MAT 1:1 Yesus Kristus hohos na to mfi fefo: Yesus Kristus tait ybam raa mana ro Daud, tna Daud ybam raa mana ro Abraham.
MAT 1:2 Masmair rau to Abraham yabe Ishak, tna Ishak yabe Yakub, tna Yakub yabe Yehuda ysya yao na.
MAT 1:3 Tna Yehuda yasen yabe Peres ysya Zerah mbam fai Tamar. Tna Peres yabe Hezron.
MAT 1:4 Tna Hezron yasen yabe Ram, tna Ram yabe Aminadab, tna Aminadab yabe Nahason, tna Nahason yabe Salmon.
MAT 1:5 Tna Salmon yabe Boas ybam fai Rahab, tna Boas yabe Obed ybam fai Rut. Tna Obed yabe Isai.
MAT 1:6 Tna Isai yabe raja Daud, tna Daud yoo Uria yfain tna yabe Salomo.
MAT 1:7 Tna Salomo yabe Rehabeam, tna Rehabeam yabe Abia, tna Abia yabe Asa.
MAT 1:8 Tna Asa yabe Yosafat, tna Yosafat yabe Yoram, tna Yoram yabe Uzia.
MAT 1:9 Tna Uzia yabe Yotam, tna Yotam yabe Ahas, tna Ahas yabe Hizkia.
MAT 1:10 Tna Hizkia yabe Manasye, tna Manasye yabe Amon, tna Amon yabe Yosia.
MAT 1:11 Tna wore wo raa mfot raa ro Yahudi makah mamoʼt Babel to, Yosia yabe Yekhonya ysya yao na.
MAT 1:12 Raa ro Yahudi mamoʼt oo ro Babel to, Yekhonya yabe Sealtiel, tna Sealtiel yabe Zerubabel.
MAT 1:13 Tna Zerubabel yabe Abihud, tna Abihud yabe Elyakim, tna Elyakim yabe Azor.
MAT 1:14 Tna Azor yabe Zadok, tna Zadok yabe Akhim, tna Akhim yabe Eliud.
MAT 1:15 Tna Eliud yabe Eleazar, tna Eleazar yabe Matan, tna Matan yabe Yakub.
MAT 1:16 Tna Yakub yabe Yusuf ro yoo fai Maria, tna au mabe Yesus ro raa mtu Kristus tait.
MAT 1:17 Maban Abraham raa mabe mamo snok Daud raa mabe to, biin beta trion 14 firwas wa. Tna maban Daud raa mabe mamo snok raa ro Yahudi raa mfot tna makah mamoʼt oo ro Babel to, biin trion 14 firwas ye. Tna maban tahun reto snok mam Kristus raa fnya mabe to biin 14 firwas wa ye.
MAT 1:18 Masmair rau ro Yesus Kristus fai Maria mabe to fefo: Maria msya Yusuf mbewok mkir anya sai fares, menohe Maria mrok mhaf. Maria mhaf reto to, mbam Har ro Tuhan. Maria msya Yusuf mbewok mjin su fefares.
MAT 1:19 Tna Yusuf ynaut bait mam srau mato yawe yitsre Maria makus. Yusuf fi ait raa ro ja yno bo ro moof, tna ait ynaut yawe yno Maria masom mkair ma.
MAT 1:20 Yusuf ynaut bo reto kri-kri to, tna ait yjin smi. Ait smi ymat malaikatTuhan sau mbrah nenat kʼait tna mawe, “Yusuf, ku ro Daud yare: Waa ma. Noo Maria mamo nfain. Ku ro yhau kʼau mhaf retait tait ybam Har ro Tuhan meto.
MAT 1:21 Meen Maria mabe Ku ro sme sait. Nafan Ku retait yasom Yesus. Ait oh mi meen yoo riof ro mase yee kʼraa wAit. Tna re Allah yyon iro wana to.”
MAT 1:22 Tuhan yno bo weto beta mamo mnan si bo ro tiwya ykyas kʼanu raa wia. Tiwya ybis nabi rAit sait yama ykyas bo weto matim. Ait yawe,
MAT 1:23 “Ku sau ro ja mjin msya raa su fefares to, kbe mhaf tna mabe Ku sme sait. Tna kbe raa mtu Ku retait yasom Imanuel.” Yesaya 7:14 Imanuel mam mai ranu to 'Allah yatam anu'.
MAT 1:24 Yusuf yrok yasen. Tna yno bo ro malaikatTuhan riwai mawe kʼait: Ait yoo Maria mamo yfain.
MAT 1:25 Menohe Yusuf yjin su ysya au fee mamo snok mam ati ro au mabe Ku sme retait. Tna Yusuf yafan Ku retait ytu yasom Yesus.
MAT 2:1 Yesus fnya mabe mam remo ro Betlehem. Mam ti weto to Herodes yamo raja mam provinsi ro Yudea reto. Tna raa majus mama. Ana weto raa ro ja mhar bo. Ana mbam ati ro ayõ maut mama snok mam kota ro Yerusalem.
MAT 2:2 Ana mtu sas mawe, “Fnya mabe Ku sait ro meen yamo Raja raa mana ro Yahudi. Ait yhau mam woyõ? Amu nmat sken rAit snok mam ati ro ayõ maut. Tna amu nwe nma nbaut Ait fo.”
MAT 2:3 Raa ro Yerusalem mari feto tna mrok ktak sai. Tna fo raja Herodes yari feto tna yrok ktak ye.
MAT 2:4 Ait ytu raa manes ro Yahudi mama siret beta: Ait ytu imam manes wana msya guru agama wana beta mama mo kʼait. Ana beta mama. Tna Herodes ytu sas kʼana yawe, “Mesias, ro Allah ysok re kbe yoo riof ro mase yee kʼraa tait, kbe fnya mabe mam wore woyõ?”
MAT 2:5 Tna ana mawe, “Bokom ro Allah mkyas mawe kbe fnya mabe Ait mam remo ro Betlehem, provinsi ro Yudea. Reto mamyot bokom ro nabi ranu sait tiwya ykom:
MAT 2:6 ‘Remo ro Betlehem mam provinsi ro Yehuda to remo ro maku sau. Remo roto taro to maku ye. Menohe remo ro Betlehem to remo ro ati: Kbe mamo remo ro masom. Meen Raa sait fnya mabe mam Betlehem. Tna Ait yamo aban mana ro yase ybo raa ro Allah wAit. Meen Ait kmot raa ro Israel.’”
MAT 2:7 Raa manes weto siret mkak. Tna fo Herodes yamo wai ytu raa majus weto mama mo kʼait. Tna ait ytu sas kʼana yawe, “Tija oh mi anu nmat sken reto frok to?”
MAT 2:8 Tna fo Herodes ybis ana yawe, “Nsen nmoʼt Betlehem. Nmo ntu sas bo ro Ku retait kaket. Tna soh nkai Ait to, hah ne nma nwe kʼjõ iti afo re jõ tamo tna tbaut Ait ye.”
MAT 2:9 Ana mari bo ro raja Herodes yawe kʼana tna masen mamo. Ana mamo tna mmat sken ro tiwya ana mmat mam ati ro ayõ maut. Sken reto mamo matim, tna ana kro mamo tis. Sken reto mamo mamo snok mam uu abyõ wore ro akut retait yhau.
MAT 2:10 Ati ro ana mmat sken reto to, ana simaut mase.
MAT 2:11 Ana mamoʼt amah reto tna twok mam mato. Ana mmat ku retait ysya yme Maria, tna ana maka mbaut Ait. Tna ana trah surah wiak wana beta tna moo bofan wana mafan Ku retait. Bo ro ana mafan to emas,kemenyan msya mur.
MAT 2:12 Tna Allah yinyam bo kʼana mkah bosmi yawe, “Hah ne nmo no kʼraja Herodes ma!” Tna ana mari feto tibyo hah me mamo iso roto mamo bana.
MAT 2:13 Raa ro majus weto hah me mamo oh. Tna Yusuf yjin smi. Ait smi ymat malaikat ro Tuhan sau mawe, “Nasen fooh! Tubat Ku retait nsam nsya yme nmoʼt negri ro Mesir. Raja Herodes srau kair yawe yama saso ku retait yame. Namoʼt Mesir tna ste wea. Nhau mam beto mamo snok mam wore wo Jõ tbis anu nhah ne nma.”
MAT 2:14 Tibyo mti reto to, Yusuf yasen fooh, teta ku retait tna ysya yme msam mamoʼt Mesir.
MAT 2:15 Ana mamoʼt Mesir to, mhau mam beto mamo snok mam ti ro Herodes yhai. Ana mhar mawe Herodes yhai, tna ana hah me mamoʼt tabam rana. Ana mbam Mesir hah mama mnan si bo ro tiwya Tuhan ybis nabi rAit sait ykyas wia yawe, “Jõ ttu Ku aJõ yama ybam Mesir.”
MAT 2:16 Ati ro Herodes yhar he raa majus weto sioh ait to, ait kmo toni. Tna ait ybis raa wait mamo mame ku mkek ro sme. Ybis ana mame ku sme ro mhau mam Betlehem msya remo ro mhau kait mam beto sor to, majat beta. Ait ynaut yawe tiwya raa majus mama saso ku mkek sait ro umur tahun ewok mamo ti te fares. Feto Herodes ybis raa mame ku sme weto beta.
MAT 2:17 Bo reto mnan si bo ro tiwya Allah ybis nabi Yeremia ykyas wia yawe,
MAT 2:18 “Ku mkek mam rabin ro Rama to marak beta. Tibyo fnya ro mhau mam beto sraujin tna mawia. Rahel mawia ku mkek wau. Tna au hawe raa mama mkyas bokyas moof msya au afo re kbe au sorni sraujin rau reto.”
MAT 2:19 Yusuf ysya Maria mhau mam negri Mesir fares tna raja Herodes yhai. Ti sau Yusuf yjin smi ymat malaikat ro Tuhan sau mama mawe kʼait mawe,
MAT 2:20 “Nasen oh! Tubat Ku retait tna ysya yme hah ne nmoʼt negri ro Israel. Tiwya Herodes yawe yame Ku retait. Menohe Herodes yhai oh.”
MAT 2:21 Yusuf yrok yasen tubat Ku retait tna ysya yme hah me mamoʼt Israel.
MAT 2:22 Tna Yusuf yari he Arkhelaus yamo raja mam provinsi ro Yudea shauk yuk ro yaja Herodes. Feto tibyo Yusuf waa yamoʼt Yudea fee. Menohe Tuhan yerif bo kʼait mkah bosmi, tna ybis ait yamoʼt provinsi ro Galilea.
MAT 2:23 Ait yamo yhau mam remo ro Nasaret. Yhau mam Nasaret to, mnan si bo ro tiwya Allah ybis nabi wAit mama mkyas wia mawe, “Ait tait, kbe raa mtu mawe, ‘Ait raa ro Nasaret’ to.”
MAT 3:1 Yohanes ro ja baptis raa tait yamo ykyas bo ro Allah. Yamo yhau mam tabam ro riamo sau mam provinsi ro Yudea. Ait ykyas yawe,
MAT 3:2 “Nashana fooh! Allah siwyan yamo Raja ytu raa wAit mama ybo fo.”
MAT 3:3 Yohanes oh mi tiwya nabi Yesaya ykyas wia yawe, “Meen raa sait kbe yama ykyas bo woJõ mam yuk ro riamo sau. Ykyas yawe, ‘Mbetrot iso mkah Tuhan yama! Nisoh iso kʼAit!’”
MAT 3:4 Yohanes yyum ratan ro ja raa sne mbam unta mawyan. Tna ykyar hotom ro mbam kak marak ye. Ja ait yabo mo msya yata kum maya ro mbam safom sai.
MAT 3:5 Tna raa mbam kota ro Yerusalem, raa mbam remo makin mam provinsi ro Yudea reto ye, msya raa makin ro mhau mam aya maam ro Yordan to, ana weto sor mama mo kʼYohanes.
MAT 3:6 Ana mama mo kʼAit tna mras iro wana. Tibyo Yohanes baptis ana mam aya ro Yordan reto.
MAT 3:7 Raa ro Farisi msya raa ro Saduki mawat mama mo kʼYohanes ye. Ana mawe ait baptis ana ye. Menohe ait yastako ana yawe, “Anu to, raa ro nmo wan-wan nfi aban kume! Awya ykyas bo kʼanu yawe Allah kmo tna meen yno bo ro mkair mbtek mai kʼanu? Awya ykyas feto tna re anu nhar nwe nsam nma saso riof kʼanu?
MAT 3:8 Nashana! Nno bo moof. Tna kbe raa mhar mawe anu nashana oh.
MAT 3:9 Soh anu nno feto to, anu nfi kake mara ro mros make mawat tna moof. Allah yatem ybo baam oh. Ait siwyan yfat ara. Kake mara ro make rau mkair to, kbe Ait yfat tna yoo beak mam tafoh makus mait. Anu ja nnaut nwe, ‘Amu fo kube ro Abraham wait renti. Feto to kbe Allah yno riof kʼamu fea!’ Menohe mfe; nnaut feto ma! Allah yatak haberek fraa wefo mamo kube renti ro Abraham wait ye!
MAT 3:11 Jõ baptis anu mkah aya sai. ⌞Reto mawe anu nashana oh.⌟ Jõ tama wia tatim. Tna Ait ro yase yiwer jõ sait kbe yama yrof jõ. Jõ fi raa ro taku sai. Kbe tbo sandal ro yse yaa rAit to fee. Jõ toof mnan si fee. Ait yama to, meen baptis anu mkah Har ro Tuhan. Tna Ait baptis anu mkah tafoh ye.”
MAT 3:12 Tna Yohanes yawe, “Ati ro raa sait ygi gandum rait to, ja ait yoo gandum makan rau yse hayah tna yoo marak rau to yse hayah ye. Tna gandum makan reto ybu mam gudang sau. Tna marak rau to, kbe yko mam tafoh. Tafoh reto raa mtai mikabuk fee. Mesias tait siwyan re kbe yno bo mfi feto kʼraa ye.”
MAT 3:13 Yohanes yhau mam aya Yordan fares to, Yesus ybam provinsi ro Galilea yama. Yesus yama yawe Yohanes baptis Ait ye.
MAT 3:14 Menohe Yohanes yawe kʼYesus yawe, “Jõ hawe baptis Nyõ. Nyõ raa ro nase. Jõ fi raa kinyah sai. Maami Nyõ baptis jõ menohe Nyõ nawe jõ te baptis Nyõ fyi?”
MAT 3:15 Menohe Yesus yawe, “Nnaut bo myum-yam ma. Nama sai baptis Jõ. Anu bno bo wefo mamo mnan si bo ro Allah ksoh beta oh meto.” Yohanes yari feto, tibyo baptis Yesus.
MAT 3:16 Yohanes baptis Yesus, tna Yesus frok ybam aya yaut. Frok si fo, ayoh twat. Tna Yesus ymat Har ro Tuhan haberek mnan fi ruu merpati sau. Ruu reto fru mama mroh abyõ kʼAit.
MAT 3:17 Tna raa mari mai sau mbam ayoh mawe, “Ait tait akut aJõ ro Jõ thafri. Ait tait, Jõ thaf mnan!”
MAT 4:1 Tna Har ro Tuhan yakah Yesus yamoʼt yuk ro riamo sau. Yamo re kbe kabes yabi (Iblis) yama sanet Ait.
MAT 4:2 Tna Yesus yhau bo yait ti trion 40 msya ayõ trion 40 ye. Tibyo yhai sre.
MAT 4:3 Tna kabes yabi ro ja sanet raa to yama sanet Ait yawe, “Soh Nyõ Ku ro Allah yare meto mi, sik nno fraa wefo haberek mamo roti re Nyõ nait.”
MAT 4:4 Menohe Yesus yisboh kʼAit yawe, “Bokom ro Allah mawe, ‘Raa taro mhau to, mnaut boit ro mait sai yoyo. Menohe ro moof to, raa mhau mnaut Watum ro Allah yoyo tna mbo mno.’”
MAT 4:5 Tna fo kabes yabi yakah Yesus yamoʼt kota Yerusalem. (Ja raa mawe kota reto to, kota ro Allah rAit.) Ana mamoʼt Samu ro Allah tna kabes yabe yse Yesus yros abyõ mam timanaf rau, ro miyõ toni.
MAT 4:6 Tna yawe kʼYesus yawe, “Soh Nyõ fi Ku ro Allah yare meto mi, sik nitsre Nyõ mbtek namo nai mam tabam mte. Bokom ro Allah mawe, ‘Kbe Allah ybis malaikat wAit swiõ wea huwya mfot Nyõ abyõ sai. Ana kbe mfot Nyõ abyõ sai mkah matem wana re naa mai mam fraa fee.’”
MAT 4:7 Menohe Yesus yawe, “Bokom ro Allah mawe ye mawe, ‘Tuhan Allah ro ja anu smot to, sanet Ait ma.’ Ulangan 6:16 Feto ye Jõ hawe kro bo ro nyõ nawe weto be kbe Jõ sanet Allah.”
MAT 4:8 Tna fo kabes yabi yakah Yesus yaut atu mana ro miyõ wer. Tna yerif bangsa ro arin aso beta fo kʼAit. Tna yerif bo mase ro bangsa weto kʼAit ymat ye.
MAT 4:9 Tna yawe, “Soh Nyõ naka mte nbaut jõ to, kbe too bo wefo beta tsan kʼNyõ.”
MAT 4:10 Menohe Yesus yisboh kabes yabi yawe, “Bo ro nyõ nawe reto to, Jõ hawe bo tno ye. Nasen namo! Bokom ro Allah mawe yum mawe: ‘Nbaut Tuhan Allah yesait aran, tna bo ro Ait yesait aran yawe to, nbo nno.’”
MAT 4:11 Tna kabes yabi yasen sikba Yesus akus yamo. Tna fo malaikat baro mama matam Ait.
MAT 4:12 Yohanes, raa mfot mamo mbu mam bui oh. Yesus yari feto, tibyo hah yamoʼt provinsi ro Galilea.
MAT 4:13 Ait sikba remo ro Nasaret tna yamo yhau mam remo ro Kapernaum. Kapernaum mhau mam aya maam ro Galilea. Tiwya tinyi rabin reto tabam ro Zebulon ysya Naftali rana.
MAT 4:14 Yesus yhau mam rabin reto to, afo re yno mnan si bokyas ro tiwya Allah ybis nabi Yesaya yama ykyas wia yawe,
MAT 4:15 “Tabam ro Zebulon ysya Naftali rana to, kene mam aya maam. Rabin reto to, mamo snok mam aya ro Yordan majoh to, ja raa mtu mawe rabin ro Galilea ye. Ana ro mhau mam rabin reto to, raa mana ro Yahudi fee.
MAT 4:16 Tiwya ana wase Allah. Ana mfi raa ro mhau mam amur yoyo sai. Tna ana mmat kek ro mase. Tna kek reto merif iso kʼraa ro mhau mam wore mamur to, re kbe ana masu mmat bo ye.”
MAT 4:17 Tna mam wore wo Yesus yamo yhau mam Kapernaum to, Ait yasen wosa yawe, “Nma fooh! Nashana! Allah siwyan yamo Raja tna re ybo anu. Ait ytu raa wAit mama fooh.”
MAT 4:18 Ati sau fo, Yesus yamo mam maru ro Galilea maam. Yamo tna ymat raa mabo ewok mse jala rana mam maru mfot syoh. Ana mbewok ja makam maru. Sait yasom Simon-Petrus tna ysya yao Andreas.
MAT 4:19 Tna Yesus ytu kʼana mbewok yawe, “Nma kro Jõ. Kbe Jõ tbis anu nmo nfot raa.”
MAT 4:20 Ana mbewok mari feto, tibyo masen fooh sikba jala wana makus. Tna mbewok kro Ait mamo.
MAT 4:21 Ana mamo tna mmat Yakobus ysya yao Yohanes. Ana bewok weto to ku ro bi Zebedeus wait. Ana mbewok msya maja rana hre mam wiak tna misoh jala wana. Tna Yesus ytu ana mbewok mama kro Ait.
MAT 4:22 Ana mari si to, mbewok masen sikba maja rana ysya wiak rana akus tna kro Yesus mamo ye.
MAT 4:23 Tna Yesus yamo yur mam provinsi ro Galilea beta. Yamo ykyas bo mam samu watum makin ro Yahudi. Ait wosa Bokyas ro Moof kʼana. Bokyas moof reto to, mkyas wore wo Allah yamo Raja ybo raa mana rAit. Tna Yesus yisoh raa ro kiyam moof beta ye. Tna ana ro ssafo fee; Ait yisoh tibyo ana metsu matak ye.
MAT 4:24 Bo ro Ait yno weto to, hahah mamo mur mtan mam provinsi ro Siria beta. Tibyo raa makah raa ro mafa bo ro knik-knak sor mama mo kʼAit. Ana weto taro to kabes mbo, tna taro to kiyam ro ruu mber, taro to maa msya matem mhai ye. Ana ro kiyam wofo fo Ait yisoh tibyo mrok moof beta.
MAT 4:25 Ait yno bo weto tibyo raa mawat kro Ait. Raa weto sor to, taro mbam provinsi ro Galilea, taro mbam rabin ro Dekapolis, taro mbam kota ro Yerusalem, taro mbam provinsi ro Yudea, tna taro ye mbam aya ro Yordan maam jaro ye.
MAT 5:1 Yesus ymat raa mawat. Feto tibyo Ait yaut yamoʼt faut mana sau. Ait hre tna kuber wAit (murid-murid) mama mo kʼAit.
MAT 5:2 Tna Yesus huwya watum ana yawe,
MAT 5:3 “Raa taro mhar mawe ana raa ro soso sai tna ana msam wai kʼAllah. Ana kbe mhau simaut mase. Ana oh mi raa mana ro Ait yamo Raja ybo.
MAT 5:4 Raa taro mnaut iro ro ana mno, tibyo sraujin toni. Kbe Allah yisoh ana mhaf tibyo mhau simaut mase.
MAT 5:5 Raa taro to mhaf sneh. Ana oh mi kbe mhau simaut mase. Kbe Allah ysan tabam refo kʼana.
MAT 5:6 Raa taro mhai sre msya mhai sbit mno bo ro Ait ksoh. Ana kbe mhau simaut mase ye. Kbe Ait yno ana mhaf mnan.
MAT 5:7 Raa taro ja matmof raa anya. Ana kbe mhau simaut mase ye. Kbe Allah yatmof ana.
MAT 5:8 Raa taro to mato mboh tna srau sau mno bo ro Ait ksoh yoyo. Ana kbe mhau simaut mase ye. Ana weto oh mi meen mmat Ait mam rabin rAit.
MAT 5:9 Raa taro ja makah iranya mama. Ana kbe mhau simaut mase ye. Kbe Allah ytu ana yawe ku wAit.
MAT 5:10 Raa taro ja mbo Watum rAit mno; tibyo raa roto sikowah ana. Ana kbe mhau simaut mase ye. Ana weto raa ro kbe Allah yamo Raja ybo to. Tna kbe mhau msya Ait mam sawro rAit ye.
MAT 5:11 Anu taro smot Jõ. Feto oh mi kbe raa mamus anu, tna mawe kair anu tna mno bo ro mkair btek mai kʼanu bo to. Kbe anu weto nhau simaut mase ye.
MAT 5:12 Nnaut nabi na ro tiwya Allah ybis mkyas bo wAit to, nnaut nwe tiwya raa sikowah ana feto ye. Feto to, simaut mase sai. Meen Allah yoo boren ro mase mam sawro rAit tna yaren anu weto ye.”
MAT 5:13 Tna Yesus fret bo yawe, “Anu nfi haa kʼraa ro tabam refo beta. Haa to, ja mafah moof. Menohe mfi bo haa reto mafah fee; kbe raa mno fyi re kbe haberek mafah u? Mafer rau aro u fee. Haa reto raa moo mbeak mam iso. Tibyo raa ro mamo-me sor to, mber kait-kat sai.
MAT 5:14 Anu nfi kek ro mram raa ro tabam refo beta. Kota ro mhau abyõ mam faut mana to, ja raa mne mmat kek reto. Kbe raa beta mmat tu oh!
MAT 5:15 Feto ye, ja raa mbet tafoh (pelita) afo re ntara raa ro twok mam amah mato. Raa moo tafoh mse mte tna moo ember burut wa fee. Tafoh reto to, ja raa hero abyõ afo re kbe kek ntara tna raa ro mama twok mam amah mato reto mmat bo.
MAT 5:16 Nno bo ro moof kʼraa. Nno feto afo re raa mmat bo moof ro anu nno tibyo ana mbaut Bja ranu ro yhau mam sawro rAit.”
MAT 5:17 Tna Yesus yawe, “Tiwya Allah ybis Musa ysya nabi wAit mama mkom watum rAit. Tna Jõ tama re tbo tno bo ro Watum reto mbis. Tawe tno beta mnan si. Nnaut nwe Jõ tama re kbe beak Watum reto makus to ma.
MAT 5:18 Nri kaket: Mam wore wo ayoh msya tabam refo makyon rau sboh fefares to, Watum ro Musa reto kbe mabo beta tu oh. Watum reto to, maja rau sau ro maku to, kbe susre fee.
MAT 5:19 Feto to, niwana Watum reto maja ro maku sau to ma. Nkyas kʼraa roto to, nbis ana miwana Watum reto msya anu to ma. Awya ro yiwana Watum ro Musa feto kbe mamo raa ro mase mam wore wo Allah yamo Raja ybo raa mana rAit to fee. Meen ait retait tait yaku kosion sai. Nbo Watum reto nno kaket. Tna nkyas kʼraa re ana mno kaket ye. Awya ro ybo Watum ro Musa matak feto, meen yase mam wore Allah yamo Raja ybo raa mana rAit.
MAT 5:20 Nri oh! Nnaut oh: Guru agama ro Yahudi msya raa ro Farisi to, ana mno bo ro Allah ksoh kaket fee. Soh anu nno bo mamyot bo ana ja mno to, meen anu nmo raa ro Allah yamo Raja ybo to fee. Soh anu nwe nmo raa ro Allah yamo Raja ybo to, nno bo ro Ait ksoh kaket.
MAT 5:21 Nri oh: Tiwya hohos na wanu mkyas Watum ro Musa kʼanu mawe: ‘Nme ajat ma.’ Keluaran 20:13 Awya ro yame ajat to, kbe raa mfot tna makah mamo mbu mam bui.
MAT 5:22 Menohe Jõ tawe kʼanu tawe: Awya ro kmo raa roto to, kbe Allah ytu safo reto yari tu oh. Feto ye awya ro yawe kair raa roto yawe, ‘Namboi!’ to, kbe raa manes ro ja mtu srah ro Yahudi to, mtu srah reto mari ye. Tna awya ro yamus raa taro yawe, ‘Nyõ wase bo!’ to, kbe Allah yfot Ait beak yamo yait mam tafoh ro rabin kair ye.
MAT 5:23 Feto to, soh anu nbo bosan sau tna nmoʼt wohat (mezbah) nwe nsan bo reto kʼAllah to, nnaut wia. Nmo tna anu nnaut bo ro tii anu nno mkair mai kʼraa roto to,
MAT 5:24 noo bosan reto nse bris agus wia. Tna fo nmo nisoh niranya nsya raa retait wia. Tna ne hah ne nmo noo bosan ranu riwai reto nsan kʼAllah.
MAT 5:25 Mfi bo anu sait nsya raa sait kmo anya. Tna anu mbewok kbe nmoʼt amah ro raa mtu srah. Rau ro moof to, anu mbewok nisoh niranya fooh, tna nfot ntem anya mam iso maka. Soh mfe to, kbe sait yamo ysan sait kʼraa manes re mkyas safo reto. Tna fo raa manes mbis anu nmo no kʼait ro ytu srah yari. Tna fo bi ait ysan anu renti kʼait ro ja ybu raa mam bui mato.
MAT 5:26 Nri kaket: Kbe anu sait raa mbu mam bui mato mamo snok mam ayõ ro ait hrat bo raa ska wia. Tna fo ait frok ybam bui mato reto.
MAT 5:27 Anu nhar watum ro tiwya Musa ykyas kʼanu hohos na. Ait yawe: ‘Nwyah ma.’
MAT 5:28 Menohe Jõ tawe kʼanu tawe: Awya sai ro ymat sas fnya re srau oot-oot to, ait retait ywyah ysya au reto mam yhaf mato oh meto.
MAT 5:29 Soh anu nsu makan ati ro tem ati misti re anu nno iro to, bo mkair. Ro moof to, tufrok nsu makan reto beak makus to. Soh anu nhau nkah nsu makan jaro mesait aran sai to, moof baro ye. Menohe soh anu nhau nkah nsu ro misti re anu nno iro to, kbe tis rau to anu fri kair sai. Kbe Allah tubat anu nkah netsu wanu, beak mam rabin ro arin kair reto (neraka).
MAT 5:30 Tna soh anu ntem ati misti re anu nno iro to, mkair meto. Ro moof to, sbi ntem reto beak war makus. Soh anu nhau nkah ntem jaro mesait aran sai to, moof baro ye. Menohe soh anu nhau nkah ntem ro misti re nno iro to, kbe Allah ybis anu netsu beta nmoʼt rabin ro arin kair reto.
MAT 5:31 Anu nhar watum ro tiwya Musa ykyas kʼanu hohos na. Ait yawe: ‘Awya ro yako yfain makus to, yako hawe sai ait ykom aam sau yee kʼau mbo. Ykom yawe ait yako yfain.’
MAT 5:32 Menohe Jõ tawe kʼanu tawe: ‘Soh fai sau mwyahte fee; yako hawe sai raa yako fai au makus to ma. Soh ait bitsre au makus to, ait retait mi yisti re au mwyahte ye. Tna raa ro yoo fai reto riryõn to, ait ywyahte ye.’
MAT 5:33 Anu nhar watum ro tiwya Musa ykyas kʼanu hohos na. Ait yawe: ‘Soh anu sait ytom Allah yasom afo re raa mhar mawe bo ro ait ykyas to, ait ykyas yaja bait oh, ykyas sioh fee; tna soh ait sumpah bo ytom Allah yasom feto; yako hawe sai kbe ait yno bo reto tu oh.’
MAT 5:34 Menohe Jõ tawe kʼanu tawe: Soh anu sumpah bo to, ntom Allah yasom ma! Allah hre abyõ mam sawro rAit tna ybo raa wAit. Feto to masi mawe anu sumpah bo ntom sawro rAit ye. Allah hre ybo raa wAit mbam tno.
MAT 5:35 Feto ye sumpah bo ntom tabam refo masom to ma: Allah tait ybo tabam refo ye. Tna sumpah bo ntom kota ro Yerusalem masom to ma: Yerusalem to kota Raja ro Yase ybo ye meto.
MAT 5:36 Tna sumpah bo ntom nna to ma: Mfi bo anu nna mboh to, anu aro ntai ntak nno nna mawyan sau haberek mamo safe fee. Tna anu ntai nno ro safe sau haberek mamo mboh bo fee ye.
MAT 5:37 Ati ro anu nkyas bo to, nwe ‘Ae’ sai. Tna nwe ‘Mfe’ sai. Soh anu nkyas bo niwer to, reto mbam kabes yabi (Iblis) oh meto.
MAT 5:38 Anu nhar watum ro tiwya Musa ykyas kʼanu hohos na. Ait yawe: ‘Nsu ska nsu, tna nbait ska nbait ye.’
MAT 5:39 Menohe Jõ tawe kʼanu tawe: Raa ro mawe mno bo mkair mai kʼanu to, nno wa ma. Soh raa miban natni ranu jaro to, haberek noo natni ro ati jaro nee kʼana miban ye.
MAT 5:40 Mfi raa sait yawe bomhaam wait mhau kʼnyõ. Soh ait yawe ytak ratan anyõ sau to, nee sai. Tna noo ratan anyõ roto taro ye niryõ nee kʼait.
MAT 5:41 Tna soh raa yama tna ybis anu nsom bo wait nmo iso kilo mara sau to, nno sai. Tna fo ne nsom soro nmo kilo mara sau naut.
MAT 5:42 Tna soh raa mayoh bo kʼanu to, noo nee sai. Feto ye soh raa mayoh bo kʼanu tna mawe kbe me misroh to, nee sai. Nbe ma.
MAT 5:43 Anu nhar watum ro tiwya Musa ykyas kʼanu hohos na. Ait yawe: ‘Nksoh raa ro mno bo moof kʼanu. Tna knait raa ro mamo byoh kʼanu to.’
MAT 5:44 Menohe Jõ tawe kʼanu tawe: Natmof raa ro mamo byoh kʼanu. Skabuk raa ro sikowah anu ye.
MAT 5:45 Nno feto afo re kbe anu nno bo mfi anu Nja ranu ro yhau mam sawro rAit to. Allah yno ayõ moo maut to, yno mkah raa ro ja mno bo mkair ye tna raa ro ja mno bo moof ye. Tna Allah yno oom mais to, yno mkah raa ro mno bo ro Ait ksoh ye tna mkah raa ro mno bo ro Ait knait ye.
MAT 5:46 Soh anu natmof raa ro ja matmof anu sai aran to, kbe Allah ymat tibyo yoo boren yaren anu aro fee. Raa ro ja moo namabyoh (pajak) to, ana ja matmof raa ro matmof ana feto ye.
MAT 5:47 Tna soh anu nmah meen kʼraa wanu mesait aran to, raa beta ja mno feto ye. Nno feto to, nyõ nno bo ro moof miwer ana oh meto fee. Ja raa ro wase Allah to, ana ja mno bo ro anu nno weto ye oh.
MAT 5:48 Feto to, nno bo ro moof mnan si, mfi anu Nja ranu ro yhau mam sawro rAit ja yno to.”
MAT 6:1 Tna Yesus yawe, “Nno bo skabuk ranu mam wore wo raa mamo-me ma. Nno bo weto afo re raa mmat anu to ma. Soh anu nno bo moof afo re raa mmat anu sai, anu Nja ranu ro yhau mam sawro rAit to, kbe yoo bo aro yaren anu fee.
MAT 6:2 Feto to, soh anu nsan bo kʼraa ro suawe to, tawyõ anu kʼraa afo re ana mmat nyõ to ma. Raa ro sioh ana sai ja mno feto. Ana ja mno feto mam samu watum tna mam iso mabi afo re raa mmat ana tna bibi ana. Jõ tawe kʼanu tawe, ana weto mkai boren wana beta oh.
MAT 6:3 Menohe anu fo, ati ro anu noo bo nee kʼraa to, nee shait banu sai afo re raa roto mhar to ma.
MAT 6:4 Natmof raa nfi feto afo re raa roto mhar bo ye ma. Nno feto tna anu Nja ranu ro yhau mam sawro rAit yesait aran yhar. Ait yesait aran yhar bo ro nyõ nno wai reto tna kbe Ait yisroh riryõn kʼanu.
MAT 6:5 Anu skabuk to, skabuk kaket. Raa ro ja sioh ana sai to, ja skabuk ye. Ana ja ksoh skabuk mam samu watum wanu. Tna ana skabuk mam iso mabi mbra ye. Ana mno feto afo re kbe raa mmat ana, tna bibi ana. Ana weto mkai boren wana oh. Meen Allah yoo boren rouu yaren ana aro fee. Anu to, skabuk mfi feto ma.
MAT 6:6 Soh anu nwe skabuk to, twok nmoʼt amah mato, tna nuut mato wa. Tna skabuk Nja ranu ro ja yhau wai. Tna kbe anu Nja ranu ymat bo anu skabuk wai feto, kbe yari anu ye.
MAT 6:7 Soh anu skabuk to, skabuk ntru nmo ne nfi raa ro wase Allah sai to ma. Bo skabuk rana to miyõ wer. Ana skabuk miyõ wer feto tna mnaut mawe reto oh mi kbe Allah yari.
MAT 6:8 Nno bo nnan fi ana mno feto ma. Anu nyoh bo fefares to, Nja ranu yhar bo ro anu nyoh weto oh.
MAT 6:9 Feto skabuk fefo: Nyõ fi amu Nja ramu ro nhau mam sawro aNyõ. Nno re kbe raa mari tibyo bibi Nyõ nasom aNyõ.
MAT 6:10 Nasen namo Raja tna nama nbo raa woNyõ. Bo ro Nyõ ksoh to, ja raa mbo mno mam sawro aNyõ oh. Nno re raa ro mhau mam tabam refo mbo mno bo ro Nyõ ksoh mfi feto ye.
MAT 6:11 Ifo to, amu nyoh boit mbam kʼNyõ natem aNyõ re boit wamu to mabut fee.
MAT 6:12 Nyon iro wamu sor. Nyon iro wamu mnan fi amu nesait ne nhaf moof nsya raa anya ro mno bo ro mkair mai kʼamu ye.
MAT 6:13 Tna nakah amu namo mam wore wo bosanet aro besruf amu to ma. Nama nitsnok amu frok nbam wore wo mkair-kar. [Nyõ Allah ro nase. Nyõ natak nbo ayoh msya tabam refo. Kbe raa bibi Nyõ maban mfo refo mamo snok mam hame wajin ye. Amin: Mabo oh.]
MAT 6:14 Soh raa mno iro mai kʼanu to, nhau nhaf kair ma. Sorni bo mkair ro ana mno mai kʼanu weto sai. Ne nhaf moof u, tna kbe anu Nja ranu ro yhau mam sawro rAit tait, yatmof anu tna yyon iro wanu ye.
MAT 6:15 Menohe soh anu nhaf kair tna knait raa ro mno iro mai kʼanu to, kbe Nja yyon iro wanu fee ye.”
MAT 6:16 “Ti aro raa mhau bo mait afo re ana skabuk kaket. Soh anu nhau bo niit feto to, nno nsu wanu mkair nfi raa ro ja sioh ana sai mno to ma. Ana mno masu mkair afo re raa mhar mawe ana mhau bo mait. Jõ tawe kʼanu tawe ana mkai boren wana beta oh. Kbe Allah yoo bo aro yaren ana fee.
MAT 6:17 Menohe soh anu nhau bo niit afo re skabuk to, nyon nsu wanu, tna shat nna wanu ye.
MAT 6:18 Afo re raa aro wase bo anu nno nhau bo niit. Soh anu nno feto kbe anu Nja ranu ro yhau wai tait yesait aran yhar bo ro anu nno wai reto tna kbe Ait yoo boren yaren anu ye.”
MAT 6:19 Tna Yesus yawe, “Nme kta mam tabam refo ma, kbe bo mabat, hesik mait, tna raa mama mitrah amah msyõf kta wanu weto, makah mamo ye.
MAT 6:20 Menohe nme kta wanu mam sawro ro Allah rAit wea. Mam sawro reto kbe bo mabat fee, hesik mait fee, tna raa ro mama msyõf bo to marak ye.
MAT 6:21 Soh anu nme kta wanu mam tabam refo fo, kbe nhaf wanu mnaut kta weto sai. Menohe soh anu nme kta wanu mam sawro ro Allah to, kbe anu nhaf nnaut sawro rAit yoyo ye.
MAT 6:22 Anu nsu wanu to, mfi lampu ro ntara anu oh meto. Soh nsu moof to, mno netsu wanu mram. Tibyo nsu maah ye. Soh anu nri watum tna nbo nno to, anu nmo mam kek reto yoyo oh meto.
MAT 6:23 Menohe soh anu nri tna nbo nno fee; kbe anu nfi raa ro masu mti. Kbe anu nhau mam mamur sai. Tna soh anu nmo mam wore wo mamur to, feto kbe mamur reto to, mrok mamur htoh toni.”
MAT 6:24 Tna Yesus yawe, “Ja sryan sait yno bo ro bobot sait aran sai. Ait yno bo ro bobot mabo ewok brio-brio to fee. Kbe ait knait bi ait sait tna ksoh bi ait sait. Kbe ait yari bo ro bobot sait yawe, tna yiwana bo ro bobot sait yawe. Feto to tawe kʼanu tawe: Nno bo ro Allah wAit sai aran. Saso kta ro tabam refo ye ma. Anu raa ntai nkro iso ewok weto su fee.”
MAT 6:25 Tna Yesus yawe, “Feto to, Jõ tawe kʼanu tawe: Nnaut yyi bo ro tabam refo toni to ma. Nnaut nfos wanu to, nnaut nwe nfos wanu to bo ro ati. Tna nnaut yyi boit ro kbe anu niit to ma. Nnaut netsu wanu to, nwe bo ro ati to ma. Tna nnaut yyi ratan ro kbe anu nyum to ma.
MAT 6:26 Sik nmat ruu ro mfru mam ayoh to. Ruu to ja wase bo mkah. Tna wase bo siwyan boit ye. Tna wase sgi gudang ro moo boit mse ye. Menohe anu Nja ranu ro yhau mam sawro rAit tait, Ait siwyan boit kʼana mait. Tna anu raa fo, Ait ymat anu kaket miwer ruu to.
MAT 6:27 Awya ro ytai yirenti yamos rait kebet naut? Anu nkin wefo fo, soh anu naut yyi bo ro tabam refo yoyo to, reto mafer marak. Allah oh mi Raa ro ybo anu nmos wanu. Allah yesait aran ytai yirenti raa mamos wana.
MAT 6:28 Tna bawya mno re anu nnaut yyi ratan ro nyum to. Sik nmat sas bosafom ro moo mam smok. Tafuf wau weto mesait moo sai. Tafuf weto mur-mur saso boit fee. Bosafom ja msui mfen ratan ro myum to fee. Menohe Allah yno bo weto moof toni.
MAT 6:29 Tiwya raja Salomo yyum ratan ro moof wer. Menohe Allah yno tafuf weto moof toni miwer. Raja Salomo, ratan rait moof mfi bosafom tafuf wau to fee.
MAT 6:30 Allah yno re bosafom ro moo mam smok ifo moo boti waor sai. Menrabu to, raa mama mkah mkak. Mhau boti waor sai, menohe Allah fayir bosafom reto. Ait yno tafuf rau moof toni. Tawe, Allah ymat anu tna ksoh anu toni miwer bosafom reto. Feto to nnaut yyi ratan ro anu nyum to ma. Anu ja smot Allah matak fee!
MAT 6:31 Nnaut yyi bombra weto ma! Ja raa mawe: Bo ro anu niit msya aya ro nta bo to au miyo? Tna msya ratan bo ro anu nyum bo to au miyo? Nnaut yyi feto ma.
MAT 6:32 Raa ro wase Allah mam tabam refo to, ana weto msui saso bo weto beta. Menohe anu fo, Nja ranu ro yhau mam sawro rAit yhar yoo boit yee kʼanu. Tna yhar bo yoo ratan yee kʼraa wAit ye. Yhar bombra weto beta.
MAT 6:33 Feto to, ntomer re nmo raa ro Allah yamo Raja ybo. Ntomer nno bo ro Ait ksoh. Saso bi Ait wia matim feto, tibyo kbe Allah yoo bo weto beta ysan kʼanu.
MAT 6:34 Feto to, nnaut yyi bo ro menrabu btek mai kʼanu to ma. Bo ro menrabu to, Allah yhar oh. Bo ro samyoh mam ti sau to maum oh mam ti reto.”
MAT 7:1 “Nmat sas raa roto ma. Nnaut nwe raa roto mno bo ro mkair ma. Nhau nnaut feto ma be kbe Allah haberek ymat sas anu si, yawe anu weto nno bo mkair ye meto.
MAT 7:2 Bo maja ro anu nbo nwe raa roto mno bo mkair to, kbe Allah haberek bo maja reto yawe anu to nno bo mkair ye. Tna bo maja ro anu nbo nnit bo ro raa roto mno to, kbe Allah haberek ybo bo maja reto ynit bo ro anu nno to ye.
MAT 7:3 Soh raa wanu sait yno bo ro mkair kebet baro sai to, reto mnan fi knuf ro maku mhau kʼait yasu. Anu nmat sas ait. Menohe knuf ro maboh mhau kʼanu nsu. Feto to anu nahni bo ro mkair-kar mase ja anu nesait nno.
MAT 7:4 Fyi re anu nwe kʼait nwe, ‘Nama, jõ tmen knuf ro maku kʼnyo nasu mato to.’ Ja anu nesait nmat knuf ro mhau kʼanu nsu mato wanu fee!
MAT 7:5 Sioh anu to ma! Nisoh anu wia. Tna kbe nsu maah re kbe nmen knuf kʼait yasu mato to.”
MAT 7:6 “Bo ro moof toni to, noo beak mtah mait to ma; be kbe haberek mafit anu. Noo haban mutiara ro mabyoh maut toni to, beak fane mait to ma; kbe fane mau maut mber kait-kat makus.”
MAT 7:7 Tna Yesus yawe, “Nyoh bo tna kbe Allah yoo bo yee. Saso bo tna kbe anu ntru bo reto. Nii mato tna kbe mato reto Allah yitrah.
MAT 7:8 Awya sai ro yayoh bo kʼAllah to, kbe Allah yoo yee. Awya sai ro saso bo to, kbe tru tu oh. Tna ro yai mato to, kbe Allah yitrah mato reto ye oh.
MAT 7:9 Mfi bo ku wanu sait yhai sre yawia boit yait to, kbe yaja yasen yoo fraa yee ku rait yait fee.
MAT 7:10 Mfi bo ku sait yawia yabo syoh to, kbe yaja yoo aban yee fee.
MAT 7:11 Anu raa to nimara mboh. Menohe anu nksoh noo bo ro moof nee ku wanu. Tna Nja ranu ro yhau mam sawro rAit to, ksoh yoo bo ro moof toni yee kʼanu ye. Soh raa mayoh bo kʼAit to, kbe Ait ksoh yoo bo reto yee kʼana ye fea!”
MAT 7:12 “Bo bawya sai ro anu ksoh nwe raa mno kʼanu to, nno mfi feto kʼana ye. Watum ro tiwya Musa ysya nabi na mkom to, mabo rau oh meto.
MAT 7:13 Mato sau ro mtit mhau. Ntomer ntwok mam mato ro mtit reto. Ntwok mam mato ro meya ma. Nmo mam iso mabi ma. Iso ro mabi reto to, iso ro rabin kair. Tna raa msis-sas kro iso reto.
MAT 7:14 Menohe iso ro mamos mae to mtit. Tna mato rau to maku toni ye. Raa ro bito kro iso tna ntwok mam mato reto to kebet baro sai.”
MAT 7:15 “Kaket anu: Kbe raa mama sioh mawe, ‘Amu fo, Allah ybis nmo nabi wAit. Amu ja nkyas bo wAit.’ He mfe. Ana weto, wan-wan mno bo moof mfi domba. Menohe ana ja safo mfi mtah serigala ye meto.
MAT 7:16 Nmat sas bo ro ana weto ja mno. Tna kbe anu nmat he ana mno bo ro mkair-kar. Feto kbe anu nhar nwe raa weto mbam kʼAllah fee. Raa taro mfi ara ro moof. Tna raa taro to, mfi abumun sai. Ja raa mryoh anggur make mbam abumun mara fee. Tna ja raa mryoh kake ro moof mbam hyoh muuf bo fee ye.
MAT 7:17 Ara ro mara moof to, kbe make rau to moof yum. Tna kake mara ro moo kaket fee, kbe make rau to mkair ye.
MAT 7:18 Ara ro mara moof to, ja make rau to mkair fee. Feto ye ara ro mara mkair to, kbe make rau to moof fee ye.
MAT 7:19 Tna kake mara ro mse make moof kaket fee, kbe raa mfat mkah war to.
MAT 7:20 Feto ye mkah ana ro sioh mawe ana nabi ro Allah. Ana mawe Allah ybis ana makah watum rAit mama mkyas. He mfe, soh anu nmat sas bo mafer ro ana mno to, kbe anu nhar nwe ana mbam Allah mama fe mfe a.
MAT 7:21 Raa ja mkyas bo kʼJõ tna mtom Jõ tasom mawe Jõ fi Tuhan rana. Menohe ana weto taro mamo raa woJõ fee. Ana kbe mamo raa ro Allah ybo yfi Raja fee. Jõ Taja yhau mam sawro rAit. Tna raa ro ja mno bo ro Ait ksoh sai oh mi kbe mamo raa wAit to.
MAT 7:22 Meen mam ati ro Allah ysok raa ro mamo raa mana rAit to, kbe raa msis-sas mama mtu kʼJõ mawe, ‘Tuhan; tiwya amu oh mi nkah natak aNyõ nkah soo ro Allah nmo nkyas kʼraa sor. Tna amu nkah natak aNyõ ye nikyak kabes sor. Tna amu nno bo ro msai mawat taro sor mkah Nyõ natak aNyõ ye.’
MAT 7:23 Menohe ati reto to, Jõ titbat tawe kʼana abyõ tawe, ‘Jõ wase anu saut! Anu raa ro ja nno bo kbik-kbak sai meto. Nmo fari tno!’”
MAT 7:24 Tna Yesus yawe, “Raa taro mari bo ro Jõ tkyas refo tna kbe mbo mno kaket. Ana weto mfi raa sait ro ja yhar bo sgi amah rait abyõ mam fraa to.
MAT 7:25 Ait sgi abyõ mam fraa to, tibyo amah rait matu fee. Oom mais mos, syar miyi mama, tna oof ye frok mama mfi to, menohe amah rait reto mros matak; matu fee.
MAT 7:26 Raa taro mari bo ro Jõ tkyas refo tna mbo mno fee. Ana weto mfi raa sait ro ja wase bo. Ait retait sgi amah rait abyõ mam snyik mana.
MAT 7:27 Oom mais mos, syar miyi mama, tna oof ye frok mama mfi amah reto to, tibyo amah reto matu mai tabam.”
MAT 7:28 Yesus ykyas watum reto matak toni. Menohe guruagama ro Yahudi to, ja bokyas wana matak kaket fee. Yesus watum bo mkak. Tibyo raa ro mari bokyas rAit reto mrok ktak beta.
MAT 8:1 Yesus yroh ybam faut mana si fo, tibyo raa makin mjor mama kro Ait.
MAT 8:2 Mam weto ye ait ro yafa kusta sait yama. Yama tna yjit yimna soh-soh kʼAit yawe, “Bobot, soh Nyõ ksoh meto mi, nisoh jõ re kusta refo marak.”
MAT 8:3 Tna Yesus yatem ybo ait tna yawe, “Jõ ksoh, tawe nyõ mbros oh!” Ayõ reto si fo, kusta reto mrok marak.
MAT 8:4 Tna Yesus yawe wa kʼait yawe, “Namo to, nkyas bo refo kʼraa ma. Namo nerif narak anyõ kʼimam ro Yahudi sait re ait ymat sas nyõ. Nyõ noof u tibyo noo bo nee kʼimam. Tna kbe ait ysan bo reto kʼAllah mamyot Watum ro Musa ykom yawe. Nno bo weto re kbe raa mhar mawe nyõ netsu moof u.”
MAT 8:5 Tna Yesus yamo snok mam remo ro Kapernaum. Tna raa sbe ro yase sait yama yo kʼAit. Raa sbe retait yamo aban mana ro ja ybo raa sbe ro Roma majin sau. Ait soh-soh Yesus yawe,
MAT 8:6 “Bobot; sryan ajõ kiyam msai yhau mam amah. Tna kiyam reto mno tibyo ait yaa msya yatem yhai. Tibyo yakus yjin sai mam aam meu.”
MAT 8:7 Yesus yari feto tna yawe, “Jõ kbe tama tisoh ait re yoof.”
MAT 8:8 Menohe aban mana ro sbe retait yawe, “Bobot, jõ fi raa ro ati fee tna Nyõ fi raa ro nase toni. Feto to tawe namo twok mam amah ajõ to ma. Naban nawe sai mam wefo tna kbe sryan ajõ retait kiyam rait marak.
MAT 8:9 Jõ thar tawe raa kinyah ja mari bo kʼraa mase ro mbo ana. Jõ tesait ja tari bo kʼraa ro mase woJõ ye. Tna raa sbe ro kinyah ja mari bo ro jõ tawe ye. Soh jõ tbis bo kʼraa sbe sait to, kbe ait yari tna yasen yamo tu oh. Tna soh jõ ttu raa sbe taro sait tawe yama to, kbe ait yasen yama ye. Tna soh jõ tbis bo kʼsryan ajõ tawe, ‘Nno bo reto.’ Kbe ait yari ybo yno tu oh! Tna Nyõ to nase toni niwrek jõ ye. Soh Nyõ nawe kiyam marak to, kiyam reto mari tibyo marak tu oh.”
MAT 8:10 Yesus yari bokyas rait reto tna yrok ktak. Raa mawat kro Ait mamo to, tna Ait yawe kʼana yawe, “Ja raa ro mhau mam tabam ro Israel fo, bosmot wana matak fee. Menohe Ait refi bosmot rait matak toni!”
MAT 8:11 Tna Jõ tawe kʼanu tawe, meen raa srim msis-sas mama mbam arin aso beta. Mama hre su msya Abraham, Ishak, ysya Yakub ye. Hre sohmaam bo su mam wore wo Allah yamo Raja ybo raa wAit to.
MAT 8:12 Tiwya tinyi Allah ymen raa ro Yahudi mawat mamo raa mana ro Ait ybo reto. He mfe, ana hawe bo mama. Meen Allah yikyak ana mhau bana mne mam wore wo mamur htoh toni. Mam wore reto to, kbe ana sraujin ana toni. Tibyo ana kbe mawia tna kakyah toni ye.
MAT 8:13 Tna Yesus yawe kʼbi yabi ro sbe retait yawe, “Hah ne namo oh, kbe sryan anyõ yoof mnan si bosmot anyõ ye oh.” Weto si oh to, sryan retait yrok yoof.
MAT 8:14 Tna Yesus yamo twok mam samu ro Petrus. Twok tna ymat Petrus snyim ro ano mjin sai. Au metsu mbe.
MAT 8:15 Yesus yamo ybo fai au matem. Tibyo kiyam reto mrok marak. Tna fai au masen saruk boit mee kʼana mait.
MAT 8:16 Tna mam wore arin knu-knu fo, raa mawat mama mo kʼYesus. Mama to, makah raa ro kabes mbo mawat ye. Tna Yesus yikyak kabes weto mkah ymai sau sai fo, tibyo kabes weto frok mamo. Tna raa ro kiyam weto beta to, kiyam wana marak ye.
MAT 8:17 Yesus yisoh raa feto to, afo re yno mnan si bo ro tiwya Allah ybis nabi Yesaya yama ykyas wia. Yesaya ykyas yawe, “Anu ro ssafo fee, Ait yisoh re boof. Tna anu ro kiyam bo to, Ait yisoh re boof ye.”
MAT 8:18 Tna Yesus ymat he raa msis-sas mama mros mur mtan kʼAit. Tibyo Ait ybis kuber wAit maut wiak msya Ait afo re ana frit mamoʼt maru reto ati tino.
MAT 8:19 Tna guru agama ro Yahudi sait yama yo kʼAit. Yama tna ytu yawe, “Bi Guru; woyõ-woya sai Nyõ namo to, jõ ksoh kro Nyõ bmo ye.”
MAT 8:20 Tna Yesus yawe kʼait retait yawe, “Mtah serigala to, ja mabum mam wafyoh rau. Tna ruu to, ja mabum mam tafat wana ye. Menohe Jõ fi 'Ait ro Yroh Yama Yfi Raa Sai'. Tna samu ro Jõ tjin aro fee. ⌞Soh nyõ nawe kro Jõ to, kbe wore nyõ njin aro fee ye.⌟”
MAT 8:21 Tna kuber wAit sait yawe kʼAit yawe, “Tuhan; nbis jõ tamo wia sama hai ro taja tna fo tama kro Nyõ.”
MAT 8:22 Menohe Yesus yawe si yawe, “Namo ma. Ana ro wase Allah to, kbe mesait sama hai wana rof. Menohe nyõ to, kro Jõ bmo.”
MAT 8:23 Yesus yaut wiak sau, tna kuber wAit kro maut ye.
MAT 8:24 Ana mamo mamo tna foos ro msai frok tubor mama mai wiak rana. Tna figyõm mase mai maut mam wiak mato ye tna mabo kait ana beta. Menohe Yesus yjin tu bait mam wiak mato.
MAT 8:25 Tibyo kuber wAit mti Ait mawe, “Tuhan; natmof anu be kbe anu bsu fo.”
MAT 8:26 Yesus yrok yasen tna yastako ana yawe, “Bosmot wanu matak fee! Anu waa bo bawya mefo?” Feto tibyo Ait yifau foos msya figyõm weto. Tibyo maru reto mrok mnem.
MAT 8:27 Yesus yno feto tibyo ana weto mrok ktak sai, tna mawe kʼanya mawe, “Bi Ait refi yatak yifau foos msya figyõm wefo mari. Bi Ait refi fi raa fe bawya mefi?”
MAT 8:28 Yesus ysya kuber wAit frit maru reto snok mam rabin ro Gadara. Mam weto to, raa mabo ewok ro kabes mbo fo mama mo kʼYesus. Ana mbewok mama mbam isra mato ro ja raa mse hai to, mama. Mbewok reto ja safo toni. Tibyo raa sait bo ter-ter yamo kait mam iso ro ana mhau reto fee ye.
MAT 8:29 Mbewok mama tna kakyah mawe kʼYesus mawe, “Ku ro Allah yare fi; Nyõ nama nno bawya kʼamu fo? Nyõ nama sikowah amu a? Makyon ro Nyõ sikowah amu to, mama fefares!”
MAT 8:30 Kene msya yuk reto ye fane mawat mau bana.
MAT 8:31 Tna kabes weto soh-soh kʼYesus mawe, “Soh Nyõ nbis amu nawe frok nmo meto mi, nbis amu nmo twok mam fane wore wono!”
MAT 8:32 Tna Yesus ybis yawe, “Nmo oh!” Tna kabes weto mari tna frok mamo twok mam fane weto. Tna fane weto mrok mker tna mhoh tbat mam rakak reto btek mam maru. Tna fane weto msu tibyo mhai beta mkak.
MAT 8:33 Raa ro kmot fane weto mmat bo ro Yesus yno. Feto tibyo ana masen fooh mhoh mamo mkyas kʼraa mam remo rana. Tna mkyas ana mbewok ro kabes mbo to ye.
MAT 8:34 Raa ro mhau mam remo reto mari bo weto, tibyo ana beta mama mo kʼYesus. Mama tna misobu Ait mawe Ait yasen yamo fooh sikba rabin rana.
MAT 9:1 Yesus yno bo weto mkak tna fo ye yaut wiak frit yamoʼt remo rAit.
MAT 9:2 Mam weto to, ait ro yaa mhai sait yjin mam sesa sai. Yjin mam sesa tna raa nkatar ait makah mama mo kʼYesus. Yesus ymat ana tna yhar yawe ana smot Ait matak. Tibyo Yesus yawe kʼait ro yaa mhai retait yawe, “Tao, sraujin ma! Iro wonyõ to, Jõ tyon oh.”
MAT 9:3 Guru agama Yahudi baro hre mam weto ye. Ana mari bo ro Yesus yawe feto tna mnaut mawe, “Bo ro Ait yawe to berasi Allah! Ja Allah yesait aran ytai yyon iro.”
MAT 9:4 Menohe Yesus yhar bo ro ana mnaut mam srau mato wana. Tna yawe kʼana yawe, “Fyi re anu nnaut bo ro mkair weto mam srau mato wanu?
MAT 9:5 Soh Jõ tawe kʼait refi tawe ‘Iro wonyõ to, Jõ tyon oh.’ Bo ro msai fee: Kbe raa mahni bo reto mabo fe mfe a. Menohe tawe, ‘Nasen namo oh!’ Tawe feto afo re kbe raa mmat bo reto mabo. Mmat tna mhar mawe Jõ ttai tno bo ewok ye to. Ewok ye mnan-nan kʼJõ.
MAT 9:6 Jõ fi 'Ait ro Yroh Yama Yfi Raa Sai'. Tna bo ro Jõ tno fo, Jõ tno re kbe anu nhar nwe Jõ tatak tyon iro raa mam tabam refo.” Tna Yesus yawe kʼAit ro yaa mhai retait yawe, “Nasen, tubat sese anyõ, tna nasom namo bonyõ!”
MAT 9:7 Tibyo ait yasen yros kaket tna yamo bait amah rait.
MAT 9:8 Raa makin ro mmat bo ro Yesus yno reto to, mrok miskawowo. Tibyo ana mbaut Allah ro yoo yatak rAit yee kʼraa to.
MAT 9:9 Yesus sikba yuk reto yamo. Yamo to, ymat raa ro ja yoo namabyoh (pajak) yee kʼpemerintah ro Roma sait. Yasom Matius. Bi ait hre mam kantor ro namabyoh rait. Tna Yesus ytu kʼait yawe, “Nama kro Jõ bmo!” Matius yari feto, tibyo ait yasen kro Yesus mamo.
MAT 9:10 Ti sau Yesus ysya kuber wAit mait boit mam amah ro bi Matius. Tna raa ro ja moo namabyoh msya raa ro ja mno iro bo mawat mama mait boit su msya ana ye.
MAT 9:11 Raa ro Farisi mmat ana mait bo su feto, tibyo mtu bo kuber ro Yesus wAit. Ana mtu mawe, “Fyi re Guru ranu yait boit su ysya raa ro moo namabyoh tna msya raa ro ja mno iro weto?”
MAT 9:12 Yesus yari bo ro ana mawe feto, tna yawe kʼana yawe, “Raa ro metsu moof ja mamo saso dokter fee. Ja raa ro kiyam oh mi mamo saso dokter to.
MAT 9:13 Nsen nmo nmat sas bo ro Allah yawe mam bokom rAit yawe, ‘Anu noo bo wanu taro nsan kʼJõ to, reto moof. Menohe jõ ksoh tawe anu natmof raa anya; reto moof toni.’ Hosea 6:6 Jõ tama ttu raa ro mhaf moof to fee. Tama fo ttu raa ro mno iro.”
MAT 9:14 Kuber ro Yohanes mama mo kʼYesus tna mtu kʼAit mawe, “Fyi re amu nsya raa ro Farisi ja nhau bo niit. Menohe kuber woNyõ mhau bo mait to fee?”
MAT 9:15 Yesus ykyas bofret kʼana yawe, “Ati ro raa sait ymen fnya to, ja raa mno bo bawya? Ana mhau bo ro mait fe mfe a? Mfe! Ana makyõ bokyõ fea! Ana makyõ bokyõ wia. Tna fo raa moo ait makah mamo. Tna kbe mafoh wana sraujin tibyo mhau bo ro mait. Kuber woJõ mfi feto ye. Jõ thau tsya ana fares fo, ana sraujin fee. Menohe ati ro Jõ sikba ana to, kbe ana sraujin tibyo mhau bo ro mait ye.”
MAT 9:16 Tna Yesus ykyas bofret ewok naut kʼana yawe, “Mfi bo ratan matah ro hri-hra sau. Ja fnya maru ratan reto mkah hawee ftah mabuf ro tna to fee. Soh au mtin feto to, kbe tis mkair. Kbe hawee ftah mabuf reto mno tibyo ratan reto mrok mhah renti. Feto ye iso bose raa mabi ro Yahudi ja mamo to hayah. Tna iso tna ro Jõ terif refo fo hayah ye. Tna iso ewok reto srioh anya ye fee.
MAT 9:17 Feto ye, Ja raa mror anggur maya ro tna mam baah marak ro matah fee. Kbe anggur maya reto mno baah marak reto matu mbua. Tna kbe anggur maya reto maus miyi mroh mamo mkak. Anggur maya ro tna to, ja raa moo mror mam baah marak ro tna sai. Tna re anggur maya reto msya baah reto bewok kbe mhau moof to.”
MAT 9:18 Yesus ykyas bo fares tna bi yabi sait yama yo kʼYesus. Ait yaka hartu Yesus, tna yawe, “Ku ajõ ro ano sau tna sai mhai oh. Nama noo natem niir ku au afo re au mrok masen.”
MAT 9:19 Yesus yari feto, tibyo yasen ysya kuber wAit kro bi ait retait mamo.
MAT 9:20 Ana mamo kri-kri fo, fai sau mama. Fai au mafa mees ro fnya yoyo tahun trion 12 oh. Fai au mnaut bau mam srau mato mawe, “Soh jõ trof tiir ratan rAit baro sai to, kbe kiyam ajõ refo marak.” Feto tibyo au nto miir ratan ro Yesus rAit makit.
MAT 9:22 Yesus haberek ymat fai au. Tna yawe kʼau yawe, “Ku aJõ, sraujin ma; nyõ smot Jõ tibyo kiyam anyõ reto marak.” Feto si fo, kiyam rau marak.
MAT 9:23 Tna Yesus yamo snok mam amah ro bi yabi retait. Ait ymat raa ro mfi oor msya raa msis-sas ro mawia tna mmai wer mam beto.
MAT 9:24 Tna Ait yawe kʼana yawe, “Frok nmo oh. Ku au reto mhai fee. Au mjin sai meto.” Menohe raa weto masah Ait sai.
MAT 9:25 Raa weto frok tna Yesus twok yamoʼt amah hawar ro ku au refo mriyor. Ait ybo ku au matem, tibyo ku au masen mros.
MAT 9:26 Bo ro Yesus yno reto raa mkyas hahah mamo snok mam rabin reto beta.
MAT 9:27 Yesus yasen yamo renti naut. Tna raa ro masu mboh mabo ewok kro Ait mam tis. Ana mtu mawe, “Yesus; Ku ro Daud, natmof amu!”
MAT 9:28 Yesus yamo twok mam amah sau tna ana mbewok ro masu mboh reto mama mo kʼAit. Tna Ait yawe kʼana yawe, “Anu mbewok nnaut nwe Jõ tatak tno anu nsu maah fe mfe a?” Tna ana mawe kʼAit mawe, “Ae, bi Yabi, amu smot Nyõ. Amu nhar nwe Nyõ fi Raa ro natak.”
MAT 9:29 Tna Yesus yiir ana mbewok masu, tna yawe, “Anu nsu maah mamo mamyot si bosmot ranu oh.”
MAT 9:30 Tibyo ana mbewok reto mrok masu maah. Tna Yesus yawe wa kʼana yawe, “Nmo nkyas bo ro Jõ tno kʼanu reto kʼraa roto ma!”
MAT 9:31 Menohe ana mbewok frok mamo mkyas Ait yasom faram mam rabin reto beta ye.
MAT 9:32 Ana mbewok ro masu mboh reto frok mamo. Tna raa makah ait ro kabes mbo sait mama mo kʼYesus. Kabes mbo ait retait tibyo ymai marak sai.
MAT 9:33 Yesus yikyak kabes reto. Tibyo ait retait yrok ymai. Raa makin ro mmat bo ro Yesus yno reto mrok ktak tna mawe kʼanya mawe, “Anu ja bmat bo ro mnan fefo aro mam Israel fee.”
MAT 9:34 Menohe raa ro Farisi baro mawe, “Kabes yabi (Iblis) oh mi yoo yatak rait yee kʼYesus re Ait yatak yikyak kabes sor to.”
MAT 9:35 Tna Yesus yamo yur mam kota makin msya remo makin beta ye. Ait yamo iti to, Ait watum raa ro Yahudi mam samu watum wana ro mhau mam beto sor. Tna Ait wosa Bokyas ro Moof (Injil) kʼana ye. Bokyas moof reto to, mkyas raa mana ro Allah yamo Raja ybo. Tna Yesus yisoh raa ro kiyam tibyo kiyam rana marak beta ye. Tna ana ro ssafo fee beta to, Ait yisoh tibyo ana matak ye.
MAT 9:36 Tna Yesus ymat raa makin weto yawe bo msuweni-wana mfi domba ro mhau akus. Raa ro kmot ana aro fee. Tibyo Ait yatmof ana.
MAT 9:37 Tna Yesus yawe kuber wAit yawe, “Raa makin weto mfi bo armato ro manes oh. Menohe raa ro matu bo to, mabo kebet baro sai; mnan fee.
MAT 9:38 Feto to, nyoh kʼAllah ro armato rAit afo re Ait ybis raa mama matu bo mam armato reto.”
MAT 10:1 Ati sau to, Yesus ytu kuber wAit mabo 12 weto mama mo kʼAit. Tna Ait yoo yatak rAit yee kʼana re kbe ana mikyak kabes sor, tna misoh raa ro kiyam tna mafa bo sor, re kbe mrok moof ye, tna misoh raa ro ssafo fee to, mrok matak beta ye.
MAT 10:2 Raabis (rasul) mabo 12 reto masom wana sor to mefo: Ait ro tinyi tait yasom Simon-Petrus, ysya yao Andreas. Tna Yakobus ysya yao Yohanes. Ana mbewok to ku ro bi Zebedeus yare.
MAT 10:3 Tna Filipus, Bartolomeus, Tomas, tna Matius ro ja yoo namabyoh (pajak), Yakobus ro Alfeus yare ysya Tadeus.
MAT 10:4 Tna Simon raa ro Zelot. Tna Yudas ro besruf Yesus.
MAT 10:5 Yesus ybis kuber wAit mabo 12 reto yawe, “Nmo no kʼraa mana ro Israel sai. Nmoʼt kota raa ro Samaria ma. Nmo nkyas kʼraa mana roto ma.
MAT 10:6 Nmo no kʼraa ro Israel mesait aran sai. Ana to, raa ro mamo tit mfi domba ro mamo tit tna raa ro kmot ana marak.
MAT 10:7 Nkyas kʼana nwe, ‘Allah siwyan yamo Raja. Ait ytu raa wAit mama tna Ait ybo ana.’
MAT 10:8 Tna nisoh kiyam rana. Nno re raa ro mhai mrok masen ye. Nisoh raa ro mafa kusta afo re ana moof ye. Tna nikyak kabes frok mbam raa ro kabes mbo to ye. Jõ too tatak aJõ tee sai kʼanu. Nayoh nwe raa moo bo mee si kʼanu ma. Nmo nno bo weto mkah nhaf ro ase sai.
MAT 10:9 Nmo to, nfau pitis msya ratan mam yu wanu ma. Tna nse sandal bo to ma ye. Tna nbo armuk trion ewok ma. Nnaut: Raa ro mkah kahren raa to, kbe raa moo boren maren ana tu oh.
MAT 10:11 Nmo snok mam kota msya remo. Tna saso raa ro yhaf moof sait, re ait yse anu njin mam amah rait. Tna nhau nsya ait mamo snok mam wore anu nsen sikba remo reto.
MAT 10:12 Anu nmo twok mam amah raa to, nmah meen kʼana wia.
MAT 10:13 Tna soh raa ro amah reto mhaf moof tna re huwya moo anu mse mam amah rana to, skabuk raa weto nwe Allah yno bo moof kʼana. Soh ana mikyak anu to, skabuk feto ma.
MAT 10:14 Soh anu twok mam remo taro tna raa mitrah amah wana kʼanu fee; tna soh raa hawe mari bokyas ro anu nkyas to, ati ro anu sikba amah reto msya remo reto nmo to, bes-bas bohasyaf ro mhau mam naa to akus sai.
MAT 10:15 Jõ tawe kʼanu tawe, ‘Meen ati ro tabam refo haberek to, kbe Allah ymat raa ro tiwya mhau mam kota ro Sodom msya Gomora tna yno bo ro maku sai mbtek mai kʼana. Menohe raa ro remo taro tii mikyak anu. Ana hawe bo mari bokyas aJõ. Tibyo bo ro meen mbtek mai kʼana weto to, kbe samyoh toni.’”
MAT 10:16 Tna Yesus yawe, “Nri oh. Anu fo raa ro nhaf sneh. Tna Jõ tbis anu nmo mam remo aro sor. Tna kbe anu nkai raa ro mkair-kar. Anu nfi domba ro mamo mam wore wo mtah serigala ja mhau. Nmo to, kaket anu nfi aban. Tna nhau nhaf moof yoyo ye, mfi ruu merpati.
MAT 10:17 Siwyan anu be kbe raa mno anu. Kbe raa wanu ro agama Yahudi mfot anu makah mamo msan kʼraa manes wana. Tna kbe ana sikowah anu mam samu watum wana ye.
MAT 10:18 Anu fo kuber woJõ. Au oh mi kbe raa mfot anu makah mamo msan kʼgubernur taro msya raja na taro sor ye. Bo mkair weto meen mai kʼanu. Menohe mafer rau ro tis to moof. Jõ bitsre bo reto mai kʼanu afo re kbe anu nkyas Jõ tasom kʼraa ro mase weto ye, msya raa wana makin ro wase Allah ye.
MAT 10:19 Meen raa mfot anu, makah mamo msan kʼraa weto. Tna kbe raa manes mtu srah wanu. Menohe wa ma. Nnaut yyi bo ro kbe anu nkyas to ma. Kbe Allah besi bokyas moof kʼanu. Kbe Ait besi bokyas rAit tna anu ne nawe si bokyas reto kʼana.
MAT 10:20 Anu nesait kar oh mi nkyas bo mam weto fee. Kbe Har ro Nja Allah oh mi besi bo ro anu nkyas to.”
MAT 10:21 Tna Yesus yawe, “Anu to, meen raa msan anu kʼraa mame. Tna raa msan mao na kʼraa mame. Tna bi sait kbe ysan kukek wait ye. Kukek na kbe masen mafa msya maja wana ye. Tna msan maja wana kʼraa mame ye.
MAT 10:22 Anu ro kro Jõ fo, kbe raa beta knait anu. Menohe awya ro bito kro Jõ snok mam tis rau to, kbe ait retait ykai riof ro mase.
MAT 10:23 Ati ro raa sikowah anu mam remo sau to, nsam nmoʼt remo roto taro. Jõ tawe kʼanu tawe, ‘Jõ fi “Ait ro Yroh Yama Yfi Raa Sai”.’ Kbe anu nmo nur ntan mam kota makin ro Israel. Nmo mkak fefares to, kbe Jõ tama.
MAT 10:24 Kuber sait ja yase yiwer guru rait fee. Tna sryan sait ja yase yiwer bobot rait fee ye.
MAT 10:25 Soh kuber sait yawe yasen ynan guru rait to, mnan oh. Feto ye soh sryan sait yawe yasen ynan bobot rait to, mnan ye oh. Jõ tfi raa yabi ro yno bo moof sait. Tna Jõ tase tbo raa ro mhau mam amah aJõ. Menohe raa baro sioh mawe Jõ tasom Beelzebul. Raa sioh mawe Jõ tfi kabes yabi (Iblis). Anu nfi ku woJõ. Feto kbe meen raa sioh mawe anu nfi kabes yabi ye.
MAT 10:26 Waa raa weto ma. Soh raa mno bo ro mkair aro, ja ana mmyõt bo reto. Ana mmyõt bo reto afo re raa mmat fee tna mhar fee. Menohe bo weto beta meen raa masbrer tu oh. Kbe raa mmat tna mhar. Bo ro raa mmyõt to, meen raa masbrah kʼraa tu oh.
MAT 10:27 Tna bokyas ro Jõ tkyas kʼanu kar to, nmo nkyas abyõ afo re raa beta mari ye.
MAT 10:28 Soh raa mama mame anu to, waa ma. Raa matak mame anu netsu wanu sai. Ana matak re kbe mame anu nmos wanu fee. Menohe waa Allah. Ait Raa ro yatak yame raa metsu wana ye msya raa mamos wana ye mam tafoh ro mait mam rabin kair to.
MAT 10:29 Ruu mbas to, mabyoh rau mroh sai. Ruu mbas mana ewok to, raa moo mkah pitis mauf sau aran sai. Menohe Allah ja kmot ana kaket. Ait bitsre sau btek ni-nan bo fee ye.
MAT 10:30 Anu nbyoh ranu to, maut toni miwer ruu mbas mabyoh rau. Feto to waa ma. Nna mawyan wanu to, Ait ntuu beta mnan oh. Ait ymat anu kaket. Feto to waa ana ro mawe mame anu to ma.
MAT 10:32 Hrenaut Jõ ma. Jõ fi 'Ait ro Yroh Yama Yfi Raa Sai'. Awya ro ykyas abyõ kʼraa roto yawe, ‘Jõ smot Yesus’ to, kbe meen Jõ tkyas ait abyõ kʼTaja ye. Tawe, ‘Ait retait raa aJõ oh metait.’
MAT 10:33 Menohe awya ro ywaar Jõ kʼraa roto yawe, ‘Jõ smot Yesus fee’, Meen Jõ twaar ait ye. Tkyas kʼTaja tawe, ‘Raa retait tait raa aJõ metait fee.’”
MAT 10:34 “Nnaut nwe Jõ tamaʼt tabam refo re tisoh iranya raa msya raa anya to fee. Jõ tama tibyo raa taro mawe ana mban Jõ. Tna raa taro mamo byoh kʼJõ. Tisti raa mafa meto.
MAT 10:35 Jõ tama fo, ‘betwat ku sait ybam yaja. Tna kbe ku sau ntwat mbam mme. Tna fai sau ntwat mbam snyim ro ano.
MAT 10:36 Ana ro mhau su mam amah ranu taro to, kbe masen mamo byoh kʼanu.’
MAT 10:37 Tna awya ro yawyan marak yaja to, tna yawyan marak yme to, menohe ait yawyan marak Jõ toni fee; ait retait yatak yamo raa aJõ metait fee. Feto ye soh awya ro yawyan marak ku ro sme rait msya ku ro ano rait bo toni miwrek Jõ to; ait retait yatak yamo raa aJõ metait fee ye.
MAT 10:38 Awya ro yawe kro Jõ to, menohe hawe bo yasom bo fanes ro mama mai kʼait to fee ye; ait retait yatak yamo raa aJõ metait fee. Soh ait yasom ara warok rait reto ye tna ait kro Jõ ye; ait retait yamo raa aJõ.
MAT 10:39 Raa taro mawe misoh metsu rana ai mam tabam refo. Ana saso riof rana mam tabam refo sai ai menohe ana mnaut mamos rana fee. Meen ana weto mhau hame wajin fee. Menohe raa taro mawe mhau saso riof rana ai mam tabam refo fee. Ana mawe mno bo woJõ. Ana saso Jõ tasom aJõ mam tabam refo. Ana weto oh mi kbe mkai riof kʼana. Ana kbe meen raa mame majat oto, menohe meen mkai riof ro hame wajin.
MAT 10:40 Feto ye, awya ro yitrah yhaf rait kʼanu to, ait retait yitrah yhaf kʼJõ oh meto. Tna awya ro yitrah yhaf rait kʼJõ to, ait retait yitrah yhaf kʼAit ro ybis Jõ tama ye oh meto.
MAT 10:41 Awya ro huwya yiranya ysya nabi ro Allah wAit sait to, kbe boren rait mase, mfi boren ro nabi ye. Tna awya ro huwya yiranya ysya raa ro ja yno bo moof to, kbe boren rait mase ye mfi boren raa ro ja mno bo moof weto ye.
MAT 10:42 Tna awya ro ymat raa woJõ tibyo yatmof ana to, kbe Allah yoo boren yaren ait tu oh. Nnaut oh; Allah ymat bo bawya ro anu nno sai: Mfi bo raa kinyah aJõ sait yhai sbit to, awya ro ywyan aya yee kʼait yata to, kbe Allah yaren ait ye.”
MAT 11:1 Yesus ykyas bo kuber wAit mabo 12 weto mkak oh. Tna Ait yasen sikba yuk reto yamoʼt remo makin ro kene mam weto ye. Yamo ykyas Watum ro Allah tna wosa Bokyas Moof kʼraa makin ro mhau mam beto sor ye.
MAT 11:2 Yohanes ro ja baptis raa tait yhau mam bui fares. Ait yari bo ro Kristus yno feto, tibyo Yohanes ybis kuber wait mamo mo kʼKristus tna mtu bo kʼAit mawe,
MAT 11:3 “Nyõ fi Mesias ro tiwya Allah ysi yawe kbe yama oh mefi, fe mfe a? Soh mfe, kbe amu ste raa roto sait hayah a?”
MAT 11:4 Menohe Yesus yawe, “Hah ne nmo no kʼYohanes tna nkyas bo ro anu nmat tna nri kʼait. Nwe:
MAT 11:5 ‘Raa ro masu mboh to, mfo refo ana mmat bo. Raa ro maa mhai to, mfo refo ana masen mamo. Raa ro mafa kusta to, mfo refo ana mrok moof. Raa ro mimara mtuk to, mfo refo ana mari bo. Raa ro mhai to, ana mrok masen. Tna raa ro masu awe to, mari Bokyas Moof ro mbam kʼAllah.’
MAT 11:6 Raa taro mmat bo ro Jõ tno tna beroh smot Jõ. Ana mwaar Jõ fee. Kbe ana weto simaut mase.”
MAT 11:7 Kuber ro Yohanes wait hah mamo. Tna Yesus yasen ykyas Yohanes kʼraa msis-sas weto. Ykyas yawe, “Tiwya anu nmoʼt yuk ro riamo nwe nmat Yohanes. Nmo to, anu nnaut nwe nmat bawya meto? Anu nmo nmat nkrum ro foos mfi matu wewe mamo-me a? ⌞Mfe, Yohanes retait raa ro yros yatak. Ait raa ro sneh sai fee.⌟
MAT 11:8 Tiwya anu nmo nmat ait mkah bawya? Anu nmo nmat bobot sait ro yyum ratan ro fyan-fyan fe mfe a? Mfe ye, bobot ro yyum ratan ro moof to, ja yhau bait mam amah ro moof mfi raja na ja mhau.
MAT 11:9 Tawe kʼanu u tawe; anu nmo saso bawya mam tabam ro riamo reto to? Anu nmo saso nabi ro Allah ybis yama fe mfe a? Ae! Yohanes tait nabi ro Allah ybis yama. Ait yase yiwer nabi na roto ye.
MAT 11:10 Yohanes retait oh mi tiwya Allah ykyas mam Bokom rAit sau. Bokom reto mawe, ‘Meen Jõ tbis raa sait yama ykyas bo woJõ yatim wia tna Nyõ nrof. Kbe ait siwyan iso kʼNyõ.’
MAT 11:11 Nnaut oh: Raa ro tabam refo aro mase miwrek Yohanes Pembaptis fee. Menohe raa mana ro Allah yamo Raja ybo to, ana ro kinyah to, ana beta mase miwer Yohanes.
MAT 11:12 Maban ti tinyi rau wore wo Yohanes yama baptis raa, mamo snok mam mfo refo fo, raa byoh srau kair kʼraa mana ro Allah ybo. Raa byoh mawe masen mfot raa mana ro Allah rAit. He mfe, raa mana rAit mo mase renti.
MAT 11:13 Tiwya Watum ro Musa msya nabi sor ro Allah ybis mama oh mi mkyas bo ro Allah mawe kʼraa. Ana oh mi mkyas bo rAit mama snok mam mfo refo. Tna Yohanes yama.
MAT 11:14 Jõ tawe kʼanu tawe, ‘Yohanes tait Elia oh metait.’ Anu nri fe mfe a? Jõ sioh fee.
MAT 11:15 Anu ro nri bokyas refo fo; nnaut kaket!”
MAT 11:16 Tna Yesus yawe, “Raa ro mhau mfo refo to, mfi awya? Jõ fret bo tawe anu fo nfi kukek: Anu nnan kukek ro hre mam pasar. Ana baro mawe kʼanya mawe,
MAT 11:17 ‘Riwai anu bsom-sam mnan fi anu bkyõ bokyõ: Amu nfi oor, tna nji howes ye, afo re kbe anu nsyoh bosyoh. Menohe anu nsyoh fee! Tna fo anu sioh bsom bfi raa ro mhai, menohe anu taro hawe bo nwia hai reto! Nsom nno fyi!’
MAT 11:18 Yohanes yama to, ait yhau bo yait msya bo yata ye. Tibyo raa mawe, ‘Kabes mbo ait’.
MAT 11:19 Tna jõ tama. Jõ fi, 'Ait ro Yroh Yama Yfi Raa Sai'. Jõ tama tna tno bo tfi Yohanes fee. Jõ tama to, ja thau bo tait fee. Tna tata anggur maya ye. Menohe anu nwe kair Jõ nwe, ‘Ait retait yait boit yasmamo! Ait retait raa ro ja yata anggur maya bisir yoyo! Tna yafoh wAit to, raa ro ja mno iro msya raa ro ja mno bo ro mkair sor: Raa ro moo namabyoh (pajak) mee kʼpemerintah bo ye!’ Menohe Jõ tawe kʼanu tawe, ‘Nnaut bo moof ro Yohanes ysya Jõ nno to, tna kbe anu nhar nwe Allah oh mi ybis amu bewok nma to.’”
MAT 11:20 Yesus yno bo ro msai mawat mam remo ro Khorazim msya remo ro Betsaida. Raa ro mhau mam remo weto mmat bo ro Ait yno. Menohe ana mashana fee. Feto to Ait kmo.
MAT 11:21 Ait yastako ana yawe, “Anu raa ro Khorazim nsya raa ro Betsaida: Meen ayoh mroh kʼanu! Tiwya Jõ tno bo ro msai mam remo wanu weto, menohe anu nashana fee. Soh tiwya Jõ tno bo ro msai weto mam remo ro Tirus msya Sidon, maami raa ro mhau mam beto mashana iro wana bose oh. Soh ana mmat bo ro Jõ tno weto to, ana sraujin tibyo myum ratan ro mkair tna mse boh ro tafoh mam mana wana abyõ.
MAT 11:22 Jõ tawe kʼanu tawe, ati ro Tuhan yoo safo mana ymit kʼraa to, kbe Ait ymat raa ro mhau mam remo weto tna yawe yno bo maku sai mbtek mai kʼana. Menohe anu niwana Ait tibyo bo ro kbe meen mbtek mai kʼanu to samyoh toni!
MAT 11:23 Tna anu ro nhau mam remo ro Kapernaum nnaut nwe meen anu beta nmoʼt sawro ro Allah rAit. He mfe, kbe meen anu nmoʼt sawro ro kabes! Tiwya Jõ tno bo ro msai mam kota ranu ro Kapernaum. Mfi bo tno bo ro msai weto mam kota ro Sodom, maami raa weto mmat tna mashana fea! Tna kota reto mhau fares ye.
MAT 11:24 Menohe Jõ tawe kʼanu tawe; ati ro Allah yoo safo mana ymit kʼraa to, bo ro meen mai kʼraa ro Sodom to, mnan-an baro ye. Menohe bo ro meen btek mai kʼanu to samyoh toni.”
MAT 11:25 Tna Yesus skabuk yawe, “Taja, Nyõ fi Tuhan ro nase. Nyõ to, nbo sawro aNyõ msya tabam refo ye. Tna Nyõ nmyõt bo aro re raa wase maja wau weto. Bo weto to, raa ro ja mhar bo to, ro mkom bo to, ana srau fee. Ana mfot fee. Menohe bo weto to, nyõ nerif kʼraa kinyah re ana mfot tna mhar. Feto to, tayoh asik mase kʼNyõ.
MAT 11:26 Taja; Nyõ nhar bo Nyõ oh. Tna ja nno bo ro Nyõ nhaf mnan sai.”
MAT 11:27 Tna Yesus yawe kʼraa wAit weto yawe, “Bombra beta to, Taja ysan kʼJõ tatem tbo oh. Raa wase Jõ. Taja yesait aran yhar Jõ. Tna raa wase Taja ye. Menohe Jõ tesait thar Ait. Tna raa ro Jõ tsok to, tkyas Ait kʼana weto re kbe ana mhar bi Ait ye.
MAT 11:28 Anu taro nsom bo fanes tna hrowyõ nhai. Nma kro Jõ tna Jõ smyoh bo ro samyoh ro anu nsom weto sor.
MAT 11:29 Nmat sas bo ro Jõ tno tna nbo nno ye. Jõ fi Raa ro thaf moof tna thaf sneh ye. Feto to, kbe nmos wanu mhau tnok ye.
MAT 11:30 Bo ro Jõ tbis kʼanu nno to mnan-nan sai. Tna bo ro Jõ tse kʼanu nsom to samyoh fee ye.”
MAT 12:1 Ayõ ro Sabat to, ja raa ro agama Yahudi ntmoh. Tna ayõ ro Sabat sau to, Yesus ysya kuber wAit mamo mfrit iti mam armato ro gandum sau. Kuber wAit mhai sre, tibyo mryoh gandum make baro mait.
MAT 12:2 Menohe raa ro Farisi mmat feto, tibyo mawe kʼYesus mawe, “Yesus! Nmat kuber woNyõ mno bo toto sai meto a? Ana mryoh gandum make mam ayõ ro raa wanu ntmoh to. Ana mno fyi meto? Mno bo reto to, ana miwer Watum ro agama ranu oh meto!”
MAT 12:3 Tna Yesus yawe, “Anu nsorni Bokom ro Allah fe mfe a? Bokom reto mkyas bo ro tiwya raja Daud yno. Tiwya ait ysya raa wait mhai awyah.
MAT 12:4 Tna ait twok mam Samu ro Allah mato. Tna yoo roti ro raa msan kʼAllah. Roti reto mbau. Menohe ait yoo yait. Roti reto ja imam na mesait aran mait. Menohe ait yoo tna yee kʼraa wait mait ye.
MAT 12:5 Ja anu nmat Watum ro Musa fefares a? Watum reto mawe ye mawe, ‘Nno bo mam ayõ ro raa ntmoh to ma.’ Menohe imam ro Allah to, ana beroh mno bo mam Samu ro Allah, menohe Allah ymat bo ro ana mno reto to, tna yawe bo reto mkair fee ye.
MAT 12:6 Anu nhar nwe Samu ro Allah to moof tna yase ye. Menohe anu wase Ait sait ro yama yhau ysya anu. Ait retait yase toni yiwrek Samu ro Allah.
MAT 12:7 Bokom ro Allah mawe, ‘Noo bo wanu taro nsan kʼJõ to, reto moof. Menohe jõ ksoh tawe anu natmof raa anya; reto to moof toni.’ Hosea 6:6 Allah ymat kuber woJõ to yawe bo ro ana mno reto mkair fee. Soh anu nhar Bokom reto kaket to, maami anu nkyas bo mkair mai kuber woJõ fee ye.
MAT 12:8 Jõ fi ‘Ait ro Yroh Yama Yfi Raa Sai.’ Jõ tatak tbo ayõ ro raa ntmoh ye. Feto to, nwe kuber woJõ wefo mno bo ro mkair to ma.”
MAT 12:9 Tna Yesus sikba wore weto tna yasen yamoʼt samu watum rana.
MAT 12:10 Tna raa sait ro yatem jaro mhai huwya mam beto ye. Ana ro Farisi baro mmat sas Yesus tna saso bo mkair ro Ait yno. Tibyo ana mtu bo kʼAit mawe, “Soh raa misoh raa kiyam moof mam ayõ ro raa ntmoh to, ana miwer Watum ro Musa ykom oh meto, fe mfe a?”
MAT 12:11 Menohe Yesus yawe si yawe, “Mfi bo anu nkin wefo sait ymat domba rait sau btek kayah. Mbtek kayah mam ayõ ro raa ntmoh to, kbe raa retait sna ykuk maut fee mfe a?
MAT 12:12 Raa to ati, tna domba to bo ro ati fee sai. Feto to, soh raa mno bo ro moof kʼraa roto mam ayõ ro raa ntmoh to, ait yiwer Watum ro agama ranu fee.”
MAT 12:13 Tna Yesus yawe kʼait ro yatem mhai retait yawe, “Betrot natem anyõ!” Raa retait betrot yatem rait. Tna yatem mrok moof mfi yatem jaro to ye.
MAT 12:14 Raa ro Farisi mmat feto tibyo masen frok mamo. Mamo saim bo mawe saso iso re kbe mame Yesus yajat.
MAT 12:15 Menohe Yesus yhar raa ro Farisi mhaf wana, tibyo Ait yirenti yamoʼt rabin roto sau. Raa msis-sas kro Ait tna Ait yisoh ana ro kiyam. Tibyo kiyam wana marak beta ye.
MAT 12:16 Tna fo Ait yawe wa kʼana yawe ana masbrah Ait kʼraa roto ma.
MAT 12:17 Ait yno bo weto to, afo re yno mnan si bokyas ro tiwya Allah ybis nabi Yesaya ykyas tinyi wia yawe:
MAT 12:18 “Raabis aJõ oh mefi. Jõ thafri Ait. Ait tait Jõ thaf mnan. Kbe too Har aJõ tse kʼAit. Tna bo ro Jõ ksoh to, kbe Ait wosa kʼraa makin ro wase Jõ fares ye.
MAT 12:19 Kbe Ait ymak ysya raa fee. Kbe Ait safuk tawyõ Ait bo fee ye.
MAT 12:20 Kbe Ait yhaf sneh kʼraa ro ssafo fee. Ana mfi krum ro foos mfi matu wewe. Kbe Ait yno feto mamo snok mam ati ro Ait yno bo ro Jõ ksoh mkak beta.
MAT 12:21 Mkah Ait yasom rAit to, raa ro bangsa sor kbe mhau mhaf minaut kʼAit mawe meen Ait yoo riof yee kʼana.”
MAT 12:22 Tna raa makah ait ro kabes mbo sait mama mo kʼYesus. Ait retait ymai marak tna yasu mboh ye. Tna Yesus yisoh ait yoof. Tibyo yrok ymai ye tna yasu maah ymat bo ye.
MAT 12:23 Tibyo raa makin ro mros sor mam weto to, mrok ktak sai tna mawe, “Yesus fi Ku ro Daud fe mfe a? Ait ro tiwya Allah ysi rene mefi fe mfe a?”
MAT 12:24 Menohe raa ro Farisi mari feto. Tna ana mawe kʼanya mawe, “Aha! Yesus yatak yikyak kabes sor mkah tak ro kabes Beelzebul rait. Kabes Beelzebul retait ja yase ybo kabes taro sor.”
MAT 12:25 Menohe Yesus yhar bo ro ana mnaut reto tna yawe, “Soh raja ro rabin sait ybo raa wait, menohe ana mafa anya ai to, kbe rabin mros matak fee. Tna raa ro mhau su mam remo sau to, soh ana mafa anya ai to, kbe ana mros matak fee ye. Tna raa ro mhau mam amah sau su to, soh ana mafa anya ai to, kbe ana mros matak fee ye.
MAT 12:26 Tna soh kabes yabi yikyak kabes wait taro to, kbe rabin ro kabes yabi yamo raja ybo to, kbe mros matak fee ye.
MAT 12:27 Anu sioh nwe, kabes Beelzebul (Iblis) yoo yatak rait yee kʼJõ oh mi Jõ tatak tikyak kabes weto sor. Menohe raa wonyõ taro ja mikyak kabes ye. Awya oh mi yoo yatak rait yee kʼana to? Anu nwe kair raa wanu meto ye! Kbe ana kmo anu mawe, ‘Mfe, Har ro Tuhan moo matak rAu mee kʼanu mefo!’ Feto to, bo ro anu nwe kʼJõ reto to, mkair sai meto.
MAT 12:28 Har ro Tuhan oh mi moo matak rAu mee kʼJõ. Tibyo Jõ tatak tikyak kabes frok to. Allah ybis Jõ tama tbo raa mana rAit to. Feto to, Ait ro yase ybo raa wait yhau ysya anu oh.”
MAT 12:29 “Jõ fret bo reto u tawe, Kabes yabi yfi raa ro yatak sait. Ja raa ter-ter twok mam amah rait fee tibyo ytak bo wait fee ye. Menohe soh raa make ait yaa yatem wia saah. Tna fo raa retait ytak bo ro mhau mam amah mato reto.
MAT 12:30 Awya ro yhaf sau ysya Jõ fee; ait retait yamo byoh tna yno bo ro mkair mai kʼJõ. Awya ro ysya Jõ yno bo woJõ su fee; ait retait sbi hri bo ro Jõ tno ye oh meto.
MAT 12:31 Feto Jõ tawe kʼanu tawe, soh raa mno iro bawya sai to, kbe Allah yyon iro wana weto. Soh raa mamus Allah to, kbe Allah yyon iro wana weto ye. Menohe soh raa mamus Har ro Allah to, kbe Allah yyon iro wana fee yum.
MAT 12:32 Jõ fi 'Ait ro Yroh Yama Yfi Raa Sai'. Soh raa sait yawe kair Jõ to, kbe Allah yyon iro rait reto. Menohe soh raa sait yawe kair Har ro Tuhan to, kbe Allah yyon iro rait reto fee yum. Kbe Allah yyon iro reto mam makyon refo fee, tna mam makyon ro meen mama fee ye.”
MAT 12:33 Tna Yesus ykyas kʼraa ro Farisi weto u yawe, “Kake mara ro moof to, kbe make rau to moof ye. Tna kake mara ro mkair to, kbe make rau to mkair ye. Ja make oh mi raa mhar mara rau to.
MAT 12:34 Anu fo raa ro ja mno bo mkair mfi aban ro mafit raa majat! Anu nhaf mato wanu to mkair. Feto fyi re kbe anu nkyas bo ro moof to? Ja raa mkyas bo mamyot si mhaf wana.
MAT 12:35 Raa ro yhaf moof to, ja bo ro moof mbam yhaf mato rait frok. Tibyo bo ro yno to moof. Tna bo ro ykyas to moof ye. Tna awya ro yhaf mkair to, ja bo ro mkair mbam yhaf mato rait frok ye. Ait yhaf mato mkair sai. Tibyo ja yno bo ro mkair tna ykyas bo ro mkair ye.
MAT 12:36 Tna Jõ tawe kʼanu tawe: Ati ro Allah ytu srah to, kbe raa sait sait yros betoo bo ro tiwya ait ykyas-kas to beta.
MAT 12:37 Ati reto to, anu ro tiwya nkyas bo ro mkair-kar to, kbe safo makan reto btek mai kʼanu. Feto ye anu ro tiwya nkyas bo ro moof to, kbe safo makan reto btek mai kʼanu fee.”
MAT 12:38 Ati reto raa ro Farisi baro msya guru agama Yahudi baro mawe kʼYesus mawe, “Amu ksoh Nyõ nno bo ro msai sau re amu nmat.”
MAT 12:39 Tna Yesus yawe kʼana yawe, “Anu raa mana ro mfo nhau mam tabam refo fo, anu ja nber safo tna kro Allah kaket fee wofo! Anu nwe Jõ tno bo ro msai aro re kbe anu nhar nwe Jõ tbam kʼAllah tama fe mfe a. Menohe Jõ kbe tno bo ro msai sau aran sai re anu nmat tna nhar: Kbe anu nmat bo msai ro mnan fi tiwya Allah yno mkah nabi Yunus sai.
MAT 12:40 Tiwya Yunus yhau mam syoh ro mase sau mhaf rau ti trion tuuf. Feto ye mkah Jõ. Jõ fi 'Ait ro Yroh Yama Yfi Raa Sai'. Meen Jõ thau mam yuk ro hai ja mhau to ti trion tuuf ye.
MAT 12:41 Ati ro meen Allah ytu srah to, raa ro tiwya tinyi mhau mam kota ro Niniwe to, kbe mrok masen ye msya anu raa mana ro mfo nhau mam tabam refo. Tna kbe ana weto mkyas bo mai kʼanu. Tiwya raa ro Niniwe mari bo ro Yunus ykyas reto. Tna ana mashana. Ait ro yhau mam befo fo, yase toni yiwrek Yunus ye. Menohe anu sor nashana fee!
MAT 12:42 Tiwya fnya manes (ratu) sau mhau mam rabin ro ati ti wayir sau. Tna au mbam rabin ro fari reto masen mamo mo kʼraja Salomo mawe mari bokyas rait. Raja retait tait raa ro yhar bo toni. Mfo refo, Raa sait ro yase yiwer Salomo retait yhau ysya anu. Menohe anu hawe bo nri bokyas rAit. Feto to meen fai au reto kbe masen mmit safo kʼanu raa ro nhau mfo wefo.”
MAT 12:43 Tna Yesus yawe, “Ati ro raa mikyak kabes sau frok mbam raa sait mamo to, kabes reto mamo ninya. Mamo ninya mam wore wo aya aro fee. Mawe sne hoh menohe kabes reto fri yuk ro moof aro fee.
MAT 12:44 Tibyo kabes reto mnaut mawe, ‘Jõ tawe thah te tamoʼt yuk ajõ ro wia rof, ro tiwya jõ sikba akus.’ Tna kabes hah me snok mam yuk reto u. Tna mmat he ‘amah’ reto raa misoh moof, tna raa aro satoh mama mhau mam beto wea fee.
MAT 12:45 Feto tna kabes reto mawe hah mamo mhau. Tna mmen mafoh na mabo trion krema mama mhau msya au ye. Kabes trion krema weto to ja mno bo ro mkair-kar toni miwer kabes ro tinyi reto. Tna ana mama twok raa retait beta ye. Tna kbe ana mno ait retait ykair toni yiwrek kair ro ait ykai tinyi wia ye. Anu raa ro mfo nhau mam tabam refo tna nno safo to, kbe anu nfi feto ye.”
MAT 12:46 Yesus ykyas bo kʼraa makin taro kri-kri fo, yme msya yao na mama mros mne. Ana mawe mkyas bo msya Ait.
MAT 12:47 Tna raa sait yama yawe kʼYesus yawe, “Nme msya nao na mros ste Nyõ mne meu. Ana mawe mkyas bo msya Nyõ.”
MAT 12:48 Menohe Yesus yawe si kʼait retait yawe, “Jõ tme to awya? Jõ tao na to awya?”
MAT 12:49 Tna Yesus yerif kuber wAit yawe, “Ana oh mi Jõ tme msya tao na mefo.
MAT 12:50 Taja yhau mam sawro rAit. Tna awya ro ja yno bo ro Taja ksoh to, Jõ ttu tawe tao, tano, msya tme oh meto.”
MAT 13:1 Tna fo Yesus sikba amah reto tna yamoʼt maru maam.
MAT 13:2 Raa msis-sas mama hre mur mtan kʼAit. Ait ymat feto, tibyo yasen yamo yaut hre mam wiak mato. Tna raa msis-sas weto ana mros sai mam aya maam.
MAT 13:3 Tna Yesus ykyas bo mawat kʼana mkah bofret yawe, “Raa sait yno armato rait sau. Tna ait yamo furere bobat manaf (benih).
MAT 13:4 Ait furere bo to, bo manaf taro mbtek mam iso. Tibyo bo manaf weto to, ruu mama mame mkak.
MAT 13:5 Tna taro to, mbtek abyõ mam tabam ro fraa mhau wa mte. Tna mtis mame tabam kaket fee. Tibyo bobat weto moo fooh sai.
MAT 13:6 Menohe wore wo ayõ mo maut mafit to, bobat weto hroyoh. Mtis mo mame tabam kaket fee, tibyo samer.
MAT 13:7 Tna taro naut mbtek ye mam wore hyoh mana. Tna hyoh mana weto mo betru kait.
MAT 13:8 Tna taro mbtek mam tabam ro mamos. Tna mo maut. Tibyo make sarer toni: Bo manaf sau-sau to, make rau trion 30. Taro to, make rau trion 60 ye. Tna taro to, make rau trion 100 ye.”
MAT 13:9 Tna Yesus yawe, “Anu ro nri bokyas refo fo; nnaut kaket!”
MAT 13:10 Tibyo kuber wAit mama mtu bo kʼAit mawe, “Nyõ nkyas bo mkah bofret kʼana nno fyi?”
MAT 13:11 Tna Yesus yawe si kʼana yawe, “Raa mana ro Allah yamo Raja ybo to, maja wau baro to, raa wase fares. Raa ro ja hawe mari Jõ to, ja Jõ tkyas mkah bofret sai kʼana. Menohe Allah ksoh re anu nsrau nfot maja wau weto.
MAT 13:12 Awya ro yawe yari tna ybo yno bo ro Allah yawe to, kbe Allah yoo bohar taro naut yiryõ kʼait ye. Kbe Allah yno re ait retait yasu maah. Tibyo kbe ait yhar bo ro Allah mawat. Menohe awya ro yari tna hawe yse mam yhaf kaket to, kbe Allah yno re bohar rait to mabuf sai.
MAT 13:13 Ana ro hawe mari Jõ to, ja Jõ tkyas bofret kʼana sai. Ana to raa ro Allah tiwya ybis nabi Yesaya ykyas tna ykom matim yawe, ‘Raa kbe mmat sas bo refo. Ana mmat sas menohe wase bo reto fares. Ana kbe mari bo refo. Ana mari, menohe srau fee ye. Ana mari yoyo, he mfe. Ana mmat sas bo yoyo, he mfe ye.
MAT 13:15 Ana mhaf matak. Tna mimara mtuk sai. Ana masu mboh tibyo mmat bo fee. Ana hawe bo mashana hah me mama mo kʼJõ afo re tisoh ana tno ana masu mmat bo, re kbe mimara mari bo, tna re ana moo Watum aJõ mse mam mhaf wana.’”
MAT 13:16 Tna Yesus yawe kuber wAit yawe, “Tuhan yno re anu nsu maah nmat bo. Tna Ait yno nimara wanu moof nri bo kaket ye. Feto to kbe anu nhau simaut mase.
MAT 13:17 Jõ tawe kʼanu tawe: Tiwya nabi na mama mkyas bo ro Allah. Ana weto msya raa ro ja mno bo ro Allah ksoh to, ana mawat ksoh mawe mhar bo refo. Ana ksoh toni mawe kbe mmat bo ro anu nmat wefo ye, he mfe. Tna ana mhaf miyoh mari bo ro anu nri wefo ye, he mfe ye.
MAT 13:18 Nri; Jõ betoo bofret raa ro furere bo manaf (benih) mam armato rait to, tkyas mabo rau mefo:
MAT 13:19 ‘Bo manaf’ reto to bokyas ro mkyas wore wo Allah yamo Raja tna ybo raa wAit. Tna ‘bokyas’ reto ro btek mam iso to, mabo rau mefo. Bokyas reto raa taro mari, he mfe. Ana weto mfot bokyas reto kaket fee. Mari menohe kabes yabi (Iblis) yama tna safto bokyas mbam kʼana mhaf wana.
MAT 13:20 Tna tkyas bo manaf ro mbtek abyõ mam tabam ro fraa mhau wa mte: ‘Bo manaf’ weto to, mkyas raa ro mari Bokyas ro Allah si fo, simaut mase.
MAT 13:21 Menohe Bokyas reto ana moo mse mhau mam mhaf mato wana waor sai. Ana mbo matak fee. Raa roto mmat bosmot wana tna sikowah ana. Feto tibyo ana mbtek mawe, tna smot Tuhan u fee. Ana weto taro to, bo ro samyoh mama mai kʼana to, tibyo ana mbtek mawe, tna smot Tuhan u fee ye.
MAT 13:22 ‘Bo manaf’ ro mbtek mam wore hyoh mana to, mkyas raa ro mari Bokyas ro Allah ye. Menohe ana mhau to, mnaut yyi. Tna ana mnaut bosatoh ro moof mam tabam refo sai. Tna ana nksoh mhau moof bana mam tabam refo sai. Bo weto moo ana mhaf re ana mnaut Bokyas ro Allah fee. Tibyo bosmot wana matak fee. Ana tufrok make aro fee ye.
MAT 13:23 Tna tkyas bo manaf ro mbtek mam tabam ro mamos. Ana weto mari Bokyas ro Allah reto, tna mse kʼana mhaf. Tna tis rau to, kbe make mawat: Taro make rau trion 100. Tna taro make rau trion 60. Tna taro make rau trion 30.”
MAT 13:24 Tna Yesus ykyas bofret sau naut u yawe, “Allah yamo Raja ybo raa mana rAit to. Ait yfi bi sait yamo furere benihgandum ro moof mam armato rait.
MAT 13:25 Tna ti sau raa mjin beta fares to, ait ro yamo byoh sait yama. Ait yama furere bibit bosafom srioh benihgandum ro riwai bi ait ro armato rait furere wia. Ait ro byoh retait furere bibit bosafom tna ysam yamo bait yarak.
MAT 13:26 Gandum reto mo tna mse saker. Tna sryan bi yabi retait, baro mamo mmat armato rait reto. Ana mmat he gandum reto bosafom mo srioh ye.
MAT 13:27 Tna ana mama mawe kʼait mawe, ‘Bi yabi; tiwya nyõ furere benihgandum ro moof mesait aran no? Menohe bosafom mo ye! Bosafom ro mo srioh ye reu mbam hayo meu?’
MAT 13:28 Bi ait yawe, ‘Byoh sait yama yno meto!’ Tna sryan wait mtu kʼait mawe, ‘Fyi, amu nmo nfit bosafom weu beak fe mfe a?’
MAT 13:29 Menohe bi ait yawe wa yawe, ‘Mfe, nmo nfit ma! Kbe anu nfit sre mkah gandum taro u srot kro ye.
MAT 13:30 Betau bosafom reto mhau moo srioh gandum su. Tna ati ro gandum manes tna raa saraf to, kbe jõ tawe kʼraa ro saraf to tawe, “Nakrao bosafom kehamit nse mam wo sau ngkaat wia afo kbe raa mkah. Tna fo nsok gandum nse hayah. Tna nwia gandum nmo nbu mam amah ro jõ siwyan mkah bo tbu bo mafer sor to.”’”
MAT 13:31 Tna Yesus ykyas bofret kʼana u yawe, “Kbe Allah yamo Raja tna ybo raa mana rait. Reto mnan fi bo manaf (benih) ro maku sau. Bi sait yoo bo manaf reto yamo furere mam armato rait.
MAT 13:32 Bo manaf reto, maku koweh syok. Bo manaf roto taro to, makan rau to mase baro ye. Menohe bo manaf ro maku reto mo tna mrok mase miwrek bosafom roto taro sor. Tna mo maut mfi ara bo feto ye. Tibyo ruu mama tafat abyõ mam ara reto kre ye.”
MAT 13:33 Tna Yesus ykyas bofret roto sau kʼana naut yawe, “Raa mana ro Allah yamo Raja ybo to, mnan ragi. Tna fai sau moo ragi kebet baro, sryoh msya tepung mawat. Feto kbe adonan reto mrok mtar mase beta.”
MAT 13:34 Yesus ykyas bo weto beta kʼraa msis-sas weto mkah bofret sai. Ja ykyas bo roto kʼana fee.
MAT 13:35 Ait yno feto afo re yno bo mnan si bo ro tiwya Allah ybis nabi sait yama ykyas tinyi wia yawe, “Kbe Jõ tkyas bo mkah bofret. Bo refo ja raa wase. Tii oh oh, mam wore wo Allah yfen tabam refo, mamo snok mam mfo refo to, ja raa wase. Menohe Jõ tama tasbrer bo weto.”
MAT 13:36 Yesus sikba raa msis-sas weto tna yamo twok mam amah. Tna kuber wAit mama mtu bo kʼAit mawe, “Sik betoo bofret ro gandum riwai Nyõ nkyas kʼamu.”
MAT 13:37 Tna Ait yawe si kʼana yawe, “Raa ro furere benih gandum ro moof tait 'Ait ro Yroh Yama Yfi Raa Sai'. Jõ fi Ait oh mefi.
MAT 13:38 Tna armato reto mkyas tabam refo. Tna benihgandum weto, mkyas mawe raa mana ro Allah rait, mam wore wo Ait yamo Raja ybo ana. Tna bibit ro bosafom weto mkyas mawe raa ro kabes yabi (Iblis) ybo mamo raa wAit.
MAT 13:39 Tna ait ro furere bibit ro bosafom tait mkyas mawe kabes yabi (Iblis). Tna ati ro raa saraf to, mkyas mawe tabam refo makyon sboh rau. Tna ana ro saraf to, mkyas mawe malaikat.
MAT 13:40 Tna bosafom ro raa khamit mkah mait tafoh to, mkyas mawe raa ro kro kabes yabi. Meen ati ro tabam refo sboh rau to, 'Ait ro Yroh Yama Yfi Raa Sai' kbe ybis malaikat wAit mama. Jõ oh mi Ait ro ybis malaikat weto mama mefi. Ana mama tna moo raa ro mno bo mkair-kar msya raa ro misti re raa roto mno iro ye to. Malaikat weto kbe tufrok raa ro mkair weto mbam raa mana rAit. Moo ana weto mse hayah.
MAT 13:42 Kbe malaikat mawah ana weto beta beak mamo mait mam tafoh ro mait warah toni. Tna mam beto to, meen ana mkai bo ro mkair-kar tibyo mawia kanasyah ye.
MAT 13:43 Tna raa ro mno bo ro Allah ksoh to, Ait yamo ana Maja rana. Kbe ana mhau mam raa mana ro Ait yamo Raja ybo. Kbe Allah fayir ana moof kaket. Fayir ana mfi bo ja Ait fayir ayõ ro moo maut rabu to. Anu ro nri bokyas reto to; nnaut kaket!”
MAT 13:44 “Raa baro tomer mamo raa mana ro Allah yamo Raja ybo to. Bo moof ati meto. Reto mfi kta ro mabyoh maut. Tiwya raa mabah saa kta reto mam armato sau te. Kta reto mhau makus mmyõt bau sai. Tna raa sait ykah armato reto tna ykai kta reto. Menohe ait ye yabah saa mam kya u. Tibyo simaut mase yamo tna yasim bo manhai wait beta. Ait yoo mabyoh rau to, tna yate tabam reto. Tibyo yoo kta ro mabyoh maut reto kʼait.
MAT 13:45 Raa mamo raa mana ro Allah yamo Raja ybo to, bo moof ati. Reto mfi raa ro ja yasim bo yoyo sait. Ait yamo saso haban mutiara ro moof baro.
MAT 13:46 Tna ait ykai haban mutiara ro mabyoh maut toni sau. Tibyo ait hah ye yamo yasim bo manhai wait beta ska. Tna ait yoo mabyoh rau tna fo hah ye yama yoo haban mutiara reto.”
MAT 13:47 “Tkyas oon ro Allah meen yamo Raja ybo raa mana rAit mabu rau. Mabu rau to, mfi jala sau ro maboh. Raa beak jala mam maru tna mfot syoh aro rau-rau.
MAT 13:48 Syoh mami jala reto matot tna raa tubat jala makah maut mamoʼt mne. Tna hre skur syoh weto tna mse aro hayah-hayah. Ro ja raa mabo to, ana msok mse mam keranjang. Tna ro ja raa mabo fee, ana beak mam aya makus.
MAT 13:49 Meen makyon ro tabam refo sboh rau to, malaikat kbe mno feto ye. Meen malaikat msok raa ro ja mno bo ro Allah ksoh to, mse hayah. Feto ye raa ro ja mno bo mkair-kar to, malaikat msok tna mse hayah ye.
MAT 13:50 Tna fo malaikat mawah ana weto beak mam tafoh ro mait warah toni. Ana weto kbe mkai bo ro mkair-kar tibyo mawia kanasyah mam beto.”
MAT 13:51 Yesus betoo maja rau kuber wAit mkak tna ytu kʼana yawe, “Anu srau nnaut tna nhar bo ro Jõ tkyas weto oh fe mfefares a?” Tna ana mawe, “Ae, amu nhar oh.”
MAT 13:52 Tna Yesus yawe, “Bokyas ro mkyas raa mana ro Allah yamo Raja ybo to, soh guru agama mfot to, ana weto mfi bobot ro ja srak mse kta ro tna msya ro bose ye.”
MAT 13:53 Yesus ykyas bofret weto mkak tna Ait yasen sikba yuk reto.
MAT 13:54 Ait hah ye yamoʼt remo rAit. Tna Ait watum bo mam samu watum rana. Raa ro mari bo ro Ait ykyas weto mrok ktak mawe, “Ait tait raa sei sai yfi anu ye mefo. Awya ro oh mi ykyas watum weu kʼAit u ee? Tna awya yoo yatak rait yee re Ait yno bo ro msai weto?
MAT 13:55 Ait yaja tait raa ro ja yfen ara a? Tna yme fai Maria, tna yao na sor: Yakobus, Yusuf, Simon, tna msya Yudas fe mfe a?
MAT 13:56 Tna Ait yano na beta mhau mam remo ranu refo ye. Ait fri bo yase reu mbam kʼawya yatak meu?”
MAT 13:57 Ana hawe mari bo ro Ait ykyas. Tna Yesus yawe, “Nabi ro Allah ybis yama to, ja raa mari ait mam woyõ-woya yamo sai. Menohe mam remo rait yesait to, ja raa hawe mari ait. Tna raa ro amah rait to, hawe bo mari ye.”
MAT 13:58 Ana smot Ait fee. Feto tibyo Ait yno bo ro msai mawat mam remo rAit fee.
MAT 14:1 Ati reto to, raja Herodes ro ybo provinsi ro Galilea tait, yari bo msai ro Yesus yno.
MAT 14:2 Tibyo Herodes yawe kʼraa wait yawe, “Yesus fi Yohanes Pembaptis ro tiwya yhai tna yrok yasen oh! Reto oh mi Yesus yatak yno bo ro msai weto to.”
MAT 14:3 Tiwya raja Herodes ytak fnya ro yao Filipus rait. Fai au masom Herodias. Yohanes yari feto, tibyo yastako raja Herodes yawe yber safo oh meto. Tibyo raja Herodes kmo Yohanes tna ybis raa wait mamo mfot Yohanes make. Mfot ait tna makah mamo mbu mam bui mato.
MAT 14:5 Tna raja Herodes yawe yame Yohanes yajat, menohe raa makin mhar mawe Yohanes tait nabi ro Allah ybis yama. Tibyo Herodes waa yame Yohanes yajat.
MAT 14:6 Tna ati reto to, raja Herodes yakyõ hwiat rait ro tiwya yme mabe ait. Ana makyõ bokyõ reto to, ku ano ro fai Herodias rau masen smar. Ymat feto tibyo ksoh.
MAT 14:7 Tibyo ait yasen yawe, “Ayoh, bo bawya sai ro nyõ nayoh to, kbe jõ too tee kʼnyõ tu oh.”
MAT 14:8 Tibyo fai Herodias, masen misbyõ ku rau tna ku rau mawe, “Jõ tayoh raa mamo mame Yohanes Pembaptis yajat. Sbi yana tna masyõ ait yana abyõ mam baki sau, moo mama mee kʼjõ.”
MAT 14:9 Raja Herodes yari feto, tibyo ynaut yyi. Menohe riwai ait ysi bo kawi oh. Yafoh na mari wia oh no, tibyo ait ye yabe u fee. Tna ait yno bo ro ku au mawe sai.
MAT 14:10 Ait ybis raa sbe sait yamo mam bui tna ktan Yohanes yana.
MAT 14:11 Tna raa sbe retait yoo Yohanes yana yse abyõ mam baki, yasyõ yakah yama yee ku au reto. Tna ku au reto makah mamo mee kʼmme mmat ye.
MAT 14:12 Tna kuber ro Yohanes wait mama moo ajat ro Yohanes makah mamo sama. Tna ana mamo mkyas bo reto kʼYesus.
MAT 14:13 Yesus yari feto, tibyo Ait yaut wiak yamoʼt oo ro mimon. Menohe raa makin msis-sas mari bo Ait yamo feto. Tibyo ana mbam remo wana sor to, mamo iso mne twat maryõt Ait ye.
MAT 14:14 Yesus yamo snok mam maru maam jaro, tna Ait ymat he raa msis-sas mros wea. Tibyo Ait yatmof ana tna yisoh ana ro kiyam sor afo re kiyam wana marak.
MAT 14:15 Hreha reto kuber wAit mama mo kʼAit mawe, “Yuk refo fo riamo. Mti oh. Nbis raa wefo masen mamo rof re kbe ana saso boit ro mait aro. Kbe ana mamo saso mam remo ro mhau kene mam wefo sor.”
MAT 14:16 Menohe Yesus yawe si kʼana yawe, “Ana mhau sai, mamo ma. Anu nesait noo boit aro nee kʼana mait.”
MAT 14:17 Tna ana mawe, “Amu nse roti trion maat msya syoh mana ewok aran sai fo.”
MAT 14:18 Tna Yesus yawe, “Nkah bo weto nma nee kʼJõ.”
MAT 14:19 Tna Yesus ybis raa msis-sas weto hre mte beta. Tna Yesus yoo roti trion maat msya syoh mana ewok reto ybo. Tna heyut mam ayoh yayoh asik mase kʼAllah. Tna Ait haber roti weto tna yee kuber wAit yawe ana saim kʼraa ro hre weto.
MAT 14:20 Raa weto moo mait tna mhaf matu beta. Menohe roti mabuf taro to msis mhau fares. Kuber ro Yesus wAit soo roti weto tna mfau mam keranjang trion 12 matot.
MAT 14:21 Ana ro mait boit mam ayõ reto to, raa sme mabo trion 5000. Raa ntuu fnya msya kukek ro mait to ye fee.
MAT 14:22 Ana mno bo weto mkak si fo, Yesus ybis kuber wAit maut wiak matim wea maru maam ati jaro. Ait yawe yesait yhau tna ybis raa msis-sas weto mamo bana.
MAT 14:23 Ait ybis ana mamo, tna mti knu-knu fo, Ait yesait aran yaut faut mana sau yamo skabuk.
MAT 14:24 Wiak ro kuber wAit maut fo, mamo susai mam aya masuf oh. Tna foos mfi mam ati ro ana miin mamo fo mama. Tibyo figyõm mai wiak rana.
MAT 14:25 Tna mam wore ayõ ro tuuf bo feto, Yesus yata abyõ mam aya mata yama yo kʼana.
MAT 14:26 Kuber wAit mmat feto, tibyo mrok waa. Tna ana mwohrarar mawe, “Bo mnat anu!”
MAT 14:27 Menohe Yesus yawe kʼana yawe, “Knar oh, waa ma! Jõ mefi!”
MAT 14:28 Tna Petrus yawe kʼAit yawe, “Soh Nyõ Yesus metait mi, nbis jõ tata abyõ mam aya mata tama to kʼNyõ ye.”
MAT 14:29 Tna Yesus yawe kʼait yawe, “Ae, nama oh.” Tibyo Petrus yroh ybam wiak, tna yata abyõ mam aya mata yamo yo kʼYesus.
MAT 14:30 Petrus yata mam aya mata abyõ yamo, menohe yari foos mfi tna yrok waa. Ait waa yawe yno sruf mam aya oh. Tna ytu kʼYesus yawe, “Tuhan; natmof jõ, fe kbe jõ tsu fo.”
MAT 14:31 Tibyo Yesus ybo Petrus yatem yayõ. Tna fo yastako Petrus yawe, “Nyõ smot Jõ kaket fee! Smot Jõ kaket!”
MAT 14:32 Ana mbewok maut mam wiak rana si fo, foos mrok mnem.
MAT 14:33 Tna kuber wAit ro mhau mam wiak mato sor maka smot Ait tna mawe, “Nyõ Ku ro Allah yare tu oh!”
MAT 14:34 Ana mamo snok mam aya maam jaro to, mroh mam rabin ro Genesaret.
MAT 14:35 Tna raa ro mhau mam rabin reto mmat he Yesus yama feto. Tibyo ana frok mamo mabah kʼraa makin beta. Tibyo raa makah raa ro kiyam sor to, mama mo kʼAit ye.
MAT 14:36 Tna ana soh-soh Ait mawe, “Amu niir ratan aNyõ makit sai mbau a?” Tna ana ro miir ratan rAit makit to, kiyam wana marak beta.
MAT 15:1 Tna raa ro Farisi msya guru agama Yahudi baro mbam Yerusalem mama mo kʼYesus. Tna ana mtu kʼAit mawe,
MAT 15:2 “Kuber woNyõ mno bo mkair berhasyoh bo mafa ro ja hohos wanu tii mno to, mkah bawya! Soh kuber woNyõ mait boit to, ana myon matem wia fee!”
MAT 15:3 Menohe Yesus yawe si kʼana yawe, “Anu nesait nno bo mkair toni: Anu ja nno bo mafa ro hohos wanu, menohe anu niwana watum ro Allah oh meto. Nno fyi meto!
MAT 15:4 Tiwya Allah yawe mam bokom rAit yawe, ‘Nmat nja msya nme na to kaket. Tna awya ro yawe kair yaja, yme bo to, kbe ait raa mame yajat tu oh.’
MAT 15:5 Menohe anu nno bo mkair: Anu nbis raa nwe matmof maja msya mme na to ma. Anu nwe, ‘Pitis ro anu nwe noo nee kʼana to, noo nee kʼAllah shauk ana oh.’ Feto to anu kro bo mafa ro hohos na wanu kaket tibyo berhasyoh Watum ro Allah oh meto.
MAT 15:7 Anu fo raa ro sioh anu sai! Tiwya Allah ybis nabi Yesaya ykyas anu ykom yawe anu nmo wan-wan sai. Mabo oh! Bokom reto mawe,
MAT 15:8 ‘Raa mana refo mbaut Jõ mkah masoh mabyõ sai. Menohe ana mhaf wana to hayah sai.
MAT 15:9 Ana maka smot Jõ mati sai. Tna watum ro ana mbo reto to watum ro mbam raa sai meto, mbam kʼJõ fee.’”
MAT 15:10 Yesus ytu raa msis-sas mama, tna ykyas bo kʼana yawe, “Nri bo ro Jõ tkyas kʼanu tna srau nnaut kaket:
MAT 15:11 Raa ro Farisi ja mmat sas bo ro raa mait. Menohe boit ro ana mait reto mamoʼt mhaf mato wana sai. Boit aro mno wa iranya raa msya Allah to fee. Menohe Allah ymat sas bokyas mkair ro frok mbam raa mhaf mato. Bokyas weto oh mi mno wa iranya raa msya Allah to.”
MAT 15:12 Tna fo kuber wAit mama kʼAit mawe, “Bi yabi, bo ro Nyõ nkyas to, raa ro Farisi mari tna ana kmo meu.”
MAT 15:13 Menohe Yesus yawe si kʼana yawe, “Jõ Taja yhau mam sawro rAit. Tna ja yso bo ro moof mam armato rAit sai. Mfi bo Ait ykah bo mam armato rAit to, kbe Ait yatu bosafom ro mkair to beak. Yatu mkah mtis ye. ⌞Tna raa ro Farisi mnan fi bosafom ro mkair reto.⌟
MAT 15:14 Nri bo raa ro Farisi mkyas to ma. Ana to mfi guru ro ja masu mboh. Mfi bo guru ro yasu mboh sait, yawe yerif iso kʼait ro yasu mboh roto sait. Kbe ana mbewok mamo sre tna btek mam kayah mato.”
MAT 15:15 Tna Petrus ytu si kʼYesus yawe, “Sik ne betoo bo ro Nyõ nkyas mkah fret reto kʼamu wia.”
MAT 15:16 Tna Yesus yawe kʼana yawe, “Anu wase bofret reto maja rau fares a?
MAT 15:17 Bo ro raa mait mam masoh to, kbe mroh beta mamoʼt mhaf. Tna kbe haberek mamo syõ. Tna raa mamo msyõ mam sutet makus agus.
MAT 15:18 Menohe soh raa mhaf mkair to, kbe bokyas mkair frok mbam raa masoh. Tna bokyas reto oh mi mno raa weto mkair.
MAT 15:19 Raa ro mhaf mato mkair to, ja mnaut-nat bo ro mkair-kar, mame ajat, wyahte raa, mjah bo kbik-kbak, tna msyõf bo. Ana sioh raa anya, tna mamus raa anya ye. Bo weto beta to, frok mbam kʼraa mhaf mato ro mkair oh meto.
MAT 15:20 Bo weto oh mi mno wa iranya raa msya Allah to. Menohe soh raa myon matem kaket fee tna mait bo to, Allah yawe bo reto to bo ati fee. Allah yawe raa ro mno bo feto to raa ro mkair to fee.”
MAT 15:21 Tna Yesus sikba yuk reto yamoʼt rabin ro Tirus msya Sidon.
MAT 15:22 Tna fai au ro Kanaan sau mbam rabin reto mama mo kʼYesus. Fai au mtu kʼAit mawe, “Yesus; Ku ro Daud yare, natmof jõ. Ku ano ajõ kabes mbo tibyo ku au mafa kiyam ro msai toni.”
MAT 15:23 Menohe Yesus shait bait sai. Tna kuber wAit mawe kʼAit mawe, “Fai au mmai wer sai. Nbis fai au reto frok mamo.”
MAT 15:24 Tna Yesus yawe kʼfai au yawe, “Soh raa ro kmot domba marak to, kbe domba mamo tit. Raa ro Israel mfi domba ro mamo tit. Jõ Taja ybis Jõ tama to kʼraa ro Israel mesait aran sai. Tna nyõ fo, fnya ro Israel fee.”
MAT 15:25 Menohe fai au reto mama kene kʼAit tna maka smot Ait. Tna soh-soh mawe, “Tuhan natmof jõ.”
MAT 15:26 Menohe Yesus yisboh si kʼfai au yawe, “Ja raa moo boit mee kukek wana mait mhaf matu. Raa moo boit ro kukek mait reto to, beak mtah mait fee!”
MAT 15:27 Tibyo fai au mawe, “Tuhan; feto saah oh. Menohe makyõ-aka ro btek mbam ambar ro tuan mait to, ja mtah mait ye oh.”
MAT 15:28 Feto tibyo Yesus yawe kʼfai au yawe, “Bosmot anyõ matak toni. Bo ro nyõ nayoh to, mabo mamyot bo ro nyõ nhaf ksoh oh.” Mam weto si fo, ku ro ano rau mrok moof.
MAT 15:29 Yesus sikba yuk reto, tna yamoʼt maru maam ro Galilea. Tna Ait yaut yamoʼt faut sau tna susu hre.
MAT 15:30 Tna raa msis-sas mama mo kʼAit. Ana makah raa ro maa maka, raa ro maa ssafo fee, raa ro masu mboh, raa ro mmai marak tna msya raa ro mafa bo roto taro sor to, mawat mama ye. Tna Yesus yisoh ana tibyo mrok moof beta.
MAT 15:31 Ana ro mmai marak to mrok mmai. Ana ro maa maka to maa wana mrok ntrot. Ana ro maa ssafo fee, maa wana mrok matak tibyo mber mamo ye. Tna ana ro masu mboh to, masu mrok maah tna mmat bo ye. Raa msis-sas mmat bo ro Yesus yno feto, tibyo mrok ktak sai, tna mbaut Allah ro Israel ye.
MAT 15:32 Tna Yesus ytu kuber wAit mama tna yawe, “Jõ tatmof raa msis-sas wefo. Ana mama mhau msya Jõ ti trion tuuf oh. Tna mfo wefo boit wana mkak ye oh. Soh Jõ tbis ana mkah hai sre hah me mamo to, kbe ana mhai awyah sne fefa mam iso maka.”
MAT 15:33 Tibyo kuber ro Yesus wAit mawe, “Fyi re anu bkai boit mnan mam yuk ro mimon refo? Raa ro mawe mait bo fo msis.”
MAT 15:34 Tna Yesus ytu kʼana yawe, “Anu nse roti jya meto?” Tna ana mawe, “Amu nse roti trion krema msya syoh kinyah baro sai mefo.”
MAT 15:35 Tna Ait ybis raa msis-sas weto hre mte beta.
MAT 15:36 Tna fo Yesus yoo roti krema reto msya syoh kinyah weto to, ybo tna yayoh asik mawat kʼAllah. Tna fo Ait haber roti weto ftah aro rau yee kuber wAit mbo saim kʼraa msis-sas weto beta.
MAT 15:37 Raa msis-sas weto mait tna mhaf matu beta. Tna roti msya syoh ro mhau fares to, kuber ro Yesus wAit soo mawah mfau mam keranjang trion krema matot.
MAT 15:38 Raa sme ro mait bo to mabo 4000. Tna raa ntuu fnya msya kukek ro mait boit weto ye fee.
MAT 15:39 Yesus ybis raa msis-sas reto masen mamo bana, tna ait yaut wiak sau yamoʼt rabin ro Magadan.
MAT 16:1 Tna raa ro Farisi msya raa ro Saduki baro mama mo kʼYesus. Tna ana sanet Ait: Ana mayoh mawe Ait yno bo msai aro re kbe ana mmat. Mmat tibyo ana mhar mawe Ait ybam kʼAllah yama fe mfe a.
MAT 16:2 Menohe Yesus yisboh si kʼana yawe, “Soh anu nmat ayõ twok hreha tna nmat iri majit to, anu nhar nwe, ‘Kbe menrabu arin moof.’
MAT 16:3 Tna rabu momo to, soh anu nmat ayoh ngknu tna mkek ye to, anu nhar nwe, ‘Rere arin mkair.’ Anu ja nmat sas ayoh to, tna nhar nwe kbe oom mais. Tna nhar nwe kbe hwyõm. Anu nmat sas bombra ro Jõ tno sor ye. Menohe anu srau nnaut fee.
MAT 16:4 Anu raa mana ro mfo nhau mam tabam refo fo, anu ja nber safo tna kro Allah kaket fee! Anu nwe Jõ tno bo ro msai aro re kbe anu nhar nwe Jõ tbam kʼAllah tama fe mfe a. Menohe Jõ kbe tno bo msai sau aran sai re anu nmat tna nhar: Meen anu nmat bo msai sau ro mnan fi tiwya Allah yno mkah nabi Yunus sai.” Yesus ykyas bo weto mkak si fo, yasen sikba ana yamo.
MAT 16:5 Yesus ysya kuber wAit mamo snok mam maru maam jaro. Kuber wAit sorni roti ro kbe ana mait to akus.
MAT 16:6 Tna Yesus yawe wa kuber wAit yawe, “Kaket anu mkah ragi raa ro Farisi msya Saduki.”
MAT 16:7 Kuber wAit mari feto, tibyo mkyas kʼanya mawe, “Anu sorni roti ro kbe biit, au oh mi Yesus ykyas feto to.”
MAT 16:8 Menohe Yesus yhar bo ro ana mkyas kʼanya feto. Tibyo Ait yastako ana yawe, “Anu smot Jõ kaket fee! Roti wanu marak to, nnaut nkyas nno fyi?
MAT 16:9 Anu wase Jõ tatak aJõ fares a? Anu sorni bo ro anu nmat oh fe mfe a? Tiwya anu nmat roti maat ro Jõ too saim kʼraa mabo trion 5000 mait to fe mfe a? Tna anu soo ro ntari mhau to, nfau keranjang ja meto?
MAT 16:10 Tna taa anu nmat bo Jõ too roti krema tee kʼraa mabo 4000 mait to, tna ro ntari mhau to, anu soo nfau keranjang ja ye meto?
MAT 16:11 Riwai Jõ tawe, ‘Kaket anu mkah ragi raa ro Farisi msya Saduki.’ Reto to Jõ tawe bofret sai meto. Roti ro raa mait oh mi Jõ tawe meto fee.”
MAT 16:12 Yesus yawe bo feto, tibyo ana mfot mawe Ait yawe wa ana afo re ana kaket ana mkah ragi ro roti meto fee. Menohe Ait yawe wa ana yawe kaket ana mkah bo watum raa ro Farisi msya Saduki.
MAT 16:13 Ana mamo snok mam rabin ro kene mam kota ro Kaisarea Filipi. Tna Ait ytu bo kuber wAit yawe, “Raa mkyas mawe 'Ait ro Yroh Yama Yfi Raa Sai' tait, awya?”
MAT 16:14 Kuber wAit mawe, “Ana taro mawe kʼamu mawe, Nyõ fi Yohanes ro ja baptis raa. Tna taro mawe, Nyõ fi nabi Elia. Tna taro mawe, Nyõ fi nabi Yeremia soh mfe to, nabi ro Allah ybis roto sait.”
MAT 16:15 Tna Yesus ytu kʼana yawe, “Bonaut ranu nesait nwe to Jõ fi awya?”
MAT 16:16 Simon Petrus yasen yawe, “Allah ro yaam tait, Nyõ fi Ku ro Ait yare. Nyõ fi Mesias!”
MAT 16:17 Tna Yesus yawe, “Simon, ku ro Yunus yare: Raa oh mi besi kʼnyõ re nkyas meto fee. Taja oh mi besi kʼnyõ re nkyas feto. Kbe nyõ nhau simaut mase.
MAT 16:18 Nyõ nfi fraa nes ro mros yum. Bosmot anyõ matak to. Kbe Jõ sgi raa mana woJõ abyõ kʼnyõ. Feto kbe nyõ nkyas watum aJõ kʼana. Tna kbe ana smot Jõ tibyo mamo raa mana woJõ ye. Kbe ana matak toni tibyo Kabes Yabi ytai yno ana btek bo fee ye.
MAT 16:19 Kbe Jõ tbis nyõ nitrah mato re kbe raa mama truk mamo raa mana ro Allah yamo Raja ybo ye. Tna kbe bo ro Allah yawe mkair to, kbe nyõ nawe bo weto mkair mam tabam refo ye. Tna kbe bo ro Allah yawe moof to, kbe nyõ nawe bo weto moof mam tabam refo ye.”
MAT 16:20 Tna Yesus yawe wa kuber wAit yawe, “Nkyas kʼraa nwe Jõ fi Mesias to ma.”
MAT 16:21 Tna maban ati reto ⌞mamo snok mam mabo rau⌟ to, Yesus ykyas bo kuber wAit yawe, “Tako hawe sai, kbe Jõ tamoʼt Yerusalem. Tna mam beto to, kbe Jõ tkai bo ro samyoh mawat btek mai kʼJõ. Bo ro samyoh weto to, mbam kʼraa manes ro agama Yahudi: Raa mabi wana msya imam manes wana, tna msya guru agama wana ye. Jõ kbe raa mame tajat. Tna ti ro tuuf to, Taja yno Jõ trok tasen.”
MAT 16:22 Petrus yari bo ro Yesus ykyas feto, tibyo ykuk Yesus yamo kait kʼait yajoh jaro. Tna Petrus yastako Yesus yawe, “Tuhan; kbe Allah yatmof Nyõ tu oh. Bo samyoh reto kbe btek mai kʼNyõ fee saut.”
MAT 16:23 Menohe Yesus haberek bhah Petrus yawe, “Petrus, namo fari tno. Nyõ nkyas bo ro kabes yabi (Iblis) ykyas meto! Nyõ nno wa Jõ to ma. Bo ro nyõ nkyas reto to, bonaut ro mbam kʼAllah fee. Bonaut reto to, mbam kʼraa sai meto.”
MAT 16:24 Tna Yesus yawe kuber wAit yawe, “Awya sai ro ksoh kro Jõ to, yako hawe sai kbe yno mfi fefo: Kbe yno bo rait u ma. Tna kbe ait yasom ara warok rait ye: Au oh mi yako hawe sai ait beroh yasom bo mase ro kbe mama mai kʼait. Tna beroh kro iso ro Jõ terif kʼait.
MAT 16:25 Raa taro mawe misoh metsu rana ai mam tabam refo. Ana saso riof rana mam tabam refo sai ai, menohe mnaut mamos rana fee. Meen ana weto mhau hame wajin fee. Menohe raa taro ja saso riof rana ai mam tabam refo fee. Ana mawe mno bo woJõ. Ana saso Jõ tasom aJõ mam tabam refo. Ana weto oh mi kbe mkai riof. Ana kbe meen raa mame majat oto, menohe meen ana mkai riof ro hame wajin.
MAT 16:26 Mfi bo raa sait ykai kta mam tabam refo to beta, menohe ykai riof ro mase fee. Meen mafer rau to bawya? Ait ynaut yawe riof ro mase to, ja raa kwiyat mkah kta wana weto a?
MAT 16:27 Jõ fi 'Ait ro Yroh Yama Yfi Raa Sai'. Meen Jõ tama u to, Jõ takah bo yase ro Taja ye. Tna malaikat wAit sor tayun Jõ mama ye. Tna kbe Jõ too boren raa sait-sait tna taren ana. Taren raa to, tno mamyot bo ro ana mno beta. Oon reto to kene oh.
MAT 16:28 Nri oh! Meen ‘Ait Ro Yroh Yama Yfi Raa Sai’ ye yama u. Yama u to, kbe yamo Raja ybo raa wAit. Ati ro Ait yama u to, anu wore siret mam wefo fo, meen anu baro nhau fares nmat Ait yama to. Ati reto to, nhai beta marak fefares.”
MAT 17:1 Ti trion ntamam firwas tna Yesus yakah Petrus, Yakobus ysya Yohanes ro Yakobus yao to, yamo. Ana maut mamoʼt atu ro miyõ sau. Ana mesait mamo kar mam yuk reto.
MAT 17:2 Tibyo Yesus yetsu haberek mam wore ana mros weto. Yasu ynaif to, mrok mawyah mfi ayõ. Tna ratan ro yyum to, mamo mboh fyok ye.
MAT 17:3 Tna ana mmat raa mabo ewok frok tubor mros msya Yesus. Ana mbewok weto to Musa ysya Elia.
MAT 17:4 Tna Petrus yawe kʼYesus yawe, “Guru; amu ye nhau mam yuk refo to moof toni. Soh Nyõ ksoh meto mi, kbe jõ ttor sbyah trion tuuf mam yuk refo: Sau kʼNyõ, sau kʼMusa, tna sau kʼElia ye.”
MAT 17:5 Petrus ykyas bo kri-kri fares fo, byõ ro mboh fyok mama mroh sro-sro ana kait. Tna ana mari Raa sait ymai mam byõ mato yawe, “Ait refi Ku aJõ ro Jõ tksoh. Ait tait Jõ thaf mnan. Nri bo kʼAit!”
MAT 17:6 Kuber wAit mabo tuuf reto mari feto tibyo ana mrok waa toni tna maka mabum mam tabam.
MAT 17:7 Menohe Yesus yama yatem yiir ana, tna yawe, “Waa ma. Nsen nros oh.”
MAT 17:8 Ana mari tna misbat mana mmat menohe Yesus yesait aran sai. Musa ysya Elia marak.
MAT 17:9 Ana mroh mbam atu reto to, Yesus ysi bo kʼana. Ysi yawe, “Bo ro riwai anu nmat to, nkyas kʼraa roto to ma. Nhau sai mamo snok mam wore wo Jõ trok tasen wia. Jõ fi 'Ait ro Yroh Yama Yfi Raa Sai'.”
MAT 17:10 Tna ana mtu bo kʼAit mawe, “Fyi re guru agama wanu ro Yahudi mawe, ‘Meen Elia yama wia tna fo Mesias yama yrof to?’”
MAT 17:11 Yesus yawe, “Ae, Elia meen yama yisoh bombra sor wia.
MAT 17:12 Jõ tawe kʼanu tawe, Elia tiwya yama oh. Menohe raa mhar ait fee. Tna raa sikowah ait mamyot ksoh rana sai. Tna meen ana mno bo mkair feto mai kʼJõ ye. Jõ fi 'Ait ro Yroh Yama Yfi Raa Sai'.”
MAT 17:13 Tibyo kuber wAit srau mawe, “Ait ykyas Elia to, Ait ykyas Yohanes ro ja baptis raa oh meto.”
MAT 17:14 Wore wo Yesus ysya kuber wAit mabo tuuf hah me mama to, ana mkai raa msis-sas ro siret wea mam yuk reto. Tna bi sait yama yo kʼYesus, tna yjit yimna mam tabam tna soh-soh Ait yawe,
MAT 17:15 “Tuhan; natmof ku ajõ! Ait tait, kiyam ro ruu mber reu msai toni. Ti aro to, kiyam reto mno ait ytek ybe mam tafoh. Tna ti taro to, btek mam aya ye.
MAT 17:16 Jõ takah ait tamo tee kuber woNyõ. Menohe ana matak misoh ait yoof fee.”
MAT 17:17 Yesus yawe, “Anu wefo mfe saut! Anu wefo raa ro wyahte Allah, tna smot Jõ fee! Kbe thau tsya anu kait fares a? Jõ thaf sneh tsya anu kait ye fee oh!” Tna Yesus yawe kʼbi retait yawe, “Nbo ku retait nakah nama!”
MAT 17:18 Ana makah ku retait mama tna Yesus yikyak kabes ro mbo ku refi frok mamo. Tna mam weto si fo, ku retait yrok yoof.
MAT 17:19 Yesus yno bo weto mkak tna kuber wAit mama mo kʼAit yesait. Tna ana mtu kʼYesus mawe, “Bo bawya mno re amu ntak nikyak kabes reto frok fee?”
MAT 17:20 Menohe Yesus yawe, “Bosmot wanu matak fee. Soh bosmot wanu maku sai, mnan fi makan (biji) ro maku sai to, kbe anu nwe kʼatu rno nwe susu mamoʼt tno. Nwe feto tna kbe atu reto susu mamo tu oh. Tna soh bosmot wanu mase mfi feto to, kbe anu ntak nno bo bawya sai ye. [
MAT 17:21 Menohe kiyam ro kabes mnan feto to, ja raa mikyak sai fee. Raa skabuk tna mhau bo mait wia, re kbe mikyak kabes reto frok.”]
MAT 17:22 Ati sau to, Yesus ysya kuber wAit mhau su mam provinsi ro Galilea. Tna Yesus yawe kʼana yawe, “Jõ fi 'Ait ro Yroh Yama Yfi Raa Sai'. Tna kbe raa mfot Jõ tna msan kʼraa roto mbo.
MAT 17:23 Tna ana mame Jõ tajat. Tna ti ro tuuf to, kbe Taja yno Jõ trok tasen.” Ait ykyas bo weto, tibyo kuber wAit sraujin toni.
MAT 17:24 Yesus ysya kuber wAit mamo snok mam remo ro Kapernaum. Tna raa ro ja moo namabyoh (pajak) mkah misoh Samu ro Allah mama mo kʼPetrus. Ana mtu kʼait mawe, “Bi Guru ranu ja yoo pitis ro namabyoh Samu ro Allah yee, fee mfe a?”
MAT 17:25 Tna Petrus yawe, “Ae, bi Ait yoo yee.” Tna Petrus yamoʼt amah. Ait twok mam amah si fo, Yesus huwya yawe kʼait wia yawe, “Simon; raa ro mase mam tabam refo ja yoo pitis ro namabyoh. Nyõ nnaut fyi? Ja ana moo pitis reto mbam kʼawya? Mbam raa kinyah ro rabin rana tna msya raa ro srim ye fe mfe a?”
MAT 17:26 Tna Petrus yawe, “Ana moo pitis raa ro srim.” Tna Yesus yawe, “Feto to, raa kinyah ro ana mbo to, moo pitis ro namabyoh mee fee. Feto to, anu ro Allah ybo fo, anu boo namabyoh ro samu rAit to bee fyi?
MAT 17:27 Menohe Jõ hawe bo ana kmo anu. Feto to, nasen namoʼt aya tna tawer syoh. Tna syoh ro nyõ nayo tinyi to, kbe nyõ nkai pitis mauf mam syoh reto masoh. Tna noo pitis weto namo nee mkah namabyoh wanu mbewok.”
MAT 18:1 Ati reto kuber ro Yesus wAit mama mo kʼAit tna mtu kʼAit mawe, “Awya ro oh mi yase mam raa mana ro Allah yamo Raja ybo to?”
MAT 18:2 Tibyo Yesus ytu ku maku sau mama mros susai tna yawe,
MAT 18:3 “Haberek nmo nfi ku maku refo. Soh mfe to, kbe anu nmo raa ro Allah ybo mam raa mana rAit to fee ye.
MAT 18:4 Awya ro yhaf sneh tna bonaut rait haberek yfi ku maku refo to, ait kbe yase mam raa mana ro Allah yamo Raja ybo ye.
MAT 18:5 Jõ ksoh anu nitrah nhaf wanu kʼraa ro mhaf sneh. Awya ro yitrah yhaf rait ku refo, ro yno feto mam Jõ tasom aJõ to, ait yno bo moof oh meto. Au oh mi; awya ro mmat raa ro mhaf sneh to, yno feto to mnan anya mfi ait yno bo ro moof reto kʼJõ ye oh meto.”
MAT 18:6 “Mam tabam refo fo, bo aro rau tko re raa mno iro. Bo weto mhau bau oh. Tibyo meen Allah yno bo ro samyoh btek mai tabam refo to. Menohe raa ro yisti re ku maku ro smot Jõ sau mno iro to, soh ait ysu mam aya yhai to, moof miwer bo ro meen Allah yno mai kʼait retait! Mfi bo raa moo fraa ro mase sau tna make mam yamyum rait tna mbeak ait mam aya sawan, tibyo ysu to, bo reto to moof miwer bo samyoh toni ro meen ait ykai. Tuhan kmo toni raa ro misti re raa roto mno iro to.
MAT 18:8 Tna soh anu ntem soh mfe naa jaro misti re anu nno iro to, sbi ntem msya naa reto noo beak makus. Anu nhau nsya Allah nkah ntem msya naa jaro sai to, reto bo ro moof. Menohe soh anu nhau nkah ntem ewok soh mfe naa ewok ro misti re nno iro to, bo ro mkair. Meen Allah yoo anu beak niit mam tafoh ro roon reto.
MAT 18:9 Feto ye soh anu nsu jaro misti re anu nno iro to, tufrok nsu makan reto beak makus. Anu nhau nsya Allah nkah nsu jaro mesait aran sai to, reto bo moof. Menohe soh anu nhau nkah nsu ewok ro misti re nno iro to, bo ro mkair. Meen Allah yoo anu beak niit mam tafoh ro rabin kair reto.
MAT 18:10 Feto ye, niwana ku kinyah wefi sait ma. Malaikat ro ja mhau msya Allah sor to, ja kmot ana ye. [
MAT 18:11 Ait ro Yroh Yama Yfi Raa sai yama mkah bo yoo riof yee kʼraa ro mamo tit.]”
MAT 18:12 “Anu nnaut fyi? Mfi bo raa sait ysia domba wait mana trion 100. Tna domba weto mana sau marak. Kbe bi ait retait yno bawya? Kbe ait yasen yamo saso domba ro marak reto fe mfe a? Kbe ait sikba domba mana trion 99 reto agus mam faut mana. Tna ait yamo saso domba ro marak reto fea!
MAT 18:13 Soh ait ykai domba ro marak reto to, kbe ait simaut mase. Menohe domba mana 99 ro mhau mam faut mana to, ait simaut mase fee.
MAT 18:14 Anu Nja ranu ro yhau mam sawro rAit to, Ait hawe bo raa kinyah wAit sait yarak feto ye.”
MAT 18:15 Yesus yawe kuber wAit yawe, “Soh raa wanu sait yno iro to, namo no kʼait tna betoo iro reto kʼait. Nkyas mam wore anu mbewok aran sai. Nkyas mam wore raa makin mmat ma. Tna soh ait yari bo ro nyõ nkyas reto to, ait retait ye yiranya u oh meto.
MAT 18:16 Menohe soh ait yari bo ro nyõ nkyas fee; namo nmen raa mabo sait atau ewok bo feto msya nyõ nmo no kʼait. Tna hre nkyas bo reto su. Watum ro Tuhan mawe, ‘Nko hawe sai raa mabo ewok, soh mfe tuuf mama tna hre su: Raa mabo ewok, soh mfe tuuf ro mesait mmat bo reto to, ntu ana mama. Tna ana weto kbe hre mkyas bo ro ana mmat. Soh ana beta mmat bo mnan anya, mawe raa retait yno bo ro mkair reto, feto tna fo raa moo srah mmit kʼraa retait.’
MAT 18:17 Tna soh ait hawe yari bo ro anu nwe to, nmo nkyas bo reto nsya jemaat. Nkyas bo reto nsya raa ro ja msya anu skabuk su. Tna soh ait hawe yari bo ro anu beta nkyas to, niranya nsya ait ma. Nmat ait yfi raa ro wase Allah. Nmat ait yfi raa ro ja mno bo mkair-kar mnan fi ana ro ja moo namabyoh (pajak).
MAT 18:18 Jõ tawe kʼanu tawe: Bo ro Allah yawe mkair to, nwe mkair mam tabam refo ye. Tna bo ro Allah yawe moof to, nwe moof mam tabam refo ye.
MAT 18:19 Tna Jõ tawe kʼanu ye tawe: Soh anu ro smot Jõ nbo ewok ntu srah bawya sai su, tna anu nrok srau sau nwe srah reto mabo tna nkyas kʼTaja ro yhau mam sawro rAit to, kbe Ait yawe srah reto mabo ye.
MAT 18:20 Wore raa woJõ mabo ewok atau tuuf siret su re mtu srah mari to, kbe Jõ siret tsya ana mam weto ye.”
MAT 18:21 Tna Petrus yama yo kʼYesus tna ytu bo kʼAit yawe, “Tuhan; soh raa wanu sait yno bo ro mkair mai kʼjõ mun aro rau-rau to, kbe jõ te tfot yatem u muhrin jya bo feto? Muhrin krema fe mfe a?”
MAT 18:22 Menohe Yesus yawe, “Mfe; muhrin krema sai fee, muhrin trion 490 bo feto.
MAT 18:23 Allah yamo Raja ybo raa mana rAit to, mnan fi raja sait. Raja retait yawe ykyas pitis ro tiwya sryan wait mhe kʼait.
MAT 18:24 Raja retait ykyas bomhaam ysya sryan wait kri-kri to, raa wait makah sryan ro bomhaam wait sait naut mama. Sryan retait tiwya yhe pitis ro bofyah mase toni.
MAT 18:25 Menohe ait ytai yisroh bofyah wefo fee. Tibyo raja retait ybis raa mfot sryan retait ysya yfain, kukek wait, tna moo kta wait beta mamo masim afo re moo mabyoh rau to misroh bofyah wait.
MAT 18:26 Menohe sryan retait yabum soh-soh raja retait yawe, ‘Bi yabi, natmof jõ! Nhau rere baro wia tna kbe tisroh pitis wonyõ beta.’
MAT 18:27 Raja retait yari feto, tibyo yatmof sryan retait tna yawe bofyah weto makus rof. Tna raja retait bitsre sryan retait yamo bait ye.
MAT 18:28 Menohe sryan retait frok yamo tna ykai sryan roto sait ro tiwya yhe pitis bofyah kebet baro kʼait. Tna sryan ro riwai raja bitsre retait, yfot sryan roto refi bekon tna yastako yawe, ‘Nisroh pitis ro tiwya nyõ nhe kʼjõ to, fooh!’
MAT 18:29 Menohe sryan roto refi yabum soh-soh ait yawe, ‘Nhau rere baro wia tna kbe jõ tisroh tu oh!’
MAT 18:30 Menohe sryan retait hawe bo yari bo ro sryan roto refi yawe. Tibyo yfot sryan refi yamo ybu mam bui mamo snok mam wore meen ait yisroh bofyah wait wia tna fo frok.
MAT 18:31 Sryan roto taro mmat feto, mnaut mawe mkair toni. Tibyo ana mamo mkyas bo ro sryan retait yno reto kʼraja rana.
MAT 18:32 Raja retait yari feto to, yrok kmo. Tibyo ait ytu sryan retait yama tna yawe, ‘Nyõ nno bo mkair toni! Taa nyõ soh-soh jõ, tibyo jõ tawe nyõ nisroh bofyah wojõ fee, makus sai rof.
MAT 18:33 Rau ro moof to, nyõ natmof raa retait mfi bo tii jõ tatmof nyõ!’
MAT 18:34 Tna raja retait kmo sryan retait, tibyo ybis raa wait mfot ait makah mamo mbu mam bui. Yhau mam beto tna raa sikowah ait mamo snok mam wore meen ait yisroh bomhaam wait beta wia tna fo frok.”
MAT 18:35 Feto tna Yesus yawe, “Soh raa mno bo mkair mai kʼanu to, kmo ait ma. Nhaf mkair ma. Ne nhaf moof u. Soh anu nno feto fee, meen Taja ro yhau mam sawro rAit to, kbe yno bo ro mkair mai kʼanu sait-sait mfi raja retait yno to ye.”
MAT 19:1 Yesus ykyas bo weto mkak. Tna Ait sikba provinsi ro Galilea. Tna yasen yamoʼt provinsi ro Yudea. Yamoʼt aya ro Yordan maam jaro.
MAT 19:2 Raa msis-sas mama kro Ait. Tna Ait yisoh raa wana ro kiyam ye.
MAT 19:3 Tna raa ro Farisi baro mama mo kʼAit. Tna mtu bo sanet Ait mawe, “Mfi bo fnya sau mno bo ro mkair aro fee; menohe au maa yako au makus sai. Soh ait yno feto to, ait yiwrek Watum ro Musa ykom oh meto fe mfe a?”
MAT 19:4 Menohe Yesus yawe, “Anu wase Bokom ro Allah. Bokom rAit reto mkyas mawe: ‘Maban tiwya tinyi to, Allah yfen raa sme tna yfen fnya ye.
MAT 19:5 Feto to, ku ro sme kbe sikba yaja ysya yme na tna yamo ysya yfain rait mhau su. Kbe ana mbewok mjin su, bonaut rana sau, mhaf rana sau, tna bewok mno bo wana su ye.’
MAT 19:6 Feto ana to, raa mabo ewok u fee. Ana haberek mfi raa sait aran sai. Tna raa sme msya fnya ro Allah yse mrat su to, raa sait bo ye betwat ma.”
MAT 19:7 Menohe raa ro Farisi me mtu kʼAit mawe, “Musa ybis yawe, soh raa sait yako yfain rait makus to, ait ykom aam ro mako au makus. Ykom tna yee kʼau wia, tna ait yako au. Bokyas aNyõ hayah tna Watum ro Musa to hayah ye. Nyõ nawe fyi meto?”
MAT 19:8 Menohe Yesus yawe, “Allah hawe raa sait yako yfain rait. Menohe anu ja hawe nri Watum ro Allah. Tibyo Musa ykom watum reto.
MAT 19:9 Nri bo refo wia: Awya ro yfain wyahte ait fee, menohe ait yako au makus sai, tna yoo fnya ro mabyõ to, ait retait ywyahte oh meto.”
MAT 19:10 Tna kuber ro Yesus wAit mawe, “Soh feto to, ro moof to raa moo fnya ma.”
MAT 19:11 Menohe Yesus yawe, “Bo ro anu nwe reto, Raa beta srau fee. Allah ykyas feto kʼraa taro re ana mse bokyas reto mam ana mhaf wana.
MAT 19:12 Raa sme taro moo fnya fee. Ana taro to, tiwya fnya mabe to, metsu rana mkair. Ana kbe mjin msya fnya matak fee. Tna taro to, raa roto taro misti ana tibyo moo fnya fee. Tna taro to, mesait mawe mhau bana sai. Allah yamo Raja ybo ana oh. Tibyo ana mawe mhau bana sai afo re mrero mari bo ro Allah ybis ana. Mari tna kbe masen mamo mno sai. Awya ro yatak yari watum refo to yari oh.”
MAT 19:13 Tna raa baro makah kukek wana mama mo kʼYesus. Ana mama re kbe Ait yse yatem abyõ kukek wana tna skabuk ana. Kuber ro Yesus wAit mmat feto, tna ana mastako raa weto.
MAT 19:14 Menohe Yesus ymat feto, tibyo bhah kuber wAit. Bhah ana yawe, “Nitsre ku kinyah weto mama mo kʼJõ. Nwe wa ana to ma! Raa ro mama mo kʼJõ mfi kukek wefo fo, mhaf wana to, Allah ksoh. Ana oh mi mamo raa mana ro Allah yamo Raja ybo to.”
MAT 19:15 Tna Yesus yse yatem abyõ kukek wana weto tna yasen yamo renti naut.
MAT 19:16 Ati sau to, bi sait yama yo kʼYesus tna ytu yawe, “Guru; kbe jõ tno bawya ro moof re kbe meen Allah yno jõ thau hame wajin?”
MAT 19:17 Tna Yesus yawe kʼait yawe, “Fyi re nyõ ntu bo bawya ro moof kʼJõ to? Ja Raa sait aran yoof. Soh nyõ nawe nhau hame wajin to, nari watum ntraa ro tiwya Allah ybis Musa ykom to, nbo nno.”
MAT 19:18 Menohe bi retait ytu bo kʼAit yawe, “Watum ryo meto?” Tna Yesus yawe, “‘Nme ajat ma! Nwyah ma! Nsyõf bo to ma! Siroyõ ma!
MAT 19:19 Nmat nja msya nme na to kaket! Tna nhafri raa ro mhau kene msya anu to ye. Nhafri ana mnan fi anu nhafri netsu wanu nesait ai to.’”
MAT 19:20 Tna bi ait refi yawe, “Bo weto ja jõ tno beta oh. Bawya sai ro mhau fares?”
MAT 19:21 Tna Yesus yawe, “Soh nyõ nawe nno bo ro moof toni to, nno bo sau naut. Namo nasim kta wonyõ beta. Tna nsaim pitis weto kʼraa ro bo marak. Soh nno bo reto to, nyõ name kta mam sawro ro Allah oh meto. Tna fo nama nkro Jõ.”
MAT 19:22 Bobot retait yari bo ro Yesus yawe feto, tibyo hah ye yamo to sraujin toni.
MAT 19:23 Tna Yesus yawe kuber wAit yawe, “Raa ro bobot masen mamo raa ro Allah yamo Raja ybo to, min toni.
MAT 19:24 Kak unta maboh sau kbe mamo twok mam sii hren soo to, mnan-nan baro ye. Menohe raa ro bobot yamo raa ro Allah yamo Raja ybo to bo ro min toni.”
MAT 19:25 Kuber wAit mari feto, tibyo mrok ktak mawe, “Soh feto to, raa awya meen ykai riof?”
MAT 19:26 Yesus yasu ymat ana tna yawe, “Anu raa to, nesait ntai nno riof kʼanu fee. Menohe Allah yno riof kʼanu saah. Ait ytai yno bo bawya sai.”
MAT 19:27 Tna Petrus yawe, “Amu wefo nsen sikba bombra wanu beta afo re nma kro Nyõ oh. Tna kbe amu nkai bo bawya?”
MAT 19:28 Tna Yesus yawe, “Nri oh! Jõ fi 'Ait ro Yroh Yama Yfi Raa Sai'. Meen tabam refo kbe haberek mamo bo ro tna. Ati reto to, kbe Jõ hre mam ambar (tahta) ro mase toni. Kbe Jõ hre abyõ tbo raa woJõ. Tna mam weto ye to, anu nbo 12 fo, kbe hre mam ambar ro mase trion 12 ye. Kbe anu ntu srah kʼraa mana 12 ro Israel to, nri ye.
MAT 19:29 Tna Jõ tisti re raa taro sikba amah wana afo re kro Jõ. Taro to sikba mao na, mano na, maja msya mme na, kukek wana afo re kbe ana kro Jõ. Taro sikba armato wana bo to makus ye. Kbe ana beta mkai bo weto u muhrin trion 100. Tna meen ana mkai roon ro hame ye.
MAT 19:30 Menohe raa mawat ro mfo refo masom wana matim wia to, meen masom haberek mee mamo tis. Tna ana ro mfo refo masom mhau tis to, meen masom haberek matim wia.”
MAT 20:1 “Allah yamo Raja ybo raa mana rAit to, mfi bi yabi sait frok rabu momo yamo saso raa baro. Yawe raa mama misoh armato ro anggur rait. Ana mkah bo rait tna ait yoo boren yaren ana.
MAT 20:2 Ait ykai raa baro tna ykyas boren mabyoh jya kbe ait yaren ana. Ana mkyas bo su. Tna ait yawe kbe ana mno bo wait mamo snok hreha tna ait yaren pitis dinar mauf sau kʼana. Tna ybis ana mamo mkah bo mam armato rait.
MAT 20:3 Tna baas ayõ moo maa matak bo feto to, bi ait retait frok yamo tna fri raa mabo baro mhau baas sai mam pasar.
MAT 20:4 Tibyo ait yawe kʼana yawe, ‘Nmo nisoh armato ro anggur ajõ. Tna kbe jõ too boren mnan si taren anu.’ Ana mari feto, masen mamo misoh ye.
MAT 20:5 Tna mam wore baas ayõ mros susai bo feto, ait frok yamo u. Ait fri raa baro mhau baas sai. Tna ykyas bo ysya ana, yawe mnan anya sai. Tna mam wore hreha ayõ hawer bo feto, ait frok yamo yno bo feto naut u ye.
MAT 20:6 Tna mam wore ayõ frut bo feto ye, ait frok yamo fri raa roto taro naut. Tna ytu kʼana yawe, ‘Riwai anu nhau baas sai nno fyi?’
MAT 20:7 Menohe ana mawe kʼait mawe, ‘Raa aro mbis amu nkah bo rait fee.’ Tibyo bi ait yawe, ‘Feto to, nmo nkah bo mam armato anggur ajõ.’
MAT 20:8 Kene mam wore arin mti bo feto, tna bi yabi ro armato rait ybis aban mana ro ybo raa ro misoh armato rait yawe, ‘Namo ntu raa ro mkah bo mam armato ajõ to. Nawe ana mama re nyõ naren ana sait-sait. Naren raa ro mama mtis wia. Tna naren raa ro mama hreha. Tna naren ana ro matim rabu.’
MAT 20:9 Ana ro mkah bo weto mama tna ait yaren ana ro mama mrof wore ayõ mfrut fo wia. Ait yaren ana sait-sait mkah pitis dinar mauf sau.
MAT 20:10 Raa ro matim rabu mkah bo to, mmat feto tna mnaut mawe kbe ana raa maren boren mase miwrek ana ro mama mam tis to. Menohe mfe. Aban mana retait yaren ana mkah pitis dinar mauf sau aran sai ye.
MAT 20:11 Ana moo boren wana tna ntbur mawe, ‘Bi ro armato anggur retait yaren bo kaket fee sai a?
MAT 20:12 Amu ro ntim rabu nkah bo wia ayõ mafit nhai to. Menohe boren ro ait yaren amu mnan anya sai mfi boren ro ait yaren kʼana ro mama mam tis! Yno fyi meto? Ana weto mkah bo ayõ sau aran sai!’
MAT 20:13 Menohe bi yabi retait yawe kʼana wetait sait yawe, ‘Tao; kmo ma. Jõ tno bo ro mkair aro mai kʼnyõ fee. Riwai anu bkyas bo su bwe anu nkah bo ti ro miyõ sau to, kbe jõ taren anu pitis dinar mauf sau no?
MAT 20:14 Noo boren wonyõ tna namo oh. Jõ ksoh taren ana ro mama mam tis ye mnan anya mfi boren ro jõ taren kʼnyõ to ye.
MAT 20:15 Nyõ nawe jõ tno bo manhai wojõ mkah jõ ksoh ajõ sai to ma fe mfe a? Soh jõ thaf ase tna tatmof raa anya to, kbe nyõ nhaf mkair a?’”
MAT 20:16 Tna Yesus yawe, “Feto ye, raa ro masom makus mtis to, meen masom haberek matim mana wia. Tna ana ro masom matim mana wia to, meen haberek masom mamo mtis mrof.”
MAT 20:17 Yesus yawe yamoʼt Yerusalem. Tna Ait ytu kuber wAit mesait aran mama. Tna Ait ykyas bo kʼana yawe,
MAT 20:18 “Jõ fi ‘Ait ro Yroh Yama Yfi Raa Sai.’ Anu bmoʼt Yerusalem mefo. Mam beto to, kbe raa moo Jõ msan kʼimam manes msya guru agama ro Yahudi. Tna kbe ana mtu srah mari tibyo mawe safo makan btek mai kʼJõ. Tna mawe raa mame Jõ tajat.
MAT 20:19 Tibyo ana ro agama Yahudi to, kbe moo Jõ msan kʼraa ro wase Allah. Kbe ana mamus Jõ, moo too mmok-mak Jõ, tna kbe ana mame Jõ tajat mam ara warok. Tna ti ro tuuf to, kbe Taja yno Jõ trok tasen.”
MAT 20:20 Bi Zebedeus yfain msya ku wau mabo ewok mama mo kʼYesus. Tna fai au mjit mimna ntmi mam tabam, tna soh-soh Ait.
MAT 20:21 Yesus ytu kʼfai au yawe, “Bo ro nyõ nayoh kʼJõ to bawya?” Tna fai au mawe, “Meen Nyõ namo Raja nbo raa mana aNyõ. Jõ tayoh kʼNyõ tawe, noo ku wojõ mabo ewok, nse mbewok hre msya Nyõ re ana mamo mase msya Nyõ ye. Nbis sait hre kʼNyõ mam ati ro natem ati. Tna nbis sait hre mam ati ro natem ta.”
MAT 20:22 Menohe Yesus yawe kʼana yawe, “Anu wase bo ro anu nyoh: Fyi, kbe anu ntai nsom kair ro kbe mama mai kʼJõ fe mfe a?” Tna ana mawe, “Amu ntak ye.”
MAT 20:23 Tna Yesus yawe, “Bo ro mai kʼJõ to, saah meen anu nsom ye oh. Menohe awya ro hre mam ati ro tatem ati msya temta to, Jõ oh mi tsok to fee. Raa ro hre mam yuk reto to, meen Taja yesait ysok bo rAit oh.”
MAT 20:24 Kuber wAit mabo nsaa taro mari bo reto, tibyo ana mrok kmo ana mbewok ro mao kʼanya reto.
MAT 20:25 Feto tibyo Ait ytu ana mama tna yawe kʼana yawe, “Raa ro wase Allah mam tabam refo to, anu nhar nwe raa ro mamo aban mana wana to, ja mberasi raa kinyah ro ana mbo. Tna raa mase ro mhre abyõ mam uu to, mberasi ana ro mamo aban mana weto ye.
MAT 20:26 Menohe anu to, nno bo feto ma. Awya sai ro yawe yase kʼanu wefo to, ait yamo raabis ranu tna ait yno bo wanu ye tu oh.
MAT 20:27 Tna awya ro yawe yatim yamo aban mana kʼanu to, ait yamo sryan tna yno bo wanu wia.
MAT 20:28 Ynan fi Jõ fo. Jõ fi 'Ait ro Yroh Yama Yfi Raa Sai'. Jõ tama fo, tawe tbis raa mno bo woJõ fee. Menohe Jõ tama fo re tno bo kʼraa. Tna tama re too tetsu ajõ tfes raa mawat. Tibyo kbe ana mkai riof ro mase”
MAT 20:29 Yesus ysya kuber wAit frok mbam Yerikho fo, raa msis-sas kro Ait.
MAT 20:30 Tna raa ro masu mboh mabo ewok hre wea mam iso maam weto. Ana mari mawe Yesus yamo frit iti feto, tibyo ana masen mtu kʼAit mawe, “Tuhan; Ku ro Daud, natmof amu!”
MAT 20:31 Raa msis-sas sor weto kmo bhah ana mbewok mawe, “Shait!” Menohe ana mbewok reto beroh mtu fari renti mawe, “Ku ro Daud, natmof amu!”
MAT 20:32 Tna Yesus yari feto, tibyo susu yros. Yros tna ytu bo kʼana mbewok yawe, “Anu ksoh nwe Jõ tno bawya kʼanu?”
MAT 20:33 Ana mawe si kʼAit mawe, “Tuhan; amu nksoh nmat bo ye!”
MAT 20:34 Yesus yatmof ana tna yiir ana mbewok masu. Tibyo ana masu maah. Tna ana kro Ait mamo ye.
MAT 21:1 Yesus ysya kuber wAit mamo mam iso ro Yerusalem fares. Tna ana snok remo ro Betfage mam Faut ro Zaitun. Tna Ait ybis kuber wAit mabo ewok matim wia. Ait yawe,
MAT 21:2 “Ntim wia, nmoʼt remo reto. Tna twok nmo to, kbe anu nkai keledai ro ano sau msya maku rau, raa mii mros wea mam weto. Nmo skur mana ewok ye nkuk nma nee kʼJõ.
MAT 21:3 Soh raa mtu bo kʼanu mawe, ‘Anu skur keledai weto mkah bawya?’ Nwe kʼana nwe, ‘Tuhan ybis yawe amu nma skur fo.’ Tibyo kbe raa retait bitsre anu skur nkah nma.”
MAT 21:4 Bo reto mabo mnan si bo ro tiwya Allah ybis nabi sait yama ykyas wia yawe,
MAT 21:5 “Nwe kʼraa ro Yerusalem mam faut ro Sion nwe, ‘Nmat Raja ranu yama yo kʼanu. Ait yhaf sneh tna Ait yaut keledai ro tna sau ye.’”
MAT 21:6 Tna kuber wAit mabo ewok reto mamo mno bo mfi bo Yesus ysi kʼana feto.
MAT 21:7 Ana skur keledai reto mkah maku rau ye mkuk makah mama. Tna raa mrus jubah wana ro myum ntom mam keledai kbor abyõ tna Yesus yaut hre abyõ.
MAT 21:8 Raa mawat mmat he Yesus yama. Tibyo ana mrus jubah wana ro myum tna tom tar-tar anya mam iso. Tna raa taro msot ara mawyan tom mam iso iti ye.
MAT 21:9 Raa msis-sas ro matim msya raa ro kro mamo mtis sor to simaut mawe, “Hosana! Nyõ nase toni! Nyõ fi Ku ro Daud yare. Tuhan ybis Nyõ nama to. Anu ro nhau mam sawro ro Allah to; nbaut Ait ye.”
MAT 21:10 Yesus twok mam Yerusalem tna raa ro mhau mam kota reto mrok mnin-nin. Ana mtu kʼanya mawe, “Bi awya meit ee?”
MAT 21:11 Raa mawe, “Yasom rAit Yesus. Ait nabi ro Allah ybis sait. Ait ybam remo ro Nasaret, provinsi ro Galilea.”
MAT 21:12 Yesus twok mam Samu ro Allah. Ait ymat raa masim bo msya raa ro moo bo mam samu ro Allah mato reto. Ymat feto tna kmo yikyak-yak ana frok mamo. Raa taro hre masim pitis (penukar uang): Masim pitis Samu ro Allah kʼraa ro sriem. Tna raa mhre masim ruu merpati bo ye. Tna Yesus haberek-barak ambar wana ro masim bo weto.
MAT 21:13 Tna Ait yawe kʼana yawe, “Bokom ro Allah mawe, ‘Amah aJõ to amah ro mkah bo raa skabuk. Menohe anu nma nno amah reto haberek mfi amah ro raa ro msyõf bo ja mhau sai!’”
MAT 21:14 Tna fo raa ro masu mti msya raa ro maa maka taro sor mama mo kʼYesus mam Samu ro Allah reto. Tna Ait yisoh ana tibyo mrok moof.
MAT 21:15 Imam manes ro agama Yahudi msya guru agama wana mros mmat bo reto ye. Ana mmat bo msai ro Ait yno ye tna mari bo kukek mbaut Ait ye mawe, “Hosana kʼNyõ, Ku ro bi Daud yare. Nyõ fi nase toni!” Raa manes ro Yahudi mmat feto, tibyo ana srau kair.
MAT 21:16 Ana mawe kʼYesus mawe, “Nyõ nari bo ro ana mawe to, fe mfe a?” Ait yawe, “Ae, Jõ tari to. Ja anu nmat Bokom ro Allah far-far refo fefares a? ‘Kbe Nyõ nno tibyo ku mkek msya ku mees ro mait sis mbaut Nyõ ye.’”
MAT 21:17 Yesus ykyas bo weto mkak tna frok sikba kota reto yamoʼt remo ro Betania tna yjin mam beto ye.
MAT 21:18 Rabu ti ana hah me mamoʼt kota. Ana mamo mam iso maka iti to, Yesus yhai sre.
MAT 21:19 Tna Ait ymat ara mara sau mros mam iso maam. Ait yamo ymat sas he make aro fee, mata rioh sai. Tibyo Yesus kmo yawe kake reto yawe, “Nyõ meen ne nake u bo fee yum!” Tibyo kake reto mrok samer.
MAT 21:20 Kuber wAit mmat bo ro Ait yno feto, tibyo ana mrok ktak toni mawe, “Fyi sai oh mi kake reu mrok samer fooh sai u?”
MAT 21:21 Tna Yesus yawe kʼana yawe, “Soh bosmot wanu matak tna anu nnaut maut-mroh fee; kbe anu nno bawya sai mfi Jõ tno feto ye. Tna mfi bo anu nwe kʼatu rno nwe, ‘Atu rno; natu namo nsya mam aya sawan!’ Soh anu tane fee; kbe bo reto mabo tu oh.
MAT 21:22 Tna bo bawya sai ro anu skabuk nyoh mkah bosmot ro matak to, kbe anu nkai tu oh.”
MAT 21:23 Yesus hah ye yamo twok mam Samu ro Allah. Ait watum bo mam beto to, imam manes msya raa mabi ro Yahudi mama. Ana mama tna mtu bo kʼAit mawe, “Awya oh mi ybis Nyõ, re Nyõ nama nno bo wefo fo? Tna awya oh mi yoo yatak rait yee kʼNyõ fo?”
MAT 21:24 Yesus yawe, “Feto Jõ ttu si bo sau kʼanu ye, tawe: ‘Yohanes Pembaptis tait, ait retait raabis ro Allah fe mfe a?’ Nkyas si kʼJõ wia. Tna fo kbe Jõ tkyas awya ro yoo yatak yee kʼJõ afo re Jõ tno bombra weto sor fo.” Raa manes weto mkyas kʼanya mawe, “Soh bwe Allah oh mi ybis ait to, kbe Yesus yawe, ‘Feto tna fyi re anu ntu sioh bo ro Yohanes yawe?’
MAT 21:26 Raa wefo mnaut mawe Yohanes tait nabi ro Allah ybis yama. Feto soh anu bwe raa sai ybis ait to, kbe raa kmo anu.”
MAT 21:27 Feto to ana mawe kʼYesus mawe, “Amu wase ye.” Tna Yesus yawe, “Feto Jõ ye te tkyas tatak aJõ ro tno bombra wefo kʼanu fee ye.”
MAT 21:28 Yesus yawe, “Bonaut ranu to nwe fyi? Bi sait yabe ku sme wait mabo ewok. Bi retait yamo yo ku rait ro yabi tna ybis yawe, ‘Ku ajõ; namo nkah bo mam armato anggur ranu.’
MAT 21:29 Tna ku retait yawe, ‘Jõ hawe.’ Menohe tis rau ait ynaut myum-yam tibyo yasen yamo ykah bo mam armato reto.
MAT 21:30 Tna fo bi ait yamo ybis ku sme rait ro tis feto ye. Ku retait yawe, ‘Ae, kbe jõ tamo tisoh.’ Menohe ait yamo fee. Ait yhau sai.
MAT 21:31 Feto sik anu nwe: Ku sme mabo ewok reto to, awya ro oh mi yno bo ro yaja ybis to?” Ana mawe, “Ait ro yabi.” Tna Yesus yawe, “Feto ye, anu meen nkus mtis agus. Tna raa ro ja moo namabyoh (pajak) msya fnya ro mwyah bo to, meen ana matim wia mamo raa ro Allah yamo Raja ybo.
MAT 21:32 Yohanes yama yerif iso ro moof kʼanu menohe anu smot ait fee. Raa ro ja moo namabyoh to, msya fnya ro mwyah bo to, ana smot Tuhan oh tna haberek mno bo ro moof ye. Anu ye nmat iso ro moof reto menohe anu nashana tna smot Ait fee.”
MAT 21:33 Yesus yawe kʼana yawe, “Nri bofret sau refo naut: ‘Bobot sait yyum anggur mara mawat mam tabam rait. Tna ait yame tok yur ytan. Tna ait yabah kayah sau mkah kbe raa moo anggur make mse maut mberkait tna moo maya rau to. Tna ait sgi harit sau mkah kbe raa mjin kmot armato reto ye. Ait yno bo weto mkak tna fo ybis raa baro yawe ana mkah tna kmot armato anggur rait reto wea, kwiyat kʼana. Ait yawe kbe ana moo make rau to, saim taro hayah kʼait. Tna bobot retait yasen yamoʼt oo roto.
MAT 21:34 Ait yhau mam oo reto kait. Tna soo ro anggur mara wait weto make manes to, bobot retait ybis sryan wait hah mamoʼt tabam rait, mamo mo kʼraa ro kmot armato reto. Bobot retait ybis sryan wait yawe, “Nkyas kʼana ro kmot armato ajõ nwe ana mryoh anggur make aro moo mee kʼanu. Tna noo anggur make weto nkah nma nee kʼjõ.”
MAT 21:35 Tna sryan weto masen mamo. Ana mamo snok mam tabam ro bobot rait reto. Menohe raa ro kmot armato reto to huwya mfot sryan weto. Ana mmuk-mak sait, tna mame sait yajat ye, tna moo fraa mai sait naut ye.
MAT 21:36 Feto tna bobot retait ybis sryan wait roto taro mawat mamo. Menohe raa huwya sikowah ana mfi sryan ro ait ybis matim wia to ye.
MAT 21:37 Mamo snok mam tis rau to, bobot retait ybis ku rait yesait ykah yabo yamo. Ait ynaut yawe, “Kbe ana waa ait tibyo mno bo moof kʼait to.” Tna ku ait yasen yamo.
MAT 21:38 Menohe raa ro kmot armato anggur reto mmat he ku ait yama. Tna ana mkyas kʼanya mawe, “Ait ro meen shauk armato refo yama mefi! Ait refi yhau ma! Nma, anu bme ait yajat to, afo re meen armato refo mhau kʼanu!”
MAT 21:39 Tibyo ana mfot ait mkuk makah mamoʼt armato mne rau tna mame ait yajat.’”
MAT 21:40 Tna Yesus ytu yawe, “Ati ro Bobot ro armato rait retait hah yama to, kbe yno bo bawya kʼana ro kmot armato reto?”
MAT 21:41 Ana mawe, “Ait kbe yame raa ro mno bo mkair-kar weto. Tna ysan armato anggur reto kʼraa roto taro. Tna ati ro soo ro anggur make mama to, kbe raa weto mryoh to, tna moo taro mee kʼait.”
MAT 21:42 Tna Yesus yawe, “Ja anu nmat Bokom ro Allah to fe mfe fares a? Bokom reto mawe, ‘Raa saso fraa mawe sgi samu sau. Ana mmat fraa sau mawe mkair. Fraa reto to, ana hawe. Tibyo moo mbeak makus. Menohe ana wase bo fraa reto oh mi fraa ro ati. Tuhan oh mi yno bo reto mabo. Tna anu bnaut bwe bo reto moof toni.’
MAT 21:43 Tna feto Jõ tawe kʼanu nbi ro Yahudi fo tawe, kbe anu ne kmot raa mana ro Allah rAit u fee. Kbe Ait yoo raa wAit ysan kʼraa roto kmot afo re kbe ana mno bo ro moof ye. [
MAT 21:44 Awya ro btek yai abyõ mam fraa reto to, kbe sasyoh-sasah. Tna awya ro fraa reto btek mai to, kbe sari ye.]”
MAT 21:45 Tna imam manes ro Yahudi msya raa ro Farisi mari bofret ro Yesus ykyas weto. Mari to, ana mhar mawe Ait ykyas bo weto mai kʼana.
MAT 21:46 Tibyo ana saim bo mawe mfot Ait. Menohe raa makin ro mhau mam weto mnaut mawe Yesus tait nabi ro Allah ybis yama sait. Tibyo raa manes ro Yahudi weto waa bo mfot Ait mam wore raa makin mmat. Ana mnaut mawe kbe raa weto kmo ana.
MAT 22:1 Tna Yesus fret bo u kʼana yawe,
MAT 22:2 “Allah yamo Raja ybo raa mana rAit. Reto mfi bawya? Raja sait yakyõ bokyõ ro ku sme rait ymen fnya tna to.
MAT 22:3 Raja retait ybis sryan wait mbo taah mamo mmen raa mama makyõ bokyõ rait. Menohe raa weto hawe. Ana mama fee.
MAT 22:4 Feto tna raja retait ybis sryan wait roto taro yawe, ‘Nmo nwe kʼana nwe, “Bo sohmaam ro bokyõ refo jõ siwyan wea oh. Jõ ktan sapi maboh wojõ ro moof sor. Tna msya bo sohmaam roto taro to, jõ siwyan bo ye oh. Ku sme ajõ yoo fnya, feto nma anu bkyõ bokyõ tna sohmaam bo su.”’
MAT 22:5 Menohe raa ro ait yoo taah yee sor to, ana mama fee ye. Sait yamoʼt armato rait. Tna ana taro msui mno bo wana sai.
MAT 22:6 Tna ana taro mfot sryan ro raja wait weto, sikowah tna mame ana majat ye.
MAT 22:7 Raja refi yari sryan wait bo raa mame feto, tibyo ait yrok kmo toni. Tna ait ybis raa ro sbe wait mamo mame raa ro taa mame sryan wait. Tna mbis ana mkah kota rana mait ye.
MAT 22:8 Ana mno bo weto mkak oh, tna raja retait ytu sryan wait mama. Tna yawe, ‘Bo sohmaam ro bokyõ reto amu siwyan oh, menohe raa ro taa jõ too taah tee to, mama fee. Ana weto mkair tibyo kbe ana sohmaam bo su msya jõ fee ye.
MAT 22:9 Feto to, nsen frok nmoʼt iso krewe makin-akan sor. Tna awya sai ro anu nkai to, nmen ana beta mama sohmaam bo ro bokyõ refo.’
MAT 22:10 Tibyo sryan weto mamo tna mmen raa makin-akan ro ana fri mam iso sor to mama beta. Raa ro ana mmen mama to, taro raa ro moof tna taro raa ro mkair ye. Raa msis-sas weto mama tna sohmaam bo su.
MAT 22:11 Tna raja retait yama ymat sas raa ro hre sohmaam bo su mam bokyõ reto. Ait ymat he raa sait yyum ratan rait ro mkair. Ait yyum ratan ro bokyõ fee.
MAT 22:12 Raja ymat feto tna ytu bo kʼait retait yawe, ‘Nyõ namaʼt bokyõ ajõ menohe nyum ratan ro bokyõ to fee! Nno fyi meto?’ Ait retait yari feto menohe shait bait sai.
MAT 22:13 Tna fo raja ybis sryan wait yawe, ‘Nmo nfot ait retait nke yaa msya yatem tna nkah beak fari mne mam wore wo mamur hto toni to. Meen raa mkai bo ro mkair-kar tibyo mawia kanasyah bo ye mam beto.’”
MAT 22:14 Tna Yesus yawe, “Allah Ait ytu raa msis-sas mama. Menohe Ait ysok raa mabo kebet baro sai mamo raa wAit.”
MAT 22:15 Raa ro Farisi frok mbam yuk reto tna mamo siret su. Tna saim bo mawe kbe ana mtu bo kʼYesus tna sanet Ait feto.
MAT 22:16 Tibyo ana mbis kuber wana msya raa ro raja Herodes wait baro mamo mtu bo kʼYesus. Ana masen mamo mtu mawe, “Bi Guru; amu nhar nwe Nyõ ja sioh fee. Tna Nyõ waa raa ro manes fee ye. Nyõ beroh nkyas bokyas ro Allah kʼawya sai. Tna iso ro Allah to, ja Nyõ nerif abyõ kʼraa to, nmyõt bo fee ye.
MAT 22:17 Feto to amu ntu bo kʼNyõ nwe: Allah ksoh yawe anu mbero namabyoh (pajak)kʼKaisar fe mfe a?”
MAT 22:18 Menohe Yesus yhar yawe ana mhaf mkair. Tna yawe, “Anu nmo wan-wan tibyo sioh ntu bo sne mate kʼJõ to, nno fyi meto?
MAT 22:19 Noo pitis mauf ro ja raa moo mee mkah namabyoh reto. Nee kʼJõ tmat wia.” Tna ana moo pitis dinar mauf sau mama mee kʼAit ymat.
MAT 22:20 Tna Ait yawe, “Nmat gambar refo: Raa mkom awya yasom rait mefo?”
MAT 22:21 Ana mawe, “Kaisar msya bokom rait meto.” Tna Yesus yawe, “Soh feto, bo bawya ro Kaisar rait to, noo nee Kaisar. Tna bo bawya ro Allah rait to, noo nee kʼAllah ye.”
MAT 22:22 Ana mari bo ro Ait yawe feto, tibyo mrok ktak sai, tna masen sikba Ait mamo ye.
MAT 22:23 Rere to, raa ro Saduki baro mama mo kʼYesus. (Raa ro Saduki to raa ro agama Yahudi ye, menohe ana ja mnaut mawe raa ro mhai to, meen me mrok masen fee.) Ana mtu kʼAit mawe,
MAT 22:24 “Bi Guru; tiwya Musa ykom yawe, ‘Soh raa sait yhai tna ait sano. Semit reto kbe yao kro mkah yabe ku aro mkah shauk biin ait ro yhai retait.’
MAT 22:25 Tna amu ntu bo kʼNyõ nwe: Mfi bo raa sme mabo ngkrema mao kʼanya mhau. Tna ro bum ymen fai sau, he ait sano tna yhai kba. Tibyo yao sait yama kro semit rana.
MAT 22:26 Ait kro menohe yabe ku aro fee ye. Feto ye yao ro tuuf yama kro semit rana naut menohe yabe ku aro fee ye. Feto ye mnan anya sai mamo snok ro ngkrema beta.
MAT 22:27 Ana ro mao na kʼanya mhai beta mkak. Tna fai au mhai mrof ye.”
MAT 22:28 Tna raa ro Saduki weto mamo ti te mtu Yesus mawe, “Meen ati ro hai mrok masen to, awya yfain fai reto? Tiwya ana mabo ngkrema ye mfain fai au reto ye fe mfe a?”
MAT 22:29 Menohe Yesus yawe, “Bonaut ranu mkair meto. Anu wase Bokom ro Allah msya Ait yatak rAit ye.
MAT 22:30 Meen ati ro raa mrok masen to, raa moo fnya u fee tna fnya msya raa u fee ye. Malaikat sor ja moo fnya fee. Meen raa mhau sai mfi malaikat mam sawro ro Allah.
MAT 22:31 Nnaut nwe Allah ykyas raa ro mhai tna meen mrok masen to yawe, ‘Jõ fi Allah ro Abraham, Ishak msya Yakub ja smot.’ Keluaran 3:6 Anu bhar bwe hohos wanu weto ro mhai ooh oh. Menohe Allah yawe feto tibyo anu bhar bwe ana mhai tibyo fee. Allah yawe ana mhau mam sawro rAit smot Ait fares to.”
MAT 22:33 Raa msis-sas weto mari feto, tibyo ana mrok ktak bokyas ro Ait ykyas reto sai.
MAT 22:34 Raa ro Farisi mari he Yesus ykyas bo kʼraa ro Saduki tna yno re ana mmai u fee. Feto to ana ro Farisi mamo mtu bo kʼYesus ye.
MAT 22:35 Ana sait yamo guru agama Yahudi. Ait yawe sanet ytu bo kʼYesus yawe,
MAT 22:36 “Guru; watum ryo oh mi mase toni mam Watum ro Musa to?”
MAT 22:37 Yesus yawe, “Nhafri Tuhan Allah ranu mkah nhaf, srau wanu beta, tna mkah bohar ranu beta ye.
MAT 22:38 Watum ro tinyi msya watum ro mase ye oh meto.
MAT 22:39 Tna watum ro ewok mnan reto ye: ‘Nhafri raa ro mhau kene msya anu to ye. Nhafri ana mnan fi anu nhafri netsu wanu nesait ai to.’
MAT 22:40 Watum ro tiwya Musa ysya nabi na mkom to, masmair rau to mbam watum ewok refo ye.”
MAT 22:41 Raa ro Farisi mkyas bo su wea, tna Yesus yama ytu kʼana yawe,
MAT 22:42 “Anu nnaut Mesias tait nwe fyi? Ait tait Ku ro bi awya yare?” Menohe ana mawe, “Mesias tait Kube ro Daud.”
MAT 22:43 Yesus yawe, “Tiwya Har ro Tuhan misbyõ bi Daud ybis ait ykyas Mesias to, menohe ytu Ait yawe, ‘Tuan ajõ’. Tiwya Daud yawe,
MAT 22:44 ‘Tuhan yawe kʼTuan ajõ yawe, “Nama, hre nsya Jõ mam ati ro tatem ati; hroh ro mase reto. Hre wea. Tna raa ro byoh, raa ro srau kair kʼNyõ to, meen tno ana mbtek mam mte. Kbe Nyõ naa nber ana weto. Tna Nyõ nros natak abyõ, nbo ana.”’”
MAT 22:45 Yesus yawe u yawe, “Tiwya Daud ytu Mesias‘Tuan rait’ to, fyi re anu nkyas nwe Mesias tait Kube ro Daud?”
MAT 22:46 Feto tibyo raa sait bo yatak ykyas bo si kʼAit fee. Tna raa aro ter-ter mtu bo kʼYesus u fee.
MAT 23:1 Yesus ykyas kʼraa makin msya kuber wAit sor yawe,
MAT 23:2 “Guru agama Yahudi msya raa ro Farisi to, ana shauk hroh ro Musa.
MAT 23:3 Feto to nri oh; Jõ ksoh anu nri watum rana. Tna nno bo bawya sai ro ana mbis kʼanu to. Menohe nno nfi ana ma: Ja ana mno bo ro ana mesait mkyas weto fee!
MAT 23:4 Ana mbis anu nno bo ro samyoh. Watum rana mfi bo samyoh ro ana make tubat tna mse kʼraa roto masom. Menohe ana mesait mbet raa weto msya ana masom su fee.
MAT 23:5 Raa ro Farisi, ana mkom Watum ro Allah baro mam ratan ro ana myum. Tna ratan ro ana myum to, betau mafyan miyõ kro mamo snok mte ye. Bo ro ana mno weto beta to, ana mawe mno afo re raa mmat tna bibi ana ye.
MAT 23:6 Soh ana mamoʼt bokyõ to, ja ana msok ambar ro moof tna hre. Tna soh mamoʼt samu watum to, ana ksoh hre mam ambar raa ro mase ja hre.
MAT 23:7 Ana ksoh bo raa hartu ana, mmah meen kʼana mam pasar tna mtu ana mawe, ‘Bi Guru’ to.
MAT 23:8 Nno feto ma. Guru ranu sait aran sai. Tna anu beta to nnan anya sai. Feto to, nwe raa mtu anu ‘guru rana’ to ma.
MAT 23:9 Tna Bja ranu tait sait aran. Ait yhau mam sawro rAit. Feto to, nwe raa ro yhau mam tabam ‘anu bja ranu’ to ma.
MAT 23:10 Mesias yesait aran oh mi yamo aban mana ranu to. Feto to, nwe anu aro nmo aban mana bo to ma.
MAT 23:11 Awya ro yase ybo anu to, kbe ait yamo raabis ranu tna yno bo wanu wia.
MAT 23:12 Tna awya ro yawe, ‘Jõ fi raa ro tase.’ kbe Allah yno ait haberek yamo raabis ranu tna yno bo wanu ye. Tna awya ro kbor sneh yamo raabis ranu to, kbe Allah yno ait haberek yamo raa ro yase ye.
MAT 23:13 Anu guru agama Yahudi nsya raa ro Farisi: Anu fo raa ro ja sioh-sah sai! Anu nmo raa ro Allah yamo Raja ybo to, fee. Tna soh raa roto mawe tomer mamo raa wAit to, anu ja nno wa. Feto to, meen kair mama mai kʼanu tu oh. [
MAT 23:14 Anu guru agama nsya raa ro Farisi: Anu fo raa ro ja sioh-sah anu sai! Anu skabuk miyõ wer afo re raa mmat anu. Ana mmat feto tna mnaut mawe anu raa ro ja nno bo moof sai. Semit mnaut mawe anu raa ro ja nno bo ro moof ye menohe anu haberek sifuut ana, tna soyak amah wana no kʼanu. Feto to, meen bo ro mkair toni mama mai kʼanu tu oh.]
MAT 23:15 Anu guru agama nsya raa ro Farisi: Anu fo raa ro sioh-sah anu sai! Anu safo triar nmo fari; anu frit sawan ye tna nmo iso mne ro miyõ mbra sor ye. Anu nmo to, nwe nno raa sait beak bosmot rait tna haberek kro bosmot ranu. Soh ait haberek tna kro agama ranu to, yamo kuber ranu to, kbe anu nber ait kaket fee. Anu nkyas watum ro mkair tibyo ait yamo yfi anu. Kbe ait raa ro sioh ait sai ye. Tis rau ykair-kar. Meen Allah yoo ait yse mam tafoh ro arin kair reto ye. Anu ja nber ait, nerif iso ro sre kʼait. Feto to meen bo ro mkair btek mai kʼanu tu oh.
MAT 23:16 Anu fo raa ro nerif iso kʼraa roto menohe anu nesait nsu mboh! Anu nesait wase iso nmo. Anu nwe, ‘Soh raa sumpah mtom Samu ro Allah to, kbe bo sumpah reto matak fee.’ Menohe anu nwe, ‘Soh raa sumpah mtom emas ro mhau mam Samu ro Allah to, kbe bo sumpah reto matak ye.’ Anu nkyas feto tibyo meen bo ro mkair btek mai kʼanu tu oh.
MAT 23:17 Anu fo raa ro wase bo tna nsu mboh! Bo ro moof to, au myo? Emas reto to, bo ro ati meto fee. Samu ro Allah oh mi mno re emas reto moof toni mnan si bo ro Allah rAit to.
MAT 23:18 Tna anu nwe, ‘Awya ro sumpah ytom wohat (mezbah) ro raa msan bo kʼAllah to, bo sumpah reto matak fee. Menohe soh raa sumpah ytom kak ro raa msan abyõ mam wohat reto to, kbe kak reto make bo sumpah reto matak ye.’
MAT 23:19 Anu fo raa ro nsu mboh! Bo ro moof to, au miyo? Kak mesait reto bo ro ati meto fee. Menohe soh raa moo kak reto mse abyõ mam wohat tna msan kʼAllah to, wohat oh mi mno re kak reto moof mnan si re Allah ksoh to.
MAT 23:20 Feto to, awya ro sumpah ytom wohat reto to, ait sumpah mkah bombra ro raa msan kʼAllah mam wohat abyõ ye oh meto.
MAT 23:21 Tna awya ro sumpah ytom Samu ro Allah to, ait sumpah ytom samu reto, tna msya Allah ro yhau mam samu mato reto ye.
MAT 23:22 Tna awya ro sumpah ytom sawro ro Allah to, ait sumpah ytom Allah ro hre abyõ tna yhau mam sawro reto ye oh.”
MAT 23:23 “Anu guru agama Yahudi nsya raa ro Farisi to: Anu fo raa ro ja sioh-sah anu sai! Anu nwe ja anu nbo Watum ro Musa kaket. Tna re ja bombra bawya sai anu noo baro nsan kʼAllah. Feto tna bo saryoh kinyah ro ja anu nyum mam armato wanu mkah bo nfiat bo ro anu sohmaam to, anu noo baro nsan kʼAllah ye: Mfi selasih,adasmanis, msya jintan bo to, ja anu noo baro nsan kʼAllah ye (persepuluhan). Bo ro maku reto anu nno. Menohe ja anu niwana bo ro ati: Anu nno bo moof kʼraa fee. Anu natmof raa fee. Tna anu smot Allah kaket fee ye. Bo ro ati weto to, anu nbo nno fee! Feto to, meen kair mama mai kʼanu tu oh.
MAT 23:24 Anu fo nnaut nwe anu nhar iso ro Allah kaket re nerif kʼraa roto ye. He mfe. Anu fo raa ro nsu mboh! Soh anu nmat bubaa mam hawereh mato to, anu noo beak. Menohe unta maboh ro mhau mam hawereh mato to, anu nta niya u mamoʼt nhaf mato!
MAT 23:25 Anu guru agama nsya raa ro Farisi: Anu fo raa ro ja sioh-sah anu sai! Hawereh msya piring to, anu nyon mne rau moof kaket. Menohe mato rau to, mkair fares. Anu nesait nfi feto ye. Anu to noof mne sai. Menohe nhaf mato wanu to, mkair: Ja anu nasmamo tna ntak bo raa ye. Feto to, meen kair mama mai kʼanu tu oh.
MAT 23:26 Anu raa Farisi to, raa ro nsu mboh! Nyon hawereh marak msya piring ro anu nsyõ boit to, nyon mato moof wia. Nno feto afo re kbe mne to, moof ye.
MAT 23:27 Anu guru agama nsya raa ro Farisi: Anu fo raa ro sioh-sah anu sai! Ja raa moo hai sama mam isra mato. Tna mawah cat mate isra mne rau. Mno feto tna kbe raa mmat moof toni. Menohe mato rau to, mkair: raa mtai msya afan bo mrek-rek yiis ye. Anu nesait nfi isra weto. Anu ja nno bo re kbe raa mmat tna mawe anu raa ro moof. Menohe anu nhaf mato ranu to, mkair. Feto to, meen kair mama mai kʼanu tu oh.
MAT 23:29 Anu guru agama nsya raa ro Farisi: Anu raa ro ja sioh-sah anu sai! Meen bo ro mkair btek mai kʼanu! ⌞Tiwya Allah ybis nabi na mama. Tna hohos ranu mame nabi weto majat.⌟ Mfo refo anu ja nisoh isra ro tiwya tinyi raa sama nabi weto. Tna raa ro tiwya mno bo ro Allah ksoh to, kubur wana to, ja anu fayir moof ye. Anu nno feto to, nnaut nwe anu nno bo moof miwrek hohos wanu.
MAT 23:30 Anu sioh anu nwe, ‘Mfi bo tiwya tinyi amu nhau ye mam wore amu hohos na mhau weto to, maami amu aro nno bo nfi ana fee. Amu nme nabi weto fee.’
MAT 23:31 Menohe anu nesait nwe bo ranu ai oh nwe anu fo nbam raa mana ro tiwya mame nabi na sor to.
MAT 23:32 Feto ye, kbe anu nme raabis ro Allah wAit mnan fi anu hohos na wanu tiwya tinyi mno wia to.
MAT 23:33 Anu fo raa ro ja nno safo yoyo! Anu nfi abboh ro ja mafit raa majat to! Fyi re anu nwe nsam nmo sikba bo mkair-kar ro meen btek mai kʼanu mam rabin ro arin kair to?
MAT 23:34 Nri kaket: Kbe Jõ tbis nabi na woJõ, msya raa ro ja mhar bo kaket, msya guru taro ye mama mo kʼanu. Ana taro to, meen anu nme majat. Tna ana taro to, kbe anu nme majat mam ara warok ye. Tna taro to, kbe anu sikowah ana ye. Tna kbe anu nbo too nmok-mak ana mam samu watum wanu to. Meen anu nikyak raa woJõ taro nbam kota ranu tna anu saka ana msam mamo snok mam kota roto taro ye.
MAT 23:35 Tiwya raa ro ja mno bo ro Allah ksoh to, hohos na wanu nfot ana mame. Ana oh mi maban Habel mamo snok bi Zakharia (ro bi Berekhya yare tait. Anu hohos na mame Zakharia yajat susai mam Samu ro Allah jaro tna mam wohat (mezbah) jaro si masuf.) Safo weto beta to meen anu nsom isti tu oh.
MAT 23:36 Nri kaket; safo weto meen anu beta nsom tu oh.”
MAT 23:37 “Raa ro Yerusalem mame nabi ro Allah sor majat. Tna raa ro Allah ybis mamo mkyas bokyas rAit to, ja raa ro Yerusalem mame ana majat ye. Ana moo fraa mai raa weto tibyo majat. Muhrin aro rau-rau Jõ srau kero ana. Tawe tatmof ana tna takrao ana tse mam wo sau re kmot ana. Mfi kook mabi ro makrao maku tna maut mabum kait to ye. Menohe anu hawe ye. Feto to Jõ sraujin raa ro Yerusalem, bo ro meen mama mai kʼana:
MAT 23:38 Allah kbe meen yatam ana ro mhau mam Yerusalem u fee. Ait sikba ana agus.
MAT 23:39 Kbe Jõ sikba tabam refo tna anu nmat Jõ u fee. Anu nmat Jõ fee mamo snok mam ati ro tabam refo haberek. Tna ati reto meen anu nanwaruk nwe, ‘Ait yase toni! Tuhan ybis Ait yama tu oh.’”
MAT 24:1 Yesus sikba Samu ro Allah yamo. Tna kuber wAit mama mo kʼAit tna merif koot ro Samu ro Allah mros to kʼAit.
MAT 24:2 Tna Yesus haberek yawe, “Nmat samu weto beta. Meen raa mitrah samu weto. Tna kbe tembok msya fraa sau bo mhau matak ntar-tar anya u fee. Kbe fraa weto sgik mbtek mai tabam beta.”
MAT 24:3 Yesus yaut yamo hre mam Faut ro Zaitun. Tna kuber wAit mama mkyas bo msya Ait yesait kar. Ana mtu bo kʼAit mawe, “Tija re bo ro Nyõ nkyas weto mabo to? Kbe amu nmat bo bawya re nhar nwe oon mabu ro Nyõ nama to? Tna amu nmat bo bawya re nhar nwe tabam refo kene sboh rau ye to?”
MAT 24:4 Yesus yawe, “Kaket anu! Nno be raa mama sioh besruf anu.
MAT 24:5 Jõ fi Mesias sait aran. Menohe meen raa mawat mama tna sruf bo mawe ana Mesias ybam kʼAllah. Kbe raa mawat mari feto tna smot raa weto.
MAT 24:6 Kbe anu nri he raa rabin taro meanya tna mafa mnin-nin. Bo weto kbe mabo tu oh. Menohe waa ma: Bo weto kbe frok matim wia. Bo weto frok mama tna tabam refo ayõ rau ro haberek tetara fee.
MAT 24:7 Tna raa ro bangsa sau kbe masen mame anya msya raa ro bangsa roto taro. Tna raa ro raja sait ybo kbe masen mame anya msya raa ro raja roto taro mbo ye. Tna kbe hai awyah btek mai kʼraa, tna kbe iin frok mam wore aro rau-rau ye.
MAT 24:8 Menohe bo ro samyoh weto beta to makit rau sai fares meto. Wore wo anu nmat bo weto to, kbe anu nhar nwe oon reto mabo oh. Reto mfi fnya ro mhaf ja kborham wia, tna kbe mabe ku to.
MAT 24:9 Anu nkro Jõ to, tibyo kbe raa mfot anu msan kʼraa sikowah tna mame anu njat ye. Tna raa bangsa ro tabam refo beta kbe knait anu.
MAT 24:10 Ati reto to, raa mawat ro tiwya smot Jõ wia to, kbe haberek. Tna kbe ana hren ksuk kʼanya ye tna knait anya ye.
MAT 24:11 Tna kbe raa mawat mama sioh raa mawe, ana to nabi ro Allah ybis mama mkyas bo wAit. He mfe. Bo ro ana mkyas to, kbe raa mawat mari tna kro ye.
MAT 24:12 Bo mkair-kar ro mfo wefo raa mno sor to, mrok msai renti. Tibyo raa mawat kbe miranya kaket u fee.
MAT 24:13 Tna awya ro bito smot Jõ matak mamo snok mam oon sboh rau to, meen ait ykai riof ro mase.
MAT 24:14 Tna bokyas moof ro mkyas raa mana ro Allah yamo Raja ybo to, kbe raa mkyas. Mkyas kʼraa ro bangsa makin mam arin aso refo beta mari. Mari wia tna fo oon rau sboh oh meto.”
MAT 24:15 Tna Yesus yawe, “Nmat bokom refo tna kbe anu nfot bo ro Jõ tawe kʼanu: Tiwya Allah ybis nabi Daniel ykyas yawe, ‘Meen bo sau ro mkair toni mama sikowah yuk ro mbau to.’ Daniel 9:27, 11:31, 12:11 Jõ tawe kʼanu tawe, ati ro anu nmat bo reto mabo to, anu nhar nwe kene mam wore wo tabam refo haberek. Ati ro anu nmat bo reto to,
MAT 24:16 anu ro nhau mam provinsi ro Yudea to; nsen nsam nmo nuut atu mana.
MAT 24:17 Anu ro hre abyõ mam samu wanu kri-kri to; kbe nroh satoh bo wanu mbam amah mato nbo frok to ma! Bo weto makus rof.
MAT 24:18 Anu ro nkah bo mam armato to; hah ne nmo noo ratan wanu ma. Nsam fooh nmo sai.
MAT 24:19 Wore weto to, fnya ro mhaf tna msya fnya ro mee sis ku mees wana fares to, ana mmof toni. Ana kbe matak msam fooh fee.
MAT 24:20 Skabuk nyoh Tuhan afo re meen ati ro anu nsam to, nsam mam snyi ro ja oom maah mais to ma. Tna re meen anu nsam mam ayõ ro raa ntmoh (hari Sabat) bo to ma ye.
MAT 24:21 Meen wore weto to, arin mkair toni. Maban tiwya tinyi Allah sair tabam refo mamo snok mam mfo refo fo, raa mkai bo ro mfi feto aro fee. Tna bo ro mkair-kar mfi feto to, aro meen me btek mai kʼraa u fee.
MAT 24:22 Oon ro samyoh reto to, oos mawe Allah yatmof raa sok wAit. Feto to yawe yisusu oon reto mabuf baro. Soh mfe to, raa sait bo meen ye yhau fee. Soh mfe to, raa beta mhai.
MAT 24:23 Meen, ati reto to, raa ro mawe besruf anu to, kbe frok mama. Taro mawe ana to Mesias, he mfe. Tna taro mawe ana to nabi ro Allah ybis mama mkyas bo wAit. He mfe ye. Wore weto to ana sair bo ro hnah. Tna mno bo ro msai mawat ye. Ana mawe besruf raa beta. Ana tomer besruf raa sok ro Allah wAit ye he mfe. Feto to, soh raa sait yawe kʼanu yawe, ‘Nmat, Mesias yama mam ati rno mno!’ Soh yawe feto to, nri ait ma! Tna soh sait yawe kʼanu yawe, ‘Nmat, Mesias yama mam ati rau mau.’ Nri bo ro yawe to ma!
MAT 24:25 Nnaut bo ro tawe kʼanu fo. Jõ tkyas bo refo kʼanu wia wore wo bo weto frok mama fefares to.
MAT 24:26 Soh raa mawe kʼanu mawe, ‘Nmat, Mesias yama oh mam tabam ro riamo yama oh!’ Soh raa mawe feto to, nri ana ma. Nmo teto ma. Tna soh raa mawe, ‘Mesias yama yhau mam amah rno hawar jaro oh!’ Soh raa mawe feto to, nri ana ma ye.
MAT 24:27 Ati ro 'Ait ro Yroh Yama Yfi Raa Sai' yama to, kbe raa beta mmat tna mhar mawe Ait yama. Soh rir mrir mbukak abyõ mam ayoh to, ja raa mmat rir reto maban ati ro ayõ maut mamo snok mam ati ro ayõ twok to. Jõ te tama u to, kbe raa beta mmat tna mhar Jõ feto ye.
MAT 24:28 Tna wore bo ro mhai mhau akus to, hofyoh yiis mhar ye oh. Tna ana mawat mama fru-fra mamo-me mam yuk reto ye.”
MAT 24:29 “Oon ro samyoh reto mkak wia, tna ayõ mrok mti mamur ye, tna snyi mrok mawyah fee ye, tna sken ro mhau abyõ mam ayoh to btek-tak ye, tna bombra ro mhau abyõ mam ayoh to mrok mnah-nah mamo mai jaro-jaro ye.
MAT 24:30 Mam ayõ reto to, raa mmat ayoh. Ana mmat bo tna mhar mawe, 'Ait ro Yroh Yama Yfi Raa Sai' yama mefo. Raa bangsa beta mam tabam refo to, mmat bo reto. Mmat tibyo mrok mawyan surut ana mkak. Jõ fi 'Ait ro Yroh Yama Yfi Raa Sai'. Meen ati reto to, raa mmat Jõ tbam ayoh mboh abyõ troh tama. Tama to, raa mmat tatak aJõ msya tase aJõ ro msai ye.
MAT 24:31 Tna saa buk-buk mawia. Feto tna Ait ybis malaikat wAit mama msok raa sok wAit moo mbam arin aso wofo beta.
MAT 24:32 Bofret ro kake mara reto to, nnaut maja rau kaket: Soh nkre ro mo safom tna sne-sne moof to, feto to anu nhar nwe kene wore snyi ro hwyõm oh meto.
MAT 24:33 Feto ye, soh anu nmat bo weto beta mama to, anu nhar nwe oon ro Jõ tama u to, kene oh meto.
MAT 24:34 Nnaut: Ati ro bo wefo beta mama to, tawe biin reto to, kbe raa taro mhau fares.
MAT 24:35 Ayoh msya tabam refo kbe saef marak. Menohe bokyas aJõ kbe meen mhau mawyõs mamo snok mam hame wajin.
MAT 24:36 Ayõ ro Jõ tama u to, raa sait bo yhar fee. Malaikat ana wase ye. Jõ, Ku ro Allah yare fi twase ye. Taja yesait aran yhar bo rAit.”
MAT 24:37 Tna Yesus yawe, “'Ait ro Yroh Yama Yfi Raa Sai' meen hah ye yama. Ait hah ye yama to, kbe raa mhau mno bo wana mnan wore wo tiwya Nuh yhau:
MAT 24:38 Tiwya mam wore aya mabo betru tabam refo fefares to, ja raa mnaut mamos wana fee. Raa mait bo sai. Tna raa msya fnya moo anya sai. Raa mno bo weto mamo snok mam ati ro Nuh twok mam wiak aken rait to.
MAT 24:39 Ati reto raa mhau ninya sai. Tna aya mabo frok mama betru ana msu beta. Meen ati ro 'Ait ro Yroh Yama Yfi Raa Sai' yama to, arin to, mfi feto ye.
MAT 24:40 Ati reto to, raa mabo ewok mkah bo mam armato rana. Kbe malaikat woJõ mroh tubat sait tna sait yhau agus.
MAT 24:41 Tna fnya mabo ewok hre mmuk gandum make to ye. Kbe malaikat woJõ mroh tubat sau tna sau mhau agus ye.
MAT 24:42 Anu ye wase oon ro Tuhan ranu yama. Feto to, hre byõ-abyõ sai.
MAT 24:43 Nnaut bofret refo kaket wia: Bi sait yhar yawe, ‘Mti fo, kbe raa ro ja ysyõf bo yama yitrah amah ajõ tna ysyõf bo wojõ.’ Soh ait yhar ayõ raa ro ysyõf bo retait ysaim to, kbe ait yjin fee. Yhau wan afo re raa ysyõf bo wait fee.
MAT 24:44 'Ait ro Yroh Yama Yfi Raa Sai' kbe meen yama u. Kbe hah yama u mam ayõ ro anu wase tna kbe nwof Ait fee. Feto to nhau siwyan Ait yoyo.”
MAT 24:45 Yesus yawe, “Bobot sait ysok sryan wait sait yamo aban mana ybo sryan wait roto taro. Tna ybis sryan retait yoo boit saim kʼsrian anya wait roto taro ye. Tna bobot retait yasen yamoʼt oo roto. Soh sryan retait mur-mur yno bo ro Bobot ybis to, ait tait sryan ro yhar bo. Tna ati ro bobot retait yhah ye yama to, soh ait ymat aban mana retait ja yno bo rait ro ybis kaket to, feto moof.
MAT 24:47 Nri kaket: Kbe bobot ysok sryan ro yari bo ro ait yawe retait yse kmot bombra wait beta.
MAT 24:48 Menohe mfi bo sryan ro yamo aban mana retait tait yhaf rait mkair. Tna ynaut yawe, ‘Bobot ajõ yarak, kbe yhah yama fooh fee.’
MAT 24:49 Feto tna ait yno bo ro mkair: Ait yai sryan ro kinyah taro. Tna yasmamo yait boit, yata aya ysya raa ro ja bisir-basar sai.
MAT 24:50 Kbe bobot rait snok yama. Yama mam ayõ ro sryan ro yamo aban mana retait siwyan fee. Bobot rait snok yama tna ymat bo mkair ro sryan retait yno.
MAT 24:51 Tibyo bobot retait kmo. Kbe ait simoyot-mayat sryan retait. Tna ybis ait yamo yhau mam yuk ro kair. Tibyo yamo yhau mam weto su ysya raa ro ja sioh ana ai to. Mam weto to, kbe raa mawia tna kanasyah ye.”
MAT 25:1 ⌞Yesus ksoh re raa siwyan ana mamo raa mana ro Allah yamo Raja ybo to.⌟ Tna Ait yawe kʼana yawe, “Oon ro Allah yamo Raja ybo raa mana rAit to, ⌞raa taro siwyan fee, kbe ntwok fee.⌟ Reto mfi ku ano mabo nsaa mbo pelita wana mamo mawe mtar ku sme ro siwyan yoo fnya ro tna.
MAT 25:2 Ana ro ano mabo nsaa reto to, mabo maat mhar bo, tna mabo maat wase bo.
MAT 25:3 Ana ro wase bo to, mbo pelita wana marak sai, minyak aro fee.
MAT 25:4 Tna ana ro mhar bo to, mbo pelita wana, tna mbo minyak wana mkah kusia ye.
MAT 25:5 Tna ku sme ro ana ste retait yama fee kait sai. Tibyo ana mjin maka, tna mjin tu ye.
MAT 25:6 Tna mam wore arin masuf raa sait ytu yawe, ‘Ait ro yoo fnya retait yama oh! Nsen ntar-tar ait!’
MAT 25:7 Tna ku ano wefo mrok masen misoh pelita wana.
MAT 25:8 Ku ano ro wase bo, ana mayoh kʼana ro mhar bo mawe, ‘Pelita wanu minyak marak, tna kene wore mhai! Noo minyak wanu baro nee kʼamu.’
MAT 25:9 Menohe ku ano ro mhar bo mawe, ‘Minyak wamu mnan amu oh. Fyi re amu noo baro nee kʼanu? Nmo no kʼraa ro masim minyak tna noo aro kʼanu!’
MAT 25:10 Ku ano ro wase bo weto masen mamo saso minyak. Ana marak tna ku sme ro yoo fnya retait yama. Tna ana ro siwyan wea kro ait mamo twok mam amah ro raa makyõ bokyõ. Tna raa muut mato matak wa.
MAT 25:11 Tna ku ano mabo maat ro wase bo weto mama tna mtu mawe, ‘Bobot (Tuan), nitrah mato kʼamu.’
MAT 25:12 Menohe ait yawe, ‘Jõ wase anu ye.’”
MAT 25:13 Yesus ykyas bofret reto maum oh meto tna yawe, “Anu ye wase ayõ ro Tuhan ranu yama. Feto to, hre byõ-abyõ wea kaket.”
MAT 25:14 Tna Yesus yawe, “Allah yamo Raja ybo raa mana rAit to. Reto mfi bobot sait ro yawe yamoʼt rabin ro fari-fara sau. Tna ait ytu sryan wait mama tna ait ysan kta wait taro kʼana somya ha-hayah ye.
MAT 25:15 Ait saim kta weto kʼana mamyot ana matak rana ro kbe ntho. Sryan sait to ait fyah pitis talenta trion maat. Tna ait sait naut fyah pitis talenta ewok ye. Tna sryan sait naut fyah pitis talenta sau sai. Bobot retait saim bo weto kʼana agus tna fo yasen yamo.
MAT 25:16 Sryan ro bofyah pitis maat retait yakah wait yamo somya renti, tna raa ntho. Tibyo maru amot maat naut miryõ.
MAT 25:17 Tna sryan ro bofyah pitis ewok yakah wait yamo somya renti tna raa ntho. Tibyo maru amot ewok naut miryõ ye.
MAT 25:18 Menohe ait ro bofyah pitis sau sai fi yakah wait yamo yabah tabam saa.
MAT 25:19 Ti mase firwas oh, tna bobot ro ysan kta wait hah ye yama. Tna ait ytu sryan ro bofyah wait weto to mama. Tna yawe kʼana yawe, ‘Tho bo wojõ oh!’
MAT 25:20 Tibyo sryan ro ait fyah pitis wait maat reto yama tho pitis wait tna yaru amot maat naut yiryõ. Tna yawe, ‘Bobot, tiwya nyõ noo pitis wonyõ trion maat fyah jõ. Tna jõ te tho tibyo taru amot maat naut tiryõ. Tna pitis wonyõ fo nsaa beta oh mefo.’
MAT 25:21 Tna bobot yawe, ‘Nyõ nno bo ro moof to. Tiwya jõ too bo kebet sai tsan kʼnyõ. Menohe nyõ nisoh nbo nno kaket tibyo mrok mafer mawat ye. Nyõ mur-mur nno bo wojõ. Feto kbe jõ te tsan bo mase taro renti naut kʼnyõ nbo nno ye. Nama nhau nsya jõ. Bo yase wojõ anu bhaf bse su. Kbe anu simaut mase su.’
MAT 25:22 Tna fo sryan ro bobot fyah pitis wait trion ewok retait yama. Ait tho pitis bobot rait tna yaru amot ewok naut yiryõ. Tna sryan retait yawe, ‘Bobot, tiwya nyõ noo pitis wonyõ trion ewok fyah jõ. Tna jõ te tho tibyo taru amot ewok naut tiryõ. Tna pitis wonyõ trion jiit beta oh mefo.’
MAT 25:23 Tna bobot retait yawe, ‘Nyõ nno bo ro moof meto. Nyõ mur-mur nno bo wojõ. Feto kbe jõ te tsan bo mase taro renti naut kʼnyõ nbo nno ye. Nama nhau nsya jõ. Bo yase wojõ anu bhaf bse su. Kbe anu simaut mase su.’
MAT 25:24 Tna fo sryan ro tiwya bobot yoo pitis sau aran sai fyah tait yama. Tna ait yawe, ‘Bobot; Jõ thar tawe nyõ tait raa ro ja naya ma toni. Nyõ raa ro ja nryoh kake mam armato ro nyõ nyum fee. Tna nyõ soo bomafer mbam armato ro nyõ furere manaf to fee ye. Tiwya nyõ noo pitis wonyõ fyah kʼamu nawe amu nmo somya renti re makit mase kʼnyõ.
MAT 25:25 Menohe jõ waa. Tibyo too pitis ro nyõ noo nee sau reto tamo tabah tabam saa sai. Pitis wonyõ oh mefo.’
MAT 25:26 Menohe bobot retait yawe, ‘Nyõ nno bo mkair. Nyõ haweboh ye. Nyõ nhar nawe jõ raa ro tryoh kake mam armato ro jõ tyum fee. Tna jõ soo bomafer mbam armato ro jõ furere manaf to fee ye.
MAT 25:27 Feto to, rau ro moof to, tiwya nyõ nakah pitis wojõ namo nse mam bank sai. Afo re kbe jõ tama tna too mabo msya mabyoh rau ye fea!’
MAT 25:28 Tna bobot yawe kʼraa wait yawe, ‘Tiwya ait ybo pitis weto yamo somya fee. Feto to, noo pitis weto namo niryõ kʼait ro ybo pitis trion nsaa tait.
MAT 25:29 Awya ro yisoh bo wait kaket moof, kbe raa moo bo taro naut miryõ kʼait ye. Menohe awya ro hawe yisoh bo rait kaket to, kbe raa mrof moo bo rait ro yse weto.
MAT 25:30 Nfot sryan ro yno bo mkair retait nwah beak fari yamoʼt wore wo mamur htoh toni. Mam yuk reto to, meen raa mkai bo ro mkair-kar tna mawia, kanasyah ye.’”
MAT 25:31 “Jõ fi 'Ait ro Yroh Yama Yfi Raa Sai'. Meen Jõ tama to, tama tkah tase aJõ. Tna malaikat woJõ beta kro Jõ ntayun mama ye. Tna Jõ kbe tamo Raja hre abyõ mam yuk ro msai tbo raa beta ye.
MAT 25:32 Tna malaikat weto kbe makrao raa ro bangsa beta makah mama mo kʼJõ. Tna Jõ kbe tsok ana betwat tse mam mkbair ewok hayah-hayah mfi raa ro ja msia hewan to. Ana ja msok domba mse mkbair sau hayah tna kambing mse mkbair sau hayah.
MAT 25:33 Domba to, Jõ tsok tse hayah mam ati ro tatem ati. Tna kambing to, tse hayah mam ati ro tem ta ye.
MAT 25:34 Tna fo Jõ tamo Raja tna tawe kʼana ro mhau mam tatem ati aJõ to, tawe, ‘Taja yno bo moof kʼanu. Nma nkai sawro ro Jõ tamo Raja tbo. Tiwya tinyi Tuhan sair tabam refo to, Ait ysok anu yawe meen nkai sawro rAit reto ye.
MAT 25:35 Anu nno bo ro moof tibyo nkai sawro rAit to. Tiwya Jõ thai sre to, anu noo boit nee kʼJõ tait. Tna Jõ thai sbit to, anu nwyan aya nee kʼJõ tata. Tna Jõ tsu srim ye mam remo ranu to, anu noo Jõ nse tjin mam amah ye.
MAT 25:36 Tna ratan ro Jõ tyum marak to, anu noo ratan nee kʼJõ tyum ye. Tna Jõ kiyam to, anu nma kmot Jõ ye. Tna raa mbu Jõ mam bui to, anu nma nmat Jõ ye.’
MAT 25:37 Tna raa ro ja mno bo ro Allah ksoh weto meen mawe kʼAit mawe, ‘Tuhan; tiwya Nyõ nhai sre mam woyõ re amu noo boit nee kʼNyõ nait to? Tna mam woyõ oh mi amu nmat Nyõ nhai sbit re nwyan aya nee kʼNyõ nata to?
MAT 25:38 Tiwya amu nmat Nyõ nsu srim mam woyõ re amu noo Nyõ nse mam amah to? Tiwya amu nmat Nyõ ratan marak mam woyõ re amu noo ratan nee kʼNyõ nyum to?
MAT 25:39 Tiwya Nyõ kiyam mam woyõ re amu nma nmat Nyõ to? Tiwya Nyõ raa mfot mbu mam bui woyõ re amu nma nmat Nyõ to?’
MAT 25:40 Jõ fi Raja retait. Meen Jõ tawe kʼana tawe, ‘Nri kaket: Bo bawya sai ro anu nno kʼraa kinyah wanu to, ro suawe sor to, bo weto anu nno kʼJõ oh meto.’
MAT 25:41 Tna Jõ tawe kʼana ro mhau mam tatem ta to tawe, ‘Nsen frok nbam wefo nmo oh! Kbe bo ro msai btek mai kʼanu. Anu kbe nmo niit mam tafoh roon ro Allah siwyan mkah bo ykah kabes yabi (Iblis) ysya malaikat wait sor.
MAT 25:42 Tiwya anu nno bo ro mkair, tibyo anu nmo niit mam tafoh reto. Tiwya Jõ thai sre to, menohe anu noo boit aro nee kʼJõ tait fee. Tna tiwya Jõ thai sbit to, menohe anu nwyan aya aro nee kʼJõ tata fee ye.
MAT 25:43 Tna Jõ tsu srim to, anu noo Jõ nse mam amah wanu fee ye. Ratan ro Jõ tyum marak to, anu noo ratan aro nee kʼJõ tyum fee ye. Tna Jõ kiyam to, anu nma nmat Jõ fee ye. Tna raa mfot Jõ mbu mam bui to, anu nma nmat Jõ fee ye.’
MAT 25:44 Menohe ana mawe si kʼJõ mawe, ‘Tuhan; tiwya Nyõ nhai sre, nhai sbit, nsu srim, ratan ro Nyõ nyum marak, Nyõ kiyam, tna Nyõ nhau mam bui mam woyõ re amu nmat Nyõ fee tna natmof Nyõ fee ye to?’
MAT 25:45 Tna Ait yawe kʼana yawe, ‘Nri kaket: Soh anu nmat raa woJõ to, tna anu nnaut nwe ana raa ati fee; tibyo anu natmof ana bo fee ye to: Jõ tawe kʼanu tawe, “Bo bawya sai ro anu hawe nno kʼraa woJõ weto sait, bo weto anu hawe nno kʼJõ ye oh meto. Feto to anu natmof Jõ fee oh meto.”
MAT 25:46 Tna raa ro matmof raa anya fee; kbe raa mawah ana beak mam wore wo arin kair. Meen tafoh mait sikowah ana mamo snok mam hame wajin. Tna raa ro mno bo ro Allah ksoh to, meen mkai mamos mae ye.’”
MAT 26:1 Yesus ykyas bo weto kuber wAit mkak tna yawe,
MAT 26:2 “Nnaut nwe, ti ewok naut tna raa makyõ korat ro Paskah. Raa makyõ korat reto to, tna kbe raa mfot Jõ msan kʼraa. Tna raa weto kbe mame Jõ tajat mam ara warok. Jõ fi 'Ait ro Yroh Yama Yfi Raa Sai'.”
MAT 26:3 Ati reto imam manes msya raa mabi ro agama Yahudi to, ana siret su mam samu maboh (istana) ro Kayafas. Kayafas tait imam Yahudi ro yase.
MAT 26:4 Ana saim mawe mamo mfot Yesus wai mamo mame mam wore raa mahni.
MAT 26:5 Menohe ana mawe kʼanya mawe, “Bo reto anu bno mam ati ro korat Paskah refo ma, be kbe bo reto mno raa makin mafa.”
MAT 26:6 Ati sau to, Yesus hre yait boit mam amah ro Simon mam remo ro Betania. Bi Simon tait, tiwya yafa kusta.
MAT 26:7 Yesus hre yait bo kri-kri fo, tna fai sau twok mama. Mama mbo minyak wangi kusia sau. Minyak wangi to mabyoh maut toni. Mama mtu abyõ mam Yesus yana.
MAT 26:8 Kuber wAit mmat feto, tibyo mrok kmo mawe, “Au mno bawya meto ee? Fyi re minyak reto sikowah sai a?
MAT 26:9 Rau ro moof to, raa masim tna moo mabyoh rau. Tna mabyoh ro mase reto kbe raa msan kʼraa kinyah ro mse bo fee.
MAT 26:10 Menohe Yesus yhar bonaut rana oh tna yawe, ‘Nno wa au to ma. Fai au mno bo ro moof kʼJõ.
MAT 26:11 Raa kinyah to, ja mhau su msya anu yoyo. Menohe Jõ fo, kbe thau tsya anu yoyo fee.
MAT 26:12 Fai au mtu minyakwangi kʼjõ tetsu refo fo, siwyan hai aJõ wia oh meto. Kebet baro naut kbe raa mame Jõ tajat tna sama hai aJõ to.
MAT 26:13 Nri kaket wia: Bokyas Moof ro mbam Allah refo, meen raa wosa mamo snok mam arin aso beta. Woyõ-woya raa mkyas to, bo moof ro fai au refo mno fo, kbe raa mnaut mkyas ye.’”
MAT 26:14 Tna Yudas Iskariot yasen yamo yo kʼimam manes ro Yahudi. Yudas tait, kuber ro Yesus wAit mabo 12 weto sait ye.
MAT 26:15 Yamo yo kʼana yawe, “Kbe anu noo bawya nee kʼjõ afo re jõ tsan Yesus kʼanu to?” Ana moo pitis mauf trion 30 maren Yudas wia.
MAT 26:16 Tna Yudas ywof ati ro moof re kbe besruf Yesus.
MAT 26:17 Ti ro tinyi mam korat 'Roti ro Ragi Marak' to, kuber wAit mama mtu kʼYesus mawe, “Nyõ nksoh nawe amu siwyan bo sohmaam mam woyõ?”
MAT 26:18 Yesus yawe, “Nmoʼt kota no kʼraa sait ro Jõ tawe kʼanu tna nwe, ‘Bi Guru yawe ayõ ro raa mame Ait to kene oh. Ait yawe kbe yakyõ bokyõ ro Paskah su ysya kuber wAit mam samu anyõ.’”
MAT 26:19 Feto tibyo kuber wAit masen mamo mno bo ro Yesus yawe reto. Tna ana siwyan bo sohmaam mkah makyõ bokyõ ro Paskah reto.
MAT 26:20 Mti reto Yesus yamoʼt amah reto tna hre sohmaam bo su ysya kuber wAit mabo 12 weto.
MAT 26:21 Ana hre sohmaam bo tna Yesus yawe, “Anu nkin wefo sait kbe hren ksuk Jõ.”
MAT 26:22 Ana mari feto, tibyo mrok sraujin toni. Tna ana wefo sait-sait saak ana mawe, “Guru; jõ fee!”
MAT 26:23 Yesus yawe, “Raa ro beru roti mam hawereh sau su ysya Jõ to, ait ro kbe hren ksuk kʼJõ oh metait.
MAT 26:24 Jõ fi 'Ait ro Yroh Yama Yfi Raa Sai'. Kbe raa mame Jõ tajat tu oh. Mame Jõ to, mnan si mkah Watum ro Allah tiwya mawe wia yum oh. Menohe ait ro hren ksuk Jõ tait, meen safo maboh mai kʼait ye tu oh. Ro moof to, tiwya yme mabe ait fee sai.”
MAT 26:25 Tna Yudas ro kbe hren ksuk Yesus yawe, “Bi guru, jõ oh mi Nyõ nawe meto a?” Yesus yawe, “Eno, au oh nyõ nawe meto.”
MAT 26:26 Ana sohmaam bo nkri-kri fo, Yesus yoo roti sau. Yoo tna skabuk yayoh asik mase kʼAllah. Tna Ait haber roti reto yee kʼana beta mait. Tna yawe, “Nmat roti refo. Tetsu aJõ oh mefo. Noo niit oh.”
MAT 26:27 Tna Ait yoo hawereh sau. Yoo tna skabuk yayoh asik mase kʼAllah. Tna yee kʼana beta mata. Tna yawe, “Noo nta anggur maya refo.
MAT 26:28 Anggur maya refo to, mees aJõ ro kbe miyi mkah riof kʼanu. Kbe raa mame Jõ tna Allah ysair bosi ro tna kʼanu oh meto. Tibyo Allah yyon iro ro raa mno to.
MAT 26:29 Jõ tawe kʼanu tawe, Jõ kbe tata anggur maya mam tabam refo u fee. Thau meen snok mam wore wo anu bhau su mam wore Allah yamo Raja ybo raa wAit. Wore weto kbe anu bta anggur maya ro tna su.”
MAT 26:30 Ana mji howes mkak, tna masen mamoʼt Faut ro Zaitun.
MAT 26:31 Tna Yesus yawe kuber wAit yawe, “Mti refo fo anu beta kbe nmat kair mai kʼJõ tibyo nsen nsam sikba Jõ nmo. Watum ro Allah mkyas feto mawe: ‘Jõ kbe tame raa ro kmot domba sait, tibyo domba wAit weto masen msam brir-brar mamo ye.’
MAT 26:32 Menohe kbe Taja yti Jõ trok tasen. Tna kbe Jõ tatim ste anu wea mam provinsi ro Galilea.”
MAT 26:33 Petrus yawe, “Soh kair mai kʼNyõ to, ana taro saah to, kbe masen msam sikba Nyõ to. Menohe Jõ kbe tasen tsam sikba Nyõ bo fee yum!”
MAT 26:34 Tna Yesus yawe, “Petrus, nari: Mti refo to, kook mara fefares to, kbe nyõ nwaar Jõ wia muhrin tuuf oh, nawe nyõ wase Jõ.”
MAT 26:35 Tna Petrus yawe, “Fyi feya sai, Jõ kbe twaar Nyõ fee! Raa mawe mame jõ tsya Nyõ bjat su to mi bewok bjat rof!” Tna kuber wAit taro mawe feto beta ye.
MAT 26:36 Yesus ysya kuber wAit masen mamoʼt yuk sau ro masom Getsemani. Tna Yesus yawe kʼana yawe, “Hre ste Jõ wea wefo tna Jõ tamo skabuk wia.”
MAT 26:37 Tna Ait yawe Petrus ysya ku ro Zebedeus yare mabo ewok kro Ait mamo ye. Mam weto to Yesus yhaf yyi tna ynaut srau mtit mjah toni.
MAT 26:38 Ait yawe, “Thaf fo nroon msai mfi bo tawe tno thai sai oh. Hre nwan nsya Jõ wefo.”
MAT 26:39 Yesus serar yamo baro naut, tna yabum skabuk yawe, “Taja; tubat bo fanes ro btek mai kʼJõ refo fo, beak fari. Jõ tawe sai. Nno bo ro Jõ ksoh to ma. Nno bo mamyot Nyõ ksoh aNyõ sai.”
MAT 26:40 Yesus skabuk mkak tna hah ye yama yo kʼana mabo tuuf weto. Tna ymat he ana beta mjin tu sai. Tna Ait yawe kʼPetrus yawe, “Anu bito hre nwan nsya Jõ ayõ sau sai fee!
MAT 26:41 Hre nwan tna skabuk re kbe bo ro tabam refo tko anu nno iro to ma. Anu nwe nno bo ro moof. Menohe anu netsu wanu matak mno to fee.”
MAT 26:42 Tna Yesus hah ye yamo skabuk naut u yawe, “Taja, soh Nyõ nawe bo ro samyoh refo Jõ tasom meto mi, Jõ tasom oh mamo mamyot si bo ro Nyõ ksoh sai.”
MAT 26:43 Ait skabuk mkak tna hah ye yama yo kʼana mabo tuuf reto u. Tna ymat he ana mjin maka toni, tibyo mjin tu bana sai.
MAT 26:44 Ait yawe bitsre ana mjin rof, tna hah ye yamo skabuk u. Bo skabuk ro muhrin tuuf reto mnan anya sai mfi bo riwai Ait skabuk wia to.
MAT 26:45 Yesus skabuk mkak tna hah ye yama yo kuber wAit. Tna yawe, “Anu njin fares a? Nsen oh! Jõ fi 'Ait ro Yroh Yama Yfi Raa Sai'. Ayõ ro raa yama besruf Jõ to, kene oh. Kbe ait besruf Jõ tna yoo Jõ ysan kʼraa ro ja mno iro mfot.
MAT 26:46 Nsen nma bmo oh! Ait ro besruf Jõ tait yama oh mefi!”
MAT 26:47 Wore Yesus yros ykyas bo reto, Yudas frok yama. Yudas tait, ait ybam kuber wAit mabo 12. Ait yama yatim tna raa sbe mawat nkro ye. Ana masom pedang wana msya hbat wana sor. Ana raa sbe weto to, raa mabi ro agama Yahudi mbis. Raa mabi weto to, imam manes wana, msya raa mabi wana ye.
MAT 26:48 (Ait ro besruf Yesus riwai yawe yerif Yesus kʼana yawe, “Kbe Jõ tamo hana raa sait to. Ait oh metait. Nfot Ait.”)
MAT 26:49 Tna mkah tetara Yudas yamo yo kʼYesus tna yawe, “Bi Guru; meen oh kʼNyõ!” Tna ait hana Yesus.
MAT 26:50 Yesus sesaban yawe, “Tafoh aJõ, reto oh mi nyõ nnaut nama fo a?” Feto tibyo raa majin reto sokraria mamo mbo Yesus tna mfot.
MAT 26:51 Kuber wAit sait ymat feto tibyo yayõ pedang rait. Yayõ pedang rait tna ysot sryan ro imam yase rait sait yimara. Tibyo ktos btek mai mam tabam.
MAT 26:52 Menohe Yesus yastako kuber rAit retait yawe, “Nsuf pedang anyõ oh! Awya ro yame raa mkah pedang yajat to, kbe raa mame ait mkah pedang ye.
MAT 26:53 Nyõ nhar bo fe mfe a? Malaikat ro Taja wAit to msis toni syok. Jõ tatak tayoh kʼTaja ybis ana mama mame anya msya raa weto ye.
MAT 26:54 Menohe Jõ hawe bo tayoh Taja ye. Bo ro Ait yawe mam Watum rAit to, kbe mabo tu oh.”
MAT 26:55 Tna Yesus yawe kʼana ro mama mfot Ait yawe, “Anu nbo pedang msya hbat nma nfot Jõ mfi bo Jõ raa ro syõf bo sai a? Ja rabu ti wawa Jõ hre betoo Watum ro Allah kʼanu mam Samu rAit to. Menohe anu nfot Jõ mam beto fee.
MAT 26:56 Menohe bo wefo beta mabo, afo re mamo mnan si bokom ro tiwya Allah ybis nabi wAit mkom matim wia to.” Tna kuber ro Yesus wAit masen msam brir-brar beta sikba Ait akus.
MAT 26:57 Raa mfot Yesus tna makah mamoʼt samu ro Kayafas. Kayafas tait imamagama Yahudi ro yase. Tna mam samu mato to, guru agama wana msya raa mabi wana hre siret wea.
MAT 26:58 Tna Petrus ybo rof-rof ana mtis. Yamo snok mam bohra ro imam yase. Tna ait fuu ye truk hre su ysya raa sbe ro ja kmot samu reto ye. Ait yawe hre ymat rof bo ro raa mno mai kʼYesus mamo snok sboh rau to.
MAT 26:59 Tna mam samu mato to, imam manes msya raa manes ro ja mtu safo raa ro Yahudi to, hre mkyas bo. Ana makin beta to, mawe mkyas bo mbesus mai kʼYesus afo re kbe ana mfot Ait mame.
MAT 26:60 Ana makin weto aro yasen yros sioh ykyas bo besus Yesus. Menohe bokyas ro ana mkyas to aro ykyas hayah-hayah sai. Tibyo ana mabo ewok masen mros tna mawe,
MAT 26:61 “Amu nri Yesus yawe, ‘Jõ fi tatak tihabah Samu ro Allah rAit tna Jõ tatak te sgi u mam ti trion tuuf sai.’”
MAT 26:62 Tna imam ro yase retait yasen yros. Ait yawe kʼYesus yawe, “Boun ro raa mawe maun Nyõ weto to, Nyõ nasen betoo fe mfe a?”
MAT 26:63 Menohe Yesus shait bait sai. Tibyo imam ro yase yawe, “Feto sik sumpah ntom Allah ro yaam tait yasom, nawe Nyõ fi Mesias Ku ro Allah yare fe mfe a?”
MAT 26:64 Yesus yawe kʼait yawe, “Au oh nawe meto. Nri oh: Jõ fi 'Ait ro Yroh Yama Yfi Raa Sai'. Meen anu nmat Jõ hre tsya Allah ro yase. Kbe Jõ hre mam ati ro yatem ati; mam hroh ro mase reto. Tna kbe anu nmat Jõ troh tama abyõ mam ayoh mboh tama ye.”
MAT 26:65 Imam ro yase yari feto, tibyo kmo ybo ratan rait yesait yhah-hah. Tna yawe, “Yesus yamus Allah meto! Yawe Ait Ku ro Allah yare. Bo mbau! Tna anu besait bri oh. Kbe anu saso raa roto mama maun Ait mkah bawya! Mfo refo anu besait bmit safo reto kʼAit!
MAT 26:66 Bonaut wanu to fyi?” Tna ana mawe, “Safo makan btek mai kʼAit oh. Raa mame yajat tu oh!”
MAT 26:67 Tibyo ana masen ntfeh oot kʼYesus, mmuk Ait, tna raa taro masen mai Ait ye.
MAT 26:68 Tna mtu kʼait mawe, “Mesias fi! Soh Nyõ to, Raa ro yhar bo meto mi, nawe kʼamu nawe, raa woyõ sor oh mi yai Nyõ meto?”
MAT 26:69 Petrus hre mne mam bohra reto. Tna sryan ro ano sau mama tna mtu bo kʼPetrus mawe, “Nyõ ja nsya Yesus ro ybam provinsi ro Galilea fe mfe a?”
MAT 26:70 Menohe Petrus ywaar kʼraa makin weto yawe, “Jõ wase, jõ thar bo ro fai au mtu reto fee.”
MAT 26:71 Tna Petrus yasen yirenti yamoʼt masa ro bohra reto, tna sryan ro ano roto sau mmat ait tna mawe kʼraa ro mhau ye mam weto mawe, “Bi ait retait taa ysya Yesus ro ybam Nazaret ye.”
MAT 26:72 Menohe Petrus ywaar matak naut u. Tna yto bo yawe, “Jõ wase Ait ye.”
MAT 26:73 Feto tibyo raa makin taro mama mawe kʼait mawe, “Nwaar ma! Nyõ fi nsya ana nbam Galilea ye! Amu nhar nyõ nmai sai.”
MAT 26:74 Petrus yari feto tibyo ywaar yawe matak tna yto bo yawe, “Ayoh, jõ thar bi Ait retait fee!” Weto si fo kook mara.
MAT 26:75 Tna Petrus ynaut bo ro riwai Yesus yawe kʼait yawe, “Kbe nyõ nwaar Jõ muhrin tuuf wia tna kook mara.” Tna ait frok yamoʼt mne yawia sut-sut.
MAT 27:1 Rabu momo to, imam manes sor msya raa mabi ro Yahudi mawe safo btek mai kʼYesus. Tna mawe Yesus, kbe raa mame yum oh.
MAT 27:2 Ana make Yesus yatem, tna makah mamo msan Ait kʼPilatus ro yamo gubernur tait.
MAT 27:3 Yudas hren ksuk Yesus. Tna yari he safo mana raa mmit kʼYesus. Tna kbe raa mame Ait yajat. Yudas yari feto tna ait sraujin msai. Tibyo yoo pitis mauf 30 reto yamo yisya kʼimam manes msya raa mabi ro Yahudi.
MAT 27:4 Tna yawe, “Jõ fi tno iro kawi oh. Jõ besruf Yesus ro wase safo aro fee, tsan tibyo Ait raa mame.” Menohe ana mawe, “Bo reto bo ramu fee. Nyõ nesait nasom bo anyõ oh.”
MAT 27:5 Tibyo Yudas yawah pitis mauf weto yai mamoʼt Samu ro Allah mato tna yamo yi kro ait yajat.
MAT 27:6 Tna imam manes sor fo masen soo pitis mauf wefo. Tna mawe, “Pitis ro misti re raa mame ajat wefo to, Allah ybau. Feto to, noo pitis wefo betruk mam surah wiak Samu ro Allah to ma.”
MAT 27:7 Ana saim su tna moo pitis weto mate tabam. (Tabam reto ja raa mabah koh mfen kusia msya bo ro raa saruk bo sohmaam (tukang periuk).) Ana mate tabam reto mkah bo meen sama hai raa ro srim.
MAT 27:8 Feto oh mi maban ati reto mamo snok mam mfo refo fo, tabam reto raa mtu masom mawe 'Tabam Mees Ajat'.
MAT 27:9 Bo ro raa mno weto mamo mnan si bo ro tiwya nabi Yeremia ykyas wia yawe, “Meen raa mana ro Israel ntho Ait mkah pitis mabyoh 30 sai. Tna fo raa manes weto moo pitis weto
MAT 27:10 mate tabam. Tabam reto ja raa mabah koh mfen bo ro saruk bo sohmaam. Ana mno bo weto mnan si bosi ro tiwya Tuhan ysi kʼjõ.”
MAT 27:11 Ana msan Yesus tna yros sayõ gubernur ro ybo provinsi reto. Tna gubernur ytu kʼAit yawe, “Nyõ fi Raja ro Yahudi fe mfe a?” Tna Yesus yawe, “Au oh nyõ nawe meto.”
MAT 27:12 Tna imam manes msya raa mabi ro Yahudi maun Yesus, menohe Ait yawe bo aro si kʼana fee.
MAT 27:13 Tibyo Pilatus yawe kʼYesus yawe, “Nyõ nari boun rana ro maun Nyõ to fe mfe a?”
MAT 27:14 Menohe Yesus shait bait sai, tibyo gubernur yrok ktak sai.
MAT 27:15 Ti reto raa ro Yahudi makyõ korat ro Paskah.Tahun aro rau-rau wore wo ana makyõ korat reto to, ja ana baro mamo mo kʼPilatus mayoh kʼait mawe ait tufrok raa ro ana mawe sait ybam bui.
MAT 27:16 (Ati reto to, raa sait ro yasom Yesus-Barabas yhau mam bui. Raa beta mhar mawe ait raa ro ja yno safo.)
MAT 27:17 Raa makin sor mama siret su oh. Feto tna gubernur Pilatus ytu kʼana yawe, “Anu ksoh nwe jõ tufrok Yesus-Barabas soh mfe kbe tufrok Yesus ro raa mtu mawe Kristus a?”
MAT 27:18 (Pilatus yhar yawe raa manes ro Yahudi sor mhaf kair Yesus. Reto oh mi ana msan Yesus kʼait to. Yhar oh mi yawe feto.)
MAT 27:19 Pilatus hre kri-kri mam ambar tna ytu srah reto yari. Tna yfain ntim soo mama mawe kʼait mawe, “Raa retait wase yber safo. Nsya srioh nkyas safo rAit ma. Ti sai jõ smi tmat tawe kbe bo ro mkair btek mai kʼanu fo.”
MAT 27:20 Menohe imam manes msya raa mabi ro Yahudi bo msu bokyas kʼraa makin weto afo re ana mayoh Pilatus mawe ait tufrok Barabas tna mame Yesus yajat to.
MAT 27:21 Gubernur Pilatus ytu bo kʼana yawe, “Ana mbewok refo fo, anu ksoh nwe jõ tufrok awya?” Tibyo ana mawe, “Tufrok Barabas!”
MAT 27:22 Pilatus ye ytu kʼana yawe, “Soh feto to, kbe jõ tno bo bawya mai kʼYesus ro raa mtu mawe Kristus tait?” Menohe ana beta mawe, “Name Ait yajat mam ara warok!”
MAT 27:23 Menohe Pilatus ytu kʼana u yawe, “Fyi, Ait yber safo bawya?” Menohe ana bito mkah mmai ro mase mawe, “Name Ait yajat yum!”
MAT 27:24 Pilatus ymat he bo ro ait yawe weto nsoso sai. Kbe raa mrok mnin-nin mawe mno mafa. Ymat feto tibyo ait yasen yoo aya yyon yatem. Yyon yatem mam wore raa masu makin mmat tna yawe, “Jõ fi tsya anu nsom safo ajat ro anu nber refo fee.”
MAT 27:25 Tna raa makin weto beta mawe, “Mbau a, safo ajat refo meen amu nsya kukek wamu nsom oh.”
MAT 27:26 Tna fo ait yitsre Barabas yamo yo kʼana, tna ysan Yesus kʼraa ro sbe wait yawe ana moo too mmok-mak Ait, tna mame Ait yajat mam ara warok.
MAT 27:27 Tibyo raa sbe ro Pilatus wait makah Yesus twok mamoʼt samu ro bi gubernur. Tna ana mtu raa sbe majin rana beta mama mros mur mtan kʼait.
MAT 27:28 Ana mrus ratan ro Ait yyum, tna moo ratan roto ro mkek sau mse kʼait yyum riryõn.
MAT 27:29 Ana moo abumun baro mhas mnan watau sau mfi watau ro ja bobot na sbyõ to mse kʼAit sbyõ ye. Tna ana moo tbyor sau mee ybo mam yatem ati ye, tna ana sioh mbaut Yesus: Ana mjit mimna ntmi tabam tna sret Ait masah mawe, “Meen oh kʼNyõ, raja ro Yahudi fi!”
MAT 27:30 Ana tfeh oot kʼAit, tna mtak tbyor ro Ait ybo to, mai abyõ mam yana.
MAT 27:31 Ana sret Ait masah tna me mrus ratan ro mkek riwai ana mse kʼAit yyum. Tna me moo ratan rAit mse yyum u. Tna ana makah Ait frok mamo mawe mame Ait yajat mam ara warok.
MAT 27:32 Raa makah Yesus mamo mam iso ro frok kota ro Yerusalem. Ana mbam kota frok mamo to, tna ana fri raa srim sait yama. Ait ybam kota ro Kirene. Yasom Simon. Ait yawe yiwrek menohe raa sbe mfot ait, mkuk ait mawe yasom ara warok ro Yesus.
MAT 27:33 Ana mamo snok mam faut sau ro masom 'Yuk ro Hamana'. Mkah mai rana to, raa mawe 'Golgota'.
MAT 27:34 Tna ana moo anggur maya srioh mkah obat empedu mee kʼYesus yata. Ait sanet baro menohe Ait hawe bo yata ye.
MAT 27:35 Raa sbe mse Yesus mam ara warok. Tna ana moo undi tane re kbe mhar awya ro yoo ratan ro Yesus rAit. Tna saim kʼanya.
MAT 27:36 Tna ana hre mam weto kmot Ait ye.
MAT 27:37 Mam ara warok Yesus yana abyõ to, raa hero bokom sau. Bokom reto mawe bo ro Yesus yno re raa mame Ait to mefo: “Yesus fi, raja raa ro Yahudi.”
MAT 27:38 Ati reto raa mame raa ro ja msyõf bo mabo ewok mam ara warok ye. Ait sait raa mse mam ati ro Yesus yatem ati, tna sait mam ati ro yatem ta ye.
MAT 27:39 Raa ro mamo frit iti sor mam weto to, mmat Yesus raa mame mam ara warok. Tna ana mana mnah sai mamus Ait ye mawe,
MAT 27:40 “Ti taa, Nyõ nawe nyõ natak nihabah Samu ro Allah tna sgi u mam ti ro tuuf sai no! Soh Nyõ Ku ro Allah meto mi, Nroh nbam ara warok reto oh afo re riof kʼNyõ.”
MAT 27:41 Tna raa manes ro agama Yahudi mros mmat ye: Imam manes, guru agama msya raa mabi wana ye. Tna ana sret Ait feto ye masah mawe,
MAT 27:42 “Raa roto saah Ait yno riof kʼana oh. Menohe Ait yesait yatak yno riof kʼAit ai fee! Soh Ait Raja ro Israel tu oh, meto mi sik yroh ybam ara warok reto tna fo kbe amu nmat tna smot Ait ye.”
MAT 27:43 Tna ana mawe, “Ait ja smot Allah tna yawe Ait tait Ku ro Allah yare. Feto to nma, anu bros ti bmat sai, kbe Allah yatmof skur Ait fee mfe a?”
MAT 27:44 Raa ro ja msyõf bo weto to, ro raa mame mam ara warok su msya Ait ye mam weto to, ana mawe kair Ait feto ye.
MAT 27:45 Maban baas ayõ ro 12 to, oo reto beta mrok mamur mamo snok hreha ayõ ro tuuf to.
MAT 27:46 Ayõ ro tuuf bo feto, Yesus ytu mkah ymai ro mase yawe, “Eli,Eli; lamasabakhtani?” Mazmur 22:2 reto to yawe, “Allah aJõ, Allah aJõ; Nyõ sikba Jõ toni sai a?”
MAT 27:47 Ana makin ro mros weto sor to, baro mawe kʼanya mawe, “Ait ytu Elia oh meto!”
MAT 27:48 Tna ana sait yamo fooh yoo bo ro aya msuf sau tna beru mam anggur maya ro mano. Ait beru, tna yayõ tmi mam tbyor makit sau tna ytu maut kʼYesus yata.
MAT 27:49 Menohe raa makin taro mawe, “Aha, nno feto ma, bhau bmat sai kbe Elia yama yno riof kʼAit fe mfe a?”
MAT 27:50 Yesus kakyah mkah ymai ro mase, tna yitsre yafos rAit tna yhai.
MAT 27:51 Tna tirai ro raa hero mam Samu ro Allah mato to, Allah yhah ftah ewok maban mam uu mamo snok mte. Tna iin frok sin tibyo fraa smut habah-habah ye.
MAT 27:52 Tna isra ro tiwya raa sama hai to mrok masoh maa. Tna raa makin sor ro tiwya smot Allah tna mhai wia to, taro me mrok masen ye.
MAT 27:53 (Ti ro tuuf to Yesus yrok yasen wia, tna fo ana frok mbam isra wana ye. Tna mamoʼt kota Yerusalem, kota ro Allah rAit to. Tna raa makin mmat ana.)
MAT 27:54 Bi yabi ro sbe ysya raa sbe wait ro kmot Yesus to mmat iin msya bo yase ro riwai frok mama to, ana mrok waa mawe, “Ae, bo mabo oh! Ait retait, Ku ro Allah yare tu oh.”
MAT 27:55 Fnya taro mawat mros fari mmat bo weto beta ye. Ana weto to fnya ro kro Ait mbam provinsi ro Galilea. Ana weto ja kro Ait yno bo wAit ye.
MAT 27:56 Fnya makin weto to ana mabo tuuf oh mi, sau masom Maria Magdalena, tna ro ewok masom Maria ro Yakobus ysya Yusuf mme, tna ro tuuf to ku ro Zebedeus wait mme.
MAT 27:57 Ayõ ro hreha tna bobot sait ybam remo ro Arimatea yama. Ait yasom Yusuf. Ait ja kro Yesus bait soo ye oh.
MAT 27:58 Ait yamo yo kʼPilatus tna yayoh yawe Pilatus ybis ait yesait yoo ajat ro Yesus tna sama.
MAT 27:59 Pilatus ybis. Tibyo Yusuf yoo ajat reto, tna sro mkah hawee mabuf ro mfyan-fyan moof sau.
MAT 27:60 Yusuf tait, tiwya yabah isra ro tna sau mam fraa mana sau mkah bo meen raa moo hai mse. Feto tna ait tubat ajat ro Yesus yamo yse mam isra reto. Ait yoo ajat reto yse, tna fo bririk fraa maboh sau burut wa isra reto mato tna yamo.
MAT 27:61 Maria Magdalena msya Maria roto sau to, ana hre kene mam mato ro isra reto ye.
MAT 27:62 Ti ro jumaat raa agama Yahudi siwyan bo mkah ayõ ro ana tmoh to. Tna rabu ti fo, imam manes ro agama Yahudi msya raa ro Farisi mamo mo kʼPilatus mawe,
MAT 27:63 “Bi yabi, Yesus retait raa ro ja siroyõ. Amu nnaut nwe tiwya wore Ait yhau fares to, yawe Ait yhai tna ti ro tuuf to, kbe Ait ye yrok yasen.
MAT 27:64 Feto to, nbis raa mamo kmot isra reto matak wa mamo snok mam ti ro tuuf to. Soh mfe to, kuber wAit kbe tbat mamo msyõf ajat rAit masom mamo. Msyõf ajat rAit tna sioh mawe kʼraa makin mawe Ait yhai menohe yrok yasen oh. Soh ana mno bo reto to, kbe arin mrok mkair renti.”
MAT 27:65 Pilatus yawe, “Ae; noo raa sbe wefo nkah nmo oh! Jõ tbis ana kmot isra reto masa to kaket wa.”
MAT 27:66 Tna ana masen mamoʼt isra reto. Tna ana mse meterai ro Roma mam isra reto masa wa ye. Tna raa sbe weto hre kmot isra reto masa wa.
MAT 28:1 Ayõ ro raa ntmoh (hari Sabat) mkak. Tna minggu rabu momo Maria Magdalena msya Maria roto sau, mamo mmat isra ro raa moo ajat ro Yesus mse fo.
MAT 28:2 Malaikat ro Tuhan sau mbam ayoh mroh mama tna bririk fraa ro raa burut wa isra mato reto. Tibyo iin ro msai frok mama sin. Malaikat reto maut hre mam fraa reto abyõ.
MAT 28:3 Malaikat reto metsu rau mfi rir tna ratan ro myum to mboh fyok ye.
MAT 28:4 Tna raa sbe ro kmot isra reto to, waa tibyo tetet mhai. Tna smut mfi raa ro mhai.
MAT 28:5 Tna malaikat reto mawe kʼfnya weto mawe, “Waa ma. Jõ thar anu nma saso Yesus ro taa raa mame yajat mam ara warok.
MAT 28:6 Ait yhau mam wefo fee. Riwai Allah yno Ait yrok yasen oh, mfi tiwya Yesus yawe wia to. Nma nmat yuk ro taa raa moo Ait mse bris to yarak meu.
MAT 28:7 Hah ne nmo fooh nwe kuber wAit nwe, ‘Yesus yrok yasen oh. Ait yatim wea oh mam provinsi ro Galilea. Nmoʼt Galilea tna kbe anu nmat Ait mam beto.’”
MAT 28:8 Ana frok mbam isra reto mkah waa. Tna ana simaut mase ye mamo. Ana mhoh fooh mamo mawe mabah bo reto kuber wAit ye.
MAT 28:9 Menohe Yesus yrok brah nenat kʼfnya weto tna yawe, “Meen oh kʼanu.” Tibyo ana mamo kait mo kʼYesus tna maka mabum mbo Ait yaa tna mbaut Ait.
MAT 28:10 Tna Yesus yawe, “Waa ma! Nmo oh tna nwe kʼraa woJõ makin nwe, ana maryõt oh mam Galilea tna kbe ana mmat Jõ ye oh mam beto.”
MAT 28:11 Wore wo fnya weto mamo kri-kri fo, raa ro kmot isra ro ajat reto baro hah mamoʼt kota. Mamoʼt kota tna mamo mo kʼimam manes sor. Tna mabah bombra ro riwai ana mmat reto beta.
MAT 28:12 Imam manes hre siret msya raa mabi ro Yahudi. Tna ana saim iso ro kbe mberkait bokyas reto. Ana saim bo su. Tna mawe moo pitis baro mee kʼraa ro sbe weto.
MAT 28:13 Raa manes mawe kʼana mawe, “Nwe kʼraa nwe tisai anu njin tu tna kuber ro Yesus mama msyõf ajat rAit makah msam mamo.
MAT 28:14 Tna soh Gubernur yari bo reto, kbe amu nkyas bo nsya ait, afo re ait yno bo aro mai kʼanu fee.”
MAT 28:15 Raa sbe moo pitis reto. Tna ana mkyas bo mamyot riwai raa manes weto msi kʼana to. Bokyas reto raa mkyas hahah kʼraa ro Yahudi mamo snok mam mfo refo fo.
MAT 28:16 Kuber ro Yesus wAit mabo 11 masen mamoʼt provinsi ro Galilea. Ana maut mamoʼt faut ro Yesus ykyas kʼana wia.
MAT 28:17 Ati ro ana mmat Ait, ana maka mbaut Ait. Menohe ana baro mhaf mko-ako smot Ait kaket fee ye.
MAT 28:18 Yesus yama kait yo kʼana tna yawe, “Allah ysan bombra ro ayoh msya ro tabam refo beta kʼJõ tbo.
MAT 28:19 Feto to, nsen nmoʼt bangsa mam tabam arin aso refo beta. Nmo to, nno ana haberek mamo raa mana woJõ ye. Tna baptis ana mkah Taja yasom, mkah Ku rAit yasom, tna mkah Har rAit masom ye.
MAT 28:20 Tna nkyas kʼraa nwe, ‘Nri bo ro Yesus yawe to. Tna nbo nno ye.’ Nnaut nwe Jõ tatam anu yoyo mamo snok mam oon sboh rau.”
MAR 1:1 Bokyas Moof (Injil) ro mkyas Yesus Kristus, Ku ro Allah yare to, tinyi rau oh mefo:
MAR 1:2 Tiwya Allah ybis nabi Yesaya yama ykom bo ro Allah ykyas kʼYesus. Bokom reto to, Allah yawe kʼYesus yawe: “Meen Jõ tbis raa sait yama ykyas bo woJõ yatim wia tna Nyõ nrof. Kbe ait siwyan iso kʼNyõ.
MAR 1:3 Meen ait yama ykyas bo woJõ mam yuk ro riamo sau. Ykyas yawe, ‘Mbetrot iso mkah Tuhan yama! Nisoh iso kʼAit!’”
MAR 1:4 Tna Yohanes ro ja baptis raa yama. Ait yhau mam yuk ro riamo sau, tna raa mama mari bokyas rait. Ait ykyas kʼana yawe, “Nashana fooh! Tna jõ baptis anu. Nashana tna Allah yyon iro wanu.”
MAR 1:5 Tna raa mbam kota ro Yerusalem, msya raa mbam remo makin provinsi ro Yudea reto to, ana weto sor mama mo kʼYohanes. Ana mama mo kʼAit tna mras iro wana. Tna Yohanes baptis ana mam aya ro Yordan.
MAR 1:6 Yohanes ja yyum ratan ro raa sne mbam unta mawyan. Tna ykyar hotom ro mbam kak marak ye. Ja ait yabo mo msya yata kum maya ro mbam safom sai.
MAR 1:7 Tna ait yawe, “Jõ fi tatim wia. Tna Ait ro yase yiwer jõ sait kbe yama yrof. Tna jõ toof mkah bo taka skur sandal rAit to fee.
MAR 1:8 Jõ baptis anu mkah aya sai. Menohe kbe Ait baptis anu mkah Har ro Tuhan.”
MAR 1:9 Yohanes yhau mam aya ro Yordan fares to, Yesus ybam remo ro Nasaret mam provinsi ro Galilea yama. Yesus yama tna Yohanes baptis Ait ye.
MAR 1:10 Yesus frok ybam aya yaut si fo, Ait heyut ymat he ayoh ftah. Tna Har ro Tuhan haberek mnan fi ruu merpati sau. Tna fru mama mroh abyõ kʼAit..
MAR 1:11 Tna raa mari mai sau mbam ayoh mawe, “Nyõ fi akut aJõ ro Jõ thafri. Nyõ fi Jõ thaf mnan!”
MAR 1:12 Tna si fo Har ro Tuhan mbis Yesus yasen yamoʼt yuk ro riamo sau.
MAR 1:13 Ait yamo yhau mam teto ti trion 40. Kak rbyoh ja mhau mam teto ye. Tna kabes yabi (Iblis) yama yawe sanet besruf Yesus. He mfe, Yesus yatak sai. Tna fo malaikat baro mama matam Ait.
MAR 1:14 Yohanes, raa mfot mamo mbu mam bui oh. Tna Yesus hah yamoʼt provinsi ro Galilea. Yamo ykyas Bokyas Moof ro Allah (Injil).
MAR 1:15 Ait yawe, “Nma fooh! Allah siwyan yamo Raja ybo raa wAit. Feto to nashana. Bokyas Moof reto bo mabo. Ntu sioh bokyas rAit reto ma!”
MAR 1:16 Ati sau fo, Yesus yamo mam maru ro Galilea maam. Yamo tna ymat raa mabo ewok mse jala rana mam maru mfot syoh. Ana mbewok ja makam maru. Sait yasom Simon ysya yao Andreas.
MAR 1:17 Tna Yesus ytu kʼana mbewok yawe, “Nma kro Jõ. Kbe Jõ tbis anu nmo nfot raa.”
MAR 1:18 Ana mbewok mari feto, tibyo masen fooh sikba jala wana makus. Tna kro Ait mamo.
MAR 1:19 Ana mamo tna mmat Yakobus ysya yao Yohanes. Ana bewok weto to, ku ro bi Zebedeus wait. Ana mbewok hre mam wiak tna misoh jala wana.
MAR 1:20 Tna Yesus ytu ana mama kro Ait. Tna ana masen fooh sikba maja Zebedeus yhau akus mam wiak ysya sryan wait. Tna ana mbewok kro Yesus mamo ye.
MAR 1:21 Yesus ysya kuber wAit weto mamoʼt remo ro Kapernaum. Ayõ ro Sabat to, ja raa ro agama Yahudi ntmoh. Tna ayõ ro Sabat reto, Yesus twok mam samu watum rana tna ykyas Watum ro Allah.
MAR 1:22 Allah yno re bokyas rAit matak toni. Menohe Guruagama wana ro Yahudi to, ja bokyas wana matak kaket fee. Tibyo raa ro mari bokyas rAit reto mrok ktak.
MAR 1:23 Ati reto raa ro kabes mbo sait hre mam samu watum reto ysya raa taro ye. Tna kabes sor ro mbo raa refi mawe,
MAR 1:24 “Yesus; raa ro Nasaret; kbe Nyõ nno bawya kʼamu wefo! Nyõ nama name amu njat a? Jõ thar Nyõ; Nyõ fi Ait ro Allah Ybis Yama!”
MAR 1:25 Tna Yesus bhah kabes reto yawe, “Shait! Nfrok nbam kʼait!”
MAR 1:26 Kabes reto mbo raa retait simoyot tna wohrarar frok mbam kʼait.
MAR 1:27 Raa beta mrok ktak tna mtu kʼanya mawe, “Bo bawya sai mefo? Watum refo matak toni! Ait ybis kabes frok, tna kabes sor mari Ait ye! Bo ro tna sau mefo!”
MAR 1:28 Tna raa mkyas Yesus yasom syohor fooh mam provinsi ro Galilea beta.
MAR 1:29 Yesus; Yohanes ysya Yakub frok mbam samu watum reto. Tna ana kro Simon ysya Andreas mamoʼt amah rana mbewok.
MAR 1:30 Ana snok mam amah reto tna raa mkyas Simon snyim ro ano kʼYesus. Au mjin amah sai tna metsu mbe toni.
MAR 1:31 Yesus yamo yo kʼfai au reto tna ybo matem teta masen. Tibyo kiyam rau marak. Tna fai au masen saruk boit mee kʼana mait.
MAR 1:32 Mti reto to, raa ro kiyam msya raa ro kabes mbo beta to, raa makah mama mo kʼYesus.
MAR 1:33 Raa ro mbam kota reto beta mamaʼt bohra ro amah reto.
