﻿Pa Rumián Pulosay kágad.
10.
Oo brátán! Mani delay wáhag o dwá gón Hodáyá pa Esráilián hamesh ent ke áyán neját berasit. 
Man pa áyán gwáhi dáta kanán ke áyán pa Hodáyá jósh o gayrat hast, bale áyáni é jósh o gayrat cha sharrén zánt o zánagéá naent. 
Á hamá rástáwariá sarpad nabutant ke cha Hodáay némagá ent o wati jenday rástáwariay barjáh kanagay johdá atant, paméshká watá Hodáay dátagén rástáwariay dastá nadátesh. 
Masih, Sharyatay sarjami o kámeli ent. Nun harkas ke imána kárit, rástáwar o bémayár hesába bit. 
Hamá rástáwari ke cha Sharyatá kayt, áiay bárawá Mussá chosh nebeshtaha kant: “Harkas ke é hokmáni sará amala kant, gón esháni barjáh dáragá zendaga mánit.” 
Bale á rástáwari ke cha imáná kayt, é dhawlá gwashit: “Wati delá magwashét ‘kay ásmáná rawt?’”, bezán ke Masihá jahlá byárit, 
“yá ‘kay johlén kabrá éra kapit?’”, bezán ke Masihá cha mordagáni jaháná borzá byárit. 
É dhawlá gwashit: “Gáltai nazzikká ent, tai dapá o tai delá ent”, bezán imánay hamá Gál ke má áiay járá janén. 
Agan dape wat bemannay ke Issá Hodáwand ent o wati delay tahá báwar bekanay ke Hodáyá á cha mordagán zendag kortag, gorhá rakkay. 
Chéá ke ensán delay tahá imána kárit o rástáwar hesába bit, dape wat ham mannit o é paymá áiá nejáta rasit. 
Pákén Ketába gwashit: “Harkas ke áiay sará imána kárit, hechbar sharmendaga nabit.” 
É bárawá Yahudi o darkawmay nyámá park o péré nést. Chéá ke hamé yakkén Hodáwand, sajjahénáni Hodáwand ent o pa hamá drostigén mardomán ke áiá tawára kanant, békesás saki o bakshók ent. 
Chéá ke “harkas ke Hodáwanday námá gipt o áiá tawára kant, á rakkit.” 
Nun mardom chón yakkéá tawár bekanant ke áiay sará imánesh nayáwortag? O chón yakkéay sará imán byárant ke áiay bárawá chizzé naeshkotagesh? O chón beshkonant agan kasé áyáni kerrá é járá majant? 
O jár janók chón jár bejanant agan rawán dayag nabutagant? Anchosh ke nebeshtah ent: “Á mardománi pád o kadam nék ant ke wasshén mestágay járá janant.” 
Bale bázénéá é wasshén mestág namannet, chéá ke Eshayá nabia gwashit: “Oo Hodáwand! May paygámay sará kayá báwar kort?” 
Gorhá imán cha eshkonagá kayt o eshkonag cha Masihay paygámay járá. 
Bale nun josta kanán: “Áyán naeshkotag?” Allam eshkotagesh, parchá ke: “Jár janókáni tawár sajjahén donyáyá shotag o áyáni habar jahánay goddhi marz o simsarán sar butagant.” 
Yakk baré padá josta kanán: “Esráil sarpad nabutag?” Awalá, Hodá cha Mussáay zobáná gwashit: “Man hamá mardománi wasilahá shomay hasaddá páda kanán ke kawmé naant; násarpadén kawméay wasilahá shomay hezhmá páda kanán.” 
Gorhá Hodá cha Eshayá nabiay zobáná pa deléri gwashit: “Maná hamáyán dar gétk ke mani shóházá naatant, man watá pa hamáyán záher kort ke mani jost o porsá naatant.” 
Bale Esráilay bárawá gwashit: “Sajjahén róchá man wati dast, náparmán o jáhelén kawméay némagá pa wassháni shahár dátag.” 
