant o é paymá wati masterénáni hakká adá bekanant. Chéá ke é kár Hodáyá dósta bit.
1TI 5:5 Janózámé ke hakk o del hájatmand o békas ent, wati ométá gón Hodáyá bandit o shap o róch dwá kant o cha Hodáyá komakka lóthit.
1TI 5:6 Bale hamá janózám ke pa wati jenday lezzatán zendag ent, bezán zendagá mortag.
1TI 5:7 Báwarmandán hamé sar o sóján bekan ke kass áyáni námá pa badi magipt.
1TI 5:8 Agan kasé wati syád o wáresáni, hás wati jenday lógay mardománi hayáldáriá makant, bezán ke áiá cha wati imáná enkár kortag o cha nábáwaréá ganter ent.
1TI 5:9 Wahdé shomá hamá janózámáni námán nebeshtaha kanét ke cha kelisáyá komakka gerant, tahná hamáiá hawár kanét ke omri shast sálá borz ent o gón wati mardá wapádár butag.
1TI 5:10 Á wati sharrén káráni sawabá washnámén mardomé bebit. Anchén mardomé bebit ke wati chokki sharr ródéntagant, mehmándárii kortag, palgártagénáni hezmati kortag, paréshánén mardománi komakki kortag o pa har paymén sharrén kárá modám tayár butag.
1TI 5:11 Kasterén janózámáni námán hawár makanét, chéá ke wahdé áyáni jesmi wáhag hamá wapáay sará ke gón Masihá hastentesh, báládasta bant, á sur o sáng kanaga lóthant.
1TI 5:12 É paymá, gón wati awali kawl o wádahay próshagá wati sará mayárbária kárant.
1TI 5:13 Eshiá abéd, tambali o jándozzi ádata kanant o lóg pa lóga rawant. Tahná jándozza nabant, habar ham barant o kárant, harkasi kárá kára dárant o anchén habara kanant ke báyad makanant.
1TI 5:14 Gorhá pa kasánén janózámán mani shawr o saláh hamesh ent ke á sur o árós bekanant, chokk byárant o wati lógáni hayáldáriá bekanant ke dozhmen áyán bohtám jat makant.
1TI 5:15 Lahtén wa cha pésará Shaytánay némagá tarretag o áiay randgiriá kanagá ent.
1TI 5:16 Har báwarmandén janéné ke áiay lógá janózám hast, áyáni hayáldáriá bekant o maylit ke kelisáay sará báré bebant, tánke kelisá hamá janózámáni hayáldáriá kort bekant ke pa rásti hájatmand ant.
1TI 5:17 Hamá kamásh ke sharriá kelisáay rahshóniá kanant, á do sari ezzat o hayáldária karzant, hás hamá ke wáz kanag o tálim dayagay kárá sakk johda kanant.
1TI 5:18 Chéá ke Pákén Ketába gwashit: “Jóhánay moshagay wahdá káigeray dapá maband” o “kár kanók mozzay hakdár ent.”
1TI 5:19 Tánke do yá say sháheda nabit, kamáshéay sará jatagén bohtámá mamann,
1TI 5:20 bale hamá ke gonáha kant, mahlukay démá malámat kanag bebit, tánke é dega mardom ebrat begerant.
1TI 5:21 Man tará Hodá o Issá Masih o gechénién préshtagáni démá kaddhana kanán ke hecch park o pér makan o é sar o sóján bezur o hecch paymén ru o ryá makan.
1TI 5:22 Kaséay sará dastay ér moshag o áiá kelisáay kamásh kanagá eshtáp makan ke degaráni gonáhán sharikdára bay. Watá pák o palgár bedár.
1TI 5:23 Taw áp waragá ay o bass. Nun pa wati láp o hamá nádráhián ke tará géshter wahdá hastant, kammé sharáb ham bwar.
1TI 5:24 Lahtén mardomay gonáh záher ant o cha gonahkárá pésar dádrasiay jágahá sara bant. Á degaráni gonáh randterá záhera bant.
1TI 5:25 Hamé warhá lahtén sharrén kár damáná záhera bit o hamá sharrén kár ke tán wahdéá chér o andém ant, á ham randterá záhera bant.
1TI 6:1 Hamá mardom ke golámiay jogay chérá ant, báyad ent bezánant ke áyáni wájah sarjamén sharapay láhek ant. É paymá Hodáay nám o imánay tálim bohtám janaga nabant.
1TI 6:2 Hamá golám ke áyáni wájah báwarmand ant, nabáyad wati wájahán é háterá kamter ezzat bedayant ke imánay bonyádá brát ant. É golám báyad ent angat géshter wati wájaháni hezmatá bekanant, chéá ke esháni hezmat dóstigén báwarmandéá páedaga dant. É chizzáni tálimá beday o gón mardomán dazbandi kan ke anchosh bekanant.
1TI 6:3 Agan kasé radén tálim bedant o cha may Hodáwandén Issá Masihay rástén habarán o Hodátorsiay tálimá dur bebit,
1TI 6:4 á gorunák ent o hecch sarpada nabit. Áiá nathahag o labz o mánáyáni sará arh o korh kanag wassha bit o é nádráhié. Eshiay ásar hamá mardománi nyámá hasadd, sest o séd, bohtámjani, badgománi o
1TI 6:5 dáemi jérhah o janjál ent ke áyáni pegr o hayál sell tarretagant o á cha rástiá dur barag butagant. Esháni gomán hamesh ent ke Hodátorsi páedagmandén kár o báré.
1TI 6:6 Bale rástén gapp esh ent ke Hodátorsi gón razámandiá mazanén páedagé.
1TI 6:7 Chéá ke má donyáyá hecch nayáwortag o wati hamráhiá cha donyáyá hecch bort ham nakanén.
1TI 6:8 Nun, agan márá warák o póshák hast, bass ent, rázig bebén.
1TI 6:9 Hamá ke sér bayaga lóthant, watá chakkásán dawra dayant o anchén ahmak o táwán dayókén wáhagáni dámá kapant ke mardomá tabáhi o barbádiá dawra dayant.
1TI 6:10 Chéá ke zardósti har warhén badén káráni risshag o wandhál ent. Lahtén ke pa zarrá hodónák ent, imánay ráhesh yalah dátag o gam o ranján kaptagant.
1TI 6:11 Bale taw, oo Timutáus, Hodái mardomé ay. Cha é chizzán watá dur bedár o pahrézkári, hodátorsi, imán, mehr, sabr o ópár o narmtabiay randá bekap.
1TI 6:12 Imánay nékén johdá bekan. Abadmánén zendá dastá byár, hamá zendá ke pa áiá gwánk janag butagay o bázén sháhedéay démá hamé nékén ekráret kortag ke taw Issá Masihay báwarmandé ay.
1TI 6:13 Hodáay bárgáhá, hamá Hodá ke har chizzá zenda bakshit o Issá Masihay bárgáhá, hamá Masih ke Pontius Pilátusay démá wati sháhediay tahá nékén ekrári kort, man tará hokma dayán ke
1TI 6:14 tán may Hodáwandén Issá Masihay áyagá, Hodáay bépóleng o béaybén hokmán bemann.
1TI 6:15 Hodáwandén Issá Masihay áyagay wahdá Hodá wata gisshénit, hamá yakkén mazanshánén Hákem ke bádsháháni Bádsháh o hodáwandáni Hodáwand ent,
1TI 6:16 hamá ke yakk o tahná namirán ent o áiay dargáh anchén rozhné ke kass ódá raseta nakant o kassá nadistag o disti ham nakant. Áiay sharap o ezzat o zór o wák tán abad barjáh bát. Anchosh bát. Ámin.
1TI 6:17 Hamá mardom ke é donyáyá hastómand ant, áyán hokm beday ke gorunák mabét o wati ométá gón wati mál o hastiá mabandét ke mál o hastia kayt o rawt. Wati ométá Hodáay sará bebandét ke gón daspachi márá alkáp o peráwánén zendé dant.
1TI 6:18 É mardomán sój beday ke sharrén kár bekanant, nékiá sarréch o málá daspach bebant.
1TI 6:19 É dhawlá, á pa wat ganjé moccha kanant ke pa áyáni áyókén zendá mohkamén bonyádé bit o hamá zendá dastá kárant ke hakk o delén zendé.
1TI 6:20 Oo Timutáus! Harché ke tai amánat kanag butag, áiay negahpániá bekan. Watá cha bé sar o pádén gappán ke gón Hodáyá hecch sar o káresh nést dur bedár o watá cha hamá drógén tálimán ham dur bedár ke pa radi zántay nám dayag butagant.
1TI 6:21 Lahténá é tálimáni randgiri kort o imánay ráhesh yalah dát. Hodáay rahmat shomay sajjahénáni sará sáhél bát.
2TI 1:1 Cha Pulosay némagá, mane Pulos ke cha Hodáay razáyá Issá Masihay kásedé án tánke hamá zenday kawl o wádahay járá bejanán ke cha Issá Masihá rasit,
2TI 1:2 pa mani dordánagén chokk Timutáusá. Tará cha Hodáén Pet o may Hodáwandén Issá Masihay némagá rahmat o rahm o émeni sar bát.
2TI 1:3 Man shap o róch ke wati dwáyáni tahá modám tará yáta kanán, Hodáay shográ gerán, hamá Hodá ke man gón pákén zamiréá áiay parastesh o hezmatá kanán, anchó ke mani pet o pirokán kortag.
2TI 1:4 Tai arsáni tránagá ke kapán, maná pa tai didárá zahira kant ke tará begendán o galá bál bebán.
2TI 1:5 Tai bégarazén imánay yátá kapán ke awalá tai ballok Luis o tai mát Yunikahay delá jágahi kort o man deljam án ke nun tai delá ham jágahi kortag.
2TI 1:6 Paméshká man tará tránagá géján ke Hodáay dátagén nyámatá dobar kármarz kan, hamá nyámat ke tará cha hamá wahdá gón ent ke man wati dast tai sará ér moshtant.
2TI 1:7 Chéá ke Hodáyá márá choshén ruhé nadátag ke márá bozdel bekant, márá zór o wák o mehr o dáshtay Ruhi bakshátag.
2TI 1:8 Gorhá may Hodáwanday bárawá sháhedi dayagá lajj makan. Mani hálatay sará ham sharmendag mabay ke man pa Hodáwandaygi bandig án. Man pa wasshén mestágá é sakki o sórián ke bardásht kanagá án, tawesh ham gón Hodáay bakshátagén zórá bardásht kan.
2TI 1:9 Hodáyá márá neját dátag o pa pákén zendéá gwánk jatag. Márá may kortagén káráni sawabá gwánki najatag, wati jenday erádah o rahmatay bonyádá gwánki jatag o é rahmat márá Issá Masihay barkatá, cha azalá dayag butag o
2TI 1:10 nun gón may rakkénókén Issá Masihay áyagá záher butag, hamá Issá Masihá ke markay jend nést o nábud kort o cha wasshén mestágay ráhá abadmánén zend záher kort.
2TI 1:11 Man gechén kanag butagán ke é wasshén mestágay jár janók o kásed o tálim dayóké bebán.
2TI 1:12 Man paméshká sakki o sóri saggagá án, bale sharmendag naán chéá ke zánán man kai sará imán áwortag o deljam án ke áiá é wák o twán hast ke tán wati áyagay róchá hamá amánatay negahpániá bekant ke maná dátagi.
2TI 1:13 Harché ke taw cha man eshkotag, é rástén tálim ant. Eshán wati kerrá bedár o pa imán o mehr esháni sará kár kan, chéá ke taw Issá Masihay ráhá ay.
2TI 1:14 Hamá wasshén mestág ke tai amánat ent, gón Pákén Ruhay komakká, áiay negahpániá bekan, hamá Pákén Ruh ke may tahá zendag ent.
2TI 1:15 Taw zánay ke Ásiáay damagay sajjahén mardomán maná yalah dátag, Pigélus o Hermugénes ham á rombá gón ant.
2TI 1:16 Hodáwand Onésiporusay lógay mardománi sará mehrabán bát, chéá ke báz bará mani arwáhi tázah kortag o mani zamziláni sawabá sharmendag nabutag.
2TI 1:17 Wahdé Rumay shahrá átk, maná sakk báz shóházi kort o dari gétk.
2TI 1:18 Hodáwand wati áyagay róchá Onésiporusay sará mehrabán bát. Wahdé man Epésosay shahrá atán, taw sharr zánay ke áiá chinkadar mani hezmat kort.
2TI 2:1 Oo mani chokk! Gorhá taw hamá rahmatay barkatá ke márá cha Issá Masihay némagá rasit, watá mohr o mohkam bedár.
2TI 2:2 Harché ke man bázén sháhedéay démá gwashtag o taw eshkotag, é tálimán anchén porehtebárén mardománi sepordah bekan ke degarán tálim dát bekanant.
2TI 2:3 Issá Masihay sharrén sepáhigéay paymá, sakki o sóriáni saggagá gón bay.
2TI 2:4 Hamá sepáhig ke jangá rawt watá gón é dega kárán dazgattha nakant. Á lóthit ke mani apsar cha man razá bebit.
2TI 2:5 Hamé dhawlá, kasé ke layb o gwáziá bahra zurit, tánke rahbandáni hesábá layba nakant, áiá katthókay tája narasit.
2TI 2:6 Kesháray awali bahr báyad ent dehkáná berasit ke hédi rétkag.
2TI 2:7 Harché man gwashagá án, esháni sará pegr bekan ke Hodáwand tará é sajjahén chizzáni zánt o sarpadiá dant.
2TI 2:8 Issá Masihá yát bekan, hamá ke Dáuday nasl o óbádagé o cha mordagán zendag but. Hamé mani paygám ent o
2TI 2:9 pa hameshiá sakki o sória saggán, tantaná chó radkárá zamzilán bastagán. Bale Hodáay habar zamzilán nabastag.
2TI 2:10 Gorhá Hodáay gechén kortagénáni háterá man har chizza saggán ke áyán ham neját berasit. É neját o eshiay abadmánén shán o shawkat Issá Masihay sará imán áragay barkatá rasit.
2TI 2:11 É gapp rást ent ke: Agan má gón Issáyá mortagén, gorhá gón áiá zendag ham bén.
2TI 2:12 Agan má sakki o sórián besaggén, gón áiá bádsháhi ham kanén. Agan má áiay moridiá enkár bekanén, á ham may pajjáh áragá enkára kant.
2TI 2:13 Agan má gón áiá béwapái bekanén, á gón má angat wapá kant, chéá ke á wati tab o sareshtay helápá shota nakant.
2TI 2:14 Báwarmandán modám é chizzáni tránagá begéj. Hodáyá sháhed kan o áyán habardár kan ke labz o mánáyáni sará jang makanét. É chizzán hecch arzesh nést, hoshká gósh dárókáni imáná tabáha kanant.
2TI 2:15 Wati sajjahén johdá bekan ke watá Hodáay démá ke pésha kanay, Hodáay kabul kortagén mardomé bebay, anchén kár kanóké bebay ke sharmendag bayagay zalurati mabit o rástiay habará bé radiá bayán bekant.
2TI 2:16 Watá cha bé sar o pádén gappán ke gón Hodáyá hecch sar o káresh nést, dur bedár chéá ke choshén gapp o rapp, mardomá cha Hodáyá róch pa róch durtera kanant.
2TI 2:17 É paymén gapp o habar báwarmandáni nyámá anchó shenga bant ke shummakay nájórhi badaná shenga bit. Himenáus o Pilétus anchén mardomán ant
2TI 2:18 ke rástiay ráhesh yalah dátag. Á gwashant ke mordag wa chónáhá cha kabrán pád átkag o zendag butagant, o é paymá lahténay imáná tabáha kanant.
2TI 2:19 Bale padá ham Hodáay sará báwarmand mohra óshtant, lógéay mohkamén bonyáday paymá. Hodáyá wati báwarmandáni sará é habar naksh kortag o mohr jatagant: “Hodáwand wati mardomán pajjáha kárit” o “Harkas ke Hodáwanday námá gipt, báyad ent watá cha badkáriá dur bedárit.”
2TI 2:20 Sérén mardoméay lógay darp o hirán tahná teláh o nograhayga nabant, dár o gelay darp ham bit. Lahtén darp o hirán pa hásén kárán kár bandaga bit o lahtén pa adnáén kárán.
2TI 2:21 Agan kasé watá cha badkáriá dur bedárit o watá palgár bekant, pa hásén kárán darpé bit, pák o palgár kanaga bit, wati wáhonday dardá wárt o pa har sharrén kárá tayára bit.
2TI 2:22 Watá cha warnáiay hawá o hawasán dur bedár o hamá mardom ke gón sápén delé Hodáwanday námá gerant, áyáni hamráhiá pahrézkári o imán o mehr o émeniá shóház bekan.
2TI 2:23 Tará gón ahmak o násarpadén gappán kár mabit, chéá ke taw zánay ke é gapp, arh o korh páda kanant.
2TI 2:24 Hodáwanday hezmatkár báyad ent arh o korh makant. Arh o korhay badalá gón harkasá mehrabán bebit, tálim dát bekant o sagg o bardáshti báz bebit.
2TI 2:25 Wati helápén mardomán pa narmi rástén ráhá sój bedant, balkén Hodá áyán móh bedant ke tawbah bekanant o rástiay zántá sar bebant,
2TI 2:26 hósh o sár bekanant o cha Shaytánay dámá bechotthant, hamá Shaytán ke é mardomi bandig kortagant tánke áiay wáhagá sarjam bekanant.
2TI 3:1 É gappá bezán, ke áheri zamánagán gránén wahda káyant.
2TI 3:2 Mardom wati jendá dósta dárant, zardóst, batháki, gorunák, záh o bad kanók, pet o mátay náparmán, náshogr, nápák,
2TI 3:3 bémehr, pahell nakanók, bohtám janók, bédásht, zálem, sharriay naprat kanók,
2TI 3:4 dróhók, béparwáh o porkebra bant o Hodáay badalá aysh o nóshá dósta dárant.
2TI 3:5 Zaherá Hodátorsa bant bale hamá zór o wáká namannant ke áyán pa rásti Hodátorsa kant. Tará gón choshén mardomán hecch kár mabit.
2TI 3:6 Esháni nyámá anchén mardom hast ke lógáni tahá poterant o hamá janénán wati dámá dawr dayant ke nézór ant o gonáhá bár ant o har paymén radén wáhagáni golám ant.
2TI 3:7 Choshén janén modám nókén tálimáni randá kapant, bale hechbar rástiá sarpada nabant.
2TI 3:8 Anchó ke Yannis o Yambris Mussáay heláp atant, hamé dhawlá é radén tálim dayók ham rástiay heláp ant, sellén pegr o hayál o drógén imánay wáhond ant.
2TI 3:9 Bale é mardom báz démá shota nakanant, chéá ke harkas esháni ahmakiá gendit, anchó ke Yannis o Yambrisay ahmaki gendag but.
2TI 3:10 Bale taw mani bárawá zánay, mani sajjahén tálim, mani zenday warh o paym, mani maksad, imán, sabr, mehr o sagg o bardáshtay bárawá o
2TI 3:11 hamá ázár o sakki o sóriáni bárawá ham zánay ke Antákiah o Ekóniah o Lestrahay shahrán mani sará kaptant. Man é ázár saggetant o Hodáwandá maná cha é sajjahénán neját dát.
2TI 3:12 Harkas ke Issá Masihay ráhá Hodái zendé gwázénaga lóthit, ázár dayaga bit o
2TI 3:13 badén mardom o rad dayók degarán rada dayant o wat rada kapant o róch pa róch gantera bant.
2TI 3:14 Bale hamá chizz ke taw dar bortagant o tará áyáni sará yakin ent, áyán barjáh bedár chéá ke taw zánay ke é chizz taw cha kojám mardomán dar bortagant.
2TI 3:15 Tará sarjamén Pákén Ketábay zánt cha gwánzagá gón ent. É ketáb tará sarpad korta kant ke chón tará Issá Masihay sará imánay barkatá nejáta rasit.
2TI 3:16 Pákén Ketábay sajjahén habar Hodáayg ant ke elhámay sheklá démi dátagant. Pákén Ketáb pa tálim dayagá, pa radiáni sarpad kanag o rást kanagá o pa pahrézkáriay hél dayagá páedagmand ent
2TI 3:17 tánke har Hodádóst pa har paymén sharrén kárá kábel o tayár bebit.
2TI 4:1 Man tará Hodá o Issá Masihay démá sawgendá dayán, hamá Issá Masih ke róché na róché padá kayt. Kayt o bádsháhia kant o zendagén o mortagénáni dadrasiá kant,
2TI 4:2 taw Hodáay habaray járá bejan, wahd o náwahd pa jár janagá tayár bay. Mardomán hakkal kan o gón mazanén sabr o ópár o bázén sar o sójé áyáni radián rást kan o delbaddhiesh beday.
2TI 4:3 Chéá ke yakk wahdé kayt ke mardom rástén tálimá bardáshta nakanant o wati chapp o chágerdá anchén tálim dayókáni mazanén rombé moccha kanant ke áyáni delay habará bekanant.
2TI 4:4 Mardom rástiay némagá delgósha nakanant o watgarhén kessaháni randá kapant.
2TI 4:5 Bale har hálat o jáwaréá tará dásht bebit, sakki o sóri besagg, wasshén mestágay jár janagay kárá démá barán kan o wati hezmatkáriay zemmahá sarjam kan.
2TI 4:6 Nun gapp esh ent ke mani hón wa chónáhá réchagi korbánigéay paymá réchag bayagá ent o mani rawagay wahd átkag.
2TI 4:7 Man wati nékén johd kortag, man wati zenday tách o maydán sarjam kortag o wati imánay sará óshtátagán.
2TI 4:8 Nun páki o palgáriay táj pa man ér ent, hamá táj ke Hodáwand, bezán ádelén dádras wati áyagay róchá maná danti, tahná maná na, hamá sajjahén mardomán ham danti ke áiay záher bayagay lóthók butagant.
2TI 4:9 Zutt kan o watá pa man sar kan.
2TI 4:10 Chéá ke Démásá wati donyádóstiay sawabá maná yalah kortag o Tesálunikiay shahrá shotag. Kriskis Galátiahá shotag o Titus Dalmátiahá.
2TI 4:11 Tahná Luká mani kerrá ent. Markásá bezur o gón wat byár, chéá ke á Hodáay hezmatkáriá pa man mazanén komakké.
2TI 4:12 Man Tikikás Epésosay shahrá dém dát.
2TI 4:13 Wahdé káay, hamá kabáh ke man Truásay shahrá Kárpusay kerrá ér kort, áiá gón wat byár o mani tumárán ham, hás hamá ke cha póstá addh kanag butagant.
2TI 4:14 Ásenkárén Sekandará gón man bázén badié kortag. Hodáwand áiay kortagén káráni sezáyá áiá dant.
2TI 4:15 Taw ham watá cha áiá dur bedár, chéá ke may paygámay sakk heláp at.
2TI 4:16 Awali randá ke man hakdiwáná pésh kanag bután, kass mani komakká nayátk. Sajjahénán maná yalah kort. Hodá eshán bebakshát.
2TI 4:17 Bale Hodáwand mani kashá óshtát o maná zór o wáki dát, tánke man sarjamiá paygámay járá bejanán o sajjahén darkawm beshkonant. É paymá man cha shéray dapá rakketán.
2TI 4:18 Hodáwand maná cha har paymén sherr o badá rakkénit o maná pa salámati wati ásmáni bádsháhiá sara kant. Áiay shán o shawkat barjáh bát, abad tán abad. Anchosh bát. Ámin.
2TI 4:19 Priskilah o Akwiláyá salám kan o Onésiporusay lógay mardomán ham.
2TI 4:20 Erástus Korentay shahrá nesht o Trupimus ke nádráh at, man Militusay shahrá yalah dát.
2TI 4:21 Zutt kan o cha zemestáná pésar watá edá sar kan. Yubulus tará salám kanagá ent, anchosh ham Pudens o Linus o Kládiá o sajjahén brát.
2TI 4:22 Hodáwand gón taw gón bát. Shomárá rahmat sar bát.
TIT 1:1 Cha Pulosay némagá, mane Pulos ke Hodáay hezmatkár o Issá Masihay kásedé án ke Hodáay gechén kortagénáni imáná mohrter bekanán o áyáni rástiay zántá démá bebarán, hamá rásti ke dém pa Hodátorsiá rahshóna bit.
TIT 1:2 É zánt márá abadmánén zenday ométá dant o Hodá ke dróga nabandit, áiá ham cha azalá é abadmánén zenday wádah kortag.
TIT 1:3 May rakkénókén Hodáyá, wati hokmay barkatá, é paygámay jár janagay zemmawári maná dátag o é paymá wati habari pa wahd záher kortag.
TIT 1:4 Pa Titusá ke mani o áiay imán yakk ent o imánay hesábá mani hakkigén chokk ent. Tará cha Hodáén Pet o may rakkénókén Issá Masihay némagá rahmat o émeni sar bát.
TIT 1:5 Man tará paméshká Kritay jazirahá nádent o shotán ke taw násarjamén kárán begisshénay o har shahrá kamásh gechén bekanay o kárán áyáni dastá bedayay, hamá paymá ke man tará hokm dátagat.
TIT 1:6 Kamásh báyad ent anchéné bebit ke áiá mardománi malámat per mabit, gón wati janá wapádár bebit, áiay chokk báwarmand bebant o choshén káré makanant ke kasé áyáni sará sarkasshi o náparmániay bohtámé jat bekant.
TIT 1:7 Kelisáay kamáshá Hodáay lógay zemmah gón ent, paméshká báyad ent áiá mardománi malámat per mabit, gorunák mabit, damáná zahr magipt, sharábié mabit, sheddatién mardomé mabit o pa zarr o málá lálech o tamáh makant.
TIT 1:8 Kamásh báyad ent mehmánnawáz bebit, sharri o nékiá dóst bedárit, dáshti bebit, pahrézkár, pák o palgár o shehm o rahdár bebit.
TIT 1:9 Kamáshá hamá porehtebárén tálim ke dayag butag, báyad ent áiay sará mohr bóshtit tánke á degarán gón sharrén tálimá delbaddhi dát bekant o hamá ke é tálimay heláp ant, áyán sarpad kort bekant ke á rad ant.
TIT 1:10 Chéá ke sarkasshén mardom o puttár o prébkár báz ent, hás sonnat kanagay mannókáni tahá.
TIT 1:11 É mardománi dap báyad ent band kanag bebit, chéá ke pa wati lálech o tamáhá lahtén lógá sarjamá tabáh kanagá ant. É anchén tálim dayagá ant ke báyad ent madayant.
TIT 1:12 Esháni jenday sháeréá gwashtag: “Kritay mardom poshti drógband ant, wakshi ant o jándozzén lápi ant.”
TIT 1:13 É gwáhi rást ent, paméshká pa trondi sarpadesh kan ke rástén imánay sará mohr bóshtant o
TIT 1:14 Yahudiáni watgarhén kessahán delgósh makanant o choshén mardománi hokmán gósh madárant ke cha rástiá bar gashtagant.
TIT 1:15 Pa pákdelén mardomán har chizz pák o sáp ent, bale á mardom ke palit o nábáwar ant, pa áyán har chizz nápák ent. Aslá, é mardománi pegr ham palit ant o zamir ham.
TIT 1:16 É mardoma gwashant ke má Hodáyá zánén, bale áyáni kár pésha dárant ke áiá nazánant. Choshén mardom bazzhenák ant, náparmán ant o hecch sharrén káray kábel naant.
TIT 2:1 Hamá chizzáni tálimá beday ke gón rástiá hamdap ant.
TIT 2:2 Mazanomrén mardénán tálim beday ke grán o sangin bebant, sharapdár bebant o dáshtesh bebit. Báyad ent áyán rástén imán o mehr o sagg o bardásht bebit.
TIT 2:3 Hamé dhawlá mazanomrén janénán tálim beday ke sharapdárén zendé begwázénant, báposhtá habar makanant o sharábi mabant. Á báyad ent sharrén kár o kerday dars o sabakká bedayant.
TIT 2:4 Gorhá kasterén janénán sar o sój korta kanant ke chón wati lógwájah o chokkán dóst bedárant,
TIT 2:5 chón dáshtesh bebit o pák o pársá bebant, chón wati lógay kárán delgósh bebant, chón mehrabán o wati lógwájaháni parmánbardár bebant tánke Hodáay habar bohtám janag mabit.
TIT 2:6 Hamé paymá warnáén mardénán ham delbaddhi beday ke dáshtesh bebit.
TIT 2:7 Taw har sharrén kárá pa áyán mesálé bebay. Tálim dayagá tachk o rást o grán o sangin bebay o
TIT 2:8 tai habar o bayán rást bebant ke kass áyáni tahá radié dar gétk makant o tai badwáh pashal o sharmendag bebant o may helápá hecch badén habaré kort makanant.
TIT 2:9 Golámán tálim beday ke har kárá wati wájaháni parmánbardár bebant, áyán wassh o razá bekanant, gón áyán hamjwábi makanant,
TIT 2:10 cha áyáni málán hecch chizz madozzant o sharrén amánatdár bebant tánke hamá tálim ke may rakkénókén Hodáay bárawá ent, á tálimá pa mardomán delkassh bekanant.
TIT 2:11 Chéá ke Hodáay rahmat ke sajjahén mardomán rakkénta kant, záher butag.
TIT 2:12 É rahmat márá tálima dant ke má watá cha hodánáparmáni o donyái hawá o hawasán dur bedárén o hamé wahdá ke má wati mobárakén ométay entezár o wadárá én, bezán wati mazanén Hodá, wati rakkénókén Issá Masihay porshawkatén áyagay wadárá én, é donyáyá pa jenday dásht o pahrézkári o Hodátorsi zend begwázénén.
TIT 2:14 Issá Masihá wati zend pa má nadr kort ke márá cha may sajjahén selkárián bemókit o pa wat kawmé pák o palgár bekant ke áiay jendayg bebit o é kawm pa sharrén káray kanagá hobbig o hodónák bebit.
TIT 2:15 É hamá chizz ant ke taw báyad ent esháni tálimá bedayay. Gón sarjamén ehtiáré áyán delbaddhi beday o pa trondi sarpadesh kan. Mayl ke mardom tará béarzesh sarpad bebant.
TIT 3:1 Báwarmandán yátá perrén ke hákem o ehtiárdáráni ezzatá bekanét, áyáni parmánbardár bebét o pa har sharrén káray kanagá tayár bebét.
TIT 3:2 Hechkasá bohtám majanét o gón mardomán arh o korh makanét, báyad narmdel bebét o gón sajjahén mardomán pa békebri pésh byáét.
TIT 3:3 Yakk wahdé má ham béagl o náparmán o gomráh butagén o har paymén badén wáhag o hawá o hawasáni golám butagén. Má wati zend badkári o hasadday tahá gwázéntag. Napratay hakdár butagén o má gón yakdomiá naprat kortag.
TIT 3:4 Bale may rakkénókén Hodáay mehrabáni o mehr ke záher but,
TIT 3:5 Hodáyá márá rakként. Márá may nékén káráni sawabá narakkénti, wati rahmay sawabá rakkénti. Áiá márá shosht o Pákén Ruhay barkatá nókén zendé dát o é paymá márá rakkénti.
TIT 3:6 Hodáyá márá may rakkénókén Issá Masihay barkatá, cha Pákén Ruhá sarréch kort,
TIT 3:7 tánke má ke áiay rahmatay barkatá pák o palgár butagén, abadmánén zenday ométay mirásdár bebén.
TIT 3:8 É gapp rást ent o mana lóthán ke taw é tálimay sará zór bedayay, tánke hamá mardomán ke wati omét gón Hodáyá bastag, wati delgóshá gón sharrén kárán bekanant. É sharrén habar ant o pa harkasá páedagmand ant.
TIT 3:9 Cha bésarén arh o korhán o moptén sar o bon kanagán o cha dapják o Sharyatay bárawá jang o jérhahán watá dur bedár, chéá ke é bémáná o bépáedagén gapp ant.
TIT 3:10 Anchén mardomé ke báwarmandáni rombá prosht o prósha kárit, yakk o do randá áiá habardár kan. Agan sharr nabut, watá cha áiá dur bedár.
TIT 3:11 Chéá ke taw zánay ke é gomráh o gonahkárén mardomé o wati jenday gonáhán bár ent.
TIT 3:12 Man Artemásá yá Tikikásá tai kerrá ráha dayán. Anchó ke kayt, taw johd bekan ke Nikupolisay shahrá, mani kerrá byáyay, chéá ke mani erádah ent ke berawán o zemestáná hamódá begwázénán.
TIT 3:13 Wati sajjahén wasá bekan ke wakil Zénás o Apulosá áyáni sapará komakk bekanay. Bechár ke á pa hecch chizzá mohtáj mabant.
TIT 3:14 May mardom báyad ent dar bebarant ke chón watá pa sharrén kárán wapka kanant tánke degaráni zaluratán purah bekanant. É paymá may mardománi zendagi bésamara nabit.
TIT 3:15 E sajjahén mardom ke mani kerrá ant, tará saláma kanant. Hamá báwarmand ke márá dósta dárant, áyán salám kan. Hodáay rahmat shomay sajjahénáni sará sáhél bát.
PHM 1:1 Cha Pulosay némagá, mane Pulos ke pa Issá Masihaygi zendáná bandig án o cha may brát Timutáusay némagá, pa may dóstigén hamkár Pilimun o
PHM 1:2 gohárén Apyah o hamráhén johdkár Arkipus o pa hamá báwarmandán ke shomay lógá pa ebádatá yakjáha bant.