MAR 1:34 Ait yisoh raa mawat ro mafa bo knik-knak weto re moof. Tna yikyak kabes mawat frok ye. Kabes weto mhar mawe Ait tait Ku ro Allah yare. Menohe Yesus hawe kabes weto mkyas Ait. Tibyo yno wa kabes weto re shait bana sai.
MAR 1:35 Ana mjin tna rabu momo, ti mwamu fares, Yesus yrok yasen yamoʼt yuk ro riamo tna skabuk.
MAR 1:36 Menohe Simon ysya yafoh na taro mama mrof saso Ait.
MAR 1:37 Ana fri Ait tna mawe, “Raa beta saso Nyõ.”
MAR 1:38 Tna Ait yawe, “Nma bmoʼt remo roto ro kene taro naut. Re kbe Jõ tkyas Watum ro Allah kʼraa ro mhau mam remo weto ana mari ye. Tkyas watum rAit reto kʼraa oh mi Jõ tama fo.”
MAR 1:39 Tna Ait yasen yamo yur mam provinsi ro Galilea beta. Yamo ykyas bo mam samu watum makin ro Yahudi. Tna Ait yikyak kabes frok mbam kʼraa ye.
MAR 1:40 Raa ro yafa kusta sait yama yo kʼYesus. Yama tna yjit yimna soh-soh kʼAit yawe, “Soh Nyõ ksoh meto mi, nisoh jõ re kusta refo marak.”
MAR 1:41 Yesus yatmof raa retait tibyo Yesus yatem ybo ait tna yawe, “Jõ ksoh, nyõ mbros oh!”
MAR 1:42 Mkah wore weto si fo kiyam rait marak.
MAR 1:43 Yesus yawe wa kʼait yawe,
MAR 1:44 “Namo to, nkyas bo refo kʼraa ma. Namo nerif narak anyõ kʼimam ro Yahudi sait re ait ymat sas nyõ. Nyõ noof u, feto to noo bo nee kʼimam re ysan kʼAllah mamyot Watum ro Musa ykom yawe. Nno feto re kbe raa mhar mawe nyõ netsu to moof u.”
MAR 1:45 Menohe raa retait yamo tna ykyas bo reto kʼawya sai ro ait fri mam iso. Tibyo raa msis-sas mbeak-ak anya mama mo kʼYesus mam woyõ-woya sai Ait yamo. Tibyo Ait twok yamoʼt remo mam wore raa mmat fee. Ait yhau wore mnem, menohe raa mbam tyo-teya sai mama mo kʼAit mam wore weto ye.
MAR 2:1 Ti baro firwas tna Yesus hah ye yamoʼt Kapernaum. Raa mkyas mawe Ait yhau mam samu mato.
MAR 2:2 Tna raa msis-sas mama mros mur mtan samu reto: Taro mros tabam, taro mros mam isit, tna amah mato matot mkah raa ye. Yesus ykyas bokyas ro Allah kʼana beta.
MAR 2:3 Mam weto to, raa baro naut mama. Tna ana mabo jiit nkatar ait ro yaa mhai sait mama. Mama mawe makah ait mama mo kʼYesus.
MAR 2:4 He raa mawat burut wa Yesus. Feto to ana makah ait maut abyõ mam ti manaf. Tna ana mitrah ti manaf reto baro mno hroh mam wore Yesus yros mte. Tna mruk ait mkah sese rait ye. Mruk mam ti samu mato.
MAR 2:5 Yesus ymat ana tna yhar yawe ana smot Ait matak. Tibyo Yesus yawe kʼait ro yaa mhai retait yawe, “Ku aJõ, iro wonyõ to, Jõ tyon oh.”
MAR 2:6 Guru agama Yahudi baro hre mam weto ye. Ana mari bo ro Yesus yawe feto tna mnaut mawe,
MAR 2:7 “Ait refi ykyas bo bawya meto? Bo ro Ait yawe to berasi Allah! Awya ytai yyon iro? Allah yesait aran sai!”
MAR 2:8 Menohe Yesus yhar bo ro ana mnaut mam srau mato wana. Tna Ait yawe kʼana yawe, “Fyi re anu nnaut bo weto mam srau mato wanu to?
MAR 2:9 Soh Jõ tawe kʼait refi tawe ‘Iro wonyõ to, Jõ tyon oh.’ Bo ro msai fee: Kbe raa mahni bo reto mabo fe mfe a. Menohe tawe, ‘Nasen, beah aam anyõ, tna namo bonyõ oh!’ Tawe feto afo re kbe raa mmat bo reto mabo. Mmat tna mhar mawe Jõ ttai tno bo ewok ye. Ewok ye mnan-nan kʼJõ sai.
MAR 2:10 Jõ fi 'Ait ro Yroh Yama Yfi Raa Sai'. Tna bo ro kbe Jõ tno fo, Jõ tno re kbe anu nhar nwe Jõ tatak tyon iro raa mam tabam refo.” Tna Yesus yawe kʼAit ro yaa mhai retait yawe,
MAR 2:11 “Nasen, tubat sese anyõ, tna nasom namo bonyõ oh!”
MAR 2:12 Tna ait yasen, tubat sese rait fooh, tna frok yamo. Raa beta mmat bo msai ro Yesus yno reto. Tibyo mrok ktak tna mbaut Allah mawe, “Anu ja bmat bo ro mfi fefo aro fefares sai!”
MAR 2:13 Yesus ybam Kapernaum hah ye yamoʼt maru maam ro Galilea u. Raa msis-sas mama mo kʼAit tna Ait ykyas bo kʼana.
MAR 2:14 Ait ykyas bo mkak, tna fo yamo. Ait yamo nkri-kri fo, ymat raa sait ro ja yoo namabyoh (pajak) yee kʼpemerintah ro Roma. Yasom Lewi, ku ro bi Alfeus yare. Bi ait hre mam kantor ro namabyoh rait. Tna Yesus ytu kʼait yawe, “Nama kro Jõ bmo!” Lewi yari feto, tibyo ait yasen kro Yesus mamo.
MAR 2:15 Ti sau fo, Yesus ysya kuber wAit mait boit mam amah ro bi Lewi. Tna raa ro ja moo namabyoh msya raa ro ja mno iro bo mawat to mama mait boit su msya ana ye. Ana weto mawat masen kro Yesus oh.
MAR 2:16 Raa Farisi ro mamo guruagama baro mmat Yesus yait boit su ysya raa weto. Tna ana mtu kuber wAit mawe, “Fyi re Yesus yait boit su ysya raa ro moo namabyoh tna msya raa ro ja mno iro bo weto?”
MAR 2:17 Yesus yari bo ro ana mawe feto tibyo yawe kʼana yawe, “Raa ro metsu moof to, ja mamo saso dokter fee. Ja raa ro kiyam oh mi mamo saso dokter to. Jõ tama ttu raa ro mhaf moof to fee. Menohe Jõ tama ttu raa ro mno iro.”
MAR 2:18 Ati sau fo, kuber ro Yohanes Pembaptis wait msya raa ro Farisi mhau bo ro mait re skabuk kʼAllah kaket. Tna raa mama mo kʼYesus tna mtu kʼAit mawe, “Fyi re kuber ro Yohanes msya kuber ro Farisi mhau bo ro mait. Menohe kuber wonyõ mhau bo ro mait to fee?”
MAR 2:19 Yesus ykyas bofret kʼana yawe, “Ati ro raa sait ymen fnya to, ja raa mno bo bawya? Anu nwe kʼait yafoh wait ro mama to, nwe ana mhau bo ro mait sai a? Mfe! Ana makyõ bokyõ fea! Ana makyõ bokyõ wia.
MAR 2:20 Tna fo raa moo ait makah mamo. Ati reto to, kbe mafoh wana sraujin tibyo mhau bo ro mait. Kuber woJõ mfi feto ye. Jõ thau tsya ana fares fo, ana sraujin fee. Menohe ati ro Jõ sikba ana tamo to, kbe ana sraujin tibyo mhau bo ro mait ye.”
MAR 2:21 Tna Yesus ykyas bofret ewok naut kʼana yawe, “Mfi bo ratan matah ro hri-hra sau. Ja fnya moo hawee ftah mabuf ro tna to, maru ratan ro matah to fee. Soh au mtin feto to, kbe tis mkair. Kbe hawee ftah mabuf reto mno tibyo ratan reto mrok mhah renti. ⌞Feto ye iso bose raa mabi ro Yahudi ja mamo to, hayah. Tna iso tna ro Jõ terif refo fo hayah ye. Tna iso ewok reto srioh anya ye fee.⌟
MAR 2:22 Feto ye, Ja raa mror anggur maya ro tna mam baah marak ro matah fee. Anggur maya reto mno baah marak reto matu mbua. Tna kbe anggur maya reto maus miyi mroh mamo mkak. Anggur maya ro tna to, ja raa moo mror mam baah marak ro tna sai.”
MAR 2:23 Ayõ ro raa ntmoh (hari Sabat) sau to, Yesus ysya kuber wAit mamo frit iti mam armato ro gandum sau. Kuber wAit mhai sre, tibyo mryoh gandum make baro mait.
MAR 2:24 Menohe raa ro Farisi mmat feto, tibyo mawe kʼYesus mawe, “Yesus fi, nmat kuber woNyõ mno bo toto sai meto a? Ana mryoh gandum make mam ayõ ro raa wanu ntmoh to. Ana mno fyi meto? Mno bo reto to, ana miwer Watum ro agama ranu oh meto!”
MAR 2:25 Tna Yesus yawe, “Anu nnaut Bokom ro Allah fe mfe a? Bokom reto mkyas bo ro tiwya raja Daud yno. Tiwya ait ysya raa wait mhai awyah tna mnaut bo ro mait.
MAR 2:26 Mam wore weto to bi Abyatar yamo imam agama Yahudi ro yase to. Ati sau to, Daud ysya raa wait hai sre. Tna ait twok mam Samu ro Allah mato. Tna yoo roti ro raa msan kʼAllah. Roti reto mbau. Menohe ait yoo yait. Roti reto to, ja imam na mesait aran mait. Tna ait yoo tna yee kʼraa wait mait ye.
MAR 2:27 Menohe Allah yawe Daud yno bo mkair fee. Allah yatmof raa. Au oh mi yno ayõ ro raa ntmoh to. Yawe raa mhau baas kebet baro afo re mno ana metsu me mrok matak ye. Ait yawe ayõ ro raa ntmoh to, bo ro samyoh fee.
MAR 2:28 Feto to, Jõ tawe kʼanu tawe, Jõ fi 'Ait ro Yroh Yama Yfi Raa Sai'. Jõ tatak tbo ayõ ro raa ntmoh ye.”
MAR 3:1 Ayõ ro raa ntmoh roto sau to, Yesus yamo ykyas bo mam samu watum ro Yahudi. Tna raa ro yatem jaro mhai sait huwya mam beto ye.
MAR 3:2 Tna raa ro Farisi baro huwya mam beto ye. Ana mros mmat rof bo ro Yesus yno. Tna ana saim bo mawe soh Yesus yisoh raa mam ayõ ro raa ntmoh to, kbe ana maun baun kʼAit mawe Ait yiwer Watum ro Musa oh meto.
MAR 3:3 Tna Yesus yawe kʼait ro yatem mhai retait yawe, “Nasen, nama nros susai mam wefo.”
MAR 3:4 Tna Yesus yawe kʼraa ro Farisi weto yawe, “Ja Watum ro agama ranu mawe anu bno bo bawya mam ayõ ro raa ntmoh? Ja bno bo ro moof, soh mfe bno bo ro mkair a? Bisoh raa, fe bme raa majat a?” Tna raa ro Farisi mhre shait sai.
MAR 3:5 Yesus ymat raa weto, yhar yawe ana mana mase. Tna yhar ana hawe smot Ait fee ye, tibyo Ait sraujin tna kmo ana ye. Tna Yesus yawe kʼait ro yatem mhai refi yawe, “Betrot natem anyõ oh!” Raa retait betrot yatem rait. Tna yatem mrok moof.
MAR 3:6 Raa ro Farisi mmat bo ro Yesus yno tna frok sikba samu ro watum reto. Tna ana mamo siret su msya raa ro raja Herodes. Ana hre su saim bo mawe saso iso re kbe mame Yesus yajat.
MAR 3:7 Yesus ysya kuber wAit mayõ anya mamoʼt maru ro Galilea. Tna raa msis mbam provinsi ro Galilea, masen kro Yesus. Ana taro mawat mbam provinsi ro Yudea,
MAR 3:8 mbam kota ro Yerusalem, mbam rabin ro Idumea, tna mbam aya maam ro Yordan jaro ati ro ayõ maut, tna mbam kota ro Tirus msya kota ro Sidon ye. Ana mari bo Yesus yno bo ro msai, tibyo ana mama mmat Ait.
MAR 3:9 Raa ro mama weto to mawat tna Yesus ynaut yawe kbe ana beak-ak anya mama weto mber Ait. Tibyo Ait ybis kuber wAit mayõ wiak sau moo mse wea kait mkah Ait yaut.
MAR 3:10 Ait yisoh raa mawat ro mafa bo oh. Tibyo raa ro kiyam mawat mama mberkait-kat anya mama kait wore Ait yros tna mawe miir kʼAit.
MAR 3:11 Tna raa ro kabes mbo baro hre mam wore weto ye. Ati ro ana mmat Yesus to, kabes ro mbo ana mrok mhar Ait. Tibyo waa maka tna mbibi Ait ye, tna wahrarar mawe, “Nyõ Ku ro Allah yare oh!”
MAR 3:12 Menohe Yesus yawe wa kabes yawe, “Anu nwe kʼraa roto nwe Jõ fi Ku ro Allah yare wia ma!”
MAR 3:13 Yesus yaut yamoʼt atu sau. Tna ytu raa ro Ait yhaf mnan mama kro Ait.
MAR 3:14 Ait ysok ana mabo 12 weto yawe, “Jõ tsok anu nmo raabis (rasul) woJõ. Re kbe anu ntam Jõ. Tna re Jõ tbis anu nmo nkyas Bokyas ro Moof (Injil).
MAR 3:15 Jõ too tatak tee kʼanu afo re anu ntak nikyak kabes frok.”
MAR 3:16 Raabis mabo 12 weto oh mefo: Simon ro kbe Yesus yafan yasom Petrus,
MAR 3:17 Yakobus ysya yao Yohanes ku ro bi Zebedeus yare. Yesus yafan ana mbewok ytu masom Boanerges, feto to 'ku ro ayoh mji'.
MAR 3:18 Andreas, Filipus, Bartolomeus, Matius, Tomas, Yakobus ku ro bi Alfeus yare, Tadeus, Simon raa ro Zelot,
MAR 3:19 msya Yudas Iskariot ro meen yoo Yesus ysan kʼraa ro Roma kbe mame Ait yajat.
MAR 3:20 Tna Yesus hah ye yamoʼt samu sau. Menohe raa mawat mamoʼt samu reto ye. Mno Yesus ysya kuber wAit msui tibyo mait boit fee.
MAR 3:21 Yesus yme msya yao na mari bo reto tna mawe kʼanya mawe, “Ait yker oh!” Tibyo ana mamo mawe makah Ait hah mamoʼt remo rana.
MAR 3:22 Tna guru agama Yahudi baro mama mbam Yerusalem mros mam weto ye. Ana mmat bo ro Ait yno tna mawe, “Kabes Beelzebul ybo Yesus. Yesus yatak re yikyak kabes sor mkah tak ro kabes Beelzebul rait. Kabes Beelzebul retait ja ybo kabes sor.”
MAR 3:23 Tna Yesus ytu raa mawat weto mama yawe, “Bonaut rana reto to mkair! Ja kabes yabi yikyak kabes anya fee.” Tna Ait ykyas bofret baro kʼana re kbe ana mhar mawe kabes aro ja mikyak kabes roto fee. Ait yawe,
MAR 3:24 “Raja ro rabin sau ybo raa wait. Menohe soh raa wait mafa anya ai to, kbe rabin reto mros matak fee.
MAR 3:25 Tna raa ro mhau mam amah sau su to, soh ana mafa anya ai to, kbe ana matak fee ye.
MAR 3:26 Feto ye soh kabes yabi (Iblis) ysya kabes roto sor mafa anya to, kbe kabes yabi yros yatak fee ye. Yhau akus sai.
MAR 3:27 Jõ fret bo reto u tawe, Kabes yabi yfi raa ro yatak sait. Fyi re raa sait twok mam amah raa ro yatak sait tna ytak bo wait to? Soh raa make ait yaa msya yatem wia saah. Tna fo ait twok ytak bo ro mhau mam amah mato reto.”
MAR 3:28 “Jõ tawe kʼanu tawe: Raa mno iro bawya sai to, Allah yyon iro wana weto saah. Raa mamus Allah to, Allah yyon iro wana reto saah to ye.
MAR 3:29 Menohe soh raa mamus Har ro Allah to, kbe Allah yyon iro wana bo fee yum. Meen raa weto mhau mkair sai mamo snok mam hame wajin.”
MAR 3:30 (Riwai raa mawe Yesus tait kabes mbo to. Reto oh mi Ait yawe bo kʼana feto to.)
MAR 3:31 Yesus yme msya yao na mama. Ana ste mne tna mbis raa ntwok mamo mmen Yesus.
MAR 3:32 Raa msis-sas hre mur mtan Yesus mam amah reto. Ana mawe kʼAit mawe, “Yesus; nme msya nao na ste Nyõ mne meu. Ana saso Nyõ!”
MAR 3:33 Menohe Yesus yawe, “Jõ tme to awya? Jõ tao na to awya?”
MAR 3:34 Tna Ait ymat raa ro hre mur mtan wefo yawe, “Raa wefo oh mi Jõ tme msya tao na mefo.
MAR 3:35 Awya ro ja yno bo ro Allah ksoh to, Jõ ttu tawe tao, tano, msya tme woJõ oh meto.”
MAR 4:1 Yesus ykyas bo mam maru ro Galilea u. Raa msis-sas mama mros mur mtan kʼait. Ymat feto, tibyo yaut hre mam wiak mato. Tna raa msis-sas weto mros mam maru maam mari bo ro Yesus ykyas.
MAR 4:2 Tna Ait ykyas bo mawat kʼana mkah bofret yawe,
MAR 4:3 “Nri! Raa sait yno armato rait sau. Tna ait yamo furere bobat manaf (benih).
MAR 4:4 Ait furere bo to, bo manaf taro mbtek mam iso. Tibyo bo manaf weto to, ruu mama mame mkak.
MAR 4:5 Tna taro to, mbtek abyõ mam tabam ro fraa mhau wa mte. Tna mtis mame tabam kaket fee. Tibyo bobat weto moo fooh sai.
MAR 4:6 Menohe ayõ mo maut mafit to, mrok hroyoh. Mtis moo mame tabam kaket fee, tibyo mrok samer.
MAR 4:7 Tna taro naut btek ye mam wore wo hyoh muuf. Tna hyoh muuf weto mo betru kait. Tibyo make fee.
MAR 4:8 Tna taro mbtek mam tabam ro mamos. Tna mo maut. Tibyo make sarer toni: Bo manaf sau-sau rau to, make trion 30 bo feto. Taro to, make rau trion 60 bo feto. Tna taro to, make rau trion 100 bo feto.”
MAR 4:9 Tna Yesus yawe, “Anu ro nri bokyas reto oh to, nnaut kaket!”
MAR 4:10 Yesus yasen yamo. Tna raa ro ja kro Ait msya kuber wAit mabo 12 to, ana mama mo kʼAit. Tna mawe, “Bawya oh mi nyõ nkyas bofret reto to? Sik betoo maja rau.”
MAR 4:11 Tna Ait yawe kʼana yawe, “Anu to ja Jõ tkyas bo abyõ kʼanu. Raa mana ro Allah yamo Raja ybo to, maja rau baro to, raa wase fares. Maja rau weto, Allah ksoh re anu nhar kaket. Menohe raa ro mne ja hawe mari Jõ. Jõ tkyas bofret kʼana tna ana mfot bo ro tawe fee.
MAR 4:12 Jõ tkyas bo kʼraa makin mkah bofret sai afo re bo ro tiwya Allah yawe mai kʼana kbe mabo. Nabi Yesaya tiwya ykyas raa wefo ykom yawe: ‘Raa kbe mmat bo yoyo menohe ana wase bo ro ana mmat reto. Ana mari bo yoyo menohe ana mfot bo ro ana mari reto fee. Tibyo ana mashana fee, tna re Allah yyon iro wana fee ye.’”
MAR 4:13 Yesus yawe kʼana yawe, “Anu nfot bofret reto fefares a? Fyi re kbe anu nsrau bofret roto to? Nri oh; Jõ betoo bofret maja rau kʼanu:
MAR 4:14 Bofret bi ro furere bo manaf (benih) to, mkyas Bokyas ro Allah.
MAR 4:15 Bo manaf ro mbtek mam iso to, mkyas mawe raa ro mama mari Bokyas ro Allah. Mari menohe kabes yabi (Iblis) yama tna safto bokyas mbam kʼana mhaf wana.
MAR 4:16 Tna tkyas bo manaf ro mbtek abyõ mam tabam ro fraa mhau wa mte: Bo manaf weto to, mkyas mawe raa ro mari Watum ro Allah si fo, simaut mase.
MAR 4:17 Menohe Bokyas reto ana moo mse mhau mam mhaf mato wana waor sai. Ana mbo matak fee. Raa roto mmat bosmot wana tibyo sikowah ana. Feto tibyo ana mbtek mawe, tna smot Tuhan u fee. Ana weto taro to, bo ro samyoh mama mai kʼana to, tibyo ana mbtek mawe, tna smot Tuhan u fee ye.
MAR 4:18 Bo manaf ro mbtek mam hyoh muuf to, mkyas raa ro mari Bokyas ro Allah ye.
MAR 4:19 Menohe ana mhau to, mnaut yyi. Tna ana mnaut bosatoh ro moof mam tabam refo sai. Tna ana nksoh mhau moof bana mam tabam refo sai. Bo weto moo ana mhaf re ana mnaut Bokyas ro Allah fee. Tibyo bosmot wana mrok matak fee. Ana tufrok make aro fee ye.
MAR 4:20 Tna tkyas bo manaf ro mbtek mam tabam ro mamos: Ana weto to, raa ro mari Bokyas ro Allah reto tna mse kʼana mhaf. Tna tis rau to, kbe make mawat. Tna taro to, make rau trion 30. Tna taro to, make rau trion 60. Tna taro to, make rau trion 100.”
MAR 4:21 Tna Yesus yawe kʼana yawe, “Ja raa mbet tafoh (pelita) afo re ntara raa mam amah mato. Raa moo mse mte tna moo ember burut wa fee. Tna raa mmyõt wai mam ambar ro mjin mte to fee ye. Menohe tafoh reto to, ja raa hero abyõ afo re kbe kek ntara raa mam amah mato reto.
MAR 4:22 Bo bawya ro raa mmyõt to, meen raa masbrah. Tna soh raa mber bo ro mkair aro to, meen raa masbrer ye.
MAR 4:23 Awya ro yari bo ro Jõ tkyas refo, rau ro moof to, kbe srau ynaut ye.
MAR 4:24 Nri oh! Soh anu nri bo wefo kaket to, kbe Allah yno anu srau nnaut bo kaket ye. Tna soh anu nri Jõ kaket fee, kbe Allah yno anu srau nnaut bo wefo kaket fee ye.
MAR 4:25 Awya ro yari tna ybo yno to, kbe Allah yno re ait retait yasu maah. Menohe awya ro yari tna hawe yse mam yhaf mato kaket to, kbe Allah yno re bohar rait to mabuf sai.”
MAR 4:26 Yesus yawe u yawe, “Allah yamo Raja ybo raa mana rAit to, yfi raa ro furere bo manaf (benih) mam armato rait.
MAR 4:27 Ait furere, tna mti to ait yjin, tna reen to ait yrok yasen. Ait kmot bo manaf weto yoyo fee. Kbe bo weto mesait mo ai sai tibyo mrok mase ye. Menohe raa retait wase maja ro bo manaf mo mesait tna mrok mase weto ye.
MAR 4:28 Tabam mesait oh mi mno re bo make to. Tinyi rau to kmoh mo maut tna mse mata msya kre tna mse make.
MAR 4:29 Ati ro bo make weto manes to raa retait yryoh sai. Feto mnan fi Allah yama ybo raa wAit ati ro Ait ksoh sai.”
MAR 4:30 Tna Yesus yawe u yawe, “Raa mana ro Allah yamo Raja ybo to, kbe mnan fi bo bawya? Tkyas bofret bawya naut re kbe anu nhar bo maja rau?
MAR 4:31 Raa mana ro Allah rAit to, mfi bo manaf (benih) ro maku sau. Tna bo manaf roto taro to, makan rau to mase baro ye. Tna raa sait yoo bo manaf ro maku reto tna furere mam armato rait.
MAR 4:32 Menohe ati ro bo manaf reto mo to, mrok mase miwrek bosafom roto taro ye. Tibyo ruu ro mfru mam ayoh to, mama mbo mam ara reto kre ye.”
MAR 4:33 Yesus ykyas Watum ro Allah kʼana mkah bofret mawat. Ait yhar ana mtai mfot watum rAit beta fee. Feto to Ait ykyas bo kʼana mamo snok mam wore ana mari tna srau mnaut sai, tna fo Ait bitsre mam weto.
MAR 4:34 Ait ja ykyas kʼana mkah bofret sai. Tna Ait betoo bofret maja weto kuber wAit mesait kar mam yuk roto hayah.
MAR 4:35 Mam ayõ ro hreha reto to, Yesus yawe kuber wAit yawe, “Nma anu buut wiak frit bmoʼt maru refo ati tino.”
MAR 4:36 Tibyo ana msya Yesus maut wiak sau sikba raa makin weto mamo. Tna raa roto taro maut wiak roto baro to, kro mamo ye.
MAR 4:37 Ana mamo, mamo tna foos ro msai frok tubor mama mai wiak rana. Tna figyõm mase mai maut mam wiak mato ye, tna mabo kait ana beta.
MAR 4:38 Yesus Ait yjin tu mam wiak tis. Tna kuber wAit mti Ait mawe, “Guru; fyi kbe Nyõ sayõ anu bsu a?”
MAR 4:39 Yesus yrok yasen tna yifah foos msya figyõm weto yawe, “Nnem oh!” Tibyo foos reto mrok mnem. Tna maru reto mrok snef u.
MAR 4:40 Yesus ytu kuber wAit yawe, “Fyi re anu waa to? Anu smot Jõ fe mfefares a?”
MAR 4:41 Ana mrok waa toni tna mtu kʼanya mawe, “Bi Ait refi yatak yifah foos msya figyõm wefo mari. Bi Ait refi fi awya mefi ee?”
MAR 5:1 Yesus ysya kuber wAit frit maru reto snok mam rabin ro Gerasa.
MAR 5:2 Ana frok tna Yesus yaut mne. Tna raa ro kabes mbo sait yama yo kʼYesus. Raa retait yama ybam isra mato ro ja raa mse hai to, yama.
MAR 5:3 Ja ait yhau mam isra mato weto. Tiwya raa make ait yatem msya yaa mkah too. Menohe ait skur beak sai. Tna fo raa moo besi msya rantai make ait kaket. Menohe ait skur beak ye. Ait safo tibyo raa sait bo ytai ybo ait fee. Tna raa sait yros ter-ter yake ait u ye fee.
MAR 5:5 Rabu-reha to ait ysom yur bait mam wore ja raa sama hai. Tna ait ysom bait mam faut rno ye. Ait yisyah tna yoo fraa ywais ait yetsu ye.
MAR 5:6 Ait yhau fari ymat Yesus yama. Tibyo ait yhoh yama yo kʼYesus kait tna yaka tmi yimna tna heyut Yesus.
MAR 5:7 Tna Yesus yawe, “Kabes; nfrok nbam kʼait!” Kabes weto soh-soh kʼAit mkah mai ro mase mawe, “Yesus, Ku ro Allah yare fi; Nyõ Naja yase toni! Kbe Nyõ nno bawya kʼamu mefo? Amu nyoh kʼNyõ nwe, ‘Nyõ nawe mkah Allah yasom nawe kbe Nyõ sikowah amu ma!’”
MAR 5:9 Tna Yesus ytu kʼait yawe, “Nyõ nasom awya?” Tna raa retait yawe, “Amu ro nbo ait refi fi kabes nwat. Tibyo jõ tasom ‘Legion.’”
MAR 5:10 Tna ait soh-soh kʼYesus hri mun aro rau mawe, “Nbis amu frok nbam rabin refo ma!”
MAR 5:11 Kene msya yuk reto ye fane mawat mau bana mam faut sau.
MAR 5:12 Tna kabes weto soh-soh kʼYesus mawe, “Nbis amu frok nmo twok mam fane wore wono!”
MAR 5:13 Tna Yesus ybis yawe, “Nmo oh!” Tna kabes weto mari tna frok mamo twok mam fane weto. Tna fane weto mrok mker tna mhoh-hah tbat mam rakak reto tna mbtek mam maru. Tna fane weto msu tibyo mhai beta mkak. Fane weto mana 2000 bo feto saah.
MAR 5:14 Raa ro kmot fane weto mmat bo ro Yesus yno. Feto tibyo ana masen fooh mhoh mamo mkyas kʼraa mam kota reto tna mkyas kʼraa ro mhau kene ye. Raa mawat mari bo ro ana mkyas weto tibyo ana mama mmat bo reto.
MAR 5:15 Mama mo kʼYesus, tna mmat he ait ro tiwya kabes mawat mbo retait hre mte. Ait yyum ratan. Tna srau yakit rait moof oh. Ana mmat feto tibyo mrok waa.
MAR 5:16 Raa ro riwai mmat bo ro Yesus yno weto mkyas ait ro kabes mbo retait tna mkyas fane weto ye.
MAR 5:17 Tibyo raa weto makin misobu Ait mawe Ait yasen yamo fooh sikba oo rana.
MAR 5:18 Yesus yawe yaut mam wiak to, raa ro riwai yker retait soh-soh kʼAit yawe, “Jõ kro Nyõ bmo ye!”
MAR 5:19 Menohe Yesus yawe kʼait yawe, “Nyõ kro ma. Namo no kʼraa wonyõ. Tna nkyas bo msai ro Tuhan yno kʼnyõ. Tna nkyas boatmof rAit, nawe Ait yatmof nyõ.”
MAR 5:20 Tibyo raa retait yasen yamoʼt oo ro Dekapolis. Tna ykyas bo msai ro riwai Yesus yno kʼait. Tibyo raa beta mrok ktak.
MAR 5:21 Yesus yaut mam wiak hah ye yamo snok maru maam jaro. Tna raa msis-sas mama mros mur mtan kʼAit mam wore aya maam weto ye.
MAR 5:22 Tna bi yabi ro ybo samu watum raa ro Yahudi sait yama. Ait retait yasom Yairus. Ait yama yaka heyut Yesus tna soh-soh kʼAit yawe,
MAR 5:23 “Yesus; ku ajõ ro ano sau kiyam, kerit wo mhai! Nama noo natem niir ku au afo re kiyam marak tna kbe au mhai fee.”
MAR 5:24 Tibyo Yesus ysya bi Yairus mamo. Tna raa msis-sas beak-ak anya kro Ait mamo ye.
MAR 5:25 Raa msis-sas weto to, fai au sau mama ye. Fai au fo mafa mees ro fnya yoyo tahun trion 12 oh.
MAR 5:26 Tiwya raa mawat mama tkif fai au oh. Menohe raa ro mtai misoh au aro fee. Feto mamo snok tis rau to, pitis wau marak. Tna kiyam rau msai renti.
MAR 5:27 Fai au mari he Yesus ja yno bo ro msai. Tibyo au mnaut mawe, “Soh jõ tiir ratan rAit sai to, kbe kiyam ajõ marak.” Tna mam wore raa mawat weto to, fai au mbito twok mamo mo kʼYesus mam ati ro ait kbor tna miir ratan rAit.
MAR 5:29 Au miir ratan rAit si fo, tna mees rau reto mrok mnem. Au mari he kiyam rau marak oh.
MAR 5:30 Au miir ratan rait si fo, Yesus yari he Ait yatak rAit baro frok mbam kʼAit. Tibyo Ait haberek ymat raa wefo tna ytu kʼana yawe, “Awya yatem miir ratan aJõ fo?”
MAR 5:31 Kuber wait mawe kʼAit mawe, “Yesus; nmat: Raa mawat beak-ak anya sai fo. Fyi re Nyõ ntu nawe awya yiir Nyõ a?”
MAR 5:32 Menohe Yesus haberek saso raa ro miir Ait sai fares.
MAR 5:33 Fai au refo mhar bo metsu rau mbros. Au mrok waa tna tetet mhai ye. Tna au maka hartu Yesus, tna mbetoo bo ro au mno beta.
MAR 5:34 Tna Yesus yawe, “Ku aJõ; nyõ smot Jõ tibyo kiyam anyõ reto marak. Riof kʼnyõ oh. Nasen namo oh. Kbe nyõ nafa kiyam reto u fee.”
MAR 5:35 Yesus ykyas bo fares tna raa baro mama mbam samu bi Yairus mama. Tna mawe kʼYairus mawe, “Ku anyõ reto mhai oh. Nno bi Guru ysui aro u ma.”
MAR 5:36 Yesus yari bo ro raa weto mawe. Tibyo Ait yawe kʼYairus yawe, “Waa ma, smot Jõ sai. Smot Jõ nawe Jõ tatak tisoh au.”
MAR 5:37 Petrus, Yakobus, ysya Yohanes ro Yakobus yao kro Yesus mamoʼt amah ro Yairus. Tna Yesus yawe kʼraa roto yawe ana kro Ait ye ma.
MAR 5:38 Ana mamo snok amah ro Yairus. Tna Yesus ymat he raa sraujin beta. Ana mawia mnin-nin.
MAR 5:39 Yesus twok tna yawe kʼana yawe, “Fyi re anu nwia mnin-nin fo? Ku au reto mhai fee. Au mjin sai meto!”
MAR 5:40 Ana masah Yesus. Ait yawe ana frok. Tna Ait yakah ku ro mhai refo maja, mme, msya kuber wait mabo tuuf aran tna twok mam amah hawar ro hai raa mse.
MAR 5:41 Yesus ybo ku refo matem yawe, “Talitakum!” (Mkah mai rana reto mawe, ‘Ku ro ano, Jõ tawe kʼnyõ, nrok nasen!’)
MAR 5:42 Yawe mai weto si fo, ku au masen mros tna mamo ye. (Ku au reto umur 12 tahun.) Raa ro mmat bo msai reto to mrok miskawowo.
MAR 5:43 Menohe Yesus yawe wa kʼana yawe, “Nmo nkyas bo msai ro tno reto renti kʼraa wia ma!” Tna yawe, “Noo boit nee ku au mait oh.”
MAR 6:1 Yesus sikba amah ro Yairus tna Ait ysya kuber wAit hah me mamoʼt remo rAit.
MAR 6:2 Ayõ ro raa ntmoh (hari Sabat) to, Ait yamoʼt samu watum raa ro Yahudi. Tna Ait yasen ykyas bo kʼana. Raa ro mari bo ro Ait ykyas to, mrok ktak. Ana mawe, “Bi refi fi, raa ro ja yfen ara sai. Ait yoo watum refo mbam woyõ? Tna Ait yno bo ro msai fyi? Bi Ait refi fai Maria makut. Tna Yakobus, Yoses, Yudas, ysya Simon mao rana fe mfe a? Tna ja yano na mhau msya anu mam remo ranu ye!” Ana mhar Yesus yme, yano na tibyo ana smot Ait fee. Ana mnaut mawe Ait Mesias fee. Mawe ait besruf ana sai feto. Tibyo ana kmo Ait.
MAR 6:4 Tna Yesus yawe kʼana yawe, “Nabi ro Allah ybis yama to, ja raa mari ait mam woyõ-woya yamo sai. Menohe mam remo rait yesait to, ja raa hawe mari ait. Tna yaja, yme, yao, msya yano na ja hawe ye. Tna raa ro amah rait to, hawe ye.”
MAR 6:5 Raa ro remo reto smot Ait to fee. Tibyo Ait yrok ktak. Tna Ait yno bo ro msai aro kaket mam remo rAit fee. Ait yatem ytor yisoh raa ro kiyam mabo baro sai. Tna Yesus yamo ykyas bo yamo yur mam remo roto taro naut.
MAR 6:7 Ati sau to, Yesus ytu kuber wAit mabo 12 weto mama mo kʼAit. Tna Ait yoo yatak rAit yee kʼana re kbe ana mikyak kabes ro mbo raa to sor. Tna Ait ybis ana mabo ewok-ewok masen mamo hayah-hayah.
MAR 6:8 Ait yawe kʼana yawe, “Nmo ntem marak sai, nbo yu mkah boit, msya pitis ye ma. Nbo armuk mesait aran sai.
MAR 6:9 Nse sandal mam naa sai, tna nbo ratan roto taro ro kbe nyum to ma.
MAR 6:10 Ati ro anu twok mam remo to, soh raa sait yoo anu yse mam amah rait to, nhau oh nsya ait mam beto mamo snok mam wore anu nsen sikba remo reto.
MAR 6:11 Ati ro anu twok mam remo taro to, soh raa mitrah amah wana kʼanu fee, tna hawe mari bokyas ro anu nkyas to, sikba remo reto nmo. Sikba remo reto nmo to, bes-baas bohasyaf ro mhau mam naa to akus sai. Nno feto afo re ana weto mhar mawe anu bitsre ana akus. Ana hawe bo mari bo ro anu nkyas. Feto tibyo ana mesait oh mi misti kair ro meen mama mai kʼana.”
MAR 6:12 Kuber ro Yesus wait mabo 12 weto masen mamo. Ana mamo wosa Watum ro Allah kʼraa mawe, “Nashana tna bitsre iro wanu.”
MAR 6:13 Ana mikyak kabes mawat frok mbam raa. Tna ana moo minyakzaitun maya ngkaru kʼraa ro kiyam mawat ye, tna kiyam rana marak.
MAR 6:14 Yesus yno bo ro msai mawat tibyo raa mkyas Ait yasom faram mamo snok mam arin aso beta. Tna raja Herodes yari Yesus yasom ye. Raa mnaut mawe, “Ait refi fi Yohanes Pembaptis, Ait yrok yasen. Reto oh mi Ait yatak yno bo msai weto to!”
MAR 6:15 Menohe raa taro mawe, “Ait tait Yohanes Pembaptis fee. Ait tait nabi Elia.” Tna raa taro mawe, “Ait tait Elia fee. Ait tait nabi ro Allah ybis sait mfi bo nabi na ro tiwya tinyi Ait ybis ye.”
MAR 6:16 Raja Herodes yari feto tibyo yawe, “Raa refi yatak yno bo ro msai. Tiwya jõ tbis raa ktan Yohanes yana yajat ne. Ait yrok yasen oh metait!”
MAR 6:17 Tiwya raja Herodes ytak fnya ro yao Filipus rait. Masom rau to fai Herodias. Yohanes yari feto, tibyo yastako raja Herodes yawe yber safo oh meto. Tibyo raja Herodes kmo Yohanes tna ybis raa mamo mfot Yohanes make. Ana mfot ait tna makah mamo mbu mam bui.
MAR 6:19 Bo ro Yohanes yawe reto mno re fai Herodias mhaf mkair. Tibyo au saso iso re kbe raa mame Yohanes yajat. He mfe.
MAR 6:20 Raja Herodes kmot ait wa wea. Ait yhar yawe Yohanes ja yno bo ro Allah ksoh sai. Tna yhar yawe Yohanes tait raa ro Allah rAit ye. Tibyo Herodes waa, tna hawe yno bo ro mkair mai kʼYohanes. Ait ynaut yawe kbe Allah yno bo ro mkair mai kʼait riryõn. Tna raja Herodes ksoh yari Yohanes ykyas Watum ro Allah ye. Ait beroh hre yari, menohe bokyas weto mno ait miskawowo ye.
MAR 6:21 Fai Herodias mhau ste ati ro raja Herodes yakyõ hwiat rait ro tiwya yme mabe ait. Raja Herodes yoo taah yee kʼraa mase sor mama. Ait ymen raa ro ja mbo provinsi ro Galilea, raa mase ro mbo raa sbe ye, tna msya raa manes ro mhau mam rabin reto taro ye. Ana mama sohmaam bo su mam bokyõ reto.
MAR 6:22 Ana makyõ bokyõ reto to, ku ano ro fai Herodias rau masen smar. Herodes ysya raa ro mamaʼt bokyõ fo, ana hre horit ku au reto bo smar. Herodes ksoh bo ymat ku au. Tibyo ait ytu ku au reto yawe, “Nyõ ksoh bo bawya? Nayoh sai. Kbe jõ too tee kʼnyõ tu oh!
MAR 6:23 Jõ tsioh fee; bawya sai ro nyõ nayoh to, kbe jõ too tee kʼnyõ. Soh nyõ nayoh rabin ajõ refo hariyah sau to, kbe jõ too tsan kʼnyõ sai!”
MAR 6:24 Ku au mari feto, tibyo frok mamo mtu kʼmme mawe, “Tme, kbe jõ tayoh bawya ee?” Mme mawe kʼau mawe, “Nayoh Yohanes Pembaptis yana!”
MAR 6:25 Ku au reto hah me mamo mo kʼbi Herodes mawe, “Jõ tayoh raa mame Yohanes Pembaptis yajat! Nno fooh tna sbi yana nasyõ ait yana abyõ mam baki sau, noo nama nee kʼjõ.”
MAR 6:26 Raja Herodes yari feto, tibyo ynaut yyi. Menohe riwai ait ysi bo kawi oh. Yafoh na mari wia oh no, tibyo ait ye yabe u fee.
MAR 6:27 Feto mam weto si fo, ait ybis raa sait yawe, “Namo sbi Yohanes yana nakah nama!” Tna raa ro ja yno feto yari tna yamoʼt bui ktan Yohanes yana.
MAR 6:28 Ait yoo Yohanes yana yse abyõ mam baki, yasyõ yakah yama yee ku au reto. Tna ku au reto makah mamo mee kʼmme mmat ye.
MAR 6:29 Kuber ro Yohanes wait mari feto, tibyo ana mama moo ajat ro Yohanes. Moo ajat tna makah mamo sama mam isra mato.
MAR 6:30 Raabis ro tiwya Yesus ybis weto, ana hah me mama siret su msya Yesus. Ana hah mama tna mkyas kʼAit bo bawya ro ana mno msya bo ro ana mkyas kʼraa ye.
MAR 6:31 Ati reto raa msis-sas mamo-me mmat Yesus tibyo ana msui, hre mait boit fee. Tna Yesus yawe kuber wAit yawe, “Nma, anu bmo saso wore mimon aro afo re anu sne hoh, biit boit, tna bjin baro rere bo ye.”
MAR 6:32 Tibyo ana masen maut wiak mamoʼt yuk ro mimon sau.
MAR 6:33 Menohe raa msis-sas weto mmat ana bo masen sikba yuk reto mamo. Tna ana weto mhar wore ana masen mamo ye. Tibyo raa ro mbam remo kene mam weto sor, ana mawat masen mamo iso snok wia mam yuk ro ana mamo reto.
MAR 6:34 Tna Yesus ysya kuber wait snok mam maru maam jaro. Ait ymat he raa msis-sas mros wea. Tna ynaut yawe, “Raa ro mkyas Watum ro Allah kʼraa wefo aro fee. Ana mfi domba ro mhau akus sai. Raa ro kmot ana aro fee.” Tibyo Ait yatmof ana tna ykyas bo mawat kʼana ye.
MAR 6:35 Hreha oh tna kuber ro Yesus wAit mama mo kʼAit mawe, “Mti oh. Tna yuk refo fo riamo.
MAR 6:36 Nbis raa wefo masen mamo rof, re kbe ana saso boit ro mait aro. Kbe ana saso mam remo msya kota ro mhau kene mam wefo sor.”
MAR 6:37 Menohe Yesus yawe kʼana yawe, “Anu nesait noo boit aro nee kʼana mait.” Tna kuber wAit weto mawe kʼAit mawe, “Amu ntai fee! Soh amu noo boit mkah nee kʼraa msis-sas refo mait to, kbe pitis mabyoh maut toni! Pitis 200 dinar bo feto!”
MAR 6:38 Menohe Ait yawe, “Anu nse roti jya meto? Sik nmo nmat wia.” Ana mamo mmat tna hah me mama mawe kʼYesus mawe, “Roti maat msya syoh mana ewok aran sai fo.”
MAR 6:39 Tna Yesus ybis re raa hre mam bosafom ro moof weto. Tna ana taro mabo 50 hre kbair sau hayah-hayah. Tna taro mabo 100 hre kbair sau hayah-hayah ye.
MAR 6:41 Tna Yesus yoo roti trion maat msya syoh mana ewok reto ybo. Tna heyut mam ayoh yayoh asik mase kʼAllah. Tna Ait haber roti weto tna yee kuber wAit yawe ana saim kʼraa ro hre weto sor. Tna yiti syoh mana ewok reto saim kʼana beta ye.
MAR 6:42 Raa weto mait tna mhaf matu beta.
MAR 6:43 Menohe roti mabuf taro msya syoh to msis mhau fares. Kuber ro Yesus wAit soo boit weto tna mfau mam keranjang trion 12 matot.
MAR 6:44 Raa sme ro mait bo weto mabo trion 5000 bo feto.
MAR 6:45 Ana mno bo weto mkak si fo, Yesus ybis kuber wAit maut wiak matim wea mamoʼt remo ro Betsaida. Yesait yhau yawe ybis raa msis-sas wefo mamo bana.
MAR 6:46 Ait bitsre raa mamo bana tna Ait yaut yamo skabuk mam faut mana sau.
MAR 6:47 Arin mti oh. Wiak ro kuber wAit maut fo mamo oh mam maru masuf. Tna Yesus yhau akus fares mam maru maam.
MAR 6:48 Foos mfi mama mbam ati ro kuber weto miin wiak mamo, tibyo ana miin wiak reto hrowyõ mhai. Mam wore ayõ ro tuuf bo feto, Yesus yata abyõ mam aya mata yama yo kʼana. Ana mmat Ait yama, yfi bo yama yiwrek ana iti yamo bo feto.
MAR 6:49 Kuber wAit mmat he Ait yamo abyõ mam aya mata yama tibyo ana miskawowo, mwohrarar mawe, “Nmat, bo mnat anu!” Menohe Yesus yawe kʼana yawe, “Knar oh, waa ma! Jõ mefi!”
MAR 6:51 Ait yaut mam wiak rana si fo, foos mrok mnem. Kuber wAit mrok mtak mmat bo msai ro Yesus yno reto.
MAR 6:52 Ana mmat bo msai ro Yesus riwai yno msya roti weto. Menohe ana srau mnaut yatak rAit fefares.
MAR 6:53 Ana mamo snok mam aya maam jaro to, ana miti wiak rana mam oo ro Genesaret.
MAR 6:54 Ana mroh mbam wiak mato mam weto si fo, raa mmat he Yesus yama.
MAR 6:55 Tibyo raa beak-ak anya mhoh mamoʼt remo ro kene mam weto mbra. Tna katar raa ro kiyam sor fo mama mo kʼYesus. Soh raa mari Yesus yhau mam yuk sau to, kbe ana katar raa ro kiyam weto mama mo kʼAit mam yuk reto ye.
MAR 6:56 Woyõ-woya sai Yesus yamo to; mam kota ye, mam remo ye, kbe raa msis-sas makah raa ro kiyam mama mo kʼAit ye. Ana mama mse raa ro kiyam weto mam pasar rana. Tna ana soh-soh kʼAit mawe, “Amu niir ratan aNyõ makit sai mbau a?” Tna ana ro miir ratan rAit makit fo, kiyam rana marak beta.
MAR 7:1 Ti sau fo, raa ro Farisi msya guru agama Yahudi baro mbam Yerusalem mama mo kʼYesus.
MAR 7:2 Ana mmat he kuber ro Yesus wAit mait boit to, ana myon matem wana wia fee.
MAR 7:3 (Raa mabi ro Yahudi mbis raa myon matem wana kaket wia mamyot bo mafa rana, tna kbe mait boit. Soh raa mait boit menohe hawe myon matem wana kaket wia to, raa mabi ro Yahudi mnaut mawe kbe Allah kmo ana weto.
MAR 7:4 Bo mafa wana roto taro mawat ye: Ati ro ana mbam pasar mama to, kbe ana hre mait boit fee. Ana mate aya myon metsu wana beta wia matim mamyot bo mafa wana. Tna kbe ana hre mait boit. Tna raa ro Yahudi ja myon hawereh msya bo ro saruk boit moof kaket feto ye.)
MAR 7:5 Raa mabi ro Yahudi weto mmat he kuber ro Yesus wAit mno bo mafa wana weto fee. Tibyo ana kmo mtu kʼYesus mawe, “Yesus; fyi re kuber woNyõ mno bo mafa wamu fee? Ro moof to, ana myon matem kaket wia tna fo mait bo to!”
MAR 7:6 Yesus yawe kʼana yawe, “Tiwya Allah ybis nabi Yesaya ykyas anu. Ait ykom yawe anu nmo wan-wan sai. Mabo oh! Bokom reto mawe, ‘Raa mana refo mbaut Jõ mkah masoh mabyõ sai. Menohe ana mhaf wana to hayah sai. Ana maka smot Jõ mati sai. Tna bo ro ana mkyas mam samu watum rana to taro watum raa sai, mbam kʼJõ fee.’”
MAR 7:8 Yesus yawe u yawe “Anu nno bo mkair! Watum ro Allah to, anu nsorni, beak. Tna anu nno bo mafa ro mbam kʼraa sai to matak.
MAR 7:10 Tiwya Allah ybis Musa ykom yawe, ‘Natmof nja msya nme na. Keluaran 20:12 Awya ro yawe kair yaja yme bo to, kbe ait raa mame yajat tu oh.’
MAR 7:11 Menohe anu nno bo mkair nwe raa matmof maja msya mme na to ma. Anu nwe kʼana nwe, ‘Thar tawe bo ro anu bewok nse to mabuf. Tii tawe tatmof anu mbewok tawe too pitis tee kʼanu, he mfe. Pitis weto beta tsan kʼAllah oh.’
MAR 7:12 Anu nwe feto tna natmof nja, nme na fee.
MAR 7:13 Anu nno bo mafa ro hohos wanu fares menohe miwer Watum ro Allah oh meto. Tna anu ja nno bo mkair mnan feto taro ye.”
MAR 7:14 Tna Yesus ytu raa msis-sas mama. Tna ykyas bo kʼana yawe, “Nri oh, nnaut oh:
MAR 7:15 Bo aro mno wa iranya raa msya Allah to. Bo aro ro twok mam raa mhaf mno feto fee. Menohe bo ro frok mbam raa mhaf mato oh mi mno wa iranya raa msya Allah to. [
MAR 7:16 Anu ro nri bokyas reto oh to, nnaut kaket!”]
MAR 7:17 Yesus sikba raa mawat weto tna yamo twok mam amah mato. Tna kuber wAit mayoh kʼAit mawe, “Nbetoo bofret reto maja rau kʼamu.”
MAR 7:18 Tna Yesus yawe kʼana yawe, “Anu fo nfot fee ye? Boit ro raa mait tna aya ro raa mata to mno wa iranya raa msya Allah to fee. Bo sohmaam ro twok mam raa mhaf mato to bo ati fee.
MAR 7:19 Bo weto twok mam raa masoh to, tna mroh beta mamoʼt raa mhaf. Tna kbe haberek mamo syõ. Tibyo raa mamo msyõ mam sutet makus akus. Feto to, boit mesait ja mno wa iranya raa msya Allah to fee.” (Mkah bokyas reto to, Yesus yawe boit aro mbau to fee.)
MAR 7:20 Tna Yesus yawe, “Soh raa mhaf mkair to, kbe ait yno bo ro mkair ye.
MAR 7:21 Raa ro mhaf mkair to, ja mnaut-nat bo ro mkair-kar. Ana mjah bo kbik-kbak, tna msyõf bo raa. Ana mame ajat,
MAR 7:22 mno bo wyahte, ana masmamo, tna mhaf mkair-kar kʼraa anya. Ana sioh raa anya, tna mno bo ro mti hrenaut. Ana mawe kair raa anya, tna tawyõ ana ai, tna mno bo ninya sai, mnaut tis fee.
MAR 7:23 Bo ro mkair weto beta frok mbam kʼraa mhaf mato ro mkair. Bo weto oh mi mno wa iranya raa msya Allah to.”
MAR 7:24 Yesus sikba remo reto tna yamoʼt rabin ro Tirus. Ait twok mam amah sau yawe ymyõt Ait wai. Menohe mfe; raa mhar Ait yama oh.
MAR 7:25 Tna fai sau mari he Yesus yama si fo, au mama mo kʼYesus. Fai au reto to, fnya mana ro Yahudi fee. Fai au fnya mana ro Siro-Fenisia. Au mama maka soh-soh kʼAit mawe, “Nikyak kabes ro mbo ku ajõ ro ano, mbau a!”
MAR 7:27 Tna Yesus yawe, “Ja raa moo boit mee kukek wana mait mhaf matu wia matim. Raa moo boit ro kukek mait reto to, beak mtah mait fee!”
MAR 7:28 Menohe fai au reto mawe, “Ae; menohe makyõ-aka ro btek mbam ambar to, ja mtah mait.”
MAR 7:29 Tna Yesus yawe kʼfai au yawe, “Bokyas anyõ reto moof toni. Feto to, hah ne namo bonyõ oh. Kabes ro mbo ku anyõ to, frok mamo oh.”
MAR 7:30 Fai au reto hah mamo snok mam amah rau. Tna mmat he ku rau reto mjin maam knar sai wea. Kabes frok mbam ku au reto mamo marak oh.
MAR 7:31 Yesus sikba rabin ro Tirus, tna yasen yamo iti kota ro Sidon yamoʼt maru ro Galilea. Ait truk mam rabin ro Dekapolis.
MAR 7:32 Tna raa makah raa sait mama mo kʼYesus. Ait retait yimara mtuk msya ymai kair ye. Ana soh-soh kʼAit mawe, “Yesus; noo natem ntor abyõ kʼraa refi, mbau a.”
MAR 7:33 Yesus yakah raa retait yamo wore ana mbewok mros kar. Tna Yesus yoo yatem krem ysu kʼait yimara ewok. Tna Yesus tfeh oot yatem yiir kʼraa retait hrea ye.
MAR 7:34 Mam weto Yesus heyut ayoh yayõ yafos fari-fara yawe, “Efata!” (Efata to mai ro Aram mawe, 'maah oh'.)
MAR 7:35 Raa retait yimara mrok moof yari bo, tna ymai mrok moof ykyas bo yasoh mnan-an ye.
MAR 7:36 Tna Yesus yawe wa kʼana yawe, “Nmo nkyas bo wefo kʼraa renti ma!” Menohe ana mrok mamo mkyas kʼraa renti sai.
MAR 7:37 Raa mari he Yesus yno bo msai reto to, mrok ktak. Ana mawe, “Ait yno bombra beta moof sai! Raa ro mimara mtuk sai, msya raa ro mai kair fyi sai, Ait yisoh mrok moof beta.”
MAR 8:1 Wore weto raa msis-sas mama mo kʼAit u. Tna boit wana marak. Tibyo Yesus ytu kuber wAit mama tna yawe,
MAR 8:2 “Jõ tatmof raa msis-sas wefo. Ana mama mhau msya Jõ ti trion tuuf oh. Tna mfo wefo boit wana mkak ye oh.
MAR 8:3 Raa weto taro mama mbam tabam wana ro fari-fara ye. Soh Jõ tbis ana mkah hai sre hah me mamo to, kbe ana mhai awyah sne fefa mam iso maka.”
MAR 8:4 Kuber ro Yesus wAit mawe, “Fyi re anu bkai boit mnan mam yuk ro mimon refo?”
MAR 8:5 Tna Yesus yawe, “Anu nse roti jya meto?” Tna ana mawe, “Amu nse roti krema.”
MAR 8:6 Tna Ait ybis raa msis-sas wefo hre mte beta. Ait yoo roti krema weto yayoh asik mawat kʼAllah. Tna Ait haber roti weto kinyah ftah aro hayah-hayah, yee kuber wAit saim kʼraa msis-sas weto beta mait.
MAR 8:7 Tna fo Yesus yoo syoh maku baro ro mse ye. Ait ybo yayoh asik mawat kʼAllah tna yoo yee kuber wAit saim kʼraa msis-sas weto beta mabo.
MAR 8:8 Tna raa msis-sas weto mait tna mhaf matu. Tna roti msya syoh ro mhau fares to, kuber ro Yesus wAit soo mawah mfau keranjang trion krema matot.
MAR 8:9 Raa sme weto mabo trion 4000 bo feto. Raa mait bo mkak tna Yesus ybis ana masen mamo bana.
MAR 8:10 Tna Yesus ysya kuber wAit maut wiak mamoʼt rabin ro Dalmanuta.
MAR 8:11 Raa ro Farisi mabo baro mama mtu bo kʼYesus mawe sanet Ait. Ana mawe Ait yno bo msai aro re kbe ana mmat tna mhar mawe Ait ybam kʼAllah yama fe mfe a.
MAR 8:12 Yesus ynifasa tna yawe kʼana yawe, “Anu raa mana ro mfo nhau mam tabam refo fo, fyi re anu nyoh kʼJõ nawe tno bo msai re anu nmat? Kbe Jõ tno fee.”
MAR 8:13 Tna Yesus ysya kuber wAit maut wiak mawe mamoʼt maru maam jaro.
MAR 8:14 Kuber ro Yesus wAit sorni roti ro kbe ana mait to akus. Roti rana sau aran sai mhau mam wiak.
MAR 8:15 Yesus yawe wa kuber wAit yawe, “Kaket anu mkah ragi raa ro Farisi msya bi Herodes.”
MAR 8:16 Kuber wAit mari feto, tibyo mkyas kʼanya mawe, “Anu sorni roti ro kbe biit, tibyo Yesus yawe bo feto to.”
MAR 8:17 Menohe Yesus yhar bo ro ana mkyas kʼanya feto. Tibyo Ait yawe, “Roti wanu kebet reto to, nnaut nkyas nno fyi? Anu wase Jõ tatak aJõ fares a? Anu nfot fefares a?
MAR 8:18 Anu nsu mti. Anu raa ro nimara mtuk. Anu sorni bo to!
MAR 8:19 Tiwya anu nmat roti maat ro Jõ too saim kʼraa mabo trion 5000 mait. Tna ati reto to, anu soo ro ntari mhau to, nfau keranjang jya meto?” Ana mawe, “Keranjang trion 12.”
MAR 8:20 “Tna feto ye, riwai Jõ too roti krema tee kʼraa mabo 4000 mait to, tna ro ntari mhau to, anu soo nfau keranjang jya ye meto?” Ana mawe, “Keranjang trion krema matot.”
MAR 8:21 Ait yawe, “Anu wefo wase tatak aJõ fares a?”
MAR 8:22 Yesus ysya kuber wAit snok mam aya maam jaro, tna mroh wiak mam remo ro Betsaida. Tna raa makah raa ro yasu mboh sait mama mo kʼYesus tna mayoh kʼAit mawe, “Natem niir raa ro yasu mboh refi afo re yasu moof.”
MAR 8:23 Tna Yesus ybo raa ro yasu mboh retait yatem, befatu ait yamo frok ybam remo reto. Ait tfeh oot bi retait yasu tna Yesus yoo yatem yse kʼait yasu ye. Tna ytu kʼait yawe, “Nyõ nmat bo aro oh, fe mfefares a?”
MAR 8:24 Raa retait heyut ymat tna yawe, “Jõ tmat bo kaket fefares. Tmat raa mfi ara ro mamo me bo feto sai.”
MAR 8:25 Yesus yoo yatem yse kʼraa retait yasu naut u. Tna ait yasu maah. Ait ymat bo kaket.
MAR 8:26 Tna Yesus yawe kʼait yawe, “Namo bonyõ oh. Namoʼt remo reto nkyas iti ma!”
MAR 8:27 Yesus ysya kuber wAit masen mamoʼt remo sor ro mhau kene mam kota Kaisarea Filipi. Ana mamo kri-kri fo, tna Yesus ytu bo kuber wAit yawe, “Raa mnaut mawe Jõ fi awya?”
MAR 8:28 Kuber wAit mawe, “Ana taro mnaut mawe, Nyõ fi Yohanes ro ja baptis raa. Tna taro mawe, Nyõ fi nabi Elia soh mfe to, nabi ro Allah ybis nama roto sait.”
MAR 8:29 Tna Yesus ytu kʼana yawe, “Bonaut ranu nesait nwe Jõ fi awya?” Tna Petrus yasen yawe, “Nyõ fi Mesias.”
MAR 8:30 Tna Yesus yawe wa yawe, “Nkyas bo refo renti kʼraa ma!”
MAR 8:31 Tna Yesus betoo kuber wAit yawe, “Jõ fi 'Ait ro Yroh Yama Yfi Raa Sai'. Kbe meen kair mawat mama mai kʼJõ. Raa manes ro agama Yahudi kbe mikyak Jõ: Raa mabi wana ye, imam manes wana ye, tna msya guru agama wana ye. Jõ kbe raa mame tajat. Tna ti ro tuuf to, kbe Jõ trok tasen.”
MAR 8:32 Ait ykyas bo ro meen mai kʼAit, yawe bo reto meen mabo tu. Tna Petrus ykuk Yesus yamo kait kʼait yajoh jaro. Tna Petrus yastako Yesus yawe, “Nawe bo feto ma!”
MAR 8:33 Menohe Yesus haberek ymat kuber wAit tna bhah Petrus yawe, “Petrus, namo fari tno. Nyõ nkyas bo ro kabes yabi (Iblis) ykyas meto! Bo ro nyõ nkyas reto to, bonaut ro mbam kʼAllah fee. Bonaut reto to mbam kʼraa sai meto.”
MAR 8:34 Raa msis-sas huwya mawe mari bokyas rAit. Tna Yesus ytu ana msya kuber wAit mama beta. Ait yawe kʼana yawe, “Anu awya sai ro ksoh kro Jõ to, nko hawe sai kbe nno mfi fefo: Nno bo wanu u ma. Menohe nsom ara warok wanu sait-sait: Au oh mi nko hawe sai beroh nsom bo samyoh ro kbe mama mai kʼanu. Tna beroh kro iso ro Jõ terif kʼanu.
MAR 8:35 Raa taro mawe misoh metsu rana ai mam tabam refo. Ana saso riof rana mam tabam refo sai ai menohe mnaut mamos rana fee. Meen ana weto mhau hame wajin fee. Menohe raa taro mawe mhau saso riof rana ai mam tabam refo fee. Ana mawe kro Bokyas Moof aJõ (Injil) tna mno bo woJõ ye. Ana saso Jõ tasom aJõ mam tabam refo. Ana weto oh mi kbe mkai riof kʼana. Ana kbe meen raa mame majat oto, menohe meen mkai riof ro hame wajin.
MAR 8:36 Mfi bo raa sait ykai kta mam tabam refo beta menohe ykai riof mase to fee; meen mafer rau to bawya?
MAR 8:37 Meen anu nhai beta, tna bo satoh wanu meen kwiyat namos wanu me u fee.
MAR 8:38 Jõ fi 'Ait ro Yroh Yama Yfi Raa Sai'. Meen Jõ hah tama u. Tama tkah bo yase ro Allah rAit. Tama tsya malaikat wAit ye. Menohe mfo refo, wore wo raa mhau mam tabam refo fares to, raa mawat mno iro woyõ-woya sai. Ana mfi raa ro wyahte Jõ. Raa mawat hawe kro Jõ. Ana hrenaut mkyas Jõ tasom. Ana ro harenaut Jõ feto to, meen ati ro Jõ hah tama u to, kbe Jõ harenaut ana ye.”
MAR 9:1 Tna Ait yawe kʼana yawe, “Nri oh! Meen anu baro nmat raa mana ro Allah yamo Raja ybo to, mama frok tubor. Frok to, anu ro nros nsya Jõ mam befo to, meen anu baro nhau fares nmat to. Ati reto to, anu nhai beta marak fefares. Anu nmat Allah ybo raa wAit feto to, kbe anu nmat Allah yatak rAit ye.”
MAR 9:2 Ti trion ntamam firwas tna Yesus yakah Petrus, Yakobus ysya Yohanes ro Yakobus yao yamo. Ana maut mamoʼt atu ro miyõ sau. Ana mesait mamo kar mam yuk reto. Tna ana mmat Yesus yetsu haberek.
MAR 9:3 Ratan rAit mamo mboh fyok. Raa sait bo ja yyon ratan moof fyok mfi feto fee ye.
MAR 9:4 Tna ana mmat raa mabo ewok frok tubor mros msya Yesus. Ana mbewok weto to, Elia ysya Musa.
MAR 9:5 Tna Petrus yawe kʼYesus yawe, “Guru; amu ye nhau mam yuk refo to moof toni. Kbe amu sgi sbyah trion tuuf mam yuk refo: Sau kʼNyõ, sau kʼMusa, tna sau ye kʼElia.”
MAR 9:6 (Ana waa, tibyo Petrus ykyas feto sai tna ait wase bokyas rait reto.)
MAR 9:7 Tna byõ mama sro-sro ana kait. Tna ana mari Raa sait ymai mam byõ mato yawe, “Ait refi Ku aJõ ro Jõ tksoh. Nri bo kʼAit!”
MAR 9:8 Mai reto mkak si fo, ana mmat mur mtan wore ana mros weto. Mmat he Yesus yesait aran sai. Tna Elia ysya Musa marak.
MAR 9:9 Ana mroh mbam atu reto mamo, tna Yesus ysi bo kʼana. Ysi yawe, “Bo ro riwai anu nmat to, nkyas kʼraa roto to ma. Nkyas ma wia, mamo snok mam wore meen Jõ trok tasen wia. Jõ fi 'Ait ro Yroh Yama Yfi Raa Sai'.”
MAR 9:10 Ana mari bo ro Ait ykyas reto tna mtu kʼanya mawe, “Bawya ro mi Ait yawe ‘Meen yrok yasen’ meto?”
MAR 9:11 Tna ana mtu kʼAit mawe, “Fyi re guru agama wanu ro Yahudi mawe, ‘Meen Elia yama wia tna fo Mesias yama yrof to?’”
MAR 9:12 Tna Yesus yawe, “Ae, Elia yatim yisoh bombra sor wia. Menohe Jõ tawe kʼanu tawe, Elia hah ye yama oh. Tiwya raa sikowah ait mamyot ksoh rana sai. Bo reto mabo oh mnan si bokom ro nabi sait tiwya ykom ykyas Elia. Tna nabi sait tiwya ykyas Jõ ye. Ait ykom yawe, ‘'Ait ro Yroh Yama Yfi Raa Sai' tait, kbe Ait yasom bo ro samyoh mawat. Tna raa makin kbe hawe smot Ait ye.’ Anu nnaut nwe bokom reto mkyas Jõ fe mfe a?”
MAR 9:14 Kuber ro Yesus wAit taro mhau akus. Ana santri bo msya guruagama Yahudi mabo baro. Raa msis-sas mros horit ana. Tna Yesus ysya kuber wAit mabo tuuf hah me mama mo kuber ro mhau akus weto.
MAR 9:15 Raa weto mmat Yesus yama tna ana simaut mase. Tibyo mhoh mamo mtar Ait.
MAR 9:16 Yesus ytu bo kuber wAit yawe, “Anu santri bawya nsya guru weto?”
MAR 9:17 Ati reto raa sait yama yawe, “Bi Guru; jõ takah ku ajõ tama to kʼNyõ. Kabes mbo ait tibyo ymai marak!
MAR 9:18 Ati ro ruu mber ait to, kabes ntubat yetsu rait mabyõ tabam. Yafyat myoh, ybait rkit kʼanya, tna yetsu marktor-ktar ye. Jõ tayoh kuber woNyõ re ana mikyak kabes frok. Menohe ana matak fee.”
MAR 9:19 Yesus yawe, “Anu wefo mfe saut! Anu wefo raa ro smot Jõ fee! Kbe thau tsya anu kait fares a? Jõ thaf sneh tsya anu kait ye fee oh!” Tna Yesus yawe kʼbi retait yawe, “Nbo ku retait nakah nama!”
MAR 9:20 Tna ana makah ku retait mama mo kʼYesus. Kabes reto mmat Yesus si fo, mbo ku retait simoyot. Tibyo btek yai tabam tna beririk-rarak ait, yafyat matot yasoh ye.
MAR 9:21 Yesus ytu bo ku retait yaja yawe, “Ait kiyam fefo tija ooh-oh fe mfe a?” Yaja yawe, “Maban tii ykek mamo snok mfo refo oh.
MAR 9:22 Kabes reto msuk ntubat ku retait mbeak mam tafoh. Tna msuk ntubat ait mbeak mam aya ye, mawe mame ait yajat. Soh Nyõ ntai nisoh ku ajõ to, natmof amu!”
MAR 9:23 Yesus yawe, “Nyõ nnaut nawe Jõ ttai tisoh ait fe mfe a? Jõ ttai tno bombra beta soh raa smot Jõ matak.”
MAR 9:24 Yesus yawe feto si fo, bi refi soh-soh ymai mase yawe, “Tuhan; jõ smot Nyõ. Menohe bosmot ajõ fo kebet sai fares. Natmof jõ re bosmot ajõ matak.”
MAR 9:25 Yesus ymat he raa msis-sas mama fooh mros mur mtan kʼAit. Tna Ait yawe kabes reto yawe, “Kabes ro mno raa mimara mtuk tna mai marak; Jõ tikyak nyõ nfrok nbam ku refi! Nhah ne nama nbo ait u ma!”
MAR 9:26 Kabes reto wahrarar mbo ku refi yetsu simoyot tna frok mamo. Tna raa mmat ku ait yjin yfi raa ro mhai. Ana mawe, “Ait yhai oh!”
MAR 9:27 Menohe Yesus ybo ait yatem tubat yasen. Tna ait yasen yros.
MAR 9:28 Rere baro naut Yesus ysya kuber wAit mamo twok mam amah mato. Ana mesait hre su tna mtu bo kʼYesus mawe, “Bo bawya mno re amu ntak nikyak kabes reto frok fee?”
MAR 9:29 Yesus yawe, “Kabes ro mfi feto to, soh raa skabuk Allah wia, kbe ana mbis kabes reto mikyak frok to saah.”
MAR 9:30 Yesus ysya kuber wAit sikba yuk reto masen mamo frit provinsi ro Galilea. Mamo to, Ait hawe raa makin mmat Ait ye.
MAR 9:31 Ait ykyas bo kuber wAit mesait sai tna yawe, “Jõ fi 'Ait ro Yroh Yama Yfi Raa Sai'. Tna kbe raa mfot Jõ msan kʼraa roto mbo. Kbe ana mame Jõ tajat. Tna ti ro tuuf to, Jõ trok tasen.”
MAR 9:32 Kuber wAit mari bokyas reto menohe ana wase bawya ro Ait ykyas reto. Tna ana waa bo mtu kʼAit ye.
MAR 9:33 Ana snok mam remo ro Kapernaum tna truk mam amah sau. Tna Yesus ytu bo kuber wAit yawe, “Riwai anu santri bawya mam iso to?”
MAR 9:34 Riwai mam iso to, ana santri anya. Ana mawe ana to, awya ro yase. Ana hrenaut mkyas bo reto tibyo mhre shait sai.
MAR 9:35 Yesus hre tna ytu ana mabo 12 reto mama. Tna yawe, “Awya ro yawe kbe yamo raa ro yase meto to, ait ye yamo yfi raa kinyah wia. Tna yno bo raa makin. Tna meen Allah yno re raa retait yamo yase.”
MAR 9:36 Tna Ait yoo ku maku sau yse mros msya ana weto. Tna Ait saku ku refo ybaut tna yawe kuber wAit yawe,
MAR 9:37 “Jõ ksoh anu nitrah nhaf wanu kʼraa ro mhaf sneh mfi ku kinyah. Awya ro yitrah yhaf rait ku kinyah sau tna yno feto mam Jõ tasom aJõ to, ait yno bo moof oh meto. Reto mnan anya mfi ait yno bo ro moof reto kʼJõ ye oh meto. Allah oh mi tiwya ybis jõ tama fo. Tibyo awya ro yitrah yhaf rait kʼJõ tait, ait yitrah yhaf rait kʼbi Allah ye oh meto.”
MAR 9:38 Yohanes yawe kʼYesus yawe, “Guru; amu nmat bi sait yikyak kabes frok tna yawe ait yno feto mkah natak aNyõ. Menohe amu wase raa retait. Tibyo amu nwe wa kʼait nwe, ‘Nno feto ma!’”
MAR 9:39 Menohe Yesus yawe, “Nwe wa kʼait ma. Awya ro yno bo ro msai mkah tak ro Jõ tasom to, kbe ait yno Jõ tasom mkair fee.
MAR 9:40 Nwe wa kʼait ma. Awya ro beswan anu fee, ait yhau mam ati ranu ye.
MAR 9:41 Nnaut oh: Soh raa sait yhar yawe anu smot Jõ, nwe Jõ fi Mesias, tibyo yatmof anu to; meen Allah yoo boren rait yaren kʼait retait tu oh. Tna soh raa sait yari Jõ, tna yatmof anu tibyo ywyan aya yee kʼanu aro nta to, kbe Allah yaren ait tu oh.”
MAR 9:42 “Raa ro yisti re ku maku ro smot Jõ sau mno iro to, soh ait ysu mam aya yhai to, moof miwer bo ro meen Allah yno mai kʼait retait! Tuhan kmo raa ro misti re raa roto mno iro to. Feto to mfi bo raa mawah fraa ro mase sau make mam yamyum, tna mbeak ait mam aya sawan to, bo reto to moof miwer bo samyoh toni ro meen ait ykai.
MAR 9:43 Soh anu ntem jaro misti re anu sait nno iro to, nsbi natem anyõ reto beak war makus. Anu nhau nkah ntem sau aran sai tna nmo twok mam sawro ro Allah to, bo ro moof. Menohe soh anu nhau nkah ntem ewok tna re nno iro to, bo ro mkair meto. Meen Allah yoo anu beak niit mam tafoh ro roon. Meen Allah yoo anu beak mam sawro ro kair reto (neraka). [
MAR 9:44 Tafoh ro roon reto mhai fee, meen mait yoyo sai mamo snok mam hame wajin. Tna afan ro mhreh-reh raa mhau mam tafoh reto to, mhai fee ye.]
MAR 9:45 Soh anu naa sau misti re anu sait nber nmo nno iro to, nsbi naa reto beak war makus. Anu nhau nkah naa sau aran sai tna nmo twok mam sawro ro Allah to, bo ro moof. Menohe soh anu nhau nkah naa ewok tna re nno iro to, bo ro mkair meto. Meen Allah yoo anu beak mam sawro ro kair. [
MAR 9:46 Tafoh ro roon reto meen mhai fee, mait yoyo sai mamo snok mam hame wajin. Tna afan ro mhreh-reh raa mhau mam tafoh reto to, mhai fee ye.]
MAR 9:47 Feto ye soh anu nsu jaro misti re anu sait nno iro to, tufrok nasu makan reto. Anu nhau nsya Allah nkah nsu sau aran sai to, reto bo moof. Menohe soh anu nhau nkah nsu ewok tna re nno iro to, bo ro mkair. Meen Allah yoo anu beak mam sawro ro kair.
MAR 9:48 Tafoh ro roon reto meen mhai fee, mait yoyo sai hame wajin. Tna afan ro mhreh-reh raa mhau mam tafoh reto to mhai fee ye.”
MAR 9:49 Tna Yesus ykyas bofret sau yawe, “Bo samyoh ro mnan fi tafoh kbe mai kʼraa beta. Tna bo ro samyoh reto kbe mno raa mrok moof. Reto mnan fi haa ye. Soh raa yoo haa ybyat mam boit rait to, kbe boit reto mafah moof.
MAR 9:50 Haa to, ja mafer moof. Menohe soh haa mafah fee; reto mkair, kbe raa mtai mno haa reto maser u fee. Feto ye, nhau to, nno bo ro mafer mawat kʼraa roto ye. Tna nhau niranya nsya raa anya. Reto moof ye. Soh anu ja nno bo ro moof fee; kbe anu raa ro mafer marak.”
MAR 10:1 Yesus sikba remo ro Kapernaum tna yaut wiak frit aya ro Yordan. Tna yamoʼt provinsi ro Yudea. Raa msis-sas mama mo kʼAit. Tna Ait ykyas bo kʼana mnan fi ja Ait yno.
MAR 10:2 Tna raa ro Farisi baro mama mo kʼAit. Ana mawe mtu bo sanet Ait mawe, “Fyi; mfi bo raa sait yako yfain makus sai. Ait yiwer Watum ro Musa ykom oh meto, fe mfe a?”
MAR 10:3 Yesus ye ytu kʼana yawe, “Watum ro Musa reto mkyas mawe bawya?”
MAR 10:4 Tna ana mawe, “Musa yawe, ‘Soh raa sait yako yfain rait makus to, kbe ait ykom aam ro mako au makus. Ykom tna yee kʼau wia, tna ait yako au.’”
MAR 10:5 Tna Yesus yawe, “Allah hawe raa sait yako yfain rait. Menohe anu ja nna matak sai; anu hawe nri Watum ro Allah. Au oh meto Musa ykom watum reto.
MAR 10:6 Menohe Bokom ro Allah mawe, ‘Maban tiwya tinyi to, Allah yfen raa sme ye tna yfen fnya ye.’
MAR 10:7 ‘Feto oh mi kbe ku ro sme sikba yaja ysya yme na tna yamo ysya yfain rait mhau su.
MAR 10:8 Kbe ana mbewok mjin su tna mhaf sau su ye.’ Kejadian 2:24 Feto to, Ana mnan fi raa mabo ewok u fee. Ana haberek mfi raa sait aran sai.
MAR 10:9 Tna raa sme msya fnya ro Allah yse mrat su to, raa sait bo ye betwat ma.”
MAR 10:10 Yesus ysya kuber wAit mamo truk mam amah mato tna kuber wAit mtu kʼYesus mawe, “Nkyas bo ro riwai reno u kʼamu.”
MAR 10:11 Tna Ait yawe, “Awya sai ro yako fnya rait makus tna yamo ymen fnya ro u to, ait retait raa ro ywyah oh meto.
MAR 10:12 Mfi bo fai sau mako maa tna msya raa roto to, fai au reto fnya ro mwyah ye meto.”
MAR 10:13 Tna raa baro makah kukek wana mama mo kʼYesus. Ana mama re kbe Ait yse yatem abyõ kukek wana. Kuber ro Yesus mmat feto, tna ana mastako raa weto.
MAR 10:14 Menohe Yesus ymat feto, tna bhah kuber wAit. Bhah ana yawe, “Nitsre ku kinyah weto mama mo kʼJõ. Nwe wa ana ma! Raa ro mama mo kʼJõ mnan fi kukek wefo fo, mhaf wana to, Allah ksoh. Ana oh mi mamo raa mana ro Allah yamo Raja ybo to.
MAR 10:15 Menohe, Jõ tawe kʼanu tawe: Awya ro hawe mama mo kʼJõ mfi kukek wefo fo, kbe ana mamo raa ro Allah yamo Raja ybo to fee.”
MAR 10:16 Yesus yawe bo weto, tna Ait tubat kukek weto yse yatem abyõ kʼana tna skabuk re Allah yno bo ro moof kʼana.
MAR 10:17 Yesus yasen yamo, tna raa sait yhoh yama tna yjit yimna hartu Yesus. Tna ait yawe, “Guru; Nyõ fi raa ro nhaf moof! Jõ kbe tno bo bawya re kbe meen Allah yno jõ thau hame wajin?”
MAR 10:18 Tna Yesus yawe, “Fyi re nyõ nawe Jõ fi raa ro thaf moof? Raa aro mhaf moof fee. Allah yesait aran sai yhaf rAit moof.
MAR 10:19 Nyõ nhar watum ntraa wefo: ‘Nme ajat ma! Nwyah ma! Nsyõf bo to ma! Siroyõ ma! Besruf raa ma! Nmat nja msya nme na to kaket!’”
MAR 10:20 Bi retait yawe, “Guru; tiwya taban tkek fares to, tiwer bo weto aro fee.”
MAR 10:21 Yesus ymat bi retait tna yatmof ait yawe, “Bo sau nyõ nno fefares: Namo nasim kta wonyõ beta. Tna nsaim pitis weto kʼraa ro bo marak. Soh nno bo reto to, nyõ name kta mam sawro ro Allah oh meto. Tna fo nama nkro Jõ.”
MAR 10:22 Ait retait bobot toni. Tibyo yari bokyas ro Yesus reto to, ait srau hri yamo bait.
MAR 10:23 Yesus ymat kuber wAit tna yawe kʼana yawe, “Raa ro bobot masen mamo raa ro Allah yamo Raja ybo to, min toni.”
MAR 10:24 Kuber ro Yesus wAit mrok ktak mari bo ro Yesus yawe reto. Tna Yesus yawe u yawe, “Ku woJõ sor fo, raa mamo raa ro Allah yamo Raja ybo to, min toni.
MAR 10:25 Unta maboh sau twok mam sii hroh to, mnan-nan baro ye. Menohe raa ro bobot yamo raa ro Allah yamo Raja ybo to min toni.”
MAR 10:26 Kuber ro Yesus wAit mari feto tibyo mrok ktak. Tna ana mtu kʼanya mawe, “Soh feto to, raa awya meen ykai riof?”
MAR 10:27 Yesus yasu ymat ana tna yawe, “Anu raa to, nesait ntai nno riof kʼanu fee. Menohe Allah yno riof kʼanu saah. Ait ytai yno bo bawya sai.”
MAR 10:28 Tna Petrus yawe, “Amu wefo nsen sikba bombra wanu beta afo re nma kro Nyõ oh.”
MAR 10:29 Yesus yawe, “Raa ro smot Jõ tna mamo mkyas Bokyas Moof ro Allah (Injil) to, taro to, sikba amah rana. Tna taro to, sikba mao msya mano na, maja msya mme na, kukek wana, tna armato wana bo sor to.
MAR 10:30 Kbe ana beta mkai bo weto beta aro naut u. Kbe ana mkai amah aro u, mao msya mano na, maja msya mme na, kukek wana, tna armato muhrin trion 100 naut u mam tabam refo. Menohe kbe raa sikowah ana weto ye. Tna meen raa weto kbe mkai roon ro hame ye. Bo wefo beta kbe mabo tu oh.
MAR 10:31 Menohe raa mawat ro mfo refo matim wia to, meen mamo tis. Tna ana ro mfo refo mhau tis to, meen matim wia.”
MAR 10:32 Yesus ysya kuber wAit mamo mam iso maka kri-kri mamoʼt Yerusalem. Tna Yesus yatim wia. Kuber wAit mnaut yyi. Tna raa taro ro kro Ait mamo fo, ana waa ye. Yesus ytu kuber wAit mesait aran mama tna Ait ykyas bo ro kbe mai kʼAit yawe,
MAR 10:33 “Jõ fi 'Ait ro Yroh Yama Yfi Raa Sai'. Anu bmoʼt Yerusalem mefo. Mam beto to, kbe raa mfot Jõ msan kʼimam manes msya guru agama ro Yahudi. Tna kbe ana mbis raa mame Jõ tajat. Tna ana ro agama Yahudi weto, kbe moo Jõ msan kʼraa ro wase Allah.
MAR 10:34 Kbe ana mamus Jõ, tfeh oot kʼJõ, moo too mmok-mak Jõ, tna kbe ana mame Jõ tajat. Tna ti ro tuuf to, kbe Jõ trok tasen.”
MAR 10:35 Tna Yakobus ysya Yohanes mama mo kʼYesus. Ana mbewok ku ro bi Zebedeus wait. Tna ana mayoh kʼAit mawe, “Guru; amu nyoh re Nyõ nno bo bawya sai ro amu nyoh kʼNyõ fo.”
MAR 10:36 Yesus ytu si kʼana yawe, “Bo ro anu nyoh kʼJõ to bawya?”
MAR 10:37 Ana mawe kʼAit mawe, “Meen Nyõ namo nase nbo raa woNyõ to; amu nyoh kʼNyõ re amu bewok nmo nse nsya Nyõ ye. Nbis amu sait hre kʼNyõ mam ati ro natem ati. Tna nbis sait hre mam ati ro natem ta.”
MAR 10:38 Menohe Yesus yawe kʼana yawe, “Anu wase bo ro anu nyoh: Meen bo ro samyoh mai kʼJõ. Fyi; kbe anu mbewok ntai nsom bo ro samyoh mnan Jõ feto ye, fe mfe a?”
MAR 10:39 Tna ana mawe, “Amu ntak ye.” Tna Yesus yawe, “Bo ro mama mai kʼJõ to, meen anu nsom ye to.
MAR 10:40 Menohe awya ro hre mam ati ro tatem ati msya tatem ta to, Jõ oh mi tsok ana weto fee. Raa ro hre mam yuk reto to, meen Allah yesait ysok bo rAit oh.”
MAR 10:41 Kuber wAit mabo nsaa taro mari bo reto, tibyo ana kmo Yakobus ysya Yohanes.
MAR 10:42 Feto tibyo Yesus ytu ana mama tna yawe kʼana yawe, “Nnaut nwe raa ro wase Allah mam tabam refo to: Raa ro mamo aban mana wana ja mberasi raa kinyah ro ana mbo. Tna raa ro mamo tuan, tna hre abyõ mam uu to, ja mbis-bas raa sai.
MAR 10:43 Menohe anu to, nno bo feto ma. Awya sai ro yawe yase kʼanu wefo to, ait yamo raabis ranu tna ait yno bo wanu ye to.
MAR 10:44 Tna awya ro yawe yatim yamo aban mana kʼanu to, kbe ait yamo sryan kʼraa beta wia.
MAR 10:45 Ynan fi Jõ fo. Jõ fi 'Ait ro Yroh Yama Yfi Raa Sai'. Jõ tama fo, tawe tbis raa mno bo woJõ fee. Menohe Jõ tama fo re tno bo kʼraa. Tna tama re too tetsu ajõ tfes raa mawat. Tibyo kbe ana mkai riof ro mase.”
MAR 10:46 Yesus ysya kuber wAit mamo snok mam kota ro Yerikho. Ana mhau ti baro firwas tna masen mamo. Tna ati ro ana sikba kota reto to, raa msis-sas kro ana mamo ye. Mam weto to, raa ro yasu mboh sait hre mam iso maam jaro yayoh bo. Ait yasom Bartimeus, ku ro bi Timeus yare.
MAR 10:47 Ait yari raa mawe, “Yesus, ro ybam Nazaret tait yama!” Tibyo ait ro yasu mboh retait ytu yawe, “Yesus, Ku ro Daud; natmof jõ!”
MAR 10:48 Raa mawat kmo bhah ait mawe, “Shait!” Menohe ait beroh ytu fari renti yawe, “Ku ro Daud, natmof jõ!”
MAR 10:49 Yesus susu yros tna yawe kʼana yawe, “Ntu ait yama!” Tna ana mtu bi ro yasu mboh retait mawe, “Yesus ytu nyõ, yawe nasen nama!”
MAR 10:50 Raa ro yasu mboh retait bitsre ratan rait ro mne mhau akus. Tna yasen fooh yamo yo kʼYesus.
MAR 10:51 Yesus ytu bo kʼait yawe, “Nyõ nksoh nawe Jõ tno bo bawya kʼnyõ?” Ait yawe, “Bi Guru; jõ ksoh tmat bo ye!”
MAR 10:52 Yesus yawe, “Bosmot anyõ misoh nyõ nasu maah meto. Namo oh.” Mam weto si fo, raa retait yasu mmat bo tna ait kro Yesus mamo ye.
MAR 11:1 Yesus ysya kuber wAit mamo mam iso ro Yerusalem fares. Tna ana snok remo ro Betfage msya remo ro Betania. Remo weto mhau mam Faut ro Zaitun. Tna Yesus ybis kuber wAit mabo ewok matim wia. Ait yawe,
MAR 11:2 “Ntim wia, nmoʼt remo reto. Tna twok nmo to, kbe anu nkai keledai maku sau raa mii mros wea mam weto. Keledai maku reto raa maut hre abyõ mam uu fefares. Nmo skur keledai reto tna nkuk nma.
MAR 11:3 Soh raa mtu bo kʼanu mawe, ‘Anu mbewok skur keledai reto mkah bawya?’ Nwe kʼana nwe, ‘Tuhan ybis yawe nee kʼAit wia. Kbe baro fooh sai raa moo misya hah me.’”
MAR 11:4 Tibyo ana mbewok masen mamo. Tna ana fri keledai reto raa mi mam amah ro mhau iso maam sau, tna ana skur keledai reto.
MAR 11:5 Raa ro mros sor mam weto mtu bo kʼana mawe, “Anu skur keledai reto nmo nno fyi meto?”
MAR 11:6 Menohe ana mawe, “Tuhan ybis yawe nee kʼAit wia. Kbe baro fooh sai raa moo misya hah me.” Tibyo raa weto mhau mmat rof bo ana skur sai.
MAR 11:7 Ana mkuk keledai reto mamo mee kʼYesus. Tna mrus jubah wana mnin keledai kbor. Tna Yesus yaut hre abyõ.
MAR 11:8 Raa msis-sas mrus jubah wana tna tom tar-tar anya mam iso. Tna raa taro msot ara mawyan tom mam iso iti ye.
MAR 11:9 Raa msis-sas ro matim msya raa ro kro mamo tis sor to, simaut mase mawe, “Hosana! Nyõ nase toni! Nyõ raabis ro Tuhan. Nyõ nama nkyas Ait to. Nyõ fi Ku renti ro nbam raja Daud, hohos wamu. Oon ro Nyõ namo Raja nbo raa mana woNyõ to, kene wo mama.”
MAR 11:11 Yesus ysya kuber wAit mabo 12 snok mam Yerusalem tna ntwok mam Samu ro Allah. Ait ymat bombra mam weto beta, menohe arin kene wo mti oh, tibyo ana masen hah mamoʼt remo ro Betania.
MAR 11:12 Menrabu Yesus ysya kuber wAit frok mbam remo ro Betania mamo. Mamo iti mam iso ro Yerusalem to, Yesus yhai sre.
MAR 11:13 Ait ybam fari ymat ara mara sau ro mata ntin toni. Ait yamo kait mam ara mair reto yawe ymat make aro fe mfe a. Ait yamo snok kait ymat menohe make aro fee, mata rioh sai. Reto soo ro kake make fefares.
MAR 11:14 Tna Yesus kmo ara mara reto nto yawe, “Kbe raa sait ye yait kake make anyõ u fee!” Kuber ro Yesus wAit ana mari bo ro Ait ykyas reto.
MAR 11:15 Ana mamo snok mam Yerusalem tna Yesus yamo twok mam bohra Samu ro Allah rAit. Ait ymat he raa miwana Samu ro Allah. Tibyo Ait kmo yikyak raa ro masim bo msya raa ro moo bo sor mam beto. Raa taro hre masim pitis (penukar uang): Masim pitis Samu ro Allah kʼraa ro sriem. Tna raa mhre masim ruu merpati bo ye. Tna Yesus haberek-barak ambar wana ro masim bo weto.
MAR 11:16 Tna yno wa raa ro frit iti mam Samu ro Allah. Yawe, “Niwana Samu ro Allah ma! Refo fo iso fee! Nsom bo wanu mam befo ma! Nmo-nma frit Samu ro Allah fo ma! Nmo twaat tno soh!
MAR 11:17 Bokom ro Allah mawe: ‘Amah aJõ fo, mkah awya sai ro ybam arin aso beta yama skabuk.’ Yesaya 56:7; Yeremia 7:11 Menohe anu niwana amah refo fo. Anu hre nno bo mfi raa ro ja msyõf bo mefo!”
MAR 11:18 Imam manes ro agama Yahudi msya guru agama wana mari bo ro Yesus yno mam Samu ro Allah. Ana mhar mawe raa mari watum ro Yesus ykyas tna mrok ktak beta. Yesus yasom mase mam rabin reto tna raa manes weto ana mrok waa. Ana mhaf mkair tna saim iso re kbe mame Yesus yajat.
MAR 11:19 Kene wore mti oh tna Yesus ysya kuber wAit frok mamo sikba kota reto.
MAR 11:20 Menrabu rabu fo Yesus ysya kuber wAit mhah me mamo frit u ara mara ro iis reto iti. Tna ana mmat he ara reto samer beta.
MAR 11:21 Tna Petrus ye ynaut bo ro iis Yesus yawe. Ait yawe kʼYesus yawe, “Guru; sik nmat! Ara mara rno iis Nyõ nbis nawe nsamer to, mabo oh!”
MAR 11:22 Yesus yawe si yawe, “Smot Allah!
MAR 11:23 Bo bawya sai ro anu skabuk nyoh kʼAllah to, nhar nwe kbe anu fri bo reto. Nnaut mamo-me ma. Feto kbe anu fri bo ro anu nyoh kʼAit reto. Mfi bo raa sait yawe, ‘Atu rno matu mamo mai mam aya sawan!’ Soh ait ynaut mamo-me fee; kbe Allah yno bo ro ait yawe reto mabo tu oh.”
MAR 11:25 Ati ro anu nros skabuk nkyas bo kʼAllah to, nmat sas anu nhaf wanu wia. Soh anu aro nhaf mkair to, nisoh nhaf moof wia. Au oh mi; sorni bo mkair ro tiwya raa mno mai kʼanu to. Kmo ana ma. Tna re anu Nja ranu ro yhau mam sawro rAit tait, kbe yatmof anu tna yyon iro wanu ye. [
MAR 11:26 Menohe soh anu hawe nisoh iranya ranu nsya raa ro mno iro mai kʼanu to, anu Nja ranu ro yhau mam sawro rAit tait, kbe yyon iro wanu fee ye.]
MAR 11:27 Yesus ysya kuber wAit hah me mamoʼt Yerusalem. Ait yamo mam bohra Samu ro Allah to, raa manes ro agama Yahudi mama: Imam manes, guru agama, msya raa mabi wana ye.
MAR 11:28 Ana mama tna mtu bo kʼAit mawe, “Awya oh mi ybis Nyõ, re Nyõ nama nno bo wefo fo?”
MAR 11:29 Yesus yawe, “Feto Jõ ttu si bo sau kʼanu ye, tawe: ‘Yohanes Pembaptis: Ait retait raabis ro Allah fe mfe a?’ Nkyas si kʼJõ wia. Tna fo kbe Jõ tkyas awya ro ybis Jõ tama tno bombra wefo sor.”
MAR 11:31 Raa manes weto mkyas kʼanya mawe, “Soh bwe Allah oh mi ybis Yohanes to, kbe Yesus yawe, ‘Feto tna fyi re anu ntu sioh bo ro Yohanes yawe?’
MAR 11:32 Raa mnaut mawe Yohanes tait nabi ro Allah ybis yama. Feto soh anu bwe raa sai ybis ait to, kbe raa kmo anu.”
MAR 11:33 Feto to ana mawe kʼYesus mawe, “Amu wase ye.” Tna Yesus yawe, “Feto Jõ ye te tkyas tatak aJõ ro tno bombra wefo kʼanu fee ye.”
MAR 12:1 Tna Yesus ykyas bofret baro kʼraa manes ro agama Yahudi weto yawe, “Bobot sait yyum anggur mara mawat mam tabam rait. Tna ait ywas ana yur ytan mam armato rait. Tna ait yabah kayah sau mkah bo kbe mbokait anggur make tna yoo maya rau to. Tna ait sgi harit sau mkah ait hre kmot wa. Ait yno bo weto mkak tna fo ybis raa baro yawe ana mkah tna kmot armato anggur rait reto weya, kwiyat kʼana. Ait yawe kbe ana moo make rau to, saim taro hayah kʼait. Tna bobot retait yasen yamoʼt oo roto.
MAR 12:2 Ait yhau mam teto kait. Yhau mamo snok soo ro anggur mara wait weto make manes. Tna bobot retait ybis sryan rait sait hah yamoʼt tabam rait, yamo yo kʼraa ro kmot armato reto. Bobot retait ybis sryan retait yawe, ‘Nkyas kʼana ro kmot armato ajõ nawe ana mryoh anggur make aro moo mee kʼnyõ. Tna noo anggur make weto nakah nama nee kʼjõ.’
MAR 12:3 Tna sryan retait yasen yamo. Yamo snok mam tabam ro bobot rait reto. Menohe raa ro kmot armato weto to raa ro mhaf kair. Ana huwya mai sryan retait. Ana mikyak ait. Tibyo ait hah ye ybo anggur aro fee.
MAR 12:4 Feto tna bobot retait ybis sryan rait roto sait u yamo. Sryan ro ewok retait yamo. Yamo snok mam tabam ro bobot rait reto tna raa ro kmot armato reto huwya mamus sryan refi ye tna mai ait yana rait ye.
MAR 12:5 Tna bobot retait ybis sryan rait roto sait yama naut. Menohe raa weno huwya mame ait yajat. Feto ye bobot retait ybis sryan wait taro mama naut. Menohe raa ro mhaf kair weto, ana huwya mai sryan weto taro, tna mame taro majat ye.
MAR 12:6 Bobot ynaut yawe, ‘Kbe tbis awya naut u fo? Kbe ana mari ku ajõ tu oh!’ Tibyo ait ybis ku rait sait aran tum ro ait yawyan marak to yamo. Tna ku retait yasen yamo.
MAR 12:7 Menohe raa ro kmot armato anggur weto mmat he ku ait yama. Tna ana mkyas kʼanya mawe, ‘Ait ro meen shauk armato refo yama mefi! Ait refi yhau ma! Nma, anu bme ait yajat to, afo re meen armato refo mhau kʼanu!’
MAR 12:8 Feto to ana mame ait yajat tna tubat ajat rait mbeak mam armato reto mne.”
MAR 12:9 Tna Yesus ytu yawe, “Bobot ro armato rait retait kbe yno bawya kʼana ro kmot armato reto? Kbe ait yama yame raa weto tu. Tna ysan armato anggur reto kʼraa roto taro.
MAR 12:10 Nsorni ma Bokom ro Allah far-far refo: ‘Raa saso fraa mawe sgi samu sau. Ana mmat fraa sau mawe mkair. Fraa reto to, ana hawe. Tibyo moo mbeak makus. Menohe ana wase bo fraa reto oh mi fraa ro ati.
MAR 12:11 Tuhan oh mi yno bo reto mabo. Tna anu bnaut bwe bo reto moof toni.’”
MAR 12:12 Raa manes ro agama Yahudi weto mhar mawe Yesus ykyas bofret weto mai kʼana. Tibyo ana kmo saim mawe mfot Yesus. Menohe ana waa mfot Ait mam wore raa makin mmat. Ana mnaut mawe kbe raa weto kmo ana. Tibyo ana sikba yuk reto mamo.
MAR 12:13 Tna fo raa manes ro agama Yahudi mbis raa ro Farisi msya raa ro kro Herodes baro mamo mo kʼYesus. Mbis ana weto mawe ana mamo ti te kro Yesus tna mari bo ro yawe.
MAR 12:14 Tibyo raa weto mama mo kʼAit tna mtu bo kʼAit mawe, “Bi Guru; amu nhar nwe Nyõ ja sioh fee. Tna Nyõ waa raa ro manes fee. Nyõ beroh nkyas bokyas ro Allah kʼawya sai. Tna iso ro Allah to, ja Nyõ nerif abyõ kʼraa to, nmyõt bo fee ye. Feto to amu ntu bo kʼNyõ nwe: Allah ksoh yawe anu mbero namabyoh (pajak)kʼKaisar fe mfe a?”
MAR 12:15 Menohe Yesus yhar yawe ana mamo wan-wan sai. Tna yawe, “Anu syoh ntu bo sanet Jõ mkah bawya? Noo pitis mauf sau nee kʼJõ tmat wia.”
MAR 12:16 Ana moo pitis mauf sau mee kʼAit. Tna Ait ytu kʼana yawe, “Gambar refo fo msya awya yasom rait mefo?” Ana mawe, “Kaisar.”
MAR 12:17 Tna Yesus yawe, “Soh feto, bo bawya ro Kaisar rait to, noo nee Kaisar. Tna bo bawya ro Allah rait to, noo nee kʼAllah.” Ana mari bo ro yawe feto tna mrok ktak.
MAR 12:18 Ati sau to, raa ro Saduki baro mama mo kʼYesus. (Raa ro Saduki to raa ro agama Yahudi ye. Menohe ana ja mnaut mawe raa ro mhai to, meen me mrok masen fee.) Ana mtu kʼAit mawe,
MAR 12:19 “Bi Guru; tiwya Musa ykom yawe, ‘Soh raa sait yhai tna ait sano to, kbe yao kro semit reto mkah yabe ku aro mkah shauk biin ait ro yhai retait.’
MAR 12:20 Tna amu ntu bo kʼNyõ nwe: Mfi bo raa sme mabo ngkrema mao kʼanya mhau. Tna ro bum ymen fai sau, he ait sano tna yhai kba.
MAR 12:21 Ait ro ytan yao ro yabi fi yasen kro semit rana menohe yabe ku aro fee. Tna ait yhai ye. Feto ye yao ro tuuf yama kro semit rana naut. Menohe yabe ku aro fee ye.
MAR 12:22 Feto ye mnan anya sai mamo snok ro ngkrema beta. Tna fo fai au reto mhai ye.”
MAR 12:23 Tna raa ro Saduki weto nti te mtu Yesus mawe, “Meen ati ro hai mrok masen to, awya yfain fai reto? Tiwya ana mabo ngkrema ye mfain fai au reto ye fe mfe a?”
MAR 12:24 Menohe Yesus yawe, “Bonaut ranu mkair meto. Anu wase Bokom ro Allah msya Ait yatak rAit to ye.
MAR 12:25 Meen, ati ro raa mrok masen to, raa moo fnya u fee. Tna fnya mamo msya raa fee ye. Malaikat ja moo fnya fee. Meen raa mhau sai mfi malaikat sor mam sawro ro Allah.
MAR 12:26 Bokom ro Musa mkyas raa ro mhai meen mrok masen to. Nnaut nwe tiwya Allah ykyas bo kʼMusa ybam tafoh ro mait ara sau. Tafoh mait ara reto sohabyoh fee, menohe mait mbane sai. Tna Allah yawe, ‘Jõ fi Allah ro Abraham, Ishak msya Yakub ja mbaut.’
MAR 12:27 Allah yawe feto tibyo anu bhar bwe hohos wanu weto ro mhai ooh oh, ana mhai tibyo fee. Menohe Allah yawe ana mhau mam sawro rAit mbaut Ait fares. Feto to tawe kʼanu raa ro Saduki to, anu susre: Maja sau riwai anu nkyas to mkair. Mabo fee.”
MAR 12:28 Yesus santri bo ysya raa ro Saduki nkri-kri fo. Tna guru agama rana sait yama yros ymat rof. Ymat he Yesus yakit maan betoo bo raa ro Saduki mtu kʼAit. Tna ait ytu kʼYesus yawe, “Watum ro tiwya Musa ykom beta to, watum ryo oh mi moof miwrek watum taro beta to?”
MAR 12:29 Yesus yawe si yawe, “Watum ro moof ati oh mefo: ‘Raa mana ro Israel, nri; Tuhan Allah ranu tait, Tuhan ro sait yum.
MAR 12:30 Nhafri Tuhan Allah ranu mkah nhaf, srau ranu beta, mkah bohar ranu beta, tna mkah ntak ranu beta ye.’
MAR 12:31 Watum ro ewok oh mi, ‘Nhafri raa ro mhau kene msya anu to ye. Nhafri ana mnan fi anu nhafri netsu wanu nesait ai.’”
MAR 12:32 Tna guru retait yawe si kʼYesus yawe, “Guru; bokyas aNyõ to moof ati. Mbris oh: Tuhan Allah tait, Ait sait yum oh. Allah roto aro mhau fee ye.
MAR 12:33 Anu raa ro Yahudi ja bnaut bwe, ‘Raa moo bo msan kʼAllah to, bo ro ati syok.’ He mfe. Mfo refo Jõ tsrau tnaut tawe, anu bhafri Ait mkah bhaf, srau ranu beta, mkah bohar ranu beta, tna mkah btak ranu beta ye. Au oh mi bo ro ati syok meto.”
MAR 12:34 Yesus ymat he bi ait retait yakit maan. Tibyo yawe, “Mbris oh, nyõ kene wo namo raa ro Allah yamo Raja ybo.” Tna raa aro ter-ter mtu bo kʼYesus u fee.
MAR 12:35 Yesus ykyas bo nkri-kri mam bohra Samu ro Allah to, tna Ait ytu bo kʼraa yawe, “Fyi re guru agama wanu ro Yahudi mawe, ‘Mesias tait Kube ro bi Daud to?’
MAR 12:36 Tiwya Har ro Tuhan mbesi bi Daud ybis ait ykom yawe: ‘Tuhan yawe kʼTuan ajõ yawe, “Nama, hre nsya Jõ mam ati ro tatem ati; hroh ro mase reto. Hre wea. Tna raa ro byoh, raa ro srau kair kʼNyõ to, meen tno ana mbtek mam mte. Kbe Nyõ naa nber ana weto. Tna Nyõ nros natak abyõ ana, nbo ana.”’”
MAR 12:37 Yesus yawe u yawe, “Tiwya Daud ytu Mesias‘Tuan rait’ to, fyi re anu nkyas nwe Mesias tait Kube ro Daud?” Raa msis-sas ro hre weto ana mari bo ro Ait ykyas to nksoh toni.
MAR 12:38 Yesus yawe wa ana yawe, “Guru agama wanu ro Yahudi to, kaket ana: Ana ksoh myum ratan ro moof tna mamo-me afo re raa mmat ana tna bibi ana. Tna ana ksoh mawe raa mmah meen kʼana mam wore wo mamo mam pasar bo.
MAR 12:39 Ati ro ana mamoʼt samu watum to, tna ati ro ana mamo makyõ bokyõ to, ja ana msok ambar ro moof tna mhre mam weto ye.
MAR 12:40 Ana skabuk miyõ wer afo re raa mmat ana. Raa mmat feto tna mnaut mawe ana raa ro ja mno bo moof sai. Semit mnaut mawe ana raa ro ja mno bo ro moof, tna ana miwro semit weto tna mtak amah wana ye. Feto to, meen bo ro mkair toni mama mai kʼana tu oh.”
MAR 12:41 Ati sau Yesus hre mam Samu ro Allah. Ait ymat rof raa ro masen mama moo pitis msan kʼTuhan. Raa ro bobot mawat makah pitis mase mama mbero ye.
MAR 12:42 Menohe semit sau moo pitis mauf wau ewok mbero ye. Pitis ro mabyoh mroh sai meto.
MAR 12:43 Yesus ytu kuber wAit mama tna yerif fai au reto kʼana yawe, “Bris oh, fai au ro semit rno moo pitis wau mabyoh mroh sai. Feto tna mfo refo pitis wau ro mse mam amah rau fares to marak. Feto to Tuhan ynaut yawe bo ro au mbero to, mawat miwer raa ofo beta.
MAR 12:44 Pitis raa taro mbero to, baro sai mbam kta wana ro mase. Menohe semit refo, moo pitis wau ewok ro mse mkah boit mait weno oh mi bero beta mefo, tibyo mtai marak.”
MAR 13:1 Yesus frok sikba Samu ro Allah, tna kuber wAit sait yawe, “Bi yabi, sik nmat Samu wore wono wia: Fraa maboh wore raa sgi amah wono to moof toni!”
MAR 13:2 Yesus yawe kʼait yawe, “Nmat Samu ro mase wono sor wia: Meen raa mitrah Samu weto beta. Tna kbe tembok msya fraa sau bo mhau ntar-tar anya feto fee. Meen fraa weto skik mbtek mai tabam beta.”
MAR 13:3 Tna Yesus ysya kuber wAit maut mamo hre mam Faut ro Zaitun ro mros msyok si Samu ro Allah. Tna Petrus, Yakobus, Yohanes msya Andreas mtu bo kʼYesus yesait kar mawe,
MAR 13:4 “Sik nyõ beto kʼamu bo ro riwai Nyõ nkyas to. Tija re bo ro Nyõ nkyas weto mabo to? Kbe amu nmat bo bawya re nhar nwe bo ro Nyõ nawe weto kene wo mabo?”
MAR 13:5 Yesus yawe, “Kaket anu! Nno be raa mama sioh besruf anu.
MAR 13:6 Jõ fi Mesias sait aran, menohe meen raa mawat mama to, sruf bo mawe ana Mesias ybam kʼAllah. Kbe raa mawat mari feto tna smot raa weto.
MAR 13:7 Kbe anu nri he raa rabin taro mame anya tna mafa mnin-nin. Bo weto kbe mabo tu oh. Menohe waa ma: Bo weto kbe frok matim wia. Bo weto frok mama tna tabam refo haberek fefares.
MAR 13:8 Tna raa ro bangsa sau kbe masen mame anya msya raa ro bangsa roto taro. Tna raa ro raja sait ybo to, kbe masen mame anya msya raa ro raja roto taro mbo ye. Tna iin frok mam wore aro rau-rau. Tna kbe hai awyah btek mai kʼraa ye. Ti ro bo samyoh weto mama to, tinyi rau sai fares meto. Wore wo anu nmat bo weto to, kbe anu nhar oon reto mama. Reto mfi fnya ro mhaf ja kborham wia, tna kbe mabe to.
MAR 13:9 Kaket anu: Anu ro smot Jõ to, meen raa mfot anu tna makah mamoʼt samu ro raa mtu safo. Tna kbe raa mai-a anu mam samu watum ro Yahudi ye. Anu smot Jõ tibyo raa mfot anu makah mamo msan kʼaban mana sor. Feto tna kbe anu nkyas Jõ tasom kʼraja bo ye.
MAR 13:10 Wore tabam haberek fefares to, Bokyas Moof ro Allah (Injil) meen raa wosa mam bangsa beta. Snok bangsa beta maka wia tna tabam haberek.
MAR 13:11 Tna ati ro raa mfot anu, makah mamoʼt samu ro ja raa mtu safo to, nnaut yyi ma. Nnaut yyi bokyas ro kbe anu nkyas si kʼraa to ma: Kbe Har ro Tuhan mbesi bokyas moof kʼanu, mti bonaut kʼanu. Feto kbe bo ro anu betoo kʼraa ro mhau susai reto to, bokyas ro mbam Har ro Moof sai.
MAR 13:12 Meen raa ro tabam refo hren ksuk anya, kbe ana mame anya majat: Raa msya mao na kʼanya, tna raa msya kukek wana ye. Tna kbe kukek mari maja, mme na fee, menohe moo ana msan kʼraa mame ana majat.
MAR 13:13 Anu fo nkro Jõ to, tibyo kbe raa beta knait anu. Awya ro beroh yari Jõ mamo snok mam tabam haberek to, meen Allah yoo riof ro mase yee kʼraa retait.”
MAR 13:14 Tna Yesus yawe, “Nmat bokom refo tna kbe anu nfot bo ro Jõ tawe kʼanu: Tiwya Allah ybis nabi Daniel ykyas yawe: ‘Meen bo sau ro mkair toni mama sikowah yuk ro mbau to.’ Daniel 9:27, 11:31, 12:11 Jõ tawe kʼanu tawe, ati ro anu nmat bo reto mabo to, kbe anu nhar nwe kene mam wore wo tabam refo haberek. Ati ro anu nmat bo reto to, anu ro nhau mam provinsi ro Yudea beta to; nsen nsam nmo nuut atu mana.
MAR 13:15 Anu ro hre abyõ mam samu wanu kri-kri to; kbe nroh satoh bo wonyõ mbam amah mato nbo frok to ma! Nsam fooh nmo ntem marak sai.
MAR 13:16 Anu ro nkah bo mam armato to; hah ne nmo noo ratan wanu ma. Nsam fooh nmo sai.
MAR 13:17 Wore weto to, fnya ro mhaf tna msya fnya ro mee sis ku mees wana to, ana mmof toni. ⌞Ana kbe matak msam fooh fee.⌟
MAR 13:18 Meen wore weto to, arin mkair toni. Maban tiwya tinyi Allah sair tabam refo mamo snok mam mfo refo fo, raa mkai bo ro mfi feto aro fefares. Tna bo ro mkair-kar mfi feto to aro meen me btek mai kʼraa u fee. Feto to skabuk nyoh Tuhan afo re meen bo reto mabo mam ati ro oom maah to ma.
MAR 13:20 Oon ro samyoh reto to, oos mawe Allah yatmof raa sok wAit. Feto to yawe yisusu oon reto mabuf baro. Soh mfe to, raa sait bo meen ye yhau fee. Soh mfe to, raa beta mhai.
MAR 13:21 Ati reto to, raa ro mawe besruf anu to, kbe frok mama. Taro mawe ana to Mesias, he mfe. Tna taro mawe ana to nabi ro Allah ybis mama mkyas bo wAit. He mfe ye. Meen ana mama tna sair bo ro hnah msya bo ro msai taro mawat. Ana mno bo ro msai re kbe besruf anu. Ana tomer besruf raa sok ro Allah wAit ye he mfe. Feto to, soh raa sait yawe bo kʼanu yawe, ‘Nmat, Mesias yama mam ati rno mno!’ Soh raa yawe feto, nri ait ma! Tna soh sait yawe, ‘Nmat, Mesias yama mam ati rau mau.’ Nri bokyas rait reto ma!
MAR 13:23 Feto kaket anu sai. Bo weto beta Jõ tawe kʼanu wia matim tna meen bo reto mabo.
MAR 13:24 Oon ro samyoh reto mkak wia, tna ayõ ro ja mafit to, me mamur. Tna snyi ro mboh to, me mboh u fee.
MAR 13:25 Kbe sken btek-tak mbam ayoh. Tna bombra ro mhau mam ayoh beta to, mrok mbrir-brar.
MAR 13:26 Jõ fi 'Ait ro Yroh Yama Yfi Raa Sai'. Ati reto to, raa mmat Jõ tbam ayoh mboh troh tama. Tama to, raa mmat tatak aJõ ro msai msya tase aJõ ye.
MAR 13:27 Jõ kbe tbis malaikat woJõ mama mtu raa sok woJõ mbam arin aso beta mama mo kʼJõ.
MAR 13:28 Tawe tkyas bofret sau kʼanu nri: Soh anu nmat ara mara sau, tna nmat ngkre ro sne-sne moof to, feto to anu nhar oh nwe kene wore snyi ro hwyõm oh meto. Nfot bofret refo maja rau:
MAR 13:29 Feto ye, soh anu nmat bo ro riwai tkyas weto mama to, anu nhar nwe oon ro Jõ tama u reto to, kene oh meto.
MAR 13:30 Nnaut: Ati ro bo weto beta mama to, tawe biin refo to, kbe raa taro mhau fares.
MAR 13:31 Ayoh msya tabam refo kbe saef marak. Menohe bokyas aJõ kbe meen mhau mawyõs mamo snok mam hame wajin.
MAR 13:32 Ayõ ro Jõ tama u to, raa sait bo yhar fee. Malaikat ana wase ye. Jõ, Ku ro Allah yare fi, wase ye. Taja yesait aran yhar bo rAit.
MAR 13:33 Anu wase ayõ reto ye. Feto to siwyan anu kaket yoyo sai.
MAR 13:34 Jõ tkyas bofret kʼanu u: Bi sait sikba amah rait yamoʼt rabin ro fari. Ait ybis sryan wait kmot amah rait wea. Tna ybis bo ro ana kbe mno to kʼana sait-sait hayah ye. Tna ybis sryan sait yros mam ati ro masa. Hre byõ abyõ.
MAR 13:35 Tawe kʼanu tawe, ‘Hre byõ abyõ ye. Anu wase ayõ ro bi retait hah yamaʼt amah rait ye: Kbe yama hreha, arin masuf, fe yama rabu momo a? Anu wase ye.
MAR 13:36 Kaket anu! Meen Tuhan yama tubor. Nno be kbe Ait ymat bo anu njin fares!’
MAR 13:37 Bo ro Jõ tawe kʼanu wefo fo, kbe Jõ tawe kʼraa beta afo re ana siwyan wea ye.”
MAR 14:1 Ti ewok naut tna raa ro Yahudi makyõ korat ro Paskah. Tna kbe ana makyõ korat 'Roti ro Ragi Marak' to ye. Imam manes wana msya guru agama wana to, ana saim wai mawe mamo mfot Yesus tna mame Ait yajat.
MAR 14:2 Menohe ana mawe kʼanya mawe, “Bo reto anu bno mam ati ro korat Paskah refo ma, be kbe bo reto mno raa makin mafa.”
MAR 14:3 Ati sau to, Yesus hre yait boit mam amah ro Simon mam remo ro Betania. (Bi Simon tait, tiwya yafa kusta.) Yesus hre yait bo kri-kri fo, tna fai sau twok mama. Mama mbo minyak wangi kusia sau. Minyak wangi to mabyoh maut toni. Au mama mihabah kusia reto tna mtu abyõ mam Yesus yana.
MAR 14:4 Raa taro hre mam weto ye. Ana baro mmat feto, tibyo mrok kmo mawe kʼanya mawe, “Au mno bawya meto ee? Fyi re minyak reto sikowah sai a?
MAR 14:5 Rau ro moof to, au masim kʼraa tna moo mabyoh rau 300 dinar. Tna mabyoh ro mase reto kbe raa msan kʼraa kinyah ro mse bo fee.” Tna ana bhah fai au reto wa.
MAR 14:6 Menohe Yesus yawe, “Bhah au ma! Nno wa au to ma. Fai au mno bo ro moof kʼJõ.
MAR 14:7 Raa kinyah to, ja mhau su msya anu yoyo. Meen ti tija sai to, nno bo moof kʼana. Menohe Jõ fo, kbe thau tsya anu yoyo fee.
MAR 14:8 Fai au mtu minyakwangi kʼJõ tetsu refo fo, siwyan hai aJõ wia oh meto. Kebet baro naut kbe raa mame Jõ tajat tna sama hai aJõ to. Au mno bo ro moof kʼJõ oh meto.
MAR 14:9 Nri kaket wia: Bokyas Moof ro mbam kʼAllah to, meen raa wosa mamo snok mam arin aso beta. Woyõ-woya raa mkyas to, bo ro fai au reto mno fo, kbe raa mnaut tna mkyas ye.”
MAR 14:10 Tna Yudas Iskariot yasen yamo yo kʼimam manes ro Yahudi. Yudas tait, kuber ro Yesus wAit mabo 12 weto sait ye. Yamo saso iso ro kbe ait ysan Yesus kʼana.
MAR 14:11 Yudas yama yo kʼana to, ana weto nksoh toni. Tna ana mawe kʼYudas mawe kbe maren pitis kʼait. Tibyo ait yasen yamo. Tna ywof ati ro moof re kbe besruf Yesus.
MAR 14:12 Ti ro tinyi korat Roti ro Ragi Marak to, ja raa ktan domba sau, ro kbe mabo mam bokyõ ro Paskah. Ti reto kuber ro Yesus wAit mama mtu bo kʼAit mawe, “Nyõ ksoh nawe amu siwyan bo sohmaam mam woyõ?”
MAR 14:13 Tna Yesus ybis raa mabo ewok mbam kʼana weto yawe, “Nmoʼt kota. Tna kbe anu fri raa sme ro yasom baah mkah aya sait. Kro ait nmoʼt
MAR 14:14 amah ro ait twok to. Tna nmo ntu kʼbi ro amah rait retait nwe, ‘Guru ranu ytu bo yawe, “Yuk ro kuber woJõ msya Jõ kbe nkyõ bokyõ ro Paskah mam woyõ?”’
MAR 14:15 Kbe ait yerif amah hawar ro uu sau kʼanu. Amah hawar reto mase. Tna ambar bo mhau wea oh. Siwyan bombra mam beto.”
MAR 14:16 Tna ana masen mamo. Ana mmat he bo beta huwya mfi bo bawya ro Yesus riwai yawe kʼana. Tna ana siwyan bo sohmaam mkah makyõ bokyõ ro Paskah reto.
MAR 14:17 Tna mti reto Yesus ysya kuber wAit beta mamoʼt amah reto.
MAR 14:18 Ana hre sohmaam bo tna Yesus yawe, “Anu wore hre niit bo su nsya Jõ wefo fo, sait kbe hren ksuk yno bo ro mkair mai kʼJõ.”
MAR 14:19 Kuber ro Yesus wAit mari bo ro Ait yawe reto, tibyo ana mrok sraujin tna ana wefo sait saak-saak Ait wa mawe, “Guru; jõ fee!”
MAR 14:20 Yesus yawe kʼana yawe, “Anu nbo 12 ro niit boit nsya Jõ su fo, sait hren ksuk kʼJõ.
MAR 14:21 Jõ fi 'Ait ro Yroh Yama Yfi Raa Sai'. Kbe raa mame Jõ tajat tu oh. Mame Jõ to, mnan si mkah Watum ro Allah tiwya mawe wia yum oh. Menohe ait ro hren ksuk kʼJõ to, meen safo maboh mai kʼait ye tu oh. Ro moof to, tiwya yme mabe ait fee sai.”
MAR 14:22 Ana sohmaam bo kri-kri fo, Yesus yoo roti sau. Yoo tna skabuk yayoh asik mase kʼAllah. Tna Ait haber roti reto yee kʼana beta mait. Tna yawe, “Nmat roti refo. Tetsu aJõ oh mefo. Noo oh.”
MAR 14:23 Tna Ait yoo hawereh sau. Yoo tna skabuk yayoh asik mase kʼAllah. Tna yee kʼana beta mata.
MAR 14:24 Tna yawe, “Anggur maya refo to, mees aJõ ro kbe miyi mkah riof kʼraa mawat. Kbe raa mame Jõ tna Allah ysair bosi ro tna kʼanu oh meto.
MAR 14:25 Jõ tawe kʼanu tawe, Jõ kbe tata anggur maya mam tabam refo u fee. Thau meen snok mam wore wo Allah yamo Raja ybo raa wait. Wore weto kbe Jõ tata anggur maya ro tna.”
MAR 14:26 Ana mji howes mkak tna masen mamoʼt Faut ro Zaitun.
MAR 14:27 Tna Yesus yawe kʼana yawe, “Anu beta kbe nsen nsam sikba Jõ nmo. Watum ro Allah mkyas feto mawe: ‘Jõ kbe tame raa ro kmot domba sait, tibyo domba wAit to, masen msam brir-brar mamo ye.’
MAR 14:28 Menohe kbe Taja yno Jõ trok tasen. Tna kbe Jõ tatim ste anu wea mam provinsi ro Galilea.”
MAR 14:29 Menohe Petrus yawe, “Mfe; ana taro saah to, kbe masen msam sikba Nyõ to. Menohe Jõ kbe tasen tsam sikba Nyõ bo fee yum.”
MAR 14:30 Tna Yesus yawe, “Petrus, nari: Mti refo to, kook mara muhrin ewok fefares to, kbe nyõ nwaar Jõ wia muhrin tuuf oh, nawe nyõ wase Jõ.”
MAR 14:31 Menohe Petrus yatak yawe u yawe, “Fyi-fya sai, Jõ kbe twaar Nyõ fee! Raa mawe mame jõ tsya Nyõ bjat su to mi bewok bjat rof!” Tna kuber wAit taro mawe feto beta ye.
MAR 14:32 Yesus ysya kuber wAit masen mamoʼt yuk sau ro masom Getsemani. Tna Yesus yawe kʼana yawe, “Hre ste Jõ wea wefo tna Jõ tamo skabuk wia.”
MAR 14:33 Tna Ait yawe Petrus, Yakobus ysya Yohanes mama nkro Ait mamo. Ait ynaut yyi tna srau mham toni.
MAR 14:34 Ait yawe, “Jõ sraujin toni mfi bo tawe thai sai oh! Nhau mam befo tna siwyan kaket ye.”
MAR 14:35 Yesus serar yamo baro naut, tna yabum skabuk. Yhar yawe ayõ ro mkair toni mama. Ait yawe yayoh Yaja re Ait tru bo ro kbe mama mai kʼAit to fee.
MAR 14:36 Ait yawe, “Abba, Taja: Jõ thar tawe Nyõ ntai natak nno bombra beta. Feto Jõ ksoh Nyõ tubat bo ro samyoh tna nno wa re kbe bo weto mai kʼJõ ma. Menohe Jõ ksoh tno bo ro Nyõ nawe sai.”
MAR 14:37 Yesus skabuk mkak tna hah ye yamo ymat he kuber wAit mabo tuuf weto mjin tu. Ait yti ana ytu Petrus yawe, “Simon, nyõ njin tu sai a? Nyõ bito hre nwan nsya Jõ ayõ sau sai fee!
MAR 14:38 Hre nwan tna skabuk re kbe bo ro tabam refo tko anu nno iro to ma. Anu nwe nno bo ro moof. Menohe anu netsu to matak fee.”
MAR 14:39 Tna Yesus hah ye yamo skabuk mun sau naut yayoh bo ro riwai Ait yayoh weto u.
MAR 14:40 Ait skabuk mkak tna hah ye yama yo kʼana mabo tuuf reto u. Tna ymat he ana mjin maka toni, tibyo mjin tu bana sai. Ait yti ana mrok masen. Tna ana hrenaut tibyo mnaut bo ro mawe si kʼAit aro fee ye.
MAR 14:41 Ait yamo skabuk muhrin ro tuuf naut. Tna hah ye yama u yawe, “Anu njin fares a? Nsen oh! Jõ fi 'Ait ro Yroh Yama Yfi Raa Sai'. Ayõ ro raa sait yama besruf Jõ fo, kene oh. Kbe ait besruf Jõ tna yoo Jõ ysan kʼraa ro ja mno iro mfot.
MAR 14:42 Nsen nma bmo oh! Ait ro besruf Jõ yama oh mefi!”
MAR 14:43 Yesus yros ykyas bo refo tna Yudas frok yama. Yudas ybam kuber wAit mabo 12. Ait yama yatim tna raa sbe mawat nkro ait mama ye. Ana masom pedang wana msya hbat. Riwai raa manes ro agama Yahudi mbis ana msya imam manes, guru agama, msya raa mabi wana mamo mfot Yesus.
MAR 14:44 (Yudas ro besruf Yesus fi, riwai yawe yerif Yesus kʼana yawe, “Kbe Jõ tamo hana raa sait to. Ait oh metait. Nfot Ait tna nbo Ait kaket tna nkah nmo.”)
MAR 14:45 Feto tna mkah tetara Yudas yamo yo kʼYesus tna yawe, “Bi Guru; meen oh kʼNyõ!” Tna ait hana Yesus.
MAR 14:46 Tna raa ro kro Yudas mfot Yesus.
MAR 14:47 Kuber rAit sait ymat feto tibyo yayõ pedang rait. Yayõ tna ysot sryan ro imam yase rait yimara nktos.
MAR 14:48 Tna Yesus yawe kʼana ro mama mfot Ait yawe, “Anu nbo pedang msya hbat nma nfot Jõ mfi bo Jõ raa ro tsyõf bo sai a?
MAR 14:49 Rabu wawa Jõ betoo Watum ro Allah kʼanu mam Samu rAit to. Menohe anu nfot Jõ mam beto fee. Bris oh bo ro anu nno refo mabo oh mnan Bokom ro Allah oh.”
MAR 14:50 Tna kuber ro Yesus wAit masen msam brir-brar beta sikba Ait akus.
MAR 14:51 Ati reto mere sait ro yyan hawee ftah sai wamu ait wa to kro Yesus ye. Raa mawe mfot ait ye,
MAR 14:52 menohe mfe; raa mbo sre hawee ftah rait mhau akus kʼana matem tibyo ait ysam sro raa yamo.
MAR 14:53 Raa mfot Yesus tna makah mamoʼt samu imam agama Yahudi ro yase rait to. Tna imam manes beta, msya raa mabi ro agama Yahudi, tna guru agama wana ye, hre siret mam beto.
MAR 14:54 Tna Petrus ybo rof-rof ana mtis. Ait yamo snok mam bohra ro imam yase. Tna ait fuu twok hre ye yni foos su ysya raa sbe ro ja kmot samu reto ye.
MAR 14:55 Tna mam samu mato to, imam manes msya raa manes ro ja mtu safo raa ro Yahudi to, hre mkyas bo. Ana makin beta to, mtu kʼanya mawe “Anu buun Yesus bwe Ait yno bo bawya afo kbe anu bme Ait yajat?” Menohe ana fri safo mana aro fee.
MAR 14:56 Raa mawat mkyas bo mbesus kʼYesus. Menohe ana sioh sai tibyo bo ro ana mkyas to hayah-hayah sai, mnan anya fee.
MAR 14:57 Tna raa mabo baro masen mros mkyas bo mbesus mai kʼYesus. Ana sioh mawe,
MAR 14:58 “Amu nri Ait yawe, ‘Samu ro Allah to, tiwya raa sgi mkah matak rana sai. Kbe Jõ tihabah Samu reto. Tna kbe Jõ sgi Samu ro tna sau mam ti trion tuuf sai. Samu ro Allah ro tna reto, raa sgi mkah matak rana fee.’”
MAR 14:59 Menohe bo ro ana mkyas sioh reto aro ykyas rait hayah-hayah sai.
MAR 14:60 Tna imam ro yase yasen yros sayõ raa weto. Tna ait ytu kʼYesus yawe, “Boun ro raa mawe maun Nyõ reto to, Nyõ nasen betoo fe mfe a?”
MAR 14:61 Yesus yari bokyas wana menohe Ait shait si bait sai. Imam ro yase retait ytu kʼYesus naut u yawe, “Nyõ fi Mesias, Ku ro Allah yare a?”
MAR 14:62 Yesus yawe si yawe, “Jõ oh mefi. Jõ fi 'Ait ro Yroh Yama Yfi Raa Sai'. Meen anu nmat Jõ hre tsya Allah ro yase. Kbe Jõ hre mam ati ro yatem ati; hroh ro mase toni reto. Tna kbe anu nmat Jõ troh tama abyõ mam ayoh mboh tama ye.”
MAR 14:63 Imam ro yase yari feto, tibyo kmo ybo ratan rait yesait yhah-hah. Tna yawe, “Anu besait bri oh. Ait yawe Ait Mesias! Ait yamus Allah oh meto! Kbe anu saso raa roto mama maun Ait mkah bawya! Tna anu nnaut nwe fyi? Kbe anu bno bo bawya mai kʼAit?” Menohe ana beta mawe, “Safo makan btek mai kʼAit oh. Raa mame yajat tu oh!”
MAR 14:65 Tna raa baro ntfeh oot kʼYesus. Ana moo hawe make Ait yasu tna mmuk Ait. Mmuk tna mawe, “Sgi nawe awya ymuk Nyõ metait?” Tna raa sbe mama makah Ait mamo mai ye.
MAR 14:66 Petrus yhau mam bohra reto tna sryan ro imam yase rait sau mama.
MAR 14:67 Au mama mmat Petrus bo hre yni foos mam tafoh. Au mmat kaket mhar Petrus yasu tna mtu kʼait mawe, “Nyõ ye oh ja nkro Yesus, raa ro Nasaret retait to a?”
MAR 14:68 Menohe Petrus ywaar yawe, “Jõ twase. Jõ thar bo ro nyõ nawe reto fee!” Tna ait yasen yamo yros mam ana mato. [Si fo kook mara.]
MAR 14:69 Sryan reto mmat Petrus yros mam weto tna mawe kʼraa ro mhau sor weto mawe, “Bi ait retait raa wana sait meit!”
MAR 14:70 Menohe Petrus ywaar naut u. Mhau baro tna raa ro mros weto sor mawe kʼPetrus mawe, “Nyõ fi raa ro Galilea ye; feto amu nhar nwe nyõ fi kuber wAit sait to! Ne nwaar ma!”
MAR 14:71 Tna Petrus ywaar matak tna yto bo yawe, “Ayoh mjah wa, jõ twase Raa ro anu nwe retait ye!”
MAR 14:72 Mam weto si fo kook mara muhrin ro ewok. Petrus yari feto tna ynaut bo ro riwai Yesus yawe kʼait yawe, “Kbe kook mara muhrin ro ewok to, nyõ nwaar Jõ muhrin tuuf oh.” Tibyo Petrus yawia sut-sut.
MAR 15:1 Rabu momo to, raa ro ja mtu safo kʼraa ro Yahudi to, hre mkyas bo reto fares: Imam manes wana, raa mabi wana msya guru agama wana ye. Ana saim mawe kbe ana mame Yesus yajat. Ana make Yesus yatem tna makah mamo msan kʼgubernur rabin reto ro ja mtu safo. Ait yasom Pilatus.
MAR 15:2 Pilatus ytu kʼYesus yawe, “Nyõ fi Raja raa ro Yahudi a?” Tna Yesus yawe, “Au oh nyõ nawe meto!”
MAR 15:3 Imam manes mbra mkyas bo mawat taro mbesus mai kʼYesus.
MAR 15:4 Tibyo Pilatus ytu kʼYesus u yawe, “Nari a? Raa mkyas bo mawat mbesus mai kʼNyõ. Nyõ nnaut fyi re hawe nkyas bo si kʼana fee?”
MAR 15:5 Menohe Yesus yawe bo aro si ye fee. Tibyo Pilatus yrok ktak bait sai.
MAR 15:6 Ti reto raa ro Yahudi makyõ korat ro Paskah.Tahun aro rau-rau wore wo ana makyõ korat reto to, ja ana baro mamo mo kʼPilatus mayoh kʼait mawe ait tufrok raa ro ana mawe sait ybam bui.
MAR 15:7 (Ati reto to raa sait ro yasom Barabas yhau mam bui. Ait ysya yafoh wait to raa ro marmtuk. Ana weto hawe raja rabin ro Roma mbo ana raa ro Yahudi. Tiwya ana mno raa mrok kmo tna mnin-nin. Tna mame raa majat. Feto tna raa mfot ait mbu mam bui.)
MAR 15:8 Raa mawat siret su tna mayoh Pilatus re kbe ait tufrok raa sait ybam bui mfi ja yno soo to.
MAR 15:9 Pilatus yhar yawe imam manes weto mhaf kair Yesus. Feto tna ait yawe, “Fyi; anu ksoh jõ tufrok Raja raa ro Yahudi yamo bait fe mfe a?”
MAR 15:11 Menohe imam manes wefo mkyas bo wai wia kʼraa makin wefo sor mawe, “Nkyas kʼPilatus nwe amu ksoh bo kbe ait tufrok Barabas.” Feto to raa makin mawe si mawe, “Tufrok Barabas, Yesus ma!”
MAR 15:12 Menohe Pilatus ye ytu kʼraa mawat wefo u yawe, “Feto kbe jõ tno bawya mai kʼAit ro anu ntu nwe ‘Raja raa ro Yahudi’ retait?”
MAR 15:13 Ana masen mtu mawe, “Name Ait yajat mam ara warok!”
MAR 15:14 Menohe Pilatus yawe, “Ait yber safo tna yiwana watum rabin ro Roma to miyo?” Menohe ana mari bo ro Pilatus yawe feto fee. Ana masen mtu mkah mai ro mase mawe, “Name Ait yajat! Name Ait yajat oh!”
MAR 15:15 Pilatus beroh yari bo ro raa weto mawe sai afo re kbe ana ksoh ait. Tibyo ait tufrok Barabas yamo yo kʼana. Tna Pilatus ybis raa moo too mmok Yesus tna msan Ait kʼraa mame yajat mam ara warok.
MAR 15:16 Raa ro sbe mbo Yesus mamo ntruk amah ro gubernur Pilatus, makah mamoʼt amah hawar ro ja raa mtu safo. Tna ana mtu raa ro sbe majin beta mama siret wo sau mam weto ye.
MAR 15:17 Tna ana moo ratan ro mkek mfi ja raja yyum sau mse kʼYesus yyum. Tna fo ana mse watau kʼAit yana sbyõ ye. (Watau reto mfi watau ro ja raja sbyõ abyõ mam yana, menohe ana mfen watau Yesus rAit mbam abumun. Mno feto mkah bo nsie Ait.)
MAR 15:18 Ana mno bo weto mkak tna ana sioh mbaut Yesus. Ana sret Ait masah mawe, “Meen oh kʼNyõ Raja ro Yahudi fi!”
MAR 15:19 Ana moo ara nkrem mai Yesus yana, tfeh oot kʼAit tna maka bibi Ait mati sai ye.
MAR 15:20 Ana sret Ait masah, tna ana mrus ratan ro mkek riwai mse kʼAit yyum. Tna me moo ratan wAit mse yyum u. Tna fo ana makah Ait mamo mkah bo mame mam ara warok.
MAR 15:21 Raa makah Yesus mamo mam iso ro frok kota ro Yerusalem. Ana mbam kota frok mamo to, tna ana fri raa sait ybam safom yama. Ait raa ro srim, ybam kota ro Kirene. Yasom Simon. (Aleksander ysya Rufus maja rana.) Ait yawe yiwrek menohe raa sbe mfot ait, mkuk ait mbis yasom ara warok ro Yesus.
MAR 15:22 Yesus raa makah mamoʼt faut sau ro masom 'Yuk ro Hamana'. Mkah mai rana to, raa mawe 'Golgota'.
MAR 15:23 Tna ana moo anggur maya srioh mkah obat mur mee kʼYesus yata. Menohe Ait hawe bo yata.
MAR 15:24 Raa sbe mse Yesus mam ara warok. Tna ana moo undi tane re kbe mhar awya ro yoo ratan ro Yesus rAit. Tna saim kʼanya.
MAR 15:25 Yesus raa make mam ara warok rabu ayõ ro krenjiit.
MAR 15:26 Riwai raa mkom bokom sau mkyas bo ro Yesus yno re mno raa mame Ait. Raa mkom tna mse mam ara warok reto abyõ. Bokom reto mkom mawe: “Raa refi raja raa ro Yahudi.”
MAR 15:27 Ara warok reto ati jaro-jaro raa mame raa ro ja msyõf bo mabo ewok msya Yesus ye. Ait sait raa mse mam ati ro Yesus yatem ati tna sait mam ati ro yatem ta ye. [
MAR 15:28 Ait raa sikowah feto mnan bokom ro Allah tiwya nabi Yesaya ykom yawe, “Raa mnaut mawe Ait raa ro yber safo ye.”]
MAR 15:29 Raa ro mamo frit iti sor mam weto to, mmat Yesus raa mame mam ara warok. Tna ana mana mnah sai mamus Ait ye mawe, “Ti taa, Nyõ nawe nyõ natak nitrah Samu ro Allah tna sgi u mam ti ro tuuf sai no!
MAR 15:30 Sik ma nroh nbam ara warok reto tna nno riof kʼNyõ nesait!”
MAR 15:31 Feto ye imam manes ro agama Yahudi msya guru agama wana to, ana sret Ait masah mawe kʼanya mawe, “Ait yatak yno riof kʼraa roto sai. Menohe Ait ytai yno riof kʼAit yesait fee!”
MAR 15:32 Tna mawe kʼYesus mawe, “Soh Nyõ fi Mesias,Raja raa ro Israel meto mi, sik ma nroh nbam ara warok reto. Nroh nbam ara warok afo re amu nmat. Tna kbe amu smot Nyõ!” Raa ro ja msyõf bo mabo ewok ro raa mame su msya Ait to, ana mamus Ait ye.
MAR 15:33 Baas ayõ ro 12 to, arin mrok mamur betru rabin reto beta, mamo snok ayõ ro tuuf.
MAR 15:34 Ayõ ro tuuf bo feto, Yesus ytu mkah mai ro fari yawe, “Eloi, Eloi; lama sabakhtani?” Mazmur 22:2 (Mai reto mawe, “Allah aJõ, Allah aJõ; fyi re Nyõ sikba Jõ toni fefo fo?”)
MAR 15:35 Ana makin ro mros weto to, baro mawe kʼanya mawe, “Sik nri, Ait ytu Elia!”
MAR 15:36 Tna ana sait yamo fooh yoo bo mabat ro aya msuf sau, beru mam anggur maya ro mano. Ait yoo tmi mam ara maku makit tna yyum maut yse kʼYesus yata. Tna ait yawe, “Anu bhau bmat kbe Elia yama smyoh Ait yroh ybam ara warok abyõ fe mfe a.”
MAR 15:37 Yesus ysiah ymai fari, tna fo yrok yajat.
MAR 15:38 (Yesus yhai si fo tirai ro raa hero mam Samu ro Allah mburut wa yuk ro mbau to, Allah yhah susai ftah ewok maban uu mamo snok mam te.)
MAR 15:39 Raa sbe yase ro yros kene mam ara warok weto ymat Yesus bo yhai tna yrok yawe, “Mabo oh, Ait refi fi Allah yare!”
MAR 15:40 Fnya baro mros fari mmat bo weto ye. Maria Magdalena, msya Maria ro Yoses ysya yao Yakobus ana mme (Yakobus retait, ait ro yaku), tna msya Salome mros su msya fnya weto sor ye.
MAR 15:41 Fnya weto beta tiwya kro Yesus mam provinsi ro Galilea. Tna fnya roto taro mamoʼt Yerusalem msya Yesus ye.
MAR 15:42 Hreha ayõ ro jiit bo feto tna Yusuf yamo yo kʼPilatus. Yusuf tait raa ro Arimatea. Ait yamo raa manes ro ytu safo raa ro Yahudi sait. Ait raa ro waa Allah. Tna ait ja ste oon ro Allah yamo Raja ybo raa mana rAit. Yusuf yamo yo kʼPilatus mam ayõ ro Jumat. (Feto to raa ro Yahudi siwyan bo wana ti sau wia mkah kbe ayõ ro raa tmoh to.) Kene wo ayõ mbtek to, Yusuf yamo fooh yo kʼPilatus. Ait waa fee. Yayoh yawe Pilatus ybis ait yesait yoo ajat ro Yesus tna sama.
MAR 15:44 Yusuf yawe kʼPilatus yawe, “Yesus yajat oh.” Tibyo Pilatus yrok ktak yawe, “Yesus yhai fooh sai a?” Tna ait ytu raa sbe ro yabi yama tna ytu kʼait yawe, “Fyi, Yesus yajat oh a?”
MAR 15:45 Raa ro sbe refi yawe, “Ae, yajat oh.” Tibyo Pilatus ybis yawe Yusuf yoo ajat ro Yesus tna sama.
MAR 15:46 Yusuf yasen yamo yoo hawee ro fyan-fyan sne moof sau. Tna yamo smyoh ajat ro Yesus mbam ara warok. Ait yoo hawee reto sro ajat rAit wa yakah yamo yse mam isra rait. Isra reto tiwya raa mabah mam atu mtkah. Ajat ro Yesus raa moo mse mam isra mato tna bririk fraa maboh sau mburut isra mato wa.
MAR 15:47 Maria Magdalena msya Maria ro Yoses yme ana mamo mmat yuk ro raa mse ajat ro Yesus.
MAR 16:1 Hari Sabtu ayõ ntwok. Ati reto ayõ ro raa agama Yahudi ja ntmoh to, mkak oh. Feto tna Maria Magdalena, Maria ro Yakobus yme msya Salome masen mamo moo minyak ro sawer msya bombra taro ye. Ana mawe menrabu ana mamoʼt isra ro Yesus raa mse. Tna ayõ ro minggu rabu momo isi ntara to, ana mrok masen mbo bombra ro sawer wefo sor mamoʼt isra. Ana mawe ngkaru ajat ro Yesus mkah bombra wefo mamyot bo raa ro Ibrani ja mno.
MAR 16:3 Mam iso iti ana mtu kʼanya mawe, “Kbe awya serar fraa ro mhau wa isra mato reto re anu twok to?”
MAR 16:4 Ana mamo baro kait tna mmat he fraa maboh reto raa serar mhau mne oh.
MAR 16:5 Ana twok mamoʼt isra reto mmat he mere sait ro yyum ratan ro mboh moof toni hre wea mam ati ro tem ati. Ana mmat feto tibyo mrok waa.
MAR 16:6 Ait retait yawe, “Waa ma. Anu saso Yesus, Raa ro Nasaret, ro taa raa mame yajat. Ait yrok yasen oh! Ait aro yhau mam wefo fee. Nma nmat yuk wore taa Ait raa mse oh mefo.
MAR 16:7 Hah ne nmo nwe kuber wAit msya Petrus ye nwe, ‘Yesus yrok yasen yatim ste anu wea mam provinsi ro Galilea. Nmoʼt Galilea tna kbe anu nmat Ait mam weto mfi tiwya Ait yawe kʼanu to.’”
MAR 16:8 Ana mabo tuuf mari bo reto mrok mamboi tna frok msam mamo sikba isra reto. Ana waa tna mhoh hah me to, mkyas bo reto kʼraa fee ye. [
MAR 16:9 Rabu momo ayõ ro minggu reto Yesus yrok yasen oh. Tna tinyi rau to yerif Ait wia kʼMaria Magdalena. (Tiwya Yesus yikyak kabes mabo krema frok mbam fai au.)
MAR 16:10 Ati reto kuber ro Yesus wAit ana hre mawia sor fo. Tna Maria Magdalena mama mawe kʼana mawe, “Nwia ma! Jõ tmat Yesus yrok yasen oh!”
MAR 16:11 Menohe raa weto mtu sioh kʼau sai, mawe bo ro au mawe reto mabo fee.
MAR 16:12 Tna Yesus yerif Ait ye mkah yetsu roto baro kuber wAit mabo ewok ro mamo iso nkri-kri mbam Yerusalem mamoʼt rabin roto.
MAR 16:13 Ana mbewok hah me mamo mkyas bo ro riwai reto kuber wAit taro. Menohe ana mtu sioh sai kʼana mbewok ye mawe bo reto mabo fee ye.
MAR 16:14 Ti baro firwas tna kuber ro Yesus wAit mabo 11 hre mait bo nkri-kri. Tna Yesus frok tubor. Ait bhah ana yawe, “Fyi re bosmot wanu matak fefares to? Raa mmat Jõ tna mama mkyas kʼanu oh, menohe anu nri fee. Anu nna mase sai ntu sioh kʼana to.”
MAR 16:15 “Nsen nmoʼt arin aso beta tna wosa Bokyas Moof ro Allah (Injil) kʼraa beta.
MAR 16:16 Raa ro smot Jõ to, tna mawe raa baptis ana to, ana weto meen mkai riof ro mase. Menohe raa ro smot Jõ fee, meen Allah yno safo mana ymit kʼraa weto beta.
MAR 16:17 Raa ro smot Jõ to, kbe ana mno bo msai sor afo re raa mmat tna mhar Jõ tatak aJõ: Ana weto kbe mikyak kabes frok mkah tak ro Jõ tasom aJõ. Tna ana kbe mkyas mkah mai roto ro ana wase fares ye.
MAR 16:18 Soh ana mbo aban to, tna aban mafit ana matem to, kbe ana majat fee. Soh raa mse bombau re swa ana to, kbe ana majat fee ye. Soh ana skabuk tna matem mtor raa ro kiyam to, kbe kiyam rait marak ye.”
MAR 16:19 Yesus ykyas bo kʼana mkak, tna Allah tubat Ait yaut yamoʼt sawro rAit. Tna Ait hre su ysya bi Allah mam ati ro yatem ati; hroh ro mase reto.
MAR 16:20 Tna kuber ro Yesus wAit masen mamo mkyas Watum ro Allah mam woyõ-woya sai. Tna Allah yatam ana. Tna yoo yatak rAit yee; tibyo ana mno bo ro msai mawat. Feto to raa mhar mawe watum ro ana mkyas to mbam kʼAllah.]
LUK 1:1 Teofilus ro yoof, Raa mawat mkom bombra beta ro Yesus yno mam rabin ranu refo.
LUK 1:2 Bo ro Yesus yno weto, raa taro mmat mkah masu wana. Amu taro nesait nmat Ait fee, menohe amu nri bokyas rana ro tinyi weto. Tna amu nkyas bokyas reto renti. Tna raa mkom bo ro ana mari mbam kʼanu weto.
LUK 1:3 Jõ ttu sas bo weto beta maban tinyi rau. Feto to tawe tesait tkom bo ro Yesus yno weto. Tkom kaket
LUK 1:4 afo re nyõ nhaf smot bo ro nyõ nari weto to, nhar nawe bo mabo.
LUK 1:5 Tiwya tinyi bi sait yasom Zakharia yamo imamagama ro Yahudi. Hohos rait tiwya mamo imam ye. Ana mbam imam mkbair ro masom Abia. Ait yfain to, masom Elisabet. Tna hohos wau to, tiwya mamo imam ye. (Ati ro ana mbewok mhau to, Herodes yamo raja mam provinsi ro Yudea.)
LUK 1:6 Allah ymat ana mbewok yawe ana mbewok to, raa ro mhaf moof. Mbewok mari tna mbo mno bo beta ro Allah ybis kʼraa wAit to beta. Bo ro raa mkyas mai kʼana aro fee.
LUK 1:7 Elisabet siban tibyo ana mbewok mabe ku aro fee. Tna bewok mabi ye oh.
LUK 1:8 Hari minggu sau fo, mabu rau snok oh, tna Zakharia ysya imam ro mbair wait to, mkah bo ro Allah rAit. Tibyo yamoʼt Samu ro Allah mam Yerusalem.
LUK 1:9 Bo sau ro ana mno to, ana moo bo msan kʼAllah. Reto oh mi ana mko bo ro mfi aku. Mko bo reto tna wasi rau to, sawer moof. Ja imam sait aran sai twok mam yuk ro mbau reto mato tna yko bo reto. Ati reto to, imam weto hre tane bo, mfi bo ja ana mno soo. Feto ana msok imam awya ro kbe twok mam yuk ro mbau reto mato. Ana hre tane he maut Zakharia.
LUK 1:10 Ayõ ro imam yko bo ro sawer reto mama to, raa makin mama mam Samu ro Allah tna skabuk. Raa beta siret skabuk mam yuk ro mbau reto mam mne wea.
LUK 1:11 Tna bi Zakharia yko bo sawer reto kri-kri mam amah mato. Tibyo malaikat ro Tuhan sau frok tubor. Mama mros tubor mros mam ati ro tem ati wohat ro mko bo sawer reto.
LUK 1:12 Ait ymat malaikat reto to, yhaf miyõ tna waa.
LUK 1:13 He malaikat reto mawe, “Waa ma! Tama tawe kʼnyõ tawe: Allah yari boyoh wonyõ oh. Tna nfain, Elisabet to, kbe mabe ku ro sme sait. Tna ku retait kbe nyõ nafan yasom Yohanes.
LUK 1:14 Kbe nyõ nawyan marak ku retait tna simaut toni. Nfain mabe ku tait, tibyo raa makin-akan yok-yok ye.
LUK 1:15 Kbe Allah ymat ait yawe ait raa ro yase. Tna kbe ait yata jyõ anggur fee. Yata jyõ roto aro fee ye. Tna kbe Har ro Tuhan matam ait, mhau mam yhaf rait maban mam ti ro yme mabe ait.
LUK 1:16 Tna bokyas rait kbe mno raa mhaf moof re kbe raa ro Israel msis haberek tna kro Tuhan.Tuhan fi Allah ro kbe ana smot.
LUK 1:17 Kbe Har ro Tuhan mjin mam Yohanes yhaf rait tna Har moo matak rAu mee kʼait. Mno mnan fi tiwya Har ro Tuhan reto mjin mam nabi Elia yhaf rait ye, tna moo matak rAu mee kʼnabi retait ye to. Meen Tuhan yama. Tna Yohanes kbe siwyan raa mhaf wana wia afo re kbe ana mari watum ro Tuhan. Bokyas rait mno re raa sme haberek me miranya msya kukek wana u. Tna raa ro srau mkair to, yno re ana ksoh mamo raa ro moof.”
LUK 1:18 Tna Zakharia fi yawe kʼmalaikat refo yawe, “Fyi re jõ thar tawe bo reto meen mabo tu oh? Jõ fi tabi oh tna tfain to mabi ye oh.”
LUK 1:19 Tna malaikat reto mawe kʼait mawe, “Jõ tasom Gabriel. Jõ thau tmat Allah. Tna bi Ait yesait ybis jõ tama tkyas bokyas ro moof refo kʼnyõ.
LUK 1:20 Menohe nyõ ntu sioh bo ro jõ tkyas reto. Feto tibyo kbe nmai marak tna nkyas bo fee mamo snok mam ati ro bo wefo mabo. Bo ro riwai tkyas to, meen snok mam makyon rau to.”
LUK 1:21 Malaikat reto mkyas bo msya Zakharia fares, tna raa ro mros mam mne to, sne ait kait. Ana miskawowo mawe fyi re ait yhau kait mam yuk ro mbau reto mato.
LUK 1:22 Tna ait frok yama to, ymai marak. Ytai ykyas bo kʼraa ro mros mwof ait wea mne to, fee. Ait yerif bo mkah yatem sai. Tibyo ana mhar mawe riwai ait ymat bo ro Tuhan yno aro.
LUK 1:23 Tna Zakharia yhau mam Yerusalem mamo snok ayõ rait ro yno bo ro riwai yno mam Samu ro Allah reto mkak. Tna fo ait yhah ye yamo bait.
LUK 1:24 Tna fo Zakharia yfain Elisabet fo, mrok mhaf. Tna au mhau mam amah rau mato snyi marak trion maat.
LUK 1:25 Tna au mnaut mawe, “Tuhan yatmof jõ: Tiwya jõ siban. Tna saban ye. Menohe Ait yno tibyo jõ trok thaf. Raa ro mkyas kair jõ to, kbe aro me mkyas-kas jõ u fee.”
LUK 1:26 Elisabet mhaf snyi trion ntamam oh. Tna Allah ybis malaikat ro masom Gabriel reto mamoʼt remo sau ro masom Nazaret, mam provinsi ro Galilea.
LUK 1:27 Ybis yawe mamo mo ku ro ano sau masom Maria. Au fo wase bo mjin msya raa sme fares. Tna raa sait yasom Yusuf yawe kbe yoo au. Ait retait kube ro raja Daud.
LUK 1:28 Malaikat refo twok mam samu ro Maria tna mawe, “Meen oh kʼnyõ. Tuhan yno bo moof toni kʼnyõ. Bi Ait yatam nyõ.”
LUK 1:29 Maria mari bokyas reto mrok mnaut bo reto myum-yam. Tna mnaut berun bau sai mawe, “Bo bawya oh mi malaikat reu mama tna mmah meen kʼjõ u?”
LUK 1:30 Tna malaikat refo mawe kʼMaria mawe, “Waa ma. Allah yno bo ro moof kʼnyõ.
LUK 1:31 Yawe nyõ kbe nhaf tna nabe Ku sme sait. Kbe nafan Ku Ait yasom Yesus.
LUK 1:32 Ku anyõ retait kbe yamo Raa ro yase. Meen raa mkyas Ait mawe Ait tait Ku ro Allah yare. Allah tait yase toni. Tuhan Allah kbe yno re meen Yesus yase ybo raa wAit yfi Raja. Kbe yase ybo raa wAit yfi hohos rAit raja Daud tii hre mam ambar tahta tna ybo raa wait mnan feto ye.
LUK 1:33 Yesus kbe yamo Raja ybo raa mana ro Yakub. Yamo Raja ybo raa wAit mamo snok mam hame wajin.”
LUK 1:34 Maria mawe kʼmalaikat refo mawe, “Bo refo kbe mabo fyi? Jõ fo tsya raa fefares.”
LUK 1:35 Malaikat refo mawe, “Har ro Tuhan msya tak rAu kbe mama mo kʼnyõ. Tna Allah yatak rAit kbe matam nyõ ye. Tibyo kbe nyõ nabe Ku sait. Ku retait Allah yse hayah mkah bo yno bo rAit. Tna kbe raa mawe Ait tait Ku ro Allah yare.
LUK 1:36 Tna raa mana wonyõ sau to, nyõ ntmo anyõ Elisabet au mabi oh tna au mhaf ye. Tiwya raa mawe au fo siban. Menohe au mfo mhaf snyi trion ntamam oh.
LUK 1:37 Allah ytai yno bo bawya sai. Bo ro samyoh aro mhau kʼAit fee.”
LUK 1:38 Tna Maria mawe, “Jõ fi sryan ro Tuhan oh. Bo ro Ait yawe yno kʼjõ reto to, yno rof oh fea!” Tna malaikat reto mamo sikba au mamo.
LUK 1:39 Tna fo Maria masen mamo fooh mo kʼntmo rau, Elisabet, mam remo rau. (Elisabet mhau mam atu far-far mam provinsi ro Yudea.) Maria ntwok mam remo reto tna mamoʼt samu ro Zakharia ysya yfain Elisabet. Tna au mmah meen kʼElisabet.
LUK 1:41 Ati ro Elisabet mari meen reto si fo, ku ro yhau kʼau mhaf yrok sio. Tna Har ro Tuhan msuf au.
LUK 1:42 Har ro Tuhan msuf au tibyo au mkyas fari mawe kʼMaria mawe, “Fnya to mawat, menohe Allah ysok nyõ tna yno bo ro moof kʼnyõ nesait aran miwer. Tna bi Ait yno bo ro moof ku ro yhau kʼnyõ nhaf retait ye!
LUK 1:43 Jõ fi awya oh mi Tuhan yme mama mmat jõ fo?
LUK 1:44 Jõ tari meen anyõ si fo, ku ro yhau mam thaf refi simaut tna yrok sio mam jõ thaf.
LUK 1:45 Tii nyõ smot Tuhan tna nawe bawya ro Ait ykyas reto to, kbe mabo. Ja nyõ nnaut maut-mroh fee. Tibyo Ait yno bo moof toni kʼnyõ re nyõ simaut toni.”
LUK 1:46 Tna Maria mawe, “Jõ tbaut Tuhan yase rait ro yno bo moof kʼjõ.
LUK 1:47 Allah oh mi Raa ro yoo riof mase yee kʼjõ tibyo jõ simaut!
LUK 1:48 Jõ fi raa kinyah sai. Menohe Ait ymat jõ. Jõ fi sryan rAit. Tna maban mam ati refo fo, kbe raa arin aso beta mawe Tuhan yno bo moof kʼjõ.
LUK 1:49 Allah tait Raa ro yatak. Yno bosair ro moof kʼjõ. Yasom rAit hayah. Raa roto mnan Ait fee.
LUK 1:50 Tna Allah yatmof raa beta ro waa Ait: Maban raa ro tinyi msya hohos wanu mamo snok ku renti ro meen anu bbe ye.
LUK 1:51 Bi Ait yatak tna yno bo mawat. Tna Ait sibrir-brar raa ro mnaut mawe ana weto raa ro mase.
LUK 1:52 Raa ro mase ja mbo raa ro kinyah. Menohe Allah soyak ana mroh mbam yuk rana ro hre. Tna Ait tubat raa kinyah ro ja mhar mawe ana to, raa kinyah sai, maut hre mam uu riryõn.
LUK 1:53 Ait ysan bo ro moof kʼraa kinyah ro haisre. Menohe raa ro bobot to, Allah yno ana haberek ybis mamo raa sai.
LUK 1:54 Ait yatmof anu, sryan wAit ro bno bo wAit. Yatmof anu raa ro Israel mnan fi tiwya Ait yawe. Ait sorni anu fee.
LUK 1:55 Tiwya Ait yawe yno bo moof kʼAbraham ysya ku renti wait mamo snok mam hame wajin. Ana to, hohos ranu oh meto.”
LUK 1:56 Maria mhau msya Elisabet mam amah rau snyi trion tuuf bo feto, tna mhah me mamoʼt remo rau.
LUK 1:57 Elisabet mhaf mase oh, ayõ rau ro mabe to kene oh. Tna au mabe ku sme sait.
LUK 1:58 Raa wana weto beta msya au mafoh na mari he Tuhan yatmof au toni. Tibyo ana beta msya au simaut.
LUK 1:59 Ku retait yhau masno ro krentuuf to, tna ana makah ait mamo mkom (sunat) tna mafan yasom. (Mno mnan fi bo mafa raa ro Yahudi ja mno.) Tna raa mama mmat Zakharia ysya Elisabet msya ku mees refi. Raa mawe mafan ku refi yasom Zakharia, kro som ro yaja.
LUK 1:60 Menohe yme mawe, “Mfe! Ait yasom rait Yohanes.”
LUK 1:61 Ana mawe, “Fyi? Raa wonyõ aro masom Yohanes fee!”
LUK 1:62 Tna ana mtu bo reto kʼZakharia. Ana merif bo mkah matem sai tna mtu mawe mafan ku retait yasom awya.
LUK 1:63 Zakharia yayoh bokom sau tna ykom yawe, “Ait yasom rait Yohanes.” Tibyo raa weto mrok ktak beta.
LUK 1:64 Ati reto fo Zakharia ymai snok u tna ait bibi Allah.
LUK 1:65 Tna ana mafoh na mrok waa. Tna raa ro mhau mam atu far-far ro Yudea to, beta mari bo reto.
LUK 1:66 Tna raa beta ro mari bo reto to, hre mnaut mawe, “Tuhan yatam ku retait to. Meen ku retait yasen yno bo bawya?”
LUK 1:67 Tna Har ro Tuhan msuf Yohanes yaja, Zakharia. Tibyo Zakharia ykyas bo ro mbam Allah. Ait yawe,
LUK 1:68 “Nma bbaut Tuhan. Ait yama ymat raa ro Israel. Ait yama yfes raa wAit. Ait tait Allah ro anu smot.
LUK 1:69 Ait ybis Raa sait yama yoo riof ro mase yee kʼanu. Ait tait kube ro raja Daud. Tiwya raja Daud yamo sryan ro Tuhan rAit ye.
LUK 1:70 Nabi ro Allah ybis mamo mkyas bo wAit to, tiwya tinyi ana makin mhaf sau mkyas mawe:
LUK 1:71 Raa taro mamo byoh kʼanu tna taro knait anu ye. Menohe Allah yatak re yno riof kʼanu.
LUK 1:72 Tiwya Ait ykyas Bosi rAit kʼhohos wanu to. Ait ynaut Bosi reto tibyo Ait yatmof ana.
LUK 1:73 Bosi ro Moof reto tiwya Ait ykyas kʼhohos ranu Abraham.
LUK 1:74 Allah yno riof kʼanu re kbe anu bno bo rAit to, waa fee. Raa ro mamo byoh kʼanu to, Ait yno re ana matak mno amu fee.
LUK 1:75 Anu boo anu bsan kʼAit re bno bo wAit sai. Tna bmo raa ro mhaf moof mamo snok mam hame wajin.”
LUK 1:76 Tna Zakharia watum ku rait Yohanes yawe, “Nyõ to, kbe natim siwyan iso mkah Tuhan ranu ro kbe yama. Allah ro yase hre abyõ ybo bombra beta tait, kbe ybis nyõ namo nkyas bo wAit. Tibyo kbe raa mtu nasom, ‘nabi ro bi Yase ybis’.
LUK 1:77 Kbe nyõ nerif bo kʼraa wAit re kbe ana mhar iso ro mamo re mkai riof ro mase. Tuhan yyon iro wana.
LUK 1:78 Allah tait yatmof raa. Tibyo ybis Mesias yama yno riof kʼanu. Ait retait kbe ybam Allah yama. Yama yfi ayõ ro ntara maut mam rabu momo.
LUK 1:79 Yama tna kek rAit mram raa ro wase Allah tna mhau mam amur hto. Yama yram raa ro waa bo mhai. Ait kbe sana anu bisoh iranya ranu bsya Tuhan.”
LUK 1:80 Tna Yohanes yabi. Tna bosmot rait matak. Ait yamo yhau mam yuk ro riamo sau mam Yudea. Yhau mamo snok mam ayõ rau ro ait snok. Tna fo ait yamo ykyas bo kʼraa ro Israel.
LUK 2:1 Wore wo tiwya Yohanes yme mabe to, Kaisar Agustus yamo raja ro yase. Ait yase ybo raja na sor mam rabin ro Roma beta. Tna ait ybis yawe raa beta ro mhau mam rabin weto sor to, mamo daftar masom wana. Daftar masom re kbe ana beta moo pitis mee namabyoh (pajak) wana kʼait.
LUK 2:2 (Ti reto to, Kirenius yamo Gubernur mam provinsi ro Siria. Tna ati reto to, ti tinyi rau ait yno daftar feto mam rabin rait.)
LUK 2:3 Yno daftar reto, ybis raa beta ro mhau mam rabin rait reto hah mamoʼt remo wana ha-hayah tna mkom masom.
LUK 2:4 Tna bi sait yasom Yusuf yhau mam remo ro Nazaret mam provinsi ro Galilea. Raja Daud tait hohos rait sait. Yusuf yari bobis reto tibyo yasen sikba Nazaret yawe yaut yamoʼt remo ro Betlehem mam provinsi ro Yudea. (Remo reto tiwya tinyi raja Daud yhau. Tibyo raa mkyas mawe remo reto to, “Remo ro Daud Yhau.”)
LUK 2:5 Tna Yusuf yasen yamo ysya fnya rait ro meen yoo. Yawe mamo daftar masom wana. Au masom Maria. Au fo mhaf.
LUK 2:6 Ana mbewok mamo, mamo, snok mam Betlehem. Tna Maria kborham.
LUK 2:7 Kbor ham tna mabe ku bum ro sme sait. Tna au moo hawe tna sro Ku retait. Yuk ro moof wore ana mjin to marak. Feto to ana mhau mam sbyah ro domba. Tna Maria moo ku rau mirya Ait yjin mam ambar sau; mam ambar ro ja raa mse bosafom re domba mabat.
LUK 2:8 Mti reto to, raa baro mhau mam smok kene wo Betlehem. Ana hre mwan tok tna kmot domba wana.
LUK 2:9 Tna malaikat ro Tuhan sau frok tubor kʼana susai. Tna ana mmat Tuhan yase rAit ro skentrat. Tibyo ana mrok waa toni.
LUK 2:10 Menohe malaikat reto mawe kʼana mawe, “Waa ma. Jõ tama tkyas bokyas ro moof. Tna raa beta ro mari bokyas refo kbe simaut mase:
LUK 2:11 Tawe, ‘Riwai fo, fnya mabe Ku sait mam Betlehem, remo ro raja Daud. Meen Ait sotak iro wanu tna yoo riof ro mase yee kʼanu to. Ait tait Kristus tna yamo Tuhan. Feto to, kbe raa simaut mase.’
LUK 2:12 Kbe anu nhar ku mees retait fefo: Saso ku sait ro yjin mam ambar sau; yuk ro ja raa mse bosafom re domba mabat. Yme sro Ait mkah hawe tna mirya ait yjin mam beto.”
LUK 2:13 Tna malaikat mawat taro naut mbam sawro ro Allah mama frok tubor ye. Ana bibi Allah mawe,
LUK 2:14 “Amu nbaut Allah ro yase toni; Allah ro yhau mam sawro rAit! Tna raa ro tabam refo to, ana ro Ait yhaf mnan to, kbe bi Ait yisoh iranya ro raa weto to, msya anya.”
LUK 2:15 Malaikat weto sikba ana hah mamoʼt sawro ro Allah. Tna raa weto masen mawe kʼanya mawe, “Nma bmoʼt Betlehem re bmat bo mase ro Tuhan ybis malaikat mama mawe kʼanu reu!”
LUK 2:16 Ana masen fooh mamoʼt remo reto mawe saso ku mees retait. Tna fri Maria, Yusuf msya Ku mees retait ro yjin mam ambar sau; yuk ro ja raa mse bosafom re domba mabat.
LUK 2:17 Mama mmat Ku retait. Tna ana masen mamo mkyas bo weto kʼraa: Mkyas bo ro riwai malaikat reto mkyas Ku mees retait.
LUK 2:18 Tna raa beta ro mari bo ro raa wefo mkyas to, mrok ktak.
LUK 2:19 Menohe Maria mari bokyas wana weto tna kbo srau tna mnaut berun sai mam mhaf mato.
LUK 2:20 Tna raa ro ja kmot domba weto hah me mamoʼt smok riwai to. Mamo tna mbaut Allah: Bo ro riwai ana mmat reto to, mabo mnan bo ro malaikat mawe kʼana. Tibyo ana bibi Allah.
LUK 2:21 Yasno ro krentuuf tna Ku retait raa mkom (sunat). Tna ana mafan ait yasom Yesus, mamyot som ro tiwya, malaikat mawe kʼMaria oh to, ati ro au mhaf fefares.
LUK 2:22 Watum ro Tuhan ybis Musa ykom to, mawe: “Fnya ro mabe ku to, mhau ti baro tna masen mamo msan bo kʼAllah re Ait yyon ana mbewok tna ana mbewok moof u.” Imamat 12:6-8 Tna mawe: “Ku sme ro bum to, ku ro Tuhan rAit oh.” Keluaran 13:2, 12 Ti baro firwas tna ayõ rau snok oh. Feto to Maria msya Yusuf masen mamoʼt Yerusalem tna twok mam Samu ro Allah. Mam beto ana moo bosan rana mee kʼimam sait ysan kʼAllah. Tna ana mabe Ku Yesus mamo msan Ait kʼTuhan ye.
LUK 2:24 Ana mamo msan bouum rana mamyot Watum ro Musa mbis mawe, “Kbe raa moo ruu tekukur mana ewok soh mfe ruu merpati ro teta mana ewok to, msan kʼTuhan.”
LUK 2:25 Ti weto bi sait yasom Simeon yhau mam Yerusalem. Ait tait raa ro yhaf moof. Ait ja mur-mur skabuk Allah. Tna yhau ste Mesias yama. Mesias retait tii Allah ysi yawe yama yo kʼraa ro Israel tna yisoh mhaf wana. Har ro Tuhan mhau mam Simeon yhaf ye.
LUK 2:26 Har ro Tuhan tii mawe kʼait oh mawe ait meen yhau ymat Mesias wia, tna fo ait yhai.
LUK 2:27 Riwai ayõ reto Har ro Tuhan mbis ait yamoʼt Samu ro Allah. Ait yamo tna ati reto Yesus yme msya Yusuf makah Ku Ait mamoʼt Samu ro Allah ye. Ana mamo ntwok mam mato mawe mno mamyot Watum ro Musa mbis.
LUK 2:28 Tna Simeon yoo Ku retait taam. Tna ybaut Allah yawe,
LUK 2:29 “Tuhan; mfo refo Nyõ nno mnan si bosi aNyõ oh. Jõ tasu tmat Ku refi. Ait ybam kʼNyõ yama yoo riof ro mase yee kʼraa. Jõ tmat Ait tibyo mfo refo jõ siwyan tamo oh. Jõ fi sryan aNyõ. Nbis jõ thai tna trof raa wojõ ro tiwya mhai wia matim sor to.
LUK 2:31 Nyõ nbis Ku refi yama re kbe raa beta mmat Ait tna mhar mawe Ait yama sotak iro wana.
LUK 2:32 Ait tait raa mana ro Israel sait. Kbe Ait yno anu bmo raa mana ro masom. Kbe raa mawe anu raa ro Israel to, raa mana ro Nyõ nsok. Tna Ait ynan kek ro mram iso mkah raa mana roto beta ye.”
LUK 2:33 Yesus yaja ysya yme miskawowo mari bokyas ro Simeon ykyas Ku mees rana retait.
LUK 2:34 Tna Simeon skabuk Tuhan yawe bi Ait yno bo ro moof kʼana mbewok. Tna yawe kʼMaria yawe, “Ku anyõ refi Allah ysok. Kbe raa mari bokyas rAit tna mmat bo ro Ait yno. Feto tna ana mhar mawe Ait oh mi Allah ysok. Bo ro yawe tna yno weto to, mno re raa ro Israel mawat mikyak Ait ye. Tibyo ana weto mbtek. Menohe raa mawat taro kbe mari bokyas rAit. Tibyo ana weto mros matak.
LUK 2:35 Raa mmat Ait tna kbe bonaut wana to, mrok msasi. Tna meen nyõ srau mham toni mnan fi bo raa moo tfo takoh nyõ.”
LUK 2:36 Mam beto to, fai mabi sau masom Hana mros ye. Tiwya au msya raa tahun trion ngkrema, menohe maa yhai tibyo au mhau semit sai. Fai au to, bi Fanuel yare ye, mbam raa mana ro Asyer. Au to, mamo nabi ro ja Allah ybis mkyas bo wAit ye.
LUK 2:37 Tna mefo refo au 84 tahun. Au mamo skabuk mam Samu ro Allah yoyo; rabu reha to, mhau skabuk tna mhau bo ro mait ye
LUK 2:38 Bi Simeon ykyas bo mkak si fo, fai Hana mama tna mbaut Allah. Au masen faram Ku retait yasom kʼraa beta ro ste Mesias, kʼraa ro minaut mawe Mesias kbe yama. Au mawe Ku retait oh mi Raa ro yama yfes raa ro Yahudi.
LUK 2:39 Yusuf ysya Maria mno bo mamyot Watum ro Musa mkak. Tna ana hah me mamoʼt remo rana, Nazaret mam provinsi ro Galilea.
LUK 2:40 Mhau tna Ku retait yabi renti tna yrok yatak renti. Ait yhar bo tna Allah yoo bouum yee kʼAit ye.
LUK 2:41 Ja tahun sau-sau firwas to, raa mabi ro Yesus mamoʼt Yerusalem makyõ korat ro Paskah.
LUK 2:42 Yesus tait 12 tahun oh, tna Ait ysya ana masen mamoʼt Yerusalem mfi bo ja ana mno soo oh.
LUK 2:43 Ana makyõ korat ro Paskah reto mkak. Tna ana masen mawe hah me mamoʼt remo rana ro Nazaret. Yusuf ysya Maria mamo, mamo menohe Yesus yhau akus fares mam Yerusalem. Tna ana wase ye.
LUK 2:44 Ana mnaut mawe ait kro raa wana makin ro mamo su msya ana. Tibyo ana mbewok mamo ti sau tna ana saso mtu Yesus kʼmao, mano wana msya mafoh wana ro msya ana mamo su.
LUK 2:45 He ana mkai Ait fee. Tibyo ana masen mhah mamoʼt Yerusalem u mawe saso Ait.
LUK 2:46 Ti trion tuuf ana saso, saso Ait. Tna mamoʼt Samu ro Allah. Ana twok mam Samu ro Allah tna fri Ait mam mato. Ait hre yari guru agama mkyas bo tna ytu bo kʼana ye.
LUK 2:47 Yesus tait srau bo ro ana mkyas weto. Tna raa beta mari bo ro Ait ykyas to, mrok miskawowo.
LUK 2:48 Tna raa mabi wAit ntwok tna mmat Ait hre susai ykyas bo ysya raa ro mase weto. Ana mnaut mawe, “Bawya meto?” Yme mawe kʼAit mawe, “Nyõ nno bawya meto? Amu mbewok saso nyõ nhai rowyõ nhai mefo!”
LUK 2:49 Menohe Yesus yawe, “Anu nma saso Jõ a? Jõ tama thau mam samu ro Taja fo fea! Anu mbewok srau fea?”
LUK 2:50 He ana mfot bo ro Ait ykyas reto fefares.
LUK 2:51 Tna fo Ait yasen ysya ana mamoʼt Nazaret. Yesus tait ja yari bo ro ana mawe. Bo ro Ait yno weto to, Maria mnaut mam mhaf mato bau sai.
LUK 2:52 Yesus yabi tna yetsu matak renti, tna yhar bo ro ati ybo yno renti ye. Allah hasu Ait tna raa hasu ye.
LUK 3:1 Tahun baro firwas tna Kaisar Tiberius yamo raja ro yabi. Ait yase ybo raja na taro mam rabin beta ro kene mam Roma. Tiberius ybo tabam reto 15 tahun oh. Wore weto Pontius Pilatus yamo gubernur mam provinsi ro Yudea. Tna Herodes yamo raja ybo provinsi ro Galilea. Filipus (Herodes yao) yamo raja mam rabin ro Iturea msya Trakhonitis. Tna Lisanias yamo raja mam rabin ro Abilene.
LUK 3:2 Tna bi Hanas ysya bi Kayafas mamo imam mase ro agama Yahudi. Mam wore weto Zakharia yare, Yohanes, yhau mam yuk ro riamo. Tna Allah ykyas bo kʼait.
LUK 3:3 Tibyo ait yasen yamo ykyas bokyas ro mbam Allah reto. Ait yawe, “Nashana fooh! Tna jõ baptis anu. Jõ baptis anu re kbe raa mmat tna mhar mawe anu nashana oh tna nmo no kʼAllah. Tibyo bi Ait yyon iro wanu.” Yohanes yamo tyo-teya mam rabin aya Yordan yur beta ykyas bo reto.
LUK 3:4 Yohanes yamo ykyas bo feto to, yno mnan si bokyas ro tiwya Allah ybis nabi Yesaya yama ykom mam aam rait. Aam reto mawe: “Meen raa sait kbe yama ykyas bo woJõ mam yuk ro riamo sau. Ykyas yawe, ‘Mbetrot iso mkah Tuhan yama! Nisoh iso kʼAit!
LUK 3:5 Naru mbetnen atu msya faut. Tna noo tabam nruk wo mbair beta matot! Tna iso ro mwak to nisoh mbetrot! Tna iso ro maut-mroh to, nisoh maru sneh!
LUK 3:6 Kbe raa ro arin aso beta mmat tna mhar mawe Allah yatak yoo riof ro mase yee kʼraa.’”
LUK 3:7 Raa mawat mama mo kʼYohanes afo re ait baptis ana. Menohe ait ykyas kʼana yawe, “Anu to, raa ro nmo wan-wan nfi aban kume! Awya ykyas bo kʼanu yawe Allah kmo tna meen yno bo ro mkair mbtek mai kʼanu? Awya ykyas feto tna re anu nhar nwe nsam nma saso riof kʼanu?
LUK 3:8 Nashana! Nno bo moof. Tna kbe raa mhar mawe anu nashana oh. Soh anu nno feto to, anu nfi kake mara ro mros make mawat tna moof. Allah yatem ybo baam oh. Ait siwyan yfat ara. Kake mara ro make rau moof fee, kbe Ait yfat tna yoo beak mam tafoh yko makus mait. Anu ja nnaut nwe, ‘Anu fo kube ro Abraham wait renti. Feto to kbe Allah yno riof kʼanu fea!’ Mfe, nnaut feto ma! Allah yatak haberek fraa wefo mamo kube renti ro Abraham wait ye!”
LUK 3:10 Tna ana mawe, “Soh feto to, nawe kbe amu nno fyi?”
LUK 3:11 Tna Yohanes yawe, “Rau ro moof to, nno fefo: Awya ro yse ratan ewok to, ait yoo sau yee kʼana ro mse aro fee. Tna raa ro mse boit wana mawat to, ana moo boit aro saim kʼana ro boit marak.”
LUK 3:12 Raa ro mkah bo ro pemerintah Roma taro mama mo kʼYohanes ye. Ana weto to, raa ro moo pitis ro namabyoh (pajak) mbam kʼraa. Ana mawe Yohanes baptis ana ye. Tna mtu kʼait mawe, “Guru; amu kbe nno bo bawya?”
LUK 3:13 Yohanes yawe, “Ati ro noo pitis raa to, noo pitis mabyoh rau ro pemerintah mawe sai to. Norot ma.”
LUK 3:14 Tna raa sbe ro pemerintah Roma taro mama ye. ⌞Ja ana mno bo ro mkair mai kʼraa afo re raa moo pitis mee kʼana.⌟ Ana mtu kʼYohanes mawe, “Guru fyi, amu kbe nno bo bawya?” Tna ait yawe, “Ntak bo raa ma. Sioh nuun boun kʼraa to ma. Tna ati ro pemerintah maren boren wanu to, nmai tis ma. Nbo pitis wanu sai nhaf mnan.”
LUK 3:15 Ti reto raa ntoni mtu kʼanya mawe, “Raa retait Mesias ro anu ste metait fe awya?”
LUK 3:16 Menohe Yohanes yawe kʼana yawe, “Jõ fi raa ro baptis anu mkah aya sai. Menohe Raa sait ro kbe yama tait, yase toni yiwer jõ. Tna jõ toof mkah bo skur sandal rAit to fee. Ait yama to, meen baptis anu mkah Har ro Tuhan. Tna Ait baptis anu mkah tafoh ye.”
LUK 3:17 Tna Yohanes yawe, “Ati ro raa sait ygi gandum rait to, ja yoo gandum makan rau yse hayah tna yoo marak rau to, yse hayah ye. Tna gandum makan reto ybu mam gudang sau. Tna marak rau to, kbe yko mam tafoh. Tafoh reto raa mtai mikabuk fee. Kbe Mesias yno bo kʼraa to, mnan anya mfi feto ye.”
LUK 3:18 Yohanes ykyas watum roto aro kʼraa ye. Ait ykyas Bokyas ro Moof kʼana feto.
LUK 3:19 Tna Yohanes ykyas raja Herodes ro ybo rabin reto to ye. Raja Herodes ytak fnya ro yao Filipus rait. Au masom Herodias. Yohanes yari feto, tibyo yastako Herodes yawe yber safo meto. Tna safo beta ro Herodes yber oh to, Yohanes ykyas tna yastako Herodes ye.
LUK 3:20 Tibyo Herodes kmo Yohanes. Tna yfot ait betruk mam bui mato. (Yno bo reto to, safo sau naut ye oh meto.)
LUK 3:21 Wore wo Herodes yfot Yohanes ybu mam bui fefares to, Yohanes baptis raa mawat. Tna ait baptis Yesus ye. Ati ro ait baptis Yesus to, Yesus skabuk kri-kri fo, tna ayoh twat.
LUK 3:22 Tna Har ro Tuhan haberek mnan fi ruu merpati sau. Tna fru mama mroh abyõ kʼAit. Tna raa mari mai sau mbam ayoh mawe, “Nyõ fi akut aJõ ro Jõ thafri. Nyõ fi Jõ thaf mnan!”
LUK 3:23 Ati reto to, Yesus tait 30 tahun bo feto tna yaban yamo ykah bo ro Tuhan rAit. Wore weto to raa mnaut mawe Yesus tait Yusuf yare. Yusuf tait ku ro Eli.
LUK 3:24 Eli tait ku ro Matat. Tna Matat tait ku ro Lewi. Tna Lewi tait ku ro Malkhi. Tna Malkhi tait ku ro Yanai. Tna Yanai tait ku ro Yusuf.
LUK 3:25 Tna Yusuf tait ku ro Matica. Tna Matica tait ku ro Amos. Tna Amos tait ku ro Nahum. Tna Nahum tait ku ro Hesli. Tna Hesli tait ku ro Nagai.
LUK 3:26 Tna Nagai tait ku ro Maat. Tna Maat tait ku ro Matica. Tna Matica tait ku ro Simei. Tna Simei tait ku ro Yosekh. Tna Yosekh tait ku ro Yoda.
LUK 3:27 Tna Yoda tait ku ro Yohanan. Tna Yohanan tait ku ro Resa. Tna Resa tait ku ro Zerubabel. Tna Zerubabel tait ku ro Sealtiel. Tna Sealtiel tait ku ro Neri.
LUK 3:28 Tna Neri tait ku ro Malkhi. Tna Malkhi tait ku ro Adi. Tna Adi tait ku ro Kosam. Tna Kosam tait ku ro Elmadam. Tna Elmadam tait ku ro Er.
LUK 3:29 Tna Er tait ku ro Yesua. Tna Yesua tait ku ro Eleazer. Tna Eleazer tait ku ro Yorim. Tna Yorim tait ku ro Matat. Tna Matat tait ku ro Lewi.
LUK 3:30 Tna Lewi tait ku ro Simeon. Tna Simeon tait ku ro Yehuda. Tna Yehuda tait ku ro Yusuf. Tna Yusuf tait ku ro Yonam. Tna Yonam tait ku ro Elyakim.
LUK 3:31 Tna Elyakim tait ku ro Melea. Tna Melea tait ku ro Mina. Tna Mina tait ku ro Matata. Tna Matata tait ku ro Natan. Tna Natan tait ku ro Daud.
LUK 3:32 Tna Daud tait ku ro Isai. Tna Isai tait ku ro Obed. Tna Obed tait ku ro Boas. Tna Boas tait ku ro Salmon. Tna Salmon tait ku ro Nahason.
LUK 3:33 Tna Nahason tait ku ro Aminadab. Tna Aminadab tait ku ro Admin. Tna Admin tait ku ro Arni. Tna Arni tait ku ro Hezron. Tna Hezron tait ku ro Peres. Tna Peres tait ku ro Yehuda.
LUK 3:34 Tna Yehuda tait ku ro Yakub. Tna Yakub tait ku ro Ishak. Tna Ishak tait ku ro Abraham. Tna Abraham tait ku ro Terah. Tna Terah tait ku ro Nahor.
LUK 3:35 Tna Nahor tait ku ro Serug. Tna Serug tait ku ro Rehu. Tna Rehu tait ku ro Peleg. Tna Peleg tait ku ro Eber. Tna Eber tait ku ro Salmon.
LUK 3:36 Tna Salmon tait ku ro Kenan. Tna Kenan tait ku ro Arpakhsad. Tna Arpakhsad tait ku ro Sem. Tna Sem tait ku ro Nuh. Tna Nuh tait ku ro Lamekh.
LUK 3:37 Tna Lamekh tait ku ro Metusalah. Tna Metusalah tait ku ro Henokh. Tna Henokh tait ku ro Yared. Tna Yared tait ku ro Mahalaleel. Tna Mahalaleel tait ku ro Kenan.
LUK 3:38 Tna Kenan tait ku ro Enos. Tna Enos tait ku ro Set. Tna Set tait ku ro Adam. Tna Adam tait ku ro Allah yare.
LUK 4:1 Yesus raa baptis mam aya ro Yordan to, tna hah ye yamo. Tna Har ro Tuhan mroh mama mbo Yesus matak. Tna Har reto makah Ait mamoʼt yuk ro riamo sau.
LUK 4:2 Yhau mam teto tna kabes yabi (Iblis) yama yawe sanet besruf Ait. Sanet Ait ti trion 40. Tna wore weto to, Yesus yhau bo yait. Tibyo yhai sre.
LUK 4:3 Kabes yabi yama sanet Ait yawe, “Soh Nyõ Ku ro Allah yare meto mi, sik nno fraa refo haberek mamo roti re Nyõ nait.”
LUK 4:4 Menohe Yesus yisboh kʼait yawe, “Bokom ro Allah mawe, ‘Boit mesait sai au oh mi mno re raa mhau to fee!’”
LUK 4:5 Tna fo kabes yabi yakah Yesus yaut mam atu mana ro miyõ sau. Tna fooh sai to, ait yerif bangsa ro arin aso beta fo kʼAit.
LUK 4:6 Tna kabes yabi yawe kʼAit yawe, “Jõ tase tbo bangsa wefo beta. Tna kta wana beta to, bo wojõ ye. Tna jõ tsan bo wefo beta kʼawya sai ro jõ ksoh tait. Nyõ nawe kbe too bo wefo beta tsan kʼNyõ fe mfe a?
LUK 4:7 Soh Nyõ naka mte nbaut jõ to, kbe too bo wefo beta tsan kʼNyõ.”
LUK 4:8 Menohe Yesus yisboh kabes yabi refi yawe, “Bokom ro Allah mawe yum mawe: ‘Nbaut Tuhan Allah yesait aran, tna bo ro Ait yesait aran yawe to, nbo nno.’”
LUK 4:9 Tna fo kabes yabi yakah Yesus yamoʼt Yerusalem. Tna yoo Yesus yse yros abyõ mam timanaf Samu Allah ro miyõ toni. Tna yawe kʼYesus yawe, “Soh Nyõ fi Ku ro Allah yare meto mi, sik nitsre Nyõ mbtek namo nai mam tabam mte.
LUK 4:10 Bokom ro Allah mawe: ‘Kbe Allah ybis malaikat wAit kmot Nyõ. Ana swiõ wea huwya mfot Nyõ abyõ sai.
LUK 4:11 Ana kbe mfot Nyõ abyõ sai mkah matem wana re naa mai mam fraa fee.’”
LUK 4:12 Menohe Yesus yawe, “Bokom ro Allah mawe, ‘Tuhan Allah ro ja anu smot to, sanet Ait ma.’ Ulangan 6:16 Feto ye Jõ hawe kro bo ro nyõ nawe weto be kbe Jõ sanet Allah.”
LUK 4:13 Kabes yabi sanet sanet Yesus feto mkak tna yamo. Ait yamo tna ste ayõ roto afo re kbe hah ye yama sanet Yesus u.
LUK 4:14 Yesus hah ye yamoʼt provinsi ro Galilea. Tna Har ro Tuhan matak rAu mhau msya Ait. Tna raa ro mhau mam rabin reto beta mari Ait yasom.
LUK 4:15 Ait yamoʼt remo weto aro rau-rau to, yamoʼt samu watum raa ro agama Yahudi. Tna ykyas bo kʼraa mam samu weto. Tna raa weto beta bibi Ait.
LUK 4:16 Tna Ait yamoʼt Nazaret, remo rAit ye. Ayõ ro Sabat to, ja raa ro agama Yahudi ntmoh. Tna ayõ ro Sabat sau to, Ait yamoʼt samu watum rana mfi ja Ait yno soo oh. Tna Ait yasen yros baca Bokom ro Allah.
LUK 4:17 Tna raa moo bokom ro tiwya Allah ybis nabi Yesaya ykom to, mee kʼAit ymat. Ait betrat aam reto tna saso far-far sau. Ykai, tna baca yawe:
LUK 4:18 “Tuhan ysok Jõ ybis yawe tamo tkyas Bokyas Moof kʼraa ro masu awe. Feto to yoo Har rAit yse kʼJõ.
LUK 4:19 Tna ybis yawe Jõ tisoh raa ro masu mti to, tno re masu wana to maah ye. Tna raa ro mberasi raa taro sor to, Jõ tno re kbe ana bitsre raa ro ana sikowah weto. Tna tama tkyas tawe, ‘Tuhan Ait siwyan oh yawe yno riof kʼraa.’”
LUK 4:20 Yesus baca mkak tna bemut aam reto ye, yee yisia kʼraa retait. Tna Ait hre. Hre tna raa beta masu wana mberoh haberek mmat Ait ye.
LUK 4:21 Tna Yesus betoo yawe, “Mam ayõ refo fo, bokom far-far wefo mabo rau oh.”
LUK 4:22 Bokyas rAit moof ati. Tna raa beta mrok ktak mawe, “Ait retait Ku ro Yusuf, fe mfe a?”
LUK 4:23 Tna Yesus yawe kʼana yawe, “Kbe anu nkyas bofret refo mai kʼJõ fea! Nwe: ‘Dokter, nesait nisoh tkif Nyõ ai!’ Anu nri he taa Jõ tno bo ro msai mam Kapernaum. Tibyo anu nkyas bofret reto to, nwe Jõ tno mnan anya mfi feto mam remo aJõ feto ye.
LUK 4:24 Menohe tkyas kʼanu tawe, ‘Nnaut: Nabi ro Allah ybis yama ykyas bo wAit to, soh yamoʼt remo rait yesait to, ja raa wait hawe mari ait.’
LUK 4:25 Nnaut ayõ ro tiwya nabi Elia yhau. Wore weto to, tahun trion tuuf hariyah tna hwyõm mase: Oom aro mais fee mam rabin ro Israel. Tibyo raa beta mhai sre. Semit mawat mhai sre ye.
LUK 4:26 Menohe Allah ybis nabi Elia yamo yo kʼsemit ro mhau mam Israel aro fee. Ait yamoʼt rabin roto yhau ysya semit sau aran mam rabin ro Sidon. Au fo mhau mam remo ro Sarfat.
LUK 4:27 Tna ti wore weto to, raa mawat mafa kusta mam rabin ro Israel. Menohe ait yisoh raa aro ro mhau mam rabin ro Israel fee. Ait yamoʼt tabam ro Siria tna yisoh raa sait ro yasom Naaman. Yisoh ait yesait aran.”
LUK 4:28 Raa beta ro siret mam samu watum reto mari bokyas rAit reto tna mrok kmo toni.
LUK 4:29 Ana beta masen mikyak Yesus frok ybam remo rana. Ana mbo Ait mamoʼt howai rakak ro miyõ sau kene mam wore remo rana. Ana mawe mamo beak Yesus mam howai rakak reto.
LUK 4:30 Menohe Yesus yamo fot wai mam raa mawat weto yamo bait.
LUK 4:31 Tna Yesus yroh yamo sia mam provinsi ro Galilea, yamoʼt remo ro Kapernaum. Ayõ ro raa agama Yahudi ja ntmoh (hari Sabat) to, Ait yamoʼt samu watum rana tna ykyas bo kʼana.
LUK 4:32 Allah yno re bokyas rAit to matak toni. Tibyo raa ro mari bokyas rAit reto mrok ktak.
LUK 4:33 Tna raa ro kabes mbo sait hre mam samu watum reto ye. Tna raa retait ytu fari-fara yawe,
LUK 4:34 “Yesus ro nbam Nazaret; Nyõ nama nno fyi kʼamu mefo? Nama sikowah amu ma! Jõ thar Nyõ: Nyõ fi Ait ro Allah Ybis Yama!”
LUK 4:35 Yesus yastako kabes reto yawe, “Shait! Nfrok nbam kʼait!” Tna raa beta hre mmat he kabes refo safo toni tna mabyõ raa retait beak mte. Tna kabes reto frok mbam raa retait. Tna raa retait ykai yaaf aro fee.
LUK 4:36 Raa beta mrok miskawowo tna mkyas kʼanya mawe, “Bokyas rAit to, msai toni. Ait yatak re ybis kabes frok. Kabes sor mari mai rAit tibyo frok sai!”
LUK 4:37 Tna raa faram Yesus yasom mam rabin reto beta.
LUK 4:38 Yesus sikba samu watum reto tna yamoʼt amah ro Simon. Ati reto to, Simon snyim ro ano au kiyam. Au to, metsu mbe toni. Tna raa soh-soh kʼYesus mawe, “Nama nmat fai au refo!”
LUK 4:39 Yesus yamo ymat he fai au refo mjin. Ait skabuk yikyak kiyam reto. Tibyo kiyam rau marak. Tna fai au masen saruk boit mee kʼana mait.
LUK 4:40 Ati ro ayõ hawer to, raa mawat mama mo kʼYesus. Mama mbo raa wana ro mafa kiyam aro rau-rau. Tna Ait yatem yse kʼana aro sait-sait. Tibyo ana mrok moof.
LUK 4:41 Tna kabes frok mbam raa mawat ye. Kabes weto mhar mawe Ait tait Mesias. Kabes weto frok to, mtu mawe, “Nyõ fi Ku ro Allah yare!” He Yesus yastako kabes weto yawe, “Shait!”
LUK 4:42 Nyah msan tna Yesus yasen sikba remo reto. Yamoʼt yuk ro riamo sau. Raa masen saso Ait tna mamo fri Ait u. Ana soh-soh kʼAit mawe “Sikba amu ma!”
LUK 4:43 Menohe Ait yawe, “Tamo tkyas Bokyas Moof reto mam remo roto taro ye. Tkyas raa mana ro Allah yamo Raja ybo. Tkyas raa mana reto kʼraa oh mi Allah ybis Jõ tama to.”
LUK 4:44 Tna Yesus yasen sikba ana weto yamo renti mam provinsi ro Yudea. Yamo ykyas bo mam samu watum makin ro Yahudi.
LUK 5:1 Ti sau to, Yesus yros ykyas bo mam maru ro Genesaret. Tna raa mawat myar mama mawe mari bokyas rAit ro ykyas mbam kʼAllah.
LUK 5:2 Tna Ait ymat wiak trion ewok raa miti mam weto. (Raa ro wiak wana weto hre myon jala wana.)
LUK 5:3 Wiak sau to Simon rait. Tna Yesus yamo yaut hre mam wiak reto, tna ybis Simon yyum wiak reto kebet baro sai. Tna Yesus hre ykyas bo kʼraa.
LUK 5:4 Yesus ykyas bo mkak tna yawe kʼSimon yawe, “Miin baro namoʼt wore wo uun wono. Tna mbeak jala re nfot syoh aro.”
LUK 5:5 Simon yawe, “Guru; riwai ti ro miyõ refo amu nsafo beak jala saso syoh he nfot aro fee! Menohe Nyõ nbis feto to, jõ te beak jala refo u oh.”
LUK 5:6 Ana beak jala refo tna fo mkuk jala reto maut tna mmat menohe syoh mawat toni. Tna jala reto maja taro hri.
LUK 5:7 Tna ana mtu mafoh wana taro mama. Ana mama tna msya ana mkuk jala refo mkah syoh mawat toni, mbeak mam wiak wana weto mato. Tibyo wiak ewok reto matot toni maami wiak hoh.
LUK 5:8 Simon yafoh na weto, sait yasom Yakobus tna sait yasom Yohanes. Ana mbewok to Zebedeus yare. Ana msya Simon-Petrus mmat syoh mawat tibyo mrok ktak. Tna Simon yamo yo kʼYesus yjit yimna. Tna yawe, “Tuhan; sikba jõ namo rof: Jõ fi raa kair!” Tna Yesus yawe kʼSimon yawe, “Waa ma! Maban wore wefo nyõ nfot syoh u fee. Kbe nyõ nfot raa.”
LUK 5:11 Ana mabo tuuf weto mkuk wiak wana mamoʼt mne. Tna sikba bo wana beta makus masen kro Yesus.
LUK 5:12 Ti sau Yesus yhau mam remo sau tna ymat raa ro yafa kusta ro mkair-kar toni sait. Raa retait ymat Yesus tna yjit yimna soh-soh kʼAit yawe, “Bobot, soh Nyõ ksoh meto mi, nisoh jõ re kusta refo marak.”
LUK 5:13 Tna Yesus yatem ybo ait tna yawe, “Jõ ksoh, tawe nyõ mbros oh!” Ayõ reto si fo, kusta reto mrok marak.
LUK 5:14 Tna Yesus yawe wa kʼait yawe, “Namo to, nkyas bo refo kʼraa ma. Namo nerif narak anyõ kʼimam ro agama Yahudi sait re ait ymat sas nyõ. Nyõ noof u tibyo noo bo nee. Nee kʼimam re ysan kʼAllah mamyot Watum ro Musa ykom yawe. Nno bo weto re kbe raa mhar mawe netsu anyõ to moof u.”
LUK 5:15 Menohe Yesus yasom to, raa mkyas renti mam woyõ-woya sai. Tibyo raa myar mama mari bokyas rAit tna soh-soh kʼAit re yisoh ana re kiyam wana marak ye.
LUK 5:16 Tna mun aro to, Yesus yamo skabuk mam yuk ro mimon.
LUK 5:17 Ti sau Yesus ykyas bo kʼraa mam samu sau. Tna raa manes ro agama Yahudi baro hre mari ye: Raa ro Farisi msya guruagama ye. Ana mama mbam kota msya remo aro rau-rau mam provinsi ro Galilea, tna mbam kota Yerusalem msya remo roto taro sor mam provinsi ro Yudea. Tuhan yatak rAit yatam Yesus. Feto to Ait yisoh raa ro mafa kiyam.
LUK 5:18 Tna raa baro mama nkatar ait ro yaa mhai sait mam sese. Tna yafoh wait weto mawe makah raa retait twok mam samu reto mse re Yesus ymat.
LUK 5:19 He raa mawat burut wa Yesus. Feto to ana makah ait maut abyõ ti manaf. Tna ana mitrah ti manaf reto baro mno hroh tna mruk ait mkah sese rait ye. Mruk mam samu mato mam wore wo Yesus yros ysya raa mawat weto susai.
LUK 5:20 Yesus ymat ana tna yhar yawe ana smot Ait matak. Tibyo Yesus yawe kʼraa retait yawe, “Tao, iro wonyõ to, Jõ tyon oh.”
LUK 5:21 Raa ro Farisi msya guruagama weto mari bo ro Yesus yawe feto tibyo kmo. Tna mnaut mawe, “Bi Ait refi yrok yawe Ait awya, re yawe yyon iro ro raa! Bo ro Ait yawe to berasi Allah! Awya ytai yyon iro? Allah yesait aran sai!”
LUK 5:22 Menohe Yesus yhar bo ro ana mnaut weto oh. Tna ytu kʼana yawe, “Fyi re anu nnaut bo weto mam nsrau mato wanu to?
LUK 5:23 Soh Jõ tawe kʼait refi tawe, ‘Iro wonyõ to, Jõ tyon oh.’ Bo ro msai fee: Kbe raa mahni bo reto mabo fe mfe a. Menohe tawe, ‘Nasen namo oh!’ Tawe feto afo re kbe raa mmat bo reto mabo. Mmat tna mhar mawe Jõ ttai tno bo ewok ye to. Ewok ye mnan-nan kʼJõ.
LUK 5:24 Jõ fi 'Ait ro Yroh Yama Yfi Raa Sai'. Tna bo ro kbe Jõ tno fo, Jõ tno re kbe anu nhar Jõ tatak tyon iro raa mam tabam refo.” Tna Yesus yawe kʼAit ro yaa mhai retait yawe, “Nasen, tubat sese anyõ, tna nasom namo bonyõ oh!”
LUK 5:25 Tna raa beta mmat he raa retait yasen yros fooh. Tna ait tubat sese rait yasom yamo. Yamo bait ybaut Allah yamo.
LUK 5:26 Ana beta miskawowo tna mbaut Allah. Ana mawe kʼanya mawe, “Ayõ refo anu bmat bo msai ro mase toni!”
LUK 5:27 Yesus frok ybam amah reto yamo. Yamo tna ymat raa ro ja yoo namabyoh (pajak) yee kʼpemerintah ro Roma sait. Yasom Lewi. Bi ait hre mam kantor ro namabyoh rait. Tna Yesus ytu kʼait yawe, “Nama kro Jõ bmo!”
LUK 5:28 Lewi yari feto, tibyo ait yasen sikba bo beta, yamo kro Yesus mamo.
LUK 5:29 Ti sau fo, Lewi yakyõ bokyõ sau re yafoh wait mama fri anya msya Yesus. Tna raa msis mama hre mait boit su. Lewi yafoh weto taro mamo raa ro moo namabyoh ye.
LUK 5:30 Raa Farisi ro mamo guruagama msya raa Farisi roto mmat he Yesus ysya raa wAit makyõ bokyõ su msya raa weto. Tna ana santri bo mawe kʼYesus kuber wAit (murid-murid) mawe, “Fyi re anu hre niit boit su nsya raa ro moo namabyoh tna msya raa ro ja mno iro bo weto?”
LUK 5:31 Tna Yesus yawe, “Raa ro metsu moof to, ja mamo saso dokter fee. Ja raa ro kiyam oh mi mamo saso dokter to.
LUK 5:32 Jõ tama ttu raa ro mhaf moof to fee. Tama fo ttu raa ro mno iro afo re kbe ana mashana.”
LUK 5:33 Raa ro Farisi msya raa taro mawe kʼYesus mawe, “Kuber ro Yohanes msya kuber raa ro Farisi ja mhau bo mait ye tna skabuk ye. Menohe kuber woNyõ ja mhau bo mait to fee.”
LUK 5:34 Yesus ykyas bofret kʼana yawe, “Ati ro raa sait ymen fnya to, ja raa mno bo bawya? Anu nwe kʼait yafoh wait ro mama to, nwe ana mhau bo ro mait sai a? Mfe! Ana makyõ bokyõ fea!
LUK 5:35 Ana makyõ bokyõ wia. Tna fo raa moo ait makah mamo. Ati reto to, kbe mafoh wana sraujin tibyo mhau bo ro mait. Kuber woJõ mfi feto ye. Jõ thau tsya ana fares fo, ana sraujin fee. Menohe ati ro Jõ sikba ana to, kbe ana sraujin tibyo mhau bo ro mait ye.”
LUK 5:36 Tna Yesus ykyas bofret sau naut kʼana yawe, “Mfi bo ratan matah ro hri-hra sau. Ja fnya moo ratan ro ntfia tna ktan fee. Au moo ratan mabuf ro ntfia reto tna mtin kait mkah ratan rau ro matah fe mfe a? Soh au mno feto to, kbe mno ratan rau ro ntfia reto mkair. Tna raa mmat mawe ratan mabuf ro moof msya ro matah to, mmat mawe ewok reto mnan anya fee.
LUK 5:37 Feto ye, Ja raa mror anggur maya ro tna mam baah marak ro matah fee. Anggur maya reto mno baah marak reto matu mbua. Tna kbe anggur maya reto maus miyi mroh mamo mkak.
LUK 5:38 Anggur maya ro tna to, ja raa moo mror mam baah marak ro tna sai.
LUK 5:39 Raa ro mhar anggur maya to, ana nksoh rana ro matah to mata. Tna ana hawe mata anggur maya ro tna.”
LUK 6:1 Ayõ ro raa ntmoh sau to, Yesus ysya kuber wAit mamo mfrit iti mam armato ro gandum sau. Kuber wAit mhai sre, tibyo mryoh gandum make baro. Ana msirori gandum weto mam matem wana tna mait.
LUK 6:2 Menohe raa ro Farisi baro mmat ana tna mtu kʼYesus mawe, “Anu nryoh gandum make mam ayõ ro raa wanu ntmoh to. Anu nno fyi meto? Nno bo reto to, anu niwer Watum ro agama ranu oh meto!”
LUK 6:3 Tna Yesus yawe, “Anu nsorni Bokom ro Allah? Bokom reto mkyas bo ro tiwya raja Daud yno: Tiwya ait ysya raa wait mhai awyah.
LUK 6:4 Tna ait twok mam Samu ro Allah mato. Tna yoo roti ro raa msan kʼAllah. Roti reto mbau. Menohe ait yoo yait. Roti reto ja imam na mesait aran mait. Tna ait yoo tna yee kʼraa wait mait ye.”
LUK 6:5 Tna Yesus yawe, “Jõ fi 'Ait ro Yroh Yama Yfi Raa Sai'. Jõ tatak tbo ayõ ro raa ntmoh to ye.”
LUK 6:6 Ayõ ro raa ntmoh roto sau to, Yesus yamo ykyas bo mam samu watum ro Yahudi. Tna raa ro yatem ati mhai sait huwya mam beto ye.
LUK 6:7 Tna guruagama na msya raa ro Farisi baro huwya mam beto ye. Ana mros mmat rof bo ro Yesus yno. Tna ana saim bo mawe soh Yesus yisoh raa mam ayõ ro raa ntmoh to, kbe ana maun baun kʼAit mawe Ait yiwer Watum ro Musa oh meto.
LUK 6:8 Menohe Yesus yhar bonaut wana wia oh. Tna yawe kʼait ro yatem mhai retait yawe, “Nasen, nama nros susai mam wefo!” Tna raa retait yasen yama yros.
LUK 6:9 Tna Yesus ytu yawe, “Ja Watum ro agama ranu mawe anu bno bo bawya mam ayõ ro raa ntmoh? Ja bno bo ro moof, soh mfe bno bo ro mkair a? Bisoh raa fe sikowah raa anya a?”
LUK 6:10 Yesus yros yasu ymat ana beta yur. Tna yawe kʼait ro yatem mhai retait yawe, “Betrot natem anyõ oh!” Raa retait betrot yatem rait. Tna yatem mrok moof.
LUK 6:11 Guru Agama na msya raa ro Farisi to, ana kmo toni. Tna ana saim bo ro mkair kbe ana mno mai kʼYesus.
LUK 6:12 Ti sau to Yesus yamo yaut mam faut sau tna yawe yamo skabuk. Tna hre skabuk Allah mam ti ro miyõ reto
LUK 6:13 mamo snok mam niah msan. Tna Ait ytu kuber wAit beta mama. Tna Ait ysok ana mabo trion 12 aran kbe ana mamo raabis (rasul) wAit.
LUK 6:14 Ana weto sait yasom Simon (ro kbe Yesus ytu yawe yasom Petrus ye), Andreas ro Simon yao, Yakobus ysya yao Yohanes, Filipus, Bartolomeus,
LUK 6:15 Matius, Tomas, Yakobus ro Alfeus yare, Simon (ro raa mtu mawe Zelot),
LUK 6:16 Yudas ro Yakobus yare, tna Yudas Iskariot ro kbe hren serek Yesus.
LUK 6:17 Yesus ysya raabis wAit mroh mbam faut reto. Tna Ait yamo yros mam tabam sneh. Tna raa mawat ro ja nkro Ait to, mama mawe mari bokyas rAit ye. Tna raa msis-sas mbam jaro-jaro sor mama ye: Raa mbam provinsi ro Yudea, mbam kota ro Yerusalem ye, tna raa ro mbam kota ro Tirus msya kota ro Sidon ye. Kota ewok refo mhau mam sawan maam ye.
LUK 6:18 Taro mama mawe mari bokyas ro Yesus. Tna ana taro ro kiyam mama mawe Yesus yisoh ana re kiyam rana marak ye. Ana ro kabes mbo to, mama tna Yesus yikyak kabes mbam kʼana weto ye.
LUK 6:19 Yesus yatak rAit yisoh ana beta moof. Tibyo raa mawat tomer mama miir Ait.
LUK 6:20 Yesus ymat kuber wAit tna yawe, “Anu ro mfo refo nsu awe to: Anu kbe nhau simaut mase. Anu oh mi raa mana ro Allah yamo Raja ybo.
LUK 6:21 Anu ro mfo refo nhai sre to: Anu kbe nhau simaut mase. Meen anu nhaf matu tna nhai sre u fee. Anu ro mfo refo nwia to: Anu kbe nhau simaut mase. Meen anu nsen nsah.
LUK 6:22 Tiwya tinyi Allah ybis nabi wAit mama mkyas bo wAit. Tna raa mno bo mkair mai kʼana. Menohe Allah siwyan boren ro mase meen yoo yaren nabi wAit weto mam sawro rAit. Jõ fi 'Ait ro Yroh Yama Yfi Raa Sai'. Tna soh anu smot Jõ, tibyo kbe raa mno bo mkair mai kʼanu to: Anu kbe nhau simaut mase. Soh raa knait anu, tna raa mikyak anu, tna raa mamus mawe sie anu to, simaut mase. Meen Allah yoo boren ro mase mam sawro rAit yaren anu fo ye. Feto to nyok-yok, tna simaut mase ye oh.”
LUK 6:24 Tna Yesus yawe, “Anu raa ro bobot to: Mfo refo anu nhau moof to. Menohe bo ro mkair-kar kbe mama mai kʼanu. Tibyo kbe meen anu nhau noof fee.
LUK 6:25 Anu ro mfo refo nhaf matu tna nhai sre fee to: Bo ro mkair-kar kbe mama mai kʼanu. Tibyo kbe meen nhaf matu fee, anu nhai sre. Anu ro mfo refo nsah to: Bo ro mkair-kar kbe mai kʼanu ye. Meen anu nwia tna sraujin toni ye.
LUK 6:26 Tiwya tinyi to, raa baro sioh mawe ana to, nabi ro Allah ybis mama mkyas bo wAit. He mfe, sioh meto. Menohe anu hohos na makin tawyõ raa ro sioh raa weto. Feto to, soh raa beta tawyõ anu mfo refo to, kbe meen anu nkai bo ro mkair-kar.”
LUK 6:27 Tna Yesus yawe, “Anu ro nri bokyas ro Jõ tkyas fo, tawe kʼanu tawe: ‘Natmof raa ro mamo byoh kʼanu. Tna nno bo moof kʼraa ro knait anu to ye.
LUK 6:28 Raa ro mamus anu to, nno bo ro moof kʼana sai. Tna raa ro mno bo mkair mai kʼanu to, skabuk ana ye.
LUK 6:29 Soh raa miban natni ranu to, noo natni ro ati jaro nee kʼana miban ye. Soh raa mtak ratan anyõ sau to, tna mawe mtak ratan roto taro ye to, nno wa ma. Noo ratan reto nee ye.
LUK 6:30 Awya sai mama mayoh bo kʼanu to, noo nee sai. Tna soh raa msyõf bo wanu to, nwe ana misya bo weto ma.
LUK 6:31 Bo ro anu ksoh nwe raa mno kʼanu to, nno mfi feto kʼana ye.
LUK 6:32 Soh anu natmof raa ro matmof anu sai aran to, kbe Allah ymat tibyo yoo boren yaren anu aro fee. Raa ro mno iro sai ja matmof raa ro matmof ana mfi feto ye.
LUK 6:33 Tna soh anu nno bo moof kʼraa ro ja mno bo moof kʼanu to, kbe Allah ymat tibyo yoo boren yaren anu aro fee. Raa ro mno iro sai ja mno bo moof kʼraa ro mno bo moof kʼana mfi feto ye.
LUK 6:34 Tna soh anu noo bo nee kʼraa ro mayoh bo kʼanu to, tna anu nhar nwe kbe ana moo bo aro mee kʼanu riryõn to, boren ro meen Allah yaren kʼanu to bo bawya? Raa ro mno iro sai ja moo bo mee kʼraa ro ana mnaut mawe kbe misya bo mnan anya feto ye.’
LUK 6:35 Menohe Jõ tawe kʼanu tawe, ‘Natmof raa ro mamo byoh kʼanu sai. Tna nno bo moof kʼana sai. Noo bo nee kʼraa ro mayoh bo kʼanu to. Ninaut nwe kbe ana misya bo aro kʼanu riryõn to ma. Soh anu nno feto to, meen boren ro Allah yaren kʼanu to mase toni. Tna kbe anu nmo ku ro Allah wAit. Ait fi Raa ro yase. Tna Ait yhaf ase, ja yno bo moof kʼraa ro wase bo yawe asik mase kʼAit. Tna Allah yno bo moof kʼraa ro ja mno bo mkair ye.
LUK 6:36 Tna tawe natmof raa mnan fi Bja ranu ja yatmof raa feto ye.
LUK 6:37 Nuun boun kʼraa ma. Tna meen raa maun boun kʼanu feto ye fee. Nmit srah kʼraa to ma. Tna meen raa mmit srah kʼanu feto ye fee. Tna soh raa mno bo ro mkair mai kʼanu to, kmo ana ma. Feto tna soh anu nno bo ro mkair mai kʼraa to, kbe ana kmo anu fee ye.
LUK 6:38 Noo bo nee kʼraa. Tna meen raa moo bo mee kʼanu ye. Kbe moo bo mninon mee kʼanu. Soh anu noo bo mase nee kʼraa to, meen ana moo bo mase mee kʼanu ye. Tna soh anu noo bo kebet sai nee kʼraa to, meen ana moo bo kebet sai mee kʼanu mfi feto ye.’”
LUK 6:39 Tna Yesus ykyas bofret kʼana yawe, “Raa ro yasu mboh sait ja yamo yatim tna ybo raa yasu mboh anya sait fee. Soh mamo su feto to, kbe ana mbewok mbtek mawe mam kayah mato ye.
LUK 6:40 Kuber sait ja yase yiwer guru rait fee. Guru rait kbe yber ait mkak wia to. Tna fo ait yhar bo mnan anya yfi guru rait ye.
LUK 6:41 Soh knuf ro maboh sau mhau kʼnyõ nasu mato to, fyi re nyõ ksoh nmat knuf maku ro mhau kʼnafoh anyõ yasu mato rait? Menohe nyõ nwase knuf sau mhau kʼnyõ nasu anu ye.
LUK 6:42 Fyi re nyõ nawe kʼnafoh anyõ nwe, ‘Nama, jõ tmen knuf ro mhau kʼnyõ nasu mato to.’ Ja nyõ nesait nmat knuf ro mhau kʼnyõ nasu mato to fee. Sioh nyõ ma! Nmen knuf maboh ro mhau kʼnyõ nasu to wia. Tna fo nyõ nasu nmat bo kaket re kbe nmen knuf maku ro mhau kʼnafoh anyõ yasu rait to.”
LUK 6:43 Tna Yesus ykyas yawe, “Ara ro mara moof to, kbe make rau to mkair fee. Tna ara ro mara mkair to, kbe make rau to moof fee.
LUK 6:44 Ara ro mros sau. Mfi bo raa wase ara reto masom to, kbe yamo ymat make rau. Tna yhar. Ja raa saso kake make mbam abumun mara to fee. Tna saso anggur make mbam hyoh to fee.
LUK 6:45 Tna awya ro yhaf moof to, ja bo ro moof mbam yhaf mato rait frok. Tibyo bo ro yno to moof. Tna bo ro ykyas to moof ye. Tna awya ro yhaf mkair to, ja bo ro mkair mbam yhaf mato rait frok ye. Ait yhaf mato mkair sai. Tibyo ja yno bo ro mkair tna ykyas bo ro mkair ye.”
LUK 6:46 “Anu ja ntu Jõ nwe Jõ Tuhan ranu, menohe anu nri bo ro Jõ tawe kʼanu to fee.
LUK 6:47 Awya ro yama yo kʼJõ tna yari bo ro Jõ tkyas re ybo yno to, ait ynan fi raa ro yhar bo.
LUK 6:48 Ait ro yhar bo to, soh ait retait sgi amah to, ait yno pondasi wia matak kaket. Yabah kayah to miyõ mamo snok mam fraa, tna yno pondasi abyõ mam fraa reto. Tna fo ait sgi amah rait. Sgi mkak tna oom mais tibyo imabo mama. Menohe pondasi rau reto to, raa sgi abyõ mam fraa tibyo amah reto mros matak, matu fee.
LUK 6:49 Raa taro mari bo ro Jõ tkyas menohe ana mbo mno fee. Ana weto mfi ait ro sgi amah rait tna yse pondasi wia mte fee. Ait retait sgi mkak tna oom mais tna imabo mama mayõ. Tibyo amah rait reto matu fooh tna sasi-sasa.”
LUK 7:1 Raa makin mari Yesus ykyas bo weto beta to, mkak. Tna fo yasen yamo snok mam remo ro Kapernaum.
LUK 7:2 Tna raa sbe ro yase sait yhau mam Kapernaum. Ait retait yamo aban mana ro ja ybo raa sbe ro Roma majin sau. Ti reto to, sryan ro ja yisoh bo rait sait kiyam, kene wo yhai oh. Bi ait hasu sryan rait retait.
LUK 7:3 Ati ro aban mana retait yari raa mkyas Yesus, ait ytu raa manes ro agama Yahudi baro mama. Tna ybis ana yawe, “Nmo saso Yesus. Tna nwe Ait yama yisoh sryan ajõ ye!”
LUK 7:4 Raa weto mari feto tna mamo mo kʼYesus. Ana soh-soh kʼAit mawe, “Aban mana retait tait, raa ro yhaf moof toni. Tna mfo refo sryan rait kiyam msai. Tna bi ait yawe Nyõ namo nisoh ait.
LUK 7:5 Anu, raa mana ro Yahudi to, Ait hasu. Bi ait yatmof anu. Tii ait yoo pitis tna re sgi samu watum ranu to.”
LUK 7:6 Yesus yari feto tna yasen ysya ana mamo. Ana mamo kene mam samu ro aban mana rait to, tna bi ait yafoh na baro mama fri ana. Yafoh wait weto mawe kʼYesus mawe, “Aban mana retait yawe Nyõ namo ma! Mbau a. Yawe ait fi raa ro ati fee tna Nyõ fi raa ro nase toni. Feto to yawe Nyõ namo twok mam amah rait to ma.
LUK 7:7 Feto oh mi aban mana retait yawe, ‘Jõ takah tabo tama to kʼNyõ fee.’ Yawe, ‘Nyõ nhau tore teto sai tna nawe sai. Nawe sai afo re sryan ajõ retait kiyam mrok marak.’
LUK 7:8 Aban mana retait yawe, ‘Jõ thar tawe raa kinyah ja mari bo kʼraa mase ro mbo ana. Jõ tesait ja tari bobis ro mbam kʼraa ro mase woJõ ye. Tna raa sbe ro kinyah ja mari bo ro jõ tawe ye. Soh jõ tbis bo kʼraa sbe sait, ait kbe yari tna yasen yamo tu oh. Tna soh jõ ttu raa sbe taro sait tawe yama to, kbe ait yasen yama ye oh. Tna soh jõ tbis bo kʼsryan ajõ tawe, “Nno bo reto.” Kbe ait yari ybo yno tu oh! Tna Nyõ to nase toni niwrek jõ ye. Soh Nyõ nawe kiyam marak to, kiyam reto mari tibyo marak tu oh.’”
LUK 7:9 Yesus yari bokyas reto tna yrok ktak. Ait siur tna ymat raa mawat ro kro Ait yawe, “Ja raa ro mhau mam tabam ro Israel fo, bosmot wana matak fee. Menohe ait refi bosmot rait matak toni!”
LUK 7:10 Tna raa manes ro riwai aban mana rana ybis weto hah mamoʼt amah rait. Ana ntwok mamoʼt amah mato tna mmat he sryan retait kiyam rait marak oh tna yrok yoof oh.
LUK 7:11 Tna Yesus yasen yamoʼt remo sau ro masom Nain. Kuber wAit msya raa mawat taro mamo su kro Ait.
LUK 7:12 Ana mamo snok mam remo makit reto si fo tna raa ngkatar hai sau frok mama. Hai reto fai ro semit sau, ku sme rau sait aran yum sai. Raa ro remo reto mawat msya fai au ro semit reto mtar hai reto.
LUK 7:13 Tuhan Yesus ymat fai au ro semit reto tna yatmof au. Ait sraujin toni ye tna yawe, “Tme, nawia ma.”
LUK 7:14 Ait yamo kait yo kʼana tna ybo sese reto. Tibyo raa ro ngkatar sese reto mros. Tna Yesus yawe, “Akut, nasen oh!”
LUK 7:15 Mere retait yrok yasen hre ykyas bo. Tna Yesus ysan ait kʼyme.
LUK 7:16 Raa beta mmat feto tna waa, tetet. Tibyo ana mbaut Allah mawe, “Allah ybis Nabi ro yase sait frok yama yo kʼanu oh! Allah yama ybet raa wAit oh!”
LUK 7:17 Bo msai ro Ait yno reto to, raa mkyas faram mamo snok mam provinsi ro Yudea beta msya rabin roto taro ye.
LUK 7:18 Kuber ro Yohanes mari bokyas reto ye tna mamo mkyas bo weto beta kʼYohanes.
LUK 7:19 Tna Yohanes ybis ana mabo ewok yawe, “Nmo no kʼYesus, tna ntu bo kʼAit nwe, ‘Nyõ fi Mesias ro tiwya Allah ysi yawe kbe yama oh mefi, fe mfe a? Kbe amu ne ste raa roto sait hayah a?’”
LUK 7:20 Kuber mabo ewok reto mamo mo kʼYesus tna mawe, “Yohanes ro ja baptis raa tait ybis amu nma fo. Ybis amu nma ntu bo kʼNyõ nwe, ‘Nyõ fi Mesias ro tiwya Allah ysi yawe kbe yama oh mefi, fe mfe a? Kbe amu ne ste raa roto sait hayah a?’”
LUK 7:21 Mam ati reto ana mmat Yesus yisoh raa ro kiyam mawat, tna yikyak kabes mawat, tna yatmof raa ro masu mboh tna yisoh ana re mmat bo.
LUK 7:22 Tna Ait yawe kʼana mbewok yawe, “Hah ne nmo no kʼYohanes tna nkyas bo ro anu nmat ye tna nri ye: Nwe, ‘Raa ro masu mboh to, mfo refo ana mmat bo. Raa ro maa mhai to, mfo refo ana masen mamo. Raa ro mafa kusta to, mfo refo ana mrok moof. Raa ro mimara mtuk to, mfo refo ana mari bo oh. Raa ro mhai to, Ait yawe sai to, tibyo ana mrok masen. Tna raa ro masu awe to, mari Bokyas Moof ro mbam kʼAllah.’
LUK 7:23 Tawe kbe Tuhan yno bo ro moof kʼraa ro mmat bo ro Jõ tno tna beroh smot Jõ fares to.”
LUK 7:24 Kuber ro Yohanes wait hah mamo, tna Yesus yasen ykyas Yohanes kʼraa msis-sas weto. Ykyas yawe, “Tiwya anu nmoʼt yuk ro riamo nwe nmat Yohanes. Nmo to, anu nnaut nwe nmat bo bawya meto? Anu nmo nmat nkrum ro foos mfi matu wewe mamo-me to a? Mfe, Yohanes tait raa ro yros yatak. Ait raa ro sneh sai fee.
LUK 7:25 Tiwya anu nmo nmat ait re nmat bawya? Anu nmo nmat bobot sait ro yyum ratan ro sne rauk? Mfe ye, bobot ro myum ratan ro moof to, ja mhau bana mam amah ro moof sai.
LUK 7:26 Tawe kʼanu u tawe, anu nmo saso bawya mam tabam ro riamo reto to? Anu nmo saso nabi ro Allah ybis yama rauk? Ae! Yohanes tait nabi ro Allah ybis sait yama. Yama to, yase yiwer nabi na roto ye.
LUK 7:27 Yohanes retait oh mi tiwya Allah ykyas mam Bokom rAit sau. Bokom reto mawe, ‘Meen Jõ tbis raa sait yama ykyas bo woJõ yatim wia tna Nyõ nrof. Kbe ait siwyan iso kʼNyõ.’”
LUK 7:28 Tna Yesus yawe, “Nnaut oh: Raa ro tabam refo aro mase miwrek Yohanes fee. Menohe mam raa mana ro Allah yamo Raja ybo to, raa ro kinyah to, ana mase miwer Yohanes ye.”
LUK 7:29 Raa makin ro mros mari Yesus ykyas bo to, ana taro raa ro moo namabyoh (pajak) ye. Ana weto tiwya mari bokyas ro Yohanes ykyas ye. Tna Yohanes baptis ana ye. Tibyo ana weto waa Allah tna mari bo ro Yesus yawe. Mawe, “Esre.”
LUK 7:30 Menohe raa ro Farisi msya guruagama ro Yahudi mawe Yohanes baptis ana ma. Tibyo ana hawe bo mari watum mbam Allah ro Yesus ykyas reto ye.
LUK 7:31 Tna Yesus yawe, “Raa ro mhau mfo refo to, mfi awya? Jõ fret bo tawe anu fo raa ro haberek nfi kukek: Anu nnan kukek ro hre mam pasar msom. Tna ana baro mawe kʼanya mawe,
LUK 7:32 ‘Riwai anu sioh bsom-sam mnan fi anu bkyõ bokyõ: Amu nfi oor, tna nji howes ye, afo re kbe anu bsyoh, menohe anu nsyoh fee! Tna fo anu sioh bsom bfi raa ro mhai, menohe anu taro hawe bo nwia hai reto! Nsom nno fyi!’”
LUK 7:33 Tna Yesus yawe, “Tiwya Yohanes ro ja baptis raa yama. Anu nmat ait tibyo nkyas nwe, ‘Ait yhau bo yait tna yata anggur maya fee. Ait kabes mama mbo.’
LUK 7:34 Tna Jõ fi, 'Ait ro Yroh Yama Yfi Raa Sai'. Jõ tama to, tfi Yohanes fee. Jõ tama to, ja thau bo tait fee. Tna tata anggur maya ye. Menohe anu nwe kair Jõ nwe, ‘Ait retait yait boit yasmamo! Ait retait raa ro ja yata anggur maya bisir yoyo! Tna yafoh wAit to, raa ro ja mno iro msya raa ro ja moo namabyoh mee kʼpemerintah bo ye!’
LUK 7:35 Menohe Jõ tawe kʼanu tawe, bo moof ro Yohanes ysya Jõ nno to, merif kʼanu mawe Allah oh mi ybis amu nbewok nma to.”
LUK 7:36 Bi ro Farisi sait yasom Simon. Ait ymen Yesus yamo yait bo mam amah rait. Tna Yesus yamo hre yait boit ysya ait su.
LUK 7:37 Menohe fai ro ja mno iro sau mhau mam remo reto ye. Au mari he Yesus yamo yait boit su ysya Simon. Tibyo fai au masen moo minyak wangi kusia sau ro au mse to, moo tna makah mamoʼt amah reto.
LUK 7:38 Au mros manwaruk mam ati ro Yesus kbor tna mawia sut-sut. Mukan rau to mbtek mam Yesus yaa tna au skur mana mawyan rau moo ngkaru Ait yaa ye. Tna au maka hana Yesus yaa tna moo minyak wangi ro au mbo to, maas Ait yaa ye.
LUK 7:39 Tna Simon ymat sas bo ro au mno feto. Tibyo ait ynaut bait yawe, “Soh Ait refi nabi sait ro Allah ybis yama feto to, kbe Ait yhar yawe fai au ro mbo Ait reto ja mno iro.”
LUK 7:40 Tna Yesus yawe kʼbi ait, yawe, “Jõ tawe tkyas bo baro kʼnyõ.” Tna Simon yawe, “Guru; nkyas oh.”
LUK 7:41 Yesus yawe, “Mfi bo raa mabo ewok mamo mhe pitis kʼbi sait. Tna ait sait yhe pitis 500 dinar. Tna ait sait yhe 50 dinar.
LUK 7:42 Snyi firwas snyi tna raa mbewok reto mtai misya pitis reto fee. Tna bi ro yoo pitis wait yee kʼana to yawe, ‘Pitis reto mhau oh.’” Tna Yesus ytu bo kʼSimon yawe, “Nnaut anyõ fyi? Raa mabo ewok reto to: Awya ro mi ksoh bi ait retait toni?”
LUK 7:43 Simon yawe si yawe, “Tnaut tawe ait ro yhe pitis mase to ksoh bi ait miwer.” Tna Yesus yawe, “Ae, bokyas ro nyõ nkyas reto mabo oh.”
LUK 7:44 Ait haberek ymat fai au reto tna yawe kʼSimon yawe, “Nmat fai au reto. Riwai Jõ twok mam amah anyõ to, nyõ noo aya aro nee kʼJõ tyon taa fee. Menohe fai au mesait myon Jõ taa mkah mukan tna ngkaru mkah mana mawyan rau ye.
LUK 7:45 Tna nyõ aro hana Jõ fee. Menohe maban riwai Jõ twok si hre mam befo to, au hana Jõ taa to mswior fee.
LUK 7:46 Nyõ aro naas minyak mam Jõ tana fee. Menohe fai refo maas minyak wangi mam Jõ taa aJõ.
LUK 7:47 Feto to Jõ tawe kʼnyõ tawe, ‘Fai au refo mhafri Jõ. Feto tibyo: Iro mawat ro au mno to, Jõ tyon beta oh. Menohe awya ro yno iro kebet sai to, tna raa yyon to, kbe ait ksoh raa ro yyon retait kebet sai.’”
LUK 7:48 Tna Yesus yawe kʼfai au refo yawe, “Iro wonyõ, Jõ tyon oh.”
LUK 7:49 Tna ana ro hre mait bo su msya Ait to mtu kʼanya mawe, “Ait fi awya oh mi yawe yyon iro raa anya to?”
LUK 7:50 Tna Ait yawe kʼfai au yawe, “Nyõ smot Jõ tibyo tawe riof kʼnyõ oh. Feto namo oh.”
LUK 8:1 Tna Yesus yasen yamoʼt kota msya remo roto taro sor. Yamo ykyas Bokyas ro Moof: Ykyas raa mana ro Allah yamo Raja ybo. Tna kuber wAit mabo 12 weto msya Ait mamo ye.
LUK 8:2 Tna fnya baro kro Ait mamo ye. Tiwya ana weto baro kiyam tna Yesus yisoh ana moof. Tna fnya weto taro to tii kabes mbo. Tna Ait yisoh ana moof ye. Sau masom Maria Magdalena. Tii Yesus yikyak kabes mabo ngkrema ro mbo au to, frok mamo.
LUK 8:3 Ana weto sau masom Yohana. (Au fo bi Khuza yfain. Ait yamo pegawai ro raja Herodes.) Tna sau masom Susana. Tna fnya roto taro naut mros mban Yesus ysya kuber wAit mam tis ye.
LUK 8:4 Raa mbam remo tyo-teya sai myar mama mo kʼYesus. Raa mawat mama tna Ait ykyas bofret sau yawe:
LUK 8:5 “Raa sait yno armato rait sau. Tna ait yamo furere bobat manaf. Ait furere bo to, bo manaf taro mbtek mam iso. Tibyo bo manaf weto to, taro raa mber makus. Tna taro to, ruu mama mame mkak.
LUK 8:6 Tna bo manaf taro to, mbtek mam fraa abyõ. Bobat weto mo maut fooh. Menohe tabam ro mka mamos aro fee. Tibyo mtis rau samer tna mata hroyoh.
LUK 8:7 Tna taro naut btek mam wore hyoh muuf ye. Tna hyoh muuf weto mo betru kait.
LUK 8:8 Tna taro mbtek mam tabam ro mamos. Tna mo maut. Tibyo make sarer toni: Bo manaf sau-sau to, make rau trion 100 bo feto.” Yesus ykyas bofret reto mkak tna yawe kʼana yawe, “Anu ro nri bokyas reto oh to, nnaut kaket!”
LUK 8:9 Kuber wAit mtu mawe, “Bawya oh mi nyõ nkyas bofret reto to? Sik betoo maja rau.”
LUK 8:10 Tna Yesus yawe, “Raa mana ro Allah yamo Raja ybo to, maja wau baro to, raa wase fares. Maja wau weto to, Allah ksoh re anu nsrau nnaut kaket. Menohe raa taro to, ja Jõ tkyas bofret kʼana sai. ‘Raa kbe mmat sas bo refo. Ana mmat sas menohe wase bo reto fares. Ana kbe mari bo refo. Ana mari, menohe srau fee ye.’”
LUK 8:11 Tna Yesus betoo bofret reto kʼana yawe, “Bo manaf reto to, Bokyas ro Allah oh meto.
LUK 8:12 Bo manaf ro mbtek mam iso to, mkyas mawe raa ro mama mari Bokyas ro Allah. Mari menohe kabes yabi (Iblis) yama tna safto bokyas mbam kʼana mhaf wana. Tibyo ana smot Allah fee. Feto tibyo ana mkai riof ro mase fee ye.
LUK 8:13 Bo manaf ro mbtek mam fraa abyõ to, mkyas mawe raa ro mama ksoh mari Bokyas ro Allah. Menohe Bokyas reto ana moo mse mhau mam mhaf mato wana waor sai. Ana mbo matak fee. Bo ro samyoh mama mai kʼana to, ana mbtek mawe, tna smot Tuhan u fee.
LUK 8:14 Bo manaf ro mbtek mam wore hyoh muuf to, mkyas raa ro mari Bokyas ro Allah ye. Menohe ana mhau to, mnaut yyi. Tna ana mnaut bosatoh ro moof mam tabam refo sai. Tna ana nksoh mhau moof bana mam tabam refo sai. Bo weto moo ana mhaf re ana mnaut Bokyas ro Allah fee. Tibyo bosmot wana matak fee. Ana tufrok make ro maku sai, tna bo make wana weto manes fee.
LUK 8:15 Bo manaf ro mbtek mam tabam ro mamos to, mkyas mawe raa ro mhaf reo mari Bokyas ro Allah. Mari tna mbo mse kaket mam mhaf mato wana. Tibyo ana weto kbe mberoh mros matak, tna tufrok make ro moof.”
LUK 8:16 Yesus yawe, “Ja raa mbet tafoh (pelita) afo re ntara raa ro twok mam amah mato. Raa moo mse mte tna moo bo burut wa fee. Tna mmyõt wai mam ambar ro mjin mte to fee ye. Menohe tafoh reto to, ja raa hero abyõ afo re kbe kek ntara tna raa ro mama twok mam amah mato reto mmat.
LUK 8:17 Bo bawya ro raa mmyõt to, meen raa masbrer. Tna bo bawya raa mkyas kmun-kmun to, meen raa beta mari.
LUK 8:18 Reto oh mi tawe nri tna nnaut bokyas aJõ kaket! Awya ro yari tna ybo yno to, kbe Allah yno re ait retait yasu maah. Menohe awya ro yari tna hawe yse mam yhaf kaket to, kbe Allah yno re bohar rait to mabuf sai.”
LUK 8:19 Yesus yme msya yao na mama mo kʼAit. Menohe raa mawat tibyo ana mamo kene msya Ait fee.
LUK 8:20 Tna raa sait yama yawe kʼYesus yawe, “Nme msya nao na mros ste mne meu. Ana ksoh fri Nyõ.”
LUK 8:21 Menohe Yesus yawe, “Raa ro mari Bokyas ro Allah, tna mbo mno kaket to, ana weto Jõ ttu tme msya tao na woJõ oh meto.”
LUK 8:22 Ti sau to, Yesus yawe kuber wAit yawe, “Nma anu buut wiak frit bmoʼt maru refo ati tino.” Tibyo ana maut wiak mamo.
LUK 8:23 Ana mamo mamo tna Yesus yjin tu mam wiak mato. Yjin tna foos frok tubor mama mai wiak rana. Tna figyõm mase mai maut mam wiak mato ye tna mabo kait ana beta. Wiak wana kene wo hoh.
LUK 8:24 Tna kuber wAit mti Yesus mawe, “Guru, guru, kbe anu bsu!” Yesus yrok yasen tna yifau foos msya figyõm ro safo weto yawe, “Nnem oh!” Tibyo foos msya figyõm reto mrok mnem. Tna maru reto mrok snef u.
LUK 8:25 Tna Ait ytu kuber wAit yawe, “Fyi re anu smot Jõ fee?” Ana mrok miskawowo tna waa. Tna mkyas kʼanya mawe, “Bi Ait refi yatak yifau foos msya figyõm wefo mari. Bi Ait refi fi awya mefi?”
LUK 8:26 Yesus ysya kuber wAit frit maru reto snok mam ati jaro. Ana riwai mbam provinsi ro Galilea tna frit mamoʼt rabin ro Gerasa.
LUK 8:27 Ana frok tna Yesus yaut mne. Tna raa ro kota reto sait yama tru Ait. Raa retait kabes mbo tibyo yyum ratan fee ti ooh oh. Tna ait yhau mam amah fee, ait ja yhau mam isra mato ro raa mse hai sai.
LUK 8:28 Tiwya kabes mama mbo raa retait ti aro rau-rau. Tibyo raa moo rantai make ait yatem msya yaa, tna kmot ait ye. Menohe kabes mno ait yatak tibyo yahri rantai beta hri. Yahri rantai reto tna ysam yamoʼt yuk ro riamo. Tna he Yesus yama. Ait ro yker ymat Yesus tibyo kakyah tna yama yo kʼAit kait tna yaka tmi yimna tna heyut Yesus. Tna Yesus yikyak kabes frok mbam ait yawe, “Snok oh!” Tna raa retait yawe, “Yesus; Nyõ fi Allah yare. Allah tait yase toni. Kbe Nyõ nno bawya kʼjõ? Jõ soh-soh kʼNyõ tawe sikowah jõ ma!”
LUK 8:30 Tna Yesus ytu kʼait yawe, “Nyõ nasom awya?” Tna raa retait yawe, “Kabes mawat mbo jõ. Tibyo jõ tasom ‘Legion.’”
LUK 8:31 Tna kabes weto soh-soh kʼYesus hri mun aro rau mawe, “Nbis amu frok nmoʼt sawro wore wo kabes ja mhau to ma!”
LUK 8:32 Kene msya yuk reto ye fane mawat mau bana mam faut sau. Tna kabes weto soh-soh kʼYesus mawe, “Nbis amu frok nmo twok mam fane wore wono!” Tna Yesus ybis yawe, “Nmo oh!”
LUK 8:33 Tna kabes weto mari tna frok mamo twok mam fane weto. Tna fane weto mrok mker tna mhoh tbat mam rakak reto btek mam maru. Tna fane weto msu tibyo mhai beta mkak.
LUK 8:34 Raa ro kmot fane weto mmat bo ro Yesus yno. Feto tibyo ana masen fooh mhoh mamo mkyas kʼraa mam kota reto tna mkyas kʼraa ro mhau kene ye.
LUK 8:35 Tibyo raa masen myum mamo mmat. Ana mroh sia mamoʼt maru mne mo kʼYesus. Mamo tna mmat he raa ro yker retait hre mte ysya Yesus. Kabes frok marak oh. Ait yyum ratan. Tna srau yakit rait moof oh. Ana mmat feto tibyo mrok waa.
LUK 8:36 Raa ro riwai mmat bo ro Yesus yno weto mkyas betoo kʼraa mawe Yesus yisoh raa ro kabes mbo retait yoof oh.
LUK 8:37 Raa weto mari tna mrok waa. Tibyo ana ro mbam rabin ro Gerasa beta to, soh-soh mawe Yesus frok sikba rabin rana reto yamo. Tna Yesus yawe yaut wiak yamo.
LUK 8:38 Tna raa ro riwai yker retait soh-soh kʼYesus yawe, “Jõ kro Nyõ bmo ye!” Menohe Yesus yawe kʼait yawe, “Nyõ kro ma.
LUK 8:39 Namo no kʼraa wonyõ. Tna nkyas bo msai ro Allah yno kʼnyõ.” Tibyo raa retait yamo ykyas bo msai ro Yesus yno kʼait reto. Ait yamo ykyas bo reto kʼraa ro mhau mam remo rait reto beta.
LUK 8:40 Yesus ybam maru maam tino hah ye yama tna raa beta ste Ait wea. Ana ksoh myum mama mtar Ait.
LUK 8:41 Tna bi yabi ro ybo samu watum raa ro Yahudi sait yama. Ait retait yasom Yairus. Ait yama yaka heyut Yesus tna soh-soh kʼAit yawe, “Guru; namaʼt amah ajõ.
LUK 8:42 Nama nisoh ku ajõ ye! Au fo ku ajõ tomu sai. Umur rau to tahun 12. Tna au kiyam, kerit wo mhai.” Yesus yari bo ro bi ait yawe feto tna yamo. Yamo mam iso maka menohe raa msis-sas beak-ak anya kro Ait mamo ye.
LUK 8:43 Tna fai sau mama miir ratan ro Yesus rAit. Fai au fo mafa mees ro fnya yoyo tahun trion 12 oh. Tiwya raa mawat mama tkif fai au oh. Menohe raa ro mtai misoh au aro fee. [Feto mamo snok tis rau to, pitis wau marak. Tna mees rau reto miyõ sai fares.] Fai au mama kait mo kʼYesus mam tis tna miir ratan rAit makit sai. Au miir ratan rAit si fo, tna mees rau reto mrok mnem.
LUK 8:45 Tna Yesus yawe, “Awya oh mi miir Jõ fo?” Raa saak ana. Tna Petrus yawe, “Guru; nmat raa mawat beak-ak anya fefo! Fyi re Nyõ ntu feto?”
LUK 8:46 Menohe Yesus yawe, “Tna sai Jõ tari he tatak aJõ frok mbam kʼJõ. Tibyo thar tawe raa miir Jõ.”
LUK 8:47 Fai reto mhar mawe bo ro au mno reto raa mhar oh. Tna au tetet mhai mama mo kʼYesus. Au maka hartu Ait tna mkyas kiyam rau reto tna mawe, “Jõ au oh mi riwai tama tiir ratan aNyõ to. Tibyo kiyam ajõ mrok mnem buu.” Mkyas bo reto tna raa beta mari.
LUK 8:48 Tna Yesus yawe, “Ku aJõ, nyõ smot Jõ tibyo kiyam anyõ reto marak. Riof kʼnyõ oh. Nasen namo oh.”
LUK 8:49 Yesus ykyas bo fares tna raa sait ybam samu bi Yairus yama. Tna yawe kʼYairus yawe, “Ku anyõ reto mhai oh. Nno bi Guru ysui aro u ma.”
LUK 8:50 Menohe Yesus yari bokyas reto to, yawe kʼYairus yawe, “Waa ma, smot Jõ sai. Smot Jõ nawe Jõ tatak tisoh au. Tna ku anyõ kbe mrok moof u.”
LUK 8:51 Ana mamo tna snok mam amah ro Yairus. Tna Yesus yawe kʼPetrus, Yohanes ysya Yakobus yawe, “Anu nbo tuuf sai kro Jõ twok mam amah mato. Anu nbo tuuf nsya ku au maja, mme sai twok mam amah. Raa taro beta mhau mne sai.”
LUK 8:52 Raa beta ro mhau mne to, sraujin tna mawia hai reto. Menohe Yesus yawe, “Nwia ma! Ku reto mhai fee. Au mjin sai meto!”
LUK 8:53 Menohe ana masah Yesus. Ana mhar mawe ku reto mhai tibyo oh.
LUK 8:54 Yesus yamo yo ku au tna ybo matem sau yawe, “Ku aJõ, nasen oh!”
LUK 8:55 Ku reto mafos rau hah me si fo, tna au masen mros. Tna Yesus ybis raa moo boit mee kʼau mait.
LUK 8:56 Yairus ysya yfain ana mrok miskawowo toni. Tna Yesus yawe kʼana yawe, “Nkyas bo refo renti kʼraa ma!”
LUK 9:1 Ati sau to, Yesus ytu kuber wAit mabo 12 weto mama mo kʼAit. Tna Ait yoo yatak rAit yee kʼana re kbe ana mikyak kabes beta ro mbo raa, tna misoh raa ro kiyam ye.
LUK 9:2 Tna Ait ybis ana mamo misoh raa ro kiyam tna mkyas wore wo Allah yamo Raja ybo raa mana rAit.
LUK 9:3 Tna Yesus yawe kʼana yawe, “Nmo ntem marak sai, nbo armuk ma, krek yume ma, nbo boit ma, nbo pitis ma, tna nbo ratan roto taro ro kbe nyum to ye ma.
LUK 9:4 Ati ro anu twok mam remo to, soh raa sait yoo anu yse mam amah rait to, nhau oh nsya ait mam beto mamo snok mam wore anu nsen sikba remo reto.
LUK 9:5 Ati ro anu twok mam remo taro to, soh raa mitrah amah wana kʼanu fee, tna hawe bo mari bo ro anu nkyas to, feto ati ro anu sikba remo reto nmo to, bes-baas bohasyaf ro mhau mam naa to akus sai. Nno feto afo re ana weto mhar mawe anu bitsre ana akus. Ana hawe bo mari bo ro anu nkyas. Feto tibyo ana mesait oh mi misti kair ro meen mama mai kʼana reto.”
LUK 9:6 Tna ana mabo 12 weto masen mamo mno bo ro Yesus ybis kʼana. Ana mamo tiyo-teya sai mkyas Bokyas Moof reto tna misoh raa ro kiyam ye.
LUK 9:7 Raja Herodes tii ybis raa mame Yohanes yajat. Tna ait yari bo ro Yesus ysya kuber wAit na mabo 12 mno to. Raa taro mkyas mawe Yesus tait, Yohanes ro tii yajat tna yrok yasen. Tibyo raja Herodes ynaut yyi ait.
LUK 9:8 Tna yari he raa taro mkyas mawe Yesus tait nabi Elia frok yama u. Tna taro mawe Yesus tait nabi roto sait ro tii yhai tna yrok yasen.
LUK 9:9 Tna raja Herodes yawe, “Ait retait Yohanes fee: Tiwya jõ tbis raa ktan Yohanes yana yajat oh. Ait ro raa mkyas retait tait awya?” Tna raja Herodes yawe yamo ymat Yesus.
LUK 9:10 Ti baro firwas tna kuber ro Yesus wAit mabo 12 weto hah me. Tna ana mkyas kʼAit mawe bo ro ana mno beta. Tna Yesus ymen ana mesait kar mamoʼt kota ro Betsaida.
LUK 9:11 Menohe raa mari he ana mamoʼt Betsaida. Tibyo ana mawat masen mamo mo kʼAit mam beto. Ait yawe ana mama rof oh tna yasen ykyas bo kʼana ye. Ait ykyas wore wo Allah yamo Raja ybo raa mana rAit. Tna yisoh raa ro kiyam to ye.
LUK 9:12 Ayõ kene hawer oh tna raa mawat mhau mari bo ro Yesus ykyas fares. (Raa sme mabo trion 5000 bo feto.) Tna kuber wAit mabo 12 weto mama mo kʼYesus mawe, “Yuk refo fo riamo. Nbis raa wefo masen mamo rof re kbe ana saso boit ro mait aro msya yuk ro mjin. Kbe ana saso mam remo msya kota ro mhau kene mam wefo sor.” Yesus yawe, “Anu nesait noo boit aro nee kʼana mait.” Menohe kuber wAit mawe, “Amu nse roti maat msya syoh mana ewok aran sai fo. Nyõ nawe amu nmo saso boit mkah nee kʼraa mawat wefo mait a?” Tna Yesus yawe, “Mfe. Nbis raa beta hre mte. Nwe ana mabo 50 bo feto hre kbair sau hayah-hayah.”
LUK 9:15 Kuber wAit mari tna mbis raa msis-sas weto hre mte.
LUK 9:16 Tna Yesus yoo roti maat msya syoh mana ewok reto ybo. Tna heyut mam ayoh yayoh asik mase kʼAllah. Tna Ait haber roti weto tna yiti syoh mana reto tna yee kuber wAit yawe ana saim kʼraa ro hre weto.
LUK 9:17 Raa weto mait tna mhaf matu beta. Menohe roti mabuf taro to msis mhau fares. Kuber ro Yesus wAit soo roti weto tna mfau mam keranjang trion 12 matot.
LUK 9:18 Ti sau to, Yesus yesait skabuk kar. Tna kuber wAit mama mo kʼAit. Tna Ait ytu kʼana yawe, “Raa makin mnaut mawe Jõ fi awya?”
LUK 9:19 Kuber wAit mawe, “Ana taro mawe, Nyõ fi Yohanes ro ja baptis raa. Tna taro mawe, Nyõ fi nabi Elia. Tna taro mawe Nyõ fi nabi roto sait ro tii yhai tna yrok yasen fo.”
LUK 9:20 Tna Yesus ytu kʼana yawe, “Bonaut ranu nesait nwe Jõ fi awya?” Tna Petrus yasen yawe, “Nyõ fi Mesias ro nbam Allah nama.”
LUK 9:21 Tna Yesus yawe wa ana yawe, “Nkyas bo refo renti kʼraa to ma.
LUK 9:22 Jõ fi 'Ait ro Yroh Yama Yfi Raa Sai'. Kbe meen Jõ tkai bo ro samyoh mawat btek mai kʼJõ. Raa ro agama Yahudi kbe mikyak Jõ: Raa mabi wana ye, imam manes wana ye, tna msya guru agama wana ye. Jõ kbe raa mame tajat, tna ti ro tuuf to, Taja yno tibyo Jõ trok tasen.
LUK 9:23 Anu awya sai ro ksoh kro Jõ to, nko hawe sai kbe nno mfi fefo: Nno bo wanu u ma. Tna rabu wawa nwe nsom ara warok wanu sait-sait: Au oh mi nko hawe sai beroh nsom bo mase ro kbe mama mai kʼanu. Tna beroh nkro iso ro Jõ terif kʼanu.
LUK 9:24 Raa taro mawe misoh metsu rana ai mam tabam refo. Ana saso riof rana mam tabam refo sai ai menohe mnaut mamos rana fee. Meen ana weto mhau hame wajin fee. Menohe raa taro mawe mhau saso riof rana ai mam tabam refo fee. Ana mawe mno bo woJõ. Ana saso Jõ tasom aJõ mam tabam refo. Ana weto oh mi kbe mkai riof kʼana. Ana kbe meen raa mame majat oto, menohe meen mkai riof ro hame wajin.
LUK 9:25 Mfi bo raa sait ykai kta mam tabam refo to beta menohe ykai riof mase fee. Meen mafer rau to bawya?
LUK 9:26 Jõ fi 'Ait ro Yroh Yama Yfi Raa Sai'. Meen Jõ hah tama u. Tna raa mmat tase aJõ. Tna raa mmat bo yase ro Allah rAit msya malaikat wAit ye. Menohe mfo refo, wore wo raa mhau mam tabam refo fares to, raa taro to hawe kro Jõ. Mawe ana saban mkyas Jõ tasom. Ana ro hawe Jõ feto to, meen ati ro Jõ hah tama u to, kbe Jõ hawe ana ye.
LUK 9:27 Nri oh! Meen anu baro nmat raa mana ro Allah yamo Raja ybo to, mama frok tubor. Frok to, anu ro nros nsya Jõ mam befo to, meen anu baro nhau fares nmat to. Ati reto to, anu beta nhai marak fefares.”
LUK 9:28 Ti trion krentuuf firwas tna Yesus yamo yaut mam atu sau yawe skabuk. Ait ymen Petrus, Yohanes ysya Yakobus ana msya Ait mamo.
LUK 9:29 Ana mamo maut mam atu reto tna Yesus skabuk. Ait skabuk kri-kri fares to, yetsu rAit to haberek: Yasu ynaif roto, tna ratan rAit mrok ngkren toni. Ngkren mboh toni mnan fi rir ro mrir.
LUK 9:30 Tna ana mmat raa mabo ewok frok tubor mros msya Yesus. Ana mbewok weto to Musa ysya Elia.
LUK 9:31 Ana mbewok ngkren toni ye. Mbewok mkyas bo kʼYesus. Mkyas mawe ati ro kbe mame Yesus yajat mam Yerusalem to kene oh.
LUK 9:32 Riwai Petrus ysya yafoh wait mjin maka, tibyo ana mjin tu. Tna fo ana mrok masen mmat Yesus yase rAit; yetsu rAit mawyah. Tna raa mabo ewok reto mros msya Ait mam wore weto ye.
LUK 9:33 Musa ysya Elia masen mawe mikba yuk reto mamo. Tna Petrus yawe kʼYesus yawe, “Guru; amu ye nhau mam yuk refo to moof toni. Kbe amu sgi sbyah trion tuuf mam yuk refo: Sau kʼNyõ, sau kʼMusa, tna sau ye kʼElia.” (Petrus ykyas sai tna ait wase bokyas rait reto.)
LUK 9:34 Petrus ykyas fares tna byõ mama sro-sro ana kait. Tibyo ana waa.
LUK 9:35 Tna ana mari Raa sait ymai mam byõ mato yawe, “Ait refi Ku aJõ, ro Jõ tsok oh. Nri bo kʼAit!”
LUK 9:36 Mai reto marak, tna ana mmat Yesus yesait kar yros mam weto. Ti mawat firwas tna kuber wAit weto mkyas bo ro ana mmat reto kʼraa wia fee.
LUK 9:37 Rabu ti fo Yesus ysya kuber wAit mroh mbam atu reto. Tna raa mawat myar mama mo kʼYesus.
LUK 9:38 Tna raa ro myar mama weto, sait yasen soh-soh Yesus ytu yawe, “Guru; nama nmat ku ajõ. Ait fi ku sme ajõ tomu sai!
LUK 9:39 Rabu wawa kabes mbo senteta ait. Tna ait wohrarar tna yrok ktor. Tna yafyat frok mam yasoh rait. Kabes reto simoyot-mayat ait, tna au hawe bo frok mbam kʼait ye!
LUK 9:40 Jõ soh-soh kuber woNyõ afo re mikyak kabes frok. Menohe ana matak fee.”
LUK 9:41 Yesus yawe, “Anu wefo mfe saut! Anu wefo raa ro wyahte Allah, tna smot Jõ fee! Kbe thau tsya anu kait fares a? Jõ thaf sneh tsya anu kait ye fee!” Tna Yesus yawe kʼbi retait yawe, “Nbo ku anyõ retait nakah nama!”
LUK 9:42 Raa retait yakah ku rait yama fares to, menohe kabes mabyõ ku retait tna yetsu mrok ktor. Tna Yesus yikyak kabes reto, tna yisoh ku retait yoof. Tna fo yoo ku retait yee kʼyaja u.
LUK 9:43 Raa beta mrok ktak mmat Allah yatak rAit ro mase reto. Raa ktak tna mkyas bo ro Yesus yno fares, tna Ait ykyas bo kuber wAit yawe,
LUK 9:44 Nri oh! Tna nnaut oh: “Jõ fi 'Ait ro Yroh Yama Yfi Raa Sai'. Tna kbe raa moo Jõ msan kʼraa roto mbo.”
LUK 9:45 Bokyas ro Yesus reto, Allah ymyõt maja rau afo re kuber wAit srau mnaut bokyas rAit reto wia fee. Tibyo kuber wAit wase bawya ro Ait ykyas reto. Tna ana waa bo mtu kʼAit ye.
LUK 9:46 Ti sau fo, kuber ro Yesus wAit santri bo kʼanya. Ana mkyas mawe kbe ana to, awya ro yase toni.
LUK 9:47 Yesus yhar bonaut wana wia oh. Tibyo Ait yoo ku maku sau yse ysya Ait mros mam ati jaro.
LUK 9:48 Tna Ait yawe kʼana yawe, “Jõ ksoh anu nitrah nhaf wanu kʼraa ro mhaf sneh. Awya ro yitrah yhaf rait ku refo, ro yno feto mam Jõ tasom aJõ to, ait yno bo moof oh meto. Au oh mi; awya ro ymat raa ro mhaf sneh to, yno feto to mnan anya mfi ait yno bo ro moof reto kʼJõ ye oh meto. Allah oh mi tiwya ybis jõ tama fo. Tibyo awya ro yitrah yhaf rait kʼJõ tait, yitrah yhaf rait kʼbi Allah ye oh meto.” Tna Yesus yawe, “Anu fo, awya ro yaku toni? Jõ tnaut tawe ait retait oh mi raa ro yase to.”
LUK 9:49 Yohanes yawe, “Guru; amu nmat raa sait yikyak kabes mkah tak ro Nyõ nasom aNyõ. Ait tait ja ysya anu bmo su fee. Tibyo amu nwe wa kʼait nwe, ‘Nno feto ma!’”
LUK 9:50 Tna Yesus yawe, “Nwe wa kʼait ma. Awya ro beswan anu fee, ait yhau mam ati ranu.”
LUK 9:51 Tna kene mam wore wo Allah tubat Yesus yamoʼt sawro rAit oh. Feto tna Yesus beroh yawe yamoʼt Yerusalem.
LUK 9:52 Ait ybis raa baro matim wia mamoʼt remo sau mam iso maka. Yawe, “Nmo siwyan bombra wanu beta re kbe amu nma.” Remo reto mhau mam rabin ro Samaria.
LUK 9:53 Menohe raa ro remo reto mhar mawe Yesus tait raa ro agama Yahudi tna yawe yamoʼt Yerusalem. Ja raa ro Samaria miranya msya raa ro Yahudi fee. Feto tibyo ana ro Samaria hawe bo Ait yhau mam remo rana reto.
LUK 9:54 Kuber wAit Yakobus ysya Yohanes mari bo weto to tibyo ana kmo mawe, “Tuhan; Nyõ nawe amu nbis tafoh mbam ayoh mroh mait raa weto fe mfe a?”
LUK 9:55 Menohe Yesus siur ymat ana tna yastako ana yawe, “Nno feto ma!”
LUK 9:56 Tna ana masen mamoʼt remo roto.
LUK 9:57 Yesus ysya kuber wAit kro iso sau mamo. Tna raa sait yawe kʼYesus yawe, “Wore Nyõ namo woyõ-woya sai to, jõ ksoh kro Nyõ bmo ye.”
LUK 9:58 Tna Yesus yawe kʼait retait yawe, “Mtah serigala to, ja mabum mam wafyoh rau. Tna ruu to, ja mabum mam tafat rau ye. Menohe Jõ fi 'Ait ro Yroh Yama Yfi Raa Sai'. Jõ fi, wore tjin aro fee. Soh nyõ nawe kro Jõ to, kbe wore nyõ njin aro fee ye.”
LUK 9:59 Tna Yesus yawe kʼraa roto sait yawe, “Nasen nama kro Jõ.” Menohe raa retait yawe, “Tuhan; nbis jõ tamo wia sama hai ro taja tna fo tama kro Nyõ.”
LUK 9:60 Menohe Yesus yawe, “Namo ma. Ana ro wase Allah to, kbe mesait sama hai wana rof. Jõ ksoh nyõ nasen namo nkyas bo kʼraa. Nkyas wore wo Allah yamo Raja ybo raa mana rAit.”
LUK 9:61 Raa roto sait yawe, “Jõ tawe tama kro Nyõ menohe nbis jõ tamo tmah meen kʼraa wojõ wia.”
LUK 9:62 Tna Yesus ykyas bofret sau yawe, “Raa sait yasen yabah tabam mam ora rait mkah bajak. Yamo, yamo betruk bajak reto, menohe ymat matim fee, haberek ye ymat mam tis. Tibyo yabah tabam reto kaket fee. Feto ye, raa baro mawe masen mkah bo mam armato ro Allah rAit. Mkah bo menohe haberek me mmat tis. Ana weto to, siwyan mamo raa ro Allah yamo Raja ybo to fee.”
LUK 10:1 Tna fo Yesus ysok raa mabo 70 naut. Ait ybis ana mamoʼt kota msya remo wore kbe Ait yamo. Yawe ana mabo ewok-ewok matim wia.
LUK 10:2 Ait yawe kʼana yawe, “Raa makin weto mfi armato ro manes oh. Menohe raa ro matu bo to, mabo kebet baro sai; mnan fee. Feto to, nyoh kʼAllah ro armato rAit afo re Ait ybis raa mama matu bo mam armato reto.
LUK 10:3 Nsen nmo. Tna nnaut oh: Anu fo raa ro nhaf sneh. Tna Jõ tbis anu nmo mam wore wo raa ro mimara mboh mhau. Anu nfi domba maku ro mamo mam wore wo mtah serigala ja mhau.
LUK 10:4 Nmo to nbo surah wiak ma. Tna krek yume ro nfau bo to ma. Nbo sandal roto to ma ye. Tna ati ro anu nmo to, nros iti-iti to ma.”
LUK 10:5 “Ati ro anu twok mam samu sau to, nmah meen kʼraa ro mhau mam samu reto nwe, ‘Riof oh kʼanu beta.’
LUK 10:6 Soh raa ro amah rait reto to, yawe yari riof ro anu nmah to, kbe Allah yno riof kʼait. Soh mfe to, kbe Allah yno riof reto mhau kʼait fee, riof reto hah me mama mhau kʼanu u.
LUK 10:7 Tna nhau mam amah reto sai aran. Nsen satoh nmoʼt amah roto ma. Nnaut: Raa ro mkah kahren raa to, kbe raa moo boren maren ana tu oh. Wore wo anu nhau mam samu reto tna nkah bo ro Allah rAit to, bo sohmaam ro anu sohmaam to mfi boren ro raa maren anu to. Feto to nsohmaam oh.
LUK 10:8 Ati ro anu ntwok mam remo sau to, soh raa ro remo reto masen mitrah amah wana kʼanu to, tna moo boit mee kʼanu niit to, tawe niit boit bawya ro ana moo mee kʼanu niit to. Tna nta aya ro ana moo mee kʼanu nta.
LUK 10:9 Tna nisoh kiyam wana moof mam remo reto ye. Tna nwe kʼana nwe, ‘Allah siwyan yamo Raja ytu raa wAit mama ybo fo.’
LUK 10:10 Menohe ati ro anu twok mam remo sau to, tna soh raa ro remo reto mikyak anu to, hah ne nmo mam iso tna nisbas bohasyaf ro mbam remo rana to akus. Tna nwe,
LUK 10:11 ‘Amu bes-baas koh ro mhau mrat kʼamu naa. Amu nno feto afo re anu nhar nwe amu nbes-baas anu akus. Anu hawe bo nri bo ro amu nkyas fee. Feto tibyo anu nesait oh mi nisti kair ro meen mama mai kʼanu.’ Nnaut: ‘Allah siwyan yama yamo Raja ybo raa mana rAit. He mfe, anu nhawe Ait ybo anu.’”
LUK 10:12 Tna Yesus yawe kʼraa wAit weto yawe, “Meen ati ro tabam refo haberek to, kbe Allah ymat raa ro tiwya mhau mam kota ro Sodom tna yno bo ro maku sai mbtek mai kʼana. Menohe raa ro remo refo tii mikyak anu. Ana hawe bo mari bokyas aJõ. Tibyo bo ro meen mbtek mai kʼana weto to, kbe samyoh toni.”
LUK 10:13 Tna Ait yastako ana yawe, “Anu raa ro Khorazim nsya raa ro Betsaida: Meen ayoh mroh kʼanu! Tiwya Jõ tno bo ro msai mam remo wanu weto, menohe anu nashana fee. Soh tiwya Jõ tno bo msai weto mam remo ro Tirus msya Sidon maami, raa ro beto mashana mbam iro wana to, bose oh. Tna sraujin tibyo myum ratan ro mjif hai tna mate boh ro tafoh mam mana wana abyõ.
LUK 10:14 Ati ro Tuhan yoo safo mana ymit kʼraa to, kbe Ait ymat raa ro mhau mam remo weto tna yawe yno bo maku sai mbtek mai kʼana. Menohe anu nikyak Ait tibyo bo ro kbe meen mbtek mai kʼanu to samyoh toni!
LUK 10:15 Tna anu ro nhau mam remo ro Kapernaum nnaut nwe meen anu beta nmoʼt sawro ro Allah rAit. He mfe, kbe meen anu nmoʼt sawro ro kabes!”
LUK 10:16 Tna Yesus yawe kʼraa wAit weto yawe, “Soh raa mari bo ro anu nwe to, ana weto mari Jõ ye oh meto. Tna raa ro mikyak anu to, ana mikyak Jõ ye oh meto. Tna raa ro mikyak Jõ to, ana mikyak bi Ait ro ybis Jõ tama ye oh meto.”
LUK 10:17 Ana mabo 70 weto mamoʼt kota msya remo sor tna hah mamo mo kʼYesus. Ana simaut toni tna mawe, “Tuhan; soh amu nikyak kabes mkah nyõ nasom anyõ, mkah tak aNyõ to, kabes weto beta mari oh ye tna msam!”
LUK 10:18 Tna Yesus yawe, “Ae, Jõ tmat kabes yabi (Iblis) ybam ayoh uu mbtek mnan fi rir ro mrir mbam ayoh uu!
LUK 10:19 Nnaut oh: Jõ tsan tatak aJõ kʼanu afo re anu ntak nber aban msya taitbai ye. Tna bo weto aro kbe sikowah anu fee. Tna kbe anu nros ntak abyõ kabes yabi (Iblis) ye. Tna ana aro kbe sikowah anu fee.
LUK 10:20 Anu ntak nikyak kabes weto, menohe simaut bo weto toni to ma. Tawe nsom wanu to Allah ykom mam sawro rAit oh. Kbe anu nhau nsya Ait su mam beto. Au oh meto nsimaut toni oh!”
LUK 10:21 Tna ati reto ye to, Har ro Tuhan mno re Yesus yesait simaut mase. Tna Ait skabuk kʼAllah yawe, “Taja, Nyõ fi Tuhan ro nase. Nyõ to, nbo sawro aNyõ msya tabam refo ye. Tna Nyõ nmyõt bo aro re raa wase maja wau weto. Bo wefo fo, raa ro ja mhar bo to, ro mkom bo to, ana srau fee. Menohe bo wefo to, nyõ nerif kʼraa kinyah re ana mhar tna srau ye. Feto to, tayoh asik mase kʼNyõ. Taja; Nyõ nhar bo Nyõ oh. Tna ja nno bo ro Nyõ nhaf mnan sai.”
LUK 10:22 Tna Yesus yawe kʼraa wAit weto yawe, “Bombra beta to, Taja ysan kʼJõ tatem tbo oh. Raa wase Jõ. Taja yesait aran yhar Jõ. Tna raa wase Taja ye. Jõ tesait thar Ait. Tna raa ro Jõ tsok to, tkyas kʼana weto re kbe mhar bi Ait ye.”
LUK 10:23 Tna Yesus ymat kuber wAit tna yawe kʼana mesait aran yawe, “Tuhan yno bo ro moof kʼanu to. Ait yno re anu nmat bombra wefo to.
LUK 10:24 Jõ tawe kʼanu tawe: Tiwya nabi ro Allah ybis mama msya raja to, mawat mhaf miyoh bo. Mhaf miyoh bo mawe mmat bo ro anu nmat wefo ye, he mfe. Tna ana mhaf miyoh mari bo ro anu nri wefo ye, he mfe ye.”
LUK 10:25 Ti sau to, guruagama sait yasen yros tna sanet Yesus yawe, “Kbe jõ tno bo bawya re kbe thau hame wajin?”
LUK 10:26 Tna Yesus ytu bo kʼait yawe, “Watum ro Musa mkyas mawe bawya? Nyõ nmat bokom reto to, nnaut nawe fyi?”
LUK 10:27 Guru retait yawe, “Nhafri Tuhan Allah ranu mkah nhaf, srau ranu beta, mkah ntak ranu beta, tna mkah bohar ranu beta ye. Ulangan 6:5 Tna nhafri raa ro mhau kene msya anu to ye. Nhafri ana mnan fi anu nhafri netsu wanu nesait ai to.”
