﻿Zabur.
147.
Hodáwandá benázénét, Halléluyá, may Hodáay názénag chón wassh ent o áiay satá kanag delkassh. 
Hodáwand Urshalimá cha nóksará addha kant o Esráilay darándhéhán yakjáha kant. 
Proshtadelán dráha kant o thappánesha bandit. 
Estárán hesába kant o har yakkéá pa nám tawára kant. 
May Hodáwand mazan ent, zóri békesás, áiay zánt o zánagá kadd o kesás nést. 
Hodáwand békebrán komaka kant, bale badkárán zeminá dawra dant. 
Hodáwandá gón shogrgozári benázénét, pa may Hodáyá soróz o chang bejanét. 
Á, ásmáná gón jambara póshénit o zeminá hawra bakshit o kóháni sará sabzaga ródénit. 
Á, haywánán waráka dant o gwarágán ham, wahdé peryáta kanant. 
Á, aspáni zórá gala nabit o na ke jangóláni pádán. 
Hodáwand hamáyáni sará wassha bit ke cha áiá torsant o sajjahén óst o ométesh gón áiay mehrá ent. 
Oo Urshalim! Hodáwandá satá kan, Oo Sahyun! Hodáwandá benázén. 
Hamá tai darwázagáni karhián mohra dárit o tai diwáláni tahá, tai chokkán barkata dant. 
Tai marz o simsarán émena kant o tará cha gehterén gandomá sérlápa kant. 
Wati hokmá zeminá ráha dant o áiay habar téziá shenga bit. 
Barpá chó pazhmá shenga kant o nódá poray paymá shánka dant. 
Tróngalá nánay hurdagáni paymá éra dant, kay áiay barpén sártiay démá óshtáta kant? 
Wati habará ráha dant o har chizz ápa bit, wati gwátá déma dant o ápa rombant o tachant. 
Wati habará pa Ákubá áshkára kant o wati hokm o parmáná pa Esráilá. 
É kári pa dega hecch kawméá nakort o é dega kawm áiay rahbandána nazánant. Hodáwandá benázénét, Halléluyá. 