PHM 1:3 Cha may Hodáén Pet o Hodáwandén Issá Masihay némagá shomárá rahmat o émeni sar bát.
PHM 1:4 Man har wahdá ke wati dwáyáni tahá tará yáta kanán, modám wati Hodáay shográ gerán,
PHM 1:5 chéá ke tai imán o tai mehray hál maná sar bayagá ent, hamá imán ke tará Hodáwandén Issáay sará hastent o hamá mehr ke tará pa sajjahén palgártagénán hastent.
PHM 1:6 Mani dwá ent ke hamá imán ke máshomá áiá sharikdár én, tai zánt o zánagá géshter kanát. Har sharrén chizzé ke márá cha Masihay barkatá hastent, áiay bárawá tai zánt géshter bát.
PHM 1:7 Mani brát! Maná tai mehráni sawabá mazanén wasshi o delbaddhié rasetag, chéá ke taw palgártagénáni del, árám o táhir dátag.
PHM 1:8 Bell toré man Masihay barkatá pa deljami tará hokm dáta kanán ke ché bekan o ché makan,
PHM 1:9 bale mane Pulos ke pirmardé án o annun Issá Masihay háterá bandig án, mehray bonyádá gón taw dazbandié kanán.
PHM 1:10 Man gón taw Ónesimusay bárawá dazbandia kanán ke imánay hesábá mani chokk ent o bandigiay wahdán maná rasetag,
PHM 1:11 hamá ke pésará tará hecch páedagi nadát, bale nun pa taw o pa man, doénán páedagmand ent.
PHM 1:12 Man áiá pa taw per tarrénagá án, bezán wati delá pa taw rawán dayagá án.
PHM 1:13 Nun ke man pa wasshén mestágá bandig án, man lóthet ke áiá wati kerrá bedárán ke tai jágahá á mani hezmatá bekant.
PHM 1:14 Bale bé tai razáyá man hecch kanaga nalóthán ke taw hecch kár pa majburi makanay, tai jenday wáhag o razá gón bebit.
PHM 1:15 Balkén á pa kasánén wahdéá paméshká cha taw sestag o dur butag ke pa modámi tará berasit,
PHM 1:16 bale cha ed o dém golámé hesáb mabit, cha goláméá báláter, dóstigén bráté hesáb bebit. Maná wa sakk dóst ent, tará angat géshter dóst ent, ensáni hesábá ham o Hodáwanday sará báwarmandén brátéay hesábá ham.
PHM 1:17 Nun agan taw maná wati sangaté sarpada bay, gorhá Ónesimusá anchó dast ger ke maná dasta geray o
PHM 1:18 agan tai káré harábi kortag yá áiá tai wámé per ent, áyán mani hesábá nebeshtah kan.
PHM 1:19 Mane Pulos é gappá daste wat nebeshtah kanagá án: “Manesha dayán o tará nagwashán ham ke tará é nókén zend mani barkatá rasetag o taw mani wámdár ay.”
PHM 1:20 Haw mani brát, mana lóthán ke pa Hodáwandaygi cha taw páedagé begerán. Pa Masihaygi mani delá é árám o táhirá beday.
PHM 1:21 Man deljam án ke taw parmánbardáré ay, paméshká pa taw nebeshtah kanagá án, chéá ke mana zánán, inchok ke mana gwashán, taw géshtera kanay.
PHM 1:22 O dega gappé, pa man jágahay band o bastá ham bekan, chéá ke maná omét ent ke tai dwáyáni barkatá ázáta bán o tai kerrá káyán.
PHM 1:23 Épáprás ke pa Issá Masihaygi gón man yakjáh bandig ent, tará saláma kanagá ent.
PHM 1:24 Mani hamkár Markás o Aristarkás o Démás o Luká ham tará saláma kanant.
PHM 1:25 Hodáwandén Issá Masihay rahmat gón taw gón bát.
HEB 1:1 Gwastagén dawr o zamánagán báz randá Hodáyá cha nabiáni dap o zobáná gón may pet o pirokán báz paymá habar kortag,
HEB 1:2 bale é goddhi róchán áiá gón má cha wati Chokkay dap o zobáná habar kortag, cha hamáiay dapá ke Hodáyá sajjahén chizz áiárá mirás dátagant o cha áiay wasilahá jaháni addh kortag.
HEB 1:3 É Chokk Hodáay shán o shawkatay ádénk ent, Hodáay tab o sareshtá záhera kant o wati porzórén habaray barkatá sajjahén chizzán barjáha dárit. Mardománi gonáháni shódagá o rand, Chokk borzén arshay Hodáay rástén kashá nesht.
HEB 1:4 Gorhá Chokk cha préshtagán sakk báz báláter ent, anchó ke hamá nám ham cha préshtagáni námá borzter ent ke Hodáyá Chokkárá mirás dátag.
HEB 1:5 Chéá ke Hodáyá hechbar gón wati hecch préshtagá nagwashtag: “Taw mani Bacch ay, maróchi man tará pédá kortag.” Hecch préshtagéay bárawá ham nagwashtagi: “Man áiay Peta bán o á mani Chokka bit.”
HEB 1:6 O padá wahdé Hodá wati awali Chokká é donyáyá déma dant, gwashit: “Mane Hodáay sajjahén préshtag áiá parastesh bekanant.”
HEB 1:7 Préshtagáni bárawá Hodá gwashit: “Wati préshtagán gwát jórha kanán, bezán wati hezmatkárán ásay bránz.”
HEB 1:8 Bale Hodá gón Chokká gwashit: “Oo Hodá! Tai bádsháhiay taht abad tán abada mánit o tai bádsháhiay asá, adl o ensápay asá ent.
HEB 1:9 Taw páki o rásti dóst dáshtag o cha badiá naprat kortag, paméshká mane Hodáyá, bezán tai Hodáyá tará cha tai hamráhán géshter, shádehay rógen per moshtag.”
HEB 1:10 Hodá gón Chokká chosh ham gwashit: “Oo Hodáwand! Taw bongéjá zeminay bonhesht ér kort, ásmán ham tai dastáni jórh kortagén ent.
HEB 1:11 É gár o bégwáha bant bale taw abadmán ay. É sajjahén chó pósháká kwahna bant.
HEB 1:12 Taw eshán chó kabáhéá péchay. É chó pósháká badal kanaga bant, bale taw dáemá hastay o tai máh o sál halása nabant.”
HEB 1:13 Hodáyá hechbar gón wati hecch préshtagá nagwashtag: “Mani rástén kashá tán hamá wahdá benend ke man tai dozhmenán tai pádáni chérá dawra dayán.”
HEB 1:14 Béshakk sajjahén préshtag hezmatkárén arwáh ant o pa hamáyáni hezmatá ráh dayag butagant ke áyán nejátay mirása rasit.
HEB 2:1 Paméshká má báyad ent hamá paygámay sará géshter delgósh bedayén ke má eshkotag, chó mabit ke gomráh bebén.
HEB 2:2 Á paygám ke cha préshtagáni dap o zobáná gwashag butagat mohr o mohkam at o áiay har paymén náparmáni o helápwarziay barhakkén sezá raset,
HEB 2:3 gorhá agan má é mazanén nejátay némagá delgósh madayén, che paymá rakketa kanén? É nejátay habar awalá Hodáwandén Issáyá kort o padá hamá mardomán pa má hamá paymá sar kort ke wat cha Issáyá eshkotagatesh.
HEB 2:4 Hodáyá bázén ajabbatén neshánié ham pésh dásht, ajabén kár o warh warhén mójezah kort o Pákén Ruhay nyámat wati delay tabá bahr kortant. Hamé paymá Hodáyá é paygámay rástiay gwáhi dát.
HEB 2:5 Hamá jahán ke áyagi ent o má áiay habará én, Hodáyá préshtagáni érdast nakort,
HEB 2:6 parchá ke yakkéá yakk jáhé gwáhi dátag o gwashtag: “Ensán chéé ke taw áiay gamwár ay, baniádam kay ent ke áiay delgóshá dáray?
HEB 2:7 Taw pa kammén wahdéá á cha préshtagán jahlter kort o padá shán o sharapay táj sará dát o
HEB 2:8 har chizz áiay pádáni chérá ér kort.” Nun wahdé Hodáyá har chizz áiay pádáni chérá ér kortag, dega hecch pasht nakaptag ke áiay pádáni chérá mabit. Albat má angata nagendén ke har chizz áiay pádáni chérá ent.
HEB 2:9 Bale Issáyá gendén ke pa kammén wahdéá cha préshtagán jahlter kanag but o nun shán o sharapay tájé sará enti, chéá ke áiá markay sakki sagget. Haw, cha Hodáay rahmatán áiá sajjahénáni háterá markay tám chasht.
HEB 2:10 Hodá, ke har chizz cha hamáiá ent o pa hamáiá, wahdé áiá bázén chokké wati shán o shawkatá sharikdár kanag lóthet, cháreti sharter ent ke man esháni nejátay rahshón, bezán Issáay kámeliá cha sakki o sóriay ráhá záhér bekanán.
HEB 2:11 Chéá ke pák o palgár kanók o pák o palgár bayók, é sajjahén yakkén Petay chokk ant, paméshká Issá eshán wati brát gwashagá sharmendaga nabit.
HEB 2:12 Gwashit: “Wati brátáni kerrá tai námay járá janán, mocchiay démá tará názénán.”
HEB 2:13 Padá gwashit: “Man Hodáay sará tawkala kanán.” O padá gwashit: “É man án o é hamá chokk ant ke Hodáyá maná dátagant.”
HEB 2:14 Chokk cha hón o góshtá addh butagant, paméshká Issá ham hón o góshtay mardomé but o átk ke gón wati marká, hamáiay zór o wáká bepróshit ke markay zóri dasta ent, bezán Shaytánayg o
HEB 2:15 é dhawlá hamáyán ázát bekant ke wati sajjahén omrá markay torsay golám butagant.
HEB 2:16 É gapp záher ent ke Issá préshtagáni komakk kanagá nayátk, Ebráhémay chokk o óbádagáni komakk kanagá átk.
HEB 2:17 Gorhá paméshká allami at ke á har hesábá wati brátáni paymá bebit, tánke Hodáay bárgáhá rahmdel o wapádárén mazanén péshwáé bebit ke kawmay gonáhán beshódit o kapárat bekant.
HEB 2:18 Áiay jendá sakki o sóri saggetag o cha chakkásá gwastag, paméshká hamáyán komakk korta kant ke chakkásay tahá ant.
HEB 3:1 Gorhá, oo pák o palgár butagén brátán! Shomá ke borzén arshay Hodáay tawár kortagénáni tahá gón ét, wati pegr o hayálán gón Issáyá bekanét, gón hamá kásed o mazanén péshwáyá ke má áiá mannén.
HEB 3:2 Á gón wati gechén kanóká wapádár at, hamá paymá ke Mussá Hodáay sarjamén lógay wapádár at.
HEB 3:3 Anchó ke lógay addh kanókay sharap cha lógay sharapá géshter ent, Issá cha Mussáyá géshter shán o sharapa karzit,
HEB 3:4 chéá ke har lógéárá addh kanóké hast, bale Hodá sajjahén chizzáni addh kanók ent.
HEB 3:5 Mussá, hezmatkáréay hesábá Hodáay sarjamén lógay wapádár at ke hamá chizzáni gwáhiá bedant ke démterá gwashag o záher kanaga bant,
HEB 3:6 bale Masih Chokkay hesábá, Hodáay lógay wapádárén sarmaster ent o Hodáay lóg má én, bale hamá shartá ke delér bemánén o pa pahré wati ométay sará mohr bóshtén.
HEB 3:7 Paméshká Pákén Ruha gwashit: “Maróchi shomá agan Hodáay tawárá eshkonét,
HEB 3:8 wati delá á paymá seng makanét ke shomay pet o pirokán sarkasshiay róchán kort, hamá wahdá ke áyán gyábáná maná chakkáset o ázmáesh kort.
HEB 3:9 Bell toré shomay pet o pirokán tán chell sálá mani kortagén kár distagatant, bale angat ódá áyán maná chakkáset.
HEB 3:10 Paméshká man á naslay sará zahr atán o gwashton: ‘Delesh gomráh ent o mani ráhána nazánant,’
HEB 3:11 Gorhá man pa hezhm sawgend wárt ke ‘hamá árámi o ásudagi ke man pa eshán armán kortag, é mardom hechbar ódá sara nabant.’”
HEB 3:12 Oo mani brátán! Hozzhár bét ke cha shomá hechkasay del bad o béimán mabit o cha namiránén Hodáyá posht makant.
HEB 3:13 Hodáyá posht janagay badalá, tán hamá wahdá ke “maróchigén róch” hastent, har róch yakdegará delbaddhi bedayét ke cha shomá hechkasay del cha gonáhay prébá seng mabit.
HEB 3:14 Chéá ke máshomá Masihay har chizzá bahramand én, bale pa é shartá ke wati deljamiá tán áherá mohr o mohkam bedárén, hamá deljami ke bendátá máshomárá butag.
HEB 3:15 Anchó ke gwashag butag: “Maróchi shomá agan áiay tawárá eshkonét, wati delá á paymá seng makanét ke shomay pet o pirokán sarkasshiay róchán kort.”
HEB 3:16 Hamáyán ke eshkot o angat sark‌asshi kort, á kay atant? Á sajjahén hamá mardom naatant ke Mussáay sarókiá cha Mesrá dar átkant?
HEB 3:17 Tán chell sálá Hodá kai sará zahr at? Hamáyáni sará zahr naat ke gonáhesh kort o jónesh gyábáná kaptant?
HEB 3:18 Kojám mardománi bárawá sawgendi wárt: “Hechbar hamá árámi o ásudagiá ke man pa áyán armán kortag, sara nabant”? Hamáyáni bárawá sawgendi nawárt ke náparmániesh kort?
HEB 3:19 Gorhá má gendén ke áyán cha wati nábáwariá natwánt hamá árámi o ásudagiá sar bebant ke Hodáyá pa áyán armán kortagat.
HEB 4:1 Hodáay kawl o wádah angat barjáh ent ke má hamá árámi o ásudagiá sar buta kanén ke áiá pa má armán kortag. Paméshká hozzhár bebén, chó mabit ke cha shomá kasé pasht bekapit o árámi o ásudagiay menzelá sar mabit.
HEB 4:2 Chéá ke márá ham áyáni paymá wasshén mestág rasetag. Hamá paygám ke áyán eshkot, á paygámá áyáná hecch páedag nadát, parchá ke eshkonókáni delá imán néstat ke paygám áyáni delá benendit,
HEB 4:3 bale má ke imán áwortag, Hodáay kawl kortagén árámi o ásudagiá sara bén. Bell toré Hodáay kár cha jahánay jórh bayagay wahdá sarjam butant, bale padá ham gwashti: “Gorhá man pa hezhm sawgend wárt ke ‘hamá árámi o ásudagi ke man pa eshán armán kortag, é mardom hechbar ódá sara nabant.’”
HEB 4:4 Hodáyá yakk jágahéá haptomi róchay árámiay bárawá gwashtag: “Haptomi róchá, mane Hodáyá cha wati sajjahén kárán árám kort.”
HEB 4:5 Bale Hodáyá chó ham gwashtag: “Hamá árámi o ásudagi ke man pa eshán armán kortag, é mardom hechbar ódá sara nabant.”
HEB 4:6 Gorhá é habar angat barjáh ent ke lahtén mardom Hodáay kawl kortagén árámi o ásudagiá sara bit, bale hamáyán ke é wasshén mestág pésará eshkotagat, wati náparmániay sawabá sar nabutant.
HEB 4:7 Gorhá Hodáyá dega róché gisshént o báz wahdá rand Dáuday zobáná “maróchigén róchay” bárawá habari kort o hamá paymá ke pésará é ketábá átkag, gwashti: “Maróchi shomá agan áiay tawárá eshkonét, wati delá seng makanét.”
HEB 4:8 Chéá ke agan Yusháyá á mardománá árámi o ásudagi bedátén, gorhá Hodáyá randterá dega róchéay bárawá habar nakortagat.
HEB 4:9 Bale pa Hodáay kawmá angat Shabbatay paymén árámi o ásudagié ér ent.
HEB 4:10 Chéá ke harkas ke Hodáay kawl kortagén árámi o ásudagiá sara bit cha wati kárán áráma kant, hamá paymá ke Hodáyá cha wati kárán árám kort.
HEB 4:11 Gorhá wati sajjahén zórá bejanén ke hamá árámi o ásudagiá sar bebén, chó mabit ke kasé may pet o pirokáni paymá náparmáni bekant o pasht bekapit.
HEB 4:12 Chéá ke Hodáay habar zendag o zórmand ent o cha har dodapén zahméá tézter ent. Anchosha borrit ke nákoná cha góshtá o majgá cha haddhá ham jetá kant o delay hayál o maksadán pa ensápa gisshénit.
HEB 4:13 Sajjahén jaháná hecch chizz cha Hodáay chammán chér o andém naent. Har chizz áiay chammáni démá záher ent o márá áiay kerrá hesáb dayagi ent.
HEB 4:14 Márá mazanén péshwáé hast ke cha sajjahénán master ent o ásmáná shotag, bezán Issá, Hodáay Chokk. Paméshká byáét wati imánay darshán kanagay sará mohra óshtén,
HEB 4:15 chéá ke márá anchén masterén péshwáé hast ke may nezóriána zánt o gón má hamdardi korta kant, anchéné ke har hesábá may paymá chakkásag butag, bale hecch gonáhi nakortag.
HEB 4:16 Gorhá byáét pa deléri dém pa Hodáay rahmatay tahtá kenzána bén tánke á may sará rahm bekant o zaluratay wahdá márá áiay komakkay barkat berasit.
HEB 5:1 Har masterén dini péshwá cha mardománi nyámá gechén kanaga bit o Hodái káráni tahá áyáni nomáendaha bit tánke pa mardománi gonáhán Hodáay bárgáhá théki byárit o korbánig nadr bekant.
HEB 5:2 Péshwá gón nazántkár o gomráhén mardomán pa narmdeli pésh átka kant, chéá ke áiá ham nezóri mán.
HEB 5:3 Paméshká báyad ent tahná pa é dega mardománi gonáhán korbánig makant, pa wati jenday gonáhán ham bekant.
HEB 5:4 Hechkas é sharapá wat zorta nakant, é sharap tahná hamá wahdá rasit ke Hodá yakkéá hamá dhawlá tawár bekant ke áiá Hárun tawár kort.
HEB 5:5 Gón Masihá ham hamé paymá but. Áiá masterén péshwá bayagay sharap watárá wat nadát. Hodáyá gón Masihá gwasht: “Taw mani Bacch ay, maróchi man tará pédá kortag.”
HEB 5:6 Dega jágahéá chosh ham gwashit: “Taw tán abad péshwáé ay, Malkisedikay darjah o makámay péshwáé.”
HEB 5:7 Masihá wati donyái zendagiay róchán pa borztawári o grétagén chammé Hodáay kerrá dwá o dazbandi‌a kort, hamáiay kerrá ke twánti Masihá cha marká berakkénit. Parmánbardáriay sawabá áiay dwá gósh dáraga butant.
HEB 5:8 Bell toré á Hodáay Chokk at, bale angat cha sakki o sóriay ráhá parmánbardárii dar bort.
HEB 5:9 Wahdé áiay kámeli záhér but, á pa wati parmánbardárán abadmánén nejátay sarchammag jórh but o
HEB 5:10 cha Hodáay némagá áiárá Malkisedikay darjah o makámay mazanén péshwáéay darjah dayag but.
HEB 5:11 É bárawá márá pa gwashagá bázén habaré hast, bale shomárá é habaráni sarpad kanag grán ent, chéá ke shomá gósh dáragá sost tarretagét.
HEB 5:12 Tán é wahdá shomá báyad ent ostád buténét, bale shomárá padá kaséay zalurat ent ke Hodáay bonyádi habarán shomárá sarpad bekant. Shomárá shir pakár ent, trondén warák wárta nakanét.
HEB 5:13 Shirmechén chokké nazánt pa man ché sharr ent, chéá ke angat nonnoké,
HEB 5:14 bale trondén warák pa bálegán ent, pa hamáyán ke wati imánay sará modám káresh kortag o é paymá nék o baday parkesh dar bortag.
HEB 6:1 Paméshká byáét cha hamá bonyádi tálimán ke Masihay bárawá ant démtera rawén o dém pa pohtagiá kenzána bén. É tálimáni bonredá dobar ér makanén: cha hamá kárán tawbah kanag ke ásaresh mark ent, Hodáay sará imán,
HEB 6:2 pákshódiáni tálim, dastay ér moshag, mordagáni jáh janag o abadmánén dádrasi.
HEB 6:3 Nun má cha eshán démtera rawén, agan Hodáay razá bebit.
HEB 6:4 Hamá mardom ke áyáni del yakk randé rozhná but o ásmáni sawgátay támesh chasht o Pákén Ruhá sharikdár butant o
HEB 6:5 Hodáay habaray washtámi o áyókén zamánagay zóresh chasht,
HEB 6:6 agan é mardomán wati ráh táb dát, hechbar dém pa tawbahá árag buta nakanant, chéá ke é mardom Hodáay Chokká padá saliba kasshant o mahlukay démá áiá béezzata kanant o é paymá watá táwána dayant.
HEB 6:7 Hamá zemin ke wahd pa wahdá áiay sará hawra gwárit o sérá ápa wárt o pa wati ábád kanókán sharrén bar o samara kárit, á zeminá Hodá barkata dant.
HEB 6:8 Bale á zemin ke konthag o dhangara ródénit, békár ent. Zuttán nálat kanaga bit o áiay ákebat sóchag ent.
HEB 6:9 Oo dordánagén dóstán! Bell toré má é paymá habar kanagá én, bale má shomay sharriáni bárawá deljam én, hamá sharri ke gón nejátá hamgranch ant.
HEB 6:10 Chéá ke Hodá náensáp naent ke shomay kárán beshamóshit. Shomá palgártagénáni hezmat kortag o angat kanagá ét o Hodá cha é mehrá bétránaga nabit ke shomá pa áiay námá kortag.
HEB 6:11 May wáhag ent ke cha shomá harkas tán godhsará hamé hobb o hodónákiá barjáh bedárit ke shomay omét purah bebit.
HEB 6:12 Sost o jándozz mabét, hamáyáni randgiriá bekanét ke cha imán o sabray ráhá Hodáay kawláni mirásdára bant.
HEB 6:13 Wahdé Hodáyá gón Ebráhémá kawl kort, wati jenday sawgendi wárt, chéá ke masteréné néstat ke áiay sawgendá bwárt.
HEB 6:14 Gwashti: “Pa rásti tará barkata dayán o tai nasl o padréchá báza kanán.”
HEB 6:15 É paymá Ebráhémá gón sabr o ópár entezár kort o hamá chizzi raset ke Hodáyá kawl dátagat.
HEB 6:16 Mardom cha wat masterénay sawgendá warant. Sawgend gappá gisshénit o har jérhahá halása kant.
HEB 6:17 Paméshká wahdé Hodáyá lóthet ke pa wádaháni mirásdárán pakká pésh bedárit ke mani erádah badala nabit, gorhá sawgendi wárt
HEB 6:18 tánke cha é doén badal nabayagi chizzán, bezán Hodáay kawlá o sawgendá, áiay panáhá átkagén mardomán pa bándátay ométá mohrén delbaddhié berasit, chéá ke buta nakant Hodá dróg bebandit.
HEB 6:19 É omét pa may arwáhá deljam o mohkamén nangaré o Hodáay bárgáhá, pardahay poshtá mekk ent,
HEB 6:20 hamá jágahá ke Issá pa maygi, cha má pésar hamá wahdá shot ke á, Malkisedikay darjah o makámay mazanén péshwáé but, abadi péshwáé.
HEB 7:1 Malkisedik Shalimay bádsháh at o borzén arshay Hodáay dini péshwá at. Wahdé Ebráhémá bádsháh prósh dátagatant o per tarragá at, Malkisedik gón áiá dochár kapt o Ebráhémi barkat dát.
HEB 7:2 Ebráhémá áiárá har chizzay dahyakk dát. Malkisedikay námay máná “adl o ensápay bádsháh” ent o á Shalimay bádsháh ent, bezán “sohl o émeniay bádsháh”.
HEB 7:3 Na áiay pet o mát o béh o bonyáday bárawá chizzé zánaga bit o na áiay zenday bendát o ásaray bárawá. Á, Hodáay Chokkay dhawlá ent o tán abad dini péshwá mánit.
HEB 7:4 Bechárét, á chinchok mazan ent ke may bonpirok Ebráhémá cha jangay áwárán áiárá dahyakk dát.
HEB 7:5 Nun Sharyatay redá Láwiay nasl o padréch ke dini péshwá bant, cha kawmá, bezán cha wati brátán dahyakka gerant, bell toré á wat ham Ebráhémay chokk o óbádag ant.
HEB 7:6 Bale Malkisedik ke cha Láwiay naslá naat, áiá cha Ebráhémá dahyakk gept o Ebráhémi barkat dát, hamá Ebráhém ke Hodáyá gón áiá wati wádah kortagatant.
HEB 7:7 Béshakk kasteréná cha masteréná barkata rasit.
HEB 7:8 Yakk némagé hamá mardom dahyakka gerant ke merant, domi némagá hamá mardom dahyakka gipt ke gwáhi dayag butag ke á zendaga mánit.
HEB 7:9 Chó ham gwashta kanén, Láwi ke dahyakka gipt, áiay jendá ham hamá wahdá dahyakk dát ke Ebráhémá dahyakk dát,
HEB 7:10 chéá ke wahdé Malkisediká gón Ebráhémá dhikk wárt, Láwi wati bonpirok Ebráhémay sréná at o angat pédá nabutagat.
HEB 7:11 Agan Láwiay dini péshwáiá ensán kámel kort bekortén, hamá péshwái ke áiay bonyádá Shariat kawmá dayag butagat, gorhá dega péshwáéay áyagay zalurat ché at, Malkisedikay darjah o makámay péshwáé, Hárunay darjah o makámay na?
HEB 7:12 Chéá ke agan dini péshwái badala bit, gorhá Sharyat ham báyad ent badal bebit.
HEB 7:13 May Hodáwandén Issá ke áiay bárawá é habar kanag butagant, cha dega kabilahéá ent o cha á kabilahá hechbar kassá korbánjáhá hezmat nakortag.
HEB 7:14 Chéá ke é gapp záher ent ke may Hodáwand cha Yahudáay kabilahá at o Mussáyá hecch nagwashtagat ke cha é kabilahá kasé dini péshwá buta kant.
HEB 7:15 É gapp hamá wahdá angat pakkátera bit ke Malkisedikay darjah o makámay péshwáé byayt.
HEB 7:16 May Hodáwand é bonyádá péshwá jórh nabut ke Sharyatá áiay béh o bonyáday bárawá hokmé mán, hamé bonyádá péshwá but ke áiay zend hechbar halása nabit.
HEB 7:17 Chéá ke áiay bárawá chó gwáhi dayag butag: “Taw tán abad péshwáé ay, Malkisedikay darjah o makámay péshwáé.”
HEB 7:18 É paymá, pésarigén hokm poshtá dawr dayag but, chéá ke nezór o kárá nayátk.
HEB 7:19 Sharyatá hecch chizz kámel nakort. Márá sharterén omété raset ke eshiay barkatá má gón Hodáyá nazzikka bén.
HEB 7:20 É kár bé sawgendá nabut. Á dega bé sawgendá dini péshwá butant,
HEB 7:21 bale Issá gón sawgendéá péshwá but, hamá wahdá ke Hodáyá gón áiá gwasht: “Mane Hodáwandá sawgend wártag o nabajján, taw tán abad péshwá ay.”
HEB 7:22 É sawgenday barkatá Issá gehterén ahd o paymánéay zámen but.
HEB 7:23 Á dega dini péshwá sakk báz butagant, chéá ke marká á móh nadátagant ke dáemá péshwái bekanant,
HEB 7:24 bale Issá tán abad zendag ent, paméshká áiay péshwái dáemi ent.
HEB 7:25 Hamé sawabá, á mardom ke cha Issáay ráhá Hodáay kerrá káyant, Issá áyán sarjamén nejáté baksheta kant, chéá ke á modám zendag ent tánke áyáni wakiliá bekant.
HEB 7:26 Márá anchén mazanén péshwáé pakár ent ke pák o palgár o béayb bebit, cha gonahkárán jetá bebit o áiay jáh cha arshá borzter bebit.
HEB 7:27 Áiá zalurat naent ke é dega dini péshwáyáni paymá har róch awalá pa wati gonáhán o randá pa kawmay gonáhán korbánig bekant, chéá ke hamá wahdá ke áiá watárá nadr kort, é kári yakkén randá kort o bass.
HEB 7:28 Sharyat anchén mardomán mazanén dini péshwá jórha kant ke áyán ensáni nezóri mán, bale hamá sawgend ke cha Sharyatá rand átk Hodáay Chokki pa péshwáiá gechén kort. Chokká wati kár sarjam kort o tán abad kámel but.
HEB 8:1 Nun may é habaráni masterén maksad esh ent ke márá anchén mazanén péshwáé hast ke ásmáná borzén arshay Hodáay tahtay rástén kashá neshtag o
HEB 8:2 pákén jágahá hezmata kant, bezán hamá asligén tambuá hezmata kant ke Hodáwandá mekk kortag, ensáná mekk nakortag.
HEB 8:3 Har mazanén dini péshwá pa thékiay árag o korbánigay nadr kanagá gechén kanaga bit, paméshká allami ent ke Issáyá ham pa nadr kanagá chizzé bebit.
HEB 8:4 Agan á zeminay sará butén, hecch paymá dini péshwáé nabutagat, chéá ke dega dini péshwá hast ke Sharyatay hesábá thékia kárant.
HEB 8:5 Á, anchén parasteshgáhéá hezmata kanant ke ásmáni parasteshgáhay nákámelén shekl o dróshomá ent, paméshká tambuay addh kanagay wahdá Hodáyá Mussá habardár kort o gwasht: “Bechár, é sajjahén chizzán hamá paymá addh kan ke man tará kóhay sará pésh dásht.”
HEB 8:6 Bale nun é hezmatá ke Issá kant, eshiay darjah cha áyáni hezmatay darjahá báz borzter ent, hamá paymá ke é ahd o paymán ke Issá eshiay myánjigeriá kant, cha pésari ahd o paymáná báláter ent o é paymánay bonhesht mohrterén wádaháni sará ér ent.
HEB 8:7 Chéá ke agan awali ahd o paymán béayb butén, dega ahd o paymánéay zalurat nabutagat.
HEB 8:8 Bale Hodáyá kawmay ayb distant o gwashti: “Mane Hodáwanda gwashán ke hamá róch pédák ant ke man gón Esráilay lóg o Yahudáay lógá nókén ahd o paymáné bandán.
HEB 8:9 Bale á paymén ahd o paymáné nabandán ke man gón áyáni pet o pirokán hamá róchá bast ke áyáni daston gept tánke cha Mesrá daresh bekanán. Á mani ahd o paymánay sará naóshtátant, gorhá man wati dém cha áyán tarrént.
HEB 8:10 Mane Hodáwanda gwashán, esh ent hamá ahd o paymán ke áyókén róchán gón Esráilay kawmá bandáni: man wati ráh o rahbandán áyáni pegr o hayáláni tahá naksha kanán o áyáni delá nebeshtahesha kanán. Man áyáni Hodá bán o á mani mahluk.
HEB 8:11 Cha ed o rand kass wati hamsáhegá tálima nadant o kass wati brátá nagwashit: ‘Hodáwandá pajjáh byár,’ chéá ke á sajjahén, kasán o mazan, maná zánant
HEB 8:12 ke man áyáni radkárián pahella kanán o cha ed o rand, hechbar áyáni gonáhán yáta nakanán.”
HEB 8:13 Hodá “nókén ahd o paymánéay” habará kant o gón é habará awali ahd o paymáná kwahn o nákára kant o harché ke nákára bit o kwahna tarrit, zutt gár o bégwáha bit.
HEB 9:1 Awali ahd o paymáná pa parasteshá ráh o rahband mán at o zeminay sará pa parastesh kanagá pákén jágahé ham hastat.
HEB 9:2 Tambué mekk kanag butagat o eshiay awali kóthiá cherágdán, thébal o pákwandhén nagan mán atant. É kóthiay nám pákén jágah at.
HEB 9:3 Domi pardahay poshtá ham kóthié hastat ke pákterén jágah gwashaga but.
HEB 9:4 É kóthiá teláhpóshén bósóchi korbánjáh mán at o ahd o karáray péti ham ér at ke sajjahén pahnáti teláhpósh atant. É pétiá mannay teláhén darp, Hárunay asá ke teji jatagat o ahd o paymánay wánek mán atant.
HEB 9:5 Pétiay sará, shán o shawkatay karrubián kapáratay sarpósh sáhél kortagat. Bale annun é chizzáni sará hurt hurtá habar kanaga nabit.
HEB 9:6 Cha hamá wahdá ke é chizz hamé paymá tayár kanag butagant, dini péshwá pa hezmat kanagá modám awali kóthiá rawant.
HEB 9:7 Tahná mazanén dini péshwá domi kóthiá rawt, bale sálé yakk randé rawt o hechbar bé hóná narawt. Á pa wati gonáhán o pa kawmay gonáhán ke pa názánti kortagantesh é hónán nadra kant.
HEB 9:8 Gón é ráh o rahbandán, Pákén Ruh pésha dárit ke tán hamá wahdá ke awali tambu mekk at, pákterén jágahá rawagay ráh angat záher naat.