LUK 10:28 Tna Yesus yawe, “Bokyas anyõ to moof mnan si! Soh nyõ nno bo weto kaket to, kbe meen nyõ nhau hame wajin.”
LUK 10:29 Menohe guru retait ksoh yawe raa mmat ait. Tibyo beroh ytu u yawe, “Raa ro mhau kene msya anu to; awya sor meto?”
LUK 10:30 Tna Yesus betoo yawe, “Raa sait ybam Yerusalem yroh yamoʼt Yerikho. Yamo mam iso maka kri-kri fo, raa ro marmtuk mfot ait mai. Tna ana mtak ratan msya bo wait beta. Tna ana sikba ait akus. Tibyo ait ykah yaaf bris akus kene wo yajat.
LUK 10:31 Yhau baro tna imam ro agama Yahudi sait yama mam iso reto ye. Tna ait ymat ait ro riwai raa mai retait bris. Menohe imam refi yatmof raa retait fee. Ait beroh yiwrek yamo sai tna sikba raa retait akus.
LUK 10:32 Tna raa Yahudi roto sait ybam raa mana ro Lewi yama ye mam iso reto. Yama tna ymat raa retait. Menohe yatmof raa retait ye fee. Ait beroh yiwrek sikba raa retait akus ye.
LUK 10:33 Tna fo raa roto ro ybam Samaria sait yama mam iso reto ye. Ait ymat raa retait, tibyo ait yrok sraujin tna yatmof raa retait.
LUK 10:34 Ait yama ymat sas raa refi yetsu o yaaf bo. Tna yoo minyak msya anggur maya karu yaaf wait weto. Tna yoo bo sro tna yake yaaf wait ye. Tna raa ro Samaria retait tubat raa ro ykai bo retait yse abyõ mam keledai rait tna yasyõ yamoʼt losmen sau. Tna yisoh ait kaket mam beto.
LUK 10:35 Tna rabu ti fo ait yoo pitis dinar trion ewok, tna yaren bi ro losmen retait tna yawe, ‘Nisoh kmot ait ro ykai bo refi kaket. Soh pitis weto mkak to, kbe jõ thah tama tisroh mabyoh wonyõ u.’”
LUK 10:36 Tna Yesus ytu bo kʼguru agama retait yawe, “Bonaut anyõ to nawe fyi? Ana mabo tuuf refo to, awya ro oh mi yno bo moof kʼraa ro tiwya raa mtak bo wait retait?”
LUK 10:37 Guru agama yawe, “Ait ro yatmof raa retait, tna yisoh raa retait ye. Ait oh mi yhafri raa anya ye.” Tna Yesus yawe, “Namo tna nno mnan anya mfi ait yno feto ye.”
LUK 10:38 Yesus ysya kuber wAit mamo renti tna snok mam remo sau. Tna fai sau masom Marta mmen Yesus ysya kuber wAit mama mhau mam amah rau.
LUK 10:39 Marta to mao sau masom Maria. Maria au hre mte kait msya Yesus mawe mari bokyas rAit.
LUK 10:40 Menohe Marta to msui toni siwyan boit ro kʼana. Srau rau to makin-akan. Tna au mamo mo kʼYesus mawe, “Tuhan; Nyõ sayõ jõ tesait sui tno bo beta a? Tna Maria mabo hre sai a? Nbis au mama mbet jõ ye re!”
LUK 10:41 Yesus yawe, “Marta, nyõ nnaut yyi bo aro rau-rau sai.
LUK 10:42 Menohe bo ro ati to sau aran. Nao Maria, au fo msok bo ro ati mefo: Au ksoh hre mari bokyas aJõ. Jõ aro tawe wa kʼau fee.”
LUK 11:1 Mun sau Yesus skabuk. Ait skabuk mkak tna kuber rAit sait yawe, “Tuhan; tiwya Yohanes yerif kuber wait re ana mhar bo skabuk. Sgi nerif iso ro skabuk kʼamu ye.”
LUK 11:2 Tna Yesus yawe, “Soh anu skabuk to, nwe fefo: ‘Taja, nno re kbe raa mari tibyo bibi Nyõ nasom aNyõ. Nasen nama namo Raja tna nbo raa woNyõ.
LUK 11:3 Ifo yoyo to, amu nyoh boit mbam kʼNyõ natem aNyõ re boit wamu to mabut fee.
LUK 11:4 Amu ja ne nhaf moof nsya raa anya ro mno bo ro mkair mai kʼamu. Feto to nyon iro wamu sor ye. Tna nitsre amu re bosanet aro besruf amu to ma.’”
LUK 11:5 Tna Yesus yawe, “Mti arin masuf tna bi sait ro ybam remo ro fari yama snok mam remo sau. Tna bi ait yamo yo kʼyafoh rait sait ro yhau mam remo reto yawe, ‘Tao, mti refo jõ tjin tsya nyõ.’ Yafoh retait yawe, ‘Jõ ksoh nyõ njin mam befo fea!’ Menohe ait ynaut yyi, yhar yawe boit marak. Tibyo ait yasen yamo yo kʼyafoh rait ro yhau kene mam amah rait. Yamo yayoh roti mabuf tuuf.
LUK 11:6 Yamo menohe yafoh rait yjin oh. Tibyo raa retait yawe, ‘Nasen natmof jõ oh: Riwai tafoh ajõ sait ybam fari yama yjin ysya jõ, menohe boit ro jõ tee kʼait yait aro fee!’
LUK 11:7 Yayoh feto menohe yafoh rait yasen yitrah mato rait fee. Yawe, ‘Namo oh! Amah mato ajõ tuut oh, tna jõ tsya kukek wojõ beta njin oh! Jõ tasen too bo weto tee kʼnyõ fee!’”
LUK 11:8 Tna Yesus yawe kuber wait yawe, “Yafoh ro yama yti raa retait mam arin masuf tait yafoh rait fea. Menohe ait ro yjin oh hawe bo yasen yoo bo yee. Tna tis rau ait yasen tna yoo bo ye. Yafoh retait beroh sai yayoh. Au oh mi raa retait yasen yoo bawya ro yayoh to yee.
LUK 11:9 Reto oh mi Jõ tawe, ‘Nyoh bo kʼAllah tna kbe Ait yoo bo yee. Saso bo tna kbe ntru bo reto. Nii mato tna kbe mato reto Allah yitrah.
LUK 11:10 Awya sai ro yayoh bo kʼAllah to, kbe Allah yoo yee. Awya sai ro saso bo to, kbe tru tu oh. Tna ro yai mato to, kbe Allah yitrah mato reto ye oh.’
LUK 11:11 Mfi bo ku sait yawia yabo syoh to, kbe yaja yoo aban yee fee.
LUK 11:12 Mfi bo ku retait yawia ruu mauf yait to, kbe yaja yoo taitbai yee fee.
LUK 11:13 Anu raa fo nimara mboh. Menohe anu nksoh noo bo ro moof nee ku wanu. Tna Nja ranu ro yhau mam sawro rAit to, ksoh yoo bo ro moof toni yee kʼanu ye. Soh raa mayoh kʼAit to, kbe Ait ksoh yoo Har rAit yee kʼana ye fea!”
LUK 11:14 Ati sau to, Yesus yikyak kabes frok mbam raa ro ymai marak. Kabes reto frok tna raa retait yrok ymai. Raa mawat mmat tibyo mrok ktak.
LUK 11:15 Menohe raa taro mawe, “Aha! Yesus yatak yikyak kabes sor fo, mkah tak ro kabes Beelzebul rait. Kabes Beelzebul retait ja ybo kabes sor.”
LUK 11:16 Raa taro sanet Yesus mawe yno bo msai aro re kbe ana mmat. Mmat tibyo ana mhar mawe Ait ybam kʼAllah yama fe mfe a.
LUK 11:17 Menohe Yesus yhar bonaut wana weto, tna Ait yawe, “Soh raja ro rabin sait ybo raa wait menohe mafa anya ai to, kbe rabin reto mnah. Tna raa ro mhau mam amah sau su to, soh ana mafa anya ai to, kbe ana matak fee ye.
LUK 11:18 Anu taro nwe Jõ tikyak kabes sor mkah tak ro kabes Beelzebul. Fyi? Kabes yabi (Iblis) yamo raja ybo kabes taro sor. Tna soh kabes weto mafa anya ai to, kbe rabin ro kabes yabi yamo raja ybo to mros matak fee.
LUK 11:19 Anu nwe Jõ tikyak kabes sor mkah tak ro kabes Beelzebul. Menohe kuber wanu ja mikyak kabes ye. Tibyo anu nnaut nwe ja kuber wanu mikyak kabes mkah matak ro awya rait? Tnaut tawe kuber wanu mesait kbe mawe bonaut ranu reto to sre.
LUK 11:20 Allah oh mi yoo yatak rAit yee kʼJõ. Tibyo Jõ tikyak kabes frok to. Feto to, Allah ybis Jõ tama tbo raa mana rAit to.
LUK 11:21 Jõ fret bo tawe, ‘Soh raa ro yatak sait ybo sbe wait tna yhau kmot amah rait to, kbe raa aro ter-ter mama mtak kta wait to fee.
LUK 11:22 Menohe mfi bo raa ro byoh yama to, soh byoh retait yatak toni to, kbe ytak sbe raa retait wait msya kta wait saah. Yoo kta weto tna ysaim kʼawya ro ait ksoh.’”
LUK 11:23 Tna Yesus yawe, “Awya sai ro hawe ysya Jõ nkah bo su to, ait retait ytoh Jõ. Tna awya sai ro hawe ysya Jõ ymen raa mama mo kʼAllah to, ait retait yfi raa ro yikyak raa somya ha-hayah.”
LUK 11:24 Tna Yesus yawe, “Ati ro raa mikyak kabes frok mbam raa sait mamo to, kabes reto mamo ninya. Mamo ninya mam wore wo aya aro fee. Mawe sne hoh menohe kabes reto fri yuk ro moof aro fee. Tibyo kabes reto mnaut mawe, ‘Jõ thah te tamoʼt yuk ajõ ro wia rof, ro tiwya jõ sikba akus.’
LUK 11:25 Tna kabes hah me snok mam yuk reto. Tna mmat he yuk reto raa misoh moof ati.
LUK 11:26 Feto tna kabes reto mawe hah mamo mhau. Tna mmen mafoh na mabo trion krema mama mhau msya au ye. Kabes trion krema weto to ja mno bo ro mkair-kar toni miwer kabes ro tinyi reto. Tna ana mama twok raa retait beta ye. Tna kbe ana mno ait refi ykair toni yiwrek bo ro tiwya ait ykai wia ye.”
LUK 11:27 Yesus ykyas bo reto to si fo, tna fai sau mtu mkah mai ro fari mawe, “Allah yno bo moof kʼfai au ro mabe Nyõ tna moo sis mee kʼNyõ nait!”
LUK 11:28 Menohe Yesus yawe si yawe, “Allah yno bo moof toni kʼraa ro mari bokyas rAit tna mbo mno kaket to.”
LUK 11:29 Raa mawat mama sifut kʼYesus. Tna Ait ykyas bo renti yawe, “Anu raa mana ro mfo nhau mam tabam refo fo, anu ja nber safo wofo. Anu nwe Jõ tno bo msai aro re kbe anu nhar nwe Jõ tbam kʼAllah tama fe mfe a. Menohe Jõ kbe tno bo myoh sau aran sai re anu nmat tna nhar: Kbe anu nmat bo msai sau ro mnan fi tiwya Allah yno mkah nabi Yunus sai.
LUK 11:30 Nnaut: Tiwya nabi Yunus yamoʼt Niniwe. Tna Allah yno bo msai re raa ro Niniwe mhar mawe Allah oh mi ybis Yunus yama. Jõ fi 'Ait ro Yroh Yama Yfi Raa Sai'. Tna kbe Allah yno bo msai ro mnan anya afo re anu nhar nwe Allah oh mi ybis Jõ tama ye.
LUK 11:31 Jõ tawe kʼanu tawe, tii ana ro mhau mam kota ro Niniwe weto to, mari bo ro nabi Yunus ykyas. Mari tibyo mashana. Mfo refo Raa ro yase yiwer Yunus tait yros susai ysya anu. Menohe anu fo hawe bo nashana. Meen, ati ro Tuhan yoo safo mana ymit kʼraa to, kbe raa ro tiwya mhau mam kota ro Niniwe to, msya anu ye mrok masen. Tna ana kbe masen mmit safo kʼanu raa ro nhau mfo wefo. Tiwya fnya manes (ratu) sau mhau mam rabin ro ati ti wayir sau. Tna au mbam rabin ro fari reto masen mamo mo kʼraja Salomo mawe mari bokyas rait. Raja retait tait raa ro yhar bo toni. Mfo refo Raa sait ro yase yiwer Salomo retait yros susai ysya anu. Menohe anu hawe bo nri bokyas rAit. Feto to meen fai au reto kbe masen mmit safo kʼanu raa ro nhau mfo wefo. Meen ati ro Tuhan yoo safo mana ymit kʼraa to, fai au msya anu ye kbe mrok masen. Tna fai au mmit safo kʼanu.”
LUK 11:33 “Ja raa mbet tafoh (pelita) afo re ntara raa ro twok mam amah mato. Ja raa mmyõt tafoh fee. Raa moo mse mte tna moo ember burut wa fee ye. Menohe tafoh reto to, ja raa hero abyõ afo re kbe kek ntara tna raa ro mama twok mam amah mato reto mmat.
LUK 11:34 Anu nsu wanu to, mfi tafoh ro ntara anu oh meto. Soh nsu moof to, mno netsu wanu mram. Tibyo nsu maah ye. Tna soh nsu wanu mti to, anu nhau mam mamur sai.
LUK 11:35 Feto to, kaket anu re kek ro mhau mam kʼanu to mait mram kaket. Mram kaket afo re anu nmo mam mamur to ma.
LUK 11:36 Soh anu netsu wanu mamur aro fee, tna anu nsu maah to, kbe anu nmat kek ro ati, tibyo mno anu nhau mam wore wo maah.”
LUK 11:37 Yesus ykyas bo reto mkak tna raa ro Farisi sait ymen Ait yamo yait boit mam amah rait. Tna Yesus yamo yait boit mam beto.
LUK 11:38 Raa ro Farisi retait ymat he Yesus yno bo mafa raa ro agama Yahudi to wia fee; mi yyon yatem wia fee menohe hre yait boit sai. Mmat tibyo ana mrok ktak mawe, “Yesus; Nyõ nait boit to, nyon natem wia fea!”
LUK 11:39 Tna Yesus yawe, “Hawereh msya piring to, anu raa ro Farisi ja nyon moof mne sai kaket. Menohe mato rau to mkair fares. Anu nwe anu nhaf wanu moof oh, menohe ja anu safto bo raa tna nno bo mkair-kar toni fares.
LUK 11:40 Anu wase bo! Allah yfen raa msya piring to, mne sai fee! Allah yfen mato wau weto ye!
LUK 11:41 Jõ tawe kʼanu tawe natmof raa kinyah ro suawe. Tna nsan boit mam piring wanu kʼana ye. Nno feto tna bo bawya ro anu nno to, kbe mrok moof mnan si bo ro Allah oh meto ye.”
LUK 11:42 Tna Yesus yawe kʼraa ro Farisi weto yawe, “anu fo raa ro sioh anu sai. Anu ja ksoh noo bouum ro tinyi (persepuluhan) ro mbam armato wanu to, nsan kʼAllah. Ja anu noo bo knik-knak mnan fi bumbu msya bo taro sor ro maku nsan ye to. Menohe anu niwana bo ro ati sor ro Allah yawe: Ja anu nno bo ro moof kʼraa kaket fee. Tna anu hafri Allah kaket fee ye! Feto to, meen kair mama mai kʼanu tu oh. Rau ro moof to, anu nsan bouum ro tinyi wanu kʼAllah ye tna nno bo ro moof kʼraa ye, tna nhafri Allah kaket ye.
LUK 11:43 Ati ro anu nmoʼt samu watum to, ja anu ksoh hre mam ambar raa ro mase ja hre. Tna ati ro anu nmoʼt pasar to anu ksoh raa roto mmat anu tna mmah meen kʼanu tna hartu anu ye. Feto to meen bo ro mkair mama mai kʼanu.
LUK 11:44 Soh raa mno kuburan moof fee, kbe raa mber kait-kat sai. Ana wase yuk reto to, hai mhau mam tabam. Tna anu raa ro Farisi fo nfi feto ye. Anu nhaf mato wanu mkair. Menohe raa mmat anu to, ana wase anu nhaf wanu to mkair. Feto to, meen kair mama mai kʼanu tu oh.”
LUK 11:45 Tna guruagama sait yawe, “Guru; nyõ nkyas bokyas weto to, nyõ namus amu wefo ye oh meto!”
LUK 11:46 Tna Yesus yawe kʼguru agama weto yawe, “Anu ja nbis raa wanu ro Yahudi bno bo ro samyoh toni. Anu bsom bo ro samyoh. Menohe anu ntubat bo weto mati fee. Feto to, meen Allah yno bo ro mkair mama mai kʼanu ye.
LUK 11:47 Hohos wanu tii mame nabi na ro Allah ybis mama. Tna raa sama hai ro nabi weto mam isra mato. Tna anu, ku renti wana ro mame nabi na weto, ja anu nisoh isra weto. Anu nmo wan-wan oh meto! Nno feto mkyas mawe bo ro hohos wanu mno reto, anu nhaf mnan. Feto to meen Allah yno bo ro mkair mama mai kʼanu.
LUK 11:49 Allah yhar bo rAit. Reto oh mi tiwya ykyas anu yawe, ‘Jõ kbe tbis nabi woJõ msya raabis (rasul) woJõ mamo mo kʼraa ro tabam refo. Tna ana ro Jõ tbis weto to, taro kbe raa mame tna taro kbe raa sikowah ye.’
LUK 11:50 Allah yno feto afo re anu nsom safo weto. Nabi na ro tiwya Allah ybis mamaʼt tabam refo to, raa mame majat beta. Raa mame menohe meen ymit safo reto kʼanu ro mfo wefo nhau mam tabam refo. Maban tiwya tinyi raa mame nabi na ro Allah ybis mama: Mbam tinyi wore wo nabi Habel yhau mamo snok mam ti ro nabi Zakharia yhau. (Tiwya bi Zakharia retait ykah bo ro Allah kri-kri mam Samu ro Allah jaro msya wohat ro bosan jaro (mezbah) masuf susai tna raa mame.)
LUK 11:52 Anu guru agama Yahudi: Raa ro tomer mamo mam iso ro moof to, anu, ja nno wa ana weto. Tna anu nesait nmo mam iso ro ati reto ye fee. Feto to, meen kair mama mai kʼanu tu oh.”
LUK 11:53 Yesus yasen sikba amah reto. Tna guruagama msya raa ro Farisi weto to, kmo wer. Ana mkyas kair Yesus tna hre su saim bo re kbe ana mtu bo aro rau mamo mam tite re sanet Ait. Ati ro ana mmat Ait u to, ana mtu bo bawya ro samyoh aro kʼAit. Ana mnaut mawe kbe Yesus ytu si bo ro mkair aro tibyo, mno re kbe raa kmo Ait.
LUK 12:1 Raa msis-sas toni mama mmat Yesus. Ana myar mama sikait-kat anya. Tna Yesus ykyas bo kuber wAit wia yawe, “Anu kaket anu mkah ragi raa ro Farisi. Ana to, ja sioh-nat ana sai. Ana ja mawe ana mari bokyas ro Allah tna mbo mno, he mfe. Bo ro ana mno reto to, mnan ragi. Ja raa moo ragi kebet tna srioh msya tepung. Srioh tibyo raa mahni ragi reto. Tna raa ro Farisi mnaut mawe raa aro wase bo ana mari Allah kaket fee. Mnaut mawe kbe raa wase tna mawe ana raa ro ja sioh-nat to fee.
LUK 12:2 Soh raa mno bo ro mkair aro, ja ana mber bo reto. Mber afo re raa anya mmat fee tna mhar fee. Menohe bo weto beta meen raa masbrer tu oh. Kbe raa mmat tna mhar. Bo ro raa mmyõt to, meen raa masbrah kʼraa tu oh.
LUK 12:3 Tna bo ro anu nkyas wore mti wai to, meen hahah baas tu oh. Tna bawya ro anu samoh wai kʼraa to, kbe raa mkyas abyõ kʼraa beta mari ye.”
LUK 12:4 Tna Yesus yawe, “Tafoh woJõ: Soh raa mama mame anu to, waa ma. Raa matak mame anu netsu wanu sai. Tna fo ana matak mno bo aro naut mai kʼanu u fee.
LUK 12:5 Menohe waa bi Allah. Ait oh mi yatak yame raa. Yatak yame raa tna fo yko mam tafoh ro meen mhau mait hame wajin ye. Feto to waa Ait yesait aran!
LUK 12:6 Ruu mbas mana maat, raa masim tna mabyoh rau to, pitis mauf ewok aran sai. Ruu mbas to, mabyoh mroh sai menohe Allah Ait sorni mana sau bo fee.
LUK 12:7 Anu nbyoh ranu to, maut toni miwer ruu mbas mabyoh rau. Feto to waa ma. Tna nna mawyan wanu to, Ait ntuu beta mnan oh. Ait ymat anu kaket. Feto to waa ma.
LUK 12:8 Jõ tawe kʼanu tawe, hrenaut Jõ ma. Jõ fi 'Ait ro Yroh Yama Yfi Raa Sai'. Awya ro ykyas abyõ kʼraa roto yawe, ‘Jõ smot Yesus’ to, kbe meen Jõ tkyas ait abyõ kʼmalaikat ro Allah wAit weto. Tawe, ‘Ait retait raa aJõ oh metait.’
LUK 12:9 Menohe awya ro ywaar Jõ kʼraa roto yawe, ‘Jõ smot Yesus fee’, meen Jõ twaar ait ye. Kbe tkyas kʼmalaikat sor tawe, ‘Raa retait tait raa aJõ metait fee.’
LUK 12:10 Jõ fi 'Ait ro Yroh Yama Yfi Raa Sai'. Awya ro yamus Jõ to, Allah yyon iro rait reto saah. Menohe awya ro yamus Har ro Allah to, kbe Allah yyon iro rait reto fee yum.
LUK 12:11 Anu smot nwe Jõ tbam Allah tama. Smot feto tibyo meen raa kmo anu, mawe anu nber safo oh meto. Kbe raa makah anu mamoʼt samu watum ro agama, mo kʼraa manes mam beto. Soh mfe ana makah anu mamo mo kʼraa ro pemerintah. Kbe ana mkyas bo maun anu to. Tna ati ro anu saak wa anu to, anu waa ma.
LUK 12:12 Mam ati reto to, Har ro Tuhan mesait kbe mbesi bokyas ro anu nkyas reto.”
LUK 12:13 Raa makin mros mari bokyas ro Yesus mam beto. Tna raa sait yawe kʼYesus yawe, “Guru: Amu nja yhai kba amu. Nbis tao ajõ saim kta baro kʼjõ.”
LUK 12:14 Tna Yesus yawe kʼait yawe, “Jõ raa ro tros susai anu mbewok to fee. Jõ tamo hakim ro tmat sas bo ranu mbewok to fee ye.”
LUK 12:15 Tna yawe kʼraa makin yawe, “Nasmamo nme kta ma. Pitis msya bo bawya sor ro raa mse to, bo ro ati meto fee. Nnaut namos anyõ. Bo ro ati oh meto.”
LUK 12:16 Tna Yesus fret bo yawe, “Bobot sait ruf wait bombra mninon.
LUK 12:17 Bo wait mninon oh tna ynaut yawe, ‘Gudang ro tse bo mawat refo mnan fee. Kbe tno fyi mefo?’
LUK 12:18 Bobot retait hre ynaut. Tna yawe, ‘Kbe tno fefo: Tbis raa mama mitrah gudang wojõ ro maku, tna sgi gudang sau ro mase renti. Tna kbe tbu gandum msya bo satoh wojõ beta mam gudang reto.
LUK 12:19 Tna tahun ro meen mama to, jõ thau baas sai. Jõ tse bo beta ro moof mninon oh. Kbe mhau bau masno snyi. Mfo refo thau tjin tna tasen sai. Thau sohmaam bo sai bojõ. Tna thau simaut mase sai!’
LUK 12:20 Menohe Allah ymat bobot retait yawe, ‘Nyõ wase bo! Mti refo Jõ too namos anyõ. Tna kta ro name reto to, kbe nyõ nuumto kʼawya yhaf yse riryõn?’
LUK 12:21 Raa ro ja tomer mame kta mam tabam refo, menohe ana tomer miranya msya Allah fee; raa weto to wase bo.”
LUK 12:22 Tna Yesus yawe kuber wAit yawe, “Reto oh mi tawe kʼanu tawe: ‘Nnaut yyi bo ro tabam refo toni to ma. Nnaut nwe nfos wanu to bo ro ati. Tna nnaut yyi boit ro kbe anu niit to ma. Feto ye, nnaut netsu wanu to, nwe bo ro ati miwer ratan ro anu nyum. Feto tna nnaut yyi ratan ro kbe anu nyum to ma.
LUK 12:24 Nmat sas ruu ro fru to: Ruu to ja wase bo mkah. Tna wase bo siwyan boit ye. Tna wase sgi gudang ro moo boit mse ye. Menohe Allah siwyan boit kʼana. Tna anu raa fo, Ait ymat anu kaket miwer ruu to.
LUK 12:25 Anu nkin wefo fo, awya ro ytai yirenti yamos rait kebet naut? Nnaut yyi bo ro tabam refo yoyo, he mfe. Allah oh mi Raa ro ybo anu nmos wanu. Allah yesait aran ytai yirenti mamos raa to.
LUK 12:26 Raa mnaut yyi mamos wana mam tabam refo to, tna tis rau bonaut yyi mirenti mamos rana fee. Feto to nnaut yyi boit ro kbe anu niit msya ratan ro anu nyum to ma: Mafer marak.
LUK 12:27 Nmat sas bosafom ro moo mam smok. Tafuf wau weto mesait moo sai. Tafuf weto mur-mur saso boit fee. Bosafom to ja msui mfen ratan ro myum to fee. Menohe Allah yno bo weto moof toni. Tiwya raja Salomo yyum ratan ro moof wer. Menohe Allah yno ara tafuf weto moof toni miwer. Raja Salomo, ratan rait moof mfi bosafom tafuf wau to fee.
LUK 12:28 Allah yno re bosafom ro moo mam smok ifo moo boti waor sai. Menrabu to, raa mama mkah mkak. Mhau boti waor sai, menohe Allah fayir bosafom reto. Ait yno tafuf rau moof toni. Tawe, Allah ymat anu tna ksoh anu toni miwer bosafom reto. Feto to nnaut yyi ratan ro anu nyum to ma. Anu ja smot Allah kaket fee!
LUK 12:29 Nnaut yyi boit ro niit ma! Nnaut yyi aya ro nta ma! Nnaut yyi bombra weto ma!
LUK 12:30 Raa ro wase Allah mam tabam refo to, msui saso bo weto beta. Menohe anu fo ku ro Allah yare oh. Ait yhar bombra beta ro anu nnaut weto.
LUK 12:31 Feto to, ntomer re Allah yamo Raja ybo anu to. Saso bi Ait wia matim feto, tibyo bo ro anu nnaut weto to, kbe Allah yoo ysan kʼanu.’”
LUK 12:32 Tna Yesus yawe, “Anu fo nfi domba woJõ ro tira. Anu nbo kebet sai; nwat to fee. Menohe waa ma. Nja ranu ksoh yoo anu yse mam sawro ro Ait yamo Raja ybo.
LUK 12:33 Nsim kta wanu tna noo mabyoh rau to, nsaim kʼraa kinyah ro suawe. Kta ro tabam refo kbe msaef marak. Soh anu nmat raa ro mse bo mabut to, tna natmof ana to, anu nme kta ro ati oh meto. Anu nme kta ro ati mam sawro ro Allah oh meto. Nno feto to, mnan fi anu nfau kta wanu mam surah wiak ro matak. Mam surah wiak reto kta wanu weto meen mkak fee, mhau mawyõs. Kta weto kbe raa msyõf fee, kbe bo mabat fee.
LUK 12:34 Soh anu nme kta wanu mam tabam refo fo, kbe nhaf wanu mnaut kta weto sai. Menohe soh anu nme kta wanu mam sawro ro Allah to, kbe anu nhaf nnaut sawro rAit yoyo ye.”
LUK 12:35 Tna Yesus fret bo yawe, “Bobot sait yamo yayõ boyõ mam tabam ro fari. Tna sryan wait mhau siwyan bobot retait hah yama: Ana mhau mwan, myum ratan wana fares, tna mbet lampu oh. Mhau tna bobot retait hah yamaʼt amah rait. Yama tna ymat he sryan weto, ana siwyan ana wea tna huwya mitrah mato re ait twok.” Tna Yesus yawe, “Kbe meen Jõ hah tama u. Feto to rabu wawa nhau siwyan anu nfi sryan weto.
LUK 12:37 Nnaut: Soh Bobot sait yama tna ymat he sryan wAit mros wea ste Ait yama; feto moof. Kbe ana simaut. Meen Bobot retait yesait yawe ana hre wia. Tna siwyan Ait, tna yesait yasyõ boit yama saim kʼana mait.
LUK 12:38 Mfi bo Bobot hah yama arin masuf, soh mfe kene wo reen to, tna soh ait ymat he sryan wAit mhau mwan fares; feto moof.”
LUK 12:39 Tna Yesus yawe, “Nnaut bofret refo kaket wia: Bi sait yhar yawe, ‘Mti fo, kbe ait ro ysyõf bo yama yitrah amah ajõ tna ysyõf bo.’ Soh ait yhar ayõ ro ait ro ysyõf bo retait ysaim yama to, kbe ait yjin fee. Yhau wan afo re raa msyõf bo wait fee.
LUK 12:40 'Ait ro Yroh Yama Yfi Raa Sai' kbe meen yama u. Kbe hah yama u mam ayõ ro anu nhar wia nwof Ait to fee. Feto to nhau siwyan yoyo.”
LUK 12:41 Tna Petrus ytu bo yawe, “Tuhan; bokyas refo, Nyõ nkyas kʼamu nesait aran sai fe nkyas kʼraa beta a?”
LUK 12:42 Tuhan yawe, “Bo refo tkyas kʼawya sai ro yamo sryan ro mur-mur yno bo ro Allah yawe, tna ro yhar bo ye. Mfi bo bobot sait yawe yamoʼt oo roto. Ait ysok sryan wait sait yhau tna yno bo rait mam wore wo ait yarak wia. Ybis sryan retait yamo aban mana ybo sryan wait roto taro. Tna ybis sryan retait yoo boit saim kʼsrian anya wait roto taro ye. Tna bobot retait yasen yamoʼt oo roto.
LUK 12:43 Tna ati ro bobot retait yhah ye yama to, soh ait ymat aban mana retait ja yno bo rait ro ybis kaket to, feto moof.
LUK 12:44 Nri kaket: Kbe bobot ysok sryan ro yari bo ro ait yawe retait yse kmot bombra wait beta.
LUK 12:45 Menohe mfi bo sryan ro yamo aban mana retait tait yhaf rait mkair. Tna ynaut yawe, ‘Bobot ajõ yarak, kbe yhah yama fooh fee.’ Tibyo ait yno bo ro mkair: Ait yai sryan ro kinyah taro. Yai ro ano msya ro sme ye. Tna yasmamo yait boit, yata aya, tibyo bisir yoyo.
LUK 12:46 Kbe bobot rait snok yama. Yama mam ayõ ro sryan ro yamo aban mana retait siwyan fee. Bobot rait snok yama tna ymat bo mkair ro sryan retait yno. Tibyo bobot retait kmo. Kbe ait simoyot-mayat sryan retait. Tna ybis ait yamo yhau mam yuk ro kair ysya raa ro ja hawe mari Allah.
LUK 12:47 Tawe kʼanu tawe, ‘Sryan ro yhar bonaut ro bobot rAit, he beswan yno fee, tna siwyan fee, kbe bobot retait kmo yahoh ait.
LUK 12:48 Menohe sryan ro wase bonaut ro bobot rAit, tibyo yno bo rait kaket fee, tna siwyan fee; kbe bobot retait mok-mak ait kebet sai. Soh Allah yoo bo kebet sai yee kʼraa sait to, Ait ybis yawe raa retait yisoh bo weto tna mno bo kebet sai ye. Tna soh Allah yoo bo bombra mawat yee kʼraa taro, ybis raa retait yisoh bo weto tna yno bo mawat miwer ait ro yse bo kebet sai.’”
LUK 12:49 Tna Yesus yawe, “Jõ tama tawe too tafoh beak mroh mam tabam refo mait mawyah. Moof ati soh tafoh reto mait mawyah oh!
LUK 12:50 Menohe tako hawe sai, meen raa mame Jõ tajat mam ara warok wia. Tna Jõ thaf aya mamo snok bo reto mkak oh!
LUK 12:51 Anu nnaut nwe Jõ tama re tisoh iranya raa msya raa anya fe mfe a? Mfe, Jõ tama tibyo raa taro mawe ana mban Jõ. Tna raa taro mamo byoh kʼJõ. Tisti fa meto.
LUK 12:52 Tama tibyo raa mabo maat ro mhau mam samu su to, mabo tuuf mban Jõ tna mabo ewok mamo byoh kʼJõ. Tibyo mafa anya. Soh mfe; mabo ewok mban Jõ tna mabo tuuf mamo byoh kʼJõ.
LUK 12:53 Kbe raa mafa anya: Ku ro sme yasen yafa ysya yaja. Tna yaja yasen yafa ysya ku ro sme rait retait. Tna ro ano mafa msya mme. Tna mme masen mafa msya ku rau reto. Tna fnya mafa msya snyim ro ano, tna fnya snyim ro ano mafa msya fnya ye.”
LUK 12:54 Tna Yesus yawe kʼraa msis fo yawe, “Anu nmat barmabyõ safe mam ati ro habeh to, ja anu nhar nwe, ‘Kbe oom mais.’ Tna kbe oom mais tu oh.
LUK 12:55 Tna soh foos mfi mama mbam ti wayir to, anu nwe, ‘Ifo fo hwyõm.’ Tna kbe hwyõm tu oh.
LUK 12:56 Anu nwe anu raa ro nhar bo. Menohe anu fo raa ro nmo wan-wan sai! Anu nhar bo ro tabam msya bo ro mhau mam ayoh. Menohe bo ro Allah yno mam oon refo to, fyi re anu wase fares.
LUK 12:57 Ja anu nmat sas tna nnaut bo mam nhaf mato. Fyi oh mi anu nesait nnaut nwe bo reto moof soh mfe mkair a?
LUK 12:58 Mfi bo anu sait nsya raa sait kmo anya. Tna anu mbewok nmoʼt amah ro raa mtu srah to, rau ro moof to, anu mbewok nisoh niranya tna nfot ntem anya mam iso maka. Soh mfe to, kbe sait yamo ysan sait kʼraa manes re mkyas safo reto. Tna fo raa manes mbis anu nmo no kʼait ro ytu srah yari. Tna fo bi ait ysan anu renti kʼait ro ja ybu raa mam bui mato.
LUK 12:59 Tna anu sait raa mbu mam bui mato mamo snok mam ayõ ro ait hrat bo raa ska wia. Tna fo ait frok ybam bui mato reto.”
LUK 13:1 ⌞Tiwya raa ro agama Yahudi baro mbam provinsi ro Galilea mamoʼt Yerusalem skabuk Allah. Ana moo binatang wana ro kbe msan to, mbo mamoʼt Samu ro Allah. Mamoʼt Samu ro Allah ktan binatang weto msan kʼAllah. Ana msan bosan wana weto kʼAllah kri-kri fo menohe raa sbe mama mame ana. Gubernur Pilatus ybis tibyo raa sbe wait weto masen mamo mame ana.⌟ Raa mabo baro mari bokyas reto tna mkyas kʼYesus.
LUK 13:2 Yesus yari feto tna ytu bo kʼana yawe, “Anu nnaut nwe fyi? Ana weto to, raa mame majat, tna Allah ymat sayõ rof sai, fyi? Iro wana mawat miwer raa roto mbam Galilea oh mi ana raa mame meto a?
LUK 13:3 Mfe. Iro ro ana mno oh mi misti kair reto mai kʼana to fee. Menohe soh anu nashana fee tna nhai to, kbe Tuhan yoo safo mana ymit kʼanu mfi ymit kʼana weto ye.
LUK 13:4 Tiwya menara ro miyõ mam koot ro Siloam matu mai raa mabo 18 majat. Anu nnaut nwe fyi? Ana weto to, mno iro mawat miwer raa roto beta ro mhau mam Yerusalem a?
LUK 13:5 Mfe. Iro wana oh mi misti kair reto mai kʼana to fee. Menohe soh anu nashana fee tna nhai to, kbe Tuhan yoo safo mana ymit kʼanu ye.”
LUK 13:6 Tna Yesus ykyas bofret yawe, “Ara mara sau moo mam tain anggur ro bi sait rait yno. Tna mun sau ait yamo saso make rau mam mara. Menohe ait ykai kake reto make aro fee.
LUK 13:7 Tibyo yawe kʼait ro kmot tain reto yawe, ‘Tahun tuuf oh mi jõ tama saso ara refo make. Menohe jõ fri make aro fee! Feto to jõ tawe nyõ nfat makus sai. Mhau mros mati sai mam tain refo mkah bawya?’
LUK 13:8 Menohe ait ro kmot tain reto yawe, ‘Mhau ruman tahun sau naut wia. Kbe jõ tabah koh aro tber mair tna too boh aro bo beak ye.
LUK 13:9 Tna kbe tahun rouu make ye. Soh tahun rouu mawe make fee, feto to nyõ nbis jõ tfat makus rof.’”
LUK 13:10 Ayõ ro raa ntmoh(hari Sabat) sau to, Yesus watum bo mam samu watum ro agama Yahudi sau.
LUK 13:11 Fai sau ro kabes sariya re kiyam tahun trion 18 oh to mama ye. Kabes reto mno tibyo fai reto kbor maka. Tna mros trot fee.
LUK 13:12 Yesus ymat fai au refo tna ytu au mama. Tna yawe, “Tme, kiyam anyõ reto tno marak oh.”
LUK 13:13 Tna yoo yatem yse kʼfai au abyõ si fo au mrok mros trot ye. Tna au masen mbaut Allah.
LUK 13:14 Bi yabi ro ybo samu watum reto ymat bo ro Yesus yno. Ynaut yawe Yesus yisoh raa ro kiyam mam ayõ ro raa ntmoh (hari Sabat) to, yawe Yesus yno iro oh meto. Tibyo ait kmo. Tna yawe kʼraa msis reto yawe, “Ti trion ntamam mkah anu nno bo wanu weto beta. Feto to soh anu aro nksoh nwe raa misoh anu to, nma mam ti makin weto sau. Nma mam ayõ ro raa wanu ntmoh to ma!”
LUK 13:15 Menohe Tuhan yawe kʼbi retait yawe, “Anu fo raa ro sioh-sah sai. Bo ro anu nwe wa to, bo weto anu nesait ja nno! Anu nkin ja skur binatang wanu ro nsia mam ayõ ro raa ntmoh. Tna anu nkuk nmo nse mata aya fe mfe a!
LUK 13:16 Tnaut tawe kbe raa mno bo moof kʼfai au refo mam ayõ ro raa ntmoh to ye fea! Fai au fo, ku renti ro Abraham ye. Tahun trion 18 oh to, kabes yabi yno au tibyo kiyam to. Fyi, ja raa mikyak kabes frok ye mam ayõ ro raa ntmoh to, fe mfe a!”
LUK 13:17 Yesus ykyas bo reto tna raa ro kmo Ait to, mrok hrenaut tibyo saban beta. Menohe raa msis-sas nksoh bo ro Ait yno reto. Mnaut mawe bo ro Ait yno to bo ro msai.
LUK 13:18 Tna Yesus yawe, “Raa mana ro Allah yamo Raja ybo to mnan fi bo bawya?
LUK 13:19 Mfi bo manaf ro maku sau. Bi sait yoo bo manaf ro maku reto yamo furere mam armato rait reto. Menohe ati ro bo manaf reto moo to, moo maut mfi ara bo feto ye. Tibyo ruu ro mfru mam ayoh to, mama tafat abyõ mam ara reto kre ye.”
LUK 13:20 Tna Yesus yawe, “Raa mana ro Allah yamo Raja ybo to mfi bo bawya?
LUK 13:21 Reto mnan ragi. Ja fai sau moo ragi kebet baro, sryoh mam tepung mawat. Mhau tna kbe adonan reto mrok mtar mase beta ye.”
LUK 13:22 Tna Yesus yamo renti mam iso maka, kbe yamoʼt Yerusalem. Yamo mam iso maka to, Ait ykyas bo kʼraa iti mam kota msya remo roto taro.
LUK 13:23 Mam remo sau to, raa sait ytu kʼAit yawe, “Raa kebet sai aran meen mkai riof ro mase fe mfe a?”
LUK 13:24 Yesus yawe, “Mato sau ro mtit mhau. Ntomer ntwok mam mato ro mtit reto. Kbe raa msis tomer twok mam mato reto menohe ana mama rere. Tibyo mtai twok fee.”
LUK 13:25 Tna Yesus yawe, “Ati ro bi ro amah rait yasen tna yuut mato reto to, meen anu ro nros mam ati ro mato mne to ntu nwe, ‘Bobot (Tuan), nitrah mato kʼamu!’ Menohe kbe bi ait yawe, ‘Mfe. Jõ wase anu. Anu awya metait?’
LUK 13:26 Tna anu nwe kʼait nwe, ‘Tiwya amu niit nta nsya nyõ oh. Tna nyõ tiwya nhau iti-iti nkyas bo mam remo wamu ye oh!’
LUK 13:27 Menohe bi ro amah rait retait kbe haberek yikyak anu yawe, ‘Jõ wase anu. Anu awya metait? Anu fo raa ro nber safo. Nsen fooh, nmo fari tno!’
LUK 13:28 Kbe anu nmat Abraham, Ishak, Yakub msya nabi na ro Allah ybis mama beta. Ana weto hre mam sawro ro Allah yamo Raja ybo raa wAit. Menohe anu fo, Allah yikyak mne nhau banu. Kbe anu sraujin anu toni. Tibyo anu kbe nwia tna kanasyah toni ye.
LUK 13:29 Kbe raa mama mbam arin aso beta. Mama hre sohmaam bo su mam wore wo Allah yamo Raja ybo raa wAit to.
LUK 13:30 Tawe: Raa ro mfo refo mamo mtis to meen ana matim wia. Tna raa ro mfo refo matim wia to, meen ana hah me mamo mam tis.”
LUK 13:31 Tna raa ro Farisi baro mama mo kʼYesus tna mawe, “Nasen namo oh, be Raja Herodes saim yawe yame Nyõ!”
LUK 13:32 Menohe Yesus yawe, “Ait tait ynan fi serigala. ⌞Ait ja hren ksuk tna yame raa.⌟ Nmo nwe kʼait nwe, ‘Yesus yawe ifo msya menrabu to, Ait yhau fares re yikyak kabes sor tna yisoh raa ro kiyam to. Tna ti ro tuuf to yno bo wAit mkak oh.’
LUK 13:33 Tako hawe sai Jõ tamo iso aJõ refo renti. Ifo fo, menrabu tna fjah tamo renti tamoʼt Yerusalem. Nabi ro Allah sor to, soh raa mame ana majat to, ja raa mame mam Yerusalem.
LUK 13:34 Raa ro Yerusalem, tiwya ana ja mame nabi ro Allah majat. Tna raa ro Allah ybis mamo mkyas bokyas rAit to, ja raa ro Yerusalem mame ana majat ye. Moo fraa mai raa weto tibyo majat. Muhrin aro rau-rau Jõ srau kero ana. Tawe tatmof ana tna takrao ana tse mam wo sau. Mfi kook mabi ro makrao maku tna maut mabum kait to ye. Menohe ana to hawe ye. Feto to Jõ sraujin raa ro Yerusalem, bo ro meen mama mai kʼana:
LUK 13:35 Ana hawe Jõ oh mi Allah kbe meen yatam ana ro mhau mam Yerusalem to u fee. Ait sikba ana akus. Kbe Jõ sikba tabam refo tna ana mmat Jõ u fee. Ana mmat Jõ fee mamo snok mam ati ro tabam refo haberek. Tna ati reto ana manwaruk mawe, ‘Ait yase toni! Tuhan ybis Ait yama to.’”
LUK 14:1 Ayõ ro raa ntmoh (hari Sabat) sau to Yesus yamo yait bo mam samu raa ro Farisi sait. Ait retait raa ro yase. Tna raa ro Farisi roto baro msya guruagama baro hre mait boit su msya ana ye. Tna raa ro yafa kiyam sait twok yama. Kiyam reto mno tibyo ait yetsu beta mtun. Raa manes ro agama Yahudi weto mmat sas Yesus. Tna Yesus ytu bo kʼana yawe, “Watum ro agama ranu mbis mawe raa misoh kiyam mam ayõ ro raa ntmoh to, fe mfe a?”
LUK 14:4 Menohe ana shait sai beta. Tibyo Yesus ybo ait ro kiyam retait tna yisoh ait. Yisoh yoof tna ybis ait yawe yamo bait.
LUK 14:5 Tna Yesus ytu bo kʼana yawe, “Fyi, mfi bo anu nkin wefo sait, ymat ku rait, soh mfe sapi rait mbtek kayah (sumur). Mbtek kayah mam ayõ ro raa ntmoh to, kbe ait yamo fooh tubat fe mfe a?”
LUK 14:6 Menohe ana weto sait ykyas bo si fee ye.
LUK 14:7 Tna ana beta mamo hre mait boit. Tna Yesus ymat he ana msok yuk ro moof wia hre. Tibyo yawe bofret kʼana yawe,
LUK 14:8 “Soh raa sait ymen fnya tna yawe anu sait yamoʼt bokyõ rait reto to, kbe nno bawya? Nyõ namo tna kbe hre mam woyõ? Ja nyõ nksoh hre mam ambar ro moof fe mfe a? Jõ tawe anu nmo hre mam ambar ro moof wia ma. Kbe raa manes sait yama bo to fyi?
LUK 14:9 Nno kbe ait ro yakyõ bokyõ rait to yama yawe, ‘Kmo ma, nasen namo hre mam yuk roto. Yuk refo mhau kʼraa ro ati ro yama refi.’ Tibyo nyõ saban tna nasen namo hre mam tis.
LUK 14:10 Rau ro moof to, soh raa mawe anu sait yamoʼt bokyõ rait to, nno fefo: Nmo to, hre mam tis. Tna kbe ait ro yakyõ bokyõ rait reto to, yama yawe, ‘Tafoh ajõ, nasen namo hre mam ambar ro moof rno.’ Tibyo raa taro mmat tna mawe nyõ raa ro nase.
LUK 14:11 Tawe kʼanu tawe, ‘Awya ro bibi ait yesait to, kbe hah ye yfi bo raa ro maku. Tna awya ro susu hah ye yaku to, ait kbe yrok yase mam uu.’”
LUK 14:12 Tna Yesus yawe kʼait ro yakyõ bokyõ rait yawe, “Soh nakyõ bokyõ to, noo taah nee kʼnafoh wonyõ ma. Noo taah nee kʼnao wonyõ, nano wonyõ, tmo wonyõ, msya raa mana wonyõ ro bobot to ma. Kbe ana weto makyõ bokyõ to moo taah mee kʼnyõ riryõn.
LUK 14:13 Soh nyõ nakyõ bokyõ to, nmen awe, nmen raa ro kinyah, raa kair, raa ro maa msya matem bo mhai, msya raa ro masu mboh bo to.
LUK 14:14 Ana weto kbe ska bo moof ro nyõ no kʼana reto fee. Menohe Allah kbe yno bo moof kʼnyõ to. Meen Ait yno re raa ro mhaf moof mrok masen. Tna mam wore weto to, kbe Allah yaren nyõ tu oh.”
LUK 14:15 Raa sait sohmaam bo su ysya ana weto. Ait yari bokyas ro Yesus reto tna yawe, “Wore wo Allah yamo Raja ybo raa mana rAit to, raa meen hre sohmaam bo mam beto ye. Awya sai ro meen hre sohmaam bo mam beto to, kbe mhau simaut mase.”
LUK 14:16 Tna Yesus yawe bofret yawe, “Bobot sait ymah korat ro mase sau. Tna ait yoo taah yee kʼraa mawat.
LUK 14:17 Bo sohmaam beta raa saruk mkak. Tna bobot retait ybis sryan sait yamo yawe kʼraa weto, yawe, ‘Nma twok oh. Raa siwyan bo beta ye oh!’
LUK 14:18 Menohe ana mama fee. Sait yawe, ‘Kmo ma: Jõ tsui tna tama fee. Jõ kwiyat tabam baro tna fares, tna tawe mfo refo tamo tmat.’
LUK 14:19 Tna sait yawe, ‘Kmo ma: Tna sai jõ too sapi mana nsaa. Tna tawe tamo tse kuk sanet tno sapi weto mkuk bajak wia. Feto to kbe jõ tama fee.’
LUK 14:20 Tna raa sait yawe, ‘Jõ tmen fnya ajõ tna fares, kbe jõ tama fee.’
LUK 14:21 Tna sryan retait hah yamo yawe bo weto kʼbobot rait. Tibyo bobot retait kmo yawe, ‘Feto to namo fooh namoʼt remo tna saso raa mam iso sai: raa ro suawe, raa ro kinyah, raa ro kair, raa ro maa msya matem wana mhai, maka, msya raa ro masu mboh to. Namo nmen ana nakah nama.’
LUK 14:22 Sryan retait yno bo reto tna hah yama yawe, ‘Tno oh. Menohe ambar ro raa kbe mama hre mawat marak sai fares.’
LUK 14:23 Tna bobot retait ybis u yawe, ‘Namo fari tna saso raa mam remo ro maku ye, mam iso krewe ye. Nawe kʼraa nawe mamaʼt samu ajõ refo afo re matot.
LUK 14:24 Tawe raa ro jõ too taah tee to, kbe mama mam korat ajõ fee saut tna sohmaam bo wojõ aro fee ye!’”
LUK 14:25 Raa mawat mama kro msya Yesus mam iso ro Ait yamo to. Yesus ymat ana tna ykyas kʼana yawe,
LUK 14:26 “Raa mawat mawe kro Jõ. Ana mawat mhafri maja msya mme, mfain msya ku wana, mao na, mano na toni. Menohe mhafri Jõ kaket fee. Feto ana weto to, raa woJõ fee. Tna awya ro hasu ait yesait toni menohe hasu Jõ kaket fee, ait tait raa aJõ fee ye.
LUK 14:27 Awya ro yawe kro Jõ to, menohe kro fee, tna yasom bo fanes ro mama mai kʼait to fee ye, ait yamo raa aJõ fee ye. Soh ait yasom ara warok rait reto ye tna ait kro Jõ ye; ait retait yamo raa aJõ.”
LUK 14:28 Tna Yesus yawe, “Mfi bo anu nkin sait ksoh yawe sgi amah to; ait hre ntuu mabyoh rau to wia fea! Tna ymat pitis ro ait yse to wia afo re yhar yawe kbe sgi mkak fe mfe a?
LUK 14:29 Soh yno bo reto wia fee, kbe ait ysair yno pondasi sai menohe sgi amah ska fee. Tibyo raa mmat tna sret ait masah tna mawe,
LUK 14:30 ‘Raa refi yawe sgi amah rait reto menohe ytai sgi mkak fee!’”
LUK 14:31 Tna Yesus yawe, “Mfi bo raja sait yawe yafa ysya raja roto sait to; ait hre ntuu raa sbe wait kaket wia. Tna ynaut mnan wia yawe, ‘Raa sbe wojõ mabo trion 10.000 sai. Tna raja roto tait raa sbe wait mabo trion 20.000. Kbe fyi? Raa wojõ mnan fe mfe a?’
LUK 14:32 Soh ynaut yawe matak to fee, kbe mam wore wo byoh mhau fari fares to, ait ybis raa mamo mo kʼraja ro yafa ysya ait. Ybis ana mamo mkyas bo su kʼait. Tna ati ewok weto mtu mari iso ro moof fyi re kbe ana miranya sai moof.”
LUK 14:33 Tna Yesus yawe, “Au oh meto: Soh raa mawe kro Jõ to, ana weto kbe mnaut bo mnan wia, tna fo kro. Awya ro hawe, ysan bo wait beta kʼAllah yatem to fee, ait retait yamo raa woJõ to fee ye.
LUK 14:34 Jõ fret bo tawe, ‘Haa to ja mafah moof. Menohe mfi bo haa reto mafah fee, kbe raa mno fyi re kbe haberek mafah u? Mafer rau to aro uu fee. Haa reto mno armato moo kaket mfi pupuk ja mno to fee. Mafer ro haa reto to, marak sai. Haa reto raa moo mbeak sai.’ Anu ro nri bokyas reto to, nnaut kaket!”
LUK 15:1 Raa ro mno iro ye msya raa ro moo namabyoh (pajak) bo ye ja mama mo kʼYesus mari bokyas rAit.
LUK 15:2 Tibyo raa manes ro Yahudi mmai kinya. Raa ro Farisi msya guruagama mmai kinya mawe, “Ait yiranya ysya raa ro mno iro tna hre mait bo msya ana su ee?”
LUK 15:3 Tibyo Ait ykyas bofret kʼana yawe,
LUK 15:4 “Mfi bo anu sait ysia domba mana 100. Tna domba weto mana sau marak. Kbe ait yno bawya? Kbe ait sikba domba mana trion 99 refo akus wia, tna hah yamo saso mana sau ro marak reto tibyo ait tru.
LUK 15:5 Tru tna simaut toni. Yasen tubat domba reto yasom abyõ mam kbek.
LUK 15:6 Tna hah yamoʼt amah. Snok si mam samu to, ait ymen yafoh na msya raa ro mhau kene msya ait tna yawe kʼana yawe, ‘Nma, bkyõ bokyõ! Domba ajõ ro marak reno no, jõ tru oh. Nma, anu simaut mase oh!’”
LUK 15:7 Tna Yesus yawe, “Soh raa sait ro ja yno iro yashana to, malaikat sor kbe simaut mase feto ye. Menohe mfi bo raa mabo 99 mnaut mawe, ‘Ja amu nhaf moof sai, kbe amu nashana fyi!’ Kbe malaikat sor ro mhau mam sawro ro Allah weto to, simaut raa weto fee.”
LUK 15:8 Tna Yesus yawe, “Soh fai sau mse pitis dirham trion nsaa. Tna soh sau mbtek marak to, kbe au mait tafoh mbo tna saso fea! Tna au moo sapu sabos kaket mam amah tibyo mkai pitis rau reto.
LUK 15:9 Tna au masen mawe kʼmafoh na msya raa ro mhau kene msya au mawe, ‘Pitis ajõ ro riwai marak reto to, jõ fri oh! Tibyo jõ simaut mase toni! Nma, anu bkyõ bokyõ!’
LUK 15:10 Taja, tme na tawe kʼanu tawe, ‘Raa sait ro ja yno iro to, soh ait yashana, kbe malaikat ro Allah sor simaut toni feto ye.’”
LUK 15:11 Tna Yesus ykyas bofret sau u yawe, “Raa sait tait yabe ku sme mabo ewok.
LUK 15:12 Tna ait ro tis fi yawe kʼyaja yawe, ‘Taja, saim kta wanu ro meen nyõ shauk to, noo baro nee kʼjõ mam wore wefo.’ Tna yaja yoo kta rait saim yee ku wait mabo ewok reto.
LUK 15:13 Ti baro firwas tna ku ro tis fi yoo bo wait msya kta ro yaja saim kʼait beta fo yasim. Yasim yoo pitis tna yasen yamoʼt oo ro fari sau. Ait yamo snok mam teto tna fo ait yno bo kbik-kbak sai. Tibyo sikowah pitis rait. Mrok marak.
LUK 15:14 Pitis rait reto marak beta tna fo haiawyah frok mama mai mam oo reto beta. Tibyo kair mama mai kʼait.
LUK 15:15 Tibyo yasen yamo yo kʼraa sait ro yhau mam oo reto. Yamo sryan yno bo rait. Tna bi ait ybis yawe yamo kmot fane bi wait.
LUK 15:16 Menohe raa aro moo boit aro mee kʼait yesait yait fee. Tibyo ku ait retait hai sre tna yawe yait boit ro fane mait ye.
LUK 15:17 Ait hre ynaut bait tna yawe, ‘Sryan ro ja mhau msya taja to, ana mhau to boit mninon. Menohe Jõ thau mam befo thai awyah thai sai!
LUK 15:18 Feto kbe tasen tamo to kʼtaja tna tawe kʼait tawe, “Taja, jõ tno iro mai kʼAllah tna mai kʼnyõ ye.
LUK 15:19 Jõ fi tno-na bo. Feto to nyõ ntu nawe jõ fi ku anyõ u fee. Tawe tamo sryan boh ro tno bo wonyõ sai.”’
LUK 15:20 Tna ait yasen hah yamoʼt oo rait. Yamo yo kʼyaja. Ait yama fari fares to, yaja ymat ait yama oh. Tna yatmof ait. Tna yhoh yamo yo ku rait tibyo yake tna hana.
LUK 15:21 Tna ku retait yawe, ‘Taja, jõ fi tno iro mai kʼAllah ysya nyõ oh. Feto to ntu jõ nawe nare to ma.’
LUK 15:22 Menohe yaja yawe kʼsryan wait yawe, ‘Nmo noo ratan ro moof toni to, nkah nama fooh nse kʼait yyum. Tna noo cincin nse mam yatem. Tna noo sandal nse mam yaa.
LUK 15:23 Tna ktan sapi ro moof sau. Anu kbe bno bokyõ, tna anu sohmaam tna simaut mase!
LUK 15:24 Tnaut tawe kbe tmat ku ajõ refi u fee! Tiwya ait yarak menohe jõ tkai ait yama u!’ Feto to ana makyõ bokyõ.
LUK 15:25 Ku rait ro bum yhau fares mam armato. Tna hah ye yamaʼt amah. Yama kene oh mam samu tna ait yari he raa simaut tna msyoh.
LUK 15:26 Tna ku ro yabi refi ytu sryan sait yama tna ytu kʼait yawe, ‘Raa mno bawya re samu mnin-nin meto ee?’
LUK 15:27 Menohe sryan retait yawe, ‘Nao ro tiwya yamo tait, hah ye yama oh! Hah ye yama mkah riof. Tibyo naja ktan sapi ro moof sau.’
LUK 15:28 Yari feto to, ku yabi fi, kmo tna hawe bo twok mam amah. Tibyo yaja frok mne tna soh-soh kʼait yawe, ‘Ntruk oh!’
LUK 15:29 Menohe ait yawe si kʼyaja yawe, ‘Ja jõ thau tsya nyõ tahun aro rau-rau tno bo wonyõ to. Tna jõ tiwana bo ro nyõ nawe to aro fee. Tna nyõ noo bo aro naren jõ fee. Nyõ nbis kambing sau kʼjõ fee ye re ktan takyõ bokyõ tsya tafoh wojõ na ye.
LUK 15:30 Tna nare ro tis retait tait yakah kta anyõ to, yamo. Yamo sikowah-kawah ysya fnya ro mwyah to, tna hah yama. Menohe nyõ ktan sapi sau nakyõ bokyõ ro mase naut kʼait u a!’
LUK 15:31 Menohe yaja yawe, ‘Tare, nyõ to ja nhau nsya jõ. Bombra ro jõ tse weto beta to, bo wonyõ oh meto.
LUK 15:32 Nyõ nao retait, tnaut tawe kbe tmat ait u fee! Tiwya yarak menohe anu be bkai u. Tibyo anu to simaut bkyõ bokyõ kʼait fea!’”
LUK 16:1 Tna Yesus yawe kuber wAit yawe, “Tkyas raa ro bobot sait. Ait ysok raa sait yamo bendahara, mkah ybo pitis wait tna yisoh bo wait beta. Ti baro firwas tna raa ro bobot retait yari he bendahara retait yisoh bo wait kaket fee, saka sikowah pitis rait.
LUK 16:2 Tibyo bi ro bobot retait ytu ait yama tna yawe, ‘Bo ro raa mkyas mai kʼnyõ fo mabo fe mfe a? Tawe tusnok nyõ. Jõ hawe bo nyõ nbo pitis wojõ u. Nasen namo nkom daftar sau. Tna nkom pitis ro tii jõ tsan kʼnyõ to mnan si. Tna nkom bo bawya ro nyõ noo mkah pitis wojõ weto beta. Tna fo daftar reto nakah nama nee kʼjõ tmat.’
LUK 16:3 Bendahara refi yamo tna ynaut yyi yawe, ‘Bobot ro ybis jõ yawe jõ frok tno bo wait u fee. Kbe tno fyi? Raa taro ja mkah bo, menohe jõ fi ja ttai tkah bo fee. Tna jõ hawe bo tayoh pitis kʼraa. Kbe jõ hrenaut.
LUK 16:4 Jõ thar iso oh! Tafoh wojõ mawat. Tamo tno bo moof kʼana afo re kbe ati ro bobot ybis jõ tufrok to, kbe ana weto mitrah amah wana kʼjõ!’
LUK 16:5 Raa mawat mno taman kʼbobot retait. Tna bendahara retait ynaut yawe iso ro moof to, kbe ait yno bo ro moof kʼraa weto. Tibyo yno fefo: Ait ytu ana sait-sait yama. Tna yawe, ‘Taman ro bobot retait trion ja fares mhau kʼnyõ to?’
LUK 16:6 Raa ro yama tinyi tait yawe, ‘Taa jõ tayoh minyak zaitun 100 tempayan.’ Menohe bendahara refi yawe, ‘Noo aam ro taman refo tna hre nkom roto ro tna sau. Nkom minyak 50 tempayan sai.’
LUK 16:7 Tna bendahara retait ytu kʼait ro ewok yawe, ‘Taman ro bobot retait to trion jya fares mhau kʼnyõ?’ Tna ait ro ewok yawe, ‘Gandum 100 pikul.’ Menohe bendahara retait yawe, ‘Aam ro taman refo, nkom 80 pikul sai.’
LUK 16:8 Bendahara retait yno feto kʼraa beta ro mno taman kʼbobot retait. Yno afo re kbe ana weto ksoh ait tna kbe mse ait mam amah mato wana. Tna fo bendahara retait yoo daftar ro ykom reto yakah yamo yee kʼbobot retait ymat. Bobot retait ymat daftar reto tna yhar yawe bendahara retait sioh ait. Menohe bobot retait bibi bendahara retait yawe, ‘Nyõ nhar bo toni sai ee!’” Tna Yesus yawe kʼana yawe, “Raa ro wase Allah to, mhar mno bo ro tabam refo su msya raa anya. Menohe raa ro mhau mam kek to, taro wase bo siwyan ana afo re meen mamo mhau mam sawro ro Allah.
LUK 16:9 Jõ tkyas kʼanu tawe: ‘Pitis msya kta ro tabam refo to, noo nee kʼraa. Noo pitis msya kta wanu to, nno bo moof kʼraa re kbe ana ksoh anu. Bombra wanu weto mkak rof mam tabam refo. Mkak tna meen Allah yitrah amah rAit kʼanu tna kbe anu nhau nsya Ait mam sawro rAit mamo snok mam hame wajin.’”
LUK 16:10 Tna Yesus yawe, “Raa sait yoo bo wait kebet baro yee kʼyafoh sait. Tna yasen yamo. Yhau tna hah ye. Hah ye tna ymat he yafoh retait yisoh bo weto, kaket moof. Feto tibyo raa retait yhar yawe soh yoo bombra mawat yee kʼyafoh rait reto kmot, kbe yafoh retait yisoh bo mawat weto kaket moof ye. Feto ye; mfi bo raa sait yoo bo wait kebet baro yee kʼyafoh sait. Tna yasen yamo. Yhau tna hah ye. Hah ye, menohe ymat he yafoh retait yisoh bo weto kaket fee. Ait yno-na sai. Feto tibyo raa retait yhar yawe nno be ait yoo bombra mawat yee kʼyafoh rait reto, kbe yafoh retait yisoh bo mawat weto kaket fee ye.
LUK 16:11 Soh anu nse kta aro mam tabam refo, menohe nno-na kta wanu to, kbe meen raa moo kta ro moof ati aro mee kʼanu fee ye.
LUK 16:12 Soh anu nno-na bosatoh ro raa, kbe raa hawe bo msan bosatoh kʼanu nesait nse.”
LUK 16:13 Tna Yesus yawe, “Ja sryan sait yno bo ro bobot sait aran sai. Ait yno bo ro bobot mabo ewok brio-brio to fee. Kbe ait knait bi ait sait tna ksoh bi ait sait. Kbe ait yari bo kʼbobot sait kaket, tna yiwana bo ro bobot sait yawe ye. Feto to tawe kʼanu tawe: Awya ybah yno bo ro Allah wAit ye tna saso kta ro tabam refo ye. Anu raa ntai nkro iso ewok weto su fee.”
LUK 16:14 Raa ro Farisi to ja masu mase mkah pitis. Ana mari bo ro Yesus ykyas weto beta tna ana sret Ait masah.
LUK 16:15 Tibyo Ait yawe kʼana yawe, “Anu nksoh nwe raa mmat bo moof ro anu nno. Mmat bo weto tna mnaut mawe anu raa ro nhaf moof. Menohe Allah yhar yawe anu nhaf mato wanu to mkair. Bo ro raa mbibi tna mnaut mawe moof to, Allah ynaut yawe bo weto mkair.”
LUK 16:16 Tna Yesus yawe, “Tiwya Allah ybis Musa ysya nabi na mama mkom Watum wAit. Mam oon ro tiwya reto mamo snok mam ati ro Yohanes yama to, raa mari Watum weto to, moof. Tna fo Yohanes yama ykyas yawe Allah yamo Raja ybo raa mana rAit. Tna Jõ tsya kuber woJõ mamo wosa Bokyas ro Moof reto. Tna raa mawat mari tibyo ntomer mamo raa ro Allah ybo yfi Raja rana.
LUK 16:17 Ja raa mnaut mawe ayoh msya tabam refo mhau yum. He mfe: Meen ayoh msya tabam refo saef marak sai. Menohe Watum weto oh mi mhau matak yum. Watum weto to, maja rau sau ro maku to, kbe susre fee.
LUK 16:18 Awya sai ro yako fnya rait makus tna yamo ymen fnya rouu to, ait retait raa ro ywyah oh meto. Tna awya ro ymen fai ro raa roto sait yako oh to, ait retait raa ro ywyah ye.”
LUK 16:19 Tna Yesus ykyas yawe, “Bi ro bobot sait yhau yoof. Ja ait yyum ratan ro mabyoh maut toni. Ratan wait to ro ngknu msya sneh. Ayõ yoyo ait yhau to, ait simaut mkah bo ro ait yse mninon.
LUK 16:20 Tna raa ro kinyah sait yasom Lazarus yhau ye. Tna raa mse ait hre kene mam amah masa ro bobot refi. Lazarus tait yetsu mbra mabet sor. Tna ait hre yayoh bo sohmaam kʼraa ro mama.
LUK 16:21 Tna Lazarus haisre toni tibyo ynaut yawe ksoh yait boit makyõ ro mbtek mbam ambar ro bobot retait. Tna mtah mama mkas Lazarus yarak ro mabet ye.
LUK 16:22 Ti baro firwas tna Lazarus yhai. Tna malaikat sor makah ait mamo mse hre mam yuk ro moof ysya Abraham su.
LUK 16:23 Tna bobot retait yhai ye. Tna raa sama ait. Bobot retait tait yamoʼt sawro ro kair. Tna mam weto ykai bo ro samyoh. Ait heyut abyõ tna ymat fari, ymat he Lazarus hre ysya Abraham su mam yuk ro moof tno.
LUK 16:24 Tna bobot retait yawe kʼAbraham yawe, ‘Taja, natmof jõ! Tafoh refo fo, mafit jõ toni oh! Tna srau fo ngkaat oh. Nbis Lazarus beru yatem mam aya tna yama yse mam hrea ajõ!’
LUK 16:25 Menohe Abraham yawe kʼait yawe, ‘Tare, nnaut sai oh: Tiwya naam fares to, nyõ bobot tna nse bombra beta. Tna Lazarus fi ykai bo ro mkair. Reto oh mi mfo refo ait ye yhau moof, tna nyõ ne nhau mam wo mkair riryõn.
LUK 16:26 Tna bo weto mesait sai fee: Nyõ nhau mam yuk sau hayah tna amu nhau mam yuk sau hayah ye. Hwai mboh sau firwas wa anu. Tibyo raa ro mbam ati reto frit mamaʼt ati refo si fee. Tna raa ro mbam ati refo frit mamoʼt ati reto si fee ye.’
LUK 16:27 Tna bobot refi soh-soh kʼAbraham yawe, ‘Feto to nbis Lazarus hah yamoʼt tabam. Nbis yamoʼt amah ro taja.
LUK 16:28 Tao na wojõ mabo maat mhau fares to. Nbis Lazarus yamo yo kʼana mabo maat weto tna yawe wa kʼana. Ykyas afo re ana misoh ana tna meen ana mamaʼt befo fee. Tna tru kair refo fee ye!’
LUK 16:29 Menohe Abraham yawe, ‘Watum ro tiwya Allah ybis Musa ysya nabi na mkom to mhau fares kʼana. Soh ana mari bo weto to, mnan sai oh.’
LUK 16:30 Menohe bobot retait yawe, ‘Taja, weto mnan fefares! Soh raa ro ja mhai aro mrok masen tna hah me mo kʼana to, tna mawe wa kʼana to, kbe ana mnaut iro wana tna mashana.’
LUK 16:31 Menohe Abraham yawe, ‘Soh ana hawe mari Watum ro tiwya Allah ybis Musa ysya nabi na mkom to, kbe ana mari bo ro raa mkyas to fee ye. Mfi bo ana mmat raa ro mhai mrok masen aro bo to, kbe ana mari raa reto fee ye.’”
LUK 17:1 Yesus yawe kuber wAit yawe, “Mam tabam refo fo, bo aro rau tko re raa mno iro. Menohe awya ro yisti re raa mno iro to, meen Allah yno bo ro mkair mama mai kʼait ro yisti retait.
LUK 17:2 Meen ait ykai bo ro samyoh toni. Ait ro yisti re raa woJõ sait yno iro to, soh ait ysu mam aya yhai to, moof miwer bo ro meen Allah yno mai kʼait retait! Mfi bo raa mawah fraa ro maboh sau, tna make mam yamyum, tna mbeak ait mam sawan, tibyo ysu to, bo reto to, moof miwer bo samyoh toni ro meen ait ykai.
LUK 17:3 Feto to kaket anu!” Tna Yesus yawe, “Soh nafoh sait yno iro to, nastako ait. Tna soh ait yashana to, nhaf ase tna kmo ait ma.
LUK 17:4 Tna soh yno iro mawat mai kʼnyõ to, tna fo hah ye yama yawe, ‘Riwai tno mkair. Tna tashana.’ Tna ait yfot yatem ysya nyõ to; kmo ait ma, nhaf kair kʼait ma. Soh ait yno iro mai kʼnyõ muhrin krema mam ti sau to, tna yama yawe, ‘Riwai tno mkair. Tna tashana.’ Soh yno feto muhrin krema ye to, kbe ne kmo ait ma.”
LUK 17:5 Tna kuber ro Tuhan Yesus wAit mawe kʼAit mawe, “Nisoh bosmot wamu re kbe matak.”
LUK 17:6 Tna Tuhan yawe, “Soh bosmot wanu maku sai, mfi bo makan ro maku sai, anu ntai nno bo ro msai. Kbe anu nwe kʼara sau nwe mamo mros mam sawan to, kbe mabo oh: Kbe ara reto mari tna mamo tu oh.”
LUK 17:7 Tna Yesus yawe, “Mfi bo bobot sait ysya sryan sait. Tna sryan retait ja ykah bo mam armato ro bobot rait, soh mfe ysia domba ro bobot wait mam smok. Hreha tna sryan retait hah yamaʼt amah to, kbe bobot yawe bawya kʼait? Kbe yawe, ‘Nama fooh, noo boit nait!’ fe mfe a?
LUK 17:8 Mfe. Kbe ybis yawe, ‘Saruk boit wojõ ro tait to wia, tna nyum ratan ro moof, tna noo boit ro jõ tait, nakah nama! Tait skak wia. Tna fo nyõ saruk boit ro nyõ nait to riryõn.’
LUK 17:9 Sryan yno bo ro bobot ybis sai. Tibyo ja bobot yayoh asik mase fee tna ybaut ait fee!
LUK 17:10 Tawe anu nmo nno bo nfi sryan retait ye. Nri tna nno bo beta ro Allah ybis kʼanu. Tna nwe fefo sai, nwe, ‘Amu fo sryan boh ro Tuhan wAit. Amu nno bo ro Ait ybis kʼamu sai. ⌞Feto to bibi anu ai to ma, shait sai oh.⌟’”
LUK 17:11 Yesus yamoʼt Yerusalem. Tna iso ro yamo to, mamo mam rabin ro Samaria msya provinsi ro Galilea masuf.
LUK 17:12 Ait twok mam remo sau fo, raa sme mabo nsaa ro mafa kusta to masen mama mo kʼAit. Ana mama kene msya Ait fee. Ana mros fari
LUK 17:13 tna mkah mai ro mase ana soh-soh kʼYesus mawe, “Guru; natmof amu!”
LUK 17:14 Yesus ymat ana tna yawe, “Nmo nerif netsu wanu kʼimam na re ana mha ninin anu netsu wanu wia. Ana mha ninin netsu wanu afo re ana mhar mawe anu nrok noof oh.” Tna ana mamo. Mamo sai mam iso fares fo, kusta wana mrok marak. Ana mrok moof beta.
LUK 17:15 Ana wefo sait, ati ro ymat he ait yoof to, ait hah ye yamo yo kʼYesus tna ybaut Allah mkah ymai ro mase.
LUK 17:16 Ait yama snok Yesus tna yaka mte hartu Ait. Tna yasu heyut yawe, “Asik mase kʼNyõ oh!” Ait retait raa ro ybam rabin ro Samaria.
LUK 17:17 Tna Yesus yawe, “Riwai Jõ tisoh raa mabo nsaa, fe mfe a? Ro mabo krenjiit taro to miyo?
LUK 17:18 Fyi re raa ro srim refi yesait aran hah yama tna ybaut Allah? Ana mabo ngkrenjiit to miyo?”
LUK 17:19 Tna Yesus yawe kʼait refi yawe, “Bosmot anyõ misoh nyõ. Nasen nros tna namo oh. Riof kʼnyõ.”
LUK 17:20 Raa ro Farisi baro masen mtu bo kʼYesus. Ana mtu bo oon ro meen Allah yamo Raja ybo raa mana rAit. Ana mtu fyi re kbe ana mhar oon reto mama oh meto. Tna Yesus yawe, “Raa baro mnaut mawe, kbe raa masu mmat bo ro msai toni aro frok mam ati ro oon reto mama. He mfe.
LUK 17:21 Tna kbe raa sioh mawe, ‘Oon rAit mama mefo!’, fee ye. Tna kbe raa sioh mawe, ‘Au mno!’, to, fee ye. Menohe nri oh! Jõ tama thau tsya anu raa oh mefo. Jõ oh mi siwyan iso re raa mamo mo kʼAllah tna Ait yamo Raja ybo ana to.”
LUK 17:22 Tna Yesus yawe kuber wAit yawe, “Jõ fi 'Ait ro Yroh Yama Yfi Raa Sai'. Meen kair mama mai kʼanu. Feto to, mam oon ro mama to, kbe anu ninaut nwe, ‘Tija oh mi Ait hah ye yama fo?’ Menohe kbe anu nmat Jõ mam ati reto fee.
LUK 17:23 Ati ro raa mawe kʼanu mawe, ‘Nmat, Ait mefi!’ Soh mfe, ‘Ait mne!’ Nri ana ma! Nhoh nmo nmat ma!
LUK 17:24 Ati ro 'Ait ro Yroh Yama Yfi Raa Sai' hah yama to, hah yama yfi rir ro mrir mam ayoh. Kbe raa beta mmat, mnan mfi bo rir ro mrir skentrat mamo mai jaro-jaro.
LUK 17:25 Jõ fi meen hah tama u. Hah te tama mun ro ewok fefares to, Jõ thau mam tabam refo wia. Tna raa mno bo ro mkair-kar mawat mai kʼJõ. Tna raa ro mfo refo mhau to mikyak Jõ wia.”
LUK 17:26 Tna Yesus yawe, “'Ait ro Yroh Yama Yfi Raa Sai' meen hah ye yama. Ye yama to, kbe raa mhau mno bo wana mnan si wore wo tiwya Nuh yhau:
LUK 17:27 Ati reto to, raa sohmaam bo tna mmen fnya bo to, snok mam ati ro Nuh twok mam wiak aken rait to. Tna bo maboh mama tubor: Aya mabo mbetru ana msu beta.
LUK 17:28 Wore wo Jo hah tama to, kbe raa mhau mno bo wana to mnan si wore tiwya Lot yhau: Raa sohmaam bo, moo bo tna masim bo wana, mhais maso tna sawyah samu bo to.
LUK 17:29 Ati ro Lot frok ybam Sodom to, bo maboh mama tubor: Tafoh msya belerang mroh mbam ayoh, tna mait ana beta mam beto.”
LUK 17:30 Tna Yesus yawe, “Jõ fi 'Ait ro Yroh Yama Yfi Raa Sai'. Meen Jõ hah tama to, kbe raa mhau mno bo wana mfi feto ye.
LUK 17:31 Tawe: Ati ro Jõ hah tama to, soh anu sait hre abyõ mam samu anyõ kri-kri to, kbe nroh satoh bo wonyõ mbam amah mato nbo frok to ma! Tna soh anu sait nkah bo mam armato kri-kri to, hah ne namoʼt samu anyõ to ma.
LUK 17:32 Nnaut bo ro Lot yfain mno!
LUK 17:33 Tawe kʼanu tawe: Raa taro tomer mawe mhau bana moof mam tabam refo. Tna ana kro Jõ fee. Ana weto meen mhau hame wajin fee. Menohe raa taro mhau bana moof fee. Ana kro Jõ. Ana kro Jõ ebokfi raa sikowah ana. Ana weto oh mi meen mhau hame wajin.
LUK 17:34 Meen Jõ hah tama tabam refo to, mti reto to, raa mabo ewok mjin mam ambar sau. Kbe malaikat woJõ mroh tubat sait tna sait yhau akus.
LUK 17:35 Tna fnya mabo ewok hre mmuk gandum make su to ye. Kbe malaikat woJõ mroh tubat sau tna sau mhau akus ye. [
LUK 17:36 Raa mabo ewok mhais bo to, kbe Ait tubat sait, tna sait yakus.]”
LUK 17:37 Tna kuber wAit mawe, “Bo weto kbe mabo mam woyõ?” Tna Yesus yawe, “Yuk ro bo mhai tna mhau akus to, kbe ruu hofyoh fru mama hre mam weto ye. ⌞Tna mam wore wo raa mno bo mkair-kar toni to, kbe meen Allah ymit safo kʼana weto mam yuk reto ye.⌟”
LUK 18:1 Yesus ykyas bofret sau. Ykyas afo re ana mur-mur skabuk yoyo, yawe ana bitsre skabuk ma.
LUK 18:2 Ait yawe, “Bi yabi sait yhau mam remo sau. Ait yamo raa ro ja ytu srah. Bi ait retait wase Allah. Tna ait ymat raa anya to kaket fee ye.
LUK 18:3 Tna semit sau mhau mam remo reto ye. Tna rabu wawa au mamo mo kʼait mawe, ‘Raa sait yno bo mkair mai kʼjõ. Nama nros nsya jõ tna saak safo ajõ.’
LUK 18:4 Menohe bi yabi retait yikyak au. Ti baro kait ait hawe bo yari au. Tna ti sau ait ynaut yawe, ‘Jõ waa Allah fee, tna ja tari bo kʼraa anya fee ye.
LUK 18:5 Menohe semit refo ja mama mkyas srah rau kʼjõ yoyo. Feto to jõ saak safo rau rof. Be kbe au mama mrit jõ yoyo to ma, tna mno jõ hrowyõ to ma.’”
LUK 18:6 Tna Yesus yawe, “Ait ro ytu srah retait ja yhaf moof fee. Menohe nri bo ro yawe: Yawe kbe ait saak safo rau.
LUK 18:7 Nnaut oh: Kbe Allah yros ysya raa wAit, tna saak safo rana ye. Anu nnaut nwe kbe bi Ait hre kait tna hawe bo yari boyoh raa wAit fe mfe a? Mfe, ana mayoh bo kʼAit yoyo to, Ait ja yari boyoh wana weto fooh. Tna ttu bo kʼanu tawe, Jõ fi 'Ait ro Yroh Yama Yfi Raa Sai'. Kbe Jõ hah tama tabam refo u. Tama u to, kbe Jõ tkai raa ro beroh smot Jõ fares aro to fe mfe a?”
LUK 18:9 Raa ro mros mari Yesus ykyas bo to, ana taro raa ro safuk mnaut mawe ana mesait aran mno bo ro moof. Ana ja miwana raa roto mnaut mawe, “Ana weto mno bo ro moof mnan si amu to fee.” Yesus ykyas bofret kʼraa weto yawe,
LUK 18:10 “Raa mabo ewok mamoʼt Samu ro Allah mawe skabuk. Ait sait raa ro Farisi tna sait raa ro yoo namabyoh (pajak).
LUK 18:11 Tna ait ro Farisi fi yros tna skabuk ait yesait yawe, ‘Jõ tayoh asik mawat kʼNyõ tawe jõ tnan fi raa ro mno bo mkair fee: Jõ tsyõf bo fee, jõ tno bo ro mkair fee, jõ raa ro twyah fee, tna jõ tfi ait ro yoo namabyoh refi fee ye.
LUK 18:12 Hari minggu sau jõ tiyas boit ro tait muhrin ewok. Tna bombra ro jõ too to, tsan sepersepuluh kʼNyõ.’
LUK 18:13 Menohe ait ro ja yoo namabyoh retait yros bait fari tna yanwaruk, tna yai yatmato skabuk yawe, ‘Allah natmof jõ ye, jõ fi raa ro tno iro.’”
LUK 18:14 Tna Yesus yawe, “Ait ro ja yoo namabyoh retait skabuk mkak tna yasen yamo bait. Tna ait ro Farisi retait skabuk mkak tna yasen yamo bait ye. Tkyas kʼanu tawe: Allah ymat ait ro yoo namabyoh retait tna yawe ait raa ro yhaf moof. Menohe Allah ymat raa ro Farisi retait tna yawe ait raa ro yhaf moof to fee. Awya ro safuk yawe ait u kar to, kbe Allah yno ait haberek yamo raa kinyah. Tna awya ro yamo raa kinyah to, kbe Allah yno ait haberek yamo raa ro mase riryõn.”
LUK 18:15 Tna raa mbo kukek wana mama mo kʼYesus. Ana mama re kbe Ait yse yatem abyõ kukek wana tna skabuk re Allah yno bo ro moof kʼana. Kuber ro Yesus mmat feto, tna ana mastako raa weto.
LUK 18:16 Menohe Yesus ytu kukek weto mama. Tna yawe kuber wAit yawe, “Nitsre ku kinyah weto mama mo kʼJõ. Nwe wa ana to ma! Raa ro mama mo kʼJõ mfi kukek wefo fo, mhaf wana to, Allah ksoh. Ana oh mi mamo raa mana ro Allah yamo Raja ybo to.
LUK 18:17 Menohe, Jõ tawe, Awya ro hawe mama mo kʼJõ mfi kukek wefo fo, kbe ana masen mamo raa ro Allah yamo Raja ybo to fee.”
LUK 18:18 Bobot sait yamo raa manes, ja ybo raa mam remo rait. Tna ait ytu kʼYesus yawe, “Guru; Nyõ fi raa ro nhaf moof! Jõ kbe tno bo bawya re kbe meen Allah yno jõ thau hame wajin?”
LUK 18:19 Tna Yesus yawe, “Fyi re nyõ nawe Jõ fi raa ro thaf moof? Raa aro mhaf moof fee. Allah yesait aran sai yhaf rAit moof.
LUK 18:20 Nyõ nhar watum ntraa ro tiwya Allah ybis Musa ykom yawe raa wAit mari tna mno. Au oh mefo: ‘Nwyah ma! Name ajat ma! Nsyõf bo to ma! Siroyõ ma! Nmat nja msya nme na to kaket!’”
LUK 18:21 Raa manes retait yawe, “Bosi weto tiwya taban tkek fares to, tno beta oh.”
LUK 18:22 Yesus yari feto tna yawe, “Bo sau nyõ nno fefares to: Namo nasim kta wonyõ beta. Tna nsaim pitis weto kʼraa ro bo marak. Soh nno bo reto to, nyõ name kta mam sawro ro Allah oh meto. Tna fo nama nkro Jõ.”
LUK 18:23 Ait retait bobot toni. Tibyo yari bokyas ro Yesus reto to, ait srau hri.
LUK 18:24 Yesus ymat ait tna yhar yawe ait sraujin. Tna yawe, “Raa ro bobot masen mamo raa ro Allah yamo Raja ybo to, min toni syok.
LUK 18:25 Kak unta maboh sau tomer twok mam sii hren soo to, mnan-nan baro ye. Menohe raa ro bobot tomer yamo raa ro Allah yamo Raja ybo to min toni.”
LUK 18:26 Tna raa ro mros mari bokyas ro Yesus ykyas reto mtu kʼAit mawe, “Soh feto to, raa awya meen ykai riof?”
LUK 18:27 Yesus yawe, “Anu raa nesait ntai nno riof kʼanu fee. Menohe Allah yno riof kʼanu saah. Ait ytai yno bo bawya sai.”
LUK 18:28 Tna Petrus yawe, “Amu wefo nsen sikba bombra wanu beta afo re nma kro Nyõ oh.”
LUK 18:29 Yesus yawe, “Ae, nnaut: Raa baro ntomer masen mamo raa ro Allah yamo Raja ybo. Ana mawe bo ro ati toni meto. Tna Allah ybis ana mamo mno bo wAit to, tibyo sikba samu rana, sikba mfain, mao, maja, mme, kukek wana bo to, Allah ymat.
LUK 18:30 Kbe ana weto mkai bo weto mninon renti mam tabam refo, tna meen mkai roon ro hame ye.”
LUK 18:31 Yesus ytu kuber wAit mabo 12 weto, yawe ana mesait mama siret su. Tna yawe, “Tiwya Allah ybis nabi wAit mama mkom bombra ro kbe btek mai kʼJõ. Jõ fi 'Ait ro Yroh Yama Yfi Raa Sai'. Anu bmoʼt Yerusalem mefo. Anu snok mam Yerusalem to, bo ro btek mai kʼJõ to, mnan si bo ro nabi na mkom wia weto.
LUK 18:32 Ana mkom mawe kbe raa moo Jõ msan kʼraa ro wase Allah. Kbe ana mamus Jõ, mno bo mkair kʼJõ, tfeh oot kʼJõ,
LUK 18:33 tna moo too mmok-mak Jõ, tna kbe ana mame Jõ tajat ye. Tna ti ro tuuf to, kbe Jõ trok tasen.”
LUK 18:34 Bokyas rAit reto to, kuber wAit aro mhar kbet fee ye. Maja rau to Allah yno re ana mnaut fee. Ana wase mawe, “Ait ykyas bawya sai meto ee?”
LUK 18:35 Yesus yama kene snok mam kota ro Yerikho, tna raa ro yasu mboh sait hre mam iso yayoh bo.
LUK 18:36 Raa retait yari he raa mawat frit tna ytu yawe, “Bawya meto?”
LUK 18:37 Tna raa mawe, “Yesus ro ybam Nasaret frit iti metait.”
LUK 18:38 Tibyo ait ro yasu mboh retait ytu yawe, “Yesus, Ku ro Daud; natmof jõ!”
LUK 18:39 Raa ro mamo msya Yesus to kmo bhah ait mawe, “Shait!” Menohe ait beroh ytu fari renti yawe, “Ku ro Daud, natmof jõ!”
LUK 18:40 Tna Yesus yros tna ybis yawe raa mbo ait ro yasu mboh retait mbo mama mo kʼAit. Yama, tna Yesus ytu kʼait yawe,
LUK 18:41 “Nyõ nksoh nawe Jõ tno bawya kʼnyõ?” Tna ait yawe, “Tuhan; jõ ksoh tmat bo ye!”
LUK 18:42 Tna Yesus yawe, “Soh feto; tbis tawe, ‘Nmat bo oh!’ Bosmot anyõ misoh nyõ meto.”
LUK 18:43 Mam weto si fo, ait yrok yasu maah tna ymat bo. Tna yasen kro Yesus yamo. Yamo tna bibi Allah. Tna raa mawat mmat bo reto ye. Tibyo ana bibi Allah ye.
LUK 19:1 Yesus ⌞ysya kuber wAit mamo kri-kri mam iso ro Yerusalem.⌟ Tna mam iso maka to, ana snok mam kota ro Yerikho.
LUK 19:2 Tna bobot sait yasom Zakheus yhau mam beto. Ait fi raa ro yamo pegawaipemerintah ro Roma tna ait aban mana pegawai taro sor ro moo namabyoh (pajak).
LUK 19:3 Ait fi raa ro yabuf. Raa mawat mama mmat Yesus. Tna bi Zakheus tomer yawe ymat Yesus ye. Menohe raa msis-sas mburut wa ait tibyo ymat Ait fee.
LUK 19:4 Tibyo ait yhoh yatim mam iso ro Yesus yamo reto, tna yaut mam ara sau tna hre abyõ mam uu. Ait hre abyõ mam uu tna ymat Yesus yamo mam te.
LUK 19:5 Yesus snok mam ara mair refo tna heyut ymat mam ara refo abyõ tna ymat Zakheus, tna yawe, “Zakheus, nroh fooh! Ayõ refo Jõ tawe tama hre iti mam amah anyõ.”
LUK 19:6 Zakheus yroh fooh tna ymen Yesus yamoʼt amah rait. Ymen Yesus feto, Zakheus simaut mase.
LUK 19:7 Menohe raa msis-sas weto mmat feto tibyo mmai kinya mawe, “Ait yhau mam amah raa ro ja yno iro rait!”
LUK 19:8 Ana mbewok hre mkyas bo tna Zakheus yawe yisoh bo mkair ro tii yno. Tibyo yasen yawe, “Tuhan; kta wojõ to, kbe jõ saim hariyah jaro tee kʼraa kinyah. Tna pitis namabyoh ro raa moo mee kʼpemerintah to, tiwya jõ too pitis hair to, jõ too mabyoh mnan si fee. Tawe kbe jõ tisya pitis reto kʼraa. Tisya tna too taro tur ye kʼraa weto muhrin jiit naut.”
LUK 19:9 Tna Yesus yawe kʼait yawe, “Ayõ refo raa ro mhau mam amah anyõ refo mkai riof ro mase. Nyõ fi nbam raa mana ro Abraham wait ye.
LUK 19:10 Jõ fi 'Ait ro Yroh Yama Yfi Raa Sai'. Tna Jõ tama saso raa ro mamo marak amo, tna tno re ana mkai riof ye.”
LUK 19:11 Tna Yesus hre iti mam amah ro Zakheus mam Yerikho fares. Yerikho to kene mam kota Yerusalem. Tna raa mnaut mawe oon ro Allah yamo Raja ybo raa mana rAit to, kbe mama fooh. Ana mnaut mawe ati ro Yesus yamoʼt Yerusalem to, kbe mabo rauk. Tibyo Yesus ykyas bofret sau afo re misoh bonaut wana ro sre meto.
LUK 19:12 Yawe, “Bobot sait ksoh yawe yamo gubernur ro ybo rabin rait. Feto to, ysaim yawe kbe yamoʼt oo ro fari yo kʼraja ro ybo rabin weto beta. Yamo yayoh kʼraja retait yawe afo re ybis ait yamo gubernur mam rabin rait ro ja yhau. Tna fo kbe hah ye yama ybo raa ro mhau mam rabin rait ro ja yhau.
LUK 19:13 Bobot retait yasen yamo fefares to, ait ytu sryan wait mabo trion nsaa mama mo kʼait. Tna yawe kʼana yawe, ‘Kbe jõ tamoʼt oo ro fari. Tamo tna thau kait baro mam teto. Wore wo jõ tarak fares to, tawe anu nhau nisoh bo wojõ kaket wea. Jõ too pitis trion nsaa refo tna saim sau kʼanu aro sait-sait. Tawe tfyah pitis wefo makit renti.’ Tna bobot retait yasen yamo.
LUK 19:14 Menohe raa ro rabin rait ro ja yhau to, knait bobot retait. Tibyo ana mbis raa baro mamo mo kʼraja retait mam oo ro fari reto ye. Mbis raa weto mamo mawe soo kʼraja retait mawe, ‘Amu hawe bobot retait yamo gubernur!’
LUK 19:15 Menohe mam oo ro fari reto raja retait yari ana fee. Ait ybis yawe bobot retait yamo gubernur mam rabin rait reto. Bobot retait yhau kait mam teto tna yasen hah ye yamaʼt rabin rait ro ja yhau. Snok mam amah rait to, tna ytu sryan wait mabo trion nsaa weto mama mo kʼait. Tna ait ytu pitis ro tiwya ait fyah kʼana weto, yawe, ‘Anu tru amot mafer renti aro fe mfe a?’
LUK 19:16 Sryan ro tinyi yama tna yawe, ‘Bobot, jõ fyah pitis anyõ reto, tna taru amot rau trion nsaa.’
LUK 19:17 Bobot retait yawe, ‘Nyõ nno bo ro moof oh! Taa nyõ mur-mur nno bo wojõ ro maku to, nisoh nno moof. Feto to jõ teta nyõ namo raa ro nase nasen nbo kota trion nsaa.’
LUK 19:18 Sryan ro ewok yama tna yawe, ‘Bobot, jõ fyah pitis anyõ reto tna tru amot rau trion maat.’
LUK 19:19 Bobot retait yawe, ‘Moof. Feto to, jõ teta nyõ namo raa ro nase nasen nbo kota trion maat ye.’
LUK 19:20 Tna sryan ro tuuf yama yawe, ‘Taja, pitis anyõ mefo. Tii jõ too hawee sau tna sro pitis anyõ, tse mam amah sai. Jõ te tamo tno mafer renti aro fee.
LUK 19:21 Jõ twaa kʼnyõ. Tnaut tawe nyõ fi raa ro ja safo triar. Nyõ safo triar tna noo baah raa tna naru amot mawat. Nno mkah bo manhai anyõ fee. Ja nyõ nryoh kake mam armato ro nyõ nyum fee.’
LUK 19:22 Tna bobot retait kmo. Tna yawe kʼait yawe, ‘Bokyas anyõ reto mnan si. Mkah bawya nyõ hawe nisoh bo wojõ mamyot bo ro tawe! Nyõ nno mkair meto! Nyõ fi sryan ro nkair. Riwai nyõ nawe jõ saso amot mkah bo manhai ajõ fee. Tna nawe jõ tryoh ara make ro jõ tyum fee ye.
LUK 19:23 Menohe nyõ noo pitis ajõ nisoh re noo mafer mawat fee! Rau ro moof to, nyõ noo pitis ajõ reto nee kʼraa re ana misoh tna mafer mawat! Nno feto re kbe jõ tama tru pitis reto mkah amot rau!’
LUK 19:24 Tna bobot retait yawe kʼraa ro mros mam weto yawe, ‘Ntak pitis ajõ mbam sryan retait yatem. Tna noo nee kʼsrian ro ybo pitis nsaa retait!’
LUK 19:25 Menohe ana ro mros mam weto mawe, ‘Bobot; raa retait ybo pitis nsaa oh!’
LUK 19:26 Tna bobot retait ykyas kʼana yawe, ‘Tawe: Awya ro yisoh bo wait kaket moof, kbe raa moo bo taro naut miryõ kʼait ye. Menohe awya ro hawe yisoh bo rait kaket to, kbe raa mrof moo bo rait ro yse weto beta mkak.
LUK 19:27 Tna tawe nmo nfot raa ro mamo byoh, ro mawe ana hawe bo jõ tamo raja tbo ana to. Nmo nfot ana beta, nbo nma, tna nme ana mam befo re jõ tmat mkah tasu ajõ ye.’”
LUK 19:28 Yesus ykyas bo weto mkak, tna fo yasen yamo. Ait ysya kuber wAit mamo mam iso ro Yerusalem fares.
LUK 19:29 Tna ana snok remo ro Betfage msya remo ro Betania. Remo weto mhau mam Faut ro Zaitun. Tna Yesus ybis kuber wAit mabo ewok matim wia. Ait yawe,
LUK 19:30 “Ntim wia, nmoʼt remo reto. Tna twok nmo to, kbe nkai keledai maku sau raa make mros wea mam weto. Keledai maku reto raa maut hre mam uu fefares. Nmo skur keledai reto tna nkuk nma.
LUK 19:31 Soh raa mtu bo kʼanu mawe, ‘Anu skur keledai reto mkah bawya?’ Anu nwe kʼana nwe, ‘Tuhan ybis.’”
LUK 19:32 Tibyo ana mbewok mamo tna mmat mnan si bo bawya ro Yesus riwai ykyas kʼana.
LUK 19:33 Ana skur kri-kri fares, tna raa ro keledai rana mama mtu kʼana mawe, “Anu skur keledai ramu reto mkah bawya?”
LUK 19:34 Ana mawe, “Tuhan ybis.”
LUK 19:35 Ana mkuk keledai reto mamo mee kʼYesus. Tna mrus jubah wana mnin keledai kbor. Tna mse Yesus hre abyõ.
LUK 19:36 Ana mamo renti. Mamo mam iso tna raa tom jubah wana ntar-tar anya mam iso iti. Tna Yesus ykah keledai yber iti yamo yamo.
LUK 19:37 Kene wo frok mam Yerusalem to, iso ro ana mamo reto mroh mbam faut ro Zaitun. Tna raa mawat ro ja kro Ait mamo mtar Ait. Raa weto tii mmat bo msai sor ro Yesus yno. Tibyo ana bibi Allah mkah mai ro mase. Tna ana smar-smar mtar-tar Ait mamo ye.
LUK 19:38 Ana mawe kʼYesus mawe, “Nyõ nase toni! Nyõ fi Raja ro nama mkah Tuhan yatak rAit! Nyõ nama mam Tuhan yasom! Kbe Nyõ nisoh iranya raa msya Ait! Nbaut Allah ro yhau mam sawro rAit!”
LUK 19:39 Raa ro Farisi baro ro mmat feto mawe, “Guru; nbis raa ro kro Nyõ weto shait!”
LUK 19:40 Menohe Yesus yawe, “Soh tbis ana wefo shait to, kbe fraa wofo masen mmai. Mtu mawe, ‘Ait retait Raa ro yase! Nbaut Ait oh!’”
LUK 19:41 Yesus snok mam Yerusalem makit rau to, Ait sraujin tna yawia.
LUK 19:42 Tna yawe, “Jõ ksoh tawe anu ro nhau mam Yerusalem to nhar nwe Jõ tama afo re tisoh iranya wanu nsya Allah. Menohe anu hawe nri bo ro Jõ tawe. Tibyo kbe anu aro srau fee. Kbe anu nhar bo ro Jõ tno reto fee ye.
LUK 19:43 Raa ro mamo byoh kʼanu to meen mama. Mama mros mur mbusyit anu. Tna kbe masen frok sker mam jaro-jaro.
LUK 19:44 Kbe raa sbe mame anu msya kukek wanu. Tna ana misasi amah wanu. Tibyo bofir (tembok) ro amah wanu to, smut frut-frat beta; sau mhau mros fee. Allah yama yawe sotak iro wanu, menohe anu wase Ait. Tibyo bo ro mkair weto kbe mama mai kʼanu.”
LUK 19:45 Yesus yamoʼt Samu ro Allah. Ait twok Samu reto bohra rau, tna ymat he raa hre masim bo wana. Tna Ait yhaf aya yasen yikyak ana.
LUK 19:46 Yawe, “Bokom ro Allah mawe, ‘Samu aJõ fo mkah bo raa skabuk. Menohe anu nma sikowah Samu refo sai!’”
LUK 19:47 Rabu wawa Yesus ykyas bo mam Samu ro Allah. Tna imam manes ro agama Yahudi, msya guruagama, msya raa mabi taro sor to, saim mawe mame Ait yajat.
LUK 19:48 Menohe raa taro sor beta mari bokyas rAit tna kbo matak. Tibyo raa manes weto mkai iso ro mame Ait aro fee. Ana mnaut mawe kbe raa weto hafrah. Ana hawe bo mno raa kmo.
LUK 20:1 Ti sau Yesus betoo watum ro Tuhan tna ykyas Bokyas ro Moof (Injil) mam Samu ro Allah. Ykyas bo to, raa manes ro agama Yahudi mama: Imam manes, guru agama, msya raa mabi wana ye. Ana mama tna mtu bo kʼAit mawe,
LUK 20:2 “Awya oh mi ybis Nyõ, re Nyõ nama nno bo wefo fo? Tna awya oh mi yoo yatak rait yee kʼNyõ fo?”
LUK 20:3 Yesus yawe, “Feto Jõ ttu si bo sau kʼanu ye, tawe:
LUK 20:4 Yohanes Pembaptis, Ait retait raabis ro Allah fe mfe a?”
LUK 20:5 Raa manes weto mkyas kʼanya mawe, “Soh bwe Allah oh mi ybis ait to, kbe Yesus yawe, ‘Feto tna fyi re anu ntu sioh bo ro Yohanes yawe?’
LUK 20:6 Raa wefo mnaut mawe Yohanes tait nabi ro Allah ybis yama. Feto soh anu bwe raa sai ybis ait to, kbe raa makin kmo. Tibyo moo fraa mai anu bjat!”
LUK 20:7 Feto to ana mawe kʼYesus mawe, “Amu wase ye.”
LUK 20:8 Tna Yesus yawe, “Feto Jõ ye te tkyas tatak aJõ ro tno bombra wefo kʼanu fee.”
LUK 20:9 Tna Yesus ykyas bofret kʼana yawe, “Bobot sait yyum anggur mara mawat mam tabam rait. Tna ait ybis raa baro yawe ana mkah tna kmot armato anggur rait reto wea, kwiyat kʼana. Ait yawe kbe ana moo make rau to, saim baro hayah kʼait. Tna bobot retait yasen yamoʼt oo roto. Ait yhau mam teto kait.
LUK 20:10 Tna soo ro anggur mara wait weto make manes to, bobot retait ybis sryan rait sait hah yamoʼt tabam rait, yamo yo kʼraa ro kmot armato reto. Bobot retait ybis sryan retait yawe, ‘Nkyas kʼana ro kmot armato ajõ nawe ana mryoh anggur make aro moo mee kʼnyõ. Tna noo anggur make weto nakah nama nee kʼjõ.’ Tna sryan retait yasen yamo. Yamo snok mam armato ro bobot rait reto. Menohe raa ro kmot armato weto to huwya mai sryan retait. Ana mikyak ait. Tibyo ait hah ye ybo anggur aro fee.
LUK 20:11 Feto to bobot retait ybis sryan rait roto sait u yamo. Sryan ro ewok retait yamo. Yamo snok mam armato ro bobot rait reto tna raa ro kmot armato reto huwya mai ait ye. Ana mamus ait ye tna mikyak ait. Tibyo hah ye yamo tna ybo anggur aro fee ye.
LUK 20:12 Tna bobot retait yasen ybis sryan rait ro tuuf yamo u. Menohe raa mai ait tna yakah yaaf. Tna ana kmo wer mikyak ait mnan ana mbewok ro tinyi ye mawe, ‘Hah namo tno!’
LUK 20:13 Tna bobot retait ynaut yawe, ‘Kbe tno bawya u? Tnaut tawe tbis ku ajõ ro tksoh refi yesait yamo rof. Kbe ana waa ait tibyo mmat ait rauk.’ Tna ku ait yasen yamo.
LUK 20:14 Menohe raa ro kmot armato anggur reto mmat he ku ait yama. Tna ana mkyas kʼanya mawe, ‘Ait ro meen shauk armato refo yama mefi! Ait refi yhau ma! Nma, anu bme ait yajat to, afo re meen armato refo mhau kʼanu!’
LUK 20:15 Tibyo ana mfot ait mkuk makah mamoʼt armato mne tna mame ait yajat.” Tna Yesus ytu yawe, “Bobot ro armato rait retait kbe yno bawya kʼana ro kmot armato reto?
LUK 20:16 Kbe ait yama yame raa weto tu. Tna ysan armato anggur reto kʼraa roto taro.” Ana mabi ro agama Yahudi mari feto, tna mawe, “Aha! Mfe!”
LUK 20:17 Menohe Yesus ymat ana tna yawe, “Nnaut Bokom ro Allah far-far refo: Fyi re Bokom ro Allah mkyas bo refo? ‘Raa saso fraa mawe sgi samu sau. Ana mmat fraa sau mawe mkair. Fraa reto to, ana hawe. Tibyo moo mbeak makus. Menohe ana wase bo fraa reto oh mi fraa ro ati.’
LUK 20:18 Awya ro mbtek yai abyõ mam fraa reto to, kbe sasyoh. Tna awya ro fraa reto mbtek mai to, kbe rarin-raran ye.”
LUK 20:19 Guruagama msya imam manes weto mhar mawe Yesus ykyas bofret reto ykyas mai kʼana. Tibyo ayõ reto ana saim iso re kbe mfot Ait. Menohe ana waa mfot Ait mam wore raa makin mmat. Ana mnaut mawe kbe raa weto kmo ana. Tibyo mfot Ait tetara mam weto fee ye.
LUK 20:20 Raa manes ro agama Yahudi mmat tan bo ro Yesus yno. Mnaut mawe iso ro moof to, soh ana mari Ait ykyas bo aro ro sre to, kbe ana mamo misisi bo reto kʼgubernur.Gubernur retait, raa ro Roma, tna ait yase re kbe yoo safo mana ymit kʼYesus. Feto tna raa manes weto mbis raa baro, mawe ana mamo ti te kro Yesus tna mari bo ro yawe. Mbis mawe ana mamo wan-wan mfi raa ro mhaf moof tna mtu bo baro kʼAit.
LUK 20:21 Tibyo raa weto mamo mo kʼYesus mawe, “Bi Guru; amu nhar nwe bo beta ro Nyõ nkyas to, bo mabo. Nyõ nkyas bo ro Allah ybis yawe anu bno, nkyas mnan si. Tna Nyõ waa raa ro manes fee. Nyõ beroh nkyas bokyas ro Allah kʼawya sai. Tna iso ro Allah to, ja Nyõ nerif abyõ kʼraa to, nmyõt bo fee ye.
LUK 20:22 Feto to amu ntu bo kʼNyõ nwe: Allah ksoh yawe anu mbero namabyoh (pajak)kʼKaisar fe mfe a?”
LUK 20:23 Menohe Yesus yhar yawe ana mamo wan-wan sai. Tna yawe,
LUK 20:24 “Noo pitis mauf sau nee kʼJõ tmat wia. Gambar refo fo msya awya yasom rait mefo?” Ana mawe, “Kaisar.”
LUK 20:25 Tna Yesus yawe, “Soh feto, bo bawya ro Kaisar rait to, noo nee Kaisar. Tna bo bawya ro Allah rait to, noo nee kʼAllah.”
LUK 20:26 Raa mawat mros mari bo ro Yesus ykyas weto. Tna bo ro ykyas to, yweh kbet fee. Tibyo raa ro mamo byoh weto mrok shait sai tna miskawowo mari bokyas ro Yesus reto.
LUK 20:27 Tna fo raa ro Saduki baro mama mo kʼYesus. (Raa ro Saduki to raa ro agama Yahudi ye, menohe ana ja mnaut mawe raa ro mhai to, meen me mrok masen fee.)
LUK 20:28 Ana mtu kʼAit mawe, “Bi Guru; tiwya Musa ykom yawe, ‘Soh raa sait yhai tna ait sano. Semit reto kbe yao kro mkah yabe ku aro mkah shauk biin ait ro yhai retait.’
LUK 20:29 Tna amu ntu bo kʼNyõ nwe: Mfi bo raa sme mabo ngkrema mao kʼanya mhau. Tna ro bum ymen fai sau, he ait sano tna yhai.
LUK 20:30 Tna ait ro ytan kro semit rana. Menohe ait sano tna yhai ye.
LUK 20:31 Feto ye yao ro tuuf yama kro semit rana naut menohe yabe ku aro fee ye. Feto ye mnan anya sai mamo snok ro ngkrema beta.
LUK 20:32 Tna fai reto mhai ye.”
LUK 20:33 Tna raa ro Saduki weto nti te mtu Yesus mawe, “Meen ati ro hai mrok masen to, awya yfain fai reto? Tiwya ana mabo ngkrema ye mfain fai au reto ye fe mfe a?”
LUK 20:34 Yesus yawe, “Raa ro mhau mam tabam refo to, ja mmen fnya.
LUK 20:35 Menohe meen raa mno feto fee. Allah ysok raa taro yno ana mrok masen. Mam makyon ro mama reto to, ana weto kbe mhau mam sawro ro Allah. Ana kbe moo fnya fee. Tna fnya weto kbe mamo msya raa fee ye.
LUK 20:36 Kbe meen ana mnan fi malaikat sor. Tibyo meen mhai u fee. Allah yno ana mrok masen. Tibyo ana to ku ro Allah wAit.
LUK 20:37 Nnaut bokom ro Musa tiwya ykom: Ti sau Allah ykyas bo kʼMusa. Musa yari mai rAit mam ara kinyah-kanah sau. Ara reto smut mait warah. Tna Allah yawe, ‘Jõ fi Allah ro Abraham, Ishak msya Yakub ja mbaut.’
LUK 20:38 Allah yawe feto tibyo anu bhar bwe hohos wanu weto ro mhai ooh oh, ana mhai tibyo fee. Menohe Allah yawe ana mhau mam sawro rAit smot Ait fares to. Raa ro mhai oh, Allah yawe ana weto mhau fares.”
LUK 20:39 Tna guruagama baro mawe, “Bokyas aNyõ to moof ati.”
LUK 20:40 Tna raa aro ter-ter mtu bo kʼYesus u fee.
LUK 20:41 Tna Yesus ytu bo kʼana yawe, “Ja raa mawe kbe Mesias tait Kube ro Raja Daud.
LUK 20:42 Menohe Raja Daud yesait, ati ro ykyas Mesias to, ytu Ait yawe, ‘Tuan ro ybo jõ.’ Mam aam ro Mazmur Daud ykom yawe: ‘Tuhan yawe kʼTuan ro ybo jõ yawe, “Nama, hre nsya Jõ mam ati ro tatem ati; hroh ro mase reto. Hre wea.
LUK 20:43 Tna raa ro byoh, raa ro srau kair kʼNyõ to, meen tno ana mbtek mam mte. Kbe Nyõ naa nber ana weto. Tna Nyõ nros natak abyõ ana, nbo ana.”’
LUK 20:44 Mam bokom far-far reto to, Daud yesait ykyas Mesias yawe, ‘Ait fi Tuan ro ybo jõ’. Fyi re raa mawe Ait fi Kube ro Daud?”
LUK 20:45 Raa beta hre mari bo ro Yesus ykyas fares. Tna Ait yawe kuber wAit yawe,
LUK 20:46 “Kaket anu be kbe guru agama miwro anu! Ana ja hasu bo myum ratan ro moof tna hasu bo raa bibi ana tna ksoh mawe raa mmah meen kʼana wore mamo mam pasar bo. Ati ro ana mamoʼt samu watum soh mfe mamo sohmaam bo msya raa roto to, ana ja msok ambar ro moof tna mhre mam weto.
LUK 20:47 Ana skabuk miyõ wer afo re raa mmat ana. Raa mmat feto tna mnaut mawe ana raa ro ja mno bo moof sai. Semit mnaut mawe ana raa ro ja mno bo ro moof, tna ana miwro semit weto tna mtak amah wana ye. Feto to, meen bo ro mkair toni mama mai kʼana tu oh.”
LUK 21:1 Yesus ykyas bo mam Samu ro Allah fares. Tna ymat raa ro bobot baro mamo mbero pitis wana mam yuk ro raa msan bosan wana kʼTuhan.
LUK 21:2 Tna ymat semit sau ro suawe ye. Au mamo mbero pitis mauf rau ewok sai.
LUK 21:3 Tna Yesus yawe, “Nri oh: Semit refo mbero pitis rau mawat miwer raa roto beta.
LUK 21:4 Ana roto beta mbero kebet sai mbam kta wana ro mninon. Menohe semit refo mse bosatoh mawat fee. Au msan bo wau beta kʼTuhan.”
LUK 21:5 Raa taro tawyõ Samu ro Allah tna mawe raa mfen fraa ro moof toni tna mse. Tna raa msan bo wana ro moof toni to, fayir Samu reto ye. Yesus yawe,
LUK 21:6 “Bo beta ro anu nmat wefo meen matu. Meen raa mitrah Samu reto. Tna kbe tembok msya fraa sau bo mhau ntar-tar anya feto fee. Meen fraa weto skik beta mbtek mai mam tabam.”
LUK 21:7 Ana mtu bo kʼYesus mawe, “Guru; tija re bo ro Nyõ nkyas weto mabo to? Kbe amu nmat bo bawya re nhar nwe bo ro Nyõ nawe weto kene wo mabo?”
LUK 21:8 Yesus yawe, “Kaket anu! Nno be raa mama sioh besruf anu. Jõ fi Mesias sait aran. Menohe meen raa mawat mama to, sruf bo mawe ana Mesias ybam kʼAllah. Tna kbe ana mawe, ‘Ayõ rau kene wo sboh oh!’ Nri ana ma! Kro ana ma!
LUK 21:9 Kbe anu nri he raa rabin taro mame anya tna mafa mnin-nin. Bo weto kbe mabo tu oh. Menohe waa ma: Bo weto kbe frok matim wia. Bo weto frok mama tna ayõ rau sboh fefares.
LUK 21:10 Tna raa ro bangsa sau kbe masen mame anya msya raa ro bangsa roto taro. Tna raa ro raja sait ybo kbe masen mame anya msya raa ro raja roto taro mbo ye.
LUK 21:11 Kbe iin ro mase toni frok. Tna haisre msya hayama kbe mai raa mam rabin jaro-jaro. Raa mawat kbe kiyam tna mhai. Tna kbe Tuhan yno bo ro mase mam ayoh abyõ. Raa beta kbe mmat tna waa.
LUK 21:12 Bo weto mama fefares to, kbe raa mama mfot anu. Anu fo kuber woJõ. Au oh mi kbe raa mfot tna sikowah anu. Kbe ana makah anu mamoʼt samu watum ro Yahudi. Tna fo ana mbo anu mamo mbu mam bui ye. Tna ana makah anu mamo msan kʼgubernur taro msya raja na taro sor ye.
LUK 21:13 Bo mkair weto meen mai kʼanu. Menohe mafer rau ro tis to moof. Jõ bitsre bo reto mai kʼanu afo re kbe anu nkyas Jõ tasom kʼraa ro mase weto.
LUK 21:14 Nnaut myum-yam bokyas ro kbe anu nkyas si kʼraa weto to ma:
LUK 21:15 Kbe Jõ tesait besi bonaut msya bokyas ro moof kʼanu, re kbe anu nkyas. Bokyas ranu reto kbe mnan si yum. Tibyo kbe raa byoh ro mhaf kair kʼanu to, aro matak mkyas bo si fee, ana shait sai.
LUK 21:16 Meen nja, nme, nao, nno msya nfoh na wanu kbe hren ksuk anu. Anu aro kbe ana mame njat ye.
LUK 21:17 Anu smot Jõ tibyo kbe raa beta knait anu.
LUK 21:18 Menohe anu nna mawyan wanu kbe sau marak bo fee ye.
LUK 21:19 Nros ntak tna beroh smot Jõ. Tna meen anu nkai riof ro mase.”
LUK 21:20 Tna Yesus yawe kuber wAit yawe, “Ati ro anu nmat raa byoh mbusyit Yerusalem to, anu nhar nwe kota reto mhau kait u fee. Baro feto bo ro mkair mama sikowah kota reto.
LUK 21:21 Ati ro anu nmat bo reto to, anu ro nhau mam provinsi ro Yudea to; nsen nsam nmo nuut atu mana. Tna anu ro nhau mam kota mato to; nsen nsam frok sikba kota reto. Tna anu ro nhau mam kota mne to; nmo twok mam kota reto mato ma!
LUK 21:22 Ti weto to oon rau sboh oh. Tibyo Allah yno bo mai kʼraa mana ro Yahudi. Yno bo ska ana mnan si Bokom ro Allah tiwya raa mkom.
LUK 21:23 Wore weto to, fnya ro mhaf tna msya fnya ro mesis ku mees wana fares to, ana mmof toni. Ana kbe matak msam fooh fee. Bo ro mti kair kbe mbtek mai rabin refo. Tna Tuhan kbe kmo raa mana ranu refo.
LUK 21:24 Ana taro kbe raa mame majat. Taro ye kbe raa mfot tna mkuk makah mamoʼt bangsa raa makin. Tna raa ro wase Allah kbe mama mhau mam Yerusalem. Kbe ana mbo kota ranu refo snok mam ayõ ro Allah ybis yawe mnan. Tna makyon rau reto mkak.”
LUK 21:25 “Fyi re anu nhar nwe tabam kene wo haberek? Meen anu nmat ayoh to, nmat bo ro mase Tuhan yno mam ayoh; meen yno bo mai ayõ, snyi msya sken ye. Tna yno figyõm mase mai mam sawan ye; tibyo anu nri hmu rau mbam fari. Mam bangsa ro arin aso beta to, kbe raa mmat bo weto, tibyo waa tna mnaut yyi. Ana tetet miskawowo.
LUK 21:26 Raa beta waa tetet mhai mmat bo beta ro mama mai. Meen bombra ro mhau mam ayoh skes to beta, Allah ybo sin. Tibyo raa mnaut yyi tru bo bawya ro kbe frok mama.
LUK 21:27 Jõ fi 'Ait ro Yroh Yama Yfi Raa Sai'. Meen ati reto to, raa mmat Jõ tbam ayoh mboh abyõ troh tama. Tama to, raa mmat Jõ tatak aJõ ro msai tna mmat tase aJõ ye.
LUK 21:28 Bombra ro riwai Jõ tkyas weto, ati ro anu nmat bo weto mama to, nsen nros! Nsimaut mase nwe ayõ ro Allah yfes anu to, kene wo mama oh meu!”
LUK 21:29 Tna Yesus ykyas bofret refo kʼana yawe, “Nmat kake mara sor.
LUK 21:30 Mam tabam ranu refo, soh nmat masyoh rau teta frok feto to, anu nhar oh nwe kene wore snyi ro hwyõm oh meto.
LUK 21:31 Feto ye, soh anu nmat bo weto mama to, anu nhar sai oh nwe oon reto kene oh meto. Allah siwyan yamo Raja ytu raa wAit mama ybo meto.
LUK 21:32 Nnaut: Ati ro bo wefo beta mama to, tawe biin reto to, kbe raa taro mhau fares.
LUK 21:33 Ayoh msya tabam refo kbe saef marak. Menohe bokyas aJõ kbe meen mhau mawyõs mamo snok mam hame wajin.”
LUK 21:34 Tna Yesus yawe kuber wAit yawe, “Nhau kaket afo re anu siwyan ayõ ro meen Tuhan yama! Nno bokyõ wer ma. Nta jyõ wer to ma. Nsui bo ro tabam refo toni to ma. Ayõ rau reto snok tubor. Soh anu nhau siwyan anu to fee, kbe anu nrok. Anu nrok mfi bo kak mami sna; tibyo mrok.
LUK 21:35 Raa beta ro mhau mam tabam refo kbe meen mkai ayõ reto tu oh.
LUK 21:36 Jõ fi 'Ait ro Yroh Yama Yfi Raa Sai'. Kaket anu yoyo! Skabuk nyoh Tuhan afo re kbe anu nhau riof sai wore wo meen bombra wefo mbtek mai kʼraa. Tna meen mam sawro ro Taja to, Jõ ttu srah kʼraa beta to. Kbe anu nma tna nros si mam wore Jõ tasu ye. Skabuk re kbe, ati reto to, tmit safo kʼanu fee.”
LUK 21:37 Baas to Yesus watum bo mam Samu ro Allah. Tna mti to, Ait yamo yjin mam faut ro Zaitun.
LUK 21:38 Tna rabu momo raa msis-sas masen mamoʼt Samu ro Allah mawe mari bokyas rAit.
LUK 22:1 Korat 'Roti ro Ragi Marak' to kene oh. Korat reto ja raa mtu mawe masom Paskah ye.
LUK 22:2 Tna imam manes ro agama Yahudi msya guruagama wana saso iso ro mame Yesus. Ana mawe mfot Ait wore wo raa makin mmat fee. Raa msis-sas hasu bo mari bokyas rAit. Tibyo raa manes weto waa raa makin mmat bo ana mfot Yesus, be kbe raa makin mrok mnin-nin.
LUK 22:3 Tna kabes yabi (Iblis) twok ybo Yudas Iskariot. Yudas tait, kuber ro Yesus wAit mabo 12 weto sait ye.
LUK 22:4 Yudas yasen yamo tna hre saim bo ysya imam manes msya aban mana ro ja mbo raa sbe. (Raa sbe weto to raa ro Yahudi. Ana ja kmot Samu ro Allah.) Raa weto hre su msya Yudas tna saso iso ro kbe Yudas ysan Yesus kʼana.
LUK 22:5 Riwai Yudas yama yo kʼana to, ana weto nksoh toni. Tna ana mawe kʼYudas mawe kbe maren pitis kʼait.
LUK 22:6 Yudas ksoh. Ait yasen yamo. Tna ywof ati ro moof re kbe besruf Yesus. Yawe kbe yno wore wo raa makin mmat fee.
LUK 22:7 Raa makyõ korat 'Roti ro Ragi Marak'. Ti ro tinyi rau reto ja raa ktan domba sau ro kbe mabo mam bokyõ ro Paskah.
LUK 22:8 Tna Yesus ybis Petrus ysya Yohanes yawe, “Nmo siwyan bo sohmaam re kbe anu bkyõ bokyõ ro Paskah.”
LUK 22:9 Ana mtu bo kʼAit mawe, “Nyõ nksoh nawe amu siwyan bo sohmaam mam woyõ?”
LUK 22:10 Yesus yawe, “Nmo ntwok mam Yerusalem. Tna kbe anu fri raa sme ro yasom baah mkah aya sait. Kro ait retait nmo twok mam samu ro kbe ait yatim twok to ye.
LUK 22:11 Tna nwe kʼraa ro samu rait reto nwe, ‘Guru ranu ytu yawe, “Yuk ro kuber woJõ msya Jõ kbe nkyõ bokyõ ro Paskah mam woyõ?”’
LUK 22:12 Kbe ait yerif amah hawar ro uu sau kʼanu. Amah hawar reto mase. Tna ambar bo mhau wea oh. Siwyan bombra mam beto.”
LUK 22:13 Tna ana mbewok masen mamo. Ana mmat he bo beta huwya mfi bo bawya ro Yesus riwai yawe kʼana. Tna ana siwyan bo sohmaam mkah makyõ bokyõ ro Paskah reto.
LUK 22:14 Bo beta raa siwyan oh. Tna mti reto Yesus ysya kuber wAit hre sohmaam bo su.
LUK 22:15 Tna Ait yawe kʼana yawe, “Tii ooh oh Jõ ksoh toni tawe hre takyõ korat ro Paskah refo tsya anu wia. Tna fo kbe bo ro mkair mama mai kʼJõ.
LUK 22:16 Jõ kbe sohmaam korat ro Paskah u fee mamo snok mam meen anu bkai mabo rau mam wore wo Allah yamo Raja ybo raa mana rAit.”
LUK 22:17 Tna Yesus yoo hawereh sau tubat abyõ mam uu tna skabuk anggur maya reto yayoh asik mase kʼAllah. Tna Ait yawe kuber wAit yawe, “Anggur maya refo noo nsaim nee kʼanya nta.
LUK 22:18 Jõ tesait kbe tata anggur maya u fee mamo snok mam oon ro Allah yamo Raja ybo raa mana rAit.”
LUK 22:19 Tna Yesus yoo roti sau. Yoo tna skabuk yayoh asik mase kʼAllah. Tna Ait haber roti reto yee kʼana beta mait. Tna yawe, “Nmat roti refo. Tetsu aJõ ro tsan mkah anu oh mefo. Niit oh. Tna kbe nno fefo u re nnaut Jõ.”
LUK 22:20 Ana sohmaam bo mkak tna Ait yoo hawereh reto tna yno mnan feto u yawe, “Anggur maya refo to mees aJõ ro kbe miyi mkah riof kʼanu. Kbe raa mame Jõ tajat tna Allah ysair Bosi ro Tna kʼanu oh meto.”
LUK 22:21 “Raa ro hren serek Jõ tait hre susai ysya anu mam wefo ye.
LUK 22:22 Jõ fi 'Ait ro Yroh Yama Yfi Raa Sai'. Kbe Jõ raa mame tajat mnan si bawya ro Allah yawe bait yum oh. Menohe bo ro mkair meen mama kʼait ro hren serek ysya Jõ retait.”
LUK 22:23 Tna kuber wAit mkyas kʼanya mawe, “Awya ro kbe hren serek fi?”
LUK 22:24 Tna kuber ro Yesus wAit mkyas renti tna santri anya mawe ana to awya kbe yase toni.
LUK 22:25 Tna Yesus yawe kʼana yawe, “Raa ro wase Allah to, raja wana ja mberasi raa wana ro mbo. Menohe raa ro mase weto, raa mtu mawe ‘raa ro mhaf ase’. He mfe.
LUK 22:26 Jõ tawe kʼanu tawe, ‘Nbo raa anya feto ma.’ Anu fo, awya ro yase, Jõ tawe yako hawe sai to ait haberek yamo ynan raa ro yaku. Tna ro aban mana to, Jõ tawe yako hawe sai ait yamo ynan sryan.
LUK 22:27 Awya yase toni: Bobot ro hre yait boit, soh mfe ait ro siwyan boit tna yasyõ yee kʼbobot yait? Ja raa mawe bobot ro hre yait boit tait yase toni. Menohe Jõ tama tfi raa ro siwyan boit tna tasyõ tee kʼanu niit ye.
LUK 22:28 Anu wefo rabu wawa ja nhau su nrat nsya Jõ, ebokfi bo ro mkair aro mai kʼJõ to. Anu oh mi raa ro ja sikba Jõ fee.
LUK 22:29 Taja ybis yawe Jõ tamo Raja tbo raa taro sor. Tna mfo refo Jõ tawe anu meen nbo raa taro ye.
LUK 22:30 Tno bo reto afo re meen anu sait-sait yase tna ybo raa mana ro Israel trion 12 weto ye. Tna wore wo Jõ tamo Raja tbo raa woJõ to, meen anu nsya Jõ hre sohmaam bo su.”
LUK 22:31 Tna Yesus yawe kʼPetrus yawe, “Simon, nari oh: Kabes yabi (Iblis) yayoh kʼAllah, yawe bitsre ait yama sanet anu beta. Yawe yno anu smot Jõ fee. Yawe yno anu sikba Jõ nmo nhau hayah; mfi bo raa sait ja yoo gandum rait ysok makan rau tna yse hayah. Tna marak rau ait yitsre akus.
LUK 22:32 ⌞Tna Allah ybis.⌟ Menohe Jõ skabuk nyõ oh, afo re bosmot anyõ matak sai. Tna nyõ nhah nama no kʼJõ. Nashana to, tna tawe nisoh nno nao na to, bosmot wana matak ye.”
LUK 22:33 Petrus yawe, “Tuhan; jõ kbe twok bui mato tna tajat su tsya Nyõ ye!”
LUK 22:34 Tna Yesus yawe, “Petrus, nari: Kbe nyõ nno feto fee. Jõ thar tawe kbe kook mara fefares mam mti refo to, kbe nyõ nwaar Jõ muhrin tuuf, nawe nyõ nwase Jõ.”
LUK 22:35 Tna Yesus yawe kuber wAit yawe, “Tiwya Jõ tbis anu tawe nmo nkyas Jõ tasom aJõ. Tna tawe anu nmo to nbo pitis ma. Tawe, krek yume ro nfau bo to ma. Nse sandal ma. Ati reto anu nbo bo aro mabut fe mfe a?” Tna ana mawe, “Mfe.”
LUK 22:36 Tna Yesus yawe, “Bokom ro Allah far-far sau mkyas Jõ mawe, ‘Kbe raa mnaut mawe Ait tait Raa ro yber safo.’ Yesaya 53:12 Mfo refo bokom reto oon rau sboh oh mefo. Kbe bo reto mabo tu oh. Bo bawya-bawa sai kbe mno wa fee. Mfo refo tawe ati ro anu nmo to, kbe krek yume wanu, tna ro yse pitis to ybo weni, tna ro yse sbe aro fee to, kbe ait yasim ratan rait re kbe kwiyat sbe sau.”
LUK 22:38 Tna kuber wAit mawe, “Tuhan nmat, sbe trion ewok oh mefo.” Tna Yesus yawe, “Mnan oh.”
LUK 22:39 Yesus sikba Yerusalem tna yamoʼt faut ro Zaitun mnan ja yno soo oh. Tna kuber wAit kro Ait mamo ye.
LUK 22:40 Ana snok mam yuk reto tna Ait yawe kʼana yawe, “Skabuk re kbe bo ro tabam refo tko anu nno iro to ma.”
LUK 22:41 Yesus yiserar yamo baro naut, tna hre tmi yimna skabuk yawe,
LUK 22:42 “Taja, Jõ tayoh kʼNyõ tawe Nyõ noo kair ro mama refo to, beak fari to. Nno re Jõ tru ma. He mfe: Nyõ nno mnan bonaut aNyõ sai.” [
LUK 22:43 Tna malaikat sau mbam sawro ro Allah mroh mama frok tubor. Mama misoh bosmot rAit. Tibyo Ait yatak.
LUK 22:44 Yesus yrok yhaf miyõ toni. Ait yhaf aya tibyo mur-mur skabuk kaket renti. Ait yimyoh frok mnan mees ro miyi tna mbtek-tak mam tabam.]
LUK 22:45 Yesus skabuk mkak tna hah yamo yo kuber wAit. Ait yama ymat menohe ana mjin beta. Riwai ana sraujin toni tibyo mhai rowyõ.
LUK 22:46 Tna Ait yawe kʼana yawe, “Fyi re anu njin to? Nsen tna skabuk. Skabuk re kbe bo ro tabam refo tko anu nno iro to ma.”
LUK 22:47 Yesus ykyas bo kri-kri fares, menohe raa majin sau mama. Yudas yatim wia yama yo kʼYesus tna hana Ait. (Yudas tait, kuber wAit mabo 12 sait.)
LUK 22:48 He Yesus yawe, “Yudas, Jõ oh mi 'Ait ro Yroh Yama Yfi Raa Sai'! Fyi ro nyõ nama hana Jõ mkah bo hren serek Jõ mefo?”
LUK 22:49 Ati ro kuber wAit taro mmat bo ro kbe Yesus tru reto ana mtu kʼAit mawe, “Tuhan fyi, amu nbo tfo nfa nsya ana fe mfe a?”
LUK 22:50 Tna kuber ro Yesus sait yasen ysot raa sait yimara ati ro yatem ati to hri. Raa retait tait sryan ro imam yase rait.
LUK 22:51 Menohe Yesus yawe kuber wAit yawe, “Mnan oh!” Tna Yesus ybo sryan retait yimara tna yisoh mrok moof u mfi tinyi.
LUK 22:52 Tna Yesus yawe kʼana ro mama mfot Ait yawe, “Jõ fi raa ro ja hafrah pemerintah Roma fee. Jõ tko raa mrok mnin-nin fee. Anu nbo sogi msya hbat wanu tna nma nfot Jõ to, nno fyi?
LUK 22:53 Rabu wawa Jõ thau su tsya anu mam Samu ro Allah menohe anu nfot Jõ mam beto fee. Mfo to, ayõ ro mamur snok mama oh. Tna anu nma wefo fo nkah ntak ro mkair mbam kabes yabi. Tibyo anu nma nfot Jõ fo.”
LUK 22:54 Ana mfot Yesus tna makah mamoʼt samu sau. Samu reto imam agama Yahudi ro yase rait to. Tna Petrus ybo rof-rof ana mtis.
LUK 22:55 Snok mam bohra ro samu reto tna raa mko tafoh susai. Tna Petrus ysya raa baro hre su.
LUK 22:56 Tna sryan sau ro ano mmat Petrus hre yni foos ye. Au mmat ait kaket tna mawe, “Raa refi ja ysya Yesus ye!”
LUK 22:57 Menohe Petrus yawe, “Bokyas anyõ fyi meto? Jõ wase ye!”
LUK 22:58 Ti baro firwas tna Petrus hre fares. Tna raa sait ymat ait tna yawe, “Nyõ ja nsya Ait ye!” Menohe Petrus ywaar yawe, “Mfe, jõ fee!”
LUK 22:59 Ayõ sau naut tna raa roto sait yawe, “Ae, ait refi raa ro Galilea ye. Ait kuber ro Yesus sait tu oh!”
LUK 22:60 He Petrus yawe, “Bokyas anyõ fyi meto? Jõ wase ye!” Petrus ykyas fares si fo tibyo kook sau mara.
LUK 22:61 Tna Yesus siur tna ymat Petrus. Tna Petrus ynaut bokyas riwai Yesus yawe kʼait yawe, “Kook mara fefares to, kbe nyõ nwaar Jõ muhrin tuuf.”
LUK 22:62 Tna fo Petrus yasen frok yamo tna yawia sut-sut.
LUK 22:63 Raa ro kmot Yesus mamus Ait. Ana moo hawee make Ait yasu tna mai Ait. Mai tna mtu kʼAit mawe, “Sgi nawe awya yai Nyõ metait?”
LUK 22:65 Bomus mawat raa mamus Ait.
LUK 22:66 Rabu momo tna raa manes ro agama Yahudi, mama siret su. (Ana weto to imam manes wana msya guruagama wana ye. Ja ana siret su re mtu safo raa ro Yahudi.) Tna raa sbe ro kmot Yesus masen mbo Ait mamo mo kʼraa manes weto.
LUK 22:67 Ana mtu kʼYesus mawe, “Nyõ fi Mesias fe mfe a?” Menohe Yesus yawe, “Soh Jõ tawe feto kʼanu to, kbe anu smot ye fee.
LUK 22:68 Tna soh Jõ ttu bo kʼanu to, kbe anu nwe si fee ye.
LUK 22:69 Menohe tawe kʼanu tawe: Jõ fi 'Ait ro Yroh Yama Yfi Raa Sai'. Maban tinyi rau mefo, kbe anu nmat Jõ hre tsya Allah ro yase. Kbe Jõ hre mam ati ro yatem ati; hroh ro mase reto.”
LUK 22:70 Tna ana beta mtu mawe, “Soh feto, Nyõ refi Allah yare a?” Tna Yesus yawe, “Ae; au oh nwe meto.”
LUK 22:71 Tna ana mawe, “Ait fi Raa sai. Menohe yesait yawe Ait fi Mesias! Yawe feto, Ait nto Allah oh meto! Tna anu besait bri oh. Kbe anu saso raa roto mama maun Ait mkah bawya! Mfo refo anu besait bmit safo reto kʼAit!”
LUK 23:1 Raa manes ro ja mtu safo raa ro Yahudi weto, beta masen mros. Tna mbo Yesus mamo mo kʼPilatus.
LUK 23:2 Mamo mo kʼPilatus tna ana masen maun Yesus mawe, “Raa refi berasi watum ro Roma toni: Ro sau to, amu raa mana ro Yahudi to, Ait yiwro amu. Yawe amu nri bo ro pemerintah mawe to ma. Ro ewok to, Ait yawe wa yawe, ‘Noo namabyoh (pajak) wanu nee kʼKaisar to ma.’ Tna ro tuuf to, Ait yawe Ait yesait oh mi Mesias. Au oh mi yawe Ait yamo Raja.”
LUK 23:3 Tibyo Pilatus ytu bo kʼYesus yawe, “Nyõ fi Raja ro nbo raa ro Yahudi fe mfe a?” Yesus yawe, “Ae; bokyas anyõ reto mabo oh.”
LUK 23:4 Tna Pilatus yawe kʼimam manes weto msya raa taro sor ro mros mari bo ro ait yawe, “Jõ tnaut tawe Ait refi fi raa ro yisti safo ro mkair aro fee. Tmit safo aro kʼAit fee.”
LUK 23:5 Menohe raa mberoh sai matak toni mawe, “Bokyas rAit yno raa ro Yudea mhaf wana beta mkair. Tinyi rau yno mam provinsi ro Galilea, tna mfo refo Ait yama ykyas bo rAit mam rabin ranu refo to ye!”
LUK 23:6 Pilatus yari bokyas reto tna ytu yawe, “Ait refi ybam Galilea a?”
LUK 23:7 Raa mawe, “Ae.” Tibyo Pilatus yawe, “Herodes oh mi ja ybo raa mam provinsi ro Galilea. Jõ fee.” (Ja bi Herodes yhau mam Galilea. Menohe ati reto ait yama iti yhau mam Yerusalem.)
LUK 23:8 Tibyo raa manes ro agama Yahudi weto mbo Yesus mamo mo kʼHerodes. Herodes ksoh ymat Yesus. Tiwya ooh oh ait yari raa mkyas mawe Yesus ja yno bosair msis toni. Tna ati reto ait yawe ymat Yesus yno bosair aro.
LUK 23:9 Herodes ytu bo msis kʼYesus. Menohe Yesus shait sai.
LUK 23:10 Imam manes msya guruagama na mros su mam weto ye. Ana kmo tna mkyas besus-basas Ait, tna maun Ait.
LUK 23:11 Riwai Yesus yawe Ait fi raja. Feto to raa sbe mawah ratan ro mfi raja na ja myum to, mse kʼAit yyum. Tna Herodes ysya ana sret Ait masah. Tna Herodes ybis raa sbe wait weto mbo Yesus hah mamo mo kʼPilatus u.
LUK 23:12 (Herodes ysya Pilatus ana mbewok ja soo mtoh anya, menohe ati reto ana mbewok me haberek miranya u.)
LUK 23:13 Yesus raa makah hah mamo mo kʼPilatus. Tna Pilatus ytu imam manes, raa manes taro, msya raa beta yawe mama siret su.
LUK 23:14 Ana mama tna ait yawe, “Riwai anu nbo Raa refi nma no kʼjõ tna anu nuun Ait nwe ja yno raa mbeswan pemerintah ro Roma. Jõ ttu sas Ait tna tnaut tawe Ait yisti safo maku aro bo fee saut. Yno safo mnan boun ro anu nuun Ait weto ye fee.
LUK 23:15 Tna Herodes ynaut yawe Ait raa sai bait ja yno safo aro fee ye. Tibyo Herodes ybis Ait hah yama yo kʼamu. Anu nhar nwe Ait yisti safo ro mase aro fee. Safo ro Ait yisti re anu nme Ait to aro fee!
LUK 23:16 Jõ tbis raa mai mahoh Ait sai. Tna fo jõ bitsre Ait.” [
LUK 23:17 Tahun aro firwas-firwas korat ro Paskah mama tna Pilatus tufrok raa sait ybam bui yawe yamo bait. Korat Paskah reto to, ait yawe kbe bitsre Yesus.]
LUK 23:18 Menohe raa ro siret mam beto hawe. Beta masen mawe, “Mfe! Nme Ait yajat! Tufrok Barabas ybam bui!”
LUK 23:19 (Tiwya raa sait ro yasom Barabas yno raa ro Yerusalem mnin-nin. Tna ait yame raa sait yajat ye. Tibyo raa mbu ait mam bui.)
LUK 23:20 Menohe Pilatus yawe bitsre Yesus. Tibyo yawe kʼraa weto u yawe ait ksoh rait to, bitsre Yesus yamo bait.
LUK 23:21 Menohe raa weto mtu fari mawe, “Mfe, name Ait yajat mam ara warok!”
LUK 23:22 Tna Pilatus yasen yawe kʼraa weto mun tuuf u yawe, “Nwe nme Ait to, fyi? Ait Raa ro yisti safo bawya? Jõ tnaut tawe Ait yisti safo aro fee saut. Safo mase ro Ait yisti re anu nme Ait to, aro fee! Feto to tbis raa sbe mai Ait wia, tna bitsre Ait yamo bait.”
LUK 23:23 Menohe raa kmo mawe renti mawe, “Yesus kbe raa mame tu!” Tibyo bokyas manta mati rana. Tna fo tis rau Pilatus yari.
LUK 23:24 Tibyo Pilatus ybis yawe raa mame Yesus mnan si bo ro ana mawe.
LUK 23:25 Tna ait bitsre Barabas ro ana mayoh retait. Tna Yesus raa msan mam ati rana. Tna ana mno mnan bo ro ana mawe sai.
LUK 23:26 Tna raa sbe mbo Yesus mamo frok amah reto, tna makah mamo mame Ait. Ana mamo mam iso tna fri raa sait ybam safom yama. Ait raa ro srim, ybam kota ro Kirene. Yasom rait Simon. Ana mfot ait tna mkuk ait yawe yasom ara warok ro Yesus. Tna Simon yasom ara warok reto kro Yesus mam tis.
LUK 23:27 Ana mamo to, tna raa mawat kro Yesus mamo ye, msya fnya baro ye. Fnya weto sraujin toni tna mawia Yesus ye.
LUK 23:28 Yesus siur haberek yawe kʼfnya weto yawe, “Fnya ro nhau mam Yerusalem: Nwia Jõ ma. Nwia anu nesait tna nwia ku wanu sai.
LUK 23:29 Meen arin mkair mama mai kʼraa ro mhau mam Yerusalem. Tibyo kbe raa mawe, ‘Fnya ro siban, fnya ro mabe ku fee, msya fnya ro moo sis mee ku mait fee to; kbe ana simaut mase!’
LUK 23:30 Arin mkair tibyo raa mayoh mawe bo mai ana majat. Mawe, ‘Rau ro moof to, atu mbra sor matu mama mnyien amu!’ Tna mawe, ‘Rau ro moof to, faut mama msyoh kait amu!’
LUK 23:31 Jõ tno safo aro fee. Jõ tnan fi ara sau ro safom fares. Menohe raa mno bo mkair mai kʼJõ mnan fefo. Menohe anu, raa ro Yerusalem fo, nno iro mawat. Anu nnan fi ara ro samer. Meen raa mno bo bawya mai kʼanu?”
LUK 23:32 Raa sme roto mabo ewok tiwya mno safo. Ana raa makah mamo re mame su msya Yesus ye.
LUK 23:33 Ana mamo snok mam faut sau ro masom 'Yuk ro Hamana'. Mkah mai rana to, raa mawe 'Golgota'. Raa sbe mse Yesus mam ara warok sau. Tna mse raa ro marmtuk mabo ewok mam ara warok feto ye. Ana mse sait mam ati ro Yesus tem ati tna sait mam ati ro Yesus tem ta.
LUK 23:34 [Tna Yesus skabuk raa sbe weto yawe, “Taja, nyon iro ro ana mno refo. Ana wase bo bawya ro ana mno.”] Tna raa sbe weto moo bo tane re kbe mhar awya ro yoo ratan ro Yesus rAit. Tna saim kʼanya.
LUK 23:35 Raa msis mros mam weto horit. Tna raa manes taro mamus Yesus mawe, “Ait yawe Ait tait Mesias ro Allah ybis yama. Yawe Ait tait Raa ro Allah ysok. Ait yno riof kʼraa roto. Sik yno riof kʼAit yesait ye!”
LUK 23:36 Raa sbe mamus Yesus ye. Tna ana moo anggur maya ro mano mee kʼYesus yata.
LUK 23:37 Tna mawe, “Soh Nyõ fi Raja ro nbo raa ro Yahudi meto mi, sik nno riof kʼNyõ nesait ai.”
LUK 23:38 Riwai raa mkom bokom sau mse mam ara warok reto abyõ. Bokom reto mkom mawe: “Raa refi raja raa ro Yahudi.”
LUK 23:39 Ait ro raa mame ysya Yesus sait yamus Yesus ye yawe, “Nyõ fi Mesias fe mfe a? Soh nyõ fi Mesias meto mi nno riof kʼamu mbewok nsya Nyõ nesait ye!”
LUK 23:40 Menohe ait roto sait yastako ait retait yawe, “Nyõ ye raa mame su najat nfi Ait. Tibyo nyõ waa Allah fe mfe a?
LUK 23:41 Anu bewok bber safo tibyo raa mame anu bewok. Menohe Ait refi yber safo aro fee!”
LUK 23:42 Tna yawe kʼYesus yawe, “Yesus; kbe namo Raja nbo raa woNyõ to, nnaut jõ ye!”
LUK 23:43 Tna Yesus yawe kʼait yawe, “Ae, ayõ refo ye kbe nyõ nsya Jõ bhau su mam yuk ro moof.”
LUK 23:44 Ayõ ro 12 baas bo feto, tna mti abut frok mama mfi bo mti. Mama mhau snok mam hreha ayõ ro tuuf.
LUK 23:45 Ayõ mo fee. Tna horden ro nkro mam Samu ro Allah reto mesait mhah ftah ewok.
LUK 23:46 Tna Yesus ytu fari yawe, “Taja, Jõ tsan tafos aJõ kʼNyõ sai!” Yawe feto tna yhai.
LUK 23:47 Raa sbe ro yase yamo aban mana tait, ymat bo weto, tibyo yasen ybaut Allah tna yawe, “Mabo oh, Ait refi raa ro yno bo moof ati sai!”
LUK 23:48 Raa mawat mros tna horit bo raa mame raa mam ara warok weto. Menohe ati ro mmat bo bawya ro snok weto beta, ana beta sraujin toni tna hah mamo bana.
LUK 23:49 Menohe Yesus yafoh wAit msya fnya baro ro kro Ait mbam provinsi ro Galilea, mros fari mmat bo weto beta.
LUK 23:50 Raa sait ro yasom Yusuf yros ymat ye. (Ait retait ybam remo ro Arimatea. Ait raa ro yhaf moof toni. Tna ait ja ste oon ro Allah yamo Raja ybo raa mana rAit. Ait raa manes ro agama Yahudi sait. Ana weto raa ro ja mtu safo raa ro Yahudi. Menohe Ait hawe bo raa saim mawe mamo mame Yesus.)
LUK 23:52 Yusuf ymat bo ro ana mno. Tna yamo yo kʼPilatus tna yayoh yawe ajat ro Yesus reto raa msan kʼait. Pilatus yawe, “Ae.”
LUK 23:53 Tibyo Yusuf yamo skur Yesus ybam ara warok reto. Tna sro ajat reto mkah hawee ro moof sau. Tna yamo yse mam isra sau. Ako reto raa kowak mam fraa ro faut sau mkah bo raa moo hai wana mse. Tna raa sama hai aro mam isra mato refo fefares.
LUK 23:54 Ayõ reto hari jumat hreha oh. Tna menrabu ayõ ro raa ntmoh (hari Sabat). Feto to mam hari jumat to, ja raa ro Yahudi siwyan bo mkah hari Sabtu.
LUK 23:55 Raa makah ajat rAit reto tna mse mam isra mato. Tna fnya ro kro Ait mbam Galilea weto mrof mamo kro mam tis tna mmat.
LUK 23:56 Tna ana hah mamo siwyan minyak ro sawer msya botkif sor mkah kbe mamo ngkaru hai ro Yesus reto. Menohe mam ayõ ro raa ntmoh to, ana swior bo ro ana mno beta; ana kro bo mafa ro agama rana.
LUK 24:1 Ayõ ro minggu rabu momo toni, fnya weto mbo botkif wana ro ana siwyan beta oh tna mbo masen mamoʼt isra reto.
LUK 24:2 Snok mam weto tna mmat fraa ro taa muut isra wa reto to, raa mririk oh. Tna isra mato maa sai.
LUK 24:3 Tibyo ana twok mam isra mato reto, he fri hai ro Tuhan Yesus reto fee.
LUK 24:4 Tibyo ana mros tna mnaut tna mtu kʼanya mawe, “Bawya mno mefo?” Menohe raa sme mabo ewok frok tubor mama mros kene msya ana. Raa weto myum ratan ro ngkren mboh fyok.
LUK 24:5 Fnya weto waa toni mrok tetet. Tibyo maka mabum. Tna raa mabo ewok reto mawe kʼana mawe, “Fyi re anu saso Ait ro yhau yaam mam befo fo? Ako mato refo fo, yuk ro ja raa mse hai.
LUK 24:6 Ait yarak. Ait yrok yasen oh! Nnaut bawya ro tiwya Ait ykyas kʼanu mam ati ro anu nhau mam Galilea fares.
LUK 24:7 Tiwya Ait yawe, 'Ait ro Yroh Yama Yfi Raa Sai' retait tait, kbe raa msan kʼraa ro mno iro. Ana weto kbe mame Ait yajat mam ara warok. Tna kbe ti ro tuuf to, Ait yrok yasen.”
LUK 24:8 Fnya weto mari bo reto tna mnaut bokyas ro Yesus reto.
LUK 24:9 Ana hah me mamo. Tna mkyas bo weto beta kuber wAit mabo 11 reto msya raa roto ro kro Ait beta.
LUK 24:10 Fnya ro mkyas bo weto kʼraabis wAit to, ana masom sor oh mefo: Maria Magdalena, msya Yohana, msya Maria ro Yakobus yme, tna msya fnya roto ro riwai msya ana mamo mmat he Yesus yarak.
LUK 24:11 Menohe kuber wAit weto mnaut mawe fnya weto sioh-sah sai. Ana mari bokyas ro fnya weto mawe fee.
LUK 24:12 Tna fo Petrus yasen yhoh yamo ymat isra mato reto. Ait yaka koyo ymat mam isra mato. He hawee ro raa sro Yesus mesait aran mbris mam weto. Tibyo Petrus hah ye yamo. Tna ynaut myum-yam yawe, “Bo bawya ro mno mefo.”
LUK 24:13 Ayõ reto ye kuber ro Yesus wAit mabo ewok mamoʼt remo sau ro masom Emaus. Mbam Yerusalem mamoʼt remo reto kilo mara 11 bo feto.
LUK 24:14 Ana mbewok mamo mam iso miyõ reto to, tna ana mbewok mkyas bo yase ro mnin-nin mam Yerusalem reto.
LUK 24:15 Ana mbewok mkyas bo weto nkri-kri tna mtu bo kʼanya si fo, tna Yesus yesait yama yo kʼana kait tna yamo su ysya ana.
LUK 24:16 Ana mmat Yesus, menohe bo sau mburut ana masu wa tibyo ana mhar Ait fee.
LUK 24:17 Tna Yesus yawe, “Anu nkyas bawya mefo?” Ana mbewok susu mros mkah masu ro sraujin.
LUK 24:18 Ana mbewok weto sait yasom Kleopas. Ait yawe kʼYesus yawe, “Nyõ nari bo aro fefares a? Nyõ nesait aran raa srim mam Yerusalem re wase bo yase ro mfo mnin-nin mam beto to fea!”
LUK 24:19 Yesus ytu bo kʼana yawe, “Bawya meto?” Ana mawe, “Bo ro taa raa mno kʼYesus, raa ro ybam Nazaret retait. Ait tait nabi ro Allah ybis yama. Ait yhar bo ykyas watum ro mbam Allah to, ykyas kaket. Tna yatak yno bo ro msai ye. Raa ksoh Ait ye tna yno Allah yhaf mnan ye.
LUK 24:20 Menohe Imam manes ro agama Yahudi msya raa mabi wamu to, moo Ait msan kʼraa mame yajat mam ara warok.
LUK 24:21 Ti tuuf yhai. Menohe tiwya amu ninaut nwe Ait oh mi raa ro yama yfes raa ro Israel. Amu ninaut nwe Ait kbe yai raa ro mamo byoh kʼamu tna yno riof kʼanu.
LUK 24:22 Tna rabu momo fo, fnya wamu baro mamoʼt isra wore raa mse ajat rAit reto. Mamo tna mmat he ajat reto marak! Ana hah me mawe kʼamu mawe ana mmat malaikat mabo baro sor. Tna malaikat weto mkyas bo kʼana mawe Yesus yrok yasen oh!
LUK 24:24 Tna raa wamu baro mamo mmat isra reto ye. Menohe mabo mfi bo ro riwai fnya mkyas weto ye. Mmat he ajat reto marak ye.”
LUK 24:25 Tna Yesus yawe kʼana yawe, “Anu raa ro wase bo! Tiwya Allah ybis nabi sor mama mkyas bo rAit. Menohe anu nhaf matak tna niwana bombra ro ana mkyas beta!
LUK 24:26 Yako hawe sai Mesias tru kair ro mnan feto wia, tna kbe Ait ykai bobot rAit ro mase to.”
LUK 24:27 Tna Yesus betoo Watum ro Allah kʼana mbam aam ro Musa ykom snok mam aam ro nabi aro sor mkom. Ait betoo bokom beta ro mkyas Ait kʼana re mhar ye.
LUK 24:28 Kene ye msya remo ro ana mbewok mamo reto to, Yesus yawe mfi bo yamo bait yiwrek sai yamo.
LUK 24:29 Menohe ana mberoh toni wesi Ait mawe, “Hreha oh, ngkinine mti ye oh. Nhau nsya amu mam befo wia.” Tibyo Yesus yari feto tna twok yhau ysya ana.
LUK 24:30 Ati ro ana mbewok hre tna msya Ait mait boit su to, Yesus yoo roti ybo tna yayoh asik mase kʼAllah. Tna Ait haber roti reto saim kʼana mait.
LUK 24:31 Tibyo mam ati reto to, ana mrok mhar mawe Ait retait Yesus. Menohe Ait yrok yarak sai tubor.
LUK 24:32 Ana mkyas kʼanya mawe, “Riwai Ait betoo Bokom ro Allah kʼanu mam iso maka iti to, anu smut ksoh!”
LUK 24:33 Ayõ reto ye ana mbewok reto masen hah me mamoʼt Yerusalem. Mam beto tna ana fri kuber ro Yesus mabo 11 weto beta msya mafoh na makin taro sor hre kri-kri wea.
LUK 24:34 Ana weto mkyas bo mawe, “Mabo oh! Tuhan yrok yasen, tna fo yerif Ait kʼSimon-Petrus!”
LUK 24:35 Tna ana mbewok masen mkyas mawe Yesus yerif Ait kʼana mam iso tna yamo su ysya ana ye. Mkyas mawe ana wase Ait wea mam weto. Tna wore wo Ait haber roti re yee kʼana mait to, ana mbewok mhar Ait ye.
LUK 24:36 Ana hre mkyas bo kri-kri fares, menohe Yesus frok tubor yros susai ysya ana. Tna yawe, “Waa ma.”
LUK 24:37 Ana mnaut mawe berwanah oh mi snok tubor mawe bo kʼana meto. Tibyo ana mrok waa tna tetet.
LUK 24:38 Yesus yawe kʼana yawe, “Fyi re anu waa to? Nnaut bo maut-mroh to ma!
LUK 24:39 Nmat ye tatem aJõ msya taa aJõ mefo. Sasas Jõ tna haninin ye. Anu nhar nwe ja berwanah to, kwiyan msya mtai aro ye mnan fi Jõ fefo fe mfe a?”
LUK 24:40 Yesus ykyas feto tna yerif naat ro yaa rAit msya yatem rAit bo kʼana.
LUK 24:41 Ana simaut toni tna miskawowo fares. Tibyo ana mnaut mamo-me fares. Tna Ait yawe, “Anu nse boit aro mam befo fe mfe a?”
LUK 24:42 Ana masen moo syoh mabuf ro saruk sau mee kʼAit.
LUK 24:43 Tna Ait yoo yabo wore wo ana beta mmat ye.
LUK 24:44 Tna Yesus yawe, “Tiwya thau tsya anu fares to, tkyas tawe, ‘Mam Bokom ro Allah to, Musa ysya nabi na msya raa ro mkom aam ro Mazmur to, mkyas Jõ tasom. Tna bombra ro ana weto mkom oh to, beta kbe mabo mnan bo ro ana mkom to ye.’”
LUK 24:45 Tna Yesus yno ana makit wana maah afo re ana mhar Bokom ro Allah.
LUK 24:46 Ait yawe, “Bokom ro Allah mawe, ‘Mesias kbe ykai bo ro samyoh mai kʼAit, tna yhai ye. Tna mam ti ro tuuf kbe Allah yno Ait yrok yasen.’
LUK 24:47 Tna Bokom ro Allah mkyas mawe ‘Mesias kbe ybis raa mamo mkyas Ait yasom.’ Ana weto kbe mawe kʼraa mawe, ‘Nashana tna kbe Allah yyon iro wanu.’ Bo refo kbe raa mkyas mam Yerusalem tinyi wia, tna fo mamo snok mam bangsa beta ye.
LUK 24:48 Anu nmat bo samyoh weto ro mai kʼJõ oh, mnan Bokom ro Allah mkyas. Anu nmat mabo rau oh to. Anu nmat oh tna kbe nsen nkyas bo weto kʼraa.
LUK 24:49 Tiwya Allah ysi yawe kbe yatak rAit matam raa. Tna kbe tbis tak ro mbam Allah reto mama matam anu. Tawe nhau mam Yerusalem wea ste tak reto mama.”
LUK 24:50 Yesus yakah ana weto yamo kene mam remo ro Betania. Mam beto tna Ait yitbat yatem rAit tna skabuk yawe Allah yno bo moof kʼana.
LUK 24:51 Skabuk ana kri-kri fo, tna Allah tubat Ait yaut yamoʼt sawro rAit.
LUK 24:52 Ana mbaut Ait. Tna ana hah mamoʼt Yerusalem mkah simaut rana mase toni.
LUK 24:53 Ja rabu wawa ana mamoʼt Samu ro Allah tna ana bibi Ait yoyo.
JOH 1:1 Tiwya tinyi tabam refo mkah bombra beta marak fares. Menohe Ait sait ro raa mtu 'Bokyas ro Allah' yhau soo bait wia oh. Ait yhau su ysya Allah, tna Ait fi Allah.
JOH 1:2 Tiwya tinyi Ait yhau su ysya Allah.
JOH 1:3 Ait tait raa mtu 'Bokyas ro Allah'. Ait tait yfen bombra beta ro mhau mam tabam refo to. Bo sau mbam iso roto aro fee.
JOH 1:4 Ait yafos rAit mhau sai yum. Ait yhau yroon yawyos. Ait fi ybo raa mafos wana msya bombra beta. Yafos ro mhau kʼAit to mnan fi kek. Tna yafos rAit reto mno raa mmat Kek reto. Mno masu maah.
JOH 1:5 Tiwya Kek reto mama tna mait mram amur. Tna amur reto to, matak mikabuk Kek reto fee. Mno tna Kek reto mhai fee.
JOH 1:6 Tna Allah ybis raa sait yama. Raa retait yasom Yohanes.
JOH 1:7 Ait yama mkah bo ykyas 'Kek' reto. Ait ykyas bo ro yesait ymat. Tna ait yama ykyas bo ro ymat reto afo re raa mhar mawe mabo oh. Afo re raa beta smot 'Ait ro ynan fi Kek.'
JOH 1:8 Yohanes fi Kek reto fee. Yohanes raa ro yama mkah bo ykyas Kek reto sai.
JOH 1:9 Kek ro ati refo mamaʼt tabam refo. Mama mram raa sait-sait.
JOH 1:10 Raa ro Ynan fi Kek retait, tiwya yfen tabam refo. Tna yama yhau mam tabam refo ye. Menohe raa ro tabam refo wase Ait.
JOH 1:11 Yesus yfen tabam refo. Tibyo bombra beta to bo wAit. Raa wAit ro tii yfen to, Yesus yama yo kʼana. Menohe raa wAit weto to, ana mawat hawe bo mmat Ait.
JOH 1:12 Menohe raa baro mmat Ait. Ana mmat tna smot Ait to. Yesus ykyas ana yawe, “Ana weto oh mi mamo ku ro Allah wAit.”
JOH 1:13 Raa mamo ku ro Allah wAit to hayah. Tna iso ro fnya mabe ku to hayah ye. Mnan anya fee. Ku ro fnya mabe to, ana mbam raa sei sai. Menohe ku ro Allah yabe to mbam raa mana sau fee. Ja raa ksoh rana mabe kube aro. Tibyo ana mabe ku. Menohe ku ro Allah yabe to hayah. Ku weto to mbam raa ksoh wana to fee. Raa sme ja ksoh yawe yjin ysya fnya. Yno tna au mhaf tna au mabe ku. Menohe raa mamo ku ro Allah wAit to mnan feto fee.
JOH 1:14 Bokyas ro Allah reto haberek mamo raa. Raa retait yama yhau mam tabam refo su ysya anu. Tna amu nmat bo yase rAit oh. Ait tait Ku bum ro Allah yare. Ku rAit sait tomu. Tibyo Allah ysan bo yase rAit beta Ku retait. Ait yhar bo ro ati miwer. Tna Ait tait Raa ro yatmof raa miwer.
JOH 1:15 Yohanes ykyas Yesus yasom kʼraa. Ykyas bo ro yesait ymat feto to, ait yhar yawe mabo oh. Mkah ymai fari Yohanes yawe, “Ait ro tiwya tkyas kʼanu to Ait oh mefi. Jõ tama tkyas Ait wia matim. Tna Ait yama. Menohe Ait fi yase yiwrek jõ. Tiwya fnya mabe jõ fefares to, Ait yhau tuu oh.”
JOH 1:16 Ait yatmof raa miwer tibyo yno bo moof kʼanu beta. Tna anu fri bo mafer mninon.
JOH 1:17 Watum ranu ro agama Yahudi to, tiwya Allah ykyas kʼMusa. Tna Musa yoo yee kʼanu. Menohe mfo refo Allah ybis Yesus yama yo kʼanu. Ybis yama afo re yerif boatmof rAit. Tna ybis Ait yama afo re kbe raa mhar Allah yhaf, srau rAit.
JOH 1:18 Raa aro ymat Allah fefares. Menohe Ku bum rAit yno re anu bhar Allah. Ait tait yesait aran Ku ro Allah yare. Tna Ait hre kut-kut ysya Yaja
JOH 1:19 Yohanes ykyas Yesus yasom. Ykyas bo ro yesait ymat feto to, yhar yawe mabo oh. Tna ti sau mam Yerusalem to, raa manes ro agama Yahudi mbis raa wana baro masen mamo mo kʼYohanes. Raa ro ana mbis to: Imam wana msya raa mana ro Lewi baro. Mbis ana mamo mtu bo kʼait mawe, “Nyõ fi awya?”
JOH 1:20 Raa weto mama mo kʼYohanes. Tna mtu bo kʼait. Tna Yohanes yasen yawe abyõ si kʼana yawe, “Jõ fi Mesias ro ja anu nwof to fee.”
JOH 1:21 Tna ana mawe, “Feto to nyõ fi awya? Amu nwof nabi Elia hah yama u. Nyõ fi bi Elia fe mfe a?” Ait yawe “Mfe.” Tna ana mawe, “Allah yawe meen Ait ybis nabi roto sait yama ye. Nyõ fi nabi retait, fe mfe a?” Ait yawe, “Mfe.”
JOH 1:22 Ana mtu mawe, “Feto to nyõ fi awya? Kbe amu hah ne nmo nkyas kʼraa ro mbis amu nma to, tna kbe amu nkyas nwe bawya?”
JOH 1:23 Tiwya Allah ybis nabi Yesaya yama ykom bokom sau. Bokom reto mkyas raa sait ro meen yama. Tna Yohanes yawe, “Jõ fi ait ro tiwya nabi Yesaya ykyas yawe, ‘Kbe raa sait yamoʼt tabam ro riamo sau tna ykyas bo ro Allah matim wia. Ykyas yawe, “Mbetrot iso mkah Tuhan yama!”’”
JOH 1:24 Ana ro raa mbis weto to taro raa ro Farisi.
JOH 1:25 Tna ana mawe kʼYohanes mawe, “Nyõ fi Mesias fee, nabi Elia fee, tna nabi roto sait reto fee ye. Awya ybis re nyõ baptis raa fo?”
JOH 1:26 Ait yawe, “Jõ fi raa ro baptis anu mkah aya sai. Menohe raa roto sait yros su ysya anu wefo ye. Tna anu wase Ait fares.
JOH 1:27 Jõ tama tkyas Ait wia matim. Tna fo Ait yama. Ait retait yase toni yiwer Jõ. Tna jõ toof mkah bo skur sandal rAit to fee.”
JOH 1:28 Bo weto to, Yohanes ykyas mam Betania. Remo reto mhau mam Aya Yordan majoh ti brat, ti ayõ maut. Ait baptis raa mam beto.
JOH 1:29 Rabu ti fo, Yohanes ymat he Yesus yama. Tna Yohanes yawe kʼraa ro hre mari ait yawe, “Nmat, Ait ro yama fi. Ait ynan fi domba maku ro Allah ybis yama. Ait tait Raa ro yama yyon iro wanu beta.
JOH 1:30 Ait oh mi riwai tkyas kʼanu tawe, ‘Jõ tama tkyas Ait wia matim. Tna fo Ait yama. Menohe Ait refi yase yiwer jõ. Tiwya fnya mabe jõ fefares to, Ait yhau bait wia oh.’
JOH 1:31 Jõ tama baptis raa mkah aya afo re raa ro Israel mhar Ait. Tinyi rau to, jõ wase Ait ye.
JOH 1:32 Ati ro Allah ybis jõ baptis raa mkah aya to, jõ wase Ait fares. Menohe Allah yerif Ait kʼjõ yawe, ‘Soh nyõ nmat Har aJõ mroh mhau abyõ kʼRaa sait to, Ait oh metait kbe baptis raa mkah Har aJõ.’ Tna mabo oh. Tkyas bo ro jõ tmat kʼanu tawe: Tmat Har ro Tuhan haberek mnan fi ruu merpati sau. Tna fru mbam uu mama mroh abyõ kʼAit.
JOH 1:34 Bo refo tasu tmat tna tkyas tawe Ait tait Ku ro Allah yare.”
JOH 1:35 Tna rabu ti fo Yohanes ysya kuber (murid-murid) wait mabo ewok mros mam weto.
JOH 1:36 Tna Yohanes ymat he Yesus frit yamo tna yawe, “Nmat, Domba maku ro Allah yama oh metait.”
JOH 1:37 Kuber ro Yohanes mabo ewok reto mari bokyas reto tibyo sikba ait tna kro Yesus.
JOH 1:38 Yesus siur, ymat ana mbewok reto kro Ait mamo mam tis tna ytu kʼana yawe, “Anu mbewok saso bawya meto?” Tna ana mtu bo kʼAit mawe, “Guru; nyõ njin mam woyõ?”
JOH 1:39 Yesus yawe, “Nma nmat.” Tibyo ana mbewok msya Ait mamoʼt amah ro Ait yhau. Ayõ ro jiit hreha bo feto. Tna ana hre mkyas bo su mamo snok mam ayõ hawer.
JOH 1:40 Kuber mabo ewok ro masen kro Yesus reto to, sait yasom Andreas. (Ait tait Simon-Petrus yao.)
JOH 1:41 Tna Andreas yamo fooh saso yao Simon tna yawe, “Amu tru Mesias oh!” (Reto oh mi Kristus.)
JOH 1:42 Tna ymen yao yakah yamo yo kʼYesus. Yesus yasu yrom Simon tna yawe kʼait yawe, “Nyõ fi ku ro Yunus yare. Kbe raa mtu nasom ‘Kefas’.” (Reto oh mi Petrus.)
JOH 1:43 Tna rabu ti fo Yesus yawe yamoʼt provinsi ro Galilea. Ait yamo saso Filipus tna yawe, “Nama kro Jõ.”
JOH 1:44 Filipus tait raa ro Betsaida. Betsaida to remo ro Andreas ysya yao Petrus rana.
JOH 1:45 Tna Filipus yamo saso Natanael tna yawe kʼait yawe, “Amu nkai Ait ro tiwya Musa ykyas mam Watum ro Allah. Ait ro tiwya nabi na mkyas ye! Yasom Yesus. Ait retait tait Yusuf yare ybam remo ro Nazaret!”
JOH 1:46 Menohe Natanael yawe, “Hemba! Feto to bo ro moof aro mbam Nazaret oto?”
JOH 1:47 Tna Filipus yawe, “Nama bmo tna kbe nyõ nesait nmat!” Ati ro Yesus ymat Natanael yama to yawe, “Ait retait raa Israel ro yhaf moof. Bosruf aro mhau kʼait fee. Ait ja yno bo mnan si raa Israel ro yoof.”
JOH 1:48 Natanael ytu bo kʼYesus yawe, “Fyi re Nyõ nhar jõ to?” Tna Yesus yawe, “Riwai Filipus ytu nyõ fefares to, Jõ tmat nyõ oh hre mam ara mair tno.”
JOH 1:49 Natanael yawe, “Bi Guru: Nyõ fi Ku ro Allah yare, Nyõ fi Raja ro nbo raa ro Israel.”
JOH 1:50 Yesus yawe kʼait yawe, “Riwai tawe tmat nyõ hre mam ara mair oh mi nyõ smot Jõ to? Bo sair reto maku sai. Jõ kbe terif bo ati ro mase aro hair kʼnyõ.
JOH 1:51 Kbe nmat ayoh mato nkro tna nmat malaikat na maut mroh abyõ kʼJõ. Jõ fi 'Ait ro Yroh Yama Yfi Raa Sai'.”
JOH 2:1 Mam ti ro tuuf to, raa makyõ bokyõ mam remo ro Kana. Raa sait yoo fai sau. (Kana to mhau mam provinsi ro Galilea.) Yesus yme mamoʼt bokyõ reto ye.
JOH 2:2 Tna raa moo taah mee kʼYesus ysya kuber wAit ye. Tna ana mamoʼt bokyõ reto beta.
JOH 2:3 Raa makyõ bokyõ reto tna anggur maya mkak. Tibyo Yesus yme mamo mo kʼAit mawe, “Yesus; anggur maya fo mkak oh.”
JOH 2:4 Menohe Yesus ye yawe kʼau yawe, “Nyõ nama nawe bo reto kʼJõ fyi? Jõ tno bo ro mno raa mhar Jõ to fefares. Oon reto sboh fefares. Jõ thar bo woJõ.”
JOH 2:5 Menohe yme masen mamo mkyas bo kʼsryan na. (Sryan baro mhau tna siwyan bo ro bokyõ reto.) Yesus yme mawe, “Bo bawya ro Ait ybis kʼanu nno to, nno oh.”
JOH 2:6 Yesus ymat baah marak (tempayan) ro mase trion ntamam mhau. (Baah weto to ja raa mse aya mkah bo raa myon matem wana mnan fi raa ro agama rana ja mno soo oh. Baah weto to ja raa mror aya 100 liter bo feto mam sau-sau.)
JOH 2:7 Tna Yesus yawe kʼsrian weto yawe, “Nmo nwyan aya nkah nma. Tna nror mam baah weto matot beta.” Sryan weto mari tna mamo mwyan aya mama tna mror matot.
JOH 2:8 Tna Yesus yawe kʼsryan weto yawe, “Tna nwyan aya reto kebet baro nror mam hawereh sau. Tna nbo nmo nee kʼbi ait ro yisoh bo sohmaam to, yata sanet yari wia.” Tibyo ana moo aya baro mamo mee kʼbi ait yata.
JOH 2:9 (Riwai Yesus yno aya mboh mam baah weto haberek mamo anggur maya.) Ana makah mamo mee tna bi retait yata baro sanet. (Ait wase anggur maya ro msu refo mbam mam woyõ. Sryan weto mesait mhar.) Bi retait sanet yari he aya reto msu. Anggur maya reto to, mafah rau to moof ati. Tna bi ait ytu kʼait ro ymen fnya retait yama.
JOH 2:10 Tna yawe kʼait yawe, “Ja raa moo anggur maya ro msu mee kʼraa mata matim wia. Raa mata ro moof reto tibyo bisir. Tna kbe tis rau to, raa masyõ anggur maya ro mkair to mee kʼraa mata. Menohe riwai nyõ nabe anggur maya ro moof refo mamo snok mam wore mfo refo tna nyõ nasyõ nee kʼraa mata!”
JOH 2:11 Yesus yno bo msai reto yerif yase rAit oh mefo. Bo msai ro tinyi reto Yesus sair mam Kana ro mhau mam provinsi ro Galilea. Tna kuber wAit smot Ait mawe Ait yase toni.
JOH 2:12 Tna fo Yesus ysya yme, yao na, msya kuber wAit mroh mamo sia mamoʼt remo ro Kapernaum. Tna mhau mam beto ti baro bo feto.
JOH 2:13 Korat ro Paskah makyon rau to kine oh. Tna Yesus yaut yamoʼt Yerusalem.
JOH 2:14 Ait yamo twok mam Samu ro Allah tna ymat he raa masim sapi,domba, msya ruu merpati bo. Tna ymat he raa taro hre mam ambar wana tna tukar pitis ye. Raa ro srim moo pitis wana mee kʼraa weto. Tna raa weto mee pitis mauf ro Yahudi kʼana si ye.
JOH 2:15 Yesus ymat raa mno bo weto tibyo yoo too sau yfen mnan cambuk bo feto. Tna ybo ymok-mak sapi msya domba ro raa masim weto frok msam mbam Samu ro Allah mato. Tna Ait haberek-barak ambar ro raa hre mkah bo moo pitis mee si kʼraa. Tibyo pitis wana somya-meya.
JOH 2:16 Tna Ait yawe kʼana ro masim ruu merpati weto to yawe, “Anu nno bawya meto ee? Tubat ruu wanu wefo fo nkah nmo to! Samu ro Taja refo fo samu ro raa masim-asam bo to fee!”
JOH 2:17 Kuber wAit mmat bo ro yno to, mnaut mawe Bokom ro Allah, far-far sau mkyas mawe: “Tmat Samu aNyõ to thaf myoh!”
JOH 2:18 Tna raa ro Yahudi mastako Yesus mawe, “Nyõ nno bo feto mkah bawya! Awya ro ybis ee! Nyõ awya re nno bo feto to? Mfi bo Nyõ nawe Allah ybis Nyõ nama to, sik nno bo msai sau tna amu nmat. Nno bo ro merif Allah yatak rAit tna fo kbe amu smot Nyõ.”
JOH 2:19 Tna Yesus yawe kʼana yawe, “Soh anu nihabah samu refo to, kbe Jõ sgi te u to mkah ti tuuf sai.”
JOH 2:20 Tna ana mawe kʼAit mawe, “Amah refo tii raa sgi sgi tahun trion 46 wia tna mkak. Fyi re nyõ nawe sgi mkak mkah ti tuuf sai a?”
JOH 2:21 Menohe ati ro Yesus yawe 'samu' reto to, Ait fret bo yawe Ait yetsu rAit yesait meen yajat tna mam ti ro tuuf to, ait yrok yasen. ⌞Reto to bo msai ro kbe yno re kbe raa mmat tna smot Ait.⌟
JOH 2:22 (Meen Yesus yrok yasen tna fo kuber wAit mnaut bokyas ro tiwya Ait ykyas reto, tna ana srau wana mrok mbrah. Tibyo ana mhar yum oh mawe Bokom ro Allah msya bokyas ro Yesus reto sioh fee; bo mabo oh.)
JOH 2:23 Mam wore raa makyõ Korat ro Paskah to, Yesus yhau mam Yerusalem. Tna Ait yno bo msai mawat. Tibyo raa msis-sas smot Ait.
JOH 2:24 Menohe Yesus yhar raa mhaf wana to. Yhar yawe kbe ana mros smot Ait tu fee. Tibyo Ait smot (percaya) ana toni fee.
JOH 2:25 Yesus yhar bo ro raa mnaut mam srau mato wana to. Yhar oh. Feto to ytu bo ro raa mnaut mam srau mato wana fee.
JOH 3:1 Raa ro Farisi sait yasom Nikodemus. Ait tait raa manes ro Yahudi.
JOH 3:2 Mti oh tna ait yama yo kʼYesus tna yawe, “Guru; raa aro mno bosair mnan mfi Nyõ feto fee, soh Allah yatam ait fee. Tibyo amu nhar nwe Nyõ Allah ybis.”
JOH 3:3 Tna Yesus ykyas bofret yawe, “Soh raa sait yawe yamo raa mana ro Allah yamo Raja ybo to, kbe ait yhah ye yamo yfi ku mees u. ⌞Au oh mi ku ro fnya mabe fee, menohe ku ro Allah yesait yabe mkah Har rAit.⌟ Soh raa retait yamo ku ro Allah yabe fee, kbe yamo raa mana ro Allah yamo Raja ybo to fee ye.”
JOH 3:4 Nikodemus wase bofret ro Yesus ykyas reto tna yawe, “Fyi re raa ro mabi oh hah me tna fnya mabe u mun ro ewok?”
JOH 3:5 Yesus yawe, “Soh raa sait yawe yamo raa mana ro Allah yamo Raja ybo to fyi? Tawe fnya me mabe ait u fee. Tawe Allah oh mi yabe Ait. Yako hawe sai kbe ait yawe Allah yabe mkah aya ye tna mkah Har rAit ye. Bokyas ro ati oh mefo.
JOH 3:6 Ati ro fnya mabe ku to, mabe ku mees. Ku mees retait yetsu rait to metsu ro tna. Menohe riwai tawe, ‘Soh raa mawe mamo raa mana ro Allah wAit to, kbe yhah ye yamo yfi ku mees u.’ Bo fret reto to, tkyas tawe: Ati ro Allah yabe ku mkah Har rAit to, raa retait yhaf, srau rait haberek. Har ro Tuhan mno yhaf srau rait haberek mamo mnan Yaja Allah yhaf msya srau rAit. Feto tibyo yamos rait to yamos ro tna.
JOH 3:7 Allah ‘yabe raa mun ro ewok u’ mkah Har rAit saah. Tibyo raa mhaf, srau wana haberek, mrok moof to. Nyõ ktak bo ro tkyas reto ma!
JOH 3:8 Foos mfi to mamo tiyo-teya sai. Tna anu wase foos reto mbam woyõ. Anu bmat foos fee. Anu bri au hmu sai. Tna Har ro Tuhan mno raa mhaf, srau wana haberek to, anu bmat fee ye.”
JOH 3:9 Nikodemus yawe si kʼYesus yawe, “Bo reto mno fyi?”
JOH 3:10 Yesus yawe, “Nyõ namo guru tna raa ro Israel ja mari nyõ ye: Fyi re nyõ wase!
JOH 3:11 Nnaut: Amu nkyas bawya ro amu nhar. Tna amu nkyas bawya ro amu nmat oh. Menohe anu, raa manes ro Israel, ja hawe bo nri bokyas ramu.
JOH 3:12 Riwai tkyas bo ro ja mabo mam tabam refo sai. Menohe anu srau fee. Anu nnaut bo weto mamo-me fares. Soh Jõ tkyas bo ro ja mabo mam sawro ro Allah to, kbe anu nfot fee ye. Feto to, tkyas bo maja ro Allah kʼanu fefares.
JOH 3:13 Raa aro mamoʼt sawro rAit fefares. Menohe Jõ fi 'Ait ro Yroh Yama Yfi Raa Sai'. Jõ tbam sawro reto frok tama oh.”
JOH 3:14 Tna Yesus ykyas kʼNikodemus yawe, “Tiwya Musa yhau mam tabam ro riamo. Tna yoo tembaga yfen aban. Yfen tna yoo ara sau yse aban ro yfen mam ara reto makit uu abyõ. Tna yati mros. Nnaut aban reto. Tna nnaut bo ro kbe raa mno mai kʼJõ: Meen 'Ait ro Yroh Yama Yfi Raa Sai' tait, kbe raa mfot. Tna kbe ana moo Jõ mse mam ara abyõ uu mnan anya mfi feto ye.
JOH 3:15 Ait kbe raa teta abyõ afo re raa beta ro smot (percaya) Ait to, kbe ana mhau hame wajin.
JOH 3:16 Allah yatmof raa ro tabam refo toni. Tibyo yasen ysan Ku rAit sait tomu yamaʼt tabam refo. Yno afo re awya sai ro smot tna msam wai kʼAit kbe mhau hame wajin. Kbe yhai fee.
JOH 3:17 Allah ybis Ku rAit yroh yama re yoo safo mana ymit kʼraa ro tabam refo fee. Menohe Ku rAit yama afo re yno riof kʼraa.
JOH 3:18 Awya ro smot tna msam wai kʼAit to, kbe bi Ait yoo safo mana ymit fee. Menohe awya ro smot Ait to fee, kbe safo mana mhau kʼait oh. Raa taro smot Ku ro Allah rAit sait tomu fee. Smot Ait fee tibyo ana mesait masom safo mana wana weto.
JOH 3:19 Au oh meto: Kek reto mama tabam refo oh. Menohe raa hasu amur toni bana. Ana nksoh mno safo. Ana hawe kek reto. Feto tibyo Allah yoo safo ymit kʼraa weto.
JOH 3:20 Awya ro yno safo to ait knait kek. Ait hawe bo yama kene mam kek. Ait waa re kbe kek reto ntara bo ro ait yno mkair tna raa mmat.
JOH 3:21 Menohe awya ro kro iso ro ati reto to, ksoh yamaʼt wore wo kek. Yama re kbe raa mmat he bo ro ait yno weto mnan si bo ro Allah yawe, yno mkah tak ro Allah rAit.”
JOH 3:22 Yesus ykyas bo weto mkak. Tna fo ysya kuber wAit masen mamoʼt yuk roto mam provinsi ro Yudea. Mhau mam beto tna Ait baptis raa.
JOH 3:23 Tna Yohanes ja baptis raa ye. Ati reto to, Yohanes yhau mam Ainon kene mam Salim. Mam beto to aya mawat. Tna raa mawat mama mo kʼait mawe ait baptis ana.
JOH 3:24 (Ti reto Yohanes raa mfot mbu mam bui mato fefares.)
JOH 3:25 Tna kuber ro Yohanes wait mkyas bo msya raa ro Yahudi sait. Ana santri bo mkyas bo mafa raa ro agama Yahudi ja mno soo oh. Ana mkyas iso ro raa misoh ana moof afo re Allah ymat ana.
JOH 3:26 Kuber ro Yohanes weto mamo mo kʼait tna mawe, “Guru; Raa ro taa ysya nyõ mam aya ro Yordan tino tait, Ait ro nyõ nerif kʼamu to, Ait baptis raa ye. Tna raa msis-sas mamo mo kʼAit.”
JOH 3:27 Tna Yohanes yawe, “Allah ybis raa mno bo rAit. Tna Ait oh mi Raa ro yoo tak yee tibyo raa weto mtai mno bo rAit. Soh Allah ybis fee, kbe raa mno bo feto fee ye.
JOH 3:28 Taa anu nesait nri bo ro tkyas tawe kʼanu tawe, ‘Jõ fi Mesias fee. Jõ fi raa ro Allah ybis tama tatim wia.’”
JOH 3:29 Tna Yohanes fret bo yawe, “Mesias yama to yama yfi raa sait ro ymen fnya. Tna jõ tnan fi yafoh rait. Yafoh rait yhau siwyan bo re kbe raa makyõ bokyõ. Yafoh retait yhau siwyan bo mam remo ro fnya reto. Ait ro yoo fnya reto yama tna yafoh yari ait ymai to, yafoh retait ksoh toni. Ynaut yawe, ‘Fnya refo fo fnya ajõ fee; au sikba jõ mamo msya Ait retait, moof toni.’ Mesias yama tna raa msis-sas mamo mo kʼAit to, jõ simaut toni. Mfi bo raa moo fnya to, ja raa makyõ bokyõ. Jõ tnan fi ait sait ro ymen fnya yafoh rait. Yafoh retait siwyan bo beta. Tna huwya re kbe ait ro yoo fnya yama. Yari he ait yama tna simaut toni. Feto to jõ simaut mase tari he Yesus yama.
JOH 3:30 Mfo refo Ait yamo Raa ro ati. Tna yamo yase renti yiwer jõ. Jõ fi raa ro ati fee. Tna te taku renti ye.
JOH 3:31 Ait ro ybam sawro ro Allah yroh yama tait yase ybo raa beta. Menohe ait ro yama ybam tabam refo to, raa ro sei sai. Ykyas bo ro tabam refo sai. Ait ro yama ybam sawro ro Allah tait yase yiwrek raa beta.
JOH 3:32 Ait ro yroh yama retait yama ykyas bombra ro Ait ymat msya bo ro yari mam sawro ro Allah. Menohe raa aro mari bo ro Ait ykyas to fee.
JOH 3:33 Ana ro mari bokyas ro Ait ykyas to mhar mawe, ‘Allah tait ja ykyas bo ro mabo.’
JOH 3:34 Allah yoo Har rAit mnan si yee kʼMesias. Tna ybis Ait yama. Tibyo Ait tait ykyas bokyas ro mbam kʼAllah.
JOH 3:35 Yaja yhafri Ku rAit. Tna ysan bombra beta kʼAit ye. Yawe yamo Raja ybo bombra beta.
JOH 3:36 Awya ro smot Ku rAit kbe yhau hame wajin. Menohe awya ro hawe bo yari Ku rAit to, ro yiwana bokyas rAit to, kbe ait fri kmo ro mbam kʼAllah mamo snok hame wajin.”
JOH 4:1 Yesus yber raa mawat tna baptis raa mawat miwer Yohanes. Yohanes baptis raa mabo kbet sai. (Yesus yesait baptis raa fee, kuber wAit oh mi ja baptis raa.) Raa ro Farisi mari he Yesus yber raa mawat. Feto tibyo Ait sikba provinsi ro Yudea hah yamoʼt provinsi ro Galilea.
JOH 4:4 Yesus yamoʼt Galilea to Ait yamo frit iti rabin raa ro Samaria.
JOH 4:5 Tna snok mam remo ro Samaria sau ro masom Sikhar. Sikhar mhau kene msya tabam ro tiwya Yakub ysan ku rait Yusuf.
JOH 4:6 Mam weto aya mato sau ro tiwya Yakub yabah. Snok mam aya mato reto tna kuber ro Yesus mamo twok mam remo saso boit ro mait. Yesus yhai rowyõ iso ro yamo. Tibyo yhau bait mam aya mato reto hre sne hoh. Ayõ ro 12 baas bo feto. Yesus hre kri-kri fo, fai ro Samaria sau mama mwyan aya. Tna Yesus huwya yayoh aya kʼau yawe, “Noo aya baro nee kʼJõ tata.”
JOH 4:9 Menohe au mawe kʼAit mawe, “Nyõ fi Raa ro Yahudi. Tna jõ fo fnya ro Samaria. Fyi re Nyõ nayoh aya tee kʼNyõ nata?” (Ja raa ro Yahudi msya raa ro Samaria miranya fee.)
JOH 4:10 Yesus yawe, “Soh nyõ nhar bouum ro Allah yawe yuumto kʼraa to, tna soh nhar awya oh mi yayoh aya kʼnyõ metait, kbe nyõ oh mi nayoh bo kʼJõ. Tibyo kbe Jõ too aya tee kʼnyõ nata to. Aya reto to mnan fi aya masu ro miyi yoyo.”
JOH 4:11 Fai au reto mawe, “Bo ro Nyõ nbo re nwyan aya to marak. Tna aya mato refo miyõ mrit toni. Fyi re Nyõ ntru aya ro mnan fi aya masu ro miyi yoyo reto?
JOH 4:12 Hohos ramu sait yasom Yakub. Tiwya yabah aya mato refo tna ysan kʼamu. Ait yesait ywyan aya mbam aya mato refo yata ye. Tna ku wait msya sapi wait ro ysia beta moo aya refo mata ye. Fyi, nawe Nyõ nase niwrek Yakub a?”
JOH 4:13 Yesus yawe, “Ja raa ro mata aya refo kbe mhai sbit u.
JOH 4:14 Menohe aya ro Jõ too tee kʼraa to hayah. Awya ro yata aya ro Jõ too tee kʼait to, kbe yhai sbit u fee mamo snok mam hame wajin. Aya ro Jõ too tee kʼait yata reto to, haberek mamo aya masu mam kʼait yhaf mato frok. Tna aya ro Jõ too tee to, awya ro yata to, kbe yhau hame wajin.”
JOH 4:15 Fai reto mayoh kʼAit mawe, “Noo aya reto baro nee kʼjõ tata. Tna kbe thai sbit u fee. Tna meen thah tama twyan aya refo u fee ye.”
JOH 4:16 Yesus ybis kʼau yawe, “Namo ntu naa, tna hah nmaʼt wefo.”
JOH 4:17 Tna au mawe, “Jõ tsya raa aro fee.” Yesus yawe, “Bo ro nyõ nawe reto mabo oh.
JOH 4:18 Raa mabo trion maat ro nyõ nsya. Tna mfo refo ro ysya nyõ yhau mam amah tait nyõ naa metait fee. Bokyas anyõ reto mabo to!”
JOH 4:19 Au mawe, “Jõ tnaut tawe Nyõ fi Nabi ro Allah ybis nama fo.
JOH 4:20 Amu hohos wamu ro Samaria ja bibi Allah to, mamoʼt atu rno. Menohe raa wanu ro Yahudi to, mawe raa bibi Allah mam Yerusalem sai.”
JOH 4:21 Ait yawe, “Nari bo ro Jõ tawe fo: Ayõ ro meen mama to, anu kbe nhar Taja aJõ. Mam wore weto to, anu nbaut Ait mam atu rno u fee tna mam Yerusalem u fee ye.
JOH 4:22 Anu raa ro Samaria nbaut Ait ro anu wase. Menohe amu raa ro Yahudi nbaut Ait ro amu nhar. Riof ro mase mama mbam raa ro Yahudi.
JOH 4:23 Menohe ayõ ro kbe mama to Har ro Tuhan kbe mkyas betoo bi Ait kʼraa re mhar bo mbaut Ait mkah mhaf ro ati. Feto kbe raa mhar bo mbaut Allah, tna mbaut Ait mam woyõ-woya sai. Allah ksoh bo raa mbaut Ait mfi feto. Tawe kʼanu tawe ayõ rau mama oh. Allah tait yfi raa fee: Yetsu marak. Allah tait har. Tibyo awya ro yawe ybaut Ait to, yako hawe sai kbe ybaut Ait mkah yamos rait ye tna tomer yhar yhaf rAit kaket ye.”
JOH 4:25 Tna au mawe, “Jõ thar tawe, Mesias (ro raa mtu mawe Kristus to) kbe yama. Yama, tna kbe betoo bombra refo beta kʼamu.”
JOH 4:26 Tna Yesus yawe, “Jõ fi Ait oh.”
JOH 4:27 Ti reto kuber ro Yesus wAit hah me. Tna mmat he Yesus hre ykyas bo ysya fai sau. Tibyo mrok ktak. Ana mawe mtu bo bawya ro ana mbewok mkyas. Tna mawe mtu fyi re Ait ykyas bo ysya fai reto. He mfe, ana shait sai.
JOH 4:28 Fai au sikba bo ro mwyan aya akus mam yuk reto, tna mhoh mamoʼt remo mawe kʼraa mawe,
JOH 4:29 “Nma nmat raa ro riwai jõ tkai mam aya mato reto! Ait ykyas bo kʼjõ tna yhar bombra ro tiwya jõ tno beta. Ait retait Kristus fe awya?”
JOH 4:30 Ana mari bo ro au mkyas kʼana tna masen frok mbam remo reto mamo mmat Yesus.
JOH 4:31 Wore au marak to, kuber ro Yesus mawe kʼAit mawe, “Guru; noo boit baro nait!”
JOH 4:32 Menohe Ait yawe, “Mfe, Jõ tse boit ro anu nhar fee. Boit reto to, tait oh.”
JOH 4:33 Tibyo ana mkyas kʼanya mawe, “Raa aro mayõ boit mama mee kʼAit yait oh a?”
JOH 4:34 Yesus yawe, “Jo tari bo kʼAit ro ybis Jõ tama. Tna boit aJõ oh mefo: Tno bo ro yawe reto beta mkak.”
JOH 4:35 Tna Yesus yawe, “Ja raa mawe ‘Snyi jiit naut tna ora ro armato manes. Tna fo raa saraf.’ Menohe Jõ tawe kʼanu tawe bo ro armato Taja rAit make manes oh. Nesait nmat oh!
JOH 4:36 Raa taro furere bo manaf (benih) mam armato ro Allah rAit wia oh. Mfo refo bo reto make manes. Tna anu fo raa ro mryoh bo ro armato rAit. Anu nryoh bo ro armato reto tibyo meen raa mhau hame wajin. Raa ro tiwya furere bo manaf tna ysya raa ro yryoh bo ro armato reto to, Allah yoo boren yaren ana mbewok ye. Tna mbewok ye simaut mase.
JOH 4:37 Ja raa mkyas mawe, ‘Raa sait furere bo manaf tna raa roto sait yama yryoh mafer rau.’ Mabo oh.
JOH 4:38 Jõ tbis anu nmo nryoh bo mam armato ro tii anu nkah fee. Raa roto mkah oh mimyoh mbtek, tna anu nmo nkai mafer rau reto sai.”
JOH 4:39 Raa ro Samaria msis mari bo riwai fai reto mawe: “Ait yhar bombra ro tiwya jõ tno beta.” Tibyo ana smot Yesus mawe Ait fi Kristus.
JOH 4:40 Tna ana mawe mabe Yesus mawe yhau ysya ana. Tna Ait yhau mam remo rana reto ti ewok.
JOH 4:41 Ana ro Samaria mari bo ro Yesus ykyas tibyo raa msis u mama smot Ait mawe bo ro Ait ykyas to mabo oh.
JOH 4:42 Tna mawe kʼfai au mawe, “Riwai bo ro nyõ nkyas sai oh mi amu smot Ait. Mfo refo amu nesait nri bokyas ro Ait ykyas. Tna amu nhar nwe Ait oh mi Raa ro yama yoo riof ro mase yee kʼraa ro tabam refo.”
JOH 4:43 ⌞Ybam provinsi ro Yudea Yesus hah yamoʼt provinsi ro Galilea fares fo. Yamo iso ro Sikhar.⌟ Yhau mam Sikhar ti ewok reto mkak tna fo yamo renti yamoʼt Galilea.
JOH 4:44 Tiwya raa ro rabin rAit hawe mari Ait. Feto to Yesus yawe, “Nabi ro Allah ybis yama ykyas bo wAit to, ja raa ro rabin rait yesait to, hawe mari ait.”
JOH 4:45 Raa ro Galilea tiwya mamoʼt Yerusalem makyõ korat ro Paskah. Tna mam beto ana mmat bo Yesus yno bo ro msai. Tibyo ati ro Yesus hah yamo snok mam Galilea to, raa rabin reto ksoh mmat Ait.
JOH 4:46 Tna Ait hah yamoʼt remo ro Kana u mam Galilea. Taa Ait yno aya mboh haberek mamo anggur maya mam remo reto. Yhau mam Kana kri-kri fo, pegawai istana sait ku rait kiyam samyoh mam remo ro Kapernaum.
JOH 4:47 Bi retait yari he Yesus ybam Yudea hah yamaʼt Galilea. Yari feto, tibyo ait yamo yo kʼYesus tna soh-soh kʼAit yawe, “Bobot, nama nisoh ku ajõ ro kiyam msai tna kerit yhai!”
JOH 4:48 Yesus yawe kʼpegawai retait yawe, “Soh anu nmat Jõ sair bo ro hnah fee, tna nmat Jõ tno bo ro msai fee ye, anu aro kbe smot Jõ fee.”
JOH 4:49 Tna pegawai retait soh-soh u yawe, “Bobot, nama fooh be kbe ku ajõ kene wo yhai oh!”
JOH 4:50 Yesus yawe, “Namo oh. Ku anyõ retait kiyam marak.” Pegawai retait smot bo ro Yesus yawe reto. Yhar yawe Ait yatak yisoh ku rait. Tna re ait yamo.
JOH 4:51 Ait yamo fares mam iso maka fo sryan wait mama mkai ait mawe, “Ku anyõ to kiyam marak oh!”
JOH 4:52 Tna pegawai retait ytu bo kʼana yawe, “Kiyam marak to riwai ayõ jya bo feto?” Tna ana mawe, “Iis mam ayõ ro sau baas bo feto kiyam marak.”
JOH 4:53 Tna ait yrok srau mbrah yawe, “Ae, iis ayõ reto oh mi Yesus yawe, ‘Ku anyõ yoof oh.’” Tibyo pegawai retait ysya fnya, kukek, raa wait beta smot Yesus.
JOH 4:54 Yesus ybam provinsi ro Yudea yamoʼt Galilea tna yno bo msai ro ewok refo mam beto.
JOH 5:1 Ti baro firwas tna raa ro agama Yahudi makyõ korat rana sau naut. Tna Yesus yaut yamoʼt Yerusalem u.
JOH 5:2 Kota ro Yerusalem to aya mbair sau mhau mam makit rau. Mhau kene mam Mato ro Domba. Mam mai ro Ibrani to, aya mbair reto masom Betesda. Tiwya raa mkait yuk trion maat ro mhau mur aya reto, mkah bo raa hre baas iti.
JOH 5:3 Raa mawat ro mafa kiyam ja mjin mam yuk weto to: Raa ro kiyam, msya raa ro masu mboh msya ro maa maka msya ro matem maa bo mhai to ja mjin mam yuk reto. [Raa weto beta hre mwof aya mata mnah-nah.
JOH 5:4 Malaikat sau mroh tna mno aya reto mnah-nah. Tna awya ro yroh wia yatim mam aya reto to, raa retait kiyam mrok marak.]
JOH 5:5 Mam yuk reto raa sait ro yafa bo tahun trion 38 bo feto yhau.
JOH 5:6 Tna Yesus yama tna ymat ait yjin mam beto. Yhar yawe ait tait kiyam ooh oh. Tibyo ytu kʼait yawe, “Nyõ ksoh bo noof fe mfe a?”
JOH 5:7 Menohe ait yawe si kʼYesus yawe, “Tuhan; mam ati ro malaikat mno aya masu refo mata mnah-nah fo tesait ttai troh fee. Raa ro tubat jõ mse troh mam aya to marak. Tawe tamo troh menohe raa roto taro mroh wia oh.”
JOH 5:8 Yesus yawe kʼait yawe, “Beah aam anyõ tna nasen namo oh.”
JOH 5:9 Ayõ reto si fo raa retait yoof. Tna ait yasen beah aam rait ybo tna yamo. Yesus yisoh raa retait mam ayõ ro raa agama Yahudi ja ntmoh (hari Sabat).
JOH 5:10 Ait ro kiyam marak retait yamo to, tna fri raa manes ro Yahudi baro. Ana mmat he bi ait ybo aam rait yamo to. Ait yiwer Watum ro agama ranu oh meto. Tibyo ana mastako ait mawe, “Ayõ ro raa wanu ntmoh refo: Nasom aam anyõ namo to nno fyi?”
JOH 5:11 Ait retait ye yawe, “Bi Ait ro riwai yno re jõ kiyam marak retait oh mi ybis jõ yawe tubat aam ajõ tna tamo fo.”
JOH 5:12 “Awya oh mi ybis nyõ tubat aam anyõ namo fi?”
JOH 5:13 “Twase ye. Ait yarak mam raa makin wefo.”
JOH 5:14 Ti baro firwas tna Yesus fri ait retait mam Samu ro Allah mato. Tna yawe kʼait yawe, “Nyõ kiyam marak mefo to, ne nno iro u to ma. Soh nawe nno bo ro mkair-kar u to, kbe kiyam ro samyoh toni mama mai kʼnyõ u.”
JOH 5:15 Tna raa retait frok yamo ykyas kʼraa manes ro Yahudi yawe, “Yesus, Ait oh mi yno re jõ kiyam marak fo.”
JOH 5:16 Ana ro Yahudi hawe bo Ait yisoh raa mam ayõ ro raa ntmoh. Tibyo ana tomer mfot Yesus.
JOH 5:17 Menohe Yesus yawe kʼana yawe, “Taja tait ykah bo rAit yoyo mamo snok mam ayõ refo. Feto to Jõ tkah bo ye.”
JOH 5:18 Riwai Yesus yisoh raa mrok moof mam ayõ ro raa ntmoh ye, tna fo Ait yawe Allah tait Yaja rAit ye. (Feto Ait yawe ynan anya ysya Allah.) Tibyo raa ro Yahudi mhaf kek renti tna mawe saso fyi re mfot Yesus tna mame.
JOH 5:19 Yesus ykyas Ait yesait kʼraa manes ro Yahudi yawe, “Nnaut: Bo bawya-bawa ro Ait retait ymat Yaja yno to, Ait yno ye. Tibyo Ait yesait yno bo aro kar fee. Ymat sas bo ro Yaja ybo yno. Tna Ait kro yno bo weto sai ye.
JOH 5:20 Allah yhafri Ku rAit. Tna yerif kʼAit bombra ro Ait yno beta. Tibyo Ait ytai yno bo ro Yaja yno ye. Kbe yerif bo ro msai toni miwrek weto ye. Tna anu nmat to nrok ktak.
JOH 5:21 Taja yatak yno raa ro mhai mrok masen, tna yno raa maam ye. Feto ye Ku retait yatak ye yno raa maam ye. Yno kʼawya ro Ait ksoh sai.
JOH 5:22 Taja yesait ytu srah ro raa sait bo yari fee. Yawe Ku rAit ytu srah raa beta.
JOH 5:23 Taja yno feto afo re kbe raa beta mmat Ku rAit, tna waa Ku rAit ye mfi bo ana mmat Ait, tna waa Ait ye. Awya ro ymat tna waa Ku rAit to fee, ait waa Taja ro ybis Ku rAit yama to fee ye.
JOH 5:24 Nnaut: Awya ro yari bokyas aJõ, tna smot Ait ro ybis Jõ tama to, meen yhau hame wajin. Ait retait meen Allah yno safo mana ymit kʼait fee. Ait yisnak hai yamoʼt roon ro hame.
JOH 5:25 Raa ro mhai oh kbe mari Ku ro Allah ymai. Tna raa ro mari kaket to, kbe maam. Makyon reto mama oh mefo.
JOH 5:26 Taja Ait yafos rAit mhau tu mroon mawyõs. Raa aro mabe Ait fee. Yhau sai. Tna yno re Ku rAit, Ait yafos rAit mhau tu mroon mawyõs ye.
JOH 5:27 Jõ fi 'Ait ro Yroh Yama Yfi Raa Sai'. Tibyo Allah yoo tak yee kʼJõ yawe Jõ fi tros susai ttu srah raa ro tabam refo. Bokyas ro ati oh mefo.
JOH 5:28 Nri bo ro Jõ tawe to ktak ma. Ayõ rau meen mama to tna raa beta ro mhai oh kbe mari Ait ymai.
JOH 5:29 Ana weto raa sama oh, menohe kbe ana beta mrok masen: Ana ro tiwya mno bo ro moof to, mrok masen tna kbe mhau hame wajin. Ana ro tiwya mno bo ro mkair to, kbe mrok masen ye. Tna Jõ ttu srah ro ana mno. Tna too safo mana tmit kʼana weto ye.
JOH 5:30 Jõ tesait ai ttu srah rana fee. Tesait tno bo sau kar fee. Jõ ttu srah tari to mnan bawya ro Allah ybis kʼJõ. Tna ja tno mnan si bo ro Ait yawe. Tno bo aro mkah ksoh aJõ tesait fee. Tno bo to tawe tno Taja yhaf mnan.
JOH 5:31 Mfi bo Jõ tesait aran tkyas tawe Jõ fi Ku ro Allah yare, kbe raa aro mari fee. Tna smot fee ye.
JOH 5:32 Menohe raa roto sait yhar Jõ tna ykyas Jõ ye. Tna thar tawe bokyas rAit reto to mabo tu oh.”
JOH 5:33 Tna Yesus ykyas kʼana ro Yahudi u yawe, “Anu nbis raa mamo mo kʼYohanes tna mtu bo kʼait oh. Ait ymat bo ro tno tna ykyas Jõ kʼanu. Ykyas bo mabo.
JOH 5:34 Ja tari bokyas mbam raa sai to fee. Menohe Jõ tkyas Yohanes bokyas rait afo re kbe anu nri ait tna nkai riof.
JOH 5:35 Tiwya Yohanes yama ynan kek ro mait. Yama tna ti baro to kek reto mram anu fo ye. Au oh mi ti reto to, anu nsu maah tna nksoh nri bokyas rait ye.
JOH 5:36 Tawe Jõ fi Ku ro Allah yare to. Tna bombra ro Jõ tno merif mawe Taja oh mi ybis Jõ tama fo. Tama tno bo ro Ait ybis to tno fo. Yohanes ykyas yawe Jõ fi Ku ro Allah yare ye. Bokyas rait reto merif Jõ tasom aJõ kebet sai. Menohe bombra ro tno merif bo reto kaket re raa mhar mawe Allah oh mi Raa ro ybis Jõ tama.
JOH 5:37 Taja ro ybis Jõ tama fo, yesait ykyas yawe Jõ fi Ku rAit. Menohe anu smot Jõ fee. Tibyo anu nri ymai fee. Tna anu nmat yasu rAit fee ye. Tna bokyas rAit anu nse mam nhaf mato wanu fee ye.
JOH 5:39 Anu ksoh nwe meen anu nhau hame wajin. Feto to anu ja hre nmat Bokom ro Allah. Nwe anu nmat tna nhar Bokom reto kaket. He mfe. Bokom ro Allah oh mi mkyas Jõ.
JOH 5:40 Menohe anu hawe bo nma no kʼJõ afo re meen nhau hame wajin.”
JOH 5:41 Tna Yesus yawe kʼraa manes ro Yahudi yawe, “Jõ saso tasom aJõ fee. Reto bo ro ati fee.
JOH 5:42 Jõ thar anu. Thar tawe anu nhafri Allah mam nhaf mato wanu to fee.
JOH 5:43 Allah yesait ybis Jõ tama tkyas yasom rAit kʼanu. Tibyo Jõ tama. Menohe anu nitrah nhaf wanu kʼJõ fee. Anu nri bo ro Jõ tkyas fee. Raa taro kbe mama mo kʼanu tna mkyas bonaut rana mesait sai. Fyi re anu nri ana? Ana mkyas masom rana mesait. Fyi re anu nitrah nhaf wanu kʼraa weto?
JOH 5:44 Anu ksoh raa mmat anu tna bibi anu. Menohe anu sorni nwe Allah ymat anu to, bo ro ati. Tibyo anu ja nwe nno bo re kbe Ait bibi anu to fee. Nno fyi meto? Allah yesait aran Raa ro yase. Au oh mi anu hawe smot Jõ fea!
JOH 5:45 Meen Jõ tamo to kʼTaja. Tamo tna taun boun kʼanu to fee. Bi Musa oh mi yaun baun kʼanu oh. Bo ro Musa ykom mesait maun boun kʼanu. Anu ninaut nwe, ‘Amu nri Musa msya Watum rait reto. Feto kbe amu nkai riof.’ He mfe.
JOH 5:46 Watum ro Musa mkyas Jõ. Soh anu nfot Watum rait kaket to, maami anu kbe smot Jõ ye.
JOH 5:47 Menohe anu nmat Watum ro Musa to, nbo nno kaket fee. Feto kbe anu niwana bo ro Jõ tkyas ye.”
JOH 6:1 Ti baro firwas, tna Yesus hah yamoʼt provinsi ro Galilea. Tna snyi reto to, kene wo raa ro Yahudi makyõ korat ro Paskah. Tna Yesus yroh yamoʼt maru ro Galilea. Tna frit yamoʼt ati tino. (Maru reto raa mtu masom maru ro Tiberias ye.) Raa mhar mawe Yesus yatak yno bo msai yisoh raa ro kiyam sor. Tibyo raa mawat mjor mama kro Ait. Tna fo Yesus yaut yamoʼt atu sau. Tna hre su ysya kuber wAit.
JOH 6:5 Yesus ymat he raa msis-sas maut mamaʼt atu reto mo kʼAit. Ait yawe kʼFilipus yawe, “Raa mawat mam befo fo, kbe anu boo roti mam woyõ bee kʼana mait fo?”
JOH 6:6 (Yesus yawe ytu feto sanet bosmot ro Filipus. Yesus yesait yhar bo bawya ro kbe Ait yno oh.)
JOH 6:7 Filipus yawe, “Pitis mabut mkah anu boo roti bee kʼana beta mait. Mfi bo pitis dinar trion 200 bo feto, kbe ana makin mait roti kebet-kebet sai to. Pitis mabut sai.”
JOH 6:8 Kuber ro Yesus rAit roto sait yasom Andreas. Andreas tait Simon-Petrus yao. Tna Andreas yawe,
JOH 6:9 “Ku yaku sait yros mam befo. Tna ait yse roti trion maat msya syoh mana ewok. Menohe bo wait weto mabut ye. Raa msis-sas fo.”
JOH 6:10 Yesus yawe, “Nbis raa weto hre mte.” Mam yuk reto bosafom moof. Tna raa weto beta hre mte. Raa sme wore weto beta to raa mabo trion 5000 bo feto.
JOH 6:11 Tna Yesus yoo roti weto, tna skabuk yayoh asik mase kʼAllah. Tna ybo saim kʼraa ro hre mam weto. Ana moo nksoh rana sai. Tna yoo syoh weto to, yno saim mnan anya ye.
JOH 6:12 Raa beta sohmaam mhaf matu. Tna Yesus yawe kuber wAit yawe, “Noo keranjang nmo soo roti msya syoh mabuf ro mhau to nfau mam keranjang. Mbeak ma.”
JOH 6:13 Riwai roti mabuf maat aran sai. Tna raa mait mhaf matu. Tna kuber wAit soo roti mabuf ro mhau fares to, mfau mam keranjang. Mfau keranjang trion 12 matot.
JOH 6:14 Raa mmat bo msai reto tibyo mawe kʼanya mawe, “Mamo snok ayõ mfo refo anu bwof nabi ro Allah ybis sait yama. Amu nnaut nwe Ait refi fi nabi retait yroh yama tabam refo!”
JOH 6:15 Ana baro mnaut mawe mabe Yesus yhau ysya ana. Ana saim kʼanya mawe mikoh Ait yamo Raja rana. Yesus yhar yawe ana mnaut bo reto tna hawe. Tibyo Ait sesa Ait tna yesait yaut yamoʼt atu sau.
JOH 6:16 Mti knu-knu fo, kuber ro Yesus mroh mamoʼt maru.
JOH 6:17 Arin mti oh to, tna Yesus yama yo kʼana fefares. Ana maut mam wiak rana mawe miin frit matim mamoʼt remo ro Kapernaum.
JOH 6:18 Ana miin mamo, mamo tna foos mase mama, figyõm mase mama mai ye.
JOH 6:19 Ana miin mamo kilo mara maat bo feto oh. Tna ana mmat he Yesus yama. Yama abyõ mam aya mata yo kʼana. Mmat tna ana waa.
JOH 6:20 Menohe Ait yawe kʼana yawe, “Waa ma, Jõ mefi.”
JOH 6:21 Ana mari mai rAit tibyo ana beta simaut. Tna mawe, “Nama naut oh!” Yaut hre tna mam weto si oh to, ana mmat he wiak rana snok mam joh ro Kapernaum oh.
JOH 6:22 Raa mawat mhau akus fares mam maru maam ati tino. ⌞Mam wore wo Yesus yoo roti yayoh asik mase kʼAllah tna yee kʼraa mait to.⌟ Tna rabu ti fo, ana mnaut mawe, “Iis wiak sau aran mros mam joh. Tna mam wiak reto kuber ro Yesus mesait aran maut mamo. Yesus fee. Feto to Ait yaut wiak ryo?” Mhau tna wiak roto baro mbam remo ro masom Tiberias mama msyoha mam joh reto ye.
JOH 6:24 Raa ro mhau mam weto fares mmat he Yesus ysya kuber wAit marak. Feto tibyo ana maut wiak weto mamoʼt Kapernaum mawe saso Ait mam beto.
JOH 6:25 Raa weto mkai Yesus mam maru tino. Tna mtu bo kʼAit mawe, “Guru; tija oh Nyõ snok wefo fo?”
JOH 6:26 Yesus yawe, “Anu saso Jõ fyi? Anu nmat bo msai ro Jõ tno menohe bohar wanu to mabuf fares. Anu niit roti tna nhaf matu. Reto oh mi anu saso Jõ.
JOH 6:27 Tomer nkah bo re nkai roti ro niit sai to ma. Roti to bo ro tabam refo sai. Rau ro moof to, anu nnaut nmos wanu. Jõ fi 'Ait ro Yroh Yama Yfi Raa Sai'. Saso boit ro mbam kʼJõ oh. Boit ro Jõ too tee kbe mnis fee, kbe mkak fee. Boit reto to mno raa mhau hame wajin. Taja ykyas Jõ yawe, ‘Ait fi, Jõ thaf mnan.’”
JOH 6:28 Tna ana mtu kʼAit mawe, “Bo bawya sai ro kbe amu nno re Allah ksoh amu to?”
JOH 6:29 Tna Yesus yawe kʼana yawe, “Bo ro Allah ksoh anu nno to fefo: Smot tna nsam wai kʼAit ro Allah ybis yama to.”
JOH 6:30 Ana mawe, “Mfi bo Nyõ raa ro Allah ybis, tna nawe Nyõ nase niwer Musa to, sik nno bo msai sau naut u. Afo re amu nmat wia tna smot Nyõ. Kbe nno bo bawya?
JOH 6:31 Tiwya tinyi hohos wanu mhau mam yuk ro riamo. Tna Allah ysair boit manna ro ana mait. Bokom ro Allah mkyas mawe: ‘Boit mfi roti mroh mbam uu mbtek. Tna Musa yoo yee kʼana mait.’”
JOH 6:32 Menohe Yesus yawe, “Musa fee. Nnaut: Taja oh mi tii yno roti mbtek mroh mbam uu to. Tna mfo refo yoo roti ro ati yee kʼanu niit.
JOH 6:33 Ait ro yroh yama ybam Allah tna yno raa ro tabam refo maam to, Ait retait tait roti ro ati ro mbam kʼAllah oh metait.”
JOH 6:34 Ana mayoh mawe, “Tuhan;roti reto, noo nee kʼamu niit yoyo oh.”
JOH 6:35 Yesus yawe, “Jõ refi fi roti reto. Tno raa mhau hame wajin. Awya ro yama yo kʼJõ tait yhai sre u fee. Tna awya ro smot Jõ to, kbe yhai sbit fee ye.
JOH 6:36 Riwai tawe, ‘Anu nmat Jõ menohe anu smot Jõ fefares.’ Mabo oh.
JOH 6:37 Menohe Taja ykyas raa roto taro yawe, ‘Ana ro Jõ tsan kʼNyõ to, ana weto kbe mamo raa woNyõ.’ Ana weto beta kbe mama mo kʼJõ. Tna awya ro yama yo kʼJõ to, kbe Jõ tikyak ait fee.
JOH 6:38 Jõ tbam Allah troh tama tno bo ro Jõ tesait ksoh to fee. Menohe tama tno bo ro Taja yawe.
JOH 6:39 Allah oh mi ybis Jõ tama to. Tna Ait ybis yawe Jõ kmot ana afo re ana beta beroh smot Jõ. Ana beta ro ysan kʼJõ to Ait ksoh yawe kbe sait yarak o yakus bo to fee. Tna meen tno re ana beta mrok masen mam ti ro tabam refo haberek u.
JOH 6:40 Allah ksoh yawe awya sai ro ymat Ku rAit tna smot Ait to, meen yhau hame wajin. Tna meen Jõ tno ana beta mrok masen mam ti ro tabam refo haberek.”
JOH 6:41 Riwai Yesus yawe, “Jõ refi fi roti ro mbam kʼAllah.” Tibyo raa ro Yahudi knot-knot Ait.
JOH 6:42 Mawe, “Menohe Ait tait Ku ro Yusuf yare sai! Anu bhar Ait yaja yme oh! Fyi re Ait yawe Ait yroh ybam Allah?”
JOH 6:43 Tna Yesus yawe, “Knot-knot ma.
JOH 6:44 Taja ybis Jõ troh tama tabam refo. Tna Ait oh mi ykuk raa taro mama mo kʼJõ. Tna soh Ait ykuk ana weto fee, ana mesait mtai mama mo kʼJõ fee ye. Tna meen Jõ tno ana beta mrok masen mam ti ro tabam refo haberek u.
JOH 6:45 Tiwya Allah ybis nabi rAit sait yama ykom bokyas rAit yawe, ‘Allah kbe yfi guru ykyas watum rAit kʼraa beta.’ Awya sai ro yari bo ro Allah yawe tna yse mam yhaf mato rait to, kbe ait retait yama yo kʼJõ.
JOH 6:46 Raa aro bo mmat Taja fee. Ait ro yama ybam Allah yesait aran ymat Taja oh.
JOH 6:47 Nnaut: Awya ro smot Jõ to, meen yhau hame wajin.
JOH 6:48 Jõ tno raa mhau maam hame wajin. Mnan fi roti ro mno re raa mhau maam mam tabam refo.
JOH 6:49 Riwai anu nkyas nwe, ‘Anu hohos na tii mait manna ro mbam Allah mam yuk ro riamo.’ Mait fea! Menohe beta mhai.
JOH 6:50 Roti ro mbam Allah oh mi Jõ mefi. Tna raa ro mait roti refo kbe mhai fee.
JOH 6:51 Jõ fi roti ro mama mbam kʼAllah. Awya ro yait roti refo kbe yhau hame wajin.Roti refo fo kwiyan aJõ. Tsan kwiyan aJõ afo re tno riof kʼraa ro tabam refo.”
JOH 6:52 Mari feto raa ro Yahudi santri anya mawe, “Fyi re raa refi yawe yoo kwiyan rAit yee kʼanu bbo?”
JOH 6:53 Yesus yawe, “'Ait ro Yroh Yama Yfi Raa Sai' tait, Soh anu nbo kwiyan rAit fee, tna soh nta mees rAit fee ye, kbe nkai riof ro hame fee. Bokyas ro ati oh mefo.
JOH 6:54 Awya ro yabo kwiyan aJõ tna yata mees aJõ to, meen yhau hame wajin. Tna jõ tno ait yrok yasen mam ti ro tabam refo haberek u to.
JOH 6:55 Kwiyan aJõ to boit ro niit oh meto. Tna mees aJõ to aya ro nta oh meto.
JOH 6:56 Awya ro yabo kwiyan aJõ tna yata mees aJõ to yhaf sau su ysya Jõ renti, tna Har aJõ mjin mam ait yhaf rait renti ye.
JOH 6:57 Taja ro yawyos retait ybis Jõ tama. Tna Ait yno re Jõ thau tawyos ye. Feto ye awya ro yabo kwiyan aJõ to yhau yawyos ye.
JOH 6:58 Jõ fi roti ro mbam Allah. Hohos wanu tiwya mait manna. Tna beta mhai. Menohe roti ro Jõ tkyas refo mnan anya msya manna reto fee. Awya ro yait roti aJõ refo meen yhau hame wajin.”
JOH 6:59 Bo wefo beta Yesus ykyas mam samu watum ro Kapernaum.
JOH 6:60 Mari bokyas ro Yesus reto, tna kuber ro Yesus wAit mawat mawe, “Bokyas refo samyoh toni. Kbe awya ro yari tna yse kʼait?”
JOH 6:61 Yesus yhar kuber wAit mmai kʼanya bokyas rAit reto. Tna yawe, “Anu kmo bokyas reto a?
JOH 6:62 Jõ fi 'Ait ro Yroh Yama Yfi Raa Sai'. Meen Jõ hah u taut tamoʼt oo ro tii thau wia. Mfi bo meen anu nmat bo reto to, kbe anu ne nnaut nwe bawya?
JOH 6:63 Har ro Tuhan mno raa ro tabam refo, mhaf, srau wana mrok haberek. Mno re ana weto moo ‘mamos ro tna’. Raa mesait tomer mno mhaf wana haberek to, mtai fee, mkai riof ro hame wajin fee. Menohe bokyas ro Jõ tkyas kʼanu to bokyas Har ro Tuhan rAu. Tna bokyas reto mno raa mkai riof ro hame wajin.
JOH 6:64 Anu nkin wefo to, taro smot Jõ fee.” (Maban tinyi wore Ait yamo guru Yesus yhar wia oh awya ro smot Ait fee, tna awya ro kbe hren serek Ait.)
JOH 6:65 Tna Yesus yawe, “Reto oh mi Jõ tkyas kʼanu tawe soh Taja ybis wia to fee, kbe raa sait ytai yama yo kʼJõ fee ye.”
JOH 6:66 Tna ayõ reto kuber wAit mawat sikba Ait, hawe bo kro Ait u fee.
JOH 6:67 Tna Yesus ytu kuber wAit mabo 12 reto yawe, “Fyi, anu nwe sikba Jõ ye fe mfe a?”
JOH 6:68 Simon-Petrus yawe kʼAit yawe, “Tuhan; amu kbe nmo no kʼawya u? Nyõ oh mi nkyas bokyas ro mno re raa mhau hame wajin.
JOH 6:69 Amu smot Nyõ tna nhar nwe, Nyõ fi Ait ro Allah Ybis Yama.”
JOH 6:70 Tna Yesus yawe, “Anu nbo 12 refo Jõ tsok oh. Menohe anu wefo sait tait kabes mhau kait yhaf mato rait.”
JOH 6:71 (Ait ykyas Yudas, ku ro Simon Iskariot yare. Ait ysya raa mabo 12 ja kro Yesus. Menohe kbe ait besruf Yesus kʼraa re mame yajat.)
JOH 7:1 Raa manes ro Yahudi mawe mame Yesus yajat. Tibyo Ait hawe yamoʼt provinsi ro Yudea fee. Yamo yur mam provinsi ro Galilea sai.
JOH 7:2 Ti weto kene wo raa ro Yahudi ja mamoʼt Yerusalem makyõ korat rana sau. Korat refo masom Korat ro Sbyah.
JOH 7:3 Tna Yesus yao na mawe kʼAit mawe, “Nyõ namo ye fea!” Ana smot Ait fefares ye. Tibyo mamus tna mbesre Ait mawe, “Nasen sikba befo. Namoʼt Yudea afo re raa ro kro Nyõ kbe mmat bo msai ro nno. Soh raa sait yawe yamo raa ro kbe masom to, ja ait ymyõt bo bawya ro yno to fee. Ja yno mam wore raa makin masu mmat. Soh Nyõ nno bo msai to, nno mam wore raa beta mmat tna mhar!”
JOH 7:6 Yesus yawe kʼana yawe, “Jõ tamo fefares. Ayõ ro Jõ tamo to fefares. Ayõ rau snok fefares. Menohe anu fo, nmo ti woyõ-woya sai to moof. Bo ati fee.
JOH 7:7 Raa ro wase Allah ja knait anu fee. Menohe Jõ tkyas bo ja raa mno to, tawe ana mno bo ro mkair-kar. Tibyo ana knait Jõ.
JOH 7:8 Nesait nmoʼt korat reto oh. Jõ tamo fefares. Ayõ aJõ reto mama fefares.”
JOH 7:9 Yesus ykyas bo feto tna yhau bait mam Galilea wea.
JOH 7:10 Yesus yao na matim wia mamoʼt korat reto. Tna Ait yesait yamo yrof. Ait yasen yamo wai. Raa aro mhar fee.
JOH 7:11 Mam korat reto raa manes ro Yahudi saso Ait. Tna mtu kʼanya mawe, “Ait miya mefi?”
JOH 7:12 Raa mawat mkyas Ait kmun-kmun kʼanya. Taro mawe, “Bi Ait tait Raa ro yoof.” He taro mawe, “Mfe, Ait besruf raa mawat.”
JOH 7:13 Menohe ana waa raa manes ro Yahudi. Tibyo ana mkyas Ait fari fee. Mkyas rere kʼanya sai.
JOH 7:14 Korat reto raa makyõ ti baro oh tna Yesus twok mam Samu ro Allah. Tna yasen ykyas bo.
JOH 7:15 Raa manes ro Yahudi mari Ait ykyas bo moof kaket, tna ana mrok miskawowo. Ana mawe, “Raa refi yhar bo mnan si, menohe ykom bo ysya guru agama to fee! Ykom bo mam remo rAit sai.”
JOH 7:16 Yesus yawe, “Bo ro Jõ tkyas refo bokyas aJõ fee. Bokyas refo mbam kʼAit ro ybis Jõ.
JOH 7:17 Awya ro ksoh yari tna yno bo ro Allah yawe to, kbe yesait yhar yawe soh bokyas ro Jõ tkyas refo fo mbam Allah fe mfe a.
JOH 7:18 Awya ro ykyas bokyas rait yesait to saso yasom rait yesait. Ait ksoh yawe raa mmat ait tna bibi ait. Menohe soh anu nmat raa sait ykyas bi roto taro yasom rait to, nri ait. Ait ro ykyas yasom bi ait ro ybis ait yama to, ait retait saso raa yasom rait sai. Ait retait oh mi raa ro ja ykyas bokyas ro ati. Bosruf aro mhau kʼait fee.”
JOH 7:19 Tna Yesus yawe, “Tii Musa yoo Watum ro Allah yee kʼanu fe mfe a? Fyi re anu wefo aro nri Watum reto nbo nno fee? Fyi re anu tomer nme Jõ?”
JOH 7:20 Tna raa msis weto mawe kʼYesus mawe, “Kabes mbo Nyõ a? Awya yawe yame Nyõ to?”
JOH 7:21 Yesus yawe, “Tiwya Jõ tno bo msai sau mam ayõ ro anu ntmoh to. Nmat bo msai reto tna anu nrok niskawowo. ⌞Tna anu kmo Jõ nwe tisoh raa ro kiyam mam ayõ ro anu ntmoh to ma.
JOH 7:22 Menohe anu nesait nno bo mam ayõ ro anu ntmoh to ye.⌟ Tiwya Musa ysi bo kʼanu yawe anu nkom ku sme wanu (sunat). (Bo reto Musa sair fee, hohos ranu tiwya ysi bo reto kʼanu.) Bo reto ait ysi tibyo anu ja nno mam ayõ ro raa ntmoh to ye.
JOH 7:23 Ati ro anu nkom ku sme wanu mam ayõ ro ntmoh to, anu nnaut nwe nno feto afo re niwer Watum ro Musa reto fee. Feto to fyi re anu kmo Jõ? Jõ tisoh raa yetsu rait muuf mrok moof mam ayõ reto.
JOH 7:24 Anu nsu nmat bo mam ti sau sai. Tna ja nuun boun fooh. Nno feto ma. Rau ro moof to, anu nmat ati ewok ye. Nmat sas tna nnaut bau mam nhaf mato wia matim. Tna kbe nhar kaket. Nno feto wia tibyo nhar tu oh nwe bo ro raa mno aro to mkair fe mfe a.”
JOH 7:25 Tna raa ro Yerusalem baro mawe, “Ait refi oh mi raa saso mawe mame mefi, fe mfe a?
JOH 7:26 Mfo refo Ait ykyas bo wore raa mawat mmat tna waa fee. Menohe raa aro mkyas bo mai kʼAit fee. Raa mabi wanu mhar mawe Ait fi Mesias a?
JOH 7:27 He mfe. Ait refi anu bhar Ait ybam rabin hayo yama. Meen Mesias yama to, kbe raa sait bo yhar Ait ybam hayo yama to fee.”
JOH 7:28 Yesus ykyas bo mam Samu ro Allah mato fares tna ykyas ymai fari yawe, “Anu saah nhar Jõ fi awya, tna nnaut nwe anu nhar nwe Jõ tbam rabin hayo tama. Menohe anu wase fares: Allah oh mi ybis Jõ tama fo. Jõ fi Raabis sai. Tna bo ro Ait yawe to mabo tu oh. Menohe anu wase Ait.
JOH 7:29 Tiwya thau su tsya Ait. Tna Ait oh mi ybis Jõ tama fo. Tibyo Jõ thar Ait.”
JOH 7:30 Yesus yawe feto tibyo raa mawe mfot Ait. He mfe. Ayõ ro raa mfot Ait to sboh rau fefares. Tibyo raa sait bo yfot Ait fee.
JOH 7:31 Raa weto to, mawat smot Yesus. Ana weto mawe, “Ati ro Mesias ro amu nwof yama to, kbe ysair bo ro hnah mawat miwer Raa refi fe mfe a?”
JOH 7:32 Raa ro Farisi mari he raa mkyas bo reto. Tna fo imam manes msya raa ro Farisi mbis raa sbe ro kmot Samu ro Allah reto to, mawe mamo mfot Ait.
JOH 7:33 Tna Yesus yawe kʼraa mam Samu ro Allah yawe, “Thau boti sai tsya anu. Tna fo kbe hah tamo to kʼAit ro ybis Jõ tama.
JOH 7:34 Kbe anu saso Jõ. Menohe yuk ro thau to anu ntai nma fee. Tibyo kbe nkai Jõ fee ye.”
JOH 7:35 Raa ro kro agama Yahudi weto mawe kʼanya mawe, “Kbe yamo tiyo tna re kbe anu bmat Ait u fee? Kbe yamoʼt rabin roto rauk? Tna yo kʼraa agama wanu ro mhau mam rabin reto? Yamo ykyas bo kʼana rauk? Soh mfe Ait yamo yo kʼraa ro wase agama ranu rauk?
JOH 7:36 Riwai yawe, ‘Kbe anu saso Jõ. Menohe nkai Jõ fee.’ Tna yawe, ‘Yuk ro thau to anu ntai nma fee.’ Reto fyi oh meto?”
JOH 7:37 Korat reto ayõ ro tis rau to ayõ ro ati. Tna Yesus yros ytu yawe, “Awya ro yhai sbit to, yama yo kʼJõ re yata aya!”
JOH 7:38 Yesus ykyas aya reto to, ykyas Har ro Tuhan. Tna yawe, “Awya ro smot Jõ to Bokom ro Allah refo mkyas ait retait. Mkyas bofret mawe, ‘Kbe ait yfi aya sau. Tna aya refo mbam ait miyi mamo. Aya reto mno re raa mhau hame wajin.’” (Meen Yesus raa mame yajat tna hah yamoʼt sawro ro Allah. Tna Yaja yoo bo yase rAit yee yno Yesus yrok yase toni. Tna fo ysan Har ro Tuhan mhau kʼraa ro smot Ait. Kbe mhau mam mhaf mato wana. Yesus yase toni fefares to, ysan Har ro Tuhan kʼraa wAit fefares ye.)
JOH 7:40 Raa mari bo ro Yesus ykyas reto, tibyo taro mnaut mawe, “Ait refi fi nabi ro anu bwof Allah ybis yama tu oh mefi!”
JOH 7:41 Taro mawe, “Mfe, Ait refi Mesias!” He taro mawe, “Ah, Mesias ybam Galilea fee!
JOH 7:42 Bokom ro Allah mawe Mesias ybam kube ro raja Daud. Tna kbe Ait yama ybam Betlehem, remo ro raja Daud tiwya fnya mabe.”
JOH 7:43 Tibyo raa mkyas Yesus to, ana mhaf sau fee tna santri anya.
JOH 7:44 Raa taro mawe mfot Yesus, he mfe; ana sait bo yfot Ait fee.
JOH 7:45 Riwai imam manes ro agama Yahudi msya raa ro Farisi to, mbis raa sbe wana mamo mfot Yesus. Raa sbe weto to ja kmot Samu ro Allah reto. Ana masen mamo mfot Yesus. He mfe. Ana hah me mama sai. Tna raa mabi ro agama Yahudi weto mtu bo kʼana mawe, “Fyi re anu nfot Ait nkah nma fee!”
JOH 7:46 Raa sbe mawe, “Raa sait ja ykyas bo mnan mfi raa retait ykyas to fee!”
JOH 7:47 Raa ro Farisi mawe, “Anu Ait besruf ye a?
JOH 7:48 Raa manes aro smot Ait fee. Tna raa ro Farisi aro smot Ait fee ye.
JOH 7:49 Ro smot Ait to, raa makin ro wase Watum ro Musa sai. Kbe ayoh mroh kʼana.”
JOH 7:50 Bi Nikodemus tait raa manes sait ye. (Tiwya mti sau ait yamo ykyas bo ysya Yesus.) Mfo refo ait hre siret su ysya raa manes taro weto tna yawe kʼana yawe,
JOH 7:51 “Ati ro anu, raa ro agama Yahudi, btu safo mana bmit raa to, anu ja bkyas safo reto, tna btu bo kʼait bri wia. Watum ranu mbis mawe anu bno feto. Bno feto afo re bhar bo ro raa retait yno kaket wia. Tna fo boo safo mana bmit kʼait retait. Ja anu bfot raa ninya tna bbu wia ma.”
JOH 7:52 Raa manes taro mastako Nikodemus mawe, “Amu nnaut nwe nyõ raa ro Galilea ye! Nmat Bokom ro Allah! Amu nhar nwe Allah ybis nabi aro mbam Galilea fee!” [
JOH 7:53 Tna raa weto sait-sait hah yamoʼt amah rait-rait.
JOH 8:1 Menohe Yesus yamoʼt faut ro Zaitun.
JOH 8:2 Rabu momo Yesus hah yamoʼt Samu ro Allah. Tna raa mawat mama mo kʼAit. Yesus hre tna ykyas bo kʼana.
JOH 8:3 Hre ykyas bo tna guruagama Yahudi msya raa ro Farisi baro mama twok. Tna sai ana mfot fai ro mwyah sau tna makah mama. Mama mse au mros susai masuf raa mawat weto.
JOH 8:4 Tna guruagama msya raa ro Farisi weto mawe kʼYesus mawe, “Guru; fai au refo mwyah msya raa sait kri-kri tna amu nfot.
JOH 8:5 Watum ro Musa mawe fnya ro mnan fefo kbe raa mawah fraa mai tibyo majat to! Tna amu ntu bo kʼNyõ: Nyõ nawe kbe amu nno bo bawya? Amu nme au fe mfe a?”
JOH 8:6 (Ana mtu bo reto kʼYesus mawe sanet Ait. Soh Ait ykyas bo ro sre kbe ana maun Ait.) Yesus yari feto to shaitrun bait sai. Tna hre mte, yatem ykom bo bait mam tabam sai.
JOH 8:7 Menohe ana beroh mtu mitan kʼAit. Tibyo Ait yasen yros yawe kʼana yawe, “Anu nkin wefo, soh awya ro yno iro fefares meto ee, yasen yama tinyi yoo fraa yai kʼau wia.”
JOH 8:8 Tna Yesus hre u tna yatem ykom mam tabam u.
JOH 8:9 Ana mari bo ro Yesus yawe reto tibyo ana sait-sait yamo sikba yuk reto marak. Sait yamo-yamo mbam kʼana ro mabi mamo snok mam ro tna beta. Tna Yesus ysya fai au refo mbewok aran mhau akus.
JOH 8:10 Yesus yasen yros ytu kʼfai au reto yawe, “Raa ro mros wefo sor to, ana beta miyo? Raa aro mamus nyõ fee mfe a?”
JOH 8:11 Fai au mawe, “Mfe. Raa aro fee.” Tna Yesus yawe, “Jõ ye tamus nyõ fee. Namo bonyõ. Tna maban mfo refo nno iro u ma.”]
JOH 8:12 Ti baro firwas Yesus ykyas bo u kʼraa mawat. Yawe, “Jõ fi kek ro mno raa ro tabam refo to masu maah. Awya ro kro Jõ to, tafos aJõ mno re ait yasu maah. Tibyo ait yamo ninya mam amur u fee. Too tafos ro tna tee kʼait tna meen yhau hame wajin ye.”
JOH 8:13 Raa ro Farisi mari bokyas rAit reto mawe, “Nyõ nesait nkyas Nyõ ai. Feto to bo ro Nyõ nkyas reto to, raa mari fee, kbe mtu sioh.”
JOH 8:14 Yesus yawe, “Jõ thar tawe Jõ tbam tiyo tama. Tna thar tawe kbe tamo tiyo ye. Tibyo tesait tkyas Jõ sai to, tna raa saah mhar tro mawe bokyas aJõ reto to, mabo bau yum oh. Menohe anu to wase wore Jõ tama tna wase wore kbe Jõ tamo ye.
JOH 8:15 Ati ro Jõ hre susai tna tse srah kʼraa to tno tesait kar fee. Jõ tsya Taja ro ybis Jõ tama to hre su. Tibyo soh Jõ tawe tse srah raa aro tari to, tno mnan si. Jõ tesait tmit safo kʼraa to fee. Menohe ati ro anu ntu srah raa nri to, anu ntu mamyot mfi bo ja raa sei sai mtu bo mari.
JOH 8:17 Ja anu nri Watum ro Musa. Tna Watum agama ranu reto mkyas mawe, ‘Soh raa mabo ewok mmat bo tna mros mkyas mnan anya to, raa mhar mawe bokyas reto mabo. Raa mtu sioh fee.’
JOH 8:18 Feto Jõ tesait tkyas Jõ ai tna Ait ro ewok to, Taja aJõ. Ait ro ybis Jõ tait ykyas Jõ ye.”
JOH 8:19 Tna ana mtu kʼYesus mawe, “Naja yhau mam tiyo?” Menohe Yesus yawe, “Anu wase Jõ tna wase Taja ye. Soh anu nhar Jõ to, anu nhar Taja ye.”
JOH 8:20 Bo weto Yesus ykyas mam Samu ro Allah, kene wore yuk ro raa mama mruk pitis ro ana msan kʼAllah. Menohe ti ro Yesus yhau mam tabam refo mkak fefares. Ayõ rau snok fefares. Tibyo raa aro mfot Ait fee.
JOH 8:21 Yesus ykyas u yawe, “Jõ kbe tamo. Tna anu saso Jõ. Menohe iro ro nno mhau fares. Tibyo meen nhai. Tna yuk ro Jõ tamo to, anu kbe nmo fee.”
JOH 8:22 Ykyas feto tibyo raa ro Yahudi mtu kʼanya mawe, “Riwai Ait yawe ‘Yuk ro tamo to, anu kbe nma fee.’ Ykyas fyi meto? Kbe takoh Ait a?”
JOH 8:23 Tna Yesus yawe, “Anu nma nbam te. Tna Jõ fi troh tama tbam uu. Anu fo nbam tabam refo. Menohe Jõ fi tbam tabam refo fee.
JOH 8:24 Riwai tawe, ‘Iro ro nno mhau fares tibyo meen nhai.’ Soh anu smot nwe Jõ fi ‘Ait ro Yroh Ybam Uu Yama’ to fee, kbe iro ro nno mhau fares tna meen nhai tu oh!”
JOH 8:25 Ana mtu kʼAit mawe, “Nyõ fi awya?” Yesus yawe, “Muhrin aro-aro Jõ tkyas betoo kʼanu oh, afo re anu nhar nwe Jõ fi awya. Menohe anu nri fee.
JOH 8:26 Thar tawe iro msya bo mkair ro anu nno to mawat. Menohe Jõ tesait kar tmit safo kʼanu fee. Bi Ait sait ybis Jõ tama. Tna Ait oh mi ykyas kʼJõ yawe bo bawya ro Jõ tama tkyas kʼanu. Tkyas bo weto aran sai. Tna bo ro Ait yawe to mabo tu oh.”
JOH 8:27 Ana wase bo Yesus ykyas Yaja Allah kʼana.
JOH 8:28 Feto to Yesus yawe, “Anu kbe tubat Jõ abyõ. Jõ fi 'Ait ro Yroh Yama Yfi Raa Sai'. Anu tubat Jõ abyõ tna fo anu nhar nwe Jõ fi awya. Ja tkyas bo kʼanu afo re anu nhar Jõ awya mefi. Tna kbe nhar nwe tesait kar tno bo aro fee. Menohe tkyas bo ro Taja ykyas kʼJõ to sai aran.
JOH 8:29 Ait ro ybis Jõ tama to yatam Jõ yoyo. Tna tno bo bawya ro Ait yhaf ksoh sai yoyo. Feto to kbe Ait sikba jõ akus to fee.”
JOH 8:30 Yesus ykyas bo reto tna raa mawat mari tna smot (percaya) Ait.
JOH 8:31 Yesus yawe kʼraa ro Yahudi ro smot Ait yawe, “Soh anu nri bokyas aJõ nbo matak nwe mabo oh to, anu fo kuber woJõ ro ati tu oh.
JOH 8:32 Kbe anu susit u fee. Kbe nhar nwe bo maja ro Allah to bo ro ati. Tna bohar reto kbe mno anu nros ntak tibyo. Bohar reto mno wa re kbe iro make anu matak u fee. Mno re anu nmo sryan boh u fee.”
JOH 8:33 Menohe ana mawe, “Amu fo kube ro Abraham. Tiwya amu nmo sryan ro raa mbis fee. Nyõ nkyas bawya meto ee!”
JOH 8:34 Tna Yesus yawe, “Nnaut: Tkyas bofret, tawe awya ro yno iro to yfi sryan boh. Iro mbo ait matak. Tna yako hawe sai yno iro.
JOH 8:35 Raa ro mamo sryan to, ja mhau tibyo mam amah ro bobot rait fee. Ait ynan fi raa ro amah mato rait reto fee. Menohe ku ro bobot retait yare wotur retait oh mi yhau ysya yaja tibyo.
JOH 8:36 Tna Bobot retait yawe Ku rAit retait oh mi yatak yno re anu nmo sryan u fee. Mabo oh: Ait yatak re yno wa bo mkair ro make anu matak.
JOH 8:37 Jõ thar tawe anu fo kube ro Abraham. Menohe anu hawe bo nri bokyas aJõ. Tibyo nwe nme Jõ.
JOH 8:38 Bo bawya ro Jõ tmat Taja yno oh mi tkyas kʼanu. Tna bo ro anu nno to, anu nri nja ranu ybis mfi feto ye.”
JOH 8:39 Ana mawe, “Abraham tait amu nja ramu!” Menohe Yesus yawe, “Soh anu fo kube ro Abraham wait to, kbe nno bo mnan fi bo ro Abraham tiwya yno ye.
JOH 8:40 Menohe anu nwe nme Jõ. Jõ fi raa ro tkyas bo ro ati kʼanu. Bo ro tkyas weto to, tari mbam kʼAllah. Tiwya Abraham yno bo ro mnan fi anu nno reto fee!
JOH 8:41 Anu nno bawya ro nja ranu ja yno.” Ana mawe, “Raa mwyah re mabe amu fee! Nja ramu Allah yesait aran!”
JOH 8:42 Yesus yawe, “Jõ fi tama tbam Allah. Ait oh mi ybis Jõ troh tama tabam refo. Ksoh aJõ tesait sai oh mi Jõ tama mefo fee. Soh Allah tait anu nja to, meto mi anu ksoh Jõ ye.
JOH 8:43 Anu fo ntai nri tna nhar bokyas aJõ fee. Bo bawya mno re anu nri bo ro tkyas to fee?
JOH 8:44 Kabes yabi (Iblis) tait anu nja ranu. Anu fo raa wait. Ja anu nri bo ro ait ykyas. Mbam tinyi rau Kabes Yabi tait ja yame raa. Ait tait raa ro sioh. Tna ykyas bo ro mabo aro fee. Bo mafa ro ja yno to, ykyas bo sioh. Raa ro ja mkyas bo sioh to, kabes yabi tait maja rana.
JOH 8:45 Anu ja nri bo sioh sai. Menohe Jõ tkyas bo ro mabo kʼanu. Tibyo anu nri Jõ fee, smot Jõ fee.
JOH 8:46 Anu weto, awya yasu ymat Jõ tno iro? Menohe soh Jõ tkyas bo ro mabo to, fyi re anu smot Jõ fee?
JOH 8:47 Awya ro yamo ku ro Allah rAit tait, yari bokyas rAit. Menohe anu fo ku ro Allah wAit fee. Tibyo anu nri bokyas rAit fee ye.”
JOH 8:48 Raa ro Yahudi mawe kʼYesus mawe, “Amu nnaut nwe nyõ fi nnan raa ro Samaria. Tna kabes mbo Nyõ!”
JOH 8:49 Yesus yawe, “Jõ fi kabes mbo fee. Jõ fi waa Taja. Tari bo ro Ait yawe. Menohe anu fo nri Jõ fee tna waa Jõ fee ye.
JOH 8:50 Bi Ait sait ksoh yawe raa bibi Jõ. Jõ tesait oh mi tomer tno bo afo re kbe raa bibi Jõ fee. Tna bi Ait retait oh mi Raa ro kbe yros susai tna beah srah raa.
JOH 8:51 Awya ro yari bokyas aJõ ybo matak to, meen yhai fee. Bokyas aJõ to bokyas ro mabo.”
JOH 8:52 Raa ro Yahudi mawe, “Mfo refo amu nhar nwe kabes mbo Nyõ tu oh! Tiwya Abraham yesait yhai oh, tna nabi na sor ro tiwya Allah ybis mama to, mhai beta ye. Menohe Nyõ nawe, ‘Awya yari bokyas aJõ meen yhai fee.’
JOH 8:53 Fyi, Nyõ fi nawe nase niwer nja ramu Abraham a? Ait yhai oh, tna nabi na sor mhai ye. Nyõ fi awya?”
JOH 8:54 Yesus yawe, “Soh Jõ bibi Jõ ai to, mafer marak. Menohe Jõ Taja oh mi bibi Jõ. Tna anu nwe Ait retait tait Allah ro anu smot.
JOH 8:55 Anu wase Ait. Menohe Jõ thar Ait. Mfi bo tawe Jõ wase Ait to, reto kbe Jõ raa ro sioh-nat tnan mfi anu fo ye! Jõ thar Ait tna bo ro Ait yawe to, tbo matak.
JOH 8:56 Hohos ranu, Abraham ksoh yinaut yawe kbe Jõ tama. Yhar yawe tama tna ait simaut.”
JOH 8:57 Tna raa ro Yahudi mawe, “Nyõ 50 tahun fefares! Tna re nawe Nyõ nmat Abraham oh a?”
JOH 8:58 Yesus yawe, “Abraham fnya mabe fefares to, Jõ fi ‘Raa ro thau yum boJõ oh.’”
JOH 8:59 Yawe feto tibyo raa Yahudi ro mros weto sor moo fraa mawe mai Yesus yajat. Menohe Ait ymyõt Ait wai, tna yamo sikba Samu ro Allah mato.
JOH 9:1 Yesus yamo tna ymat bi ro yasu mboh sait. Ait retait tii fnya mabe to, yasu mboh bait yum oh.
JOH 9:2 Tna kuber ro Yesus mtu kʼAit mawe, “Guru; fyi re bi refi fi, fnya mabe to yasu mboh feto? Ait yno iro fe mfe a? Yaja, yme mno iro a?”
JOH 9:3 Yesus yawe, “Ait yesait yno iro mi yasu mboh meto fee. Tna raa mabi wAit mno iro ro misti re yasu mboh meto fee ye. Ait yasu mboh afo re kbe raa mmat bo ro Allah yno tna mhar yatak rAit.”
JOH 9:4 Tna Yesus ykyas bofret kʼana yawe, “Baas fares fo, feto nma, anu bno bo rAit ro ybis Jõ. Kbe mti mama tna hawe sai to, raa aro mno bo fee.
JOH 9:5 Wore Jõ thau fares mam tabam refo to, Jõ fi kek ro mram tabam refo.”
JOH 9:6 Yesus ykyas mkak tna fo tfeh oot mam tabam. Ait hre tna ysom tabam reto tna mka mfi hrotat. Ait yoo tabam reto karu mam bi ait retait yasu.
JOH 9:7 Yawe, “Nasen namo nyon nasu mam aya masu ro Siloam.” ('Siloam' mkah mai ro Ibrani to mawe 'raa mbis'. ) Raa retait yamo yyon yasu mam aya reto tna hah yamo to, yasu mrok moof oh.
JOH 9:8 Raa mhar mawe ait tait raa ro yasu mboh tna ja hre yayoh bo kʼraa. Tna ana mmat ait yasu ymat bo yamo mam iso. Tibyo mtu kʼanya mawe, “Ait refi awya? Ait fi bi ro ja hre yayoh bo metait fe mfe a?”
JOH 9:9 Taro mawe, “Ait oh metait.” He taro mawe, “Mfe, raa retait yasu ynaif ynan bi retait sai.” Tna ait yesait yisboh kʼana yawe, “Aha, jõ oh mefi.”
JOH 9:10 Ana mtu kʼait mawe, “Nyõ nno fyi re nasu moof to?”
JOH 9:11 Ait yawe, “Raa sait ro yasom Yesus yoo tabam kbet yno mka, tna karu mam tasu aJõ. Tna ybis jõ yawe, ‘Namo nyon nasu mam Siloam.’ Tibyo tamo tyon tasu. Tna fo tmat bo!”
JOH 9:12 Ana mtu mawe, “Raa retait miya?” Ait yawe, “Jõ twase ye.”
JOH 9:13 Ana weto makah ait ro riwai yasu mboh retait mamo mo kʼraa ro Farisi.
JOH 9:14 Ti ro Yesus yoo tabam yisoh raa ro yasu mboh retait to, yno mam ayõ ro raa ntmoh (hari Sabat).
JOH 9:15 Feto to raa ro Farisi mtu sas kʼait refi ye mawe, “Fyi re Ait yisoh nyõ nasu moof?” Tna ait yawe, “Ait yoo tabam ro hrotat yse mam tasu ajõ. Tna ybis tamo tyon tasu, tna tasu ajõ maah.”
JOH 9:16 Raa ro Farisi weto taro mawe, “Raa ro yno bo msai refi fi raa ro Allah ybis fee. Soh Ait Allah ybis meto mi Ait yiwer ayõ ro raa ntmoh feto fee.” Menohe raa taro mawe, “Mfe, raa ro mno iro ja mno bo msai mnan fefo fee!” Tibyo raa ro Farisi masen santri kʼanya feto.
JOH 9:17 Tna ana mtu kʼait ro riwai yasu mboh tait u mawe, “Nyõ oh mi riwai Ait yisoh. Nyõ nnaut nawe fyi? Ait tait awya metait?” Menohe ait yawe, “Raa retait tait nabi ro Allah ybis yama ykyas bo wAit.”
JOH 9:18 Menohe raa ro Yahudi weto mtu sioh mawe tiwya ait retait yasu mboh fee, tna mfo yasu mrok moof to fee. Tibyo ana mtu raa mabi wait mama.
JOH 9:19 Tna mtu sas kʼana mbewok mawe, “Ait refi ku ranu bewok fe mfe a? Tna ati ro yme mabe to ait yasu mboh fe mfe a? Fyi oh mi mfo ait yasu ymat bo fo?”
JOH 9:20 Yaja ysya yme mawe, “Ait refi ku ramu. Tna amu nhar nwe ati ro yme mabe ait to yasu mboh yum bait oh.
JOH 9:21 Menohe amu wase fyi re ait yasu moof. Tna amu wase awya ro yisoh ait yasu ye. Sik ma ntu kʼait yesait sai. Ait yabi oh tna yesait ykyas bo kʼanu.”
JOH 9:22 Ana mbewok mhar mawe taa raa ro Farisi mawe, “Awya ro smot Yesus yawe, ‘Ait tait Mesias’ to, kbe amu nikyak ait, nwe ait skabuk su ysya raa ro Yahudi u fee.” Tibyo yaja yme waa raa manes ro Yahudi.
JOH 9:23 Reto oh mi ana mbewok mawe, “Ait yabi oh. Feto to ntu kʼait yesait sai.”
JOH 9:24 Tna raa ro Farisi mtu kʼait ro riwai yasu mboh refi mawe yama yo kʼana u. Yama tna ana mawe, “Amu nhar nwe Ait ro yasom Yesus retait tait Raa ro ja yno iro. Ait ytai yno re raa masu maah to fee! Nkyas nawe bi Allah yesait oh mi yisoh nyõ re nasu maah. Afo kbe raa bibi Allah.”
JOH 9:25 Tna ait retait yawe, “Ait retait raa ro ja yno iro fe mfe a? Jõ wase ye! Ro jõ thar to tiwya jõ tasu mboh. Tna mfo refo jõ tmat bo oh.”
JOH 9:26 Tna raa weto mtu kʼait u mawe, “Ait yno bawya kʼnyõ re nmat bo fo?”
JOH 9:27 Ait retait yawe, “Riwai jõ tkyas kʼanu oh to, he anu nri fee. Fyi re anu nwe nri u? Anu nwe kbe nmo nkro Ait ye a?”
JOH 9:28 Ana mari bo ait yawe reto tna mamus ait mawe, “Nyõ fi raa ro namo kuber Raa retait! Amu fo raa ro nri bo ro Musa ykom!
JOH 9:29 Amu nhar nwe Allah ykyas bo kʼMusa oh. He amu wase Raa retait ybam tiyo meto!”
JOH 9:30 Tna ait ro tii yasu mboh retait yasah yawe, “Ait yisoh jõ tasu mrok moof, tna anu wase nwe Ait retait ybam tiyo to fyi?
JOH 9:31 Anu bhar bwe soh raa ja mno iro to, Allah kbe yari boyoh raa weto fee. Menohe bi Ait yari boyoh kʼraa ro ja mhau mrat msya Ait tna mno bo ro Ait yawe.
JOH 9:32 Maban tiwya tinyi mamo snok mam mfo wefo to, raa sait bo yisoh raa ro masu mboh maban mam wore fnya mabe to fee.
JOH 9:33 Soh Ait retait raa ro Allah ybis to fee, meto mi Ait ytai yno bo feto fee.”
JOH 9:34 Tna ana mawe kʼait mawe, “Nbam ti ro nme mabe nyõ to nyo nno iro oh. Tna nyõ fi nawe nama watum bo kʼamu a?” Tna ana mikyak ait mawe ait skabuk su ysya raa ro Yahudi u fee.
JOH 9:35 Yesus yari he ana mikyak ait ro yasu maah retait, tibyo yamo saso. Ykai tna ytu kʼait yawe, “Nyõ smot 'Ait ro Yroh Yama Yfi Raa Sai' tait fe mfe a?”
JOH 9:36 Bi ait ro yasu maah retait yawe, “Awya metait? Nawe kʼjõ ye re kbe jõ smot Ait ye.”
JOH 9:37 Tna Yesus yawe, “Ait nyõ nmat oh. Ait ysya nyõ mbewok nkyas bo ngkri to, Ait oh metait.”
JOH 9:38 Raa retait yawe, “Tuhan; jõ smot Nyõ.” Tna ait yaka mte ybaut Ait.
JOH 9:39 Yesus yawe, “Jõ tamaʼt tabam refo mkah bo ttu srah raa tari. Tama afo re tno raa ro masu mboh to mmat bo. Tna ro masu mmat bo to, tno ana masu mti.”
JOH 9:40 Raa ro Farisi mabo baro mros mam weto ye tna mari bo ro Yesus yawe reto. Tna ana mtu kʼYesus mawe, “Fyi? Nyõ nawe amu fo raa ro masu mboh ye a?”
JOH 9:41 Yesus yawe, “Mfi bo anu nsu mboh meto mi safo makan mbtek mai kʼanu fee. Menohe anu nwe anu raa ro nmat bo. Feto to iro ro anu nno to mhau tu.”
JOH 10:1 Yesus yawe, “Nnaut: Domba mana mawat mhau mam ana (kandang). Tna ana reto masa rau sau aran sai. Raa sait ja yhau kmot masa reto. Ait ywan tok. Soh raa ro ja ysia domba wait yama to, ait ro kmot masa reto yawe raa refi yama twok. Menohe mfi bo raa sait yama wai, ait twok mam masa rau to fee, ait yaut ana reto yroh ti mato to. Anu bhar bwe ait retait raa ro ysyõf domba.
JOH 10:3 Ait ro ysia domba yama tna raa ro ja kmot ana masa reto yhar ait yawe, ‘Ae, nama ntruk.’ Tna ait ro ysia domba ytu domba wait weto. Ytu domba weto masom wana tna domba weto kro ait mamo. Domba wait weto mari ait ymai tna fo kro ait mamo.
JOH 10:4 Ait yakah domba wait weto beta frok. Tna ait yamo. Yamo yatim tna domba weto mhar ait ymai tibyo nkro.
JOH 10:5 Menohe soh raa srim sait yama ytu domba weto mama to; kbe domba weto hawe kro ait ye. Ana wase mai rait reto. Tibyo waa tna msam.”
JOH 10:6 Yesus fret bo reto kʼana menohe ana wase bo maja rau ro Ait ykyas reto.
JOH 10:7 Feto to Yesus yawe kʼana yawe, “Jõ fi tamo masa ro domba twok.
JOH 10:8 Tiwya raa taro mama tna ksoh mawe raa kro ana. Ana sioh mawe soh raa kro ana to, kbe riof kʼana. He mfe. Raa ro tiwya mama, ti ro Jõ tarak fares to, ana beta raa ro msyõf bo sai. Tna domba mari ana mmai fee ye.
JOH 10:9 Jõ fi tamo masa. Awya ro twok mam masa reto kbe ykai riof ro mase. Awya ro yama yo kʼJõ to, ait ynan fi domba ro ja mamo me mkai bosafom ro moof tna mabat.
JOH 10:10 Raa taro to mnan fi raa ro mama mawe msyõf domba weto, tna mame domba weto, tna sikowah domba weto. Menohe Jõ tama afo re riof kʼana. Tama re kbe ana mhau bo mninon. Bokyas ro ati oh mefo.”
JOH 10:11 Tna Yesus yawe, “Jõ fi Raa ro tsia domba woJõ kaket. Ait ro ja ysia domba wait kaket to, soh ymat mtah rbyoh mama mafit domba wait re mabo to, ait waa fee. Ait yno wa re mtah reto mafit domba wait fee. Ysan yetsu rait mkah riof ro domba wait. Menohe ait ro kmot domba raa to, soh ait retait ymat mtah rbyoh mama mafit domba weto to, kbe ysam yamo sikba domba weto. Tibyo mtah mafit domba taro mabo, tna taro mamo brir-brar.
JOH 10:13 Raa retait saso boren ro kbe raa maren sai. Au oh mi ait kmot domba weto. Ait ye ynaut domba weto fee. Ait yisoh ymat domba weto kaket fee. Tibyo ysam sikba domba weto sai.
JOH 10:14 Menohe Jõ fi raa ro kmot domba woJõ kaket. Jõ thar domba woJõ sau-sau, tna ana mhar Jõ ye.
JOH 10:15 Taja yhar Jõ tna Jõ thar Ait mfi feto ye. Tna Jõ bitsre Jõ tetsu aJõ raa mame afo kbe riof raa ro mnan fi domba woJõ.
JOH 10:16 Jõ kmot domba woJõ roto taro ye. Ana weto ja mberur su msya domba woJõ wefo fo fefares. Mhau hayah fares. Kbe takah domba weto nma. Kbe ana mari Jõ tmai tna kro Jõ ye. Meen tno re domba woJõ beta mberur su mamo domba mkbair sau. Tna kbe Jõ tesait aran kmot ana beta.
JOH 10:17 Jõ tsan tetsu aJõ mkah riof raa woJõ weto beta. Reto oh mi Taja yhafri Jõ. Meen tsan tetsu aJõ raa mame mkah domba woJõ tna kbe trok tasen.
JOH 10:18 Raa sait bo ytak tetsu aJõ kʼJõ fee. Jõ ksoh aJõ sai oh too tsan. Taja yno Jõ tatak re too tafos aJõ tsan tna tatak re tesait trok tasen ye.”
JOH 10:19 Raa ro Yahudi mari bokyas ro Yesus reto tibyo mhaf sau fee. Ana santri anya u.
JOH 10:20 Ana taro mawat mawe, “Ait refi fi kabes mbo tna yker meto! Nri Ait ma!”
JOH 10:21 Menohe ana taro mawe, “Raa ro kabes mbo to ja mkyas bo feto fee! Ait kabes mbo fee. Raa ro kabes mbo to, ja ana misoh raa ro masu mboh to mno re masu mrok maah mfi feto fee.”
JOH 10:22 Mam soo ro arin ngkanam tna raa mfos to raa ro Yahudi ja makyõ korat sau ro masom 'PentahbisanBait Allah'. Tna ti reto to Yesus yamoʼt Yerusalem.
JOH 10:23 Tna Yesus yamo-ama bait Samu ro Allah mam yuk ro masom 'Serambi Salomo'.
JOH 10:24 Raa ro Yahudi mawat mama mur mtan Yesus. Tna mtu kʼAit mawe, “Snyi ja naut tna Nyõ nawe abyõ afo re amu nhar nwe Nyõ fi Mesias fe mfe a?”
JOH 10:25 Yesus yawe, “Riwai Jõ tawe oh kʼanu to. Menohe anu nhar nwe Jõ fi Mesias fefares. Bo msai ro Jõ tno sor to Taja ybis, tibyo tno. Tno mkah Ait yatak rAit afo re anu nmat tna nhar nwe Jõ fi awya.
JOH 10:26 Menohe anu wefo fo domba woJõ fee. Tibyo anu smot Jõ fee.
JOH 10:27 Domba woJõ to ja mhar Jõ tmai. Tna Jõ thar ana. Tna ana kro Jõ.
JOH 10:28 Jõ tno re ana meen mhau hame wajin. Meen ana mhai fee. Tna raa sait bo yatak ytak ana mam Jõ tatem bo fee saut.
JOH 10:29 Taja ro ysan ana kʼJõ retait tait yase ybo bombra beta. Tna raa aro matak re mtak ana mbam Ait yatem rAit fee.
JOH 10:30 Jõ tsya Taja to Raa sau aran sai: Amu mbewok fo nhaf, nkit msya srau sau aran.”
JOH 10:31 Yesus ykyas bo reto tna raa ro Yahudi moo fraa u mawe mai Yesus yajat.
JOH 10:32 Tna Yesus yawe, “Jõ Taja ybis yawe tno bo ro msai. Bo msai ro Jõ tno weto to mawat oh. Tna tno bo msai ro ryo afo tibyo anu nwe nme Jõ?”
JOH 10:33 Menohe ana mawe, “Bo ro nno fee. Nyõ fi raa tu sai menohe riwai nawe Nyõ nnan anya nsya Allah. Nyõ namus-amas Allah oh meto. Feto oh mi amu nwe nwah fraa nii Nyõ to.”
JOH 10:34 Tna Yesus yawe, “Menohe Watum ro Musa ja anu nri to mawe, ‘Tawe anu fo raa matak nfi “allah.”’
JOH 10:35 Anu bhar bwe Bokom ro Allah to mhau bau yum. Tiwya Allah ykyas bo reto kʼraa baro. Soh Allah yawe ana weto mfi ‘allah’ to,
JOH 10:36 tnaut tawe kbe Raa roto sait yfi ‘allah’ ye saah. Mabo oh: Allah ysok Raa sait tna yse Ait hayah. Ait yawe, ‘Ait tait Raa aJõ.’ Ait retait Allah ybis yroh yama tabam refo to. Tiwya Allah yawe feto. Tna Jõ tawe ‘Jõ fi Ku ro Allah yare.’ Fyi re anu nwe Jõ tamus-amas Allah oh meto?
JOH 10:37 Soh Jõ tno bo ro mnan anya msya bo ro Taja ja yno to fee, smot Jõ ma.
JOH 10:38 Bo ro tkyas sai mno re anu smot Jõ fee rauk. Menohe nmat bo ro tno. Jõ tno bo ro mnan Taja aJõ ja yno. Tno afo re anu smot Jõ. Jõ tno re kbe anu srau nwe Jõ Taja yhaf, srau rAit sau su ysya Jõ. Tna Jõ thaf, srau sau tsya Ait ye.”
JOH 10:39 Yawe bo reto tna ana tomer u mawe mfot Ait. Menohe Ait frok yamo sikba ana.
JOH 10:40 Tna fo Yesus hah yamo frit aya ro Yordan yamoʼt majoh ro tiwya Yohanes baptis raa wia. Tna yhau.
JOH 10:41 Tna raa msis mama mo kʼAit. Tna mawe, “Tiwya Yohanes yno bo msai aro fee. Menohe ykyas Raa refi. Tna bo ro yawe to mabo mnan bo ro tii ait ykyas.”
JOH 10:42 Tibyo raa msis ro siret mam beto smot Yesus.
JOH 11:1 Raa sait yasom Lazarus yhau mam remo ro Betania. Yhau ysya yano na Maria msya Marta. (Yano Maria refo oh mi kbe moo minyak wangi karu Tuhan Yesus yaa rait tna mawah mana mawyan karu to.) Lazarus tait kiyam.
JOH 11:3 Kiyam tibyo yano mbewok reto tiim soo kʼYesus mawe, “Tuhan; amu nno ramu ro nyõ nhafri tait kiyam.”
JOH 11:4 Yesus yari feto tna yawe, “Kiyam reto to misti ait yhai fee. Bo mno feto re raa bibi Allah. Ait kiyam afo re kbe raa bibi Ku ro Allah yasom rAit ye.”
JOH 11:5 Yesus yhafri Maria msya mao Marta msya mano Lazarus.
JOH 11:6 Yesus yari soo ro raa mawe Lazarus ait kiyam. Menohe Ait beroh yhau mam beto ti ewok naut.
JOH 11:7 Tna fo yawe kuber wAit yawe, “Nma hah bmoʼt Yudea.”
JOH 11:8 Ana mawe, “Guru; taa sai raa ro Yahudi mam beto mawe moo fraa mai Nyõ! Tna re mfo nawe nhah namoʼt beto u a?”
JOH 11:9 Yesus yawe, “Mbam rabu mamo snok hreha to, arin maah. Awya ro yamo ayõ ro maah to, kbe ait wasim fee. Kek ro mhau mam uu mno re tabam refo maah.
JOH 11:10 Menohe soh yamo mamur to, kek aro fee, kbe ait wasim.”
JOH 11:11 Tna Yesus yawe, “Bfoh ranu, Lazarus, yjin oh. Tna Jõ tamo tti ait yrok yasen.”
JOH 11:12 Menohe kuber ro Yesus mawe, “Tuhan; soh Lazarus yjin sai to, kbe kiyam marak.”
JOH 11:13 (Yesus yhar yawe Lazarus yhai oh. Riwai yawe 'yjin' to Ait fret bo sai. Menohe kuber wAit mnaut mawe ykyas yawe yjin mfi bo ja soo raa mno.)
JOH 11:14 Tibyo Yesus yawe kʼana abyõ yawe, “Lazarus yhai oh.
JOH 11:15 He Jõ tarak mam remo reto to, moof kʼanu. Soh anu nmat bo ro kbe tno to, kbe anu smot Jõ. Nma, anu bmo bmat ait.”
JOH 11:16 Tna Tomas, ro ja raa mtu yasom Didimus tait, yawe kuber roto yawe, “Nma bmo kro Ait tna soh raa mame Ait to, kbe anu bjat su bsya Ait rof!”
JOH 11:17 Ana mamo. Tna snok mam Betania to, tna raa mawe kʼYesus mawe Lazarus yhai tna raa mse mam isra mato yasno jiit oh.
JOH 11:18 Remo reto to kene mam Yerusalem. Nmo to kilo mara tuuf bo feto.
JOH 11:19 Tna raa ro Yahudi mawat mama mbam Yerusalem mawe hre mawia msya Lazarus yano mabo ewok reto.
JOH 11:20 Marta mari he Yesus yama. Tna au frok mamo mtar Ait mam iso. Tna Maria mhau mam amah.
JOH 11:21 Marta mamo mo kʼYesus tna mawe, “Tuhan; Nyõ nama mam befo fooh mi tano ajõ yhai fee.
JOH 11:22 Menohe jõ thar tawe bo bawya sai ro Nyõ nayoh kʼAllah to, kbe Ait yari.”
JOH 11:23 Yesus yawe, “Nano anyõ kbe yrok yasen.”
JOH 11:24 Marta mawe, “Thar tawe meen tabam haberek u tna raa ro mhai kbe mrok masen. Feto meen Lazarus yrok yasen.”
JOH 11:25 Yesus yawe, “Jõ oh mi Raa ro yno re raa mrok masen. Tna tno re meen ana mhau hame wajin. Raa ro smot Jõ kbe mhai to, menohe mhai tibyo fee.
