﻿Zabur.
132.
Dém pa Urshalimá borzád rawagay sawté. Oo Hodáwand! Dáudá yát kan o áiay sakki o sórián. 
Gón Hodáwandá sawgendé wárti o gón Ákubay zórmandén Hodáyá kawli kort o gwashti: 
“Tánke pa wati Hodáwand, pa Ákubay zorákén Hodáyá lógé addh makanán, wati jenday lógá narawán, watá árám kanagá naylán, chammán nazza nayárán, mecháchán dhokkagá naylán.” 
Bechár, má Eprátahay shahrá ahd o karáray pétiay zegr eshkot o Jáháray sardhagárá dar gétk. 
“Byáét áiay lógá rawén o áiay pádáni padagay démá sojdaha kanén o gwashén: 
‘Hodáwand! Jáh jan o wati ásudagiay jágahá byá gón wati zóray ahd o karáray pétiá. 
Tai dini péshwáyán pahrézkáriay póshák gwará bát o tai wapádárén hezmatkár shádehiay kukkár bekanátant.”’ 
Pa wati hezmatkár Dáudá bechár o wati “rógen per moshtagéná” dawr maday. 
Hodáwandá gón Dáudá sawgendé wárt, kawlé korti o cha wati zobáná nabajjit, ke: “Man cha tai óbádagán yakké tai bádsháhi tahtá nádénán. 
Agan tai chokk, mani ahd o karáray sará bóshtant o mani hamá rahbandáni randgiriá bekanant ke manesh sója dayán, gorhá tai óbádag, tai bádsháhi tahtá nendant, tán abad.” 
Chéá ke Hodáwandá Sahyun dar chetag o pa wati menendjáhá dósti butag, gwashtagi: 
“É mani árámjáh ent, tán abad. Man hamedá wati bádsháhi tahtá nendán chéá ke dóstona bit. 
Man eshiá barkata dayán o ábáda kanán, eshiay garibán lápséra kanán. 
Man eshiay dini péshwáyán rakkagay pósháká gwará dayán o eshiay wapádárén mardom pa shádehi kukkára kanant. 
Man edá pa Dáudá kánthé ródénán o pa wati “rógen per moshtagéná” cherágé róka kanán. 
Eshiay dozhmenán, sharmsáriay pósháká gwará dayán o eshiay sar gón drapshókén tájéá borza bit.” 