HEB 9:9 Á tambu pa annugén wahdá mesálé o hamá théki o korbánig ke parastesh kanóká nadra kortant, áyán parastesh kanókay zamir sarjamiá pák korta nakort.
HEB 9:10 É chizz warag o nóshag o tahr tahrén shosht o shódi rasmán kármarza bant o bass. Bezán é záheri rasm ant o tán hamá wahdá kára kanant ke nókén dawr o zamánagay rahband byayt.
HEB 9:11 Bale Masih mazanén péshwá but o átk ke márá hamá sharrén chizzán bedant ke annun márá hastant. Á cha anchén master o kámelterén tambuéá gwast ke ensánay dastá jórh nakortag, bezán cha é hastiá dhann ent.
HEB 9:12 Masih páchen o gwaskáni hónay barkatá nashot, wati jenday hónay barkatá bass yakkén randá pákterén jágahá shot o pa má abadmánén ázátié áworti.
HEB 9:13 Chéá ke agan nápákén mardománi sará páchen o káigeráni hónay dranzag o korbánigén porrápay poráni chandhag áyán dini hesábá pák o palgára kant,
HEB 9:14 gorhá Masihá ke abadmánén Ruhay barkatá watá Hodáay bárgáhá béaybén korbánigé kort, áiay hón may zamirá báz géshter páka kant. Márá cha hamá kárán páka kant ke ásaresh mark ent tánke má namiránén Hodáay parastesh o hezmatá bekanén.
HEB 9:15 Paméshká Masih nókén ahd o paymánéay myánjiger ent, tánke Hodáay tawár kortagén mardomán wádah dátagén abadmánén mirás berasit. Masihay mark áyán cha hamá náparmániána rakkénit ke awali ahd o paymánay wahdá kanag butagant.
HEB 9:16 Chéá ke wasiyat hamá wahdá kára dant ke wasiyat kanókay mark sábet kanag bebit.
HEB 9:17 Wasiyat tahná marká rand kár bandaga bit o tán wahdé ke wasiyat kanók zendag ent, wasiyatá asaré nést.
HEB 9:18 Paméshká awali ahd o paymánay bandag ham bé hónay rechagá nabut.
HEB 9:19 Wahdé Mussáyá Sharyatay sajjahén hokm gón sarjamén kawmá gwashtant, áiá gwask o páchenáni hón zort o ápá hawár kortant o gón sohrén pazhm o zupáay thálán, tumár o sajjahén kawmay sará dranzetant.
HEB 9:20 Mussáyá gwasht: “Esh ent hamá ahd o paymánay hón, hamá ahd o paymán ke Hodáyá shomárá eshiay barjáh dáragay hokm dátag.”
HEB 9:21 Hamé paymá áiá hón zort o tambu o hamá sajjahén chizzáni sará dranzetant ke parasteshay wahdá kármarza butant.
HEB 9:22 Chónáhá, Sharyatay hesábá kamm o gésh sajjahén chizz gón hóná pák o palgár kanaga bant o bé hónay réchagá pahellia narasit.
HEB 9:23 Gorhá báyad ent ásmáni chizzáni shekl o dróshomá addh kortagén nákámelén chizz gón é korbánigán pák o palgár kanag bebant, bale ásmánay asligén chizzán sharterén korbánig pakár ent.
HEB 9:24 Chéá ke Masih mardománi bastagén parasteshgáhéá nashot, bezán asligénay shekl o dróshomá addh kortagén nákámelén parasteshgáhá nashot, ásmánay jendá shot ke Hodáay bárgáhá may wakiliá bekant.
HEB 9:25 Ódá pa é maksadá ham nashot ke watá báz randá korbánig bekant, bezán masterén dini péshwáay paymá nakorti. Masterén dini péshwá sál pa sál mazanén parasteshgáhay pákterén jágahá gón hamá hóná rawt ke áiay jenday hón naent.
HEB 9:26 Agan har sál korbánig pakár butén, gorhá Masihá báyad ent cha donyáay bendátá báz bará sakki o sóri besaggetén. Bale nun ke wahd sarjam but, Masih yakkén randá záher but o bass, tánke gón wati sar o sáhay korbán kanagá gonáhá nést o nábud bekant.
HEB 9:27 Hamá paymá ke pa ensáná bass yakk randé mark o cha marká rand dádrasi gisshénag butag,
HEB 9:28 Masih ham yakkén randá korbánig kanag but ke bázén mardoméay gonáhán wati jenday gardená beladdhit. Albat, á padá záhera bit, bale pa gonáháni baddhá kanagá na, pa hamá mardománi nejátá ke áiay wadárá ant.
HEB 10:1 Sharyat áyókén sharrén chizzáni tahná násarjamén sheklé, áyáni asl naent. Paméshká har sál gón yakkén korbánigáni takrár kanagá, Sharyat á mardomán kámel korta nakant ke pa parasteshá káyant.
HEB 10:2 Agan Sharyatá mardom kámel bekortén, korbánig kanag báyad ent band butén, chéá ke parastesh kanók yakkén randá tán abad pák o palgár butagatant o padá hechbar pa gonáhán watá mayárbáresh nakortagat.
HEB 10:3 Bale é korbánig sálay sará gonáháni yát o tránagá perrénant,
HEB 10:4 chéá ke káiger o páchenay hón gonáhán nést o nábuda nakant.
HEB 10:5 Gorhá wahdé Masih jaháná átk, gwashti: “Tará korbánig o hayrátay hobb o wáhag néstat, bale taw badané pa man tayár kort.
HEB 10:6 Taw cha sóchagi korbánig o gonáháni korbánigán razá nabutay.
HEB 10:7 Gorhá man gwasht: ‘Oo Hodá! Esh ent, man átkagán ke tai wáhagá sarjam bekanán, mani bárawá tumárá nebisag butag.’”
HEB 10:8 Anchó ke borzá nebisag butag, Masihá gwasht: “Tará korbánig o hayrátay hobb o wáhag néstat o taw cha sóchagi korbánig o gonáháni korbánigán razá nabutay,” harchont ke é korbánig Sharyatay hesábá nadr kanaga bant.
HEB 10:9 Padá gwashti: “Esh ent, man átkagán ke tai wáhagá sarjam bekanán.” Gón é habará Issá awali ahd o paymáná dura kant o domiá kárit o
HEB 10:10 Má Hodáay wáhagay sawabá pák o palgár kanag butagén, Issá Masihay badanay korbánig bayagay barkatá ke á yakkén randá tán abad korbánig but.
HEB 10:11 Har róch har dini péshwáé pa wati dini káráni kanagá óshtit o rand pa rand hamá yakkén korbánigán nadra kant ke hechbar gonáhán shoshta nakanant.
HEB 10:12 Bale wahdé Issáyá pa gonáháni dur kanagá yakk korbánigé tán abad nadr kortagat, shot o Hodáay rástén kashá nesht o
HEB 10:13 nun tán hamá wahdá wadárig ent ke dozhmen áiay pádáni chérá dawr dayaga bant.
HEB 10:14 Chéá ke yakkén korbánigay barkatá pák o palgár bayókén mardomi tán abad kámel kortagant.
HEB 10:15 Pákén Ruh ham pa má gwáhia dant, gwashit:
HEB 10:16 “Hodáwanday habar esh ent: ‘É hamá ahd o paymán ent ke cha á róchán o rand gón áyána bandáni. Wati ráh o rahbandán áyáni delá nádénán o áyáni pegr o hayáláni tahá naksha kanán.’
HEB 10:17 Padá gwashit: ‘Nun hechbar áyáni gonáh o badián yáta nakanán.’”
HEB 10:18 Nun wahdé gonáh pahell kanag butagant, padá pa gonáháni dur kanagá korbánig kanagay zalurat naent.
HEB 10:19 Gorhá brátán! Issáay hónay barkatá má pa deljami pákterén jágahá shota kanén,
HEB 10:20 bezán cha hamá nók o zendbakshén ráhá pardahay á démá shota kanén ke Masihá gón wati badanay korbán kanagá pa má pach kortag.
HEB 10:21 Nun ke márá mazanén péshwáé hast ke Hodáay lógay kármaster ent,
HEB 10:22 gorhá byáét gón hamá delsetki o deljamiá ke cha imánay ráhá rasit, Hodáay nazzikká rawén. Gón anchén delé berawén ke cha nápákén zamirá palgárag butag o gón anchén badané ke pákén ápá shódag butag.
HEB 10:23 Byáét wati darshán kortagén ométay sará mohra óshtén, chéá ke wádah kanók wati wádahay sará óshtátag.
HEB 10:24 Byáét hamá ráh o darána chárén ke chón yakdomiá pa mehr kanag o sharrén kárán delbaddhi bedayén.
HEB 10:25 Wati báwarmandi nend o nyádán yalah makanén chó ke lahténá esháni yalah dayag hél kortag. É nyádáni yalah dayagay badalá, byáét yakdomiá delbaddhia dayén, hás ke shomá gendét ke Hodáwanday áyagay róch nazzikk ent.
HEB 10:26 Bale agan rástiay zánagá rand má pa zánt gonáh bekanén, gorhá hecch choshén korbánigé pashta nakapit ke é gonáhán beshódit,
HEB 10:27 tahná áyókén sezáay tors, bezán jamburén ásay tors pashta kapit, anchén ásé ke Hodáay dozhmenána pelekkit o éra bárt.
HEB 10:28 Harkasá ke Mussáay Sharyata namannet, áiay sará rahm kanaga nabut o do yá say sháheday gwáhiay sará markay sezá dayaga but.
HEB 10:29 Nun shomay hayálá á mardom chinkadar géshter sezáay hakdár ent ke Hodáay Chokká mána nayárit o hamá ahd o paymánay hóná nápáka zánt ke hamá mardomárá palgártagi o Hodáay Pákén Ruhá ke cha rahmatá porr ent, béezzata kant.
HEB 10:30 Chéá ke má áiá zánén ke gwashtagi: “Bérgiri mani kár ent, sezá dayók man án.” Chosh ham gwashtagi: “Mane Hodáwand wati kawmay dadrasiá kanán.”
HEB 10:31 Haw, é torsnákén chizzé ke mardom namiránén Hodáay dastá bekapit.
HEB 10:32 Hamá gwastagén róchán yát kanét ke shomá cha Masihay nurá rozhná butét, hamá wahdá ke shomá bázén sakki o sórié sagget o angat mohr óshtátét.
HEB 10:33 Baré mahlukay démá béezzat kanag o ázár dayaga butét o baré gón hamá mardomán hamdard atét ke sakki o sóriáni tahá atant o
HEB 10:34 hamáyáni gamwár atét ke zendáná bandig atant. Wahdé shomay mál o hasti pol o pánch kanaga but, shomá pa washdeli mannet, chéá ke shomá zánt ke gehterén o abadmánén mál o hastiáni wáhond ét.
HEB 10:35 Gorhá wati delériá gár madayét ke deléri mazanén mozzé kárit.
HEB 10:36 Shomárá sabr o ópár pakár ent tánke Hodáay wáhagá sarjam bekanét o é dhawlá hamá chizz shomárá berasant ke Hodáyá wádah kortagant. Chéá ke:
HEB 10:37 “Bass kammé wahd pasht kaptag, hamá ke áyagi ent kayt, déra nakant.
HEB 10:38 Mani rástáwar o bémayárén mardom imánay barkatá zendaga mánit, bale agan yakké pad bekenzit, cha áiá wassh o razá nabán.”
HEB 10:39 Albat má cha á mardomán naén ke pada kenzant o nést o nábuda bant, má cha hamáyán én ke wati imánay barkatá rakkant.
HEB 11:1 Imán hamá chizzáni sará deljami ent ke márá cha áyán omét hast o hamá chizzáni sará setk ent ke chamzáherá gendaga nabant.
HEB 11:2 Imánay barkatá, may bonpirokáni nám pa sharri geraga but.
HEB 11:3 Imánay barkatá, má zánén ke jahán Hodáay hokmá addh kanag butag, bezán é chizz ke gendaga bant, cha chamzáherén chizzán addh kanag nabutagant.
HEB 11:4 Imánay barkatá, Hábilá pa Hodáyá cha Káenay thékiá sharterén théki áwort o Hábilay hamé imánay barkatá Hodáyá Hábil pák o palgár hesáb kort o áiay thékiáni táripi kort. Bell toré Hábil mort, bale imánay barkatá angat habará ent.
HEB 11:5 Imánay barkatá, Hanuk cha donyáyá chest kanag but ke mark magendit. Á, randá donyáyá gendag nabut chéá ke Hodáyá wati kerrá bort o chest bayagá pésar áiay bárawá gwáhi dayag butagat ke Hodái wash o razá kortag.
HEB 11:6 Bé imáná kass Hodáyá razá korta nakant, chéá ke harkas ke Hodáay nazzikká rawt, báyad ent báwar bekant ke Hodá hast o wati shóház kanókán enáma dant.
HEB 11:7 Imánay barkatá, Nuhá pa hodátorsi mazanén bójigé addh kort ke wati lógay mardomán cha tuppáná berakkénit. Hodáyá á, hamá chizzáni bárawá habardár kortagat ke angat záher nabutagatant. Gón wati é kárá Nuhá donyá mayárbár kort o hamá páki o palgáriay mirásdár but ke cha imáná kayt.
HEB 11:8 Wahdé Hodáyá Ebráhém parmát ke hamá jágahá beraw ke randterá tai mirása bit, imánay barkatá, Ebráhémá Hodáay hokm mannet. Bell toré nazánti kojá rawagá án, bale sar gept.
HEB 11:9 Imánay barkatá, Ebráhém wádah dátagén molká darámadéay paymá gedánáni tahá nesht. Esák o Ákubá ham hamé paymá zenda gwázént, chéá ke á ham Ebráhémay paymá yakkén wádahay mirásdár atant.
HEB 11:10 Ebráhémá é kár paméshká kort ke á hamá shahray némagá cháragá at ke áiay bonyád abadmán ent, hamá shahr ke áiay nakshasáz o addh kanók Hodá ent.
HEB 11:11 Imánay barkatá, Ebráhémá é twán raset ke nasl o padréchéay pet bebit, bell toré á sakk pir at o Sárah béawlád at, chéá ke Ebráhémá zánt ke wádah kanók wati wádahá puraha kant.
HEB 11:12 Paméshká cha yakk kaséá bezán cha hamá kasá ke pádi kabrá atant, anchén padréché pédá but ke ásmánay estáráni paymá báz at o tayábay rékáni dhawlá béhesáb.
HEB 11:13 É sajjahén mardomán hamá chizz narasetant ke áyán wádah dayag butagat, bale tán zenday áheri róchá wati imánesh dáshtagat. Á chizzesh éwaká cha durá distant o gal butant. Áyán mannet ke má zeminay sará darámad o mosáper én.
HEB 11:14 Á mardom ke choshén habara kanant, pésha dárant ke má watanéay shóházá én.
HEB 11:15 Agan á hamá molkay hayálá buténant ke yala‌hesh dátagat, áyán pa per tarragá móh hastat.
HEB 11:16 Bale gehterén molkéay lóthók atant, ásmáni molkéay. Paméshká Hodá sharmendaga nabit ke watá áyáni Hodá begwashit, chéá ke Hodáyá pa áyán shahré tayár kortag.
HEB 11:17 Imánay barkatá, Ebráhémá chakkás o ázmáeshay wahdá Esák pa korbánig kanagá áwort. Á ke wádahi rasetagatant, tayár at ke wati yakkén chokk Esáká korbánig bekant,
HEB 11:18 bell toré Hodáyá gón áiá gwashtagat ke tai nasl o padréch cha Esáká hesáb kanaga bit.
HEB 11:19 Ebráhém é yakiná rasetagat ke Hodá mordagán zendag kort ham kant o má gendén ke Esák cha markay dapá per tarret o átk.
HEB 11:20 Imánay barkatá, Esáká Ákub o Issu pa áyáni bándátá barkat dátant.
HEB 11:21 Imánay barkatá, Ákub markay wahdá wati asáay komakká óshtát, sari jahl kort, Issopay har yakk mardénchokké barkati dát o Hodái parastesh kort.
HEB 11:22 Imánay barkatá, Issopá wati omray goddhi róchán, cha Mesrá Esráiliáni dar kapagay bábatá habar kort o wati haddháni kabr kanagay bárawá sar o sóji dátant.
HEB 11:23 Imánay barkatá, Mussáay pet o mátá cha bádsháhay hokmá ham natorset o cha Mussáay pédáeshá rand tán say máhá chéresh dát, chéá ke distesh sharrangén chokké.
HEB 11:24 Wahdé Mussá rost o mazan but, imánay barkatá, nalótheti ke kasé maná Perawnay jenekkay chokk begwashit.
HEB 11:25 Gonáhay adároki aysh o nósháni badalá, áiá Hodáay kawmay hamráhiá ázáray saggag gechén kort.
HEB 11:26 Áiá delá gwasht ke pa Masihaygi mani béezzat bayag cha Mesray ganj o hazánagán sharter ent, chéá ke áiay chamm ásmáni enámá sakk atant.
HEB 11:27 Imánay barkatá, áiá cha bádsháhay gazabá natorset o Mesri yalah dát. Sabr o ópári kort, chéá ke “Hamá Nadistagéni” dist, bezán Hodá.
HEB 11:28 Imánay barkatá, áiá Sargwazay aid gept o darwázagáni sará hón dranzet ke awali mardénchokkáni koshók Bani Esráilay chokkán dast per makant.
HEB 11:29 Imánay barkatá, kawm cha Sohrzerá gwast, chó ke cha hoshkén dhagáréá. Bale wahdé Mesrián gwazagay kóshest kort, bokketant.
HEB 11:30 Imánay barkatá, hapt róchá kawm Ariháay shahray diwálay chapp o chágerdá tarret o padá shahray diwál kapt.
HEB 11:31 Imánay barkatá, náparmánén mardománi hamráhiá badkárén Raháb koshag nabut, chéá ke áiá jásus o chárig pa washdeli wasshátk kortant.
HEB 11:32 Dega ché begwashán? Man Jedun, Bárák, Shamshun, Yaptáh, Dáud, Samwél o nabiáni bárawá habara nakanán ke wahd nést.
HEB 11:33 Imánay barkatá bádsháhi‌esh geptant, adl o ensápesh barjáh kort, Hodáay wádah dátagén chizzesh rasetant, shéráni dapesh bast,
HEB 11:34 jamburén ásáni bránzesh koshtant o cha zahmáni dapá rakketant. Hamá ke nezór atant zórmand butant, jangá zreng butant o dhanni lashkaresh táchéntant.
HEB 11:35 Janénán wati mortagén mardom padá zendagá rasetant. É paymén mardom ham hastat ke ázár dayag o koshag butant, bale pa sharterén áheratéay ométá ázát bayagesh namannet.
HEB 11:36 Lahtén kalág gerag o shallák o hayzarán janag but, lahtén gón zamzilán bandag o zendáná dawr dayag but,
HEB 11:37 lahtén sengsár kanag but, lahtén gón arragá kapp kanag o gón zahmá koshag but. Cha nezgáriá áyáni póshák pasi póst atant, bazzag atant, ázár dayag o béezzat kanag butant.
HEB 11:38 Donyá áyáni láhek naat. Á, dasht o gyábán o kóhán sargardán atant o gár o hóndhán neshtagatant.
HEB 11:39 Á wati imánay barkatá, pa sharri yát kanag butant, bale cha áyán yakkéá ham wádah dátagén chizz naraset.
HEB 11:40 Chéá ke Hodáyá pa má sharterén chizzé delá at, tánke é mardom gón má hawár kámel bebant.
HEB 12:1 Nun ke may chapp o chágerdá sháhedáni mazanén rombé hast, gorhá byáét har bár o gonáhé ke márá sakk mána gisshénit, áiá cha wat dura kanén. Wati zenday hamá tách o maydán ke may démá ent, byáét gón mohrén erádah o hemmaté áiá sarjama kanén.
HEB 12:2 Byáét wati chammán Issáay sará sakka kanén ke imánay péshgám ent o imánay kámel kanók. Pa bándátay wasshián áiá sakki o sóri sagget o salib kasshagay sharmendagii mán nayáwort o randá shot o Hodáay tahtay rástén kashá nesht.
HEB 12:3 Hamáiá bechárét ke gonahkáráni naprati sagget ke shomá dam mabarét o delprósh mabét.
HEB 12:4 Shomá angat tán wati kóshárénagay haddá gonáhay helápá naóshtátagét.
HEB 12:5 Balkén shomá hamá delbaddhi dayókén pant o nasihatá ke peté wati chokká dant, shamoshtag? Á gwashit: “Oo mani chokk! Hodáwand ke tará adaba dant nádelgósh mabay o wahdé tará hakkala dant delprósh mabay.
HEB 12:6 Chéá ke Hodáwand hamá mardomá adaba dant ke dostia dárit o hamáiá hakkala dant ke wati chokkia zánt.”
HEB 12:7 Sakkián adabé bezánét o besaggét. Hodá shomárá wati chokkáni hesábá chárit. Choshén chokk hast ke peti adab madant?
HEB 12:8 Agan shomá cha adabá zebahr ét, bezán nájáez ét o petay hakkén chokk naét, chéá ke adab har chokká dayaga bit.
HEB 12:9 Márá sajjahénán ensáni pet butag ke márá adabesh dátag o má ezzat dátagant. Gorhá má báyad ent wati ásmáni Petay angat géshter parmánbardáriá bekanén ke márá zend berasit.
HEB 12:10 May petán pa kammokén wahdéá márá hamá paymá adab dátag ke áyáni delá sharr butag, bale Hodá pa may jenday páedagá márá adaba dant ke áiay pákiá sharikdár bebén.
HEB 12:11 Adab dayagay wahdá, har paymén adab mardomá tawrénit o wassha nabit, bale randá hamáyán ke adab geptag, áyáni bar o samar émeni o pahrézkária bit.
HEB 12:12 Gorhá wati nátwánén básk o nezórén kóndhán zórmand kanét.
HEB 12:13 Pa wati pádán tachkén ráh addh kanét ke langén pád dar marawt o dráh bebit.
HEB 12:14 Wati wasá bekanét ke gón sajjahén mardomán émeniay ráhá berawét o páki o palgáriay shóházá bebét ke bé pákiá hechkas Hodáwandá dista nakant.
HEB 12:15 Bechárét kass cha Hodáay rahmatán zebahr mabit o hecch zahrén risshagé marodit o janjál pédá makant ke cha eshiá bázéné nápáka bit.
HEB 12:16 Bechárét hechkas badkár yá ke Issuay paymá béhodá mabit ke pa yakk béléay waragá wati pédáeshi hakki bahá kort.
HEB 12:17 Shomá zánét ke randterá wahdé áiá lóthet barkatay mirásdár bebit, áiay habar mannag nabut. Harchont á gréwáná barkat geragay randá at, bale tawbahay móhi naraset.
HEB 12:18 Shomá choshén kóhéay démá nayátkagét ke áiá dast per kort bekanét, choshén kóhé naent ke cha áiá ás shamálaha kasshit. Dém pa taháróki o zrombi o gwát o lurhéá ham nayátkagét o
HEB 12:19 na ham dém pa karnáay tawárá yá gappay anchén tawáréá ke gón áiay eshkonagá mardomán peryát kort ke gón má dega hecch magwash.
HEB 12:20 Chéá ke mardomán Hodáay é parmán sagget nakort ke agan jánwaréay dast o pádé ham kóhá belaggit, allamá sengsár bebit.
HEB 12:21 Á nedárag anchó torsnák at ke Mussáyá gwasht: “Man cha torsá larzagá án.”
HEB 12:22 Bale shomá Sahyunay kóhá, bezán namiránén Hodáay shahr, ásmáni Urshalimá átkagét. Shomá lakkáni lakk préshtagay shádahén mocchiá átkagét,
HEB 12:23 Hodáay hamá awali chokkáni mocchiá átkagét ke áyáni nám ásmáná nebisag butag. Hodáay kerrá átkagét, hamá ke sajjahénáni dádras ent, hamá pákénáni arwáháni kerrá átkagét ke kámel kanag butagant,
HEB 12:24 Issáay kerrá átkagét ke nókén ahd o paymánay myánjiger ent, hamá dranzetagén hónay kerrá átkagét ke cha Hábilay hóná sharter habara kant.
HEB 12:25 Delgósh kanét ke habar kanóká dhálchár makanét. Á mardomán ke zeminay sará habardár kanók dhálchár kort, agan áyán tachagay ráh nadist, gorhá má chón tatka kanén agan cha hamáiá wati démá betarrénén ke cha ásmáná márá habardára kant?
HEB 12:26 Á wahdá áiay tawárá zemin larzént, bale nun wádahi kortag ke dega baré man na tahná zeminá, ásmáná ham larzénán.
HEB 12:27 É habar “dega baré” hamá chizzáni dur kanagay némagá esháraha kant ke larzénaga bant, chéá ke jórh kortagén ant, tánke hamá chizz bemánant ke larzénaga nabant.
HEB 12:28 Nun ke márá anchén bádsháhié rasit ke larzénaga nabit, báyad ent Hodáay shográ begerén o pa ehterám o hodátorsi hamá paymá parasteshi bekanén ke áiá pasond ent,
HEB 12:29 chéá ke may Hodá pelekkókén ásé.
HEB 13:1 Gón yakdomiá bráti mehrá barjáh bedárét.
HEB 13:2 Mehmándáriá mashamóshét, chéá ke gón é kárá lahténá bé pajjáh áragá préshtagáni mehmándári kortag.
HEB 13:3 Bandigáni hayálá anchó bedárét, gwashay shomá wat gón áyán bandig ét. Hamá ke béezzat kanaga bant, áyáni hayálá ham anchó bedárét, gwashay shomá wat béezzat kanag bayagá ét.
HEB 13:4 Báyad ent harkas sur o sángay ezzatá bedárit o jan o mard gón yakdegará wapádár bebant, chéá ke Hodá zenákár o badkárán sezá dant.
HEB 13:5 Wati zendmáná cha zarray hers o tamáhá dur bedárét o gón hamá chizzá razá bebét ke shomárá hastent, chéá ke Hodáyá gwashtag: “Man hechbar tará tahná naylán o yalaha nakanán,”
HEB 13:6 Gorhá cha má har yakké pa deljami gwashta kant: “Hodáwand mani madat kanók ent, mana natorsán. Mardom maná ché korta kanant?”
HEB 13:7 Wati péshwáyán yát kanét ke Hodáay habaresh pa shomá raséntag. Áyáni zendmánay ásar o ákebatá bechárét o áyáni imánay ráhá begerét.
HEB 13:8 Issá Masih hamá yakkén paymá ent ke butag, zi, maróchi o tán abad.
HEB 13:9 Gón tahr tahrén ajabén tálimán gomráh mabét, chéá ke pa má hamé sharr ent ke cha rahmatay barkatá may del dhaddh bebit, cha ward o warákay ráh o rahbandán na, ke cha áyán hecch páedaga narasit.
HEB 13:10 Márá anchén korbánjáhé hast ke sháhediay tambuay hezmatkárán óday warákáni waragay ejázat nést.
HEB 13:11 Masterén dini péshwá, pa gonáháni shódagá korbánig kortagén dalwatáni hóná pákterén jágahá bárt, bale jón cha ordgáhá dhann sóchaga bant.
HEB 13:12 Paméshká Issáyá ham cha shahray darwázagá dhann azáb sagget ke mardomán gón wati hóná pák o palgár bekant.
HEB 13:13 Gorhá byáét ordgáhá dhann Issáay kerrá rawén o má ham hamá béezzatiá besaggén ke áiá sagget.
HEB 13:14 Chéá ke edá márá dáemi shahré nést, má hamá áyókén shahray wadárig én.
HEB 13:15 Gorhá byáét modám Issáay barkatá, satá o sanáay korbánigá pa Hodáyá nadra kanén. É korbánig hamá lontháni bar o samar ent ke áiay námá gerant.
HEB 13:16 Cha nékén kárán o wati mál o hastiá degaráni sharikdár kanagá béhayál mabét, chéá ke Hodáyá anchén korbánig dósta bant.
HEB 13:17 Wati péshwáyáni parmánbardáriá bekanét o áyáni habarán bezurét, chéá ke á, shomay arwáhay negahpán ant o é bábatá áyán Hodáay kerrá jwáb dayagi ent. Gorhá bellét ke á pa shádeh wati kárá bekanant, pa norondhag na, chéá ke áyáni norondhag shomárá hecch páedaga nadant.
HEB 13:18 Pa má dwá kanét chéá ke deljam én ke may zamir pák ent o má lóthén ke har dábá pa ezzat zend begwázénén.
HEB 13:19 Cha shomá dazbandia kanán ke hás pa man dwá kanét ke zutt shomay kerrá per betarrán.
HEB 13:20 Sohl o émeniay Hodá ke áiá may Hodáwandén Issá, bezán ramagay mazanén shepánk, cha abadmánén ahd o paymánay hónay barkatá cha mordagán zendag kort o áwort,
HEB 13:21 shomárá sajjahén sharriáni tahá kámel kanát ke shomá áiay wáhagá sarjam bekanét. Cha Issá Masihay barkatá may delá hamá chizzán beródénát ke áiay chammán sharr ant. Issá Masihay shán o shawkat abad tán abad barjáh bát. Ámin.
HEB 13:22 Oo brátán! Man dazbandia kanán ke pa sabr o ópár mani delbaddhi dayókén habarán gósh bedárét. Man wati habar gwandh geptag o nebeshtah kortagant.
HEB 13:23 Sahig bebét ke may brát Timutáus cha zendáná ázát kanag butag. Agan á zutt byayt, áiá zurán o shomay gendoká káyán.
HEB 13:24 Wati sajjahén péshwáyán o sajjahén palgártagénán drót o salám sar kanét. Itáliái báwarmand shomárá drót o saláma gwashant.
HEB 13:25 Hodáay rahmat shomay sajjahénáni sará sáhél bát.
JAM 1:1 Cha Hodá o Hodáwandén Issá Masihay hezmatkár, Ákubay némagá pa dwázdahén kabilahán ke donyáyá sheng o sháng ant. Shomárá salám sar bát.
JAM 1:2 Oo brátán! Wahdé warh warhén chakkás o ázmáeshána kapét, é chizzá sarréchén shádehié bezánét.
JAM 1:3 Chéá ke zánét shomay imánay chakkás sabr o ópára kárit,
JAM 1:4 bale bellét ke é sabr o ópár sarjam bebit tán shomá rost o rodóm bekanét o tamán o kámel bebét o shomárá hecch kammié mabit.
JAM 1:5 Agan cha shomá yakkéay zánt o hekmat kamm bebit, cha Hodáyá belóthit o Hodá, ke cha wati bakshendagiá harkasá bé mennat o shegána dant, áiá zánt o hekmata bakshit.
JAM 1:6 Bale gón báwarmandiá belóthit o hecch shakké delá mayárit, chéá ke dodelén mardom zeray chawl o mawjáni dhawlá ent ke gón gwátá har némagá létha wárt.
JAM 1:7 É warhén mardomé, chosh hayál makant ke áiá cha Hodáwandá chizzé rasit.
JAM 1:8 Parchá ke á dodel ent o wati hecch kár o hecch kerdáray sará mohr naóshtátag.
JAM 1:9 Nézgárén brát, wati marháh o ezzatmandiay sará pahr bekant o
JAM 1:10 hastómand, wati darbéshi o nézgáriay sará, chéá ke hastómand dashtay golay paymá hoshka tarrit o zawála bit.
JAM 1:11 Róch gón wati sóchókén bránzá sara kasshit o káhán hoshka kant, áyáni polla rechant o zébáiesh gára bit. Hastómand hamé paymá ent, wati kasb o káráni chen o lánchá gimmorit o bégwáha bit.
JAM 1:12 Bahtáwar hamá ent ke wati ázmáesh o chakkásán mohra óshtit. Parchá ke wahdé á cha chakkásán sarbolanda bit, zendmánay hamá táj áiá rasit ke Hodáyá pa wati dóst dárókán wádah kortag.
JAM 1:13 Á ke chakkásá kapit, magwashit: “É Hodá ent ke maná ázmáesha kant.” Chéá ke Hodá gón hecch badié chakkásaga nabit o hechkasá chakkás o waswasahá dawra nadant.
JAM 1:14 Harkas ke waswasaha bit, é áiay jenday sellén wáhag ant ke galáénant o dámá dawria dayant.
JAM 1:15 Sellén wáhag ke lápporra bant, gorhá gonáh pédá bit, gonáh ke rodit o mazana bit, marka kárit.
JAM 1:16 Oo mani dordánagán! Rad mawarét.
JAM 1:17 Har nékén dád o har tamánén tohpah o théki cha borzá kayt, cha nur o rozhnay Petay némagá ke hechbar badala nabit o hecch tahári o sáhegéá áiay arwáh o jabiná ráh nést.
JAM 1:18 Áiay wáhag hamé butag ke márá cha rástiay habaray wasilahá pédá bekant, tánke áiay jórh kortagénáni awali bar o samar bebén.
JAM 1:19 Oo mani dordánagán! Sharr delgósh bekanét. Harkas báyad ent eshkonagá tayár bebit, bale habará eshtáp makant o zutt zahr magipt.
JAM 1:20 Chéá ke ensánay zahr o hezhm, á pahrézkáriá pa bar o samara naylit ke Hodá lóthit.
JAM 1:21 Paméshká har warhén paliti o sajjahén badián cha wat dur kanét o pa békebri o narmdeli, hamá gál o habarán delá bedárét ke shomay del o jáná nádénag butag o shomay rakkénagay wák o twáni hast.