JOH 11:26 Awya ro yhau smot Jõ to, kbe yhai fee. Nyõ nhar nwe bokyas aJõ refo bo mabo to, fe mfe a?”
JOH 11:27 Marta mawe, “Ae Tuhan. Jõ smot Nyõ. Jõ thar yum oh tawe Nyõ fi Mesias. Nyõ fi Ku ro Allah yare. Nyõ fi Raa ro tiwya raa mkyas mawe, ‘Meen Allah ybis Raa sait yroh yamaʼt tabam refo.’”
JOH 11:28 Marta mawe feto tna au hah mamoʼt amah. Tna samoh kʼmao Maria mawe, “Bi Guru yhau mam wono. Tna Ait ytu nyõ yawe namo.”
JOH 11:29 Maria mari feto tna masen fooh tna frok mamo mo kʼYesus.
JOH 11:30 Ti reto Yesus twok remo reto fefares. Ait yhau fares mam yuk ro Marta riwai mkai Ait.
JOH 11:31 Raa Yahudi ro hre mawia msya Maria mam amah to mmat he Maria masen tna frok fooh mamo. Ana mnaut mawe mamo mawia mam yuk ro isra wore raa mse Lazarus yetsu. Tibyo ana beta masen kro au.
JOH 11:32 Menohe Maria mamo mo kʼYesus. Mmat Ait, tna mjit mimna mam wore Ait yros. Tna mawe, “Tuhan; ti ro Lazarus yhai to, soh Nyõ nhau mam wefo mi, tano ajõ yhai fee.”
JOH 11:33 Yesus ymat Maria mawia feto tna ymat raa ro Yahudi mama msya au to mawia ye. Ymat tibyo Ait srau mham ye.
JOH 11:34 Yawe, “Anu nse ait mam woyõ?” Tna ana mawe, “Nama nmat.”
JOH 11:35 Tna Yesus yawia.
JOH 11:36 Raa ro Yahudi weto mmat he Yesus yawia tna mawe, “Ait yhafri Lazarus toni.”
JOH 11:37 Menohe taro mawe, “Ait yisoh raa ro masu mboh to masu maah. Fyi re Ait ymat Lazarus fee, tna yisoh kiyam rait yno wa re yhai fee?”
JOH 11:38 Yesus sraujin toni u. Tna yamoʼt isra reto. (Tiwya raa moo Lazarus mse mam isra mato, tna muut mkah fraa mabi sau.)
JOH 11:39 Yesus yawe, “Niyaban fraa reto!” Menohe Lazarus yano, Marta mawe kʼYesus mawe, “Nno ma! Ait yhau mam isra mato masno jiit oh. Ynis oh!”
JOH 11:40 Yesus yawe, “Tkyas kʼnyõ oh tawe, ‘Soh nyõ smot Jõ to, kbe nmat bo yase ro Allah rAit.’”
JOH 11:41 Tna ana miyaban fraa reto tna Yesus yasu heyut ayoh yawe, “Taja, Nyõ ja nari bo ro Jõ tkyas. Tibyo tayoh asik mase.
JOH 11:42 Thar tawe Nyõ nari bo ro tkyas yoyo. Menohe tkyas bo refo afo re raa ro mhau mam wefo mari tna smot Jõ. Afo re ana mhar mawe Nyõ oh mi Raa ro nbis Jõ fo.”
JOH 11:43 Yesus yawe feto, tna ytu mkah ymai fari yawe, “Lazarus, frok nama!”
JOH 11:44 Tibyo Lazarus yari tna frok yama. Ait frok menohe hawee ro taa raa moo sro yetsu to make ait matak fares. Tna hawee sau sro yasu ye. Tna Yesus yawe kʼraa ro mros mam weto yawe, “Skur hawee reto re mbitsre ait yamo.”
JOH 11:45 Raa Yahudi mama hre mawia msya Maria tna ana masu mmat bo msai ro Yesus yno reto. Tibyo ana mawat smot Yesus.
JOH 11:46 Menohe ana taro mamo mo kʼraa ro Farisi tna mkyas bo ro Yesus yno reto.
JOH 11:47 Tibyo raa ro Farisi msya imam manes mtu raa manes taro ro ja mtu safo raa ro Yahudi to beta mama. Mama hre siret su tna ana mtu kʼanya mawe, “Anu bno fyi? Raa refi yno bo msai mawat!
JOH 11:48 Soh anu bno bo aro fee, kbe raa beta smot Ait mawe Ait fi Mesias! Tna tis rau to, raa pemerintah ro Roma kbe mama soyak yuk refo. Yuk refo tiwya Allah ysan kʼanu, raa mana ro Yahudi. Mfo refo pemerintah ro Roma mbo anu, menohe mbis mawe bo ro agama ranu to, besait bno tna bbis fares. Anu waa kbe Raa refi mno raa mrok mnin-nin. Tna fo pemerintah mama mbo anu matak. Tna mawe besait bbo raa wanu u fee ye.”
JOH 11:49 Raa weto sait yasom Kayafas. Tahun reto to, ait retait yamo imam agama Yahudi ro yase. Tna ait yawe, “Anu nhar bo aro fee!
JOH 11:50 Rau ro moof to, raa sait yhai sai. Soh mfe, kbe raa mana ranu ro Yahudi majat beta.”
JOH 11:51 Kayafas yawe feto menohe bokyas reto mbam ait yesait fee. (Tahun reto ait oh mi yamo imam ro yase. Feto tibyo Allah oh mi ybis ait ykyas bo reto ynan fi nabi ro ykyas bokyas ro Allah.) Kayafas ykyas feto tna bonaut rait yesait yawe riof kʼraa mana ro Yahudi ⌞mam tabam refo. Menohe bo maja ro Allah ynaut yawe to: Yesus kbe yajat siwyan iso re raa mkai riof mase ro hame wajin.⌟
JOH 11:52 Yajat afo re yno bo moof kʼanu ro Yahudi kar fee. Kbe yajat afo re yno bo ro moof ku ro Allah makus mbrir-brar sor mam tabam refo beta ye. Mfo refo ana mhau ha-hayah. Menohe kbe mhau su tna mamo mhaf srau sau su ye.
JOH 11:53 Maban ayõ reto raa ro Yahudi saim mawe mame Yesus yajat.
JOH 11:54 Feto to Yesus sikba Yudea. Yawe yamoʼt wore raa masu makin mmat Ait fee. Tibyo yamoʼt remo sau ro masom Efraim. Efraim to mhau kene wo tabam ro riamo. Tna ysya kuber wAit mamo mhau mam weto.
JOH 11:55 Korat ro Paskah kene oh. Tibyo raa ro Yahudi mawat mbam remo aro sor mamoʼt Yerusalem. Mamoʼt Yerusalem mawe misoh ana siwyan mamyot bo mafa raa ro agama Yahudi ja mno ati ro makyõ korat ro Paskah fefares.
JOH 11:56 Raa mawat mamoʼt Yerusalem tna mamoʼt Samu ro Allah. Ana saso Yesus he mkai fee. Tibyo mros mam Samu ro Allah mkyas kʼanya mawe, “Anu nnaut nwe kbe Yesus yamaʼt korat refo fe mfe a?”
JOH 11:57 Taa imam manes msya raa ro Farisi msi bo kʼraa mawe, “Awya ro yhar yuk ro Yesus yhau mam woyõ to, kbe raa retait yama yawe kʼanu.” Mbis feto re kbe ana mamo mfot Ait.
JOH 12:1 Ti ntamam naut tna Korat ro Paskah. Tna Yesus yamoʼt Betania, remo ro Lazarus. Lazarus tait raa ro tiwya yhai tna Yesus yno yrok yasen.
JOH 12:2 Yesus yama tibyo raa siwyan bo sohmaam. Tna Lazarus, Yesus msya raa taro hre su tna Marta masyõ bo sohmaam reto.
JOH 12:3 Tna Maria moo minyak wangi ro mabyoh maut. Kusia reto liter hariyah bo. Moo minyak wangi reto mtu mam Yesus yaa. Tna ngkaru mkah mana mawyan rau. Minyak reto sawer fiyau mam amah mato reto beta.
JOH 12:4 Yudas Iskariot tait, kuber ro Yesus sait. (Ait oh mi ro kbe hren serek Yesus.) Ymat bo ro Maria mno tna hafrah yawe,
JOH 12:5 “Nno bawya meto ee? Fyi re minyak reto sikowah sai a? Rau ro moof to, nasim kʼraa tna noo mabyoh rau 300 dinar. Tna mabyoh ro mase reto kbe raa msan kʼraa kinyah ro mse bo fee.”
JOH 12:6 Yudas ymat raa ro kinyah fee. Ait tait raa ro ybo pitis wana beta. Ait yasu mase ja ysyõf pitis wana baro. Au oh mi yawe feto.
JOH 12:7 Menohe Yesus yawe, “Bhah au ma! Mno feto re mnaut ti ro kbe raa sama hai aJõ.
JOH 12:8 Raa kinyah to, ja mhau su msya anu yoyo. Menohe Jõ fo kbe thau tsya anu yoyo fee.”
JOH 12:9 Raa ro Yahudi mawat mari he Yesus yhau mam Betania. Tna ana masen mamoʼt beto. Mamo mawe mmat Yesus yesait ye, tna mamo mawe mmat Lazarus ro Yesus yno yrok yasen to ye.
JOH 12:10 Feto tibyo imam manes ro agama Yahudi saim bo mawe mame Lazarus ye.
JOH 12:11 Mawe ait yaam tna bo reto misti re raa ro agama Yahudi mawat mawe kro Yesus tna smot Ait tna sikba bo ro ana mkyas.
JOH 12:12 Korat ro Paskah kene oh. Tibyo raa ro Yahudi mawat mbam remo aro sor mamaʼt Yerusalem oh. Yesus sohmaam bo ysya Lazarus tna rabu ti fo yawe yamoʼt Yerusalem. Raa mawat mari he Yesus yamaʼt Yerusalem. Yama fares mam iso
JOH 12:13 tna ana mama mtar Ait. Raa miji ara palem mata tna mbo mamo sikoyõ mtar Yesus mawe, “Hosana! Ait yase toni! Tuhan ybis Ait yama! Ait yamo Raja tna ybo raa ro Israel!”
JOH 12:14 Yesus tru keledai ro maku teta tna sau tna yaut hre abyõ. Bo reto yno mnan Bokom ro Allah mawe:
JOH 12:15 “Anu raa ro Yerusalem, ro mhau mam atu ro Sion; waa ma. Nmat, Raja ro ybo anu tait yama yo kʼanu. Ait yaut keledai ro tna sau yama.”
JOH 12:16 Ti reto kuber ro Yesus wAit mnaut bokom far-far reto fee. Ana srau bombra weto fefares. Menohe kbe Yesus yrok yasen tna fo ana mrok mnaut bo reto tiwya raa mkom oh mam Bokom ro Allah. Tna ana mrok mnaut mawe bo ro raa tiwya mno weto, ana mno kʼYesus mnan si Bokom reto.
JOH 12:17 Ti weto to, raa ro mhau mam Yerusalem to, ana mawat tiwya mmat Yesus yno Lazarus yrok yasen tna frok ybam isra mato reto. Tna ana weto mkyas bo reto renti.
JOH 12:18 Tibyo raa mawat mhar mawe Yesus yno bo msai reto. Feto tibyo ati ro Ait yamaʼt Yerusalem reto to, raa mawat mamo mtar Ait.
JOH 12:19 Raa ro Farisi mmat he raa msis-sas mamo mo kʼAit tibyo mawe kʼanya mawe, “Raa arin aso beta mamo kro Yesus, tna anu bno bo aro u fee!”
JOH 12:20 Mam korat ro Paskah to, raa mawat mamo mbaut Allah mam Yerusalem. Ana ro mama makyõ korat reto to, ana baro raa ro Yunani ye.
JOH 12:21 Ana weto mamo mo kʼYesus kuber wAit sait yasom Filipus. (Filipus tait remo rait Betsaida mam provinsi ro Galilea.) Mamo mo kʼFilipus tna mawe, “Amu nwe ksoh nmat Yesus.”
JOH 12:22 Tna Filipus yamo yawe bo reto kʼAndreas. Tna ana mbewok mamo mawe kʼYesus.
JOH 12:23 Tna Yesus yawe, “Jõ fi 'Ait ro Yroh Yama Yfi Raa Sai'. Ayõ kene wo Jõ thai. Kbe bo mai kʼJõ tna raa mmat Jõ tase aJõ.
JOH 12:24 Nnaut: Tkyas gandum makan kʼanu tawe, ‘Ja gandum makan krioh mbam kayoh rau tna mbtek mai tabam. Tna mbrom-brom mhai. Tna fo kmoh frok. Tna mo maut. Tis rau to make. Make makan sarer. Soh gandum makan reto mbrom-brom mam tabam fee, kbe mhau makan sau yum. Soh mhai fee kbe make fee.’
JOH 12:25 Awya ro ksoh yhau mam tabam refo toni to, kbe ykai riof ro hame fee. Menohe awya ro yako yawe yhau mam tabam refo kait fee, meen ait retait yhau hame wajin.
JOH 12:26 Awya ro yawe yno bo woJõ to, yako hawe sai yama kro Jõ. Wore wo thau to, kbe sryan aJõ yhau mam beto ye. Kbe Taja ymat sryan aJõ retait yawe ait yno bo ro moof.”
JOH 12:27 Tna Yesus yawe, “Mfo refo to tnaut yyi toni. Ayõ refo mama tna tkyas tawe bawya? Tayoh Taja tawe riof kʼJõ fe mfe a? Mfe. Bitsre bo ro samyoh refo mai kʼJõ. Jõ tsan tafos aJõ oh mi tama mam tabam refo to!
JOH 12:28 Tawe, ‘Taja bo ro tno refo, nno re raa mmat tibyo bibi Nyõ nasom aNyõ.’” Tna Allah ybam sawro rAit ykyas yawe, “Tno oh. Tna kbe tno u.”
JOH 12:29 Raa ro mros mam weto to mawat. Ana mari mai reto tna taro mawe, “Barmabyõ mji!” Menohe taro mawe, “Mfe, malaikat sau mkyas bo kʼAit!”
JOH 12:30 Yesus yawe, “Mai reto anu nri ye a? Fyi re Allah ykyas kʼJõ feto? Yno afo re anu nri mai rAit ye.
JOH 12:31 Ayõ rau snok oh. Allah kbe ytu srah raa ro tabam refo. Yno tibyo kabes yabi (Iblis) ro ja ybo raa ro tabam refo to, Allah yikyak ait yamo.
JOH 12:32 Menohe kbe raa tubat Jõ abyõ tna tajat. Feto kbe tkuk raa beta mama mo kʼJõ.”
JOH 12:33 Yesus yawe feto afo re raa mhar mawe kbe raa mame yajat mam ara warok.
JOH 12:34 Raa mawat mros mari bo ro Yesus ykyas. Ana mari bo ro yawe reto tna mawe, “Watum ro Musa mkyas mawe, ‘Mesias kbe yhau hame wajin.’ Fyi re Nyõ nawe, 'Ait ro Yroh Yama Yfi Raa Sai' tait, kbe raa mame yajat? 'Ait ro Yroh Yama Yfi Raa Sai' tait bi awya metait?”
JOH 12:35 Yesus yawe, “Kek reto mhau su msya anu waor sai. Arin ro maah fo, nmat sas iso ro anu nmo. Kbe arin ro mti mama. Kbe nmo fyi-fya? Awya ro yamo mam amur wase iso ro ait yamo.
JOH 12:36 Smot Kek reto wore mhau msya anu fares to. Smot Kek reto afo re kbe nhau mam arin ro maah.” Yesus ykyas bo reto mkak tna sikba yuk reto sesa Ait.
JOH 12:37 Yesus yno bo msai mawat ro merif Allah yatak rAit. Yno re kbe raa ro Yahudi mmat. Menohe ana smot Ait fee.
JOH 12:38 Bo reto mamo mnan si bo ro tiwya Allah ybis nabi Yesaya ykyas yawe: “Tuhan; awya yari bokyas ramu tna yfot yse kʼait? Awya ymat yatak aNyõ?”
JOH 12:39 Ana mari watum aNyõ, menohe ana moo mse kʼana fee. Feto to nabi Yesaya ykyas u yawe:
JOH 12:40 “Allah yno ana masu mboh afo re mmat bo ma. Tna yno makit wana mbin afo re ana mnaut bo kaket ma. Mfi bo ana hah me mama mo kʼJõ maami tisoh ana.”
JOH 12:41 Tiwya tinyi Yesaya yhar Yesus yase rAit. Feto oh mi ykyas Ait feto.
JOH 12:42 Feto sai, menohe raa mawat smot Ait tna msya raa manes ro Yahudi taro smot Ait ye. Menohe ana waa raa ro Farisi kbe mikyak ana. Waa kbe mawe ana skabuk su msya raa ro Yahudi mam samu watum rana u fee. Tibyo mawe abyõ fee.
JOH 12:43 Ana weto hasu bo raa bibi ana sai, menohe ana mrok mawe Allah bibi ana to bo ati fee.
JOH 12:44 Tna Yesus yawe, “Awya ro smot Jõ to, ait smot Jõ tesait sai meto fee. Ait smot bi Ait ro ybis Jõ ye oh meto.
JOH 12:45 Awya ro ymat Jõ to, ymat bi Ait ro ybis Jõ ye.
JOH 12:46 Jõ tamaʼt tabam refo tnan kek. Tama afo re raa beta ro smot Jõ to, kbe mamo mam arin ro mamur u fee.
JOH 12:47 Raa taro mari bokyas aJõ menohe mbo mno fee. Jõ too safo mana tmit kʼana weto to fee. Tama tabam refo mkah bo tmit safo kʼraa to fee. Tama tno riof kʼraa.
JOH 12:48 Raa taro to mikyak Jõ tna mse bokyas aJõ mam mhaf mato rana to fee. Ati ro tabam refo haberek u to, kbe awya yoo safo mana ymit kʼana? Raa fee: Meen bokyas ro Jõ tkyas oh to, mesait mmit safo mana kʼana weto. Tesait kar tkyas bo aro fee. Menohe tkyas bo ro Taja ykyas kʼJõ to sai. Tna Jõ betoo bo bawya ro Ait yawe Jõ betoo kʼanu. Tibyo mam ati ro tabam refo haberek to bokyas aJõ mesait oh mi meen mmit safo mana kʼana weto.
JOH 12:50 Bi Ait ysi bo, tna raa ro mari mno bo ro Ait ysi to meen mhau hame wajin. Feto to bo bawya ro tkyas to, bo reto mnan si msya bo ro Taja ysi kʼJõ yawe Jõ tkyas.”
JOH 13:1 Yesus ysya kuber wAit makyõ korat ro Paskah fefares tna Ait yhar yawe kbe Ait sikba tabam refo tna yamo yo kʼYaja. Ayõ rau to kene oh. Tna Yesus yno bo sau afo re ana mhar mawe Ait yhafri raa wAit ro mhau mam tabam refo. Ait yhafri ana toni syok.
JOH 13:2 Mti oh tna Yesus ysya kuber wAit huwya mait boit. (Ti reto to, kabes yabi (Iblis) yisbyo bonaut rait kʼYudas Iskariot oh. Tna Yudas yari yawe kbe besruf Yesus. Yudas tait Simon yare.)
JOH 13:3 Yesus yhar yawe Yaja ysan tak rAit kʼAit oh re yase ybo bombra beta. Tna yhar yawe Allah oh mi ybis Ait yama, tna kbe hah ye yamo yo kʼAllah u.
JOH 13:4 Yhar bo reto tibyo yasen tna yrus ratan miyõ rait. Tna yoo hawee ftah sau ybin mam yaka.
JOH 13:5 Tna ywyan aya yama. Tna fo hre yyon kuber wAit maa maban. Tna moo hawee reto karu.
JOH 13:6 Yno tna snok Petrus yawe yyon yaa. Menohe Petrus yawe wa yawe, “Tuhan; fyi re Nyõ ro nase nawe nyon jõ taa a?”
JOH 13:7 Yesus yawe, “Bo ro Jõ tno refo, mfo wefo fo nyõ wase fares. Menohe kbe meen nyõ nhar.”
JOH 13:8 Petrus yawe, “Nyon taa ajõ ma!” Tna Yesus yawe, “Soh Jõ tyon nyõ naa to fee, nyõ namo kuber woJõ fee ye.”
JOH 13:9 Simon-Petrus yawe, “Soh feto, nyon taa mesait sai ma! Nyon tatem msya tana ye re toof!”
JOH 13:10 Yesus yawe, “Awya ro yate aya oh to yetsu rait moof oh. Ait yaa rait mesait aran kbe yyon u, tna yetsu beta moof oh. Anu sait aran yhaf moof fee, menohe anu beta taro nhaf moof oh.”
JOH 13:11 (Yesus yhar oh awya ro kbe hren serek Ait. Reto oh mi Ait yawe, “Anu beta noof fee.”)
JOH 13:12 Yesus yyon ana maa beta mkak. Tna fo yoo ratan rAit yyum u, tna yama hre u. Tna yawe, “Bo ro riwai tno to, anu nhar bo maja rau fe mfe fares a?
JOH 13:13 Ja anu ntu Jõ ‘bi Guru’ soh mfe nwe ‘Tuhan’. Mabo oh, anu ntu feto bo moof.
JOH 13:14 Jõ fi tamo Tuhan tna Guru ranu. Tna tyon anu naa to. Feto to tbis anu beta kbe nyon naa wanu kʼanya ye to.
JOH 13:15 Tno feto afo re anu nhar bo moof ro nno. Tawe anu ye nno bo moof kʼraa anya, mnan fi ja Jõ tno kʼanu to!
JOH 13:16 Nnaut: Sryan sait yase yiwer bobot rait fee. Tna raabis sait yase yiwer ait ro ybis fee ye.
JOH 13:17 Anu nhar bo ro tkyas kʼanu weto beta. Au oh mi nhaf sneh sai to. Nhau nfi sryan ro ja yno bo moof kʼraa anya. Soh anu nno bo feto to, kbe Allah yno bo ro moof kʼanu.”
JOH 13:18 Tna Yesus yawe, “Riwai tawe, ‘Anu nhaf moof oh.’ Tawe bo reto menohe tkyas anu beta fee. Jõ thar awya ro Jõ tsok. Bokom ro Allah far-far sau mkyas mawe, ‘Ait sait ro hre yait boit su ysya Jõ oh mi kbe yamo byoh kʼJõ.’ Mazmur 41:9 Tawe bokom reto mabo fo.
JOH 13:19 Jõ tkyas bo refo kʼanu wia. Tkyas kʼanu wia matim afo re wore wo anu nmat bo refo mabo to, kbe anu smot Jõ. Tna kbe nhar nwe Jõ fi Mesias.
JOH 13:20 Nnaut: Awya ro ymat tna hartu raa ro Jõ tbis to, ait ymat tna hartu Jõ oh meto. Tna awya ro ymat tna hartu Jõ to, ait ymat tna hartu bi Ait ro ybis Jõ ye oh meto.”
JOH 13:21 Yesus ykyas bo refo mkak tna fo Ait sraujin. Tna bo ro yhar oh Ait ykyas abyõ yawe, “Anu nkin wefo sait kbe besruf Jõ.”
JOH 13:22 Kuber wAit mmat sas anya. Mnaut mawe awya mi Yesus yawe metait.
JOH 13:23 Kuber ro Yesus sait, ro Ait yhafri retait hre mam yajoh ti jaro.
JOH 13:24 Tna Simon-Petrus skabuk yasu kʼait re ait ytu kʼYesus awya mi Yesus yawe metait.
JOH 13:25 Tna kuber retait susu kene kʼYesus tna ytu yawe, “Awya oh mi Nyõ nawe metait?”
JOH 13:26 Yesus yawe, “Nmat: Too roti ftah kebet. Tna Jõ beru mam aya refo tee kʼait.” Tna Yesus yoo roti ftah sau beru mam aya reto tna yee kʼYudas. (Yudas tait ku ro bi Simon yare.)
JOH 13:27 Yudas yoo roti reto si fo, kabes yabi (Iblis) twok mam yhaf mato. Tna Yesus yawe kʼait yawe, “Bo ro kbe nno reto to, nno fooh oh!”
JOH 13:28 (Ana taro ro hre mait boit to wase mawe fyi re Yesus ykyas feto kʼYudas.
JOH 13:29 Yudas oh mi raa ro ja ybo pitis wana. Tibyo ana taro mnaut mawe Yesus ybis Yudas yamo yoo boit aro re kbe ana mait mam korat reto. Soh mfe ana mnaut mawe Yesus ybis ait yoo pitis aro yamo yee kʼraa ro masu awe.)
JOH 13:30 Yudas yoo roti reto si fo, ait frok. Arin mamur oh.
JOH 13:31 Yudas yamo. Tna Yesus ykyas bo kbe yhai tna yrok yasen. Yawe, “Jõ fi 'Ait ro Yroh Yama Yfi Raa Sai'. Fooh sai tna kbe raa mmat Jõ tase aJõ. Kbe raa mmat bo ro Jõ tno tibyo ana mbaut Allah.
JOH 13:32 Bo ro tno mno re kbe raa mbaut Allah. Feto to fooh re Allah yerif Jõ tase aJõ ye.
JOH 13:33 Kukek woJõ sor: Ayõ baro firwas tna Jõ kbe thau kait tsya anu u fee. Anu kbe saso Jõ, menohe yuk ro Jõ tamo to anu ntai nma fee. Taa tkyas bo refo kʼraa manes ro Yahudi ye.
JOH 13:34 Tbis bo ro tna sau kʼanu nbo nno. Jõ tatmof anu. Tna tawe, ‘Fyi-fya rau to anu natmof anya kaket mfi Jõ tatmof anu to!’
JOH 13:35 Soh anu natmof anya kaket to, kbe raa mmat tna mhar mawe anu fo kuber woJõ.”
JOH 13:36 Simon-Petrus ytu yawe, “Tuhan; namo tiyo?” Yesus yawe, “Yuk ro Jõ tamo to, mfo refo nyõ kro fee. Kbe meen nyõ nama nrof.”
JOH 13:37 Petrus yawe, “Tuhan; fyi re jõ kro Nyõ mfo refo fee? Jõ waa fee. Jõ kbe raa mame tajat saah! Menohe tawe tsan tetsu ajõ afo re riof kʼNyõ.”
JOH 13:38 Tna Yesus yawe, “Petrus, nari: Nyõ nawe nsan netsu re riof kʼJõ to, nyõ nkyas niwer fe mfe a? Rere kook mara fefares to, kbe nyõ nwaar Jõ wia muhrin tuuf oh, nawe nyõ wase Jõ.”
JOH 14:1 Tna Yesus yawe kuber wAit yawe, “Waa ma. Sraujin ma. Smot Allah oh! Nsam wai kʼAit. Tna smot Jõ. Nsam wai kʼJõ ye.
JOH 14:2 Mam samu ro Taja yhau to yuk ro meen anu nhau to mawat. Jõ tamoʼt samu ro Taja re kbe siwyan yuk aro kʼanu kbe nma nhau. Soh samu reto marak to, Jõ tkyas kʼanu feto fee.
JOH 14:3 Tamo siwyan yuk ro anu kbe nhau to, tna hah tama tmen anu bmo. Tmen anu re kbe anu nhau nsya Jõ su mam beto.
JOH 14:4 Anu ye nhar iso ro mamoʼt yuk reto.”
JOH 14:5 Menohe Tomas yawe, “Tuhan; kbe Nyõ namo tiyo? Amu wase! Feto to amu wase iso reto ye!”
JOH 14:6 Tna Yesus yawe, “Jõ fi iso reto. Bokyas aJõ to mabo beta. Jõ oh mi tno re raa mhau hame wajin. Tna raa aro yamo yo kʼTaja mam iso roto to fee. Awya ro yawe yamo yo kʼTaja to, yako hawe sai kro Jõ.
JOH 14:7 Anu nhar Jõ oh to, anu nhar Taja aJõ ye. Mfo refo anu nhar Ait oh. Anu nmat Jõ mnan anya mfi anu nmat Ait ye oh.”
JOH 14:8 Filipus yawe, “Tuhan; nerif Naja kʼamu re kbe amu nmat Ait kaket rof tna fo kbe amu nnaut yyi u fee.”
JOH 14:9 Yesus yawe kʼFilipus yawe, “Thau tsya anu ooh oh, menohe nyõ wase Jõ fares a? Awya ro ymat Jõ to, ait retait ymat Taja ye oh meto. Fyi re nyõ nawe, ‘Nerif Naja kʼamu’?
JOH 14:10 Jõ fi srau sau, thaf sau tsya Taja. Tna Taja srau sau, yhaf sau su ysya Jõ ye. Menohe nyõ wase bo reto fares a? Bo ro tkyas kʼanu to, tkyas bonaut aJõ sai fee. Taja oh mi yatam Jõ yoyo tna Jõ tkyas bo ro Ait yawe kʼJõ. Ait yesait yno re tno bo wefo beta.
JOH 14:11 Smot Jõ. Tna nhar nawe bokyas aJõ refo mabo: ‘Jõ fi srau sau, thaf sau tsya Taja. Tna Taja srau sau, yhaf sau su ysya Jõ ye.’ Soh nyõ ntu sioh bokyas aJõ reto fares to, sik nmat bo msai ro Jõ tno mkah tak rAit to, afo re nyõ smot Jõ matak.
JOH 14:12 Nnaut: Awya ro smot Jõ to, kbe yno bombra mnan si bo ro Jõ tesait tno to ye. Tna tamo to kʼTaja. Tibyo kbe raa retait yno bo ro mase miwrek bo ro Jõ tno to ye.
JOH 14:13 Bo bawya sai ro anu nyoh to, kbe Jõ tno. Bo ro nyoh mkah tak ro Jõ tasom aJõ to, kbe tno yum. Tno afo re raa mbaut Taja.
JOH 14:14 Soh anu weto nyoh bo sau kʼJõ mkah tak ro tasom aJõ to, kbe Jõ tari tno yum.”
JOH 14:15 Tna Yesus yawe, “Soh anu nhafri Jõ to, kbe nbo nno bo ro Jõ tbis kʼanu to ye.
JOH 14:16 Jõ tamo tayoh Taja afo re ybis Har rAit mama mhau matam anu mamo snok hame wajin. Bo ro nno to Har mban anu yoyo. Har reto ja mkyas bo ro mabo.
JOH 14:17 Raa ro wase Allah to, ana mhar Har rAit fee. Srau Har rAit fee ye. Feto to raa weto to Har rAit mjin kʼana mhaf mato fee. Mako hawe sai ana mkai Har rAit fee. Menohe anu fo, Har ro Tuhan mhau mam nhaf mato wanu tna mhau matam anu yoyo. Feto to anu nhar Har rAit, srau Har rAit reto.
JOH 14:18 Jõ kbe sikba anu nhau nkus mnan fi kukraa to fee. Jõ kbe hah te to kʼanu u.
JOH 14:19 Mhau baro feto raa ro wase Allah kbe mmat Jõ u fee. Menohe anu fo kbe nmat Jõ u. Jõ fi raa ro tawyos. Tibyo anu meen nhau nawyos ye.
JOH 14:20 Ayõ reto to, kbe anu nhar nwe Jõ thaf sau su tsya Taja, tna anu nhaf sau nsya Jõ ye. Tna Jõ thaf sau tsya anu ye.
JOH 14:21 Awya ro ybo yno bo ro Jõ tbis kʼait to, ait retait oh mi yhafri Jõ ye. Ait ro yhafri Jõ tait kbe Taja yatmof ait retait ye. Tna Jõ kbe tatmof raa retait tna tno re ait yhar Jõ to ye.”
JOH 14:22 Tna Yudas roto sait, (Iskariot fee,) ytu kʼYesus yawe, “Tuhan; Nyõ nno re amu nesait nhar Nyõ sai. Tna fyi mkah raa ro tabam refo, ana ro wase Allah ye?”
JOH 14:23 Yesus yawe, “Awya ro yhafri Jõ kbe yari bo ro tbis kʼait ybo yno ye. Tna Taja kbe yhafri ait. Tna Jõ tsya Taja kbe nma nhau su nsya ait retait ye.
JOH 14:24 Awya ro yhafri Jõ fee kbe yari bo ro tbis kʼait fee, ybo yno fee ye. Bokyas ro tkyas refo fo bonaut aJõ tesait to fee. Tkyas bo ro Taja ykyas kʼJõ sai.”
JOH 14:25 Tna Yesus yawe, “Bo wefo beta Jõ tkyas kʼanu mam wore wo Jõ thau tsya anu fares fo.
JOH 14:26 Tna kbe Taja ybis Har rAit mama mo kʼanu. Har reto kbe mkyas watum kʼanu tna bo ro nno to, Au mban anu ye. Taja ybis Har mama shauk Jõ re kbe mno bo woJõ renti. Har reto kbe mamo guru ro betoo bombra beta kʼanu tna mno anu nnaut bombra ro Jõ tkyas kʼanu to beta.
JOH 14:27 Tawe tsan bo sau kʼanu. Jõ thau thaf tnok sai. Jõ tamo menohe tawe tno anu nhau nhaf tnok ye. Raa ro tabam refo mawe mno raa mhaf tnok ye. Menohe bo raa mno re mhaf wana tnok to hayah. Ana mhaf tnok mnan si Jõ thaf tnok to fee. Jõ tamo menohe tawe tno anu nhau nhaf tnok. Feto to waa ma. Sraujin toni ma.
JOH 14:28 Riwai tawe, ‘Jõ tamo tna kbe thah te tama to kʼanu u.’ Taja tait yase yiwer Jõ. Tna tamo to kʼAit. Feto to sraujin ma. Rau ro moof to, soh anu nhafri Jõ to, kbe anu simaut bo nhar nwe tamo to kʼAit.
JOH 14:29 Jõ tkyas bo refo kʼanu wia. Tkyas kʼanu wia matim afo re kbe nmat bo refo mabo to, kbe anu smot Jõ.
JOH 14:30 Ayõ rau kene oh, tna kabes yabi (Iblis) yama. Tibyo ayõ aro u fee re tkyas bo mawat tsya anu. Kabes retait yase ybo raa ro tabam refo. Menohe ait yase yiwer Jõ fee.
JOH 14:31 Menohe Jõ sayõ bo ro yno afo re raa ro tabam refo mhar mawe Jõ thafri Taja. Afo re ana mhar mawe bombra ro tno to tno mnan si bo ro Taja ybis Jõ.” Tna Yesus yawe, “Nma, bsen bmo.”
JOH 15:1 Kuber ro Yesus wAit msya Yesus mamo. Tna Yesus ykyas bo renti. Ait fret bo yawe, “Jõ fi anggur mara ro moof. Taja oh mi yamo Raa ro mkah tna misoh armato anggur reto.
JOH 15:2 Anggur mara fo, ngkre rau ro make fee, kbe Taja ysot. Tna kre rau ro make to, kbe yisoh srof re make mawat renti.
JOH 15:3 Anu noof mfi anggur mara ro raa misoh oh. Bokyas ro anu nri kʼJõ reto mno re anu wefo nhaf moof.
JOH 15:4 Nhau nrat nsya Jõ tna Jõ thau trat tsya anu ye. Ngkre sau mesait kar kbe make fee. Soh ngkre sau mhau mrat msya mara rau fee, kbe make fee. Tna soh anu nhau nhaf, srau sau nsya Jõ to fee, kbe nke fee ye.
JOH 15:5 Jõ fi tnan fi anggur mara sau. Tna anu to nnan fi ngkre rau. Awya ro yhau yhaf sau ysya Jõ to, tna soh Jõ thau thaf sau tsya ait ye, kbe ait retait yake mawat. Soh anu nhaf sau su nsya Jõ to fee, kbe anu ntai nno bo aro fee ye.
JOH 15:6 Awya ro yhau yhaf sau ysya Jõ fee, ait retait ynan fi ara ngkre sau ro raa msot tna beak makus. Ara ngkre reto mhau ngkaat. Tna kbe raa moo ngkre weto makrao mam wo sau mbeak tna mko mam tafoh tna mait.
JOH 15:7 Soh anu nhau nhaf sau su nsya Jõ tna soh bokyas aJõ anu nme mam nhaf wanu to ye, kbe anu nyoh bo bawya ro anu nksoh sai to tna kbe nkai.
JOH 15:8 Soh anu make mawat to, kbe raa mmat tna mhar mawe anu fo kuber woJõ oh meto. Soh anu nno bo wefo kbe raa mbaut Allah.”
JOH 15:9 Tna Yesus yawe, “Taja yhafri Jõ. Tna Jõ thafri anu wefo mfi feto ye. Nhau nhafri Jõ wer.
JOH 15:10 Jõ tari bo ro Taja ybis kʼJõ tbo tno. Tibyo Ait yhafri Jõ wer. Soh anu nri bo ro tbis kʼanu, nbo nno to, kbe Jõ thafri anu wer mfi feto ye.
JOH 15:11 Jõ simaut mase. Tna tkyas bo weto kʼanu afo re anu simaut mase ye. Jõ ksoh tawe anu simaut mase, mnan fi Jõ simaut mase; aro mabut fee.
JOH 15:12 Bo ro Jõ tbis kʼanu oh mefo: Nhafri anya kaket. Nhafri anya kaket mnan fi Jõ thafri anu wefo ye.
JOH 15:13 Soh raa sait yhafri yafoh wait to, ja ksoh yawe yno riof kʼana. Tna mfi bo raa mbis mawe raa retait ysan ait yetsu afo re riof kʼana to, kbe yawe, ‘Ae.’ Ait ro ysan yetsu rait feto to, kbe raa mmat tna mhar mawe ait retait yhafri yafoh wait toni miwer.
JOH 15:14 Soh anu nno bo bawya ro Jõ tbis kʼanu to, anu fo Jõ tafoh woJõ.
JOH 15:15 Sryan sor to, ja wase bo ro bobot rana yno. Menohe bo bawya ro Jõ tari kʼTaja to, tkyas kʼanu. Tibyo ati ro Jõ tkyas anu to, ttu anu sryan woJõ u fee. Anu fo Jõ tafoh woJõ.
JOH 15:16 Anu nsok Jõ to fee. Jõ oh mi tsok anu. Tna tbis anu nmo tna tufrok make: Make ro kbe mhau bau tibyo. Tna bo ro anu nyoh mkah tak ro Jõ tasom to, kbe Taja yoo yee kʼanu.
JOH 15:17 Bo ro tbis kʼanu oh mefo: Hafri anya kaket.”
JOH 15:18 Yesus yawe kuber wAit yawe, “Raa ro tabam refo knait anu. Menohe ktak ma. Nnaut nwe ana weto tiwya knait Jõ wia oh.
JOH 15:19 Raa ro tabam refo smot Jõ fee. Menohe anu fo nhaf sau nsya ana weto fee. Mfi bo anu nhaf sau su nsya ana weto meto mi kbe ana ksoh anu to! He mfe. Anu smot Jõ tibyo anu nhaf sau su nsya raa ro tabam refo fee. Jõ tsok anu afo re anu nmo raa woJõ. Anu fo raa ro tabam refo u fee. Au oh mi ana weto knait anu.
JOH 15:20 Nnaut bo ro riwai tkyas kʼanu tawe, ‘Sryan sait yase yiwer bobot rait fee.’ Jõ tnan fi bobot ranu. Tna ja raa sikowah Jõ. Feto kbe raa sikowah anu fo ye. Raa ro tabam refo ja mari bo ro Jõ tkyas kʼana to fee. Tna meen ana mari bo ro anu nkyas kʼana to ye fee.
JOH 15:21 Ana wase Allah ro ybis Jõ troh tamaʼt tabam refo. Tibyo raa weto kbe mno bo ro mkair mai kʼanu. Anu kro Jõ oh mi kbe ana mno bo ro mkair mai kʼanu to.
JOH 15:22 Mfi bo tama to kʼana fee tna tkyas bo kʼana fee, maami Allah ymit iro kʼana fee. Tna yawe ana masom iro wana to fee ye. He mfe, tama to kʼana oh. Tna ana mari bo ro Jõ tkyas kʼana fee. Tibyo kbe ana mesait masom iro wana yum. Kbe saak iro wana fee.
JOH 15:23 Awya ro knait Jõ to, Ait retait knait Taja aJõ ye.
JOH 15:24 Mfi bo tama to kʼana fee tna tno bo ro msai aro fee, maami Allah ymit iro yawe ana masom to fee. He mfe, ana mmat bo msai ro Jõ tno, bo ro ja raa mno fee. Tna ana beroh knait Jõ tsya Taja ye.
JOH 15:25 Bo mkair ro ana mno reto to mnan si bo ro tiwya Musa ykyas. Watum ro agama rana reto mkyas ana matim wia. Au oh mi: ‘Jõ tno bo mkair aro fee menohe raa knait Jõ sai.’ Mazmur 35:19, 69:5 Bo ro tiwya Allah yawe to mhau rau oh.”
JOH 15:26 Tna Yesus yawe, “Kbe tayoh kʼTaja re ybis Har rAit mama matam anu. Har reto kbe watum bo kʼanu. Tna bo ro nno to, kbe Har reto mban anu ye. Har reto mbam Allah mama to tna ja mkyas bo ro maja to sau sre fee. Mkyas bo ro mabo. Kbe mama tna mkyas Jõ tasom aJõ.
JOH 15:27 Tna anu fo tiwya kro Jõ bmo su maban tinyi wore wo Jõ tamo guru. Tibyo anu nkyas Jõ tasom aJõ kʼraa ye.”
JOH 16:1 Yesus yawe kuber wAit yawe, “Riwai tkyas tawe, ‘Kbe raa ro tabam refo knait anu.’ Bo weto beta Jõ tkyas kʼanu wia matim afo re kbe nmat bo wefo mabo to, kbe anu beroh smot Jõ fares. Kbe anu btek nwe fee.
JOH 16:2 Raa manes ro Yahudi kbe meen mikyak anu, mawe wa mawe anu skabuk su nsya raa ro Yahudi mam samu watum rana u fee. Tna kbe raa mame anu taro njat. Tna raa ro mame anu weto to mnaut mawe ana mno bo moof, mnaut mawe reto Allah yhaf mnan.
JOH 16:3 Ana weto wase Taja tna wase Jõ ye. Tibyo mno bo feto.
JOH 16:4 Kair weto mama mai kʼanu fe fares. Tiwya tinyi snok mfo refo thau tsya anu fares. Feto to tkyas bo mkair weto tna sai. Mfo refo Jõ tkyas bo wefo kʼanu wia matim. Tkyas wia re kbe meen, ati ro bo mkair weto mabo to, anu nnaut nwe bo weto tiwya tawe kʼanu oh.”
JOH 16:5 “Menohe ayõ baro firwas tna thah tamo to kʼAit ro tiwya ybis Jõ troh tama tabam refo. Menohe fyi re anu sait bo ytu kʼJõ fee yawe, ‘Nyõ namoʼt hayo meto?’
JOH 16:6 Jõ tkyas bo wefo tibyo anu sraujin.
JOH 16:7 Anu hawe bo Jõ sikba anu. Tamo tna kbe tbis Har ro Tuhan mama mo kʼanu. Har reto kbe mkyas watum kʼanu tna bo ro nno to, Au mban anu ye. Nnaut: Jõ tamo menohe tis rau to mafer moof kʼanu meto. Soh Jõ tamo fee; kbe Har reto mama mo kʼanu fee ye.
JOH 16:8 Meen Har ro Tuhan mama tna betoo bo kʼraa ro tabam refo. Mkyas kʼana ro hawe smot Jõ. Har rAit betoo iro ro ana ja mno to re mhar kaket. Tna Har rAit betoo bo ro Allah ksoh raa mno to ye. Raa ro tabam refo ja mnaut mawe ana mhar bo ro Allah ksoh ana mbo mno oh. He mfe. Kbe Har rAit betoo bo reto kʼana kaket. Tna raa ro tabam refo ja mros susai mtu sas safo raa to, mtu kaket fee ye. Kbe Har rAit betoo bo reto kʼana kaket ye.
JOH 16:9 Raa ro tabam refo smot tna msam wai kʼJõ fee. Au oh mi Har rAit kbe betoo iro wana kʼana kaket.
JOH 16:10 Tamo to kʼTaja to tna kbe anu nmat Jõ u fee. Feto to tesait tkyas bo kʼraa ro tabam refo u fee. Au oh mi Har ro Tuhan kbe betoo bo ro Allah ksoh raa mno to.
JOH 16:11 Kabes yabi (Iblis) ja ybo raa ro smot Jõ fee. Menohe Allah yoo safo mana ymit kʼait oh. Au oh mi kbe Har rAit mama betoo iso ro Allah kbe yros susai ytu safo raa to.
JOH 16:12 Tna Yesus yawe kuber wAit yawe, “Jõ tawe tkyas bo mawat kʼanu fares. Menohe tkyas bo weto beta fee. Bo ro samyoh meto tna mfo refo anu srau fefares.
JOH 16:13 Menohe kbe Har ro Tuhan mama. Tna Har reto mkyas bo sioh fee. Mkyas bo ro Allah kʼanu re anu nhar bombra beta ro ati. Har reto mesait mkyas bonaut rau fee. Menohe mkyas bo ro mari kʼAllah. Tna mkyas bo ro meen mama ye.
JOH 16:14 Har reto mari bo mbam kʼJõ tna mkyas bo reto kʼanu. Mno feto tna kbe raa mhar bo yase aJõ, tibyo bibi Jõ.
JOH 16:15 Bombra ro Taja wAit msya bohar rAit weto beta to bo woJõ ye. Feto oh mi tawe kʼanu tawe, ‘Har reto kbe mkyas bombra ro Au mari mbam kʼJõ to mkyas kʼanu.’”
JOH 16:16 Tna Yesus yawe, “Ayõ kbet baro sai tna kbe anu nmat Jõ u fee. Tna ayõ kbet sai naut tna anu nmat Jõ u.”
JOH 16:17 Tna kuber ro Yesus mtu kʼanya mawe, “Ykyas bawya meto ee? Ait yawe yamo yo kʼYaja tibyo ayõ kbet sai baro tna kbe bmat Ait u fee. Tna ayõ kbet sai naut tna anu bmat Ait u.
JOH 16:18 Bawya oh mi ykyas yawe, ‘Ayõ kbet sai?’ Anu wase bwe Ait ykyas bo bawya meto!”
JOH 16:19 Menohe Yesus yhar yawe ana mawe mtu bo kʼAit. Tibyo yawe, “Riwai tawe, ‘Ayõ kbet sai baro tna kbe nmat Jõ u fee. Tna ayõ kbet sai naut anu nmat Jõ u.’ Reto oh mi anu ntu kʼanya meto a?
JOH 16:20 Nnaut: Anu kbe sraujin tna nwia. Menohe raa ro tabam refo kbe simaut renti. Anu kbe nwia wia matim. Menohe kbe simaut mrof.
JOH 16:21 Mfi bo fai sau ro mhaf kene wo mabe to, ayõ ro ngkine mabe to kborham toni. Tna ku frok. Tna au sorni bo riwai kborham reto. Ku rau frok yama oh tibyo au simaut.
JOH 16:22 Mfo refo anu fo sraujin. Menohe kbe anu simaut mase mfi feto ye. Kbe hah tama fri anu u. Tna raa sait bo yatak yno re simaut ranu reto marak fee.
JOH 16:23 Nnaut: Ti reto to, anu ntu bo aro kʼJõ u fee. Wore weto to, bo bawya sai ro anu nyoh mkah tak ro Jõ tasom aJõ to, kbe Taja ysan kʼanu.
JOH 16:24 Mamo snok mam mfo refo to, anu nyoh bo aro mkah tak ro Jõ tasom fefares. Nyoh re kbe anu tru. Tna kbe simaut mase.”
JOH 16:25 Tna Yesus yawe kuber wAit yawe, “Bo wefo beta Jõ tkyas kʼanu mkah bofret. Menohe meen tkyas bo maja ro Taja to, tkyas abyõ sai kʼanu.
JOH 16:26 Ati weto to, kbe anu nesait nyoh bo kʼTaja mkah tak ro Jõ tasom. Jõ tayoh fee. Taja yesait yhafri anu. Tibyo anu nesait nyoh bo kʼAit. Anu nhafri Jõ tna smot Jõ to. Tna Anu nhar nwe Allah ybis Jõ tama. Feto tibyo Taja yesait yhafri anu to.
JOH 16:28 Tbam Taja troh tamaʼt tabam refo. Tna mfo refo Jõ sikba tabam refo hah tamo to kʼTaja.”
JOH 16:29 Tna kuber ro Yesus mawe, “Mfo refo Nyõ nkyas bo abyõ. Nyõ fret bo fee.
JOH 16:30 Nkyas feto to tna mfo refo amu nhar nwe Nyõ nhar bombra beta. Riwai Nyõ nhar bo ro amu nwe ntu kʼNyõ oh, menohe amu ntu bo reto fefares! Nyõ nkyas bombra beta mkak oh. Reto oh mi amu smot Nyõ tna nhar nwe Nyõ nama nbam Allah. Kbe amu ntu bo aro u kʼNyõ to fee.”
JOH 16:31 Tna Yesus yawe, “Mfo refo anu smot Jõ.
JOH 16:32 Menohe kbe anu nsam. Anu aro yasen ysam yamoʼt samu rait-rait. Tna sikba Jõ tesait akus. Menohe Taja yatam Jõ tibyo tesait kar fee.
JOH 16:33 Bo wefo beta tkyas kʼanu afo re nhaf tnok tna waa ma. Nhau nhaf sau, srau sau su nsya Jõ tna kbe nhaf wanu tnok tna waa ma. Anu nhau mam tabam refo fares tibyo kbe anu raa sikowah. Menohe sraujin toni ma, mbito ntak. Jõ tase tros tatak tbo ait ro ybo tabam refo.”
JOH 17:1 Yesus ykyas bo weto kuber wAit mkak. Tna fo heyut ymat ayoh tna yawe, “Taja, Jõ fi Ku aNyõ. Kene wo ayõ rau sboh oh. Nno re raa mmat Jõ tase aJõ. Raa mmat Jõ tase aJõ mi ana mmat Nyõ nase aNyõ oh meto.
JOH 17:2 Tiwya Nyõ noo tak nee kʼJõ tamo Raa ro tase tbo raa ro tabam refo beta. Nno feto afo re Jõ tatak tno raa mhau hame wajin. Nyõ nsok awya ro yamo raa woJõ, tna Jõ tno ana weto beta meen mhau hame wajin ye.
JOH 17:3 Jõ ksoh re ana mhar Nyõ nhaf, srau aNyõ kaket, tna mhar mawe Nyõ fi Allah yesait aran tum. Tna Jõ ksoh re ana mhar mawe Jõ fi Yesus Kristus: Jõ fi Ait ro Nyõ nbis tama tabam refo. Soh ana mhar anu mbewok feto kbe ana mkai roon ro hame oh meto.
JOH 17:4 Tno bo ro Nyõ nbis kʼJõ to, beta tno mkak. Au oh meto tno re raa mmat bo yase aNyõ.
JOH 17:5 Tiwya tinyi thau tsya Nyõ su mam wore wo tabam refo raa mfen fefares. Bo yase wanu bewok to mninon. Mfo refo tayoh tawe Nyõ tubat Jõ hah te tamo to kʼNyõ, tna nno re tase mnan tii reto u.
JOH 17:6 Taja, raa ro tabam refo to, taro mamo raa woNyõ. Tna Nyõ nawe raa weto to raa woJõ ye. Jõ tno re ana mhar Nyõ. Ana mari bo ro Nyõ nawe tna mbo mno.
JOH 17:7 Bo ro Nyõ noo nee kʼJõ oh, mfo refo raa woJõ weto, mhar mawe Nyõ oh mi Raa ro noo bombra wefo beta nee kʼJõ.
JOH 17:8 Bokyas ro Nyõ nawe kʼJõ to, Jõ tkyas kʼana oh. Tna ana mari tna moo mse kʼana oh. Ana mhar mawe Jõ tama tbam Nyõ. Ana mnaut maut-mroh fee. Ana smot Jõ tna mhar mawe Nyõ oh mi nbis Jõ tama.
JOH 17:9 Mfo refo Jõ skabuk ana. Skabuk raa ro tabam refo fee. Skabuk ana ro Nyõ nsan kʼJõ sai. Ana wefo fo raa woNyõ.
JOH 17:10 Raa woJõ beta to raa woNyõ ye. Tna raa woNyõ beta to raa woJõ ye. Ana weto, bo ro mno to merif bo yase aJõ.”
JOH 17:11 “Taja, Nyõ nesait aran Raa ro nase. Thau mam tabam refo kait u fee tna Jõ tama to kʼNyõ. Menohe ana mhau mam tabam refo fares. Taja, Nyõ to Raa ro nase. Jõ tayoh kʼNyõ tawe kmot ana mkah natak aNyõ. Tak reto Nyõ nsan kʼJõ ye. Kmot ana re kbe ana mhau mhaf, srau sau, mnan fi Nyõ nsya Jõ bhaf sau to ye.
JOH 17:12 Wore thau tsya ana fares to, Jõ kmot ana mkah natak aNyõ, tak ro Nyõ nsan kʼJõ reto. Jõ kmot ana tibyo ana beta beroh smot Jõ. Menohe Bokom ro aNyõ mawe ana sait kbe safe mkak. Reto tiwya nabi sait ykom tna kbe mabo mnan si Bokom reto.”
JOH 17:13 Tna Yesus skabuk yawe, “Ayõ baro firwas tna hah tama to kʼNyõ mam teto. Menohe thau mam tabam refo fares to, tkyas bo wefo beta afo re ana wefo simaut toni mnan fi Jõ to ye.
JOH 17:14 Jõ tnan anya tsya raa ro tabam refo fee. Jõ tkyas bokyas aNyõ kʼana ro Nyõ nsan kʼJõ oh. Ana wefo mnan anya msya raa ro tabam refo fee. Tibyo raa ro tabam refo knait ana.
JOH 17:15 Jõ skabuk tawe Nyõ tufrok ana mbam tabam refo fee. He tayoh re Nyõ kmot ana re kbe kabes yabi (Iblis) yno ana ma.
JOH 17:16 Ana wefo mnan anya msya raa ro tabam refo fee; mnan fi Jõ tnan anya raa ro tabam refo fee ye.
JOH 17:17 Bokyas aNyõ to bo ro ati. Bokyas aNyõ to bo ro mabo tu oh! Jõ tayoh tawe nno re ana mari bokyas aNyõ tna mbo mno. Feto oh mi Nyõ noo ana nbo mkah mno bo woNyõ.
JOH 17:18 Tiwya Nyõ nbis Jõ troh tama tabam refo. Tna tbis ana wefo mamo mo kʼraa ro tabam refo mfi feto ye.
JOH 17:19 Tawe too Jõ tsan kʼNyõ re tno bo ro Nyõ nawe. Tno feto afo re mafer ro moof kʼana. Kbe ana beroh matak moo ana msan kʼNyõ re mno bo woNyõ to ye.”
JOH 17:20 Tna Yesus yawe kʼYaja yawe, “Jõ skabuk ana wefo mesait aran fee. Meen ana mamo mkyas Jõ tasom aJõ renti. Tibyo kbe raa taro smot Jõ. Feto to Jõ skabuk raa weto ye.
JOH 17:21 Tayoh re ana beta mhaf sau msya anya, mnan fi Nyõ nhaf sau nsya Jõ to ye. Tna mnan fi Jõ thaf sau tsya Nyõ ye. Jõ skabuk bo refo re kbe ana beta mhaf sau msya anu mbewok. Feto tibyo raa ro tabam refo mmat tna mhar mawe Nyõ oh mi Raa ro nbis Jõ troh tama tabam refo.
JOH 17:22 Tiwya Nyõ nsan bo yase aNyõ to kʼJõ. Tna Jõ tsan bo yase aNyõ reto kʼana ro smot Jõ. Afo re ana beta mhaf sau, mnan fi Anu bewok bhaf sau ye.
JOH 17:23 Jõ fi thaf sau su tsya ana. Tna Nyõ fi nhaf sau su nsya Jõ. Tayoh re ana ro smot Jõ to beta mhaf sau su mnan si. Soh raa woJõ mhaf sau su to, kbe raa ro tabam refo mhar mawe Nyõ oh mi nbis Jõ. Tna raa ro tabam refo mhar mawe Nyõ nhafri Jõ tna Nyõ nhafri ana ro smot Jõ mnan anya ye.”
JOH 17:24 Tna Yesus skabuk renti yawe, “Taja, tiwya tabam refo Anu bfen fefares to, Nyõ hafri Jõ oh wia. Tibyo Nyõ nsan bo yase aNyõ kʼJõ. Jõ skabuk raa ro Nyõ nsan kʼJõ; raa beta ro kbe smot Jõ: Jõ ksoh tawe ana meen mhau su msya Jõ mam sawro aNyõ ye. Tna re ana mmat bo yase aJõ reto ye.
JOH 17:25 Taja: Nyõ fi raa ro nhaf mato moof ati. Raa ro tabam refo wase Nyõ. Menohe Jõ thar Nyõ. Tna kuber woJõ wefo mhar mawe Nyõ oh mi nbis Jõ sai.
JOH 17:26 Jõ tkyas Nyõ nasom aNyõ kʼana wefo oh. Tna kbe tno feto renti. Nyõ nhafri Jõ kaket. Tna tkyas nasom aNyõ kʼana afo re ana mhar bo hafri raa anya mnan fi Nyõ nhafri Jõ. Tno afo re Jõ tesait thaf sau tsya ana.”
JOH 18:1 Yesus skabuk mkak. Tna fo Ait ysya kuber wAit masen mamo. Ana frit aya ro Kidron mamoʼt maam jaro. Tna twok mam armato sau.
JOH 18:2 (Yesus ysya kuber wAit ja mamoʼt armato reto. Tibyo Yudas ro besruf Yesus, yhar yuk reto oh.)
JOH 18:3 Yudas yerif iso ro mamoʼt armato reto kʼraa sbe ro Roma. Tna riwai imam manes ro agama Yahudi msya raa ro Farisi, mbis aban mana wana mesait baro mama ye. Feto to Yudas yakah raa mawat yama mbam Yerusalem: Raa sbe ro Roma majin sau, msya aban mana ro agama Yahudi baro mama ye. Ana mama nkro Yudas to, mbo lentera, tafoh, msya masom sbe wana to ye.
JOH 18:4 Yesus yhar bo ro kbe mai kʼAit wia oh. Tibyo Ait yasen yamo yo kʼraa weto yawe, “Anu saso awya?”
JOH 18:5 Ana mawe, “Yesus, raa ro Nazaret.” Tna Yesus yawe, “Jõ Ait oh mefi.” (Yudas, ro besruf Ait, yros ysya ana mam weto ye.)
JOH 18:6 Ati ro Yesus yawe, “Jõ Ait oh mefi.” to, ana susu mhah me tna mbtek mawe mam tabam.
JOH 18:7 Yesus yawe u kʼana yawe, “Anu saso awya?” Ana mawe, “Yesus, raa ro Nazaret.”
JOH 18:8 Ait yawe, “Tkyas oh tawe Jõ oh mefi. Soh Jõ tesait oh mi anu saso to, bitsre ana wefo taro mamo rof.”
JOH 18:9 (Yesus yawe raa sbe weto bitsre kuber wAit mhau riof feto to, ykyas mnan fi bo ro riwai Ait skabuk wia matim yawe, “Raa ro Nyõ nsan kʼJõ to Jõ kmot ana tibyo ana beta beroh smot Jõ; sait bo kbe yarak fee.”)
JOH 18:10 Tna Simon-Petrus ybo krewan rait tna ysot raa ro yama yfot Yesus sait yimara. (Ait retait yasom Malkhus. Ait tait sryan ro imam yase rait.) Petrus ysot yimara rait ro tem ati ktos.
JOH 18:11 Tna Yesus yastako Petrus yawe, “Noo krewan anyõ reto srya mam tafat rau u! Taja ysi bo kʼJõ, yawe tasom bo ro samyoh ro mfo refo mama mai kʼJõ. Tna Jõ tawe tno bo beta mnan si bo ro Taja ybis oh!”
JOH 18:12 Tna raa sbe ro Roma majin reto msya aban mana ro yase ybo ana mfot Yesus. Ana msya raa ro ja kmot Samu Ro Allah tna msya raa manes ro agama Yahudi weto sor mfot Yesus tna make yatem.
JOH 18:13 Ana mbo Ait makah mamo mo kʼHanas. (Ti weto to bi Kayafas yamo imam agama Yahudi ro yase. Bi Hanas tait imam yase ro wia. Bi ait tait Kayafas snyim rait.
JOH 18:14 Kayafas oh mi raa ro taa yawe kʼraa mabi ro agama Yahudi yawe, “Rau ro moof to, raa sait yhai sai. Soh mfe to, kbe raa wanu majat beta.”)
JOH 18:15 Mbam armato reto, Simon-Petrus ysya kuber roto sait kro mam ttis mrof. Raa makah Yesus twok mam samu mato ro imam yase rait. Kuber roto retait, imam yase yhar oh. Tibyo ait kro Yesus mamo snok mam bohra reto.
JOH 18:16 Menohe Petrus ste mne wea mam masa. Tna kuber roto retait yamo ykyas kʼsrian ro ano sau ro ja kmot masa, tna ymen Petrus twok mam bohra reto mato ye.
JOH 18:17 Petrus twok tna sryan ro mros mam masa reto mtu kʼait mawe, “Nyõ refi kuber ro Raa retait ye, fe mfe a?” Petrus ywaar yawe, “Mfe.”
JOH 18:18 Arin foos-foos tna sryan msya raa manes taro mros mam bohra mni foos. Tna Petrus yamo yros kene ysya ana mam tafoh reto yni foos ye.
JOH 18:19 Imam yase ro wia yasom Hanas. Ait yhau mam amah mato tna ytu sas Yesus. Ytu yawe bo ro ja ykyas to bawya, tna raa ro ja kro Ait to awya.
JOH 18:20 Yesus yawe, “Taja: Ja Jõ tkyas abyõ kʼraa mawat mari. Tkyas bo kʼraa ro Yahudi sor mam samu watum wana tna mam Samu ro Allah mam Yerusalem fo ye. Tkyas bo wai aro fee.
JOH 18:21 Fyi re nyõ ntu bo kʼJõ? Ntu bo kʼana ro mari bokyas aJõ reto. Ana mhar bo ro Jõ tkyas reto.”
JOH 18:22 Yesus yawe feto tna raa manes sait yiban yasu. Tna yawe, “Nasoh moof sai! Nkyas bo feto kʼimam ro yase retait ma!”
JOH 18:23 Yesus yawe, “Soh Jõ tkyas bo ro mkair aro, feto nawe abyõ re raa mhar. Menohe soh Jõ tkyas bo ro ati to, fyi re nyõ niban Jõ?”
JOH 18:24 Yesus yatem rait, riwai raa make mkah too. Tna Hanas ybis raa makah Yesus mamo mo Kayafas. (Ti reto to, bi Kayafas yamo imam ro yase.)
JOH 18:25 Mam bohra samu reto to, Petrus yros yni foos fares. Tna raa mtu kʼait mawe, “Nyõ fi kuber ro Yesus!” Menohe Petrus ywaar yawe, “Mfe!”
JOH 18:26 Sryan imam ro yase sait yros mam weto ye. Ait retait raa mana sau ysya sryan ro riwai Petrus ysot yimara retait. Tna yawe kʼPetrus yawe, “Jõ thar Nyõ. Nyõ oh mi riwai nsya Ait nmo su mam armato!”
JOH 18:27 Tna Petrus ywaar yawe, “Mfe!” Yawe feto si fo kook sau mara.
JOH 18:28 Rabu momo raa ro Yahudi weto makah Yesus mbam samu ro Kayafas mamoʼt samu wore wo Gubernur Pilatus ja ytu srah yari. Menohe ana raa ro Yahudi tibyo ana mesait twok mam samu reto mato fee. Watum ro agama rana mawe samu raa ro agama roto to mbau kʼana. Tibyo ana kaket ana tna twok mam mato fee. Soh miwer watum reto kbe ana sohmaam bo msya raa wana mam korat ro Paskah to ma.
JOH 18:29 Feto tibyo Pilatus frok yamoʼt mne yo kʼana tna ytu yawe, “Bo bawya ro anu nkyas mai kʼraa refi fo?”
JOH 18:30 Ana mawe, “Soh Ait yno safo fee, fyi re amu nfot Ait nkah nma no kʼnyõ!”
JOH 18:31 Pilatus yawe, “Nbo Ait nmo oh! Nesait nmit safo kʼAit mnan si Watum ro agama ranu rof.” Ana mawe kʼPilatus mawe, “Amu nwe nno yasu marak menohe Pemerintah Roma mawe amu raa ro Yahudi ntu srah wamu tna nmit safo menohe mbis mawe anu nme raa majat mamyot si watum ranu fee!”
JOH 18:32 Bo refo ana mkyas mnan si bawya ro Yesus ykyas wia matim yawe iso ro kbe raa mame Ait yajat.
JOH 18:33 Pilatus hah twok mam samu reto tna yawe Yesus kro Ait. Ait ytu bo kʼYesus yawe, “Nyõ fi Raja raa ro Yahudi fe mfe a?”
JOH 18:34 Tna Yesus yawe, “Bokyas reto mbam kʼnyo nesait sai a? Bo ro nyõ nawe reto mbam raa roto fe mfe a?”
JOH 18:35 Pilatus yawe, “Jõ fi raa ro Yahudi fee! Raa woNyõ ro Yahudi msya imam manes wonyõ mesait oh mi msan Nyõ kʼJõ tatem fo. Nyõ nno bo bawya re ana msan Nyõ kʼjõ fo?”
JOH 18:36 Yesus yawe, “Wore wo Jõ tase tbo raa mnan fi Raja to, tno mam tabam refo fee. Mfi bo tawe tamo Raja mam tabam refo fo, maami raa ro kro jõ kbe mros tis kʼJõ. Soh feto to, kbe ana mafa tna mno wa afo re raa ro Yahudi mfot Jõ to ma. He mfe. Wore wo tbo raa mnan fi Raja to, tno mam tabam refo fee.”
JOH 18:37 Tna Pilatus yawe, “Soh feto, Nyõ fi Raja fe mfe a?” Yesus yawe, “Ae, Jõ fi Raja. Au oh mi fnya mabe Jõ tna troh tama tabam refo. Tama tabam refo mkah tno bo sau aran, au oh mi; tama tkyas bokyas ro ati. Tama afo re tkyas bo ro ati kʼraa. Tna awya ro yros tis bo ro ati mbam kʼAllah to, ait yari bo ro Jõ tkyas.”
JOH 18:38 Tna Pilatus ytu kʼAit yawe, “Bo ro ati to bawya meto?” Tna Pilatus frok yamo yo kʼraa ro Yahudi ro mros mam mne tna yawe, “Tkai bo ro Ait yno mkair aro fee.
JOH 18:39 Menohe mfo refo anu nkyõ korat ranu ro Paskah. Tna bo mafa ro anu nno soo oh mi, ja tbis re raa ranu sait frok mbam bui tna yamo bait. Feto to anu ksoh nwe jõ kbe tufrok Raja ro Yahudi refi fe mfe a?”
JOH 18:40 Ana mawe, “Mfe! Bitsre Ait yamo bait ma! Bitsre Barabas kʼamu!” (Barabas tait raa ro tiwya yno safo tibyo pemerintah Roma mbu ait mam bui to.)
JOH 19:1 Tna Gubernur Pilatus yoo Yesus yee kʼraa nsaah Ait.
JOH 19:2 Tna raa sbe ro Roma weto moo bo ro maan mnan fi bmun hyoh tna ste watau sau. Tna mse Yesus sbyõ yana. Tna ana mawah ratan ro mkof ngknu sau, ro ja raa mase myum to, tna mse kʼAit yyum.
JOH 19:3 Tna ana mama mros mam Ait yasu tna sret Ait masah mawe, “Meen oh kʼNyõ, raja raa ro Yahudi!” Tna ana mai Ait yasu.
JOH 19:4 Tna Pilatus frok yamoʼt mne mun sau naut yo kʼraa ro Yahudi, tna ybis raa sbe makah Yesus frok. Ait yawe, “Jõ tsan Ait kʼanu re anu nhar nwe jõ tnaut tawe Ait yno safo sau bo fee. Jõ tmit safo aro kʼAit fee ye.”
JOH 19:5 Yesus yyum ratan ro mkof tna sbyõ watau ro maan reto to, tna raa makah Ait mama. Tna Pilatus yawe, “Nmat Ait oh metait.”
JOH 19:6 Imam manes msya raa wana ro mabi mmat Ait fo ana masen mawe, “Name Ait yajat oh!” Pilatus yawe kʼana yawe, “Nesait nkah Ait nme yajat. Jõ tkai bo ro mkair sau aro Ait yno fee.”
JOH 19:7 Menohe raa ro Yahudi weto mawe, “Ait yawe Ait fi Ku ro Allah yare. Tna watum ro agama ranu mbis mawe, ‘Soh raa yawe bo feto to, kbe Ait raa mame yajat.’”
JOH 19:8 Pilatus yari bo reto to, ait waa toni renti.
JOH 19:9 Tibyo Ait hah twok mam samu mato reto u. Tna raa sbe mbo Yesus twok ye. Tna Pilatus ytu kʼAit yawe, “Nyõ raa ro hayo?” Menohe Yesus yawe bo aro si kʼait fee.
JOH 19:10 Pilatus yawe, “Nyõ hawe nkyas bo nsya jõ a? Nyõ wase nawe jõ fi tatak tbis raa mbitsre Nyõ namo bo Nyõ. Tna soh jõ tbis feto to, kbe raa mbitsre. Tna soh tbis raa mame Nyõ to, kbe raa mame.”
JOH 19:11 Yesus yawe, “Allah oh mi Raa ro yoo tak reto yee kʼnyõ to. Soh Ait yoo yee fee maami nyõ natak fee ye. Feto to ait ro ysan Jõ kʼnyõ natem anyõ to iro rait reto msai miwer iro anyõ.”
JOH 19:12 Pilatus yari bokyas ro Yesus reto tna yawe tomer bitsre Yesus. Menohe raa ro Yahudi mtu fari-fara mawe, “Bi yabi, soh nyõ bitsre Ait to, nyõ nafoh Kaisar fee! Awya ro yawe yamo raja to ait retait yamo byoh Kaisar!”
JOH 19:13 Raa ro ytu srah to ja hre mam ambar sau. Ambar refo fo mhau mam yuk ro raa mtu mawe 'Litostrotos'. (Mai ro Ibrani to, raa mtu mawe 'Gabata'.) Pilatus yari bo raa ro Yahudi riwai mawe reto tna yamo hre mam ambar reto. Ait ybis raa sbe makah Yesus frok.
JOH 19:14 (Ti reto to, raa siwyan bo re menrabu mno korat ro Paskah. Ayõ ro 12 baas bo feto.) Tna Pilatus yawe kʼraa ro Yahudi weto yawe, “Raja ranu mefi!”
JOH 19:15 Menohe ana mtu mawe, “Nkah Ait nmo oh! Nmo nme Ait yajat! Nme ait yajat mam ara warok!” Tna Pilatus yawe, “Nwe tbis raa mame raja ranu mam ara warok a?” Tna imam manes weto mawe, “Kaisar yesait aran yamo raja ramu!”
JOH 19:16 Tna Pilatus ysan Yesus kʼana re raa mame. Tna raa sbe ro Roma weto makah Yesus mamo.
JOH 19:17 Ana moo ara warok mse kʼYesus yasom. Tna mamoʼt yuk ro masom Hamana. (Mai ro Ibrani to raa mawe 'Golgota'.)
JOH 19:18 Mam beto raa mse Ait mam ara warok reto. Raa roto mabo ewok raa mame su msya Ait ye. Sait mam ti yatem ati, tna sait mam ti yatem ta, tna Yesus raa mse mam masuf.
JOH 19:19 Tna Pilatus ybis raa mkom bo refo: “Yesus fi raa ro Nazaret. Ait fi raja raa ro Yahudi.” Bokom refo raa moo mse mam ara warok.
JOH 19:20 Yuk ro raa mame Yesus to kene sai mam kota. Tibyo raa ro Yahudi mawat mmat bokom reto. Bokom reto raa mkom mam mai trion tuuf: Ibrani, Latin msya mai ro Yunani.
JOH 19:21 Menohe imam manes ro agama Yahudi weto hafrah. Ana mamo mo kʼPilatus mawe, “Nkom ‘raja raa ro Yahudi’ ma! Nkom: ‘Raa refi yawe ait raja raa ro Yahudi.’”
JOH 19:22 Menohe Pilatus yawe, “Ro jõ tkom reto mhau yum oh.”
JOH 19:23 Raa sbe ro Roma mse Yesus mam ara warok. Tna fo ana moo ratan rait saim ftah trion jiit. Aro yoo ftah sau-sau. Menohe jubah rAit to, tiwya raa mfen kaket moof. (Jubah reto to, raa mtin mnan fi ja raa mtin ratan to fee. Raa moo benang tna sne muuf. Mfen mbam uu snok mam te.)
JOH 19:24 Feto to raa sbe mawe kʼanya mawe, “Anu bhah jubah rAit reto ma. Nma, anu tane mkah undi re merif awya ro kbe ykai jubah reto.” Tna ana mno feto re mnan si mkah Bokom ro Allah mawe: “Ana saim-sam ratan aJõ, tna jubah aJõ ana mno mkah botane.”
JOH 19:25 Fnya mabo jiit mros kene mam ara warok mair ro Yesus. Ana oh mi: Yesus yme Maria, msya mao, msya Klopas yfain ro masom Maria ye, tna msya Maria Magdalena ye.
JOH 19:26 Yesus ymat yme msya kuber wAit sait mros. Ait retait Yesus yhafri. Tna yawe kʼyme yawe, “Tme, ku anyõ retait.”
JOH 19:27 Tna yawe kuber rAit retait yawe, “Nme oh meto.” Ayõ reto ye kuber retait ymen Yesus yme yamo yse mam samu rait.
JOH 19:28 Tna fo Yesus yhar yawe bombra beta ro Yaja yawe kʼAit yno to, yno mkak oh. Tna yawe, “Thai sbit.” Yawe feto ykyas mnan si tiwya Allah ybis raa mkom mam Bokom rAit.
JOH 19:29 Anggur maya ro mano baro mhau mam baah sau. Tna raa moo bo ro mmot aya mnan fi spon, make mam ara makit tna mberu mam anggur maya reto. Tna tubat mee kʼYesus yata.
JOH 19:30 Yata tna yawe, “Bo ro tama tno mam tabam refo, tno mkak oh!” Tna yanwaruk ysan yamos rAit kʼYaja tibyo yhai.
JOH 19:31 Ti reto to, ayõ ro jumat. Feto to, raa ro Yahudi siwyan bo mkah ayõ ro raa wana ntmoh (hari Sabat). Ana ro manes hawe bo ajat weto mhau nkro akus mam ara warok ayõ menrabu reto. Menrabu to ayõ ro mase. Au oh mefo ana baro mamo mo kʼPilatus mayoh re ybis raa sbe wait miji raa weto maa wana tna skur ajat weto mbam ara warok trion tuuf reto.
JOH 19:32 Pilatus ybis. Raa mana ewok raa mame msya Yesus fo. Tna raa sbe weto miji maa wana wia.
JOH 19:33 Tna ana mawe miji Yesus yaa rAit, he Ait yajat wia oh. Tibyo miji Yesus yaa fee.
JOH 19:34 Menohe raa sbe sait yawah sawya ysu yajoh. Tibyo mees msya aya miyi frok.
JOH 19:35 Ti reto to, raa sait yesait ymat bo reto. Tna ait oh mi ro ykom aam refo. Tna bo ro ykyas to mabo tu. Ykyas bo refo afo re anu nhar nwe bo wefo beta ait ykyas sioh fee.
JOH 19:36 Bo weto mabo feto afo re mnan si Bokom ro Allah mawe: “Ytai rAit sau kbe raa miji fee.”
JOH 19:37 Tna bokom far-far taro ye mawe: “Ana kbe heyut mrom Ait ro ana msu.”
JOH 19:38 Bi Yusuf tait raa ro Arimatea. Tna ait kuber ro Yesus wAit sait ye. Menohe ait waa raa manes ro Yahudi. Tibyo smot bait wai. Yesus yajat tna Yusuf yamo yo kʼPilatus tna yayoh yawe yoo ajat ro Yesus. Tna Pilatus ybis Yusuf yamo yoo.
JOH 19:39 (Nikodemus tait raa ro tiwya yamo yo kʼYesus mam wore arin mti sau.) Ati refo ait yama tna ysya Yusuf mbewok makah ajat reto mamo. Nikodemus yakah bo ro mnan fi gaharu. Bo reto raa srioh msya mur tna mabyoh maut toni. Samyoh rau to 34 kilo bo feto.
JOH 19:40 Ana mabo ewok reto makah lenan (hawee ro moof) ye. Moo bo reto tna ngkaru mam hawee reto tna sro ajat ro Yesus. Mbewok mno mnan si ja raa ro Yahudi mno hai wana.
JOH 19:41 Kene wo Golgota to armato ro moof sau. Tna wore weto to raa mabah isra mato mkah bo meen raa mse hai wana. Menohe mamo snok ayõ reto raa mse hai mam isra mato reto aro fefares.
JOH 19:42 Menrabu ayõ ro raa ntmoh. Tna isra reto kene sai. Tibyo ana mbewok moo ajat reto sama mam isra mato ro armato reto.
JOH 20:1 Ayõ ro minggu, rabu ati reto to, arin maah fefares. Tna Maria Magdalena mamoʼt isra reto. Mamo snok yuk reto tna mmat he isra reto to, masoh maa wea. Au mmat he fraa ro raa muut wa isra masoh reto to, raa mririk oh.
JOH 20:2 Mmat feto tibyo mhoh fooh mamo saso Simon-Petrus ysya kuber ro Yesus yhafri retait. Mamo mo kʼana mbewok tna mawe, “Jõ tmat Tuhan yarak mam isra! Raa msyõf Ait oh! Amu wase raa mse Ait mam tiyo!”
JOH 20:3 Tibyo Petrus ysya kuber roto sait masen mamo mmat Ait mam isra reto.
JOH 20:4 Mbewok mhoh mamo, he kuber roto retait yhoh wia Petrus. Tna snok isra mato reto wia matim.
JOH 20:5 Ait retait yaka koyo ymat mam isra mato. Ymat he hawee lenan ro raa sro Yesus reto sai mbris akus. He ait twok isra mato reto fee.
JOH 20:6 Tna Simon-Petrus yama tis yrof ait snok mam yuk reto. Snok tna twok mam isra reto mato. Tna ait ymat hawee reto mbris akus mam weto.
JOH 20:7 Tna ymat hawee mabuf ro raa make Yesus yana. Hawee reto raa beah tna mse hayah baro.
JOH 20:8 Tna fo kuber ro riwai yhoh yatim wia Petrus fi yamo twok ye. Ymat tna ait yhar yawe Yesus yrok yasen.
JOH 20:9 (Bokom ro Allah mawe Yesus kbe yrok yasen. Menohe ati reto to, ana mhar maja rau kaket fefares.)
JOH 20:10 Tna fo kuber mabo ewok weto to hah mamoʼt amah.
JOH 20:11 Maria Magdalena mros kait kene wo isra reto to, mawia. Mawia tna maka mmat isra mato.
JOH 20:12 Menohe mmat he malaikat mabo ewok. Malaikat weto mbewok myum ratan ro mboh. Mbewok hre mam ati ro raa mse Yesus ajat rAit. Sau hre mam ati ro yana, tna sau hre mam ti yaa.
JOH 20:13 Malaikat weto mawe kʼau mawe, “Fyi re nyõ nawia fo?” Maria mawe, “Tuhan ajõ ro smot tait, ajat rAit raa moo mamo marak. Tna jõ wase raa mse mam woyõ.”
JOH 20:14 Mawe bo reto tna haberek mmat he Raa sait yros mam weto. Ait refi Yesus, menohe au wase Ait ye.
JOH 20:15 Yesus ytu kʼfai au yawe, “Fyi re nyõ nawia fo? Nyõ saso awya meto?” Maria mrok mawe Ait fi raa ro kmot armato reto. Tibyo mawe kʼAit mawe, “Taja, soh nyõ noo Ait meto mi, nerif wore wo nyõ nse afo re jõ tamo too Ait takah tamo.”
JOH 20:16 Tna Yesus yawe, “Maria!” Tibyo au msiur mmat Yesus tna mawe, “Rabuni!” (Mai ro Ibrani reto to, mawe 'Guru'.)
JOH 20:17 Tna Yesus yawe, “Nbo Jõ wia ma! Jõ hah te taut tamo to kʼTaja fefares. He namo no kʼtao woJõ na. Tna nkyas kʼana nawe mfo refo Jõ hah te tamo to kʼTaja aJõ. Ait fi anu Nja wanu ye. Ait fi Allah ro Jõ smot. Tna Ait fi Allah ro anu smot ye.”
JOH 20:18 Maria mamo mo kuber ro Yesus wAit mawe, “Riwai jõ tmat Tuhan!” Tna mkyas kʼana bombra beta ro Ait yawe.
JOH 20:19 Ayõ ro minggu reto arin mti oh. Tna kuber ro Yesus wAit hre su mam amah sau. Ana waa raa Yahudi ro manes weto. Tibyo muut masa matak. Menohe Yesus yama yros tubor susai kʼana tna yawe, “Waa ma.”
JOH 20:20 Ait ykyas feto tna yerif yatem msya yatefau rAit kʼana. Ana mmat Tuhan u to, ana simaut mase.
JOH 20:21 Tna Yesus yawe u yawe, “Riof kʼanu oh! Tiwya Taja ybis Jõ tamo to kʼraa. Tna mfo refo tbis anu tawe nmo no kʼraa nfi feto ye.”
JOH 20:22 Tna fo Ait yfi yafos rAit kʼana tna yawe, “Tsan Har ro Tuhan kʼanu mefo. Noo oh!
JOH 20:23 Soh anu nwe kʼraa nwe, ‘Jõ tawe, iro ro nno to marak oh.’ Feto kbe Allah yyon iro ro ana mno oh. Menohe soh anu nwe iro ro ana mno mhau fares to, iro ro ana mno mhau bau.”
JOH 20:24 Tomas, ro ja raa mtu yasom Didimus ye, tait kuber ro Yesus wAit sait ye. Ana to mabo 12. Ti ro Yesus yerif Ait reto to, Tomas hre su ysya kuber taro to fee. Ait yarak.
JOH 20:25 Yama tna kuber taro mkyas kʼait mawe, “Amu nmat Tuhan!” He Tomas yawe, “Soh jõ tmat yier ro paku mam yatem fee, tbo fee, tna tnit temkrem mam yhaf ate ro raa mame fefares to, jõ aro wase bokyas ranu reto bo mabo rau yum fee.”
JOH 20:26 Minggu sau firwas tna kuber ro Yesus wAit hre su mam amah u. Tna Tomas hre ye. Mato beta raa muut matak. Menohe Yesus yama yros tubor susai ana tna yawe, “Riof kʼanu oh!”
JOH 20:27 Tna Ait yawe kʼTomas yawe, “Nmat tatem aJõ nbo. Natem nbo tatefau aJõ. Nnaut maut-mroh ma. Smot Jõ oh!”
JOH 20:28 Tomas yari yno tna yawe kʼYesus yawe, “Nyõ fi Tuhan ajõ! Nyõ fi Allah ro Jõ smot!”
JOH 20:29 Tna Yesus yawe kʼait yawe, “Nyõ nmat Jõ oh mi nyõ smot Jõ. Raa taro mmat Jõ fee, menohe kbe ana smot Jõ. Kbe ana weto mhau simaut mase.”
JOH 20:30 Amu, kuber ro Yesus nmat bo msai ro yno mawat. Menohe jõ tkom bombra beta mam aam refo fee.
JOH 20:31 Bombra ro jõ tkom mam aam refo fo, tkom afo re anu nhar nwe Yesus tait Mesias. Ait fi Ku ro Allah yare. Tkom afo re anu smot Ait. Anu ro smot Ait msya nri bo ro Ait yawe to, kbe nkai riof ro hame.
JOH 21:1 Ti baro firwas tna Yesus yerif Ait kuber wAit mam maru ro Galilea. (Maru reto to, masom maru ro Tiberias ye.) Bo reto fefo:
JOH 21:2 Simon-Petrus, Tomas (ro ja raa mtu yasom Didimus), Natanael (raa ro Kana mam provinsi ro Galilea), ku ro Zebedeus wait, tna msya kuber ro Yesus mabo ewok roto taro naut to ana hre su.
JOH 21:3 Tna Simon-Petrus yawe kʼana yawe, “Tamo takam syoh.” Tna ana mawe, “Amu kro ye.” Ana maut wiak tna saso sioh mti reto mamo snok rabu. He mfot syoh aro fee.
JOH 21:4 Isi ntara Yesus yros maru maam. Menohe ana mhar mawe Yesus metait fee.
JOH 21:5 Tna Ait ytu kʼana yawe, “Tao na, nfot syoh aro fe mfe a?” Ana mawe, “Mfe!”
JOH 21:6 Yawe, “Sik beak pukat ranu ti ntem ati kbe tru sioh!” Ana mari mno feto tna mkai syoh mawat toni. Tibyo ana mtai tubat fee.
JOH 21:7 Kuber ro Yesus yhafri retait yawe kʼPetrus yawe, “Tuhan metait!” Petrus yari feto tna yasen yyum ratan ro riwai yrus. Tna tbat mam aya kni yamo yo kʼYesus.
JOH 21:8 Kuber taro mhau mam wiak mato tna miin mamo mrof. Miin mamo tna mkuk pukat reto msya syoh weto mamoʼt maru mne. (Mne reto mhau fari fee; 100 meter sai bo feto.)
JOH 21:9 Ana snok mne tna mroh mbam wiak. Tna ana mmat roti msya syoh baro raa konta mam tafoh masuf.
JOH 21:10 Tna Yesus yawe, “Sgi nbo syoh ro anu tru baro nma!”
JOH 21:11 Simon-Petrus yaut mam wiak tna ykuk pukat reto mamaʼt mne. Syoh ro mabi ran trion 153 mhau mam pukat reto mato menohe hri fee.
JOH 21:12 Yesus yawe kʼana yawe, “Nma sohmaam bo.” Kuber weto mhar mawe Ait refi Tuhan tibyo ana beta waa mawe mtu kʼAit fee. Mtu mawe Ait awya fee.
JOH 21:13 Tna Yesus yoo roti reto saim kʼana. Yoo syoh weto yee kʼana mabo ye.
JOH 21:14 (Yesus yrok yasen tna ti ro yerif Ait kuber wAit reto to, muhrin tuuf oh meto.)
JOH 21:15 Ana sohmaam bo mkak. Tna Yesus yawe kʼSimon-Petrus yawe, “Yohanes yare: Fyi, nyõ nhafri Jõ toni niwer raa taro fe mfe a?” Tna Petrus yawe, “Ae, Tuhan, Nyõ nhar nawe jõ thafri Nyõ.” Yesus yawe, “Feto to nsia domba maku woJõ.”
JOH 21:16 Mun ro ewok u Yesus yawe kʼait yawe, “Yohanes yare: Fyi, nyõ nhafri Jõ kaket fe mfe a?” Tna Petrus yawe, “Ae, Tuhan, Nyõ nhar nawe jõ thafri Nyõ.” Yesus yawe, “Feto to kmot domba woJõ.”
JOH 21:17 Tna Yesus ytu ro mun tuuf u kʼait yawe, “Yohanes yare: Fyi, nyõ nhafri Jõ fe mfe a?” Yesus ytu bo reto mun tuuf tna Petrus yari feto tna sraujin yawe, “Ae, Tuhan, Nyõ nhar bombra beta. Tibyo nhar nawe jõ thafri Nyõ.” Yesus yawe, “Feto to nsia domba woJõ.
JOH 21:18 Nnaut: Ati ro nyõ mere fares to, nyõ nesait ntau hotom anyõ, tna namo tiyo-teya ro nyõ ksoh sai. Menohe ati ro nyõ nabi to, kbe nyum natem nee kʼraa roto mbo tna moo hotom anyõ mbo mtau mati kʼnyõ naka ye. Tna ana makah nyõ mamoʼt yuk ro nyõ hawe bo namo.”
JOH 21:19 Yesus yawe bo reto yerif iso ro meen Petrus yajat. (Meen Petrus smot Yesus matak tibyo raa mame ait yajat Raa mmat bo ro yno tna mbaut Allah.) Tna Yesus yawe kʼait yawe, “Nama, kro Jõ oh!”
JOH 21:20 Tna Petrus ymat he kuber ro Yesus yhafri retait kro ana mam tis. (Ait retait oh mi raa ro tiwya susu hre kene ysya Yesus tna ytu kʼAit yawe, “Tuhan; awya oh mi kbe besruf Nyõ to?”)
JOH 21:21 Petrus ymat kuber retait tna ytu kʼYesus yawe, “Fyi? Bo bawya ro kbe mai kʼait refi?”
JOH 21:22 Yesus yawe, “Mfi bo Jõ tawe ait yhau yroon snok mam ti ro Jõ tama u to, bo ro nyõ nsya nhar meto fee. He bo ro nyõ nno to, nyõ kro Jõ sai!”
JOH 21:23 Tibyo kuber weto taro mabah bokyas mawe kuber retait meen yhai fee. Ebokfi Yesus yawe feto fee. Ait yawe, “Soh Jõ ksoh tawe ait yhau yaam mamo snok mam ati ro Jõ thah tama u to, bo ro nyõ nsya nhar meto fee.”
JOH 21:24 Jõ oh mi kuber retait. Tmat bo ro Yesus yno weto tna tkom fo. Tna anu bhar bwe bawya ro jõ tkyas to beta mabo tu oh.
JOH 21:25 Bo ro Yesus yno taro to mawat fares, raa mkom beta fee. Mfi bo raa mkom beta beryum to, aam ro raa mkom weto to mninon. Tnaut tawe kbe yuk ro raa mse bokom reto mam tabam refo to mnan fee.
ACT 1:1 Teofilus; tkom aam ro ewok refo tiim kʼnyõ. Tiwya tkom aam ro tinyi to, tkyas bombra ro tii Yesus yno tna msya bombra ro Ait watum ye.
ACT 1:2 Mam aam ro tinyi reto to, jõ tkom tna tkyas tawe raa sikowah Yesus tna mame Ait yajat. Tna Ait yrok yasen. Tna yhau mam tabam refo ti 40 naut. Mam wore weto to, raabis ro tiwya Ait ysok mmat Ait muhrin aro-aro ye. Tna Ait yno bo ro msai mawat afo re ana mhar kaket mawe Ait yrok yasen tu oh. Tna Ait ykyas bo kʼana. Ykyas wore wo Allah yamo Raja ybo raa mana rAit to kʼana. Tna Ait ysya Har ro Allah mbewok mbis bo kʼana ye. Aam ro tinyi reto to, tkyas wore wo Yesus yhau mam tabam refo mamo snok mam ati ro Allah tubat Ait yaut yamoʼt sawro rAit.
ACT 1:4 Yesus yaut yamo fefares to, Ait ysya raabis rAit hre sohmaam bo su. Tna Ait yawe, “Nhau mam kota ro Yerusalem. Frok nbam kota refo wia ma. Nhau ste bo ro tiwya anu Bja ranu yawe kbe yoo yee kʼanu to. Bo reto tiwya Jõ tkyas kʼanu oh:
ACT 1:5 Tiwya Yohanes yama baptis raa mkah aya sai, menohe ti baro firwas to, kbe Allah baptis anu mkah Har rAit.”
ACT 1:6 Ati sau to, raabis ro Yesus wAit hre su msya Ait mam faut ro Zaitun. Tna ana mtu kʼAit mawe, “Tuhan; mfo refo Nyõ nasen nno bangsa Israel mros u fe mfe a?”
ACT 1:7 Menohe Yesus yawe, “Anu Bja yesait yhar bo rAit. Yno bo reto mam ayõ ro meen wono naut. Menohe Ait ykyas ayõ reto kʼanu nhar fee.
ACT 1:8 Tkyas ti ro meen Har rAit mroh mbo anu. Ati reto to, kbe Ait yoo yatak rAit yee kʼanu. Tna bo ro tiwya anu nmat Jõ tno to, kbe anu nbo nkyas mam kota ro Yerusalem tna mam provinsi ro Yudea beta. Tna kbe nkyas mam rabin ro Samaria ye tna mamo snok mam tabam arin aso wefo beta ye.”
ACT 1:9 Yesus ykyas bo weto kʼana mkak. Tna fo Allah tubat Ait yaut yamoʼt sawro rAit. Tna raa ro mros mam weto sor heyut mmat Ait yaut yamo. Tna ayoh mboh burut Ait wa tibyo ana mahni Ait.
ACT 1:10 Ana mhau mrom Ait yaut kri-kri fo, malaikat mabo ewok ro myum ratan mboh toni frok tubor.
ACT 1:11 Malaikat mbewok mawe kʼana mawe, “Anu raa ro Galilea: Anu nros heyut nmat bawya meto? Yesus yaut yamoʼt sawro rAit. Tna meen Ait hah ye yama u. Meen Ait hah ye yama u mnan bo riwai anu nmat Ait yaut yamo feto.”
ACT 1:12 Kuber wAit mbam Faut ro Zaitun me mhah me mamoʼt Yerusalem. Mbam Zaitun mamoʼt Yerusalem to kilo sau bo feto.
ACT 1:13 Tna ana me mamoʼt amah ro ja ana mhau. Maut mamoʼt amah hawar ro uu. Ana weto to: Petrus ysya Yohanes, Yakobus ysya Andreas, Filipus ysya Tomas, Bartolomeus ysya Matius, tna Yakobus ro bi Alfeus yare ysya Simon (Simon tait ja knait raa ro Roma mbo raa ro Israel ma.) tna Yudas ro Yakobus yare,
ACT 1:14 fai Maria ro Yesus yme, Yesus yao na msya fnya baro ye. Ana beta to mhaf rana sau tna ana ja hre su skabuk yoyo.
ACT 1:15 Ati sau reto to, raa wana mabo 120 bo feto mama siret su msya ana. Tna Petrus yasen yros ykyas bo kʼana yawe,
ACT 1:16 “Raa wamu: Bo ro tiwya Allah yawe to, mhau rau oh. Tiwya Har rAit sobu raja Daud. Bokyas reto ait ykom mam aam ro Mazmur. Ykom yawe, ‘Ait yerif iso ro raa kbe mama mfot Yesus.’ Daud ykom bo reto tiwya ooh oh.
ACT 1:17 Tna anu nhar nwe Yudas tiwya ysya amu yamo raabis ro Yesus wAit ye. Yesus ysok ait tna yno bo ro Yesus ybis ysya amu wefo ye.
ACT 1:18 Menohe Yudas yno bo ro mkair. ⌞Ait yasim Yesus.⌟ Mkah pitis ro raa maren ait to, Yudas yoo tabam. Tna ait btek yhaf mamo siya tna yhaf ntaba mfais yajat mam tabam reto.
ACT 1:19 Tna raa ro mhau mam Yerusalem beta to, mhar bo reto. Tibyo ana mkyas tabam reto to, mawe masom HakalDama.(‘HakalDama’ to, mai ranu mawe, ‘Tabam ro Mees’).
ACT 1:20 Watum ro Allah tiwya Daud ykom mam aam ro Mazmur reto mawe, ‘Tabam ro yhau to, makus oh. Tna raa me mhau mam tabam reto u ma.’ Mazmur 69:26 ‘Hroh ro tiwya ait hre reto to, raa roto me shauk hre riryõn.’”
ACT 1:21 Tna Petrus ykyas yawe, “Mamyot bokom reto tawe nma, anu bsok raa sait hre mam hroh ro Yudas. Anu bsok raa ro yhau ysya anu su mam wore wo tiwya Tuhan Yesus yhau su ysya anu fares to:
ACT 1:22 Raa ro yhau ysya anu maban ati ro Yohanes baptis raa, mamo snok mam ati ro Yesus yaut yamoʼt sawro rAit sikba anu beta to. Kbe ait retait kro anu tna bkyas bo ro anu bmat: Bkyas bwe Yesus yrok yasen.”
ACT 1:23 Tna ana beta msok raa mabo ewok. Raa mabo ewok reto, sait yasom Yusuf (ja raa mawe yasom Barsabas ye tna yasom Yustus ye), tna msok ait sait yasom Matias.
ACT 1:24 Tna ana skabuk mayoh Tuhan mawe, “Tuhan; Nyõ nhar raa mhaf wana beta. Nerif kʼamu awya ro Nyõ ksoh nsok.
ACT 1:25 Raa retait shauk hroh ro Yudas yamo raabis aNyõ. Kbe yno bo woNyõ ro nbis. Yudas btek tna sikba hroh reto. Yamo ykair, btek kayah.”
ACT 1:26 Tna ana hre tane, he maut Matias. Tibyo ait kro raabis ro Yesus tna ana beta mabo 12.
ACT 2:1 Mabu ro Pentakosta to, raa ro smot Yesus beta siret mam yuk sau.
ACT 2:2 Tna ana ro hre mam amah mato reto beta mari bo ro hmu sau. Hmu mfi foos ro msai toni mbam ayoh mama.
ACT 2:3 Tna ana mmat mfi bo tafoh mait feto. Tna tafoh reto mbet raa mana abyõ beta.
ACT 2:4 Tna Har ro Tuhan mbo ana matak. Tibyo ana masen mkyas bo mkah mai raa roto. Mkyas mamyot bo ro Har sobu ana.
ACT 2:5 Ja raa ro agama Yahudi mawat mama makyõ korat rana reto mam kota ro Yerusalem. Tna tahun reto ye raa agama Yahudi mbam rabin roto makin mamaʼt Yerusalem ye. Ana weto to raa ro ja mur-mur skabuk Allah.
ACT 2:6 Ati ro ana mari bo ro hmu reto to, raa mhoh mama mmat. Mama mari he raa Kristen weto mkyas bo: Ana makin mari bo ro ana mkyas mkah mai wana-wana tibyo ana beta mrok.
ACT 2:7 Ana mrok ktak toni tna mawe kʼanya mawe, “Ana ro mkyas bo weu beta raa mbam provinsi ro Galilea!
ACT 2:8 Fyi sai re ana mkyas bo mkah mai wanu beta to?
ACT 2:9 Anu fo raa ro bbam rabin ro Partia, rabin ro Media msya rabin ro Elam ye. Tna taro to raa ro mbam rabin ro Mesopotamia, provinsi ro Yudea, provinsi ro Kapadokia, provinsi ro Pontus, rabin ro Asia,
ACT 2:10 rabin ro Frigia, rabin ro Pamfilia, bangsa ro Mesir msya raa ro mbam bangsa ro Libia ro kene mam kota ro Kirene ye. Tna anu taro fo nbam kota ro Roma, tna taro to nbam sato ro Kreta, nsya rabin ro Arab bo. Anu beta fo raa bbam raa mana ro Yahudi ye tna bsya raa roto ro mrok kro agama Yahudi tna sai. Anu bri raa Kristen wefo mkyas bo yase ro Allah yno mkah mai wanu ro ja bmai soo.”
ACT 2:12 Ana ktak beta. Tna ana mtu kʼanya mawe, “Bo bawya ro mefo ee?”
ACT 2:13 Menohe ana taro sret raa Kristen weto mawe, “Ana weto mata anggur ro msu tna bisir meto!”
ACT 2:14 Tibyo Petrus yasen yros ysya raabis mabo 11 refo tna ykyas bo mkah mai ro mase kʼraa weto beta yawe, “Anu raa ro Yahudi nsya raa ro nhau mam Yerusalem sor: Nri bo ro jõ tkyas kʼanu fo, tna nhar kaket:
ACT 2:15 Raa ro mkyas bo mkah mai raa roto wefo fo, ana bisir mfi bo anu nwe to, fee! Rabu sai fares mefo.
ACT 2:16 Menohe bo msai ro anu bmat refo oh mi bo ro tiwya Allah ybis nabi Yoel yama ykom mam aam rait yawe,
ACT 2:17 ‘Meen, kene mam sboh rau to, Jõ too Har aJõ tee kʼraa beta. Feto to ku ro sme wanu msya ku ro ano wanu bo to, kbe ana makah soo woJõ mamo mkyas kʼraa. Tna ku ro tna mmat bo ro Jõ terif kʼana ye. Tna raa mabi kbe smi mmat bo ro Jõ tkait kʼana ye.
ACT 2:18 Tna mam ati reto ye, sryan woJõ ro sme msya ro ano bo to, kbe Jõ too Har aJõ tee kʼana ye. Tna kbe ana makah soo woJõ mamo mkyas kʼraa ye.
ACT 2:19 Tna kbe Jõ tno bo ro msai mam ayoh. Tno bo msai mam tabam refo ye afo re raa mmat tna mhar Jõ tatak aJõ. Meen raa mmat mees, mmat tafoh msya wasi ro maun maut ye.
ACT 2:20 Tna kbe ayõ haberek mti mamur htoh, tna kbe snyi haberek mkek mfi mees wia, tna fo ayõ ro Tuhan to mama. Ayõ reto to, ayõ ro msai toni.
ACT 2:21 Tna awya ro ksoh kro Tuhan kbe ykai riof.’”
ACT 2:22 Tna Petrus yawe, “Raa ro Israel: Nri bo ro jõ tawe fo: Nnaut oh: Yesus raa ro Nasaret tait, tii yno bo ro msai. Ait sair bo ro hnah re kbe raa mmat tna mrok ktak tna waa. Bo weto beta Ait yno re kbe anu nmat tna nhar nwe yatak rAit to mbam Allah.
ACT 2:23 Tna Allah ysan Ait kʼanu, raa ro agama Yahudi, re anu nsan Yesus kʼraa ro wase Allah. Ana weto mame Ait yajat mam ara warok. Anu nesait oh mi nsom isti reto to. Bo weto beta mamo mamyot iso ro tiwya Allah yhar tna saim wia to.
ACT 2:24 Menohe Allah yno Yesus yrok yasen. Yesus Raa ro yatak. Ait yhai tibyo fee. Allah yno Yesus yrok yasen.
ACT 2:25 ⌞Mam aam ro Mazmur⌟ Daud ykom ⌞bo ro Yesus yawe kʼTuhan Allah⌟ yawe, ‘Jõ tmat Tuhan yhau kait ysya Jõ yoyo. Allah yros mam ati ro Jõ tatem ati tna yban Jõ. Feto Jõ waa bo mkair kbe raa mno mai kʼJõ to fee.
ACT 2:26 Kbe thai to, tna Tuhan Allah beak Jõ takus mam sawro ro hai fee. Jõ fi Ait ro Allah ybis yama. Hai aJõ, kbe Ait sayõ rof makus mnis fee. Feto oh mi Jõ simaut mase. Jõ bibi Nyõ yoyo ye.
ACT 2:28 Nyõ nerif iso kʼJõ re tamo tru roon ro hame wajin. Soh thau tsya anu to, kbe Jõ simaut mase.’”
ACT 2:29 Tna Petrus ybo ykyas renti yawe, “Raa wamu: Jõ thar tawe far-far ro riwai mkyas raja Daud fee. Anu hohos ranu Daud tiwya yhai oh. Tna raa moo hai rait sama mam isra mato. Tna anu bhar isra reto mhau tno fares.
ACT 2:30 Daud tait nabi ro Allah ybis yama ykyas bo wAit. Tna Allah ykyas bo kʼait yawe, ‘Meen Jõ tsok Raa sait ybam ku renti wonyõ. Tna Raa retait kbe Jõ tse hre shauk hroh anyõ mkah bo yamo Raja.’
ACT 2:31 Daud yhar bo ro meen Allah yno. Feto oh mi ykyas yawe, ‘Mesias meen yhai tna yrok yasen. Kbe Allah sikba Mesias yakus mam sawro ro hai fee. Tna hai rAit mhau makus mnis bo fee ye.’
ACT 2:32 Yesus oh mi Allah yno re yrok yasen to. Tna amu, raabis wait beta, tii nmat Ait mkah nsu wamu.
ACT 2:33 Allah tubat Yesus yse hre mam hroh ro mbe. Tna Ait yoo Har rAit yse kʼYesus mnan fi tiwya Ait yawe yno. Har rAit reto oh mi Yesus yoo yse kʼamu ye. Tibyo amu nkyas Ait yasom mkah mai aro rau-rau. Bo reto anu nmat tna nri kri-kri fo.
ACT 2:34 Daud ykom bo ro Allah yawe kʼYesus: ‘Tuhan Allah yawe kʼTuan ajõ yawe: “Nama, hre nsya Jõ mam ati ro tatem ati; hroh ro mase reto. Tna raa ro byoh, raa ro srau kair kʼNyõ to, meen tno ana mbtek mam mte. Kbe nyõ naa nber ana weto. Tna Nyõ nros natak abyõ ana, nbo ana.”’ Mazmur 110:1 Anu bhar bwe Daud yesait yamoʼt sawro tna hre ysya Allah feto fee.
ACT 2:36 Feto to tkyas kʼanu raa ro Israel beta, tawe: Nhar nwe Yesus ro anu nme yajat tait, Allah tubat Ait yse abyõ, yawe Yesus fi Tuhan. Yawe Yesus fi Mesias ye.”
ACT 2:37 Ana mari feto tna bokyas reto mroh mame kʼana mhaf. Tibyo ana mtu kʼPetrus ysya raabis (rasul) makin taro fo mawe, “Amu kbe nno bawya?”
ACT 2:38 Tna Petrus yawe kʼana yawe, “Nashana oh! Tna nbis raa baptis anu mkah Yesus yasom. Afo re Ait yyon iro wanu ye. Tna kbe Ait yoo Har ro Allah yse matam anu.
ACT 2:39 Tuhan Allah ranu kbe yoo Har ro rAit yse matam awya sai ro Ait ytu yama yo kʼAit: Yse kʼanu raa ro agama Yahudi bsya kukek wanu ye, tna msya raa roto ro wase Allah ye.”
ACT 2:40 Tna Petrus ykyas bo taro mawat ye: Ait yawe wa kʼana yawe, “Raa ro mfo wefo mhau mam tabam refo to, ja mno bo ro mkair-kar. Kbe meen Allah ymit safo kʼana. Snok nbam kʼana weto tna nmo no kʼAit re kbe nkai riof!”
ACT 2:41 Raa ro mari bo ro Petrus ykyas tna mawe ana smot Yesus ye to, raa mabo 3000 bo feto. Ana mawe raa baptis ana.
ACT 2:42 Ana mari bo ro raabis mkyas to, mbo mno. Tna ana miranya kaket, tna makyõ Korat ro Mait Roti Su afo re ana mnaut Yesus ro yhai to. Tna ana skabuk su ye. Bo weto beta to, ana mno yoyo.
ACT 2:43 Raabis ro Yesus mno bo ro msai. Ana mno bo ro msai tna re raa mmat tna mhar Allah yatak rAit. Tna raa beta mrok ktak tna waa Allah.
ACT 2:44 Raa ro smot Yesus weto to, beta msuk siret su. Tna bo bawya sai ro ana mse to, bo wana su.
ACT 2:45 Ana moo bo wana masim tna moo mabyoh rau to saim kʼraa kinyah wana ro mse bo mabut.
ACT 2:46 Tna rabu ti wawa ana mhaf sau siret su mam Samu ro Allah. Ana siret makyõ Korat ro Mait Roti Su, tna mait boit su mam amah aro mamo-mamo ye. Ana simaut mase mno bo weto. Ana aro srau ewok fee.
ACT 2:47 Ana mbaut Allah yoyo. Tna raa beta ksoh ana ye. Rabu ti wawa to Allah yoo riof yee kʼraa taro u. Tibyo raa mkbair ro smot Yesus to mrok mase renti.
ACT 3:1 Ti sau fo, Petrus ysya Yohanes mbewok mamo skabuk mam Samu ro Allah. Ana mamo mam wore ayõ hawer bo feto. Ja raa ro Yahudi skabuk mam ayõ reto.
ACT 3:2 Ana mbewok mamo to, raa masom bi ro yaa mhai sait kri-kri mama ye. Ait retait yaa mhai. Yaban ykek to feto bait oh. Ti ro raa mabe ynan feto oh. Tna rabu ti wawa ja raa makah bi ait mama mse mam bohra makit Samu ro Allah reto. Ana mse ait hre mam masa ro masom 'Masa ro Moof'. Ja ait hre mam yuk reto yayoh pitis kʼraa ro mama twok mam Samu ro Allah.
ACT 3:3 Ait hre tna ymat Petrus ysya Yohanes mama twok mam bohra Samu ro Allah. Tna yayoh bo kʼana mbewok yawe, “Natmof jõ, noo pitis nee mbau a!”
ACT 3:4 Ana mbewok masu sayõ ait tna Petrus yawe kʼait yawe, “Nasu nmat amu wia!”
ACT 3:5 Tibyo ait yasu ymat ana tna ait ynaut yawe kbe ana moo pitis aro mee kʼait.
ACT 3:6 Menohe Petrus yawe kʼait yawe, “Jõ tse pitis aro fee saut. Menohe bo ro jõ tatak tno fo, tno kʼnyo: Mkah Yesus Kristus ro Nasaret yatak rAit to, jõ tbis nyõ nasen namo oh!”
ACT 3:7 Tna Petrus ybo ait refi yatem ati ybo tubat yasen yros. Petrus yno feto si to, ait refi yaa masu mrok matak tna yaa beta mrok matak ye.
ACT 3:8 Ait yasen srot tna kro ana twok mamoʼt bohra Samu ro Allah. Ait simaut mase yamo tna tbat- tbat ybaut Allah.
ACT 3:9 Raa beta mmat he raa retait yamo tna ybaut Allah feto.
ACT 3:10 Ana mhar mawe ait retait ro ja soo hre yayoh pitis mam 'Masa ro Moof'. Tna mrok ktak sai mawe, “Ait ro yaa mhai retait; yaa moof yasen yamo a?”
ACT 3:11 Ana mros mam Samu ro Allah amah hawar mase ro mne sau. Hawar reto masom Serambi ro Salomo. Ait ro riwai Petrus yisoh retait simaut tibyo yatem ybo Petrus ysya Yohanes matak fares fo. Tna raa beta mhoh beak-ak anya mama mo kʼana tna raa mmat bi ait bo yaa haberek moof to, ana ktak sai.
ACT 3:12 Tna Petrus ymat raa msis-sas refo tibyo yasen yawe kʼana yawe, “Raa ro Israel, anu nmat bo ro msai refo tna nrok ktak nno fyi? Anu nmat sas amu to, nrok nwe amu nkah ntak ramu oh mi nisoh ait refi re yoof yasen yamo to ma. Bo moof ro amu nno to, mno re amu ntak nisoh ait refi fo fee ye.
ACT 3:13 Allah ro anu hohos na wanu Abraham, Ishak, ysya Yakub, ja smot to, Ait oh mi yno Yesus Sryan rAit yrok yase toni to. Yesus Ait oh mi tiwya anu nsan kʼPilatus. Tna Pilatus yawe bitsre Ait he mfe, anu nwe, ‘Bitsre Ait ma!’
ACT 3:14 Yesus, Ait yama yno bo ro Allah ybis sai, Ait yato mboh sai, menohe anu hawe Ait. Tna anu nyoh kʼPilatus nwe bitsre Barabas ro ja yame ajat riryõn kʼanu.
ACT 3:15 Tna Yesus oh mi sair iso ro raa mhau mae tinyi tait. Anu nme Ait yajat oh. Ait yajat menohe Allah yno Ait yrok yasen yaam u. Tna amu oh mi nsu nmat bo weto beta to.
ACT 3:16 Anu beta nhar ait ro yaa mhai. Yesus yatak rAit oh mi mno ait refi yaa rait matak to. Amu smot Yesus. Amu nhar nwe Ait yasom rAit to matak toni. Tna bosmot reto oh mi misoh ait yaa moof matak. Anu nsu wanu beta nmat fo.
ACT 3:17 Raa wamu; tiwya anu nsya raa mabi wanu wase nwe Yesus tait Mesias fee. Tna anu nme Ait yajat. Anu wase oh mi anu nno bo ro mkair reto.
ACT 3:18 Tna Allah sayõ anu nno feto rof. Yawe bo reto mabo mamo mnan si bokyas ro tiwya Ait ybis nabi wAit mama mkyas wia. Tiwya ana mawe, ‘Mesias tait meen ykai bo ro samyoh mai kʼAit wia tu.’ Mazmur 2:1-2, 22:1; Yesaya 53:7-8 Bo reto mabo rau oh mefo.
ACT 3:19 Nri beta! Tna nashana oh! Tna haberek ne nma no kʼAllah, afo re kbe Ait yyon iro wanu.
ACT 3:20 Tna Ait yno re anu nhaf simaut. Meen Tuhan Allah ybis Yesus hah yama u. Tiwya Ait ysok Yesus Kristus yamo Mesias ranu.
ACT 3:21 Mfo refo Yesus yhau mam sawro ro Allah wea. Ait yhau mam beto mamo snok oon ro tiwya Allah yawe. Tna ati reto to, meen Ait yisoh bombra beta mam arin aso mrok moof wea. Tiwya Allah ybis nabi na wAit mamo mkyas bo rAit. Ait ybis ana mkyas bo reto matim wia oh.
ACT 3:22 Tiwya Allah ybis nabi Musa yama ykyas yawe, ‘Tuhan Allah meen teta Nabi sait ybam raa wamu wefo yfi jõ. Tna bo ro Nabi retait yawe kʼanu beta to, nri kaket!
ACT 3:23 Tna raa ro hawe bokyas rAit to, kbe Allah tufrok ana mbam kʼraa wAit mamo mhau mne.’
ACT 3:24 Nabi beta sor tiwya mkyas oon ro meen mama reto ye. Nabi Samuel ye, tna ysya nabi taro sor ro mrof ait to ye. Ana mkyas bo ro meen mabo mam wore weto to, mkyas matim wia.
ACT 3:25 Tna anu oh mi ku renti ro nabi na weto to. Bo ro Allah ysi kʼana yawe meen yno to, ykyas kʼanu ye. Nnaut bo ro tiwya Allah ysi kʼAbraham yawe fefo: ‘Ku renti wonyõ meen sait oh mi yno re Allah yno bo ro moof kʼraa ro tabam refo beta.’
ACT 3:26 Tna au oh mi Allah ybis Yesus, Sryan rAit, yama yo kʼanu raa ro Yahudi wia, afo re Ait yno bo ro moof kʼanu. Bo moof ro Ait yno to oh mefo: Ait yno re anu sait-sait haberek kro Ait tna ne nmo iso ro mkair u fee.”
ACT 4:1 Petrus ysya Yohanes mbewok mkyas bo kri-kri msya raa msis-sas weto fares. Tna raa mabi ro agama Yahudi baro mama mo kʼana mbewok. Ana ro mama to, imam ro Yahudi baro ye, raa ro Saduki baro msya aban mana raa sbe ro ja kmot Samu ro Allah ye.
ACT 4:2 Ana mbewok mkyas bo kʼraa weto mawe, “Yesus yrok yasen oh. Feto to, kbe raa ro mhai meen mrok masen maam u ye.” Raa mabi ro Yahudi weto mari bo ro ana mkyas reto. Tibyo mrok kmo ana mbewok.
ACT 4:3 Tibyo ana mfot ana mbewok tna makah mamo mbu mam bui mato. Menohe arin fo mti oh. Tibyo ana mbewok mhau mam bui mato reto snok mam ayõ ro menrabu.
ACT 4:4 Raa makin ro riwai mari bo ro ana mbewok mkyas weto to, mawat mama smot Yesus. Ana weto msya raa ro smot Ait wia to, raa sme beta mabo trion 5000 bo feto. (Fnya msya kukek wana raa ntuu fee.)
ACT 4:5 Rabu fo, raa manes ro agama Yahudi mama siret su mam Yerusalem: Raa mabi, msya guru agama ye hre siret beta.
ACT 4:6 Bi Hanas ro yamo imam yase, bi Kayafas, bi Yohanes ysya bi Aleksander tna msya raa ro mbam raa mana ro ja mamo imam mase wana to, ana beta mama siret ye.
ACT 4:7 Tna raa makah Petrus ysya Yohanes mamo mse mros susai mam wore ana siret fo, tna ana mtu bo kʼana mbewok mawe, “Iis anu mbewok nisoh raa retait mkah awya yasom? Iis anu nisoh ait mkah awya yatak rait?”
ACT 4:8 Tna Har ro Tuhan matam Petrus matak, tibyo ait yawe kʼraa weto yawe, “Anu raa manes ro Yahudi nsya raa mabi sor:
ACT 4:9 Mfo anu ntu srah refo kʼamu nri. Safo ro anu ntu oh mi amu mbewok nno bo moof kʼait ro kiyam sait to a? Tna anu ntu kʼamu nwe fyi oh mi amu nisoh raa retait re yoof to.
ACT 4:10 Amu nkyas kʼanu beta nsya raa ro Israel beta ye afo re anu nhar bo refo kaket: Taa ait retait yaa mhai menohe mkah Yesus Kristus ro ybam Nasaret yatak rait oh mi amu nisoh raa retait. Yesus tait anu nme yajat tna Allah yno Ait yrok yasen. Ait retait oh mi yno re raa retait yrok yoof tna yros re anu nsu nmat beta to.
ACT 4:11 Bokom ro Allah mkyas Yesus mawe, ‘Raa sgi samu sau mkah fraa. Ana moo fraa sau sanet. He mfe, ana hawe fraa reto tibyo mawah beak makus to. Menohe fraa reto mrok mamo fraa ro moof.’ Mazmur 118:22 Yesus tait yfi fraa reto. Tna anu fo nikyak Ait wia tinyi nfi raa ro sgi samu reto.
ACT 4:12 Ait yesait aran yatak yoo riof ro mase yee kʼraa. Raa roto fee. Mam tabam refo fo, Allah yno Yesus yesait aran yatak yoo riof yee kʼraa.”
ACT 4:13 Tna raa ro siret weto mhar mawe ana mbewok to, raa ro tiwya mkom bo mam sekolah tinggi to fee. Tibyo ana mrok ktak sai mmat bo Petrus ysya Yohanes matak mros mkyas to. Ana mhar mawe ana mbewok to tiwya msya Yesus ye.
ACT 4:14 Tna ana mmat bi ait ro iis Allah yisoh ye. Mmat ait retait yros yatak mam beto ysya ana ye. Tibyo ana mastako ana mbewok fee. Ana shait sai.
ACT 4:15 Feto to ana mbis ana mbewok frok mbam siret reto wia, tna ana saim bo kʼanya mawe,
ACT 4:16 “Raa ro Yerusalem beta mhar mawe ana mno bo ro msai. Kbe anu btak bwaar bo reto fee ye. Feto to kbe anu bno bawya kʼana mbewok refo u?
ACT 4:17 Anu hawe raa mabah msas bo refo be kbe raa beta mari. Feto to nma, anu bwe wa kʼana mbewok. Bwe ana mkyas bo mam Yesus yasom u ma.”
ACT 4:18 Tna fo raa manes weto mtu Petrus ysya Yohanes me mama twok u. Tna ana mawe wa kʼana mbewok mawe, “Ne nkyas Yesus yasom u kʼraa ma ee!”
ACT 4:19 Menohe Petrus ysya Yohanes mbewok mawe si kʼana mawe, “Anu nesait nnaut nwe fyi? Ja Allah ksoh yawe amu mbewok nri bo ro awya yawe? Anu beta fe bo ro Allah yawe a?
ACT 4:20 Nko hawe sai amu bewok nkyas Yesus yasom renti. Bo ro amu nsu nmat msya bo ro amu nri oh to, kbe amu nbo nkyas yum!”
ACT 4:21 Ana ro mtu srah weto mkai safo makan aro fee. Tna ana mhar mawe ait ro Yesus yisoh retait, umur 40 tahun bo feto. Raa makin mmat bo msai reto tna bibi Allah. Feto to raa manes weto waa mawe raa makin kbe kmo ana ye. Tibyo ana mawe wa kʼPetrus ysya Yohanes matak u ye. Tna fo bitsre ana mbewok mamo.
ACT 4:23 Raa manes ro Yahudi bitsre Petrus ysya Yohanes. Tna ana mamo mo kʼmafoh na wana ro smot Yesus. Tna bo ro riwai imam manes msya raa mabi ro Yahudi mkyas kʼana to, ana mbewok mkyas beta.
ACT 4:24 Ana mafoh na wefo mari feto, tibyo ana skabuk mawe kʼAllah mawe, “Tuhan; Nyõ oh mi nfen ayoh, tabam, aya sawan msya bombra beta ye.
ACT 4:25 Amu nnaut bi Daud, hohos ramu. Ait yamo sryan aNyõ. Tna ait ykyas yawe, ‘Raa mana makin mrok minin mno fyi? Tna ana hre saim bo mati sai mno fyi! Raja makin ro tabam refo siwyan mame anya oh. Tna raa manes sor berur mhau mam wo sau mno bo ro mkair mai kʼTuhan Allah ysya Mesias rAit ye.’ Mazmur 2:1-2 Bo ro tiwya Daud ykyas reto to, bokyas aNyõ. Bokyas ro Nyõ nkyas kʼait nkah Har aNyõ.
ACT 4:27 Tuhan: bo ro tiwya Nyõ nbis Daud ykom reto to, mabo oh. Bo reto oh mi Raja Herodes ysya gubernur Pontius Pilatus siret su msya raa mana ro Israel ye tna msya raa mana roto makin ye to. Ana siret su mam kota refo saim bo mawe mame Yesus yajat. Yesus tait sryan aNyõ ro Nyõ nesait nbis yama. Ait tait, Nyõ nbis yamo Mesias.
ACT 4:28 Amu nhar nwe bo ro ana mno reto to, Nyõ nesait saim mamyot Nyõ natak anyõ msya ksoh aNyõ matim wia oh. Tna ana mame Yesus yajat.
ACT 4:29 Tuhan: Mfo wefo raa mabi ro Yahudi mawe kbe ana mno bo mkair-kar mai kʼamu ye. Feto to amu nma no kʼNyõ soh-soh nwe noo natak aNyõ nee kʼamu afo re amu nros ntak bito nkyas bokyas aNyõ.
ACT 4:30 Tna nisoh raa ro kiyam mrok moof. Nno bo ro msai, sair bo ro hnah re kbe raa makin mmat tna mhar natak aNyõ. Tna mhar mawe Yesus, sryan aNyõ ro Nyõ nesait nbis yama tait, yoo yatak rAit yee kʼamu afo re amu nno bo ro msai weto.”
ACT 4:31 Ana skabuk mkak si to, amah ro ana skabuk reto mrok mnah-nah. Tna Har ro Tuhan mbo ana matak beta, tibyo ana matak mkyas Watum ro Allah. Waa fee.
ACT 4:32 Mam wore weto to, raa makin ro smot Yesus weto to, ana mhaf sau. Tna bombra ro ana aro mse to, ana mawe bo rana mesait kar fee. Ana mawe bo wana beta. Tibyo raa aro mse bo mabut fee. Ana ro mse bo mnan to, mabe bo wana weto fee. Moo mee sai.
ACT 4:33 Tna Allah yoo yatak ro mase yee kʼraabis (rasul) wAit. Tibyo ana ja mkyas Yesus yasom kʼraa, mawe Allah yno Yesus yrok yasen yaam u. Tna Allah yoo bouum mawat yee re ana beta mhau matak mno bo wAit ye.
ACT 4:34 Ana aro mbo amah, tna aro mbo tabam. Ti aro-aro soh ana mmat raa Kristen taro mhau matem marak to, ana masen masim bo wana. Masim bo tna moo mabyoh rau to, mbo mama mee kʼraabis ro Yesus. Tna raabis weto saim kʼana ro ja mhau matem marak. Feto kbe bo wana mabut fee. Ana aro bo mhau matem marak u fee.
ACT 4:36 Ana sait yasom Yusuf. Ait ja raabis mtu yasom Barnabas ye. (Mam mai ramu to, mawe ‘raa ro ja ykyas bo moof re kbe raa sorni sraujin rana’). Ait to raa mana ro Lewi ybam sato ro Siprus.
ACT 4:37 Ait yasim armato rait tna yoo mabyoh rau to, yama ysan kʼraabis weto mbo tna saim kʼraa kinyah wana ye.
ACT 5:1 Ait sait yasom Ananias tna yfain masom Safira. Ana mbewok masim tabam wana baro ye.
ACT 5:2 Menohe ait yabe mabyoh rau baro yse kʼana mesait wai. Tna yoo baro ysan kʼraabis yawe, “Mabyoh rau beta oh mefo.” Bo ro Ait yno reto to, yfain mhar ye oh.
ACT 5:3 Menohe Petrus yawe kʼait yawe, “Kabes yabi (Iblis) mbo nyõ nhaf anyõ meto! Thar tawe nyõ nabe pitis reto jaro nse kʼnyõ. Nyõ nno safo meto! Sioh Har ro Tuhan to ma!
ACT 5:4 Ati ro nyõ nasim tabam reto fefares to, tabam reto tabam anyõ. Tna ati ro nyõ nasim to, pitis reto mhau kʼnyõ beta ye. Soh riwai nyõ ksoh nabe pitis beta mhau to, reto safo aro fee. Menohe nyõ sioh Allah oh meto! Nyõ sioh raa meto fee!”
ACT 5:5 Ananias yari feto tibyo yatu btek yai mam tabam yajat. Tna raa ro mari bo reto beta to, mrok waa toni.
ACT 5:6 Tibyo ku sme ro mere baro mama sro ajat refo, tna ana teta masom mamo sama.
ACT 5:7 Ayõ tuuf bo feto firwas, tna Ananias yfain mama twok. Au wase bo ro mai kʼau maa Ananias to, fefares ye.
ACT 5:8 Tna Petrus ytu kʼau yawe, “Sik ma nawe abyõ kʼjõ: Tabam ro anu nsim reto to, mabyoh rau beta oh mefo a?” Tna au mawe, “Ae, pitis beta oh meto.”
ACT 5:9 Menohe Petrus yawe, “Anu mbewok saim kʼanya nwe sanet Har ro Tuhan meto a? Nmat mere ro mama fo. Riwai ana sama hai ro naa. Ana kbe teta hai anyõ makah mamo sama naut.”
ACT 5:10 Tibyo fai au matu mai mam tabam majat ye, kene kait mam wore Petrus yros to. Tna mere weto twok mmat he fai au majat. Tna ana teta ajat reto masom frok mamo sama ye mam ati ro kene maa yajoh jaro.
ACT 5:11 Tibyo raa mana ro smot Yesus msya raa roto ro mari bo reto to, mrok waa beta ye.
ACT 5:12 Tna raabis ro Yesus mno bo msai, tna sair bo hnah mawat ye afo re raa makin mmat tna mhar Allah yatak rAit. Tna raa ro smot Yesus to, mhaf sau. Ana beta ja mama siret su mam 'Serambi ro Salomo'.
ACT 5:13 Raa roto taro waa mama berur su msya raa ro smot Yesus weto. Menohe raa ksoh ana ro smot Yesus weto tna mawe ana ja mno bo moof toni.
ACT 5:14 Tna rabu ti wawa raa msis-sas mama smot Tuhan Yesus tna mama kro ana miranya su ye. Ana ro mama weto to, raa sme taro tna msya fnya taro ye.
ACT 5:15 Raa mmat raabis mno bo msai. Tibyo makah raa ro kiyam sor frok mama mse mam iso mabi. Ana taro raa mse mjin abyõ mam ambar tna taro mse mjin mam aam wana ye. Ana mno feto afo re soh Petrus yama frit iti to, yawyan mai ana tna kbe mno ana mrok moof ye.
ACT 5:16 Tna raa mbam remo ro mhau kene mam kota ro Yerusalem sor to, mama ye. Ana makah raa ro kiyam msya raa ro kabes mbo ye mama. Tna Allah yisoh ana mrok moof beta.
ACT 5:17 Menohe imam agama Yahudi ro yase ysya raa wait ro Saduki mmat bo ro kuber ro Yesus wAit mno. Tna ana mrok mhaf kair toni.
ACT 5:18 Tna ana mbis raa mamo mfot raabis ro Yesus mbu mam bui.
ACT 5:19 Menohe mti rau to malaikatTuhan sau mama mitrah masa ro bui reto sor tna tusnok ana frok. Tna malaikat reto mawe kʼana mawe,
ACT 5:20 “Nmo nros mam Samu ro Allah tna nkyas bokyas ro mroon refo beta.”
ACT 5:21 Ana mari feto, tibyo rabu momo fo, ana mamo twok mam Samu ro Allah. Tna masen mkyas watum ro Yesus reto. Mam ati reto ye imam ro yase ysya raa wait hre mkyas bo ro iis. Tna ana mtu raa manes ro ja mtu safo raa ro Yahudi sor to, mawe mama siret su. Raa manes ro Israel beta hre su. Tna fo ana mbis raa mamo tufrok raabis ro Yesus mbam bui makah mama.
ACT 5:22 Tna raa weto mamoʼt bui. Mamo tna mmat he raabis weto marak. Tibyo raa weto me hah mamo mkyas kʼraa ro siret wea weto mawe,
ACT 5:23 “Amu nmoʼt bui, tna nmat mato matak wa fares tna raa ro kmot bui mros kmot sai fares. Menohe amu nitrah masa reto to, amu nkai raa sait bo yhau mam bui mato reto fee!”
ACT 5:24 Aban mana raa sbe ro ja kmot Samu ro Allah tait ysya imam manes mari bo ro raa mkyas feto. Mari tna ana mrok miskawowo. Tna mawe kʼanya mawe, “Bo bawya ro mabo mefo? Kbe meen sboh rau to fyi?”
ACT 5:25 Tna fo raa sait yama yo kʼraa manes ro Yahudi weto tna yawe, “Raa ro iis anu nfot nbu to, ana mros mkyas bo mam Samu ro Allah mno.”
ACT 5:26 Tibyo ait yabi ro ybo raa sbe ro ja kmot Samu ro Allah ysya aban mana wait mamo mbo raabis ro Yesus weto makah mama. Ana mbo raabis weto to, mno bo ma fee, ana waa bo kbe raa msis-sas refo mrok kmo mawah fraa mai ana majat.
ACT 5:27 Raa sbe mbo raabis wefo makah mama mse mros mam wore ana ro ja mtu safo raa ro Yahudi to, hre siret wea. Tna imam rana ro yase ytu bo kʼraabis ro Yesus yawe,
ACT 5:28 “Tiwya amu nwe wa anu nwe anu nkyas Yesus yatak rait u ma. Menohe anu nri fee sai, tibyo beroh nmo nkyas Yesus yasom kʼraa ro Yerusalem beta mari oh! Tna anu nkyas kʼraa nwe amu oh mi nsom mees ro Yesus rAit to.”
ACT 5:29 Menohe Petrus ysya raabis makin taro fo mawe, “Amu nri bo ro Allah yawe tu oh. Soh raa mawe bo roto hayah to, amu nri ana to fee.
ACT 5:30 Anu nme Yesus mam ara warok yajat. Tna Allah ro anu hohos na smot tait, yno ait yrok yasen.
ACT 5:31 Ait oh mi Allah yse hre mam hroh ro mbe re yamo aban mana ro yoo riof ro mase yee kʼraa to. Yno feto afo re raa ro Israel mashana tna Ait yyon iro wana.
ACT 5:32 Amu nsya Har ro Tuhan ye oh mi nsu nmat bo weto beta. Allah ysan Har rAit kʼraa ro mari bo ro Ait yawe.”
ACT 5:33 Bo ro raabis weto mkyas to, mame kʼana mhaf tibyo ana kmo tna mnaut mawe mfot raabis wefo mame majat to.
ACT 5:34 Menohe raa ro Farisi sait yasom Gamaliel yasen yros. Bi ait tait guru agama ro Yahudi. Tna ja raa makin mari bo ro ait yawe. Ait yasen yros tna ybis raa tufrok raabis weto mamoʼt mne rere wia.
ACT 5:35 Ana frok mamo wia tna fo ait yawe, “Raa wojõ: Nnaut kaket bo ro kbe anu nno kʼraa weu.
ACT 5:36 Raa wefo mno bo mnan si mfi bo ro bi ait sait yasom Teudas tiwya yno. Teudas tait frok yama tna yawe ait raa ro yase. Tna raa mabo trion 400 mari kro ait ye. Menohe ait raa mfot mame tna fo raa ro ja kro ait weto mso-sa ha-hayah ye. Tis rau to, bo ro ait ykyas to, mabo fee.
ACT 5:37 Teudas mkak tna fo mam ati ro Raja Kaisar yawe ntuu raa makin wait to, raa sait naut yasom Yudas frok ye. Ait retait ybam provinsi ro Galilea. Ait hawe bo raja Kaisar ybo rabin refo tna raa msis-sas mari kro ait ye. Menohe ait raa mame, tibyo raa ro kro ait weto mso-sa ha-hayah ye.
ACT 5:38 Feto to jõ tawe kʼanu tawe, nme raa ro kro Yesus wefo majat ma. Anu kbe bhau bmat rof bo ro ana mno sai. Soh bo reto mbam kʼraa to, kbe mso-sa sai akus.
ACT 5:39 Soh bo reto mbam kʼAllah to, kbe anu btai bno wa bo ro ana mno bo fee saut, tna kbe anu bfa bsya Allah yesait sai oh meto.”
ACT 5:40 Raa weto srau sau mari bokyas reto. Tna ana mtu raabis weto twok. Tna ana mbis raa moo too mok-mak ana. Tna mawe wa kʼana mawe, “Nkyas Yesus yasom u to ma ee!” Tna raa manes ro Yahudi weto mitsre raabis ro Yesus frok mamo.
ACT 5:41 Raabis weto sikba amah reto frok mamo mkah simaut ro mase. Ana mhar mawe bosmot wana kbe mno re ana mkai bo ro samyoh. Mawe, “Allah ymat amu yawe nhaf moof mnan si. Tibyo amu nkai bo reto.” Mnaut feto tna ana simaut mase.
ACT 5:42 Tna fo rabu ti wawa ana mamo mkyas Yesus yasom renti. Mawe, “Ait tait Mesias.” Ana mkyas Bokyas Moof (Injil) refo yoyo mam Samu ro Allah tna mam amah aro maut mroh ye.
ACT 6:1 Ti weto to raa taro mawat naut mama smot Yesus. Ana weto mbam raa mana ro Yahudi beta. Ana taro ja mkyas bo mkah mai ro Yunani, tna taro to, ja mkyas bo mkah mai ro Yahudi ye. Tna mkbair ro ja mkyas bo mkah mai ro Yunani weto mno mmai msya ana ro mkyas bo mkah mai ro Yahudi. Ana mawe, “Raa ro ja saim boit mee kʼraa soo to, ana saim mee kʼsemit wanu kaket fee.”
ACT 6:2 Raabis mabo 12 reto mari bo raa weto mawe. Tibyo ana mtu raa jemaat beta mama hre su mkyas bo reto. Ana mawe, “Raa wamu, soh amu nesait sui saim boit nee kʼraa to, amu nrero re kbe nkyas Watum ro Allah kaket fee. Feto to mkair.
ACT 6:3 Nma, anu bsok raa wamu mabo krema tna bbis ana saim boit mee kʼsemit wanu. Kbe anu saso raa ro ja raa hartu, raa ro ja Har ro Tuhan mbo matak, tna ro mhar bo kaket ye. Anu bsok raa ro mfi feto.
ACT 6:4 Anu bno feto afo re amu nrero mkah bo skabuk kʼAllah tna nkyas watum rAit kaket.”
ACT 6:5 Tna bo ro ana mawe reto to, raa beta ksoh. Tibyo ana msok Stefanus. Ait bosmot rait matak toni, tna Har ro Tuhan mbo ait matak ye. Tna msok Filipus, Prokhorus, Nikanor, Timon, Parmenas, msya Nikolaus ye. Nikolaus tait raa ro Antiokhia, ybam raa mana ro Yahudi fee. Menohe tiwya ait yrok kro agama Yahudi.
ACT 6:6 Raa baro makah raa mabo krema refo makah mama mee kʼraabis (rasul) weto. Ana moo matem mtor kʼana abyõ skabuk ana, re kbe ana moo boit saim kʼraa kaket.
ACT 6:7 Tna Watum ro Allah to, syohor yoyo mamo. Tibyo rabu ti wawa raa ro mhau mam Yerusalem taro u mawat mama smot Yesus. Tna imam Yahudi mawat mama msan ana mhaf smot Yesus ye.
ACT 6:8 Stefanus tait, bouum (karunia) ro mbam kʼAllah mhau kʼait. Bi Ait ysan yatak rAit yee kʼStefanus ye. Tibyo Stefanus yno bo ro msai. Tna ysair bo ro hnah mawat ye afo re raa mmat tna mhar Allah yatak rAit.
ACT 6:9 Stefanus ykyas Yesus yasom. Tna raa baro ro smot Yesus fee, masen besboh bo ro Stefanus yawe. (Ana to mbam samu skabuk ro Yahudi sau. Ana tiwya mamo sryan raa, tna bobot wana mitsre ana. Ana weto taro to, mbam kota ro Kirene msya raa ro mbam kota ro Aleksandria, tna taro to raa ro mbam provinsi ro Kilikia msya raa ro mbam rabin ro Asia taro ye.)
ACT 6:10 Ana weto santri bo ro Stefanus yawe. Menohe Stefanus ykyas mkah Har ro Allah matak rAu. Ait ykyas bo kaket. Tibyo ana weto mros matak santri bo msya Stefanus fee ye.
ACT 6:11 Ana mhaf kair Stefanus. Tibyo ana masen mamo wai tna msu bo kʼraa roto baro mbis ana mamo mkyas-kas Stefanus. Tna raa weto sioh mawe kʼraa makin mawe, “Amu nri Stefanus yamus Musa ysya Allah.”
ACT 6:12 Mkah iso reto ana misti re raa makin, raa mabi ro Yahudi msya guru agama Yahudi mrok kmo Stefanus. Tibyo ana mfot Stefanus makah mamo mee kʼraa manes ro mtu srah raa ro Yahudi.
ACT 6:13 Menohe raa ro mhaf kair Stefanus mamo wai tna mbis raa masen mkyas bo sioh mawe, “Stefanus yiwana Samu ro Allah refo yoyo tna yiwana Watum ro Musa!
ACT 6:14 Amu nri ait ykyas Yesus raa ro Nasaret. Yawe Yesus meen yama yihabah Samu ro Allah refo! Tna ait ykyas bo ro anu bno soo. Yawe Yesus ybis raa mno bo roto hayah ye. Ait ykyas Watum ro Musa kaket fee!”
ACT 6:15 Tna raa beta ro hre mam siret reto mmat Stefanus yasu rait. Mmat he yasu rait to ngkren moof, mfi malaikat masu to.
ACT 7:1 Tna imam agama Yahudi ro yase ytu kʼStefanus yawe, “Bo ro raa mkyas mai kʼnyõ wefo fo, bokyas ro ati fe mfe a?”
ACT 7:2 Tna Stefanus yawe, “Tafoh na nsya raa mabi wojõ: Nri, tkyas masmair rau mefo: Tiwya tinyi anu hohos ranu Abraham yamo yhau mam Haran fefares to, Allah ro yase toni tait yerif Ait kʼAbraham mam rabin ro Mesopotamia.
ACT 7:3 Tna Allah yawe kʼait yawe, ‘Nasen sikba rabin anyõ refo namo. Sikba raa mana wonyõ akus, tna namoʼt rabin sau ro kbe Jõ terif kʼnyõ.’
ACT 7:4 Abraham yari feto, tibyo ait sikba rabin raa ro Kasdim tna yamo yhau mam remo ro Haran. Yhau tna yaja yhai. Tna fo, Allah ybis ait satoh ybam rabin reto yamoʼt rabin ro mfo anu nhau mam Kanaan refo fo.
ACT 7:5 Mam wore weto to, Allah ysan bo aro kʼait fee, tabam kebet baro bo fee. Tna Abraham ait yabe ku aro fefares ye, menohe Allah ysi bo kʼait yawe, ‘Meen Jõ tno rabin refo beta mhau kʼnyõ nsya ku renti wonyõ nbo ye.
ACT 7:6 Tna meen ku renti wonyõ kbe mamo raa srim mam rabin raa roto. Tna raa ro rabin reto masen mbis ana mamo sryan wana tna mno bo ro samyoh mai kʼana ye mamo snok mam tahun trion 400.
ACT 7:7 Raa ro mbo ku renti wonyõ weto to, kbe meen Jõ tno bo ro samyoh btek mai kʼana. Tna fo ku renti wonyõ frok mbam bangsa reto tna mama skabuk Jõ mam yuk refo.’
ACT 7:8 Tna Allah ybis Abraham yawe, ‘Nyõ nsya raa sme wonyõ beta kbe nkom tohmi (sunat) afo re raa mhar mawe anu fo raa woJõ.’ Kejadian 21:2-4, 25:26, 29:31–30:24, 35:16-18 Abraham yabe Ishak tna ti ro krentuuf to ait ykom (sunat) Ishak. Ti baro firwas fo Ishak tait yabi tna ait yabe Yakub. Tna Yakub yabe anu hohos na wanu mabo trion 12 ro masom to.
ACT 7:9 Tna ait sait ybam kʼana yasom Yusuf. Ait yao na mabo 11 to, mhaf kair ait. Tibyo ana moo ait masim mtai kʼraa ro Ismael. Tna raa weto moo ait makah mamoʼt rabin ro Mesir. Menohe Allah yatam ait.
ACT 7:10 Bombra ro mkair ro raa mno mai kʼait beta to, Allah yno riof kʼait. Tna Allah yno re raja Mesir ksoh ait. Ait ymat he Yusuf yhar bo kaket. Tibyo raja retait ysok Yusuf yamo gubernur ybo rabin ro Mesir msya ybo samu ro raja wait beta ye.
ACT 7:11 Tna hai awyah frok mama mai rabin ro Mesir msya rabin ro Kanaan ye. Tibyo raa mkai bo ro samyoh toni. Tna anu hohos na, bo ro ana mait to mrok marak ye.
ACT 7:12 Menohe ati ro Yakub yari he Mesir to, boit gandum mhau fares to, ait ybis anu hohos na wanu masen mamoʼt Mesir. Tinyi rau ro ana mamoʼt Mesir oh meto.
ACT 7:13 Tna ana hah me mamo muhrin ewok to, Yusuf yasbrah ait kʼyao na. Tna ait yakah yao na wait weto yamo yerif kʼraja, re kbe ait yhar ana.
ACT 7:14 Tna Yusuf ybis raa mamo mtar yaja ysya raa wait mamaʼt Mesir. Tibyo raa mabo trion 75 satoh bo wana mamo mhau bana mam beto.
ACT 7:15 Yakub yasen yamoʼt Mesir yhau ti baro, tna yhai mam beto. Tna anu hohos na ro masom to ana mhai mam Mesir ye.
ACT 7:16 Tna ati ro hohos wanu frok mbam Mesir to, ana masen moo maja rana ytai mirenti mamo mse mam isra sau ro mhau mam tabam refo. Isra reto tiwya tinyi kukek ro bi Hemor ro mhau mam remo ro Sikhem to, masim kʼAbraham.
ACT 7:17 Tiwya Allah yawe kʼAbraham yawe, ‘Meen Jõ takah ku renti woNyõ frok sikba Mesir.’ Tiwya ana frok mbam Mesir fefares to, raa mana ranu mabe ku mawat hair. Tibyo ana ro Israel weto mrok msis toni.
ACT 7:18 Tna fo raja roto sait yasen ybo rabin ro Mesir reto riryõn. Raja retait wase Yusuf ye.
ACT 7:19 Ait yasen sikowah raa mana ranu ro Israel reto. Yber kait anu hohos na tna ybis ana moo ku mees wana to, beak mne majat makus.
ACT 7:20 Ti weto oh mi Musa fnya mabe ye to. Musa fnya mabe to, Allah ymat yawe Musa yoof toni tna yme mtos ait snyi tuuf mam amah ro yaja.
ACT 7:21 Snyi tuuf weto mkak to, yme moo ait mse mam wiak maku sau yakus. Tna ku ro ano ro raja sau moo ait mtos mfi ku rau feto.
ACT 7:22 Tna Musa ykom bo mam Mesir. Yhar bo ro Mesir kaket. Tna ait yros yatak ykyas bo ye tna ait yatak yno bo ye.
ACT 7:23 Musa tait umur 40 tahun bo feto fo, ait yawe yamo ymat raa wait ro Israel.
ACT 7:24 Ait yamo, tna ati reto, ait ymat raa ro Mesir sait yai raa ro Israel sait. Musa ymat feto tibyo ait yban raa rait ro Israel retait tna yai ait ro Mesir retait yajat.
ACT 7:25 Musa ynaut yawe, ‘Raa ro Israel ana mmat feto to, kbe mhar mawe Allah ysok jõ mkah tno riof kʼana.’ Menohe ana mhar fee.
ACT 7:26 Tna fo rabu ti ait frok yamo tna ymat he raa mana wait ro Israel mabo ewok mafa anya. Ait yawe yno re ana miranya. Ait bhah ana yawe, ‘Anu to raa mana sau sai, nfa ma!’
ACT 7:27 Menohe ait ro yno bo mkair kʼraa roto fi besre kʼMusa yawe, ‘Awya oh mi ysok nyõ yse nbo amu tna ntu srah ro ja amu nno fo?
ACT 7:28 Nyõ nawe name jõ mfi bo iis nyõ name raa ro Mesir sait yajat a?’
ACT 7:29 Musa yari feto tibyo waa. Tna yasen ysam yamoʼt rabin ro Midian tna yhau bait beto yfi raa srim sai. Tna ait yabe ku sme mabo ewok mam beto ye.
ACT 7:30 Musa yhau mam Midian tahun trion 40. Tna ait yamo kene mam atu ro Sinai. Tabam reto riamo. Yamo nkri-kri to, tna malaikat sau mbrah nenat mam tafoh ro mait mam hyoh mana sau fo.
ACT 7:31 Musa ymat bo reto tibyo yrok ktak sai. Tna yamo kait ymat kaket. He Tuhan yawe kʼait yawe,
ACT 7:32 ‘Jõ fi Allah ro nyõ hohos na ja smot. Tiwya Abraham, Ishak, ysya Yakub ja smot Jõ ye.’ Musa yrok waa tetet tibyo ait yros ymat bo reto u fee.
ACT 7:33 Tibyo Tuhan yawe kʼait yawe, ‘Jõ tama terif Jõ kʼnyõ mam yuk refo fo tibyo yuk refo mbau. Feto to nrus sandal ro nyõ nse to.
ACT 7:34 Jõ tmat bo samyoh ro mai kʼraa woJõ mam Mesir oh to. Jõ tari bo ro ana mawia ye. Jõ troh tama fo mkah bo too riof tee kʼana. Feto to mfo refo Jõ tbis nyõ nasen hah namoʼt Mesir.’
ACT 7:35 Tiwya Raa ro Yahudi mikyak Musa mawe, ‘Awya oh mi ysok nyõ nbo amu tna ntu srah ro amu nno bo to?’ Menohe ait oh mi Allah ysok yamo aban mana ro yoo riof yee kʼana. Allah ybis malaikat rAit mama merif au kʼait mam hyoh mana to.
ACT 7:36 Musa oh mi yakah raa ro Allah wAit snok ybam Mesir. Ait yno bo ro msai. Ait ysair bo ro hnah afo re raa mmat tibyo mhar Allah yatak rAit ye. Ait yno bo msai weto mam rabin ro Mesir, mam sawan ro masom 'Aya Mkek' tna mam tabam ro riamo wore wo ana mamo mur tahun trion 40 bo to ye.
ACT 7:37 Musa ykyas yawe kʼraa ro Israel yawe, ‘Meen Nabi sait yfi jõ, kbe Allah ysok ybam raa mana wamu tna ybis Ait yama yo kʼanu.’
ACT 7:38 Malaikat sau moo bokyas ro mroon to, mee kʼMusa mam atu ro Sinai. Tna Musa ykyas watum reto kʼanu hohos na mam tabam ro riamo tna ait ykom watum reto re kbe anu bmat tna bhar ye.
ACT 7:39 Menohe anu hohos na hawe mari bo ro ait yawe tna ana mikyak ait sai. Tna ana mnaut mam mhaf mato mawe ana hah me mamo bana Mesir u sai.
ACT 7:40 ⌞Tna ti sau Musa yaut yamoʼt atu ro Sinai yhau baro kait tna hah ye fefares.⌟ Tna raa weto mawe kʼHarun mawe, ‘Musa ro tiwya ybo amu frok nbam Mesir tait, amu wase bo ro btek mai kʼait ye. Feto to nasen nfen dewa sau mkah bo mira iso kʼanu frok bbam tabam refo bmo. Bo weto kbe raa katar matim tna anu kro mam ttis.’
ACT 7:41 Tibyo ana mfen dewa sau mfi sapi maku sau feto. Tna ana moo kak baro ktan mse mkah bo ro msan re kbe dewa reto mhaf moof. Ana mmat bo ro ana mesait mfen moof, tibyo ana simaut mase mbaut dewa reto ye.
ACT 7:42 Tibyo Allah kmo tna haberek kbor rof re ana skabuk sken, snyi msya ayõ bo ye. Allah yno feto mamyot bokom ro tiwya Ait ybis nabi na mama mkom wia mawe, ‘Raa ro Israel; tiwya anu nhau mam tabam ro riamo tahun trion 40. Tna anu ktan kak nsan kʼJõ aro fee.
ACT 7:43 Menohe anu skabuk smot bo ro anu nesait nfen sai. Tna anu sgi samu sahfra kabes Molokh tna anu bibi smot sken ro masom Refan ye. Feto to, kbe Jõ tawah anu beak, nmoʼt rabin ro Babel tino.’
ACT 7:44 Tna Allah ybis Musa yfen Sbyah ro moof sau. Tna Allah yerif iso ro Musa yfen ye. Ja raa mmat Sbyah reto tna mhar mawe Allah yhau ysya ana. Tna Sbyah reto, anu hohos na wanu ja mitrah mbo makah mamo mam woyõ-woya sai ana mamo mam tabam ro riamo reto.
ACT 7:45 Tna anu hohos na wanu msya Yosua mbo Sbyah ro Allah reto makah mamaʼt rabin ro Kanaan refo fo ye. Ana mama twok to, Allah yatim yno raa mana makin ro ja mhau mam oo reto msam mbrir-brar mamo wia. Tna hohos wanu mbo Sbyah reto mamo mhau mam rabin reto riryõn. Tna Sbyah ro Allah reto mhau msya ana weto tahun firwas tahun mamo snok mam oon ro raja Daud ybo ana.
ACT 7:46 Tna Allah Ait yhaf ksoh Daud. Tna Daud yayoh kʼAllah yawe, ‘Nbis re jõ sgi amah sau mkah bo Nyõ nhau. Nyõ fi Allah ro tiwya Yakub smot.’
ACT 7:47 Menohe ku rait Salomo oh mi sgi amah ro mkah bo Allah yhau reto to.
ACT 7:48 Menohe Allah ro yase toni tait ja yhau mam amah ro raa sgi fee. Tiwya ybis nabi rAit sait yama ykyas bo reto wia yawe,
ACT 7:49 ‘Jõ tbo raa beta ro mhau mam sawro aJõ msya raa ro mhau mam tabam refo beta ye. Sawro aJõ to mfi wore Jõ hre wefo tna jõ tawah taa skok mam tabam refo. Amah ro ma fyi kbe anu sgi kʼJõ thau to? Anu wefo ntai sgi samu mkah jõ tamo thau baas ye fee saut.
ACT 7:50 Jõ tatem aJõ oh mi tno bombra wefo beta fo.’”
ACT 7:51 Tna Stefanus yawe kʼraa ro kmo ait weto yawe, “Anu nsya anu hohos na to, nnan anya sai. Anu nhaf matak tibyo hawe nri bo Har ro Tuhan mawe kʼanu. Anu nnan fi raa ro wase Allah tibyo nimara mtuk ja nri Ait fee!
ACT 7:52 Nabi na sor ro tiwya Allah ybis mama to, anu hohos na sikowah ana beta. Tna nabi weto baro mama mkyas Raa sait ro wase yber safo. Mawe kbe Ait retait yama. Menohe anu hohos na mame nabi weto majat ye. Tna fo Ait retait yesait yama. Menohe anu besruf Ait, tna nsan Ait kʼraa mame yajat to ye. Ait tait Yesus.
ACT 7:53 Watum ro malaikat mkyas kʼMusa ykom to, tiwya Musa ysan kʼanu menohe anu nri Watum reto nbo nno fee ye.”
ACT 7:54 Raa manes ro Yahudi mari feto, tibyo ana mhaf mrok kmo toni.
ACT 7:55 Menohe Har ro Tuhan mbo Stefanus matak. Tna ait heyut abyõ sawro ro Allah. Tna ymat bo yase ro Allah rAit. Tna ymat Yesus yros ysya Allah mam hroh ro mbe ye.
ACT 7:56 Tibyo Stefanus yawe, “Jõ tmat sawro ro Allah mato nkro, tna tmat 'Ait ro Yroh Yama Yfi Raa Sai'. Ait yros mam ati ro Allah yatem ati ye.”
ACT 7:57 Ana mari feto, tibyo kmo toni msyah tna burut wa mimara wana afo re mari bo ro ait ykyas fee. Tna ana beta masen mamo mfot Stefanus.
ACT 7:58 Mfot ait tna makah frok mamoʼt kota mne. Raa ro riwai mkyas bo mai kʼStefanus weto to, mrus ratan wana ro ja myum mne fo, mse kʼraa sait ybo kmot wea. Raa retait ait yasom Saulus. Tna ana moo fraa mai ait.
ACT 7:59 Ana mawah fraa mai Stefanus kri-kri fo, ait yawe, “Tuhan Yesus: Noo tafos ajõ!”
ACT 7:60 Tna ait sisya tmi yimna tna skabuk mkah ymai ro mase yawe, “Tuhan; noo iro refo nse kʼana masom to ma.” Ait ykyas bo weto mkak si fo tna yajat.
ACT 8:1 Tna raa ro mhau mrat msya Allah baro mama sama hai ro Stefanus. Tna ana sraujin ait ye. Tna maban ti reto to, raa sikowah raa mana ro smot Yesus. Tibyo ana ro smot Yesus beta masen mso-sa mamoʼt remo aro-aro mam provinsi ro Yudea reto. Tna taro mamo mhau mam rabin ro Samaria ye. Raabis (rasul) ro Yesus wAit mesait aran mhau akus mam Yerusalem. Tna Saulus ait srau sau ysya ana ro mame Stefanus ye.
ACT 8:3 Tna ait tomer yno bo mkair mai kʼraa ro smot Yesus. Saulus twok mam amah aro frok-frok tna soh ykai raa ro smot Yesus aro to, ait ybis raa mfot ana weto. Ait yfot raa sme msya ro ano ye, makah mamo mbu mam bui.
ACT 8:4 Raa ro smot Yesus frok mso-sa mamo mhau mam remo aro-aro. Mhau to, ana mkyas Bokyas Moof ro Yesus (Injil) mam woyõ-woya sai.
ACT 8:5 Ana sait ro yasom Filipus yasen yamoʼt kota sau mam rabin ro Samaria. Ait ykyas kʼraa ro mhau mam kota reto yawe, “Yesus tait oh mi Mesias.”
ACT 8:6 Filipus ykyas Yesus yasom tna ysair bo ro hnah re kbe raa mmat tna mhar Allah yatak rAit. Raa msis-sas mari ait tna mmat bosair ro ait yno. Tibyo ana beta mari bo ro ait ykyas to, kaket ye.
ACT 8:7 Ait yikyak kabes frok mbam kʼraa mawat. Tna kabes weto frok mamo to, wohrarar mkah mai ro mase. Tna raa ro maa msya matem mhai to mawat. Filipus yisoh ana re maa, matem me moof. Tna raa ro maa maka to, ait yisoh tibyo ana mrok masen mamo ye.
ACT 8:8 Raa ro kota reto mmat feto, tibyo mrok simaut mase toni.
ACT 8:9 Tna raa sait yasom Simon ja yno bo ro hnah mam kota reto soo oh. Tna raa ro Samaria mmat bo ro ait yno to mrok ktak sai. Tna bi ait ynaut ait yesait yawe ait tait raa ro ati toni.
ACT 8:10 Raa kinyah msya raa ro bobot beta ja mari ait kaket tna mnaut mawe Allah yoo yatak rAit yee kʼbi ait refi. Mnaut mawe au oh mi ait yno bo ro hnah. Ja raa mtu Simon retait mawe, 'Bi Ait ro Yatak Toni'.
ACT 8:11 Raa makin weto mmat ait yno bo ro hnah feto ti ooh-oh. Tibyo ana kro ait.
ACT 8:12 Menohe Filipus yama ykyas Bokyas Moof ro Yesus Kristus. Ykyas raa mana ro Allah yamo Raja ybo. Raa mari mfot bo ro Filipus yawe feto tna smot Yesus. Smot Yesus tna raa baptis ana ro sme msya ro ano ye.
ACT 8:13 Tna Simon, ro ja yno bo hnah retait, yama smot Yesus ye. Tibyo raa baptis ait ye. Tna ait yhau kro Filipus yoyo. Tna Simon ymat bo Filipus yno bo ro msai mawat. Filipus ysair bo ro hnah re kbe raa mmat tibyo mhar Allah yatak rAit. Simon ymat bo weto beta tna yrok ktak sai.
ACT 8:14 Raabis ro mhau mam Yerusalem mari bo raa ro Samaria smot bokyas ro Allah feto, tibyo ana mbis Petrus ysya Yohanes mbewok masen mamoʼt rabin reto.
ACT 8:15 Tiwya raa makin weto raa baptis ana mkah Yesus yasom sai. Menohe Har ro Allah reto mroh matam ana fefares. Tna Petrus ysya Yohanes snok mam rabin reto to, ana mbewok skabuk re kbe Allah yoo Har rAit yee kʼana makin weto.
ACT 8:17 Ana mawah matem mse kʼraa weto, tibyo Allah yoo Har rAit yse kʼana.
ACT 8:18 Simon ymat he raabis weto moo matem mtor abyõ kʼraa feto, tibyo Allah yoo Har rAit yse kʼraa weto. Simon ymat feto, tna ait yhaf myoh yawe yoo pitis yee kʼana mbewok.
ACT 8:19 Ait yayoh yawe, “Nasim tak reto kʼjõ ye, afo re awya sai ro jõ tawah tatem tse abyõ to, kbe Allah yoo Har rAit yse kʼana ye.”
ACT 8:20 Menohe Petrus yastako Simon yawe, “Nyõ nnaut nawe Allah yatak to, ja raa moo mkah pitis a? Kbe nyõ nbo pitis wonyõ namoʼt rabin kair ro tafoh mait yoyo rno!
ACT 8:21 Nyõ srau ewok kʼAit oh meto ma! Kbe tak refo mhau msya nyõ ye fee saut.
ACT 8:22 Nashana oh! Nnaut nawe noo tak ro Allah rAit mkah pitis ma! Nyõ nno iro meto! Soh-soh Tuhan yyon iro ro nyõ nno reto.
ACT 8:23 Thar tawe nyõ nhaf mkair toni. Kabes yabi ybo nyõ tna re ja nno iro mawat.”
ACT 8:24 Menohe Simon yawe kʼana mbewok yawe, “Anu nesait soh-soh Tuhan afo re kbe bo ro anu nkyas kʼjõ weto to, btek mai kʼjõ ma.”
ACT 8:25 Petrus ysya Yohanes mbewok mkyas watum ro Tuhan msya bo ro tiwya ana mmat Yesus yno ye. Ana mkyas bo mkak tna fo hah me mamoʼt kota ro Yerusalem. Tna mam iso ro ana mamo to, ana mkyas Bokyas ro Moof (Injil) reto mam remo raa ro Samaria makin ro ana mamo iti to.
ACT 8:26 Tna malaikat ro Tuhan sau mbis Filipus mawe, “Nasen namo sia snok mam iso ro mroh mbam Yerusalem mamoʼt kota ro Gaza to.” Iso reto to, iso ro riamo sai.
ACT 8:27 Filipus yari feto tibyo yasen yamo. Ait yamo tna ykai raa manes sait ro ybam bangsa ro Etiopia. Bi ait ja ybo pitis ro bangsa reto. Tna fai Kandake mamo ratu ro mbo bangsa ro Etiopia. Bi ait tiwya yamoʼt Yerusalem mkah bo skabuk.
ACT 8:28 Mfo refo hah ye yamoʼt Etiopia yamo. Bi ait hre mam asya rait yhoh yamo kri-kri to, ait baca aam ro tiwya Allah ybis nabi Yesaya ykom.
ACT 8:29 Tna Har ro Allah mbis Filipus mawe, “Namo oh teto, namo kene kait mam asya reto to.”
ACT 8:30 Tna Filipus yhoh yamo mam weto tna yari he bi ait baca aam ro nabi Yesaya ykom. Tibyo Filipus ytu kʼait yawe, “Nyõ nmat aam reto tna srau ye fe mfe a?”
ACT 8:31 Tna bi ait yawe, “Soh raa aro betoo bokom refo maja rau kʼjõ fee, fyi re kbe jõ thar to? Nama naut hre nsya jõ.
ACT 8:32 Bokom ro bi ait baca reto mkyas Yesus mawe, ‘Ait yfi domba ro ja raa mkuk makah mamo ktan mkah bo mabo to. Tna Ait ye yfi domba maku ro raa ktan mawyan menohe kwek fee, shait sai. Ait retait ykyas bo aro fee ye.
ACT 8:33 Tna raa sikowah Ait mfi Ait raa kair sai. Raa mtu srah rAit to hayah sai, mfi srah ja raa mtu soo to fee. Ait yabe ku fefares to, raa mame yajat oh. Feto to raa aro bo mkyas ku renti wAit fee ye.’”
ACT 8:34 Tna bi ait retait ytu bo kʼFilipus yawe, “Bo ro nabi Yesaya ykom reto to, awya oh mi ait ykyas feto to? Nabi Yesaya ykyas ait yesait fe ykyas raa roto aro ye a?”
ACT 8:35 Tna Filipus betoo bokom ro nabi Yesaya ykom reto. Tna fo ykyas Bokyas Moof ro Yesus (Injil) kʼbi ait ye.
ACT 8:36 Ana mbewok mamo, mamo, tna snok mam aya sau. Tibyo bi ait yawe kʼFilipus yawe, “Aya saah mefo. Mfo refo nyõ baptis jõ fe mfe a?” [
ACT 8:37 Filipus yawe, “Soh nyõ smot mkah nhaf anyõ kaket ee, kbe jõ baptis nyõ.” Tna bi ait yawe, “Jõ thar tawe, Yesus Kristus tait Ku ro Allah yare.”]
ACT 8:38 Tibyo bi ait ro ybo pitis ro Etiopia retait yawe kʼait ro ybo asya rait reto yawe, “Nros! Jõ troh wia.” Tna Filipus ysya bi ait mbewok mroh mamo mros mam aya reto tna Filipus baptis bi refi mam aya reto.
ACT 8:39 Ana mbewok frok mbam aya maut mros mne to, Har ro Tuhan tubat Filipus makah mamo. Tna bi ait ymat Filipus u fee. Tna bi yabi refi yasen yamo renti mkah simaut ro mase.
ACT 8:40 Har ro Tuhan makah Filipus mamoʼt remo ro Asdod. Tna ait yasen yamo renti. Yamo ykyas Bokyas Moof ro Yesus (Injil) mam remo beta ro mhau mam iso ro ait yamo iti. Tna ait snok mam kota ro Kaisarea.
ACT 9:1 Tii weto to, Saulus knait raa ro smot Tuhan Yesus. Tna ait saim bo yawe raa mame raa ro smot Yesus to majat. Tna ait yamo yo kʼimam agama Yahudi ro yase yawe,
ACT 9:2 “Taja; nkom aam baro kʼraa mabi ro Yahudi sor ro mhau mam kota ro Damsyik. Mam aam weto nkom nawe nyõ nbis jõ tama tfot raa ro kro Iso ro Tuhan Yesus to. Noo aam weto nee kʼjõ tna tamoʼt Damsyik tee aam weto kʼraa mabi mmat. Tna soh jõ tkai raa sme msya fnya ro smot Yesus sor to, kbe jõ tfot ana take takah tamoʼt Yerusalem.”
ACT 9:3 Paulus yamoʼt Damsyik, tna wore ait yamo kene kait mam kota reto to, ait ymat bo sau mfi rir ro mrir mkek to. Bo reto mbam ayoh btek mama mame mur mam wore ait yros.
ACT 9:4 Ait yatu yai mam tabam, tna yari mai sau mawe, “Saulus; nyõ sikowah Jõ nno fyi meto?”
ACT 9:5 Menohe Saulus ytu si yawe, “Tuhan; Nyõ fi awya metait?” Menohe Ait yawe si yawe, “Jõ fi Yesus ro ja nyõ sikowah tait.
ACT 9:6 Nasen oh! Tna namoʼt kota. Mam kota kbe raa sait ykyas bo ro tbis tawe meen nyõ nno.”
ACT 9:7 Raa ro kro ait mamo su weto to, mrok shait bana sai. Riwai ana mari mai reto, menohe ana mmat raa ro ykyas bo reto aro fee ye.
ACT 9:8 Saulus yari mai reto tibyo yasen yros, menohe yasu mti. Tibyo ana ro kro ait mamo to, mbo yatem mamoʼt Damsyik.
ACT 9:9 Ti ro tuuf firwas to, ait ymat bo fefares ye. Ait yait bo fee ye, tna yata aya bo fee ye.
ACT 9:10 Raa sait ro smot Yesus yasom Ananias. Ait yhau mam kota ro Damsyik. Tna Tuhan yinyam bo kʼait mkah bosmi yawe, “Ananias!” Tna Ananias yawe, “Tuhan; jõ mefi!”
ACT 9:11 Tuhan ybis ait yawe, “Nasen namoʼt iso ro ja raa mtu masom ‘Iso ro Ntrot’ to. Tna ntu kʼraa ro mhau mam amah ro bi Yudas to, nawe nyõ saso raa sait yasom Saulus ro tiwya raa mabe mam kota ro Tarsus. Saulus tait mfo refo skabuk kri-kri meto.
ACT 9:12 Riwai Jõ tinyam bo kʼSaulus tna ait ymat raa sait yasom Ananias twok yamaʼt amah mato reto. Tna ymat Ananias yawah yatem ytor kait abyõ afo re ait yasu mrok maah tna ymat bo ye.”
ACT 9:13 Tna Ananias yawe, “Tuhan; ait retait, tiwya jõ tari raa msis mkyas mawe ait yno bo ro mkair mai kʼraa woNyõ mam Yerusalem.
ACT 9:14 Ait fi, Imam manes ro agama Yahudi mbis ait yamaʼt befo. Yama mkah bo yfot yake raa ro smot Nyõ beta meto.”
ACT 9:15 Menohe Tuhan yawe, “Nasen namo no kʼait oh! Saulus tait raa ro Jõ tsok yno bo woJõ. Jõ tsok ait mkah bo ykyas Jõ tasom kʼraa mana ro Israel ye, tna kʼraa mana roto makin msya raja wana ye.
ACT 9:16 Tna meen bo ro samyoh kbe btek mai kʼait ye. Bo weto, kbe Jõ tesait terif kʼait matim wia.”
ACT 9:17 Ananias yari feto tibyo yasen yamo. Yamoʼt amah ro bi Yudas tna ykai Saulus. Tna Ananias yoo yatem ytor kʼSaulus tna yawe, “Saulus, tao ajõ; ti taa Tuhan Yesus yerif Ait kʼnyõ mam iso ro nyõ nama iti to. Ait ybis jõ tama to kʼnyõ afo re nyõ nasu mrok maah tna re Har ro Allah mama mbo nyõ matak ye.”
ACT 9:18 Ananias yawe feto to, bo sau mfi syoh masin btek mbam kʼSaulus yasu. Tibyo ait yrok yasu maah. Ait yasen tna Ananias baptis ait.
ACT 9:19 Tna ait yait boit, tibyo yetsu matak u. Saulus yhau ti baro ysya raa ro smot Yesus mam kota ro Damsyik.
ACT 9:20 Tna mam weto si oh to, ait ja yamo wosa bokyas ro Yesus mam samu skabuk raa ro Yahudi sor yawe, “Yesus tait Ku ro Allah yare.”
ACT 9:21 Raa ro mari bo ro ait ykyas to, mrok ktak beta tna mawe, “Ait refi oh mi tiwya yhau mam Yerusalem tna sikowah raa ro smot Yesus mam tno. Tna raa mawe ait yamaʼt befo mkah bo yfot raa weto yakah yamoʼt Yerusalem. Tna kbe ysan ana kʼimam manes ro Yahudi.”
ACT 9:22 Saulus ykyas Yesus yasom kʼraa ro Yahudi ro mhau mam Damsyik. Ykyas kaket. Ait betoo kʼana yawe Yesus tait Mesias. Mbetoo mbe toni. Tibyo ana mrok mamboi tna ana matak msya ait santri bo fee ye.
ACT 9:23 Ti mawat baro firwas tna raa ro Yahudi hre siret tna saim bo su mawe kbe ana mame Saulus yajat.
ACT 9:24 Menohe Saulus yari bo ro ana saim reto. Baas mti bo to, raa ro Yahudi ste wa mam kota kitana re huwya mame ait yajat. ⌞Tiwya raa mana tembok muur kota reto mne.⌟
ACT 9:25 Ana ro Yahudi ste wa Saulus feto, tibyo mti sau fo raa ro smot Yesus mse Saulus mam keranjang maboh sau. Tna mruk ait yroh wai mam tembok ti mne.
ACT 9:26 Ait yasen frok ybam Damsyik hah ye yamoʼt Yerusalem. Ait snok si mam Yerusalem fo, ait yawe yiranya ysya raa ro smot Yesus. He mfe. Ana waa mtu sioh kʼait mawe, “Ait refi sne mate kʼanu yawe ait smot Yesus, yawe feto to, ait sioh anu sai meto.”
ACT 9:27 Menohe Barnabas yakah ait yamo tne kʼraabis ro Yesus tna ait ykyas kʼana yawe, “Saulus ro tiwya tinyi hawe kro Yesus tait, mfo refo haberek kro Yesus oh. Tuhan yerif Ait mam iso maka, tna ykyas bo kʼait ye. Tna fo ait yamoʼt Damsyik to. Mam Damsyik Ait yasen ykyas Yesus yasom kʼraa. Ait waa ana fee ye.”
ACT 9:28 Feto to ana ksoh Saulus yhau mam Yerusalem ysya ana. Yhau mam Yerusalem tna ykyas Yesus yasom kaket mam beto ye.
ACT 9:29 Ait ja santri bo ysya raa Yahudi ro ja mkyas bo mkah mai ro Yunani. Menohe ana mari Ait fee. Ana mawe mame ait yajat.
ACT 9:30 He mfe. Kuber ro Yesus wAit ana mari bo ro ana saim reto. Tibyo ana makah ait mamoʼt kota ro Kaisarea. Tna fo ana mbis ait yamo renti yamoʼt kota ro Tarsus.
ACT 9:31 Tna ti weto to, raa mkbair ro smot Yesus mam provinsi ro Yudea, provinsi ro Galilea msya rabin ro Samaria beta to, raa aro bo sikowah ana u fee ye. Ana bosmot wana mo matak renti. Mhau to waa Tuhan. Tna Har ro Allah mros tis ana, mban ana. Tna raa mawat ro smot Yesus fefares to, ana mama smot Yesus ye.
ACT 9:32 Petrus yamo yur ytan mam remo makin weto to, ait yamo sia yamo ymat raa ro Allah wAit mam remo ro Lida.
ACT 9:33 Mam beto to, ait ykai raa sait yasom Eneas. Eneas tait, yaa msya yatem bo to mhai ye, tibyo ja yakus yjin sai bait mam aam sai tahun trion krentuuf oh.
ACT 9:34 Petrus yawe kʼEneas yawe, “Eneas, Yesus Kristus yisoh nyõ noof oh. Nasen beah aam anyõ oh.” Petrus yawe feto, tibyo Eneas yasen buu yros.
ACT 9:35 Tna raa ro mhau mam Lida msya raa ro mhau mam Saron beta to, ana mmat Eneas yamo fo, feto tibyo mrok waa smot Tuhan Yesus ye.
ACT 9:36 Tna fai sau ro smot Yesus mhau mam remo ro Yope. Fai au masom Tabita. (Tna mam mai ro Yunani to, raa mtu au masom Dorkas ye.) Au to ja mno bo moof tna matmof raa kinyah yoyo ye.
ACT 9:37 Mam ati reto to, au kiyam tibyo mhai. Raa moo hai rau mse mate aya tna moo mse mam amah hawar ro uu.
ACT 9:38 Remo ro Yope msya remo ro Lida to mhau kene sai. Tna raa mkbair ro smot Yesus tna ro mhau mam Yope mari he Petrus yhau iti mam Lida. Tibyo ana mbis raa mabo ewok masen mamo mawe kʼait mawe yama fooh.
ACT 9:39 Mamo, tna Petrus yari feto tibyo yasen kro ana mamoʼt Yope. Ait snok si fo ana makah ait mamoʼt amah hawar ro uu reto. Semit beta ro mhau mam beto to, hre mawia. Ana mama mo kʼPetrus tna merif ratan ro tiwya Dorkas mtin mee kʼana sor fo.
ACT 9:40 Petrus ybis ana ro mhau mam beto beta frok. Tna fo, ait yesait aran yhau mam amah hawar reto. Tna ait yaka tmi yimna mte tna skabuk. Tna ait haberek ymat hai reto tna yawe, “Tabita, nasen oh!” Tibyo au mrok mmat Petrus tna masen hre ye.
ACT 9:41 Petrus ybo au matem teta tna au masen mros. Tna fo ait ytu semit weto msya raa ro Allah wAit mama mmat fai Dorkas ro mrok masen.
ACT 9:42 Bo ro Petrus yno reto syohor mamo snok mam rabin reto beta. Raa mawat mari feto tibyo mama smot Yesus.
ACT 9:43 Tna Petrus yhau mam Yope ti baro kait ye. Yhau mam amah ro bi Simon ro ja yfen bo ro mbam kak marak tait.
ACT 10:1 Bi sait yhau mam kota Kaisarea to yasom Kornelius. Ait yamo aban mana ro ja ybo raa sbe majin sau. Raa sbe ro ybo weto mabo 100. Tna ana weto to raa mbam rabin ro Italia.
ACT 10:2 Kornelius ja mur-mur skabuk Allah. Tna Kornelius, yfain, msya raa ro ja mhau mam amah rait to, beta waa Allah ye. Menohe ana to raa ro Yahudi fee. Ait ja yoo bo mawat yee kʼraa kinyah ro Yahudi, tna ait skabuk Allah yoyo ye.
ACT 10:3 Baas fares mam ayõ ro tuuf feto, ait ymat malaikat ro mbam Allah sau mama twok mam amah rait tna mawe kʼait mawe, “Kornelius fi!”
ACT 10:4 Ait ymat sas malaikat reto tna yrok waa yawe, “Tuhan; bo bawya mefo?” Tna malaikat reto mawe kʼait mawe, “Allah yari skabuk anyõ oh tna ymat bosan ro ja nyõ nsan kʼraa kinyah ye oh. Ait ymat feto mno yhaf mnan.
ACT 10:5 Nasen nbis raa baro mamo fooh mamoʼt remo Yope. Tna mmen Simon-Petrus yama.
ACT 10:6 Ait yhau mam amah ro bi Simon ro ja yisoh kak marak. Amah reto to mhau kene mam wore aya sawan maam kait.”
ACT 10:7 Tna malaikat reto sikba Kornelius mamo. Tna fo ait yasen ytu sryan wait mabo ewok msya raa sbe ro ja smot Allah kaket sait mama. Ana weto ja mhau mno bo ro Kornelius ybis sai.
ACT 10:8 Ana mama tna ait betoo bo ro ait ymat weto beta kʼana. Tna fo, ybis ana mamoʼt Yope tna mmen Petrus yama.
ACT 10:9 Rabu ti fo ana masen mamo. Ayõ baas to ana mamo kene mam remo ro Yope. Tna mam weto to, Petrus yamo yaut abyõ mam amah tna skabuk ye.
ACT 10:10 Petrus yhai sre tna yawe yait boit. Boit raa siwyan kri-kri fo tna Allah yinyam bo sau kʼait.
ACT 10:11 Ait ymat ayoh mato maah, tna fo ait ymat bo sau mfi bo hawee mabuf ro maboh sau mroh mbam uu mama. Hawee reto kro mbam tuut trion jiit mroh snok mam tabam.
ACT 10:12 Ymat he binatang aro rau-rau beta mhau abyõ mam hawee reto. Binatang msya aban ro mton aro rau-rau, tna msya ruu aro rau-rau ye.
ACT 10:13 Tna ait yari mai sau mawe, “Petrus: Nasen ktan bo weto nabo oh!”
ACT 10:14 Menohe Petrus yisboh si yawe kʼTuhan yawe, “Mfe saut! Bo ro amu nbau weto to, ja jõ tabo bo weto mafa fee!”
ACT 10:15 Tna mai reto mkyas kʼait muhrin ro ewok mawe, “Allah yawe, ‘Mfo wefo to, tawe bo weto bo ro mbau fee. Nabo oh. Nbau bo weto u to ma.’”
ACT 10:16 Bo reto Allah yno muhrin tuuf, tna fo Allah tubat hawee ro riwai reto to, maut mamoʼt ayoh twok mamo marak.
ACT 10:17 Tna Petrus ynaut bo refo mam yhaf yawe, “Bo bawya ro jõ tmat mefo ee?” Ait ynaut feto, tna raa ro bi Kornelius ybis weto mama. Riwai ana snok mam remo ro Yope tna mtu sas amah ro bi Simon. Ana mros mam amah mato.
ACT 10:18 Tna mtu mawe, “Simon-Petrus metait a?”
ACT 10:19 Petrus hre ynaut bo ro ymat fares. Tna Har ro Allah mawe kʼait mawe, “Nari, raa mabo tuuf saso nyõ mama fo.
ACT 10:20 Nasen tna nroh namoʼt te. Tna fo nsya ana nmo. Jõ oh mi tbis ana mama mmen nyõ to. Feto to namo sai.”
ACT 10:21 Tna Petrus yroh yamoʼt te tna yawe kʼana yawe, “Jõ ro anu saso oh mefi. Bo bawya ro anu nnaut nma fo?”
ACT 10:22 Tna ana mawe kʼait mawe, “Amu nma fo, bi Kornelius ybis. Ait tait aban mana raa ro sbe. Ait ja yno bo ro Allah ksoh tna smot Allah ye. Tna raa ro Yahudi beta mmat bo ro ait yno to, mawe ait tait raa ro ja yno bo moof. Iis malaikat ro Allah rAit sau mawe ait ybis amu nma nmen nyõ bmoʼt amah rait mam Kaisarea. Mawe nyõ namo no kʼait tna kbe ait yari bo ro nyõ nkyas kʼait.”
ACT 10:23 Petrus yari bo ro ana mawe feto. Tna yawe, “Nma njin nsya jõ oh mam befo. Tna menrabu rabu anu bmo.” Rabu fo, ana mabo jiit masen mamo sikba Yope tna kro iso ro mamoʼt Kaisarea. Tna raa ro Yope ro smot Yesus taro kro ana ye.
ACT 10:24 Mam Kaisarea to, Kornelius ytu yao na msya yafoh na bo to mama hre su msya ait ste Petrus wea. Tna rabu ti fo, Petrus ysya raa wait wefo mamo snok mam Kaisarea.
ACT 10:25 Petrus yamo twok mam amah mato fo, Kornelius yama tna yaka yabum yawe hartu ait ye.
ACT 10:26 Menohe Petrus ymat feto ybo ait yasen tna yawe, “Nasen oh, jõ fi raa sai mefo. Tnan anya tsya nyõ sai.”
ACT 10:27 Petrus ykyas bo ysya bi ait kri-kri to, twok mam amah mato fo. Ait ymat he raa msis siret ste ait wea oh.
ACT 10:28 Tna ait yawe kʼana yawe, “Anu fo raa ro srim. Menohe anu nhar bo mafa ramu raa ro agama Yahudi to. Watum ranu mkyas mawe, ‘Anu raa ro Yahudi: Nmo niranya nsya raa mana roto ma! Tna twok mam amah wana bo to ma ye!’ Menohe taa, Allah yinyam bo kʼjõ yawe raa mana roto to, kbe mbau kʼamu, raa ro Yahudi u fee. Yawe, ‘Nnaut nwe raa mana roto to raa ro mkair ma!’
ACT 10:29 Feto oh mi ati ro anu ntu jõ tamaʼt befo to, jõ ksoh tama sai. Tna hawe fee. Mfo, jõ ksoh thar bo bawya ro mno re anu ntu jõ tamaʼt befo fo?”
ACT 10:30 Tna bi Kornelius yawe kʼait yawe, “Ti jiit mam wore ayõ hawer fefo fo, jõ skabuk mam amah. Jõ skabuk kri-kri fo, bi ro yyum ratan ro mboh kren toni sait yros tubor kene mam jõ tasu.
ACT 10:31 Tna yawe kʼjõ yawe, ‘Kornelius, bo ro nyõ skabuk kʼAllah to, Ait yari oh. Tna bombra ro nyõ ja nsan kʼraa kinyah to, Ait yhar oh.
ACT 10:32 Feto to, nbis raa mamoʼt Yope mmen Simon-Petrus yama. Ait mfo yhau mam amah ro bi Simon ro ja yfen bo mkah kak marak tait. Amah reto to mhau kene mam aya sawan maam kait.’
ACT 10:33 Jõ tari feto si to, tbis raa mamo fooh mmen nyõ tna nyõ nhaf moof kʼjõ nama fo. Tna mfo amu beta siret mam wore Allah yasu ymat refo, mkah bo nri bo ro Allah ybis nyõ nkyas kʼamu beta.”
ACT 10:34 Petrus ykyas bo kʼana yawe, “Mfo refo Jõ srau tnaut tawe Allah ysok raa mana sau yse hayah tna ysok raa mana roto taro yse hayah fee saut. Ait ymat beta yawe mnan anya sai.
ACT 10:35 Ja Ait ymat raa mana ryo sai to, awya sai ro waa Ait tna yno bo ro Ait ksoh to, Allah yoo ait yamo raa mana rAit ye.
ACT 10:36 Bokyas riwai reto Allah ykyas kʼraa mana ro Israel: Ykyas yawe, ‘Yesus Kristus tait kbe yoo riof ro mase yee kʼraa beta.’
ACT 10:37 Anu nesait nhar bo beta ro tiwya mabo mam provinsi ro Yudea. Tinyi rau to, Yohanes ro ja baptis raa to, ykyas bo mam provinsi ro Galilea.
ACT 10:38 Tna fo Yesus ro ybam remo ro Nazaret yama. Allah yoo yatak yee kʼAit tna yoo Har rAit yse matam Ait ye. Allah yatam Yesus tibyo woyõ-woya sai Yesus yamo to, Ait ja yno bo moof tna raa ro kabes yabi (Iblis) ybo to Ait yisoh moof ye.
ACT 10:39 Tna amu, raabis ro Yesus wait, nmat bo ro Ait yno beta mam kota Yerusalem msya rabin ro Yahudi to ye. Bo reto amu nbo nkyas. Tna raa mame Ait yajat mam ara warok.
ACT 10:40 Menohe mam ti ro tuuf to Allah yno Ait yrok yasen. Tna yno re raa mmat Ait ye.
ACT 10:41 Raa makin beta fee. Menohe amu nmat Ait, tna amu hre niit boit nsya Ait su ye. Tiwya Allah ysok amu nesait re nmat tna nkyas Ait yasom kʼraa roto ye.
ACT 10:42 Ait ybis amu nmo nkyas Yesus yasom. Ybis amu nmo nkyas nwe, ‘Allah ysok Ait yamo Raa ro yhau susai ytu srah raa ro mhai msya raa ro mhau fares bo yari ye.’
ACT 10:43 Tiwya nabi na beta mhaf sau mkyas Ait msya bo ro kbe Ait yno. Ana mawe awya sai ro smot Ait to, kbe Allah yyon iro wana beta ye.”
ACT 10:44 Tna Petrus ykyas bo wefo kri-kri fo, Har ro Tuhan mroh mama mbo Kornelius ysya raa wait ro mari bo ro Petrus ykyas fo beta.
ACT 10:45 Tna ana mrok mkyas bo mkah mai roto ro ana wase fares, tna mbaut Allah ye. Tna raa ro Yahudi ro smot Yesus, ana ro riwai kro Petrus mama mbam Yope to, hre mmat. Ana ro Yahudi mmat Allah yoo Har rAit yuumto kʼraa mana roto ye to, ana mrok ktak toni. Tna Petrus yawe kʼana yawe,
ACT 10:47 “Allah yoo Har rAit yse mbo raa wefo oh. Yno mamyot mnan fi ro tiwya Ait yno kʼanu ye oh. Nma, anu baptis raa wefo mkah aya ye! Kbe raa aro mno wa fee.”
ACT 10:48 Tibyo Petrus ybis raa baptis ana mkah Yesus Kristus yasom. Tna ana mabe Petrus soh-soh ait mawe, “Nyõ namo wia ma. Nhau nsya amu ti baro wia rere!”
ACT 11:1 Tna raabis (rasul) ro Yesus msya raa ro smot Yesus mam rabin ro Yudea beta to, tiwya mbam raa mana ro Yahudi sai aran. Tna ana mari he raa mbam raa mana roto baro mama smot bokyas ro Allah ye.
ACT 11:2 Tna Petrus yamoʼt Yerusalem. Mam beto to, raa Yahudi ro smot Yesus taro mastako ait mawe,
ACT 11:3 “Taa nyõ twok mam amah raa mana roto to, tna sohmaam bo nsya ana su ye. Feto Allah hawe!”
ACT 11:4 Menohe Petrus betoo bo weto sau-sau kʼana kaket yawe,
ACT 11:5 “Taa jõ skabuk mam remo ro Yope kri-kri fo, Allah yinyam bo sau kʼjõ. Tna jõ tmat bo sau mfi bo hawee mabuf ro maboh sau mroh mbam uu. Hawee reto kro mbam tuut trion jiit, tna mroh snok mam tabam kene wore jõ hre.
ACT 11:6 Tna jõ thaninin, tmat he mato to matot mkah binatang ro mha, binatang ro rbyoh, aban ro mton, msya ruu ye.
ACT 11:7 Tna jõ tari mai sau mama mawe kʼjõ mawe, ‘Petrus; nasen ktan bo weto nabo oh!’
ACT 11:8 Menohe jõ tawe kʼTuhan tawe, ‘Mfe, bo ro amu nbau mefo, ja jõ tabo fee.’
ACT 11:9 Menohe tari mai ro mbam sawro reto muhrin ro ewok. Mkyas mawe, ‘Bo ro Allah yawe nyõ nabo to, ne nbau to ma!’
ACT 11:10 Bo reto, Allah yno muhrin ro tuuf. Tna fo Allah tubat bo weto beta yakah yamoʼt ayoh twok marak.
ACT 11:11 Tna mam weto si to raa mabo tuuf snok mam amah ro amu nhau. Ana weto to, taa Kornelius ybis mbam kota ro Kaisarea yawe mama mo kʼjõ mam remo ro Yope.
ACT 11:12 Tibyo Har ro Allah mawe kʼjõ mawe, ‘Nasen nsya ana nmo su oh! Nnaut bo myum-yam ma!’ Tna raa wamu mabo ntamam refo masen kro jõ mamoʼt Kaisarea. Amu nmo twok mam amah ro bi Kornelius.
ACT 11:13 Tna ait yawe, ‘Taa malaikat sau frok tubor mam amah mato tna mkyas kʼjõ mawe jõ tbis raa mamoʼt Yope tna mmen Simon-Petrus yama.
ACT 11:14 Malaikat reto mawe kbe amu nri bokyas ro Simon-Petrus ykyas afo re kbe Allah yoo riof ro mase yee kʼjõ tsya raa wojõ beta.’
ACT 11:15 Tibyo jõ taban tkyas bo fo, Har ro Tuhan mroh mama mbo ana mfi bo ro tiwya tinyi rau mroh mama mbo anu wia oh mefo.
ACT 11:16 Tna jõ te tnaut bo ro tiwya Tuhan yawe, ‘Yohanes baptis raa mkah aya sai, menohe anu to, kbe Allah baptis anu mkah Har rAit.’
ACT 11:17 Tiwya anu smot Tuhan Yesus Kristus tna Allah yoo Har rAit yee kʼanu. Tna jõ tmat tawe Allah yoo Har rAit yee kʼana ye. Ait yno mnan fi bo tiwya yno kʼanu ye to. Feto tna jõ thau sayõ bo ro Ait yno sai. Tnaut tawe jõ fi raa sei sai, kbe tno wa bo ro Allah yno reto to fee!”
ACT 11:18 Tna raa ro Yahudi mari bo ro Petrus betoo feto. Tibyo ana mastako ait u fee. Tna mbaut Allah mawe, “Allah yno iso ro moof afo re raa mbam raa mana roto mashana ye, tna meen ana mkai mamos mae ye.”
ACT 11:19 Maban mam wore Stefanus tiwya raa mame to, raa sikowah raa ro smot Yesus. Tibyo ana msam somya mamo snok mam rabin ro Finisia, sato ro Siprus msya kota ro Antiokhia. Ana mamo to, mkyas Yesus yasom kʼraa ro Yahudi sai aran.
ACT 11:20 Menohe ana makin ro somya weto to, ana taro raa ro mbam Siprus msya raa ro mbam kota ro Kirene. Ana weto mkyas Bokyas ro Moof (Injil) mamo snok mam kota ro Antiokhia. Tibyo mkyas Tuhan Yesus yasom kʼraa ro ja mkyas bo mkah mai ro Yunani ye.
ACT 11:21 Tna Tuhan yatam ana tibyo raa msis-sas mashana smot Ait.
ACT 11:22 Tna raa ro smot Yesus mam Yerusalem to, ana mari bo raa ro Yunani smot Yesus ye. Tibyo ana weto mbis Barnabas yasen yamoʼt Antiokhia.
ACT 11:23 Barnabas tait raa ro ja yno bo moof, tna Har ro Allah ja mbo ait matak. Tna bosmot rait matak ye. Barnabas yamoʼt kota ro Antiokhia. Tna ymat bo Allah yatmof raa ro rabin roto ye feto. Ait srau bo reto, tibyo yrok simaut mase. Tna ait ykyas bo moof kʼana yawe, “Nhau to, smot Tuhan kaket!” Tibyo, raa msis-sas mama smot Tuhan Yesus.
ACT 11:25 Tna fo Barnabas yasen yamoʼt kota ro Tarsus saso Saulus.
ACT 11:26 Ait ykai Saulus, tna yakah ait hah yamoʼt Antiokhia. Ana mbewok mhau su msya raa ro smot Yesus mam beto to tahun sau. Ana mhau mam beto to mkyas, mbetoo bokyas ro Yesus kʼraa msis. Tna mam beto ye raa maban mtu raa ro smot Yesus weto, ja mtu mawe 'raa mana ro Kristen' to.
ACT 11:27 Ti weto to, nabi ro Allah ja ybis mkyas bo wAit to, baro mama mbam Yerusalem mamoʼt Antiokhia.
ACT 11:28 Tna nabi weto to, sait yasom Agabus. Har ro Tuhan ybis ait yasen yawe, “Meen hai sre ro msai sau btek mai rabin ro wefo beta.” (Bo ro ait yawe reto mabo mam ati ro raja Klaudius ro yase ybo rabin weto beta.)
ACT 11:29 Tna raa ro smot Yesus ro mhau mam Antiokhia to, ana mawe, “Boit wana ro mhau mam Yudea to mabut. Feto to bma, anu boo pitis wanu baro bee kʼana ro smot Yesus ro mhau mam beto.” Tibyo raa sait-sait yoo pitis rait yee mamyot bo ro ait yse.
ACT 11:30 Tna fo Barnabas ysya Saulus mbewok makah pitis weto mamo msan kʼmajelis ro mhau mam Yerusalem mkah bo ana saim kʼraa wana ro hai sre.
ACT 12:1 Mam ti weto to raja Herodes ybis raa wait mamo mfot raa ro Kristen baro afo re ait yno bo ro mkair btek mai kʼana.
ACT 12:2 Tna ait ybis raa sait yoo sogi yaru Yakobus ro Yohanes yao tait yajat.
ACT 12:3 Raa ro Yahudi ksoh bo ro ait yno reto. Tibyo ait ybis raa mamo mfot Petrus. Yfot Petrus mam wore raa ro Yahudi makyõ Korat Roti ro Ragi Marak.
ACT 12:4 Raa mfot Petrus tna raja Herodes ybis ana mbu ait mam bui tna ybis raa sbe mabo trion 16 kmot ait. Raja Herodes ynaut yawe kbe Raa ro Yahudi makyõ Korat ro Paskah mkak oh tna fo, ait kbe ytu srah rait mam wore raa masu makin mmat.
ACT 12:5 Feto to Petrus, yhau mam bui fares, menohe raa ro Kristen mur-mur skabuk ait kʼAllah.
ACT 12:6 Raa ro Yahudi makyõ Korat ro Paskah mkak. Tna Herodes yawe mhau rabu tna tufrok Petrus frok ybam bui reto. Tna mti rau fo, Petrus yjin. Raa sbe mabo ewok kmot ait. Rantai trion ewok make ait yatem tna mii kʼana matem ye. Tna Petrus yjin mam masuf. Tna raa sbe mabo ewok naut mros mam masa ro mne kmot bui reto.
ACT 12:7 Tna malaikat ro Tuhan sau frok mros tubor mam wore Petrus yjin. Tna kek sau mrok mait mram bui reto. Tna malaikat reto mti ait mawe, “Nasen fooh!” Tibyo rantai ro make ait yatem reto mrok ntras mbam ait yatem btek.
ACT 12:8 Tna malaikat reto mawe, “Noo ratan anyõ nyum tna noo sandal anyõ nse naa ye.” Petrus yari yno bo ro malaikat mawe reto. Tna fo malaikat mawe, “Noo jubah anyõ to nyum naut tna kro jõ bmo.”
ACT 12:9 Tna ait kro malaikat reto frok mamo. Mamo to mfi bo ait wase-wasa sai. Ynaut yawe yjin smi bo ymat malaikat reto. Ait wase yawe bo reto mabo tu oh, fe mfe a?
ACT 12:10 Tna ana mbewok frok miwrek raa sbe ro kmot bui reto, tna fo mamo miwrek raa sbe roto, tna ana snok mam masa besi ro muut snek reto wa. Masa reto to, mesait mato maa sai. Tna ana frok, tna mamo kro iso sau si fo, malaikat reto mrok marak sikba tubor sai mam weto.
ACT 12:11 Tna ait yrok yhar kaket yawe, “Bo refo mabo oh! Mfo refo jõ thar tawe Tuhan ybis malaikat rAit tna yno riof kʼjõ. Ait bitsre jõ tbam raja Herodes yatak rait tna mbam bo ro raa ro Yahudi saim mawe mno mai kʼjõ bo ye.”
ACT 12:12 Ait yrok srau feto tna fo, yamoʼt samu ro Maria ro Yohanes-Markus yme. Mam beto to, raa mawat siret tna hre skabuk.
ACT 12:13 Petrus yama yai masa ytu ana. Tna sryan ro ano sau masom Rode mama mros wane mari awya ro mii ytu mam ti masa meit.
ACT 12:14 Au mari he Petrus ymai tna au simaut mase tibyo sorni mitrah masa reto kʼait. Au mamo fooh mamo mabah kʼana ro mhau mam amah mato reto mawe, “Petrus yama meit!”
ACT 12:15 Menohe ana mawe si kʼau mawe, “Nyõ nker meto a?” Menohe au mawe, “Jõ tker fee. Bi ait yama meit!” Tibyo ana mawe, “Tna sai nyõ nmat malaikat ro ja kmot ait.”
ACT 12:16 Menohe Petrus yros fares tna ytu u. Tna ana mitrah masa tna mmat he ait yesait yros. Tibyo mrok ktak sai.
ACT 12:17 Petrus yawe kʼana yawe, “Shait oh! Tuhan yakah jõ frok tbam bui reto. Jõ tkyas bo ro Tuhan yno wia. Tna fo nsen nmo nkyas bo weto kʼYakobus ysya raa wanu taro ye mari.” Ait ykyas bo weto mkak tna ymah meen kʼana akus tna frok yamoʼt yuk roto.
ACT 12:18 Rabu fo, raa sbe wefo mrok mkyas mnin-nin mawe, “Wah, ait snok ybam woyõ? Ja weno anu ste matak to re ait frok yamo woyõ!”
ACT 12:19 Raja Herodes yari bo reto, tibyo ybis raa sbe roto mamo saso Petrus menohe ana mkai ait fee. Tna Herodes ytu sas kʼraa sbe ro ti sai kmot Petrus weto tna ybis raa sbe roto mfot ana mame majat. Tna fo raja Herodes yasen frok ybam rabin ro Yudea yamoʼt kota ro Kaisarea tna ait yhau ti baro kait mam beto ye.
ACT 12:20 Ti weto to raja Herodes kmo raa ro kota Tirus msya raa ro kota Sidon toni. Kota wana to ja mkai boit mbam oo ro raja retait ybo. Tna raa wana baro saim su tna mamo mkyas bo kʼait. Ana mamo tna mkai bi Blastus wia. Ait retait ja yisoh amah ro raja rait. Ana mawe kʼait mawe ana ksoh mrok miranya msya raja u. Blastus yari feto, tna yawe bo ro ana saso reto moof. Tibyo ait yamo ykyas kʼraja Herodes.
ACT 12:21 Tna Herodes ysok ti sau yse mkah ykyas bo kʼraa weto beta. Ti reto ait yyum ratan ro ja raja myum tna yaut hre mam ambar ro ja raja hre ye. Tna ykyas bo kʼana.
ACT 12:22 Ana mari bo ro yawe to, simaut mmai mnin mawe, “Mai reto mai ro mbam kʼallah sait meto tna mai reto raa meto fee.”
ACT 12:23 Tna raja Herodes sayõ ana mbaut ait sai. Ait ywaar bo ro ana mawe fee, tna ait ybaut Tuhan fee ye. Tibyo mam weto si oh to, malaikat ro Tuhan sau mno ait kiyam. Moo saba mse mkok ait. Tibyo yhai.
ACT 12:24 Tna watum ro Tuhan to syohor yum. Tibyo raa taro u mawat bo mari tna mama smot Yesus ye.
ACT 12:25 Barnabas ysya Saulus mbewok mno bo ro raa mbis kʼana mam Yerusalem mkak. Tna fo, ana mbewok mhah mamoʼt Antiokhia tna mmen Yohanes ro ja raa mtu yasom Markus tait ysya ana mama ye.
ACT 13:1 Ati sau fo jemaat ro Antiokhia siret su. Ana skabuk kʼTuhan tna mhau bo ro mait afo re skabuk kaket. Ana fo nabi ro ja Allah ybis mamo mkyas bo wAit to baro msya guru baro ye. Ana weto to, sait yasom Barnabas tna sait yasom Simeon-Niger. Tna sait yasom Lukius ro ybam kota ro Kirene, tna sait yasom Menahem. (Menahem tait, Saulus ysya Herodes bo to ana tiwya raa mtos su.) Ana hre skabuk su to, Har ro Tuhan mawe kʼana mawe, “Jõ ksoh Barnabas ysya Saulus mamo mno bo woJõ.”
ACT 13:3 Raa weto mhau bo ro mait tna moo matem mtor abyõ kʼana mbewok refo skabuk mayoh Allah yatam ana. Tna fo ana mmah meen akus tna bitsre ana mbewok mamo.
ACT 13:4 Har ro Tuhan mbis, tibyo Barnabas ysya Saulus mbewok mamoʼt joh ro Seleukia. Tna ana mbewok mbam Seleukia maut kapal mamo snok sato ro Siprus.
ACT 13:5 Ana mhau mam remo ro Salamis to, ana mkyas Watum ro Allah. Mamo mkyas mam samu skabuk raa ro Yahudi sor. Tna mere sait yasom Yohanes-Markus kro ana mbewok ye mkah yno bo wana.
ACT 13:6 Ana mamo mur mtan mam sato reto, tibyo snok mam remo ro Pafos. Mam beto to, ana mkai raa ro Yahudi sait yasom Baryesus-Elimas. Ait tait raa ro ja yari botkif mafot kaket tna sioh yawe ait tait nabi ro Allah ybis yama ykyas bo wAit.
ACT 13:7 Ait ja yiranya ysya Gubernur ro sato reto. Gubernur retait yasom Sergius-Paulus. Ait raa ro yhar bo toni. Gubernur retait ja ksoh yari Watum ro Allah. Tibyo ait ytu Barnabas ysya Saulus mama.
ACT 13:8 Menohe Baryesus-Elimas yno wa afo re Gubernur retait smot Yesus ma.
ACT 13:9 Menohe Har ro Tuhan mbo Saulus matak. (Ja raa mtu ait yasom Paulus ye.) Mbo matak tna yasu sayõ Baryesus-Elimas tna yawe,
ACT 13:10 “Kabes yabi (Iblis) ybo nyõ matak to! Ja nyõ hawe bo ro moof tna nno bo kbik-kbak sai! Nyõ sioh raa yoyo tna iso moof ro Allah yerif kʼraa to, nyõ nno mkair sai.
ACT 13:11 Nyõ nno feto tibyo Tuhan kbe yno bo ro samyoh btek mai kʼnyõ ye. Mfo refo nasu mrok mboh! Ti baro firwas nyõ nmat bo fee ye.” Paulus yawe si feto fo, Elimas ait yrok yasu mti. Tna ait saso ninya wore yamo tna saso raa yawe ro mbo yatem re befatu mamo.
ACT 13:12 Gubernur retait ait ymat he Elimas yrok yasu mti tna ait yari bokyas ro Tuhan ana mbewok mkyas to yrok ktak. Tibyo ait yrok smot Yesus.
ACT 13:13 Paulus ysya yafoh na sikba Pafos tna maut kapal tna mhoh mamoʼt remo ro Perga. Perga mhau mam provinsi ro Pamfilia. Mam Perga Yohanes-Markus sikba ana tna hah ye yamoʼt Yerusalem.
ACT 13:14 Tna mbam Perga ana mamo renti mam iso mne. Mamo tna snok mam kota Antiokhia ro mhau mam rabin ro Pisidia. Tna mam ayõ ro raa ntmoh (hari Sabat) to, ana mamo skabuk mam samu skabuk raa ro Yahudi.
ACT 13:15 Ana hre tna mari raa mbaca bokom ro Musa ykom baro msya bokom ro nabi na mkom baro ye. Mbaca mkak, tna raa mabi ro mbo samu skabuk reto to, mbis raa mamo mtu bo kʼPaulus ysya Barnabas. Mtu bo kʼana mbewok mawe, “Raa wamu: Anu ksoh nma nkyas bokyas baro kʼamu ye, fe mfe a? Soh nwe nkyas meto mi nkyas oh.”
ACT 13:16 Paulus yasen yros. Tna yawe, “Anu raa ro Israel nsya anu raa mbam rabin roto ro wa Allah bo nri ee:
ACT 13:17 Allah ro anu raa ro Israel ja smot tait, tiwya tinyi ait ysok hohos wanu. Ana mamo raa srim mam Mesir. Mhau mam Mesir to, Ait yno ana mrok mriembes mase. Tna mkah Ait yatak rAit ro mase to, Ait ybo ana frok mbam Mesir mamo.
ACT 13:18 Tna tahun trion 40 firwas bo feto to, Ait yhau ymat tan bo ro ana mno mkair mam tabam ro riamo to.
ACT 13:19 Anu hohos na mamo snok mam oo ro Kanaan tna mame anya msya raa ro mhau mam oo reto. Mame anya msya raa mana krema. Tna Allah yoo yatak yee kʼana re safto tabam wana shauk riryõn kʼraa wAit ro Israel.
ACT 13:20 Allah yno bo weto beta to tahun trion 450 bo feto firwas wa. Mam wore wo ana mhau mam Kanaan Allah ysok raa ro ja yamo aban mana ybo ana. Aban mana weto to, aro sor mbo ana mamo snok mam wore wo nabi sait ro yasom Samuel yama ybo ana mtis naut u.
ACT 13:21 Tna anu hohos na mayoh kʼAllah mawe, ‘Noo raja sait nse ybo amu.’ Tibyo Allah yoo Saul yse yamo raja ro ybo ana. Saul tait ku bi Kisy yare. Raa wait beta to ku renti-renta bi Benyamin ro tiwya tinyi bi Yakub yare. Saul yamo raja tna ybo ana 40 tahun.
ACT 13:22 Tna Allah beak ait yakus. Allah yawe: ‘Jõ tmat sas Daud ku ro bi Isai yare tna ait yno Jõ thaf mnan. Ait raa ro kbe yno bo ro Jõ ksoh beta.’ 1 Samuel 13:14; Mazmur 89:21 Feto to Ait ysok Daud yse yamo raja riryõn shauk hroh ro Saul reto.
ACT 13:23 Mbam ku renti ro Daud yabe oh mi, Allah siwyan Raa sait mkah bo yoo riof ro mase yee kʼraa ro Israel. Ait retait yama oh. Yasom rAit Yesus.
ACT 13:24 Yesus yasom frok fefares to, raa sait ro yasom Yohanes yama. Yohanes ykyas kʼraa ro Israel makin yawe, ‘Nashana oh! Tna nma re kbe jõ baptis anu.’
ACT 13:25 Yohanes yno bo ro Allah ybis kʼait tna yawe, ‘Anu nnaut nwe jõ fi awya? Jõ fi Mesias fee. Ait retait kbe yama yrof jõ. Ait yase toni syok. Menohe jõ fi raa kair sai. Tibyo jõ trus sandal rAit fee.’”
ACT 13:26 Tna Paulus ykyas bo renti naut yawe, “Raa wojõ; anu taro to ku renti ro bi Abraham yabe. Tna anu taro to raa rabin roto menohe anu waa Allah bo ye. Allah tiwya ykyas yawe Raa sait meen yoo riof ro mase yee kʼanu. Tiwya Allah ykyas Raa retait re kbe anu ro mfo refo bhau to bri tna kbe bkai riof.
ACT 13:27 Tiwya raa wase mawe Yesus tait Mesias. Raa ro mhau mam Yerusalem msya raa mabi wana mhar bo reto fefares. Bokom ro tiwya Allah ybis nabi na mkom mawe, ‘Meen raa mikyak Ait tna mame Ait yajat.’ Tna ana ro mhau mam Yerusalem to, ja mbaca bokom reto mam ayõ ro ana ntmoh (hari Sabat) soo oh. Tna ana mesait mikyak Yesus mnan si bo ro nabi na tii mkyas weto to, mhau rau oh. Menohe ana srau mnaut bo weto fee ye.
ACT 13:28 Yesus yno bo ro mkair aro fee. Menohe raa sioh mawe yno bo mkair. Mawe yno safo tibyo mamo mo kʼPilatus mawe, ‘Noo safo mana nmit kʼAit oh! Nbis raa wonyõ nawe mame Ait yajat!’
ACT 13:29 Ana mno bo weto beta mamyot bo ro tiwya nabi na mkom wia matim oh. Ana mno bo weto mkak. Tna fo, ana skur ajat rAit mbam ara warok reto mamo sama Ait mam isra mato.
ACT 13:30 Menohe Allah yno Ait yrok yasen.
ACT 13:31 Tna raa mmat Ait u ye. Raa ro tiwya kro Ait mamo mbam Galilea mamo snok mam Yerusalem to, ana weto mmat Ait ti aro ye. Tna mfo refo ana weto ja mkyas bo ro ana mmat Ait yno to. Ana mkyas Yesus yasom kʼraa wamu ro Yahudi ye.
ACT 13:32 Mfo refo jõ tsya Barnabas nma nkyas bokyas refo kʼanu. Bokyas reto misti simaut kʼraa: Au oh mi bosi ro tiwya Allah ykyas ysi kʼhohos wanu.
ACT 13:33 Bo ro tiwya ysi reto to, mfo refo mabo oh. Anu fo ku renti wana. Tna anu fo bmat: Allah yno Yesus yrok yasen. Yno mamyot mfi bokyas ro tiwya tinyi Raja Daud ykom mam Mazmur ro ewok to, yawe, ‘Nyõ tait Ku aJõ tna riwai Jõ tabe Nyõ oh.’
ACT 13:34 Tna Allah ykyas Ku rAit Yesus yawe Ait kbe yno Yesus yrok yasen tna kbe ye yhai u fee. Allah yawe, ‘Tiwya tsi bo tawe tno bo moof ku renti ro Daud yabe sait to. Tna bo ro Jõ tesait tsi meto kbe mabo! Au oh mi; “Meen Ku renti rait sait yasen yamo Raja.”’
ACT 13:35 Tna tiwya Daud yawe kʼAllah mam Mazmur far-far roto yawe, ‘Ait ro Nyõ Nbis Yama tait, meen Nyõ sayõ ajat rAit makus mnis fee.’”
ACT 13:36 Tna Paulus ykyas renti yawe, “Bokyas reto to, Daud ykyas ait yesait fee. Daud yno bo ro Allah ybis kʼait yno mam wore wo tiwya ait yhau fares to. Ait yno bo weto mkak tna ait yhai. Tna raa makah hai rait mamo sama mam yuk ro tiwya raa sama hohos na wait ye. Tna hai rait mrok mnis.
ACT 13:37 Menohe hai ro Yesus mnis makus mfi Daud fee: Allah yno Yesus yrok yasen.
ACT 13:38 Taja, tano na; nri oh. Nhar oh. Bo ro Yesus yno oh mi mno re Allah yyon iro raa to.
ACT 13:39 Tna awya ro smot Ait to, kbe Allah yyon iro wait beta. Tibyo Allah yawe ait retait raa ro yhaf moof ati. Menohe Watum ro Musa mno raa mhaf wana moof ati feto fee.
ACT 13:40 Tiwya Allah ybis nabi wAit mama mkom mawe, ‘Meen, mam wore wo anu nhau to, kbe Jõ tno bo ro msai sau. Kbe raa betoo bo reto kʼanu. Menohe kbe anu nri tna nfot fee. Kbe anu nmus-amas Ait. Kbe anu nrok ntak ye. Tna kbe anu nhai beta.’” Habakuk 1:5 Nri smot Yesus be kbe bokyas reto mai kʼanu ye.
ACT 13:42 Paulus ysya Barnabas mkyas bo mkak. Tna raa frok samu skabuk reto mamo. Mamo tna raa weto soh-soh ana mbewok mawe, “Amu ksoh anu mbewok ne nma nkyas bo reto u kʼamu. Nma nkyas mam ayõ ro raa ntmoh (hari Sabat) ro rouu ro mama naut.”
ACT 13:43 Raa skabuk mkak. Tna raa mawat kro Paulus ysya Barnabas mamo. Ana weto to, raa ro Yahudi ye tna msya raa ro mbam rabin roto menohe ro kro agama ro Yahudi ye. Tna ana mbewok reto mkyas kʼana mawe, “Mkah tak ro Allah rAit to, nhau smot Ait yoyo.”
ACT 13:44 Ayõ ro raa ntmoh rouu to, raa ro kota reto beta mama siret mari bokyas ro Allah.
ACT 13:45 Menohe raa ro Yahudi mmat raa msis weto mari bo ro Paulus ykyas to, ana hawe. Tna mrok mhaf mkair. Tibyo ana mamus ana mbewok. Tna besboh bo ro ana mawe.
ACT 13:46 Menohe Paulus ysya Barnabas waa fee. Ana me mawe kʼana ro Yahudi weto mawe, “Allah ybis amu nkyas watum rAit kʼanu wia matim. Menohe anu hawe bo nri. Anu nnaut nwe anu noof mnan si, tibyo meen nkai nmos mae fe mfe a? Anu hawe bo nri Watum ro Allah feto to, kbe amu haberek kbor wamu tna nmo nkyas kʼraa mana roto.
ACT 13:47 Feto ye Tuhan ybis amu yawe, ‘Jõ tsok nyõ mkah namo nnan nfi kek. Kbe nyõ nram iso kʼraa rabin roto makin. Re kbe nyõ nakah riof ro mase namo nee kʼraa ro mhau mam arin aso beta.’”
ACT 13:48 Raa mbam raa mana roto mari feto, tibyo mrok simaut mase. Ana mawe bokyas ro Tuhan reto moof syok. Tna raa ro tiwya Allah ysok yawe meen mkai mamos mae to, ana mama smot Yesus beta.
ACT 13:49 Tna bokyas ro Tuhan, raa makah mamo mkyas mam rabin reto beta.
ACT 13:50 Menohe raa ro Yahudi mkyas-kas Paulus ysya Barnabas. Ana mkyas kʼfnya manes ro mhau mam kota reto tna ro ja waa Allah ye. Tna mamus ana mbewok kʼraa ro mase ye. Tibyo fnya msya raa wefo sikowah Paulus ysya Barnabas tna mikyak ana mbewok frok mamo mbam oo rana ye.
ACT 13:51 Paulus ysya Barnabas ngkaru bohasyaf ro mhau kʼana mbewok maa to war feto. Tna mbewok masen mamoʼt remo ro Ikonium.
ACT 13:52 Raa ro smot Yesus mam Antiokhia simaut mase tna Har ro Allah mbo ana matak ye.
ACT 14:1 Mam remo ro Ikonium Paulus ysya Barnabas mno bo ro ja ana mno soo oh: Ana mbewok twok mam samu skabuk ro raa Yahudi tna mkyas Yesus yasom. Mkyas bo kaket, tibyo raa ro Yahudi msya raa ro Yunani ye msis-sas mama smot Yesus.
ACT 14:2 Menohe raa ro Yahudi taro hawe smot Yesus. Ana weto mkyas-kas ana mbewok kʼraa ro wase Allah. Mno raa mrok kmo ana ro smot Yesus.
ACT 14:3 Paulus ysya Barnabas mbewok mhau ti mawat baro kait ye mam beto. Ana mbewok mkyas Tuhan yasom kʼraa. Ana waa fee. Ana mkyas boatmof ro Tuhan. Tna Ait yoo yatak rAit yee kʼana re mbewok mno bo ro msai. Ana sair bo ro hnah re kbe raa mmat tibyo mhar mawe ana mkyas bo ati, ana sioh fee.
ACT 14:4 Raa ro mhau mam remo reto to, mhaf sau fee: Taro ksoh Paulus ysya Barnabas. Tna taro ksoh raa Yahudi ro hawe smot Yesus.
ACT 14:5 Ana ro hawe smot Yesus weto to taro raa ro Yahudi msya raa manes wana. Tna taro to, raa mana roto tna msya raa manes wana. Ana weto beta saim bo su mawe mfot ana mbewok afo re ana mno bo ro mkair mai kʼana. Mawe mawah fraa mai ana majat bo ye.
ACT 14:6 Ana mbewok mari feto, tibyo ana msam mamoʼt rabin ro Likaonia. Ana mamoʼt remo ro Listra, remo ro Derbe msya tabam ro kene mam remo weto. Mamoʼt rabin ro Likaonia reto tna mkyas Bokyas Moof ro Yesus (Injil) renti.
ACT 14:8 Ana mamo snok mam remo ro Listra to, ait ro yaa mhai sait hre. Ait tait, tii tinyi fnya mabe to, yaa mhai oh. Tna ja yamo fefares.
ACT 14:9 Ait hre yari bo ro Paulus ykyas. Paulus yasu sayõ ait tna ynaut yawe bosmot rait matak. Bosmot rait matak re kbe Allah yisoh yaa rait moof matak.
ACT 14:10 Paulus ymat feto, tibyo yawe mkah ymai ro mase yawe, “Nasen nros ntrot.” Tibyo ait retait yrok sontor yasen yros tna yamo ye.
ACT 14:11 Raa msis-sas mmat bo ro Paulus yno feto. Tibyo masen mmai mnin. Ana mkyas mkah mmai rana ro Likaonia mawe, “Ana mbewok refo raa sai fee. Ana mbewok refo allah mefo. Ana haberek mamo mfi raa sai tna mbam sawro wana mama mo kʼanu oh mefo!”
ACT 14:12 Ja Barnabas ykyas bo kebet sai, tibyo ana mtu yasom Zeus mfi allah rana sait. Tna Paulus ja ykyas bo mawat tibyo ana mtu yasom allah Hermes.
ACT 14:13 Tna imam yanes sait yama ye. Imam retait tait, yoo tafuf fayir sapi ro sme baro. Fayir tna yakah sapi weto yamo frok remo kitana wore samu sahfra ro Zeus rait mhau. Ait ysya raa msis-sas mawe ktan sapi weto mee kʼPaulus ysya Barnabas. Mawe mee mkah bo mbaut ana mbewok.
ACT 14:14 Ana mbewok mari feto tna hawe. Hawe tibyo ana mbewok mhah ratan wana ro mesait myum mawe, “Raa wefo mnaut mawe amu fo mfi allah sor ro ja ana smot!” Tna ana mbewok mhoh mamo mbukak iti mam raa msis-sas wefo masuf susai tna mtu mawe,
ACT 14:15 “Anu nkin; nri oh! Nno bo refo nno fyi? Nhar nwe amu fo Allah fee. Amu fo raa sai, nnan anu ye. Bokyas Moof ro mkyas Yesus (Injil) to, amu nkyas kʼanu afo re anu sikba bosmot wanu ro mkair weto tna nma smot Allah ro yaam. Ait oh mi yfen ayoh msya tabam refo tna yfen aya sawan msya bombra ro mhau mam wore weto beta to.
ACT 14:16 Ti bose oh to, Ait yhau sayõ raa mana sau-sau beta mamo iso wana mamyot bo ro ana mhaf wana ksoh sai.
ACT 14:17 Ait sayõ raa mno feto to, menohe Ait sikba ana makus fee. Ait yerif Ait kʼraa mam bo moof msis-sas ro Ait yno kʼanu. Bo moof ro Ait yno kʼanu oh mefo: Ait yno oom mais mbam ayoh tna yno boit msya bobat moo moof mam armato wanu ye. Tna yoo boit yee kʼanu niit re nhaf mnan tna yno anu simaut mase ye.”
ACT 14:18 Ana mbewok mkyas feto re mno wa raa makin weto kbe mno bo reto ma tna mbaut ana feto ma. Raa weto mawe beroh msan bo kʼana mbewok menohe mfe.
ACT 14:19 Ti baro firwas, tna raa ro Yahudi baro mbam kota ro Antiokhia msya remo ro Ikonium mama. Mama, tna mkyas bo haberek hren msya myoh moo raa makin refo afo re ana haberek knait Paulus. Tibyo ana mai ait mkah fraa. Mai mkak oh tna ana mrok mawe ait yajat oh. Tibyo mkuk ajat rait frok mamo beak mam remo mne.
ACT 14:20 Menohe raa ro smot Yesus mama mros mur mtan kʼait, tna ait yrok yasen tna twok mam remo reto u. Tna rabu ti fo ait ysya Barnabas mbewok masen frok remo reto mamo renti remo ro Derbe.
ACT 14:21 Paulus ysya Barnabas ana mamoʼt remo ro Derbe, tna mkyas Bokyas Moof ro Yesus (Injil) mam beto. Tna raa msis mama smot Yesus. Tna ana mbewok mhah mamoʼt Listra, Ikonium msya Antiokhia mam rabin ro Pisidia ye.
ACT 14:22 Tna mam kota weto to, ana mkyas bo kʼraa ro smot Yesus mawe, “Nros natak nbo bosmot wanu matak. Soh anu ksoh bmo raa mana ro Allah yamo Raja ybo to, kbe anu bkai bo ro samyoh mawat.”
ACT 14:23 Tna mam jemaat sau-sau Paulus ysya Barnabas msok majelis taro mkah bo kmot raa ro smot Yesus mam kota wana. Ana mbewok mhau bo ro mait tna skabuk msan majelis weto kʼTuhan ro ana smot. Tna ait yayoh yawe Tuhan yatam majelis weto.
ACT 14:24 Ana mbewok mamo mur mam rabin ro Pisidia mkak, tna twok mam rabin ro Pamfilia.
ACT 14:25 Tna ana mkyas watum ro Tuhan mam remo ro Perga. Mkyas mkak, tna mamo siya snok mam remo ro Atalia.
ACT 14:26 Tna ana mbam beto maut kapal hah me mamoʼt kota ro Antiokhia mam provinsi ro Siria. (Tiwya jemaat ro mhau mam Antiokhia oh mi ro mbis Paulus ysya Barnabas mamo mkyas Yesus yasom mam rabin roto taro to. Tiwya ana skabuk mayoh Allah mawe Ait yatam ana mbewok wore woyõ-woya sai mamo. Tna mayoh mawe Allah yoo bouum ye kʼana mbewok, yno re raa mari bokyas ro ana mkyas, tibyo mama smot Yesus. Paulus ysya Barnabas mkyas Yesus yasom mam rabin roto mkak.)
ACT 14:27 Tna ana snok si mam kota ro Antiokhia. Ana mbewok mtu raa jemaat reto beta mama siret su. Tna fo ana mbewok mkyas bombra beta ro ana mno mkah tak ro Allah rAit. Tna mawe Allah yitrah amah rait tna yawe raa mbam raa mana roto ye mama smot Tuhan ye.
ACT 14:28 Tna fo ana mbewok mhau baro kait msya raa ro smot Yesus mam beto ye.
ACT 15:1 Raa baro mbam Yudea mamaʼt Antiokhia tna mkyas kʼraa Kristen ro mhau mam beto mawe, “Soh anu sunat fee mamyot watum ro Musa ykyas feto, kbe anu nkai riof fee ye.”
ACT 15:2 Menohe Paulus ysya Barnabas ana mbewok hafrah bo ro ana mkyas reto. Ana masen santri bo msya raa weto. ⌞Tna jemaat ro Antiokhia wase kbe Allah yawe ana sunat ku sme wana fe mfe a?⌟ Wase, feto mnaut mawe ana mtu kʼraa ro mhar bo reto. Tna ana msok raa baro mbis ana mamoʼt Yerusalem. Mbis ana mamo mkyas bo reto su msya raabis (rasul) ro Yesus wAit msya raa manes roto. Tna ana msok Paulus ysya Barnabas msya raa baro mbam Antiokhia ye. Msok ana weto to, mbis mamoʼt Yerusalem tna mtu mawe, “Kbe anu, raa Kristen sunat ku sme wanu fe mfe a?”
ACT 15:3 Raa Kristen ro Antiokhia to, ana mkyas bo reto mkak tna masen mamo betne Paulus ysya raa weto sor mamo snok kota rana reto makit. Paulus, Barnabas msya raa jemaat ro kro ana mamo iso rabin ro Fenisia msya provinsi ro Samaria. Mam iso maka iti to, ana fri raa Kristen ro mbam raa mana ro Yahudi baro. Paulus ysya raa ro kro ait mkyas bo kʼana mawe, “Raa ro mbam raa mana roto to, ana taro mashana tna smot Tuhan Yesus oh!” Raa Kristen mari feto tibyo simaut mase toni ye.
ACT 15:4 Paulus ysya Barnabas msya raa Kristen ro mbam Antiokhia weto mamo snok mam Yerusalem. Tna raa Kristen ro mhau mam Yerusalem mmah meen kʼana. (Raa weto oh mi raabis ro Yesus wAit, raa ro majelis, msya raa Kristen taro ye.) Paulus ysya Barnabas mkyas bo ro Allah yno to. Mawe ja ana mamo mkyas Yesus yasom, tna raa rabin roto, ro Yahudi fee, ana to mawat mama smot Yesus ye.
ACT 15:5 Menohe raa ro Farisi baro ro smot Yesus mari bo reto ye. Ana mari feto tna masen mros mawe, “Raa ro Yahudi fee, ro mama smot Yesus ye oh to, sunat ana ye! Tna nbis ana kro Watum ro Musa ye!”
ACT 15:6 Raabis weto msya raa majelis taro hre su mkyas bo reto mawe, “Allah yawe kbe raa beta sunat ku sme wana fe mfe a?”
ACT 15:7 Ana hre mkyas bo reto baro kait ye oh. Tna Petrus yasen yros yawe, “Taja nsya tao na; anu nhar nwe tiwya Allah ysok jõ tbam kʼanu mkah bo jõ tamo tkyas Bokyas ro Moof (Injil) kʼraa mana roto makin. Yno afo re ana mama smot Yesus ye.
ACT 15:8 Allah yhar raa mhaf mato beta. Tna Ait yawe Ait ksoh ana ye. Tna yoo Har rAit yse kʼana ye mnan fi Ait yse Har rAit yse kʼanu raa ro Yahudi to. Yno re kbe anu bhar bwe Ait ksoh ana weto ye.
ACT 15:9 Allah ysok anu hayah tna ana hayah fee. Ana smot Yesus tibyo Ait yisoh ana mhaf mato wana moof ye.
ACT 15:10 Kaket anu! Sanet Allah ma! Anu besait bsya hohos wanu hrowyõ bhai kro bo mafa ranu kaket to. Fyi re anu nnaut nwe Ait ksoh raa rabin roto masom bo fanes reto ye?
ACT 15:11 Riof ro anu bkai to mbam boatmof ro Tuhan Yesus Kristus rAit sai. Mbam bo mafa ramu to fee! Tna ana weto mkai riof mam iso ro bosmot ye mnan anya!”
ACT 15:12 Tna Paulus ysya Barnabas masen mkyas bo. Ana mkyas mawe “Allah yoo yatak rAit yee kʼamu mbewok re nno bo ro msai. Amu sair bo ro hnah re kbe raa mana roto mmat tna mhar Ait yase rait.” Raa ro siret weto hre shait sai mari.
ACT 15:13 Paulus ysya Barnabas mkyas bo wana mkak. Tna fo Yakobus yasen yawe, “Taja nsya tao na; nri oh!
ACT 15:14 Simon-Petrus riwai ykyas bo ro tna sai tinyi rau! Ait betoo yawe Allah yatmof tna ysok raa taro mbam raa mana roto mamo raa wAit ye.
ACT 15:15 Bo reto mamo mamyot bo ro tiwya Allah ybis nabi na mama mkom mawe,
ACT 15:16 ‘Meen Jõ thah te tama tisoh samu ro Daud rait. Samu rait reto tiwya matu tna kbe te sgi u. Bombra ro tiwya nsasi beta meen me mros matak.
ACT 15:17 Jõ tno feto afo re raa ro Yahudi, tna msya raa ro rabin roto beta kbe saso Jõ. Ana weto tiwya wase Jõ. Menohe jõ ttu ana weto ye, tawe ana mamo ku woJõ to. Kbe meen ana saso Jõ ye. Tuhan Allah yesait ykyas bo reto.
ACT 15:18 Tiwya tinyi ykyas bo reto beta re kbe raa mhar.’”
ACT 15:19 Tna Yakobus yawe, “Feto to jõ tnaut tawe, raa ro rabin roto weto, anu bbis bwe ana kro bo mafa wanu beta ma, ana ksoh rana sai. Kbe anu bno bo ro nririt wa iso kʼana mama mo kʼAllah to ma.
ACT 15:20 Jõ tnaut tawe anu bkom aam sau tee kʼana. Bkom aam bwe: 1. Sohmaam bo ro raa moo msan kʼberhala oh to ma. 2. Tna nwyah bo to ma ye. 3. Nbo kak kwiyan ro mees mhau fares to ma. 4. Nta mees ro kak raa ktan to ma. ⌞Soh ana kro bo mafa wanu weto sai to, kbe moof. Kbe anu ro Yahudi hrenaut fee. Tna kbe anu biranya moof sai.⌟
ACT 15:21 Watum ro Musa mkyas mawe bo weto beta raa ro Yahudi mbau. Mam woyõ-woya sai tiwya bose oh, ja raa wanu bkyas bo reto. Feto to raa mhar oh. Tna anu raa ro Yahudi bmat bokyas reto mam samu skabuk wanu ye. Anu bmat bokom reto mam ayõ ro raa ntmoh (hari Sabat) yoyo.”
ACT 15:22 Tna fo raabis ro Tuhan wAit, raa majelis msya raa ro ja smot Tuhan taro ye, ana beta hre mkyas bo su. Tna ana mawe msok raa mabo baro mbam ana makin weto tna mbis ana mamoʼt kota ro Antiokhia. Ana msok raa manes mabo ewok: Yudas-Barsabas ysya Silas. Tna mbis ana mbewok kro Paulus ysya Barnabas mhah me mamoʼt Antiokhia.
ACT 15:23 Tna ana weto sor mkom aam sau mee kʼYudas ysya Silas mbewok mbo makah mamo. Aam reto mkyas mawe, “Taja, tme, tao, tano na ro nbam raa mana roto; amu nkom aam refo nee kʼanu ro nhau mam Antiokhia, tna ro nhau mam remo taro mam provinsi ro Siria, msya provinsi ro Kilikia ye. Meen oh kʼanu beta.
ACT 15:24 Amu nri raa mabo baro mama mo kʼanu, tna ana mkyas bo ro mno anu nrok susit ye. Amu aro nbis ana nwe ana mama mkyas bokyas feto fee.
ACT 15:25 Riwai amu nhau mam Yerusalem to, siret su tna nkyas bo reto. Tna amu nsok Yudas-Barsabas ysya Silas tna nbis ana mbewok refo mama mo kʼanu. Ana kro Paulus ysya Barnabas, ro ja amu ksoh to, mama.
ACT 15:26 Yudas ysya Silas ja mros mana matim mno bo ro Tuhan ybis kʼana sai.
ACT 15:27 Feto oh mi amu nbis ana mbewok mamo mo kʼanu to. Ana oh mi kbe mama mkyas watum ramu reto kʼanu kait mamyot si aam ro amu nkom refo fo.
ACT 15:28 Amu hawe bo nbis anu nno bo ro samyoh. Tna Har ro Tuhan mkyas bo reto kʼanu ye mnan anya. Feto to amu nsi bo wefo kʼanu sai: 1. Sohmaam boit ro raa moo msan kʼberhala oh to ma. 2. Nta mees ro kak raa ktan to ma. 3. Nbo kak kwiyan ro mees mhau fares to ma. 4. Tna nwyah bo to ma ye. Bokom wamu kebet sai oh mefo, mkah bo watum anu afo re anu nberhasyoh raa ro Yahudi to ma. Meen oh kʼanu beta.”
ACT 15:30 Raa Kristen ro mhau mam Yerusalem weto ana mmah meen kʼana mabo jiit reto. Tna fo ana masen mamoʼt Antiokhia. Raa mabo jiit reto snok mam Antiokhia. Tna ana mtu raa Kristen beta ro mhau mam beto sor mawe mama siret beta. Tna ana mbaca aam reto kʼana beta.
ACT 15:31 Raa mari bokyas ro aam reto to, ana simaut mase.
ACT 15:32 Yudas ysya Silas to, mbewok nabi ro ja Allah ybis mkyas bo wAit to ye. Tna wore wo ana mhau mam beto to, ana mkyas bo kʼraa ro smot Yesus. Bo ro mbewok mkyas reto to, mno bosmot wana matak.
ACT 15:33 Ana mbewok mhau mam Antiokhia ti baro firwas. Tna ana masen mawe hah me mamoʼt Yerusalem. Tna raa Kristen mmah meen kʼana mbewok tna mawe kbe ana mbewok mmah meen kʼraa Kristen ro mhau mam Yerusalem ye. Tna mawe mayoh asik mase kʼraa ro mbis ana mbewok mama to ye. [
ACT 15:34 Menohe Silas yawe ait yhau wia fares mam Antiokhia.]
ACT 15:35 Paulus ysya Barnabas mhau mam Antiokhia ti baro naut mkah bo mkyas watum ro Tuhan kʼraa ro mhau mam beto ye. Tna raa Kristen mawat taro ye mkyas watum ro Tuhan mam beto ye.
ACT 15:36 Mhau ti baro naut tna Paulus yawe kʼBarnabas yawe, “Anu mbewok hah be bmoʼt kota ro tiwya bkyas Tuhan yasom sor to no. Tawe anu be bmo bmat raa ro mama smot Yesus tna sor to. Feto kbe anu bhar soh ana mhau smot Yesus matak fe mfe a?”
ACT 15:37 Barnabas ait ksoh ymen Yohanes ro ja raa mtu yasom Markus tait, kro ana mamo ye.
ACT 15:38 Tiwya Markus yasen sikba ana mam Pamfilia. Feto oh mi Paulus ait hawe bo ymen Markus kro ana mamo u fee.
ACT 15:39 Feto tibyo Paulus ysya Barnabas kmo anya toni tibyo ana mbetne-tna anya: Sait yasen yamo hayah-hayah. Barnabas ait ymen Markus kro ait maut wiak (kapal) mamoʼt sato ro Siprus.
ACT 15:40 Tna Paulus ymen Silas kro ait mamo ye. Tna raa ro Kristen weto skabuk Tuhan afo re bouum rait mhau matam ana mbewok.
ACT 15:41 Paulus ysya Silas mbewok mamo mur mtan mam provinsi ro Siria msya provinsi ro Kilikia. Ana mkyas watum ro Tuhan reto kʼraa Kristen ro mhau mam rabin weto sor to, tibyo bosmot wana mrok matak ye.
ACT 16:1 Paulus yasen yamoʼt remo ro Derbe tna fo yamoʼt remo ro Listra ye. Mam weto ait fri ku ro sme sait yasom Timotius. Timotius ja smot Yesus. Ait yme, fnya mbam fnya mana ro Yahudi. Tna fai au reto smot Yesus ye. Timotius, ait yaja ybam raa mana ro Yunani.
ACT 16:2 Raa ro ja smot Yesus ro mhau mam Listra msya Ikonium to, ana ksoh Timotius, mawe ait raa ro ja yno bo moof ye.
ACT 16:3 Paulus ksoh yawe Timotius kro ait mamo ye. Menohe raa mbam raa mana ro Yahudi ana mhar mawe Timotius yaja tait, ybam raa mana ro Yunani. Tna ana mhar mawe soh Timotius ynan anya ysya raa ro Yahudi, raa ro Yahudi kbe ksoh mari bo ro ana mkyas. Feto tibyo Paulus sunat Timotius wia.
ACT 16:4 Tna Paulus, Silas, ysya Timotius masen mamoʼt kota makin. Mamo mmat raa ro smot Yesus. Ana mbo aam raabis (rasul) ro Yesus msya majelis tiwya mkom mam Yerusalem. Tna mkyas aam reto kʼraa jemaat weto mawe, “Ana mbis mawe anu kro bo mafa raa ro Yahudi ja mno beta ma, kro bo ro raa mkom mam aam refo sai tna nbo nno ye.”
ACT 16:5 Tibyo raa ro smot Yesus sor fo, bosmot wana mrok matak. Tna rabu ti wawa to raa roto taro mama smot Yesus ye.
ACT 16:6 Har ro Tuhan mkyas kʼPaulus, Silas, ysya Timotius mawe, “Nmo nkyas Watum ro Allah mam rabin ro Asia ma!” Feto tibyo ana mamo twat sai mkyas Watum ro Allah mam rabin ro Frigia msya provinsi ro Galatia sai.
ACT 16:7 Ana mama snok mam kitana provinsi ro Misia tna ana sik twok mam provinsi ro Bitinia ye menohe Har ro Yesus mno wa mawe, “Ntwok mam provinsi reto ma!”
ACT 16:8 Feto tibyo ana mamo miwrek provinsi ro Misia iti tna mamoʼt remo ro Troas.
ACT 16:9 Mti reto Paulus ait yjin smi ymat raa ro Makedonia sait yros tna soh-soh ait yawe, “Paulus: Nasen namaʼt provinsi ro Makedonia nmat amu ye!”
ACT 16:10 Paulus ymat bo reto, tna amu srau nwe Allah ybis amu nsen nmo nkyas watum rAit kʼraa ro Makedonia ye. Feto tna amu siwyan bo wamu tna nsen nmoʼt Makedonia.
ACT 16:11 Amu sikba remo ro Troas tna nuut kapal nhoh nmoʼt sato ro Samotrake. Tna rabu ti to amu nmo nuut kapal nmo renti nmoʼt remo ro Neapolis ye.
ACT 16:12 Tna nbam Neapolis nsen nmoʼt Filipi, kota ro mase tinyi mam provinsi ro Makedonia reto. (Kota ro Filipi to, pemerintah Roma mbo.) Amu nhau ti baro mam beto ye.
ACT 16:13 Ayõ ro raa ntmoh (hari Sabat) to, amu nsen nmoʼt aya sau ro kene mam kota reto makit. Amu nnaut nwe raa ro kro agama Yahudi ja mamo skabuk su mam yuk reto. Tibyo amu nmo hre su nsya fnya sor ro riwai mamo matim tna hre su mam yuk reto wea. Hre tna nkyas bo nsya ana.
ACT 16:14 Ana weto, sau masom Lidia. Fai au mbam remo ro Tiatira. Au ja mkah bo mtaus hawee ro mkek. Lidia ja smot Allah. Au hre mari Paulus ykyas Yesus yasom. Tna Tuhan yno au mrok mhaf smot Yesus ye.
ACT 16:15 Lidia msya raa ro amah rau mawe raa baptis ana. Tna au mawe kʼamu mawe, “Anu nhar nwe jõ smot Yesus. Soh feto to, nma, kbe anu njin mam samu ramu ye, mbau a.” Fai au matak sai mawe amu nma. Tibyo amu nmo nhau mam amah rau.
ACT 16:16 Ati sau amu nmoʼt yuk ro raa skabuk. Tna amu fri ku sau. Ku au reto raa awe. Awe reto ja kabes mbo tna au mkyas bo ro meen btek mai kʼraa. Tna ja raa mama mtu tane bo kʼau ye. Pitis ro raa moo mee reto, ku au mbo fee, moo mee kʼbobot wau. Awe reto ja moo pitis mawat mee kʼbobot wau ye.
ACT 16:17 Ati reto to, awe reto kro Paulus ysya amu mam tis. Tna mmai wer mawe, “Raa wefo fo raabis Allah ro yase wAit! Ana mama merif iso ro kbe raa mamo tna mkai riof ro mase!”
ACT 16:18 Ti mawat ye oh ku au reto mno feto yoyo sai. Tna Paulus ynaif fasa yari bo ku au reto mtu feto. Tna ait haberek yawe kabes ro mbo au reto yawe, “Mkah Tuhan Yesus yasom: Jõ tikyak nyõ tawe nfrok nbam ku au reto namo!” Feto si to kabes reto sikba ku au, frok mamo.
ACT 16:19 Tna bobot ro ja mtos ku au sor to, kmo mawe, “Nno fyi meto! Wore kbe amu tru pitis aro u fee oh?” Tna ana mfot Paulus ysya Silas mamoʼt pasar msan ana mbewok kʼraa ro sbe.
ACT 16:20 Tna ana makah Paulus ysya Silas mamo msan renti kʼaban mana ro mbo kota reto. Ana sioh maun boun mawe, “Raa ro Yahudi wefo fo mno raa ro befo mrok mnin-nin.
ACT 16:21 Ana sobu mawe anu bno bo mafa wana. Mawe ksoh anu bno bo miwer watum ro Roma, miwer pemerintah ja mbis!”
ACT 16:22 Raa ro berur su weto mari feto tna ana mrok mamus Paulus ysya Silas ye. Tna aban mana ro mbo kota reto mbis raa mhah ratan wana mbewok mbam ana metsu tna mbis raa moo too mok-mak ana mbewok ye.
ACT 16:23 Ana mbewok raa mmok-mak mkak. Tna makah mamo mbu mam bui. Aban mana ro mbo kota mbis raa kmot ana mbewok matak toni.
ACT 16:24 Tibyo raa sbe ro kmot ana ybu ana mbewok mam amah hawar ro mhau masuf susai. Tna make ana mbewok maa ye.
ACT 16:25 Arin masuf to, Paulus ysya Silas mbewok skabuk tna mji howes ye kʼAllah. Tna raa taro sor mhau mam bui reto ye. Ana weto hre mari bo ana mbewok skabuk tna mji howes feto si fo
ACT 16:26 iin ro msai frok sin amah reto. Mato beta mrok masoh maa. Tna bo ro raa make to mrok hri-hra beta ye.
ACT 16:27 Raa sbe ro kmot ana yrok yasen. Tna ait ymat he mato ro bui reto mrok masoh maa beta. Ait ynaut yawe raa ro ait kmot weto beta frok msam mamo oh. Tibyo yayõ tfo rait yawe takoh ait. Ait ynaut yawe yhau ma kbe raja Kaisar ybis raa mame ait yajat ye.
ACT 16:28 Menohe Paulus ytu mkah ymai ro mase yawe, “Ntakoh nyõ ma! Amu beta nhau fares mefo!”
ACT 16:29 Tna raa sbe retait yayoh tafoh tna ybo yhoh yamoʼt bui mato. Yamo yo kʼPaulus ysya Silas to, ait tetet tna ysit yimna mam tabam.
ACT 16:30 Tna yasen yakah ana mbewok frok mne. Tna ytu yawe, “Jõ tno bawya re kbe jõ tkai riof ro mase?”
ACT 16:31 Paulus ysya Silas mawe, “Smot Tuhan Yesus afo re kbe nyõ nkai riof ro mase. Tna raa wonyõ ye: Soh ana smot Tuhan to, kbe ana mkai riof ro mase ye.”
ACT 16:32 Tna Paulus ysya Silas betoo Watum ro Tuhan kʼraa sbe retait ysya ana ro mhau mam amah rait beta.
ACT 16:33 Mti reto ye ait yyon tna yisoh yaaf wana ye. Tna ait ysya raa wait ro mhau mam amah rait beta mawe ana mbewok baptis ana ye.
ACT 16:34 Tna fo bi ait yakah Paulus ysya Silas yamoʼt amah rait, tna yasyõ boit yama yee kʼana mbewok mait ye. Ait ysya raa wait smot Yesus tibyo ana simaut mase toni syok.
ACT 16:35 Rabu momo to aban mana kota ro Filipi sor mbis raa sbe wana mamoʼt bui tna tufrok Paulus ysya Silas re ana mamo bana.
ACT 16:36 Tna raa sbe ro kmot ana mbewok retait ykyas bo reto kʼPaulus yawe, “Aban mana ro kota refo sor riwai mbis mawe raa tufrok anu mbewok nmo. Feto to nmo oh. Tna meen oh kʼanu.”
ACT 16:37 Menohe Paulus yawe si kʼraa sbe ro riwai mama weto yawe, “Amu mbewok fo raa ro Roma. Nmo nkyas bo reto kʼaban mana weto. Nwe ana mesait miwer watum ro pemerintah Roma: Taa ana mbis raa mmok-mak amu mam wore raa makin mmat. Tna mbu amu mam bui ye. Mno feto menohe mtu srah ranu mbewok fefares! Bo ro ana mno reto mkair toni! Tna mfo refo ana mawe mbis amu nmo shait sai a? Feto to amu hawe ye. Amu nwe kbe aban mana ro mbo kota refo mesait makah mabo kait mamaʼt befo afo re tufrok amu to saah.”
ACT 16:38 Raa sbe weto hah me mamo mkyas bo weto kʼaban mana weto. Ana weto mari he Paulus ysya Silas ana warga negri Roma, feto tibyo aban mana weto mrok waa.
ACT 16:39 Tna mesait mamo mo kʼana mbewok mam bui. Tna makah ana mbewok frok mamo, tna soh-soh ana ye mawe, “Nmo frok nbam kota ramu oh!”
ACT 16:40 Tna fo Paulus ysya Silas mamoʼt amah ro fai Lidia rau. Ana fri raa ro smot Yesus taro ye mam beto. Ana mbewok mkyas bo moof kʼraa weto. Tna fo mbewok masen mamo renti.
ACT 17:1 Paulus ysya Silas masen mamo renti naut. Ana mamo iti snok mam remo ro Amfipolis msya remo ro Apolonia. Tna fo ana mbewok snok mam kota ro Tesalonika. Samu skabuk raa ro Yahudi sau mhau mam beto ye.
ACT 17:2 Mam ayõ ro raa ntmoh (hari Sabat) to, Paulus ja yamoʼt samu skabuk reto, ykyas Bokom ro Allah. Tiwya yno bo reto mfi bo mafa ro ja ait yno sor to, yno muhrin tuuf oh. Tna mam ayõ reto ye Paulus yamoʼt samu skabuk ye.
ACT 17:3 Ait yasen betoo Watum ro Allah kʼraa ro Yahudi weto. Yawe, “Bokom ro Allah mkyas Mesias. Mkyas mawe kbe Ait ykai bo ro samyoh: Raa mame Ait yajat. Tna mam ti ro tuuf to, kbe Ait yrok yasen ye.” Ykyas Bokom ro Allah ro ana mhar oh reto. Tna betoo afo re ana srau mawe Yesus tait Mesias to.
ACT 17:4 Bokyas ro Paulus matak toni. Tibyo raa ro hre mari weto to, taro mama smot Yesus: Raa mbam raa mana ro Yahudi ye, raa ro ja smot Allah mbam raa mana ro Yunani mawat ye, msya fnya manes mawat ye. Ana mama smot Yesus tna kro Paulus ysya Silas ye.
ACT 17:5 Menohe raa ro Yahudi ro hawe smot Yesus fee to, ana mmat feto tibyo mrok mhaf mkek. Tna ana mamoʼt pasar tna saso raa ro mkair. Saso raa ro ja mira mboh-bah sai. Tna mtu ana ro ja mamo-ama sai mama. Raa ro Yahudi weto mbis ana ro mkair weto mamo mno raa ro kota reto beta mrok mnin-nin. Tna fo raa mkbair reto mamo twok mam amah bi sait ro yasom Yason. Ana mawe saso Paulus ysya Silas re mfot tna makah mamo msan kʼraa.
ACT 17:6 He mfe, ana mbewok marak. Tibyo ana kmo mfot Yason ysya raa ro Kristen mabo baro ye. Mfot tna makah mkuk mamo msan kʼaban mana ro ja mbo kota ro Tesalonika reto. Raa ro berur su weto maun kair ana. Mkah mai ro mase mawe, “Raa weto ja mno bo ro mkair mam woyõ-woya sai! Tna ana mawe mama mno bo ro mkair mam kota ranu ye!
ACT 17:7 Yason fi ja yiranya ysya ana weto. Tna yoo ana yse mam amah rait ye. Raa ro Kristen ana mno bo ro mkair miwana bo ro raja Kaisar yawe. Tna ana mkyas mawe Raa sait ro yasom Yesus yamo Raja ro yase.”
ACT 17:8 Raa ro Yahudi weto mkyas feto mno raa mrok mnin-nin. Aban mana ro ja mbo kota reto kmo ye.
ACT 17:9 Tna ana mbis Yason ysya yafoh wait mabo ewok weto moo pitis aro mamo make safo reto. Tna fo raa bitsre ana mamo bana.
ACT 17:10 Raa ro Kristen waa kbe raa mno bo ro mkair mai kʼPaulus ysya Silas. Feto to mti reto ana mberuk ana mbewok, mbis ana masen mamoʼt remo ro Berea. Paulus ysya Silas mamo snok mam Berea to, mbewok mamoʼt samu skabuk raa ro Yahudi.
ACT 17:11 Raa ro Berea to ja mno bo ro moof. Ana mfi raa ro Tesalonika to fee. Raa ro Berea ksoh toni mari Paulus ysya Silas mkyas Yesus yasom. Rabu ti wawa to raa weto mmat Bokom ro Allah. Mawe mmat re kbe ana mhar bo ro Paulus ykyas to, mamyot mfi Bokom ro Allah fe mfe a.
ACT 17:12 Tna raa mbam raa mana ro Yahudi mawat mama smot Yesus. Tna raa manes mbam raa mana ro Yunani msya fnya manes wana taro mawat mama smot Yesus ye.
ACT 17:13 Menohe raa Yahudi ro mhau mam Tesalonika mari he Paulus ykyas Watum ro Allah mam remo ro Berea ye. Feto tibyo ana baro masen mamoʼt remo reto. Snok mam Berea ana mkyas kair Paulus. Ana mno raa kmo Paulus. Tna mawe kʼraa makin mawe, “Nri bokyas rait ma!”
ACT 17:14 Raa mana ro Kristen mari feto tna sobu Paulus mawe, “Nasen nsam wai namoʼt Atena wia.” (Atena to kota sau ro mhau kene mam aya sawan maam.) Silas ysya Timotius mawe ana mbewok mhau akus mam Berea wea.
ACT 17:15 Tna raa betne Paulus yamo snok kota ro Atena tna Paulus yawe kʼana yawe, “Hah ne nmoʼt Berea nbis Silas ysya Timotius mama srot mrof jõ.” Tna ana ro riwai betne Paulus weto hah me mamoʼt Berea.
ACT 17:16 Wore Paulus ste ana wea mam Atena to, ait sraujin toni ymat bo raa ro kota reto ja smot berhala msis.
ACT 17:17 Tna re ait yamoʼt samu skabuk ykyas bo ysya raa ro Yahudi tna msya raa rabin roto ro ja smot Allah ye to. Tna rabu ti wawa Ait ykyas bo ysya raa ro ait fri mam pasar to ye.
ACT 17:18 Tna ait ykyas bo ysya guru ro ja kro bonaut ro bi Epikuros tna ysya guru ro ja watum bonaut wana mam samu sau ro masom Stoa ye. Paulus santri bo ysya raa ro kro bonaut weto to tna ana baro mawe kair ait mawe, “Bi ait refi yhar bo bawya ee? Ait yhar bo kebet baro sai menohe ait yasoh mase toni syok!” Ana taro mnaut mawe, “Ait ykyas kabes raa ro rabin roto taro meto.” (Paulus ykyas Yesus kʼana yawe Ait yrok yasen oh mi raa mkyas bo reto.)
ACT 17:19 Tna raa mfot Paulus makah mamo msan kʼraa ro beah srah mam Faut ro Areopagus. Mam weto ana mawe kʼait mawe, “Sik nkyas bokyas ro tna reto kʼamu re amu nri ye.
ACT 17:20 Bo ro nyõ nkyas reto to, bokyas ro tna fares. Sik betoo maja rau afo re amu nri tna nhar.”
ACT 17:21 (Raa ro Atena beta msya raa srim ro mhau mam beto to ana ksoh mari tna mkyas bo ro tna rioh sai.)
ACT 17:22 Paulus yasen yros mam wore raa siret mam Faut ro Areopagus reto yawe, “Anu raa ro Atena; jõ tamo te mam kota ranu to, tna tmat berhala msis. Jõ trok tawe anu to raa ro mur-mur smot dewa sor. Tna jõ tmat wohat mkah bo anu nsan bosan kʼdewa weto ye. Tna mam wohat sau raa mkom: ‘Wohat refo fo mkah raa msan bosan kʼallah sau ro ja raa wase.’ Allah ro anu smot menohe wase fares retait oh mi mfo refo Jõ tkyas kʼanu nri mefo.
ACT 17:24 Allah ro yase retait, Ait yase yfen arin aso msya bombra beta, Ait oh mi yase ybo tabam msya ayoh to. Ait yhau mam samu ro raa sgi fee!
ACT 17:25 Bo rAit ro yse to aro mabut fee. Ait yayoh bo kʼraa sai fee. Ait oh mi yoo roon yee kʼraa. Ait oh mi yoo mafos rana yee kʼraa beta. Ait oh mi yoo bombra beta yee to.
ACT 17:26 Tiwya tinyi Allah yfen Adam wia. Tna mbam Adam Ait yfen raa mana beta. Yno ana betru tabam refo beta to. Ait oh mi ybis yawe anu raa sait-sait bhau mam makyon wore wo ait yme mabe ait. Tna yno raa mana mhau mam oo wana hayah-hayah wore ana mhau bo to.
ACT 17:27 Allah yfen raa afo re kbe ana saso Ait. Ait ksoh yawe raa ro saso Ait to. Yawe anu raa bkai Ait saah. Raa tru Ait saah. Ait yros rit fee.
ACT 17:28 Ait oh mi yoo yatak rAit yee tibyo anu baam, anu bnah to. Tna yno re anu bhau bno bo wanu ye bo to. Tiwya raa wanu ro ja sair bomna baro mawe, ‘Anu wefo beta ku ro Allah wAit ye.’
ACT 17:29 Anu fo ku ro Allah wAit beta tna anu baam tna bnah-nah ye. Feto to jõ tkyas kʼanu tawe Allah, ro yare anu to, Ait raa ro yaam ye tu oh. Nnaut nwe Allah tait yfi berhala ro raa mfen mbam fraa, emas, msya perak bo ma.
ACT 17:30 Raa ro tiwya tinyi wase Allah to, ana mno-na bo sai. Tna Allah yros sayõ. Menohe mfo refo Ait ybis raa ro tabam refo beta yawe ana mashana tna smot Ait beta oh.
ACT 17:31 Allah ymah oon yawe meen ait yama ytu srah raa ro tabam refo beta. Raa sait ro tiwya Ait ysok to, meen yasen ytu srah yari. Ait retait yhar raa mhaf wana beta tna kbe yno bo rAit moof mnan si. Bi Ait retait tiwya yhau mam tabam refo. Tna raa mame yajat. Menohe Allah yno Ait retait yrok yasen. Yno Ait yrok yasen afo re raa beta kbe mhar mawe Ait retait Raa ro Allah ysok.”
ACT 17:32 Ati ro Paulus yawe raa retait yrok yasen feto, raa taro masah. Menohe ana taro mawe, “Amu ksoh nwe nyõ nama nkyas bo refo kʼamu u.”
ACT 17:33 Tna Paulus sikba ana yamo.
ACT 17:34 Raa ro mari bo ro Paulus ykyas reto, baro kro bonaut rait tna ana mama smot Yesus ye. Ana wefo fo sait yasom Dionisius, (Ait retait raa manes ro ja mtu srah mam Faut ro Areopagus.) ysya fai au ro masom Damaris, tna raa baro naut msya ana ye.
ACT 18:1 Tna fo Paulus sikba kota ro Atena yamoʼt kota ro Korintus.
ACT 18:2 Mam weto ait fri raa ro Yahudi sait yasom Akwila. (Ait raa mabe mam provinsi ro Pontus.) Akwila ysya yfain Priskila raa srim. Ana mamaʼt Korintus mbam provinsi ro Italia. (Ati reto to, raja yase ro yasom Klaudius ybo Italia. Ait knait raa ro Yahudi tna ybis ana beta frok mbam kota Roma mamo. Kota ro Roma mhau mam rabin rait ro Italia ye.) Ti ro Paulus ybam Atena yama to, ait yamo yo kʼana mbewok.
ACT 18:3 Bo ro ja ana mbewok mkah to, ana mfen kemah mnan bo ja Paulus ykah ye. Feto to ait yhau ysya ana mbewok tna ana mkah bo su.
ACT 18:4 Tna mam ayõ ro raa ntmoh (hari Sabat) yoyo to, ja Paulus yamoʼt samu skabuk ykyas Yesus yasom. Raa ro Yahudi msya raa ro Yunani mama hre mari bo ro ait ykyas. Tna ait tomer yoo ana mhaf afo re ana smot Yesus ye.
ACT 18:5 Tna Silas ysya Timotius mbam Makedonia mama. Tna Paulus yitsre bo ro ja ykah. Yitsre bo yfen kemah tna ykyas Yesus yasom rabu ti wawa. Ait ykyas kʼraa ro Yahudi yawe, “Yesus tait Mesias.”
ACT 18:6 Menohe ana ro mbam raa mana ro Yahudi hawe mari bokyas ro Yesus. Ana kmo tna mamus Paulus. Feto tibyo ait yasen yamo. Tna ait yitut bohasyaf mbam ratan rait reto. Yno feto re kbe ana mhar mawe ait yitsre yatem kʼana yawe, “Soh bo ro mkair btek mai kʼanu to kanyin sai oh! Jõ tasom isti reto fee. Mfo refo jõ tamo tkyas Yesus yasom kʼraa ro mbam raa mana roto makin.”
ACT 18:7 Tibyo Paulus frok sikba samu skabuk reto tna ykyas bo mam weto u fee. Tna ait yamoʼt samu ro Titus-Yustus ro yhau kene mam weto. Bi Titus-Yustus tait raa ro ja smot Allah. Menohe ait raa mana ro Yahudi fee. Tna Paulus ykyas Yesus yasom mam samu rait reto.
ACT 18:8 Raa ro mhau mam Korintus, taro hawe smot Yesus. Menohe taro mawat ksoh mari bokyas ro Paulus ykyas reto. Ana weto mama smot Yesus tna mawe raa baptis ana ye. Ro mrok smot Yesus weto, raa sait yasom Krispus. Ait raa ro Yahudi. Tna ait yamo aban mana ro ja ybo samu skabuk ro agama Yahudi mam kota ro Korintus reto ye. Ait ysya raa ro mhau mam amah rait to, ana beta mama smot Yesus.
ACT 18:9 Ti sau fo Paulus yjin smi. Tna ait yari Allah ykyas bo kʼait yawe, “Waa ma. Jõ kbe tatam nyõ yoyo. Feto to nkyas Yesus yasom renti sai, shait ma. Raa mawat mam kota refo fo raa woJõ. Feto kbe raa sait bo yno bo ro mkair mai kʼnyõ fee.”
ACT 18:11 Tna re Paulus yhau mam Korintus tahun sau hariyah tna ykyas Yesus yasom kʼraa.
ACT 18:12 Tna fo Galio yamo gubernur mam provinsi ro Akhaya reto. Tna raa ro agama Yahudi mawat mkyas bo ro mkair mai kʼPaulus. Tna ana makah ait mamoʼt samu ro ja bi Galio ytu srah to.
ACT 18:13 Ana makah Paulus mamo mo kʼbi Galio tna maun boun kʼait mawe, “Bi ait refi yber safo mai kʼamu raa ro agama Yahudi! Ait ykyas bosmot roto sau. Ait yno raa mawat miwer Watum ro Musa!”
ACT 18:14 Paulus yawe yros saak wa ait, menohe bi Galio sbi hri wa, yawe bo kʼraa ro Yahudi yawe, “Paulus yno safo fee. Tna ait yiwer pemerintah ro Roma fee ye. Fyi re anu nakah ait nma no kʼjõ fo?
ACT 18:15 Bo ro anu santri anya to bo ranu ro agama Yahudi sai. Soh ait yiwer Watum ranu meto mi, anu nesait beah srah refo! Jõ hre susai ttu safo ro mnan feto fee!”
ACT 18:16 Tna fo ait yikyak ana frok mbam samu mato reto wore ja raa hre beah srah.
ACT 18:17 Tibyo raa ro Yahudi weto kmo. Ana beta haberek saka bi Sostenes to mai ait mam bohra samu reto. (Bi Sostenes fi aban mana ro ybo samu skabuk rana.) Tna bi Galio ymat rof bo raa mafa sai, yno wa bo fee ye.
ACT 18:18 Paulus yhau ti baro naut mam kota ro Korintus. Tna fo ait ymah meen kʼraa ro Kristen akus. Tna Paulus, ysya Priskila msya Akwila masen mamoʼt remo ro Kengkrea. Mam Kengkrea Paulus yawe skabuk yoyo. Feto tna ait ymur yana mawyan. (Yno mamyot bo mafa raa ro Yahudi ja mno soh ati ro ana mawe skabuk kaket.) Tna ana mabo tuuf maut kapal mamoʼt provinsi ro Siria.
ACT 18:19 Ana mamo snok mam kota ro Efesus. Mam beto Paulus sikba ana tna ait yesait yamoʼt samu skabuk ykyas bo ysya raa ro Yahudi.
ACT 18:20 Raa ro Yahudi weto ana ksoh mari bo ro Paulus yawe. Ana mawe mabe ait mawe, “Namo ma! Nhau baro kait mam befo!” Menohe ait yawe, “Mfe, ayõ mkak oh.
ACT 18:21 Soh Tuhan ybis mi, meen jõ thah te tama to kʼanu u to.” Ait ymah meen kʼana akus tna yasen yaut kapal sikba Efesus yamo.
ACT 18:22 Tna Paulus yaut kapal yamoʼt kota ro Kaisarea. Tna ait yroh mam beto yamo yaa iso mne yamo yut. Paulus ymah meen raa Kristen ro mhau mam beto sor. Tna fo yasen yamo renti yamo sia kota ro Antiokhia.
ACT 18:23 Ait yhau mam Antiokhia ti baro. Tna fo ait yasen yamo ymat raa Kristen ro mhau mam provinsi ro Galatia msya rabin ro Frigia. Yamo ymat jemaat sor ykyas bo yno bosmot wana matak.
ACT 18:24 Tna raa ro Yahudi sait yasom Apolos yamoʼt Efesus. Ait raa mabe mam kota ro Aleksandria. Apolos raa ro ykyas bo yasoh mnan-nan tna yhar Watum ro Allah kaket.
ACT 18:25 Tiwya raa mkyas Yesus yasom kʼait. Menohe ait yhar watum ro Yohanes Pembaptis sai, yhar bokyas ro Yesus mabut-abat sai fares. Apolos ksoh toni ykyas Yesus yasom. Ait betoo kʼraa yawe Yesus tait Mesias ro yoo riof ro mase yee kʼraa. Ait ykyas bo reto kaket ye.
ACT 18:26 Ti sau Apolos yros ykyas bo mam samu skabuk raa ro agama Yahudi. Ait waa fee. Tna Priskila msya Akwila msya raa taro hre mari bo ro ait ykyas. Menohe ana mbewok mawe kʼanya mawe, “Bi ait refi yhar bokyas ro Yesus mnan fefares.” Tibyo ana mbewok masen sobu ait tna mmen ait ysya ana mamoʼt amah rana. Mam weto ana mbewok hre mbetoo Iso ro Yesus kaket kʼait. Tna bi Apolos ait hre shait sai, ksoh yari. Ait kmo fee.
ACT 18:27 Tna Apolos yawe ksoh yamoʼt provinsi ro Akhaya. Tna raa Kristen ro mhau mam Efesus fo ana ksoh ye. Feto to ana mkom aam sau kʼraa Kristen ro mhau mam Akhaya. Aam reto mkyas Apolos kʼana mawe ait raa ro yoof. Tna mbis raa jemaat mam Akhaya mawe kbe ana mitrah amah wana tna mawe ait yhau ysya ana. Ana mee aam kʼApolos ybo. Tna ait sikba Efesus yamoʼt Akhaya. Apolos frok mam Akhaya. Tna ykyas watum ro Tuhankʼjemaat mam beto. Ykyas bo kaket tna raa weto mari bo ro ait yawe. Mari tibyo mrok mhar boatmof ro Allah tna bosmot wana mo matak renti.
ACT 18:28 Apolos yamo yros mam wore raa makin mmat tna santri bo ysya raa ro agama Yahudi ye. Tna ait betoo Bokom ro Allah kʼana kaket afo re ana mhar mawe Yesus tait Mesias oh metait.
ACT 19:1 Wore wo Apolos yhau mam kota ro Korintus fares, Paulus yamo iso safom twat snok mam kota ro Efesus. Paulus snok mam Efesus to, ait fri raa ro ja smot Yesus baro.
ACT 19:2 Tna ait ytu kʼana yawe, “Anu smot Yesus oh, tna Allah yoo Har rAit yse kʼanu ye fe mfefares a?” Menohe ana mawe si mawe, “Fefares. Amu ja nri raa mkyas Har rAit aro kʼamu fefares.”
ACT 19:3 Tna Paulus ytu kʼana yawe, “Feto tiwya raa baptis anu to, anu kro bokyas ro mbam kʼawya?” Menohe ana mawe, “Bokyas ro mbam Yohanes Pembaptis.”
ACT 19:4 Tna Paulus betoo makit rau yawe, “Tiwya Yohanes baptis raa ro mashana tna smot Raa sait ro kbe yama. Raa retait yasom Yesus.”
ACT 19:5 Ana mari feto tibyo mawe raa baptis ana mam Tuhan Yesus yasom.
ACT 19:6 Tna Paulus yoo yatem ytor abyõ kʼana skabuk. Tna Har ro Allah mroh mbo ana. Tibyo ana mmai mai ro ana wase fares mkyas bo ro Har merif kʼana tna mkyas watum ro mbam kʼAllah ye.
ACT 19:7 Raa sme weto beta mabo trion 12 bo feto.
ACT 19:8 Tna ja Paulus yamoʼt samu skabuk raa ro agama Yahudi tna ykyas bo. Ait waa fee. Ait ykyas raa mana ro Allah yamo Raja ybo. Ait yno feto mamo snok snyi trion tuuf. Ait yros santri bo ysya raa ro Yahudi weto, ykyas bo kaket.
ACT 19:9 Menohe ana baro beswan bo ro ait ykyas to. Ana mana mase sai tna hawe bo smot Yesus ye. Ana baro mkyas kair bokyas ro Paulus reto mawe, “Yesus tait Mesias fee! Paulus yerif iso ro meen raa mkai riof ro mase meto fee ye!” Ana mno feto tibyo Paulus yasen sikba ana, tna ysya raa Kristen taro mamoʼt amah ro Tiranus rait. (Amah reto ja raa hre mkom bo ye. Amah reto mase toni.) Rabu ti wawa to ait hre ykyas bokyas ro Yesus mam beto.
ACT 19:10 Paulus yhau yno bo reto mamo snok tahun trion ewok. Tibyo raa ro mhau mam rabin ro Asia reto to, ana beta mari bokyas ro Yesus. Raa mbam raa mana ro Yahudi ye msya raa mbam raa mana ro Yunani ye beta mari. Tna taro smot Yesus, tna taro smot fee ye.
ACT 19:11 Allah yoo yatak rAit yee kʼPaulus tibyo Paulus yno bo ro msai toni.
ACT 19:12 Tna raa mbo bo mabat ro ja Paulus ybo mam yatem karu yimyoh to, msya bo mabat ro ja ybin yaka bo sor to, mbo, makah mamo mee kʼraa ro kiyam to mbo. Tna Har ro Allah mno kiyam rana marak. Tna kabes ro mhau kʼana to frok msam sikba ana ye.
ACT 19:13 Raa botkif ro Yahudi mabo ngkrema ja mamo mam woyõ-weya sai. Mamo mikyak kabes frok mbam raa ro kiyam. Ana weto to ku mabo krema ro mao kʼanya, ku ro bi Skewa wait. (Bi Skewa tait imam yanes ro Yahudi sait.) Ana weto mari he Paulus tkif raa mkah Yesus yatak rait. Tibyo ti sau ana weto mawe ana mikyak kabes frok mbam kʼraa ro kiyam mkah Tuhan Yesus yasom ye. He mfe: Ana mbis kabes sau mawe, “Tuhan Yesus ro ja Paulus ykyas tait, mkah yasom rAit amu nikyak nyõ frok nbam raa retait!” Menohe ana mabo ngkrema weto smot Yesus fefares, tibyo ana mbo tak rAit fee ye. Ana mkyas feto menohe kabes reto mhau kʼraa retait tna mno raa retait yatak tna safo toni. Tna kabes reto mawe “Jõ thar Yesus ysya Paulus. Ana weto matak mikyak jõ saah. Menohe anu ntak fee!” Tna kabes reto frok fee.
ACT 19:16 Tibyo ait ro kabes mbo refi tbat yfot raa mabo krema ro mao na kʼanya wefo. Kabes kmo mukah ana mkah yaaf tna mhah ratan wana ro myum ye. Tna ana nsro raa msam frok mamo mbam amah reto.
ACT 19:17 Raa ro Yahudi msya raa ro Yunani ro mhau mam Efesus beta mari bo reto tibyo mrok waa. Tna Tuhan Yesus yasom rAit, raa mbo faram yoyo.
ACT 19:18 Raa ro smot Yesus to, ana mawat mama mras iro wana abyõ, mkyas mam wore raa masu makin mmat to mawe, “Mfo refo amu nashana oh. Botkif ro mkair tiwya amu nno to, amu noo mbeak fari. Mfo refo anu smot Yesus.”
ACT 19:19 Tna ana ro tiwya matak mari botkif taro sor fo, makah bokom ro botkif wana ro tiwya mmat. Makah mama mse tna raa mkah mait mam wore raa mawat mros mmat. Botkif ro raa mkah mait weto to, ja mabyoh maut toni, pitis trion 50 perak bo feto.
