﻿Pédáesh.
5.
Ádamay nasl o padréchay ketábi kessah chosh ent: Hodáyá á róchá ke ensán jórh kort, wati sheklá jórhi kort. 
Mardén o janéni jórh kortant. Hamá wahdá ke addhi kortant, barkati dátant o áyáni námi ensán kort. 
Ádamá ke 130 sál but, wati paymén, wati sheklay mardénchokkéay pet but o áiay námi Sayt kort. 
Saytay pédáeshá rand, Ádamá 800 sál omr kort o áiá dega mardénchokk o janénchokk ham but. 
É hesábá Ádamá sarjamiá 930 sál omr kort o mort. 
Saytá ke 105 sál but, cha áiá Énósh pédá but. 
Énóshay pédáeshá rand, Saytá 807 sál omr kort o áiá dega mardénchokk o janénchokk ham but. 
É hesábá Saytá sarjamiá 912 sál omr kort o mort. 
Wahdé Énóshá 90 sál but, cha áiá Kenán pédá but. 
Cha Kenánay pédáeshá rand, Énóshá 815 sál omr kort o áiá dega mardénchokk o janénchokk ham but. 
Énóshá sarjamiá 905 sál omr kort o mort. 
Kenáná ke 70 sál but, cha áiá Mahalalél pédá but 
Mahalalélay pédáeshá rand, Kenáná 840 sál omr kort o áiá dega mardénchokk o janénchokk ham but. 
Kenáná sarjamiá 910 sál omr kort o mort. 
Wahdé Mahalalélá 65 sál but, cha áiá Yáred pédá but. 
Yáreday pédáeshá rand, Mahalalélá 830 sál omr kort o áiá dega mardénchokk o janénchokk ham but. 
Mahalalélá sarjamiá 895 sál omr kort o mort. 
Wahdé Yáred 162 sál but, cha áiá Hanuk pédá but. 
Hanukay pédáeshá rand, Yáred 800 sál omr kort o áiá dega mardénchokk o janénchokk ham but. 
Yáred sarjamiá 962 sál omr kort o mort. 
Wahdé Hanuká 65 sál but, cha áiá Metushálah pédá but. 
Metushálahay pédáeshá rand, Hanuká 300 sál Hodáay ráhá gáma jat o áiá dega mardénchokk o janénchokk ham but. 
Hanukay sarjamén omr 365 sál but. 
Hanuká Hodáay ráhá gáma jat o randá kassá nadist, chéá ke Hodáyá Hanuk zendagá zort o bort. 
Wahdé Metushálahá 187 sál but, cha áiá Lamék pédá but. 
Lamékay pédáeshá rand, Metushálahá 782 sál omr kort o áiá dega mardénchokk o janénchokk ham but. 
Metushálahá sarjamiá 969 sál omr kort o mort. 
Wahdé Laméká 182 sál but, cha áiá mardénchokké pédá but. 
Áiá wati chokk Nuh námént o gwasht: “É chokk márá cha may dastáni hamá gránén kár o zahmatán ásudaga kant ke cha Hodáay nálat kortagén zeminá chest butagant.” 
Nuhay pédáeshá rand, Laméká 595 sál omr kort o áiá dega mardénchokk o janénchokk ham but. 
Laméká sarjamiá 777 sál omr kort o mort. 
Nuhay omr 500 sál but o randá cha áiá Sám o Hám o Yápet pédá butant. 