JAM 1:22 Hodáay habará, anchosh sahl o hoshká gósh madárét o watá rad madayét, áiay sará kár bekanét.
JAM 1:23 Chéá ke harkas é habará eshkont o áiay sará kára nakant, hamá mardomay dhawlá ent ke wati chehragá ádénká chárit,
JAM 1:24 watá gendit, bale anchosh ke cha ádénkay démá dura bit, hamá damáná wati rang o dróshomá shamóshit.
JAM 1:25 Bale á ke wati chammán dém pa tamán o kámelén Sharyat, bezán “ázátiay Sharyatá” tarrénit o áiay sará mohra óshtit, shamóshkárén eshkonóké naent, mannókén kár kanóké. Á wati kár o kerdá bahtáwara bit.
JAM 1:26 Á kas ke watá Hodádósté zánt bale wati zobánay mahárá dáshta nakant, watá rada dant o galáénit o áiay “Hodádóstiá” páedagé nést.
JAM 1:27 Hamá Hodádósti ke may Hodáén Pet, pák o béaybia zánt: “Sakkiáni wahdá janózám o chórawáni dastá gerag” o “Watá cha é donyáay gandagián pák dárag” ent.
JAM 2:1 Oo mani brátán! Shomá ke may mazanshánén Hodáwand Issá Masihay báwarmand ét, mardománi nyámá park o pér korta nakanét.
JAM 2:2 Pa mesálé, agan yakké gón teláhén challah o mondrikk o wasshén póshákán shomay diwáná byayt o dega dertagpocchén bazzagé ham bepoterit o
JAM 2:3 shomá atlaspóshá gón sharrén chammé bechárét o begwashét: “Byá, byá borzá benend”, bale gón á bazzagá begwashét: “Ódá bósht”, yá: “Mani pádáni démá benend”,
JAM 2:4 gorhá shomá wati nyámá park o péré naesht o gón wati sellén hayálán ér janagi káré nakort?
JAM 2:5 Oo dordánagán! Gósh dárét. Hodáyá é donyáay nézgárén mardom gechén nakortagant ke báwará hastómand bebant o hamá bádsháhiá mirás bebarant ke Hodáyá pa wati dóst dárókán labz o kawl kortag?
JAM 2:6 Bale shomá nézgáráni béezzati kortag. É hastómand naant ke shomay sará setama kanant o shomárá gerrénant o hakdiwánána barant?
JAM 2:7 Hamé naant ke hamá sharapdárén námay sará kopra kanant ke Hodáyá shomárá bakshetag?
JAM 2:8 Agan sháhánagén Sharyatá, hamá dábá barjáh bedárét ke Pákén Ketáb hokma kant: “Gón wati hamsáhegá wati jenday dhawlá mehr bekan”gorhá shomá sharr kortag.
JAM 2:9 Bale agan park o péré bellét, gonáha kanét o Sharyat ham shomárá hamá dhawlá mayáriga kant ke gonahkárána kant.
JAM 2:10 Parchá ke agan kasé Sharyatay sajjahén rahbandáni sará kár bekant bale yakk rahbandé ham bepróshit, bezán sajjahén Sharyati próshtag.
JAM 2:11 Áiá ke gwashtag: “Zená makan,” anchosh ham gwashtagi: “Hón makan.” Nun agan zená makanay bale hón bekanay, taw Sharyat próshtag.
JAM 2:12 Gorhá hamáyáni dábá kár o habar bekanét ke ázátiay Sharyatay sará dádrasi kanaga bant.
JAM 2:13 Chéá ke á mardom ke mehr o rahma nakanant, áyáni dádrasi pa bérahmia bit. Bale mehr o rahm, dádrasiay sará báládast o sóbéna bit.
JAM 2:14 Oo brátán! Bé kár o kerdá, tahná gón báwarmandiay gapp o habará, kaséá ché sutt o páedagé rasit? É paymén báwarmandi chón áiá rakkénta kant?
JAM 2:15 Agan brát yá goháré rózig o pósháká mohtáj bebit o
JAM 2:16 cha shomá yakké gón áiá begwashit: “Pa salámati beraw, sharrén póshák bepósh o lápay sérá bwar,” bale pa áiay jesmi zaluratáni purah kanagá hecch makant, áiay káré sharra bit?
JAM 2:17 Bé kár o kerdá, báwarmandi mortag.
JAM 2:18 Nun buta kant kasé begwashit: “Tai kerrá báwar hast o mani kerrá kár o kerd. Taw wati báwará bé kár o kerdá maná pésh bedár o man cha wati kár o kerdá, tará wati báwará pésha dárán.”
JAM 2:19 Tará báwar ent ke Hodá yakké. Sharr ent. Déh o jennáni báwar ham hamesh ent o cha torsá larzant.
JAM 2:20 Oo nádán! Pa békerdén báwarmandiay bébar o bésamariá dalil o neshánia lóthay?
JAM 2:21 May bonpirok Ebráhém, cha wati kár o kerdá pák o pahrézkár hesáb árag nabut hamá wahdá ke wati chokk Esáki korbánjáhá bort?
JAM 2:22 Genday ke áiay báwarmandi o kárkerd, hórigá démá shotant o báwarmandi gón kárkerdá sarjam but.
JAM 2:23 É dhawlá, hamá nebeshtah pa sar raset o sarjam but ke gwashit: Ebráhémá Hodáay sará báwar kort o hamé báwar, pa áiá páki o palgári hesáb árag but o á Hodáay dóst zánag but.
JAM 2:24 Gorhá gendét ke harkas cha wati kárkerdá pák o pahrézkár zánaga bit, tahná cha báwar o imáná na.
JAM 2:25 Anchosh ham, bannámén janén Raháb cha wati kár o kerdá pák o pahrézkár hesáb árag nabut, hamá wahdá ke chárigi jáh o panáh dátant o cha dega ráhéá táchéntant?
JAM 2:26 Haw! Bezán, hamá dábá ke bé ruhá, jesm o ján mortag, bé kár o kerdá báwar ham mortag.
JAM 3:1 Oo mani brátán! Chosh mabit, cha shomá bázéné ostád bebit. Chéá ke zánét, má ostádáni sará gránterén dádrasia kapit o
JAM 3:2 má sajjahén báz rada janén o thagala warén. Agan kasé cha wati habarán thagal mawárt, tamán o kámelén ensáné o wati sarjamén jesm o jánay mahárá dáshta kant.
JAM 3:3 Agan má aspáni dapá lagám bekanén tán áyán wati parmáná byárén, gorhá áyáni sajjahén jesm o jáná har némagé ke belóthén táb dáta kanén.
JAM 3:4 Thuhén bójigán bechárét. Harchont ke báz mazan ant o pa áyáni démá baragá trondén gwát pakár ent, bale náhodá bójigá gón hordén sokkáné har jáh ke belóthit bárt.
JAM 3:5 Hamé dhawlá, zobán o lellek ham ensánay jesmay yakk hordokén bahré bale mazanén gorraga jant. Anchosh ke ásay hordén trishkoké, mazanén jangalé sóchit,
JAM 3:6 zobán ham yakk anchén ásé ke may jesm o jánay rag o bandáni tahá selliáni donyáé. Mardomá pahk sell o áludaga kant o áiay drostigén zendá ása jant. Zobán wat ásé ke cha dózahay ásá rók butag.
JAM 3:7 Har dhawlén jánwar, báli morg, már o gój o daryái sahdár rámag kanaga bant o ensáná é kár kortag,
JAM 3:8 bale hechkas zobán o lelleká lagám korta nakant. Zobán sarkasshén sherré ke cha koshókén zahrá porr ent.
JAM 3:9 Gón hamé zobáná wati Hodáwandén Petá satá kanén o gón hamé zobáná hamá mardomán nálata kanén ke Hodáyá wati shekl o dróshomá addh kortagant.
JAM 3:10 Cha yakkén dapá satá o saná ham dara kayt o baddwái o nálat ham. Oo brátán! Nabáyad ent chosh bebit.
JAM 3:11 Buta kant cha yakkén chammagá sórén o wasshén áp berombit?
JAM 3:12 Oo mani brátán! Enjiray drachké zaytunay bar dáta kant? Yá ke anguray drachké enjira dant? Hamé dhawlá, sórén chammagé wasshén áp rombénta nakant.
JAM 3:13 Shomay nyámá dáná o aglmand kay ent? Bellét eshiá cha wati sharkerdiá pésh bedárit, gón hamá békebri o mehrabániá ke cha hekmatá kayt.
JAM 3:14 Bale agan shomay delá tahlén hasadd o watgarazi mán ent, gorhá pahr makanét, dróg mabandét o é rástiá bemannét.
JAM 3:15 É dhawlén “hekmat” cha borzá éra nayayt, zemini, napsáni o shaytáni ent.
JAM 3:16 Chéá ke har jáh hasadd o watgarazi bebit, ódá petnah o áshóp o dega har dhawlén gandagia bit.
JAM 3:17 Bale á hekmat ke cha borzá kayt, awalá ke pák o palgár ent, randá sohl árók o narm, mannók o cha néki o rahmatay bar o samará porr ent, cha park o pér o dorui o dopóstiá ham dur ent.
JAM 3:18 Á ke sohl o saláhay tohmá keshant, pahrézkária ronant.
JAM 4:1 Shomay nyámá, jang o dapják cha kojá wadia bant? Cha shomay jenday hamá tamáh o wáhagán naant ke shomay rag o bandáni tahá jangá ant?
JAM 4:2 Chizzé lóthét o shomárá narasit. Cha hamáiay tamáhá, hón o kóshá kapét, bale angat shomárá narasit. Nun jang o jadala jórhénét, padá ham shomárá narasit chéá ke cha Hodáyá nalóthetagó.
JAM 4:3 Wahdé lóthét o narasit, pa é sawabá ent ke shomá gón badén morád o wáhagé lóthetag tán á chizzán pa wati aysh o nóshán kár bebandét.
JAM 4:4 Oo zenahkárán! Nazánét ke donyáay dósti, Hodáay dozhmeni ent? Harkas ke donyáay dóstiay randá ent, watá Hodáay dozhmena jórhénit.
JAM 4:5 Hayála kanét ke Pákén Ketábá mopt o náhudag gwashtag: “Ruhé ke Hodáyá mayshomay jesm o jáná dametag, tán hasadday kesásá pa má hodónák ent”?
JAM 4:6 Bale rahmaté ke á márá bakshit, béhesáb géshter ent. Paméshká Pákén ketába gwashit: Hodá porkebr o gorunákén mardománi helápá mohra óshtit, bale békebr o darbéshén mardománi sará wati rahmatána gwárénit.
JAM 4:7 Gorhá, watá Hodáay dastá bedayét. Shaytánay démá mohr bóshtét o á cha shomay démá tachit.
JAM 4:8 Gón Hodáyá nazzikk bebét, Hodá ham gón shomá nazzikka bit. Oo gonahkárán! Wati dastán pák kanét. Oo dodelán! Wati delá sáp kanét,
JAM 4:9 zári bekanét, mótk byárét o begréwét. Wati kandagán mótkay tahá badal kanét o shádehián andóháni tahá.
JAM 4:10 Hodáwanday bárgáhá, békebr o darbésh bebét o Hodáwand shomárá borz o sarperáza kant.
JAM 4:11 Oo brátán! Yakdomiá ér majanét o badgói makanét. Harkas ke wati brátá bad begwashit o áiá mayárbár bekant, rást esh ent ke áiá Sharyat bad gwashtag o mayárig kortag. Agan taw Sharyatay dádrasiá kanay, gorhá Sharyatay sará kár kanagá naay, Sharyatay helápá shawr borragá ay.
JAM 4:12 Bale dádras o Sharyatay jórhénók yakké. Á hamá ent ke rakkénag o tabáh kanagay wák o twáni hast. Gorhá taw kay ay ke wati hamsáhegay dádrasiá kanay?
JAM 4:13 Bale shomá ke gwashét: “Maróchi o bándá é shahr o á shahrá rawén o sálé hamángora gwázénén, sawdágeria kanén o mazanén sutta katthén,” sharr gósh dárét.
JAM 4:14 Shomá haminchok ham nazánét ke bándá ché bit. Shomay zend chéé? Shomá báp o hormay paymá ét ke damánokéá gendaga bit o padá gára bit.
JAM 4:15 Gorhá chosh begwashét: “Agan Hodáwand belóthit, zendaga mánén o é paym o á paymá kanén.”
JAM 4:16 Bale nun chosh ent ke pa kebré pahra kanét. Har é warhén pahré sell ent.
JAM 4:17 Gorhá, agan kasé bezánt kojám kár sharr ent o á kárá makant, gonahkára bit.
JAM 5:1 Nun shomá, oo zarr o málay wájahán, begréwét o zári kanét, chéá ke tahárén róch dém pa shomá pédák ant.
JAM 5:2 Shomay mál o hasti zawál butag o sarhetag o jámag o póshák ham warók o ramézá wártagant.
JAM 5:3 Shomay zarr o simm zang geptagant o zangesh shomay helápá gwáhia dayant o ásay dhawlá shomay jesm o jánay góshtá warant, parchá ke é goddhi róchán, zarr o máló ambár kortag.
JAM 5:4 Bechárét, annun hamá kárendah o dehkánáni mozz shomay helápá kukkára kant, ke áyán shomay dhagáráni keshár rón o mósh kortagant o shomá gón mandr o repk áyáni mozz nadátag. Á ronókáni é peryát, zórmandén Hodáwanday góshá rasetag.
JAM 5:5 Shomá zeminay sará pa aysh o nósh o hawá o hawas zend gwázéntag. Watá pa koshagay róchá sharr sáthetag o pazzóró kortag.
JAM 5:6 Shomá tachk o pahrézkárén mardom mayárig kortag o koshtagant. Á shomay helápá naóshtátagant.
JAM 5:7 Oo brátán! Tán Hodáwanday áyagá, sabr o ópár kanét. Bechárét ke dehkán che paymá wadára kant tán zemin wati porarzeshén bará beródénit, á pa érahti o bahári hawrán chón wadárig ent.
JAM 5:8 Shomá ham sabr kanét o delá dhaddh kanét parchá ke Hodáwanday áyag nazzikk ent.
JAM 5:9 Oo brátán! Yakdomiay zangá majanét tánke dádrasiá mayárig kanag mabét. Chéá ke dádras, darwázagay dapá óshtátag.
JAM 5:10 Brátán! Sakkiáni wahdá, sabr o ópárá cha hamá nabián sabakk begerét ke Hodáwanday námá habaresh kortag.
JAM 5:11 Má hamáyán bahtáwara zánén ke wati zendesh pa sabr o ópár gwázéntag, shomá Ayyubay sabr o tahambolay bárawá eshkotag o zánét ke Hodáwandá áiay ásar o ákebat ché kort. Chéá ke Hodáwand wat gamwár o mehrabán ent.
JAM 5:12 Bale, oo mani brátán! Sawgend mawarét, na ásmánay, na zeminay o na dega chizzéay. Bellét ke shomay “haw”, haw bebit o “na”, na bebit, tán chosh mabit ke mayárig kanag bebét.
JAM 5:13 Agan cha shomá kasé sakki o sórián kaptag, dwá bekant o agan yakké gal o shádán ent, saná o satá bekant.
JAM 5:14 Agan cha shomá kasé nádráh ent, kelisáay kamáshán tawár bekant tán pa áiá dwá bekanant o Hodáwanday námá rógeni per bemoshant.
JAM 5:15 Báwarmandi dwá nádráhá dráha kant o Hodáwand áiá páda kant o agan gonáhi kortag, gonáhi bakshaga bant.
JAM 5:16 Paméshká, wati gonáhán, yakdomiay démá bemannét o pa yakdomiá dwá belóthét tán dráh kanag bebét. Pahrézkárén mardoméay dwáyá zór mán o barjáha bit.
JAM 5:17 Elyás may paymén mardomé at, bale pa delsetki dwái kort ke hawr mabit. Gorhá tán say o ném sálá zeminá hawr naretk.
JAM 5:18 Padá ke dwái kort cha ásmáná hawrán gwart o zeminá bar o samar dát.
JAM 5:19 Oo mani brátán! Agan cha shomá kasé cha rástiá thagal bwárt o degaré áiá per betarrénit,
JAM 5:20 bezánét ke harkas yakk gonahkáréá cha gomráhiá betarrénit, gonahkárá cha marká rakkénit o bázén gonáhéay bakshagay sawabsáza bit.
1PE 1:1 Cha Issá Masihay kásed Petrosay némagá, pa hamá sajjahén darándhéhén mardomán ke Pontus, Galátiah, Kápádukiah, Ásiá o Bitiniahay damagán sheng o sháng ant. Hodáyá cha wati péshzánti o gón wati palgár kanókén Pákén Ruhá, shomárá gechén kortag tán Issá Masihay parmánbardáriá bekanét o hamáiay hón shomay sará páshag o dranzag bebit. Hodáay rahmat o sohl o ásudagi shomay sará gésh o géshter bát.
1PE 1:3 May Hodáwandén Issá Masihay Hodáén Petá satá o saná bát. Cha wati sarréchén rahmatá o gón Issá Masihay cha mordagán zendag bayagá, Hodáyá márá nóksará pédá kort tán márá zendagén omété berasit.
1PE 1:4 Áiá pa shomá ásmáná mirásé ambár kortag ke é mirás hechbara napussit, gára nabit o abadmán ent.
1PE 1:5 Shomá Hodáay sará báwar kortag o Hodá ham gón wati zór o wáká pa hamá nejátá shomay negahpániá kant ke cha annuná tayár ent o áheri zamánagá paddara bit.
1PE 1:6 É shomay shádmáni ent, toré shomá nun pa damánokéá gránén wahd o chakkásán bekapét.
1PE 1:7 É chakkás paméshká káyant ke shomay mohr o mohkamén báwar Issá Masihay záher bayagay wahdá satá kanag o sárháyag o ezzat dayag bebit. Shomay báwar cha zawál bayókén sohr o teláhá báz géshtera karzit, bell toré sohr cha ásá gwastag.
1PE 1:8 Shomá Masih hechbar nadistag, angat áiá dósta dárét. Annun ham shomá áiá nagendét, bale áiay sará báwaró hast o hecch labzé shomay porshawkatén wasshiá darshán korta nakant,
1PE 1:9 chéá ke wati báwar o imánay morádá gendagá ét, bezán shomay jánay rakkag.
1PE 1:10 Paygambarán hamé rakkagay bárawá bázén johlánkén patth o pól kortag. Á paygambarán hamé rahmatay bárawá péshgói kortag ke shomárá rasagi at.
1PE 1:11 Masihay Ruh cha áyáni zobáná habar kanán o gwashán butag ke Masihá chónén sakki saggagi ent o randá áiá chónén mazanén shán o shawkaté rasit. Gorhá, á modám hamé johdá butagant ke bezánant Pákén Ruh kai bárawá habará ent o é kár kadéna bit.
1PE 1:12 Pa áyán paddar butag ke wahdé habará atant wati hezmatá nakanagá atant, shomay hezmatá kanagá atant. Nun gón Pákén Ruhay zórá dega mardomán é wasshén mestág pa shomá raséntag, hamá Pákén Ruh ke cha ásmáná dém dayag butag. Pa é wasshén mestágay zánagá préshtag ham delmánag ant.
1PE 1:13 Wati lánká bebandét o hozzhár bebét. Zendá pa shehm o rahdári begwázénét. Wati ométá pa Hodáay hamá rahmatán bebandét ke Issá Masih wati záher bayagay wahdá pa shomá rasénitesh.
1PE 1:14 Habarzurén chokkáni paymá bebét. Maylét ke shomay zend hamá dhawlá sellén wáhagáni dastá bebit ke shomay názántiay wahdá butag.
1PE 1:15 Hamá dhawlá ke shomay gwánk janók pák ent, har káray tahá shomá ham pák bebét.
1PE 1:16 Chéá ke nebisag butag: “Man pák án o shomá ham báyad ent pák bebét.”
1PE 1:17 Agan shomá Hodáyá wati Peta gwashét, ke á harkasay dádrasiá bé ru o ryá, áiay káráni hesábá kant, gorhá wati darándhéhiay wahd o pásán pa sharap o ezzat gón Hodátorsi begwázénét.
1PE 1:18 Shomá zánét ke cha hamá náhudagén zendá ke cha shomay pet o pirénán shomárá rasetagat, bahá zurag o mókag butagét, bale gón nograh o sohrá na, ke abadmán naant,
1PE 1:19 gón hamá béayb o békecchahén Gwarándh, bezán Masihay bébaháén hóná bahá zurag butagét.
1PE 1:20 Masih cha donyáay jórh bayagá pésar gechén kanag butag, bale é goddhi róchán pa shomaygi átk o paddar but.
1PE 1:21 Cha áiay wasilahá, shomárá Hodáay sará báwar hast, hamá Hodáay sará ke Masihi cha mordagán zendag kort o shán o shawkati dát. Paméshká, shomá Hodáay sará báwara kanét o cha hamáiá ométwár ét.
1PE 1:22 Nun ke shomá gón rástiay randgiriá watá pák o palgár kortag o gón yakdegará padelén mehray wáhond butagét, gorhá pa del o setk gón yakdomiá mehr bekanét.
1PE 1:23 Chéá ke shomárá nókén zend cha zawál bayókén tohmá narasetag, cha zawál nabayókén tohmá rasetag, bezán cha Hodáay zendag o abadmánén gál o habará.
1PE 1:24 Parchá ke: “Ensán chó káh o sabzagá ent o shán o shawkati chó káhay pollá. Káh o sabzaga merant o poll ham kapant.
1PE 1:25 Bale Hodáwanday gál o habar tán abada mánit.” É gál o habar hamesh ent ke shomárá mestág dayag butag.
1PE 2:1 Paméshká, har paymén badi, makr o préb, dotal o dopósti, hasadd o kénagán cha wat dur kanét o hechkaséay poshtá bad o radén habar makanét.
1PE 2:2 Nun ke shomá Hodáwanday néki o mehrabániay tám chashetag, nók pédá butagén nonnokáni paymá pa pák o ruhánién shirá shodig bebét tánke cha hameshiá dém pa wati rakkagá rodán bebét.
1PE 2:4 Issá Masihay némagá byáét, hamá zendagén seng ke mardomán pasond nakort o nazort bale Hodáyá gechén kort o áiay chammá Issá bématth o porarzesh at.
1PE 2:5 Nun shomá zendagén sengáni paymá pa ruhánién lógéay bandagá kár bandag bebét, pák o palgártagén ruhánién péshwá ham bebét o anchén ruhánién korbánig bedayét ke cha Issá Masihay wasilahá Hodáyá washnóda kanant.
1PE 2:6 É hamá habar ent ke Hodáay Pákén ketábá átkag: “Bechárét, man Sahyuná sengé éra kanán. É seng bébahá o gechénién bonheshté. Á kas ke eshiay sará báwar bekant, hechbar pashal o sharmendaga nabit.”
1PE 2:7 É seng pa shomá ke imánó áwortag porarzesh ent, bale pa áyán ke imánesh nayáwortag: “Á seng ke bánbandén ostáyán pasond nakort o nazort hamá seng, bonhesht but.”
1PE 2:8 o “sengé ke mardomána thagalénit o kóhé ke áyán dawra dant.” Áyáni thagal waragay sawab esh at ke Hodáay habaresh nazort. Áyáni ásar o ákebat hamesh at.
1PE 2:9 Bale shomá Hodáay gechén kortagén bádsháhén ruhánién péshwá o pákén kawm ét, Hodáay jenday kawm ét o áiá shomárá cha taháriá dém pa wati porshawkatén rozhnáiá gwánk jatag tán áiay mazanén kárán jár bejanét.
1PE 2:10 Pésará shomá kawmé naatét bale annun Hodáay kawm ét. Pésará shomárá Hodáay rahmat narasetagat bale annun áiay rahmat shomárá gón ent.
1PE 2:11 Oo dordánagán! Shomá é donyáyá bégánag o darámad ét. Mani dazbandi hamesh ent ke watá cha á jesmáni lóth o wáhagán pahréz bekanét ke shomay ruhay helápá janga kanant.
1PE 2:12 Nábáwaráni nyámá pák o palgárén zend begwázénét. Bell toré á, shomárá bohtáma janant o gwashant ke shomá radén kár kanagá ét, bale gón shomay nékén káráni gendagá, Hodáay áyagay róchá Hodáyá sharap o ezzat bedayant.
1PE 2:13 Shomá pa Hodáwandaygi, sajjahén ehtiárdárén mardománi parmánbardáriá bekanét, bádsháhay ham ke cha sajjahénán master ent o
1PE 2:14 hákemáni ham ke cha bádsháhay némagá pa radkáráni sezá dayag o sharkerdén mardománi sharap dayagá dém dayag butagant.
1PE 2:15 Hodá lóthit shomá gón wati sharrén kerd o kárán ahmakén mardománi násarpadén habaráni démá bedárét.
1PE 2:16 Shomá ázát ét, paméshká ázátén mardománi dhawlá zend begwázénét bale wati ázátiá hechbar pa radén kárán nimmón makanét, wati ázátiá pa Hodáay hezmatá kár bebandét.
1PE 2:17 Harkasá ezzat bedayét o pa báwarmandán hásén mehré delá bedárét, wati zendá pa Hodátorsi begwázénét o bádsháhá sharap bedayét.
1PE 2:18 Oo golámán! Wati wájaháni parmánbardáriá bekanét o áyán báz ezzat bedayét. Tahná narm o mehrabánén wájaháni parmánbardáriá makanét, trond o zórákén wájaháni parmánbardáriá ham bekanét.
1PE 2:19 Wahdé shomá gón Hodáyá wapádár ét o náhakkén sezáyána saggét, shomay hamé sabr o ópár wat pa shomá sharapé bit.
1PE 2:20 Agan shomá pa radén káréá sezá dayag bebét, gorhá chón á sezáay saggag shomárá sharapdára kant? Bale agan sharrén kár o kerdéay sawabá sakki besaggét, Hodá shomárá satá kant.
1PE 2:21 Shomá pa hamé sakkiáni saggagá gechén kanag butagét, parchá ke Masihá ham pa shomaygi sakki sagget o nemunah o mesálé but ke shomá áiay randgiriá bekanét.
1PE 2:22 “Áiá hecch gonáh nakort o kassárá prébi nadát.”
1PE 2:23 Bell toré béezzat kanag but, bale angat ham hechkasi béezzat nakort. Tantaná wahdé sakki saggagá at, kassárá pádtrápi nadát. Áiá Hodáay sará tawkal kort ke tachkén ensáp o dádrasia kant.
1PE 2:24 Áiá wat may gonáháni bár salibay sará wati baddhá laddhet, tánke gonáh cha may delá bemerit o pa néki o páki zend begwázénén, ke shomá cha hamáiay thapp o thórán dráh butagét.
1PE 2:25 Mésháni paymá gár o sargardán atét, bale nun hamáiay kerrá per tarretagét ke shomay arwáháni shepánk o sambálók ent.
1PE 3:1 Oo janénán! Hamé paymá, shomá wati mardáni parmánbardáriá bekanét, tán agan cha áyán yakké Hodáay habará mamannit, gorhá á gón habará na, gón wati janay kár o kerday gendagá Hodáay sará báwar bekant,
1PE 3:2 hamá wahdá ke shomay Hodátorsi o pákdámoniá gendit.
1PE 3:3 Shomay singár o palgár zaheri mabit ke sará chón begwapén, chónén saht o zéwar per bekanén o chónén god bepóshén.
1PE 3:4 Eshiay badalá, wati del o jabiná gón narm o árámén ruhéay páydárén zébáiá besingárét, ke pa Hodáyá é chizz báz porarzesh ent.
1PE 3:5 Kwahnén wahd o zamánagá anchosh butag o pák o nékén janén ke ométesh pa Hodá butag, watá gón wati mardáni parmánbardáriá singáretagesh,
1PE 3:6 anchosh ke Sárahá Ebráhémay parmánbardári kort o wájah o masteri gwasht. Agan shomay kár nék o sharr bebant o maylét ke chizzé shomárá betorsénit, shomá ham hamáiay chokka bét.
1PE 3:7 Oo mardán! Shomá ham gón wati janán pormehr bebét ke cha shomá názorkter ant. Janén gón shomá zendmánay porbarkatén thékiá sharikdár ant. Áyán ezzat bedayét, tán chosh mabit ke shomay dwá eshkonag mabant.
1PE 3:8 Néth, shomá sajjahén yakdel o hamdard bebét, gón yakdomiá mehr bekanét, narmdel o békebr bebét.
1PE 3:9 Gón hechkasá badiay badalá badi makanét. Agan kaséá shomárá záh o zakat kort, áiá záh o zakat makanét, eshiay badalá pa áiá nékén dwá belóthét ke pa hamé kárá gwánk janag butagét o cha hameshiá shomárá barkata rasit.
1PE 3:10 Paméshká: “Á kas ke zendmánay wáhagdár ent o wasshén róch gendaga lóthit, áiay zobán cha badiá dur bebit o lonth cha makr o prébá;
1PE 3:11 cha badiá per betarrit o néki bekant; sohl o émeni belóthit o hameshiay shóházá bebit.
1PE 3:12 Chéá ke Hodáwanday chamm, nék o pahrézkárén mardomán sakk ent o góshi gón hamáyáni dwáyá. Bale Hodáwand wati démá cha badkerdén mardomána tarrénit.”
1PE 3:13 Nun ke shomá pa nékén káráni kanagá wáhagdár ét, kay shomárá táwán dáta kant?
1PE 3:14 Agan pa shomay nékén kárán shomárá ázár berasit, angat ham shomá bahtáwar ét. Cha áyáni pádtrápán matorsét o paréshán mabét.
1PE 3:15 Bass, wati delá Masihá Hodáwand bemannét o hamáiá sharap bedayét. Agan kasé shomay ométay sawabay jostá bekant, modám pa passaw dayagá tayár bebét.
1PE 3:16 Bale é kárá gón narmi o pa sangini bekanét. Wati jabin o wejdáná pák o sáp bedárét, tánke shomárá bad o rad gwashagay wahdá, á mardom gón shomay nékén Masihi kerdáray gendagá cha wati záh o zakatán pashal o sharmendag bebant.
1PE 3:17 Paméshká, agan Hodáay razá bebit ke sakki besaggét, gorhá badén káráni sakkiay saggagay badalá, nékén káráni sakkiá besaggét.
1PE 3:18 Masihá ham yakk baré pa may gonáhán sakki sagget, bezán á “Nék o Páká” pa gonahkárán wati ján nadr kort tán márá pa Hodáyá sar bekant. Masih jesmi koshag but bale Ruhá zendag kort.
1PE 3:19 É, hamáiay Ruh at ke bandigén arwáháni nyámá shot o pa áyán járé jati,
1PE 3:20 hamá arwáh ke gwastagén zamánagá náparmániesh kortagat, bezán Nuhay zamánagá ke bójig addh bayagá at o Hodá gón sabr o ópár wadárig at, bale kammén mardomé, bezán tahná hasht mardom cha ápay ráhá rakket.
1PE 3:21 Hamé áp shomay pákshódiay mesál o nemunah ent ke annun shomárá rakkénit. Pákshódi jesm o jánay zaheri chellán páka nakant, é pa pákén wejdán o jabiná gón Hodáyá shomay dazbandi ent ke cha Issá Masihay jáh janagay wasilahá shomárá rasit,
1PE 3:22 hamá Masih ke ásmáná shotag o nun Hodáay rástén némagá neshtag o préshtag o zór o wák, hamáiay dastay chérá ant.
1PE 4:1 Nun hamá dhawlá ke Masihá wati jesm o jáná sakki sagget, shomá ham pa anchén káréá tayár bebét, parchá ke har wahdá kaséá mán jesmá sakki saggetag, cha gonáhá rakketag.
1PE 4:2 É paymá, nun á wati mantagén jesmi zendá ensáni lóth o wáhagáni sará nagwázénit, Hodáay wáhagáni sará gwázénit.
1PE 4:3 Shomá bázén wahdé hamá káráni sará gwázéntag ke Hodánábáwarén mardomán dósta bant, chó ke badkári, hawá o hawas, hanósh o bésári, sharábwáriay mahpel, aysh o nósh o é gandagén botparasti.
1PE 4:4 Nun wahdé á gendant ke shomá é radén káráni hár o hirrópá áyáni hamráha nabét, hayrána bant o shomárá bad o rada gwashant.
1PE 4:5 Bale é mardomán hamáiay démá jwáb dayagi ent ke pa sajjahén zendagén o mortagénáni dádrasiá tayár ent.
1PE 4:6 É dhawlá, Hodáay wasshén mestág pa mordagán ham rasénag but, ke sajjahénáni dhawlá áyáni jesmi dádrasi butagat, tánke arwáhesh Hodáay paymá zendag bemánant.
1PE 4:7 Donyá zutt halás bayagi ent, paméshká gón shehm o rahdáriá watá grán o sangin bedárét tán dwá kort bekanét.
1PE 4:8 Cha sajjahénán masterén gapp esh ent ke yakdomiá pa del o setk dóst bedárét ke mehr, bázén gonáhéay bakshagay sawabsáza bit.
1PE 4:9 Bé norondhagá wati lógay dapá pa yakdomiá pach bekanét.
1PE 4:10 Shomá har yakkéá cha Hodáyá hásén twáné rasetag. Amánatdáráni paymá, Hodáay tahr tahrén nyámatán pa yakdomiay hezmatá kár bebandét.
1PE 4:11 Kasé ke habara kant, Hodáay jenday habarán bekant o kasé ke hezmata kant gón Hodáay dátagén zór o wáká hezmat bekant, tánke cha Issá Masihay wasilahá Hodáyá satá o saná berasit. Sajjahén shán o shawkat o zór o wák abad tán abad hamáiay bátant. Anchosh bát. Ámin.