ACT 19:20 Bo weto syohor kʼraa beta mari. Tna watum ro Tuhan Yesus mrok matak oh meto.
ACT 19:21 Bo weto mkak tna fo Paulus yawe, “Har ro Allah mbis mawe jõ tasen tamoʼt kota ro Yerusalem. Jõ tawe tamo iti mam provinsi ro Makedonia msya provinsi ro Akhaya. Tna fo kbe jõ tamoʼt kota ro Yerusalem. Kbe thau mam Yerusalem ti baro tna tawe tamoʼt kota ro Roma ye.
ACT 19:22 Tna jõ ksoh tafoh ajõ Timotius ysya Erastus mbewok matim wia mamoʼt rabin ro Makedonia. Jõ tesait thau akus ti baro naut mam befo.” Tna Paulus yhau ti baro mase mam rabin ro Asia fares.
ACT 19:23 Wore weto raa taro ro mhau mam Efesus mawe ana smot Tuhan Yesus. Bosmot ro Tuhan reto mno raa ro kota reto mrok mnin-nin.
ACT 19:24 Raa sait ro yhau mam kota reto yasom bi Demetrius. Ait ja yoo perak yfen patung mkah bo raa smot. Raa makin ro mhau mam kota ro Efesus to ana ja smot dewi Artemis. Tibyo bi Demetrius ysya yafoh na wait ja masim patung ro Ait yfen weto to, moo pitis mawat ye.
ACT 19:25 Tna Demetrius ytu yafoh wait sor mama siret su msya raa ro ja mfen bo ro dewi Artemis taro sor. Tna ait yawe kʼana yawe, “Tao na: Amu ja fri bomafer mbam bo ro anu bfen refo mawat oh.
ACT 19:26 Menohe Paulus ait beswan yawe, ‘Bo ro raa mfen reto to, dewa meto, bo ati meto fee! Raa ro smot dewi Artemis to wase bo fares!’ Tna raa mawat mari bokyas ro Paulus. Ait sioh yno raa ro mhau mam Efesus to mesait aran fee. Raa ro mhau mam rabin ro Asia refo beta mari bokyas rait ye!
ACT 19:27 Kbe meen raa hartu bo ro anu bfen to u fee ye. Kbe raa hawe bo ro amu ja nsim. Tna kbe raa miwana samu sahfra ro dewi Artemis reto ye. Raa ro mhau mam rabin ro Asia refo tna raa ro mhau mam arin aso beta ja smot dewi Artemis ye. Nno be raa mbaut dewi ranu reto u fee. Nno be kbe raa mawe Artemis to dewi ro mase fee! Safo refo kbe msai toni!”
ACT 19:28 Raa weto mari bo ro Demetrius yawe, tibyo ana mrok kmo toni. Ana masen hawyõn dewi rana mmai wer mawe, “Asik mase kʼdewi Artemis. Au fo dewi raa ro Efesus!”
ACT 19:29 Bo ro raa mno mnin-nin syohor mamo snok raa ro mhau mam kota reto beta mari ye. Tna raa mawat mhoh mamo kait yuk ro raa hre siret reto tna mmat. Ana mawe saso Paulus mfot, menohe mkai ait fee. Tibyo ana mfot Gayus ysya Aristarkhus, Paulus yafoh na wait. (Ana mbewok mbam Makedonia kro Paulus mama.) Raa ro Efesus mfot ana mbewok makah mamoʼt yuk reto.
ACT 19:30 Paulus yari feto tna yawe yamo yrof ana mbewok mam yuk ro raa siret reto. Menohe yafoh na wait taro mabe ait mawe, “Namo ma!”
ACT 19:31 Raa mase ro mamo aban mana mam rabin ro Asia to mabo baro ja miranya msya Paulus ye. Ana mawe kʼraa sait mawe, “Namo nawe wa kʼPaulus, nawe kbe yamoʼt yuk ro raa siret reto ma.”
ACT 19:32 Raa ro siret weto to mmai mnin: Taro mmai wer mawe fefo, tna taro mmai wer mawe fno. Raa ro mama siret mam weto taro wase bo masmair rau ro misti re ana mamo siret sor mam yuk reto to ye.
ACT 19:33 Tna raa ro Yahudi baro mama siret mam yuk reto ye. Ana baro myum bi Aleksander yatim to, mbis bo kʼait mawe, “Nasen saak anu wa afo re raa mhar mawe anu, raa ro Yahudi to bisti bo refo fee!” Tna Aleksander yasen yros tna yawe raa makin shait beta, re kbe ana mari bo ro ait yawe. Menohe raa taro mmat ait yasen yros to, ana mnaut mawe ait oh mi yisti safo reto.
ACT 19:34 Raa makin weto mrok mhar he ait fi raa ro agama Yahudi. Feto tibyo ana masen mtu mkah mmai ro mase mawe, “Asik mase kʼdewi Artemis! Au oh mi dewi raa ro Efesus to!” Ana mtu baro kait feto ye oh.
ACT 19:35 Tna raa mase ro mbo kota Efesus sait yasen yros yawe, “Tao na; shait oh! Waa ma. Raa beta mhar mawe anu ro bhau mam Efesus fo, ja kmot sahfra ro dewi Artemis. Raa mhar mawe fraa ro mhau mam sahfra ramu to, fraa ro mbau. Fraa reto mfi dewi Artemis, tiwya btek mbam ayoh.
ACT 19:36 Tna raa sait bo kbe ywaar bo reto fee ye. Feto to, knar oh! Nno bo mnin-nin toni ma!
ACT 19:37 Anu nbo raa mabo ewok reto nkah nmaʼt befo nno fyi! Ana mbewok riwai mawe kair dewi ranu fee. Tna ana msyõf bo mbam sahfra ro dewi Artemis aro bo fee ye.”
ACT 19:38 Tna bi yabi retait yawe kʼDemetrius ysya raa wait ro mfen patung yawe, “Soh anu nwe nuun boun raa to, nmoʼt samu ro ja raa mtu srah! Raa ro ja mtu srah to, ana huwya mari safo ro raa makah mamo mkyas kʼana. Kbe ana hre susai mtu safo refo mari ye.
ACT 19:39 Soh anu nwe nkyas safo roto taro to, nmo nkyas mam siret ro raa beta hre mari ye.
ACT 19:40 Soh nyõ nisti re raa mrok mnin-nin fefo, kbe raa maun anu mawe anu besait oh mi bno bo ro mkair. Kbe anu huwya saak wa anu bwe bawya no? Bo ro kbe anu bwe aro fee ye!”
ACT 19:41 Raa ro yase retait ykyas bo weto mkak. Tna ybis raa weto mamo bana.
ACT 20:1 Raa ro mnin-nin to mrok mnem. Tna Paulus ytu raa Kristen ro mhau mam kota ro Efesus yawe ana mama siret su. Tna ait ykyas bo kʼana yawe, “Jõ ksoh anu beroh smot Tuhan kaket!” Paulus ykyas bo mkak tna ymah meen kʼana akus. Tna ait yasen yamoʼt provinsi ro Makedonia.
ACT 20:2 Paulus yamo yur ytan mam rabin ro Makedonia tna ykyas bo kʼraa Kristen ro mhau mam beto sor. Yawe ana bito smot Tuhan Yesus matak sai. Tna fo ait yasen yamoʼt rabin ro Yunani.
ACT 20:3 Paulus yhau mam rabin reto snyi trion tuuf. Tna ait siwyan yawe yaut kapal yamoʼt provinsi ro Siria, he mfe. Ait yari he raa ro Yahudi saim bo mawe mame ait. Feto tibyo ait yamo yaut kapal reto fee. Ynaut yawe yamo iso mne sai. Feto tibyo ait yhah ye yamo yur mam Makedonia wia tna fo snok mam Siria.
ACT 20:4 Menohe yafoh na wait taro beroh maut kapal reto mamo. Ana weto oh mi: Sopater ro ybam remo ro Berea (ait ku ro bi Pirus yare), Aristarkhus ysya Sekundus (ana mbewok mbam kota ro Tesalonika), Gayus (ait ybam remo ro Derbe), Timotius, tna Tikhikus ysya Trofimus ye (ana mbewok mbam rabin ro Asia).
ACT 20:5 Ana mabo krema reto maut kapal matim wia. Tna ana ste amu ro nmo iso mne wea mam remo ro Troas.
ACT 20:6 Tna amu fo nmo naa sai nmo snok mam Filipi. Amu nhau mam beto nkyõ Korat Roti ro Ragi Marak. Tna fo amu nsen nuut kapal nmo renti. Amu nmo mam aya sawan ti trion maat tna snok mam Troas. Mam Troas amu fri amu nfoh wamu mabo krema ro matim wia tna ste amu mam beto. Tna amu nhau mam kota reto ti trion krema naut.
ACT 20:7 Mam ayõ ro Minggu amu raa ro Kristen nmo siret su. Amu nkyõ Korat ro Niit Roti afo re amu nnaut Yesus ro tiwya raa mame yajat. Tna Paulus yawe menrabu rabu ait yamo. Feto to amu nhau tna nri ait ykyas bo kait. Ykyas bo mamo snok mti reto arin masuf.
ACT 20:8 Tna raa mno tafoh mawat mse mait ye. Amu hre mam amah reto ntakor ro tuuf.
ACT 20:9 Tna mere sait yasom Eutikhus hre mam hroh ro amah kri-kri fo. Paulus ykyas bo miyõ toni. Tibyo mere retait yut yjin maka fee. Ait yrok yjin tu sorni ait tibyo ytek ybam hroh reto, yamo yai mte tibyo yajat. Raa tubat mere retait he ait yajat oh.
ACT 20:10 Tna Paulus yroh yamo mam te tna yaka ybo mere retait. Yaka ybo tibyo ait yrok yasen. Tna Paulus yawe, “Waa ma. Ait yhai fee.”
ACT 20:11 Paulus hah ye yaut u yamoʼt amah hawar reto. Ait haber roti ftah aro rau-rau tna yee kʼana beta mait. Korat reto mkak tna Paulus ykyas bo naut u kʼana mamo snok nyah msan. Tna ait yasen yamo.
ACT 20:12 Tna raa mamo bana beta, msya mere ro riwai yhai tna yrok yasen ye. Ana tne mere retait yamoʼt amah rait ye. Tna raa weto sraujin u fee, ana simaut mase sai.
ACT 20:13 Amu nesait nuut kapal ntim joh ro Asos ste Paulus wea. Taa ait yawe ait yesait yamo iso mne, tna yawe kʼamu yawe amu kbe nryot nsio ait mam weto.
ACT 20:14 Ait yama snok si kʼamu mam Asos to, yaut kapal ramu tna amu beta nmoʼt joh ro Metilene.
ACT 20:15 Tna kapal reto mhoh renti. Rabu ti fo amu snok si mam sato ro Khios. Rabu ti naut to, amu nhoh nmo kene kait mam sato ro Samos, tna rabu ti naut to, amu snok mam remo ro Miletus.
ACT 20:16 Tna Paulus yawe kʼamu yawe, “Anu bmo tkia iti mam Efesus ma. Soh bwe tkia iti mam Efesus to, kbe ti mkak sai mam Asia. Anu bmo fooh sai afo re kbe bmo snok wia mam Yerusalem mam ati ro raa makyõ Korat ro Pentakosta.”
ACT 20:17 Mam joh ro Miletus to, Paulus ybis raa sait yamo ytu majelis ro jemaat Efesus mama mo kʼait.
ACT 20:18 Ana mama tna Paulus yawe kʼana yawe, “Tao na; tiwya jõ thau tsya anu ooh-oh. Tna anu nhar jõ kaket.
ACT 20:19 Anu nhar nwe ja jõ tno bo ro Tuhan ybis mkah thaf ro sneh yoyo. Tna jõ tukan btek yoyo ye. Tna jõ tkai bo ro samyoh mbam raa ro Yahudi ro saim mame jõ tajat ye.
ACT 20:20 Menohe jõ beroh tkyas watum ro Yesus kʼanu kaket. Jõ tber kait bo maja taro fee ye. Jõ terif bo kʼanu mam woyõ-woya sai tna mam amah wanu bo ye.
ACT 20:21 Wore weto to, tkyas bo kʼraa ro Yahudi msya raa ro Yunani ye. Ja rabu ti wawa jõ tkyas bo kʼana to, tawe ana mashana, tna mama mo kʼAllah, tna smot Tuhan Yesus ye.
ACT 20:22 Tna mfo refo Har ro Allah mbis jõ tamoʼt Yerusalem. Tna jõ wase bo bawya ro kbe btek mai kʼjõ mam beto ye.
ACT 20:23 Menohe woyõ-woya sai jõ tamo to, Har ro Allah mkyas kʼjõ wia mawe kbe meen raa mfot jõ tna mbu mam bui. Tna kbe bo ro mkair roto taro btek mai kʼjõ ye.
ACT 20:24 Menohe jõ te tnaut tetsu ajõ bo fee ye. Tna jõ waa fee ye. Bo ro ati to, jõ beroh tkyas Bokyas Moof ro Yesus (Injil). Beroh tkyas tawe Allah yatmof raa tibyo yoo riof ro mase yee kʼana. Au oh mi bo ro Tuhan Yesus ybis Jõ tno mamo snok tabi thai si fo.
ACT 20:25 Ja jõ thau tsya anu tkyas raa mana ro Allah yamo Raja ybo. Tna mfo refo jõ thar tawe meen anu nmat jõ tasu u fee.
ACT 20:26 Feto to jõ thar tna tawe kʼanu tawe soh meen anu aro nkai riof ro mase fee, jõ wase ye. Jõ tasom isti reto fee.
ACT 20:27 Tiwya jõ beroh tkyas Watum ro Allah kʼanu. Jõ haweboh fee. Jõ tber kait bo maja taro fee ye.
ACT 20:28 Nhau kmot netsu wanu kaket. Tna kmot raa jemaat ranu ro mhau mam Efesus kaket ye. Ana oh mi tiwya Har ro Allah mee kʼanu mkah bo anu kmot ana to. Feto to, kmot ana kaket mfi bo ja raa kmot domba wana kaket ye to. Allah kwiyat ana mkah mees ro Ku rAit Tuhan Yesus oh.
ACT 20:29 Jõ tamo. Tna thar tawe raa ro mno bo mkair-kar kbe mama. Ana weto meen mno bo ro mkair kʼanu, mfi mtah rbyoh ro ja mafit domba to.
ACT 20:30 Raa weto mesait fee: Anu nkin wefo taro meen nsen nkyas bokyas ro mkair, bokyas ro ntrot fee. Ana taro mam jemaat ranu mesait kbe moo raa mhaf afo re ana mari tna kro Yesus u to fee. Raa weto ksoh mawe kbe raa mari tna kro ana mesait.
ACT 20:31 Bo reto jõ tkyas kʼanu tawe matim wia afo re kbe anu nhar tna nnaut kaket kmot anu. Tna nnaut nwe ro tiwya tahun trion tuuf muuf to, rabu-reha to jõ tkyas bo wefo kʼanu yoyo. Ti aro-aro jõ sraujin tna tawia ye.
ACT 20:32 Tna mfo refo jõ skabuk tsan anu kʼTuhan. Jõ skabuk re kbe Ait yatam anu, tna yno bosmot wanu mrok matak mkah watum rAit. Anu nri watum rAit to, kbe Ait yoo bouum ysan kʼanu. Bouum reto Ait yuumto kʼanu nkin wefo nesait fee. Meen Ait yuumto bouum reto kʼraa ro Ait ysok mamo raa wAit beta.
ACT 20:33 Anu nhar nwe ja jõ taam bo raa fee. Jõ tasu mase saso perak,emas msya ratan bo fee ye.
ACT 20:34 Menohe jõ tesait tkah bo wojõ afo re bo ro tse to mabut fee. Feto tna raa ro ja kro jõ to, bo wana ro mse to mabut fee ye.
ACT 20:35 Bo ro tno to, weto beta Jõ tno afo re anu nmat tna re nhar bo moof re kbe anu nesait nbo nno feto ye. Feto to, nkah bo wonyõ nesait kaket ye. Nno kaket afo re kbe anu ntai natmof raa ro kinyah ye. Nnaut bokyas ro Yesus: Tiwya Ait yawe, ‘Ro moof to anu noo bo nee kʼraa anya. Nmo nyoh bo yoyo ma.’”
ACT 20:36 Paulus ykyas bo mkak. Tna ana beta maka ntmi mimna tabam tna skabuk.
ACT 20:37 Ana beta sraujin saku Paulus mawia tna mmah meen kʼait yamo oh.
ACT 20:38 Ana sraujin toni mnaut bo ro Paulus yawe kʼana; yawe ana meen me mfri ait u fee. Tna ana makah Paulus mamo betne yaut kapal yamo.
ACT 21:1 Amu nmah meen tna bitsre ana. Amu nuut kapal reto nhoh nmoʼt sato sau ro masom Kos. Rabu ti fo amu snok mam sato ro Rodos, tna nbam Rodos to amu nmo renti mam remo ro Patara.
ACT 21:2 Mam Patara to amu nroh nbam kapal reto tna fri kapal sau ro mamoʼt ati jaro. Mamoʼt rabin ro Fenisia. Tna amu nuut kapal reto nmo.
ACT 21:3 Kapal reto mamo tna amu nmat sato ro Siprus mhau mam ati ro ntem taa, tna amu niwrek iti sai nmoʼt provinsi ro Siria. Amu nmo feto tibyo snok mam kota ro Tirus. Tna raa ro mkah bo mam kapal reto mwia bosatoh ro masyõ mamo mkah bo kbe raa masim mam beto.
ACT 21:4 Mam Tirus amu nroh tna nmo nirer raa Kristen ro mhau mam beto. Amu nhau mam beto ye ti trion krema. Har ro Allah mkyas bo kʼraa Kristen ro mhau mam beto, ⌞mawe kbe bo ro mkair mbtek mai kʼPaulus mam Yerusalem.⌟ Feto to ana mawe wa kʼPaulus mawe, “Namoʼt Yerusalem ma.”
ACT 21:5 Ti weto mkak. Tna amu nwe nuut kapal reto nmo renti. Raa Kristen ro mhau mam beto, fnya wana msya kukek wana, ana beta ye masen mama betne amu mam kota makit. Tna mam aya sawan maam fo amu beta nka tmi nimna tabam tna skabuk su.
ACT 21:6 Tna amu nuut kapal, tna ana hah me mamo si bana.
ACT 21:7 Amu nbam Tirus nuut kapal nmo snok mam kota ro Ptolemais. Amu nroh mam beto nmah meen nsya raa Kristen ro mhau mam beto sor. Tna amu njin nsya ana ti sau mam beto ye.
ACT 21:8 Tna rabu ti fo amu nsen nuut kapal nmo renti tna snok mam kota ro Kaisarea. Mam beto amu nmoʼt samu ro Filipus tna nhau nsya ait. Filipus fi raa ro ja yamo ykyas Yesus yasom kʼraa ro mari bokyas rAit fefares. Ait sait ybam kʼana mabo krema ro tiwya raabis ro Yesus msok mam Yerusalem.
ACT 21:9 Filipus ku wait ro fnya fain mabo jiit. Tuhan yuumto bouum kʼana tna re ana ja mari mai ro mbam Tuhan tna mkyas bokyas rAit reto kʼraa mfi raa ro nabi.
ACT 21:10 Amu nhau mam Kaisarea ti baro ye. Tna Allah ybis nabi sait yasom Agabus ybam provinsi ro Yudea yama.
ACT 21:11 Ait yama snok kʼamu tna yoo hotom ro Paulus rait tna yesait yake ait yaa oo yatem bo tna yawe, “Har ro Tuhan mawe fefo: ‘Raa ro hotom rait refi fi, kbe raa mbam raa mana ro Yahudi huwya make ait mam Yerusalem tna mawah msan kʼraa ro mbam raa mana roto.’”
ACT 21:12 Amu nri feto tibyo amu nsya raa Kristen ro mhau mam beto to, nwe nbe Paulus. Amu soh-soh ait nwe, “Namoʼt Yerusalem ma!”
ACT 21:13 Tna Paulus yhaf hri yawe, “Mkah bawya re anu nwia tna nno jõ thaf roon toni fo. Jõ tawe tno bo ro Tuhan ybis kʼjõ yoyo sai. Soh raa mfot mbu jõ tna mame jõ tajat ye, bo weto moof beta ye. Jõ beroh tamoʼt Yerusalem.”
ACT 21:14 Paulus yari bo ro amu nkyas fee. Tibyo amu soh-soh ait u fee, nwe kʼanya nwe, “Anu bsan ait kʼTuhan sai oh.”
ACT 21:15 Amu nhau ti baro mase mam kota ro Kaisarea. Tna amu nsen siwyan bo wamu mkah bo nmoʼt Yerusalem.
ACT 21:16 Raa ro Kristen mabo baro mbam Kaisarea msya amu nmo ye. Amu nmo tna raa ro Kaisarea weto mawe amu njin nsya ana mafoh sait. Ait retait yasom Manason. Ait raa mabe mam sato ro Siprus tna ait smot Yesus ooh-oh. Tna amu nhau iti nsya ait mam samu rait.
ACT 21:17 Amu snok mam Yerusalem to, tna raa Kristen ro mhau mam beto mmah meen kʼamu mkah mhaf ro moof toni.
ACT 21:18 Rabu ti to, Paulus ysya amu nmo nmat Yakobus. Tna majelis taro beta mama siret su ye.
ACT 21:19 Paulus ymah meen kʼana tna fo betoo bo maja sau bitsre-bitsre beta kʼana. Ait ykyas bo ro Allah yno wore ait yamo ykyas Yesus yasom kʼraa ro mbam raa mana roto.
ACT 21:20 Ana mari feto tibyo mawe, “Tao; amu nri feto ksoh toni tibyo nyoh asik mase kʼAllah. Menohe raa wamu ro Yahudi taro mari feto to, kbe ana mrok kmo! Mam Yerusalem fo, raa ro Kristen msis-sas mbo Watum ro Musa ykom to, matak fares ye.
ACT 21:21 Ana mhar mawe nyõ ja nkyas bo kʼraa ro mhau mam rabin roto makin. Nkyas bo kʼraa mana makin to, nkyas kʼraa mana ranu ro Yahudi ye. Tna ana weto baro mamus nyõ. Ana sioh mawe, ‘Paulus ybis raa wanu weto, yamo yawe kʼana yawe, “Kro Watum ro Musa to ma. Nbo nno ma. Sunat kukek wanu ma. Tna kro bo mafa wanu ja bno soo to, ma ye.”’
ACT 21:22 Tna mfo refo fyi? Ana mari bo nyõ namaʼt befo fo, kbe ana mama mfot nyõ! Kbe anu bno bo bawya afo re bno wa ana?”
ACT 21:23 Tibyo majelis weto mnaut bo reto mamo-me tna mawe kʼPaulus mawe, “Raa ro Yahudi mabo jiit ro smot Yesus mros ye wefo fo. Ana mawe kbe ana myon metsu rana mamyot bo mafa ranu mkah bo skabuk Tuhan kaket. Amu nwe nyõ nno fefo:
ACT 21:24 Nyõ kro ana nmo nyon netsu wanu. Tna nmur nana mawyan ye. Tna noo pitis nee kʼana mabo jiit kbe maren raa ro ymur ana mana mawyan wana to. Nno feto re kbe raa beta mmat tna mhar mawe bo ro riwai ana mari to, mabo fee. Kbe ana mhar mawe nyõ ja kro Watum ro Musa matak fares.
ACT 21:25 Tiwya amu nkom aam sau nee kʼraa Kristen ro mbam raa mana roto oh. Amu nkom bobis baro kʼana weto. Amu nwe kbe ana kro bo mafa raa mana ro Yahudi beta ma, mhau sai. Aam reto mkyas mawe: 1. Sohmaam boit ro raa moo msan kʼberhala oh to ma. 2. Nta mees ro kak raa ktan to ma. 3. Nbo kak kwiyan ro mees mhau fares to ma. 4. Tna nwyah bo to ma ye.” Ana mkyas bo weto mkak tna ana mamo bana.
ACT 21:26 Paulus yari bo ro majelis weto mawe. Rabu ti naut tna ait yakah raa mabo jiit weto. Tna ana mabo maat myon metsu wana. Tna raa mmur mana mawyan wana ye. Ana mno mamyot bo mafa raa ro Yahudi ja mno. Mno bo weto afo re ana moof mnan si skabuk Allah. Ana mno bo weto mkak tna mamo twok mam Samu ro Allah tna mawe kʼimam mawe, “Ti baro naut tna bo ro amu nno refo mkak. Tna fo amu sait-sait kbe nkah bosan nma nee kʼAllah.”
ACT 21:27 Ti trion krema to, Paulus yno bo reto kene wore mkak oh tna yhau mam Samu ro Allah. Tna raa ro agama Yahudi baro mbam rabin ro Asia mmat ait. Ana weto kmo tna masen mfot ait. Ana mawe kʼraa makin mawe,
ACT 21:28 “Raa ro Israel: Nma bfot Paulus! Ait fi ja yamo woyõ-woya sai ykyas bo kʼraa yno re ana mber hasyoh anu. Yno ana miwer Watum ro Musa ykom. Yno re raa miwana Samu ro Allah refo ye. Bi ait mefi! Mfo wefo ait yakah raa mbam raa mana ro Yunani baro twok mam Samu ro Allah mato ye. Bo reto anu bbau, kbe mno Samu ranu refo mkair!”
ACT 21:29 (Taa ana mmat Paulus yiranya ysya Trofimus, raa ro mbam Efesus. Feto to ana mnaut mawe Paulus yakah ait yamo twok mam Samu ro Allah mato ye.)
ACT 21:30 Mari feto to raa mrok kmo Paulus. Ana beta mhoh mama. Mama mfot ait tna mikyak ait frok mbam Samu ro Allah. Tna raa muut mato Samu ro Tuhan reto wa ye.
ACT 21:31 Raa ro Yahudi hre saim bo mawe mame Paulus yajat. Menohe raa mamo mkyas kʼraa sbe ro Roma. Mkyas kʼaban mana raa ro sbe mawe kota ro Yerusalem to, raa mmai mnin-nin toni oh.
ACT 21:32 Aban mana yari feto tna yasen ybis raa sbe ro mase yawe, “Ntu raa kinyah wonyõ baro. Nma, anu bsen broh bmoʼt kota fooh! Raa makin mam weto mnin-nin!” Raa makin ro mnin-nin weto mmat raa sbe weto mama fo, tna bitsre mai Paulus fee.
ACT 21:33 Tna aban mana retait yamo yfot Paulus tna ybis raa sbe wait moo rantai ewok make ait yatem. Tna ytu kʼPaulus yawe, “Nyõ awya? Bo ro nyõ nno fo bawya mefo?”
ACT 21:34 Menohe raa msis-sas weto taro kmo mmai wer mawe, “Ait yno bo rno!” Tna taro mmai wer mawe, “Ait yno bo rau!” Raa mnin-nin feto tibyo aban mana retait yari bo masmair rau kaket fee ye. Tibyo ait ybis raa sbe makah Paulus mamoʼt snek rana.
ACT 21:35 Ana makah ait mamo snok si mam barit fo raa mawat mjor beak-ak anya tibyo raa ro sbe wefo tubat Paulus katar abyõ.
ACT 21:36 Raa mawat ro hyu kro ait kmo mmai wer mawe, “Nno ait retait yasu marak to!”
ACT 21:37 Paulus raa makah twok mamoʼt snek raa sbe. Tna ait ytu bo kʼaban mana retait mkah mai ro Yunani yawe, “Nbis jõ tkyas bo kʼnyõ kebet baro wia, mbau a?” Tna bi refi yrok ktak yawe, “Nyõ nhar mai ro Yunani ye oh a?
ACT 21:38 Feto nyõ fi raa ro Mesir fe mfe a? Riwai jõ trok tawe nyõ fi raa ro Mesir ro taa yno safo tait. Ait retait taa ysya raa wait mabo trion 4000 mama. Ana weto mbo sbe ymok ana mafa msya raa wamu. Tna fo ana msam mamoʼt yuk ro riamo!”
ACT 21:39 Paulus yawe, “Mfe, jõ fi raa ro Yahudi. Kota ajõ to Tarsus, ro ja masom ye mam provinsi ro Kilikia. Jõ soh-soh nyõ nbis jõ tkyas bo kʼraa wefo sor.”
ACT 21:40 Bi ait ybis. Tna Paulus yros mam barit reto tna yawe raa makin shait beta, re kbe ana mari bo ro ait yawe. Tna ait ykyas bo kʼana mkah mai ro Ibrani yawe,
ACT 22:1 “Tao msya taja na; nri ro jõ tkyas saak jõ wa refo wia.”
ACT 22:2 Raa msis-sas weto mari Paulus ykyas bo mkah mai rana ro Ibrani. Feto tibyo ana mrok mnem beta. Tna ait yawe,
ACT 22:3 “Jõ fi raa ro Yahudi. Tna fnya mabe mam kota ro Tarsus ro mhau mam rabin ro Kilikia to. Menohe jõ raa mtos thau tabi mam kota refo. Tiwya guru ajõ bi Gamaliel. Ait yber jõ kaket. Ait ykyas Watum ro Musa kʼjõ msya bo mafa anu hohos wanu ja mno ye. Tna bo weto mame kʼjõ thaf. Jõ raa ro mur-mur kro Watum ro Allah. Tiwya tkyas tna mno mnan mfi bo mfo refo anu nbo nkyas ye fo.
ACT 22:4 Tiwya jõ sikowah raa ro kro Iso ro Tuhan Yesus ye. Bo ro tno misti re raa Kristen baro mhai. Jõ tfot raa sme msya fnya ye tawah tbu mam bui ye.
ACT 22:5 Bo weto to, imam agama Yahudi ro yase ysya raa wait ro ja mtu safo raa ro Yahudi sor to, ana mmat mkah masu rana oh. Ana mhar mawe jõ sioh fee. Tiwya ana oh mi mkom aam baro mee kʼjõ tbo. Tbo aam weto tamoʼt kota ro Damsyik tawe tfot raa Kristen ro mhau mam beto. Tawe tfot tna tbo takah ana nmoʼt Yerusalem fo, tna raa mtu srah tna mmit safo kʼana ye.
ACT 22:6 Ati reto baas fares tna tamo mam iso, kene mam Damsyik to, tna bo sau mfi naar mkek mait mbam ayoh btek mama mame mur mtan mam wore jõ tros.
ACT 22:7 Tna jõ btek tawe tai tabam tna jõ tari mai sau mame kʼjõ timara mawe, ‘Saulus; nyõ sikowah Jõ nno fyi?’
ACT 22:8 Jõ te ttu si tawe, ‘Tuhan; Nyõ awya metait?’ Ait yawe, ‘Jõ fi Yesus raa ro Nasaret, ro ja nyõ sikowah.’
ACT 22:9 Raa ro kro jõ nmo su mmat nar reto. Menohe mai ro mkyas to, ana mari fee.
ACT 22:10 Tna fo jõ ttu kʼTuhan tawe, ‘Tuhan; kbe jõ tno bawya?’ Ait yawe kʼjõ yawe, ‘Nasen oh! Tna namoʼt Damsyik. Mam beto to, kbe raa sait yama ykyas kʼnyõ. Ykyas bombra ro meen nyõ nasom beta.’
ACT 22:11 Riwai naar btek mame mam wore jõ tros. Tna kek mawyah rau mno tasu mti. Tmat bo fee. Tibyo ana ro kro jõ nmo to, mbo jõ tatem makah nmoʼt Damsyik.
ACT 22:12 Mam Damsyik raa sait yasom Ananias yama yo kʼjõ. Ait refi ja waa Allah tna kro Watum ro Musa yoyo. Tibyo raa Yahudi ro mhau mam beto to, ana beta ja hartu bi ait.
ACT 22:13 Ait yama yros kait kʼjõ tna yawe, ‘Saulus; tao ajõ: Nasu mrok maah oh!’ Mam weto si fo jõ tasu maah tna tmat Ananias ye.
ACT 22:14 Tna ait yawe, ‘Allah ro tiwya anu hohos wanu smot tait, yawe ysok nyõ mkah nno bo ro Ait yawe. Tna yno re nyõ nmat Yesus tna nari bo ro Ait ykyas ye. Yesus tait raa ro yato mboh.
ACT 22:15 Ait yawe kbe nyõ namo nkyas bo ro riwai nyõ nmat, tna bo ro nyõ nari reto ye.
ACT 22:16 Bawya re nyõ ntane mamo-me to? Nasen oh! Nawe raa baptis nyõ. Tna kbe Tuhan yyon iro wonyõ ye.’
ACT 22:17 Tno bo weto tna fo Jõ thah tamoʼt Yerusalem. Tna ati sau jõ skabuk mam Samu ro Allah kri-kri to Har ro Allah mber beroh-roh msya jõ tamos ajõ.
ACT 22:18 Tna jõ tmat Tuhan ro ykyas bo kʼjõ. Ait yawe, ‘Nasen sikba Yerusalem fooh tna frok namo! Ja nyõ nkyas bo ro Jõ tno kʼnyõ. Tna raa hawe. Ana, mawe bo reto mabo fee, mawe nyõ sioh sai.’
ACT 22:19 Menohe Jõ tawe, ‘Tuhan; raa ro Yerusalem ja mhar oh, mawe jõ fi tiwya tamoʼt samu ro skabuk aro-aro tna tfot raa ro smot Nyõ. Ana mhar mawe ja tfot ana tna tawah tbu mam bui tna sikowah ana ye.
ACT 22:20 Tiwya Stefanus ykyas Nyõ nasom. Tna raa kmo tna mame ait yajat to. Ati reto to, jõ srau sau tsya ana tna tros kmot ratan raa ro mame ait to ye.’
ACT 22:21 Menohe Allah beroh yawe, ‘Namo oh! Mfo refo Jõ tbis nyõ frok namo fari. Namo nkyas Jõ tasom kʼraa ro mhau mam rabin roto.’”
ACT 22:22 Raa ro Yahudi mari bo ro Paulus ykyas mamo snok mam bokyas tis refo. Ait yawe Allah ybis ait yamo ykyas Yesus yasom kʼraa ro mhau mam rabin roto; kʼraa ro Yahudi fee weto. Ana mari feto tna kmo mmai tis. Raa mawat weto beswan bo ro ait yawe. Ana mawe, “Nme ait yajat! Paulus ye yhau kait mam tabam refo ma!”
ACT 22:23 Raa weto mmai mnin fares sai tna mrus ratan wana ro ja ana myum mne to, mai maut tna mabah bohasyaf beak maut mam uu ye.
ACT 22:24 Feto tibyo aban mana raa sbe retait ybis raa wait makah Paulus twok mam snek rana. Aban mana ro sbe retait, ait wase bo ro Paulus yno re raa ro Yahudi kmo mmai wer mamus ait. Tibyo ybis raa mtu bo kʼPaulus tna sie ait afo re kbe ait yasbrah safo ro ait yber reto.
ACT 22:25 Raa sbe baro make Paulus yatem mkak tna mawe mmok ait. Menohe Paulus yawe bo kʼraa sbe ro yase sait yawe, “Fyi, watum ro Roma ja mbis raa ranu mmok raa ro Roma wia matim menohe raa mtu srah rait fefares a?”
ACT 22:26 Raa sbe ro yase retait yari feto tibyo yawe kʼraa wait yawe, “Nros wia!” Tna yamo yo kʼaban mana raa sbe retait tna yawe, “Bo refo oh kbe nyõ nno meto a? Paulus yawe ait warga negri Roma: Raa ro bi Kaisar ja ybo kmot!”
ACT 22:27 Tibyo aban mana retait yamo yo kʼPaulus ytu yawe, “Nawe kaket, nyõ fi raa ro Roma tu a?” Menohe Paulus yawe, “Ae, mabo oh!”
ACT 22:28 Tna ait yawe, “Jõ tiwya twok tamo raa ro Roma to, jõ too pitis namabyoh ro mase toni tee kʼraja Kaisar!” Menohe Paulus yawe, “Jõ tno bo ro mfi feto fee! Jõ fi raa manat. Jõ fi raa ro Roma yum. Jõ taja ait raa ro Roma!”
ACT 22:29 Ana mari feto si fo raa sbe weto bitsre ait tna mayõ ana fooh mamo. Tna bi yabi refi simbyar yrok yhar yawe riwai ait ybis sre raa make Paulus yatem fo tibyo ait yrok waa ye.
ACT 22:30 Aban mana retait yawe yhar bo ro raa Yahudi mkyas mai kʼPaulus. Rabu to, ait ytu raa mabi ro agama Yahudi mama siret su. Ana ro mama to, imam manes msya raa manes ro ja mtu safo raa wana sor to. Tna ait ybis raa wait yawe, “Namo tufrok Paulus ybam bui. Tna nakah ait nama re kbe amu nkyas bo ro ait yno!”
ACT 23:1 Paulus yasu yrom raa manes ro Yahudi weto sor tna saak ait wa yawe, “Tao na: Allah yhar yawe jõ fi raa ro ja tno bo ro Ait yawe to, tno mkah thaf ro moof sai yoyo.”
ACT 23:2 Paulus ykyas bo feto tibyo imam ro yase ybis raa ro mros kene mam Paulus to, yawe mai ait yasoh. Imam ro yase retait yasom Ananias.
ACT 23:3 Tna Paulus yawe kʼAnanias yawe, “Allah kbe yai nyõ ska riryõn! Nyõ hre mam befo beah srah ajõ mkah Watum ro Musa ykom. Menohe nyõ nesait niwana Watum reto mkah bo nbis raa mai jõ. Nyõ namo sroyõ sai meto!”
ACT 23:4 Raa ro mros mam weto mawe kʼPaulus mawe, “Ait retait imam yase ro Allah ysok! Nawe kair ait ma!”
ACT 23:5 Tna Paulus yawe, “Kmo ma; jõ wase. Jõ thar tawe bi ait yamo imam ro yase fee. Bokom ro Allah mawe, ‘Nmus aban mana ro ja ybo anu to ma.’”
ACT 23:6 Paulus yhar yawe raa ro hre ytu srah rait weto, bonaut wana to hayah-hayah. Ana taro mbo bonaut raa ro Saduki tna ana taro mbo bonaut raa ro Farisi. Tna ait yhar yawe ja ana miranya fee. Feto to ait yawe, “Tao na wojõ; jõ fi raa ro Farisi tna jõ taja tait raa ro Farisi ye. Jõ tkyas bo tawe raa ro mhai to meen me mrok masen. Bonaut reto oh mi raa mfot jõ mtu srah fo!”
ACT 23:7 Ait yawe bo feto si fo raa ro Farisi msya raa ro Saduki mayõ mafa anya. Tibyo raa makin wefo mrok mitwat mkbair ewok ye.
ACT 23:8 (Raa ro Saduki matak sai mawe raa ro mhai to meen mrok masen fee. Tna mawe ja malaikat aro fee ye. Tna mkyas mawe ja kabes aro msya har aro bo fee ye. Menohe raa ro Farisi, ana mawe bo weto beta mabo ye.)
ACT 23:9 Ana santri bo weto mno mmai mnin-nin toni. Tna raa Farisi mabo baro ro mamo guru agama ro Yahudi ye to, masen mros. Tna mkyas bo matak kʼana ro mtu srah mawe, “Bi ait refi yno bo ro mkair aro fee! Nno be har soh mfe, malaikat bo aro mkyas bo kʼait!”
ACT 23:10 Raa masen mmak msai toni tibyo aban mana raa sbe retait yrok waa ynaut yawe, “Ayoh ee! Kbe raa mai-a Paulus bo ye.” Tibyo ybis raa sbe yawe, “Nmo nbo Paulus nkah ait nmo truk snek mato oh!”
ACT 23:11 Rabu ti naut Tuhan Yesus frok nenat yros mam Paulus yajoh jaro. Tna yawe, “Waa ma. Tiwya nyõ nkyas Jõ tasom mam Yerusalem. Tna kbe nyõ namo nkyas Jõ tasom mam Roma ye.”
ACT 23:12 Rabu ti to raa ro Yahudi baro saim bo mawe, “Nma, anu bme Paulus yajat. Tna anu beta bhau bo biit ye. Bhau bo biit mamo snok ati ro anu bme ait. Tna fo anu biit bo msya bta aya bo u.”
ACT 23:13 Ana ro saim bo su weto mabo 40 bo feto.
ACT 23:14 Ana masen mamo mo kʼimam manes ro agama Yahudi, msya raa mabi wana mawe, “Amu saim bo nwe nme Paulus yajat. Tna amu beta nwe kbe amu niit bo aro fee tna nta aya fee ye. Kbe amu nyas bo niit mamo snok ati ro amu nme ait yajat.
ACT 23:15 Feto to amu nwe anu nsya raa manes ro ja mtu safo raa Yahudi to, anu nkom aam sau ntim mamoʼt aban mana raa sbe. Nkom nwe ait yakah Paulus yama yo kʼanu u. Nwe anu nisoh nmat srah reto kaket. Nkom feto tna amu huwya mam iso ro mamoʼt snek rana reto. Tna kbe raa makah Paulus mama mbam snek. Ana snok mam befo fefares, amu huwya nme ait yajat wia.”
ACT 23:16 Menohe Paulus yamu ro yano mabe sait yari bo raa ro Yahudi saim feto. Tna ku retait yamoʼt tok raa ro sbe reto tna ykyas bo reto kʼyamu Paulus.
ACT 23:17 Paulus yari feto tibyo ytu raa sbe ro yase sait yama tna yawe kʼait yawe, “Nakah ku refi namo no kʼaban mana ranu. Ku ait refi yawe ykyas bo kʼbi ait.”
ACT 23:18 Raa sbe retait yakah ku ait yamo yo kʼaban mana raa ro sbe tna yawe, “Paulus ro yhau mam bui yawe jõ takah ku refi tama to kʼnyõ re yber kait bo aro kʼnyõ.”
ACT 23:19 Aban mana retait ybo ku retait yatem yakah yamoʼt amah majoh jaro tna ytu bo kʼait yawe, “Nyõ nawe nkyas bo bawya kʼjõ?”
ACT 23:20 Ku retait yawe, “Raa ro Yahudi saim bo mawe kbe mame Paulus yajat. Mawe kbe mama mayoh kʼnyõ re menrabu nyõ nbis raa makah Paulus mamo sia no kʼraa manes wana ro ja mtu srah. Ana sioh mawe mtu ait yamo mkah bo mtu srah rait reto kaket ye.
ACT 23:21 Menohe ana mabo 40 saim bo mawe mmyõt mam iso maka huwya mame Paulus meto. Feto nari bo ro raa weto mawe ma! Ana beta saim bo mawe soh ana mame Paulus fefares to, masi mawe ana mait bo fee ye. Mfo wefo ana siwyan wea oh, huwya mari bo kʼnyõ sai.”
ACT 23:22 Aban mana retait yawe ku tna retait yawe, “Nkyas bo refo kʼraa aro ma. Tna nkyas nawe bo nyõ nama mam befo tna nber kait bo refo kʼjõ oh to ma.” Tna aban mana retait ybis ku retait hah ye yamo bait.
ACT 23:23 Tna fo aban mana raa sbe retait ytu raa sbe ro mase mabo ewok yawe mama. Ana mama tna ait ybis ana yawe, “Nmo nbis raa sbe wanu mabo trion 270 siwyan ana. Nbis ana weto mabo 200 moo sawya wana mbo. Tna nbis ana mabo 70 maut kuda. Nbis ana siwyan bo wana fooh mkah bo anu nsen nmo. Tna mti refo mam ayõ ro krenjiit to, nmoʼt kota ro Kaisarea.
ACT 23:24 Nkah Paulus nmo kaket. Nkah ait nmo no kʼgubernur Feliks mam Kaisarea. Tna noo kuda sau mkah bo kbe Paulus yaut ye.”
ACT 23:25 Aban mana raa ro sbe retait yasom Klaudius Lisias. Tna ait ykom aam sau mawe fefo:
ACT 23:26 “Gubernur Feliks ro yase: Jõ tmah meen kʼnyõ.
ACT 23:27 Raa refi yasom Paulus. Ait refi fi raa ro Yahudi saim mfot tna mawe mame. He mfe. Jõ tari he ait raa ro Roma. Feto tibyo jõ tsya raa sbe ro jõ tbis to, nmo nno wa.
ACT 23:28 Jõ tawe saso thar safo masmair ro raa maun ait kaket. Tna re jõ takah ait tamo to kʼraa manes ro ja mtu srah raa ro Yahudi weto to.
ACT 23:29 Jõ hre tari bo ana mtu srah rait. Ana maun Paulus mawe yiwer Watum ro agama rana sai. Tnaut tawe ait yiwana watum ro Roma aro fee. Ana mawe jõ tbis raa mno bo ro mkair mai kʼait. Mawe jõ tbu ait mam bui tna tbis raa mame ait yajat. Menohe jõ tkai safo aro re tmit kʼait fee.
ACT 23:30 Tna fo jõ tari raa ro Yahudi saim mawe mame ait yajat. Au oh mi jõ too ait beruk yama yo kʼnyõ fo. Tna jõ tbis ana ro maun boun kʼait weto mama mkyas bo kʼnyõ ye.”
ACT 23:31 Aban mana raa sbe ykom aam reto mkak. Tna mam wore wo mamur, ait ybis raa ro sbe masen makah Paulus mamo mno bo riwai ait ybis kʼana. Mti reto ana mamo snok si remo ro Antipatris.
ACT 23:32 Tna rabu ti fo, raa sbe ro mamo maa sai mhah mamoʼt snek raa ro sbe. Tna raa sbe ro maut kuda msya Paulus mamo renti mamo.
ACT 23:33 Ana wefo mamo snok si mam Kaisarea. Tna moo aam reto mee kʼGubernur Feliks tna moo Paulus msan kʼait ye.
ACT 23:34 Gubernur Feliks ymat aam reto mkak. Tna ytu kʼPaulus yawe, “Nyõ ja nhau mam oo ro hayo?” Tna Paulus yawe, “Jõ fi raa ro Kilikia.”
ACT 23:35 Tna Feliks yawe, “Feto kbe soh raa ro maun boun kʼnyõ mama snok si mam befo to, kbe jõ ttu srah anyõ.” Tna ait ybis raa sbe wait makah Paulus mamo kmot ait mam amah mase ro raja Herodes.
ACT 24:1 Ti ro maat tna raa agama Yahudi ro maun baun kʼPaulus mbam Yerusalem mamo sia tna snok mam Kaisarea. Ana weto oh mi imam rana ro yase tait yasom Ananias, ysya raa mabi ro Yahudi taro sor, msya raa sait ro yasom Tertulus. Ait yamo raa ro ja ykyas bo soko raa mabi ro Yahudi. Snok mam Kaisarea tna ana beta mamo mo kʼgubernur Feliks. Ana mkyas bo ro ana maun boun kʼPaulus.
ACT 24:2 Bi Feliks hre ytu sas safo to, tna ait ybis raa mamo mmen Paulus makah mama. Tna fo Tertulus yasen yaun Paulus yawe kʼbi Feliks yawe, “Bi gubernur ro anu hartu; nyõ nbo rabin refo moof toni. Rabin refo kbum sai: Raa ro mamo byoh mama mame anya msya anu fee. Tna ja nyõ nbis raa misoh remo wanu sor to, reto moof toni ye.
ACT 24:3 Bo weto beta to ro nyõ nisoh mam woyõ-woya to, amu nyoh asik mase toni kʼnyõ.
ACT 24:4 Jõ tkyas bo miyõ fee. Jõ soh-soh nyõ re nari bo ro jõ betoo kʼnyõ to baro rere.
ACT 24:5 Amu nnaut nwe Paulus refi yno bo ro mkair toni. Mam woyõ-woya sai ait yamo to, ait yno raa ro Yahudi mrok kmo. Tna ait yamo aban mana raa mkbair sau ro kro Yesus ye. Yesus, Ait raa ro ybam remo ro Nasaret.
ACT 24:6 Tna ait yawe yber hasyoh Samu Allah ro mbau reto ye. He mfe amu nfot ait fooh. Tna amu nwe ntu srah rait mamyot watum ramu raa ro Yahudi.
ACT 24:7 Menohe mfe, aban mana raa sbe ro yasom Lisias yno wa. Ait ytak Paulus tna ybis amu ro nuun boun kʼait to, yawe nma no kʼnyõ mam befo.
ACT 24:8 Mfo refo amu ksoh nyõ nesait ntu safo ro amu nuun boun kʼait to, nari. Tna kbe nyõ nhar bo mabo ye.”
ACT 24:9 Raa Yahudi taro ro hre mam beto to masen tna mkyas bo maun Paulus ye. Tna ana mawe bo ro Tertulus riwai ykyas to, mabo oh.
ACT 24:10 Raa ro agama Yahudi weto mkyas bo mkak. Tna bi Feliks yawe Paulus ykyas bo riryõn. Tna Paulus yawe, “Taja; jõ thar tawe nyõ namo raa ro ja hre susai ntu srah mam rabin refo fo, tii ooh-oh. Feto oh jõ ksoh bo saak ajõ tama betoo kʼnyõ fo.
ACT 24:11 Nyõ nhar nawe tiwya ti trion 12 wia to, jõ tamoʼt Yerusalem tawe skabuk.
ACT 24:12 Tna raa ro Yahudi wefo ana sait bo fri jõ tno bo ro mkair aro fee ye: Jõ santri bo tsya raa fee. Tna jõ tno re raa mno mnin-nin bo fee ye. Ana mmat jõ tno bo ro mkair mam Samu ro Allah fee ye. Tna tno raa mam samu watum kmo fee ye. Thau mam Yerusalem iti to, tna tno raa mnin-nin mam woyõ-woya sai aro fee ye.
ACT 24:13 Ana maun jõ menohe ana mmat tna mhar mawe bombra ro ana mkyas mai kʼjõ weto to, sau mabo fee ye!
ACT 24:14 Jõ tawe kʼnyõ abyõ tawe, jõ smot Allah ro amu hohos ramu ja smot ye. Menohe Jõ kro iso ro bi Yesus tiwya yerif. Reto oh mi mno ana kmo. Raa ro Yahudi wefo mawe jõ tno mkair meto. Menohe jõ kro Watum ro Musa beta kaket tna tari bokom ro Allah ybis nabi wAit mama mkom beta to, tbo tno kaket fares ye.
ACT 24:15 Jõ smot Allah mnan anya ye mfi ana wefo ye. Jõ tsya ana beta ninaut nwe raa beta ro mhai to, meen Allah yno re anu be brok bsen: Raa ro mno bo mkair ye, msya raa ro ja mno bo moof ye.
ACT 24:16 Feto oh mi ja jõ thau tisoh jõ kaket afo re thaf moof tsya Allah yoyo tna thaf moof kʼraa anya yoyo bo ye.
ACT 24:17 Tii ooh-oh jõ tamoʼt Yerusalem fee. Tna fo jõ tamoʼt beto mkah bo takah pitis baro tee kʼraa Yahudi ro kinyah. Tna tawe tamo tsan bosan kʼAllah ye.
ACT 24:18 Feto to jõ twok mam Samu ro Allah. Mam wore jõ tno bo weto kri-kri to, raa ro Yahudi baro mama. Ana mama mfri jõ mam Samu ro Allah. Tno bo wojõ mam Samu ro Allah reto to, riwai jõ tyon tetsu ajõ mamyot bo mafa ramu raa ro Yahudi oh to. Tna mam weto ye tesait thau kar. Raa aro makin msya jõ bo fee. Tna raa aro mno mmai bo fee ye. Tna tnaut tawe raa ro Yahudi mabo baro mbam rabin ro Asia mama mam ati reto ye. Ana weto mamus jõ saah. Bokyas rana oh mi misti re raa mmai to.
ACT 24:19 Soh ana weto mamaʼt befo mi, ana oh mi kbe maun jõ tna mkyas bo kʼnyõ.
ACT 24:20 Menohe ana weto mama fee. Feto nbis raa ro hre mam befo mesait mkyas safo bawya ro tber mai kʼana meto! Taa wore raa manes ro Yahudi ytu srah to, ana mkai safo makan aro fee!
ACT 24:21 Tnaut tawe ana kmo bo sau ro jõ tkyas kʼana tawe, ‘Jõ smot tawe raa ro mhai to, meen me mrok masen.’ Au oh mi raa maun boun kʼjõ fo. Bokyas reto mno re ana kmo anya tibyo ana mesait mrok mkyas mnin-nin!”
ACT 24:22 Tiwya bi Feliks yari Yesus yasom oh. Tna ait yyum srah reto matim tna yawe, “Srah ro jõ ttu fo mnan oh. Jõ ksoh tawe bi Lisias ro yamo aban mana raa sbe kbe yesait yama ybam Yerusalem. Tna fo jõ tkyas srah refo mkak oh.”
ACT 24:23 Tna ait ybis raa sbe ro yase sait yawe, “Nabe Paulus menohe nbu ait mnan-nan sai. Tna raa ro mama moo bo mee kʼait to, nno wa ana ma.”
ACT 24:24 Ti baro firwas tna bi Feliks yama ysya yfain. Au masom rau Drusila. Tna au to fnya ro Yahudi. Feliks ybis raa sait yamo ytu Paulus yama. Paulus yama tna ykyas Yesus Kristus yasom rAit. Paulus ykyas bosmot rait reto tna Feliks hre yari.
ACT 24:25 Tna Paulus betoo iso ro Allah yno raa mamo mato mboh. Tna yawe Allah yawe raa misoh ana kaket tna re mno-na bo ma. Tna ykyas wore meen Allah beah srah kʼraa beta. Yari bo weto to, Feliks yrok waa yawe, “Mnan oh, namo oh. Ti aro tna kbe jõ ttu nyõ hah nama nkyas bo kʼjõ u.”
ACT 24:26 Mam weto ye Feliks ait srau ynaut yawe, “Kbe Paulus yoo pitis aro yee kʼjõ fe mfe a?” Feto oh mi yhau ysuk ytu Paulus yama ysya ait mkyas bo to.
ACT 24:27 Paulus raa mbu tahun trion ewok oh. Tna fo Perkius Festus yamo gubernur mam rabin ro Kaisarea shauk yuk ro Feliks riryõn. Feliks yawe yoo raa ro Yahudi mhaf rana. Feto to ait sayõ Paulus yhau sai mam bui.
ACT 25:1 Gubernur Festus snok mam provinsi reto. Ait yhau ti tuuf tna ait ybam kota ro Kaisarea yamo yut kota ro Yerusalem.
ACT 25:2 Mam weto to imam manes ro agama Yahudi msya raa mabi wana sor mama mo kʼbi ait tna mkyas Paulus. Ana maun boun Paulus tna mayoh kʼFestus mawe,
ACT 25:3 “Bi yabi: Amu ksoh nyõ nbis Paulus raa makah mamaʼt Yerusalem.” (Raa weto ana saim bo mawe kbe raa huwya mame Paulus yajat iti mam iso maka).
ACT 25:4 Menohe Festus yawe, “Mfe, Paulus mfo refo raa mbu mam Kaisarea. Kbe jõ tesait hah te tamoʼt beto ye.
ACT 25:5 Feto to, nbis raa manes wanu baro kro jõ. Tna bmo sia Kaisarea btu srah refo kʼPaulus mam beto. Soh ait yber safo to, kbe too safo mana tmit kʼait.”
ACT 25:6 Festus yhau mam Yerusalem ti baro krentuuf atau saa bo feto. Tna ait hah ye yamoʼt Kaisarea. Rabu ti fo ait ytu srah tna ybis raa mamo mmen Paulus makah mamaʼt samu ro srah reto.
ACT 25:7 Ati ro Paulus yama snok mam beto to, raa Yahudi ro mama mbam Yerusalem sor to, mros mur mtan kait tna maun boun ro fanes mawat mai kʼait. Menohe ana aro mtai mros merif boun mabo sau kaket bo fee ye.
ACT 25:8 Tna Paulus saak ait wa yawe, “Jõ tno bo ro mkair aro tber hasyoh Watum ro Musa fee. Jõ tiwana Samu ro Allah aro fee. Tna tiwana bi Kaisar fee ye.”
ACT 25:9 Menohe Festus yawe yayoh raa ro Yahudi mhaf tibyo ait ytu kʼPaulus yawe, “Fyi, nyõ ksoh namoʼt Yerusalem tna kbe jõ beah srah anyõ mam tno fe mfe a?”
ACT 25:10 Menohe Paulus yawe si yawe, “Mfe, jõ fi warga negri Roma: Raa ro bi Kaisar ja ybo kmot. Feto to yuk refo oh mi mnan oh mkah bo raa mtu srah ro kʼjõ to; tabam raa ro Yahudi fee. Taja, nyõ nesait nhar oh jõ tno bo ro mkair aro mai kʼraa ro Yahudi fee.
ACT 25:11 Soh jõ tber safo ro mkair afo saah feto ee, jõ too tetsu ajõ tsan kʼraa mame tajat rof fea! Menohe boun ro raa maun jõ to, mabo aro fee. Feto kbe raa mbis jõ kbik-kbak msan kʼraa ro Yahudi to ma, re kbe ana mtu srah ro kʼjõ fee saut ye. Jõ tayoh kʼraja Kaisar ro yase afo re kbe ait yesait ytu srah refo.”
ACT 25:12 Bi Festus ykyas bo su ysya raa manes wait. Tna ait yawe kʼPaulus yawe, “Nyõ nayoh nawe bi Kaisar yesait oh kbe ytu srah anyõ to, feto to jõ tbis nyõ namoʼt Roma afo kbe bi Kaisar ytu srah refo.”
ACT 25:13 Ti baro naut fo raja Agripa ysya yfain fai Bernike mbewok mamaʼt Kaisarea tna mmah meen gubernur Festus.
ACT 25:14 Ana mbewok mhau ti baro mam beto. Tna Festus ykyas srah ro Paulus kʼana yawe, “Raa ro tiwya gubernur Feliks ybu sait yhau mam bui fares.
ACT 25:15 Ati ro jõ tamo thau mam Yerusalem to, imam manes ro agama Yahudi msya raa mabi wana maun ait. Tna mawe jõ tno bo ro samyoh mai kʼait ye.
ACT 25:16 Menohe jõ tawe kʼana tawe, ‘Amu raa ro Roma ja nno feto fee. Raa mtu srah raa retait wia. Tna kbe ait retait saak ait wa re kbe raa ro maun ait mari wia. Tna fo raa moo safo mana mmit. Ana mno bo weto mkak wia. Tna fo ana moo raa retait msan kʼraa ro maun boun to, sikowah ait.’
ACT 25:17 Tawe feto, tna raa manes ro Yahudi weto mawe kro jõ mamaʼt befo. Tna rabu ti fo jõ tbis raa mamo mmen Paulus makah mama yros saak ait wa wore amu beta hre nri.
ACT 25:18 Jõ trok tawe kbe ana maun ait retait mkah safo ro samyoh toni, menohe mfe.
ACT 25:19 Raa mros maun ait to, mkyas bosmot rana sai; bonaut Paulus ysya ana to hayah sai. Tna ana mkyas bi sait ro yasom Yesus ye. Raa retait tiwya yajat oh. Menohe Paulus yatak sai yawe bi retait yhai tibyo fee. Yawe Ait ye yrok yasen oh.
ACT 25:20 Jõ tnaut mamo-me ye tawe, ‘Fyi re kbe jõ ttu safo refo thar fo?’ Tibyo jõ ttu kʼPaulus tawe, ‘Nyõ ksoh namoʼt Yerusalem tna kbe jõ beah srah anyõ mam kota reto fe mfe a?’
ACT 25:21 Menohe Paulus yayoh yawe safo reto ait yakah yaut yamoʼt samu srah ro uu naut. Tna yawe ait yhau mam bui mam befo wea ste raja Kaisar ro yabi ytu srah rait. Feto jõ tbis ait twok bui tna jõ saso wore mre aro afo re tbis ait yamo yo kʼbi Kaisar mam Roma.”
ACT 25:22 Tna raja Agripa yawe kʼgubernur Festus yawe, “Jõ ksoh tari bo ro bi retait ykyas ye.” Tna Festus yawe, “Menrabu jõ ttu ait yama ykyas bo kʼnyõ nari.”
ACT 25:23 Rabu ti fo raja Agripa ysya yfain fai Bernike myum bosnyam wana. Tna bewok masen mamoʼt amah ro raa mtu srah reto mato. Tna raa manes ro kota Kaisarea msya raa sbe ro mase to, mama ye. Ana beta hre. Tna bi Festus ybis raa makah Paulus mama ye.
ACT 25:24 Tna Festus yawe, “Raja Agripa ysya raa ro mama siret mam befo msya amu sor fo: Nmat bi ait refi. Raa ro Yahudi beta kmo ait. Raa Yahudi ro mhau mam Yerusalem msya raa ro mhau mam befo ye; ana mama mo kʼjõ tna mtu-tu mkah mai ro mase mawe, ‘Kbe Paulus yhau kait mam tabam refo ma! Nme ait yajat to!’
ACT 25:25 Menohe jõ tkai safo makan ro misti re ait yasu marak to, aro fee. Tna fo ait yesait yayoh yawe safo rait refo ait yakah yaut yamo yo kʼraja Kaisar ro yase. Feto to, tawe kbe tbis raa makah ait mamoʼt Roma.
ACT 25:26 Raja Agripa, rabu refo jõ takah Paulus tama befo fo; sik nyõ nsya raa ro hre mam wefo beta ntu bo kʼait. Jõ tawe tkom aam sau tiim bi Kaisar to, kbe betoo safo refo maja rau kʼait. Menohe jõ srau tnaut safo makan rau ro kbe jõ tkom to aro kaket fefares ye.
ACT 25:27 Soh jõ tiim Paulus yamo yo kʼbi Kaisar ytu srah rait, menohe jõ tkom aam ro maun ait aro fee, kbe raa masah jõ sai.”
ACT 26:1 Raja Agripa yawe bo kʼPaulus yawe, “Nasen nkyas bo saak nyõ wa.” Tna Paulus yros yawe,
ACT 26:2 “Taja; nyõ nno bo moof. Jõ simaut mase tesait tkyas bo kʼnyõ kait. Jõ saak jõ wa boun ro raa Yahudi maun jõ refo. Nyõ nhar agama ro Yahudi tna nhar bo mafa wamu ro nno soo oh. Nyõ nhar bo weto kaket tna nhar bo mabo rau ro ja amu nno santri anya bo ye oh. Jõ soh-soh kʼnyõ tawe hre wia nari bo ro jõ saak wa jõ refo. Hrowyõ ma.
ACT 26:4 Tiwya tinyi jõ thau tsya raa mana wojõ mam Yerusalem. Feto to raa Yahudi beta mhar jõ, tna mhar bo ro ja jõ tno taban tkek ye oh.
ACT 26:5 Ana tiwya mhar jõ ooh-oh. Mhar mawe jõ kro bonaut raa ro Farisi ye. Tna amu, raa ro Farisi to, ja nhau nbo agama wamu ro Yahudi matak toni. Tna soh ana ksoh to, kbe ana mkyas bo weto kʼnyõ ye, mawe mabo.
ACT 26:6 Jõ tinaut tawe bo ro Allah tiwya ysi kʼamu hohos wamu akus to, meen Ait ybo yno. Bosi reto to, tbo tna tnaut yoyo. Tna au oh mi jõ tasen tros tasom srah refo fo.
ACT 26:7 Raa mana wamu 12 beta ja mnaut bosi reto ye. Amu ja skabuk baas mti yoyo. Amu samyoh wer nno bo ro Allah yawe. Raja Agripa, jõ tinaut tawe bosi reto to, bo ro ati. Tna au oh mi raa wojõ ro Yahudi masen kmo jõ.
ACT 26:8 Tao na; fyi re anu ntu sioh ye nwe, ‘Allah yatak re yno raa ro mhai mrok masen fee!’”
ACT 26:9 Tna Paulus yawe, “Tiwya jõ knait raa ro Kristen tawe tno bo ro mkair mai kʼana. Tiwya jõ takit, srau tna thaf mnan anya msya anu nkit tna nhaf wanu sor feto ye.
ACT 26:10 Reto oh mi tiwya jõ tamoʼt Yerusalem to. Tna imam manes wanu mkom aam sau moo matak wana mee kʼjõ. Ana mbis tna tamo tfot raa ro Allah wAit. Tna takah ana mawat tbu mam bui. Tna jõ tsya raa roto su tawe raa mame ana majat ye.
ACT 26:11 Ti aro-aro jõ sikowah ana. Tamoʼt woyõ-woya sai saso raa ro Kristen. Jõ saso ana mam samu skabuk sor ye. Soh tkai aro to, tfot tna tbis raa sikowah ana. Jõ tawe tno re ana mwaar Yesus tna beak bosmot wana makus. Jõ kmo ana msai toni tibyo jõ tasen tamoʼt rabin roto ye tna sikowah raa ro Kristen mawat.”
ACT 26:12 Paulus yawe kʼraja Agripa yawe, “Ati sau to, imam manes mbis jõ tamoʼt kota ro Damsyik saka sikowah raa ro Kristen.
ACT 26:13 Tna wore baas ayõ mros susai bo feto to, jõ tamo mam iso maka kri-kri fo, jõ tmat naar ro kren mroh. Naar reto mawyah toni syok miwrek ayõ ro mafit to ye. Naar reto mroh mame mur mtan wore wo jõ tros msya raa ro kro jõ mros to ye.
ACT 26:14 Amu beta ntek nwe ni mam tabam. Tna jõ tari mai sau mame kʼjõ timara mkah mai ro Ibrani mawe, ‘Saulus, Saulus; fyi re rabu ti wawa nyõ nno bo ro mkair sikowah jõ yoyo sai feto to? Nyõ nno feto to nyõ nesait nari nyõ nham ai ye meto.’
ACT 26:15 Tna jõ ttu si tawe, ‘Nyõ fi awya?’ Menohe Tuhan yawe, ‘Jõ fi Yesus ro ja rabu wawa nyõ sikowah.
ACT 26:16 Nasen oh! Jõ terif Jõ kʼnyõ tawe tsok nyõ namo sryan aJõ. Kbe nyõ nno bo woJõ. Jõ tsok nyõ mkah namo nkyas bo ro riwai nyõ nmat wefo msya bo ro meen Jõ terif kʼnyõ naut ye.
ACT 26:17 Jõ tbis nyõ namo nkyas Jõ tasom kʼraa ro Yahudi msya raa mana roto ye. Meen ana mfot tna sikowah nyõ ye. Menohe Jõ kbe titsre nyõ nbam ana matem, tno riof kʼnyõ.
ACT 26:18 Namo nkyas Jõ tasom kʼana feto tna kbe ana masu maah. Mbam wore wo mamur to, kbe ana mamo mhau mam arin ro moof. Tna kbe kabes yabi (Iblis) yase ybo ana u fee. Tna kbe ana mamo raa ro Allah ybo riryõn. Namo nkyas Jõ tasom kʼana afo re ana smot Jõ. Mkah bosmot reto kbe Allah yyon iro wana. Tna meen Ait yoo riof ro mase ysan kʼana ye. Ysan kʼana ysya raa ro Ait ysok mamo raa wAit beta ye.’”
ACT 26:19 Tna Paulus yawe kʼRaja Agripa yawe, “Bo ro tiwya Allah ybis jõ tno reto oh mi jõ tari tna tbo tno sai.
ACT 26:20 Feto to tinyi rau to, jõ tasen tamo tkyas Yesus yasom kʼraa Yahudi ro mhau mam kota ro Damsyik. Tna fo tamo to kʼana ro mhau mam Yerusalem, msya ana ro mhau mam provinsi ro Yudea beta. Ana beta to mbam raa mana ro Yahudi. Tna fo jõ tamo tkyas bo kʼraa ro mbam raa mana roto makin ye. Jõ tkyas kʼana beta tawe, ‘Nashana oh! Nma no kʼAllah. Nno bo ro moof sai tna kbe raa taro mmat mhar mawe anu weto nashana tna nmo no kʼAllah oh.’
ACT 26:21 Tkyas feto oh mi raa ro Yahudi taro hawe. Ana mfot jõ mam Samu ro Allah mawe mame jõ tajat.
ACT 26:22 Menohe Allah yatmof jõ re jõ thau fares fo. Tibyo jõ thau tkyas Ait yasom kʼraa beta. Tkyas kʼraa kinyah ye tna kʼraa ro mase ye. Tna bo ro jõ tkyas wefo fo mamo mamyot bokyas ro tiwya Allah ybis nabi na msya Musa mama mkyas wia ye. Tiwya ana mawe,
ACT 26:23 ‘Meen Mesias yama. Tna kbe raa sikowah Ait tna mame Ait yajat ye. Tna fo kbe Ait yrok yasen. Ait tait Raa ro kbe yrok yasen to, tinyi wia yatim. Kbe yakah kek ro Tuhan yama. Tna raa mana rAit ro Yahudi msya raa mana roto ye kbe mmat kek reto.’”
ACT 26:24 Paulus betoo bo weto saak wa ait kri-kri fo, tna Festus yawe mkah ymai ro mase yawe, “Paulus; nyõ nker meto a? Ja nyõ nkom bo wer. Tna bohar mawat ro nhar weto mno re nyõ nker meto a?”
ACT 26:25 Menohe Paulus yawe, “Taja ro yase, jõ takit ajõ moof sai. Bo ro jõ tkyas fo mabo tu oh.
ACT 26:26 Raja Agripa ait yhar bo ro jõ tkyas refo ye oh. Feto tna tkyas bo refo abyõ kʼbi ait fo. Bo wefo tiwya raa mno wai fee. Raa beta mmat tna mhar oh. Bi ait yari bo weto ye oh.
ACT 26:27 Raja Agripa; fyi: Ja nyõ nari bo ro tiwya Allah ybis nabi wAit mama mkyas fe mfe a? Jõ thar tawe nyõ niwana bokyas wana weto fee.”
ACT 26:28 Raja Agripa yawe kʼPaulus yawe, “Nyõ nnaut nawe bo ro nyõ nkyas fo, kbe mno jõ tawe smot tna kro Yesus ye a?”
ACT 26:29 Paulus yawe, “Jõ skabuk Allah afo re nyõ haberek namo raa ro Kristen. Tna raa ro mari bokyas ajõ fo ye. Soh ana mamo raa ro Kristen mam mfo wefo moof ye. Tna soh ana mamo mnan jõ meen rere bo to moof ye. Menohe jõ hawe bo ana raa mfot mbu mfi jõ tiwya raa mfot mbu to.”
ACT 26:30 Paulus ykyas bo weto mkak. Tna raja Agripa, gubernur Festus ysya Bernike msya raa makin ro hre msya ana su weto beta masen mamo.
ACT 26:31 Wore ana frok kri-kri to, ana mkyas bo kʼanya mawe, “Paulus retait yno bo ro mkair fee. Bo ro yno to safo fee. Nno be raa moo safo mmit kʼait ma. Nno be kbe raa mame ait yajat ma!”
ACT 26:32 Tna raja Agripa yawe kʼgubernur Festus yawe, “Paulus yno bo ro safo aro fee. Feto to, jõ ksoh bitsre ait yamo sai bait. Menohe mfe, ait yawe yakah safo refo yaut oh. Soh feto to bi Kaisar yesait aran ro yatak bitsre ait sai.”
ACT 27:1 Gubernur Festus ysan Paulus kʼraa sbe sait ro yasom Yulius mkah kmot ait. Yulius tait raa sbe ro yase sait ro mbam raa sbe mkbair ro raja Kaisar ja ybo. Bi Festus ybis Yulius yawe ait ybo Paulus ysya raa ro mhau mam bui baro to, kmot ana. Kmot ana tna yakah ana mamoʼt provinsi ro Italia. ⌞Tna meen raa mmit safo wana weto mam kota ro Roma.⌟ Feto to, ti baro naut amu nsen nmo nuut kapal.
ACT 27:2 Amu nuut kapal sau ro mbam joh ro Adramitium mama. Tna kbe mamoʼt joh aro iti-iti mam rabin ro Asia to mamo. Bi sait ro yasom Aristarkhus ysya amu nmo ye. Ait tait raa provinsi ro Makedonia sait ybam kota ro Tesalonika. Kapal reto masen mamo masyõ amu.
ACT 27:3 Tna rabu ti fo, amu snok mam joh ro Sidon. Yulius fi yno bo moof kʼPaulus: Ati ro kapal reto mros mam beto to, ait bitsre Paulus yroh yamo ymat yafoh na wait wea. Tna yafoh wait weto moo bo mee kʼait. Tna Paulus hah ye yamoʼt kapal.
ACT 27:4 Tna kapal reto masyõ amu nbam Sidon nmo fo, foos mase mfi mama. Tibyo raa ro mbo kapal reto makah amu nmo nwyan sato ro Siprus afo re figyõm ro sawan mai kapal fee.
ACT 27:5 Tna fo amu nhoh nmo sawan maam provinsi ro Kilikia msya rabin ro Pamfilia to nmo tna snok mam joh ro Mira mam provinsi ro Likia.
ACT 27:6 Amu nroh mam remo Mira. Tna raa sbe ro mbo amu ykai kapal sau mbam kota ro Aleksandria kbe mamoʼt rabin ro Italia. Ait ybis amu nmo nuut mam kapal reto.
ACT 27:7 Kapal ro masyõ amu nmo rere sai. Amu nmo, nmo. Tna raa ro mbo kapal reto mawe nmo kene mam joh ro Knidus. He mfe. Foos mase mfi msai toni tibyo amu nmo to hrowyõ nhai. Tna ana makah kapal mamo iso ro ana mawe mamo reto tu fee: Amu nmo twat aya mastu ro Salmone afo kbe sato ro Kreta burut wa foos.
ACT 27:8 Amu hrowyõ oh nmo niwrek tabam makit reto tna nmo snok mam yuk ro masom 'Joh ro Moof' to kene mam remo ro Lasea.
ACT 27:9 Amu nhau mam beto ste foos mnem wia. Amu nhau, nhau tna ti ro Korat ro Puasa firwas. Tna amu nhau mam joh reto fares. Mam snyi reto to, ja foos msya figyõm mase toni. Tna Paulus yawe kʼraa ro mbo kapal reto yawe,
ACT 27:10 “Tao na; soh anu beroh bmo renti to, kbe anu bkai bo ro msai toni mam sawan. Kbe figyõm ro mase refo mno bosatoh msya kapal refo surun marak. Tna kbe anu bsu bkak ye!”
ACT 27:11 Menohe raa sbe ro ybo ana tait, yari Paulus fee. Ait yari ana mbo kapal reto mkyas sai.
ACT 27:12 Snyi reto foos msya figyõm mase toni. Tna ana mhar mawe joh reto mnan fee. Feto to ana makin ro mbo kapal reto mawe, “Kbe anu bito bmo renti tna snok mam remo ro Feniks tna bhau mam beto mam wore nsoo ro foos mfi to.” Remo ro Feniks mhau mam sato ro Kreta mam ati ro burut wa foos.
ACT 27:13 Tibyo ati ro foos mfi mbam ati ro selatan to ana mawe, “Nbis raa skur too ro kapal! Anu bsen bhoh bmo naut!” Feto tibyo amu nsen nhoh sawan maam ro sato Kreta to nmo.
ACT 27:14 Ana mamo baro kait fee, tna oof ro mase toni syok mfi mbam tabam ati ro timur to frok mama.
ACT 27:15 Oof mfi mbam ati ro kapal mamo to. Oof reto mai kapal tibyo amu bito nmo fee ye. Feto to amu bitsre kapal reto mhau soso mamo-me sai.
ACT 27:16 Amu soso nmo kene mam sato maku sau ro masom Kauda. Sato reto burut wa foos. Tna raa hrowyõ mhai tubat sekoci ro raa make mne to, tubat maut mse mam kapal mato refo.
ACT 27:17 Ana tubat sekoci reto mse mam kapal mato. Tna fo ana moo too make kapal mne reto kaket matak afo re kbe figyõm mai renti habah ma. Tna ana waa mawe kbe kapal soso mamo tna mai habah mam snik mana ro Sirtis. Ana smyoh bo mabat ro mi kapal reto tna mitsre, afo re foos mai kapal reto soso mamo rere baro sai.
ACT 27:18 Figyõm reto mai amu msai toni. Tna rabu ti fo raa masen tubat bosatoh ro kapal reto masyõ. Bosatoh weto mkah kbe raa masim fo, raa tubat beak mam aya afo re kapal mnan-nan.
ACT 27:19 Tna ti ro tuuf fo ana tubat kapal mtai-ta taro beak mam aya ye.
ACT 27:20 Amu nhau ti baro mase ye oh to, snyi mboh fee ye, tna sken mkek fee ye. Foos aya msya figyõm to mai tu feto oh. Amu nrok nwyan marak nwe kbe amu nsu nkak bamu sai oh.
ACT 27:21 Ti baro ye oh raa weto mait boit fee. Tna Paulus yros susai kʼana yawe, “Tao na; taa anu nri bo ro jõ tawe mi anu bsen bhoh bbam Kreta bmo bkai bo ro msai toni mam sawan fefo fe kbe kapal refo mkai bo msya bosatoh wanu surun marak oh.
ACT 27:22 Menohe waa ma, kbe anu sait bo ysu fee, soh kapal refo saah.
ACT 27:23 Allah ja ybo jõ tna jõ tari tno bo rAit. Ti sai Ait ybis malaikat sau mama mo kʼjõ mawe,
ACT 27:24 ‘Paulus; waa ma. Nyõ kbe namo no kʼraja Kaisar. Allah yatmof yno re nyõ nsya raa wefo beta kbe nkai riof ye.’
ACT 27:25 Feto to, waa ma. Jõ smot Allah tna thar tawe bo ro yawe to, kbe mabo.
ACT 27:26 Anu beta kbe nkai riof. Menohe kapal refo kbe foos mai mso mamoʼt sato sau tna kbe mako mam fraa.”
ACT 27:27 Figyõm mai amu ti trion 14 mkak oh. Tna amu soso nmo-ne sai mam sawan ro Adria to fares. Tna mam arin masuf raa ro mbo kapal reto mari he ana mamo snok kene mam mne oh.
ACT 27:28 Tibyo ana moo too mi fraa tna mbero mam aya, mawe mnit uun rau. Tna ana mmat he aya sawan mam yuk reto to, uun 40 meter sai. Ana hre baro tna masen moo fraa ro mi too reto mbero mnit aya naut u. Tna mmat he aya uun rau 30 meter bo feto.
ACT 27:29 Ana waa mawe nno be kapal reto mamo mako mam fraa. Tibyo ana tubat jangkar trion jiit mam kapal tis, mruk mam aya. Tna ana hre mnaut mawe bo mno re reen fooh ee a.
ACT 27:30 Tna raa ro ja mkah bo ro kapal reto to, baro saim mawe msyõf sekoci reto masen msam wai sikba kapal reto mamo. Ana tubat sekoci reto mse mam aya tna sioh mawe, “Amu nuut sekoci refo nmo bero jangkar mbam kapal mana wia.”
ACT 27:31 Menohe Paulus yawe bo kʼbi Yulius ysya raa sbe wait yawe, “Soh raa ro mbo sekoci reto masen msam mamo to, kbe anu raa ro bhau mam kapal refo fo sait bo ykai riof fee ye.”
ACT 27:32 Feto to, raa ro sbe ofo masen sbi too ro sekoci reto afo re sekoci reto mso mamo makus.
ACT 27:33 Rabu konok to, Paulus yawe kʼana yawe, “Niit boit oh! Ti trion 14 mkak oh anu nhau waa yoyo sai, tibyo anu niit bo aro kaket fee ye.
ACT 27:34 Tawe anu niit boit kebet baro afo re kbe ntak. Tna waa ma. Anu bsu marak bo fee ye.”
ACT 27:35 Paulus ykyas bo weto mkak si fo yasen yoo roti tna yayoh asik mawat kʼTuhan mam wore ana masu mmat beta. Tna ait haber roti reto yait.
ACT 27:36 Ana mmat feto mrok simaut baro tna hre mait boit ye.
ACT 27:37 Amu ro nhau mam kapal mato reto nbo trion 276.
ACT 27:38 Ana mait boit mhaf matu oh. Tna fo raa masen tubat gandum ro mhau fares mkah kbe raa masim to, beak mam aya afo re kapal reto mnan-nan mamo.
ACT 27:39 Rabu momo to, ana mmat sawan maam ro snyik mana kene oh. Menohe ana wase rabin reto fares. Ana mawe makah kapal reto mamoʼt mne reto.
ACT 27:40 Raa weto masen sbi too ro jangkar fo, tibyo jangkar sruf akus mam aya. Mam weto ye ana misoh miin kapal reto, mno re mamo trot. Tna moo too make bo mabat ro kapal reto (layar) mros abyõ afo re foos moo kapal refo beak mamoʼt mne.
ACT 27:41 Menohe kapal reto mamo mako mam snik mana sau. Kapal mana rau mako tibyo mnah baro bo fee ye, tna figyõm mai kapal tis fo habah.
ACT 27:42 Raa ro sbe weto masen saim bo mawe kʼanya mawe, “Anu bsen bme raa ro frok mbam bui weto beta majat! Bi yabi retait ybis amu kmot ana kaket, re kbe ana aro msam mamo fee. Soh ana sait bo yasen kni yamo to, kbe bi ait yame anu bjat ska riryõn!”
ACT 27:43 Menohe Yulius ksoh Paulus tna yawe, “Nno feto ma!” Tna ait ybis yawe, “Awya ro yhar bo kni to, busyok yame aya kni yatim wia yaut mne.
ACT 27:44 Tna anu taro nbo kapal ftah kni nrof.” Tibyo ana kni beta mamo maut mam mne mkah riof beta.
ACT 28:1 Amu beta nmo snok mne nkai riof oh. Tna amu nrok nhar nwe sato reto to, sato ro masom Malta oh meto.
ACT 28:2 Raa ro mhau mam sato reto mno bo moof toni syok kʼamu. Ana huwya mtar amu tna misoh amu kaket ye. Arin mkair re amu nfos toni. Tna ana mko tafoh re kbe amu nmo nni foos ye.
ACT 28:3 Paulus soo roko thauk tna yamo yawah roko weto yko abyõ mam tafoh. Ait yno feto kri-kri fo, tafoh mafit aban sau ro mhau mato fo tibyo mham frok, tna mafit Paulus yatem.
ACT 28:4 Raa ro sato reto mmat aban reto mafit Paulus yatem kro feto, tibyo mawe bo kʼanya mawe, “Tnaut tawe raa refi fi ja yame raa majat, menohe ait ykai riof sai mam sawan sai. Tna kabes sayõ ait yhau yaam fee.”
ACT 28:5 Paulus bes-baas aban reto mamo mait mam tafoh, tna Paulus yari ait yham bo baro fee tum.
ACT 28:6 Raa ro sato refo mnaut mawe rere baro feto Paulus yatem mrok mtun mase, tna kbe ait yatu btek yai mam tabam yajat. Ana mhau mwof baro kait oh. Menohe yatem moof sai; bo ro ana mnaut reto to, mabo aro fee. Tibyo ana me mnaut mawe, “Nno be bi ait retait kabes sait!”
ACT 28:7 Raa ro yase mam sato reto yasom Publius. Tna tabam rait mhau kene mam beto. Ait yitrah amah rait kʼamu tna yno bo moof kʼamu ti trion tuuf.
ACT 28:8 Mam ati reto to, Publius yaja kiyam. Ait yetsu mbe tna ysyõ ksoh ye. Paulus yamo ymat raa ro kiyam retait. Tna skabuk yatem ytor abyõ kʼbi ait. Tibyo bi ait yrok kiyam marak ye.
ACT 28:9 Paulus skabuk raa retait yrok bros feto, tna bokyas reto raa mari faram ye. Tna raa kiyam taro beta mamo mo kʼPaulus tna ait skabuk ana mrok bros beta ye.
ACT 28:10 Tibyo raa ro Malta mno bo moof toni kʼamu tna mayoh asik mase kʼamu ye. Amu nhau mam sato reto snyi tuuf. Tna mam wore amu siwyan nuut kapal roto to, raa ro sato reto makah boit msya bo roto taro ye mama mee kʼamu niit mam kapal. Kapal sau ro tiwya mama mbam kota ro Aleksandria soso mam sato reto mam soo ro foos mfi reto ye. Kapal reto tiwya raa mfen mana rau mfi dewa wana mabo ewok mawyan rana. Dewa mabo ewok ro ja ana smot weto to, masom Dioskuri. Tna amu nsen nmo nuut kapal nmo renti.
ACT 28:12 Kapal reto nhoh nmo snok mam joh ro Sirakusa tna soso nhau ti trion tuuf mam beto.
ACT 28:13 Amu nbam beto nsen nmo renti nmo nwyan tabam reto snok mam joh ro Regium. Rabu ti fo, foos mfi mbam ati ro selatan tna ti ro ewok to amu snok mam joh ro Putioli.
ACT 28:14 Mam Putioli to, amu nroh tna nkai raa Kristen baro ye. Ana mabe amu nhau nsya ana mam beto ti trion krema. Tna fo amu nsen nmo iso mne nmoʼt kota ro Roma.
ACT 28:15 Raa Kristen ro mhau mam Roma mari bo amu nma kri-kri fo, tna baro masen mamaʼt remo ro Apius (yuk reto ja raa mama masim bo) mkah bo mtar amu. Tna raa Kristen taro mamaʼt remo ro Tres Taberne mkah bo mtar amu ye. Paulus ymat raa weto mama to, ait simaut mam yhaf mato tna yayoh asik mawat kʼAllah ye.
ACT 28:16 Amu nmo snok mam kota ro Roma to raa ro pemerintah matmof Paulus mbis ait yhau mam amah sau ysya raa sbe sait ro kmot ait. Mbis ait yhau mam bui fee.
ACT 28:17 Paulus yhau masno tuuf tna ait ytu raa manes ro Yahudi mama siret su. Tna Paulus yawe kʼana yawe, “Raa wojõ sor: Jõ to tno bo ro mkair aro mai kʼraa wanu fee. Tna tber kait bo mafa ranu ja hohos wanu mno soo bo to fee ye. Menohe raa mfot jõ mam Yerusalem msan kʼraa ro Roma. Tna makah jõ mamaʼt befo.
ACT 28:18 Raa mase mtu srah ajõ tna mkai safo mabo ro ana maun boun kʼjõ to, aro fee ye. Tibyo ana mawe bitsre jõ tamo. He mfe.
ACT 28:19 Raa ro Yahudi matak wa sai. Feto oh mi jõ te takah srah refo taut tamo to kʼraja Kaisar tna kbe ait ytu srah ajõ fo. Menohe jõ tawe abyõ tawe jõ tamaʼt befo taun boun anu raa ro Yahudi fee.
ACT 28:20 Feto oh mi riwai jõ ttu anu nma no kʼjõ fo. Tawe betoo bo refo kʼanu. Anu raa ro Israel ja bwe Mesias ro Allah ysok yoo riof yee kʼraa to, kbe yama. Jõ tnaut tawe feto ye. Tna au oh mi raa mfot jõ makah mamaʼt befo fo.”
ACT 28:21 Tna raa ro Yahudi weto mawe, “Amu nkai aam ro mbam rabin ro Yudea mkyas bo mkair ro nyõ nno bo aro fee ye. Tna raa sait ybam raa wamu wefi bo yama ykyas bo mkair ro nyõ nno bo to fee ye.
ACT 28:22 Menohe amu nri raa beta mawe kair bosmot raa ro Kristen oh. Tna amu huwya nri bo ro nyõ nesait nkyas.”
ACT 28:23 Tna ana mmah oon mawe ti aro ana mama siret su u. Tna mam rabu ro oon sboh to, raa msis-sas mamaʼt amah ro Paulus yhau. Paulus huwya betoo bo kʼana. Ait ykyas wore wo Allah yamo Raja ybo raa mana rAit. Ait ykyas bo kʼana mamo snok hreha. Tna ait ykyas Yesus kʼana ye. Yawe Ait Mesias ro tiwya Watum ro Musa msya nabi na mkyas ye.
ACT 28:24 Tna ana taro mari bo ro ait ykyas to, smot bokyas reto mawe mabo oh. Tna ana taro to, hawe smot bokyas reto ye.
ACT 28:25 Ana mhaf wana hayah-hayah sai. Tna santri anya. Tibyo Paulus yasen ykyas bo ro tiwya Allah ykyas kʼnabi Yesaya: “Nasen namo no kʼraa wefo. Tna nawe kʼana nawe, ‘Anu ja nri bo menohe anu srau nnaut bo ro anu nri reto fee. Anu nmat bo menohe mfi bo anu nhar bo reto fee. Anu hawe bo smot Jõ. Tna anu nimara mtuk, hawe nri Jõ fee. Tna nsu wanu mti, wase bo ye. Menohe mfi bo anu hah nma no kʼJõ to, soh anu nhaf smot Jõ to, kbe tno re anu nrok noof; kbe anu nimara nri bo, tna nsu wanu to, kbe nmat bo tna nhar ye.’” Yesaya 6:9 - 10 Paulus yawe, “Tiwya Har ro Tuhan mkyas bokyas reto kʼnabi Yesaya. Ait ykom bo reto tna ykyas kʼanu hohos na wanu ye. Tna bokyas mbam kʼHar ro Tuhan reto mabo oh mefo!” Paulus ykyas bo reto mam tis tna raa mbam raa mana ro Yahudi masen mbrir-brar mbam siret refo mamo.
ACT 28:28 Tna ait yawe kʼana yawe, “Nri oh! Nhar oh: Riof ro Allah yoo yee reto to, mfo refo Ait yoo yee kʼraa ro mbam raa mana roto makin ye. Tna ana weto to, kbe mari tna moo riof rAit reto mse kʼana to.” [
ACT 28:29 Paulus yawe bo weto mkak. Tna raa ro Yahudi weto taro mrok kmo. Ana beta masen mamo tna santri bo kʼanya iti ye.]
ACT 28:30 Tna Paulus yhau tahun trion ewok muuf mam samu ro ait kwiyat reto. Ja ait ksoh huwya ykyas bo ysya awya sai ro yama yo kʼait.
ACT 28:31 Yhau to, ait ykyas bo abyõ sai ykyas wore wo Allah yamo Raja ybo raa mana rAit. Tna ait ykyas Tuhan Yesus Kristus yasom rAit ykah yatak tna raa aro mno wa bo fee ye.
ROM 1:1 Aam refo mbam kʼjõ, Paulus. Jõ tamo sryan ro Kristus Yesus. Tiwya Allah ytu jõ yawe tamo raabis rAit. Ysok jõ yse hayah yawe kbe tno bo wAit. Au oh mi tamo tkyas Bokyas Moof ro Allah.
ROM 1:2 Bokyas ro Moof reto, tiwya Allah ysi yawe kbe ykyas kʼraa ro tabam refo. Tinyi ybis nabi wAit mama mkom Bokyas ro Moof reto mam watum rAit wia. Mkom bokyas reto mam wore wo Yesus yarak fares.
ROM 1:3 Bokyas ro Moof reto mkyas Yesus, Ku ro Allah yare. Ait fi Allah yare oh tna haberek yamo raa tu ye. Yusuf, ro tiwya ytos Yesus mam wore yhau mam tabam refo to, ait retait ybam kube ro raja Daud. Feto to raa mawe Yesus tait ybam kube ro raja Daud ye.
ROM 1:4 Yhau yamo snok Ait yabi. Tna raa mame yajat. Tna Allah yno Ait yrok yasen mamyot matak Har ro Allah. Allah yno Yesus yrok yasen afo re raa beta mhar mawe Yesus Kristus tait raa tu sai fee. Yno feto yerif yawe Tuhan ranu retait yfi Allah ye. Yamo Ku ro Allah yare metait.
ROM 1:5 Tna mkah bo ro Yesus yno oh mi Allah yatmof jõ. Yatmof jõ re tamo raabis (rasul) ro Allah tna tkyas yasom rAit kʼraa makin ro mhau mne, ana ro agama Yahudi fee. Jõ tasen tamo to kʼana ro mne weto tna ttu ana re kbe ana mama smot Kristus. Re kbe ana smot, tibyo mari bo ro Ait yawe, mbo mno kaket. Tis rau to, kbe raa mmat bo ro ana weto mno tna raa weto mama bibi Yesus ye.
ROM 1:6 Anu ro Roma ye nsya raa roto taro ro mhau mne ye to, Allah ytu anu yawe nmo raa ro kro Yesus Kristus.
ROM 1:7 Taja, tme, tao, tano na ro nhau mam kota ro Roma; jõ tkom aam refo tiim mamoʼt kʼanu ro Allah ytu nmo raa wAit oh. Allah yhafri anu beta. Jõ skabuk kʼanu Bja Allah, re Ait ysya Tuhan Yesus Kristus kbe matmof anu tna mno re anu nhau nhaf tnok sai.
ROM 1:8 Anu ro jemaat Roma smot Yesus matak oh. Tna raa ro tabam arin aso beta mari oh, tna mkyas bosmot ranu refo. Tibyo mam tinyi rau fo, jõ tayoh asik mase kʼbi Allah mam Yesus Kristus yasom:
ROM 1:9 Jõ mur-mur tno bo ro Allah yawe tna tkyas Bokyas Moof ro Ku rAit, Yesus. Tna Ait yhar yawe ati ro jõ skabuk to jõ skabuk anu yoyo ye.
ROM 1:10 Jõ skabuk re kbe jõ tama to kʼanu. Tiwya ooh-oh jõ tawe tama to kʼanu. Tna soh Ait ksoh to, kbe jõ tama tmat anu.
ROM 1:11 Jõ ksoh toni tawe tama to kʼanu. Tawe tama re kbe tinyan bouum ro mbam Har ro Tuhan (karunia). Tna kbe bouum reto mno re anu nros ntak smot Allah kaket.
ROM 1:12 Au oh mi jõ tama to kʼanu to, kbe bosmot ajõ mno bosmot wanu mo matak. Tna kbe bosmot wanu mno bosmot ajõ mo matak ye.
ROM 1:13 Tiwya ooh-oh jõ tawe tama to kʼanu. Menohe bo mburut wa jõ. Jõ tawe tama tkai make aro mam Roma beto. Anu to, nbam raa mana ro Yahudi fee. Tiwya jõ tamoʼt remo roto tkyas bo kʼraa ro wase agama Yahudi ye. Tna tkai make aro mam wore weto. Tna mfo refo jõ tawe tama to kʼanu feto ye.
ROM 1:14 Allah ybis jõ tamo tkyas Bokyas Moof refo kʼraa mana roto makin. Yawe tamo tkyas kʼana ro mkyas bo mkah mai ro Yunani ye tna ro mkyas bo mkah mai roto ye, kʼana ro mhar bo ye tna ro wase bo to ye.
ROM 1:15 Reto oh mi jõ ksoh tama tkyas Bokyas Moof ro Yesus refo kʼanu ro nhau mam Roma ye.
ROM 1:16 Allah yno re Bokyas Moof ro Yesus reto to, matak moo riof ro mase mee kʼraa. Thar mafer rau reto tibyo jõ ksoh tamo tkyas Bokyas reto. Jõ twaa fee. Awya ro yari Bokyas reto tibyo smot Yesus to, kbe ykai riof: Tinyi rau to, raa mbam raa mana ro Yahudi, tna msya raa mbam raa mana roto makin ye.
ROM 1:17 Tna Bokyas Moof reto to, mafer moof. Bokyas ro Moof reto mbetoo iso ro raa mkai riof. Mkyas mawe, kbe raa smot Yesus wia tibyo Allah ymat mees rAit yawe ana mfi raa ro mhaf moof ati. Iso ro bosmot reto sau aran. Au oh mi Bokom ro Allah mkyas mawe, “Raa ro smot Allah oh mi raa ro Ait yawe ana mfi raa ro mhaf moof ati. Feto kbe ana mhau mroon.”
ROM 1:18 Tna mafer Bokyas ro Moof reto sau naut ye: Bokyas reto mkyas mawe Allah kmo raa ye. Allah yhau mam sawro rAit tna ymat raa ro mno iro to, tibyo kmo ana beta. Raa mno iro mai kʼAit tna mai kʼraa anya ye tibyo Ait kmo ana weto. Bo ro ana mno mkair reto mberkait bo ati ro mbam kʼAllah. Tibyo Ait yoo safo mana ymit kʼana weto.
ROM 1:19 Allah yerif bo rAit ro ati to kʼana oh. Ana beta mhar bo ro ati mbam kʼAllah reto oh.
ROM 1:20 Ti tinyi rau tabam refo Allah yfen. Tna mamo snok mam mfo refo to, raa mmat bombra ro Allah yfen. Raa mahni Allah yabo rAit to menohe raa mmat bo ro bi Ait yfen. Tna bo ro Ait yfen weto merif Ait yase rAit tna merif Ait yatak rAit ro mroon ye. Raa mmat tibyo ana srau mnaut mhar mawe Ait tait Raa ro yatak toni tna yase toni ye. Meen ati ro Allah ymit safo kʼraa ro hawe bo smot Ait to, kbe yawe kʼana yawe, “Sioh anu ai to ma. Tiwya anu nmat bombra ro Jõ tno beta oh, reto mnan oh re anu nrok nhar Jõ ye.”
ROM 1:21 Raa weto to, srau mhar Allah oh. Menohe ana hawe bo mbaut Ait. Tna hawe bo mayoh asik mase kʼAit ye. Tibyo ana mnaut-nat bo ro mafer marak. Tna srau wana to mrok mabuf.
ROM 1:22 Ana mawe ana mhar bo menohe ana mrok manyiya.
ROM 1:23 Ana hawe bo smot Allah ro yroon, tna yoof toni retait. Menohe ana ksoh mfen patung aro ro mafos fee; bo ro masu mnaif mnan raa, taro mnan ruu, mnan kak, aban bo to. Ana mfen tna smot patung wana weto.
ROM 1:24 Raa weto mhar bo ro ati mbam kʼAllah baro oh. Menohe ana hawe bo smot bi Ait. Feto to Ait yatam ana fee. Ait sayõ rof bo ro ana mno to tibyo ana mno bo bawya ro ana mesait ksoh sai. Ana mhaf mamur tibyo ksoh mno bo ro mkair toni. Ana srau oot-oot maus-as bo sai. Ana to sikowah metsu wana oh meto.
ROM 1:25 Bo ati ro mbam kʼAllah to, ana mhar mam mhaf mato wana. Menohe bo ro ati weto ana mbeak makus. Mbeak makus tna ana mawe mari bo sioh. Ana sioh ana ai oh meto. Allah oh mi yfen tabam refo beta. Rau ro moof raa bibi Allah yesait aran sai tna mno bo ro bi Ait yawe mamo snok mam hame wajin. Amin: Mabo oh! He mfe, raa weto to miwana Allah. Tna smot bo knik-knak ro Ait yfen sai.
ROM 1:26 Ana mno feto tibyo Allah yatam ana fee. Ait sayõ rof ana sai. Tna ana weto taro mawat srau oot-oot mno bo ro mkair toni, mno bo ro mti hrenaut: Fnya wana taro hawe bo msya raa sme wana: Fnya mjin su mjah fnya anya.
ROM 1:27 Tna raa sme taro hawe bo mjah fnya wana. Raa sme srau oot-oot anya tibyo mjin su mjah raa sme anya wana ai. Ana mno bo ro mkair feto oh mi Allah yno bo ska kʼana riryõn. Tna kair matu mai kʼana metsu wana.
ROM 1:28 Ana mmat sas bo ro Allah yno. Mmat bo ro ati reto. Mhar oh menohe hawe bo mfot bo reto tna mse mam kʼana mhaf wana fee. Mawe mafer aro fee. Allah ymat he ana miwana Ait. Feto to Ait yatam ana fee. Ait sayõ rof ana. Tna ana mhau mhaf mamur. Mhaf mato wana to mkair tibyo ana mno bo ro mti safo.
ROM 1:29 Ana to mno iro mai kʼAllah yoyo. Tna ana mno safo aro rau-rau mai kʼraa anya ye. Ana masu mase sai mkah bo ro raa. Ana ja mno bo ro mkair-kar, maam bo raa anya, mame raa anya, mmak msya raa anya, sioh-sah anya, mhaf mato wana saim safo ro mkair yoyo, ntoo anya.
ROM 1:30 Ana mawe kair anya, ana knait Allah, miwana raa anya, tna tawyõ ana ai. Ana to safuk mawe ana uu kar yoyo ye. Tna ana ksoh bo msair safo rouu yoyo. Tna hawe bo mari bo kʼraa mabi wana.
ROM 1:31 Ana makit marak. Ana to srau ewok, ksoh raa roto fee, matmof raa anya to fee ye.
ROM 1:32 Ana mhar mawe Allah yawe awya ro wyahte Watum rAit feto kbe raa mame ait to yajat. Menohe ana mesait beroh mno bo ro mkair weto. Tna ana msya mafoh na ro miwana Allah mfi feto ye to, ana mbibi anya ye.
ROM 2:1 Tna anu bhar bwe iro ro raa mno feto to, kbe Allah ymit kʼana tu oh. Menohe anu bsait fyi? Mfi bo anu bmat raa roto tibyo mam bhaf mato wanu bwe safo btek kʼana. Menohe anu bsait ja haberek bno bo mkair mnan anya mfi ana feto ye. Anu bsait oh mi bwe safo btek mai kʼanu oh meto! Anu bhar bwe kbe Allah ymit safo weto kʼanu mnan si tu oh! Kbe raa aro yban anu fee saut! Kbe anu bsam bmo fari re Allah yahni iro wanu fee ye!
ROM 2:4 Mfo refo Ait yoo safo ymit kʼraa to fefares. Allah tait Raa ro kanyin sai. Ait tait Raa ro yhaf ase. Allah ksoh yawe raa mashana. Feto to Ait bitsre rere baro feto tna re kbe raa mashana. Nno be anu aro niwana boatmof rAit reto to ma. Beroh nno bo ro mkair ma, re kbe meen Allah yno bo ro mase mai kʼanu.
ROM 2:5 Anu to, nna mase tna hawe bo nashana. Anu to beroh nno iro. Feto to anu nno Ait kmo renti. Tna kbe meen Ait yno bo ro mase mai kʼanu. Nnaut oh: Meen, ati sau to, kbe Ait yoo srah ymit kʼraa beta. Wore Allah yoo safo ymit kʼraa ro mno safo to, yno bo ro mnan si oh meto. Tna kbe raa beta mmat mawe Ait yno bo mnan si yum.
ROM 2:6 Allah kbe ska bo kʼraa sait-sait mamyot si bo ro ait retait yno:
ROM 2:7 Raa ro beroh mno bo ro moof to, mno re Allah yhaf mnan. Ana weto to raa ro ja saso roon ro hame. Mam wono to ana weto ksoh re Allah yoo ana yse hre abyõ mam yuk ro moof, tna kbe raa mmat ana ye. Ana ro saso bo weto oh mi meen Allah yno afo re fri roon ro hame.
ROM 2:8 Menohe kbe Allah kmo raa ro ja mno bo ro moof mkah ana mesait ai sai. Kbe Allah kmo raa ro ja mmat raa anya fee. Kbe Ait kmo raa ro hawe bo mari bo ati ro mbam kʼAit, tna raa ro ja mber safo. Tibyo meen ana weto mkai bo ro mkair.
ROM 2:9 Meen kair mai kʼraa beta ro ja mno bo mkair: Raa mbam raa mana ro Yahudi wia tinyi tna msya raa mbam raa mana roto ye. Kbe ana mbewok ye srau wana hri.
ROM 2:10 Menohe meen Allah yno bo ro moof kʼraa ro ja mno bo ro moof. Meen Allah yoo ana weto yse hre abyõ mam yuk ro moof tna mam wono to, kbe raa mmat ana ye. Tna ana weto meen mhau mhaf tnok ye: Raa ro Yahudi wia tinyi tna raa mbam raa mana roto makin to ye.
ROM 2:11 Allah ymat raa beta to, yawe mnan anya sai. Ysok raa sait fee.
ROM 2:12 Tna raa mbam raa mana ro Yahudi to, ana mhar Watum ro Allah yoo yee kʼMusa. Tna soh ana mno bo mnan si Watum reto to fee, kbe yoo safo mana ymit kʼana. Tna raa ro mbam raa mana roto makin to, ja wase Watum ro Musa. Menohe soh ana mno iro miwer Watum reto to, meen ana safe mkak ye.
ROM 2:13 Allah tait yhaf mnan kʼawya? Ait hawe raa ro mhar Watum ro Musa sai menohe mbo mno beta fee. Ait yhaf mnan raa ro mari Watum reto tna mbo mno beta. Allah ymat sas ana weto tna meen yawe ana oh mi raa ro mhaf moof ati.
ROM 2:14 Raa ro mbam raa mana roto makin weto, ana wase Watum ro Musa reto. Menohe ana baro mno bo moof mfi bo ana kro Watum reto. Watum maja rau reto ana mhar mam mhaf mato wana ai sai.
ROM 2:15 Bo moof ro ana weto mno to, merif mawe Allah yno re mhaf mato wana to, mti bonaut kʼana. Mti bonaut kʼana re mhar Watum reto maja rau. Ana mesait mnaut bana re mhar mno bo ro moof mamyot Watum reto. Tna soh ana mno bo ro mkair to mhaf wana bhah ana ye.
ROM 2:16 Meen, ati ro Allah yoo safo mana ymit kʼraa sait-sait to, kbe ymat sas raa mhaf mato wana. Ymat sas tibyo yhar bo beta ro tiwya ana mno wai. Tna yhar soh raa kro Bokyas Moof ro Yesus to, tna mno mnan si, fe mfe a. Tna fo Kristus Yesus yoo safo mana ymit kʼraa. Bokyas Moof reto oh mi ja jõ tkyas kʼraa.
ROM 2:17 Anu taro nwe, “Jõ fi raa ro Yahudi. Tna amu nnaut nwe Watum ro Musa reto to, matak re mno amu nhaf moof ati tibyo nkai riof ro mase.” Tna anu weto to safuk nwe anu niranya nsya Allah oh.
ROM 2:18 Tna anu nwe anu nhar bo bawya ro Ait yhaf mnan. Tna anu nhar Watum ro Musa tibyo anu nhar bo ro moof msya nhar bo ro mkair.
ROM 2:19 Anu to, nwe anu nsu maah re mbefatu raa. Mbefatu raa tna nerif iso ro Allah kʼraa ro masu mti fares. Anu nwe anu to, nbo kek nmo nram raa ro mhau mam wore mamur fares.
ROM 2:20 Anu nwe Watum ro Musa mno re anu nhar bo ro ati. Tna anu nwe anu nhar Watum ro Allah beta mnan si oh to. Nwe nhar oh tibyo nerif bo kʼraa ro wase bo ye tna nmo guru ro ja watum bo kʼraa ro mfi ku kinyah fares ye.
ROM 2:21 Soh anu nwe nhar bo weto beta oh to, fyi re anu nbo tna nno bo weto fee! Rau ro moof to, anu nesait nri bo ro ja anu watum kʼraa. Anu nkyas nwe, “Nsyõf bo ma!” Fyi, anu nesait ja nsyõf bo fe mfe a?
ROM 2:22 Anu to, nkyas nwe, “Nwyah ma!” Fyi, anu nesait nwyah ye fe mfe a? Anu nkyas nwe, “Amu knait berhala bo to.” Fyi re anu nmoʼt yuk ro raa msan bo kʼberhala weto, tna nsyõf bosan ro raa mse kʼberhala weto!
ROM 2:23 Anu safuk nwe anu nhar Watum ro Allah yoo yee kʼMusa oh. Menohe anu nno bo miwer Watum rAit reto. Anu nno bo bawya meto ee? Soh anu niwer Watum rAit to, anu niwana Allah oh meto.
ROM 2:24 Feto oh mi Bokom ro Allah mkyas mawe, “Anu, raa ro Yahudi, oh mi nisti re raa ro mbam raa mana roto makin mamus Allah ranu to.”
ROM 2:25 Anu raa ro Yahudi to, ja nkom tohmi (sunat). Anu nkom anya feto, afo re kbe raa mhar mawe anu to, raa ro Allah wAit. Soh anu weto nri tna kro Watum ro Musa weto beta mnan si to, kbe bo mafa ro nkom tohmi reto mafer moof ye. Soh anu nkro Watum ro Musa weto beta to fee, anu weto nnan anya nsya raa mana roto sai, ro raa mkom fee. Anu nkom to, mafer marak.
ROM 2:26 Feto ye: Ana ro raa mkom tohmi fee; mfi bo ana weto mari Watum ro Musa mbo mno kaket to, kbe Allah ymat ana mfi raa wAit ye, mnan anya msya raa ro raa mkom oh.
ROM 2:27 Raa ro mbam raa mana roto makin to, ja mkom fee. Menohe soh ana ja mno bo mamyot Watum rAit to, Allah yhaf mnan ana ye. Menohe anu ro raa mkom oh tna nhar Bokom ro Allah ye to; soh anu niwer Watum rAit reto to, meen Allah yoo safo ymit kʼanu. Ymit safo kʼanu tna kbe raa ro mne mros mmat mawe, “Ae, amu ksoh ye.”
ROM 2:28 Anu ro Yahudi nwat to nwe kro bo mafa ro hohos na wanu. Tibyo anu raa mkom tohmi oh. Anu raa mkom feto oh mi misti anu weto nnaut nwe anu nesait ku ro Allah wAit to, ku ro ati to. He mfe.
ROM 2:29 Mfi bo anu raa mkom, tna mfi bo anu kro bo mafa raa ro Yahudi to, bo ati meto fee. Watum ro Musa to, matak misoh raa mhaf wana moof to fee. Soh Har ro Tuhan misoh anu nhaf wia to, kbe anu nmo raa ro Allah wAit ro ati to. Kbe raa ro tabam refo bibi anu u fee. Menohe kbe Allah bibi anu.
ROM 3:1 Amu fo raa mana ro Yahudi. Amu raa mana ro Yahudi bkai mafer bawya? Amu fo raa mkom oh to, mafer rau to miyo?
ROM 3:2 Mafer rau to mawat: Bokyas ro Allah to, tii Ait yehau oh kʼamu hohos na wamu.
ROM 3:3 Bo ro Allah yawe tna yno to, mhau bau yum. Menohe raa Yahudi baro hawe smot Allah. Ana miwana bo ro bi Ait yawe. Bo ro ana mawe tna mno to, kbe mburut wa Bokyas ro Allah makus fee saut. Ebokmi raa ro tabam refo beta sioh raa anya. Menohe Allah tait sioh raa fee. Bokom ro Allah mawe, “Meen raa masu maah tna mrok mhar mawe ana mno bo mkair. Tibyo ana manwaruk mawe, ‘Allah yoo safo mana ymit kʼanu to, yno bo mnan si oh meto.’ Tna raa taro kbe maun Allah mawe yno safo. He mfe, kbe safo btek Ait aro fee.”
ROM 3:5 Raa taro ye hafrah jõ mawe, “Amu nnaut nwe, ‘Allah yoo safo ymit kʼanu raa ro bno iro to, Ait yno bo moof mnan si oh meto. Menohe fyi meto? Soh anu raa ro ssafo fee re btek mam iro beta, fyi re Allah ymit safo mana weto kʼanu? Allah yber safo oh meto! Rau ro moof to, meen Ait sayõ rof bo ro raa mno sai, tna yoo safo mana ymit kʼanu to ma!’” Ana weto mkyas bo mamyot raa ro tabam sai, bonaut rana reto to mabuf.
ROM 3:6 Bokyas mkair toni meto! Ana ro jõ tkyas weu to, mkyas bo ro sre. Allah tait Raa ro yhaf moof ati. Soh mfe to, fyi re meen Ait yoo safo mana ymit kʼraa ro tabam refo beta?
ROM 3:7 Ana weto hafrah jõ u mawe, “Karik raa mmat he amu fo raa ro sioh raa. Menohe ana mmat Allah to, mawe Ait Raa ro ja sioh fee. Ait yno bo ro mnan si yum. Mmat bo weto tibyo ana bibi Allah, mawe bo ro Ait yno to moof miwer. Tis rau to sioh ramu to mafer moof. Feto to kbe Allah ymat iro wamu yoo safo mana ymit kʼamu fyi meto?”
ROM 3:8 Raa taro to sioh mawe, “Paulus yawe fefo: ‘Nma, bno iro re kbe ro moof to, frok mbam iro reto!’” Raa ro mkyas bo feto, ana beta to raa ro masoh mase. Maami Allah yoo safo ymit kʼana weto.
ROM 3:9 Feto to fyi? Allah ynaut yawe amu raa ro Yahudi to, raa ro ati niwrek raa mana roto, fe mfe a? Mfe saut! Riwai jõ tkom tawe raa beta mno iro oh: Raa mbam raa mana ro Yahudi ye tna msya raa ro mbam raa mana roto makin ye. Tibyo kbe Allah yawe safo btek kʼana beta.
ROM 3:10 Feto ye, Bokom ro Allah mawe fefo: “Raa ro tabam refo sait bo yhaf moof ati fee.
ROM 3:11 Tna raa ro tabam refo to bohar wana beta mabuf. Bonaut rana msya bokyas wana to mafer marak. Tna sait saso Allah fee ye.
ROM 3:12 Raa beta haberek kbor kʼAllah. Ana beta to mafer marak sai. Tna sait bo yno bo ro moof fee.”
ROM 3:13 “Mbam srau wana to, raa mkyas bo ro mnis, mfi hai ro mhai tna raa sama fefares to, kbe mnis ye. Tna hrea wana mkyas bo to sioh. Tna masoh anif wana mkyas tna saraf-saraf raa. Mfi abboh ro ja saraf raa majat.”
ROM 3:14 “Tna ana mhaf knait raa yoyo tibyo masoh wana to mhau mamus raa yoyo ye.”
ROM 3:15 “Tna maa wana to, mhoh mamo mame-ama raa sai.
ROM 3:16 Woyõ-woya ana mamo to ana sikaut-kat bo raa ye, tna sikowah raa ye.
ROM 3:17 Ana to wase bo miranya ye.”
ROM 3:18 “Tna ana to wase bo waa Allah ye.”
ROM 3:19 Nnaut oh: Bokom weto to, tiwya Musa ykom mam Watum rait. Tna bokom beta ro mhau mam Watum ro Musa to bo ro Allah ykyas kʼraa ro Yahudi. Allah yoo Watum reto yee afo re kbe raa mhar bo ro moof tna mno, tna bo ro mkair to mno ma. Feto tibyo ati ro Ait yoo safo ymit kʼraa to, kbe raa beta mhar mawe bo ro moof to miyo. Tna kbe raa sait bo fee yasen ywaar yawe, “Jõ twase bo reto!” Kbe raa sait saak ait to fee ye. Bo ro bi Ait yawe to, meen raa ro tabam refo beta to, mari tna manwaruk.
ROM 3:20 Allah yawe raa beta ro mhau mam tabam refo to, sait yhaf moof ati fee. Raa baro siko mbo Watum ro Musa mno mnan si. Menohe Watum reto to, matak mno re raa mamo mhaf moof ati to fee. Allah ymat ana weto yawe ana weto to raa ro ja mber safo ye. Watum reto to, mafer rau oh mi mno re raa mhar mawe ana raa ro ja mno iro.
ROM 3:21 Mfo refo Allah yerif iso roto sau kʼanu re kbe Ait kmo anu u fee yawe anu bfi raa ro mhaf moof ati. Watum ro Musa to matak re misoh raa mhaf moof ati fee. Menohe Watum reto msya bokyas ro Allah ybis nabi wAit mkom to, tiwya mkyas iso ro tna refo matim oh.
ROM 3:22 Iso ro tna reto oh mi: Raa smot Yesus Kristus tibyo msam wai kʼAit (iman) to. Allah yawe awya ro smot Yesus feto to, kbe Allah ymat mees ro Yesus tibyo yawe ana mfi raa ro mhaf moof ati oh. Raa ro Yahudi ye tna msya raa ro agama Yahudi fee ye mamo iso reto saah. Beta mnan anya sai.
ROM 3:23 Raa beta to mno iro. Menohe Allah tait Raa ro yase. Ait yno bo ro moof toni. Bo moof beta ro anu raa bno to moof mnan Ait fee. Mabut fares sai.
ROM 3:24 Tna Allah ksoh rAit sai yatmof anu. Yatmof anu tna Kristus Yesus yfes anu. Tibyo Allah ymat mees ro Yesus tibyo yawe anu bfi raa ro bhaf moof ati. Bhaf mkair aro u fee.
ROM 3:25 Raa ro tabam refo mno iro. Tna ja Allah yawe safo btek mai kʼraa awya ro yno iro oh. Tibyo meen Ait sikowah ana. Menohe anu taro to, meen Allah sikowah anu wefo fee. Fyi? Ait ysan Yesus tna raa sikowah Ait, mame Ait riryõn. Ait shauk anu oh meto. Raa beta mmat raa mame Ait to. Yesus yake anu raa ro bno iro weto mkah mees rAit oh meto. Tibyo Allah yhaf mnan raa ro smot Yesus. Anu smot Yesus tna nhar bo ro Ait yno reto bo mabo. Tna raa ro tiwya mno iro, ati ro Yesus raa mame fefares to, Allah sikowah ana wia fee. Ait kanyin sai bait fares. Soh Yesus shauk yuk wana to fee, kbe raa mawe kair Allah mawe, “Fyi re Nyõ natmof raa ro mno iro ee? Nyõ nkro Watum aNyõ fee meto. Bo mkair oh meto!” He mfe, Allah yse Yesus shauk yuk wana oh. Yno feto yerif yawe Allah tait Raa ro yno bo mnan si oh.
ROM 3:26 Tna mfo refo ye; Allah ymat raa ro smot Yesus mawe bo ro Ait yno to, mabo oh. Allah yawe ana weto mfi bo raa ro mhaf moof ati. Allah ysan Yesus afo re raa mmat tna mhar mawe Allah fi Raa ro yno bo moof mnan si.
ROM 3:27 Feto to kbe anu raa safuk bo bawya? Mfi bo anu bri Watum ro Musa tna ja bbo bno to, kbe Allah ymat anu yawe anu to raa ro bhaf moof ati fe mfe a? Mfe: Anu beta bno iro oh. Menohe anu smot (percaya) Yesus bwe bo ro yno weto to mabo oh. Anu smot Yesus feto sai afo re kbe Allah ymat mees rAit tibyo yawe anu bfi raa ro mhaf moof ati.
ROM 3:28 Anu bhar bwe, mkah bosmot (iman) reto oh mi Allah ymat anu yawe anu bfi raa ro mhaf moof ati. Anu bri Watum ro Musa bbo bno to, kbe mno anu bhaf moof ati to fee.
ROM 3:29 Anu raa ro Yahudi nnaut nwe Allah yawe anu nesait aran nma no kʼAit a? Mfe, Ait ksoh yawe raa mana roto makin mama mo kʼAit ye fea!
ROM 3:30 Anu bhar bwe Allah sait aran metait. Tibyo ysaim iso sau aran re kbe raa mama mo kʼAit: Raa Yahudi ro smot Kristus Yesus, mhaf mse bo ro Ait yno to, kbe Allah yawe ana beta to mfi raa ro mhaf moof ati meto. Tna msya raa ro mbam raa mana roto makin ye; ana beta ro smot Kristus Yesus tna mhaf mse bo Ait yno to, kbe Allah yawe ana to mfi raa ro mhaf moof ati meto ye.
ROM 3:31 Feto to fyi? Bosmot mirare Watum ro Musa a? Mfe. Anu smot Kristus Yesus to anu bros tis Watum ro tiwya Allah yoo yee kʼMusa maja rau oh meto.
ROM 4:1 Nnaut bi Abraham. Ait tait anu hohos ranu, raa ro Yahudi. Tiwya ait yhau mam tabam refo tna ykai bo bawya?
ROM 4:2 Allah ymat Abraham yawe ait tait yfi raa ro yhaf moof ati. Bombra ro Abraham yno oh mi mno re ait yrok yhaf moof ati fe mfe a? Mfe. Soh mabo to, kbe ait safuk re kbe raa bibi ait saah. He mfe; ait ytai yno bo aro re kbe Allah bibi ait to fee.
ROM 4:3 Bokom ro Allah mawe fefo: “Bo ro Allah ykyas kʼAbraham reto to, ait yari tna smot (percaya). Smot yawe bo ro Allah yawe reto to meen mabo. Au oh mi Allah yawe Abraham tait raa ro yhaf moof ati.”
ROM 4:4 Soh raa sait ykah bo raa to, kbe raa moo boren maren ait to. Tna boren reto to, raa mawe 'bouum' fee. Boren rait sai meto.
ROM 4:5 Tna raa mawe 'bouum' soh raa moo bo mee sai kʼait; mee kʼait ebokmi ykah bo rana aro fee. Feto ye Allah ksoh yuumto haf ro moof kʼraa ro smot (percaya) Ait. Yawe ymat raa mfi ana mhaf moof ati oh to, au oh mi bouum ro Ait yuumto kʼraa to. Ait ja yuumto bouum refo kʼraa ro mhaf mkair.
ROM 4:6 Tiwya raja Daud yhar bo reto ye. Yhar yawe, ksoh rAit sai, Allah ysan haf ro moof kʼraa baro. Ana mno bo aro wia fee re kbe Allah yno feto. Yoo sai. Kbe ana weto simaut. Raja Daud yhar bo reto tibyo ykom fefo:
ROM 4:7 “Raa taro to, ana miwer Watum ro Musa menohe Allah skur re ana masom iro weto u fee. Tna iro ro ana mno to, Allah yyon beta. Allah yno bo moof kʼana weto oh.
ROM 4:8 Safo mana wana to, Allah ymit kʼana fee. Allah yno bo moof kʼana weto oh.”
ROM 4:9 Raa ro Allah ymat yawe raa weto raa ro mhaf moof ati to, kbe ana simaut. Ana weto to awya? Raa Yahudi ro tiwya raa mkom tohmi (sunat) oh mesait, tna msya raa ro mbam raa mana roto makin ye fe mfe a? Ja anu bwe Allah ymat bosmot (iman) ro Abraham tibyo Allah yawe ait yfi raa ro mhaf moof ati.
ROM 4:10 Nnaut tija Allah yawe Abraham raa ro yhaf moof ati? Raa sunat ait matim wia oh fe mfe a? Mfe. Ti ro Allah yawe Abraham raa ro yhaf moof ati to, Abraham tait raa sunat fefares.
ROM 4:11 Allah ymat bosmot (iman) ro Abraham tna yawe ait yfi raa ro mhaf moof ati. Yawe feto tna ti baro firwas raa sunat ait. Raa sunat ait afo re kbe raa mhar mawe ait yhaf moof ati. Feto ye mkah raa ro raa sunat fee: Awya sai ro smot (percaya) Allah to, Allah ymat ait yawe ait tait yfi raa ro mhaf moof ati. Ait yhaf moof ati ynan fi Abraham tiwya yrok raa ro yhaf moof ati. Tibyo raa mawe ait yfi ku ro Abraham.
ROM 4:12 Feto ye, raa ro Yahudi, ana ro raa sunat oh: Soh ana smot Allah mnan anya mfi Abraham tiwya smot Allah to, ana mamo ku ro Abraham wAit ye.
ROM 4:13 Tiwya Allah yawe yuumto tabam refo beta kʼAbraham ysya kube wait. Fyi re Ait ysok Abraham? Tiwya Abraham kro Watum ro Allah mnan si tibyo Allah ysok ait, fe mfe a? Mfe, bosmot (iman) ro Abraham oh mi Allah yawe ait yfi raa ro mhaf moof ati. Tibyo Allah ysok ait.
ROM 4:14 Feto ye, soh Allah ysok raa ro kro Watum ro Musa sai, tna ysan bosan kʼana mhaf mse to, kbe bosmot ranu mafer marak sai. Tna bo ro tiwya Allah yawe kʼAbraham reto to, mafer marak ye! He mfe, mafer rau mhau kʼanu fares.
ROM 4:15 Woyõ-woya raa mhar Watum ro Musa to, kbe raa miwer watum reto. Tna soh raa miwer Watum reto kbe Allah kmo ana. Tibyo yno bo mbtek mai kʼana. (Tna wore Watum reto raa wase to, kbe raa miwer Watum reto fee ye!)
ROM 4:16 Feto to Allah yawe raa mrok mhaf moof ati mkah bo mamo mam iso ro bosmot (iman). Ait ksoh rAit sai yuumto haf ro moof kʼanu feto. Iso reto Ait yuumto bo kʼraa ro Yahudi mesait kar fee. Yuumto bo kʼawya-awa sai ro smot Allah ynan fi tiwya Abraham smot Allah feto. Kbe yuumto bouum reto tu oh. Tna Abraham tait anu bja ranu beta.
ROM 4:17 Mam bokom ro Allah, Ait yawe kʼAbraham yawe, “Jõ tno re raa mana mawat aro u kbe mawe, ‘Abraham tait bja ranu.’” Kejadian 17:5 Tna bo ro Allah yawe reto Abraham ynaut mamo-me fee. Ait yhar yawe Allah tait Raa ro yno raa ro mhai to, mrok masen. Tna Allah yhar bombra beta ro marak fares, tibyo ykyas raa ro ysair fefares ye.
ROM 4:18 Abraham tait yabi oh ati ro Allah yawe kʼait to yawe, “Meen nyõ kube wonyõ to msis-sas. Kbe ana rembes mamo raa mana mawat aro u.” Kejadian 15:5 Bo ro Allah yawe reto to, Abraham ynaut maut-mroh fee. Yhar yawe bo ro Allah yawe yno to, kbe mabo tu oh. Abraham umur 100 tahun bo feto oh. Menohe bosmot (iman) rait mroh fee. Ait yhar yawe yetsu rait saf-safo u fee. Tna yfain Sara to, mhaf ku rau to msyit oh. Menohe yinaut sai yawe kbe ana mabe ku.
ROM 4:20 Bo ro Allah yawe to, Abraham ynaut maut-mroh fee. Bosmot rait mo matak renti. Bo reto mabo fefares Abraham ybaut bo yase ro Allah rAit.
ROM 4:21 Ait yhar yawe Allah yatak yno bo ro Ait yawe reto mabo.
ROM 4:22 Bokom ro Allah mawe, “Abraham yari bo ro Allah yawe, yfot yse kʼait. Au oh meto Allah yawe Abraham tait raa ro yhaf moof ati.”
ROM 4:23 Bokom reto mawe Abraham yfi raa ro yhaf moof ati. Bokom reto mkah Abraham yesait kar fee.
ROM 4:24 Bokom reto mkah anu ye. Soh anu smot Allah, ro yno Tuhan ranu Yesus yrok yasen to, kbe Allah yawe anu fo bfi raa ro mhaf moof ati ye.
ROM 4:25 Anu bno iro. Menohe Allah sikowah anu fee. Ait ysan Yesus yawe Ait raa sikowah tna mame riryõn. Yno feto yake anu ro bno iro mkah yetsu rAit. Tna Allah yno Yesus yrok yasen re kbe yerif yawe bo ro Yesus yno to, mnan si oh. Yno re kbe Allah ymat anu yawe anu to, bfi raa ro mhaf moof ati to.
ROM 5:1 Feto to Tuhan ranu Yesus Kristus yno re Allah ymat bosmot ranu tibyo yawe anu bfi raa ro mhaf moof ati. Mafer rau sau to anu brok biranya bsya Allah oh meto.
ROM 5:2 Mafer sau naut to, anu smot bo ro Yesus yno tibyo Ait tubat anu. Tubat yse anu hre mam wore wo moof. Tna wore weto to, ja Allah yatmof anu yoyo. Tna mafer sau naut to, mfo refo ja anu simaut mase binaut bwe meen bmat bo yase ro Allah rAit tna bkai bo yase rAit reto baro kʼanu ye.
ROM 5:3 Reto sai fee: Mam wore anu bkai bo ro samyoh matu mai kʼanu to anu simaut mase ye. Anu bhar bwe kbe mafer rau to moof. Anu bhar bwe bo mama matu mai kʼanu weto to mno re anu bmo raa ro btak, raa ro kanyin sai.
ROM 5:4 Anu bito bsom bo ro matu mai kʼanu to, mno re anu raa ro bhaf ntrot renti. Anu bhau bhaf ntrot to, mno re anu raa ro binaut bwe meen bhaf bse bo yase ro Allah siwyan kʼanu.
ROM 5:5 Allah yawe Ait yhafri anu toni. Ait yhafri anu tibyo ysan Har rAit to mjin kʼanu bhaf mato wanu. Tna Har reto mno re anu bhar bwe Allah yhafri anu. Tibyo binaut bwe bo ro Allah yawe siwyan kʼanu reto to, kbe mabo tu oh. Kbe anu hrenaut fee.
ROM 5:6 Tna tiwya Allah ysok oon ro Kristus yama. Oon reto to, Allah ymat yawe anu raa ja hawe bo bri bo ro Ait yawe. Tna ymat yawe anu raa ro saf-safo fee ye. Feto tna Kristus yama ysan Ait kʼraa mame yajat re yno riof kʼanu.
ROM 5:7 ⌞Bo ro Kristus yno reto yuan fee. Awya ro ksoh yiryõ ait? Tnaut tawe raa ro tabam refo sait bo kbe yawe ait yesait raa mame riryõn fee.⌟ Mfi bo raa sait yno safo aro fee, tna raa mawe mame yajat to: Awya ro yawe, “Nme ait retait ma! Nma nme jõ riryõn re riof kʼait!” Ja raa aro mawe bo feto fee. Tna mfi bo ait ro yhaf moof sait tait, tna raa mawe mame ait ro yhaf moof retait yajat to: Kbe fyi? Karik sait roto yawe yasen shauk.
ROM 5:8 Menohe Kristus yno bo reto. Ymat anu wore wo ja bno iro. Tna yama tna ysan Ait raa mame yajat. Reto oh mi anu bhar bwe Allah yhafri anu.
ROM 5:9 Kristus yawe raa mame Ait yajat rof. Ysan Ait yesait mkah bawya? Afo re mfo refo Allah ymat anu yawe mees ro Yesus rAit reto mno anu bfi raa ro mhaf moof ati. Feto to meen ati ro Allah kmo tna ymit safo kʼraa ro tabam refo to, kbe Ait kmo anu fee. Boatmof rAit msai meto! Kbe anu bkai riof. Allah ymat bo ro tiwya Yesus yno kʼanu to. Ymat tibyo kbe Ait ymit safo aro kʼanu fee!
ROM 5:10 Wore wo anu bhoh byoh kʼAllah fares to, Ait ybis Ku rAit yama tna raa mame yajat. Ait yajat re kbe mees rAit misoh iranya ranu bsya Allah. Tnaut tawe Ait yhafri anu toni sai. Tna Yesus yrok yasen tna yhau yaam fares. Feto to thar tawe anu bhau biranya bsya Ait. Meen anu brok bsen ye to. Kbe bkai riof ro mase.
ROM 5:11 Anu bkai riof ro mase ye tna anu safuk bo ro Allah yno kʼanu ye. Bwe, “Yesus KristusTuhan ranu yisoh iranya ranu bsya Allah. Yisoh tibyo mfo refo anu biranya bsya Allah to.”
ROM 5:12 Mfo refo anu biranya bsya Allah. Menohe tiwya tinyi to iro ntwok mamaʼt tabam refo. Twok mam ati ro Adam yno iro ro tinyi. Tibyo iro msair bo raa mhai ye. Tna bo raa mhai to, mamo mbet raa beta. Tibyo raa beta mno iro ye. Tibyo raa beta mhai ye. Tna Adam oh mi yisti.
ROM 5:13 Allah yoo Watum rAit yee kʼMusa fefares to, raa ro tabam refo wase bo miwer Watum reto. Menohe ana ja mno iro soo oh.
ROM 5:14 Maban mam wore Adam yhau mamo snok mam wore Musa yhau to, raa beta mno iro tibyo mhai. (Ebokmi iro ro ana mno to hayah, tna iro ro Adam yno to hayah ye. Adam yiwer watum sau ro tiwya Allah yawe kʼait. Ana roto to wase Watum ro Allah fares. Bo ro ana miwer to, marak fares. Ana mno iro sai.) Adam ro yatim ysya Yesus ro kro mam tis to, mbewok mnan anya baro.
ROM 5:15 Menohe mafer mbam bo ro ana mbewok mno to, hayah toni. Adam tait yno iro tibyo yisti kair kʼraa mawat. Tna Kristus tait yno bo merif mafer ro moof kʼraa mawat. Tiwya raa sait yiwer bo ro Allah ybis. Tibyo yisti raa beta mhai. Tna Raa roto sait yuumto boatmof ro Allah kʼraa mawat. Ait oh mi Yesus Kristus. Bo moof ro Ait yno to mase toni miwrek safo ro Adam yber.
ROM 5:16 Bo ro Adam yno to, misti kair. Reto to mnan anya msya boatmof ro Allah yuumto kʼanu to fee. Adam tait yno iro sau tibyo Allah ytu srah tna ymit safo mana rait reto kʼraa mawat. Mfo refo raa miwer watum ro Allah to mawat. Menohe anu ro smot Yesus to, Allah ymat anu yawe anu bfi raa ro mhaf moof ati. Feto oh mi boatmof ro Yesus yuumto kʼanu reto to, misti bo ro moof kʼanu raa mawat.
ROM 5:17 Raa sait yno iro. Tibyo kbe raa beta mhai. Menohe bouum ro Allah to, mase miwer. Ait yuumto boatmof rAit kʼanu. Yno mkah bo ro Raa sait yno. Ait retait oh mi Yesus Kristus. Ait yno re anu fo, bfi raa ro mhaf moof ati. Tibyo kbe anu bhau broon tna biranya bsya Ait. Tna kbe anu bmo raa ro ati hre su bsya Ait mam yuk rAit ro mase tno.
ROM 5:18 Tiwya Adam yiwer bo ro Allah yawe sau. Bo reto oh misti re Allah ymit safo kʼraa beta. Tna Kristus yno bo ro moof sau tibyo Allah ymat raa beta yawe ana to, mfi raa ro mhaf moof ati. Mafer rau to, kbe raa mhau mroon.
ROM 5:19 Tiwya raa sait hawe bo yari watum ro Allah yawe. Tibyo ait yisti re raa mawat masen mno iro. Feto ye Raa sait yari bo Allah yawe. Tibyo raa mawat kbe mrok mamo raa ro mhaf moof ati.
ROM 5:20 Tna Allah yoo Watum ro Musa yee kʼraa afo re ana miwer bo ro Allah yawe. Raa miwer Watum ro Musa reto mawat. Menohe wore wo raa miwer watum ro Allah mawat to, Allah yuumto boatmof rAit kʼana to mawat miwer.
ROM 5:21 Allah yuumto boatmof rAit msis kʼanu oh. Tinyi rau to, iro make raa matak. Feto tibyo raa beta kbe mhai. Feto ye mfo refo boatmof ro Allah ybo anu matak. Tuhan ranu Yesus Kristus yama yno re anu bhaf moof ati tna kbe meen bhau broon.
ROM 6:1 Feto to fyi? Kbe anu bno iro renti re kbe boatmof ro Allah reto mninon kʼanu u fe mfe a?
ROM 6:2 Mfe saut! Anu to raa ro tiwya smot Kristus oh tibyo anu raa baptis oh. Nnaut oh: Raa baptis anu to, fret bo mawe anu bsya Kristus su to, raa tiwya mame bjat oh. Tiwya tak mkair sau mbo anu misti re anu raa ja bno iro to. Menohe ati ro anu bhai su bsya Kristus to, tak mkair reto mitsre anu tna mbo anu u fee. Reto oh mi anu hawe bo bno iro renti u fee.
ROM 6:4 Raa baptis anu to, fret bo mawe anu bjat, tna anu raa sama bsya Kristus. Raa mame yajat tna Yaja mkah yase rAit, yno re Kristus yrok yasen. Feto ye mkah yase rAit reto yno re anu bmos wanu to mrok maam. Reto oh mi tak mkair reto mbo anu renti u fee. Tibyo anu kro iso ro tna to.
ROM 6:5 Soh anu bsya Ait tiwya bjat oh to, kbe anu brok bsen bsya Ait tu oh.
ROM 6:6 Tiwya tak ro mkair reto mbo anu re anu ja bno iro. Menohe anu bhar bwe, anu bsya Yesus to raa mame afo re tak reto mbo anu u fee. Tibyo anu bmo sryan ro bri tak reto u fee ye.
ROM 6:7 Tna awya ro yajat ysya Kristus to, Allah yawe ait retait yrok yhaf moof ati oh. Tibyo tak mkair reto mbo ait u fee. Tna misti ait yno iro u fee.
ROM 6:8 Soh tiwya anu bhai bsya Kristus to anu bhar bwe meen anu brok bsen bsya Ait fea!
ROM 6:9 Anu bhar bwe Kristus yrok yasen to. Tibyo meen ye yhai u fee. Yesus sbi hri wa hai matak rau reto. Ait yase yiwer. Kbe hai mbo Ait u fee.
ROM 6:10 Ait yajat mun sau aran sai. Yajat to sbi hri wa tak mkair ro ja misti raa mno iro reto. Tna mafer bo ro Kristus yno reto to, meen mhau matak yum oh. Tna Ait yrok yasen to, yhau mkah yno bo ro Allah wAit.
ROM 6:11 Feto to nnaut nwe anu bhai bsya Kristus Yesus oh. Tibyo tak ro mkair reto mbo anu u fee. Menohe anu bnaut anu bwe anu baam bsya Allah su oh mefo. Anu bhau mkah bno bo ro Allah wAit.
ROM 6:12 Feto to anu bhau raa sai mam tabam refo baro fares to, anu beroh bri tak ro mkair reto u ma. Nno wa be nmo sryan ro tak reto tibyo bo ro ja raa msrau oot-oot mno to, kbe anu kro nno ye.
ROM 6:13 Tna anu netsu wanu to, mfi bo sbe ye. Kaket anu nsoh wanu, ntem wanu, nhaf wanu to! Noo anu nsan kʼtak ro mkair reto nmo sbe rau to ma. Kbe tak reto misti re anu nno bo ro mkair-kar. Menohe anu nfi raa ro mhai oh. Tna Allah yno re anu nmos ranu mrok naam u. Feto nsan netsu wanu beta kʼAllah ybo mkah nmo sbe rAit. Feto to kbe Ait ybo anu nno bo ro moof ati to.
ROM 6:14 Watum ro Musa mbo anu u fee. Mfo refo to, boatmof ro Allah mhau mkyar anu. Tibyo kbe anu nmo sryan ro tak mkair reto u fee.
ROM 6:15 Watum ro Musa mbo anu u fee. Tna Allah ymat mees ro Kristus tibyo yatmof anu yoyo. Feto to, mfo refo anu bno iro mbau a? Mfe saut!
ROM 6:16 Anu bhar bwe, soh anu bitsre anu bsan kʼraa roto mbis to, ja anu bmo sryan rait oh meto. Anu fo nmo sryan ro awya rait? Soh nwe nri tak ro misti iro to, kbe anu nhai. Menohe soh nwe nri bo ro Allah yawe to, kbe yawe anu nfi raa ro mhaf moof ati. Nksoh ranu to ryo?
ROM 6:17 Tiwya anu nmo sryan ro tak mkair reto, tibyo nhau nno iro yoyo. Menohe Allah tubat anu. Tna raa wAit merif watum ro ati kʼanu. Tna mfo refo anu nri watum rAit reto tna nbo matak oh. Feto to jõ tayoh asik mase kʼAllah.
ROM 6:18 Allah yno re tak ro mkair reto mbo anu u fee. Mfo refo anu nmo sryan ro Allah rAit. Tibyo anu nno bo ro moof ati.
ROM 6:19 Riwai tkyas raa ro mamo sryan. Anu raa sai. Feto to tkyas bofret reto afo re anu nhar bo ro jõ watum kʼanu to kaket. Nnaut nafos wanu: Awya ro ybo? Tiwya anu ntem, nkit, nsoh wanu bo to mno bo masmamo tna anu niwer watum ro Allah. Reto oh mi anu ksoh nmo sryan ro tak mkair reto. Tna mfo refo jõ tawe kʼanu tawe, “Nno bo ro moof ati mkah anu ntem, nkit, nsoh wanu bo to. Anu nmo sryan ro Allah wAit oh meto. Tna mafer rau to, anu nhau nno ro bo ro Allah wAit yoyo sai.”
ROM 6:20 Wore wo tak ro mkair reto mbo anu fares to, Allah ybo anu re nno bo moof ati to fee.
ROM 6:21 Ati ro anu nnaut bo ro tiwya anu nno weto to, anu saban. Bo ro anu nno wore weto to, mafer rau to bo bawya? Bo weto misti re raa mhai tibyo.
ROM 6:22 Menohe Allah skur anu re tak ro mkair reto mbo anu u fee. Tna mfo refo anu nmo sryan ro Allah wAit oh. Mafer rau to, anu nhau nno ro bo ro Allah wAit yoyo sai. Tibyo meen tis rau to anu nhau hame wajin ye.
ROM 6:23 Soh raa mno iro to, Allah yawe boren ro yaren ana weto to: Ana mhai tibyo. Menohe Allah yatmof anu: Ait yuumto roon ro hame kʼraa ro smot Kristus Yesus, Tuhan ranu.
ROM 7:1 Taja, tme, tao, tano na; anu beta nhar watum ro tabam refo fo fea! Tna wore raa mhau maam fares to mako hawe sai ana mari watum ro tabam refo.
ROM 7:2 Nnaut fai sau msya maa: Watum reto mawe mako hawe sai au mhau msya ait yesait sai mamo snok ati ro ait yhai. Menohe ati ro maa yhai to, watum reto mbo fai au u fee.
ROM 7:3 Mfi bo fai au mamo msya raa roto mam wore maa yhau fares; au mwyahte maa oh meto. Menohe soh maa retait yhai wia oh to, tna au mawe msya raa rouu to au miwer watum fee oh meto. Reto to au mwyahte maa meto fee. Watum reto mawe wa bo ro au mno reto fee.
ROM 7:4 Mfi feto ye, jõ fret bo tkyas anu bsya Watum ro Musa. Tiwya Watum ro Musa mbo anu matak. Menohe ati ro anu bhai bsya Kristus oh to, anu bros hayah bbam Watum ro Musa. Feto afo re anu bmo bsya Raa roto sait. Raa roto retait oh mi Kristus. Ait yrok yasen. Tna anu bmo bsya Ait afo re kbe anu bno bo ro Allah yhaf mnan to.
ROM 7:5 Tiwya, anu fo raa ro hawe bo bri Allah, bwe bhau bno bo ro besait ksoh sai to. Bhaf ranu ksoh mawe bno iro. Bo bawya ro Watum ro Musa mawe wa to, bo weto oh mi anu beroh bno. Feto to Watum ro Musa mno re anu nksoh bno iro renti. Iro to misti hai.
ROM 7:6 Tiwya Watum ro Musa mbo anu matak. Tna anu betsu wanu ro mno iro to mhai. Tibyo Watum reto mbo anu u fee. Anu mbros oh. Mfo refo anu bmo sryan kʼbobot ro tna. Anu bmo sryan ro bri Har ro Tuhan tna bno bo ro Har reto mbis. Bri Bokom ro Musa bbo bno u fee.
ROM 7:7 Anu bnaut bwe Watum ro Musa reto mkair fe mfe a? Mfe. Raa ro kro Watum reto mno iro meto fee. Mafer to Watum reto to, Watum reto mbo kek tna mram thaf mato ajõ tna re jõ thar iro ro jõ tno. Watum reto mkyas mawe, “Naam bo raa ma!” Feto oh mi thar tawe tno bo reto ma. Iro meto.
ROM 7:8 Watum reto mawe, “Naam bo raa ma!” Menohe tak mkair ro ja misti raa mno iro reto to, mno re jõ taam bo raa aro rau-rau. Misti jõ tno iro oh meto. Feto to, Watum ro Musa siwyan iso re tak ro mkair reto misti anu bno iro meto. Soh iso reto siwyan fee, tak mkair reto misti anu bno iro fee ye.
ROM 7:9 Tiwya jõ twase Watum reto fares to, thau tna twase bo tawe jõ fi raa ro tno iro. Menohe jõ tari Watum reto tibyo tasu maah. Tibyo thar tawe jõ fi raa ro tiwer Watum reto. Jõ fret bo tawe, “Ti reto to, iro mrok maam.
ROM 7:10 Iro mrok maam menohe jõ thai.” Tiwya tnaut tawe, “Watum ro Musa reto mno re jõ tkai roon ro hame.” He mfe, Watum ro Musa to misti jõ thai oh.
ROM 7:11 Tak mkair reto moo Watum ro Musa tna miwro jõ. Miwro jõ mawe soh tari Watum ro Musa reto, kbe mno riof kʼjõ. He mfe. Watum reto moo safo mana mmit kʼjõ tna misti re kbe jõ thai. Tibyo jõ fret bo tawe, “Iro msya Watum reto mame jõ tajat.”
ROM 7:12 Feto to Watum reto mesait to moof. Watum reto mbam kʼAllah mama. Tna bombra ro Allah yawe to, watum weto beta bo ro ntrot bau yum tna bo ro moof bau oh.
ROM 7:13 Fyi, bo ro moof reto misti jõ thai a? Mfe saut! Tak mkair ro misti iro oh mi mno jõ thai to. Tak mkair reto moo Watum ro Musa tna mame jõ to. Jõ hawe tari watum ro Allah tibyo jõ beroh tari tak mkair reto tibyo tno iro renti. Feto oh mi anu bhar bwe tak mkair reto to, mkair-kar toni!
ROM 7:14 Watum reto to moof bau. Watum reto to mbam Har ro Tuhan. Menohe jõ fi raa sai tibyo amah mato ajõ to mti sai. Tna tak ro mkair reto moo jõ mbu tamo sryan rau. Tibyo tari tak reto tna tno iro.
ROM 7:15 Fyi re tno bo ro jõ tno fo? Jõ ksoh tawe tno bo ro moof menohe jõ tno fee. Tibyo tno bo ro mkair. Tna bo ro mkair reto to, jõ hawe bo tno ye.
ROM 7:16 Soh jõ tno bo ro mkair, bo ro jõ hawe tno to, jõ sraujin. Reto to merif mawe jõ thar mam thaf ajo tawe Watum ro Musa reto moof. Jõ besboh bo ro Watum reto mkyas to fee.
ROM 7:17 Feto to jõ tesait oh mi tno iro fee. Tak ro mkair reto mjin mam jõ thaf. Tibyo tno iro.
ROM 7:18 Jõ thar tawe jõ fi raa sai. Tna bo ro moof mjin mam thaf ajõ aro fee. Jõ ksoh tno bo ro moof. He mfe, tno bo ro moof to fee.
ROM 7:19 Bo moof ro jõ ksoh tno oh mi jõ tno fee. Menohe bo ro mkair ro jõ hawe tno oh mi jõ tno renti.
ROM 7:20 Soh jõ tno bo ro mkair, bo ro jõ hawe tno to, jõ tesait oh mi tno iro reto fee. Tak ro mkair reto mjin mam jõ thaf. Au oh mi tno iro meto.
ROM 7:21 Jõ tkai bo maja sau oh mefo. Jõ thaf ajõ ksoh mawe tno bo ro moof. Menohe tno bo ro mkair fares.
ROM 7:22 Mam thaf mato jõ hasu watum ro Allah toni tawe ksoh tbo tno.
ROM 7:23 Menohe tetsu ajõ ja mawe mno bo ro mkair fares. Feto to tak ro mkair reto tna thaf ajõ to, mbewok sarok anya. Tna tak ro mkair reto to, make jõ matak toni.
ROM 7:24 Tibyo jõ kmo jõ ai tna sraujin toni. Bo ro mbtek mai kʼjõ tasom to, samyoh toni fo! Kbe awya yama tna skur tak mkair ro make jõ reto re kbe riof kʼjõ?
ROM 7:25 Yesus KristusTuhan ranu oh mi Raa ro meen skur jõ. Tibyo jõ tayoh asik mase kʼAllah.
ROM 7:26 Feto to mam thaf mato ajõ to, tamo sryan rAit. Tawe ksoh tari watum ro Allah tbo tno. Ebokmi wore tetsu ajõ refo mhau fares to, kbe tak mkair reto mbo jõ tetsu fares ye.
ROM 8:1 Feto to mfo refo anu bhai su bsya Kristus Yesus oh. Tibyo Allah kbe yno safo mana ymit kʼanu aro fee.
ROM 8:2 Tiwya tak ro mkair reto make anu misti anu ja bno iro. Tibyo meen bhai. Menohe mfo refo anu bhai su bsya Kristus Yesus oh. Tibyo Har ro Tuhan mno re tak ro mkair reto make anu matak u fee. Har ro Tuhan mno re anu bmo mam iso ro moof. Meen anu bhai fee, bhau hame wajin.
ROM 8:3 Anu raa sai. Feto to bhaf wanu beta tiwya mkair. Tna Watum ro Musa matak mno anu boof fee. Matak misoh iranya ranu bsya Allah fee ye. Feto to Allah yesait yisoh yiranya ysya anu. Ybis Ku rAit haberek yamo raa sai yfi raa makin ro ja mno iro. Tna yroh yama tabam refo. Yama yake iro wanu, raa ro bno iro. Yake mkah yetsu rAit. Allah yno safo mana wanu ymit kʼYesus oh meto.
ROM 8:4 Tna Yesus yroh afo re Ait kro Watum ro Musa mnan si ye. Yno feto afo re bombra ro Watum reto msi kʼanu bno to, Ait yno beta oh kʼanu. Mfo refo anu raa ro ja bri bo Har ro Tuhan mbis bno. Tna anu bri tak ro mkair reto u fee. Tna anu bhau bno bo ro tabam sai u fee ye.
ROM 8:5 Raa ro tabam refo to, ja ana makit wana mnaut bo ro tabam refo sai. Menohe raa ro Har ro Tuhan mbo to, ja ana makit wana mnaut bo ro Har reto ksoh.
ROM 8:6 Tna raa ro makit wana to, ja mnaut bo ro tabam refo sai to, ana weto meen mhai tna mkai kair. Menohe raa ro makit wana to, ja Har ro Tuhan mbo matak to, kbe ana mhaf tnok tna meen mhau hame wajin ye.
ROM 8:7 Tna ana ro ja mnaut bo tabam refo to ana mhoh byoh kʼAllah. Tna ana weto mtai kro Watum rAit fee tibyo ana hawe bo mari Watum rAit ye.
ROM 8:8 Feto oh mi raa ro tabam refo to mtai mno Allah yhaf mnan fee.
ROM 8:9 Menohe soh Har ro Tuhan mhau msya anu to, Har rAit mbo anu ye. Anu fo raa ro tabam sai fee. Soh Har ro Kristus mhau msya raa to fee, ana weto to raa ro Kristus wAit fee ye.
ROM 8:10 Iro misti re raa beta metsu wana to, kbe mhai. Menohe soh Har ro Kristus mhau mam anu nhaf mato to, kbe netsu sai aran mhai. Allah ymat mees ro Kristus tibyo yawe anu to nfi raa ro mhaf moof ati. Tibyo Har rAit meen mno anu naam mamo snok hame wajin.
ROM 8:11 Allah yno re Yesus yrok yasen. Tna soh Har rAit mhau msya anu to, kbe bi Ait yno anu netsu wanu ro mhai to, mrok masen ye. Allah ro yno re Kristus yrok yasen to, kbe yno re anu nrok nsen ye. Yno feto mkah Har rAit ro mhau msya anu to.
ROM 8:12 Tao na wojõ: Riwai tkyas tawe, “Tiwya tak ro mkair reto mbo anu misti re anu nno bo ro tabam sai. Menohe mfo refo anu nmo sryan ro tak reto u fee.”
ROM 8:13 Awya ro ja yno bo ro tabam sai to meen yhai tibyo. Menohe soh anu bitsre bo knik-knak ro mkair-kar to, beak fari mkah tak Har ro Tuhan to, kbe meen anu nhau hame wajin.
ROM 8:14 Awya sai ro yari bo ro Har rAit mkyas tna ybo yno to ait oh mi ku ro Allah rAit.
ROM 8:15 Allah yayõ anu ytos. Tibyo anu btu Ait bwe, “Abba, Bja!” Mfo refo anu ksoh bmo bo kʼAllah mfi ku sait ja ksoh yamo yo kʼyaja. Har rAit mno re anu to waa bo nmo no kʼAit to fee. Tiwya anu bmo sryan ro tak mkair reto mbo. Tibyo anu waa bo meen bhai tibyo. Menohe mfo refo anu waa u fee.
ROM 8:16 Anu bhaf wanu mhar mawe anu fo ku ro Allah wAit oh. Tna Har rAit mkyas mnan anya ye mawe kʼanu mawe anu ku ro Allah wAit tu oh.
ROM 8:17 Soh anu bmo ku ro Allah wAit to, kbe anu bhaf bse bo yase rAit ye. Bo yase reto kbe Ait ysan Kristus tna ysan kʼanu ye. Tna bo ro samyoh mai kʼanu ye mnan anya msya bo ro samyoh ro tiwya mai Kristus to ye. Anu bsom bo ro samyoh feto tibyo kbe anu bkai bo yase rAit reto ye.
ROM 8:18 Tna jõ tnaut tawe bo samyoh ro matu mai kʼanu weto to bo maku sai. Menohe bo yase ro Allah rAit to, ro kbe anu fri to, bo msai toni.
ROM 8:19 Bombra beta ro Allah yfen mam tabam refo to, mhau sraujin mawe tija fooh Allah yasbrah ku wAit yoo bo yase rAit yse kʼana baro.
ROM 8:20 Tiwya tinyi to, Allah sikowah-kawah bombra ro Ait yfen beta. Kak msya, safom, ora, syoh bo to, Ait yno bo mbtek mai bo weto beta. Tibyo bo weto taro kbe mhai, taro to kbe rabo, tna taro to kbe mnis-nas feto ye. Tna mfi bo bombra beta weto mkyas bo to, kbe ana mawe kʼanu mawe ana hawe bo ro Allah yno btek sikowah-kawah ana reto. Menohe Allah yno oh mamyot ksoh rAit sai. Tna mfo refo to, bombra weto beta ste minaut mawe meen Allah yitsre bo weto mbam bo ro btek mai reto ye. Tibyo bo weto mbros tna msya ku ro Allah wAit su to, kbe mkai bo yase ro Allah ye.
ROM 8:22 Anu bhar bwe bombra beta ro Allah yfen to ste wea. Bo weto mwof ti ro ana mbros mbam bo ro make ana. Tiwya tinyi mamo snok mfo refo to, bombra weto to, sraujin tna mkai bo fares. Reto mfi fnya ja mari kborham wia tna mawe fooh re mabe ku to!
ROM 8:23 Bo weto mesait aran sai mawe fooh to fee. Anu beta bwe fooh re Allah yoo bo weto ysan kʼanu ye. Allah yoo Har rAit yse kʼanu oh. Yse kʼanu matim wia afo re anu bhar bo yase ro Allah kebet wia matim. Tibyo anu ste ati ro Ait yoo bo yase rAit ro msis yuur beta. Feto tibyo anu bwia mam anu bhaf mato tna srau kero bwe fooh re anu, ku ro Allah yayõ to, bmo bhau bsya Ait tna kbe bkai betsu wanu ro moof.
ROM 8:24 Mbam ati ro tiwya anu smot Kristus tibyo bkai riof rAit oh to, mamo snok mfo refo to anu ste binaut bwe meen anu bkai bombra ro Ait siwyan kʼanu. (Mfi raa mkai bo ro ana nksoh oh to, kbe ana beroh minaut bo reto aro u fee.)
ROM 8:25 Menohe anu bkai bo weto fefares. Feto to mfo refo anu beroh bsom bo ro samyoh tna ste binaut bombra ro meen Allah siwyan kʼanu meto.
ROM 8:26 Wore arin mkair tibyo bmos wanu ssafo fee to, rau ro moof anu binaut bo ro meen Allah siwyan kʼanu meto. Wore weto to, anu wase skabuk bkyas bo bawya kʼAllah. Menohe Har rAit mhar bonaut wanu oh. Tibyo Har mesait skabuk anu kʼAllah kaket miwrek ja anu raa btai skabuk to.
ROM 8:27 Allah ja ymat sas anu bhaf, srau mato wanu to. Tna yhar bo ro Har rAit soh-soh mawe to ye. Feto to anu, raa ro Allah wAit to, Har rAit ja skabuk anu mamyot bo ro Allah yhaf ksoh yno kʼanu ye.
ROM 8:28 Anu bhar bwe: Awya ro yhafri Allah tna Allah ysok ait yamo raa wAit oh to, Allah ysaim bo bawya ro kbe mama mo kʼraa retait ye. Bo ro moof ye tna bo ro matu mai kʼait ye. Allah ysaim bo weto kaket re kbe makit rau to moof kʼraa retait.
ROM 8:29 Tabam refo Allah ysair fefares to, Ait ysok raa ro kbe yatmof. Ysok ana feto yawe ana weto oh mi meen mamo mnan fi Ku rAit, Yesus. Allah yawe Ku bum rAit yatim wia. Tna raa rouu mawat mamo ku ro Allah wAit ye. Meen mamo mrof mhau msya Ait mnan fi raa mana sau su.
ROM 8:30 Tna raa ro Allah ysok weto oh mi Ait ytu mama mo kʼAit. Tna ana weto oh mi Ait ymat mees ro Yesus yawe ana mfi raa ro mhaf moof ati. Tna ana weto oh mi meen mkai bo yase rAit ro mninon.
ROM 8:31 Allah yno bo ro moof kʼanu mninon. Feto to anu bhar bwe Allah yros tis yban anu meto. Feto to kbe awya yatak yiwer anu?
ROM 8:32 Allah yhaf mabe Ku rAit to fee. Ysan Ait yroh yama yajat mkah yfes anu beta. Feto to anu bhar bwe Ait yatmof anu. Kbe anu bhau to bo mabut fee. Tibyo meen ysan bonaut rouu beta kʼanu ye tu oh.
ROM 8:33 Tna Allah oh mi ymat mees ro Yesus yawe anu bfi raa ro mhaf moof ati. Feto to awya ro yaun boun kʼanu raa ro Allah ysok oh to? Kbe ait retait yatak fee.
ROM 8:34 Anu oh mi bno iro. Menohe Kristus Yesus yesait raa mame yajat. Ait yoo yetsu rait yake iro wanu beta. Tna fo Ait yrok yasen ye. Yrok yasen tna yaut yamo hre ysya Allah mam sawro rAit. Hre ysya Allah mam hroh ro tem ati; hroh ro mase reto. Yesus yhau mam tno yban anu. Feto to awya ro ymit safo kʼanu to, yatak fee.
ROM 8:35 Bo bawya kbe mno wa hafri ro Kristus kʼanu to? Kbe Ait yhafri anu yum! Kbe bo mama mai kʼanu taro, menohe Kristus yhafri anu to fares. Mfi bo make anu oo, bo mno yoot anu oo, haisre mama mai kʼanu oo, ratan ro byum marak oo, safo mama mai kʼanu oo, raa mame anya bo to, kbe Kristus tait yhafri anu fares.
ROM 8:36 Tiwya raa skabuk Allah mam Bokom rAit mawe fefo: “Amu kro Nyõ oh mi raa taro kmo amu yoyo, mawe mame amu njat. Amu fo nnan anya sai nnan domba ro ja raa ktan.”
ROM 8:37 Bo bawya ro mai kʼanu to bnaut yyi ma. Bhar bwe Kristus yhafri anu fares. Tna Kristus yatak rAit mno re tis rau to anu bros btak abyõ.
ROM 8:38 Reto oh mi jõ thar tawe bo aro matak re mno Allah yitsre anu to fee. Mfi bo anu bhai oo, bhau baam bo to, kbe Ait yitsre anu fee. Malaikat oo, kabes bo to matak fee. Bombra ro mama mai kʼanu mkah ayõ ro ifo tna ayõ ro meen mama wono beta to, kbe mno re Ait yitsre anu fee. Bo ro matak toni mam tabam refo aro kbe mno anu to, Ait yitsre anu fee ye.
ROM 8:39 Bo ro mhau mam uu matak re mno Ait yitsre anu fee. Bo ro mhau mam tite to, matak fee ye. Bo ro Allah yfen beta to aro matak miwer Ait fee ye. Allah yhafri anu yum. Kristus Yesus fi Tuhan ranu. Anu bmat bo ro Kristus yno tibyo bhar bwe Allah yhafri anu toni syok.
ROM 9:1 Taja, tme, tao, tano na; bo ro jõ, Paulus, tkyas kʼanu fo jõ sioh fee. Kristus ysya Har ro Allah to mhar mawe jõ tkyas bo refo mkah thaf ro moof. Bo tkyas to mabo yum.
ROM 9:2 Jõ tnaut raa ro Israel, raa mana wojõ to, jõ sraujin toni yoyo. Jõ tawe soh Allah ksoh mi yno ayoh mroh kʼjõ rof re jõ tkai kair tna ana weto mkai riof to jõ ksoh. He mfe.
ROM 9:4 Tiwya Allah ysok ana, raa mana ro Israel to, yse hayah tna yno bo moof kʼana ye. Ait yayõ ana re ana mamo ku wAit. Ait yerif bo yase rAit kʼana. Ait ysi bo kʼana. Ait yoo Watum ro Musa yee kʼana. Ait yerif iso re ana skabuk Ait mam Samu rAit ro mbau. Tna Ait yawe kbe yno bo ro moof kʼana ye.
ROM 9:5 Raa ro Israel, hohos wana to, raa ro masom. Tna Mesias tait raa ro Israel ye. Yme msya bi ro tiwya ytos Ait to, wore wo Kristus yamaʼt tabam refo: Ana weto to raa ro Israel ye. Kristus tait Allah ro ybo bombra beta. Tna kbe raa mbaut bi Ait mamo snok mam meen hame wajin. Amin: Mabo oh!
ROM 9:6 Feto to tiwya Allah yawe yno bo ro moof kʼraa ro Israel. Yatem roro re yno fe mfe a? Yatem roro fee! Menohe raa mana ro Israel beta mamo raa ro Allah wAit ro wotur fee. Allah ysok raa to, ymat raa mana sai aran fee. Ana ro Ait ysok oh mi mamo raa wAit to.
ROM 9:7 Nmat kube ro Abraham yabe: Ana beta to Allah ytu yawe ‘Abraham yare na ro wotur fee’. Allah yawe kʼAbraham yawe, “Kbe jõ tmat kube wonyõ ro Ishak yabe, ana mesait aran oh mi ttu ku woJõ.”
ROM 9:8 Au oh mi ku ro Abraham wAit beta mamo ku ro Allah fee. Tiwya Allah ysi bo kʼAbraham yawe meen ait yabe ku sait. Ku ro tii ysi retait tait oh mi ku ro krek waan ro yaja. Yao ro yabi fee. Feto ye mfo wefo to raa ro tii Allah ysi weto oh mi Ait ytu yawe ku wAit.
ROM 9:9 Tiwya Allah ysi bo kʼAbraham yawe, “Tahun rouu Jõ thah te tama to kʼnyõ. Kbe tama tmat ku mees sait. Ku ait ro nyõ nsya Sara nbe oh.”
ROM 9:10 Nmat kukek ro Ishak yabe ye: Ishak tait anu hohos ranu ye. Ait yoo Ribka tna au mhaf. Tna mabe ku mabo ewok mam ayõ sau reto ye.
ROM 9:11 Fai au mabe ku weto fefares tna Allah yawe kʼau yawe, “Ku ro nabe ytek yatim to, kbe yamo sryan ro yari bo kʼait ro ytek tis yrof.” Kejadian 25:23 Ku mabo ewok reto au mabe fefares. Ana mno bo ro moof aro fefares tna bo ro mkair aro fefares ye. Menohe Allah ysok ku sait. Ysok Yakub to ku retait ja yno bo moof fe mfe a? Mfe. Allah ysok Yakub fyi? Ysok Yakub mamyot si bonaut rAit sai. Allah yhar bo rAit oh.
ROM 9:13 Reto oh mi Allah ykyas mam bokom rAit yawe, “Jõ tatmof Yakub tna Jõ knait Esau.”
ROM 9:14 Feto ye, tiwya Allah yawe kʼMusa yawe, “Jõ tsok raa taro tawe tatmof ana. Soh tawe tsok raa weto tno bo ro moof kʼana to, kbe tno sai.” Keluaran 33:19 Feto to anu bkyas bwe Allah yno bo ro mkair fe mfe a? Allah yno bo ro mkair fee saut!
ROM 9:16 Allah ksoh ysok raa ro kbe mamo ku wAit to, ysok ana mamyot bo ro ana mno to fee. Ana hamer mamo raa wAit oh mi Ait ysok ana fee ye. Allah ysok tna yatmof raa mamyot Ait ksoh rAit sai.
ROM 9:17 Bokom ro Allah mawe, “Tiwya Allah yawe kʼraja ro Mesir yawe, ‘Jõ tno re nyõ namo aban mana nbo raa ro Mesir beta. Tna Jõ tisti bo msai mbtek mai kʼnyõ. Jõ tno feto oh mi kbe raa beta mmat tna mhar tatak aJõ. Mhar mawe Jõ fi raa ro tase tbo raja ye tna tbo raa beta ye. Tibyo kbe raa mamo mkyas Jõ tasom aJõ kʼraa ro tabam refo beta.’”
ROM 9:18 Feto to anu bhar bwe Allah ysok raa taro yawe Ait yatmof ana. Tna taro ysok to, yno re ana mimara mtuk mnan fi raja ro Mesir retait.
ROM 9:19 Menohe anu sait santri bo ysya jõ yawe feto rauk, yawe: “Aha! Soh Allah ksoh rAit sai yno raa taro mimara mtuk to, tibyo mako hawe sai bo ro Allah yawe to mabo tu. Tis rau Ait ymit safo mana kʼraa weto yno fyi?”
ROM 9:20 Nkyas bo feto to ma! Anu raa tuu ro tabam refo sai. Anu to raa ro Allah yfen. Bofen ro ait sait yfen to ja masen hafrah bo si kʼait ro yfen bo reto to fee. Nno be bo ro yfen reto mhafrah mawe, “Nyõ nfen jõ mfi fefo fyi?”
ROM 9:21 Nnaut raa ro ja mabah koh tna mfen mangkuk bo (tukang periuk). Mfi bo raa sait yamo yabah koh baro. Yoo tna yihabah yse mam kbair ewok. Tna kbair ro sau to, yoo yfen bo ro moof. Tna kbair ro ewok to, ait yoo yfen bo ro mkair-kar sai. Yfen bo mamyot bawya ro ait ksoh sai mam yhaf mato rait.
ROM 9:22 Feto ye Allah oh mi yfen anu raa. Ait yfen raa taro to, yawe Ait kmo ana. Yhar yawe meen yno bo ro msai mbtek mai kʼana yum. Ait yase yno bo kʼraa mamyot Ait ksoh rAit sai. Menohe Ait yhau kanyin toni wia sai.
ROM 9:23 Ait kanyin wia afo re kbe raa taro mmat bo yase rAit. Mmat bo yase rAit ro miwer toni. Raa beta to, mkbair ewok. Ait ysok mkbair sau to yawe yatmof ana. Yatmof ana tibyo mkai riof ro mase. Mkbair ro mkai riof reto to, mhar mawe mkbair jaro mkai bo ro mkair-kar. Tibyo mkbair ro mkai riof mrok mhar mawe bo yase ro Allah to mase toni syok.
ROM 9:24 Tna anu oh mi mkbair ro Allah yatmof reto. Ait ytu anu bbam raa mana ro Yahudi taro ye tna anu bbam raa mana roto taro ye. Yawe anu beta kbe bmat bo yase rAit.
ROM 9:25 Tiwya Allah ykyas bo reto mam bokom ro nabi Hosea yawe, “Raa ro tiwya raa woJõ to fee, meen jõ ttu ana re kbe ana mama mo kʼJõ tna mamo raa woJõ ye. Tna raa ro tiwya jõ thafri fee, meen jõ thafri ana ye.”
ROM 9:26 “Tiwya Allah yawe kʼraa ro mhau mam rabin sau to yawe, ‘Anu to raa mana woJõ to fee!’ Menohe meen kbe Ait yawe kʼraa weto yawe, ‘Jõ fi Allah ro yaam. Tawe kʼanu tawe, “Mfo wefo anu nmo raa mana woJõ.”’”
ROM 9:27 Tna nabi Yesaya ykyas raa ro Israel yawe, “Ku be ro bi Israel to, msis bia mfi snyik makan ro ftau mboh mam sawan maam. Menohe ana kebet aran sai kbe mkai riof.
ROM 9:28 Kbe Allah ymit safo kʼraa ro tabam refo. Yno bo mbtek mai kʼana mnan si. Yno bo mbtek mai kʼana abut sai. Tibyo kube ro bi Israel kebet aran sai kbe mkai riof.”
ROM 9:29 Nabi Yesaya yawe tinyi yawe kbe Allah yatmof raa ro Israel baro, yawe, “Allah tait yase ybo bombra beta. Oos Ait maami yno raa wanu baro bhau, maami anu beta safe mkak bnan fi raa ro Sodom msya Gomora bo oh.”
ROM 9:30 Feto to, anu bhar bwe fefo, “Raa ro wase agama Yahudi to, tiwya ana saso iso re mamo mhaf moof to fee. Ana saso fee, menohe ana smot Kristus tna mkai mhaf ro moof mam iso reto: Allah ymat mees ro Yesus tibyo yawe ana mfi raa ro mhaf moof ati meto.
ROM 9:31 Tna raa ro Israel tomer kro Watum ro Musa re kbe Allah ymat ana yawe ana raa ro mhaf moof. Menohe mfe. Ana mkai fee. Allah ymat ana yawe ana mhaf moof to fee ye.”
ROM 9:32 Fyi re ana weto mamo mhaf moof to fee? Ana mamo iso ro sre: Ja ana mnaut mawe ana kro Watum ro Musa kaket tibyo mkai riof. He mfe. Iso ro raa smot Kristus to, ana hawe bo kro. Raa fret bo mawe fraa sau burut wa iso ro ana mamo. Tibyo ana wasim tna mbtek mawe.
ROM 9:33 Tna bo reto to, mabo oh mnan si tiwya Bokom ro Allah mkyas matim wia: “Jõ too fraa sau tse mam Sion. Fraa reto mburut iso wa. Tna raa ro Yahudi wasim fraa reto tibyo mbtek mawe. Menohe raa ro smot ‘Fraa’ reto to, meen manwaruk fee.”
ROM 10:1 Taja, tme, tao, tano na; jõ tnaut raa ro Israel to, srau hri. Tna jõ skabuk soh-soh Allah tawe yoo riof yee kʼana ye.
ROM 10:2 Jõ thar tawe ana safo triar mno bo ro ana mnaut mawe Allah ksoh. Menohe ana wase bo ro Allah ksoh.
ROM 10:3 Allah yno iso re kbe Ait yawe raa mamo mhaf moof. Menohe raa wase iso rAit reto. Tna ana siko mamo mhaf moof mkah mamo mam iso rana mesait, iso roto. Tibyo ana hawe bo mamo mam iso ro Allah yerif kʼana re mamo mhaf moof.
ROM 10:4 Ana ro Israel weto siko kro Watum ro Musa mawe kbe ana mesait misoh mhaf wana. Menohe anu fo smot Kristus. Reto oh mi Allah ymat mees ro Yesus tibyo yawe anu fo, bfi raa ro mhaf moof ati oh. Tibyo awya sai ro smot Kristus sai to, kro Watum ro Musa u fee.
ROM 10:5 Tiwya Musa ykom yawe, “Awya ro ksoh yhaf moof mkah bo kro Watum ro Musa to, yako hawe sai kbe yari tna kro Watum ro Musa reto beta, ybo yno mnan si.”
ROM 10:6 Menohe mfo refo anu smot Kristus tibyo Allah ymat anu yawe anu fo raa ro bhaf moof mnan si oh meto. Kbe anu bno bawya naut u? Anu fo raa tu ro tabam refo sai. Mfi bo tiwya watum ro Allah mawe, anu sait ytai yamoʼt sawro ro Allah tna saso Kristus fee. Tna ybis Ait yroh yamaʼt tabam refo fee ye. Raa sait aro ytai yno feto fee.
ROM 10:7 Tna anu sait ytai yroh yamoʼt sawro ro hai mam ti no tna saso Kristus re tubat Ait to fee ye. Raa sait aro ytai yno feto fee.
ROM 10:8 Bokom ro Allah mawe, “Bokyas ro Allah reto mhau nkene sai. Tna bokyas reto anu nkyas ye tna anu nhar mam nhaf mato wanu ye.” Tna bokyas reto amu nbo nkyas ye nwe kbe raa smot Yesus.
ROM 10:9 Au oh mi awya sai ro hrenaut fee, menohe ykyas abyõ kʼraa yawe, “Yesus tait yamo Tuhan ro ybo jõ.” Tna soh ait yhar mam yhaf mato yawe, Yesus yajat tna Allah yno Ait yrok yasen; kbe meen ait retait ykai riof.
ROM 10:10 Jõ tkyas u tawe soh raa sait ksoh yawe Allah ymat ait yfi raa ro mhaf moof to, kbe ait yno bo bawya? Soh ait smot Yesus mam yhaf mato rait to, kbe Allah yawe ait yfi raa ro mhaf moof. Tna soh ykyas abyõ yawe, “Yesus yamo Tuhan ro ybo jõ.” ykyas mam wore raa mros mmat to, kbe meen ait ykai riof.
ROM 10:11 Bokom ro Allah mkyas reto ye mawe, “Awya sai ro smot Ait to, meen yanwaruk fee.”
ROM 10:12 Allah ymat raa to, raa ro Yahudi ye msya raa mana roto makin ye. Ymat ana yawe ana mnan anya beta sai. Raa sait hayah fee. Raa mkbair ewok weto ye mamo mo kʼAllah mam iso sau reto. Tna Yesus yamo Tuhan ybo ana mkbair ewok weto ye. Ro mayoh kʼAit to, kbe bi Ait yno bo moof msis soh kʼana beta.
ROM 10:13 Bokom ro Allah mawe, “Awya sai ro yamo yo kʼTuhan Allah tna ytu yawe ‘Tuhan noo riof nee kʼjõ ye!’ to, kbe meen ait ykai riof.”
ROM 10:14 Menohe raa ro smot Ait fefares to, kbe mayoh bo kʼAit fyi? Tna soh ana wase Ait yasom fefares to, fyi re kbe ana smot Ait? Tna soh raa mamo mkyas Yesus yasom kʼana fefares to, fyi re kbe ana mhar Ait yasom?
ROM 10:15 Tna soh Allah ybis sryan aro mamo fefares to, fyi re sryan mamo mkyas Yesus yasom kʼana? Bokom ro Allah mawe, “Raa ro makah Bokyas Moof mama mkyas to mno bo moof toni.”
ROM 10:16 Menohe tiwya Allah ybis raa mamo mo kʼraa ro Israel. Tna raa weto mkyas Bokyas ro Moof kʼana oh. Raa mamo mkyas oh menohe raa ro Israel msis hawe bo smot. Tiwya Nabi Yesaya ykyas bo refo yawe, “Tuhan; awya oh mi yari tibyo ybo yno bo ro amu nkyas to?”
ROM 10:17 Feto to anu bhar bwe, “Ja raa mari Bokyas ro Moof (Injil) reto to wia matim. Mari Bokyas Moof ro Kristus reto tna fo ana mhaf mse Bokyas reto tibyo smot Kristus.”
ROM 10:18 Raa ro Israel weto to mari Bokyas reto oh fe mfe a? Mari oh! Bokom ro Allah mawe, “Bokyas rana reto to, raa mkyas mamo snok mam tabam refo beta oh. Mamo snok mam arin aso beta oh.”
ROM 10:19 Fyi, raa ro Israel srau mnaut bo ro ana mari reto to, kaket fe mfe a? Mhar oh. Allah yawe kʼMusa yawe, “Kbe Jõ tno bo moof kʼraa roto taro. Raa weto tiwya Jõ tsok fee. Tibyo anu, raa woJõ to, kbe nmat tibyo nrok kmo. Kbe jõ tatmof raa mana ro wase Jõ. Feto oh mi tno anu fo nrok kmo.”
ROM 10:20 Feto ye, Allah ybis Yesaya ykom bo ro mai kʼraa ro Israel sau. Tibyo Yesaya waa fee. Tna ykom bo ro Allah ykyas raa ro mne weto yawe, “Raa ro Yahudi fee ja ana saso Jõ fee. Menohe ana mkai Jõ oh. Ana mayoh bo kʼJõ fee. Menohe Jõ terif Jõ kʼana tibyo ana mhar Jõ.”
ROM 10:21 Menohe ykyas raa ro Israel yawe, “Jõ ttu ana mama mo kʼJõ. Tiwya ttu ooh oh. Menohe ana hawe. Ana to mana mase. Ana raa ro mari bo meto fee.”
ROM 11:1 Feto to fyi? Tiwya Allah yawe suku Israel to raa wAit. Karik Allah yikyak ana fe mfe a? Mfe saut. Nnaut oh: Jõ fi raa ro suku Israel ye. Bi Abraham tait hohos ajõ. Tna jõ tbam ku mbair ro bi Benyamin.
ROM 11:2 Allah yikyak raa wAit ro tiwya Ait ysok to fee! Nnaut bokom Allah ro mkyas nabi Elia to. Mkyas mawe nabi Elia ati ro ait skabuk. Tiwya ait skabuk yaun raa ro Israel yawe,
ROM 11:3 “Tuhan; raa ro Israel to mame nabi woNyõ oh. Ana mirarin wohat woNyõ oh. Wohat ro raa sgi mkah moo bo mko muum kʼNyõ. Jõ tesait aran thau smot Nyõ fares. Tna mfo refo ana saim mawe mame jõ ye fo.”
ROM 11:4 Tna Allah yawe si yawe, “Nyõ nesait kar fee. Jõ tehau raa ro Israel to, mabo 7000 to, smot Jõ fares ye. Tna kabes sau ro masom Baal to, ana mabo 7000 weto smot fee.”
ROM 11:5 Mfo refo to mnan feto ye. Raa ro Israel msis hawe bo smot Allah. Menohe ana, raa ro Israel kebet baro to, Allah ysok tibyo yatmof ana fares.
ROM 11:6 Ait yatmof ana weto fares. Tibyo ysok ana re ysan riof kʼana. Riof reto Ait ysan kʼraa mamyot bo ro moof ja ana mno to fee. Ait yatmof ana sai meto. Soh Ait ymat bo moof ro ja ana mno to, kbe bwe riof to boren ro Ait yaren raa. He mfe.
ROM 11:7 Feto to fyi? Raa ro Israel msis mkai bo ro ana saso reto to fee. Kebet aran mkai riof sai: Ana ro Allah ysok sai aran mkai riof reto. Tna raa ro Israel msis weto to, Allah yno re ana mrok mana mase tibyo hawe bo mari Watum rAit.
ROM 11:8 Bokom ro Allah mkyas bo reto ye. Mawe, “Allah yno re ana mhaf mti. Tibyo ana masu mmat bo fee. Tna ana mimara wana mari bo ro Allah yawe to fee. Tna raa ro Israel mhau feto mamo snok mfo refo ye.”
ROM 11:9 Tna Raja Daud yawe, “Allah, ska bo kʼana weto: Mam wore raa weto makyõ bokyõ to, nabah kayah tna saro ana re kbe ana mbtek mam kayah reto. Tna sna ana mam wore ana simaut mase.
ROM 11:10 Nno re ana masu mti rof re kbe mhar bo toni ma. Nno re ana masom bo fanes tibyo.”
ROM 11:11 Feto to fyi? Raa mana ro Yahudi, Israel to, ana hawe bo smot Yesus. Tibyo Allah beak ana makus. Reto mfi bo ana wasim fraa, tibyo mbtek mawe. Anu nnaut fyi? Allah ymat iro ro ana mno tibyo beak ana mhau makus tibyo fe mfe a? Mfe saut. Ait yawe yno feto afo re riof ro Ait siwyan kʼraa ro Yahudi to, raa ro mbam raa mana roto makin mkai riryõn. Ana weto masen mamo mo kʼAllah. Tibyo meen raa mana ro Yahudi mmat tibyo mhaf sarok tna mashana ye. Raa mana ro Yahudi mashana tibyo meen mesait saso riof ro Allah rAit ye.
ROM 11:12 Raa mana ro Israel miwer bo ro Allah yawe kʼana. Menohe mafer rau to, raa mana roto fri. Raa mana roto weto mkai riof. Tna soh raa mana ro Israel kbe misoh iranya rana msya Allah to, moof ati. Kbe mafer rau to, moof miwer.
ROM 11:13 Anu to, nbam raa mana roto. Tna jõ fi, raa ro Allah ybis tama to kʼraa mbam raa mana roto makin. Tamo to kʼraa mana ro Yahudi fee. Tna bo ro jõ tasom refo fo, jõ tbo akah-akah sai. Tna re tkyas bo baro kʼanu mefo:
ROM 11:14 Raa mana ro Yahudi to raa mana ajõ. Menohe jõ tama to kʼanu ro nbam raa mana roto wefo. Jõ tinaut tawe kbe raa ro Yahudi weto mmat he anu nkai riof. Tna ana mesait mnaut mamos wana. Tna kbe ana maam bo riof ro moof reto. Feto kbe ana taro nksoh saso riof ro Allah reto ye.
ROM 11:15 Allah yikyak raa mana ro Israel. Bo ro yno reto misti re ytu raa mbam raa mana roto makin mama mo kʼAit. Tna yisoh iranya wana msya Ait ye. Bo ro Allah yno reto samyoh kʼraa mana ro Israel. Menohe misti mafer ro moof kʼraa mana roto makin. Tna soh raa mana ro Israel kbe haberek mawe Allah yisoh iranya wana msya Ait ye to, fyi? Moof toni! Yoo raa mana ro Israel me mamo raa wAit u. Tna meen, ati ro oon sboh to, kbe Allah tubat raa wAit ro mhai beta mrok masen.
ROM 11:16 Raa mana ro Israel ja mno roti to, ana moo baro msan kʼAllah wia. Mawe roti bi Allah rAit. Soh ana mse roti baro hayah mkah Allah to, Ait yawe yno re roti ro mhau fares to, ja ana mait oh mi roti ro moof ye. Tna “Mfi bo ara mair to moof, kbe ara ngkre rau to, moof ye.”
ROM 11:17 Jõ fret bo tawe raa ro Israel beta to mfi ara zaitun ro moof sau. Tna bi Abraham ysya kube wait ro tiwya tinyi smot Allah to mfi bo mtis ro ara reto. Tna ngkre to, mfi bo raa. Menohe mfo refo kube ro Abraham mawat renti (au oh mi raa mana ro Israel) to, hawe bo smot Kristus. Tibyo Allah yoo ana beak fari mfi bo raa beska ara ngkre tna mbeak ye. Tna raa mana roto makin to mfi bo ara zaitun roto sau. Tna ara reto to mkair, mesait mo mam safom sai. Tiwya anu ro nbam raa mana roto to nfi bo ngkre sau mam ara ro mkair reto. Tna anu baro smot Kristus. Tibyo yoo anu tna yake nrat nsya raa wAit ro mbam raa mana ro Israel ye. Raa mana ro Israel weto to, ku wAit ro wotur. Tibyo anu nsya ana nhaf nse bo yase ro Allah siwyan mkah raa mana ro Israel. Anu beta bhaf bse bo yase weto su.
ROM 11:18 Menohe bibi anu abyõ kʼraa ro Israel to ma. Nnaut oh: Anu fo nfi ara zaitun ngkre wau sai. Tna ja ngkre wau weto to mros kar fee. Anu oh mi swior ara zaitun mtis rau to fee. Mtis matam anu oh mi anu nhau naam.
ROM 11:19 Feto to anu ro nbam raa mana roto to, kbe anu nwe, “Ngkre raa mana ro Israel weto, Allah beska beak makus. Allah beak ana weto afo re yoo amu raa mana roto yse shauk yuk ana raa mana ro Israel mhau to riryõn.”
ROM 11:20 Bo ro anu nkyas reto to, mabo oh. Menohe nnaut oh: Raa ro Israel weto to ana hawe bo smot Kristus. Tibyo Allah beska ana beak. Tna anu fo smot Kristus. Tibyo Ait yoo anu yse nrat nsya mtis reto. Feto to anu safuk anu nwe anu raa ro noof to ma. Rau ro moof to, anu kaket anu tna waa bi Ait.
ROM 11:21 Nnaut oh: Raa ro Israel weto to kube bi Abraham ro wotur. Menohe Allah yatmof ana fee. Ana smot Kristus fee tibyo Ait beska ana beak. Yno mnan fi raa msot ara ngkre ro mkair. Feto to, kaket anu! Soh anu hawe bo smot Ait to, kbe Ait yatmof anu fee ye. Kbe Ait beska anu mbeak ye.
ROM 11:22 Feto to anu bmat bwe: Allah tait Raa ro yatmof raa taro ye. Tna Raa ro kmo raa taro ye. Tiwya raa ro mbam raa mana ro Israel taro hawe bo smot Kristus. Tibyo Allah kmo ana. Menohe Ait yatmof anu raa ro nbam raa mana roto weto. Feto to, niwana boatmof rAit ma! Beroh smot Ait renti. Soh mfe to kbe Ait ysot anu beak nkus ye.
ROM 11:23 Feto ye mfi bo raa mana ro Israel haberek tna mama smot Ait to, kbe Ait yoo ana ymit mrat mam mara rau u. Allah tait yatak yno bo reto mabo ye.
ROM 11:24 Anu fo nfi ara ngkre ro mbam ara zaitun roto taro sai. Tna ara reto mkair, mesait mo mam safom sai. Menohe Allah yno bo ro msai: Ait yoo anu ymit mam ara zaitun rAit reto. Ait ksoh yno bo reto sai. Feto ye kbe Ait ksoh toni yoo ara kre ro tiwya wotur weto ye ymit u mam ara mara rau reto to tu!
ROM 11:25 Taja tme tao, tano na; Allah ymat raa mana ro Israel hayah tna ymat raa mana roto makin hayah ye. Jõ tkyas bo refo kʼanu afo re anu nhar kaket. Re kbe anu tawyõ anu ai to ma. Bokyas refo fo, tiwya Allah ymyõt kʼraa. Bo ro Allah ymyõt kʼraa reto oh mi raa mana ro Israel to, mfo refo ana msis to, mhaf matak. Tna raa mana roto to, Allah ytu ana mawat kbe mama. Ytu ana mabo mnan si mama wia tna kbe Allah ytu raa mbam raa mana ro Israel mama mrof naut.
ROM 11:26 Reto oh mi raa ro Israel beta to, kbe mamo mo kʼAit tna kbe meen mkai riof rAit. Bokom ro Allah mkyas bo reto mawe, “Meen Raa Sotak sait ro yoo riof yee kʼraa yama. Yama ybam Sion, sawro rAit, yama. Yama yo kʼanu, kube ro Yakub wait. Tna yno re anu niwana Ait u fee.”
ROM 11:27 “Mam ti weto to Jõ tno bo moof ro tiwya tawe tno kʼana. Au oh mi Jõ skur iro wana beta.”
ROM 11:28 Raa ro Israel ja miwana Bokyas Moof ro Yesus. Tibyo mamo byoh kʼAllah. Allah yno feto afo re anu ro nbam raa mana roto kbe nkai mafer ro mase. Menohe tiwya Allah ysi bo kʼAbraham, Ishak, ysya Yakub to. Ana mamo hohos kʼraa ro Israel. Tibyo Allah ysok ana ro Israel tna Ait yhafri ana fares.
ROM 11:29 Allah ja ysok raa ro kbe yoo riof yee. Tna riof ro tiwya yawe ysan kʼraa to, Ait yhaf mabe fee. Yno mabo yum oh.
ROM 11:30 Tiwya anu ro nbam raa mana roto to, beswan-swan bo ro Allah yawe. Menohe mfo wefo fo, raa ro Israel beswan-swan bo ro Ait yawe. Tibyo Ait yatmof anu.
ROM 11:31 Mfo refo ana beswan-swan Ait. Tibyo Ait yatmof anu oh. Feto ye kbe meen Ait yatmof ana ye. Kbe Ait yatmof ana mnan anya Ait yatmof anu ye.
ROM 11:32 Allah yfot ybu raa beta su yawe, “Raa ro tabam refo beta beswan-swan Jõ: Raa mana ro Israel ye msya raa mana roto ye.” Yawe feto re kbe meen, ati ro Ait yerif boatmof rAit kʼana to, kbe ana safuk ana fee. Kbe ana beta mhar mawe boatmof rAit sai aran yno riof kʼana.
ROM 11:33 Allah tait raa ro yoof toni! Iso ro Ait yatmof anu to bo msai! Kta ranu oh meto. “Bo ro Ait yhar to mase. Ait Raa ro srau miyõ toni ye. Tna bo ro Ait saim yno to, raa aro bo hre mmat sas fee. Awya oh mi yhar iso ro Ait yno bo weto to?”
ROM 11:34 Allah yesait oh mi yfen bombra weto beta to. Tna yatak rAit oh mi bombra weto beta mhau fares. Ait ksoh rAit sai yfen bombra weto beta afo re raa mmat tibyo bibi Ait yase rait. Tibyo “Awya oh mi yhar Tuhan yakit rAit? Awya oh mi watum bo kʼAit to?” Yesaya 40:13 “Awya ro ja yoo bo yee kʼTuhan tna ye yawe bi Ait yoo bo sroh to?” Ayub 41:11 Nma, anu bmat sas bo yase rAit tibyo bbaut Ait mamo snok mam meen hame wajin! Amin: Mabo oh!
ROM 12:1 Taja, tme, tao, tano na; Allah yatmof anu toni. Feto oh mi anu ro nkit maan to, nno bo bawya? Allah yatmof anu feto tibyo jõ sobu anu tawe noo nhaf, srau wanu bo beta nsan kʼAllah ybo. Anu raa wAit to, nhau nno bo wAit sai. Noo nhaf, srau wanu nsan kʼAit fefo fo tna nhau nno bo wAit to, kbe Ait yhaf mnan anu. Tna anu nbaut Allah oh meto ye.
ROM 12:2 Ja raa ro tabam refo tko anu kro iso rana su. Nri ana ma! Kaket anu yoyo re kro iso ro tabam refo ma. Menohe nsan nkit msya bonaut wanu to beta kʼAllah yoyo. Nsan kʼAit to, kbe yno bonaut wanu weto to, haberek mrok moof renti. Tibyo kbe nhar bo nno bo mnan si Ait yhaf, srau mato rAit to: Au oh mi anu nhar bo bawya ro Ait yawe moof to. Kbe anu nhar bo bawya ro Ait yhaf ksoh. Kbe anu nhar bo bawya ro moof toni syok.
ROM 12:3 Allah tubat jõ tamo raabis rAit. Tibyo ybis jõ yawe tamo tkyas watum rAit fo kʼanu beta. Tawe anu to yok-yok anu toni to ma. Anu smot Kristus tibyo Allah yuumto bouum (karunia) kʼanu oh. Bouum weto Allah ynit kaket saim kʼanu raa sait-sait tna kʼfnya sau-sau feto. Bo ro anu nhar nno kaket to, bouum ro mbam kʼAllah mama. Feto to yok-yok anu toni to ma.
ROM 12:4 Bouum weto mnan fi raa yetsu rait. Raa yetsu rait to sau aran sai. Menohe yatem oo, yaa oo, yana bo to mrat mam yetsu rait reto. Tna yetsu haber rau to aro hayah-hayah. Tna haber makin weto to, ja mno bo rau hayah-hayah ye.
ROM 12:5 Feto to anu ye. Anu ro kro Kristus to bsis bia. Menohe anu beta bsya anya bhau su. Mnan fi anu fo betsu sau aran tna anu haber anya. Anu bnah su tna bnaut raa anya ye.
ROM 12:6 Anu aro sait-sait fri bo ro mbam kʼAllah. Ait yuumto bouum kʼanu sait-sait hayah-hayah ye. Allah yoo tak yee kʼraa taro re ana mari mai ro mbam kʼTuhan tna mkyas bokyas rAit reto kʼraa mfi raa ro nabi. Anu weto to nkyas kaket! Nkyas mamyot si bosmot ranu reto.
ROM 12:7 Tna anu taro to, Allah yoo tak yee re anu ja nno bo aro rau-rau re nbet raa. Anu weto nsen nbet raa oh! Tna anu taro to, Allah yoo tak yee re anu nmo guru. Anu weto nsen nerif bo kʼraa oh!
ROM 12:8 Tna anu taro to, soh raa aro sraujin to, ja anu nkyas bo moof afo re ana sorni sraujin wana. Anu weto: Nsen nno feto renti! Tna anu taro to, Allah yno re anu nse bo mawat. Anu weto to natmof raa ro mse bo mabut. Natmof ana mkah nhaf ro mbyõ oh! Tna bi Ait yoo tak yee kʼanu taro re anu nmo aban mana. Anu weto kaket anu re mur-mur nno bo reto oh! Tna anu taro nhar bo nmat raa ro masom bo ro samyoh. Kbe anu weto to natmof ana weto tna nros tis ana mkah simaut mase.
ROM 12:9 Nhafri raa anya to kaket. Nno mkah wan-wan to ma. Tna nsok bo ro nwe moof to kaket. Bo ro mkair-kar to, beak fari. Bo ro moof to, nbo nno.
ROM 12:10 Nhafri anya mnan fi ja raa hafri mao mano na wana. Tna nmat anya to kaket ye. Nmat anya mnan fi ana fo raa ro ati miwer nyõ.
ROM 12:11 Hawe boh to ma! Nno bo ro Tuhan rAit to nno mur-mur mkah nhaf myoh.
ROM 12:12 Tna ninaut nwe bombra ro Allah yawe kʼanu to meen mabo. Bo weto oh mi anu simaut mase. Mam wore bo ro samyoh mai kʼanu to, kanyin nsom sai oh. Tna beroh nros skabuk yoyo ye.
ROM 12:13 Soh anu nmat raa ro Allah wAit tna bo ro ana mse aro mabut to, noo bo nee kʼana. Tna nitrah amah wanu kʼraa ye.
ROM 12:14 Wore raa mno bo mai kʼanu to, skabuk Allah re yno bo moof aro kʼana. Nwe kbe ayoh mroh mai ana to ma.
ROM 12:15 Wore raa simaut mase to, simaut su nsya ana ye. Tna mam wore raa sraujin tna mawia to, hre nwia su nsya ana ye.
ROM 12:16 Nhau nhaf sau su nsya anya. Nnaut nwe anu raa ro nse niwrek raa taro to ma. Niranya nsya raa kinyah. Nnaut nwe anu nhar bo niwer raa taro to ma.
ROM 12:17 Tna soh raa aro mno bo mkair mai kʼanu to, nno bo ska si to ma. Nhau nno bo ro raa beta mnaut mawe moof.
ROM 12:18 Tna nmak nsya raa roto to ma. Saso niranya nsya raa beta. Menohe soh raa aro kmo fares tna hawe me miranya msya anu su to, mhau oh. Kbe anu nisoh iranya reto fyi?
ROM 12:19 Tafoh na wojõ; raa ro mno bo mai kʼanu to, anu nesait ska bo to ma. Mhau kbe Allah kmo ana tna yoo safo mana ymit kʼana weto. Bokom ro Allah mawe: “Jõ oh mi ska bo tna tno bo ro samyoh mai to. Bo woJõ kbe tno.”
ROM 12:20 Anu nesait ska bo to ma. Menohe nno bo ro moof kʼraa ro mhoh byoh kʼanu. Bokom ro Allah mawe: “Raa ro mamo byoh kʼanu to, soh ana mhai sre to, noo boit nee kʼana mait. Tna soh mhai sbit to, noo aya nee kʼana mata. Soh anu nno feto to, kbe ana hrenaut.”
ROM 12:21 Nno ma be bo ro raa mno mkair to, miwro anu re kbe anu nno safo ye. Rau ro moof to, beroh nno bo ro moof. Feto kbe tis rau to safo mroh mam mte. Tna bo ro moof to, mros abyõ matak.
ROM 13:1 Tna pemerintah ro mase to, anu to sait-sait nri bo pemerintah ro mbo anu to mawe. Pemerintah weto beta to mesait mbrah ai fee. Allah oh mi yoo yatak yee kʼpemerintah weto tibyo ana mros. Pemerintah ro mfo refo to ye, Allah oh mi yesait tubat sawyah to.
ROM 13:2 Feto to awya ro beswan bo maja ro pemerintah to, ait beswan bo maja ro Allah oh meto. Tna awya ro yari bo ro pemerintah mawe to fee, kbe Allah yoo safo mana ymit kʼait retait.
ROM 13:3 Awya ro yno bo moof to ait waa fee. Yhar yawe pemerintah kbe mmit safo mana kʼait aro fee. Menohe ait ro ja yno bo mkair saah ait waa. Kbe pemerintah mmit safo mana kʼait tu oh. Soh anu hawe bo waa pemerintah to, nno bo ro moof tibyo pemerintah kbe bibi anu.
ROM 13:4 Raa ro pemerintah to sryan ro Allah ybis to afo re ana mno bo moof kʼanu. Menohe mfi bo anu nno safo to, pemerintah to mi anu waa to. Pemerintah mros matak re kbe mmit safo kʼraa ro mno safo. Tna Allah oh mi Raa ro yoo tak reto yee kʼpemerintah.
ROM 13:5 Feto to nri bo ro pemerintah mawe. Nri afo re pemerintah mmit safo kʼanu fee. Tna nri ye afo re anu nhaf ranu bhah anu fee.
ROM 13:6 Reto oh mi anu bero namabyoh nee pemerintah. Raa ro pemerintah to sryan ro Allah ybis mkah armato ro pemerintah.
ROM 13:7 Bo bawya ro pemerintah msi mawe anu ktan to noo nee oh: Namabyoh ye tna cukai ye. Tna raa ro mamo aban mana mbo anu to, nri bo ro ana mawe tna nbo nno kaket. Tna raa ro manes to, nmat ana beta kaket ye.
ROM 13:8 Anu aro bo nno bo fyah kʼawya-kawa bo ye ma. Menohe bo sau noo nee kʼraa yoyo: Au oh mi noo nhaf anyõ nee kʼraa yoyo. Awya ro yatmof raa anya, ait tait raa ro yno Watum ro Musa maja rau mnan si oh meto. Feto to tawe kʼanu tawe beroh natmof raa anya yoyo.
ROM 13:9 Watum ro Allah mawe, “Nwyah ma. Nme raa ma. Nsyõf bo raa ma. Naam bo raa ma.” Keluaran 20:13-17 Tna Watum taro sor to, maja wau weto mberur beta mnan anya. Au oh mi: “Natmof raa anya kaket mnan fi anu ja natmof netsu wanu mesait ai.”
ROM 13:10 Raa ro matmof raa anya to mno bo ro mkair mai kʼraa anya to fee meto. Feto to awya ro ja yatmof raa anya, ait yno Watum ro Allah maja wau mnan si oh meto.
ROM 13:11 Tii tinyi, ati ro anu nashana smot Yesus to, tii oon sboh rau mama fefares. Menohe mfo refo anu bhar bwe ti ro anu bkai riof to mama ngkene baro oh. Feto to hawe boh to ma! Nrok nsen tna nbo bo riwai tawe kʼanu to, nno weto beta kaket.
ROM 13:12 Mti ngkine mwo mamo oh tna reen fo mama. Bo ro mkair raa mno to, ja ana mno mam wore wo mamur fares. Feto to nma, nitsre bo mkair ro anu nno to beak makus. Tna nno bo ro Allah ksoh. Bno feto kbe anu bno wa bo ro mkair mnan fi raa ro sbe ja myum ratan ro besi. Myum ratan ro besi feto, tibyo raa mama mame ana majat fee.
ROM 13:13 Nma, bno bo mfi ja raa ro mhau mam wore wo maah. Nkyõ bokyõ mnin-nin to ma. Nbisir to ma. Nus-as bo ma. Nsrau oot-oot fnya raa oo ku ano bo to tna nno ana to ma. Nhau ntoh anya to ma. Tna naam bo ro raa to ma.
ROM 13:14 Rau ro moof to, anu nhau srau sau, nhaf sau su nsya Kristus Yesus Tuhan ranu. Tna kaket anu be kbe nri bo ro nasmamo weto to tibyo nno.
ROM 14:1 Raa taro smot Kristus, menohe bosmot wana matak fefares. Ana weto mawe bo aro mbau kʼana fares. Nitrah nhaf wanu tna niranya nsya ana. Nhau hafrah bo ro ana mnaut weto to ma.
ROM 14:2 Raa taro to, sohmaam bo knik-knak sai mkah mhaf ro moof. Tna taro to, bosmot wana matak fefares. Ana mbau bo mabo kak aro rau-rau. Ja ana mabat bobat mkah boit sai.
ROM 14:3 Allah ymat tna yiranya ysya ana mbewok ye. Feto to anu aro nno nnan fi bi Ait ye fea! Anu ro ja sohmaam bo knik-knak to, niwana ana ro mabat bobat sai to ma! Tna ro nbat bobat sai to, nmat ana ro sohmaam bo knik-knak beta weto to, nwe ana mno iro meto to ma!
ROM 14:4 Allah oh mi Raa ro ybo ana. Anu fee! Ana weto mros matak soh mfe mbtek to, bo ro Tuhan rAit sai! Tna Ait fi yatak yno re ana mros matak tna smot Ait kaket.
ROM 14:5 Tna raa taro mnaut mawe ayõ aro to, mbau tibyo raa mamo mkah bo fee tna ayõ aro to mbau fee. Tna raa taro mnaut mawe ayõ ro mbau to aro u fee. Rau ro ati to, anu nno bo ro nhaf mato wonyõ mesait mbis.
ROM 14:6 Ro mnaut mam mhaf mato mawe, “Ayõ sau to hayah, ayõ reto to mbau.” Bo ro ana mno reto, ana mno mkah bo mbaut Tuhan. Tna taro mnaut mawe, “Allah yoo kak yee re jõ tabo. Tibyo tayoh asik mase kʼbi Ait.” Bo reto ait yno mkah bo mbaut Tuhan ye. Tna raa taro to ja mabo kak fee. Mno feto mkah bo mbaut Tuhan ye. Ana weto mawe, “Allah yoo bobat wefo yee kʼanu nbat. Tibyo amu nyoh asik mase kʼbi Ait ye.”
ROM 14:7 Wore wo anu sait-sait bhau mam tabam refo fo, Tuhan oh mi ybo anu ybis. Tna wore anu sait-sait bhai to Tuhan oh mi ybo anu ybis. Anu bhau bno bo ro anu besait ksoh to fee.
ROM 14:8 Anu bhau baam to, tomer bno bo ro Tuhan yhaf mnan. Tna mamo snok mam ati ro anu bhai to, anu ksoh bno bo ro Tuhan yhaf mnan yum ye. Wore anu bhau fares tna wore anu bhai to, Tuhan oh mi Raa ro ybo anu.
ROM 14:9 Reto oh mi Kristus yhai tna yrok yasen to: Yno feto re Ait yamo Tuhan tna anu beta bmo sryan wAit ro bri bo Ait ybis kʼanu. Feto mam ati ro anu raa bhau fares ye tna mam ati ro anu bhai ye.
ROM 14:10 Feto to mfi bo ro riwai tkyas raa taro mnaut mawe bo sau to mbau. Tna anu nmat tibyo anu hafrah ana. Anu hafrah sryan ro Kristus wAit weto to, nno fyi meto ee! Mkah bawya anu nmat raa anya ro kro Kristus to, nwe bo ro ana mno reto to iro meto! Allah yesait oh mi meen ytu srah ranu aro sait-sait.
ROM 14:11 Bokom ro Allah mkyas bo ro meen mabo mawe, “Tuhan ro yaam tait yawe yum oh yawe, ‘Kbe meen raa sait-sait yamo yjit yimna tna heyut ymat Jõ. Tna raa sait-sait kbe yhar tna yawe, “Mabo oh, Nyõ fi Allah.”’”
ROM 14:12 Allah yawe feto to, anu bhar bwe meen anu fo sait-sait bras abyõ kʼAllah bwe, “Ae, tiwya jõ tno bo wefo beta.”
ROM 14:13 Feto to anu nuun-an anya nkyas bo ro mbau aro u to ma. Nuun-an bo weto ma be kbe anu ro kro Kristus to nwe kair anya nwe, “Bo ro nno reto to iro meto!” Nno be anu nno wa iranya raa msya Allah meto.
ROM 14:14 Jõ fi raa ro thaf, srau sau su tsya Tuhan Yesus. Tna thar tawe bo sohmaam aro to mbau kʼanu fee. Menohe soh anu sait ynaut mam yhaf mato rait yawe, “Boit refo fo mbau kʼjõ.” Nhar nwe boit reto mhau mbau kʼait fares meto.
ROM 14:15 Mfi bo anu ja sohmaam bo sau, menohe bo sohmaam reto to, ja mbau kʼraa taro ro kro Kristus. Soh anu beroh sohmaam bo reto mam wore wo raa weto mmat to, anu nno bo mkair mai kʼana oh meto. Nno feto to, anu natmof raa weto kaket fee. Kristus yajat afo re yyon iro wana weto ye. Nno be anu nisti tna ana me mbtek mam iro.
ROM 14:16 Bo ro anu nwe moof weto to, Allah yawe anu nno saah. Menohe ro moof to, anu nno ma re kbe raa ro ja mbau bo reto to, kbe mkyas-kas anu fee.
ROM 14:17 Anu bhau mam raa mana ro Allah yamo Raja ybo to, ro ati oh mefo: Anu to bhau bhaf sau su bsya Har rAit. Tibyo bhau bhaf ranu moof, bhau bhaf wanu to tnok, tna simaut mam anu bhaf mato wanu ye. Bo bawya ro sohmaam msya bo ro bta to bo ro ati fee.
ROM 14:18 Raa ro ja mhau mhaf wana mnan feto to, mno bo ro Kristus rAit oh meto. Kbe Allah yhaf mnan ana ye tna kbe raa mhaf mnan ana ye.
ROM 14:19 Feto to, nma: Anu bno re raa ro kro Kristus to miranya kaket. Tna bno re anu tubat bosmot wanu beta ye.
ROM 14:20 Bo sohmaam beta to Allah yawe moof. Yawe anu sohmaam saah. Menohe raa taro mhar bo reto mam mhaf mato wana to fefares. Soh ana mmat bo ro anu niit to karik kbe ana mbtek mam iro. Allah yno re ana mama smot Ait oh. Nno be tis rau to, bo ro anu sohmaam to misti re bosmot rana reto sasyõ.
ROM 14:21 Anu taro ja nbo kak tna nta anggur maya. Soh nno bo weto nisti re raa anya ro kro Kristus taro mbtek mawe to, beroh nno bo weto ma. Bo bawya ro mno re raa mbtek mawe to, beroh nno ma.
ROM 14:22 Nkyas bo weto tna sohmaam bo weto mam wore wo raa weto mahni sai. Nno bo weto mam wore Allah yasu ymat tna raa mahni. Niwana bo ro Ait yawe kʼanu ma. Niwerek bo ro anu nhaf nwe moof to ma. Tna kbe Allah yno bo moof kʼanu.
ROM 14:23 Tna awya ro ynaut maut-mroh mam yhaf mato to, menohe beroh sohmaam bo reto to, ait yno mkair meto. Soh anu nno bo ro miwana bosmot ranu to, Allah yawe anu nno iro oh meto.
ROM 15:1 Feto to fyi? Anu to smot Kristus matak re bwe boit bo to ro mbau to aro u fee. Menohe anu bmat anu besait sai to ma. Anu tam-tam raa wanu ro bosmot rana sne fares ye.
ROM 15:2 Rau ro moof to, anu sait-sait bno bo ro raa anya mhaf mnan. Au oh mi anu bno bo moof kʼraa anya ro ja tubat bosmot rana mrok matak ye.
ROM 15:3 Tiwya Kristus yno feto ye. Ait yno bo afo re kbe Yaja yhaf mnan. Ait saso bo ro Ait yesait yhaf ksoh to fee. Bokom sau mkyas bo ro tiwya Mesias yawe kʼyaja Allah yawe, “Allah, tiwya raa mamus Nyõ tna Jõ tros tkai riryõn.”
ROM 15:4 Anu sorni ma. Bo bawya sor ro tiwya raa mkom mam Bokom ro Allah to, Ait ybis ana mkom afo re anu bmat tna bhar bo weto ye. Tibyo bo ro anu bmat mam Bokom ro Allah to, ja tubat bosmot ranu re anu binaut bhar bwe meen anu bkai riof ro mroon tu. Tna bo sau naut: Bo ro anu bmat mam Bokom ro Allah to merif mawe kbe anu bito bsom bo ro matu mai kʼanu to. Bo weto mno re anu binaut roon ranu ye. Binaut bwe meen anu bkai riof ro mroon reto.
ROM 15:5 Allah Ait oh mi ja yoo yatak yee kʼanu re anu bito bsom bo ro matu mai kʼanu to. Tna Ait oh mi ja tubat bosmot ranu ye. Jõ skabuk tayoh Tuhan afo re kbe anu beta nhau nhaf sau su. Nno reto mnan fi bo ja Kristus Yesus yhau yhaf sau su ysya anu to.
ROM 15:6 Nhau nhaf sau su tibyo kbe anu nbaut Allah mkah nhaf sau su ye. Allah fi Yesus Kristus, Tuhan ranu Yaja.
ROM 15:7 Feto to jõ tawe kʼanu ro nhau mam Roma to, tawe beta nitrah nhaf wanu kʼanya re niranya kaket. Tiwya Kristus ymat anu beta. Soh raa mmat he anu nmat raa anya mnan fi Ait yno feto, kbe ana mbibi Allah.
ROM 15:8 Nnaut oh, Kristus yama yo kʼamu, raa mana ro Yahudi to, re kbe Kristus yno bo moof kʼamu yfi bo sryan sait ja yno bo raa. Yno feto afo re kbe raa mhar mawe bo ro Allah yawe to, ybo yno tu oh. Au oh mi: Tiwya Allah yawe kʼAbraham ysya kube wait to yawe kbe Ait ybis Mesias yama yo kʼamu.
ROM 15:9 Tna Mesias retait yama re kbe yatmof raa ro mbam raa mana roto ye. Yama tibyo ana ro mbam raa mana roto to, kbe mbaut Allah ye. Bokom ro Allah far-far refo mkyas bo ro raja Daud yawe kʼAllah yawe, “Jõ tji howes tna bibi Nyõ nasom aNyõ mam wore wo raa mana roto makin mmat.”
ROM 15:10 Tna mam far-far roto bi sait yawe kʼana ro mbam raa mana roto to, yawe, “Nsen simaut! Anu ro nbam raa mana roto to, simaut su nsya raa wAit ro mbam raa mana ro Yahudi ye!”
ROM 15:11 Tna far-far roto sau naut ye mkyas mawe, “Jõ tawe kʼanu ro nbam raa mana roto weto beta to, tawe, ‘Bibi Tuhan ramu ye!’ Jõ ksoh raa beta bibi Ait!”
ROM 15:12 Tna mam far-far roto sau naut Yesaya ykom yawe, “Bi Isai, kube rait sait meen yama. Yasen yamo Raja tna ybo raa ro mbam raa mana roto makin beta. Raa weto to, kbe mhar tna minaut mawe meen Mesias retait yoo riof yee kʼana.”
ROM 15:13 Allah ja yno re anu bhar tna binaut bwe bo beta ro Ait yawe to, kbe mabo tu oh. Tna jõ skabuk anu re kbe nhau nwai kʼbi Ait kaket. Nwai kʼbi Ait feto tibyo Ait yno anu nhau nhaf tnok yoyo, tna simaut mam anu nhaf mato wanu yoyo ye. Tna skabuk re Har rAit mno anu ninaut renti nwe bo ro bi Ait yawe to, kbe mabo. Kbe yno mkah tak ro Har rAit.
ROM 15:14 Taja, tme, tao, tano na; Jõ thar tawe anu to, raa ro ja nno bo moof tna ja nhar bo mnan si ye. Tna anu nhar bo watum kʼanya ye.
ROM 15:15 Menohe Allah yatmof jõ yoo bouum yee kʼjõ. Bouum reto yee afo re Kristus Yesus ybis jõ tamo raabis rAit tamo to kʼanu. Anu to nbam raa mana ro Israel fee. Anu to, nbam raa mana roto makin. Tama to kʼanu to, tama tkyas Bokyas Moof (Injil) ro Allah. Tama tfi imam ro ja ykyas bokyas ro mbam kʼAllah. Anu nri tna Har rAit moo anu msan kʼAllah re nno bo wAit. Au oh mi jõ too anu tsan anu kʼAllah. Tsan anu kʼAit mnan mfi raa msan bosan roto taro kʼAit. Tna Allah yhaf mnan yoo anu. Allah yoo bouum reto yee kʼjõ to, tibyo jõ tkom watum refo kʼanu, tkyas abyõ kʼanu sai. Kmo ma. Tkom bo wefo tee afo re anu nnaut bo wefo u, sorni ma.
ROM 15:17 Feto to jõ bibi Kristus ati ro jõ tno bo ro Allah ybis jõ tno.
ROM 15:18 Jõ tamo tkyas Kristus yasom kʼraa ro mbam raa mana roto makin. Yesus yno re bo ro jõ tkyas tna bo ro jõ tno weto to, mafer moof. Tibyo ana weto mari bo ro Allah yawe oh. Kbe jõ tyok-yok bo ro mfi fefo ro mama mbam kʼAit sai. Jõ wa tyok-yok bo roto fee.
ROM 15:19 Har rAit moo tak mee kʼjõ re tno bo ro hnah tna bo ro msai aro sor. Jõ tkyas Bokyas Moof ro Yesus mnan si oh mbam kota ro Yerusalem mamo snok mam provinsi ro Ilirikum.
ROM 15:20 Ati ro tkyas Bokyas Moof ro Kristus refo to, jõ tomer tamo tkyas mam wore wo raa mari mbo Bokyas refo fefares. Tkyas bofret sau: Mfi bo raa ro ja sgi amah. Soh ait roto sait yatim yati sankaf to, jõ hawe tama sgi amah reto riryõn.
ROM 15:21 Menohe jõ ksoh tno bo mnan fi nabi Yesaya tiwya ykom, “Raa ro wase bokyas rAit to, meen kbe raa mama mkyas Mesias yasom kʼana weto re ana mari tna mhar ye.”
ROM 15:22 Au oh mi jõ thau mam oo refo fares. Allah ybis jõ tkyas Kristus yasom kʼraa mam befo wia. Tawe tama tmat anu ro nhau mam Roma, menohe tama fefares.
ROM 15:23 Tkah bo mam oo wefo mkak oh. Mfo refo jõ rero tama to kʼanu. Tii tahun mawat oh jõ tawe tama tmat anu.
ROM 15:24 Bonaut ajõ to tamoʼt Spanyol. Tna jõ tinaut tawe kbe tmat anu mam Roma iti. Jõ tama thau tsya anu ti baro afo re anu bkai anya mam beto. Tna jõ ksoh anu noo bo ro jõ tnaut to baro nee kʼjõ re tasen tamo renti.
ROM 15:25 Menohe mfo refo to tamoʼt Yerusalem wia. Takah bo tamo tee kʼraa ro Allah wAit mam kota reto wia.
ROM 15:26 Jemaat makin ro mhau mam Provinsi Makedonia msya Provinsi Akhaya to, taa ana mawe ana ksoh mberur moo pitis mee. Ana moo pitis reto mee re kbe jõ takah tamo tee kʼraa kinyah ro Allah wAit mam Yerusalem.
ROM 15:27 Ana mawe mno bo refo. Mawe rau ro moof to, ana moo bo aro mee kʼraa mbam raa mana ro Yahudi weto. Tiwya ana ro mbam raa mana roto weto to, smot Bokyas Moof ro Yesus tibyo mkai mafer ro moof ye. Bokyas Moof ro Yesus frok mbam raa mana ro Yahudi wia. Tibyo raa ro mbam raa mana roto mam befo mbibi ana ro Yahudi mawe asik mase. Feto tna ana ro mbam raa mana roto to, mawe ana mbo pitis baro tiim sroh si kʼana ro Yahudi weto.
ROM 15:28 Jõ tesait tawe takah pitis reto tamo tna tee kʼana ro kinyah mam Yerusalem weto. Jo kaket re ana mkai bouum ro moof reto wia. Ana mkai mkak, tna fo kbe tamoʼt Spanyol. Tna tama iti tmat anu mam Roma beto ye.
ROM 15:29 Jõ thar tawe tamo to kʼanu to, kbe Kristus yno bo ro moof toni kʼanu beta.
ROM 15:30 Taja, tme, tao tano na; Anu beta fo raa ro kro Tuhan Yesus Kristus. Tna Har ro Allah mno re anu beta batmof anya kaket. Feto to jõ soh-soh anu tawe ntomer nros tis kʼjõ: Skabuk jõ nsan kʼAllah yatem rAit.
ROM 15:31 Mfo refo to arin ro mkair mam Provinsi Yudea. Raa ro hawe smot Kristus to saim jõ mawe mame. Feto skabuk re Allah ywas jõ. Tna skabuk re pitis ro jõ too tee kʼana ro Allah wAit mam kota Yerusalem to, kbe ana fri pitis weto mkah mhaf ro moof.
ROM 15:32 Skabuk feto afo re kbe jõ tama to kʼanu, soh Allah ybis. Tibyo kbe jõ tama tirer anu tna kbe simaut tsya anu ye su.
ROM 15:33 Allah oh mi yno re anu bhau bhaf tnok. Tna jõ skabuk re kbe Ait yatam anu ye. Amin: Mabo oh.
ROM 16:1 Tna jõ tkyas fai Febe baro kʼanu afo re ati ro au mama to, kbe anu ntam-tam au. Au to raa wanu sau ye. Tna au mamo diaken mam jemaat rau ye. Jemaat reto mhau mam kota ro Kengkrea. Kbe au mamo mmat anu mam Roma.
ROM 16:2 Nmat au kaket mnan fi bo anu ja nmat raa ro Allah wAit makin to. Tiwya au mmat jõ kaket feto ye tna au mmat raa mawat sor ye. Tna wore au mhau msya anu to noo bo ro au mnaut aro to, nee kʼau ye.
ROM 16:3 Nmah meen kʼPriska msya maa Akwila. Ana mbewok to, Kristus Yesus ybis mkah bo rAit su msya jõ ye.
ROM 16:4 Tiwya, ana mbewok mno wa raa ro mhoh byoh kʼjõ to, mame jõ fee. Mno feto kene wo raa mame ana majat he mfe. Ana mbewok mno bo feto tibyo tayoh asik mase kʼana. Jõ tesait sai fee; raa ro mbam raa mana roto makin ye. Jemaat wana beta mayoh asik mase kʼana mbewok ye.
ROM 16:5 Nmah meen kʼana msya jemaat ro ja siret skabuk su mam amah rana mbewok ye. Tna nmah meen kʼEpenetus. Ait fi raa ro jõ thafri. Ait fi raa ro tinyi mamo kro Kristus mam rabin ro Asia.
ROM 16:6 Tna nmah meen kʼfai Maria ye. Fai au to mur-mur mno bo moof kʼanu yoyo.
ROM 16:7 Tna nmah meen kʼAndronikus ysya Yunias. Ana mbewok to tiwya kro agama ro Yahudi ye. Ana mbewok tiwya mamo kro Kristus matim wia, tna fo jõ. Ana smot Kristus mi raa mbu ana mam bui mato msya jõ ye. Ana mbewok weto to, raabis ro Tuhan ye. Raa mawe ana to raabis wAit ro moof.
ROM 16:8 Nmah meen kʼAmpliatus ye. Ait tait raa ro kro Tuhan. Tna jõ thafri ait.
ROM 16:9 Nmah meen kʼUrbanus ye. Ait tait Kristus ybis ykah bo rAit ysya jõ ye. Tna nmah meen kʼStakhis. Ait tait raa ro jõ ksoh ye.
ROM 16:10 Nmah meen kʼApeles ye. Bosmot rait to matak. Tiwya ait smot Kristus tibyo raa sikowah ait. Menohe bosmot rait matak fares. Tna nmah meen kʼjemaat ro ja skabuk mam amah ro Aristobulus.
ROM 16:11 Tna nmah meen kʼHerodion. Ait tait tiwya raa ro Yahudi ye. Tna nmah meen kʼNarkisus ysya raa wait beta ro kro Tuhan ye.
ROM 16:12 Nmah meen kʼfai Trifena msya fai Trifosa. Ana mbewok mur-mur mkah bo ro Tuhan. Tna nmah meen kʼfai Persis. Au to mur-mur mkah bo ro Tuhan yoyo ye. Tna jõ ksoh au ye.
ROM 16:13 Nmah meen kʼRufus ysya yme. Ait tait raa ro Tuhan ysok. Tna fai au to mnan fi jõ tme ye.
ROM 16:14 Nmah meen kʼAsinkritus, Flegon, Hermes, Patrobas, Hermas msya raa ro kro Kristus taro sor tna skabuk su msya ana.
ROM 16:15 Nmah meen kʼFilologus ysya Yulia, kʼNereus ysya yano, tna kʼOlimpas ye. Tna nmah meen kʼraa ro Allah wAit mam beto ye beta.
ROM 16:16 Anu nmah meen kʼanya ye tna hana anya. Jemaat ro kro Kristus beta sor mmah meen kʼanu ye.
ROM 16:17 Taja, tme, tao, tano na; jõ sobu anu tawe, kaket anu. Kbe raa mama mkyas bokyas roto taro kʼanu. Anu nhar bokyas moof ro Kristus oh to. Mfi bo raa mkyas bo ro mamyot bokyas ro Kristus reto to fee, niranya nsya ana weto ma. Nmat sas wa ana weto. Bokyas rana reto mno wa re raa smot Allah matak fee, tna mno re raa mbrir-brar mam jemaat.
ROM 16:18 Raa ro mfi feto to, mkah bo ro Tuhan Kristus ybis to fee. Ana mno bo ro mhaf wana ksoh sai. Ana weto mhar bo mkyas kaket, re raa ksoh mari bokyas rana. Menohe ana mkyas bo sioh. Raa mhaf reo mari bo ro ana mawe tna mnaut mawe bo mabo, he mfe. Ana ja miwro raa feto.
ROM 16:19 Raa beta mhar mawe anu nri Bokyas Moof ro Yesus oh tna nbo nno. Jõ tari bo ro anu nno feto tibyo jõ simaut mase ye. Jõ ksoh tawe anu nhau nsu maah re nhar bo ro moof tna nbo nno. Tna ksoh tawe anu wase bo nno bo mkair-kar ye.
ROM 16:20 Allah oh mi yno re anu bhau bhaf tnok. Kbe Ait yno fooh re Ait yber kabes yabi tait (Iblis) hasyoh mam anu naa ti te. Tna jõ skabuk Tuhan ranu Yesus Kristus re yatmof anu.
ROM 16:21 Timotius ja ykah bo su ysya jõ. Ait ymah meen kʼanu beta. Tna Lukius, Yason ysya Sosipater mmah meen kʼanu ye. Ana mabo tuuf tiwya raa ro agama Yahudi mfi jõ ye. Menohe mfo refo amu nmo raa ro kro Kristus.
ROM 16:22 Jõ ro tkom aam refo tasom Tertius. Jõ fi raa ro kro Tuhan, tna tmah meen kʼanu ye.
ROM 16:23 Gayus ymah meen kʼanu ye. Raa jemaat mam befo to ja siret skabuk su mam amah rait. Tna jõ, Paulus, mfo refo tjin tsya ait ye. Bi Erastus yamo bendahara kota refo. Ait ymah meen kʼanu. Kwartus tait raa ro kro Kristus sait, ymah meen ye.
ROM 16:24 [Jõ skabuk Tuhan ranu Yesus Kristus re yatmof anu beta. Amin: Mabo oh!]
ROM 16:25 Tna bibi Allah! Bi Ait oh mi yatak yno anu nros smot Yesus matak. Yno mkah Bokyas Moof ro jõ tkyas Kristus Yesus oh meto. Bokyas reto to, tiwya Allah ymyõt bose bau. Yasbrah fee.
ROM 16:26 Menohe Allah saim yawe mfo refo Ait yasbrah oh. Tibyo amu nhar tna mbetoo bo ro tiwya Ait ybis nabi wAit mama mkom. Allah ro yhau yawyos ybis jõ tamo tkyas Bokyas refo kʼraa mana beta. Allah saim jõ tamo tkyas feto afo re kbe ana mhar tna smot Ait. Ana smot tibyo mari bo ro Ait yawe, mbo mno kaket.
ROM 16:27 Jõ skabuk re kbe anu bmat Yesus Kristus tibyo anu bbaut bo yase ro Allah rAit mfo refo mamo snok mam hame wajin! Allah yesait aran yhar bo toni. Amin: Mabo oh!
1CO 1:1 Aam refo mbam kʼjõ, Paulus. Tiwya Allah ytu jõ yawe tamo raabis (rasul) ro Kristus Yesus rAit. Jõ tsya bi Sostenes nmah meen kʼanu. Sostenes tait raa ranu ro ja kro Kristus.
1CO 1:2 Aam refo amu nkom tna tiim kʼanu, raa jemaat ro Allah mam kota ro Korintus. Allah ymat anu nsya Kristus su tibyo Allah yoo anu nmo raa ro ja mno bo wAit sai. Ait ytu anu nmo raa wAit nsya raa magin ro mamo mo kʼYesus Kristus oh to ye. Yesus Kristus tait Tuhan ro ybo anu bsya raa ro kro Kristus beta ro mhau mam woyõ-woya ye.
1CO 1:3 Amu mbewok skabuk Bja Allah, re Ait ysya Tuhan Yesus Kristus matmof anu tna mno re anu nhau nhaf tnok ye.
1CO 1:4 Anu nmo no Kristus Yesus oh. Allah yatmof anu oh. Feto to jõ tayoh asik mase kʼAllah yoyo.
1CO 1:5 Anu nma no kʼKristus Yesus oh. Tibyo Allah yoo bouum ro mase yee kʼjemaat ranu: Yno re anu nhar bo knik-knak kaket, tna yno re anu ntak nkyas bo kaket moof ye.
1CO 1:6 Ait yoo bouum rAit yee kʼanu mi raa mhar mawe bokyas ro Kristus tiwya amu mbewok nkyas kʼanu to bokyas ro mabo.
1CO 1:7 Mfo refo anu nhau ste Tuhan ranu, Yesus Kristus ro kbe yama mun ro ewok. Anu ste Ait yama to, anu nhaf nse bouum (karunia) ro Allah yuumto kʼanu to, aro mabut fee.
1CO 1:8 Tna bi Ait kbe yban anu snok mam tis rau reto. Yban anu afo re anu nros ntak tu. Tna meen ati ro Tuhan ranu, Yesus Kristus yoo safo mana ymit kʼraa to, kbe yawe anu nber safo aro fee.
1CO 1:9 Allah ymen anu oh yawe anu bma biranya bsya Ku rAit, Tuhan ranu Yesus Kristus. Tna bo ro Ait yawe to, kbe ybo yno tu oh.
1CO 1:10 Taja, tme, tao, tano na; raa ro Kloe mawe kʼjõ mawe anu riwai nfa anya. Jõ soh-soh kʼanu mam Tuhan ranu, Yesus Kristus yasom tawe, “Nfa anya ma! Tawe nhau nhaf sau su tna bonaut ranu sau su.”
1CO 1:12 Anu taro nwe, “Jõ fi kro Paulus!” Tna taro nwe, “Paulus fee, jõ kro Apolos!” Tna taro nwe, “Jõ kro Kefas-Petrus!” Tna anu roto taro nwe, “Jõ kro Kristus aran sai!”
1CO 1:13 Anu nno fyi meto? Kristus yetsu rAit sau aran sai! Jõ oh mi raa mame tajat fee! Jõ too riof ro mase tee kʼanu to fee! Raa baptis anu aro to mkah jõ tasom ajõ to fee ye!
1CO 1:14 Jõ hawe bo raa mnaut mawe, “Paulus ja baptis raa mawat afo re kbe ana ksoh kro ait!” Tiwya jõ tesait baptis Krispus ysya Gayus, mbewok aran sai. Tibyo jõ tayoh asik mase kʼAllah.
1CO 1:16 (Tna tiwya jõ tesait baptis Stefanus ysya raa wait ye. Jõ baptis ana weto sai aran.)
1CO 1:17 Mhau raa roto baptis raa. Kristus ybis jõ tkyas Bokyas ro Moof (Injil) rAit sai. Tiwya Kristus yajat mam ara warok afo re raa fri riof ro mase. Tna bokyas reto oh mi bokyas ro matak toni. Jõ hawe bo bokyas ajõ ro moof mi mayõ raa tibyo ana ksoh mama mo kʼKristus. Menohe bo ro Kristus yno reto oh mi kbe mayõ raa mhaf wana to bo ro ati. Jõ thar bo tkyas kaket fee. Ara warok reto au oh mi merif Allah yhaf rAit kaket matak.
1CO 1:18 Raa taro mamo iso ro mkair. Meen Allah yno ana safe mkak. Ana weto mari amu nkyas nwe, “Yesus raa mame yajat mam ara warok afo re kbe raa fri riof ro mase.” Mari feto to, ana mnaut mawe amu wase bo. Menohe anu ro bkai riof ro mase to, bhar bwe bokyas reto to matak toni.
1CO 1:19 Bokom ro Allah mawe fefo: “Raa ro makit maan to, meen Jõ tno re ana mamboi. Bombra ro ana mhar reto to, meen Jõ sibrir marak.”
1CO 1:20 Raa ro makit maan to, Allah yawe, “Ana wase bo.” Raa ro mnaut mawe ana mhar bo kaket tna mamo guru to, Allah yawe, “Bonaut rana to mabuf sai.” Raa ro mhar bo tna hre mkyas iso ro raa mnaut bo to, Allah yawe, “Bo ro ana mhar to mafer aro fee.”
1CO 1:21 Allah yno re raa ro makit maan to, bombra ro ana mhar to, iso ro raa mkai riof to fee. Menohe yno re Bokyas Moof ro Yesus (Injil) ja amu nkyas reto mi merif iso ro raa mamo mo kʼAit tna mkai riof ro mase. Raa ro wase Allah to mnaut mawe amu ro ja nkyas Bokyas (Injil) reto to, raa ro wase bo. Menohe Allah ysan riof ro mase kʼraa beta ro mari Bokyas reto tna mse kʼana mhaf.
1CO 1:22 Mfi bo amu nkyas ara warok ro Kristus to, raa mana ro Yahudi ja mari fee. Ana weto mawe mmat bo hnah wia tna fo ana smot bokyas ramu reto. Tna raa mana ro Yunani mnaut mawe kbe ana mkai Allah mkah bonaut rana sai. Feto to raa ro Yahudi mnaut mawe Yesus tait Kristus rana fee, mnaut mawe bokyas ramu mamyot bo ro ja ana smot fee. Tna raa ro mbam raa mana roto makin to, mnaut mawe ana saso bohar ro ati. He mfe. Tna ana mnaut mawe amu wase bo! He mfe ye.
1CO 1:24 Menohe raa taro Allah ymen yawe, “Nma smot Kristus!” Ana taro to raa mana ro Yahudi ye. Tna Ait ymen raa ro mbam raa mana roto makin ye. Ana weto smot Kristus. Ana mhar mawe Kristus oh mi Allah yatak rAit. Tna ana mhar mawe Kristus oh mi bohar rAit ye.
1CO 1:25 Raa ro tabam sai ana mnaut mawe iso ro Allah yerif re raa mamo mkai riof reto to, iso ro mkair. He mfe. Bo ro ana weto mhar to mabuf sai. Bohar ro Allah reto to mase miwer. Tna raa ro tabam sai mnaut mawe ana mesait to raa ro matak. He mfe. Ana raa ro sne sai. Allah tait raa ro yatak tna raa ro tabam refo aro matak fee.
1CO 1:26 Taja, tme, tao, tano na; nnaut nwe: Tiwya raa mnaut mawe anu nkin nhar bo kebet aran sai. Raa ro wase Allah mnaut mawe anu nkin to raa ro nse fee. Raa ro wase Allah mnaut mawe anu nkin to raa manes fee. Tna fo Allah ytu anu yawe, “Nma smot Kristus!”
1CO 1:27 Menohe Allah ysok raa ro tiwya wase bo to, yawe ana mamo mo kʼAit. Tna yno re ana mhar bo miwrek raa tabam ro ja mhar bo tna mamo mo kʼAllah fee. Yno feto afo re ana ro tabam refo to hrenaut. Tna Allah ysok raa ro ssafo fee to, ytu ana mamo mo kʼAit. Tna yno re ana matak miwrek raa ro ja matak. Yno afo re ana ro hawe mamo mo kʼAit to hrenaut ye.
1CO 1:28 Tna bombra ro ati fee, msya bombra ro ja raa hawe to, bo weto to, bi Ait ysok tna yawe bo weto to bo ro ati meto.
1CO 1:29 Allah yno feto afo re raa safuk ma. Raa taro mawe, “Jõ fi raa ro thar bo. Feto to Allah ysok jõ yawe tamo raa wAit sait.” He mfe. Allah hawe bo raa mkyas feto, bokyas reto to, bokyas ro sre.
1CO 1:30 Bi Ait yesait oh mi yno re anu nhau nsya Kristus Yesus su. Nhau nsya Kristus su tibyo Allah ymat anu yawe anu bfi raa ro mhaf moof ati. Tna Allah yawe anu nhau nno bo wAit sai. Tna Kristus yoo yetsu rAit yfes anu. Feto to Allah yno re bo beta ro anu bhar to, Kristus oh mi sair to.
1CO 1:31 Bokom ro Allah mkyas mawe, “Safuk bombra ro anu nno to ma. Rau ro moof to, nnaut bombra ro Tuhan yno kʼanu sai, tna safuk bibi Ait.” Yeremia 9:24 Rau ro moof to, kbe anu nri bokom ro Allah reto.
1CO 2:1 Taja, tme, tao, tano na; tiwya jõ tama tkyas bo ro Allah yawe kʼanu to tkyas bo reto mkah mai ro moof kaket fee. Tna jõ tkyas bo mfi raa ro ja mhar bo toni to fee ye.
1CO 2:2 Bo ro jõ tkyas kʼanu oh mefo: “Yesus Kristus tiwya raa mame yajat mam ara warok oh.” Jõ tkyas bo ro mase aro kʼanu fee.
1CO 2:3 Jõ tama tinyi to kʼanu to, jõ waa tna tetet thai.
1CO 2:4 Ati reto to, jõ tkyas mfi raa ro mhar bo mbetoo mase fee. Menohe Har ro Tuhan mno re ati ro jõ tkyas to, raa mari tna mawe bokyas ro jõ tkyas to mbam Allah.
1CO 2:5 Har ro Tuhan mno feto afo re anu nhar nwe bo ro jõ tkyas reto mbam bonaut raa sai fee, menohe mbam Allah yatak rAit. Jõ tkyas feto tibyo anu nrok smot Ait.
1CO 2:6 Raa ro kro Kristus taro to bosmot wana matak oh. Tna ati ro amu mbewok hre nsya ana weto to, kbe amu nkyas maja ro Tuhan mase kʼana. Tna bo bawya ro amu nkyas refo mbam kʼAllah, mbam kʼraa ro makit maan mam tabam refo fee. Tna bawya ro amu nkyas reto mbam kʼraa manes ro tabam refo fee ye. Meen ana mkah bohar wana weto to msat marak sai.
1CO 2:7 Tinyi rau to, bombra ro Allah yhar to, Ait ymyõt fares. Tinyi rau Ait yfen tabam refo fefares to, Allah siwyan bohar reto wia oh. Yawe kbe yoo yee kʼanu mam wore wo anu bkai bo yase rAit.
1CO 2:8 Raa manes ro tabam refo, ana mhar bohar reto fee. Mfi bo tiwya ana mhar bohar reto oh to, Tuhan Yesus ro ja anu bibi tait mi kbe ana mfot mame Ait yajat mam ara warok to fee.
1CO 2:9 Raa manes weto wase bohar refo. Bokom ro Allah mkyas mawe fefo: “Meen Allah yno bo ro moof toni kʼraa ro hafri Ait kaket. Bo weto to, raa aro mmat fefares. Tna mari fefares. Tna mhar bo weto fefares ye.”
1CO 2:10 Har rAit mmat sas bombra beta. Mhar bo ro Allah ymyõt fares ye. Mhar tna masbrah bo weto kʼanu raa ro kro Kristus oh.
1CO 2:11 Mfi raa sait ynaut bo mam yhaf mato rait to, raa aro mhar bonaut rait fee. Ait yesait aran yhar bait. Tna raa aro mhar bombra ro Allah ynaut mam yhaf mato rAit fee ye. Har rAit mesait aran mhar bombra ro Allah rAit.
1CO 2:12 Tna Har ro mjin kʼanu bhaf to har ro mbam tabam refo fee. Har ro mbam kʼAllah oh mi mjin kʼanu bhaf ranu to. Har rAit mjin mam anu bhaf ranu afo re anu bhar bombra ro Allah yuumto kʼanu.
1CO 2:13 Feto to bo ro amu nkyas tna mbetoo kʼraa to bohar ro mbam kʼraa ro tabam refo fee. Menohe Har ro Tuhan mjin kʼamu nhaf ramu tibyo amu nhar tna nkyas bohar ro ati mbam kʼAllah. Har rAit oh mi mno re amu nkit wamu maan afo re amu ntai nkyas bohar ro mbam Allah kaket.
1CO 2:14 Raa ro wase Allah to, ana mhar bombra ro mbam Har rAit fee. Anu bkyas bo weto to, ana mnaut mawe anu wase bo. Har rAit mjin kʼana mhaf rana to fee, tibyo ana weto mtai mhar bo ro mbam kʼAllah to fee ye.
1CO 2:15 Menohe anu to, Har rAit mjin kʼanu bhaf wanu, au oh mi anu bhar bo ro mbam kʼAllah weto. Menohe raa taro mhar maja rau ro anu bkyas to fee.
1CO 2:16 Bokom ro Allah mawe fefo: “Awya oh mi yhar Tuhan yhaf msya yakit rAit? Tna awya oh mi ytai ykyas watum kʼAit to?” Yesaya 40:13 Amu fo nhaf sau su nsya Kristus tna nhar bo rAit reto.
1CO 3:1 Taja, tme, tao, tano na; tiwya wore wo jõ tama tmat anu to, tmat he anu to raa ro kro Kristus oh. Menohe bosmot ranu to matak fefares. Tibyo jõ tkyas bo kʼanu mnan fi tkyas kʼraa ro ksoh bo ro tabam sai. Anu nfi ku mees fares.
1CO 3:2 Feto to jõ tkyas maja Tuhan ro msai aro kʼanu fee. Anu nfi ku mees ro mata sis maya sai fares. Anu ntak niit boit nfi raa mabi to fefares.
1CO 3:3 Anu ja ksoh bo ro tabam refo sai fares. Jõ tari he anu taro naam bo raa anya fares. Tna anu nmak nsya raa anya fares ye. Feto to jõ tnaut tawe anu nfi raa ro tabam refo sai fares.
1CO 3:4 Anu taro nkyas nwe, “Jõ fi kro Paulus!” Tna anu taro nwe, “Paulus fee, Jõ fi kro Apolos!” Soh anu nkyas feto to, jõ thar tawe anu nfi raa ro tabam refo sai. Anu nfi raa ro kro Kristus fee.
1CO 3:5 Jõ tsya Apolos fo sryan ro Tuhan wAit sai. Amu mbewok ja nno bo ro bi Ait ybis sai. Ait oh mi ybis amu mbewok nkyas Yesus yasom kʼanu tna re anu nri tna nsam wai kʼKristus.
1CO 3:6 Bokyas ajõ reto to, mfi kake makan sau ro jõ tyum. Tiwya jõ tyum kake makan reto mam anu nhaf mato wanu. Tna Apolos ywyan aya ytu. Menohe Allah Ait oh mi yno re moo to.
1CO 3:7 Raa ro myum tna msya raa ro mwyan aya mtu weto to raa ro ati fee. Allah tait raa ro ati, ro yno re bo moo.
1CO 3:8 Raa ro yyum ysya raa ro ywyan aya ytu to, ana mbewok to mnan anya sai. Mbewok mkah bo mana sau su. Menohe kbe boren ro Allah yaren ana to, aro rait hayah-hayah. Meen ait yaren bo kʼana mamyot bo samyoh aro rait-rait.
1CO 3:9 Amu mbewok nfoh kʼanya tna nkah armato ro Allah rAit to su. Anu, jemaat ro Korintus fo, nnan fi armato ro Allah rAit. Tna anu fo nfi samu ro Allah rAit ye.
1CO 3:10 Allah yoo bouum yee kʼjõ: Ait yno re jõ thar tamo tkyas Yesus Kristus yasom kʼraa kaket re ana mama smot bokyas rAit. Bo ro jõ tno reto mfi jõ sgi samu sau: Tinyi rau to, jõ tati sankaf mros. Tna fo raa roto mama sgi renti. Anu ro sgi renti to, sgi kbik-kbak to ma!
1CO 3:11 Yesus Kristus tait yfi sankaf ro ati. Sgi samu abyõ mam sankaf roto taro to ma!
1CO 3:12 Kbe raa moo bo aro rau-rau makah mama misoh sgi mam sankaf reto to abyõ. Raa misoh sgi amah reto mkah bo ro moof mfi emas, perak, fraa ro moof aro rau-rau ye. Tna taro moo bo ro mkair mfi ara atau bosafom ro ngkaat bo to ye.
1CO 3:13 Meen ayõ ro Tuhan yama to, kbe Ait sanet bo ro raa sait-sait rait yno. Sanet mkah tafoh ro mait. Sanet re yhar soh ait yno bo rait kaket fe mfe a?
1CO 3:14 Meen Tuhan yoo tafoh yuus bo ro raa sgi. Ana taro to mno bo wana kaket wore wo ana mhau mam tabam refo. Bo ro ana mno kbe mberoh mros matak tibyo Tuhan yaren ana.
1CO 3:15 Tna raa taro to, mno bo wana kaket fee wore wo ana mhau mam tabam refo. Bo ro ana mno to, kbe mait mkak beta. Hrowyõ rana to makus. Kbe ana mkai boren aro fee. Kbe ana mabo rana mkai riof, menohe kene wo tafoh mait ana.
1CO 3:16 Nnaut oh: Anu raa magin ro kro Kristus beta to samu ro Allah rAit. Tna Har ro Allah mjin kʼanu nhaf wanu beta.
1CO 3:17 Wore wo Allah yhau to, yuk ro mbau meto. Anu beta to samu ro Allah rait oh meto. Mfi bo raa aro mitrah samu ro Allah reto, kbe Allah yno ana safe mkak ye.
1CO 3:18 Raa ro tabam refo ro mhar bo to, Allah ymat ana tna yawe, “Ana wase bo.” Bokom ro Allah mawe fefo: “Raa ro tabam refo mnaut mawe, ‘Anu bhar bo!’ Ana mawe feto tna mamo mno bo wana mamyot bo ro ana mesait mhar sai. Menohe Allah yno re bo ro ana mawe mno to, mabo fee. Allah yaka boka yse mam iso wore raa mno bo wana mamyot bo ro ana mesait mhar sai.” Ayub 5:13 Tna Bokom ro Allah mawe fefo: “Raa ro mhar bo to, Tuhan ymat bonaut wana tna yawe, ‘Bonaut wana weto to mabo aro fee.’” Mazmur 94:11 Mfi bo raa ro tabam refo fo mnaut mawe, “Anu fo raa ro bhar bo.” Jõ tnaut tawe ana weto sioh ana ai sai. Raa ro mhar bombra ro mbam kʼAllah kaket to, ja raa ro tabam refo mnaut mawe ana wase bo. Nnaut oh: Rau ro moof to, anu nri bohar ro mbam kʼAllah to. Mfi bo anu nno feto, kbe raa ro tabam refo mnaut mawe anu weto wase bo. Menohe Allah ymat anu to, yawe anu raa ro nhar bo. Feto to nitsre raa ro tabam refo mnaut feto rof!
1CO 3:21 Feto to bibi raa sai toni to ma. Nwe raa sait yhar bo toni tibyo anu nwe kro-kro ait to ma. Bombra beta to mhau mkah merif mafer ro moof kʼanu, raa ro Allah wAit.
1CO 3:22 Jõ tsya Apolos tna tsya Kefas-Petrus ye, amu nbo tuuf nkyas watum mkah merif mafer ro moof kʼanu. Tna bo bawya ro anu nkai mam tabam refo; mam wore anu nhau fares ye, tna wore anu aro nhai ye, tna bombra ro meen mama ye to, Allah yno re bo weto beta merif mafer ro moof kʼanu ye:
1CO 3:23 Tna anu weto beta to raa ro Kristus wAit. Tna Kristus tait Ku ro Allah rAit.
1CO 4:1 Jõ tsya Apolos nmo sryan ro Kristus. Tna bi Allah ysan bohar rAit kʼamu mbewok nbo yawe amu mbewok nmo mbetoo bohar rAit reto kʼraa renti. Bohar reto to, raa ro tabam refo wase fares.
1CO 4:2 Mfi bo raa mawe moo bo wana mee kʼraa taro sait yse wea to, ja ana mamo saso raa sait ro yhaf makin fee. Ja ana saso raa ro kbe kmot bo reto kaket.
1CO 4:3 Jõ tari he anu nnaut nwe jõ tno bo ro mkair. Nwe jõ srau ajõ ewok tama tkah armato ro Tuhan. Jõ tnaut mamo snok mam wore anu nkyas weto fee. Jõ tesait wase thaf ajõ ai!
1CO 4:4 Tuhan yesait aran oh mi Raa ro hre susai tna ymat sas bo ro jõ tno. Jõ tnaut tawe thaf ajõ to moof sai. Menohe bo ro jõ tesait tnaut mam thaf mato ajõ to bo ro ati meto fee. Bo ro Tuhan ynaut yawe to, rau ro ati oh meto.
1CO 4:5 Feto to, anu nesait nuun boun kʼanya wia to ma. Nhau meen Tuhan yesait yama yoo safo yerif raa sait-sait tiwya yno to. Bi Ait yhar bo beta ro ja raa mmyõt wai to. Yhar bo ro raa mnaut mam mhaf mato wana ye. Meen Ait yama yasbrah bo beta ro mhau mam raa mhaf mato wana beta ye. Ati reto kbe Allah bibi raa sait sait ro yhaf moof.
1CO 4:6 Taja, tme, tao, tano na; ti tinyi raa sait yawe, “Nno bo niwrek maja ro Allah yawe kʼanu to ma.” Tna jõ ksoh betoo u sai kʼanu. Au oh mi jõ tkom bofret riwai reto kʼanu tawe, “Apolos ysya jõ mbewok nkah armato ro Allah su.” Nnaut oh; raa ro mnaut mawe raa sait yase yiwrek raa taro to, ana weto miwrek maja ro Allah oh meto.
1CO 4:7 Anu to raa ro Allah yfen beta. Anu taro ja nmat raa taro nwe, “Nyõ to raa ro ati fee!” Mkair feto! Bawya oh mi anu sait safuk yawe ait yase yiwrek raa taro to! Bombra beta ro anu nkai to mbam kʼawya?
1CO 4:8 Anu taro ja nnaut sre-sre nwe, “Amu fo bobot oh. Feto to amu hawe nri watum ro anu, raabis ro Allah ja nkyas u to ma! Amu fri bobot mninon oh. Amu nnaut bawya u? Amu nfi raja oh!” Mfi bonaut ranu reto mabo oh kbe amu simaut mase nsya anu ye. Tna amu ksoh kro anu to, bsen bmo raja bbo raa ye! He mfe.
1CO 4:9 Jõ tnaut tawe Allah yno re raa ksoh mama horit amu, raabis (rasul) wAit. Raa horit amu mfi bo amu to raa ro safe mkak. Tna raa msya malaikat mawe mama mmat bo ro mbtek mai kʼamu.
1CO 4:10 Amu fo mur-mur nri Kristus tibyo raa taro mnaut mawe amu fo raa ro wase bo. Anu jemaat ro Korintus to, anu baro ja tawyõ bo nwe anu to raa ro kro Kristus tna nhar bo. Ja anu nnaut nwe amu fo raa ro ssafo fee. Tna anu safuk nwe anu raa ro ja ntak. Ja anu nnaut nwe amu fo raa kair sai tna ja anu safuk nwe anu to raa ro manes.
1CO 4:11 Ja amu nhai sre, nhai sbit, tna ratan wamu to ro mrat mam amu netsu wamu sai. Tna raa mai amu. Tna wore amu njin to aro kaket fee. Tna amu nmo ninya sai mam tabam.
1CO 4:12 Tna amu ja mur-mur saso boit wamu nesait sai. Soh raa mamus amu to, amu nno bo moof kʼana sai. Tna soh raa sikowah amu to, amu kanyin sai.
1CO 4:13 Mamo snok mfo refo to, raa mkyas-kas amu to, amu kmo ana si fee. Amu nkyas kʼana mkah nhaf ro sneh sai. Tna raa mnaut mawe amu fo nfi bo ro mnis ja raa mbeak makus sai.
1CO 4:14 Jõ tkyas watum riwai reto kʼanu, tawe mti hrenaut kʼanu fee. Tno afo re kbe anu nnaut, tna kaket anu. Anu to nfi ku wojõ ro jõ ksoh.
1CO 4:15 Guru ro mbetoo bo ro Kristus kʼanu to magin. Menohe jõ oh mi tama tna tkyas Bokyas ro Yesus kʼanu tatim wia tibyo anu nhaf smot Kristus Yesus. Feto to jõ fi tfi anu nja ranu. Jõ fi anu nja sait aran.
1CO 4:16 Reto oh mi jõ tkyas watum reto tawe, “Anu nmat bo ro ja jõ tno to, tna anu kro nno ye.”
1CO 4:17 Ja jõ tamo iso ro Kristus kaket. Reto oh mi riwai jõ tbis Timotius yamo yo kʼanu: Kbe ait ye ykyas iso ro ja jõ tamo reto kʼanu re anu ne nnaut u. Timotius ynan fi ku ajõ ro ksoh. Ait tait ja mur-mur kro Kristus. Kbe ait snok kota ro Korintus teto tna ykyas iso ro Kristus kʼanu. Bokyas reto ja jõ tkyas woyõ-woya jõ tamo, mam jemaat magin.
1CO 4:18 Jõ tari he anu taro safuk nwe anu to raa ro nhar bo. Ana weto mnaut mawe, “Kbe Paulus yama u yo kʼanu fee.”
1CO 4:19 Raa ro mhau mam raa mana ro Allah yamo Raja ybo to, ja anu bhar ana. Ja bo ro ana mno to, ana mno mkah tak ro Allah rAit. Raa roto taro ja mkyas mkah masoh sai. Bo ro ana mno to, mkah matak rana sai. Feto to, kbe jõ tama fooh to kʼanu, soh Tuhan yiserar tamos ajõ miyõ rere. Tama tmat anu ro safuk weto. Tna kbe thar soh anu ja nno bo nkah tak ro Allah, fe anu ja nno bo nkah tak ranu nesait sai.
1CO 4:21 Anu ksoh ranu sai: Mfi bo anu nno bo ro moof to, kbe jõ tama tkyas bo kʼanu mkah thaf ro sneh. Tna mfi bo anu beroh nno bo ro mkair weto kbe jõ tama tkyas watum kʼanu mkah kmo.
1CO 5:1 Jõ tari he raa ro jemaat ranu sait ja yaus yaja yfain. Bo ro ait wyahte reto to, mkair toni! Ja raa ro wase Allah to, ana hawe bo ro mnan feto mno. Fyi re raa ro kro Kristus sait yasen yno bo feto!
1CO 5:2 Fyi re anu nsen safuk nwe, “Amu raa to nno bo moof!” Anu hrenaut tna sraujin fea! Raa ranu sait yno bo mkair wyahte to fyi re anu nbe ait nwe yhau ysya anu? Rau ro moof to, anu nikyak ait frok ybam jemaat ranu too!
1CO 5:3 Jõ tabo fo thau fari tsya anu menohe thaf ajõ fo mrat msya anu. Jõ thau to tnaut anu yoyo. Jõ thau mam tefo to, jõ too safo mana tse kʼraa retait oh.
1CO 5:4 Mam Tuhan Yesus yasom rAit to, jõ tbis jemaat ranu tawe anu nmo berur siret su tna nkyas safo reto. Siret su tna nno bo mnan mfi bo jõ tsya anu hre su ye. Tna kbe Tuhan Yesus yatak rAit yatam anu ye.
1CO 5:5 Jõ tbis anu tawe, “Noo safo mana nmit kʼait retait oh! Tufrok ait ybam jemaat ranu reto! Tna nsan ait kabes! Nsan ait kabes yabi (Iblis) re kbe bo mkair mbtek mai kʼait. Soh yetsu rait ro masmamo marak to, kbe yamos rait mkai riof mam ati ro Tuhan yama.”
1CO 5:6 Anu ja safuk nwe, “Amu raa ro nno bo moof.” He mfe. Anu nmo sre. ⌞Raa ro jemaat ranu sait yhau yno bo ro mkair fares, menohe anu sayõ rof sai! Nno feto ma!⌟ Anu nhar bofret refo fe mfefares a? Raa fret bo mawe: “Ragi kebet to, raa mno tepung to mase.”
1CO 5:7 Tufrok raa retait ybam jemaat ranu mnan fi raa ro Yahudi ja beak ragi wana wore ana makyõ Korat ro Paskah. Tufrok ait retait fooh re kbe anu to nhau noof. Tna kbe iro ro ait yno to mbet anu fee! Nnaut raa ro Yahudi: Korat ro Paskah to, ja ana ktan domba. Ana ktan domba to mno tibyo ana mkai riof. Menohe anu raa ro kro Kristus to bnaut bwe Kristus tait tiwya raa mame yajat. Kristus raa mame yajat tibyo riof ro mase mama kʼanu.
1CO 5:8 Nma, anu simaut mnan mfi bo ja raa simaut wore wo ana makyõ korat reto. Tna nitsre kmo msya iro ro ja raa mno to. Beak iro makus mfi bo raa ro Yahudi ja beak roti ro raa mno mkah ragi to makus ye. Tna anu bmo raa ro ja srau makin fee. Bmo raa ro bhaf wanu to moof ati.
1CO 5:9 Aam ro tiwya jõ tkom tiim kʼanu to tawe, “Anu to niranya nsya raa ro maus-as bo to ma.”
1CO 5:10 Au oh mi jõ bhah anu tawe, “Niranya nsya raa ro kro Kristus tna ja maus-as bo to ma!” Raa ro wase Tuhan fares to mawat toni. Tna ana weto to ja soo oh maus-as bo, tna masmamo, besruf raa, tna smot kabes fares sai. Woyõ-woya anu raa ro ja kro Kristus nmo mam tabam refo to, raa ro mimara mboh to mhau mam wore weto ye. Kbe anu fri ana tna nkah bo nsya ana su fares.
1CO 5:11 Jõ tkom aam refo tiim kʼanu tawe, “Raa mawat mkyas mawe ana mamo raa ro kro Kristus oh. Menohe ana taro to maus-as bo fares, tna masmamo, tna smot kabes fares, tna mkyas-kas raa, tna bisir-basar, tna besruf raa. Raa weto oh mi jõ tawe wa kʼanu tawe, ‘Niranya nsya ana weto ma!’” Raa ro mkyas mawe ana raa ro kro Kristus menohe ja mno bo ro mkair to, tawe anu niranya nsya ana weto ma. Tna hre niit boit su nsya ana weto ma!
1CO 5:12 Jõ fi tase re tse srah kʼraa ro wase Tuhan to fee! Meen Allah yesait aran ymit safo mana kʼana weto. Menohe raa ro kro Kristus to, tbis anu tawe, “Raa ro jemaat ranu to anu nesait betoo srah wanu kʼanya!” Bokom ro Allah to mawe bau fefo yum oh: “Nikyak raa ro mber safo to frok mbam jemaat ranu.”
1CO 6:1 Anu raa ro Allah wAit to, nkyas safo to, nno kaket. Mfi anu sait yno safo mai kʼanu roto sait to, nmo no kʼraa ro wase Tuhan tna nwe ait hre susai to ma! Jõ tawe kʼanu tawe, “Anu saso raa ro Allah wAit sait re kbe ait hre susai tna ymat sas safo ranu reto.”
1CO 6:2 Nnaut oh: Meen anu raa ro Allah wAit to meen bkyas safo raa ro tabam refo beta. Soh meen anu btai bkyas safo wana weto to, mfo refo anu besait btai hre susai bkyas bo sre maku ro raa wanu aro mno fea! Ja bo ro ana mno mkair to bo ro samyoh fee.
1CO 6:3 Nnaut oh: Meen anu to btu safo ro malaikat aro mno to ye. Safo ro ja raa mno mam tabam refo to mase fee. Anu bhar bkyas safo weto saah. Bo samyoh fee!
1CO 6:4 Jõ tawe kʼanu tawe, “Mfi bo raa wanu aro mno bo ro mkair to, anu nesait hre nkyas bo reto. Saso raa manes ro ja kro Kristusatau raa kinyah wanu ro ja kro Kristus sai. Ana mbewok ye mhar bo mnan si re kbe hre susai mtu srah ro raa wanu aro mno to.”
1CO 6:5 Anu nsis nhar bo. Feto to anu nesait nisoh bo mkair ro anu aro nno to! Menohe ja anu nno feto fee. Tibyo jõ bhah anu, afo re anu hrenaut!
1CO 6:6 Jõ tari he anu raa ro kro Kristus to, ja nmo no kʼraa ro wase Tuhan tna ait hre susai ykyas bo mkair ro anu nno. Jõ tari feto tna hawe. Anu nno bo fyi meto!
1CO 6:7 Rau ro moof to, anu nisoh niranya fooh. Menohe anu mbrir-brar mam jemaat ranu fares. Bo ro anu nno reto to mkair. Rau ro moof to, mfi bo raa wanu mno bo mkair mai kʼanu tna besruf anu to, ska si to ma! Ana mno feto rof sai, tna anu kanyin sai.
1CO 6:8 Menohe jõ tari he anu ja besruf anya tna nno bo mai kʼraa anya ro ja kro Kristus!
1CO 6:9 Nnaut oh! Sioh anu ai to ma! Raa ro ja mno-na bo to, meen mamo mhau mam sawro ro Allah yamo Raja ybo to fee. Raa ro maus-as bo, msya raa ro smot kabes, msya raa ro mwyah, msya raa sme ro ja haberek mnan fnya tna soo bo maus,
1CO 6:10 msya raa ro msyõf bo, msya raa ro masmamo, msya raa ro bisir-basar, msya raa ro mkyas-kas raa, tna msya raa ro besruf raa: Ana weto beta to, meen mamo mhau mam sawro ro Allah yamo Raja ybo to fee.
1CO 6:11 Tiwya anu baro nno bo mfi feto ye. Menohe Yesus yyon iro wanu oh. Tna yoo anu ysan kʼAllah re nno bo wAit sai. Tibyo Allah ymat anu tna yawe anu nfi raa ro mhaf moof ati sai. Tuhan Yesus Kristus yno feto mkah Har ro Allah matak rAu.
1CO 6:12 Jõ tari he raa ro kro Kristus taro ksoh mno-na bo fares. Tna ana mkyas mawe, “Soh watum aro mawe wa bo ro tno reto fee; kbe tno bo bawya sai ro jõ ksoh!” Menohe nnaut nwe bombra taro to mafer marak. Watum ranu mkyas mawe bo aro mbau kʼanu fee. Feto to jõ saah tno bombra weto beta; menohe jõ hawe bo tno. Nno be bo ro mkair aro mbo jõ.
1CO 6:13 Anu taro nwe, “Allah yfen anu bhaf wanu tna yno re anu biit bo. Tna yfen boit re kbe raa mait. Menohe anu bhaf wanu msya boit ro anu biit to, meen Allah yno sasyoh sai.” Anu saak-saak anu feto nwe, “Nno bo bawya ro anu ksoh sai.” Anu nwe fyi meto! Bokyas ranu reto mnan anya msya bokyas sre ro kro refo: “Tuhan yfen anu betsu wanu to re anu bus-as bo bsya fnya to saah.” He mfe! Tuhan yfen betsu wanu to re anu bno bo ro Ait ksoh. Tna Tuhan yatak ybo anu betsu wanu reto ye.
1CO 6:14 Tna meen yno anu betsu wanu refo me mrok masen. Yno mkah yatak rAit mnan fi tiwya Ait yno Tuhan Yesus ye yrok yasen to.
1CO 6:15 Nnaut oh: Anu netsu wanu to Kristus yetsu rAit jaro oh meto. Anu aro nkah netsu ro Kristus rAit reto to, njin nsya fnya ro ja mwyah to ma!
1CO 6:16 Nnaut oh: Raa sait ysya fnya ro ja mwyah sau mjin su to, mbewok mrat mkah kwiyan sau. Bokom ro Allah mawe fefo: “Raa ro yjin ysya fnya to, mbewok mrat mkah kwiyan sau.”
1CO 6:17 Awya ro yrat ysya Tuhan to, kbe Har ro Tuhan to mrat msya raa retait matak tu oh.
1CO 6:18 Feto oh mi jõ tawe kʼanu tawe, “Bitsre wyah to mbeak fari!” Iro roto taro to ja mno raa metsu wana mesait ai mkair to fee. Menohe raa ro yaus-as bo to, yno iro ro sikowah yetsu rait yesait ai oh meto.
1CO 6:19 Sorni bo refo to ma: Anu netsu ranu to amah. Tna Har ro Tuhan ja mjin mam amah weto. Har ro Tuhan mhau mam anu nhaf mato wanu. Tibyo anu netsu ranu to, bo ranu nesait aran nbo to fee.
1CO 6:20 Anu fo Allah bain mhai oh mkah mabyoh ro msai. Anu fo raa ro bi Ait rAit. Feto to anu nkah netsu nhaf wanu to nno bo ro moof afo re raa mmat tna bibi Allah.
1CO 7:1 Riwai anu nkom aam tiim kʼjõ tna ntu bo kʼjõ nwe, “Paulus; nyõ nkyas watum kʼamu tna betoo nawe soh amu, raa ro kro Kristus nwe nmen fnya to fyi?” Tna jõ tawe kʼanu tawe, “Soh raa yawe yhau semana sai bait feto to moof.
1CO 7:2 He raa mawat mhau muut bo maus fee. Tibyo ana maus-as bo sai. Rau ro moof to fefo: Fai sau to msya raa sait tna bi sait ymen fai sau; tna kbe ana mbewok to mhau su.”
1CO 7:3 Raa sme ysya yfain to ana mbewok mjin su soo oh. Soh anu sait ksoh yjin su ysya yfain to, kbe fai au miwana maa ma. Tna soh anu sau ksoh njin su nsya naa to, kbe ait yiwana anu ma ye.
1CO 7:4 Nno be fai sau mkyas kʼmaa mawe, “Jõ tetsu ajõ fo bo ajõ kar!” Raa ro au msya to, au metsu rau to bo rait oh. Tna nno be raa sme sait ykyas kʼyfain yawe, “Jõ tetsu ajõ fo bo ajõ kar!” Fnya ro ait yoo to, ait yetsu rait to bo rau oh.
1CO 7:5 Anu nwe wa kʼanya ma. Anu mbewok njin hayah to ma. Anu mbewok ja nsya anya njin su oh. Menohe soh anu mbewok nnaut nwe njin hayah ti baro re anu skabuk Tuhan to, anu mbewok hre su nkyas wia, tna anu njin hayah ti baro. Njin hayah ti baro feto tna anu mbewok hah ne nsya anya u. Nno feto afo re anu mbewok srau oot-oot toni to ma. Tna kbe kabes yabi (Iblis) yiwro anu re anu nus-as bo to ma.
1CO 7:6 Bo ro riwai jõ tkyas weto to, tawe tbis kʼanu fee. Tkyas watum ajõ sai.
1CO 7:7 Tnaut tawe rau ro moof to, raa mhau semana mfi jõ fefo sai. Menohe raa sait-sait fri bo mbam Allah to aro rait hayah-hayah. Taro to mawe moo fnya, taro to mawe ana moo fnya fee.
1CO 7:8 Tna jõ tkyas watum kʼraa ro moo fnya fefares to, tna kʼfnya ro msya raa fefares ye, tna kʼsemit to ye tawe, “Rau ro moof to, anu to nhau kar nfi jõ.
1CO 7:9 Soh anu aro nuut fee to, anu nsya anya rof. Soh mfe to, kbe anu srau oot-oot tibyo anu mbtek mam iro.”
1CO 7:10 Tna jõ tbis fnya ro msya raa oh to tawe, “Tuhan ysi bo kʼanu yawe, ‘Anu aro to sikba naa tna nhau hayah to ma!’
1CO 7:11 Soh fnya sau sikba maa mamo to, au me mamo msya raa roto to ma. Mfi bo au mesait hawe mhau kar to, au hah me u msya raa rau riwai sai.” Tna tbis raa sme ro yoo fnya oh to, tawe, “Anu aro hawe fnya wanu tna nbis frok to ma!”
1CO 7:12 Tna jõ tkyas watum ajõ kʼanu taro to tawe, “Mfi bo anu, raa ro kro Kristus sait, tiwya noo fnya ro kro Kristus fee, tna soh au reto mawe mhau msya nyõ matak to; kbe nyõ nbis au frok to ma!” (Watum riwai reto mbam kʼjõ sai, Tuhan ybis fee.)
1CO 7:13 Tna mfi bo anu fnya ro kro Kristus aro tiwya nsya raa ro kro Kristus fee, tna soh ait retait yawe yhau su ysya nyõ to tawe kʼnyõ tawe, “Nyõ nako ait yakus ma!”
1CO 7:14 Soh raa ro kro Kristus fee yoo fnya ro ja kro Kristus oh, au misti Allah yno bo ro moof kʼau maa ye. Tna soh fai ro kro Kristus fee msya maa ro kro Kristus oh, ait yisti Allah yno bo moof kʼait yfain ye. Ana mno feto tna ku wana ro tiwya mkair to, Allah yno bo ro moof baro kʼana ye.
1CO 7:15 Fyi rau re anu fnya ro kro Kristus nhar raa ro anu nsya to, kbe ykai riof ro mase ye fe mfe a? Tna ro sme to, fyi rau re anu nhar fai ro noo to, kbe mkai riof ro mase ye fe mfe a? Menohe Allah yawe anu, raa ro kro Kristus to siko nhau nsya raa tna niranya sai. Feto to mfi bo fai ro kro Kristus fee sau mako maa ro kro Kristus tna mawe sikba ait to anu nbe au to ma. Tna mfi bo raa ro kro Kristus fee sait yako yfain ro kro Kristus to yawe sikba fai au to anu nbe ait to ma.
1CO 7:17 Tiwya Tuhan saim tna yno re anu raa fo aro bno bombra wanu to aro rau-rau. ⌞Raa taro mamo bobot tna Tuhan yno re raa taro mamo awe. Tna Tuhan yno re raa taro mhau semana bana tna taro to yawe moo fnya.⌟ Tna mfo refo Allah ymen anu nmo raa ro kro Kristus oh. Tna jõ tawe kʼanu tawe, “Anu aro yhau yno bombra rait mnan si bo bawya ro tiwya Allah ysan kʼait yno. Ybo yno renti.” Bo refo ja jõ tkyas mam jemaat aro-aro beta.
1CO 7:18 Soh anu aro raa ro Yahudi tna tiwya raa sunat anu oh to, tna fo Allah ymen anu nmo kro Kristus to; mbau a, anu netsu ranu mhau feto oh. Tna soh anu aro to, raa sunat fefares to, tna fo Allah ymen ait yamo kro Kristus to, anu saso raa sunat ait to ma.
1CO 7:19 Raa mana taro to, bo mafa rana to ja raa sunat ku sme wana. Tna raa mana taro to ja sunat ku sme rana to fee. Bo mafa raa mana taro ja mno feto to bo ro ati fee. Rau ro ati to anu nri bo ro Allah ybis kʼanu tna nbo nno.
1CO 7:20 Rau ro moof to, anu aro nhau nkah bo wanu mnan mfi bo bawya ro tiwya tinyi rau anu nno wia wore wo Allah ymen anu nma kro Kristus.
