﻿Mattá.
15.
Nun cha Urshalimá átkagén lahtén Parisi o Sharyatay zánóger Issáay kerrá átk o gwashtesh: 
“Tai morid chéá may pet o piroki rasmá próshant o waragá pésar dasta nashódant?” 
Áyáni passawá gwashti: “Shomá chéá pa wati rasmay dáragá Hodáay hokmá próshét? 
Hodáyá gwashtag: Wati pet o mátá ezzat beday o harkasá ke wati pet yá mát nálat kort, áiay sezá mark ent. 
Bale shomá gwashét: ‘Agan kasé wati petá yá mátá begwashit: “Hamá komakk ke man báyad ent shomárá bedátén, á man Hodáay ráhá korbán kortag,” 
nun ejázat naent ke á wati pet o mátá komakk bedant.’ Shomá pa wati rasmay dáragá Hodáay habará halás o nákára kanét. 
Oo doru o dopóstén mardomán! Eshayá nabiá shomay bárawá sharr gwashtag: 
É mardom dapá maná ezzata dayant, bale delesh cha man sakk dur ent. 
É moptá maná parastesha kanant o mardománi ráh o rahbandáni tálimá anchosha dayant ke gwashay Hodáay hokm ant.” 
Issáyá mardom wati kerrá lótháént o gwashtant: “Gósh bedárét o sarpad bebét. 
Chizzé ke dapá rawt, mardomá nápáka nakant, bale hamá chizz ke cha dapá dara kayt, mardomá nápáka kant.” 
Nun morid áiay kerrá átkant o gwashtesh: “Taw zánay ke tai é habarán Parisi tawréntagant?” 
Issáyá passaw dát: “Har nehálé ke mani ásmáni Petá nakeshtag, gwajaga bit. 
Shomá áyán bellét. Á, kóráni kórén rahshón ant, wahdé yakk kóré domi kóray rahshóna bit, doén kandhá kapant.” 
Petrosá gwasht: “É mesálay mánáyá márá sarpad kan.” 
Issáyá gwasht: “Shomá angat ham inchok násarpad ét? 
Nazánét harché ke dapá rawt, lápá mána bit o padá cha rótán dara kayt. 
Bale harché ke cha dapá dara kayt, cha delá chesta bit o hamé chizz ensáná sell o nápáka kant. 
Chéá ke badén pegr o hayál, hón o kósh, zená, bénangi, dozzi, drógén sháhedi o kopr cha delá chesta bant. 
Hamé chizz ant ke mardomá nápáka kanant, gón nashoshtagén dastán warák warag mardomá nápáka nakant.” 
Issáyá á jágah yalah dát o Sur o Saydunay damagá shot. 
Kanháni janéné ke hamóday mardomé at, átk o kukkári kort: “Oo Hodáwand, oo Dáud bádsháhay chokk! Mani sará rahm kan. Mani jenekká jenné per o jenekk sakk azáb ent.” 
Bale Issáyá hecch nagwasht. Morid Issáay kerrá átkant o dazbandiesh kort: “Eshiá roksat kan, kukkár kanáná may randá kaptag.” 
Issáyá darráént: “Man bass pa Bani Esráilay gárén méshán ráh dayag butagán.” 
Gorhá janén áiay pádán kapt o gwashti: “Oo Hodáwand! Maná komakk kan.” 
Gwashti: “Chokkáni naganay pach gerag o kochekkáni démá dawr dayag sharr naent.” 
Janéná gwasht: “Haw, oo Hodáwand! Bale kochekk ham naganay hamá chondhána warant ke cha áyáni wáhondáni parzónagána kapant.” 
Gorhá Issáyá áiay passawá gwasht: “Oo bánok! Tai imán mohr o mohkam ent, hamá dhawl bit ke taw lóthay.” Hamá damáná áiay jenekk dráh but. 
Issáyá á jágah esht o shot, cha Jalilay Mazangwarmay lambá gwast o yakk kóhéay sará sar kapt o nesht. 
Bázén mardomé áiay kerrá átk. Lang, kór, mondh, gong o dega har paymén násalámatén mardomesh Issáay kerrá áwortant o áiá dráh kortant. 
Wahdé Esráilián dist ke gong habar kanagá ant, mondh dráh bayagá ant, lang tarragá ant o kór gendagá ant, gorhá hayrán butant o wati Hodá satá o sanáesh kort. 
Issáyá wati morid lótháént o gwashtant: “Maná é mardománi sará bazzaga bit, say róch ent ke mani kerrá ant o pa waragá hecchesh nést. Mana nalóthán ke eshán gón shodigén lápé roksat bekanán. Chó mabit ke ráhá betosant o bekapant.” 
Moridán darráént: “É gyábáná má inchok nán cha kojá byárén ke é mardom sér bekanant?” 
Gorhá Issáyá cha moridán jost kort: “Shomárá chont nagan gón?” Gwashtesh: “Hapt nagan o lahtén kasánén máhig.” 
Áiá gón mardomán gwasht: “Zeminay sará benendét.” 
Haptén nagan o máhigi zortant, Hodáay shogri gept, nagan o máhigi chondh chondh kort o moridáná dátant o moridán mardománá dátant. 
Sajjahénán sérá wárt o cha sar átkagén chondhán moridán hapt lach porr kort. 
Janén o chokkán abéd, chár hazár mardéná warák wárt. 
Mardománi mocchiay roksat kanagá rand, Issá bójigá nesht o Magadanay damagá shot. 