1PE 4:12 Oo dordánagán! Cha hamá ásén chakkás o ázmáeshán hayrat makanét ke shomay chakká kapant o wati delá magwashét ke é ajabén káré gón má bayagá ent.
1PE 4:13 Tán ódá ke gón Masihay sakkiáni saggagá sharikdár ét gal o shádán bebét, tánke hamá sáhatá ke áiay shán o shawkat paddara bit, shomá ham wassh bebét o békesás shádmáni kort bekanét.
1PE 4:14 Agan Masihay námay sawabá shomárá záh o zakata kanant, shomá bahtáwar ét, parchá ke Hodáay porshawkatén Ruhá shomay delá jágah kortag.
1PE 4:15 Watá pahrézét ke cha shomá kasé hóni, dozz, radkár o pléndh bayagay sawabá sakki o sóriáni tahá makapit.
1PE 4:16 Bale agan kasé Masihi bayagay sawabá sakki o sóriáni tahá bekapit, cha eshiá pashal o sharmendag mabit o pa wati Masihi bayagá Hodáyá satá o saná bekant.
1PE 4:17 Nun dádrasiay wahd átkag o é dádrasi cha Hodáay hándán o kahólá bendáta bit. Agan dádrasi cha Hodáay hándáná bendáta bit ke má én, gorhá á mardománi ásar o ákebat ché bit ke Hodáay wasshén mestágay namannók ant?!
1PE 4:18 “Agan pahrézkárén mardoméay rakkag chó grán ent, gorhá nábáwar o gonahkáráni hál ché bit?”
1PE 4:19 Paméshká, á ke gón Hodáay razáyá sakki o sóriáni tahá kaptagant, watá may jórh kanókay sepordah bekanant ke wapádár ent o nékén kár kanán bebant.
1PE 5:1 Man wat ke cha kelisáay kamáshán yakké án o Masihay sakki o sóriáni sháhedé án o áiay paddar bayagién shán o shawkatá sharikdár án, shomay nyámá harché kamásh hast, cha áyán mani dazbandi esh ent ke:
1PE 5:2 Hodáay ramagay shepánki o cháragá bekanét ke shomay sepordah kanag butag. É kárá pa nádelkasshi makanét, pa del o setk bekanéti hamá dhawlá ke Hodá lóthit. Gón hobb o hodónáki bekanéti, pa wati jenday nap o suttá makanéti.
1PE 5:3 É ramagay sará wájahi makanét ke shomay dastá dayag butag, pa eshiá sharrén mesálé bebét.
1PE 5:4 Padá wahdé masterén shepánka kayt o paddara bit, shomá shán o shawkatay hamá tájá katthét ke hechbar gár o zawála nabit.
1PE 5:5 Oo warnáyán! Anchosh shomá ham wati masterénáni parmánbardáriá bekanét o gón yakdomiá békebr o darbésh bebét, chéá ke: “Hodá porkebr o gorunákén mardománi helápá mohra óshtit, bale békebr o darbéshén mardománi sará wati rahmatána gwárénit.”
1PE 5:6 Paméshká, Hodáay porwákén dastay chérá watá békebr o darbésh bekanét tánke á, wati gisshéntagén wahdá shomárá borz o sarperáz bekant.
1PE 5:7 Wati sajjahén gam o paréshánián hamáiay sará yalah kanét, parchá ke áiá shomay hayál gwar ent.
1PE 5:8 Grán o sangin o hozzhár bebét, chéá ke shomay dozhmen, Shaytán, chó shérá gorrán ent o shóházá ent ke kojá shekáré berasiti tán bederrit o éri bebárt.
1PE 5:9 Shaytánay démá bóshtét o wati báwará mohr o mohkam bedárét. Bezánét ke hamé paymén sakki o sóri jahánay é dega jágahán ham shomay brátáni sará bayagá ent.
1PE 5:10 Nun Hodá, ke sajjahén rahmatáni málek ent o shomárá cha Masihay ráhá dém pa hamá abadmánén shawkatá gwánki jatag, shomay kammén sakki o sóriay saggagá rand, shomárá nóksará twána dant, mohr o mohkama kant o páydári o zóra bakshit.
1PE 5:11 Wák o kodrat abad tán abad hamáiayg ent. Anchosh bát. Ámin.
1PE 5:12 É gwandhén kágadon gón Silwánusay komakká nebeshtag, ke áiá wapádárén bráté zánán, tánke shomárá delbaddhi bedayán o gwáhi bedayán ke Hodáay rahmatáni hakkén ráh hamesh ent. Hamé ráhá mohr bóshtét.
1PE 5:13 Cha hamá bánokén goháray némagá shomá sajjahénán salám sar bát ke Bábelay shahrá ent o gón shomá hór gechén kanag butag. Cha mani chokk, Markásay némagá ham shomárá drót o drahbát sar bát.
1PE 5:14 Gón pormehrén chokkagán yakdegará drahbát begwashét. Shomá sajjahénán sohl o émeni sar bát ke Masihay arwáh o jabiná ét.
2PE 1:1 Cha Issá Masihay hezmatkár o kásed, Shamun Petrosay némagá, pa hamáyán ke cha may Hodá o rakkénók Issá Masihay barkatá, hamá paymén bébaháén báwaré rasetagesh ke márá rasetag.
2PE 1:2 Shomá ke Hodá o may Hodáwand Issáyá pajjáha kárét, cha áiay zánagá shomay sará rahmat o sohl o ásudagi gésh o géshter bát.
2PE 1:3 Áiá gón wati Hodái wák o kodratá, márá har zalurién chizz pa anchén zendéá dátag ke Hodáyá pasond ent. É chizz márá cha hamáiay pajjáh áragá rasetag ke gón wati néki o shán o shawkatá márá gwánki jatag.
2PE 1:4 Hamé paymá, máshomárá cha é chizzán wati bébahá o sakkén mazanén kawl o wádahi dátag tán gón Hodái zátá sharikdár bebét o cha hamá tabáhiá berakkét ke donyáyá hastent o sellén wáhagáni bar o samar ent.
2PE 1:5 Paméshká wati wasá johd bekanét ke gón sharkerdiá wati báwará mohr o mohkam bekanét o hamé paymá: gón zántá wati sharkerdiá,
2PE 1:6 gón shehm o rahdáriá wati zántá, gón sabr o ópárá wati shehm o rahdáriá, gón Hodádóstiá wati sabr o ópárá,
2PE 1:7 gón á dega báwarmandáni dóst dáragá wati Hodádóstiá mohr bekanét o gón sajjahén mardománi dóst dáragá pa báwarmandán wati mehrá mohkam bekanét.
2PE 1:8 Parchá ke agan shomay nyámá hamé chizz bebant o berodant, gorhá cha may Hodáwand Issá Masihay zánag o pajjáh áragá béasar o bésamara nabét.
2PE 1:9 Bale agan kaséá é sharri mabant, allamá kamdid o kóré o shamoshtagi ke cha wati pésarigén gonáhán pák butag.
2PE 1:10 Oo mani brátán! Paméshká wati sajjahén johdá bekanét ke é gwánk janag o gechén bayagay tahá mohr bóshtét, chéá ke agan chosh bekanét, hechbar thagala nawarét.
2PE 1:11 Gorhá pa shomá may Hodáwand o rakkénókén Issá Masihay abadmánén bádsháhiay darwázag, pa delpachén washátkié pacha bit.
2PE 1:12 Paméshká man harwahd shomárá é habaráni tahtál o hayálá perrénán, bell toré shomá é habarán wata zánét o é rástiay sará mohr óshtátagét ke shomárá rasetag.
2PE 1:13 Tánke man wati jesm o jánay é tambuá án, mani hayálá sharter hamesh ent ke é chizzán shomay yátá byárán o tahtál bedayán,
2PE 1:14 chéá ke zánán kammén wahdéá rand é tambuá roksata kanán. Hodáwandén Issá Masihá maná cha é habará sahig kortag.
2PE 1:15 Wati wasá johda kanán ke mani marká rand ham, har wahdá é chizzáni hayálá bekapét.
2PE 1:16 Wahdé má gón shomá Hodáwandén Issá Masihay zór o kodrat o áiay per tarragay bárawá habar kort, pa cháláki jórh kortagén kessaháni randgiriá naatén, má gón wati jenday chammán áiay shán o shawkat distagat,
2PE 1:17 á wahdá ke Hodáén Petá Issá shán o sharap dát. Porshawkatén tawáré pa Issáyá átk o gwashti: “É mani dóstén bacch ent, man cha eshiá báz wassh o razá án.”
2PE 1:18 É tawár ke cha ásmáná átk, má hamá wahdá wat eshkot ke gón áiá pákén kóhay sará atén.
2PE 1:19 Anchosh márá nabiáni pakkáén habar ham hastant, sakk sharr ent ke esháni némagá delgósh bekanét, cherágéay paymá ant ke taháriá drapshit, tán hamá wahdá ke róch bebit o bámay estár shomay deláni tahá sar bekasshit.
2PE 1:20 Masterén habar esh ent ke bezánét Pákén Ketábay hecch péshgói, nabiáni jenday máná kortagén naent
2PE 1:21 chéá ke péshgói cha Ensánay erádah o wáhagá dhann ent, Pákén Ruh mardománi delá neshtag tán cha Hodáay némagá habar bekanant.
2PE 2:1 Bale mardománi nyámá drógén nabi ham hastat, hamá dábá ke shomay nyámá drógén ostád wadia bant ke chérandari bérán kanókén báwarán rawája dayant, tantaná wati Hodáwandá ham namannant ke ái gón wati hóná bahá zortant. Á gón tézén gár o bégwáhiéá dochára kapant.
2PE 2:2 Bázéné esháni badkáriáni randgiriá kant o rástiay ráh, é ostádáni sawabá kalág gerag o béhormat kanaga bit.
2PE 2:3 É ostád, wati tamáh o jópaháni háterá gón habaráni chál o prébá shomárá polant. Bázén wahdé bit ke áyáni sará mayárbáriay shawr borrag butag. É shawr purah kanaga bit o áyáni tabáhi wábé naent.
2PE 2:4 Hodá tantaná cha hamá préshtagán sar nagwast ke gonáhesh kort. Dózahay tahárterén tahárókiá band o zamzili kortant tán dádrasiay róch berasit.
2PE 2:5 Cha kwahnén jaháná ham sar nagwast o Hodánábáwaráni donyáay sará tuppáni áwort o tahná Nuh ke rásti o pahrézkáriay jár janók at, gón hapt kasá rakkénti.
2PE 2:6 Hodáyá, Sodum o Gomurahay shahr ham sótk o por kort o cha zeminay sará gár kortant, tán pa Hodánábáwarán dars o ebraté bebant o
2PE 2:7 pahrézkárén Lut ke cha násharén mardománi selli o badkárián sakk delranj at, rakkénti
2PE 2:8 (parchá ke á nék o pahrézkárén mardá hamáyáni nyámá zenda gwázént o Lutay pahrézkárén ruh, har róch cha á násharén kárán sakk padarda but ke Lut gendag o eshkonagá atesh).
2PE 2:9 Gorhá hamé paymá Hodáwanda zánt ke wati pahrézkárén mardomán chón cha chakkásán berakkénit o badkárán sezá bedant tán hamá wahdá ke dádrasiay róch berasit.
2PE 2:10 Hodáay kahr o sezá hás hamá mardománi sará kapit ke wati jesmay maháresh sell o nápákén wáhagáni tahá yalah kortag o hecch wák o kodratá namannant o mána nayárant. Haminchok tamard o porkebr ant ke cha ásmáni zórmandáni sobakk kanagá torsesh nést.
2PE 2:11 Bale préshtag ke cha é zórákán zórmandter ant, angat Hodáwanday bárgáhá eshán sobakk o béezzata nakanant.
2PE 2:12 É mardom násarpad o bézobánén jánwaráni paymá ant. Hamá kárána kanant ke áyáni sareshta gwashit o tahná pa gerag o koshagá pédá butagant. Hamá káráni sará maskará o rishkanda kanant ke sarpadesha nabant o jánwaráni paymá gár o bégwáha bant.
2PE 2:13 Wati gandagén káráni sezá o padmozzesha rasit. Áyáni shádehi hamesh ent ke róchay rozhnáiá mast o hanósh bebant. Gón shomá hór warák waragay wahdá, á wati aysh o nósháni tahá gark ant o é pa shomá bannámi o pólengé bit.
2PE 2:14 Gón nápák o zenahkárén chammán, hechbar cha gonáhá séra nabant o sost o nezórén mardomán pa mandr o repk wati dámá perrénant. É mardom tamáh o lálechá balad o zántkár ant, nálat butagén ant.
2PE 2:15 Cha rástén ráhá dar shotag o cha Bahuray chokk Balyámay ráhay randgiriá gomráh butagant ke wati sellén káray mozzi dóst at.
2PE 2:16 Bale Balyám wati gonáhay sará sarzanesh kanag but. Áiay bézobánén har, ensánéay paymá habará lagget o á nabii cha ganókiá dásht.
2PE 2:17 É paymén mardom hoshetagén chammag o anchén báp o horm ant ke tuppán áyán har némagá bárt. Tahárterén taháróki áyáni ásar o ákebat ent.
2PE 2:18 É, batháka janant o habaresh puch o hálig ant. Hamá mardomán gón jesmi badén wáhagán préba dayant o wati dámá perrénant ke nóki cha radkáráni dastá rakketagant.
2PE 2:19 Áyán ázátiay kawl o wádaha dayant bale wat selkáriay golám o bandig ant. Chéá ke harkas chizzéá wati wájah o mastera kant, wat áiay golám o bandiga bit.
2PE 2:20 Hamá mardom ke gón may Hodáwand o rakkénók Issá Masihay zánag o pajjáragá cha é donyáay selkáriána rakkant, agan padá hamá selkáriáni tóká bekapant, randi hálesh cha pésarigéná ham gantera bit.
2PE 2:21 É mardomán, agan cha páki o pahrézkáriay ráhá hecch mazántén, pa áyán gehter at cha eshiá ke zánagá o rand, cha é pákén hokmá bebajjant ke áyáni sepordah kanag butag.
2PE 2:22 É batal áyáni bárawá chón wassha gwashit ke: “Kochekk pa wati shántagénán pera tarrit.” o “Shoshtagén hukk padá pujgeláni tahá létha wárt.”
2PE 3:1 Oo dordánagán! É nun domi kágad ent ke pa shomá nebisagá áni. Har doén kágadon pa é sawabá nebeshtant tán shomay delá sharrén pegr o hayáláni hobb o wáhagá pédá bekanán o shomárá tahtál bedayán
2PE 3:2 hamá habarán wati yátá byárét ke gwastagén zamánagán péshigén pák o palgártagén nabián gwashtagant, anchosh ham may Hodáwand o rakkénókay hokmá shomay hayálá byárán ke áiay kásedán shomárá dátag.
2PE 3:3 Cha har chizzá pésar bezánét ke áheri zamánagán, maskará o rishkand kanókén mardom jáha janant ke wati sell o badén wáhagáni randgir ant.
2PE 3:4 Gwashant: “Gorhá áiay áyagay wádah chón but? Cha hamá wahdá ke may pet o pirén mortagant, har chizz hamá paymá ent ke cha jahánay jórh bayagay wahdá butag.”
2PE 3:5 É paymá pa zánt, wati chammán cha é rástiá banda kanant ke ásmán, Hodáay hokmay sará cha dérigén wahdán hastat o é zemin, cha ápá o ápay ráhá jórh butag o
2PE 3:6 cha hamé ápá á zamánagay donyá boddhet o gár o bégwáh but.
2PE 3:7 Cha hamá hokm o habará ham sajjahén ásmán o é zemin, pa ásá gechén kanag butag o tán dádrasiay róch o nábáwarén mardománi tabáhi o zawál bayagá dárag butagant.
2PE 3:8 Bale, oo dordánagán! Cha é habará béhayál mabét ke pa Hodáwandá yakk róché, hazár sálay paymá ent o hazár sál, yakk róchéay paymá.
2PE 3:9 Lahtén mardom gomána kant o gwashit ke Hodáwandá wati per tarrag o áyagay kawl o wádah mahtal dáshtag, bale chosh naent. Rástén habar esh ent ke Hodáwand gón shomá sabr o ópára kant, wahd o móha dant ke gonahkár tawbah bekanant, chéá ke nalóthit kassé gár o bégwáh bebit.
2PE 3:10 Bale Hodáwanday róch allamá kayt. Chosh ke dozzé anágata kayt o sajjahénán jáha serrénit. Á róchá ásmán gón torsnákén tawár o bustagé gár o bégwáha bit, estár o máh o róch o harché ke ásmáná hast, ásá kapit o ápa bit o zemin o harché ke zeminá hast sochit o pora bit.
2PE 3:11 Nun ke zánét harché may chágerdá hast gár o zawál bayagi ent, gorhá báyad ent shomay zend pák o palgár bebit o pa Hodádósti begwazit.
2PE 3:12 Hodáay róchay entezár o wadárá ham bebét o johd bekanét ke á róch zutter berasit, hamá róch ke ásmána sochit o ápa bit o estár o máh o róch o harché ke ásmáná hast ásá kapant o ápa bant.
2PE 3:13 Bale má nókén ásmán o zeminay entezár o wadárá én ke áyáni tahá adl o rásti hákema bit. Chéá ke é Hodáay labz o wádah ent.
2PE 3:14 Oo dordánagán! Nun ke é chizzáni wadárá ét, johd kanét á shomárá pák o béayb o gón wat pa sohl o árámiá wadi bekant o begendit.
2PE 3:15 É habará ham mashamóshét ke may Hodáwanday sabr o ópáray maksad rakkénag ent, anchosh ke may dordánagén brát Pulosá gón Hodábakshetagén hekmaté pa shomá nebeshtag.
2PE 3:16 Wati sajjahén kágadáni tahá hamé bárawá nebisit. Á kágadáni lahtén habaráni zánag o dar barag grán ent o násarpad o nezórén mardom á nebeshtahán wati tabá chahra dayant o pa radi máná kanant, bale é mardom wat zawála bant. Gón Pákén Ketábay á dega nebeshtahán ham hamé kárá kanant.
2PE 3:17 Paméshká, oo dordánagán! Nun ke shomá é sajjahén chizzán cha pésará zánét, pahréz kanét tán radkár o násharén mardom shomárá wati gomráhiay némagá mabarant o shomá wati mohr o mohkamén zendá mabáhénét.
2PE 3:18 Gón may Hodáwand o rakkénók Issá Masihay rahmat o zántá, rost o rodóm gerán bebét. Shán o shawkat annun tán abad, hamáiayg ent. Anchosh bát. Ámin.
1JO 1:1 Hamá ke cha azalá hastat, hamá ke má eshkotag, gón wati chammán distag, hamá ke má cháretag o dast per kortag, á zendmánay gál ent.
1JO 1:2 Zend záher o paddar but, má distag o pa áiá gwáhia dayén. Má pa shomá hamá namiránén zenday járá janén ke gón Petá at o pa má paddar but.
1JO 1:3 Á chizz ke má distag o eshkotag shomárá gwashén tánke gón má hamdel o hamsetk bebét. May hamdeli o hamsetki, gón Pet o áiay Chokk Issá Masihá ent.
1JO 1:4 Má eshiá pa shomá nebisén tánke mayshomay shádmáni purah o sarjam bebit.
1JO 1:5 Á kolaw o paygám ke má cha áiá eshkotag o pa shomá jára janén, esh ent: Hodá nur o rozhn ent o áiay arwáh o jabiná hecch tahári nést.
1JO 1:6 Agan begwashén gón áiá hamdel o hamráh én o padá ham taháriá gám janagá én, gorhá dróga bandén o rástiay sará kár nakanagá én.
1JO 1:7 Bale agan rozhnáiá rawagá én, hamá paymá ke á rozhnáiá ent, gorhá watmánwatá hamdel o hamsetk én o áiay Chokk Issáay hón márá cha sajjahén gonáh o mayárán pák o palgára kant.
1JO 1:8 Agan begwashén bégonáh o bémayár én, watá rada dayén o rástiá may delá jágah nést.
1JO 1:9 Bale agan wati gonáhán bemannén, á ke wapádár o ádel ent may gonáhána bakshit o may sajjahén nápahréziána shódit.
1JO 1:10 Agan begwashén gonáhen nakortag, áiá drógbanda kanén o áiay habarán may delá jágah nést.
1JO 2:1 Oo mani dordánagén chokkán! É chizzán pa shomá nebisán ke shomá gonáh makanét, bale agan kaséá gonáhé kort, démpáné hast ke Petay kerrá pa may rakkénagá habara kant, hamá pák o ádelén Issá Masih.
1JO 2:2 Á may gonáháni shódókén korbánig ent, tahná may na, sajjahén jahánay gonáháni korbánig ent.
1JO 2:3 Agan má áiay hokm o parmánáni sará kár bekanén, gorhá sarpada bén ke má áiá zánén.
1JO 2:4 Kasé ke gwashit: “Man áiá zánán” bale áiay hokmáni sará kára nakant, drógbandé o áiay delá rásti nést.
1JO 2:5 Bale kasé ke áiay habaráni sará kára kant, pa rásti, Hodáay mehr áiay delá kámel o sarréch butag. Cha hamé chizzá zánén ke má Issá Masihay arwáh o jabiná én.
1JO 2:6 Kasé ke gwashit: “Man áiay arwáh o jabiná án,” báyad ent hamáiay ráhá berawt.
1JO 2:7 Oo dordánagán! É nókén hokmé naent ke pa shomá nebisagá án, hamá kwahnén hokm ent ke cha bendátá shomárá gón at. É kwahnén hokm hamá gál o habar ent ke shomá eshkotag.
1JO 2:8 Bale padá ham pa shomá nókén hokmé nebisagá án ke eshiay rásti, cha shomá o áiá paddara bit. Chéá ke taháróki gára bit o rástén rozhn hamé annun ham drapshagá ent.
1JO 2:9 Kasé ke gwashit: “Rozhnáiay tóká án,” bale cha brátá naprata kant, angat tahárókiá ent.
1JO 2:10 Kasé ke gón wati brátá mehra kant, rozhnáiá ent o rozhnáiay tahá hecch choshén chizzé nést ke áiay rad kapag o thagal waragay sawabsáz bebit.
1JO 2:11 Bale á kas ke cha brátá naprata kant, taháriá ent o mán tahárókiá gáma jant. Á nazánt kojá rawagá ent chéá ke taháriá kór kortag.
1JO 2:12 Oo dordánagén chokkán! Pa shomá nebisagá án chéá ke hamáiay námay sará shomay gonáh bakshag butagant.
1JO 2:13 Oo wájahén petán! Pa shomá nebisagá án chéá ke shomá áiá zánét, hamá ke cha azalá ent. Oo warnáyán! Pa shomá nebisagá án, chéá ke shomá Shaytánay sará báládast butagét.
1JO 2:14 Oo chokkán! Pa shomá nebisagá án, chéá ke shomá Petá zánét. Oo wájahén petán! Pa shomá nebisagá án, chéá ke shomá hamáiá zánét ke cha azalá ent. Oo warnáyán! Pa shomá nebisagá án, chéá ke twáná o tamard ét o Hodáay habar shomay delá ent o shomá Shaytán prósh dátag.
1JO 2:15 Donyá o har chizzé ke áiay tahá hast, dóstesh madárét. Agan kasé donyáyá dóst bedárit, Petay mehr áiay delá nést.
1JO 2:16 Chéá ke donyáay sajjahén chizz, bezán jesmay lóth o wáhag, chammay lóth o wáhag o málay kebr o gorur, cha Petá nayátkagant, cha donyáyá átkagant.
1JO 2:17 Donyá o donyái wáhag, gár o zawála bant, bale kasé ke Hodáay wáhagáni sará kára kant, abadmán ent.
1JO 2:18 Oo chokkán! Nun goddhi damán o sáhat ent. Hamá dábá ke shomá eshkotag, “Masihay dozhmen” pédák ent, hamé annun ham Masihay bázén dozhmené átkag o cha hameshiá zánén ke sáhat, goddhi sáhat ent.
1JO 2:19 Á cha má dar átkant, bale chónáhá cha má naatant, agan cha má buténant, gón má mantant. Bale áyáni rawagá sharr pésh dásht cha áyán yakké ham cha má naat.
1JO 2:20 Bale “á Pákéná” shomárá “rógen per moshtag” o shomá sajjahén chizzána zánét.
1JO 2:21 Man pa shomá nebisagá án, pa é sawabá na ke rástiá nazánét, rástiá zánét o sarkecha warét ke cha rástiá hecch drógé wadia nabit.
1JO 2:22 Drógband kay ent? Hamá ent ke namannit Issá, Masih ent. Hamá kas ke Pet o Chokká namannit, Masihay dozhmen ent.
1JO 2:23 Harkas ke Chokká namannit, Pet ham áiayga nabit. Harkas ke Chokká mannit, Pet ham áiayga bit.
1JO 2:24 Bellét harché ke shomá cha bendátá eshkotag shomay delá bemánit. Agan é habar ke shomá cha bendátá eshkotag shomay delá bemánit, gorhá Pet o Chokkay arwáh o jabiná mánét.
1JO 2:25 É hamá chizz ent ke hamáiá márá labz o wádah dátag, bezán namiránén zend.
1JO 2:26 Man pa shomá é chizz hamáyáni bárawá nebeshtagant ke shomárá gomráh kanaga lóthant.
1JO 2:27 Bale shomá cha áiay némagá “rógen per moshag” butagét o é “per moshag” shomay delá mánit. Shomárá zalurat nést kasé shomárá dars o sabakk bedant, chéá ke cha Hodáay némagá, “rógen per moshag” wat shomárá sajjahén chizzán sabakka dant. É “rógen per moshag” rást ent o drógéné naent. Hamá paymá Hodáay arwáh o jabiná bemánét ke shomárá tálimi dátag.
1JO 2:28 Nun, oo mani dordánagén chokkán! Áiay arwáh o jabiná bemánét tánke áiay záher bayagay wahdá, may del dhaddh bebit o áiay démá sharmendag mabén.
1JO 2:29 Agan zánét ke á rást o pák ent, gorhá zánét harkas ke rástiay ráhá rawt cha hamáiá pédá butag.
1JO 3:1 Bechárét ke Petá chónén mehré márá bakshetag ke Hodáay chokk zánag bebén o béshakk má Hodáay chokk én. Donyá márá nazánt o pajjáha nayárit chéá ke donyáyá á ham pajjáh nayáwort.
1JO 3:2 Oo dordánagán! Annun má Hodáay chokk én, bale angat zánag nabutag ke má ché jórh bayagi én, haminchoka zánén, wahdé á záhera bit má ham hamáiay dhawlá bén, parchá ke á wahdi má áiá hamá paymá gendén ke á hast.
1JO 3:3 Harkasá cha áiá choshén omété hast watá páka kant, anchosh ke á wat pák ent.
1JO 3:4 Harkas ke gonáha kant, Sharyatay helápá kára kant, chéá ke gonáh, náshari ent.
1JO 3:5 Shomá zánét, á paddar but tán gonáhán gár o bégwáh bekant, áiá hecch gonáh nést.
1JO 3:6 Á kas ke áiay arwáh o jabiná mánit, gonáha nakant. Harkas ke gonáha kant Issái nadistag o nazántagi.
1JO 3:7 Oo chokkán! Bechárét kasé shomárá gomráh makant. Harkas rástiay ráhá rawt, rástén mardomé, anchosh ke á, pák o rást ent.
1JO 3:8 Á ke gonáha kant Shaytánay chokk ent parchá ke Shaytán cha bongéjá gonáh kanán ent. Hodáay Chokk paméshká paddar but ke Shaytánay kárán bepróshit o zawál bekant.
1JO 3:9 Á ke cha Hodáyá pédá butag gonáha nakant, parchá ke Hodáay zát áiá mán ent. Gorhá á gonáh korta nakant, chéá ke cha Hodáyá pédá butag.
1JO 3:10 Hodáay chokk o Shaytánay chokk, hamé paymá zánag o pajjáh áraga bant, á kas ke rástiay ráhá narawt, Hodáay chokk naent o anchosh á kas ham ke gón wati brátá mehra nakant.
1JO 3:11 Á kolaw o paygám ke shomá cha bongéjá eshkot, hamesh ent ke báyad ent yakdomiá dóst bedárén.
1JO 3:12 Káenay dhawlá mabén ke Shaytánay chokk at o wati bráti kosht. Nun chéá á koshti? Pa é sawabá ke áiay jenday kár o kerd sell o shaytáni atant o brátay kár nék o Hodái atant.
1JO 3:13 Oo brátán! Cha é habará hayrat makanét ke donyá gón shomá naprata kant.
1JO 3:14 Má zánén ke cha marká gwastag o pa zendmáná rasetagén, chéá ke gón wati brátán mehra kanén. Harkas ke mehra nakant, markay sáhegá mánit.
1JO 3:15 Kasé ke cha brátá bézára bit o naprata kant hónigé. Shomá zánét, hónigén mardomé hechbar namiránén zenday wáhonda nabit.
1JO 3:16 Má mehr é paymá pajjáh áwort ke Masihá wati ján pa maygi nadr kort, tánke má ham wati jáná pa brátán nadr bekanén.
1JO 3:17 Agan kaséá donyái mál o melkaté bebit o brátéá mohtáj begendit bale pa áiá bazzagi mabit, gorhá Hodáay mehr che paymá choshén mardoméay delá jágaha kant?
1JO 3:18 Oo dordánagén chokkán! Byáét mehr kanén, bale na pa dap o habar, pa del o setk o gón kár o kerd.
1JO 3:19 Cha hamé kárá zánén ke má, gón hakk o rástiá hamband o paywast én o agan may del márá mayárbár ham bekant, angat Hodáay démá mohr o deljama bén, chéá ke Hodá cha may del o hayálán master ent o har chizzá zánt.
1JO 3:21 Oo dordánagán! Agan may del o jabin márá mayárbár makant, gorhá Hodáay gwará ásudag o deldhaddh én.
1JO 3:22 Á wahdi harché cha áiá belóthén márá rasit, chéá ke áiay hokm o parmánána zurén o pa hamáiay washnódiá kára kanén.
1JO 3:23 Áiay hokm hamesh ent ke áiay Chokk Issá Masihay námay sará báwarmand bebén o watmánwatá mehr bekanén, hamá paymá ke márá hokmi kortag.
1JO 3:24 Harkas ke Hodáay hokmáni sará kára kant, áiay arwáh o jabiná mánit o Hodá ham á mardomay delá jágaha kant. Wati Ruhi márá bakshetag o é paymá zánén ke á may delá mánit.
1JO 4:1 Oo dordánagán! Har ruhéay sará báwar makanét, ruhán ázmáesh kanét o bechakkásét ke bárén cha Hodáay némagá ant yá na? Chéá ke bázén drógén nabié donyáay chárén kondhán potertag.
1JO 4:2 Hodáay Ruhá é dhawlá zánét: har hamá Ruh cha Hodáay némagá ent ke báwara kant o mannit ke Issá Masih, ensáni rang o dróshomá ér átkag.
1JO 4:3 Bale har ruhé ke Issáyá namannit, á cha Hodáay némagá naent o Masihay hamá dozhmenay ruh ent. Shomá eshkotag ke á ruha kayt o hamé annun ham donyáyá ent.
1JO 4:4 Oo dordánagén chokkán! Shomá cha Hodáyá ét o áyáni sará báládast butagét, chéá ke á ke shomay delá ent cha áiá master ent ke donyáyá ent.
1JO 4:5 Á donyáayg ant, paméshká harché ke gwashant ham donyái ent o donyáay gósh áyáni némagá ent.
1JO 4:6 Má cha Hodáyá én o kasé ke Hodáyá zánt, áiay delgósh may némagá ent, bale á ke cha Hodáyá naent, áiay delgósh may némagá naent. Rástiay Ruh o gomráhiay ruhá hamé dhawlá zánén o pajjáha kárén.
1JO 4:7 Oo dordánagán! Gón yakdomiá mehr bekanén, chéá ke mehr cha Hodáyá ent o harkas ke mehra kant, cha Hodáyá pédá butag o Hodáyá zánt.
1JO 4:8 Á ke mehra nakant Hodái nazántag, chéá ke Hodá mehr ent.
1JO 4:9 Hodáay mehr é dhawlá may nyámá paddar but ke wati yakk o yakdánagén chokki é jaháná rawán dát tánke cha áiay némagá zendmánay wáhond bebén.
1JO 4:10 Má gón Hodáyá mehr nakortag, mehr hamesh ent ke áiá kortag o wati Chokki dém dátag tán pa may gonáháni shodagá korbánig kanag bebit.
1JO 4:11 Oo dordánagán! Agan Hodáyá é dhawlá gón má mehr kortag, má ham báyad ent yakdomiá dóst bedárén.
1JO 4:12 Kassá hechbar Hodá nadistag, bale agan yakdegará mehr bekanén, Hodá may delá mánit o áiay mehr may delá kámel o sarréch butag.
1JO 4:13 Áiá márá cha wati Ruhá bahré dátag. Cha hamedá zánén ke má áiay arwáh o jabiná mánén o á may delá.
1JO 4:14 Má distag o gwáhia dayén ke Petá wati chokk rawán dátag tán jahánay rakkénók bebit.
1JO 4:15 Á ke mannit Issá Hodáay chokk ent, Hodá áiay delá jágaha kant o á Hodáay arwáh o jabiná.