1CO 7:21 Anu taro to, ati ro anu nma kro Kristus to, nmo sryan boh wia oh. Sraujin bo reto ma. Nhau nno bo ro bobot wanu mbis to renti. Menohe mfi bobot yawe bitsre anu sait yawe, “Frok namo nno bonyõ sai.” Feto moof toni, nyõ snok oh!
1CO 7:22 Tna jõ tawe kʼanu ro ja nmo sryan ro bobot fares to tawe, “Simaut oh! Nnaut nwe ati ro Tuhan ymen anu nmo kro Ait to, Tuhan yno tibyo anu nmo sryan ro ja kabes mbo to u fee!” Tna jõ tawe kʼanu raa ro bobot tawe, “Anu nmo kro Kristus to, anu nmo sryan rAit!”
1CO 7:23 Allah fi bain anu mhai oh. Ait bain anu mkah mabyoh ro msai oh. Mfo refo Allah ybo anu. Feto to nri Ait abyõ raa ro tabam refo.
1CO 7:24 Tao, tano na; tiwya tinye wore wo Ait ytu anu nmo kro Kristus fefares to, anu aro sait-sait ykah bo hayah-hayah ye. Tna mfo refo anu kro Kristus. Rau ro moof to, bo ro tiwya anu nkah to, nhau nkah renti sai.
1CO 7:25 Tna fo jõ tkyas raa sme msya fnya ro msya anya fefares to baro kʼanu: Bo ro anu ntu reto to, jõ tari bokyas mbam Tuhan fefares. Bo ro jõ tkyas fo mbam kʼjõ sai. (Tuhan yatmof jõ yno re jõ thar bo. Feto to nri bonaut ajõ fo:)
1CO 7:26 Mfo refo to wer ro mkair toni mam kota ranu. Feto to jõ tkyas watum refo tawe, “Nhau nfi ja anu nhau to fares:
1CO 7:27 Anu ro nmen fnya oh to, nhau nsya fnya wanu fares. Hawe fnya wanu ma. Tna nbis au frok mamo mhau hayah to ma. Tna anu ro nmen fnya fefares to, saso fnya noo fooh to ma.”
1CO 7:28 Ana ro msya anya oh to ja masom bo ro samyoh mam tabam refo. Tna jõ hawe bo anu nsom bo ro samyoh. Au oh mi jõ tkyas watum ro riwai reto kʼanu. Raa ro mmen fnya oh to, bo ro ana mno reto to, mkair fee. Tna fnya ro msya raa oh to, bo ro ana mno reto mkair ye fee ye.
1CO 7:29 Tao, tano na; ayõ aro u fee oh. Mfo refo anu ro tiwya noo fnya oh to, tawe anu to nhau nnan mfi bo anu noo fnya fefares.
1CO 7:30 Tna anu ro sraujin tna nwia to, nnaut nwe, “Ayõ aro u fee re kbe jõ hre tawia sai.” Tna anu ro simaut to, nnaut nwe, “Ayõ aro u fee re jõ hre tasah sai.” Tna anu ro nse bo mawat to, nnaut nwe, “Bo wojõ wefo to, kbe mhau kʼjõ kait fee.”
1CO 7:31 Tna anu ro nkah bo to, nnaut bo ro anu ja nno mam tabam refo toni to ma. Nno be kbe bo ro tabam refo mbo anu matak. Bo ro anu bmat mam tabam refo fo kbe msat marak beta.
1CO 7:32 Jõ hawe anu sui toni nno bo ro tabam refo. Raa ro ymen fnya fefares to, kbe ait ynaut bo ro Tuhan sai. Yhau rero yno bo ro Allah ksoh.
1CO 7:33 Menohe raa ro yoo fnya to, srau rait ynaut bo ro tabam, yhau yno bo ro yfain ksoh.
1CO 7:34 Kbe ait srau ewok. Mnan feto ye, fnya ro msya raa fefares to rero mno bo ro Tuhan ksoh sai: Au mhau rero ti wawa mnaut Tuhan tna mno bo ro Tuhan ksoh. Ro msya raa oh, ja sui mno bo ro maa ksoh.
1CO 7:35 Jõ tkom bo ro riwai reto tawe tifah anu fee. Tkom afo re anu nhau noof, tna nhafri Tuhan to kaket, srau ewok fee.
1CO 7:36 Tna mfi bo raa sait ykir fnya sau, tna ait yhau yut mkah bo yaus fee, ro moof to, ait yoo au. Ait yoo au to iro meto fee.
1CO 7:37 Tna mfi bo raa sait kaket ait tna ksoh yhau bait semana sai, bonaut rait reto to moof ye. Ait yoo fnya reto ma.
1CO 7:38 Feto ait sait ro yoo fnya to yno bo moof. Tna raa ro yoo fnya fee; ait yno bo moof toni.
1CO 7:39 Tna jõ tawe kʼfnya ro msya raa oh to tawe, “Nhau nrat nsya raa wanu oh.” Tna soh meen maa yhai to, au mhau mrero me msya raa rouu ro ja kro Kristus ye; reto to au ksoh rau sai. Au me msya raa ro kro Kristus fee to ma.
1CO 7:40 Menohe tkyas watum refo kʼfai ro maa yhai oh to, tawe, “Soh anu ne nsya raa rouu fee; kbe anu nhau moof sai banu.” Tna tnaut tawe watum ro jõ tkom kʼanu refo to mbam Har ro Allah.
1CO 8:1 Tna fyio jõ tkyas kak ro ja raa moo msan kʼberhala wia. Tkyas bo reto baro kʼanu: Anu beta to raa ro nhar bo oh. Tna jõ tawe kʼanu tawe: “Kaket anu; re kbe bo ro anu nhar reto mno re anu safuk anu ai to ma.” Raa taro to safuk ana ai mawe ana mhar bo toni. Bohar ro ja ana safuk reto to, ja tubat raa taro to fee. Nnaut nwe: Anu natmof raa anya to bo ro ati. Iso reto oh mi anu tubat raa anya to.
1CO 8:2 Mfi bo raa sait tait safuk tna ynaut yawe, “Jõ fi thar bo.” Ait retait yhar bo ro ati fefares.
1CO 8:3 Raa ro ja hafri Allah to, ana weto oh mi raa ro Allah yhar.
1CO 8:4 Kbe anu, raa ro kro Kristus nbo kak ro raa riwai moo msan kʼberhala wia to fe mfe a? Berhala ro raa mfen to, anu bhar bwe berhala weto to Allah meto fee. Allah yesait aran yum. Allah roto aro magin fee.
1CO 8:5 Raa taro smot bombra aro rau-rau ro mhau mam tabam refo tna mam ayoh ye. Bombra ro ja raa smot msya kabes aro ro mbo raa to msis. Tna raa taro mari kabes weto mnan fi 'tuhan' rana.
1CO 8:6 Menohe anu bhar bwe Bja ranu Allah tait yesait aran yase tna yatak yum. Tiwya Ait yfen bombra beta. Tna anu bhau mam tabam refo mkah bo bbaut Ait. Tna anu bhar bwe Yesus Kristus yesait aran tait Tuhan ro ybo anu. Yesus yesait yfen bombra beta mkah Allah yatak rAit. Tna Yesus yatak rAit reto oh mi mno re anu bhau baam mam tabam refo fo.
1CO 8:7 Menohe bo reto to, raa taro to wase fares. Tiwya ana weto mamo kro Kristus fefares to, ana smot berhala weto ye. Tna ana weto mnaut mawe kak ro raa moo msan kʼberhala to mbau. Ana mnaut feto fares. Tna mfi bo ana weto mnaut mamo-me fares menohe mberoh mabo kak reto to, ana mnaut mawe ana mno iro meto.
1CO 8:8 Boit aro ja misoh iranya ranu bsya Allah to fee. Tna boit aro ja mno re iranya ranu bsya Allah to mkair fee ye. Tna mfi bo anu bhau biit boit aro to, bo ro bno feto to misoh iranya ranu bsya Allah to fee ye.
1CO 8:9 Anu fo boo bo bawya-bawa biit sai saah. Menohe raa taro to, ana mnaut mamo-me fares. Feto to kaket anu afo re bo ro anu ksoh bno to mno re raa taro mbtek mam iro fee. Bo reto to, bo ro ati.
1CO 8:10 Anu weto, taro smot Yesus kaket matak oh. Tna taro nhaf smot Ait matak fefares. Mfi bo anu taro ro nhar bo to nmo twok mam samu ro berhala sau tna hre niit bo to, tna raa sait yamo twok to, kbe fyi? Mfi bo ait ro yama retait ynaut mamo-me fares tna ymat bo ro anu nno to, kbe ait yait boit reto ye.
1CO 8:11 Kaket anu! Soh raa ro yhaf rait smot Yesus matak fefares ymat he nyõ nait bo reto to, bo ro nyõ nhar tna nno reto kbe tko ait retait tibyo ait ynaut yawe yno iro. Nno be anu sait yisti meto. Kristus Ait tiwya yajat afo re ana weto mkai riof ye.
1CO 8:12 Anu ja biit bo bawya-bawa sai saah. Tna raa taro mamo kro Kristus oh menohe ana mnaut boit ro mait mamo me fares. Mfi bo anu sait to beroh yait bo bawya sai wore raa ro ynaut mamo-me fares to hre ye, fyi? Nyõ ntko ait re yno bo ro ait ynaut yawe mkair to, nyõ nesait nno iro meto. Nyõ nno iro mai kʼait retait. Tna nyõ nno iro mai Kristus ye oh meto.
1CO 8:13 Feto to jõ hawe bo tko raa ro kro Kristus yabo kak ro ait ynaut yawe mbau to. Nno be jõ tisti re ait yno iro. Mfi bo tafoh ajõ sait waa yabo kak ro raa msan kʼberhala wia to, kbe jõ tabo kak u fee saut.
1CO 9:1 Raa taro msi mawe jõ kro tno bo mafa rana. Menohe bo mafa wana weto mbo jõ matak fee. Jõ fi raa ro ana mbis fee. Jõ fi raabis (rasul) ro Tuhan rAit. Tiwya jõ tmat Yesus to mkah tasu ajõ. Tna ati ro jõ tama tkyas Bokyas ro Yesus kʼanu mnan fi Tuhan ybis to anu haberek tna nmo kro Kristus. Feto to anu nhar nwe jõ fi raabis ro Tuhan tu oh. Menohe raa taro mkyas mawe jõ fi raabis ro Tuhan fee.
1CO 9:3 Raa taro hafrah jõ. Feto to jõ tkyas bokyas refo tawe saak wa jõ:
1CO 9:4 Jõ tsya Barnabas, amu mbewok fo raabis ro Tuhan. Feto to rau ro moof to, anu noo boit nee kʼamu niit sai.
1CO 9:5 Tna raabis ro Tuhan roto taro ksoh mmen fnya to, tna wore wo ana mamo to, au nkro su msya ana ye saah. Raabis taro to mno feto. Tna Yesus yao na ro tis taro ja mno mfi feto ye. Tna Kefas-Petrus tait yno mfi feto ye.
1CO 9:6 Raabis taro to ja ana mkah armato wana u fee. Ana msui mkyas watum. Tna raa mawe moof meto. Menohe jõ tsya Barnabas to, ja anu nisoh nmat amu kaket fee. Tibyo amu mbewok nesait saso boit wamu ro niit to kar sai.
1CO 9:7 Ja raa sbe ro mamo mafa msya raa mana roto taro to, aban mana ro ybis ana mamo to, kbe ait yoo boren yaren ana fea! Tna mfi bo raa sait yyum anggur mara mam armato rait to, meen anggur mara reto make to, kbe bi ait yait anggur make reto taro fea! Tna raa ro ja yhau kmot domba to, ait ksoh rait yoo sis maya ro domba weto yata sai!
1CO 9:8 Bo mafa weto to, ja raa mno. Tna Watum ro mbam Allah mkyas mnan anya msya bo mafa weto ye.
1CO 9:9 Watum ro tiwya Musa yoo ybam Allah reto to, mawe rau ro moof to, raa yisoh ymat sapi wait ro mkah bo msya ait to ye: “Ati ro sapi mkah bo su msya anu mam armato ranu kri-kri to, anu nke sapi reto masoh to ma. Feto to anu mbitsre sapi reto mabat gandum baro sai.” Ulangan 25:4 Allah ykyas sapi mam Watum rAit mkah bawya? Watum rAit to Ait yoo yee mkah yisoh anu raa fea!
1CO 9:10 Allah ykyas bo ro sapi reto yawe, “Sapi mnan anu raa fyi?” Ja soh raa mkah bo mam armato to, ana minaut mawe meen ana moo make rau tna mait: Ait ro yabah tabam reto ye, ait ro tusnok pasa mbam padi rau ye, tna sapi ro mkah bo su msya raa mam armato reto ye, beta minaut mawe meen ana moo make baro tna mait. Watum riwai reto mkyas anu, raabis wAit ye.
1CO 9:11 Ati ro Barnabas ysya jõ nkyas watum kʼanu to, mnan fi bo amu nso naf. Tna anu fo mnan fi armato. Ja soh raa ykah bo mam tabam refo to, ait yinaut yawe meen ait yoo bo ro ait ynaut re yhau mam tabam refo ye. Ynaut boit ro yait, ratan ro yyum, msya samu ro yjin bo to. Bo ro Barnabas ysya jõ nkah to armato ro Allah. Rau ro moof to, anu beta noo bo ro amu mbewok nnaut mam tabam refo to, nsaim kʼamu riryõn.
1CO 9:12 Raa roto mama mkyas Kristus yasom kʼanu tna ja anu nmat ana tna noo boit ro mait nee kʼana ye. Rau ro moof to, anu nmat amu mbewok mnan ana ye. Menohe ja amu mbewok nyoh boit ro niit mbam kʼanu beta fee. Tuhan yawe amu mbewok nyoh feto, menohe amu hawe. Amu nnaut nwe, “Mfi bo amu mbewok nyoh boit ro niit to, kbe anu hawe nri bokyas ro amu nkyas.” Feto to tiwya amu mbewok nma nkyas Bokyas ro Kristus kʼanu to, amu nyoh bo aro kʼanu fee. Boit ro amu niit to mnan fee. Menohe amu kanyin sai. Amu mbewok nnaut nwe, “Nno be ana hawe bo mari bokyas ro amu nkyas.”
1CO 9:13 Nnaut nwe: Ati raa ro agama Yahudi mawe msan bo kʼAllah to, ana moo bo sohmaam makah mamoʼt samu ro Allah msan bo reto. Tna Allah ybis imam moo bo reto baro kʼana mkah bo kbe ana mesait sohmaam ye. Tna ati ro raa Yahudi moo domba msya, sapi bo to mawe msan kʼAllah to, ja imam ktan tna yoo haber jaro yse mam wohat ro Allah rAit (mezbah) tna yoo jaro kʼait yesait yabo. Yno bo reto mnan fi bi Ait ybis oh.
1CO 9:14 Feto ye Allah ybis yawe raa ro mkyas Bokyas ro Yesus to, kbe ana moo bo ro mait mbam raa ro mari bokyas rana reto.
1CO 9:15 Allah yawe amu, raa ro ja nkyas bokyas rAit to, noo bo ro niit mbam raa ro mari bokyas ramu. Menohe jõ hawe tno bo reto. Tna jõ tkom aam refo tayoh bo kʼanu fee. Feto jõ thai sai rof. Jõ safuk tawe, “Allah ybis raa mawsse ana moo bo mee kʼjõ, menohe jõ tawe, ‘Mbau a, jõ hawe bo raa moo bo mee kʼjõ.’”
1CO 9:16 Allah ysi bo kʼjõ yawe jõ tamo tkyas Bokyas ro Yesus reto. Tibyo jõ tari tna tno sai. Feto jõ tyok-yok jõ fee. Soh jõ tkyas Bokyas ro Yesus reto to fee, kbe ayoh mroh kʼjõ!
1CO 9:17 Mfi bo jõ ksoh ajõ tamo tkyas Bokyas reto maami raa moo bo maren jõ saah. He mfe! Jõ tfi sryan ro Allah ybis sai tibyo tamo tkyas Bokyas reto kʼraa. Ja raa moo boren maren sryan wana to fee.
1CO 9:18 Riwai jõ betoo tawe Allah ybis yawe raa moo bo mee kʼjõ soh jõ ksoh. Menohe jõ hawe bo raa maren jõ. Feto to raa moo boit msya pitis bo to maren jõ fee. Menohe tkyas Bokyas ro Kristus kʼraa tna raa moo pitis mee kʼjõ aro fee. Tna jõ thaf mnan meto. Jõ tayoh boren aro fee.
1CO 9:19 Raa aro moo pitis maren jõ fee. Tna raa mfot jõ mbis jõ tamo sryan rana to fee. Jõ ksoh raa mawat mari tna mbo bokyas ajõ reto, tibyo tamo tkyas Yesus yasom kʼraa to. bo mafa raa make jõ matak fee. Menohe jõ thaf reo kro bo mafa ranu weto afo re anu nri tna nbo bokyas ajõ reto. Jõ ksoh ajõ sai tamo tnan sryan raa beta.
1CO 9:20 Jõ tamo tkyas Yesus yasom kʼraa mam wore woyõ-woya to, bo mafa rana to hayah-hayah. Ati ro jõ tkyas Yesus yasom kʼraa mana ro Yahudi to jõ tno bo mnan fi raa ro Yahudi ja mno to ye. Tno feto afo re kbe ana weto ksoh mari bokyas ajõ mhaf reo. Mari tibyo ana mawat mawe ana smot tna kro Yesus. Tna ati ro jõ tkyas kʼraa ro ja matak mari Watum ro Musa yoo mbam Allah to, jõ tari kro Watum reto ye. Tno feto afo re kbe ana weto mari bokyas ajõ tibyo ana mawat mawe smot tna kro Yesus ye. (Menohe ati ro jõ tesait thau kar to, trero tari Watum ro Musa reto fee.)
1CO 9:21 Tna ati ro jõ tkyas Yesus yasom kʼraa ro wase Watum ro Musa reto to, jõ tnan ana weto ye. (Menohe jõ tari tna tno bo ro Allah ysya Kristus mbis kʼjõ matak to fares.) Tno feto re kbe raa msis ksoh mari bokyas ajõ tibyo smot tna kro Yesus ye.
1CO 9:22 Tna ati ro jõ tkyas Yesus yasom kʼraa ro mhaf wana mamo-me fares to, jõ kaket jõ afo re jõ tno bo ro ja ana mhar mno mkah mhaf ro moof sai. Tno feto afo re kbe ana mari bokyas ajõ tibyo smot tna kro Yesus ye. Jõ tamo tkyas Yesus yasom kʼraa mam wore woyõ-woya to, ja jõ kro bo mafa wana ye. Tno feto afo re ana taro mari bokyas ajõ tibyo smot tna kro Yesus ye.
1CO 9:23 Jõ tawe tno bo reto beta afo re raa mari Bokyas ro Kristus. Tno feto tna anu beta bkai bo ro moof mbam Bokyas reto.
1CO 9:24 Mfi bo raa baro santri anya mhoh to, ana beta mhoh mamoʼt makit rau to. Menohe sait aran ro snok wia tinyi to, kbe yoo bouum ro raa siwyan muum kʼait. Tna tawe kʼanu tawe, “Anu nmo nhoh iso ro Kristus rAit to, nhoh kaket oh! Re kbe anu nkai bouum ro Tuhan siwyan yum kʼanu feto ye.”
1CO 9:25 Anu nhau nno bo ro Kristus ybis kʼanu to siko nno kaket. Sanet anu nesait nfi raa ro santri anya yhoh ja sanet yetsu rait yesait: Rabu wawa ait yhoh tna yait boit ro moof yawe yno ait yetsu rait mrok matak. Ait yno bo feto tna yinaut yawe yoo bouum ro kbe raa moo mee kʼait. Bouum reto to mhau kait fee. Menohe bouum ro anu, raa ro kro Kristus kbe boo to, meen mhau mawyõs.
1CO 9:26 Feto to jõ thoh-hah fee. Jõ hamer thoh tamo iso ro Kristus rAit to kaket. Tna raa ro petinju ja yhar yai raa kaket, yai sre fee. Feto ye jõ thau tno bo ro Kristus ybis jõ to tomer tno kaket ye.
1CO 9:27 Jõ kaket jõ tna thoh thoh thai afo re jõ tetsu ajõ matak. Jõ fi ja tkyas kʼraa roto tna terif iso ro Kristus kʼana. Nno be jõ tesait tamo sre-sre tibyo meen Kristus yoo boren yaren jõ fee!
1CO 10:1 Taja, tme, tao, tano na; sorni bo ro hohos wanu tiwya mno to ma: Raa mana ro Yahudi weto beta tiwya frok mbam tabam ro Mesir. Ana frok mbam Mesir to, raja ro ybo Mesir to saka ana. Menohe Allah yno iso re ana frit aya sawan ro masom 'Laut Merah' tna mkai riof. Tna Allah yhau mam barmabyõ sau ro sbyah ana wa.
1CO 10:2 Tiwya hohos wanu weto beta kro Musa tibyo raa mawe barmabyõ reto msya aya sawan reto 'baptis' ana.
1CO 10:3 Tna Allah yno bo ro msai: Ait yoo boit yee kʼana mait mam iso. Tna ana beta mait boit reto ro masom manna.
1CO 10:4 Tna Allah yno bo msai re aya snok mbam fraa sau. Tna ana beta mata aya reto. Fraa reto fret bo mawe Kristus. Tiwya Ait yatam ana yamo.
1CO 10:5 Raa magin reto to, beta mmat bo ro hnah weto ro Allah yno. Menohe ana beta mno Allah yhaf rAit to mnan fee. Tibyo ana mawat mhai akus mam yuk ro riamo reto.
1CO 10:6 Tna bokyas reto raa mkom afo re anu bmat tna bhar tna bisoh anu kaket. Nno be anu bno bo ro mnan fi hohos wanu weto tii mno to ma. Ana weto masmamo tna saso bo ro mkair-kar.
1CO 10:7 Tna ana taro mbaut berhala. Kaket anu re anu aro nbaut berhala nnan ana ma! Bokom ro Allah mawe, “Raa ro Israel sohmaam bo tna ana smar simaut tna mbaut berhala ro ana mfen.”
1CO 10:8 Nus-as bo nnan fi ana taro to ma. Bokom ro Allah mawe, “Raa ro Israel mabo 23.000 mno bo ro feto tibyo mhai mam ayõ sau.”
1CO 10:9 Sanet Tuhan ranu ma, mnan fi ana taro tiwya mno. Ana taro sanet Tuhan tibyo Ait ybis aban mafit ana weto majat.
1CO 10:10 Kmo Allah tna nmai wer mnan fi ana taro to ma. Tiwya ana weto baro mno mai mawe, “Anu bhau mam yuk ro riamo mam befo to, tna boit ro moof aro fee!” Tibyo malaikat sau mama mame ana weto majat.
1CO 10:11 Bo weto mbtek mai kʼana afo re anu bmat tna bisoh anu kaket. Anu bmat bokom ro Allah reto tna bnaut kaket re kbe anu bno bo mnan fi ana tiwya mno to ma. Anu mfo bhau mam ti sboh rau oh mefo.
1CO 10:12 Raa ro yawe, “Jõ fi smot Yesus matak. Jõ ja tno iro fee saut!” Rau ro moof to, ait retait yisoh ait yno kaket re kbe ait ytek mam iro to ma.
1CO 10:13 Ati ro bo aro mama sanet anu re anu kene wo mbtek nno iro to, nnaut oh: Bo weto mama sanet raa beta. Allah kbe yerif iso kʼanu frok nmo re kbe anu nno iro fee. Tna Ait yhar anu ntak wanu to mamo snok woyõ. Ait yno wa re bo weto tko anu toni to ma. Bo ro Allah yawe yno to, kbe ybo yno tu oh.
1CO 10:14 Feto to noo berhala msya bombra ro tabam refo tiwya anu smot to, mbeak fari.
1CO 10:15 Anu to nnan raa ro srau manes oh. Anu nesait nnaut nwe bo ro jõ tkyas refo mabo fe mfe a:
1CO 10:16 Anu, raa ro kro Kristus ja bkyõ Korat ro Biit Roti Su. Tna anu byoh asik mase kʼAllah tna bta anggur maya baro. Anu bta anggur maya reto to, tna bhaf sau, srau sau bnaut Yesus mees rAit, ati ro raa mame yajat. Tna roti ro anu biit reto to, fret bo mawe Yesus tait kwiyan rAit oh meto. Anu sohmaam korat reto to, anu bhaf sau su bnaut Yesus ati ro raa mame yajat.
1CO 10:17 Roti reto to, sau aran tna anu sait-sait beta biit roti reto su. Anu bhaf sau, srau sau, bonaut sau feto to, anu beta to betsu ranu sau aran.
1CO 10:18 Nnaut raa mana ro Israel: Ana moo domba, sapi, msya boit bo to, makah msan kʼAllah mam wohat (mezbah) ro mhau mam Samu ro Allah. Ana moo bo weto msan kʼAllah mnan si iso ro bi Ait ybis oh. Tna Allah yawe ana weto moo bo reto baro kʼana mesait mabo ye. Ana mhaf sau su msya anya tna msya Allah to, mbaut bi Ait meto.
1CO 10:19 Tna jõ tkyas kak msya bombra ja raa moo msan kʼberhala: Raa taro smot berhala sor mnan fi allah wana. Menohe berhala weto to ara, atau fraa bo to sai. Tna bosan ro raa msan weto to kak msya bo ro sei sai, bo ro mbau fee.
1CO 10:20 Bo weto to, ana msan kʼAllah fee. Ana weto wase Allah. Bo ro ana msan weto to, ana msan kabes sor. Ana miranya msya kabes aro rau-rau oh meto. Tna jõ hawe anu aro niranya nsya kabes. Feto to, jõ tawe kʼanu tawe, “Anu nsya ana hre su tna nbo kak ro ana msan kabes to ma! Mfi bo anu nno bo feto to, anu niranya nsya kabes ye meto.”
1CO 10:21 Anu nkyõ Korat ro Niit Roti Su to mkah bo niranya nsya Allah. Anu ja nta anggur maya tna niit roti mkah bo nnaut Tuhan. Nkyõ korat ro kabes tna niranya nsya kabes ye to ma!
1CO 10:22 Kbe Tuhan yawe, “Anu kro Jõ oh! Anu kro jõ tna kabes mnan anya to fee saut ye!” Bo msai meto! Tuhan tait yatak yiwer, kbe Ait kmo anu!
1CO 10:23 Raa ro kro Kristus taro to ksoh mno-na bo fares. Tna ana mkyas mawe, “Soh watum aro mawe wa bo ro tno reto fee; kbe tno bo bawya sai ro jõ ksoh!” Menohe jõ tawe kʼanu tawe, “Bombra taro merif mafer aro fee, tna bombra taro tubat raa anya to fee.”
1CO 10:24 Saso bo ro moof mkah netsu wanu nesait sai to ma. Rau ro moof to, anu nno bo ro moof mkah raa anya beta.
1CO 10:25 Bokom ro Allah mawe: “Tabam refo msya bombra beta to bo ro Tuhan wAit.” Mazmur 24:1 Feto to, ati ro anu nmoʼt pasar nwe noo kak to, ntu bo kʼraa ro masim kak wia to ma. Nwe, “Kak refo riwai raa msan kʼberhala to fe mfe a?” to ma. Noo kak bawya ro anu nksoh noo sai. Noo mkah nhaf ro moof sai.
1CO 10:27 Mfi bo raa sait ro kro Kristus fee to ymen anu yawe, “Nma biit boit su mam amah ajõ.” Nmo oh tna niit mkah nhaf ro moof. Niit bo bawya ro ait saruk yse kʼanu niit. Ntu nwe “Boit refo riwai raa msan kʼberhala to fe mfe a?” to ma.
1CO 10:28 Menohe mfi bo anu hre su niit boit tna raa sait yawe kʼanu yawe, “Boit refo riwai raa msan kʼberhala wia oh.” Yawe feto anu nhar nwe raa retait yhaf rait yawe wa. Feto niit boit reto ma.
1CO 10:29 Jõ tkyas bo ro ait retait ynaut yawe sai. Anu nesait nhar nwe bo ro mbau aro fee. Menohe Ait retait ynaut yawe boit reto to mbau. Feto to anu nmat ait. Niit boit reto ma!
1CO 10:30 Raa taro hawe bo mmat raa anya tna mawe, “Ja jõ tayoh asik mase kʼAllah ro yoo boit yee kʼjõ tait. Boit aro mbau kʼjõ fee. Fyi re raa mkyas jõ, mawe jõ tno bo ro mkair?” Nno feto ma!
1CO 10:31 Bo ro anu niit tna aya ro nta tna bo beta ro ja anu nno to, nno kaket re kbe raa mbibi Allah.
1CO 10:32 Mfi bo anu hre su nsya raa ro Yahudi to, kaket anu re kbe anu nisti ana mno iro to ma. Tna mfi bo anu hre su nsya raa ro Yunani to, kaket anu re kbe anu nisti ana mno iro to ma. Tna mfi bo anu hre nsya raa anya ro kro Kristus to, kaket anu re kbe anu nisti ana mno iro to ma.
1CO 10:33 Ja jõ tno feto ye. Bo bawya ro jõ tno to jõ hamer tno bo ro moof mkah raa beta. Jõ saso bo ro moof kʼjõ tesait sai fee. Tno feto re kbe ana fri riof ro mase ye.
1CO 11:1 Jõ tawe kʼanu tawe, “Anu boti iso ajõ, mnan fi jõ boti iso ro Kristus.”
1CO 11:2 Anu rabu wawa ja nnaut jõ yoyo. Tna watum ro yum bau oh, ro tiwya jõ tkyas kʼanu to ja anu nri. Anu nno moof meto.
1CO 11:3 Tna jõ tkyas bo sau kʼanu naut: Nnaut oh: Allah tait yase abyõ Kristus. Tna Kristus tait yase abyõ kʼanu raa sme aro sait-sait. Tna raa sme sait-sait tait yase abyõ kʼyfain.
1CO 11:4 Kristus tait yase abyõ raa sme. Feto to mfi bo raa sme sait skabuk soh mfe ykyas bokyas ro mbam kʼAllah kri-kri to, tna ait sbyõ watau rait fares to, ait retait yiwana Kristus meto.
1CO 11:5 Tna raa sme sait-sait tait yase abyõ kʼyfain. Feto to mfi bo fai sau mawe skabuk soh mfe mkyas bokyas ro mbam kʼAllah to ja au moo hawee mai mana wa to. Soh au moo bo sbyõ mana wa to fee, au miwana maa ro yase kʼau meto. Fai reto to, mti saban mnan fnya ro mmur mana mawyan.
1CO 11:6 Mfi bo fnya hawe moo bo sbyõ mana wa to fee, fai reto mamo ktan mana mawyan mabuf sai rof. Fnya ro ktan mana mawyan mabuf soh mfe mmur mana to, fai reto mno bo ro mkair tna mno au hrenaut ai ye. Ro moof to fnya ja sbyõ bo.
1CO 11:7 Taja nsya tao wojõ na; Allah yfen anu ynan fi Ait yesait. Anu ro sme merif bo yase ro Allah rAit. Raa mmat anu tna bibi Allah. Feto to ati ro anu skabuk soh mfe ati ro anu nkyas bokyas ro mbam kʼAllah to, sbi bo mam nna wanu to ma. Reto to bo ro kmun fee. Menohe fnya sbyõ bo mana wana wa to, ana merif maa yase rait oh meto.
1CO 11:8 Tiwya Allah yfen raa sme mbam kʼfnya to fee. Yfen fnya mbam kʼraa sme.
1CO 11:9 Raa sme to Allah yfen mkah bo mban fnya to fee. Fnya saah Allah yfen mkah bo mban raa sme.
1CO 11:10 Reto oh mi fnya ja moo hawee mai mana: Re raa mmat au to mhar mawe maa tait yase ybo au. Tna malaikat ro mmat bo ro fai au mno to, mmat mawe bo reto au mno moof ye.
1CO 11:11 Tuhan tait yase abyõ kʼanu. Feto to fnya wanu mesait mros kar fee. Tna raa sme nesait nros kar fee ye.
1CO 11:12 Tii tinyi to Allah yfen fnya mbam kʼraa sme. Tna mfo refo raa sme snok mbam fnya ro mabe ana. Tna bombra beta mama mbam kʼAllah.
1CO 11:13 Nesait nnaut banu sai nwe, “Ati ro fnya skabuk Allah to, mfi bo au moo bo sbyõ wa mana rau to fee, reto to bo ro kmun fe mfe a?”
1CO 11:14 Mfi bo raa mmat raa sme sait betau yana mawyan miyõ to, ja mnaut mawe reto to, bo ro kmun fee ye.
1CO 11:15 Fnya to, mana rana miyõ to mfi bosnyam rana. Allah yno mana mawyan wana to burut wa mana wana. Feto to bo mafa ro ja amu nno to oh mefo: Fnya wamu to ja betau mana rana miyõ.
1CO 11:16 Soh anu aro santri watum riwai reto, jõ tawe, “Amu nsya jemaat ro Allah taro to, ja amu nno bo mafa sau aran reto.”
1CO 11:17 Tna jõ tkyas bo ro mtan to, jõ bibi anu meto fee: Anu siret su to, mafer rau to mkair. Tibyo jõ bhah anu.
1CO 11:18 Ro sau to, jõ tari he anu siret su to, anu baro nhau hayah-hayah tna nmak anya ye. Bo ro raa mkyas weto to, jõ thar tawe baro mabo.
1CO 11:19 Fyi, Tuhan yhaf rAit mhau kʼanu ro ati ryo?
1CO 11:20 Ati ro anu hre su nkyõ Korat ro Niit Roti reto to, anu ja nhaf sau su nnaut Yesus mees rAit fee!
1CO 11:21 Anu aro sait-sait safto sohmaam bo mase. Tibyo boit mkak tna raa taro to mhau muut mhai sre. Tna taro to, mata anggur maya toni tibyo bisir.
1CO 11:22 Bo ro ja anu nno feto to mkair! Mfi bo anu nno feto kbe raa sret jemaat ro Allah. Tna anu niwana raa kinyah wanu meto tna nno re ana hrenaut. Ro moof to mi ati ro anu nma to, anu sait-sait sohmaam bo wia mam amah wanu.
1CO 11:23 Bo ro Tuhan tiwya yawe kʼjõ to, jõ te tkyas kʼanu u. Mti ro Yudas besruf Yesus reto to, Tuhan Yesus yoo roti sau.
1CO 11:24 Yoo tna skabuk yayoh asik mase kʼAllah. Tna Ait haber roti reto yee kʼana beta mait. Tna yawe, “Nmat roti refo. Tetsu aJõ ro tsan mkah anu oh mefo. Niit oh. Tna kbe nno fefo u re nnaut Jõ.”
1CO 11:25 Ana sohmaam bo mkak tna Ait yoo hawereh tna yno mnan feto u yawe, “Anggur maya refo to, mees aJõ mefo. Kbe Jõ raa mame tna Allah ysair bosi ro tna kʼanu oh meto. Anu nta bo refo renti to, nnaut Jõ.”
1CO 11:26 Feto oh mi anu ja nkyõ Korat ro Niit Roti. Ati ro anu niit roti reto tna nta anggur maya reto to, anu beta nkyas u nwe 'Tuhan raa mame yajat' oh meto. Nno korat refo mfi bo mafa ro ja anu nno to, nno u mamo snok ati ro meen Tuhan hah ye yama u.
1CO 11:27 Reto oh mi awya ro yakyõ Korat reto to, tna yait kbik-kbak sai, yno iro meto. Ait retait yiwana Tuhan yetsu rAit msya mees rAit oh meto.
1CO 11:28 Feto to ati ro anu nwe niit Korat reto to, nisoh nhaf wanu sait-sait to wia matim.
1CO 11:29 Awya ro ynaut Tuhan yetsu rAit wia fee, menohe yait Korat reto sai to, kbe Tuhan yoo kair mbtek mai kʼait.
1CO 11:30 Mabo oh! Reto oh mi raa jemaat ranu taro mawat kiyam, ssafo fee, tna taro mhai oh to.
1CO 11:31 Soh anu bisoh anu bhaf mato wanu wia to, kbe Tuhan yoo kair mbtek mai kʼanu to fee.
1CO 11:32 Ja Tuhan yoo kair mbtek mai kʼanu, raa ro kro Kristus to fyi? Yno afo re anu bmat sas bhaf mato wanu tna bisoh anu. Anu bisoh bhaf mato wanu wia to, meen tis rau to, ati ro Ait ymit safo mana kʼraa ro tabam refo to, kbe ymit safo mana kʼanu fee.
1CO 11:33 Taja, tme, tao, tano na; anu nma nkyõ Korat ro Niit Roti reto tna sohmaam bo kbik-kbak sai to ma. Nma tna hre sne raa ro jemaat beta mama wia, tna beta sohmaam korat reto su.
1CO 11:34 Mfi bo anu aro nhai sre to, niit boit wia mam amah wanu. Niit boit wia tna nmo siret su re kbe anu aro nhai sre fee. Tibyo niit Korat reto tna nasmamo fee. Soh anu niit Korat reto mkah nhaf wanu ro moof to, meen Tuhan yoo safo mana ymit kʼanu fee. Kbe meen jõ tama to kʼanu u to, kbe jõ terif bo roto taro kʼanu u.
1CO 12:1 Taja, tme, tao, tano na; tna fo jõ tkyas bouum (karunia) Har ro Tuhan moo muumto kʼanu. Jõ betoo bouum weto aro rau-rau afo re anu nhar kaket. Har ro Tuhan moo bouum wefo muumto kʼanu afo re anu tubat anya tna smot Allah kaket.
1CO 12:2 Nnaut tiwya tinyi weno to, wore anu wase Allah fares to, anu nbaut berhala sor. Bawya mno re anu nbaut berhala weto ro wase bo mkyas a? Tiwya raa besruf anu tibyo anu smot berhala weto.
1CO 12:3 Ati ro anu nri raa mkyas bo to, fyi re anu nhar nwe bokyas reto mbam kʼAllah fe mfe a? Tawe kʼanu tawe mfi bo anu nri raa sait ykyas Yesus yawe, “Kbe ayoh mroh kʼAit!” Anu nhar nwe Har ro Allah mjin kʼraa retait yhaf rait fee. Tna mfi bo anu nri raa sait yawe, “Yesus tait Tuhan ro yase.” Kbe anu nhar nwe Har ro Allah mjin kʼait yhaf rait.
1CO 12:4 Bouum to aro rau-rau, menohe weto beta to, Har rAit oh mi moo muumto kʼanu to.
1CO 12:5 Tna anu bno bo aro rau-rau re tubat raa jemaat wanu. Menohe bo ro anu ja bno weto beta to, anu bno mkah Tuhan Yesus yasom rAit. Tuhan tait sait aran.
1CO 12:6 Tna Allah yno re anu tubat raa mhaf wana to, mkah iso aro rau-rau. Menohe Ait ro yno bo weto tait sait aran ye.
1CO 12:7 Tna Har rAit moo bouum aro rau-rau muumto kʼanu beta mkah bawya? Mno mkah anu, raa ro kro Kristus to, kbe bisoh anya, teta anya tna bno raa makin rAit beta moof.
1CO 12:8 Tna bouum Har ro Allah moo muumto kʼanu raa ro kro Kristus to, au oh mefo: Mno re raa taro mhar bo watum raa kaket. Tna Har reto moo bohar muumto kʼraa taro re ana mhar maja ro Tuhan kaket.
1CO 12:9 Tna Har reto mno re raa taro smot Tuhan kaket matak. Tna mno re raa taro to skabuk raa ro kiyam to re mrok moof.
1CO 12:10 Tna Har reto moo matak mee kʼraa taro to, afo re ana mno bo ro msai. Tna moo matak mee kʼraa taro re ana mari mai ro mbam Tuhan tna mkyas bokyas rAit reto kʼraa mfi raa ro nabi. Tna moo matak mee kʼraa taro re ana mhar har aro rau. Ana weto mari raa mkyas bo tna mmat sas bokyas reto tna ana mhar mawe bokyas reto mabo mbam Tuhan fe kabes a. Tna Har ro Tuhan moo matak mee kʼraa taro re ana mkyas mkah bahasa roh. (Ana mkyas mai aro rau hayah-hayah ro ja ana mesait wase.) Tna moo matak mee kʼraa taro re ana mhar mai weto. Kbe ana me mkyas bokyas riwai reto kʼraa jemaat ro hre mam weto to mkah mai rana. Tibyo raa ro jemaat beta mari tna mhar ye (menafsirkan).
1CO 12:11 Har sau aran oh mi moo bouum (karunia) ro riwai jõ tkyas weto beta muum kʼraa. Har reto moo tak aro rau-rau tna saim kʼraa aro sait-sait mkah ksoh rAu mesait sai.
1CO 12:12 Raa yetsu rait to sau aran sai. Menohe yatem, yaa, msya yana bo to mrat yetsu rait reto. Yetsu rait haber to msis bia. Tna anu, raa ro Kristus wAit to bsis bia ye. Menohe anu beta brat su bsya Ait tibyo bmo raa mana sau su. Au oh mi raa fret bo mawe anu fo bnan yetsu rAit.
1CO 12:13 Anu beta to bsis tna anu fo raa aro rau hayah-hayah ye: Anu taro to raa ro Yahudi tna taro to raa ro Yunani. Anu taro raa kinyah bmo sryan boh tna taro to sryan boh fee. Menohe Har sau aran baptis anu beta. Au oh mi Har ro moof mjin mam anu bhaf wanu beta oh to. Tna mno re anu beta smot Kristus. Tna Har reto oh mi Har ro mbam kʼAllah.
1CO 12:14 Raa yatem, yaa, yana bo to mrat yetsu rait reto. Raa yetsu rait to haber sau aran fee; haber msis.
1CO 12:15 Mfi bo jõ taa maban ajõ mkyas mawe, “Jõ fi Paulus yatem sau fee. Feto to jõ hawe bo trat tsya yetsu rait!” Kbe mabo a? Mfe. Mako hawe sai, jõ taa reto to, mhau mrat jõ tetsu ajõ fares.
1CO 12:16 Tna mfi bo jõ timara ajõ to mawe, “Jõ fi Paulus yasu rait fee. Feto to jõ hawe bo trat tsya yetsu rait!” Kbe mabo a? Mfe. Mako hawe sai jõ timara reto to, mhau mrat jõ tetsu ajõ fares.
1CO 12:17 Mfi bo jõ haber beta haberek mamo tasu to, kbe jõ tari bo fyi? Tna mfi bo jõ haber beta haberek mamo timara to, feto kbe jõ tasan bo ro sawer to fyi? He mfe.
1CO 12:18 Allah yfen betsu wanu to Ait yfen haber aro hayah-hayah yse kʼanu betsu. Yfen yse mam yuk ro betsu aro rau-rau mkah bonaut rAit sai.
1CO 12:19 Mfi bo anu betsu wanu haber msis fee, anu betsu ranu to fyi?
1CO 12:20 Anu raa fo haber msis menohe betsu sau aran sai.
1CO 12:21 Mfi bo jõ tasu ajõ to mkyas kʼtatem mawe, “Natem, nyõ to bo ro ati fee!” Tna mfi bo jõ tana to mawe kʼjõ taa ajõ to mawe, “Naa, nyõ to bo ati fee!” Reto to mkair meto!
1CO 12:22 Tna anu haber aro ro sne oh mi haber ro ati syok.
1CO 12:23 Ja anu hawe raa mmat betsu wanu haber taro to fee. Anu hrenaut. Haber wanu weto taro anu bwe moof fee. Feto to anu kaket haber wanu weto. Tna haber wanu weto anu byum ratan wa re raa mahni.
1CO 12:24 Menohe haber wanu ro moof weto, ja anu kaket haber weto fee; mhau rof raa mmat. Allah yesait yfen anu tna yse haber beta mhau su. Tna haber wanu ro ja anu nwe mkair to, Ait yawe haber ro ati oh meto.
1CO 12:25 Yno feto afo re haber wanu aro to twat hayah-hayah fee. Beta bisoh bmat anya kaket to moof.
1CO 12:26 Mfi bo raa haber sau mham to, kbe ait yetsu rait beta mkair. Mfi bo haber sau raa mbaut to, kbe ait yetsu rait beta simaut ye.
1CO 12:27 Raa magin ro kro Kristus to, anu fo yetsu rAit. Tna anu beta to haber aro rau-rau ro brat bsya Ait.
1CO 12:28 Allah ysok yawe anu bfi haber ro Kristus yetsu rait aro rau-rau. Tna fo jõ ntuu haber wAit weto taro: 1. Raabis wAit (rasul). 2. Nabi ro Allah ybis mama mkyas bo wAit. 3. Guru ro mbetoo bokyas ro Allah maja rau. 4. Raa ro mno bo ro msai. 5. Raa ro skabuk raa ro kiyam tibyo ana weto mrok moof. 6. Raa ro ja mbet raa anya. 7. Raa ro mamo aban mana. 8. Raa ro mkyas bo mkah bahasa roh.
1CO 12:29 Menohe ja raa beta mamo raabis ro Allah fee. Tna raa beta mamo nabi wAit to fee. Beta mamo guru ro ja mbetoo bokyas ro Allah maja rau to fee. Beta mno bo ro msai to fee.
1CO 12:30 Beta skabuk raa ro kiyam tibyo ana weto mrok moof to fee. Beta mkyas mkah bahasa roh to fee. Tna raa beta menafsirkanbahasa roh weto tna me mkyas bokyas riwai reto kʼraa jemaat to fee ye.
1CO 12:31 Har ro Tuhan muumto bouum (karunia) weto kʼraa. Rau ro moof to, anu hamer fri bouum ro moof ati. Tna fo jõ terif iso ro moof ati kʼanu:
1CO 13:1 Mfi bo jõ tkyas bo mkah mai aro rau hayah-hayah: Mai ro tabam refo beta ye tna mai ro ja malaikat mkyas to ye. Mfi bo jõ thar mai weto beta menohe ja jõ tatmof raa anya to fee, kbe mafer marak sai. Tno mnan feto to, jõ fi tnan ain ro raa mai kaket fee. Tna jõ tnan bo ro mawia mho menohe mafer rau marak.
1CO 13:2 Soh jõ wase bo tatmof raa anya menohe jõ thar tari mai ro mbam Tuhan tna tkyas bokyas rAit reto kʼraa to, kbe tno mkah bawya? Mafer rau to miyo? Mfi bo jõ wase tatmof raa anya menohe bonaut ajõ maah tibyo thar bo maja ro samyoh beta kaket to, kbe bo reto tis rau to, meen mafer aro fe mfe a? Tna mfi bo jõ smot bi Ait kaket matak to tna tbis atu sau mirenti mamo mros mam yuk roto to, tibyo atu reto mirenti mamo oh. Kbe mafer rau to miyo? Rau ro ati to jõ tatmof raa anya. Mfi bo jõ tno bo riwai weto beta, menohe tatmof raa anya to fee, kbe mafer marak.
1CO 13:3 Mfi bo jõ too bombra wojõ beta saim kʼraa ro mse bo aro fee to, mafer rau to miyo? Mfi bo raa ro ja ngknait raa magin ro kro Kristus to, mfot jõ tna mko tajat rof, mafer rau to miyo? Mfi bo jõ tatmof raa anya fee to, kbe mafer marak.
1CO 13:4 Raa ro mhar bo matmof raa anya kaket to, ja ana mbi-ba to fee. Raa ro mhar bo matmof raa anya to, ja mhaf sneh. Raa ro matmof raa anya to, wase bo maam bo raa, tna ana wase safuk mawe ana uu kar, tna ana wase bo tawyõ ana mesait.
1CO 13:5 Tna raa ro mhar bo matmof raa anya to, ja mmat raa anya, tna ja mbat mkyas bo msya raa anya taro to fee, tna ja mbo kmo fooh mam matem to fee, tna ja wase botoh ye.
1CO 13:6 Mfi bo raa mhar bo matmof raa anya to, ati ro ana mmat bo mkair to, ana mrok sraujin. Tna ati ro ana mmat bo ro moof to, ana ksoh simaut.
1CO 13:7 Tna raa ro mhar bo matmof raa anya to, ja ana kmot raa anya re bo mbtek mai kʼraa weto fee. Tna raa ro mhar bo matmof raa to, ja mari bo ro Allah ysi kʼana to, tna mse kʼana mhaf. Tna ja ana beroh minaut mawe bo weto kbe meen mabo tu. Ana mnaut maut-mroh fee ye. Tna raa ro mhar bo matmof raa anya to, bo bawya sai ro mama mai kʼraa weto to ana beroh siko masom sai.
1CO 13:8 Kbe raa hafri Tuhan ysya raa anya yum. Menohe meen raa bernubuat u fee. Tna meen raa mkyas bo mkah bahasa roh to u fee. Tna bohar ro raa mhar to, kbe saef ye.
1CO 13:9 Mfo refo anu bhar bo mnan si fee. Tna raa ro mkyas bokyas ro Allah to, bohar wana to mnan si fee ye.
1CO 13:10 Meen Allah yno bombra beta mrok moof mnan si. Tna bombra ro mnan si fee to, kbe saef beta.
1CO 13:11 Ti tinyi to jõ tkek fares, tna jõ tkyas tfi ku mkek ja mkyas fares tna tnaut bo mnan fi ja ku mkek mnaut bo to ye. Tna mfo refo jõ tabi oh tibyo tno bo mnan fi kumkek ja mno to u fee.
1CO 13:12 Mfo refo anu bhar bo kaket fefares. Mnan fi raa sait ymat yasu rait mam bowane ro mkair to, tibyo ymat yasu rait kaket fee. Menohe anu meen bhar bombra beta kaket. Mfo refo jõ thar bo mabut fares. Menohe meen jõ thar bo kaket mnan si. Mnan fi Allah ja yhar jõ mnan si to.
1CO 13:13 Tna jõ tawe kʼanu tawe, “Bo tuuf refo meen saef fee: Kbe raa smot Tuhan renti yoyo. Tna kbe raa minaut mawe bo moof ro meen mabo to yoyo. Tna kbe raa hafri Tuhan ysya raa anya yoyo mamo snok woyõ-woya sai ye. Bo tuuf refo to, meen mhau mawyõs. Tna raa matmof raa anya to, bo ro mase miwer bombra beta.”
1CO 14:1 Rau ro ati to, anu natmof raa anya kaket. Ja Har ro Tuhan moo bouum aro rau-rau muumto kʼraa ro kro Kristus. Siko nkai bouum weto! Bouum (Karunia) ro mase toni to raa bernubuat.
1CO 14:2 Raa ro mkyas bo mkah bahasa roh to mkyas bo kʼraa meto fee. Mkyas bo kʼAllah sai meto. Raa roto mhar mai ro ana mkyas reto fee. Mamos wana mkyas bo kʼAllah. Tna Ait yesait yhar bo ro ana mkyas reto.
1CO 14:3 Menohe awya ro yari mai ro mbam Tuhan tna ykyas bokyas rAit reto kʼraa (bernubuat) mkah mai rana to, ja bokyas rait reto raa mari tna mhar. Raa taro mari tibyo bokyas reto mno re ana smot Tuhan kaket. Taro mari tibyo misoh ana re kro Tuhan kaket. Tna taro mari tibyo sraujin u fee.
1CO 14:4 Ait sait ro ykyas mkah bahasa roh to tubat ait yesait aran. Menohe ait ro bernubuat mkah mai ro raa mhar to tubat raa ro jemaat beta oh meto re ana smot Allah kaket ye.
1CO 14:5 Rau ro moof to, anu beta nkyas mkah bahasa roh. Menohe soh anu beta nri mai ro mbam Tuhan tna bernubuat mkah mai ranu nesait to, reto merif mafer kʼraa msis. Feto to bo reto moof miwer. Ait ro bernubuat retait raa ro ati yiwer ait ro ykyas mkah bahasa roh. Menohe mfi raa aro mhar menafsirkan bahasa roh to. Kbe Har ro Tuhan mno re ait yhar bahasa roh weto re ytai ye ykyas kʼjemaat mkah mai rana. Tibyo raa jemaat mari tna mhar bokyas ro mbam Har riwai raa mkyas reto ye. Feto to moof miwer.
1CO 14:6 Taja, tme, tao, tano na; mfi bo jõ tama to kʼanu tna tkyas bo mkah bahasa roh sai to, mafer aro kʼanu fee! Menohe karunia aro rau ro Har msan kʼjõ to, kbe merif mafer kʼanu: Mfi bo jõ tkyas soo ro mbam kʼAllah kʼanu mkah mai ranu to, kbe merif mafer kʼanu. Tna mfi bo jõ tkyas watum ro mbam kʼAllah mkah mai ranu to, bo reto kbe merif mafer kʼanu ye. Tna mfi bo jõ bernubuat to, kbe bo reto merif mafer kʼanu ye. Tna soh jõ tasyah anu mkah mai ranu to, mafer aro kʼanu ye.
1CO 14:7 Oor msya kerombi-kecapi bo to, bo ro maam fee. Menohe bo weto mmai saah. Mfi bo raa sait yfi oor soh mfe yai kerombi-kecapi kaket fee, kbe raa wase bobaut ro ait retait ysom reto fee. Kbe raa mamboi, tna msya ait mbaut bobaut reto su fee.
1CO 14:8 Tna mfi bo raa sait yfi saa kaket fee, kbe raa mnaut mawe, “Raa retait yfi-fa sai a?” Tibyo mama fee.
1CO 14:9 Feto ye ati ro anu nkyas mkah mai aro rau hayah-hayah to. Mfi bo raa wase mai ro anu nkyas to, kbe ana mari tna mhar fe mfe a? Mai ranu weto marak sai. Bokyas reto merif mafer aro kʼraa fee.
1CO 14:10 Mai ro tabam refo fo msis bia. Tna raa aro mhar mai rana-rana.
1CO 14:11 Menohe jõ thar mai weto beta fee. Ati ro raa srim mkyas to, jõ tari tna tnaut tawe mnan fi ana mmai-ma sai. Jõ tari saah menohe tamboi sai. Tna raa srim mhar mai ro jõ tkyas fee ye. Ati ro ana mari jõ tkyas to, mnan fi jõ tmai-ma sai. Ana mari saah menohe mamboi sai.
1CO 14:12 Taja, tme, tao, tano na; jõ thar tawe Har ro Tuhan msan bouum kʼanu oh tna anu ksoh toni. Rau ro ati to, anu sait-sait siko nkai bouum aro ro misoh raa ro jemaat ranu.
1CO 14:13 Feto to awya ro ja ykyas bo mkah bahasa roh to, rau ro moof to, ait skabuk ye. Skabuk yayoh kʼAllah re ybis Har ro Moof mno re ait yhar mai ro riwai ait ykyas reto. Tna re kbe ait ye ykyas bo reto kʼjemaat mkah mai rana (menafsirkan) afo re ana mari tna mhar ye.
1CO 14:14 Mfi bo jõ skabuk mkah bahasa roh to, kbe tamos ajõ fri mafer saah. Menohe jõ twase bo ro jõ skabuk to bawya meto.
1CO 14:15 Soh feto to jõ kbe tno fyi? Rau ro moof to, jõ tno ewok ye: Tamos ajõ skabuk mkah bahasa roh ye tna jõ skabuk mkah mai ajõ ye afo re bonaut ajõ fri mafer ye. Tna jõ tamos ajõ tbaut bobaut mkah bahasa roh ye. Tna jõ tbaut bobaut mkah mai ajõ ye afo re bonaut ajõ fri mafer ye.
1CO 14:16 Mfi bo nmos ranu mbibi Allah tna nyoh asik mase kʼAit mkah bahasa roh to, kbe raa ro hre su skabuk msya anu to wase bo ro anu nkyas reto tna ana msya anu mbibi Allah fyi? Tna mfi bo ana wase bo nyõ nayoh asik mase meto fee. Fyi re kbe ana mawe, “Amin.”
1CO 14:17 Nyõ nayoh asik mase kʼAllah mkah bahasa roh to moof. Menohe bokyas anyõ reto misoh raa roto taro fee.
1CO 14:18 Jõ ksoh tkyas mkah bahasa roh tna ja jõ tno bo reto mase miwer anu beta. Har ro Moof msan bouum reto kʼjõ tna jõ tayoh asik mase kʼAllah.
1CO 14:19 Menohe ati ro jemaat siret skabuk su to, jõ hawe tkyas bo wer mkah bahasa roh to. Mfi bo jõ tkyas bo mabuf sai kʼraa mkah mai ro ana mhar to mafer rau to moof miwer.
1CO 14:20 Taja, tme, tao, tano na; jõ hawe bo anu nhar bo mabuf mnan fi ja kumkek sai to ma. Rau ro moof to, anu nhar bo kaket mnan fi raa ro mabi. Menohe ku mees ja wase-wasa bo mno safo. Tna ro moof to, anu ye wase bo mno safo mfi ku mkek feto ye.
1CO 14:21 Watum ro Musa mkyas mawe: “Meen Jõ tbis raa ro srim mamo mkyas bo kʼraa mana refo. Tna raa ro mmai hayah to, kbe mama mkyas bokyas aJõ kʼana ye. Menohe ana hawe bo mari sai fares.”
1CO 14:22 Har ro Moof mno re raa taro mkyas mkah bahasa roh to, mno mkah raa ro smot Yesus oh fee. Mno afo re raa ro wase Yesus kbe mari tna mrok. Mno afo re ana weto mhar mawe bo ro ana mari reto to, bo ro msai mbam kʼAllah. Tna Har ro Moof muumto bouum (karunia) roto kʼraa taro re ana bernubuat mkah mai ro jemaat ja mhar oh. Bouum reto oh mi merif mafer kʼraa ro smot Yesus wia oh.
1CO 14:23 Feto to, mfi bo jemaat ranu berur skabuk su, tna anu beta nkyas mkah bahasa roh to fyi? Mfi bo raa ro smot Yesus fee mama twok to, kbe ana mrok mawe anu beta nker.
1CO 14:24 Menohe mfi bo anu beta bernubuat mkah mai ranu to fyi? Soh raa sait ro smot Yesus fee tait yama to, kbe ait yari bokyas ro mbam Tuhan. Bo ro anu beta nkyas reto merif iro ro ait yno. Ait yari tna bokyas reto mame kʼait yhaf tibyo ait yashana.
1CO 14:25 Anu beta nri mai ro Tuhan feto tibyo bo ro anu nkyas reto sibrer bo ro ja ait ynaut mam yhaf mato rait. Tibyo yanwaruk tna ybaut Allah yawe, “Mfo refo thar tawe Allah yhau ysya anu oh.”
1CO 14:26 Ati ro anu siret su skabuk Tuhan to, kbe anu nno fyi? Rau ro moof to, anu taro nbaut bobaut, tna anu taro nkyas watum, tna anu taro nkyas soo ro mbam kʼAllah, tna taro nkyas mkah bahasa roh, tna Har mno re raa taro menafsirkan bahasa roh riwai raa mkyas to, ne nkyas kʼjemaat mkah mai rana, re ana mari tna mhar. Bo ro anu nno weto to, nno beta re kbe jemaat fri mafer ro moof.
1CO 14:27 Mfi bo raa mawe mkyas mkah bahasa roh to, raa mabo ewok o tuuf sai aran bo feto. Sait ykyas wia tna kbe sait naut yasen ykyas. Tna Har mno re raa sait taro menafsirkan mai ro riwai raa mkyas weto. Ait yasen ye ykyas bokyas riwai reto kʼjemaat mkah mai rana re ana mari tna mhar.
1CO 14:28 Mfi bo raa ro ja menafsirkan (ye ykyas bokyas riwai reto kʼjemaat mkah mai rana) to yarak, kbe anu aro nsen nkyas mkah bahasa roh to ma. Nhau shait sai. Tna nesait nkyas sai mam nhaf mato wanu nsya Allah.
1CO 14:29 Tna nabi ro ja Allah ybis mama mkyas bo wAit to: Rau ro moof to, ana mabo ewok, tuuf bo to, masen mkyas sai bo feto. Sait ykyas kri-kri to, ana taro to, hre mari kaket. Mari bokyas reto tna mnaut mawe, “Bokyas ro ati meto, fe mfe a?”
1CO 14:30 Anu nkin hre nri bo reto nkri-kri to, tna mfi bo anu sait yari bokyas ro mbam kʼAllah tna yawe yasen ykyas to, nabi ro ykyas nkri-kri to shait yari wia. Tna ait retait ro yari bokyas ro mbam kʼAllah tait, yasen ykyas bokyas reto ye.
1CO 14:31 Mkah iso reto anu aro sait-sait nkyas bokyas ro Allah, tibyo raa ro jemaat beta nri watum reto. Tna watum reto to, mno anu nros ntak.
1CO 14:32 Ati ro Allah ybis nabi wAit mkyas bo to, ja Ait ybo ana matak afo re ana sorni ana to fee. Ait ybis sait yros ykyas bo to, kbe ybis ana roto hre mbo ana re shait wia.
1CO 14:33 Allah tait hawe bo raa mno bo mnin-nin. Yawe anu nno bo kbik-kbak to ma.
1CO 14:34 Watum ro jõ tkyas kʼfnya na mnan si Watum ro Musa ykom yee kʼraa ro Yahudi to. Ati ro raa jemaat mama skabuk su to, fnya masen mros mkyas bo to ma. Kbe ana hre shait sai tna mmat raa sme. Bo refo ja jõ tkyas mnan anya kʼraa ro Allah wAit mam jemaat aro-aro beta.
1CO 14:35 Mfi bo fnya wase bo ro raa sme mkyas to, kbe ana shait wia. Tna rere ana mamoʼt amah tna fo mtu bo reto kʼmaa. Fnya mkyas bo mam ati ro jemaat mama hre siret su to ma; ana hrenaut fea!
1CO 14:36 Fyi re anu hawe nri bokyas riwai reto? Bokyas reto to, Bokyas ro Allah. Fyi re anu ro nhau mam kota ro Korintus nnaut nwe anu nhar bo miwer raa anya ro Kristen taro! Anu tna sai nmo kro Kristus. Rau ro moof to, anu nri watum ro Allah ykyas kʼjemaat taro ye.
1CO 14:37 Anu taro nwe, “Allah ybis jõ tamo nabi wAit sait.” Tna anu taro nwe, “Har muumto bouum (karunia) roto taro kʼjõ.” Soh mabo to, Har reto mno re anu nhar bo. Tibyo anu nhar nwe bo ro jõ tkom wefo to, mbam kʼAllah yum bau oh.
1CO 14:38 Mfi bo raa sait hawe bo yari bokom ajõ refo to, nmat ait to ma.
1CO 14:39 Taja, tme, tao, tano na; raa mari watum mam mai rana mesait to bo ro ati. Feto to, bouum ro ja Har msan kʼanu raa ro kro Kristus to, rau ro mase toni to au oh mefo: Mno re raa taro bernubuat. Rau ro moof to, saso bouum reto. Tna bhah raa ro mkyas bo mkah bahasa roh to ma.
1CO 14:40 Menohe bo bawya ro anu nno to nisoh nno beta kaket, nno kbik-kbak to ma!
1CO 15:1 Taja, tme, tao, tano na; ne nnaut Bokyas Moof ro Yesus (Injil) tiwya jõ tkyas kʼanu. Tiwya anu nri tna smot Bokyas reto tna ja anu nbo Bokyas reto matak fares.
1CO 15:2 Mfi bo anu nri Bokyas Moof ro Yesus (Injil) nse kʼanu, tna nbo matak renti yoyo to, anu nkai riof ro mase. Soh mfe to, Bokyas reto mraun sai, kbe anu nkai riof reto fee.
1CO 15:3 Tiwya jõ tari Bokyas ro Yesus refo tna jõ tama somya kʼanu. Rau ro ati to, anu smot nwe Kristus yajat re yyon iro wanu. Bo reto tiwya mayir matim mam Bokom ro Allah oh.
1CO 15:4 Tna raa moo ajat rAit mse mam isra sau. Tna ti ro tuuf to Allah yno Ait yrok yasen. Bo reto to mayir matim mam Bokom ro Allah wia oh.
1CO 15:5 Ait ye yrok yasen tna yerif Ait Kefas-Petrus, tna yerif Ait kuber wAit mabo 12 to ye.
1CO 15:6 Tna yerif Ait u kʼraa ro kro Kristus mabo trion 500 bo feto mam siret rana. Ana weto mawat taro mhau fares tna raa taro to mhai oh.
1CO 15:7 Yerif Ait kʼana weto tna yerif Ait kʼYakobus ye. Tna yerif Ait kʼraabis wAit (rasul) beta ye.
1CO 15:8 Ttis rau to, yerif Ait kʼjõ ye. Yesus yerif Ait kʼJõ tis beta, tna jõ fi raa ro ati fee. Jõ tnan ku mees ro fnya mabe myoh.
1CO 15:9 Tiwya jõ tamo saka raa ro kro Kristus to simoyot-mayat. Feto jõ tanwaruk tna tnaut tawe jõ fi raa ro mase fee. Jõ tari he raa mawe jõ fi raabis ro Allah to, tnaut tawe jõ thaf moof mnan si fee. Jõ tnan raa kinyah sai.
1CO 15:10 Jõ fi raa ro tno bo mkair menohe Allah yatmof jõ. Yatmof jõ tibyo tamo raabis rAit. Tna boatmof rAit reto merif mafer ro moof. Mno re jõ safo tno bo ro Ait ybis kʼjõ to kaket miwer raabis rAit roto taro. Bo reto jõ tno mkah tatak ajõ meto fee. Tatak reto mbam kʼAllah yesait boatmof rAit ro ja matam jõ.
1CO 15:11 Awya oh mi tiwya yama ykyas Bokyas ro Yesus reto kʼanu re anu nri tna smot to? Jõ tesait soh mfe raa taro a? Anu bsom ranu to bo ro ati fee. Ro ati to anu nri bokyas ro ait ykyas reto tna nfot, nse kʼanu.
1CO 15:12 Amu, raabis rAit to, ja nkyas nwe, “Kristus yajat tna Allah yno re Ait yrok yasen.” Mfi bo anu smot bokyas reto to, fyi re anu taro nwe, “Aha, raa ro mhai to meen ana mrok masen fee!”
1CO 15:13 Anu taro to srau ewok nwe “Raa ro tii kro Kristus oh tna mhai to meen mrok masen fee.” Menohe anu nnaut nwe tii Kristus yajat tna yrok yasen fe mfe a?
1CO 15:14 Tna mfi bo anu nnaut nwe Kristus yajat tna yrok u fee, bo ro amu nkyas kʼanu reto to, mafer aro fee. Mfi bo reto mabo fee, anu smot Kristus mkah bawya? Soh feto to, bosmot ranu reto mabo marak ye.
1CO 15:15 Ja amu nkyas nwe, “Allah yno Kristus yrok yasen.” Mfi bo Allah yno feto fee, bo ro amu nkyas to sioh-sah sai. Anu nnaut nwe amu nma besruf anu fe mfe a? Mfe saut! Ana ro mkyas mawe, “Raa ro mhai meen mrok masen fee.” Ana weto mkyas bo ro Allah to mweh!
1CO 15:16 Mfi raa meen mrok masen to fee, ana mnaut mawe bawya? Mawe, “Kristus yrok yasen fee ye tna Ait yhai tibyo.” Bonaut rana reto sre!
1CO 15:17 Mfi bo Kristus yrok fee, maami bosmot ranu to mkai mafer aro fee ye. Tna mfo refo to iro wanu mbo anu matak fares.
1CO 15:18 Mfi bo reto mabo aro fee maami, raa ro tiwya kro Kristus tna mhai oh to meen fri riof fee ye.
1CO 15:19 Mfi bo ro ana mkyas reto mabo to, fyi re anu binaut bwe, “Kbe Ait yerif riof kʼanu.” Mfi bo ro anu binaut reto mater mam wore anu bhau mam tabam refo sai to, meen bhai tna kwiyan wanu to sari-sara sai. Mfi bo reto mabo to, anu raa ro kro Kristus to mamboi toni miwrek raa roto taro sor!
1CO 15:20 He mfe: Allah yno Kristus yrok yasen tu oh! Kristus yrok yasen yatim wia tna meen raa ro mhai to, kbe Allah yno ana mrok masen ye.
1CO 15:21 Ja raa beta to, kbe bhai. Tna raa sait aran yisti.
1CO 15:22 Adam tait hohos anu raa beta. Tna ait yno iro. Feto to anu raa kbe bhai beta. Feto ye Kristus tait ynan fi hohos anu beta ye. Tna Ait yrok yasen oh. Feto kbe anu meen brok bsen u ye.
1CO 15:23 Raa beta meen mrok masen beta mam ayõ sau su fee: Tiwya Kristus yrok yasen tinyi wia yatim. Tna oon ro Ait yama tabam refo u to, meen raa wAit beta mrok masen ye.
1CO 15:24 Tna tabam haberek. Tna ana ro mamo byoh Kristus to, kabes beta, aban mana, bobot, raa ro matak, msya raa ro mase bo to, kbe Kristus yno ana beta safe mkak. Kristus yamo Raja tna ybo raa mamo snok ati ro Ait yber hasyoh raa beta ro mamo byoh kʼAit. Kristus kbe yhau abyõ ybo bombra beta. Tna tis rau to yno re kbe raa waa bo mhai u fee. Tna yoo yatak rAit ysya hroh rAit reto yee kʼYaja.
1CO 15:27 Bokom ro Allah mawe Allah yoo Kristus yse abyõ ybo bombra beta. Bokom reto mawe 'bombra beta'. Menohe Allah tait, kbe Kristus ybo fee. Allah oh mi Raa ro yoo bombra weto beta yse kʼYesus.
1CO 15:28 Kristus yber hasyoh raa beta ro mamo byoh kʼAit mkak to tna Ait ysan bo beta kʼYaja. Tna Kristus yesait yawe Yaja yase ybo Ait ye. Feto to tis rau to, Allah yesait aran ro yase toni tna ybo bombra beta.
1CO 15:29 Raa baro mnaut raa wana ro mhai oh. Tibyo ana ksoh raa mbaptis ana. Mfi bo raa ro mhai meen mrok masen fee, raa mno bo reto mkah bawya?
1CO 15:30 Amu ja nkyas Yesus yasom kʼraa tibyo raa taro kmo amu yoyo, mawe mame amu njat. Mfi bo ro amu nkyas to, bo ro mabo fee; mkah bawya amu beroh nmo nkyas bokyas refo renti?
1CO 15:31 Jõ tkyas Bokyas ro Yesus reto tibyo raa taro to knait jõ. Ti wawa raa saim bo mawe mame jõ tajat. (Bo ro jõ tkyas reto mabo tu oh!) Tna anu haberek smot Kristus Yesus Tuhan ranu tibyo jõ simaut. Bo reto mabo tu oh!
1CO 15:32 Jõ thau mam Efesus fo, wore tiwya raa ro kmo jõ to mama mafa msya jõ. Ana weto safo mfi kak rbyoh. Mfi bo raa ro mhai kbe mrok masen to fee, kbe jõ bitsre bokyas refo rof. Jõ bitsre bo refo afo re raa kmo jõ u fee. (Menohe Kristus yrok yasen to mabo oh, sioh fee! Tna meen raa wAit beta kbe mrok masen ye.) Feto to nri raa ro hawe bo mari Allah to ma! Ana taro mkyas mawe, “Mfi bo anu menrabu kbe bhai to, nma, ifo biit bo wer, bta jyõ wer! Mbau a! Tnaut tawe raa mamos wana mhau mawyõs fee. Fyi re anu kaket anu bno bo ro moof? Mafer marak!”
1CO 15:33 Nri bokyas rana reto ma! Ana weto mkyas bo sioh-sah. Nnaut oh: “Mfi bo raa sait yiranya ysya raa ro mimara mboh to, kbe ait retait yasen yno bo mnan ana ye.” Bokyas reto to mabo oh.
1CO 15:34 Feto to nisoh nhaf wanu nno bo ro moof. Nno iro u to ma. Anu baro nhar Allah fefares. Bo reto tawe kʼanu afo re anu hrenaut tna nanwaruk.
1CO 15:35 Raa taro mtu bo mawe, “Raa ro mhai to, kbe meen mrok masen fyi? Metsu wana weto to meen mnan bawya?”
1CO 15:36 Anu wase bo a? Metsu raa ro meen mrok masen to moof miwer. Ati ro anu nyum ⌞yafrun⌟ to makan weto sari mam tabam wia tna kmoh moo maut. Feto ye raa metsu rana ro mhai to, msya metsu rana ro mrok masen to, kbe hayah, mnan anya fee.
1CO 15:37 ⌞Yafrun⌟ makan ro anu nyum weto mnan mara rau ro kbe moo to fee. Bobat manaf rau ro tinyi raa myum to maku sai fares.
1CO 15:38 Menohe Allah yno bo makan aro sor to haberek tna moo maut mkah bonaut rAit sai. Bo makan masu aro rau to hayah-hayah. Allah yno re bo ro ja raa myum aro hayah-hayah to moo maut mse make aro hayah-hayah.
1CO 15:39 Tna bo knik-knak ro maam to beta mnan anya fee: Raa metsu wana to mnan anya msya kak to fee ye. Tna ruu to metsu rau to hayah ye. Tna syoh to metsu rau to hayah ye.
1CO 15:40 Tna bombra ro mhau mam ayoh uu to bo weto mnan anya msya bombra ro mhau mam tabam refo fee. Bombra ro mhau mam ayoh uu weto moof wau to hayah, tna bombra ro mhau mam tabam refo to moof wau to hayah ye.
1CO 15:41 Ayõ msya snyi msya sken to mnan anya fee. Bo weto moof beta. Tna sken weto to aro rau-rau hayah ye.
1CO 15:42 Feto ye mkah raa ro mhai tna meen mrok masen. Hai ro raa sama to, kbe mnis. Tna metsu ro meen mrok masen reto to hayah, kbe meen mhau mroon.
1CO 15:43 Hai ro raa sama to moof fee tna matak fee. Menohe metsu ro meen mrok masen to hayah. Anu raa betsu wanu ro meen mrok masen reto kbe matak tna moof ye.
1CO 15:44 Anu raa betsu ranu to mtai mhau mam tabam refo sai. Anu bhai tna hai ranu raa sama. Menohe anu betsu wanu ro meen mrok reto to hayah. Betsu wanu ro tna to, meen matak mhau mawyõs mam sawro ro Allah. Wore anu bhau mam tabam refo fares to Allah yfen anu betsu wanu mfi betsu wanu wefo. Tna kbe meen Allah ysan betsu ro tna kʼanu.
1CO 15:45 Bokom ro Allah mawe, “Allah yfen Adam yasen yamo raa ro maam tinyi wia.” Menohe 'Adam ro Ttis' tait hayah. Ait fi Kristus. Tna Ait yno re anu bfos ranu maam.
1CO 15:46 Raa betsu wanu ro tinyi fo matak mhau mam tabam refo sai. Tna fo meen bi Ait ysan betsu ro meen mhau mroon to kʼanu.
1CO 15:47 Raa ro tinyi tait, Allah yoo koh yfen. Tna Raa ro Ttis tait yfen mkah koh sai fee. Ait ybam sawro ro Allah yama.
1CO 15:48 Raa ro tabam refo to mnan hohos ranu, Adam. Tna raa ro meen mhau mam sawro ro Allah to, kbe ana mnan fi Kristus.
1CO 15:49 Anu ro bhau mam tabam refo fo betsu wanu to bnan Adam. Tna meen anu fri betsu ro mnan Ait ro yama ybam sawro ro Allah.
1CO 15:50 Taja, tme, tao, tano na; jõ tawe kʼanu tawe, raa betsu wanu wefo to, Allah yfen yno kwiyan msya mees sai. Tna betsu wanu wefo ro kbe mhai tna sari to, meen mhau mam sawro ro Allah yamo Raja ybo to fee. Sawro rAit reto to, bombra beta mamo mhau tno fee: Bo ro mhai tna bo ro sari to, meen mhau tno fee.
1CO 15:51 Nri a? Bo ro tkyas kʼanu refo ja raa mhar kaket fefares. Anu beta meen bhai fee. Menohe anu beta kbe haberek.
1CO 15:52 Meen, ati ro raa mfi saa buk ro ttis mawia to, bo reto kbe frok tubor. Tna raa ro mhai to, ana mse metsu wana ro mroon. Tna mrok masen. Tna anu betsu wanu beta to, kbe haberek ye.
1CO 15:53 Betsu wanu mam tabam refo to, sne tna kbe mhai. Menohe meen anu bse betsu wanu ro tna. Betsu wanu weto to matak. Tna kbe mhau mroon, mhai fee.
1CO 15:54 Meen anu brus betsu wanu ro bose wefo tna haberek bse betsu wanu ro matak weto. Tna mam wore weto to raa mhai u fee. Kbe anu bros btak. Tna ati reto to, kbe bokom ro Allah refo mabo: “Oon ro raa mhai to maum oh. Mamo snok mam mfo refo fo, Ait ro yase tait yros abyõ mam bombra beta!”
1CO 15:55 “Ait sait yhau abyõ bombra beta mefi! Kbe raa mhai u fee. Ait fi yhau abyõ tibyo raa sraujin bo kbe ana mhai to u fee!”
1CO 15:56 Raa ro mno iro kbe mhai. Tna Watum ro Musa yoo mbam Allah oh mi mno re raa mhar mawe ana mno iro to. Tibyo anu raa to ja waa bo anu bhai.
1CO 15:57 Menohe Allah ybis Tuhan ranu Yesus Kristus yama yoo riof yee kʼanu. Ait yno feto tibyo anu waa bo meen bhai to aro u fee. Kbe anu bros btak. Tibyo byoh asik mase kʼAit.
1CO 15:58 Taja, tme, tao, tano na ro jõ ksoh; Allah ysan riof kʼanu oh. Feto tibyo jõ tawe kʼanu tawe, “Bito nros tu. Tna smot bi Ait kaket renti mamo snok tis rau. Susu ma. Nno bo ro Tuhan ysi kʼanu to, nno kaket. Anu nhar nwe bombra ro anu nno weto to, kbe meen saef fee.”
1CO 16:1 Tna ro mtan to, tkyas pitis ro anu noo nsan kʼraa kinyah ro Allah wAit. Tiwya jõ tawe kʼjemaat mam provinsi ro Galatia weto tawe, “Ayõ ro minggu yoyo to, anu aro sait-sait yoo pitis wait baro yse hayah wia.” Tna jõ tawe anu beta nno bo mnan raa ro jemaat mam Galatia weto tii mno ye: Anu sait-sait kbe tufrok pitis wanu mamyot bo ro ja anu nkai to, noo baro nsan. Siwyan pitis wanu to wia re ati ro jõ tama to, kbe anu nhoh-hoh saso to ma.
1CO 16:3 Nsok raa ro ja mno bo moof baro re ana moo pitis ranu reto to, makah mamo mee kʼraa ro Yerusalem. Jõ tama tna kbe tkom aam sau tee kʼana weto makah mamo ye. Tkom aam reto tkyas pitis ro anu nee reto afo re jemaat ro Yerusalem mhar ana weto ro mbam jemaat ro Korintus mama to awya sya.
1CO 16:4 Soh anu ksoh to, kbe jõ tsya ana nmo su kota ro Yerusalem ye.
1CO 16:5 Meen jõ tbam Yerusalem tama frit Makedonia, tna tama to kʼanu mam Korintus.
1CO 16:6 Tna thau hari minggu baro soh mfe snyi baro tsya anu mam beto. Twase fares. Karik jõ thau snyi ro foos mfi to ska wia. Tna kbe anu noo bo ro jõ tnaut to baro nee tna re tasen tamo iso renti.
1CO 16:7 Jõ hawe bo tama thau ti mabuf sai. Soh Tuhan ybis to, jõ ksoh thau kait baro tsya anu.
1CO 16:8 Jõ tawe thau mam Efesus fo baro rere mamo snok mam korat ro Pentakosta wia.
1CO 16:9 Raa mawat mam befo beswan bokyas ajõ. Menohe Tuhan yerif iso afo re jõ tkyas Bokyas ro Yesus kʼraa tna mafer rau to moof.
1CO 16:10 Tna soh Timotius yama yo kʼanu to, nmat ait kaket. Tna nmen ait nse yhau ysya anu mam amah wanu re ait waa ma. Ja ait ykah bo ro Tuhan ybis to, ynan jõ ye.
1CO 16:11 Nitrah nhaf wanu kʼait. Niwana ait to ma. Tna ati ro ait snok ybam kota ranu yamo to, noo bo nee kʼait afo re ait yamo kaket. Jõ tsya raa ro kro Kristus taro to, ste ait kbe hah ye yamaʼt Efesus.
1CO 16:12 Tna ro mtan to, jõ tkyas bfoh ranu, Apolos kʼanu. Riwai jõ tbis ait kro raa ro smot Kristus taro to mama mmat anu. Jõ soh-soh ait ysya ana mamo. Menohe ait yako. Yawe ait sui. Yawe meen ti aro to tna ait yama.
1CO 16:13 Jõ tawe kʼanu tawe, “Nhau kaket anu. Bito nros ntak tu. Tna smot Kristus matak snok mam tis rau. Waa ma.
1CO 16:14 Bombra beta ro anu nno to, nno mkah nhaf ro natmof raa anya.”
1CO 16:15 Anu nhar nwe Stefanus ysya raa wait weto to, ana raa ro tinyi smot Kristus mam provinsi ro Akhaya. Ana moo mhaf wana mee kʼTuhan tna mfo refo ja ana mhau mbet raa anya ro Allah wAit. Ana weto to mamo sryan kʼanu beta.
1CO 16:16 Tna tawe kʼanu tawe, “Niwana ana ma. Nmat ana to, tna nri bo ro ana mawe kʼanu to kaket.” Ana weto mur-mur mkah bo ro Tuhan kaket. Jõ tawe kʼanu tawe, “Nri bo kʼawya sai ro ja mboti iso ro Stefanus ysya raa wait mno to.”
1CO 16:17 Stefanus, Fortunatus ysya Akhaikus mama mo kʼjõ oh. Tibyo jõ simaut toni. Anu jemaat ro Korintus to nhau mam tabam ro fari tna anu ntai nma no kʼjõ fee. Feto to ana mabo tuuf weto mama mkah bo msya jõ su.
1CO 16:18 Ana mno re jõ simaut. Mnan fi tiwya ana mno anu simaut ye. Jõ tawe kʼanu tawe, “Nyoh asik mase kʼraa ro mnan feto.”
1CO 16:19 Jemaat ro Asia weto mmah meen kʼanu. Akwila ysya Priskila msya jemaat ro siret skabuk su mam amah rana to mmah meen kʼanu beta ye.
1CO 16:20 Raa ro kro Kristus to ro mhau mam befo beta to mmah meen kʼanu ye. Jõ tawe kʼanu tawe, “Hana anya tna nmah meen kʼanya.”
1CO 16:21 Tna jõ tmah meen kʼanu beta ye. Jõ tesait tkom aam refo tiim kʼanu.
1CO 16:22 Awya ro hawe bo yhafri Tuhan to, kbe ayoh mroh mai kʼait. Maranata; Tuhan, nama fooh sai!
1CO 16:23 Jõ skabuk afo re Tuhan Yesus yatmof anu beta.
1CO 16:24 Tna Kristus Yesus yno re jõ thafri anu beta ye.
2CO 1:1 Aam refo mbam kʼjõ, Paulus. Allah ksoh tibyo jõ tamo raabis (rasul) ro Kristus Yesus rAit. Jõ tsya Timotius nmah meen kʼanu. Timotius fi raa ranu ro ja kro Kristus ye. Amu mbewok nkom aam refo nee kʼanu jemaat ro Allah, mam kota ro Korintus. Amu nkom aam nee kʼanu nmat wia tna nwe anu nee kʼraa ro mhau mam remo makin sor mam provinsi ro Akhaya. Nee kʼana ro Allah wAit re ana beta mmat aam refo ye.
2CO 1:2 Amu mbewok skabuk Bja Allah nyoh re kbe Ait ysya Tuhan Yesus Kristus matmof anu beta tna mno re anu nhau nhaf tnok sai.
2CO 1:3 Nma anu bibi Allah! Ait tait Yesus Kristus Yaja. Yesus Kristus tait Tuhan ranu. Tna Allah tait anu Bja ranu beta ro smot Yesus to ye. Boatmof beta to mbam bi Ait yesait aran yum. Tna ati ro anu sraujin to, Ait ykyas bo kʼanu, yno re anu sorni sraujin wanu weto.
2CO 1:4 Ti aro-aro bo knik-knak ro mkair-kar mama mai kʼanu. Tna raa mno bo ro mkair-kar mai kʼanu ye. Tibyo anu sraujin. Menohe Allah yno re anu sorni sraujin wanu weto. Yno re anu bhaf wanu me simaut u. Yno bo reto afo re anu bhar bno bo reto kʼraa roto ye. Bo knik-knak ro mkair ja mama mai kʼraa. Tna mfo refo soh anu bmat he raa sraujin to, anu bmo bkyas bo moof kʼana bno re ana sraujin u fee. Bno ana me simaut u. Anu be bno bo ro tii Allah yno kʼanu feto.
2CO 1:5 Kristus tii ykai bo ro mkair-kar mawat. Tna Allah yno re Ait sorni sraujin rAit reto. Anu kro Kristus, tibyo anu fri bo ro mkair-kar mawat mnan fi Ait ye. Reto mnan fi kair ro mama mai kʼYesus msis-sas hofyat tibyo mama mai kʼanu ye. Menohe Allah ja yno re anu be bnaut sraujin wanu u fee. Yno feto kʼanu mnan fi tii yno Kristus ye.
2CO 1:6 ⌞Amu mbewok nkyas riof ro mase kʼraa.⌟ Tibyo ti aro aro kair mama mai kʼamu. Tna ti aro rau-rau Allah ykyas bo moof kʼamu nhaf wamu ye. Ait yawe, “Waa ma. Sraujin ma. Nnaut yyi ma. Bito ntak oh!” Ait yno amu nhaf mnem feto. Yno amu sraujin toni fee. Amu fri kair ye, tna Allah yno amu nhaf wamu me mnem u. Bo ewok weto Allah ybis afo re anu nros ntak smot Yesus. Anu raa ro kro Kristus to, ja fri bo ro mkair, mnan fi bo mkair ro mbtek mai kʼamu mbewok feto ye. Tna Allah ykyas bo moof kʼanu nhaf wanu ye. Yno anu sraujin u fee feto. Ait yno anu nhaf mnem feto. Tis rau to, ati ro anu nkai bo ro samyoh to, anu ntai ntak beroh nsom kair reto.
2CO 1:7 Ja bo ro mkair-kar mbtek mai kʼanu ye, mnan fi bo mkair ro ja mbtek mai kʼamu mbewok feto ye. Menohe amu nhar nwe kbe Allah yno anu sraujin u fee. Yno feto mnan ja Ait yno kʼamu mbewok ye.
2CO 1:8 Raa wamu sor: Amu mbewok nkyas bo baro kʼanu, afo re anu nhar arin ro mkair tii amu nkai mam rabin ro Asia Kecil. Ati reto to, raa mno bo ro mkair toni mai kʼamu. Tibyo amu ntak nsom bo ro fanes reto to fee. Amu ntai fee. Tibyo amu nnaut nwe kbe amu nhai.
2CO 1:9 Ti reto to, amu nnaut nwe ayõ ro amu nhai to kene oh. Menohe amu nhai fee; amu nhau sai. Allah ybis arin ro mkair reto mama afo re amu nhar nwe amu nesait ntak nno riof kʼamu ai fee. Allah yno amu nfos wanu miyõ fares afo re amu nhar nwe Ait oh mi Raa ro yatak yno riof kʼraa tna yatak yno raa ro mhai to, mrok masen.
2CO 1:10 Wore weto to bo ro msai toni mama mai kʼamu. Tibyo amu kene wo nhai. Menohe ati reto to, Allah yno riof kʼamu. Tna mam wore wo bo ro mkair-kar meen mama to, amu nhar nwe kbe Ait yno riof kʼamu sai ye.
2CO 1:11 Sik ma nros tis amu mbewok mkah bo skabuk amu. Kbe Allah yari boyoh wanu tibyo yno amu nhau fares. Feto tibyo raa mawat mmat bo ro moof Allah yno kʼamu mbewok. Soh Ait yno re amu nhai fee, kbe ana mayoh asik mase kʼAit sai.
2CO 1:12 Amu mbewok simaut toni nwe amu ja nno bo beta mkah nhaf ro moof sai. Wore amu nhau mam tabam refo to, amu nhau nno bo ro Allah wAit sai. Bo ro ati reto. Tna amu nno bo ro moof kʼanu ro nhau mam kota ro Korintus to, amu sioh anu aro fee ye. Raa ro tabam refo mnaut mawe, “Amu nno bo feto fee; Paulus ysya Timotius wase bo.” He mfe, Allah yatmof amu oh mi amu ntak nno bo ro moof sai.
2CO 1:13 Amu mbewok nkom aam kʼanu to, amu nkyas bo abyõ sai, re kbe anu srau nhar kaket. Amu nmyõt bo aro fee. Tna jõ tawe ksoh re kbe anu nhar nwe
2CO 1:14 amu mbewok to raa ro nhaf moof. Anu nhar amu kaket fefares. Menohe kbe anu nhar amu kaket. Tna meen ati ro Tuhan Yesus yhah yama u to, kbe anu bibi amu, nwe amu nno bo ro moof syok. Ati reto to, kbe amu mbewok bibi anu beta feto ye.
2CO 1:15 Tii jõ tnaut tawe, “Jemaat ro mhau mam kota ro Korintus to, ana ksoh jõ. Feto to, ana ksoh mawe jõ tamo tmat ana.” Tibyo tawe tamoʼt provinsi ro Makedonia to, tna tawe tama tmat anu wia. Tii tawe tamo iti tmat anu ro nhau mam Korintus. Tna thah tama to, tawe tmat anu iti u. Tna mun ro ewok reto to, tawe kbe anu noo boit aro, noo bo ro jõ tawe bo to baro nee kʼjõ, re kbe tbo tamo renti mam provinsi ro Yudea. ⌞Tawe tamo, tama tna tkyas watum ro Tuhan kʼanu u.⌟ Tawe kbe tno bo moof reto kʼanu muhrin ewok. He mfe. Tii tama mun ro ewok reto fee. ⌞Ati reto to, jõ ksoh tawe tama. Menohe tnaut myum-yam mam thaf mato tawe anu taro hawe jõ. Anu nhar jõ kaket fefares. Anu wase jõ thaf moof sai. Mno tibyo tawe rau ro moof to, tyum ati ro tama u.⌟ Feto to tii tama tmat anu muhrin ro ewok reto fee.
2CO 1:17 Tii tnaut tawe tama to kʼanu. Menohe tama fee; tyum ati ro tama u. Tibyo anu hre nnaut ntu banu nwe fyi? Nno be anu nnaut nwe ja tno tfi raa ro tabam refo sai. Ana weto ja srau ewok. Ana weto ja mawe, “Ae, kbe tno bo reto.” Menohe ana ja mno bo ro ana mawe reto fee.
2CO 1:18 Bo ro Allah yawe yno to, Ait kbe yno tu oh. Tna Watum rAit ro amu nkyas kʼanu to, ja sioh fee ye.
2CO 1:19 Tii jõ tsya Silwanus, ysya Timotius nma nkyas Yesus Kristus yasom kʼanu. Ait fi Ku ro Allah yare. Yesus tait Raa ro srau makin-akan fee. Ait ja ykyas bo mabo rau sai aran. Tna bo ro yawe yno to, Ait yno yum.
2CO 1:20 Allah ysi bosi mawat. Tna Kristus tait Raa ro yno bo weto beta. Au oh mi raa ro kro Yesus ja bibi bo yase ro Allah rAit. Tna anu bwe, “Amin: Mabo oh!”
2CO 1:21 Nnaut nwe Allah oh mi Raa ro ysok anu tna yawe anu bmo raa wAit. Tna Ait oh mi Raa ro yno amu nsya anu bros btak smot Kristus.
2CO 1:22 Ait yoo Har rAit yse kʼanu afo re raa mmat tna mhar mawe anu fo raa wAit yum oh. Tna yoo Har rAit yse mjin mam anu bhaf mato wanu ye. Allah yoo Har rAit reto yse matim wia. Yno afo re kbe anu bhar bwe Ait kbe yno bombra sor ro yawe meen mama mrof. Meen yno yum feto oh.
2CO 1:23 Jõ hawe bo tama bhah anu. Tto bo mkah Allah yasom tawe reto oh mi jõ thah te tamaʼt kota ro Korintus fefares to.
2CO 1:24 Amu ro nmo raabis ro Allah rAit to, amu hawe bo nbis-baas anu, tko-tka anu nwe, “Smot fefo!” Amu nno feto fee! Nnaut bo reto ma! Amu nhar nwe anu ja nros ntak smot Kristus matak oh. Tna amu ksoh nros tis tna nban anu afo re anu simaut mase.
2CO 2:1 Tiwya tama to kʼanu to, tna bhah anu. Bokyas ajõ mno anu sraujin. Tna mno jõ sraujin ye. Jõ hawe bo tno feto u. Feto to ati reto te tama tmat anu mun ro ewok reto fee. Tyum ti aro.
2CO 2:2 Mfi bo jõ tama tno anu sraujin to, kbe awya oh mi ye yno jõ simaut u to? Kbe raa aro fee. Kbe anu beta sraujin sai.
2CO 2:3 Jõ hawe tama bhah anu. Tibyo tiwya tkom aam sai ro bhah anu. Tesait tama fee. Tkom aam reto to, ⌞re kbe raa ro tii mno bo ro mkair weto to, kbe mari tna manwaruk. Manwaruk tna me mno bo ro moof.⌟ Jõ hawe bo tama tkyas bo ro mno anu sraujin. Feto to tama fefares, tyum ti aro. Soh anu ne nno bo ro moof to, tna re ne simaut u to, reto mno jõ simaut mase ye. Anu nhar nwe ati ro jõ simaut mase to, anu ja simaut mase ye.
2CO 2:4 Tako hawe sai tkom aam reto bhah anu. Jõ ksoh anu toni sai tibyo tkom. ⌞Tkom afo re anu nanwaruk, tna ne saso Tuhan.⌟ Tii tkom aam reto to, jõ srau mham tna yukan mbtek ye, menohe jõ beroh tkom. Jõ hawe bo bokom ajõ mno anu sraujin. Menohe tkom re kbe anu nhar nwe jõ thafri anu.
2CO 2:5 Raa ro jemaat ranu sait tii yno bo ro mkair. Bo ro yno reto mno jõ sraujin. Tna mno anu ro jemaat Korintus reto beta sraujin toni. Bo ro tawe reto to, jõ tkyas tiryõ ye fee.
2CO 2:6 Anu nwat nifah ait. Reto mas mafer ro ati kʼait: Tibyo ait yashana oh. Mnan oh. Bhah ait renti u ma.
2CO 2:7 Mfo refo ntu ait yama tna nbo yatem tna ne niranya nsya ait u. Nkyas bo rere kʼait afo re ait sraujin toni fee. Nno be ait sraujin toni, ⌞tibyo yitsre bosmot rait.⌟
2CO 2:8 Tawe nkyas bo kʼait nwe anu natmof ait fares, afo re kbe ait sraujin toni fee.
2CO 2:9 Aam ro tii tkom tee kʼanu reto to, sanet anu. Tkom afo re kbe thar tawe soh anu nri bo ro tawe beta to, fe mfe a?
2CO 2:10 Soh anu sorni bo ro ait yno tna ne nbo ntem nsya ait to, kbe jõ sorni bo ro ait retait yno to ye. (Ebokmi jõ kmo ait u fee: Safo ro yno reto to mai kʼjõ fee.) Kristus ymat tna yhar yawe jõ tnaut anu tibyo kmo raa retait u fee.
2CO 2:11 Anu bhar bwe ja kabes yabi (Iblis) hawe bo anu biranya bsya raa anya. Ait saim bo yawe anu bhaf kair. Feto to, ne nbo raa retait yatem afo re kbe kabes yabi retait besruf anu fee.
2CO 2:12 Tiwya tamoʼt remo ro Troas. Tamo tkyas Bokyas Moof ro Kristus. Tamo tna Tuhan yno re raa ro mhau mam remo reto ksoh mari bo ro jõ tawe.
2CO 2:13 Titus tait anu bfoh ranu mam Kristus. Tnaut tawe Titus yatim wia oh, tna ste jõ mam tno. He mfe; ait yarak fares. Tibyo jõ tnaut yyi ait. Yarak fares feto, tibyo thau kait mam remo ro Troas fee. Tmah meen kʼraa weto, tna tasen tamo bojõ mam provinsi ro Makedonia.
2CO 2:14 Amu mbewok kro Kristus. Ait yamo aban mana ramu. Tna amu noo nhaf wamu nee kʼAit oh. Reto mfi bo Ait yatim wia yamo. Tna amu simaut mase kro Ait mam tis. Allah yno Kristus yase yros yatak abyõ. Tna amu nros ntak su nsya Ait ye. Tna raa ro byoh mhau mte. Tayoh asik mase kʼAllah. Mam woyõ-woya amu mbewok nmo to, amu nkyas Bokyas Moof ro Kristus kʼraa. Amu nkyas Ait yasom afo re ana mhar Ait ye. Bokyas Moof reto to, mfi bo ro sawer moof.
2CO 2:15 Amu mbewok nkyas Bokyas ro Moof reto. Amu nkyas bo reto tna Allah ksoh. Soh Kristus yesait ysan bo kʼAllah to, Ait ksoh bo reto toni. Amu mno bo ro Kristus ybis yawe. Feto to ati ro amu nno bo weto to, reto mnan fi Kristus yesait ysan bo ro sawer kʼAllah ye. Tna ntwe rau to, raa ro mkai riof ro mase to, ana masan ye. Tna raa ro mamo mam iso ro mkair to, ana masan ntwe rau to ye. Menohe ana hawe. Tibyo kbe ana safe mkak to.
2CO 2:16 Raa ro mkai riof to, ana masan ntwe reto mnaut mawe, “Bo ro sawer reto to! Bo moof ro mno riof kʼamu.” Menohe raa ro kbe safe mkak to, ana masan ntwe rau to, mnaut mawe, “Bo mnis! Bo ro meen mno amu safe mkak!” Amu raabis ro Allah fo, nesait ntak nno bo ro msai refo to fee. Anu beta fo raa tu sai. Anu aro besait btak bkyas Bokyas Moof ro Yesus fee.
2CO 2:17 Guru taro mno bo ro mkair. Ana mawat saso pitis sai tna reto oh mi ana mkyas bokyas ro Allah. Menohe amu fo raa ro srau ewok fee. Allah oh mi ybis amu nkyas bokyas rAit to. Tibyo amu nfi sryan ro Kristus wAit nmo nkyas bokyas refo. Amu nhar nwe Allah yros ymat sas amu.
2CO 3:1 Ti aro-aro to, guru ro srim mama ⌞mawe mkyas watum ro Allah mam jemaat ranu.⌟ Ana ja bibi ana ai afo re anu nnaut nwe ana to raa ro mhar bo. Tna guru ro srim weto to, baro mama moo aam (surat perkenalan) mee kʼanu nmat. ⌞Aam wana weto to mbam jemaat wana ro mhau fari. Raa manes mam jemaat wana mam wono tii mkom aam weto. Mkom aam bibi guru weto. Bibi ana afo re kbe anu nhar nwe ana weto to raa ro moof.⌟ Menohe anu ro nhau mam kota ro Korintus nhar amu mbewok oh. Feto to amu nma bibi amu nesait ai fee. Tna amu nma nerif aam (surat perkenalan) kʼanu feto fee ye.
2CO 3:2 ⌞Tiwya anu wase Kristus. Tna amu nma nkyas Ait yasom kʼanu. Tibyo anu nashana. Au oh mi anu nhar nwe amu fo raabis ro Allah tu oh.⌟ Tna raa beta soh ana mmat anu to, mmat he mfo refo anu nhaf, srau wanu to moof. Mmat feto tibyo ana weto mhar mawe bo reto mbam bokyas ramu ro anu beta nri. Feto mi ana mhar mawe amu fo raabis ro Allah to ye. Mhar mawe tii amu nkyas watum rAit kʼanu kaket. Anu beta nhar bo ro amu ja nno oh. Feto to, amu nbo aam (surat perkenalan) aro noo nee kʼjemaat ranu nmat to fee. Amu nno mkah bawya? Tna amu nyoh nwe anu nkom aam ro bibi amu fee ye. Amu nwe nbo aam re kbe jemaat roto mmat to mkah bawya? ⌞Amu nno bo nfi guru ro anu wase fares weto fee.⌟ Amu nhar mam amu nhaf mato wamu to, nwe mfo refo anu kro Kristus.
2CO 3:3 Anu nrok smot Kristus. Tna raa mmat he anu nhaf, srau wanu to mrok moof. Reto mnan fi Kristus yesait ykom aam sau. Amu mbewok oh mi ro tiwya nma nkyas Ait yasom kʼanu. Reto mnan fi anu nesait oh mi 'aam' ro Ait ykom reto. Aam reto mkyas amu ye mawe amu oh mi raabis wAit. Allah tait Allah ro yaam. Tna Har rAit oh mi Kristus yoo yama ykom aam reto. Yoo bokom msya tinta ykom abyõ mam aam fee. Ykom abyõ mam fraa fee ye. Ait yse watum rAit mam anu nhaf mato. (Reto mnan fi Ait ykom yno mayir abyõ mam raa mhaf mato.)
2CO 3:4 ⌞Amu mbewok nhar nwe anu nrok smot Kristus tu oh. Tna Har ro Allah mama mhau mam anu nhaf mato ye.⌟ Kristus oh mi yno re amu nhar bo weto. ⌞Feto to amu nhar nwe Allah oh mi ybis amu nmo nkyas Bokyas ro Moof reto kʼanu.⌟
2CO 3:5 Amu nkah armato ro Tuhan mkah tak ramu ai fee. Allah oh mi yno bo aro sor ro amu nkah to, tufrok mafer ro moof.
2CO 3:6 Allah yno amu srau tna ntai re kbe mbetoo Bosi ro Tna kʼanu. Bosi ro Tinyi reto tii Allah ykom mam fraa. ⌞Au oh mi Watum ro Musa.⌟ Tna soh raa miwer bobis aro ro ybis tinyi weto to, misti re raa weto mhai. Menohe Bosi ro Tna reto to, Allah ykom mam fraa fee. Har rAit yesait mno re raa srau watum rAit. Har rAit matak mno afo re meen raa mhau hame wajin. Feto oh mi Allah yawe amu mbetoo Bosi ro Tna reto kʼanu. ⌞Au oh mi Bokyas Moof (Injil) ro Yesus.⌟
2CO 3:7 Tiwya Allah ykyas Watum ro Tinyi kʼMusa. Tna ykom yiir abyõ mam fraa. Tna Musa ymat bo yase ro Allah rAit, tibyo Musa yesait yasu ynaif mrok mawyah. Bosi ro Tinyi reto misti re raa mhai. Menohe Bosi reto to, matak tna mbetoo Allah yase rAit ye. Ti baro firwas tna Musa yasu ynaif ro mawyah reto to, kren rau mroh maku baro. Maku baro menohe raa ro Israel mtai mros sayõ ait yasu rait kaket fefares. Yasu rait kren toni fares.
2CO 3:8 Bosi ro Tinyi reto mbetoo Allah yatak rAit. ⌞Menohe Bosi reto to, matak misoh raa mhaf, srau wana to fee.⌟ Tna misti re raa mhai. Menohe mfo refo Allah yno bo wAit mkah Har rAit. Reto mbetoo bo yase ro Allah rAit to moof miwer.
2CO 3:9 Bosi ro Tinyi reto to, moo safo mana mmit kʼraa. Menohe Bosi reto mbetoo bo yase ro Allah rAit ye. Mfo refo Har rAit mbetoo Iso ro Tna. Iso ro Tna reto to, Allah ⌞ymat mees ro Yesus tibyo⌟ yawe raa mhaf moof ati oh. Tibyo Allah ymit safo kʼraa ro mhaf moof weto fee. Iso ro tna refo fo, mbetoo bo yase ro Allah rAit reto moof miwer Bosi ro Tinyi reto.
2CO 3:10 Jõ tmat Bosi ro Tinyi reto tna Iso ro Tna refo to, tnaut tawe ro Tinyi to, merif bo yase ro Allah rAit to, kaket fee. Tna Iso ro Tna refo merif bo yase ro Allah rAit reto kaket.
2CO 3:11 Tii Musa yasu ynaif mrok kren toni. Ti baro firwas tna kek reto mawyah maku sai baro. ⌞Au oh mi anu bhar bwe Watum ro Tinyi matak rau to mroh kebet-kebet.⌟ Menohe Iso ro Tna reto merif bo yase ro Allah rAit mamo snok mam hame wajin. Tibyo mase rau to moof tna matak toni.
2CO 3:12 Amu mbewok ninaut nwe Iso ro Tna refo meen mhau mamo snok mam hame wajin. Amu nhar bo reto, tibyo amu nkyas Iso refo yoyo. Amu shait fee. Amu waa fee.
2CO 3:13 Tii Musa yoo hawee mabuf tna burut wa yasu ynaif. Ait yhar yawe kek reto mroh mroh tibyo burut wa yasu ynaif. Ait ksoh raa ro Israel mnaut mawe kek reto mhau fares. Ait hawe ana mmat bo kek reto mroh mamo marak. Menohe amu nno feto fee.
2CO 3:14 ⌞Amu nhar nwe Bosi ro Tna, matak rau reto meen mhau tibyo hame wajin. Kbe mroh marak fee.⌟ Menohe tiwya raa ro Israel weto to srau bokyas ro Allah fee. Ana makit mbin. Tna mamo snok mam mfo refo ye, raa ro Israel mmat Bokom ro Musa fares ye menohe srau Bosi ro Tinyi reto fefares. Bo sau burut wa ana makit wana. Tibyo ana wase Allah. Bo reto mnan fi hawee ro mno wa. Tibyo raa mahni bo yase ro Allah rAit. Kristus yesait aran oh mi Raa ro ytai matak yrus hawee reto afo re raa srau Bokyas ro Allah.
2CO 3:15 Mamo snok mfo refo, ati ro raa ro agama Yahudi mmat Bokom ro Musa reto, bo burut wa ana makit wana, afo re ana srau bokom reto fee.
2CO 3:16 Menohe soh raa haberek tna mamo mo kʼTuhan to, kbe Ait yrus hawee reto.
2CO 3:17 Tuhan tait Har. Soh Har rAit reto mjin mam raa mhaf wana to, kbe ana mamo mo kʼAllah to, bo aro burut iso reto wa u fee.
2CO 3:18 ⌞Amu nfi Musa fee. Tii Musa yoo hawee mabuf tna burut wa yasu rait.⌟ Menohe anu bmat bo yase ro Tuhan rAit. Anu bmat Iso ro Tna mase rAu. Tna Har rAit moo bo yase rAit baro mse kʼanu ye. Tibyo ati ro raa mmat anu to, ana mmat bo yase ro Tuhan rAit oh meto. Anu bfi bowane oh meto. Tuhan tait Har. Har rAit ja mhau misoh anu. Misoh, misoh anu fo, mno anu haberek bmo bfi Yesus. Reto oh mi Har rAit reto mno bo yase ro Tuhan rAit ro mse kʼanu oh to, mawyah rau maut, maut mase renti.
2CO 4:1 ⌞Allah yoo Har rAit yse kʼraa mhaf wana.⌟ Yno feto tibyo amu mbewok nmo tna nkah bo wAit, nmo nkyas Bosi rAit ro Tna reto. Amu hrowyõ saah, menohe amu beroh nkah bo wAit. Bitsre fee. Ait yatmof amu. Tibyo amu ntai matak nmo nkyas Bosi rAit ro Tna renti.
2CO 4:2 ⌞Raa taro mawe amu mbewok ja besruf raa.⌟ He mfe. Amu hawe bo nno bo ro mkair, hawe bo besruf raa. Amu nkyas bokyas ro Allah to, amu sioh niryõ maja aro fee ye. Amu nkyas watum rAit to, nkyas abyõ sai. Allah ja yros ymat sas bo ro amu nno. Feto kbe raa mhar mawe amu nkyas bo refo mabo.
2CO 4:3 Raa taro to, bo sau ja burut wa ana masu wana afo re ana wase Allah. Bo reto mnan fi hawee ro mno wa. Tibyo masu mti. Ana weto mhar Allah kaket fee. Tibyo ana kbe mari bo ro amu mbewok ja nkyas to fee. Ana weto srau Bokyas Moof refo fee. Tna meen ana mkai riof fee ye.
2CO 4:4 Kabes yabi (Iblis) tait yfi allah ro ybo tabam refo. Tna ait besruf ana weto beta. Ait burut wa masu wana afo re mmat bo yase ro Kristus rAit fee. Au oh mi yno re ana mari tna srau Bokyas Moof ro Kristus reto (Injil) fee. Kbe ana srau wase bo Kristus tait ynan fi Allah. Masu maah fee.
2CO 4:5 Amu mbewok nmo, nmo to, ja nkyas amu nsom wamu fee. Amu nmo to, nkyas nwe Yesus Kristus tait Tuhan ro yase ybo raa. Yesus ybis yawe amu nma nkah armato rAit mam kota ro Korintus. Ybis yawe amu nma nros tis sai tna nban anu.
2CO 4:6 Ati ro Allah yfen tabam refo fo, Ait yawe sai yawe, “Maah!” Tna mabo: Maah mbrah nenat mama. Ait oh mi Raa ro yno kek mawyah mram anu bhaf mato wanu ye. Yno bsu maah re bhar bo yase ro Allah rAit. ⌞Anu bmat kek reto mam Musa yasu rait fee;⌟ bo yase ro Allah rAit reto anu bmat mam Kristus yasu rAit.
2CO 4:7 ⌞Amu nhar Bokyas ro Moof reto (Injil).⌟ Nhar nwe bo reto to, bo ro mabyoh maut toni, mfi bo satoh. Menohe amu mbewok fo raa sei sai. Amu nse nfi Allah fee. Allah yerif yase rAit kʼamu raa sei sai, ro ja ntak fee. Tak rAit reto yse kʼamu. Reto mnan fi raa moo bosatoh ro mabyoh maut to, mse mam kusia mato. Ja kusia to matak fee, mhau kait fee. Allah yno bo refo afo re raa mhar mawe tak rAit ro msai toni reto to, mbam kʼamu fee, mbam kʼAllah yesait.
2CO 4:8 Amu fo raa sai. Amu ntak fee. Tna kbe meen amu netsu wamu nhai ye. Tna bo ro mkair ja mai kʼamu mbewok. Bo aro rau-rau mama mai. Menohe amu btek nwe fee. Ti aro bo mno amu namboi, tibyo amu wase bo bawya ro kbe amu nno. Menohe amu beroh nno bo ro moof sai.
2CO 4:9 Raa mawat knait amu. Menohe Raa sait yhau yatam amu fares. Raa ro byoh mai amu tibyo amu btek nwe. Menohe amu njat fee, amu nhau naam fares.
2CO 4:10 ⌞Amu mbewok smot Yesus tibyo ja nmo, nmo nkyas yasom rAit. Nkyas yasom rAit yoyo tna raa taro hawe bo mari.⌟ Ana weto mno bo mkair-kar mai kʼamu mbewok. Amu nhau mam tabam refo to, ja bo ro mkair-kar mai kʼamu, mnan fi tii bo ro mkair-kar sor mai kʼYesus ye. Ait raa mame yajat ye oh. Menohe yrok yasen. Amu raa sai. Tna kbe meen amu netsu wamu nhai ye. Menohe amu nhar nwe tak ro mno Yesus yrok yasen reto to, ja mros tis mban amu fo ye. Mban amu afo re amu beroh ⌞smot Ait tna nkyas yasom rAit renti.⌟ Amu nno feto afo re kbe raa mmat yatak rAit ro yse kʼamu. Soh raa mmat yatak rAit ro yse kʼamu to, kbe ana mhar mawe Ait yesait yhau yaam fares ⌞tibyo smot Ait ye. Raa taro hawe bo mari amu nkyas Yesus yasom.⌟ Tibyo ana ja mayõ hre saim-sam bo mawe mame amu njat. ⌞Menohe amu nhau naam fares tna beroh nkyas yasom rAit renti.⌟
2CO 4:12 Feto tibyo amu wase nwe tija kbe amu njat. Menohe amu nsom bo ro fanes reto afo re anu kbe meen nkai riof ro mase reto.
2CO 4:13 Mam Bokom ro Allah raa sait ykyas yawe, “Jõ smot Allah. Tibyo tkyas kʼraa tawe, ‘Jõ fi raa ro smot Allah.’” Amu mbewok smot Allah ye. Tna nhar nwe meen Ait yno amu nrok nsen. Tibyo amu nkyas bokyas rAit reto ye.
2CO 4:14 Amu mbewok nhar nwe tii Allah yno Yesus yrok yasen. Tna nhar nwe meen Allah yno amu nrok nsen mfi feto ye. Anu to raa mana ro Kristus ye. Feto kbe meen Allah yno anu beta nrok nsen ye. Meen yakah anu beta yamo yo kʼAit. Yse anu bros su mam wore wo Ait yhau.
2CO 4:15 Amu nsom bo mkair ro mama mai kʼamu. Nsom sai afo re anu nsya raa taro nri Bokyas Moof ro Yesus. Tna re kbe raa mawat mkai boatmof ro Allah rAit ye. Raa mkai boatmof rAit reto to, tna ana mkyas yasom rAit, mbo faram renti. Tna fo raa roto fri boatmof rAit ye. Tis rau to, raa msis-sas mayoh asik mase kʼAllah tna mkyas yase rAit ye.
2CO 4:16 Feto to, amu mbewok nkyas Tuhan yasom rAit renti feto. Amu nkah bo wAit fo, bo mkair-kar aro sor mbtek mai kʼamu. Tna amu nrok hrowyõ ye. Menohe amu nhau nkah bo mam armato rAit renti fares. Bitsre fee. Amu netsu wamu hrowyõ-rawa. Netsu wamu wefo kbe meen mkair tna fo amu nhai. Ti aro rau-rau amu sraujin ye. Menohe ti firwas ti Tuhan yisoh amu nmos wamu fo, yno re me matak.
2CO 4:17 Mfo wefo bo ro mkair-kar sor mai kʼamu. Menohe amu nnaut nwe, “Mbau a; bo ro mkair weto mai kʼamu rof, kbe meen mhau kait fee. Kbe meen amu nhaf nse bo ro moof miwer mamo snok mam hame wajin.” Soh amu nnaut tna nnit bo ewok reto to, amu nnaut nwe, “Bo mkair-kar ro mai kʼamu mam tabam refo fo, bo ro samyoh kʼamu fee. Bo weto to mfi bo ro mnan-nan sai; bo ro ati fee. Kbe marak fooh. Tna bo samyoh ro amu mfo refo beroh nsom weto to, kbe mno mafer ro moof. Meen amu nhaf nse bo yase ro Allah wAit mase miwer.”
2CO 4:18 Amu nmat sas bo ro ja raa mahni, bo ro amu nsu nmat fefares. Au oh mi amu beroh nnaut bo moof ro meen mama. Amu nnaut bo weto yoyo. Bo weto to meen mhau mamo snok mam hame wajin. Bo ro ja amu nmat mam tabam refo fo kbe mhau waor sai.
2CO 5:1 Anu betsu wanu mfi amah ro manyah tibyo mantrat. Amu mbewok nhar nwe, kbe meen amu nhai tna amu netsu wanu wefo mnis makus. Reto bo ro ati fee. Meen anu beta sikba tabam refo. Menohe Allah siwyan wore wo meen anu bhau mam sawro rAit oh. Reto mnan fi amah ro matak. Mnan fi amah ja raa mfen fee. Tna 'amah' wanu weto meen mhau mroon mamo snok mam hame wajin.
2CO 5:2 Anu bnaut bwe bhau mam tabam refo fares to, bo ro samyoh toni. Anu bwia tna srau kero bwe bse betsu wanu ro tfia. Anu bnaut bwe, “Fooh re Tuhan yoo anu bestu wanu ro moof, yee kʼanu.”
2CO 5:3 Meen anu bhai tna bmo bhau mam sawro ro Allah to, kbe anu bmos wanu mesait aran mhau fee. Meen Allah yoo betsu ro tna yee kʼanu.
2CO 5:4 Mam tabam refo fo, anu betsu wanu wefo matak fee. Kbe bhai. Menohe anu hawe bo bhau betsu marak sai. Feto to anu bwia tna srau kro bwe bse betsu wanu ro tna. Reto mfi 'amah' ro matak. Anu betsu wanu ro tna to, meen mhai fee. Betsu wanu ro tna weto kbe mhau mamo snok mam hame wajin.
2CO 5:5 Allah yesait oh mi yawe ksoh kbe meen yoo betsu wanu ro tna weto yee kʼanu byum. Tna mfo wefo Ait yoo Har rAit yse kʼanu. Yse wia matim afo re anu bhar bwe bo ro yawe meen yno reto to, kbe yno tu oh!
2CO 5:6 Amu mbewok nhar nwe bo refo meen mabo. Tibyo amu waa fee. Tna amu nhar nwe wore wo amu nhau mam netsu wamu wefo fo, amu nhau mam tabam refo fares. Amu nmo nhau su nsya Tuhan mam sawro rAit fefares.
2CO 5:7 Amu nhau mam tabam refo to, amu nahni tna nwe bo reto mabo fefares. Menohe amu nhar nwe bo reto meen mabo tu oh.
2CO 5:8 Nhar bo reto tibyo amu waa fee. Amu nnaut nwe soh amu nhai to moof. Feto kbe amu nmo nhau su nsya Tuhan mam sawro rAit. Nhau mam wore weto to moof miwer amu nhau mam tabam refo.
2CO 5:9 Rau ro ati to, amu beroh nno bo ro moof afo re kbe ja Ait yhaf mnan kʼanu. Amu ksoh nno bo ro moof yoyo; mam tabam refo ye tna meen mam sawro rAit ye.
2CO 5:10 Bko hawe sai meen anu beta bmo bo Kristus. Tna Ait ytu srah wanu. Tna ymit safo kʼraa ro mno bo ro mkair mam tabam refo. Tna ysan bo moof kʼraa ro mno bo ro Ait ksoh, bo ro Ait yhaf mnan.
2CO 5:11 Amu mbewok nhar bo reto. Feto to amu waa Tuhan, tna nkyas Ait yasom. Amu nwe kʼraa nwe, “Nashana oh!” Allah yhar amu nhaf mato. Tna jõ ksoh tawe anu nhar amu nhaf mato ye: Nhar nwe amu nma no kʼanu to, mkah nhaf wamu ro moof. Amu raa ro srau ewok fee.
2CO 5:12 ⌞Guru taro miwana amu, mawe amu mbewok nwe besruf anu. Menohe mfe. Ana wase amu nhaf wamu.⌟ Ati ro Guru weto mnit raa to, ana ja mmat raa metsu mne sai. Ana mmat raa yasom rait, msya bobot rait bo to. Mmat bo weto sai, tna mawe ana mesait raa ro moof. Tibyo ana miwana amu mbewok. Amu nkom aam refo nkyas amu fefo afo re anu nhar amu kaket. Tna re anu nhar nwe kbe ne nkyas bawya kʼraa ro miwana amu. Amu ksoh nwe anu nhar amu kaket afo re anu nhar nwe amu nhaf wamu moof. Amu ja hawe bibi amu ai fefo. Menohe sik ma nri amu bibi amu wia. Amu nnaut nwe soh anu nhar amu kaket to, kbe anu nksoh amu tna nros tis kʼamu kaket ye.
2CO 5:13 Soh raa mamus amu, tna mawe amu nkit mkair to, mbau a. Bo ro ana mnaut mawe to, bo ro ati fee. Thar tawe bo ro ja amu mbewok nno weto to, bo ro Allah ybis yawe. Raa taro mawe amu nkit moof. Nnaut nwe bo ro amu ja nno to, nno afo re mafer moof kʼanu.
2CO 5:14 Amu nhar nwe Kristus yatmof amu. Au oh mi amu ksoh nwe nno bo bawya ro Ait ybis. Amu nhar nwe Ait yajat tna mafer mawat kʼraa beta. Raa sait aran yajat menohe reto mnan mfi raa beta mhai oh ye meto.
2CO 5:15 Kristus yajat afo re mafer moof kʼraa beta. Yno afo re raa ro mhau mam tabam refo fares to, kbe mno bo ro moof kʼana mesait aran u fee. Tna kbe mno bo ro ana mesait aran ksoh mno to fee ye. Yajat afo re ana mhau mno bo ro Kristus yhaf mnan. Tii Ait yajat tna yrok yasen. Reto oh mi mno re kbe mafer msis kʼana weto.
2CO 5:16 Tiwya amu mbewok nwase Kristus fares to, amu bonaut wamu mfi raa ro tabam sai. Tna ati reto, soh amu mbewok nnit raa to, amu nnit kaket fee: ⌞Ati reto amu nmat raa yasom rait tna msya bobot rait bo feto sai.⌟ Menohe mfo refo amu nhar nwe, ⌞rau ro ati to: Anu raa kbe bhau bno bo ro Kristus ksoh.⌟ Feto to, mfo refo ati ro amu nnit raa to, ⌞amu nmat sas raa mhaf mato wana.⌟ Tiwya soh amu mbewok nnit raa to, ja nmat ait mkah amu nsu wanu sai. Tibyo amu nnit bo ro yetsu mne sai. Tii amu nnit Kristus feto ye. ⌞Ati reto to, amu nnaut nwe Ait tait raa sei sai.⌟ Menohe mfo refo amu nnit Ait feto u fee. ⌞Mfo refo amu nhar nwe Ait tait Tuhan ro ybam Allah yama.⌟ Tna mfo refo soh amu nwe nnit raa to, ⌞amu nwe nhar ait yhaf mato rait.⌟
2CO 5:17 Raa ro tabam refo to, ja mhaf wana to mkair. Menohe awya ro kro Kristus to, kbe yamo srau sau, yhaf sau su ysya Ait. Allah yno ait yhaf rait to, haberek. Raa retait yhaf ro tii tinyi mkair reto to, haberek mamo moof kaket. Feto to, awya ro kro Kristus to, yfi bo Allah ye yfen yhaf, srau rait u. Ro tinyi to mamo firwas. Raa retait yhaf, srau rait masen mfi Kristus yhaf, srau rAit ye. Bombra ro tii ro wia smut marak beta. Allah yno yhaf rait mrok tna sai.
2CO 5:18 Allah oh mi yno bo ro moof weto beta to. Yno anu be biranya bsya Ait. Ait ysan Kristus. Tna yitsre raa mame yajat afo re anu be biranya bsya Ait. Tna Ait ybis amu mbewok yawe amu nmo nkyas bo weto kʼraa.
2CO 5:19 Amu nkyas nwe, “Kristus yno iso ro tna. Tna Allah ytu raa beta yawe ana mamo mam iso reto re kbe me miranya msya Allah. Ait ysan Yesus tna raa mame Ait yajat. Yno feto tna safo ro raa mno to, meen ait ymit kʼana fee.” Ait ybis amu nmo nkyas bokyas reto kʼraa.
2CO 5:20 Tna re amu nmo raabis ro ja mkyas Kristus yasom kʼraa. Reto mnan fi amu nsoh wamu nkyas bo ro Allah yawe kʼanu. Amu soh-soh anu nwe nnaut bo ro Kristus yno reto to, tna nse mam nhaf mato wanu oh! Allah yawe anu ne niranya nsya bi Ait.
2CO 5:21 Nnaut nwe Kristus tait Raa ro yno iro aro fee. Menohe Allah yatmof anu tibyo ybis Kristus yama. Yama tna Allah yno Kristus yasom iro wanu ro bno. Tii yama yno bo reto re kbe meen Allah ymit safo aro kʼanu fee. Allah ymat mees ro Kristus tibyo yawe anu bfi raa ro mhaf moof ati.
2CO 6:1 Amu mbewok nkah armato ro Allah su nsya anu. Amu nkyas watum refo kʼanu nwe, “Anu fri boatmof rAit oh to. Tna boatmof reto to, nbo sibosom-bosam sai to ma!”
2CO 6:2 Tii mam aam ro nabi Yesaya to, Allah ykyas wore wo Ait ysan riof kʼraa. Yawe: “Mam wore wo Jõ ksoh tawe tatmof anu to, Jõ tari bo ro anu skabuk. Mam ati ro Jõ ksoh tawe tno riof kʼanu to, Jõ tama tban anu.” Yesaya 49:8 Tna amu mbewok nwe kʼanu nwe, “Nri oh: Allah siwyan oh yawe yatmof raa. Masno ro tii yawe ysan riof kʼraa to, mfo refo mama oh. ⌞Ait yno iso reto oh.”⌟
2CO 6:3 Amu mbewok nkah armato ro Allah rAit to, ja amu nno kaket. Amu nno bo ro moof sai, afo re raa mmat tna ksoh mawe smot Yesus ye. Mfi bo amu nno bo ro mkair to, kbe raa mkyas-kas amu. Tna ati ro amu nkyas Yesus yasom to, kbe raa hawe bo mari.
2CO 6:4 Amu mbewok fo raabis ro Allah. Nmat bo ro amu nno, afo re anu beta nhar nwe amu ksoh nno bo wAit sai. Bo bawya ro Ait yawe to, amu nri tna nno: Ti aro amu mbewok nsom bo ro samyoh. Ti aro bo ro mkair-kar mbtek mai kʼamu. Bo ro msai mama mai kʼamu, tna amu beroh nno bo ro Ait yawe.
2CO 6:5 Tii raa moo too mmok amu ye. Tna ti aro-aro to, raa mfot amu, mbu mam bui mato. Raa hafrah bo ro amu nwe ye tna mno raa mafa. Amu ja nkah bo mawat, tna njin kaket fee. Tna boit ro niit mnan fee ye.
2CO 6:6 Bo weto mai kʼamu menohe amu ja nhau nhaf moof sai: Amu nhau nto mboh sai ye, tna amu mur-mur nri tna nhar bo ro Allah yawe. Tna amu nhau nno bo ro moof sai kʼraa. Tna mam wore kair mama mai kʼamu to, amu kanyin sai. Har ro Tuhan mjin mam amu nhaf wamu ye. Tna amu ja natmof raa ye, mkah srau ewok fee; mkah srau sau sai.
2CO 6:7 Amu mbewok ja nkyas watum ro Allah: Amu nkyas bo mabo yum oh. Tna Allah yatak rAit mhau kʼanu. ⌞Raa ro byoh mamus amu.⌟ Menohe amu fo nhau nhaf moof sai bamu. Amu nhau nno bo ro Allah yawe sai. Amu mbewok nhau nhaf moof sai bamu. Reto mnan fi 'sbe' ro Allah yse kmot wa amu. Tna reto mfi bo sbe ro bewas wa bokyas ro mkair-kar ja raa mkyas mai kʼamu. Amu nhau nhaf wamu moof to, reto mban wa raa ro mhoh byoh mama.
2CO 6:8 Ti aro to, raa miwana bo ro amu nwe. Ti aro raa maun amu mawe amu fo besruf raa sai. He mfe; amu ja nkyas bo abyõ sai, nkyas bo mabo yum oh. Fyi-fya sai raa mamus amu to, ⌞amu mbewok ja nri bo ro Allah yawe tna nno sosor.⌟ Raa taro mawe amu fo noof. Raa taro bibi amu.
2CO 6:9 Amu raa ro nsom marak. Raa taro wase amu. Menohe raa taro mnaut mawe amu raa ro nse. Rabu wawa raa kmo amu. Ana saim mawe kbe mame amu njat. Menohe mamo snok mfo refo amu mbewok nhai fefares. Bo ro samyoh weto sor mai kʼamu. Menohe amu nhau naam sai bamu fares mefo.
2CO 6:10 Bo mno amu sraujin ye, menohe ja amu simaut fares ye. Amu fo raa kinyah sai, ro nse bo kebet sai. Menohe Tuhan yoo bohar rAit ysan kʼamu mbewok. Bohar reto mnan fi bo satoh ro mabyoh maut. Amu ja nkyas watum ro Allah reto kʼraa mawat. Amu nsan bo satoh refo saim kʼraa mawat oh meto. Tibyo ana beta masen bobot. Amu nse bombra aro fee. Menohe amu fri bo ro moof mbam Tuhan. Reto moof miwer toni sai.
2CO 6:11 Raa wamu ro nhau mam kota ro Korintus; riwai amu mbewok nkyas bo abyõ sai. Amu nkyas feto afo re anu nhar amu nhaf srau wamu.
2CO 6:12 Amu noo nhaf wamu mbewok nee kʼanu oh. Menohe anu to noo nhaf wanu nee kʼamu fee.
2CO 6:13 Jõ tkyas bo refo kʼanu mfi fo anu beta ku wojõ ro jõ tatmof. Jõ ksoh tawe anu noo nhaf wanu nee kʼamu si ye.
2CO 6:14 Raa ro smot Yesus fee to, nno irat ranu nsya ana to matak ma. Raa ro ja mari bo ro Tuhan yawe, tna msya raa ro ja mno bo ro mkair-kar to, ewok weto to mnan anya fee. Raa ro mhau mam kek ro Tuhan to, mhaf wana sau su msya raa ro mhau mam wore wo mamur to fee.
2CO 6:15 Kristus yhaf rAit mnan anya msya Belial fee. Yhaf rAit hayah sai. Feto ye raa ro smot Kristus ja mhaf wana to mhau hayah msya raa ro smot Ait fee.
2CO 6:16 Berhala msya bo ro tabam ja raa skabuk to hayah. Tna Samu ro Allah reto hayah. Mfo refo anu beta fo haberek bmo samu ro Allah yhau oh meto. Allah tait Allah ro yaam. Tiwya Tuhan Allah yawe, “Meen Jõ thau su tsya raa woJõ. Jõ oh mi tesait thau tatam ana. Ana weto meen smot Jõ. Tna kbe ana mamo raa mana woJõ.”
2CO 6:17 Feto to Allah yawe, “Tufrok mbam raa ro wase Jõ. Nhau su nsya ana weto ma. Nbo bo wana ro mkair aro ye to ma. Nno feto tna Jõ thaf reo to, titrah thaf tawe Jõ ksoh anu nma no kʼJõ.”
2CO 6:18 Tuhan Allah tait Raa ro yase ybo bombra beta. Tna Ait yesait ykyas yawe, “Nno feto tna kbe Jõ tfi anu Nja ranu ye. Tna kbe anu nfi ku sme woJõ msya ku ro ano woJõ ye oh meto.”
2CO 7:1 Raa wamu, ro amu mbewok ksoh; tii Allah ysi bo weto kʼanu oh. Yawe Ait yfi anu Bja ranu. Feto to nisoh nhaf, srau wanu kaket. Bo knik-knak ro mno anu netsu wanu mkair to, beak fari. Bo ro mkair sor ro anu nno to, nitsre makus oh! Nisoh netsu wanu ye, nhaf wanu ye. Anu beta waa Allah. Feto to, nisoh nisoh anu re nhau nno bo wAit yoyo sai.
2CO 7:2 Noo nhaf wanu nee kʼamu mbewok. ⌞Raa taro mawe amu fo raabis ro Tuhan fee. Nri ana ma.⌟ Ana mamus amu, mawe amu nno bo ro mkair. Mawe amu saso pitis sai tibyo besruf raa sai mefo. Menohe mfe. Amu nhaf mato wamu moof toni sai, amu sikowah tna besruf raa fee. Amu ja sioh raa aro fee.
2CO 7:3 Tkyas bo refo besus kʼanu fee. Amu mbewok ksoh anu toni. Mam wore wo amu nhau mam tabam refo fares to, amu nnaut anu yoyo. Soh fyi-fya sai to, kbe amu njat su nsya anu ye tu oh.
2CO 7:4 Thar tawe anu ro nhau mam kota ro Korintus to, kbe nhau nno bo ro moof sai. Tna jõ bibi anu. Tkyas bo reto kʼraa roto ye. Bo mkair mawat mama mai kʼamu mbewok mam befo fares. Menohe tari he anu ne nno bo ro moof tna jõ trok simaut mase toni.
2CO 7:5 Woyõ-woya sai amu mbewok nmo to, amu fri bo ro mkair. Ati ro amu twok mam provinsi ro Makedonia to, kair mai kʼamu mbewok ye: Raa hafrah bo ro amu nkyas. Tna amu nnaut yyi tna waa ye.
2CO 7:6 Allah tait Raa ja yisoh raa ro mnaut yyi tna sraujin. Yno re ana mnaut yyi u fee, tna sraujin u fee. Ait yno feto kʼamu mbewok ye: Yno re Titus frok mam provinsi ro Makedonia refo. Allah yno re amu nhaf wamu tnok oh meto.
2CO 7:7 Amu ne sraujin u fee. Amu simaut mase nmat Titus u. Ait ybam kota ranu ro Korintus yama. Tna bo ro ait yama ykyas to, mno amu simaut mase toni: Yawe anu ksoh jõ tama to kʼanu u. Yawe anu sraujin. Yawe ⌞anu nri bo ro tii jõ tkyas kʼanu. Nri tna nashana. Tna mfo refo anu nhar nwe bo ro tii anu nno reto to, mkair toni.⌟ Jõ simaut mase toni tari he anu nfot bo ro tii tawe reto tna nno. Titus yawe anu ne nros tis kʼjõ. Bo reto mno Titus ye simaut u tna mno re jõ sraujin u fee ye.
2CO 7:8 Tii tkom aam tna bhah anu. Tna anu nmat aam reto nrok sraujin. Reto mno re jõ sraujin ye. Menohe anu sraujin tibyo fee. Bo ro tawe kʼanu to, mafer rau to moof sai. Mfo refo anu sraujin u fee ye. Tna jõ aro bo sraujin anu u fee ye.
2CO 7:9 Jõ hawe bo tno re anu sraujin. Menohe bo mafer rau to, anu nwe nashana to. Bo ro tkom to, mno anu sraujin wia. Tna Allah yno re tis rau to, anu sraujin ranu reto misti bo ro mkair aro fee.
2CO 7:10 Ti aro raa sraujin bo ro mkair ana mno. Sraujin tibyo masahana tna mkai riof. Raa mrok takoh srau feto to moof. Allah yno tis rau to mafer moof: Raa mkai riof. Raa ro Allah wAit soh sraujin to, ja me mari bo ro Allah yawe. Tibyo mafer rau to, Allah yno ana mhaf, srau to me moof u. Menohe raa taro mrok takoh srau fee. Mamo mo kʼAllah ye fee. Tibyo ana sraujin kait mamo snok mhai si. Raa sraujin kait mfi feto to mkair. Raa ro tabam refo fo, ja ana sraujin feto.
2CO 7:11 ⌞Tiwya raa wanu sait yno safo. Tna anu nastako ait fee. Menohe anu sayõ rof safo reto. Anu noo safo mana nmit kʼait fee ye. Anu nesait nno bo mkair oh meto. Menohe tiwya jõ bhah anu tna anu nri bo ro tawe.⌟ Sraujin mfi feto to moof. Allah yno re mafer ro moof frok: Anu nashana bo ro mkair tii anu nno. Au oh mi anu nsen noo safo mana nmit kʼait oh. Reto moof. Mfo refo anu ksoh toni nno bo moof. Tna re raa mhar mawe jemaat ranu reto me mno bo ro moof sai. Jõ tari bo beta ro anu nno weto to, tna thar tawe anu nri bo ro jõ tkom mam aam ro tii tkom tee kʼanu reto.
2CO 7:12 Tii tkom aam reto fyi? Tkom tawe bhah ait ro yisti safo reto fee. Tna tkom tkyas raa ro ait yno reto sai ye fee. Tii tkom aam reto afo re anu nesait nrok nhar nhaf wanu. Nhar nwe anu noo nhaf wanu nee kʼamu. Allah ksoh yawe anu nhaf sau su nsya amu mbewok.
2CO 7:13 Mfo refo amu nhar bo anu ne ksoh amu mbewok tna ne nri bo ro amu nwe. Tibyo amu mbewok ne sraujin u fee. Titus ymat anu mam kota ro Korintus tna hah yama. Tna ait simaut ye. Tna amu ksoh toni nmat he ait simaut toni. Anu nno ait yhaf rait me simaut u.
2CO 7:14 Tii Titus yama yo kʼanu mam Korintus fefares to, Jõ tkyas anu kʼait. Tkyas bo ro moof. Tna ait yama yo kʼanu to, ymat yawe bo ro jõ tawe reto mabo oh meto. (Mnan anya msya bombra beta ro ja jõ tkyas kʼanu oh. Ja jõ tkyas bo ro mabo sai.) Tis rau bo ro tii tkyas kʼait to, yesait ymat yawe mabo. Tibyo jõ hrenaut fee.
2CO 7:15 Mam ati ro Titus yama yo kʼanu reto to, anu nitrah nhaf wanu tna nri bo ro ait ykyas. Ait ynaut yawe anu waa tna hartu ait. Tibyo ait ksoh anu toni ye.
2CO 7:16 Mfo refo thar tawe anu ksoh nno bo ro moof. Tibyo jõ simaut mase.
2CO 8:1 Raa wamu sor; amu mbewok nwe nkyas jemaat sor ro mhau mam provinsi ro Makedonia kʼanu. Allah yatmof ana. Yoo tak yee kʼana.
2CO 8:2 Tibyo ana me matmof raa anya. Mam wore wefo fo kair toni mai kʼana weto. Tna ana mse bo kebet sai. Menohe ana simaut mase fares. Tna ana matmof raa ro smot Yesus, ro mhau mam kota ro Yerusalem mkah mhaf ase toni. Tibyo ana msan bo ro msai kʼraa weto.
2CO 8:3 Thar tawe raa ro Allah wAit mam provinsi ro Makedonia weto to, mse pitis kebet sai. Menohe ana ksoh moo pitis kebet ro ana mse weto to, msan kʼraa kinyah ro Allah wAit mam kota ro Yerusalem. Ana ro mhau mam Makedonia weto mnaut ana mesait ai sai fee.
2CO 8:4 Ana mhar mawe jemaat roto taro ye mawe kbe moo pitis mee kʼraa kinyah weto. Tna ana mawe kʼamu mbewok mawe, “Amu ro nhau mam Makedonia fo, nesait ksoh toni nno bo reto ye.” Raa aro bo mbis ana mawe msan pitis wana ye fee. Ana mhaf mbyõ sai.
2CO 8:5 Raa ro mhau mam Makedonia weto to, moo mhaf wana mee kʼAllah wia matim. Tna mari bo ro Allah yawe. Tibyo ana moo mhaf wana mee kʼamu ye. Ana mno bo moof reto miwer bo ro tii jõ tnaut tawe ana mno.
2CO 8:6 Tahun ro wia raa ro mhau mam Makedonia weto mno bo reto. Tna tii Titus yama ykyas raa ro Yerusalem weto kʼanu ro nhau mam kota ro Korintus ye. Yawe ana mhau bo marak sai. Ati reto to, anu nwe natmof ana. Ati reto to, anu nwe nsan pitis kʼana. He mfe. Anu bitsre bo ro anu nwe nno reto. Anu nno fefares! Feto to, mfo refo amu nbis Titus nwe ait hah yama yo kʼanu mam kota ro Korintus u. Amu nbis ait yama yawe kʼanu ye yisobu anu yawe, “Pitis ro anu tii nwe nsan kʼraa ro kinyah to, anu nsan fefares! Anu natmof raa ro mhau mam Yerusalem fe mfe a! Nsan pitis wanu mnan si tiwya anu nwe feto oh!”
2CO 8:7 Anu raa jemaat ro Korintus to, ja nno bombra sor kaket: Bosmot ranu ja matak. Anu nkyas maja ro Tuhan kʼraa moof toni ye. Anu nkit maan tna nhar bo ye. Anu ja ksoh nno bo ro moof. Tna anu nhafri amu ye. Bombra wanu beta weto to mninon oh. Feto to, jõ tisobu anu tawe, “Natmof raa ro mhau mam Yerusalem oh! Nno mkah nhaf ase ranu ye.”
2CO 8:8 Jemaat taro msan pitis kʼraa ro kinyah. ⌞Tii Titus yama yo kʼanu mam Korintus. Tna anu nwe anu natmof raa ro kinyah ye. Nwe anu ksoh nsan bo kʼraa kinyah ro mhau mam Yerusalem.⌟ Tna jõ tkom aam kʼanu tawe sanet boatmof wanu. Tawe tbis bo kʼanu fee. Tkyas afo re raa mhar boatmof ranu reto ye. Anu ja natmof raa anya kaket ye fe mfe a?
2CO 8:9 Nnaut nwe Tuhan ranu Yesus Kristus yatmof anu beta toni ye. Tiwya bo wAit ro yse to mninon oh. Menohe Ait yatmof anu. Tibyo Ait yitsre bo yase rAit msya bosatoh wAit beta tna yroh yama tabam refo. Yama yhau mam tabam refo ynan raa ro suawe sai. Yno bo reto afo re anu nsen bobot sor ye meto. Feto tibyo tawe ne natmof raa kinyah makin sor to, mkah nhaf ase nfi Ait feto ye oh!
2CO 8:10 Tahun ro wia anu nwe anu ksoh nsan pitis kʼraa kinyah wanu ro mhau mam kota ro Yerusalem. Anu fo jemaat masmair ro nwe nno bo reto. Ati weto to, jemaat roto aro moo pitis mee kʼraa ro Yerusalem weto fefares. Tahun ro wia, anu aro noo pitis wanu baro berur su oh. Tna fo anu bitsre bo moof ro tii anu nwe nno reto. Anu nno mkak fefares. Jõ tnaut tawe ro moof to, ne makrau pitis wanu u.
2CO 8:11 Mfo refo noo pitis wanu berur su to, nno mkak oh! Tii anu hre nkyas su oh, nwe anu ksoh natmof raa ro mhau mam kota ro Yerusalem. Bo ro tii ksoh nno to, nno mamo snok mkak oh! Nno mkah simaut ranu tii ro wia reto yum oh. Awya ro yatem miyõ, kbe ysan pitis mawat. Tna awya ro yatem mabuf, kbe ysan kebet sai.
2CO 8:12 Soh raa ksoh moo bo wana msan kʼraa mamyot si bo ro ana mse to, kbe Allah yhaf mnan. Mfi bo ana mse pitis kebet sai, tibyo msan pitis kebet sai to; kbe Allah yhaf mnan raa weto ye.
2CO 8:13 Tkyas bo refo kʼanu to, tawe tse bo samyoh kʼanu nsom to fee. Jõ hawe bo anu nfi raa ro kinyah afo re ana weto mse pitis mawat. Tawe feto fee! Jõ ksoh anu mkbair ewok nse bo mnan anya sai.
2CO 8:14 Mfo refo anu fo nhau to bo mninon. Tna ana mhau bo marak. Meen soh anu nhau bo marak to, kbe ana me matmof anu feto ye. Ro moof to anu nsya ana nhau to nse bo mnan anya sai.
2CO 8:15 Bokom ro Allah mkyas bo reto. ⌞Mkyas ati ro raa wAit tufrok tabam ro Mesir. Tna boit ro ana mait to marak.⌟ Mawe: “Raa sait yanyah boit ⌞manna⌟ mawat. Tna bo ro kbe yait to mnan si. Yait mkak tna aro mhau fee. Tna raa sait roto yanyah bo kebet sai. Menohe kbe bo ro ait retait yait to mnan si ye feto.”
2CO 8:16 Amu mbewok nyoh asik mase kʼAllah. Ait yno re Titus yhaf rait mnan anya msya jõ thaf ajõ: Ait ksoh yawe yros tis yban anu ro nhau mam kota ro Korintus ye.
2CO 8:17 Amu nkyas kʼait nwe amu ksoh ait hah yama yo kʼanu u. Tna ait yawe ait yesait ksoh toni yawe yno bo reto.
2CO 8:18 Kbe Titus yesait yama fee. Penginjil sait kbe kro Titus yama. Penginjil retait, raa ro jemaat magin mhar ait oh, tna mawe ait fi raa ro yoof. Ja ykyas Bokyas Moof ro Yesus kʼraa kaket.
2CO 8:19 (Tii jemaat sor msok penginjil retait tna mbis ait mawe meen yamo su ysya amu mbewok nmoʼt Yerusalem ye. Mfo refo ait kro Titus yama. Meen ait kro jõ tsya Timotius ye, nmoʼt Yerusalem. Ati reto to, amu nbo tuuf kbe nmo su noo pitis ro anu siwyan reto, nkah nmo nee kʼraa jemaat mam Yerusalem reto. Kbe raa mmat bo ro amu nno refo tna bibi Tuhan. Tna kbe raa mhar mawe amu nesait ksoh natmof ana mam Yerusalem ye.
2CO 8:20 Amu hawe bo raa mkyas mawe amu noo pitis reto tna nmo nno-na bo. Feto to, amu nwe amu nbo tuuf kbe nmo su nsan pitis mase reto.
2CO 8:21 Bo ro amu nno to, amu nno abyõ sai. Bosan reto amu nisoh nbo kaket. Amu ksoh Tuhan ymat sas bo ro amu nno refo, tna yawe amu nno bo refo kaket. Tna kbe raa mmat bo ro amu nno refo ye, tna mawe amu nbo bo refo kaket ye.)
2CO 8:22 Tna amu mbewok nbis nfoh ramu sait naut kbe yama ysya ana mbewok mo kʼanu mam kota ro Korintus ye. Ait retait tait amu sanet oh: Ti ro wia sor to, ait yno bo ro amu nwe to, ja ksoh yno beta kaket sai. Tna mfo refo ait ksoh toni yawe yama yo kʼanu. Ait yhar yawe anu ksoh nno bo ro moof.
2CO 8:23 Nnaut nwe Titus tait ja ykah bo su ysya jõ. Tna amu nfoh mabo ewok reto, raa ro jemaat sor taro msok ana mbewok. Msok ana mbewok tna mbis ana mama su kro Titus ye. Raa mmat bo moof ro ja ana mbewok mno tna bibi Kristus.
2CO 8:24 Natmof raa weto. Tna jemaat taro sor kbe mmat bo moof ro anu nno reto. Mmat tna mhar mawe bo tii tkyas kʼana to, bo mabo. Mhar mawe anu ja nno bo ro moof.
2CO 9:1 Jõ tkyas pitis ro anu nwe nsan kʼraa ro Allah wAit mam Yerusalem. Menohe tkyas u fyi?
2CO 9:2 Thar tawe anu ksoh toni noo pitis reto nee kʼana. Tna tkyas anu kʼraa ro Allah wAit mam provinsi ro Makedonia oh. Tawe kʼana tawe, “Raa ro mhau mam kota ro Korintus msya raa taro ro mhau mam provinsi ro Akhaya weto to, ana ksoh moo pitis mee kʼraa ro pitis marak. Tahun ro wia ana ksoh berur pitis wana oh.” Ana mari bo reto tna mawat mawe ana ksoh berur pitis wana msan kʼraa ro Yerusalem weto ye.
2CO 9:3 Jõ tbis Titus ysya amu nfoh mabo ewok weto mama mo kʼanu. Ana mama re kbe mmat soh raa jemaat ranu siwyan pitis reto wea oh fe mfefares a. Ja amu bibi anu; nwe kʼraa ro Makedonia nwe anu ksoh nno bo ro moof refo. Meen soh ana baro msya jõ nma no kʼanu to, kbe ana mmat mawe bosan reto anu siwyan oh. Mnan fi bo jõ tawe kʼana wia oh.
2CO 9:4 Pitis tii anu nwe ksoh nsan reto to, soh amu nma tna ana mmat he anu siwyan pitis reto fefares to, kbe amu hrenaut ye tna anu hrenaut ye.
2CO 9:5 Reto oh mi jõ tbis ana mabo tuuf weto matim wia mama mo kʼanu. Kbe ana mama mros tis mban jemaat ranu. Mban anu siwyan bo ro nsan reto wea. (Jõ bibi anu, anu nwe noo pitis mawat nee kʼraa ro Yerusalem weto to, tawe anu raa ro nhaf moof toni.) Pitis ro anu nwe ksoh nsan to, soh anu siwyan pitis reto wea oh to, reto moof. Tna fo jõ tama mam tis. Soh feto to, kbe raa mmat tna mhar mawe anu nesait ksoh nno bo ro moof reto. Tna mhar mawe raa tko anu re nsan bo reto fee.
2CO 9:6 Nnaut oh; raa mawe, “Awya ro furere ⌞sfo⌟ makan kebet sai to, meen yatu kebet sai. Tna awya ro yoo furere mase to, meen yatu mase ye.”
2CO 9:7 Ro moof to, anu beta nnaut pitis mabyoh jya ro kbe nsan. Nnaut mnan mam nhaf mato wanu aro sait-sait wia matim. Tna nesait nhar nwe kbe noo pitis mabyoh jya nee. Tna fo noo nee. Nno be raa tko anu nsan bo wanu. Tna anu ro hawe bo nsan pitis kʼraa to, kbe nsan ma. Nno be anu nsan pitis mkah nhaf ro mkair meto. Allah ksoh yawe raa msan bo mkah mhaf ro simaut mase.
2CO 9:8 Tna Ait yatak re kbe yoo bouum mninon yee kʼanu. Ait yatak yno re anu nse bombra beta mnan, aro mabut fee. Ja yoo bo mninon yee kʼanu yoyo afo re anu natmof raa anya ye. Afo re anu nno bo moof aro rau-rau kʼraa ye.
2CO 9:9 Bokom ro Allah mkyas mawe, “Ait ja yoo bombra saim kʼraa. Ait yoo bo yee kʼraa ro mse bo aro fee. Yhaf rAit moof yum mamo snok mam hame wajin.”
2CO 9:10 Allah oh mi Raa ro yoo ⌞sfo⌟ manaf yee kʼraa furere to. Yno ⌞sfo⌟ manaf reto mo miyõ tna manes. Tna Allah yoo boit yee afo re raa mait ye. Ait yno re anu nse bo mnan. Yno bo wanu ro nkah to, mafer mninon ye. Tna yno re kbe anu nmo raa ro mhaf moof ati miwer bo ro ti ro wia ye.
2CO 9:11 Ait kbe yoo bobot aro rau-rau yee kʼanu. Yno bo reto afo kbe anu noo bo nee kʼraa mkah nhaf wanu ro mbyõ sosor. Amu nbo tuuf kbe nkah bosan ro anu nsan reto nmo nee kʼana mam tno. Tna tis rau to, ana weto kbe me mayoh asik mase kʼAllah.
2CO 9:12 Anu nsan pitis kʼraa ro mse bo aro fee weto. Reto kbe mno bo ro moof trion ewok: Kbe raa ro Allah wAit weto mse bo mnan ye. Tna mno re kbe raa simaut mase mayoh asik mase kʼAllah ye.
2CO 9:13 Anu nsan pitis mawat kʼana ro mhau mam Yerusalem. Bosan sor ro anu nsan weto mno raa bibi bo yase ro Allah rAit. Tna kbe raa mhar mawe ja anu nri Bokyas Moof ro Yesus tna nbo nno ye.
2CO 9:14 Raa ro smot Yesus mam Yerusalem weto to, mhar mawe Allah yatmof anu toni. Tna boatmof rAit oh mi mno re anu nno bo moof kʼana si. Feto to, ana mhafri anu tna skabuk anu kʼAllah ye.
2CO 9:15 Allah ysan bo ro moof miwer toni kʼanu ye. Nma, anu byoh asik mase kʼAit.
2CO 10:1 Jõ fi Paulus, ⌞raabis ro Tuhan.⌟ Anu nhar nwe Kristus tait Raa ro ja yhaf sneh. Tna jõ soh-soh anu mam Kristus yasom rAit, tawe ⌞nri bo ro jõ tawe kʼanu.⌟ Tiwya, ati ro jõ tama to kʼanu to, ja tkyas bo mkah thaf sneh ye. Menohe ati ro jõ thau fari tna tkom aam ro tee kʼanu to, jõ tkyas bo ro matak toni.
2CO 10:2 Raa ro jemaat ranu mam kota ro Korintus to, taro mamus jõ. Tawe soh ana mari bo ro jõ tawe fee, kbe jõ bhah ana tu oh! Jõ hawe bo tkyas bo tbait ktan-ktan. Menohe ana weto maun amu mbewok mawe amu nhaf ranu mkair, mnan fi raa ro wase Allah. Ana maun mawe amu raa ro saso bo ro tabam refo sai. Meen jõ tama to kʼanu to, tna soh jõ tari bo ana mkyas bo reto fares to, kbe jõ bhah ana tu oh!
2CO 10:3 Ae; amu mbewok nhau mam tabam refo fares. Menohe amu ⌞nmak, soh mfe⌟ nme anya nsya raa mfi raa ro tabam refo ja mno to fee.
2CO 10:4 Amu ja safo nsom sbe mfi raa ro tabam refo ja mno to fee. Mkah Allah yatak rAit oh mi amu ntai beswan bo ro mbam kabes. Mkah Allah yatak rAit amu nmo simoyot snek ro kabes sor to brir-brar marak.
2CO 10:5 Raa taro miwana Allah tna safuk mawe ana u kar. Tna raa taro mkyas Allah to, menohe mkyas maja ro sre. Bo ro ana mkyas reto to, bo mabo fee. Bokyas rana ro sre reto oh mi mno wa re kbe raa mhar Allah kaket fee. Raa ro beswan Allah weto to, Ait yoo tak yee kʼamu afo re amu ntak nikyak bonaut wana ro sre weto makus sai. ⌞Amu nno mkah tak ro Allah,⌟ tibyo kbe ana ksoh mari bo ro Kristus yawe. Kbe ana ksoh mhar Allah kaket tna msya mhar maja rAit ro ati reto.
2CO 10:6 Tawe beroh nri bo ro Kristus yawe kaket! Nri tna nbo nno oh! Tna meen kbe amu mbewok nhar awya ro ja yari bo ro Kristus yawe, tna nhar awya ro yari Ait fee. Meen amu nma to, kbe amu nsen bhah awya ro hawe yari bo ro Kristus yawe. Tna kbe amu nmit safo mana kʼait retait.
2CO 10:7 Awya raa ro Kristus rAit? Soh anu nmat sas raa to, nmat bo ro mne sai ma! Soh anu nnaut nwe anu fo raa wAit to, nnaut nwe jõ fi raa rAit sait feto ye. ⌞Raa taro santri mawe, “Paulus tait raabis ro Kristus fee.” Ana mawe ana mesait oh mi raabis ro Kristus. Menohe ana weto mmat sas raa tna mnit ana kaket fee. Ana ja mmat bo ro raa mno tna mmat ratan ro myum msya raa masom wana, tna msya bombra ro raa mse bo to sai. Ana mmat raa mhaf mato wana fee.⌟
2CO 10:8 Riwai jõ tesait tkyas tak ro Tuhan yoo yee kʼamu mbewok. Tkyas amu feto jõ bibi amu ai. Menohe jõ hrenaut fee. Tuhan ybis amu nma afo re nti bonaut kʼanu. Ybis amu nma nros tis anu. Amu hawe nma nmit safo mana mai kʼanu.
2CO 10:9 Jõ tkom bo tna bhah anu mkah aam to fyi? Aam ro tii tkom tee kʼanu to, msya aam ro tkom refo ye to, tkom tee afo re anu waa jõ to fee.
2CO 10:10 Raa taro mamus jõ mawe, “Ati ro Paulus ykom aam yee kʼamu to, ait ykyas bo ro ktan-ktan toni kʼamu. Ait bhah amu toni afo re amu waa ait. Menohe ati ro yama yo kʼamu, tna yros ykyas su ysya amu to, reto hayah: Yama ykyas bo ysya amu to, aro mfi feto fee ye! Amu nmat he ait raa ro yatak fee. Raa ro mase ja mhar mkyas bo mmai moof kaket, menohe Paulus yhar feto fee! ⌞Tibyo ja amu nri bo ro ait yawe fee ye.⌟”
2CO 10:11 Meen ati ro jõ thah tama to kʼanu u to, tama hafrah raa ro mamus jõ. Kbe tkyas bo rere kʼana weto u fee. Kbe tama thaf sneh to fee. Tama hafrah ana weto mkah tak ro Tuhan. Bo ro ja jõ tkom tee kʼanu mam aam sai, kbe tkyas abyõ. Tna kbe ana weto mhar mawe jõ fi raa ro sne-sna sai fee.
2CO 10:12 Guru ro mhau msya anu baro safuk mawe, ⌞“Amu oh mi raa ro nse, raa ro Allah ybis.”⌟ Ana mawe ana mase abyõ miwer awya? Ana mnit ana mase rana reto, mmit msya ana mesait aran sai. Mno feto to ana wase bo sai. ⌞Ana weto safuk tna mkyas bo miwer bo ro ana mesait mno. Ana mkyas bo miwer.⌟ Amu aro ja nno mfi feto fee.
2CO 10:13 Amu mbewok nkah bo mam wore wo Allah ybis kʼamu sai aran. Amu maum mamo snok mam wore weto sai. Amu nmo fari nmo niwer to fee. Ait ybis amu nma no kʼanu tna nkyas bokyas rAit. Amu safuk ⌞nwe amu nisoh bosmot wanu kaket. Bosmot wanu taro mo matak oh.⌟ Raa ro mhau mam remo roto taro to, Allah ybis re penginjil roto taro mkyas bokyas rAit kʼana. Allah ybis amu mbewok nmo no kʼana weto fee. Tibyo amu oh mi safuk nwe amu nse nbo jemaat weto to fee.
2CO 10:14 Tiwya amu mbewok nma no kʼanu mam kota ro Korintus, tna nkyas Bokyas Moof ro Kristus reto. Amu raa ro tinyi ntim wia nma fari snok mam kota ranu. Feto to amu safuk anu to, saah. Reto miwer bo ro Allah ybis kʼamu mbewok nmo nno to fee. Tna ati reto to, amu nmo nkyas watum ro Tuhan mam remo ro miwrek kota ro Korintus majoh ro tino fefares.
2CO 10:15 Allah ybis raa roto taro mamo mkyas ⌞Yesus yasom⌟ kʼraa ro mhau mam remo roto taro. Jemaat mam remo weto to, mnan fi armato ro penginjil roto mkah. Allah ybis amu mbewok nmo nkah bo mam remo weto fee. Tna amu safuk nwe amu nisoh bosmot raa weto fee ye. Jemaat ranu mam kota ro Korintus reto oh mi mnan mfi armato ro Tuhan ybis yawe amu nkah. Feto to amu safuk nwe, “Raa ro mhau mam kota ro Korintus to, mfo refo ana smot Kristus ye.” Amu safuk nkyas feto to, bo ro mkair meto fee. Amu ksoh ⌞anu nri bo ro amu nwe. Soh anu nri bo kʼamu to, amu ninaut nwe kbe⌟ bosmot ranu mo matak. Tna kbe amu ne nti bonaut ro mase naut u kʼanu ye. Tibyo bosmot wanu mo matak.
2CO 10:16 Tna fo meen amu mbewok nmo nkyas Bokyas ro Moof mam rabin roto taro. Mam rabin weto to raa aro mkyas Bokyas Moof reto fefares. Amu hawe bo nmo nkah bo mam yuk ro raa mkyas Yesus yasom oh. Allah ybis penginjil roto taro mamoʼt wore weto oh. Tna kbe ana safuk armato ro ana mesait mkah weto saah. Amu safuk nkyas armato ro amu nesait nkah sai.
2CO 10:17 Bokom ro Allah mkyas mawe, “Soh raa safuk to, rau ro moof to, kbe ana mawe, ‘Nmat bo moof ro Tuhan yno refo!’”
2CO 10:18 Ati ro raa mesait bibi ana ai to, bo ro ana mawe weto to bo ati fee. Bo ro ana mkyas mawe reto to, kbe mno Tuhan bibi ana fee. Rau ro ati to, Tuhan oh mi ynaut yawe anu aro bno bo ro moof to! Tuhan yhaf mnan raa weto.
2CO 11:1 Taja, tme, tao tano na; sik nri bo ro jõ tawe refo: Kbe tkyas bo tfi raa ro wase bo hrenaut wia. ⌞Kbe jõ bibi jõ tesait ai.⌟ Thar tawe ja anu nri bo ro tawe.
2CO 11:2 Jõ thafri anu, mnan fi Allah yesait yhafri anu. ⌞Jõ takah tayun anu rere tibyo anu nmo kro Kristus. Tna jõ tros wa kmot anu afo re anu smot Ait kaket.⌟ Nmo su nsya Ait kaket. Re kbe raa aro mno anu fee. Jõ tnan fi raa sait ro ytos ku rait ro ano. Tna tbis raa sait, tawe yoo ku au. Tna jõ kmot ku au kaket re kbe meen ati ro ait yama ymen au to, au mhau mato mboh fares.
2CO 11:3 Menohe raa taro mama besruf anu. Jõ waa be kbe anu nri bo ro ana mawe tna anu nmo kro ana. (Mno mfi tiwya tinyi aban ro srau wer reto besruf Hawa mam armato ro Eden.) Nri ana ma. Anu nmo su nsya Kristus oh. Nros ntrot nsya Ait. Smot Ait yesait aran. Srau ewok ma.
2CO 11:4 Tii amu mbewok nma nkyas Yesus yasom kʼanu to, amu nkyas kaket. Tna fo raa taro mama mawe ana raabis ro Allah. He mfe. Bo ro ana mkyas to, mnan anya msya bo ro amu nkyas to fee. Hre nifra sneh nri bo ro ana mkyas reto to ma! Ana mkyas Yesus ye, menohe ana mkyas bo miwer. Bo ro ana mkyas aro mnan si msya bo ro Yesus tii ykyas fee. Har ro tii mama mjin mam anu nhaf mato wanu to Har ro ati. Menohe ana weto mkyas har roto aro. Tii anu nri Bokyas Moof ro amu nkyas kʼanu. Iso reto to, iso sau mesait aran ro raa mamo tna kbe mkai riof. Menohe guru weto merif iso roto, iso ro sre. Ana sioh mawe raa kbe mkai riof mam iso ro ana merif reto.
2CO 11:5 ⌞Raa weto sioh mawe ana to raabis (rasul) ro mbam Allah mama. He mfe. Ait ro ybis ana mama fee. Tna ana mawe⌟ ana raa ro mase toni. Menohe ana mase miwer jõ fee. Jõ fi raa ro Allah ybis yawe tkyas Bokyas ro Moof reto kʼanu.
2CO 11:6 Jõ tkyas bo to, ja tasoh mnan-nan fee sai. Menohe takit maan tna thar bo ro Allah miwer ana. Nnaut wore wo tii jõ betoo maja ro Allah kʼanu: Anu nhar nwe bo ro tii tawe to, bo weto beta to, bo mabo. Guru weto to mhar bo mkyas mayoh mno raa mhaf. Menohe ana mhar maja ro Allah kaket fee.
2CO 11:7 Ati ro jõ tama tkyas Bokyas Moof kʼanu to, tawe kbe anu noo boren nren jõ fee. ⌞Jemaat sor ja maren boren kʼraabis ro mama mkyas watum ro Tuhan kʼana.⌟ Menohe jõ tawe anu kbe noo pitis aro nren jõ fee. Anu nnaut nwe jõ tno bo ro mkair meto? Tawe tno feto afo re anu nhar nwe jõ ja hartu anu. ⌞Watum ro Tuhan jõ tkyas kʼanu mno anu nsen bobot tna⌟ jõ tfi sryan ranu sai. ⌞Nno be anu aro nnaut nwe bokyas ajõ ja mafer marak, tna reto oh mi tawe kʼanu tawe anu nren boren kʼjõ fee: Nnaut bo reto ma!⌟
2CO 11:8 Tii jõ tama thau tsya anu to, tna jemaat roto oh mi maren boren kʼjõ. Anu raa ro Korintus to noo boren nren jõ fee. Reto mfi bo jõ ttak bo wana weto, afo re tama tno bo moof kʼanu.
2CO 11:9 Tii thau tsya anu to, boit msya bo ro tse aro mabut. Tna raa ro smot Kristus mbam provinsi ro Makedonia mama. Ana oh mi moo pitis, bo to mee kʼjõ. Tibyo bo ro tse to mnan. Jõ hawe bo tno anu aro nsui. Tibyo tii tayoh pitis kʼanu ro Korintus fee. Tna meen tayoh bo aro kʼanu fee ye.
2CO 11:10 Jõ safuk tawe jõ tkyas watum ro Tuhan kʼanu menohe ja tayoh pitis kʼanu fee. Wore wo jõ tamo mam provinsi ranu ro Akhaya to, kbe tno feto ye: Kbe tawe kʼraa tawe, “Noo boren nren jõ ma.” Jõ smot Kristus tibyo anu nhar nwe bo ro jõ tawe refo to bo mabo tu oh.
2CO 11:11 Jõ tatmof anu. Menohe jõ hawe bo too pitis ro anu nwe nee kʼjõ. Allah yhar yawe jõ tatmof anu.
2CO 11:12 Guru ro mkair taro weto bibi ana mesait ai mawe ana weto ja mno bo mnan anya mfi bo ro amu mbewok ja nno. He mfe. Jõ tkah bo ro Tuhan to, ja jõ tayoh pitis kʼanu fee. Tna meen tama tkyas watum ro Tuhan kʼanu to, kbe tayoh bo aro kʼanu fee ye. Tno feto to tno wa guru weto. Tno afo re anu nhar nwe guru weto to hayah. Ana mnan anya mfi amu fo fee.
2CO 11:13 Guru ro bibi ana mesait ai weto to, mawe ana raabis (rasul) ro Kristus ye. Menohe mfe: Ana weto to raa ro mamo wan-wan sai. Ana mawe ana mkah bo mam armato ro Tuhan, he mfe. Ana besruf anu.
2CO 11:14 Nrok tna ktak ma! Kabes yabi (Iblis) tait ja yamo wan-wan ye. Ait besruf raa tibyo raa taro mnaut mawe ait ynan fi malaikat ro moof sau. Yamo wan-wan haberek yfi malaikat ro moof.
2CO 11:15 Feto to nrok tna ktak ma! Nnaut nwe soh kabes yabi ja besruf raa to, kbe raa ro mari ait ja mno feto ye fea! Ana mamo wan-wan ye. Kaket anu! Bokyas rana siroyõ-raya. Tis rau to, kbe Allah ymit bo kʼraa ro ja mno bo feto fea!
2CO 11:16 Riwai jõ tawe, “Nnaut nwe jõ fi raa ro wase bo hrenaut to ma!” Nnaut nwe jõ hawe bo bibi jõ ai. Tako hawe sai mfo refo tkyas bo baro ro tiwya jõ tno. Sik hre sai nifra sneh nri bo ro tawe refo. ⌞Tkyas bo wefo afo re anu nhar nwe jõ fi raabis ro Kristus tu oh.⌟
2CO 11:17 Ja Tuhan hawe bo raa mesait bibi ana ai. Menohe mfo refo tkyas bo feto tfi raa ro wase bo sai.
2CO 11:18 Raa mawat bibi ana mesait ai. Ana safuk mawe ana raa ro mase mam tabam refo. Feto kbe jõ tfi ana weto tna tkyas bo baro mfi ana weto wia ye. ⌞Menohe jõ tnaut tawe bo ro ana safuk mawe mkyas reto to, bo ro ati fee.⌟
2CO 11:19 Anu nnaut nwe anu raa ro nhar bo. Tna re anu ja sayõ rof raa ro wase bo mkyas bo.
2CO 11:20 Tmat bo anu sayõ rof raa awya sai ro yhau ysya anu. Anu hre nri bo ro guru aro sor beta mawe. Anu ja nri bo kʼana ro moof tna nri bo kʼana ro mno bo mkair ye. Kaket anu! Ana taro mbis-bas anu weto nfi sryan boh wana sai. Tna ana mayoh bo mawat kʼanu. Ana besruf anu. Ana mawe ana raa ro mase miwer anu. Ana mamus anu ye. Reto mnan fi ana mai-a anu mkah bokyas rana.
2CO 11:21 Menohe amu mbewok ja nno bo feto kʼanu fee. ⌞Amu ja nhaf sneh. Feto to raa taro mkyas mawe amu fo raabis ro Allah fee.⌟ Guru weto ja mesait mkyas mase rana. Feto to, tako hawe sai, mfo refo jõ tesait tkyas bo wojõ baro feto ye. Tkyas re kbe anu nri bo kʼjõ ye. (Ja raa ro wase bo hrenaut mesait aran bibi ana mesait sai.)
2CO 11:22 Ana weto tawyõ mawe ana raa ro Ibrani. (Au oh mi raa mana ro tiwya Allah ysok.): Jõ fi raa ro Ibrani ye. Ana weto mawe ana ku renti ro bi Abraham. (Ait oh mi raa ro tii Allah ysok.): Tna jõ fi ku renti ro bi Abraham ye. Ana weto mawe ana raa ro Israel: Feto tna jõ fi raa ro Israel ye.
2CO 11:23 Ana mawe ana mamo sryan ro Kristus. Tna jõ tamo sryan rAit ye. Menohe jõ tno bo ro bi Ait ybis yawe to, tno moof miwer. (Tako hawe sai, jõ bibi jõ ai fefo, tfi raa ro mamboi!) Jõ tno bo ro Kristus ybis to, au oh mi bo mkair mawat mai kʼjõ: Jõ tkah bo rAit to, samyoh toni. Ana weto to mno bo rAit kaket fee. Tkyas Kristus yasom oh mi tii raa mfot jõ tna mbu mam bui mato mun aro firwas-firwas to. Ana weto to, raa mfot mbu mam bui mato fee. Ti aro to, raa hawe bo jõ tkyas Kristus yasom. Tibyo ana mfot jõ tna mmok-mak jõ. Menohe guru weto to, raa mfot tna mmok-mak to fee. Tna ti aro firwas-firwas to, raa sikowah jõ ye maami jõ thai. Menohe thau fares. Ana weto to, aro mnan jõ feto fee.
2CO 11:24 Tna muhrin maat raa ro Yahudi mfot jõ tna moo too mmok-mak jõ. Ti wore weto to, ana mok-mak jõ muhrin mawat (39).
2CO 11:25 Tna raa mfot jõ muhrin tuuf to, mfot jõ tna mai-a jõ mkah armuk wana. Mai-a jõ mfi ja ana mai raa ro yber safo sait. Tna ti sau to, raa moo fraa mai jõ ye. Tna jõ taut mam kapal thoh mam sawan to, tna muhrin tuuf kapal ro masyõ jõ weto fri bo ro mkair. Tna kapal sau reto hoh. Tibyo ti sau, ayõ sau jõ soso sai abyõ mam aya mata. Menohe tkai riof sai.
2CO 11:26 Ja jõ tamoʼt rabin ro fari so oh. Tamo tkyas Bokyas Moof ro Yesus (Injil). Wore weto to, jõ tkai bo msai roto aro ye: Jõ tamo mam iso tna frit aya tamoʼt ati jaro tna kene wo tsu. Ti aro raa ro msyõf bo mfot jõ mtak bo wojõ. Ti aro to, raa wojõ mbam raa mana ro Yahudi to, kmo jõ. Tna ti aro raa ro mbam raa mana roto to, kmo jõ ye. Bo ro msai mai kʼjõ mam wore jõ thau mam kota ye. Tna bo ro msai mai kʼjõ mam wore wo tamo mam yuk ro riamo ye. Bo msai mai kʼjõ mam wore wo jõ taut wiak thoh mam aya sawan ye. Tna ti aro raa mamo wan-wan tna mawe ana raa ro kro Yesus ye. Tna mawe ana mafoh wojõ. He mfe. Tis rau to ana besruf jõ, mno bo ro mkair mai kʼjõ.
2CO 11:27 Jõ tkah bo wojõ ye tna timyoh mbtek. Jõ hrowyõ thai ye. Ti aro tkah bo wojõ ti ro miyõ mamo snok mam reen, tna tjin fee ye. Ti aro jõ thai awyah ye, thai sbit ye. Ti aro amah ro tjin to marak. Tna ratan ro tyum to mabut-abat ye, tibyo tfos toni.
2CO 11:28 Bo ro msai weto beta mai kʼjõ oh. Tna jõ thafri anu mam jemaat beta ye. Tibyo jõ tnaut yyi tawe skabuk anu beta yoyo. Reto mnan fi jõ tasom bo ro samyoh toni yoyo.
2CO 11:29 Soh anu aro kiyam, netsu ssafo fee to, reto mno jõ tfi bo tesait kiyam ye tsya anu. Tna soh raa mno re anu aro mbtek mam iro to, reto mno jõ sraujin su tsya anu ye.
2CO 11:30 Jõ tkyas bo weto beta afo re anu nri bo kʼjõ kaket ye. Tna nri bo ro guru weto mkyas ma. Jõ hawe bo tesait bibi jõ ai. Feto to, jõ safuk tkyas bo roto taro kʼraa. Tkyas bo ro ja mai jõ sai. Kbe anu nri bo wefo tna nhar nwe jõ tesait tatak fee.
2CO 11:31 Allah yhar yawe bo ro jõ tkyas refo to, bo mabo. Jõ sioh fee. (Allah tait Tuhan Yesus Yaja. Rau ro moof to, kbe raa bibi Ait mamo snok mam hame wajin.)
2CO 11:32 Tna tkyas kʼanu tii wore wo tamo tkyas Bokyas Moof reto (Injil) mam kota ro Damsyik: Ati reto raja Aretas ybo tabam reto. Tkyas Bokyas Moof reto mno raa kmo jõ. Tibyo tsam snok tamo tbam kota reto wai. Tawe tsam tamo wai menohe aban mana ro ybo kota reto ybis raa wait kmot iso wa. Ana hre mwan kota reto makit rau. ⌞Remo reto raa mtan mur mkah tembok ro matak toni.⌟ Tna raa kmot iso beta wa. Raa ste wa mam kota kitana re huwya mfot jõ. Tibyo jõ frok tamo fyi?
2CO 11:33 ⌞Tamoʼt samu sau ro mhau mam kota makit rau. Tna mti to, tafoh wojõ moo keranjang maboh sau. Moo tna mbis jõ hre mam keranjang reto mato rau.⌟ Tna moo keranjang reto, mruk jõ wai mam hroh ro tembok reto sau. Feto tibyo jõ frok mbam kota reto tna aban mana ro kota reto to, yfot jõ fee.
2CO 12:1 Soh raa mesait bibi ana ai to, mafer aro fee. Ja tno feto fee; menohe tako hawe sai, tkyas bo wefo kʼanu renti ⌞afo re anu nhar nwe jõ fi raabis ro Allah tu oh.⌟ Mfo refo jõ tkyas ati ro Tuhan ybo jõ. Ybo tna yno re tari bo ro msai, tna yerif bo kʼjõ ye. Yerif bo ro Ait ja ymyõt.
2CO 12:2 Jõ thar raa ro kro Kristus sait.Tahun 14 ro wia to, ait yaut yamoʼt sawro ro Allah. Allah yakah ait yamoʼt sawro rAit ro mhau abyõ mam u reto. (Sawro rAit ro tuuf reto. Allah ybo yetsu rait yaut yamo, soh mfe yakah yamos rait sai yaut to, jõ wase ye. Reto to Allah yesait aran yhar bait.)
2CO 12:3 Thar tawe raa retait Allah yakah yaut yamoʼt sawro ro moof reto. (Allah yakah ait yetsu rait yaut yamo, soh mfe yakah yamos rait sai yamo to, jõ wase ye. Allah yesait aran yhar sai bait.)
2CO 12:4 Yaut yamoʼt sawro tna yari bo ro msai. Yari bo ro ja raa mhar fee. Bo weto to msai toni. Allah ja ymyõt bo reto. Tna Ait yawe wa yawe raa aro me mkyas bo weto ma.
2CO 12:5 Jõ safuk raa retait, bo ro ymat saah. Menohe soh tkyas jõ tesait to, tkyas bo weto fee. Tkyas bo roto taro sai. Tkyas tawe jõ ja ssafo fee sai. Jõ ksoh raa mhar mawe jõ tesait tatak fee.
2CO 12:6 Menohe soh jõ ksoh raa bibi jõ to, kbe tkyas bo naut u. Tna soh jõ ksoh tawe tkyas bo weto renti to, bo weto beta to bo mabo ye. (Raa ro mkyas bo miwer maja rau to, raa ro wase bo oh meto.) Menohe jõ hawe tkyas bo moof ro jõ tno. Ro moof to, raa mesait mmat bo ro ja tno, tna mesait mari bo ro ja tawe. Feto tna soh ana mesait mawe bibi jõ to, saah.
2CO 12:7 Allah ybis re bo sau mama sikowah jõ. Yno afo re jõ tnaut tawe jõ fi raa ro taku sai. Tii Allah yerif bo ro msai kʼjõ, menohe Ait hawe bo reto mno jõ bibi jõ. Ait hawe jõ tnaut tawe jõ fi raa ro tase tiwer raa taro. Feto to Ait yitsre kabes yabi (Iblis) ybis kabes roto sau mno jõ, sanet jõ. Bo yno reto sanet jõ yoyo mnan fi bo abumun mami jõ.
2CO 12:8 Tna jõ skabuk Allah muhrin tuuf oh. Jõ soh-soh Ait tawe, “Mnan oh! Natmof jõ. Nno re bo reto sikowah jõ u fee.”
2CO 12:9 Menohe Ait yawe si kʼjõ yawe, “Mfe, bo reto kbe mno nyõ renti. Menohe nnaut nawe Jõ tatmof nyõ yoyo. Boatmof aJõ reto to, aro mabut fee. Ati ro nyõ natak fee, ati ro nyõ ntai marak to, kbe nyõ nnaut nawe tak aJõ mnan si oh.” Yawe feto tna thar tawe soh jõ safuk bo samyoh sor ro mno re jõ sne-sna to, kbe raa mhar mawe Kristus yatak rAit ja matam jõ yoyo oh meto. Feto oh mi jõ simaut fo. Feto oh mi jõ safuk tkyas wore wo jõ tatak ajõ to mabut.
2CO 12:10 Ae; ebokmi bo ro mkair mama mai kʼjõ to, tna jõ tatak fee, tna raa mamus jõ, tna jõ tasom bo ro fanes to, tna raa mno bo ro mkair mai kʼjõ, tna bo ro msai mama mai bo to, menohe ja jõ tnaut yyi fee. Jõ waa fee. Jõ thaf mnem fares. Thar tawe ati ro jõ tatak fee, kbe Kristus ysan tak rAit kʼjõ. Yno afo re kbe raa mmat tna smot Kristus.
2CO 12:11 Guru ro riwai tkyas weto to, ana taro mnaut mawe ana raabis (rasul) ro Allah. Tna ana miwana jõ, mawe, “Paulus tait raa ro yase fee.” Ana weto to matak miwer jõ fee. Menohe anu taro nri ana. Au oh mi, tako hawe sai, jõ tesait tkyas jõ ai tfi raa ro wase bo. Ro moof to, anu oh mi bibi jõ; jõ tesait ai fee. Ro moof to, anu teta jõ, tna nros tis nban jõ; jõ tesait ai fee.
2CO 12:12 Nnaut nwe tii ati ro thau tsya anu to, tno bo ro msai, tna jõ sair bo ro hnah. Ati reto to, jõ beroh tno bo weto sor afo re anu nhar nwe, “Bo mabo. Paulus tait raabis ro Allah tu oh.”
2CO 12:13 Anu taro nnaut nwe Jõ tno bo moof kʼjemaat roto taro, tna bo ro mkair kʼanu sai. Anu nkyas bo reto, nno mkah fyi? Tii thau tsya anu to, tno bo mnan anya msya bo ja jõ tno wore wo thau tsya jemaat roto ye. Menohe jõ tayoh pitis kʼanu weto aro fee.
2CO 12:14 Tna jõ siwyan tawe tama to kʼanu u. Tama muhrin ro tuuf refo fo, tna kbe tayoh pitis kʼanu fee. Menohe jõ tayoh tawe anu noo nhaf wanu sai nee kʼjõ. Tawe noo pitis nee kʼjõ ma. Anu to nfi ku wojõ. Tna kukek ja moo pitis mee kʼmaja, mme na wana fee. Raa mabi oh mi ja moo pitis mee ku wana to.
2CO 12:15 Jõ ksoh too bo tee kʼanu. Jõ tawyan marak anu. Tibyo too thaf ajõ tee kʼanu tna tawe too bo wojõ ro tse beta tiryõ kʼanu ye. Anu nhar nwe Jõ tatmof anu. Reto mno re anu taro hawe bo noo nhaf wanu nee kʼjõ fe mfe a?
2CO 12:16 Anu nhar nwe ja tayoh pitis aro kʼanu fee. Menohe jõ ksoh tatmof anu. Fyi, anu taro nwe jõ besruf anu oh meto a? Pitis ro jõ tawe anu nsan kʼraa kinyah weto to, jõ too aro kʼjõ feto fee.
2CO 12:17 Raa ro jõ tbis mama mo kʼanu to, ana aro besruf anu fe mfe a?
2CO 12:18 Tii tbis Titus ysya nfoh ramu sait mamo mo kʼanu. Ait besruf anu fe mfe a? Mfe, ait yhaf rait moof mnan anya mfi amu mbewok nhaf wamu. Tna bo ro amu mbewok ja nno to, mnan anya ye.
2CO 12:19 ⌞Amu aro ja nno bo ro mkair mai kʼanu fee.⌟ Feto tna amu nkom aam refo nwe saak-saak amu fee. Feto fee. Amu nkom aam refo mkah bo betoo amu ai kʼanu to fee. Amu nkom aam refo mkah mti bonaut wanu. Amu nkom aam refo afo re nno bosmot ranu kbe matak. Allah yhar yawe amu nhaf wamu sau su nsya Kristus. Tna amu ksoh anu toni. Bo bawya ro amu nno to, amu nno afo re bo reto nban anu tis oh meto.
2CO 12:20 Meen ati ro jõ tamaʼt kota ro Korintus to, anu nnaut nwe kbe jõ bibi anu. Menohe jõ waa be kbe tama tna tmat he anu nhau nno bo ro mkair fares. Nno be anu ngo-ngat anya, tna naam bo raa, kmo anya, nnaut bo ro netsu wanu ai, nyi-ntoo raa, nkyas-kas raa, bibi anu ai, tna nno-na bo kbik-kbak sai. Soh jõ tama tna tmat he anu nno bo ro mkair weto to, kbe tkyas tna tno bo bawya u kʼanu? Jõ tako tama te bhah anu.
2CO 12:21 Tiwya jõ bibi anu. Menohe jõ waa be kbe te tama u to, tmat he anu taro nno bo ro mkair-kar fares: Tiwya anu taro nasmamo, taro nus-as bo tna taro ntak fnya mabi raa bo ye. Soh jõ tama tna tmat he anu nwat ne nashana fefares to, kbe jõ sraujin tna hrenaut. Allah ymat bo ro anu nno to, yawe, “Ja Paulus bibi raa ro Korintus fyi?”
2CO 13:1 Nnaut nwe Bokom ro Allah mawe: “⌞Soh raa sait yaun baun yawe raa roto sait yber safo to, nmit safo kʼraa retait wia ma:⌟ Nko hawe sai raa mabo ewok, soh mfe tuuf mama tna hre su: Raa mabo ewok, soh mfe tuuf ro mesait mmat bo reto to, ntu ana mama. Tna ana weto kbe hre mkyas bo ro ana mmat. Soh ana beta mmat bo mnan anya, mawe raa retait yno bo ro mkair reto, feto tna fo raa moo srah mmit kʼraa retait.” Ulangan 19:15 ⌞Nko hawe sai hre su tna nkyas safo reto, tna nke oh!⌟ Kbe tama to kʼanu mun ro tuuf.
2CO 13:2 Tii wore tamoʼt kota ro Korintus mun ro ewok to, tawe wa kʼanu tawe, “Ati ro jõ hah tama to kʼanu u to, kbe tmit safo kʼanu.” Mfo refo thau fari tna tkom bo reto u kʼanu beta: Tkyas kʼanu ro tii nno iro ye, tna kʼanu taro sor ye.
2CO 13:3 Menohe anu nnaut maut-mroh nwe, “Paulus tait raabis ro Allah fee. Ait ykyas bo ro Kristus yawe to fee. Kristus tait Raa ro yatak. Bi Ait yatak re ymit safo kʼraa. Menohe Paulus tait raa ro yatak fee sai.”
2CO 13:4 Nnaut nwe tiwya Kristus yroh yama tabam refo to, Ait haberek yamo raa sai ro yatak fee. Ait yama yfi raa ro yhaf sneh sai. Yitsre yatak rAit tna yajat mam ara warok. Menohe Allah yatak rAit mno Ait yasen yaam u. Jõ thaf sau su tsya Kristus. Tibyo titsre tatak ajõ reto ye: Tii tama to kʼanu tfi raa ro thaf sneh sai, tfi raa ro tatak fee. ⌞Wore weto jõ bhah anu fee.⌟ Menohe Allah yno re jõ tatak re kbe tama tisoh bosmot wanu.
2CO 13:5 Tawe kʼanu aro sait-sait tawe, “Nmat sas nhaf mato wanu. Anu ja smot Yesus Kristus kaket fe mfe a? Bo ro yawe to, anu nnaut maut-mroh fe mfe a? Anu nnaut nwe bo ro ysi to, ja Ait ybo ye fe mfe a? Ati ro nmat sas anu nhaf mato wanu to, soh anu nkai bosmot ro matak to, anu nhar nwe Ait yhau ysya anu tu oh.”
2CO 13:6 Ati ro nmat sas anu nhaf mato wanu to, jõ ksoh tawe anu nkai bosmot ro matak. Tii jõ tama tkyas Bokyas Moof ro Yesus kʼanu. Tna mfo refo bosmot wanu mo matak oh. Soh bosmot wanu matak feto to, anu nhar nwe amu mbewok oh mi tii nti bonaut kʼanu to. Tibyo nhar nwe amu mbewok fo raabis ro Tuhan tu oh.
2CO 13:7 Amu mbewok skabuk anu kʼAllah. Amu nyoh re kbe anu nno bo ro mkair aro u fee. Soh anu nno bo ro mkair to, kbe raa taro mmat tna mnaut mawe amu raabis ro Tuhan fee. Menohe bo ro ana mnaut mawe reto to, bo ro ati fee. Fyi-fya sai raa mnaut mawe amu mbewok fo raa ro nkair to, rau ro ati to, anu nhau nno bo ro moof yoyo.
2CO 13:8 Kbe amu mbewok nma no kʼanu u. Tna soh amu nmat he anu niwana watum ro Allah to, kbe amu bhah anu wa. Menohe soh amu nmat he anu nri bo ro ati mbam kʼAllah reto, tna nbo nno kaket fares to, amu nban tis anu fea! (Amu fo raa ro ja nno wa bo ro moof to fee.)
2CO 13:9 Soh amu bhah raa fee, kbe raa taro mnaut mawe amu ntak fee. Feto to raa taro mnaut mawe amu fo raabis ro Allah fee. Bo ro ana mnaut mawe reto to, bo ro ati fee sai. Soh amu nma tna nmat he anu nros ntak fares to, kbe amu simaut mase sai. Tii anu taro nno bo ro mkair. Tna re amu skabuk Allah nyoh re kbe Ait yisoh anu nhaf wanu me mrok moof.
2CO 13:10 Jõ tarak fares tna tkom aam refo tiim kʼanu. Tkom aam refo afo re meen, ati ro tama to, kbe jõ thafrah bo ro anu nno fee. Jõ hawe bo bhah anu mkah tak ro Tuhan yoo yee kʼjõ. Tuhan ybis jõ tama tno re bosmot wanu mo matak. Ait yoo tak yee kʼjõ afo re kbe tisoh bosmot wanu. Yoo yee afo re tno bosmot ranu kbe mbraun to fee.
2CO 13:11 Taja, tme, tao, tano na; meen oh kʼanu! Simaut mase oh! Nisoh anu nhaf wanu moof. Nri bo ro jõ tawe wefo beta. Nhau nsya anya to, nhaf msya nkit sau su. Niranya nsya raa anya kaket. Allah tait Raa ro yatmof raa tna yno anu nhau nhaf tnok ye. Jõ skabuk re Ait yatam anu yoyo.
2CO 13:12 Nmah meen kʼanya ye tna hana anya. Raa ro Allah wAit mam befo to, beta mmah meen kʼanu ye.
2CO 13:13 Jõ skabuk re kbe Tuhan Yesus Kristus ysya Allah matmof anu beta. Tna re kbe Har rAit mno anu beta niranya kaket tna nhau nhaf sau su ye.
GAL 1:1 Aam refo fo mbam kʼjõ, Paulus. Jõ fi raabis ro Yesus Kristus ysya Allah. Yesus Kristus tiwya yajat menohe Yaja Allah yno re Ait yrok yasen. Ana mbewok oh mi mbis jõ tamo tkyas watum refo. Raa ro tabam refo aro mbis jõ fee.
GAL 1:2 Jõ tsya raa makin ro kro Kristus nmah meen tna tiim aam refo kʼanu, jemaat makin ro nhau mam provinsi ro Galatia.
GAL 1:3 Amu skabuk Bja Allah, re Ait ysya Tuhan Yesus Kristus matmof anu tna mno re anu nhau nhaf tnok ye.
GAL 1:4 Tiwya Kristus ymat iro wanu tibyo yoo yetsu rAit ysan yawe raa mame Ait yajat. Reto oh mi Ait yake safo wanu. Mfo wefo fo arin mkair toni: Raa ro wase Ait to ja mno-na bo sai. Arin mkair tibyo Bja Allah yawe Kristus yama yoo riof yee kʼanu.
GAL 1:5 Nma, anu bbaut Bja Allah mamo snok mam hame wajin. Amin: Mabo oh!
GAL 1:6 Taja, tme, tao, tano na; anu fo tna sai kro Kristus. Allah ytu anu mkah boatmof ro Kristus yawe anu nmo raa wAit. Menohe mfo refo jõ tari he anu nri bokyas roto sau. Ayoh ee! Anu haberek kbor kʼAllah! Tna jõ waa: Anu nri bokyas reto mfi Bokyas ro Moof (Injil) meto. Ebokfi bokyas reto bokyas ro sre meto.
GAL 1:7 Bokyas ro anu nri reto to, mnan si Bokyas Moof ro Kristus meto fee! Raa mkbair sau mama mkyas bokyas roto reto kʼanu. Ana mama ksoh mno re anu nantutu. Tibyo anu nnaut mamo-me tna wase bokyas ro ati to miyo! Bo ro ana mkyas reto to, miwer Bokyas Moof ro Kristus. Ana mkyas bo ro mabo fee.
GAL 1:8 Jõ tawe kʼanu tawe, “Mfi raa sait yama yo kʼanu tna ykyas bokyas roto kʼanu yawe, ‘Bokyas ajõ refo to Bokyas Moof ro Yesus!’ Nri ait ma!” Mfi bo meen amu nesait soh mfe, malaikat ro mbam sawro ro Allah mama mkyas bokyas roto, nri bo kʼana weto ma! Awya sai ro ykyas bo sre tait, kbe Allah yno ayoh mroh kʼait!
GAL 1:9 Tna bo ro riwai reto to, jõ tawe te tkyas u kʼanu tawe, “Mfi bo raa awya sai ykyas bokyas roto kʼanu tna yawe, ‘Bokyas ajõ refo Bokyas Moof ro Yesus!’ Nri ait ma! Mfi bokyas rait reto miwer Bokyas ro Yesus tiwya anu smot meto; meen Allah yno ayoh mroh kʼait!”
GAL 1:10 Jõ tkyas bo mabo sai tna raa taro hawe jõ. Anu nnaut fyi? Jõ tno bo re kbe raa mhaf mnan jõ to fe mfe a? Mfe, jõ tno bo ro moof re kbe Allah yhaf mnan jõ. Mfi bo jõ tkyas bo tna tno bo afo re raa mhaf mnan jõ to, soh tno feto jõ tnan sryan ro tno bo ro mfi raabis ro Kristus rAit to fee.
GAL 1:11 Taja, tme, tao, tano na; nhar oh, nnaut oh: Bokyas ro Kristus tiwya tkyas kʼanu to, mbam raa ro tabam refo meto fee.
GAL 1:12 Bokyas reto raa ro tabam refo mkyas kʼjõ tinyi fee. Mama mbam guru aro fee ye. Menohe Yesus Kristus oh mi yasbrah Bokyas reto kʼjõ to.
GAL 1:13 Tiwya weto to, tmat bokom raa ro agama Yahudi to kaket. Bo mafa msya bosmot weto to, amu hohos na wamu tiwya mbo mno ye. Tna jõ mur-mur kro bo mafa wana miwer tafoh wojõ na. Tna jõ somya agama reto mamo renti ye. Feto to jõ safo toni saka raa ro kro Kristus. Anu nri bo ro jõ tno oh: Tiwya jõ simoyot raa ro kro Kristus. Tna jõ siko tawe tno jemaat ro Allah safe mkak.
GAL 1:15 Menohe tiwya wore jõ thau mam tme mhaf fares to, Allah ysok jõ oh. Tamo snok tanes tna wase tawe Yesus tait Ku ro Allah yare metait fefares. Tna mam ati ro Allah ksoh to, Ait yatmof jõ, ytu jõ tna yawe tamo tkyas Bokyas Moof ro Yesus.
GAL 1:16 Yatmof jõ, tna yasbrah Ku rAit kʼjõ re kbe jõ thar he Yesus yamo Mesias ranu. Thar tawe Ait oh mi Raa ro Allah ysok yamo raa sotak ranu. Allah yasbrah Ku rAit kʼjõ afo re tasen tamo tkyas Ait yasom. Raa mana ro Yahudi to, tkyas Ait yasom kʼana fee. Tkyas Ait kʼraa ro mbam raa mana roto makin. Tamo tkyas kʼana tawe, “Yesus tait Ku ro Allah yare.” Ati reto to, jõ tasen tamo fooh ttu bo kʼraa ro tabam refo wia fee.
GAL 1:17 Tamoʼt Yerusalem to kʼraabis (rasul) roto taro fee ye. Ana mamo raabis ro Kristus wia matim tna mhar bo oh, menohe jõ tamo ttu bo kʼana wia fee. Jõ tasen tamo to kʼraa ro mhau mam oo ro Arab wia tna hah te tamoʼt kota ro Damsyik u.
GAL 1:18 Tahun trion tuuf firwas tna tasen tamoʼt Yerusalem. Jõ tamo hre su tsya Kefas (Petrus) tna tsya ait thau ti trion 15 bo feto.
GAL 1:19 Thau mam tno to, jõ fri Tuhan Yesus yao Yakobus ye. Menohe jõ fri raabis roto aro fee. Fri ana mbewok aran sai.
GAL 1:20 (Bawya ro jõ tkom kʼanu refo to mabo tu oh. Allah yhar yawe jõ sioh anu fee.)
GAL 1:21 Tna tbam Yerusalem jõ tasen tamoʼt provinsi ro Siria msya provinsi ro Kilikia.
GAL 1:22 Ati weto to, raa jemaat ro kro Kristus mam provinsi ro Yudea to, ana mmat jõ mkah masu fefares.
GAL 1:23 Ana mari raa mkyas jõ sai mawe, “Paulus ro tiwya simoyot raa ro kro Kristus to, mfo yesait smot Kristus tna ykyas yasom rAit kʼraa.”
GAL 1:24 Ana to mari bo jõ tashana smot Yesus feto tibyo mbaut Allah.
GAL 2:1 Tahun trion 14 firwas tna jõ thah te tamoʼt Yerusalem. Tamo tsya Barnabas tna tmen Titus ye.
GAL 2:2 Allah yasbrah bo kʼjõ, ybis jõ tasen tamoʼt Yerusalem. Jõ tamoʼt Yerusalem tna tamo siret su tsya raa manes ro kro Kristus. Jõ hre su tsya ana tna betoo tawe, “Bokyas ro Kristus refo ja jõ tamo tkyas kʼraa mana roto makin. Raa mana ro Yahudi to, tkyas kʼana fee.” Jõ tkyas bo tsya raa manes weto mesait aran wia. Jõ waa be kbe ana ro mase weto hafrah tna hawe bo raa mkyas Bokyas ro Kristus kʼraa mana roto. Tno feto be kbe raa mnaut mawe watum ro tkyas kʼraa mana roto reto to mafer marak.
GAL 2:3 He mfe; raa manes weto mhaf mnan bo ro ja tamo tkyas kʼraa mana roto makin reto. Raa manes weto to mbam raa mana ro Yahudi. Tna Titus tait ybam raa mana ro Yunani. Menohe ana mmat ait tna mbis ait raa mkom tohmi (sunat) to fee. Bo mafa rana raa ro Yahudi sai aran meto.
GAL 2:4 Tiwya raa mkbair roto taro mawe wa bokyas ajõ. Tna ana mawe mbis Titus ykom tohmi. Raa mkbair reto sioh mawe ana kro Kristus, he mfe. Ana weto baro ja mama wan-wan skabuk su msya amu. Ana mhar mawe ja amu kro bo mafa raa ro Yahudi fee. Tna re ana mama mmat tan amu. Ana mnaut mawe bko hawe sai, anu raa ro kro Kristus bbo Watum ro Musa tna bno bo mafa raa ro Yahudi beta ye. Menohe anu bhar bwe bo mafa weto to make anu u fee.
GAL 2:5 Feto to amu aro ja nri bo ro raa mkbair reto mawe kebet bo fee saut! Amu nros tu nkyas Bokyas Yesus ro ati. Amu nwe nkyas Bokyas reto kʼanu raa ro kro Kristus mam provinsi ro Galatia. Amu nros ntak afo re Bokyas ro ati mhau kʼanu matak yum.
GAL 2:6 Tiwya, amu nbo tuuf nsen nmoʼt Yerusalem. Tna ati ro amu hre su nsya raa manes ro kro Kristus mam tno to, ana hre mari bo ro jõ tkyas. Mari tna tgyõt bokyas roto aro fee. (Raa ro tabam refo mmat ana to, mawe ana raa manes. Menohe Allah ymat raa ro mase msya raa ro kinyah to, yawe mnan anya sai. Tna jõ tnaut tawe feto ye.)
GAL 2:7 Ana weto mawe tgyõt bokyas roto aro fee. Ana makit sau su mnaut mawe, “Bokyas ro Paulus refo mnan si. Amu nnaut nwe Allah ysok ait tna ybis ait yamo ykyas Bokyas ro Yesus kʼraa ro wase agama Yahudi. Ait ysok Paulus refi mnan si tiwya ysok Petrus ye. Petrus tait, Allah ybis yamo ykyas Bokyas ro Yesus kʼraa mana ro Yahudi.”
GAL 2:8 Ae, Allah yoo yatak rAit yse kʼPetrus yamo raabis rAit yamo yo kʼraa mana ro Yahudi. Feto ye bi Ait oh mi yoo tak yse kʼjõ, yawe jõ tamo to kʼraa mana roto makin.
GAL 2:9 Tna ati reto to, Yakobus, Kefas (Petrus), msya Yohanes ana mawe, “Esre.” Tna ana mfot matem msya jõ tna msya Barnabas. Ana mabo tuuf reto to, mamo aban mana mam jemaat ro Yerusalem. Ana weto mfot matem msya amu tna mawe, “Anu fo bkah bo mana sau su. Amu nhar nwe Allah yoo bouum yee kʼanu mbewok, ybis anu nmo no kʼraa mana roto makin, raa mana ro Yahudi fee. Tna ybis amu nmo no kʼraa ro Yahudi.”
GAL 2:10 Tis rau to ana msi bo kʼamu mbewok mawe, “Sorni ma: Nmat tna natmof raa kinyah ye!” Tna jõ ksoh tno bo reto ye. Tna amu mbewok nsen sikba Yerusalem tna nsen nmo bamu.
GAL 2:11 Raa ro kro Kristus mbam raa mana roto to, tiwya Kefas (Petrus) ja hre yait bo su ysya ana. Tna yiranya ysya ana ye. Menohe ti baro firwas tna Yakobus yafoh wait baro mama snok mam kota ro Antiokhia. (Ana weto mbam raa mkbair ro ja mnaut mawe, “Raa beta ro kro Kristus, mako hawe sai, kbe ana kro bo mafa ranu, raa mana ro Yahudi to beta!”) Tna Kefas (Petrus) tait waa ana. Tibyo yari tna kro bo ro ana mawe. Feto tna ait hawe bo yiranya ysya raa mana roto ro kro Kristus u. (Ait sesa ait feto to, ait yari Bokyas ro Yesus ybo yno fee.) Tna Barnabas ysya raa Yahudi ro kro Kristus beta to mmat bo ro Kefas (Petrus) yno. Tibyo ana mari bo mbam raa mkbair reto ye. Mari tibyo sesa ana ye tna miranya msya raa mana roto ro kro Kristus u fee ye. Ana beta masen sioh ana sai oh meto. Feto to ati ro jõ tmat Kefas (Petrus) to, jõ bhah ait tawe, “Nyõ sesa nyõ to, nno bo ro mkair meto!”
GAL 2:14 Jõ tmat he ana miwer Bokyas Yesus ro ati oh meto. Feto to wore wo raa jemaat ro Antiokhia beta siret su to, jõ tawe Kefas (Petrus) tawe, “Fyi! Nyõ fi raa mana ro Yahudi fe mfe a? Menohe anu smot Kristus tibyo nyõ bitsre bo mafa raa ro Yahudi oh, tna nasen nno bo mnan raa mana roto sai. Nyõ nno feto moof. bo mafa weto to, make nyõ u fee. Menohe mfo refo nyõ nbis raa Yahudi ro mfo refo kro Kristus oh, nawe ana miranya msya raa mana roto to ma. Nbis bo reto mkah bawya!”
GAL 2:15 Tna tawe kʼPetrus tawe, “Nyõ nsya jõ fo, anu mbewok bbam biin raa mana ro Yahudi. Tibyo anu raa ro bhar Watum ro Musa nteet. Menohe raa ro mbam raa mana roto to, ana wase Watum reto. Feto to raa ro Yahudi, ja mnaut mawe raa mana roto weto beta to ‘raa ro mno iro’.
GAL 2:16 Menohe anu ro kro Kristus oh bhar bwe, ‘Watum reto mtai mno raa mhaf mato moof ati to fee.’ Allah ymat raa ro mari Watum ro Musa ja mbo mno to, tna yawe ana weto to, raa ro mhaf moof ati to fee. Awya ro smot Kristus Yesus oh mi Allah ymat tna yawe ana weto raa ro mhaf moof ati to. Watum ro Musa reto matak meto fee. Tiwya, ati ro anu brok bhar bwe bo reto mabo to, anu bashana tna smot Kristus Yesus. Tna anu bsen kro Ait oh.
GAL 2:17 Feto to, anu raa Yahudi bitsre Watum ro Musa. Anu ksoh bwe Allah ymat anu yawe anu bhaf moof ati mfi raa ro wase mno iro. Feto to, anu bsen smot Kristus oh. Menohe raa ro Yahudi mmat he anu bitsre Watum ro Musa tibyo ana mkyas kair amu. Ana mawe, ‘Aha! Paulus na mno iro meto! Ana mnan anya mfi raa ro mbam raa mana roto! Kristus yisti re ana mno iro!’ He mfe: Kristus yisti re raa mno iro fee saut! Raa bitsre Watum ro Musa to iro meto fee.
GAL 2:18 Jõ fret bo tawe Watum ro Musa to mnan anya msya amah ro rabo. Tna jõ titrah amah reto oh. Fyi re jõ haberek tbo ara ro rabo reto tna sgi amah reto u? Mfi bo jõ te tisoh jõ thaf moof mkah bo haberek tna tari Watum ro Musa tbo tno u to, jõ tno iro oh meto.
GAL 2:19 Tiwya jõ thau tari Watum ro Musa to tbo tno. Menohe mfo refo jõ thar tawe Watum reto misoh irat ajõ tsya Allah moof to fee. Feto to jõ bitsre Watum reto afo re tno bo ro Allah yawe. Allah yawe jõ smot bo ro Kristus yno. Jõ smot tawe raa mame Ait yajat mam ara warok. Tibyo yisoh iranya ajõ tsya Allah.
GAL 2:20 Thau mam tabam refo tesait thau kar fee. Kristus yamos rAit ysan kʼjõ. Feto to thau tno bo kar u fee. Kristus yamos rAit mjin mam jõ thaf ajõ. Thau mam tabam refo fo, thau smot Ku ro Allah yare. Safo ajõ to Allah ymit Ku rAit Kristus. Feto oh mi Kristus yajat raa mame mam ara warok. Reto mnan bo jõ tesait tajat raa mame su tsya Ait ye. Au oh meto Allah ymat jõ to, yawe yoo riof yee kʼjõ. Ku ro Allah yare tait yatmof jõ tna ysan yetsu rAit shauk jõ.
GAL 2:21 Jõ hawe bo haberek kro Watum ro Musa u. Maami jõ tiwana Allah boatmof rAit oh meto. Bo ro Yesus yno oh mi Allah ymat jõ tna yawe jõ tfi raa ro mhaf moof ati. Watum ro Musa to matak re misoh jõ thaf moof ati to fee. Mfi bo Watum reto matak mnan si maami tiwya Kristus ysan yetsu rAit fee!”
GAL 3:1 Ayoh ee! Anu raa jemaat ro nhau mam Galatia fo, tnaut tawe raa sioh mno anu. Tibyo anu namboi tna nwe kro Watum ro Musa! Anu nno fyi sai meto ee? Tiwya tkyas Bokyas ro Yesus kʼanu to. Tawe Yesus tait raa mame yajat oh. Tna jõ betoo maja rau to kaket.
GAL 3:2 Jõ ttu bo sau kʼanu tawe, “Tiwya anu nkai Har ro Tuhan to fyi? Anu kro Watum ro Musa tibyo nkai fe mfe a? Mfe, anu nri Bokyas ro Yesus tna smot (percaya) Bokyas reto nwe bo mabo. Tibyo nkai Har ro Tuhan fea!
GAL 3:3 Tinyi rau to, Har rAit misoh iranya ranu nsya Allah. Mkah bawya anu ne nwe anu nesait ntai ntak nisoh iranya ranu nsya Allah feto! Mfo refo anu tomer nisoh iranya reto renti mamo snok tis rau to, mkah tak ranu nesait ai a? Anu wase bo toni sai meto a?
GAL 3:4 Tiwya anu smot Bokyas ro Yesus. Tna bosmot ranu reto mno re raa sikowah anu. Tna mfo refo anu ksoh nwe bitsre bosmot ranu tna mbeak makus fe mfe a?” Jõ tinaut tawe anu nno feto ma.
GAL 3:5 Tna te ttu bo kʼanu u tawe, “Fyi re Allah ysan Har rAit kʼanu to? Fyi re Allah yno bo ro hnah mam jemaat ranu to? Anu kro Watum ro Musa mi Ait yno meto, fe mfe a?” Mfe! Anu nri Bokyas ro Yesus tna smot (percaya) nwe Bokyas reto mabo.
GAL 3:6 Nnaut Abraham: Tiwya tinyi ait yari bo ro Allah yawe tna smot (percaya). Smot yawe bo ro Allah yawe reto to meen mabo. Tna Bokom ro Allah mawe, “Bo ro Allah ykyas kʼAbraham reto to, ait yari tna smot (percaya). Smot yawe bo ro Allah yawe reto to meen mabo. Au oh mi Allah yawe Abraham tait raa ro yhaf moof ati.”
GAL 3:7 Feto to, nri oh, nhar oh: Raa ro smot Allah feto, ana mnan fi ku ro Abraham yabe.
GAL 3:8 Bokom ro Allah tiwya mkyas raa ro mbam raa mana roto ye. Mawe ana ro smot Ait kbe Ait ymat ana mfi raa ro mhaf moof ati. Tna Allah ykyas Bokyas Moof reto matim wia tinyi wore bo weto mabo fefares. Bokyas ro Moof (Injil) reto to, Allah ykyas kʼAbraham matim wia. Yawe, “Mkah nyõ to, meen Jõ tno bo ro moof kʼraa mana roto makin.”
GAL 3:9 Feto to, anu bhar bwe raa ro mari tna smot Allah to, kbe Allah yno bo moof kʼana weto. Yno bo moof kʼana mfi tiwya Ait yno bo moof kʼAbraham wia. Abraham tait, raa ro smot Allah. Bo ro Allah yawe to, ait ynaut mamo-me fee. Ja yari tna yawe bo mabo.
GAL 3:10 Raa taro mnaut sre mawe, “Amu ja nri Watum ro Musa, feto kbe meen amu nkai roon ro hame.” Menohe Bokom ro Allah mawe, “Raa ro beroh mari Watum ro Musa tna mbo mno bo weto beta to fee, meen ayoh mroh kʼana weto. Hawe sai kbe ana mbo mno maja beta renti.” Ulangan 27:26 Awya ro mtai mno bo weto beta? Raa aro mtai mno feto fee. Raa matak mari tna mbo mno bo weto beta mnan si to fee. Feto kbe ayoh meen mroh kʼana weto beta.
GAL 3:11 Bokom ro Allah mawe, “Raa ro smot Jõ oh mi raa ro mhaf moof ati to. Tibyo meen Allah yoo roon yee kʼraa weto.” Habakuk 2:4 Au oh mi Allah yawe Ait yoo roon yee kʼraa ro smot Ait. Feto to anu bhar bwe, “Awya ro kro Watum ro Musa tibyo yawe Watum ro ait kro reto mno re yhaf rait moof ati to, ait yawe bo ro sre meto. Awya ro kro Watum reto menohe smot Allah to fee; sait bo yhaf moof ati to fee.”
GAL 3:12 Ati ro Allah yoo Watum reto yee kʼMusa to, Ait ykyas bo yawe bawya? Ykyas bosmot (iman) aro fee. Bokom ro Allah mawe, “Kbe ayoh mroh kʼawya sai ro ybo yno bo weto beta mnan si to fee.” Imamat 18:5 Soh raa mawe mamo raa ro mhaf moof mamyot Watum ro Musa to, mako hawe sai kbe mari bo beta ro Watum reto msi kʼana mbo mno sau-sau mnan si.
GAL 3:13 Feto kbe meen ayoh mroh kʼanu, raa beta, fe mfe a? Anu beta biwer Watum ro Musa oh. Rau ro moof to, Allah kmo anu yno ayoh mroh kʼanu beta. Oos maami Kristus yfes anu. Watum ro Musa mawe, “Allah kmo yno ayoh mroh kʼawya sai ro raa mame yajat mam ara warok.” Ulangan 21:13 Kristus raa mame mam ara warok tibyo ayoh mroh kʼAit oh. Yno feto mkah anu riryõn, afo re kbe ayoh mroh kʼanu to fee. Ait yfes anu oh meto.
GAL 3:14 Tiwya Allah ysi bosi akus kʼAbraham yawe yno bo ro moof kʼait ysya kube wait. Ti baro firwas tna Ait bitsre bosi reto kʼanu, raa ro nbam raa mana roto ye. Au oh mi Allah yno re Kristus yfes anu. Anu smot Kristus Yesus tibyo Ait yno bo ro moof kʼanu ye: Ait yoo Har ro Allah to mhau matam anu ye. Ysan Har ro Allah kʼanu mnan fi bo tiwya Ait yawe to ye.
GAL 3:15 Taja, tme, tao, tano na; mam tabam refo to, ati ro bi yabi sait yuumto bombra wait ku rait sait to, ja raa roto taro mari tna kro bo ro bi retait yawe. Bo ro ait yawe to, kbe mabo tu. Raa roto mno wa ku retait fee. Ait yesait oh mi krek waan ro yaja yuumto reto. Raa aro yirenti fee. Tna bo ro Allah yawe yuumto kʼAbraham to mnan feto ye. Ait yawe yum, kbe yno tu oh.
GAL 3:16 Allah yawe, “Meen Jõ tuumto bo kʼAbraham kube wait sait.” Kejadian 17:19 Bokom ro Allah far-far reto mkyas mawe yuumto bo kube ro Abraham 'magin' to fee. Menohe Bokom refo mkyas kube rait sait aran sai. Tna Ait retait oh mi Kristus to.
GAL 3:17 Nhar oh! Nnaut oh: Allah ykyas bo kʼAbraham wia matim yawe kbe yuumto bo kʼait. Tna tahun trion 430 firwas tna Allah yoo Watum yee kʼMusa. Tna bo ro tiwya Allah yawe yuumto kʼAbraham to, yawe yum oh. Allah ynaut tna ybo fares. Watum ro Musa reto mno wa bo ro Allah yuumto kʼAbraham to fee.
GAL 3:18 Allah yawe yuumto bo reto kʼraa ro kro Watum ro Musa fe mfe a? Mfe. Tiwya yawe kbe yuumto bo reto kʼAbraham ysya kube wait. Allah ysi bosi akus tna bo ro Ait yawe yno to, kbe ybo yno tu oh. Tna bosi reto oh mi Ait yatmof Abraham.
GAL 3:19 Soh Allah ksoh rAit sai mi Ait yuumto bo kʼraa to, Ait yoo Watum yee kʼMusa mkah bawya? Yoo afo re mbam Watum reto raa mrok mhar bo ro moof to miyo tna ro iro to miyo. Allah ksoh yawe raa kro Watum reto tibyo fee. Yawe raa kro Watum reto mamo snok ati ro Raa sait yama sai. Tiwya ati ro Allah ysi bo kʼAbraham to, Ait ykyas kube ro Abraham sait. Ait retait oh mi Kristus. Tiwya Allah ybis malaikat wait moo Watum reto mamo mee kʼMusa. Tna Musa yros susai yoo Watum reto yamo yee kʼraa ro Yahudi.
GAL 3:20 Mfi bo raa mabo ewok santri bo to, ja raa sait yros susai ana mbewok weto. Raa retait yno re kbe ana mbewok mrok makit sau su to. Tiwya, ati ro Allah yoo Watum reto yee kʼraa to, yno mnan feto ye: Musa yros susai ykyas bo ysya Allah tna ysya raa. Menohe tiwya Allah yesait aran ysi bosi reto kʼAbraham. Ait yno bo reto ai. Ybis Abraham yno bo aro fee. Rau ro ati to, Abraham smot bo ro Allah yawe meen mabo. Ait ynaut bo reto maut-mroh to fee.
GAL 3:21 Tiwya Allah ysi bosi yawe yuumto riof kʼanu raa. Feto to fyi? Watum reto santri bo msya bosi reto fe mfe a? Mfe: Watum ro Musa matak re kbe mno anu bhaf moof to fee. Watum reto Allah yoo mkah yoo riof yee kʼraa to fee. Mfi bo Watum reto matak re mno anu bhaf moof to, maami Allah yno sai ye mfi feto.
GAL 3:22 Bokom ro Allah mawe raa beta mno iro. Menohe Allah ysi bosi kʼanu, raa ro mno iro to, re kbe yyon iro wanu: Yawe raa beta ro smot Yesus Kristus tna msam wai kʼAit to, kbe Ait yyon iro wana tna ysan riof kʼana.
GAL 3:23 Tiwya wore anu wase bo smot Yesus to, Watum ro Musa kmot anu. Kmot anu wa re kbe anu bno iro kbik-kbak to fee. Watum reto kmot anu wa mamo snok Allah yerif iso ro bosmot (iman) reto.
GAL 3:24 Tiwya Watum ro Musa reto mnan mfi 'guru' ro mber anu re bma bo Kristus. Afo re anu bsam wai kʼAit. Anu smot Yesus feto tna Allah ymat bosmot ranu reto tibyo yawe anu to bfi raa ro mhaf moof ati.
GAL 3:25 Mfo wefo anu smot Kristus. Tna Watum ro Musa mamo guru ranu u fee.
GAL 3:26 Mfo refo fo anu smot Kristus Yesus tna nsam wai kʼAit. Tibyo anu nmo ku ro Allah wAit oh meto. Anu to, Allah baptis oh. Au oh mi Ait yawe anu nhaf sau su nsya Kristus to.
GAL 3:28 Feto to raa mbam raa mana ro Yahudi msya anu raa ro nbam raa mana roto makin ye, anu beta bmo bhaf sau, srau sau, bkit sau su bsya Kristus Yesus oh. Anu ro mamo sryan boh ye, raa ro ja mros kar tna mamo sryan fee ye, raa sme ye, msya fnya ye to: Anu beta bmo bhaf sau, srau sau, bkit sau su bsya Kristus Yesus oh. Tibyo Allah ymat anu yawe anu nnan anya sai.
GAL 3:29 Tna soh anu beta smot Kristus oh to, anu fo nmo raa wAit. Anu beta to kube ro Abraham ye. Tibyo Allah ysi bosi yawe yuumto bouum kʼanu weto ye.
GAL 4:1 Bi ro krek waan sait yhai. Mfi bo yhai tna ku rait ro yabe sait to ykek fares to, bi roto sait kbe yayõ ku retait ytos. Tna bi refi yoo waan ro yaja tii yhai to, yoo yse wia. Kbe ku retait yabi tna ye yrof yoo waan rait bi ait ro yse. Tii ykek fares ait ynan fi sryan boh: Bi retait ybis-baas ku retait, tna ait yse bo aro fee ye. Ebokmi bo wait to bo beta ro yaja tiwya krek ye. Ku retait yabi tna bi ait yoo waan rait yee. Tna yhar yawe bo wait.
GAL 4:2 Wore ait ykek fares to, raa roto ytos ait. Tna bi retait ybo waan rait mamo snok mam ayõ ro ku retait yanes oh, mnan tiwya yaja ysi oh.
GAL 4:3 Feto ye mnan amu raa ro agama Yahudi: Ati ro amu nkek fares mamo snok mam ayõ ro tiwya Allah Bja ranu ysi oh to, amu nri Watum ro Musa tna nno bo mafa raa ro agama Yahudi fares. Bo ro tabam weto mbo anu matak fares. Bo ro tabam weto mbo amu mnan fi raa bobot sait ybo sryan boh wait.
GAL 4:4 Menohe oon sboh, tna Allah ybis Ku rAit yama. Fnya ro sai mabe Ait. Fnya ro mabe Ait ysya raa ro ytos Ait to, ana mbewok raa ro agama Yahudi. Tibyo Allah yno re Yesus tait raa ro yari Watum ro Musa ye.
GAL 4:5 Allah ybis Ku rAit yama re kbe yfes amu. Yama yfes amu, raa ro tiwya nri Watum ro Musa. Yfes amu raa re Allah yayõ amu tibyo nmo ku wAit, tna kbe noo bo beta ro Ait ysan kʼamu.
GAL 4:6 Tna anu nmo ku wAit ye. Tibyo Allah ybis Har ro Yesus mama mabum mam anu nhaf wanu ye. Har rAit mno re anu bkyas bo kʼAllah mam bhaf mato wanu bwe, “Abba, Taja!” Tna anu bhafri bi Ait bnan fi Ku rAit Yesus yhafri Yaja ye.
GAL 4:7 Feto to, anu sait-sait nnan fi sryan boh to u fee. Allah yno re anu nmo ku wAit oh. Tibyo anu krek waan ranu ro Allah yuumto kʼanu oh.
GAL 4:8 Tiwya anu nhar Allah fefares to, anu nri tna kro bo ro tabam sor. Bo weto to mnan Allah fee. Bo weto matak fee ye.
GAL 4:9 Menohe mfo refo to anu nhar Allah to, Ait ro ati oh. (Rau ro ati to, Ait yhar anu ye!) Anu ne nri bo ro tabam refo to, nno fyi meto! bo mafa raa ro agama Yahudi msya Watum rana to mfi bo ro tabam sai. Bo weto to matak fee. Anu nri bo weto to mafer marak. Anu ksoh nwe bo weto mbo anu u to, nnaut nwe fyi meto!
GAL 4:10 Tna fo jõ tari he anu nkyõ bokyõ ro agama Yahudi ye. Watum rana mkyas ayõ aro rau-rau msya snyi msya tahun wore ana makyõ korat wana. Tna mfo refo anu kro nkyõ bokyõ weto mnan ana ye. Anu nnaut nwe nno feto tibyo nisoh iranya wanu nsya Allah oh meto. He mfe.
GAL 4:11 Tiwya jõ thau tsya anu to, jõ hrowyõ thai tkyas Bokyas Moof ro Yesus kʼanu. Tna mfo refo to, jõ tnaut yyi tawe hrowyõ ajõ reto mafer aro fe mfe a?
GAL 4:12 Taja, tme, tao, tano na; tiwya jõ bitsre Watum ro Musa tna jõ tnan fi anu. Feto to jõ soh-soh anu tawe, “Nitsre Watum reto tna nhau nnan fi jõ ye.” Tiwya jõ thau tsya anu to, anu nno bo ro mkair mai kʼjõ fee.
GAL 4:13 Anu nhar nwe bo ro mno re jõ tamo to kʼanu to, jõ kiyam. Ti reto to, jõ kiyam tibyo jõ tamo thau mam beto. Thau tsya anu tna tkyas Bokyas Moof ro Yesus (Injil) kʼanu ye.
GAL 4:14 Tna kiyam ajõ reto mno anu nsui. Menohe anu natmof jõ, tna anu nashoho fee, anu nikyak jõ fee ye. Menohe anu nisoh jõ moof. Anu nitrah nhaf wanu kʼjõ mnan fi anu nmat malaikat ro mbam kʼAllah. Anu nno bo moof kʼjõ mfi bo anu nmat Kristus Yesus yesait bo ye.
GAL 4:15 Mam ati reto anu nhaf mnan kʼjõ. Anu nmat jõ to nhaf mbyõ. Tna anu ksoh ntufrok nsu mauf wanu nhaut mam jõ tasu ajõ ro mkair. Menohe mfo refo simaut ranu reto miyo?
GAL 4:16 Mfo refo tkyas bo he anu nri fee sai. Bo ro tkyas abyõ reto to mabo ye. Bo ro tkyas refo sioh fee. Tna mfo refo bokyas ajõ reto mno anu nrok nwe jõ tamo byoh kʼanu a?
GAL 4:17 Raa mkbair reto masen mamo mo kʼanu tna mkyas bo matak. Ana weto mkyas bo re kbe anu kro ana. Menohe ana mkyas bo mkah bonaut rana ro mkair. Ana mawe mno re kbe anu twat nsya jõ, re kbe anu nsen nmo nkro ati rana. Nri bokyas rana ma.
GAL 4:18 Mfi bo raa matak mkyas bo ro moof, tna anu nri bokyas rana to, jõ ksoh. Wore thau tsya anu ye tna wore jõ tarak ye to, jõ ksoh tawe anu nmur-mur nri tna nno bo ro moof yoyo.
GAL 4:19 Taja, tme, tao, tano na; anu to nfi ku wojõ ro jõ ksoh. Tiwya tama tkyas Yesus yasom kʼanu to, tetsu mham-ham mfi fnya ro kborham tna mabe. Anu smot Yesus tna nsam wai kʼAit oh, menohe bosmot ranu matak fefares. Feto to jõ tnaut yyi tna tari kborham u. Tawe fooh re bosmot ranu matak. Fooh re anu nrok nhaf sau su nsya Kristus yhaf rAit.
GAL 4:20 Tna ksoh tawe tama thau tsya anu u, tna re tkyas bo kait tsya anu. Jõ hawe bo bhah anu. Jõ ksoh tawe tkyas bo rere tsya anu tna tisoh betrot bo wanu ro nno. Menohe thau fari ntefo tna kbe tno bawya u kʼanu?
GAL 4:21 Ayoh ee! Watum ro Musa anu nhar oh. Menohe maja rau to, anu nhar kaket fefares. Anu kro Watum ro Musa reto re kbe meen anu nkai riof a? Ebokfi mabo fee!
GAL 4:22 Bokom ro Allah mawe, “Tiwya Abraham yabe ku sme wait mabo trion ewok: Sait ybam Hagar ro mamo sryan boh, tna sait ybam yfain fai Sara ro mamo sryan ye fee.”
GAL 4:23 Ku ro Abraham wait mabo ewok to: Ait ro mbam Hagar to bo ro msai fee. Hagar mhaf reto mfi bo ja raa mno sai feto. Menohe ati ro Sara mhaf ku Ishak to, fai au mabi oh. Tiwya Allah ysi bosi kʼAbraham to oh mi ait ysya Sara mtai matak mabe ku rau. Fai au mabe ku mam wore au mabi oh to, bo ro msai meto.
GAL 4:24 Fnya mabo ewok reto fret bo mawe bosi trion ewok. Hagar fret bo mawe Watum ro Musa. Allah yoo Watum reto yee kʼMusa mam atu ro Sinai, ro mhau mam oo ro Arab. Tna Watum reto make raa taro fares. Ana weto to mamo sryan mfi Hagar. Tna mfo refo raa ro mhau mam kota ro Yerusalem to, ja Watum ro Musa mbo ana to, make ana matak fares ye.
GAL 4:26 Tna bofret ro ewok to: Raa mkyas mawe Sara mnan anya ‘kota Yerusalem ro mhau mam uu’. Au oh mi wore Allah yamo Raja ybo raa wAit to. Anu fo bnan ku ro Sara mabe. Sara mamo sryan fee tna anu bros kar ye: Watum ro Musa make anu u fee.
GAL 4:27 Bokom ro Allah mawe, “Fnya ro sfot to kbe ana mabe ku mawat. Tna fnya ro msya raa wana mhau su to kbe mabe ku kebet sai. Tibyo: Fnya ro raa wana sikba ana makus tna ja mabe ku aro fee: Simaut oh! Fnya ro wase bo kborham to: Yok-yok tna sikoyõ oh!”
GAL 4:28 Taja, tme, tao, tano na; tiwya Allah ysi bosi yawe kbe Abraham yabe ku. Tna yabe Ishak. Tna anu fo bnan Ishak: Bosi reto mno re anu bmo ku ro Allah wAit.
GAL 4:29 Tiwya Hagar msya Abraham mabe ku Ismael mbam ksoh rana sai. Tna fo Har ro Tuhan mno re Abraham yabe ku Ishak. Ku Ismael yabi tna yno bo samyoh mai kʼIshak. Tna mfo refo to, mnan anya ye: Anu to bfi Ishak. Anu bmo ku ro Allah wAit mkah Har rAit ye. Tna raa ro kro Watum ro Musa fares to ja mno bo samyoh mai kʼanu.
GAL 4:30 Menohe ⌞tii Allah ybis Abraham yawe yikyak Hagar.⌟ Bokom ro Allah mawe, “Nikyak sryan boh reto masen msya ku rau to mamo. Meen ku rau retait yasen yoo bouum anyõ aro fee. Ku ro yros kar, ybam fai au ro mros kar, meen yesait aran fri bouum reto.”
GAL 4:31 Au oh meto: Anu fo ku ro sryan boh reto wau fee. Reto oh mi anu kro Watum ro Musa fee. Anu fo ku ro fai Sara. Anu bri tna smot Allah reto oh mi Ait meen yoo riof yee kʼanu to.
GAL 5:1 Kristus skur anu re bo aro matak make anu u fee. Kristus yno afo re anu nros kar oh! Feto to nros ntak oh! Nno be raa make anu mkah Watum ro Musa soh mfe bo roto to ma! Raa ro mari Watum ro Musa to masom bo fanes mnan fi sryan boh.
GAL 5:2 Raa mkbair reto mbis anu mawe, “Nko hawe sai raa mkom (sunat) anu afo re nisoh iranya wanu nsya Allah.” He mfe. Jõ fi Paulus, raabis ro Allah. Tna jõ tawe kʼanu tawe, “Nri ana to ma! Mfi bo anu nno bo reto to, mafer bo ro Kristus mno to, aro fee kʼanu! Mfi bo anu nno bo reto to, anu fo nfi raa ro smot Kristus fee.”
GAL 5:3 Nri a? Awya ro ynaut yawe, “Ro moof to, jõ raa mkom (sunat) afo re misoh iranya ajõ tsya Allah.” Ynaut sre meto. Awya ro yawe feto to, yako hawe sai, kbe yari tna kro Watum ro Musa weto sau-sau mnan si!
GAL 5:4 Anu taro tomer kro Watum ro Musa afo re Allah yawe anu raa ro mhaf moof ati: Bonaut ranu reto to sre. Anu weto ja niranya nsya Kristus u fee. Anu nitsre boatmof ro Allah oh meto!
GAL 5:5 Menohe Har ro rAit mhau mban anu. Anu smot Kristus tibyo nwof tna binaut oon wore meen anu bhau bhaf moof ati. Tibyo Allah yhaf mnan kʼanu.
GAL 5:6 Anu bhaf msya bkit, srau sau su bsya Kristus Yesus. Anu bhar bwe anu raa mkom oo mkom fee bo to, bo ro ati meto fee. Ro ati to anu smot Kristus tibyo batmof raa anya kaket.
GAL 5:7 Tiwya tinyi anu nno bo ro moof: Anu nri tna smot bokyas ro ati reto nwe bo reto mabo oh. Menohe raa roto taro mama sioh wa anu. Feto tibyo anu beroh smot bokyas ro ati reto fee.
GAL 5:8 Awya ykyas bo kʼanu tna yoo anu nhaf wanu re anu nri bokyas ro sre reto? Allah ro ytu anu to yno meto fee.
GAL 5:9 Bokyas ro raa mkbair reto to besruf anu beta a? “Ati ro raa maim roti to, kbe raa moo ragi kbet mno tepung mo mrok mtar mase.”
GAL 5:10 Menohe Tuhan yno re bokyas reto kbe beswan anu fee. Awya ro yno anu nrok nantutu to, kbe Allah yoo safo reto kbe ymit kʼait.
GAL 5:11 Taja, tme, tao, tano na; raa taro mawe, “Paulus ybis yawe raa mkom (sunat) raa re kbe misoh iranya rana msya Allah meto.” He jõ tkyas bo reto fee. Mfi bo jõ tkyas bo reto fares to, maami raa ro Yahudi sikowah jõ u fee. Jõ tkyas tawe, “Ro ati to, raa smot bo ro Yesus tiwya yno mam ara warok. Iso reto aran oh mi misoh iranya raa msya Allah.” Tna raa ro Yahudi to hawe mari bo ro jõ tkyas reto. Tibyo ana sikowah jõ.
GAL 5:12 Ana mkbair reto mkyas bo sobu anu. Tna mbis mawe anu raa mkom (sunat). Ana mno re anu nantutu. Rau ro moof to, ana mamo msot bo wana rof!
GAL 5:13 Taja, tme, tao, tano na; Allah ytu anu nmo no kʼAit. Tibyo bo aro make anu u fee. Menohe kaket anu re kbe nno iro to ma! Rau ro moof to, natmof raa anya. Tna nno bo moof kʼraa anya kaket.
GAL 5:14 Au oh meto, bo ro Allah ysi beta, yawe anu bno to, maja weto beta to sau aran. Au oh mi: “Natmof raa anya kaket mfi bo ja anu natmof netsu wanu nesait ai.”
GAL 5:15 Ntoh anya to ma! Santri anya to ma! Kaket anu, be kbe tis rau mti kair kʼanu anya ai.
GAL 5:16 Tawe kʼanu tawe, “Soh anu nri Har ro Tuhan reto to, mno re kbe anu hawe bo nno bo ro asmamo to u.”
GAL 5:17 Bo ro anu raa nksoh bno to hayah. Tna bo ro Har ro Tuhan nksoh mawe anu bno to hayah ye. Mbewok santri anya. Menohe Har ro Tuhan matak re ja anu bno bo mkair ro anu bhaf mbis anu bno to fee.
GAL 5:18 Soh anu nri Har ro Tuhan kaket to, kbe Watum ro Musa matak aro ye mbis anu to fee.
GAL 5:19 Anu bhar bwe raa taro to mhaf wana mkair. Tna ana mari bo ro mhaf wana ro mkair weto to mbis ana. Tibyo ana mno iro mfi fefo: Ana taro maus-as bo. Taro srau oot-oot tibyo mno boasmamo, bo ro mti hrenaut.
GAL 5:20 Taro smot bo ro tabam, tna taro mari mafot ro kabes re saso matak rana. Taro knait anya, taro mbait mamus anya, ana taro waa kbe raa safto bo ro ana mse, taro mbo kmo mam matem, taro ja saso masom rana, taro mno bo re raa mbrir-brar mam jemaat tna safto-safto ana.
GAL 5:21 Tna taro maam bo raa, ana taro bisir-basar, tna makyõ bokyõ mnin-nin yoyo bo. Tawe kʼanu u tawe, “Raa ro ja mno bo mfi fefo to meen Allah yuumto bo kʼana fee. Ana meen mamo mhau mam sawro ro Allah yamo Raja ybo to fee ye.”
GAL 5:22 Menohe raa ro mari bo kʼHar ro Tuhan to, kbe ana weto mno bo moof mnan ara ro tufrok make moof. Make ro moof weto oh mefo: Ana matmof raa anya kaket, ana simaut mase yoyo mam mhaf, srau wana, mhaf mato wana to tnok, ana kanyin sai masom bo ro mai kʼana, mhaf ase, ja ana mno bo moof kʼraa roto, tna bo ro ana mawe mno ja krim-krim mno tu oh.
GAL 5:23 Ana mhaf sneh, tna ja mbo metsu wana kaket tibyo mno bo nyi-nan fee. Raa ro ja mno bo ro moof weto to watum aro mno wa ana fee.
GAL 5:24 Raa ro Kristus Yesus ybo weto to, ana masmamo u fee. Boasmamo ro tiwya ana mno weto to, ana moo mbeak mam ara warok makus oh.
GAL 5:25 Har ro Tuhan mno re anu brok baam. Feto to nma, anu bri bo ro Har mawe.
GAL 5:26 Feto to saso nsom re kbe raa bibi anu to ma. Ntoh anya to ma. Tna kmo anya to ma.
GAL 6:1 Taja, tme, tao, tano na; soh anu sait yno iro to, kbe anu baro nmo nmat ait. Anu baro ro ja nri bo kʼHar ro Tuhan to nmo tna watum bo kʼait nno mkah nhaf ro sneh. Nwe, “Nhah ne nno bo ro moof.” Tna kaket anu be kbe ana mno tibyo anu ntek ye.
GAL 6:2 Tna nmat raa anya ro mkai bo ro samyoh to, nsen nmo nbet ana. Nsya ana tubat bo ro samyoh reto su. Nisoh ana mhaf wana re ana sraujin u fee. Anu nno feto to anu kro watum ro Kristus oh meto.
GAL 6:3 Soh raa sait ro ati fee ynaut yawe, “Jõ fi raa ro ati!” Ait tait sioh-sah ait oh meto.
GAL 6:4 Menohe ait ro yawe bibi ait yesait ai to, rau ro moof to, ait ymat sas bo ro ja ait yno kaket to wia. Tna soh ykai mafer ro moof to, kbe ait simaut mam yhaf mato. Nmat sas bo ro raa roto mno to ma.
GAL 6:5 Rau ro moof to, raa sait yesait kaket ait ai sai. Tna siko yno bo moof mnan si bo ro Allah yerif kʼait.
GAL 6:6 Tna raa ro ja mkyas watum ro Allah kʼanu to, kbe anu sait-sait noo bo nee kʼana riryõn.
GAL 6:7 Sioh anu nesait to ma: Allah ymat tna yhar bo ro anu sait yno-yno. Awya ro ynaut mam yhaf mato yawe, “Allah wase bo ro mkair ja jõ tno to.” Raa retait sioh ait yesait ai oh meto! Feto niwana Allah to ma! Jõ fret bo tawe, “Mfi bo raa sait furere bobat makan rau mam armato rait to, kbe meen bobat weto to make. Tna tis rau to ait yaret bobat mnan anya mamyot makan tiwya ait furere to.”
GAL 6:8 Reto oh mi: Anu bhaf to mkair. Tna awya ro yari bo ro yhaf rait mbis, tibyo yno bo ro asmamo to, kbe ait safe mkak. Tna awya ro yari bo kʼHar ro Tuhan ybo yno to, kbe meen ykai roon ro hame mbam Har reto ye.
GAL 6:9 Nma, anu beroh bno bo ro moof. Wore anu hrowyõ to, bitsre ma. Tna meen tis rau to, anu bkai bo ro moof.
GAL 6:10 Wore wo moof refo. Feto to nma, anu bno bo moof kʼraa beta: Tinyi rau to, kbe anu bno bo moof kʼraa anya ro smot Kristus. Tna fo bno bo ro moof kʼraa roto beta ye.
GAL 6:11 Bokom ro tis refo fo, jõ tkom mkah tatem ajõ ai. Tkom mayir mase.
GAL 6:12 Raa mkbair reto tomer mkuk anu re kro Watum ro Musa. Mno feto afo re kbe raa wana ro agama Yahudi nksoh. Au oh mi ana mbis anu mawe raa mkom (sunat). Ana mhar he bo reto bo ro ati fee. Rau ro ati to, raa smot (percaya) bo ro Yesus tiwya yno mam ara warok. Bo ro yno reto misoh iranya raa msya Allah. Raa mkbair reto mhar bo reto menohe beroh mbis raa mawe ana raa mkom (sunat). Raa mkbair reto waa kbe raa ro Yahudi to kmo tna sikowah ana.
GAL 6:13 Ana ksoh mawe raa mari he anu raa mkom tna kro Watum ro Musa ye mnan si mkah bo ro ana mbis. Re kbe ana safuk mawe, “Raa ro mhau mam Galatia to mari tna kro amu oh.” Raa mkbair reto to, tiwya raa mkom (sunat) oh. Menohe ana mesait, kro Watum ro Musa mnan si fee.
GAL 6:14 Jõ hawe bo safuk. Jõ hawe bo raa mmat jõ. Jõ ksoh re raa mmat bo ro Tuhan ajõ Yesus Kristus yno sai. Au oh mi ysan yetsu rAit mam ara warok. Watum aro msya bo ro tabam refo fo taro to, ja raa mnaut mawe bo ro ati. Menohe mfo refo jõ tnaut tawe bo weto to bo ro ati fee. Tna bo ro jõ tnaut tawe bo ro ati to, raa ro tabam refo to hawe bo weto ye.
GAL 6:15 Mfi bo anu raa mkom oo mkom fee bo to, bo ati fee. Rau ro ati to anu smot Kristus tibyo nmos wanu to mrok maam.
GAL 6:16 Jõ skabuk Allah re Ait yatmof awya-awa sai ro miwer bo maja ro jõ tawe refo fee. Tna jõ skabuk re Ait ysan riof rAit kʼana weto tna yno re ana mhau mhaf tnok ye. Ana oh mi raa ro Israel, raa ro Allah wAit.
GAL 6:17 Tna jõ hawe te santri bo wefo tsya anu u fee. Raa roto ro mamo byoh kʼKristus sikowah jõ mnan oh! Jõ fi raabis ro Tuhan rAit tibyo raa mai jõ mayir-ayar mawat kʼjõ sai.
GAL 6:18 Taja, tme, tao, tano na; jõ skabuk Tuhan ranu Yesus Kristus re yatmof anu sait-sait. Amin: Mabo oh.
EPH 1:1 Aam refo mbam kʼjõ, Paulus. Allah ksoh tibyo jõ tamo raabis ro Kristus Yesus rAit. Jõ tkom aam refo kʼanu raa ro Allah wAit mam kota ro Efesus. Anu to, beroh smot Kristus tna Allah yse anu nmo raa wAit nsya Kristus Yesus su ye.
EPH 1:2 Jõ skabuk Bja Allah, re Ait ysya Tuhan Yesus Kristus kbe matmof anu tna mno re anu nhau nhaf tnok sai.
EPH 1:3 Tuhan ranu Yesus Kristus tait, ytu Allah Yaja rAit. Tna Allah ymat anu bsya Kristus su tibyo Allah yno bo ro moof beta kʼanu. Bo ro moof weto to, anu bkai mam tabam refo fee. Menohe Allah siwyan bo ro moof weto kʼanu meen tru mam sawro rAit. Mabo oh tibyo anu bibi Allah bwe yno bo ro moof ati beta kʼanu to!
EPH 1:4 Bo moof sau ro Allah yno to, tabam refo Ait ysair fefares to, Ait ysok anu oh. Feto to nma bibi Ait! Ait ysok anu afo re Allah ymat anu yawe anu bsya Yesus su oh. Anu bsya Yesus su oh mi Allah ymat anu yawe anu bfi raa ro wase mber safo ye. Tna Ait ysok anu re anu bhau bno bo wAit sai ye.
EPH 1:5 Tna bo sau naut ro Allah yno kʼanu to, Ait yayõ anu bmo kukek ro Ait ytos. Feto to nma bibi Ait! Tiwya tinyi, anu brak fares to, Allah yhafri anu tibyo yesait yawe kbe Ait yayõ anu bmo kukek wAit feto. Tna Yesus Kristus siwyan iso re Yaja yayõ anu kʼAit ytos to. Allah yhaf moof tibyo yayõ anu mamyot bo ro Ait ksoh sai.
EPH 1:6 Ait yayõ anu feto, afo re kbe anu bhar boatmof rAit ro msai toni tibyo bibi Ait. Tawe u tawe, Allah yhafri Ku rAit Yesus toni. Tna Yesus ysair iso re Allah yatmof anu tibyo yayõ anu bmo kukek wAit to.
EPH 1:7 Iso ro Yesus ysair kʼanu reto oh mi yroh yoo mees rAit yfes anu. Iro ro anu bno to, Ait yyon beta. Allah ymat anu yawe anu bsya Yesus su oh. Allah yatmof anu yoo mees ro Yesus yyon anu feto. Tna boatmof ro Allah to, kta ro mabyoh maut toni.
EPH 1:8 Tna Allah ro yhar bombra beta tna yakit maan ati tait, yhaf reo yoo boatmof rAit reto yatmof anu sai.
EPH 1:9 Tna bo sau naut ro Allah yno to, Ait yasbrah bo sau ro Ait ksoh anu nhar ye. Feto to nma bibi Ait! Tiwya Allah ymyõt bo ro Ait ksoh yno baro, raa mhar fee. Makyon ro matim wia mkak oh. Makyon ro tna fo, Allah yasbrah bo reto kʼanu yawe Yesus yatak ybo bombra beta fo. Ybo bombra ro mhau mam sawro ye tna bombra ro mhau mam tabam refo ye. Allah yhaf moof tibyo yno feto. Ait saim makyon refo matim wia tna Allah tubat Yesus yhau abyõ ybo bombra weto to.
EPH 1:11 Tna Allah ja yisti bombra beta mamo mnan si bo ro Ait ksoh. Tiwya tinyi, anu brak fares to, Ait ysok anu mnan si bo ro Ait ksoh sai. Ysok anu ymat anu yawe anu bsya Kristus su, tibyo yawe anu bmo raa wAit.
EPH 1:12 Tiwya anu smot Kristus binaut bwe meen kbe yoo bo yuumto kʼanu. Allah ysok anu btim wia feto afo re kbe raa mmat bo moof ro Ait yno kʼanu reto tibyo mbibi Ait.
EPH 1:13 Tna ati ro anu nri bokyas ro ati, ati ro anu nri Bokyas Moof (Injil) reto ro merif iso ro raa mkai riof to, anu nfot tna nse kʼanu. Anu smot Kristus to. Anu smot Ait tibyo Allah yoo Har rAit yse kʼanu re kbe anu nhar nwe anu nmo raa wAit nsya Kristus su. Har ro Ait yoo yee kʼanu reto to, Har rAit yesait ro tiwya ysi.
EPH 1:14 Tiwya Allah yoo Har rAit yuumto kʼanu matim wia. Ait yno bo sau ro tiwya ysi kʼanu reto mabo oh. Feto to, anu bhar bwe meen Ait yuumto bo roto ro Ait tiwya ysi kʼanu to ye. Tna Allah yfes anu re anu bmo raa ro meen Ait ybo ye. Kbe raa mmat bo moof ro Ait yno weto to tibyo mbibi Ait.
EPH 1:15 Jõ tnaut bo weto beta. Tna raa mkyas anu kʼjõ ye. Raa mawe anu smot Yesus Tuhan ranu. Tna mawe anu raa ro Allah wAit beta to, ja anu natmof anya beta ye. Bokyas ro jõ tari reto mno re ja jõ skabuk anu tayoh asik mase kʼAllah. Jõ sorni anu fee.
EPH 1:17 Tna jõ tayoh re Ait yoo Har rAit yno anu nkit maan tna yerif bonaut wAit kʼanu re kbe anu nhar Ait kaket ye. Yesus KristusTuhan ranu ja smot Allah ye. Tna Allah tait, Bja ranu. Ait yase rAit msai toni.
EPH 1:18 Tna jõ tayoh re Allah yoo kek rAit yram anu nhaf afo re kbe anu nhar bo baro wefo: Ro sau to, anu ro Ait ytu nmo raa wAit to, jo skabuk re kbe anu nhar ninaut sawro ro Ait siwyan kʼanu. Ro nkro to, kbe anu nhar kta wAit ro meen Ait yuumto kʼanu. Kta ro msai toni weto, kbe yuumto kʼanu nsya raa wAit roto beta ye.
EPH 1:19 Ro tis to, jo skabuk re kbe anu nhar Allah yatak rAit ro msai toni kʼanu ro smot Yesus. Tak roto beta to ssafo fee. Tak rAit ro msai toni reto oh mi tiwya mno Allah ytai
EPH 1:20 yno Yesus yrok yasen. Tna tubat Ait yamoʼt sawro rAit. Tna yse hre ysya Ait mam yajoh ro yatem ati; hroh ro mase reto.
EPH 1:21 Mfo refo Kristus hre abyõ bombra beta. Tna ro masom roto beta mhau mte sai. Pemerintah ye, aban mana sor ye, ro mase ye, msya bobot sor ye, mhau mte beta. Kristus hre abyõ feto mam makyon refo sai fee. Kbe Ait hre abyõ feto mam makyon ro meen mama ye. Ait hre abyõ yum.
EPH 1:22 Tna Allah yoo bombra beta yse mam Yesus yatem ybo afo re kbe Ait yase tna bombra weto mari Ait. Tna jemaat rAit mfi Ait yetsu. Tna Allah yse Yesus yamo mana rau. Tna jemaat rAit msya Ait su to mhau muuf kaket. Tna Ait oh mi yhau mam bombra beta tna yno bombra beta weto mhau muuf kaket ye.
EPH 2:1 Anu tiwya tinyi to nhai sai. Tiwya anu niwer watum ro Allah. Iro weto oh mi anu nhai to.
EPH 2:2 Tiwya ja anu nhau nno iro weto mamyot iso raa ro tabam refo ja nkro ye. Kabes yabi (Iblis) tait, ja ybo kabes beta. Ait tait har ro mfo refo ykah bo rait mam mhaf raa ro ja hawe mari bo ro Allah ksoh. Iso ro tiwya anu nkro reto to, mamo mamyot bo ro kabes retait ksoh ye.
EPH 2:3 Tiwya amu nsya anu beta ye kro iso reto. Tiwya anu bhau srau oot-oot bo ro tabam sai. Tna bo ro anu srau ksoh msya bonaut ro tabam to, tiwya anu kro bno ye. Tna ati reto bo mafa wanu to mnan anya msya bo mafa raa ro tabam refo roto beta ye. Tna Allah kmo ana weto yawe meen yno bo ro samyoh btek mai kʼana to.
EPH 2:4 He anu mfe! Allah yse boatmof wAit msis tna Ait yhafri anu toni syok.
EPH 2:5 Tiwya anu ja biwer watum rAit tibyo bhai sai nkri-kri to, Allah yoo anu yno anu brok baam bsya Kristus su. (Boatmof rAit oh mi Ait yoo riof yee kʼanu oh to!)
EPH 2:6 Tna Allah ymat anu bsya Kristus su tibyo Allah tubat anu bsya Kristus su tna yse anu hre mam sawro rAit bsya Kristus su ye.
EPH 2:7 Allah ymat anu bsya Kristus su tibyo yatmof anu feto. Boatmof ro tiwya Allah yatmof anu weto to, mafer rau ro tis to, mfi bo kta ro mabyoh miwer kta roto beta. Ait yatmof anu feto afo re mam makyon ro meen mama to, kbe Ait yerif boatmof rAit weto kʼraa. Kbe ana mhar mawe Allah yhaf moof ymat anu to.
EPH 2:8 Jõ tawe u tawe, anu smot Kristus tibyo Allah yatmof anu yoo riof yee kʼanu. Bo weto to, anu nesait nno fee. Bo weto to, tiwya Allah yuumto kʼanu sai.
EPH 2:9 Anu raa besait bkah bo re bisoh biranya bsya Allah meto fee. Ait yatmof raa sai. Ait yesait yno feto re kbe raa safuk ana fee.
EPH 2:10 Allah oh mi ysair anu to, Ait oh mi ymat bo ro Yesus yno tibyo yno anu brok raa ro tna. Allah yno anu brok raa ro tna feto, afo re mfo refo, mam tabam refo fares to, kbe anu ja bhau bno bo moof ro tiwya Ait saim kʼanu sait-sait bno.
EPH 2:11 Feto to, sorni bo ro kbe tkyas fo ma! Anu to, nbam raa mana ro Yahudi fee. Tna anu nma nkro Kristus oh. Ana ro mbam raa mana ro Yahudi to, ja santri bo msya anu. Bo mafa rana raa mana ro Yahudi to, ja ana mkom tohmi (sunat). Sunat tibyo safuk ana mawe ana to raa ro Allah wAit. (He mfe, bo reto to, ja raa mno mkah matem sai. Bo ro tabam sai meto.) Tna anu, ro ja wase agama rana ro Yahudi to, ja wase sunat feto. Tiwya fnya mabe anu to, anu nsya nme beta to raa ro Yahudi fee ye. Tibyo ana ro fnya mabe mamo raa ro Yahudi to, ja mtu ee anu mawe, “Anu raa ro wase bo sunat sai meto.”
EPH 2:12 Anu to, nbam raa mana ro Yahudi fee. Ti tiwya weto to, anu beta nhau nsya Kristus su fefares. Tna ti weto to, Allah ymat anu yawe anu nhau nsya raa mana rAit ro Yahudi fee ye. Mfi bo raa ro srim, anu nwase bo ro tiwya Allah ysi kʼana ro Yahudi ye. Tiwya Ait ysi yawe, Ait kbe ybis Raa ro yase sait yama yoo riof ro mase yee kʼraa to. Tna ti weto ye to, anu nhau mam tabam refo to, tna nwase Allah fares tna wase bo ninaut riof ro mase ye.
EPH 2:13 Menohe mfo refo, Allah yoo anu yakah yama yse kene kʼAit. Tiwya anu nhau fari menohe Allah ymat mees ro Yesus Kristus, tibyo yoo anu feto.
EPH 2:14 Tiwya anu ro wase agama Yahudi nhau hayah tna amu ro tiwya kro agama Yahudi nhau hayah ye. Ti reto to, Watum ro Musa mros mbetwat wa mfi bo tembok maboh sau mros masuf. Mbetwat wa re kbe anu biranya su fee. Tiwya amu nbo Watum reto matak. Tibyo amu kmo anu ro wase Watum reto. Menohe ati ro Kristus yamaʼt tabam refo tna yajat to, Ait yihabah tembok reto matu makus. Watum makin ro tiwya Allah yoo yee kʼMusa to, mbo raa u fee. Yesus yesait oh mi yno mkbair ewok weto mrok miranya. Ait ysair mkbair ro tna sau oh meto. Mam mkbair reto to, amu raa ro Yahudi nsya anu raa ro Yahudi fee ja bhau biranya su. Raa mkbair ewok ro tiwya mhau hayah weto to, Allah yoo ytan su mam raa mkbair ro tna sau.
EPH 2:16 Ara warok ro Yesus oh mi misoh raa mkbair ewok weto re mamo yetsu rAit sau tibyo mkbair ewok weto mhau miranya su. Mkbair ewok weto kmo anya u fee. Tna anu ro bhau mam Ait yetsu sau reto su to, ara warok reto oh mi misoh iranya ranu bsya Allah ye.
EPH 2:17 “Ait yama ykyas iso ro raa mrok miranya msya Allah. Anu to, nbam raa mana ro Yahudi fee. Tna Ait ykyas iso reto kʼanu ro tiwya nhau fari wase bo ro Allah ye. Tna Ait ykyas iso reto kʼana raa mana ro Yahudi ye, ana ro tiwya mhau kene mhar bo ro Allah baro to.”
EPH 2:18 Yesus oh mi anu mkbair ewok mkai Har ro Tuhan sau reto su. Tibyo anu btai bros bkyas bo bsya Bja ranu yesait ye.
EPH 2:19 Feto to, anu to raa ro srim u fee. Tna anu to raa ro mne u fee ye. Menohe anu nmo raa mana sau nsya raa ro Allah wAit. Nmo kukek wAit oh meto.
EPH 2:20 Anu weto su to, nmo amah ro bi Ait sgi. Tna raabis (rasul) wAit msya nabi ro Ait ybis mkyas bo wAit to, mamo sankaf wau. Tna Kristus Yesus yesait yamo sankaf ro matak toni miwer sankaf roto beta to.
EPH 2:21 Allah ymat raa ro mhau msya Kristus su, yoo ana weto su sgi amah rAit reto kri-kri fares. Sgi maut maut feto mamo amah sau ro Tuhan yhau ybo ana to.
EPH 2:22 Tna anu ye. Anu nhau nsya Kristus su, tibyo Allah yoo anu sgi amah rAit reto ye. Tna Ait yhau mam amah reto mkah Har rAit.
EPH 3:1 Tiwya raa mfot jõ, Paulus, tna makah mamo mse jõ mam bui to. Anu to, nbam raa mana ro Yahudi fee. Yesus Kristus ybo jõ, tibyo tamo tkyas Ait yasom kʼanu. Tibyo raa mfot jõ to.
EPH 3:2 Anu nri he Allah ysok jõ re takah boatmof (anugerah) rAit tamo tsan kʼanu.
EPH 3:3 Tiwya raa wase boatmof reto. Menohe Allah betoo bo reto kʼjõ. Riwai tkom tkyas boatmof reto kebet.
EPH 3:4 Tna anu nbaca bokom reto tibyo ntai nhar bo ro Allah betoo kʼjõ reto. Kristus oh mi anu tiwya wase tait.
EPH 3:5 Tiwya anu raa hohos na wanu to, Allah betoo bo reto kʼana fee. Menohe mfo refo, Ait yoo Har rAit betoo bo reto kʼanu raabis wAit (rasul). Tna Ait betoo bo reto kʼnabi wAit ye.
EPH 3:6 Ait betoo kʼamu yawe, raa awya sai ro smot Bokyas Moof ro Yesus to, kbe bi Ait ymat anu yawe anu bhau bsya Kristus su to. Raa ro Yahudi ye msya raa ro Yahudi fee ye to, kbe Ait yatmof anu beta su. Tna anu bnah su mam Kristus yetsu ye. Tna mkbair ewok weto su to, kbe anu bkai riof mase ro tiwya Allah ysi kʼraa wAit to ye.
EPH 3:7 Allah yoo boatmof (anugerah) rAit baro ysan kʼjõ re tamo raa ro ja takah Bokyas Moof reto tkyas. Tamo tkyas to, Ait yoo yatak rAit yee kʼjõ ye.
EPH 3:8 Anu raa ro Allah wAit to, tnaut tawe jõ fi thau mte toni. He mfe, Ait yoo boatmof reto saim kʼjõ re tamo tkyas kta reto kʼanu. Anu to raa ro Yahudi fee. Anu ro bhau bsya Kristus su to, kta ro anu bkai to, msis miwer. Anu raa btai ntuu mabyoh rau fee ye.
EPH 3:9 Tna Allah ro ysair bombra beta tait, ysaim re jõ tasbrah maja rAit reto. Maja rAit reto to, maban tiwya tinyi Ait ymyõt re raa wase. Tna maja rAit reto oh mefo: Kristus yama siwyan iso re kbe mfo refo to, raa awya ro smot Ait to, kbe mkai riof ro mase. Raa mana ro Yahudi fee ye msya raa mana ro Yahudi ye.
EPH 3:10 Ait saim feto afo re mfo refo kabes sor msya malaikat sor, aban mana wana msya raa mase wana ro mhau mam sawro to, kbe ana mmat sas raa mkbair ro kro Yesus. Ana mmat sas anu feto, tibyo mhar mawe Allah yakit maan saim bo ro moof aro rau-rau.
EPH 3:11 Allah saim maja reto yawe mhau yum maban tiwya tinyi mamo snok mam hame wajin. Tna Ait yoo Yesus KristusTuhan ranu to, yno maja rAit reto mabo.
EPH 3:12 Anu smot Yesus tibyo Allah ymat anu su bsya Ait oh mi anu btai bros bkyas bo kʼAllah tna waa Ait fee.
EPH 3:13 Feto to, anu nri jõ thau mam bui to, jõ tayoh re anu nsraujin toni to ma. Tis rau to, kbe Allah yse mafer ro msai kʼanu to.
EPH 3:14 Reto oh mi jõ taka tjit timna hartu Bja ranu.
EPH 3:15 Raa mana ro mhau mam tabam refo msya raa mana ro mhau mam uu to ye, Ait yamo Yaja yafan ana sau-sau beta.
EPH 3:16 Ait yse kta wAit ro msai toni. Tibyo jõ skabuk kʼAit tayoh re yoo yatak rAit baro yee kʼHar rAit mbo mam kʼanu nhaf mato re anu nros ntak.
EPH 3:17 Au oh mi anu smot Kristus oh tibyo jõ tayoh re Allah yse Kristus yjin mam kʼanu nhaf wanu meto. Tna jõ tayoh kʼAllah re kbe anu nbo boatmof matak toni ye mfi bo amah sau mros abyõ mam sankaf wau ye tna ara mtis ja mno re ara matu fee ye.
EPH 3:18 Anu nbo boatmof matak feto to, kbe anu nsya raa wAit beta to, ntai nhar boatmof ro Kristus kaket. Kbe anu nnit boatmof rAit reto, nwe miyõ wer tna maboh wer ye tna mase wer ye bo.
EPH 3:19 Anu raa btak bhar boatmof rAit beta fefares. Menohe tayoh re Allah yno anu nhar boatmof reto kaket baro naut. Tna jõ tayoh re Allah yoo yhaf rAit yfau mam kʼanu nhaf mato ye snok anu nhaf mrok sau su msya Ait yhaf rAit ro matot toni.
EPH 3:20 Tna nma anu bibi Allah! Bonaut wanu msya bo ro ja anu byoh kʼAit beta to, kbet aran. Tna Ait yatak rAit ro yse kʼanu to, ytai ybo yno bo miwer bo weto toni.
EPH 3:21 Anu bmat Kristus Yesus ysya raa mkbair wAit to, bwe bibi Allah bwe bo yase wAit to msai toni. Bwe feto to, maban tiwya tinyi mamo snok mam hame wajin. Amin: Mabo oh!
EPH 4:1 Jõ kro Tuhan oh mi raa mfot jõ mse hre mam bui fo. Tna tiwya Allah ytu anu re nma nkro iso ro Tuhan ye. Tna anu bnaut bo ro riwai tkom beta to, jõ sobu anu nsen nno bo ro moof mnan fi anu nkro iso rAit meto.
EPH 4:2 Bo bawya ro anu nno nkro iso rAit to, yok-yok anu to ma, nhau nhaf sneh sai. Tna nbi-ba to ma. Natmof raa anya tibyo kanyin anya ye.
EPH 4:3 Ja Har ro Tuhan mno anu nhau nhaf sau su. Nhau mur-mur noo iranya ranu nke anu beta su re anu nhau nhaf sau, srau sau feto. Nhau mur-mur nisoh anu su feto kaket!
EPH 4:4 Anu beta ro smot Yesus bmo yetsu rAit sau aran sai. Tna Har ro Tuhan to, sau aran ye. Tiwya Allah ytu anu nmo raa wAit tibyo sawro ro anu ninaut to sau aran ye. Feto to, nhau nhaf sau su to.
EPH 4:5 Tuhan ranu sait aran ye. Bosmot ranu sau aran ye. Tna anu baptis raa re betoo bo sau aran ye. Feto to, nhau nhaf sau su to ye.
EPH 4:6 Allah ranu tait, anu beta Bja ranu tait, sait aran ye. Ait yesait ybo anu beta. Ait yesait yoo anu beta re ybo anu yno bo wAit. Tna Ait yesait yjin mam kʼanu bhaf beta ye.
EPH 4:7 Tna Kristus yoo yatak rAit baro saim kʼanu sait-sait. Bouum (anugerah) weto to, Kristus ynit kaket.
EPH 4:8 Tiwya Allah ykyas bouum weto mam Bokom rAit yawe, “Ait yfot raa byoh msis-sas yakah yamo. Ati ro Ait yaut yamoʼt abyõ to, Ait yakah ana weto yamo ye. Tna Ait saim bouum kʼraa.”
EPH 4:9 Bokom reto, mabuf rau mawe, “Ait yaut yamoʼt abyõ.” Maja rau mawe, Yesus yroh yamoʼt tabam refo mato ti no ye.
EPH 4:10 Ait ro yroh yesait oh mi Ait ro yaut yamoʼt abyõ yiwer bo beta. Tibyo Ait hre abyõ ybo bombra beta ye.
EPH 4:11 Ait ro ja saim bouum kʼraa tait oh mi yoo raa weto baro ysan mamo raabis ro Allah (rasul), taro mamo nabi ro ja Allah ybis mamo mkyas bo wAit, taro ja masen mamo mkyas Ait yasom rAit kʼraa ro wase Ait fares, taro mhau kmot jemaat mkyas watum ro Allah kʼana bo.
EPH 4:12 Ait ybis ana mama mkyas Watum rAit kʼanu raa wAit makin afo re anu siwyan bban anya bisoh anya bo. Ait ksoh anu tomer bban anya re kbe anu bfen anu su matak bmo yetsu ro Kristus rAit su.
EPH 4:13 Ana watum kʼanu bo feto, mno yum mamo snok mam tis rau. Tis rau oh mi kbe anu beta brok bhaf sau su, bbo bosmot ranu sau aran sai to. Tna kbe anu bhar ku ro Allah yare kaket su to. Au oh mi anu beta bmo Ait yetsu tna Ait yetsu mo mamo raa meto. Anu mkbair rAit kbe mo maut renti snok mase rau, mnan fi Ait yase rAit.
EPH 4:14 Anu bmo yetsu rAit feto oh mi anu bfi kukek kinyah aro u fee. Wore wo raa mama mawe besruf anu to, kbe anu bbo watum ro Allah matak. Bri ana fee saut! Raa taro to, kbe mkyas watum rana ro sre to, saim miwro anu, sioh anu bo feto. He mfe, kbe anu bros btak su. Wore wo figyõm weto mai kʼanu msya foos mfi mai kʼanu to, kbe anu bnaut bo weto mamo-me fee ye. Kbe bros btak bhar Yesus kaket su yum.
EPH 4:15 Tna anu bsait to, besruf anya to ma. Menohe anu bwe bhaf moof kʼanya to, bkyas bokyas ro ati kʼanya. Bkyas bokyas ro ati kʼanya feto oh mi kbe anu bmo Kristus yetsu rAit ro mo maut kaket moof to. Tna bo ro anu bno beta to, kbe anu bwe bno mnan fi Ait ksoh rAit. Nnaut nwe anu raa wAit bnan yetsu rAit to. Tna Ait tait yamo yetsu rAit mana to.
EPH 4:16 Ja Ait yoo anu raa wAit sait-sait yfen yetsu rAit kaket. Ait yse anu kaket, yake anu su kaket ye. Yake anu su feto afo re kbe anu bhaf moof kʼanya, tibyo bisoh yetsu rAit kaket ye. Anu bisoh anya to, anu bno mkah tak ro Ait yoo saim kʼanu sait-sait oh. Tibyo kbe yetsu rAit moo kaket moof to.
EPH 4:17 Feto to, jõ takah tak ro Tuhan sobu anu tawe, anu nkro iso ro ja ana ro wase Allah nkro to aro u ma. Ana mamo to, srau wana ja mnaut-nat bo ro mafer marak sai.
EPH 4:18 Mhaf srau wana weto to, mhau mam wore wo mamur sai. Ana wase bo tna mana matak mari bo fee, tibyo mhau fari mne. Allah yoo yamos rAit yee kʼana fee.
EPH 4:19 Bo ro mti hrenaut to, ana mberoh mno sai. Ana srau oot-oot bo, mhai bo moo bo to, tibyo mno bo ro mkair-kar makin.
EPH 4:20 Menohe anu ro nkro Kristus to, ja nkro iso rAit ro hayah. Iso ro tiwya raa merif kʼanu reto to, ja anu nkro nno bo mkair-kar weto u fee.
EPH 4:21 Bo maja wAit to, bo ro ati beta. Tna anu nri bo maja wAit weto oh. Anu nmo raa wAit tna bo maja weto to, raa mbetoo kʼanu oh.
EPH 4:22 Ana merif kʼanu mawe, iso ro mnis, iso ro tiwya anu nkro to, ntomer re nkro iso reto u ma. Raa ja mrus ratan ro mnis tna beak makus to. Tawe sikba iso reto makus feto ye. Nkro iso ro wia reto u ma. Iso ro tiwya anu nkro reto to, ja anu srau oot-oot bo, tna srau wanu sioh anu re srau nhaf mrok mnis riryõn.
EPH 4:23 Menohe anu nsrau msya nhaf to, nhau re kbe Allah yisoh yisoh moof tna to.
EPH 4:24 Tna Allah ysair iso ro tna sau. Iso ro tna reto to: Yawe anu nno bo moof kʼanya mkah sioh aro fee. Tna ja anu nhau nno bo wAit sai mkah sioh aro fee ye. Anu nkro iso ro tna refo, tibyo anu nsrau nsya nhaf haberek moof mamyot srau yhaf rAit. Reto mfi anu noo ratan ro moof to, nyum. Nmat iso ro tna refo tna nkro ye.
EPH 4:25 Anu nkro iso ro tna reto to, anu nhau mam Kristus yetsu rAit sau aran. Feto to, sioh anya u ma. Nkyas bo kʼanya to, nkyas bo ro mabo sai.
EPH 4:26 Ati ro anu nrok kmo to, kmo anya kait ma be kbe nno iro. Nkmo anya to, nkmo maban rabu snok mti to ma. Nisoh niranya ranu fooh sai.
EPH 4:27 Nno feto be kbe kabes yabi (Iblis) yno anu.
EPH 4:28 Anu aro ro tiwya nsyõf bo to, nsyõf bo aro u ma. Menohe ro moof to, nsen nmo nkah bo hrowyõ mkah ntem wanu. Tibyo mafer to, kbe nse mnan mkah noo baro saim kʼraa ro yu marak ye.
EPH 4:29 Tna anu nkyas bo kʼraa awya sai to, mai ro mafer marak to, nkyas ma! Menohe nmat ana ro kbe mari bo ro anu nkyas wia to, nkyas bo ro kbe mafer moof kʼana sai.
EPH 4:30 Nkaket nasoh feto be kbe Har ro Allah mrok sraujin! Ait yoo Har rAit yse kʼanu re kbe anu nesait nhar nwe anu nmo raa wAit mamo snok mam makyon tis rau. Tna mam makyon tis rau reto to, kbe Ait yfes anu to.
EPH 4:31 Nhaf kek kʼraa to ma! Nhaf safo kʼraa to ma! Nkmo raa to ma! Nmai nsya raa to ma! Nmus raa to ma! Bo ro mkair-kar mfi feto to, noo nbeak makus beta.
EPH 4:32 Menohe nhau nhaf moof kʼanya sai. Tna nhau nhaf ase kʼanya ye. Tiwya Allah ymat anu yawe anu nsya Kristus su, tibyo yyon iro wanu. Allah yatmof anu feto to, ati ro raa mno bo mai kʼanu to, natmof ana mfi feto ye.
EPH 5:1 Mfi bo ku yaku sait ro yaja hasu tait, ja kbe ku retait ymat sas bo ro yaja yno tibyo yawe kro yno ye. Anu to, kukek ro Allah wAit to, feto to, bo bawya ro Allah ja yno to, tomer nkro nno ye.
EPH 5:2 Nhau to, natmof raa anya. Nno mnan fi Kristus tiwya yatmof anu to. Ait ymat anu tibyo yoo yetsu rAit ysan kʼAllah. Tna Allah ksoh bo ro Kristus yno reto. Tiwya raa makah kak bo to, mamo ktan tna mko msan kʼAllah mam wohat (mezbah) sau. Mko kak tna Allah yari sawer rau yawe yhaf mnan to. Kristus ysan Ait yetsu kʼAllah feto ye. Tibyo Allah yhaf mnan bosan ro Yesus ysan reto ye.