1JO 4:16 Má hamá mehr zántag o áiay sará báwar kortag ke Hodáyá márá dátag. Hodá mehr ent o harkas ke wati zendá pa mehr begwázénit, Hodáay arwáh o jabiná mánit o Hodá áiay delá.
1JO 4:17 Mehr may nyámá hamé dhawlá kámel o sarréch butag ke jost o porsay róchá deldhaddh bebén. Chéá ke má é donyáyá hamáiay dhawlá én.
1JO 4:18 Mehray tahá tors nést. Sarréchén mehr, torsá gára dant. Chéá ke tors cha sezáay hayálá kayt o kasé ke torsit cha mehrá sarréch nabutag.
1JO 4:19 Má mehra kanén chéá ke pésará áiá gón má mehr kortag.
1JO 4:20 Kasé ke gwashit: “Maná Hodá dóst ent” o cha wati brátá naprata kant, drógbandé, parchá ke wati brátá gendit o dóstia nadárit, gorhá Hodáyá ke nagendit che paymá dósti dáshta kant?
1JO 4:21 Má é hokm cha hamáiá geptag ke gwashit: “Harkas ke gón Hodáyá mehra kant, báyad ent gón wati brátá ham mehr bekant.”
1JO 5:1 Harkasá é báwarmandi bebit ke Issá hamá Masih ent, á cha Hodáyá pédá butag. Harkasá ke Pet dóst ent, Chokká ham dósta dárit.
1JO 5:2 Wahdé gón Hodáyá mehra kanén o áiay hokmán kára bandén, zánén ke Hodáay chokkán mehra kanén.
1JO 5:3 Hodádósti hamesh ent ke Hodáay hokmán kár bebandén o áiay hokm gránén báré ham naent.
1JO 5:4 Chéá ke harché cha Hodáyá pédá butag, donyáay sará báládast o sóbéna bit o may báwar o imán hamé báládasti ent ke donyáyá érdasta kant.
1JO 5:5 Abéd cha á kasá ke báwara kant Issá Hodáay Chokk ent, dega kay donyáyá érdast korta kant?
1JO 5:6 É hamá ent ke cha áp o hóná átkag, bezán Issá Masih, tahná cha ápá na, cha áp o hóná. É Ruh ent ke gwáhia dant, chéá ke Ruh rásti ent.
1JO 5:7 Parchá ke say gwáh o sháhed hast:
1JO 5:8 Ruh, áp o hón. É har sayén hamshawr ant.
1JO 5:9 Agan má ensánay gwáhiá mannén, gorhá Hodáay gwáhi báz master ent, chéá ke Hodáay gwáhi hamá ent ke wati Chokkay bárawá dátagi.
1JO 5:10 Harkas ke Hodáay Chokkay sará báwara kant, áiá é gwáhi wat gón ent, bale á ke Hodáay sará báwara nakant, Hodái drógband kortag, chéá ke Hodáay gwáhi dayagi pa Chokká báwar nakortag.
1JO 5:11 Á gwáhi esh ent ke Hodáyá márá namiránén zend bakshetag o é zend cha Hodáay Chokkay némagá ent.
1JO 5:12 Hamá kas zenday wáhond ent ke gón Hodáay Chokká gón ent o á ke gón Chokká gón naent, zenday wáhond naent.
1JO 5:13 É chizzon pa shomá nebeshtant ke shomárá Hodáay Chokkay námay sará báwar ent, tán bezánét ke namiránén zenday wáhond ét.
1JO 5:14 Cha áiá márá é deldhaddhi rasetag, harché ke áiay lóth o wáhagay sará belóthén, á eshkont.
1JO 5:15 Nun agan zánén harché cha áiá belóthén márá eshkont, gorhá deljam én ke may lóth o wáhag sarjam butagant.
1JO 5:16 Agan kasé bráté begendit anchén gonáhé kanagá ent ke markay sawaba nabit, dwá bekant o Hodá áiá zenda bakshit. Eshiá hamá kasay bárawá gwashán ke gonáhi markay sawaba nabit. Gonáhé hastent ke markay sawaba bit, mana nagwashán ke kasé pa choshén gonáhéay bakshagá dwá bekant.
1JO 5:17 Har badén káré gonáh ent, bale anchén gonáhé ham hast ke markay sawaba nabit.
1JO 5:18 Má zánén harkas ke cha Hodáyá pédá butag, gonáha nakant, hamá ke cha Hodáyá pédá butag Hodá wat áiay negahpániá kant o Shaytánay dast pa áiá narasit.
1JO 5:19 Má zánén ke Hodáay chokk én o sajjahén donyá Shaytánay zór o wákay chérá ent.
1JO 5:20 É chizzá ham zánén ke Hodáay Chokk átkag o márá é póh o zánti dátag ke á “Rásténá” bezánén. Má hamá “Rásténay” arwáh o jabiná én, áiay Chokk Issá Masihay arwáh o jabiná. Rástén Hodá o namiránén zend, hamá ent.
1JO 5:21 Oo dordánagén chokkán! Watá cha botán dur bedárét o bepahrézét.
2JO 1:1 Cha kelisáay kamáshay némagá, pa gechén kortagén bánok o áiay chokkán ke pa del maná sakk dóst ant. Tahná maná na, hamá sajjahénán ham dóst ant ke rástiá zánant.
2JO 1:2 Paméshká márá dóst ant ke may delá rástiá jágah kortag o tán abad gón má hamráh ent.
2JO 1:3 Hodái mehr o rahmat o sohl o ásudagi, cha Petén Hodá o áiay Chokk Issá Masihay némagá, pa rásti o mehr gón má góna bit.
2JO 1:4 Gal o shádán bután wahdé zánton tai lahtén chokk rástiay sará zenda gwázénit, hamá dhawlá ke Petá márá hokm kortag.
2JO 1:5 Nun, oo bánok! Man nókén hokmé nebisagá naán, é hamá hokm ent ke cha bongéjá márá gón butag, bale cha taw dazbandia kanán, máshomá gón yakdomiá mehr bekanén.
2JO 1:6 Mehr hamesh ent ke áiay hokm o parmánáni sará zend begwázénén. Áiay hokm hamesh ent ke shomá cha bongéjá eshkotag. Hamé mehray hokmay sará zend begwázénét.
2JO 1:7 Chéá ke bázén rad dayóké donyáyá potertag o tálán ent o é habará namannant ke Issá Masih ensáni jesm o jánéá ér átkag. É paymén mardom rad dayók o Masihay dozhmen ant.
2JO 1:8 Hósh o sár bét ke may káray bar o samará barbád o zawál makanét, sarréchén mozzé pa wat bekatthét.
2JO 1:9 Harkas ke Masihay tálimay sará mohr maóshtit o watsará démáter berawt, Hodá áiayg naent, bale harkas ke Masihay tálimay sará mohr bóshtit, ham Pet áiayg ent, ham Chokk.
2JO 1:10 Agan kasé shomay gwará byayt o é tálimá mayárit, áiá wati lógá maylét o wasshátki magwashét.
2JO 1:11 Parchá ke é dhawlén mardoméay wasshátk kanag, gón áiay radén kárán sharikdár bayag ent.
2JO 1:12 Bázén chizzé hast ke pa taw benebisán, bale nalóthán gón kalam o kágadá bebant. Ométwár án ke shomay kerrá byáyán o dém pa dém gapp o trán bekanén tán mayshomay shádmáni sarréch bebit.
2JO 1:13 Tai gechénién goháray chokk tará baddhé drót o drahbáta gwashant.
3JO 1:1 Cha kelisáay kamáshay némagá pa dordánagén Gáyusá ke pa del maná sakk dóst ent.
3JO 1:2 Oo dordánag! Dwá kanán ke tai sajjahén kár pa sharri démá berawant o tai jesm o ján ham, tai ruhay paymá dráh o salámat bebit.
3JO 1:3 Báz gal o shádán bután ke lahtén sangat átk o gwáhiesh dát ke taw rástiay wapádár ay, bezán wati zendá rástiay sará gwázenagá ay.
3JO 1:4 Hecch chizz maná cha eshiá géshter shádána nakant ke beshkonán mani chokk rástiay sará zenda gwázénant.
3JO 1:5 Oo dordánag! Taw brátáni sajjahén kárán gón wapádáriá kanay, toré á bégánag bebant.
3JO 1:6 Áyán, báwarmandáni démá pa tai mehrá gwáhi dátag. É sakkén sharrén káré bit ke taw áyán hamá paymá sát o saparán rawán bekanay ke Hodáay razá ent.
3JO 1:7 Chéá ke á pa hamá námaygi sar geptagant o cha nábáwarán komaké nageptagesh.
3JO 1:8 Gorhá má báyad ent choshén mardomán madat bekanén, tán má pa rástiay démá baragá hamkár bebén.
3JO 1:9 Chizzé pa kelisáyá nebeshtagon, bale Diutripis ke masteriay lóthók ent, may ehtiárá namannit.
3JO 1:10 Wahdé wat byáyán, áiay káráni hesáb o ketábá kanán, chéá ke may helápá drógén bohtám sheng o tálán kanagá ent. Pa inchoká ham bassa nakant, brátán wasshátka nakant o á degarán ham ke brátán wasshátk kanaga lóthant pa é kárá naylit o áyán cha kelisáyá dara kant o gallénit.
3JO 1:11 Oo dordánag! Badiay randgiriá makan, nékiay randgiriá bekan. Harkas ke nékia kant cha Hodáay némagá ent, bale á ke badia kant Hodái nadistag.
3JO 1:12 Sajjahénán, Dimitriusay bárawá sharrén gwáhi dátag, tantaná rástiay jendá ham. Má ham hamé dhawlá gwáhia dayén o wata zánay ke may gwáhi rást o barhakk ent.
3JO 1:13 Bázén chizzé hastat ke pa taw benebeshténán, bale nalóthán gón kalam o kágadá bebant.
3JO 1:14 Ométwár án ke pa hamé zuttán tará begendán o dém pa dém gapp o trán bekanén.
3JO 1:15 Tará sohl o ásudagi sar bát! Dóst tará drót o drahbáta gwashant. Taw ham dóstán yakk yakká pa nám, salám sar kan.
JUD 1:1 Cha Ákubay brát, Issáay Masihay hezmatkár, Yahudáay némagá, pa hamá gwánk jatagénán ke Hodáén Petá dóst ant o pa Issá Masihaygi gón sharrén pahrézé dárag butagant.
JUD 1:2 Shomay sará rahmat, sohl o ásudagi o mehr gésh o géshter bát.
JUD 1:3 Oo dordánagán! Wáhagdár atán pa shomá hamá rakkagay bárawá benebisán ke má sajjahén áiay sharikdár én. Bale man zalurat dist ke gón é chizzáni nebisagá, shomay delá shawk pédá bekanán tán pa hamá báwará johd bekanét ke yakk randé palgártagénán dayag butag o tán abad gón máshomá góna bit.
JUD 1:4 Chéá ke lahtén anchén mardom chérokái shomay nyámá potertag ke wati béhodáiay sawabá cha pésará mayárig kanag butagant. Á Hodáay rahmatán tába dayant o pa wati bénangén kár o wáhagán káresha bandant o may yakk o yakdánagén Wájah o Hodáwand, Issá Masihá namannant.
JUD 1:5 Shomá é sajjahén chizzán sarpad butagét o zánét, bale lóthán shomárá tahtál perrénán ke Hodáwandá yakk baré wati kawm cha Mesrá rakként, bale á ke bébáwar atant randterá gár o bégwáhi kortant.
JUD 1:6 Áiá hamá préshtag ham tán dádrasiay mazanén róchá tahárókiá gón abadmánén zamzilán bastagant ke wati ehtiáray borz o bolandén kadresh nazánt o wati jágahesh yalah dát.
JUD 1:7 Hamé paymá, Sodum o Gomurah o kerr o gwaray shahráni mardom, ke hamáyáni dhawlá bénangiesh kort o nárahbandén wáhagáni randá kaptant, abadi ásá dawr dayag butant tán pa degarán dars o ebrat bebant.
JUD 1:8 Anchosh, gón é sajjahén sargwastáni zánagá, hamá mardom ke wati wábáni tahá zendag ant, wati jesm o jáná palit o gandaga kanant, ehtiárá namannant o ásmáni zórmandán sobakk o béezzata kanant.
JUD 1:9 Tantaná mazanén préshtag Mikáilá, á wahdá ke Mussáay jónay bárawá gón Shaytáná yakk o doi kort, é tahm o joryat néstat ke Shaytáná sobakk o mayárig bekant. Tahná gwashti: “Hodáwand tará sezá bedayát.”
JUD 1:10 Bale é, hamá chizzáni sobakki o béhormatiá kanant ke áyáni bárawá heccha nazánant. É mardom násarpad o bézobánén jánwaráni paymá, wati sareshtay randá kapant o é paymá gár o bégwáha bant.
JUD 1:11 Bazhn o apsóz pa áyán! Chéá ke Káenay ráhá rawant o wati suttáni padá Balyámay gomráhiá kapant o Kóráay sarkasshiá bérána bant.
JUD 1:12 É mardom, shomay pormehrén báwarmandi diwánán, wahdé pa béparwáhi gón shomá hórigá waráka warant pa shomá bannámi o pólengé bant. É hamá shepánk ant ke tahná wati jenday pazzór kanagay randá ant. Hamá béhawrén jambar ant ke gwátesha bárt. Hamá dhokkáli drachk ant ke bébar o bérisshag ant o do bar mortagant.
JUD 1:13 É zeray hamá mastén chawl o mawj ant ke wati sharmnákén káráni kap o gajján dara réchant. Hamá gesar o sargardánén estár ant ke tahárterén taháróki áyáni abadi ásar o ákebat ent.
JUD 1:14 Hanuk ke Ádamay haptomi nasl o padréch at, esháni bárawá chosh péshgóia kant o gwashit: “Hodáwand gón wati lakkáni lakkén palgártagénána kayt,
JUD 1:15 tán sajjahénáni dádrasiá bekant o é béhodáén nábáwarán pa áyáni sajjahén gandakárián o pa hamá sajjahén sellén habarán ke é bébáwarén gonahkárán áiay helápá gwashtagant, mayárig bekant.”
JUD 1:16 É mardom, gellahgozár, irázger o wati badkári o sellén wáhagáni boddhetagén ant, pa wat pahra bandant o pa wati nap o suttán gón cháplusi o charpzobáni mardomán satá kanant.
JUD 1:17 Ji, oo dordánagán! Shomá may Hodáwand Issá Masihay kásedáni péshgóián wati yátá bedárét
JUD 1:18 ke shomárá gwashtesh: “Goddhi zamánagá, anchén rishkand kanók wadia bant o káyant ke wati béhodái o sell o badén wáhagáni randgir ant.”
JUD 1:19 É, donyái mardom ant, cha Hodáay Ruhá zebahr ant o jetái dawra dayant.
JUD 1:20 Bale oo dordánagán! Shomá watá cha pák o béaybén imáná mohr o mohkam bekanét o gón Pákén Ruhay madatá dwá belóthét.
JUD 1:21 Watá Hodáay mehráni sáhegá bedárét o may Hodáwandén Issá Masihay rahmatay entezár o wadárá bebét ke shomárá pa namiránén zendá sara kant.
JUD 1:22 Gón á lahténá ke dodel ant mehrabán bebét,
JUD 1:23 lahténá cha ásá bekasshét o berakkénét o dega lahténá rahmat pésh bedárét bale gón tors o larz o cha áyáni jámagán ham naprat bekanét ke áyáni jesmá palit kortagant.
JUD 1:24 Hamá ke shomárá cha thagal warag o kapagá mohr dáshta kant o béayb o gón mazanén shádmánié shomárá wati porshawkatén dargáhá bort o sar korta kant,
JUD 1:25 may yakk o yakdánagén Hodá o rakkénóká, may Hodáwand Issá Masihay wasilahá, cha azal, annun o tán abad shán o shawkat o wák o kodrat berasát! Anchosh bát. Ámin.
REV 1:1 Issá Masihay hamá elhám ke Hodáyá áiárá dát tán wati hezmatkárán hamá chizzán pésh bedárit ke allam zutt bayagi atant. Áiá wati préshtagé pa wati hezmatkár Yuhannáyá rawán dát tán é elhám áshkár bebit.
REV 1:2 Yuhannáyá hamá chizzáni gwáhi dát ke distagatanti, bezán Hodáay habar o Issá Masihay sháhedi.
REV 1:3 Bahtáwar hamá ent ke é péshgóiay labzán pa borztawária wánit o bahtáwar hamá ant ke é péshgóiay labzán gósha dárant o harché ke nebisag butag, wati delá dárantesh, chéá ke wahd nazzikk ent.
REV 1:4 Cha Yuhannáay némagá, pa Ásiáay damagay haptén kelisáyán: Cha hamáiay jenday némagá ke hastent, hast butag o áyagi ent, cha hamá haptén ruháni némagá ke áiay bádsháhi tahtay démá ant o cha wapádárén sháhed Issá Masihay némagá shomárá rahmat o émeni sar bát. Issá Masih hamá awali ent ke cha mordagán zendag butag o donyáay bádsháháni hákem ent. Shán o shawkat o zór, abad tán abad hamáiá sar bát ke márá dósta dárit o gón wati hóná márá cha gonáhán ázáti kortag o dini péshwá o bádsháhié jórhi kortag ke áiay Hodáén Petay hezmatá bekanén. Anchosh bát. Ámin.
REV 1:7 Bechár, á gón jambarán pédák ent o hamok chamm áiá gendit, hamá ham ke áiay jánesh thong thong kortag o zeminay sajjahén kawm hamáiay sawabá porsiga bant. Haw, anchosh bát. Ámin.
REV 1:8 Hodáwandén Hodá gwashit: “Bendát man án o halási man án, hamá ke hastent, hast butag o áyagi ent, porwák, á man án.”
REV 1:9 Man, Yuhanná, shomay brát án o hamá ázár, bádsháhi o sabr o ópárá shomay hamráh án ke márá Issáay námay sawabá rasant. Man Hodáay habar o Issáay sháhediay sawabá Patmusay jazirahá atán.
REV 1:10 Hodáwanday róchá Hodáay Ruh mani delá potert o man eshkot ke poshtá borzén tawáré but, gwashaygá karnáay tawáré at.
REV 1:11 Gwashti: “É chizzán ke taw genday, ketábéay tahá nebeshtahesh kan o pa haptén kelisáyán démesh day, pa Epésos, Samurná, Pergámum, Tyátirah, Sárdis, Piládelpiá o Lawdikiáay kelisáyán.”
REV 1:12 Man hamá tawáray némagá chakk jat ke gón man habará at. Man ke chakk tarrént, hapt teláhén cherágdánon dist o
REV 1:13 cherágdánáni nyámá ensáni chokkéay dhawléné diston, drájén pashké gwará ati ke tán pádán at o sénagá teláhén patthié bastagati.
REV 1:14 Sar o mudi chó pazhmá espét atant, chó barpá espét, o chammi chó ásay bránzá.
REV 1:15 Pádi purah táptagén brenj atant ke ásay kurahéá rók atant o tawári chó bázén ápáni tawárá at.
REV 1:16 Hapt estári rástén dastá at o cha áiay dapá dodapén tézén zahmé dar áyagá at. Démi gón wati sarjamén rozhná chó róchá drapshagá at.
REV 1:17 Man ke dist, purah mordagé bután o áiay pádáni démá kaptán. Wati rástén dasti mani sará ér kort o gwashti: “Mators, man awali o áheri án.
REV 1:18 Man zendagén án. Man mortagatán o bechár, nun zendag án, abad tán abad. Mark o mordagáni jahánay kelit maná gón ant.
REV 1:19 Paméshká harché ke taw dist, harché ke annun bayagá ent o harché ke démterá bit, nebeshtahesh kan.
REV 1:20 Haptén estár ke taw mani rástén dastá distant, áyáni o haptén teláhén cherágdánáni ráz esh ent: haptén estár haptén kelisáyáni préshtag ant o haptén cherágdán haptén kelisá ant.”
REV 2:1 Pa Epésosay kelisáaypréshtagá nebeshtah kan: É habar hamáiayg ant ke haptén estári rástén dastá ant o haptén teláhén cherágdánáni nyámá gám janagá ent. Á chosha gwashit:
REV 2:2 Man tai kárána zánán, tai zahmatkasshi o sabr o ópárá. Mana zánán ke taw badén mardomán saggeta nakanay, hamáyán ke watá kásed gwashtag bale nabutagant, taw á mardom chakkásetagant o distag ke drógband ant.
REV 2:3 Mohr óshtátagay o gón sabr o ópáré har chizzet pa mani námá saggetag o damet nabortag.
REV 2:4 Bale maná gón taw yakk gelagé hastent. Nun taw á paymá mehr kanagá naay ke bendátá kanagá atay.
REV 2:5 Paméshká yát kan ke cha kojá kaptagay. Tawbah kan o hamá kárán bekan ke taw bendátá kortagant. Agan wati pashómániet záher nakort, man pa taw pédák án o tai cherágdáná cha áiay jágahá dura kanán.
REV 2:6 Bale tará é sharri hastent ke taw ham cha Nikuláitáni kárán naprata kanay o man ham naprata kanán.
REV 2:7 Harkasá ke gósh per, gósh bedárit ke Pákén Ruh gón kelisáyán ché gwashit. Hamá ke sóbéna bit, man áiá cha zenday hamá drachká waragay hakká dayán ke Hodáay baheshtá ent.
REV 2:8 Pa Samurnáay kelisáaypréshtagá nebeshtah kan: É hamá awali o áheriay habar ant ke mortagat o padá zendag but. Á chosha gwashit:
REV 2:9 Man tai ázár o nézgáriá sarpad án bale taw hastómand ay. Á koprána zánán ke hamá mardomán kortagant ke watá Yahudia gwashant bale Yahudi naant. Á Shaytánay kanisahé ant.
REV 2:10 Cha áyókén ázárán mators. Bechár, Shaytán cha shomá lahténá pa shomay chakkásagá zendáná kant o taw tán dah róchá ázár dayaga bay. Tán markay sáhatá wapádár bay o man tará zenday tájá dayán.
REV 2:11 Harkasá ke gósh per, gósh bedárit ke Pákén Ruh gón kelisáyán ché gwashit. Harkas ke sóbéna bit, cha domi marká hecch táwáné nagendit.
REV 2:12 Pa Pergámumay kelisáaypréshtagá nebeshtah kan: É hamáiay habar ant ke dodapén tézén zahmi gón ent. Á chosha gwashit:
REV 2:13 Mana zánán taw kojá jahmenend ay, hamódá ke Shaytánay taht ent, bale taw mani nám mohr dáshtag. Taw mani wapádárén sháhed, Antipásay wahdá ham mani sará báwar kanagá enkár nakort, hamá Antipás ke shomay nyámá koshag but, hamódá ke Shaytán jahmenend ent.
REV 2:14 Bale maná gón taw lahtén gelag hast. Tai kerrá lahtén mardom hast ke Balyámay tálimay mannók ant. Balyámá Bálák sój dát ke pa Esráilay chokkán dámé chér begéjit ke Esráilay chokk, pa botán kortagén korbánigán bwarant o béráh o rahbandén wapt o wáb bekanant.
REV 2:15 Hamé paymá tai kerrá dega lahtén choshén ham hast ke Nikuláitáni tálimay mannók ant.
REV 2:16 Paméshká tawbah kan, agan na man pa taw zutt pédák án o gón wati dapay zahmá áyáni helápá jangé bongéja kanán.
REV 2:17 Harkasá ke gósh per, gósh bedárit ke Pákén Ruh gón kelisáyán ché gwashit. Hamá ke sóbéna bit, man áiá cha chér o panáhén manná bahré dayán. Man á mardomá espétén sengé ham dayán ke áiay sará nókén námé nebeshtah ent. É námá tahná hamá zánt ke áiá dayaga bit.
REV 2:18 Pa Tyátirahay kelisáaypréshtagá nebeshtah kan: É Hodáay Chokkay habar ant, hamáiay ke chammi chó ásay bránzá ant o pádi purah táptagén brenj. Á chosha gwashit:
REV 2:19 Man tai kárána zánán, tai mehr o imán, hezmat o sabr o ópárá. Taw annun cha á kárán géshter kanagá ay ke bendátá kortagant.
REV 2:20 Bale maná cha taw yakk gelagé hast ke taw hamá janén, Izábelá saggagá ay ke watá paygambaré gwashit. Á tálim dayagá ent o mani hezmatkárán gomráh kanagá ent. Áyán béráh o rahbandén wapt o wáb o hamá korbánigáni waragay sójá dayagá ent ke pa botán kanag butagant.
REV 2:21 Man áiárá wahd dátag ke balkén tawbah bekant, bale á cha wati zenahkáriá pashómán bayaga nalóthit.
REV 2:22 Bechár, man áiá tahtay báhótha kanán o hamá ke gón áiá zená kanagá ant, áyán sakkén azábéay tahá dawra dayán, agan áiay káráni randgiriesh yalah nadát o tawbahesh nakort.
REV 2:23 Man áiay chokkán wabáé dayán o koshán, gorhá sajjahén kelisá zánant ke man hamá án ke del o hayáláni hálán dara géjit o man shomá harkasá áiay káráni hesábá mozza dayán.
REV 2:24 Bale Tyátirahay é dega mardom, shomá ke é tálimay mannók naét o “Shaytánay johlén rázán”, anchosh ke lahténa gwashit, sharriá sarpad naét, é gappán shomárá gwashán: “Shomay sará dega gránén báré naladdhán,
REV 2:25 bale hamá chizzáni sará ke shomá watá mohr dáshtag, tán mani áyagá watá anchosh bedárét.”
REV 2:26 Hamá ke sóbéna bit o tán áherá mani kárána kant, man áiá kawmáni sará wák o ehtiára dayán.
REV 2:27 Á gón ásenén asáéá anchó kawmáni sará hokmránia kant ke kunzag próshaga bant.
REV 2:28 Anchén ehtiáré cha mani Petay némagá maná rasetag. Man áiá sohbay estárá ham dayán.
REV 2:29 Harkasá ke gósh per, gósh bedárit ke Pákén Ruh gón kelisáyán ché gwashit.
REV 3:1 Pa Sárdisay kelisáaypréshtagá nebeshtah kan: É hamáiay habar ant ke haptén estár o Hodáay haptén Ruhi gón ant. Á chosha gwashit: Man tai kárána zánán. Taw námé dar áwortag ke zendag ay, bale aslá mortagay.
REV 3:2 Ágah bay o hamá chizzán mohr o mohkam kan ke angat pasht kaptagant bale meragi ant. Chéá ke man tai kár distagant ke mani Hodáay chammán kámel naant.
REV 3:3 Gorhá tawbah kan o harché ke tará rasetag o taw eshkotag yátesh kan o mohresh bedár. Agan ágah nabutay, man dozzokáia káyán o taw hecch sarpada nabay ke man che wahdá pa taw káyán.
REV 3:4 Bale tará Sárdisá lahtén mardom hast ke wati póshákesh palit nakortagant, á espétpósha bant o gón man gáma janant chéá ke karzant.
REV 3:5 Harkas ke sóbéna bit, hamesháni dhawlá espétpósha bit. Man áiay námá hechbar cha “Zenday Ketábá” gára nakanán o wati Pet o Petay préshtagáni démá áiá mannán.
REV 3:6 Harkasá ke gósh per, gósh bedárit ke Pákén Ruh gón kelisáyán ché gwashit.
REV 3:7 Pa Piládelpiáay kelisáaypréshtagá nebeshtah kan: É habar hamáiayg ant ke pák o rást ent, hamáiayg ke Dáuday keliti dastá ent. Á chizzá ke á pach bekant, kassi band korta nakant o á chizzá ke á band bekant, kassi pach korta nakant. Á chosha gwashit:
REV 3:8 Man tai kárána zánán. Bechár, man tai démá pachén darwázagé eshtag ke kassi band korta nakant, chéá ke tai zór kamm ent o angat taw mani habar mannetag o cha mani námá enkár nakortag.
REV 3:9 Bechár, man cha Shaytánay kanisahay mardomán lahtén tará dayán, cha hamáyán ke watá Yahudia gwashant bale Yahudi naant o dróga bandant. Bechár, man áyána parmáyán, á káyant, tai pádáni démá kapant o sarpada bant ke man tará dóst dáshtag.
REV 3:10 Taw mani hokm mannetag o sabr o ópár kortag, paméshká man ham tará cha dádrasiay sáhatá rakkénán ke pa zeminay sará neshtagénáni chakkásagá sajjahén donyáyá áyagi ent.
REV 3:11 Man zutt pédák án. Harché ke tará hast, mohresh bedár tánke kass tai tájá pach magipt.
REV 3:12 Hamá ke sóbéna bit, man áiá wati Hodáay parasteshgáhay menoké jórha kanán o á padá hechbar cha parasteshgáhá dara nayayt. Man áiay sará wati Hodá o wati Hodáay shahr, nókén Urshalimay námá o wati nókén námá nebeshtaha kanán. Nókén Urshalim cha mani Hodáay némagá, cha ásmáná éra kayt.
REV 3:13 Harkasá ke gósh per, gósh bedárit ke Pákén Ruh gón kelisáyán ché gwashit.
REV 3:14 Pa Lawdikiáay kelisáaypréshtagá nebeshtah kan: É habar “Ámin”, wapádár o rástén sháhed, Hodáay addh kortagénáni sarchammagay habar ant. Á chosha gwashit:
REV 3:15 Man tai kárána zánán ke taw na sardmehr ay o na garmjósh. Drégatá taw yá sárt buténay yá garm.
REV 3:16 Nun ke taw shirgarm ay, na garm ay o na sárt, paméshká man tará cha wati dapá shánán.
REV 3:17 Taw gwashay ke “Man hastómand án, man mál o dawlat katthetag o maná hecch chizzay zalurat naent,” bale taw sarpad naay ke badhál, bazzag, nézgár, kór o jándar ay.
REV 3:18 Man tará nasihata kanán ke cha man ásá táptagén teláh pa bahá bezur tánke hastómand bebay, espétén póshák pa bahá bezur o gwará kan ke tai bénangén jándari chér bebit o pa wati chammán malam pa bahá bezur o chammán bemosh tánke dist bekanay.
REV 3:19 Man hamáyán neherra dayán o adaba kanán ke maná dóst ant. Paméshká pa del pashómán bay o tawbah kan.
REV 3:20 Bechár, man darwázagay dapá óshtátagán o thokkagá án. Agan kasé mani tawárá eshkont o darwázagá pacha kant, man tahá káyán. Man gón áiá o á gón man waráka wárt.
REV 3:21 Hamá ke sóbéna bit, man áiá gón wat, wati tahtay sará nendagay hakká dayán, hamé paymá ke man sóbén bután o gón wati Petá, áiay tahtay sará neshtán.
REV 3:22 Harkasá ke gósh per, gósh bedárit ke Pákén Ruh gón kelisáyán ché gwashit.
REV 4:1 Cha eshán o rand man cháret ta ásmáná darwázagé pach ent o hamá karnáay dhawlén tawár ke man pésará eshkotagat gón man habará ent. Gwashagá at: “Edá borzád byá ke man tará pésha dárán cha é chizzán o rand allamá ché bayagi ent.”
REV 4:2 Hamá damáná Hodáay Ruh mani delá potert o man dist ta arshá tahté ér ent o yakké tahtay sará neshtag.
REV 4:3 Á ke tahtay sará neshtagat, gendagá yashm o rubiay sengay rang at o zomorrodpaymén sanjéá tahtay chapp o chágerd geptagat.
REV 4:4 É tahtay chapp o chágerdá bist o chár taht ér at o bist o chár kamásh áyáni sará neshtagat. Kamáshán espétén póshák gwará at o teláhén tájesh sará at.
REV 4:5 Cha tahtá gerókay shahm dar áyagá at, grand o borzén tawár atant o tahtay démá ásay hapt mashal rók at. É mashal Hodáay haptén Ruh ant.
REV 4:6 Tahtay démá purah daryáé at ke chó shisshagá at, chó bolórá. Tahtay chapp o chágerdá, nyámjiná, chár sahdár hastat ke démá o poshtá sarjamá chammesh per at.
REV 4:7 Awali sahdár shéray paymá at, domi gwaskay paymá, sayomiá mardomi démé per at o cháromi bálén wakábéay rangá at.
REV 4:8 Cha é chárén sahdárán har yakkéá shash bánzol o har némagá chamm per at, bánzoláni chérá ham. É hecch bassa nakanant o shap o róch gwashagá ant: “Pák ent, pák ent, pák ent, porwákén Hodáwandén Hodá pák ent, hamá ke hast butag, hastent o áyagi ent.”
REV 4:9 Har wahdá ke sahdár tahtay sará neshtagéná, abad tán abad zendagéná shán o shawkat o sharapa dayant o áiay shográ gerant,
REV 4:10 gorhá bist o chárén kamásh tahtay sará neshtagénay démá kapant o hamáiá názénant ke abad tán abad zendag ent, wati táján tahtay démá éra kanant o gwashant:
REV 4:11 “May Hodáwand o may Hodá! Taw shán o shawkat, ezzat o zóra karzay, chéá ke taw sajjahén chizz addh kortagant o sajjahén chizz cha tai wáhagá jórh butag o hastant.”
REV 5:1 Padá man dist ke tahtay sará neshtagéná ketábé, bezán tumáré rástén dastá ent ke posht o démi nebeshtah ant o hapt mohr jatag.
REV 5:2 O man porzórén préshtagé dist ke gón borzén tawáréá jár janagá at: “Kay é mohráni próshag o tumáray pach kanagay láhek ent?”
REV 5:3 Bale hechkas néstat, na ásmáná, na zeminay sará o na zeminay chérá, ke é tumárá pach kort bekant o eshiay tahá bechárit.
REV 5:4 O man zár zárá gréwagá atán chéá ke hecch choshén mardomé dar nakapt ke é tumáray pach kanagay láhek bebit yá eshiay tahá cháret bekant.
REV 5:5 Bale cha kamáshán yakkéá maná gwasht: “Magréw, bechár Yahudáay kabilahay shér, Dáuday óbádag sóbén butag. Á, é tumár o eshiay haptén mohrán pach korta kant.”
REV 5:6 Padá man tahtay sará, nyámá, chárén sahdár o kamásháni nyámá, Gwarándhé dist ke óshtátagat o gwashaygá helár kanag butagat. Gwarándhá hapt kánth o hapt chamm per at. É Hodáay haptén Ruh ant ke sajjahén zeminay sará dém dayag butagant.
REV 5:7 Gwarándh shot o tumári cha tahtay sará neshtagénay rástén dastá zort.
REV 5:8 Wahdé tumári zort chárén sahdár o bist o chárén kamásh Gwarándhay démá kaptant, har yakkéá changé dastá at o teláhén darpesh gón at ke sóchokiá porr atant. É Hodáay palgártagén mardománi dwá atant.
REV 5:9 Á nókén sawté janagá o gwashagá atant: “Taw tumáray zurag o eshiay mohráni pach kanagay láhek ay chéá ke taw helár kanag butagay o gón wati hóná pa Hodáyá cha har kabilah, zobán, kawm o rájá mardom pa bahá zortag.
REV 5:10 Taw á pa may Hodáyá dini péshwá o bádsháhié jórh kortagant o á, zeminay sará hokumata kanant.”
REV 5:11 Padá man cháret o eshkot ke bázén préshtagéay tawár ent. É lakkáni lakk atant, hazáráni hazár. Tahtay chapp o chágerdá atant, sahdár o kamásháni chágerdá.
REV 5:12 Gón borzén tawáréá gwashagá atant: “Hamá Gwarándh ke helár kanag but, karzit ke áiá zór o mál o dánái o wák o ezzat o shawkat o satá dayag bebit.”
REV 5:13 Ásmáná, zeminay sará, zeminay chérá o daryáay tóká, harché ke áyáni tahá hast, man eshkot sajjahén addh kortagén chizz gwashagá atant: “Satá, ezzat, shawkat o zór, tahtay sará neshtagénay o Gwarándhay bát, abad tán abad.”
REV 5:14 Chárén sahdárán “ámin” gwasht, kamásh dém pa chér kaptant o Hodá o Gwarándhesh názént.
REV 6:1 Man dist ke Gwarándhá cha haptén mohrán awali pach kort o man eshkot cha chárén sahdárán yakké granday tawáray paymá gwashagá at: “Byá.”
REV 6:2 Man cháret ta espétén aspé o aspswárá tirkamáné gón. Áiá tájé dayag but, sóbén at o pa géshter sóbén o kámyáb bayagá démá rawán at.
REV 6:3 Wahdé Gwarándhá domi mohr pach kort, man eshkot domi sahdár gwashagá at: “Byá.”
REV 6:4 Dega aspé démá dar átk ke chó ásá sohr at. Aspswárá é zór o wák dayag but ke cha zeminay sará sohl o émeniá halás bekant ke mardom yakdomiá bekoshant. Áiá baláhén zahmé dayag but.
REV 6:5 Wahdé Gwarándhá sayomi mohr pach kort, man eshkot sayomi sahdár gwashagá at: “Byá.” Man cháret ta syáhén aspé o aspswárá sháhémé dastá ent.
REV 6:6 Man cha chárén sahdáráni darnyámá tawáré eshkot, gwashagá at: “Kilué gandom pa róchéay mozzá o say kilu jaw pa róchéay mozzá, bale rógen o sharábay kimmatá kár madár.”
REV 6:7 Wahdé Gwarándhá cháromi mohr pach kort, man eshkot cháromi sahdár gwashagá at: “Byá.”
REV 6:8 Man cháret ta mani démá shunzén aspé. Aspswáray nám “mark” at o mordagáni jahán áiay poshtá at. Áyán zeminay chárekay sará zór o wák dayag butagat ke pa zahm, dhokkál o wabá o cha zeminay saray rastaráni dastá óday mardomán bekoshant.
REV 6:9 Wahdé Gwarándhá panchomi mohr pach kort, man korbánjáhay chérá hamáyáni arwáh distant ke Hodáay habar o hamá sháhediay sawabá koshag butagatant ke áyán barjáh dáshtag.
REV 6:10 Zár zárá gréwag o gwashagá atant: “Oo pák o rástén Hodáwand! Tán kadén dádrasia nakanay o may hónay bérá cha zeminay sará neshtagénána nageray?”
REV 6:11 Á sajjahénán espétén póshák dayag but o gwashag butant ke kammé angat sabr kanét tán shomay hamráhén hezmatkár o shomay brát, shomay dhawlá koshag bebant o hesáb sarjam bebit.
REV 6:12 Man cháragá atán, wahdé Gwarándhá shashomi mohr pach kort, mazanén zeminchandhé átk. Róch cha mudá addh kortagén porsi goday dhawlá syáh but, chárdahi máh chó hóná sohr tarret o
REV 6:13 ásmánay estár anchó zeminá kaptant ke enjiray drachk trondén gwátéay démá wati zakk o kathekkén barán dawra dant.
REV 6:14 Ásmán chó nazz átkagén tumáréá shot o har kóh o har jazirah cha wati jáhá sorénag but.
REV 6:15 Padá zeminay bádsháh, mazanén mardom, pawji sarmaster, hastómand, zóráwar, har golám o har ázátén mardom, sajjahénán watá gáráni tahá o kóháni seng o taláráni nyámá chér dát.
REV 6:16 Áyán gón kóh o talárán gwasht: “May sará bekapét o márá cha tahtay sará neshtagénay chehragá o cha Gwarándhay gazabá chér bedayét.
REV 6:17 Chéá ke esháni gazabay mazanén róch átkag o eshiay démá kay óshtáta kant?”
REV 7:1 Cha eshán o rand man chár préshtag dist. Zeminay chárén kondhán óshtátag o zeminay chárén gwátesh dáshtagatant tánke gwáté na zemin, na daryá o na drachkéay sará bekasshit.
REV 7:2 Padá man dega préshtagé dist ke cha hamá jágahá chest but ke róch dara kayt o zendagén Hodáay mohri gón at. Áiá gón hamá chárén préshtagán ke zemin o daryáay táwán dayagay zór o wákesh dayag butagat, sakk kukkár kort o gwasht:
REV 7:3 “Zemin, daryá o drachkán tán hamá wahdá táwán madayét ke má, may Hodáay hezmatkáráni péshánigá mohr najatag.”
REV 7:4 O man hamáyáni hesáb eshkot ke mohr janag butagatant. Cha Esráilay chokkáni sajjahén kabilahán, yakk sad o chell o chár hazár mardom mohr jang butagat:
REV 7:5 cha Yahudáay kabilahá dwázdah hazár mardom mohr jang butagat, cha Rubenay kabilahá dwázdah hazár, cha Jáday kabilahá dwázdah hazár,
REV 7:6 cha Ásheray kabilahá dwázdah hazár, cha Naptáliay kabilahá dwázdah hazár, cha Manasiay kabilahá dwázdah hazár,
REV 7:7 cha Shamunay kabilahá dwázdah hazár, cha Láwiay kabilahá dwázdah hazár, cha Issákáray kabilahá dwázdah hazár,
REV 7:8 cha Zebulunay kabilahá dwázdah hazár, cha Issopay kabilahá dwázdah hazár, cha Benyáminay kabilahá dwázdah hazár kas mohr jang butagat.
REV 7:9 Cha eshán o rand, man cháret ta baláhén mocchié ke kassá hesáb korta nakort. Á cha har kawm, kabilah, ráj o zobáná atant o taht o Gwarándhay démá óshtátagatant. Áyán espétén póshák gwará at o macchi pisshesh dastá at.
REV 7:10 Pa borztawári kukkárá atant: “Rakkénag may Hodáay dastá ent, hamáiay ke tahtay sará neshtag o rakkénag Gwarándhay ham dastá ent.”
REV 7:11 Sajjahén préshtag, tahtay chapp o chágerdá óshtátagatant, kamásh o chárén sahdáráni chapp o chágerdá. Tahtay démá, dém pa chér kaptant o Hodáesh parastesh kort.
REV 7:12 Gwashagá atant: “Ámin, satá o shawkat o dánái o shogrgozári o ezzat o zór o wák may Hodáayg ant, abad tán abad. Ámin.”
REV 7:13 Cha kamáshán yakkéá maná jost kort: “É ke espétén póshák gwará dayag butagant, é kay ant o cha kojá átkagant?”
REV 7:14 Man passaw dát: “Wájah! Taw wata zánay.” Nun áiá gón man gwasht: “É hamá ant ke cha mazanén azábá dar átkagant o wati póshákesh gón Gwarándhay hóná shoshtag o espét kortagant.
REV 7:15 Hamé sawabá, é Hodáay tahtay démá ant o shap o róch, áiay parasteshgáhá, áiay hezmatá kanant o hamá ke tahtay sará neshtag eshán sáhéla kant.
REV 7:16 Cha ed o dém é na shodiga bant o na tonnig, na esháni sará róchay bránza kapit o na dega tabd o lewáré laggit.
REV 7:17 Chéá ke tahtay nyámá óshtátagén Gwarándh, esháni shepánka bit o eshán zendápay chammagáni ráhá pésha dárit o Hodá cha esháni chammán har arsá pahka kant.”
REV 8:1 Wahdé Gwarándhá haptomi mohr pach kort arshá kesás ném sáhatá bétawári but.
REV 8:2 Padá man haptén préshtag distant ke Hodáay démá óshtátagatant. Áyán hapt karná dayag but.
REV 8:3 Dega préshtagé átk o korbánjáhay kerrá óshtát ke teláhén bósóché gón ati. Áiá báz sóchoki dayag but ke gón Hodáay sajjahén palgártagénáni dwáyán yakjáhesh bekant o hamá teláhén korbánjáhay sará péshesh bekant ke Hodáay tahtay démá ent.
REV 8:4 Sóchokiáni dutt gón Hodáay palgártagénáni dwáyán hawár, cha préshtagay dastá Hodáay kerrá borzád shotant.
REV 8:5 Padá préshtagá bósóch zort, cha korbánjáhay ásá porri kort o zeminay sará dawri dát. Grandán grandet, borzén tawár chest butant, gerókán jat o zeminchandhé átk.
REV 8:6 Padá haptén préshtagán, ke áyán haptén karná gón atant, watá pa karnáyáni janagá tayár kort.
REV 8:7 Awaligá wati karná jat, tróngal o ás gón hóná hawár zeminay sará ér réchag but. Zeminay sayyakk ásá ér bort, drachkáni sayyakk ásá ér bort o sajjahén sabzén káh ásá ér bortant.
REV 8:8 Domi préshtagá wati karná jat, baláhén kóhéay dhawlén chizzé ke pahk bon at, daryáay tahá dawr dayag but o daryáay sayyakk hón but.
REV 8:9 Daryái sahdáráni sayyakk mort o bójigáni sayyakk tabáh but.
REV 8:10 Sayomi préshtagá wati karná jat, baláhén estáré ke mashaléay dhawlá rók at, cha ásmáná kawr o chammagáni sayyakkay sará kapt.
REV 8:11 Estáray nám “Jawr” ent. Ápáni sayyakk tahl but o bázén mardomé cha ápáni tahliá mort.
REV 8:12 Cháromi préshtagá wati karná jat. Róchay sayyakk, máhay sayyakk o estáráni sayyakk anchosh janag but ke sayyakkesh tahár but. Róchá ham wati rozhnáiay sayyakk gár dát o shapá ham wati rozhnáiay sayyakk gár dát.
REV 8:13 Randá man cháret o eshkot ke ásmánay nyámá bálén wakábé kukkár kanagá at: “Apsóz, apsóz, apsóz pa zeminay nendókán, hamá karnáyáni tawáráni sawabá ke é dega sayén préshtagán janagi ant.”
REV 9:1 Panchomi préshtagá wati karná jat o man dist ke estáré cha ásmáná sestag o zeminá kaptagat. Áiá johlén tahtarunay chátay dapay kelit dayag but.
REV 9:2 Estárá johlén tahtarunay chátay dap pach kort. Nun cha chátá dutt chest but, gwashaygá cha mazanén kurahéá dutt dar áyagá at. Cha chátá dar áyókén duttán róch o ásmánay dém tahár kortant.
REV 9:3 Nun cha duttán zeminay sará madag dar átk o é madagán zeminay zummáni paymén zóré dayag but.
REV 9:4 Gón eshán gwashag but ke tahná hamá mardom ke Hodáay mohresh péshánigá per naent, áyán o abéd zeminay saray hecch káh o sabzag yá dega keshár o drachké táwán madayant.
REV 9:5 Madagán é hakk dayag nabut ke eshán bekoshant bale tahná tán panch máhá azábesh bekanant, anchén azáb ke cha zummay tejá mardoméá rasit.
REV 9:6 Á róchán mardom marka lóthant bale markesha narasit. Markay lóthóka bant o mark cha áyána tachit.
REV 9:7 Madag purah aspáni paymá atant ke pa jangá tayár kanag butagatant o áyáni saragay sará teláhén tájay dhawlén chizz atant o chehragesh ensánay paymá atant.
REV 9:8 Áyáni mud janéni mudáni dhawlá atant o dantán shéray dantánáni paymá.
REV 9:9 Áyáni sénagá áseni sénagpósh bastagat o bánzoláni tawáresh purah hamá bázén arrábaháni tawáray dhawlá atant ke aspesh bastag o pa jangá mána rechant.
REV 9:10 Zummáni dhawlén letthek o tejesh per at o letthekán é zór mán at ke mardomán tán panch máhá thappig bekanant.
REV 9:11 Bádsháhé hastatesh ke johlén tahtarunay préshtag at, Ebráni zobáná námi Abaddón at o Yunániá, Apólyón.
REV 9:12 Awali “apsóz” gwastag, bechár, cha é chizzán o rand dega do “apsóz” áyagi ent.
REV 9:13 Shashomi préshtagá wati karná jat o hamá teláhén korbánjáh ke Hodáay démá ent, man cha áiay chárén kánthán tawáré eshkot.
REV 9:14 Gón shashomi préshtagá, hamáiá ke karnái gón at, gwashagá at: “Hamá chárén préshtagán ázát kan ke mazanén kawr Parátay kashá bastagant.”
REV 9:15 Nun chárén préshtag ázát kanag butant ke pa hamá sáhat, róch, máh o sálá tayár kanag butagatant ke baniádamáni sayyakká bekoshant.
REV 9:16 Man eshkot, aspswárén lashkar do hazár lakk at.
REV 9:17 Hamá asp o aspswár ke man elhámay tahá distant, chosh atant: Aspswáráni sénagá ásrangén, syahsabzén o zardén gókortrangén sénagpósh bastagat; aspáni sar, shéri saragay dhawlá atant o cha áyáni dapá ás, dutt o gókort dar áyagá at.
REV 9:18 Baniádamáni sayyakk, say azábá kosht, bezán hamá ás, dutt o gókortay azábá ke cha aspáni dapá dar áyagá at,
REV 9:19 chéá ke aspáni zór áyáni dap o letthekáni tóká at o áyáni letthek máray dhawlá atant ke saresh per at o gón eshán mardomesh thappiga kortant.
REV 9:20 Pasht kaptagén mardom ke é azábán nakoshtagatant, angat cha wati dastáni kárán pashómán nabutant o tawbahesh nakort o teláh, nograh, brenj, seng o dáray hamá palitén arwáh o botáni sojdah kanagesh yalah nakort ke na dista kanant, na eshkota kanant o na ráh shota kanant.
REV 9:21 É mardom na cha wati kosht o kóshán pashómán butant, na cha wati sehr o jádugeriá, na cha wati zenahkáriá o na cha wati dozzián.
REV 10:1 Nun man dega porwákén préshtagé dist ke cha ásmáná ér áyagá at. Jambari pósháki gwará at, sará sanjé ér ati, chehragi róchay dhawlá at o pádi ási menokay paymá atant.
REV 10:2 Kasánén ketábé dastá ati ke pach at. É ketáb tumáré at. Préshtagá wati rástén pád daryáay o chappén zeminay sará ér kort o
REV 10:3 kukkári kort, anchó ke shéré gorrit o wahdé kukkári kort, hapt granday tawár átk ke habará atant.
REV 10:4 Wahdé haptén grandán habar kort man lóthet benebisánesh, bale tawáré cha ásmáná eshkoton, gwashagá at: “Harché ke haptén grandán gwasht, chéresh beday o nebeshtahesh makan.”
REV 10:5 Padá man hamá daryá o zeminay sará óshtátagén préshtag dist ke wati rástén dasti ásmánay némagá chest kort.
REV 10:6 O hamáiay sawgendi wárt ke abad tán abad zendag ent, hamáiay ke ásmán o harché ke ásmánán hast, zemin o harché ke zeminá hast, daryá o harché ke daryáay tahá hast jórhi kortagant. Gwashti: “Nun wahd halás ent.
REV 10:7 Hodáay ráz hamá róchán sarjama bit ke haptomi préshtag wati karnáyá janagia bit, hamá paymá ke Hodáyá gón wati hezmatkárén paygambarán jár jatag.”
REV 10:8 Gorhá hamá tawárá gón man padá habar kort ke man cha ásmáná eshkotagat. Gwashti: “Beraw, hamá pachén tumárá bezur ke daryá o zeminay sará óshtátagén préshtagay dastá ent.”
REV 10:9 Man préshtagay kerrá shotán o kasánén tumár lóthet. Áiá maná gwasht: “Bezur o bwari. É tai lápay tahá tahla bit bale tai dapá bénagay dhawlá shirken.”
REV 10:10 Man kasánén tumár cha préshtagay dastá zort o wárt. Dapá bénagay dhawlá shirken at bale anchó ke man wárt, mani láp tahl but.
REV 10:11 Maná gwashtesh: “Pa taw é allami ent ke padá bázén kawm, ráj, zobán o bádsháháni bárawá péshgói bekanay.”
REV 11:1 Maná kadd o kesás kanagi latthé dayag but o gwashag but: “Pád á, Hodáay parasteshgáhá o korbánjáhá kadd o kesás kan o hamá mardomán hesáb kan ke ódá parastesha kanant.
REV 11:2 Bale parasteshgáhay dhanni péshgáhá yalah kan, kadd o kesási makan chéá ke é darkawmán dayag butag. Á, pákén shahrá tán chell o do máhá lagatmála kanant.
REV 11:3 O man wati do sháhedá wák o ehtiára dayán ke tán hamá hazár o do sad o shastén róchán paygambari bekanant. Eshán góni gwará bit.”
REV 11:4 É, hamá doén zaytunay drachk ant, zeminay Hodáwanday démá óshtátagén doén cherágdán ant.
REV 11:5 O agan kasé eshán táwán dayag belóthit, cha esháni dapá ás dara kayt o dozhmenána wárt. Gorhá agan kasé eshán táwán dayag belóthit, hamé dhawlá allamá koshaga bit.
REV 11:6 Eshán ásmánay band kanagay ehtiár gón ent tánke esháni paygambariay róchán hecch hawr mabit o ehtiáresh hast ke ápá hónay tahá badal bekanant o har wahdá ke belóthant, gón har paymén wabáéá zeminá jata kanant.
REV 11:7 Wahdé eshán wati sháhedi sarjam kort, cha johlén tahtaruná dar áyókén rastar gón eshán janga kant, eshán shekasta dant o koshit o
REV 11:8 esháni jón Urshalimay bázárá ér kanaga bant, hamá shahr ke pa mesálé Sodum o Mesray námá zánaga bit, hamódá ke esháni Hodáwand salib kasshag butag.
REV 11:9 Tán say o ném róchá cha har kawm, kabilah, zobán o rájá mardom esháni jónána chárant bale kabr o kapan kanagesha naylant.
REV 11:10 Zeminay sará neshtagén mardom, esháni sará gala bant o jashna gerant o pa yakdomiá théki déma dayant, chéá ke é doén paygambarán zeminay sará neshtagén mardom ázár dátagant.
REV 11:11 Bale say o ném róchá rand, cha Hodáay némagá zenday ruh esháni jóná per tarret o é wati pádáni sará óshtátant. Harkasá ke distant, mazanén torsé áiay jáná kapt.
REV 11:12 Padá eshán borzén tawáré eshkot ke cha ásmáná gón eshán gwashagá at: “Edá, borzád byáét.” Esháni dozhmen cháragá atant o é, jambaréay tahá borzád ásmáná shotant.
REV 11:13 Hamá damáná baláhén zeminchandhé átk o shahray dahyakk tabáh but. Zeminchandhá hapt hazár mardom mort. Pasht kaptagénán sakk báz torset o borzén arshay Hodáesh shán o shawkat dát.
REV 11:14 Domi “apsóz” gwastag, bechár, sayomi “apsóz” zutt áyagi ent.
REV 11:15 Haptomi préshtagá wati karná jat. Ásmáná borzén tawár atant ke gwashagá atant: “Donyáay bádsháhi may Hodáwand o áiay Masihay bádsháhi jórh butag o á abad tán abad bádsháhia kant.”
REV 11:16 Nun bist o chárén kamásh ke wati tahtáni sará Hodáay démá neshtagatant, dém pa chér kaptant o Hodáesh názént.
REV 11:17 Gwashtesh: “Porwákén Hodáwandén Hodá! Má tai shográ gerén, hamá ke hastent o hast butag, chéá ke taw wati mazanén zór o wák dastá geptag o hokmráni bendát kortag.
REV 11:18 Kawm zahr geptagant o tai gazab átkag. Mordagáni dádrasiay wahd rasetag. Tai hezmatkárén paygambarán, tai palgártagénán o harkasá ke tai námay tors hast, kasán o mazan, áyáni mozz dayagay wahd átkag o hamáyáni barbád kanagay wahd ke zeminá barbád kanagá ant.”
REV 11:19 Padá Hodáay parasteshgáh arshá pach kanag but o Hodáay ahd o karáray péti, áiay parasteshgáhay tahá gendag but. Geróki shahm, borzén tawár o grand atant, zeminchandh o sakk báz tróngal but.
REV 12:1 Ásmáná mazanén neshánié záher but: janéné ke róch áiay póshák at, máh pádáni chérá o dwázdah estári tájé sará ati.
REV 12:2 Lápi porr at o cha chellagi dardán kukkárá at, chellag bayagay tawreshtán at.
REV 12:3 Padá dega neshánié ásmáná záher but: baláhén sohrén azhdiáé, hapt sarag o dah kánthi per at o hapt táji sará at.
REV 12:4 Azhdiáay lettheká ásmánay estáráni sayyakk ropt o zeminá dawr dát. Janén ke chokká kapagi at, azhdiá, janénay démá óshtátagat tán anchó ke áiay chokk pédá bit, hamá damáná chokká bwárt.
REV 12:5 Janéná mardénchokké pédá kort, hamá ke áiá sajjahén kawmáni sará gón ásenén asáéá hokmráni kanagi ent. Janénay chokk pach gerag o Hodá o áiay tahtay kerrá barag but.
REV 12:6 Janén tatk o gyábáná shot ke ódá Hodáyá pa janéná jágahé tayár kortagat tánke á, hazár o do sad o shast róchá ódá chárag o delgósh kanag bebit.
REV 12:7 Padá ásmáná jangé bendát but. Mikáil o áiay préshtagán azhdiáay helápá jang kort. Azhdiá o áiay préshtagán ham jang kort.
REV 12:8 Bale azhdiá sarzór nabut o cha ed o rand ásmáná pa áiá o áiay préshtagán jágahé nabut.
REV 12:9 Baláhén azhdiá dar kanag but, hamá kwahnén már, ke Eblis o Shaytán gwashaga bit o sajjahén donyáyá gomráh kanagá ent. Á gón wati préshtagán zeminá dawr dayag but.
REV 12:10 Padá man borzén tawáré cha ásmáná eshkot ke gwashagá at: “Nun may Hodáay rakkénag o zór o bádsháhi o áiay Masihay ehtiár rasetag, chéá ke may brátáni bohtám janók, hamá ke róch o shap áyáni sará may Hodáay démá bohtám janagá at, gallénag butag.
REV 12:11 May brát, Gwarándhay hón o wati sháhediay labzay sawabá, bohtám janókay sará báládast butagant. Markay démá áyán wati sáhay hecch parwáh nakortag.
REV 12:12 Paméshká shádehi kanét, oo ásmánán o ásmánáni neshtagénán! Bale bazhn o apsóz pa shomá, oo zemin o daryá! Chéá ke Shaytán pa shomá ér átkag, cha zahrá sakk porr ent, chéá ke zánt ke áiay wahd kamm ent.”
REV 12:13 Wahdé azhdiáyá dist ke man gallénag o zeminá dawr dayag butagán, hamá janénay randá kapt ke mardénchokki pédá kortagat.
REV 12:14 Janéná mazanén wakábay do bánzol dayag but tánke bál bekant o gyábáná wati jágahá shot bekant. Á, ódá tán wahdéá, wahdán o ném wahdá cha máray dazrasá dur dárag o hayáldári kanaga bit.
REV 12:15 Gorhá márá cha wati dapá kawréay paymá áp pizzhár dát ke janéná hár bebárt.
REV 12:16 Bale zeminá janén komakk kort, wati dapi pach kort o hamá kawri ér bort ke azhdiáyá cha wati dapá dar kortagat.
REV 12:17 Azhdiá janénay sará sakk zahr gept o gón áiay é dega chokkán pa jangá dar kapt, gón hamá chokkán ke Hodáay hokmáni mannók ant o pa Issáyá wati sháhediay sará mohr óshtátagant.
REV 12:18 Nun azhdiá, tayábay rékáni sará óshtát.
REV 13:1 Gorhá man dist ke cha daryáyá rastaré chest bayagá at. Dah kánth o hapt saragi per at. Kántháni sará dah táj atant o áiay har saragay sará kopri nám per at.
REV 13:2 Hamé rastar ke man dist, polangéay dhawlá at. Pádi purah mammi pádáni paymá atant o dapi shéri dapéay paymá. Azhdiáyá wati zór, wati taht o wati baláhén ehtiár eshiárá dátant.
REV 13:3 Rastaray yakk saragéá gwashaygá koshókén thappé per at, bale koshókén thapp dráh butagat. Sajjahén zemin hayrán but o rastaray randgirii kort.
REV 13:4 Áyán hamé azhdiá parastesh kort chéá ke rastarárá ehtiári dátagat o rastaresh parastesh kort o gwashtesh: “Kay rastaray dhawlá ent? Kay gón eshiá jang korta kant?”
REV 13:5 Rastará dapé dayag butagat ke bathák janag o koprén habar kanagá at o ehtiár dayag butagat ke tán chell o do máhá harché ke kanaga lóthit, bekant.
REV 13:6 Eshiá wati dap, Hodá, Hodáay nám o áiay menendjáhay helápá, bezán hamáyáni helápá pa kopr kanagá pach kort ke arshá neshtagant.
REV 13:7 Áiá ejázat dayag but ke Hodáay palgártagén mardománi helápá jang o jadal chest bekant o áyán prósh bedant. Áiá har kabilah, kawm, zobán o rájay sará ehtiár dayag but.
REV 13:8 Zeminay sará neshtagén sajjahén mardom rastará parastesha kanant, á sajjahén ke áyáni nám donyáay addh bayagá pésar “Zenday Ketábay” tahá, Gwarándhay ketábá nebeshtah kanag nabutagatant, hamá Gwarándh ke helár kanag butagat.
REV 13:9 Harkasá ke gósh per, gósh bedárit.
REV 13:10 “Á ke bandig bayagi ent, bandijáhá rawt. Á ke gón zahmá koshag bayagi ent, gón zahmá koshaga bit.” Eshiay tahá Hodáay palgártagén mardomán ópár o imánay zalurat ent.
REV 13:11 Gorhá man dega rastaré dist ke cha zeminá chest bayagá at. Eshiá gwarándhéay dhawlá do kánth per at bale azhdiáay dhawlá habará at.
REV 13:12 Eshiá awali rastaray sajjahén ehtiár gón at o cha hamáiay némagá kár kanagá at. Zemin o zeminay sará neshtagén mardomi parmátant ke awali rastaray parasteshá bekanant, hamáiay ke koshókén thappi dráh butagat.
REV 13:13 Eshiá mazanén nesháni pésha dásht, ási ham cha ásmáná tán zeminá mahlukay chammáni démá éra gétk.
REV 13:14 É neshániáni sawabá ke eshiá rastaray démá pésh dáragay ejázat dayag but, eshiá zeminay sará neshtagén mardom rada dátant. Hokmi dátant ke “Hamá rastaray sharapá boté jórh kanét ke zahmé laggetagi, thappig butag bale angat zendag mantag.”
REV 13:15 Domi rastará ejázat dayag but ke awali rastaray botá sáh mán bekant tánke awali rastaray bot habar ham kort bekant o hamáyán bekóshárénit ke é botá parastesha nakanant.
REV 13:16 Eshiá sajjahén mardom, kasán o mazan, hastómand o nézgár, ázát o golám, é hokm dátant ke wati rástén dastá yá péshánigá nesháné per bekanant,
REV 13:17 tánke á hecch chizz gept yá bahá kort makanant, agan neshánesh per naent. Neshán rastaray nám yá áiay námay nambar at.
REV 13:18 Edá hekmat pakár ent. Bell hamá kas rastaray nambará hesába kant ke zánti hast, chéá ke é nambar baniádamayg ent. O eshiay nambar shash sad o shast o shash ent.
REV 14:1 Randá man cháret ta hamá Gwarándh Sahyunay kóhay sará óshtátag o yakk sad o chell o chár hazár mardomi gón ke áiay o áiay Petay námesh péshánigay sará nebeshtah ent.
REV 14:2 O man tawáré cha ásmáná eshkot, chó bázén ápáni tawárá, purah baláhén grandéay tawár at. É tawár ke man eshkot purah chang janók atant ke wati changán janagá atant.
REV 14:3 É yakk sad o chell o chár hazárén mardom, tahtay démá o chárén sahdár o kamásháni démá nókén sawté janagá atant. Abéd cha hamá yakk sad o chell o chár hazárénán ke cha zeminá mókag butagatant, dega kassá é sawt dar borta nakort.
REV 14:4 É hamá ant ke watá gón janénán palitesh nakortag chéá ke dast najatagén ant. Har jágah ke Gwarándha rawt, é randgiria kanant. É cha mardománi nyámá mókag butagant, Hodá o Gwarándhay awali bar o samar ant.
REV 14:5 Cha áyáni dapá hecch dróg dar nayátkag o bémayár ant.
REV 14:6 Padá man dega préshtagé dist, ásmánay nyámá bál at. Abadi wasshén mestágé gón ati ke pa zeminay saray neshtagénán, pa har kawm, kabilah, zobán o rájá jári bejant.
REV 14:7 Gón borzén tawáréá gwashti: “Hodáay bimmá delá bedárét o áiá shán o shawkat bedayét chéá ke áiay dádrasiay sáhat átkag o rasetag. Hamáiá parastesh bekanét ke ásmán o zemin, daryá o ápi chammagi jórh kortagant.”
REV 14:8 Cha eshiá rand, dega préshtagé, domi préshtag átk o gwashti: “Kaptag, mazanén shahr, Bábel kaptag, hamá ke wati zenahkáriáni mast kanókén sharábi sajjahén kawmáná wáréntag.”
REV 14:9 Randá dega préshtagé, sayomi préshtag átk. Gón borzén tawáréá gwashti: “Agan kasé rastar o áiay botá parastesh bekant o péshánigá yá dastá áiay nesháná bezurit,
REV 14:10 á, Hodáay hezhmay hamá pahkén sharábá wárt ke Hodáay gazabay pyálahá réchag butag o gón ás o gókortá pákén préshtagáni démá o Gwarándhay démá ham azáb dayaga bit.
REV 14:11 Áyáni azábay dutt abad tán abad chesta bant. Hamá ke rastar o áiay botá parastesha kanant yá rastaray námay nesháná zurant, áyán róch o shap hecch áráma nabit.
REV 14:12 Edá Hodáay palgártagénán sabr o ópár pakár ent, hamáyán ke Hodáay hokmáni sará kára kanant o pa Issáyá wati imánay sará mohra óshtant.”
REV 14:13 Gorhá man cha ásmáná tawáré eshkot, gwashagá at: “Nebeshtah kan: Mordag bahtáwar ant, hamá ke cha ed o rand Hodáwanday ráhá merant.” Pákén Ruh ham gwashit: “Haw, áyáni zahmatkasshia hallant o á áráma gerant, chéá ke áyáni kortagén kár áyáni hamráh ant.”
REV 14:14 Man cháret ta espétén jambaré o jambaray sarborá purah ensánay chokkay dhawléné neshtag. Áiay sará teláhén tájé o dastá tézén dásé.
REV 14:15 Dega préshtagé cha parasteshgáhá dar átk, pa borztawáriá dém pa hamáiá kukkárá at ke jambaray sará neshtagat: “Wati dásá démá byár o beron, chéá ke rón o móshay wahd átkag. Zeminay keshár rasetag o tayár ent.”
REV 14:16 Gorhá hamá ke jambaray sarborá neshtagat, wati dási zeminay sará sorént o zemin rón o mósh but.