EPH 5:3 Tna anu raa ro Allah wAit to, anu nhau nno bo ro mkair-kar u to ma. Nus-as bo to ma. Nhau nhaf mato mboh sai. Tna nhai bo raa noo to ma. Ro moof mam mkbair ranu to, kbe anu nkyas safo weto u fee. Safo weto mhau marak beta!
EPH 5:4 Tna nkyas bo kʼanya to, nkyas bo ro nasoh mkair-kar to ma, sioh-sah sai to ma, nkyas bosret ma. Bo weto to, mamo mamyot bo mafa ramu fee. Ro moof to, nwe asik mawat kʼAllah.
EPH 5:5 Bo sau ro anu nhar oh to: Ana ro maus-as bo, ana ro mato mboh fee, msya ana ro mhai bo raa moo to, ana weto sor to, mhaf saso bo ro tabam sai meto. Ana to, mfi raa ro ja smot fraa sai meto. Kbe ana beta mkai sawro ro Allah fee. Ati ro Kristus ysya Allah mbewok mamo Raja mbo raa wana to, kbe ana mbewok muumto bo kʼana ro ja mno bo mkair-kar weto to aro fee.
EPH 5:6 Raa mkbair ro hawe mari bo ro Allah yawe, tibyo mno bo mkair-kar weto to, Allah kmo ana. Tna Allah kbe yoo safo mana ymit kʼana weto. Feto to, ati ro raa mama besruf anu mawe bo ro mkair weto bo moof to, nri ana to ma! Sioh sai meto!
EPH 5:7 Berur su nsya ana weto to ma!
EPH 5:8 Tiwya anu nhau mam wore wo mamur. Menohe mfo refo anu nberur su nsya Kristus tibyo nhau mam wore wo maah. Raa mkbair ro mhau mam wore wo maah to, ja mno bo ro moof. Feto to, ntomer re nkro iso ro moof reto ye.
EPH 5:9 (Nhau mam wore wo maah to, tis rau to, kbe anu nno bo ro moof, kbe anu ja nno bo ro Allah ksoh, tna kbe anu nhau nhaf ntrot ye.)
EPH 5:10 Tna ntomer saso bo ro mno Tuhan yhaf mnan to.
EPH 5:11 Tna ana ro mhau mam wore wo mamur fares to, ja mno bo ro mafer marak. Nsya ana nno bo mkair weto u ma! Menohe nros hayah tna nitras bo ro ana mno weto.
EPH 5:12 Bo mkair ro ja ana mno wai weto to, soh anu nkyas bo mfi weto sai to, kbe mti hrenaut kʼanu.
EPH 5:13 Menohe bo beta ro kek mama mram nkri-kri to, kbe raa mmat kaket.
EPH 5:14 Reto oh mi raa mkyas mawe, “Anu ro njin to, nrok nsen! Anu ro naam fefares to, nsen tibyo kbe Kristus yram anu!”
EPH 5:15 Feto to, iso ro anu nkro to, nmat sas wia kaket. Nhau nsrau miyõ. Nsrau mabuf to ma!
EPH 5:16 Wore wefo fo wore wo kair mawat. Feto to, ayõ ro nhau fares fo, nbo somya kaket re mafer moof toni.
EPH 5:17 Anu nbo anu nmo kaket feto to, namboi ma! Menohe iso ro Tuhan yhaf ksoh anu nkro to, ntomer re nhar kaket!
EPH 5:18 Nta jyõ anggur bisir to ma! Raa ro bisir to, ja mno bo kbik-kbak sai. Menohe ro moof to, Har ro Tuhan mbo anu nsrau nhaf beta matak.
EPH 5:19 Har ro Tuhan mbo anu feto to, anu nhre su nkyas bo kʼanya to, kbe anu bibi Tuhan mkah Mazmur, mkah howes ro mbibi Ait, mkah bobaut bo to. Tna mam kʼanu nhaf mato to, nji howes kʼAit yari tna bibi Ait ye.
EPH 5:20 Yesus Kristus yamo Tuhan ybo anu. Tibyo bo bawya ro anu nkai to, nwe asik mase kʼanu Nja Allah yoyo sai.
EPH 5:21 Tna Har ro Tuhan mbo anu feto to, kbe anu waa Kristus tibyo nhaf sneh hre mte nri bo raa anya mawe ye.
EPH 5:22 Anu fnya ro nsya raa oh to, nri bo ro anu naa mawe. Nri nbo nno mfi bo ja raa mari bo ro Tuhan yawe mbo mno ye.
EPH 5:23 Raa sme mamo aban mana mbo ana mfain wana. Mfi bo Kristus yamo aban mana ybo raa mkbair ro kro Ait. Tna Ait sotak iro wanu ro bhau mam Ait yetsu ye.
EPH 5:24 Tna mfi bo raa mkbair ro nkro Kristus ja mari bo ro Ait yawe to, feto ye, kbe fnya mari bo beta ro ana maa mawe kʼana mbo mno feto ye.
EPH 5:25 Tna anu raa sme ro noo fnya oh to, natmof anu nfain wanu. Natmof ana mnan si tiwya Kristus yatmof anu raa mkbair ro nkro Ait. Ait yoo Ait ysan mkah anu.
EPH 5:26 Ait ysan Ait feto re kbe yoo raa mkbair rAit ysan kʼAllah ybo. Ait yyon anu wia, raa baptis anu tna watum ro Tuhan misoh anu ye. Au oh mi Ait yoo anu bmo raa ro Allah wAit feto.
EPH 5:27 Ait yisoh anu feto afo re meen ati ro Ait yroh yama u to, kbe raa mkbair rAit siwyan mkah Ait yoo kʼAit. Mfi bo fnya ro ait sait siwyan yoo kbe mfayir au moof syok mfi bo fnya-fain fares tna metsu rau to bo ro mkair aro mhau fee ye. Mfi feto kbe Kristus fayir anu ye. Kbe Ait yno anu bhau bno bo ro Allah wAit sai. Tna kbe anu bmo raa ro ja wase bber safo fee ye.
EPH 5:28 Anu raa sme nno mfi feto ye. Tawe kʼanu tawe, anu sait-sait tomer natmof anu nfain ranu mnan si ja anu natmof anu netsu ye. Ait ro yatmof yfain to, yatmof ait yesait oh meto.
EPH 5:29 Raa sait bo ja knait ait yetsu rait ai fee saut. Raa to, ja kaket metsu rana, saso boit kaket, moo ratan ro moof miyum bo to. Raa ja kaket metsu rana mfi bo Kristus ja kaket raa mkbair rAit.
EPH 5:30 Anu to, Ait yetsu haber na. Tibyo Ait ja kaket anu.
EPH 5:31 Watum ro Allah mawe, “Feto to, kbe ku ro sme sikba yaja ysya yme na tna yamo ysya yfain rait mhau su. Tibyo ana mbewok to makit sau su, srau sau su tna bonaut wana mbewok to mnan anya ye.”
EPH 5:32 Watum reto to, maja rau ro ati sau to, tiwya raa wase. Jõ tkyas Kristus ysya raa mkbair rAit oh meto.
EPH 5:33 Menohe anu raa sme sait-sait to, ntomer re natmof nfain ranu mnan si anu ja natmof anu netsu ai. Tna anu fnya sau-sau to, ntomer re waa naa to ye.
EPH 6:1 Tna anu ro nkek fares to, ro Tuhan ybo to; nri bo ro nja nme na mawe tna nbo nno. Nno feto to, nno bo ro moof mnan si meto.
EPH 6:2 Watum tinyi ro Allah ysi yawe kbe mafer moof to, yawe feto ye yawe, “Nmat nja msya nme na to kaket!
EPH 6:3 Nmat ana feto re kbe anu nhau noof tna nmos miyõ mam tabam refo ye.”
EPH 6:4 Tna kukek maja to; nno re kukek wanu mrok kmo to ma be kbe tis rau to ana hawe mari anu u. Menohe ntos ana kaket! Nisoh ana tna watum ana mamyot iso ro Tuhan ksoh to.
EPH 6:5 Tna anu ro sryan boh to; ana ro mbis anu mam tabam refo to, nri bo ro ana mawe to, nbo nno beta. Nhau nhaf ntrot waa tna ntetet ana ro mbis anu. Nri ana mfi Kristus yesait oh mi ybis anu to.
EPH 6:6 Nri ana to, nno re kbe ana mbibi anu sai to ma! Nno bo nhaf ewok feto to ma. Nnaut nwe anu nmo sryan boh ro Kristus wAit ye. Nri bo ro bobot wanu mawe to, nbo nno mkah nhaf sau. Feto oh mi anu mur-mur nno bo ro Allah ksoh to.
EPH 6:7 Nri bobot wanu kaket to, nno mfi anu nri raa sai to fee. Nhaf reo nri ana to, mfi bo anu nri bo ro Tuhan yawe nbo nno to.
EPH 6:8 Anu ro sryan ye nsya anu ro sryan fee ye to; anu nhar oh nwe bo moof bawya sai ro anu nno to, meen kbe Tuhan yisroh kʼanu.
EPH 6:9 Tna anu bobot ro nbo sryan boh to; nno bo ro moof kʼsryan boh wanu mfi feto ye. Tna nmus sryan wanu to ma. Anu nhar oh nwe bi ro uu yase ybo ana weto ye, tna ybo anu ye. Tna ja Ait ysok raa sait yawe yase tna sait yawe yaku to fee. Ymat anu beta yawe nnan anya beta.
EPH 6:10 Tna bo ro jõ tkyas tis oh mefo, Tuhan yatak rAit to matak toni. Anu nhau su nsya Ait oh. Feto to, noo yatak rAit nbo re kbe anu nros ntak smot Ait ye.
EPH 6:11 Kabes yabi (Iblis) ja yama yawe besruf anu. Feto to, noo bombra ro Allah siwyan kʼanu to, nbo re ntai nros ntak nno wa kabes retait.
EPH 6:12 Byoh ro mhoh mama mafa msya anu to, raa sei fee. Byoh wanu to, kabes makin sor. Ana to, kabes mase ye, aban mana wana ye, kabes ro matak mbo tabam refo tna misti wore wo mamur refo ye, tna msya kabes ro mhoh mam ayoh mno bo ro mkair-kar ye.
EPH 6:13 Feto to, noo sbe, karef bo bombra ro Allah siwyan kʼanu to, re ntak nfa nsya kabes to. Noo beta siwyan nbo wia. Feto oh mi anu ntai nno wa kabes tna nros matak mam ati ro kair mama mai kʼanu to.
EPH 6:14 Feto to, nros matak: Siwyan anu wia mfi bo raa sbe ro mamo mafa anya to, ja siwyan ana wia ye. Raa sbe ja mkyar hotom re siwyan mafa to. Siwyan anu feto ye: Nhau nkyas bo ro ati sai tna sioh-sah raa anya to ma! Tna mfi bo ana ro sbe ja moo bo mse kmot matmato to, nhau nno bo ro Allah ksoh sai.
EPH 6:15 Tna ja ana moo sepatu ro matak mse mam maa wana. Mfi feto, Bokyas Moof ro mno anu nrok niranya nsya Allah to, noo nbo matak re siwyan anu kaket ye.
EPH 6:16 Tna msya bo ro riwai weto, raa sbe ja moo perisai mbo mban ana. Mfi feto, nbo bosmot wanu kaket re nban anu nno wa karef ro kabes yabi (Iblis). Karef weto to, mfi bo yse tafoh ro mait mam karef maan tna ynak anu to. Kabes yabi tait ja yetsu mnis safo.
EPH 6:17 Tna raa sbe ja moo helem sbyo mana wa to. Mfi feto, noo riof mase ro Tuhan yoo yee kʼanu nbo ye. Tna Har ro Tuhan siwyan pedang kʼanu to ye. Watum ro Allah oh meto.
EPH 6:18 Tna Har ro Tuhan kbe matam anu re anu skabuk nkyas bo kʼAllah kaket yoyo. Skabuk to, skabuk bo aro rau-rau tna nyoh re Ait yban anu mam bo ro anu nno beta to ye. Skabuk to, hre byõ abyõ re bito skabuk raa ro Allah wAit beta ye.
EPH 6:19 Tna skabuk jõ ye re kbe ati ro jõ tkyas bo kʼraa to, kbe Allah yoo bo ro tkyas yerif kʼjõ wia. Tna re kbe jõ tros tkyas Bokyas ro Moof reto to, jõ waa fee. Bokyas reto tiwya raa wase, tna tros betoo kʼraa to.
EPH 6:20 Tiwya Allah ysok jõ ybis yawe tamo tkyas Bokyas Moof reto. Au oh mi raa mfot jõ moo rantai make tna mse mam bui fo. Feto to, skabuk jõ re kbe jõ tros tatak tkyas Bokyas reto fares tna waa fee. Re kbe tno bo ro tiwya Allah ybis jõ tno meto.
EPH 6:21 Bi Tikhikus tait, raa ranu sait ro amu nhafri tait, ait yamo sryan Tuhan ro mur-mur yno bo ro Tuhan ye. Ati ro ait yamo yo kʼanu to, kbe ait ykyas bo ro jõ tkai mam wefo msya wore wo jõ thau fo kʼanu. Kbe ykyas bo weto beta kʼanu.
EPH 6:22 Au oh mi jõ tbis ait yamo yo kʼanu. Yamo re kbe anu nhar bo wamu. Tna kbe ait ykyas bo moof kʼanu afo re anu sorni bo mkair ro mai kʼanu ye.
EPH 6:23 Anu ro ja kro Kristus to, Jõ skabuk Bja Allah, re Ait ysya Tuhan Yesus Kristus kbe mno re anu nhau nhaf tnok sai. Tna jõ tayoh kʼAllah re kbe anu natmof anya kaket tna kbe anu nhau smot Ait kaket ye.
EPH 6:24 Tna anu ro nhafri Tuhan ranu Yesus Kristus yum to, jõ tayoh re Allah yatmof anu beta ye.
PHI 1:1 Aam refo mbam kʼjõ Paulus tsya Timotius. Amu mbewok nmo sryan ro Kristus Yesus wAit. Tna amu mbewok nkom aam refo tiim kʼanu, raa ro Allah wAit mam kota ro Filipi. Anu to, smot Kristus Yesus tibyo Allah yoo anu nmo raa wAit. Tna amu nkom aam refo, kʼraa majelis wanu, msya diaken wanu ye.
PHI 1:2 Amu skabuk Bja Allah, re Ait ysya Tuhan Yesus Kristus matmof anu tna mno re anu nhau nhaf tnok ye.
PHI 1:3 Ati ro jõ tnaut anu to, jõ tayoh asik mase kʼAllah.
PHI 1:4 Tna ati ro jõ tamo tkyas Bokyas Moof ro Yesus (Injil) to, anu ja nros tis Jõ. Mbam tiwya tinyi anu smot Bokyas ro Moof reto mamo snok mam mfo refo to, anu nros tis jõ feto. Tibyo jõ skabuk anu to, jõ simaut mase yoyo ye.
PHI 1:6 Tii anu smot Yesus to, Allah yisoh anu nhaf mato wanu. Tna jõ thar tawe Ait kbe yisoh anu; yisoh, yisoh renti mamo snok mam muktis rau: Meen mam ati ro Kristus Yesus hah ye yama u to, kbe yisoh mkak.
PHI 1:7 Jõ thafri anu beta. Au oh mi jõ tnaut anu feto. Mfo refo thau mam bui. Tna Allah yno re anu beta natmof jõ ati ro jõ thau mam befo. Nno feto to, anu nerif boatmof rAit. Tna ti aro-aro jõ tkyas Bokyas Moof ro Yesus (Injil) tna betoo kʼraa. Mam woyõ-woya sai. Allah ysan boatmof rAit kʼanu beta. Yno re anu beta bhar boatmof rAit.
PHI 1:8 Allah yhar yawe jõ tawyan marak anu beta mfi Kristus Yesus yawyan marak anu ye to.
PHI 1:9 Jõ skabuk anu kʼAllah to, jõ tayoh re kbe Ait yno anu nsrau bo rAit ro ati to kaket renti. Tna jõ tayoh re kbe Ait yno anu ntai nhar bo ro moof to, nbo, tna bo ro mkair to, beak makus. Allah yisoh anu kaket renti feto to, kbe anu nhar natmof anya kaket renti ye.
PHI 1:10 Tibyo anu nhar bo bawya ro moof. Tna anu nsok bo weto to. Anu nwe nno bo weto. Tna bo ro mkair to, anu beak makus. Au oh mi kbe anu nhau nto wanu mboh, nno bo mkair fee mamo snok ati ro Kristus hah ye yama u.
PHI 1:11 Tibyo Yesus Kristus yno anu nhaf moof ati. Tna anu fri mafer rau. Kbe raa mmat mafer ro anu fri weto tibyo bibi Allah tna mbaut Ait ye.
PHI 1:12 Taja, tme, tao, tano na; bo ro mbtek mai kʼjõ fo mno tibyo raa mawat mari Bokyas Moof ro Yesus (Injil) to.
PHI 1:13 Mfo refo raa sbe ro kmot istana reto, msya raa ro mhau mam kota refo beta mhar mawe jõ tkyas Kristus yasom. Mhar mawe reto oh mi raa mfot jõ tna mbu mam bui.
PHI 1:14 Raa makin ro Kristen mhar mawe jõ ntwok mam bui. Tna mmat he Allah yban jõ fares. Mmat feto tna bosmot rana mrok matak. Tibyo ana masen mkyas bokyas ro Allah ye. Ana waa fee.
PHI 1:15 Jõ thar tawe raa taro mkyas Kristus yasom mkah mhaf rana ro moof. Ana weto mhar mawe jõ fi raabis (rasul) ro Allah. Tna ana mhar mawe Tuhan bitsre jõ ntwok mam bui. Allah yno afo re jõ tkyas Bokyas Moof ro Yesus (Injil). Yawe jõ tros tban Bokyas Moof reto. Jõ thau mam bui fo, tna jõ tari he raa taro mhaf kair. Ana hawe jõ. Ana mkyas Kristus yasom to, ksoh mawe kbe bo ro mkair mbtek mai kʼjõ. (Ana ksoh jõ tari feto tibyo trok sraujin mam bui refo.) Ana mkyas Kristus yasom to, mawe raa mmat ana. Ana hawe jõ tamo raa manes mam jemaat, miwer ana. Ana saso bo mkah masom wana sai.
PHI 1:18 Ana mno feto rof, mbau a. Fyi-fya sai raa mkyas Kristus yasom to, jõ simaut mase sai.
PHI 1:19 Jõ thau mam bui fo, menohe thar tawe bo bawya ro mai kʼjõ to, kbe tkai riof. Thar tawe anu beta skabuk jõ. Tna thar Har ro Yesus Kristus matak rAu ye. Feto kbe tis rau to, mno tibyo riof kʼjõ.
PHI 1:20 Jõ tinaut tawe kbe raa mmat Kristus yase rAit. Jõ skabuk Tuhan afo re kbe jõ waa ma. Fyi-fya sai bo mkair mama mai to, jõ skabuk afo re kbe jõ tno bo ro moof sai. Re kbe tanwaruk fee. Tna soh raa mmat jõ to, kbe ana bibi Kristus yase rAit. Mfi bo jõ thau fares ye tna mfi bo jõ raa mame tajat ye; bo bawya ofo sai, jõ tawe beroh hartu Kristus.
PHI 1:21 Ja jõ thau mam tabam refo to, thau tnaut Kristus yoyo. Tna mfi bo jõ thai, tamo to kʼbi Ait to, moof toni ye.
PHI 1:22 Mfi bo jõ thau tno bo ro Kristus ybis mam tabam refo renti to, mafer rau to moof ye. Jõ twase tamo iso ryo!
PHI 1:23 Ewok ye moof: Jõ ksoh toni tamo thau su tsya Kristus. Iso reto to moof toni kʼjõ.
PHI 1:24 Menohe thau tabam refo tsya anu to, tmat anu to, iso ro moof ati mkah kʼanu beta.
PHI 1:25 Feto to, jõ thar tawe kbe jõ thau tu oh. Thau tsya anu beta fares teta bosmot ranu. Re kbe anu smot Kristus matak. Tna kbe bosmot ranu reto mno anu simaut mase ye.
PHI 1:26 Kristus Yesus kbe yno re Jõ thah te tama to kʼanu. Tibyo kbe simaut ranu mase renti to.
PHI 1:27 Ro ati oh mi anu kro Bokyas Moof ro Kristus(Injil) to, kaket moof. Mfi bo jõ tama to kʼanu to, kbe jõ tesait tmat anu. Tna mfi bo jõ tama fee, kbe raa mkyas anu. Feto tna kbe jõ tari soh anu smot Kristus matak fares fe mfe a. Nhau nno bo ro Kristus ybis. Nhau nno bo mamyot Bokyas rAit. Nros ntak smot ait. Beroh nhau nhaf wanu sau su.
PHI 1:28 Raa taro hawe bosmot ranu ro Kristen. Tna ana mama mawe mno anu. Menohe waa ma. Soh anu nros ntak sai tna waa fee, kbe raa weto mmat. Kbe ana mmat tna mhar mawe Allah yesait oh mi yban anu. Kbe ana mhar mawe Allah yno riof kʼanu feto oh mi ja anu waa fee. Tna ana mhar mawe meen bi Ait yno kair mama mai kʼana.
PHI 1:29 Anu smot Kristus oh mi raa mno bo mkair mai kʼanu. Allah yno bo ro moof aro kʼanu. Ro sau to, Ait yno re anu smot Yesus Kristus. Ro ewok to, Ait yitsre bo ro samyoh mbtek mai kʼanu ye.
PHI 1:30 Tii thau tsya anu mam kota ro Filipi. Tna anu nesait nmat bo mkair ro mai kʼjõ. Mfo refo anu fri bo ye mnan anya mfi jõ ye.
PHI 2:1 Anu bhau bhaf sau su bsya Kristus feto tibyo Ait ykyas watum rAit kʼanu. Ait yatmof anu tibyo anu sraujin u fee. Har ro Tuhan ja matam anu ye. Tna Kristus yhaf sneh kʼanu tna yhaf ase kʼanu beta ye.
PHI 2:2 Feto kbe jõ tawe, “Nhau nnan anya nfi Ait: Natmof anya. Nhau nhaf sau, tna bonaut sau su. Kro iso sau su ye.” Nno feto tna kbe jõ simaut mase.
PHI 2:3 Nmat raa anya kaket. Nno bo moof kʼanya nwe ana raa ro ati tna anu nesait raa ro ati fee. Nhau nhaf sneh sai. Saso nsom kʼanu fee ye.
PHI 2:4 Nsaso bo ro anu nesait nnaut kar to ma, tomer nbet raa roto mkai bo ro ana mnaut to ye.
PHI 2:5 Nhau nhaf, srau wanu mnan anya msya Kristus Yesus yhaf, srau rAit.
PHI 2:6 Kristus Yesus ynan anya ysya Allah menohe Ait srak yuk rAit ro mase reto fee.
PHI 2:7 Ait yitsre yuk reto tna haberek yamo sryan. Yamo raa ro yhau mam tabam refo sai.
PHI 2:8 Yhau ynan raa. Ynan raa ro mase fee. Tna yhau yno bo ro Allah ybis kʼAit to, mamo snok ati ro ait yhai. Ait yajat to, raa mame mam ara warok yfi raa ro mber safo.
PHI 2:9 Reto oh mi Allah tubat Ait yse mam yuk ro mase miwer bo knik-knak wofo beta. Tna yawe Ait yasom rAit to mase miwrek som raa ro tabam refo beta.
PHI 2:10 Afo re meen beta mjit mimna tna mbaut Yesus; raa ye, malaikat ye msya kabes bo beta ye.
PHI 2:11 Tna mawe kʼYesus Kristus mawe, “Nyõ fi Tuhan ramu.” Mkyas feto to, ana mbaut Allah, Yaja rAit ye oh meto.
PHI 2:12 Taja, tme, tao, tano na ro jõ ksoh; tiwya jõ thau tsya anu su to, anu ja nri bo ro Allah yawe kʼanu tna nbo nno. Mfo refo jõ tarak tna jõ sobu anu tawe, “Tomer nri bo ro bi Ait yawe yoyo. Nhau to, waa bi Ait. Tna bito saso riof mase ro bi Ait ysan kʼanu ye.”
PHI 2:13 Allah yesait ybo anu nhaf wanu. Bi Ait oh mi yno re anu ksoh nno bo ro Ait yawe. Ait oh mi yno anu ntak nno bo ro Ait ksoh.
PHI 2:14 Bombra bawya ro anu nno to, nmai kinya ma. Tna nmak ma.
PHI 2:15 Afo re anu nmo raa ro wase mber safo sai. Tna kbe nhau nno bo ro moof sai. Raa taro ja mhaf wana mkair tna ana mno bo ro mkair. Menohe anu fo raa mana ro Allah wAit. Anu nhau mam tabam refo su nsya ana weto. Menohe anu fo nfi kek ro nram iso ro moof. Anu nfi sken ro mait mam wore wo mamur.
PHI 2:16 Anu ja nbo watum ro Allah nkyas kʼraa afo re ana mmat kek reto. Afo re meen ana mhau hame. Soh anu nri tna nno bo ro jõ tawe reto to, kbe jõ safuk. Meen ati ro Kristus hah ye yama u to, jõ simaut mase. Kbe jõ thar tawe bo ro jõ hamer tno to mafer moof.
PHI 2:17 Tiwya anu nri bo ro jõ tkyas kʼanu tna nsen smot Tuhan Yesus. Feto oh mi jõ simaut mase. Tna mfi bo raa mame jõ tajat to, kbe jõ tsan tabo msya mees ajõ kʼAllah. Thar tawe anu nsan nhaf, srau wanu kʼbi Ait oh mfi jõ ye. Tibyo jõ simaut mase tsya anu beta.
PHI 2:18 Tna kbe anu simaut su nsya jõ ye.
PHI 2:19 Jõ ksoh re Tuhan Yesus yno re Timotius yama fooh yo kʼanu. Jõ tawe kbe tbis ait yama tna hah ye yamo fooh kʼjõ. Tna re jõ tari bokyas ro mbam kʼanu. Soh Timotius ykyas yawe anu nhau noof to, kbe jõ simaut mase.
PHI 2:20 Ait yesait aran yhaf sau, bonaut sau su ysya jõ. Amu mbewok nnaut anu yoyo. Tna amu nmat bonaut wanu. Raa wojõ roto ja mnaut anu kaket fee.
PHI 2:21 Ana to, ja msui mkah bonaut wana sai kar. Tibyo ana mnaut bo ro Kristus Yesus fee. Ana mnaut tna mawe mno bo rAit to fee.
PHI 2:22 Menohe Timotius ja ybet jõ nkyas Bokyas Moof ro Yesus (Injil). Anu nhar nwe ait ybet jõ ynan ku sait ja ybet yaja rait ykah bo. Ait yno feto tibyo thar tawe ait yhaf rait moof.
PHI 2:23 Reto oh mi jõ tsok ait tna tawe kbe tbis ait yama yo kʼanu. Jõ tabe ait yhau wea ysya jõ fo. Raa beah srah ajõ fefares. Jõ ste tari bokyas mbam raa ro maun jõ tna mbu jõ mam bui refo fares. Tna fo jõ tbis Timotius yama fooh yo kʼanu.
PHI 2:24 Jõ tinaut tawe kbe Tuhan yno riof kʼjõ. Tna kbe jõ tkah tabo ajõ tesait hah te tama to kʼanu fooh.
PHI 2:25 Mfo refo tnaut tawe tbis Epafroditus yhah yama yo kʼanu. Ait yfi jõ tao ajõ. Ait ja ykah bo su ysya jõ. Tna ait beroh yhau ysya jõ tna yasom bo ro fanes ysya jõ ye. Tii anu nbis ait yamoʼt Filipi tna yno bo wojõ.
PHI 2:26 Ait yama tna kiyam. Ait kiyam msai tibyo maami kerit yhai. Menohe Allah yatmof ait tna kiyam rait marak. (Allah yno kiyam rait marak to, yatmof jõ ye oh meto. Mfi bo ait yhai to, maami jõ sraujin ait toni.) Ait yhafri anu beta. Ynaut yawe, “Nno be raa ro Filipi mnaut yyi mawe jõ kiyam fares. Kbe ana mari sraujin.” Tna ait yawe yama ymat anu afo re anu nnaut yyi ait fee.
PHI 2:28 Reto oh mi jõ tbis ait hah ye yama fooh yo kʼanu. Afo re kbe anu nmat ait tna anu nwyan mama. Kbe anu simaut mase tna jõ thaf ajõ tnok ye.
PHI 2:29 Kbe Epafroditus yama to, nitrah nhaf wanu kʼait. Ait raa ro yawe yno bo ro Kristus ksoh yoyo. Tna hartu raa beta ro mno bo moof mfi ait feto ye.
PHI 2:30 Tiwya ait yno bo ro Kristus yawe. Reto oh mi ait kiyam tna kerit yhai. Ait ybyat yetsu rait tna yama yatmof jõ. ⌞Anu jemaat ro Filipi nhau fari.⌟ Tibyo anu nma nbet jõ fee. Menohe ait yama yatmof jõ to, shauk anu.
PHI 3:1 Taja, tme, tao, tano na; anu nhau nrat nsya Tuhan. Feto to simaut mase! Bokom ro mrof refo fo, tiwya jõ tkyas kʼanu beta oh. Tna te tkyas u re kbe anu nnaut bo wefo kaket tna sorni fee:
PHI 3:2 Raa Yahudi baro mama mkyas bokyas ro mkair: Ana mbis raa sme beta mawe, “Nko hawe sai, nkom tohmi (sunat).” Kaket anu, nri ana ma: Watum rana to, safo wer, mfi mtah ro ja safo mafit raa.
PHI 3:3 Anu fo, raa ro Allah sunat to. Anu oh mi Har ro Tuhan mbo re bbaut Tuhan kaket. Ana reto fee. Anu fo bibi Kristus Yesus bwe Ait tait yase toni. Anu safuk bo ro tabam refo fee.
PHI 3:4 Jõ tesait safuk bo ro tabam refo saah. ⌞Menohe jõ hawe; thar tawe bo weto to mafer marak.⌟ Tiwya jõ kro bo mafa ro Yahudi kaket. Jõ kro bo weto kaket miwer ana beta!
PHI 3:5 Tiwya tme mabe jõ tna masno krentuuf to, raa sunat jõ. Jõ fi tbam raa mana ro Israel, tna biin ro Benyamin ye. Au oh meto jõ fi raa Ibrani ro mase. Tna tamo raa ro Farisi. Tii weto to, jõ kro Watum ro Musa kaket. Tna ja tno bo mafa ro agama Yahudi to, kaket ye.
PHI 3:6 Tna jõ safo toni sikowah raa ro Kristen. Tna tiwana Watum ro Musa aro fee ye.
PHI 3:7 Tiwya tnaut tawe tno bo weto moof ati to, tkai riof mase. He mfe. Mfo refo jõ smot Kristus. Tna thar tawe bo weto beta mafer marak sai.
PHI 3:8 Feto sai fee; bo weto beta mti bosruf kʼjõ. Mfo refo thar Kristus Yesus, Tuhan ajõ. Tibyo jõ fri mafer mawat. Jõ ksoh tiranya tsya Kristus. Tibyo mfo refo tnaut tawe bombra ro tabam refo to, mfi bo ro mnis sai. Tna jõ beak makus sai. Jõ tksoh thar Kristus sai.
PHI 3:9 Jõ ksoh thau tiranya tsya Kristus. Jõ ksoh tawe Allah ymat jõ tna yawe jõ tfi raa ro mhaf moof ati. Menohe jõ ttai tatak mno bo ro moof mnan si fee. Soh jõ kro Watum ro Musa kaket to, reto mno jõ thaf moof ati fee. Menohe soh jõ tsam wai kʼKristus to, kbe Allah ymat jõ tna yawe jõ raa ro thaf moof. Watum ro Musa matak mno raa mhaf moof fee. Allah oh mi Raa ro ytai yatak yno raa mhaf moof ati to. Raa ro msam wai kʼKristus to, Allah ymat mees ro Kristus tibyo yawe ana weto mfi raa ro mhaf moof ati.
PHI 3:10 Jõ ksoh thar Kristus. Tna jõ ksoh Ait yatak rAit mhau matam jõ ye. Tii Ait yhai tna Ait yatak rAit oh mi mno Ait yrok yasen. Soh raa mno bo ro mkair-kar mai kʼjõ to. Jõ tawe bito tasom bo weto sai tnan Ait ye. Tna soh Tuhan ybis to, kbe too tetsu ajõ tbyat tna re tnan Ait ye. Jõ waa fee.
PHI 3:11 Afo kbe tis rau to, Ait yno jõ trok tasen.
PHI 3:12 Jõ tnan Kristus Yesus fefares. Jõ thaf mato moof ati fefares. Menohe jõ hamer tamo thau tiranya tsya Ait hame wajin. Reto oh mi Kristus Yesus ysok jõ tamo raa wAit.
PHI 3:13 Taja, tme, tao, tano na; bo ro jõ tksoh reto mabo fefares. Menohe jõ beak bo ro mafer marak. Jõ tawe sorni bo ro tiwya jõ tno to, tna beroh tamo fri roon ro hame.
PHI 3:14 Jõ tkro iso ro Kristus Yesus kaket mamo snok mam tis rau to, meen Allah yaren jõ. Meen Ait ytu jõ tamo thau mam sawro rAit.
PHI 3:15 Anu beta ro bhau bbo bosmot ranu kaket to, anu srau sau bnaut feto. Tna soh anu aro nhaf, srau wanu ha-hayah to, kbe Allah yisoh anu nhaf, srau ranu.
PHI 3:16 Nma, anu bbo tna bno bo beta ro Allah tiwya yawe oh kʼanu to, bbo bno kaket.
PHI 3:17 Taja, tme, tao, tano na; nmat bo ro jõ tno to, tna nboti bo ro jõ tno weto ye. Kro nno bo nnan jõ ye. Nmat tna kro raa taro ro ja mno bo moof to ye.
PHI 3:18 Kristus yhai mam ara warok mkah anu. Menohe raa mawat hawe anu fri mafer rau. Ana weto mamo byoh Kristus. Tiwya jõ tkyas ana weto kʼanu oh. Ana weto mno jõ sraujin.
PHI 3:19 Ana srau wana oot-oot bo ro mkair sai. Ana safuk bo mkair ro ana mno; bo ro mti saban sai. Tna ana mnaut bo ro tabam refo sai. Raa weto meen masu marak.
PHI 3:20 Menohe ⌞anu bmoʼt sawro ro kair fee.⌟ Kbe meen anu bmo bhau mam Sawro ro Allah. Sawro rAit to tabam ranu oh meto. Tna anu simaut mase ste Tuhan Yesus Kristus. Ait tait Raa Sotak ranu. Meen Ait ybam tno hah ye yama.
PHI 3:21 Yama tna yno anu betsu wanu haberek mamo moof mfi yetsu rAit. Mfo refo to, anu betsu wanu sne. Menohe Ait yetsu rAit yatak tna yoof. Meen Ait yno anu betsu wanu haberek to, mamo moof mfi yetsu rAit ro yoof ye. Bi Ait yase ybo bombra wofo beta ykah yatak rAit.
PHI 4:1 Taja, tme, tao, tano na; jõ thafri anu. Jõ ksoh tmat anu nsu nnaif, jõ ja tahni ooh oh. Anu nno jõ simaut mase! Jõ tkyas bo ro riwai reto beta kʼanu terif iso ro anu nhau smot Tuhan kaket.
PHI 4:2 Euodia msya Sintikhe; nisoh niranya wanu mbewok. Nnaut nwe anu mbewok fnya ro smot Tuhan. Feto to, ne nhaf sau, bonaut sau su.
PHI 4:3 Sunsugos; nyõ jõ tafoh ajõ. Nyõ ja nkah bo nsya jõ ye. Namo nkyas bo moof kʼana mbewok afo re ana me miranya u. Fnya ewok reto msya Klemens tiwya msya jõ nkyas Bokyas Moof ro Yesus (Injil). Ana msya jõ tafoh wojõ taro ye mkyas Injil. Allah ykom ana masom wana mam aam rAit oh. Ykom yawe meen ana beta mhau mroon to.
PHI 4:4 Simaut yoyo oh! Anu niranya nsya Tuhan. Feto to, simaut mase!
PHI 4:5 Tna sneh-sneh nsya raa anya beta. Tuhan kene wo yama oh.
PHI 4:6 Nnaut yyi bo aro ma. Bo bawya ro anu nnaut to, skabuk bo weto beta kʼAllah. Tna nyoh asik mase kʼbi Ait ye.
PHI 4:7 Nno feto to, kbe Allah yno anu nhaf tnok. Anu niranya nsya Kristus Yesus tibyo Ait kmot anu nhaf wanu, tna kmot bonaut wanu ye. Ait yno anu nhaf wanu tnok toni. Raa ro wase bi Ait to, ja ana srau bo reto fee.
PHI 4:8 Taja, tme, tao, tano na; nnaut bo ro mfi fefo kaket: Bombra ro moof ati, bombra ro mase, bombra ro mafer moof. Nnaut bombra ro Allah ksoh. Nnaut bo ro mfi feto yoyo sai.
PHI 4:9 Bo ro ja jõ tno to, nmat tna nbo nno feto ye. Bo ro jõ tkyas to, nri tna nbo, nno ye. Boti iso ajõ reto to, kbe Allah yatam anu. Kbe yno anu nhau nhaf tnok.
PHI 4:10 Anu nkai iso mkah bo natmof jõ u. Tibyo jõ tayoh asik mase kʼAllah tna simaut mase. Ooh oh anu nsan bo kʼjõ fee. Thar tawe anu sorni jõ fee. Thar tawe anu nksoh nsan bo kʼjõ. Menohe iso mkah bo anu tiim pitis kʼjõ to aro fee.
PHI 4:11 Jõ tkyas bo ro pitis baro kʼanu fo; menohe jõ thau bo marak fee. Mam wore wo arin moof, mkair ye to, bo mafa oh, ja thau suse fee.
PHI 4:12 Ti aro thau bo marak. Tna ti aro tse bo mase. Ewok ye ja thaf tnok fares. Wore wo hanyah tna wore wo thai sre ye, jõ tnaut yyi fee. Mfi bo jõ thau yu marak tna mfi bo thau bo msis; bo weto beta to, jõ thar tasom oh.
PHI 4:13 Bawya sai ro mai kʼjõ to, kbe Tuhan yoo yatak rAit yee kʼjõ afo re jõ tatak tasom bo weto beta.
PHI 4:14 Menohe anu natmof jõ mam wore wo jõ thau bo marak to, anu nno bo moof oh meto.
PHI 4:15 Tiwya jõ tkyas Bokyas Moof ro Yesus (Injil) kʼanu mam kota ro Filipi. Tna jõ tasen sikba provinsi ro Makedonia tamo. Wore weto jemaat ranu oh mi ro nsan bo kʼjõ. Tinyi rau to, jemaat taro mros tis mban jõ feto fee.
PHI 4:16 Tna jõ tamo thau mam kota ro Tesalonika. Thau mam Tesalonika to, jõ tnaut bo. Tna anu tiim pitis kʼjõ mun sau, ewok feto ye.
PHI 4:17 Jõ tkyas bo ro pitis fefo to, tkyas re kbe anu tiim pitis kʼjõ fee. Thar tawe Allah ymat he anu natmof jõ feto. Tna kbe bi Ait yaren anu riryõn. Reto oh mi jõ tkyas pitis ro anu nsan kʼjõ.
PHI 4:18 Bo ro anu tiim kʼjõ to, jõ tkai beta mbam Epafroditus oh. Tna mfo refo jõ tse bo mnan. Bouum ro anu nuum kʼjõ reto to, mfi bo sawer ro anu nsan kʼAllah. Bi Ait ksoh bo ro anu nno reto.
PHI 4:19 Jõ smot Allah. Ait Raa ro bobot. Ait Raa ro yase. Tii Ait yoo bo yee kʼjõ. Anu smot Kristus Yesus ye. Feto kbe Ait yoo bombra yee kʼanu re kbe anu nse bo aro mabut fee.
PHI 4:20 Nma, anu bbaut Allah, Bja ranu mamo snok mam hame wajin. Amin: Mabo oh!
PHI 4:21 Nmah meen ajõ kʼraa ro Allah wAit mam Filipi beta. Tna jõ tafoh wojõ ro mhau msya jõ mam befo mmah meen kʼanu beta ye.
PHI 4:22 Raa ro Allah wAit mam befo beta to, msya raa ro mhau mam amah mato raja Kaisar rait to, ana mmah meen kʼanu beta ye.
PHI 4:23 Jõ skabuk re kbe Tuhan Yesus Kristus yatmof anu beta.
COL 1:1 Aam refo mbam kʼjõ, Paulus tsya anu bao Timotius. Allah ksoh tibyo jõ tamo raabis (rasul) ro Kristus Yesus rAit.
COL 1:2 Amu mbewok nkom aam refo kʼanu raa ro Allah wAit mam kota ro Kolose. Anu to, beroh smot Kristus tna Allah yse anu nmo raa wAit nsya Kristus Yesus su ye. Amu skabuk Bja Allah, re Ait kbe yatmof anu tna yno re anu nhau nhaf tnok sai.
COL 1:3 Raa mkyas anu kʼamu nri mawe anu smot Yesus Kristus matak. Tna raa ro Allah wAit beta to, ja anu natmof ana beta kaket ye. Amu nri bo ro anu nno weto, tibyo amu skabuk anu to, ja amu nyoh asik mase kʼAllah yoyo. Tuhan ranu Yesus Kristus tait, ytu Allah Yaja rAit.
COL 1:5 Watum ro ati to, Bokyas Moof ro Yesus (Injil) to, tiwya raa mkyas kʼanu nri. Anu nri tna ninaut nwe meen anu nkai bo ro Allah siwyan kʼanu yse mam sawro rAit. Anu ninaut tna ste bo ro yse mam sawro rAit weto, tibyo anu smot Ait matak. Tna anu ninaut bo weto tibyo natmof anya kaket feto ye.
COL 1:6 Tiwya tinyi anu nri Bokyas Moof reto tibyo nhar nwe boatmof ro Allah to bo mabo. Maban tinyi rau weto mamo snok mam mfo refo to, Bokyas Moof reto to, anu fri mafer mawat. Tna anu nkyas Bokyas Moof reto kʼraa roto renti ye. Tibyo ana fri mafer rau ye. Bokyas Moof reto mfi ara make sau ro mo maut tna make mawat. Tna mam woyõ-woya raa mkyas Bokyas Moof reto mam tabam refo beta to, raa mkai mafer rau tna mkyas renti mnan fi anu feto ye.
COL 1:7 Bi Epafras tait, ait ysya amu ja nkah bo ro Kristus su. Tna amu nhafri ait ye. Tiwya ait yamo ykyas Bokyas Moof reto kʼanu nri. Tna ait ja mur-mur yno bo ro Kristus ybis ait yno re anu fri mafer rau ye.
COL 1:8 Tna ait ykyas anu kʼamu yawe, ja Har ro Tuhan mno anu natmof anya ye.
COL 1:9 Feto to, maban tii tinyi Epafras ykyas anu kʼamu to, amu sorni anu fee. Amu skabuk anu tna nyoh re kbe Har ro Tuhan yno anu nsrau miyõ tna nkit maan ye. Re kbe anu nhar bo ro Ait ksoh anu nno to kaket.
COL 1:10 Amu nyoh bo weto re kbe anu nno bo ro moof mnan raa ro ja nkro iso ro Tuhan. Re kbe Ait yhaf mnan bo ro anu nno beta. Tna amu skabuk re kbe bo moof ro anu nno beta to, kbe raa fri mafer rau yoyo. Re kbe anu nhar Allah renti-renti naut.
COL 1:11 Allah yatak rAit to msai toni. Amu nyoh re kbe Ait yoo yatak rAit reto yse kʼanu ye. Re kbe bo bawya ro btek mai kʼanu to, kbe anu beroh smot Ait tna nhau nhaf knar.
COL 1:12 Tna amu nyoh re kbe anu simaut mase nyoh asik mase kʼanu Bja ranu. Ait oh mi tubat anu yse nsya raa wAit. Anu to, Ait ysok yse hayah mam wore wo maah. Tna kbe Ait yuumto bouum baro kʼanu beta ye.
COL 1:13 Tiwya, kabes yabi (Iblis) ybo anu mam wore wo mamur. Tna Allah oh mi yisnok anu bbam wore wo mamur reto tna yse anu mam raa mana ro mfo refo Ku rAit yamo Raja ybo. Tna Ku rAit tait, Allah yhafri toni.
COL 1:14 Allah yoo Yesus yfes anu. Au oh mi iro ro anu bno to, Ait yyon beta.
COL 1:15 Allah tait, anu raa bmat bkah bsu fee. Menohe Yesus tait, raa mmat oh. Yesus yhaf srau rAit to merif Allah yhaf srau rAit kʼanu ye. Yesus tait, Kubum ro yhau abyõ ybo bosair wAit beta.
COL 1:16 Allah ybis Yesus ysair bombra beta. Bombra ro mhau mam sawro ye, bombra ro mhau mam tabam refo ye, bo ro ja raa mmat ye, bo ro ja raa mahni ye to, Yesus ysair beta. Bo ro ja anu bahni to: Kabes msya malaikat sor ye, aban mana wana ye, ro mase ye, bobot ye beta to. Yesus yesait ysair beta re kbe yesait fri mafer rau ye.
COL 1:17 Bombra weto beta marak fares to, Yesus yhau wia yatim oh. Tna Ait yno re bombra weto mhau muuf sai fares. Oos Ait maami bombra weto mbtek-tak makus sai.
COL 1:18 Raa ro smot Ait makin (jemaat) to mfi Ait yetsu rAit. Tna Ait yamo mana ybo Ait yetsu rAit reto ye. Ait oh mi ysair jemaat rAit tinyi to. Tna Ait ro tinyi yrok yasen. Allah yno feto, afo re Kristus yesait yrok yase yatim raa msya bombra beta.
COL 1:19 Tna bo yase ro Allah rAit msya bobot wAit beta to mhau mam Kristus. Allah ksoh yse bo yase rAit mam Kristus feto to. Tibyo Allah yse Kristus yamo yase yatim raa msya bombra beta to.
COL 1:20 Raa mame Kristus yajat mam ara warok. Tna Allah yoo mees ro Kristus rAit reto yisoh iranya ro Allah ysya bombra beta. Bo ro mhau mam tabam refo ye msya bo ro mhau mam sawro ye to, Allah yoo mees ro Kristus yno Allah yrok yiranya ysya bo beta to.
COL 1:21 Tna anu to, tiwya anu nhau hayah mfi raa ro srim sai. Tna tiwya anu srau wanu to, ja mafa msya Allah tibyo nno bo ro mkair-kar.
COL 1:22 Menohe mfo refo, Allah yisoh iranya ranu nsya Ait oh. Ati ro Kristus yhau mam tabam refo, raa mame Ait yetsu yajat. Ajat rAit oh mi misoh iranya ranu nsya Allah to. Tna yisoh iranya ranu afo re meen yse anu mam wore wo Allah yhau. Yse anu mam sawro rAit to, tna kbe ymat anu yawe anu to, raa wAit ro nhau nno bo wAit sai. Tna mam sawro rAit to, kbe Ait ymat anu yawe anu nfi raa ro wase mber safo to. Tna mam sawro rAit to, kbe raa maun boun anu aro u fee ye.
COL 1:23 Menohe beroh nbo bosmot wanu kaket be kbe nkai iranya reto nsya Allah fee. Bito oh! Nros ntak. Bokyas Moof ro ja jõ, Paulus, tkyas to, Allah ybis jõ tamo tkyas. Tna Bokyas reto ja raa mkyas woyõ-woya mam tabam refo ye. Tna Bokyas Moof reto to, anu tiwya nri ye to, tibyo ninaut nwe meen kbe anu nkai roon ro hame wajin. Ninaut bo reto matak. Susu fari re sorni bo reto ma!
COL 1:24 Tiwya Kristus yno bo ro mafer moof mkah anu bkin ro smot Ait. Anu weto to Ait yetsu rAit oh meto. Yno feto, tibyo bo ro samyoh mawat btek mai kʼAit. Tna mfo refo fo, jõ ye. Jõ tno bo ro mafer moof kʼanu, tibyo bo ro samyoh baro btek mai kʼjõ tetsu ye. Jõ tkai bo samyoh ro mabut fares weto baro to, jõ simaut mase.
COL 1:25 Allah ysok jõ ybis re tamo sryan rAit. Tamo sryan rAit tno bo ro kbe mafer moof kʼanu raa wAit. Re kbe jõ tkyas watum rAit beta kʼanu.
COL 1:26 Maban tiwya tinyi anu hohos na wanu wase watum wAit baro. Ait betoo watum weto kʼana fee. Ait ymyõt watum weto sai. Menohe mfo refo, Ait yasbrah watum weto kʼanu raa wAit to.
COL 1:27 Anu raa ro Kolose to, nbam raa mana ro Yahudi fee. Tna Allah ksoh re anu nrok nhar mafer watum ro tiwya raa wase weto. Tna mafer watum reto to, mfi bo kta ro msai toni kʼanu. Kʼanu raa mana ro Yahudi fee. Bo ro tiwya raa wase reto to, Kristus yhau mam kʼanu. Tibyo anu ninaut nwe meen kbe anu nkai bo yase rAit mam sawro rAit.
COL 1:28 Kristus oh mi amu nkyas kʼraa. Allah yisoh amu nkit re maan toni. Tibyo amu nkyas Kristus to, amu bhah wa raa awya sai, tna amu betoo bo kʼraa awya sai kaket ye. Afo re meen raa awya sai ro mari bokyas ramu reto kbe siwyan moof kaket. Tna kbe Allah yoo ana ymat yawe ana msya Kristus su to mrok moof mnan si meto.
COL 1:29 Tna jõ tomer siwyan raa feto to, Kristus yatam jõ yoo yatak rAit yee ybo jõ matak. Tna Ait yatak rAit to matak toni!
COL 2:1 Tna jõ ksoh anu nhar nwe jõ safo tomer siwyan anu feto ye. Anu ro nhau mam Kolose ye, ana ro mhau mam Laodikia ye, msya raa wamu ro mkai jõ mam tabam refo fefares beta ye.
COL 2:2 Jõ tomer re kbe anu nros smot Yesus matak mam anu nhaf wanu. Kbe anu natmof raa anya tibyo nhau nhaf sau su. Mkah iso reto oh mi kbe anu nros smot Yesus matak to. Tna jõ tomer re kbe anu nhar Yesus kaket. Ait oh mi watum ro tiwya Allah ymyõt tibyo raa wase to. Tna soh anu raa wAit nhar bo wAit beta kaket to, tna nbo bohar ro ati weto matak to, kbe mfo refo bohar weto mse mafer kʼanu. Tna mafer rau msai mfi bo kta ro mabyoh maut toni.
COL 2:3 Allah yoo bohar msya watum ro mabyoh maut toni weto beta to yse ymyõt mam Yesus yesait sai.
COL 2:4 Jõ betoo bo refo kʼanu re kbe raa mama besruf anu ma. Ana mama to, kbe masoh moof re besruf anu.
COL 2:5 Mfo refo jõ tabo fo thau fari tsya anu. Menohe thaf ajõ fo mrat msya anu fares. Jõ thau to, tnaut anu yoyo. Jõ thau mam tefo to, jõ tari he anu ja nkro iso ro ntrot su tna anu ja smot Kristus matak ye. Tari feto, tibyo jõ simaut mase.
COL 2:6 Tiwya anu nkai Yesus Kristus tna nmen Ait yamo Tuhan ro yase ybo anu. Feto to, nhau nkro Ait kaket.
COL 2:7 Anu nkro Ait kaket to, anu nfi bo ara ro mtis rau ja mno re ara reto matu fee. Tna Yesus yfi bo tabam ro mbo mtis weto matak. Tna anu nfi bo amah sau ro raa sgi sgi matak abyõ tna Yesus yamo sankaf rau ye. Tiwya raa mkyas Yesus kʼanu. Ana betoo bosmot ranu to, maja rau kaket. Tawe nbo bosmot ranu reto matak re kbe anu nros ntak ye. Tna nayoh asik mase kʼAllah yoyo ye.
COL 2:8 Bo maja ro tabam refo hayah tna bo maja ro Kristus hayah ye. Bo maja ro tabam refo to, mafer marak tna miwro raa. Tna masmair rau to, mbam bo mafa raa sai tna mbam kabes sor ro mbo tabam refo ye. Masmair rau to mbam Kristus fee. Feto to, kmot anu wa, be kbe raa mama mkyas bo maja ro tabam refo tna mfot anu.
COL 2:9 Bo yase ro Allah rAit msya bobot wAit beta to, mhau mam Kristus yetsu yum. Au oh mi anu bbo bo maja wAit sai aran to.
COL 2:10 Tna Allah ymat anu nsya Kristus su, tibyo bo ro anu nnaut re nkro Ait to, mabut aro fee. Kristus hre abyõ ybo bombra beta. Tna kabes msya malaikat sor to msya aban mana ye mhau mte beta.
COL 2:11 Tiwya raa sai moo matem wana tna mkom tohmi (sunat) anya. Menohe anu ro nhau su nsya Kristus to, Ait yisoh anu nhaf mato wanu. Bo ro mkair-kar ro tiwya mhau mam anu nhaf to, Ait sbi bo ro mkair-kar weto tna yoo beak makus oh. Sunat ro ja Kristus yno kʼanu raa wAit oh meto.
COL 2:12 Ati ro raa baptis anu to, Allah yoo anu tna kubur anu nsya Kristus su ye. Tna mam ati reto to, anu smot nwe Allah yatak yno Kristus yrok yasen oh. Tna Allah ymat bosmot wanu reto, tibyo Ait yno anu nrok nsen nsya Kristus su oh.
COL 2:13 Tiwya tinyi anu nhau nfi raa ro mhai sai beta. Bo ro niwer watum ro Allah msya nhaf mkair-kar ro Kristussunat fefares weto, oh mi misti re anu nhai beta to. Tiwya anu nhau nfi raa ro mhai sai nkri-kri to, Allah yoo anu yno anu nrok naam nsya Kristus su. Allah yyon iro ro tiwya anu bno biwer watum rAit beta, tibyo yno anu brok baam to.
COL 2:14 Safo ro anu sait-sait bber to, Allah ykom mam aam wanu sau-sau beta. Aam weto mko mawe anu hrat tuu oh. Tibyo anu biranya bsya Allah fee. Menohe Ait yatmof anu yoo aam weto yawe makus rof. Au oh mi Ait yoo aam weto tna paku mam ara warok ro Yesus. Mees ro Yesus oh mi make safo wanu raa bno to.
COL 2:15 Tna kabes sor msya aban mana wana beta to, Ait yoo matak wana beak makus sai. Tibyo kabes weto matak mbo anu u fee. Tna Kristus yerif ana kʼraa makin re raa makin mhar mawe Kristus yaut abyõ ybo beta tna kabes sor msya aban mana mroh mte, hrenaut sai beta. Raa mame Ait yajat mam ara warok reto oh mi Ait yaut abyõ ybo beta to.
COL 2:16 Kabes sor msya aban mana weto matak aro u fee. Feto to, fyi re anu nri watum wana fares to? Awya sai ro bhah anu yawe, “Boit ro mbau meto, niit ma! Bo ro nta reto mbau!” to, nri ait ma! Tna soh sait yawe, ayõ aro mbau to, nri ait ma ye! Mfi bo sait yawe, “Bokyõ refo mbau!” soh mfe, “Mti fo, snyi frok tna, tibyo mbau!” soh mfe yawe, “Ifo fo, ayõ ro raa ntmoh.” Nri watum mfi feto to ma!
COL 2:17 Watum ro tiwya raa mkyas weto to, matim merif iso ro mama tna sau. Mfi bo raa mawyan sai. Tna mabo rau to Kristus yesait.
COL 2:18 Kristus yesait yoo anu raa wAit beta su sgi yetsu rAit sau aran kaket. Tna Ait yamo mana ybo anu beta mam yetsu rAit. Ait yoo anu yse yake matak. Tna ja Ait yoo bo ro anu bnaut to saim kʼanu ye. Tna yno re anu bhau biranya su ye. Tibyo kbe Allah yno yetsu ro Kristus rAit reto mo kaket moof. Menohe raa baro hawe mari mana reto. Ana ksoh kro iso roto. Ana to, mawe ana mhaf sneh sai, he mfe. Ana to, ja smot malaikat. Ana mjin smi-sma bo to, mbo bosmi weto matak, mawe bo ro ati toni! Makit wana mnot-nat bo ro tabam sai tibyo ana mrok mana mase ye. Menohe bo ro ana safuk to, bo ro ati fee ye. Tna anu to, kmot anu wa be kbe ana mama miwro anu btek to. Soh ana miwro anu btek to, meen anu nkai bo ro Allah siwyan kʼanu fee ye.
COL 2:20 Kristus yajat to, anu nhai su nsya Ait ye. Tibyo kabes sor ro mbo tabam refo fares fo, mbo anu u fee. Fyi re anu nwe nkro iso ro tinyi mfi bo kabes weto mbo anu fares? Anu nhai nsya Kristus oh! Nkro iso reto u ma! Ana ro mawe miwro anu to watum anu mawe:
COL 2:21 “Nbo bo weto ma!” “Noo boit reto sanet kebet ma!” “Niir bo reto ma!”
COL 2:22 Boit reto to, bo ro ati fee. Raa mait tna makus sai. Tna watum mfi weto to, watum msya maja ro frok mbam raa sai. Feto to, nri watum mfi weto to ma!
COL 2:23 Watum weto mamo mamyot bosmot ro raa sair sai. Tna raa ro kro watum weto to, mawe ana mhaf sneh sai, he mfe. Tna ana mnaut mawe soh raa mhau bo mait bo to, kbe fri mafer rau. Raa baro mmat bo weto mawe, ja raa ro makit maan mno bo weto to. Menohe watum weto misoh raa mhaf fee. Kbe ana mhaf masmamo fares.
COL 3:1 Allah yno anu nrok nsen nsya Kristus su. Feto to, tomer saso bo ro mhau abyõ mam wore wo Ait yase hre ysya Allah mam tem ati rAit.
COL 3:2 Bo ro mhau mam abyõ weto to, nbo kbo mam nsrau wanu. Tna nnaut-nat bo ro mhau mam tabam refo to ma.
COL 3:3 Tiwya anu nhai nsya Kristus su. Tibyo mfo refo, anu nhau naam nsya Kristus su tna nsya Allah su ye. Anu nhau naam feto, menohe mabo rau to, Allah ymyõt fares.
COL 3:4 Menohe ati ro meen Allah yasbrah Kristus ysya bo msai wAit to, kbe Allah yasbrah anu nsya bo msai wanu ye. Kristus oh mi anu nhau naam to. Feto to, saso bo ro mhau mam abyõ to.
COL 3:5 Anu nhau naam nsya Kristus su to, nkro iso raa ro tabam refo aro u to ma! Raa ro tabam refo to, taro maus-as bo, ana taro to mato mboh fee, taro to masmamo, taro to srau oot-oot mno bo ro mkair-kar, tna ana taro to mhai bo raa moo. Ana weto to, mfi bo raa ro smot fraa sai meto. Ana ro mhai bo raa moo to, mnaut-nat bo ro tabam sai tna mnaut-nat bo ro Kristus fee. Anu to, nistre bo weto beta beak fari makus sai.
COL 3:6 [Raa mkbair ro hawe mari bo ro Allah yawe, tibyo mno iro weto to,] Allah kmo ana. Tna Allah kbe yoo safo mana ymit kʼana weto.
COL 3:7 Tiwya anu nkro iso reto ye. Au oh mi tiwya anu nhau nno bo ro mkair-kar weto to.
COL 3:8 Menohe mfo refo fo, bo ro mkair-kar beta to, nitsre tna mbeak fari makus. Mfi bo raa ja mrus ratan ro mnis tna beak makus to. Nkmo raa to ma! Nhaf safo kʼraa to ma! Nhaf ro mkair-kar kʼraa to ma! Nmus raa to ma! Bokyas ro nsoh mkair-kar to, frok mbam nsoh wanu to ma!
COL 3:9 Sioh anya to ma! Tiwya iso ro bose oh msya bo mafa wau ro mkair-kar to anu nrus beak makus oh. Feto to, nno bo ro mkair-kar weto u ma!
COL 3:10 Anu nyum ratan ro tna oh. Au oh mi anu nkro iso ro tna oh. Tibyo nmo raa ro tna (baru) to. Tna anu raa ro tna to, ja Allah yisoh yisoh anu fares fo, re kbe anu nhar Ait kaket baro naut. Ait yisoh yisoh anu feto mamo snok anu nsrau msya nhaf haberek mamo mnan si Ait srau msya yhaf ye. Ait oh mi ysair raa ro tna to.
COL 3:11 Anu ro Ait ysair tna to, anu bibi anu nesait ai to ma. Anu beta nnan anya sai. Anu raa mana ro Yunani nsya anu raa mana ro Yahudi to, nnan anya sai. Tna anu ro tiwya raa mkom tohmi (sunat) nsya anu ro tiwya raa mkom (sunat) to fee, anu nnan anya sai ye. Raa ro tiwya mhau fari tna mkyas bo mam mai rana mesait sai msya raa ro tiwya mhau mam safom sai ye. Anu ro sryan boh nsya anu ro sryan boh fee ye. Anu beta nnan anya sai. Menohe ro ati to, Kristus yesait aran. Ait oh mi yhau mam kʼanu raa wAit nhaf beta to.
COL 3:12 Allah ysok anu nmo raa wAit. Tna Ait yatmof anu ye. Tna anu nmo raa ro tna ye. Allah yno bo ro moof weto beta kʼanu. Feto to: Nhau natmof anya kaket, nhau nhaf moof sai, yok-yok anu to ma, nhau nhaf sneh sai, nhaf to mhau knar sai,
COL 3:13 kanyin anya ye. Tna anu awya sai ro ynaut yawe raa mno bo mai kʼait to, ait yatmof ana sai. Yhaf kair ma. Tiwya Tuhan ymat iro wanu tna yatmof anu. Feto to, natmof anya mfi Ait yatmof anu feto ye.
COL 3:14 Tna bo moof ro jõ sobu anu nno weto to, bo sau naut ro ati toni miwer watum roto weto: Nhafri raa anya. Mfi bo raa moo too make ara matak. Anu nhafri raa anya kaket to, kbe anu nhau srau sau su nsya nhaf sau su kaket matak beta to.
COL 3:15 Tna Allah ytu anu nma nrok niranya su nmo Kristus yetsu sau aran su. Kristus yno anu nrok niranya. Feto to, ati ro anu saim bo ro kbe anu nno to, nnaut iranya ranu kaket wia. Tna nyoh asik mase kʼAllah ye.
COL 3:16 Tna bokyas ro Kristus to, nhau nnaut mam kʼanu nhaf kaket re kbe mafer wau to mninon kʼanu. Tibyo kbe anu nkit maan nwatum raa anya kaket tna nwe wa raa ro mawe mno bo ro mkair ye. Nji howes kʼAllah to, nyoh asik mase kʼAit mkah nsoh mabyõ sai to ma! Nji howes mkah nhaf srau mato kaket! Bibi Tuhan mkah Mazmur, mkah howes ro mbibi Ait, tna mkah bobaut bo to ye.
COL 3:17 Tna bo bawya ro anu nno msya bo bawya ro anu nkyas beta to, nri bo kʼTuhan Yesus ro ybo anu. Tibyo nno bo weto beta mamyot iso ro Ait yawe anu nkro to. Nno bo weto to, nyoh asik mase kʼAllah anu Nja ranu ye. Yesus yisoh iranya ranu nsya Nja re nyoh bo kʼAit to.
COL 3:18 Yesus yamo Tuhan ybo anu feto to, ro moof to, anu fnya nri bo ro anu naa mawe. Nri nbo nno!
COL 3:19 Tna anu raa sme to; natmof anu nfain wanu. Nkyas bo kʼana to, nbait ktan-ktan to ma!
COL 3:20 Tna anu ro nkek fares to; nri bo ro nja nme na mawe tna nbo nno beta. Nno bo weto to, kbe Tuhan yhaf mnan anu to.
COL 3:21 Tna kukek maja to; nno re kukek wanu mrok kmo to ma be kbe tis rau to ana hawe mari anu u.
COL 3:22 Tna anu ro sryan boh to; ana ro mbis anu mam tabam refo to, nri bo ro ana mawe to, nbo nno beta. Nri ana to, nno re kbe ana mbibi anu sai to ma! Nhaf makin feto to ma. Nri bo ro ana mawe to, waa Tuhan, tibyo nbo nno mkah nhaf sau.
COL 3:23 Bo bawya ro anu nno to, nno re kbe raa mmat tna bibi anu sai to ma. Menohe nno bo weto kaket mkah nhaf ro moof tna kbe Tuhan yesait aran ymat tibyo yhaf mnan kʼanu to.
COL 3:24 Anu nhar oh nwe meen kbe anu nkai boren ro kbe Tuhan yuumto kʼanu. Anu nhar bo reto, tibyo nno bo ro raa mbis anu nno mam tabam refo kaket to. Anu nno bo ro TuhanKristus oh meto.
COL 3:25 Menohe sryan boh ro mno safo aro to, meen kbe Tuhan ymit safo weto kʼana. Ja Tuhan ysok raa sait fee. Kbe ymit safo ro raa mno beta.
COL 4:1 Tna anu ro nbo sryan boh to; anu nhar oh nwe Ait sait ro yase ybo anu tait, Ait hre mam sawro rAit. Feto to, nmat sryan ro anu nbo kaket. Nno bo ro moof kʼana mamyot bo ro ati (adil). Tna niwana ana to ma! Menohe nmat ana mfi bo ja anu nmat anu nesait ye.
COL 4:2 Tna anu beta to, nhau mur-mur skabuk nkyas bo nsya Allah. Skabuk feto, nnaut bo ro anu nkyas kʼAit kaket. Tna nyoh asik mase kʼAit ye.
COL 4:3 Skabuk feto to, skabuk amu ye. Nyoh kʼAllah re kbe Ait siwyan iso ro amu nmo nkyas Bokyas rAit ro Moof. Re kbe amu nkyas Kristus. Tiwya tinyi raa wase Ait, menohe Allah yasbrah Ait kʼanu. Tna tiwya jõ tkyas Ait tibyo raa mfot jõ tna mse jõ mam bui refo fo.
COL 4:4 Tna skabuk re kbe jõ betoo bokyas reto kaket mnan si Allah ybis jõ tkyas to.
COL 4:5 Ati ro anu nhau nsya raa ro wase Tuhan fares fo, nmo kaket mfi bo raa ro makit maan. Nmo kaket feto, tna nbo ati ro nhau nsya raa ro wase Allah weto to, somya kaket re kbe mafer moof kʼana ye.
COL 4:6 Nkyas bo nsya ana to, nhau nhaf moof kʼana yoyo tna nkyas mkah iso ro kbe ana ksoh mari ye. Nkyas feto, tibyo kbe anu nhar nkyas bo si kʼana sait-sait mam ati ro ana mtu bo kʼanu ye.
COL 4:7 Bi Tikhikus tait, raa ranu sait ro amu nhafri. Ait yamo sryan Tuhan ro mur-mur yno bo ro Tuhan ye. Tna ja ait ykah bo ysya amu ye. Ati ro ait yamo yo kʼanu to, kbe ait ykyas bo ro jõ tkai mam wefo msya wore wo jõ thau fo kʼanu. Kbe ykyas bo weto beta kʼanu.
COL 4:8 Au oh mi jõ tbis ait yamo yo kʼanu. Yamo re kbe anu nhar bo wamu tibyo anu ne sraujin amu u fee.
COL 4:9 Tna jõ tbis Onesimus yamo ysya bi Tikhikus ye. Onesimus tait, raa ranu ro Kolose sait ye. Tna amu nhafri ait ye. Tna ait mur-mur kro Tuhan ye. Kbe ana mbewok mkyas bo ro amu nkai mam wefo beta kʼanu.
COL 4:10 Aristarkhus ymah meen kʼanu. Ait tait, raa mfot mse mam bui ysya jõ fo. Tna Markus, bi Barnabas tmo tait, ymah meen kʼanu ye. (Markus tait, tiwya raa makah soo ro ajõ mkyas.) Soh ait yama to, nitrah nhaf wanu kʼait.
COL 4:11 Tna Yesus ro ja raa mtu yasom Yustus tait, ait raa Yahudi ro smot Kristus oh. Ana raa ro Yahudi mabo tuuf aran ro mfo refo mkah bo msya jõ. Raa mana ro Allah yamo Raja ybo oh mi amu nkyas to. Tna ana ja misoh thaf ajõ re jõ sorni sraujin ajõ ye.
COL 4:12 Tna bi Epafras, raa ranu ro Kolose sait, ait ro yamo sryan ro Kristus Yesus tait, ymah meen kʼanu ye. Ait skabuk to, ja ait skabuk anu hrowyõ yhai yoyo ye. Ait skabuk re kbe anu nros smot Tuhan matak. Tna ait skabuk re kbe anu nhar bo ro Allah ksoh anu nno beta to, nhar nbo kaket.
COL 4:13 Jõ tasu tmat ait hrowyõ skabuk anu feto. Tna ait skabuk raa ro smot Tuhan mam kota ro Laodikia msya kota ro Hierapolis mfi feto ye.
COL 4:14 Tna Lukas ro ja tkif raa tait, ro raa mhafri tait, ymah meen kʼanu ye. Tna Demas ymah meen kʼanu ye.
COL 4:15 Nmah meen ajõ kʼraa wamu ro mhau mam Laodikia ye. Tna nmah meen ajõ kʼfai Nimfa msya jemaat ro ja skabuk mam amah rau.
COL 4:16 Aam refo fo, raa mbaca kʼanu mkak wia, tna nno re raa makah mamo mbacakʼjemaat ro skabuk mam kota Laodikia ye. Tna aam ro jõ tiim kʼjemaat ro Laodikia to, noo nbaca mam jemaat ranu ye.
COL 4:17 Tna nwe kʼbi Arkhipus nwe, “Tiwya Tuhan ybis nyõ nno bo wAit. Kaket nyõ re nno beta!”
COL 4:18 Tna jõ Paulus tmah meen kʼanu ye. Tna meen refo fo, bokom ro tis refo fo, jõ tkom mkah jõ tatem ajõ. Skabuk jõ mam bui refo. Sorni ma! Tna jõ tayoh re Allah yatmof anu ye.
1TH 1:1 Aam refo mbam kʼamu, Paulus, Silas nsya Timotius. Amu nmah meen kʼanu jemaat ro nhau mam kota ro Tesalonika. Anu smot Allah, anu Bja ranu, ysya Tuhan Yesus Kristus. Amu skabuk afo re bi Ait yatmof anu beta tna yno re anu nhau nhaf tnok ye.
1TH 1:2 Amu skabuk nkyas bo kʼAllah to, ja amu skabuk anu beta ye. Skabuk anu nyoh asik mase kʼbi Ait yoyo.
1TH 1:3 Amu nkyas anu kʼAllah Bja ranu to, amu nnaut nwe anu smot Tuhan Yesus kaket, tibyo ja nkah bo wAit. Tna anu ja mur-mur natmof anya kaket ye. Tna anu ja beroh ninaut nwe Tuhan ranu Yesus Kristus meen hah ye yama u.
1TH 1:4 Amu nhar nwe Allah yatmof anu tna ysok anu nmo raa mana rAit ye oh.
1TH 1:5 Tiwya amu nkyas Bokyas Moof ro Yesus (Injil) kʼanu tna Bokyas reto mroh mami mam kʼanu nhaf. Har ro Tuhan mno re anu nhar nwe Bokyas reto to, bokyas ro mabo tu. Bokyas ro mbam raa sai fee. Tiwya amu nhau nsya anu su. Tna anu nmat sas amu. Nmat tna nhar nwe amu ja nno bo ro moof kʼanu. Tibyo nhar nwe bo ro amu nwe to bo mabo.
1TH 1:6 Anu nri Injil ro amu nkyas to, Har ro Tuhan mno anu simaut mase. Tna anu kro nno bo ro ja amu nno ye afo re anu nnan amu tna nnan Tuhan ye. Anu nno feto tibyo bo ro mkair mama mai kʼanu oh. Menohe anu beta beroh nbo Injil reto kaket.
1TH 1:7 Raa Kristen ro mhau mam provinsi ro Makedonia msya provinsi ro Akhaya to, beta mmat bo ro anu nno. Mmat feto tna ana mawe kro mno bo ro ja anu nno ye, afo re ana mnan anu.
1TH 1:8 Anu ja nkyas tna nno watum ro Tuhan. Tna raa beta mari oh: Raa ro Makedonia msya Akhaya ye tna raa mam arin aso wofo beta. Raa beta mhar mawe anu smot Allah kaket. Feto kbe amu nesait nkyas bosmot ranu kʼraa mkah bawya u?
1TH 1:9 Raa weto mesait mkyas anu ro Tesalonika mawe, “Tiwya raa ro mhau mam Tesalonika ja smot bo ro tabam sai. Menohe Paulus sya mamoʼt kota reto tna mkyas Allah. Raa ro mhau mam Tesalonika weto mitrah mhaf wana tna ana mari bo ro Paulus sya, mawe. Feto tibyo raa ro Tesalonika haberek smot Allah ro yroon. Ana smot Allah ro ati tna kro Ait mno bo ro Ait yawe.
1TH 1:10 Tna ana mhau ste Ku ro Allah yare hah ye yama ybam sawro rAit. Yasom Yesus. Tiwya Ait yhai menohe Allah yno re Ait yrok yasen. Meen ati ro tabam refo haberek tna kair mama mai kʼraa to, Yesus kbe yoo riof yee kʼanu raa wAit”
1TH 2:1 Taja, tme, tao, tano na; anu nhar nwe bo ro tiwya jõ tama tkyas kʼanu to mafer msis oh.
1TH 2:2 Tiwya tinyi amu nmoʼt kota ro Filipi to, raa mno bo ro mkair mai kʼamu tna mikyak amu ye. Ana hawe mari Bokyas Moof ro Allah (Injil). Menohe Allah ranu yatam amu. Tna amu nsen nmo no kʼanu mam kota ro Tesalonika. Tna raa mama mno anu. Menohe amu beroh nkyas Injil kʼanu, amu waa fee.
1TH 2:3 Watum ro Tuhan amu nma nkyas kʼanu to, bo ro ati. Amu nkyas watum rAit to, nkyas sre fee. Amu nkyas bokyas reto mbam nhaf wamu ro moof. Amu besruf anu fee.
1TH 2:4 Allah yawe amu noof tna yoo Bokyas Moof ro Yesus (Injil) yehau kʼamu to, yawe amu nmo nkyas to. Amu nmo nkyas Injil afo re raa nksoh amu to, fee. Amu ja nno bo afo re Allah ksoh amu. Bi Ait oh mi Raa ro ja sanet amu nhaf mato wamu.
1TH 2:5 Anu beta nhar nwe amu nhaf mato wanu to moof sai. Amu nkyas bo nsoh moof sai fee. Menohe amu nkyas bo abyõ sai kʼanu. Amu nmyõt bo aro fee. Amu nsu mase mkah pitis wanu fee. Allah ja ymat tna yhar bo ro amu nkyas reto. Yhar yawe amu sioh anu fee.
1TH 2:6 Amu nwe anu bibi amu fee! Amu hawe anu nsya raa roto bibi amu. Menohe amu fo raabis (rasul) ro Kristus. Feto to amu nse re nbis anu feto. He mfe, amu hawe. Tibyo ja amu nbis-bas anu fee.
1TH 2:7 Amu fo raabis ro Kristus wait menohe amu sneh sai nhau susai nsya anu. Amu nhaf sneh nfi fnya ro misoh ku mkek wau ye.
1TH 2:8 Amu natmof anu oh mi amu nma nkyas Bokyas Moof ro Allah reto kʼanu. Amu nksoh anu toni sai oh mi amu nhau niranya nsya anu ye.
1TH 2:9 Wore weto to, amu nkyas Injil kʼanu ye, tna nkah bo wamu nesait to ye. Nnaut nwe rabu-reha ja amu nimyoh marak nkah bo ramu nesait. Amu nesait saso boit mkah bo amu niit bo to, re kbe amu nno anu beta hrowyõ nmat amu fee.
1TH 2:10 Amu nhau nsya anu ro smot Yesus to, anu nmat amu nhaf oh. Wore weto to, amu nhau nno bo ro Allah wAit sai. Amu ja nno bo ro Ait ksoh sai. Amu wase nber safo ye. Ja Allah ysya anu nesait nmat nhar bo reto oh.
1TH 2:11 Nnaut nwe amu nhau nsya anu tna nisoh anu aro sait-sait mfi bi sait ro yisoh ku wait.
1TH 2:12 Amu nkyas watum kʼanu re kbe nisoh bosmot ranu. Ja amu nkyas bokyas mas mafer ro ati kʼanu. Amu nno feto afo re anu nhau nno bo mamyot bo ro Allah ksoh anu bno. Bi Ait ytu anu meen nmo nhau mam sawro ro Ait yamo Raja ybo. Mam tno to, kbe anu nhar bo yase rAit kaket ye.
1TH 2:13 Taja, tme, tao, tano na; bo roto sau naut ro mno amu nyoh asik mawat kʼAllah yoyo to fefo: Bokyas ro tiwya amu nkyas kʼanu to, anu nri tna nwe watum ro mbam kʼAllah oh meto. Anu nhar nwe bokyas reto to, bokyas ramu nesait sai fee. Anu nri watum rAit reto tna nfau nse kʼanu nhaf wanu sait-sait. Watum reto matak re misoh anu nhaf wanu. Watum ro Allah kbe mas mafer ro ati kʼanu ro smot Yesus Kristus. Anu beta nnan raa Kristen ro mhau mam provinsi ro Yudea. Jemaat ro Allah weto mkai bo ro mkair mbam raa wana mesait ye.
1TH 2:15 Raa wana ro Yahudi oh mi tiwya mame Tuhan Yesus ysya nabi na majat to. Tna ana mikyak amu ye to. Bo ro ana mno weto to, Allah knait. Tna ana mamo raa ro byoh kʼraa beta ye.
1TH 2:16 Ana hawe amu nkyas Watum ro Tuhan kʼraa mana roto. Ana hawe raa ro mbam raa mana roto makin mkai riof ro mase. Ana mno wa amu nkyas Bokyas Moof reto to, iro ro samyoh oh meto. Feto oh mi Allah kmo tna yno bo ro mkair btek mai kʼana ro Yahudi to.
1TH 2:17 Taja, tme, tao, tano na; tiwya anu betne anya, amu nmo si tna anu nhau akus si mam beto to. Anu betne anya mno amu sraujin toni tna amu nnaut anu yoyo sai. Amu nwe fooh aro re amu hah ne nma nmat anu u.
1TH 2:18 Amu nhau to, nnaut nwe hah ne nma nmat anu. Tiwya jõ tawe thah tama tmat anu menohe mfe. Kabes yabi (Iblis) yno wa.
1TH 2:19 Amu nwyan marak awya? Awya ro mari Bokyas Moof mbam kʼamu tna re mno amu simaut mase. Anu, raa ro Tesalonika fea! Meen ati ro Tuhan Yesus hah yama u to, kbe amu safuk anu fea! Kbe anu beta bros su bsya Tuhan Yesus.
1TH 2:20 Ati ro amu naut anu to, amu safuk tna simaut mase.
1TH 3:1 ⌞Amu nbo tuuf nri he bo ro mkair mama mai kʼanu ro nhau mam Tesalonika.⌟ Amu srau kero anu beta ntu nwe anu nhau fyi? ⌞Amu wase fares. Feto to amu nbis Timotius yama yo kʼanu.⌟ Tna amu mbewok nesait nhau akus sai mam kota ro Atena.
1TH 3:2 Timotius tait amu nfoh ramu ro ja ysya amu ykyas Bokyas Moof ro Kristus ye. Amu nbo tuuf refo ja nhau nno bo ro Allah ybis yawe amu nno. Amu nbis Timotius yama yawe kʼanu yawe, “Waa ma. Nnaut yyi ma. Bito ntak sai.” Ykyas feto re kbe anu nhau smot Kristus kaket matak.
1TH 3:3 Tiwya anu nesait nhar oh nwe kbe bo ro mkair mama mai kʼraa ro Kristen beta. Bo ro mama mai kʼanu reto to, Allah oh mi ybis mama meto. Tna mfo refo mabo oh. Feto to amu mbewok nbis Timotius yama ykyas bo kʼanu re kbe anu nros tu. Tna bito nsom sai, ne susu ma.
1TH 3:4 Tiwya amu nhau nsya anu beta fares to, amu nkyas bo refo kʼanu wia matim ye. Amu nwe kbe raa mama mno anu beta. Tna anu nesait nhar nwe bo reto mabo oh.
1TH 3:5 Jõ waa tnaut tawe kabes yabi (Iblis) sioh yno anu kawi. Be kbe kabes yabi sanet anu, yno re anu smot Yesus u fee. Be kbe yno anu beak Bokyas Moof (Injil) ro tiwya amu nkyas kʼanu. Feto oh mi jõ thau ste kait fee; jõ tbis Timotius yama yo kʼanu fooh. Jõ tbis ait yama ymat bosmot ranu. Tawe ymat anu tna hah yama ykyas kʼjõ.
1TH 3:6 Tna sai Timotius hah yama. Tna jõ simaut mase tari bokyas rait. Yawe bosmot ranu matak fares. Tna ait yawe anu ja beta natmof anya ye. Yawe anu nnaut amu yoyo ye, nwe soo aro fooh re anu beta nmat amu nsu nnaif, ja nahni ooh oh. Tna amu ksoh nma nmat anu beta ye.
1TH 3:7 Mfo refo bombra ro mkair-kar sor mama mai kʼamu mam befo. Menohe amu nri bo ro Timotius yama ykyas reto. Yawe bosmot wanu beta matak fares. Amu nri feto tna amu nnaut yyi anu u fee.
1TH 3:8 Amu nhar nwe anu smot Tuhan matak fares. Feto to amu nhau to, nhaf wanu tnok sai.
1TH 3:9 Allah yari skabuk wamu oh. Yno bo moof kʼanu oh meto. Amu simaut mase tna nyoh asik mase kʼbi Ait ye.
1TH 3:10 Rabu-reha to, amu skabuk Allah, nyoh nwe amu hah nma no kʼanu u, mkah bo nisoh bosmot wanu ro mabut fares.
1TH 3:11 Amu skabuk Allah, anu Bja ranu, ysya Yesus Kristus,Tuhan ranu. Amu nyoh nwe Ana misoh iso ramu; mno re amu nma fri anu beta u.
1TH 3:12 Tna amu skabuk re kbe Ait yno anu natmof anya myum mase, tna yno anu natmof raa roto beta ye. Nno feto mfi bo amu ja natmof anu beta ye.
1TH 3:13 Meen Tuhan Yesus yama u ysya raa wAit beta. Tna anu beta bros bmat Allah; anu Bja ranu. Kbe Tuhan ytu safo wanu yari. Tna amu nyoh bi Ait afo re Ait yisoh anu nto wanu mboh. Yisoh anu feto tibyo ymat anu yawe anu nber safo aro fee.
1TH 4:1 Taja, tme, tao, tano na; tiwya amu watum kʼanu nkyas iso ro Allah ksoh anu nkro re kbe Ait yhaf mnan anu. Tna amu nhar nwe anu ja nhau kro iso reto. Tna mfo refo amu ne sobu anu nwe kro iso reto kaket renti. Amu soh-soh anu feto mkah Tuhan Yesus yasom rAit.
1TH 4:2 Iso ro tiwya amu nbis anu nkro reto to, anu nhar oh. Tna mkah Tuhan Yesus yatak rAit to, amu nbis anu nkro iso reto.
1TH 4:3 Bo sau ro Allah ksoh anu nno to, yawe nhau nfi raa wAit ro mato mboh sai. Au oh mi mbeak wyah bo to fari.
1TH 4:4 Ait ybis anu raa sme aro sait-sait yoo fnya rait tna yhau su, yjin su ysya au mesait aran sai. Iso ro raa makin mawe moof meto. Tna raa ro mhau mno bo ro Allah wAit sai to, ja nkro iso reto ye.
1TH 4:5 Srau oot-oot fnya raa to ma. Nno bo nfi raa ro wase Allah to ma. Ana weto ja masmamo.
1TH 4:6 Soh raa sme aro yno-na bo to, ait yno bo ro mkair mai yafoh rait oh meto. Nnaut nwe kbe Tuhan yno bo ro samyoh btek mai kʼraa sme ro yno bo mkair mfi feto to.
1TH 4:7 Allah ysok anu bma bo kʼAit to, yawe anu bno bo ro mkair to ma tna bwyah ma. Ait ybis anu bhau bno bo wAit sai to.
1TH 4:8 Awya ro hawe bo yari bo refo fo, ait yiwana raa fee, yiwana Allah ro yoo Har rAit yse kʼanu oh meto.
1TH 4:9 Anu raa Kristen ja natmof raa anya. Bo reto anu beta nhar oh. Bo reto anu nri kʼAllah yesait. Feto to amu ne nkom bo reto nwe afat fee.
1TH 4:10 Jõ thar tawe anu natmof raa Kristen ro mhau mam provinsi ranu ro Makedonia reto beta. Menohe amu ksoh nwe anu ne nno u hair sai.
1TH 4:11 Nhau nsya raa anya knar sai. Nbet nkyas bo ro raa mati to ma. Nhau to, nesait nkah bo wanu sai mfi bo tiwya amu nkyas kʼanu to.
1TH 4:12 Nhau nno bo reto afo re raa ro mne mmat anu to, mawe, “Raa ro Kristen weto, ja raa ro mno bo ro moof sai.” Tna nhau nkah bo wanu feto re kbe anu nhau bo marak fee, tna kbe anu aro nwof bo ro raa roto mno mati fee ye.
1TH 4:13 Taja, tme, tao, tano na; nnaut raa Kristen ro mhai oh to, sraujin toni ma. Nhar nwe meen ana me mrok masen. Menohe raa ro smot Yesus fefares to, soh raa wana mhai to, kbe ana sraujin tu oh.
1TH 4:14 Anu bhar bwe Tuhan Yesus tiwya yhai tna ye yrok yasen. Feto anu bhar bwe Allah meen yno raa ro msam wai kʼYesus tna mhai to, kbe mrok masen ye. Mrok masen tna msya Ait mhau su ye.
1TH 4:15 Tiwya Tuhan yesait yawe kʼanu yawe meen anu ro bhau fares ati ro Ait yama to, kbe anu bsen bmo tru Ait wia fee.
1TH 4:16 Ati reto to, raa mari mai maboh mbam malaikatTuhan ro mase sau, tna raa mari saa buk-buk ro Allah mfi ye. Tna Tuhan yesait yroh ybam sawro rAit yama. Tna raa beta ro smot Tuhan Yesus tna mhai wia to, kbe ana mrok masen maut mamo mo kʼAit matim wia.
1TH 4:17 Tna fo anu ro bhau baam mam tabam refo fares to, kbe Allah tubat anu buut bmo ye. Meen anu buut bmo bsya ana ro mhai tna mrok masen wia ye. Tna anu beta bmo bkai Tuhan Yesus mam ayoh skes abyõ tna bmo bhau bsya Ait mamo snok mam hame wajin ye.
1TH 4:18 ⌞Soh anu aro nhai to,⌟ nnaut tna nkyas bokyas refo kʼanya. Bokyas refo kbe mno re anu sraujin toni fee.
1TH 5:1 Wore wo Tuhan hah yama u to, amu ne nwe kʼanu u nno fyi?
1TH 5:2 Anu nhar oh nwe wore wo Ait hah yama u to, kbe yama tubor. Kbe raa siwyan fefares tibyo ana mrok. Reto mnan fi wore wo raa mama msyõf bo ti sai. Ja raa siwyan fefares ye.
1TH 5:3 Tna raa ro wase Tuhan fares to, taro mawe, “Arin moof sai. Kbe bo mkair-kar aro mai kʼamu fee. Kbe amu nhau riof sai.” He mfe. Mam wore weto kbe Tuhan yno bo ro mkair btek mai abut kʼana. Kbe ana mkai riof fee. Mnan mfi fnya ro mhaf to. Au mhau, mhau to, tna wase wore wo au kborham tna kbe ku rau mbtek.
1TH 5:4 Anu fo raa ro Kristen. Anu nhau mam wore wo mamur u fee. Anu nhar nwe kbe meen tabam haberek tna Tuhan hah yama u. Nhar oh. Feto kbe ati ro Yesus hah yama u to, kbe anu nrok fee. Raa roto kbe mrok. Kbe mrok mnan mfi ja raa mrok mam ati ro raa mama msyõf bo wana ti sai.
1TH 5:5 Anu fo raa ro nhau mam wore wo maah. Anu fo nfi raa ro mhau mam wore mamur fee. Anu nhau mam mti fee.
1TH 5:6 Menohe raa taro wase bo ro Tuhan. Ana mfi raa ro mjin tu sorni ana sai. Menohe anu fo bhau siwyan yoyo wea sai. Bhau bkit wanu maah. Bhau btak bisoh anu kaket ye.
1TH 5:7 Raa ro mjin to, ja mjin mti. Tna raa ro bisir bo to, mbisir mti ye.
1TH 5:8 Menohe anu fo hayah. Anu ja bhau mam wore wo maah. Feto to anu ja bnaut anu re bno-na bo fee. Tna anu beroh smot Tuhan ye. Anu beroh bhaf moof kʼanya ye. Anu bno bo weto to, bno wa re kbe anu aro btek bwe mam iro fee. Anu bfi raa ro sbe. Ana myum bo wa mawe mno riof kʼana. Raa ro sbe ja myum ratan ro besi mkah bo mno wa kbe raa mama mame ana majat fee. Tna anu bmo wai Tuhan Yesus, kbe yoo riof ro mase yee kʼanu. Reto mfi raa sbe ja sbyõ watau ro besi. Ana myum bo wa mawe mno riof kʼana.
1TH 5:9 Allah ysok anu fo. Ysok tna ksoh yawe meen yno bo ro mkair mbtek mai kʼanu to fee. Bi Ait ysok anu tna ksoh yawe Yesus KristusTuhan ranu yoo riof ro mase yee kʼanu.
1TH 5:10 Tiwya Ait yhai. Yhai afo re kbe anu bhai tibyo fee. Yawe anu ro bhau baam mam tabam refo fares tna bsya anu ro bhai wia oh, meen anu bsen beta bmo bhau su bsya Ait ye.
1TH 5:11 Nkyas bokyas ro moof weto kʼanya re kbe anu nhau smot Yesus matak. Nkyas bo moof kʼanya re kbe anu aro waa fee. Tna sraujin fee. Tna nnaut yyi fee ye. Thar tawe anu ja nno bo weto, nno kaket oh.
1TH 5:12 Taja, tme, tao, tano na; hartu raa ro Allah yse mbo anu. Ana weto ja mur-mur mkyas Tuhan Yesus yasom kʼanu. Tna ana ja watum bo kʼanu ye.
1TH 5:13 Ana mno bo ro moof feto. Tibyo natmof ana tna hartu ana ye. Nhau to, niranya kaket nsya raa anya ye.
1TH 5:14 Taja, tme, tao, tano na; soh raa wanu aro ja yno bo kbik-bak to, nmo nastako ait. Tna soh raa ro sraujin aro to, nmo nkyas bo moof kʼana re ana sorni sraujin wana. Tna ana ro smot Tuhan kaket fee, nmo nkyas bo re nno bosmot rana me matak u. Tna sneh-sneh nsya raa anya beta ye.
1TH 5:15 Kaket anu: Soh raa mno bo ro mkair mai kʼanu to, ne nno bo ro mkair ska mai si kʼana ma. Nno bo moof kʼraa wanu ro smot Yesus ye. Tna nno bo moof kʼraa roto taro ye.
1TH 5:16 Nhau to, simaut mase yoyo sai.
1TH 5:17 Tna skabuk yoyo ye.
1TH 5:18 Anu fo raa ro smot Kristus Yesus. Allah ksoh yawe bo bawya sai ro mama to, nyoh asik mase kʼbi Ait.
1TH 5:19 Tna soh Har ro Tuhan mkyas bo kʼanu to, nri kaket, niwana bokyas reto ma.
1TH 5:20 Bokyas ro Tuhan ykyas kʼraa (mfi raa ro nabi) to, niwana bokyas rAit reto ma.
1TH 5:21 Tna bokyas ro raa mkyas kʼanu to, sanet wia. Ntu tna nmat sas kaket wia. Bokyas ro moof to, nbo nno.
1TH 5:22 Bo ro mti safo to, beak fari.
1TH 5:23 Allah tait Raa ro yatak yno raa mhaf tnok. Amu nyoh kʼAit re yama yatam anu re nhau nno bo wAit yoyo sai. Yno anu nhaf, srau wanu beta to mhau moof mfi raa ro wase mber safo. Amu nyoh kʼAit re yatam anu feto mamo snok mam oon ro Yesus Kristus hah ye yama to.
1TH 5:24 Allah ysok anu ytu yawe nma no kʼAit. Tna bo ro Ait yawe yno to, kbe yno tu oh.
1TH 5:25 Taja, tme, tao, tano na; skabuk amu nbo tuuf ye.
1TH 5:26 Nmah meen kʼanya ye tna hana anya ye.
1TH 5:27 Mkah Tuhan yatak rAit, amu nbis anu nwe baca aam refo kʼraa ro Kristen beta ro mhau mam Tesalonika, afo kbe ana mari beta ye.
1TH 5:28 Amu skabuk Allah re Tuhan ranu Yesus Kristus yatmof anu.
2TH 1:1 Aam refo mbam kʼamu Paulus, Silas ysya Timotius. Amu nmah meen kʼanu jemaat ro Tesalonika. Anu smot Allah, anu Bja ranu ysya Tuhan Yesus Kristus.
2TH 1:2 Amu skabuk Allah, anu Bja ranu, nyoh re Ait ysya Tuhan Yesus Kristus kbe matmof anu tna mno re anu nhau nhaf tnok sai.
2TH 1:3 Taja, tme, tao, tano na; ja anu smot Yesus Kristus kaket renti naut. Tna anu natmof raa anya to, ja nno matak renti naut ye. Tibyo amu nyoh asik mase kʼAllah yoyo.
2TH 1:4 Bo weto oh mi amu nkyas jemaat ranu kʼraa. Wore wo amu nmo nirer jemaat Allah roto to, amu nkyas anu. Amu nwe, “Ja bombra ro samyoh mama mai kʼjemaat ro Tesalonika. Tna raa sikowah ana ye. Menohe bosmot rana matak sai fares.”
2TH 1:5 Anu smot Yesus oh mi bo mkair ja mbtek mai kʼanu. Allah ymat he anu beroh nsom bo mkair-kar feto. Tibyo yawe anu noof nmo nhau mam sawro ro Ait yamo Raja ybo. Anu bmat bo weto to, tna bhar bwe ati ro Allah hre susai ytu srah to, Ait soko raa sait ye fee. Ja yno bo ro moof sai.
2TH 1:6 Allah ja yno bo moof toni. Tna meen Ait yno bo ro mkair ska kʼraa ro mno bo ro mkair mai kʼanu to, riryõn.
2TH 1:7 Tiwya raa mno bo ro mkair mbtek mai kʼanu menohe Allah kbe yoo riof yee kʼanu riryõn, tna yoo riof yee kʼamu ye. Meen Ait yno bo weto beta mam ati ro Tuhan Yesus hah ye yama ybam sawro rAit. Yama mkah yatak rAit ro mase. Kbe yama ysya malaikat wAit mroh mama mam tafoh ro mait warah to.
2TH 1:8 Tna Ait kbe yno bo ro mkair ska kʼraa ro wase Allah msya raa ro hawe mari tna kro Bokyas Moof (Injil) ro Tuhan Yesus ranu.
2TH 1:9 Bo ro samyoh meen mbtek mai kʼana mamo snok hame wajin. Tna Tuhan kbe beak ana frok mbam kʼAit mamo mhau hayah. Meen ana weto mahni tak msya bo yase rAit ye.
2TH 1:10 Bo weto beta meen mabo mam ati ro Ait hah yama. Yama to, kbe raa wAit mbaut yase rAit. Tii anu nri bokyas ro amu nkyas kʼanu to, nfot nse kʼanu. Tibyo meen anu bibi Ait su nsya raa wAit beta ro ja smot Ait.
2TH 1:11 Amu nnaut bo weto tna re amu skabuk anu yoyo. Amu skabuk re kbe Allah ymat anu yawe anu noof tna ytu anu nmo raa mana rAit ro ybo. Mfo refo anu nwe nno bo ro moof. Anu smot Yesus tibyo nwe nkah bo wAit ye. Tibyo amu nyoh kʼAllah re kbe yoo yatak rAit yee kʼanu re anu nno bo weto kaket. Re kbe yno bo weto beta mrok moof.
2TH 1:12 Raa mmat anu, raa ro Kristen to. Tna amu skabuk bo ro riwai weto, afo re raa ro mmat anu to, mmat bo yase ro Tuhan rAit ye. Re kbe raa bibi Tuhan Yesus. Tna re raa mmat bo ro anu nno mam ait yasom to, kbe bibi anu ye. Boatmof ro Allah ranu ysya Tuhan Yesus Kristus oh mi yno bo weto beta mabo.
2TH 2:1 Taja, tme, tao, tano na; jõ tkyas baro kʼanu betoo wore wo meen Tuhan ranu Yesus Kristus, kbe hah ye yama tabam refo u. Tkyas wore wo Ait yakah anu yamo yse mberur su bhau mam wo sau bysa Ait to.
2TH 2:2 Amu nri he raa baro mkyas kʼanu mawe Tuhan Yesus hah yama u oh. Waa ma, bo reto mabo fefares! Soh raa mawe Har ro Allah merif bo reto kʼana to, nri ana ma! Soh raa mawe amu nkom bokyas reto mam aam to ye, nri ana ma! Amu nkyas bo feto fee. Nnaut yyi ma. Bo reto mabo fefares.
2TH 2:3 Soh fyi-fya sai to, nri bo ro raa mkyas sioh anu to ma. Wore wo Ait hah yama fefares to, bo ewok kbe matim wia: Ro sau to, raa mawat ro ja kro Tuhan to, kbe haberek kbor tna hawe kro Ait u. Tna ro ewok to, raa ro yetsu mnis safo sait yama wia. Ait refi Allah siwyan mkah bo yamo yait mam tafoh ro mroon.
2TH 2:4 Ait retait kbe safuk tawyõ ait uu kar yiwrek bo taro sor ro ja raa smot mfi allah ye. Tna ait bito yaut yamo hre mam Samu ro Allah tna yawe ait tait Allah.
2TH 2:5 Nnaut nwe mam wore tiwya jõ thau tsya anu to, bo wefo beta jõ tkyas kʼanu oh.
2TH 2:6 Bo ro mno wa re ait ro yetsu mnis safo retait frok yama fefares to, anu nhar oh. Tna meen ati ro Allah ybis to, kbe ait retait frok yama.
2TH 2:7 Tak mkair ro ja misti raa mno iro to, mno bo rau oh. Tak reto mhau mno bo rau to, mno wai sai fares. Menohe raa sait ririt tak reto fares. Meen Tuhan ybis tna ait ro ririt tak ro mkair reto kbe bitsre tak reto.
2TH 2:8 Tna kbe raa mmat ait ro yetsu mnis safo retait frok yama. Menohe ati ro Yesus Kristus hah ye yama to, Ait kbe yame ait ro yno safo retait mkah yafos rAit. Tna fo Yesus frok yama to, tna yase rAit yno raa retait yajat ye.
2TH 2:9 Raa ro yetsu mnis safo retait meen frok yama. Tna wore wo yhau mam tabam refo to, kbe yno bo ro msai mkah yatak ro kabes yabi (Iblis) rait. Kbe yno bo ro msai, tna sair bo ro hnah afo re raa mhar yatak rait. He mfe. Bo ro ait ysair weto to bo sioh beta.
2TH 2:10 Wore weto to, raa msis kbe hawe mari watum Allah ro ati. Soh raa ksoh mari tna mbo watum ro Allah reto, kbe ana mkai riof ro mase. Menohe ana weto to, hawe. Ana weto to, meen mait mam tafoh ro mroon reto. Ana ksoh smot bo mkair-kar. Ait ro yetsu mnis safo retait ja sioh ana sai.
2TH 2:11 Reto oh mi Allah ybis bo ro mkair reto mama sioh ana. Tna ana mari ait ro yetsu mnis safo retait tna mfot bokyas rait mse kʼana.
2TH 2:12 Ana weto mari bokyas ro sioh feto. Ana miwana watum ro Tuhan. Raa weto to, ja nksoh mno iro. Tna kbe Tuhan yno safo mana ymit kʼana weto beta.
2TH 2:13 Taja, tme, tao, tano na ro Tuhan ksoh; tiwya tinyi Allah ysok anu oh yawe yoo riof yee kʼanu. Har rAit misoh anu re nhau nno bo ro Allah wAit sai. Tna anu nri watum rAit tna nhar nwe bo mabo. Au oh mi Allah yoo riof yee kʼanu. Feto oh mi rabu ti wawa to, amu nyoh asik mawat kʼAllah.
2TH 2:14 Bokyas Moof (Injil) ro amu nkyas kʼanu refo oh mi iso ro bi Ait ytu anu nma no kʼAit to. Allah ytu anu nma no kʼAit to, yawe anu nsya raa wAit taro, kbe nhaf nse bo yase ro Tuhan ranu Yesus Kristus rait to.
2TH 2:15 Taja, tme, tao, tano na; reto oh mi amu nwe kʼanu nwe, “Nros ntak!” Ja amu nkyas watum kʼanu, tna nkom aam tiim kʼanu ye. Nbo watum ramu reto kaket matak ye.
2TH 2:16 Amu skabuk Allah Bja ranu. Ait ja yatmof anu. Yatmof anu tna ykyas bo moof kʼanu mamo snok mam hame wajin. Tna Ait yno re anu binaut sne Yesus hah yama u mkah simaut ro mase ye. Amu nyoh re kbe Allah ysya Tuhan ranu Yesus Kristus
2TH 2:17 mkyas bo ro moof kʼanu re kbe anu nhau smot Yesus matak. Amu nyoh kʼAna mbewok re kbe Ana moo matak rAna mee kʼanu. Feto kbe anu ntak nkyas bokyas ro moof yoyo tna nno bo ro moof yoyo ye.
2TH 3:1 Taja, tme, tao, tano na; tiwya tinyi amu nkyas watum ro Tuhan kʼanu. Tna anu nri tna nse mam nhaf mato wanu. Mfo refo jõ tawe anu beta skabuk amu afo re watum ro Tuhan, kbe amu nkyas renti mam rabin taro sor ye. Skabuk re kbe raa mari watum reto tna mawe mbo mno kaket ye.
2TH 3:2 Raa makin sor ro mari watum refo to, ana taro smot fee. Ana weto baro mimara mtuk. Taro saim bo mkair-kar mai kʼamu. Feto to, skabuk amu afo re Allah kmot amu wa.
2TH 3:3 Tuhan tait yoof toni. Bo ro bi Ait yawe to, kbe yno tu oh. Kbe Ait yno re bosmot ranu matak. Tna kbe Ait kmot anu ye mbam bo mkair ro kabes yabi (Iblis) yno mbtek mai kʼanu to.
2TH 3:4 Amu nhar nwe Tuhan yno re anu ja nbo nno bo beta ro amu nkyas kʼanu. Tna amu nhar nwe kbe meen anu nbo nno bo weto ye. Kbe anu susu fee.
2TH 3:5 Amu skabuk re kbe anu nhar boatmof ro Allah rAit. Tna mam wore wo bo mkair mai kʼanu to, amu skabuk re kbe anu bito nsom bo reto, tna susu fee. Menohe nros ntak nfi bo tiwya Yesus Kristus yros yatak tna bito yasom bo ro mbtek mai kʼAit to ye.
2TH 3:6 Taja, tme, tao, tano na; amu nbis kʼanu mkah Tuhan Yesus Kristus yasom rAit nwe, soh raa wanu aro haweboh tna mari watum ro amu nkyas kʼanu fee, kbe niranya nsya ana weto ma. Sesa anu sai.
2TH 3:7 Anu nhar nwe, tii wore wo amu nhau nsya anu to, amu haweboh fee. Amu nesait safo nkah bo wamu. Anu beta nesait nmat bo ro amu nno feto. Tna tawe anu kro nno mfi bo tiwya amu nno feto ye.
2TH 3:8 Tiwya amu sohmaam bo raa to, makus fee. Amu noo pitis nee. Mti baas to, amu nsafo nkah bo wamu afo re amu nno anu hrowyõ ma.
2TH 3:9 Amu nesait nkah bo wamu sai feto amu raabis ro Kristus wAit. Ja raa jemaat moo boit mee kʼamu niit sai, he mfe. Amu safo nkah bo wamu nesait sai nimyoh marak. Amu nno feto afo re anu nmat bo moof ro amu nno to, tna kro nno bo mfi bo amu ja nno feto ye.
2TH 3:10 Tiwya wore amu nhau nsya anu fares to, amu nkyas kʼanu nwe, “Awya ro haweboh to, ja ykah bo fee to, noo boit nee kʼait retait yait ma!”
2TH 3:11 Raa mawe kʼamu mawe raa taro ro mhau msya anu sor to, ja haweboh. Ana mkah bo aro kʼana fee. Ana mhau mkyas bo ro raa mati sai. Reto oh mi amu nkyas bo weto kʼanu.
2TH 3:12 Mkah Yesus Kristus yasom rAit, amu nbis raa weto nwe, “Nhau knar! Tna nkah bo aro kʼanu nesait. Re kbe anu sohmaam mafer mbam bo ro anu nesait nkah to.”
2TH 3:13 Taja, tme, tao, tano na; beroh nno bo ro moof. Ne hrowyõ ma.
2TH 3:14 Mfi bo raa jemaat ranu, taro hawe mari bo ro amu nkom wefo fo, sesa anu sai. Nhau niranya nsya ana ma, re kbe ana hrenaut.
2TH 3:15 Menohe nmat ana mfi raa ro byoh to ma. Watum ana rere sai, mfi bo nao na kʼanya bo feto ye.
2TH 3:16 Tuhan tait yatak yno re anu bhau bhaf tnok. Tna amu skabuk nyoh re anu nhau nhaf tnok mam bombra beta ro anu nno. Tna amu nyoh re kbe Ait yhau yatam anu beta yoyo ye.
2TH 3:17 Meen mbam kʼjõ Paulus. Aam refo mbam kʼjõ. Anu nhar bokom ajõ to mfi fefo.
2TH 3:18 Amu skabuk Allah re Yesus KristusTuhan ranu yatmof anu beta. Au oh meto.
1TI 1:1 Aam refo mbam kʼjõ, Paulus. Allah tait Raa Sotak ranu. Tna anu bhaf wai Kristus Yesus. Ana mbewok mbis jõ tamo raabis ro Yesus rAit.
1TI 1:2 Timotius; jõ tkom aam refo tiim kʼnyõ. Tii jõ betoo bosmot refo kʼnyõ. Tna nyõ nrok smot Yesus ye. Feto to jõ tawe nyõ nfi ku ajõ. Jõ skabuk Allah, Bja ranu, ysya Tuhan ranu Kristus Yesus afo re ana mbewok matmof nyõ tna mno re nyõ nhau nhaf tnok sai.
1TI 1:3 Tiwya jõ sikba nyõ tamoʼt oo ro Makedonia to, jõ tbis nyõ nhau wea mam kota ro Efesus. Guru ro mkyas watum ro Tuhan mam kota reto to, baro mkyas sre. Feto to tawe nyõ nhau mam beto tna nawe wa guru weto nawe, “Nkyas watum ro Tuhan to, nkyas maja rau kaket!”
1TI 1:4 Nawe wa raa nawe, “Nkyas mna ro ti ro wia ma! Nkyas masmair biin wanu yoyo to, mnan oh.” Raa ro mkyas bo weto to, saso mak sai meto. Mafer marak sai. Menohe watum ro Tuhan to, kbe raa mari tna smot Ait tibyo mkai mafer ro moof.
1TI 1:5 Bo ro Allah ybis mam watum rAit reto, mafer rau oh mi raa matmof anya. Soh raa mhau mato mboh, tna mhau mhaf moof tna mhau smot Yesus kaket; mkah srau sau sai, mkah srau ewok fee; kbe ana weto ja matmof raa anya ye.
1TI 1:6 Raa taro me haberek, mhau moof feto fee. Ana weto mamo mweh iso ro mkair sau hayah. Tna ja mkyas bokyas ro mafer marak sai.
1TI 1:7 Ana mawe mamo guruagama Yahudi. Ana mbetoo Watum ro Musa kʼraa. Menohe ana wase Watum reto. Ana mbetoo Watum reto mfi ana mhar kaket menohe ana mesait srau maja rau kaket fee.
1TI 1:8 Anu bhar bwe, soh raa kro Watum ro Musa reto, mbo mno kaket to, kbe ana fri mafer.
1TI 1:9 Tna Allah yoo Watum reto yee afo kbe misoh raa ro ja mno bo ro mkair fo: Raa ro miwer Watum reto ye, msya raa ro ja hafrah raa ro mase ye, tna msya raa ro miwana Allah ye, raa ro mno iro ye, raa ro wase bo skabuk Allah fee ye, tna msya raa ro mame raa majat, ro mame maja, mame mme majat ye. Allah yoo Watum yee re kbe raa weto mmat tna waa.
1TI 1:10 Tna raa ro mwyah ye, tna msya raa sme ro msya anya ye, tna msya raa ro ja mfot raa mabu ye, raa ro sioh-sah ye, tna awya sai ro yiwana watum ro Tuhan roto aro ye. Watum rAit to moof mkah anu raa bbo bno to.
1TI 1:11 Tna Watum rAit reto mamo mamyot si Bokyas Moof ro Allah (Injil) ye. Tna Allah ro ja anu bbaut tait, sair Injil rAit ro msai reto. Tna Injil rAit reto, Ait yehau kʼjõ tbo tkyas renti.
1TI 1:12 Jõ tayoh asik mase Kristus Yesus, Tuhan ranu ro yoo yatak yee. Ait yawe jõ raa ro thaf ntrot tibyo ybis jõ yawe tamo tno bo rAit.
1TI 1:13 Tiwya jõ fi raa ro tamus bi Ait. Tna jõ safo tno bo mkair mai kʼraa wAit ye. Menohe Yesus yatmof jõ. Ti weto to, jõ smot Ait fefares tna jõ wase bo ye. Au oh mi Yesus yatmof jõ.
1TI 1:14 Tuhan ranu yatmof jõ toni. Jõ smot Kristus Yesus tibyo Ait yno jõ smot Ait kaket. Tna yno jõ thafri raa anya ye.
1TI 1:15 Bokyas ro mrof refo fo bo ro ati. Feto to nri nbo kaket: “Kristus Yesus yama tabam refo mkah yoo riof yee kʼraa ro ja mno iro.” Tna jõ fi tno iro mase miwer raa weto beta.
1TI 1:16 Menohe Tuhan yatmof jõ: Jõ fi tno iro mase sai feto tna Tuhan yatmof jõ. Yno re kbe raa mmat tna mhar mawe Kristus Yesus tait raa ro yhaf sneh. Kbe raa mmat feto tna smot Ait. Tna mkai riof ro mase ye. Meen ana weto mhau hame wajin ye.
1TI 1:17 Jõ ksoh raa beta waa kʼAllah. Ait tait Raja ro yatak ybo tabam refo. Ybo ti ro wia mamo snok mam hame wajin. Ait meen yhau yroon yum. Ait raa mmat fee ye. Tna Ait sait aran ro yase. Nma, anu beta hawyõn tna bbaut Ait mamo snok mam hame wajin. Amin: Mabo oh!
1TI 1:18 Timotius, ku ajõ; jõ tsi bo kʼnyõ: Nari bo ro jõ tkom kʼnyõ refo beta. Tiwya raa mkyas bo kʼnyõ, mkyas bo ro mbam kʼAllah. Tna bo ro jõ tsi refo mamyot bo ro tiwya ana weto mkyas ye. Kbe meen bo mama mai kʼnyõ. Tna soh nyõ nnaut bokyas reto to, kbe nyõ nros natak tna beroh nno bo ro Tuhan.
1TI 1:19 Kbe nyõ nhau to smot Ait kaket. Tna kbe nyõ nhar mam nhaf anyõ nwe ja nyõ nno bo ro moof ye. Raa taro to, ana mhar bo ro moof menohe ana haberek tna hawe bo mbo mno u fee. Tna tis rau to ana smot Tuhan Yesus fee ye: Ana bitsre bosmot rana sai makus.
1TI 1:20 Himeneus ysya Aleksander mno feto oh: Bosmot wana ana beak makus sai. Tibyo jõ tsan ana kabes yabi (Iblis) afo re ana waa tna mashana tna kbe mamus Allah u ma.
1TI 2:1 Ro sau to, jõ tkyas bo skabuk: Ati ro anu skabuk to, skabuk bo aro rau-rau: Nyoh boyoh ye tna skabuk raa beta ye. Soh-soh bi Ait re kbe yban anu mam bo beta ro anu nno, tna nyoh asik mase kʼbi Ait ye:
1TI 2:2 Skabuk raja na sor msya raa ro mase taro beta re misoh raa wana kaket. Afo re anu bhau kbum, mam arin ro moof. Skabuk re kbe anu bhau bno bo ro Allah ksoh, tna waa bi Ait ye.
1TI 2:3 Allah, Raa Sotak ranu, ksoh yawe anu skabuk feto.
1TI 2:4 Ait ksoh yawe raa beta kbe mkai riof ro mase. Tna ksoh yawe raa beta mhar watum rAit ro ati.
1TI 2:5 Au oh mi: Allah tait sait aran yase. Tna Kristus Yesus yamo Raa Sotak, yros susai masuf ysya Allah tna ysya anu ye. Yesus fi Raa ro
1TI 2:6 ysan yetsu rAit mkah raa mame. Anu raa beta bno iro. Menohe Yesus bitsre Ait raa mame riryõn. Yesus yno bo reto mam ati ro Allah yawe.
1TI 2:7 Tna Allah ybis jõ tama tkyas bo refo. Yawe jõ betoo bosmot ro ati refo kʼraa mana ro Yahudi to fee. Yawe jõ tamo tkyas kʼraa mana roto makin sai. Bokyas refo mabo, jõ sioh fee.
1TI 2:8 Jõ tkyas kʼraa sme beta tawe, “Nisoh anu re nhau nno bo ro Allah wAit sai. Nisoh anu wia feto, tna tubat ntem wanu abyõ skabuk nkyas bo kʼAit. Tna kmo anya to ma. Ntoh anya to ma.”
1TI 2:9 Tna jõ tkyas kʼfnya beta tawe, “Nyum ratan ro kmun. Nyum ratan ro mabyoh maut afo re raa mmat tna mbibi anu to, ma. Nyum ratan ro afo sai. Naya nana toni ma. Fayir anu toni ma.
1TI 2:10 Anu ro nwe anu ja nhau nrat nsya Allah to, nhau nno bo ro moof sai.
1TI 2:11 Ati ro jemaat skabuk su to, anu fnya hre shait tna knar nri watum sai. Nsu heyut tna nri raa ro mase mbo anu.
1TI 2:12 Soh anu fnya nmo guru to, nwatum raa sme to ma. Nbis-bas bo kʼraa sme to ma. Shait sai nri bo ro ana mawe.”
1TI 2:13 Tiwya tinyi rau to, Allah yfen Adam wia yatim tna yfen Hawa.
1TI 2:14 Tna kabes yabi (Iblis) besruf Adam fee. Fnya oh mi Iblis besruf tna au mbtek mam iro to.
1TI 2:15 Ro moof to, fnya mhau smot Yesus, tna matmof raa anya, tna mhau mno bo ro Allah wAit sai, tna mbo ana kaket to. Soh fnya mbo bo weto mno to, kbe mabe ku tna mkai riof mbam Allah.
1TI 3:1 Bokyas refo fo bo ati: “Raa ro yawe yamo majelisjemaat to, ait ksoh yaut hre mam hroh ro moof.”
1TI 3:2 Anu nsok raa ro yamo majelis wanu sait to, nsok kaket. Nsok raa ro wase mber safo be kbe raa mkyas-kas ait. Nsok raa ro ja yno bo mfi fefo: Raa ro yoo fnya sau aran sai, ro yiramu ait rere, ro ynaut ait re yno-na bo fee, ro ja yitrah amah rait kʼraa, tna ro yhar bo watum raa ye.
1TI 3:3 Ro ksoh yata anggur fee, ro kmo yoyo fee, ro sneh sai, ja yiranya ysya raa roto ye, tna yasu mase mkah pitis fee ye.
1TI 3:4 Nsok ait sait ro ja yisoh fnya rait msya ku wait kaket moof. Tna ybo ku wait kaket re ana waa ait tna mari bo ro ait yawe.
1TI 3:5 (Soh ait tait wase ybo fnya msya kukek wait kaket fee to, kbe ait yisoh jemaat Allah to fyi?)
1TI 3:6 Nsok raa ro yashana smot Yesus tna sai to ma. Soh ait tna sai yamo raa ro Kristen to, tna yamo majelis to, kbe ait tawyõ ait ai tna btek yno iro mnan tiwya tinyi kabes yabi (Iblis) yno ye. Feto to nsok raa sait ro smot Yesus ooh oh.
1TI 3:7 Nsok raa ro yasom rait to moof kbe yamo majelis. Raa retait ja raa ro mne mhar ait tna mawe ait yasom rait to moof ye. Soh mfe to, kbe raa maun, tna ait btek mam kayah ro kabes yabi saro to.
1TI 3:8 Raa ro mamo diaken to, nsok raa ro ja mfi fefo: Raa ro waa Allah, ro srau ewok fee, ro ksoh mata anggur fee, ro srau mnaut bosatoh re kbe mno bo mkair fee ye.
1TI 3:9 Raa ro mbo bosmot ranu matak. Bosmot ranu refo to, maja rau taro samyoh. Tna raa ro mamo diaken to, nsok raa ro mhar bo maja weto tna mhar mam mhaf mato mawe bo mabo.
1TI 3:10 Raa ro mawe mamo diaken to, nsok ana fooh ma. Nsanet raa weto wia. Tna soh ana mhau mno bo ro moof to, kbe nsok ana nse mamo diaken mno bo ro jemaat.
1TI 3:11 Nmat sas raa retait yfain ye. Diaken yfain to, fnya ro ja waa Allah, ro ja mkyas mun-mun raa fee, ro miramu au rere, tna raa taro mmat au, tna mhar mawe bo bawya ro au mno to ja mno bo moof. Au wase bo sioh raa.
1TI 3:12 Raa ro mamo diaken to yoo fnya sau aran sai. Raa ro ja yisoh kukek msya raa wait kaket moof ye.
1TI 3:13 Soh diaken yno bo ro jemaat kaket moof to, kbe raa hartu ait. Tna ait yhar yawe bosmot rait to, bo ro ati. Tibyo ja ykyas Kristus Yesus yasom msya bosmot rait to, ykyas kʼraa kaket ye.
1TI 3:14 Bo wefo beta jõ tkom tiim aam refo kʼnyõ. Jõ tksoh tama tmat nyõ fooh, tna tiim aam refo matim wia kʼnyõ ye.
1TI 3:15 Soh jõ tarak fares to, nmat aam refo re kbe nhar iso ro jemaat mhau mno bo ranu. Anu fo raa ro Allah wAit. Allah ro yaam. Anu raa jemaat to, ja nros tubat watum rAit ro ati. Anu ja nros kaket nbo watum rAit matak. Anu nfi sankaf ro mros matak ja tubat amah rau ye.
1TI 3:16 Bosmot ranu maja rau baro samyoh: Ja raa srau mnaut fooh to fee ye. Menohe anu ro smot Ait to bhar bwe: “Yesus yama tabam refo. Yama tna yetsu rAit yfi raa sai. Tna Har ro Tuhan mawe Ait raa ro wase yber safo. Tna malaikat sor mmat Ait ye. Tna raa mkyas Ait yasom kʼraa mana ro mhau mam tabam refo beta. Tna raa smot Ait. Tna Allah tubat Ait yakah yamoʼt sawro rAit.”
1TI 4:1 Har ro Tuhan mawe ayõ ro meen wono to, raa ro ja smot Kristus baro kbe haberek kbor wana tibyo smot Ait u fee. Ana me mari har ro besruf raa, tna kro bokyas ro kabes.
1TI 4:2 Bokyas wefo mbam kʼraa ro hren ksuk. Raa weto mamo wan-wan sai. Ana mkyas bo siroyõ. Ana mhaf mkair. Soh Har ro Tuhan mbesi bo kʼana to, ana mari fee.
1TI 4:3 Ana weto mawe wa kʼraa mawe, “Noo fnya ma!” Mawe raa mhau sai semana bana. Mawe fnya mhau bana seren sai. Tna raa weto mawe wa mawe, “Nbo kak ma!” Nri ana weto ma. Nnaut nwe kak to, tii Allah yfen mkah bo raa mabo. Kak weto Ait yfen mkah bo anu raa Kristen to bbo. Anu ro smot Kristus fo bhar iso rAit ro ati re ja anu byoh asik mase kʼAllah tna bbo sai.
1TI 4:4 Bombra ro Ait yfen to weto beta moof. Soh raa mayoh asik mase kʼAllah mkah bo ro ana mabo to, bo sohmaam ro mbau to, aro fee.
1TI 4:5 Watum ro Allah msya skabuk ranu to, mno bo weto beta to, bo ro Allah yawe moof sai.
1TI 4:6 Timotius; soh nyõ betoo bo ro riwai weto beta kʼraa Kristen mam weto to, reto moof. Nyõ nno bo ro Kristus Yesus ybis kʼnyõ nno to, kaket oh meto. Nno feto to, nyõ nkro iso ro bosmot ranu kaket, tna ja nari maja rau ro ati kaket ye.
1TI 4:7 Nnaut oh: Bokyas mna ro mafer marak to, mbeak fari. Nari ma. Beroh nhau nrat nsya Allah.
1TI 4:8 Mfi bo raa mur-mur yno yetsu rait yrok yoof to, mafer reto mabuf sai. Menohe raa beroh mhau mrat msya Allah to, mafer mase mkah bombra beta; mfo refo ye tna meen mkah makyon rouu ye.
1TI 4:9 Nari oh: Bokyas refo bo ro ati!
1TI 4:10 Anu fo bsam wai kʼAllah. Ait tait Raa Sotak ranu, Allah ro yaam. Anu bhar bwe bo ro Ait yawe to, meen mabo. Ait yawe yoo riof yee kʼraa beta. Anu bsam wai kʼYesus tibyo ait ysan riof kʼanu beta. Au oh mi anu safo bkah bo rAit.
1TI 4:11 Timotius; nkyas tna mbetoo bo wefo beta kʼjemaat ⌞ro Efesus reto.⌟
1TI 4:12 Soh raa miwana nyõ tna mawe nyõ mere fares to, hrenaut ma. Nhau nbo kek mram iso ro moof kʼraa Kristen taro: Nkyas bokyas ro moof sai. Nno bo ro moof. Natmof raa, smot Yesus kaket, tna waa kʼAllah re kbe nno iro fee. Soh raa jemaat reto mmat bo ro nyõ nno weto to, kbe ana mno mfi bo nyõ nno feto ye.
1TI 4:13 Tna wore nyõ nhau ste jõ tama to, nmur-mur baca Bokom ro Allah kʼjemaat. Tna betoo maja rau kaket re kbe raa mari mbo mno ye.
1TI 4:14 Tiwya majelisjemaat skabuk nyõ. Ana mawah matem wana mse kʼnyõ abyõ. Tna nabi na mawe Allah yoo bouum ysan kʼnyõ. Bouum reto mno kbe nyõ nno bo ro jemaat kaket. Feto kbe nmur-mur nno bo weto kaket!
1TI 4:15 Beroh nno bo weto kaket afo kbe raa beta mmat mawe bo ro nyõ nkah weto moof miwer bo ro tiwya nyõ nno ye.
1TI 4:16 Hamer nkyas watum ro Allah maja rau ro ati. Beroh nno bo wefo beta kaket afo kbe nyõ nesait nkai riof tna nsya raa makin ro mari nyõ to, kbe mkai riof ye.
1TI 5:1 ⌞Mfi bo raa yabi sait yno bo mkair to,⌟ bhah ait ma. Hartu bi ait tna nerif iso ro moof kʼait yfi bo nyõ naja anyõ ye. Nmat raa sme ro tna mfi bo nao na ye.
1TI 5:2 Nmat fnya mabi mfi bo nme anyõ ye. Tna nmat ku ro ano mfi bo nano na sai ye. Nmat ana to, waa Allah re nno iro to ma.
1TI 5:3 Nkyas kʼraa jemaat reto nbis nawe ana mmat fnya semit ro mesait mhau kar. Nno be ana weto mhau bo marak.
1TI 5:4 Semit ro ku wana aro mhau fares, soh mfe semit ro matat wana mhau fares to, nbis raa wana weto kbe mmat semit rana. Mmat ana to, sroh bo ro tiwya fai au mno kʼana to. Reto to, Allah ksoh.
1TI 5:5 Semit taro mesait mhau kar. Raa ro mmat ana aro fee. Ana msam wai kʼAllah ro ymat ana sai. Mti-baas to ana skabuk Allah tna msan ana kʼBi Ait ymat.
1TI 5:6 Menohe semit roto taro mhau mnaut bo ro tabam sai. Ana mnaut Allah fee. Ana wefo mhau maam fares. He mamos wana ro smot Allah to, mhai oh.
1TI 5:7 Nkyas bo wefo beta kʼraa jemaat ye. Soh ana mno bo moof kʼsemit wana to, kbe raa mkyas-kas ana fee ye.
1TI 5:8 Tna mfi bo raa sait hawe ymat raa wait to, bhah ait nawe, “Raa ro smot Kristus fee mno bo mkair rof, mbau a. Menohe nyõ beak bosmot anyõ nno-na bo feto to, nno bo ro mkair toni meto!”
1TI 5:9 Nmat semit mam jemaat ranu. Nsok semit taro tna nkom ana masom mam daftar. Semit ro kbe jemaat mmat to, semit mfi fefo: Semit ro umur 60 tahun maut yut. Tna ro tii msya raa sait aran sai.
1TI 5:10 Nsok semit ro ja raa mhar oh. Mhar tna mawe au ja mno bombra ro moof: Tii au misoh kukek wau kaket. Tna semit reto ja mitrah amah rau kʼraa ye. Raa ro Allah wAit mbam remo roto mama to, au mmat ana, kamus maa wana bo to. Semit reto ja moo bo mee kʼraa ro bo marak. Nsok semit ro mur-mur mno bo moof aro rau ye. Tna nkom ana masom wana mam daftar reto.
1TI 5:11 Semit ro fnya fain fares to, nkom ana masom mam daftar reto ma. Kbe ana mawe mamo msya raa u. Tna kbe ana mnaut Kristus kaket fee.
1TI 5:12 Ana weto kbe msya raa rouu tna miwana bo ro tii ana mawe.
1TI 5:13 Nno be jemaat mmat semit ro fnya fain fares to, tna fnya weto haweboh sai. Kbe ana hre mam amah mafoh na wana sai. Hre msya ana rabu wawa tna mkyas raa. Kbe ana mkyas bo raa mati, tna mkyas-kas bo ro mkair-kar ye.
1TI 5:14 Reto oh mi jõ tawe ⌞nkom ana masom mam daftar reto ma.⌟ Ro moof to semit ro fnya fain fares mamo msya raa u. Tna mabe ku, tna mhau msui misoh amah wana msya kukek wana. Feto kbe raa ro hawe anu to, kbe mkyas-kas anu raa ro Kristen bsom ranu fee.
1TI 5:15 Semit baro hah me kro iso ro kabes yabi (Iblis) oh.
1TI 5:16 Semit to, nbis kukek wana mesait mban semit wana wia. Menohe semit ro mesait mhau kar to, kbe jemaat mban ana mesait sai aran. Afo re jemaat msui fee.
1TI 5:17 Majelis ro ja misoh jemaat kaket to, nbis raa jemaat nawe, “Hartu raa weto.” Tna majelis ro mur-mur mkyas tna betoo watum ro Allah to, nbis raa jemaat nawe, “Hartu raa weto kaket matak!”
1TI 5:18 Bokom ro Allah mkyas mawe, “Wore sapi mkah bo wanu to, nke masoh rau to ma, nhau au mait bo.” Ulangan 25:4 Tna, “Raa ro ykah bo wanu to, nren ait tu oh.”
1TI 5:19 Soh raa sait yaun boun majelisjemaat to, nari boun ro ykyas reto ma. Soh raa mabo ewok, tuuf mkyas feto ye, kbe nari tna nkyas bo reto.
1TI 5:20 Raa ro mno iro to, bhah ana wore raa jemaat mari ye, afo re raa taro mrok waa ye.
1TI 5:21 Nari bobis riwai wefo fo kaket. Ati ro nyõ nhau susai ntu srah to, nno ntrot sai. Soko raa sait bo ma. Bo ro jõ tbis nyõ nno wefo fo, Allah yros ymat ye, Kristus Yesus yros ymat ye tna malaikat ro Allah ysok to, ana mmat ye.
1TI 5:22 ⌞Ati ro nyõ nsas raa sait yamo majelis to, srot-srot nsok raa sait ma.⌟ Srot-srot tubat natem nse kʼraa retait to ma. Tna kaket nyõ: Soh raa taro mno iro to, nsya ana nno-na bo ye to ma. Kaket nyõ tna waa Allah re nno iro fee
1TI 5:23 (Timotius; ntkif nhaf anyõ ro ja mham to. Nata aya mesait kar sai ma. Nata anggur maya kebet ye.)
1TI 5:24 ⌞Nsok raa ro mamo majelisjemaat to, kaket.⌟ Iro ro raa mno taro to, raa mhar tetara. Tna raa mtu srah wana fefares. Iro ro raa mno taro to, ana mno wai. Tna mamo muktis rau to raa mhar tis ye tu oh.
1TI 5:25 Feto ye bo moof ro raa mno to, taro kbe raa mhar ye. Bo moof ro raa mno taro to, raa mno mmyõt wai menohe kbe raa mhar ye tu oh.
1TI 6:1 Raa Kristen ro mamo sryan boh kʼbobot wana to: Waa tna nri bobot wanu kaket. Hartu ana afo re raa ro Kristen fee kbe mmat anu nhaf mato ro moof to. Feto kbe ana mkyas-kas Allah ranu yasom to fee. Feto kbe ana mkyas kair bosmot ranu fee ye.
1TI 6:2 Soh bobot wanu raa ro Kristen fee, hartu ait retait ye. Tna soh bobot wanu raa ro Kristen to, hartu ait retait ye. Ait ynan fi anu nao ranu. Feto to, niwana ait ma. Hartu tna nri bo kʼbobot retait kaket. Nno bo rait kaket ye. Bobot ro mkai bo ro moof mbam kʼanu to, ait smot Yesus ye. Tna Allah yatmof bobot retait ye. Timotius; nkyas bokyas refo kʼjemaat ye. Nbis nawe ana mbo mno.
1TI 6:3 Raa taro mkyas watum ro Allah to, menohe mkyas maja rau to, kaket fee. Ana miwer maja rau ye. Ana sioh miryõ bonaut wana ye. Raa taro to, mno mkair feto. Soh raa sait ykyas watum ro Allah to, menohe yisnak maja ro Allah feto to, ait wase iso ro Tuhan ranu Yesus Kristus. Ait srau rait ha-hayah. Ait yerif iso ro mkair. Yerif iso ro moof ati to fee.
1TI 6:4 Ait retait wase bo. Ait bibi ait yesait sai ai, tna ait tri-tri santri bosmot sininya ro mayõ raa mmak ye. Raa santri bo feto to, ana mno re raa mhaf mkair, ja mno raa maun boun kʼanya ro mkair, tna mbat-bat anya ye.
1TI 6:5 Raa ro mkyas bo mweh feto to, mno raa ngko-ngkat anya miyõ kait. Ana weto mhaf, srau wana mkair, ana wase watum ro ati. Tna ana mnaut mawe mbam bosmot ranu ro Kristen to, kbe mbobot.
1TI 6:6 Raa baro ja mno bo ro Allah ksoh tna mawe mhaf wana mnan oh meto. Ana weto mkai mafer ro moof ati mbam bosmot ranu.
1TI 6:7 Tiwya ati ro anu fnya wanu mabe anu to, anu bbo bo aro frok fee. Tna meen anu frok bbam tabam refo bbo bo aro bmo fee ye.
1TI 6:8 Feto to, soh anu bkai boit ro biit, msya ratan ro byum baro to, bo weto mnan sai oh.
1TI 6:9 Raa ro saso bobot sai, srau wana ro mkair ja miwro ana. Tibyo ana mamo mam iso ro mkair tna mbtek mam kayah mato. Bo ro msai mbtek mai kʼana.
1TI 6:10 Raa ro ja srau mnaut pitis sai to, kbe bonaut reto misti re ana mweh iso ro mwak. Tna ana kro iso ro bosmot ranu u fee. Tibyo mno bo ro mkair-kar msis. Tiwya raa ro Kristen mabo baro mamo mam iso ro mkair reto oh. Tibyo bombra ro mkair mbtek mai kʼana.
1TI 6:11 Menohe nyõ fo raa ro Allah rait. Feto to nhau toto mam bo ro mkair riwai to beta. Tomer nno bo mfi fefo: Nno bo ro moof, bo ro Allah ksoh sai. Smot Tuhan kaket. Natmof raa. Beroh nros nasom bo mkair-kar ro mbtek mai kʼnyõ. Tna nno bo mkah nhaf ro sneh sai yoyo.
1TI 6:12 Nhau smot Yesus matak. Beroh smot Ait nfi raa ro santri anya mhoh to. Ana ja beroh mhoh mamo snok si tis rau feto ye. Beroh tna mkai roon ro meen hame wajin. Reto oh mi tiwya Allah ytu nyõ yawe namo no kʼAit. Tna tii reto to, nyõ nkyas kʼraa makin nawe nyõ kro Yesus to ye.
1TI 6:13 Mfo refo jõ tsi bo kʼnyõ. Tsi bosi wefo mam wore Allah ymat ye, tna mam wore wo Kristus Yesus ymat ye: (Allah oh mi Raa ro yoo yafos yum kʼraa msya bombra wofo beta. Tna Kristus tiwya ykyas bosmot ro ati refo wia kʼPontius Pilatus ye.)
1TI 6:14 Tsi tawe: “Nari tna nno bo ro jõ tkom mam aam refo. Nno bo weto beta kaket. Nno bo mkair ma be kbe raa mkyas-kas nyõ. Nhau nno bo weto yoyo mamo snok mam ati ro Tuhan ranu Yesus Kristus hah yama u.”
1TI 6:15 Meen Yesus hah yama u mam ati ro Allah yawe. Allah tait yase yiwrek raa beta. Anu bbaut bi Ait. Ait tait Raja ro yase tna ybo raja ro mhau mam tabam refo beta. Tna Ait Bobot ro yase yiwer bobot taro sor beta.
1TI 6:16 Ait yesait aran yhau yroon, bi Ait meen yhai fee. Tna Ait yhau mam wore kek ro maah tna kren-kran toni. Raa aro mamo mros kait mmat Ait fee. Nama, anu heyut bi Ait ro ybo bombra beta mkah yatak rAit ro meen mhau hame. Amin: Mabo oh.
1TI 6:17 Nkyas kʼraa ro bobot to, nawe ana safuk mawe ana u kar to ma. Kbe bosatoh ro ana mse mam tabam refo to mno riof kʼana fee. Bosatoh mhau kait fee. Kbe meen bo weto mhau akus mam tabam refo. Ro moof to, ana msam wai kʼAllah sai ro yoo bombra msis-sas yee kʼanu bhaf bse.
1TI 6:18 Nkyas kʼana nawe bo moof ro ana mno to, bo ro ati miwrek bosatoh ro ana mse. Ro moof to, ana msan bo kʼraa. Tna saim kta wana mkah mhaf wana ro ase.
1TI 6:19 Feto oh mi ana mame kta ro meen mhau hame. Feto oh mi ana siwyan bo matim wia mkah meen wore wono. Feto oh mi ana mkai roon tna mhau hame wajin.
1TI 6:20 Timotius; Allah yoo watum rAit yehau kʼnyõ nbo kaket. Nirit nyõ nkah bokyas mkair ro mafer aro fee ye. Nhau toto mam bo santri ro mno raa mhar bo fee. Bo santri reto to mkair.
1TI 6:21 Bo santri reto misti re raa mabo baro sikba bosmot ranu ro Kristen. Jõ skabuk Allah afo re Ait yatmof anu.
2TI 1:1 Aam refo mbam kʼjõ, Paulus. Allah ksoh tibyo jõ tamo raabis ro Kristus Yesus rAit. Tna Ait ysi yawe anu ro biranya bsya Yesus to, kbe meen bhau hame wajin.
2TI 1:2 Timotius; jõ tksoh nyõ nfi ku ajõ. Jõ skabuk Bja Allah, re Ait ysya Tuhan ranu Kristus Yesus matmof nyõ tna moo riof mee kʼnyõ. Tna jõ skabuk re ana mno anu nhau nhaf tnok sai.
2TI 1:3 Jõ tayoh asik mase kʼAllah. Jõ tno bo ro Ait ybis yawe. Tno bo wAit mkah thaf ro moof mfi hohos wojõ tiwya mno ye. Jõ tnaut nyõ tna skabuk nyõ yoyo ye.
2TI 1:4 Tiwya ati ro jõ sikba nyõ tamo to, tnaut nyõ sraujin toni. Tnaut tawe nyõ nawia ye tna jõ tksoh hah te tama to kʼnyõ afo re jõ simaut mase.
2TI 1:5 Jõ thar tawe nyõ smot Yesus matak. Nyõ smot Ait matak mfi fai Lois, matat anyõ msya nme Eunike. Ana mbewok smot bi Ait matim wia tna fo nyõ smot Ait ye.
2TI 1:6 Tii jõ too tatem ttor kʼnyõ abyõ to, skabuk nyõ. Tna Tuhan yoo bouum yuumto kʼnyõ. Nnaut bouum reto to, nsorni ma.
2TI 1:7 Nnaut nwe Har ro Tuhan mno re anu waa ma. Har reto mno anu bros btak. Mno anu batmof raa anya ye. Tna mno anu bnaut anu re bno-na bo fee ye.
2TI 1:8 Feto to, nkyas Tuhan ranu yasom rAit to, kaket. Hrenaut ma! Jõ tkyas Tuhan Yesus yasom ye, tibyo raa mfot jõ. Tna jõ twok bui mam befo. Menohe saban jõ fo ma. Nsan nyõ to, nkro nno nfi jõ ye. Kbe anu mbewok bkyas Bokyas Moof ro Yesus (Injil). Tna mkah Allah yatak rAit to, kbe anu mbewok bros bsom bo mkair-kar ro mai kʼanu ye.
2TI 1:9 Ait oh mi yoo riof ro mase yee kʼanu tna ytu anu bmo raa wAit. Yawe anu bhau fares fo, bhau bno bo moof ro Ait ksoh. Bo ro bi Ait yno kʼanu wefo fo, anu bno bo moof kʼAit wia fee. Bi Ait ksoh rAit sai oh mi Ait yatmof anu. Tiwya tinyi yfen tabam refo fefares to, Ait yawe yatmof anu tibyo ybis Kristus Yesus yama.
2TI 1:10 Tna Allah yno boatmof rAit mabo mam wore wo Kristus Yesus yama sbi hri wa tak ro mkair. Tak reto ja mno raa mhai to. Kristus Yesus tait raa sotak ranu. Bokyas ro Moof (Injil) mkyas bo reto. Bokyas ro Moof reto mfi kek ro merif iso. Au oh mi meen anu bhau hame wajin, kbe bhai fee.
2TI 1:11 Tna Allah ysok jõ yawe tamo raabis rAit. Ait yawe tbo Bokyas ro Moof (Injil) reto tamo tkyas tna betoo kʼraa ye.
2TI 1:12 Jõ tkyas Yesus yasom oh mi jõ tkai arin mkair refo. Menohe jõ saban ⌞thau mam bui refo⌟ fee. Jõ smot bi Ait. Tna thar tawe Ait yatak re kbe kmot Bokyas ro Ait yoo yee kʼjõ reto. Thar tawe Ait kbe kmot Bokyas rAit, maja rau ro ati reto. Kmot mamo snok mam ati ro tabam refo haberek u.
2TI 1:13 Bokyas ro jõ tkyas reto to, maja rau to mnan si. Feto to noo bokyas reto nbo nkyas kaket. Nkyas mamyot bokyas ro nyõ nari kʼjõ reto ye. Tna nhau smot Kristus Yesus matak. Nhau natmof raa ye.
2TI 1:14 Kmot Bokyas ro Moof (Injil) ro Allah yoo yee kʼanu bkyas to. Injil reto to, mfi kta ro moof ati. Har rAit ro mhau kʼanu mbewok to, kbe mno nyõ natak nno bo reto.
2TI 1:15 Nnaut nwe raa ro Kristen mikba jõ akus. Ana ro mbam rabin ro Asia Kecil to, masen haberek kbor bana. Figelus ysya Hermogenes ro ja mban jõ to, ana mbewok mikba jõ ye.
2TI 1:16 Menohe Onesiforus ysya raa wait rabu ti wawa fo, ana mros tis kʼjõ. Jõ skabuk Tuhan re kbe bi Ait yatmof ana. Jõ twok mam bui to, tna ait yawe hrenaut aro bo fee, ait beroh yama sai.
2TI 1:17 Ati ro ait yama snok kota ro Roma to, ait safo saso jõ. Tna fo ykai jõ.
2TI 1:18 Nnaut bo knik-knak ro moof tiwya ait yno kʼjõ mam kota ro Efesus ye. Jõ skabuk Tuhan re kbe yatmof ait mam ati ro Ait yama yros susai ytu srah kʼraa beta.
2TI 2:1 Timotius; nyõ nfi ku ajõ. Jõ tkyas watum refo kʼnyõ afo re nyõ nros natak mkah boatmof ro Kristus Yesus.
2TI 2:2 Tiwya tkyas bo kʼnyõ mam wore wo raa msis mros mari ye to. Nbo bokyas reto tna ne nkyas kʼraa ro ja mros tu smot Allah; raa ro kbe susu fee. Nehau bokyas ajõ reto kʼraa ro mhar bo. Tna kbe ana me mkyas bokyas reto kʼraa roto taro renti ye.
2TI 2:3 Anu kro Kristus Yesus tibyo bo mkair-kar mai kʼanu to. Kbe anu siko bsom sai, mfi raa sbe ja siko masom bo mkair-kar ro mbtek mai kʼana.
2TI 2:4 Raa ro sbe to, ja ana mkah bo wana mesait fee. Ana mhau mrero sai. Ana mhau siwyan mari mno bo ro bi yabi ybis yawe sai.
2TI 2:5 Tna raa ro wareet msom kakas to, soh ait hawe kro bo maja rau to, kbe raa mse boren kʼait fee.
2TI 2:6 Tna raa sait ro ymur-mur ykah bo mam armato rait to, kbe ait yait make ro tinyi mbam bo wait ro ykah reto tu oh.
2TI 2:7 Timotius; nnaut bokyas ro jõ tkyas weto, tna kbe Tuhan yno nyõ nhar bo weto beta.
2TI 2:8 Nnaut oh: Bokyas Moof (Injil) ro jõ tkyas refo mkyas Yesus Kristus ro yhai tna yrok yasen. Ait tait Kube ro raja Daud.
2TI 2:9 Jõ tkyas Bokyas ro Moof (Injil) refo oh mi jõ tkai bo ro mkair. Raa mfot make jõ tfi raa ro ja yno safo. Menohe raa aro mtai mfot make watum ro Allah reto ye fee.
2TI 2:10 Jõ tksoh tawe raa ro Allah ysok to, kbe ana beta mkai riof ro Ait ysan mbam Kristus Yesus. Tna kbe mkai bo yase rAit ye. Bo yase ro Tuhan rAit to meen mhau hame wajin ye. Feto oh mi jõ siko tasom bombra beta ro mama mai kʼjõ.
2TI 2:11 Bokyas ro mrof refo bo ati: “Soh anu bhai bsya Ait su to, kbe meen anu bhau su bsya Ait ye.
2TI 2:12 Soh anu bhau smot bi Ait matak to, meen anu bsya bi Ait su bbo bombra ye. Soh anu bwaar Ait to, kbe Ait ywaar anu ye.
2TI 2:13 Soh anu haberek kbor banu tna bhaf makin to, ja Ait yros tu fares, susu fee. Kbe Ait ywaar Ait fee saut.”
2TI 2:14 Timotius; nkyas bo weto kʼjemaat ro Efesus wono. Ne nkyas bo weto beta afo re ana sorni bo riwai jõ tkom weto ma. Allah ymat bo beta ro anu bno mam tabam refo. Raa baro ksoh hre santri bokyas aro rau. Mno bo reto to, mafer marak. Kbe ana sorni maja ro Allah tna bitsre maja ro ati. Tibyo kair mama mai kʼana. Nawe wa kʼana nawe, “Nno feto ma!”
2TI 2:15 Nmur-mur nno bo ro Allah wAit. Nkyas Bokyas ro Ati maja rau kaket re raa mhar. Nyõ nno feto to, kbe nyõ saban bo aro fee. Tna kbe Ait yawe nyõ nno bo ro moof.
2TI 2:16 Bokyas ro mafer marak to, nros nari ma. Bokyas reto mno raa mari Allah fee, mno raa mimara mboh renti sai.
2TI 2:17 Bokyas mkair reto mbet-bat raa renti mfi abet kair ro ja mabah re kbe mrok mase renti. Himeneus ysya Filetus, ana mbewok mkyas bokyas ro mkair mfi feto ye.
2TI 2:18 Bokyas ro ati reto to, ana mbewok mkyas fee. Ana mkyas bokyas ro mweh. Ana mkyas mawe, “Anu brok bsen beta mam tabam refo oh.” Raa Kristen baro mari bokyas reto tibyo ana me haberek bitsre bosmot rana reto mrok marak.
2TI 2:19 Menohe bokyas ro Allah rAit to, mros matak sai. Kbe raa aro mtai mitrah fee. Bokom rAit mkyas mawe, “Tuhan yhar raa wAit.” Bilangan 16:5 tna “Awya sai ro yawe ana smot Tuhan to, yako hawe sai ait bitsre iro ro ait yno.”
2TI 2:20 Amah ro mase to, ja bombra aro rau-rau mhau. Bo weto raa mfen mbam emas msya perak. Tna taro ye raa mfen mbam ara msya koh uun ye. Bo wefo fo, taro mkah bo raa mno bo ro ati kaket, tna taro raa mno bo ro sei sai ye.
2TI 2:21 Awya ro yisoh yhaf rait moof tna beak bo mkair ro ait yno to, ait retait kbe Allah ysok re yno bo ro ati. Ait yhau yno bo ro Allah wAit sai. Raa retait yhau siwyan yawe yno bawya sai ro moof.
2TI 2:22 Mere msya ku maut ja ana mhaf myoh mawe mno bo masmamo. Nno feto ma! Tomer nno bo ro Allah ksoh sai. Beroh smot Tuhan matak. Natmof raa. Niranya nsya raa ro ja soh-soh Tuhan yatam ana tna mhau mhaf moof ye.
2TI 2:23 Raa taro to ksoh mno bo santri. Ana mkyas bo ro mafer marak. Hre nsya raa ro ksoh mno bo santri feto ma. Nyõ nhar nawe bokyas mfi feto kbe sie raa mafa anya.
2TI 2:24 Raa ro yamo sryan ro Tuhan to, ja yno bo moof kʼraa beta. Ait yhar bo betoo watum ro Tuhan kʼraa. Tna raa mno bo mai kʼait to, ait ja yhaf sneh sai kʼana. Masi ma ait yafa ysya raa fee.
2TI 2:25 Soh raa beswan-swan bo ro ait ykyas to, kbe ait betoo maja rau kʼana rere. Betoo rere tna ynaut yawe kbe Tuhan yno ana mhaf mrero, re kbe ana mashana tna fo mari watum ro ati reto.
2TI 2:26 Raa weto to, kabes yabi (Iblis) yfot ana oh. Ait yake ana matak tna yiwro ana afo re ana mno bo ro ait yawe. Menohe sryan ro Tuhan retait ynaut yawe soh raa weto haberek tna mari watum ro Tuhan to, kbe ana snok mbam sna ro Iblis, tiwya ana mber.
2TI 3:1 Nnaut oh, meen wono to, kene wo tabam haberek to, kbe bo ro mkair-kar toni mama mai kʼraa.
2TI 3:2 Wore weto to, raa kbe mno bo mkair wefo: Kbe ana mnaut metsu wana mesait sai, ana nksoh mame kta, ana masoh mase, tawyõ ana toni, mbat-bat kʼraa, mari bo raa mabi mawe kʼana fee, wase bo mayoh asik mase, ana waa Allah fee,
2TI 3:3 ana matmof raa fee, hawe bo miranya msya raa fee, ntoo raa, misoh ana kaket fee re mno-na bo, marmtuk, knait bo ro moof,
2TI 3:4 hren serek, srot-srot mkyas bokyas tna mnaut ttis fee, bibi ana ai sai. Tna ana ksoh bo ro tabam refo sai, ksoh Allah fee.
2TI 3:5 Ana mamo wan-wan: Ana mno bo raa ro smot Allah ja mno to, menohe ana moo mhaf wana mee kʼbi Ait fee. Mno feto tna ana wase Allah yatak rAit. Niranya nsya raa ro mno bo mkair weto ma.
2TI 3:6 Raa weto taro mamoʼt amah aro-aro tna besruf raa. Ana mkyas bokyas ro sioh. Tna ana miwro-wra fnya ro bosmot wana matak fee. Fnya weto ksoh mno bo ro mkair tibyo mbtek mno iro mawat.
2TI 3:7 Fnya weto hre mari watum yoyo menohe ana ntru watum ati ro mbam Allah reto fee.
2TI 3:8 Tiwya tinyi to Yanes ysya Yambres beswan-swan Musa. Raa weto beswan watum ro ati reto feto ye. Bo ro ana mnaut weto mkair sai. Tna bosmot wana to, Allah knait.
2TI 3:9 Kbe ana mkyas bo ro sioh tna tinyi rau raa mari. Menohe ti baro firwas tna raa beta mhar mawe ana weto wase bo mfi bo tiwya Yanes ysya Yambres ye.
2TI 3:10 Timotius nyõ nari watum ro Tuhan ja jõ tkyas, tna nyõ nse mam nhaf mato anyõ oh. Tna nyõ nmat bo ro jõ tno. Nyõ nhar jõ thaf ajõ ye. Nyõ nhar nawe jõ smot Tuhan Yesus matak. Tna ja thaf tnok sai thau twof bo ro kbe mama. Tna tatmof raa ye. Tna jõ beroh tros tasom bo mkair-kar ro mbtek mai kʼjõ ye.
2TI 3:11 Jõ raa sikowah-kawah tna bo mkair-kar mbtek mai kʼjõ ye; mfi bo ro tiwya mai kʼjõ mam kota ro Antiokhia, remo ro Ikonium tna mam remo ro Listra ye. Menohe Tuhan kmot jõ, yno riof kʼjõ.
2TI 3:12 Raa beta ro kro Kristus Yesus tibyo ja mhau mno bo ro Allah ksoh to, kbe raa mno-na ana tu oh.
2TI 3:13 Tna raa ro marmtuk msya raa ro siroyõ to, kbe meen ana mno safo renti naut. Ana siroyõ raa roto tna kbe raa roto siroyõ ana ye.
2TI 3:14 Menohe nyõ nhaf anyõ to, mnan anya msya ana weto fee. Nyõ nhar watum ro Tuhan. Nyõ nhar mam nhaf mato nawe bo ro ati reto. Tawe nhau nbo watum ro ati reto kaket. Amu ro tiwya nkyas watum reto kʼnyõ to, ja nkyas bo siroyõ fee.
2TI 3:15 Naban tinyi nkek fares to, raa mkyas Bokom ro Allah kʼnyõ. Bokom reto mno nyõ nhar bo afo re nyõ smot Kristus Yesus. Tibyo nyõ nkai riof ro mase.
2TI 3:16 Bokom ro Allah reto beta to, Ait yesait besi kʼraa, yawe mkom. Bokom ro Allah reto moof mkah bo mkyas tna betoo kʼraa, afo re ana mhar maja rau kaket. Soh raa mno bo ro mkair aro to, kbe Bokom ro Allah mifah ana. Tna Bokom ro Allah merif iso ro moof re raa mhar tna mno bo ro Allah ksoh. Bokom ro Allah matak re misoh raa mhaf ro mkair to mamo moof ye.
2TI 3:17 Soh raa ro Allah wAit mmat Bokom rAit to, kbe ana mhau siwyan mno bombra beta ro moof.
2TI 4:1 Meen Kristus Yesus hah ye yama tabam refo u. Tna ytu safo kʼraa beta. Ytu safo raa ro mhai oh ye msya raa ro mhau fares ye. Yama to, yamo Raja ybo raa wAit. Reto oh mi jõ tbis bo refo kʼnyõ. Tna Allah ysya Kristus Yesus mros mari tna mmat ye.
2TI 4:2 Tbis tawe, “Nkyas Watum ro Allah kʼraa. Rabu wawa to, nhau siwyan nkyas Watum ro Allah. Raa mari, soh mfe raa hawe to, beroh nkyas sai. Nawe wa kʼraa nawe, ana mno bo ro mkair to ma. Tna nerif iso ro moof kʼana. Nkyas Watum ro Allah kʼana rere re nisoh mhaf wana msya bosmot rana kaket matak.”
2TI 4:3 Meen wono to, kbe raa taro hawe mari ⌞bokyas ro Allah⌟ maja rau ro ati. Kbe ana saso guru-guru ro mkyas bokyas ro ana nksoh mari sai. Tna ana mtu guru weto mama.
2TI 4:4 Raa weto hawe mari bokyas ati reto, tna ksoh mari bokyas ro mna sai.
2TI 4:5 Kaket nyõ. Nhau to nno bo srot-srot fee. Beroh natak sai mam arin kair. Nkyas Bokyas ro Moof (Injil). Tna nno bo ro Tuhan ybis kʼnyõ to beta.
2TI 4:6 Jõ too tetsu ajõ tsan kʼAllah. Tnaut tawe baro feto tna raa mame jõ tajat.
2TI 4:7 ⌞Jõ tkyas Yesus yasom oh feto⌟ tno bo ro Allah ybis to, beta mkak oh. Tna jõ tomer tno bo reto kaket moof tamo snok si tis rau. Tno mkak oh. Reto mfi raa ro santri anya mhoh to. Ait yhoh yamo snok si tis rau reto ye. Tna jõ smot Tuhan matak feto fares ye.
2TI 4:8 Tuhan ymat jõ yawe jõ fi raa ro wase tber safo. Tna Ait siwyan boren mkah bo meen yaren jõ oh. Tuhan kbe hre susai ytu srah to, tna Ait soko raa sait ye fee. Meen ati ro tabam refo haberek to, Ait ysan boren reto kʼjõ tesait aran fee. Kbe ysan boren reto kʼraa beta ro ste minaut mawe bi Ait meen hah ye yama u.
2TI 4:9 Fooh re nyõ nama no kʼjõ.
2TI 4:10 Demas ait saso bo ro tabam refo sai. Tibyo yasen sikba jõ yamoʼt kota ro Tesalonika. Tna Kreskes yamoʼt provinsi ro Galatia. Tna Titus yamoʼt rabin ro Dalmatia.
2TI 4:11 Tna Lukas yesait aran yhau ysya jõ. Nmen Markus tna nakah ait nama. Ait ja mur-mur ysya jõ nno bo.
2TI 4:12 Jõ tbis Tikhikus yamoʼt kota ro Efesus oh.
2TI 4:13 Ati ro nyõ nama to, noo ratan ro tyum tetsu ajõ ro foos to, nakah nama. Ratan reto tiwya jo sikba akus mam amah ro Karpus rait mam remo ro Troas. Tna noo aam ro bokom wojõ ye. Nsorni ma aam bokom ro perkamen wojõ nakah nama ye.
2TI 4:14 Bi Aleksander ro ja yfen tembaga tait yno bo mkair-kar mawat mai kʼjõ oh. Kbe Tuhan ska ait riryõn mnan si bo ro mkair ait yno kʼjõ feto.
2TI 4:15 Nyõ kaket ait ye. Ait ja safo yikyak bokyas ro anu bkyas.
2TI 4:16 ⌞Raa ro Yahudi maun jõ. Ana mnaut mawe raa mkyas Yesus yasom to, mber safo meto.⌟ Ati ro raa mkyas safo ajõ tinyi rau to, raa aro mros tis mban jõ fee. Raa beta sikba jõ mamo. (Skabuk Allah re kbe Ait yoo bo mkair reto yee kʼana masom fee.)
2TI 4:17 Menohe Tuhan yatam jõ tna yoo yatak rAit yee kʼjõ re tkyas Bokyas Moof reto beta. Tibyo raa ro wase Tuhan to, ana beta mari ye. Raa mtu srah ajõ to, Tuhan yno riof kʼjõ. Reto mfi bo jõ snok singa masoh rau ro nsibyõ jõ. He mfe.
2TI 4:18 Tna Tuhan kbe yitsre jõ tbam bo ro mkair-kar ro mama mai kʼjõ beta ye. Kbe Ait yno riof kʼjõ, yakah jõ yamoʼt sawro ro Ait yamo Raja ybo. Ro moof to, raa mbaut Ait hame wajin. Amin: Mabo oh!
2TI 4:19 Jõ tmah meen kʼPriska msya Akwila. Tna msya Onesiforus ysya raa wait beta ye.
2TI 4:20 Erastus yhau akus mam kota ro Korintus. Tna bi Trofimus kiyam yhau akus mam remo ro Miletus.
2TI 4:21 Nama wia fooh wore wo arin ngkanam fee wefo. Ebulus ymah meen kʼnyõ. Pudes, Linus, Klaudia msya raa Kristen beta ro mhau mam befo mmah meen kʼnyõ ye.
2TI 4:22 Jõ skabuk Tuhan afo re yatam nafos anyõ tna yatmof nyõ ye.
TIT 1:1 Aam refo mbam kʼjõ Paulus, sryan ro Allah tna raabis ro Yesus Kristus. Allah ybis jõ tamo tkyas watum rAit ro ati kʼraa ro Ait ysok. Tkyas watum kʼana afo re bosmot rana matak. Feto kbe ana mhar mno bo ro bi Ait ksoh.
TIT 1:2 Ana weto minaut mawe meen ana mhau hame wajin. Allah ja ykyas bo sioh fee. Tiwya tinyi Ait ysi yawe kbe raa wAit meen mhau hame. Yawe bo reto tiwya tinyi, wore wo yfen tabam refo fefares.
TIT 1:3 Bi Ait tait Raa Sotak ranu. Tna oon ro Ait ysok to, Allah yerif Bokyas rAit reto kʼraa: Ait yehau Bokyas Moof reto kʼjõ tna ybis jõ tamo tkyas.
TIT 1:4 Titus; jõ tkom aam refo tiim kʼnyõ. Bosmot wanu mbewok mnan anya; feto nyõ nfi ku ajõ. Jõ skabuk Bja Allah re Ait ysya Yesus Kristus, Raa Sotak ranu, matmof nyõ tna mno re nyõ nhau nhaf tnok ye.
TIT 1:5 Jõ sikba nyõ nhau akus mam sato ro Kreta mkah nisoh bo ro jemaat. Tiwya jõ tbis nyõ nsok raa ro mamo majelis mam remo wana sor.
TIT 1:6 Nsok raa ro mfi fefo: Raa ro wase mber safo. Raa ro moo fnya sau aran sai. Tna ku wana to, smot Kristus tna mno-na bo fee. Tna ku wana ja mari bo ro ana mawe.
TIT 1:7 Ait ro yamo majelis jemaat to, kbe yisoh jemaat ro Allah. Feto to, nsok raa ro wase mber safo. Au oh mi nsok raa ro ja mbibi ana mesait fee, kmo yoyo fee, nksoh mata anggur fee, mafa msya raa yoyo fee, tna sioh raa mkah bo saso pitis fee.
TIT 1:8 Feto to nsok raa ro ja yno bo mfi fefo: Ait ksoh yitrah amah rait kʼraa. Ait ksoh yno bo moof. Ait ynaut ait kaket re yno bo ro kbik-kbak fee. Ait ja yno bo ro Allah ksoh. Ait yhau yno bo wAit sai. Tna ait yatak ybo ait yesait re yno bo moof yoyo sai.
TIT 1:9 Saso tna nsok raa ro ybo watum ro Tuhan tna yerif kʼanu kaket. Afo re ait ykyas watum reto kʼraa ro jemaat. Afo re ait betoo mkah maja rau ro ati. Tna kbe yisoh mhaf rana msya bosmot rana kaket matak. Ait yhar watum ro Tuhan kaket to, kbe ait yatak yawe wa raa ro beswan-swan watum ro ati reto tna yerif iso ro moof kʼana.
TIT 1:10 Raa ro agama Yahudi mawat to, ja mana mase tna mikyak bokyas ranu. Ana mkyas mawe, “Allah ybis yawe raa wAit beta kro bo mafa ro agama Yahudi.” Nri ana ma. Ana weto mkyas bokyas ro mafer marak. Bokyas reto besruf raa.
TIT 1:11 Nkyas kʼana nawe ana shait sai. Ana mkyas bosruf. Raa Kristen msya fnya, kukek wana baro mari bokyas rana oh. Tibyo kro bokyas wana ro mkair weto. Raa ro agama Yahudi weto mkyas bokyas feto saso pitis sai.
TIT 1:12 Tiwya nabi sait ybam sato ro Kreta ykyas ana yawe: “Raa ro Kreta to ja sioh-sah raa. Ana mno-na bo mfi fane rbyoh. Ana srak bo tna hawe boh ye.”
TIT 1:13 Bokyas reto bo ati. Ait ykyas sioh fee. Feto to bhah raa jemaat nawe, “Nri bokyas mkair reto ma. Soh anu kro bo mafa ro agama Yahudi to, reto misoh bosmot ranu fee.”
TIT 1:14 Nawe wa kʼraa Kristen weto afo re ana mari bo mna raa ro Yahudi ja mkyas to, fee. Nawe wa kʼana re kbe ana mari raa weto fee. Raa ro agama Yahudi weto, ana mikyak bokyas ro Yesus. Ana mikyak bokyas ro ati meto.
TIT 1:15 Anu raa ro smot Yesus to, Allah ymat anu yawe anu nfi raa ro mhaf moof oh. Bo ro mbau kʼanu to aro u fee. Menohe raa taro to, smot Yesus fee. Tna mhaf mato wana mkair fares. Ana to ja mawe bo ro mbau to mawat. Ana mhau bo weto menohe mkai mafer aro fee ye. Ana mhaf mkair tna bonaut wana mkair ye.
TIT 1:16 Ana weto mamo wan-wan mawe ana mhar Allah kaket. Menohe soh anu bmat bo ro ana mno to, anu bhar bwe ana wase bi Ait. Allah knait bo ro ana mno weto. Ana hawe mari bo ro bi Ait yawe. Ana matak mno bo ro moof aro fee.
TIT 2:1 Titus; nkyas bokyas ro Allah, maja rau kaket.
TIT 2:2 Nkyas kʼraa sme ro mabi nawe, “Nbo anu nesait kaket re nno bo ro moof yoyo sai. Nno bo moof afo re raa beta heyut anu. Nnaut anu re nno-na bo ma. Nbo watum ro Tuhan, maja rau kaket. Natmof raa. Tna nros ntak smot bi Ait mam wore wo arin mkair.”
TIT 2:3 Feto ye, nkyas kʼfnya ro mabi nawe, “Nhau to, nno bo ro Allah wAit sai. Ntoo raa ma. Nksoh nta anggur to ma. Nkyas bo kʼraa to, betoo bo ro moof.”
TIT 2:4 Nkyas feto kʼfnya ro mabi. Tna kbe ana mkyas bo moof kʼfnya ro tna mawe, “Natmof naa msya ku mkek wanu.
TIT 2:5 Nnaut anu re nno-na bo ma. Nhau to nto mboh. Nisoh amah wanu moof. Nno bo moof kʼraa. Tna nasu heyut naa.” Soh fnya mno bo ro moof weto beta to, kbe raa mmat. Kbe ana mhar mawe anu ro kro Bokyas ro Allah, ja bno bo ro moof sai. Tna kbe ana mkyas-kas anu fee.
TIT 2:6 Feto ye sobu ku sme ro tna nawe, “Nhau to, nno bo ro kbik-kbak ma.”
TIT 2:7 Titus; rau ro ati to, nyõ nesait nno bo ro moof beta. Afo re raa mmat bo ro nyõ nno moof to, mawe mno mfi nyõ nno feto ye. Nkyas watum ro Tuhan to, maja rau kaket.
TIT 2:8 Nkyas bo ro moof. Nkyas feto tna kbe raa ro knait anu to, mmat he anu bno bo ro mkair-kar aro fee. Tibyo ana weto hrenaut.
TIT 2:9 Nkyas kʼsrian boh sor nawe, “Nri bombra beta ro bobot wanu mbis mawe. Ne nkyas si ma. Tna kbe bobot wanu ksoh anu, sryan ro Kristen.
TIT 2:10 Niswak bo ma. Nhau nhaf wanu ntrot sai. Tna kbe bobot wanu mhar mawe anu ja nno bo ro moof sai. Soh anu nno feto to, kbe raa ro mmat anu ksoh mhar watum ro Allah ye. Ksoh mhar Raa Sotak ranu ye.”
TIT 2:11 Tiwya Allah yatmof anu tibyo ybis Yesus yama. Yno feto afo re raa beta mhar boatmof rAit. Re kbe ana mkai riof rAit ro mase.
TIT 2:12 Ait yerif iso ro moof kʼanu afo re anu bno bo ro bi Ait ksoh. Anu saso bo ro tabam refo to, mnan oh. Anu bnaut boatmof rAit reto bwe beak bo ro mkair weto to. Tna boatmof rAit mno anu bnaut anu re bno-na bo fee. Anu fo ja wase bber safo ye. Anu bhau mam tabam refo fo bno bo ro Allah ksoh. Boatmof ro Allah reto mno anu fri mafer mawat oh meto.
TIT 2:13 Meen anu bhau hame. Anu bkah simaut mase sne wore wono. Ati reto kbe anu bmat bo yase ro Allah rAit. Kbe bmat Raa Sotak ranu Yesus Kristus yama.
TIT 2:14 Tiwya Yesus yoo yabo rAit yee raa mame mfi bofes. Yno afo re yoo riof yee kʼanu ro ja bno iro. Ait yno anu bhaf wanu moof. Tibyo anu bmo raa mana rAit. Anu fo raa ro ksoh bno bo ro moof.
TIT 2:15 Titus; nkyas bo refo beta kʼjemaat. Nbo ana susu afo re ana mari mno bo refo. Nkyas bo moof kʼana afo re ana smot Tuhan kaket. Tna nawe wa kʼana ro hawe mari mno. Nyõ nase nno feto. Nno afo re kbe raa aro miwana nyõ fee.
TIT 3:1 Titus; nbis raa jemaat reto nawe, “Nri pemerintah msya raa mase ro mbo anu mam tabam refo. Nno bo ro ana mawe. Nhau siwyan re nsen nno bombra ro moof.
TIT 3:2 Mbat-bat raa ma. Ngko-ngkat anya ma. Niranya nsya raa mkah nhaf ro sneh sai.”
TIT 3:3 Tiwya anu bhar Yesus fefares to, anu wase bo ye: Anu bri bo ro raa mawe fee. Tii raa besruf anu ye. Anu srau wanu oot-oot bo ro tabam refo aro rau-rau. Tna bo weto mkyar anu. Tii weto to anu saim-sam bo ro mkair mai kʼraa. Tna baam bo raa. Raa knait anu. Tna anu knait anya ye.
TIT 3:4 Anu bhaf wanu mkair feto, mamo snok mam ayõ ro Allah yerif boatmof rAit kʼanu. Ait yatmof anu. Tna Ait yamo Raa Sotak ranu.
TIT 3:5 Bi Ait yoo riof yee kʼanu. Anu tiwya bno bo moof kʼAit wia fee. Bi Ait ksoh rAit sai oh mi Ait yatmof anu. Ait yyon iro wanu mkah Har rAit. Tna Har rAit mno anu brok boof. Anu bfi ku rAit ro Har rAit msair mkah bhaf ro moof. Anu bfi ku mees ro fnya mabe tna.
TIT 3:6 Allah yno bo mninon kʼanu. Ait ybis Yesus Kristus, Raa Sotak ranu yama. Yesus Kristus sotak anu, tibyo Allah yoo Har rAit yse kʼanu.
TIT 3:7 Anu raa ro bno bo mkair menohe Ait yatmof anu yawe anu bfi ku wAit ro wase mber safo. Yno feto afo re anu bmo ku wAit. Afo re anu binaut bwe kbe ysan roon ro hame kʼanu.
TIT 3:8 Bokyas riwai reto to, bo ati. Nkyas bokyas reto kʼraa jemaat. Nkyas kaket afo re raa ro smot Allah kbe tomer mno bo ro moof to kaket. Awya sai ro mari bokyas refo tna mbo mno to, kbe fri mafer moof.
TIT 3:9 Raa taro hre santri bo ro mafer marak, mfi bokyas mair ro raa mabe ana (silsilah). Tna raa taro hre mkyas agama Yahudi msya Watum ro Musa ykom. Bokyas rana reto mno raa saso-sasa tna mno raa mmak. Nri bokyas rana reto ma. Bokyas reto mafer marak-arak sai.
TIT 3:10 Soh raa jemaat aro yisti bo re raa brir-brar mam jemaat to, bhah ait. Bhah ait muhrin sau snok ro mun ewok to. Tna soh ait yari bo ro nyõ nkyas fee, nawe wa raa ro Kristen me miranya msya ait ma.
TIT 3:11 Ait retait yno iro meto, yamo tit yno-na bo sai. Yhar iro ro yno to misti re kbe ait ykai bo, menohe ait beroh yno fares.
TIT 3:12 Nhau mam sato ro Kreta tno wea. Kbe jõ tbis Artemas soh mfe to Tikhikus yama yo kʼnyõ. Ait snok to, nyõ safto nama no kʼjõ mam remo ro Nikopolis. Kbe tamoʼt remo reto thau mamo snok wore wo hwyõm.
TIT 3:13 Zenas, ro yhar hukum retait, ysya Apolos to, mbewok masen sikba ⌞Kreta⌟ ye. Nisoh ana kaket mkah iso ro ana mbewok mamo to, re kbe ana mbewok bo marak mam iso ma.
TIT 3:14 Jõ ksoh tawe raa wanu mur-mur mno bo moof. Feto kbe ana mmat raa anya tna moo bo mee kʼraa ro bo marak. Ana mno feto, kbe mamos rana mafer moof.
TIT 3:15 Raa beta ro mhau msya jõ mam befo mmah meen kʼnyõ. Amu nmah meen kʼraa Kristen ro matmof anu. Tna jõ skabuk Tuhan afo re Ait yatmof anu beta.
PHM 1:1 Aam refo mbam kʼamu mbewok; jõ Paulus tsya Timotius. Jõ ja tkyas Kristus Yesus yasom rAit tibyo raa mfot jõ tna twok mam bui mam befo. Tna Timotius tait, anu bao ranu mam Yesus Kristus. Amu mbewok nkom aam refo tiim kʼanu nbo tuuf; Filemon, Apfia msya Arkhipus, tna msya raa jemaat taro ro ja mama skabuk mam amah ranu. Filemon tait amu nfoh ramu, ro ja ykah bo su ysya amu. Fai Apfia to, anu bno ranu mam Yesus Kristus. Tna Arkhipus tait anu bfoh ranu ro ja ysya anu beroh yasom bo ro Kristus ybis ait yno.
PHM 1:3 Amu mbewok skabuk Bja Allah, re Ait ysya Tuhan Yesus Kristus matmof anu tna mno re anu nhau nhaf tnok ye.
PHM 1:4 Filemon; raa mkyas mawe nyõ smot Tuhan Yesus matak. Tna mawe nyõ natmof raa ro Allah wAit beta ye. Jõ tari feto tna ti wawa jõ tayoh asik mase kʼAllah ro jõ smot.
PHM 1:6 Tna jõ skabuk re anu bhaf sau su. Anu mbewok smot Tuhan Yesus tibyo biranya moof. Jõ skabuk re anu bhaf sau su bsya bi Ait ye afo re anu bhar bouum ro Kristus ysan kʼanu beta. Re kbe anu bhar bo reto kaket tna bhaf bse bo weto beta.
PHM 1:7 Raa mawe nyõ nkyas bo moof kʼraa ro Allah wAit. Nyõ nno ana sraujin fee, tna waa fee meto. Tibyo ana mhaf me mnem. Jõ tari nyõ ja natmof raa wAit feto tibyo bokyas reto mno jõ simaut mase.
PHM 1:8 ⌞Jõ fi raabis ro Kristus rAit⌟ feto to jõ tatak re tbis bo sai kʼnyõ. He mfe, jõ thar tawe nyõ ja natmof raa Kristen tibyo jõ tsi bo refo kʼnyõ fee; jõ soh-soh nyõ sai. Tawe natmof jõ ye: Nnaut nawe jõ fi tabi oh. Tna jõ tkyas Kristus Yesus yasom tibyo raa mfot jõ mbu.
PHM 1:10 Feto to, jõ soh-soh nyõ tawe natmof Onesimus. ⌞Ait retait sryan boh anyõ ro tiwya yasen ysam wai yamo.⌟ Wore wo jõ thau mam bui befo to, Onesimus yama yari jõ tkyas Yesus yasom. Tna ait haberek yamo raa ro Kristen. Mfo refo jõ ksoh ait yfi ku ajõ. Jõ tayoh kʼnyõ tawe natmof ait.
PHM 1:11 Tii ait raa ro ati kʼnyõ fee; bombra ro ait yno to, nyõ nkai mafer ro ati fee. Menohe mfo refo ait raa ro yafer moof, kbe ait yno bo ro moof kʼanu mbewok.
PHM 1:12 Filemon; jõ tawyan marak Onesimus. Menohe jõ tbis ait ybo aam refo tna hah ye yama yo kʼnyõ.
PHM 1:13 Maami, jõ tksoh tawe tabe ait yhau mam befo. Soh ait yhau ysya jõ mam befo to, kbe ait sroh yuk anyõ. Kbe ymat jõ tna yno bo wojõ mam wore wo jõ thau mam bui fares fo.
PHM 1:14 Menohe, jõ hawe tno bo feto. Soh nyõ nbis tain. Thau tari bokyas mbam kʼnyõ wia. Jõ tksoh nyõ nbis ait hah yamo yo kʼjõ mkah ksoh anyõ sai.
PHM 1:15 Tii ait ybam amah anyõ ysam yamo yhau toto baro wia. Tnaut tawe Tuhan ybis afo re kbe ait hah ye yama yhau ysya nyõ tibyo.
PHM 1:16 Jõ ksoh Onesimus. Tna tnaut tawe kbe nyõ ksoh ait ye miwer jõ. Mfo refo ait yamo sryan anyõ sai fee. Ait yamo raa ro Allah rAit ye. Tibyo ait yfi nyõ nao anyõ mam Tuhan ye.
PHM 1:17 Filemon; ja nyõ nawe anu mbewok bfoh kʼanya mam Kristus. Soh nyõ nawe natmof jõ to, jõ soh-soh nyõ tawe nitrah nhaf anyõ kʼsryan boh ranu Onesimus. ⌞Kmo ait ma.⌟ Nitrah nhaf anyõ kʼait mnan anya mfi bo ja nyõ nitrah nhaf tna nmat jõ ye.
PHM 1:18 Soh ait tiwya yno bo mkair, yiswak bo aro to, kmo ait ma. Tawe jõ tesait tasom safo rait reto.
PHM 1:19 Jõ tkom aam refo re nyõ nhar kbe jõ sroh bo wonyõ ⌞ro ait ysyõf to.⌟ Nnaut oh, ⌞jõ oh mi tkyas Bokyas Moof ro Yesus kʼnyõ. Tibyo nyõ namo raa ro Kristen to.⌟ Soh nyõ nari boyoh ajõ refo to, reto sroh bo moof ro tiwya jõ tno kʼnyõ reto.
PHM 1:20 Tafoh ajõ; anu mbewok smot Tuhan. Natmof jõ. ⌞Jõ waa be kbe Onesimus hah yama to, kbe nyõ kmo ait toni.⌟ Menohe soh nyõ nmat ait mkah nhaf ro moof to, kbe nyõ nno bo ro Tuhan ksoh oh meto. Tna kbe nyõ nno jõ te simaut mase.
PHM 1:21 Bo ro jõ tayoh kʼnyõ refo fo, jõ thar tawe kbe nyõ nno tu oh. Tnaut tawe kbe nyõ nno bo moof miwrek boyoh ajõ refo ye.
PHM 1:22 Jõ tnaut tawe Tuhan yari skabuk ranu. Tna kbe baro feto jõ frok bui tna tama to kʼnyõ. Siwyan yuk mam samu anyõ mkah kbe jõ tama tjin wea.
PHM 1:23 Epafras ymah meen kʼnyõ. Ait tait raa Kristen ro yhau su ysya jõ ye mam bui refo.
PHM 1:24 Tna jõ tafoh na wojõ taro ro ja mkyas Yesus yasom ye, ana mmah meen kʼnyõ ye. Ana masom wana to Markus, Aristarkhus, Demas ysya Lukas.
PHM 1:25 Jõ skabuk afo re Tuhan Yesus Kristus yatmof anu.
HEB 1:1 Mam masno ro wia to, Allah ykyas bo kʼraa wanu; raa ro Yahudi. Ait ybis nabi wAit mama mkyas bo wAit. Mama mkyas bo kʼanu hohos na wanu mam ti aro rau-rau tna mkah iso aro rau-rau ye.
HEB 1:2 Menohe mam masno ro tis refo to, Ku rAit Yesus oh mi Raa ro ykyas bo ro mbam kʼAllah kʼanu. Allah ysya Ku rAit Yesus yfen ayoh msya tabam refo msya bombra beta. Tna Allah ysan bombra weto beta Ku rAit.
HEB 1:3 Bo yase ro Ku rAit to mnan anya msya Yaja yase rAit ye. Soh anu bmat tna bhar Ku rAit Yesus, reto mnan anya msya anu bmat tna bhar Yaja Allah ye. Yesus yhau ybo bombra beta. Ait yno mkah bokyas rAit ro matak toni. Tiwya Ait ysair iso ro yyon iro raa. Tna fo yaut yamoʼt sawro. Allah tait Raja ro yase toni. Tna Yesus yaut yamo hre ysya Ait mam ati ro yatem ati; hroh ro mase toni reto.
HEB 1:4 Feto oh mi anu bhar bwe Yesus tait yase toni yiwer malaikat sor. Tna bhar bwe yasom rAit 'Ku ro Allah' reto to, yase toni ye.
HEB 1:5 Tiwya Allah yawe: “Nyõ fi Ku aJõ oh. Ifo fo Jõ tamo Nyõ Naja.” Mazmur 2:7 Tna Allah yawe: “Jõ fo tamo Ait Yaja. Tna Ait tait Ku aJõ.” 1 Tawarikh 17:13 Ja Allah ytu malaikat aro yawe ku wAit to fee.
HEB 1:6 Tna Allah ybis Ku bum rAit yamaʼt tabam refo. Ati reto Allah ybis malaikat wAit beta yawe: “Nmo nbaut Ait.”
HEB 1:7 Tna Allah ykyas malaikat yawe: “Tno malaikat woJõ mnan fi foos. Tna tno sryan woJõ mnan fi tafoh.”
HEB 1:8 Menohe Allah yawe Ku rAit yawe, “Nyõ fi Allah ro nase. Tna namo Raja nbo raa msya bombra beta mamo snok mam hame wajin. Nyõ ja nbo raa woNyõ mkah nhaf ro moof ati.
HEB 1:9 Bo ro raa mno moof to, Nyõ ksoh. Tna bo mkair ro ana mno to, Nyõ knait. Feto oh mi Jõ tsok Nyõ namo Raja. Tna ttu minyak mam nana aNyõ. Tno afo re raa mhar mawe Jõ tsok Nyõ tna teta Nyõ. Tawe, ‘Simaut mase oh; tse Nyõ mam hroh ro mase miwer raa roto beta.’”
HEB 1:10 Tna Allah yawe kʼTuhan Yesus u yawe, “Tuhan; tiwya tinyi Nyõ oh mi nfen tabam refo tna natem aNyõ nfen ayoh reto ye.
HEB 1:11 Ayoh msya tabam refo meen marak. Menohe Nyõ kbe nhau hame wajin. Ayoh msya tabam refo meen bose tna mkair, mnan fi ratan ro bose ja mhah hri marak ye.
HEB 1:12 Meen Nyõ mbewakom ayoh msya tabam refo mnan fi raa mrus ratan ro bose oh, tna beak makus. Tna raa moo ratan ro tna, myum. Meen Nyõ nfen tabam msya ayoh ro tna shauk riryõn ye. Menohe Nyõ nesait ja nros tu. Nyõ nhau moof mnan si mamo snok mam hame wajin.”
HEB 1:13 “Nama, hre nsya Jõ mam tajoh ro tatem ati. Hre wea oh. Tna raa ro mamo byoh kʼNyõ to, meen tno ana mbtek mam mte. Kbe Nyõ naa nber ana weto. Tna Nyõ nros natak abyõ ana, nbo ana.” Mazmur 110:1 Menohe Allah yawe bo feto kʼmalaikat wAit fee.
HEB 1:14 Malaikat weto to, mase mfi Tuhan Yesus fee. Allah yfen ana weto to, mbis ana mno bo wAit, ana to sryan wAit. Tna Ait ybis ana mama mbet raa wAit ro kbe fri riof ro mase.
HEB 2:1 Yesus tait yase. Watum rAit to matak miwer watum taro sor. Feto to, bo ro tiwya anu nri kʼAit to, nbo tna kro kaket! Nno be kbe anu ne nmo tit.
HEB 2:2 Tiwya Allah ybis malaikat wAit mroh mamo mkyas Watum rAit kʼMusa. Allah ybis yawe kbe raa mari Watum rAit reto, tna mbo mno kaket tu oh. Soh raa miwer Watum ro malaikat yoo yee kʼMusa reto to, Allah yno re bo mama mai kʼana tu oh.
HEB 2:3 Menohe Tuhan Yesus yerif iso roto kʼanu re bkai riof. Tiwya Yesus ykyas riof ro mase reto kʼraa baro wia matim. Tna fo ana ro mesait mari bo ro Ait ykyas reto, me mkyas riof reto kʼanu. Soh anu biwana riof ro mase reto to, kbe Allah yoo safo mana reto ymit kʼanu tu oh.
HEB 2:4 Ja Allah yno bo ro msai sor, tna sair bo ro hnah ye. Tna Allah ysok bouum (karunia) aro yoo yuumto kʼraa mkah Har rAit ye. Ait ksoh yno bo weto afo re raa mmat tna mhar mawe bokyas ro Yesus to, bokyas ro ati, bokyas ro merif riof ro mase.
HEB 2:5 Wore wo meen raa mkai riof ro tkyas reto to, kbe awya yase tna ybo bombra sor? Allah ysan hroh reto kʼmalaikat fee.
HEB 2:6 Au oh mi raa mkyas Allah mawe: “Amu fo raa ro tabam refo sai. Fyi re Nyõ ro nase ja nmat amu ro nku sai? Tna fyi re Nyõ nmat ku ramu ye?”
HEB 2:7 “Mam masno ro anu raa bhau mam tabam refo fo, malaikat ro Allah sor to, mase miwer raa. Nyõ noo bobot nee kʼraa; tna re bombra taro sor hartu mmat anu raa. Nyõ noo bo weto naren raa, mnan fi boren ro ja raa maren.
HEB 2:8 Tna Nyõ nawe, ‘Mam tabam refo to, aro mase miwer raa fee. Menohe masno refo fo mhau kait fee.’” Mazmur 8:5-7 Bokom reto mawe: “Allah yno raa mase mbo bombra beta.” Menohe anu bmat feto to fefares.
HEB 2:9 Tiwya Yesus yama tabam refo tna yhai. Yhai afo re riof kʼraa. Allah yno Yesus yamo raa sai ro yhau mam tabam refo. Yesus yhau mam tabam refo mamo snok tahun baro to, yhau ynan fi raa sai, ro ja mase miwer malaikat sor fee. Mam tabam refo raa sikowah Ait tna mame yajat. Feto oh mi Allah teta Ait, yoo yase yee. Tna yno re bombra beta hartu Ait. Allah yatmof raa tibyo ybis feto. Yatmof raa re bitsre Yesus raa mame riryõn. Tna mafer rau moof kʼraa beta.
HEB 2:10 Allah ybis Yesus haberek yamo raa, tna yama mam tabam refo. Ybis afo re Yesus yhar bo ro ja mai kʼraa to, yhar mnan si, aro mabut fee. Ait bitsre bo ro mkair mbtek mai kʼYesus, tna raa mame yajat. Yesus sair iso ro tna oh meto. Tna yakah raa mawat mamo mam iso reto tna re mkai riof. Allah yno bo moof meto. Allah oh mi yfen tna ybo bombra beta. Yfen afo re bombra beta bibi Ait.
HEB 2:11 Yesus oh mi yoo raa ysan kʼAllah re mno bo wAit. Anu bmo ku ro Allah wAit feto. Tibyo Yesus ysya anu to, Bja sait su. Tibyo bwe Allah tait Bja ranu. Tna Yesus hrenaut anu fee. Ytu anu yawe anu fo yao, yano na to.
HEB 2:12 Yesus yawe kʼYaja yawe, “Allah; kbe Jõ tkyas Nyõ nasom aNyõ kʼtao, tano na woJõ. Tna tsya ana nji howes nbaut Nyõ.”
HEB 2:13 Tna Yesus yawe, “Jõ smot Allah toni.” Tna yawe, “Jõ thau mam befo tsya raa ro Allah yoo yee kʼJõ.”
HEB 2:14 Yesus yama tabam refo afo re bo ro kabes yabi (Iblis) yno to rarin beta. Tiwya kabes yabi yatak yno re raa mno iro. Yno wa raa mkai riof oh meto. Menohe Yesus haberek yfi raa. Tna yhau ynan fi raa sai. Yhau tna yhai ynan fi ja raa mhai ye. Yno feto afo re kabes yabi yhau mte. Tiwya kabes yabi yatak yno wa re kbe raa mkai riof fee. Menohe Yesus tait yatak yiwer.
HEB 2:15 Ja raa beta waa bo kbe meen mhai. Menohe Yesus yno riof kʼraa wAit. Tibyo ana waa bo mhai to u fee.
HEB 2:16 Tiwya Yesus tait yatmof malaikat fee. Ait yatmof raa. Tna yhau yban tis anu raa ro Yahudi.
HEB 2:17 Yawe yban tis anu feto oh mi tiwya Ait yamo raa ynan fi anu. Anu bmo yao yano na. Tiwya Ait yhau mam tabam refo tna ykai bo ro ja raa mkai to ye. Yesus yhar anu kaket re kbe Ait yamo imam yase ro ja yatmof anu tna mur-mur yno bo ro Allah yawe. Tna Ait ysan bosan re kbe Allah yyon iro raa to ye.
HEB 2:18 Tiwya yhau mam tabam refo fares to, raa msya bo ja tko Ait ye, ksoh mawe Ait yno iro. ⌞Menohe yno iro aro fee.⌟ Tna raa sanet Ait ye. Feto to Ait yhar yawe anu raa bhau mam tabam refo to, bo min toni, mnan-nan fee. Tibyo Ait yhar bo yban tis anu kaket to ye.
HEB 3:1 Taja, tme, tao, tano na; anu bmo raa ro Allah wAit. Tna ytu anu meen bkai roon mam sawro rAit ye. Nnaut Yesus ysya bo ro yno: Ait yamo raabis (rasul) ro Allah. Tna yamo imam ranu ro yase ye. Tibyo anu bhar bwe Ait oh mi ro yisoh bosmot ranu. Hre nnaut bo reto kaket.
HEB 3:2 Tiwya Musa yno bo beta ro Allah ybis. Tna Yesus yno bo beta ro Allah ybis Ait feto ye. Ana mbewok ye mur-mur mno bo ro Allah yawe. Ana bewok mfi sryan ro ja kmot amah ro bobot rait kaket.
HEB 3:3 Mfi bo raa sgi amah ro moof to, kbe raa bibi ait ro ski amah reto. Ana bibi amah ro ait sgi reto fee. Musa yno bo moof. Menohe Yesus yno bo moof toni. Feto kbe anu bibi Yesus yiwer.
HEB 3:4 Raa mawat mhar bo sgi amah. Menohe Allah yesait aran yfen bombra beta to.
HEB 3:5 Tiwya Musa yno bo ro Allah yawe: Ait mur-mur ymat raa ro Allah wAit. Tna ykyas bo ro Allah yawe meen mama mrof ye. Yawe meen Raa sait yama ykyas Bokyas ro Ati.
HEB 3:6 Menohe Kristus tait Allah yare to. Ait yban tis raa ro Allah wAit, tna ymur-mur yno bo ro Allah yawe reto yfi sryan sai fee. Ait oh mi yase ybo raa ro Allah wAit. Soh anu bros tu smot Tuhan tna bhau binaut bwe bo ro Ait yawe to, kbe mabo to. Soh anu bhau bbo bno feto mamo snok mam oon sboh rau to, kbe anu bmo raa wAit tu oh.
HEB 3:7 Feto to, Har ro Tuhan mkyas kʼanu mawe, “Nri bo ro Allah yawe!” Tna Allah yawe: “Mfo wefo to,
HEB 3:8 niwana bokyas aJõ to ma, mnan fi tii hohos wanu mno ye! Nros tna nri mai aJõ! Tiwya raa mana ro Israel mhau mam yuk ro riamo tna sanet Jõ. Ana mari bo ro Jõ tawe to fee. Ana to, mana mase sai.
HEB 3:9 Anu hohos wanu mhau moof mam yuk ro riamo reto tahun trion 40. Mhau to mmat bo msai ro Jõ tno. Menohe ana moo mhaf wana mee kʼJõ fee. Ana sanet Jõ ⌞tna mawe, ‘Kbe Ait kmo anu to fee! Kbe Ait ymit safo kʼanu fee.’⌟
HEB 3:10 Au oh meto Jõ kmo hohos wanu weto. Tna tawe, ‘Ana weto to, ja kro Jõ fee. Ana weto wase iso ro Jõ terif kʼana.’
HEB 3:11 Feto to Jõ kmo ana. Tawe, ‘Tiwya Jõ tawe kʼana tawe, kbe ana mhau mam wore wo raa hrowyõ u fee.’ Menohe Jõ tto boto tawe, ‘Kbe ana mamo mhau mam wore weto fee saut!’”
HEB 3:12 Taja, tme, tao, tano na; nhau nisoh nhaf wanu afo re kbe anu smot Allah kaket. Kaket anu be anu aro hawe smot Ait. Hawe smot Ait feto, tibyo haberek nwaar Allah ro yaam to ma.
HEB 3:13 Ti wawa to, sobu raa anya, nwe, “Nno iro u to ma! Soh nyõ nno iro renti to, kbe nyõ besruf nyõ ai. Niwana bo ro Allah ykyas kʼnyõ ma.”
HEB 3:14 Nnaut maut-mroh to ma. Menohe ne smot Kristus kaket mnan fi tiwya tinyi anu smot wia to. Soh anu beroh smot Ait mamo snok mam tis sboh rau to, anu fo raa wAit tu oh.
HEB 3:15 Bokom ro Allah riwai jõ tkyas kʼanu to mawe: “Mfo wefo to, niwana bokyas aJõ to ma, mnan fi tii hohos wanu mno ye! Nri mai aJõ! Tiwya raa mana ro Israel mhau mam yuk ro riamo tna sanet Jõ. Ana mari bo ro Jõ tawe kʼana fee. Ana to, mana mase sai.”
HEB 3:16 Awya oh ana weto to? Tkyas raa mana ro Israel. Tii Musa yakah ana frok mbam rabin ro Mesir. Tna Allah ykyas bo kʼana. Menohe ana miwana bokyas rAit. Ana mno Allah kmo meto.
HEB 3:17 Tii Allah kmo awya? Ait kmo ana ro mno iro weto. Ait kmo ana mamo snok 40 tahun. Tna ana weto beta mhai mam yuk ro riamo.
HEB 3:18 Tiwya Allah yto boto yawe bawya? Ait yto boto yawe, “Raa mana ro Israel to, ja mari bo ro Jõ tawe to, fee. Feto tibyo tawe kbe ana mhau mam wore wo tiwya Jõ tsi kʼana to fee saut! ‘Wore wo raa hrowyõ u fee’, kbe ana mkai fee saut.”
HEB 3:19 Tna anu bhar bwe ana weto smot Allah fee. Au oh mi ana mamo mhau mam wore weto fee.
HEB 4:1 Tiwya Allah ykyas wore wo meen raa wAit hrowyõ u fee. Tna bo ro ysi reto to, Ait ynaut tna ybo fares. Feto to, nisoh anu kaket re kbe anu beta nkai bo ro Ait ysi reto.
HEB 4:2 Tiwya raa mkyas Watum ro Allah kʼraa mana ro Israel. Ana mari bokyas reto, menohe mse mam mhaf wana fee. Tibyo bokyas reto mafer marak kʼana weto. Tna anu to, raa mkyas Bokyas Moof ⌞ro Kristus(Injil)⌟ kʼanu ye. Feto to smot Ait tna nse bokyas rAit mam anu nhaf wanu.
HEB 4:3 Anu ro smot Yesus tibyo nbo Bokyas Moof reto kaket to, anu oh mi kbe nmo nhau mam wore wo raa wAit hrowyõ u fee meto. Tiwya Allah yawe, “Jõ tkyas wore wo kbe raa hrowyõ u fee. Menohe Jõ kmo raa ro Israel toni. Tibyo tbo boto tawe, ‘Kbe ana mamo mhau mam wore weto, fee saut!’” Mazmur 95:11 Allah yfen tabam refo tna siwyan wore wo raa wAit meen hrowyõ u fee ye. Siwyan mkak oh. Menohe raa ro Israel weto tii mkai wore weto fee.
HEB 4:4 Bokom ro Allah mawe: “Ti ro ntamam Allah yfen bombra ro tabam refo to beta mkak. Tna ti ro ngkrema to, Ait yitsre bo ro yno beta. Ayõ ro Allah hrowyõ fee oh meto.”
HEB 4:5 Nnaut nwe Bokom ro Allah riwai mkyas ‘wore wo raa wAit hrowyõ u fee’ mawe: “Kbe ana mamo mhau mam wore weto fee saut!”
HEB 4:6 Raa mana ro Israel tiwya mari bokyas ro moof sau wia, menohe ana mbo mno bokyas reto fee. Feto tibyo ana weto mkai wore weto fee. Anu bhar bwe wore wo Allah siwyan reto to, mhau fares. Kbe raa roto taro mkai wore weto.
HEB 4:7 Tiwya raa mana ro Israel mamo mhau mam wore weto fee. Tibyo Allah ysok ti sau naut yawe 'mfo refo'. Masno aro rau firwas tna Daud ykyas yawe: “‘Mfo refo’ to, nros tna nri mai ro Allah. Niwana bokyas rAit to ma!”
HEB 4:8 Tiwya Yosua yakah raa ro Israel mamoʼt tabam ro Kanaan. Menohe mbam Bokom riwai reto to, anu bhar bwe bo ro Yosua yno reto to mabut fares. Tna masno ro kbe raa ‘hrowyõ u fee’ to, sboh fefares. Mabu rau mhau fares. Bhar bwe far-far mam Bokom ro Allah reto mkyas masno roto.
HEB 4:9 Feto to anu bhar bwe raa ro Allah wAit meen mhaf mse bo ro Ait yawe reto. Masno ro ykyas reto to, mnan ayõ ro ja raa ntmoh tna hrowyõ mno bo wana to fee. Mnan ayõ ro ngkrema to,
HEB 4:10 tiwya Allah yitsre bo ro yno beta. Ayõ reto to ayõ ro Ait hrowyõ u fee ye. Allah siwyan wore sau re kbe meen raa wAit hrowyõ u fee ye. Awya ro meen yhaf yse wore wo Allah siwyan reto to, kbe yitsre bo rait ro yno beta ye.
HEB 4:11 Nma, anu tomer re bkai wore weto. Tiwya raa mana ro Israel mari bo ro Allah yawe fee. Tibyo mkai fee. Niwana Allah mnan fi ana weto to ma, be kbe anu aro nkai wore weto fee ye.
HEB 4:12 Bokyas ro Allah to bo ro mawyõs, bo ro matak toni. Bokyas ro Allah mhar raa mhaf mato wana ye tna mhar bombra beta ro raa mnaut mam makit, srau wana to ye. Bokyas ro Allah to mfi tfo ro maan toni: Mnan tfo ro mame raa mhaf mato ye, tna mitwat raa makor msya mtai bo ye. Tna Bokyas ro Allah ja mmat sas bo ro raa mnaut mam srau wana tna mmat sas bo ro raa makit saim mno ye.
HEB 4:13 Tiwya tinyi Allah yfen bombra beta ro mhau mam tabam refo tna mam ayoh skes to ye. Allah ymat tna yhar bombra beta. Bo bawya sai ro raa mno to, Allah yasu ymat. Ymat bo beta ro ja raa mmyõt wai to ye. Meen mam wore Ait yros susai ytu srah yari to, anu raa kbe bros bkyas safo wanu beta ro anu bno.
HEB 4:14 Yesus tait Ku ro Allah yare. Ait yamo imam ranu ro yase. Ait yase re yamo ykyas boyoh wanu kʼAllah mam sawro rAit. Feto to nma, anu bros btak tna bbo bosmot ranu reto kaket!
HEB 4:15 Imam ranu ro yase retait yhar yawe anu raa sai. Ait yhar yawe anu raa bhau mam tabam refo to, bo min toni, mnan-nan fee. Tiwya yesait yamo raa tna raa tko mawe Ait yno iro. Raa sanet Ait, tna bo ro samyoh mbtek mai kʼAit ye. Menohe Ait yno iro fee.
HEB 4:16 Yesus yhar yawe ja raa matak mnan fee. Feto kbe Ait ykyas anu kʼAllah kaket ye. Nma bmo bo kʼAit. Waa ma. Anu bhar bwe Allah ja yatmof anu. Wore wo bombra sor mama mai anu to, anu bhar bwe Yesus yban tis anu. Anu bhar bwe Allah ksoh yoo tak rAit yee kʼanu.
HEB 5:1 ⌞Tiwya ati ro Yesus yama fefares to,⌟ ja Allah ysok raa sait yawe yamo imam ro yase mam agama Yahudi. Tna raa ro yamo imam ro yase retait oh mi yayoh boyoh raa kʼAllah. Ja soh raa ksoh mayoh asik mawat kʼAllah to, ana moo bosan mee kʼimam. Tna kbe iman ysan bo weto kʼAllah. Tna imam retait ja ysan bo roto kʼAllah ye. Ysan re Ait kmo raa ro mno iro to fee ye.
HEB 5:2 Imam ro yase, ait yesait raa sai. Tna yhar yawe raa taro wase bo, tna bosmot rana to matak fee, tna mno iro ye. Tna imam retait yhaf sneh yban ana. Yhar yawe ti aro bosmot rait yesait matak fee ye, tna yesait yno iro ye. Feto tibyo ait yhaf sneh yban tis ana ye.
HEB 5:3 Au oh mi ait ja ktan kak tna yoo ysan mkah ait yesait wia matim. Ysan kʼAllah re yake safo wait ro yno to ye. Tna ait yoo bo ro raa roto makah mamo mee kʼait, yoo ysan kʼAllah. Ysan re yake safo wana ro mno to ye.
HEB 5:4 Raa aro ja yesait ysok ait ai yamo imam ro yase to fee. Allah yesait ysok tna ytu imam sait yawe yamo imam ro yase. Ja Allah ysok tna ytu raa sait mnan tiwya ysok Harun yawe yamo imam ro yase to.
HEB 5:5 Feto ye Kristus tubat Ait yesait fee. Ait ysok Ait ai yamo imam ro yase to fee. Allah yesait yawe, “Nyõ fi Ku aJõ. Mfo refo tamo Nyõ Naja.”
HEB 5:6 Tna Allah yawe, “Tawe Nyõ namo imam mamyot Melkisedek. Nyõ namo imam mamo snok mam hame wajin.”
HEB 5:7 Ati ro Yesus yhau mam tabam refo fares to, Ait skabuk yayoh bo kʼYaja Allah. Ykyas bo kʼYaja ykyas fari to, yawia tna yukan mbtek. Ait yhar yawe Yaja yatak re yno riof kʼAit. Yesus ja yasu heyut yari bo ro Allah yawe. Tibyo Allah yari bo ro Yesus skabuk.
HEB 5:8 Yesus tait Ku ro Allah yare, menohe bo ro mkair mno Ait ye. Tna bo ro mkair weto to, mno re Ait yari bo ro Allah yawe to, ybo yno kaket.
HEB 5:9 Bo ro mkair mai kʼYesus tibyo raa mame yajat. Allah ybis afo re Yesus yhar bo ro ja mai kʼraa to, yhar mnan si. Yhar oh tna ysair iso re kbe raa mamo mkai riof. Awya sai ro yari bokyas rAit, tna ybo yno to, kbe meen yhau hame wajin.
HEB 5:10 Tna Allah ysok Yesus yawe yamo imam ro yase mamyot Melkisedek. Allah yawe Yesus hre mam yuk ro mase.
HEB 5:11 Jõ tawe tkyas bo riwai reto msis kʼanu fares. Menohe anu nkit mbin, ja srau fee. Tna re jõ tifra sneh betoo bo reto rere sai kʼanu.
HEB 5:12 Anu smot Yesus ooh-oh: Snyi firwas snyi tna tahun firwas tahun oh. Menohe anu nhar bosmot ranu kaket fefares. Nhar kaket fefares tna re nkyas bo refo kʼraa kaket fefares ye. Rau ro moof to, raa mama mbetoo bosmot ranu, maja ro tinyi rau u kʼanu, mkyas rere, afo re anu nesait srau. Feto to jõ tkyas maja ro msai aro kʼanu fee. Anu nfi ku mees ro mait sis sai fares. Anu ntak niit boit nfi raa mabi to fefares.
HEB 5:13 Awya ro yait sis sai to, yfi ku mees fares. Tibyo wase bosmot ranu maja rau fares ye. Yhar bo yno bo ro moof fefares ye.
HEB 5:14 Maja ro msai to mnan fi boit ro matak. Raa ro ja beroh mbo mno bo ro moof to, mrok makit maan, mrok mhar bo mmat sas bombra beta. Mmat sas tibyo mhar bo ro moof re mno. Tna mhar bo ro mkair re mno fee.
HEB 6:1 Watum ro Kristus, maja taro ro mnan-nan to, bo weto anu nhar oh. Feto nma, anu bkyas bokyas refo maja baro ro samyoh fares, re kbe anu brok btak. Watum rAit ro anu nhar oh mefo: -Nashana tna nno bo ro mkair to ma. Raa ro mno bo ro mkair to, kbe mkai riof to fee. -Smot Allah. -Raa baptis anu. -Nmo no kʼraabis ro Tuhan re ana moo matem mtor kʼanu abyõ tna skabuk anu. -Raa ro smot Yesus tna mhai to, kbe meen mrok masen. -Kbe meen Allah yoo safo mana ymit kʼraa. Tna bo ro yawe reto to, meen mabo yum. Tiwya raa mkyas bo weto beta kʼanu re nhar oh. Feto to nno bo mnan fi ku mees u to ma.
HEB 6:3 Anu bkyas bo weto oh. Tna soh Allah ksoh ybis to, tawe kbe anu bkyas bo ro mase renti.
HEB 6:4 Raa taro tiwya mhau mam wore wo mamur menohe ana mamo mhau mam wore wo maah. Ana weto tiwya moo bouum ro Allah yoo yee kʼana oh. Tna Har rAit mjin mam mhaf wana oh.
HEB 6:5 Tna mhar mawe bo ro Allah yawe to, moof toni. Tna ana mhar tak ro Allah ye tna minaut sawro ro Ait siwyan kʼana.
HEB 6:6 Tna fo, soh ana weto haberek kbor to, ana mesait mame Yesus muhrin ro ewok u. Tibyo mno re raa miwana Ait tna sret Ait masah. Soh ana weto mamo tit tna mikyak Tuhan Yesus to, kbe ana me mashana u fee saut.
HEB 6:7 Oom mais mroh mame tabam beta. Tabam taro to raa mkah tna tabam reto tufrok mafer mawat kʼraa ro mkah. Tibyo Allah yno bo moof kʼtabam reto. Tabam reto to mnan fi raa ro moo bouum ro mbam Allah tibyo mno bo ro moof.
HEB 6:8 Menohe tabam roto taro to, tufrok abumun msya bo hyoh sai. Tibyo kbe Allah yto tabam reto. Meen tis rau to, Ait yuus tabam reto. Tabam reto to mnan fi raa ro moo bouum ro mbam Allah menohe me mno bo ro moof fee.
HEB 6:9 Tafoh na wojõ; jõ tkyas bo wefo menohe jõ tnaut tawe anu wefo kbe nhaf nse bo ro moof. Anu ja tufrok mafer ro mkair to fee. Tnaut tawe anu nmo mam iso ro meen nkai riof.
HEB 6:10 Ati ro Allah ytu srah yari to, ja yno kaket. Tna kbe Ait ynaut bombra ro moof ja anu nno. Ja anu natmof raa wAit to. Tna Allah ynaut yawe nno feto to, mnan anya msya anu nno bo moof weto kʼAit yesait ye. Nno feto yhar yawe anu natmof Ait ye.
HEB 6:11 Amu ksoh nwe anu nhau nno bo weto mamo snok mam wore anu nhai. Beroh nno renti afo re meen anu nkai riof ro mbam kʼAllah. Kbe meen anu nkai bo ro anu nwof tna nhaf ninaut fares reto: Bo moof ro meen Allah yuumto kʼanu.
HEB 6:12 Anu nhar bosi ro Allah ysi kʼanu, raa wAit. Feto to haweboh ma. Beroh nno bo ro moof mnan fi raa wAit ro matim wia. Nnaut raa wAit ro tiwya smot Allah: Tii ana weto mhau mwof bo ro Allah ysi kʼana. Ana mwof kait tna beroh smot Allah matak. Tibyo mkai.
HEB 6:13 Nnaut: Tiwya Allah ysi bosi kʼAbraham. Ati ro ysi bo reto, Ait yto boto ye. Allah yto boto to, ytom yasom rAit ai. Allah tait Raa ro yase. Raa roto aro mase miwer Ait fee. Feto to ysi bosi reto to, tna yto boto mkah yasom rAit ai.
HEB 6:14 Allah yawe, “Kbe Jõ tno bo ro moof kʼnyõ. Tna meen tno nyõ nabe ku renti msis-sas.”
HEB 6:15 Tibyo Abraham yhau to, beroh ste bo ro Allah ysi reto. Ait hrowyõ fee. Tna mabo.
HEB 6:16 Soh raa sait yto boto to, ja ytom raa sait yasom ro yase yiwrek ait. Tna ait ro yase tait yhaf sau yawe kbe bo reto mabo ye. Ja raa mari feto mawe, “Kbe ait ybo yno tu oh!” Kbe raa mnaut maut-mroh bokyas rait reto fee. Kbe raa besboh bokyas rait fee.
HEB 6:17 Allah ksoh yawe ku renti ro Abraham wait weto, kbe mhar mawe Ait tait Raa ro yros tu, susu fee. Afo re ana mhar mawe bo ro Ait ysi kʼana weto to, kbe meen yno tu oh. Feto to ykyas sai fee, ysi bo sai fee; Ait yto boto ye.
HEB 6:18 Ait ysi bosi ye. Tna Ait yto boto ye. Bo ewok weto to, kbe mhau bau. Allah wase bo sioh to. Anu ro bsam wai kʼAit oh to, anu bhaf binaut bwe bo ro Ait tiwya ysi kʼanu weto to, kbe yno tu oh. Bohar reto to mban anu tis, misoh anu bhaf wanu. Tibyo waa ma.
HEB 6:19 Anu bhaf binaut bo ro meen mama kʼanu mbam Allah. Meen anu bhaf bse tu oh. Allah sorni bo fee saut. Bo ro yawe yno to, anu bbo matak. Soh anu bnaut bo moof weto to, kbe anu bros btak; susu fee. Bo moof weto to mnan si jangkar ro ja raa mbeak mam aya tna kapal reto mros matak. Yesus yban tis anu afo re anu bros btak ye. Ait yase re kbe yamo ykyas boyoh wanu kʼAllah. Ait yhau su ysya Allah. Yhau su ysya Allah ynan fi imam yase ro Yahudi. Tiwya soh imam retait yamo yo kʼAllah to, ait twok mam yuk ro mbau. Yesus fi yamo imam ranu ro yase, ynan Melkisedek. Yamo imam mamo snok mam hame wajin, meen yhai fee. Tna Yesus fi yamo wia yatim ykyas boyoh wanu kʼAllah.
HEB 7:1 Tiwya Melkisedek yamo raja ro ybo tabam ro Salem. Ait yhar yawe Allah tait Raa ro yase toni. Tna yamo imam rAit. Tii Abraham yamo yafa ysya raja makin sor. Ait yros yatak abyõ tna byoh weto to mhau mte. ⌞Tna Abraham ytak bo wana.⌟ Ati ro hah ye yamoʼt tabam rait to, raja Melkisedek yama ytar ait. Tna Melkisedek skabuk re Allah yno bo ro moof kʼAbraham.
HEB 7:2 Tna Abraham yoo bo ro taa ytak mbam raja makin msya raa wana weto. Yoo hariyah (sepersepuluh) mbam bo weto beta to, yee kʼMelkisedek. Som Melkisedek to, maja rau to ‘raja ro ybo raa wait tait, yhaf moof ati, ro wase bo yber safo.’ Tna bi ait tait raja ro ybo tabam ro Salem ye. Som Salem reto, maja rau to 'iranya moof'. Feto to ait raja ro yisoh iranya moof to ye.
HEB 7:3 Melkisedek tait, raa mhar yaja msya yme bo fee. Mhar hohos wait fee ye. Tahun ro fnya mabe Ait to, anu wase ye. Tna soh ait yhai oh to, anu wase ye. Ait tait ynan fi Ku ro Allah yare. Ait yamo imam mamo snok mam hame wajin.
HEB 7:4 Bi Melkisedek fi raa ro yase toni. Tiwya Abraham yoo bo hariyah (sepersepuluh) mbam bosatoh rait ro riwai ytak to, yee kʼMelkisedek. Feto anu bhar bwe bi Melkisedek fi yase yiwer Abraham, hohos ranu ro yasom.
HEB 7:5 Watum ro agama ranu mkyas ku renti ro mbam bi Lewi. Ana ro mamo imam mam agama ro Yahudi to, Watum reto mkyas mawe, “Ana weto moo bosan raa ro Yahudi ja moo msan kʼana. Ana moo bo hariyah (sepersepuluh) mbam raa wana sor; ebokmi ana weto to ku renti ro Abraham wait ye.”
HEB 7:6 Menohe Melkisedek, ait ku renti ro bi Lewi fee. Feto Abraham yoo bo wait hariyah, yee kʼMelkisedek yno fyi? Tiwya Allah ysi bosi kʼAbraham. Feto anu bhar bwe Abraham tait raa ro ati ye. Menohe bi Melkisedek fi yase yiwer Abraham. Tibyo Melkisedek oh mi skabuk Allah re yno bo ro moof kʼAbraham.
HEB 7:7 Anu bhar bwe raa ro yase mi ja skabuk re Allah yno bo ro moof kʼraa ro kinyah.
HEB 7:8 Raa ro mamo imam mam agama Yahudi to raa sei sai. Kbe mhai ye. Raa weto ja moo bo hariyah mbam raa anya sor. Menohe raa mawe Melkisedek fi yhai fee. Ait yhau yroon.
HEB 7:9 Ati ro Melkisedek yama ytar Abraham to, Lewi yarak fares. Hohos rait mabe ait fefares. Menohe raa mawe, “Ati ro Abraham ysan bo kʼMelkisedek to, reto mnan fi imam Lewi yesait yoo bo rait hariyah yee. Mawe mnan fi Abraham msya ku renti Lewi ro yabe fefares, msan bo reto su. Yoo yee ebokfi ja raa msan bo kʼLewi.”
HEB 7:11 Ati ro Allah yoo Watum ro Musa yee to, Ait ysok imam mbam ku renti ro Lewi msya bi Harun. Ana weto mbo raa afo re ana mari kro Watum ro Musa. Menohe imam weto matak misoh iranya raa msya Allah to fee. Feto to, Allah ybis imam roto taro sait yama. Ybis imam ro ynan fi Melkisedek yama.
HEB 7:12 Imam sor ro mnan fi Harun mkyas Watum ro Musa. Tna mfo wefo Raa roto taro sait shauk yuk ro mase reto. Ait tait yatak yisoh iranya raa msya Allah. Tibyo Watum rAit shauk Watum ro Musa ye.
HEB 7:13 Bokom ro Allah mkyas Yesus. Yesus hohos wAit weto to, ku renti ro Lewi fee. Ait ybam ku renti ro Yehuda. Tna Watum ro Musa mkyas mawe ku renti ro Yehuda ja mamo imam fee. Ana ja moo bosan raa tna msan kʼAllah mam Samu rAit ye fee.
HEB 7:15 Mabo oh. Imam roto sait yama. Tna Ait ynan fi Melkisedek. Yama tibyo bo ro riwai tkyas to, mfo refo anu srau bhar kaket.
HEB 7:16 Kristus yamo imam fyi? Ait tait Ku renti bi Lewi fee. Feto yamo imam mkah tak ro Watum agama Yahudi ranu to, fee. Allah ysok Ait yamo imam mkah yatak rAit. Tak rAit reto oh mi yno Ait yhau yroon ye. Meen yhai fee.
HEB 7:17 Allah yawe kʼYesus yawe, “Tawe Nyõ namo imam mamyot Melkisedek. Nyõ namo imam mamo snok meen hame wajin.”
HEB 7:18 Watum ro Musa mkyas mato ro imam tna mkyas mato mawat roto taro sor. Mato ro imam reto, bose oh. Matak fee. Mafer marak. Tibyo anu sorni makus oh.
HEB 7:19 Watum reto to matak re misoh bo aro kaket to fee. Feto to Allah ysair iso ro tna. Iso reto moof miwer. Tibyo anu bhau binaut bwe soh anu kro iso ro tna reto kbe anu bmo biranya bsya Allah.
HEB 7:20 Ati ro Allah yawe Yesus yamo imam to, Ait yto boto. Menohe ati ro raa roto mamo imam to, Allah yto boto feto fee.
HEB 7:21 Yawe kʼYesus yesait aran yawe, “Nyõ namo imam mamo snok mam hame wajin. Jõ fi Tuhan Allah. Tawe feto tna tbo matak tu oh. Kbe tnaut maut-mroh fee.”
HEB 7:22 Allah ysi bosi ro tna sau tna yto boto. Kbe ybo matak. Yawe feto tibyo anu bhar bwe Yesus yno bo moof toni miwer bosi ro tiwya tinyi.
HEB 7:23 Mamyot bosi ro tiwya tinyi reto to, ku renti ro Lewi to, mabo mawat mamo imam oh. Menohe ana weto mabi tna mhai. Mhai tna ku wana masen mamo imam ro Yahudi riryõn. Imam weto sait yhau tibyo fee.
HEB 7:24 Menohe Yesus yhau yroon. Feto to Ait tait imam ro meen yhai fee.
HEB 7:25 Yamo imam ro meen yhau hame wajin. Ait yayoh bobyoh wanu kʼAllah. Feto to, raa ro mawe mamo kut-kut msya Allah to, Yesus yatak re yakah ana mamo mo kʼAllah. Tna yatak yno riof kʼana weto mamo snok mam hame wajin ye.
HEB 7:26 Yesus yamo imam ranu ro yase to, yban tis anu to, yno bo mnan si. Ait yhau yno bo ro Allah wAit sai. Yesus tait Raa ro ja wase bo yber safo. Ait yato mboh. Mfo refo Ait yhau su ysya raa ro mno iro to u fee. Allah yno Yesus yase toni. Yoo Ait yse hre mam sawro rAit.
HEB 7:27 Yesus tait ynan fi imam ro mase roto taro sor fee. Ait yoo kak tna ktan re ysan kʼAllah to fee. Imam ro mase roto taro to, ti wawa ja ana msan bosan. Ti wawa ana msan bosan mkah iro wana mesait to tinyi. Tna fo ana msan bosan mkah iro raa ye. Ja mno bo reto yoyo. Menohe ati ro Yesus ysan yetsu rAit yesait to, ysan mun sau aran sai. Feto tna re yyon iro raa mamo snok mam hame wajin.
HEB 7:28 Watum ro tinyi reto mkyas mawe raa sei sai mamo imam ro yase. Menohe anu raa sai fo, btak fee; ja bno iro sai. Tna ati ro Allah yawe Kristus yamo Imam ranu ro yase to, Ait yto boto. Allah ysok Ku rAit yawe yamo Imam. Allah yno Ku rAit yamo Imam ro ja yno bo ro moof toni yum.
HEB 8:1 Jõ tkyas kʼanu tawe Yesus tait yamo Imam ranu ro yase. Reto to Ait yno bo ro moof toni. Allah tait Raja ro yase toni, tna Yesus yaut yamo hre ysya Ait mam ati ro yatem ati; hroh ro mase toni reto.
HEB 8:2 Mam tno Ait yhau yno bo mam yuk ro mbau. Yuk reto Tuhan yesait yfen. Mnan anya msya Sbyah ro Tuhan raa mtor mam tabam refo to fee.
HEB 8:3 Raa ro mamo imam mase to, ja moo bo ro raa mama mee kʼana, tna msan bosan weto kʼAllah. Ja soh raa ksoh mayoh asik mawat kʼAllah, ana moo bo mee kʼimam. Tna kbe ait ysan bosan weto kʼAllah. Tna imam retait ja ysan bosan mkah iro raa to ye. Tna Yesus, ro yamo imam ranu ro yase to, ysan bo bawya?
HEB 8:4 Tii yhau mam tabam refo to, Ait yamo imam fee. Raa ro mamo imam makin mam agama Yahudi ja mhau oh. Tna ana oh mi mhau msan bo kʼAllah mamyot Watum ro agama ranu mbis mawe.
HEB 8:5 (Tiwya Allah yroh yama yo kʼMusa mam atu sau. Yroh yama tna ybis Musa ytor Sbyah mam tabam refo. Ybis yawe, “Sbyah refo to, ntor kaket: Sgi mnan fi maja ro Jõ terif kʼnyõ. Sgi Sbyah reto kro maja mnan fi samu aJõ ro mhau mam sawro.” Tibyo Musa sgi Sbyah ro skabuk reto.) Feto tna mbam tii reto to, imam ro Yahudi ja mno bo wana mam Sbyah reto. Sbyah reto kebet sai mnan anya msya samu ro Tuhan rAit. Menohe samu ro Tuhan rAit, ro mhau mam sawro rAit to, samu rAit ro ati.
HEB 8:6 Imam weto ja mno bo mamyot Watum ro Musa; Watum ro tii bose. Menohe Allah ysi yawe meen yno bo moof kʼanu miwer bo ro tiwya ysi yawe yno kʼhohos wanu. Feto to, Bosi ro Tna reto moof miwer Watum tii bose reto. Yesus ybo Bosi ro Tna reto, tibyo yros susai ykyas bo ysya Allah tna ysya raa. Tibyo bo ro Ait yno to, moof miwer bo ro imam weto mno.
HEB 8:7 Watum tii bose reto to moof mnan si fee. Feto tibyo Allah saso bo ro tna aro; bosi ro moof miwer, tna re kbe shauk Watum tii bose reto.
HEB 8:8 Tiwya tinyi nabi Yeremia ykom bo ro Allah yawe kʼraa ro Yahudi. Ait yawe ana mno bo ro mkair, yawe, “Kbe meen Jõ tkyas bosi ro tna kʼraa ro Israel. Kbe meen Jõ tkyas bosi ro tna kʼraa ro Yehuda.
HEB 8:9 Bosi ro tna refo fo mnan bosi ro tiwya tkyas kʼhohos wana to fee. Tiwya Jõ takah ana frok mbam tabam ro Mesir. Tna Jõ tkyas watum kʼana. Menohe ana mari bo ro tsi kʼana weto mbo mno fee. Feto tibyo Jõ haberek kbor.
HEB 8:10 Kbe meen Jõ tkyas bosi ro tna kʼraa ro Yahudi. Meen tno re watum aJõ mhau kʼana makit msya mhaf wana yum. Kbe ana mbaut Jõ tesait aran. Kbe ana mbaut bo ro tabam u fee. Tna ana mamo raa mana woJõ.
HEB 8:11 Tna ati reto to, raa mabi msya kukek bo beta kbe mhar Jõ kaket. Feto kbe raa sait watum yafoh wait u fee. Yawe, ‘Saso Tuhan, tna kbe nhar Ait kaket!’ Kbe yawe feto u fee. Mam wore weto to, kbe raa beta mhar Jõ kaket oh: Raa ro mase ye, msya raa ro kinyah ye.
HEB 8:12 Bo ro ana mno mkair to, kbe tyon beta. Mnan fi kbe Jõ sorni iro wana ro mno to makus.”
HEB 8:13 Allah yawe bosi reto to 'Bosi ro Tna'. Yawe feto to, yno shauk Watum ro Musa, ‘Bosi ro Tinyi’ reto. Bosi tii bose reto to, kbe Allah yirenti makus sai.
HEB 9:1 Bosi ro tinyi reto to, Allah ysi bo kʼraa ro Yahudi. Ykyas bo maja ro ana mama mo kʼAit, tna skabuk Ait. Tna ykyas Sbyah sau mam tabam refo, msya hawar rau ro mbau tna Allah yesait aran twok.
HEB 9:2 Tiwya tinyi raa mtor Sbyah reto. Sbyah reto to, mato rau to, hawar trion ewok: Mam hawar ro tinyi reto, raa moo sawe ro mara sau mse mros, msya ambar sau. Tna roti ro mbau to, raa moo mse abyõ mam ambar reto. Hawar reto to, raa mtu mawe, 'yuk ro mbau'.
HEB 9:3 Tna raa hero horden sau re burut wa hawar ro ewok reto. Tna hawar refo fo raa mtu mawe, 'yuk ro mbau toni'.
HEB 9:4 Mam hawar reto to, wohat (mezbah) ro maku sau mhau. Mam wohat reto to, imam ro yase yko bo ro sawer. Wohat reto to, raa moo emas mfen. Tna mam Sbyah hawar mato ye to, peti perjanjian mhau ye. Peti reto to, raa mfen mkah ara tna moo emas minin kait. Bo trion tuuf mhau mam peti reto mato: Ro sau to boit manna ro tiwya Allah yoo yee kʼraa ro Yahudi mait. Manna reto mhau mam baah (bulibuli) sau ro emas. Tna ro ewok, armuk ro Harun. Armuk reto tiwya tafuf frok. Tna ro tuuf to, raa mse bosi ro bose reto tiwya raa mkom mam fraa ye.
HEB 9:5 Mam peti reto abyõ rau to, raa moo emas mfen kerub mabo ewok. Ewok weto mros kmot peti reto. (Kerub weto to, raa mfen re imam yase ymat tna yhar yawe bo yase ro Allah rAit mhau mam weto.) Kerub weto maim wana mburut masa ro ja raa muut peti reto. Raa mtu bokait reto mawe, ‘Yuk refo fo Allah yyon iro raa’. Mam bokom ro mabuf refo fo, jõ betoo maja wau beta fee.
HEB 9:6 Raa misoh Sbyah reto, moo bo weto mse mam Sbyah kaket feto. Tna imam ro Yahudi sor ja truk yoyo mam hawar ro tinyi reto sai. Truk tna mno bo wana.
HEB 9:7 Menohe imam ro yase yesait aran truk mam hawar ro mbau toni reto mato rau. Truk mam hawar ro mbau toni reto to, tahun sau truk muhrin sau aran sai. Ati ro ait truk to, truk yatem marak fee. Truk to ybo mees. Ysan bosan reto mkah iro ait yesait yno, tna mkah iro raa ro Yahudi mno ye. Iro wana ro ana mno he ana wase sai ye.
HEB 9:8 Imam ro yase yno feto tna Har ro Tuhan betoo maja rau kʼanu. Mawe mam wore wo Sbyah reto mhau mam tabam refo fares to, raa mamo skabuk mam mne sai, menohe bo mno wa ana tibyo ana mamo kut-kut msya Allah fefares. Yuk ro Allah yhau to, ana mbau fares.
HEB 9:9 Anu bmat bo ro imamagama Yahudi weto mno to, bhar bwe mamo snok mfo refo, bo ro mno to, matak fee. Soh raa mawe asik mawat kʼAllah to, ana msan bo kʼAit. Tna imam msan bosan mkah iro wana ro mno ye. Menohe bo ro mno weto to misoh raa mhaf wana fee. Tibyo ana mhar mam mhaf mato mawe ana mkair fares.
HEB 9:10 Watum ro agama Yahudi to ⌞Watum ro Musa,⌟ aro mkyas boit ro mait, msya aya ro mata, tna iso ro mate aya afo re raa mrok moof. Menohe bo weto beta misoh raa mhaf mato fee. Bo weto misoh raa metsu wana sai. Raa mbo bo reto to, Watum ro tinyi reto to, matak mamo snok bosi ro tna mama sai.
HEB 9:11 Mfo refo Kristus yamo Imam ranu ro yase. Tna Ait yno bo ro moof miwer. Ait truk mam yuk ro mbau oh. Yuk ro mhau mam sawro ro Allah reto, ro mhau mam tabam refo fee, ro raa mfen fee.
HEB 9:12 Tiwya Kristus truk mam yuk ro mbau toni to, Ait ybo mees ro kambing fee. Ybo mees ro sapi maku to ye fee. Menohe truk mam yuk ro mbau toni reto to, mkah mees rAit ai. Truk tna ysan bosan reto mun sau aran sai. Yno tibyo bain raa mhai oh. Yno tibyo raa mkai riof mamo snok mam hame wajin.
HEB 9:13 Mamyot Watum ro Musa to, ⌞soh awya ro ksoh skabuk Allah, menohe yno bo aro yiwer Watum ro bose reto to, kbe ait yamo skabuk wia fee.⌟ Yamo yo kʼimam wia matim. Tna imam yoo mees ro kambing, soh mfe mees sapi ro sme, soh mfe mees sapi ro ano to, yko ysan kʼAllah. Yko mkak tna yoo boh rau furere abyõ mam raa retait. Tibyo Watum ro tinyi reto mawe raa retait yoof u. Raa retait yrok yoof tna kbe skabuk Allah u, ebokfi bo ro imam yno reto yyon ait yhaf mato moof fee.
HEB 9:14 Soh feto to, fyi mkah mees ro Kristus yesait? Mees ro Kristus rAit reto matak re misoh anu bhaf mato wanu ye. Har ro Tuhan mhau hame wajin. Tna mkah matak rAu to, Kristus ysan Ait yesait ai kʼAllah. Ait ro yoof toni, ja yhar iro yno to fee. Anu ro bno iro. Ja raa ro mno iro kbe mkai riof fee. Menohe anu bhar mam bhaf mato bwe anu bkair u fee. Mees rAit matak re mno anu brok boof. Mees ro Kristus reto mno anu ksoh bno bo ro Allah yawe. Allah ro yaam oh metait. Bo ro Kristus yno reto to, moof miwer bo ro imam ja mno.
HEB 9:15 Anu tiwya biwer Watum ro Musa. Kristus yhai afo re yyon iro wanu weto ye. Anu to, Ait bain mhai oh. Au oh meto Kristus tait ybo Bosi ro Tna reto. Tibyo yros susai ykyas bo ysya Allah tna ysya raa wAit ye. Yno feto, tibyo awya ro Allah ytu yawe yamo yo kʼAit to, kbe ykai bo ro tiwya Allah ysi reto: Kbe meen ait ykai mafer rau mamo snok mam hame wajin.
HEB 9:16 Reto mnan si bi yabi sait ro yawe ysan kta rait kʼraa anya. Ytom raa yasom yawe meen, ati ro yhai to, kbe raa retait yoo kta rait. Tna ati ro raa mhar mawe bi ait yhai to, raa ro tiwya yawe reto kbe yoo bo ro ait yawe ysan kʼait.
HEB 9:17 Wore wo bi retait yhau fares to, raa ro ja ait ytom yasom to, ykai kta reto fefares.
HEB 9:18 Reto oh mi tiwya Allah ysi bosi ro tinyi kʼMusa to, ati ro ysi to, Musa ktan kak ye: Ktan sapi ro tna, msya domba ro sme sau, tna yoo mees reto, srioh msya aya tna ysan kʼAllah. Ja mees oh mi make bosi to mno matak. Tiwya Musa yros ykyas Watum ro Allah kʼraa ro Israel beta. Tna ykyas bo ro Allah ybis beta kʼana. Ykyas mkak tna fo yoo domba mawyan ro mkek msya ara 'hisop' ngkre rau. Ybo bo weto bero mam mees reto tna yitut abyõ mam aam ro Watum ro Allah tna yitut abyõ mam raa ro mros mari bokyas rait to beta ye.
HEB 9:20 Musa yawe, “Bosi ro Allah ysi kʼanu to, mees refo mno bosi reto matak. Allah ysi yawe, ‘Nno bombra beta ro tsi kʼanu to, nno kaket!’”
HEB 9:21 Tna Musa yoo mees reto yitut abyõ mam Sbyah reto ye. Tna yitut abyõ mam bombra sor ro mhau mam Sbyah reto ye.
HEB 9:22 Raa mkyas Watum ro Musa reto to, ja mawe, “Mam mato reto to, mees to bo ro ati: Watum reto mbis imam moo mees mitut abyõ mam bombra beta. Mkyas mawe mees reto oh mi mno re bombra mrok moof mnan si, afo re Allah ksoh ymat. Tna mees oh mi mno re Ait yyon iro raa. Iso roto aro fee.”
HEB 9:23 Tiwya Musa yoo mees, yno Sbyah ro mbau msya bombra ro mhau mam Sbyah reto mrok moof, afo re Allah ksoh ymat. Menohe bombra weto sor to, maja kro bombra ro mhau mam sawro ro Allah sai. Mnan anya fee. Bombra ro mhau mam sawro weto to bo ro ati. Bombra ro ati weto to, mrok moof mkah bosan ro moof toni. Tna bosan ro Kristus ysan reto to moof toni.
HEB 9:24 Kristus truk mam sawro ro Allah tna hre ysya Allah. Mfo refo Ait yhau mam sawro tna ja ykyas boyoh ro anu byoh to, yawe kʼAllah. Tiwya Ait truk mam Sbyah ro mbau mam tabam refo fee. Sbyah reto to, bo ro raa sgi sai. Sbyah ro ati mhau mam sawro. Ro mhau mam tabam refo to, tii raa sgi kro maja rau ro ati sai meto.
HEB 9:25 Tna Kristus truk mam sawro ro Allah tna re ysan bosan mun sau aran sai. Reto mnan. Menohe imamagama Yahudi ro yase ja truk mam Sbyah ro mbau reto to, mun aro rau. Tahun ti wawa ait ktan kak, tna yoo mees rau, truk. Truk mam Sbyah reto hawar ro mbau toni tna ysan bosan reto. Ybo mees ro kak sai. Ysan mees ro ait yesait to fee.
HEB 9:26 Mfi bo Kristus yamo imam yase, ynan imam yase ro ja yhau mam tabam refo to, reto moof mnan si fee. Soh feto to, mbam tiwya tinyi Allah yfen tabam refo to, maami Ait ye yama u, tna ye yhai mun aro rau-rau to. Menohe yno feto fee. Ait yama mun sau sai tna raa mame yajat mam ara warok. Yama mam makyon muktis wau wefo to, tna ysan yetsu rAit yesait ai. Yno afo re iro mbo anu u fee. Yno mun sau sai to, mnan. Tna bo ro yno to, mhau matak yum mamo snok mam hame wajin.
HEB 9:27 Anu raa ro bhau mam tabam refo to, ja bhai mun sau aran sai. Bhai tna kbe meen Tuhan yoo safo mana ymit kʼanu.
HEB 9:28 Kristus yhai mun sau aran to ye. Yoo yetsu rAit ysan mnan fi bosan ro ysan kʼAllah. Ysan bosan reto mun sau aran sai mkah bo yyon iro raa mawat ro mno. Kbe meen Ait hah yama u. Yama yyon iro raa fee. Reto tii Ait yno oh. Kbe Ait yama yno riof kʼraa ro mhau ste Ait.
HEB 10:1 Watum ro Musa to, merif bo moof ro meen mama kʼanu mam sawro ro Allah. Menohe watum reto merif maja bo ro moof weto to sai. Anu bmat bo moof weto kaket fefares. Bo ro ja raa mno tna mmat mam tabam refo fo, bmat bo ro ati reto fefares. Au oh meto, imam sor ja ysan bosan mun aro rau-rau tna tahun firwas tahun. Tna anu bhar bwe bosan ro ana msan reto to, moof mnan si fee. Raa mama skabuk to, ja makah bosan. Mawe msan bosan afo re miranya msya Allah. Menohe bosan weto to matak re mno raa weto mhaf mato mrok moof mnan si to fee.
HEB 10:2 Mfi bo bosan weto to, matak re mno raa mhaf mato moof to, kbe raa mamo msan bosan renti u to fee. Mfi bo bosan weto to matak mnan si to, kbe raa msan bosan mun sau aran sai. Feto tna mhar mawe mhaf wana moof mamo snok mam hame wajin. Mhar mawe ana mkair u fee.
HEB 10:3 Menohe mfe: Ana ja msan bosan tahun firwas tahun. Mno tna me mnaut iro wana ro mno to u ye meto.
HEB 10:4 Sapi msya domba bo to, mees wana matak myon iro raa to fee saut.
HEB 10:5 Mees reto matak fee. Feto to Kristus yroh yama tabam refo tna yawe kʼAllah yawe, “Jõ thar tawe bosan ja raa msan to mame kʼNyõ nhaf fee. Tna raa msan bosan roto aro mkah iro wana ro mno. Tna bosan weto to mame kʼNyõ nhaf aNyõ fee ye. Menohe Nyõ siwyan Jõ mkah tamo ‘Bosan’ ro mnan si moof kaket.
HEB 10:6 Tiwya raa ktan kak, tna mko msan kʼNyõ. Tna msan bosan mkah iro wana ro mno to ye. Menohe bosan wana weto to mame kʼNyõ nhaf to fee.”
HEB 10:7 Tna Yesus yawe kʼAllah yawe, “Jõ fi Raa ro tiwya raa mkyas. Mam Bokom aNyõ tiwya raa mkom mawe, ‘Jõ siwyan tna ksoh tno bo ro Nyõ nawe.’”
HEB 10:8 Mam uu to, tkom bo ro Yesus ykyas trion ewok. Ro tinyi to yawe, “Jõ thar tawe bosan msya kak ja raa mko msan to, tna msya bosan ja raa msan mkah iro wana ro mno to, mame kʼNyõ nhaf fee.” Fyi re Yesus yawe bo reto? Yawe ebokfi Watum ro Musa mbis mawe anu, raa ro Yahudi mno bo weto.
HEB 10:9 Tna fo Yesus yawe kʼAllah yawe, “Jõ siwyan tna ksoh tno bo ro Nyõ nawe.” Anu bmat bokyas trion ewok weto to, tna bhar bwe iso ro tinyi reto Yesus skur beak. Tna re ysair iso ro tna sau.
HEB 10:10 Yesus yama ysan yetsu rAit oh to, yno bo ro Allah ksoh. Yesus Kristus ysan yetsu rAit mun sau aran sai. Tna mkah iso reto to, Ait yoo anu ysan kʼAllah re bmo raa wAit.
HEB 10:11 Imam ro agama Yahudi sor mno bo ro Watum ro Musa mbis: Rabu wawa ana ktan kak tna msan mnan anya bo ro ja soo ana mno wia. Menohe bosan reto matak myon iro raa mno to fee.
HEB 10:12 Yesus yamo Imam ro yase ye. Menohe yno feto fee. Ait ysan yetsu rAit muhrin sau aran sai. Bo ro Ait yno reto matak re kbe yyon iro raa ro mno. Bosan rAit reto ysan mun sau aran tna matak re kbe bain raa mhai oh. Tna yamo hre su ysya Allah mam ati ro yatem ati. Yaut hre mam hroh ro mase reto mamo snok mam hame wajin.
HEB 10:13 Tna Yesus hre mam beto ste wea; ste ati ro Allah yno raa ro mamo byoh kʼAit to, mbtek mte. Tna kbe Ait yros yatak abyõ ybo ana.
HEB 10:14 Yesus ysan bosan reto yno raa wAit mrok moof mamo snok mam hame wajin. Bosan reto to, ysan mun sau aran sai tna reto mnan si. Yesus yisoh raa wAit kri-kri fares ye.
HEB 10:15 Mam bokom ro nabi Yeremia, Har ro Tuhan mkyas bo reto kʼanu ye. Mawe,
HEB 10:16 “Kbe meen Jõ tkyas bosi ro tna kʼraa ro Yahudi. Meen tno re watum aJõ mhau kʼana makit msya mhaf wana ye.”
HEB 10:17 Tna mawe, “Iro msya safo ro ana mno to, kbe Jõ tyon mkak; mnan fi kbe Jõ sorni makus.”
HEB 10:18 Yesus yatak yyon iro msya safo ro raa mno. Feto to raa ktan kak msan fares to, mkah bawya? Ne nno bo weto u ma.
HEB 10:19 Taja, tme, tao, tano na; mees ro Yesus rAit reto myon iro wanu oh, mno anu boof. Feto nma, anu bmo bo kʼAllah mam yuk rAit ro mbau toni reto. Waa ma.
HEB 10:20 Yesus sair iso ro tna refo. Ait yhai to, tna yetsu rAit mfi horden ro burut wa hawar ro mbau reto to, yno mrok ntwat tna mato maah. Tna mfo refo Ait yhau tna ytar anu truk bmo bo kʼAllah.
HEB 10:21 Yesus yamo Imam ro yase ranu. Ait tait yerif iso re kbe anu bmo bo kʼAllah. Anu fo raa ro Allah wAit.
HEB 10:22 Feto to, nma, anu bmo biranya bsya Allah. ⌞Anu bashana oh.⌟ Tibyo raa baptis anu mkah aya oh. Feto tna anu bhar bwe bhaf wanu mrok moof. Anu bhaf wanu mrok moof oh, mnan fi raa ro mate aya ro moof oh, tibyo metsu moof. Anu bhar bwe anu smot Ait kaket. Anu fo srau ewok fee.
HEB 10:23 Anu bhau bkyas riof ro meen mama kʼanu. Bnaut bwe Yesus ro tiwya ykyas riof reto. Tna bo ro yawe yno to, kbe ybo yno tu oh. Feto to, nma, anu bhau bhaf binaut riof reto yoyo.
HEB 10:24 Nma, anu sobu anya nwe batmof anya tna bno bo moof kʼanya ye.
HEB 10:25 Nma, kbe anu hre su tna skabuk su ye. Raa taro ja haweboh bo skabuk. Anu bhar bwe ayõ ro Kristus hah yama u to, kene oh. Feto to nma, anu bros tis anya, tna bkyas bo moof kʼanya afo re anu smot Tuhan matak.
HEB 10:26 Soh anu bhar iso ro ati oh, menohe ja bno iro fares to, anu biwana Kristus, ro ysan yetsu rAit. Ysan mkah bo yyon iro wanu ro bno. Raa ro beroh mno iro fares to, ana mikyak bo ro Ait yno oh meto. Tna bosan roto aro ro kbe myon iro wana to, aro u fee.
HEB 10:27 Ana weto kbe waa fea! Ana mhar mawe meen Tuhan yoo safo mana ymit kʼraa ro mamo byoh kʼAit. Tna mhar mawe tafoh ro mase meen mait ana weto ye.
HEB 10:28 Tiwya bo mafa ranu, raa ro Yahudi to, anu bkyas bwe, “Awya sai ro yiwer Watum ro Musa to, raa mai ait yajat. Soh raa mabo ewok, soh mfe mabo tuuf maun ait to, kbe raa matmof ait fee, raa mai ait yajat yum.”
HEB 10:29 Soh raa yiwer Watum ro Musa to, yno bo ro mkair. Kbe raa moo safo mee mai tu oh. Soh feto to, kbe fyi soh raa yikyak Ku ro Allah yare? Bo reto bo ro mkair toni! Ro yno feto ymat mees rAit yawe mkair. Yesus mees rAit mno bosi ro tna reto matak. Tiwya mees ro Yesus misoh ait re yamo raa ro Allah rAit. Tna mfo refo raa retait yawe mees reto mkair. Ait retait yamus Har ro Tuhan oh meto. Yamus Har ro tiwya matmof ait. Tibyo kbe meen bo samyoh ro msai toni kbe btek mai kʼait.
HEB 10:30 Anu bhar Allah yhaf msya srau rAit. Bhar bwe Ait yawe, “Jõ oh mi ska bo tna tno bo ro samyoh mai to. Bo woJõ weto kbe tno tu oh!” Ulangan 32:35-36 Tna yawe, “Kbe Tuhan yoo safo mana ymit kʼraa wAit.”
HEB 10:31 Allah tait Allah ro yaam. Meen Ait yoo safo mana ymit to, bo ro msai toni reto.
HEB 10:32 Nnaut mam wore tinyi anu nmo no kʼYesus, tibyo nhau mam kek rAit. Ati reto to, bo ro samyoh mama mai kʼanu. Menohe anu nros ntak.
HEB 10:33 Ti aro rau raa masah anu. Tna raa mai anu. Tna ti aro rau bo ro samyoh feto mai nfoh na wanu ye. Menohe wore weto anu nros su nsya ana ye.
HEB 10:34 Nfoh na wanu taro to, raa mfot mbu mam bui mato. Menohe tiwya anu nmo nmat ana, nkyas bo ro moof kʼana. Anu smot Yesus tibyo ti aro to, raa mama mtak bo wanu ye. Menohe anu ja kmo fee. Anu nhar nwe mam mato ro bosmot ranu to, anu nhaf nse bo ro moof miwer bo ro anu bhaf bse mam tabam refo. Anu nhar nwe anu nbo bo ro meen mhau hame wajin. Feto to anu simaut mase.
HEB 10:35 Bo ro anu smot tna nhar weto to, nbo kaket matak oh! Anu smot Allah kaket tibyo Ait siwyan bo ro moof toni tna kbe yaren anu.
HEB 10:36 Beroh nno bo ro Allah yawe to, nno renti. Nno mkak, tna bo ro ysi kʼanu to, kbe yoo yee kʼanu.
HEB 10:37 Bokom ro Allah mawe: “Tuhan tait kene wore yama oh meto. Kbe nyum ti aro u fee.
HEB 10:38 Raa ro ja beroh smot Jõ to, tawe ana weto oh mi mfi raa ro mhaf moof ati to. Menohe soh ana haberek kbor tna mawe me smot Jõ u fee, ana weto mame kʼJõ thaf fee.”
HEB 10:39 Menohe anu fo kbe haberek kbor fee. Anu fo kbe Allah yno safe mkak fee. Anu smot Ait tibyo yno riof kʼanu.
HEB 11:1 Bosmot ro matak to bawya? Awya ro smot Tuhan matak yhar yawe bo ro yhaf yinaut to, kbe mabo tu oh. Bosmot rait reto to matak. Awya ste bo ro ait yasu ymat fefares to, tna yhar yawe bo reto meen mabo to, bosmot rait reto to matak.
HEB 11:2 Tiwya tinyi hohos wanu taro smot Allah matak feto. Reto oh mi Allah yawe ana mno bo moof.
HEB 11:3 Anu smot Allah matak tibyo anu bhar bwe Allah yfen tabam refo msya ayoh skes bo beta. Bo ro anu bmat mfo refo to, Ait yno re snok mbam bo ro marak fares sai. Yawe sai mkah yasoh tna yno bombra beta mabo oh meto.
HEB 11:4 Tiwya Habel smot Allah matak. Ait yoo bo ro moof ysan kʼAllah. Menohe yao Kain yari bo ro Allah yawe fee. Tibyo yoo bo ro mkair tna ysan kʼAllah. Habel smot bo ro Allah yawe to kaket. Tibyo Allah yawe bosan ro ait ysan to, bo moof. Tna Allah yawe ait raa ro yhaf moof ye. Tiwya ooh-oh Habel yhai oh. Menohe mfo refo anu bmat tna bkyas bosmot rait fares.
HEB 11:5 Tiwya Henokh smot Allah matak, tibyo yhai fee. Allah tubat ait mkah yaam yaut yamoʼt sawro rAit. Tibyo raa saso Henokh, menohe mkai fee. Bokom ro Allah mawe wore Henokh yhau fares to, Allah yhaf mnan ait. Yno feto tibyo Allah tubat ait mkah yaam, yaut yamo sai.
HEB 11:6 Awya ro yamo yo kʼAllah to, tinyi rau to ait yhar yawe Allah yabo tu oh. Tna yhar yawe ja Allah yno bo ro moof kʼraa ro saso Ait kaket. Raa ro smot Allah matak fee, mno Allah yhaf mnan fee saut.
HEB 11:7 Tiwya Nuh smot Allah matak, tibyo yfen aken sau. Allah ykyas kʼNuh matim wia, yawe kbe yoo safo mana ymit kʼraa. Yawe kbe yno bo ro mkair mai kʼraa ro tabam refo. Bo ro Allah yawe kbe yno mai kʼraa to, yno fefares, Nuh yasu ymat fefares. Menohe yhar yawe Allah yesait aran yase. Tna re yari bo ro Ait yawe tna waa. Tibyo yfen aken reto mkah yasyõ fnya msya kukek wait ro sme, tna msya fnya wana bo re mkai riof. Bosmot ro Nuh matak. Tibyo ait yari bo ro Allah yawe, ybo yno. Tna Allah yawe ait raa ro yhaf moof. Bosmot rait reto mno riof kʼait ysya fnya, kukek wait weto. Menohe Allah ymat yawe raa taro smot Ait mfi Nuh fee. Tibyo ana weto safe mkak.
HEB 11:8 Tiwya Abraham smot Allah matak, tibyo yari bo ro Allah yawe, tna ybo yno ye. Allah ytu ait ybis yawe yasen sikba rabin rait tna yamoʼt rabin roto; ro ait wase fares. Tibyo Abraham yasen, satoh bo wait, tna yamoʼt rabin raa. Allah ysi bo kʼait yawe meen ysan rabin reto kʼait.
HEB 11:9 Abraham smot Allah, tibyo yamo yhau mam rabin raa reto, yfi raa srim. Yhau mam rabin ro Allah ysi yawe ysan kʼait to, yhau mam sbyah sai. ⌞Yhar yawe yhau mam tabam reto kait fee.⌟ Tahun firwas tahun tna ku rait Ishak ysya yatat Yakub ja mhau mam sbyah sai ye. Ana mbewok mnaut bosi ro tiwya Allah ysi kʼana maja rana ye.
HEB 11:10 Abraham yhau mam sbyah sai tna yhaf yinaut yawe meen ait yamo yhau mam remo ro Allah rAit. Yhau mam remo ro matak tna mhau yum reto, remo ro Allah sgi tna siwyan kʼait yhau tibyo.
HEB 11:11 Abraham smot Allah matak. Tna ait yhar yawe bo ro Allah yawe yno to, kbe ybo yno tu oh. Tibyo Abraham ysya Sara mabe ku sait. Abraham ysya yfain fai Sara to, mabi toni oh.
HEB 11:12 Yabi oh, tibyo yetsu ssafo yabe ku u fee. Menohe yabe ku. Tna ku retait yabe ku renti mawat. Abraham tait raa sait aran sai, tna yabe ku renti wait mawat; mnan sken ro ja mhau mam ayoh skes. Tna kbe raa aro mros ntuu ku renti wait fee. Ana msis mnan fi snyik ro mftau mboh mam aya sawan maam.
HEB 11:13 Raa wore wo tkyas mam uu to, ana mkai bombra ro Allah ysi weto fefares. Menohe bosmot wana matak fares; ana mhau to, mhaf minaut tna ste bombra weto ro meen mama. Ana ksoh bo weto tibyo simaut. Tii ana beta mhai to, mhaf mse bombra weto fefares. Ana mawe ana mhau mam tabam refo mnan fi raa srim sai.
HEB 11:14 Soh raa mkyas feto to, anu bhar bwe ja ana ste rabin roto taro, rabin rana mesait.
HEB 11:15 Ana mawe ana mnan fi raa ro srim. Mfi bo ana mnaut rabin wore wo tiwya ana mhau to fares, maami ana mhah me mamoʼt rabin reto.
HEB 11:16 Menohe ana mhaf minaut rabin taro ro mhau mam tabam refo fee. Ana minaut rabin sau ro moof miwer; ro mhau mam sawro ro Allah rAit. Allah siwyan remo sau kʼana mkah bo meen mhau oh. Tna raa weto minaut remo reto. Feto to raa mkyas Allah to mawe, “Ait fi Allah ro ana weto smot.” Ana mawe feto tna Ait ksoh; Ait saban fee.
HEB 11:17 Tiwya Abraham smot Allah matak, tibyo yari bo ro Allah yawe, tna ybo yno ye. Allah sanet ait ybis yawe yoo ku rait Ishak ktan. Tna Abraham yawe, “Ae, kbe tno oh.” Ti reto to, Allah ysi bo kʼait oh tna ykyas ku renti wait oh. Tna Ishak tait ku ro Abraham yabe sait aran. Menohe Abraham siwyan yawe ysan ku retait kʼAllah.
HEB 11:18 Ebokmi ait ynaut yawe tiwya Allah yawe ku rait Ishak oh mi meen yabe ku renti msis-sas.
HEB 11:19 Abraham ynaut yawe Allah yatak yno Ishak yrok yasen. Tibyo Abraham siwyan ktan Ishak. Tna kene wo mabo oh. Kene mo sboh. Menohe Allah yno wa. Feto to Abraham ynaut yawe mnan fi mabo. Tna yawe Allah yno ku rait Ishak yrok yasen.
HEB 11:20 Tiwya Ishak smot Allah matak, tibyo skabuk yayoh Allah yawe yno bo ro moof ku wait mabo ewok. Yayoh Allah re meen yno bo ro moof kʼYakub ysya Esau.
HEB 11:21 Tna Yakub smot Allah matak. Ati ro ait yabi oh, kene wo yhai to, ait skabuk yayoh Allah yawe yno bo ro moof ku ro Yusuf wait mabo ewok. Tna tmi yana mam armuk rait tna ybaut Allah.
HEB 11:22 Tiwya, mam tabam ro Mesir to, Yusuf kene wo yhai. Ait smot Allah matak. Tibyo ybo bo ro Ait yawe matak ye. Yhar yawe meen Allah yakah raa mana ro Israel snok mbam tabam reto. Tna Yusuf ysi bo kʼraa wait yawe ati ro ana snok mamo to, ana moo ait ytai rait to, makah mamo ye. Yawe ait ytai mhau akus fee.
HEB 11:23 Tiwya Musa yme mabe ait. Tna raja Mesir ybis yawe raa behoh ku sme beta majat. Menohe raa mabi wait mmat mawe ku retait yoof toni. Tna ana waa raja retait fee. Ana smot Allah matak, tibyo ana moo Musa mimyõt wai snyi trion tuuf.
HEB 11:24 Raja retait, ku ro ano rait, mayõ Musa, mtos. Tibyo Musa yhau mam amah rau tna yabi. Menohe ait smot Allah matak. Tibyo yawe kʼraa yawe ait ku ro au mabe metait to fee.
HEB 11:25 Ait hawe bo yhaf yse bo moof ro Mesir. Ait hawe bo yno iro. Tna yhar yawe bo moof mam tabam refo to, mhau waor sai. Feto to yasen yamo yhau ysya raa mana ro Allah rAit. Yhau ysya ana weto to, bo samyoh mai kʼait.
HEB 11:26 Yhar yawe Allah ysok raa mana rait ro Yahudi reto yawe ku renti wana weto oh mi meen mabe Kristus. Musa yhau ymat bo ro meen mama reto to, yawe mafer moof kʼait. Yawe mafer moof toni miwer kta ro Mesir beta. Feto tibyo Musa yawe yhau ysya raa mana ro Israel. Yawe kbe bo samyoh mai kʼait rof.
HEB 11:27 Ait smot Allah matak. Tibyo yasen frok ybam Mesir. Ait yhar yawe kbe raja kmo ait. Menohe ait waa fee. Ait smot Allah, ro ja raa mahni. Menohe Allah yerif Ait kʼMusa. Feto to ait yawe beroh sikba Mesir.
HEB 11:28 Musa smot Allah matak. Tibyo yari ybo bo ro Allah yawe. Tna yakyõ korat ro Paskah. Yno si to, yoo mees karu mam amah sor raa ro Israel wana ja mhau. Malaikat sau mama mame kubum raa ro Mesir beta. Menohe Musa yoo fito reto yai wa feto. Tibyo malaikat reto mama mame kubum raa mana ro Israel weto to fee.
HEB 11:29 Raa ro Israel smot Allah matak. Tibyo ana mroh mamo frit sawan ro 'Laut Merah' mnan fi ana mamo mam tabam ro ngkaat sai. Tna raa ro Mesir mawe ana mno feto ye. Menohe mfe; Allah yno raa ro Mesir to beta msu mkak saut.
HEB 11:30 Raa ro Israel mamo mur mam remo ro mabi sau, masom Yerikho. Mamo mur ti trion krema. Ana smot Allah matak. Tibyo yno fraa ro raa mafir mur mam remo reto to, mrok nraref.
HEB 11:31 Tiwya raa ro Israel baro mama mmat tan remo ro Yerikho to. Mamo mmat tan, tna Rahab moo raa weto mimyõt wai mam amah rau. Tna re ana mkai riof. (Rahab to fnya ro Yerikho. Au to fnya ro ja mwyah.) Menohe raa roto ro mhau mam Yerikho ja mari bo ro Allah yawe fee. Tna raa sbe ro Israel mama mame raa ro Yerikho weto. Mama mame ana majat. Menohe Rahab smot Allah matak. Tibyo raa mame au majat fee.
HEB 11:32 Kbe jõ tawe bo bawya naut u? Ayõ mnan fee. Feto to tkyas Gideon, Barak, Simson, Yefta, Daud, Samuel msya nabi makin sor taro fee.
HEB 11:33 Ana weto beta smot Allah matak. Feto to, ana taro mafa rabin roto taro tna ana mros matak. Tna raa ro mamo byoh kʼana to, mbtek mte. Ana roto taro mamo raa ro mase tna mbo raa wana kaket moof. Taro to fri singa ro nsafo, menohe singa weto mafit ana mabo fee.
HEB 11:34 Ana ro smot Allah weto to, taro truk mam tafoh ro mait. Menohe tafoh reto mait ana sohabyoh fee. Raa wanu taro to, byoh saka ana, mawe mame ana majat, menohe ana mkai riof. Taro to raa ro maka sne, ssafo fee, menohe mrok matak. Tna taro matak re mafa msya raa mana roto taro kaket. Tibyo raa ro mamo byoh kʼana weto msam mamo.
HEB 11:35 Fnya baro ro smot Allah kaket to, raa wana ro mhai oh to, mrok masen. Menohe raa roto taro smot Allah kaket, tibyo raa mfot ana mai. Raa sikowah ana. Menohe mawe raa mai ana majat rof, bitsre ana mamo fee. Mawe feto afo re meen Allah yno ana mrok masen. Mrok masen tna kbe yno bo moof kʼana miwer yno kʼraa roto taro.
HEB 11:36 Raa taro smot Allah kaket, tibyo raa sret ana masah. Tna moo too mok-mak ana. Taro to raa moo rantai make, tna mbu ana mam bui mato.
HEB 11:37 Taro to raa moo fraa mai majat. Tna taro to raa ktan mabuf ewok. Tna taro to raa moo tfo ro miyõ, takoh ana tna majat. Taro mse ratan aro fee, tibyo ana moo domba marak soh mfe kambing marak sai myum. Ana to, boit msya bo ro ana mse to, mabut. Raa mno bo ro samyoh mai kʼana. Raa mno bo mkair kʼana ye.
HEB 11:38 Amah ro ana weto mhau to aro fee. Tibyo ana mamo ninya mhau mam yuk ro riamo; mam atu, tna mam isra msya ako mato ye. Raa ro tabam refo hawe ana, mnaut mawe ana raa ro mkair. Menohe raa ro tabam refo to, Allah ynit msya ana weto yawe mnan anya fee. Anu bhar bwe raa ro smot Allah matak weto to, raa ro moof miwer.
HEB 11:39 Raa weto beta tiwya smot Allah matak. Reto oh mi ana mno Ait yhaf mnan. Menohe ana beta mhai. Mhai wia tna bombra ro moof Allah ysi kʼana to, sait ykai fefares.
HEB 11:40 Allah ynaut yawe soh ana mesait aran mkai bombra ro tiwya ysi to, moof fee. Yawe soh anu ro smot Ait mfo refo to, nsya ana ro tiwya tinyi smot Ait weto, kbe nkai bombra ro tiwya ysi weto su to, moof miwer. Allah ksoh yawe anu raa mkbair ewok weto, beta mamo raa ro mhaf moof mnan si, aro mabut fee.
HEB 12:1 Raa ro tiwya smot Tuhan to msis oh. Tna ana mhau mmat rof anu. Feto to nma, anu beroh smot Ait matak ye. Bo bawya ro mno wa bosmot ranu to, noo beak makus. Iro msya bo mkair ro anu bno to, kbe mno anu btek bwe. Feto to nno u ma. Nma, anu bros btak smot Tuhan matak mamo snok sboh rau. Nma, anu bhoh wai kʼAit mam iso ro moof. Ait yerif iso reto kʼanu oh. Mfi bo raa baro santri anya mhoh to, ana mhoh mamoʼt makit rau to, tna kbe moo bouum ro raa siwyan muumto mee kʼana.
HEB 12:2 Nma, anu bsu bfi fon to, bmat Yesus aran. Ait oh mi raa ro sair iso re kbe anu smot Ait tna bmo bo kʼAllah oh meto. Tna Ait oh mi kro iso ro bosmot reto kaket mnan si mamo snok mam tis rau to ye. Tiwya yhau mam tabam refo to, Ait yhar yawe kbe meen Allah yoo simaut ro mase yee kʼAit riryõn shauk bo samyoh ro Ait yasom. Tibyo Ait yajat mam ara warok, menohe Ait hrenaut fee. Yawe kbe yasom bo mkair reto sai rof. Yajat tna fo yaut yamo yo kʼAllah. Allah hre mam ambar-tahta rAit. Tna Yesus hre su ysya Allah mam ati ro yatem ati.
HEB 12:3 Kbe ati ro raa mno bo ro mkair mai kʼanu fo, nnaut Yesus. Tii raa ro ja mno iro to, ana mno bo mkair mai kʼAit ye. Yesus beroh tna yasom bo weto ro mai kʼAit. Ja anu bsom bo ro samyoh weto fee, bsom bo ro mnan-nan sai. Nnaut bo reto re kbe soh anu hrowyõ to, kbe anu bitsre bosmot wanu to ma.
HEB 12:4 Ja anu beswan iro to. Menohe anu aro nno mamo snok nkai yaaf o nhai bo fefares.
HEB 12:5 Nsorni ma watum ro Allah: Mam bokom sau raa sait ykyas bo ku sme rait. Bokom far-far wefo mkyas bo kʼanu, ku wAit ye, mawe: “Ku ajõ: Ti aro Tuhan yno bo ro samyoh mai kʼanu afo re anu brok bhar bo. Soh Ait bhah anu to, niwana ma! Kmo ma! Tna ati ro anu nno bo ro mkair, tibyo Ait yastako anu to, hrowyõ ma.”
HEB 12:6 “Nnaut nwe Tuhan yno bo reto kʼraa ro Ait ksoh. Awya ro Ait ytu yawe yamo ku rAit to, soh ait retait yno bo ro mkair aro to, kbe yno bo mai kʼait riryõn afo re ait yhar yawe ye yno bo reto u ma.”
HEB 12:7 Bo ro Allah yno mai kʼanu to, mfi bo raa mabi ja mno kukek wana. Feto to beroh kanyin sai. Soh ku wana mno bo ro mkair to, raa mabi mastako tna mai ana fea!
HEB 12:8 Ja raa mabi mastako kukek wana. Tna misoh ku wana, afo re ana mashana tna mari bo ro raa mabi mawe kaket. Tna anu fo ku ro Allah wAit. Feto oh mi Ait yastako anu tna yno bo mai kʼanu, afo re anu nashana ye. Soh yno feto fee, anu to ku wAit fee, menohe nfi ku ro ja fnya mabe-aba sai.
HEB 12:9 Soh anu bno bo mkair to, kbe bja wanu ro tabam refo mai anu fea! Tna anu heyut bmat ana. Anu bri bo ro ana mawe. Feto kbe anu bsom bo ro Allah yno mai kʼanu feto ye. Ait tait anu Bja ro yhau mam sawro rAit. Kbe anu heyut bmat Ait tna bri bo ro yawe. Bhar bwe yno feto afo re riof kʼanu.
HEB 12:10 Tiwya anu bja wanu mno bo mai kʼanu, tna mitsre bo ro samyoh mai kʼanu tahun baro sai, mam wore wo anu bkek fares sai. Mno bo ro ana mnaut mawe misoh anu boof. Tna anu bhau mam tabam refo fares to, Allah yitsre bo ro samyoh mai kʼanu afo re yisoh anu boof. Re kbe meen anu brok boof mnan Ait ye.
HEB 12:11 Bo samyoh ro Allah yitsre mai kʼanu to, ati ro anu bkai to, anu bnaut bwe bo mkair. Mno anu sraujin. Menohe raa taro bito masom bo weto mamo snok mam sboh rau. Tibyo bo samyoh reto misoh raa weto mhaf wana: Mno ana mhaf tnok tna mno re ana ksoh mno bo ro Allah ksoh ye.
HEB 12:12 Anu ro naa sne to; nsen nsit nros.
HEB 12:13 Anu bmo mam iso ro bosmot. Nisoh betrot iso reto, afo re anu smot Allah matak. Raa baro to, bosmot wana matak fee. Nno bo ro misoh bosmot wana mamo matak. Nisoh iso re kbe anu aro btek nwe fee. Feto re nros ntak.
HEB 12:14 Tomer re kbe nhau niranya nsya raa beta. Tna tomer nhau nno bo ro Allah wAit sai. Raa ro mhau mno bo ro Allah wAit sai to, mesait sai aran kbe meen mmat Allah mam rabin rAit.
HEB 12:15 Nhau to, kmot anya kaket. Afo re anu beta nmo mam iso ro Yesus sair tna yatmof anu reto. Nno be anu aro sikba iso reto tibyo nkai boatmof ro Allah fee. Raa ro mweh iso reto to, ana miwro raa mawat. Ana mno iro. Tibyo raa mawat kbe mkai riof fee. Ana weto mnan fi raa ro mji foo, tibyo syoh mawat mhai.
HEB 12:16 Nhau to kmot anya. Afo re anu aro nwyah, nus-as bo to ma. Afo re anu aro wase Allah ma. Nno be anu nnan fi Esau, ro tiwya wase Allah. Ait wase Allah tibyo yiwana bo moof ro yaja yawe ysan kʼait. Yiwana kta ro yaja yse mkah ku bum rait reto tna ynaut boit ro ifo yait sai. Yno feto yasim kta reto.
HEB 12:17 Esau yno bo reto. Tna fo hre ye ynaut bo ro yno. Tna yayoh yawe yaja yno bo ro moof reto kʼait. Menohe ait aro ye fri bo weto fee. Tibyo ait sraujin tna yawia. Yawia menohe aya mhau mam srau oh. Yaja yno bo moof reto kʼait fee.
HEB 12:18 Tiwya Allah yoo watum rAit yee kʼMusa mam atu ro Sinai. Mam wore weto to, Allah yawe wa yawe raa aro mamo kene kait mam atu reto to ma. Allah yno tafoh mait mam atu reto, tna yno mamur hto msya foos ro msai bo mfi ye. Yno raa mari bo sau mawia fari mnan fi raa mfi saa bo feto. Tna ana mari mai ro mno ana waa toni. Mai reto mbis mawe, “Raa msya kak bo to, aro mamo kene kait mam atu reto to ma. Soh bo aro mamo miir atu reto mair to, nme bo reto majat: Noo fraa nii kak reto majat.” Keluaran 19:12-13 Ana mari mai reto tna mrok waa. Tibyo ana soh-soh Allah mawe ykyas bo kʼana u ma. Tiwya Allah yoo watum rAit kʼraa ro Israel to, yno bo ro msai toni weto. Musa ymat bo weto tna yhaf aya yawe, “Jõ waa tetet thai!” Ulangan 9:19 Menohe iso ro anu nmo no kʼAllah to, iso ro hayah.
HEB 12:22 Ja anu nmo no kʼAllah mam iso ro maut faut ro Sion. Sion to mnan fi Yerusalem ro mhau mam Sawro ro Allah. Tna anu nmo kait no kʼAllah ro yaam to, ro yhau mam sawro rAit. Anu nmo mam iso reto oh. Anu nmo no kʼmalaikat msis-sas. Malaikat weto hre su tna simaut mase.
HEB 12:23 Anu nmo mam iso reto tibyo anu nmo raa mkbair ro Allah wAit to. Anu fo ku wAit ro masom. Anu nsom wanu to, Allah ykom mam sawro rAit oh. Kbe meen anu nhau nsya Ait su mam sawro rAit. Anu nmo no kʼAllah oh. Ait oh mi meen yoo safo mana ymit kʼraa beta. Anu nmo raa mkbair sau su nsya raa wAit ro mhai wia matim; raa ro Ait yisoh mhaf wana moof mnan si, aro mabut fee.
HEB 12:24 Anu nmo no kʼYesus oh. Ait ybo Bosi ro Tna reto matak mkah mees rAit. Tibyo yros susai ykyas bo ysya Allah tna ysya raa wAit ye. Tiwya Habel raa mame yajat ye. Tna mees rait frok ye. Menohe mees ro Yesus ysan to, mafer moof miwer: Yesus yhai afo re Allah yyon iro wanu.
HEB 12:25 Nri bo ro Allah yawe kʼanu. Niwana ma! Musa tait raa ro tiwya yhau mam tabam refo sai. Tii ait ykyas bo ro mbam Allah kʼraa. Menohe raa miwana bokyas ro Allah reto. Tibyo bo ro mkair mama mai kʼraa weto. Mfo refo Kristus oh mi Raa ro ykyas bo ro mbam Allah kʼanu. Ait ybam sawro ro Allah yroh yama. Feto kbe nri bo ro Ait yawe. Haberek kbor kʼAit ma, be kbe bo ro mkair toni mama mai kʼanu.
HEB 12:26 Tiwya Allah ykyas bo mam atu ro Sinai tna tabam mrok mnah. Tna mfo refo Ait ysi yawe, “Meen Jõ tno tabam refo mnah u ye, tna msya ayoh skes mnah ye!”
HEB 12:27 Yawe yno tabam refo mnah u. Yawe kbe meen yno mnah toni tibyo bombra ro yfen mam tabam refo beta marak. Tna bo ro meen mhau mawyõs aran kbe mhau. ⌞Reto bo ro tii ysi kʼanu, raa wAit ye.⌟
HEB 12:28 Meen anu bmo bhau mam sawro ro Allah yamo Raja ybo to. Tna sawro ro anu bhau reto to, mhau matak hame wajin. Feto to nma oh, anu byoh asik mase kʼAit tna heyut bmat Ait, tna waa Ait ye. Soh anu bbaut Ait kaket oh meto, kbe Ait yhaf mnan.