REV 14:17 Dega préshtagé cha ásmáni parasteshgáhá dar átk. Áiá ham tézén dásé gón at.
REV 14:18 Dega préshtagé cha korbánjáhá átk ke ásay sará ehtiári hastat. Áiá gón borzén tawáréá gón hamáiá gwasht ke tézén dási gón at: “Wati tézén dásá démá byár o zeminay anguray drachkáni hóshán borr, chéá ke nun angur rasetagant.”
REV 14:19 Gorhá préshtagá wati dás zeminay sará sorént, anguri mocch kortant o Hodáay gazabay mazanén sharábkasshi hawzay tahá dawr dátant.
REV 14:20 Sharábkasshi hawz cha shahrá dhann lagat dayag but o cha hawzá hón dar átk. Hón anchó báz at ke aspáni lagámán sar but o tán say sad kilumitará chó ápá tatk.
REV 15:1 Randá man ásmáná dega hayrán kanók o baláhén neshánié dist, hapt préshtag ke haptén godhsari azábesh gón atant, godhsari, paméshká ke gón eshán Hodáay gazab sarjama bit.
REV 15:2 Padá man chizzé dist, daryáéay paymá at bale chó shisshagá at, gón ásá hawár. O man dist shisshagi daryáay kashá hamá óshtátagatant ke rastaray sará o áiay bot o námay nambaray sará sóbén butagatant. Changesh dastá at ke Hodáyá dátagatant.
REV 15:3 Áyán Hodáay hezmatkár Mussáay sawt dapá at o Gwarándhay sawt ham. Gwashagá atant: “Tai kár mazan o hayrán kanók ant, oo porwákén Hodáwandén Hodá! Tai ráh pa adl o rásti ant, oo kawmáni bádsháh!
REV 15:4 Kay ent ke cha taw natorsit, oo Hodáwand! Kay ent ke tai námá shawkata nadant? Chéá ke tahná taw pák ay. Sajjahén kawma káyant o tai bárgáhá tará parastesha kanant, chéá ke tai ádelén kár záher butagant.”
REV 15:5 Cha eshiá rand, man cháret o parasteshgáh, bezán “sháhediay tambu” arshá dist ke pach at.
REV 15:6 Haptén préshtag ke haptén azábesh gón atant, cha parasteshgáhá dhanná dar átkant. Áyán sapá o rozhnáén lilomén god o póshák gwará at o sénagá teláhén patthiesh bastagat.
REV 15:7 Padá cha chárén sahdárán yakkéá haptén préshtagáná hapt teláhén darp dát ke cha Hodáay gazabá porr atant, abad tán abad zendagén Hodáay gazabá.
REV 15:8 Parasteshgáh cha duttá porr but ke cha Hodáay shawkat o áiay zórá átk o kassá tán hamá wahdá parasteshgáhay tahá shota nakort ke haptén préshtagáni haptén azáb sarjam nabutant.
REV 16:1 Padá man borzén tawáré eshkot ke cha parasteshgáhá pédák at o gón haptén préshtagán gwashagá at: “Berawét o Hodáay gazabay haptén darpán zeminay sará beréchét.”
REV 16:2 Gorhá awali shot o wati darpi zeminay sará rétk. Hamá mardomán haráb o dardnákén résh dar átk ke rastaray neshánesh per at o áiay botá parastesh kanagá atant.
REV 16:3 Padá domiá wati darp daryáay sará rétk. Daryá chó mordagéay hóná but o áiay tahay har sahdár mort.
REV 16:4 Padá sayomiá wati darp kawr o chammagáni sará rétk o á hón butant.
REV 16:5 Gorhá man eshkot ke ápáni préshtag gwashagá at: “Taw ádel ay, taw ke hastay o butagay, oo Pákén! Chéá ke taw é dádrasi kortagant.
REV 16:6 Eshán tai palgártagén mardom o paygambaráni hón rétkag, paméshká taw esháná hón pa nóshagá dátag. É hameshiay láhek ant.”
REV 16:7 O man eshkot ke korbánjáh gwashagá at: “Haw, oo porwákén Hodáwandén Hodá! Tai dádrasi rást o pa adl ant.”
REV 16:8 Nun cháromiá wati darp róchay sará rétk o róchá ejázat dayag but ke mardomán gón ásá besóchit.
REV 16:9 Mardom cha é sakkén garmiá sotkant, bale tawbah kanag o Hodáyá shán o shawkat dayagay badalá, hamá Hodáay námay helápá kopresh kort ke é azábáni sará ehtiári hastat.
REV 16:10 Randá panchomiá wati darp rastaray tahtay sará rétk. Áiay bádsháhi syáh o tahár but o mardom cha é paréshániá wati zobán o lellekán jáyagá atant.
REV 16:11 Pa wati dard o réshán borzén arshay Hodáay helápá kopresh kort, bale cha wati kárán tawbahesh nakort.
REV 16:12 Padá shashomiá wati darp mazanén kawr, Parátay sará rétk o kawray áp hoshk but tánke ródarátki bádsháháni ráh sáp bebit.
REV 16:13 Man say palitén ruh dist gwashaygá pogol atant ke cha azhdiáay dapá, rastaray dapá o cha drógén paygambaray dapá dar áyagá atant.
REV 16:14 É hamá palitén ruh ant ke mójezah pésha dárant o sajjahén donyáay bádsháháni kerrá rawant ke áyán pa jang kanagá yakjáh bekanant, hamá jang ke porwákén Hodáay mazanén róchá bit.
REV 16:15 “Bechár, man dozzokáia káyán. Bahtáwar hamá ent ke ágaha mánit o wati póshákán tayára dárit tánke á jándará dar mayayt o áiay nang gendag mabit.”
REV 16:16 Palitén ruhán é bádsháh hamá jágahá mocch kortant ke Ebráni zobáná námi Hármagedun ent.
REV 16:17 Nun haptomiá wati darp gwátá rétk o borzén tawáré cha parasteshgáhay tahtá átk, gwashagá at: “Kár halletag.”
REV 16:18 Gerókán jat, borzén tawár o grand but o anchén baláhén zeminchandhé átk ke cha hamá wahdá ke ensán zeminay sará pédá butag, choshén zeminchandhé nabutag, anchén zórmandén zeminchandhé at.
REV 16:19 Mazanén shahr, Bábel say thokkorá bahr but o kawmáni shahr kaptant o Hodáyá mazanén shahr, Bábel yát at o wati gazab o hezhmay sharábay pyálahi áiárá dát.
REV 16:20 Har jazirah gár but o hecch kóh pasht nakapt.
REV 16:21 Baláhén tróngalé but. Har yakk tróngalé chell kiluay kesásá grán at o cha ásmáná mardománi sará kapt. Áyán pa tróngalay tuppánay azábá Hodáay helápá kopr kort, chéá ke é azáb sakk torsnák at.
REV 17:1 Randá cha hamá haptén préshtagán ke hapt darpesh gón at, yakké átk o gón man habari kort o gwashti: “Byá edá man tará hamá mazanén kahbagay sezáyá pésha dárán ke bázén ápáni sará neshtag.
REV 17:2 Gón áiá zeminay bádsháhán zená kortag o zeminá neshtagén mardom áiay zenahkáriay sharábá bésár kortagant.”
REV 17:3 Padá préshtagá maná ruhay tahá gyábánéá bort o man janéné dist ke anchén rozhná sohrén rastaréay sará neshtagat ke kopri námán póshetagat o hapt sarag o dah kánthi per at.
REV 17:4 Janéná jamu o rozhná sohrén god gwará at. Gón teláh o gránbaháén seng o morwáredá sambahetagat. Teláhén pyálahé dastá ati ke cha bazzhnákén chizz o áiay zenahkáriáni palitián porr at.
REV 17:5 Áiay péshánigá námé nebeshtah at ke rázé at: “Mazanén Bábel. Kahbagáni o zeminay palitiáni mát”.
REV 17:6 Nun man dist ke janén cha Hodáay palgártagénáni o Issáay sháhedáni hónay nóshagá neshah o malár at. Man ke dist, sakk hayrán o habakkah mantán.
REV 17:7 Préshtagá gón man gwasht: “Taw parchá hayrán ay? Man tará é janén o hamá hapt sarag o dah kánthi rastaray rázá gwashán ke janén áiá swár ent.
REV 17:8 Á rastar ke taw dist, yakk wahdéá hastat, nun néstent bale cha johlén tahtaruná dar áyagi ent o barbádiay némagá rawt. Zeminá neshtagén hamá mardom ke cha jahánay jórh bayagay wahdá áyáni nám ‘Zenday Ketábá’ nebeshtah naent, é rastará ke gendant hayrána bant, chéá ke é rastar yakk wahdé hastat o nun néstent bale padá áyagi ent.
REV 17:9 Pa eshiay sarpad bayagá dánáén saré lóthit. Haptén sar, hapt kóh ant ke áyáni sará janén neshtag. Hapt bádsháh ant ham,
REV 17:10 panchay bádsháhi halás butag, yakké annun bádsháh ent o dega yakké angat nayátkag o á, wahdé kayt, allam pa kammén wahdéá mánit.
REV 17:11 Hamá rastar ke yakk wahdé hastat o nun néstent hashtomi ent, bale cha hapténán yakké o tabáhiay némagá rawt.
REV 17:12 O dahén kánth ke taw distant, dah bádsháh ant ke angat hecch bádsháhiesh narasetag, bale áyán rastaray hamráhiá pa yakk sáhatéá bádsháhiay ehtiára rasit.
REV 17:13 É sajjahénáni maksad yakk ent o é wati zór o ehtiárá rastará dayant.
REV 17:14 É gón Gwarándhá janga kanant bale Gwarándh eshán prósha dant, chéá ke á, hodáwandáni Hodáwand o bádsháháni Bádsháh ent o hamá ke gón áiá góna bant, áiay tawár jatagén, dar chetagén o wapádárén hamráh ant.”
REV 17:15 Nun préshtagá maná gwasht: “Hamá áp ke taw distant, hamódá ke kahbag neshtag, kawm, mocchi, ráj o zobán ant.
REV 17:16 Hamá rastar o dahén kánth ke taw distant gón kahbagá naprata kanant, áiá wayrán o jándara kanant, áiay góshtá warant o áiá gón ásá sóchant.
REV 17:17 Chéá ke Hodáyá áyáni delá dátag ke Hodáay maksaday sará kár bekanant, hamshawr bebant o wati bádsháhiá rastará bedayant tán hamá wahdá ke Hodáay habar sarjam o purah bebant.
REV 17:18 O hamá janén ke taw dist, mazanén shahr ent ke zeminay saray bádsháháni sará hokmránia kant.”
REV 18:1 Cha é chizzán o rand man dega préshtagé dist ke cha ásmáná ér áyagá at. Áiá mazanén ehtiáré gón at o zemin cha áiay shán o shawkatá rozhná but.
REV 18:2 Gón mazanén tawáréá kukkári kort: “Kaptag, kaptag, mazanén Bábel, nun palitén ruháni menendjáh butag o har nápákén arwáhay jágah ent o har nápákén morgay kodóh ent o har nápák o bazzhnákén sahdáray lóg ent.”
REV 18:3 Chéá ke sajjahén kawmán áiay zenáay mast kanókén sharáb wártag. Jahánay bádsháhán gón áiá zená kortag o donyáay sawdáger cha áiay zyádahén aysh o ásudagián hastómand butagant.
REV 18:4 Randá man cha ásmáná dega tawáré eshkot, gwashagá at: “Oo mani mardomán! Cha eshiá dar áét tánke shomá eshiay gonáhán sharik mabét o eshiay azáb shomay sará makapant,
REV 18:5 chéá ke eshiay gonáh sar pa sar ant o ásmáná rasetagant o Hodáyá áiay radén kár yát kortagant.
REV 18:6 Harché ke áiá kortag gón áiá hamá paymá bekanét o do sari bedayéti, hamá pyálah ke áiá ér rétkag, cha hamá pyálahá pa áiá do sari ér réchét.
REV 18:7 Haminchok ke watá shán o shawkati dátag o aysh o nóshay tahá zendi gwázéntag, nun haminchok azábi bedayét, chéá ke wati delá gwashtagi: ‘Man malakahé án o tahtay sará neshtagán, janózámé naán o hechbar porsa nagendán.’
REV 18:8 Esháni sawabá yakk róchéay tahá áiay azáb, bezán mark, pors o dhokkála káyant o á gón ásá sóchaga bit, chéá ke Hodáwandén Hodá porwák ent o áiay dádrasiá kant.”
REV 18:9 Zeminay bádsháhán ke gón Bábelay shahrá zená kortag o aysh o nóshay zendesh gwázéntag, wahdé áiay sochagay duttána gendant, pa áiá gréwant o porsiga bant.
REV 18:10 Áiay azábá ke gendant, torsant, dura óshtant o gwashant: “Apsóz, apsóz, oo mazanén shahr! Oo Bábel, oo mohkamén shahr! Chéá ke yakk sáhatéay tahá tai dádrasiay wahd raset.”
REV 18:11 Zeminay sawdágera gréwant o pa áiá porsiga bant, chéá ke áyáni sámánán nun kass pa bahá nazurit;
REV 18:12 teláh, nograh, gránbaháén seng o morwáred, lilomén god, jamu o harir o rozhná sohrén god o har paymén washbóén dár, har paymén ájén chizz, cha gránbaháén dár, brenj, ásen o sengmarmará jórh kortagén chizz,
REV 18:13 dárchini, masálah, sóchoki, morr, sóchagi, sharáb, zaytunay thél, gehterén árt, gandom, gók o pas, asp o aspgárhi, golám o ensáni zend.
REV 18:14 Hamá bar o samar ke shomay arwáh pa áiá hodónák butag, cha shomay dastá shotag. Sajjahén zinati o drapshókén chizz cha shomay dastá shotagant o nun hechbar dar géjaga nabant.
REV 18:15 É chizzáni sawdáger ke cha é kahbagá hastómand butagant, cha áiay azábay torsá dur durá óshtant, gréwant o porsiga bant.
REV 18:16 Gwashant: “Apsóz, apsóz, oo mazanén shahr! Chéá ke lilomén god, jamu o rozhná sohrén póshák gwará dayag butay o gón teláh o gránbaháén seng o morwáredá sambahénag butay,
REV 18:17 bale choshén baláhén mál o melkat yakk sáhatéay tahá tabáh kanag but.” Sajjahén náhodá, jánshó o hamá mardom ke daryáyá sapara kanant yá kára kanant dur óshtátagatant.
REV 18:18 Wahdé áiay sochagay duttesh dist, kukkáresh kort o gwashtesh: “É mazanén shahray dhawlén, dega shahré butag?”
REV 18:19 Á hák pa sar butant o gréwán o mótk áráná kukkár kanagá atant: “Apsóz, apsóz, oo mazanén shahr! Hamá ke daryáyá bójigesh hastat, cha tai mál o melkatá hastómand butagant, bale yakk sáhatéay tahá tabáh kanag butay.”
REV 18:20 Áiay sará shádehi kanét, oo ásmánán! Shádehi kanét, oo Hodáay palgártagén mardomán, oo kásed o paygambarán! Chéá ke Hodáyá eshiay dádrasi hamá paymá kortag ke eshiá gón shomá kortag.
REV 18:21 Padá porwákén préshtagéá, jenteri táay kaddén mazanén sengé chest kort o daryáyá dawr dát o gwashti: “Gón hamé trondiá mazanén shahr, Bábel jahlád dawr dayaga bit o padá hechbar shóház kanag buta nakant.
REV 18:22 Chang janók, sázger, nal o sorná janókáni sázay tawár padá hechbar tai tahá eshkonaga nabit. Hecch honaray honarmand padá hechbar tai tahá shóház kanaga nabit. Jenteri tawáré padá hechbar tai tahá eshkonaga nabit.
REV 18:23 Cherágay rozhn padá hechbar tai tahá nadrapshit. Sálónk o bánóri tawáré padá hechbar tai tahá eshkonaga nabit, chéá ke tai sawdáger zeminay sakkén mazanén mardom butagant o tai jádugeriay sawabá, sajjahén kawm rad dayag butagant.
REV 18:24 Paygambar o Hodáay palgártagén mardom o harkas ke donyáay tahá koshag butag, áyáni hón é shahray tahá dar kapt.”
REV 19:1 Cha é chizzán o rand man anchén mazanén tawáré eshkot, gwashaygá ásmáná sakkén baláhén mocchiéay tawár at, gwashagá atant: “Hodáwandá benázénét, Halléluyá. Rakkénag o shawkat o zór may Hodáayg ant,
REV 19:2 chéá ke áiay dádrasi rást o pa adl ant. Áiá hamá mazanén kahbag sezá dátag ke zemini gón wati zenahkárián gomráh kortagat. Hodáyá cha áiá wati hezmatkáráni hónay bér geptag.”
REV 19:3 O áyán yakk randé padá gwasht: “Hodáwandá benázénét, Halléluyá. Abad tán abad cha kahbagá dutt chesta bit.”
REV 19:4 Padá bist o chárén kamásh o chárén sahdár dém pa chér kaptant. Tahtay sará neshtagén Hodáesh parastesh kort, gwashtesh: “Ámin. Hodáwandá benázénét, Halléluyá.”
REV 19:5 Gorhá cha tahtá tawáré átk, gwashti: “May Hodáay tawsipá bekanét, oo áiay sajjahén hezmatkárán, oo sajjahén Hodátorsán, kasán o mazan!”
REV 19:6 Padá man anchén tawár eshkot ke chó mazanén mocchi o bázén áp o trondén grandáni tawárá atant ke gwashtesh: “Hodáwandá benázénét, Halléluyá. Chéá ke may porwákén Hodáwandén Hodá hokmránia kant.
REV 19:7 Gal bebén o shádehi bekanén o hamáiá shán o shawkat bedayén, chéá ke Gwarándhay suray wahd átkag o áiay bánórá watá tayár kortag.
REV 19:8 Áiá lilomén, rozhná o sapáén god, pa gwará kanagá dayag butag.” Lilomén god, Hodáay palgártagén mardománi pahrézkári ant.
REV 19:9 Padá préshtagá maná gwasht: “Nebeshtah kan: bahtáwar ant hamá ke Gwarándhay suray shámá lóthag butagant.” Padá gwashti: “É Hodáay rástén habar ant.”
REV 19:10 Nun man áiay pádáni démá sojdah kanagá kaptán, bale maná gwashti: “Chó makan, man ham tai o tai brátáni dhawlén hezmatkáré án ke Issáay sháhediá dayant. Hodáyá parastesh kan. Issáay bárawá sháhedi dayag paygambariay jawhar ent.”
REV 19:11 Man dist ke ásmánay dap pach ent o mani démá espétén asp o aspswáré. Aspswáray nám “Wapádár o Rást” at. Pa adl dádrasia kant o pa adl jang ham kant.
REV 19:12 Áiay chamm chó rókén ásá atant o bázén tájé sará ati. Áiay saragay sará námé nebeshtah at ke áiay jendá abéd, dega kassá é nám nazánt.
REV 19:13 Áiá hóná méntagén kabáhé gwará at o námi “Hodáay Gál” at.
REV 19:14 Ásmáni pawj, hamáiay poshtá gón atant, espétén aspán swár o sapá o espétén lilomén póshák gwará.
REV 19:15 Cha aspswáray dapá tézén zahmé dar áyagá ent tánke gón eshiá kawmán bejant o gón ásenén asáéá áyáni sará hokmráni bekant. Á, porwákén Hodáay gazab o hezhmay sharábkasshi hawzá lagat dayagá ent.
REV 19:16 Áiay kabáh o ránay sará námé nebeshtah ent: “bádsháháni Bádsháh o hodáwandáni Hodáwand.”
REV 19:17 Padá man dist ke préshtagé róchay tahá óshtátag. Gón borzén tawáréá sajjahén morgáni némagá kukkári kort ke ásmánay nyámá bál atant: “Byáét o pa Hodáay mazanén shámá mocch bebét,
REV 19:18 tánke shomá bádsháháni gósht, sáláráni gósht, porwákén mardománi gósht, asp o aspswáráni gósht, sajjahén mardománi gósht, ázát o golámáni o kasán o mazanénáni góshtá bwarét.”
REV 19:19 Nun man rastar dist o zeminay bádsháh o áyáni pawj ham distant ke gón aspswár o áiay pawjá pa jangá mocch butagatant.
REV 19:20 O rastar, hamá drógén paygambaray hamráhiá gerag but ke rastaray démá mójezahi pésh dáshtagat. Gón é mójezahán, áiá hamá rad dátagatant ke rastaray neshánesh zortagat o áiay botesh sojdah kortagat. Doén, zendagá hamá gwarmá dawr dayag butagatant ke gón ás o gókortá bon at.
REV 19:21 Á dega pawji gón aspswáray zahmá ke cha áiay dapá dar áyagá at koshag butant o sajjahén morgán watá cha áyáni góshtá sérláp kort.
REV 20:1 Randá man préshtagé dist ke cha ásmáná ér áyagá at. Áiá johlén tahtarunay kelit o mazanén zamzilé dastá at.
REV 20:2 O áiá azhdiá gept o pa hazár sálá bast, bezán hamá kadimi már ke Eblis o Shaytán ent.
REV 20:3 Johlén tahtarunay tahá dawri dát o tahtarunay dapi kobl kort o mohr jat ke tán é hazárén sál purah mabant, á dega baré kawmán rad dát makant. Cha hazárén sálán o rand, allamá Shaytán pa kammokén wahdéá ázát kanaga bit.
REV 20:4 Randá man taht dist o á ke tahtáni sará neshtagatant, áyán dádrasiay ehtiár dayag but. O man hamáyáni arwáh distant ke áyáni sar pa Issáay bárawá sháhedi dayag o Hodáay habaray sawabá borrag butagatant, hamáyáni ke rastar o áiay botesh sojdah nakortagat o wati péshánig yá dastay sará áiay neshánesh nazortagat. Á padá zendag butant o hazár sálá gón Masihá hokmrániesh kort.
REV 20:5 É awali jáh janag ent. Pasht kaptagén mordag, tán hamá wahdá padá zendag nabutant ke é hazárén sál purah nabutagatant.
REV 20:6 Bahtáwar o pák o palgár ant hamá ke é awali jáh janagá sharika bant, domi marká áyáni sará hecch ehtiár nést o á, cha Hodá o Masihay némagá dini péshwá jórha bant o gón Masihá tán hazár sálá hokmránia kanant.
REV 20:7 Wahdé hazárén sál sarjama bant, Shaytán cha wati bandijáhá ázát kanaga bit o
REV 20:8 zeminay chárén kondhán neshtagén kawmáni rad dayagá rawt ke Ájuj o Májuj ant. Eshán pa jangá moccha kant. É daryáay rékáni kesásá báza bant.
REV 20:9 É sajjahén kawm dém pa zeminay práhén patthá borzád butant o Hodáay palgártagén mardománi ord o dóstnákén shahresh chapp o chágerd kort, bale ásé cha ásmáná jahlád átk o éri bortant.
REV 20:10 Padá esháni rad dayók, Eblis, ás o gókortay gwarmá dawr dayag but, hamódá ke rastar o drógén paygambar ant. Eshán, shap o róch, abad tán abad azába rasit.
REV 20:11 Randá man baláhén espétén tahté dist o hamá ham ke tahtay sará neshtagat. Zemin o ásmán cha áiay démá tatkant o pa zemin o ásmáná hecch jágahé pasht nakapt.
REV 20:12 Man mordag distant, mazan o kasán, ke tahtay démá óshtátagatant. Ketáb pach kanag butant o dega ketábé ham pach kanag but, “Zenday Ketáb”. Mordag wati kortagén káráni hesábá dádrasi kanag butant, hamá káráni hesábá ke ketábáni tahá nebeshtagat.
REV 20:13 Daryáyá wati lápay mordag dar kortant o mark o mordagáni jaháná ham wati tókay mordag dar kortant o har yakké wati kortagén káráni hesábá dádrasi kanag but.
REV 20:14 Mark o mordagáni jahán, ásay gwarmá dawr dayag butant. É ásay gwarm, domi mark ent.
REV 20:15 Agan kaséay nám “Zenday Ketábay” tahá nebeshtah naat, á, ásay gwarmá dawr dayag but.
REV 21:1 Randá man nókén ásmán o nókén zeminé dist chéá ke awali ásmán o awali zemin gár butagatant o daryá ham nun néstat.
REV 21:2 O man pákén shahr dist, nókén Urshalim, cha Hodáay némagá cha ásmáná ér áyagá at. Bánóréay dhawlá tayár kanag o pa wati lógwájahá sambahénag butagat.
REV 21:3 O man borzén tawáré eshkot ke cha tahtá pédák at, gwashagá at: “Bechár! Hodáay menendjáh mardománi kerrá ent, nun á wat áyáni kerrá nendóka bit. Á, Hodáay mardoma bant o Hodá wat gón áyán yakjáha bit.
REV 21:4 Hodá cha áyáni chammán har arséá pahka kant. Mark nun pashta nakapit o na pors o na zári o na darda bit, chéá ke pésarigén chizz gwastagant.”
REV 21:5 Hamá ke tahtay sará neshtagat, gwashti: “Bechár, man sajjahén chizzán cha nóksará addha kanán.” Padá gwashti: “Nebeshtah kan, chéá ke é habar porehtebár o rást ant.”
REV 21:6 Chosh ham maná gwashti: “Kár halletant. Bendát man án o halási man án, bongéj o ásar. Hamá ke tonnig ent, man áiá cha zenday chammagá mopt o bé zarrá ápa dayán.
REV 21:7 Hamá ke sóbéna bit, é sajjahén chizzi mirásá rasant, man áiay Hodá bán o á mani chokka bit.
REV 21:8 Bale lagór o nábáwar o hamá ke bazzhnák ant, hónig o zenahkár o jáduger o botparast o sajjahén drógband, esháni ásar esh ent ke ásay gwarmá gón ás o gókortá sóchag bebant. É domi mark ent.”
REV 21:9 Cha hamá haptén préshtagán ke cha goddhi haptén azábán porrén hapt darpesh gón at, yakké átk o maná gwashti: “Edá byá, man tará bánórá pésha dárán, Gwarándhay lógbánoká.”
REV 21:10 Áiá ruhay tahá maná baláhén o borzén kóhéay sará bort o pákén shahr, Urshalimi pésh dásht ke cha Hodáay némagá cha ásmáná ér áyagá at o
REV 21:11 gón Hodáay shán o shawkatá drapshagá at. Eshiay drapshnáki chó gránbaháén seng, akikay dhawlá sáp at.
REV 21:12 Baláh o borzén diwálé hastati o dwázdah darwázag ke har darwázagay dapá préshtagé óshtátagat o darwázagay sará námé nebeshtagat. É Esráilay dwázdahén kabilaháni nám atant.
REV 21:13 Ródarátká say darwázag, shomálá say darwázag, jonubá say darwázag o rónendá ham say darwázag atant.
REV 21:14 Shahray diwálá dwázdah bonred hastat o áyáni sará Gwarándhay dwázdahén kásedáni nám atant, har yakkéay sará yakk námé.
REV 21:15 Hamá ke gón man habará at, kadd o kesás kanagi teláhén latthé gón ati ke shahrá o áiay darwázag o diwálá kadd o kesás bekant.
REV 21:16 O shahr chárkondh at, haminchok ke eshiay dráji at haminchok práhi. Préshtagá shahr gón latthá kadd o kesás kort, sarjamiá kesás do hazár o do sad kilumitar at. Dráji, práhi o borzi yakkén kaddá atant.
REV 21:17 Padá áiay diwáli kadd o kesás kort. Ensáni kadd o kesásay hesábá ke préshtag kár bandagá at, diwál kesás shast o panch mitar at.
REV 21:18 Shahray diwál cha yashmá jórh kanag butagat o shahr cha anchén pahkén teláhá ke chó shisshagá sáp at.
REV 21:19 Diwálay bonred gón har warhén gránbaháén sengán singárag butagat. Awali bonred yashm at, domi nilom, sayomi akik, cháromi zomorrod,
REV 21:20 panchomi senge solaymán, shashomi rubi, haptomi teláhrangén ákut, hashtomi bayrel, nohomi pokráj, dahomi shunzén akik, yázdahomi pérózah, dwázdahomi jamuén ákut.
REV 21:21 Dwázdahén darwázag cha morwáredá jórh kanag butagatant, har yakk darwázagé cha yakk morwáredéá o shahray práhén damk cha pahkén teláhá jórh kanag butagat, chó shisshagá sáp.
REV 21:22 Man eshiay tahá hecch parasteshgáh nadist, chéá ke porwákén Hodáwandén Hodá o Gwarándh eshiay parasteshgáh ant.
REV 21:23 O shahrá na róch pakár ent o na máh ke áiá rozhná bekanant, chéá ke Hodáay shán o shawkat eshiá rozhná kant o Gwarándh eshiay cherág ent.
REV 21:24 Kawm eshiay rozhnay tahá gáma janant o zeminay bádsháh wati shán o shawkatá eshiay tahá kárant.
REV 21:25 Eshiay darwázag hechbar róchá banda nabant chéá ke ódá hechbar shapa nabit.
REV 21:26 Sajjahén kawmáni shawkat o sharap eshiay tahá áraga bant.
REV 21:27 Hecch paymén palitén chizz yá hamá ke bazzhnákén kára kanant o dróga bandant, ódá poterta nakanant, bass hamá shota kanant ke áyáni nám “Zenday Ketábá” nebisag butagant, hamá Gwarándhay ketábá.
REV 22:1 Randá préshtagá maná zendápay kawr pésh dásht ke chó bolórá sáp at. Cha Hodá o Gwarándhay tahtá dar áyagá ent o
REV 22:2 shahray bázáray nyámá tachán ent. Kawray é dast o á dastá zenday drachké ke dwázdah bar o samara kárit, har máh cha bará bár ent o drachkay ták pa kawmáni dráh kanagá darmán ant.
REV 22:3 O hecch paymén nálaté pashta nakapit. Hodá o Gwarándhay taht hamódá bit o áiay hezmatkár áiay hezmatá kanant.
REV 22:4 Áiay chehragá gendant o áiay nám áyáni péshánigána bit.
REV 22:5 Ódá hechbar shapa nabit, cherág o róchay rozhnay zalurata nabit, chéá ke Hodáwandén Hodá wat áyáni sará wati rozhná drapshénit o á, abad tán abad hokmránia kanant.
REV 22:6 Préshtagá gón man gwasht: “É habar porehtebár o rást ant. O Hodáwand, paygambaráni ruhay Hodáyá, wati préshtag dém dátag ke áiay hezmatkárán é chizzán pésh bedárit ke allamá zutt bayagi ant.”
REV 22:7 “Bechár, mane Issá zutt pédák án. Bahtáwar hamá ent ke hamé péshgóiay habaráni parmánbardáriá kant ke é ketábá mán ant.”
REV 22:8 O mane Yuhanná, hamá án ke é chizzi eshkotag o distagant. Wahdé man eshkot o dist, hamá préshtagay pádáni démá pa sojdahá kaptán ke maná é chizzi pésh dáshtant.
REV 22:9 Bale áiá maná gwasht: “Na, chó makan. Man ham tai o tai brátén paygambaráni dhawlén hezmatkáré án o hamáyáni dhawléné án ke é ketábay habaráni mannók ant. Hodáyá parastesh bekan.”
REV 22:10 Randá maná gwashti: “É ketábay paygambariay habarán mohr majan, chéá ke wahd nun nazzikk ent.
REV 22:11 Hamá ke badia kant, bell angat badia kant, hamá ke palit ent, bell angat palit ent o hamá ke pahrézkár ent, bell angat pahrézkária kant o hamá ke pák o palgár ent, bell angat pák o palgár ent.”
REV 22:12 Bechár, mane Issá zutt pédák án o maná mozz gón ke harkasá áiay káray hesábá mozz bedayán.
REV 22:13 Bendát man án o halási man án, awali o áheri, bongéj o ásar.
REV 22:14 Bahtáwar hamá ant ke wati póshákána shódant tánke cha zenday drachká waragay ejázatesh bebit o cha shahray darwázagán, tahá shot bekanant.
REV 22:15 Bale kochekk, jáduger, zenahkár, hónig, botparast o harkas ke dróga bandit o gón drógá mehra kant, é sajjahén cha shahrá dhanna bant.
REV 22:16 “Man ke Issá án, wati préshtag dém dátag tánke kelisáyáni háterá shomárá é chizzáni sháhediá bedant. Man Dáuday risshag án o Dáuday poshpad ham. Sohbay rozhnáén estár man án.”
REV 22:17 Pákén Ruh o bánóra gwashant: “Byá.” Hamá ke eshkont, bell gwashit “Byá.” Hamá ke tonnig ent, bell kayt, hamá ke lóthók ent bell cha zendápá mopt o bé zarrá zurit.
REV 22:18 Man pa harkasá ke é ketábay péshgóiay labzán eshkonagá ent, sháhedia dayán ke agan kasé esháni tahá chizzé gésh bekant, Hodá áiay sará hamá ázárán gésha kant ke é ketábay tahá nebeshtah ant.
REV 22:19 O agan kasé cha ketábay péshgóiay habarán chizzé dar bekant, Hodá cha zenday drachká o cha pákén shahrá ke é ketábay tahá áyáni bárawá nebeshtah ent, áiay bahrá dara kant.
REV 22:20 Hamá ke é chizzáni sháhediá dant, gwashit: “Haw, man zutt pédák án.” Anchosh bát. Ámin. Byá, oo Hodáwandén Issá!
REV 22:21 Hodáwandén Issáay rahmat gón shomá sajjahénán bát. Anchosh bát. Ámin.