HEB 12:29 ⌞Tiwya tinyi Musa yawe,⌟ “Allah tait yatak toni ynan fi tafoh ro mait bo mkak.”
HEB 13:1 Nhau nsya anya to, niranya moof.
HEB 13:2 Raa ro srim to, msya raa ro anu wase to, nmen ana nmo nse mam samu wanu. Tna nsorni ma, noo boit nee kʼana mait ye. Raa ro mno feto to, baro moo boit mee kʼmalaikat oh meto. Menohe ana wase.
HEB 13:3 Raa ro raa mbu mam bui mato to, nmo nmat ana ye. Nros tis nban ana. Nnaut nwe ana mnan anya mfi bo anu ai, oh mi raa mbu mam bui mato meto. Nros tis nfoh wanu, mam wore wo raa mno bo ro samyoh mai kʼana ye. Nnaut nwe mnan anya mfi bo weto mai kʼanu ai.
HEB 13:4 Soh raa moo fnya tna fai reto mamo msya ait to, tawe raa beta kbe mros tis kʼana mbewok re miranya matak. Allah yawe wa yawe raa bitsre anya ma, tna mamo mwyah bo to ma. Kbe Allah yoo safo mana ymit kʼraa ro mwyah weto.
HEB 13:5 Allah ykyas mam bokom rAit yawe, “Jõ sikba anu fee saut. Jõ thau su tsya anu yum.” Ulangan 31:6,8 Feto to, nsu mase mkah pitis to ma. Nhau to, nnaut nwe bo bawya ro anu nse oh to, mnan.
HEB 13:6 ⌞Riwai Bokom ro Allah mawe kbe Ait sikba anu fee.⌟ Tibyo anu bhar bwe, Tuhan ja yban tis anu. Tibyo anu waa bo ro kbe raa mno mai kʼanu to fee.
HEB 13:7 Nnaut raa ro tiwya mkyas watum ro Tuhan kʼanu. Nnaut bo ro moof ja ana mno msya mafer rau. Tna smot Tuhan kaket mnan fi ana ja smot ye.
HEB 13:8 Yesus Kristus ja yhau ynan anya sai, ja haberek fee. Iis, riwai, tna mfo refo ye, tna mamo snok mam meen hame wajin to mnan anya sai. Ait yhau feto yum.
HEB 13:9 Mfo refo raa baro mkyas watum roto taro sor. Ana mawe wa raa mawe mabo fane bo to ma. Mawe mbau. Kro watum rana reto to ma. Ana ro mno feto mkai mafer aro fee. Nnaut nwe bo mafa ro agama ja ana mno soo oh to, mno bosmot rana to, mo matak fee. Nri ana ma. Nri Tuhan ro yatmof anu. Ait oh mi ro ysan boatmof rAit u kʼanu. Nnaut nwe boatmof rAit oh mi kbe mno bosmot ranu mo matak renti.
HEB 13:10 Soh imam ro Yahudi ksoh yawe Allah yyon iro raa wana to, ana truk mam Sbyah ro Allah. Tna msan sapi msya domba bo to, mam wohat ro mbau. Mbau menohe watum rana mbis mawe ana mesait moo baro mabo ye. Anu smot Yesus, tna bhar bwe bo ro Ait yno oh mi 'bosan' ro matak mkah bo myon iro wanu. Imam weto smot Yesus fee. Tibyo ana fri mafer ro moof reto to fee ye.
HEB 13:11 Mam korat ro masom Pendamaian to, raa msan bo to, mno feto fee: Ja imam ro yase ktan sapi msya kambing. Tna yakah mees reto, ntruk mam yuk ro mbau toni. Mees reto ait ysan afo re Allah yyon iro ro raa mno. Menohe sapi msya kambing mabuf weto raa moo makah frok mbam Sbyah reto. Raa moo tafoh mamo mkah mam mne.
HEB 13:12 Tiwya raa makah sapi msya kambing mabuf weto mamo frok mbam remo. Tna Yesus ye. Raa makah Ait mamo frok mbam remo mamo mame mam mne ye. Yitsre raa mame Ait afo re mees rAit reto myon iro ro anu bno. Au oh mi Ait yoo anu ysan kʼAllah re anu bno bo wAit sai.
HEB 13:13 Ait raa mame mam remo mne rau. Tibyo raa makin miwana Ait, sret Ait masah. Nma, anu kro Ait bmoʼt remo mne ye. Bitsre raa miwana anu, sret anu masah feto ye.
HEB 13:14 Nnaut nwe mam tabam refo fo, yuk ro anu bhau tibyo fee. Anu bhaf binaut bwe ste remo ro anu meen bhau mamo snok mam hame wajin.
HEB 13:15 Yesus yamo imam ranu ro yase. Bo ro anu bsan kʼAllah to, au oh mi anu bibi Allah yasom rAit tna bwe asik mase kʼAit yoyo.
HEB 13:16 Nsorni ma nno bo moof kʼraa. Noo bo nee kʼraa. Bno feto to, Allah yawe mnan fi anu bsan bo kʼAit, tna bno yhaf mnan oh meto.
HEB 13:17 Nri bo raa wanu ro mase mawe to. Nbo nno. Ana oh mi raa ro mbo anu tna kmot anu. Kbe meen Allah ytu bo kʼana tna ana mkyas bo bawya ro ana mno. Soh anu nri ana tna nno bo moof, kbe ana ksoh. Tna soh anu nno bo ro mkair, kbe ana sraujin, tna mafer marak kʼanu nesait ye.
HEB 13:18 Skabuk amu ro nkom aam refo ye. Amu nnaut nwe ja amu nhau nhaf moof. Tna amu nhau to, ja nwe nno bo ro moof ye.
HEB 13:19 Jõ soh-soh kʼanu tawe skabuk Tuhan re kbe jõ thah te fooh tama to kʼanu.
HEB 13:20 Allah tait yno re anu bhau bhaf tnok: Tiwya Tuhan Yesus yajat, tna mees rAit mno bosi ro tna matak. Bosi reto meen mhau tu mamo snok mam hame wajin. Tna Allah yno Yesus yrok yasen. Tna Ait yamo Raa ro yase ro kmot anu. Ait kmot anu kaket mnan fi raa ro ja kmot domba wait.
HEB 13:21 Jõ skabuk Allah re Ait yoo bo ro moof yee kʼanu: Yisoh anu afo re anu nhar bo, tna re anu ntak re kbe nno bo ro Ait yawe. Jõ skabuk re yno anu nhau nhaf sau, srau sau su nsya Yesus. Kbe yisoh anu, re kbe bno bombra ro Ait ksoh. Re kbe Ait yhaf mnan. Tna jõ skabuk re kbe raa bibi Tuhan Yesus yase rAit mamo snok mam hame wajin. Amin: Mabo oh!
HEB 13:22 Taja, tme, tao, tano na; jõ tawe anu nri watum ro jõ tkom mam aam ro mabuf refo.
HEB 13:23 Anu bfoh ranu, Timotius; tii raa tufrok ait mbam bui mato oh. Soh ait yamaʼt befo fooh to, kbe amu mbewok nma su no kʼanu.
HEB 13:24 Nmah meen ajõ kʼraa wanu ro mase, tna msya raa ro Allah wAit beta ye. Raa wanu ro mhau mam rabin ro Italia to mmah meen kʼanu.
HEB 13:25 Jõ skabuk Tuhan afo re Ait yatmof anu beta.
JAM 1:1 Aam refo mbam kʼjõ, Yakobus. Jõ tamo sryan ro Allah ysya Kristus Yesus. Ja jõ tno bo ro ana mbewok mbis. Jõ tmah meen kʼanu raa mana ro Yahudi ro nso-sa nbam rabin ranu nmoʼt arin aso beta sor:
JAM 1:2 Taja, tme, tao, tano na; soh bo ro mkair-kar mama sanet anu to, simaut mase.
JAM 1:3 Anu nhar nwe bombra ro mkair mama, sanet bosmot wanu to. Menohe mafer rau to moof sai. Feto to simaut mase. Bo mkair-kar sor ro mama mai kʼanu to, mafer rau mno bosmot wanu mrok matak renti.
JAM 1:4 Bito nsom bo ro mkair-kar weto to, afo re anu nkai makit rau to. Bo weto, mno bosmot wanu matak; kbe anu smot Kristus matak aro mabut fee. Kbe anu nno bo ro Ait ksoh to mnan si, aro mabut fee ye.
JAM 1:5 Tna soh anu nkin sait wase bo ro Allah ksoh ait yno to, feto skabuk yayoh Allah afo re yoo bohar yee kʼait. Allah tait Raa ro yatem miyõ, Raa ro yhaf ase. Kbe Ait yoo bohar yee kʼraa retait tu oh. Ait bhah raa retait fee.
JAM 1:6 Awya ro yayoh bo to, ynaut myum-yam ma. Nhar nwe Allah ksoh yoo bohar yee kʼait ro yayoh. Ait ro ynaut mamo-me to yfi figyõm ro foos mfi maut mroh.
JAM 1:7 Ait ro ynaut maut-mroh to, kbe ait ykai bo aro mbam Tuhan fee.
JAM 1:8 Ait ro yhaf mko-ako yoyo tait, kbe bo beta ro ait yno to, ait yros ybo yno kaket fee ye.
JAM 1:9 Anu, raa Kristen ro kinyah aro to; nhau to, simaut mase. Allah ymat anu yawe anu raa ro mase. Feto to safuk nnaut bo ro Ait yawe reto.
JAM 1:10 Tna anu ro bobot sor to; nnaut nwe meen anu safe marak mfi bosafom tafuf sai. Nnaut bo reto tna safuk nwe Allah ymat anu to yawe anu raa ro mase fee.
JAM 1:11 Raa ro bobot to, mase wana mhau waor sai. Ana mfi bosafom. Allah yno ayõ moo mbait ktan-ktan mafit, tna bosafom samer. Tna tafuf mrur-rar marak. Moof rau mhau waor sai ye. Feto ye mkah raa ro bobot. Ana mhau mame kta wana to, kbe ana safe marak sai.
JAM 1:12 Kbe Allah yno bo moof kʼraa ro bito mros masom bo ro mama mai kʼana to. Soh ana bito masom bo ro mkair reto mamo snok tis rau to, kbe ana siwyan moo boren wana ro Allah yaren kʼana ye. Allah siwyan boren ro mhau mamos mae. Meen Ait yoo boren reto yee kʼraa ro mhafri Ait to.
JAM 1:13 Ati bo ro mkair mama mai kʼanu sait to, anu baro nwe, “Bo reto mbam kʼAllah. Ait tko anu bno iro.” He mfe. Bo aro tko Allah fee saut. Tna Ait ja tko raa mno iro fee ye.
JAM 1:14 Raa aro yesait srau oot-oot yawe yno bo ro mkair-kar. Ait srau rait saro ait tibyo mbtek kayah.
JAM 1:15 Ait srau rait oot-oot tna ait btek mam iro oh meto. Mafer rau to ait yno iro yoyo. Tna ait yhai tna meen ykai yamos mae fee ye.
JAM 1:16 Taja, tme, tao, tano na ro jõ ksoh; kaket anu re bo ro mkair aro besruf anu ma. Bo weto mbam kʼAllah fee.
JAM 1:17 Bouum ro moof msya bo ro ati to, mama yum oh mbam Allah ro yhau mam sawro rAit. Tna Ait yfen bombra ro mawyah mam ayoh sor to. Ait ja ye haberek fee. Ait yno bo moof yum. Rabu Ait yno bo sau, tna hreha Ait haberek yno bo roto hayah fee ye. Ait sait yum oh.
JAM 1:18 Bo moof ro Ait yno weto to sau oh mefo: Mkah Ait ksoh rAit sai, Ait yno anu bmo raa mana wAit mkah bokyas rAit ro ati. Ait yno feto afo re yitbat anu yse mam wore ati syok mbam bombra ro Ait yfen taro to ye.
JAM 1:19 Taja, tme, tao, tano na ro jõ thafri; nri bo refo kaket! Hoh-hoh nri bo fooh. Menohe nkyas fooh to ma, tna kmo fooh bo to ma ye.
JAM 1:20 Raa ro kmo to, kbe mno bo ro Allah ksoh to fee.
JAM 1:21 Feto to noo bo mkair-kar ro mhau mam nhaf to, mbeak war makus beta. Tna safo ro ja anu nno bo to, beak fari ye. Tna noo Watum ro Allah mkah nhaf ro sneh to, nse kʼanu nhaf riryõn. Watum reto matak moo riof ro mase mee kʼanu to.
JAM 1:22 Nri Watum ro Allah to, nri tna nfot nse kʼanu. Soh anu nri sai menohe nbo nno fee, anu sioh anu sai meto.
JAM 1:23 Awya sai ro yari Watum ro Allah menohe ybo yno fee; ait retait ynan raa ro yros wane ait yasu ynaif mam bo wane to.
JAM 1:24 Ait tna sai yhaninin ait mam bo wane, menohe frok yamo si to ye sorni yasu ynaif ro riwai haninin reto fooh sai.
JAM 1:25 Watum ro Allah to bo ro ati, bo ro mnan si. Watum rAit reto ja make raa matak fee. Menohe watum rAit reto ja skur raa re ana rero kro Ait. Awya sai ro bito ymat sas watum rAit ybo yno tna sorni fee; kbe Allah yno bo moof kʼAit. Raa retait yno bo to, kbe Allah yatam ait.
JAM 1:26 Raa sait ynaut yawe ait ja smot Allah kaket tna yno bo ro Allah ksoh. Menohe soh ait kaket hrea rait fee; soh ait ykyas-kas bo to, ait retait sioh ait sai oh meto. Tna bosmot rait mafer marak.
JAM 1:27 Kair mama mai ku kʼraa msya semit to, Allah, Bja ranu ksoh anu bmo bmat ana. Allah ynaut yawe bosmot ro matak oh meto. Raa baro kaket ana re kbe bo ro tabam refo saro ana fee. Tibyo ana btek kayah fee. Allah yawe raa weto mno bo ro moof ye, tna bosmot rana matak ye.
JAM 2:1 Taja, tme, tao, tano na; anu smot Tuhan Yesus Kristus ro yase. Niwana raa taro-taro ma. Anu nhau to, nnit raa nwe raa taro maut tna raa taro mroh to ma. Nmat raa ro mase msya raa ro kinyah to, nwe ana weto beta mnan anya.
JAM 2:2 Mfi bo raa mabo ewok mama skabuk su msya anu to: Raa sait fayir ait sria cincinemas mam yatem krem msya yyum ratan ro moof. Tna ait sait yyum ratan ro manyah sai.
JAM 2:3 Ja anu nmat ait ro yyum ratan ro moof toni tna tam-tam ait. Ja anu nwe, “Bi yabi; nama hre mam wore moof wono.” Tna ja anu nwe kʼait ro ykair refi nwe, “Namo nros wore wono.” Tna nwe, “Namo hre mte wore wono.”
JAM 2:4 Nno feto ma. Nmat raa to, nsok sait tna nwe ait ykair to ma. Soh anu nno feto to anu raa ro nhaf mkair. Nwe raa ati hayah tna raa kair hayah feto ma.
JAM 2:5 Taja,tme, tao, tano na; nri oh: Raa kair ro mhau mam tabam refo fo, bosmot wana matak. Reto oh mi Allah ysok ana yawe ana mfi raa ro bobot. Tna Ait ysok ana re meen mamo mhau mam sawro ro Ait yamo Raja ybo ye. Bo reto tiwya Ait yawe yum oh kʼraa ro hafri Ait to.
JAM 2:6 Allah ysok raa kair feto. Menohe ja anu niwana ana weto. Nnaut nwe raa ro bobot mam tabam refo oh mi raa ro ja mber hasyoh anu to. Tna ana mfot anu makah mamo mo kʼraa ro mtu srah mari bo to.
JAM 2:7 Tna ana ro bobot ye oh mi mamus Yesus. Mkah Ait yasom ro moof reto, Allah ytu anu bmo raa wAit to.
JAM 2:8 Watum ro matim mam Bokom ro Allah to mawe, “Natmof raa anya kaket ye mfi ja natmof netsu anyõ nesait ai to ye.” Imamat 19:18 Soh anu nbo watum reto nno to, reto moof oh meto.
JAM 2:9 Menohe mfi bo anu nsok raa ro bobot nwe hayah, tna nsok raa kair nwe hayah feto to, anu niwer watum ro Allah oh meto. Anu nno iro oh meto.
JAM 2:10 Awya ro ybo watum ro Allah beta yno, menohe yiwer watum rAit sau aran sai to, Allah ymat ait yawe yiwer watum rAit beta oh meto. Feto to, safo makan btek mai kʼait.
JAM 2:11 Tiwya Allah yawe, “Nwyah ma.” Tna Ait yawe, “Nme ajat ma.” Feto to, awya ro ywyah fee menohe yame ajat to, ait yiwer Watum ro Allah oh meto.
JAM 2:12 Mfo refo anu nhaf nse watum ro Yesus. Watum rAit reto ja make raa matak fee. Menohe Watum rAit reto ja skur raa. Skur re kbe ana rero kro Ait. Feto to nkyas bo mamyot bo ro Ait ykyas. Nno bo mamyot bo ro Ait ybis. Meen Allah ytu srah wanu to, ybo watum ro Yesus reto tna ytu kʼanu. Allah siwyan ytu srah kʼanu. Nnaut nwe soh anu nhaf nse bo ro Yesus yawe, feto kbe Allah ymit safo makan kʼanu fee.
JAM 2:13 Tna awya ro ja yatmof raa anya to, ati ro Allah ytu srah rait yari to, kbe Allah yatmof ait retait ye. Menohe awya ro ja yatmof raa anya fee; ati ro Allah ytu bo kʼait yari to, kbe Allah yatmof ait fee ye.
JAM 2:14 Taja, tme, tao, tano na; raa sait yawe, “Jõ smot Tuhan.” Soh ait yawe feto menohe ybo Watum ro Tuhan fee, yno fee; bosmot rait reto mafer marak. Kbe Allah ymat bosmot rait reto, yawe yoo riof ro mase yee kʼait retait fee.
JAM 2:15 Mfi bo raa wanu ro sme sait, soh mfe, ro ano sau bo, soh bo ro ana myum mabut tna boit ro ana mait mabut to, natmof ana.
JAM 2:16 Soh anu sait yawe, “Meen oh kʼanu! Nmo kaket! Nyum ratan ro mno netsu mbe. Nmo niit bo!” Soh bo ro ana mse to mabut, menohe ait retait ykyas bo moof mkah yasoh sai menohe, yoo bo yatmof ana weto fee; bo ro ait ykyas reto to mafer marak sai.
JAM 2:17 Feto ye mkah bosmot wanu: Soh anu smot Tuhan menohe nbo watum rAit nno fee; bosmot ranu reto mafer marak ye meto.
JAM 2:18 Mfi bo raa taro mawe, “Nyõ nawe nyõ smot Tuhan kaket. Menohe jõ tari watum ro Tuhan, tbo tno.” Kbe jõ tawe kʼait retait tawe, “Sik nerif bosmot anyõ reto kʼjõ. Bo ro jõ tno oh mi merif bosmot ajõ re kbe raa mmat tna mhar mawe jõ smot Tuhan.”
JAM 2:19 Anu nhar nwe Allah tait sait aran to. Reto moof baro ye. Menohe nnaut nwe ja kabes magin mhar mawe Allah sait aran ye. Tna ana waa bi Ait tetet mhai ye. Ro moof to, anu nkit nhar bi Ait tna nri watum rAit nbo nno kaket ye.
JAM 2:20 Anu taro wase bo! Anu nkyas nkah nasoh sai nwe anu smot Tuhan to, menohe ja anu nbo watum rAit nno fee. Bosmot feto mafer marak.
JAM 2:21 Nnaut Abraham, anu hohos ranu: Ait yari bo ro Allah yawe kʼait to, ybo yno: Ait yakah ku rait Ishak yawe ktan ait ysan kʼAllah. Bo ro Abraham yno oh mi Allah ymat ait tibyo yawe ait yfi raa ro mhaf moof ati to.
JAM 2:22 Anu bmat bo ro ait yno tna bhar bwe bosmot rait mamo wrok-rok anya su msya bo ro ait yno. Bo ro ait yno reto mno bosmot rait mnan si.
JAM 2:23 Reto mamo mamyot Bokom ro Allah mkyas mawe: “Bo ro Allah ykyas kʼAbraham reto to, ait yari tna smot (percaya). Smot yawe bo ro Allah yawe reto to meen mabo. Au oh mi Allah yawe Abraham tait raa ro yhaf moof ati.” Kejadian 15:6 Tna raa mawe, “Abraham tait Allah yafoh rAit.”
JAM 2:24 Feto to anu bhar bwe raa ro smot Tuhan sai menohe mbo watum rAit mno fee; Tuhan yhaf mnan kʼana weto fee ye. Menohe soh raa smot Tuhan tna mbo watum rAit mno ye to, Allah yhaf mnan kʼana weto.
JAM 2:25 Rahab to fnya ro ja mwyah. Menohe nnaut bo moof sau ro au mno to ye: Tiwya au tam-tam raa ro Israel mabo ewok wore wo ana mama mmat tan kota ro Yerikho. Tna au mmyõt ana mbewok mam amah rau. Tna fo au merif iso roto re kbe ana msam mamo. Au mno bo ro moof, tibyo Allah yawe fai au ja wase mber safo fee.
JAM 2:26 Raa metsu wana, mesait mhau kar fee. Soh mafos marak to, kbe raa mhai tu oh. Feto ye soh anu smot Tuhan sai tna nbo watum rAit nno fee; mafer marak.
JAM 3:1 Taja, tme, tao, tano na; anu nwat nwe nsen nmo guru to ma. Meen ati ro Allah ytu srah to, kbe Ait ytu bo ro samyoh toni mai kʼamu ro nmo guru sor to, miwrek raa roto.
JAM 3:2 Anu beta fo ja bno bo ro mkair-kar mawat ye. Awya ro ja kaket ait re ykyas bo ro mkair-kar fee, ait retait yno bo moof. Ait yatak yisoh ait ysya yetsu rait beta to kaket oh metait.
JAM 3:3 Anu bhar bke sna wa mam kuda masoh. Bno afo re kuda reto mno bo ro anu bwe, tna mhoh mkah metsu rau kro iso ro anu ksoh sai.
JAM 3:4 Nmat sas kapal to. Kapal to bo ro maboh. Tna kemudi rau to maku sai. Foos ro mase mfi mai mamo, menohe kemudi ro maku mfi miin sai mno kapal reto mamo yum mam ti ro raa ksoh. Tna kapal reto kro raa ro ybo kemudi reto ksoh rait sai.
JAM 3:5 Feto ye mkah anu hrea msya anu betsu. Hrea bo ro maku sai mhau kʼanu betsu refo ye. Tna hrea refo mno tibyo anu bibi anu bwe anu bno bo ro mase mbra sor. Tna kaan ro maku sai, soh btek to, kbe mbet safom ro msai mbra to, mait mkak sai.
JAM 3:6 Hrea fo mnan tafoh to ye. Kabes Yabi oh mi yno anu hrea feto re anu hrea misti anu betsu mno bombra ro mkair-kar yoyo maban tinyi anu raa mabe, mamo snok mam wore wo anu bhai ye.
JAM 3:7 Bombra ro mfi binatang ro ja safo, ruu, aban bo ro ja mton mam safom msya syoh ro mhau mam aya bo to, raa mhar bo mno ana mha ye oh.
JAM 3:8 Menohe hrea to, ja raa sait bo yatak yno re mha fee ye. Hrea to ja mno bo ro mkair-kar yoyo sai. Hrea to mnan bosaro ro raa saro raa re mhai ye.
JAM 3:9 Anu bkah hrea bbaut Tuhan, anu Bja ranu tait. Menohe anu bkah hrea wanu bto boto kʼraa ye. Nno feto ma! Nnaut nwe Allah oh mi yfen anu raa; yfen mfi Ait ye to.
JAM 3:10 Mbam bsoh sau reto ye anu bibi Allah ye tna anu bmus raa anya ye. Raa wamu; Nno feto ma!
JAM 3:11 Aya ja miyi frok mbam aya mato sau. Kbe aya ro frok reto mafah ewok a? Raa mata aya reto to, taro mafah moof tna taro mafah matan to fee.
JAM 3:12 Tna feto ye kake sau ro masom ara to, ja mse kake zaitun make fee. Tna kake anggur mara mse kake ro masom ara make fee ye. Tna aya mato ro ja mafah matan to, kbe me haberek mafah moof u fee ye. Feto to, nkyas bo ro moof yum sai.
JAM 3:13 Mfi bo raa wanu sait yawe ait raa ro yhar bo kaket. Soh ait yno bo moof mkah yhaf ro sneh to, anu nmat nhar nwe ait raa ro yhar bo. Soh ait yhar bo ro ati to, kbe yno bo mkah yhaf ro sneh feto ye.
JAM 3:14 Menohe soh anu naam bo toni, nhaf mkair, tna nnaut anu netsu ranu nesait kar sai to, feto mkair. Soh anu nno bo weto to, bibi anu ma! Anu nhar bo fee! Anu raa ro sioh anu sai meto.
JAM 3:15 Bohar ro mnan feto to, mbam kʼAllah meto fee. Bohar reto to mbam tabam refo sai meto; mbam kʼanu raa msya mbam kabes yabi sai meto.
JAM 3:16 Raa ro maam bo raa tna mnaut ana metsu mesait kar bo to, wore ana mhau to, ana mno bo kbik-kbak tna ana mno bo ro mkair-kar sor ye.
JAM 3:17 Menohe raa ro Allah yoo bohar rAit yee kʼana to, tinyi rau to ana waa Allah re mno iro fee. Ana ksoh msya raa miranya sai, ana mhaf sneh, tna mari bo ro raa mawe. Ana matmof raa anya tna mno bo ro moof sai. Ana mmat raa to, tna mawe raa sait hayah-hayah fee, ja msok raa fee. Tna ana kro Tuhan kaket, mkah srau sau sai, srau ewok fee.
JAM 3:18 Raa ro ja mno raa misoh miranya wana to, mafer rau oh mi raa mno bo ro ja Allah ksoh to.
JAM 4:1 Bo bawya misti re anu nmak tna nfa nsya raa anya bo to? Anu srau oot-oot bo ro tabam refo oh mi anu nmak tna nfa bo to. Bonaut mkair weto msya bonaut ro moof to, mbewok ja mafa anya mam kʼanu nhaf mato.
JAM 4:2 Anu srau oot-oot bo sau menohe anu nkai bo reto fee, tibyo anu nme ajat. Feto ye, anu safo saso bo menohe anu nkai bo ro anu saso reto fee, tibyo anu nmak tna nfa anya bo to. Anu nyoh kʼAllah fee. Au oh mi anu nkai bo fee.
JAM 4:3 Anu taro bonaut wanu ja mkair sai. Tna anu nyoh bo kʼAllah, menohe nyoh bo ro anu nhaf mato wanu ksoh sai. Soh anu nyoh feto, kbe anu nkai bo ro anu nyoh reto fee ye.
JAM 4:4 Anu kro Allah kaket fee! Anu nhaf makin! Awya sai ro ksoh bo ro tabam refo toni to, ait knait Allah oh meto. Bo reto anu wase fares a? Feto to awya ro ksoh yno bo ro tabam refo wer to, Allah yiranya ysya ait fee tna ait yafa ysya Allah oh meto.
JAM 4:5 Bokom ro Allah mawe, “Har ro Allah yse kʼanu to, Ait yhaf myoh. Au oh mi Ait ksoh yawe anu kro Ait yesait aran.” Nnaut nwe bokyas reto bokyas ro ati to.
JAM 4:6 Menohe Allah yoo har mesait yee kʼanu sai fee. Ja Ait yoo bouum ro mase miwrek har reto yee. Reto oh mi Bokom ro Allah mawe, “Allah beyun raa ro ja bibi ana ai. Menohe Ait yatmof raa ro mhaf sneh.”
JAM 4:7 Feto to, waa Allah. Nri bo ro Ait yawe. Beswan-swan kabes yabi (Iblis). Nikyak ait to, tna ait ysam yamo fari.
JAM 4:8 Nmo nhau nrat nsya Allah. Niranya nsya Ait. Tna kbe Ait yama yrat yhau yiranya ysya anu ye. Anu taro ja nno iro. Ne nno iro u ma. Tna anu taro ja nhaf makin, anu kro Allah kaket fee. Nisoh nhaf wanu afo re anu nros tu smot Ait matak.
JAM 4:9 Nnaut iro ro anu nno to, waa tna nwia surut anu kaket. Nashana! Sah ro anu nsah to, haberek mamo wia, tna simaut ro mase to, haberek mamo wian surut wia afo re Allah yatmof anu ye.
JAM 4:10 Nka nanwaruk mkah nhaf ro sneh kʼTuhan, tna re Ait teta anu nmo raa ro nse.
JAM 4:11 Taja, tme, tao, tano na; nwe kair anya ma. Awya ro yawe kair raa wamu sait, ait yawe kair Watum ro Allah ye oh meto. Tna awya ro ynaut mam yhaf mato yawe raa wamu sait yno bo mkair to, ait yawe kair Watum ro Allah ye oh meto. Soh anu nwe Watum ro Allah mkair to, anu nbo Watum ro Allah nno fee; menohe anu hre nwe watum rAit mkair sai oh meto.
JAM 4:12 Allah yesait aran yoo watum rAit yee kʼraa. Tna Ait yesait aran kbe yhau susai, ytu bo kʼraa yari bo ye. Feto ye Ait yesait aran yatak yoo riof yee kʼraa. Tna Ait yesait aran yatak beak raa mamo mait mam rabin kair. Feto to awya oh mi anu to, re nwe kair raa anya nwe mno bo mkair to?
JAM 4:13 Anu taro nwe, “Ifo, soh mfe menrabu to, kbe amu nsen nmoʼt kota tna nhau mam beto tahun sau. Amu nhau mkah nsim bo saso pitis tna kbe amu nkai mafer mawat.” Nkyas feto ma. Nri oh:
JAM 4:14 Bo bawya ro menrabu btek mai kʼanu to, anu wase ye. Anu to nfi wasi ro maun maut. Wasi reto mhau waor sai tna marak.
JAM 4:15 Ro moof to, nwe fefo: “Soh Tuhan ksoh yawe amu nhau naam to, kbe amu nhau naam. Tna soh Ait yawe amu nno bo sau to, kbe amu nno bo reto.”
JAM 4:16 Nesait kar nsaim tna nkyas bo ro kbe anu nno to ma. Anu safuk tna bibi anu sai meto. Anu bibi anu feto to, mkair meto.
JAM 4:17 Feto to, awya sai ro yhar yno bo ro moof, yhar bo moof ro Allah ybis yawe ait yno to, kbe yno tu oh! Soh ait ybo yno fee; yno iro meto.
JAM 5:1 Anu ro bobot to, nri kaket: Meen bo ro msai btek mai kʼanu. Feto to nsen nwia sut-sut anu.
JAM 5:2 Kta wanu to, meen sasyoh makus. Tna ratan wanu to, meen bo mabat ye.
JAM 5:3 Makyon sboh rau tna pitis emas msya perak wanu to, meen hesik mait ye. Kta ro anu nse weto to mafer marak. Hesik reto meen masen mkyas bo. Meen hesik reto mkyas mawe anu nno bo ro mkair. Mkyas mawe anu nhau to ja nwe nme kta sai. Hesik reto meen mait anu netsu wanu mfi tafoh to ye.
JAM 5:4 Tna anu sioh raa ro anu nbis mryoh bo mam armato wanu to. Anu sioh tna boren rana reto anu nren fee. Feto to ana mkiyat ana hrowyõ rana. Tna Allah ro yatak toni yari bo ro ana mkyas reto.
JAM 5:5 Anu nhau nhaf nse bombra ro tabam refo mfi raa ro bobot. Anu mfi fane bo to; raa moo boit ro mait. Metsu maboh tna raa ktan.
JAM 5:6 Raa taro wase mber safo. Ana ja mafa msya anu fee. Menohe anu nkyas bo ro mkair mai kʼana weto tna nme ana majat.
JAM 5:7 Menohe anu ro kinyah sor: Nhau to, bito nsom bo mkair ro matu mai kʼanu. Bito nsom mamo snok mam ati ro Tuhan hah yama u. Nmat raa ro ja ykah armato rait. Ait yhau kait ste armato reto manes. Yhau to, snyi ro oom mais firwas tna oom hwyõm. Tna fo ait yhaf yse armato reto mafer rau.
JAM 5:8 Nhau, nhau nnan ait feto ye. Ati ro Tuhan yama u to kene oh. Feto to nhau nfit nkar matak sai.
JAM 5:9 Tna nmai kʼanya ma; kbe Tuhan beah srah wanu. Ait ro ytu bo kʼraa beta yari to, kene wo yama oh.
JAM 5:10 Taja, tme, tao, tano na; nnaut nwe tiwya Tuhan ybis nabi wAit mama mkyas bo rAit. Ana mkyas bo rAit tibyo mkai bo ro mkair. Menohe ana mhau to, bito masom bo samyoh mbra ro btek mai kʼana to.
JAM 5:11 Bo mkair mama mai to, menohe anu bhar bwe bi Ait yno bo moof kʼana. Nnaut bi Ayub: Tiwya ait bito yasom bo ro matu mai kʼait mamo snok tis rau to. Tna Tuhan yno bo moof kʼait riryõn. Nnaut nwe Tuhan tait, Raa ro ja yatmof raa.
JAM 5:12 Bo ro ati syok to mefo: Nto boto ma! Ntom ayoh ma, tna ntom tabam refo ma ye. Ntom bo bawya sai to ma ye. Nwe, “Ae” atau “Mfe” sai. Soh anu nto bo aro to, kbe Allah yawe safo makan btek mai kʼanu to.
JAM 5:13 Soh anu nkin sait ykai bo ro samyoh mai kʼait to, ro moof to, ait skabuk kʼAllah. Tna soh anu nkin sait simaut to, ro moof to, ait yji howes ybaut Allah.
JAM 5:14 Tna soh anu nkin sait kiyam to, ro moof to, ait ytu raa majelis mama. Tna kbe ana skabuk Tuhan mtom Ait yasom. Tna ana moo minyak baro karu mam ait yetsu ye.
JAM 5:15 Tna soh ana skabuk mkah bosmot rana ro matak to, kbe kiyam rait marak. Tna soh tiwya ait yno iro aro to, kbe Tuhan yyon iro reto ye.
JAM 5:16 Feto to, nras iro wanu ro nno kʼanya tna skabuk anya ye afo re Tuhan yno kiyam ranu marak. Raa ja mhaf moof to, skabuk raa to, boyoh wana matak toni.
JAM 5:17 Nabi Elia tait raa sai ynan anya yfi anu wefo ye. Ait safo skabuk kʼAllah re yno oom mais fee. Skabuk feto tibyo Allah yno oom mais fee mamo snok tahun trion tuuf hariyah.
JAM 5:18 Tna ait ye skabuk u. Tibyo Allah yno oom mais u. Tna bombra ro mo mam tabam refo mrok mo u tna mse make ye.
JAM 5:19 Taja, tme, tao, tano na; soh anu nkin sait btek mam iro to, tna anu roto sait yisoh ait retait afo re ait hah ye yamo yo kʼAllah to, feto moof ye.
JAM 5:20 Nhar nwe awya sai ro ykyas bo kʼraa sait ro yno iro to, soh yno re raa retait yashana tna ye yno iro u fee to, riof mase kʼraa retait. Yafoh rait yno riof kʼraa retait re kbe yamos rait meen yhai fee. Tna ait yno Allah yatmof raa retait yyon iro wait ye meto.
1PE 1:1 Aam refo mbam kʼjõ, Petrus. Jõ tamo raabis (rasul) ro Kristus Yesus rAit. Tkom aam refo tee kʼanu ro nhau mam provinsi ro Pontus, provinsi ro Galatia, ro Kapadokia, ro Asia Kecil msya ro Bitinia bo. Anu to raa ro Allah ysok. Anu kro Kristus tibyo nhau mam tabam refo to, nfi raa ro srim sai.
1PE 1:2 Tiwya tinyi Allah, anu Nja ranu, ysok anu. Ati ro anu nrak fares to, Ait ysok anu mnan si bo ro Ait yhar oh meto. Ysok anu tna Har rAit misoh anu re nhau nno bo ro Allah wAit sai. Allah ysok anu re kbe anu nri bo ro Yesus Kristus yawe tna nbo nno. Tna re kbe mees rAit myon anu noof. Jõ skabuk Allah, re kbe Ait yatmof anu beta tna yno re anu beta nhau nhaf tnok toni ye.
1PE 1:3 Nma anu bibi Allah! Ait tait Tuhan Yesus Yaja. Tna Ait yatmof anu toni. Allah ‘yabe anu muhrin ro ewok u’. Tibyo anu fo bmo ku wAit. Yesus Kristus tiwya raa mame yajat tna Ait yrok yasen. Tna kbe yhau yroon mamo snok mam hame wajin. Feto to, anu bhar bwe bo ro Ait ysi kʼanu to, kbe yno tu oh. Tibyo anu ja bhau binaut yoyo bwe bo weto meen mabo tu oh.
1PE 1:4 Tna bouum ro meen Ait yuumto ku wAit sor reto to, kbe meen mhau mamo snok mam hame wajin. Bouum reto mhau mam sawro ro Allah. Mhau mam tno, mrat kʼanu matak. Kbe aro marak fee. Meen mhau mawyõs.
1PE 1:5 Anu smot Ait kaket. Tibyo Ait kbe kmot anu mkah yatak rAit. Kmot anu afo re meen anu bkai riof ro mase. Riof ro mase reto, Allah siwyan oh. Menohe mfo refo Ait ymyõt bAit fares. Ymyõt mamo snok mam ati ro tabam refo haberek. Tna fo yno riof reto mabo.
1PE 1:6 Anu bhar bwe kbe meen anu bkai riof ro mase. Bo reto mno anu simaut mase. Anu simaut mase ebokfi mfo refo bo ro mkair-kar aro rau mama mai kʼanu wia.
1PE 1:7 Bo samyoh ro mama mai kʼanu weto to, sanet bosmot (iman) wanu. Kbe anu bhau smot Yesus matak fe mfe a? Bo ro samyoh mama mai kʼanu, menohe bo mafer rau to moof: Mno bosmot wanu matak mnan si. Emas to bo ro mabyoh maut, menohe bosmot wanu to, mabyoh moof miwer. Emas to mhau hame wajin fee. Menohe bosmot ranu to, meen mhau hame wajin. Ja raa moo emas mse mam tafoh. Tibyo meyom-eyom. Tna bo roto taro ro mhau mrat kʼemas reto mait marak. Tno fo emas mabo rau mhau fares to. Au oh meto tafoh reto mno emas ro mkair mrok moof miwer. Tna bo samyoh ro mama mai kʼanu weto to, mfi tafoh; kbe mno bosmot wanu matak miwer ye. Tna meen, ati ro Yesus Kristus hah yama to, soh bosmot wanu matak fares to, meen Allah bibi anu. Tna yoo bobot yee kʼanu, ymat anu.
1PE 1:8 Anu nmat Ait fefares, menohe anu nhafri Ait. Anu nahni Ait menohe anu smot Ait. Anu simaut mase, tna nwyan marak, hasu toni ye.
1PE 1:9 Anu fri mafer mbam bosmot ranu. Mafer rau oh mi riof ro mase. Tibyo anu simaut mase.
1PE 1:10 Tiwya nabi na sor saso riof ro mase reto. Allah ybis ana mama mkyas boatmof ro meen mama kʼanu. Tna ana saso, mtu ninya, saso. He mfe. Mesait mhar kaket fee.
1PE 1:11 Nabi weto to, Har ro Kristus mhau mam ana mhaf wana ye. Har reto mkyas kʼana mawe meen Kristus ykai bo ro mkair wia. Tna fo ykai bo ro msai. Menohe ana wase wore meen tija bo weto mabo. Tna ana wase iso ro bo weto mabo ye.
1PE 1:12 Tna Allah ybis Har reto mama mhau msya raa mam mfo wefo baro ye. Tna raa weto baro mama mkyas Bokyas Moof ro Yesus kʼanu oh. Tiwya Har reto mkyas boatmof reto kʼnabi na ye. Mkyas mawe kbe meen sboh rau to mam wore wo nabi weto mhau fares fee. Meen ana mhai marak wia tna bo weto mabo. Allah yoo bonaut yee kʼnabi weto re mhar mawe bo ro ana mkyas tna mkom to, mkah anu. Kbe mafer reto kʼanu. Meen mabo mam masno ro anu wefo bhau. Boatmof reto moof toni tibyo malaikat sor ksoh mawe mmat tna mawe mhar bo weto ye.
1PE 1:13 Allah yno bo weto beta. Feto to, nhau nkit nnaut bo kaket. Tna nbo anu kaket re nno bo ro kbik-kbak to ma. Nhau to, ninaut tna ste boatmof ro Allah yoyo. Ste nwe meen Ait yoo boatmof reto yee kʼanu mam ati ro Yesus Kristus hah yama mun ro ewok.
1PE 1:14 Anu to ku ro Allah wAit. Feto to, nri bo ro Ait yawe to, nbo nno. Tiwya anu wase Ait. Tibyo anu ksoh nno bo ro masmamo sai. Ne nno feto u ma.
1PE 1:15 Allah ytu anu yawe anu nmo ku wAit. Ait yhau to, yno bo ro moof sai. Feto to, bo bawya sai ro anu nno to, nno bo ro moof sai nfi Ait ye.
1PE 1:16 Bokom ro Allah mawe: “Jõ fi ja thau tno bo ro moof sai. Feto to nhau nno bo ro moof sai nfi Jõ ye.”
1PE 1:17 Anu nmo no kʼAllah oh. Tna ja ntu Ait nwe Nja ranu. Anu nhar nwe Ait ymat raa ro mase msya raa ro kinyah to, yawe mnan anya sai. Tna Ait ymat bo ro raa beta mno. Ait oh mi Raa ro meen yros susai ytu srah ro anu bno to. Nnaut nwe anu bhau mam tabam refo to, bhau boti sai. Meen Ait ytu srah ro anu bno. Feto to mam wo nhau mam tabam refo fares to, waa tna nri bi Ait.
1PE 1:18 Tiwya anu nri bo ro Allah yawe fee, nhau mnan fi tii anu hohos na ro tiwya mhau wia. Tii anu nhau to, mafer marak; anu nhau-ha sai to. Menohe nnaut nwe Raa sait yama tho anu. Yoo perak tho anu fee. Yoo emas tho anu fee. Perak msya emas to mabyoh mroh, meen sari marak.
1PE 1:19 Menohe yoo mees rAit yfes anu. Kristus tait yfi domba maku sau. Tiwya ja raa moo domba maku ro moof sau, ktan tna msan kʼAllah. Kristus mees rAit to moof miwer.
1PE 1:20 Tiwya tinyi, wore Allah yfen tabam refo fefares to, Ait ysok Yesus Kristus. Ysok tna yhau ti firwas ti, snyi firwas snyi. Tna yoo Ait yee kʼanu mam wore tis refo.
1PE 1:21 Anu nhar bo ro Yesus Kristus yno, tibyo anu smot Allah. Tii Kristus yhai, tna Allah yno Ait yrok yasen. Tna Allah yse Kristus mam yuk ro yase ye. Allah yno bo weto beta re kbe anu ninaut nwe Allah tait Raa ro yhaf moof. Yno re kbe anu nsam wai kʼAit tna smot Ait.
1PE 1:22 Bo ro Allah yawe to, bo ro mabo rau tu oh. ⌞Ait ksoh yawe anu kro Yesus.⌟ Anu nri nno bo weto; tibyo Allah yyon iro wanu ro nno oh. Tna anu ja natmof raa anya ro smot Yesus ye. Tawe natmof anya kaket!
1PE 1:23 Allah ‘yabe anu muhrin ro ewok u’. Tibyo anu to ku wAit. Anu Nja ranu tait meen yhau hame wajin, kbe yhai fee. Bokyas rAit to mhau mamo snok hame wajin ye. Mfo refo anu smot bokyas rAit ro mroon reto. Tibyo nmo ku wAit oh.
1PE 1:24 Anu bhar bwe Bokom ro Allah mkyas mawe: “Raa to mfi bosafom: Mbewok ye mhau waor sai tna mhai. Mbewok ye raa mmat mawe moof. Reto mfi bosafom tafuf sai: Ewok ye kbe mrur tna marak fooh sai.
1PE 1:25 Menohe Bokyas ro Tuhan meen mhau hame wajin.” Yesaya 40:6-8 Bokyas ro Moof refo tii raa mama mkyas kʼanu oh.
1PE 2:1 Feto to, noo bo mkair to, mbeak: Nno bo ro mkair kʼraa to ma. Besruf raa anya ma. Sioh nmo tite to ma. Tna nsu mase bo raa ma. Naam bo ro raa anya mse to ma. Ntoo raa anya ma.
1PE 2:2 Anu nhar oh nwe Tuhan tait yoof. Feto to, nnaut Watum ro Tuhan yoyo; nfi ku mees ro ja mnaut sis mait. Mait tna kbe mabi tna masen matak. Watum ro Tuhan reto mnan fi sis maya ro moof. Kbe mno bosmot ranu mrok matak.
1PE 2:4 Nma no kʼYesus. Ait yfi fraa sau ro mroon. Fraa reto to, raa beak makus. Menohe Allah ysok fraa reto yawe fraa ro mabyoh maut, fraa ro ati.
1PE 2:5 Anu to nfi fraa ro mroon ye. Tna Allah yoo anu re kbe sgi yuk ro Ait yhau. Anu, raa mkbair rAit to nfi Samu ro Allah. Ait ysok anu re nhau nno bo wAit: Nfi imam wAit. Anu smot Yesus Kristus tibyo ja nno bo moof, bo ro mno Allah yhaf mnan oh meto. Bo ro anu nno weto to, mnan bosan ro anu nsan kʼAit.
1PE 2:6 Bokom ro Allah mawe Yesus ynan fi fraa. Mkyas mawe: “Nmat, Jõ tsok ‘Fraa’ sau ro mabyoh maut. Jõ too ‘Fraa’ ati reto tse mam Sion. Tna raa ro smot Ait to, meen sraujin fee.”
1PE 2:7 Anu ro smot Yesus nnaut nwe Ait yfi 'Fraa' ro mabyoh maut. Menohe raa taro mnaut feto fee. Ana weto smot Ait fee. Bokom ro Allah mawe: “Tiwya raa ro sgi amah to, moo ‘Fraa’ reto beak makus. Menohe mfo refo ‘Fraa’ reto mamo ‘Fraa’ ro ati syok.” Mazmur 118:22 Tna mawe, “‘Fraa’ reto mburut wa iso. Tibyo raa wasim tna mbtek mawe.”
1PE 2:8 Raa ro smot Yesus fee ja mari bokyas ro Allah fee ye. Mbo mno fee. Tibyo ana mbtek mawe. Tiwya tinyi Allah ysok ana fee. Ati ro ana marak fares to, Ait yhar yawe meen ana weto kbe mbtek mawe.
1PE 2:9 Menohe anu to, raa mkbair ro Allah ysok. Anu to, nfi imam sor ro mno bo ro Allah wAit. Anu to raa mana rAit. Anu nmo raa mkbair rAit. Allah yno bo weto afo re kbe anu nkyas yase rAit kʼraa. Tiwya anu nhau mam wore wo mamur. Menohe Ait ytu anu oh, yawe frok. Ytu anu yawe nma nhau mam wore wo kek. Yawe nhau mam wore wo kek rAit ro msai toni.
1PE 2:10 Tiwya anu to raa wAit fee. Menohe mfo refo anu nmo raa mana rAit oh. Tiwya anu nhar boatmof rAit fee. Menohe mfo refo to, anu nhar boatmof rAit oh.
1PE 2:11 Tafoh na wojõ; anu nfi raa srim mam tabam refo. Feto to, nnaut anu, afo re anu srau oot-oot nno bo ro mkair to ma. Nno ma be kbe bo ro mkair weto mno wa anu tna kbe kro Tuhan kaket fee.
1PE 2:12 Mam wore anu nhau mam tabam refo to, kaket anu, nhau nno bo ro moof sai. Feto tna mfi bo raa ro wase Allah sioh mawe anu nber safo aro to, kbe ana mhar mam mhaf mato wana mawe ja anu nno bo ro moof sai. Ana mmat bo moof ro anu nno weto. Tibyo meen, ati ro Allah yama to, kbe ana bibi Ait.
1PE 2:13 Nri bo ro raa mase mbis kʼanu to, nbo nno. Bo ro Tuhan ksoh oh meto. Nri raja ro yase,
1PE 2:14 tna nri gubernur bo ye. Ana weto to raabis ro raja.Raja sor ja mbis gubernur bo mawe moo safo mee kʼraa ro mno bo mkair. Tna ana bibi raa ro mno bo moof.
1PE 2:15 Raa taro wase bo tna wase Allah ye. Tna kbe ana sioh mawe anu nno bo ro mkair. Allah ksoh yawe anu nhau nno bo ro moof sai yoyo. Tibyo raa mmat tna mhar he raa weto to mkyas bo sioh sai. Tna re kbe raa mari bokyas rana fee.
1PE 2:16 Nnaut: Tiwya ⌞iro bo to⌟ make anu. Menohe mfo refo anu kro Yesus. Tibyo yno anu rero; bo reto make anu u fee. Nnaut feto mam nhaf mato wanu wia tna nwe kbe anu nhau nno bo ro moof sai. Nno be anu aro nno bo ro mkair wai. Nnaut nwe anu nmo sryan ro Allah wAit re nhau nno bo ro moof sai.
1PE 2:17 Hartu raa ro mase. Nhau to, nmat raa anya. Natmof raa anya ro smot Yesus. Waa bi Allah. Tna heyut nmat raja.
1PE 2:18 Anu ro nmo sryan boh ro raa: Tawe nri bo ro bobot wanu mawe to, nbo nno. Heyut nmat ana ro mhaf moof ye, tna heyut nmat ana ro mbait ktan-ktan to ye.
1PE 2:19 Soh raa mno bo ro mkair kʼanu to, rau ro moof to, anu kanyin sai, kmo ma. Ati ro nno bo moof menohe bo ro mkair mai si to, nnaut nwe, “Allah ksoh yawe jõ thau thaf moof, ska si bo fee.” Soh anu beroh nno bo moof sai to, reto moof.
1PE 2:20 Menohe soh anu nno bo ro mkair, tibyo raa mai; feto tna anu kanyin sai, kbe Allah bibi anu fee. Soh anu nno bo ro moof menohe raa mai to, anu nnan fi Yesus oh meto. Soh anu nno bo moof feto tna beroh nsom bo mkair ro mai kʼanu si to, tna kmo fee, feto kbe Allah bibi anu. Tiwya raa mai Kristus. Bo ro mkair mama mai Kristus menohe Ait kanyin yasom. Ja yno bo moof menohe yasom bo mkair ro mai Ait. Yasom afo re kbe Allah kmo anu fee. Tiwya raa mno bo mkair mai Kristus, menohe yhaf rAit moof fares. Tna Allah ysok anu ybis yawe soh raa mno bo mkair mai kʼanu to, anu nsom bo ro msai reto; nno mnan tiwya Ait yno feto ye.
1PE 2:22 Bokom ro Allah mkyas Yesus mawe: “Ait ja yhar iro yno fee. Ait sioh fee.”
1PE 2:23 Tna mam ati ro raa mamus Kristus to, Ait yamus ana ska si fee. Ati ro raa mno bo ro mkair-kar kʼAit to, Ait kmo si fee. Ait yhar yawe bombra weto Allah ymat. Tibyo Ait shait kanyin yasom sai. Yhar yawe meen Allah yros susai ska bAit. Ait raa ro yros susai; ja soko raa sait ye fee.
1PE 2:24 Anu bno iro. Menohe Yesus oh mi raa mame yajat mam ara warok. Ait yesait yasom iro wanu ro bno tna raa mame yajat. Yno afo re anu be bno iro u fee. Tna bhau bno bo ro Allah ksoh sai. Raa mai Ait afo re anu bhau boof.
1PE 2:25 Tiwya anu nri bo ro Ait yawe fee. Tibyo anu nmo tiit. Anu nfi domba ro mesait mhau kar; tna raa ro ja yatam tna kmot domba weto to yarak. Tna mfo refo anu hah ne nmo no kʼAit oh. Ait kbe yatam anu tna kmot anu.
1PE 3:1 Tme, tano na; tawe anu nri bo ro naa na mawe to, nbo nno. Nno feto afo re naa na, kbe ksoh kro Yesus ye. Soh ana miwana bokyas ro Tuhan to, kbe ana mmat bo moof ro anu nno tna ksoh kro Ait ye. Nhau shait sai tna bo ro anu nno to, kbe mno ana ksoh mama kro Ait ye.
1PE 3:2 Soh anu ja waa Allah tibyo nno iro fee, kbe ana mmat bo ro anu nno reto.
1PE 3:3 Kbe raa mnaut mawe anu fnya ro noof. Menohe ana mmat tiin ro emas ja anu hero mam nimara to fee. Mmat haban ro nabe mam namyõm to fee. Mmat ratan moof ro anu nyum to fee. Mmat bo anu nisoh nna moof bo fee ye. Anu fnya fayir anu to, bo ro ati fee.
1PE 3:4 Rau ro ati to, raa mmat bo ro anu nno. Mmat bo ro anu nno tibyo mhar mawe anu fnya ro nhaf mato moof. Fnya metsu wana mamo snok mo mabi tna moof u fee. Menohe soh anu ja knar tna nhaf tnok bo to, meen anu nbi to, nhau nhaf moof sai fares. Allah yawe rau ro ati oh meto.
1PE 3:5 Tiwya tinyi fnya taro mno ana moof feto ye. Tii fnya ro smot Allah misoh ana mhaf wana. Ana minaut mawe bo ro Allah yawe to, kbe yno tu oh. Tna ana mari bo ro maa na mawe to, kro.
1PE 3:6 Tii Sara mari bo ro maa Abraham yawe tna mbo mno. Au heyut mmat ait. Tna mtu ait mawe bobot ro ybo au (tuan). Waa ma. Nno bo ro moof mfi tii Sara mno. Soh anu nno feto anu nfi ku renti wau to ye.
1PE 3:7 Taja, tao na; tawe nhau nsya fnya wanu to, nkit marak ma. Hartu ana. Fnya ro anu noo to, mfi nfoh wanu ro metsu matak fee. Nnaut nwe Allah yatmof ana yawe meen ana weto mhau hame wajin ye mnan anu ye. Hartu ana afo re kbe Allah yari bo ro anu skabuk nyoh kʼAit.
1PE 3:8 Taja, tme, tao, tano na beta; nhau niranya nsya anya kaket. Natmof anya kaket. Nmat anya kaket mkah nhaf ro sneh.
1PE 3:9 Tna soh raa mno safo mai kʼanu to, nber safo ska si ma. Soh raa mamus anu to, nmus si to ma. Menohe nkyas bo moof kʼana sai. Allah ytu anu yawe nmo raa wAit afo re anu nno bo moof feto ye. Tna kbe Allah yno bo ro moof kʼanu ye.
1PE 3:10 Bokom ro Allah mawe: “Awya ro yawe yhau moof to; kaket ait re ykyas bo ro mkair ma, sioh to ma.
1PE 3:11 Awya ro yawe yhau moof to; kbe yoo bo knik-knak ro mkair-kar, bo ro mimara to, tna beak fari. Kbe yno bo ro moof sai aran. Tna kbe ait tomer yno re yiranya ysya raa beta.
1PE 3:12 Tuhan ja kmot raa ro mno bo moof. Tna yari skabuk ro ana mayoh kʼAit ye. Menohe Ait knait raa ro mber safo.”
1PE 3:13 Soh anu ja nno bo ro moof to, kbe awya yawe yno bo ro mkair mai kʼanu? Ja raa roto aro mno bo ro mkair mai kʼanu fee.
1PE 3:14 Menohe mfi bo anu nno bo ro moof tibyo raa mhaf kair tna mno bo mkair aro mai kʼanu to, waa ma. Kbe Allah ymat tna yno bo ro moof kʼanu.
1PE 3:15 Nnaut nwe hartu Kristus mam nhaf mato wanu. Nnaut nwe Ait tait Tuhan ro ybo anu. Soh raa mtu kʼanu mawe, “Anu ja smot Kristus mkah bawya? Tna fyi re anu nwof nwe kbe Ait yno bo ro tiwya ysi kʼanu?” Nnaut bo ro kbe nyõ nkyas si kʼana to kaket. Nnaut bo ro kbe anu betoo reto wia matim. Tna nwe si kʼana to, nkyas mkah nhaf ro sneh. Hartu ana.
1PE 3:16 Anu kro Yesus tibyo ja raa mamus anu. Menohe nhau nno bo ro moof sai re kbe anu nhar mam nhaf mato wanu to, nwe ja anu nno bo ro moof. Tawe nhau nno bo ro moof sai, afo re raa ro mamus anu to, mrok hrenaut. Ana mkyas bo kbik-kbak sai menohe anu ja nno bo aro mfi bo ana mkyas feto fee. Tibyo kbe ana hrenaut.
1PE 3:17 Nno be anu nno bo ro mkair tibyo bo ro samyoh mai. Soh anu nno bo ro moof menohe Allah ybis tibyo, bo ro mkair mama mai kʼanu to, soh anu nros nsom sai to, anu nno moof meto.
1PE 3:18 Tiwya Kristus yno bo ro moof sai. Menohe bo ro mkair mai kʼAit ye. Tibyo yajat. Anu ro bno iro. Menohe Ait oh mi ro yasom bo ro mkair tna yajat. Yajat mun sau aran. Yajat afo re yakah anu yamo yo kʼAllah. Yetsu rAit raa mame yajat, menohe Yamos rAit mrok maam u.
1PE 3:19 Tiwya tinyi bi Nuh sgi aken ro mase sau. Raa ro mhau mam masno reto to, ana weto mari bo ro Allah yawe fee. Allah ksoh yawe ana mari bo ro yawe tna twok mam aken reto. Nuh sgi aken fares tna Allah ste ana, ksoh yawe ana mashana. He mfe. Raa mabo krentuuf sai aran twok mam aken reto tna mkai riof. Aya mabo tna raa roto beta msu. Mhai tna mamos wana mamo mhau mam bui mato. Tahun firwas tahun tna Yesus yhai tna yrok yasen. Yrok yasen tna yakah yamos rAit to, yamo ykyas Bokyas Moof kʼraa weto. Ykyas kʼraa ro tiwya mari bo ro Allah yawe fee, ro tiwya mhai sor. Aya mabo tna raa mabo krentuuf sai aran mari bo ro Allah yawe. Allah ybu raa mabo krentuuf weto mhau bana mam aken reto mato.
1PE 3:21 Aya mabo mbetru tabam refo. Tna aya reto fret bo mawe anu raa baptis mkah aya. Anu ⌞nashana oh. Tna⌟ ksoh nhar mam nhaf mato wanu nwe anu nkair u fee. Nhar nwe Allah yawe anu nrok noof oh. Tibyo anu nbis raa baptis anu. Mno bo reto afo re netsu ranu ro mkair to myon tna mrok moof to fee. Raa baptis anu feto fret bo mawe Yesus Kristus yrok yasen. Tna mawe Ait yatak re yno riof kʼanu ye.
1PE 3:22 Mfo refo Yesus yhau mam sawro ro Allah. Tna Ait hre ysya Yaja Allah mam ati ro yatem ati; yuk ro mase reto. Yesus Kristus yase tna Ait hre abyõ ybo bo beta. Yhau mam tno tna yatak ybo malaikat msya kabes sor msya bo beta. Bo weto beta mari bo ro Ait yawe tna mbo mno.
1PE 4:1 Tiwya Kristus yno bo ro moof sai. Anu ro bno iro. Menohe raa mai Ait tna sikowah yetsu rAit. Kbe meen raa mno bo mai kʼanu feto ye. Soh anu tru kair to, nfit nkar matak mnan fi Ait. Tawe bito nros sai. Awya ro fri kair mam yetsu rait to, ait yno iro u fee.
1PE 4:2 Feto tibyo wore wo ait retait yhau renti mam tabam refo to, ait yno bo ro Allah ksoh. Ait yno bo masmamo ro ja raa ksoh mno to, u fee.
1PE 4:3 Tiwya anu ja nno bo ro mkair mfi raa ro wase Allah ja mno. Mnan oh! Nno feto u ma. Ana mhau to, ja mno bo ro kbik-kbak sor: Ana makyõ bokyõ yoyo, tna simaut nashe-nsha anya yoyo, ana mwyah msya anya, ana bisir yoyo, ana mbaut kabes, tna mno iro ro mkair toni mawat fares ye.
1PE 4:4 Menohe mfo refo anu nno bo ro ana ja mno to u fee. Tna nfoh na wanu ro bose to, mmat mawe anu hawe kro ana u. Anu nber safo mfi bo tiwya anu nsya ana nno to u fee ye. Tibyo ana sret anu masah, tna mamus anu bo ye.
1PE 4:5 Nnaut nwe mako hawe sai, meen ana weto beta mros betoo safo ro ana mno sor to kʼAllah. Kbe meen Ait yoo safo mana ymit kʼana: Ana ro mhai oh tna ro maam fares to ye. Kbe meen ana weto hrenaut tna manwaruk.
1PE 4:6 Meen Allah ymit safo kʼraa ro mhai oh ye. Au oh mi raa mamo mkyas Bokyas Moof (Injil) kʼana ye, afo re raa weto mari tna smot Yesus ye. Afo re mamos wana meen mhau hame wajin; mamyot bo ro Allah ksoh.
1PE 4:7 Mfo wefo to, kene wore bombra beta sboh rau oh. Feto to, nnaut anu kaket. Tna nisoh anu re nno-na bo ma. Nno feto re kbe anu skabuk kaket.
1PE 4:8 Awya ro yatmof raa anya kaket to, ja ye ynaut iro bo raa mno mai kʼait to fee. Feto to, rau ro ati to, natmof anya kaket.
1PE 4:9 Soh raa mama to, nitrah amah mato wanu, tna noo boit nee kʼana mait, tna ana msya anu njin ye. Nno mkah nhaf ro moof; knot-knot ma.
1PE 4:10 Bouum (karunia) aro-aro ro mbam kʼAllah mhau kʼanu. Ait yno re anu aro sait-sait ntai nno bo aro moof kaket. Nno bo aro rau-rau weto to, nbet raa anya. Nno bo weto nbet raa anya mamyot si boatmof aro rau hayah-hayah ro Ait ysan kʼanu sait-sait.
1PE 4:11 Anu taro ja nkyas Watum ro Allah kʼraa. Mkah bouum reto nkyas watum ro mbam kʼAllah mnan si! Tna anu taro ja nbet raa anya. Mkah bouum msya tak ro Allah yoo yee reto to, nbet raa kaket! Yesus Kristus yno re anu ntai nno bo weto beta. Mkah bouum weto to nno bo ro moof afo re kbe raa bibi Allah. Meen raa bibi Ait ysya yatak rAit mamo snok mam hame wajin. Amin: Mabo oh!
1PE 4:12 Tafoh na wojõ ro jõ ksoh; bo ro mkair mama mai kʼanu to. Ati ro bo mama mai kʼanu to, nrok ma. Ktak ma. Mam tabam refo bo ro samyoh ja mai kʼraa soo oh.
1PE 4:13 Menohe simaut sai! Nnaut nwe anu nkai bo ro samyoh toni to, anu nnan fi Kristus oh meto. Meen ati ro Ait hah yama u to, kbe yno re raa beta mmat bo yase rAit. Tna kbe anu simaut mase!
1PE 4:14 Anu kro Kristus, tibyo kbe raa mamus anu. Ati ro ana mamus anu to, nnaut nwe Allah ja yno bo moof kʼanu. Sraujin ma. Ait yno re Har rAit matam anu. Har ro Allah ja bibi bo yase rAit.
1PE 4:15 Nno be anu aro nno bo mkair. Tna au oh mi raa mno bo ro samyoh mai kʼanu. Nno be anu aro nme ajat, soh mfe nsyõf bo raa, soh mfe nber safo aro, soh mfe srioh-sfa bo raa roto bo. ⌞Raa ro mno bo weto kbe hrenaut tna nanwaruk fea!⌟
1PE 4:16 Menohe anu to, ja kro Kristus. Tibyo kbe raa mno bo ro samyoh mai kʼanu. Soh bo reto mama mai to, hrenaut ma, nanwaruk ma. Raa mhar mawe anu kro Kristus to, bo ro moof meto. Feto to bibi Allah.
1PE 4:17 Mabu sboh oh: Bo mkair mama mai kʼanu oh. Anu to ku wAit. Tna Ait ytu safo ro anu bber wia matim. Tna meen Ait yoo safo mana ymit kʼraa ro wase Allah ye. Ayoh ee! Fyi mkah ana weto? Ana mari Bokyas Moof rAit menohe mbo mno fee!
1PE 4:18 Bokom ro Allah mawe: “Raa ro ja mno bo moof sai to, meen ana mkai riof to, bo ro min. Meen fyi mkah ana ro wase Tuhan, msya raa ro mno iro ye?”
1PE 4:19 Allah ybis yawe bo ro samyoh mama mai kʼraa wAit. Menohe anu bhar bwe Allah yhar bait oh. Feto to, anu nhau mam tabam refo to, nsan anu kaket kʼAllah ybo mam yatem rAit. Ait Raa ro yfen anu. Tna bo ro yawe yno to, anu bhar bwe kbe meen ybo yno tu oh. Nma, anu bhau bno bo ro moof sai.
1PE 5:1 Taja tna tao na ro manes tna nmo majelis; jõ tamo raa majelis ye. Tii jõ tmat Kristus yajat mam ara warok tkah tasu ajõ ai. Tna meen jõ tsya raa wAit roto kbe bmat tna fri bo yase rAit ye.
1PE 5:2 Tawe kmot raa mam jemaat ranu kaket. Ana weto to, raa ro Allah wAit. Anu nmo aban mana, tna kmot ana. Anu nmo majelis fyi? Raa aro tko anu yawe nmo majelis fee. Anu nesait nwe ksoh nmo majelis, reto Allah ksoh ye. Jõ hawe bo anu nsu mase mkah pitis oh mi nwe nmo majelis. Menohe tawe anu ksoh nno bo aro rau-rau re kbe tubat tna nros tis nban raa ro jemaat ranu.
1PE 5:3 Nbo raa jemaat ranu to, nbait ktan-ktan ma, tna kmo ana ma. Nnaut nwe anu nse toni niwrek ana to ma. Menohe nno bo ro moof re ana mmat tna ksoh mno bo ro moof mnan anu ye.
1PE 5:4 Nno feto tna meen, ati ro Tuhan ranu hah yama u to, kbe yoo boren yaren anu. Boren ro Ait yaren reto to, moof toni. Meen mhau hame wajin ye.
1PE 5:5 Tao na ro tna fares: Tawe nri bo ro raa mabi mawe kʼanu to, nbo nno. Bokom ro Allah mawe, “Allah beyun raa ro bibi ana mesait ai. Menohe raa ro mhaf sneh to, Ait yoo bouum yee kʼana.” Amsal 3:34 Feto to, nri Bokom reto kaket: Nno bo kʼanya mkah nhaf ro sneh.
1PE 5:6 Allah yatem rAit ybo anu. Feto to, nhau nhaf sneh kʼAit, nfi raa ro kinyah. Soh anu nhau nhaf sneh kʼAllah to, kbe Ait tubat anu. Meen, mam ayõ ro Ait yawe to, kbe meen Ait tubat anu hre mam yuk ro moof.
1PE 5:7 Tna Allah srau ynaut anu yoyo. Feto to, skabuk bo mkair-kar ro mai kʼanu. Nnaut yyi ma. Nsan bo weto kʼAit yatem ybo riryõn.
1PE 5:8 Kabes yabi (Iblis) tait yamo byoh kʼanu. Ait yfi singa ro mhaisre tna saso raa mafit tna mabo. Feto to nisoh nhaf, srau wanu. Nsen tna nhau siwyan anu kaket ye; nno be bo miwro anu.
1PE 5:9 Anu nhar nwe raa ro smot Kristus mam arin aso beta to, Iblis yno bo ro samyoh mai kʼana beta mfi bo anu feto ye. Feto to nfa nsya Iblis. Nfa to, beroh nros ntak tna smot Kristus kaket.
1PE 5:10 Allah yatmof anu. Tiwya Ait ytu anu, yawe niranya nsya Kristus. Tibyo meen anu fri bo yase rAit ro mhau hame wajin. Menohe mfo refo bo ro samyoh mai kʼanu. Bo ro mkair-kar reto kbe mhau kait fee, tna mrok marak. Ait kbe yisoh anu. Kbe yno anu nros ntak tna nhau smot Ait.
1PE 5:11 Bi Ait yatak ybo bombra beta mamo snok mam hame wajin. Amin: Mabo oh!
1PE 5:12 Aam refo jõ tiim kʼanu. Silwanus oh mi ykom aam refo. Tnaut tawe ait tait jõ tafoh ro yros tu, susu fee. Jõ tkyas bo baro kʼanu re tisoh bosmot wanu. Nnaut nwe Allah yatmof anu; tibyo yoo riof ro mase yee kʼanu. Ait yuumto bouum ro ati kʼanu oh meto. Nnaut boatmof rAit reto tna nros ntak.
1PE 5:13 Raa jemaat ro mhau mam Babilon, mmah meen kʼanu ye. Allah ysok ana msya anu beta yawe nmo raa wAit. Tna Markus, ro jõ ksoh tait, ymah meen kʼanu ye.
1PE 5:14 Nmah meen kʼanya tna hana anya ye. Jõ skabuk anu beta ro nhaf sau nsya Kristus. Jõ skabuk re kbe anu beta nhau nhaf tnok ye.
2PE 1:1 Aam refo mbam kʼjõ, Simon-Petrus. Jõ tamo sryan tna raabis (rasul) ro Kristus Yesus rAit. Ait tait Allah, tna Ait sotak iro wanu ye. Ait tait Raa ro yhaf moof ati. Ait ysan bosmot ro moof toni kʼanu. Tkom aam refo tee kʼanu ro fri bosmot refo ye, mnan anya nsya amu ye.
2PE 1:2 Jõ skabuk Allah re anu nhar Ait ysya Yesus ro yamo Tuhan ybo anu. Nhar Ana kaket tibyo Ait yatmof anu beta toni tna yno re anu beta nhau nhaf tnok toni ye.
2PE 1:3 Allah tait yhaf moof ati. Tna bo yase rAit to msai toni ye. Tibyo Ait ytu anu bma bo kʼAit tna re bhar Ait. Tna mkah bohar reto Allah yatak rAit yno re anu bhar bombra beta re kbe bhau bno bo ro Ait ksoh.
2PE 1:4 Ait ysi bosi ro mafer moof kʼanu oh meto. Ysi yawe yno bo weto re anu bhau bhaf moof bnan fi Ait yhaf moof ye. Anu kro Yesus tna Ait yno iso re anu biranya bsya Allah ye. Raa ro tabam refo to, ana masmamo. Ana mnaut bo ro mkair yoyo tibyo ksoh mno bo ro mkair ye. Menohe Allah ysi bosi weto kʼanu afo re bhaf mato wanu ro tiwya mkair to, mrok moof.
2PE 1:5 Allah yno bo weto beta. Feto oh mi soh anu nwe nrok noof to, nno bo wefo sor: Anu smot Kristus oh. Mfo refo tomer kaket afo re nno bo ro moof ye. Nno bo ro moof tna tomer nhar Allah kaket ye.
2PE 1:6 Nhar Allah kaket, tna nisoh anu ai re nno-na bo ma. Nisoh anu. Tna beroh kro Yesus. Beroh kro Yesus, tna nno bo ro Allah ksoh to ye.
2PE 1:7 Nhau nno bo ro Ait ksoh tna niranya nsya raa anya ro Kristus wAit ye. Niranya nsya raa anya tna natmof raa anya beta ye.
2PE 1:8 Soh anu mur-mur nno bo ro moof weto beta kaket yoyo to, bo weto mno mafer moof. Bo weto mno anu nhar Tuhan Yesus Kristus kaket tibyo anu kbe tufrok mafer ro moof ye.
2PE 1:9 Menohe awya ro yno bo weto to fee, ait yfi raa ro masu mboh tna hre mumu. Ait yfi raa ro sorni bo ro Yesus yno: Ait sorni yawe Yesus yyon iro wait ro yno to fee.
2PE 1:10 Tafoh na wojõ ro jõ ksoh; tomer nno bo weto renti. Nno feto tna kbe anu nhar nwe Allah ysok anu oh. Nhar nwe Allah ytu anu oh. Soh anu nno bo weto to, kbe meen anu btek nwe fee.
2PE 1:11 Tna meen anu twok mam sawro ro Yesus Kristus yamo Raja ybo to tu oh. Ait yamo Tuhan ro ybo anu. Tna Ait sotak iro wanu ye. Sawro rAit reto meen mhau hame wajin. Allah ksoh yawe anu twok tu oh. Ait huwya ymah meen kʼanu.
2PE 1:12 Anu ja nros tu tna nhar bokyas ro ati reto oh. Menohe jõ te tkyas bo weto kʼanu u, re kbe anu nnaut yoyo.
2PE 1:13 Tnaut tawe tkyas bo weto u to, moof re kbe anu sorni ma. Tibyo mam wore thau fares to, kbe te tkyas bo weto kʼanu u.
2PE 1:14 Thar tawe kbe thau kait fee. Baro feto sai oh to, jõ thai tamo bojõ. Tuhan Yesus Kristus ykyas feto kʼjõ oh.
2PE 1:15 Meen jõ tarak. Reto oh mi jõ tomer tno bo re kbe anu nhau nnaut bo wefo fares.
2PE 1:16 Amu nkyas kʼanu oh nwe Tuhan Yesus Kristus tait Raa ro yatak. Tna nwe meen Ait yama u. Amu nkyas bo reto mfi bo mna ja raa mkyas-kas to fee. Tiwya amu nesait nmat yase rAit, nmat mkah amu nsu wamu.
2PE 1:17 Tiwya Yaja Allah bibi Ait tna teta Ait. Bo yase ro Allah rAit to msai toni. Yesait yawe, “Ku aJõ ro tatmof oh mefi. Ait tait Jõ thaf mnan.”
2PE 1:18 Tiwya amu nros su nsya Ait mam atu wore Allah ykyas bo kʼAit. Tna nesait nri mai reto mbam sawro ro Allah.
2PE 1:19 Nnaut mai ro amu tii nri reto. Tna amu ja nbo bokom ro tiwya tinyi Allah ybis nabi wAit mama mkom to ye. Tibyo mfo refo amu nhar tu oh nwe bo ro nabi wAit mkom weto to, bo ro ati. Tawe nri bo ro nabi weto mawe to kaket. Soh anu nri bokom wana weto to, kbe anu nhar nwe bokyas roto taro to, bo ro ati ye, fe mfe a. Bo ro tii nabi wAit mkom to mnan fi kek ro mram yuk ro mamur. Soh raa mbo kek to, kbe mmat iso ro mamo. Feto to nri bo ro nabi wAit weto mawe to, mamo snok mam ati ro Tuhan Yesus Kristus yama u. Meen ati reto to, kbe yno re anu bhar Allah kaket. Reto mnan fi reen mama, mnan fi sken ro ja mor-mor mam ti to brat.
2PE 1:20 Tna ro ati to, nnaut bo refo: Nabi mesait mkyas tna betoo Bokom ro Allah fee.
2PE 1:21 Bokyas reto to, bonaut ro mbam raa fee. Nabi na ja mkyas bokyas ro mama mbam kʼAllah. Tna Har rAit oh mi mno re ana mkyas bo weto.
2PE 2:1 Tiwya tinyi to raa baro sioh mawe ana to nabi ro Allah ybis mama mkyas bo wAit. He mfe. Ana mkyas bo ro ntrot fee. Guru weto mamo mkyas bo kʼraa ro Allah wAit, sioh mawe Allah ybis ana mama. Mfo refo, kbe guru aro mama mo kʼanu tna mberur su re mbesruf anu feto ye. Mama tna mkyas bo ro mti kair kʼanu ye. Ana mkyas Tuhan Yesus ro ybo anu. Menohe ana sioh mawe, “Tiwya Ait yhai afo re yfes anu to fee.” Tna ana mawe, “Ait yyon iro wanu to fee ye.” Ana mkyas bo ro sre feto tibyo Allah yno srot re ana safe mkak.
2PE 2:2 Guru weto ja mno bo ro mti saban. Tna raa ro mkyas mawe ana kro Kristus to, kbe mawat mari guru weto tna kro mno bo ro mkair mnan fi ana to ye. Mno feto tna raa ro mne mmat. Mmat tna mkyas-kas iso ranu ro moof to, mawe iso ro mkair.
2PE 2:3 Guru weto masu mase mkah pitis. Kbe mkai mabyoh mawat mbam kʼanu. Ana mkyas bokyas ro sioh kʼanu afo re mbesruf anu. Menohe Allah yako bo ro ana mno. Ait siwyan kair ro meen mai ana. Meen ait yno ana safe mkak tu oh.
2PE 2:4 Tiwya malaikat taro mno iro ye. Tna Allah ybis ana mamoʼt sawro ro kair. Tna ybu ana mam kayah ro mamur. Ybu mamo snok meen Ait ymit safo kʼana.
2PE 2:5 Tna tiwya tinyi yno raa mawat safe mkak ye. Nuh yawe wa kʼana, yawe, “Nhau nno bo ro Allah ksoh!” Menohe ana mari ait fee. Feto to Allah yno riof kʼNuh ysya raa mabo krema mesait aran sai. Tna Ait yno aya mabo mbetru ana beta ro ja mari bo ro Allah yawe fee.
2PE 2:6 Tna tiwya Allah yoo safo mana ymit kʼraa ro mhau mam Sodom msya Gomora ye. Ait ykah kota ewok weto mait makus. Yno afo re raa mmat tna mhar mawe kbe Allah yoo kair mai kʼraa ro ja hawe mari bo ro Ait yawe.
2PE 2:7 Menohe Ait yno riof kʼbi Lot. Lot tait raa ro yhaf moof. Ait ymat bo asmamo raa mno. Ymat he ana miwer watum ro Tuhan. Tibyo yhaf hri.
2PE 2:8 Lot yhau mam wore wo raa mno bo mkair. Yesait yhau yhaf moof sai. Rabu reha to ait ymat tna yari bo ana weto mno miwer watum ro Allah. Tibyo yhaf tnok fee.
2PE 2:9 Anu bmat bo weto beta to, bhar bwe Allah ja ymat tna yhar bo ro raa mno. Taro mno bo ro Ait ksoh. Tna ati ro bo mama mai kʼana, sanet ana to, Ait yatak yno riof kʼana. Taro mber safo. Tna anu bhar bwe Ait ymat ana weto ye. Tna Ait yatak sikowah ana ye. Sikowah tna meen yoo srah ymit kʼana ye.
2PE 2:10 Meen Allah sikowah raa ro masmamo, ro ksoh mno bo ro mkair. Tna kbe sikowah raa ro ja hawe bo raa ro mase mbo ana to ye. Meen Ait sikowah ana weto tu oh. Guru weto to miwana Allah tna mnaut mawe ana raa ro mase. Tibyo ana mamus malaikat msya bo sor ro mhau mam sawro ro Allah. Ana waa bo weto fee, hartu bo weto fee ye.
2PE 2:11 Malaikat sor matak miwer guru weto. Menohe malaikat sor ja waa tna hartu bombra sor ro mhau mam sawro msya Allah. Waa bo weto tibyo berasi fee.
2PE 2:12 Guru weto to, ntoo bombra sor ro ana wase. Ana makit marak mfi kak. Ana srau masmamo sai. Tibyo mno-na bo ye. Kak mabi ja mabe maku rau tna tis rau raa mame sai. Kbe meen guru weto safe mkak ye.
2PE 2:13 Kbe Allah yno bo ska kʼguru weto ro tiwya mkyas bo ro mkair kʼraa. Guru weto ksoh mno-na bo mam ayõ ro baas ye. Ana weto mno bo asmamo ye, menohe mama hre msya anu sohmaam bo su msya anu ye: Ana wase hrenaut. Ana mfi bo mkair ro mhau mrat kʼanu.
2PE 2:14 Ana mmat fnya to, mawe mwyahte. Ana mno iro yoyo. Raa taro to bosmot wana matak fee. Tna guru weto mama tko ana re mno iro. Guru weto to, masu mase mawe mame kta bana yoyo. Tibyo Allah kbe yno ayoh mroh mai kʼana.
2PE 2:15 Ana to sikba iso ro ati tna mamo tit. Nabi Bileam tait ku ro bi Beor: Tiwya ait yno bo mkair re ykai bombra ro ait ksoh. Tna guru weto mno feto mfi Bileam ye.
2PE 2:16 Menohe tiwya, ati ro Bileam yno bo mkair reto to, keledai rait mastako ait. Keledai ja mmai marak. Menohe ati reto, Allah yno keledai reto mmai mfi raa tna mno wa Bileam. Tibyo nabi retait yrok bitsre bo ro mkair yno reto.
2PE 2:17 Guru weto mnan fi aya mato ro ja raa mamo mwyan aya. He mfe, aya msa marak. Tna ana mfi bias sai; raa mmat tna mawe kbe oom mais. He mfe. Foos mfi tna bias reto to, smut somya marak. Allah siwyan yuk ro mamur toni mkah bo yawah ana weto beak. Meen ana mhau mam beto mamo snok mam hame wajin.
2PE 2:18 Ana tawyõ ana ai. Ana sioh-nat sai; ja miwro raa mkyas mawe bo ro raa ksoh sai. Ana mhar mawe raa ro tabam refo ja ksoh mno bo masmamo. Tibyo ana saso raa ro tna sai haberek, ro taa sikba mafoh wana ro ja mno bo mkair. Tna Guru weto tko ana re me hah me mno iro.
2PE 2:19 Guru weto tko ana mawe, “Nno bo bawya sai ro anu ksoh. Nri watum aro fee! Raa aro mbo anu u fee! Anu nmo sryan fee!” Menohe guru weto mesait ja mari tak ro misti iro to. Iro mbo ana matak. Mako hawe sai ana mno bo ro mkair. Feto to ana weto ja mfi sryan ye.
2PE 2:20 Ana weto tiwya raa ro tabam refo sai. Ana mhaf mato wana mkair. Menohe ti sau ana mashana; ana ksoh mawe Yesus sotak iro wana. Ana mawe kro Tuhan Yesus Kristus. Tibyo bitsre iro ro mno. Mhau tna hah me haberek kbor, kro Yesus u fee. Mfo refo iro mbo ana u. Feto to, meen kair ro mase miwer ro tinyi kbe mai kʼana.
2PE 2:21 Ro moof miwer to, tiwya ana wase iso ro raa kro re mno bo ro Allah ksoh. Soh feto, meen bo ro mkair kbe mai kʼana. Menohe ana haberek tna mhar kro Kristus. Mhar Kristus tna raabis wAit mkyas bobis ro Allah ybis kʼana weto ye. Tna fo ana me haberek kbor tna mhah me miwer bobis reto. Mno feto tibyo meen kair ro mase toni kbe mai kʼana.
2PE 2:22 Bo ro ana mno to mfi bo ja raa mawe: “Mtah ja ntoom tna mhah me mait u.” Tna “Fane ro moof ja mhah mamo mate mtum rau.”
2PE 3:1 Tafoh na wojõ ro jõ ksoh; refo aam ro ewok ro jõ tiim kʼanu oh mefo. Tkom aam trion ewok wefo tee kʼanu tawe tti bonaut kʼanu. Re kbe anu nmat aam wefo tibyo nnaut bo ro moof mam nhaf wanu tna sorni fee.
2PE 3:2 Tiwya Allah ybis nabi wAit mama mkyas bo wAit. Jõ tkom aam refo re kbe anu nnaut bokyas wAit weto u. Tuhan sotak iro wanu to. Tna ybis amu, raabis (rasul) wAit to, nmo nkyas bo ro Ait ybis weto kʼanu ye. Tkom aam refo re kbe anu nnaut bobis wAit weto u ye.
2PE 3:3 Tna nnaut bo refo, bo ro ati oh mefo: Masno ro tis to, raa ro wase Tuhan kbe sret bokyas ranu. Tna ana kro bonaut rana mesait; bonaut rana ro masmamo.
2PE 3:4 Kbe ana mawe, “Ja anu nwe Yesus kbe hah yama u ⌞tna yoo safo mana ymit kʼraa.⌟ Menohe mfo refo to Ait yhau mam wore woyõ? Ait kbe yama fee! Hohos wanu tiwya mhau tna fo mhai marak. Tna mfo refo raa mhau tna fo meen mhai ye. Mnan anya sai! Tabam refo to, mhau tu bau feto oh maban tinyi rau Allah yfen no.”
2PE 3:5 Ana weto mhar menohe mfi bo wase bo, tiwya tinyi Allah watum rAit mfen ayoh skes to. Ykyas sai tna yno aya miyi mamo saim anya tibyo tabam refo frok.
2PE 3:6 Tna mkah watum rAit reto yno aya mabo mbetru tabam refo ye. Ait sikowah tabam refo oh meto.
2PE 3:7 Tna mkah watum rAit reto ye, Ait saim yawe meen Ait yoo tafoh yse mait ayoh msya tabam refo. Mam ati reto to, kbe yoo safo mana ymit kʼraa: Raa ro ja mari bo ro Allah yawe to fee, kbe safe marak.
2PE 3:8 Tafoh na wojõ ro jõ ksoh; nsorni ma: Tuhan ymat ti sau to, yawe mnan tahun trion 1000. Tna ymat yawe tahun trion 1000 mnan anya mkah ti sau sai.
2PE 3:9 Tuhan ranu tait, soh ysi bosi to, kbe yno tu oh. Ait yyum mabu rau to, menohe Ait sorni fee. Ait yhau ywof anu sai. Ksoh yawe raa beta mashana wia. Allah hawe yawe aro safe mkak fee.
2PE 3:10 Meen Ait yama tubor. Kbe raa siwyan fefares tibyo mrok. Yama ynan raa ro mama msyõf bo. Ati reto to, kbe raa mari bo ro msai toni mji. Tna ayoh mrok marak. Tna bombra ro mhau mam ayoh beta mait marak. Tabam refo msya bombra rau to, kbe mait ye.
2PE 3:11 Anu nhar nwe kbe tafoh mait bombra beta marak. Feto kbe nisoh anu kaket. Nno iro ma. Nhau nno bo ro Allah ksoh.
2PE 3:12 Nhau nno bo weto to, tna kbe anu nhau ste ayõ ro Allah yawe reto to, mkah simaut. Tna nno bo afo re kbe ayõ reto sboh fooh. Ati reto to, kbe Ait yoo tafoh yse mait ayoh. Tna kbe tafoh reto mno bombra beta mam tabam refo meyom-eyom marak ye.
2PE 3:13 Menohe anu binaut bo ro Allah ysi yawe. Anu ste masno ro meen Allah yfen ayoh ro tna msya tabam ro tna. Mam wore weto to, raa beta kbe mhau mno bo ro Allah ksoh.
2PE 3:14 Tafoh na wojõ ro jõ ksoh; anu ste masno reto. Feto to tomer re nhau mam tabam refo fares to, nno iro u ma. Nber safo aro u ma. Nhau niranya nsya Allah ye.
2PE 3:15 Nnaut nwe Tuhan ranu yhau rere afo re raa roto mkai riof ye. Tiwya Allah yoo bohar yee kʼPaulus, anu bfoh ranu. Tiwya ait ykom aam tiim kʼanu to, ykyas bo weto ye.
2PE 3:16 Ykyas ati ro meen tabam refo haberek mam aam wait ro ykom sor to ye. Bo ro ait ykom to taro raa srau mnaut kaket fee. Raa taro wase Tuhan tna bosmot rana matak fee. Ana weto mmat bo ro samyoh weto to, tna mbetoo maja rau kbik-kbak; ana haberek-barak bawya ro Paulus ykom. Ana mbetoo Bokom ro Allah far-far roto taro sre ye. Mkyas Bokom ro Allah sre tibyo meen Allah yno bo ro samyoh matu mai kʼana.
2PE 3:17 Tafoh na wojõ ro jõ ksoh; anu nhar bo weto oh. Feto to, kaket anu afo re anu kro raa ro miwer watum ro Tuhan to ma. Nri bo mkair ro ana mkyas to ma. Anu ja smot Yesus kaket. Nri bokyas rana ma be kbe bosmot ranu maut-mroh tna kbe nmo tit meto.
2PE 3:18 Jõ ksoh tawe anu nhar Tuhan Yesus Kristus, ro sotak iro wanu to. Nhar Ait kaket renti. Tna ksoh tawe anu nhar boatmof rAit kaket renti ye. Nma, anu bbaut bo yase rAit mamo snok mam hame wajin. Amin: Mabo oh!
1JO 1:1 Tabam refo tiwya tinyi rau to raa ro yasom rAit 'Bokyas ro Mroon' yhau wia. Tna fo Ait yama yhau mam tabam refo. Tiwya amu nesait nmat Ait mkah nsu wamu. Amu nri bokyas rAit tna nbo Ait nkah ntem ramu ye. Tna amu ksoh nkyas Bokyas ro Mroon reto kʼanu:
1JO 1:2 Tiwya Ait yama yhau mam tabam refo to, amu nesait nmat Ait. Tibyo amu nkyas bo ro amu nmat to kʼanu. Bi Ait ro amu nkyas retait tiwya tinyi yhau yum oh ysya Yaja. Tna kbe meen yhau yroon ye.
1JO 1:3 Ait ro amu nri tna nmat retait, yasom rAit Yesus Kristus. Amu nkyas yasom rAit kʼanu afo re anu nmo raa ro Kristen ye. Anu nmo raa ro Kristen to, kbe iranya ranu nsya amu mnan anya. Amu ja niranya nsya Allah tna nsya Ku rAit Yesus Kristus ye.
1JO 1:4 Tna soh anu nri bokyas ro amu nkom refo moof kaket to, kbe amu simaut mase.
1JO 1:5 Bokyas ro amu nri mbam kʼYesus, tna ne nkyas kʼanu beta, au oh mefo: Allah tait yfi kek, tna arin mamur aro mhau kʼAit fee.
1JO 1:6 Soh anu sait yawe, “Iranya ajõ tsya Allah matak.” to, he mfe; ja yno bo ro mkair-kar fares. Ait oh mi yamo iso ro mamur fares. Ait retait sanet yawe sioh-sah awya mefi! Ait retait yiranya ysya Allah ye fee.
1JO 1:7 Menohe soh anu bhau mam arin ro maah to bnan fi bi Ait ja yhau mam wore wo maah to ye, kbe anu biranya kaket. Tna mees ro Yesus Ku rAit reto mroh mama tna myon iro wanu.
1JO 1:8 Soh anu bwe, “Anu ja wase iro bno!” to, anu sioh-sah anu sai. Anu bkyas feto to, anu bkyas bo ro mabo fee.
1JO 1:9 Soh anu ja betoo iro ro ja anu bno abyõ to, kbe Ait yyon iro wanu; Ait yyon anu boof. Ait retait Raa ro yhaf moof, tna bo ro bi Ait yawe to, kbe Ait yno tu oh.
1JO 1:10 Watum ro Allah mkyas mawe, “Raa beta ja mno iro.” Soh anu sait yawe, “Mfe, jõ ja twase iro tno!” Ait retait yiwana Watum ro Allah reto. Fyi, ynaut yawe Watum ro Allah ja sioh-sah raa a?
1JO 2:1 Kukek wojõ: Aam refo jõ tkom tiim mama kʼanu re kbe anu nno iro ma. Tna soh anu sait yno iro to, kbe Yesus Kristus ro yhau yoof retait, yamo yo kʼAllah tna yros susai masuf yawe, “Nyõ kmo ait toni to ma.”
1JO 2:2 Ait fi Raa ro sotak iro wanu tna yno re iro wanu Allah yyon beta. Yyon iro wanu besait sai fee. Ait yyon iro raa makin ro mhau mam tabam refo beta ye.
1JO 2:3 Soh anu bri tna bno bo ro Allah ybis kʼanu to, reto merif mawe, anu bhar Ait yhaf mato rAit.
1JO 2:4 Mfi bo raa sait yawe, “Jõ thar Allah yhaf mato rAit.” Soh ait retait ja yari yno bo ro bi Ait ybis to fee, ait fi raa ro ykyas bo sioh retait. Ait ykyas bo ro ati meto fee.
1JO 2:5 Awya sai ro yari tna ybo yno bo ro Allah yawe to, ait retait yhafri Allah kaket, aro mabut fee. Fyi re anu bhar bwe anu bhaf sau su bsya Allah fe mfe a?
1JO 2:6 Raa ro ja mno bo ro Kristus yno to, ana mesait sai aran oh mi raa ro mhaf sau su msya Allah oh. Raa roto taro mhaf sau su msya Allah fee.
1JO 2:7 Taja, tme, tao, tano na ro jõ ksoh; tkom aam refo tsi bo ro tna kʼanu fee. Bosi ro Allah ykyas ooh-oh bo ro ati fares: Tiwya tinyi Ait yawe, “Nko hawe sai, anu natmof raa anya kaket oh!” Mfo refo jõ te tsi bosi reto kʼanu u.
1JO 2:8 Tna jõ betoo bosi refo maja rau ro tna: Maja rau oh mi Yesus yama mam tabam refo fo, tna raa mmat he Ait ja yatmof raa kaket. Yno feto yerif iso ro ati reto kʼanu. Tna mfo refo raa mmat anu beta ja batmof raa anya kaket ye. Boatmof reto to, mfi kek ro mama mram tabam ro mamur refo. Mfo refo kek reto mo maut tna mamur to mroh baro.
1JO 2:9 Awya ro yawe, ‘Jõ thau mam kek ro Kristus’ to, menohe ait knait raa ro Kristen taro, ait retait yhau wore wo mamur fares.
1JO 2:10 Awya ro yatmof raa Kristen taro to, kek ro Kristus mhau kʼait retait. Tna kek reto kbe mram iso ro ait yamo re kbe ait ytek yawe mam iro fee.
1JO 2:11 Awya ro knait raa anya ro Kristen to, ait retait yhau mam wore mamur fares. Yasu mti tibyo wase iso ro yamo ye.
1JO 2:12 Kukek wojõ; jõ tkom aam refo tiim kʼanu tna thar tawe Kristus yno re Allah yyon iro wanu oh to.
1JO 2:13 Taja na; jõ tkom aam refo tiim kʼanu tna thar tawe anu nhar bi Ait yhaf mato rAit kaket oh. Anu nhar bi Ait ro tiwya yhau bait wia wore tabam refo Allah tii yfen fefares. Tao na ro tna; jõ tkom aam refo tiim kʼanu tna thar tawe anu nsya kabes yabi (Iblis) nfa oh. Tna anu ntak nikyak ait ro yetsu mnis safo retait. Ait yros yatak abyõ fee.
1JO 2:14 Kukek na; jõ tkom aam refo tiim kʼanu tna thar tawe anu ja nhar Bja ranu yhaf mato rAit kaket. Taja na; jõ tkom aam refo tiim kʼanu tna thar tawe anu ja nhar Tuhan yhaf mato rAit. Ait yhau bait wea wore tabam refo tii yfen fefares. Tao na ro tna: Jõ tkom aam refo tiim kʼanu tna thar tawe bosmot ranu to matak oh, tna anu ja nri bokyas ro Allah nbo nno. Tibyo anu ntak nikyak ait ro yetsu mnis safo oh to.
1JO 2:15 Kaket anu: Saso-sasa bo knik-knak ro tabam refo toni to ma! Awya ro yhafri bo weto to, ait yhafri Allah ranu fee. Allah tait anu Bja ranu.
1JO 2:16 Bo knik-knak ro tabam refo fo boasmamo ro mase: Raa ro masmamo ja mno bo ro ana metsu rana ksoh sai, ana mnaut ttis to fee. Ana weto oh mi hafri bo ro tabam refo. Raa ro mmat bo tna srau oot-oot mawe moo; ana weto oh mi hafri bo ro tabam refo. Tna raa ro saso masom ro mase, re raa bibi ana; ana weto oh mi hafri bo ro tabam refo. Bo weto beta to bo ro tabam refo sai, mbam kʼAllah anu Bja ranu fee.
1JO 2:17 Tabam fo msya bombra aro rau-rau ro ja raa masmamo to, meen aro mhau mawyõs fee. Bo weto beta kbe saef mkak. Ro meen mhau mawyõs oh mi raa ro mari tna mbo mno bo ro Allah ksoh.
1JO 2:18 Kukek wojõ; tabam ro mfo refo fo, kene wore nsboh rau oh. Tiwya anu nri raa mkyas mawe, “Raa yase sait ro yasom rait ‘Kabes ro Knait Kristus’ kbe frok yama.” Mfo wefo fo raa makin mari Kabes ro Knait Kristus oh. Bo reto merif kʼanu mawe makyon sboh rau kene oh mefo.
1JO 2:19 Ana ro knait Kristus weto to, tiwya skabuk msya anu su. Menohe ana mhaf rana to hayah tibyo ana masen frok sikba anu mamo. Bo reto merif kʼanu mawe ana mhaf sau su msya anu to fee. Raa ro mhaf sau su mnan msya anu to, ana mhau skabuk su msya anu fares.
1JO 2:20 Menohe Tuhan yesait ybis Har rAit mama mjin kʼanu nhaf wanu tibyo anu beta ja nhar bo ro ati kaket.
1JO 2:21 Taja, tme, tao, tano na; tkom aam refo kʼanu fyi? Tnaut tawe anu wase bo a? Mfe. Anu nhar bo kaket. Anu nhar nwe bokyas ro mbam kʼAllah to bo ro ati sai. Tna anu nhar nwe bokyas reto maja ro sioh aro fee ye.
1JO 2:22 Mfi bo raa sait ywaar Yesus yawe, “Yesus tait Mesias fee.” Raa retait raa ro knait Kristus. Raa ro knait Kristus weto to, ja mwaar Yesus tna mwaar Yaja rAit ye.
1JO 2:23 Awya ro ywaar yawe, ‘Yesus tait Ku ro Allah yare metait fee.’ to, ait retait yiranya ysya Allah fee. Tna awya ro yitbat yawe, ‘Yesus tait Ku ro Allah yare oh metait.’ to, ait oh mi ja yiranya ysya Allah to.
1JO 2:24 Reto to bokyas ro ati tiwya anu nri tna smot tinyi rau. Soh anu smot bokyas reto nbo renti to, kbe anu nhaf sau su nsya Allah tna nsya Ku rAit ye.
1JO 2:25 Tna bi Ait ysi kʼanu yawe, meen anu bhau broon.
1JO 2:26 Bo wefo beta jõ tkom tiim kʼanu weto afo re anu nhau kaket anu. Nri raa ro mama mkyas bo ro mkair tna besruf anu to ma!
1JO 2:27 Yesus Kristus ybis Har rAit mroh matam anu. Feto to anu nhar bo ro ati weto oh. Soh raa sait yama ykyas bokyas roto naut kʼanu to, nri ait retait ma! Har ro mjin kʼanu nhaf to mesait merif bombra ro ati kʼanu. Har reto ja mkyas bo ro siroyõ fee. Feto to, rau ro moof to, anu nhau nhaf sau su nsya bi Ait, mfi bo tiwya tinyi Har rAit mkyas mawe kʼanu.
1JO 2:28 Kukek wojõ; beroh nhau nhaf sau su nsya Kristus afo re meen ati ro Ait hah yama u to, anu waa bo ntru Ait to fee, tna anu hrenaut Ait fee ye.
1JO 2:29 Anu nhar nwe Ait tait Raa ro yhaf moof yum bait sai. Tibyo anu nhar ye nwe awya sai ro ja mno bo moof to, ana oh mi ku ro Allah wAit to.
1JO 3:1 Nnaut oh; Allah tait yawyan marak anu toni syok re yawe anu fo ku wAit! Ae, anu fo ku wAit ro wotur fea! Tna raa ro tabam refo mhar Allah yhaf mato rAit kaket fee. Ana weto wase Bja ranu tibyo ana mhaf rana mnan msya anu bhaf ranu to fee. Feto to ana mhar anu, ku wAit weto fee ye.
1JO 3:2 Taja, tme, tao, tano na ro jõ tksoh; mfo wefo fo anu bhar oh bwe anu ku ro Allah wAit. Menohe anu hre bnaut bwe bmos ranu fo meen mnan fyi? Anu wase fares. Menohe anu bhar bwe meen Yesus yama tabam refo mun ro ewok to, kbe anu beta bmat bi Ait. Bmat tibyo haberek bnan bi Ait ye.
1JO 3:3 Tna awya ro yinaut tna ywof ti ro Ait yama reto to, ja yisoh ait kaket re yno iro fee. Yawe yhau yhaf mato moof ynan bi Ait ro yhaf moof sai.
1JO 3:4 Awya ro yiwana watum ro Allah to, Ait retait yno iro meto. Tibyo awya ro yno iro to, ait retait yiwer watum ro Allah.
1JO 3:5 Anu nhar nwe Yesus yama mkah bo yyon iro wanu. Tna bi Ait yno iro aro fee.
1JO 3:6 Tibyo awya ro yhau yhaf sau su ysya bi Ait to, ja hawe yno iro aro u. Awya ro ja yno iro yoyo to, ait retait yamo yo kʼbi Ait fefares, tna wase bi Ait fares.
1JO 3:7 Kukek wojõ ro jõ ksoh; raa mama mkyas bo mawe moo nhaf wanu to, nri ma! Nnaut oh; awya ro ja yno bo moof to, ait retait raa ro yoof yfi bi Ait ro yoof.
1JO 3:8 Tna awya ro ja yno iro to, ait retait raa ro kabes yabi (Iblis) rait. Mbam tiwya tinyi snok ttis rau to kabes yabi yno iro bait. Tna Ku ro Allah yare yama mkah bo yitrah bo ro kabes yabi yno mkair weto.
1JO 3:9 Kukek ro Allah wAit to, ja mno iro yoyo fee. Har rAit mhau matam ana tibyo ana ja wase mno iro. Ana mnan fi Maja rana ro ja wase yno iro.
1JO 3:10 Feto to, fyi re anu bhar bwe Ku ro Allah wAit weto miyo? Tna fyi re anu bhar bwe raa ro kabes yabi wait weto miyo? Tawe kʼanu tawe; awya ro ja yno bo ro mkair to ait retait ku ro Allah fee. Tna awya ro ja yatmof raa anya kaket to fee, ait retait ku ro Allah fee ye.
1JO 3:11 Tiwya tinyi raa mkyas watum reto kʼanu mawe, “Nko hawe sai, natmof raa anya kaket.”
1JO 3:12 Feto to knait raa nnan fi Kain tiwya knait yao to ma! Tiwya Kain tait kabes yabi (Iblis) ybo ait. Ait yno bo ro mkair tna ymat he yao rait yno bo ro moof. Ymat feto tibyo yhaf sarok yame yao yajat.
1JO 3:13 Taja, tme, tao, tano na; raa ro mimara mboh to, kbe knait anu tu oh. Ana knait anu feto, nrok ktak ma!
1JO 3:14 Anu batmof raa anya ro Kristen to, feto oh mi anu bhar bwe anu bwyan wanu ro tiwya mhai weto to, mfo refo mrok maam oh. Tna awya ro yatmof raa anya to fee, yawyan rait to mhai fares.
1JO 3:15 Allah yawe, “Awya ro knait raa anya ro Kristen to, ait retait yber safo ynan raa ro yame raa yajat.” Tna anu nhar nwe raa ro yame ajat retait tait meen ykai roon ro hame fee.
1JO 3:16 Anu bno fyi re batmof raa anya kaket? Kristus yerif iso ro moof kʼanu: Ait ysan yetsu rAit, yawe yno bo re anu meen bhau hame wajin. Rau ro moof to, anu ye bno bo bawya sai afo re riof kʼraa Kristen anya ye.
1JO 3:17 Soh raa sait yse bombra msis oh tna ymat raa Kristen anya ro mse bo marak to fyi? Soh ait yatmof raa weto ait retait ynan Allah ro ja yatmof raa ye. Soh ait yatmof raa weto fee, ait retait wase boatmof ro Allah.
1JO 3:18 Kukek wojõ; mfo refo anu bmo raa ro Kristen, tibyo anu bhar bo ro ati. Tna anu bbo bno bo ro ati ye. Anu ja nkyas nwe, “Ja amu natmof raa anya kaket.” Nkyas feto nkah nsoh wanu sai ma. Rau ro moof to, anu natmof raa anya tna nno bo ro moof kʼana ye. Nkyas nsoh sai ma.
1JO 3:19 Fyi re anu bhar bwe anu kro Allah mam iso rAit ro ati to? Raa ro ja yatmof raa anya mnan fi feto to, ait retait yhar yawe ait kro iso ro ati tu. Tibyo ait yamo yo kʼAllah to waa fee.
1JO 3:20 Menohe soh anu sait yno bo ro mkair. Rau ro moof to, ait hah ye yamo yo kʼAllah fooh. Tna yisoh yhaf moof u. Nnaut kaket oh: “Allah yhar bombra beta tna Ait yatak yisoh anu nhaf wanu u.”
1JO 3:21 Taja, tme, tao, tano na ro jõ ksoh; soh Allah yisoh anu bhaf wanu oh to, anu waa fee. Anu bmo bo kʼbi Ait sai. Anu tetet fee.
1JO 3:22 Soh anu ja bri bo ro Allah ybis kʼanu tna bbo bno, kbe Ait yhaf mnan ysya anu. Soh feto to, bo bawya ro anu byoh kʼAit to, kbe Ait yoo yee kʼanu.
1JO 3:23 Tna bo ro Ait ysi kʼanu to, au oh mefo: Smot Ku rAit Yesus Kristus kaket. Tna bko hawe sai anu batmof raa anya kaket, mnan fi tiwya Ait ysi kʼanu oh.
1JO 3:24 Awya sai ro yari bo ro Allah yawe tna ybo yno to, ait oh mi raa ro yhaf sau su ysya Allah. Tna bi Ait yhaf sau su ysya ait retait ye. Allah yse Har rAit mjin kʼanu bhaf wanu afo re anu bhar kaket bwe Ait yhaf sau su ysya anu.
1JO 4:1 Taja, tme, tao, tano na ro jõ ksoh; watum aro rau beta ro anu nri to, nfot srot to ma! Nse kʼanu nhaf ma! Raa mawat sioh mawe ana nabi. Raa mawat sioh mawe Allah ybis ana mama mkyas bo wAit. Ana sioh mawe feto, he mfe; bokyas wana to mbam kabes. Tna ana masen mamo mbesruf raa mam woyõ-woya ana mamo mam tabam refo ye. Feto to, raa mama mkyas bo kʼanu to, anu sanet nmat sas watum rana wia. Tna mfi bo bokyas rana mbam kʼHar ro Tuhan to fee, nri tna smot bokyas reto ma!
1JO 4:2 Kbe anu bno fyi re bhar watum reto to mbam Har ro Tuhan fe mfe a? Ro moof to anu btu sanet raa ro mkyas watum reto wia bwe, “Fyi, nyõ smot nawe Yesus Kristus tait ybam Allah yama mam tabam refo, tna haberek yamo raa ati, fe mfe a?” Tna soh ait yawe si yawe, “Ae, Jõ smot.” Kbe anu bhar bwe Har ro mjin kʼait yhaf mato to mbam kʼAllah. Feto to bokyas raa retait reto anu bri.
1JO 4:3 Menohe soh ait ywaar bo reto yawe si yawe, “Yesus Kristus tait Raa ro ybam Allah yama to fee.” Kbe anu bhar bwe watum raa retait mbam Har ro Tuhan fee. ⌞Feto to nri bokyas rait to ma! Smot ma!⌟ Bokyas rait reto mbam Kabes ro Knait Kristus. (Tiwya anu nri raa mkyas mawe, “Ait sait ro yasom ‘Kabes ro Knait Kristus’ kbe yama.” Tna jõ tawe kʼanu tawe ait retait yama oh.)
1JO 4:4 Kukek wojõ; nnaut nwe anu fo ku ro Allah wAit. Tna Har rAit ro mjin kʼanu bhaf wanu to, mase toni miwer. Kabes Yabi (Iblis) tait yase ybo bombra ro tabam refo sai. Tibyo kabes sor ro ait ybo to mtai miwro anu, ku ro Allah, to fee. Har ro Tuhan reto matak miwer. Kbe mno kabes weto mhau mte.
1JO 4:5 Guru sor ro wase Allah weto to mama mkyas bo ro mbam tabam refo sai. Tibyo raa ro wase Allah ja mari bokyas ro guru weto mkyas.
1JO 4:6 Menohe anu fo ku ro Allah wAit. Tna awya ro yari bokyas ro anu bkyas to, anu bhar bwe ait retait yhar Allah yhaf mato rAit kaket. Tna raa ro mari bo ro anu bkyas to fee, anu bhar bwe ana weto to ku ro Allah wAit fee. Iso reto oh mi anu bhar kaket bokyas aro rau weto mbam tiyo: Taro mbam Har ro ati, tna taro mbam har kabes ro besruf raa ye.
1JO 4:7 Taja, tme, tao, tano na ro jõ ksoh; natmof raa anya kaket. Allah oh mi yno re anu natmof raa anya saah. Awya ro yatmof raa anya kaket to, ait retait ku ro Allah rAit. Tna yhar Allah yhaf mato rAit ye.
1JO 4:8 Allah ja yatmof raa. Feto to anu bhar bwe awya ro yatmof raa anya to fee, ait retait wase Allah.
1JO 4:9 Allah tait yabe Ku sait aran tomu yum. Tna ybis Ku ro yare retait yama tabam refo yno iso re kbe anu bhau hame wajin. Feto oh mi anu bhar bwe Allah yatmof anu toni.
1JO 4:10 Tiwya anu nhafri Allah fee. Menohe Allah yatmof anu matim wia fefo: Tiwya iro ro anu bno weto misti re Allah kmo anu. Tna Ait ybis Ku rAit yroh yama yake safo wanu. Feto to yno re Allah kmo anu u fee.
1JO 4:11 Taja, tme, tao, tano na ro jõ ksoh; Allah yatmof anu toni. Fyi-fya rau to, batmof raa anya kaket mfi Ait yatmof anu!
1JO 4:12 Raa sait bo aro ymat Allah fefares. Menohe bi Ait yhau yhaf su ysya anu to, mafer rau to anu batmof raa anya. Raa mmat bo anu ja batmof raa anya to, aro mabut fee. Tna kbe ana mhar mawe, “Allah oh mi yno re ana matmof raa anya.”
1JO 4:13 Anu fo bhau bhaf sau su bsya Allah fe mfe a? Tna bi Ait yhau yhaf sau su ysya anu fe mfe a? Allah ybis Har rAit mama mjin kʼanu bhaf wanu oh. Feto oh mi anu bhar kaket bwe anu bhaf sau su bsya bi Ait tna bi Ait yhaf sau su ysya anu ye.
1JO 4:14 Tiwya ati ro Ait yhau mam tabam refo fares, amu nesait nbo tna nmat Yesus yabo rAit. Feto to amu nhar nwe bokyas refo mabo tu oh. Tna amu nkyas yasom rAit nwe Allah ybis Ku rAit yroh yama tna sotak iro raa beta.
1JO 4:15 Awya ro ykyas abyõ yawe, “Yesus tait Ku ro Allah yare.” Allah yhau yhaf sau su ysya raa retait tna raa retait yhaf sau su ysya Allah ye.
1JO 4:16 Allah yno bo ro riwai weto afo re anu bhar kaket bwe, “Bi Ait yatmof anu toni.” Feto to anu smot bi Ait. Allah ja yatmof raa. Tna awya ro ja yatmof raa anya to, ait retait yhau yhaf sau su ysya Allah tna Allah yhaf sau su ysya ait retait ye.
1JO 4:17 Bo ro riwai reto oh mi mno re anu ja batmof raa anya to, aro mabut fee. Soh anu bhau bhaf sau su bsya Allah to, meen ati ro bi Ait ytu safo mana kʼraa sait-sait to, kbe anu waa fee. Anu bhar bwe wore anu bhau mam tabam refo fares to, anu ja batmof raa anya ye mnan fi bi Ait yesait ja yatmof raa ye.
1JO 4:18 Soh anu batmof raa anya kaket to, anu bhar bwe meen ati ro bi Ait ytu safo mana kʼraa to, kbe yno bo mai kʼanu fee. Feto to anu waa Allah fee. Menohe raa ro ja matmof raa anya fee, ana weto kbe mnaut yyi ana mamos wana tna ana waa ye fea!
1JO 4:19 Allah yatmof anu wia matim tibyo anu ne nhafri bi Ait ye.
1JO 4:20 Awya ro yawe, “Jõ thafri Allah.” Menohe ait knait raa ro Kristen taro to, ait retait yhar Allah boatmof rAit fee saut! Yawe ait yhafri Allah to, ait sioh! Raa ro tabam refo ja anu bmat bkah bsu wanu. Tna soh ait retait wase yatmof raa ro ja ymat to, fyi mkah Allah; raa ro anu bsu wanu bahni? Ait ro riwai retait wase yhafri Allah ye tu oh!
1JO 4:21 Bobis ro Allah oh mefo: “Awya ro yhafri Jõ to, fyi-fya rau to, kbe ait yatmof raa ro Kristen taro ye.”
1JO 5:1 Awya ro smot Yesus Kristus tna yhar yawe, “Yesus tait Raa ro Allah ysok mkah bo yoo riof ro mase yee kʼraa” to, ait retait ku ro Allah. Tna awya ro yhafri Allah to, kbe ait retait yhafri Allah yare ye.
1JO 5:2 Anu fo ja batmof raa ro Kristen taro fe mfe a? Soh anu ja bri bo ro Ait ybis kʼanu tna ja bbo bno to, kbe anu bhar kaket bwe, “Anu batmof raa ro Kristen taro ye.”
1JO 5:3 Soh anu bhafri Allah to, kbe anu bri bo ro Ait ybis kʼanu tna ja bbo bno bo weto ye tu oh. Tna bo ro Ait ybis weto to samyoh fee.
1JO 5:4 Bombra ro tabam refo ja miwro ku ro Allah wAit re ana mbtek mam iro fee. Bosmot ranu mno re anu bros btak bikyak bo mkair-kar ro tabam refo.
1JO 5:5 Raa ro smot Yesus tna mhar mawe Ait Ku ro Allah yare to, ana weto mesait aran kbe mros matak. Bombra ro tabam refo meen miwro ana weto fee.
1JO 5:6 Tiwya raa baptis Yesus mkah aya. Tna Ait ysan yetsu rAit kʼraa mame yajat tna mees rAit frok ye. Tna Har ro Allah mesait mkyas mawe, “Bo weto to mabo tu oh.” Anu bhar bwe Har rAit ja mkyas bo mabo sai.
1JO 5:7 Tna Allah yerif bo trion tuuf refo kʼanu: Har rAit, aya reto, msya mees reto. [Yerif bo tuuf wefo beta kʼanu afo re anu smot bwe Yesus Ait oh mi Raa ro yoo riof yee kʼanu.]
1JO 5:9 Bokyas ro raa mkyas kʼanu to, ja anu smot tna nnaut mamo-me fee. Tna Allah tait Raa ro yase toni, feto to bokyas rAit to matak miwer! Bi Ait ykyas Yesus kʼanu yawe, “Yesus tait Ku aJõ.” Feto tibyo anu bhar bwe bokyas rAit reto matak yum.
1JO 5:10 Awya ro smot bokyas reto yawe “Yesus tait Ku ro Allah yare” to, ait yhar kaket yawe bokyas ro Allah riwai reto to bo ati oh. Tna awya ro smot bokyas ro Yesus reto fefares to, ait retait ywaar yawe bokyas ro Allah riwai reto to bo ro ati fee. Tna ait ro hawe smot Tuhan reto ait ynaut yawe fyi? Ynaut yawe Allah tait Raa ro siroyõ a?
1JO 5:11 Bokyas ro ati oh mefo: Allah ysan roon ro hame kʼanu oh. Tna Ku rAit oh mi yama yno re anu bhau hame to.
1JO 5:12 Feto to awya ro smot Ku rAit to, kbe ait retait ykai roon reto. Tna awya ro hawe smot Ku rAit to, kbe yhau hame fee.
1JO 5:13 Jõ tkom bo wefo beta tiim kʼanu ro smot Ku ro Allah rAit afo re anu nhar nwe meen anu nhau hame wajin.
1JO 5:14 Tna anu nhau skabuk Allah to waa fee. Anu bhar bwe soh boyoh ranu mnan anya msya Ait ksoh rAit to, kbe Ait yari boyoh ranu.
1JO 5:15 Anu bhar bwe Ait yari boyoh ranu tna bhar bwe kbe anu bkai bombra ro anu byoh kʼAit weto ye.
1JO 5:16 Soh anu sait ymat raa ro Kristen yno iro aro to, rau ro moof to, nyõ skabuk nayoh kʼAllah afo re bi Ait yatmof ait retait, yoo riof yee kʼait. Iro taro to, Allah ynaut yawe safo toni, kbe misti raa mhai tu oh. Tna jõ tawe anu skabuk raa ro mno iro ro safo weto to ma.
1JO 5:17 Bombra ro mimara beta to Allah yawe, “Iro meto.” Tna iro taro to misti re raa mhai fee.
1JO 5:18 Anu bhar bwe ku ro Allah wAit to ja mno iro fee. Yesus yatam ana tna saka wa kabes yabi (Iblis). Tibyo kabes yabi ytai yno ana fee.
1JO 5:19 Tna anu bhar bwe kabes yabi yase ybo raa beta ro mhau-ha sai mam tabam refo. Menohe anu fo ku ro Allah wAit to, kabes yabi ytai ybo anu u fee.
1JO 5:20 Anu bhar bwe Yesus yroh yama mam tabam refo tibyo anu btai bhar maja ro Allah. Ait yroh yama afo re kbe anu bhar Allah ro yase, yhaf mato rAit. Tibyo anu fo bhaf sau su, srau sau su, tna bonaut wanu ro bnaut sau su bsya bi Ait tna bsya Ku rAit Yesus Kristus ye. Ait retait Allah ro yase, ro ysan roon ro hame kʼanu.
1JO 5:21 Kukek wojõ; smot bombra ro tabam refo fo ma! Smot Allah ranu ro yaam sai.
2JO 1:1 Aam refo mbam kʼjõ Yohanes, ro tabi oh. Nyõ to fnya manes ro Allah ysok. Tna tkom aam refo tiim kʼnyõ nsya kukek wonyõ ro jõ ksoh toni. Raa Kristen beta ro mhar bokyas ro ati mbam kʼAllah to ana ksoh anu ye.
2JO 1:2 Anu beta smot bokyas reto oh. Tna bokyas ro ati reto to, kbe matam anu mamo snok mam hame wajin.
2JO 1:3 Jõ skabuk Allah, Bja ramu. Jõ skabuk Bja Allah afo re Ait ysya Yesus Kristus, Ku rAit, matmof anu tna moo riof mee kʼanu. Jõ skabuk re kbe ana mno anu nhau nhaf tnok ye. Tna jõ skabuk re ana matam anu re kbe anu bhau smot bokyas ro ati reto tna bhau batmof raa anya kaket ye.
2JO 1:4 Tano; jõ simaut toni thar tawe ku wonyõ baro ja kro iso ro ati reto ye, mamyot bo ro Bja ranu ysi kʼanu.
2JO 1:5 Mfo refo jõ tkom aam refo tsi bo ro tna kʼanu fee. Bosi ro Allah ykyas ooh-oh to bo ro ati fares: Tiwya tinyi Ait yawe, “Nko hawe sai, natmof raa anya kaket!”
2JO 1:6 Anu batmof raa anya fyi? Anu bri bosi ro Allah ysi kʼanu tna bbo bno. Tna bosi reto anu nri mbam tinyi oh, au oh mi: “Anu raa woJõ; nko hawe sai to, nhau natmof raa anya kaket.”
2JO 1:7 Mfo wefo fo raa mawat masen mama tna besruf raa mawe, “Tiwya Yesus Kristus yama tabam refo to, haberek yfi raa to fee.” Raa ro mama mkyas bo reto to, oh mi raa ro besruf raa tna ro knait Kristus ye.
2JO 1:8 Kaket anu beta, tna nri bo ro ana weto mkyas to ma! Tiwya amu hrowyõ nhai nkyas Bokyas ro Yesus mnan si kʼanu oh. Soh anu nri tna nbo bokyas kair ro ana weto mkyas to, meen Allah yaren boren mase kʼanu weto fee. Feto to tomer nbo bosmot ro ati renti re kbe anu nkai boren wanu ro mase.
2JO 1:9 Awya ro ynaut yawe, “Bokyas ro Kristus mnan si to fee. Feto kbe jõ saso bokyas roto taro naut.” Ait ro ynaut yawe feto mi raa ro yiranya ysya Allah fee. Menohe awya ro beroh ybo bokyas ro ati reto to, ait retait yiranya ysya Allah. Yiranya ysya Bja ranu Allah, tna ysya Ku rAit ye.
2JO 1:10 Soh guru sait yama yerif iso roto taro kʼanu to, menohe yerif iso ro Kristus ati reto to fee; nitrah nhaf wanu kʼait ma. Tna nitrah amah wanu kʼait ye ma.
2JO 1:11 Awya ro ymat tna ymah meen guru retait; kbe ait retait yasom safo su ysya guru retait ye.
2JO 1:12 Bo ro tawe tkyas kʼnyõ to mawat fares. Menohe jõ hawe bo tkom mkah aam. Tnaut tawe kbe jõ tama kait to kʼnyõ afo re simaut ranu mase toni.
2JO 1:13 Tano; jõ tmah meen kʼnyõ mbam nao anyõ mam Kristus, msya kukek wau ro mhau mam befo.
3JO 1:1 Aam refo mbam kʼjõ Yohanes, ro tabi oh. Tkom aam refo tiim kʼnyõ Gayus, ro jõ ksoh toni.
3JO 1:2 Tafoh ajõ ro jõ ksoh; jõ tari he ja nyõ nhau smot Tuhan kaket to. Tna jõ skabuk Allah re nyõ kiyam fee. Tna skabuk re bi Ait yoo arin ro moof yee kʼnyõ re nhau.
3JO 1:3 Taa raa ro Kristen baro mama tna mawe kʼjõ mawe, “Gayus tait yros tu smot Kristus ysya bokyas rAit ro ati reto. Ait beroh yamo iso ro ati reto, susu fee.” Bokyas rana reto mno jõ simaut mase.
3JO 1:4 Raa ro mfi kukek wojõ to, soh jõ tari he ana mamo mam iso ro ati reto kaket fares to, mno re jõ simaut mase.
3JO 1:5 Tafoh ajõ ro jõ ksoh; raa ro Kristen ro nyõ wase fares mbam remo roto tiwya mama mkyas bokyas ro Yesus mam remo anyõ to. Tna jõ tari he nyõ nno bo ro moof kʼana. Bo ro nyõ nno reto to, moof toni mamyot raa ro smot Tuhan ja mno.
3JO 1:6 Ana weto hah me oh tna mkyas kʼjemaat mam befo mawe, “Tii amu nmo nkyas Yesus yasom to, tna Gayus yatmof amu. Tna ati ro amu snok mbam remo rait to, ait yoo bo yee kʼamu afo re amu nmo kaket.” Sik nno bo reto renti. Bo ro nyõ nno mkah nhaf ro ase reto to, mnan si kʼAllah yhaf rAit.
3JO 1:7 Tiwya ana weto masen mamo mkyas Yesus yasom. Tna raa ro Kristen matmof ana. Tna ana mayoh bo kʼraa ro wase Allah to fee.
3JO 1:8 Rau ro moof to, anu bitrah amah wanu kʼana ro ja mamo mkyas bosmot ranu ro ati. Bno feto kbe anu teta ana tna btak bsom bo ro ana masom weto su.
3JO 1:9 Tiwya jõ tkom aam tiim kʼjemaat ranu reto. Menohe bi Diotrefes yari bokyas ajõ fee. Ait safto yawe ait yesait aran yase ybo jemaat mam remo ranu reto.
3JO 1:10 Soh jõ tama tmat anu mam beto to, kbe jõ betoo bo ro Diotrefes yno mkair weto. Tawe kʼjemaat tawe, “Ja ait ykyas-kas amu. Tna ait hawe ymat raa wamu ro ja mamo mkyas Yesus yasom mam remo aro rau-rau ye. Tna anu ro nwe nmat raa ro mama weto to, Diotrefes yno wa anu tna yikyak ana weto masen frok mamo. Yno bo mkair toni meto.”
3JO 1:11 Gayus, tafoh ajõ ro jõ ksoh; nno bo mkair mfi raa taro mno to ma. Nmat raa ro mno bo ro moof tna nno bo mfi ana mno. Awya ro ja yno bo ro moof to, ait tait ku ro Allah rAit. Tna awya ro ja yno bo ro mkair to, ait retait wase Allah fares.
3JO 1:12 Raa beta mbaut bi Demetrius, tna amu nbaut ait ye. Ait yhau yno bo moof mnan si bokyas ati reto. Tna nyõ nhar nawe ja amu nkyas bokyas ro ati sai, ja amu sioh fee.
3JO 1:13 Bo ro tawe tkyas kʼnyõ to mawat fares. Menohe jõ hawe bo tkom mkah aam.
3JO 1:14 Tnaut tawe kbe jõ tama fooh to kʼnyõ tna tkyas bo wefo.
3JO 1:15 Jõ skabuk re nyõ nhau nhaf tnok sai. Nafoh wonyõ ro mhau mam befo sor to mmah meen kʼnyõ. Tna tawe nyõ nmah meen ajõ kʼtafoh wojõ ro mhau mam beto aro sait-sait ye.
JUD 1:1 Aam refo mbam kʼjõ Yudas, Yakobus yao. Jõ tamo sryan ro Yesus Kristus. Tkom aam refo kʼanu ro Allah ymen oh, re nmo ku wAit. Anu Bja tait yatmof anu tna ja Yesus Kristus kmot anu ye.
JUD 1:2 Jõ skabuk afo re boatmof msya riof mhau mninon kʼanu. Tna jõ skabuk re kbe anu beta nhau nhaf tnok toni ye.
JUD 1:3 Tafoh wojõ ro jõ ksoh; riwai jõ tnaut tawe tkom aam tee kʼanu tkyas riof ro mase tiwya Allah ysan kʼanu beta. He mfe, mfo refo jõ tkyas watum roto kʼanu wia. Nri oh! Srau nnaut oh: Nsen nikyak bokyas ro siroyõ! Nbo nkyas bosmot ranu ro ati refo fo matak. Bosmot ranu reto to, Allah yoo yehau kʼraa wAit. Tawe anu nros ntak nbo bosmot refo yoyo.
JUD 1:4 Tiwya raa baro twok jemaat ranu wai. Ana mhau susai msya anu. Raa weto to wase Allah. Ja ana mkyas bo ro mkair mawe, “Nma, anu raa ro Kristen kbe bno bo ro anu ksoh sai! Soh anu bno bo ro masmamo to, kbe anu bsom iro weto fee. Allah yatmof anu sai! Kbe Ait kmo fee!” Tna ana mwaar Yesus Kristus ye. Ana sioh mawe, “Bi Ait tait Raa ro yase fee! Ait yamo Tuhan ro ybo anu to fee!” Tiwya tinyi raa mkyas bo ro meen mai kʼraa ro mkair mfi guru weto. Tna raa mkom mam Bokom ro Allah matim wia mawe, “Meen Allah yno bo ro mkair mai kʼraa ro mno bo ro mkair to!”
JUD 1:5 Nnaut oh; tiwya tinyi Tuhan yno re raa wAit masen snok mbam tabam ro Mesir mkah riof. Snok mbam Mesir tna ana baro hawe smot bi Ait. Bo ro Ait yawe to, ana mnaut mamo-me. Tibyo Ait yasen yno ana safe mkak.
JUD 1:6 Nnaut oh; tiwya malaikat beta to mase toni. Menohe malaikat baro mari bo ro Allah ysi kʼana fee, tna hawe mhau mam yuk ro bi Ait ybis kʼana. Feto to Allah yake ana wa mkah rantai ro matak. Tibyo ana mtai snok fee. Tna fo Ait ybu ana mam yuk ro mamur toni. Mfo refo ana hre mam yuk reto wea fares mamo snok ayõ ro Tuhan yama ytu safo ro ana mno.
JUD 1:7 Nnaut oh, tiwya tinyi Allah yno bo ro mkair mai kʼraa ro mhau mam remo ro Sodom msya Gomora, tna msya raa ro mhau ngkine mam weto ye: Tiwya ana mno wyahte, tna mno bo ro mkair roto ro mninon mfi feto ye. Tibyo Tuhan yno bo ro mkair mai kʼana. Ait yasen ykah ana mkah tafoh matim wia. Yno feto afo re raa taro mmat tna waa tafoh ro meen mait hame wajin.
JUD 1:8 Riwai jõ tkyas guru ro mama tna ja mkyas bo ro mkair kʼanu. Ana weto ja mno bo ro ana mnot-nat sai mfi bo ro ana smi mmat. Iro ro ana mno weto to, kbe mno metsu wana mrok mkair. Ana weto raa ro mana mase: Ja ana miwana raa ro mase mbo ana tna mkyas-kas malaikat msya kabes ye.
JUD 1:9 Malaikat sait ro yase yasom Mikhael tait, tiwya tinyi ait santri bo ysya kabes yabi (Iblis). Ana santri hai ro Musa reto to, kbe awya ybo. Tna Mikhael yaun kabes yabi fee. Mikhael waa. Tibyo, ait yawe kabes yabi yawe, “Kbe Tuhan yesait bhah nyõ!”
JUD 1:10 Menohe guru ro ja siroyõ wefo fo, ana waa tna hartu raa aro fee! Ana makit marak, mkyas bo masoh miyõ kbik-kbak sai, tna mamus bo knik-knak ro ana wase fares. Ana wefo makit, srau wana to mfi fane. Ana misoh mnaut ana fee. Tibyo masmamo mno-na bo. Bo mkair-kar ro ana mesait mno weto to, kbe misti hai wana mesait.
JUD 1:11 Bo mkair ro ana mno mfi fefo: Ana knait raa tibyo mame raa majat ye mnan fi tiwya tinyi Kain yno to. Tna ana ja saso pitis re mno bo mkair mfi tiwya tinyi bi Bileam yno. Tna ana beswan-swan raa ro yase ybo ana mfi tiwya tinyi bi Korah yno ye. Feto to kbe meen Allah yno bo ro mase mai guru weto.
JUD 1:12 Ati ro anu raa ro Kristen berur sohmaam bo su to, anu ja nno bo reto nwe niranya su nkah nhaf ro moof sai. Tna guru ro siroyõ weto, ana mhaf sau su msya anu fee. Menohe ana mama mberur sohmaam bo su msya anu, ana hrenaut marak. Bo mkair ro ana weto mno to misti re raa mkyas-kas anu raa ro Kristen to, mawe anu nno bo ro mkair. Guru weto mnaut ana mesait sai. Ana mtos ku ro Allah wAit kaket fee. Ana weto mfi raa ro saso boit mkah ana mesait mait, he masen mira domba ro ja ana kmot to, mamo mse mabat bosafom fee. Tna guru weto to, raa mnaut mawe kbe ana mari watum ro moof kʼana, he mfe. Guru weto mfi ayoh ro safe sai; raa mrok mawe kbe oom mais, he mfe. Foos mfi tna ayoh ro mkair reto to smut somya marak. Tna ana mfi kake ro make fee mam arsoo ro ja kake make. Tna ana mfi ara ro raa matu mtis tibyo mrok samer. Guru weto mnan fi ara weto; ewok ye make fee.
JUD 1:13 Ana mfi figyõm ro mai mafyat mam sawan. Ja raa mmat mafyat reto tna ja raa mmat kair ro guru weto mno ye. Menohe ana saban fee. Tna ana weto mfi sken ro mamo tit. Sken weto fru mamo ninya mamoʼt yuk ro mamur tna mkair, yuk ro Allah siwyan mkah meen ana mhau hame wajin.
JUD 1:14 Tiwya bi Henokh, (biin ro ngkrema mbam Adam tna raa mabe ait) ykyas ati ro Tuhan yama ytu srah guru ro mkair weto. Bokyas refo ait ykyas wia matim yawe: “Meen Tuhan yama tabam refo ro mun ewok to, ysya malaikat wAit msis.
JUD 1:15 Yama ytu safo ro raa beta tiwya mno kʼbi Ait. Yama yno bo msai mai kʼraa ro metsu mnis safo weto. Tiwya ana mno bo ro mkair-kar to. Tna kbe bi Ait yno bo mase mai kʼraa ro mkyas bo masoh miyõ kʼAit ye.”
JUD 1:16 Raa weto mnaut myum-yam tna mmai kinya, tna ja maun raa roto mawe raa weto mno bo mkair. Tna ana masmamo mno bo ro ana ksoh sai. Ana bibi ana ai, tna ana sroyõ mkyas bo ro moof kʼraa re kbe raa moo bo mee kʼana.
JUD 1:17 Tafoh wojõ ro jõ ksoh; nnaut bo ro raabis (rasul) ro Tuhan ranu Yesus Kristus tiwya mkyas mawe kʼanu wia matim.
JUD 1:18 Ana mawe, “Meen, kene wo tabam refo haberek to, raa ro mbat-bat mama mkyas-kas bosmot ranu. Ana weto raa ro masmamo, ja mno bo ro ana ksoh sai, mno bo ro Allah ksoh to fee.”
JUD 1:19 Ana wefo misti re raa ro jemaat ranu masen mmak tna mbrir-brar. Tna ana masmamo bo ro tabam sai. Har ro Tuhan mjin kʼana mhaf mato wana fee.
JUD 1:20 He anu, tafoh wojõ fo; jõ tawe kʼanu tawe, “Nisoh bosmot ranu yoyo re kbe bosmot ranu mo matak renti. Bosmot ranu to mbam kʼAllah mama. Tna skabuk mkah Har ro Tuhan matak rAu.
JUD 1:21 Ste roon ro hame kri-kri fo, nhau nhafri Allah tna natmof raa anya kaket ye. Yesus Kristus yatmof anu feto oh mi Ait ysan roon ro hame reto yee kʼanu.
JUD 1:22 Raa ro smot Yesus Kristus kaket fefares to; betoo maja ro ana wase weto kʼana rere afo re kbe ana mhar ye.
JUD 1:23 Raa ro mbtek mam iro to; nfot ana nse mam iso ro moof afo kbe ana mkai riof, afo re kbe meen ana mkai tafoh ro mait mroon reto fee. Tna raa roto ro mno iro to; knait ana ma; menohe knait iro ro ana mno. Natmof ana, tna kaket anu re kbe iro ro ana mno weto mbet anu fee.”
JUD 1:24 Allah tait yatak kmot anu re anu mbtek fee. Tna meen bi Ait yakah anu nmo no kʼAit mam sawro rAit. Anu haberek nfi raa ro wase mber safo. Tna kbe anu nmat Ait yase rAit mkah simaut mase.
JUD 1:25 Allah sait tum. Ait ysan riof kʼanu mkah Tuhan Yesus Kristus. Ait tait Allah ro yase, tna ro yatak ybo bombra beta mbam tiwya tinyi, mfo refo, tna snok mam hame wajin. Ro moof to raa beta hawyõn yasom rAit yoyo. Amin: Mabo oh.
REV 1:1 Aam refo mkyas bombra ro kbe mama fooh. Allah ykyas bo wefo kʼYesus Kristus. Tna Yesus Kristus yasbrah bo wefo kʼraa ro Allah wAit matim wia re ana mhar bo ro Allah kbe yno. Tna Yesus ybis malaikat sau mroh mamo mkyas bombra ro kbe mama fooh wefo fo kʼjõ. Jõ fi Yohanes, sryan rAit sait ye.
REV 1:2 Bo ro jõ tmat to, jõ tkom beta mnan si. Au oh mi bo ro Allah ysya Yesus Kristus mkyas merif kʼjõ.
REV 1:3 Mabu rau kinene mama oh. Kbe Tuhan yno bo ro moof mama kʼait ro ymat bokom refo. Tna yno bo ro moof mama kʼait ro yari bokom refo, tibyo ybo yno ye.
REV 1:4 Jõ tmah meen kʼanu ro nhau mam jemaat trion krema mam rabin ro Asia. Tna jõ skabuk Allah afo re bi Ait ysya Yesus Kristus ysya har mabo krema kbe matmof anu tna mno re anu nhau nhaf tnok ye. Har weto ja mhau mam ati ro bi Ait yasu mam wore Ait hre abyõ mam tahta rAit. Allah tait yaban tiwya tinyi yhau yum, tna mfo refo yhau fares ye, tna meen yhau yaam mamo snok mam hame wajin ye.
REV 1:5 Yesus Kristus ja mur-mur ykyas bo ro ati kʼanu. Ait Raa ro tinyi yrok yasen. Tna Ait tait ro yase toni ybo raja na ro mhau mam tabam refo beta. Yesus yatmof anu. Ait yajat tna mees ro frok mbam yetsu rAit to, yyon iro wanu.
REV 1:6 Tna Ait yno re anu bmo raa mana ro Allah yamo Raja ybo. Tna anu to, bmo imam ye. Yesus tait Yaja Allah. Nma anu hawyõn Yesus tna bkyas bwe, “Bi Ait yatak ybo bombra beta yoyo mamo snok mam hame wajin.” Amin: Mabo oh!
REV 1:7 Nmat, Ait ykah barmabyõ mboh sro-sro Ait to yama. Kbe raa beta heyut mmat bi Ait yama; raa ro tiwya mame Ait yajat kbe mmat Ait ye. Kbe raa beta mmat Ait yama feto to mawia. Amin: Mabo oh!
REV 1:8 Tuhan Allah yawe, “Jõ fi Raa ro tinyi tibyo Jõ tasom ‘Alfa’. Tna Jõ fi Raa ro ttis ye tibyo Jõ tasom ‘Omega’ ye. Maban tiwya tinyi thau yum, tna Jõ mfo refo thau fares ye, tna meen thau taam mamo snok mam hame wajin ye. Jõ fi Raa ro tase tbo bombra beta.”
REV 1:9 Jõ, Yohanes smot Yesus mnan fi anu, raa ro jemaat trion krema to ye. Anu smot Yesus tibyo ja raa mno bo ro mkair mai kʼanu. Anu smot Yesus tibyo anu bito bsom bo reto ye. Anu smot Yesus tibyo anu bmo raa mana ro Allah yamo Raja ybo. Tiwya jõ tkyas watum ro Allah tna tkyas Yesus yasom tibyo raa mfot jõ mbeak mam sato ro Patmos refo.
REV 1:10 Tiwya, mam ayõ ro ja anu skabuk Tuhan to, Har rAit mama mbo jõ matak. Tibyo jõ smi tmat bo. Tna tari mai sau ro mkyas fari mnan fi raa mfi saa mam jõ kbor tis. Mai reto mawe:
REV 1:11 “Bombra ro nyõ nmat to, nkom. Bokom reto to, tiim mamo jemaat trion krema. Tiim kʼana ro mhau mam kota ro Efesus, ro Smirna, ro Pergamus, ro Tiatira, ro Sardis, ro Filadelfia msya ro Laodikia ye.”
REV 1:12 Tna jõ haberek tmat tis, tmat awya metait ro ykyas bo kʼjõ. Tna jõ tmat bo ro mnan fi sawe ro emas trion mara krema.
REV 1:13 Tna jõ tmat Raa sait ro yasu ynaif ynan fi 'Ait ro Yroh Yama Yfi Raa Sai' yros mam sawe weto masuf susai. Ait oh mi Yesus metait. Ait yyum ratan ro miyõ toni mamo snok mam yaa te. Tna yyan hawee ro emas ybin ntkah.
REV 1:14 Yana mawyan rAit mboh toni. Tna yasu mait mnan fi tafoh.
REV 1:15 Yaa rAit mnan fi tembaga ro kren, ro raa mko mam tafoh. Tna ymai to msun mnan fi aya ro mase sau miyi msun.
REV 1:16 Yatem ati ybo sken trion krema. Tna pedang sau ro maan ti ewok mhau mam yasoh rAit. Yasu ynaif mkek warah toni mnan fi ayõ ro moo mafit baas.
REV 1:17 Jõ tmat Ait to, ttek taka tabum tfi bo thai mam ati ro yasu rAit. He Ait yoo yatem ati ybo jõ tna yawe, “Waa ma. Jõ fi Raa ro tinyi tna Raa ro ttis ye.
REV 1:18 Jõ fi thau tawyos: Tiwya Jõ thai oh menohe trok tasen. Meen thau troon mamo snok mam hame wajin. Tna Jõ tatak tbo raa beta mamos rana. Tna thar ayõ raa aro rait sait-sait kbe meen yhai. Tna tatak tbo sawro ro hai ye.
REV 1:19 Bo ro nyõ nmat wefo fo, nkom oh. Bo weto to taro frok mfo refo ye tna taro to meen mama ye.
REV 1:20 Sawe emas trion mara krema ro riwai nyõ nmat weto to fret bo mawe jemaat trion krema. Tna sken trion krema riwai tbo mam tatem ati weto to malaikat ro mbo jemaat weto.”
REV 2:1 Yesus yawe kʼYohanes yawe: “Nkom aam nee kʼmalaikat ro mbo jemaat Efesus to nawe, ‘Watum refo mbam kʼJõ ro tbo sken trion krema mam tatem ati, ro tamo susai mam sawe emas trion mara krema weto. Tawe fefo:
REV 2:2 Jõ tmat anu, raa ro nhau mam kota ro Efesus; tna thar bombra ja anu nno ro moof sor. Tibyo jõ bibi anu. Thar tawe anu ja siko tna mur-mur nkah bo. Tna raa ro mber safo to, anu nmat sayõ fee ye. Tna raa ro mama mo kʼanu mawe ana raabis (rasul) aJõ to, anu ja ntu sanet ana wia re anu nhar bo ro ana mama mkyas to mabo fe mfe a. Soh ana weto raa ro sioh sai, anu ja nri bo ro ana mawe fee.
REV 2:3 Jõ tasom aJõ oh mi raa mno bo ro mkair-kar mai kʼanu tna sikowah anu. Kair reto to, ja anu bito nsom tna nri hrowyõ fee ye. Anu nno bo weto beta moof. Tibyo Jõ bibi anu.’
REV 2:4 Tiwya tinyi anu nhafri Jõ. Menohe mfo refo anu nhafri Jõ kaket fee. Nno feto to Jõ bhah anu.
REV 2:5 Bawya re anu sorni Jõ! Nashana oh! Nisoh nhaf wanu re kbe anu ne nhafri Jõ mnan fi tii tinyi u. Nno bo ro tiwya tinyi anu nno wia. Soh anu nashana fee; kbe Jõ tama to kʼanu tna titbat sawe mara ro mhau kʼanu.
REV 2:6 Menohe anu nno bo baro ro moof fares: Anu ja knait raa ro kro Nikolaus. Bo ro ana mno to, Jõ knait ye.
REV 2:7 Anu ro nri bokyas refo fo; nri bo ro Har aJõ mawe kʼjemaat wefo, tna nbo nno kaket! Awya ro bito yros yatak tna re smot Jõ mamo snok mam tis rau to, meen Jõ taren ait: Kbe too kake sau ro mno re raa mhau mawyõs to, tee kʼait yait. Ara ro make kake reto to, moo mam armato ro Allah rAit. Watum ro Jõ tkyas kʼraa ro jemaat Efesus maum oh mefo.”
REV 2:8 Tna Yesus yawe kʼYohanes yawe: “Nkom aam nee kʼmalaikat ro mbo jemaat Smirna to nawe, ‘Watum refo mbam kʼJõ; Raa ro tinyi, tna Raa ro tis. Tiwya Jõ thai oh menohe trok tasen. Tawe fefo:
REV 2:9 Jõ tmat anu ro nhau mam kota ro Smirna; tna thar tawe anu smot Jõ. Tna bosmot ranu reto oh mi raa ja mno bo ro samyoh mbtek mai kʼanu. Tna thar tawe ja anu nse bo aro fee ye. (He mfe, bosmot ranu to mnan fi bo satoh mawat tibyo anu to bobot!) Jõ tmat tna thar tawe raa ro Yahudi ja mamus anu ye. Ana weto mawe ana raa ro Yahudi; raa woJõ. He mfe, ana weto to raa mana ro ja mban kabes yabi (Iblis).’
REV 2:10 Waa ma: Kair ro kbe anu tru to, mhau kait fee, mhau ti trion nsaa sai. Wore weto kabes yabi (Iblis) yno tibyo raa mfot anu taro makah mamo mbu mam bui. Tna anu taro kbe fri kair aro rau-rau ye. Jõ tawe kʼanu tawe: Bito smot Jõ sai mamo snok mam wore anu nhai. Susu ma. Tna kbe Jõ too watau (mahkota) tee kʼanu sait-sait. Watau weto fret bo mawe mamos mai ro kbe tsan kʼanu.
REV 2:11 Anu ro nri bokyas refo fo; nri bo ro Har aJõ mawe kʼjemaat wefo, nbo nno kaket! Awya ro bito yros yatak re smot Jõ mamo snok mam tis rau to, meen, ati ro raa mhai mun ro ewok to, kbe ait retait, yhai fee. Watum ro Jõ tkyas kʼraa ro jemaat Smirna to maum oh mefo.”
REV 2:12 Tna Yesus yawe kʼYohanes yawe: “Nkom aam nee kʼmalaikat ro mbo jemaat Pergamus to, nawe, ‘Watum refo mbam kʼJõ ro tbo pedang ro maan ti ewok.
REV 2:13 Jõ thar tawe anu, raa ro nhau mam kota ro Pergamus, ja nhau mam wore wo raa mawat mari tna kro kabes yabi (Iblis). Menohe anu fo ja smot tasom aJõ matak fares. Tiwya Antipas ykyas Jõ tasom aJõ tibyo raa mame ait yajat. Ait raa ro srau ewok fee. Tii mam wore wo arin mkair feto to, Jõ tmat he anu nros ntak tna anu nwaar Jõ fee. Feto to, Jõ bibi anu.’
REV 2:14 Menohe anu baro to ja nri watum ro mkair tna nbo nno. Watum reto to mnan fi tiwya bi Bileam ykyas kʼraa sait yasom Balak. (Tiwya Bileam yawe kʼBalak yawe, ‘Namo niwro raa ro Israel afo re ana mno iro.’ Ait sioh yawe soh ana sohmaam bo ro raa msan kʼberhala oh to, kbe Allah kmo fee. Tna ait sioh yawe soh ana mno wyahte to, kbe Allah kmo fee ye.)
REV 2:15 Feto ye anu baro nri watum ro mkair ja Nikolaus ykyas tna nbo nno. Tibyo Jõ bhah anu.
REV 2:16 Nashana oh! Awya ro yashana to fee, baro feto Jõ tama tno kair mbtek mai kʼait. Kbe Jõ tafa tsya ait retait tame mkah pedang ro mhau mam tasoh aJõ.
REV 2:17 Anu ro nri bokyas refo fo; nri bo ro Har aJõ mawe kʼjemaat wefo tna nbo nno kaket! Awya sai ro yari watum refo ybo yno kaket to, kbe jõ too boit-manna ro ja Jõ tmyõt to, tee kʼait yait. Tna too fraa ro mboh sau tee kʼait yse. Awya ro bito yros yatak smot Jõ mamo snok mam tis rau to, meen Jõ tafan ait yasom ro tna sau u. Ait yasom ro tna reto to, kbe Jõ tkom abyõ mam fraa ro mboh reto. Tna ait yasom rait ro tna reto to, raa sait bo yhar fee. Raa ro yse fraa reto yesait aran oh mi yhar to. Watum ro Jõ tkyas kʼraa ro jemaat Pergamus to maum oh mefo.”
REV 2:18 Tna Yesus yawe kʼYohanes yawe: “Nkom aam nee kʼmalaikat ro mbo jemaat Tiatira to nawe: ‘Watum refo mbam Ku ro Allah yare retait. Ait yasu mait mnan fi tafoh. Tna Ait yaa rAit mait mnan fi tembaga ro kren. Tna Ait yawe kʼanu yawe:
REV 2:19 Jõ tmat anu, raa ro nhau mam kota ro Tiatira; tna thar bombra ro ja anu nno sor. Tibyo Jõ bibi anu. Thar tawe anu nhafri Jõ, tna smot Jõ matak ye. Anu to ja mur-mur nno bo ro Jõ ksoh ye. Tna wore bo ro samyoh mbtek mai kʼanu to anu bito nsom. Jõ thar tawe anu mur-mur nno bo ro moof wefo beta miwer bo ro anu nno wia. Feto to Jõ bibi anu.’
REV 2:20 Menohe Jõ bhah anu ye. Guru sau ja mkyas bo ro sre mam jemaat ranu, menohe anu nsu sayõ rof sai. Fai au mawe au to nabi ro Allah ybis mama mkyas bo wAit. He mfe. Au mbesruf raa woJõ re ana mamo tiit. Au mnan fi Izebel. Au sioh mawe kʼraa jemaat mawe soh ana wyahte to, kbe Allah kmo ana fee. Tna au sioh mawe soh ana sohmaam bo ro raa msan kʼberhala oh to, kbe Allah kmo fee ye. Au mkyas bo ro sre menohe anu nsu sayõ rof sai. Tibyo Jõ bhah anu.
REV 2:21 Tiwya ooh-oh Jõ tawe kʼau tawe ‘Nashana oh!’ Menohe au hawe bo bitsre wyahte rau reto.
REV 2:22 Feto kbe Jõ tubat au mbeak mam aam ro au mjin, tna tno re au kiyam. Tna raa ro mwyahte msya au to, soh ana bitsre bo mkair ro ana mno to fee, tna soh ana mashana fee, kbe Jõ tno bo ro mkair toni mai kʼana beta ye.
REV 2:23 Kukek wau to, kbe Jõ tame majat. Kbe jemaat beta mhar mawe Jõ fi Raa ro thar raa mhaf mato msya srau wana beta. Thar bo beta ro ana mnaut. Tna kbe ana mhar mawe meen Jõ tno bo ska kʼanu sait-sait riryõn mamyot bo ro anu aro rait sait-sait yno.
REV 2:24 Menohe Jõ bibi anu taro. Anu raa ro Tiatira taro, ja hawe nri watum rau ro sre reto. Tna bo maja ro kabes yabi (Iblis) yasbrah kʼraa to, anu wase ye. Tibyo Jõ bibi anu. Rau ro ati to, anu bito nros ntak smot Jõ mamo snok mam tis rau. Jõ tbis bobis aro renti kʼanu nno u fee.
REV 2:25 Tawe nros ntak sai; nhau nri watum aJõ nno renti mamo snok mam ayõ ro Jõ tama.
REV 2:26 Awya ro bito yros yatak smot Jõ tna mur-mur yari bo ro Jõ tawe kʼAit mamo snok mam tis rau to, meen Jõ tno re ait yasen ybo raa mana ro mbam arin aro.
REV 2:27 ‘Kbe ait yamo raa ro yase ybo raa kinyah wait matak toni mkah armuk ro besi tna ana mhau mte kʼAit. Kbe ait tubat ana yabyõ mam tabam re ana sari mnan fi bo raa tubat kusia nihabah re habah.’ Kbe tsan tatak aJõ kʼait ro yros yatak retait. Tno feto re ait yasen ybo raa mana aro-aro. Tak reto to mnan anya mfi tak ro Jõ Taja tiwya ysan kʼJõ.
REV 2:28 Tna kbe Jõ too sken ro mor-mor ati tobrat to tee kʼait ye.
REV 2:29 Anu ro nri bokyas refo fo; nri bo ro Har aJõ mawe kʼjemaat wefo, nbo nno kaket! Watum ro Jõ tkyas kʼraa ro jemaat Tiatira to maum oh mefo.”
REV 3:1 Tna Yesus yawe kʼYohanes yawe: “Nkom aam nee kʼmalaikat ro mbo jemaat Sardis to nawe: ‘Watum refo mbam kʼJõ ro tbo Har ro Tuhan mabo trion krema. Tna Jõ tbo sken trion krema weto ye. Jõ thar bombra beta ro anu nno. Raa mmat anu weto to, ana mnaut mawe anu naam fares. Menohe anu nhai oh.
REV 3:2 Anu, raa ro nhau mam kota ro Sardis ja smot Tuhan matak fee. Nsen oh! Bosmot ranu kene wo mhai oh. Nsen tna nisoh bosmot ranu kaket matak! Bo ro anu ja nno to, Allah ymat tna yawe moof mnan si fefares.
REV 3:3 Nnaut Watum ro Tuhan oh! Tinyi rau to, anu nri bo ro Ait yawe tna nbo nno kaket. Nri Watum rAit ne nbo nno kaket u! Soh anu nsen fee tna nashana fee; kbe jõ tama tfi raa ro msyõf bo. Meen jõ tama mam ayõ ro anu siwyan fefares.’
REV 3:4 Menohe anu ro nhau mam Sardis to, anu baro ja nno bo ro mkair fee. Anu fo nnan fi raa ro kmot ratan wana kaket re moof tu. Tibyo Jõ bibi anu weto. Anu weto to nhaf moof mnan si. Tibyo meen anu nyum ratan ro mboh tna nsya Jõ bmo su. Anu ja nno-na bo fee. Raa ro mno-na bo to, ana mnan fi raa ro ja kaket ratan wana fee.
REV 3:5 Awya ro bito yros yatak re smot Jõ mamo snok mam tis rau to, kbe meen ait yyum ratan ro mboh mnan fi ana weto ye. Yasom rait to raa mkom mam aam sau. Aam reto masom rau: ‘Raa ro Meen Mhau Hame Wajin’. Yasom rait kbe mhau mam aam reto tibyo. Kbe Jõ sikarus yasom rait fee. Tna kbe Jõ tawe kʼTaja ysya malaikat wAit tawe, ‘Raa refi fi raa aJõ sait.’
REV 3:6 Anu ro nri bokyas refo fo; nri bo ro Har aJõ mawe kʼjemaat wefo, nbo nno kaket! Watum ro Jõ tkyas kʼraa ro jemaat Sardis maum oh mefo.”
REV 3:7 Tna Yesus yawe kʼYohanes yawe: “Nkom aam nee kʼmalaikat ro mbo jemaat Filadelfia to nawe: ‘Watum refo mbam kʼJõ. Allah yesait ybis Jõ tno bo wAit. Jõ fi ja tkyas bo ro mabo tu. Jõ tbo kunci ro raja Daud rait. Tna Jõ tbis raa tawe ana oh mi mama twok mam sawro ro Allah fe mfe a. Mato ro Jõ titrah to, raa sait bo ytai yut fee. Tna mato ro Jõ tuut to, raa sait bo ytai yitrah fee ye.
REV 3:8 Jõ thar bombra beta ro anu, raa ro Filadelfia to ja nno. Jõ titrah mato sau oh re anu nma ntruk. Tna raa sait bo ytai yut mato reto fee. Jõ thar tawe anu raa ro Kristen to ntak baro sai. Menohe anu ja nri bo ro jõ tawe tna nbo nno fares. Tna anu nwaar Jõ tasom aJõ fee. Feto to Jõ bibi anu.
REV 3:9 Tna thar tawe raa ro agama Yahudi aro mhau mam kota ranu reto ye. Menohe ana taro mkyas bo sioh mawe, “Amu fo raa ro Yahudi ye.” He mfe. Ana ja mros tis mban kabes yabi (Iblis). Kbe meen Jõ tsan ana weto kʼanu nbo. Tna tbis ana mama mo kʼanu. Ana maka manwaruk tna mawe, “Anu oh mi raa ro Tuhan yhafri. Amu fee.”
REV 3:10 Anu ja nri watum aJõ tna beroh smot Jõ. Feto to meen ati ro arin mkair mai kʼraa ro tabam refo beta to, kbe Jõ tban anu. Wore weto Jõ sanet raa tna kbe Jõ tatem aJõ burut anu wa.
REV 3:11 Jõ tama fooh oh mefo. Bosmot ranu to nbo nno kaket re kbe anu fri watau (mahkota) ro Jõ siwyan taren kʼanu to. Bitsre bosmot ranu ma, re kbe raa roto sait bo ytak boren ranu reto fee!’
REV 3:12 Awya ro yros matak re smot Jõ mamo snok mam tis rau to, kbe meen Jõ tno re ait yros tu mam samu ro Allah mnan fi arnu ro mros matak mam amah. Tna meen ait aro frok ybam beto fee ye. Tna kota Yerusalem ro tna, wore Allah ja yhau to, kbe mbam uu mroh mama. Tna kbe Jõ tkom bo mam anu netsu ranu. Tkom Allah yasom rAit tna msya kota rAit masom. Tna Jõ tkom Jõ tasom aJõ ro tna mam anu netsu ranu ye. Tkom mam anu netsu wanu mnan fi aat re kbe raa mhau mawe anu fo raa woJõ.
REV 3:13 Anu ro nri bokyas refo fo; nri bo ro Har aJõ mawe kʼjemaat wefo, tna nbo nno kaket! Watum ro Jõ tkyas kʼraa ro jemaat Filadelfia maum oh mefo.”
REV 3:14 Tna Yesus yawe kʼYohanes yawe: “Nkom aam nee kʼmalaikat ro mbo jemaat Laodikia to nawe, ‘Watum refo mbam kʼJõ. Jõ tasom aJõ raa mtu mawe “Amin” Jõ mur-mur tkyas bo ro ati kʼanu. Jõ fi tase tbo bombra ro Allah yfen beta.
REV 3:15 Jõ tmat anu, raa ro nhau mam kota ro Laodikia; tna thar bombra beta ro anu nno. Tmat anu to, Jõ thaf mnan fee. Bo ro mbe to Jõ ksoh. Tna bo ro ngkanam to Jõ ksoh ye.
REV 3:16 Menohe anu fo ja nbe fee tna ngkanam fee ye. Feto to anu nno Jõ thaf mnan fee, kbe Jõ tooh anu frok nbam tasoh aJõ mnan fi boit ro tait tari mkair.
REV 3:17 Ja anu nkyas nwe, “Amu fo bobot. Amu fri bo satoh mawat nkah ntak ramu nesait sai. Ja amu nhau to, bo aro mabut fee.” He mfe; anu wase kta ro Tuhan rAit. Feto to anu to nmof toni, nhau bo marak, nsu mti, tna sroraa ye.
REV 3:18 Jõ watum anu tawe: “Noo emas ro moof mbam kʼJõ. Emas aJõ to, raa mko oh re moof; bo ro mrat mam emas reto marak. Soh anu noo emas aJõ ro moof toni to, kbe anu to bobot. Tna noo ratan mboh kʼJõ ye. Nyum afo re mburut anu netsu wanu ro sroraa, re kbe anu saban ma. Tna noo obat kʼJõ ye tna ngkaru nsu wanu afo re nmat bo.”
REV 3:19 Raa ro Jõ tatmof to, Jõ tastako tna tasyah ana mhaf wana ye. Tna bo samyoh mbtek mai kʼana afo re ana waa Jõ tna mashana.’
REV 3:20 Nri kaket: Jõ tros masa mne tna ttu kʼraa. Awya ro yari Jõ tmai tna yitrah mato kʼJõ to, kbe Jõ twok mam amah rait tna tsya ait mbewok niit boit su tna thau tsya ait su ye.
REV 3:21 Awya ro yros yatak mamo snok mam tis rau to, mnan fi tiwya Jõ tros tatak to, ait tait yoof ynan si. Tibyo kbe yasen tna ybo raa makin taro. Tibyo kbe Jõ tse ait hre ysya Jõ su abyõ mam ambar (tahta) aJõ. Tiwya tros tatak tibyo mfo refo jõ hre tsya Taja su abyõ mam ambar rAit.
REV 3:22 Anu ro nri bokyas refo fo; nri bo ro Har aJõ mawe kʼjemaat wefo, tna nbo nno kaket! Watum ro Jõ tkyas kʼraa ro jemaat Laodikia maum oh mefo.”
REV 4:1 Tna fo jõ tmat mato sau maah mam sawro ro Allah. Tna jõ tari mai ro riwai tari wia oh. Mai reto mnan fi saa ro buk-buk mkyas bo kʼjõ mawe, “Nama naut no kʼJõ mam befo re kbe terif bo ro meen mama!”
REV 4:2 Mam weto si oh to, Har rAit mbo jõ matak. Tibyo jõ smi tmat bo. Tna mam sawro ro Allah reto to, tmat Raa sait hre abyõ mam ambar (tahta) sau.
REV 4:3 Bi Ait retait yasu, ynaif rAit moof toni mnan fi fraa sau ro safom masom yaspis msya fraa sau ro masom sardis. Tna naar sau mur mtan mam ambar (tahta) reto to, ngkren-ngkran mnan fi fraa sau ro safom masom zamrud.
REV 4:4 Mam wore wo ambar ro bi Ait reto, raa manes mabo trion 24 hre mana mur abyõ mam ambar (tahta) rait-rait. Ana weto to myum ratan ro mboh tna sbyõ watau (mahkota) ro emas.
REV 4:5 Tna rir mrir frok mbam ambar ro bi Ait rAit, tna barmabyõ mji msai ye. Tna kek trion krema mait mawyah mam ati ro Ait yasu, ro hre abyõ mam ambar rAit. Kek weto to Har ro Allah wAit mabo trion krema.
REV 4:6 Tna wore ambar (tahta) reto to, aya sawan ro mnan fi kaca mhau mte. Tna kak (makhluk) ro Allah wAit mana jiit mhau mur bi Ait ro hre abyõ mam ambar rAit reto. Kak weto to masu mauf wana to mawat; ati ro masu msya ati ro kbor ye.
REV 4:7 Kak ro Allah wAit weto to sau masu rau mnan fi singa. Ro ewok to masu rau mnan fi lembu ro maku. Ro tuuf to masu rau mnan fi raa. Ro jiit to masu rau mnan fi ruu hofyoh.
REV 4:8 Kak mana jiit weto to maim sau rau-rau to trion ntamam. Metsu kak weto to masu mauf mawat; mam maim wana ati ti uu ye tna mam ati ti te ye. Mti baas kak mabo jiit ro Allah wAit weto mbaut Tuhan yasom rAit yoyo mawe, “Tuhan Allah tait yros kar. Ro moof mnan Ait aro u fee saut. Ait yesait yatak ybo bombra beta. Allah tait yaban tiwya tinyi yhau yum, tna mfo refo yhau fares, tna meen yhau tu mamo snok mam hame wajin ye.”
REV 4:9 Kak ro Allah wAit mana jiit weto hawyõn bi Ait tna bibi Ait, tna mayoh asik mase kʼAit ro hre abyõ mam ambar (tahta) reto. Bi Ait yhau yroon mamo snok mam hame wajin. Tna wore kak weto mbaut bi Ait si to
REV 4:10 raa manes mabo trion 24 weto ntmi mimna mam bi Ait yasu ro hre abyõ mam ambar (tahta) reto. Ana ntmi mimna tna mbaut Ait ro meen yhau yaam mamo snok hame wajin. Tna fo ana moo watau (mahkota) ro emas wana mbyat mam ati ro Ait yasu, tna ana mawe,
REV 4:11 “Nyõ fi Tuhan ramu. Nyõ fi Allah ro amu smot. Nyõ nesait nhaf moof mnan si, tna re raa hawyõn Nyõ. Nyõ Raa ro nase. Tna amu bibi Nyõ. Nyõ oh mi nfen bombra wofo beta. Tna ksoh anyõ sai oh mi Nyõ nfen bombra wofo beta. Nyõ nesait aran nbo anu beta bfos ranu.”
REV 5:1 Tna jõ tmat bi Ait ro hre mam ambar (tahta) abyõ tait ybo aam ro mbewakom sau mam yatem ati rAit. Aam refo raa mkom mne rau ye tna mato rau ye. Tna raa mbewakom aam reto muut tna mse ri trion krema mrat wa.
REV 5:2 Tna jõ tmat malaikat sau ro safo toni mtu mkah mai ro mase mawe, “Awya ro yhaf mato moof toni afo re behah ri ro msit aam ro muut fo?”
REV 5:3 Menohe raa aro fee yhaf moof toni re kbe betrat aam reto: Raa ro mhau mam tabam refo ye, raa ro mhau mam tabam ro ti te ye tna raa ro mhau mam sawro ro Allah ye, sait bo yhaf moof toni fee. Feto tna re raa behah ri weto ymat aam reto mato rau fee ye.
REV 5:4 Raa sait bo yhaf moof toni fee, afo re betrat aam reto ymat mato rau bo fee. Tibyo jõ tawia tsut-sut.
REV 5:5 Tna raa manes weto sait yawe kʼjõ yawe, “Nawia ma: Yesus yatak tna yoof mnan si. Kbe Ait betrat aam ro raa mse ri trion krema mrat wa reto. Ait yasom rAit: 'Singa ro mbam raa mbair ro Yehuda' Ait tait raja Daud hohos sait. Tiwya Ait yafa ysya raa ro byoh to, yros yatak. Tna byoh weto mhau mte.”
REV 5:6 Tna jõ tmat Domba Maku sau mros susai mam masuf yuk ro ambar-tahta reto. Kak (makhluk) ro Allah wAit mana jiit weto msya raa manes mabo trion 24 weto mros mana mur mam Domba Maku reto. Tmat he Domba Maku reto to, mabet ro tiwya misti hai, he masen mros. Domba Maku reto to, tanduk rau to trion krema tna masu mauf rau to trion krema ye. Tanduk msya masu mauf wau weto fret bo to mawe Har ro Allah trion krema. Har weto to Allah ybis mamoʼt tabam arin aso wofo beta.
REV 5:7 Domba Maku reto masen mamo moo aam ro raa mse ri mrat wa reto mbam kʼbi Ait ro hre mam ambar (tahta) abyõ to, yatem ati rAit.
REV 5:8 Mamo moo aam reto tna kak ro Allah wAit mana jiit weto msya raa manes mabo trion 24 weto beta ntmi mimna hartu Domba Maku reto. Aro sait-sait ybo kerombi (kecapi) sau msya hawereh ro emas sau. Tna wasi ro sawer snok mbam hawereh mato maun frok. Wasi reto to, boskabuk raa ro Allah wAit skabuk mamo maut mo kʼTuhan.
REV 5:9 Tna kak ro Allah wAit mana jiit weto msya raa manes trion 24 weto mbaut bobaut ro tna sau. Ana mbaut Domba Maku reto mawe: “Nyõ oh mi nhaf moof nnan si re noo aam tiwya raa mse ri mrat wa reto to tna betrat. Feto to amu nbaut Nyõ. Raa mbam raa mana aro rau beta to, Nyõ nsan kʼAllah oh. Ana weto to mmai rana aro rau ha-hayah ye. Ana mama mbam rabin rana aro sor ye. Tiwya Nyõ raa mame najat. Tna mkah mees aNyõ nyõ ntho raa weto beta nee kʼAllah.
REV 5:10 Nyõ nsok ana weto nse hayah mkah mamo imam ro ja mno bo ro Allah ranu. Tna kbe ana mamo raja mbo raa ro tabam reto ye.”
REV 5:11 Tna fo jõ tmat malaikat msis-sas toni tna tari mai wana ye. Malaikat weto mros mur mtan mam ambar (tahta) reto msya kak ro Allah wAit mana jiit weto tna msya raa manes weto. (Malaikat weto to mabo trion 10.000, 100.000 bo feto.)
REV 5:12 Tna malaikat weto beta mbaut bobaut mkah mai ro mase toni mawe kʼDomba Maku reto mawe, “Tiwya raa mame Nyõ najat. Nyõ fi nhaf moof mnan si. Feto to raa moo kta mee kʼNyõ. Nyõ fi natak toni. Nyõ nhar bo. Tna amu hartu Nyõ, tna hawyõn Nyõ, tna bibi Nyõ ye!”
REV 5:13 Tna jõ tari bobaut. Bombra ro mhau mam sawro mam uu ye, mam tabam reto ye, mam tabam ti te ye, tna mam aya sawan to, weto beta mbaut bobaut kʼBi Ait ro hre abyõ mam ambar (tahta) rAit ysya Domba Maku reto. Ana mawe, “Anu mbewok ntak toni. Amu bibi anu mbewok tna hawyõn anu mbewok, tna hartu anu mbewok ye mamo snok hame wajin.”
REV 5:14 Tna kak ro Allah wAit mana jiit weto mawe, “Amin: Mabo oh.” Tna raa manes mabo trion 24 reto ntmi mimna heyut ana mbewok.
REV 6:1 Jõ tmat Domba Maku reto behah ri krema ro msit aam reto sau. Masen behah ro tinyi to, tna kak ro Allah wAit sau mtu mawe, “Nama oh!” Mmai rau to mase mnan fi barmabyõ ro mji.
REV 6:2 Tna jõ tmat kuda sau ro mawyan mboh mros mam weto. Raa sait hre abyõ mam kuda reto to, hre ybo taur sau. Tna raa mama moo watau (mahkota) sau mee kʼait sbyõ. Ait tait safo yawe yamo yame raa ro byoh.
REV 6:3 Tna fo Domba Maku reto behah ri ro ewok. Tna kak Allah wAit ro ewok reto mtu mawe, “Nama oh!”
REV 6:4 Tna tmat kuda roto sau frok u mama mros. Kuda refo fo mawyan mkek mfi kaan kek. Tna raa moo pedang sau mee kʼraa sait ro hre abyõ mam kuda reto. Raa mbis ait yroh yamo tabam reto tna yno re raa miranya moof u fee. Raa mbis ait yno tibyo raa ro tabam reto mame anya.
REV 6:5 Tna fo Domba Maku reto behah ri ro tuuf. Tna kak Allah wAit ro tuuf reto mtu mawe, “Nama oh!” Tibyo tmat kuda ro mawyan safe sau frok mama mros. Tna raa sait ro hre abyõ mam kuda to, ait tait yatem ybo timbangan sau.
REV 6:6 Tna jõ tari bo sau mnan fi raa mmai frok susai mam wore kak ro Allah wAit mana jiit weto hre. Tna mai reto mawe kʼait ro hre abyõ mam kuda reto mawe, “Boit to raa masim mabyoh maut renti: Pitis-dinar sau to, raa moo gandum kbair sau sai. Tna boit jelai to raa moo kbair trion tuuf sai mkah pitis (dinar) sau.” Menohe mai reto mbis mawe, “Minyak msya anggur maya to, kmot kaket ye!”
REV 6:7 Tna fo Domba Maku reto behah ri ro jiit. Tna kak Allah wAit ro jiit reto mtu mawe, “Nama oh!”
REV 6:8 Tna jõ tmat kuda ro mawyan fiyaf kair-kar sau to mros. Raa ro hre abyõ mam kuda reto, ait yasom rait 'Haiyama'. Tna raa roto yrof ait ttis. Ait retait yasom 'Sawro Hai'. Ana mbewok to, raa mbis mamo tabam reto. Tna raa msan raa ro tabam reto baro (seperempat) kʼana mbewok matem mbo. Raa mawe raa ro tabam reto baro kbe ana mbewok mame majat mkah pedang. Tna baro to, kbe ana mbewok mno re ana mhai sre tibyo mhai. Tna baro to, kbe ana mbewok mno re kiyam ro samyoh mai ana re mhai. Tna baro to, kbe ana mbewok mno re kak ro safo mamo mafit ana tna majat.
REV 6:9 Tna fo Domba Maku reto behah ri ro maat. Tna tmat bo sau ro mnan fi wohat (mezbah) sau wore raa msam bo kʼAllah. Wohat reto ati ti te to, jõ tmat raa mawat ro tiwya mhai to, mafos wana. Raa wefo fo tiwya mkyas Watum ro Allah tna mbo mno tibyo raa mame ana majat.
REV 6:10 Ana weto mkah mai ro mase mawe, “Tuhan; Nyõ fi Raa ro nase. Nyõ fi Allah yesait ybis nno bo wAit. Tna ja nkyas bo ro mabo tu ye. Meen tija Nyõ nse srah tna nno bo ska kʼraa ro tiwya mame amu njat mam tabam reto?”
REV 6:11 Tna fo raa moo ratan ro mboh mee kʼana weto sait-sait kait tna myum. Tna raa mawe kʼana mawe, “Hre baro wea re anu nfoh wanu ro ja mkyas watum ro Tuhan mam tabam reto fares to, kbe raa mame ana majat ye. Tna fo Jõ tno bo ska kʼana ro tiwya mame anu njat mam ttis rau.”
REV 6:12 Tna fo tmat Domba Maku reto behah ri ro ntamam. Tna iin ro msai toni sau frok mama. Tna ayõ haberek mamo safe mnan fi haan. Tna snyi haberek mamo mkek mnan fi mees.
REV 6:13 Tna sken ro ayoh nkryot mbtek mai mam tabam. Sken weto mbtek mnan fi ara make ro hba mrur-rur mbam mara rau mam ati ro foos homun mase mfi to.
REV 6:14 Tna ayoh mrok marak mnan fi aam ro raa bewakom. Tna atu beta msya sato beta mirenti mbam yuk ro mros wia to, mamo mros mam yuk roto.
REV 6:15 Tibyo raa msam mamo mmyõt ana mam ako mato ro ati ti te, tna mam isra ro atu ye: Raja makin msya ku wana ye, raa manes, msya raa sbe ro mase sor, raa bobot beta ye, msya sryan wana tna msya raa roto sor ye.
REV 6:16 Ana waa re mawe kʼfraa weto msya atu weto mawe, “Nma mbtek oh! Nyinkait amu njat! Nma nmyõt amu wa re bi Ait ro hre abyõ mam ambar (tahta) rAit yahni amu. Tna nwas amu wa afo re Domba Maku, kmo rau mbtek mai kʼamu ye fee!”
REV 6:17 Ayõ sboh oh. Awya oh mi ytai yros bito yasom kmo rAna to?
REV 7:1 Tna fo jõ tmat malaikat mabo trion jiit to mros; sau mros ti mare, sau to mros ti wayir, sau mros ti habeh, tna sau mros ati to brat. Malaikat weto mros mno wa foos tibyo foos aro mfi mam tabam reto fee. Mfi mam tabam mne ye fee, tna mfi mam aya sawan ye fee, msya ara bo fee ye.
REV 7:2 Malaikat mabo jiit weto matak mno yoot bombra ro tabam mne msya aya sawan to ye. Tna tmat he malaikat roto sau mbam ati tobrat frok mama. Allah ro yaam tait yoo bo sau yee kʼmalaikat reto yawe, “Namo name aat kʼraa!” Malaikat reto mbis malaikat mabo jiit weto mkah mai ro mase mawe,
REV 7:3 “Nmo simoyot tabam mne msya aya sawan, msya ara bo wia ma. Nhau wia, amu nme aat kʼraa baro makit wana wia. Kbe raa mmat aat kʼana makit wana to, mhar mawe raa weto to sryan ro Allah wAit.”
REV 7:4 Tna raa mawe kʼjõ mawe, “Raa mabo trion 144.000 mame aat ro Allah kʼana makit wana oh. Ana weto to kube ro Israel, mbam raa mana aro rait sosor. Ana weto to:
REV 7:5 Raa mabo trion 12.000 to mbam raa mana ro Yehuda. Raa mabo trion 12.000 to mbam raa mana ro Ruben. Raa mabo trion 12.000 to mbam raa mana ro Gad.
REV 7:6 Raa mabo trion 12.000 to mbam raa mana ro Asyer. Raa mabo trion 12.000 to mbam raa mana ro Naftali. Raa mabo trion 12.000 to mbam raa mana ro Manasye.
REV 7:7 Raa mabo trion 12.000 to mbam raa mana ro Simeon. Raa mabo trion 12.000 to mbam raa mana ro Lewi. Raa mabo trion 12.000 to mbam raa mana ro Isakhar.
REV 7:8 Raa mabo trion 12.000 to mbam raa mana ro Zebulon. Raa mabo trion 12.000 to mbam raa mana ro Yusuf. Raa mabo trion 12.000 to mbam raa mana ro Benyamin.”
REV 7:9 Tna tmat raa mana msis bia mros mam wo sau. Raa msis miwer re raa aro ntuu mkai fee. Ana weto to mbam raa mana aro rau-rau beta. Ana mmai rana to aro rau ha-hayah ye. Tna ana weto mama mbam rabin rana aro sor-sor ye. Ana weto beta mros ati ro bi Ait yasu, ro hre abyõ mam ambar (tahta) rAit tna mam ati ro Domba Maku masu ye. Ana beta myum ratan ro mboh tna mbo ita palem mata ye.
REV 7:10 Ana masen mkyas mkah mai ro mase toni mawe, “Riof ro amu nkai fo, mbam kʼAllah ramu ro hre abyõ mam ambar tna msya mbam Domba Maku reto ye.”
REV 7:11 Tna malaikat weto beta mros mana mur mam ambar reto msya raa ro mase mabo trion 24 weto tna msya kak (makhluk) ro Allah wAit mana jiit weto. Tna malaikat weto mjit mimna mbaut Allah
REV 7:12 mawe, “Mabo oh: Nyõ fi Allah ramu ro yatak toni tna yhar bo. Amu bibi Nyõ tna hartu Nyõ! Tna amu nyoh asik mase kʼNyõ tna amu hawyõn Nyõ ye mamo snok hame wajin. Amin: Mabo oh.”
REV 7:13 Tna raa manes weto sait ytu kʼjõ yawe, “Raa mawat ro myum ratan ro mboh weto to, awya sor metait? Ana mama mbam hayo?”
REV 7:14 Tna jõ tawe si kʼait tawe, “Taja, nyõ nhar to.” Tna ait yawe, “Raa wefo fo, tiwya mkai wer ro mkair toni tna mfo ana tru riof. Ratan wana ro mkair to, ana myon mboh mkah mees ro Domba Maku rau to.”
REV 7:15 Mnan feto oh mi: “Mfo refo raa ro myum ratan ro mboh wefo mros mam ati ro bi Ait yasu, ro hre abyõ mam ambar (tahta) rAit. Baas, mti ana mhau mam samu rAit tna mno bo rAit. Bi Ait ro hre abyõ mam ambar (tahta) reto to, kbe sbyah ana wa.
REV 7:16 Tibyo kbe ana mhar mhai sre msya mhai sbit bo u fee. Tna ayõ bo kbe mafit ana u fee ye.
REV 7:17 Domba Maku ro hre mam yuk ro ambar (tahta) reto kbe mros mana matim tna kmot ana mam iso. Mamo makah ana mira mamo mata aya ro moof. Aya reto mno re raa mhai fee. Tna kbe Allah karu ana yukan.”
REV 8:1 Tna Domba Maku behah ri ro msit aam reto muut ro krema reto. Tibyo bombra beta mam sawro ro Tuhan mrok mnem setengah jam.
REV 8:2 Tna fo jõ tmat malaikat mabo krema mros mam ti Allah yasu. Tna raa moo saa mee kʼana mbo.
REV 8:3 Tna jõ tmat malaikat roto sau mama mros mam wohat (mezbah). Au mbo hawereh emas ro raa mfau bo mawat ro sawer (dupa). Kbe malaikat reto msan bo ro sawer weto tna msya raa ro Allah wAit skabuk wana beta to, maun maut mamo mo kʼbi Ait. Msan bo sawer msya skabuk weto abyõ mam wohat emas ro mhau mam ati ro bi Ait yasu, ro hre abyõ mam ambar (tahta) rAit.
REV 8:4 Malaikat reto mbo hawereh. Tna wasi rau ro ja sawer moof msya skabuk raa ro Allah wAit to, maun maut mbam hawereh reto mamo mo kʼAllah.
REV 8:5 Tna fo malaikat reto moo kaan baro ro mait mam wohat to, mfau mam hawereh mato. Tna fo moo mbeak mamo tabam reto. Mno tibyo ayoh mji, barmabyõ rurur, rir mrir, tna iin frok ye.
REV 8:6 Tna malaikat mabo krema ro mbo saa weto to, mros siwyan mfi saa weto.
REV 8:7 Malaikat ro tinyi mfi saa rau. Tibyo oom ro mnan fi es makan mais mbtek mai mam tabam. Oom ro mfi es makan ye, msya tafoh srioh mees mroh mai mam tabam reto ye. Tibyo tafoh mait tabam reto majoh jaro (sepertiga) msya ara baro. Tna mait bosafom ro safom to, beta mkak.
REV 8:8 Tna malaikat ro ewok mfi saa rau tna tmat he bo mnan fi atu ro tafoh mait warah sau. Raa moo atu reto mbeak mamo mbtek mam aya sawan. Tibyo aya sawan majoh jaro (sepertiga) haberek mrok mfi mees.
REV 8:9 Tna bombra ro mhau mam aya sawan baro to mhai-ha mkak (sepertiga). Tna kapal ro mamo mam aya sawan baro (sepertiga) surun ye.
REV 8:10 Tna malaikat ro tuuf mfi saa rau. Tna tmat he sken maboh sau ro mait mnan fi sawe. Sken reto mbam ayoh mbtek mai mam aya ro mase baro (sepertiga) msya aya masu beta ye.
REV 8:11 Sken reto masom rau to Apsintus. Sken reto mbtek mai aya baro, tibyo aya weto haberek mrok mtah. Raa msis mata aya ro mtah reto tibyo raa weto mhai.
REV 8:12 Tna malaikat ro jiit mfi saa rau. Tna ayõ ro ja moo mafit to, majoh baro (sepertiga) mhai. Tna snyi majoh jaro (sepertiga) msya sken baro (sepertiga) mhai ye. Tibyo ayõ ro ja moo mafit baas to aro moo mafit u fee. Tna mti to, snyi mboh kait fee mnan mfi ja snyi mboh soo to fee ye. Tna sken taro mawyah u fee ye.
REV 8:13 Tna jõ tmat ruu rajawali sau fru abyõ mam ayoh war-war. Tna ruu reto mmai fari mawe, “Malaikat mabo tuuf ro mhau fares to, kbe ana mfi saa wana tna kair ro mase mbtek mai kʼraa ro tabam reto!”
REV 9:1 Tna malaikat ro maat to, mfi saa rau. Tna jõ tmat sken sau mbam ayoh mbtek mama mai mam tabam. Tna raa moo kunci sau mee kʼsken reto. Kunci reto to, kunci ro mkah raa mitrah masa ro muut wa sawro ro kabes ja mhau.
REV 9:2 Ait ro yfi sken retait yitrah masa reto maah. Tna wasi frok maun maut mbam hroh reto. Wasi mawat toni mnan fi kaah raa mkah. Wasi mawat frok burut wa ayõ tibyo arin mamur.
REV 9:3 Tna bo mfi mo kawier msis frok mbam wasi reto, fru mamo tabam reto. Mo kawier weto mafit raa tna ana mari mham toni mnan fi tait bai mafit bo feto.
REV 9:4 Raa mbis mo kawier weto mawe, “Nmo nbat bombra ro moo mam tabam reto to ma; nbat bosafom msya ara ma. Nmo nfit raa sai. Menohe nfit raa ro ja mame aat ro Allah kʼana makit wana to ma!”
REV 9:5 Snyi marak maat bo feto mo kawier weto mafit raa. Tna raa weto mari mham toni mfi bo taitbai mafit. Mari mham toni menohe Allah yawe wa kʼmo kawier weto yawe, “Nfit raa weto majat ma!”
REV 9:6 Mam weto to, mo kawier mafit raa tibyo ana mham toni. Mham toni tibyo ana tomer mawe mno re ana majat afo sorni mham. Menohe ana majat fee. Ana mawe, “Aro fooh re bhai!” Menohe mfe.
REV 9:7 Mo kawier weto to mnan fi kuda ro raa siwyan mamo mafa. Mo kawier sbyõ watau (mahkota) ro emas. Tna masu mnaif mnan fi raa.
REV 9:8 Mana mawyan to miyõ mnan fi fnya mana mawyan. Tna mbait to maan mnan fi singa mbait.
REV 9:9 Mo kawier weto burut matmato wana mkah bo ro mnan fi besi. Mo kawier weto fru to, maim wana msun toni mnan fi asya mawat ro raa maut mamo mafa anya ye.
REV 9:10 Mamo snok snyi marak maat muuf bo feto mo kawier weto sikowah raa. Mo kawier weto takoh raa mkah sawyah wana to mnan fi taitbai sawyah.
REV 9:11 Mo kawier ro mase sau mbo mo kawier taro beta. Mo kawier refo fo, malaikat ro safo sau, ro ja mbo kabes taro sor mam sawro rana. Malaikat reto raa mtu mkah mai ro Ibrani to mawe masom Abadon. Tna mkah mai ro Yunani to, malaikat reto raa mawe masom Apolion.
REV 9:12 Mfo refo kair ro tinyi mkak. Tna fo kair mase trion ewok naut kbe mama riryõn.
REV 9:13 Tna malaikat ro ntamam mfi saa rau. Tna jõ tari mai sau frok mbam wohat ro Allah. Tna wohat reto tuut rau trion jiit. Wohat reto to, raa mfen mbam emas tna mhau mam ati ro Allah yasu rAit.
REV 9:14 Tna mai reto mbis malaikat ro riwai reto mawe, “Namo bitsre malaikat mabo jiit ro tiwya Allah yfot yake mhau akus mam aya mabi ro Efrat to!”
REV 9:15 Tibyo malaikat ro ntamam reto mamo tna bitsre malaikat mabo jiit weto. Malaikat jiit weto mhau siwyan mkah mamo mame raa baro (sepertiga) ro mhau mam tabam reto. Tiwya ooh-oh, mbam tahun ro wia rno mamo snok mam ayõ ro mfo refo. Malaikat weto mhau sne oon ro kbe ana mamo mame raa. Tna mfo refo malaikat weto Allah ybis mamo mame raa majat.
REV 9:16 Malaikat mabo jiit weto to mbo raa sbe wana mawat toni. Tna tari he raa mawe ana mabo trion 200.000.000. Raa sbe weto beta hre abyõ mam kuda wana.
REV 9:17 Jõ smi tmat raa sbe ro hre abyõ mam kuda wana weto beta to mafir matmato wana mkah bo ro matak. Bo ro ana mafir wa matmato wana to ro fiyaf msya ro mkek mnan fi kaan kek, tna msya ro safe mnan fi aya mos ro safe toni. Tna kuda weto mana wau to mnan fi singa mana. Tna tafoh, wasi msya belerang frok mbam kuda weto masoh wana.
REV 9:18 Tafoh, wasi msya belerang weto to mno raa baro majat. Raa ro majat to mabo trion sepertiga mbam raa ro mhau mam tabam reto.
REV 9:19 Kuda weto to masoh wana msya sawyah wana matak mai raa majat mnan fi aban abboh ro ja mafit raa majat to.
REV 9:20 Raa ro mhau fares mmat bo weto, menohe ana mashana fee. Ana bitsre bo ro mkair-kar ja ana mno to fee: Ana mhau mbaut kabes sai fares, tna ana mhau mbaut berhala ro raa mfen mbam emas, msya perak, msya tembaga, msya fraa, msya ara bo fares sai. Berhala wefo fo mmat bo fee tna mari bo fee, tna mamo bo fee ye.
REV 9:21 Tna raa weto mashana safo ro ana mber weto fee sai: Ana weto mame raa majat sai fares, mari bo ro kabes mkyas kʼana fares, tna ana mwyah fares, tna msyõf bo fares ye.
REV 10:1 Tna jõ tmat malaikat roto sau ro matak. Malaikat reto mbam sawro ro Allah mroh mama. Tna barmabyõ sro-sro au. Tna naar sau maya muur abyõ mam malaikat mana rau. Tna masu mnaif rau to, mawyah mnan fi ayõ, tna maa rau mnan fi bo tafoh mara ewok.
REV 10:2 Tna mam matem rau mbo aam maku ro bewakom sau. Aam reto betrat oh. Malaikat reto mros tna maa rau ro matem ati mber mam aya sawan. Tna maa rau ro ti tem taa to mber mam tabam mne ye.
REV 10:3 Tna au mkyas mkah mai ro mase mnan fi singa ro masen mho. Malaikat reto mkyas si fo barmabyõ trion krema mji si tna mkyas bo.
REV 10:4 Jõ tari barmabyõ weto mji si fo jõ tawe tkom bokyas ro jõ tari reto. He mfe; mai sau mbam sawro ro Allah mawe kʼjõ mawe, “Bo ro barmabyõ krema weto mkyas to, nmyõt rere, nkom ma!”
REV 10:5 Tna jõ tmat malaikat ro riwai mros maa sau mber mam aya sawan tna maa sau to mber mam tabam mne. Malaikat reto tubat matem ati rau
REV 10:6 tna mawe, “Allah yhau yroon mamo snok mam hame wajin. Tna bi Ait yfen ayoh msya bombra beta ro mhau abyõ mam ayoh reto. Yfen tabam refo msya bombra ro mhau mam tabam refo beta ye. Tna yfen aya sawan msya bombra ro mhau mam aya sawan reto beta ye. Jõ tama tkyas bo mam Ait yasom rAit, tawe: ‘Oon ro mama to, Allah yyum u fee ye, kbe Ait ye yirenti fee ye!
REV 10:7 Bo ro Ait saim yawe meen mama to, ja raa wase. Menohe tiwya Allah ykyas bo reto kʼnabi wAit ro ybis mamo mno bo wAit. Malaikat ro krema reto kene wo mfi saa rau. Tna bo ro Allah saim reto kbe mabo mnan si tu oh.’”
REV 10:8 Tna mai mbam sawro ro Allah riwai jõ tari reto to, mkyas kʼjõ u mawe, “Namo no kʼmalaikat ro mros maa sau mber mam aya sawan tna maa sau mber mam tabam mne reto. Malaikat reto mbo aam sau mam matem rau. Mbo betrat oh. Nasen namo noo aam ro malaikat reto nbo.”
REV 10:9 Tna fo jõ tamo to kʼmalaikat reto tayoh kʼau tawe, “Noo aam ro maku reto nee kʼjõ.” Malaikat reto moo mee kʼjõ tna mawe, “Noo aam refo nabat. Nabat mam nasoh to, nari maya msu mnan fi kum. Niya mroh mamoʼt srau to, kbe nari mrok mtah.”
REV 10:10 Tna jõ too aam maku reto tabat. Tabat to tari maya msu mfi kum. Menohe tiya mroh mamoʼt srau mato to tari he mtah.
REV 10:11 Tna raa mbis jõ mawe, “Namo nkyas watum ro Tuhan u. Nkyas bo ro kbe mama. Bi Ait yasbrah bo wefo kʼnyõ matim wia tna ybis nyõ yawe namo nkyas bo refo kʼraa ro mhau mam rabin mawat taro sor ye. Namo nkyas kʼraa mana taro mawat, nkyas kʼraa ro mkyas mai ro mawat aro rau ha-hayah ye, tna msya raja na mawat ye.”
REV 11:1 Tna raa moo bo mnan fi tbyor mara sau to, mee kʼjõ tna mbis mawe, “Namo nnit Samu ro Allah reto msya wohat (mezbah) rau mkah tbyor mara reto. Tna ntuu raa ro skabuk mam Samu ro Allah reto to mabo jya.
REV 11:2 Menohe bohra ro mne rau to, nnit ma. Bohra reto to, mhau kʼraa ro mbam raa mana roto makin. Kbe raa weto mamoʼt kota ro Yerusalem. Tiwya Allah ysan kota rAit reto to kʼanu, raa mana wAit sai. Menohe raa roto kbe twok mhau mam beto mamo snok snyi marak trion 42 muuf. Ana mno re kota ranu mkair, tibyo anu smot Allah mam kota ranu reto u fee.”
REV 11:3 Tna bi Ait yawe, “Kbe Jõ tbis nabi mabo ewok mamo mkyas bombra ro kbe mama. Ana mbewok weto ja mkyas Jõ tasom aJõ. Tna tbis ana mbewok myum ratan ro mkair-kar tna mamo mkyas bokyas aJõ kʼraa mamo snok ti trion 1260 muuf.”
REV 11:4 Nabi mabo ewok reto to, raa fret bo mawe ana mnan fi ara zaitun mara ewok ro moo mam wore wo Tuhan yasu. Tna mawe ana mnan si sawe ro emas trion mara ewok ro mhau mam ati ro Tuhan yasu rAit ye. (Tuhan tait yatak ybo tabam refo beta.)
REV 11:5 Tna soh raa ro byoh mno bo ro mkair mai kʼana mbewok reto to, kbe ana mbewok mame raa weto majat. Mame majat mkah tafoh ro kbe frok mbam kʼana masoh tna mait raa weto majat.
REV 11:6 Wore wo nabi mabo ewok weto mkyas bokyas ro Allah to, ana mbewok matak mbo ayoh msya tabam refo. Matak mbo ayoh wa re oom mais fee. Tna ana matak mno aya haberek mamo mees. Ana matak mno kair ro mase aro rau-rau mai mam tabam refo ye. Ana mbewok mno bo weto ati ro ana nksoh rana sai.
REV 11:7 Nabi mabo ewok reto mkyas bokyas ro Allah mkak oh. Tna fo kak sau mbam sawro ro kabes mhau to, kbe frok mama mafa msya ana mbewok. Kak ro ja mban kabes reto to matak. Tna kbe mame ana mbewok majat.
REV 11:8 Majat tna ajat wana makus mbris mam iso mabi mam kota ro Yerusalem. (Mam kota mase reto to, tiwya raa mame Tuhan ro ana mbewok ja smot to, mame Ait yajat mam ara warok.) Tna raa fret bo mawe kota reto to, masom Sodom msya Mesir.
REV 11:9 Tna raa mbam raa mana aro rau-rau beta mama mmat. Ana weto mmai rana aro rau ha-hayah ye, tna mama mbam rabin wana aro sor-sor ye. Ana kbe mama mmat ajat mbewok reto. Raa mawe ajat nabi mabo ewok reto to, raa sama ma. Tna mawe ajat mbewok reto mhau wia re raa mama mmat. Feto to ti trion tuuf hariyah to raa sama ajat weto fefares.
REV 11:10 Nabi mabo ewok reto tiwya ana mno bo ro samyoh aro rau mai kʼraa tna ana fo mbewok majat. Tibyo kbe raa simaut fayir tna moo bo moof mee kʼanya ye.
REV 11:11 Ti tuuf hariyah reto ska tna Allah yoo yafos yee kʼnabi mabo ewok refo tna ana mbewok mrok maam u. Raa mmat ana mbewok masen maam u to, ana mrok waa toni.
REV 11:12 Tna nabi mabo ewok reto to, mari mai ro mase sau mbam sawro ro Allah mtu kʼana mawe, “Anu mbewok: Nuut nma no kʼJõ mam wefo!” Tibyo ana mbewok misbat maut mamo abyõ. Tna barmabyõ ro mboh sro-sro ana mbewok, tna masyõ ana mamoʼt sawro ro Allah. Tna raa ro byoh masu heyut mmat ana mbewok misbat maut mamo.
REV 11:13 Ana mbewok misbat maut si to, iin ro msai frok mama msin tabam refo. Tibyo kota reto majoh jaro (sepersepuluh) to rarin. Tna raa mabo trion 7000 majat ye. Tna raa ro mhau fares mrok waa toni tna mkyas Allah ro yhau mam sawro rAit mawe, “Ae, Tuhan Allah tait yase toni!”
REV 11:14 Kair ro ewok mama mai kʼraa oh meto, tna kair ro tuuf to kine mama oh.
REV 11:15 Tna malaikat ro krema mfi saa rau ye. Tna jõ tari he mai mawat ro mase mam sawro ro Allah mawe: “Raa ro mamo raja oh mi ja mbo tabam reto to. Menohe mfo refo to, Tuhan ranu yesait oh mi yase yamo Raja ybo tabam reto ysya Kristus ro Ait ysok ye. Kbe Ait yase yamo Raja ybo tabam reto mamo snok mam hame wajin.”
REV 11:16 Tna raa manes mabo trion 24 hre mam ambar (tahta) wana mam ati ro Allah yasu. Ana weto maka mbaut bi Ait
REV 11:17 mawe: “Tuhan; amu nyoh asik mase kʼNyõ. Nyõ fi nase nbo bombra beta. Nyõ fi nhau yum bonyõ tinyi oh tna mfo refo nhau naam fares ye. Nyõ natak aNyõ nase niwer toni. Tna Nyõ nasen namo Raja nbo tabam reto oh. Tibyo amu nyoh asik mase kʼNyõ.
REV 11:18 Tiwya raa ro smot Allah fee; ana kmo Nyõ. Tna mfo refo ayõ sboh oh. Nyõ kmo ana riryõn. Mfo refo Nyõ nros susai tna noo srah nse mai kʼraa ro tiwya mhai oh. Tna mfo refo Nyõ noo boren naren kʼsrian woNyõ ye: Nabi woNyõ ro tiwya Nyõ nbis mamo mkyas bo woNyõ, tna msya raa woNyõ makin ye, tna msya raa ro ja hartu Nyõ to ye. Ana weto to raa ro mase tna raa ro kinyah ye. Tna ayõ sboh oh re Nyõ noo safo mana nmit kʼraa ro tiwya mno bo ro mkair.”
REV 11:19 Tna Samu Allah ro mhau mam sawro rAit to, mato rau nkro. Tibyo raa mmat Peti perjanjian reto. Tna ayoh mji, rir mrir mnin-nan, barmabyõ rurur tna iin frok sin, tna oom ro mnan fi es makan mais ye.
REV 12:1 Tna jõ heyut tmat bo ro msai sau mam ayoh abyõ uu: Tmat fai sau mros abyõ mam snyi. Fai au myan ayõ mamo ratan rau. Tna mana rau sbyõ sken trion 12 mnan fi watau (mahkota).
REV 12:2 Au mhaf tna kene mam wore mabe oh. Tibyo mari he au kborham tna msiah.
REV 12:3 Tna jõ heyut tmat bo msai sau roto mam ayoh: Tmat kabes aban sau, tna masom rau to naga. Kabes aban to maboh toni tna marak rau to mkek. Kabes aban reto to, mana rau to trion krema tna tanduk rau to trion nsaa. Tna abyõ mam mana wau to sbyõ watau (mahkota) trion krema ye.
REV 12:4 Tna kabes aban reto tubat sawyah rau to, tufrok sken ro mhau mam ayoh to jaro (sepertiga). Tna mbeak sken weto mbtek mai mam tabam. Kabes aban reto mhau mros ste kene msya fai au ro kborham reto. Mros mawe fai au mabe ku retait btek to, kabes aban refo miya fooh.
REV 12:5 Tna fai reto mabe ku sme sait. (Ku retait kbe yase ybo armuk ro besi tna ybo raa ro tabam arin aso wofo beta to matak.) Fai au mabe ku retait tna raa mama tubor mtak ku retait afo re kabes aban reto miya ku retait ma. Raa moo ku retait makah msam mamo mo kʼAllah ro hre abyõ mam ambar (tahta) rAit.
REV 12:6 Tna fai au reto masen msam mamoʼt yuk ro mimon sau; yuk ro Allah siwyan wea. Tna raa kmot au, misoh au mam teto ti trion 1260 muuf.
REV 12:7 Tna mam sawro ro Allah to malaikat sait ro yasom Mikhael yafa ysya kabes aban reto: Mikhael ysya malaikat wait ro moof to, mafa msya kabes aban reto tna msya malaikat wau ro mkair weto.
REV 12:8 Menohe kabes aban msya malaikat wau to matak fee. Tibyo kabes aban msya malaikat wau to, raa mikyak frok mbam sawro ro Allah.
REV 12:9 Kabes aban reto to, masom Iblis soh mfe to Kabes Yabi. Kak refo tiwya tinyi haberek mamo aban ro soo ye. Kabes Yabi ja sioh raa ro tabam refo beta. Ait ysya malaikat wait to, raa mikyak frok mbam sawro ro Allah tna frok mamoʼt tabam.
REV 12:10 Tna jõ tari mai ro mase sau mbam sawro ro Allah mawe, “Mfo refo Allah ranu yros yatak abyõ tna kabes yabi (Iblis) yhau mte. Feto tna riof kʼanu. Raa beta mhar mawe Allah yase yamo Raja tna ybo raa beta matak. Tna raa mhar mawe Allah ysok Kristus yamo yase ybo raa. Tiwya kabes yabi ja yaun anu ro smot Kristus to, rabu-reha. Yaun anu yawe kʼAllah yawe, ‘Raa woNyõ, mno bo mkair!’ Tna raa mbeak kabes yabi frok btek ybam sawro ro Allah yamo tabam.
REV 12:11 Kabes yabi yaun raa ro Allah wAit yawe ana mno iro. Menohe ana mros matak smot bi Ait mhar mawe mees ro Domba Maku reto myon iro wana oh, tna re ana mrok mhaf moof. Tibyo Kabes yabi yhau mte. Raa ro Allah wAit weto to, wore wo raa mawe mame ana majat to, raa wAit weto mwaar Yesus yasom fee. Ana mros matak mawe ana smot Yesus fares tna msan metsu rana re raa mame ana majat. Ana mno feto tibyo Kabes yabi retait yhau mte kʼana.
REV 12:12 Kabes yabi raa mikyak frok ybam sawro ro Allah, feto kbe anu ro nhau mam sawro rAit fares to; simaut mase oh! Menohe anu raa nsya bombra ro mhau mam tabam reto msya aya sawan bo to; kbe nmof toni: Kabes yabi yroh yamo yo kʼanu oh. Ait yhar yawe ti rau ro Allah yoo safo mana ymit kʼait to, kinene oh. Tibyo ait kmo tna safo toni.”
REV 12:13 Kabes aban mnaut mawe raa mbeak au mamo tabam, tibyo au kmo toni. Tna kabes aban masen saka fai au ro mabe ku sme retait.
REV 12:14 Menohe raa moo ruu ro mase sau maim wau to, mee kʼfai au. Moo mee kʼfai au mtan fai au kbek rau re kbe au fru mamoʼt yuk ro mimon. Yuk reto to, Allah siwyan kʼfai au wea. Au mhau bau mam teto tna raa kmot au, misoh au tahun trion tuuf hariyah re kbe kabes aban reto mkai au fee.
REV 12:15 Tna fo kabes aban reto frus aya mawat toni frok mbam masoh rau. Tna aya reto miyõ mamoʼt yuk ro fai au mhau tna mabo kait fai au reto. Kabes aban reto mawe aya mayõ fai au reto soso mamo.
REV 12:16 Menohe tabam to masoh maa tibyo aya ro kabes aban reto frus to, beta twok mamo tabam mato. Tibyo fai au mkai riof.
REV 12:17 Tna kabes aban reto mrok kmo fai au toni. Tibyo mamo sikowah ku wau ro mabe roto taro. Ku wau weto to: Raa ro ja mari Watum ro Allah mbo mno tna ana bito mros matak smot Yesus ysya watum rAit.
REV 12:18 Tna kabes aban reto mamo mros mam aya sawan maam.
REV 13:1 Tna jõ tmat kak ro ja mban kabes sau frok mbam aya sawan masuf. Kak reto metsu sau, mana rau to trion krema tna tanduk rau to trion nsaa. Tna watau (mahkota) mana mur abyõ mam tanduk rau sau-sau. Tna mam mana sau-sau wau to, raa mkom masom kair ro mamus Allah.
REV 13:2 Kak ro jõ tmat reto metsu rau mnan fi pus ro maboh sau masom macan tutul. Tna maa kbis rau to miyõ tna maan mnan fi kak sau ro masom beruang maa. Tna mbait rau to maan mnan fi singa mbait. Tna kabes aban reto msan matak rau kak ro ja mban kabes reto. Mbis kak reto hre mam ambar (tahta) rau tna mbo raa mkah matak rau.
REV 13:3 Kak reto mana wau trion krema. Tna hbis maboh mhau mayir mam mana rau sau. (Tiwya raa maru kak reto tibyo kene wo majat, he mfe. Tibyo hbis maboh reto mhau mayir sai fares.) Raa beta mmat kak ro ja mban kabes reto tna ana mrok ktak tibyo mari bo ro kak reto mawe.
REV 13:4 Kabes aban reto moo matak mee kak ro ja mban kabes reto. Tibyo raa mbaut kabes aban reto tna mbaut kak ro ja mban kabes reto ye. Raa mbaut kak reto mawe, “Raa arin aso matak mnan anya mfi kak refo fee! Tna raa aro mtai mafa msya kak refo fee ye!”
REV 13:5 Kak ro ja mban kabes reto safuk mawe au u kar, tna au mamus Allah. Allah yasu sayõ rof kak reto. Tibyo kak reto mros matak mbo raa ro mhau mam tabam refo, mamo snok snyi trion 42.
REV 13:6 Kak reto mamus Allah yasom rAit tna mkyas kair Samu ro Allah ye, tna mkyas kair bombra beta ro mhau mam sawro rAit ye.
REV 13:7 Tna kak ro ja mban kabes reto mafa msya raa ro Allah wAit. Raa moo matak mee tibyo kak reto mros matak tna raa ro Allah wAit matak fee. Allah yasu sayõ rof kak reto. Tna kak reto mros matak mbo raa mbam raa mana aro rau-rau beta: Ana mmai rana to aro rau ha-hayah ye. Raa weto mama mbam rabin rana aro sor-sor ye.
REV 13:8 Yohanes ymat he raa mawat toni kbe mbaut kak ro ja mban kabes reto. Ana weto to raa mkom masom wana mam aam ro Domba Maku rau to fee. Raa mabo baro sai hawe mbaut kak reto. Ana weto to masom wana raa mkom mam aam Domba Maku rau. Aam reto mkyas raa masom ro kbe mhau hame wajin. Allah yfen tabam refo fefares to, bi Ait ynaut Domba Maku refo. Ynaut yawe, “Kbe raa mame Domba majat re kbe mees rau myon iro raa; tibyo ana mkai riof.”
REV 13:9 Anu ro nri bokyas refo fo; nbo nno kaket!
REV 13:10 “Allah ysok raa taro. Tna yawe meen raa mfot raa weto tna makah ana mamoʼt tabam rana. Allah yhar bo rAit. Feto to raa weto kbe raa mfot tna makah mamo tabam rana tu oh. Tna awya ro Allah yawe meen raa mame ait mkah pedang to, kbe bo reto mabo tu oh ye.” Yeremia 15:2, 43:11 Meen arin ro mkair mama. Tna wore oon sboh to, kbe raa beta mkai bo. Anu raa ro Allah wAit to, kbe nkai bo ye. Jõ tawe kʼanu tawe bito smot bi Ait kaket! Susu ma!
REV 13:11 Tna jõ tmat kak roto sau frok mbam tabam te mato maut. Kak reto tanduk rau to trion ewok mnan fi domba maku. Kak reto mkyas bo to, mmai rau mnan fi naga mmai.
REV 13:12 Kak ro ewok reto mros tis mban kak tinyi ro ja mros tis kabes reto. Kak ro tinyi reto msan matak rau kak ro ewok. Mno re raa msya bombra ro tabam refo mbaut kak ro tinyi reto.
REV 13:13 Kak ro ewok fo mno bo ro msai toni. Kak reto matak mbero tafoh mbam ayoh mroh mama mai mam tabam refo. Tna raa masu mmat kak reto mno bo ro msai.
REV 13:14 Kak tinyi ro ja mban kabes reto moo tak rau mee kak ro ewok reto afo re ro ewok reto mno bo ro msai. Tibyo raa mari bo ro kak ro ewok reto mkyas. Tna kak reto besruf raa; mbis ana mfen patung sau ro masu mnan fi kak tinyi reto tna mse kʼana mbaut. (Kak ro tinyi reto to, tiwya raa maru mkah pedang tibyo mana mabet maboh menohe majat fee.)
REV 13:15 Tna raa moo tak mee kak ro ewok reto re au mno patung reto maam. Tibyo patung reto mrok maam tna mmai ye. Raa taro hawe mbaut patung reto. Tibyo patung reto mbis raa wau mawe, “Nmo nme ana weto majat!”
REV 13:16 Tna patung reto mbis raa beta moo tanda mnan fi aat tna mame kʼana matem ati, soh mfe makit wana: Raa mabi msya kukek ye, ro mase msya ro kinyah, tna ro bobot msya ro sryan ye. Ana mako hawe sai, raa mikoh raa beta mame aat reto.
REV 13:17 Menohe raa taro hawe. Tibyo kak ro ewok reto mno wa re ana weto moo boit fee, tna masim boit kʼraa fee ye. Kak reto mbis mawe raa ro mame aat reto mesait aran moo boit tna masim boit. Aat ro raa mame reto to, kak masom rau soh mfe to angka rau reto.
REV 13:18 Awya sai ro ja yhar bo to, kbe yhar bofret ro angka reto: Kak reto angka rau to 666. Tna aat reto merif raa sait yasom rait ye.
REV 14:1 Tna jõ tmat Domba Maku sau mros abyõ mam faut ro Sion. Au mros msya raa mabo trion 144.000 su. Makit wana to raa mkom Domba Maku masom rau msya Allah yasom rAit ye.
REV 14:2 Tna jõ tari mai sau mbam ayoh msun mnan fi aya mase sau ro miyi msun. Tna mnan fi ayoh ro mji ye. Mai reto mnan fi raa mai kerombi (kecapi) wana.
REV 14:3 Raa mabo trion 144.000 weto mros mam wore ambar (tahta) ro Allah hre. Raa wefo mros mam ati kak ro Allah wAit mana jiit weto masu wana tna msya raa manes mabo trion 24 weto ye. Raa mabo trion 144.000 weto mbaut bobaut ro tna sau. Raa roto sait bo yhar bobaut reto fee ye. Ana mesait aran mhar bobaut rana reto. Ana mabo trion 144.000 tiwya Yesus yfes. Tibyo ana mbaut bobaut kʼbi Ait.
REV 14:4 Tiwya wore wo ana weto mhau mam tabam reto fares to, ja ana kaket ana mamo maus bo msya fnya fee. Ana mhau mato wana mboh sai. Tna ana mhai. Tna ana mamo mhau msya Domba Maku. Tna woyõ-woya Domba reto mamo to, ana weto kro mam tis mamo ye. Yesus yoo raa ro tabam refo to, tna raa mabo trion 144.000 wefo fo mkbair ro tinyi raa msan kʼAllah msya Domba Maku.
REV 14:5 Ana weto ja mhar bo sioh raa fee, tna wase mber safo ye.
REV 14:6 Tna jõ tmat malaikat roto sau fru abyõ mam ayoh war-war. Malaikat reto to fru mama mkyas Bokyas Moof ro mroon (Injil). Mkyas Bokyas Moof reto kʼraa mbam raa mana aro rau-rau beta: Ana mmai wana aro rau ha-hayah ye. Tna ana mama mbam rabin rana aro sor-sor ye.
REV 14:7 Tna malaikat reto mkyas mkah mai ro mase mawe, “Oon sboh oh! Mfo refo Allah yoo safo mana ymit kʼraa. Feto to tawe anu waa tna hawyõn Ait oh! Nbaut bi Ait ro tiwya yfen ayoh msya tabam, aya sawan msya aya mato beta!”
REV 14:8 Tna malaikat roto sau mama. Malaikat ro ewok refo mawe, “Kota Babel rarin oh! Raa ro mhau mam kota ro mase reto to ja mno bo ro mkair. Ana mnan fi fnya ro mwyah. Tiwya fnya weto mno re raa ro mhau mam rabin aro sor beta sorni ana tibyo msya au mwyah ye. Bo ro au mno reto to mnan fi anggur ro mno re raa bisir sorni ana to ye, tibyo ana mno bo ro mkair-kar.”
REV 14:9 Tna malaikat ro tuuf mama mtan naut. Mawe mkah mai ro mase mawe, “Masi ma raa mbaut kak msya patung reto fee! Masi ma anu sayõ rof sai tna re raa mame aat ro kak reto kʼanu ntem wanu soh mfe nkit wanu to fee!
REV 14:10 Kbe Allah kmo awya ro yno feto. Kbe Ait kmo toni. Raa fret bo mawe kmo ro Allah rAit safo toni mnan fi anggur maya ro safo toni. Raa ro mbaut kak soh mfe patung reto kbe Allah yoo ana yko mam tafoh msya belerang ro mait. Kbe malaikat wAit sor to msya Domba Maku reto mros horit bo ana mait.
REV 14:11 Raa weto sikotok mam tafoh. Tna wasi mbam tafoh reto to, kbe maun mwiok mamo snok mam hame wajin. Raa ro mbaut kak msya patung reto tna awya sai ro sayõ rof raa mame aat ro kak reto kʼait yetsu rait to, kbe yari mham yoyo, tna mham reto swior-was fee ye.”
REV 14:12 Menohe jõ tawe kʼanu raa ro Allah wAit tawe: Bito nros ntak re smot Yesus matak mamo snok mam tis rau. Nri bo ro Allah ybis kʼanu tna nbo nno kaket. Nhau smot Yesus mam wore wo arin mkair tna oon sboh to!
REV 14:13 Tna jõ tari mai sau mbam sawro ro Allah mawe kʼjõ mawe, “Nkom bo ro Jõ tkyas fo: Kbe Tuhan yno bo moof kʼraa ro mhau smot Ait mamo snok mam ati ro meen ana mhai. Raa wAit ro mhai wore arin mkair to, meen mkai riof mam sawro ro Allah rAit.” Tna Har rAit mawe, “Esre, kbe meen ana mkah bo tna mimyoh snok to u fee. Kbe ana hrowyõ u fee. Bo moof ro tiwya ana mno to, Allah ynaut fares. Feto to kbe ana fri mafer rau reto: Kbe bi Ait yaren ana tu oh.”
REV 14:14 Tna jõ tmat barmabyõ ro mboh sau tna raa sait hre abyõ mam barmabyõ reto. Raa retait ynan fi 'Ait ro Yroh Yama Yfi Raa Sai'. Tna Ait sbyõ watau (mahkota) ro emas sau. Tna ybo sogi sau ro maan toni.
REV 14:15 Tna tmat malaikat roto sau frok mbam Samu ro Allah. Malaikat refo mawe kʼAit ro hre abyõ mam barmabyõ ro mboh reto, mkah mai ro mase mawe, “Nbo sogi anyõ reto namo tabam tna nsot bo ro manes weto. Ayõ sboh oh; bo ro tabam weto make manes oh. Feto to namo nsot!”
REV 14:16 Tibyo Ait ro hre mam barmabyõ mboh retait yayõ sogi rAit tna yroh yamo ysot bo ro tabam weto.
REV 14:17 Tna malaikat roto sau frok mbam Samu ro Allah. Malaikat refo mbo sogi ro maan sau.
REV 14:18 Tna malaikat sau naut frok. Malaikat refo ja mhau mko tafoh abyõ mam wohat ro Allah. Malaikat refo mbam wohat reto to, mama mawe kʼmalaikat ro mbo sogi maan reto. Tna au mawe mkah mai ro mase mawe, “Noo sogi anyõ ro maan reto nroh namo tabam reto tna nsot anggur make. Anggur make weto to manes oh. Feto to, namo nsot.”
REV 14:19 Tna malaikat reto mayõ sogi rau tna mamo msot anggur make weto mbam mara ro make weto sor. Msot tna mamo mbeak mam bak sau mato. Bak refo fo wore wo Allah sikowah raa.
REV 14:20 Bak reto mhau mam kota reto mne rau. Raa ro malaikat mbeak mam bak mato reto to, raa mber. Mber re mees wana snok-snak. Tna mees miyi frok mbam bak reto, miyi mnan fi aya. Mees reto miyi snok mamo. Miyi mamo to raa mnit miyõ rau: 300 kilometer. Tna mees reto tee rau to meter ewok bo feto.
REV 15:1 Tna jõ tmat bo ro msai mam sawro ro Tuhan: Bo ro kbe sikowah tabam reto to, trion krema mhau fares. Tna fo kbe Allah kmo rAit maum oh weto. Jõ tmat malaikat mabo krema tna ana mbo hawereh sau-sau. Kair ro mase trion krema mhau mam hawereh wana weto aro sau-sau. Allah siwyan tufrok kair ro ttis wefo; kbe kair trion krema naut sikowah raa ro tabam refo. Tna kmo rAit maum oh weto.
REV 15:2 Tna tmat aya sawan ro ntwar toni mnan fi kaca. Aya sawan reto to srioh tafoh mait. Tna tmat raa mawat mros mam aya sawan reto maam jaro. Ana weto to tiwya mhau mam tabam. Mhau mam tabam reto ana beswan kak ro mban kabes msya patung reto. Ana hawe bo mari tna mbaut bo ewok reto fee ye. Tna tiwya ana hawe bo raa mame aat kʼana metsu rana ye. Aat reto mkom angka ro merif masom kak reto. Ana hawe mno bo weto tibyo Allah yoo kerombi (kecapi) yee kʼana mbo.
REV 15:3 Tna ana mbaut bobaut sau ro tiwya Musa ybaut. Tna msya bobaut ro Domba Maku. (Tiwya Musa yamo sryan ro Allah to; yari bo ro bi Ait yawe.) Ana mbaut mawe: “Nyõ fi Tuhan Allah ro nase. Nyõ namo Raja tna nbo bombra beta yum. Nyõ nno bo ro moof msya bo ro msai toni ye. Ati ro Nyõ ntu srah raa to, Nyõ nhar awya ro yno iro, tna nmit safo kʼait. Nyõ nsok raa sait bo fee ye. Nhaf, srau aNyõ to moof ati sai.
REV 15:4 Awya oh mi waa Nyõ to fee? Awya oh mi ybaut Nyõ nasom aNyõ to fee? Nyõ nesait aran noof toni yum. Raa ro tabam refo beta mmat mawe Nyõ nno bo ro moof mnan si. Tibyo ana beta kbe mama mbaut Nyõ.”
REV 15:5 Tna fo jõ tmat Samu ro Allah mam sawro rAit. Tna sbyah reto mato rau to kro.
REV 15:6 Tna malaikat mabo krema frok mbam Samu ro bi rAit reto to mama. Malaikat weto mbo kair trion krema ro kbe sikowah raa. Ratan wana to, raa mtin mbam hawee lenan ro moof toni tna kren-kran ye. Ana mbin ntkah wana mkah hawee ro emas.
REV 15:7 Tna kak ro Allah wAit mana trion jiit weto, sau moo hawereh emas trion krema. Moo tna mee kʼmalaikat mabo krema weto. Kmo ro Allah rAit mhau mam hawereh wana sau-sau. Allah kbe yhau yroon mamo snok hame wajin.
REV 15:8 Tna wasi betru Samu rAit. Wasi reto mbam bo yase ro bi Ait rAit msya yatak rAit ye. Tna raa sait bo yamo twok mam Samu mato reto wia fee. Kbe malaikat krema weto mtu kair ro mase trion krema mamo mbtek mam tabam reto. Bo ro sikowah tabam reto, kbe malaikat weto mno mkak wia tna fo raa twok mam Samu mato reto u.
REV 16:1 Tna jõ tari mai ro mase sau frok mbam Samu ro Allah reto mawe kʼmalaikat mabo krema weto mawe, “Kmo ro Allah mhau mam hawereh trion krema ro anu mbo mam ntem. Nasen nmo ntu kmo rAit reto mbtek mamoʼt tabam oh!”
REV 16:2 Malaikat ro tinyi moo hawereh mkah bo ro kbe sikowah tabam reto, tna mamo mtu bo reto mam tabam. Tibyo kaus ro msai toni snok kʼraa beta ro mbaut patung reto msya raa ro mame aat kak reto. Kaus weto snok kʼana beta metsu wana sor tna ana weto mari mham toni.
REV 16:3 Malaikat ro ewok moo hawereh rau mkah bo ro sikowah tabam to, tna mtu bo reto mamo mbtek mam aya sawan. Tibyo aya sawan beta haberek mnan mees mfi mees ro ajat. Mees reto mno bombra ro mhau mam aya sawan to beta mhai.
REV 16:4 Malaikat ro tuuf moo hawereh rau mkah bo ro sikowah tabam to, tna mtu bo reto mamo mbtek mam aya ro mase msya aya mato beta. Tibyo aya haberek mnan fi mees.
REV 16:5 Tna tari malaikat sau ro ja matak mbo aya beta to, mawe kʼAllah mawe: “Ati ro Nyõ ntu srah raa to, Nyõ nhar awya ro yno iro, tna nmit safo kʼait. Nyõ nsok raa sait bo fee ye. Nyõ nesait aran noof toni yum. Nyõ fi naban tiwya tinyi nhau yum tna mfo refo nhau yum fares ye.
REV 16:6 Tiwya raa weto mame raa woNyõ msya nabi woNyõ to majat. Tibyo mees rana snok. Mfo refo Nyõ ska bo kʼana riryõn; nno re ana mata mees ska si bo ro ana mno weto.”
REV 16:7 Tna fo jõ tari mai sau frok mbam wohat ro Allah reto mawe kʼbi Ait mawe: “Esre, Tuhan Allah; Nyõ to nase tna nbo bombra beta. Nyõ to nno bo ro moof ati. Ati ro Nyõ nse srah kʼraa to, nyõ nhar awya ro yno iro to, nse hayah, tna nhar awya ro yno bo ro moof to, nse hayah ye.”
REV 16:8 Malaikat ro jiit moo hawereh rau to mtu kmo ro Allah mamo mbtek mam ayõ. Tibyo ayõ mrok mbe toni tna mait raa mkah tafoh rau.
REV 16:9 Allah yno re ayõ smoh raa. Tibyo ana mrok kmo tna mamus Allah. Bi ait oh mi yatak tna ybis kair ro mase weto mama mai ana. Menohe ana hawe bo mashana. Tna ana hawe bo bibi bo yase rAit ye.
REV 16:10 Malaikat ro maat moo hawereh rau mkah kmo ro Allah to, tna mtu bo reto mamo mbtek mam ambar (tahta) kak ro ja mban kabes reto. Tibyo rabin ro ja kak reto mamo raja mbo to, mrok mamur. Tna raa ro mhau mam rabin rau reto to, mari mham toni, tibyo ana mafit hrea wana.
REV 16:11 Ana weto mham toni tna kaus snok mam metsu wana beta. Tibyo ana mamus Allah ro yhau abyõ mam sawro rAit. Menohe ana mashana fefares. Ana mno bo ro mkair fares.
REV 16:12 Malaikat ro ntamam moo hawereh rau mkah kmo ro Allah to tna mtu bo reto mam aya mase sau ro masom Efrat. Tibyo aya reto mrok msa ngkaat. Tna raa mamo iso mam aya ngasasia rau reto. Tna raja makin ro mbam ati ro tobrat msya raa sbe wana to, masen mamo kro iso reto.
REV 16:13 Tna tmat kabes mabo tuuf ro mnan fi aah bo feto. Kabes weto to, sau frok mbam kabes aban masoh rau. Tna sau frok mbam kak ro ja mban kabes reto to, masoh rau ye. Tna sau frok mbam ait ro ja sioh raa to, yasoh rait ye. Ait ro tis tait, ja sioh yawe ait tait nabi ro Allah ybis yama ykyas bo wAit. He mfe, ait yama besruf raa sai.
REV 16:14 Kabes mabo tuuf wefo ja mno bo msai. Kabes weto frok mamo mo kʼraja ro ja mbo raa ro tabam refo beta. Mamo tna mawe ana beta berur mam wo sau tna siwyan mamo mafa. Ana mhar mawe Allah tait yase ybo bombra beta. Tna ana mhar mawe kbe Ait yama yafa ysya ana. Tna raja weto to mhau wea siwyan ayõ reto.
REV 16:15 Tna Yesus yawe, “Nri oh! Meen Jõ tama tubor tfi raa ro ja msyõf bo. Feto to nhau siwyan. Raa taro mjin sai. Ana siwyan fefares tibyo meen mrok. Kbe ana hrenaut mfi raa ro mamo sroraa. Awya ro yhau siwyan yoyo to, kbe simaut. Kbe ait hrenaut fee. Kbe ait sroraa fee.”
REV 16:16 Tna fo kabes trion tuuf weto mbis raja weto mamo hre siret mam wo sau. Yuk reto mai ro Ibrani to mawe masom Harmagedon.
REV 16:17 Malaikat ro krema moo hawereh rau mkah kmo ro Allah to, tna mtu bo reto mamo mbtek mam ayoh war-war. Tna jõ tari mai sau ro mase mbam ambar (tahta) ro mhau mam samu ro Allah mato to mawe, “Bombra beta tno mkak oh!”
REV 16:18 Tna rir mrir mnin-nan, tna ayoh mji, barmabyõ rurur, iin ro msai toni frok mama. Iin ro msai miwer mnan fi feto to, frok mam tabam refo aro fee. Iin ro msai toni reto.
REV 16:19 Tibyo kota Babel mrok ftah trion tuuf. Raa ro mhau mam kota ro mase reto to, ja mno bo ro mkair yoyo. Tibyo Allah kmo. Allah kmo tibyo ybis malaikat riwai reto moo hawereh rau to mamo mtu kmo ro Allah rAit mbtek mai raa ro Babel weto. Tna iin reto frok mno raa ro wase Allah roto sor ye, mno kota wana sasyoh ye.
REV 16:20 Tna sato beta msya atu beta marak.
REV 16:21 Tna oom ro mnan fi es makan mais. Es makan weto to maboh. Fanes wau to 50 kilogram sau-sau bo feto. Es makan weto mroh mbtek mame raa. Raa mkai bo mkair ro mase feto tibyo ana mamus Allah.
REV 17:1 Tna malaikat mabo trion krema ro mbo hawereh mkah Allah kmo wAit weto to, sau mawe kʼjõ mawe, “Nama, kbe Allah yno bo mai kʼwyah mabi ro hre abyõ mam aya mawat. Au mwyah toni tibyo Allah kmo. Nama nmat.
REV 17:2 Tiwya fai au reto mno re raa sorni ana, tibyo mwyah msya fai au. Bo ro au mno reto to mnan fi anggur maya ro mno raa re mbisir sorni ana, tibyo ana mno bo mkair-kar. Tna au mno raja makin msya raa ro mhau mam rabin aro sor beta sorni ana, tibyo mwyah msya fai au ye.”
REV 17:3 Tna Har ro Tuhan mbo jõ matak. Tibyo jõ smi tmat bo. Tmat bo malaikat reto makah jõ mamoʼt yuk sau ro mimon. Tna tmat fai au ro mwyah reto hre abyõ mam kak ro ja mban kabes reto. Kak reto to, mawyan rau to mkek. Tna raa mame aat mawat mam kak reto metsu rau. Aat weto to mkom bokom ro mamus Allah. Kak reto mana wau trion krema tna tanduk wau trion nsaa.
REV 17:4 Tna fai reto to, myum ratan rau ro mkin msya mkek. Tna au fayir metsu rau mkah emas mawat, msya mutiara mawat, msya fraa ro mabyoh maut tna kren-kran aro rau mawat ye. Tna matem mbo hawereh ro emas sau. Hawereh reto raa moo bombra beta ro mkair, msya bombra ro mwyah weto mfau matot.
REV 17:5 Mam makit rau to, raa mkom som baro ro ja raa mti bomyõt fares kʼraa. Raa mkom: ‘Kota Babel ro Mase’ tna ‘fai au refo fo, ku wau ja mwyah.’ tna ‘Bombra ro mkair mam tabam refo to, beta frok mbam fai au refo.’
REV 17:6 Fai au knait raa ro Allah wAit. Tibyo raa wAit ro ja mkyas Yesus yasom to, au mbis raa mamo mame ana majat. Ana raa mame majat tna fai au mata mees wana. Tibyo bisir tna simaut mase, tna safuk. Jõ tmat fai au reto tna trok ktak.
REV 17:7 Tibyo malaikat reto mtu kʼjõ mawe, “Fyi re nyõ nrok ktak to? Kak ro mana wau trion krema msya tanduk wau trion nsaa reto to, kbe jõ betoo kʼnyõ. Tna jõ betoo fai au ro hre abyõ mam kak kabes reto kʼnyõ ye re nyõ nhar:
REV 17:8 ‘Kak ro ja mban kabes ro riwai nyõ nmat reto to, tiwya mhau mam tabam refo. Mfo wefo marak oh. Tna kak reto meen frok mbam sawro ro kabes ja mhau to, tna me mama mber tabam refo u. Mhau, tna majat. Kbe raa makin mmat kak reto tna ana taro mrok ktak. Raa ro mmat kak reto mrok ktak oh mi masom wana aro raa mkom mam aam ro Tuhan rAit fee. Aam refo masom rau to: “Raa ro Kbe Mhau Hame Wajin.” (Tiwya tinyi Allah yfen tabam refo to, aam reto raa mkom oh. Aam refo mkyas raa masom ro meen mhau hame wajin.)
REV 17:9 Raa ro mhar bo to, kbe mhar bofret reto mawe fefo: Kak reto mana wau trion krema weto to fret bo mawe atu trion krema ro fai au reto ja hre abyõ.
REV 17:10 Kak mana wau trion krema weto to fret bo mawe raja mabo trion krema ye. Raja mabo krema weto to, mabo maat mbtek oh. Tna mfo refo sait hre ybo raa fares. Tna sait frok yama fefares. Kbe raja refi yama menohe ait yase ybo raa waor sai.
REV 17:11 Kak ro tiwya mhau tna mfo wefo marak reto fret bo mawe raja ro krentuuf oh meto. Kak refo fo raja mnan fi raja mabo krema roto riwai weto ye. Tna kbe majat.
REV 17:12 Tanduk trion nsaa weto to fret bo mawe raja mabo nsaa roto. Raja mabo nsaa wefo mamo mase mbo raa fefares. Ana weto mase mbo raa kait fee. Kbe ana msya kak reto mamo raja mbo raa ayõ sau sai.
REV 17:13 Raja weto to bonaut wana msya srau wana sau su. Ana beta mawe msan matak wana kak ro ja mban kabes reto. Ana mawe kak reto mbo raa wana ro ja ana mesait mbis.
REV 17:14 Meen kak ro ja mban kabes reto msya raja mabo nsaa weto mamo mafa msya Domba Maku. Tna raa taro kro ati ro Domba Maku reto mafa ye. Raa weto tii Allah ysok tna mmen re ana mamo raa wAit. Ana weto mur-mur smot Ait; mhaf magin fee. Ait ro ynan fi Domba Maku reto to, Tuan ro yase. Ait yatak ybo tuan mbra taro sor. Ait tait Raja ro yatak ybo raja taro sor. Feto to ana mamo su mafa msya raa byoh to, tna kbe ana mros matak. Tna mno raa byoh weto mbtek tu oh!’”
REV 17:15 Tna malaikat reto mbetoo bofret reto renti mawe, “Riwai nyõ nmat fai au ro ja mwyah to, hre mam wore aya mawat to. Aya weto fret bo mawe raa mbam kʼraa mana aro rau-rau. Ana mmai rana aro rau ha-hayah ye. Tna mama mbam rabin rana aro sor ye.
REV 17:16 Tna riwai nyõ nmat kak ro ja mban kabes reto tna tanduk wau trion nsaa. Kak reto msya tanduk wau (raja mabo nsaa weto) to, kbe knait fai au ro mwyah reto. Ana kbe mtak bombra ro au mse msya ratan wau ro myum beta. Tibyo au sroraa. Tna kbe raja weto mfot fai au, tna mabo kwiyan rau. Tna moo fai au mko mait mam tafoh.
REV 17:17 Allah yno re raja weto msan tak wana kak ro ja mban kabes reto afo re kak reto mase mbo raa wana. Kbe Allah sayõ rof kak reto masen mbo raa mamo snok ayõ ro bi Ait yawe sai. Tna bo ro raja weto msya kak mno to, ana mno mamyot bo ro bi Ait saim ykyas wia.
REV 17:18 Tna riwai nyõ nmat fai sau ro ja mwyah, ro hre abyõ mam kak ro ja mban kabes reto. Fai reto fret bo mawe kota mabi sau. Kota mabi reto matak mbo raja ro tabam reto beta ye.”
REV 18:1 Tna fo jõ tmat malaikat roto sau mroh mbam sawro ro Allah mama. Malaikat reto to matak toni. Au mroh tna bo mase rau mawyah toni tibyo mram tabam refo.
REV 18:2 Mroh tna mkyas mkah mai ro mase mawe, “Kota Babel rarin oh! Kota ro mase reto rarin oh! Mfo wefo kabes mawat msya ruu mbra ro mkair-kar ja raa knait to, mamo mhau mam tore tno.
REV 18:3 Raa ro mhau mam kota ro Babel to, mnan fi fai au ro ja mwyah. Tiwya fai au reto mno re raa sorni ana tibyo mwyah msya fai au. Au tko raja makin msya raa ro mhau mam rabin aro sor beta mno iro ye. Bo ro au mno reto to mnan fi anggur maya ro mno re raa mbisir sorni ana to. Tibyo ana mno bo mkair-kar. Tiwya raa ro ja hre masim bo to, mamoʼt kota reto re moo bo ro moof aro kʼana. Moo bo msis bia tna masim. Tibyo ana weto mamo bobot.”
REV 18:4 Tna jõ tari mai roto sau mbam sawro ro Allah mawe, “Raa mana wojõ; snok mbam kota reto fooh! Snok mbam kota reto afo re anu nhau su nsya raa weto fee tna kbe nno iro nsya raa weto fee ye! Kair ro mase kbe mama mai kʼana. Snok fooh afo re kair reto mai kʼanu ye fee!
REV 18:5 Raa weto mno iro mawat. Iro ro ana mno weto to mfaut maut mnan fi atu sau ro faut miyõ toni kene mam ayoh. Tna Allah ynaut safo ro ana mber.”
REV 18:6 Tna Allah yawe kʼmalaikat wAit yawe, “Mfo refo tbis anu nmo nno bo mai kʼraa ro Babel. Nmo ska bo ro mkair tii ana mno wia. Bo ro anu nno to mnan fi boren wana ro Jõ taren. Nmo nno boska mai kʼana muhrin ewok u. Raa fret bo mawe kmo aJõ to safo toni mnan fi anggur maya ro safo toni. Feto kbe Jõ safo sikowah raa ro Babel.
REV 18:7 Tiwya ana weto mno bo mkair toni: Ana masmamo tibyo mamo bobot toni tna mbibi ana mesait ai sai. Ana mawe: ‘Anu fo bnan fi fnya manes. Anu fo bnan fi semit fee! Anu fo bhar sraujin fee ye!’ Raa ro Babel bibi ana mesait ai sai tna mse bombra wana msis toni. Feto tibyo Jõ bitsre kair ro mase toni mbtek mai kʼana riryõn. Tna tbis anu nmo sikowah ana re mawyan surut ana.
REV 18:8 Jõ fi Tuhan Allah ro tse safo mana tmit kʼraa. Jõ fi Raa ro tase. Feto oh mi mam ti sau aran sai kbe kair ro mase mbtek mai kʼraa ro Babel: Kbe ana kiyam samyoh toni, tna raa mawat mhai. Kbe raa weto sraujin toni. Tna hai sre kbe mai kʼana ye. Tna kota ro ana mhau reto to, kbe raa mkah mait.”
REV 18:9 Raja makin tiwya ksoh bombra msis-sas ro ana mkai mam Babel tna ana mno bo ro mkair msya raa ro Babel ye. Tna ati ro raa mkah kota ro Babel to, kbe raja weto mros mmat wasi maun tna mawia sraujin toni.
REV 18:10 Kbe ana mros fari mmat bo samyoh ro mai kota reto to, mrok waa toni mawe, “Ayoh! Bo mkair! Kota ro masom rno mait mkak! Tiwya kota reto matak toni. Tna mam ayõ sau reto sai bo ro samyoh matu mai tibyo kota ro Babel rarin!”
REV 18:11 Tna raa ro ja hre masim bo to, mmat he kota ro Babel rarin oh. Tibyo ana mawia sraujin. Mawia mawe kbe raa ro Babel aro moo bo ro ana masim u fee.
REV 18:12 Tiwya raa masim emas,perak, msya fraa ro kren-kran mabyoh maut aro rau, msya mutiara, hawe aro rau; ro lenan, ro mkin, ro sutera, msya boyan ro mkek toni tna msya bombra ro raa mfen mbam ara ro sawer sau, bombra ro raa mfen mbam gading ye, bombra ro raa mfen mbam ara ro mabyoh maut mnan fi aku ye, tembaga ye, besi ye msya fraa ro moof toni sau masom pualam. Tiwya ana masim bo weto tna raa ro Babel moo.
REV 18:13 Tna ana masim ara kayu manis marak rau msya rempah-rempah roto ro mno re bo sohmaam sawer. Tna ana masim ri ro masom kemenyan ro raa mko to, wasi rau sawer mnan fi ara aku ro raa mko, msya mur,anggur maya, minyak,gandum msya tepung rau. Tna ana masim sapi,domba,kuda msya asya ro kuda mkuk, tna raa masim ku awe ye.
REV 18:14 Tna raa mawe: “Anu nwe nsim bombra mam Babel tna fri mafer moof to, he mfe; bo weto msaef beta oh. Tna bosatoh msya bosnyam ro tiwya anu nasmamo to, weto beta marak ye. Kbe anu nkai u fee.”
REV 18:15 Raa ro tiwya moo bombra mam kota ro Babel tna me masim kʼraa to, mamo bobot. Raa ksoh bombra weto tna moo mkah pitis mabyoh ro maut. Tibyo raa ro masim bo weto to mamo bobot. Ana mros fari mmat kair ro mai kota reto, tna mrok waa tetet.
REV 18:16 Ana ro ja masim bo to mawia mawe: “Ayoh! Feto oh a? Bo mkair! Kota ro mase no mait mkak oh! Tiwya raa ro kota reto myum ratan ro moof toni: Hawee ro lenan, ro mkin, msya boyan ro mkek toni. Tiwya ana weto fayir metsu wana mkah bofayir ro emas, fraa ro mabyoh maut tna kren-kran, msya mutiara ye.
REV 18:17 Mam ayõ sau sai bosatoh ro ana mse to mait mkak!” Tna raa mase ro mbo kapal beta msya raa ro mkah bo mam kapal sor, msya raa ro maut kapal beta ye, msya raa ro ja makam bo maru mam aya sawan bo, kbe ana beta mros fari mmat.
REV 18:18 Kbe ana mmat wasi mbam kota ro Babel maun mwiok maut to ana mawe, “Kota mabi ro hayo mnan fi kota reu u?”
REV 18:19 Raa ro mmat to sraujin toni tibyo moo bohasyaf mse abyõ mam mana wana tna mawia mawe: “Ayoh! Feto oh a? Bo mkair! Kota ro mase no mait mkak oh! Tiwya kapal wanu masyõ bosatoh mamoʼt kota ro Babel masim no. Anu bsim bo kʼraa ro Babel to mamo bobot beta. Tna mam ayõ sau sai bo ro samyoh matu mai tibyo bo satoh weto beta saef marak!”
REV 18:20 Tna mai reto mawe kʼraa ro Allah wAit mawe, “Anu ro nhau mam sawro ro Allah to, nsya raa ro Allah wAit tna msya raabis (rasul) wAit, msya nabi wAit ye to: Simaut mase oh! Tiwya raa ro Babel mno bo ro mkair mai kʼanu. Feto tibyo Allah yoo safo mana ymit kʼana riryõn.”
REV 18:21 Tna malaikat ro matak sau tubat fraa ro maboh sau, mnan fi fraa kilangan tna tubat fraa reto mai mamoʼt aya sawan mawe: “Feto ye kota Babel ro mase reto to, kbe Allah tubat mbeak yai mamo te mnan fi fraa refo ye. Tibyo habah, kbe raa sait bo ykai kota reto u fee ye.
REV 18:22 Tna mam kota reto to, raa ro mai kerombi (kecapi) aro u fee ye. Tna raa aro mji howes u fee ye. Kbe raa aro mfi oor u fee, tna raa aro mfi saa u fee ye. Kbe raa aro mkah bo wana u fee. Kbe raa aro mfen bo u fee. Tna raa aro mmuk boit mkah fraa kilangan u fee ye.
REV 18:23 Tna lampu aro mawyah mam kota reto u fee ye. Tna raa aro simaut makyõ bokyõ mam kota reto u fee ye. Tiwya raa ro mase masim bo mam kota reto. Tna raa ro mhau mam kota reto besruf raa ro mbam rabin taro beta. Raa mawat mmat bo ro mkair-kar tiwya raa ro Babel mno to. Raa taro mmat tibyo ana mawe mno feto ye.
REV 18:24 Raa ro Babel misti tibyo raa mame raa majat to: Nabi na msya raa ro Allah wAit taro to ye. Tna raa taro tiwya raa mame majat to, raa ro Babel masom isti reto ye.”
REV 19:1 Tna jõ tari raa mmai msun mam sawro ro Allah mawe: “Haleluya, anu bbaut Tuhan! Riof ro anu bkai refo fo mbam kʼAllah ranu. Rau ro moof to, raa mbaut Ait. Ait tait Raa ro yase.
REV 19:2 Bi Ait ja yno bo ro moof ati. Tna ati ro Ait yros susai to, Ait yhar awya ro yno iro, tna ymit safo kʼait. Kota Babel reto to mnan fi fai sau ro mwyah toni tna misti tibyo raa makin mbtek mam iro. Feto to Allah riwai yoo safo mana ymit fai au reto. Tiwya fai au mame raa ro Allah wAit majat to, tna bi Ait yno bo ro samyoh mbtek mai kʼau ska si bo ro au mno.”
REV 19:3 Tna ana riwai weto me mawe u mawe, “Haleluya, anu bbaut Tuhan! Fai ro mwyah reto to, Allah yko mam tafoh. Tna wasi mbam tafoh reto to, kbe maun mwiok maut mamo snok mam hame wajin.”
REV 19:4 Tna raa manes mabo trion 24 weto msya kak ro Allah wAit mana jiit weto maka mbaut Allah ro hre abyõ mam ambar (tahta) rAit reto. Mawe, “Amin: Mabo oh! Haleluya, anu bbaut Tuhan!”
REV 19:5 Tna mai sau mbam ambar (tahta) ro Allah rAit mawe, “Anu sryan ro Allah: Nma nbaut Allah ranu! Anu beta ro ja hartu bi Ait; ro nbi nsya ro kinyah ye; nma nbaut bi Ait oh!”
REV 19:6 Tna jõ tari raa msis-sas mmai mnin. Ana mmai msun mnan fi aya ro miyi msun, tna mnan fi ayoh ro rurur mase toni. Ana mawe, “Haleluya, anu bbaut Tuhan! Tuhan Allah ranu tait yase. Ait yamo Raja ro yatak ybo bombra beta oh!
REV 19:7 Nma, anu simaut mase tna bbaut bi Ait! Ait ro yfi Domba Maku retait, siwyan yama oh! Ait yama yawe yoo fnya. Tna fnya ro Ait yawe yoo to siwyan oh. Au fayir au oh.
REV 19:8 Raa moo ratan lenan ro mboh tna moof toni mee kʼau myum.” (Raa ro Allah wAit ja mhar mno iro fee. Ratan lenan ro moof reto fret bo mawe bo ro moof ana mno wore ana tiwya mhau mam tabam reto.)
REV 19:9 Tna malaikat reto mawe kʼjõ mawe: “Nkom bo ro jõ tawe refo: ‘Meen Domba Maku mmen fnya tna makyõ bokyõ rAu. Tna Tuhan yoo taah yee kʼraa taro yawe ana mamoʼt bokyõ reto. Ana ro mamo to, kbe simaut mase.’” Tna fo malaikat reto mawe, “Jõ tkyas bokyas ro ati, bokyas ro mbam Allah oh mefo.”
REV 19:10 Jõ tari feto to taka tabum te mam ati ro malaikat masu rau, tawe tbaut malaikat reto. Menohe malaikat reto mawe, “Nno feto ma! Nbaut Allah yesait aran sai. Jõ fi sryan rAit sai mnan fi nyõ nsya nafoh wonyõ. Nafoh wonyõ ja mari watum ro Allah mbo mno. Tna ana mros matak mkyas Yesus yasom kʼraa taro to ye. Raa mkyas Yesus yasom kʼraa taro to, ana mkyas mkah Har ro Tuhan matak rAu mnan fi nabi ro tiwya mkyas soo ro Allah.”
REV 19:11 Tna jõ tmat sawro ro Allah mato nkro. Tna tmat kuda ro mboh sau. Ait ro yaut hre mam kuda reto abyõ tait, yasom rAit ‘Ait Ro Srau Ewok Fee’, tna ‘Ait Ro Ykyas Sioh Fee’. Ati ro Ait yros susai to, Ait yhar awya ro yno iro, tna ymit safo kʼait. Ait ysok raa sait bo fee ye. Tna ati ro Ait yamo yafa ysya raa byoh ro hawe Allah to, Ait ja ysok raa sait fee ye.
REV 19:12 Ait yasu rAit mawyah mnan fi tafoh. Tna Ait sbyõ watau (mahkota) mawat. Tna raa mkom yasom sau mam yetsu rAit mnan fi raa mame aat. Som reto raa sait bo yhar fee. Ait yesait aran yhar yasom rAit reto.
REV 19:13 Tna ratan ro Ait yyum to, raa mamruk mkah mees. Tna yasom rAit to 'Bokyas ro Allah.'
REV 19:14 Ait yamo yafa tna raa sbe mbam sawro ro Allah kro Ait mamoʼt tabam. Raa sbe weto maut kuda ro mboh sor ye. Tna ana myum ratan ro raa mtin mkah hawee lenan ro moof tna ro mboh toni.
REV 19:15 Tna pedang sau ro maan toni mhau mam Ait yasoh. Kbe yafa ysya raa byoh mbam raa mana ro tabam reto beta mkah pedang rAit reto. Kbe ana mbtek tibyo Ait ybo armuk rAit ro besi tna ybo ana matak. Allah ro yase tna ybo bombra beta tait, Ait kmo raa byoh weto. Ja raa moo anggur make mawat tna mbeak mam bak mato sau. Tna raa mber anggur make weto re maya wau frok. Tna mnan fi feto to, kbe Allah yoo byoh weto yamo mbeak mam wore bi Ait kbe sikowah raa. Tna raa ro hre mam kuda reto abyõ tait, kbe Ait yamo yber raa weto sari.
REV 19:16 Mam ratan ro Ait yyum reto tna mam yafamu mair to, raa mkom Ait yasom ewok fefo: ‘Tuhan ro Yatak Ybo Raa ro Mase Mbra Sor’ tna ‘Raja ro Yatak Ybo Raja taro Sor’.
REV 19:17 Tna jõ tmat malaikat sau mros abyõ mam ayõ. Tna mkah mai ro fari to malaikat refo mtu ruu beta ro fru mam ayoh to mawe, “Nma, anu beta siret su siwyan anu. Kbe anu nmo sohmaam korat ro Allah siwyan kʼanu.
REV 19:18 Kbe anu nbo raa msis-sas kwiyan wana: Raja na, msya raa mase ro ja mbo raa sbe ye, msya raa mase taro sor ye, raa ro ja maut kuda msya kwiyan kuda wana ye. Kbe anu nbo bobot msya sryan wana ye, tna nbo raa mabi msya raa kinyah kwiyan wana ye.”
REV 19:19 Tna tmat kak ro ja mban kabes reto. (Kak ro metsu sau, mana rau to trion krema tna tanduk rau trion nsaa reto.) Au msya raja na ro tabam reto tna msya raa sbe wana, wefo beta siret su mawe mafa msya bi Ait ro yaut kuda tait ysya raa sbe wAit weto.
REV 19:20 Tna bi Ait ro yaut kuda tait ysya raa sbe wAit mfot kak ro ja mban kabes reto. Tna ana mfot nabi retait ro ja sioh raa ye (ro tiwya yno bo ro msai aro afo re raa mari kak reto. Yno bo ro msai weto besruf raa afo re ana sayõ rof raa mame aat sau kʼana metsu wana. Tiwya kak reto mbis raa mame aat rau. Tna raa weto mbaut patung ro masu mnan fi kak reto ye.) Bi Ait ro yaut kuda tait ysya raa sbe wAit mfot nabi ro ja sioh raa, tna mfot kak reto ye. Mbewok maam fares to, raa makah ana mamo mbeak mam tafoh ro mait mwarah mkah belerang. Tafoh reto mait mbrer mnan fi sawan.
REV 19:21 Tna raa sbe ro mban tis nabi palsu tait ysya kak reto, ana mbewok weto to, bi Ait ro yaut kuda retait yame majat mkah pedang ro mhau mam yasoh rAit. Tibyo ruu beta fru mama tna mabo ajat weto kwiyan wana tibyo mhaf matu.
REV 20:1 Tna jõ tmat malaikat sau mbam sawro ro Allah mroh mama. Tna malaikat reto mbo kunci sau msya rantai sau ro mase. Kunci reto mkah raa mitrah sawro ro kabes mhau.
REV 20:2 Malaikat reto mfot kabes aban reto. (Kak reto tiwya tinyi haberek mamo aban ro soo. Aban reto masom Iblis soh mfe to Kabes Yabi.) Malaikat reto mfot kabes aban reto tna make. Tna malaikat tubat kabes aban mbeak mamoʼt sawro ro kabes mhau. Tna muut masa wa mkah kunci reto. Kabes aban mhau mam beto mamo snok mam tahun trion 1000. Malaikat mno feto afo re kabes aban reto kbe sioh raa u fee mamo snok tahun trion 1000. Tahun trion 1000 weto mkak tna kabes aban kbe raa bitsre waor sai.
REV 20:4 Tna tmat raa baro hre abyõ mam ambar (tahta). Raa weto matak mtu srah mari. Tna tmat raa mawat mamos wana ye. Raa wefo fo raa ro tiwya mkyas Watum ro Allah tna mkyas mawe ana smot Yesus. Tibyo raa msot ana mana wana re majat. Tiwya raa wefo mhau mam tabam refo fares to, ana mbaut kak msya patung reto fee. Tna raa mame aat ro kak reto kʼana matem soh mfe makit wana to fee ye. Tna tmat raa weto mrok masen. Tna ana mamo mase tna msya Kristus ana mbo raa mamo snok tahun trion 1000.
REV 20:5 Raa wefo tiwya mbaut kak msya patung reto fee. Tibyo raa mame ana majat. Raa weto oh mi raa mkbair ro meen mrok masen wia tinyi. Tna raa roto ro tiwya mhai oh to, ana weto mrok masen fefares. Mhau tahun trion 1000 mkak tna raa roto taro beta ro tiwya mhai to, kbe mrok masen ye.
REV 20:6 Raa ro mrok masen wia tinyi weto to, Allah yoo ana yse kait kʼAit. Kbe ana simaut mase. Ati ro raa mhai mun trion ro ewok to, kbe ana wefo mhai u fee. Kbe ana wefo mamo imam ro Allah msya Kristus ye. Tna kbe msya Ait mamo raja mbo raa mamo snok tahun trion 1000.
REV 20:7 Tahun trion 1000 weto mkak tna kabes yabi raa bitsre ybam yuk ro tiwya raa mfot ait make mbu.
REV 20:8 Tna fo ait yamo sioh raa ro mhau mam tabam refo. Ait sioh raa ro mhau mam ati ti mare, ati ti wayir, ati ti habeh, msya ati to brat ye. Tna kabes yabi yamo sioh raa ro mhau mam rabin ro Gog msya rabin ro Magog ye. Kabes yabi yamo ybis raa weto beta mberur su mwo sau tna siwyan ana bo mamo mafa. Ana ro siret to msis bia mnan fi snyik ro mhau mam aya sawan maam to.
REV 20:9 Tibyo raa mama mbam rabin wana sor-sor hayah to mamoʼt kota ro masom ‘Kota ro Allah Ksoh’. Raa ro Allah wAit mhau mam kota reto. Tna raa byoh mamo burut ana weto. Menohe tafoh mbam ayoh mroh mait byoh weto mkak.
REV 20:10 Kabes yabi ja sioh raa ro mama mbam rabin wana sor-sor. Ait raa tubat mbeak yamo mait mam tafoh ro mait mwarah mkah belerang. Tafoh reto mait mbrer mnan fi aya sawan. Tiwya kak ro ja mban kabes, ro mana rau trion krema reto msya nabi ro ja sioh raa tait to, raa moo ana mbewok mbeak mam tafoh reto oh. Kbe tafoh mait sikowah ana yoyo mamo snok mam hame wajin.
REV 20:11 Tna jõ tmat bi Ait sait hre abyõ mam ambar (tahta) mabi ro mboh sau. Tna ayoh msya tabam refo to mrok mansyaf sai. Bo weto mtai mhau mam ati ro Ait yasu fee.
REV 20:12 Tna jõ tmat raa ro tiwya mhai oh; ro mabi msya kinyah ye. Ana masen mros mam ati ro bi Ait yasu ro hre abyõ mam ambar (tahta) rAit reto. Tna raa betrat aam ro mhau mam beto sor. Aam weto sau fo masom rau ‘Raa ro Kbe Mhau Hame Wajin’. Tna aam roto sau mkyas bo ro raa sait-sait tiwya yno. Allah ymat aam weto tna ytu safo yse kʼraa ro mros weto mamyot si bo ro ana weto aro sait-sait tiwya yno.
REV 20:13 Tna raa ro tiwya mhai msya ro majat weto to, hai msya ajat weto beta mrok masen mros: Taro mrok masen mbam aya sawan ye, taro to mrok masen mbam kayah mato ro tiwya raa sama ana ye, tna taro mrok masen mbam sawro ro hai snok. Tna raa wefo beta mamo mros mam ati ro Allah yasu. Tna Allah yse srah kʼana mamyot si bo ro ana tiwya mno sor.
REV 20:14 Bo ro misti tibyo raa mhai to, tna msya sawro ro hai to, raa makah mamo mbeak mam tafoh ro mait warah mkah belerang. Tafoh reto mait mbrer mnan fi aya sawan. Reto to hai ro mun ewok.
REV 20:15 Tna awya ro yasom rait raa mkom mam aam ‘Raa ro Kbe Mhau Hame Wajin’ reto to fee, kbe ait retait raa mbeak mam tafoh reto. Aam reto mkyas raa masom wana ro kbe mhau mroon.
REV 21:1 Tna jõ tmat ayoh ro tna msya tabam ro tna. Ayoh msya tabam msya aya sawan ro Allah yfen wia to, marak.
REV 21:2 Tna jõ tmat kota Yerusalem ro tna. Kota reto to kota ro Allah rAit. Tna jõ tmat kota reto mroh mbam sawro ro Allah rAit mama. Allah siwyan kota reto to moof toni; mnan fi fnya fain ro ja fayir ana moof wer re mamo maryõt mere rau retait.
REV 21:3 Tna jõ tari mai ro mase sau mbam ambar (tahta)Tuhan rAit mawe, “Mfo refo Allah yroh yama yhau su ysya raa. Raa weto kbe mamo raa mana wAit tna bi Ait tait Allah ro ana smot. Kbe bi Ait yesait yhau yatam ana.
REV 21:4 Kbe Ait yno re ana aro sraujin u fee. Ait kbe karu ana yukan wana. Wore weto to, raa wAit aro mhai u fee. Tna raa wAit aro mhar bo sraujin u fee. Ana aro mhar bo mawia u fee. Tna ana aro mhar bo kiyam u fee ye. Bombra weto to bose oh, marak beta.”
REV 21:5 Tna Ait ro hre mam ambar rAit reto abyõ to yawe, “Jõ tfen bombra beta tna u. Jõ tawe kʼnyõ tawe nkom bo ro Jõ tkyas wefo beta. Bo ro Jõ tkyas fo bo ati. Bo mabo tu. Tibyo nkom beta afo re kbe raa mmat.”
REV 21:6 Tna Ait yawe kʼjõ yawe, “Bo beta to Jõ tno mkak oh! Jõ fi Raa ro tinyi tibyo Jõ tasom aJõ ‘Alfa’. Tna Jõ fi Raa ro ttis ye tibyo Jõ tasom aJõ ‘Omega’ ye. Awya ro yhai sbit to, kbe Jõ too aya ro moof baro tee kʼait yata. Yoo mkah pitis bo aro fee ye. Yoo sai. Aya reto mno re raa mhau hame wajin.
REV 21:7 Awya sai ro tiwya yros yatak re smot Jõ snok ttis rau to, mfo refo ait fri bo weto beta. Jõ fi Allah ro ait smot. Tna ait yamo ku aJõ ye.
REV 21:8 Menohe raa aro smot Jõ fee: Tibyo kbe ana mhai mun ewok u. Raa weto to, raa ro ja waa tibyo smot Jõ fee. Ana taro hawe bo smot Jõ. Ana taro to mno bo ro mimara. Ana taro mame raa majat. Ana taro ja mwyah. Ana taro ja mari bo ro kabes mawe, tna mno mafot ro kabes weto. Ana taro to mbaut Jõ fee, ana mbaut bombra roto. Ana weto msya raa beta ro sioh-nat raa ye to, meen raa tubat ana beta mbeak mam tafoh ro mait mbrer mnan fi aya sawan. Reto to, hai ro mun ewok.”
REV 21:9 Tna malaikat mabo krema ro riwai mbo kair mase ro ttis mam hawereh wana to, sau mama mo kʼjõ mawe, “Nama nmat fnya fain ro Allah ymen mama msya Domba Maku.”
REV 21:10 Tna Har ro Tuhan mbo jõ matak. Tibyo tmat malaikat riwai reto makah jõ mamo tne mam atu mana sau ro miyõ toni. Amu nros tno tna au merif kota sau kʼjõ. Kota reto to kota ro Allah rAit. Jõ tmat kota reto mroh mbam sawro ro Allah rAit mama.
REV 21:11 Allah yhau mam kota reto. Tna bo yase rAit mait mawyah tna kren toni skah kota reto mnan fi fraa sau ro safom tna mabyoh maut masom yaspis. Tna mnan fi kaca ro ntwar toni ye.
REV 21:12 Tna tembok ro mana mur kota reto to, miyõ tna mase ye. Tembok reto masa rau trion 12. Tna malaikat sau mros kmot masa weto sau-sau. Tna raa mkom masom sau abyõ uu masa weto sau-sau. Som ro raa mkom weto to raa mana ro Israel trion 12 to masom wana.
REV 21:13 Masa trion 12 weto to, trion tuuf sayõ mam ati to brat. Tna trion tuuf sayõ mam ati ti mare, tna trion tuuf sayõ mam ati ti wayir, tna tuuf sayõ mam ati ti habeh.
REV 21:14 Tembok ro mana mur kota reto to, raa sgi abyõ mam fraa trion 12 ro mhau mam te. Tna raabis (rasul) ro Domba Maku mabo trion 12 weto to raa mkom ana masom wana mam fraa weto sau-sau.
REV 21:15 Tna malaikat ro mkyas bo msya jõ reto to, mbo armuk emas mara sau mkah bo mnit kota reto.
REV 21:16 Kota reto tuut wau trion jiit. Malaikat reto mnit kota reto mase rau, mabuf rau msya miyõ rau to mnan anya sai: 12.000 stadia sau-sau.
REV 21:17 Tna malaikat reto mnit tembok reto ye. Tembok reto tebal rau to 144 hasta.(Malaikat reto ntuu mnit bo weto mnan si ja raa ntuu mnit bo ye.)
REV 21:18 Tembok reto raa mfen mkah fraa ro safom masom yaspis. Tna kota reto to, raa sgi mkah emas ro moof. Emas reto to ntwar toni mnan fi kaca.
REV 21:19 Tna fraa ro mhau mam te weto raa fayir mkah fraa ro mabyoh maut tna kren-kran aro rau-rau: Ro tinyi to raa fayir mkah fraa ro safom masom yaspis. Ro ewok to raa fayir mkah fraa ro safe mnan fi uun safe, masom nilam. Ro tuuf to fraa ro masom mirah. Ro jiit to fraa ro safom masom zamrud.
REV 21:20 Ro maat to fraa ro masom unam. Ro ntamam to fraa ro masom sardis. Ro krema to fraa ro masom ratnacempaka. Ro ngkrentuuf to fraa ro masom beril. Ro ngkrenjiit to fraa ro masom krisolit. Ro nsaa to fraa ro masom krisopras. Ro 11 to fraa ro masom lazuardi. Ro 12 to fraa ro mkin masom kecubung.
REV 21:21 Tna masa trion 12 weto to raa mse wa mutiara ro maboh sau mam mato weto sau-sau. Tna kota reto raa mse emas ro moof abyõ mam iso rau. Emas reto to twaar toni mnan fi kaca.
REV 21:22 Samu wore wo raa mamo mbaut Allah to, aro fee. Tuhan Allah ysya Domba Maku reto, mbewok mesait mhau mam kota reto. Feto to raa mbaut ana mam woyõ-woya sai. Tuhan Allah tait yase ybo bombra beta.
REV 21:23 Ait yase rAit mfi kek ro mawyah mam kota reto. Tna Domba Maku kren toni skah kota reto tibyo snyi msya ayõ ro mafit aro fee ye.
REV 21:24 Bo yase wana mbewok ro mfi kek to, kbe mram kota reto. Tna raa mbam rabin aro rau kbe mhau mno bo wana mam beto. Tna raja na ro tabam refo kbe makah kta wana mama mse mam kota reto ye.
REV 21:25 Raa ro mhau mam kota reto to wase mti. Feto to tembok ro mana mur kota reto to, masa rau mhau maah yoyo, raa muut fee ye.
REV 21:26 Raa mbam rabin aro rau-rau kbe makah bosatoh wana msya bombra ro moof toni mamo mse mam kota reto ye.
REV 21:27 Bombra ro mkair aro to, raa moo makah mamo mse fee saut. Tna raa ro mno bo mkair msya raa ro sioh to, kbe mamo twok mam kota reto fee ye. Ro kbe twok mam kota reto to, raa ro kbe mhau hame wajin. Ana weto mesait sai. Raa weto masom wana raa mkom mam aam sau oh. Aam refo masom “Raa ro Kbe Mhau Hame Wajin.” Aam refo fo aam ro Domba Maku rau.
REV 22:1 Tna malaikat reto merif aya sau kʼjõ. Aya refo miyi frok mbam ambar (tahta) ro Allah ysya Domba Maku hre. Aya refo ro ntwar toni mnan fi kaca tna mno re raa mhau hame wajin.
REV 22:2 Aya reto miyi mamo susai mam iso kota Yerusalem ro tna reto to masuf. Tna aya refo maam rau ti ewok to ara mo mros. Ara weto to make kake ro mno re raa mhau hame wajin. Snyi sau-sau to make: Tahun sau to make mun trion 12. Tna ara wefo mata wau to misoh raa ro kiyam tibyo kiyam wana marak.
REV 22:3 Tna bo ro misti kair aro mhau mam kota reto fee. Allah ysya Domba Maku mbewok ja mhau mam kota reto ye. Ana hre abyõ mam ambar (tahta) wana tna mbo raa wAna. Tna sryan ro wAit ro ja mno bo rAit to, meen mhau mam beto tna mbaut Ait ye.
REV 22:4 Kbe ana mmat bi Ait yasu. Tna yasom rAit raa mkom kʼana makit sor.
REV 22:5 Kbe Tuhan Allah yesait yram kota reto yoyo. Tibyo raa ro mhau mam kota reto to wase mti. Ana wase bo lampu aro msya ayõ ro mafit ana fee. Tna kbe ana beta mamo raja mbo raa mamo snok hame wajin.
REV 22:6 Tna malaikat reto mawe kʼjõ mawe: “Bokyas refo fo bo ati. Bo mabo tu. Kbe raa mari tna mse kʼana. Tuhan Allah yesait ybis Har rAit mroh mbo nabi wAit re ana mkyas bo. Tna ybis malaikat rAit mama merif bo wefo kʼsrian wAit re ana mhar bo ro kbe mama fooh.”
REV 22:7 Tna Yesus yawe, “Nri oh! Kene wo Jõ tama oh! Awya ro yari watum ro aam refo tna ybo yno to, kbe simaut mase.”
REV 22:8 Jõ Yohanes oh mi tari tna tmat bo wefo beta ro kbe mama mam muktis rau. Jõ tari tna tmat bo wefo mkak. Tna jõ taka tabum te mam ati ro malaikat masu rau tawe tbaut malaikat reto ro merif bombra wefo kʼjõ tmat.
REV 22:9 Menohe malaikat reto bhah jõ wa mawe, “Nno feto ma! Nbaut Allah yesait sai. Jõ fi sryan rAit sai tnan fi nyõ. Nyõ nsya nabi roto sor, tna nsya raa beta ro mari watum aam refo tna mbo mno ye to, anu beta bmo sryan ro ja mno bo ro Tuhan rAit.”
REV 22:10 Tna malaikat reto mawe, “Nmyõt watum aam refo to ma! Oon rau kene oh!
REV 22:11 Awya sai ro ja yber safo to, nhau rof; kbe ait yhau yber safo bait tu. Tna awya sai ro ja yno bo ro mkair to, nhau rof; kbe ait yno bo ro mkair bait tu! Tna awya sai ro ja yno bo ro moof to, kbe yhau yno bait tu. Tna awya ro ja yno bo ro Allah wAit to, kbe yhau yno bo ro Allah wAit tu!”
REV 22:12 Tna Yesus yawe, “Nri kaket: Jõ tama fooh oh mefo! Jõ takah boren raa tama taren raa. Kbe taren raa sait-sait mamyot si bo ro raa retait tiwya yno-yno.
REV 22:13 Jõ fi Raa ro tinyi, tibyo Jõ tasom aJõ to ‘Alfa’. Tna Jõ fi Raa ro ttis ye, tibyo Jõ tasom aJõ to ‘Omega’ ye.”
REV 22:14 Yesus yawe, “Raa ro myon ratan wana ro mkair re mrok mboh to, kbe simaut mase. Ana weto kbe mait kake ro mno re raa mhau hame wajin to. Tna kbe ana mamo twok mam kota Yerusalem ye.
REV 22:15 Menohe raa ro ja mno bo ro mkair-kar to, kbe mhau sai mne. Ana weto to taro mari bo ro kabes mawe tna mhar mafot ro kabes weto. Tna ana taro to raa ro mwyah. Tna ana taro to raa ro mame raa majat. Tna ana taro to mbaut berhala tna ana taro to ksoh sioh-nat raa ye.
REV 22:16 Jõ fi Yesus. Tna Jõ tbis malaikat aJõ reto mama mo kʼnyõ mkyas bo wefo beta. Tna tsi bo kʼnyõ tawe nkyas bo wefo kʼraa jemaat weto sor. Jõ tasom aJõ to ‘Kmoh Tbam Daud, Hohos aJõ’, tna ‘Sken Mor-mor Ti Tobrat’ ye.”
REV 22:17 Tna Har ro Tuhan msya fai ro Yesus ymen to, mbewok mawe kʼYesus mawe: “Nama oh!” Tna awya ro yari watum refo to yawe: “Esre, nama oh!” Awya ro yhai sbit to yama sai. Tna awya sai ro ksoh yama yoo aya ro moof baro yata to, yama ye. Kbe yoo mkah pitis aro fee. Yoo sai. Aya refo mno re raa mhau hame wajin.
REV 22:18 Ro mari watum aam refo to, jõ tawe kʼanu tawe: “Kaket anu! Awya ro tkyõt aam refo maja rau baro renti to, kbe Allah kmo ait: Kbe yoo kair ro mase riwai raa mkyas mam aam refo weto beta to, bitsre mbtek mai kʼait.
REV 22:19 Tna awya sai ro yiruru watum ro aam refo maja rau baro makus to, kbe Allah yiruru boren ro yaren raa retait ye: Kbe bi Ait yawe ait retait yamo truk mam kota ro Allah rAit reto to fee ye. Tna yawe ait retait kbe yait kake ro mno re raa mhau hame wajin to fee ye. Boren raa weto to riwai raa mkyas mam aam refo.”
REV 22:20 Yesus oh mi yawe bokyas mam aam refo beta to mabo tu. Tna yawe, “Esre, Jõ tama fooh mefo!” Tna Yohanes yawe, “Amin: Mabo oh! Tuhan Yesus; nama fooh!”
REV 22:21 Jõ skabuk afo re Tuhan Yesus ysan boatmof rAit kʼanu raa ro Allah wAit. Amin: Mabo oh.
